رواية شخوص متداخلة الفصل الثاني والأربعون 42 - بقلم .

روايـة: شخـوص داخلـة

مُهم: "لا تنسون التصويت والتعليق ع كُل فقرة+مُتابعة حسابي🔴 .

- وأنا يَا سَيدي كُنت أعيبُ الحُب
ونَسيت إنَ كُل مَن عَابَ إبتلى .

___

فيّ كُل مرة يجعلني أحُبه بطريقة أعمق وأكثر فيّ كُل خلاف يحصُل بيننا يجعلنيّ اتأكد أن لا شيء قادر على تفريقنا

أننا مرتبطان بشيء متين لا يُمكن لأي قوة أن تُبعدنا ..

في كُل مرة يثبت ليّ بمواقفهِ الرجولية وتمسكهُ الشديد بي وفيّ كُل مرة يثبت لي أنهُ الوحيد الذي يستحق قلبيّ

..

صفن بوچهي وملامحة مليانة علامات أستفهام لطلب مالتي الغريب والمُفاجئ . .

-الاغـا: ليش رايدة تتعلمين ؟

حاوطت رگبته بايديه وجاوبتة بأبتسامة: "أريد أتعلم حتئ أحمي روحي بغيابك..

رفع حاجبة ما عاجبة كلامي وزفَر نفس بقئ ساكت . .

-ها شگلت؟..

-الاغـا: ليش تكذبين ؟

بعدت ايديه عنه بأرتباك وعدلت وگفتي وجاوبتة وعيني علئ الشجَرة . .

-ذو الفقار ماحاجه أكذب مثلاً أريد أقتلك وأريد أدرب ؟..

-الاغـا: ما جبت طاري القتل!..

-اووه گول ما أريد أدربچ وأعلمچ خصم الحچي!..

-الاغـا: ماتيلدا شنو دا تخططين علئ شنو ناويه؟..

-ماكو..

-الاغـا: رفعي راسچ وجاوبيني خلي عيونچ بعيوني وگولي ماعندي مُخطط ولو أنا ما مصدق لأن طلب غريب بهيچ وقت شنو معناهَ ؟..

طگطگت أصابعي وجاوبتة بنبرة هادئة: "ماعندي..

عدل شعرهَ وهز راسه وهو يهمس" ماعدها ماعدها..

-الاغـا: تمام أمشي..

-وين؟..

-الاغـا: للمكان إلي أتدرب بي أنا

-وين صاير؟..

-الاغـا: دقايق ونوصل اله..

-تمام لعد..

باوعلي من فوگ ليجوا وگال: "مبدلة ومجهزة نفسچ وكأنُ تدرين رح أوافق..

ضحكت وگلتله: "طبعًا لعد غير أنت زوچي سر سعادتي..

-الاغـا: بطليهن هالسوالف..

-شبيهن؟ صارن سوالفي ما تعجبك؟..

-الاغـا: أسكتي بوية وأمشي..

-والله يالله، إذا ما أعجبك طلگني..

-الاغـا: أسكتيييييي..

-لااا تعيييييط..

-الاغـا: الله يلعنك يا شيطاااان..

-تلعنه گدامي يعني قصدك أني شيطانة؟..

اجا يمي رفع كف ايدي وعضه بكل قوة دفعته من صدرة وأني أصرخ..

-متزووووجة هاااسكييييي أنيييي..

-الاغـا: انچبي وامشي لا أغير رأيي..

-ها بديت تذلني..

-الاغـا: أتعلمي وحدچ رايح أنا أصعد لغرفتي أنام..

-غرفتنا قصدك..

-الاغـا: أي تعالي نامي يمي..

-اهوو ذو الفقار شبيك يلا عفية بزوچي حبيبي..

غمزلي وأبتسم وهو يگول: " حبيبي ؟..

أنتبهت علئ روحي من جفصتها بقيت ساكتة..

-الاغـا: ها ؟ دگوليها وريحيني..

-شگول؟ جوعانة قصدك؟..

-الاغـا: من اعضچ بيدچ الثانية أحد يلومني ؟..

-شحدك والله أعضك أني ما أسكت..

غمزلي: " لعد ما أكيف ؟ يلا سوي..

-شنوو؟..

-عضيني..

-اييييعَ..

-هنيال أمي..

مشى قبلي وسبقني، سكتت ورحت ركض أمشي وراهَ وأحنا ساكتين، يرفع حاجبة وأني أسحگ حذاءة..

وصلنا للمكان بعد مرور وقت بالمشَي، المكان عباره عن أرض خضراء مليانة حَشيش وكوخ كبير وبيَر مي بالقُرب منهُ . .

تمَشيت بهدوء وگفت أخذت سهم من المجموعة الاسهم الحُمر الموجودة علئ قطعة خشب كبيرة

حسيت بأيدينه حاوطت خصري ردت احچي همس بأذني: "شششش عينچ علئ أمامچ..

بلعت ريگي باوعت أمامي علامة أكس كبيرة علئ الحايط، المفروض أصوب عليها..

-الاغـا: ضغطي علية وشمري السهم أنا يمچ..

-هآ..

-فهاوه؟..

-لِا لِا..

-سباعيه؟..

-أي طبعًا..

-تمام لعد شوفيني مهارتچ..

-هو أني لو أعرف چان طلبت منك تعلمني؟..

-حاولي تجربين..

-ماشي..

جريتَ نفس وعيني صارت علئ السَهم، دحاول أضغط الرُمى وايدي رجَفت، وگع بالأرض..

زفرتَ نفس وتخصرت وگلتله: "ذو الفقار..

-الاغـا: ها يروحي..

-سالمة سالمة..

أبتعدت عنهُ ضغطت مرة ومرتين حاولت عَشرة وما صار، استخدامة شوي صعب..

تالي اجا يمي وبقى طول الوقت يعلمني المَرة الالف يلا ضبطت وصل السهم ببعُد مسافة كبيرة، حسيَت بفخر بنفسي وضليت أضحك واغمزلة عاد هو بقئ فاتح حلگه ما مُصدگ ماتيلدا تغمز بقئ مُصدوم

-شَبيك حُبي علئ شنو مُتفاجئ..

-الاغـا: تطورات واضحَة، نوب حبي وغمزات هاي كلها علمود علمتچ؟ لو أعرف هالتطورات تصير بعد التدريب كان دربتچ قبل ٦ أشهَر..

-شسالفة ياعيني..

-الاغـا: لو أعلمچ علئ أستخدام المُسدس شنو تسوين؟..

-أبوسك..

-أم الصوت بشرفي..

طگها بضحكة واجا يمي أبتعدت وگلتله: "هااا خير سالمين خوما صدگت..

-الاغـا: يروحلچ فدوا المسدس وصاحب المسدس وأهل المُسدسين..

-ايباهَ خانك التعبير مو؟..

-هو هيچ يمكِن..

-تدري شنو؟..

-گولي يابه..

-ما چنت أعرف عندك روح فكاهية من جانب شخصيتك عبالي الاغاويين ما يضحكون..

-الاغاويين؟ هالمره أنتِ خانچ التعبير صح؟..

-ولا يستقر المُدرس العربي المُهم المعنئ شبيك..

-أي صح بـَس هالشخصية إلي دا تحچي وياچ ما چانت موجودة قبل ما تدخلييَن لحياتي..

-بمعنئَ؟..

-أنا چنت مَريض وأنتِ طيبتيني وغيرتيني، ذو الفقار الواگف حاليًا گدام هالعيون الحلوة بفضلها صرت زين أنتِ دكتورتي چَنتي بمثابة شيء روحي تَرف غيرني بكم شهَر للأحسن حَال..

-الحمَدلله..

-صلَيبي المُميز..

-عيونهَا فُقاري..

-أنتِ طبيبة عشگي..

أبتسمَت وجاوبتة بحُب وعيوني مُركزة بملامحَه: "يُخبرني كَاهن كنيستنا أَن الحُب لـ الله فَقط،وأنا أتأملك بَعدها وأقول في سري "ولِملائكتهِ أيضًا..

-الاغـا: كان صُوتكِ مثل تراتيل مسيحية ،كُنتِ جميلة كالكنيسة المهجَوره في جو مغيم ، كُنتِ كنيستي التي التجئ إليها في أصعب أوقاتي وحزني ، كُنتِ ولازلتِ تحُفتي الفنية..

-أحتويني أحتويني..

-بعيوني أثنين أخليچ يا بقائي..

إن كُنتِ كارثة سأكون الحَلّ، هكذا أُحبكِ كما أخبرتكِ سابقًا بأن حُبي إليكِ مختلفًا كالأختلاف السماءِ على الأرض..

أبتسمَت وبقيت ساكتَة، علمني علئ المُسدس مَر وقت طووويل وأحنا بهالمكان من الصبَح واكفيت علئ رجَلينا عَلمني كُل الفنون والمهَارات بالأستعمال لدرجة صرت أستخدمَة أحسن منهُ وأني أضحك ايدَي صارت خفيفة بأستخدمة..

رميت ٩ طلقَات وي كُل طلقَة أهَمس لروحي حوار، وأني ناويه علئ مُخطط هالـ٩ طلقَات رح تكون بمثابَة رد جميَل علئ ٩ جرائَم ..

لحدما غابت الشمَس وصار الليل گال خلي نَرجع للقصر . .

وفعلاً رجعنا، دخلنا للقصر رئستًا دخلت للحمام غسلت من التراب إلي توسخَ جسمي وملابسي كُلها بي، تالي نزلت جوا كُلهم مُجتمعين بالقصر..

گعدَت علئ القنفة سألت ساندرا چانت گاعدة يميَ، الاغا مالتي وين ؟..

غمزلتي بضحَكة وگالت: "الاغا مالچ عنده شغل كم ساعة ويرجع..

-مممم.. اگلچ صُدگ سؤال؟

سانـدرا: گوليلي حـبيبي..

-شنو حبيبي ما أحبها هالكلمة..

سانـدرا: ماتحبيها؟ لعد منو الخاصبتنا زوجي حبيبي وحبيبي..

