رواية شخوص متداخلة الفصل الثامن والعشرون 28 - بقلم .

روايـة: شخـوص داخلـة

مُـهم: "لِا تنسون التصويت ولعوها🔥.

فتى فُتن في فتاةٍ فتاهَ
‏وبات بسبب الفتاةِ فتات
‏عن حُبِّها روَى ولا ارتوى
‏قادهُ إليها الهوى فَهَوى
‏ظنها جنَّةً وعلى نفسه جَنى
‏نبضُ قلبه عليلٌ فهزّ يسراه
‏أرقٌ شديد ضرَّ جفناه
‏ ضجرٌ يميل بخده على يُمناه
‏ثمّ عاد إلى ربِّهِ فـ هداهُ
‏ثمّ إذا بربِّه يهديها إياه

_________

بعدت الغطا عن جسمي بالامبالاة وأنصدمت من شفت حيوان كالذئب نايم بقربي وعيونه الزرگه تباوعلي!

طفرت بسررعة من السرير وگلبي رح يوگف صرخت بصوت عالي كردة فعل ركضت للباب وأنفتح قبل ما أفتحة ودخِل الاغا وهو مُتفاجئ مباشرةً وبدون تردد أو تفكير شمرت روحي بحضنه

أسمع نبضات گلبه تسارعت لحظات قليلة وبعدني عنهُ رافع حاجبة يباوعلي بأستفهام من تصرفي المُفاجئ وسئلني . .

- اشبيكي ماتيلدا !؟

جاوبتة بصرخة بسرعة: " طلللللعه طللللعه بررررب عليييييك

- هوو منو دخيلو لربكي! اشبيكي يابا

أشرت بيدي علئ السرير وجاوبتة: " هذا الذئب ما داتشوفه!! شيسوييي بالقصر وبالغرررفة؟؟ جاوبني

صارت عيونهُ علئ الحيوان الي متمدد بكُل رياحه وكأنُ يگلي هذا مكاني وهذا سريري هنُا أنام حتئ من نظراته ما أرتاحيت وخفت دخيلك ياربييي!!

القئ نظرة عليه سريعة ولزم ايدي فزيت وصرخت: "هاااا هااا

طگها بضحكِة قوية وعالية ضليت صافنة بوجهة

گال: " ول ابويي هذا ذئب ؟

جاوبتة مُستغربه: "لعد شنوو ؟

رد بضحكة: " هذا كلب يابا

- تشاقة صح ؟

- وربكي هذا كلب نوع من أنواع الكلاب الهاسكي

- بس يشبه الذئب

- أي ابويي صح بس تقفين يمو يعضكي منين ماعدكي ترافة

- دا تستهزء حضره جنابك ؟

- لِا

- تمام يا ..

قاطعني بأبتسامة وجاوبني: " الاغـا

- ليش ما تگُولي أسمك ؟!

- شعليكي بأسمي مو مُهم

- مُجرد سؤال ماشي وبالنسبة للذئب ؟

- كلب بوويه كلب اشبيكي لطشتي بالذئب

- شيسوي بالغرفة ماخذ راحته ونايم بكُل صلافة ؟

ما جاوبني لزم ايدي وگفني يم القنفة وراح للكلب خلاه يگوم ويطلع من الغرفة، طلعة وسد الباب

فتح الثلاجة طلع بطل مي فتحه وشرب وگال . .

- هذا النوع من فصيلة الكلاب يحتاج مكان باغد يعيش بي ما يعيش بمكان بي حغاغة عالية لأن يتساقط شعغه فدخل لغغفتي لأنُ باغدة

- أها حلو وأسمه غريب!

- أصل كلاب الهاسكي نشأ بين قبيلة تشوكشي، قبيلة من البدو السيبيريين في سيبيريا، لذلك أسمهُ الهاسكي السيبيري

- وشكله ؟ عيونه زرگ صح حلوات بس يخوفن وحاده كأنُ يريد يفترسني

- شحده إلي يلمسكي أنتِ فغيستي إلية أنا لوحدي!

