تحميل رواية «شريعة العشق» PDF

شريعة العشق

بارت ٤٦

نورا ناصر

•.¸

بـ لسان جندي عراقي يگول :

يعني ٧و ٨ سنين حرب وقذائف وضرب وقصف وطلعت منهن ، وأخر شي اموت من الشوگ ! ، ضيعتي هيبة الحرب يابه 💙

لمن كال هيجي ماحسيت بأي شي ، داخلي يكسوه الجليد وصعب الكسر وما اعرف لحد الان اذا عندي اي مشاعر تجاهه او لا ممتاكدة من مشاعري لذلك اكتفيت بكلمة اوكي ..وببرود

بسرعة رد ؛ يعني هذا اخر كلام عندج؟

جاوبته بثقة ؛ اي

كال ؛ يلا باي

جاوبته ببرود ؛ باي

اريد اسده سمعت صوته ؛ ادري انتي متحسين ولو شويه ولو شويه كولي ابقى كولي احبك عزا بعينج شنو انتي؟

_لا مااحس ..

عاط :نعلعلا شيب الخلفوني حتى عيوبج وبرودج هم احبه اعشقه ..

_اوكي ..

ضحك : اروح اولي اشرفلي لا ابتلي بيج

_ شدعواك شهالعصبية ترا انت اذا تريد تروح عادي ماراح امنعك .

_ ويرضاها قلبج ؟

_ خو ما اكعد اتوسل بيك قسور !! ترا مااعرف اتوسل والله .

_ كايلج توسلي ترا هي مو شغلة توسل لا بس انت مو هامج ابد ..

تنهدت ..

_ يله اني اروح هسه ..

_ تصبح على خير ..

تحسر من جاوبني وانتِ من اهل الخير ..

نمت وكعدت الصبح باوعت للساعة بالعشرة ، اني بالعادة اول مااكعد مزاجي مضروب جلاق اذا واحد كالي صباح الخير اعيط بي واهلي يعرفوني...

نزلت جوا البجامه مالتي تك صاعد وتك نازل وشعري مفتوح ونازل ع وجهي بس همزين شعري سرح وبالليل من نمت جنت منظفه بشرتي ومخليه حمرة ومرطب والكحله سايله طالعه جني ساحرة

دخلت للاستقبال شفت عمه يمنه بس شافتني شهكت وعوجت حلكها وباوعت ع ماما: هاي شنو سوسن بنتج تكعد الظهاري أني هذا الحجي ميصرفلي ابد اني من اجيتكم انوسه حتى طبخ غده كملته..

باوعتله صفح: حجيت بداخلي هي ايناس للوحده الظهر زين اذا كعدت

ماما جاوبتها: ياعيني متكوليلي شعدها تكعد الصبح بعدها بيت أبوها اذا متدلل بجال امها وابوها لعد شوكت تدلل وبعدين توها ساعه عشرة

عمه: اي متشوفين تربيتهن فاسدة اذا يسمعن هذا كلامج كل خير ميصير برأسهن

باوعتلي: يلا فوتي غسلي واكليلج لكمه حتى نروح صار ساعه كاعده انتظرج ماادري اشاف بيج وخبصنا هسه لو بجمال اخواتج جان كلت حقه

ماما: يا شبيها تخبل حنطاوية مملوحه احلى بناتي عبورة كافي خفة دمها

اني مزاجي بنزرقي كاعده وهاي هواي جفصت لعنة الله عليك يا الشيطان شلون تخليني هسه اغردلها وكف بعيني بابا وقسور خطيه تذكرت شلون ضاج من حجيت على سهير رمزي

اتذكرت مقطع لسهير رمزي ويا حسين فهمي جان شويه جريء ، ضحكت هي عبالها دااضحك عليها

ظلت تعيط: شوفيها شوفيها شلون ممتربايه تضحك عليه

تركتها وكمت غسلت وتريكت وصعدت بدلت ونزلت صارت ماما بوجهي اخذتني على صفحه

_بنيتي شتحجي لتجاوبيها مو تخزيني زين ترى ابتلي بيج رأسي صدع من الصبح لهسه

_اهوووو يعني تظل تجفص واني لازم اسكت

_اششش انجبي يلا فوتي كدامي عيب من قسور الولد بكولشي واكفلنه قدري حبه الج واسكتي قابل راح تتزوجين امه انتي؟

_لا بس العفريت الاسود حتصير ام زوجي

ضحكت ماما ودفعتني حتى اطلع

حجت ماما ويا عمه: يلا عيني كومي كملت عبورة

باوعتلي من فوك ليجوا عبالك معاجبها لبسي واني درت وجهي عنها وعدلت شعري بعنادها اعرفها تتخبل من هالفقرة

كالت لامي خلي اخابر على حسام "ابنها الجبير" حتى يجي ياخذنا خابرت وحجت وياه من كلامها فهمت انو طلع بعيد عنه

_ عمه لعد غير تنطي خبر لو بس جايه تتعاركين ويانه من الصبح ..

كرصتني ماما وعمه خزرتني وتنفست بعصبية ..

وظلت تهز راسها بعدم رضى ..

ظلينا واكفين بالطرمة ربع ساعه ..

ماما كالت لعمه: ام حسام امشي نروح بسيارة تحسين شكو واكفين صار ربع ساعه.....

رفعت تك حاجبها ؛ شنو ان شاءالله انتِ تسوقين ؟

_ اي لعد ليش ؟ ترا من زمان اني اسوق شبيج خايفة؟

_ لا بس ممجربة صاعدة وياج خاف تسويلنا حادث ؟

_ دكولي يا الله ام حسام صدك جذب صعدي صعدي وتوكلي على الله ..

صعدت ماما وطلعت السيارة من الكراج وهي كعدت بالصدر واني ليورا ، حسيت بعمه كولش منضغطه وماما حست بهذا الشي ..

التفتت على ماما : من شوكت تسوقين

_من زمان اخوج علمني وطلعلي اجازة سوق بس اني مااطلع هواي الا بالضرورة من تحسين ماكو يلا اطلع بالسيارة ..

دارت وجهه ومدري شنو دردمت ..

رجعت باوعت لامي ؛ اكولج سوسن كولي لمريم بنتج لمن تشوف محمد خلي تثكل لا كلش تموع روحها وادور قسور يلزمه يشبعه كتل ترة هو كبر عمره ١٨ هسه وصاير مدمغة ومكفخة لقسور بسبب بناتج ؟

_ شسالفه ام حسام بنات اخوج هذني شون تحجين عليهن هيج شجاج انت كلش متغيرة هالفترة .

_ اي ياعيني مو قسور كضاه لمحمد كضيان بسبب بناتج هو يريد يرضي عبير بأي طريقة وواكع بيها المسكين محمد .

عبير ؛ عمه شسالفة هو ابنج سكط وطايح حظه وانت صارلج ساعة تستفزين بينه نرجع للبيت مو احسن ؟

_ ايبااه عاد شلونجن انتن الام مسترجله والبنات كلمة مستهترات قليله بحقهن

_مو عيب ام حسام شنو هالحجي ترى اكدر اجاوبج بس اني ساكته احتراماً لتحسين ولقسور بس انتي اي احترام ماخليتي اذا احنه هيج لويش جايين تخطبون من عدنا دكينا بابكم احنه لو شمرنا بنتي عليكم

_هسه ع اساس شلونها بنتج اشو هي سكط مرتين تصوبت واكيد تلكين بيها عطل

حجيت اني:اكولج عمه صارلج ساعه تتجاوزين واحنه ساكتيلج لا عبالج ميتين ع ابنج اخذي الج اشبعي بي شنو قحط رجوله وهسه ترجعوني للبيت انعل ابو هيج زواج بعدنا بالبداية وهاي لعبت لعب ابنج ضابط ع نفسج مو علينا شناقصني واتزوج هيج زواج يلا امي ذبيها بيتها وخلي نرجع همزين ماابتعدنا.....

رجعنا للبيت جنت كولش معصبة وماما ظلت بس تباوعلي الي فهمته من نظراتها انو عبالها اني احمل بداخلي مشاعر لقسور لذلك جانت تباوعلي بترقب ..

بس حتى لو تعلقت بقسور او تولدت عندي مشاعر تجاهه ، المشاكل الي صارت وأدت المشاعر وهيه بعدها بالمهد .

بقيت كاعدة ع الكرسي واضرب برجلي ع الكاع ومعصبة بسبب الاهانة الي توجهت النا من عمه ...

اجتي ماما وصار موعد دوامها عصري الساعة ب ١٢

كالت رايحة للمدرسة اني وخلي اكولج شغلة ممنوع تخابرين قسور وتحجين وياه حجي زايد افتهمتيى؟

كالت هيج لان تعرفني حروح اتعارك وياه

باوعتلها وتنفست بضيق وهزيت راسي .

هي طلعت واني حاولت الهي نفسي حتى مااتصل بي

دخلت سبحت وطولت بالحمام كملت وطلعت صليت وحميت الاكل وكعدت انتظر ماما ومريم و بابا حاليا خارج بغداد عنده مناقشة مال طالب ماستر...

اجت مريم من المدرسة وماما خابرتني كالت خالج متخربط وحروح اشوفه اتغدي انتي واختج ومااريد ارجع والكاجن متكافشات ترى افرغ ضيم گلبي بيجن زين ؟

_ اني بحال اتعارك ويه مريم هسه ؟

_ ادري بيج تطلعين ضيم كلبج بيها استقري بين ما اجي ..

_ صار ماما اطمأني ..

صبيت غده وتغدينا وصعدت مريم تنام واني كمت عزلت المطبخ صارت ساعه بالثلاثه اندك الباب رحت فتحته صار بوجهي قسور عيونه دم ودكم بدلته العسكرية مشلعه وشعره مكفش وحال الضيم حاله...

باوعلي بعتب وندم ولو بيده يمكن ياخذني ويشرد بعيد عن امه واني بادلته النظرة بكل الثقه وعبالك جنت شمتانه بهذا حاله .

"قسور جان رجل بمعنى الكلمة ابد مايوم ضوجني او انتقص مني جنت من اضوج وهو موجود يكولي ابد لتضمين بداخلج احجي عيطي كسري الاشياء بس لتقهرين حالج نهائي الدنيا متسوا واحد يضوج علمودها لتضوجين وتقهريني واذا ضجتي من شي تعالي احجيلي واعتبري نفسج دتحجين ويا حالج "

تنهدت بعصبية ، وبداخلي احس بالم غريب بصدري واني اقرا علامات الحزن على ملامحه .

باوعت انتبهت كرار وياه!!!!!انصدمت ماتوقعت راح اواجه قسور بهاي السرعة...

كرار : جنت راجع للبيت واشوف قسور ديمشي بالشارع وحالته حاله ومبين متوجه لبيت عمي تحسين استغربت شبي هذا ؟

نزلت من سيارتي ورحت اله سحبته جان معصب سألته وين رايح ؟ ظل يدردم مفهمت منه ، جريته لسيارتي وكعدنا وظل يحجيلي الي صار وياه ..

كال قسور ؛ يا اخي رجعت رجعت للبيت واليوم فرحان ع الاساس راح يأجرون بدلات عمود حفلة الخطوبة ..

وصلت للبيت قبل شويه دخلت شفت امي بالبيت استغربت شو راجعه بوقت ؟ سألتها ظلت تفشر ع عبير وامها وطلعتهن غلطانات أني اعرف أمي مو خيرة وعبالها اضرب محمد لان اريد ارضي عبير وبيت خالي تحسين بشكل عام .

وبنفس الوقت اعرف عبير عرمة ومتسكت ابد والله يعلم امي شحجت وجان رد عبير هيج بس الي عصبني أمي ختمت كلامها

_ازوجك بنت ليل ولا ازوجك هاي الادبسز وحده فلتانه وطالعه عن الطريق انت شعبالك التمشي بالطريق الاعوج بس الي ترافق ولد لا مو هيج كدامك عبير وحده عوجه ومكسرة

اني حجت هيج ع محبوبتي لو الشياطين تربعت برأسي كدامي الطبله الجبيرة ضربتها بوكس فلشتها

امي شهكت ورجعت لورا باوعتلها : لجججج انتي شنوووو من عمه شلوووون تطعنين بنت اخوج بشرفها فهميني تقبلين واحد يحجي ع بنتج انتي مو ام انتي الشيطان بعينه اريد الله ياخذني واخلص منج كرهت عيشتي ..

لجججج لييييش شمسويلججج ومتريديلي السعادة فهمييييني يوووووم شطالب منج بنت اخوووج حبيتهااا كفرت خوما كفرت من خررررب حظي انتي هيج وهي عرمة لسانها طوله مترين مو عبالك طولها شبر ونص

_دمشي لك صاير رجال وجاي يصيح عليه بيك خير جان اختاريت وحده برأسها خير مو وحده بلا اخلاق

_بسسسس لخاطر ربج شنوووو انتي مديت ايدي ع مقدمة القميص مال البدلة سحبتها بقوة اتشلعت الدكم اختنكت اريد هوا احس نفسي ضاق .

انصدمت من شافتني هيج ظلت تدعي على عبير: ان شاءالله يوم الاشوفها بتابوت هي وامها واخلص منهن راح يموت ابني بسببهن الساقطات

تخبلت من سمعتها دعت كمت ادك ع صدري ومااعرف شحجيت وشخربطت بس فززتني وهي

تدعي عليه

_لك انت ابن عاق حرامات تعبي بيك حرامات حبلت بيك يوم اليجيبوك اليه ملفوف بالعلم واتحنه بدمك

فتحت عيوني على وسعها دفرت الباب مال الصاله وطلعت امشي واعثر اريد اوصل لعبير اكولها اخذج واروح لاخر الدنيا معليه لا بأمي ولا بأهلي

انتي اهلي صيرلي اهل واصيرلج الدنيا كلها عوضيني عن حنان امي الفاقده اعرف انتي كتله مال حنان بس خافيه هذا الشي وعاكسه جانب قاسي حتى متبينين انتي ضعيفه ... وووكلام هواي اريد اكوله الها .

انتبه على نفسه فتح باب السيارة ونزل يركض باتجاه بيت عمي تحسين ، لحكته بنفس السرعة وصلنا لبيت عمي ظل قسور يدُك الباب بجنون ..

ثواني وطلعتله عبير بس شافته ظلت تباوعله بكل قسوة وشموخ وعبالك دتتشفى بعمتي من خلاله

كللها اريد احجي وياج

جاوبته بقسوة اكثر ؛- واني مااريد احجي وياك خلص كلمن يروح لحاله ماكو قسمة ونصيب وخلي امك تفيدك

مو البارحه سويتها براسي احسن ام بالدنيا روح خلي تزوجك ع ايدها اني ماافيدك وع كولتها امي مسترجله واني مستهترة

كملت كلامها ورادت تسد الباب بوجهنا دفعه عليها هي مدت راسها باوعتني ؛- كرار اخذه وروح رووحوا ماريد اشووفه ..

بعصبية حاجيتها : ولج عبير اسمعي منه احسن لتخسرين حبه بعد متلكين مثله لو تدورين الدنيا كلها ترى بايع الدنيا كلها وشاريج انتي متعرفين العسكري من يحب اني اعرف وشفت هالحب بأبويه وشلون يحب امي ..

احجي وياهه قافلة متقتنع وقسور يدفع بالباب اريد اهدي مايفيد ، دفع الباب مصر يريد يحجي وياها

انفتح الباب وهيه ركضت فاتت جوه وسدت باب الصاله لحكها حاول يقنعها تفتح الباب ماكو قفلت

ظل يدفر بالباب قفل لزمته حيل بس اريد اطلعه من بيتهم ما اكدرت ، ظل يصيح بصوت عالي: لجججج انتي جهنم جحيييم انت ابتلاء اليه ، تدوسين على گلبي وعليه وارجع احبج اكثر والقرأن اذا مافتحتي الباب ابتلي بيج اليوم

عبير: شفته فقد كام يدفر بالباب ويحجي وصوته انبح اول مرة اشوفه قسور بهيج ضعف بس مع ذلك جنت رافضه موضوع ارتبط بي قفلت فكرت اذا اتزوجه امه وكحه واني صلفه مستحيل حيعيش مرتاح بيناتنه فكرت بي هو مو بيه ..

اذا تزوجنا هي امه واني زوجته حياته حتصير تعيسة فضلت ابتعد من البداية ولا اتزوجه وافشل مو كولشي بالحياة نريده نحصل عليه صح قسور بي كل المواصفات الاحبها بس اكو امور اقوى تجبرني مااقبل بي بعد الصار اليوم

فززتني دفراته ع الباب حيل وكلامه وهو يحجي بصوت تعبان: راح اتركج بلكي الزمن يطيب گلبي ويعالج جرحه بس لتصدكين تتوفقين واني نفسي بيج وما راح اضعف واتركج بهاي السهوله لا راح ابتعد مؤقت حتى تعيدين حساباتج مو قسور اليترك شي ملكه انتي مالتي والياخذج اخلي طلقه برأسه

سمعت صوت خطواته وهو يبتعد وكرار يحجي وياه يكوله اتركها بعدها معصبه من كلام امك اذا امك طاعنتها بشرفها شي طبيعي يصير عدها ردة فعل...

صار صوتهم بعيد باوعت من الشباك ، شفت كرار لازمه وماخذه باتجاه الباب ، التفتت كرار باوعلي بأسى اجت عيني بعينه وهز راسه بعدم رضى سديت الشباك وخليت راسي عليه ، سمعت صوت الباب الرئيسي انسدت ...

كعدت ورا الباب ابجي قهرني منظر قسور وشكله بس لهنا وبس كلمن يشوف حياته لويش اظلمه واظلم نفسي دعيتله ان شاءالله يلكي بنت الحلال الي تسعده وتنسي وتعوضه واني انطفي بحياته مثل شمعة حاصرتها الرياح وهيج احسن للكل .

نزلت مريم باوعتلي عيونها منعسة وتتثائب : شنو هذا الصوت عبالي صوت التلفزيون وبعدين شبيج تبجين

باوعتلها باع حظي هاي اذا يجينا حرامي وهي بالبيت يبوكها ويصعدها بالسيارة وهي ع نومتها فاصلة رب الحلو تركتها وصعدت احوال انام ومنظر قسور ميروح من كدامي .

***

صفاء: بعد اسبوع خابرني صديقي الكلفته علمود الرقم كال الخط مسجل بأسم بثينة عباس تشكرت منه وسلمت عليه يعني الخط بأسم اخت رافد معناها شكوكي صحيحة الكلب مخلي عينه على زوجتي اذا ماخليت دمه بطوله مو ابن ابويه اني...

رجعت للبيت صارت بوجهي زهراء وجهه تعبان واصفر وطبعاً هذا الاسبوع خلص مشاحنات بيناتنا كلمة وحده مااتحمل منها بسرعه اعيط بيها زين ومنها متحملتني .

باوعتلي اجت عليه حجت بتعب : الله يساعدك

ببرود جاوبتها ؛ هلو ..

_جوعان احضرلك الاكل

_تغديتي انتي؟

_لا داانتظرك بس عمو وعمه اكلوا ودخلوا ناموا

_ اسبح وانزل بين ما تحضرين الاكل.

_ ان شاءالله ..

صعدت سبحت ونزلت لكيتها محضرة الاكل وكاعده ع الميز وصافنه فزت من صفنتها على صوت سحبة الكرسي .

باوعتلها بشكوك وسألتها شبيج شو وجهج تعبان وشاحب ؟

وخرت ايدها من جوه خدها وجاوبتني ؛- ماادري شو دايخه ومابيه حيل وعندي امتحان ولعبانه نفسي من الدراسة كولش صعبة

سكتت ماجاوبتها ، كملنا اكلنا واحنا ساكتين

خلصت كمت على حيلي ؛ كملي شغلج ولحكيني للغرفة ..

هزت راسها وتباوعلي محتارة ، صعدت اني للغرفة

وكعدت انتظرها ، ورا شويه اجت ، وكفت تباوعلي محتارة .

اشرتلها تعالي ، احت وكفت يم السرير ، كمت على حيلي وشغلت تسجيل الصوت مال المكالمه سمعتها صوت صديقي نصير ..

سمعته كله رمشت عدة رمشات و ظلت صافنه تباوعلي متوترة ..

رفعتلها تك حاجب واباوعلها بشراسة ونظراتي تأمرها وتريد تبرير ..

_ صفاء والله ممبين عليه هيج شمدريني هو شنو بداخله اشو مبين انسان لطيف ومحترم وهو يتعامل ويا الكل مثل ميتعامل ويايه

باوعتلها كوة واكفه كل شويه تريد توكع لزمتها كعدتها على الجربايه جنت بارد بتعاملي وياها هي فطيرة ودائما تاخذ الناس ع نيتها يعني تشوف كل الناس خوش ناس سكتت عنها بس تحلفت لذاك العار اني اله

رحت لبيتهم سألت عنه كالوا مسافر خارج بغداد

ورا شهر صادف محرم ودنيا شويه باردة

و بليلة عاشوراء عدنا طبخ واحنه بطبيعتنا من نطبخ الاقارب كلها تلتم عدنا ، لان طبخنا ضخم .

لبست دشداشة سودة ولفيت اليشماغ لفة نسميها چراويه ..

شافتني ست زهراء سوتلي حفله ؛- انته شنو تلبس هيج وتطلع ويمكن تجي اسراء وتشوفك تريد تجذب البنات انت متعلم تشلع گلبي؟

_ اسراء تجي ؟؟ شبيج انتي خبلة لا لا وحدة من الاثنين انتي لو خبلة لو خبلة .

بلعثمة كالت ؛ اي اذا متجي يجن بنات خالاتك ويرحن يوكلللها صفاء هيج لابس انته تريد هيج موو ؟؟

_ اووو شون تفكير تفكيرج ولج هسه اني شلابس زي الوزير دطيررري ووخري من كدامي .

طلعت بسرعة من الغرفة ورحت جوة ، البيت مليان اقاربنا طلعت بره يم الولد شويه ورجعت ساعدتهم بالطبخ .

طبيت اريد اروح للمطبخ اجيب المصفاة الجبيرة حتى نبزل التمن ، دنيا الليل واحنه بهذا اليوم نحج للصبح نواسي عقيلة بني هاشم ناس تطبخ حتى توزع ثاني يوم بثواب الامام وناس تقرأ قرأن وناس تسمع محاضرة وتبجي .

طبيت اكو منور يم المطبخ دا افوت سمعت صوت همس اتقربت سمعت صوت رافد ديحجي ، باوعت شفت زهراء واكفة يمه ، استعرت الشكوك بداخلي

ختلت بالجهه الثانية حتى محد يشوفني .

وبقيت واكف اريد اسمعه شيحجي وبداخلي بركان ومشتعل هذا شجابه ومنو عزمه كتمت انفاسي بعصبية

سمعته يكوللها :- والله زهراء اني دا احجيلج الحقيقة هاي مشاعري الج من اول يوم شفتج بي زهراء اني كلش حابج والله!!!!

يتبع...

شريعة العشق

بارت ٤٧

نورا ناصر

بالترك مال البيت جنت دااحمس البصل وداافكر بصفاء الخبيث حرك دمي ولبس الدشداشة السوده ومافكر بمشاعري واني اغار عليه ، وذني بنات خالاته وخواله يكولن اله من لبس السواد سبي العباد واني دمي يفور ويغلي .

فززني من صفنتي صوت دكتور رافد وهو يسلم عليه جمدت بمكاني وتذكرت كل كلام صفاء عنه وتذكرت من سمعت المكالمه وتهديدات صفاء ، هذا شجابه هسه !! ومنو عزمه ؟ اكيد الولد وميدرون بعملته

رديت السلام بتوتر

وكملت : عمو مدتشوف اني وحدي هنا والمكان اظلم يعني اذا احد شافك هنا وحدنا شيكول شعندك جاي هنا ؟

جاوبني: اول شي أني مو عمج وثاني شي افتقدتج مدااشوفج بالكلية وسألت عليج كالوا دتداوم معناها دتتهربين مني

_ليش اتهرب منك اكو شي حتى اتهرب بس محاضرتك مملة واني اكتفي استنسخهم من صديقاتي وادرس بالبيت وهاي كل السالفه

_امممم بس ترى افصلج غيابج كثر

_براحتك وياريت هسه تروح وجودك هنا غلط اني دااشتغل وخاف احد يشوفك ويفهم غلط

_علاوا يجي واحد ويفهم غلط اني اريد يفهمون غلط من حسن حظي اذا فهموا غلط

_نعمممممم شبيك عمو شدتحس ترى عيب عليك

"بإصرار"كلتلج مو عمج أني زهراء .. زهرااء اني احبج من قبل لا تتزوجين وجنت مقرر اخطبج واعرف صفاء تزوجج وهو مجبور وهو يحب بنت خالته ، بوقتها جنت ادرس ومشغول وانت صغيرة وملحكت اخطبج

من تزوجتي صفاء انصدمت وهسه انتِ كبال عيني

ادري بيج متعذبة ويه صفاء هواي اطلكي منه وربي اسعدج اني .

_اششش اسكت تخبلت وخررر منااا يله ..شجابك على صفاء وتقارن نفسك بي انته

_ ليش بلله شناقصني وصفاء احسن مني .

حجه هيج وهو يتقرب مني ..

ابتعدت كم خطوة وجاوبته ؛ لاا انت تخبلت رسمي واذا تريد تعرف شناقصك انت ينقصك هواي اولهم الغيره والشرف انت واحد خسيس جاي دتصارح مرة متزوجه شكد شرفك رخيص يا خايس

اتقدم عليه حاول يلزمني ويحجي ؛ والله زهراء اني دا احجيلج الحقيقة هاي مشاعري الج من اول يوم شفتج بي زهراء اني كلش حابج والله!!!!

ماكدر اصرخ لاتصير مشكلة جبيرة تقربت منه اريد اضربه راشدي كمت ارجف اول مرة اتعصب ، مد ايده لزم ايدي الي رفعتها بوجهه ..

فتحت عيوني على اوسعها ، سحبت ايدي منه واريد انهزم من يمه  مااشوف الا صفاء كبالي وعيونه يتطاير منها شرارات الغضب .

بسرعه صفاء دفعه وصار وجهه ع الحايط النثر ،

لزم رأسه ولطخه بالحايط وظل يغلط عليه ويسبه

وذاكه يحوس يريد يفلت نفسه .

عطت صفااء ، التفتلي ودفعني من زندي ولازمه بيد وحده . 

وهمس: ثوووووله تريدين تفضحين نفسج هسه كلها تكول هي مواعدته محد يكول عنه كلب أبن كلب تعرفين مجتمعنا يقدس الذكور .

كمل كلامه دار

وظل يلكم رافد ع مكانه الحساس مرة ومرة يركع راسه بالكاع والحايط وذاك يرافس والجدورة كبار ونار مشعولة ظليت اشهك بخووف ورعب .

وذاك حار شلون يمسح الدم عن وجهه وصفاء تولاه بوكسات ودفرات الجدر وكع ع الكاع وارتجى ع الحايط  واني ايديه على وجهي مرعوبة ، ركضت طفيت البريمز .

ظليت اجرجر بصفاء التفتت عليه صاك اسنانه ومعصب كال فوتي جوا بسرعه وبوجهج لغرفتج وابد لتنزلين

لزمته من ايده: فدووة شحتسوي أبوس ايدك لتعصب شوف ايدك شلون دترجف خيولي ميوصل لنعالك والله

_لج بويه فوتي جوا "ويدفع بيه "

يدفع يريد يطلعني ورافد كام لزم صفاء من ملابسه ووكعه ع الكاع ، اجت ايده ع الجدر الحار ، يريد يكوم ضربه على وجهه ظل يطلع الدم من خشمه حلكه .

وكاموا واحد يملخ اللخ ،  فقدت من شفتهم وصفاء يضرب وينضرب كمت اصرخخ ،  على صوتي اجوا حمويني وولد عمامي البقية

اول واحد وصل عمو حسين شافهم يتمالخون

عاط  : هااااي شكووو هنا ؟

وراح ظل يفاككهم ..

طب  وراه بهاء  واني طلعوني ، وكعت بالمطبخ

  كمت الطم اجوي البنات كوموني واستلمني  خالات صفاء تحقيق واني مابيه حيل حتى اردهن بالي يم صفاء منظره ميروح من بالي والدم يطلع من حلكه وخشمه ، ما اتحمل اشوفه هيج قلبي يعورني عليه .

تجمعن بنات خالاته وظلن يتهامسن واسمع بنت خالته تهمس ويا بنت خالها : لج عيني لكفها ويا هذا رافد ابن عمة ابوها ع اساس دكتورها تلكيها مسويه وياه علاقه وصفاء شافهم

وذيج تجاوبها: هسه هي شنو واذا حلوة وعيونها ملونه اشو تنكط فهاوة شنو شاف بيها لج شايفته شلون يباوعلها من تفوت عيونه تريد تاكلها

عبالهن لاهية اللطم وما اسمعهن وهنه يحجن عليه وبسمعتي عذرت صفاء اثاريه يعرف شنو من ملة هذول .

متحملت كلامهم عطت بيهن: انتن شنووو جايات لبيتي وتطعنني بشرفي وحدتجن متوصل لاظفري جايات تحجن عليه حقيرات صفاء حبني لان شاف العندي من اخلاق وأدب انتن تفتقدنه الله لايبارك بيجن عدجن الشرف شي سهل وتكعدن تحجن بي

ظليت اعيط عليهن وهنه سون نفسهم مصدومات

اجت زوجة حسين أروى شافتني اصيح..

تقربت مني تهدأ بيه ؛ زهراء على كيفج اعصابج

شكوو شبيهن وياج ؟ تباوعلهن وتباوعلي ..

حجيتلها واني ارجف واشر عليهن ، هنه يبتعدن واني امشي وراهن واصيح ..

وكفتني على جهة وحاجتهن ؛ احنه بمصاب وحزنانين على الامام وانتن جايات تسوون افلام مكسيكية اوصلن لاخلاق زهورة وبعدين احجن

وكفت بوجهه وحدة ؛ انت فاهمة غلط ترة ماحجينه عليها ولا طعناهه بس الي بعبه صخل يمعمع .