-زوچي حُبي هذا شيء خاص هذا سَبشل..

سانـدرا: أوي من هسة تمَيز

-أي وأني قلبه المُميز..

سانـدرا: ربي يديم هالمحبة لعد أحنا شنريد، أي شنو سؤالچ گوليلي ياعيني..

-هو شنو شغلة؟..

باوعتلي مُستغربة وگالت: "ماتعرفين ؟..

-لو أعرف أسألچ مثلاً ؟ بعدروحي..

سانـدرا: لا بس فاجئتيني ما چنت أدري أنتِ ماتعرفين شغل أخوي الاغا..

-أي ما چنت أسأل ماچان هالشيء هامني، هسة هَمني وأشتغل الفضول، جاوبيني أنتِ..

سانـدرا: ذو الفقار رجل أعمال مُعروف جدًا بتركيا

-أها..

-أي يگلبي المُميز..

-أنچبي هاللقب بـَس لفُقاري يلوگ..

-أحترمي نفسچ لچ أنا أكبر منچ دكتورة وكُل هالهيبة وتگوليلي انچبي..

-ياوسفهَ، عُمري رح يدخل الـ٢٨ منو الأكبر لاتخليني اهلس شعرچ هسة

-دباع الميانه ياربي..

-خاف ماعاجبچ تردين الرسمية بت قادر..

-دخيلك ربي أحفظ هالجزء البقئ من عقل ماتيلدا مرت أخوي..

-بنت أداريس..

- أووف ما اگول بـَس الله يساعد گلب أخوي

-ترا توم كروز هو المحظوظ بيه علئ فكرة..

عبد القـادر: الله بالخير مغت أبني شلونكي إن شاءالله مغتاحة ؟

التفتت علية وجاوبتة بأبتسامة: "بشوفة وچهك مرتاحة..

عبد القـادر: يابا دايمة اشنو الأخبار ماكو شيء جديد ؟..

-مثليش؟ طلع شيب براسي تدري؟..

عبد القـادر: بيها الخير ، لا أقصد تطورات بعلاقتكم أنتِ وأبني..

-وين تريد توصل عمو؟..

عبد القـادر: ما صغتي حبله..

-من شوفهَ وچهك..

عبد القـادر: غايد أصير جد..

-ولا يهمك رح أصيحلك جدو كُل يوم..

عبد القـادر: أنتِ ما ينأخذ منكي كلمة جدية؟..

-لا بيبيه..

عبد القـادر: عجيب!!..

مديت ايدي علئ سلة الفواكِة وگلتله: "تريد تفاح؟ أخضر أحمر شتحَب؟..

خزرني وما جاوبني..

-عينك جدو..

عبد القـادر: عائشَتي يابا غاح أغوح أنا لغرفتي أنام أغتاح كم ساعة وقولي للخدم يحضغولي الحمام أتحمم من أقعد من نومي..

عائَـشة:" نوم العافية، إن شاءالله..

راح واجوي ذو النون واباذر لازمين ملفات خلو المسدسات علئ الميز وگعدو علئ القنفة الي أمامي..

ابـاذر: الله بالخير..

-هله..

ابـاذر: تغحيب من وغا خشمكي..

-هله هلا هلاو اهلين هلوووو..

ذو النـون: اشبيها الواادم ؟..

ابـاذر: ما اعغف أبو العون بـَس شكلها فاصلة من الأخير..

-أحترموني ترا أني زوجة أخوكم الكبير..

ذوالنـون: السابقة محتغمينها فالأحتغام هم لكي أطمئني..

خزره اباذر وگف جره من قميصة وهمس بأذنه كلام، هز راسه وسكت..

رادو يرحون..أجت سجَئ

سـجَئ: لحظة ذو النون !! ..

التفت عليها وجاوبها: "نعم ؟؟..

سـجَئ: أريد أروح لبيت عَمي عبد الرشيد توصلني أنت ؟ ..

ذو النـون: ليش أبو عادل السايق وينو؟ ما تغحين وياهَ مثل كل مغه ؟..

سـجَئ: أتصل علئ رقم القصر قبل ربع ساعة تقريبًا وگال زوجتة مريضة ورايح للمستشفئ من وصل هناك بلغنا وگال ما يگدر يجي للقصر بسبب سوء حالتها الصحية يومين ويرجع..

ذو الـنون: سلامتها يارب أي خطيه مغتو من زمان قال مريضه يلا جهزي نفسكي تلقيني بالسيارة منتظغكي لا تتأخفي عندي شغل أوصلكي بطغيقي واغوح..

سـجَئ: تمام شكرااا نوني..

رفع حاجبة وگال إلها: "شقلتي بويه ؟..

لزمه اباذر وگال الهُ: " يابا أمشينا نغوح نطمن علئ مغتو ونوقف وياه بهاليوم الصعب خطيه أبو عادل غجال مسكين وفقيغ..

ذو النـون: أتصل عليه واطمئن عليهم وأنا غايح أوصل سجَئ تالي أغوح للمستشفئ وغاها للشغل..

ابـاذر: تمام يابا..

طلعوا وبقت سجئ واكفة باوعتلي نظرة خطف وراحت تركض للغرفة ..

گلت دام محد موجود بـَس عائشة وساندرا، خلي أروح أفهم شبيها مخليه راسها وي راسي بشنو تفكر وتخطط..

تمشيت رحت لغرفتها شفت الباب مفتوح، دخلت وگفت يم القنفة، التفتت علية وتخصرت وصاحت بصوت عالي بنبره مُتنرفزة..

سـجَئ: شلون أدخلين لغرفتي بدون استأذان ؟؟..

أبتسمَت وجاوبتها بهدوء: " مثلما أخذتي أسواري بدون استأذان..

سـجَئ: خليني ساكتة وأطلعي برا يلاااا..

-شَبيها سجاوي الوردة مُنفعلة وتطرد بعصبيَة؟..

سـجَئ: لچ كارهتچ وحاقدة عليچ فوگ ما تصورين أطلعي برااااااااااا..

-ليش داده ماخذهَ فلوسچ حلالچ اسواراتچ ؟..

سـجَئ: أني مُتقصدة أخذه، أخذته بحقَاره وبحقد سمعتيني هسة أرتاحيتي ؟؟..

-قصدچ بكُل صلافه..

سـجَئ: ورح أخذ كُل شيء منچ كُل شيء أتحبي وأتعزي مُهما كان بسيط، صغير الشأن قبل الكبير..

-اخذيهن بالعافية تتهنين هاي إذا اكو اشياء غالية بحياتي صراحةً فاجئتيني صرت اشكك بنفسي منيلي اشياء كبيرة..

سـجَئ: الأ ابچيچ ددددم مثلما بچيتيني دموعي ما رح تروح هدر..

-الناس تگول دمنا مايروح هدر، وأنتِ دموعچ، يلا أختلاف ثقافات..

سـجَئ: لچ لا تستهزئين وأطلعي برااااااااا

-هييييي أنتِ لا تصرخين طرشتَي أذني لحظة أبتعد كم سانتي عنچ ما أريد أخسر أذني ، ترا غالية علية مثلما دموعچ غالية..

سـجَئ: الله ياخذچ..

-أمين، الرب يسمع منچ..

سـجَئ:ذو النون ينتظرني أريد أبدل ما أريد أضيع وقتي وياچ يا حيوانة أطلعي براا يلاا كارهة حتئ وجهچ إلي بسببهَ أنتِ دخلتي لحياتنا وعرقلتيها..

-أطلع بـَس بعدما تگوليلي ليش كارهتني، خاف مُقصره وياچ وما أعرف ؟..

سـجَئ: رح أخذ كُل شيء تحبينهَ مُثلما أخذتي إلي أحبهَ وهذا وعَـدد..

-منو هو؟..

باوعتلي بنَظرة حقَودة وأشرت أصبعها بوچهي وجاوبتني..

سـجَئ: ذو الفَقار!! ، أخذتي مني بكُل سهولة..

-فُقاري؟.. تردينه صُدگ؟ أخذي بـَس هسة طالع ما موجود بالقصر للأسف..

رادت تحچي تالي بسرعة غيرت مَلامحها من حقارهَ إلئ هدوء ونظرات بريئةَ ومُتعطفة ويايَ، حتئ نبرهَ صوتها تغيرت وعيونها ركزتَ وياي أكثرر بالحديَث..

سـجَئ: يعني أنتِ ما تردين ذو الفقار ؟..

ضيقت عيني وما حسيت براحهَ عدلت وگفتي،ميلت راسي ..

باوعت علئ المرايا شفت "ذو الفقار" واگف يم الباب وراي ببداية الغرفة ويسمعنا ..

اتفاجئت، وبنفس الوقت گلت بگلبي"ها يعني لهالسبب تغيرت رئستًا..

عرفت أدارك الموقف ومُباشرةً جاوبتها بنبرهَ عالية بعدما ظلت ترجع تسألني نفس كلامها..

- ما يخصچ وكافي بطلي هالسوالف أعرف بيچ تردين تخربين بيني أني والاغا وتدخلييَن بعلاقتنا مثل الحشريهَ..

أني أحُب زوجي وفُقاري يحبَني بل يعشقنَي ويموت علية ويشوفَني كُل شيء بحياتة لذلك لا تحاااولين أبدًا لأنُ بكُل محاولة أنتِ رح تفشلين يا حبيبتي..

ردت اكمل كلامي قاطعني بدخولهَ خلا ايده علئ كتفي وهَمس بصوت ناصي بأذني: "احبچ..

تالي رفع راسه وباوعلي وگال: " ماتيلدا مُنتظرچ بالغرفة تعالي من تفرغين..

-ماشي..

غمزلي وطلعَ، باوعتلها تباوعلي بنظرات تريد تكتلني وتهجم علية علئ رغم أني ما فرحانة بـَس الاسئلة شاغلتني ليـشَ هالحقد هذا.. معقول صُدگ تحب ذو الفقار ؟ زين أني ما جبرتهَ يحبني.. هو لو يريدها كان اتزوجها بـَس الواضح هي شامرهَ نفسها علية؟!..