- ولِا يستقر الهاسكي

- ول يابا

تذكرت إبراهيم من يگول إلية "شرسَـتي" أنعصر گلبي وسكِتت حيل مشتاقة اله ما مصدگهُ هيچ انگلبت حياتي وأبتعدنا شيصبرني 6 أشهر بدونـه ؟

- الصفنه ما ليكي

- بكيفي ؟ مُمكن لِا تتدخل

- صار بويه إن شاءالله

- شگد مُستفز بردودك

- أرميكي هسة ولكعبة

- يله أرمي سويها إذا أنت زلمة

- بس إذا قتلت المرأة ما أصبح زلمة ما صح ؟

- مُستفز وامنا العذراء

- وينو صليبكي ؟

باوعت علئ رگبتي ما موجود تفاجئت رحت علئ السرير شفته هم ماكو

سألته: " وينه ؟ أنت ماخذه صح ؟

ضحِك وجاوبني: " صح

- انطينياه

- تؤؤؤ

- أريده!

- تحبينو للصليب ؟

- سؤالك سخيف طبعًا أي

- دائمًا علئ غقبتكي ما يفارقكي ؟

- أي

- أقدر أعغف شنو سر هذا الحُب ؟

- الصليب مُقدس عدنا هو قوة المجاهدين وسلاحنا فقد أوصانا الرب قائلاً: "أن اراد أحد يأتي ورائي فلينكر نفسه ويحمل صليبه ويتبعني"

- أها حلو يعني فخِغ الكم ؟

- أي الصليب هو موضوع فخرنا بهذِه الحياة وهو علامة إيماننا

وگال بولس الرسول"وأما من جهتي فحاشا لي أن افتخر إلا بصليب ربنا يسوع المسيح الذي به قد صلب العالم لي وأنا للعالم"

- تتكلمي بقوة وثقة، عيونكي كأنُ سلاح تتكلم بدل شفاهكي

- بدلاً من أن تحمل سلاحاً أو شيئاً يحميك، أحمل الصليب واطبع صورته على اعضائك وقلبك

- عجبني صغاحةً

- أي بـَس ليش هالاسئلة ؟

- مُجرد أسئلة لمراتي ما بيها شيء ما صح ؟

- صفقة ورب يسوع صفقة عاد لِا تصدگ نفسك هواي! وتعِيش دور الازواج

- ول ابويي صحَ أنا كثيغ مُصدق ضاركي بشيء ؟

- لِا

- حَلوي

- منو هي ؟

- كفشه شعركي الصباحية

باوعت علئ نفسي بالمراية والتفتت مُبتسمة بوجهة بثقة . .

- حلوة أني بكُل حالاتي فلا تحِاول تحرجني لِان رح تتفشل وتندم صدگني

- الأنثئ الواثقة بنفِسها والقوية أقِدسها

- شكرًا الك يالاغا

عينه صارت علئ الساعة بـ9:30 تالي صارت نظراته عليه وأبتسم وگال: " صباحكي وغد وغدتي

- صباح النور عيني

طلع بره وهِو يضحك ولازم بطل المي ويهز براسه . .

رحت ورا ركض وگلتله: " صليبي اررريده!

رد بضحكِة:" فكرتكي نسيتي

مد ايده لجيب تراكسوده الأسود وطلع الصليب أنطانياه ردت أخذه هز براسه بِـ "لا" وتقرب لبسه برگبتي

- شكرًا بس ما الهُ داعي

- صليبكي ضايقكي وأنتِ نايمة فخلعتو حتئ ما تتأذين وتغتاحين بنومكي

- أهاااا

- أي بويه

تركني رنزل من الدرج وأني رجعت للغرفة دخلت للحِمام غسلت وجهي بمي بارد ولبست فستان ماكو ملابس بيت غيرهم فقط فساتين صح حلوات بس أحس مُتقيده بيهم وما أعرف البسهم علئ طول اليوم!

