تحميل رواية «شريعة العشق» PDF

#في_شريعة_العشق

بارت 10

نورا ناصر

ملاحظة 1 .. اولا اعتذر ع تأخير اني علقت بالبارت وكلت انو صاحبة القصة مسافرة ما اكدر انزل بدون ما نتفق على بعض الامور واشكر تفهمكم واشكر كل الي سألو عني ❤

ملاحظة 2.. ياريت بدون غلط ع الام بسبب تصرفها بهذا البارت ميخالف انتقدوا التصرف بس بدون غلط 😘

♡♡♡♡♡♡

فتحت الباب وظلت واكفة سمعت صوت يمها رجعت اشوف منو ..

سمعت صوت جيرانه ابو طه :-  خير أم زهراء شعجب مو من عوايدج  توكفين بالباب خوما اكوشي عبوره بيها شي محتاجين شي أمريني ؟

_  لاخويه سلامتك  عدكم كهرباء ؟

جاوبها :- لا وطنية ماكو بس السحب

_ مشكور خوية ابو طه ..

سدت الباب ودخلت ، باوعتلها :- يوم خلي أروح اشوفها خاف يم بيت عمو ..

خزرتني :-  عفيه زهراء  تريدين تفضحيني ..

دنكت وايدي على حلكي وبالي يودي ويجيب ، رحت جبت الصاية من البيت وانطيتها الها .. لبستها ...

بعدنا واكفين ، اندكت الباب ..

ركضت امي وركضت وراهه فتحته  شفت جيرانه أبو طه كال لأمي :- أكولج خويه انتي

تدورين ع عبير مو ؟

_ ها ..

_  خويه ترة عبير يم الكابينة مال السحب صاعدة ع التيل دترفع الجوزة و أبني عبد الرحمن يمها ..

امي خلت ايدها على خدها وراحت ويا ابو طه

واني دخلت وسديت الباب وبالي كله يمها هاي شون سوت هيج شطلعها !!!!

عبير: كعدت ميته حر أباوع مريم غركانه ، التفتت  يم

راسي بنكة شحن كمت حولتها يم رأس مريم

ونزلت ..

باوعت على أمي نايمه ، عدلت تراكي وشعري

وطلعت فكرت  أروح اسوي الجوزة وارجع..

طلعت من البيت شفت  الجوزة عاليه ماالوحها حظي الفكر شسوي هسه ؟

اجه عبد الرحمن جيرانه اشرتله يجي اجه ..

:  عبد حباب أوكف احرسني بس أصعد احولها ..

باوعلي و ضحك :  اني اصعد وانتي احرسيني.

_  لالا هي مالتنه أني أسويها

_ لا  ميصير تصعدين تيل شلون يصير ..

تركته  يحجي وصعدت احاول أريد ارفعها مجاي اكدر الوحها حسيت تعلكت .. باوعت من بعيد شفت

أبو طه و ماما جايين من بعيد يمشون ..

حسيت بدوخة والشمس صكعتني ، وصلت يم التيل 

خزرتني وحجت بعصبية واصكة سنونها: عبير  أنزلي

خلي عبد الرحمن يسويها..

نزلت وهو صعد ماما باوعتلي صفح ولزمتني من أيدي قوي وتشكرت  منهم اخذتني ورجعنا الطريق كله ماما محجت ولا حجايه بس ساكتة ..

وصلنا للبيت بس فتنا ع الاستقبال  دفعتني بكل قوتها وتركتني وفاتت .. انقهرت كلش و رحت وراها ...

_  أمي شفتج نايمه وأنتي مو زين عليج الحر رحت دااسويها شعرفني هيج صعبه والله طلعت علمودج خفت عليج مو قصدي اخوفج..

أني احجي وهي خازرتني

رحت عليها بستها كلتلها والله بس هيج ردت

أسويها ..

_  لعد هيج تخوفيني عليج

عبير: ماما وداعتج مو قصدي

ماما: لججججج متتت بدمي عبالي بيج شي

انتن ناويات ع موتي فهمني شسويتلجن أني...

تحجي بعصبية وتتقرب مني واني ابتعد خايفة

لزمتني من شعري وفقدت جتي زهراء تحاول تبعدها عني مكدرت خزرتها ..

وبفحيح خفيض ومملوء بالوعيد :-  وحق محمد اذا

مبطلتي حركاتج الرعنه ادفنج بيدي طايحة

الحظ مو كيفتي من شفتي أبوج يمدح بيج

أكسره لرأسج حيوانه أريد الله يهديج وتطلعين

باب الصاله مو باب الشارع كومي ولي من وجهي

الله لايبارك بيج ..

حسيت بألم قوي كلش براسي تركتني بقوة لزمت راسي وصعدت ابجي ،   شي والله لان خفت عليها من الحر  هيج عاملتني ،  صح أني هم صوجي شلون أطلع من البيت بدون ما اكوللها ، حيييل بيه استاهل دكافي والله عايشه اللحظه بعد لو تنكلب الدنيا مالي دخل ..

دااريد أشوف منو يبدللهم غاز منو يسحل الاثاث

بسيطة ام السوس ...

اخخخ توجعت  والله جرتني من شعري جر ولاتكول بيها شضيه براسها شنو من قساوة

بس ويايه مطلعة قساوتها اخخخخ راسي حيطير والله من الالم مديت أيدي ع فروة رأسي شفت أكو دم ديطلع من راسي....

شديت رأسي  وكالعادة كتمت الالم بعضي للمخده

بعد هذا الموقف ابتعدت و مالي علاقة وكلامي صار قليل ويا الكل انطويت على نفسي وانعزلت..

زهراء :  صعدت عبير تركض لغرفتها وامي انهارت وكعدت تلطم على رجليهه رحت كرفصت مقابيلها

لزمت ايديها احاول اهديها ..

انصدمت واني اشوف ايديها كلها دم !!

صرخت ماما دم دم ..

شافته لطمت ع راسها وصعدت الدرج تركض وكوة تجر النقس ماسكة المحجر بقووة ومستندة عليه ويه كل كم باية توكف تستريح يله تكمل تصعد ..

فتحنا الباب مالكيناها بالغرفة سمعنا صوت المي بالحمام ركضنا للحمام ، شفناهه مقابيل المراية واكفة وتضمد جرحها ..

باوعت علينا بنظرة برود وعدم اهتمام

ماما بلهفة :- عبير ماما ؟؟

ما اهتمت لامي كملت ضماد راسها وراحت تلفلفت بفراشها ..

راحت ماما عليها خلت أيدها ع راسها وباستها ورفعت

رأسها خلته ع رجلها وعبير عبالك حجار ولا يمها.. تباوع بالفراغ وبدون اي ردة فعل ..

أمي: بنتي متت بدمي عليج والله كلت خاف

متحملت كلام الدكتور وشو شسوت بنفسها ..

عبير لساهه ساكتة ومتحجي ..

_ يمه جاوبيني لتشلعين قلبي فدوة أروحلج حبيبة

أمج حاجيني ..

كعدت عبير تباوع لامي :  حبيبة أمج مو؟ لعد منو طلع دمي بابا مثلا ؟؟ ترى مكفرت شفتج نايمه وحارة رحت اسوي السحب شمدريني التيل عالي..

بعدين انتي لازم تفرحين أني بهذا وضعي وأفكر بيج وبأخواتي ولان بابا مموجود طلعت اسويلكم السحب وتالي تضربيني وتدعين عليه ؟

ماما جرتها باستها وتبجي وحتى الكلام اختفى من على لسانها ..

عبير : ماما عفية تركوني اريد اظل وحدي اريد انام بهدوء وبدون صوت ..

تركناها ونزلنا جوة ..

اباوع لماما ولا ارتاحت تروح وتجي بالصاله

وعينها ع الدرج ..

قهرتني رحت سويتلها عصير ليمون واجيت داانطيها رفضت تشرب العصير : كون اشرب سم اني شنو هالقسوة بنتي بهذا الحال وتفكر بيه وتالي أمد ايدي عليها واطلع دمها من كون شلل يشل أيدي ع هالعملة هاي بيش اواجه ربي واني بنية مريضه زدت ألمها ..

دتحجي هيج وتدعي على نفسها  نزلت عبير

استغربنا وسكتت ماما ...

باوعت علينا وتمددت ع القنفه

ماما باوعتلها وأبتسمت وكأن عرفت أنو عبير

نزلت بس حتى تطمنها لان تعرف حيظل بالها

مشغول ماطول هي فوك وامي جوا ..

رفعت رأسها تباوع النا :  شنو هذا العصير بس الكم

وأني بنت زوجة أبوكم محصله بس التكفخ

انطوني عصير وياكم بلكي اغص بي واموت بلكي

بي سم

.

ماما بس  تباوعلها وهي بالكوة ضامة ضحكتها ..

زهراء: صار من عيوني هسه أسويلج ..

عبير: لا اله هذا أريده( أني جنت اعرف هذا كلاص

العصير لماما زهراء مسويته بس دااريد أبين لامي

اني مزعلانه منها)

كامت ماما كعدت بصفي حاوطت اكتافي وانطتنيا شربت شويه وانطيته لامي ..

عندي الم فضيع براسي مكدرت اتحمله غمضت عيوني وعضيت شفتي .. حست ماما عليه وظلت تباوعلي وتشوفني شلون اتألم ..

صاحت : زهراء جيبي تليفوني دااريد أخابر

جاوبتها زهراء صار ماما دقيقة ..

دقيقة جابته واجت اسمع  ماما اتصلت ع صفاء وطلبت منه يجي للبيت ..

خلال دقايق  واجه  صفاء وحجتله ماما كل شي صار .. بين عليه التعصيب  وهو يحاجي امي بس باحترام ..

صفاء: هو هيج لعد ياعمه شلون انطاج قلبج

تضربيها وهي بهذا الحال باوع وجهه شلون

صاير اصفر من خرب بالحظ  ..

امي بندم :- بعد صارت ياعمة هسه كولي شنسوي ؟

_ ناخذهه للدكتور مالتها يشوفها ، زهراء غيري ملابسها دناخذهه للدكتور ..

زهراء :- ان شاءالله  .

اخذتني وصعدنا فوك غيرتلي ملابسي ونزلت اخذني صفاء وماما دخلنا على الدكتور ، رفع الضماد من على راسي وصار يفحصني ..

بعثني على المفراس وسويته رجعوني للدكتور مرة الثانية يشوف النتائج ..

كال :-  الشضيه متحركه  وهسه ضروري عملية وضعها ميتحمل

ماما بس سمعت كلام الدكتور  شبكتني وظلت تبجي

: سوده بوجهي شسويت بيج كون أيدي مشلوله قبل لا أمدها عليج يمه جنتي تفكرين

بيه وأنتي بعز ألمج واني شسويت ضربتج من

كون كسر بيدي...

شبكتها واهمس باذنها : دكولي ياالله يوم هي العملية ورايه ورايه يجوز الي صار من صالحي قابل انتي

تكرهيني يا ماما هو اني اتسكطت بعد أنتي شعليج لتحملين نفسج مسؤولية أمي أريد من ادخل للعملية أخر وجه اشوفه هو أنتي ومن اصحى اذا الله كتبلي عمر هم أول وجه اشوفه أنتي تمام ماما ..

أمي استمرت تبجي بحرقة

وحاضنتني كل قوتها بهالاثناء اجه صفاء

صفاء : يلا يوم شي وراد يصير انتي مالج ذنب

وهي عبير وراها العملية وراها أنتي شعليج هي

كدها تعديها ان شاءالله أنتي بس ادعيلها...

صفاء : أحجي ويا عمتي وبالي شارد  عبير

لازم يحلقون شعرها صح هي تعرف بس صعبة

أني من حجيت ويا دكتورها قلبي انمرد شلون

حتتحمل هاي وهي كلها ١٤ سنة...

باوعتلها جانت دتصبر بأمها كلت الله يعين ان شاءالله حتتدمر نفسيتها الله ينتقم من الي جان السبب بنص المدنيين ويزرعون عبوات ع الامريكان يخلونهم يهيجون ويرمون الله ينتقم منهم ..

رجعنا  للبيت نجيب احتياجاتها ومناك نروح

للتجهيزات الطبيه حتى نجهز الاشياء الي تحتاجها

بالعملية وبعدها نروح  للمستشفى ،   بالطريق للبيت

عبير شافت اكل كتلت روحها الا تاكل وهو ميصير ..

_ لج ميصير وراج عملية وبنج اعقلي يا بنية ..

بتذمر كالت : اهوو  هم عملية وهم حصير كرعه وهم ماكو زقنبوت عيش وشوف شهالعيشة هاي البائسة...

عبير: رجعت للبيت تلكتني مريم تمشي وراي وتحجي

_ عبير عبير عدلت سريرج وسويتلج عصير

عاطت بيها ماما لج مريم اسكتي اختج مو بحالج هسه يلا روحي منها ..

اجتي حضنتني تحجي ببراءة وتوسل  :- ولج عبير مو سويتلج عصير تعالي اشربي ولج والله مشربت قبلج ولا انطيت لزهراء وحتى لماما ماانطي بس الج كلتلها مااريد

واني ما ابديت اي رد فعل عفتها ورحت افكر بشعري اليوم  واصل لخصري وباجر اصبح بلا شعر....ربي منك الصبر صبرني وصبر أمي...

زهراء: رجعت عبير للبيت جنت أشوف بعيونها

أنكسار وخيبة فضيعة وأمي حالها بالضيم لزمت

الفون وخابرت بابا :-  تحسين هسه تجي بنتك

عدها عملية باجر واني مااكدر وحدي والله ظهري

أنكسر ..

بابا اكد الها  انو راح يجي وسدت التليفون ..

انتبهت صفاء واكف وصافن رحت وديت اله مي

_ اتفضل صفاء

_ هااا اشكرج بس صيحي عبير بسرعة تأخرنا ..

هزيت راسي وصعدت..

دخلت للغرفة شفت عبير متمدده بحذائها ومخليه أيدها ع عيونها وتبجي..

رحت يمها  لعبت بشعرها فزت بسرعه

مسحت عيونها تباوعلي مصدومة : ها شكو تريدون شي؟

أبتسمت بوجهه :- لا بس صفاء دزني عليج يكول يلله

عبير: تمام هسه أجي أنزلي

باوعتلها نظرة اخيرة قبل لا انزل شنو من قوة

باصعب لحظاتها متحب تبجي كدامنا وبس شافتني مسحت دموع عيونها الله يصبرج ويشافيج... دعيتلها ونزلت ..

صار صفاء بوجهي ولكيت كرار هم جاي هو وعمو

سلمت عليهم ورا شويه نزلت عبير رافعه شعرها

وعيونها دم شافها عمو كام وراح عليها حضنها و

كام يبجي...

عبير: شنو السالفه اصبركم تصبروني كلها تبجي

بعدني ما متت والله هي عملية هسه كلمن يسوي

عملية يموت دكول ياالله ياعمو ...

تركته ورحت باوعت هذا كرار أبتسمتله كلتله هلوو مجاوبني بس  يباوع بوجهي حجيت  بداخلي اوووو انت الثاني...

التفتت  لزهراء وين مريم ؟

زهراء: مريم زعلت منج لان صيحتي عليها وراحت نامت...

عبير: ها براحتها تعشيتوا؟

صفاء: ضحكت لج أم بطن ماكو اكل اليوم بس

العشاء وباجر ريوك ماكو بعدها انطلقي...

عبير: لا بس دااسأل اعرف ماكو أكل ..

ماما كعدت بصفي وكرار كعد كدامي ..

صفاء: شوفي عبوره أنتي هسه من نروح للمستشفى

عبير: قاطعته أعرف حتزينون شعري ع هاي صحتوني؟

ماما باوعت عليه :-  بنتي أبوج بالطريق جاي

هزيت رأسي :- تمام ماما حصعد اخذ دوش

بين ممتعشون ويجي بابا..

تركتهم وصعدت لغرفتي همزين مريم زعلت عليه ملكيتها بالغرفه اخذت المكص ودخلت للحمام عدنا مرايا ورا باب الحمام ع الطول وكفت كدامها وبديت اكص بخصلات شعري كل ماارفع المكص واكص خصله أحس جزء بداخلي يقوى أكثر وجزء يتحطم ...

كملت كص شعري باوعت لشكلي بالمراية وصل شعري لحد اذني

اباوع لنفسي وصعب اوصف احساسي ، سبحت وغسلت الحمام من دااطلع باوعت لنفسي بالمرايا شفت

وجهي ملامحي بيها حزن بس الله يعرف بي...

طلعت تمددت ع سريري شويه وانفتحت الباب وفاتت  ماما شافتني شهكت..

رفعت راسي وشوية من جذعي :-  شكو أمي ترى بعد

عندي شعر لعد باجر شتسوين أنتوا دتعبوني

والله حرام عليكم المفروض أنتوا تصبروني مو

أني اصبركم محد يحس بيه بس ربي تعببببببت

والله تعبتتتتت لتكابليني وتبجين فدوة اروحلج

أرحمي حالي مااتحمل والله اشوف دموعج غير

قهر هذا...

دااحجي ومنفعله صعد بابا و ويا كرار ..

بابا: خير خير باباتي ليش صوتج عالي

بعده مكمل كلامه انتبه عليه انصدم بعد  محجه ثواني

ورجع كمل كلامة وتغيرت نبرته..

_  الله طالعه تخبلين فدوة لهاي الشعرات

وباسني باوعت ماما بعدها دتبجي ..

تقدمت وبست راسها وايدها ..

كرار: عبوره يلا نزلي صفاء دينتظرج جوا

بابا :  شكو وليش بسرعه تقررت العملية المفروض بعد أسبوعين؟

_ ها بابا مو اني  وكعت وتأذيت ..والطبيب قرر يقدم الموعد ..

تبادلت النظرات ويا مريم اشوفها تخزر بيه  : جذابه هسه الله يذبج بالنار بابا معليك منها أني اكولك الصح...

خزرتها جريتها من ايدها  دفرتني وركضت لابويه رافعة راسها باتجاهه وتحجي ويا: بابا باوع مو طفت السحب عبير راحت...

اريد اجرها اسكتها بابا مقبل كلي عوفي بنتي وماما متكتفة وواكفة بس تباوع وتبجي ..

بابا : اي مريوم كملي

: اي بابا عبير راحت  حتى تسوي الجوزة واحنه نايمين وكعدت ماما ملكتها عبالها عبير انخطفت بعدين اجه جيرانه أبوطه كاللهم عبير يم النقطة مال السحب راحت ماما جابتها وضربتها لالالا اوكف مضربتها جرتها

من شعرها حيل ولطخت راسها ع القنفه بالحافه

وطلع دم منها لان الضربه صارت ع الشضيه والله

بابا هاي كل القصه..

والتفت عليه كالت عيب تجذبين ع أبوج هسه

الله يذبج بالنار باوعت ع بابا عيونه نطت وخزر

أمي ...

بابا : عفيه هاي أنتي العاقله المثقفه هيج تسوين

لعد غيرج شتسوي لججججج أكووو وحده تضرب

بنتها وهي مرررريضه فهميني شلون طاوعتج

ايدج ومديتيها عليها وهي بهذا الحااال منو

سمحلج تضربيها ولججججج ؟

عبير: أباوع ع بابا شرايين كصته برزت من كد

العصبيه أول مرة بابا هيج يعصب فقد حتى

كام يلطم ع رأسه..

كرار دفعني ع كييف وراح لزم بابا أما أمي جانت واكفه تبجي وتهمس والله مو قصدي شتتوقع أذي روحي عبير روحي  عساني بالموت ولا ماده أيدي عليها..

بس بابا جان ميسمع صوتها بس يعيط اتعجبت

ع نفسي واكفه بس اتفرج بعدين حسيت ع لزمة

أيد باوعت هاي مريم دنكت وجريتها من اذنها..

اذا شفتج كدامي أموتج والله أمشي ولي طايحة

الحظ .. هي بسرعه فلتت وبنفس الوقت جانت

خايفه أول مرة تشوف بابا هيج عصبي هو حتى

أني اول مرة اشوفه بهالحاله ..

رحت عليه لزمته :  ادري قابل أني بالنسبه الك أعز من ماما بعدين بابا أني هيج ولا هيج لازم أسوي العملية

أمي معليها افهمني

زهراء: سمعت صوت صياح بابا جنت جوا أني

وصفاء صعدت اركض وصفاء تبعني شفت عبير

لازمه بابا وتحجي ويا هي وكرار أما ماما سوده

عليه جانت مفرفحه من البجي...

لزمتها أمي اهدي لتحملين نفسج مسؤولية فدوة ليروح يصير بيج شي..

صحت عبير بس عبير شافت الوضعية تعبانه

راحت ع صفاء "  يلا صفاء أمشي أهلي بعمرهم ممتعاركين هسه حبوا يستعرضون وأني

قلبي خلصان...

نزلت عبير ظليت صافنه هاي شبيها شو ولا مهتمه أمي بس شافت عبير نزلت هي طفرت تريد تطلع وراها حتى تروح ..

صاح عليها بابا : وين وين عيني انوب حتطلعين بدشداشتج مو شنو طرطور أني ..

وعاط بيها فووووتي بدلي فضينا يلا..

ماما مناقشت راحت لبست صايتها وطلعت..

من طلعت ماما رجعت عبير علينا باوستنا

وراحت على مريم لزمتها وظلت تشاور باذنها

ومريم بس تهز براسها ، وخرت عنها وطلعت ..

  طلعت عبير و مريم كلبت البيت بالبجي

تدخل للغرف تبجي وتصيح عبيرررر والله

مااسوي وكاحة بعد حبابه تعالي الدكتور حقير

و أولهم صفاء يضربون أبر ..

ولج ارجعي اريد اسكتها مااكدر اخير شي كابلتها وكعدت أبجي وياها أختي عمليتها صعبة وبراسها بجاه شباب القاسم أختي تطلع منها بالسلامه ربي حق الشباب ع الشباب بجاه نبيك المصطفى ..

كمت جريت مريم

وخليتها ع رجلي تعبت من البجي وحتى صوتها

طبك موتتني يلا نامت رحت خليتها بفراشها...

اندكت الباب طلعت شفته  صفاء..

كال تعالوا لبيتنا شنو باقيات وحدكم بالبيت...

زهراء: بس مريم نامت وشسمه اني ..

صفاء: زهراء اول شي بعد لتكولين شسمه هالكلمة

عيب ثاني شي مريم ميحتاجلها كرين ترى عادي

أني اشيلها ..

هزيت راسي بقبول وتركته ورحت اخذت ملابس اليه ولمريم ورجعت  لكيت صفاء كاعد دينتظرني جان مخلي راسه بين اديه ومدنك صفنت عليه بدون ما انطق ، حس اكو حركة يمه رفع

رأسه كال ها كملتي ؟

جاوبته أي

: تمام مريم وين نايمه ؟

.. اشرتله ع غرفتي ، راح للغرفة واجه شايلها طلع كدامي للطرمة واني قفلت باب الاستقبال  .

بقى واكف ينتظرني ، لمن خلصت باوعلي : ها زهراء كملتي ؟

هزيت رأسي مد ايده  اخذ من أيدي جنطة الملابس واشرلي براسه : يلا ..  حتى اطلع طلعت كدامه

وهو قفل الباب الرئيسي ورحنا لبيتهم.....

رحنا لبيتهم ،  بقيت بيت عمو محد موجود بس عمو

وعمه وصفاء اصلاً يطلع الصبح ويرجع ب٢ ياكل

ويرجع يطلع يشتغل ويا استاذه بالعياده ...

بهالايام الي بقيت يمهم حسيت بعمة تريد تقربني منه

بس  كولش انزعجت لان أني واعدت

نفسي بعد مالي دخل بي...اريد اطيب قلبي من عشقه جنت محتاجة احد يبعدني عنه مو يقربني ..

بس عمه جانت تلح هواي أكوي ملابس صفاء شوفي صفاء وين اسألي صفاء  ماكل لولا ..

يووووو صرعتني جنت أغلس وادز مريم تسأله الى أن فد يوم عمه كالعاده دزتني

حتى أشوف صفاء يريد أكل او ماكل لولا رحت

لمريم : مريومه حبيبتي روحي اسألي صفاء يريد

أكل لولا؟

: اهوووو دروحي زهراء اني اجيت وياكم هنا

لان محد بقى بالبيت مالتنا بس مو معناها تشوفين محد ماكو وتسويني خدامه لصفاء ذاك هو روحي اسألي وتعالي غطيني أريد أنام ترى والله أكوم أبجي هسه ع ماما وبابا وعبير واخليج

تحيرين بيه لتكولين ما كالت....

فكرت اوو شسوي هاي خاف صدوك تسويها وتظل تبجي هو أني مخلصتها وياها يا مستوره أنستري

رحت غطيتها باوعت بوجهه وعيوني تتوسل

_ ميمو حبيبي  مابيها مجال هسه تشوفين

صفاء ..

خزرتني وغطت حتى رأسها....

ظليت اعصر بيديه محتارة ، شسوي ياربي شون ورطة تورطت  وأني بعدني أفكر صاحت عمه:  ها يمه زهوره وين صرتي شو مالج صوت ؟؟

شلون ورطه اهووووو اصعد وامري لربي صعدت

دكيت الباب ماكو رد ظليت أدك باب غرفته وهو

ماكو أي جواب ..

قررت أفتح الباب خاف نايم وميسمع خلي بس أمد راسي اشوف ، مديت راسي ماكو سمعت صوت

الدوش كلت ايييي همزين ديسبح خلي أفلت..

قبل لا اطلع انفتحت باب الحمام وصار صفاء

بوجهي لابس برنص بس من يم الخصر وصدره

عاري ...

عزززززا وجهي كام ينطي الوان احتاريت شنو احجي

هو صافن بوجهي لزمت اطراف شعري متوترة واندب

حظي دنكت واحجي بقلبي .. شدعي عليج عمه الله ياخذني..

رفعت راسي اريد احجي ويا شفته على  ع صفنته لا متحرك من مكانه ولاشي بس مخلي الخاولي ع شعره ودينشف بي ومنتظرني أحجي ..

: خير زهوره مو من عوايدج تصعدين لغرفتي محتاجه شي أمريني بالخدمه أني

: لا بس شسمه

تقرب عليه :  أني كم مرة أكولج بطلي تكولين شسمه عيب هالكلمه والشارع منحرف

يفسرها تفسير محلو وهسه اتركي البس والشسمه

وكوليلي شتريدين

..  صار قريب عليه ،  أني صح ابتعدت عنا بس قلبي يحبه وداطبق نصيحة امي  ابتعدي عنه واكسبي كرامتج وحبج أخفي ..

واني داامشي حسب كلامها يعني نبض قلبي بحبه شي مو بيدي بس أني الي بيدي الابتعاد عنه والحمدلله أبتعدت ..

رفعت راسي  باوعت صفاء قريب عليه

ومدنج لمستوايه منتظرني احجي..

درت وجهي منه لفيت اريد اطلع بس متوترة وارجف مثل كل مرة اشوفه اتوتر وارجف ، لفيت بسرعه اجيت دااطلع من الغرفه عود داانهزم ، رجلي انصدمت بحافة الميز توجعت كلش والتوت رجلي وجيت دا اوكع  بس

صفاء لحك عليه ولزمني من ايدي وسحبني اله ..

وكال الله  الله شبيج يمعوده كل متشوفيني توكعين ترى والله بشر مثلج مو بعبع ..

صفاء : من سحبتها من ايدها ووكفتها عدل باوعت ملامحها تتألم ، خدودها اشتعلت صارت جمر من الخجل..

بقت مغمضه عيونها حييل واديها ع صدري

دفعتني ونزلت تركض ..

ظليت أضحك عليها  شكد متغيره ، باوعت ع

نفسي : اشتعلوا أهلك صفاء بيك بخت موكع البرنص مال الحمام جان صار فلم اباحي لا وانوب صاير

منقذ وخلصت البنية من وكعة معدله وانت جان

وكع البرنص وتصير بيك فضيحة معدله ..

زهراء: تركته ونزلت قلبي نبضاته احس الكل

يسمعها بسرعه توجهت لفراش مريم جريتها لحضني وغمضت عيوني قوي من الفشله ردت

بس أنام من تكعد مريم اخذها واروح لبيتنا واخابر ع عمو ابو كرار  يدز أبنه سرمد وزوجته يمنا

مستحيل ابقى هنا بعد هاي عمه تلح وأني منا بس

اشوف صفاء اصير زماله اكوم أمشي بالملكوب.. 

شلي بهالدوخه ارجع لبيتنا أحسن واني بين هالتفكير نمت من كعدت طلعت من الغرفة ..

طليت من الشباك  لكيت صفاء بالحديقه

واني جنت محضره نفسي دااريد ارجع لبيتنا

بس مريم معانده بس تبجي تريد تبقى هنا حقها

اذا صفاء مدللها وين ميروح هي ويا بس بالليل

تبجي ع عبير وماما وبابا تتعب وتنام أخير شي

عطت بيها سكتت جريتها من أيدها عمه

ماكو رايحه يم بيت أخوها وعمو نايم طلعت

للطرمه صفاء بس سمع صوت الباب مال المطبخ

انفتح رفع رأسه جان ديقرأ شافني وبيدي جنطتنا

استغرب أجه عليه

صفاء: خير زهراء وين ؟

زهراء: لبيتنا

جاوبني ليش أكو أحد زعجج قصرنا وياج بشي

اذا متضايقه من وجودي بالبيت أطلع اروح يم

جماعتي اما مال ترجعين لبيتكم مستحيييل أقبل

ابقي اني أطلع من البيت...

زهراء: لا صفاء مو هيج والله ممتضايقه من وجودك هو بيتك وأني مضايقتكم بي..

دا أحجي ومريم بس تريدلها فرصه حتى تبقى يم صفاء كل شويه وكالت أي نبقى هنا شكو رايحيين هناك

محد يطلعني ومحد يشتريلي باوعتلها وخزرتها سكتت

صفاء انتبه ضحك اخذ الجنطه من أيدي ودخل

صفاء: تعالي أدخلي شكو واكفه بعدج كل عقلج

أخليج تطلعين

زهراء فتت وراه ومدري شجاني ظليت ابجي واحجي: صفاء حباب الله يخليك جيب الجنطه اريد

أروح لبيتنا وبعدين أحنه مو بعيدين عليكم هو

حايط ع حايط ماكو داعي أبقى يمكم

تبادلنا النظرات جانت نظراته مصدومه واني اباوعله برجاء باوع لمريم  واكفه دتباوع علينا

اشرلها تفوت جوا

فرحت راحت تركض اجه عليه  مد ايده لوجهي

مسح دموعي ..

_   أني أعرف ليش تريدين تطلعين من بيتنا

اكيد بسبب الي صار اليوم  وبعدين هالشي ترى

تافه هو صار قابل أنتي متعمده بس أنتي بسبب

وضعج تكبرين الامور وتهولينها والا أني هالشي-مو ببالي

أبد عادي عثرتي ووكعتي فدوة ،  زهوره لتكبرين

الامور وهسه أني جوعان وهاي عمتج توسلت

بيها تسويلي أكل مقبلت تكول تكعد بنت عمك

وتسويلك حجيتها واني اضحك

هو يحجي واني اعصر بيديه واحس احتريت وحبات عرك تولدت على جبيني هزيت راسي برضا

رحت للمطبخ وبلشت اسويله اكل ،  وافكر بلي كاله اكيد  كلامه صح أني مكبره الامور بسبب تفكيري

خلي أبقى هنا الى أن تطلع عبير ونرجع لبيتنا.....

صفاء .. طلعت للدوام هستوة مخلص محاضرتين

اجاني اتصال من امي فتحت خط اجاني صوتها يلعلع

: ولك صفاء تعال الحكني ابوك راح يموتني اذا متجي احركها لروحي والله ...

يتبع

في شريعة العشق

بارت 11

نورا ناصر

وهيه دتحجي صارت هوسة يمها صرت اسمع صوت ابوية وصوتها يتصايحون بعد ثانية انقطع الاتصال...

استغربت وقلقت بنفس الوقت ، خليت تليفوني بجيبي وطلعت ..

اخذت أجازة ورجعت للبيت وصلت ،  لكيت زهراء كاعده ع التخم بالصاله مخلية ايدها على حلكها كأنها تكتم ضحكة ..

ومريم واكفه يم الباب وتصيح عمه حتموت عمه

فتحت عيوني على اوسعها وركضت : شكو زهراء شبيها الحجيه ما لحكت أوصل للبيت خوما أكو شي ..

جاوبتني مرتبكة: هااا لا ماكو شي ...

ظليت اباوعلها مستغرب متحط عينها بعيني وايدها على حلكها ، زين هسه أسال منو؟ 

اخذت مريم وصعدت فوك ركض ، رحت دكيت الباب على غرفة امي ، اجاني صوت ابويه بصياح من داخل الغرفة ...

_ منووووو ؟ شطلعت هااي واحد ميكدر ياخذ راحته؟

هنا عرفت أمي ليش خابرتني يابه وكعت بالكاع من

الضحك  لزمت بطني وظليت اضحك بصوت عالي

جاوبته من مكاني وبعده الضحك مسيطر عليه :- يابه أني شعليه الحكومه خابرتني تصيح الحكلي خاف مكثر المعيار ع كيفك حجي ترى الحجيه كبرت...

بعدني دااحجي انفتحت الباب وطلعلي يعدل

بفانيلته باوعلي وظل يخزر بيه  :  ولك أنت متستحي مو شفت نفسك صرت دكتور ادوس ع راسك هسه طايح الحظ

_ لعد كول لمرتك بعد لتخابرني عيب هاي سوالف مال فاسدين وأني خوش ولد وبعدني مغمض و كولشي مااعرف بس أكولك هي ليش جانت تصيح ؟

-: بيك خير ابقى بمكانك !!!

-: منو كالك بيه خير الي كالك بيه خير ترى

يضحك عليك حشاك

بس ها  بنات عمي تحسين هنا وعيب هاي زهراء جبيرة ترى حجي زحمه تشوف هيج وضع كدامها فدوة لعينك منا وجاي اخذ الحذر وكول للحجيه لاتهرجنا بصياحها لعد أحنه منين طلعنا لو هاي عيارة نسوان ...

_ لا يا طايح الحظ لك انت زودتها ترة اربيك من جديد..

ضحكت وتركته فات جوة وكفت يم الدرج وصحت على زهراء...

