تحميل رواية «شريعة العشق» PDF

شريعة العشق

نورا   ناصر

بارت ٥٦

‏وأدركتْ بوضوح أن حياتها قد قُلبت، وأنها وحيدة، غريبة، غير ضرورية، وكل ما حولها غير ضروري لها، وكل ما كان في الماضي قد انتزع منها، واختفى كأنما احترق وتبعثر رماده في الريح.

                ***

|‏ دفعات من الالم انبعثت بداخلي الاحساس بالرعب بدا يجتاحني ، شنو المخفي عني الله اعلم ، ربي الطف بحالي .

عمو هم جان ميفهم معنى كلامها سألها شتقصدين ام غيث ؟

جاوبته: مااقصد شي عيني أبو حسين ..

استمرت عيوني مركزة باتجاههم لحظات مرسلة للجميع نظرات حارقة

مشيت بهدوووء بس احس مثل الي يمشي ع االجمر ..

احس مخدرة حتى صوت همام يوصلني بعيد او تلاشى صوته واختفى عن اسماعي .

صعدت فوك اخذت همام لحضني وصفنت

وافكار اقتحمت مخيلتي من كل جانب .

ظل همام يلح عليه يبجي يريدني انزل بي .

اخذته ونزلت جوه ، كبل فتت للمطبخ وتجاهلتهم

كلهم ، حتى عمه وعمو صاحو عليه جيبي يمنه المطبخ

حار بس اني بغير عالم عنهم .

اخذته غسلتله وسويتله اكل وكعدت اوكل بي واصفن وافكر كلساع وعلى صوته وهو يصيحني

ماما ، انتبه واخلي اكل بحلكه ياكل وارجع اصفن وافكر .

للعصر اجه صفاء

انتبهت عليه  من شاف  خالته عقله عبالك طاير مو من عادته هالشي شبي هذا شديصير يربي عقلي حيوكف

مرات نحس بأشياء بس نجذب احساسنا ونكول لا ماكو هيج شي هاي دنتخيل من كد التفكير جنت حاسه اكو شي واني عرفته شنو بس جذبت نفسي

تعبني صفاء كولش تعبني ...

وراها يوم ثاني ، الصبح جنه موجودين اثنينا بالبيت وهو ماراح لعيادته ، ظل يحوس ما اعرف شبي ، حاول بقوه يدور عليه زلة بس ملكه ، رزل صيح ضرب همام مافتحت حلكي وسكتتت اريد اشوف وين توصل وياه ..

اخذت ابني ونزلت جوة ، شفت عمه مخبوصة

باوعتلي كالت روحي لاهلج صار هواي مرايحتلهم

جاوبتها لا عمه البارحة من جيت من الدوام رحت يمهم

لمن جبت همام من يمهم ..

كالت عمج مموجود راح لبيت بهاء يبقى يمهم

لتعبين نفسج ولتطبخين روحي يم اهلج مدام سبت اليوم .

حسيت نفسي ثكيلة عليهم اليوم ضجت حيل اخذت ابني وطبيت للحمام ، خليته واكف يم الغسالة

وبلشت اخلي الملابس لحتى ينغسلن ، سمعت صوت صفاء ع الدرج يحجي

اي اي هسه فد شويه واجي صبر صبر ..

صااح زهراء وووينج ؟؟

غمضت عيوني تنفست بقوة وجاوبته بصوت متكسر وحزين وغصة ؛ هياتني  بالحمام اني .

دفع الباب ودخل مخنزر عيونه ؛ روحي لبيت اهلج ..

شمرت الملابس شمر بالغسالة ورفعت نفسي باوعتله وبنفاذ صبر وبنبرة كلها شك جاوبته ..

_ ليش بلله اروح شكو عدكم انته وامك ؟؟؟

تقرب مني اكثر ، هيئته تموتني خوف ظليت اباوعله بفزع وذهول عبالك مديشوفني لا يشوف شخص يكرهه يموت منه

_ مثل ما اكوولج سوي مفهوم .

بعناد جاوبته ؛ لا مو مفهوم دا ابقى هنا اريد اشوف شعدكم بالله شنو الي ضامينه عني .

طبك اسنانه وكور قبضة ايده وضربها براحة ايده اللخ

بمعنى تهديد او مستعد للهجوم .

من بين اسنانه المطبقة كال ؛ زهراااااء .

خليت ايدي على صدره بده يحصرني ، دفعته وصحت بي ووخرررر ،  ضربني راشدي و دفعني حيل ع الحايط حسيت ضلوعي تكسرت هو ضخم وطويل واني عصفورة....

هو انصدم من فعلته ، فتح عيونه مرعوب ، اني كعدت بالكاع ع ارضية الحمام الرطبة ظليت ابجي وهمام يبجي يم راسي ، اذني انسدت ، رفعت راسي مشفته ، غسلت وجهي بسرعة  اخذت همام الي جان يبجي بهستيريا اكيد بسبب العنف الي شتفه من ابوه وهو يضرب امه خليت على راسي شال وطرت لبيت اهلي ..

رحت لبيت أهلي اثر ضربته على وجهي احاول اخفيها بشالي ،  ماما انتبهت ع صفناتي وكل مااصفن عيني تدمع اتذكر حبه ودلاله وهمساته اليه انقهرت مفتقدته

        سألتني ماما: شبيج بنتي شو مهمومه؟

أبتسمتلها : لاماما ماكو شي

_زهوره ع أمج هالسوالف ولج أنتي بنتي أنتي واخواتج حافظتجن من نظرات عيونجن احجي شبيج

بست أيدها : يوم ماكو شي شويه تلاغيت ويا صفاء لان ميقبل اجي يمكم

هنا حسيتها مااقتنعت بكلامي بس متريد تضغط عليه

همام نام ع رجلي شلته ورحت لغرفتي بس حطيت راسي ع المخده شبعت بجي تذكرت حبه اليه ودلاله ميقبل انام الا بحضنه

جنت اذا ازعل يكولي: الفراش معليه انتي زعلانه صح بس اتخبل اذا مانمتي بصفي احرك الغرفه ع رأسج

ضحكت هسه صار هو يطردني ...

بقيت بغرفتي ، الى ان اندكت الباب دتفتحه امي  مكدرت لان مقفول بالقفل صاحت من وراه

زهورة ماتردين غدة ؟

مسحت دنوعي بسرعة ولملمت شتات روحي ، ابتلعت ذرات من الهواء اريد اخلص حنجرتي من هالغصة المرة

الماليتها ، جاوبت ماما هسه جايه ، كعد همام على صوتي ، ظل يبجي يريدني ، تجاهلته جزء من الثانية وتوجهت للمراية باوعت لنفسي ، بده اثر الراشدي يختفي ، طبطبت عليه ومسحته دااحاول اوخره .

سمعت صوت بابا يم الباب مال غرفتي

هاي منو هنا زهورة لو بس هيمو ؟

الظاهر سمع صوت همام يبجي ، فركت عيوني بسرعة

جاوبته ؛ اني هنا بابا لحظة ، اخذت همام من الجرباية لحكته حينزل ويوكع ..

فتحت الباب وصار بابا كدامي اول مجيت مشفته

جان بالسوك سلمت عليه هلو بابا حبيبي شلونك .

هلا بنيتي واخذ مني همام وظل يبوس بي .

بداخلي فرحت همام شغله عني وماباوعلي ماريده يشوف تعابير الحزن على ملامح وجهي الكئيب والبائس .

طلعت تغديت يمهم اكلت كم لكمة دا اتظاهر انو اني طبيعية ، لكن بالي يمهم ، يم بيتنا هناك وافكر اريد اعرف ليش طردوني اليوم وشعدهم وشنو المضموم عني !!!

باوعت على عبير اكثر حزن مني ، لا تحجي لاتسولف لاتضحك لساهه حزينة على مها "الله يرحمها"

خلصنا غداء وكمنه ، بابا وماما اخذوا هيمو يلعبونه

واني دخلت لغرفتي ورجعت لافكاري ..

بقيت يمهم لليل ، العصر بابا اخذ همام وطلعه وياه

والمغرب جابه تعشينه بالليل وقررت ماارجع اخذت همام ورحت لغرفتي انومه ..

توني دااغفه دك موبايلي باوعت ع الشاشه صفاء درت وجهي باوعت ع همام خاف كعد من صوت الموبايل

اخذت الموبايل طلعت بره جاوبته ...

اول مفتحت خط اجاني صوته طرشني طرش : لج سسسسكط وليتي لبيت أهلج غير ترجعين لمهجومتج ليش تخليني اغردلج بهالليل ما كلتي اكو رجال ينتظرني ليش تكفريييييني بس هو مو صوججج صوج الكلب الي خلاج تولين

همستله بحزن : بس صفاء انت ضربتني وطردتني

_و أن يكن مية الف مرة كايلج مااتقبل تنامين برا غرفتج هسه جااايج

سد الخط بوجهي ظليت صافنه ع الموبايل بره بالحديقة واني ع صفنتي اندك الباب  طلعت فتحته صار كدامي بطوله الفارع وضخامته الي غطت كل شي خلفه ، باوع  لملابسي ورمقني بنظرة معناهه أني شكلت؟

جريت نفس بضيق ودرت وجهي منه ، تركته ودخلت للغرفه بدلت ملابسي ولملمت اغراضي وطلعت لكيته بالصالة وباوعت للساعة ١٠ بالليل ..

شال همام اخذه واني رحت دكيت الباب ع غرفة اهلي كلتلهم حروح لبيتي....

رجعت للبيت وياه امشي بصفه بس ولا كلمة حجيت وياه ، دخلت للبيت وانوب فتت ع الصالة  وانصدمت بوجود أسراء وامها كدامي ..

باوعت لااسراء تباوعلي وتضحك ...

التفتت ع صفاء وجهه ظل ينطي الوان بسرعة تنهد ودار وجهه مني  هو فهم ليش باوعتله تركني وصعد بسرعة ، لحكته بدون مااسلم عليهن سمعت عمتي تكول وراي

_العتب مو عليج العتب ع المدرسة والدكتور ماعرفوا يعلموج احترام الضيف

مجاوبتها بس أريد اوصل لصفاء داافتهم شنو هالمهزله فتحت الباب واني ارجف من العصبية صحت بي

: أكدر افهم ذني شعدهن هنا هاااا جاووووبني شنو الديصير تطردني من البيت ومن أرجع الكي حبيبتك القديمة هنا وخالتك هم فهمني شكوووو

تقدم عليه وهو مرتبك: اششششش صوتج الولد نايم ليفز

_هه خايف ع همام!!! ليش منو يومية يكفخ بي هاااا ابويه لو أمي لو أني من شوكت خايف عليه ؟

_كافي لجججججج أسكتييي ترى الخمج ع حلكج والله

_اي مو تايهتلك مو جنت بيت أهلي شعندك جيت ورايه هااا مو طردتني

اتقدم عليه وحط أيده ع حلكي وحجه وهو يصك ع اسنانه : لججج خطاااار شنووو اطردهم بعدين اسراء  مختنكة خطيه واهلها ديرفهون عنها شبيييج انتي......

_ وهي جايه لهنا شنو دتبحث عن بقايا حبها وبعدين من شوكت أهلها يرفهون عنها مو قبل جبروها تتزوج ابن عمها كلامك كله ميقنعني

همس: طبج مرض عساج عمرج مااقتنعتي أمشي انخمدي لا اخمدج بيدي والله

تركته ورحت اخذت همام بحضني وحاولت انام يلا اول وتالي الحقيقة تنكشف أني حاسه أكو شي والا شبي هيج تغيير فجأة ...

عبير : جنت تعبانة كلش اباوع للعلبة مالة مها وادير وجهي اشبع بجي

ماكدر حتى افتحها اعرف راح انقهر اكثر ..

دخلت عليه ماما للغرفة تأملتني لحظات ، حسيت بنظراتها عليه ، حجت بصوت ناصي : زين أني حروح لبيت عمج كريم گلبي ديوجعني ع كرار أروح اشوفه تجين ويايه ؟

كمت واني امسح دموعي الي حفرت خدي بحرارتها وغزارتها جاوبتها بسرعة ؛ اي اجي ..

نزلت ماما واني كمت بدلت ولبست شالي بعد استشهاد مها تحجبت شفت الدنيا متسوى ع شنو أني مطلعه شعري واصوم واصلي نزلت لماما لكيتها دتنتظرني هي ومريم وبابا رحنا لبيت عمو ..

دكينا الباب طلعتلنا هند بنت اخت مرة عمي .. رحبت بينا وابنها يمشي وراها ، اخذته بوسته ونزلته ..

دخلتنه للبيت ، سلمنه عليهم وسألنه عن كرار

راحت هند صاحته ونزلت ...

اجه ظهره محني ولحيته طولانه عيونه يشع منها الحزن ، اووف كرار شسوه بيك فراك مها ..

سلم وديريد يكعد ماما اشرتله

يكعد بصفها  هو استجاب الها وكعد يمها

ظلت تحجي وياه بصوت ناصي...