تسارعت انفاسي شهكت مصدومه من حقارتهن توجهت الهن ام احمد تطلع بيهن وتحاجيهن ؛ لا تزودوها كافي متشوفوها شون متفرفرة على رجلها صدك جذب .

اخذتني من ايدي وتصعد بيه ع الدرج ؛ روحي لغرفتج زهورة هسه اجي يمج بس اسويلج عصير ليمون.

التفتت عليها وكوة متحمله الي اني بي احس دوخة فضيعه ونفسي تلعب اريد اتقيء بس ما اكدر

_ ماريد اريد اروح اشوف صفاء حبابة شلونه هسه .

_ مابي شي صدك جذب منج هسه هم برة جاي يتفاهمون وشويه ويرجع .

صعدت لغرفتي اطكطك باصابعي تنهدات الاسى تنبثق من اعماق صدري ، ودموعي تجوي خدي شوكت ارتاح يربي مامقسوملي لا افرح ولا ارتاح .

صعدت ام احمد بيدها كلاص العصير خلته ع الكومدي ؛ مددي ونامي ارتاحي لاتخافين صفاء يم الولد برة يحجون انت ارتاحي شوفي شصار بيج ووجهج شحاله .

_خابرت ع صفاء ادك وميجاوبني. خو مابعدهم يتعاركون فدوة ام احمد  والله اخاف يصير بي شي وايده طخت بالجدر هماتين بس لا احتركت ايده .

_ لا تخافين زهورة لا تخافين على كيفج ليش هيج انت خوافة ؟

كعدت يمي وانطتني كلاص العصير ، اخذت منه رشفة وخليته احس لعبت نفسي من ريحته .

طلعت ام احمد ، ارتاحيت شويه بس روحي مجاي تهدأ ، غسلت وجهي بمي دافي ونزلت جوة ظليت انتظرهم كعدت يم عمه كلساع تباوعلي بشك وتسأل بيه ؛ بنات اختي يكولن جنتي يم رافد بالترك ودخل عليكم صفاء وصارت العركة شسالفة ؟ احجيلي هسه ؟

غمضت عيوني ودنكت راسي تنفست بضيق وروحي احسها بخشمي ، شجاوبها هسه ، ام احمد تولت المهمة عني وسكتت عمه ؛ عمه ماكو شي بيناتهم رافد متجاوز ومفشر على صفاء وتدرين بصفاء عصبي ومايتحمل .

سكتت بس نظراتها باتجاهي كلها شكوك .

ام احمد تريد تغير الموضوع سألتني ليش ما اجوي اهلي ..

جاوبتها عمه ؛ هم هماتين عندهم طبخ .

ظليت اباوع للساعة واكل باظافري باوعت لام احمد بحيرة ؛ ام احمد تأخروا شعدهم ؟

_ هسه اخابر احمد ، وكامت على حيلها .

راحت تخابر باوعت للساعة صارت تقريباً ساعه ٣:٣٠ بالليل ، ورة دقايق دخلوا باوعت لصفاء جان مشدوده ايده ووجهه خريطة

نسيت الكل واكف

ركضت عليه و عيوني تسبق خطواتي

حضنته وابجي وهو استحى لان خالاته وخواله واخوانه و عمامنا واكفين واني حاضنته كدامهم .

بعدني وابتسم طمني انو هو مابي شي خالاته تحمدله بالسلامه ويسألوا عن سبب العركة ظل يسب برافد ويغلط بدون مينطيهم اسباب العركة الرئيسية .

تركهم وصعد لحكته لكيته ديطلع ملابس من دخلت للغرفه

التفتلي : تعالي حضريلي ملابس سوده حطيتي عينج ع الدشداشة تالي انترست دم "حجاها وهو مبتسم "

كمت ابجي ظل يتأفأف و اجه يمي لزم وجهي وباوع بعيوني: بس فهميني حنفيتج شوكت تخلص

_متخلص

_معناها تورطت لعد ماكو فد طريقه اتراجع بيها وارجعج لبيت عمي؟

باوعتله مبرطمة ودموعي على خدي

هو كمل كلامه: ولو شرجع منج اخذتج من بيتج مسلفنه ارجعج مكسوره زحمه صرتي حاجه خربانه واكسباير

ضربته ع صدره غمزلي : اكسباير يم الكل بس يمي صلاحيتج متجدده

_دوخر شكد متستحي

نصه صوته وقلد صوتي: شستحي خييييه ومط حلكه مو شفت الصايه والصرمايه بعد عمج وضحك بصوت عالي

_ع فكرة انت واحد قليل الادب

_لاعيب قابل شفتيني مغتصبج لو متحرش بيج ها منو ركض ورا منو دمشي لج كل مااشوفج جنتِ توكعين كدامي هم واكعه بحبي وهم مخلصتها تكوم وتوكع .

برطمت شفايفي ورحت باتجاه الكنتور

رحت طلعتله ملابسه اجه حضني من وره وباس خدي

سألنيى: شبيج زهرتي شنو ضجتي لان كلتلج تركضين ورايه اذا انتي ركضتي ترى انتي احسن مني اني زحفت لعد ههه احبج والله

_لا والله مزعلت بس سكتت لان اعرف اذا ابقى اناقشك تكوم تحجي حجي فاسد

ضحك بصوت عالي: ولج حجي فاسد شنو انتي منين تجيبين هالسوالف ،  امشي اطلعي من الغرفه لاصدك اصير فاسد وجهج صاير احمر من البجي وعيونج ذبلانه ترى هذا الشي يغريني...

شمرت الملابس عليه وشردت من الغرفة....

********

كرار: من بعد الموقف الصار بين قسور وعبير بعد مشفتها ابد ،  ورا شهرين عمي دز عليه عنده شغله ويريدني اخلصها اله رحتلهم طبيت للبيت وكعدت يم عمي سولفنه طبت عمتي سلمت عليها وكعدت يمنه واجت مريم جابت ضايفة ، هذا كله وعبير ماكو ماشفتها ولا اجت سلمت ابد .

كملت شغلي ويا عمي وطلعت ، شفت عبير

كاعده بالحديقة .. 

رحت يمها سلمت عليها ردت عليه ببرود ودنكت تباوع للكتاب الي بيدها ، باوعتلها هيئتها  شكد قاسية وذاك المسكين قسور راح يموت بسببها وهي ولا يمها

تنهدت و سألتها: مو كافي؟

باوعتلي ؛ بحيرة كافي شنو؟

جاوبته ببرود حازم ؛ عبير قسور يحبج وثقي بمحمد لو تدورين الدنيا كلها متلكين احد يحبج من بعد امج وابوج بكد قسور لج فلش بيت اهله من عرف أمه هيج حاجيه وياج عبير قسور خوش ولد وصايم مصلي

اسألني اليه اني اعرف سوالف الضابط مااعمم واكول الكل بس الاغلبية تراي

_تراي؟ شنو هاي انوب

_ههههه هسه انتي تركتي كل الكلام ركزتي بتراي عبير لتوكفين حياتج ع حجاية اقسم بمعتقداتي لو عندي اخت اكبعها وانطيها لقسور لج بابا صعب بهذا الزمن تلكين هيج رجال يحبج فكري زين ولتخسرين هيج انسان

_لا متسوى بعد كلمن يروح بطريقه أني متأكدة اذا اتزوجه نهاية زواجنا الطلاك خليني هيج ابقى بالنسبة اله ذكرى حلوة ولا يجي يوم ويكرهني اني متأكدة اذا تزوجنا حيكرهني

كرار أني اعرف نفسي مااتعاشر مزاجيه وعصبية ومغرورة وميعجبني العجب وانته تعرفني لو متعرفني كرار ؟

هزيت راسي بثقة ..

كملت كلامها ؛ تمام وبعد فوك كل هذا انانية يعني يمكن بالمستقبل اذا استمرت امه هيج تعاملني امنعه يتواصل وياها وهو شله بهالدوخة

والتمعمس خلي يشتري راحة باله احسن اله .

_ مصرة على كلامج اخر حجي عندج هذا ولج الولد تعبان بسببج تعبان ؟؟ حسييي .

_ شوف كرار  أني اعرف أنت تتواصل وياه بلغه كلامي كوله عبير تسلم عليك وتكول خلي ينساني ويشوف حياته وبحاله وحده أصير اله

_شنو هي ؟

_الا اذا انطبقت السمه ع الارض

بعصبية ؛ خررررب يومج شكد قاسية لج انتي شنو ولا تستاهلين حبه دمعه من دموعه متستاهلين ظلي هيج بهذا غرورج وكبريائج واذا ماعضيتي اصابعج ندم مو ابن حلال أني .

ظلت تباوعلي بشموخ ولا اثر كلامي ولا حتى بقدر ذرة

عصبت منها كلش ما اتحملها ابد .

تركتها وطلعت اذا ابقى كاعد يمها والله اجرم بيها رجعت للبيت بعدني بالباب خابرني قسور عبالك يعلم جنت يم الي يحبها واذته قبل شوية .

رحتله حجيتله كل كلامها كال هذا هو براحتها بلكي يجي يوم وتحن وتشوف حبي

نصحته اتزوج بلكي تنسى هاي قافله ومستحيل يجي يوم توافق بلكي اذا شافت تخطب تتحرك مشاعرها ولو هي مجمدة شيحركها رب الحلو

قسور: كل عقلك انت تحجي تصيرلي مرة غير عبيري شكد بطران ليش هو اني اشوف غيرها بعيوني لو تحلالي مرة غيرها

باوعت عليه وصفنت  حبه عجيب حتى ميفكر بكرامته ومع ذلك مااذاها ولا ضغط عليها مكتفي يراقبها من بعيد ..

ضحك : تدري هي مو بلا احساس لك من تصوبت متظهر آلمها ولا تشتكي كدام اهلها ومن جنت اروح اشوفها جانت تشكيلي شنو يوجعها وتظل تبجي وتعبر عن ألمها بس كدامي متريد امها تشوفها وتتأذى عليها

بس حظي الاسود من اسألها تحبيني تجاوبني بكل ادب واخلاق : لا الحب يجي بعد الزواج واذا انت كدها حتخليني احبك اما هسه أني مااحبك

حركني حرك من يحجي وعيونه دم ، قهرني

طلعت من يمه واني  بذيج الساعة

كرهت عبير وحقدت عليها بزيادة و اتمنيت اليه سلطه عليها حتى اعرف شون اتصرف وياهه .

وصلت للبيت لكيت مها دتنظف وامي وابويه كاعدين بالصاله سلمت وكعدت يمهم روحي بخشمي اذا واحد دغني انفجر بي اجتني مها جابتلي جاي وراحت شربته وصعدت للغرفه تمددت ع الجربايه ظليت بس اتصفن فكرت اخابر ع عبير تالي كلت تولي شكو اكبر رأسها

دك تليفون مها مجاوبت ظل يدك غلست عنه سطرني

اجتها رسالة اخذت الفون وفتحتها .. 

جانت الرساله من بنت خالها ؛ كاتبتلها عرفت مكان هاي السحارة بصليخ اخذت موعد الج يوم الجمعه تعالي عليه ونروح ...

انصدمت شنو سحارة؟؟  ومها منين تعرف هيج نماذج قذرة ، عصرت التليفون بيدي حييل ، كمت من مكاني فتحت الباب ومديت رأسي صحتها بعصبية

_ مهااااااا 

اجاني صوتها من جوة ؛ اجيتك كرار .

بقيت واكف بباب الغرفة ، احس التليفون راح ينكسر بيدي من شدة ضغطي عليه .

اجت  باوعتلها واشرتلها تفوت للغرفة .

فاتت واني فتت قبلها ، سمعت صوتها .

_ ها حبيبي ؟

التفتت عليها بعصبية ، طابك اسناني وعيوني بكصتي  رفعت الموبايل وبعدني فاتح الرسالة خليته بمستوى عيونها

_ هاي شنو مها شديصير بله تكدرين تفهميني شنو اني غشيم ونايم ورجليه بالشمس ومرتي من ورايه تفتر ع السحارات

تقربت مدت ايدها  اخذت الفون من أيدي وترجف وتباوع بالشاشة قرت الرساله وباوعتلي دتخفي خوفها وارتباكها خزرتها وصكيت ع أسناني: احجييي لا أبتلي بيج ومحمد

بتوسل ؛ كرار خلي افهمك

_اي فهميني غبي كدامج خليني افتهم

_لاحشاك حبيبي شوف هاي وحده تاخذ خيرة واني كلت خلي أشوف ليش مديصير عندي حمل خاف احد مسويلنا سحر .

_سحر!!! منو يسويلنا برأيج وع شنو يسوون غير اكو شي بينا يجذب الانتباه حتى يسوون علموده صخام بوجهج اذا هسه اجنزج اكو كلب أبن كلب يلومني

سكتت متحجي جريتها من شعرها صاحت اخخ كرار حباب بس افهمني ..ولزمت ايدي الي لازم بيدي شعرها ، طليت بوجهه حجيت

من بعد ماشددت لزمتي لشعرها: اهلي او عمامي وحتى اهل امي ماعدهم سوالف السحر والشعوذة اذا ابالج واحد مسويلج سحر اميرة ديانا دوري عليه يم اهلج

راح اطلع ارجع مااريد اشوفج كبالي وحق محمد اذا رجعت وشفتج بالبيت اجنزج وعلي انعل أبوج لابو ساعة السودة العرفتج بيها بنت الكلب انوب تفترين ع السحارات موووو ؟

يتبع ....

السلام عليكم .. رجاءً كافي غلط على عبييييير صار ٤ بارتات غلط عليها يابه ميصييييير مييييصيير الزموا اعصابكم .

شريعة العشق _____________________________

بارت   ٤٨

نورا   ناصر

اشتعلت نظراتها برعب تمتمت بتوسل ودموعها تجري على خدودها ؛ لااا كرار حباب متنعاد وداعتك...

فلتتها من ايدي وكعت يم رجليه ، دنكت اباوع الها ظليت اصيح عليها

انتي منو صخم بوجهج وبجى يمج ع الطفل شبيج مخبوصه وعندج اكبر هم بالزواج هو انجاب الاطفال احجييييي

_كرار والله مااحب هاي السوالف بنت خالي اسماء هي كالت عمتها تسويلها مشاكل وتروح لهاي المرية ومدري شنو تنطيها وعمتها صارت زينه وياها والله كرار ماعندي نية سوء بس أريد طفل أني اريد جزء منك يصير بأحشائي واذا متقبل اروح بلاها والله بلاها حباب لتزعل

_تكولي لتزعل طايحة الحظ ، ماكرر كلامي هسه تلمين ملابسج وتولين لاهلج .

طلعت من الغرفة وبس اسمع شهكاتها ، نزلت جوة شفت امي بالصالة واكفة بس شافتني كالت ؛ هاي شكوو شبيك تصيح  ؟

_ يووم وديها لاهلها خلي تتأدب ما اريد اشوفها كبال ماااريد ..

مشيت باتجاه الباب دا اريد اطلع تبعتني وتحجي ويايه

تجاهلتها ودمي يغلي طلعت من البيت وخابرت ام مها كتلها عمه تعالي اخذي بنتج وعلميها عدل وعود رجعيها بعدين هيه ما افتهمت سديته بسرعة .

عبير .. دا اقرا هالسنة سادس ومكرسة وقتي للدراسة

دك موبايلي رفعته مها تتصل ، جاوبته ؛ هلاو مهاووي .

جاوبتني تبجي وتشهك ما فهمت من كلامها شي ابد بس تبجي عطت بيها ؛ اسممعي ولج راسي صاير هلكده من الدراسة ومصدعة احجي شبيج ترة سطرتيني سطر احجي شكووو بلا ما تبجين ؟

حسيتها اللتقطت انفاسها وشهكت وناشغت يله جاوبتني ؛ كرارر ككك رار طردني حيطلكني عبير لحكيلي !!

بصدمة جاوبتها واني اعدل كعدتي ع الجرباية ؛ عزا بعينج شمصخمه ولج ؟

_ ممسويه شي وداعتج .

كمت من السرير ظليت افتر بالغرفة حاجيتها بعصبية

_ اسمعي لج لاتحلفين جذب بداعتي ما تعلميني بابن عمي وخاصة كرار اعرفه اكثر من نفسي يحبج ويبوس التراب الي تمشين عليه مايطلكج هيج بدون سبب كوليلي شمصخمه ؟

ارتبكت وجاوبتني ؛ عبير والله مو قصدي بس داروح لوحدة سحارة وهم تذب خيرة داشوف ليش مايصير حمل وصار كومه متزوجين .

_ ماريد اغلط عليج بس اكولج الله يطيح حظج ولج انتيي شنووو شنووو هالسوالف هاي الي تردين تدخلين نفسج بيها والله حقه وما الومه اي رجال مايقبل مرته تسوي هيج سوالف طايح حظها وخاصة انتي زوجج يحبج وممقصر عليج عمه وعمو يموتون عليج ومدللينج شكو تمشين بهيج دروب ؟ تدرين اذا رحتي مرة وحدة لهيج اماكن تظلين كلما يصير عندج شي تلجأين الهم لادنى شي حتروحين الهم ويصير عندج ادمان على هيج سوالف كل مخافة الله ماكو .

_ عبير حاجي لكرار فدوة ماريد اتطلك منه احبه  الي اسبوع يم اهلي اخابره ميجاوبني وعمه تكولي معصب لتجين هسه خل يهدأ فدوة انت تعرفيله شسوي كوليلي .

_ شسوين يعني شسوين مصخمتها وملطمتها باعي اني ما احجي وياه صار فترة مطنكرين على بعض بس راح اخابره واحاجي شسوي امري لألله بس والله اذا عدتيها وجفصتي هيج جفصة انسيني مااحترمج بعد ابد .

_ هو بس خلي يرجعني والله ما اعيدها .

_ اكولج انت ترة لا حكة ع الضيم واكو عشرة وعشرين سنة وميصير عدهم وانت بس سنة ومدري شكد وحتتخبلين ؟

ظل تتأفأف ، وعدتها احجي وي كرار رغم المشاحنات الي بيناتنا والقطيعة الي صارلنا بالاشهر منحجي وي بعض بس هاي مها اني معتبرتها اختي الثالثة وبنفس الوقت ما اعرف احد يطلب مني طلب وارده مو بعد مها صديقتي واختي ، ختمته منها وخابرت كرار .

دك هواي مافتح خط ، دزيتله مسج ع الوتساب

رد كرار دا احجي وياك ....

قرأه وانتظرت هواي ما رد ....

خابرت مها كتلها زوجج مطنكر عشتو ومايرد عليه .

كالت تلكي هسه عرف اني مخابرتج ومحاجيتج بموضوعنه لذلك مايرد .

_ لا هو مطنكر وكارهني لان كالي ارجعي لقسور واني رافضة عمود هيج .

_ فدوة عبير روحيلهم للبيت واحجي وياه حبابة بداعتي .

_ اي اي لا تخبصيني يجي باجر ويصير خير .

يوم ثاني داومت وجان دوامي عصري ، بس طلعت من المدرسة اني ملابسي توجهت لبيت عمو كريم ، باوعت شفت سيارة كرار موجودة بالكراج فتت للبيت دكيت باب الاستقبال طلعتلي عمه سلمت عليها سألتها عن كرار كالت فوك هسه اصيحه .

صعدت عمه واني خليت جنطتي على التخم ووكفت انتظرها ، عدلت صدريتي بهذلتني الجنطة بيها كومة كتب .

نزلت عمه وجهه وملامحها مامرتاحة ، ظليت اباوع الها

كالت ؛ والله بنتي مدري شكولج مايقبل ينزل .

_ ميخالف عمه هو زعلان ادري بي اني هسه اصعد احجي وياه وهو فوك .

_ والله يابنتي صاير نار وشرار بسبب مرته وعملتها تخابرني تبجي واكعد اتوسل بي يرجعها ميقبل .

_ اي عمه هيه مها فطيرة وتمشي ورة كلام اهلها بس متقصد خطية وتحبه هسه اني احجي ويا بلكي يقنع .

راحت كعدت ع التخم وكالت اي والله ياريت واني هم تعودت على وجودها هنانه ويايه راده عني الوحشة وتكسر كلبي من تخابر وتبجي .

هزيت راسي ؛ من رخصتج عمه راح اصعد اشوفه .

عفتها وصعدت فوك ، وصلت لباب غرفته دكيت الباب

مرة مرتين الثالثة بديت اعصب وضربت على باب غرفته بعصبية وصاكه اسناني يله كال بتعجرف نعم .

ويدري اني الي وره الباب محد غيري .

زفرت بعصبية وفتحت الباب ، شفته متمدد على السرير واديه جوه راسه ، تبادلنا النظرات رفع حاجبه ودار وجهه وكال طلعي وسدي الباب .

كتله بتكبر ؛ كووووم خل نحجي .

؛ ماكو حجي بيننا يله روووحي .

( ويأشر بيده )

(بإصرار حازم وبدأ صبري ينفذ )؛ لااااء اكو (وبنبرة أمر وأشر براسي )يله كوم .

كعد على حيله بكسل مد ايده لوره راسه  ويحك بشعره

  ؛ شتردين ؟

حسيت عقلي يثور بدماء حارة وقلبي يفور من تصرفاته كتله بتفهم...شريد مثلا ؟ ترى مجرد دا اناقشك بموضوع زوجتك مو اجبرك ...

ضحك باستهزاء و وكف بجذعه المتعب تقرب مني ونزل راسه المستواي...شنوو دتناقشين متجبرين ...لا الله عليج اجبريني بشرفج اجبريني ...

كمل بسخرية...ههههههههههه تناقش متجبر شوفي عزيزتي لا تناقشين ولا تتدخلين حياتي وحر بيها مثل ما انتي حرة بحياتج مو صح ؟

رديت بعتب وقهر...اهاااا يعني الاخ زعلان لان مقبلت تتدخل بحياتي

طقطق اصابعه بهدوء شديد وضحك ...ترى متهميني اني الخاطر قسور حجيت

التقطت انفاسي بغضب مرير جاوبته...ولا انت تهمني بس اني اجيت الخاطر صديقتي وهسه اكتشفت انت فعلا متستاهلها واصلا حرامات اتزوجتك .

رفع اصبعه بنظرات جامده خبيثه...لعد اطلعي برا من تدخل في ما لا يعنيه لقيه ما لا يرضيه واني ما احجي ويه المزعطه وماكو داعي افهم شخص ما يفهم لان اكو قول يكول...نقل الصخور من مواقعها افضل من تفهيم من لا يفهم .

قابلته بنظرات ضعيفه تايهه ...هههه طالعه اصلا ع اساس غرفتك القصر الجمهوري

قهرني وحسيت كلامه مثل الريح العاتيه الي بعثرت اجزاء روحي فلازم احرگ گلبه مثل ما استفزني واستنزف طاقتي

كملت باستفزاز...بس قبل لا اطللع احبب اكولك شغلة جنت اني واكفة وياك ضد مها بس هسه من شفت تصرفاتك لا فعلا مها مو غلطانة انت الغلط منك

وبعديين احمد ربك وشكره ان مرتك دتحاول يصير عندكم طفل وتكذب على نفسها بس هي غبيه نست انت بدون رجوولة واحتمال عقييم

تعابير العنف تغطي وجهه الصارم ، ثار الغضب بدااخله ما شفت غيير نفسي ارتطمت بتاج الجربايه من قوة الراشدي الي خلاني فقدت السمع للحضات ...

ثبتت نفسي كوة ، رجعت باوعتله تقابلت نظراتنا بصراع غاضب ركز بنظراته عليه وصمته يخوفني اكثر من ثورة الغضب الي توقعتها منه .

وكفت اباوعله بسخرية واستهزأ بيه بابتسامة مستفزة ورافعة حاجبي ، اشتعلت نظراته من جديد ؛ لتياوعين هيج للج يله انزلي لا ابتلي بيج ومها مالج علاقة بيها .

درت وجهي وبسرعة ركضت واسمعه يتحسر ، نزلت اركض على الدرج واني  بحاجة الى اخماد الحريق المندلع في جوفي ، انسلت من داخلي امنية تمنيت مااشوف عمه كدامي لتشوفني بهذا الوضع .

رحت للصالة ماشفتها تنهدت بارتياح اخذت جنطتي من على القنفة وطلعت من باب الاستقبال اكو مراية باوعت لوجهي ، صفحة خدي حمررررة وشعري مخربط .

عدلته بسرعة واني امشي وطلعت من بيتهم .

****

زهراء : داومت واني متحلفه اذا رافد تقربلي اشتكي عليه او افضحه فضيحة لاصارت ولا استوت ، وصادف بيومها عدنا محاضرته ،

صار وقت المحاضرة تفاجئت  ماكو مااجه ، استغربت  اخر محاضرة طلعت تليفوني و خابرت صفاء .

جاوبني ؛ حبيبي  حطلع قبل الخط اني تعبانة دا ارجع للبيت .

_ لطلعين وحدج زهراء  خابري على أحمد او كىار يجوج .

_ تمام  ، خابرت احمد واجاني رجعني  للبيت دخلت جوه  لكيت بهاء يمنا سلمت وصعدت بدلت وصليت ونزلت رايح بهاء توجهت للمطبخ حضرت الاكل بين مايجي صفاء ..

انتظرته جوة لان اعرف على جيه ، ومن اجه صبيت وكعدنا ناكل ، كلساع اباوعله وبداخلي شكوك اريد اسأل على رافد بس اخاف منه .

هو ظل  يراقبني عبالك يعرف عندي حجي

رفع حاجبه ؛  شبيج احجي ؟ عيونج مليانه حجي !

احم ؛ حبيبي  اسألك بس لتعصب وتفهمني غلط .

خله الخاشوكة من ايده وظل يفرك باديه ؛ احجي اسمع .

_اليوم جانت عدنا محاضرة لرافد بس شو مااجه ليش ومن سألت عليه كالوا صار اسبوعين ماكو

_اي مو بهاء سجنه وأني رفعت عليه دعوة وشرطت عليه اتنازل بشرط يقدم نقل بأسرع وقت واذا تأخر موضوع نقله ياخذ اجازة وهسه سدي الموضوع ترى مالي خلك

سكتت شفته تعصب كمل اكل واني لملمت وصعدت للغرفه داانام توني اغفه ودخل صفاء للغرفه بس سويت نفسي نايمه ، اجه يمي و سحبني لحضنه .

قرب حلكه من اذني وظل يهمسلي: ادري بيج كاعده حياتي فلا تمثلين النوم لان أنتي فاشلة بالتمثيل

فتحت عيوني  باوعتله غمزلي: بس بارعه بغير شي وهذا الشي أني احبه

_صفاء والله نعسانه وتعبانه وظهري يوجعني فدوة خلي انام اعوضك بعدين

_بشنو تعوضيني

_هههههه ع اساس متعرف حجيت ووخرت ايده عن جسمي لان جان ديتلمس بجسمي بجرأة

_لا مااعرف واذا اعرف بس اول سطر انتي كملي الباقي

_ماطول تعرف السطر الاول معناها واضح عندك التعويض حبيبي

بسرعه صار فوكاي :ياروح حبيبج وانفاسه ونبضه أني مااجل التعويض ولا احب اساوم ع حقوقي

_حقوقك؟ ماانطاني مجال اكمل كلامي بسرعه اخذ شفايفي وجردني من ملابسي عبالك داخل بمعركه وعبالك هاي أول مرة يتقربلي أبد لهفته متتغير من يتقربلي هي هي ومن اسأله شلون هيج انت يكولي حتى انفاسج تثيرني أسكتي واستري ع نفسج وكالعادة يسكتني بطريقته الخاصه الاحبها

هو كولش حنين صح عصبي وشالع گلبي بس ميطول غضبه ، الا بالفراش مجنون ولمساته قاسيه بس من أباوع بعينه يعرفني اتأذيت يرقق لمسته ويهمسلي اسف حبيبي مااكدر اقاومج ابادله بأبتسامه

من بعد ماكمل وابتعد عني حسيت بألم بطني ووجع بظهري جان خفيف بس من كمت ووكفت ع رجليه دااريد أروح للحمام اباوع رجليه عباره عن خط دم نزل مني تفاجئت عبالي عادي بس صار الم عندي واصلا فايتتني هوايه وناسية نفسي  .

خليت ايدي على بطني متألمة واكوول اخخخ ، بسرعه طفر صفاء  من مكانه اخذني للحمام سبحني سألني شوكت أخر مرة اجتني الشهرية تذكرت صارلها شهر ونص ماكو من جاوبته عصب .

_اي غير تحجي تكولين بسرعه لبسني ونزلنه جوه 

كال لامه تلحكنه للسيارة الالم موتني كمت اعض بيدي وابجي وهو انخبض ميعرف شيسويلي حتى يروح الالم ظل الالم يروح ويجي .

اجت عمه صعدت وساق بكل سرعته ، وصلنا للمستشفى دخلت على الدكتورة فحصتني ودزوا تحاليلي للمختبر واني للردهة .

بقت عمه يمي وكلساع كالت اني متأكدة انتي حامل وضعج مو عاجبني هالفترة وجهج شاحب واكلج قليل ونهار كله تصيحين ايع وميع .

درت وجهي شوكت صحت ايع وميع بلله .

رن موبايلها طلعته من جزدانهه كالت هذا عمج اروح اجاوبه وطلعت .