طلعت من الغرفة وهي سدت الباب قوي رگعته عبالك عدها عداوه وياهَ هالمسكين الحمدلله علئ نعمة العقل، مشيت وأني اطگطگ أصابعي وأفكر.. التفكير قتلني بين الماضي والحاضر..

رجليه ودتني لغرفة ساندرا، دگيت الباب گالت تفضل، دخلت وأبتسمت گالتلي: "شعجب أجيتي بهذا الوقت؟..

-أي تعرفيني بهالوقت يم اخوچ السيد..

سانـدرا: أيي هلا بيچ بكُل وقت، ادخلي..

-دخلت حُبي..

ضحكت وسكِتت، شفتها تكتب، وگفت يمها گاعدة علئ السرير ومُطشره الاوراق والملفات وبيدها ورقة وقلم وتكتب..

سألتها: "شنو دا تكتبين؟..

سانـدرا: ولاشيء بـَس أشياء للعلاج مَريضي ودا اقرا كُتب باچر رايحة لعيادتي عندي مُراجعين..

-أها.. كُتب شنو؟..

سانـدرا: علم نفس..

-عادي اقرا ؟..

سانـدرا: أي أكيد إذا تحُبين تقرين أقري بدون ما تاخذين استأذان مني باعي هالمكتبة إلي بصف الخزانة بيها مُختلف الكُتب أقري إلي يعجبچ..

-اها تمام شكرًا دكتورتنا..

سـاندرا: ولو ما بيناتنه شكُر..

-عَيني وعَيني..

تمشيت القيتُ نظرة علئ الرفوف المكتبة مليانة كُتب . . جذبني ولفت نظري أسم كِتاب لكن كانت رواية، أوراقها زيتيه وعددها كبير، بعنوان "بين اليأس والأمل". .

حبيت اقراها دام بالقصر ماعندي شيء بس مشاكل وي سجئ واگابل وجهة أبن القادر وسوالفه.. حتئ وهو مريض فلاونزة ما يسكت لسانه..

بس رغم هذا، احسه گلبه طيب، ما أعرف إذا أحساسي صح أو مُجرد أحساس، بـَس طول هالفترة المُضت إلي عشتها هُنا بالقصر ما حاول يضايقني وما بدر منه موقف يفشلني لو يجرحني بكلام مُعين لو لو..

بالعكس كان يعاملني بحنيهَ مثل حنية أبنه، ودائمًا يدافعلي إذا سجئ جفصتها لو تتعمد تقهرني.. يردها وما يسمح إلها تغثني..

گلتلها أخذته بعدين أرجعه الچ، هزت راسها بالقبول، وطلعت من غرفتها، صعدت للطابق الثالث فتحت باب غرفتنا دخلت وقفلتها شفته گاعد علئ الميز وعيونه علئ شاشة اللابتوب..

خليت الكتاب علئ المُيز بالقُرب من السرير، أخذت تراكسود حريري من الخزانة ورحت بدلت بالحمام، طلعت وهو بعده گاعد يكتب ويشتغل وملفات متروسة الميز..

سألته: "يمته تنام؟..

-الاغـا: فد ساعة، صح نسيت اگلچ باچر الصبح نروح للقرية، أمي تريد تروح مُشتاقة للاجواء هُناك، فأخذچ وياي أعرف بيچ مُشتاقة لأصدقائج..

أبتسمت وأني أتذكر دانيال ولورين قبل ٦ أشهَر قرروا يسكنون بالقرية وي أمهاتهِم وهم ذو الفقار أيدهم بالموضوع لأن علمود حمايتهم وأمن إلهم..

وبين كُل فترة وفتَرة چانُوا يجون، ولحد الأن ما مسوين عَرس ماكو وقت مُناسب، وخطية دانيال دا يتعب ودا يشتغل ليل نهار، حتئ يكون نفسة من صفر..

علئ رغم ذو الفقار گالهَ أشتغل وياي وما قبل وانطاهَ شغل جاهز بـَس يجي يطبق وهم ما قبل، چان مُصر هو يشتغل ويطلع فلوس من عرق جبينه بدون مُساعدة أحد..

جاوبته: "تمام لعد، بـَس شنو اللبس برأيك؟..

-الاغـا: ملابس..

-الله ما چنت أعرف بالطلعة تنلبس ملابس عبالي أروح عريانه..

-الاغـا: أي أي..

هزيت ايدي وسكتت چان عندي مزاج وردي فرحت فتحت الكنتور طلعت فُستانين ومشيت يمه وأني اقدمهم اله..

سألته: "برأيك شنو اللبس يا لون الفستان الأحمر لو البُني؟..

جاوبني وعينه علئ اللابتوب: " الاحمغ..

اتفاجئت عبالي رح يگول البُني أكيد..

گلتله: "بـَس الأحمر أنت ما تقبل اللبسه بـَس الك.. والبُني هم حلو؟..

-الاغـا: البُني البُني..

-يگُلك باچر رح تعرس النملة واخيرًا نروح مو؟..

-الاغـا: أي بـَس بيش الساعة..

-بـ٢ بليل..

-الاغـا: بأي مكان ؟..

-بالمُلهئ..

-الاغـا: شعدها معرسه وي الكح* *..

-عريسها سيد نمل چان هذا طلبه..

-الاغـا: يريد يشوف الرقاصات أبن ال*..

-أي خطيه يگلك النملة ما تعرف ترگص..

-الاغـا: أنتِ هم مثلها ماتعرفين تركصين وحارمتني وأنا غجال فقير ما احچي بالعها وساكت..

-باااالك ووووين ذو الفقااار شبيك من كُل عقلك تجاوبني لا كلش واضح بالك وياي بحيث تسأل علئ العرس وتحاورني مااعرف ماخذني علئ گد عقلي..

-الاغـا: أحبچ..

-ذو الفقااااارررر..

-الاغـا: ها يروحي..

تقربت منه ولزمته من قميصة وگلتله: "عوووف اللابتوووب خبلتني يا نملةةة..

-الاغـا: شبي الهاسكي يغرد..

-يااااااا..

-الاغـا: وسم بقلبي هااا شبيكي..

-أثبتتتت علئ لهجة خبلتنيي..

-الاغـا: تمام يابا تماام.. بس لحظة لحظة بقئ ملف واحد أنطي صبرررر فدوا أروح لهلعيون التسطر سطرر..

-أخذذذ راحتك كمل شغلللللك..

-الاغـا: أخذي راشدي بعد..

-أنوثتي ما تسمحلي أضرب رجال..

-الاغـا: هههههههههههه اخخ ول أبويي جايلچ بـَس دقايق..

-ماكووو ولا دقيقة رايحة أقرا كتاب..

-الاغـا: لايابه لابويه زعل صليبي..

ماجاوبتة، أخذت مخده وگعدت علئ القنفة تمددت وغطيت جَسمي فتحت أول ورقة وبديت اقرا وأني ساكتة..

مَرت ربع ساعة وهو خلص شغلة طفى اللابتوب ودخل للحمام غسل ورجع فتح الثلاجة طلع لفة لحم ما متعشي صار ياكل ويباوعلي، اباوعله خطف وانزل راسي اكمل قراءة وهو يطگها بضحكة عالية ويكمل اكلة..

غسل ورجع، نزع قميصه وطفى الضوه وتمدد علئ السرير..

صحت: "هاااي ليييش مو دا اقراا ليييش طفيت الضووه اهووو ذو الفقار المُزعج..

-الاغـا: أريد أنام تعبان بويه..

-وأني اريد اقرا شوفلك غرفة تنام بيها لو مكان..

-الاغـا: اشوفلي حضن يحتويني بهالتعب..

-أكسر رجليك إلي تاخذك إلها..

-الاغـا: شوفيني..

-والرب إذا جبت طاري بنات يا ذو الفقار لساني ما يحچي حروف أسمك..

-الاغـا: لعد ما أكيف، أرجعي علئ الاغا كلش أفرح، أسمي ما أحبة ول أبوي..

-هآ فقوري وچهك چنه قوري..

-الاغـا: بدت رحمة الله عمي اشغلچ الضوه وأنا الممنون ولا يهمچ بـَس خليني أنام..

-عفيه..

-الاغـا: اگوم اهفچ هسة؟..

-شنو اهف؟..

-الاغـا: اسطرچ..

-منين متعلم هالمُصطلحات سيد ذو الفقَار؟..

-الاغـا: من حبيباتي البصراويات..

شمرت الكتاب وگفت وحچيت بعصبية وأصبعي بوچهة بتهديد: "ماتيلدا رح تغرد ساعتها ما تسكت لو منو يجي تسكت لو شلون ابووو بنااااات؟؟..

ضحك وما جاوبني، طلع أصبعه الوسط ونام علئ بطنهَ..

-أي نام نام مسوي روحك فقير وأنت أكبر...

قاطعني وگال: " أكبر گوا* گوليها لا تستحين..

-الحليم تكفيه اشاره..

طلع أصبعه الوسط مرة ثانية وگال: " وهسة ؟..

-نام نام يلوچهك قوري ومواعين الفرفوري..

-الاغـا: وچهي چنه قوري بـَس يلمع ويجذب البنات..

هو گال هيچ ورحت شمرت روحي عليه طلعت ايده وعضيتههه حيييييل يمكن طلع دم منهاا..

حسيت أرتاحيييت لأن غثني ومتعمد.. المُشكلة ظل يضحك ولا همه الالم..

-الاغـا: اخخ بوووويه مُتزوج هاسكي أنااا..

-نسيت روحك الصبح من عضيتني..

-الاغـا: أسسف لأن ضوجتچ بـَس أحب اضوجچ شسوي..

-ويعتررف..

-الاغـا: بوسة صلح؟ شنو رأيچ؟..

-اييييعَ..

-الاغـا: أدري متزوج بـَس بالأسم مگضيها نواشف وغزل حتئ البوسه بالگوه وهي بـَس ٤ مرات ينحسبن من هالحلگ إلي يغررد بوووووويه الله أكبررررر...