هند بعد وفاة مها رجعت كعدت وياهم هم رادوها يمهم لان بيتهم صار مينطاق من الوحشة والحزن وكرار بعد وفاة مها صار أنسان محطم بمعنى الكلمة ، ضعف جسمه لان اكله قل و أبتعد عن الكل مو ذاك كرار اليضحك ويشاقي ..

  بهاي الفترة جانت عدنا امتحانات الفاينل وهند طلبت مني ابقى يمهم شويه لان الكل ضايج ومقهور ..

لذلك بقيت وطلبت من بابا يجيبلي ملازمي حتى اقرا .

بقيت يمهم سوينا العشه اني وهند وخلينا صاحوا كرار مقبل يجي ، عمو اشرلي روحي صيحي .

صعدت فوك  واني اتذكر مها شكد جنت اجي اصعدلها فوك خاصة لمن جانت حامل جنت اخابرها اكوللها راح اجيج تكولي اني فوك ومابيه انزل صعديلي .

بلعت الغصة كوة ، الف مرة ترددت ما اصعد بس حاولت ووصلت لغرفتها ، ضربت ع الباب بخفة بيدي الترجف بصوت يكاد يكون مسموع .

واني دا اضرب ع الباب انفتحت لان بس مردودة الباب مامسدودة بالقفل مالتها ، انفتحت وكفخت بحشمي ريحة الغرفة عبالك بعدها بيها ريحة مها .

صرت اشهك لا إرادي واديه على حلكي اريد اكتم شهكاتي ماريد احد يسمعها ، احس دمي يحترك وكلبي دينعصر ومدفوعة برغبة ماكدر اتحكم بيها اريد افوت وابجي هنانه بلكي ارتاح .

اخذتني رجليه لسريرها لمن جنت افوت عليها وهيه جانت كاعدة هنا لازمه بطنها وتنتظرني ، عبالك داشوفها هنانه وبهاللحظة كاعدة وتباوعلي بعيونها البريئة وملامحها .

تقدمت من السرير ولمن وصلت يمه وكعت على ركبي وشهكت شهكة قوية مع بكاء ممزوج بأنين مؤلم ، عبالك هسه سمعت خبر استشهادها .

خليت كصتي على السرير وابجي بحركة ، حسيت باحد ديقترب مني ، باوعت شفته كرار ، ظليت اباوعله بتعب وارهاق متوسل ، وهو بنظرات جامدة تتأملني .

راقبته بعيون كلها دموع  نزل للارض وكرفص  بصفي مد ايده للسرير وكور قبضة ايده .

حسيته بلع ريك ؛ شسويتي بيه عبير من ماتت لهسه اني ماداخل للغرفة ، على صوتج جيت .

شهكت اكثر واني اكول اسفة بصوت كوة يطلع من البجي ...

ويه ما تتجول نظراته بالغرفة ؛ تدرين الغرفة بعدها على لمستها وترتيبها حتى هاي الجرباية بقت على ترتيبها قبل لتطلع رتبت الغرفة وطلعت وبعد مارجعت بعد مارجعت عبير ماااارجعت.

كلت اووووف بصوت كله بجي وظليت اناشغ ...

وهو ضرب ايده على السرير ، كمت على حيلي واحس قلبي حيطلع من مكانه وركضت جوه نزلت اركض وابجي وطلعت للحديقة اشم هوا احس راح اختنك ..

اشتميت هوا دقايق ودخلت غسلت وجهي ورجعت يمهم ، لكيت الاكل على حطته وبعدهم الكل حزين وضايج ، كعدت يمهم سألني عمو عن كرار هزيت راسي

وكوة اكلت كم لكمه وهم هم وبعدها رجعنا الاكل مثل ماهو للثلاجة .

بالليل كعدت اقرأ بحديقة بيت عمو شفت خيال فوك رأسي

درت وجهي دااشوف شكو شفته كرار جان ديبجي ومركز نظره ع ملازمي من شافني باوعتله مسح دموعه واجه كعد مقابيلي

حجه بصوت تعبان ومكسور : تدرين عبير المفروض هسه هي هم دتحضر للفاينل ودتمتحن وجان صارت أحلى خريجة بس اخخخخخخ الانذال حرموا مني الفرحتين .

خليت اديه على وجهي ..

اختنك بعبرته باوعلي : كملي دراستج وفوتي نامي حارة هنا لج او كومي أدرسي بالاستقبال ليش كاعدة بالحر .

مسحت دموعي وهزيت راسي كوة طلع صوتي

_ هسه افوت بس دقايق ..

يريد يفوت رجع سألني ؛ فتحتي الامانة شفتي شنو بيها ؟

هزيت راسي ؛ لا كرار والله مجاي اكدر والله ..

هز راسه بتفهم وطب جوة ،  ظليت أباوع مااعرف شلون أواسي أحس نفسي عاجزة اواسي نفسي لو اواسي هو محتارة وعاجزة ومكسورة بنفس الوقت

كملت دراسة دخلت للصالة لكيته ديسمع اغنية حسين الجسمي (فگدتك يااعز الناس) جان يسمعها ويبجي بحرگه تركته براحته وفتت يم هند نمت .

                   ******

زهراء : بعد مرور فترة ، صفاء تخربط فدمرة ومنتهي يذب من رأسه هو بهالفترة كولش تعبان الاكل ميبقى بمعدته ابد جوا عيونه اسود شفايفه بيضه صايرة ووجهه اصفر شاحب منتهي وضعفان كولش

ركضت عليه : شبيك صفاء حبيبي ؟ سندته كومته غسلتله وهو رغم ضعف بس ثكيل وطويل واني يمه كتكوته بالكوة كدرت اغيرله ملابسه لان تلفهم رحت سويتله كلاص لبن وانطيتهيا ..

باوعلي: منا وجاي باب البيت متخطييي افتهمتييييي لا اهلج ولا أي بشر تكابليني وتكعدين أي مكان مترووحييين

_صار بس لتصيح واشرب اللبن  ضغطك أكيد نازل

صفاء بهالفترة انتبهتله ساعة ينفرني وساعة يتخبل اذا ميشوفني كدامه تعبت حرت شسويله من اتقربله ميريدني واذا أبتعد عنه يزفني

مرة من المرات جنت نايمه حسيت ع أيده ديمشيها ع جسمي بلمسات جريئة هو صارله فترة كولش طويلة ممتقربلي تركته براحته .

من أبتعد عني اخذني بحضنه وبسرعه غفه رفعت رأسي وسندته بكف أيدي ظليت اباوعله مررت اصابعي ع حواجبه وخده فز باوعلي خزرني أبتسمتله قبل ليحجي بسته من شفايفه لان عرفت حيرزلني ..

نتر بيه: نااامي وجرني وقيدني بحضنه غفيت

كعدت الصبح قبله صليت ونزلت حضرتله الريوك سمعت صوته ديتقيئ صعدت أركض حتى وكعت ع الدرج احبه واخاف عليه اعامله مثل أبني همام بالضبط دخلت للغرفه لكيت همام واكف بباب الحمام ويبجي والمميه بحلكه بس شافني ظل يشرلي ع ابوه

_اووووع ...

دخلت للحمام شفته صفاء حتى خشمه طاك دم اجيت دااغسله دفعني : دوخخخرررري لجججج كم مرة كلتلج لتتركيني وتنزليييين حيوووووانة أنتي متفتهميييين

انقهرت من كلامه بس كتمتها بداخلي

_ميخالف عمري حقك عليه والله نزلت دااسويلك ريوك لان انت نمت بدون عشه كلت أكيد يكعد جوعان

مدلي أيده دااكومه لزمني من ايدي ،  وكعت بحضنه هو ثكيل مااكدرله تفشلت

كال : لو صايح همام يكومني مو  احسن

وهمام ماصدك بس سمع أسمه ذب مميته ولبس نعاله واجه يركض وكام يجر بشعري ديريد يوخرني عن أبوه ميقبل يغااار انوب دااريد أكوم هذا كطع شعري لزمتني الضحكه وصفاء خربان ضحك ع المنظر

لزم همام: وخرر بابا خطيه ننه شعرها كطعته ولك مو هيج ..

بالكوة كمت وهذا همام خازرني مثل أبوه من يخزر بالضبط

سألت صفاء: اكولك منو سواله مميه

_أني منو يعني كعد يبجي عبالك بلبل ديغرد ملعون الوالدين نايم ودفيان بفراشك وشبعان نوم شكو تكعد تلطم ولج غير اتخبل من يكعد يبجي

شلت همام وبسته لان برطم عرف كلام أبوه عليه باوعت لصفاء: حبيبي طالع عليك وع خالته عبير اشو انت من تكعد كصتك ميكصها السيف وتتعارك ويا ذبان وجهك وذيج تكعد تدردم عبالك بايكين ورثها

شفته ديريد يكوملي طلعت اركض من الحمام حضرتله ملابسه وهو سبح وطلع بدلتله بيدي ونزلت وياه جنت اخاف اتركه مااريده يعصب كمل ريوك وراح للدوام واني صعدت كملت نومتي....

                           ****

عبير :  عدنا امتحان لدكتورة كلش متسلطة يعني شاطرنا بالكوة يحصل عدها درجة نجاح هي جبيرة بالعمر وممتزوجه وتتخبل أذا شافت بنية مخليه مكياج او مصبغه اظافرها او كاشخه ترزلها كدام الولد رزالة غسل ولبس

واتذكر بيوم اجيت للمحاضرة مالتها متأخرة ورا المحاضرة بدقيقتين هو الحد الاقصى عشر دقائق بعد المحاضرة الاولى وممنوع ندخل ...

دكيت الباب وفتحته باوعتلي من فوك ليجوا عبالك دتفصلني 

اشرت بأصبعها عليه : أنتي شنو هاللبس ووين جايه عدنا حفلة لو حضرتج رايحة للزوراء

جاوبتها بأستهزاء: للزوراء!!!!

وباوعت ع ملابسي وملابسها هي جانت لابسه قميص ابيض وتنورة بيها مية لون وربطة بيضه بعدني ممكمله كلامي جان أسمع صوت أسامة

_دكتورتنا عجل أنتي ماتحبين اللبس الحلو وروحج يابسه يبويه غيرج روحه طريه وخضره والبنت بعدهي شابه انتي عليش محروج دمج ول بويه شلون سالفه هاي من الصبح ادري انتي تنطين محاضرة خاصة بالتعليم لو باللبس وبعدين شبي لبسها وانتي جايه تحجين عليها من صباحيات الله

باوعتله الكل صافن عليه هو رزن وثكيل وابد مايوم مدافع لبنية واصلاً الاغلبية يتمنون يحجي وياهم بالاضافه الى انُ هو كولش شاطر وعنده حضور قوي

جاوبته الدكتورة: وانتَ منو طلب منك تتدخل شنو اختك خطيبتك هي يلا اتفضل اطلع برا

كام هو وكف وجانت سبحة بيده فرها ومن وصل يم الدكتورة خزرها وكاللها: سهلة ان ماجبت العميد عليج فلا أبن ابوي وصل يمي باوعلي وديطلع جان هي تصيحه

_اوووكف اخذها وياك وروح دافع عنها يم العميد

جاوبتها: اكولج دكتورة اذا انتي عندج عقد نفسية تعالجي ومااسمحلج تدخلين بلبسي اوك بابا وماما قابلين بي انتِ شكو ومنو طلب رأيج انتي وظيفتج هنا تنطينا محاضرة وتطلعين مو وظيفتج تدخلين بلبسنا تمام وبعدين شلابسه أني هي سترة وبنطرون لو تريديني ألبس تنوره كبس مثلج

عاطت بيه: اطلعيييي برااااا قليلة الادب شكد صلفة ...

خزرتها : هسه أعلمج منو قليلة الادب طلعت من القاعة نزلت الدرج اركض واسامه يصيح ورايه

_اكفي بويه شجاج انا احجي ويا العميد واذا مااخذت حكج ازين شاربي كدام الكل ..

وكفت بنص الدرج باوعتله .. لحكني ومشه بصفي كلما اسبقه بخطواتي يجي يمي ..