شويه اجه صفاء وجهه مشرق بابتسامة على ملامحه تقدم ودنك لمستواي و باسني بكصتي ورجع ظل يباوع بوجعي : مبروك يا فرحة صفاء ونبضه لج طفلتي انتي حامل

_صدوك صفاء احلف

_وداعتج عندي

خليت أيدي ع بطني احساس يجنن انج تكونين حامل من الرجل التحبي وتعبتي حتى صرتي من نصيبه حسيت بعطف اتجاه هذا الكائن الصغير الموجود بأحشائي وتشوقت لشوفته

سألته لعد ليش هيج صار شبيه انزف ومتوجعة ؟

_مو اني اخذتج بقوة وانتي بعدج شهرين لا والمصيبه حرموني منج ١٥ يوم هاي لازم ابات بالمستشفى هو انتي بس اشمج افقد

_شكد منحرف ووكح

_اي منحرف لعد لو ما انحرافي جان صرتي أم شوفي هاي اهم منجزاتي بس انتي متعافية ومتقدرين النعمه أسكتي لا تطير من ايدج واعطل

_خرررب صفاء عيييب انت متعرف العيب

منين عيب منج أنتي هههههه

حجاها باستهزاء وكمل كلامه: بابا انتي مرتي يعني ماكو عيب بيناتنه

_اي زين شوكت اطلع

_بس يكمل المحلول ونطلع نروح لدكتورة نسائية تشوفج وبعدها نرجع للبيت

بقيت على ما خلص المحلول وتالي طلعنه  اخذني لدكتورة هو يعرفها أباوعله متحمس أكثر مني تالي عمه كالتله: اكولك يمه اذا تريد نشيله نخلي ببطنك اثكل شبيك فضحتنا جنك ديج هراتي بس تكمز .

ضحكنا اثنينه  ..... جاوبتها عمه فرحان عوفي ..

_ ما كايليله لا تفرح احنه بس مو هيج دادة .

باوعت لصفاء بمعنى شبيها امك جاوبني بنظراتها

مشيهااا ..

وصل السره اليه فحصتني كالت الطفل صحته زينه بس لازم مااتحرك هواي ولازم زوجي يبتعد عني من كالت هيج باوعت لصفاء عبس وجهه شكله يضحك

باوعتله بنظرات شماته رفع حاجبه ..

كتبتلي الدكتورة  مقويات وفيتامينات

ورجعنا للبيت ..

رحت لاهلي كلتلهم باركولي ماما اقترحت ابقى يمهم بس صفاء مقبل

صفاء اخذ اجازة وكابلني وكعد يحير شلون يهتم بيه وصل مرحلة حتى يوكلني بيده ويسبحني ويمشطلي الى ان خلصت اجازته ووضعي تحسن رجعت اداوم

بس النساوة متعبتني كولش اتخبل من ريحة صفاء ومن ريحة الاكل واذا اجه يمي اظل استفرغ وهو خطيه ابد ميضوج ولا يعصب يغسلي ويتركني وينام بالصاله الفوك حتى خاف احتاج شي هو يمي

دخلت بالشهر الرابع وصادف اخر يوم امتحانات الفاينل رجعت سبحت ولبست شي خفيف وصليت وكمت  ورتبت الغرفه صايرة هوسه واني هاملتها

كملت احتريت دخلت ذبيت مي ع جسمي ولبست دشداشة اليوم عندي موعد يم الدكتورة وصفاء ميقبل الا هو ياخذني .

تمددت على السرير خليت ايدي على بطني وابني يررف رفات خفييفة ابتسمت على اثرها .

كمت طلعت من الغرفة  ، حسيت بباب المقابل غرفتي مثل الي توه انسد او اندفع دفعه خفيفة ..

صحت صفاء انت هنا ؟؟

مجان اكو اجابة ، فكرت اني دا اتخيل خلي انزل جوة انتظره اذا اجه عود اصعد ابدل .

توه مخليه رجلي ع الباية الاولى ، حسيت اكو شي جوه رجلي عبالك زيت او زاهي .

فتحت عيوني على اوسعها ، ذبيت كل ثقلي على الحديد مال  الدرج  بس ماكو فايدة تسرسحت من الدرج عطت عيطة يمكن حتى أهلي سمعوها كل فكري صار بأبني خليت ايدي بطني .

انركعت بطني على البايات وايدي ورجلي تعورت انكلبت فوك وجوه ،  شفت الموت بعيني وبس اصرخ اريد احد يطلع ينقذني

ماكووووو ... 

رجلي انلوت لمن وكعت ع اخر باية ، ومااشوف غير بس الدم اخذني والم فضيع صار عندي ببطني ، ظهري وكل عظامي وجسمي  ..

يتبع ...

السلام عليكم ، كل عام والجميع بخير وان شاءالله تحقيق الاماني .⠀

    ⠀     ┈┉━❀❃❀━┅

شريعة العشق

بارت ٤٩

نورا ناصر

"""""""""""""""""

كان كبريائها

كأخر جندي صامد في بغداد

يابئ الاعتراف بسقوطها ...

_____////_____

ببكاء ممزوج بأنين تلقفتني الارض وألمي ماينوصف بكلمات ، كل جسمي يوجعني والوجع الاكبر بالروح والخوف من الفقد ، خايفة اشد الخوف لا افقد ابني ...

بقيت ثواني على هذا الحال ابجي اعيط واصرخ الى ان اجت عمه وعمو الي باوعتلهم ابجي وواون من الوجع .

بنظراتي اتوسلهم ينقذون ابني!!!!

اجه عمو يمي يريد يكومني صرررخت لاااا عمووو لا تلزمني ايدي توجعني عمو ايدي يمكن انكسرت عموووو ..

بخووف ورجاء بنيتي بس اكومج منا تحملي .

"عمه بذعر " ؛ عزاا وصخام هاي شوون وكعتي غير تنزلين  على كيفج ياعيني راااح الطفل هسه راححح دتنزفين .

صرررخت بألم عمه الدرج كله زاهي وزلككت عمه انتي غسلتي ؟

بصدمة ؛ ياا شووف الحظ اني اغسله ؟ لو انتي ؟؟

عمو ؛ هسه مو وكتجن تسولفن كومي بنيتي اوديج للمستشفى .

صرخت ؛ عموو اريد صفاء اريد صفاااااااء....

منين ميلزموني اعيط واصرخ كل جسمي يوجعني والرطوبة بين رجلية خلتني انصاب بنوبة ذعر ورهبة ..

كووة وبالشافعات يله ودوني للصالة ، رجلي كوة امشي عليها متزلغة ومتعورة ..

لازمه بطني اعرج وامشي وايدي الخ لازمتني عمه منها وتمشيني كوة والدم يرسم طريقه لاسفل رجلي ويدمر ملابسي .

'راسي انضرب وانجرح واحس رطوبة بي ويوجعني ودوخة وعيوني غواش كوة اشوف بيهن من البجي ومن الم راسي'

خابروا على صفاء جاي بالطريق واجت ماما واخواتي يمي واني ابجي وحاضنة ماما واهذي وماما تبجي وتدعي وتهدأني .

الى ان اجه صفاء فتح الباب بسرعة واجه يركض باتجاهي كمبص كدامي واني اشكيله حالي بنحيب وصراخ  ،  رفعني عن الارض ، تعلكت بركبته

وطلب من ماما تلبسني بسرعة .

وطار بيه للسيارة وخلاني بالورة ووجهه يتصبب عرك وعيونه حمرة دم وانفاسه تلهث .

دار بسرعة صعد بالصدر وطار بينا للمستشفى....

بالمستشفى دخلنا على الدكتورة فحصتني كالت رحمج مفتوح ودتنزفين هسه حالا ترحين للصالة يسوولج كرداش ..

عيطت والطفل دكتورة وووطفلي ؟؟

كالت الطفل منتهي الله يعوضج .

انهاريت تمنيت ميتة ولا ذيج الساعة

شكد جنت فرحانة بي شكد جنت متمنيته ..

كل عظامي تون عليه وجسمي متكسر وايدي ماكدر احركها واعرج ، حتى السسترات انقهرن على حالتي

صعدت ع السدية بنجوني بنج موضعي والدكتورة

سوتلي كرداش ..

من خلصت اغمى عليه ، او فقدت الوعي ما اعرف شنو الي صار بيه ، صحيت أني متمددة على السرير مال المستشفى   وماما كاعده بصفي على الكرسي..

باوعتلها بوهن وروحي مثقلة بمكاييل من وجع

لاحظت عيونها حرة دم من البجي

تقلصت ملامحي وانظميت الها وصرت ابجي

ظلت تهدي بيه بصوت كله انكسار وألم ..

تذكرت كل شي صار وظليت احجي الها ..

_ ماما الدرج جان كله زيت اي والله جان كله يزحلك

يووم هاي فعلة فاعل والله .

جاوبتني يوم متوهمة شجاب الزيت على الدرج خاف مغسول غاسلته انت بزاهي وممنظفته زين وتدعبلتي بي وعبالج زيت ؟

حاجيتها بنفي ؛ لا لا وربي مااجذب عليج جان اكو احد فووك بالغرفة الفوك اني متأكدة حسيت بحركة والله ماما والله وكعولي ابني قتلووه موتوه والله والله مااكذب ااااه ..

بهاللحظة دخل صفاء للغرفه اجاني باوعتله راسه ووجهه عابس ومهموم حسيت بألم ببطني وشي ديوجعني كولش .

سألت صفاء : مات الطفل صفاء مااات  حجيت وبجيت بنحييب مؤلم ..

بنظرات مليانة بالالم وبنرة رجاء ؛ عمري العوض بسلامتج ممقسوملنا ان شاءالله ربنا يرزقنا غيره

تهسترت فقدت كمت اغلط واصيح عليه: لا مقسووووم النا مقسووم لحد الظهر يتحرك ببطني وجان يدفر بيه اختتتتك الحقيرة قتلت أبني والله الا أشرب من دمها والله امشي اطلععع مااريد أشوف وجهك كدامي حقيرررر بس عليه صاير رجال واختك موتت أبنك بدم بارد وجاي تكولي مامقسوووم النا؟

لزمتي من ايدي جانت توجعني كولش عطت وحجيت

والله اني لاحظت اكو حركة فوك والدرج مليان بشي مااعرفه مااعرف شنو خاله ع درج وخلتني اتزحلك منه.

صفاء ؛ اهدي اهدي زهراء بس خل افهم منج يعني انت شفتي رشا بالبيت لو مشفتيها ؟؟

_ مااريد افهمك ولا اريدك تفهم مني ، اكررررهك اطلللع مااريد اشوفك ساعة السودة الحبيتك بيها شنو شفت بيك حتى حبيتك أمداني

التفتت ع ماما جانت تبجي: طلعي أمي مااريد أشوفه

هو جان يباوعلي ومصدوم بكلامي طلع من الغرفه 

واني بقيت منهارة ، لحظات  واجت الدكتورة الظاهر هو دزها انطتني أبرة ، وراها هدأت و نمت ..

وراها كعدت وظلت امي تحضرني حتى نطلع لان كتبولي على خروج من المستشفى .

اجه صفاء نزل رجليه ولبسني  الحذاء ويريد

يشيلني  دفعته:  وخررر مااريدك حس لتصير لزكة

_ميخالف بس خلي اشيلج حتى متتأذين من تمشين

سكتت نزلني من السرير وخلاني على الكرسي المتحرك وصلني للسيارة كعدني لكدام وماما وعمه ليورا وبقينا الطريق كله ساكتين ، التاف عليه

كال اوديج دكتور كسور ناخذ الج اشعة خاف عندج كسر ..

صكيت اسناني وحجيت ؛ ماااريد مابيه شي ..

وصلنا للبيت راد ينزلني مقبلت جلبت بماما

_أروح ويا أمي اريد ارتاح

سكت ماحجه شي دفر باب البيت ودخل وأني رحت ويا ماما لبيتنا ..

                           ****

صفاء: جنت بشارع المغرب دااخذ علاج لزهرتي وللحجية خابرتني أمي تصيح الحك مرتك وكعت من الدرج ودتنزف ما عولت اوصل للبيت لكيت زهراء حالتها حالة ، تبجي وتصيح من الالم ، شلتها وركضت للمستشفى واني بعدني مااعرف شلون وكعت بس من صحت كامت تصيح وتغلط عليه وتكول اختك قتلت أبني

انصدمت بكلامها معقولة رشا توصل بيها المرحلة تموت أبن اخوها هي صح رعنه وطايحة الحظ بس مو لهاي الدرجة ..

طلعت من الغرفة ، شفت امي متوجهة لغرفة زهراء بالمستشفى ظليت أباوع لامي ثواني و اشرتلها تجي يمي ، استجابت الي و اجت يمي .

سألتها: يوم شنو معنى كلام زهراء فسريلي ترى واكف ع شعرة واتخبل..

حجت بصوت تعبان: شنوو يوم شبيها زهراء وشنو تكوول ؟

_ تكول رشا وكعت الطفل هيه رشا جانت بالبيت اليوم ؟

_ لا شفتها رشا ولا اجتي مرتك لمن وكعت جنت اني نايمة وتدري بيه الظهر افقد وانام اني وابوك وكعدنا على صوت عياط مرتك .

ظلت  تبجي امي على الطفل وهيه جانت فرحانة بي ، حسيتها صادقة ، وزهراء اكو شي ومجاي افهمه ربي لاتحيرني واكشف الحقيقة بأسرع وقت واذا رشا هي السبب مراح ارحمها هالمرة بس اريد دليل قووي على انو هيه الي سوت بزهراء هيج ..

  تركتها لامي  ورحت للدكتورة دزيتها تضرب زهراء ابرة مهدئة لان اتهسترت

زهراء دتحملني السبب ومتحس بناري شكد صعبة عليه خسرت أبني واني بالليل جنت اتلمس ببطن زهراء وفرحان  وهو يدفر  .

جنت منتظره لحظة  لحظة أحسب الايام وهي تضحك عليه تكولي شبيك مستعجل اكثر مني والمصيبة شاك بأختي قتلت أبني أختي الي  من دمي ولحمي .

اختي الي اذا زعلوها أني اروحلها لبيتها احير شأخذ بيدي وما انام الليل اذا ماتراضيها واطيب خاطرها تاليها تموت أبني!!

محد يحس بيه زهراء نظرات اللوم والعتب بعيونها تذبحني صعدت للغرفه فتحت الخانه مال ملابسها صارت ملابس الطفل كدامي طلعت وضعفت كدامهم

بجيت وعاتبت ربي شسويت أني وهيج مشلوع گلبي من دون اخواني مو حسد بس هم أنقهر على نفسي حبيت وانخذلت وتالي لمن ربي جبر بخاطري تجي بنت أمي وابويه تهدم سعادتي وتحرمني من احلى لحظات بحياتي

دخلت أمي للغرفه اخذتني لحضنها : يمه المؤمن مبتلى وأنت مؤمن الله يعوضكم ان شاءالله

_يمه و حركة گلب زهراء شلون بيها وأني ولهفتي للطفل شلون اتعود هو راح وبعد ميرجع بس فهميني رشا اني شسويتلها وهيج هي ويايه يوم كل متجي هنا وتسويلها مشكله أني بالليل أروحلها واراضيها

حاجتني امي ؛ يمه مرتك متوهمة رشا ماجتي صارلها كوومة شنو نسيت ابوك طردها وراحت بعد ماجتي اني اروحلها للبيتها بس ماتجي والله صدكني ..

تجاهلت كلامها ، طفرت من حضنها ، ونزلت جوه  شغلت السيارة وبوجهي لبيت رشا .. 

دكيت الباب طلعلي أبنها حضني بوسته ودخلت هي جانت كاعده ع الميز بالمطبخ بس شافتني ارتبكت

التفتت ع اطفالها: خالو روحوا لغرفتكم أريد احجي ويا ماما

مشيت قبلها للاستقبال وهي اتبعتني كعدت لزمت رأسي بأثنين اديه باوعتلها

بالله عليج أسألج سؤال وجاوبي: بشنو أذيتج لج من دون أخوانج ميمر يومي اذا مااجي اشوفج شمحتاجه

لج شسويتلج وهيج تجازيني شلون نفسج سمحتلج تدفعين بنت عمج وهي حامل ولج حتى لو مو بنت عمج ومو زوجتي بنية حامل شلون تدفعيها انتي ماعندج مخافة الله متفكرين لا الله يعاقبج بأطفالج لجج أنتي من ياطين الله خالقج خرررررب يووومج..

رشا ؛ شبييك صفاء شنوو كايلتلك مرتك عني بالله اني من اشهر ماجاية لبيتكم ولا ادري شصار ما صار .

تقربت منها ابتعدت خطوات للخلف مرعوبة وماتحط عينها بعيني ؛ انت اليوم ماجنتي ابيتنا ؟؟

_ لا والله صفاااء مااجيت لبيتكم اصلا مستغربة كلامك هسه ..

صيحت اثييير ليييينا وينكم تعالولي .. 

اجوي يركضون من الممر ، وصلوا يمي

اصير صار على يميني ولينا على يساري .

خليت اديه على ظهرهم ودفعتهم بخفة باتجاه امهم .

باوعت بعيونها بنظرات حارقة مشتعلة وداخلي الله يعلم بي احس بركان مشتعل وديحركني ..

_ احلفي بجهالج انت مجنتي ابيتنا اليوم وماتسببتي بوكعة زهراء .. يله جاوبي ابني مقابل جهالج!!!

سكتت وتباوعلي صييحت احجييييي يله...

تقربت عليها لزمتها من ركبتها خنكتها ، عاطوا الجهال دفرتها وكعت على القنفة وتوجهت باتجاهه غضب متملكني مدفوع برغبة مااكدر اتحكم بيها ، اريد اقتلها وانهيها واخلص منها هسه بهاللحظة .

بس الي وكفني حلفانها بجهالها

_ صفاء وداعت جهالي مو اني الي دفعتها ولا تسببت بدفعها ..

هزيت راسي بأسف تمتمت ؛ الله يمهل ولا يهمل انتظري جزائج من الله اني بعد مالي شغل بيج ..

...فعتها وطلعت متندم ياريتني ماحلفتها بجهالها ما الهم ذنب بس الغضب الي بداخلي طغى عليه ..

هدأت شوية نزلت للسوك  اخذت مسواگ ومعلاك شويته ورحت لبيت عمي تحسين ..

دكيت الباب طلعلي عمي سلمت عليه ودخلت جوه

كال الله يعوضكم ولتضوج من حجي زهراء أم ومحروگ گلبها اعذرها ترى هي تحبك...

_ اعرف عمي حقها وعاذرها ..

استأذنت من عمي ودخلت لغرفتها لكيت عبير متمده يمها شافتني طفرت سلمت وطلعت اما زهراء جانت نايمه ووجها اصفر تعبان بستها بكصتها فزت باوعتلي وبرطمت

همستلها: لتبجين ياروح صفاء وفرحته والله بس تصيرين زينة أحبلج بتوأم

_ جذاااب وخررر عني ..

_ها مستعجله تريدين هسه لج مو زين هسه لازم تطيبين يلا نداهم الغار

ضحكت...

: اي اضحكي والله يعوضنا يلا أكعدي اكلي جبتلج معلاك

_لاا مااحبه صفاء تلعب نفسي

_ماكو تلعب نفسج غصباً عليج تاكلين خسرتي هواي دم يلا عمري كومي...

_اي بس تأكل ويايه أكيد انت لهسه ع الريوك

_ميخالف أكل وياج فديت الي بالها يمي وتفكر بيه ..

كمت فتحت الباب صحت ع عبير جابت الاكل ومسويه عصير وكرفس انطتني الاكل وراحت

بالكوة جبرتها تأكل سألتها :زهراء شبيها اختج

_منو منهم؟

_عبير شو مو على بعضها

_ها هيج على موضوع خطوبتها مو تفركش كولشي

_اي ادري سولفتيلي

_اي هي عليه وكرار كل ميشوفها يرزلها وهسه هي راحت سادس وبدت خصوصي وشو ضاربه الدنيا عرض الحايط ولو ساعات ماما تكول تلكاها تبجي ومتعرف شتريد

_خاف تريد ترجع لقسور

_لا مو اجه عمو عبد اللطيف وسألها وكعد وياها ع انفراد ماكو قافله

_عوفوها براحتها لتضغطون عليها ..

_ اي هيه براحتها محد ضاغط عليها بس هيه مدري شبيها ضايجة ..

_ يله متروحين ويايه ؟

_ لالا خليني هنانه ارتاح وارجع ..

_ براحتج .. بوستها واخذت ايدها شفتها مشدودة سألتها بعدها توجعج ؟

بحزن ردت كل شي يوجعني ...

رجعت كعدت يمها ع الجرباية داخلي راسها على صدري عاطت اخخخ .

رققت لمستي وبستها على راسها وخدودها

سألتها ؛ ابقى يمج ؟

هزت راسها وجاوبت بنفي لا صفاء لاا رووح .

رجعت بستها وطولت بوستي واتنفستها وداخلي يحمل كل قهررر الكوون ..

طلعت من يمها بصمت ، سلمت على بيت عمي ورجعت للبيت طلعت ملابس الطفل و ويانه مُعين زوجته حامل وحالتهم تعبانه كلت باجر انطيهيا بالدوام لفيت راسي وحاولت انام

كرار: رجعت للبيت تفاجئت شفت مها بالبيت كاعدة يم امي ، خزرتها دنكت وظلت تعصر بأصابعها .

اجت امي باتجاهي .. الله يساعدك ..

جاوبت امي ونظراتي باتجاهه مشتعلة بغضب ..

كال يوم مرتك عرفت خطئها والي فات مات هسه اخذها فوك واتفاهموا وكافي زعل انته تحبها وهيه تحبك ومالها داعي كل هذا الي دتسوي .

سألتها ؛ منو جابها ؟

مدري منين طلع ابويه وجاوبني على سؤالي ؛ اني جبتها عندك اعتراض ..

سكتت وبعدها نظراتي عليها 

ابويه كال اخذها وحلو مشاكلكم وكافي زعل ماتسوى .

هزيت راسي وبعدني معصب توجهت ليمها حجيت من بين اسناني ؛ كومي كدامي وصعدي فوك .

رفعت راسها وعيونها تعبانة ومقهورة وتتوسل

_ احلف كرار ما تأذيني ؟

ابويه جاوبها شحده يأذيج بابا كومي وياه وتفاهموا على كيفكم واستفادي من اخطائج وبعد لا تكرريها .

كامت مثل المجبورة وخايفة ، اشرتلها بيدي يله فوتي

فاتت قبلي واني وراها ، صعدنا لغرفتنا فتنه وسديت الباب بقت جامدة بمكانها عبالك تايهة ومتندل شي ومبينه اطرافها دترجف وخايفة ..

رحت صرت كبالها ؛ شوفي لج خطج هسه تكسري موبايل بعد ماكو تخابرين اهلج من موبايلي بنت خالج اذا عرفت عندج تواصل وياها هاي الي الله كتبها عليج وموضوع الطفل اذا عدتي أبتلي بيج مو دتولين للدكتورة وتاخذين علاج لو الا تصخمين وجهج وتصيرين حداد براسي

_ كل الي تريده يصير فدوة حباب كرار غلطة ومتتكرر ..

تركتها ورحت بدلت ملابسي ، وتوجهت للسرير اريد انام لهسة حاقد  عليها  يمكن لو ما مخافة الله جان جنزتها بس لعنت الشيطان وهي ظلت تنك فوك رأسي

كرار تريد غده اخليلك .. ؟ كرار اصبلك جاي ، تريد شي ؟

وخرت الغطه وعطت بيها ..

_بسسسسسس لتحجين وماريد منج شي

أسكتي اريد انطمرررر تعبااااان

خلت أيدها ع حلكها ودخلت بالفراش واسمع بس صوت شهكاتها ..

عفتها وطلعت برا الغرفه ...

مرة ايام بقيت اعاملها ببرود ومرات عصبية ،  تمرضت لان أبتعدت عنها وعاملتها بقسوة ظلت تاكل شي قليل ومرات متاكل ، حجي متحجي ابد واني مغلس عنها ..

فديوم رجعت للبيت صعدت للغرفة  لكيتها نايمة ..

بدلت وشكد تحركت بالغرفة وهيه ماكو حتى ماتحركت ..

نزلت سألت أمي عليها كالت تريكت ورجعت نامت تكول مالي خلك وانته هم على كيفك وياها يا امي ميصير هيج كافي فكك صار شكد على هالسالفة وانت مانسيتها وبعدين هيه رادت تروح ماراحت اصلا كافي تعذبها ..

هزيت راسي بتفهم وصعدتلها ، باوعت بوجهه نايمه و مبين باجيه جفونها وهيه مسدودة مبينة حمرة ..

كعدتها من النوم .. سألتها شبيج

جاوبت بتعب وقهر ؛ مابيه تعبانه أريد اروح لاهلي

_لا ماكو روحه لاهلج وكومي بدلي اخذج للدكتور وضعج ماعاجبني

_مااريد اروح كولشي ماريد ..

_لالا تريدين بسرعه كومي يلا اسبح واطلع الكاج مغيره ملابسج مفهوووم؟

تركتها ودخلت للحمام طلعت لكيتها دتبدل حركتها بطيئة...

اخذتها للدكتور طلب مجموعه تحاليل سويناها وهي متململه ومالها خلگ ، الدكتور كال روحوا لدكتورتها رحنالها هي وياه نفس المجمع

طلبت تحليل حمل سوته وكعدنا ننتظر

مها: يعني هسه من سوينا كل هالتحاليل وطلع مابيه شي ارتاحيت من صرفت هلكد فلوس ع شي مو ضروري

_اي ارتاحيت انتي معليج مصارف من جيب ابوج

_ اسكت عنك احسن  احاجيك حجاية وحدة ترجع الحجايه عليه بعشره .

_ اي احسن لو تسدين بوزج وتسكتين ..

صاحوا أسمها  رحت جبت التحليل طلعت حامل ، طرت من الفرح بلحظتها علمودها لان حتتخبل وهم فرحت حصير اب ..

رحت يمها كومتها واني اضحك همستلها: هذا حتى الطفل خاف من السحر كال خلي اشكل احسن من مايسمطوني بسحر يشعلون اهل اهلي

_شنو طفل ؟ كرار أني حامل كمت اضحك

_دمشي نشوف الدكتورة دخلنا

كالت ماما أنتي حامل شهرين ونص شلون محسيتي

جاوبتها : اي دكتورة مو هي كل مرة تغيب وبعدين تجي فما خليت ببالي ونفس الاعراض بالضبط ..

كتبتلها مقويات ورجعنا للبيت لكينا خالتها يمنا  باوعلتها : اكلج شعدها خالتج يمنه شنو شمت خبر

_والله مكلتلها

_اعرف بس خاف وافقت ع الفلاح وجايه ترجع موافقه

ضحكت مها و نزلنا سلمنا ..

رحت يمها حجيت بمكر ؛ ها خاله اليوم جايه ترجعين موافقه مو

_موافقتيش يمه

_ع العريس غير ...

خالة مها فتحت حلكها بصدمة ؛ ياا شوف الخبيث متجوز من سوالفك انته ..

التفتت على مها همست  شوفيها شلون وجهه ورد اكلج مها حواجب خالتج مثل المكناسة مال السعف

ضحكت مها بصوت عالي وخالتها انتبهت

كمت كرصتها .. توجعت وظلت تفرك مكان الكرصة ..

امي لزمت خالتها على العشه مقبلت تبقى راحت وصلناهه للباب ورجعنه ..

امي سألتنا بشروا شبيها مها شطلع عدها ؟

جاوبتها مها ام السحورة حامل حتجيبلنا ولد من السحورة ..

امي جاوبت برفض ؛ لك حتى ملحكت روحي اسكت لاتلزكلها مبروك يووم وان شاءالله الله يسهللها

و من اليوم تنزلون تنامون جوا وبعد ممنوع تشتغلين

: اي حجيه ممنوع تشتغل شغل البيت بس عادي تشتغل يمي

_شغليش ماما

_مثل شغلج أنتي وابويه من طلعتوني ههههههههه

_لايا سافل شوكت يصير برأسك خير انت

_ليش مو راح اسويج بيبية وتعبت ظهري علمودج وتالي تكوليلي سافل وكدام مرتي هم ما مرجيه منج هاي ولو زوجج عقيد وعندج الحساب

_اي وشنو يعني

_يعني كل السوالف المكسرة عنده

دااحجي وابويه كاملي واني طفرت وتركتهم يتعاركون اجتني مها خربانه ضحك هاي شسويت بربك

_لج خليتهم يتعاركون حتى اخمطج ادري بيج بعد متكومين من يمهم تعالي نحتفل بالطفل ابو السحورة

_كرااااار والله ازعل والنبي مو سحارة هي تاخذ خيرة أمشي اوديك عليها

ضحكت جريتها للسرير تعاااي مشتاقلج وربي ..

عااطت على كيفك كرااار ...

..........

عبير .. رجعت من المدرسة مشي الخط ماكو اليوم

دخلت لفرعنا ودا امشي ، الشارع شبه فارغ دنيا الظهر حسيت بسيارة بصفي تمشي على كيف باوعت عرفتها سيارة كرار .

درت وجهي وسرعت مشيتي سمعت صوته اجاني

باوعت فاتح الجامة وظل يحجي وياي ..

اصعدي عبير خلي نحجي!!!

رفعت راسي بتكبر وتمسكت بجنطي ثبتتها زين وكملت مشيتي وسرعت خطواتي ..

حسيت خطوات ورايه شفته نازل من السيارة  ولحكني

مشيت اسرع بعد شوية واركض ..

بس هو خطواته جانت اسرع لحك بيه ، لزمني من ايدي وديوكفني ، اريد افلت  ايدي منه بقووة بس هو بقى لازمني ، عطت بي

وخررر لا عبالك كل مرة تضربني هل مرة انت معليك بيه و‏‏୪ أنت إبن عمي و  ‏‏୪ اعرفك.....

كرار ؛ ثوول عبير بس دا نحجي تعالي اصعد

بعده ممكمل اجانه صوت ؛ هاي شكو شصاير بينكم ؟

التفتنه وكرار عاف ايدي واشوف قسور مقابيلي بملابسه العسكرية ونظراته ما تتفسر ..

يتبع....

"فقط ايام العيد النشر بين يوم ويوم"

السلام عليكم ورحمة الله وبركاته

حنزل اليوم بارت خاف باجر ما انشر ..

"""""""""""""""""":::""""""""""""

#شريعة_العشق

بارت ٥٠

نورا ناصر

""""""""""""""":::"""""""""""""

باوعت لكرار جمدت نظراته ، غضبي تبخر تحت تأثير نظراته الجامدة

اما قسور عيونه تشتعل اثناء مايباوعلي .. ظليت اباوعله بحيرة وألم مقهورة على حاله مبين تعبان كولش ..