زهراء: جنه كاعدين بالصالة الصبح ومحد موجود بالبيت ،  عمه طلعت بالبرنص من الحمام مانشوف اله  عمو سحبها للغرفه وهيه هرجت الدنيا بالصياح وخر اله ما وخر .

ظليت اضحك اكيد عمو ما انتبه علينا احنا موجودين بالصالة ،  ربع ساعة و اجه صفاء فات للبيت

استحيت اكوله على الي صار سويت نفسي ما ادري ..

رحت على مريم سحبتها من ايدها  وصعدت للغرفه  اكلت راسي شبيها عمه وليش تصيح ؟

_  عطت بيها وسكتت..

جريت الملابس ودا اريد اعزل بيهم وافكر بعبير

سمعت صوت  صفاء يصيحلي

نزلت بسرعة  باوعلي ونزل راسه...

_ عيني زهوره فدوة لقلبج اعتبري نفسج

مشفتي شي ، والله خجلان منج شسوي عدنا

اثنين مراهقين .

... بالله هسه هذا شكوله ؟ خلي اسوي نفسي ما ادري بلكت تعبر عليه

_  ليش هو شكو ليش دتعتذر ؟

باوعلي وابتسم بخجل ودار وجهه وحجى :- ها لا ماكو شي بس دااعتذر لان ردتي تطلعين من البيت بسببي ..

_  هاا !! لعد من رخصتك عبالي أكو شي ..

تركته ورحت للغرفه لكيت ست مريم دتحجي ويا ماما

بالتليفون وخربانه ضحك بس شافتني سدت  الموبايل شمرته عليه  وتلفلفت وسوت نفسها نايمة ...

رحت عليها ادغها من ورة الشرشف الي تلفلفت بي : لج مريومه شكو ؟ ليش من شفتيني سديتي الفون ؟

سكتت ومحجت شي حاولت مرة واثنين ماكو متحجي عفتها ، دك الموبايل ماما دتخابر جاوبتها : الو

اجاني صوتها : ولج زهراء شلون تخلين أختج تشوف هيج مناظر كدامها ؟

- شبيدي ياماما هو الشسمة صار بسرعة

_ الشسمة شنو ولج ؟  هسه حالا تلمين ملابسكم وتروحين للبيت ، ولج  انوب هاي الادبسز تخابرني تتمضحك ،  كوليلها أمج تكول بس أرجع من البيت الا اشلع اذاناتها ، وانتي مثل مكلتلج

دا اكوللها صار  ،  سدت الخط بوجهي بسرعة ..

قابل شبيدي عليهم هم بيتهم ويردون يرتاحون بي  رحت على مريم جريتها حيل من ايدها عطت بيها

كامت هي رفعت اديها دتحمي وجهه مني...

_ لج شكو مراح اضربج كومي بدلي ملابسج .. نزلت من السرير  طلعت الها ملابس وغيرت وهي تبجي وتحجي

_ هو اني شسويت بس كلتلها عمو جر عمه للغرفه

وهي تصيح ااه اتركني غير هو ديضربها ليش ماما

تصيح عليه وأنتي هم ولكم والله مسويت شي....

خزرتها اشش اسكتي بلا لغوة زايدة

صاحت :- ها تذكرت صح عبير كايلتلي الفتنه اشد من القتل واليفتن الله يذبه بالنار مو زهراء؟

_ كتلج اسكتي كافي شجاااج

_ ولج أنتي الثانية ليش بس تصيحين عليه

وماما هم هسه ياريت سويت شي ديلا شسويلكم

هسه ليش دتبدليلي وين حنروح مو كرار واعدني

اليوم ياخذني لمدينة الالعاب؟

بس تحجي ولا جاي تسكت صرعتني ،  عطت بيها سكتت اخذتها ونزلت لاكاني عمو بس شافني دنك ..

سويت احم وحجيت ويا :-  عمو حنروح للبيت اريد انظفه أكيد صار وسخ هسه لان صار كم يوم احنا هنا.

  ارتبك ظل يحجي وهو مدنج : - بويه يا بيت تروحيله وانتوا بنات وحدكم عود خلي يجي أبن عمج وياخذكم...

_  لا عمو لازم أروح هو هنا قريب عليكم  ماعلينا شي بس نحتاجكم نخابرلكم عود

_ديلله  زين ديري بالج على نفسج وعلى اختج بنيتي ..

_ صار عمو ، استأذنت منه وطلعت

وصلت لبيتنا فتحت القفل وفتنا جوا ، و مريم باوعتلي تريد تبجي لان الخاتون مواعدها كرار ياخذها لمدينة العاب السيدية ...

بسرعه عطت بيها :-  ولا صوت اسمعلج ويلا أمشي غيري ملابسج وتعالي دنظف البيت بسرعه.. هزت راسها وبس تخزر ، 

صعدت بدلت ملابسها واجت دتساعدني..

دا انظف بالمطبخ وهي بالصالة و اسمع صوت بجي بهدوء رفعت راسي اتسمع زين الها ، طلعت من المطبخ ورحت عليها ..

حاجيتها شبيج شكو ؟

من بين دموعها جاوبت : أنتي تعيطين عليه لان ماما ماكو بقى بس تضربيني يعني واذا فتنت قابل شسويت كلت ماما أكيد ضايجه خلي اضحكها شو كلها تعيط عليه ، همزين عبير مريضه جان ضربتني هاي الوكحه

خلصت منها

_ ولج يعني أنتي فرحانه لان اختج مريضه

مو ؟

_  لالا مو هيج بس يعني اثنين يرزلوني

احسن من ثلاثه ...

ضحكت عليها ، ديله كملي الي بيدج

_ هسه كملت مسح الاخشاب

بعد شسوي ؟

_ بكيفج اي مكان وسخ نظفي ..

_ حروح انظف غرفتنا حتى أنام واذا

اجه كرار صيحيني .. _ ديله روحي .. 

                            ****

عبير: وصلت للمستشفى اخذوني سوولي الاجراءات الروتينية باوعت ماما وبابا ميتحاجون ،  وواحد داير وجهه عكس وجه الثاني...

  تركتهم وماتدخلت  مالي خلك أبد ، د احس حياتي على المحك ،  فقدت الرغبة بكل شي بس ما احس بالخوف وانما مجرد عدم رغبة بالحياة..

أجه الدكتور ظل يشجعني  عباله خايفه ..

بس بالحقيقة مخايفه لان الاعمار بيد الله بس مقهورة على شعري الي راح يزينو  هواي ..

ورة مخلص الدكتور كلامه  اخذوني لغرفة ثانية

واجت ممرضة فتحت شعري وبلشت تزينة بالمكينة

ظليت اباوع لخصلات شعري وهيه توكع ع الارض

ويا كل خصلة توكع احقد ع نفسي لان اصريت اروح ويا خالاتي للدورة رغم معارضة امي ..

وتالي خسرت عافيتي وبنفس الوقت مااعرف شنو من

احساسيس تهاجمني قوة على كره على حقد  ..

دقايق مرت واني سرحانة بالتفكير ، انتبهت على الكاع مليانة شعر مديت ايدي  لراسي ولا شعرايه بي..  ابتسمت تذكرت من جنت اغور اخواتي بشعري لان أطول شعر بيهم وسرح ، كلت بداخلي حييل استاهل الله ميضرب بحجار ..

دخل صفاء صفن عليه شوية شفت نظراته كلها أسى عضيت باطن شفتي مجنت اريد شفقة عليه ..

ابتسم واجه يطبطب على كتفي :  ها   عبورة  اريدج قوية وسباعية ، عمي تحسين دائما  يكول الله مارزقني

بولد رزقني بعبير بنت أبوها .. ماريد اشوفج هيج اريدج قوية ..

_ صفاء حباب  مااريد ماما تشوفني ولا حتى بابا لان بس يشوفني يتعارك ويا أمي وهي مريضه شوفلك طريقه اغطي راسي بيها ..

اومأ بإي  ،  نزع الي ع راسي مال الوقايه

ولبسها الي لزم ايدي  وطلعني .. رجعوني للغرفة ،  اجت ماما مدت ايدها دتريد تشوف راسي مقبلت خفت عليها ؛- ماما عفية اريد انام اذا تسمحين ..

_ نامي عمري نامي وارتاحي ولا يهمج

غمضت عيوني واستسلمت للنوم ..

من الصبح كعدتني الممرضه قاست الضغط ونبضات القلب  ..

وجهت كلامها للدكتور :- دكتور كل شي طبيعي الضغط ونبضات القلب 

ابتسم الدكتور بوجهي :-  عفيه سباعية ..

بعدها  رادوا ياخذوني لصالة العمليات طلبت منهم اسلم ع بابا وماما استعجلوني حتى مااتاخر

رحت سلمت عليهم وحجيت ويا بابا انو أمي مالها

ذنب بالكوة يلا اقتنع ،  اجه الدكتور واخذوني للصالة

دخلت باوعت المنظر مرعب سكاكين ومقصات وبعد ادوات مال جراحه تخوف ..

حجيت  بداخلي دخيلك ربي اذا اخذت امانتك بس هون الفراق على أمي لان هي قبل كم سنه فقدت ولدها ومناقصها الم فراق الضنا بعد ...

واني صافنة دااباوع ع الادوات

الدكتور انتبهلي: بابا لتباوعين عليهم ذني مو الج

ترى هاي للي نفتح بطنه وصدره انتي بس نضربج

ابرة وهاي هيَ ..

ابتسمت على كلامه والطمأنينة بنبرة صوته ، مجاوبته بعدها صعدوني للسديه أجت دكتورة التخدير ظلت تتشاقى ويايه

وبعدها محسيت بشي..

                             ***

صفاء: صار  عدنا نقص بالكتب رحنا لشارع  المتنبي اني وصديقي هيثم ،  بالطريق  دنتمشى حسيت عنده شي باوعتله وابتسمت : أحجي شبيك هيثم

: والله صفاء ماادري شكولك بس ليروح بالك

بعيد أني قصدي شريف الله يشهد ...

_ دحجي شبيك اسمعك ولا يهمك ..

_ ذاك اليوم اجيت عليك  فتحتلي الباب بنية الله يستر

عليها كولش حلوة أذا مابيها زحمه بلكي تحاجي

اهلها اريد القرب منكم يااخي بس شعرها قضية

مااريد أفكر بيها بالحرام ألي اعرفه انت ماعندك

اخت بس وحده ومتزوجه هاي شتصير منك؟

... اتذكرت زهراء هي سافرة وشعرها

طويل شي بداخلي احسه احترك هاي بنت عمي

غيرتي مسمحتلي هذا ديتغزل بشعرها كدامي شنو

طرطور أني...

باوعت عليه بعتب :  بس من الاصول

متباوع عليها المفروض من تشوف بنية تطلعلك

من بيت صديقك تدنك مو تظل تباوع عليها

وبعدين عيب تتغزل بيها كدامي عسى ما تكون

جارتي أنت شنو تخبلت؟

درت وجهي معصب حجيت من ورة خشمي :  واذا تريد تخطبها عود سهله احجيلك ويا اهلها ويصير خير

ظل يعتذر كتله مصار شي ،  كملنا شغلنا ورجعت للبيت سألت  أمي على بنات عمي جنت جايبلهم حلويات خطيه اتبهذلن انقهر عليهن.. 

أمي: يمه زهره أخذت اختها وراحت لبيتهم

: وانتوا شلون قبلتوا تخلوهم يرحون شنو

سالفتكم لخاطر الله

سكتت أمي  عفتها طلعت من بيتنا توجهت لبيت عمي دكيت الباب

فتحته زهراء سلمت عليها وفتت

بس جنت ع أعصابي انفعلت كلش وحاجيتها بانفعال

_ أكولج زهراء أني مو كلتلج لتطلعون واذا تريدين

أني أطلع حجيت لو محجيت ؟

_ صفاء مقصرتوا بس أني اريد اكعد ابيتنا

كافي مليت شنو كوة هي خوما كوة لتلح يااخي

طلبت مني وبقيت وهسه بعد مااكدر وياريت تتركني براحتي واذا احتاجيت شي عود اخابر

عليك مو بعيد أنت ...

جنت أحجي ويا بعصبيه وانفعال ضجت من خضوعي اله وع شنو هالخضوع ياريت اكو شي

بس لهنا وبس..

تبادلنا النظرات  هو ظل صافن بوجهي متفاجئ لان جنت أحجي بصوت عالي مكدرت اسيطر على اعصابي ..

صفاء: اشش لا تعصبين ونصي صوتج  تمام..

جريت نفس رفعت شعري ليفوك : براحتج بس اذا احتاجيتي شي عود كوليلي ..

هدأت شوية وحجيت بهدوء كملت :- مو تخجلين امانة الله ترى ابن عمج اني مو غريب ، اهلج بشدة ولازم اوكف بجانبكم..

درت وجهي وأريد اطلع ، تذكرت ميثم رجعت

_ زهراء زهراء صدك فد سؤال

_ جواب..

_ اكولج   انتي اذا واحد خطبج بهذا عمرج تقبلين

لولا؟

زهراء: هو كالي هيج احس قلبي  ينبض بسرعه وخدودي احس حرارة دتطلع منهم

أكيد حيخطبني معقولة حس بيه وبمعاناتي بحبه؟

جاوبته واني احاول اسيطر على نفسي واكتم ابتسامة كادت تطلع غصب عني ،

جاوبته :- بكيف بابا وماما شيكولون أني امشي وراهم لان أكيد هم يعرفون مصلحتي اكثر مني

  حجيت هيجي  بس  احس الصوت بالكوة يطلع مني

وقلبي احسه وصل لحنجرتي .. بقيت مدنكة وما اكدر اخلي عيني بعينه .. 

: زين اذا الولد طلب منج تتحجبين توافقين

لولا؟  وهو اصلا انتي ليش لحد الان ممتحجبه

ترى كبرتي .. 

زهراء: الحجاب مو مقياس للعفه والشرف بس هو

اول وتالي أني اتحجب يعني مستحيل ابقى سافرة

صفاء:تمام ، خوش حجي ،  استأذنتها وطلعت بقى بس احاجي عمي

لان التمست من كلامها الموافقه رحت للمستشفى لعبير ..

                        ****

عبير: صحيت من البنج  أكو الم فضيع براسي الله ما اتمناه حتى للعدو باوعت أني بغرفه وحدي واسمع بس

صوت نبضات قلبي بعد دقائق زاد الالم اريد اعيط

اخاف لايزيد الالم شويه واجه الدكتور

كال الحمدلله ع السلامه هزيتله راسي...

: دكتور فدوة اي شي يسكن الالم حموووت

ابتسملي وطلب من الممرضة تضربني أبرة

الدكتور : بطله عدت سلامات كلها يومين او

ثلاثه ان شاءالله ترجعين لبيتكم

جنت اباوعله وما ابالي أي شي بس اريد

الالم يروح شويه شويه بدا الالم يخف رجعت نمت

زهراء: من حجه ويايه صفاء بموضوع الخطوبة ، اطلقت تنهيدة ارتياح من قلب مثقل بالهموم ..

و احس ملكت الدنيا

معقولة صفاء حيخطبني ؟ اي ليش لا قابل شناقصني بس كون ماما توافق...

واذا موافقت أني أعرف شلون اقنعها أهم شي اتزوج صفاء وارتبط بحب حياتي بس مااعتقد صفاء حيفتح الموضوع هسه وخصوصاً وضع عبير ومنا أني سادس يلا أني صبرت هالسنين مااصابر هسه المهم الله عوض صبري الف الحمدلله ...

                           ****

صفاء ... بالمستشفى شفت كرار

يباوع على عبير من الجام العازل

رحت يمه طبطبت على كتفه : ها كرار شنو الوضع ؟

التفتت الي تحسر ورجع يباوع على عبير :  خطيه عمي تحسين احس مرض عبير كبره ٢٠ سنه حتى جكاير كام يشرب اباوعله من يمشي حاني ظهره

اما عمتي بالضيم وحدها قصه خطية عبير

شنو ذنبها لا شعر مثل البنات لا عافيه ادعي من

الله كون تعدي ع خير..

_ يصير خير ان شاءالله وتصير زينة سهلة سهلة

_ اي  هسه طلع الدكتور من عدها كال حالتها مستقره بس متطلع من العناية لان يخافون يلتهب

الجرح فد اسبوع يلا تطلع منا بس تعال اكولك

عمتي سكرها مديستقر وعمي  تصدك اذا اكولك

البارحه خلص ٤ باكيتات احجي اريد ماكو

هزيت راسي :  حقه هو معتبر عبير سنده وهسه ديشوفها بهذا الوضع متحرك لا أيد

ولا رجل متكولي شيصير بي هسه أنت روح لبيتكم اسبح وغير ملابسك وارتاح و أني باقي

هنا عود تعال باجر

: هاي كل عقلك تحجي اعوف عمي بهذا الوضع واروح هو حتى ولد ماعنده ويساعده

ع الي هو بي أنوب تريدني أروح شوفلك غيرها

: ولك أني هنا بعدين لتكول ماعنده ولد

لعد أحنه شنو قابل مو ولده هسه حبيبي روح واذا

كولش توازيت وغمزتله وباوعت ع عبير عود

تعال بالليل دفرته يلا روح

هو ضحك وراح  ...

عبير: بعد أسبوع طلعت من العناية لغرفه خاصه

طبعاً خلال هذا الاسبوع مشفت لا بابا ولا ماما

أي شخص من أهلي مشفته من دخلت للغرفه

لكيت أمي كاعده ولازمه رأسها بأثنين اديها لو

ما وضعي والي أني بي جان رحت أركض لحضنها

أوووويلي شكد مشتاقتلها بس مكدرت لان جانوا

ديدفعون بيه حتى ماانتبهت لبابا ابد ظليت أباوع

ع أمي هي سوده عليه بس شافتني كامت واجت

لزمت السديه الي اني بيها باوعتلها وابتسمت لزمت أيدها هي نصت باست ايدي الي بيها كانولا

من خلوني ع السرير اجت بوستني وبابا هم تحمدلي بالسلامه الي صدمني كرار شو هذا لا خجل من بابا ولا من أحد اجه باسني براسي ويحجي بلهفه..

كرار: والله ممصدك طلعتي الف الحمدلله ع السلامه

بابا جان ديمسح دموعه راح حضنه :- گرة عينك يابه كلها أيام وتصير مثل الورد أهم شي رجعت بالسلامه...

ظل بابا يطبطب على كتفه :- مقصرت ابني مقصرتو كلكم ..

                         ****

زهراء: جنت بالبيت واندكت الباب رحت فتحتها  شفت صفاء وامه  واجت عيني بعينه دنكت بسرعة ارتبكت كوة كدرت اخفي ابتسامتي ..

_  عبير طلعت من العناية وطلبت تشوفوها يلا زهورة حضري نفسج انتي ومريم وامشو حتى تزوروهه اني وامي حنروح هسه حتى ناخذكم ويانا ..

دنكت وهمست هسه بس اغير ملابسي دقايق

غيرت ملابسي وملابس مريم  ورحت وياهم الطريق

كله فرحانه لان صاعده ويا نفس السيارة ودااستنشق عطره ...

صح مو أول مرة اصعد ويا بس هالمرة غير شكل تلميحاته السابقة بالخطوبة بعثت الامل بيه

كل شويه أرفع رأسي اباوعله بس هو ولا يمه ولا مهتم اصلاً حتى ماانتبهلي ضجت اصلاً جنت فرحانه بي أكثر من فرحتي بأختي...

وصلنا للمستشفى هو نزل قبلي وفتح الباب لامه

نزلت أني باوعتله اشرلي براسه يعني يلا ..

من دخلنا شو كلها تسلم عليه عبالك يداوم وياهم وصلت للردهه شفت بابا بالباب رحت سلمت عليه وحضنته

بابا: أدخلي سلمي ع أختج بس بابا فدوة لتباوعين

ع شعرها ترى تتحسس وباوع ع مريم الي جانت

متحمسه أكثر مني لان حتشوف عبير بس أني بالي بغير مكان ...

دخلنا لعبير انصدمت من منظرها

الوجه اصفررررر بمعنى الكلمه الشفايف بيض

الشعر ماكو جانت دتباوع ع الباب وكأنوا دتنتظر

جيتنا..

مريم بس شافتها خافت ختلت ورايه

باوعت ع عبير ابتسمت تك خد وهزت راسها

رحت بوستها وهاي مريم ولاتكول كبرت هرجتنا

بالبجي حسيت عبير تضايقت طلعتها لمريم ...

رجعت لكيت عبير دتبجي بصوت عالي وتصيح

اطلعوووا ولا واحد منكمممم أريد اشوفه لحد يجي يمممممي ..

ركض بابا صاح الدكتور انطاها أبرة مهدئة

ظلت تصيح الى أن نامت متتت قهر عليها هاي

شصاير بيها كل هذا ومريم ولا وصلت يمها أبد

ولا كأن تعرفها تباوعلها من بعيد وتبجي...

بست عبير هي ونايمه وطلعت صار بوجهي

صفاء كال أجه حسين هو يأخذكم أني راح أبقى

يم عمي خاف يحتاج شي

هزيت رأسي دااطلع جان يستوقفني :-  لحظه زهراء بس تعالي عندي موضوع وياج

متت من الفرح كلت أكيد حيحجي ويايه بموضوع الخطوبة واخيراً الحلم صار حقيقه

اخذني ورحنا يم ماما وبابا  بصالة

الانتظار 

صفاء : عمي ولو مو وقتها بس أكو ولد

ويايه طالب أيد زهراء شتكول ..... ؟

يتبع

في شريعة العشق

بارت12

نورا ناصر

كلماته كدست ثقل كبير على صدري ، خنكني بهالاحرف الي القاها الي مكانت مجرد احرف قليلة وانما اشبه بالرصاص ، انطلقت من مسدس واخترقت قلبي حسيت نفسي كدام عمود مشنقة وبيها حبل اعدامي  ، قتلني ، شنقني ، ذبحني من الوريد للوريد ، اول شخص اوسع اله مساحة بوجداني وحياتي  ، بهاللحظات حسيت بالنبذ وهالاحساس يذبح ، احساس خلى شكو حقد بالدنيا انزرع بداخلي اتجاه هذا الشخص ...

قبل ليجاوب  بسرعه حجيت ووجهت كلامي لبابا وبصوت يخنقه الكبرياء :- أني مموافقه والاهم من كل هذا أني هالسنه سادس وماما مريضه وعبير هم ويحتاجون من يهتم بيهم والزواج حالياً أخر همي ، ياريت بابا مااكون ازعجتك بس هاي حياتي واني اقررها .... حجيت هيج وباوعت لصفاء وخزرته بقى مصدوم وعيونه متسعة .

بابا هز رأسه بمعنى أي : هذا هو بنتي واني اوياج انت بعدج الدنيا كدامج وخليج بدراستج احسن محد يفيدج غير الشهادة.

صفاء: أنصدمت أني من حجيت وياها جانت شبه

موافقه معقولة؟شنو الي تغير ؟ ظليت افكر بنفس اللحظة ،  هاي بس لا عبالها أني ردت أخطبها اليه مستحيل تكون لهاي الدرجة سطحية.....

وحتى همَ بهذا الحال وهي تفكر بيه شنو من حب

بداخلها لعد الله يجبر خاطرها ويعوضها بالاحسن

مني أن شاءالله....

أنتبهت عمتي دتحجي ويايه

تسألني ع وضع عبير جاوبتها انو بعد أربع ايام

وان شاء الله تطلع للبيت استأذنت من عمتي

ورحت دااشوف عبير لكيتها نايمه تركتها ورجعت

يم عمي وعمتي.

زهراء ماعونت ارجع للبيت استأذنت من بابا اروح ويا عمو محسن ماردت ارجع ويا صفاء ...

بس وصلت للبيت انفجرت بالبجي بقيت بالساعة اني ابجي ، رفعت راسي ومسحت دموعي

حسيت اكو شي بداخلي اكتسب قوة من كلامه

اني صح ابتعدت عنه بس بعدني أحن اله..

هالمرة حتى  راح أحرم نفسي من شوفته أنعل ابو قلبي شهالذله هاي ..

رحت قفلت الابواب وصحت مريم حتى تنام

وهاي الثانية بالكوة اقتنعت تنام وما اكدر انام واخليها كاعدة هذه مسؤؤليتي عمرها عشرة وتصرفاتها تصرفات طفلة ٤ سنوات ...

  اخخخ  الليل شطوله منمت ولا لحظه بس أتكلب

بفراشي أحس قلبي يوجعني أني هم قمة بالانانية

أختي دتصارع الموت وأني بس حجه ويايه

بموضوع خطوبة مو بس نسيت أختي نسيت

حتى نفسي....

شكد تافهه أني شكد كرهت روحي ليش هيج بكلمة وحدة تأملت هوايه منه وهو مجان يقصد على نفسه يقصد على ولد يعرفه شون تافهه وغبية شون ما انتبهت ظليت اكل باصابعي وندمانة حيل هسه شراح يكول عني هو اخ شيخلص الليل لوجه الصبح يلله نمت  .

صفاء: رجعت للبيت اجيت أمر ع زهراء خاف محتاجه شي بس ترددت كلت لا لازم أبتعد عنها

هاي اي تصرف مني تحسبه حب...

تركتها ودخلت للبيت تلكتني أمي تريد تحجي بستها براسها وطلبت منها تأجل كلامها لان رأسي ديوجعني

هي هم خطيه سكتت...

تركتها ونمت كعدت الصبح سمعت صوت مريم كلت هاي شجابها نزلت ، رحت يمها  شافتني صبحت عليه وراحت حتى ما انتظرت اجاوبها ..

أبتسمت هاي شبيها رحت وراها

صحتها : مريم  شبيج ؟

مريم: مابيه بس زهراء دتنتظرني تسويلي أكل

و دزتني جبت لعمه كيك تاكلون منه وهسه أريد

أرجع اكل لان متت جوع البارحه متعشيت نمت بلا عشى حتى  يلا باي صفاء ...

عافتني وراحت تركض ، بقيت متفاجأ وتكول

ممتعشية البارحة !  اكيد متتعشى  زهراء حتى عشى ممسوية الله يعلم بحالها البارحة !

عبير: كتبلي الدكتور خروج طلبت من بابا يجيبلي كاسكيته..

محبيت أشوف مريم وهي تسويلي مهرجان صراحة مجنت أفكر لا بأمي اذا أنقهرت ولا بابا جنت أفكر بنفسي وبس وضعي يكسر خاطر العدو صفيت جلد وعظم وشعر ماكو ..

كرهت أهلي ونظرات الشفقه بعينهم دائما اتصنع النوم

حتى مااشوف نظراتهم خصوصاً أُمي تحس هي المذنبه وهي شعليها أني تصوبت بس هي لان ضربتني دتحمل نفسها المسؤولية...

اما بابا جان من يمشي بالغرفه اشوفه حاني ظهره أنتبهت عليه ديدخن بس محجيت واذا حجيت شنو حيتغير مثلاً أبتعدت عن الكل...

وصلت لبيتنا اتلكتني زهراء بوستني وجانوا هناك

خوالي وعمامي وذبحوا خروف جوا رجلي جان

بابا لازمني بعدها دخلت جوا باوعت كلها تباوعلي

بشفقه تركتهم وصعدت نمت شكد أكره هيج وضع...

توة فايتة ع الغرفة انفتحت الباب ودخل كرار هو ومريم ، باوعت الهم شفت مريم لازمة ايد كرار قوي

جريت نفس بضيق وبلعت ريكي :  كرار أخذها وانزل حباب ترى مناقصني قهر والله فدوة حسوا بيه

مريم من سمعتني هيج حجيت  اجت تركض حضنتني

وظلت تبجي بحركة وتناشغ ..

تبجي وتشم بيها بس اني  أبد لا بجيت ولا شي

أكتفيت ا مسد ع شعر مريم وبعدتها عني ...

اجه كرار  تقربت مني : باعي عبير الحمدلله أنتي عديتي مرحلة الخطر الكل جان خايف عليج أنتي عزيزة علينا لتظنين الي أنتي بي سهل بس شوفي أني مراح اشفق عليج ولا شي لان أعرفج قوية وهاي الفترة أزمة وتعدي عليج وحتى متكولين كرار مو خوش

شوفي هاي البارحه أجيت ونصبت بلي بغرفتج حتى منا وجاي أني أجي العب وياج بلي ها شتكولين؟

محجيت أبد اكتفيت بس اباوعله خطيه ديحجي عباله الوضع سهل صح هو ديشجعني بس بعد مستحيل أرجع مثل قبل الي أنكسر عمره ميتصلح شي بداخلي تحطم ..

طلع كرار وطلعت مريم وراه ، بهذه الفترة ظلو ماما وبابا ينامون يمي بالغرفة امي تكضي الليل كله تقرا قرأن يم راسي لو مرات اكعد اشوفها صافنة عليه

شعور يضوجني من اشوفها هيج .

زهراء: من طلعت عبير تحملت مسؤولية البيت

كله ماما ٢٤ ساعه عصبيه وتفرغ عصبيتها لوبيه

لو بمريم لو أي شي يجي كبالها تكسره...

مرات يجي صفاء أبد مطلعتله ولا لمحت حتى ظله أجبر مريم هي التقدم الضايفه و يا ويلها اذا رفضت..

هيج اريح اليه تعبت بالنهار ملتهيه بالشغل بس بالليل

اوف يالليل شيخلصه بس جانت مريم ملهيتني

لان كامت تنام يمي متصعد يم عبير...

لان عبير حتى من وجود بابا وماما تتضايق بس ذابتها

ع الصامت راح تخبلنا بهدوئها تحجي ع كد السؤال والجواب اما من نحجي أحنه أبد متندمج

دائماً صافنه ومرات انتبه عليها تدمع عيونها

وتغمضهم حييل حتى متبجي...

ماما سوت كيك وكالت ودي لبيت عمج وخلته بايدي الصحن ظليت ارجف هم اروح واشوف صفاء واني صار بالاسبوعين مشايفته ...

_ ماما خلي مريم تودي حبابة

باوعتلي باستغراب : ليش وانت شبيج متودي

ارتبكت كلش ظليت ادور بعيوني بالارجاء وما اثبتهم بعيون ماما :- مو ماما ش أأ هذا

جانت واكفة ع الكاونتر وناطيتني ظهر وتباوعلي بس من سمعت نبرة صوتي وشون مرتبكة ، اندارت تباوعلي بشك وريبة : زهراء لا تخبليني شبيج ؟ خو ما رجعنا للموضوع القديم مالتج ؟

خوفتني وعضيت شفتي ودنكت ..

_ شوفي ترة مو بحالج اني هسه بروحي لاهية ويا عبير ودتشوفين حالتها لتخبليني وتوبي من سوالفج هاي وودي الكيك لبيت عمج ، مريم بالحمام دتغسل يلله اشو كدامي ..

اذا استمر ارفض راح تفتح ويايه تحقيق وهيه عبالها نسيته لصفاء ، خلي اروح لازم اواجه مشكلتي هاي لشوكت ابقى خاتلة اول وتالي راح اشوفه سواء هنا او ابيتهم او بالشارع . .

طلعت من بيتنا ورحت لبيت عمو شفت مرة حيدر يمهم سلمت عليها وسألتها عن عمة كالت بالهول واخذت صحن الكيك مني واني رحت سلمت على عمة وطلعت من بيتهم وصار بوجهي صفاء .

هاي الجنت خايفة منها ظليت ادعي بقلبي ياربي ما اوكع ياربي ما اوكع ظلت رجليه ترجف ياربي راح اوكع ياربي ما اوكع فدواتك .

سد الباب واجه يمشي ويباوعلي وصل يمي : ها شلونج زهراء ؟

باوعتله ثواني ودرت وجهي وجاوبت : زينة الحمدلله

_ اكولج اني بلغت صديقي برفضج لموضوع الخطوبة فلتضوجين نفسج تمام ؟

رجعت باوعتله وعيوني متسعة ع الاخر ونظراتي كلها حقد ، مصدومة منه ليش ديذكرني بالموضوع راح اجن...

عليت نبرة صوتي : واني شعليه دتحجيلي عن صاحبك معليه ولتفتح هالموضوع كدامي بعد مكاعدة على كلبك حتى تجيبلي خطابة .. 

رفع ايده وجهه عليه يأشر بيها باتجاهي ومعصب :- لج شنو هاللسان هذا شدعوة انفعلتي شكتلج هسه اني صايرة متنطاقين ابد ، هم زين ماصرتي من نصيب صديقي جان فشلتيني باسلوبج الي يلعب النفس .

احسن نار الكون كله شعلتني وفوكاهه ينتقد اسلوبي عديم الاحساس حاجيته بنبرة حادة حاولت ما اخلي يعتقد انو هو يكدر يستفزني  : اسمع منا وجاي معليك بيه لا تحشر نفسك باي شي يخصني ابد ابد .

اريد اروح اروح سحبني اله قوي : تعالي تعالي شوكت تدخلت بيج ها فهميني ؟

ضحكت باستهزاء :- لااا ابد متدخلت جايبلي عريس وتكولي تحجبي هايه كلها مو تدخلات يا حضرة الدكتور ...

_ انت وحدة الكلام وياج ضايع تفسرين الامور على هواج ما اتعب نفسي واضيع وقت وياج يلله روحي

فريت بيدي ورمقته بنظرة غضب وحقد جانت اكثر من مجرد نظرة جانت تعكس كل شي احسه بداخلي

طلعت من بيتهم واحس قلبي معصور بقبضة من نار وافكر ما اعرف اذا الي حجيته ويا صحيح خايفة لا فسرتله حبي بدون ما اقصد محتارة شلون اتعامل ويا .

فتت للبيت من باب المطبخ شفت امي ماكو حسيت براحة بلكي اكدر اروح لغرفتي وانعزل شويه

فتت ع الهول وسمعت امي تحجي من الاستقبال

صاحت :- زهراء جيتي تعالي سلمي على خالتج .

غمضت عيوني حييل وتنفست باوعت للمراية شفت وجهي محتقن وجوة عيوني صاير احمر ، شون راح افوت اسلم على خالة واني هيجي! شكوللهم اذا سألو شبيج ؟

دا افكر رجعت امي صاحت :- زهراء وينج ؟

جاوبتها اجيت ماما ...

رحت للاستقبال فتت وسلمت على خالة وهم زين محد انتبه عليه كعدت وكضيتها مدنكة ، وامي وخالتي يسولفون .