نزلت وأني أعدل بشعِري يمنه ويسره دخلت للمطبخ شفت الخدم يجهزون الأكل

وَ وحده مُنهم گالت إلية: " Hanımefendi, kahvaltı birkaç dakikaya hazır olur

"سيدتي سوف يجهز الفطور
بعد دقائق إن شاءالله"

سانـدرا: عُمري صباح النور عروستنا

- هههه هلوو

دخلت سجئ من شافتني خزرتني وگالت: "تعالو علئ السفرة حتئ نفطر لِا تتأخرون عمو عبد القادر وصل

جاوبتها بضحِكة: " تمام ياعُمري سجاوي الوردة النادرة

سَجئ: لِا تدوسين بالبطن من الصبح

سانـدرا: أستهدو بالرحمن بنات! دخيلكم أبتعدو عن المشاكل أو أجلوها من نخلص أكل أتعاركو علئ راحتكم

جاوبتها: " شعندي غير سجاوي الورد هههههههه الحُبب

سَجئ: اللهم طولچ يا رووووح!

رديت: " روحِي وأحنا نجي وراچ ياوردة

طلعت وهي ادردم غمزتلي ساندرا وضحِكنا

طلعنا من المطبح ما أعرف أماكن القصر لذلك هي لازمه ايدي نتمشئ وادليني هذا غرفة وهذا مكتب وهذا كذا وكذا حتئ أحفظهم

سانـدرا: هذِه غرفة للاغـا ممنوع أحد يدخل إلها

- شنو يسوي بيها ؟

سانـدرا: يتدرب بيها وإذا حالته أتدهورت يختفي ويتواجد بيها يطلع قهره، يجرح نفسه ويتخبل بيها لحِدما يفقد

- لهذِه الدرجة واصل لهلمرحلة إنُ يأذي نفسه؟!

سانـدرا: ولچ بعدچ ما شايفة شيء! هواي رح تشوفين أشياء توگف العقل هو سببها

- مممممم

باوعت علئ اليمنه باب أسود مقفول سألتهِا:" وهاي شنو ؟

سانـدرا: هاي بيها أسلحة

- صُدگ!

سانـدرا: أي لِا تتعجبين كُلش طبيعي هالشيء كُل قصور تركيا موجودة هالغرفة وأبوي أنسان معروف فملزوم عنده هالاشياء لكن صدگي ما يقتل أحِد بدون ذنب الا إذا اتعده علينا وقتل شخص من أرجال أبوي

- أهاا !! عِادي أشوفها ؟

سانـدرا: أيي المفاتيح موجودة عِندي أنتظري دقايق

تركتني بقيت واگفه بمكاني شوي ورجعت إلية وبيدها مفاتيح هزت براسها وگالت تعالي ندخِل

فتحت الباب ودخلنا سوية أنصدمت من شفِت غرفة عبارة كُوومة أسلحة بكُل أنواعها وحجومها

ردت الزم مُسدس ماقبلت وگالت ما يرضون الولد جاوبتها شعرفهم خليني مُستمتعة

أخذت مُسدس وعيوني تباوعله بكُل حُب أضحِك بسخريه وأفكِر رح أستفاد من هالغرفة هواي بالأوقات الصعبة

سانـدرا: ديري بالچ لِا تطلع رصاصة بالغلط أستري علينا ولچ

- لِا تخافين اطمئني عُمري أصلاً المسدس لعبتي ههههههههههه

سانـدرا: أمشي نطلع قبل لِا يجي أحد

- أي أنتظري شوي أشوف هذا شكله حلو يشهي واحد يرمي بي

سانـدرا: أستهدي بالرحمن أذكري ربچ

- ههههههههه طالعين طالعين

طلعنا وأني أضحكِ عليها تالي دخلتني لغرفة كبيرة وَ واسعة

فقط طاولة كبيرة وَ طويلة ملكية الشكل بيها 10 كراسي بالالوان الخضراء الغامقة وأمامها ميز وعليه تماثيل

گعدنا ودخلو كُلهم گعدو بنفس الوقت عائشة وعبد القادر وسَجئ . .