-هآ زين حاسبهن..

-الاغـا: شلون ما أحسبهن احلئ شعور غير.. أول أثنين أخذتهن بليل وحده الصبح وحده الظهر مثل الدوه چنت عليل وطبت يابوووويه..

-گول اللهم أحفظ ماتيلدا..

-الاغـا: اللهم احفظ ماتيلدا وبوساتها..

-سخيييييف..

-الاغـا: هههههههههه وداعة العزار أموت علئ السخافه إلي بـَس وياچ..

-أنت مو تريد تنام؟ يلا كمل نومتك شو..

حضني بأيده الأثنين وهمس بأذني: " احچيلي قصة قبل النوم وأنام.. وإذا ماتگدرين أكوو بدائل..

-مثل شنو؟..

-الاغـا: نامي علئ گلبي..

-لا تصير طماع..

-الاغـا: شلون ما أصير وكُل هالحسن يمي..

-باوعله وأبتسم..

گلت هيچ ومُباشرةً أبتسمَ ونظرات عيونه ظلت تسرحَ بحُب وتفحص جزء جزء..

-الاغـا: الرمَش السابع والعشرون جذبَني..

-هآ؟..

-الاغـا: حفظت تفاصيلچ من كُثر عيوني تسولف بيچ..

-مممم..

-الاغـا: يكَادُ حَسْنكِ أن يَغوي ملائكته فَما بالَكِ بأبن الطيِن والماءِ ؟

أبتسمت ونزلت راسي، أخذ خصلة من شعري ولفها علئ أصبعه وشمهَا بعُمق وغمض عيونه..

-الاغـا: خصلات شعركِ مُلفته اناديكِ كُفي عن تجعيدهُ، يفتنني ويقتلني ذهلني ويخلق بي افكاراً سديدة..

-هآ لعد عوفني أروح قبل ما أفكارك تتنفَذ..

-لا أبقي هُنا بـَس خليني أنام وبالي مُطمئن أنتِ قريبة يم گلبي..

-رح أبقئ يلا نام.. دللوو دللوو ياأبني الوكح..

-ههههههه فدوا اروحلچ احبچ..

-أسم الله علئ روحك الأحبها..

-أعتراف بـَس بطريقة مُبتكره..

-هههههههههه لا مو أعتراف مُتوهم..

-منذ اول ضحكة رأيتها على وجهكِ همس ليّ قلبي نحنُ على وشك الحياة..

-ما أعرف شنو أجاوبك ذو الفقار بس ربي يحفظك إلية يا راحتي يالمحتويني، يا ضحكاتي كُلهن أنتَ، أني ما چنت أضحك بـَس من دخلت لحياتك، وأمنا العذراء چانت ضحكاتي ينحسبن.. بس من شفتك كُلشي اتغير كُلششي..

أني مِن شِـفتكِ ‏شِـفت رُوحي بلا مراية، ‏ولگيتكِ تشبه البية، ‏وحيد وحزنك ولاية، ‏مِن خوفي جزة الدنيا ‏لگيتك ضحكة وحچاية ‏ومِن عيني إشتهت تبچي‏ لگيتكِ للـدمع آية..

أبتسم علئ كلامي وباسني، حاوط خصريَ ودفن راسه برگبتي ظل وقت علئ وضعيته ردت اگوم ماقبل ..

-الاغـا: ششششش كلامچ يرن بأذني خليني فرحان بي وايدي علئ گلبچ هيچ خليني نايم مُرتاح ولو هم ما اگعد ماعندي أعتراض..

-أسم الله علئ روحك إذا ماتگعد شلون أكمل حياتي أني أرتاح ماتيلدا يمك ياروحِها..

-هنيالي عليها..

-وعليك هنيالي..

مر وقَت، أنتبهت عليه غفى ونام، عيني صارت تتجول علئ تفاصيل وجهَة، ومَلامحة الغير عادية بالنسبة إلية.. من كُثر تعلقي بي أريد أضمه بگلبي..

لأول مرةَ اتجرئ وأتقرب منه وأبوسه، استغليت الفرصة لأن نايم، ضحكت علئ خبالي قبل شوي عضيته وهسة بستهَ يلا يستاهل ليل ونهار يتغزل بيه.. كملت ضحكتي وأني اگوم علئ كيف خاف لا يفز، ورجعت علئ القنفة..

رجعت أخذت الكتاب وفتحته علئ أخر ورقة قريتها، وكملت القراءة، بحدود الساعتين اقرا وعيوني راحت بـَس أحداثها تشَد وحلوة، لدرجة اندمجت..

تالي أستوقفتني كلمة،"مرض" ذكرتني بالفترة إلي علاجت بيها ذو الفقار قبل ٦ أشهَر ..

رفعت راسي وشفت ايد ذو الفقار المُحترگه .. سديت الكتاب وغمضت عيوني سافرت ذكرياتي للماضَي وأني أتذكر اول موقف من قررت اغيره واعالجة . .

Back to the past

فتحت الميز وأني أدور علئ مفتاح الغرفة المقفولة وببالي خطهَ لازم تتنفذ حتئ افك التعلق المريض بشيء راح وصار بالماضي وانتهئ ..

استشاريت ساندرا وهي وافقتني وايدتني بهالشيء.. رغم نعرف رح تكون ردة فعلة قوية.. بس رح أخاطر لأجل تغييرَه..

لگيت ٦ مفاتيح گلت أكيد واحد منهم مفتاح للغرفة، أخذتهم كلهم وطلعت من غرفتنا، مشيت وگفت بالُقرب من الغرفة المقفولة.. جربت اغلب المفاتيح ماصارو، المفتاح الخامس صار خليت ايدي علئ گلبي بأبتسامة راحة..

دخلت وشغلت الاضاءة نبَض گلبي وجسمي أرتعَش وكزبر وأني أشوف صورَي مُوجودة بكُل مكان وبكُل الزوايا والأركان، علئ الحايط وعلئ الأرض بأيطارات مُختلفة الحجوم صغيرة وكبيرة وبألالوان مُختلفة..

بديت أنزل بيهم تالي جمعتهم كُلهم بمكان واحد وطلعتهم خارج الغرفة..

نزلت جوا بسرعة صحت لحارسين واكفين بالقُرب من الصالة.. لاحظت إنُ الحرس يتواجدون بالقصر ٢٤ ساعة واكو مجموعة ثانية من الحرس تكون خارج القصر وينقسمون إلئ مجموعة تحرس ليلي والثانية بالنهار..

گلتلهم باللغة التركية حتئ يفهمون علية لان مو عرب، عندي صور فوگ أريد أنزلهم جوا محتاجة مساعدة بالتنزيل إذا مُمكن، ماگالوا لا بالعكس تركوا كل شيء بيدهم وهزوا راسهم بالقبول وسبقوني للطابق الثالث..

نزلوا الصور للحديقة ورا القصر بالطلب مني، وهم مُتفاجئين من الصور بـَس حسيتهم بلعوها وسكتوا بدون مايحچون شي زايد ورجعوا لمكانهم بدون مايعارضون لو يسألون شنو رح أسوي بيهم..

تركتهم ورحت للمطبخ أخذت قداحة، رجعت ركض وحرگتهم كلهم، صارت النار تشتعل اقوئ وتحرگ صورة صورة..

تالي دخل ذو الفقار للقصر وهو يخابر راد يدخل والتفت علية أنتبه من ريحة الحرگ وشاف النار اتخبل شمر الموبايل بالأرض وركض بأتجاهي سألني بخوف علئ حالي عيونه شافتني بس أني،"شكوو ماتيلدااا وخرري من الناررر أبتعدي لا تنحرگييين شداتسوووين هنااااا..

سكتت ما جاوبتة تالي بعدني بمسافة وعيونه الأثنين شافوا الصور الا انجن بحيث عاط بيه بصوت عاالي: "هذه صوورررر رويداااااااا دا تحررررگين بيييييهم ؟؟!!!!!!!...

ماجاوبتة ظل يهز بيه دفعني علئ الحايط اتأذت أيدي بـَس بقيت ساكتة عيونه صارن حُمر وما يعرف شيسوي الصور كلهن أحترگن صارن رماد بـَس كم صورة بقت والنار دا تاكلهن..

من الصدمَة وهو ديشوف صور زوجتة الي أتمرض ودخل حالة نفسية بسببها دا يحترگن شمر روحه بالأرض وايديه صارت علئ نار حاول يطفي اخر صور بقن..

تخبلت ركضت بسرعة اله ودفعته من النار وأني أشوف ايده اليمنئ احترگت!!..

اجو الحراس علئ صوته وصريخي وأني أحاول أبعده عن النار، جابوا برميل مي وطفوا النار كلها..

عيونه ذبلت وبقئ مُتمدد بالأرض ومتكئ علئ الحايط ردت احچي سوالي علامة بيده وگال: "شششششش ما أريد أسمع كلمة منچ..

ظل صافن علئ السمه والتعبَ والحزن واضحين بملامح وجهة حسيت بتأنيب الضمير بألي سويته بـَس لازم هالشيء يصير حتئ يتأقلم وينسئ، الصور يأذوا مو مجرد صور عادية محتفظ بيها

لا، هو نصف مرضه بسببهن، كل ما يشوفن يتألم أكثر ويتذكر زوجتة وحادث وفاتها إلي لحد الآن ما أعرف شلون توفت.. ولا هو گالي..

دخلوا اباذر وذو النون مصدومين من حالة اخوهم گوموا بالگوه ودخلوا للقصر گال الهم اريد ارتاح بالغرفة فصعدوا للطابق الثالث..

تالي نزلوا وأني واكفة يم ساندرا اطگطگ اصابعي، سألوني بشك علئ حالة ذو الفقار..

جاوبتهم: "ماكو شيء بـَس تعب من الشغل..

ابـاذر:"شغليش يابا السالفة أكبغ!

سـاندرا: أخواني اطمئنوا أني أعرف وماكو شيء مجرد مشكلة بيناتهم بين الزوج وزوجتة تگدرون تتطمئنون ..