اندكت الباب باوعتلي امي :- ماما زهراء كومي شوفي منو ؟

_ صار ماما ، رحت للباب وافكر بس لا هذا صفاء اجه خلي اطل من الباب خاف يطلع هو ما افتحله الباب احاجي من جوه  اكوله روح وانسى عندك بيت عم نهار كله تهين ببنتهم علما وصلت للباب اني مية جملة تخوط ابالي اريد اكولها اله بعد لسه حاقدة عليه .

وصلت للباب وطليت من الزرف وكلت منوووو

اجاني صوت من ورة الباب : اني كرار اجيت اشوف عبير افتحي زهورة ..

.. يا هذا كرار مايسوى صار ساعة اخطط عبالي صفاء ...

فتحت اله الباب وفتت جوة ، طب هو سلم على امي وخالتي وكعد ، شلت الصينية الي يم خالتي ودا اروح للمطبخ سمعت صوت عبير تصرخ بشكل هستيري موتتني خوف وركضت اول وحدة صعدت فوك .

طبيت لغرفتها شفتها واكعة على وجهه يم باب الحمام   وكعتها صايره ع حافة الباب ع خدها ، رحت اركض الها وجهه ع الكاع وتصرخ حلكها ظل يطلع دم  ورحتها (سنها) وكعت بيدها ..

جتي امي وخالتي وكرار واني بقيت مصدومة اريد اهدي بيها مجاي اكدر ظلت  تلطم ع رأسها

ومن شافت أمي تخبلت بالزايد ظلت تصيح اكررررهكم اطلعوووا براا ولا وجه أريد أشووووفه

منكم ان شاءالله فديوم تصعدون وتلكوني جثه

هامده أنتووووا شنووو من اهللل تاركينييي وحدي متكولون هاي مريضه بيهاااا سم خاااف تحتاج أحد من عساااني بالموت....

ماما من شافتها هيج فاقده وتعيط وتدعي ع نفسها وكل محاولاتها لتهدأتها باءت بالفشل ضربتها راشدي كل ظنها حتهدأ ...

بس بالعكس من انضربت بسرعه اغمى عليها

امي اشرت لكرار شالها واخذها جوة لبسنا بسرعة وطلعنا للشارع اجرنا سيارة وكبل للمستشفى ..

الدكتور بعد ما فحصها كال انهيار عصبي وضروري تراجع دكتور نفسي حالتها النفسية كولش تعبانه ممكن تأذي نفسها أذا بقت هيج ..

ماما وكرار طلبوا من الدكتور تنصحهم بدكتور نفسي زين وبالفعل وصفولنا دكتور بشارع

الكندي بالحارثيه... 

جنت اباوع ع عبير هي ونايمه وجهه اصفررررر

كركم وحلكها بي بقايا دم خليت ايدي على خدي وابجي على حالها ..

اجه  بابا هو وعمتي وجهه اصفر ويلهث بس شاف عبير

حط راسه يم زندها وظل يبجي بصوت عالي: كومي باباتي والله محتاجج يكلولي ماعندك

ولد وأني اكولهم لا عبك بنتي هي الولد وسند

لاخواتها الله من ياخذ شي ينطي شي اخذ مني

علي عوضني بيج بعد أبوج كومي كسرتي ظهري

كل مااشوفج بهذا الوضع أتمنى الموت اليه كل يوم

أكول اليوم تتحسن لا باجر وانتي وضعج نحو الاسوء كوليلي وين أخذج لتظلين نايمه بويه أكعدي أرجعي مثل قبل صيحي أهرجي البيت

بصياحج وداعة أمج مااكولج صوتج عالي نصي

أبد أني اشتاقيت لهذا الصوت ولج سوسن بنتج

جاااي تموت أني ليش مكتوب عليه بيدي أدفن

ولدي شسويتلك ربي لا اعتراض ع حكمك

بابا جان يحجي ويبجي وبجى الكل هو نايم يم

زند عبير وماما يم رجليها هناك وانتبهت ع كرار

كاعد وحده بالزوايه ومخلي رأسه بحضنه ويبجي

بصوت مخنوك بعدين توجه ع بابا حضنه وبعده عن عبير

صفاء: رحت لبيت عمي تحسين دااشوف عبير

طلعتي مريم تبجي افتهمت من كلامها أنو عبير

واكعه وماخذيها للمستشفى ركبت سيارتي ولحكتهم وصلت للطابق البي عبير شفت زهراء

كاعده بالممر ولازمه رأسها بيدها وتبجي حقيقةً

مااعرف شصار بيه من شفتها رحت عليها كعدت

يمها هي فزت بس من شافتني

زهراء: صفاء عبير أختي دتموووت فدوة أنت مو

دكتور طمني ع وضعها ابوس أيدك كول تعيش وما بيها شي لك صار ٥ ساعات مغمي عليها ومدتحس بشي والله قابله ترجع ترزلني وتصيح

عليه بس خلي ترجع مثل قبل

صفاء: شفتها تبجي وتنود جريتها من أيدها كلتلها

هي صحياً مابيها شي بس حالتها النفسية تعبانه

يحتاجلها دكتور نفسي و سفر وترجع مثل الورد

وينطلق لسانها ع الكل هسه كومي دااريد أشوفها...

كومتها ورحت شفت عمي يبجي كومته من ايده عمو صدك جذب منك كوم ميصير هيج مسمع مني رحت لكرار اخذته وطلعنا برة ظل يحجيلي

كرار : لك صفاء وضع عبير ديزيد سوء مريم أختها

مدتتقبلها أبد وهن ذني متعلقات وحده بالثانية

حتى جانن يسوون حلف ضد زهراء من تنظف

وتمنعهن من الحركة اقل شي يسوونا يشمرن وراها زاهي حتى تزلك وتوكع بس هسه مريم

مبتعده عن عبير  ..

_ ترجع مثل اول صدكني هسه لازم تراجع طبيب نفسي اكولك هيه شلون وكعت ؟

_ ما ادري جانت بالحمام يمكن دايخة وواكعة جانت وحدها فوك المفروض يبقون احد يمها ، اذا زهراء تساعد عمتي ومريم مبتعدة عن عبير .

_ اني احاجي عمي اخليهم ينزلوها يم زهراء جوا احسن

_ هيه متقبل اله بغرفتها ..

_ يصير خير .. خليت ايدي على كتفه ورحنا يمهم ..

زهراء: صحت عبير بعد ٦ ساعات ورجعنا للبيت

جانت الطريق كله صافنه ومو بحال أحد بس

وصلنا للبيت نزلت بسرعه ..

تلكتها مريم تركض ، خلت ايدها على كتف مريم وبعدتها منها ، دخلت لغرفة ماما رحت وراها شفتها نايمة ..

تذكرت قبل جانت  تسوي هيج اروح لغرفة امي

تكول محتاجه حنان ماما أني ضايجه ومن تحضني أمي ارتاح ، رحت لماما راحت يمها حضنتها

_ ماما ابقي يمها اني اسوي كل الشغل .

هزت راسها بحزن واني طلعت من الغرفة ورحت اسوي الشغل واجت خالة ساعدتني ، اشتغل وافكر بعبير وحالتها ، تالي تذكرت صفاء شون حجيت ويا بالمشفى بشكل عادي واني قبل ساعات متعاركة ويا ، خليت ايدي على حلكي وهو هم نسى عركتنا ، ضحكت على نفسي وعليه ....

ثاني يوم أخذها بابا وماما لدكتور نفسي وبدأ

مرحلة العلاج خلال هالفترة تحسنت عبير بشكل

ملحوظ كامت تنزل تاكل ويانه مرات تنظف لو

تغسل مواعين بس بعدها ساكته متحجي حتى

من تشوف شي غلط بس تباوع صفح قبل ترزل

هسه لا مرات ماما تكول لمريم سوي شي يزعج

عبير تريد تشوفها هم تصيح وتعاقب مريم لولا

هي بس تعكد حاجبها لو تباوع صفح لو يحترك

البيت متدخل...

الحمدلله شعرها بدأ يطلع صح ولادي بس زين وهذا الشي جان سبب ان مريم ترجع تتقبل عبير بس الاخت ولايمها لحد ما مرة أجت مريم تريد عبير تلعب وياها مكعبات وذيج جانت متمدده ع القنفه ورافعه رجليها ومغطيه

عيونها بالباند مريم ظلت تروح وترجع يم رأسها وتصيح بأذنها : عبير عبير عبير عبير عبير عبير ولج مو

دااحجي وياج  عبير عبير عبير عبير عبير عبير

كومي دنلعب كافي نوم أنتي شنو متملين هيييي

مو دااحجي وياج ...

حكت راسها وكالت بصوت مسموع خلي اهزها  واذا مجاوبت اعضها لان ماما كالت ممنوع تجريها من شعرها هزتها مترد رفعت أيدها وعضتها كل قوتها

باوعت لعبير بس  فتحت عيونها وعكدت حاجبها استغربت كلش ..

_ شكو شتريدين ؟ أكو واحد يكعد النايم هيج شنو

جلب أنتي وتعضين

مريم: كومي نلعب حبابه صار هواي ملاعبين سوا

عبير:  أنتي شنو مناويه تكبرين صف خامس ابتدائي وبعدج زعطوطه شيلي هالبسطيه من الكاع و روحي من وجهي ناقصه هوسه أني وديري بالج أنوب تعضيني

يلا ولي..

كامت مريم كفخت عبير وشردت ظلينه مبتسمين ونباوع عليهم ..

صفاء: دخلت للبيت شفت رشا عدنا سلمت عليها وكعدت يمها باوعتلي و كالت ذاك الاسبوع جانت

المشيه مال اسراء وعكب باجر خطوبتها والعقد

حتتزوج بتكريت أبن عمها ...

رفعت راسي باوعتلها مصدوم ودنكت اتجاهل كلامها واسوي نفسي ممهتم ..

كملت كلامها : بس لو تشوفوها هي ٢٤ ساعه تبجي وتدعي ع أهلها وقبل المشيه بيومين شربت

شكو دواء بالبيت حاولت تنتحر بس لحكولها و

غسلوا معدتها...

أني أسمع وروحي تحترك حرك الله لايوفق أبوها وأخوها خطيتنا احنا الاثنين بركبتهم..

كامت رشا : صفاء متوصلني لبيتي فدوة لعينك ما اكدر اتأخر بعد

امي : وين يوم اكعدي بعد وكت ..

_ لا يوم هم يالله ، ها صفاء توديني ؟

_ عندي شغل هسه اخابر حيدر يجي يوصلج...

خابرته واجه اخذها صعدت لغرفتي أحس نار صارت بصدري أحمد الله وأشكره حذفت كل ارقامهم جان ما اعرف شنو من الممكن اسوي ، بقيت اتقلب ع الجمر

غفيت شوية واسمع جرس الباب ومحد ديفتح

باوعت من الشباك هاي عبير نزلت أركض فتحتلها الباب .. : ها عبورة خو ماكو شي فوتي ؟

عبير: لا بس جيت أكولك صفصف هذا العلاج شوكت استخدمه؟ ترى نسيت وأهلي نايمين بس مريم كاعده ..

اخذت العلاج منها ظليت اباوعله

عبير :- فدوة بسرعه لتكعد ماما وتروح

تصعد  وهم عبالها طلعت شو وين

: ضحكت وحجيت بداخلي أول مرة أشوفها خايفه

تحجي وتتلفت خاف أمها تطلع شرحتلها وقت العلاج بعدني دااحجي واسمع صوت زهراء تحجي ويا مريم

_ شعندج كاعدة هنا ؟

مريم: داانتظر عبير راحت تسأل صفاء ع علاجها

وكعدتني هنا كالت لتتحركين ع مااجي خاف تكعد

ماما ويظل بالها بس شو مكعدت ماما كعدتي أنتي

روحي نامي مو أنتي المطلوبه ماما المطلوبه

ضحكت عليهن ظلت زهراء تباوعلنا وتخزر هزيت راسي وبقلبي حجيت ماتصيرلج جارة ، راحت عبير تركض وتكول شكرا صفاء واني فتت جوة ..

دخلت للبيت رحت للمطبخ شربت مي وصعدت لغرفتي لكيت واني بعدني مداخل لغرفتي اسمع صوت موبايلي يرن ، بس فتت خلصت الرنة رحت اخذته وفتحتها انصدمت ٦ مكالمات لم يرد عليها من اسراء ..

انصدمت اسراء !!! شعدها تتصل بيه ؟ بعدني صافن

وجان يرن الموبايل وهم اسرأء.. !!!

يتبع .

في شريعة العشق

بارت 13

نورا ناصر

بقيت ثواني مغيب عن ذهني غمضت عيوني استوعب الي ديصير كدامي ، بعد غياب قاتم وطويل ، اريد استوعب حبها الي لهسه ماطبت منه وخذلانها الي لهسه ما مصدكة ..

فتحت عيني واباوع لرقمها رقم رقم شون انساه واني الي اشتريته الها وجبته مثل ماطلبت اخر رقمين يكون مثل مواليدها ...

فركت وجهي بتوتر ،  فتحت خط وخليت الموبايل على إذني ، وجريت حسرة ، اجاني صوتها

تبجي وتعيط : صفاء الحكلي راح يزوجوني غصب حباب لا تسمح الهم ..

سكتت واني اسمع صوتها يملي اسماعي ...

_ صفاء اني مااتزوج غيرك ويرتبط أسمي بغير أسمك ، اني ادري خذلتك بس انت متدري شصار بيه  أهلي جبروني والله غيث حمى السجينه وطبعها ع فخذي لان تعاركت ويا وكلتله لو صفاء لو مااتزوج...

فدووة صفاء انقذي ماعندي غيرك لو أعرف أشرد

وياك ولا أكون أم لغير اطفالك ، دااشوف الموت يوميه انوب يريدون يزوجوني لواحد مغصوب

عليه واني هم مغصوبه عليه هذا حراام والله

هيج زواج باطل ..

صفاء صفاء دتسمعني ليش مدتجاووب ..

جانت تحجي واني صافن بعدين هي عاطت صفاااء

جاوبتها ببرود :-  اهدئي الا ماكو حل ماكو شي يصير

بالغصب نحجي ويا أبن عمج ونشوف أذا هو زلمه

مستحيل يتزوج وحده متريده بس كوليلي غيث

السافل وين

: طالع عرس صديقه من عساه لارجع كون...

_ طيب اسراء شنو اليضمن كلامج صح ؟ أنتي

جنتي تكدرين تحجين هالكلام قبل فترة ليش هسه يلا حجيتي؟

_  صفاء والنبي هددوني جسمي تشوه من الضرب فدووة أروحلك حتى لو متتزوجني بس انقذني والله قابله صفاء دااموت

_ يصير خير

_ يعني حتساعدني ؟ مراح تتخلى عني ؟ والله اني !!

_ كافي اسراء كافي خليني افكر شراح نسوي

_ مشتاقتلك صفاء

_ ادري وين جنتي قبل ليش صدمتيني بيج ليش ما اعترفتي من جنا سوى جان كلتيلي اهلي هددوني جان كدرت اوكف وياج من قبل .

_ مكدرت صفاء مكدرت هددوني بيك والله

_ ماشي اني راح اشوف شون اتصرف

_ ياريت ماتخذلني صفاء اجت ماما لازم اروح

_ روحي وطمنيني

باي صفاء ...

سديت الخط

كعدت ظليت صافن معقولة غيث هيج وحش شلون تسمحله نفسه يأذي اخته زين رشا ليش محجت شو كل أسبوع يمنه ولا جابت طاري أسراء وكل هذا الي ديصير الها  سهله تدلل رشا.

فكرت اخابر  عمي  أبو كرار هو عقيد بالجيش بلكي يكدر يساعد بشي ..

خابرته وحجيتله كل كلام اسراء جاوبني انو هم يكدرون يسجنون غيث بس لازم اسراء تتعرض للفحص الطبي حتى يثبتون صحة كلامها ...

_  بس عمي هالشي مستحيل منو يخليها تطلع وانوب تتعرض للفحص هي دتكول حابسيها وبعد يومين العقد.... 

- : لعد يا أبني نروح نداهم بيتهم ؟ اذا سوينا

هيج راح ننتقم منها ومو بعيد اخوها يموتها بعدين

انت مو تطلبه فلوس؟ احنه نكدر عن طريقك نسجنه بس فكر بأختك اقل شي ترى ينسجن ٥

سنوات وبهاي الحاله اطفال اختك حيكرهوك لان

بعدتهم عن أبوهم

_ هو انسجن وبعدها سددلي الدين وتنازلت ...

_ : لعد صفاء ماكو حل لو أسراء تتعرض للفحص لو أنسى واذا تريد تخطبها ونفسك بيها بعدك وتريد نروح ع اهلها ماعدنا مانع تدلل شوف شنو تريد أنت واحنه وياك خوش أبني...

_ والله عمو ما ادري شنو  اكولك عقلي مشتت خلي افكر ..

نهيت الاتصال ويا عمي صفنت أني أريدها لولا؟

عقلي مشوش هي حب حياتي واذا كلامها صح

معناها هي انجبرت ترفضني واني بالعراق وماكو

بنية تكدر توكف بوجه أهلها هالشي من سابع

المستحيلات ...

واسراء ترباية أيدي مستحيل تتشجع

وتوكف بوجه أبوها وأخوها وترفض خلي أطلع

منها ليش أبقى أكل بنفسي واخطبها للمرة الاخيرة. 

اذا صارت صارت واذا لا كولشي قسمه ونصيب .

رجعت خابرت عمي وبلغته بقراري وهو أيدني

_ عفيه أبني لتخذلها لان الحرمة بشارب الخير

هي لو ما تعرفك كدها متخابرك اتوكل واحنه وياك

واني هسه أبلغ عمامك....

_ خوش عمي أعتمد عليك؟

_ اي بوية لايظل بالك

سديته وكلام عمي ريحني ولو أني ادري من سابع

المستحيلات تكون من نصيبي بس ع الاقل اريح

ضميري ..

.

.

.

عبير: صاحت عليه ماما حتى اغير ملابسي ونروح للطبيب النفسي بالحارثية ، اني ابد معارضت بالعكس حبيت الفكرة ..

مجنت راضية ع الوضع الي اني بي ، وبشدة  ردت اطلع من الحالة النفسية والكآبة والعدوانية الي اجتاحتني بعد الحادث والي شفت بي الموت بعيوني ..

وصلنا لعيادة الدكتور وبعدها دخلنا السكرتير لغرفته باوعتله الدكتور رجال كبير بالعمر  وكله وقار وجهه بشوش ارتاحت نفسيتي لكلامه وشقاه وياي ..

طلب من ماما وبابا يطلعون وبقينا اني ويا بالغرفة

كلمني بنبرة حانية حسيت الطمئنينة تغلغلت بيه ووصلت لاعماق روحي ..

الدكتور :- بنتي اسمعي هاي السالفة ، هاي من جنت بكدج جانت عندي أخت توأم مالتي كولش حلوة

أني وياها دائما نتناكر بس اكلناوشربنا ، كعدتنا وكومتنا كله سويه منفترق ابد ...

الى أن صار عمرها١٩ سنه اجوها خطابه وتزوجت وعبالج جزت منها؟ لا هم كل يوم أروح يمها واشوف شمحتاجه وارجع للبيت...

الى أن صارت حامل واحنه مدلليها وزوجها

يموت عليها ، تعسرت ولادتها حولولها عمليات وبالعملية صار  عدها نزيف...

..حاولوا يوقفوا متوقف تالي طلبوا توقيع زوجها حتى يرفعون الرحم ورفعوا الها

وخسرت اكثر شي يحسسها بالانوثه وجانت هاي

اخر مرة تتذوق بيها طعم الامومه...

شوفي يا بنتي أنتي حالتج زينه واذا زينتي صفر

واذا أتصوبتي صح الشعر تاج المرأة وأني مقدر

وضعج بس أهم شي عافيتج عندج ..

وانتي بعدج بداية شبابج أريدج تكونين قوية وتتجاوبين ويايه

حتى نعدي هالازمه واني متأكد مراح تطولين عندي لان دااشوفج قوية وعندج اصرار

وبعدين شبي الشعر الولادي اطلعي العبي طوبة

ويا الولد هم رياضه وهم ونسه ..

عبير: ضحكت بداخلي ميدري أني جنت أتعارك

ويا ولد الفرع حتى العب وياهم طوبه ....

حبيت كلام الدكتور وبالفعل رجعت مثل قبل و صرت صديقة ماما اكثر ، جلسات العلاج جانت مثل اعادة ترميم روحي الي دمرتها صدمة الحادث ، الدكتور مطولت عنده بس شهر وبعد مااحتاجيته أبد....

زهراء .. طلعت من غرفتي الجو حار يفور الظاهر طفى السحب والخط الذهبي ماكو مشيت و سمعت صوت مولدة البيت احد ديسحب بيها رحت لورة البيت شفت عبير تجر بالمولدة ، ظليت اباوع الها كلما تجر بالحبل توكع والله لو تشوفها امي تتخبل لان تخاف عليها ..

عكس بابا الي جان بكولشي يعتمد ع عبير اذا راد

يغسل السيارة  تساعده واذا راد يروح يفول

بانزين ياخذهه ويا ،  شكو اشياء تخص الولد هي وياه

دوم اسمعه  يكول هاي ابن اليه وبنت لامها وهي بالفعل جانت هيج ويا امي تكون بنت ام بيت و ويا بابا

ولد ...

اخير شي ثبتت المولدة  خلت رجلها عليها  وجرتها حيييل اشتغلت بس اشتغلت كامت عبير تهز وتدك اصبع وتركص  عبالك جابت كأس العالم مو شغلت المولده ...

واكفة دا اضحك عليها اجتي امي  بس شافتها عاطت كلتلها ولج انتي شنو جنيه متخافين لو صاير بيج شي هسه شسوي ؟

عبير جاوبت أمي :- اطمئني يوم كولشي ميصير شفتج دتلوبين من الحر وبابا معلمني شلون اشغلها وهياتني شغلتها وكولشي مبيه ... مدت ايدها لجبينها تمسح عنها العرك

وكملت كلامها :-  بس والله متتت حر مجهود ذوله

الزلم شكد اقوياء شو بابا فرة وحده وتشتغل الا

اني مرغلتني تمرغل يلا اشتغلت مولده حقيرة ...

اروح اسبح واطلع اذب الزبل دام دنيا الظهر كلها

نايمه خوما اخليهم يشوفوني واني اذب الزبل...

صعدت تسبح..

أمي باوعتلي :-  اتعلمي شويه

شوفي اختج شلون متحمله مسؤولية من يغيب

ابوج عن البيت المفروض هاي انتي السوالف

تتحمليها مو هي بس شسوي للمابيهم خير..

وتركتني وراحت مهتميت اصلا شبعانة من هالحجي شسوي ..

عبير : طلعنا نذب الزبل اني ومريم شفنا حسين ابن جيرانه الغثة كلما نطلع يضوجنا ، جان ديلعب بالشارع من شافنا تمدد عبالك شارع الخلفة ولا عبالك دنيا الظهر ...

يمنعنا نعبر الشارع او من يشوف مريم  وحدها يضربها هالمرة حلفت اشوفه الامهات شنو تجيب وحتى اعلم مريم   متخلي ولد يتمادى عليها خوما تبقى مثل زهراء غير انتحر....

صراحة من شفته فرحت هم صرت زينه واسترجعت عافيتي وهم اريد  اني اعلمه شلون يضرب اختي ابن المشعول الا افعصه فعص بابا ومموجود الوقت اليه اذا مااطلع دمه اني مو عبود بسيطه...

رحت جبت السطل وخليت بيها حبل يابس حتى ضربته تصير توجع اليوم اسمط عشيرتك حسون بس كون تعدي سلامات وامي متضربني...

باوعت مريم  ترجف خايفة : انتي امشي ورايه ومعليج اذا  مدميته كدامج اني مو اختج...

مريم وعيونها تتجول بالشارع وترجع تباوع عليه مرعوبة :  ولج اخاف عبير دمشي خلي نرجع ..

_  معليج حتى اذا امي ضربتنا اني اخذ الضرب بدل عنج لان اني حضربه وانتي عود كوليلها عبير ضربته اني معليه ..

ظلت تبجي :-  لا مو انتي تتأذين...

بنبرة تحذير :-  تمشين ويايه لا ادوس ببطنج وبطن

حسين وياج ؟

_ اجي والله اجي

وصلت يم حسين باوعلنه ورفع حاجبه ومبتسم بخبث

_  ها ولجن شكو طالعات وبعدين شعدجن جايات منا متشوفن داالعب؟

جاوبته بعصبية :- ومتلعب طبك مرض يمك احنه لو الي بعبه صخل يكول ميييع ولي ابو الوسخ..

(والله جذب هو يلمع عبالك جامه مال سيارة وملمعيها)

تخصر وخنزر عيونه :-  هاي عليمن ولج ؟

فتحت عيوني عود دا اخوفه :-  ولاجه التلجلج عيونك دولي منا ..

اني احجي ومريم  لازمتني من خصري كل قوتها عبالك

حطير...

شال ايده ديجرني من ملابسي  اني بسرعه

طلعت الحبل مبقيت مكان مضربته بي اخير شي

وكع رفعت رجليه وسويتله فلقه اخخخ يامحمد

حسيت دمي برد اني اضرب بي واطفال المنطقه

يصفكولي لان جان شابعهم ضرب...

متركته الا طلعت دمه وشلت سطلة الزبل وذبيتها ع راسه ورجعت للبيت ..

اندكت الباب ظليت اتلفت ومريم  بسرعه باوعتلي عرفت ذوله اهل حسين كتلها شبيج لج اكعدي هسه اني اطلعلهم ..

طلعت للباب فتحته لكيته هو وامه حمدت الله لان ماما نايمة واذا هيه طالعة الها جان رحت بيها ..

باوعتلها بنظرة براءة :-  تفضلي خاله تأمرين بشي ؟

باوعتلي بنظرات اتهام وصيحت بوجهي :-  ولج ليش هيج مسويه بأبني ..

عكدت حاجبي وباوعتلها  :- شمسويه بلله ؟

_  كولي شنو الي مسويتي بعد

ببرود جاوبتها :- اي شنو ؟ ماادري ؟

_  امشي لج صيحي امج المدرسه وخابصتنا وهي متعرف تربي..

نشغت وحجيت  :- عيب خاله لازم احنه نتعلم الادب منج شلون هيج تقللين من امي كدامي

باوعت لحسين وخزرته :- ولك   منو ضربك انت اشو لازم اطفال الشارع وتضرب بيهم عبالك ثور منو يكدرلك...

هو بس خزرته باوعلي مرعوب :- لا لا ماما مو هي جانت تذب الزبل واني وكعت وعثرت بسطلتها...

عزززا اجيت اخرب من الضحك

بس عيب تروح هيبة الخزرة ....

لزمته  امه من اذنه ودنكت علي :-  ولك بغل جايبني وهاده ع الناس واحجي  ع امهم وانت تجذب اني اعلمك .. سوت اذنه حمرة يلله تركته وهو يتوسل ..

تقربت مني وباستني :- اعذريني حبيبة مفشلني هالولد ويا الجوارين دومه خلي ارجع للبيت اني اعلمه ، يلله فوتي جوة وسلميلي ع امج..

_  يوصل خالة ، دخلت وسديت الباب وراها .. بس فتت  سديت الباب واخذت طرمتنا وهي شطولها اخذتها كلها تدبج واطك اصبعتين هم كتلته وهم امي متدري جان شوت البصل ع اذني وهم انكتل من امه دخلت للبيت لكيت مريم تباوعلي بنظرات كلها خوف

كرصتها من خدودها واضحك :- هيا بنا الى الاحتفال هيا......

زهراء: جنت كاعده بالصاله دااقرأ صح عطله بس

دااتحضر للسادس اريد اطلع معدل افرح ماما بيه واخلي بابا يرفع راسه واثبت للكل انو اني مو فاهية مثل ميكولولي ..

اندكت الباب طلعت فتحته صاروا

بوجهي صديق بابا وزوجته واختها وامها ،  سلموا ودخلتهم للصاله جانوا جايين ع عبير بس الحجيه واخت زوجة صديق بابا كصتني

كص بالنظرات حتى خجلت ماعونت يكعدون حتى اطلع  اصيح  ماما وبابا ..

صحتهم ورحت للمطبخ دااسوي الضيافه لكيت عبير كاعده دتلعب بالموبايل شافتني رفعت رأسها أرتبكت وشمرت الموبايل بسرعه وسألتني منو أجه؟

استغربت وتساءلت بقلبي شبيها ؟  أول مرة هيج تتصرف...

جاوبتها وهي بسرعة  لبست كاسكيته وطلعت من المطبخ ..

طليت عليها شفتها دخلت للاستقبال تسلم رحت ع الموبايل لزمته

ماكو لا مكالمه ولا رساله تركته ورحت اسوي عصير ..

.

.

.

عبير: جنت كاعده بالمطبخ ودك الموبايل باوعت

عليه شفته صفاء رفعت الخط ..

جان مخابر ديسأل عن صحتي بس اخذتنا السوالف  وحجالي ع اسراء قلبي وجعني على أختي

اعرف بيها بعدها تحبه صح تتصرف بلا ابالية

بس بالها يمه أني مو غشيمه عمري صار ١٥ سنه واميز شديصير  ..

من كلي صفاء بقراره

كتله :- صفاء لتتبع قلبك أمشي ورا عقلك شوف

شنو يكولك سوي ..

ضحك :- دوم اكول عنج فاهمة وحجيج درر

_ غير اريد مصلحتك ماما تكول القلب دائماً يدمر

الانسان لان هو مركز العاطفه والعقل هو الصح

فأنت يا ابن عمي لتسمع لقلبك وكافي المشاكل

الي صارت ..

صح خطيه اسراء بس بالنهايه كلمن

ياخذ نصيبه من هاي الدنيا فكر بأختك هم هي

شنو ذنبها زوجها واحد حقير وعدها اثنين اطفال

منه حاول تنقذ أسراء بس مو بالزواج لان هيج

كلكم تتأذون

_ اي صح كلامج عبوو اني هم فكرت احجي ويا ابن عمها ..

_  صفاء بس  مو تحجي وتفصح عن علاقتكم لا

وانما استدرجته وشوفه لان اذا حجيت عن الماضي خلي ببالك مستقبل أسراء ويا أكيد

حتتأذى أكثر من الاذيه الي هي دتعيشها هسه...

_ ليش هو اكو احد معرف بعلاقتنا احنا جنا مخطوبين

_ والله اني هم مقهورة عليها ..

_ ان شاءالله تنحل طبعا اني خابرت اسأل عن صحتج والحمدلله انت بخير ..

_ تسلم صفاء ..

توني ختمت الكلام ويا صفاء ودخلت عليه زهراء

ارتبكت لان كمت احس أختي عبالها عندي شي

ويا صفاء  ...

نظراتها اليه مو طبيعي وخصوصا

من يجي صفاء يشدلي كانيولا لو يجيبلي علاج

اشوف نظراتها شلون تصوبها عليه جنت أضوج من تصرفاتها أني بيا حال وهي وين حايرة أني

كل همي استعيد عافيتي وهي تخوط بصف الاستكان وين مااروح اشوفها ورايه هي متدري

صفاء يشفق عليه واني دااموت من نظرات الشفقه ..

صفاء: كلام عبير جان صح بس أني جنت هاويها ورايدها للموت رغم خذلانها الي بس جان اكو مبرر وعذرتها ..

اجتمعوا كل عمامي عدنا وحجوا ويه  الحجي

هو بس سمع بيهم تخبل گلب البيت بالصياح

_ هم رجعتنا على هاي العائلة النكسة لك حلم ابليس بالجنة وربك ماتصير الك ..

_ ليش ماتصير الي ياب شنو نسيت ناطي بنتك الهم رشا مو تصير جنتهم وبعدين اسراء ما الها ذنب بلي سوو اهلها ..

_ لك والله لو يعود الزمن صخلة ما انطيهم بعد مو مرة بس لخاطر اطفالها مخليها عدهم ولا تكلي اسراء مو ذنبها ماانسى من وكفت كبالنا وهاي عمامك يشهدون وفشلتنا .  ..

نزلت راسي وفركت ايديه بأسف منين ما ادورله يدورلي واسمع صوته يصدح بكل المكان

_ اذا رحت وخطبتها والله  اتبرأ منك ولا انته ابني ولا اعرفك .

كمت على حيلي اوجهه وعليت نبرة صوتي  :- هسه انته ليش دتصيح ترة دنتفاهم ..

كام على حيله وظل يصيح اكثر  تدخلوا اخواني وعمامي بس الحجي قفل ظل يصيح ويصيح :-

لو تجيب وحده من الشارع مااعترض

بس أسراء لا يعني لا  ولك ماعندك احساس مو مية مرة تعرضوا عمامك للاهانه وانت هسه جاي تكولي أريدها ؟؟

_ اي اريدها وشنو يعني ولا تقارن اسراء ويا بنات الشوارع هاي قبل لتكون حبيبتي بنت خالتي بغض النظر عن اهلها واخوها الكلب الحيوان الي هو رجل بنتك ..

تقرب خطوات مني ورفع ايده صاروا عمامي بيني وبينه لازمينه و يهدأون بي بس هو يصيح ومنتفض ومعصب بكل قوته صيح :-  كوم أطلع برا لا بارك الله بيك كلب أبن الكلب ماريد اشوفك هنا بعد اطلللع ..

حيدر اخويه لزمني من ايدي وظل يهمس لك اطلع بره متشوفه شحاله وشلون صار اطلع بين ميهدأ ارجع ..

طلعت برا البيت ورجعت بالليل كبل لغرفتي ، واعد ايام خطبتها يوم يوم ،   وظليت الوب اريد رقم ابن عمها الي خطبها الى ان حصلته يلله ارتاحيت ..

خابرته واتفقت ويا أشوفه بالكرادة طلعت واني كلي امل لحتى انهي خطوبتها ، انتظرته بالمكان الي اتفقنا عليه واجه الولد بس فات عرفته وانصدمت هذا هو نفسه الي جان واكف بالعركه من تعاركت ويا اخو اسراء ..

وهو  كولش محترم اتمنيت يتفهم الموضوع ويترك اسراء بحال سبيلها ..

كعدنا وحجيت وياه :- اسمع خالد اني يمكن انت تعرف او ماتعرف جنه اني واسراء مخطوبين بس ماصارت القسمة وهسه البنية استنجدت بيه ولجأت الي والحرمة بشارب الخير ، اسراء مموافقه عليك اعتذر واكول هذا الكلام وانت اكيد مستحيل تقبل بوحدة رافضتك ..