رحنا للعميد دخلنا لكيت بابا كاعد يمه بابا قبل فترة صار معاون العميد للشؤون العلمية ولحد الان محد يعرف هذا ابويه من شافني استغرب ظل يباوع ع اسامه ويباوعلي

عاد اسامه حجه كولشي للعميد وبابا مبين من نظراته انزعج من كلام دكتوره أسماء

العميد: باباتي اعتبريها امج ومحبت لبسج

_لا العفو دكتور ماما اذا معجبها لبسي  تحجي ويايه ع انفراد مو ترزلني كدام الكل شنو طالبة أني لو الميري مالتها وتجي ترزلني بهالشكل

انتبهت بابا يباوعلي ومبتسم

العميد حجه ويا بابا: دكتور تحسين بس اصعد ويا بنتي وأبني احل مشكلتهم واجي بابا كام وكف اجي وياك دكتور

صعدنا للقاعه وهي جانت دتعيط من دخل العميد والمعاون واحنه وياه وجهه صار اصفر سألها العميد ع شنو الصياح جاوبه ولد من الناصرية

_دكتور جاي تصيح ع هاجر لان مصبغه اظافرها ميخالف دكتور احنه بالمدرسة وكلشي ممنوع هنا

من حجه هيج الطلاب كلهم ضحكوا عاد العميد حجه ويا الدكتورة وبابا والطلاب كلهم طلبوا من العميد يغيرها محد يريدها وبما أنو هي وبابا نفس الاختصاص صار بابا بديل عنها يبوووو انلاصت عاد بابا شلونه ايده والدرجات

بلش بابا بالمحاضرة ومن خلصت طلع واني نزلت للحديقه داادور زمن سمعت صوت اسامه ديصيحني التفتت عليه كال: لتضوجين يولي هي هاي مخبله وتضوج من البنوات مو ادور انتي

_نعمممم!!

_ابتسم لاماكو شي بعده واكف ويايه شفت اكو ظل صار واسامة مركز نظره ورايه

التفتت لكيت قسور ديقترب منه وجان ديخزر بأسامة

يتبع ..

الغلاف هذا خاص لعبير وقسور وعن مستقبلهم بالرواية ..

تصميم AbeerAL_Hussnawy

بنات اريد تنتبهون على شغلة اكو مقاطع او مشاهد او مواقف تصير فلاش باك ومرات هواي امرر بالاحداث يعني امرر اشهر او سنة او هيج شي البارحة احد الاخوات ببيج قصص ليل وعشك كالت اسراء لساهه بالعدة وملحكت ارد ع تعليق مادري وين صار لا وانما هو دامرر الايام وامشي الاحداث ..

تحياتي الكم 😘❤

#شريعة_العشق

بارت     ٥٧

نورا     ناصر

اللتفتت اشوف  قسور يخزر بأُسامة ، باوعتله لابس قميص اسود وبنطرون بيجي ، اللون الاسود منطي نشعة لبشرته البرونزية ، ظل مركز نظره على أسامة وقبضة ايده يضغط عليها بقوة لدرجة عروك ايده صارت باينة .

اجيت اسلم عليه ، قاطعني بنبرة اشبه بالنتر تقرب ؛ عمتي دتتصل عليج ومتردين ظل بالها اتصلت بيه وجنت قريب عليج كلت أمر اشوفج خاف بيج شي بس الحمدلله عرفت بشنو ملتهية

جان يحجي ومركزه نظره ع أسامة ابد مباوعلي

جاوبته: اي جانت عندي مشكلة ويا دكتورتنا والموبايل صامت ..

ءءءااااااعرفك اسامة زميلي .....

مد أيده وسلم عليه انتبهت ع أيد قسور لزم كف أسامة بقسوة وتقرب عليه شاوره بكلام ماوصل لاسماعي وخلاني بحيرة ،  أسامة باوع بعيونه  بكل برود وأبتسامة جامدة غير مهتمة ..

وخر من اسامة و باوعلي رافع تك حاجبه

وبنبرة امر صارمة : عود جاوبي امج لتقلقيها عليج مفهوم ؟

التفت وديروح يطلع مشيت وراه بسرعة و لحكته

واحجي : اخذني وياك مالي واهس اكمل دوام .

وكف باوعني ثواني بتأمل وهز  راسه بقبول ومشى .

سألته واني احاول اسبقه بخطواته .

شكوو شبيك هيج تباوعلي ؟

رجع دار وجهه عليه باوعلي بنظرات حيرانه ووياهه حسرة مكتومة هواي ..

_ هذا دوم يوكف يمج ؟

عضيت شفتي ووراهه بلعت ريك بصعوبة

لو يدري خطبني ورفضته شيسوي ؟؟؟

صفنت باوعلي ؛ ها صفنتي ؟

بعفوية كتله؛  غير زميلي ؟ شكو بيها اذا حجينه ؟ يمكن دنحجي بأمور الدراسة ليش بالك شطح وراح لبعيد ؟ 

ها كتيلي زميلج مو ؟ وعوج حلكه ..

كلت هففف واستمريت امشي ويا لباب الجامعة مشيت أمشي وياه الطلاب كلها تباوعلنا مدري شبيهم

هو يمشي واني أمشي بكل بطئ وهو خطواته واسعة واصلا رجلينه طوال واني نيلز

التفتلي

_متمشين شبيج دتكسرين بيض فضيييني

_والله هو هذا مشيي انت شبختك جبيرة

رجع عليه بدون ميحجي ظل يمشي ع كيفه ثواني والتفتلي: اني لو أمشي مثلج اظل ساعتين يلا اوصل

مجاوبته بس باوعتله بنظرات مبهمة ، وصلنا السيارة صعدنا كعدت بصفه بالصدر وهو كلساع يباوعلي

ببلاهة سألته شبيك ؟

بابتسامة جاوبني ؛ حلو الحجاب عليج .

هزيت راسي ، عصرت ايدي حسيت بحرارة بخدودي .. هو حرك السيارة وعينه ع الطريق

سألته بنبرة سريعة  :شنو شاورت أسامة

التفتتلي بسرعه خزرني: موو شغلج لججج

رفعت حاجبي بتحدي وسكتت عوجت حلكي ودرت على الجامة اباوع للطريق .

اجاني صوته : شخبار صفاء شو مدااشوفه هالايام خيره مختفي؟

_ماادري والله .

_هاا نسيت اني اصلا سألت الشخص الخطأ  هو انتي شتدرين حايرة لو تنامين لو تقرين لو تتعاركين

باوعتله صفح هو رفع اديه وأبتسم : اسف يمي عيوني

جاوبته؛ كلامك صاير يشبه كلام امك بالضبط .

خله ايده عود اتجه والتفتلي ؛ لعد غير ابنها اني .

حجه هيج وركز ع الطريق  .

رديت باقتضاب ؛ اي صاير نسخة مستنسخة منها بس تطك بالحجي وتشمر بسامير .

ضحك بصوت عالي وبنبرة لطيفة ؛ يا الله شكد احب سوالفج شوكت تصيرين اليه واشبع من هالسوالف ؟

_ رجعنا قسور رجعنا ؟

_ اي لج وربي ماراح امل ولا اكل اله لمن تصيرين اليه

_ وامك ؟

_ شبيها امي بعد ؟.

_ قسور انت ناوي تدمر حياتك ؟ تسلب راحتك ؟ راحتك مو وياي قسور افهم هالشي .

حسيته عصب ؛ بطلي تكولين هالشي كتلج مية مرة راح اعزلج عنها .

_ قسور هاي امك حتى لو تعزلني عنها لابد ننجمع بيتكم او بيتنا الي تعزلني عنه وتصير حزازيات ومشاكل .

_ قابل شكد ننجمع هو بالمناسبات اعياد هيج شي كلها ساعة زمان وبعدها نرجع لعشنه .

كال اخر كلمة وباوعلي مبتسم ..

_ اي هسه خلي اخلص كلية والله كريم .

_ يعني ما أيس ابد ؟

_ ما اعرف ..

_ لعد منو يعرف امي ؟

_ كولشي ولا امك .

_ دنجبي عااااد .

_ هاي شبيك قسور لتغلط ...

_ اي مو تلحين امك وامك ..

باوعتله مخنزرة ومن التفتت عليه فكيتها رفعت حاجبي كاتمة ضحكة .

هو على وضع ملامحي ابتسم ورجع عينه ع الطريق .

وكف السيارة نزل اشترالي حبشكلات من هاي الاحبها "جبس عصير نستلة كالكسي"

باوعت بالعلاكة ورجعت باوعتله ديحرك السيارة

كتله ؛ شمدريك ؟

_ شنوو ؟

قبل لأجاوبه جاوبني يضحك ؛ احساسي ...

وحرك السيارة ، جنت اريد اسأله شمدريك هاي الشغلات احبها بس هو فهم عليه ..

وصلنا للبيت ودعته ونزلت ، تلكتني ماما رزلتني : انتي وينج اتصل بيج متردين بله احتاجيتج بشغله مهمة متكولين خاف أمي بيها شي ماتت شنو انتي المن شايله الموبايل لعد

_أمي دوام ولازم اخلي صامت بوقت المحاضرة ..

_حبيبتي ظل بالي عليج شفت الصبح طلعتي مالج خلگ فدووة بعد لتهملين موبايلج

_صار صار

_شو راجعه بوقت خير

حجيتلها الصار وصعدت بدلت ونزلت تريكت وكمت نظفت البيت وسويت غده لان هي جانت بيومها تعبانه ومريم بالدوام ..

طلعت داارش الحديقه سمعت همام يبجي وأمه تصيح

عليه وهو يهددها ببابا: دول(اكول)  لبابا عليت (عليج) 

خربت ضحك صحت عليها من السياج: لجج زهراء شعندج ويااه أني اعلمج ..

هو بس سمع صوتي الحيال زاد بالبجي ويصيح عليها

حاجيته ؛ حبيبي جايتك هسه اخذك خلي تولي معليك بيها ..

انداريت يمهم رحت جبته وأمه خربانه ضحك عليه وهو خاتل بحضني ميريدها جبته لبيتنا واجيت غديته ونومته ..

زهراء: مرت الايام والاشهر تخرجت كعدت بالبيت ، صديقاتي تعيينن او اشتغلن بمختبرات اهليه او مستشفيات ، الا اني قررت الزم بيتي وزوجي وطفلي ما اعرف الايام شضامتلي ، ما اضمن تصرفات صفاء لان احسه مو بوعيه هالايام ومتغير ، بالاضافة الى اسراء وامها ورشا رجليهن خفت علينه وعلى بيتنا هالفترة وقلبوا عمه وعمو عليه ، حتى رشا الي جانت ممنوع تفوت للبيت صارت تفوت بكل حرية الظاهر لعبنها صح واني الي الله ....

حياتي ويا صفاء مد وجزر يوم زين ويوم يخلصها يتعارك ويايه وصلت بي المرحله ميتقبلني أبد واذا تقربلي وكمل يركض للحمام يتقيئ جنت اتمنى الموت ولا اشوفه هيج ينقرف مني

كام مني وطبع اثار قساوته عليه ، لملمت روحي

واني ميتة من الالم ركض للحمام وصوته يوصلني ديتقيء ..

طلع من الحمام يتنفس بصعوبة ويسند نفسه بالحايط ولازم بطنه المنفوخة من فترة والسبب مجهول النا

اجه كعد ع طرف الجرباية وانفاسه مسموعة .

بصوت راجف : صفاء اذا انت هيج عندك قرف مني لتتقربلي انت دتأذيني والله دااموت من تسوي هيج مااريد شنو كوة هيي لتتقربلي لخاطر ربك ..

لزم رأسه بأديه باوعلي: زهراء مو بيدي اتمناج واريدج بس من اوصل يمج أشوفج وحش ساعديني ولج أريدج وبنفس الوقت مااريدج من تبتعدين عني أحس نفسي طفل ومضيع امه ومن تقتربين اختنكككككك...

نبرة صوته صارت عالية وبعصبية ، خلتني ارجف

يمه تيبلام مد ايده وشمره ع الكاع تكسر ، فزيت وشهكت واني ابجي ، خايفة ، دار وجهه عليه

نظرات عيونه تخوف حمرة ، مد ايده الي  جرني بقوة وكعدني يمه...

ظليت اباوعله مرعوبة مرعوبة واشهك ..

همس بتعب ؛ لتخافين ما اذيج ..

طمنتني كلماته ،  اخذت رأسه حضنته لصدري

وظليت اقرأ قرأن ...

غمضت عيوني ودموعي على خدي ، ظليت اتمتم بالايات يم اذنه ، حسيته اختنك كوة يتنفس ،دفعني بكل قوته..

وكعت من الجرباية للكاع تأذيت حيييل بس محجيت كتمت آلامي ، عضيت على شفتي حسيته بألم قوي براحة ايدي ، باوعتلها كلها كزاز .

رفعت راسي شفته متمدد ع  الجرباية ولازم راسه وصدره يهبط ويرتفع بقووى وبتعب ومغمض عيونه .

اباوعله ومن اعماقي ينبثق الحزن والالم ، شسوو بيك الله لاينطيهم ..

رحت غسلت ايدي خليتها جوة المي وظليت اطلع الكزاز الناعم الي نبت بيها ، سبحت و رجعت للغرفة لكيته نايم وكلساع يفز يفتح عيونه يتهد بفزع واحد موجوع ومألوم ويرجع ينام .

من اشوفه هيج اموت قهر وحسرة اتمنى الالم بيه ولا بي ..

نظفت الكاع لان صارت كلها كزاز خاف يصعد همام وينجرح ، نظفتها بهدوء عن لا يكعد صفاء لان بسرعة يكعد ع الصوت .

ايدي بعدها ينبع منها الدم ، رحت عقمتها و شديتها

كعدت على طرف الجرباية اباوعله واتامله وعيوني كلها دموع ، امسحها تنزل غيرها ، دموعي حارة تحفر خدي وتجوي بسبب قوة الالم وشدته  .