كال بتعب ونبرة حزن مهزوزة ؛  شونج عبير ؟

ببرود جاوبته تمام زينة انت شلونك ؟

جاوب الحمدلله .. حسيت بعيونه كلام هواي ..

حسيت الشكوك استعرت بداخله على اثر نظراته الي صار يوزعها بيني وبين كرار ، خلت كرار يدنك راسه اما اني ظليت اباوعله بثقة احاول افند شكوكه الي تولدت عنده وفضحتها نظراته ..

عفتهم وظليت امشي واسمعهم يحجون هو وكرار وكرار يشرح اله .. واني رجعت للبيت ..

و هالفترة فترة مراجعة السادس انقطعت عن الكل صح هو أدبي بس ع الاقل لازم اطلع اعلى شي بي اذا مو اعلى عاد كلية مقبولة ولو بالعراق ماكو شهادة تتقدر ..

  بالليل ضجت ومااجاني نوم كمت طلعت الموبايل وفتحته لان جنت قافلته ، فتحته ولكيت كومة رسائل من قسور ..

فتحتهم جان يحجيلي عن يومه شلون يمر او يعاتبني واكو  رسائل حب واكو رسائل مرزلني بيهم

اكو رساله بيهم كاتب (دخيل ربج شنو من بشر أنتي لج  بالجذب ماكلتي أسال عاد كولي أبن عمتي اشوف شلونه )

ورسالة لخ كاتب(بالرغم من انج حقيرة ونذله وناكرة العشيرة بس هم احبج أنتي مرض مزمن مستحيل اتعافى منه )

ورسالة(أحبج ياقاسية الملامح والاطباع)...

بقيت لساعة متأخرة اقرأ بيهم وابتسم ونفس الشي ماكو مشاعر بداخلي احس داخلي جليد وبس . .

غلقت الفون ونمت....

و بهالاسبوع تفاجئت بجية عمة أم قسور وابوه

رجعوا خطبوني وهالمرة مو أني رفضت بابا هو الرفض خصوصاً بعد ما ماما كالتله ع كلام عمه

جاوبهم: ماكو قسمة يابه باجر عكبة تجيني بنتي سابحه بدمها الولد ضابط ويوم هنا وعشرة بدوامه شنو جايز من بنتي أني هاي زهوره اتعذبت لمن ربنا كال بس اجي اعذب الثانية ليش ماعندي خبز اوكلهن ..

من بعد كلام بابا شفت نظرات فرح بعيون عمه لان بابا جان هيج جوابه وبالاخير ختمتها: قحط بنات هسه ع حورها بنتك مو زين من أبني كلبها خليها ع گلبك سمج باير

بابا ضحك  :سمج باير خايس ماشامرها عليج خويه بنتي أريدها يمي سندانه ورد أني اسقيها بيدي يومية ولا اخليها تتعذب يمج بنتي واعرفها صح لسان بس اذا راحت يمكم راح تتحمل المر علمود يستمر زواجها ومتشوف نظرة حزن بعيني او عين أمها واني شلي بهالدوخه ع كولتج

ودك ع صدره خليها سمج باير ع گلبي وباوعلي وابتسم

رديت الابتسامة لبابا .. وعمه جاوبته يعني تفشلني اني جاية عمود ابني ترة لان ثبرني بيها مو علمود شي والله ..

ابنج درة مال الله بس ماله نصيب يمنه الله يعوضه بوحدة تناسبه اكثر ..

طلعت عمه معصبة ..

كرار .. كرهت نفسي لمن شفت قسور وهو يبوعلها بنظرات تمووت قهر وبنفس الوقت كرهت عبير بسبب قساوتها وياه وهيه تباوعله بتكبر وغرور..

وزاد  كرهي لنفسي اكثر لمن تذكرت نفسي من ضربتها وتجاوزت على املاكه تمنيت امحي هذيج الحظة من تاريخ حياتي بس لمن شفتها وهيه تباوعلها بقساوة بداخلي اكول تستاهل الراشدي الي اكلته مني ..

رجعت للبيت صعدت لغرفتي لكيت مها تبجي وامي يمها انصدمت سألتهم خير شكو شصاير ؟

امي جاوبتني ؛ مرتك تنزف وديها للدكتورة يله بسرعة

رحت يمها كمبصت كدامها لزمت اديها اهديها ..

باوعتلي وعيونها حمرة دم ؛ كرار ابني وكع يمكن !

_ ليش شصار وكعتي تعورتي شبيج شون وكع ؟

هزت راسخا بنفي ؛ لا ما وكعت ولا شي بس نزف خفيف  ..

باوعت لامي بنظرة استفسار

افتهمت نظراتي وجاوبت ؛ عادي تصير مو اله وكع هسه ارتاح ووديها لدكتورتها ..

رجعت باوعت لمها سألتها متوجعة يأذيج شي ؟

هزت راسها بمعنى لا ؛ لا بس بطني مدتكبر ولا نساوة عندي مو مثل هذيج الايام اصلا عادي عبالك مو حامل ..

معقولة التحليل يخطأ ؟ باوعت لامي ووجهت السؤال الها ..

كل شي توقع يووم وهسه مثل مكتلك طب اغسل واطلع احضرلك الاكل وانتي مها حضري نفسج نروح لدكتورتج تشوف حالتج .

عافتنا امي وطلعت ، غسلت واكلت شويه وكمت بدلت ملابسي واخذت مها للدكتورة مالتها اخذت سونار

كالتلها اي حمل ماكو ابطنج سوي تحليل حمل بالدم والادرار مرة ثانية وتعالي رحنه سوينا التحاليل وطلع ماكو حمل ..

رجعنا الطريق مها كله تبجي واني بس ساكت حتتخبل على الطفل واني معصب منها بس ماكدر ارزلها هسه بنفس الوقت مقهور عليها .

اسمعها تحجي وي امي ؛ عمه والله الدكتورة ذيج المرة حسبتلي وكالتلي عليج شهر ونص ..

جاوبتها امي ؛ اخذتي سونار ذيج المرة؟

_ لا ما اخذت .. بس هسه اخذتلي وكالت عندي تكيس واللتهابات وهيه مأثرة عليه ..

جاوبتها ؛ كافي مها سدي الموضوع وبعد لاتحجين بي

عوفيها بيد رب العالمين ..

كرار بسس ..

اششش كافي كتلج سدي الموضوع ..

ورة فترة جتي يمنا بنت خالتي هند ، زوجها توفى قبل مدة وحالتها النفسية تعبانة وهيه كلش تحب امي وترتاح الها لذلك اجت يمنه ..

لاحظت على مها  تغار من هند صح متشكي وهي وياها حبايب بس أني اعرف مرتي وحافظها ..

  بالليل نزلت أشرب مي لكيت هند شايله ابنها  وتفتر بيه البنية من شافتني خجلت

كالت: أسفه خاف كعدت على صوته بس شوفة عينك مديقبل ينام

_ لا يمعودة شسالفة اخذي راحتج اني اصلا نزلت اشرب مي لا سمعت صوته ولا ابد ..  اشوو انطينيا اخذه يمي فوك وانت روحي نامي ..

_ لا لا خطية مها تكعد خاف نايمة اني هسه اخذه بالحديقة وبلكي يسكت ..

دا اجاوبها  نزلت مها ظلت تباوع علينا بنظرات ماتتفسر

هند باوعتلها كالت: وهاي نزلت مهاوي الظاهر افتقدتك يلا خويه تصبح على خير اخذت أبنها وراحت واني شربت مي وصعدت لحكتني مها

_شعندك نازل هيج وقت؟

_عطشان نزلت اشرب مي

_هااا ليش مكعدتني اجيبلك مي

_هاي شبيج ترى مو مكسر وشكو اكعدج تنزلين حتى تجيبيلي مي !!!!

_ اي شكو بيها انزل واذا يعني ؟؟

رفعت تك حاجبي مهاا الي ابالج شيلي اوكي ويله تعالي نامي اخذتها لحضني وظليت ابوس براسها

تحسرت خلت اديها على صدري اخذت كف ايدها وظليت ابوس بي  ..

وهم ظلت تتحسر درت جسمي عليها ظليت اباوعلها

مبتسم ؛ شكو هالحسرات بلله ؟

اتسعت ابتسامتها همست احبك اريدك بس الي مو بيدي والله هند حبابة بس الي بيه مايخليني كرار احبك والله ..

قربت شفتي من كصتها بستهااا حييييل وظليت اطبع بوساتي على خدها وحنجها وراسها واخر شي ختمتها على شفتها وخرت لمن شفتها محتاجة هوا كتلها واني اشدد على الاحرف واني امووووت عليج وهسه يله نامي الوقت متأخر وباجر وراي دوام ..

زهراء ...  كاعدين نسولف أني وماما عن مها خطية شلون طلعت مو حامل وهيه جانت فرحانة ..

صفنت وظليت افكر  الدورة مالتي شو مااجت هذا الشهر

باوعتلي ماما : ها شو صفنتي

_أكولج يوم ترى الشهرية متأخرة عني صار ١٣ يوم

_ليش محجيتي لعد غير تكولين ياماما

_والله ماادري شلون نسيت

_هسه اجيبلج اختبار منزلي وشوفي ومنا للعصر اخذج للمختبر ونشوف

طلعت ماما للصيدلية و راحت جابتلي اختبار رحت استخدمته ،  وطلعت النتيجة  خطين واضحات كمزت من الفرحه تالي خليت أيدي ع بطني: سوري أبني حبيبي اذيتك ..

طلعت من الحمام  ورحت بشرت ماما ..

كالت العصر هم اخذج و نروح نتأكد ..

بقيت يم ماما والعصر رحت للمختبر و حللت وطلعت حامل فرحت ودعيت من اعماقي ربي يحفظه هالمرة ويسلم واجيبه صاحي واشوفه ..

رجعت للبيت لكيت صفاء صاير اعصاب لان متصل بيه واني ممجاوبته تليفوني بقى ببيت اهلي ..

لزمت ايده : حبي والله غصباً عليه تأخرت أبنك سبب تأخيري

ضحك متفاجأ ؛ شنو أبني لتكولين حامل!!!

_عمري الف مبروك حتصير احلى أب بالدنيا

شالني وظل يفتر بيه: كااافي حباب دخت كمت اضحك بصوت عالي وهو يبوس بركبتي

غمزلي: شوفي مو كلتلج أداهم المغارة واحبلج وسويتها

_ديلا هسه اليسمعك يكول حبلتني ورا شهرين ترى صار ٦ اشهر من سقطت مو مسوي نفسك برأسي ستة سلندر ههههه

_لج غير رحمت بحالج وكلت خطيه أنتي شايفه نفسج شلون تكومين تمشين بعد ماانام وياج مايعه هم تحجي

ضربته ع جتفه: عزززا بعينك ولاتستحي

ضحك بصوت عالي ودخل للحمام ..

مرت ايام والنساوة مأذيتني كلش ودومي مبتعدة عن صفاء مرات يزعل ومرات يعذرني وبيوم جان زعلان مني لان اغلب وقتي ابيت اهلي ..

دخلت عليه توة جاي من الدوام رحت ظليت ابوس بي وبالاخير بسته من تفاحة أدم ..

_زهرررررااااء وخرري لتتحرشين وهسه بس اجي يمج اووي وخر عطرك و***

_عززززا هاي ليش تفشر مو عيب أدري شنو هذا لسانك متبري منك

_متبري مني بس ما تبري منج شنو رأيج هسه اخلي لساني يترجم اثاره ع جسمج وغمزلي

دفعته وكمت بس هو أسرع مني لزمني وسحبني عليه

باوعلي بتوسل: والله مشتاق عاد بس شويه يمكن بس اشمج نكمل مااطول ابد

_عزززززا ههههههههه شبيك حبيبي شو فدمرة

_دتعالييي اشتعل ابو حبيبج اني بالضيم وهي تجر الحجاية جر ولج دخيل ربج حتى فهاوتج اعشقها

خزرته : مو فاهية

_أحلى فاهية انتي محبوبتي

وباسني جان مخبوص عبالك أول مرة يتقربلي حاير شلون يترجم اشتياقه وبس همساته لحالهم تكفي وتوفي غمرني بأحلى كلمات الحب

تركيبة عجيبة صفاء بحضني طفل صغير ويم أهله رجل بمعنى الكلمه يأمر وينهي كلامه مسموع حاله حال عمو واخوه الجبير بس اذا عصب اووويلي وهو منا صوته خشن اذا عاط بيه انخلس  من صدوك يصير يخوف ..

راح سبح واجه  نام واني بقيت كاعدة  ظليت اجيب اطراف شعري وامررها ع وجهه و ع صدره وطفر من نومته و فز ،  ويظل يباوعلي وعيونه حمر

مصدوم سألني خوما بيج شي ياروحي

ابتسمت وجاوبته : لا بس ضجت أني كاعده وانت نايم كوم أكعد ويايه لتنام وتخليني وحدي

_زهرتي والله تعبان والصبح عندي دوام باجر خميس واسهر وياج

_مااا  أبنك ديدفر بيه وانت نايم كوم لتنام مااا

كال امري لالله .. ظل كاعد ويايه واني احجي وهو بس صافن عليه وعيونه حمر يريد ينام أخير شي جرني لحضنه وهمس:

خلي انومج وانام بعدين حبابه أرحمي حال العبد البائس الي الله مطيح حظه وبلاه بوحده خبله وبلا ضمير ..

اجيت اجاوبه سكتني ببوسه بعدها بالفعل نمت كوة ..

كعدت الصبح جان كاعد قبلي نزلت وتريكنا وصعدت ابدل .. ظل يباوعلي  يشوفني شنو ألبس وخاف اطوخ بالمكياج يراقبني ..

احب غيرته عليه ظليت اطوخ بالمكياج متعمدة  تخبل ظل يفتر ورايه ، لزمني وثبتني على الحايط ويمسح بوجهي

تصنعت البجي ؛ صفاااء عوووفني حباب ظلت عليه ترة الكل يحطن مكياج موبس اني

جاوبني بأقناع : جمالج بس أليه مااقبل احد يشوفج وانتي مخليه مكياج ،  شوكت تخلصين كلية ترررررى اختنكت ..

(هوايه يغار عليه وحرصه وخوفه عليه اكبر من غيرته واحساسه بالمسؤولية خلاني اشوفه مثل ابويه والبنية من تشوف شخص مثل ابوها معناها عظيم هواي بعينها ) .....

عبير خلصت امتحانات الحمدلله وجنت مجاوبه بيهم ماعدا الجغرافية ومااعرف ليش مااجلتها ومريم قبلي مخلصه بابا كال بالليل نطلع اختاروا المكان كل مرة اروح لشارع الربيعي هالمرة عجبني اروح للمنصور

وبالفعل بالليل طلعنه وصفاء و زهراء اجوي ويانه افترينا شويه صفاء اجاه اتصال وطلع بالحديقه مال المطعم يجاوب واني ضجت عجبني اطلع شويه اشم هوا

طلعت وانصدمت  صفاء واكف ويا اسراء ورشا

صفاء : خابرني صديقي طلعت للحديقة مالة المطعم

والصدمه اشوف رشا وياها أسراء  صارن بوجهي..

ظليت أباوع بوجه رشا مااعرف حقارة خباثه او صدفه بس نظراتها متوحي أنو هاي صدفه جيتها لهنا

تقربن باتجاهي واجن ديسلمن عليه ..

بقيت اباوعلهن بنظرات فضب بعدني صافن عليهن طلعت عبير بس شافتني أجت يمنه

باوعتلها وهي بسرعه سألتني: صفاء ذني شيسون هنا ترى أبد مو وقتهن زهراء حامل وذيج المرة هاي واشرت ع رشا وكعتها وموتت أبنها انوبه هسه وياها اسراء شكو شديصير وليش أنت من اجاك اتصال طلعت برا جنت تعرف بوجودهن؟

جاوبتها بعصبية : لا منين أعرف بس أجاني اتصال من صديقي وطلعت دااجاوبه لان جوه هوسه عود هنا أسمع زين اشو طلعت صارن بوجهي

باوعتلي بنظرة عبالك تريد تدرسني التفتت ع رشا: اكول يا حلوة طكطكي نعالج أنتي وهاي السحلية ويلا منا جايبتها وجايه شكو عدنا عرس مثلاً

وبعدين انتي وباوعت ع أسراء ادري مو متزوجه أثكلي خلي طابوكة منا ومنا عيب تركضين ورا رجال متزوج وحيصير أب شنو ماعندج خجل أنتي ولج

جريت عبير حتى أنبهه لان صوتها بدأ يعلى واحنه بمكان عام وجهت كلامي لرشا : اخذي زبالتج وارجعي منين مااجيتي لا اطيح حظج لابارك الله بيج من أخت قذرة كل مااكول تنعدلين الكاج اكثر عوجه مو بيدج ذيل الجلب مينعدل

رشا ؛ مكان عام هذا مو للخلفوج افتهمتي ..

عرفت حتكب عركة جريت عبير ودخلت بالمدخل مال المطعم كالت صفاء أحلف متدري بيهن ؟

_شبيج خبله أنتي لج ماابدل أختج بكنوز الدنيا بابا أختج صارتلي وطن وسند شدتحجين أنتي

رجعنا كعدنا اكلنا جنت كاعد ع أعصابي كلش توترت بس ردت نرجع وجنت ناوي اكول لزهراء حتى متعرف من غيري وتسويلي زفه ..

زهراء من رجعنا حجالي صفاء كلشي لمن  شاف رشا وأسراء جاوبته: حبيبي أني كلي ثقه بيك وبحبك واعرف عيونك متشوف غيري وگلبك مينبض بعد للماضي

سألني : اي محقق كونان شلون عرفت

_اعرف حبي اعرف أنتي بحضني طفل صغيرون ومتشوف نفسك شلون تضيع من تنام يمي حتى نفسك تسحبه بصعوبه

تركته وكمت اريد أروح للحمام جان مكعدني بحضنه سألني وين ؟

_للحمام حبيبي هسه أجيك مو تنام وغمزتله

_تريدين حقج الشرعي مو هههههههه 

_أي لعد شنو وحد مشتاقتلك اذا اجيت ولكيتك نايم اذبحك

رفع اديه بأستسلام :حاضر سيدتي ماانام بس تعالي جاي شعندج رايحه للحمام

_يعني حبيبي الي يروح للحمام شيسوي؟

جنت احجي وشفايفه مخليها ورا أذني وكل شويه ياخذ شحماية أذني بين شفايفه ديثير مشاعري واني تكش روحي بس اريد افلت وهو مقيدني بحضنه ميخليني أكوم

همس : اليروح للحمام عنده خيارين أنتي ياهو منهم ؟ يحجي وانفاسه الحارة تضرب ع بشرتي ولحيته تدغدغني

جاوبته بصوت ناصي: أنت لويش تفاصيلك منحرفه حبيبي اتركني اكوم حباب

_لج ترى بعدني مشوفتج الانحراف ع اصوله تعالي اشوفج شلون يصير الانحراف أنتي ماطلبتي الا حقج

_صفاااااااء

_عيونه ونبضه وروحه

_وخررر لحيتك تدغدغني وانفاسك حارة تچويني

_ها يعني ابطل اشاورج لو ازين لحيتي أنتي اختاري

التفتت عليه خزرته : حتى اذبحك اذا زينت لحيتك

ضحك بصوت عالي : دتعاااالي أني اذبحج ع فراش الزوجية ونشوف منو يذبح منو أول ولو أني ذبحتج من زمان حتى شرحتج ههههههههه

جانت جولة من الحب المتخلو من همساته التخليني أضيع وانسى حتى نفسي واني بحضن حبيبي ولمساته الدافية من أكول كلمة أحبه أعنيها بكل معنى وبكل صدق أكولها هذا الرجل اتملكني يفهمني من نظرة واني هم أعرف شنو اليضوجه وشنو اليفرحه

جنت أتجنب الاشياء التغثه بس هو لا خبيث يحب يضوجني ومن أعصب ينرفزني أكثر يضحك

يكولي :أول مرة اشوف فاهية تعصب

يخليني اتعصب بالزايد وهو يظل يضحك عليه وياخذني بحضنه

لحد مافديوم جان عليه ٨ أشهر وبطني واصله لخشمي وانوب وزني زاد بشكل فضيع واني قزمه جنت يم أهلي واجه صفاء عليه وذني عبير ومريم الحقيرات شبعني تصنيف لان قزمه ومنا حامل

عبير تفتر ورايه وتحجي: ادري دوخري منا لندوس عليج جنج ركية تمشي وتدعبل

ومريم تجاوبها: لج اي بربي صدوك ركية المصيبه زوجها شطوله وهي اذا وكفت يمه رقم عشره

اجاهم صوت ماادري شوكت أجه اصلاً : بنات عمي حجيتوا معاناتي ويا السنافر وطكها بضحكه

اني منا هرمونات الحمل مأثرة عليه وذوله يصنفون عليه كعدت بباب غرفة بابا وماما أبجي واشكي

اجاني صفاء يحجي ويضحك: هاي شنو ولج كعدتي بباب غرفة أمج وابوج حتى يسمعوج وأنتي تبجين متخافين ربج خاف أنطرد واني جوعان وامي يم بيت بهاء جان خفتي ربج شويه

عبير ومريم خربات ضحك عليه وهو يباوعلهم عود يخزرهم بس هو بالكوة كاتم ضحكته

_هاي شنوو بنات مو عيب تضحكون ع اختكم السنفورة اااقصد الجبيرة ترى عيب عاد احترموها كدامي شجعوني أحترمها

عبير تجاوبه: يمعود كومها عاد من باب الغرفه ترى أمي ماعدها مانع تبقينا بدون أكل مجرمة تفقد ع بنتها القزمه القزمة الدبة حميسه وطكتها ضحكه

اجه صفاء كومني واني بعدني أبجي : ولج كافي بجي خاف انوب تكصرين بالزايد شلون بيه أشيلج لو اعلكج حتى الناس تشوفج

طلعوا بابا وماما من الغرفه وذوله الثلاثي انخرسوا ذنيج راحن للمطبخ وصفاء كاعد عاقل ويغمزلي ويأشر ع بطنه عود لتحجين جوعان خاف انطرد

ضحكت عليه وتركته ورحت ويا البنات احضر الغداء

....

عبير .. طلعت من بيتنا توجهت لبيت عمو كريم

رايحه اشوف مها .. خابرتني تبجي وماعرفت شبيها اصرت اله اجيها ورغم كارهة كرار هالفترة ومزاعلته صار هوايه بس انقهرت عليها ورحت ..

وصلت لبيت عمو فتت  لكيت قسور وكرار كاعدين بالحديقه سلمت عليهم ببرود ومدنكة ..

ردوا عليه رفعت راسي بلا وعي اجت عيني بعين قسور

تنهدت ونظراته تبث شتات متماسك ، حسيت على اثرها بوخزات تخترق قلبي وتألمني على حاله ، لااراديا توجهت نظراتي لكرار الواكف بصفه وجان يباوعلي بصبر شبه مفقود ونظرات الرفض تنبثق من عيونه بشراسة ..

حسيتها اطول لحظة بحياتي عفتهم  تشتت وتبعثرت

                 .. دخلت للبيت بسرعة ..

سلمت على عمه وعمو واستأذنت منهم اروح  لغرفة

مها دكيت الباب مال غرفتها ، فتحته بعد ثواني

ودموعها حمرة و تبجي وتشهك ..

فتحت الباب وراحت لنص الغرفة تبجي وتمسح بدموعها توجهت الها بنفاذ صبر ؛ يمعودة شبيج شكو ؟

ظلت تجر انفاسها كوة ونطقت  : ولج عبير الحكيلي كرار حيتزوج هند عليه والله اموووت اذا سواها...

يتبع ...

شريعة العشق

بارت ٥١..

نورا ناصر

قصيرتي❤️

لمحت في قامتك بغداد

وأشيائي وأمنياتي

وأنا يا أنا مغرم بقامتك كما أغرمت

ببغدادي

فاتت عبير جوه ، ظلت عيون قسور تتبعها الى ان اختفت عن انظارنا اثنينه ، جر حسرة بذل جهد بكتمها لكن بالاخير طلعت تكشف عن معاناة قلبه وعذابه وهو يشوف محبوبته القاسية والمغرورة والمتمردة على حبه والرافضة لقربه  ..

توها فاتت وقسور استأذن وراح وصلته للباب

وحسيته يريد بس ينهزم من المكان الي يجمعه بيها حسيته متأذي ..

فكرت هاي  فرصة عبير يمنه حتى احجي وياها

دخلت مشفتها يم امي وابويه سألتهم كالوا صعدت يم مرتك ..

صعدت فوك بسرعة سويت الدرج ٤ بايات ..

توه داا افوت للغرفة  سمعت كلام مها وهيه تشكي لعبير ..

اتخبلت هاي شدتسربت ومنين جابت هيج كلام دفرت باب الغرفة وفتت بسرعة ،  اثنينهن فزن ..

عبير تباوعلي بصدمه أما البلوة مالتي تباوعلي بعتب ويمكن لو بيدها تفترسني ..

توجهت عليها جريتها من ايدها وكومتها من على السرير وظليت لازمها واني اسألها: منين جبتي هيج كلام ها ولجججج ؟

ظلت تحجي وتبجي ؛ وره مارحت انت يم قسور سمعت هند تخابر على أمها وتبجي وتكولها تعالوا أخذوني مااريد أبقى هنا يريدون يزوجوني لكرار

باوعتلي: هي شلون هيج تحجي اذا مو أكو أساس للموضوع قابل تحجي من وحدها ها كولي تحجي من وحدها ؟

باوعت ع عبير اجت تطلع عطت بيها: تعاااالييي أنتييي الثانييية وين مولييييه

بقت متحنطه بمكانها مصدومه شلون عطت بيها التفتت عليه تباوع بصدمة خزرتها رجعتلي الخزرة .

ظلينا نتبادل النظرات بغضب الى ان كالت عبير

_ شراايد مني ؟

_ ابقي انتظري لتطلعين عندي حجي وياج ..

تريد تحجي سكتتها بنظرة غضب حذرتها تبقى هادئة ،

فلتت مها من قبضة ايدي ورجعت كعدت على السرير

انحنيت باتجاهه وخليت ايدي ع السرير اسند جسمي ..وبعدني معصب : باعي هذا الموضوع اصلاً ماعندي علم ومااعرف منين دتجيبين هيج شخابيط ترى روحي طالعه وواصله لهنا واشرت ع كصتي ، عندج حجي تكولينه اليه تسمعين مني تتأكدين يله تظلين تعوين افتهمتي لو لا ؟

ظلت تمسح بدموعها وتباوعلي بحركة وقهر

وكفت  وباوعت على عبير ..

نزلت ركض واني اعصابي متوترة وادور  على أمي

شفتها بالمطبخ  ركض توجهت الها :  حجيت وياها ظلت تباوعلي وعبالك هي عدها علم بكلام بمها

سألتها: يوم متفهميني شديصير من ورا ظهري شنو رجل كرسي بالبيت أني واخر من يعلم وكاعدين تخططون من ورايه ترى أفلش البيت هسه وعلي لتخبلوووووني .

بقت مصدومة وتباوعلي اريد اكمل كلامي ..

اجه ابويه من وراية وعاط بيه : شبيك ولك هرجتنا بصوتك شتريد انت هااا وهاي المرة عديتها الك تصيح بوجه أمك مرة ثانية أدوس ع راسك بحذائي كلب شلون تصيح بوجه أمك مو شفت نفسك كبرت ترى بعدك كدامي ذاك الطايش حيووووان

سكتت وجريت نفس اتمالك اعصابي واديه وره راسي

سألته عن الموضوع جاوبني: لو بيك خير تجي تحجي ويايه مو كاعد تهوس بنص النسوان بس ناقص مابيك حظ هاي حجاية نسوان واني من يمي سديت الموضوع وانت كاعد هسه مسوي حفلة أبن القندرة جان أستحيت على نفسك انعل أبوك لابو حتى تربيتك ولي من وجهي عابت هيج خلقة زفرة

تركني وطلع من المطبخ واسمع صوت  ركع الباب حيل فاتت أمي من يمي وراحت للغرفه مالتهم

التفتت شفت هند واكفه بباب المطبخ لازمة الاطار الخشبي و تبجي كسرت خاطري والظاهر سمعت الكلام كله..

رحت عليها دنكت بانكسار حاجيتها: خيتي أني أعتذر  رفضتج أني احب مرتي وما اريد اتزوج عليها انت مثل اختي ..

جاوبتني: لا كرار أني بعد زوجي مستحيل اتزوج أعيش لابني وانت ألله يخليك اذا فتحوا الموضوع أرفضه من يمك خويه والله مالي نفس بالزواج أبد وانوب اتزوجك انته متزوج وتحب مرتك لا مستحيل  عساني بالموت قبل لا أسويها واني حروح لاهلي واسفة اذا ضوجتكم ويايه ..

_ لا ابد ابقي هنانه ولتديرين بال والموضوع اعتبربه انسد صدكيني .

_ لا كرار والله انتوا مثل اهلي واني متعودة عليكم بس بعد هاليوم ما اكدر .

_ ميخالف اذا تردين ترجعين ارجعي بس شوكت ميعجبج تعالي وابد لاتحطين ابالج هذا الموضوع ومن هاللحظة ينسي .

باوعتلي هزت راسها ، عفتها صعدت فتت للغرفة

مها كاعدة ع السرير ومتوترة كلش ، وكفت واديه على خصري ، هيه  أجت حضنتني ، حضنتها شميتها حيل خليتها على صدري وبست رأسها ..

لحظات بعدتها عني ، تجولت نظراتي بالغرفة  انتبهت عبير ماكو سألتها عنها كالت راحت لان شافت الجو متوتر ..

شكد عنيدة يا الله مو كلتلها تبقى عندي حجي وياها ..

باوعتلي بنظرات تريد تفسير ..

فتحت عيوني ؛ ها شكوو خيرج ؟

_ لا ماكو شي يمعود عبالك اغار من عبير ترة وداعتك ماكو هيج شي وبراحتكم شتحجون احجوا..