جاوبني بهدوء وتفهم : شوف خويه أني بنت عمي مااريدها بس الوالد كال اغضب عليك ليوم الدين اذا متتزوجها...

كلت ميخالف صار خلاف ومن كد الحاحهم بالسالفة اني تركت البيت صار شهرين...

خابروني مناك كالو ابوك  انجلط بسببك  وبصراحه مااريد أكون سبب رئيسي بموت الوالد صح الاعمار بيد الله بس مااريد ضميري يأنبني العمر كله ...

ضيف على هذا كله  اني ضابط ودتشوف البلد يعني على ساعه واستشهد ليش اموت واني غاضب أهلي خلي أموت وهم راضيين عني وأني أسراء صح مااريدها بس أني رجال وهي راح تصير بذمتي

ححاول أسعدها كد مااكدر بالتالي هي مالها ذنب

واني الانجبرت عليها مو هي...

هو جان يحجي ونار بداخلي تشتعل تعب

عمري راح يروح لغيري ، مكدرت اكثر ويا بالكلام

بس اطمئنيت لان خالد مبين خوش زلمه سلمت عليه وطلعت ..

وثاني يوم صادفت خطوبتها اووويلي يا نار قلبي شيطفيها بقيت مثل السمجه المزوهره من تطلع

من المي...

اول شي سويته  تركت البيت حتى ماافرغ عصبيتي بواحد من اهلي ماله ذنب بلي صار ..

ظليت أمشي بالسيارة بشوارع بغداد أباوع الناس

كلمن ملتهي بهمه وصلت للبياع لكيت حجيه كاعده تبيع چرك كعدت بصفها باوعت ع تجاعيد

وجهه كل تجعيده تحجي شي من الحزن والاسئ ...

قدمتلي جركايه وصبتلي استكان جاي شربت

ظلت تباوعلي وسألتني :-  شعندك يمه هنا انت مبين واحد شبعان هذا مو مكانك ..

صفنت وصفكت بيديه ...

_ كوم يمه كوم أرجع منين مااجيت

رفعت راسي باوعتلها :-  ليش حجيه خاف ضوجتج ؟

_لا يمه بس هنا يكعدون بس الفقراء والي مثل

حالي....

_ حجيه اني تعبان من روحي دخيلج خليني هنا

_شباب هالوكت كولشي ماشفتوا الله يساعدكم

شنو سالفتك يمه ؟

_ مااريد ادوخج يوم...

_يمه خلي ببالك شما تشوف من مصايب  بعدين راح تشوف الاقوى منها مادامك بالعراق ...

كلشي توقع وليدي هاي اني كدامك فقدت زلمتي بحرب ايران وكلت ماكو هيج مصيبة بعد ..

وبهاي الحرب وكع سكف البيت ع بنتي واخوها وسكتوا بمكانهم ...

انت مادامك عايش بالعراق لازم تدفع ثمن وجودك

بهذا البلد هذا كلامي خلي ترجيه بأذنك..

مدري ابجي  ع حالي مدري ع حالها صدك الي

يشوف مصيبة الناس تهون عليه مصيبته...

واني متعجب مااتزوجت محبوبتي شكد تافه لعد

كمت بستها براسها وانطيتها هالقاسمه الله وطلعت...

ظليت اسوق انتبهت أني واصل لقوس بغداد كلت

اي يا محلاها هسه أروح لمعشوق الملايين أبو

الحسن علي هو يبرد نار قلبي باوعت ساعه ٢ الظهر كلت ابات هناك وصدك توجهت للنجف بس

وصلت للصحن ودمعت عيوني  صار ست اشهر أحنه مفترقين بس اليوم أحس روحي راحت

مني يمكن لان صارت بأسم غيري وبعد مستحيل

نرجع...

وصلت للشباك لزمته وكعدت ظليت احجي

ويا الامام أجيت مكسور قلب ياعلي بجاهك عند

الله طفي النار الي بداخلي واسعدها ووفقها مااريد

شي بس سعادتها وراحتها خليها تنساني ربي بجاه

فحل الفحول تجبر خاطرنا...

بجيت ودعيت احس جزء بيه أرتاح طلعت للصحن أصلي اجه طفل صغير يمي ياخذ التربه ويرجع يرجعها لمكانها كملت صلاة كعدته بحضني ظليت اتشاقى وياه

اجه أبوه اخذه كال اعتذر ضوجك بس جنت اصلي مكدرت اقطع صلاتي ...

بوسته وانطيته :- الله يحفظه ويخلي الك ..

تشكر مني اخذه وراح ..

بيومها بتت بالامام شو حلمت أني داامشي بطريق وعر

وكله صخور وفجأه عبرت الطريق ورحت ع بستان كله ورد وخضار شفت فدى وعلي انطوني

وردة وراحوا لحكتهم أريد الزمهم ماكو اختفوا

فزيت من الحلم جان ديقرأ قرأن الفجر كعدت رحت للحمامات توضيت ورجعت قريت كم صفحة

واذن صليت وطلعت بوجهي لبغداد ....

زهراء: جنت أشوف صفاء شلون مهتم بعبير و

يداريها هو من زمان هيج بس بعد الي صار ولا

اندكيت بي حتى من يجي للبيت مااطلعله..

لحد اخر مرة اجه سوا المغذي لعبير وراح هي جانت

صافنه مااعرف ليش الشيطان وسوسلي حسيت

أختي دتحبه...

جانت ماما كاعده يمها انطيت أمي

علاجها وكعدت أسولف ويا عبير سألتها هالسنه

شلون تداوم وهي بهذا الوضع باوعتلي بحزن بس

محجت ماما خزرتني عدت السؤال عليها

عبير: هاي شبيج زهراء شي طبيعي اداوم واذا

شعري ولادي ترى مو جريمه ولا عيب العيب بيج

أنتي من دتستفزيني وانتي تعرفين وضعي اطمئني اداوم شي طبيعي والي يستهزأ بشكلي

اني أعرف شلون اجاوبه وهسه كومي منا أريد انخمد ان شاءالله مااكعد واشوفج

ماما عاطت بيه ورزلتني خلتني اكره حالي ..

يوم ثاني شفت ماما طلعت للدوام لان بلشت امتحانات الدور الثاني واني كلش كارهة عبير وضايجة منها شكوكي حتموتني ، صعدت وفتت لغرفتها شفتها كاعدة تلعب بموبايلها من شافتني خلته على صفحة وظلت تباوعلي ..

ركعت الباب وتقربت منها :-  شوفي ولج أني لاعبالج مااعرف لا اعرف كولش زين ومغلسه أنتي عينج ع صفاء شفتي نفسج اتسكطتي وصرتي وحده مشوهه تريدين تلطشين براسه ولج هو أني شعري شطوله وعيوني ملونه وميباوعلي أنوب يباوعلج ألج وانتي جنج ولد لا حبيبتي اصحي واذا شفتج

أنوب دازه ع صفاء متلومين الا حالج

يتبع ..

في شريعة العشق

بارت14

نورا ناصر

جنت دااحجي بعصبية وبكل حقد ويا عبير

رغم أني أعرف وضعها الصحي وحالتها النفسية

دون الصفر بس مع ذلك قسيت عليها بالكلام ومارف الي جفن ..

ذكرتها بوضعها مع أنو هي مناسيته أبد وأني يمكن أكثر وحده تعرف ،  يوميه بالليل أصعد الكاها

تبجي ..

ما اعرف شنو الي صار وصرت بهالجحود والقسوة يمكن الحب عماني والغيرة شعلت روحي وضميري مكمم بهاي اللحظة ..

عيوني بعيونها وهيه تطالعني بذهول وصدمة

واني اطالعها بنظرات كلها اتهام وقسوة ..

دااحجي وارزل بيها وسمعت صوت امي  وراية عاطت بس بتعب وجهد ...  زهراااااء...

التفتت اشوفها وكعت من طولها

جمدت بمكاني مثل قالب الثلج وبس عيوني مفتوحة على اوسعها اباوع على امي الي اني سبب بانهيارها

اباوعلها برهبة وخوف ، دفعتي عبير بخفه ومرت من يمي وراحت تركض لماما الي متحرك لا أيد ولا رجل....

اباوع لماما شفايفها زركة ومتتحرك كامت عبير تكعد بيها وتحركها ، تبجي وتتوسل وتبوس بيدها ..

كامت رشت على وجهه مي هم نفس الشي ...

شكد تضرب على خدودها متصحى ..

ركضت الها و وكعت يم رجليها ابوس بيهم

متت خوف امي حتموت بسببي

ظليت ابوس برجليها وابجي ...

نزلت مريم مخروعة صرخت مامااااا

اشرت الها عبير لج مريم جيبي عطر بسرعة

ظلت مريم محتارة بين تجي لماما وبين تروح تجيب عطر وتنفذ كلام عبير ، صاحت عليها مرة لخ

دارت وجهه وراحت لغرفة امي ورجعت وبيدها عطر

دنكت على ماما الي جانت عبير مخليه راسها بحضنها

ظلت مريم تشمم ماما العطر وسط بكاءنا وتوسلاتنا الى ان كحت ماما وصارت تتنفس ..

عبير : انصدمت من الكلام الي وجهته الي زهراء

اختي تشكك بيه مكدرت اصدك بس من شفت امي وكعت بعد سماعها كلام زهراء الي توجه الي تمنيت اني واكعة بدال منها عملية تزين شعري اهون من وكعة أمي هاي حسيت نفسي فقدت الحياة كلها هي بس صحت

حضنتني وكامت تبجي...

ظلت ماما تباوعلي بنظرات حزينة : لج يمه سووده عليه هاي تاليتها أختج تعيرج

ولج لو مخلفه بزون ولا مخلفتها لا أني صوجي

دللتها وصادقتها عبالي براسها حظ بس أني الها

منا وجاي يمه حبيبه لتهتمين أنتي ست البنات

تروحلج فدوة أمج يا بعد روحي

ظليت العب بشعرها واباوع لعيونها : ماما شبيج واذا حجت والله مااهتميت لكلامها لتقهرين نفسج أهم شي عافيتج بعد عمري

شو كومي خلي أسبحج سوده عليه من الحر وتجين تلكين هيج مهرجان كدامج

فجأة امي انتبهت لزهراء كاعده يم رجليها

دفرتها وحجت بعصبية:-  كومي ولج منا وجاي لا أنتي بنتي......

بسرعه خليت أيدي ع حلك ماما قبل لاتكمل كلامها

_ لايوم لتحجين شي بساعة عصبيه هي هم

عصبت وحجت والانسان من يعصب ممسؤول عن

أفعاله ...

بقت زهراء مخلية ايدها على وجهه وتبجي ..

صحت مريم : تعالي مريم عاونيني ، جتي مريم ولزمت ماما ويايه وكومناها ودخلتها للحمام سبحت وطلعت  لكيت زهراء واكفه بالباب ،  تعصر بيديها وتزم بشفايفها باستياء واضح ، شافتها ماما خزرتها وتعدتها ..

.

.

.

زهراء: بسبب كلامي خسرت أمي من ذاك اليوم بعد أبد مباوعت بوجهي ولا حتى حجت ويايه

بس عبير جانت تحاول تقرب بيناتنه بس أمي كولش قست عليه وبصراحة استاهل أني متعجبه

من نفسي شلون حجيت هيج ويا أختي وهي

تعبانه ..

بهذه الفترة سمعت بمحاولات صفاء بترجيع  اسراء

بس مهتميت الي جان شاغل بالي هو شلون أمي تسامحني والي قهرني أكثر من عرفت عبير شنو

ناصحته حقدت ع نفسي .....

صفاء: أستسلمت للامر الواقع واصلاً هي مو قسمتي شسوي بعد أكثر من السويته ، قنعت نفسي بالتخرج هالسنة ع الاقل حققت واحد من أحلامي أحنه مو كلشي نريده نحصله ....

رحت لبيت عمي ابو كرار  طلعلي عبدالله  سألته على كرار..

كال :- فوك بغرفته معتزل العالم مااعرف شبي أدخل

شوفه مااعرف أحنه لازم نتسمى عائلة مجروحين

بسبب الحب ...

ضحكت وكفخته ودخلت صعدت لكرار لكيته صافن وبغير عالم...

محبيت احرجه بالسؤال لان يمكن أني أعرف

شبي ..

رحت كعدت يمه على السرير وخليت ايدي على كتفه واباوعله بحزن: كوم دنطلع لك شبيك خاتل بالبيت جنك بنية ..

جاوبني بنبرة حزن : مالي خلك تريد تطلع أخذ عبودي وطلعوا أنتوا اني اعفيني اليوم دخيلك صفاء ..

_  ولك هي هاي الدنيا مو كلشي نريده نحصله

بعدين أنت أهون مني لعد أني شكول خسرت الي

أحبها سنين ومنا الحجي بالكوة يلا رضا عني دكوم

هي دنيا وخلصانه خلي نعيشها بحلوها ومرها

_ لك أنت والله عجيب ولا عبالك خسران الاول

والتالي هي وحده من أثنين لو انت بلا أحساس

لو أنت تافه عاد أنت حدد شتريد

ضحكت وجاوبته :  أبن عمي الي بالقلب خلي الا ما يوم ربك يجبر الخاطر  أني حتى مااريد أفكر بيها لان حرام صارت بذمة غيري وهسه كوم خلي أروح أشوف عبير وعمتي صار هواي مرايحلهم ...

بعدني دا احجي طفر وبنبرة سريعة حجه: يلا كوم شبيك شمنتظر مو صارلك ساعه تتوسل ؟

فاجئني ردت العب عليه شويه واشوف شعنده: هااا لاا بطلت تذكرت اروح اخذ السيارة

للغسل اوسخ من وجهك

هو حس دا اضحك علي كام دفرني ضحكت بصوت عالي وكعت من الكرسي

_ امشي لك تضك عليه

كمت من الكاع واخذت السويج :- ديله يله اني نازل جوة بدل واتبعني ..

نزلت جوة انتظرته بالسيارة لحد بعد دقايق يله اجه  اخذته ورحت

لبيت عمي تحسين دكينا الباب طلعتنا عبير من

شفتها ظليت صافن وجهه عبوس بس الحلو بيها

واثقه من نفسها طلعت تعدل بشعرها وهو حاله

حال شعري او اقل هماتين عجبتني صراحة ..

دخلنا للبيت بس أستغربت زهراء ولا طلعت أجت

مريم ضيفتنا سألناها ع زهراء كالت نايمه.

زهراء : بدأ الدوام ماما جانت شايله هم عبير بس

عبير جانت هي الي تشجع ماما جانت مصرة أنو

تداوم أما ماما جانت متخوفه لان أني استهزأت

بأختي شلون بالغريب ..

ماما  :-  والله يا بنتي خايفه عليج اذا اختج مرحمت

بحالج شلون لعد بصديقاتج بس أني وياج هناك

أي شي يضوجج تعالي احجيلي ...

عبير: تمام بس شو أم السوس غلستي مشتريتيلي

ملابس شوكت نروح أريد من المنصور أما عن شعري ترى زين والي يحجي أني اعرف شلون ارده

لتخافين عليه...

بين ما دنحجي سمعنا  صوت صياح

كولش عالي ديجي من بيت عمو طلع بابا يركض

صفاء: كاعدين أني والحجي اندكت الباب طلعت أشوف منو صار بوجهي غيث الغثيث ، من شفته ظل يصيح ويلغي عرفته جاي يريد يسويله هوسة ويريد  اضربه داخل بيتي حتى يحقني بقانون العشائر بس أني محققت غايته

غيث :- أسمع لك أختك تنساها هسه هي بذمتي واذا

بعد وصلت لبيتنا اكسر رجليك

صيحت بوجهه : أكولك أبو الوسخ هو منو واصل باب بيتكم شو هواي تاكل نعل جوعان اذا جوعان كول هسه أجيبلك علف او أكولك تعال اكل الثيل الي بحديقتنا الفلاح صارله أسبوع ماكو وانت بكونك

طلي تفضل اعلف حتى متكول أبن خالتي ماضيفني

أما شغلة أختي احط النعال بحلكك اذا منعتها تجي لهنا وبعدين شعندك جاي شنو صحيت من نومتك

_  لا ياعار بس شفت اسراء متصله بيك شوف

أكولك اذا وصلت لاختي لو اندكيت بيها متلوم

الا نفسك

_ : أنت ليش مسألت نفسك اختك ليش أتصلت

بيه أني حجاوبك لان شافت ماعدكم زلم اتصلت

بيه حتى أساعدها غيث أسترجل واذا صعبه عليك

اتحجب

جنت أحجي الظاهر صوتنا عالي مااشوف الا عمي

تحسين واكف كدامنا وظل يرزل بينا اثنينا

عمي: عفيه اسباع انوب وصلت بيكم بالشارع تتعاركون

وانت غيث شعندك جاي أختك وانطيتها

لابن عمك شنو منخلص من بلاكم أحنه

أمشي تروح منا لا أخابر اخويه عليك وارفع دعوة تتهجم علينا واحنه ببيوتنا

صاير زلمه من تالي وكت الزلمه الي يسعد أخته مو الي يجبرها تتزوج علمود الفلوس امشي ولي الله لا يبارك بيك

هنا غيث انخلس صوت مطلعله دار وجهه و ولى

وعمي ظل يباوعلي

_صفاء كافي تعبتنا مو بس أنت مصارت التحبها

من نصيبك خاف الله بينا ترى حرام كل يوم وكابه

العيطه أذا تستمر هيج تدور المشاكل دواره وحق

الخلقك ابتلي بيك ذاك اليوم صرتوا وهسه كلمن

راكب راسه علينا من دنعل ابهاتكم ع هالاخلاق هاي

مديت ايدي اله بحركة الصبر :- عمي بس اسمعني

حتى ماانطاني مجال احجي تركني ودخل

لبيتهم وركع الباب دخلت للبيت ادور التليفون لان اخابر  رشا لان ادري بيها هيه ام الفتن ..

صعدت لغرفتي شفته ع الميز اخذته وخابرتها بس جاوبت عطت بيها

_شوفي رشا اذا بعد سويتي قاله اكسر راسج

تجين هنا معززة مكرمه بس أنتي طالعه ع أهل

الوالده تبثين خبث سهله اليوم رايح لاخوج حسين اذا مااخلي يعيد تربيتج مااتسمى بأسمي لان اعرف الوالد قلبه رهيف.....

بنبرة توسل جاوبتني  :- لا عفية صفاء والله محجيت بس اسمع خل افهمك

_ ولا حجاية وحدة اله اربيج من جديد

ظلت تحجي وتبجي مااهتميت الها سديته بوجهه

كل متجي تسويلها مشكله خرررب هيج أخت دلالنا

الزايد الها طلع عينها بس سهله تدلل.

.

.

.

زهراء: راح بابا اتأخر شويه واجه عرفنا اخو أسراء

جاي ديتعارك ويا صفاء لان أخته متصله بصفاء

وبابا مرزلهم اثنينهم

ماما استأذنت من بابا اخذت عبير وراحت للمنصور

ديجهزون للمدرسة واني رحت دااسوي حلويات

اليوم خالتي تجي يمنا ، بابا راح للمكتب عنده بحوث ومريم أجت دتساعدني دااشتغل اندك الجرس غسلت ايدي ونشفتها و طلعت للباب صار بوجهي صفاء.....

لزمت طرف ملابسي وعصرتها قوي

دنكت وحاجيته

زهراء: هلو صفاء تفضل رايد شي؟

_لا بس الكهرباء طكت واجيت اكوي القميص اذا

مابيها زحمه

_لا يمعود شنو السالفه جيبه أكوي الك....

_ لج لا اني اكوي متعود ..

_ لا اا والله هسه ثواني اكوي واجيبه الك  .. 

_ يله لعد حنتعبج زهورة

هزيت راسي واني مدنكة :- لا والله ماكو تعب ..

اخذته منه وهو دخل جوا يم بابا

رحت اني كويت القميص وكملته

دكيت الباب عليهم انطيته القميص اخذه وراح ..

ورحت غسلت ورجعت للمطبخ وانصدمت

بمريم القنبله المطبخ عبارة عن طحين وكشور

البيض تارسه المغسله رحت عليها لزمتها من ايدها

_هاي شمسويه أنتي؟

_كيك شنو متشوفين لو بس أنتي حلال تطبخين

وأني حرام

_أي بس مو هيج

_لا هيج هذا اليه أني وعبير وذاك السويتي

أنتي الكم أنتوا الكبار

_ليش هي عبير زعطوطه وانتي تقسمين بكيفج

_لا مو هيج بس هو من أبدي اتعلم اتعلم براسها

لعد شلون الواحد يتعلم

_ والله كون تسمعج ...  اخذته منها وعدلته

انوب زعلت وظلت تبجي ، عطت بيها يابه دولي ولا تكبرين ..

نظفت الهوسه ورحت دااسبح قبل لا افوت للحمام شفت موبايلي ديرن باوعت هذا

صفاء خير ياربي مو من عوايده أبد يتصل بيه

جاوبت طلعت عمتي بهتت و سلمت عليها

كالت :- أكولج يمه زهوره متجين يمي شويه ضايجه؟

_ لاعمه مااكدر ماما طالعه اذا تحبين تعالي

يمنا سويت بسكويت مثلج وكيك يلوك لحلكج

_يايمه هو اني أذا أكدر خوب اني أجي ليش اكولج

تعالي يمه

ابتسمت عرفت بيها لان صفاء بالبيت وتريدني

أجي خصمتها وياها وكلتلها مااجي زعلت مني وسدت التليفون بوجهي ..

ضحكت و دخلت سبحت وطلعت من الحمام

وأسمع صوت عمه يمنه فتت للاستقبال شفتهم متجمعين كلهم صفاء وبابا وعمه وعمو سلمت عليهم

رحت يم عمة همست باذني :- كلتلج تعالي مااجيتي عاد أجيت أني صفاء جابني ..

حجيت بداخلي شكد لوتيه شافت ما مني

جيه اجت وقبل شويه سوت نفسها مكسره

كلتلها هلا بيج عمه البيت بيتج

جاوبت مبتسمة :- يمه هنياله اليحطج بيته ولك صفاء شم ريحة الحلويات باوع البيت شلون نظيف يلمع

لمع الله وكيلك أنظف من وجه غيث وبنت خالتك

بس أحنه شنسوي للماعدهم ذوق

انصدمت هاي شدتحجي اباوع صفاء كوة

كاتم ضحكته وعمي خربان ضحك وبابا صافن مدري شبي .

بهالاثناء دخلت عبير تضحك وماما ترزل بيها سلموا وفاتو واني  رحت جبتلهم مي وقدمت كيك وبسكويت هم وعمه مستمره تحجي وتقصف بأسراء وصفاء

وهذا مثل بلاع الموس ميكدر يحجي أنوب اندارت ع ماما تحجي وياهه

_  أكولج داده هاي بنتج زهوره بعد لتطلعيها

ترى عيني عليها عندي واحد تيس الا مااكسر

راسه واخلي يمشي عدل ويفتح عيونه ويشوف

خلقة الله زين

ماما جاوبتها بتعجب : شنو أم حسين يا تيس وشجابه على زهراء

_هسه انتي مالج دخل بس احفظي كلامي زين

ماما هزت راسها ومادري اذا فهمت او لا

واني تركتهم ورحت للمطبخ خجلت من كلامها كلش ...

عمه صايره ولا تستحي تحجي طك بطك...

ورة دقايق هم  صاحتني تريدني أرجع اكعد يمهم غلست  مجاوبتها ..

و كعدت احضر العشاء  ، اجت عبير ساعدتني

سوت المقابلات انتبهت هاي ولا حاقده

عليه بسبب الكلام الي كلته الها عادي تتشاقه و

تضحك ويايه من صدوك حقدت ع نفسي...

شفت خالتي تأخرت رحت خابرتها كالت متكدر تجي واعتذرت من ماما ..

مدينا السفرة و التمينا ع العشاء احنه وبيت عمو

كعدة حلوة شبعنا ضحك عبير وعمه

من ينجمعن يبدن بالعالم تصنيف ماكو واحد يسلم

منهن

ام صفاء:-  أكولك يمه صفاء صار عمرك ٢٦ سنه شوكت

ناوي تتزوج لو بعدك تلطم ع الماضي هاي صارلك

سنه ونص واني اكول خلي يطيب جرحه

جاوبتها عبير : عمه تدرين اني شنو الي يخليني

صافنه

_شنو يمه ؟

_هذا ابنج صفاء بس ها مو تزعل صفاء احنه

دنتشاقه المهم عمه أبنج ماعنده ذوق راح حب

وحده تكول طشت لحم زين هاي اذا تعاركتوا

وهي عصبت متخاف تروح تكفخك وتجيب اخرتك؟

ضلينا نضحك   و ماما تخزر بعبير  تريدها تسكت تنتبه ماكو و هاي كاعده بصف عمه وشابعات صفاء تصنيف  وهو مغلس ولا يحجي ذابها ع الصامت..

ماما كالت لعبير بس كافي ماما عيب عبورة

عبير: أم السوس شحجينا كله عيب عيب ترى

اسوي سواية مريم من تهددكم تسكتون عني

لا أكوم أبجي هههههههههه

صفاء: هسه أنتي مشبعتي تصنيف مو خلصنا عشاء وانتي بس تحجين

_لا عليك الله صارلك ساعه ساكت بس هذا الطلع

منك صارت زحمة

صفاء: يعني شسويلج هو أحنه مصدكين رجعتي

تتشاقين ويانه عمي صنفي منا لباجر طاحظه

الي يمنعج بس أكلي عشاج ترى برد... 

بعدها بشويه راحوا بيت عمو  كلام عمه ابد

مااثر بيه لان أكو شي بداخلي انكسر منا الي

سويته بعبير أستقتلت وضوجت الكل علمود صفاء

وهو بالتالي كلمن ياخذ نصيبه تركتها بيد الله اذا

هو قسمتي او لا ومنا هو بعده مو ناسي اسراء وقبل فترة يريد يرجعها يعني بعده قلبه متعلق بيها وهيج اني راح اتعب ويا خليني اركز بدراستي احسن ..

صفاء: رجعنا من بيت عمي لزمت امي حاجيتها

يوم الكلام الي حجيتي ابيت عمي عيب ترة كافي تلميحات لخاطر ربج لتملين عقلها للبنية خليها دتدرس وهالسنة هيه سادس ...

_ اكولك انت اعمى ؟ شوف  بنت عمك وشوفها شحلاتها بس عيونها يسوون رأسك بس انت راسك راس الصخل قافل ع ذيج الهايشه هي صح بنت أختي بس اني فرحانه من ماصارت الك

وأذا انكسر قلبك وكسرتهم ويطبك طوب...

_ يوم ترة هالمرة صارت مرة لخ ما اريدها تنعاد اخليكم واطلع والله

_ لك تريد تفشلني ويا بيت عمك هسه شيكولون شبيها بنتنا ؟

_ يووووم الله يخليج دا اكولج كافي شيلي الفكرة هاي من بالج اني وزهراء مانرهم

_ لك يمه أني تعبت واريد الي تساعدني شوكت اشوف حفيدي

اليسمعج يكول ماعندج أحفاد هو أبن حسين أكبر من عبير واصغر من زهراء بسنه ..

لك هو وين شايفتهم كلمن بيت وحده اريد اشوف ابنك

شفت الكلام مايجيب نتيجة كتلها تصبحين على خير يوم ... تركتها وصعدت نمت

عبير: الحمدلله وضعي اتحسن بس كلام زهراء

كل مااجي أنام ينعاد عليه ترك اثر بالغ بنفسي

احس صدى يألم مسامعي

اتمنى انسى ...

اول ايام مقبلت ماما اداوم بس زهراء داومت ،  ضجت بالبيت فكرت  خلي أكعد بالحديقه الي باب البيت

ودنيا العصر رحت كعدت ،  شفت زهراء جايه من بعيد  تمشي بعصبية ...

انتبهت أكو ولد يمشي وراها ويضحك ووضعه مو طبيعي فهمت انو ديتحارش بيها ،  دخلت ركض

للبيت جبت الماسحه وطلعت...

كعدت انتظره يوصل لباب بيتنا حتى اخبزه وخاف يسوي شي اني قريبة ع البيت حتى أنهزم  ...

صفاء .. العصر رجعت للبيت واني بالسيارة من بعيد شفت هوسة يم باب بيت عمي عبير لازمة الماسحة ودتضرب بالولد وصوت صياحه كلما اقترب يصير واضح:-  متستحي تمشي وراها ماعندك اخوات مو عيب عليك...والولد مخلي ايديه على راسه يحمي نفسه وديحاول يشرد وهيه وراه وتضرب بي ..

دست للسيارة بسرعة ووصلت يمهم وانصدم بالولد

الي متوقعتها منه يسويها نزلت من السيارة اخذت الماسحة من عبير وشمرتها ، صاحت عبير هذا ديتحارش بزهراء ويمشي وراها

انصدمت اكثر  ثبته قوي وضربته بوكس على وجهه ....

يتبع

بارت صغير تعويض 😬

في شريعة العشق

بارت 15

نورا ناصر

ثالث يوم بالدوام شفت شخص  يباوعلي من بعيد

شبهت عليه ، شايفته بمكان بس ناسية وين ؟

مهتميت اله وداومت عادي ..

اله باليوم الرابع من الدوام رجعت مشي للبيت

واني بالطريق واحس خطوات ورايه

خفت التفت ، صارت صوت الخطوات قريبة مني

ويا كل خطوة اسمعها كانَ الخوفُ يتمدّد بيه ، والقلقُ يتكثّف ، والعرقُ يتصبّبُ على جبيني واحس قلبي وصل لبلعومي ..

لشويه وصار يهمس قريب مني

يحلوة اوكفي بس كلمتين نحجي

فتحت عيوني بصدمة

يربي خاف يخطفني شسوي

كال اني خطبتج من ابن عمج بس كال رفضتيني

ماتردين تزوجين اني جاي احاول لان مدا اكدر اطلعج من بالي ، عجبتيني كلش ...

ظل يتقرب ويحجي وياي ويهمس وكلامه صار جريء

ويتوسل ، عباله يسيطر على قلبي بهاي كلماته ميدري قلبي حاجز محبوبه من قبل سنين..

بعد خطوات واوصل لبيتنا وهو مستمر يمشي واني سابقته بكم خطوة بس ، شفت عبير ظلت تباوعلي من بعيد ، اشرتلها بملامحي المتجهمة ، طبت تركض وطلعت بيدها الماسحة...

اجت تركض باتجاهنا شالت الماسحة وضربته وين اليوجعه ،  تضرب بي وهو يحاول يحمي نفسه منها ويريد يشرد يمشي ورافع ايديه يحمي وجهه ومرة راسه ..

وهيه وراه تعيط واني مخليه ايدي على حلكي وجسمي كله يرجف رجيف مصاير اجر بيها اريدها تفوت متقبل مستمرة تهجم عليه باوعت  شفت سيارة صفاء وكفت يمنا ..

متت خوف مدري شصار الي طبيت اركض للبيت اعصر بيديه وابجي شمرت جنطتي حتى مجاي اكدر اشيلها احس حيلي كله بايد وصوت صياحهم وصوت صفاء دا اسمعه وهو يصيح على الولد طلعت ماما على صوت صياحهم ..

صفنت بوجهي من شافت حالتي دنكت وخفت منها كلش عافتني وطلعت وراهم ..

صفاء : كلب نذل مو كلتلك البنية مموافقه شعندك لاحكها ...

لكمته ببوكس الدم كام يخر من خشمه وكع بالكاع وايده على خشمه انملت دم ، وخرها وباوعلي

ولك تضربني صفاء ..؟؟

دنكت عليه ورفعته من ياخته واكسر راسك ولك شعندك لاحك بنت عمي ؟

_ لك صفاء أني اريدها وطلبتها بالحلال وانت تعرف هالشي وردت بس اقنعها ...

نزلته للكاع بقوة ارتطم بالارض صيحت بوجهه : تقنعها ياعار تف عليك ...

اجيت اموته من الضرب ، طلع ابويه سحبني منه

_ لك صفاء راح تموته ونبتلي بي وخر عنه

_ عوفني يابه عوفني اادبه هالعار

لزمني ابويه قوي وبعدني عنه

وهيثم ديحاول يكوم من الارض ومتوجع

صيحت عليه  حضر عمامك انعل أبوك لابو شرفك عار ناقص ...

التفتت شفت عمتي بالكوة لازمة عبير

تريد تهد ويايه وزهراء ماكو مختفيه ...

عدلت ملابسي واني التقط انفاسي

راح ابويه على هيثم وكومه وكله روح منا يلله

وهذا الجبان ماصدك لحس صوابه وكام ....

عمتي كالت صفاء منو هذا تعرفه انت ؟

جاوبتها واني لازمها من كتفها واحاول اطببها جوه

اي عمه عود جان صديقي هو نفسه الي يريد يخطب زهراء وهيه رفضت

_ وشعنده لاحكها للبنتي مو رفضته بعد شكو جاي تابعها ؟

_ كتله يحضر عمامه خلي نأدبه ونطيح حظه ناس متجي اله بالعين الحمرة اله اخلي عبرة لغيره فوتي عمه فوتي جوة ...

زهراء ...  متت خوف واني انتظر امي تفوت عليه واني بغرفتي ، خايفة لايطلعون الصوج بيه او عبالهم اني مواعدته  ..

دقايق واسمع صوت امي من الصالة وينج زهراء تعالي هسه ..

طلعت ارجف امشي يمكن عبالهم أني مواعدته ، افرك بيديه امشي وانصي مثل الي مسوي جريمة كبيرة اول مرة اتعرض لهيج موقف تحرش .. 

بس طلعت صاحت بوجهي عبير: ولج انتي شلون تسكتيله وجاي وراج للبيت مو عندج موبايل ويسجل جان سجلتي كلامه انعل أبوه لابو اخخخ بعدني مابردت قلبي بي...

بس عفيه صفاء خوش ادبه ولج بيج بخت أني

كاعده بالباب وشفتكم جان كالوا هي صاحبته

الناس بس تريد حجايه ع الواحد أنتي الى متى تبقين هيج جبانه لو لسانج بس عليه

بعدها تحجي وتفرفح راحت ماما جابتلها مي

حلكها يبس من كد ماعيطت انطت المي الها و اجت ماما يمي تقربت عليه كلش واني ابتعد عنها

_ بيج بخت اختج كاعده ولج لو طالعه هاي جيرانه ام محمد وشايفتكم جان سوتج فرجه  للعالم أدري يا ماما مو عندج موبايل جان خابرتي صخمتي...