أذن المغرب ، كعدته حتى يصلي فز يباوعلي مخنزر وبياض عيونه محمر ، صاير بلون الدم ، وبالكوة يله صحصح و كام...

بكسل وامتعاض ..

راح توضى واني صليت ، اجه فرش سجادته ديصلي  لاحظته من ديصلي كل شويه وخربط ويرجع يعيدها تالي عصببب

عاااط : مداااااااكدرررر حتى سووورة الفاتحة اخربططططط بيها شديصيرلي ربيييييي كلشي ولا صلااااتي اختتتنكككك

همام جان ديلعب فز كام يبجي ركضت شلته وخليته بحضني وحضنته وهو شاف همام ديبجي لو تخبل اجه عليه لزمني من أيدي حييل

_هذاااا يخااااف منيييي مووووو احجييي؟

بخوف رديت ؛ لا حبيبي مو منك بس هو يخاف من الصوت العالي طالع عليه

سكت شلت همام نزلته جوه وصعدت لكيت صفاء ساجد ويبجي بصوت ناصي ويحجي: دخيلك ربي ساعدني لا زوجتي دااتقبلها ولا أبني ولا حتى أكدر اصلي شديصيرلي اللهي دخييلك أني عبدك الحقير ارحمني برحمتك الواسعة

متقربلته تركته وكملت صلاتي ونزلت سويت عشه.....

مرت ايام ، خالته كثرت زيارتها النا جنت حاسه وراها شي مو خاليه أبد من تجي جانت تجيب وياها اكل عود لاختها المشكلة حتى عمه تغيرت عليه وبالطابه والطالعه ترزلني اختنكت من البيت ومن نفسي ومن حياتي ومن كل شي ..

ساعات اكعد وحدي واظل أبجي والمصبرني هو همام من يشوفني أبجي يجي يحضني ويمسح دموعي لو يكابلني ويبجي ويايه....

رحت يم اهلي كضيتها صفنات وهم يلعبون ويه همام

عبير وماما وحدة تباوع للخ ونظراتهن تتساءل ومحتارات .

فززتني من صفنتي عبير وهيه تسألني ؛ شكو شبيج حتكضيها صفنات احجي ويانه سولفي غردي .

وخرت ايدي من جوه خدي ووياهه تحسرت دااحجي ماما سألتني ؛ شبيج يوم بعده صفاء تعبان ؟

_ اي والله ماما بعده خبلني..

_ شغلي سورة البقرة على طول بغرفتكم وغسليها بمي وخل وملح .

_ يوم دا اسوي هيج والله دااسوي يرجع زين يوم يومين ويتخبل او مرات حتى من اشغلها يختنك ويعصب ويريد بس يضربنه .

عبير ؛ بصدمة الهالدرجة صدك والله ؟

هزيت راسي ، ماما كالت ميقبل يروح شيخ سيد يقرا عليه ويعالجه ؟

تحسرت مره كتله عصب اجه يضربني ..

عبير ؛ وانت ليش ساكتة على هالوضع هذا ..

_ شسوي دا احسه مو بوعيه وحتى مريض الاكل ميبقى ببطنه ، بطنه منفوخ على طول ، شعره ديوكع ايده نهار كله ترجف ، اجازاته كثرت بس ميكعد بالبيت احسه منهزم مني اني لازم ابقى وياه معندي غير خيار ابد هذا حب حياتي خو ما اتركه .

_ احجي وي بابا عمامي اخوته خلي يشوفوله جارة ..

_ هو مرات زين مرات لا بس اكثر اوقاته مو زين .

_ عمه مدتشوف هيج حالته ؟

_ اي تشوفه واني هم كتلها كالت هو طبيب ويعرف وضعه شنو اكيد يعالج نفسه .

_ هيه هاي هم محسوبة ع الامهات شجاهه .

ماما ؛ عبير شنو هالحجي هذا ابنها واكيد هيه دتشوف بعينها وتعرف شديصير وياه واكيد مقهورة عليه .

كامت عبير ؛ اكوم اقرا ..

كامت واني كعدت يم ماما ، تغديت يمها لان بوقتها جان صفاء متخبل عليه وكالي روحي لاهلج انت وابنج .

الظهر صعدت لعبير ، شفتها لازمة نفس العلبة ودتبجي ومنهارة ، اخذتها منها ونترت بيها حتموتين نفسج كلما اجي اشوفج لازمتها وتبجي افتحيها وفضينه .

غطت وجهه باديها وظلت تبجي بحركة ، وتردد ما اكدر مااكدر مو هسه خلي انسى ولو ما انسى خلي اتعود على هالوضع .

بقيت اهدي بيها ميفيد ، اخذت العلبة ونزلت جوه ضميتها يم ماما عنها ..

العصر قررت ماما  تاخذني لبيت خالتي بالدورة كالت غيري جو حتموتين نفسج بالبجي وقلة الاكل والضيم .

وافقت اني وخليتها تخابر صفاء تترخص منه ..

ظلت تتصل بي لوين يله جاوبها واخذت منه النوافقة ورحت وياهه ورجعنا بالليل .

صعدنا فوك اني وهمام ، رأسا راح الغرفة المقابيل غرفتنا ، رفع رجلي وديفتح بالمقبض مال الباب اشو الغرفة متنفتح .. تفاجئت وقلبي نغزني .

جريته من ايده ورحت لغرفتي بدلتله وبدلت ملابسي ..

واستمرت الغرفة مقفولة ، وراهه بأيام كعدت من النوم ع صوت ضحك عالي باوعت صفاء نايم ع بطنه غطيته نزلت جوا فتت للصالة

لكيت أسراء وامها ورشا سلمت عليهم وكعدت

سألتني خالته: لعد وينه صفاء ترى اليوم جمعه ماكو دوام

جاوبتها واني مطايقتها: نايم

_الساعه عشرة شوكت يكعد لعد؟

_حبيبتي اني مكايله شي هسه يكعد من النوم وشوفنه قابل طاير؟

جاوبتني أسراء: أبن اختها وجايه تشوفه أنتي شكو؟

ضحكت بصوت عالي: أني شكو شنو هاي لازم ناسيه هو رجلي وأبوه أبني صبرك ربي من صباحياتك نصبح ع هيج 

مكملت  اجانه صوت صفاء وهو منعس : صباح الخير

سلم ع خالته واجه دور  اسراء يسلم عليها

تقربت منه باسته بخده .

أحس عقلي طار ثواني انفتحت عيوني احس قلبي انمدتله ايد تعصره عصر وتخلي ينزف لحد الموت!!!!!

تريد تبوسه ع الخد اللاخ  دفعها ومخلاهه باوعلها وخزرها ، مقابل على تصرفها ، ظلت تباوعله محرجة وعيونها دتاكله بنظراتها .

كورت قبضة ايدي احس قلبي ينزف واني اباوعلهم بحقد ، التفتتلي  تباوعلي بكل حقارة ، خزرتها ولو بيدي اشرب من دمها ومايشفي غليلي .

انتبهت من صفنتي صفاء ديحجي ويايه: زهراء  جووعاااان سويلي ريوك

انتفضت ؛ صار

دااريد اكوم جان تنط رشا :لالا هسه أني واسراء نسوي ريوك للكل

جاوبها صفاء بمزاجيه ؛ لااااع كلت زهراء تسوييي باوعلي : يلا شبيج صافنة كومي ..

كمت للمطبخ لحكتني رشا واسراء

كالت اسراء: اشبعي منه مؤقت وداعتج الا اطردج منا وتطلعين وانتي الممنونه

مجاوبتها اجت دغتني : انتي هيييي مو دااحجي ويااااج ليش متجاوبين

عوجت حلكي وجاوبتها: مو حتى اشوفج يلا اجاوبج بس اني مدااشوفج كدامي ليش دااجاوب حشرة ونكرة ودفعتها وطلعت من المطبخ الحار وصحت صفاء يتريك

شويه واجه ظل صافن سألته : شبيك متأكل؟

_وكليني

كمت اسويله لفات اله ولهمام ...

اسراء بالطالعة والنازلة تخزر بيه .. خلص ريوك وكال روحي لاهلج .

نترت بي ماروح مو بكيفك هالمرة واذا اروح بعد ماارجع واكول لبابا وعمامي عليك يطرد بيه ..

مد ايده لوجهه ظل يحك بلحيته محتار ، داانطي الاكل نتره مني وكام صعد ..

صعد فوك طلعت  شفت اسراء لحكته ع الدرج  ظلت تحجي وياه بهمس اريد دليل يربي اريد بس دليل ..

التفتت عليها شافني باوعلها خزرني ظلت تتحرك شفايفه بمعنى انزليييي ، هي بقت ثواني واكفة بمكانه كرر كلامه ويوزع نظراته بيني وبينها .

هزت راسها التافت ونزلت ، ظلت تخوزر بيه تباوعلي واباوعلها تبادلنا نفس نظرات الحقد والكره ..

ع طول اليوم بقى فوك بالغرفة مانزل خايف لا اكشفه من نظراته يمكن جفصاته ، هه  ميدري اني كاشفته والي ساعة انفجر بي وانسي حتى اسمه بس اريد دليل عليهم امسح بيهم الكاع بسيطة يدللون ..

العصر صعدت شفت اسراء طلعت من غرفتنه ...

نار واشتعلت بيه ، باوعتلي تضحك بشماته وتمشت من يمي ونزلت

فتت عليه  ديبدل  رحت يمه بعصبية ..

نترت ؛ شعدها هنا يمك هاا ..

اندار عليه عيونه حمرة من الغضب ؛ اجت تريد اوصلهم .

توصللهم ؟ شووفير ساايق انته عدهم مثل ما اجوي يرحون .

نتر ؛ شبيييج هاا شبيييج بطلي هاي سوالفج بطليها .

صفاء والله والله اذا .

خله ايده على حلكه بمعنى اششش وخزرني ظليت ارجف من خزرته بس استمريت اهدده ..

والله ياصفاء اذا بينكم شي انته وياها ادمرك وادمرها والله وتنسى شي اسمه زهراء وهمام .

راح باتجاه بالباب والتاف عليه نظفي عقلج من هالافكار وارتاحي تمام ..

راح وطبك الباب ..

مانزلت وراه ما اريد انقهر من اشوفها تصعد وياه او تقترب منه ابد ..

رشا بقت يمنا ، نزلت جوا دااصلي المغرب وهمام يمي يكمز ع ظهري كملت صلاة وجريت همام لحضني ادغدغه وأبوس بي وهو يضحك ...

جانت رشا دتحجي ويا امها ومتقصدة تسمعني اصلاً جانت تحجي وتباوعلي

_يووم لعد زهراء ما درت بصفاء متزوج اسراء عليها من اول ما خلصت عدتها ......!!!!!

يتبع ...

شريعة العشق

بارت ٥٨

نورا ناصر

كوني كالحديد لا يئن.. ولايحن """"""""

حسيت الهوا ينسحب من انفاسي ، وقلبي انعصر عصرة مؤلمة على اثرها احس قلبيي انتحر من الالم ، مر شريط حياتي ويه صفاء بلحظة ، ماعشت وياه بصفاء اله قبل كم سنة يله وبعد ما اكدرت اخلي يحبني تجي حبيبته القديمة بكل وضاعة وتاخذه مني وبهذا يكون تحققت اسوء هواجسي ، كنت شاكة بالموضوع ، اما هسه متأكدة ومتيقنة .

حسيت بالخيبة تعتريني واليأس مسيطر عليه

كمت ارجف ، كوة واكفة على حيلي

أني وين من كل هذا من خلصت العدة لهسه صار فوك ال ٦ أشهر ، معناها من جان يبات برا البيت واتصل بي ويطلعلي مغلق جان يمهاا!!

ومن اكوله يكولي خفارات او سفر او هوايه حجج واهية يطلعها الي وقلبي الفطير مصدكه ..

زين ليش؟؟؟  بشنو قصرت وياه مهتمه بي ومداريته أكثر من طفلي مفضلته ع أبني معتبرته امي وابويه واهلي تالي هيج يجازيني!!!

باوعت لرشا بحقد واطرافي تتراجف ..

كلتلها: الرخيص يبقى رخيص ولو شما نقيمه ميرتفع سعره...

والدوني هم يبقى دوني واخوج هيج واحد نذل ورخيص .. جريت همام وحطيت أيدي ع رأسه

_  وداعته لأبني الا ادفعكم الثمن غالي وهاي شماتج ارجعها الج واعرف انتي السبب بزواج اخوج التافه بس والله وداعة أمي الا اردلج الصاع صاعين .

تخصرت وتحجي بوكاحة وحقارة ؛ وشسوين ببلله ههاي تهدد فوكاهه ..

كامت دتريد تهجم عليه لزمت اديهه قوي نبتت اضافري بسواعدهه ودفعتها وكعت ع التخم  ، مااعرف منين اجتني القوة رغم ارجف بشكل موطبيعي

صرخت عمه ؛ ياعزا تخبلت زهراء تخبلت ولج حماتج اكبر منج شون تضربيها .