وأني وساندرا يم بعِض

بدو ياكلون أنتبهت علئ الكراسي الفارغة أكو أشخاص ما موجودين ليش ؟

ساندرا چانت گاعده بقرب كرسيَي أتدنيت يمها وسألتها بهِمس: " وين البقية ؟

سانـدرا: أخواني مسافرين صار إلهم شهرين تقريبًا واليوم العصر رح يجون فراح نسوي إلهم أستقبال إن شاءالله

- أها يوصلون بالسلامة

سانـدرا: أمين حبيبتي

- همه شنو أسمائهم ؟

سانـدرا: " أبـاذر " و " ذو النـون "

- أها الرب يحفظهم والاغـا مالكم وينه؟

تنهدت وجرت نفس طويل أنتبه علينا عبد القادر وهو ياكل أبتسمت بوجهة مباشرةً وهو ضحِك وكمل أكله

ضربتها علئ رجلها وهمستلها: "ممم ايييي

ضحِكت وشربت شاي تالي جاوبتني بهِمس . .

سانـدرا: أخوية الاغـا ما ياكل ويانا علئ السفرة ولِا يگعد اصلاً

- وين ياكل لعد ؟

سانـدرا: اكو غرفة صغيرة بصف هالغرفة لوحده ياكل بيها

- ليش ؟

سانـدرا: عازل نفسه ما يحُب يختلط وگلت الچ هو يعاني من حالة نفسية لذلك رح تشوفين تصرفات منهُ غريبة لكن بسبب حالتة صدگيني

- أها !!

سانـدرا: لعد أني ليش گلت الچ وأمي هم گالت الچ إنُ أنتِ رح تغيري ورح تكونين أقرب شخص الهُ ورح ترجعين أخوية وأطلعينه من حالتة النفسية وعقدتهُ

- ممممم!

سانـدرا: أساسًا أبوية أصر علئ زواجكم علمود هالشيء لأنُ يدري أنتِ رح تكونين علاجهُ

- هههههههههه

ضحِكت بصوت عالي ما أعرف شبيه ضحِكت ضحكة هستريه بحيث دموعي صبن وعيوني صارت حمرة

أنتبه عليه عبد القادر صب كلاص مي وقدمة إلية اخذته منهُ شربت وغصيت

عبد القـادر: اشبيكي تبكين

- ما دا ابچي مُتوهم

عبد القـادر: لكن والدموع ؟

- هاي دموع الفررح الفررح

عبد القـادر: ليش فغحانه

- علئ حياتي سعيدة حِيل إذا مگابله وجهك 24 ساعة عمو شلون ما تريد اكون سعيدة ؟ أصلاً بقمة السعادة صدگني

عبد القـادر: هههه بيها الخير

أباوع لساندرا حاصرتها الضحِكة كرصتني من زندي صرخت بيها من الوجع: " أخِخ وعمه شبيچ

سانـدرا: مُتوهمه شبيچ انطيني خبز حُبي

- ههههههههه نزول عليچ ياروحي اقصد هاچ تفضلي تفضلي الف عافية

أنطيتها الخبز وأني ميتة ضحِك . .

أحِس إنُ صايرة نفسيتي حلوة حتئ بعز قهِري وبوسط حزني عكس قبل چانت الأبتسامة مفارقتني والضحكة غايبة مني

عبد القـادر: صحيح ماتيلدا غاح أغوح هسة للمنطقة سكنكي علمود أختكي

- اجي وياك ؟

عبد القـادر: لِا يابا ما يحتاج وكذلك عندي شغل بالشركة فأعتقد أطول هناك أسبوع

- هواية! دز أختي للقصر وكمل شغلك

عبد القـادر: ما تِرهم صدقيني

كمل أكله وگام من السفرة ولحگته عائـشة وسَجئ، بقينا بـَس أني وياها

سانـدرا: رايحه اگوم اغسل حتئ نطلع بعد شوي نسولف ونحچي مثل ما أتفقنا

- أي أكيد اصلاً شبعت گايمه وياچ

سانـدرا: تمام لعد أمشي

گمنا من الكراسي وطلعِنا من الغرفة بعدما غسلنا گالت "عندي كم شغلة أسويها بعدين نطلع، جاوبتها: " تمام براحتچ..