أنتي شلون بيج ليش ماصعدتي سيارة

واجيتي للبيت اكو وحده تسوي سوايتج جايه من

شارع المغرب  لهنا مشي طبعا يشوفج أنتي وهذا شعرج ولبسج وجايه تتمشين شي طبيعي هيج يسوي...

ولج زهراء من باجر تلبسين حجاب وأريد الله يهديج وتبقين سافرة ..

اكتفيت بس اهز راسي ومدنكة والدمع بطرف عيني

وامي مستمرة ترزل بيه بدون توقف ..

جتي عليها عبير سحبتها من كف ايدها وظلت تحجي وياهه بهدوء :-  يوم شي صار بعد

والصوج مو كله بزهراء هو أبن حرام وناقص شلون يلحك بنت عم صديقه هم ولد الحرام  كثرانين هاي الايام ...

راحت امي كعدت ع التخم وجرت نفس :- هسه شكول لابوج وصفاء كاله حضر عمامك موخوش سالفة والله

ظلت امي تحجي وي عبير بالموضوع واني رحت اركض لغرفتي وايدي على قلبي ، ينبض بعنف من الخوف والحيرة اكلتني اكل ..

بالليل بقيت بالغرفة ماطلعت وبقيت بالسرير متلفلفة ونايمة ، اجه بابا ديريد يحاجيني سويت نفسي نايمة ماكمت ، وراهه دخلت عبير تصيحني ع العشاء هم مجاوبتها ..

يوم ثاني الصبح بقيت بالبيت ومطلعت للدوام وحتى اهلي مشفتهم للعصر انفتحت الباب عليه وشفتها ماما

كالت كافي حابسة على نفسج ديري بالج ع البيت رايحين للطبيب انو وعبير دنجيك حالتها ، ديري بالج على اختج ..

انتفضت من السرير بسرعة واني اعصر باصابعي

بنبرة حماسة جاوبتها :- صار ماما تتتددللين

رفعت تك حاجبها ، تنهدت ، طلعت وسدت الباب .

طلعت اني من الغرفة مشفت بس مريم ، تشكلت وبلشت المع البيت واسوي حلويات وكيك

واني مشغولة بالمطبخ اندكت الباب ، صحت على مريم تفتح الباب راحت واجت كالت  عمه أم حسين جتي يمنه ...

طلعت تلكيتها من الباب وفوتتها بالمطبخ ..

بس دخلت اشتمت :- الله شنو هاي الريحة الحلوة

_ عمه دا اسوي كيك وحلاة جكليتيه

_ اي عاد كيكج من هذا اليعجب مرة حسين شكد تسوي كيك وذيج مرة حيدر احسه زفر زفر ولا ينأكل اله الكيكه الي تسوي اكل وما اشبع منه ..

ضحكت :- تدللين عمه هسه بس اطلع الكيكة اخليلج واذا تردين حلاوة هماتين

اشرت بيدها :- لا لا ما اريد حلاوة تكعد على كلبي وخاف يصعد السكر بس كيك وهم قطعة لصفاء اخذهه ويايه اكوله من زهراء

دا اشرب مي غصيت

كامت تضرب على ظهري :- اسم الله اسم الله هاي شبيج عيني زهورة بس سمعتي باسمه غصيتي ، اي حقج ماتنلامين .

انداريت عليها وكوة مسيطرة واحجي :- لا عمه عفية هسه شيكول عليه عيب استحي والله ..

_ لج وعليمن تستحين انت اول وتالي اله ..

ظليت اكل واضرب على صدري بقبضة ايدي ، وهيه تكول اسم الله اسم الله ..

هسه معليه اريد حصتي وحصة صفاء

سكتت وافكر خلي اخليلها قطعة واغلس على حصة صفاء بلكي تنسى ..

اندكت الباب كالت :- يا هذا منو الي جاييلكم ؟

_ ما ادري عمة هسه اطلع واشوف ..

طلعت للباب فتحتها صارن بوجهي  عائلة صديق بابا

زوجته وامها الي اجونا قبل فترة  ، سلمت عليهم وفاتو جوة  وكعدو بالاستقبال ..

رجعت للمطبخ عمه كالت منو ؟

_ عمه هذه زوجة صديق بابا وامها  ..

_ امج ماكو مو ؟

_ اي عمه راحت للدكتور عمود تشوف حالة عبير ..

_ اروح اني اكعد يمهم عيب يبقون وحدهم بين متجي امج ..

راحت كعدت يمهم واني بقيت احضر الهم الضيافة ..

خلصت واخذت الصينية ورحت للاستقبال واسمع عمه تكوللهم

: - والله جيتكم ع عيني وراسي بس أني البنية خاطبتها لأبني الدكتور صفاء ..

النسوان ظلن وحده صافنه بوجه الثانيه وعمه تباوعلي من فوك ليجوة واني بعد شويه وتوكع الصينية من ايدي ..

بقيت اباوع  بوجه عمه مو من حقها

تتدخل بيه وتطرد ناس جايه دتخطبني هي لا

أمي ولا أبويه ومالها سلطة عليه عزززا هاي أذا

سمعت ماما او بابا عرف هي مفشلته كدام جماعته

شحيسوي عزززا العزاني

طلعوا النسوان رحت ع عمه حجيت وياها

_عمه شلون هيج تسوين من حالج ترى محلو هذا

التصرف أبد أنتي مااستشاريتي لا ماما ولا بابا

ولا حتى أني شلون تطردين النسوان من شورج

هسه أذا عرفت ماما تتخبل

_والله جنج مكيفه وتريدين تتزوجين بنت سوسن

لعد دادة ليش عيونج تنط من تشوف وليدي ؟

_ عمه بس خلي افهمج

_ اسكتي بنات أخر وكت ولا تنحزرن أني سويت هيج علمودج شفتج هايمه بحبه لصفاء كلت خلي أساعدها..

دنكت وسكتت ..

هيه كملت كلامها :- جايه تكمزين ع رأسي جنج قرد ومضيع أمي ولي من وجهي ...

راحت تمشي صوب باب البيت دتريد تطلع

التفتت عليه :- عود من تجي أمج كليلها عمتي

طردتهم وأني اريدها من الله حجه ..

و يلا أني رايحه حتى الكيك مالتج هم ماريده ..

زهراء: ظليت صافنه هاي شبيها أنوب مقتنعه

بتصرفها وتصيح عليه ، اووووو شعليه من يجون

بابا وماما هم يحلوها أني مالي دخل ....

عبير: من طلعنا من الدكتور بعد ما طمن ماما ع

وضعي أمي اتصلت ببابا حتى يجي يأخذنا ونرجع

للبيت جاوبها نص ساعه ويوصل كعدنا ننتظر

الى أن اتصل بابا حتى نطلعله ، طلعنا شفنا واكف بباب العيادة ..

  أول مصعدنا بالسيارة بابا سحب أيد ماما وباسها

ولا عبالك أني موجوده ولايمهم أني هم غلست

وبلش كاظم الساهر يتغزل بليلى واني أباوع

عليهم كل شويه أدير راسي ع واحد منهم حتى

ركبتي كامت توجعني أخير شي حمحمت وهم ولا

يمهم

بابا: تدرين أم بنياتي داافكر ناخذ أجازة ونسافر

لتركيا بالصيف مسافرنا لان التهينا بعبورة واني

أعرف نفسي مقصر وياج

ماما: لا عيوني حشاك من التقصير أشو شايلني

ع رأسك واذا توجعت أني انت قبلي تتمرض اجمل

عطايا ربي أنتَ

مديت رأسي من المجال الي يصير بين الكشنين

مال الصدر

_اكولكم كاظم وليلى انتوا تتغزلون واني متت

جوع اشترولي لفة عاد وكملوا غزلكم

والله الجماعه يمكن جانوا ناسيني شو ذوله

التفتوا عليه بصدمه عوزهم يكلولي أنتي من

شوكت هنا .....

وصلنا قريب المنصور بابا مر ع مطعم جاب عشاء

جاهز وكالعادة اشترى مسكة مال ورد لماما واجه

كاظم الساهر انطه لماما الورد واني لفة أمي كل

عقلها فرحانه بالورد واني بهاي اللحظه اشوف

لفة الشاورما شريك احلامي من الجوع ...

وصلنا للبيت تلكتنا مريم

_ترى عمه ام صفاء جانت هنا وراحت

بابا: ليش ماانتظرتنا

_ ماادري حتى مابقت تتعشى يمنا جانت كاعده

هي وزهراء سويه

بابا: زين منو اجه منو راح ؟

مريم: لا بابا بعد ميصير افتن و اوصل حجي

عبير متقبل كالت الفتن أشد من القتل والله يذبني

بالنار

بابا: بويه سألتج ماكلتلج فتني  لعد أنتي لو

اطخه لو اطلع مخه عجيييب

دخلنا تلكتنا زهراء عبالك مسويه فد مكسورة

ماما عرفتها لحكتها

زهراء: من اجوا أهلي خفت هسه عبالهم أني

طلبت من عمه هيج تسوي المصيبة ماما

حافظتني من شافتني هيج مرتبكة لحكتني

للمطبخ

_شبيج زهوره شكو أحجي

زهراء: ها مو شسمه هاي عمه

_ شنو شسمه شنو عمه أحجي بنتي شكو

زهراء: حجيت لماما كولشي تفاجئت

وكالت  وانتي شكو خايفه شعليج نكول لأبوج وهو

يتصرف لتظلين من كولشي تخافين وراج كلية

ماما تشجعي ..

هزيت راسي واني مدنكة ..

كالت يلا أروح اغسل واجي حضروا الاكل

أنتي وعبير هاي بس تجوع تثبرنا طالعه ع أبوج

ومنا هم أبوج جوعان مابيه حيلهم والله احس

السكر مرتفع

كتلها سلامتج ماما ..

_ الله يسلمج ..

تركتني وراحت اطمئنيت من كلامها ماما دائما

تشجعني وتقويني كلامها طاقه أيجابيه اليه

دائماً...

اجت عبير باوعت عليه

_زهراء ترى ميته جوع عليج العباس لتتصفنين

تعالي نحضر الاكل وبابا هم جوعان ...

كمت وياها ساعدتها هي جانت ممنوع تدنك هواي

الدكتور مانعها تعشينا بعدها ماما فتحت الموضوع

ويا بابا صار نار كام يعيط باوع ع الساعه بعد وقت لبس وصاح عليه وينج زهورة امشي ويايه

تفاجئت وصفنت بوجهه :- ووين وين بابا ؟

_ لبيت عمج يلا امشي

_ بس بابا

_ امشي داكولج ..

مشيت وراه واني ساكتة ..

دكينا الباب طلع عمو همزين صفاء جان توه

متعيين وعنده خفر جان متت بدمي من الخجل والفشلة ..

دخلنا بابا حجه وياهم عمو تخبل بس عمه جانت

ترادد

_أبن عمها شبي شناقصه دكتور وحلو ومثقف

وبعدين اني ماارتاحيت لذني النسوان و زهراء هم

بنتي وشفت المناسب وسويته وشتحجون اني

مقتنعه بتصرفي..

باوعت عليه وخزرتني

بابا كام على حيله واستأذن كال الحجي ضايع عليمن

اتعب نفسي بس بعد أم حسين ممنوع تدخلين

بهيج مواضيع مصيرية صح أحنه أهل بس الزواج

قرار ومن حق الاهل والبنية مو زوجة العم تحسم

الامر ..

كالت اي يابه حقك واني اعتذر بس ترة اكيد زهراء مجانت راح توافق وهم رجعت باوعتلي مخنزرة

واني دنكت ..

صفاء: تحدد وقت الكعده واتجمعوا عمامي

واجوا أهل هيثم  وعمامه وشيخهم ..

ابو هيثم :- عمي أبني خطبها وانتوا رفضتوا وهو غلط

مااكول ماغلط من لحك بنتكم بس احنه هسه

كاعدين بداركم ونصحح الغلط بالصح أني ارجع

واكول طالب أيد بنتكم المحروسه لأبني وكدام

هالوجوه الخيره واتمنى ما ترفضوني

جاوبه ابويه: حجي طلبك ع عيني و رأسي بس

بنت اخويه أني خاطبها لأبني صفاء وهسه ارجع

اخطبها من اخويه وكدام الكل....

صفاء: انصدمت من كلام الوالد حتى مااخذ رأيي

من حاله فجر القنبله الكل ظل صافن ومدهوش

بسبب كلام ابويه انتبهت عمي تحسين خازرني

يمكن عباله اني الطلبت من الحجي هيج يحجي

احتاريت شنو اسوي هيثم من حاله نط وظل يصيح

_أنت شكو كبرتها ورفضت وهسه سويت كعده

خو جان كلت أني أريدها متستحي مو عيب عليك

جايبنا وجايب شيخنا حتى تذلنا لو تهينا

جاوبته :- بنت عمي و أني اولى بيها دمي ولحمي شكو انطيها الك وانت اذا رايدها صدك لازم تخاف

عليها مجان لحكتها وتشمر حجي سخيف شلون

أمن انطيك بنت عمي وانام مرتاح ...

ظل يعيط ويغلط شويه ونتكامش اني ويا وعمامه وكفوا بيننا ،  تالي طلعوا بالتدفع من البيت

رجعت جوا وهنا القنبله الفجرها الوالد دخلت لكيت ابويه وعمي تحسين يصيحون والظاهر

عمي مقابل ع تصرف ابويه وعمامي جانوا

ديهدئون بالوضع عمي بس شافني اجه يمي يحجي بعصبية :- ولك أنت يومية يمنه ليش محجيت وكلت أجي هنا تحطوني بهيج موقف كدام الزلم هسه أقل

شي يكولون أبوها طرطور وماعنده رأي

: عمي اهدأ هسه الصار صار واني صدكني

مثلك كولشي مااعرف انصدمت بكلام ابويه

اصلا حتى ماعندي علم بي حالي حالك صدكني

ظل عمي يصيح تالي ترك بيتنا وطلع لان هي

الكعده جانت بيتنا بأعتبار احنه بيت عمها الجبير

وبعدها عمامي استأذنوا وطلعوا

رحت ع أبويه حجيت وياه: يابه أنت شلون تسوي

هيج بينا كدام الزلم وتخلينا واحد يباوع بوجه

الثاني وبعدين هذا زواج وحياتي هاي انت شلون

تاخذ هيج قرار يخص كل حياتي مو جزء منها

_العندي كلته وغصباً ماعليك تتزوج بنت عمك أنت هواي انطيتك مجال اخوانك كلهم اختاروا

زوجاتهم بأختيارهم لان هم صح أما انت رحت

حبيت اسراء ومية مرة اتعرضنا للاهانه بسببك

وكلت ميخالف أبني يحبها بس هسه صار لازم

اتدخل ..

_ يابه شنو تتدخل قابل زعطوط اني لو ابن ١٦ سنة وتزوجني بكيفك وبدون حتى متاخذ رأيّ

_ ولك مكيف بروحك عود دكتور واذا دكتور ع

نفسك مو ع الجتف الشالك هذا عمك تحسين

دكتور وذاك عمك كريم عقيد وعمك مهدي قاضي

لليوم محد وكف بوجهي أنت جاي من تالي

تتحداني...

_ هسه بشنو متحديك متكولي بس بالاخير يا ابويه هاي حياتي اني واني الي راح اتزوج ..

_ لك اسكت كافي ما اسمع صوتك ، ها خلي ببالك أسراء  الاسبوع اليجي زواجها وانت هم الاسبوع اليجي تخطب وحق الحق والي انزله اذا عارضت بريئ منك ليوم الدين

_  يابه مو هيج الحجي لتاخذني بعصبيتك

الموضوع يحتاج تفاهم مو صياح وفرض رأي

_ماكو تفاهم بعد العندي حجيته وخلي ببالك

اسراء اذا شافت دلال من زوجها تظل تضحك ع

نفسها لان حبت قبله ، المرأة تميل للي يدللها وخو

اذا صار عدهم اطفال تنساك تماماً..

انت هم حط عقلك براسك وامشي ورايه تاليك

تجي تشكرني لان راح ازوجك بنت عمك ....

التفت ع أمي أكولج أم حسين اليوم شنو من الايام وهاي بنت أختج شوكت كتيلي تتزوج يايوم من الاسبوع الجاي؟

_اليوم ثلاثاء واسراء الخميس اليجي زواجها

_هذا هو حضر نفسك لعد انت هم الخميس هي

خطوبه وهو عقد

صفاء: ظليت احجي وياه أبد ولا اهتم اخير شي

تركني ودخل لغرفته ظليت اباوع لامي بعدم رضا

كالت شكو تباوعلي هو ابوك من حاله خطبها الك

_ لا والله انتوا اثنينكم طابخيها سوا

دارت وجهه وخلت ايدها على خدها

_ قابل هيه دولمة

تأفأت وطلعت من البيت تمنيت هسه يصير كدامي هيثم جان طلعت ضيم الدنيا كلها بي ..

زهراء: اجه بابا وجه ميبشر بخير استقبلته ماما

اني جنت مطمئنة لان ماما طمنتني كالت مجرد

اعتذار وتخلص

_شبيك عيني شو وجهك مزنبر خو ماكو شي

التفتت ع مريم طلبت منها تجيب مي لبابا

سألته شكو

بدأ يحجي انصدمت من الي صار ماما عصبت

بس ظلت تحجي بصوت ناصي كدام بابا متحب

صوتها يعلى بوجه بابا

_شوف تحسين ذاك اليوم زوجة اخوك تطرد

خطابة بنتي وسكتت وهسه اخوك واذا يعني

اخوك الجبير بس ميصير هيج يضربنا عرض الحايط احنه اهلها واحنه الي نقرر مو ياهو اليجي

ويقرر نيابة عنا وفوك كل هذا نسوا رأي زهراء

وهي صاحبة الشأن

بابا: اهدئي لتعصبين ليرتفع السكر مو زين عليج

ياعيوني كولشي واله حل وقابل هم جبرونا

الحل بيد زهراء شتكول أحنه وياها وشرط يكون

اختيارها صح وباوعلي بنظرة تحذير

ماما باوعتلي  بنظرة وطولت النظر ماعرفت افسر

نظرتها بعدها استأذنت ودخلت لغرفتي مااعرف

عقلي مشوش صح جنت متمنية صفاء بس احس

اكو شي بيه مقابل يرفض هذا الارتباط حجيت

بداخلي

_زهراء مو هذا الجنتي تتمني صبرتي وجانت

نهاية صبرج الفرج بعد شتريدين ليش مختنكه

يمكن لان قهرت أختي وعيرتها بمرضها يمكن

لان ماما هواي انزعجت من تصرفاتي

بعدين كلت ماما أكيد حترشدني للشي الصح ظليت انتظرها بس مااجت لغرفتي انوب بابا

رمى الكرة بملعبي وينتظر مني جواب

تالي أني صعدت لعبير دخلت لغرفتها ملكيتها بس مريم

نايمه صعدت للسطح لكيت عبير متمدده ع القنفه

حست أكو احد وراها الفتت باوعتلي وظلت ع

وضعها رحت جبت كرسي واجيت كعدت يمها

باوعتلي

_خير زهراء اكو شي أحجي؟

انتي شعندج هنا الوقت متأخر ترى ؟

_رأسي يوجعني وصعدت هنا محبيت ازعج مريم

خطيه نايمه ليش اكو أشكال اذا نمت هنا ؟

زهراء: لا عادي أكولج عبير شنو رأيج بكلام بابا

_ماادري حياتج وانتي حرة بيها

عرفت متريد تدخل خاف هم اجرحها

_هاي شبيج عبورة أعرف غلطت والنبي تأنيب

الضمير موتني لتظلين هيج  شايله بقلبج عليه اجيت دندردش دردشة اخوات

: أكول انتي شعجب صعدتي لهنا صار هواي

مصاعده للطابق الثاني

عرفت ع شنو دتلمح هو صح اني مصعدت من يوم الي حجيت وياها بقسوة

_لتظلين حقودة وهاي رأسج ابوسه الج بعدني

دااحجي..

دفرتني اجيت اوكع من الكرسي

خربت ضحك عليها باوعتلها مخنزرة عليه

عبير: اني لو حقودة مجان باوعت بوجهج

باوعي حكولج شي و أنتي القرار الاول والاخير

الج و اتأكدي ان بابا وماما وياج زهراء سوي

الي يناسبج واختاري سعادتج بس مو معناها

تختارين سعادتج وتتغاضين الامور الثانوية لا

احسبي حسابج رشا حماتج حتصير والاهم من كل

هذا صفاء قلبه مو الج اما اذا انتي كدها وتكولين

اكدر اكسب قلبه اتوكلي والله يسهلج بس ترى

هالشي مو سهل حتعبين هواي وتتعرضين للصد

ويمكن للكلام الجارح

هذا الكل العندي وهسه من رخصتج بدأ مفعول

العلاج اروح انام

كلام عبير صح صفاء عنيد واكيد راح

يتعبني افكر بالموضوع والله كريم ....

يتبع ...

النشر بين يوم ويوم واذا يوم صار ضرف ومانشرت اعوضكم بارتين ورا بعض ♡.....

سنة سعيدة للجميع وان شاءالله تحقيق الاماني

شهداءنا ، شهداء ثورة تشرين وكل شهداء العراق عيدكم في الجنة اجمل 💔

متابعة لحساب الكاتبة بلا زحمة

RUBA0SMIL

في شريعة العشق

بارت16

نورا ناصر

صفاء: ابويه قفل  اله اتزوج زهراء وانوب علنها امام الملأ والكل صار يعرف ابويه خطب زهراء اليه مبقى احد من العائلة ماعرف ..

ابويه كرهني بعيشتي اطب اطلع يتعارك ويايه

و امي مساندته واثنينهم عليه ..

مرات اصفن معقولة امي اسراء بنت أختها كارهتها بشكل مو طبيعي ليش وشنو السبب معقولة لان خذلتني ؟

ظلت الحيرة تحاصرني والتفكير أخذ مني مأخذ

اني مااريد أصير ظالم متأكد زهراء متنسعد

ويايه هي تحبني بس أني لا ...

وهذا الشي حيأذيها لان البنية من تحب تحاول كولشي تسوي حتى تسعد محبوبها فما بالك زهراء الي تحب من طرف واحد واني متأكد اي شي تسوي مراح اكدر اتقبله منها مو شايفها غير اختي الصغيرة ، بس شسوي لابويه الي ورطني وفشلني بنفس الوقت ورطني بزهراء وفشلني ويه عمي . ...

رجعت  للبيت وجنت تعبان كلش من تعب الشغل والمرضى ومنا التفكير بهالموضوع ، فتت للبيت فتحت الباب اجاني صوته من الهول ..

ها صفاء اجيت ؟

تنهدت عرفته شيريد : اي حجي جيت

_ تعال اشو احجي وياك

_ اعرف شراح تحجي ويايه واني تعبان ومالي خلك هسه اجلها رحمة على ذاك الاب ..

كام على حيله واجه يمي اني واكف بباب الهول ومتكتف وكاني مستسلم او تعودت على هالمهرجان اليومي

- : شوف ولك أني راح اروح ع عمامك حتى نحجي ويا عمك تحسين وغصباً ما عليك تجي ويانه نخطبها  لبنت عمك

نزلت ايديه وتنهدت:- اكولك يابه ترى كولشي بالاجبار ماعدا الزواج أني البنية مااريدها ليش محد بيكم ديفهم

عليه ياامة الاسلام مااريدهااااااا

صحت بعلو صوتي واني الزم  بقميصي واعتب بيها ورافع راسي ليفوك

تقدم عليه لزمني من ياختي

وظل يغلط ويسب بيه ويصيح : ولك وحق محمد اذا متجي ويانه بريئ منك ليوم الدين وانعل ابوك

لابو مرضعك ك*** ساقط سرسري مو محترمك

ليش تخليني اطلع من الكلجيه

اجت امي لزمت ابويه من ايده الي لازمني بيها : عوفه عوفه هذا واحد ناقص يريد يمشي

رأيه علينا امداك وامده بطني الجابتك ..

هسه مفهمت امي دتفكني منه لو دتحرضه عليه ؟

ابويه نزل ايده مني وظل يسب ويغلط

التزمت الصمت تركتهم وصعدت للغرفه

سبحت وبدلت رحت تمددت ع السرير

وافكر  كلت بعد ماابقى بالبيت

لو تحترك الدنيا شنو زعطوط أني ويجبروني

والله حلوة هاي ...

طفرت من السرير وطلعت جنطه ورتبت ملابسي بيها

ونزلت صار بوجهي أبويه واكف يم الدرج مبين يريد يصعد الي ..

بس شافني تفاجأ لزم الدرج وحجه بنبرة عتاب

_ها ولك تريد تطلع من البيت هاي تالي تربيتنا

الك تتركنا واحنه بهذا العمر عفيه بأبني تعالي ام حسين تعالي شوفي ابنج يريد يعوفنا ويروح ....

اجت امي خلت ايدها على صدرها : تريد تعوفنا صفاء وين رايح يمه ؟

جاوبتها واني انزل :- هو هذا الي ردتو شسويلكم يعني تارك الكم البيت عليمن هالعرايك بالطبة والطلعة اريح الكم والي ..

نزلت وهيه تبعتني وتحجي :- شوف اكولك اليطلع من داره يقل مقداره لتكول ماكالت أمي..

فتحت الباب وطلعت وكفت عيني عليهم :- لا اطمأني ما اكول ، هم ظلو ساكتين ..

تركتهم وطلعت للشارع صارت بوجهي عبير

ظلت تباوعلي بعدين باوعت ع الجنطه

_خير صفصف وين رايح ؟

_لجهنم التاخذني واخلص..

_الله وياك عود سلمنا ع الجماعه ...

باوعت عليها بنظرة استفسار ..

عبير:اي شبيك مو دتكول لجهنم يعني جماعتنا

كلهم هناك أنتم السابقون ونحن اللاحقون

تركتني وراحت صوب السوبر ماركت

واني طلعت رحت يم ولد صديقي من العمارة

مأجر شقه ببغداد ، اتفقت

ويا ادفع نص الايجار واشارك بالمصرف..

بعد ماتواصلت ويه اهلي واذا يتصلون ما اجاوبهم

طلعت ويا جماعتي نتعشى بمطعم صمد..

كاعدين دناكل ونسولف شفت  أسراء وخطيبها

فاتو للمطعم وكعدوا اخذتني نظراتي لعند اسراء وتأملت  وجهه جان عبوس ونظراتها كلها حزن

مدنكة وهو يسولف وياهه ومبين مهتم بيها ..

بس هيه ابد متقلدله ولا حتى تباوع بعينه

مكتفية بنقر اصابعها على سطح الميز

ونظراتها بالفراغ ..

ظلت عيوني شاخصه عليهم حسيت صديقي يدُغني

باوعت عليه كال ها وين ؟ مو  راحت عيونك شبيك صافن ..

اخذت الشوكة وغرستها بالاكل ودنكت واحجي احاول اسيطر على نبرة صوتي لا انفضح ..

_ لا هيج ماكو شي بس صافن

_ لك صفاء والله معاجبني وضعك كولي شبيك بلكي نكدر نساعدك ..

_ لا يا اخي ما كو شي واذا اكو اني اكولك عود ..

اقتنعوا وسكتو وغيرنا الموضوع

بس بقيت كل شويه استرق النظر الهم..

حمدت الله مشافتني اسراء الله يعلم شجان صار بحالها

مكدرت اتحمل المنظر الي كدامي وافكار براسي استعمرتني ، فقدت شهية الاكل وحتى مشاركة اصدقائي الكلام والضحك استسلمت لسكون عميق وهدوء غير مبرر ..

حسيت نفسي غريب خليت الشوكة على جهة

اخذت مي وجرعته واحس غصة ببلعومي متنبلع ..

كمت على حيلي واستأذنت من جماعتي

ظلو يحجون

_ يمعود صفاء بعد وكت احنا بايكين روحنا بوك وكله شغل وتعب اكعد بعد وكت لتخرب علينا طلعتنا ..

خليت ايدي على كتفه لا حبيبي اوس لازم اروح اترخص اني تذكرت شغلة جنت ناسيها لازم اروح

_ يمعود صفاء بيك شي مو على بعضك اليوم اذا محتاج مساعدة كلنا اخوتك هنا ..

_ متقصر حمودي حبيبي ان شاءالله ننجمع غير مرة هسه لازم اروح ..

رحت غسلت وطلعت بس بعد مباوعت على مكان اسراء وخطيبها ..

واني دااطلع صار بوجهي خطيبها سلم عليه : تعال سلم ع بنت خالتك كاعدة هناك  مو وصيتني عليها ؟

جاوبته بنبرة سريعة: لالالا مستعجل خابروني صديقي متخربط اريد اخذه للمستشفى انت سلم عليها وباركيلها نيابة عني ربي يسعدكم ان شاءالله...

حجيت هالكلام بس حسيت شي ديشك قلبي

داخلي يصرخ هاي مالتي ربيتها ع أيدي واخذوها

مني الميخافون من الله ...

صرت اندب حظي الكئيب احس حرب وقائمة بداخلي ...

جاوبني :- سلامات ان شاءالله ويوصل سلامك الله وياك ..

تركت المطعم وطلعت رجعت للشقه وحدي جعفر نازل لاهله ،  جريت باكيت الجكاير وصرت ادخن اريد ناري تطفى ...

يا الله صبرني بعد يومين عن زواجها شسوي هسه

احمل نفسي الذنب لان ما كدرت اسوي شي وبس بقيت اتفرج عليها وهيه تروح مني ..

تكورت على نفسي وحبست حزني باعمق نقطة من روحي وللخمسة الفجر يلله نمت ....

زهراء: مرت الايام التهيت بدوامي ،  ماما متقبل اشتغل بالبيت لان سادس  الشغل صاير ع عبير ومريم مع انو عبير هم بكالوريا ثالث متوسط ومريم صارت صف خامس وكل  ميشتغلون يختموها بعركه ..

عبير متتحمل تصرفات مريم لان  تزاغل ومتشتغل زين واني كاعدة بالغرفة اقرا ويوصلني صوت عركهم اضل اضحك وهم اتشتت ويروح بالي لوين وصوتهم يصير يوصلني بعيد وافكر بصفاء سمعت طالع من البيت كل هذا حتى ميتزوجني بس اني والله استاهل وحيل ويايه كون الزم قلبي وادوس عليه بالقندرة يخليني بمواقف بايخة كلش ويذلني يلعن ابو هالقلب شكد مأذيني ومعذبني ملكيت غير ابن عمي الي كضى عنره كله ديحب بنت خالته وحتى من انخطبت هم ميقبل يتزوج وحدة غيرها  تأفاأفت وقلبت الصفحة وصرت اقرا بالصفحة الي وراها...

عبير: مريم شلعت قلبي اكولها سوي هيج تعاند وتسوي العكس ارفع ايدي اريد اكفخها واتراجع كبرت بعد مترهم ..

طلعنا  داانغسل بالطرمه اني ارش مي

وهي تسحب بالماسحه ، ظلت تخبث ترجع

المي عليه عصبتني كلش ..

باوعت ورايه وظليت اتلفت منا ومنا  همزين مشفت لا ماما ولا  وبابا ولا زهراء لان حابسة نفسها دتقرأ ..

اخذت الصوندة ورشيتها بالمي ، ظلت تعيط واني اركض وراهه وارش عليها وهي تركض لتنهزم مني وتوكع واحنا طرمتنا جبيرة نكعتها تنكع يله تركتها.

كتلها يلله امشي ولي اني اكمل الغسل ..

ظلت تبجي وبوعيد كالت :- بسيطة والله بس تكعد ماما اكولها عليج ان شاءالله اتمرض حتى يذبوها براسج واني اكولهم بنتكم الشريره نكعتني

_دروحي مخبله تدعي ع نفسها بالمرض واذا

تمرضتي تشبعين أبر اني شكو عليه ..

دخلت وهيه تدردم والله بعد ولا اساعدج

فريت ايدي وكملت الطرمة .....

فتت جوة شفتها واكفة بالباب

تخصرت : ها اشو هنا متروحين تبدلين ...

_ ماروح اله تطلع ماما تشوفني منكعة اكوللها عليج  حتى ترزلج

ظليت اضحك عبالها خايفة ما اكدر افرها عليها واطلع الصوج منها ..

صعدت للغرفه سبحت وغيرت ملابسي توني

داانام انفتحت الباب ودخلت مريم باوعتلي صفح...

ضحكت :- ها فشلت خطتج مو محد طلعلج ها؟

بنبرة بكاء :- سكتي سكتي اله تكعد ماما واكوللها 

_ هههه بعدج تههددين ؟

فركت عيونها وراحت للحمام ...

متدري ما اخاف من الضرب صارلها شكد عايشة وياي

خلي انام احسن ..

المغرب اجوي عمامي وبقو يمنا ع العشى ، ساعدت ماما شوية وصعدت فوك لان احس راسي حينفجر ، جتي مريم ورايه كالت تعالي ماما تربدج ..

مجاوبتها وهيه نزلت بسرعة ..

اريد افوت للغرفة سمعت صوت عمه وعمو بغرفتي وجنهم ديتعاركون ..

هيه تكوله وخر عني شاردة منك من البيت تلحكني لهنا شوكت تبطل سوالفك خليتني اصعد الدرج وروحي فحطت عبالي عندك شي شياتين تاليها تريد تسوي فساد ...

كاللها ولج يا فساد ولج اني رجلج

انت متكبر شو اولادك بطولك واحفادك ماشاءالله شوون وياك اشو دوخر عني قابل احنا ابيتنا..

ابيتنا نهارج كله منهزمة مني كلت احصرج هنا بلكي تخجلين على نفسج ..

اسمع عمه تعيط وعبالك تريد تتملص منه  ومفهمت شبيهم ..

كلت يا عزا بس لا راح يخنكها خلي افووت للغرفه افكها منه ..

اريد اريد افتح الباب وافوت سمعت صوت بابا ورايه

بابا :- وينج بويه أمج دتدور عليج شعندج صاعده فوك وامج محتاجتج ؟

جاوبته: بابا صدعت وصعدت دااريد أرتاح بس شو عمه وعمو بالغرفه ديتعاركون يمكن  ..