دارت وجهه راحت للسرير كعدت ،  تركتها ودخلت للحمام  سبحت

عبير : نزل كرار وبس اسمع صوت صياحه ، باوعت لمها بعدم رضى ؛ دشوفي متصيرلج جارة دشوفي شلون مستقتل عليج لا تضيعينه بخبالج افتهمتي ويله هسه اني رايحة ..

مسحت دموعها لزمتني من ايدي ؛ وين رايحة مو كالج ابقي ليروح يحجي عليج ..

ابتسمت بسخرية ؛ وشكالولج عني اني مها حتى اخاف منه ..

بقت فاتحة عيونها ، طبطبت على زندها يله رايحة مها وماريد اسمع عن خبالاتج هاي بعد ترة وربي تخسري كل العمر ..

لالا يمعودة اخر مرة ..

نزلت جوة سمعت صوت صياحهم جاي من المطبخ وعمو يرزل بي ، طلعت من باب الصالة و رجعت للبيتنا

  بالليل خابرني كرار جاوبته ..

_ اني مو كتلج ابقي عندي حجي وياج تبقين عنيدة وراسج يابس ..

_ انته بس احمد ربك اني جاوبتك هسه ويله كولي شرايد ؟

_ ايباااخ  ،  أريد احجي وياج  باجر العصر خوش؟ 

_ اي تعال  هلا بيك

ثاني يوم العصر اجه وكالعادة جان موضوعه قسور

جاوبته: كرار أفهمني قسور كامل ومابي أي نقص بس أني وياه منرهم أني اذا صرت اله أسوّد حياته والله أخلي يلعن ساعة السودة التزوجني بيها

افهمني أني مااتحمل نفسي من اعصب أحير شحجي ماعدا لساني سليط ومااسكت واعبر مثل غيري يعني أني مرات أصفن ع المتزوجات شلون يسكتن أذا زوجهن صاح بيهن أو رزلهن أني اذا صار بيه هيج مااسكت ارده رد قوي اما قسور أمه عرمه واني مااسكتلها لان هي دائما تحجي ع ماما ومريم تكرهنا بسبب محمد اللزكة..

كرار: زين قسور مستعد يكعدج بيت وحدج وينقل من بغداد وتعيشون خارج بغداد وهيج بعد متشوفين امه

_ههههههههه كل عقلك أترك بغداد وماما وبابا واخواتي علمود زواج!!! لييش شبيه مخبله

وكالعادة انتهى حديثنا برزالة من كرار : أنتي راح تبقين هيج والله وحتى مريم تستقر وتتزوج وأنتي تبقين بهذا غرورج وكبريائج عبالج الدنيا دايمتلج لا عبوره غلطانه هاي الدنيا فانية عيشيلج كم يوم بيها وانتي فرحانه أحسن من ماتعيشين تبحثين عن المثالية والكمال ومتلكيهم بس أني أبقى اخوج شوكت متريديني موجود .

تنهدت وبعدت نظراتي منه ..

بقى واكف ثواني عيونه عليه ، التفتت عليه

_ كرار انسى وسد الموضوع كافي ..

_ اي هو هم  هيج .

سلم وطلع ..

مريم : لبنى أخت قسور مسويه قراية للامام هيه متزوجة أبن صديق أبوها ودزت علينا نساعدها ..

رحنا يمها أني وعبير ساعدناهه وره شويه

عبير راحت ويا حماتها لاخت قسور  ديجيبون اشياء لصينية القاسم...

باوعت أخته دخلت لغرفتها وقفلت الباب شويه وطلعت تباوعلي وتضحك مااهتميت ظليت اساعدها

اندك الباب راحت بنتها فتحت الباب مااشوف غير محمد كدامي باوعت للبنى خزرتها هي عرفت قصدي

كالت: والله هو محلفني بس يريد يحجي وياج اسمعيلها شكو بيها وتركتني وحدي ميتة خوف واتابع خطواتها وهيه تبتعد ، اجيت الحكها منعني محمد صار كدامي....

يبتسم بوجهي ابتسامة جريئة ويتفحصني ..

نطقت من بين اسناني المطبقة  واني مو كادرة حتى اطيقه ؛ وخرر من كدامي يلله وخر ..

لزمني وثبتني ظليت اتحرك وادفع بي واغلط عليه وخررر كلب حيوان حقييير وخررر اكرهك اكررهك ..

دفعني من جتفي وصارت عيونه ترسل اشارات غاضبة

كال: لج لتبيعين شرف براسي ترى أكدر بأي طريقة اخليج تبوسين قندرتي حتى أستر عليج جري عدل وماشيني أحسلج هو أنتي منو عندج ابوج كل يوم مسافر لو داخل العراق لو خارجه وامج مريضه باجر عكبة تموت وهاي أختج المسترجله ترى متفيدج

كرد فعل ع كلامه رفعت أيدي اريد اضربه راشدي كل قوتي  هو يريد يلزمني اجه الراشدي على ركبته

ظل  يباوعلي وعيونه تبث غضب دفعني ع الحايط يريد يضربني عطت وظليت ارافس ..

_وخررررر حقييرررر انعل أبوك لابو حتى أمك كلبببب أبن الكلب ان شاءالله امك تموت قبل أمي بيش طالبها واذا اختي مسترجلة فهي اشرررررف من اختككك الساقطططة تجيب ولد على بنات الناسسس وخررررر

اذا متوخر الم الناس كلها عليك .

صوتي بدا يعلى جتي لبنى صاحت محمدددد

التفت عليها دفعته وطلعت

وكفت بالطرمة ابجي وافرك بديه وخايفة لا بلحظة يطلع محمد وينفذ تهديده مال قبل شويه ، بس توصلني من شباك الاستقبال اصواتهم وهو يتعارك ويه اخته ..

انفتحت الباب وفاتت عبير وحماة لبنى ، اني عبالك شفت المنقذ مالتي رحت رميت نفسي بحضنها وكمت ابجي بصوت عالي واحجيلها ع الصار...

طبت للبيت معصبة و صاحت ع لبنى ..

جتي لبني وجهه ينطي الوان

كلتلها سؤال واحد وجاوبي

_هيج تصونين الامانه مو حتى النبي وصى بصيانة الامانة متخافين ربج لاتطلع ببنتج ليش هيج ولج مسويه بمريم شوفي شلون ترجف بس والنبي الا أكول لبابا

والتفتت ع محمد : وانت ياعديم الرجوله أني الك اذا مااخلي ولد عمي يطيحون حظك مو بنت أبويه اني ..

اجت عليه سحبتني وطلعت ، من طلعنا قسور جان توه جاي لمن شاف عبير تبهذل وهي أبد عبالك جبل

باوعلنا أجه سلم ع عبير بلهفه ولو بيده يمكن يضمها عن الدنيا كلها

بس هي بسرعه كالتله: قسور تكدر توصلنا للبيت؟

هز برأسه بموافقة كال اي اوصلكم بس شصتير شبيج هيج متوترة ومبين معصبة ؟

كال هيج ونظراته عليها تريد تاكلها ..

جاوبته باقتضاب بعدين تعرف .. وتوجهت للسيارة بسرعة وصعدت وصعدت وراهه اني .. كعدنا بالورة هو اجه وصعد بالسيارة وقبل لا يحرك التاف علينا .

_ عبير شكو شصاير منو وياج احجي قبل لا احرك انزل احرك الدنيا والله .

باوعتله وجاوبت بحدية ؛ ماريدك تحرك الدنيا اريدك توصلنا لبيتنا .

همس بامتعاض صار .

  حرك السيارة و الطريق كله نظراته ع عبير وهي تباوعله بخزرة...

  من وصلنا قبل لتنزل كالتله علم اخوك الرجوله واختك خلي تتعلم شرف الناس مو لعبة واليوم الا اكول لبابا

انصدم والتفتت عليها ، مصدوم و صافن يباوع عليها وعيونه متسعة ، يريد يسألها نزلت بسرعة وركضت للبيت ..

باوعلي سألني: مريم شكو شبيها أختج ترجف من العصبية

جاوبته : اذا تريد تعرف تفضل أدخل للبيت وانت تعرف

بس هز راسه وماحجه شي نزلنا اني وياه ..

دخل ويايه وعبير حجت كولشي لبابا الولد خطيه ظل صافن واعتذر من بابا كاله علاجهم يمي خالي الا اجيبهم جوا رجلك يعتذرون

طلع قسور وهو صاير نار....

ثاني يوم جاب أمه واخته واخوه وخله أخوه يعتذر من بابا بس نظرات محمد جانت تتوعدلي أني وعبير وبابا حس

باوعله: انت جاي تعتذر لو جاي تتوعد لبناتي بنظراتك شنو قصتك أبني

_لا خالي العفو منك شعندي وياهن بس هاي أني كدامك اكولها مريم أليه واذا صارت لغيري افرغ طلقه برأسها ...

كام يريد يطلع سحبه بابا ورجعه تعااال اشوو انته تهدد تعرف نفسك انت شنوو لو لا ؟؟

صارت عمه بيناتهم هيه وبابا ؛ هسه هاي فوكاهه بعد مو جلي نعتذرلك يا اخوية ..

جاوبها بابا بعصبية ؛ مدتشوفين ابنج شديحجي ..

تقرب قسور من محمد وصفكه راشدي ، صرخت عمه وانتفضت وظلت تدفع بقسور وتصيح عليه ..

_ الله لاينطيك الله ياخذك ..

قسور مااهتم لكلام امه وظل يدفع بمحمد ويطرد بي من بيتنا اطلع لك خسيس حيوان اطلع .

طلع محمد وهو يباوع عليه مخنزر عيونه ..ونظراته تتجول بيننا اني وقسور اخوه ..

تبعته عمه ولبنى  ..

قسور وكف كدام بابا ومبين خجلان ظل يعتذر هواي من بابا لحد ماراح ...

بس طلعوا بابا التفتت  لماما معصب

وكال بعصبية ؛ ممنوع بعد بناتج يروحن لبيت عمتهن ترى احاسبج الج والله لتكولين ماكال

سكتت أمي وظلت تباوع عليه ..

زهراء :  نايمة حسيت على الم ببطني ،  دااتحرك صفاء حابسني بحضنه بالكوة كدرت التفتت للجهه الثانية وهو الله يسلمه جاعصني جعص بحضنه واني احس بنفسي ثكيلة كلش لان هذا اخر شهر الي بالحمل ..

بعد ثواني اختفى الالم ، كمت من مكاني ورحت للحمام وطلعت رجعت اريد انام ، ظلت تجيني الام تروح وتجي اقوة ، ظليت اتنفس سريع واتحرك بفراشي لمن يجيني الالم اعض شفتي والزم بطني واتكلب .

حس عليه صفاء وكعد يباوعلي وعيونه حمرة من النعاس مشبعان نوم ، باوعت ساعة ١ ..

كال شبيج حبيبتي؟

كعدت واباوعله مادري شبيه صفاء الم يجيني يمكن راح اولد .. 

طفر من الجرباية اخذني  للحمام غسلي وغير ملابسي ورجع  لبس تيشرته وبنطرونه ونزل كعد عمه ورجع صعد واجه نزلني واني الالم كلما اله و زاد كمت أبجي وأعض بالشال مالتي

صحت ع صفاء: حباب صفاء أريد ماما مااتحرك منا اذا مو هي ويايه

لزم وجهي : عمري أنتي خابرتها هسه ع مااقفل البيت هي ع جيه

الالم جان كولش قوي متتت من الوجع أحس روحي حتطلع كرهت صفاء وكرهت الساعة السودة التزوجت بيها ع هذا الوجع الدااحس بي مووت أحمر شفت الموت بعيوني اجت ماما صعدت يمي وبابا خطيه أجه ورانا بسيارته

لزمت أيدي وظلت تهدي بيه

_يلا ماماتي اتحملي هي شدتها ساعات بعدين من يجي النونو وتحضني تحسين نفسج ملكتي الدنيا ومابيها

باستني برأسي وصفاء شغل السيارة وعيونه عليه ويمشي سريع وعمه تكوله ع كيفك يمه وهو نظراته عليه

عطت بي : لتبااااااوووووع كل الديصيررر بيه من وراااك شكو تناممم ويايه

ماما وعمه ضحكوا وهو يكولي: أسف بعدمااعيدها بس هالمرة وكوة كاتم ضحكته

وصلنا للمستشفى كالوا بعدها وهي هاي أول بطن خلوها تمشي وهو أني وين أكدر أمشي زدت بالبجي

تالي بابا كال: واني مخبل ابقيها هنا هسه اخذها أهلي

وصفاء هم مقبل أبقى هنا وانوب دكتورتي مسافرة عدها مؤتمر رحنا لمستشفى أهلي بالكرادة فحصتني الطبيبة  كالت ؛ ماعدها توسع عملية هاي

اجه صفاء يمي كعد همسلي: شوفي لو مخليتني افترسج واتعب ظهري شويه جان مو عملية وجان هسه أنتي زركتي للطفله بس من يوم يومج عوبة خلصتيها عليه اوووي يوجعني واووي مااتحمل

ادري شلون لعد اتحملتي أول مرة

دفرته برجله كام من يمي وهو يضحك

صفاء:  اخذوا زهراء لصالة العمليات تباوعلي تدور أمان شتباوعين هو أني خايف أكثر منج بستها برأسها كلتلها أنتظرج هنا واشرتلها ع مكانها ،  تكوميلي بالسلامه بنت گلبي

دخلت للصالة واني أحس روحي تريد تطلع وعمي يضحك عليه : شبيك ولك عبالك أنت راح تجيب مو هي لو ندري مدخليك وياها احسن صرعتنا رايح جاي أدري هم عندك ولادة أنت ولك

بعد فترة يمكن ساعة وعشر دقائق طلعوها من العمليات جانت صاحية بس متوجعه تبجي من ألم العملية اخذوها للغرفة الخاصه بيها دخلت عليها

بستها من كصتها وهمستلها: كبرتيني عشرين سنة زهرتي انطيتني اجمل شيء بالدنيا حبيبة صفاء وروحه هنيالي بيج والله أحسد نفسي زين مااختارت أمي وزين ماسوت من خطبتج أليه ممنون أني منها

دخلوا عمي وعمتي أبتعدت عنها تحمدولها السلامه وهي حبيبتي عيونها محاوطتني سألت أمها : ماما أبني وين شو مشفته شلونه

جاوبها عمي : اي بابا جبتي واحد خشمه تارس وجهه واسووود خلصتيها تتعقلين علينا تالي هذا انتاجج وأني عبالي يطلع يشبهج عيونه ملونه وابيض تالي خلفتي عبسي يلا أهم شي تمام الخلقه

يحجي وكاتم ضحكته هي باوعتلي برطمت : شنو صفاء شو بابا يقلد ع أبني شبي

لزمت أيدها : يخبل صغيروني وأحمر وبعده ترف عمي يغار ويضوج لان كبرتي صار جدو كال خلي أقلد ههههههه

راحت عمتي جابت الطفل انطته لزهراء بس خلته بحضنها كامت تبجي وباسته بكصته باوعتلي وهمست

_صفاء هذا أعظم أنجاز بحياتي طفل منك وأني امه

سمعتها عمتي : ياا داده لعد منو جانت تصيح صفاء اكرررهك

ضحكنا عليها وهي تباوع لامها مزعوجة ، اجت الدكتورة حتى تعلمها شلون ترضعه عمي طلع واخذ أمي وياه راحوا للبيت واني وعمتي بقينا يم زهراء رفعوا السرير وطلعت صدرها اباوع زهراء وجهه أحتقن وتبجي وتبوس برأسه

روحي شاغت احس شي مالتي وانوخذ مني بالفعل غرت من أبني سميناه همام وبيومها باتت زهراء بالمستشفى وثاني يوم طلعنا عمي طلب مني زهراء تبقى يمهم مامانعت لان هنا منو يداريها هناك اخواتها يمها

اول ماوصلنا تلكونا عبير ومريم سلموا ع اختهم وعبير أخذت همام اباوعلها هاي الثانية هم كامت تبجي من شالته عبالك معجزة ومريم تصيح جيبي اجه دوري أني اشيله هسه عبالك لعابة وزهراء تضحك عليهن وعبير متقبل تنطي لمريم

عبير: لك حياتي صرت خاله انت يا فصعون سويتني خاله فدووة أروح أني لهذا الوجه

بابا باوعله شلون عنوني كزكزت عليه

عمه: انطي  الطفل لاختج خلي تشيله وكومي صبي اكل لزهراء وفرشي لصفاء خلي ينام يلا حبيبتي

انطته لمريم و تركتنا وكامت

عبير : وجود همام بيتنا ضافلنا نكهه جديدة اذا بجه حتى بابا يركض ويانه يشوفه شبي ويخبص الدنيا وكلنا نترزل اذا بجه عبالك احنه مبجي وهو الملعون بالنهار نايم وبالليل يسوي حفله يبجي أمه ولو أني لو مريم ناخذه منها حتى تنام خطيه ...

بقت عدنا زهراء خامس يوم ولادتها تفاجئت بعمه ام قسور اجتي وكعدت يم ماما وتحجي اني جيت ابارك لزهراء وهم لخاطر ام صفاء هيه هم تجيني توجبني .

ظليت اعض بشفتي من العصبية امي اشرتلي اسكت ..

باوعتلي عمه ودارت وجهه ..

اندكت الباب طلعت داشوف منو فتحتها شفته محمد ..

خزرته وعوجت حلكي شرايد ؟

اجيت على امي ، دفع الباب ودخل للحديقة ..

وكفته بصوتي ؛ وامك شنو زغيرونه ماتندل تجي ؟

التفتلي ظل يباوعلي واجه باتجاهي ؛ عبير انت كلش حلوة ..

اتسعت عيوني ؛ امشي اطلع برررره ..

تقرب مني قسور ميستاهلج هم زين رفضتيه ..

يا حقير يا تافه كتلك اطلع برة

ليش تطرديني اني ماريد مريم جنت غلطان اريدج انتي !!!

يتبع ..

شريعة العشق

نورا ناصر

بارت ٥٢

اي عشــﮕــتك

دوهنتني

وفرفحت نبضاتي بيك

يل سمارك تارس عيوني عشــﮕ

يلي بيك الله نثر كل الورد

يادفو اليخزر بعينه من يمر بيه البرد

..

عبير: أنصدمت من كلامه استمر يستفزني ويضحك عرفت غايته شنوو بس يريد يأذينا ،  باوعت عليه هذا حتى الكلام ضايع وياه واحد تافه وسخيف وحقير هم بس كلت لازم أرزله ع شنو شايف نفسه هذا أشو لا شهادة لا أخلاق لا صوم لا صلاة وبكل وقاحه يتمادى ويحجي ويايه هيج ومسوي نفسه يحبني وهو يعرف كولش زين أخوه يريدني بس ديريد ينتقم مني ومن قسور بنفس الوقت لان دواه قسور وبس .

_أكولك أنت متستحي شايف نفسك أنت هاا متكولي اشو تهوس مثل المطي وبعرس ايهاب فضحتنا وسويت نفسك تحب مريم وهسه كاعد تتجاسر ويايه وتحجي هيج مو اطيحه لحظك أنت وين واني وين لتباوع ليفوك لتنكسر ركبتك مطي ..

كال لتغلطين للج لتغلطين لا اكسره لراسج انت صدكتي اني اباوع عليج وضحك باستفزاز لا صدووك صدكتي اباوع عليج ؟

: انت واحد خايس وعقلك بكد القندرة او عبالك أني تافهه مثلك واقبل بوساخة المجتمع

ماانطيته مجال يحجي تركته واجيت أطلع جان يفززني كلامه : أني عرضت عليج الزواج حتى أكسر خشم قسور بيج

باوعتله وضحكت: شكد مسكين تروح فدوة لنعال قسور انت وين وهو وين امداك من اخ عار ع الاخوة أنت

طلعت صارت ماما بوجهي جريتها من أيدها واخذتها للمطبخ وحجيتلها كولشي كالتلي زين تسوين من جاوبتي هيج وهذا بعد فلا أخلي يوصل لبيتنا الكلب

بعدها راحت عمه ومن أجه بابا ماما حجتله كولشي وهو دخل للمكتب وصاحني وهم حجيتله كلام محمد طلع فونه واتصل بعمو زوج عمتي

كاله: كلمتين و رد غطاهن أبنك محمد اذا وصل لبيتي بعد أخلي دمه بطوله ولتكول ما كال وترى انزل لمستوى خسيس وأبلغ قسور بكلام أبنك

عفت بابا يحجي ويه عمو ابو قسور وطلعت ، رحت لعند زهراء بغرفتها ، دخلت وسديت الباب ، تقربت منهم نايمين اثنينهم ، زهراء مستسلمة للنوم تعبانة الليل تسهر عليه خطية ..

رحت  تمددت يمها بالغرفه خاف تكعد

تحتاج شي ، عبالك انتقلت عدوى النوم الي

و ماحسيت ع نفسي لمن غفيت وياهم ،،

فززني صوت صفاء ، باوعت شفته  يبوس بأبنه ويحجي وياه ، رفعت جسمي بسرعة وافرك بعيوني

سلمت عليه بخجل ..

باوعت لزهراء الخبله تضحك عليه لان ماحسيت ع صفاء من دخل للغرفه خزرتها وطلعت من الغرفه

زهراء : هيمو حتطلع أربعينه و صفاء خبلني كل ميجي وشمرله حجايه حرت وياه وانوب يصدمني يغار من أبنه يعني من كل عقله اذا أرضع همام يضوج ويظل معبس لو يفتعله مشكله بدون سبب أغلس عنه مااجاوبه

وراها ظل ميقبل ياخذ صدري شوفته لماما وعمه باوعن للسانه كالن بي فطريات هذا ومطكك ..

اخذناه لطبيب اطفال كتبله علاج  وحليب ..

لمن عرف صفاء حولته ع المميه فرح

تعجبت  عليه عبالك طفل ظليت اباوعله واهز براسي برفض شسويله هذا بلله

سألته : صفاء كل عقلك تغار من أبنك

_لج باباتي أفهمي عليه أنتي مالتي وبس حتى من أبوج وامج أغار عليج مو أنوب هذا المطي يرضع منج اتشعوووط اموووت بدمي

صدمني بجوابه استوعبت الصدمة ثواني وطكيتها ضحكة .. عصب ؛ حقج ماحاسة بيه ودار وجهه ..

خبلني بغيرته احتاريت شحجي وياه ،  بجه  همام هو طفر يسكته عباله حنطي صدري ميدري مااكدر لان متأذية وصدري مورم وهمام اصلا تعلم ع الممة

كتله شكوو شبيك ؟

_ عوفي اني اسكته ..

_ يا خرب عبالك حنطي صدري مو ؟؟

غمزلي ؛ بعد متكدرين الحلال رجع لاهله بعد ما الحرامية أخذوا مني ويباوع لابنه ويرفع بيه وهو بيده ويضحكه ..

طلعت الاربعين ورجعت لبيتنا وهنا مشكلة ثانية همام أذا بجه خاف هناك بابا وماما يرزلوني هنا عمه تلعب بيه طوبة وصفاء ممصدك يشيله ويشمره ع عمه حتى افرغله واصلاً أني مانظفت بعد ألاربعين بقيت أسبوعين يلا نظفت وهو يمشي ويشمر حجي

_العالم حبلت نسوانها للمرة الثانية واني منتظر البحر الاحمر شوكت ينشف

غلست  عنه وهو عصب درت وجهي وأني أضحك عليه رجع كال : أدري نافورة خوما نافورة هسه حتى لو نافورة ادوس الدكمه وتنطفي

وظل يدردم ، اجه انطاني همام وكال هاج ابنج سهرة سعيدة اني راح انام امري لألله .. اخذته منج وهو راح للسرير خله المخدة على راسه ويتنهد ويدردم الى ان نام ..

كرار: مها نجحت بس معدلها ضعيف يعني شي أكيد معهد بصراحه كيفت لان هي كسولة وبسرعه تمل يعني مااتصور تكمل كلية ع الاقل معهد سنتين يطبن منا يطلعن منا صار موعد التقديم قدمتلها بس هي ضاجت تريد ويا عبير وذيج معدلها كولش عالي الثانية ع المدرسة مالتهم باوعت لمها ضحكت

كلتلها : يعني شلون تريدين ويا عبير وأنتي معدلج اذا انفخ عليه يطير

_لعد خلي عبير تجي ويايه والله ماادبر أداوم بدونها

_مخبله أنتي عبير حلم حياتها تدخل كلية تجي تدخل معهد ع واهسج ليش ترى ظلم هذا حبيبي اكيد راح تتعرفين ع بنات وتصادقين غيرهم واما عبير هذا وينه بيتهم بنفس الشارع شوكت متدرين روحي شوفيها

باوعتلها بمكر : و عود خلي تنطيج كم درس تشحنج عليه

ضحكت جريتها لحضني اكو فقرة جانت محلوة بمها أبد من تجيها الشهرية تتخبل تظل تتعارك ويا الحياطين اخذها بحضني أنوب تزيد تالي كمت أتركها واطلع لان أذا اعصب ماارحمها

كعدت الصبح قبلها كمت سبحت ورجعت بدلت باوعتلها تباوعلي بحيرة ابتسمتلها: صباح العافية مهاوي

ببرود جاوبت ؛ صباح النور

_شبيج مطنكرة من الصبح شكو؟

_لا ماكو شي اكوم اسويلك ريوك

_لالا لتعبين نفسج مااشتهي فد بالعشرة اتريك بالدوام

لزمتها من أيدها ورجعتها للفراش ودخلت وياها بالبطانية : شيوجعج عيوني

_غايبتلي  صار اربع ايام

_اي ياالله

_بس بطني توجعني وظهري هم

ضجت بس مبينت كدامها ، بستها براسها

وهمستلها  : العمر كدامنا حبيبي

نزلت لاكتني امي على الدرج صبحت عليها ...

ونزلت جوة نزلت ويايه سألتني اخليلك ريوك ؟

هزيت راسي ؛ لا يووم ما اريد ..

_ عندي موضوع وياك اريد احجي اكعد شوية

كعدت ع الكرسي وكتفت اديه وارتجيت واباوعلها بحيرة ..

_يوم كرار اني صح سديت موضوع هند بس  خاف فديوم تريد تتزوج  اتزوجها هالبنية بنت اختي ربت على ايدي واحسلك من غيرها منها بلكي تخلفلك طفل زوجتك رحمها ضعيف وهاي حيصيرلك سنتين وانت ماكو طفل

هي جانت هواي تلح عليه هاي مو اول مرة تكولي هالحجي صح تحب مها وتعاملها زين بس تحب هند بنفس الوقت وجانت رايدته لواحد منه بس هند تزوجت زوجها المرحوم على حب والكل قدر هالشي ..

محبيت اطوخ بالحجي واني متأخر وخاف تسمع مها اختصرت الموضوع وجاوبتها الله كريم ..

كمت ورجعت الكرسي لمكانه دا اطلع من المطبخ انصدمت  شفت مها باوعتلي وعيونها كلها دموع

وكأنها سمعت كل شي حجينا .

جريت نفس بقهر ومديت ايدي لشعري ارفعه ليورة بتوتر وهيه  صعدت تركض ..

دخلت للغرفه دخلت وراها عاطت بيه:ليش كرار ليش تكولك اتزوج تكولها الله كريم وأني مفكرت بيه وهند المسكينة مفكرت بيها يعني قصدك دتفكر بالموضوع مووووو صارحني ترى دااعيش عذاب نفسي بس الله يدري بي

_يواش يواش شبيج منو كال اتزوج عليج والله بس ردت اسكتها حتى تفك ياخه مني لان مليت واني اكولها مااريد افتهمي عليه مها كلها دتضغط عليه لتصيرين انتي وياهم ضدي

_مليت كرار ماخليت دكتورة مارحلتها شسوي فهمني وكلها تكولي مابيج شي

عصبت منها  : يعني قصدج العييييب مني موووو

باوعتلي : ها شفت الكلام يأذي تأذت مشاعرك ورجولتك مو واني متحمله كل هالمدة كلام يسممني من امك واسكت لخاطرك

اتقربت عليهت ولزمت وجهه بأثنين اديه: شنو البيدي اسويلجيا مهاوي امريني بس لتبجين دموعج تحرك گلبي

باوعتلي بحقد وهي تمفض اديه منها وكامت على حيلها وكالت بأصرار : طلكني

ظليت اغلي تعبت ما اتحملت رفعت ايدي وضربتها على وجهها ..

لزمت وجهه وظلت تنشغ ..

_  ولج مها أنتي شتحجين شنو طلكني أني أحبج مو بس احبج هم أموت عليج وانتي بكل برود تكولين طلكني ..

ظلت تشهك بصوت عالي .. جريت نفس واني بعدني اغلي ومعصب ..

تقربت حاولت احضنها دفعتني  وعاطت بيه : وخررررر لتلزمني هسه توديني ماابقى هنايه ماابقى

تركتني وراحت فتحت الكنتور وطلعت جنطه وكامت تخلي بيها ملابس أي قطعة تجي كدامها تاخذها بعصبية من الكنتور وتشمرها بالجنطة ..

_مها اعقلي مها هذا مو حل مها شدتسوين تخبلتي ولج

احاجيها  مدااتجاوب عليه جريت الجنطه وطشرت الملابس منها

دفعتني وراحت جابت الجنطه ورجعت الملابس

رحت عليها  لزمتها من  أيدها عاطت بيه : عووووفني كلتلك وخرررر هسه توديني لاهلي واذا متوديني أسوي شي بنفسي وأبليك والله لتكول ماكالت يلا وخرررر

ظليت صافن عليها  أول مرة هيج تصيح  دائما اكوللها فاهية ومثل الثلج واني حنطاوي ودمي حار واظل اضحك عليها ...

أبتعدت عنها اريدها تهدأ حقها بلي دتسوي مجنت اريدها تسمع كلامي ويه امي ابد بس صارت بعد ..