باوعولها وهزو راسهم سكتوا ماگالوا شيء.. قبل مايرحون سألني ذو النـون..

ذو النـون: واشنو الشيء الي حرقتو ؟... .

-ماكو شيء مجرد غراض تخصني قديمة فحرگتها..

ابـاذر: والاغا يعغف ؟..

-أي أكيد، هو چان يمي علئ فكرة..

ابـاذر: تمام هذا هو.. اخذي غاحتكي..

-مرخوص أبو ذر..

طلعوا وساندرا گابلتني..

سانـدرا: شسويتي احچي؟..

-"سولفتلها..

سانـدرا: تمام روحي صعدي يمه وأبقي بقربة وأكيد رح يسألچ ليش هيچ سويتي جاوبي"علمودك وعلمود نفسيتك تتحسن وتطلع من القوقعة المريضة العايش بيها وتلتفت لحاضرك ومُستقبلك..

-تمام صاعدة..

-الله وياچ، بالچ علئ أخوي..

-بعيوني أخلي بـَس خايفة من ردة فعلة لأن بالحديقة ماگالي شيء..

-لاتخافين ما يأذيچ، مُن الممكن يعصب وهالأحتمال ٥٠% لأن هو حاليًا بحالة صدمة بـَس لاتقلقين احتوي وأحضني وگوليله أنتِ يمه وكرري أسمچ بأذنه وخلي هاليوم يعدي علئ خير، تالي ينسئ هالموقف.. بس بالبداية صعبة علية تالي يتعود..

- إن شاءالله ، الرب يسمع منچ..

صعدت فوگ دخلت للغرفة بهدوءَ شفته متمدد علئ السرير قست حرارته طبيعية رحت جبت مي اخذه مني وشربه وهو ساكت..

-شلون صرت؟..

-الاغـا: شتقولين أنتِ..

-ذو الفقار أني سويت هيچ علمودك علمود تنسئ، الصور يأذونك ساندرا تگول چنت تجرح ايديك الأثنين وكل فترة وفترة بالمستشَفئ بسببهم أنت من تشوفهم ترجع مثل قبل

ترجع ذكرياتك وحادثة وفاتها سنة ٢٠٠٦ وما تسيطر علئ نفسك ينجن جنونك وتأذي نفسك، باللا وعي علئ روحك..

-الاغـا: لكن أنا ما سألتكي..

-ذو الفقاررر فدوا لا تحچي وياي هييچ!! سويت هالشيء علمودك وعلمود صحتك وحالتك والررب يسوع ما چان أبالي اقهرك..

-الاغـا: أعغف..

-ذو الفقاررر؟..

-الاغـا: نعم ؟..

تغيرت ملامحي إلئ بهت، من سمعت كلمة نعم، گلتله: " شنو نعم؟ گول صليبي المُميز..

-الاغـا: صليبي ما تسوي أشياء بدون علمي علئ العموم طفي الاضوية أغيد أنام غاسي غاح ينفجغ..

-سالمته يارب تمام رح أطفي بـَس اهدء..

مر اليوم هادئ، ثاني يوم گعدت لگيته ما موجود بالغرفة گاعد قبلي.. غيرت ملابسي ونزلت جوا سألت الخدم عنه گالوا بالمكتب من الساعة 6 الصبح دخل وما طلع..

خفت لا مسوي بروحه شيء كردة فعل، أخذت نفس وحچيت وي ساندرا گالت اطمئني تريگ ويانا أني وأمي وما گال شيء ولا جاب طاري موقف أمس..

رحت للمكتب دگيت الباب سمعت ردهَ وهو يگول :"أتفضل.. جَريت نفس ودخلت بهدوء..

گاعد بكُل صلابة وقوة مثل عادتهَ ، ايده وره شعرهَ ورجليه الأثنين علئ الكرسي أمامة لابتوب مُشتغل ونفاضه جكاير . .

تركت الباب مفتوح ودخلت بكُل هدوء بلعت ريگي وسألته..

-شلونك؟..

-الاغـا: واضح من حالتي..

-ليش متوتر وما تخلي عيونك بعيوني؟..

-الاغـا: تؤؤ ما متوتر غلطانة..

-بلي لعد شنو تفسير رجلك الي تهزها بشكل سريع وايدك المُتداخلة بشعرك وعيونكَ الذبلانه صافنة علئ السقف شنو معناهم ؟..

-الاغـا: تفكير عَميق..

-لا، الرئيس مُتوتر..

-الاغـا: أنتِ ليش عنيدة وكلامچ ثابت، گلتلچ كل شيء مابيه..

-مممم لعد اتأكد بطريقتي بلا أقتنع..

-الاغـا: شنو تقصدين ماتيلدا ؟..

تقدمت الهُ بأبتسامة مُرضية مُمزوجة براحة، مديت ايدي اليُمنئ برقة علئ خدهَ ومررتها علئ لحيته ونزلت علئ شفايفه..

تالي لزم ايدي وگال بحدهَ:"بطليهن..

هَمست بأبتسامة وايدي علئ صدرة: "شنو أبطل ؟..

هَمس بأذني: " بطلي حركاتچ السخيفة..

جاوبتة وعيني بعينهَ بكُل تحدَي:" نتعلم منك يا آغـا..

قيدني بأيدي وگعدني بحضنهَ بعد شعرَي من أذني وأني أضحك، همس بأذني: "لعبتي بحال الاغـا لعب يا نسمة فؤادي..

-ياقوة عيونَي ونظرهن..

-الاغـا: طبيبة عشگي صايرة وكحة شلون بيچ؟..

-وأني شعنَدي بهالدنيا غير أنت وعيونك؟..

-الاغـا: صليبي كافي تكابرين عيونچ حچت..

أبتسمتَ وجاوبتة: "وشنو فسرتها ؟..

-الاغـا: حُب..

-يجوز..

ضربني علئ خدي بخفه ورفع شعري سوا كعكة وگال: " روحي أريد أكمل شغلي إذا أنتِ موجودة رح أصفن بهالعيون وما أخلص..

-ما زعلان مني؟..

-الاغـا: بخصوص شنو؟..

-موقف أمس..

-الاغـا: گعدت الصبح وحچيت وي أختي وبعد حوار حديث وياها نسيت حتئ المُوقف وحتئ بلا كلام وي دكتورة نفسية أنا ما أزعل منچ، الجرح من ايدچ دوا..

-صُدگ شلون صارت ايدك الاحترگت؟..

-الاغـا: تسلم عليچ بويه..

-لا صُدگ..

نزلت راسي شفتها صايرة حَمره.. رفعتها وعيوني مركزة بعيونه سألته بخوف:-ليش ما رحت للدكتور الجلدية لو الحروق..

-الاغـا: ماتسوه..

-لا تسوووه فدوا روح لخاطري!! تلتهب والررب..

أبتسم ورفعها وخلاها علئ گلبي..

-الاغـا: هسة طابت من چاست نبضچ..

-يروحهااااا..

-الاغـا: تگومين لو أبدي أتفنن واشوفچ كما خلقچ ربچ؟..

-لا گاايمه گااايمه..

-الاغـا: بـَس بهاي مُطيعه وتاخذين الكلام وأنتِ الممنونه البقية أعند منچ ماكو، أم راس اليابس..

گمت وتخوصرت وگلتله: "إذا أني أم راس اليابس فأنتَ فقَوري وچهك چنه قوري..

شمَر علية علبة الكلينكس ركضت بسرعة وأني أضحك شمرتله بوسة بالهوى وهو غمزلي وطلعت من المكتب..

مَر كم يوم ورجع يتصرف طبيعي وبمرور الأيام صرت أتحكم باللبسه تالي محيت الألوان السوداء من كل شيء يخصه

وغيرت أثاث الغرفة خليتها بالالوان الفاتحة، أخذت رأي ساندرا بالالوان وهي ساعدتني بالأختيار..

سانـدرا: شوفي أختاري اللون الرمادي المقارب للون الأزرق، من الألوان الي تساعد على تهدئة ألاعصاب وتجعل بالشعور بالراحة النفسية وهدوء الأعصاب، لو لون الأخضر المائي الي يساعد على توسيع المساحات الضيقة في الغرفة ، لو لون الوردي الفاتح من الألوان المريحة للأعصاب بالصبغ ، لو اللون البيج الهادئ وهو من الألوان الدافئة الي تساعد على راحة ألاعصاب وتقلل التوتر

بعد كلامها أختاريت ٣ اللوان رمادي وبيج وازرق فاتح..

تدريجيًا بدء يتغير للأحسن وكُل اهل القصر لاحظوا التغييَر حتئ حُراس القصر اتفاجئوا من گال الهم نادوني بـ"ذو الفـقار..

بـَس چان شرطهَ علية وهو ما تنتهي هالعلاقة وعقد الزواج المُدته ٦ أشهر يتجدد للعُمر كُله..

رحنا للمحكمة وكُل الشروط لغيناها وجددنَا العقد من جديد وبمهَر ومؤخر جديد رغم ما ردتهم بـَس هو گال لازم ..

وچان دائمًا يگولي نسوي حفلة عرس بـَس أني أتهرب وما أريد أسوي..

اصدقائة چانوا مُسافرين ومن رجعوا لتركيا وعرفوا بي أتزوج عزمونا علئ حفَلة بسيطة لبست فستان طويل ورحنا سويه بوقتها تونست.. وتعرفت علئ ناس جَدد ، حلوة وتنحَب..

بالنسبة إلئ F بكُل فترة يتصل وما قاطعني، كُل نهاية أسبوع يتصل علية وأني الزم گلبي خاف لا أحد يسمعني.. أروح للحديقة وأجاوبة

يسألني علئ الرام وأني أحاول اتشرَد بأي شيء لو اگله دا أحاول أعرف وين موجود..

سايرته علمود أختي كاردينيا إذا أسوي شيء مو مثل المتفق علية رح يأذيها ..

بس بنفس الوقت ما گدرت أتدخل بخصوصيات الاغا، وحتئ مرتين حاولت بسبب الضغط من إبراهيم علية، وما لگيت لامفاتيح ولا خزنه ولا أوراق ولاشيء يوصلني للرام..