اتقرب بابا بعدني عن الباب  وكاتم ضحكته

: أنزلي بويه نامي بغرفتي لو بغرفة زهراء أحسن ..

: ليش شكو وجوا هوسه أريد هنا بعدني

دااحجي بابا خزرني وبنفس الوقت طلعت عمتي

أم صفاء من الغرفه تعدل بملابسها...

بابا بعده خازرني همزين مريم نزلت جانت سوت حفله

... عمه انصدمت بابا بس شافها انفجر يضحك

بصوت عالي وطلع وراها عمو ..

بابا كاله: دخيل ربك أبو حسين توازيت خوما توازيت

أدري مجبور اي جان رحت لبيتك ..

اباوع عمه وجهه ظل ينطي الوان وايدها على حلكها ودنكت  وعمو ولايمه

مستمر يحجي  ويا بابا يكوله حاجات انسانية مستعجلة ...

عرفت الشغله أكبر من عمري لذلك بابا خزرني وجرني من أيدي دفعني

ع كييف نزلت وتركتهم تلكتني أمي

ماما: هاي وينج يا بنتي خوما بيج شي هزيتلها راسي ودخلت لغرفة زهراء لفيت راسي ونمت

زهراء: اجوي عمامي وبعد العشى كعدو  يحجون ويا بابا عمود يخطبوني لصفاء بس بابا رأسا  عاط بيهم: انتوا جايين وحتى الولد مو وياكم معناها مرايد بنتي شنو تريدون

تجبروا عليها حتى يسود عيشتها شعندي اني

هن بس ثلاثه وقت اليجي صفاء ويطلبها مني

واشوف بعيونه الرغبه بالزواج من بنتي يلا

انطيكم رأيي وهااا مو شرط يكون رأيي موافقه

ممكن يكون رفض..

طلعوا عمامي بدون اي اجابة من بابا وره ماطلعوا صاحني رحت اله ؛- نعم بابا ..

ظل يباوعلي ويحجي :- زهراء اهتمي بدراستج

معليج بهاي الخبصه الدتصير أني اعرف شلون

أحلها انتي سادس هسه أريدج ترفعين راسي

وراس أُمج زين بابا؟

_صار بابا حبيبي تدلل.....

.....

صفاء: بيوم زواج أسراء جنت كاعد بالعطيفية

بالمرسى روحي طالعه من الدنيا والبيها دك موبايلي باوعت هاي رشا اهووو هسه هاي شتريد

رفعت الخط اجاني صوت الهلاهل والاغاني

للحظه تخيلت أسراء بالبدله وديزفوها اليه هاي

تعب عمري بسرعة لعنة الشيطان حرام أفكر بيها

بعد صارت عرض غيري هالكلمه توجع وتحرك

دمي حرك ...

حجت رشا

_صفاء أمي تريد ترجع للبيت تكدر تجي تاخذها

_اني أريد فديوم اسوي تحليل اريد اشوف أنتي

اختي لو اكو خلل بالموضوع

_يا هاي شبيك شكلتلك أني

_تروحين منا لا ابتلي بيج شكد حقيرة ولج أنتي

شنو صنف دمج بالعباس لو مااختي الا افشر

عليج فشار محد ناطقه قبلي وطزززز بالشهاده

وطزززز بيج وبأهلج وبعشيرتج وبخوالج كلااااب

اخذتواااا مني تعبببب عمري وهسه تخابرني حتى

أسمع صوت الهلاهل الله يلعنج من اخت ولج

انتي زباله اتحسف اكول هاي اختي روحي

مالي دخل لا بيج ولا حتى بأمج كولوا عني عاق

كولوا سرسري طزززززز بيكم كلكم بعد لحد

يخابرني وحق محمد انتقم منه اليخابر عليه ك**** سفله

أحجي ومفرفح وسديته بوجهه ، كولشي توقعت بس ماتوقعت تخابرني وتسمعني الهلاهل اني بشر والله حبيتها وردتها حلالي واثنينا انجبرنا ع البعد مااكول غير الله يسعدها..

بعدني احجي بداخلي دك موبايلي باوعت هاي

زهراء شتريد هاي انوب جاوبتها

_لك صفاء كرار متعارك وضاربي سجينه بكتفه

فدووة لحكله دينزف

انصدمت كرار هادئ وبس يضحك مو مال مشاكل

:زين هسه هو وين؟

_بمدينه الطب

_تمام اهدئي هسه رايح اشوفه

رحت لكيت كرار مخيطين كتفه بس نازف هواي

جان أبويه موجود وعمي ابو كرار واخوه عبدالله

سلمت عليهم وبعدها رحت ع كرار شفت وضعه

ميحتاج يبقى بالمستشفى طلعناه سألته شكو

شبيك ليش هيج صاير وياح غمزلي فهمت

ميريد يحجي كدام أبوه بس وصلنا لبيتهم اخذته

للغرفه وصعدت وكعدت سألته شبيك  شكو اول تالي تتعارك

كرار: ولك جنت رايح اجيب أمك الشفيه غير

رايحه لعرس بنت خالتك بالطريق وشفت بنية

اكو ولد ديلحكها ..

نزلت داابعده عنها جان ديجر بجنطتها  اشو هذا بس شافني فلت ووكعت

جنطة البنية بالكاع شلت الجنطه داانطيها رفعت

راسي لك صفاء جمالها يجلطططططط مو بنية

قنبله انفلاقيه ترعط رعط عود مثل وجهك الخايس

_ انجب وكمل لتلغي لغوة خايسه مثلك

_وبعدها ياخويه اخوها الطرطور مدري منين

طلع واجه ديضربني حمسته ببوكس اشو الثور هاج وصاح جهيد ومنير..

هسه أبن العفطي وين جنت من جانوا يصجمون بيها؟

المهم واجوا اثنين تكول عتاوي هجموا عليه..

ظليت اضرب بيهم و ما احس الا واحد ضربني سجينه بكتفي ابن الزمال شكني شك ..

كون بيك ولا بيك غيث السرسري ماسواها كل هذا صار بسبب أمك ام الاعراس والفواتح 

: هسه أمي وين؟

: أبن الزمال صار ساعه احجيلك وجاي تكولي

أمي وين انعل ابوك لابو حتى امك بجهنم شمدريني وين غير عالم ساقطه..

ولي يلا اريد امدد كون اصبح ع وجه هاي ام عيون حراكه تروحلها فدوة انت وامك واختك رشا هاي اختك

رشا لو اختي الله كفيلك كل مااكل ادخل اصبعي

بحلكي حتى ازوع عليها

صفاء: لك انت شكد سرسري حتى الفاظك سوقيه

باوعلي وظل يركص حواجبه :- لا ولك مو سوقيه لان متعرف تسوق هههه يلا تدعبل روح جيب امك ست

نفيخه خاف هم تخطبلك مرة هم ولو هي قافله

ع زهراء الا تعال صدوك ولك انت ليش متوافق

ع زهراء والنبي تجنن وام بيت وخلوقه وبنت

عمنا ونعرف اخلاقها بس انت خايس تدور ع

براميل ...

ظل يغمز رفعت ايدي اريد اضربه بس وكف بعيني جرح كتفه كمت خابرت ع حيدر يروح يجيب أمي واني مريت ع بيت عمي اشوف عمتي صار هواي

مشايفها دكيت الباب طلعتلي زهراء باوعتلها سألتها منو موجود

_بابا وماما تفضل

دخلت طلعت عمتي حضنتني وفوتتني جوة

دخلت اسلم على عمي شفته وجهه ثكيل عليه

كعدت بصفه :- عمي وداعتك ماعندي علم أني شعليه وهيج تباوعلي عمي والله انت عزيز عندي الي تريده

أمرني بي واني اسوي أبنك اني عمي قبل لا اكون

أبن اخوك

جرني وباسني ظل يحجي ع تصرف ابويه وصدمني من كال جاب عمامك واجه مااعرف

الحجي شبي وليش هيج ديتصرف ...

زهراء: كاعدة بالغرفة دا اقرا فاتت ماما كالت اجه صفاء تعالي اكعدي لتظلين تتهزمين مو حاله هاي قوي قلبج وقوي شخصيتج مراح ياكلج هو لتخلين افكارج تهزمج يلا بنتي

امشي أكعدي يمنه

_بس اسوي جاي واجي

_عبير تسوي شنو صغيره عبير يلا فوتي كدامي

طلعت كعدت بصف ماما وهو ديحجي ويا ابويه وحتى ابد ما باوعلي واني دنكت بس جنت استرق النظر كل شويه واباوعله ..

حسيت اني  بالفعل أني مكبرة الامور صح حجوا بموضوع الخطوبه وخجلت بس احسن من مااظل اتهزم بالتالي كولشي قسمه ونصيب كلام ماما قواني..

ظل صفاء يحجي وياهم وين كاعد وشنو ديسوي حسيت بي حزين وضايج وتعبان ..

ظلو ماما وبابا يقنعو يرجع لبيتهم بس هو ماقبل ..

بعدها استأذن ديروح  ماما جلبت بي ع العشاء مقبل سلم وطلع من طلع ماما باوعتلي وابتسمت وراحت دتسوي العشاء واني رحت اقرأ

كرار: البنية الشفتها جانت ورانا بالفرع أني من

زمان مراقبها قبل سنه ونص مشفت عليها شي...

ومن شفت هذا ديلحكها نار وشبت بضلوعي نزلت

اريد اسحله بس شرد واجوا اخوانها وصار الصار...

بعدها يومية ظليت  أروح لفرعهم بأوقات الدوام حتى اشوفها ..

الحلو بالموضوع فديوم دااروح لبيت عمي تحسين

وشفت بنية نفس هيئتها دتدك بالباب...

رحت أمشي ع كيييف وصلت الها

طليت بوجهه والله وجان تطلع هي نفسها ...

فتحتلها الباب عبير وسلمت عليها واني فتت وراها الي عرفته  طلعت صديقة عبير المقربه..

والظاهر  وحتى عمي وعمتي يعرفوها.

كعدت يمهم بالاستقبال  باوعت لعبير غمزتلها

عضيت شفه ماكو ممنتبها الي ..

بعدها اخذتها وصعدت فوك لغرفتهم ..

سألت عمتي عنها  كالت هاي صديقة عبير تجيها يقرون سوى ، ظليت اباوع وراهم شويه ونزلت عبير دتاخذ عصير طفرت وراها للمطبخ

_عبو بداعة أمج هاي البنية منين تعرفيها وشسمها؟

عبير: ها

كرار: ها

عبير: شنو ها شو تعيد كلامي انت منين تعرفها؟

كرار: صار سنة مراقبها بس مااعرف أسمها ولا

حاجي وياها

عبير: كرار ترى البنية مو من الي بالك اذا تريد

تلعب اكو هواي غيرها يدورون لعب وقشمرة هاي

خط احمر والنبي ترى اكول لبابا عليك افتهمت لولا

_يمعوده شبيج لو ادور لعب جان مو اركض وراها

سنتين ومكتفي بالمراقبه ترى اكدر اضحك عليها

واقشمرها بس هي خاشه بمخي وهسه مكلتيلي

شسمها؟

_مها أسمها

_حلو مها وعيونها صدك عيون المها هاي بكدج

لو اكبر لو اصغر شو عبالك اكبر منج

عبير: رفعتله تك حاجب اكول شو رحت زايد شعليك انت متكولي يلا روح البنية دتنتظر فوك

عيب

خرررررب ضميرج ولا يطلع منها شي اي

شكو بيها اكابل بيت عمي واكعد بلكي تطلع تجيهم

هواي همزين طلعت صديقة عبير ..

طلعت من بيت عمي تلكاني حيدر وكفنا ببابهم نسولف مدخلت للبيت بعدنا نسولف وطلعت الغزال احس روحي انسحلت سحل ، ناعمه وعيونها وحدها قضيه

وخدودها عبالك فراولة مزروعه بوجهه..

طلعت وراها عبير شافتني كصيت صديقتها كص هزت

أيدها ودخلت يلا همزين عبير مو مريم لو مريم

جان طشتني بالعشيره..

رجعت للبيت واني بس أفكر بيها ....

صفاء: خابرتني أمي تريد تشوفني رحت للبيت لكيت خالتي أم اسراء بالبيت جانت عايزة التمت

ادري مو زوجت بنتها بعد شتريد اني ذوله شنو مااخلص منهم خررررب شرفهم سلمت وسألتها

شلونها ومن هالحجي جنت كاعد ع اعصابي عاد

هي بدت تحجي

_يمه البنية تزوجت وراحت لبيت زوجها أنت شوف حياتك وتزوج شمنتظر وليدي ليش توكف

حياتك علمود الماضي ماكو واحد مات ورا واحد

انت ع شنو تارك بيت اهلك

ضحكت بصوت عالي خاله انتي بس لا عبالج تارك البيت علمود بنتج خوماكوشي شو كولش رايحه زايد...

اني تركت البيت بسبب خلاف ويا الاهل انتي شنو مدخله نفسج بالموضوع ومسويتني راح أموت علمود بنتج..

والله سالفتج تضحك الظاهر مامصدكه بنتج واحد حبها ومصارتله مو ههههههههههههههه هو همزين مصارت

القسمه ويصير غيث المطي خال اولادي وثلثين

الولد ع الخال ههههههههههه

هي ظلت صافنه بوجهي وزعلت شالت جنطتها و

سلمت ع أمي  وخزرتني وكالت همزين ماانطيت بنتي لهيج واحد

_اسواكم واسوه عشيرتكم ماانطت بنتها لهيج واحد هو انتي يصحلج تزوجين بنتج لدكتور

والله من هذا حجيج مبين ظال حسرة بنفسج

تكولين نسيبي كذا مركز  .. احجي واضحك

ظلت تفر بيدها وطلعت .. من طلعت اجت أمي تصيح ...

كلتلها: انتي شتريدين زهراء لو اسراء والله مداافهم عليج دخت حددي موقفج..

_ لك انت متستحي صاير لك انت عاق

تركتها و صعدت لغرفتي اخذت كم تبديله من داانزل صار بوجهي

أبويه اجه عليه

_هاي شنو ولك اليوم انت هنا اكول البيت منور

باوسته وحضني : اجيت اخذ ملابسي يابه

_لا شنو ملابسك هذا بيت أبوك انت أبقى واني

اطلع ولك أمك ضغطها مينزل علمودك شنو من

قلب شايل انت متكولي

_يابه مااكدر

_براحتك

طلعت ورجعت للشقه بقيت يم صديقي

دوامي مستمر بس بالليل جان يمرني طيفها واتعوذ الشيطان لان حرام افكر بيها تزوجت الله

يسترها ..

زهراء: امتحنت الشهر الاول والحمدلله درجاتي

زينه ماما جانت تساعدني واني مخليه مدرسين

هم ...

بس الي جان يخلي جو البيت كئيب عبير

مدتداوم مااعرف شبيها اذا داومت ثاني يوم او

اذا جرت اسبوع الاسبوع الثاني تتخربط ويجيبوها بتكسي للبيت ...

وضعها يوم زين واسبوع لا ومع ذلك جانت تكابر امتحاناتها نصها دتتأجل درجاتها هم مو مثل العام مثلاً الرياضيات رسبت  بي وعادولها الامتحان نجحت ودرجتها جانت  بالسبعين بينما العام جابت اعفاء وهي هم مغلسه ، كل مااصعدلها الكاها صافنه لو نايمه

اما ماما اوووف ماما تعبت كولش بين عبير وبين

البيت جانت عبير ايدها اليمنى ..

دخلت للبيت جايه من الدوام جانت عبير ممداومه وماما جايه بوقت

للبيت لكيت امي بالمطبخ سلمت عليها كالت:

عبورة بدلي بسرعه وتعالي ساعديني مداالحك

ابوج ع جيه

جاوبتها: تمام ماما بس أني زهراء

_استغفرالله ياربي والله متعوده عليها دومها جوا

أيدي تشتغل وتساعدني لا اعتراض ع حكمك

روحي ماماتي بدلي وتعالي حضري الميز قبل

جية أبوج واختج مريم هم ع جيه

تفاجئت خير ماما شبيها عبير ؟

يتبع ..

اذا ممكن تابعوها sarayo01

في شريعة العشق

بارت17

نورا ناصر

عبير: داومت وجان عندي امتحان كيمياء وماما المدرسة مالتي البنات مخبوصات يقرون

اني جنت مصفطه وكاعده لان قاريتها مااريد

ادوخ نفسي واخربط فاتت من يمي وحده من

البنات تفر بيدها وتحجي ..

_اي عيني شكو عليج أمج المدرسة أكيد الاسئلة

عندج ومنا المدرسات مقهورات ع وضعج عود لان

شعرج زينوا

بقيت اباوع الها بعدم اهتمام ومجاوبتها ولا اهتميت لكلامها مددت ايديه ع الرحلة واعصر باصابعي

جاوبتها صديقتها  : لج يشفقون عليها هاي شبيج واذا

أمها مدرسة فد نمونه دشوفيها ولد وكاعد بنصنا

والتفت ع البنات : بنات البسوا حجاب اكو ولد

كاعد بنصنا وضحكت بصوت عالي

باوعت للبنات اكو بيهم ضحكوا واكو ضاجوا

رجعت التفتت الهم وباوعتلهم صفح: الخلل مو بشعري حبيبتي الخلل باخلاقج الزباله أنتي اصلاً حرامات تكملين دراسة وتنحسبين ع الطبقه المثقفه مكانج مو هنا مكانج

بعدني دااحجي طبت ماما وامتحنتنا .....

طلعنا بعد ما خلصنا امتحان رحت ورة المدرسة وجنت كلش ضايجة على البنات الي يضحكون عليه باوعت شفت طالبات الابتدائية ديجوون شفت مريم اختي رحت يمها لزمتها ولج شجابج هسه بعدنا بالدرس قبل الاخير ؟

_ اي اجه علينا السايق على وقت شسويله ..

دنحجي اني ومريم واجتي روان وصديقتها حنين

اجن قريب عليه روان كالت هاي الكرعة شفتي شون طلعت اول وحدة وبسرعة

جاوبتها حنين اي لج امها منطتها الاسئلة وجاوبت بسرعة بدون تفكير شعدها باقية

مريم كالت لج هذن يحجن عليج ويكولن كرعة

سحبتها لج امشي خل يحجن علاج الجاهل التجاهل

اريد الزمها لمريم مكدرت كبل هدت على روان وحنين وراحت لروان لزمتها من شعرها وسحبته

روان كوة وخرتها منها وابتعدت وظل مريم تحوم عليها

وتصيح : ادبسز تعيرها بشعرها الا اشلع شعرج بيدي حتى تصيرين مثلها..

كبت العيطة والهوسة بين بنات الابتدائية مريم وشلتها وروان وحنين وشلتهم وصارت امالخ وتجمعوا البنات ورى المدرسة لان صارت فرصة ماقبل الدرس  الاخير ..

بعدها الهوسه كابه لحظات ونشوف المعاونة ع راسنا

صاحت بصوت عالي كدامي للادارة وخزرتني أني ومريم باوعت ع مريم عيونها كلها غضب رحنا للادارة لكينا ماما كاعده بس شافتنا خزرتنا

المديرة كامت تعيط وترزل بينا

_شنو فاتحه قاعة مال مصارعه اني وهيج مسويات مو عبالجن بنات المدرسة ومتتحاسبن

حتى فصل افصلجن والله ...

ماما بقت مصدومة وحتى متعرف تحجي ..

المعاونه جاوبتها: عيني ام محمد انطيهم مجال يحجون هن مؤدبات ولليوم مطلع صوتهم الا اذا صاير

شي يلا هيج يتصرفن

_احجن خاتونات

باوعت ع ماما جانت فشلانه من تصرفنا

التفتت للمديرة :- ست عدنا امتحان كيمياء والبنات ديراجعون واني مدااقرأ كاعده برحلتي ، اجن حنين وروان وكاموا يعيروني بشعري ويكلولي أمج مدرسة

وشي اكيد الاسئلة عندج وبعدين روان  التفتت ع البنات وتكولهم البسوا حجاب اكو ولد بنصنا وهاي حنيم تكولي المدرسات يشفقون عليج ترى ست صح أني مسويه عملية بس الصوج مو بيه الصوج بعقل طالباتج واني أكدر اتحجب وانهي هاي المهزله وكلامهم الجارح الي كل يوم يترس اذاني يله ارجع للبيت

بس أني دااتحداهم واذا شعري ولادي مو فد عاهه

مستديمه كله كم شهر ويطول انتي بدال متصيحين علينا علمي طالباتج الانسانية وعدم

التشمت بالمريض واذا اختي ضربتها حيل بيها

واني مسؤوله عن كلامي حتى لو فصلتيني مثل

مكلتي

التفتت  شفت ماما مدمعه يمكن انقهرت بسبب كلام الي سمعته متدري صار عندي عادي اذا

أختي اول وحده حجت هيج ويايه الغريب كلامه

ميجرح مثل ماابن أمك وابوك ويعيرك

التفتت المدير على حنين وروان  وسالتهم صح هذا

الكلام بسرعه حلفوا بالقران كذب

مريم: ست اذا كذب اسألي بنات الشعب وبنات

شعبتي وشوفي شيكولون

المديرة أمشوا ويايه اخذتنا لشعبتي وسألتهم اذا

جان الكلام صح او لا الكل كال الكلام صح

بعدها اخذت حنين وروان وفصلتهم أسبوع واستدعت ولي أمرهم ..

حسيت انتصرت عليهم اذوني حيل كل هاي الفترة هما يسمعوني حجي وبحجة الشقه يضحكون الصف عليه واني ابد ما اتحمل نفسيتي بسرعة تتعب لذلك جنت اغلب الوقت كئيبة وضايجة حتى بالبيت ..

بس بعد الصار اليوم ابد محد اندكت بيه بس هم رجعنا للبيت ضايجين اني وماما رآسا فتت لغرفتي وانعزلت ..

.

.

.

صفاء: رجعت من دوامي العصر ، فتت للشقة مالي خلك كل شي  حقيقةً مشتاق لأمي ، لكعدة ابويه وغزله بأمي كدامي...

لمناكرنا اني وياه من نسمع أخبار ،  التليفون ميكفي بس أسمع صوتهم ممتعود ابقى بعيد عنهم كل هالفترة

طلعت من الحمام واسمع موبايلي يرن رحت اخذته شفته اخويه حسين جاوبته وبعد السلام كال

_لك انت متخاف الله تارك اهلك وحدهم وهم كبار

بالعمر اتقي ربك بيهم واذا جبروك تتزوج بنت

عمك قابل انت أحسن منها لو الحبيتها قبل أحسن

منها أشو ادب واخلاق وأم بيت وين لاكيها تتزوج

هيج وحده حط عقلك براسك وارجع لبيت ابوك

وبطل حركات المزعطه

_يامزعطه شبيك اذا عمري ٢٦ وهم يقررون عني

شنو طفل كدامهم واذا أهلي هاي حياتي واني

اقرر شلون اعيشها محد يتدخل

- : ولك أبوك نايم بالفراش متعلم عليك لتصير زمال من تالي وكت أرجع للبيت طيب خاطره مو شرط تتزوج

_هذا هو الم سلاباتي وارجع ....

سلمت عليه وسديته عبالك اجه الاتصال بوقته

و أحس أبويه ديلزمني من أيد

التوجعني ديعرف شلون يجيبني للطريق

ثاني يوم سلمت على جعفر ورجعت لبيتنا.....

.

.

.

كرار: ظليت مرابط لبيت عمي وهي فدوة للخلقها

بين يوم ويوم تجي يم عبير هذا الشي جان من

مصلحتي..

لحد ما فد يوم دااروح لبيت عمي وشفت صفاء دينزل من سيارته باوعت عليه ورحت دااسلم عليه

_ها لك صخل رجعت ليلى لعيلها وطير السعد

يبرالها ها نكول مبروك مو ههههههه لك ساقط

مشتاقلك ، اذا طلعتي بعد من البيت ولج صفية

أكسر رجلج ادبسز ماعدنا بنات تترك بيت اهلها

صفاء: أني من زمان اكول عليك واحد ساقط

بس هسه اثبتت انت ساقط بعدين تعال جاي

سمعت عنك اخبار حلوة شعندك مرابط لبيت عمي

العصفورة مبين موعد جيتها

كرار: اي لك من تروحلها فدوة انت وهذا وجهك

عبالك ارملة مدري مطلقه لالا وجه المضروب

بوري امداك شبيك ولك جنك واحد مهتلف كاتله

الضيم من غسل الغسلك يامطي واذا تزوجت

زهراء اشو احلى منك ابو حلك وين لاكيها

صفاء: ولك اجت اجت وراك التفتت

خليته يلتفت ودفعته طب  وكع بالكاع جنه  الثور

من يوكع  ظل يغلط ويفشر عليه..

واني اضحك عليه واصلا  البنية ما اجتي عفته وفتت للبيت ...

.....

عبير: مها كثرت جياتها يمنا جانت تجي بالاسبوع

يومين هسه صارت يوميه والي دااستغربه من

تجي يجي كرار وراها أني أعرف مها ماعدها

سوالف عوجه وحتى كرار صحيح لسانه فالت

بس ميندك بالبنات أبد حاجيت مها

_مها أكو شي بينج وبين كرار أحجي ؟

_لا والنبي عبير بسس

_اي شنو البس كملي

_عبير شوفي هو مراقبني وبصراحه أبد مافديوم

حجه ويايه ولا حتى أني لان تعرفين أني اخواني

يدورون المشاكل دواره بس بصراحه أبن عمج

مختلف يعني حتى انضرب علمودي أني عمري

١٧ أكبر منج واميز حركات الولد وهو لحد الان

مازعجني مكتفي بالمراقبه

-: شوفي مهاوي أنتي صديقتي وهو أبن عمي

يعني خاف باجر عكبه يصير شي بيناتكم اني

مالي دخل هاي حياتج وانتي حرة بيها بس

حافظي ع سمعتج صح هو حباب وخوش ولد

بس يبقى انسان وممعصوم من الخطأ

هزت رأسها ودنكت كملنا دراسة وراحت من دااوصلها للباب شفت كرار كاعد بالحديقه هو

وماما هزيت راسي انهجم بيتك كرار شوكت لحكت تجي وشمدريك مها هنانه ادري شنو عندك جهاز استشعار هذا بس لايسويلنه مشاكل ..

هو بس شافنا وظل عينه على مها وهاي الثوله ارتبكت جريتها من ايدها وطلعتها للباب ورجعت

شويه وجان يدزلج مسج كرار

(لج انتي هم عندج قلب ولا اصدك دخيل ربج

ادري تشوفيني اباوع تسحليها وتطلعيها ليش

عدوج خوما عدوج)

تركته مجاوبته مااريد اتدخل خاف يصير شي

وتوكع براسي قابل شيريد اقدمها اله على طبق من ذهب والله بطران ...

.

.

.

صفاء: وصلت للبيت شفت الحجي تعبان

نايم بالفراش دخلت عليه سلمت جاوبني من ورا خشمه

حسين اشرلي اطلع واتركه يرتاح طلعت

كعدت بالصاله فاتت أمي

_ ها ارتاحيت الا تموت ابوك يلا ترتاح عبالك هاي

شخصية تكبر ع اهلك مو ؟ ولك البارحة طلعنا من المشفى والدكتور كال مهدد بجلطة

استغفرت وتأفأفت :- يمه رجعت بعد شتريدين لخاطر الله ...

_خاف زحمه عليك من رجعت ...

كمت بوست راسها وهيه استمرت تدردم عليه

التزمت الصمت وسكتت ..

صاحني حسين ورحت كعدت يمهم هو وابويه بالغرفة ..

حسين: صفاء شتريد أني ماحبيت ضغط الحجي

والحجيه عليك بس من اصفن بنت عمك تناسبك

والله وخوش بنية أنت ليش رافضها؟

باوعت ع ابويه ميباوعلي وجهت كلامي

لحسين وبنبرة بيها حزن ويأس جاوبته: لا ليش رافضها هذا هو نروح لعمي ونطلبها منه والي بي خير يقدمه ربنا

كمت أريد اطلع صاحني أبويه

_الله يرضى عليك أبني ويبرد قلبك والله متأكد

راح تشكرني ع هذا الزواج

بست ايده وطلعت صارت امي بوجهي تركتها

وصعدت لغرفتي وظليت محتار ، هاي اني شسويت خايف من نفسي لا اظلم بنت عمي وهي منا ترفه اذا واحد عاط بيها تكوم تبجي ، رفعت راسي ليفوك وناجيت ربي تمتمت يا اللهي ساعدني ماعندي غيرك

قررت اواجه مصيري هذا نصيبي من الدنيا ع شنو

زعلان وتارك البيت وين ما تصفى خلي تصفى ...

بالليل صعدت امي كالت تعال سلم على خالتك ام اسراء وزوجها سمعانين بابوك مريض وجايين ديشوفوه ..

صدك تحجين يوم شون عين صلفة ويجون ؟

_ يوم ميخالف الفات مات خلي نبدي بداية جديدة من هسه واحنا اهل بنتهم ماصارت النا قسمة ونصيب والله يسعدها لا انت راح تبقى بلا زواج ولا هيه اشو تزوجت والله يسعدها ..

فكرت خاف ما انزل ويكولون حاقد وبعده يريد بنتنا ومن هالحجي خلي انزل وابين الهم انو اني ممهتم واكسر شوكة عينهم احسن ..

نزلت سلمت عليهم شافو ابويه وبعدها طلعو كعدو بالاستقبال اباوع لزوجها وجهه ثكيل عليه

باوعتلي خالتي  وحجت: أنت صدوك راح تخطب بنت عمك؟

_اي خاله وان شاءالله انتي حاضره

_لا وين احضر لو تموت مااجي لعرسك وان شاءالله بعمرك متتهنى

_باوعت عليها مصدوم ليش؟

_لك بنتي لليوم تبجي عليك وانت بكل سهوله

قررت تتزوج ياويلك من عذاب ربك من كون الله

لايوفقك وعساها بعافيتك دعوة ام محروك قلبها

أمي: هاي ليش هيج ام ضرغام شمسويلج أبني

وتدعين عليه ؟

صفاء: خاله ترى مو اني التركتها انتوا ماانطيتوها

الي كلها عمود فلوس ، وهاي دعاويج كلها باطل يعني ترجع عليج

خافي ع نفسج

_العتب مو عليك العتب ع التتسمى أختي راح

تموت حتى تجيب بنت حماها للبيت من كون

الله لاوفقكم ولا تلحكون تفرحون بعرسه عرسكم

عساه ينقلب فاتحه

ماعجبني اردها ع شنو اتعب نفسي انسانه مريضه

شو متت حتى انجمع ويا بنتها بالحلال وهسه

جايه تطلعني غلطان مرة الشريف سكتت عنها

استمرت تدعي وامي ترد عليها لمن ما طردتها من البيت وذيج ظلت تعيط وتغلط وتدعي

وتصيح  أخير شي ختمتها

الا احرمكم من شوفة بنتكم

حجيت بداخلي: طزززز بيج وبنتنا عاد هي شلونها

اشو نسخه منج نفس الحقارة

طلعت وهيه تصيح ...

دخلت أمي باوعتلها بطرف عيني لان قبل فترة

تعاركت ويايه لان حجيت ويا اختها بطريقه

محلوة هي فهمت معنى نظرتي وراحت للمطبخ

كالت رايحة احضر عصير للحجي اصب الك وياي

هزيت راسي برفض  .

تمتمت : كيفك

صعدت لغرفتي ظليت أقرأ وافكار براسي بسبب

الخطوة الي اخذتها ، وصلت لحد  كلت أنطي مجال

لنفسي ولبنت عمي الدنيا متوكف ع أحد بس

قبلها لازم أحجي ويا زهراء مااريد اظلمها ..

.

.

.

زهراء: كاعدين خمستنا ماما مسويه

بسبوسه وعبير مسويه عصير كاعدين دناكل

وبابا يحجي عن دوامه وماما كذلك اندك الباب

راحت عبير دتفتحه شويه واجت كالت بيت

عمو أبوحسين اجو ووياهم عمو كريم وعمو ابو حسين ودخلتهم للاستقبال ..

كام بابا كال  حضرولنا جاي

وطلع  ..

تأفأفت ماما: أدري شنو أجبار ولد ميريد والله حلوة هاي عبالك بنتي تايهتلهم حتى أنطيها لواحد ميريدها

عبير: لا ماما صفاء وياهم

امي ظلت باهته أما أني احس قلبي أجه يطلع من

مكانه كلت ماطول اجه وياهم يعني وافق ممعقولة يجيبو غصب عنه مستحيل صفاء ينجبر ..

ماما راحت للمطبخ وعبير تبعتها شويه وطلع بابا

باوعلي جنت كاعده دااقرأ بالصاله وراح للمطبخ

اخذ الجاي وعبير اتبعته شايله مي اتأخروا شويه

وراحوا من طلعوا أجه بابا صاح ماما وراحوا

للمكتب

اجت عبير يمي : اهوووو اجتماع مغلق ميكولون اكو طناطله هنا يكتلهم الفضول...

يلا ياخبر بفلوس بكرا ببلاش

ولو مبين سبب هالاجتماع وباوعتلي

خزرتها _قزالقرط شكو تباوعين هيج... ؟

قوست شفايفها وحركت اكتافها : هسه أني حجيت شي ؟  شبيج انتي مثل البيها جن بس تكمزين ..

صفنت تباوع بالفراغ وكملت كلامها

_  بس والله حلو صفصف حيصير

نسيبي ...

وطكتها ضحكة كلش طويلة

خزرتها وانزعجت :- لا أنتي صايرة كولش متنطاقين...

_يمه منج ومن عيارتج الزم شباك العباس عليج

انتي طايرة من الفرح علينا ولج مو حتى ثلج

گلينا

خزرتها بس هي منطلقه مدري شبيها عطت

بيها كاااافي شجااااج تخبلتي....