باستسلام : صار صار اهدئي هسه اوديج لبيت اهلج ارتاحي كم يوم مبين عليج تعبانه

تقربت عليه ورفعت اصبعها بوجهي: ماارجع بعد ابد ولتقشمرني وتاخذني ع كد عقلي لو تموت بعد ماارجعلك

_شبيج مهاوي تخبلتي انعل ابو الطفل اليجيني من غيرج ليش هيج ترجفين عمري اهدئي تحبين اخذ اجازة ونسافر كم يوم ترتاحين ولج والله اموت الف موته من اشوفج هيج ومابيدي شي اسوي الج

بنبرة كلها بجي وانكسار: حباب وديني لماما ..

بغضب  ؛ صار يلا بدلي

كعدت بالكاع تبجي  انهارت ، تعبت منها ومليت من المشاكل الي دااتفتعلها بس احبها مو بيدي  ،  ظليت واكف اباوعلها واديه بجيوبي ..

طلعت موبايلي خابرت ع ولد وياي بالدوام

كتله ؛  أتاخر اخذلي زمنية ساعتين .. وسديته

تقربت عليها  حضنتها وشددت حضنتي هيه  زادت بالبجي بحضني واني ظليت امسح ع رأسها واهمس: مخبله والله أحبج والله ماابدلج بكنوز الدنيا شبيج راح تموتين نفسج ع شي مموجود؟

ظلت تفر راسها بنفي وتشهك وتتنفس كوة ..

كمت جابتلها  كلاص مي وشربتها  وغسلت وجهها

خليته على صفحة ورجعت حضنتها

وظليت ابوس بكل جزء بوجهها... 

مديت ايدي لحنجها ورفعته باتجاهي اباوعلها

: بعدج تريدين تروحين لاهلج؟

صفنت بوجهي ثواني و مجاوبتني بس هزت راسها

بمعنى اي ..

وخرتها مني وكمت بعد ما جنت مكرفص مقابليها ..

عصبت دفرت الشالوزنه برجلي وشلت الفازه وركعتها

بالكاع ركع هي طفرت من مكانها وابتعدت خطوات مني تباوعلي خايفة

باوعتلها : يلا كومي

كلت هيج ونزلت قبلها افور واغلي من العصبية ..

توجهت للسيارة ، فتحتها وصعدت ركعت الباب ركع

وظليت انتظرها الى ان اجت باوعتلها تجر بجنطتها جرر وعيونها حمرة باوعتلي وفتحت باب الورة وشمرت الجنطة وتريد تكعد بالورة طليت عليها باوعتلي خزرتها تعالي صعدي هناا لا ابتلي بيج هسه ..

ظلت تباوعلي بفزع ركعت الباب حيل من بين اسناني حجيت اشتعل ابوووج ..

فتحت باب الصدر وصعدت كعدت ، قبل لتسد الباب حركت السيارة ... ظلت تباوعلي بذهوول ، تجاهلت نظراتها ..

وديتها لبيت اهلها نزلت يم بابهم واني حركت السيارة وطلعت .. ظليت افتر بالشوارع مالي خلك لكل شي

داومت وبالي مو يم الشغل ، ماارتاحيت ابد اخذت الفون وخابرتها ماكو ماترد ابد دزيت كومة رسائل ولا رسالة تجاوب عليها ..

كوة خلص الدوام رجعت للبيت واني طول الطريق افكر بالموضوع ولازم اخلي حد الهذا الموضوع ..

نزلت للبيت شفت امي سألتني شبيكم انته ومرتك ليش طلعت زعلانة سألتها حتى ماكلفت نفسها وجاوبتني ؟

يووم دخيلج ابوووس ايدج وجه وكفه سدي موضوع الزواج هذا سدي رحم الله والديج .

يعني مها طلعت زعلانة انته رحت كلت الها ؟

جاوبت بيأس ماكلت الها هيه سمعت ..

ترة مرة ماتاكل مرة ياامي شكو بيها اذا تزوجت وهند ومها صديقات ..

يوم انت شتحجين ترة والله اخذها واعزل بيت وحدنا يرضيج هالشي ؟

لا طبعا اني شبقالي غيرك اخوتك كلمن ملتهي بمرته

لعد سدي هذا الموضوع الله يخليج ..

درت وجهي اريد اصعد اجاني صوتها ؛ تريد غده ..

اشرتلها بيدي بمعنى لا ...

كالت راح تبقى بلا غده ميصير هيج يصير بيك شي ياامي ..

جاوبت بغضب ماااشتهي ..

صعدت دخلت للغرفة تحسرت مابيها مها احسها ظلمة من صدك لو شكد مااشغل اضويه تعودت على وجودها

بدلت وتمددت ورجعت اتصل بيها متجاوب ادز مسجات هم نفس الشي ، للمغرب اني اتكلب بفراشي

اريد انام ما اكدر ..

طلعت ويه اصدقائي كضيتها صفنات اريد بس انسى شويه ما اكدر فكري كله يمها رجعت للبيت وكفت كبال الباب مكدرت افوت غيرت وجهتي وتوجهت لبيت اهلها ..

دكيت الباب طلعتلي امها كعدت اسولف الها على سوالف مها كتلها عمه هيه تتخيل من وحدها وتفتعل مشاكل عمود الاطفال وا لا اني مابالي هالموضوع ابد بس هيه حيل خابصة روحها ..

امها ردت بتفهم ؛ ادري بيها بنتي واعرفها هيه لان تحبك خايفة تخسرك اعذرها ابني ، اني هسه اكوم اكعدها هيه نايمة ..

كمت امنعها ؛ لا عمه لتكعديها خطية خليها نايمه بس  خليني اني  اروح يمها ..

تبعت امها لغرفتها فتحت الباب عليها نايمة ، ظليت اباوع على ووجهه البريء بعتب وجريت حسرة .

رحت كعدت يمها على السرير اتأملها وجهه الاحبه واخذ خصلات شعرها واتحسسها واشمها ..

مددت يمها حاوطت خصرها باديه وابوس بركبتها ..

فزت وبعدها  ممصحصحه التفتت عليه و ابتسمت

بلحظتها حسيت بأحساس حلو مشتاق لريحتها ولانفاسها مشتاق اصبح بوجهه الاحبه حضنتني وضمت راسها لصدري حييل ..

ظليت ابوسها بأشتياق بكل من  جزء بوجها خدودها وحنجها وخشمها  وكصتها واخير شي لشفايفها و تفننت ببوستها

كلما تريد تجر نفس وتبتعد اقربها أكثر واحضنها اكثر حسيت ضلوعها حتتكسر من شدة حضنتي جانت حركاتنا واهاتنا هي المسؤوله عن تعبير اشتياقنا

لزمت وجهها : قاسية حقيرة جلبه شلون انطاج گلبج تنامين بدوني واني ماشفت طعم النوم تذليني لان أحببببج مووو كطعت شفايفها وبقسووة بس اريد اترجم اشتياقي ..

بجت : كرار اذيتني

_ولج أذي نفسي ومااذيج مخبله أنتي امي دوختني ومحمد ردت بس أسكتها ولج النسوان كلهن من بعدج عدم منو أكدر اباوع بوجهه من بعدج

وضربتها  على راسها بخفه خبله انتي افتحي عقلج وارفعي الزحمة عن المطي المتمدد هنا

سألتني: متتزوج عليه كرار مو؟

_بعدها تسأل ولج مخبل واتزوج عليج متت يلا تزوجتج اهلج لعبوا بيه لعب حتى عمي سجنوا وماتركتج اجي هسه اتركج علمود طفل هلكدوتج نيلز وبهذلتي أحوالي وكفت عشيرتي تك رجل يلا اخذتج

_بس أني اريد طفل

: واني اذا مو منج مااريده افتهممممي صح اريد طفل اليوم قبل باجر بس العمر كدامنا طويل ليش تدوخين نفسج

مدت اديها لركبتي ولزكت بيه وحضنتني حيل : كرار احبببك انت مالتي اني وبس

_اي واضح وباوعتلها صفح

رفعت راسها لامست شفايفي وباستني ..

_ حبيبي عندي طلب يمك

_كولي

_اول شي كول تم

_مخبل واكول تم قبل مااعرف بله كلتيلي امشي بالشارع بلا هدوم مخبله اعرفج تسويها

ضحكت ... 

همستلها : مها اريد انام تعبان اخذيني بحضنج كافي تحجين تعبااان

فتحتلي اديها اجيت لحضنها بلهفه ومديت أديه اتلمس ..

باوعتلي: مو كلت تعبان تريد تنام ايدك وخرها وبلا وكاحه

_شبيج حبيبي ليش تفهمين غلط دااطمن ع حلالي خاف صاير بي شي

ضحكت بصوت عالي حطيت ايدي ع حلكها: اششششش اشتعل ابوج شنو هالضحكه الي تجيب التايه ..

زهراء: ايامي دتمر تجنن ملتهية ويا صفاء ويا ملاكي هيمو ماخذ لون عيون مريم رصاصي وهو ابيض وسمين ينكرط كرط يومية الصبح تجي عبير الخبله ومرات يصادف صفاء بعده مرايح للدوام وهي تجي علينا تبوس همام وتظل تلعبه

أني وصفاء نعرف نومتها عزيزة ومن نسألها شعندج جايه تجاوب : مجايه اشوفكم جايه اسمع هالفصعون شلون يناغي ومرات صفاء يخابرها حتى تجي تاخذه وينفرد بيه ...

صفاء .. همام خبلني يباوعلي و يبجي يريد اشيله

باوعت لزهراء تباوعلي بتوسل لان تعبت وتريده يسكت وهو ماكو قافل اخذته منها شلته وبوسته سكت

اجت زهراء جابتلي الممه باوعتلها باستفهام : هاي شنو بعد ؟

_ااا رضعه بين مااغسل المواعين هو نايم حتى اخلي بسريره

_لا عليج الله وين أعرف اني يروح يغص وتكعدين تلطمين واطلع اني اموته

ضحكت: لا ميغص شو تعال اكعد هنا واني اعلمك شلون ترضعه

_ليش دتحسسيني راح ارضعه من صدري

_ههههههههههههههههههههه

_اشششششش صوتج شنو هالضحكه الفضيحة هاي ؟؟ 

_هسه دكعد ياصفاء سويتها سالفه

مدت ايدها انطتني الممه وعلمتني لا ومو بس هيج انوب لازم من يكمل رضاعه اشيله واطبطب ع ظهره صرت حرفياً الداده دودي...

اخذته منها وهيه راحت للمطبخ واني انطيته لممه اخذها دااسكته  مادبرتها وظل ييجي ..

اجت زهراء على صوته تباوعلي بعدم رضى ..

اخذته وهي تدردم : هي هاي مادبرتها فوكاها يكول عني فاهية هسه منو طلع الفاهي أني لو انت طفل مادبرت ترضعه ..

رحت كعدت ع التخم والله هذا شغلج موو شغلي

خلته على رجلها وظلت تهزه وتلوليله ..

كمت اريد اصعد صاحت عليه تحجي بهمس لان همام بده يغفي ..لتروح خلي يغفى حتى تصعده فوك وراي كومه شغل ..

رجعت كعدت تنهدت وكلت امري لالله ..

نومته وانطتينا اصعده للغرفه ..

زهراء: انطيت همام لابوه يصعده للغرفه واني بقيت الملم واعزل بالمطبخ وعمه نايمة ..

فجأة وسمعت صوت صفاء يعيط ويفشر ع همام وعليه كلت عززززا هذا شبي تخبل صعدت أركض قبل لا افتح الباب

صحت : شكو شبيك صفاء

فتحت الباب وانصدمت بمظهره اجيت اوكع  بالكاع من الضحك وهو يعيط عليه ويخزرني

وذاك همام ولا عبالك قبل شويه جان نايم مصحصح ويباوع لابوه ..

عاط بيه صفاء: لجججج لتضحكييين شوفي الكلب الاررررعن شسوه بهدومي

_صفاء ترى هو حليب ههههههههههه قابل عملها عليك

_اي دخلي يسويها حتى ارجعه بأمه ابن الكلب

_هههههههههههه أني شكو انت وابنك

_تضحك الفطيرة كومي سويلي حل حلكه فاهي مثلج عاااط يا أم حسين جنتي بوحده صرتي بأثنين

_ههههههههه كافي عليك الله حموت من الضحك

_كومي سبحيني

_يااا كل عقلك دروح ذاك الحمام أني بس همام اسبحه هههههههه..... عود اريد استفزه ..

اخذ همام ونزل جوه ، تبعته لباب الغرفة عطت بي وين رايح ..

جاوبني اووودي لامي ..

صحت عمه نايمه ..

كافي نوووم خل تكعد ..

ظليت اضحك والملم بالغرفة دقايق واجه ..

جرني من أيدني حيل ودخلني وياه للحمام

باوعلي: هسه تسبحيني يلا مو بس أبنج حايرة بي ابو حلك الفاهي

حسيت هو ديغار من أبنه ويفتعل هيج سوالف حتى مااهتم بأبنه أكثر منه مع أنو أني ابد ماهملته حتى ملابسه أني انسقهم ومن يجي من الدوام أني أنزعه واسبحه وابدله بيدي بس هو يجن جنونه من يشوفني أهتم بهمام

دخلنه للحمام ظل يباوع بركبتي مخرمشه سألني :هاي شنو منو مخرمشج لج صار ٣ أيام ماواصل يمج

جاوبته : همام ويبوووو ياريتني ماحاجيه تخبل

ظل يصيح تفرهدت اجه الغير وكام يخرمش واجه غيري وكامت تحضنه ...

عبالك صدك يغار من ابنه واني اخرب من الضحك عليه ..

صفاء: اني  بالدوام واتصلت بيه رشا مردت اجاوبها بس شفتها تلح لعنت الشيطان و جاوبتها ..

اجاني صوت أني أعرفه وياما جنت أغفى وأني أسمعه حسيت شي يمشي بدمي من سمعت صوتها طلعت من الغرفه الجنت بيها

تمشيت لحديقة المستشفى وهي بعدها تحجي وأني حرف مانطقت لان لو حجيت خفت أنفضح دكات گلبي احسها تسارعت وصلت للحديقة كعدت ع المصطبه

نترت بيها: أنتي شنو ماعندج شرف بس فهميني هذا الرخص الي أنتي بي شنو لج بويه أنتي مرة متزوجه واني تزوجت وصرت أب وهسه لو يصبوج ذهب ماابدل اظفر زهراء بيج لج يابه جنت أعمى اني وهسه فتحت الله رزقني بمرة خاااااام تعرفين شنو خااام ع گلبي تعرفني من نظرة شنو أريد فاهمتني أكثر من نفسي

جايه تتوسلين بيه كل عقلج شوفي ولج وداعة أبني هالمرة راح اعديها واسكت مرة الثانية أفضحج ودينه للنبي وأنعل شرفج سسسكككط

سديت الخط واني جسمي يرجف مو مكالمة عبالك جنت بحرب حيلي أنهد أني ماشايف هيج وحده زوجها يروح للدوام وهي تخابر حبيبها وخطيبها السابق بس بنت الشارع تسويها لعنت الشيطان وكمت كملت شغلي....

عبير: كاعدين أني وبابا وماما بالمطبخ سويت عصرونية ومريم خاتون هم كاعدة ..

سألت أمي

: اكولج أمي شلون تزوجتي بابا شو كبرنا وصرتوا جد وبيبي ومتقبلون تحجون شنو جنتوا شاردين من أهلكم وعيب تحجون كدامنا حتى مننحرف

ماما: ولج ليش تحسسيني أني صديقتج بالمدرسة مو أمج شو فد مرة رافعه الحزمه مو اجي اعوج حلكي

بابا جان يضحك جاوبني: تستحي تحجي أمج خجلانه من ماضيها شوفيها هاي امج شوفتني الويل وركضتني ركضة وراها من هاي التمام جبت شيوخ وسادة حتى گوام العباس (ع) جبتهم يلا قبلت

ماما : اني احجيلج اذا تركت السالفه لابوج هسه يطلعني فدمرة

_يلا احجي

_شوفي ابوج جان يحبني ويموت عليه وأني بيت أبويه جبير هو أبوج يعرفني اكعد بالحديقه الخلفية يم أشجار الليمون لان ريحتهم طيبة هو يتعمد يجي من الباب الخلفية حتى يشوفني وأني من اشوفه اتخبل عبالك شايفه ملك الموت كدامي

_يا شدعواج تلكين بجمال بابا وبأخلاقه شلون متعافيه

_ولج مو بدينا ترى مااكملج السالفه

_اهوووو بدت الذله

_اي فد يوم أمي الله يرحمها صاحتني حجت ويايه وكالت تحسين أبن أم احمد خطبج شنو رأيج أني هي حجت هيج لو أني تخبلت بهذا الوقت أني جنت طالبة كلية وابوج ديدرس ماجستير والبنات ذابحات نفسهن عليه وحاسداتني لان يحبني وأني مااريده جنا سالفة أني وابوج بالعشيرة أني مااريده وهو كل ميشوفني يحلف بالكاظم الا ياخذني وبرضاتي هم

اخير شي تعب كوم وصادق خوالج حتى يتقربلي أكثر وكام يبات بالبيت وشكد اسمعه حجي ماكو ميفيد أذن

التفتت ع بابا: شجاك بابا ماعندك احساس

_يااحساس ولج امج جانت تجنن بشبابها وهسه وبعد ومن جنت أشوفها ولهذا يومج دكات گلبي هي هي

ماما ضحكت ودنكت وبابا غمزلها

بابا: بس هو صدك أني واحد بلا كرامة واحد غيري ميباوع بوجهه ع سوالفها ويايه هههههههه بس أني احبها وهاي أختج زهراء طالعه عليه صفاء لعب بيها طوبه وهي تصيح احبه

_اي صح والله زهراء مثلك زين بعدين شلون تزوجتوا

_الله وكيلج جبروها عليه اني رحت لامها وقريتلها اليتيمه ههههههههه وبيبتج الف رحمه ع روحها ماقصرت جبرتها هههههه

_وانت شلون قبلت تتزوج وحده متريدك ومجبورة عليك

_شكد بطرانه ولج اني مصدك اخذها

_زين ماما شوكت حبيتي لبابا

_ولج لحد مجبت زهراء واني اموت منه اتخبل واكو امور بين الرجال ومرته جنت اسويها تأدية واجب وخوف من الله بس هو يموت عليه حتى ملابسي يلبسني بيده

بابا جاوبها: وتالي غصباً عنج حبيتني وانتي الممنونه ههههههههه

ماما كملت كلامها: من اجيتي انتي للدنيا وكمتي تزحفين بيوم من الايام ابوج جان راجع من الدوام واني مااطيقه عناد بي ماسويت اكل ولانظفت البيت وهو اجه لكيت الوضعية هيج تخبل كسر البيت

لبسني حجابي ووداني لأهلي وعاند ميقبل يرجعني الى ان انتي تمرضتي عليه تريدين ابوج اضطر يرجعني بس جان ميباوع بوجهي كمت اضوج ليش هيج يعاملني وين راح حبه ودلاله بديت أحب ابوج وانتظره شوكت يجي للبيت وكمت بدون ماانتبه احير شلون ادلله

بعدين ابوج سولفلي كال تعمدت اسوي هيج كلت اذا بقت نفسها والله ولا ابقيها ع ذمتي اشو اني مشلوع قلبي وهي هم واثنينا ممرتاحين

بعدنا دنسولف ررن موبايل بابا كال الوو زهراء ..

كام على حيله بذهوول وعاط جايج ابويه جاي بس دقيقة ..

امي كالت شكو  شبيها زهراء ..

جاوب ماما وهو يريد يطلع بسرعة

تكول  الحكي بابا أبني حيموووووت ما ادري شبي ابنها.....

يتبع ..

الفديو تصميم user49690003

شكرا حبيبتي وعاشت ايدج 😍

ادعولها 💔

شريعة العشق

بارت ٥٣

نورا ناصر

اندكت الباب طلعت فتحتها صارت ام اسراء مقابيلي تفاجئت بجيتها فنحت عيوني ، هيه حتى ماسلمت رفعتلي تك حاجبها وايدها على خصرها وحجت بنتر

_ شكوو شبيج عيني لو متقبلين اجي يم اختي اشوفها ؟؟

بعدني دا اجاوبها صاحت عمه من باب الاستقبال

؛ زهراء منو بالباب ..

دفعت الباب وطبت اني عيني اني ام صفاء جيت دااشوفج ..

تلكتها عمه ؛ هلا ومرحبا تعالي خيتي فوتي مشتاقتلج شكو واكفة بالباب ..

وباوعتلي عمه وخزرتني ..

تفاجئت وام اسراء تتلفت عليه وتخزر بيه سوون عليه وليه بالخزرات ..

طبت جوه هيه وعمه اول مكعدت سمعت صوت همام يبجي ، صعدت اركض نزلته ..

لكيت عمه بالمطبخ دتحضر ضيفه  لاختها ..

خليت همام بالكاع وكتلها ؛ عنج عمه اني احضرلها روحي كعدي يمها ..

التفتت عليه كالت ترة عيب صعدتي فوك وخليتيها حتى كلاص مي مخليتي بيدها انت شنو ماتنسين ترة صفاء تزوج واسراء متزوجة .

_ عمه ليش تظلميني وتسيئين الظن بيه ترة اني صعدت لان همام يبجي ورحت نزلته جوه .

باوعت لهمام وطلعت من المطبخ واني حضرت الضيفة ورحت قدمتها الها ، ظلت تباوعلي من فوك ليجوه وبلشت تحجي ..

_ اخخ يا ام صفاء اخخ شحجيلج بلله هسه والله هذا ثاني طفل توكعه اسراء ثاااني طفل ..

لطمت عمه على رجلها ؛ يا عزااا شلون توكعه بالهه شلوون ؟

_ والله تشيل روحها وتركعها لو تظل تكمز وتوكعه متخبلة ماتريد طفل منه تكول ماريد منه طفل ..

رغم هو وردة ودرة مال الله والله بس شسويلها بعدها ماتكدر تنسى صفاء الله لاينطي الي جان السبب ..

وظلت تباوعلي واني واكفة اباب الاستقبال ..

ماتحملت وجاوبتها : بنتج متزوجه وصفاء هم تزوج وصار أب مااعتقد اكو داعي تحجين بشي ماله معنى أنتي جايه خطار لو جايه تسوين مشاكل

ظلن اثنينهن يخزرن بيه كامت ام اسراء ...

نعم الله عليج سويتيني جايه اسوي مشاكل لعد اني رايحة بس خلي يكون عندج علم ترة اني جاي اشوف اختي واشكيلها مجايه اسوي مشاكل ..

عضيت شفتي وفتخت عيوني ...

طلعت وعمه وراها تتوسل بيها ترجع ..

كالتلها تعالي يمعودة معليج من الحجي شبيج ؟

التفتت عليها ام اسراء لا اني طالعه وها خليت ذيج العلاكة بيها طرشي الكم سويت وتنقصته الكم ..

جاوبتها ؛ ليش تعبتي نفسج وتدرين بينه اني وابو حسين مناكل الطرشي قولون والمعدة جان خليتي الكم .

_ اي ادري متاكلون خلوا لصفاء يحب الطرشي مالتي

راحت عمه وصلتها للباب ورجعت رزلتني رزالة معدلة وتحلفت بيه بس يجي صفاء تشكيني و دخلت لغرفتها زعلانه ..

ضجت ورحتلها حاجيتها ماقبلت وظلت مصرة ع أنو بس يجي أبنها تكوله ..

رحت ريكت همام وبلشت اريد انظف وهو مايكعد حررك كولش  .

رحت لعمه لغرفتها طلبت منها تخلي همام يمها بين ماانظف

جاوبتني: لا ألي دخل بيج ولا أبنج...

كملت تنظيف وهمام كلساع يسويله شغلة

اخر شي حبسته بالحجلة ..

رحت للمطبخ دا اسوي كبة مالكيت زيت مخلص

طلعت تنكة دهن اريد افتح القبق ماتنفتح

اخذت سجينة وكسرتها وطلعت منها الدهن وخليتها بالكاع ورحت ع الطباخ احمس حشو للكبة دااحشيها ..

واني ملتهية وجان اسمع همام يصرخ التفتت عليه

ايده كلها دم متتتت نشفف دمي ركضت لزمته وشلته

ظل الدم يتدفق بشكل مرعب ايدي ترجف مااعرف شسوي توجهت للمغسلة غسلت ايده انترست المغسلة

دم ..

خليته بالكاع يفرفر احس حيوكع من ايدي وجسمي كله يرجف دورت تليفوني كوة لكيته خابرت صفاء مايرد ماتعبت نفسي ودكيت مرة ثانية ،  خابرت بابا وكتله الحك ابني حيموووت ..

بعدني داسد الموبايل طلعت عمه من غرفتها مصدومة

_ هاي شكو شبيج تعيطين ؟

شافت همام فتحت حلكها ولطمت ع صدرها اجت اخذته من الكاع ولزمت ايده المجروحة وظلت تباوعلها

وتسأل بيه هاي شلون صار بي هيج ؟ غير تديرين بالج ؟

باوعتلها واخذته منها: هسه تاخذي مني من طلبتتت منج تلزمي ماقبلتي هسه هيج أحسن خلي أختج تفيدج ..

اخذته منها بدون مااسمع اي كلمة وطررت بي للحديقة لان سمعت صوت الباب اكيد بابا اجه وهي ظلت تدردم ورايه ..

دخل بابا خطية وجهه مخطوف وماما وراه واخواتي

ماما تلهث ميتة خوف ووجهه شحب وايدها على قلبها ..

اخذ بابا همام من أيدي ركضت لبست بسرعة ونزلت

وراه واخذناه بالسيارة ، بالطريق خابرنا صفاء

وهناك جان ينتظرنا  بالطوارئ مال مدينة الطب ..

بس وصلنه  اخذه من عند بابا وركض بيه وهو حبيبي بس يصرخ فحصه أبوه

باوعلي: لتخافين مابي شي بس ايده محتاجة خياط هسه يخيطوا وهاي هي تفض اهدئي أبويه أنتي شبيج وجهج اصفر عمري .

استمريت ابجي وقلبي احسه حيطلع من مكانه

طلعني برا ودخل همام حتى يخيطون كف ايده  طلعني لان ميريدني اسمع صوت البجي وأني اصلاً انتهيت رجليه مااكدر اوكف عليها بعد ..

على ما كملوا أحس روحي طلعت ، انطانيا حبيبي مسنح ويشهك من كد البجي ..

اخذته ابجي وياه واديه ترجف ، اخذه مني بابا و رجعنا للبيت ..

عمه وجهه ثكيل عليه ماحاجيتها اخذت أبني غيرت ملابسه ورضعته ..

بقيت مخليته بحضني وكاعدة وبعدها الخوفة بيه

هو نام على رجلي واني بقيت اباوعله وبعده دمعي مانشف عليه ..

سودة عليه ماما كلها مني اني السبب اني مهملة لو شايلة التنكة قلبي اعمى امداني ..

أحس حيلي انهد من شفته بهيج وضع شويه ودخل صفاء  باوعتله وعيوني كلها دموع وقهر ، شهكت ، اجه اخذه من حضني ونومه بسريره .

حاجيته بنبرة كلها بجي خلي يمي انومه ..

كال اشش عوفي نايم تأذى اليوم وانت هم متأذية وبجيتي هوايه تمددي وارتاحي وبسريره أمن اله لا تنلجم ايده ..

بقيت كاعدة اجه مددني ومدد بصفي و  ظل يمسد بشعري ويهمسلي كلام حلو يلامس شغاف قلبي 

غفيت ع همساته وبوساته ...

بالليل كعدت مشفته يمي ولا حتى همام حبيبي ..

تمططت وكمت من الفراش ونزلت ..

سمعت صوتهم بالمطبخ ، رحت شفت صفاء ديسوي عشه وعمو لازم همام وكاعد وعمه ماكو يمهم ..

عمو كال حمدلله على سلامة همام وسألني شلون انجرحت ايده وسولفتله الي صار كله ..

باوعت صفاء دياكل من الطرشي طبت عمه سألها منين هذا الطرشي شكد طيب يشبه طرشي خالتي ..

بسرعة اخذت من ايده خيار جان دياكل بيها

كتله لتاكل خااااف ..

بعدني ممكملة وعمه انهدت بيه ..

شجاج ماتكوليلي شنو هالسم العندج هاي عود هستوج طالعه من المستشفى بابنج احمدي الله وشكريه مو تذبين سم ع العالم ..

بقيت فاكه حلكي وعمو ظل يحجي عليها ....

وصفاء ولا تاب استمر ياكل وبيومها هو الوحيد الي اكل كومه منه وعبالك مسوه مخصوص بس اله

قلبي ظل يلعب وماارتاحيت ..

يوم ثاني .. رجعت من الدوام واني اخلي همام يم ماما اذا عصري واذا ماما صباحي يم عمه مرات الله هاديها ..

هالسنة اخر مرحلة الي اتمنى اتخرج واخلص لان تعبت هوايه وهمام يراد اله كومه مسؤؤلية وانقهر لمن اخلي واروح للجامعة ..

رجعت للبيت لمحت  رشا طلعت من البيت وصعدت بسيارة وراحت ، باوعت شفت عمه واكفة بباب البيت ..

بيومها جنت مخليه همام يم ماما ومريم وعندي امتحان مكدرت اغيب عمود ايده ..

رحت اخذته من بيت اهلي ورجعت لبيتنا ، شفت عمه منتظرتني بالكراج بس شافتني تلكتني اخذت همام من ايدي وظلت تحاجي ، صفنت على تغييرها البارحة جانت ترزل بيه ومتشبع وهسه مدري شون اوصفها صدمتني ..

دخلت للبيت جيت اخذ همام منها كالت صعدي بدلي وارتاحي خلي يمي ..

صعدت بدلت ومصدومة منها صار هواي ممعاملتني هيج معاملة اصلا اشتاقيت لتعاملها القديم ويايه

مدري ليش البشر يتغير ومايبقى على حاله ..

نزلت دااصب غده اجت يمي وبيدها همام ..

كالت اكولج شفتي رشا طلعت منا موو ؟

هزيت راسي وكلت شعليه بيها ..

كالت اي حبابة عمج يكلب الدنيا اذا عرف هيه جانت هنا ..

التفتت عليه نصف اللتفاتة ؛ عمه اني مو مثل متتصورين والله مادور مشاكل ولا احب اوكع نفسي بيها دوم مبتعدة عنها ..

