رواية زوجة رجل ضعيف الفصل الرابع 4 - بقلم عادل عبدالله

دعاء: وأنا هشتغل إيه في المطعم؟ شادي: أي حاجة يا دودو، ممكن تشتغلي في المطبخ وده هيبقى سهل أوي بالنسبالك. دعاء: طيب يا شادي، كلم صاحب الشغل ويارب يوافق. تاني يوم، كلم شادي صاحب المطعم أستاذ كامل، اللي وافق بصعوبة. وبدأت دعاء تستعد للنزول للعمل مع شادي في المطعم.

وفي صباح اليوم التالي، ذهبت دعاء مع شادي للمطعم وقابلوا أستاذ كامل صاحب المطعم، اللي بمجرد رؤيته لدعاء سال لعابه عليها. أنوثة دعاء المتفجرة استطاعت أن تأسر أستاذ كامل، الرجل الأرمل الخمسيني اللي ترمل من وفاة زوجته من خمسة أعوام. وافق الأستاذ كامل فورًا على استلامها للعمل في مطبخ مطعمه. دخلت دعاء لمطبخ المطعم وبدأت في التعرف على زميلاتها الجدد. وأرتدت ملابس العمل وبدأت عملها.

وبعد حوالي ساعة، دخل أستاذ كامل إلى المطبخ، وكانت نظراته لها كالسهام الموجهة تجاه معالم أنوثتها. سألها: كامل: إيه أخبار الشغل معاكي يا مدام دعاء؟ دعاء: تمام يا فندم. كامل: مش بحب كلمة يا فندم دي، كل اللي هنا بيقولولي يا مستر كامل. اقترب من أذنها وقال لها: كامل: ولما نكون لوحدنا، ممكن تقوليلي كامل بس. ثم قال لباقي العاملين في المطبخ: كامل: وأنتم أخبار الشغل معاكم إيه؟ هند (المشرفة) : تمام يا مستر كامل.

كامل: فيه حاجة ناقصاكم هنا؟ فيه أي صنف مش موجود أو قرب يخلص علشان نشتريه مكانه؟ هند: لا يا مستر، كله تمام. كامل: خلي بالك يا هند كويس من مدام دعاء، علميها الشغل كويس علشان تبقى شاطرة زيك. هند: حاضر يا مستر. انصرف مستر كامل وتركهم لعملهم. بدأت دعاء في التعرف على الموجودين والحديث معهم عن طبيعة العمل ومواعيده والمرتب. ثم قالت لها هند: هند: أنا سمعت مستر كامل بيقول عليكي مدام دعاء. أنتي متجوزة؟

دعاء: أيوه، شادي اللي شغال بره ده جوزي. هند: معقول! ورضي يشغلك هنا؟ دعاء: أيوه، علشان أكون جنبه ونروح ونيجي مع بعض. هند: ربنا يوفقكم. دعاء: أنا أول مرة أشتغل، لكن ظروفنا الأيام دي هي اللي أجبرتني على الشغل. هند: ربنا يوفقك يا حبيبتي، لكن أنتي شكلك هتعمري معانا هنا. دعاء: ربنا يسمع منك، أنا محتاجة الشغل أوي خصوصًا الأيام دي. هند: اسمعي مني، أنا زي أختك الكبيرة. دعاء: أكيد طبعًا.

هند: مستر كامل معاه فلوس كتير وكريم، ولو انبسط منك هيغرقك فلوس. دعاء: يغرقني فلوس؟! هند: أيوه. دعاء: للدرجة دي؟ هند: أيوه. دعاء: وأعمل إيه علشان ينبسط مني؟ هند: أي حاجة يقولك عليها تسمعي كلامه، ساعتها هينبسط منك أوي ويديلك كل اللي أنتِ عايزاه. شرد ذهنها قليلًا، وبدأت دعاء في الربط بين كلام المشرفة هند وكلام مستر كامل، وبدأت تشعر بأنه سيطلب منها أشياء خارج إطار العمل.