غيرت مِلابسي حاولت بقدر الأستطاع أهتم بنفسي بـَس ما اگدر فشلِت

دا أشوف كُل الأشياء بعيوني باهته ليست لها روح وشاحبة ومُتعبة

تأوي إلى عينِي ذات التجاعِيد المُتناثرة و اللون الشاحِب حاضناً إياهَن

ماكنتُ يومًا شاهدتُ هذا، أيُمكن للوضوح ألا يكونَ مرئياً، أم عينِي غير مرئية ؟

‏فجأة أتحَول إلى شخص لِا يوجد شيء بداخلهُ أتجنب كُل تلك التوافه من الأمور

لاِ أعاتب ولِا أناقش ولِا أجادل أنظر للراحلين عني بهدوء تام دون حزن يستقبل الصدمات بصمت رهيَب

‏أحيانًا يكون ذنبي أنّي صبورة للحدّ الذي يوهم الناس أني خشبه وأني بالأصل غصن حتى الهوى الرقيق يكسرهُ

تنهدتُ بضيق قاتل أشعر بألم قاسي ثقيل في وسط صدري بنبضات قلبي

‏إنه في أسفل حِلقي ‏صلب كأنهُ حجر ‏ناعم معاند ‏لا أستطيع أبتلاع ريقي!

••

جريت نفِس طويل وطلعت من الغرفة أفتر بالقصر بمَلل

لمحتُ الاغا لابس بنطرون وقميص أسود بأسود يتمشئ بهدوء والكلب يتمشئ ورا كأنُ أصدقاء

مشيت بقربهُ أنتبه إلية وتوقف رافعلي حاجبة والكلب توقف بنفِس الوقت

سألني: " رايده شيء ماتيلدا ؟

- لِا لكن ما أعرف أحد هُنا بـَس ساندرا وگالت مشغولة فبقيت أتمشئ حتئ يمر الوقت أسرع

- أنا مُوجود ول ابويي تعالي وياي

- ماشي

تمشيت وعيني علئ الكلب ما أعرف ليش أخاف منهُ وأحسه يريد يهجم عليه بس لازمته أخلاقة

أنتبه علية وهز ايده وكمل طريقة للغرفة أول مرة أشوفها علئ رغم وارتني ساندرا الغرف يمكن نست تشوفنياها

دخلنا كانت غرفة فارغة ما بيها أي شيء سألته: " ليش جبتني هُنا ؟

- هذا الوقت مُخصصو للتدريب الكلب إذا تحبين أبقي وإذا لِا غوحي

- لِا باقيه

- أها صحيح نسيت، رح اتدربه؟ وليش الا هُنا بالغرفة

- أي يحتاج تدريب من ٣٠-٦٠ دقيقة كل يوم والركض مو مناسب اله بالجو الحار

كل الكلاب أظافرها بيها أوعية دموعية، لذلك إذا گطعت مسافة كبيرة غاح يسبب نزيف فمخلي بهذِه الغرفة

- أها لعد حلوو

بقيت ربع ساعة تقريبًا مُتكئة علئ الحايط وأنفخ وأجر نفِس بمَلل قاتل تالي وكفت يمه

باوعلي بتساؤل وگال: " شكو ؟

- مليت أريد أطلع شعندي مگابلتهم أنت والكلب مالتك

- غوحي يابه غاح أخلص من تصير نص ساعة

- تمام لعد طالعة

الكلب علئ الأرض وأني واكفة بقرب الاغا

اتدنيت ردت أفتح الباب وچان يصرخ بصوت عالي وگفه لگلبي لزمت ايد الاغا حَيل وهو ضحك

- خرعني ورب يسوع شنو من كلب غريب هذا مو اگُلك ذئب بس أنت ما تصدگني!

- هههههههه ول أبويي كلب يخوفكي

- تِره صوته يصحي المرحوم من قبره والرب صوته يجلط!