Back to the present

فزيت من ذكرياتي علئ صوت موبايلي يَرن ركضت بسرعة أخذته قبل لا يفز ذو الفقار..

أباوع علئ الساعة بـ١٢:٠٠ ..

تلمست شاشه الموبايل أتفاجئت من شفت المُتصل رقم مجهول، أذن هذا F!! ماكوو غيرره يتصل علية بهيچ وقت!!!..

أخذته وطلعت برا الغرفة نزلت جوا وگفت بالمُمر رفعت أتصال وجاوبتة بهَمس ما اگدر أصيح لايفزون..

-خيررر شكووو؟؟

أسمع أنفاسه وسكِوت تام، رجعت سألته مرة الثانية والثالثة تالي سمعت صوت ضحكاته الطاغية علئ مسامعي المُقززة..

إبراهـيم: يا هلا بنسم روحي شلونچ شنو الأخبار؟..

-الررب ياخذك شنو تررريد ليش متصل بنص الليل؟؟..

إبراهـيم: أها أعتذر أعتذر يمكن قاطعتكم أنتِ والاغا مالچ بعلاقتكم تگدرين ترحين تكملين بشرط تخلين المايك مفتوح حاب أسمع..

-تااكل تببببن..

إبراهـيم: روحي رجعي لحضنه بـَس أحب اگلچ إبريل إلي رح يجي أريد الرام موجود.. وقد أعذر من أنذر.. إذا الرام ما يصير بأيدي راس أختچ رح يكون مُغلف بصندوق وينتظرچ بالباب القصر..

ردت أصرخ ضغطت علئ نفسي وكتمتها بگلبي دموعي نرلن علئ خدي بحرررگه گلب والأتصال أنقطع..

گعدت علئ الأرض نزعت الصليب من رقبتي وبسته ودموعي عشَره عَشره ناجيت الرب وگلبي نارر علئ أختي يا رررب أنت تعرف بالضغط الي دا يصيررر علية صرت بين نارين بين أختي وبين الشخص الي احتواني..

صرت اشهگ وأردد الادعية من كتاب الإنجيل واقوي نفسي وأصبرها..

ادعوني وقت الضيق أنقذك فتمجدني (مزمور 50 /15 ) -

(الرجاء يمنع الخوف ويمنع القلق والاضطراب ويبعث الاطمئنان بل اننا نكون في الرجاء ) (رو 12:12)

(كل مشكلة تبدو معقدة امامنا عند الله لها حلول كثيرة وكل باب مغلق له مفاتيح كثيرة هو الذي يفتح ولا احد يغلق ) (رؤية 3:7)

(ثق انك ليس وحدك انت محاط بمعونه الهية وقوات سمائية تحيط بك) ..

گمت بحيلي ومسحت دموعي أنتِ اقوئ ماتيلدا أقوئ من هالضغوط ، كل شيء رح يتصلح ، رح يرجع طبيعي وأختچ رح ترجع لحضنچ ، الرب وياچ ، الرب مع المظلوم..

تمشيت خطوات قليلة وأجر النفس بالگوه، حسيت الأوكسجين قليل بهالمكان بالي وتفكيري كلهُ يم كاردينيا يا أمنا العذراء أحفظيها أحفظي قطعة من روحَي..

بهالأثناء سمعت صوت قوي وگع التفتت لورا بسررعة صارت عيني علئ مَزهرية وگعت بالأرض وتكسرت ..

لزمت گلبي وكل تفكيري صار إنُ أكو شخص چان موجود وسمع كلامي لو شاف حالتي!!..

ركضت بسرعة شفت ماكو أحد رحت للممر الثاني الغرف مسدوده بابهن ومحد موجود!!

ما اطمئنيت ولا أرتاحيت وبقئ الخوف بداخلي إنُ اكوو شخص چان موجوود..

رجعت شلت اجزاء المزهرية شمرتها بالنفايات وركضت بسرعة صعدت للطابق الثالث ودخلت الغرفة..

عيني صارت علئ ذو الفقار لسه نايم ونفس وضعيته ما مُتغير.. شمرت روحي بحضنه وغطيت روحي بالبطانية إلي مُتغطي بيها وغمضت عيوني..

ثاني يوم گعدت علئ بوساته علئ وچهي صبح علية وقدملي وردة حَمرة أخذتها منه بأبتسامة..

ما گلت شيء گام وأني أتثاوب تالي گمت غيرت ملابسي وغسلت وچهي شفت الساعة بـ٩ الصبح..

-الاغـا: صليب گلبي جهزي كم قطعة ملابس وخليها بالجنطة رح نبقئ بالقرية بالحدود اليومين..

-تمام هسة نروحَ؟..

-الاغـا: أي بس أنا وأنتِ وأمي والسيارة جاهزة من نص ساعة چنت مُنتظرچ تگعدين نتريگ ونطلع..

-أها والبقية لعد؟..

-الاغـا: أختي ساندرا عدها شغل مُلتزمة بي ما تگدر تروح ويانا وسجَئ عند بيت عمي وأخواني عدهم شغل..

-أها لعد أنت شعجب رح تجي ماعندك شغل؟..

-الاغـا: الشغل وأهل الشغل يهون لشوفة هالعيون..

-يعني؟..

-الاغـا: أجلت الشغل علمودچ أعرف بيچ تردين ترحين وماعندي مانع گلت اوديچ بس أنا وياچ ما أصبر يومين بدونچ أبقئ تايه

-ممممم

-الاغـا: أي يلا عُمراتي أستعجلي..

-شنو عُمراتي !؟..

-الاغـا: هههههههه لقب غريب بـَس أنتِ فَسري معناهَ..

-عُمرك بالماضي والحاضر والمُستقبل ؟..

-الاغـا: هيچ شيء..

-بس مايصير هيچ صاروا هواي اللقاب وأني ما عندي نص لقب واحد اناديك بيك أحس بخجل..

-الاغـا: فكري..

-تؤؤ لحظة لحظة نسيت لقبي الحلو..

-الاغـا: شنو هو؟..

- ذوذو

-الاغـا: ماتيلدا خلينا حبايب من صبح..

-ذوذو.. ذوذي.. شبي يخبل

-الاغـا: ول ابوي نازل عشر دقايق والگاچ بالكراچ حتئ الريوگ أكلي بالسيارة.. يلاا تأخرنا

-تمام ما رح اتأخر ذوذو..

-الاغـا: نااازل ناااازل..

مَر هاليوم وأحنا بالقرية علئ الغده شوا دانيال وذو الفقار سمك علئ الحطب واجواء تجنن وي بروده الجو ونعوشه السفره واللمه الي افتقدتها، أبتسامتي ما فارگتني ولساني ما سكت بالسوالف وي لورين ودانيال..

لليل وأحنا گاعدين سوية مُجتمعين ذو الفقار سوا شاي علئ الحطب طعمة غيَر، گعدنا سويه وكلها راحت نامت ورا الساعة ١٠ بقينا بـَس أحنا وَ دانيال ولورين..

سولفنا لحدما صارت الساعة ٣ وسمعنا صوت اذان الفجَر، راحوا يصلون والفلاحين گعدوا وعمة عائشَة، وأني بقيت وحدَي مُنتظرتهم يخلصون صلاتهم..

تالي گامت لورين دخلت للكوخ سألتها شنو تسوين گالت اقرا ايات من الكتاب الآنجيل گلتلها أريد واحد إذا عندچ، جاوبتني أي أخذي مال دانيال أنطتنياه ورجعت لمكانها..

رحت توضيت وگفت أصلي الصلاوات.. وكل الي اجا علئ بالي أختي كاردينيا..

(( أيها الرب يسوع يا من قلت تعالوا إلي أيها المتعبين والثقيلي الأحمال وأنا أريحكم ها إني اّتي إليك وأضع أمامك كل أعباء حياتي لأنني أؤمن بأنك ستحملها عني اليوم وكل يوم كما حملت الصليب ذات يوم وها إني أغسل باب حياتي وحياة عائلتي بدمك الكريم

الهي الحنان كم من مرة شعرت بالضيق والإحباط وطلبت عونك في وقت ضيقي كم من مرة صرخت إليك أين يدك التي كانت تمد لي العون والسند وقت ضيقي

الهي رغم كل هذا اللوم والعتاب إلا إني ألوم نفسي أولا لأني أنا ابتعدت عنك ورفضت سماع صوتك ، فأنا أهملتك فلماذا أعاتبك إن لم اسعي للعمل بوصاياك ، لقد تعبت من معاملتي القاسية إلا انك لم ولن تتركني لأنك تحبني، عاملتي إلهي بحسب جودك ومراحمك لا بحسب شري وأثمي. إنني أطلبك يارب فليس لي أحد سواك فاحمي حياتي وخلصني يارب . أمين ))

مر يومين أجمل لحظات عشتها ساعة ساعة ودقيقة دقيقة، شبعنه سوالف وسوينه هواي اشياء ردنه نسويها وراجعنه ذكرياتنه، من الطفولة، الأبتسامة ما فارقتني..

حسيت هالفرحة وراها حزن طوويل ، رادوني أحساس رح تصير مُصيبة وربما شيء مُنتظرني رح يقلب حياتي من جديد !!

رادوني أحساس غريب وإنُ رح يكون أخر مرة أشوفهم ، هاليومين ما رح يتكرووا ، بعد ما اگدر احچي وياهم لو عيوني تشوفهم !! گلبي أنعصر وعيوني صارت حُمر دم " الـوداع " !!!

رجعنا للقصر وأني ختمت الآنجيل بگلبي بـَس أريد الرجفه تروووح!! ياررب لا تفجعني بأحد عزيز علئ گلبي وروحي يارب أحفظهم بحق أمنا العذراء...

اتفاجئت من دخلت للقصر وشفت بنات عم الاغا موجودات .. وسجَئ جايه وياهم..

