رواية زوجة رجل ضعيف الفصل الثامن 8 - بقلم عادل عبدالله

شادي: أنتي السبب. دعاء: أنا؟ شادي: أيوه أنتي. دعاء: ليه يا حبيبي؟ شادي: إحنا كان تحت أيدينا كنز، وانتي اللي ضيعتيه. دعاء: أنا؟ كنز إيه وضيعته إزاي يا عم شادي؟ شادي: الراجل الأبله اللي اسمه كامل ده، أنتي كنتي ممكن تاخدي منه كل الفلوس اللي عايزينها وزيادة، لكن أنتي اللي طلعتي هبلة. دعاء: أنت تقصد إيه يا شادي؟ كنت عايزني أبيع شرفي؟ شادي: إيه اللي بتقوليه ده! يا بت، أنتي متعرفيش المثل اللي بيقول "شوّق ولا تدوّق"؟

دعاء: يعني إيه؟ شادي: يعني تغريه وتعشميه وتاخدي منه كل اللي إنتي عايزاه بدون ما ياخد منك غرضه. دعاء: أخس عليك يا شادي! أنت بتتكلم بجد؟ عايزني أعمل كده؟ شادي: يا بت، أنتي غبية. لو كنتي عملتي اللي بقولك عليه، كان زمانا لسه في الشغل وبناخد منه كل اللي عايزينه، وماكنش لمس منك شعرة واحدة. إنما شوفي بغبائك وصلنا لإيه! دعاء: أنا مش مصدقة اللي بسمعه منك دلوقتي! معقول أنت شادي اللي حبيته وبيعت الدنيا كلها علشانه؟

أكيد أنا بحلم! شادي: مش بقولك أنتي غبية! دعاء: وأنا اللي كنت مستغربة من رد فعلك لما عرفت إن كامل اغتصبني! دلوقتي عرفت إن الحاجات دي عندك عادي! شادي: تقصد إيه يا بت؟ دعاء: مفيش، مش قصدي حاجة. هات فلوس أنزل أشتري أكل. شادي: خدي دي، آخر فلوس معايا. هاتي شريط برشام وعلبتين سجاير، والباقي هاتي بيه الأكل. دعاء: هو بعد البرشام والسجاير هيتبقى فلوس؟ شادي: اتصرفي على قد الفلوس اللي معاكي.

دعاء: ما تبطل البرشام يا شادي، أحسن إحنا ظروفنا زفت خالص. شادي: تاني هترجعي تقوليلي بطل الزفت؟ البرشام من الآخر يا دعاء، أنا مش هبطل برشام، ومتتكلميش في الموضوع ده تاني. دعاء: طيب قولي، مش عايز تبطل البرشام ليه؟ شادي: من الآخر كده يا دعاء، أنا ضعيف قدام الكيف، وعندي استعداد أعمل أي حاجة عشان أكيف دماغي، إلا إني أبطل البرشام. أنا الحياة بالنسبالي هي البرشامتين اللي بأخدهم والسيجارتين اللي بشربهم.

دعاء: يا خسارة يا شادي! يا ألف خسارة! شادي: خسارة ليه؟ دعاء: خسارة عشان مش أنت شادي اللي حبيته. أنا اتخدعت فيك! شادي: كل ده عشان بكلمك بصراحة؟ لازم أخدعك عشان تبقي مبسوطة! دعاء: خلاص يا شادي، مفيش فايدة دلوقتي من الكلام. خرجت دعاء وجاءت له بالحبوب المخدرة والسجائر والطعام. وبعد تناول الطعام أشعل شادي سيجارة وأخرج قرص مخدر وتناوله. فأمسكت بيده دعاء وقالت له: هات واحدة. شادي: ليه؟ دعاء: أشمعنى أنت يعني؟

أنت تتبسط وأنا أفضل كئيبة! ومتنساش إن أنا اللي دفعت تمن الفلوس دي. شادي: تقصدي إيه؟ دعاء: هات واحدة الأول، وأنا أقولك. وبعد أن تناولت قرص المخدر قالت له: أنت نسيت إن الفلوس دي اللي أنا بعت بيها شرفي! شادي بغضب: أنتي مصممة تعكنني علينا وتفصليني! دعاء: لا يا حبيبي، متفصلش. كمل شحن يا حبيبي، يلا. وبعد يومين خلصت الأموال فقالت له دعاء: هات فلوس يا شادي. شادي: أجيب فلوس منين؟ مفيش! دعاء: يعني إيه مفيش؟