هزت راسها وسكت تباوع لهمام وتضحكه ..

وراها بفترة صفاء طلب يلبس قميصه النيلي

كال اكولج اشو قميصي النيلي صار شكد مالابسه وينه بالله طلعي الي ..

دورت الكنتور خبصته خبص ملكيتة ..

عبير: قدمت كلية وبعد فترة طلعت القبولات طلعتلي كلية قانون وهم لان بابا دكتور بيها رحت للكلية علمود التسجيل رحت أني وبابا سجلت وبعدها رجعت للبيت طبعاً جانت اهم شروط الوالد أنو لازم محد يعرف اني بنته حتى الطلاب ميسمعوني كلام وانو نجحت بزود ابوها والاسئلة عدها ومن هالكلام ..

ورفض حتى يعرف الاساتذة عليه حتى خاف ارسب عدهم ميساعدوني علمود بابا

بعد أسبوعين داومت شعبتي جانت أغلبها ولد من الجنوب واكثر شي من الناصرية والحلة والانبار أني جنت بالمرحلة الاولى ممحجبة ومقتنعه أنو الحجاب حجاب النفس مو شرط أغطي شعري واني كلي معاصي اكو هواي محجبات وهم لايصلون ولا عدهم اعمال بيها خير ولا سمعتهم زينه والعكس صحيح ..

لاحظت أكو ولد من الفلوجه هو أسمر حيل بس جسمه يجنن وعيونه خضر هذا طول المحاضرات هو صافن بوجهي

الدكتور انتبه عليه

وكاله : أسامة ركز ويايه

وهو مااهتم للدكتور  اكو ولد كاعد بصفه أسمه ميثاق هذا يمشي ويحشش انتبه ع نظرة اسامة الي ..

همسله بصوت مسموع : عينك وين ع الصبورة أكعد زين مثل الصورة

بالنهاية اثنينهم انطردوا من المحاضرة والكل ظل يضحك عليهم ..

أسامة شاب ثري واغلب بنات الكلية يتمنونا سيارته أخر موديل ولبسه كذلك وعطر يجيب التايه ومع ذلك جنت مااهتم أله ولا اباوعله بنظرة

لبسي أني هم جان ارقى شي ببنات القسم واغلب الولد جانوا يتمنون أحجي وياهم بس أني جانت عندي صديقه وحده بيتهم بالمنصور أسمها زمن هاي وحيدة أهلها وعليها غرور ماشيلته بنية بحيث من نمشي سوا جنا نسمع كلام الولد والبنات

(ذني شكد مغرورات وذني شكد متكبرات وشايفات نفسهن )

هذا الكلام تعودنا نسمعنا يومية عبالك محاضرة احنه مو مغرورات بس هم نطاقهم ضيق عدهم البنية اذا مشت ويا ولد معناها كبل ذوله

طلعت من الدوام باوعت الخط جان مموجود ظليت التفت وجان اشوف قسور بالبدلة العسكرية ولابس نظاراته ومنتجي ع بنيد السيارة...

من شافني نزع النظارات و رفعلي حاجب وابتسم

غلب على ملامحه الشوق واللهفة...

ماابديت اي رد فعل ابد ، ولا حتى ابتسمت ..

اتمشيت اله ببرود و وكفت كباله سلمت عليه اباوعله بنظرات باردة ..

وره ماسلمنه على بعض سألته ؛ شجابك قسور هنانه ؟

ضحكلي كال: ترى الخط أني سرحته بس والله مزعج بالكوة يلا تدعبل اشتعلوا اهله

_انت منو سمحلك تطرده؟

_شوفي ولج لاتبيعيهن عليه ادري بيج فرحتي من شفتيني يلا أصعدي اوصلج عندي حجي وياج

_يااا كل عقلك أصعد وياك هسه أاجر تكسي واروح للبيت...

_أكسر رجليج غير ؟؟ (حجاها وهو يضحك)

كمل كلامه ؛ أصعدي بداعة أمج والله هسه اجيت من الدوام وبوجهي عليج والنبي مشتاقلج كد رحمة الله كد تعب البية والله ..

سكتت مجاوبته وبس ظليت اباوع ع الشارع

ماكو ولاسيارة والطلاب بدوأ يقلون لان بدأ الدوام المسائي...

اضطريت اصعد وياه ، حرك السيارة شوية ووكف يم

سوبر ماركت قريب على الكلية.

نزل من السيارة ورجعو انطاني علاكة ..

فتحتها بيها  نستله وعصير ...

كتله شنو هاي ؟

كال أعرف بيج حقيرة وماراح تنزلين ويايه نتغدا جبتلج ذني خاف ينزل ضغطج ..

رفعتله تك حاجب ووياهه ابتسامة ..

طلعت تليفوني خابرت بابا وكلتله حرجع ويا قسور لان الخط مااجه

بالطريق وكالعادة ازدحامات بغداد وخصوصا وقت انتهاء الدوام شغله ميتسولف بيها اصلاً الازدحام دماار أني بديت اعصب وهو ولا مهتم يباوعلي مبتسم باستمتاع ..

التفتلي باوعلي درت عليه التقت نظراتنا ، نظراته تشع حب اعجاب ولهفة ..

كال: سامعة اغنية يا ليل طول شويه

_اي سامعتها بس ليش؟

_هسه أني اكول يا ازدحام طول شويه ع الئعدة الحلوة ديه

ضحكت :اي مكلت شتريد ليش اجيت؟

_عبير ما غيرتي رأيج ولج صار سنة وكسور  لخاطر ربج لو حجر هم جان حن حسي بيه ولج مااشوف غيرج والقرأن حتى البيت هجرته علمودج ارضي بيه وعلي الكرار امشيج ع الورد ، عبير أنتي عندي شي غالي ميتقدر لابثمن ولا بأي شي حبج يجري بدمي

ظليت ساكته رفعت ايدي لوجهي خليت ايدي جوه خدي عيوني ليكدام وتنهدت بضيق مجاوبته هو تحسر : زين بس كوليلي ليش شايفتني مو خوش ادمي احجي كولي والله مااضوج ولج وصلت لمرحلة حتى بصلاتي اتذكرج واخربط وارجع اعيدها أني الجنت بالصلاة اغمض حتى اركز بيه

تالي هيج يصير ويايه

جاوبته بأصرار ؛ قسور ماكو نصيب شنو هي كوة شوف حياتك يااخي

عاط بيه : لتكوووولين اخي لججججج ومحمد ترى أبتلي بيج ..

باوعتله بغضب وخزرته وهو دار وجهه والطريق كله يدعي ع نفسه گلبي وجعني من دعائه بس التزمت السكوت ..

ونبضات قلبي تتسارع صار مثل بركان على وشك الانفجار ...

ماتحملته عطت بي كااافي قسورررر كاافي واديه على اذاني .. وظليت ابجي بحركة وانهااريت اعيط   .

وكف السيارة بسرعة ركنها ودار عليه مصدوم

عبير عبير شبيج عبييير ..

ظل يجر بيه من زندي ، نفضت ايدي منه والتفتت عليه معصبة وعيوني جمر ؛ وديني للبيت ومااريد اسمع صوتك واذا حجيت اشمر نفسي والله لو هسه انزل ..

كال بهدوء مايعكس دواخله ؛ صار صار بس اهدي ..

درجت وجهي منه وهو حرك السيارة .. وصلني للبيت داانزل ترددت ودرت عليه .. حباب قسور بعد لتعيدها ؟

شنوو مااعيدها مااجي عليج للكلية موو ؟

جان قصدي ميدعي على نفسه بس ردته يأيس مني

كتله ايييي ونزلت بسرعة من سيارته ..

صعدت بدلت ونزلت اكلت رحت شفت ماما لان خابرتني الصبح جان صوتها تعبان..

دخلت للغرفه طبعاً بابا بالدوام لان عنده محاضرتين بالمسائي ..

شفتها حبيبتي وجهه أصفر وتعبانه ومريم نايمة يم رجليها الظاهر جانت تفرك برجل ماما وغافية

كعدتها صعدت لغرفتها  واني كعدت يم أمي ظليت أتلمس بوجهه حست عليه أبتسمتلي واني دخلت وياها بالفراش حضنتها وكمت أبجي

لزمت وجهي بأثنين اديها: شبيج بنتي ليش تبجين

_ماما أنتي تعبانه فدووة كوليلي شنو أسويلج ويروح التعب والمرض منج والله لو بيدي أشيل مرضج واخليه بيه متتصورين شكد أتعذب من اشوفج هيج

باستني: شبيج عبورة قابل جديدة عليج أني هسه شويه وأصير زينه ليش البجي من شوكت أنتي أم دميعه واني اكول عليج قوية

_اي يوم بس القوة مو بكل وقت اكو ساعات نضعف كدام الي نحبهم واني ضعيفه كدامج أمي حبابه صيري زينه أذا صار شي عليج امووووت والله مااتحمل

حضنتني وشددت حضنتها وباست رأسي صحينا ع صوت بابا وهو يضحك ويحجي: هاي شنو عيوني سوسن اشو حاضنه غيري ترى اغااار أني ومية مرة كايلج اغار من بنتج

باوعلي وحجه: يلا كومي ولج شلون صلفه حاضنه امها ونايمه يلا برا

طلعت واني اضحك ع بابا كل عقله صار عصبي .....

....

زهراء .. بنفس الاسبوع كعدت من النوم وجان يوم جمعة دوام ماكو تأخرت بنومتي كعدت على صوت عمه مخبوصة وتبجي نزلت اركض شفت صفاء واكف يمها وايده على حلكه ومبين ضايج ..

ركضت عليهم سألت بفززع شكو شصاير ؟

باوعتلي عمه وجاوبتني ؛ اسراء بنت اختي تعزت وتلطمت زوجها جاي من وحدته بديالى ،  غدروا بالطريق وكتلوا هو وجماعته سودة عليه وهسه اني رايحة للعزاء مالته ..

انصدمت خليت ايد على حلكي واللخ على صدري مفزوعة وجعني قلبي عبالك انضربت بسجين ، رغم ماا اعرفه وممعاشرته بس الخبر صدمني وعبالك احساسي انبأني مقدما بأنه اكثر وحدة راح تتضرر من هذا الحدث هيه أني ..

يتبع ..

شريعة العشق

بارت ٥٤

نورا ناصر

گُنت أخاف أنْ يأخذٓ أحدهم مكاني حتى

إكتشفت انـه لا مكان لي أصلاً"💔

..

طلعوا صفاء وامه من البيت ، صفاء راح يوصلها للعزه او يروح للفاتحة مادري بعد حتى ما سألته ..

ركضت لهمام فوك سمعته يبجي ، وافكر باسراء

اكيد ماضايجة على زوجها هسه ويمكن فرحانة يربي جانت متزوجة واني مخلصانة منها مو هسه بعد ارملة!!!!

..

استغفرت ربي وبعدت هالافكار السيئة عني

اخذت ابني رحت بدلت اله وريكته وبالي مو صافي

ابد وقلقة واصارع احساسي  ..

انظف ومشغول بالي وكلساع اصبر نفسي

زهراء شجاج مو هيج مو هيج ماواثقة من صفاء انت ؟؟

صرت احجي ويه نفسي الى ان اجه صفاء وحده وعمه بقت يم اختها ..

استقبلته من الباب وقلبي يرجف اباوعله بتوهان

، بلعت ريك  ؛ ها حبيبي ..

كال هلو هلو ..

رحت للفاتحة ؟

كال اي وهسه راح اغفي شوية بس فدوة اروحلج سكتيلي همام لان تعبان انام ربع ساعة مو اكثر اريد اطلع ..

اي حبيبي صار ، تبعته للدرج وشايله همام على ايدي ويبجي يريد ابوه وصل كم باية لنص الدرج

صح عليه صفاء هم شفتها ؟؟

التفتت عليه متفاجأ ورافع حاجبه ؛ منو تقصدين ؟

عدلت وطفتي وحولت همام للجهة اللخ ويشفايف مرتعشة وقلبي نبضه اسرع من المعتاد ؛ اقصد اسراء .

ظل يفر بيده وبلش يعصب ؛ صدك تحجين انتي ؟؟ وين اشوفها يعني فاتحة زوجها شبيج زهراء وصلت امي لبيت خالتي ورحت لجادر الزلم عزيت وطلع .

بلعت ريك وهو رمقني بنظرة من فوك مكدرت افسرها

وكمل طريقة يتلفت الى ان اختفى من امام انظاري .

عضيت شفتي ونزلت همام وظليت اغم روحي

امداني  امدانييييي ..

ياربي بدد مخاوفي وخلصني من هالشكوك الي بلشت تحفر بروحي وتاكل كلبي بأول يوم من سمعت خبر إستشهاد زوجها ..

صفاء بهذه الفترة  اخذ التخصص وصار أغلب وقته برا البيت  يطلع من السبعه الصبح ميرجع غير ب١١ بالليل...

و فتح عيادة و بالاضافه الى أنو اشتغل بمستشفى أهلي ، صرت قليل أشوفه صرت أمل من الوضع الي اني بي ..

عمه وعمو أغلب وقتهم ع التلفزيون ومرات يرحون يم ولدهم أبقى وحدي وهذا الارعن مالتي هم يظل يبجي ويلزم الباب الرئيسي يريد يطلع ..

ويدك عليه ويصيح عبييي او يصيح أدو ( جدو)

مرات اودي يمهم وارجع لبيتي لو اخابر صفاء واخذه واروح يم أهلي ابقى يمهم الى ان يجي ..

أكثر من مرة تعاركت ويا صفاء علمود شغله لان تعبت ومليت وأني وحدي ومسؤولة عن طفل مرات أفكر اذا لا سامح الله صار شي بأبني شلون أطلع وأني وحدي وحتى بابا بالدوام وماما كذلك وعبير ومريم يعني محد يمي

أكوله اترك الشغل الاهلي أحنه مو بعازته اشو راتبك خير من ألله والعيادة ممحتاجين أني وابنك بحاجتك صرت أضوج وحدي

يجاوبني: أني علمود منو دااشتغل ومشكوك حلكي بالنص غير علمود أامن مستقبلكم دتشوفين الوضع شلون تعبان و أني أريد أضمن مستقبل أبني عود من أكون نفسي اترك الشغل بالمستشفى الاهلي

كل مرة أحجي وياه ويسكتني بأسلوبه

صرت أشتاقله كولش مدااشوفه هواي مرات يجي بالوحده وأكون مطفيه بس كاعدة أنتظره و أول ميوصل ياخذني بأحضانه

كل مرة يتقربلي بيها نفس لهفته وحبه يزيد مينقص ...

مرة من ديروح للدوام وجان مسهرني بالليل وياه لساعة متأخرة وكل مااغفى يضغط ع أيدي حيل او يكرصني حتى أكعد هو هاي عادته حتى ميخليني انام ..

كمت سويتله ريوك جبرني الا اتريك وياه اكلت وصعدت تمددت وهو صعد ورايه وظل يبدل ويتغزل بيه غفيت ماحسيت بنفسي  أجه نفخ بوجهي ..

تململت : اووووو صفاء أريد انام شنو هم ليل هذا والله نعست للصبح منايمة بسببك وبعد شويه يكعد همام يسويلي حفله أول ميكعد يبجي ويدورك خليني أنام شويه

_من اطلع نامي هسه خليني أشبع من وجهج مدااشبع منج أبد هسه لو ماعندي دوام الا أدخل وياج بالفراش

_عززززا بعينك همزين لعد عندك دوام هو أنت من غير شي مبهذل احوالي يلا امشي اطلع منحرف متوحش

أني اعيط وهو يضحك عليه أجه باسني أحسه أكل شفايفي مو عبالك باسني دفعته أريد أجر نفس بالكوة يلا تركني واني الهث وهو خربان ضحك داامسح بحلكي أحس طلع دم مااحس غير عضني من خدي شلعه شلع كمت أبجي أذاني حيل

أجه كفخني ع كيف ع رأسي : ظلي أبجي كل ماسويتلج شي تكومين تلطمين عوزج ملايه واني تفترين بالنص وتدبجين ..

ظليت اباوعله باستنكار ومقوسه شفايفي ..

ظل يباوعلي و يضحك عليه ، عصبني ، طلع الخبيث وحتى ماراضاني ..

بس طلع اخذت تليفوني و خابرته بنبرة تهديد حاجيته

: شوفلك مكان تباااات بي افتهمت

جاوب بسرعة وببرود ؛ اي افتهمت

بعصبية ؛ لتحجي ويااااايه ببرووووود

بنبرة جامدة ؛ صار مااحجي وياج برود

بانفعال اكثر وغضب ؛ صفاااااء ترى أني عصبية لتستفزني

بأقناع : صار ابويه مااستفزج

_صفااااااء

بحنية ؛ عيوووونه وعمره وگلبه وفرحة سنينه والخضار الباقي بعمره شبيج دگة گلیبي يروحلج فدوة صفاء لتعصبين عمري يلا نامي حبي ..

ايي هو اني هم اكدر عليك وعلى لسانك لا والله ولا اكدر ...

اجتني صوت ضحكته ؛ لج نامي نامي صوتج يذوبني ومكدر اشتغل ..

اكدر انام ؟ شون اكدر انام كسرت نومتي ..

ديلله عاد لاتطوخيها ابقي كاعدة واني راح اشتغل يله حبيبي يله عاد ..

سديت الاتصال ورجعت نمت

عبير: بلشت امتحانات الفانيل ،  كملت وطلعت طبعاً باجر يصادف عدنا امتحان بالمادة اليدرسها النا بابا ولحد الان محد يعرف اني بنته لان بابا يكتب ع الملزمه اليطبعها النا اسمه وعشيرته ميكتب اسم جدو

االمادة الي يدرسها بابا صعبة بشكل وبابا حدي والطلاب كلها تخاف منه واذا واحد ماعنده يومي لو تحترك الدنيا مينجح والغياب ينقص من عدنا ٥ درجات والزي ٥ درجات هاي طارت ١٠ وهو الكورس كله ٢٠ شينجحنا هواي جانوا يكرهون بابا وحتى غلط يغلطون عليه وأني اسمع وافرفح مااكدر ارد لان بابا منبهني

بس للامانة هو حقاني مرة ولد سأله ليش هيج قاسي ويانه جاوبه: اني مو قاسي بس مااريد حق واحد يضيع ع أي اساس اساوي بين الي مااشوفه وجهه وبين الملتزم ويحضر ويناقش وعنده بيبر وبين المخلصها بالسنتر

من طلعت صار بوجهي أسامة ظل يباوعلي ويضحك كال: بنت بغداد عندي حجاية وياج اذا ممكن

رفعتله تك حاجبمتعجبة: لا مو ممكن

_بويه مااخليج تتأخرين حدري هين بالحديقه هن چلمتين والله وياج

_شنو شدتحجي مداافهم هاي يا لغه

ضحك ضحكة طويلة

_بويه هاي لهجتنا من تحدرين ليغاد يمنه أعلمج عليها ..

_شنو تحدرين شنو يمكم بيك شي أنتَ؟

_اي بيه أنتي وحك ربج ليلي ماانامه من تمشين أحسج تمشين على گلبي مو ع كاع الله أنتي وهذا لبسج يجيب التايه ول يابه صار سنة انه الحكج ماتحسين أنتي مو وريتي گلبي ور

_شوف نص كلامك مداافهمه وهسه من رخصتك وباوعت ع الساعه أريد اروح الخط ع جيه يلا حباب وخر

أجيت داامشي صار كدامي همس :أحبج وتراب اخوي واعرف أنتي صعبة جنت من أشوف بنية تلبس مثل لبسج اكول مو شريفة بس هسه أختلف الوضع وحك كلام ألله اني مو بس احبج لا متيم بيج

فزيت من كلامه فتحت عيوني ع اوسعها استوعب الصدمة لاجزاء من ثانية وبعدها خزرته ...

وتركته ومشيت عنه سريع ، اسمع خطواته ورايه  يصيح : بعد أبوج لبسج بلكن تغيري مو شعلتي جدود جدودي صح مو من حقي اتدخل بس مااتحمل هيج تلبسين

رجعت عليه: انت مالك دخل افتهمت لولا وهذا كلامك اعتبر نفسي ماسمعته وديربالك بعد تعيده

نننن احبج تهي بهي

جنت احجي ورافعة اصبع الشهادة بوجهه وهو يباوعلي ومخلي اديه بجيوبه ومبتسم باستمتاع ، درتله ظهري ، تركته وطلعت من الكلية

مرت الامتحانات بسلام بس اسامة جان محاوطني بنظراته وابتسامته الهادئة واني ابد ماعبرته

قسور بهالفترة رجع فتح موضوع الخطوبة وماانطيت جواب جنت ملتهية بالدراسة وهو جان مكتفي يراقبني من بعيد ابد مااذاني ولا ضوجني ، قسور تركيبة غريبة يمكن لو غير بنية من زمان وافقت عليه لان كامل مكمل ورجل بمعنى الكلمة...

اسامة من رفضته بعد مااتقربلي لحد ما فديوم كاعدين عصرية اني وماما اندك الباب طلعت فتحته صارت بوجهي مرية وجهه رحماني سلمت عليه ووياها اثنين بنات وحده شابة والثانية تطلع ثلاثينية من شافني صلن ع النبي

سألتني الحجيه : يمه انتي عبير؟

_اي حجية تفضلي ليش واكفين للباب

حجت وحده منهن:يافدووة انوب صاحبة ملكى والله زين مااختار ..

لهجتهم جانت غربية ربطت انو ذوله اهل اسامة دخلتهم للاستقبال ورحت صحت ماما كعدت يمهن واني رحت دااحضر الضيافة ، اجت امي وراي للمطبخ

باوعتلي بشك : تعرفيهم مو؟

_اي

_عفيه عليج لعد وذاك القبل اسبوع رجع فتح موضوع الخطوبة شنو سبير لو تضحكين عليه

_ماما من كلت اعرفهم مو معناها عندي شي ويا ابنهم واصلا ماعندي علم بموضوع جيتهم..

باوعتلي بعدم تصديق وممقتنعة

كالت بحدية ونظراتها كلها ريبة ؛  جيبي الضيافه وتعالي..

راحت قبلي دااخذ الصينية وصلني مسج على موبايلي

خليت الصينية واخذت الموبايل فتحتها مكتوب (احببببج )....

باوعت الرقم رقم  قسور غمضت عيوني تنهدت  هالشي حسسني بالذنب مع انو اني مالي علم بجيتهم ابد طلعت قدمتلهم الضيافة وكعدت شويه وطلعت من يمهم ..

حسيت بيهم راحوا طلعت للاستقبال انتظر ترجع ماما لان طلعت وراهم ، جتي ملامحها متتتفسر قبل لتستجوبني حاجيتها ؛ يوم من هسه مموافقه لان الولد مجرد زميل وماااعرفه لتكعدين تسويلي سالفة وهاي نظراتج الله يخليج ارحميني منها .

دااريد اصعد جرتني من ايدي كالت بحدية

_ تعالي مخلصت حجي حتى تعوفيني وترحين ..

تنهدت وجاوبتها ؛ شكوو ماما ..

_ احسمي قرارج من هسه ..

_ يا قرار ماما ..

_ تعرفين عليمن احجي اني دااقصد قسور ترة الولد تكطعت رجلينه من الجية والروحه عليج كافي امي ارحمي بحاله .

_ وعمه ؟؟؟

_ يعزلج وحدج هو هم هيج كال ..

_ وتتوقعين حماتج راح تتركني بحالي ؟ لا والله متتركني المهم اني هسه خليني مركزة بدارستي ، ترة والله عذاب اليه هذا كله .

شفتها راحت كعدت ع التخم وتباوعلي بعدم رضى تركتها وصعدت لغرفتي ، اخذت الموبايل واباوع للرسالة مالة قسور واقراها مرة واثنين وثلاثة وداخلي مااعرف شيريد ..

****

كرار: جنت بالكراج هستوني وصلت للبيت ، انفتحت الباب وطبت  مها  تعبانه توهة جايه من الدوام  من الدوام ، مابيها حيل تشيل روحها ، تمشي وتسحل بنفسها سحل  ،  من اجت عيني عليها گلبي فز توجهت عليها ، لزمت وجهه باثنين اديه وظليت اباوع بعيونها التعبانة..

استبعدت موضوع الحمل لان مو اول مرة تتعب وتتمرض ، عيونها بيهن حجي ..

بنظراتي حاجيتها شكوو ؟

تنهدت ونظراتها تتجول بالارجاء متخليها بعيني

_شبيج ابويه انتي شو وجهج اصفر خيرج ؟

_يمكن ضغطي هابط دووخة ولعبان نفس ..

_لج لا ثولة اني اكول حامل ترى حتى مااجتج صار شهرين اني حاسبلج تتذكرين من كلتلج احبلج وهاي وفيت بوعدي

ظلت تباوعلي بفهاوة جريتها ورا الحمام الخارجي دفعتني : شبيك تخبلت ليشوفنا أحد شيكول علينا

_ وشكو بيها حلالي يابه دمشيييي ..بستها بركبتها وهيه مثل الكشت وظلت تمر ايدها كدام خشمها

_ هاي شنو سابح بالعطر ؟

ضحكت عليها .. وهيه مزاجها برتقالي واني عاذرها ..

دفعتني وفاتت جوه ..

جريت المفاتيح من السيارة وسديت الباب وصعدت تبعتها للغرفة شفتها متمددة بملابسها ونايمة .. ماكعدتها عفتها ..

العصر كعدت ظليت الح اله اخذها للمجمع

مقبلت لا كرار ماريد لا احلل ولا شي هالمرة انوب نفس ذيج المرة واطلع مو حامل واتفشل .

كرفصت مقابيلها لزمت اديها اباوع بوجهه

_ لج انت صدك تحجين ؟ حامل وله مو حامل مايهون عليه اخليج هيج كدامي تذبلين .

ابتسمت بوهن ؛ بس بشرط ماتكول لاحد رايحة احلل كول هيج طالعين نفتر ونرجع .

هزيت راسي بتفهم مووو تدللين شعندي غيرج اني .

جريتها من ايدها واخذتها للحمام وكفت يمها خاف تدوخ وتوكع غسلت وجهه وتباوعلي ابتسمت

شبيك حبيبي ؟

همست بابتسامة ؛ احبج مها .

_ عبالك حامل مو ؟ هسه يطلع نفس ذيج المرة .

_ حامل مو حامل نبقى العمر كله هيج ماعليه اني احبج واموت عليج .

اجت لعندي خلت اديها على صدري ومدنكة وتحجي

بغصة  ومرارة ؛ بس اني اريد طفل .

رفعت وجهه من حنجها وظليت اباوعلها بهيام وقهر .

وامرر ابهامي على بشرتها الناعمة وعيونها تلالي ومدمعة تباوعلي وترمش على كيف ..

  رحنا للمختبر حللت وطلعت صدك حامل

اجت تحجي وتهز بالورقة مالة التحليل

يارب ميطلع مثل ذيج المرة

خليتها تعيده الي مرتين احس دمي خلص .

ضحكت عليها وعلى دلعها لو بيدي ابوسها واحضنها بس زحمة المختبر متروس عالم ..

جنت كولش فرحان  أحلى خبر بحياتي ولو ماعيب من الناس الا اشيلها واطير بيها للبيت ..

توجهنا  للبيت والطريق كله أكولها ممصدك أصير اب ابد مااخليج تشتغلين ولا تتحركين وأي شي يتعبج ممنوع تسوي..

وهي تضحك وهم مخليه ايدها على بطنها وكلساع تشرد بتفكيرها وتصفن ..

لزمت ايدها انطيتها نظرة إطمئنان ؛ لاتفكرين عمري هالمرة صدك حامل واني متأكد ..

جرت نفس واطبقت اجفانها بتوسل وهمست "يارب"

وصلنا للبيت اجت تنزل

كلتلها: وييين متمشين أني اشيلج

وبالفعل شلتها ونزلت اتلكتنا أمي من باب الاستقبال

تضحك: يا ولكم تخبلتوا شنو هاي

_حجيييه جنتج السنفوووره حاااامل ولجججج يوممم راح اصيرررر اب

امي فرحت وكامت تهلهل نزلت مها بوستها ...

مرت الايام ودخلت حبيبتي بشهر الخامس ..

وحددتلها الدكتورة موعد للسونار ..

كالت تدري لهسه ممصدكة ويمكن اليوم يله اصدك لمن اشوفه بالسونار بعيني ..

تقربت منها لج وهاي الطوبة شنو واشر على بطنها ..

قوست شفايفها بمعنى ماادري وضحكت ..

بستها من خدها وامي صاحتها من جوة يله مها تأخرنا ..

اخذتها امي سوت سونار  ،  هي جانت تريد ولد واني بنية جنت حالف يمين بس تجيني بنية أسميها مها ع اسمها من كد مااحبها واعشقها ،  صدقاً احبها اكثر من نفسي واكثر  حتى من ابني الي بطنها

من رجعوا كالوا بيها ولد باوعتلها هي فرحانه  اجت يمي حضنتها من خصرها بيد وحدة بست راسها

علت رجليها تهمسلي وايدها على لحيتي ..

_  حيجيني طفل نسخة منك اريده ونفس اطباعك وحنيتك اريده نسختك المصغرة ..

باوعتلها وابتسمت ورجعت بست راسها

ها هسه صدكتي بنفسج حامل شفتي الطفل ..

اي اي شفته وبعد ممصدكة اله بيدي يله ..

كتلها خششمج .. وضربت ارنبة خشمها باصبع الشهادة بخفة وابتسمت بوجهه ..

بيومها الوالد سوا حفله وعزم بيت اخوية

وسماهر جانت تكمز عبالك هي الحامل

فرحانة النا هواية ..

مها دخلت بشهر الثامن نهايته وحددتلها الدكتورة عملية لان الطفلة جايه مو على رجليها ..

  فديوم اجت عليها امها وراحوا للكاظمية ديجهزون للطفل واني الطريق كله اخابر عليها لان ازدحامات اخاف عليها وماكدرت اروح عندي شغل ..

رجعت للبيت كووة كبل لا ادخل للبيت لكيت صديقي سلمت عليه كال ها منين جاي ؟

كتله هاي جيتي من الشغل ..