سألت ساندرا عرفيني عليهم هذول منو وشنو وضعهن وليش جايات ؟!!.. ظلت تضحك وعافت الي بيدها وجاوبتني..

سانـدرا: أعرفچ علئ بنات عمي.. هذني الـ٨ "زينب، سوزان، رسلان، بتول، نرجس، روان، لمياء، هناء"..

مُطلقات ، أرامل ، عزابيات ،

لطمت علئ صدري وصرخت:-ذو الفقااااار وينننه بسررررررررعة!! ..

ماتت ضحك ومعدتها ظلت تأذيها من الضحك الي ضحكته وأني اصرخ بيها زوجي أرريده والله إلي تخلي عينها عليه ماتلوم الا نفسها...

بقن عدنا أسبوع، وبالگوووه يلا راحن، وأني ما فارگته دقيقة رجلي علئ رجله لدرجة عاط بيه وگال ادخلي وياي للحمام بعد ست ماتيلدا؟؟؟

جاوبته: " أي أدخل..

-الاغـا: مو اگلچ صايرة وكحه..

-غير أنت زوچي حبيبي..

-الاغـا: دگوليهاا صاارت بنفسي..

-شگول..

-الاغـا: أعترفي بحُبچ إلية لچ وكحة..

-الحليم تكفيه أشاررره..

-الاغـا: بـَس بالنطق غيرر..

-مااا..

-الاغـا: ليش ؟؟..

-أستووحي..

-الاغـا: شنيي بويه ؟؟..

-أستووووحيييي.. أووويي..

-الاغـا: وجعوي أي والله روحي عمي روحي مانريد شيء منچ ام راس اليابس..

-غير يگعد ابو وچهه الچنه قوري ومواعين الفرفوري..

-الاغـا: التموتين عليه ديلاا..

-بهاي حقك..شعندي غيرك أحبل أجيب يُماي أموت علئ زوچي سَر سعادتي..

-الاغـا: بطليهن بويه بطليهن..

مرت أيام هادئة.. صار عنده أجتماع بليل ودزوله دعوه علئ عشه أنت وشخص، عاد گلتله طبعًا تاخذني أني زوجتك حبيبتك..

-الاغـا: لا أخذ حبيباتي البصراويات..

-تخسى..

-الاغـا: أنا حبيبج مو عدوج ها بويه شنو تيهتي ؟..

-لاااا..

-الاغـا: اكو وحده عاقلة تگول لزوجها تخسى؟..

-منو گلك أني عاقلة ؟ أني خبلة خاف ماتدري هسة دريت..

-الاغـا: لعد هنيالي يابه روحي بدلي الساعة بـ٨ موجودين بالمطعم..

-تمام رايحة اللبس الأحمر..

-الاغـا: حتئ ارميج ولكعبة..

ضحكت وجاوبته: "أشاااقة أشااااقة..

-الاغـا: عفية بعُمراتي التاخذ الكلام يلا لا تأخريني..

-تمام رايحه طلقة..

-الاغـا: هههههه يا نسمَتي..

لبست فستان سمائي فاتحَ طويل ومُخصر وعلئ الكتف فرو أبيض.. خليت مُكياج خفيف وشعري مفتوح علئ طولة..

بالنسبة اله خليته ينسق وياي ويلبس قميص سمائيَ..وهو الممنون بـَس زاد فوگ الجمال جمالين طلعت بخور وصرت ابخره وهو ميت ضحك وأني أضحك وياهَ..

صعدنا بسيارتهَ السودة الكبيَرة ومن داخل واسعةَ كُلش.. وصلنا للمطعم نزلنا سويه وايدينا مُتشابگات ببعض..

چان أستقبال حار وناس من طبقات مُختلفة موجَودة.. گعدنا سويه كرسيه يم كرسي مالي.. ظليت ساكتة وهم بدوا يتناقشون..

گعد گبالي شخص نظراته چانت مو راحه ما عرفت افسرها حاولت اشغل نفسي فتحت جنطتي ورجعت سديتها مدري احتاريت شسوي..

أنتبه علية ذو الفقار ولزم ايدي وعصرها.. وهز براسه، ميل راسه يمي وگال بهمس: "أنا يمچ لا تقلقين إذا متوترة وما عجبتچ الگعده نگوم بـَس گوليلي..

جاوبته: "لا بالعكس عادي..

-الاغـا: متأكدة؟..

-أي كمل كلامك وي أصدقائك..

-الاغـا: ولو ما مصدگچ بـَس رح أمشيها..

-أيي صدگني..

-الاغـا: أحبَچ يا روحَ ذو الفقار، هسة يجي العشهَ وراها بساعة نطلع أصبري..

-اهآ تمام..

تالي هالشخص سألني بنبرهَ حاده..

-شنو أسمچ ؟..

عدلت گعدتي وجريَت نفس وجاوبتَه بهدوء..

-قـوة..

مُهـند:- عاشت الأسامي..

أبتسم ذو الفقار بضحكة وسكت.. ضربته برجله وهمست الهُ:" هذا الأثول ما مرتاحة اله..

-الاغـا: هذا أبن عمي..

-صُدگ؟ أي گلت بيني وبين نفسي ينطيك شبه بـَس يبقئ اثول ما ارتاحيت اله ولنظراته أوي دباع حركاته مال واحد مايع عود صاحب شركة ومدير اعمال البنية الي بصفه عدها رجوله اكثر منه دباع ضحكتة مال وحده رح تطلگ..

-الاغـا: ههههههههههه هالكثر زاعجچ ول ابوي..

-اگُلك استعجل مليت هاي مو اجوائي ما أحس بالأنتمااء..

-الاغـا: أنتظري ساعة يابه..

-يمته يوصل الأكل؟..

-الاغـا: اصيرلچ أكل..

-مالح أنت..

غمزلي وهمس:- وين ضايگتني؟..

-شضوگ ؟!..

-الاغـا: الوطن بوويه الوووطن..

مر وقت وسلموا ورجعنا للقصر بعد معاناة.. گلت التوبه إذا اطلع بعد خليني مُگابله وجهة عبد القادر ولا أبن أخو مهند الغثيث ..

مرت أيام دخلنا بسنة جديدة وأحتفلت بالعيد يوم القيامة ورحت للكنيسة وي لورين ودانيال..

مر شهر ، وشهرين وثلاثه ، لحدما دخلنا للشهر إلي گلبي يخاف منه "إبريـــل"..

تسّعه وخَمسْوّن دَقيقه مِنَ السّاعه الوَاحده بَعدّ مُنتصف الليّل هيَّ بفكري مُجرد دقائقٍ مِن خوفٍ يَجعلنيّ أَشُعر أَنَ الحّائط حُفرةَ اشّواك ..

-إبـريل - مـيلادي - وفاة عائلتي - جرائم مُرعبة حُدثت فيهُ - الساعـة 12:00 - F

..

『قصر عبد القـادر ↲ الساعـة التاسعة مساءً』

واكفة بفُستاني الأحمر وعيوني الشاحبَه علئ المرآة إلي أمامي . .

ربّاه إني ضائعه والأرض في عيني تضيق ربّاه إني لم أبح لا أخ يدري أو صديق واليوم جئتك سائلاً والجرح في قلبي عميق ..

يا رب بحق أمنا العذراء خلي إبريل هالسنة يكون خيرر!! أحِس نغزات بهالليلة المشؤومة..

مليئه بالحزن ، تنهمر منها دموعها ، تأبى الانصياع لما يقال لها انها انثى تمتلك من العناد ما يجعلها تقف امام المها وتنظر له وتقول انني ابكي حسناً هذا حزني يجب ان اجعله يزول..

تنهمر من جفن عينها قطرات بل وابلٌ من الدموع لكي يصفى قلبها من الحزن لكن فجأة تضحك وتقول في نفسها لما انا ابكي انه العناد تعاند حزنها تاره وتبكي تاره اخرى

وما بين هذا وذاك انثى تمتلك من لين القلب ما يجعلها سيده بحسن خلقها قويه بعنادها طيبه ببكائها ..

اندگ الباب دخلت ساندرا وهي تگول:- الكُل منتظرچ وين رحتي الكيكة نريد نقطعها..

-روحي دا تتقطع ببطئ ساندراا !!..

أجت حضنتني وهي تحاول تطمني وتخفف الالم والحزن من روحي..

سانـدرا: ذو الفقار موجود والحرس موجودين لا تقلقين إن شاءالله ما يصير شيء ما رح يگدر يأذيچ صدگيني..

-ما مهتمة لنفسي خلي يأذيني عادي بس! أختي...

سانـدرا: ياروحي الله موجود، الله يحفظها من كُل شر وينقذها من كل مؤامره سيئة إن شاءالله لا تاكلين هم صدگيني ما رح يصير شيء..

-الرب يسمع منچ..

نزلنا سويه وقطعت كيكة ميلادي الي خطط اله ذو الفقـار .. كان لابس رسمي يباوعلي بنظرات ما عاجبة وضعي شك أكو شيء . .

رن موبايلي وايدي رجفت من قريت المتصل رقم مجهول تركتهم وگلت للاغا هسة أجي..

مشيت بهدوء صعدت الدرج تالي ركضت فوگ دخلت لغرفتي ونسيت أقفل الباب....

ضغطت رد وجاوبت بكلمات مُتقاطعة: " شنو تريد !! ..

إبراهـيم: بدون أي كلام زايد فقط جاوبيني الرام عندچ أو لا ؟

-إبراهيم بس.....

إبراهـيم: شششششش جاوبي أي أو لا بسررعة..

-بس أنطيني وقت فدواا لا تضغط علية إبراهيم حاولت اتقرب اله علمود الرام هوااي حاولت بس ماكوو نتيجة ما أخذت منه أي جواب ولا شيء ينفعك وما أعرف رقم الخززنه..

إبراهـيم: يعني ما أخذتي ؟

-إبراااهيم فدواااا أسمعني والرب هواااي حاولت اتقرب لذو الفقااار علموود الراام ماا گدررت ما انطاني أي معلوومة.. أسمعنني لا تسووي شيء يأذي رووحي وأختي كاردينيااا فدوااااااا

ظل يعيط بيه وصوت تكسير غراض ورمي خفت لا طلقة منه تصيب أختي ، گلبي صار بشيشه شعووور أصعب من الصعب گلبي نااارررر كأنُ قطعة خشب نبتت بروووحي...