_دولي مو شكول واحد يفرحلج نكديه هسه شويه

وتجي ست الكل تنطيج موشح غير كلت اهيئج

قبل لينعرض فلم الرساله اروح اقرأ اشرفلي

تركتني وراحت ابتسمت معقولة حب ٦ سنوات

من طرف واحد بعد كل العذاب وليالي السهر والدموع والمعاناة حنجمع وياه بالحلال وعد عليه

الا اخلي يعشق خيالي ممصدكه والله فدواتك

ربي مفشلتني شكد دعيتك الحمدلله والشكر

طلعت ماما كالت تعالي بنتي أريد احجي وياج

عضيت شفتي من داخل وقلبي نبضاته بأذني

تركت الكتاب على جهة وكمت وراها دخلت لغرفتها

اشرتلي اكعد يمها رحت امشي بهدوء نبضاتي سابقتني  اعض بشفتي واعصر باصابعي رجليه ترجف رجف مصاير

رحت كعدت يمها ع السرير ومخليت عيوني بعيونها ابد مدنكة وشابكة اصابعي وهيه تحجي

_زهوره ماماتي عمامج اجوا اليوم ووياهم صفاء

ديطلبون أيدج شنو رأيج بنتي؟

رفعت راسي اباوع كدامي بس سكتت  وشبه ابتسامة انرسمت على وجهي ، اعض بشفتي حتى اكتمها ادنك راسي وارجع انصي محتارة ..

اجاني صوتها :- أحجي بنتي لتظلين ساكته ومهما يكون قرارج أبوج يكول احنه وياها يلا يمه أبوج دينتظر الجواب يكول بيت عمها مستعجلين ..

هم بقيت ساكته لساني مايعيني احجي ابد

_راح انطيج مدة يومين تفكرين زين ماماتي ؟

هزيت رأسي وطلعت صار بابا بوجهي شافني أبتسم جر رأسي وباسه...

بس تركني رحت لغرفتي اركض  أول مدخلت

دك فوني باوعت هذا صفاء عززززا بعيني هذا

شيريد متصل شمرت الموبايل مجاوبته انقطع الاتصال رجع دك كلت خلي اشيله بس رفعته اجاني وخلاني ارتبك واتوتر ..

_الو هلو زهراء شلونج شخبارج

جاوبته بعد لحظات من الصمت وبتلعثم :-  الحمدلله بخير انت شلونك؟

_ع الله عندج وقت أحجي وياج لو دتدرسين ؟

بنبرة مترددة :_لاماعندي شي احجي

_تمام بعد شكد عن عطلة الستين يوم ؟

_يمكن أسبوعين او اقل ليش؟

_ شدي حيلج واقري وهسه خلي احجي وياج

بالمفيد ، شوفي بنت عمي أنتي تعرفين وضعي وكل

ظروفي ألي اريده منج تصبرين عليه أني مااريد

اظلمج اذا الله سهل وصارت قسمتنا

دتسمعيني؟

_ببببلي دااسمعك..

_لعد متحجين

_منتظرتك تكمل كلام غير

ضحك بصوت عالي :-  زهراء هاي عود انتي صدك هيج فطيرة لو فاهيه ؟

_ليش هيج تحجي ويايه ؟

_لابويه سلامتج فكري بالموضوع ورجعولنا خبر

لتستعجلين كل الوقت الج ومعليج بأي واحد

يضغط عليج وبالذات أمي هاي حياتج مو حياة

أحد ثاني وفري السعادة لنفسج بكل الطرق الممكنه يلا أني أروح مع السلامه

عفت التليفون والحيرة محاصرتني اني نفسي مدا اعرف شنو اريد ولهسه احس ضحكته ترن باذني

ومستقرة باعماقي صرت احاجي نفسي

خلص زهراء الي تريدي صار شكو بعد !!!

مرت يومين وصاحتني ماما

تعالي زهراء بنتي  عمج مخابر على ابوج يريد يعرف  جوابج؟

جاوبتها بدون ما اباوع الها ونظراتي تتجول بالفراغ _هاا بكيفج ماما

_لا ماكو بكيفج هذا زواج وهاي حياتج الج مو

لبسه اشتريها الج ع ذوقي

دنكت راسي وحجيت  موافقه...

_وليش مدنكه راسج هذا زواج سنة الحياة مابي

مستحى بنتي بس خلي أكولج شي أني مدايمتلج

قوي شخصيتج يمه ترى أبن عمج من حب أسراء

ماحبها لشكلها حبها لشخصيتها صفاء ميحب المرأة الضعيفه أبني شخصيتج يمه تعبت واني

اركض وراج وانصح

وخلي ببالج ترى صفاء بعده مجروح يعني راح

يتعبج يابعد أمج أني ما أكدر امنعج حتى ماباجر

عكبه تكولين أمي وكفت بطريقي بيج حيل يمه

تتزوجين واحد قلبه مو اله؟

باوعت ع ماما : يوم أني اعرف شلون اكسبه لتخافين عليه اطمئني

هزت راسها: هذا هو يمه

لليل صاحني بابا رحت للمكتب باوعلي وابتسم

تعالي باباتي اكعدي

كعدت كدامه

_أمج بلغتني بجوابج

خجلت منه دنكت

_أرفعي راسج بويه لتنزلي أبوج عايش وتنزلين

راسج

رفعت راسي اباوعله استحيت ادنك واعلي واباوع ع الحايط الوراه

_ بنتي أبن عمج خوش رجال واني دومي اعتبره

أبني بس أبن عمج جرحه ماطاب بعده..

ألي اريده منج لتزيدينه هم فوك همه واخته معليج بيها أبد ..

تضوجج تروحين لصفاء تشتكيله مو تسوين

مشاكل واطلع اني مااعرف اربي

زين بويه لتنزلين

راسي وراس امج الله يرضى عليج

_ان شاءالله بابا

_اخذي راحتج بنتي وخلي هذا الكلام ترجية باذنج ....

.

.

.

صفاء: ورا أسبوع من روحتنا لبيت عمي تحسين

جنت كاعد بالصاله اتفرج فلم خابرني عمي

_بويه صفاء تفضل يمي رايدك بحجايتين

جاوبته :- صار عمي بس اغير ملابس واجيك

رحت داادك الباب ع أمي وابويه واسمع صوتهم

_انت صدك متستحي أصغر ولدك راح يتزوج وانت

بعدك فاسد

_ولج شنو فاسد الله يرحم ايام زمان منو جانت

تستعرض انتي لو نادية الجندي لا صدكتي أني

مريض ترى حصان بعدني بحيلي

_يايايا تخبلت انت والله كون الزمه وانطي للبزون

صحت عليهم من ورا ولج يمه شنو التنطي

للبزون قابل هو زفر زين اذا انطيتي وكمتي تحوصين عليه بنص الليل وين نوديج بطلي عيارة

نسوان من وعيت للدنيا لهسه وهو يركض وراج

اجاني صوت ابويه من جوة الغرفة: ولك انت واكف تتسمع علينه بيك خير ابقى بمكانك..

_لا منيلي خير لو بيه خير جان فدت اني راح

اروح لبيت عمي تحسين خابرني يريدني

صعدت اضحك عليهم عبالك مراهقين هاي صار

كم مرة الكفهم الحجي ظل يراهق على اخر وكت معبالك هستوة طالع من ازمة صحية ..

بدلت ورحت لبيت عمي استقبلني

كعدنا بالمكتب مالته ظلينا نحجي بعدين دخل

بالموضوع

_شوف صفاء بنت عمك وافقت أني أعرف انت

بعدك تحن لأسراء الي وكف بعيني مرض أبوك

مااريد أخسره..

بس ثق بالعباس لو فديوم اجت

بنتي تبجي وتشتكي منك محد يوكف كدامي

انطيتك وردة انت مجبور تداريها اما اذا هسه

تكولي انجبرت ومن هالحجي أني وياك اصير مو

ضدك

_عمي هي المداراة من واجبي هي راح تصير مسؤوله مني اذا الله سهل بس تبقى شغله وحده

حتى ماتكولون صفاء خذلنا أني اريد أحجي وياها

ع انفراد صح أني خابرتها بس حسيتها خجلانه مني يعني الخطوبة بعد الامتحانات أريد اني

احجي وياها هالفترة اذا مابيها زحمه عليكم

_بخصوص شنو تحجي ؟

_عمي انت تعرف رشا راعية مشاكل

شغله وحدة مااريد زهراء تندك بيها ورشا أني اعرف شلون اوكفها عند حدها يعني الزواج استقرار مو

مشاكل واني اختي مااكدر امنعها من بيتنا

والشغلة الثانية خاصه بيني وبين زهراء مااكدر

احجيها كدامك صح انت ابوها بس هي منا و

جاي مسؤوليتي أني مو انت

_هذا هو هسه اصيحلك زهراء

راح صاح زهراء دخلت وعمو كال اخذوا راحتكم

أني بالصاله موجود طلع عمي وهيه فاتت تباوع لعمي من طلع وسد الباب وراه دنكت وسلمت عليه بنبرة مرتبكة :

_ هلو صفاء شلونك...

_هلو بيج تعالي أكعدي خلي اكولج شغلة ..

يتبع ...

هلاو  اسفة البارحة مانشرت لان جنت يم اهلي ونسيت الجنطة وبيها الفون تعرفون احنا اذا رحنا لاهلنا بجنطتين نرجع ب ٤ جنط 😁

فاني دحست التليفون بوحدة من الجنط ونسيتها وجويسم كيف مقبل يرجع عليه اله اليوم الظهر اصلا فرح من نسيته 😒

في شريعة العشق

بارت18

نورا ناصر

توتر تملك اعصابي بشدة سرت بيه ارتعاشة عجزت عن قمعها ، تقدمت باتجاهه كوة وكعدت مثل ما طلب مني

كعدت واني اباوع ليكدام بدون ما التفت اله او احط عيني بعينه ...

اجاني صوته :- شوفي زهراء عمي بلغني

بجوابج وعندي كم شغلة اريد اكولها الج

هزيت راسي ودنكت .....

_ خطج باجر اغيره الج لان يعرفوا اهل امي

وهذا الشي راح يسببلج ازعاج

سكتت شويه كال تمام

هزيت راسي : بلي تمام الي تشوفه ...

_منا وجاي شنو تحتاجين تطلبي مني أني مو

من عمي ..

بسرعه جاوبت : لا لا عيب

ضحك :- شنو العيب بس اعقد عليج اي شي

تحتاجي تطلبي مني ممنوع تطلبين من أهلج

_بس شسمه

كام من مكانه واجه تقرب عليه

_ وهاي الشسمه شوكت تبطليها مو كلنا عيب هههههه

_لا مو عيب تفكيرك بي خلل

_اممم من تجين يمي اترجملج الشسمه وبعدين

كولي مو عيب

رفعت راسي باوعتله و خزرته ...

_ها شو تخزرين معناها طلعتي تعرفيها

عوج حلكه ويحجي ...

فتحت عيوني على اتساعها كتله يلا باي صفاء وطلعت اركض ...

.

.

.

صفاء ظليت اضحك عليها ، رجعت للبيت شفت الحجيه طالعه من الحمام و الوالد بعده بالحمام : ها نكول مبروك راح يجيني اخو؟

_انجب ولك متستحي أنت

_أني شعليه انتي وكعتيله للرجال فاسد وفاسد

طلعتي انتي تحبين الفساد شعندج سابحه دنيا

المغرب حتى متفوتج الصلاة مو ؟

بعدني دااحجي طلع ابويه من الحمام شافني جان يكول

_لو مخلفلي جرو احسن منك واكفلي سجينه

بخاصرتي

_لالالا ليش مو فرغتلك الجو وطلعت بعد شتريد

تريد تنام بغرفتي روح اصعد بس بعدها اغسلوا

الفراش هههههههه

أمي: اي نشوفك عود منا وجاي تظل تغسل بفراشك

ضحكت وتمددت ع التخم ......

كرار: غسلت سيارتي وخلصت ودا اغسل

الطرمه واطلع المي ليبرا ، لابس فانيلا تعلاكه وشورت وماخذني الواهس اطلع بالمي واغني واني على هالحال فاتت مهاوي من يمي وكفت احس جمدت بمكاني وظليت اباوعلها ..

ظلت تباوعلي مخنزرة

رفعتلها تك حاجب ونصف ابتسامة مرسومة على وجهي وتباوع الها بهيام ..

فتحت عيونها مصدومة ظلت تفر بيدها كالت _ متستحي طالع هيج متكول اكو بنات يفوتون

تستعرض بجسمك كدامهم

ضحكت وغمزت الها :- وانتي هم شكو تباوعين متستحين ؟

تريد تحجي فاتت جيرانا هاي شويه مو راحة

ظلت تباوعلي وتضحك وفاتت ..

التفتت لكيت مها خازرتني

وهي منا عيونها كبار عضيت شفتي وتمتمت

خررررب شيب الخلفج

ظلينا نتناطح بالنظرات وصرت استفزها اعض ضفتي وابتسم نصف ابتسامة مستفزة.

حسيتها عصبت :- شبيك فرحان بنفسك متروح تدخل جوا اتغير ملابسك

تقربت عليها شويه وهمست :- صار هسه ابدل بس ليعصب الحلو من كون يروحلج فدوة منير وجهيد واخويه عبدالله

خزرتني وراحت تمشي سريع لبيت عمي واني

دخلت بدلت ولحكتها دخلت لبيت عمي بعد ما

فتحتلي الباب مريم لكيتها هي وعبير كاعدات

بالحديقه هي بس شافتني وكفت

عبير: ها وين هسه اجيتي ؟

_لاحبي أروح أني وها نسيت اكولج بعد مااداوم

حكعد اقرأ بالبيت

كرار: شنو هاي اذا حضر الشياطين خلو الملائكه

هي سمعتني بس مادارتي بال تقربت يمهم

عبير: هلو كرار

_هلو بيج وجهت كلامي لمها شبيج انتي بس شفتيني كمتي قابل راح اكلج لو مشايف بنات أني واذا حلوة يعني ع كيفج

مها: وانت منو يمك شكو لاحكني

_قابل جاي لبيتكم لو لبيت عمي يلا تعالي أكعدي

خلي ادرسكم باوعت عليها بعدها خازرتني

شبيج بنتي لتخزرين لتطلع عيونج من مكانها

بس صدك تذكرت ذاك اليوم خلال مسيرتي مال المراقبه شفتج رايحه لمدينة الالعاب من وصلتي

لهناك صعدتي بدولاب الهوى مال الاطفال مو هو

هذا ع كدج لان ذاك الجبير متنوشين تصعديله

عالي المقعد وانتي منا جنج قوطية بيبسي ام

الخمسمية مدحدحه

مها: عبير صيحي بأبنج عمج

كرار: عبيرشعليها اني دااحجي وياج مو هي بعدين شنو تصيح بيه قابل طفل أني لو اختها

جنت ناصب على عبير لان قزومه بس شوفي الله بالمرصاد رزقني بأحلى

قزومه وغمزتلها

مها: ولج عبير ديغمزلي انتي شبيج ساكته

كرار: يلا تعالي نيلز حتى اقريكم صاروا عدنا اثنين

نيلز عبير و انتي ههههههه

باوعتلي صفح

_ها متصدكين اسألي عبير جنت ادرسها رياضيات

تاخذ اقل شي ٩٠

عبير: ها هاي شوكت؟

كرار: لتصيرين مثل بنت عمج رشا البومه توكفين

للواحد ع الزلة مو اني احبج ليش تخليني اعيد

حساباتي

مها: عبير أني اروح

كرار: لج وين داده وين والعباس الحكج بس

تطلعين

مها: عبير ترى زودها

عبير: مها شنو هالحركات انتي تحبي وهو يحبج

لتصيرين مثل ذيج البنية تحبه وتصيح ذليت

نفسي تالي من خطبها دخلت للغرفتها لكيتها

شادة وصله وتركص دبطلن عيارة هاي مشاعر

ليش تضموها

كرار: ابوس راسج ع هالكلام الخطير يروحلج فدوة صفاء واخته أم لسان المنشار باوعت ع مها

لكيتها مدنكه وتفرك بايدها

عبير: كمت جريتها دتعالي أكعدي شكو دتخفين

مشاعرج قابل هو أحسن منج معبر عن حبه وانتي

خانسه بنتي لتستحين من شي هو فطرة من ربج

كرار: عبير نقذتني هالبنية دومها واكفتلي هي

قريبة اليه كل اليعرفونا عبالهم اني وياها عدنا

علاقة حب بس اليجمعنا اكبر من الحب اخوة

وصداقة...

يمكن الي يشوفها يلومها لان حرجت مها بس كلامها

صح ليش دائماً ننتقص من المراة واذا حبت نوصفها بأن هي ممتربايه و اكو يكولون مو شريفه

الي سوته عبير هو شي بسيط من حق المرأة

تتساوى ويا الرجل وتعبر عن مشاعرها هاي فطرة

من ربنا مو عدنا معناها ليش نخفيها هي شي

مو معيب ولا مخجل الحب شي مقدس بس

للشرفاء مو للي يلوثوا ويرتكبون حماقات بأسم

حب ...

زهراء: بدت الامتحانات جنت اتمنى تخلص واحصد ثمار تعبي مال ١٢ سنه واخلص من قيود

المدرسة وبنفس الوقت أريدها تخلص لان

حنخطب لصفاء بعد الامتحانات دااحس بهاي

الفترة ربي عوضني نهاية صبري فرج وراح اتزوج

الي أنتظرته وحبيته من طرف واحد هي مو شغلة

كرامة شغلة قلب دگ دگة حب لشخص خطأ

بس بالنهايه هذا الشخص حيصير من نصيبي

بهاي الفترة عبير هم جانت بكالوريا بس هاي ولا

يمها تقرأ باليوم ٧ ساعات وتعزل تكول اني ثالث

شكو متعبه نفسي هو ثالث قابل سادس واصلاً هي امتحنت قبلي وخلصت تكول زينه وجانت

فرحانه بشعرها لان صار كاري وبعد محد يكدر

يقلد عليها ....

عبير: كرار هواي تقرب من مها هو اول كلية ومها ويايه ثالث متوسط ، البنية كولش حبابه بس اهلها شويه حديين

ومتأكدة يرفضون كرار لاسباب طائفية وحجيت

هذا الشي وياهم بس جان حبهم اقوى من ان

يتركون بعض لاجل هيج سبب واني هم تركتهم

والتهيت ويا ماما بالبيت

كرار: جانت أجمل لحظات حياتي ماجنت اعرف

القدر شنو ضاملي حبيتها بكل حواسي جانت

طفله بريئة تخجل حتى من كلمة أحبج عشقت

حتى خيالها خجلها من اراقبها وتصير خدودها

ورديه جانت مثل نسمة هواء بارد تمر بعز صيف

هيج جانت

جنت اشرد من ضغوطات الدراسة والشغل الها

مجرد اسمع صوتها صدقاً ينزاح عن كل هم بنت

مرحه وحيوية حييتني صورتلي الدنيا جنه حبيت

كولشي من خلالها بس اخخخخ من القدر دائماً

يظلمنا

صفاء : خلصت زهراء امتحانات وتحدد موعد

الخطوبه اتفقت أمي وعمتي ع كولشي أني ما

اعرف بهاي الامور بس عمي كال الخطوبه بقاعه

مااريد زوجتي تتعب وهي مريضه وهاي هدية

خطوبتكم من عندي

اتفقنا أني وزهراء نروح نحجز قاعه بعد ماخابرتها

جنت حريص بكلشي لازم اخذ رأيها مااريد احرمها

من فرحه هي حابه تعيشها حبها نقي لو ما نقي

مستحيل يتحقق الشي الي تتمناه وانتظرت هلكد

وبالنهايه ربنا عوضها

رحت ع بيت عمي طلعت زوجة عمي جانت تعبانه

سكرها مرتفع خطيه سألتها : شعجب يوم انتي فتحتي و هيج تعبانة البنات وينهن عنج ؟

جاوبتني: لعد منو يفتحه ومريم يم بيت خالتها وعبير زعلانه متعاركه ويا أبوها وذيج اياهه بغرفتها

حابسه على نفسها وزهره دتحضر نفسها ادخل أبني

ليش واكف بيتك هذا يمه

دخلت أنقهرت عليها جانت لازمه سبحتها ومبين

التعب عليها راحت جابتلي عصير بارد

الجو حار شهر السابع شربته وكعدت انتظرت شويه وطلعت زهراء مكدرت

اطلع واترك زوجة عمي بهذا الوضع باوعت ع زهراء جانت دتعدل بسوارها

اشرت الها : زهراء صيحي عبير تنزل يم أمج واذا منزلت كوليلها ترى صفاء يصعد ينزلج غصب عنج

زهراء: عكدت حاجبي وصعدت لعبير جانت ضاربه

الدنيا جلاق ومتمدده ومخليه الهتفون بأذنها

ورافعه رجليها ع الحايط رحت عليها هزيتها

التفتت باوعتلي

_خير شكو شو بعدج هنا؟

_هسه حروح بس كومي نزلي جوه ماما متخربطه

واني حطلع ومحد موجود غيرج

_ليش وين بابا؟

_راح يجيب مريم يلا كومي نزلي

تركتها ونزلت بعدني ع الدرج حسيت بيها دتمشي

ورايه شافت صفاء سلمت عليه وكعدت يم

ماما واحنه طلعنا

عبير: نزلت يم ماما جانت تعبانه رحت كعدت يمها

شبيج يوم فدوة لتخوفيني

_يمه مابيه شي شويه السكر صاعد اخذت علاج

هسه ينزل لتخافين بعد روحي

باوعت عليها وكعدت مااكدر اسوي شي لو هبوط

انطيها حلويات بس من يصعد مااكدر انطيها

شي سكتت وظليت اباوعلها ..

ورا ساعتين قستلها السكر لكيته نازل الحمدلله

من تتخربط أمي احس روحي تروح مني

أمي اعز حتى من نفسي مجرد أسمع كلمه بنيتي لو عبرة يمه ، احس ملكت الدنيا ومابيها لو من تجي

بالليل تغطيني وتمسح ع رأسي هاي وحدها حياة

ثانية..

باوعتلها حبيت اضحك وياها

_اكولج سوسه ليش كلهم طلعوا بس أني وياج بقينا؟

_هسه لو اكوم افرك حلكج تكوليلي سوسه ولج

أمج اني طايحة الحظ سوسه شنو

_يا بعد روحي لعد حسوني زوجج من يدلعج سوسه وسوسايتي شو تفرحين بس اني تعوجين

حلكي اعتبريني تحسين شكو بيها ههههههه

_عاب هالحلك اعتبرها تحسين تطولين توصلين

لاظفر ابوج انتي ام كصة المعوكفه شوكت ماجيتج الكاج لو عصبيه لو نايمه

_سجلتج ترى شلون لعد من يكولج تحبيني

متحجين ها هاج سمعي ..

سمعتها الصوت دنكت شالت شحاطتها تريد تكفخني أني كمزت عليها أبوس بيها وادغدغها وهي تضحك بهاللحظه طب

بابا

_ها ولج ماخذج الواهس فارغتلج الساحه

_زعلانه وياك مااحاجيك

بابا: أنتي زعلانه عليه وامج زعلانه عليه ومريم

زعلانه عليه لان جبتها من بيت خالتها أدري مسوين حلف النساء ضدي انتن ولجن

عبير: يا حتى ام السوس زعلانه عليك لعد سالفتك

خربانه ولهذا السبب قررت اصالحك بس بشرط

تنطيني حمررة

مريم: أني هم اصالحك وتنطيني حمرة

بابا:انتي شنو جزء لا يتجزأ من عبير شتحجي

انتي تقلدين ؟ زين هسه انتوا اصالحكم وامكم شلون؟

عبير: والله بابا شغلتك تعبانه الحكومه زعلانه

عليك معناها من هسه احجزلك مكان بغرفتي

بابا ضحك

ماما: من سوالفك غير رجال شكدك شطولك بنتك

حتتزوج وانت تسوي هيج

بابا: أدري شمسوي ليش تخلينا نطلع سوالفنا كدام

بناتنا يامرة

عصب بابا وراح للمكتب مريم لحكته جابت

خمسين الف واجت

مريم: عبير ليش غلستي ع الفلوس واذا بابا وماما

زعلانين احنه شعلينا هاج هاي الج

خلت الفلوس بيدي وصعدت ولا اهتمت للوضع

ماما هم راحت للمكتب لحكت بابا اني كعدت

اباوع اخبار رياضيه اموت ع شي اسمه نشأت

اكرم وادور على اخباره بكل نشرات اخبار الرياضة ...

.

.

.

زهراء: طلعت ويا صفاء الطريق كله ساكت واني

هم ساكته من وصلنا صف السيارة بالكراج ونزلنا

لزم أيدي ، التفتت اله باوعت عليه وتبادلنا النظرات

برزت نظراته بس مكدرت افسرها ، دنكت واحس بدفو ايده ، احساس غريب تسلل لقلبي وروحي تمنيت تبقى ايدي بيده طول العمر ..

دخلنا ظل صفاء يتفق ع الترتيبات واني اختاريت

الاغاني وترتيب الدخولية واغنية الدخول اختاريت أغنية نانسي (لون عيونك غرامي) حسيتها تعبر عن مشاعري تجاه صفاء ..

طلعنا جان باقي ع الخطوبه أسبوع ردت أرجع للبيت لان تركت ماما مريضه وبالي طول الوقت بقى يمها وقلبي عليها ..

طلبت من صفاء نرجع مقبل كال وين نرجع عازمج

ع غداء ساعه وحده شنو ترجعين لاهلج ممأكله

مكدرت ارفض ورحنا لمطعم بالجادرية

صفاء: شنو تحبين تأكلين؟

_ ما اعرف انطيني المنيو اشوف

قدملي المنيو ظليت اباوع بيها حسيت عيونه تراقبني رفعت نظري باوعتله شفته مركز بيه عبالك أول مرة

يشوفني ، بس أني جنت اخجل احط عيني بعينه

عيونه مأسرتي ، ارتبكت وطلبت سلطة فتوش ولازانيا

وهو طلب كباب وتكه ومقبلات

اكلنا جنت ماارفع راسي لان بس أرفع راسي

اخجل وبعد مااكل ، اكلت شويه وتركت الاكل

وهو دياكل انتبه عليه كال :- اكلي ليش تركتي الاكل لتخجلين مني ابد و لتتقيدين ترى نفسي صفاء أبن عمج ماكو شي اتغير والي اتغير للافضل حتصيرين حلالي يعني مالها داعي كل هالخجل هذا

_ لا مااخجل بس شبعت ...

_راح اكوم اغسل واجي الكاج مكمله اكلج ..

راح غسل واجه لكاني العب بالموبايل باوعلي وهز

رأسه

صفاء: شو ممأكله؟

_مااريد

_تشربين جاي؟ ولو انتي شأكلتي

_اي عفيه اريد جاي راسي ديوجعني

_سلامتج

طلب جاي وشربت بعدها كمت غسلت ورجعنا بالطريق حجه ويايه وهو ديسوق :- شوكت النتائج؟

_بعد أسبوعين ليش؟

_حتى نبدي نجهز غرفتنا قبل الدوام نتزوج

لو عندج رأي ثاني؟

: - لا بس أني اريد اختار الغرفه واكسسواراتها اذا ممكن

_أي اكيد انتي لعد اني هو انتي راح تكعدين بيها

أكثر مني شي طبيعي ع ذوقج ...

ابتسمت بوجهه وكملنا طريقنا

وصلنا للبيت ، دخل ويايه يتطمأن على ماما شافها زينه سلم وراح لبيتهم..

رحت يم ماما حجيتلها التفاصيل جانت كولش فرحانه جرت رأسي وباسته

_الله ينطيني عمر كون واشيل ولدج بيدي

بست أيدها : الله يطول عمرج ماما ...

دخلت لغرفتي

عبير: ظل بالي يم بابا وماما خطيه أمي تعبانه

وشو بابا هالمرة قفل حتى مصالحها كاظم الساهر

غلس حتى ع الوردة نزلت لكيت ماما متمدده ع

القنفه رحت كعدت يم رجليها وصرت افركهم الها

سألتها: يوم شكو شنو المشكله؟ الي اعرفه أنتوا

متطولون بزعلكم ساعه شو بابا دخل للمكتب

بعد مطلع

ماما: بنتي لتشغلين بالج ونسيت أكولج ترى باجر

النتائج مالتكم

عبير: ميخالف بس مكلتيلي شكو

ماما: هبه

_شبيها بنت ام حسين غير

ماما : ليش أكو غيرها مخابره أبوج تبجي وتريده

يساعدها

عكدت حواجبي: ليش شبيها خوما بيها شي

باوعتلي ماما وابتسمت: لا لتخافين مابيها شي

بس تريد فلوس متداينه علمود تفتح محل تسوي

تسوي صالون وفشل مشروعها وخابرت أبوج تريد

فلوس

عبير: وتالي

ماما: شتالي رايح منطيها خمس ملايين بدون

ميحجي ادري ساعدها بس مو بهيج مبلغ وانت

بنتك ع أبواب زواج ومن حاجيته كام يعيط

وينتر والله أني رجال ومرة استنجدت بيه شلون

مااساعدها ناقص غيره أني صاحب بنات باجر

عكبه وحده من بناتي توكع بمشكله ومن تطلب

مساعده محد يساعدها رد الدين هذا لان أبوها

رفض يساعد البنية مكسورة جنح

_ ماما ترى كلام بابا صح عبالي شو شكو وانتي زعلانه بصراحه زعلج ماله داعي المفروض تفرحين من عندج هيج رجال يساعد الناس وحتى الاذوا يساعدهم بس حتى بناته من يحتاجون شي محد يرفض مساعدتهم أحنه نتعلم منج يوم صغريها ولتكبريها هو مو اصرفوا ما في الجيب يأتيكم مافي الغيب

هسه أنتي شايله هم زواج زهراء الا بعدله أقل شي

شهر دكولي ياالله ماما بعدني احجي رفعت

راسي لكيت بابا مكتف اديه لصدره يباوعلي و

مبتسم حجه ويا ماما

_شوفي مو اكولج سندي هاي والله مو غلطان من

أكول هيج حبيبة أبوها هاي

اجه عليه باسني

باوع لماما ها راحت الطنكورة لو بعدها

ماما: والله لو مو بنتك تحجي ويايه فلا ارضى

بس هاي مدري شلون تكدر تفر عقل الواحد ملعونه

نفس أسلوبك أكبر رأس تقنعه

تركتهم وطلعت للحديقه أنتظر مها شو هاي بس

أرتبطت بكرار بعد متجي هواي عبالك خلصت

المصلحه رحت دااجيب الموبايل حتى اخابرها

باوعت للموبايل رقم يتصل بيه

رفعت الخط اجاني صوت اسراء تبجي وتحجي

حتى مداافهم شتريد بس جانت منفعله صوتها

مال وحده خسرانه شي عزيز قهرتني

أسراء: عبير ماعندي غيرج عفيه أعرف اتصالي بيج خطأ ويسبب مشاكل الج واليه بس كوليلي

صدوك صفاء حيخطب لو أمي تجذب عليه وتريد

تحرك دمي

-: اسراء اهدئي واذا تزوجت قابل يبقى طول

العمر عايش ع الذكرى مثل ماانتي تزوجتي هو هم

من حقه يعيش حياته ويستقر انت شكو دتبجي

مو تزوجتي عيب وحرام اصلاً زوجج يدري بيج

دتبجين ع الماضي اعقلي اسراء ماكو مجال للرجعه بعد الي بيناتكم انتهى قبل ليبدي حتى

الله يوفقكم اثنينكم ويسعدكم

شهكت وجاوبتني :- عبير والله فرحانتله بس أمي حجت كلام يغث كالت أبوه ضاربه و زوجه وحده ممعروف اصلها من فصلها صدوك هالكلام لو تكذب صفاء يستاهل ست البنات ليش ظلموا لج ليييشششش

_ وهو هم اخذ ست البنات امج تلعوص بالحجي حرامات هاي مرة جبيرة بالعمر جان عرفت شلون اهينها لو الميحصل العنب يكول عنه

حامض اطمئني حبيبتي صفاء حيخطب اختي

زهراء

صاحت بصدمة :- زهراء!!!!!! شوكت هو جان ميريدها بس يلا همزين زهراء ع الاقل تحبه هسه ارتاحيت لان

زهراء متأكدة تسعده فدوة عبوره لتكولين اتصلت بيج صار لازم اروح قبل ليجي خطاب

سدت الخط صفنت هاي امها شكد حقيرة مصرة

لحد هاللحظه تشوه صورتنا عبالك بگنا الورث

مال الخلفها يلا هي والله تتجازه....

كرار: قوت علاقتي بمها صرت انام ع انفاسها ما

اخليها تقفل الخط الا انام ومن اكعد احب اول صوت اسمعه هو صوتها هي جانت تكعدني الصبح

حتى اروح للدوام بريئة نقية اجمل هدية من ربي

اجتني هي مها ، اذا اتغزل بيها تسكت لو تسد الخط

وارجع اخابرها اعيط عليها لان قفلت الخط بوجهي وهي تظل بس تعتذر وتتوسل بيه حتى ارضى

أهلي حسوا بيه من صفناتي لو من اصفن

أبتسم حتى من ادرس اوزع ابتسامات انجنيت

بحبها مرات انسى حتى الدراسة واكعد اخابرها

وهي تتوسل بيه حتى اقرأ والكه نفسي مستجيب

لطلبها وبالفعل اغلق الخط وادرس

فديوم تخابرنا كالعادة

كرار: شلونه حبيبي اليوم لج مشتاقلج بكد حنان

امي عليه

مها: والله اني هم

_انتي هم شنو ولج احجيها مو راح اموت انتي

شكد باردة

_لا والله بس أخجل

_هسه قابل اني واكف كدامج هو اتصال يا عمري

مها: كرار خوما يجي يوم تتركني

_اترك روحي ومااتركج بطرانه أنتي

لج بابا افهمي أنتي حبي النقي ودكة قلبي وعافيته

لج احببببببببببببببببببببج لكيت نفسي اصيح

بعلو صوتي هي بسرعه كلتلي عزززززا بعين أمي

تخبلت هي بعدها دتحجي جان يدخل ابويه للغرفة

مخنزر ومعصب صاح : وسم وقزالقرط شبيك جنك ثور هاج عليه بهالليل انعل ابوك لابو ساعه ١٢ شنو مننطمر

شلون خلفه زفر مخلفين حبتك حية كون

رفعت راسي مبتسم :- _العفو يابه ..

هز ايده وطلع أبويه عسكري وانضباطي

حتى بالبيت بس احنه مصادقينا

باوعت الخط بعده مفتوح خررررب حظي المبهذل

هاي سمعت الرزاله من سي السيد

حمحمت: الو

هي خربانه ضحك

_شكو تضحكين ولج هاي بسببج اخذنا رزاله

بعدها تضحك من كد مضحكت لزمتها أم

العوافي هسه شلون حتستمرين تضحكين ترى

أطلع من الغرفه واوكف بالممر وهم اصيح احبج

_لالا حسكت والله حسكت ...