- أي الشيء الحلو بهذِه الفصيلة من الكلاب إنُ ما تنبح إنما تطلع صوت "عواء"

لأن بنظر الكلب إنُ يغشع نفسو ذئب لذلك يعوي وبهذِه الحالة حظري نفسكي لأي جلطة تجيكي بسبب العواء مالته

- لِا تخلي يتقرب مني وأكون ممنونه منك طول العُمر صُدگ دا احچي

- يا بوووويه بعيني الأثنين

ضحِكت بخفه وطلعت من الغرفة ..

صارت الساعة 12 الظهر صليت صلاتي بالغرفة ما اجا من الصبح مادخل إلها وهالشيء ريحني أخذت راحتي بالدعاء

ورا الظهر الكُل أنشغل يحظر الأكل والحلويات الطيبة والزينة

سألت ساندرا ليش تسوون هالأشياء فجاوبتني إنُ أي شخص يغادر هالقصر أكثر من شهر نحتفل بقدومة ونطبخ الهُ الأشياء إلي يحبها

تركتهم وگعدت علئ القنفة تكون كبيرة بوسط القصر أمامي الدرج وبخلفي باب القصر

اطكطك بأصابيعي بهدوء وأفكِر بأختي وبإراهيم . .

مشتاقة الهُ لعيونه لصوته لأهتمامة ولشوفته الصبح بكُل يوم

مشتاقة لغزله ولكلامة إلي بكُل حُب وعركاتنه المُحبة بالشركة

كُل يوم يسئلني اكلتي ؟ أخاف علئ عيونچ الحلوة لِا تسهرين أكثر

- أنتِ صرتي كُل هِلي بعد وفاتهم أنتِ أمي الثانية وحبيبتي الوحيدة وروحِي من الدنيا ،،،

-شرسَـتي ،،،
-وما شراستك كُلها إلا لإخفاء قلب هش لا حدود لهشاشته ،،،

- فهَل الوردُ يَلد ورداً بهيئةَ بشراً يُشابهك ؟
- أنتِ جميلة الجمائل ،،،
- أميرتي ،،،
- وردتي ،،،
- حَبيبتي ،،،

- "ديري بالچ علئ عيونچ أحبهم بگد شمِس بغداد"

جريت نفِس وزفرته بقهِر لزمت گلبي وهمِستُ لروحِي: " تخلص تخلِص الـ6 أشهر إن شاءالله..

أنفتح الباب وسمعت هلهوله عائـشة گمت من القنفة والتفتت للخِلف عدلت فستاني ورحت يمهم

عيوني صارت عليهم أثنين شباب عرفتهم هذولي أخوانه للاغا كُلش يتشابهون الثلاثة ينطون ملامح للبعض

بشرتهم حُنطية مائلة للبياض والعيون بُني اللون لحِيتهم مُحدده بترتيب

طولهم تقريبًا وسط مو كُلش طوال لكن الاغا إذا أوگف يمه ما أبين

كُلش طويل تقريبًا 195 وأني 162 أكتافه عريضة لدرجة يگدر الشخص ينام عليها ميحتاج مخده بليل

ضحِكت علئ كلامي وهمساتي لنفسي دخلو وگعدو علئ القنفة وبقيت واكفة ما منطية أي ردة فعل فقط أباوع بوجوهم الطيبة

وگفت بقربي ساندرا وهمست بأذني: " سلمي عليهم هذولي أخواني..