معرفش أتصرف، مش أنت راجل البيت! شادي: مفيش فلوس يا دعاء، أعمل إيه يعني! دعاء: أنا معرفش بقي، أنت الراجل. اتصرف زي ما تتصرف وخلاص. شادي: طيب يا دعاء، أنا هتصرف. عجز شادي عن التصرف وضاق بهم الحال كثيراً حتى اضطروا للعودة إلى مدينتهم، ولكنهم سكنوا بعيداً عن أهلهم. مرت أيام صعبة حاولوا فيها البحث عن عمل دون جدوى. خرج شادي من المنزل وغاب عدة ساعات ثم عاد ومعه طعام وفاكهة والسجائر والحبوب المخدرة.

دعاء: جبت فلوس منين يا شادي؟ شادي: اتصرفت يا حبيبتي، مش أنتي قولتيلي اتصرف! دعاء: أنا بسألك اتصرفت إزاي يعني؟ شادي: اتصرف وخلاص بقي. المهم دلوقتي تعالي ناكل، ويلا جهزلنا الجو عشان نسهر سهرة حلوة. اعتاد شادي على البقاء بدون عمل، وكل عدة أيام حين يتعثر يختفي لعدة ساعات ثم يعود ومعه المال وكل احتياجاتهم. تكرر نفس الشيء عدة مرات حتى جاء ذات يوم ولم يستطع الخروج من المنزل لمرضه، فقال لها: أنا تعبان يا دعاء ومش قادر أنزل.

دعاء: وهنعمل إيه والبيت مفيش فيه رغيف عيش ولا جنية واحد! شادي: هتروحي لواحد صاحبي هيعطيكي فلوس. دعاء: صاحبك مين ده؟ شادي: الواد خالد اللي بيقف على أول الشارع. دعاء: خبر أسود! لا مش رايحة. شادي: ليه؟ دعاء: ده كل الناس عارفين إنه بتاع بنات وبيبيع مخدرات! يعني وقفتي معاه شبهة من كل ناحية. شادي: أنتي مش هتلحقي تقفي معاه. أنا هكلمه في الموبايل، وبمجرد ما تروحي هناك في دقيقة واحدة هيعطيكي الفلوس وشريط برشام.

دعاء: وهيعطيني الحاجات دي بدون فلوس؟ ببلاش كده! شادي: أيوه. دعاء: فهمني طيب، إزاي ده؟ شادي: ملكيش دعوة فيه. مصالح بيني وبينه. دعاء: مصالح إيه اللي بينك وبينه يا شادي؟ شادي: قولتلك ملكيش دعوة. خرجت دعاء وذهبت إلى خالد، وحدث ما توقعته تماماً. بمجرد ذهابها إليه جذبها من يدها وحاول التحرش بها. عادت دعاء خالية اليدين تحمل داخلها غضب هائل. دعاء: مجبتش حاجة. شادي: ليه؟ دعاء: صحبك شدني من إيدي واتحرش بيا. شادي: يعني إيه؟

دعاء: يعني ضربته بالقلم وتفيت في وشه ومشيت. شادي: يخربيتك يا دعاء! أنتي مجنونة يا بت! كل الناس بتعاكسك وعايزاكي، ولا دي خيالات في دماغك؟ دعاء: يعني أنا كدابة يا شادي! شادي: أنا معرفش يا دعاء. اللي أعرفه حاجة واحدة بس دلوقتي، إننا لازم نجيب فلوس النهاردة. دعاء: وأنا أعمل إيه؟ شادي بعصبية: انزلي اتصرفي وهاتي فلوس بأي طريقة. وانتي راجعة هاتي معاكي أكل للعشا وعلبة سجاير وشريط برشام. دعاء: اتصرف إزاي وهجيب فلوس منين؟

شادي: معرفش يا دعاء، اتصرفي! المهم ترجعي ومعاكي فلوس وتجيبي كل اللي قولتلك عليه. دعاء: أنا معرفش اجيب فلوس منين دلوقتي. شادي: اتصرفي زي ما تعرفي، اعملي أي حاجة. المهم هاتي فلوس. يلا اتفضلي، مشفش وشك إلا ومعاكي اللي قولتلك عليه. دعاء: طيب ما تتصرف أنت. صفعها شادي بعنف على وجهها، وأمسك بيدها وسحبها وأخرجها من باب الشقة ثم أغلقه.