كال كبل شوية صار انفجار بالكاظمية وهواي عالم راحت بي ..

يتبع ..

شريعة العشق

بارت ٥٥ ..

نورا ناصر

في وطني البائس 💔

عليك أن تكره الساعة الثانية عشر بعد منتصف الليل ، عليك أن تكرهها تحديدًا قبل بضعةِ أيام من العيد !

لماذا ؟

- لأنّك ستسمع دوي إنفجار قويّ ، يهزّ بيتك !

هذا إن كنت محظوظًا وكنت في بيتك !

أما إن كنت بموضع الانفجار فستذهب روحك شهيدة من دون وداع الى مستقرها الآخير .. !

في وطني البائس ، تهتز البيوت من وقع الانفجار

ولا تهتز ضمائر فاعلي الانفجار !!

بغداد الى متى 💔🇮🇶

ألم ينتهي نزيفك يا بغداد ؟

تناثرت الاشلاء قرب المحال التجارية التي كانت تعج بالمواطنين الابرياء اطفالٌ ونساء ورجال وشيوخ من جميع الطوائف والاديان ، لم يكن يفرق الانفجار بين سني وشيعي او صابئي ومسيحي ، الكل سواء

يخترق الاجساد ويبعثرها ، لتصطبغ الارض بالدماء الطاهرة وتفترش بالاشلاء المبعثرة ، لتصعد الارواح البريئة الى السماء وتلج الفردوس الاعلى بأمر الرب .

على احد الارصفة تقبع جثة الفتاة الحسناء حبيبة الشاب الوسيم ، ذات التسعة عشر ربيعا ،  التي لبثت تنتظر طويلاً ، تنتظر طفلا يسكن احشاءها ،  ليأتي بعد صبر مضني ،  ويضيء  عتمتها ، وبعد ان اصبحت تحمله في رحمها ، جاء الموت سريعاً ليختطف روحها وجنينها معاً ، يأكد لها  بأن لا مكان لها هنا

فالجنة بانتظارها .

اخترقت النيران والشضايا جسدها الطاهر لتحترق وتتفحم اوصالها ، ااااه!!!!! ،  هل تألمتي يا صغيرة ؟

كيف ولجت النيران الي خلاياكِ الحسية ؟ هل عانيتي ؟

كيف سيصل خبركِ الى ذلك الولهان ، العاشق الشهم ؟ 

كيف سينسى عشقا نبتَ في حنايا القلب وانعجن بهِ

كيف ستغادرين حياته ؟ مؤكد بانك ستغادرينه  مثل نصل سكين يغادر جرحه

يأبى ان يشفى وان مرت السنون ، واي نصل هو ؟ واي مكان اخترق وبأي عمقٍ استقر!!!!

بعد ان هدأت الاصوات الموجوعة ، وصعدت الارواح الى بارئها ،  وعبقت رائحة شواء اللحم البشري وامتلأت الارض بالسوائل البشرية الداكنة اللون ،  لتشكل مجرى اشبه بنهري دجلة والفرات ولكن بدل الماء دماً ، وبقلوب يملئُها الاسى ، وبمقلٍ مليئةٍ بالعبرات ، تجمعت الجموع وهرعت سيارات الاسعاف الى المكان وتجمع العديد من الاشخاص ، والمتطوعين لحمل الجثث والمصابين ونقلهم الى المستشفيات .

جاء احدهم لينقل جثة التي لم تتم فرحتها برؤية جنينها ، وبيدين ترتعشان وعيون مليئة بالدموع

على اثر المنظر المهول الذي امامه حيث جثة متفحمة بذراع واحدة اما الاخرى فالله وحده من يعلم اين قذف بها الانفجار واين استقرت والى اي جثة ستنسب .

ارتعشت يداه ووقعت الجثة منه على الارض بقوة وانشقت بطنها الحامل بولدها الذي لم يبصر النور بعد وليخرج منها الوليد كما اقرت به الطبيبة لكن من دون صالة عمليات فهنالك الشارع من احتضن جسد امه ، وبلا ادوات ومشارط طبية فقد تولى الانفجار والشضايا واللهب مهمة شق البطن واخراج الجنين   .. ليخرج بدوره من عتمة الرحم الى عتمة اخرى هي عتمة العراق ..

                           ****

قبل أسابيع من الانفجار ..

جانت مها تفز نص الليل وخاصة لمن دخلت بالشهر الثامن وجانت مايات الطفل بدت تنشف لذلك الطبيبة عجلت بالعملية وحددت موعدها وظلت تاخذ ابر للرئة .

تفز بالليل حلمانة وحرارتها مرتفعة وعركانة

تحضني ميتة من الخوف ، سحبتها لصدري ظلت

تمتم ؛ يكلي اكتبي وصيتج ..

عبست ملامحي باوعت بوجهه انفاسها تلهث وعيونها كوة تفتحها تعبانة وايدها على بطنها .

اششش مها شنو هالحجي شدتلغين ..

ماالغي والله يومية يتكرر هذا الحلم كرار اني راح امووووت .

خليت ايدي على حلكها سكتتها ؛ لللج كافي مها دخيلج بلا هالحجي هذا هاي يمكن انت لان تعبانة وخايفة من العملية هذا عقلج الباطن وتأثيراته ، حبابة نامي وارتاحي .

لالا كرار اني حاسة راح يصير شي معقولة اموت بالعملية هاا كرار ؟

اخذتها لحضني اكثر بعد شوي واخنكها كلبي ظل ينبض سريع يريد يطلع من مكانه .. احضنها وانومها على ايدي للصبح ..

قبل ايام من الانفجار جيت بالليل للبيت وطبيت للغرفة

شفتها كاعدة على السرير حليانه صايرة تجنن ملامحها ملائكية وابتسامتها عبالك من الجنة بيدها علبة مخليتها بحضنها .

رحت تقربت عليها وبستها على راسها طولت بالبوسة وشميتها حيييل ، كعدت بصفها ، اخذتها لحظني

حليانه اليوم حبيبي ..

ابتسمت لي ووخرت عني وعدلت كعدتها لحتى تصير مقابيلي كالت حبيبي هاي العلبة اريدك تنطيها لعبير ..

اخذتها منها داافتحها لزمت اديه ، باوعتلها

باستنكار ؛ اوكي اوكي هسه كايم اوديها الها ..

_ لالا موو هسه لمن اااءءءء.

بنفس النظرة وبنبرة تساؤل ؛ شكووو شعندج ..

لزمتني من عكسي ؛ اكعد خل افهمك ..

وهاي كعدنا شعندج ..

باع مجرد احساس ويروح لحاله واذا ماصار شي تبقى العلبة بمكانها ..

بنفاذ صبر ؛ مها شهاللغوة هاي احجي شنو الي تردين توصلين اله ؟

خاف يصير عليه شي انطي هاي العلبة العبير بس امانة لتفتحها انته ..

بيومها تعاركت وياها وطلبت منها تبطل تسوي هالسوالف بس قلبي وجعني ماريد حتى تذكر اسم الموت كدامي . لزمت اديها باعي مها احنه راح نموت سوا تمام ؟ وان شاءالله اني قبلج يومي قبل حتى مكدرت اكمل انعصر كلبي عصر ..

خلت اديها على حلكي وكالت اششش وراحت خلت العلبة بالكنتور ..

بيوم الانفجار .. لمن سمعت كلام صديقي تذكرت مها بالكاظمية ،  أريد اوكف ع رجليه بعد مااكدر حسيت حياتي وكفت بهاي اللحظة وشريط ذكرياتي ويا مها ديمشي كدامي من شفتها وبديت الحكها لحد هاي اللحظه حسيت سعادتي انسرقت مني وفرحتي وحلم عمري ، اخذوا مني احلى أيام حياتي رفعت موبايلي اتصل عليها ماكو مغلق رجعت خابرت ع أمها نفس الشي ..

بهالاثناء طلع  أبويه : ولك بويه كرار مرتك وين رجعت لولا ؟ ولك انفجار بالكاظمية

سكتت واحس دموعي تحرك عيوني  عاط بيه: احجيييييي ولككككك ليش ساكت

ماجاوبته ،  حرفياً بهاي اللحظات روحي ماتت وبقى بس جسدي ركضت ركبت سيارتي وسقتها حتى مااعرف شلون سيطرت ع السيارة جنت اتمنى يطلع حلم الداامر بي واذا مو حلم كون الحكها

صحت بصوت عالي واني اسوق: ربييييييي دخيللللللك اخذ عمرررري وخليها عايشة

وصلت للكاظمية  ساديها هه بعديش بعد ماالناس استشهدت سألت الشرطي : خويه الجرحى والشهداء وين بيا مستشفى اخذوهم يرحم والديك جاوبني

_بمستشفى الكاظمية

رجعت اركض للسيارة بالطريق كوومة اتصالات اجتني من اهلها من اهلي ارد واصيح مااعرف شنو يحجون وما اعرف شيكولون ولا اعرف شنو ارد عليهم

وسقتها بمعدل وصلت للمستشفى لكيت اهلها قبلي

اجه اخوها وابوها يركضون كالو ماكو مها ماكو مالكيناهه لحد الان ..

شفت عمتي ام مها ع السدية ركضنه عليها سألنها

وين مها كوة حجت جانت مصابة واصابتها خطرة وجسمها كله دم كالت جانت ورايه تمشي ومادري بيها ..

ركضنه ندور عليها الى ان لكيناهه بالطب العدلي

هنا جانت القاضية عرفت حبيبة عمري صارت بعداد الموتى والتحقت بموكب شهداء العراق

مو بس هي استشهدت روحي هم استشهدت وياها راحت واخذت احلى ايام حياتي اخذت روحي وياها استشهدت وهي بحسرة تشم الطفل ومن حبلت بي راحت لربها شابة مظلومة وام شهيدة انسرقت منها فرحة احتضان طفلها راحت يم الرحمن تشكو ظلم العباد

ابويه من شافني اجه حضني فقدت احس روحي دتطلع گلبي ديوجعني

كمت اصيح : لجججججج مهاااااااوي وين عفتي حبيبج ورحتي حبببيييبة موو هييييج جان الوعد ابويييه أنتي ولج كوووومي بعد كم يوم عمليتتتتج ليشششش ربي والله بعد وكتتتتت ماشبعت منها بعدنيييي

ابويه كام يبجي ع بجيي دفعتهم ورحت لثلاجة الموتى شفتها حبيبتي الشهيدة غركانة بدمها والطفل هم ميت الشضايا مخترقة جسمه ..

تقربت منها واحس بداخلي بركان فاير يصلي دمي وصوتي يطلع متكسر بسبب شدة الوجع

همستلها واني ابجي وصعبة الرجال من يبجي: حبيبي لتخافين أني يمج أبويه أنتي بعد طولي طولج هياتني يمج مااتركج ابد الى ان اوصلج لمدينة علي الكرار واوصي عليج انتي مظلومه مهاوي ماشفتي شي بحياتج مثواج الجنة بعد روحي حبيبة

ياريت يومي قبل يومج ولججج صعبة عليه اشوفج هيج ربيييي منك الصبرررر لا اعتراض ع حكمك اللهييي انطيني من صبر العقيلة زينب

ظليت اصيح واحجي وياهه متسمع صرخاتي وتوسلاتي من اتوسللها متكعد احس راح اتخبل وافقد عقلي مادري بحلم لو بعلم اني مجاي اكدر لااستوعب ولااصدك...

_مهاوي بويه اعرفج عنودية بنيتي شلون استسلمتي للموت بسهولة ولج ماافكرتي بكرارج من بعدج شيصير بحاله ولجججج سنين أربي بيج كدامي طفلتي انتي ومن حلويتي رحتي من أيدي شحجي مااكدر والله مااكدر ع هيج شي هذا اكثر من طاقاتي

شفت صفاء واخويه ليث اجوي حضنوني وسحبوني عنها وأني اشيل بروحي واركعها مايكدرون يلزموني أبد

(المعروف عن الشهيد يندفن بدمه لان هو شهيد)

اخذناها للبيت جان صفاء لازمني هو وعبدالله كعدت يم تابوتها حبيبتي هاي مااعوفها وصلنا للبيت اول مادخلنا صارت عبير كدامي جانت تبجي بحركة وكأن هي دتعاني مثلي فقدان  صديقتها ..

من نزل التابوت نامت عليه ...

ظلت تصرخ بصوت عالي: ولججج مهااااوي خسرتج والله انتي أختي مو بس صديقتي شلون اكمل حياتي بدونج ولج كسرتيييي ظهررري خييتي والله بعد وكت عمررري محالله وموهوبة مثواج الجنة ياغاااالية

حبيبتي ارتاحي خلصتي من ظلم الدنيا ورحتي شهيدة مظلومة أنتي ملاك والله لليوم ماسمعنا صوتج جنتي خفيفة الظل الف رحمة ع روووحج مهاااوي

جنت كاعد بصفها انتبهت بالكوة عمي تحسين شال عبير من التابوت حتى خشمها طك دم شكد مافرفحت وبجت

اهلها اعترضوا يريدون يدفنون بمقبرتهم ببغداد وهم صارت هوسة وتالي ابويه تدخل وقتعهم وطلع بينا للنجف جنت مااكدر احجي ولا اكدر امشي يسحلون بيه سحل منهار لاخر نفس احس روحي تصعد للسمه وترجع احس احتضر واريد اموت واتمنى اموت واللحكهه .

وصلنا النجف زورناها الامام علي وصلينا ع روحها والجنازة راحوا يصلون

كعدت يم رأسها : ها مهاوي لهنا وانتهت مو يعني بعد مااكعد ع صوتج ولا من ارجع من الدوام تستقبليني ولججج شلووون فهميني شلوووون مااسمع صوتج ولا اشمج ولا اشوفج الليل شيخلصه واني فاقد وشفاقد فاقد محب وزوجة حنونة وام شهيدة ولج انتي تخافين من الظلمة شلون بيج اليوم لخااااطرررر الله ربيييي كسرت ظهري ليششش هيج

رفعت رأسي حاجيت مولاي: أبو الحسن مريتي بأمانتك مولاي بجاهك عند الله خفف عنها ضيق القبر سيدي خطار يمك مهاوي وانت كريم تحب الضيافه دخيلك ياابو الحسن اشفعلها بشفاعتك

كملوا زيارة وتوجهنا لوادي السلام جانت الساعه ب٣ الفجر وصلنا لكينا الدفان حافر القبر بدوا بمراسيم الدفن واني اباوعلهم احس روحي انسلبت مني من نزلوها اللحد نزلت وياها بالكوة طلعوني

واووويلي من بدوا يذبون عليها التراب جنت اصرررخ احس حنجرتي انجرحت من الصياح منهار لاخر لحظة اتمنى افقد انام وماكعد الوجع دمرني كل احساس موجع بالكون بيه بهاللحظة

حبيبة عمري تندفن كدام عيوني واني عاجززز عن فعل اي شي ...

اجوي جماعة ابويه الضباط شالوني شيل وكعدوني بالسيارة انتهت حياتي بموتها هيهات يرجع كل شي بعد

كملوا دفن واني نزلت اركض نمت ع القبر وصرخت: مهاااا مااعوفج وعلي مااعوووووفج اظل مكابلج وكاعد كل عقلهم أرجع لبغداد وانتي هنا واني ادري بيج تخافين من الظلمة اتخسى ع شواربي اذا أسويها لتخافين بنيتي يمج أني أبويه أنتي

اجاني ابويه حضني: كوم بويه كوم الله يصبرك مايفيد الحجي ماتسمعك وليدي ادعيلها يلا حبيبي لازم انت تلزم فاتحة زوجتك بعد أبوك يلا بويه

_لااا يابه ماارجع والله تخاااف من الظلمة بووووويه البارحه بحضني جانت ومتقبل اطفي الضوء ياابه تخاااف واني الغبي اتعارك وياها واليوم تنام بالظلمة وع التراب كومي ويايه والله مااعاندج بعد ولااتعارك وياج وداعتج من كووون الله ياخذ عمري شعندي عايييش  مرتي وأبني ماااكدددددر تعببببت

حضني وظل يبجي ويايه : يلا حبيب ابوك انت مؤمن هذا قضاء وقدر وكلنا نموت مايظل غير وجه ربك الكريم

اجاني صفاء شالني شيل وصعدني وياه الطريق كله اون صوتي اختفى من الصياح وهو بس يردد لااله الا الله انا لله وانا اليه راجعون

وصلنا بغداد روحي مخيم عليها الحزن كل مكان اباوعله الي ذكرى بي وياها وصلنا يم الزوراء تذكرت من جانت جايه سفرة مدرسية واني ضربت الدوام ولحكتها شنسى وشريد انسى اصلاً

وصلنا لبيتنا نزلت ودخلت جوا ،  اتلكني عماتي وزوجات عمامي اخذن من خاطري هنا جانت عيني تدور انسانة وحدة وبس احتاجيتها بشدة بس هي تفهمني وهي هم فاقدة مثلي هناك ولمحتها جان حالها يرثى له

صوتها رايح من البجي والصياح رفعت رأسها شافتني رحت عليها بخطوات تعبانه : عبير تعالي ويايه للغرفة..

كامت تجر روحها جر كوة تمشي وتشهك وصوت شهكاتها باسماعي ، التفتت عليها ؛  مها انطتني امانة لازم انطيجياهه ..

رفعت عينها بعيني عيونها حمرة دم تباوعلي مستغربة مشيت ومشت كدامي  باوعتلها تمشي محدبة من الحزن وتسحل بنفسها سحل وكفت بالباب توجهت للكنتور فتحته وانطيتها العلبه اخذتها وراحت .

خلصت ايام الفاتحة والناس راحت لاهلها الغرفة هجرتها صرت انام بالصالة واصلاً الليل يمر واني كاعد على حيلي اتذكر كل لمسة وكل ضحكة منها باوعت ع الساعة جانت ب٤ الفجر صعدت لبست دشداشة سودة وتوجهت للنجف وصلت ساعة ستة الصبح

وصلت لقبرها جان بعده ما مبني كعدت يمه واتلمس بترابه وصرت احجيلها شسويت بهاي الخمس أيام : مهاوي  اجيتج شو مااستقبلتيني مثل عادتج ومااتلكيتني بكلاص مي وماحضنتيني مهااااا مااشتاقيتي بوية مهااوي مااعرفت عنج قاسية ولج كسرتي ظهري والله

مهااا زعلانه مو لان عفتج بالظلمة اعذريني ابويه أنتي والله غصب عني عفتج وحدج اليوم ابات يمج ها زين هيج بس لتزعلينن عمر كرار وفرحته

سولفيلي شلونج أنتي اخخخخخ ياريت الكبر بي باب وافتحه وادخل اشوف وضعها شلونه أذن الظهر ماحسيت بالوقت وموبايلي بالسيارة رحت جبت مي توضيت وصليت يم قبرها ..

رجعت للسيارة فتحت موبايلي بي  ٨٥ مكالمة من ابويه خابرته اجاني صوته: هيج هيج منك ولككك ويننننك من الفجر لهسه اتصل بيك ومتررررد وين انت ابنيييي

تنهدت رمشت وجاوبته بتعب وصوتي كوة يطله

_ بالنجف يابه محتاج شي؟

سكت وجر حسرة: شايل فلوس جنسيتك وياك .

_اي حجي شايلهم الله وليظل بالكم عليه ..

وهسه الله وياك ..

سديته بدون ما اسمع منه كلمة

ورجعت للقبر وكعدت اقرأ قرأن يم رأسها ، بقيت على هذا الحال  لليل واني ع كعدتي مايهون عليه ارجع وافاركها .

   الى ان  غفيت تعبت من البجي والحجي حطيت راسي يم راسها ونمت والقرأن بيدي

فزيت على صوت رجال رفعت رأسي باوعلي : عمي شعندك هنا انت أهلك ميردوك بايت بنص الكبور كوم عمي كوم ارجع لبيتكم

باوعتله بقيت صافن دا استوعب ومرت لحظات اباوعله ومجاوبته ، نصه لمستوايه: شنو بويه ماتسمع انت وشعندك هنا نايم وليدي وهذا الكبر مامبني شتصير من صاحب الكبر انته؟

بصوت مبحوح واني ادنك وافرك بوجهي جاوبته

_ مرتي ..

_ها هاي البنية الشابه الله يرحمها ويصبرك بجاه هذا الصباح بجاه داحي باب خبير الله يلهمك الصبر وليدي بس مايصلح تنام بنص الكبور وانت بعدك شاب مو زين بويه

هزيتله رأسي وجريتها حسرة ،  اذن الفجر وهو كاعد يمي يحجيلي ع مصايب اهل البيت وصبرهم حسيت نفسي شويه ارتاحيت من سمعت كلامه ..

اخر شي خله ايده على كتفي يطبطب عليه

_  كووم بويه صلي وادعيلها وانه رايح هسه .

بوجع حاجيته بتوسل ؛ عمي ادعيلي بالصبر لو بالموت اريد الحكها .

_ كول يا الله وليدي كلنا نموت ابني وان شاءالله ما انساك من دعائي الله يصبرك .

ودعته وراح واني كمت توضيت وصليت ..

خلصت صلاة وصار لازم ارجع ، ودعت شهيدتي بحسرة وألم وعذاب ، احس روحي بقت يمها

توجهت للزيارة زرت وبجيت وصليتلها ركعتين بالامام ورجعت لبغداد

                          *****

عبير:  استشهاد مها جان صدمة  بالنسبة للكل

بنية خلوقة وهادئة وطيوبة تحب الحياة تحب زوجها جانت منتظرة ع احر من الجمر لحظة ولادتها تالي راحت شهيدة مظلومة حسيت نفسي خسرت وحدة من اخواتي هي اقرب اليه من نفسي جنت اشتكيلها من اضوج ومن اعصب اخابرها اغرد وهي تظل ساكتة لو تضحك واني اتنرفز من سكوتها واظل اغلط عليها وهي تضحك

واخير شي تكولي ها ارتاحيتي طلعتي خبالج هسه وعصبتي وصيحتي شحصلتي يلا كوليلي وتنصب عليه للاسف صارت ذكرى بس ذكرى حلوة لليوم مانسيتها بكل فرض اصليلها ركعتين وكل خميس اسويلها ثواب واكثر من مرة اروح ازورها أني وبابا وهناك الكي العاشق الحزين حاضن القبر وينعيها ..

اخذت العلبة منه وره مارحت لبيتنا حضنتها واشتم ريحتها وابجي الى ان نمت ماادري بنفسي ..

حسيت بزهراء تكعد بيه ..

عبير عبير كومي نامي عدل ليش هيج نايمة ؟

عدلت نفسي احس وجع بوجهي ..

لزمتني زهراء من حنجي   وظلت تباوع بوجهي بتفحص ؛ شوفي هاي العلبة طبعت اثر بوجهج انت مخلية وجهج عليها ومتدرين .

خليت ايدي على وجهي مكان الاثر افرك بي ..

شنو بيها هاي العلبة ؟

تنهدت وكمت شلتها خليتها بالكنتور وايدي ترجف

مالي خلك لكل شي حتى حجي مابيه احجي .

خطية زهراء كعدت تحجي وتصبر بيه بس اني اسمع وما ارد ، ماكو كلام يطيب روحي .

ممصدكة بعد ما اشوفها لمها ابد .

صاحت عليها ماما لحتى تاخذ ابنها نزلت واني بقيت منعزلة بغرفتي ..

زهراء .. اخر يوم بفاتحة مها رحت يم اهلي طليت على عبير لان جانت منهارة بالفاتحة قهرتني كلش

صعدت اشوفها لكيتها نايمة وحالها يصعب ع الكافر

كعدتها لان وجهه صاير على علبة ونايمة .

كعدت واني ظليت اواسيها واحجي وياهه بس عبالك متسمعني ، صاحت عليه ماما ونزلت اخذت همام ديبجي على ابوه ، اخذته ورحت للبيت .

فتحت الباب داافوت صار بوجهي صفاء خزرني استغربت شبي ..

باسنان مطبقة بعصبية ؛ وين جنتي خاتون ؟

رمشت عدة رمشات ،  بلعت ريك وجاوبته

_ بفاتحة مها اليوم اخر يوم ورجعت ويه ماما رحت اشوف عبير لان طلعت قبلنا تع

مخلاني اكمل يفترسني بنظراته عبالك شايف شي يكرهه ، طلع ودفعني جوه وطبك الباب حيل ظل همام يبجي عليه وهو لا اهتم اله .

بعدها صفاء بهاي الفترة كولش تغير وصار مزعج ع اقل شي يصيح ويعيط يعني همام بعمره ماضاربه هسه اذا سمع أبنه يبجي يتخبل وايده والراشدي صرت اخاف اذا بجه همام اخذه واصعد بي فوك اذا جان صفاء جوا وبالعكس..

اذا طلب شغله مني يا ويلي اذا اتاخرت ١٠ دقائق

الدنيا يكلبها عليه عبالك يكرهني ..

جنت مستغربة شبي وشنو الي تغير وصار هيج فجأة حاجته من ياخذها صارت بقسوة أشوف الموت يلا يكمل والمصيبة من يبتعد أشوفه منقرف مني أموت قهر ادخل للحمام اظل أبجي أباوع لنفسي بالمرايا مابيه خلل شبي لعد ؟

خابرت ماما شكيت الها ، ظلت تستغفر علمتني اغسل الغرفه بملح خشن وخل وسويتها اسبوع واني مرتاحه لا يصيح ولا يعيط هادئ بس هالمرة أبتعد عني صح يجمعنا سرير واحد بس أحسه بعيد عني

من يريد يتقربلي يجيني بلهفه بس من يندمج يرفع رأسه يخزر بيه وتالي يبتعد ويتركني ...

حرت شلون احتويه بس عجزت ، ملابسه جنت أني البسه بيدي و أني انسقله ، حبي اله عبر مرحلة الجنون هسه صار من يكعد الصبح ويريد يبدل ميقبل أني اتقربله أباوعله أيده ترجف من يبدل

شافني دااباوع عليه صاح بيه : أدبسززززز دتشووووفني مااكدر اتسولب غير تجييييين تساعديني شنو حضرتج متفرجة تعاااااالي بدليلي يلاااا

دمعت عيوني من غلطه عليه من الصبح وانوب همام زاد الطين بله كعد يبجي بسبب صياح ابوه وصوته العالي وظل يصيح : ماما ويصرخ

حرت بيناتهم ونظرات صفاء وخزراته أحسها دتفترسني وكأنه منتظر مني زلة انو أروح لابنه حتى يطيح حظي رحت لسرير همام شلته ونزلته

خليته يم رجليه بين ماابدل لأبوه و أرجعله سودة عليه ظل لازم رجليه ويبجي

وهذا الصخر الكدامي دنك مدري شعجب شاله وبوسه بدلت لصفاء وخليتله عطر ولبسته الساعه انطاني همام وهو داير وجهه مني منقرف ..

طلع لا حمداً ولا شكوراً قبل من جنت ابدله يخبلني بحركاته ومن يطلع يبوسني براسي ويدعيلي هسه لا يخزرني ويطلع ويطبك الباب حيل عبالك بس يريد يطلع وخلص مني .

طلع واني اخذت همام من الارض حضنته حيل

بعده يناشغ ، اخذته للجرباية نومته على رجلي

وظليت اهز بي ، نام وبعدها شهكاته .

رفعته لصدري ، شميته و بوسته ورحت خليته بسريره

ونزلت جوة .

اليوم جمعة وصفاء يفتح العيادة مالته الصبح واني ماعندي دوام ، نزلت جوة ، باوعت ساعة ب ٨ ..

شفت عمتي وعمي بالمطبخ صبحت عليهم

سألوني على همام كلتلهم نايم ..

عمه كالت مو سمعته يبجي شبي وذاك ابوه يصيح شبيكم من الصبح ؟

هزيت راسي بحزن وشعلت الطباخ شجاوبها

عمو طلع من المطبخ ، جتي عمه بصفي .

اكولج راح تجي أُختي ام اسراء ديري بالج لزمي نفسج مو تسمعينها حجي .

باوعتلها وقلبي مليان غيض منها همست بحزن

_ لا عمه اطمإني مالي خلك لهاي السوالف احبس نفسي بالغرفة واسكت لو اكولج اروح يم اهلي ماريد ازعج اختج بوجودي .

خليت ايد على ايد باحتجاج ؛ يااااا ترة اختي جايه ع الغدة ،  منو يسوي الغده لعد تدرين بيه اتعب اني ومابيه .

صار عمه حسوي من هسه الاكل واروح قبل لتجي ..

لا عيني لاااا شسوين منه هسه يبرد يصير محلو كتلج لزمي نفسج مو صعبة و هي  مراح تاكلج عيوني .

اكتفيت بالسكوت وقلبي يغزوه الالم ، طلعت هيه واني ظليت اهز براسي بعدم رضا .

وبلشت احضر للغده واجت ام اسراء بس اني ماطلعت الها بقيت بالمطبخ ، اجاني عمو كال طالع للسوك محتاجة شي ؟

كتبتله قائمة بشغلات محتاجتهم للمطبخ .. طلع واني بقيت سادة باب المطبخ واشتغل .

جتي عمه كالت متطلعين تسلمين عليها عيب ترة .

تنهدت ؛ هسه اغسل ايدي واجي ..

طلعت واني غلست منها .. اجه عمو جايب المسواك

كعدت اعزل بي

سمعت عمه تصيح ؛ تعالي ابنج كعد صعديله مابيه اصعد لو هم متجين لابنج  ؟؟

هنا انجبرت اطلع واسلم عليها خاصة هيه كاعدة بالصالة ..

طبيت سلمت عليها ردت عليه من ورة خشمها

ودااصعد لهمام

سمعتها ضحكت كالت الله يالنايم ورجليك بالشمس .

انداريت اباوعلها بصدمة ولازمة طرف المحجر مال الدرج وصوت همام بأذني ..

باوعت لعمه وجهه صوفر واحتقن ومتحط عينها بعيني وتتحاول تتجنبني وتدير وجهه عني..

الفيديو تصميم AbeerAL_Hussnawy

يتبع ..