جاوبتها وعيني بعينها: " هم يسلمون أني الضيف مو هِم

سانـدرا: أنتِ زوجة أخوهم مو ضيف يمااايييي شلون بيچ ؟

- ها اخذيلچ راشدي بعد ؟ والرب ما أسلم اصلاً ما أعرف أسمهم

سانـدرا: ههههههه ولچ حُبي إلي لابس سمائي هذا "أباذر" والي لابس رصاصي هذا "ذو النون"

- أوووكِ شعجَب يلبسون الوان عبالي مثل أخوهم الاغا يحُب الأسود الواضح ومايبدله

سانـدرا: أي صحَ شخصيتهم تختلف عن أخوي الكبير الاغا بكُل شيء

- ممممم

ابـاذر: اشلونكي ماتيلدا

عدلت وگفتي وجاوبتة بأبتسامة عادية: "الحمد لله

ابـاذر: دومكي مليحة يارب ، بعدين نتعرف الوقت ما مناسب ما صح ؟

- يمكُن أي

ذو النـون: ول يابه هو وينو الاغـا ؟

- ما أعرف

ابـاذر: غيغ زوجكي اشون ماتعغفين وينو ؟

سكِتت باوعت الهُ بنظرة إنُ تعرف هذا مو زواج حقيقي . .

فهمني وسكِت تالي گامو أثنينهم وقبل ما يطلعون من القصر همِس لأخو علئ الجكارة شعلها إلهُ وَ ورثها وطلعو سوية

بعد ساعة أحتفلو وأكلو وأصواتهم صارت عالية ضحِك ولمه عائلية بس بدون الاغا أبتعدت عنهم حسيت هذا مو مكاني وتركتهم

القصِر صار هادئ بشكِل مُخيف بحيث الابره أسمعها إذا وگعت يمكن لأنُ بس أني موجودة لأنُ عائـشة دخلت لغرفتها وعبد القادر طلع للمنطقة حتئ يجيب أختي والاغا وأخوانه ما موجودين وسَجئ رجعت نامت

بـَس الخدم متواجدين بالبيت وكُل شوي المح شخص يدخل ويطلع سألت ساندرا عليهم گالت هِذول الخدم والحراس عدهم الصلاحية التامة يتجولون هُنا بالقصر

صارت الساعـة 5 العصِر گالتلي أمشي نطلع للحديقة كُلش كبيرة نتونس ونغير جو وكذلك نسولف

هزيت راسي "بالقبول" اخذت سلة فواكِة وحلويات وطلعنا سوية للحديقة خلف القصر فارغة مِحد متواجد بيها بـَس حراس واكفين من بعيد

گعدنا علئ الحشيش قدمتلي تفاح مُقطعته بالمطبخ ضحكِت واخذته منها بقينا بحدود النص ساعة بـَس ناكل ونسولف أشياء عِادية

تالي گالت إلية: " تردين تعِرفين عن الاغا لو أبوية بالأول ؟

جاوبتهَا:" براحتچ مو مُهم الأول منو..

سانـدرا: تمام لعد ، شوفي أبوية كان عايَش بالعراق - موصل

حب أمي إلي هي بالأصل من اقاربة لكن من بعيد حِيل ومو موصلية ، بغدادية

- اها واني اگول ليش لهجتكم أنتِ وأمچ تختلف جذريًا عن عبد القادر وَ ولده

سانـدرا: أني تعلمت اللهجة البغدادية من صغري من أمي أما أخواني يعرفون يحچون بغدادي عِادي مو صعب عدهم بـَس يحبون الموصلية وصفو ويا أبوية باللهجة

- مممم حِلوو بـَس لهجتهم صعبة مرات ما أفهم علئ عبد القادر

سانـدرا: أي لذلك أني احچي بغدادي هههههه

- الـحمد لله أنتِ مثل لهجتي لأنُ كل أهل البيت لهجتهم غريبة وتصفني

سانـدرا: سَجئ بنت عمي المرحوم، كذلك بغدادية لأنُ عمي متزوج أمها من بغداد

- طلعتو تحبون بغداد هِواي بحيث كُل نسواينكم منها

سانـدرا: أي أبوية چان عنده شغل بين الموصل وبغداد ويحُب هالمحافظة

- حقة يحُبها بيها ريحة الغوالي

سكِتت وأني أتذكر أمي أنعصر گلبي ودنگت راسي ايدي صارت تتجول علئ الحِشيش بالامبالاة

سانـدرا: تذكرتي أهلچ صِح ؟

- أي..