شلت همام وصعدت أركض فتت للغرفة وقفلت الباب وأحس گلبي يريد يطلع من مكانه ميعرف ينبض لو ينفجر ..

الحقير صفاء طلع  مستغفلني ويلعب بذيله من ورايه وصاير براسي سي السيد سهلة صفاء اذا ماابجيك دم فلا بنت امي وابويه....

بقيت كاعدة بالغرفة افكر شراح اسوي ، اعصر اديه مرة واللتهم اطراف اصابعي بوجع مرة ثانية ..

_أفتحي الباب ونزلي اتعشي يلا مو تروحين تتخربطين ونحير بيج وبعدين شدعوه عليج حابسه نفسج قابل انتي اول وحده يتزوج عليها زوجها

احس دمي فار فتحت الباب صارت بوجهي: شوفي حجيه أنتي ماعرفتي تربين ولتظلين تبررين لو انتي بيج خير جان ربيتي بنتج هجامة البيوت وجان علمتي ابنج الوفاء أذا مااخلي ابويه وعمامي يعلموكم الاصول تدللين وانتي جنتي تدرين بأبنج متزوج من جانت تجي بنت أختج ال*** للبيت بس جنتي ساكته موووو

_اي ادري وشتريدين تسوين سوي اذا تريدين تطلعين من البيت تسوين فضل بس خلي ببالج أبنه واشرت ع همام لو تموتين متاخذي

_هههههههههههههههههه بأحلامج اخلي يمكم حتى هم يطلع عار طبكت الباب بوجهه

بعد ساعات اتحرك مقبض الباب ، فززني باوعت ظل يتحرك اكثر ، كام همام يريد يفتحه ، ظليت اباوعله رافع رجليناته وماد ايده ويحرك باليده ، تنهدت وكمت فتحت القفل وتراجعت للخلف اباوعله بحقد وكره

وهو يباوعلي ومن وجهه  مبين عليه يعرف أني عرفت بزواجه  اخذ همام ويريد ينزل عطت بي : وووووين ماخذ أبني جيييبه

تكلم بهدوء قاتل وتوتر ؛ اودي يم امج عندي حجي وياج مااريده يسمع ..

ظليت اتنفس بعصبية واباوعله بنفس النظرة المو راضية تفارقني نظرة الحقد والكره .

اخذ همام وطلع واني بقيت كعدت ع السرير بهدوء ، الهدوء الي يسبق العاصفة طبعا .

بعد دقايق اجه ، ظل يفتر بالغرفه تجاهلته ومحجيت وياه واعرفه كولش زين يتخبل من برودي جان منتظر مني اصيح او اسأله بس أني سويت العكس تظاهرت بالبرود عكس النار البداخلي..

ظل بس ينفخ بعصبية يريد اتحرك بقيت ع وضعي

مل من الوضع  جر الكرسي واجه كعد كدامي

صفت بوجهي ؛ مناويه تحجين ؟

مجاوبته ظليت اباوعله بكره ، ومنقرفة منه ،

نفخ بعصبية :زهراء أني أحبج والله ومستعد افرط بكلشي الا أنتي أذا تريدين هسه اطلكها والله بس لتتركيني أني بدونج مااسوى فلس

باوعتله بغضب بدون مااجاوبه

عاط بيه: أدري خرررررسه لو تريدين تعصبيني احججججججي لتظليييين ساكته تدرين بيه اتخبل من تتجاهليني ..

كمت وكفت بعد ما جنت كاعده ع الجربايه: لو تسوى الحجي جان حاجيتك بس متسوى انت رخييييص تعرف شنو رخييص أنت لو بيك خير متركض ورا وحده باعتك وسوتك مهزلة كدام العشيرة لو عندك غيرة ع نفسك وكرامتك جان متزوجت وحدة فيما سبق اخوها فشلك وفشل عمامي وطردوكم من بيتهم لو انت تعتبر من صنف البشر جان أحترمت النعمه العندك...

فتح حلكه مصدوم من كلامي ...

كملت ؛ ولك أمي واختي شكد نصحوني وشكد انهانيت وانضربت بس اتحملت علمود شنو علمووودك انت!!!!

ههه وياريت طلعت تستاهل تتذكر من رافد ظل يلحكني شلون تخبلت هاي عود بس جان يدز رسائل مو انوب ..

بعدني ممكمله سد حلكي: ديررررري بالج تنطقيها ادفنج والله

نفضت نفسي منه مشمئزة ؛ غير يستقر الدفان بس تدري انت ممثل بارع خوش اتقنت الدور ...

جان ساكت ميحجي شي ..بس عيونه حيطلعن من مكانهم ..

_ مااكول غير حسبي الله ونعم الوكيل بيك وان شاءالله حوبتي تطلع بيك انت واختك وامك دعوة مظلومة محروك گلبها

تركني وطلع ...

بقيت بالغرفة ورا ، كم ساعه جنت متمددة سمعت صوت اسراء شنو هاي يمكن دااحلم كمت فتحت الباب صارت بوجهي هي وصفاء!!!!

ظليت متحنطة بمكاني معقولة صفاء بهالنذالة وانوب عبالك جان منتظر الفرصه الي أعرف بيها حتى يجيبها ويجي ؟

بعدني اباوعلهم صعدت رشا وهاي خو عبالك مو بنت عمي عبالك عدوتي بسرعه فتحت الباب مال الغرفه المقابل غرفتي انصدمت غرفة نوم كامله هاي شوكت جابوها معقولة اني لهدرجة غشيمه لو ع نيتي

ورشا بسرعه استغلتها : اكيد مستغربه الغرفه شوكت اجت تتذكرين من رحتي لبيت خالتج بالدورة هو بهذا اليوم الكناري جانوا مختارين الغرفه بس من رحتي جبتها ...

بقيت بس واكفة ببرود بس داخلي اعاصير وعواصف قلبي ينبض بقوة وانفاسي كوة تدخل لرياتي احس راح اختنك .

دخلت لغرفتي لميت رجليه لصدري وبجيت بقهر وحسرة ليش هيج صار ويايه شسويتله حتى يجازيني بالخيانه مستحيل ابقى وياه اطلك وغصباً ماعليه احس الهواء اختفى اريد اجر النفس مدااكدر لزمت الياخه مال التراك شكيتها بس اريد اجر نسمة هواء ماكو واني ع هالحال دخل صفاء شافني هيج اجاني يركض

لزمني من اكتافي : تنفسي زهراء تنفسي  جري النفس لتسوين بنفسج هيج والله مااستاهلج اني

اشرتله بيدي مدااكدر رفعني وكعدني ع الجربايه وظل يفرك بظهري كحيت قوي شويه،ارتاحيت اشرتله يطلع من الغرفه مقبل تالي همجت عليه

_حققققير نذل اطلللللع برااا غرفتي مااريد اشوف وجهك كدااااامي امششششي اطلع روحلهااا يلا روحلهااا الله ينتقم منكم ان شاءالله تحترك بنفس النار الدااحترك بيها نذذذذذل

شفته ديدور ع شي عرفته يدور ع موبايلي حتى لا اخابر بابا تعب وملكاه اصلا حتى اني مدالكاه الظاهر ويه اغراض همام والعابه ..

اجه عليه: انطيني موبايلج

مجاوبته عاط بيه: انطيييييني موووبايلج

ظل يصيح لمن تعب مجاوبته وبس اباوع بعيوني

فتح باب الغرفة وطلع وركع الباب وراه بعصبية .

رحت دورت على موبايلي وخابرت على بابا

بس اجاني صوته صرخت: بابا الحكلي كسروووا بنتك بابا اذوووها لبنتك

معرفت شنو حجه بابا ظليت اصرخ وصفاء يدك ع الباب شويه وسمعت صوت هوسة نزلت اركض شفت بابا وماما بعدهم مصدومين ممصدكين ، ركضت ع بابا حضنته

ماما كالت: يلا ماما جيبي التحتاجيه وتعالي

اجيت اصعد صار صفاء بوجهي ميقبل اصعد التفتت باوعت لبابا بسرعه اجه باتجاهي

_اصعدي واريد اشوف منو يمنعج سوووسن صعدي ويا بنتج بسرعه يلا أنتظركم اني ..

جان يحجي ويباوع لصفاء الي جرني من ايدي وخلاني ورا ظهره

_عمي مرتي متطلع وهاي بيناتنا مااسمح لأي شخص يتدخل

بابا: لاا كول غيرها كمل كلامه وضرب صفاء بوكس ع خشمه وجه صفاء صار عبارة عن دم ابد ماانقهرت عليه صعدت اركض والصياح ورايه ..

اخذت ملابس لهمام واليه ونزعت الحلقه خليتها ع الميز باوعت للغرفه وكأن دااتذكر ايامي الحلوة بيها ضحكتنا وهمساتنا ومن يجي من الدوام يحضني بأشتياق نزلت دموعي حسيت ايد ع كتفي التفتت ماما اخذتني بحضنها

طلعنا من الغرفه صارت رشا واسراء بوجهنا ضحكت أسراء: ههههه كل واحد بالنهاية يرجع لمكانه وأني رجعت لمكاني

جاوبتها لرشا: خلصنا من الحية وامها

التفتتلهم ماما : ان لم تستحي فأصنع ماشئت حسبنا الله ..

نزلنا طلعت من بيت عمو وداخلي ينزف دخلت لبيت أهلي اتلكاني همام حضني ويبجي لان صار كم ساعه مشايفني بوسته: حبيبي يمك أني مااعوفك هياتني أجيت سكت

دخلت من باب المطبخ صارت بوجهي عبير عيونها مدمعه اجت عليه حضنتني: خيولي هو الخسران والله حيرجعلج يبجي دم ذني بسحورتهن فرن عقله صدكي صفاء مو بوعيه لو بوعيه ميخسر الذهب ويبدله بالفالصو ..

طبيت كعدت على القنفة وابني بحضني وصافنه بفراغ مسلوبة الروح والارادة اتمنى اصرخ ابجي انهااار بس شي بداخلي ديرفض الانهيار  وفضلت السكوت...

رغم مختنكة حييييل والضغط يولد الانفجار على ساعة انفجر بس كل شويه اصبر نفسي واستغفر ربي...

اباوع البابا جان يروح ويرجع وهو متوتر ومتعصب وكل شويه وصفگ ايده باسف

وماما كل شويه وكالت...حسبي الله ونعم الوكيل ..الله ينتقم منهن حرمن الولد من ابووو الله ياخذ حقج يممه منه ومنهن خليهم والله ما يتهنون لان باطليين....

بابا باوعلي بعصبية....شلووون اتزووج شلوون سووه هييج بيج الحيوان الحشره منطي مرة تسوه راسه وراس عشيرته وتالي هيج يسووي...

لا والله مو اني ابووج يا زهراء الي اشوف دمعتج على خدج وما اسووي شي اله اخليهم يتندمون حقراء...

اخذ الموبايل واتصل شوويه وكال...هاا ابو حسين...ههه حبيت ابارك الك بزواج ابنك السطل مبروك بس ليش ما كلتولنه نقوم بالواجب ونزفه بدينا ...

ضل يحجي هو وعمو واشتد بينهم النقاش وبعدها بابا كله...هذا هووو ابنك الحيوان كطع حبل المودة بينه ما اريد منه شي بس يطلك بنتي ويتهنه بحياته

وبعدها رجع كال بعصبية...انت شتحجي اي حقك مو بنتك المجروحة شنو الله محلل اله هاي وانت اخووي هيج تحجي الله حلل اله اذا جانت مرته مقصرة وياه اذا جانت ناشز اذا جانت متخلف خله امور قبل التعدد مو ابنك الفايخ الي ما عنده عذر بس المهم يرضي غروره يجي يتعدد ... ويطبق الشرع براس بنتي هل اثول هذا...

كمل كلامه بقهر...ما اريد شي منكم يجي يطلك بنتي والله ومحمد وعلي وياه قابل هو فد مندله هل تافهه هذا ...

قفل الخط وهو لسه يفور واني حاضنه ابني وابجي وماما تهدي بية...

حتى لگمة محد خله بحلگه ولا مي وعبير ومريم خطيه كاعدات يمي ويمسحن بدموعي ويبوسن بيه بس اني مو وياهن لا مقهووره مطعووونه بنص قلبي...

تقريبا مرت ساعة واندك الباب راحت مريم فتحته وما اشوف اله صفاء اقتحم الاستقبال ويانه ...

بابا من شافه عقد حواجبه بغضب وقبض على ايده حتى شرايينه بينت باوعله باستهزاء...هله بابن اخووي هله بالادبسز هله بالعاااار هله بالعريس محتار شلون ابارك الك والله بله شتريد جاي ؟ شعندك لافي اطلع بره يله ...

صفاء جر نفس وملامحه متعبر عن اي شي زفر نفسه وكال...عمي انت فاهم غلط يعني يعني ...