_اي أموت عليج مها اموت ع صوتج وع هدوئج

وعفتج لج من رحت فدوة لذاك الطول عبالك

شخاطه

_اهووووووووو شنو هاي كرار

_اوووويلي هم زعلت نيلز ...

مها تدلل عليه واني أموت على دلالها

كل أمام ازوره وبكل فرض ادعي تكون قسمتي..

حجيت وياأهلي علمود اخطبها كالوا كمل كلية وادلل وخلي هي هم تكمل سادس كلت اصبر اصلا هي بعدها

صغيرة مو مال زواج ومسؤولية...

بعدها قللت جياتها لبيت عمي وهذا الشي حرمني شوفتها السبب لان أخوها ميقبل تطلع هواي.

زهراء ... متمدده ع جربايتي اليوم النتائج

عبير قبل اسبوع استلمت نتيجتها وطلعت ناجحه ..

ماما سوتلها حفله وعزمت صديقاتها ..

واليوم موعد النتيجه مالتي

جنت كولش خايفه اطرافي ترجف ومغص ببطني

ماما جانت تهون عليه بس أني الخوف متملكني

اعرف نفسي انجح بس خاف مااجيب المعدل

البالي بعدني أفكر ودك موبايلي صفاء بقيت متساءلة

هذا شيريد عززززا بس لا طلع النتيجه

بسرعة رفعت الخطواجاني صوته : هلو زهراء شلونج؟

بنبرة سريعة جاوبته :- ميته خوف صفاء اليوم النتيجه

_اهدئي طلعتها هاي بيدي

قلبي صار يدك سريع :- اي احجي شكد المعدل عفية

_أول شتريدين هديه؟

_أنت أجمل هدية صارتلي مااريد غيرها بعد

كلتها وانصدمت على نفسي شلون تجرأت وحجيتها

هو ظل يضحك

_ها يعني متريدين غيري هديه بس خلي اكولج

ترى اني هدية عاوية فأطلبي غير هدية

زهراء: هسه دكولي المعدل حباب لتلعب بأعصابي

_معدلج ٨٦

عطت عيطه من الفرح و ظل يضحك ويصيح

طرشتي اذني ولج مو هيج ...

أجت ماما ع صيحتي

حضنتها وابجي وبشرتها باست رأسي حتى ماانتبهت بقيت صفاء ينتظر رحت لكيته غالق الخط

راحت ماما خابرت بابا وبشرته وهو

حبيبي رجع من دوامه باركلي ولبسني طالع كلادة

ذهب .. ديلبسني اجت ماما

كالتله أدري انت تروح تجيب لبنتك هدية غير تاخذني

وياك لو رف اني ونسيتني

بابا: ولج هو منو ينساج حتى أم هاني الفراشه

مرات اغلط واصيحها بأسمج

ماما ضحكت : ميخالف هسه تتغدى وتاخذني اشتري هديه لزوزو

هز راسه مبتسم .. صار يابه صار

زهراء: لتعبون نفسكم تعبكم ويايه كولش كافي

والله مااريد هدية

بابا: شعدنا غيركم باباتي ..

صفاء: رجعت للبيت كلت لاهلي زهراء نجحت الحجي كال بعد شكو جنتوا منتظرين تستلم النتيجه وهاي استلمتها معناها نتوكل ..

مجاوبته طبيت سبحت وغيرت ملابسي واكلت ورجعت بدلت رحت اشتري هدية الها مال نجاحها شفت محبس عجبني اشتريتلها ورجعت نمت مكعدت غير ساعه ١١ بالليل...

زهراء:ظليت افكر ا شو صفاء حتى مااجه باركلي ولا تعب نفسه معقولة هذا كل عقله يحجي لعد شكو وافق

اكيد مايريدني انفتحت باب غرفتي كمت شفت عبير النعاس بعينها ولازمه موبايلها

عبير: هاج خاتون هذا صفاء ديخابر عليه يريدج

مرة ثانية لتغلقين موبايلج وتزعجون الناس بدت

رحمة الله وياكم

زهراء: اخذت الموبايل وهي صعدت اني صح موبايلي طفى شحن ونسيت اشحنه وهاي عبير

نومتها عزيزة اذا واحد كعدها وهي نايمه تظل

تغرد الله يعلم شغردت لصفاء

جاوبت الو هلو صفاء

ميحجي خربان ضحك :صفاء تسمعني

_اي اي اسمعج

_شبيك تضحك ؟

هاي عبير اول شي رزلتني وهسه رزلتج مو لسان

عدها بيكيسي

_يااا عززززا شكلتلك

_انسي المهم عيني اني اعتذر والله تعبان واجيت

نمت ومكعدت غير هسه عمي وعمتي نايميين

لو كاعدين؟

_لا كاعدين ديسمعون اخبار ليش تسأل؟

_اوك لعد سلميلي عليهم

زهراء: مديت رأسي لكيت بابا وماما كاعدين وهاي

عبير هم كاعده تدردم مدري شبيها بس شافتني

خزرتني ضحكت عرفت طارت نومتها رجعت للغرفه شويه واندكت الباب اسمع صوت صفاء

اجت عبير : تعالي هذا صفاء اجه وبابا يكول خلي

تجي تسلم

طلعت باوعتله يممممه يجننن بهاللحظه حسيته

بالفعل هو مالتي هو جان مندمج من سلمت انتبه

وكف اتقدم عليه باسني من راسي وباركلي وطلع

علبه صغيرة من جيبه انطانياها

كال اعذريني والله اجيت متأخر بس احسن

من ماابقى لباجر

وضحك ..

عبير: كاظم الساهر نمبر ثري نسيت الباقه مال

الكرفس ااااقصد الورد

صفاء: لا انساج وماانساها انتي بعمرج محد جايبلج ورده مو مبين هههه

عبير: اي والله صح حتى بابا من يشتري لماما

واني وياه يشوفني اباوع وميحس ويكول خلي

اشتريلها يشتريلي لفة شاورما بس وداعتك

اللفه اطيب

ظلينا نضحك ع سوالفهم هي وصفاء بعدها استأذن صفاء وراح ثاني يوم اجوا بيت عمو حددوا

موعد الخطوبه الاسبوع جنت احس نفسي اسعد

بنت بالدنيا الاحبه صار الي ونجحت بمعدل عالي

وماما وبابا الله يحفظهم اليه جانوا اول اسباب

سعادتي

بدينا نجهز أني وماما دنروح نحجز بدله

قبل لنطلع جتي مريم تركض ورانا : أريد اروح وياكم شنو هي قابل يومية عدنا عرس

عبير: هذا مو عرس ديرحون يأجرون بدلات انتي

لتحشرين نفسج بالطابه والطالعه

مريم: أنتي معليج ابقي هنا سوي عشاء واني اروح

وياهم

عبير: ولج هاي منو المعليها مو اكف انتف شعرج

والقرأن صار هواي ممستفردة بيج طول لسانج

غصباً ماعليج تبقين بالبيت

ظلن يتعاركن اثنينهم وهرجن البيت بصياحهن ..

لحد ما ماما بزعت وصيحت على عبير بصوت كلش عالي : ولجججججج عبيرررر شنو تكوميلها شنو

تستفردين بيها بعدني عدلة مامتت وانتي هيج

تعامليها واني اكول عنج ايدي اليمنى

عبير: ماما لتسويها دراما تبقى بالبيت شعدها رايحه حفله خوما حفله

ماما: شنو هي بكيفج ولج كومي مريم بدلي أريد

اشوف منو تمنعج

عبير باوعت ع مريم خزرتها و مريم بسرعه

حجت: لالالا ماما مااروح ابقى يم عبير نسوي

عشاء مو عبير تقبلين ابقى يمج

ماما: طاحظجن اثنينجن انتي وهاي الجبيرة من

مسيرتجن هاي المسترجله كومي بدلي امشي ويانا

_لا ماما مااروح وركضت مريم صعدت فوك

عبير كعدت ع التخم وحطت

رجل ع رجل

عاطت ماما : ولج اذا بقت مريم هيج تخاف منج

وترجف والنبي الزمج اكطعج واريد اشوف منو

يمنعني منج جرتها من ياختها ودفعتها امشي

صيحيها خلي تنزل تجي ويايه لا اموتج والله

صعدت عبير جابت مريم واجت كعدت

مريم: يلا ماما تاخرنا

ماما خزرت عبير وذيج تباوعلها ولا يمها

ولا عبالك ترزلت وانكفخت...

طلعنا وصلنا لاحمد البديري بالمنصور حجزت بدله

لونها وردي وسخ وفستان لون ذهبي قصير وماما اشترتلي فستان ابيض

رحنا دنشتري حذاء عاليه باوعت ماما

متذمرة سألتها شبيج ؟

_بالي يم اختج بقت وحدها وانوب اني ضربتها

ورزلتها

_ماما هسه تلكيها نامت وحتى عشاء ماسوت هي

عبير بس تضوج تنام قابل متعرفيها

رحنا للمطعم دنشتري عشاء كامت مريم فتحت جنطتها

وطلعت فلوس

مريم : ماما أني ادفع

_منيلج فلوس ماما

_مو هاي عبير من صعدت نزلتني انطتني من مصروفها كالت خاف تحتاجين شي تشتري هاج هاي فلوس وهسه اني مااحتاجيت حدفع العشاء

لان هاي بنتج اذا شافت الفلوس ع حطتها تصيح

عليه والله شريره مو بيدها

اني وماما وحدة باوعت للثانية وضحكنا عليها شكد تخاف من عبير

مع ان عبير دائما تنصحها تكولها احترمي ولتخافين الخوف يضعف شخصيتج بينما الاحترام يصقل شخصيتج

رجعنا للبيت ودخلنا للصاله نسمع

صوت عبير عالي هارج البيت هرج كانها دتتعارك اول ما سمعناهه تكوول :- اختي تاج رأسكم تروحون

فدوة لاسمها....

يتبع ..

في شريعة العشق

بارت19

نورا ناصر

بقينا وحدة تباوع بوجه الثانية اني وامي ، ذهول وتعجب شديصير جوة ومنو يم عبير !!؟

ركضنا  للصاله بسرعة انصدمنا بوجود  أم اسراء

وزوجها ، هاي شدتسوي يمنا ؟ وهم الها عين شون عالم متستحي !  باوعت للكاع كلها كزاز وكلاصات مكسره ..

ركض بابا على عبير وفات حتى بدون مايسلم

_شكو بنتي شصاير هنا؟

بابا هاي ام اسراء اجت تكول بنتكم بالسحر اخذت صفاء والا هو بنعال ميشتريها

الله يعلم امج ليا سحارة اخذتها وسهلت القسمه

بابا عيونه صارت دم وشرايين وجهه كلها

برزت من العصبيه باوع على ام  اسراء وعاط بوجهه

: بيج بخت أنتي مرة لورجال جان عرفت شلون اردج والعتب مو عليج العتب على الي جاي وياج كاعدة ابيتنا وتحجين علينا  بس صدك الي استحوا ماتوا....

هيه كامت على حيلها بوجه بابا ؛- لا عيني ابو زهراء ترة احنا جايينكم زيارة دنشوفكم انت شون تصدك كلام وحدة جاهلة مثل هاي ؟

تقدمت امي الها ؛- ما اسمحلج بناتي متربيات احسن تربية ما علمناهن ع الكذب عيب عليج جاي تهينينا ابيتنا ؟

_ عيني زهراء يا اهانة ليش مكبرة الموضوع

مريت على اختي اشوفهه طلعت مموجودة جيت دا اطلع فكرت امر عليكم اشوفكم ، صلة رحم سويتوهه اهانة

وظلت تفر بيدها :- امشي ابو ضرغام امشي الظاهر ميردون احد يدك بابهم يشوفهم ..

دتطلع  وهيه تفر بيدها من وصلت يمي بعدتني عن طريقها بقسوة حاستها كارهتني هوايه

تصرفها هذا خلى قلبي ينبض بشكل مؤلم

وتلاشت الفرحة من روحي ..

طلعت وزوجها وراها عبالك خروف يتبعها

لا كال الها عيب ولا ردعها ..

طلعت وراحت عبير سدت الباب وراهم واجت

ماما عصبت حيل بحيث احس الدم احتقن بوجهه

بس كتمت و محجت لان شافت بابا اعصابه فول

اجت عبير لمت الكزاز من الكاع ماما باوعت ع بابا

وحجت: اكولك عيني هاي اولها هيج لعد بعدين

شنو حيصير ببنتي اذا دخلت بيت اختها خابر

اخوك وخرب كولشي ...

بابا وباوع ع ماما وحجه بكل عصبيه: شنو اخرررررررب ولجججج هي لعب اطفال بيت اخويه ٤ مرات يخطبوهاااااا مني واردهم وهسه

من وصلت للصدك اروحح اكوله بطلت وعلمووووود منووو علمود وحده زباله تريديني

اخررررب ويا اخووويه ؟

ماما من شافت بابا عصبي سكتت ، وبقت واكفة مكانها

وبابا راح كعد على التخم ويتنفس بعصبية وايديه على جبينه ،  البيت الوضع مكهرب بي وكلنا مصدومين

مريم ظلت تباوع بالوجوه :- ادري حتبقون صافنين تره خلي اكولكم الاكل الي جبناه من المطعم

حيبرد شوكت نأكل ..

بابا باوعلها وضحك وكأن كل عصبيته تلاشت

: - وانتي همج بطنج يعني؟

_اي بابا شسويلكم لعد هسه بيدي شي ومااسوي..

كرصها من خدها وديفوت جوا كال ؛- يلله بناتي خلو كل الي صار ورا ظهركم وخلو العشى دنتعشى اني رايح اغسل .. وفات جوا

كلنا تحركنا بدون صوت ماما تبعته لبابا واني رحت لغرفتي خليت العلاليك وبدلت ملابسي ورحت للمطبخ

حضرت الاكل ويا  عبير بصمت بدون منحجي احس الصدمة بعدها مسيطرة علينا ، لعد هاي ام اسراء شكد حاقدة ، زين هم رفضو لصفاء ليش هسه دتطلع سمها علينا؟؟

معقولة هيه مجانت موافقة ع ابن عمها لاسراء زين هيه مو امها المفروض توكف وياهه وتساعدها تتزوج الي تحبه ليش خلت اسراء تنظلم هيج ؟ شبيها ماعدها شخصية على ولدهه ومخليتهم بكيفهم يزوجوها ؟

لو هي شغلة عناد صارت لان صفاء مقبل يتنازل عن الفلوس الي يطلبهن من غيث شغلة تحير فعلا اكلت راسي من القلق وبس افكر ..

خلينا العشى  وكعدنا نتعشى والهدوء والسكوت سيد المكان ، حتى نفسنا مسدودة ، اكلنا شوية بس مريم بقت اخر وحدة يله كامت من السفرة ...

اندكت الباب وطلع بابا يشوف منو طول شويه يله رجع

سألته ماما ؛- منو بالباب ؟

كعد بابا وتنهد وفرك وجهه بيديه ؛- صفاء وامه اجو ديعتذرون عن تصرف ام اسراء ، بس عجيب  شمدريهم؟

جاوبته مريم: أكيد عبير كالتلهم

_ وينها عبير صيحيها 

راحت مريم جابتها واجت ..

بابا باوع على عبير و سألها ؛-  هاي انتي كايله لصفاء وامه ع خالته؟

بسرعة جاوبته _بلي اني ..

_استشاريتي منو ورحتي حجيتي كلتي لامج

لو اليه شنو انتي من حالج تتصرفين؟

_لا بابا مو من حالي بس انتوا جنتوا ماكو واني

خفت منها نظراتها مدري شونها هيه وزوجها ومنا ظلت تحجي حجي زايد  كتلها راح اخابر صفاء يقبل بخرطكم هذا ؟

خابرت على صفاء كتله تعال شوف خالتك شنو تكول

كال  احنه بكربلاء دنزور وهاي كل القصه....

سكت بابا وهي صعدت ...

الليلة هاي كضيناهه كلنا ضايجين احس فرحتي ناقصة بسبب الي صار ..

واحس الحيرة محاصرتني معقولة بعد متخلصت من اسراء لسه ؟

كرار:.... خابرت على مها ماكو رد انتابني القلق واني متعود اخابرها احجي وياهه كل شويه بس اليوم ماكو استغربت وقلقت عليها بس لا انلكفت ..

ما استسلمت  ظليت اتصل بيها من الصبح لليل

وهم ماكو جواب زاد قلقي وتفكيري لاا  أكيد صاير

بيها شي ..

فكرت ورحت  خابرت على عبير طلبت منها تتصل بيها

كالت اني هم دا اتصل بيها ماكو مختفية ..

لج شوفلياهه ترة ظل بالي عليها ليكون بيها شي دبريها اليه اتصلي هسه

_ على كيفك روميو اصبر شويه شخبصتني ....

_ ديلله لاتصيرين فاهية داكولج قلق قلق ..

سدته بعد دقايق انتظرتها تخابر تنطيني خبر عنها  رن تليفوني لزمته جاوبت عبير بسرعة

اجاني صوتها :- اكولك كرار هاي متعاركه ويا زوجة اخوها ..

_ لا يا الله ليش والتليفون شعليه متجاوب عليه ؟

_ مو هاي  مفتنه لاخو مها وهذا لازم مها اموتها كتل

وخطيه هسه ايدها مكسورة ..

_لا يا الله كسر بيدج ولا بيدها

_ واني شعليه ؟

_ يله لتزعلين بيد اخو مها ولا بيدها ، تعالي كوليلي انتي منو جاوبج؟ صار من الصبح لهسه اتصل ماكو رد..

_سهى  اختها جاوبت

_اوكي مقصرتي بنت عمي يله باي روحي روحي من وجهي

_ ولا تستاهل طبعا ...

سديته من عبير ظليت الوب كلت بعد مابيها مجال اخطبها واخلصها من هالمعاناة ، هذا اخوها واحد سكط

اهم شي الفلوس وزوجته والباقي لاشي عنده

طلعت من غرفتي بقصد احاجي ابويه ، امشي وايديه بجيوبي ، محتار من ردة فعل ابوية خاف هم يحط بيها انه ويأجلها ..

فتت عليه للصالة هستوة يريد يكوم ينام

ديطفي التلفزيون ..

كتله يابه فد دقيقة بس احجي وياك بموضوع

اشرلي اكعد :- احجي كرار اسمعك شكوو بهالليل ؟

_ يابه اريد اخطبها للبنية ضروري هسه

_ شنو صار ولك خو ما صخمت وجوهنا وسويتلك مكسورة وياهه

_ يابه باوع لوجهي مال صخام وجه اني بس طل بوجهي الله عليك ...

_ هستوة ماكل ماريد اروح استفرغ

_ هو غير انته ابويه

_ شتقصد ولك ؟؟؟

_ يابه ترة والله صاك واخبل  دخطبلياهه اسويلكم احفاد يونسوكم

_ خليها ورة خطبة صفاء الله كريم

_ يابه الله ماكو اكرم منه هاي منتهين منها احنا

_ ان شاءالله ان شاءالله بس وخر عني عود اخطبها الك ..

راح لغرفته واني صعدت لغرفتي ....

.

.

.

زهراء : قبل الخطوبه بيوم اخذتني ماما للصالون

حفيت ورتبت شعري وسويت تنظيف بشرة..

باوعتلي الكوافيرة وركزت بيه

كالت خلي اسويلج خصل اشقر كلش يرهم ويا بشرتج ..

جاوبتها ماما بسرعة ؛ لا لا خليها ع العرس احسن حلو شعرها لونه بني طبيعي ..

كالت على راحتكم ...

رجعنا للبيت ماما كالت صعدي ارتاحي ونامي زين باجر اكعدج من وكت ..

صعدت اباوع لوجهي بالمراية

طلعت غير شكل احس نفسي بحلم موحقيقة واخيرا راح اصير اله واذا جان حلم ياريت ما اصحى منه ..

ظليت اكرص بخدودي واضحك ..

رحت للسرير عود ماما كالت نامي وكت

ومنين يجيني النوم ظليت بس اتقلب بفراشي

وافكر بكل حياتي الجاية وشلون اخلي صفاء يعشقني ظليت اخطط وافكر اسوي هيج واسوي هيج واضحك على نفسي حد ما نمت ...

حسيت بصوت ماما يمي وكعدت تمططت

وكمت غسلت وجهي ورحت للمطبخ

شافتني ماما ابتسمت :- هلا بالعروسة

ابتسمت واحس السعادة احتلتني ..

والدم ملئ خدودي من الخجل ..

صبت الحليب دافي وخلته ع الميز و جبرتني اشربه

ارتشفت منه شويه وباوعت على ماما خطية  وحدها تفتر تروح منا وتجي منا ولا تكعد

وصوت انفاسها المتعبة يتخلل لاسماعي ..

سألتها لعد وين عبير اشو مدتساعدج؟

وهيه تطلع الجدر جبير من الكاونتر جاوبتني

_  كعدت من السته خطيه غسلت الطرمة ونظفت وهسه دخلت تسبح ..

_زين منو يروح ويايه للصالون؟

_عمتج ام كرار وبنت خالتج

_لعد وانتي؟

_شلون اترك البيت وبعد شويه يجون خوالج

وخالاتج ابقى اسوي غده ..

زهراء: ماما عبير موجوده

_ولج وين تكدر وحدها واليوم هي صبحت مريضه سابحه ونايمه ع السبلت وهسه بلاعيمها

ومصخنه لا ماما لا مااكدر اتركها وين تدبر تطبخ

وتحضر كل هالامور زين من عدها نضفت وهيه بهالحالة ..

هزيت راسي مستسلمة وامي اشرتلي اكمل اشرب الحليب ، شربته واندكت الباب ، ماما صاحت على مريم تفتحه ، راحت فتحته و اجت عمه ام

كرار وبعدها بشويه اجن خالاتي وبناتهم ...

صاحتني عمه كالت عجلي بنتي حتى نروح للصالون لنتأخر ..

واني داكوم جاوبتها :- ان شاءالله عمه اني مخلصة  معندي شي ..

رحت غسلت و بدلت وطلعت ، اخذتني عمه

ورحنا لصالون اريدو بشارع فلسطين ...

الفرحه مسايعتني بعد ساعات اتسمى

بأسمه واصير زوجتة شرعاً...

الحلم الي جنت احلم بي صار حقيقه

مجان ببالي أي شي غير ارجع

للبيت واتم الحفله ...

مردت اعكر مزاجي بأي شي حتى الافكار السلبية بعدتها عني ، اليوم يومي ربي عوضني نهاية صبري فرح وفرج....

رفعت راسي لكيت ام الصالون مكمله حقيقه

معرفت نفسي من صدُك طالعه مميزة دعيت بهاي

اللحظه ربي يرزق كل بنية بمثل فرحتي الي دااعيشها وميحرم كل وحده حبت من حبيبها ..

بعد ما خلصنا خابرنا على بابا حتى يجي علينا

وبقينا كاعدين ننتظره ، حسيت نفسي ما اكدر انتظر بعد ، خايفة ليصير شي وماتتم الحفلة يربي عجلها خلي نعقد قبل ليصير شي هيج جنت افكر ...

خابرنا بابا كال وصلت ، وفاتت ماما للصالون ظلت تباوعلي فرحانة لمعت عيونها بالدمع حضنتني وحضنتها ...

عمه ام كرار كالتلها لاتبجينها ام زهراء ليخرب مكياجهه ، هزت راسها امي ومجاوبت بس ابتسمت مديت ايدي لخدها ومسحت دموعها وهيه ابتسمت بوجهي..

خلو البرنص على راسي وغطو وجهي وطلعنا من الصالون اجه بابا باس راسي وفتحلي باب السيارة وصعدت بيها ماما كعدت بالصدر واني بالورة بين عمه ام كرار وعمة ام صفاء بس صعدت ظلت تهلهل بالسيارة ، ظلينا نضحك ..

وصلنا للقاعه شفت  صفاء واصل قبلي بس شفته

قلبي صارت نبضاته مضطربه وسرت رعشه بكل

جسمي تملكتني رغبة عارمة وملحة بان يجي وياخذني بين اضلاعه ونغيب عن العالم كله بلحظة عناق دافية ..

اشروله يجي ياخذني ، ميل روحه عليه راد يوخر البرنص من على وجهي ، لزمته امه من ايده كلتله اعقد يلله ..

لزمني من ايدي ورحنا لغرفة الانتظار

  هناك متواجد سيد يعقدلنا ...

اخذني وكعدت على جهة  وظلوا

يحجون بابا والسيد وصفاء وبعدها اجه عمو

بدأ السيد يحجي عن الزواج وبعدين بدأ بمراسيم

من سألني السيد رأسا كلت نعم اقبل بسرعة

اشرلي السيد كال خل اكمل وبعدين كولي

فشلت كلش وصفاء دنك راسه وظل يضحك بدون صوت ..

شسوي مستعجلة عبالي ديسألني طلع بعده ممكمل ... ووافقت مجنت مصدكه هاللحظه  عيوني

بعد مااسيطر عليها بس ماما حست بيه وشاورتني

_مبروك بنتي ان شاءالله هاي دموع الفرح دوم

اشوفها ع وجهج وهسه امسحي دموعج قبل

لتصير سهول ووديان بوجهج ويطفر الولد

ضحكت بعدها ماما عدلت وجهي وهم راحوا

دخلوا للقاعه وبقينا بس اني وياه اجه تقرب مني

رفع البرنص عن وجهي من شافني ظل صافن

وشبه ابتسامه ع وجهه

_مبروك زهراء ربي يوفقني ان شاءالله واكدر

اسعدج

وباس كصتي

همستله: ربي يبارك بيك

اجت المصوره وبدينا نصور...

طلبت من صفاء يلف ايده على خصري والايد الخ لازمة ايدي ورافعها بعلو كتفي ويقرب شفتي من شفته بس بدون مايلامسها ..

خجلت كلش من لزمني ماكدرت اسيطر على ارتعاشة جسمي وهو حس بيه ظل يباوع بعيوني ثواني ونزل عينه حسيته مزعوج ...

اللقطات جانت كلش جريئة واحنا مو كدها كوة دبرناهه ، حسيت صفاء مجاي يكدر ينجذب الي وباله مو وياي ..

خلصنا تصوير و اجت منسقة الحفله كالت ٥ دقائق وتدخلون ..

من دخلنا شغلوا اغنية نانسي لون عيونك غرامي

حسيت كل كلمة بيها تعنيلي عبالك دتعبر عن

احساسي...

بدون ادراك لزمت أيد صفاء حيل هو انتبه عليه وابتسم ودنك يكمل ضحكته بصمت ..

من وصلنا للستيج شغلوا اغنية

اليسا (عبالي حبيبي) بدينا نرقص سلو جنت بهاي

اللحظه اسعد انسانه بالدنيا احس محلقة فوك الغيم بجناحين من سعادة ..

بعدها جتي زوجة اخوه حسين همست باذنه

مكدرت اوصل للكلام الي كالته ، بقى حاضني ويحجي وياهه ، هز راسه مزعوج وهيه راحت كعدت ، تركني كعدت بالكوشة وهو راح صوب زوجة اخو يحجي وياهه ..

باوعتله من مكاني يحجي معصب ضجت كلش وتمنيت اعرف شبي ، اجت عبير بوستني وباركتلي

حسيت ببشرتها نار من الصخونة ، لزمت ايدها

همستلها: شلون صرتي؟

_لا احسن لتشغلين بالج بشي عيشي اللحظه

وافرحي ..

تركتني وراحت باوعت  لمريم ماخذه القاعه طول وعرض تركص وماما تكولها اكعدي ..

اجت ماما يمي كالت شوفي المعزاية اكوللها كعدي تكولي : هم اخت العروس وهم بنت عم العريس

شلون أكعد ..

ظلينا نضحك كتلها من حقها اني اتمنى اكوم اركص هسه عفية كوموني خل اركص ..

ماما ظلت تضحك هسه يجي خطيبج اركصي ويا ..

رفعت راسي والضحكة تارسة وجهي ؛- خلي يجي وينه هو اشتاقيتله ، وظليت ادور عليه بالقاعة واباوع ع المعازيم

كملت كلامي ؛-  هسه ميجي يكول اكعد يم مرتي وين راح ..

كرصتني ماما كالت ولج اصبري اسكتي فضحتينا ..

ضحكت دا اشاقة ماما

_ انتي تشاقين وهمَ يسمعوج  يكولون ممصدكة اثكلي ...

ارتكيت بظهري وخليت رجل على رجل ارتفعت البدلة ليفوك وكتفت ايديه كتلها ها كعدنا يله ست وهسه شلوني عاقلة مو ..

ضحكت كالت اروحلج فدوة

_ اسم الله عليج بس جيبيلي رجلي ترة بالموت يله حصلته ..

ظلت تهز راسها وتضحك وتكول متصيرلج جارة ..

شغلوا اغاني سريعه وبدا الركص اجه صفاء  كعد يمي مزعوج ويتأفأف ... 

التفت عليه

سألته: شكو شبيك عصبي ؟

_لا ماكو شي لتشغلين بالج...

_ شلون يعني ما اشغل بالي ؟ ضروري بهاليوم تصير عصبي يعني ؟ دكول مجبور عليه وفضها ...

باوعلي وخزرني خزرة عيونه جانت ترسل بريق شرير شلت حركتي شل

حجى :- مو وكت سوالف المزعطة مالتج زهراء مفهووم ؟

بحدية كال كومي ؛- كومي نركص

لزمني من ايدي حيل عصرني عصر ، توجعت احسه نزلني سحل من على درجات الكوشة ...

الانفعال بصوته بعث القلق بنفسي وتملكني الاضطراب وراحت الشكوك المزعجة تحرق اعصابي ..

سكتني كوة وبدينا نركص  شويه وتركته اريد ارجع للكوشة لان مالي مزاج اكمل وضجت من تصرفه ..

لزمني حيل من خصري ثبتني على جسمه

اريد اوخر مكدرت باوع بوجهي

_ وين رايحة هسه بدينه

تحججت :  الكعب بدأ يأذي رجلي اريد اروح اكعد

حاجيته واني دايرة وجهي عنه ..

رخه ايده من عليه ، درت وجهي عنه و تركته ورجعت

كعدت وهو باوعلي بنظرة عميقة وراح يم بابا وابوه

بقيت كاعدة مزعوجة ويمي بنات خالاتي وبنات عمي يسولفن بس اني بعالم ثاني عن عالمهن يسألني اسئلة يكرروها عليه كذا مرة يلله اجاوب ..

شغلوا الجوبي وبدأ الركص بين الولد وعمامي

وبابا جان مترأس الركصه وبالطرف صفاء ...

صفاء: الي يشوفني اركص يكول ماكو هم ع قلبه

وكولش مرتاح بس اني عكس هالشي ...

حتى بيوم خطوبتي صارتلي كومه مشاكل اولها من وصلت  للقاعه لكيت رشا وزوجة حسين متعاركات وبالتالي طلعت رشا زعلانه لحكتها اتوسلت بيها

ترجع ..

جاوبتني

_بيك خير اطرد زوجة حسين من القاعه عود ساعتها احضر خطوبتك..

_ انت ام المشاكل متجوزين من سوالفج شون اطرد مرة حسين بلله شلج بيها هاي ؟ هو اكعدي بمكان بعيد عنها لو مترتاحين اله تطلعين بيها انه ؟

_ انتوا اخواني ولا واحد بيكم رجال...

_ لج احجي عدل لا افرك حلكج ..

ظلت تفر بيدها

تركتها وفتت جوة عليمن متعب نفسي هيه هاي تجوز من سوالفها لا والله ..

وصيت بهاء اخويه الوسطاني يوصلها واني فتت جوة ..

زهراء: خلصت الحفلة واجه صفاء اخذني صعدت بسيارته بس احس نفسي ضايجة ، طلعت السعادة الي حسيتها ببداية العقد كلها من خشمي ..

صعدت بصفه وحرك السيارة اباوعله  الطريق كله صافن  وموبايله ماسكت بس يرن..

باوعتله وبنبرة حدية  ؛- صفاء جاوب ع الموبايل...

تنهد :- معليج زهراء عوفي ..

_  حيحترك من كد المكالمات وانت مدتجاوب ..

مجاوبني مخلي ايده جوة حنكه ويسوق ومبين عليه معصب كلش ..

باوعتله بعصبية ؛- انت ليش مدتجاوب منو ديتصل بيك ممكن اعرف ؟

جاوبني بغضب : زهرااااء اتركي الموبايل ترى اكسره مااريد اعكر مزاجي فوك ما هو متعكر ...

استغفرالله

باوعلي بنظرة معرفت افسرها ، لساني تجمد بخلكي درت وجهي منه صوب الجامة والطريق كله اني عيوني مدمعة وغصة ماكدر ابلعها تأججت النيران واستعرت بداخلي مطلعت عليه حفلة  ..

وصلنا لبيتنا دخل السيارة بالكراج والتاف واجه دينزلني نترت ايده واني مخنزرة واتنفس بصعوبة

ابتعد عن طريقي واني نزلت وحدي  تركته

ودخلت سمعته ورايه

يسب ويغلط وكأنه يسب شخص بس مكدرت اعرف منو ؟

دخلت لغرفتي صحت ع عبير ساعدتني انزع البدله

وافتح التسريحه  خلصت ودخلت للحمام من طلعت

سمعت صوت بيت عمو بالبيت اجيت دااطلع

انتبهت على  موبايلي ديدك ...

جاوبت سمعت صوت بنية ...

حجيت منو ويايه؟

_  اني اسراء ..

جريت نفس هاي شتريد انوب شنو ما ناويه اخلص انوب ذاك مدري شبي عابس وجهه وبس

ينتر ويعيط ...

جاوبتها  تفضلي ؟

بنبرة حزينة ومبحوحة اجاني صوتها : مبروك زهراء ان شاءالله زواجة الدهر

_الله يبارك بيج تسلمين

اسراء: فدوة زهراء ديري بالج عليه وخلي بعيونج

صفاء يستاهل كل الخير

جاوبتها: يمعوده ببطن عيني صار زوجي وقبلها هو أبن عمي لتوصين حريص وانتي اهتمي ببيتج

ولتظلين تركضين ورا الماضي ترى هاي خيانه

خاف زوجج يسمع اتصالج عيب

وسديت الخط بوجهه.....

يتبع ...

تابعوها بلا زحمة aso_alyasiry