سانـدرا: حقچ الوالدين مُستحيل وفاتهم وعدمهم من الحِياة شيء سهل! شعور صعب وموقف موتهم أصعِب ربي يريح بالچ وگلبچ حبيبتي

- أمين

سانـدرا: أي ومن بعد الزواج انولدنا أحِنا وتالي اخذنا لتركيا صار إلنا سنين طويلة هُنا بهذا القصِر

- أنتو من عائلة غنية ؟

سانـدرا: أي ما داتشوفين كُل هالاملاك والقصور ههههههه

- ربي يديمهم لعد احنا شنريد ههههههه

سانـدرا: أي وهسة نحول علئ أخوي

- أي سولفي غردي

سانـدرا: أخوي حب وحدة 7 سنوات وأنجمعو بالأخير وتزوجو سنة كاملة وهو أسعِد أنسان وصار عنده ولد أسمه مُجتبئ لكن توفو أثنيهم بنفِس اليوم!

- شلون توفو ؟

سانـدرا: صدگيني لو بيدي چان سولفتلچ بس هالموضوع عند الاغا خط أحِمر ما يقبل احچي حتئ الچ نبهني وخلاني أقسم إنُ ما احچي

- ليش أنتِ بالذات قسمتي ؟

سانـدرا: لأنُ يدري رح نصير صديقات وأعمارنا مُتقاربة لبعض فأحتمال كُلش كبير علاقتنا تكون قوية بالأيام القادمة

- أها حِلو يفكر ليگدام

سانـدرا: أي ويمكن بالأيام القادمة هو يسولفلچ بذات نفسه

- الرب كريم هذِه حياته ما أحب أتدخل بيها بـَس كفضول سألت

سانـدرا: أي طفولتنا حِلوة لِا بأس بيها چنه نتعارك كل يوم ههههههه بـَس أني أقرب وحِدة للاغا چان قبل يسولفلي كُل شيء بـَس بعد وفاة زوجتة وأبنه تغيَر وأنعزل

- هو شنو أسمـه برب يسوع جاوبيني؟

سانـدرا: ما يقبل هههههههه

- ليش شنو رح أكل أسمة

سانـدرا: لِا بـَس مُحتفظ بكُل شيء يخصه رح اگلچ شيء حتئ لِا تتفاجئين بعدين

- مممم گولي ؟

سانـدرا: الحراس والخدم ما يعرفون أسمة نهائيًا فقط معروف بالاغا ولِا يحچون وياهَ كلمة يرجفون من يشوفو

- أووووي

سانـدرا: أي هواي حچيتلچ عن عائلتي سولفيلي أنتِ حابه أعرف عن حياتچ وعد مني ما اگول لأي أحِد

صفنت بالأرض مُتنهده بضيق وكُل الذكريات السودة صِارت ببالي

حِياتي ؟ تكتفي بكلمة وحدة قادرة علئ إنُ تختصِر كُل شيء مريت بي "أجـرام"

خطف، قتل، أغتصاب، تعذيب

أنكسار، هشاشه، خذلان، كذب

مُجرم مجهول، قناع أسود، ضحِكة

دم، لون أحِمر، F

..

رديت عليهَا:" أقسمي ما تگولين أسراري لأحد أحد ومن ضمنهم الاغـا ؟

سانـدرا: أقسم بالله ما اگول لأي أحد والكلام رح يكون بين الدكتور ومريضهُ ما يطلع لطرف ثالث

فضفضيلي احچيلي رح ترتاحين وأطلعين إلي ابداخلچ وإلي كاتمتة وبنفس الوقت أنصحچ! اعلاج الخطأ إذا موجود

هزيت راسي "بالموافقة" وجاوبتها: "تمام..

عادت ذاكرتي اليائسة الئ سنوات الماضية وبديت أكشف إلها عِن حياتي بالتفصيل

يـتبـع ✞. . .

⭐⭐⭐⭐⭐⭐

صوتـو فراشاتي أنتظر تعليقاتكم وتاگاتكم الفستِق🤤🔥

توقعاتكم يحلوين ؟

الكـاتبة #نمـارق⚜️