مجان عنده كلام يكووله لان هو غلطان...

بابا كال...يعني شنوووو؟ يعني ما تعترف بروحك عااار

صفاء بغضب...احترم نفسك من اجيت لحد الان انت بس تغلط واني اكول عمي ومحترمك ما اريد اتجاوز

وتعديت عليه ابيتي وهسه مستمر تغلط اني جاي اتفاهم وارجع مرتي .

بابا تقرب منه ولزمه من قميصه بعصبية...شوووف لك قبل لا تتجاوز وتغلط اريد منك شغلة وحده تطلك زهراء وتولي من خلقتي...

جاوبه بثقة...ما اطلكها

بابا بقهر...لا تطلكها وراح اعتبرك نعال ونكطع وبنتي ما تلبس نعالات مكطعه تطلكها منا ازوجها منا وابنها وياها اخلي يركص بعرسها...

بجيت اني وارجف ولازمه ابني الي اول ما شافه وهو متخبل يريد يروح اله وما يثبت بين ادييه

فلت من بين اديه وراح يركض الابو بخطوات مرحة وغير متزنه وهو يصفك بديه وينطق بابا بابا...

باوعله هو بقهر وتقرب منه وشاله باسه بخده وباوعلي شحيت نظري مني منقرفة ،  وبعدها كال...اذا تريد تتطلك ابني اخذه منها لو اعرف اكاتل العالم كلها...

بابا سحبه منه لكن هو لزمه بقووه ورجع سحبه وصار الغلط والصياح .وماما تلطم على خدها وعبير راحت تفارغهم...

اني ضليت مثل الضاربتها صاعقه بس اصررخ وابجي اريد ابني...

وابني ضل يصررخ من وراهم خبلوو وماكالو طفل يمكن يتعارض او يتخبل من وره عياطهم...

شفته حيوكع من بين اديهم ...ركضت عليه واخذته منهم ضميته الصدري واني اصررخ وانهاريت...اطللللع بررره ابني ما انطييي ما انطي لو تذبحننني...

بابا ضربه ببوكس على وجهه للمرة الثانية خلال هاليوم الاسود هذا ع اثر الضربة  هو فقد توازنه لكن سرعان ما تماسك حط ايده على انفه وشفايفه الي تنزف رفع إصبعه بتهديد و وعييد ؛ هيييين والله والله انتوا فتحتوا الحرب عليكم والله لو اعرف اكتلكم كلكم اخذ ابني اخذه.....

                           *****

عبير .. خلصت اخر محاضرة ودا اطلع للبيت رحت للحمام...

شفت الحمام صاير حرب البسوس كولها تمكيج وترتب وتعدل حتى مشط جايبات يمشطن ويرتبن بشعرهن..

جريت نفس.... شلون ورطه حتى مكان ماكو واحد يرتب شكله...

طلعت عندي مراية صغيرة رتبت بيها شكلي ورجعت ضميتها بالجنطة..

عدلت بنطروني ،  لابسة بنطرون اسوود وتشيريت اسود طويل ولابسة فوگاه قميص طويل زيتوني يصير اطول من التشيرت و لابسه حذاء اوف وايت وشال اوف وايت...

طلعت من الجامعة بعدني ببوابة الجامعة شفت قسور  من بعيد تافئفت بقهر .

يالله هذا اببد ما يمل بس ينزل من دوامه الكاه جاي للجامعة حتى مرات استحي والله هسه يكولون تواعد بره الجامعة اي اي مو بعيدة يكولوها لان تكررت جياته...

مشيت وتقربت منه ،  ابتسم ؛ قبل لا تحجين اي شي ترى اجيت عندي شغلة هنا وكلت مدام الوقت متاخر اكيد حتطلعين كلت اخذج بطريقي...

ابتسمت...لا ما احجي اي شي بس ترى وكفتك كل مرة هنا عيب وانت تعرف هاي جامعة وتصير سمعة مو حلوة بحقي مو صح؟

رفع حاجب متعصب ؛ الي يجيب سيرتج بالباطل بعده جنيين ببطن امه اشك حلكه اليحجي بيج واوكله تبن بكد لشة الخلفه...

تنهدت واني ارفع عيوني ليفوك بعدم قبول

_  انوب تريد تعارك يمعووود عوفني من المشاكل هسه اني دا اروح ..

رد ببتسامة..اني اوصلج ترى ميصير كاسر نومتي وجاي مناك لهنا بس حتى اخذج وياي ...وانتي تردين ترحين الوحدج

ضحكت...اوووف حبل الكذب قصير مو تكول عندك شغل واجيت مضطر لهنا...

باووعلي من فووگ ليجووه وعيونه تنبض بإعجاب

_ دصعدي اصعدي ليسمعها يكول بحياتها مجذبت

ابتسمت وصعدت بالصدر وهو صعد يسووق درت وجهي للجام واباوع للشارع ...

وهو شغل المسجل اغنية الحاتم العراقي...كل التحب تفترك بس احنه حبنة صدك ...

وهو يدندن ويه كلمات الاغنية واني متوترة وكاعدة على اعصابي...

وصل لمقطع....ماخذ عهد على كلب غيرك بشر مااحب لو حتى تنساني مايحلى غيرك احد وحدك تظل للابد ميصير الك ثاني... كلشي بحياتي الك معذبني ومدلك انت الي تأمر امر بس كلي اشرايد

باوعتله بحزن وروح مجروحة مقهورة عليه اكثر ما مقهورة على نفسي ابتسمت ابتسامة مجاملة...

وهو ضحك ؛ اي والله ميصير الج ثاني...

نزلت عيوني بخجل وضليت افرك باصابعي ولسة مبتسمة بابتسامة نازفة...

وهو رجع يدندن.... من وصل الهالمقطع عله صوووته واني باوعلته مصدوومه واحس بلهفة مررح دخلت بروحي...

يباوعلي ويرجع يباوع للشارع وصوته عالي كال....خلينه ننسى الحزن نام على صدري اطمئن وادفه باحساسي من تحجي كلبي يدك كلي اني اصيرن عشك من جدمي الراسي حبك ليالي وغنه يجدد بكل سنة وانت هديتي العمر غيرك ولارايد

صاح بصوووت عالي...اووووويلي هل مقطع على الجرح يمثلني والله...

مديت ايدي وطفيت المسجل...

هو باوعلي مصدوم ...ليش طفيتي

ضحكت...حرام الاغاني صير متديين واقرا سورة النساء بدل حضني ونام على صدري عساس صدرك مخده ام الريش...

ضحك...صدري مخده ديباج گطن طبي مغلف بالرومانسية اذا حابه جربي على التجربة وبعدها احكمي

ضربته على ايده بعصبية...كافي كافي لا تشطح على الترابي ...وعلى ذكر الترابي وين ماخذني انت...

باوعلي بتفكير...ماخذج اشمرج بالصحراء لان كلبي مورم منج...

ضحكت...يييي الله عليك حتى اتزوج شيخ بدوي واخلص منك 

ركز بعيوني ثواني بعدها كال ؛ لا يا طايحة الحظ تتزوجين بدوي ومتتزوجيني اني الي صارلي سنين اركض وراج...

ضحكت ...بكيفي هههه

وكف مقابيل صاج البديع كال...يالله انزلي خلينه نتغده

رفعت حاجبي مراضيه على تصرفه

_لااااا والله اخاف متقبل اني كتلك وصلني للبيت مو تجيبني للمطعم وبعدين مشكور شبعانه...

باوعلي بهدوء؛جبتج للمطعم لان عندي موضوع وياج نحله وبعدها نروح هذا الموضوع خاص بيني وبينج وما احب واحد يتدخل بي غيرنه...

واني جان اكدر اخابرج واحجي وياج بهل موضوع بس اني انسان احب الواقع واريد اشوف ملامحج على

هالموضوع للمرة الاخيرة...لذلك فضلت يكون وجها لوجه...

جاوبته بتفهم...اوكي بس اكتب رسالة الماما اخاف أتأخر...

ضل ينتظرني كتبت المسج  ونزلت...

جان اكووو طفل واكف بباب المطعم شعره اشكر وعيونه لونهن عسلي عبالك هارب من احد افلام الديزني يجنن لازم بيده حزمة مال ورد احمر بغصن طويل..

رفع راسه وباوع القسور كال...عمو فدووه فدووه اشتري الصاحبتك وردة الله يخليك ...

قسور ضحك واني حطيت ايدي على خدي وهمست بداخلي...يااا عزا بعينه سواني صاحبته...

قسور حط ايده وعبث بشعره الاشكر ...حبيبي هاي مو صاحبتي

باوعله ببراءة ...لعد مرررتك

انطه الورد القسور كله..شسمك عموو وهي شنو اسمها

قسور رد عليه بضحكه...اسمي قسور وهي عبير

رفع اديه بطفولة وهو يدعي...يااااربي ان شاء عبير زوجة عمو قسور تصير حامل وتجيب تووم ولد

شهكت وفتحت عيوني بصددددددمه وقسور ما تمالك نفسه وضحك

عطت بي...لك استحي هاي وانت طفل الگاع ما تجرعك مو عيب هالكلام...

قسور يضحك...خلي خلي احلى حتى من دعاء ليلة الجمعة..

باوعلي الطفل وهو يعقد حواجبه الشكرة...عمو هاي شبيها فوك ما ادعيلها شوف عمو عوفها وتزوج والله تجر عدل واذا تريد انطيك اختي تجنن وعيونها ملوونة...

فتحت حلكي مصدومه من كلامه وحسيت بمشاعر اجتاحت اعاصير روحي...

اخذ قسور الحزمه مالة الورد كولها كله..يشرفني نسبك يالنسيب وان شاء الله كم يوم واني عندكم بس كلي شكد سعرها كلها هاي الحزمة...

كمز بفرح وهو ينطنط ...صدك عمو حتشتريها كلها يااارب مو بس يصير عندك ولد من عبير مرتك لا وهم من اختي يصير عندك درزن منها...

باوعتله بحقد مو طفل انتقام لسانه اطول منه...

قسور اشتره الورد منه كله وانطانياه اخذته منه بعصبية واني اباوع للولد...

قسور كله...انت ليش تبيع ورد وليش ما انت هسه بالمدرسه وبعدين شنو اسمك...

تغيرت ملامحه للحزن...عمو احنه مهجرين من ديالى وابوية مات كتلو الارهاب وضلت بس امي واخواتي اجينه هنا وما اكدر اجيب نقل من مدرستي القديمة لهذا السبب اني ما اكدر اداوم...واشتغلت ويه واحد نبيع ورد يم المطاعم والجامعات...

واني اسمي تيسير

حزنت علية حييل خطيه مسكيين رغم لسانه طووويل تقربت منه وانطيته الورد كله واخذت بس وحده...

مع العلم قسور انطاه مبلغ كل الورود...

قسور باوعله بحنان كله...هاي الفلوس انطيهن الامك استفادو منهن وهذا الورد بيعه وانطي لابو الشغل مالتك اوكي حبيي

هز راسه بي وحضن قسور من خصره وقسور ظل يداعب شعره باصابعه ويضحك ويباوعلي ، ابتسمت على ابتسامته ..

بعدها دخلنه جوه

كعدنه كال...شبيج اشو ضجي بس. لا مقهورة من تيسير لان ناسبته بس حقه وين يلگه نسيب مثلي

ضحكت...اليمدح نفسه ينرادله رفسه

باوعلي برومانسيه ...اووووويلي ياريت لو ترفسيني رفسيني يالله

رفعت الورده وحركتها بهدوء على خدي ...عووفنه من الرفسات وكول شنو موضوعك

رد ؛ اول شي نتغده وبعدها نحجي وهسه شنو حابه تاكلين

_يعني هو صاج البديع شبي غير الصاج جيبلي صاج

ضحك...لا بي همبرگر وصاج ومقبلات وريزو

_صاج احسن

راح طلب صاج وببسي ومقبلات وشويه واجه خلاه كدامي كال ؛ مرة يالله البدوي  اكلي...

ضحكت واخذ الصاج من ايده من نظراته ولهفتة عليه ما عرفت شلون اكل ضليت محتاره وخجلانه حبيت الطف الجو كتله...اي شلونها عمتو

رد بهدوء وهو يحرك الخاشوكة على المقبلات...زيينه الحمد لله بس شعجب اول مره تساليني عنها

بطولة بال ؛ ما اكرهه بس هي متحبني

جر نفس ؛ يالله بعدين تتصافن

تنهد...اي قسور احجي شنو موضوعك

_ انت ليش ضميتي عني ؟

_ شنو الي ضميته عنك ؟

_ أُسامة لمن خطبج ؟ ليش مكتيلي ليش ضميتي عليه ؟

_ خطبني ورفضت وهاي هيه ..

_ ليش مكتيلي لمن سألتج عنه ؟

_ مو مهم بالنسبة لي قسور يعني انته هسه جايبني هنا علمود أسامة ؟

_ ‏‏୪ مو علموده ..  وكمل بنبرة حزم ..