انتهى اليوم الأول في العمل. وفي نهاية اليوم، نادى مستر كامل على شادي ثم أعطاه خمسمائة جنيه. نظر شادي له بتعجب ثم قال له: شادي: خير يا مستر كامل، فلوس إيه دي؟ كامل: دي عشانك، خارج حسابك، علشان أنا حاسس بظروفك. شادي: متشكر جدًا يا مستر، مش عارف أقولك إيه. كامل: لا أبدًا، متقولش حاجة. المهم تهتم بشغلك كويس وتجيب مراتك معاك على طول علشان تساعدك في المصاريف.

شادي: حاضر يا فندم، أنا فعلًا حبيت الشغل في المطعم هنا، وإن شاء الله أكون عند حسن ظن سعادتك. أخذ شادي دعاء ثم انصرفا، وهو في قمة السعادة. وقال لها: شادي: شفتي مستر كامل أداني إيه؟ دعاء: إيه ده؟ شادي: خمسمائة جنيه، وقالي دول خارج حسابي علشان حاسس بظروفنا، وقالي أهتم بالشغل وأجيبك معايا على طول علشان نساعد بعض في المصاريف. دعاء: فعلًا هند المشرفة قالتلي إنه كريم أوي، لكن بالصراحة أنا مش مرتاحة للراجل ده.

شادي: ليه يا دعاء؟ دعاء: مش عارفة، لكن مش مرتاحة له خالص. نظراته كده فيها حاجة غريبة وكلامه فيه تلميحات مش فاهمها لحد دلوقتي. شادي (بعصبية) : نظرات إيه وتلميحات إيه! ده راجل قد أبوكي، ومن ساعة ما اشتغلت في المطعم مفيش واحدة اشتكت منه. دعاء: أنا بقولك على إحساسي. شادي: إحساسك غلط، وبلاش بقى الكلام ده علشان منقطعش عيشنا عنده بأيدينا. إحنا ما صدقنا لقينا شغل، والراجل كريم وأيده فرطة أهو.

دعاء: طيب يا شادي، يارب يطلع إحساسي غلط. شادي: تحبي تتعشي إيه بقى؟ دعاء: أي حاجة. شادي (بضحك) : نتعشى سمك وجمبري علشان تبقى ليلتنا حلوة. وفي اليوم التالي، ذهب شادي ودعاء إلى عملهم في المطعم. وفوجئ شادي بمستر كامل يقول له: كامل: أنت من النهاردة مش هتدخل المطعم جوه تاني. شادي: تعجب شادي، ليه يا مستر؟ أنا عملت حاجة غلط؟

كامل: لا يا حبيبي، بالعكس. لكن بدل أعمال لم الصحون والأطباق وأعمال النضافة، هخليك تقف على باب المطعم تستقبل اللي داخلين. هتستقبل اللي داخلين وتقعدهم مع كلمتين حلوين وابتسامتك الحلوة، وبس. وتنادي كابتن الصالة لهم وترجع تقف تاني بره. تعجب شادي ثم قال له: شادي: حاضر يا مستر. كامل: أنا شايفك لسانك حلو وبتتكلم كويس ومظهرك حلو، علشان كده لازم تبقى واجهة مشرفة للمطعم. وفي مقابل ده هزود أجرك. شادي (بفرحة)

: حاضر يا مستر، وإن شاء الله هكون عند ظنك فيا. استلم شادي عمله الجديد في المطعم، وانقطعت صلته نهائيًا بالمطبخ، وأصبح لا يرى دعاء إلا وقت خروجهم فقط. مستر كامل أصبح دائم التردد على المطبخ، سواء بسبب أو بدون. وبعد عدة أيام، دخل مستر كامل للمطبخ وسأل دعاء: كامل: إيه يا دعاء، أخبار الشغل معاكي إيه؟ دعاء: تمام يا مستر. وضع مستر كامل يده يتحسس ظهرها بلمسات شهوانية ثم قال لها: كامل: لو فيه أي مشكلة معاكي في الشغل، قوليلي.