إبراهـيم: عندچ ٣ أيام فقط تجين لهذا العنوان *** أنتِ والرام الساعة بـ٢ الظهر ، إذا ما أجيتي ساعتها ودعي أختچ حبيبتچ عشر طلقات براسها مو وحده وأقطع اجزاء جسمها جزء جزء واقدمهم الچ وأني أبتسم..

-إبررااااهييييم لاتسووووي هيچ اسمعنيي فدواااا...
صررررخت وقطع الأتصال شمرت الموبايل وأني مُنهاااررره صرت الطم علئ وچهي اكررهه إبررررريل يارررب ساااعدني أنقذذني من هالمصيبة الوگعت بيها وماكوو مفرر ولا حل منهاا أنقذذ أأأختي رووحي من هالدنيااااا...

بهالأثناء سمعت صوت ذو الفقار وهو يگول: "ها يا كسرتي طلع كل هالحُب چذبه ما چنت اظن داخل بعلاقة حُب خادع!؟..

شهگت بقوة ولطمت علئ صدري وأني أهمس سمعننني سمممعنني گمت علئ حيلي وأني أشوف عيونه حُمرر وسجَئ واكفة ورا تبتسم وساكتة..

تقربت يمه وأني أحاول الزم ايده واشهگ ودموعي مثل الشلال وزادت النغزات والرجفه أحس روحي دا تخرج من جسدي ببطئ وتعذبني..

دفع ايدي وأني أصيح بس خلي أفهمك فدواا لا تفهم خطأ ذوو الفقااررر لخاطررر كلشي حلووو اسمعنني الله يخلييييك!!! بس أنت ظليت الي وهم تتركني گولولي موووتي ولا هالعذاااب الي دا اعيييشه..

كسر الغراض وشمر ميز المرايا كلها الكزاز اتناثر وصار قطع صغيرة وهو يصيح شفتهم ولچ شفتهم سمعتچ بأذني تگليله حاولت اتقرب اله علمود الراام ولچ من نبررره صوتچ وكلامچ كللشي فهممتتت لچ الله أكبررر عليچ هيچ گلبي لعبتي بي عااشت ايدچ..

-فدوااا اسمعني والله فهمت خطأ ورووح أمي وأبووي أني موو هيچ موو هيچ ما خنتتك والله والله وأمنااا العذراااااء..

-لچ شفتتهم شفتتتهم....

دخلت ساندراا مصدومة علئ صوت الصريخ قفلت الباب وباوعت علئ سجئ بتفاجئ رادت تسأل شكو ركضت الها بسررعة وأني ميته بچي سولفتلها كلشي صار گلتلها فهمي فدواا...

اجا يمي ولزم رگبتي حيييل اختنگت ودفعته سجئ وهي تگول الزم رووحك ذو الفقاارر لا تتخبل علئ ماتيلداا لاتأذيهااا تاالي تتندم...

-الاغـا: لچ أنا الي يخوني بشغلي اوديه لورا الشمس تعرفين شنو ورااا الشمس؟ تالي الخيانه منين ؟؟ من الأنسانة الأحبها وگلبي نبض من جديد الها ؟؟ لچ شلوون انطاچ گلبچ الترف شلووون؟!!!...

باوعت ساندرا لسَجئ وهُنا فهمت هي الطرف الثالث الي خربت بينه.. وهي الي جابت ذو الفقار حتئ تسمع وهي الي گالتله علئ مكالمة..

تقدمت ساندرا يمها وضربت سجئ راشدي قووي وأحمر خدهاا..

سانـدرا: لچ أنتتتتِ شنوو من شيطاانه أطلعي براااااا يا حيواااانه ياا نذذذله..

لزمت خدها وجاوبتها بحقد: "أي نذله لأن فضحتهاا وأنتِ تردين اطمطمين علئ خيانه مرت اخوچ أنتِ الحيوااانه...

صرخت بوجهة: "لچ هسسسة ارتاااحيتيي جاوووبيني اررتاااحيتي اررتاااح گلبببچ المسموووم ؟؟..

سـجَئ: كلش ارتاحيت من انكشف كلللشييي...

طردتها ساندرا برا الغرفة وراحت دقايق لأمها عائشة گلتلها لهي الضيوف وخليهم يرحون گوليلهم صار عدنا ظرف واللغي كلشي..

سوت الي گالتها عليه ورادت تصعد للغرفة وما قبلت، دخلت للغرفة وقفلت الباب..

عيوني تجول عليه وهو منطيني ظهره ولازم راسه.. حاولت اتقرب منه دفعني علئ الحايط ولوا ايدي ورا ظهري..

دفعته ساندرا وضربته علئ صدره وگالتله: "اهدئ لا تخلي لحظة عصبية أتدمر كلشي حلو بيناتكم كلشي ينهدم اسمع وفكرر واهدئ وتالي قرر لا تظلم ماتيلداا ترا هي المظلوومة..

دخل للحمام غسل وجهة وطلع مر وقت وهو گاعد ويلف بأيده الي كلها دم من ورا الكزاز الي لزمه.. وأني گاعده علئ الأرض ورجليه لصدري بوضعيه الطفل اشهگ واناشغ والم ونغزات بگلبي ونار بصدري ما تنطفي..

گال بصوت تعبانَ وهو موجهة كلامه لساندرا: "احچي أسمعچ..

سانـدرا: رح احچيلك كُل شيء بـَس بعدها أنتظر منك تصالح ماتيلدا وتبوس گلبها التعبان هسة..

-الاغـا: إذا الحق يمها أعتذر وأنا الممنون وايدي بأيدها ومهما يكون أنا أسندها وإذا غير هالشيء تطلع من حياتي مثلما دخلت.. وهذا أخر كلام..

سانـدرا: أدري چانت صدمة الك بـَس أنت ما فهمت وهذه الحقيرة سجئ الحية هي ساس البلا ..

-الاغـا: سجئ گالتلي ماتيلدا منتظرتك بالغرفة دخلت للغرفة بهدوء وسمعت هالمصيبة رجلية ما حملني الله وكيلچ احچي بعد اخوچ اشفي گلبي العليل بلكت يطيب من يسمع كلامچ..

هزت راسها بالقبول وگفت يمه وصارت تسردله كل شيء مريت بي من الطفولة لحد أخر مُكالمة، من أول جريمة لأخر جريمة، من أول عذاب لختامة بأختي..

ما ضمت عنه حرف حچتله حتئ أسم المُجرم F إلي هو عدو عبد القادر هم سولفتله كُل شيء..

يسمع وهو مصدوم وعيونه عليه ٣ ساعات كاملات مرن وهي بـَس تحچي وهو بكل اذن صاغيه الها يسمع ويتنهد..

من خلصت صفگ ايد بأيد.. وگف وفتحلي حضنه وگالي بتعب تعالي بويه..

گمت ركضت شمرت روحي بحضنه متت بچي حضني قوي لصدره أشهگ وهو يمسح علئ شعري مشاني بهدوء گعدني علئ السرير.. أحتار شنو يسوي باسني براسي وبخدي وبأيديه دموعي اختلطن وي تنهداته الحاره ونبضاتنه التنسمع..

عافتنا ساندرا وسدت الباب بقيت بحضنه حاضنته بقوة كأنُ أبوي هذا أماني ملجئي أريد ابقئ حاضنته طول عُمري..

-الاغـا: أنا أسف وأعرف كلمة أسف ما تكفي ، وإذا أبوس عيونچ التعبانات يمكن نتفارگ ، وإذا أبوس گلبچ التعبان يمكن يوگف ، رغم كُل إلي مريتي بي بويه أنا فخور بيچ فخور بزوجتي القوية المُحاربة الي حاربت بقوة وحافظت علئ نفسها، ما أعرف شسوي هسة أنا محتار شلون أجاوبچ شلون أخفف هالحزن من روحچ شلون وي كل كلمة شلون محروگ گلبي

لكن الأهم إلي لازم تعرفينه أنا وياچ أنا ذو الفقار سيف مچلب برگبتچ ما اعوفچ لا هيهات أنا سندچ ومسندچ واتكائچ وضلعچ الثابت رح أكون وأبقئ وياچ علئ المره قبل الحلوه رح أكون وياچ بكُل خطوة

أنا وأنتِ رح نتتقم منهُ رح تاخذين بثارچ ودم اهلچ وكُل عزازچ ما يروح هدر من هالمجرم النذل الكلب إلي ذبح وقتل ارواح لاتعد..

رح نلعبها صح أنا وأنتِ .. صار الوقت إلي تنتقمين بي ماتيلدا ذو الفقار وياچ..

بدأ العد التنازلي . .

...

مر ٣ أيام دربني وعلمني شنو احچي وشنو اگول، جهزني من الصغيرة قبل الكبيرة..

صارت الساعة بـ١ الظهر لبس بنطرون أسود وقميص أسود وأني كذلك وستره جلد سوده.. گال من نرجع وأحنا مُنتصرين نذب هاللون..

رح يكون يوم تحديد مَصير ، أما موت أو حياة ، أما ينتصر المظلوم أو الظالم ، أنا التي يطلق عليها بالفتاة المُحاربة أم F ..

ذو الفـقار:- صَليبي

- گلبها

- جاهزة للمعركة ؟

- أكيد

أبتسَم:- المسدس وَ ٣ طلقات ؟

- موجودة

- ايدچ ؟

- بأيدك دائمًا

يتـبع 🎭✞ . . .

⭐⭐⭐⭐⭐

لاتنسـون التصويت وتعليقاتكم وتاگاتكم🤤🔥

هالبارت كلش طويل تعبت بكتابته فجروو بالتفاعل واروني حماسكم 😈 ..

أنتظروني في الحلقـة الأخـيرة🦅🔥

الكـاتبة #نـمارق رحـيم⚜️