إسمعيني عبير ولاخر مرة راح اكولج هاي الشغلة وبعدها راح انسحب من حياتج نهائيا تمام ؟

يتبع ..

سلام عليكم .. بالنسبة لدعاء صفاء البارحة "اني عبدك الحقير " موجود بدعاء كميل ابن زياد الي علمه اله امير المؤمنين الامام  علي عليه السلام مجايبينه من جيبنا فعلا تفاجئت بالاستهزاء الي صار مو ع كل شي نستهزء مايجوز هالشي ...

البارت هدية لجميع المتابعين ولطلاب السادس والثالث وحتى الدراسات العليا هواي يراسلوني يطلبون دعاء الهم

ربي يوفقكم كلكم وايضا اهتموا بدراستكم محد يفيدكم كلشي يلحك عليه اتركوا كل شي واستعدوا لأي طارئ واقروا لاتهتمون الهالضروف وتكولون كورونا ومن هالكلام ان شاءالله شدة وتزول .

اقدم شكري وامتناني لصديقتي الغالية Smoo-1997

ساعدتني ببارت اليوم فديتها 😘💚شكرا ياروحي تعبتج ⚘⚘⚘⚘

شريعة العشق

بارت ٥٩

نورا ناصر ..

أيغلبُكِ الشوقُ أم تغلبينهْ؟

‏ويعثو بكِ الليلُ إذ تسهرينهْ؟

‏تقولينَ أنّكِ في خيرِ حالٍ

‏ولكنّ روحكِ تبدو حزينهْ!

‏أما زلتِ من بعدِ عامٍ ونصفٍ

‏تسحّين دمعكِ إذ تذكرينهْ؟

‏وما زلتِ رغمَ الجراحِ العميقةِ

‏رغم الجفا والأذى تعشقينهْ؟

باوعتله بقهر حسيت قلبي وجعني عليه ، لالا مو عليه عليه اني حسيت بانقباضة قاسية تعصر  بقلبي عصر ، ما ان سمعت كلماته الاخيرة الي بيها يكول حأتركج للابد ، ماريد يتركني ولأول مرة احس اريده من صدك .

باووعلي بهدوء وبنبرة اهدأ ؛ عببير اني كل مره تهووون عليه كرامتي وارجع واكول ماكو كرامة بالحب موضوعي وياج اليوم هو مثل قبله اكييد وهاي احتمال وجهة نظرج

بس ثقي بالله هاي اخر مره اطلبها أو يمكن انطقها واكولها ومهما يكون ردج بعد ما ازعجج اني اريد اريح ضميري وادافع عن حبي وهذا اخر دفاااع لمشاعري وبعدها اغلق كل منفذ يتجه الج لذلك هو سؤال وجوابه عندج هو باب ومفتاحه عندج...

انتي كل مره تجرحيني ولا اتذكر بيوم من الايام انطيت لجروحج رفض بالعكس دووم متقبلهن ...بس هسه اريد بس جواب

همست بتوتر واني اعرف سؤاله...شنوووو؟

بلع ريكه وتنفس ...اني اريدج زوووجة الية شنو جوابج...

باوعتله بحيرة واسى على مشاعره تجاهي غمضت عيوني وجاوبته بدون تفكير لكن بقناعة

                 ...قسور اني موافقة ...

كلتها هيج وركزت بوجهه ، هو يباولي ثواني متفاجأ لا بل مصدوم ، شوية وانرسمت على  ملامحه احلى ابتسامة ممكن اشوفهه على وجهه ضحكت وياه ، باوعت لاديه يحركهن يريد يلزم اديه ، رفعت عيني بعيونه بلعت ريك بس مافكرت ابد احركهن وابتعد عنه هو تردد رفع ايده لراسه يعدل شعره .

وكأنه نظراته تكولي من تصيرين حلالي .. بقيت مبتسمة وهو محتار شيسوي يتحرك يتلفت يتنهد براحة ..

بعد لحظات من الصمت ؛ قسور بس فدوة هسه ما اريد اي مظاهر فرح الى لمن تطلع مها من السنة مالتها .

تقرب عليه ؛ فدوة القلبج ماريد تأجيل هسه بعد روحي وعيوني وقلبي ع الاقل خلي بس نعقد تدور السنة نسوي  حفلة بكد الدنيا .

_ قسور اني ما اعيش وي امك صعبة ءءء يعني مااعرف شكولك بس انته ادرى ليهسه ماكدر انسى كلامها ويايه مو بيدي والله .

_ لج لا اني هم اريد راحتج نأجر شقة او نشتري بيت على كدنا ويصير عشنه احنا وحبشكلاتنا .

_ حبشكلاتنا منو ؟

_ زعاطيطنا شبيج .. كال هيج وارتكى ع الكرسي بارتياح ويضحك .

اني هم ضحكت وهزيت راسي ..

_ بعد ماكو تضمين عني شي تمام ؟

_ شنو ضميت عنك بالله !

_ موضوع أُسامة بعد شنو موو هسه كتلج ؟

_ وانت منين عرفت ؟

_ عرفت منه هو كالي ..

_ أهااا .. يعني حجيتوا .. ؟

_ اي حجينه وكالي واخذت منه وعد بعد ميقرب منج .

تنهدت وكلت ؛ احسن ..

انتفض وقرب مني ؛ ليش مضايقج شي ؟؟

كتفت اديه ؛ لا لا يمعود بس اهدا ماكو شي من الي ابالك ..

همس الحمدلله وشرب مي كال يله امشي ..

رجعنا للبيت يوم الجمعة من نفس الاسبوع جاب عمامه وعمامي واجوي البيتنا خطبوني ..

جنت واكفه دااحجي ويا زهراء واجاني مسج منه (  احبج بنت گليبي عبيري )

من قريتها أبتسمت رفعت راسي جانت زهراء دتباوعلي رفعتلي تك حاجب : ها المغرورة وكعت اصوفر يعني ؟

ضحكت بصوت عالي وهي كمزت عليه وهمام يكمز ع الواهس ويصيح ننه وعبي بدون ميفهم شكو اصلاً شلته وظليت ادغدغ بي وهو خربان ضحك

اجتنا ماما من المطبخ : صوووتجن ولجن زلم بالاستقبال رفعة رأس لابوجن صوتجن طالع وانتي عبيره شطولج تصيرين بعد وتبقين طفلة

_ميخالف ماما ودعيني برزالة هالمرة اوافق ع قسور وبس نتزوج والله اذا شفتج بجيتي ورايه اشيل البدله وانزع حذائي واطلع اركض بحلم بعلم اخلص من رزايلج سوسه ههههههههه

ماما: ادبسز ولا تصيرلج چارة شكدج تصيرين بعد ؟

_ماما اهم شي الجسم جبير العالم شمدريها بعقلي هههههههههههه اهم شي كدامهم اني عاقله وخبالاتي يمكم ههههه

_متصيرلج جارة ابد هههههههههه

بعدنا دنحجي طلع كرار من الاستقبال باوعلي : عبير صوتكم نصوا شويه

هزيت رأسي ظليت اباوعله هو رجع فات جوه ...

فززني من صفنتي همام ديجر بالتيشيرت نصيت لمستواه : هاحبيبي شتريد؟

_دووعان عبود دوعااان

شلته واخذته للمطبخ سويتله اكل بعدها سمعت صوت الزلم طلعوا من البيت باب المطبخ جان مردود والجام مظلل شفت قسور جان لابس قاط والابتسامه ماليه وجهه ويتلفت ع البيت يريد يشوفني ...

ضربه ع كتفه كرار بخفه : ها لك عيونك لا افكسهن

_انجب حبيبي كلها اسبوعين وتصير مرتي واسمها ينور جنسيتي ولي من وجهي شوفتك تكصر العمر

ضحك كرار وراحوا ابتعدوا يسولفون ويضحكون ..

زهراء : بالليل  داانوم همام وهو  متخبل عليه قافل يريد ينام يم عبير وهي عدها دراسة ومطايقه أي بشر ودتركض ورا بابا حتى يشرحلها بس ميقبل

_ يكولها حالج حال الطلاب شنو ع رأسج ريشة واجي انطيج درس خصوصي

أيست منه وصعدت تقرأ ...

اخذته اسكته ميسكت انوب ظل يبجي على ابوه

متت من القهر فوك قهري ، ظل يناشغ ، اخذته بالحديقة كوه داخ يله نام ..

اخذته لفراشه نومته واني تمددت ،  ظليت اتكلب بفراشي ، شكد اكره الليل تهيج بي كل المواجع واظل اتذكر صفاء ولحظاتي وياه وذكرياتي اظل ابجي الى أن انام اشتاقله مو بيدي وقلبي حقير ميرضى ينساه تعذبت ولو بيدي اطلعه من مكانه واشمره بس حتى اخلص من هالعذاب ..

صفاء كل يوم والثاني يدك الباب يطلعله بابا يتعارك وياك وتصير هوسة ابابنا ويجون عمامي يتدخلون ويهدأونهم وينسحب صفاء ..

صفاء: مااعرف شلون صحيت ولكيت نفسي متزوج أسراء...وشون وافقوا اهلها واخوانها الي جانوا معارضين زواجنا من سنوات ..

عبالك حلم وشوكت صار كل هذا صدقاً بالله عبالك جنت مغيب عن الوعي وهسه صحيت...

صحيت  وحبيبتي ماكو يمي ادور ع ريحتها ادور وجهه بين الوجوه بس ماكو ..

بالليل ادخل لغرفتها الكيها باردة طافيه مابيها روح اطلع ملابسها اشمهم واحضنهم بعدهم بيهم ريحتها

بس من اشوفها كدامي تصير بشكل بشع عبالك وحش وريحتها نتنه بس من تروح اظل ادورها

اسراء اشوفها كدامي ملاك بس من اتقربلها اتقزز وتلعب نفسي حتى اظل اذب من رأسي بس بالنهاية ارجعلها احسها ملاذي الوحيد...

اما زهراء من يمر طيفها أبتسم بس بنفس الوقت مااريدها مااعرف شنو ديصير ويايه ...

كل يومية ادك الباب عليهم ويطلعلي عمي تحسين يتعارك ويايه ..

اخر شي هددني ؛ اسمع لك بنتي متريد تشوف وجهك ولي منا ..

_ عمي بس اسمعني!!!

اششش انجب اسكت ولا كلمة واذا ظليت يوميه تلفي لهنا ثق بالله اخذها وانتقل من هذا المكان وتحلم تشوف ابنك بعد ..

صارت هوسه وتدخلوا عمامي واضطريت انسحب لا صدك يسويها عمي وياخذهم ويروح وهو مسويها من قبل لمن اخذهم لسوريا ، انسحبت دخلت للبيت كاره روحي والدنيا طالعة من خشمي ، صارت مقابيلي اسراء

واكفة وتباوعلي باعتراض واحتاج عطت بيها شبيج وخري من كدامي يللله ..

..

عفتها وصعدت فووك حسيت بخطواتها ع الدرج معناتها جتي ورايه .. التفتت خزرتها

ماريدة روحج انتي اشو انزلي لا ابتلي بيج والله ..

درتلها ظهري وصعدت توجهت للفوك اريد ادخل لغرفتنا اني وياهه دفرت الباب بس انفس عن الغضب الي بداخلي مجنت ناوي افوت اريد اروح لغرفة زهراء

وفعلا دفرت الباب سوه صوت عالي سمعت صوت شهكتها من ورايه ما اهتميت الها رحت لغرفة زهراء دا اريد افوت صارت هي ع الباب خزرتها وعطت وخري دا افوت ما اريد اشوف شكلج .

خلت اديها على صدري ؛ حبيبي اني ممكفيتك شكو مرجعها والله مخليتك بعيوني انت ليش متحس بيه صفاء ..

عطت ؛ وخري اسراااء وخررري

ماوخرت بقت معاندة ضربت الباب بيدي فزززتها الضربة ، ظلت تباوعلي بخوووف ، حضنتني شويه شويه حسيت بشعور غريب يجتاح كياني ويبعثرني ، احس نفسي مكبل ، رغبة منبعة بداخلي اريد اضربها ، بس ما اكدر .

بعدها اخذتني من ايدي بهدوء واني امشي وراهه مثل الاعمى ورحنا لغرفتنا ، واحس بداخلي شي يبجي قلبي يتمزق والسبب زهراء ..

                             *****

زهراء جنت  بالحديقة  سمعت هوسة يم باب بيت عمو

خليت شالي على راسي وطلعت وكفت بالباب ..

شفت اولاد عمي بهاء وابو احمد ساندين صفاء  من اديه ديصعدوا بالسيارة ، بس صفاء منتهي فد نوب

صفنت عليه اباوعله بلا وعي ، وداخلي يتأكل

من شافني ظل يباوعلي بنظرات كلها ألم وحنان..

بقيت اباوعله وهم يفوتوا بالسيارة كوة وهو بس يباوع بعيونه ، ماحسيت اله على صرخت همام يمي يصيح يريد ابووه .

اخذته عبير وشالته من الكاع ظلت تسكت بي

وعمو ابو احمد حرك السيارة ومشوا بيها بعد ما خله صفاء بالوره حتى ما ارتجى رأسا وكع ع الكشن ..

اجاني صوت إسراء وهيه تحاجي رشا الظاهر جانن واكفات بالباب واني ممنتبهة عليهن بالي يم ذاك الي ما ادري شبي ..

اسراء بنبرة حقد ؛ ناس بلا كرامة تركهم وبعدهم يبجون عليه حاجة بربع

ظايت اباوعلها رشا كالت ؛ لج تلكينها هسه شمتانه بي ..

تقربت منها اسمعي رشا هذا الكلام الي راح اكوله

اي شي تسوينه سواء زين او مو زين راح يرجع عليج الله يمهل ولا يهمل ..

عبير تباوعلهن وتضحك: ياا باع منو يحجي ام السحورة ام الرجوله الدايحه تدخلين للبيت لا هسه اعيد تربيتج من جديد بنت السيبندي صايرة برأسنا مرة وانتي فلس متسوين لا عبالج ماادري بسحورتج وهياته صفاء عافيته دتروح بسبب سحورتج

تقربت عليها : بس و علي اذا مااهجم بيتج انتي ورشا مثل ما هجمتوا بيت أختي فلا بنت أبويه أني

ظلت  اسراء تهز بيدها ؛ انوب عليه الزعاطيط ..

اشرتلها عبير وحطت اصبعها ع حلكها وخزرتها : اشششششششش لجججج يلا امشي انقبري بالبيت

هاها نسيت عندي تصوير الج وانتي ورشا السكط الا اشوفه لغيث ولصفاء دااريد اشوف وجهجن شلون حيصير يلاااااا

اباوع ع اسراء وجهه انغلس ورشا وجهه صوفر

يردن يحجن جرتني عبير وطبكت الباب بوجهن

لحكت عبير جريتها من ايدها

_ولج يا فيديو؟

اباوعلها خربانه ضحك ولازمه بطنها وكعت بالكاع من كد مضحكت : ولج جذبت عليهن بس بربج شفتي وجهن شلون صار اصفر ههههههههههههههههههه عبالهن اني لحكتهن من راحن يسون سحر ههههههههههههههههههههه

_ولج ولا تنلام بيج ماما شوكت تكبرين

طلعت ماما حجينالها ، باوعت ع عبير وكومتها : عفيه عليج عبره زين تسوين بيهن ذني المايستحن اهم شي حيعيشن برعب وكل اعتقادهن انتي عندج تصوير ضدهن

دخلنه جوه كوة سكتت همام كلساع يتذكر ابوه

ويظل يبجي يريدن ، بعدها نعس ونام بدون حتى مياكل ، خفت عليه لايتمرض وظليت اكل بأصابعي

وافكر بي ودموعي ع خدي ، واتحسب واستغفر

وادعي علي كان السبب ..

لمن اجه بابا صاحني رحت لكيته هو وماما كاعدين بغرفتهم سألني بابا: زهراء بنتي ع شنو ناويه

باصرار جاوبته ؛ اريد اتطلك بابا

_اخر قرار عندج

_بلي حبيبي مستحيل ارجعله بعد

ثاني يوم اخذني بابا للمحامي وفهمنا شنو لازم أسوي وفعلاً رفعت قضية طلاك مر ع الوضع اسبوع وصفاء ماكو ردة فعل اله أبد اصلاً  كارهته حتى ذكر اسمه يزعجني

الليل اوووف يالليل شيخلصه اظل من السمجه المطلعيها من المي اتكلب ادور حضنه وادور ريحته الى ان يأذن الفجر واني منايمه تالي اصلي واحضن ابني وانام ..

التعلق بالشخص موت بطيء واني هيج حالي ويه صفاء متعودة عليه وتعودت عليه وكوه يله يخلص الوقت احسه واكف ..

بعد اسبوع  عبير جانت بالكلية راحت دتشوف نتيجتها ومريومه نايمه بصفي وماما وبابا بغرفتهم  جنت توني دااغفى سمعت صوت الباب الرئيسي اتكسر تكسر طلع بابا يلبس بتشيرته راح فتح الباب جان صفاء اني جنت واكفه ورا البردة  يعني اشوفه ميشوفني

من شفته بهتت هذا شصاير بي وجهه اصفر وجوا عيونه اسود وشفايفه بيض ويابسه ولاعبالك ذاك صفاء هو جان يصيح وبابا واكف ببرود عبالك متشمت بوضعه تالي سحبه بابا ودخله للاستقبال

اسمع صفاء يصيح : والعباس مااطلكها والحمزة لو تكتلوني هم مااطلللللك لججججج زهرررراء دتسمعينييي مووووو؟؟  مااطلكج واللله مخبل أني حتى اطلكككككج

اجه بابا صاحني : تعالي بابا ويايه

مردت ادخل واشوفه وضعه يصعب ع الكافر خفت لا اضعف ومهما يكون هو أبن عمي قبل ليصير زوجي وابو ابني جرني بابا وباوعلي نظرة كلها حنان دخلت وياه صفاء بس شافني وكف واجه اتجاهي بابا دفعه

كاله أسمع منها اول وباوعلي 

شحيت نظراتي منه وحجيت ..

_صفاء مااريد ارجعلك بعد مو گوة افهم مااريدك دست عليه وع كرامتي وسامحتك لان احبك بس مال تكسرني بضرة ومنو هالضرة اسراء الباعتك واني اشتريتك لو اموت مااسامحك والله لك انت هنتني وكداااام أختك الحية ضحكت اعدائي وشمتتهم بيه صفااااء

هو جان ساكت صافن بوجهي حتى رمشة مرمش عبالك ديحفظ ملامحي اجه لزمني من أيدي باوعتله عيونه مليانه دمع وندم

_زهراء غلطت اعرف والله بس لتعاقبيني وتبتعدين عني الله يخليج جرني من أيدي تعالي نصحح غلطي أني وياج سويه ساعديني مو أنتي دومج ويايه لج غللللللطتتتتت والله مااعرف شوكت وشلون تزوجتهاااااا وداعة أبني مااادري ولججججج عبالك جنت نايم وهسه كعدت ع خبر القضييييية

جنت اباوعله متشفيه بي ، هواي داس عليه وهواي سامحته ذلني واذاني لشوكت أبقى اسامح مااحس الا همام فات

وصرخ : تفتففففف عبيبي ( صفصف حبيبي)

واجه يركض حضن ابوه من رجليه وظل يبجي رافع راسه عليه صفاء دنك لمستواه  بوهن وضعف وشاله بتعب ويشم بي عرفت هو مديشم أبنه ديشمه لان ريحتي بي تركتهم وطلعت ..

رجعت للغرفة بقيت اتصفن ، لميت رجليه لصدري وحضنتهن ، خليت خدي على ركبي وصارت الدموع

تنزل ، غمضت عيوني احبس دموعي ميفيد تتكاثر اكثر واكثر ، قلببي يوجعني ما اعرف شلون اتصرف .

ع هالحال اني ودخلت ماما بيدها همام يبجي مكطع نفسه من البجي على ابوه ، اخذته اريد اسكته ظل يضرب بيه ويبجي ، احتارينه بي ، اجه بابا اخذه ووداه لصفاء .

لليل ظليت الوب اريد ابني وهو باقي يمهم ، رحت حاجيت بابا راح جابه نايم حبيبي سودة عليه اخذته ابجي يربي دموعي ماتخلص لشوكت ابقى هيج اني

الله ينتقم من الي فرقوا هالطفل عن ابوه .

بقى يلح يوميه يبجي يريد ابوه واني اريد اعوده ينساه بس وكعت بيها ومجنت اعرف هالشي غلط ولازم نفصل مشاكلنه عن هالطفل ..

بعدهه تمرض همام وصارت حالته اسوء ، ترك الاكل

وبس يبجي دخلت بي مستشفى بقيت ايام تبهذلت من صدك ، بس منطيت خبر لصفاء ..

اجاني بابا للمستشفى كعد يمي ع السرير واني ابجي ..

: بنتي أبنج ميرهم بدون ابوه ولا بدونج ولج گلبي ديتكطع من اشوف حفيدي كانولته بيده وكاطع الاكل

ماما : زهوره بنتي شنو ذنب همام يتحمل نتيجة اغلاطكم ولج أبنج حيموت هيجي ميصير تبقين حارمته من ابوه لج هذا مو عقاب بعدي ابنج عن عقابج لزوجج ميصير يا امي ..

سكتت مجاوبت بس ابجي وابوس بيد همام الي نايم وميدري بالدنيه ..

امي كالت فكري بنتي فكري دخيلج خل نشوف صيغة حل ترة صفاء مستحيل يطلك مستحيل .

يعني شنو ماما ارجعله بعد كل هذا ؟

مكلنه هيج بس لاتحرمين الطفل من ابوه فكري يابنتي بكل الاحوال القرار الج بس كون قرار ينصف ابنج الي ديموت على ابوه ..

ظليت اباوعلهم بتوسل محتارة حيرة جبيرة ، حرت بين أبني وبين كرامتي ...

مستحيل ارجعله مستحيل ..

ماما  خلي همام بالنهار يمه وبالليل يمي بس رجعه لصفاء مارجع خلي يطلكني .

ظلوا واحد يباوع للثاني .. طلعنا من المستشفى

لمن صار زين همام ظلينه ندزه بالنهار يمهم وللمغرب اخذه يمي ، بس طول هاب الفترة اكعد ابجي عليه

اجه بابا يمي شافني ع هالحال تحسر وكعد بصفي .

مد ايده يحك بلحيته ؛ راح تبقين على هذا حالج زهراء شون وياج بنتي هذا هو ابنج مو بعيد يمج تره .

خليت راسي على كتف بابا وظليت ابجي ، ظل يهدأ بيه ، اخذني لحضنه ..

_ زين شنو رأيج تدخلين دورة مال تعليم سياقة تتعلمين تسوقين وبس تضبطينها الج مني سيارة .

جنت كارهة الدنيا كلها طالع من عيني كل شي

تبعثرت وتشتت مالي واهس لاي شي واي شي مايفرحني .

لاسياقة ولا تعيين ولاغيرهم اريد ارجع الزمن ليوره

واعيش بين زوجي وابني ، حياة مابيها  اسراء ولا الي صار كله .

بس بابا أصر اله اخذ دورة تعليم سياقة وفعلا

تعلمت اسوق وبابا اشترتلي سيارة وصرت اطلع بيها

اني وخواتي وماما ، تعودت على وضعي بس بداخلي حزن وبقايا عذاب وحب واشتياق .

بابا دورلي شغل واشتغلت بمستشفى اهلي

وبيوم طلعت من المختبر تفاجئت بصفاء

كدامي ديمشي وبصفه دكتورة ، عضيت شفتي وبداخلي احجي ابو النسوان ميشبع من النسوان ...

بس هذا شصاير بي حالته حاله ومبهذل ، ومبين تعبان زين هو شيسوي هنانه معقولة لاحكني هو ميداوم هنا

درتله ظهري ورجعت للمختبر وطكيتها صفنات .

خلص دوامي وداارجع للبيت نزلت واني بس افكر

رحت للكراج داخذ سيارتي ، صعدت بيها وجان يصير

كدامي ، اريد احرك اطلع واكف .

نزلت واسوي نفسي ما اعرفه ببرود حاجيته

بلا زحمة وخر دا اطلع .

اجه يمي وكف ؛ مبروك الشغل الجديد والسيارة بله مافكرتي وراج رجال تاخذين منه الاذن بكلشي لتنسين تره اني ممطلكج لهسه .

_ وشسويلك اذا ممطلكني رفعت دعوة طلاق وانت تماطل صار اشهر شسويلك بلله ؟

تقرب اكثر ؛ زهراء من بعدج كلش تعبت والله حرام شتردين مني كولي انفذ بس ارجعي لج فكري بأبنج ابنا همام ميعيش بدونه هذا متشوفي جان وردة مفتحة هسه ذبلان وجهه اصفر شحاله .

ديحجي لزم بطنه متوجع وكوة يتنفس .. ابتعد خطوات طخ بالسيارة الي وراه وبقى لازم بطنه

صفنت عليه انقهرت ، ظليت اباوعله بشفقة ممزوجة بتعالي ، سمعت صوت عامل الكراج ؛ خير اختي اكو شي ؟

التفتت عليه !!!! سمعت صوت صفاء يوكع بالكاع ..

يتبع ..

شريعة العشق

بارت ٦٠

نورا ناصر ..

اعرفها تحّن لمن

يجيها الليل ، أنه اتحداها

اذا متشوفني وتغفه...

التفتت وراي باوعت بصدمة لصفاء الي جان مكرفص ع الكاع ومثني رجليناته ومخلي كصته على ركبه ومدخل ايده مخليها على بطنه ويصدر تأوهات موجوعة .

بقيت اباوعله صافنة وعيوني مليانة دموع ، من اعماقي احس انو قطعة من روحي تتوجع واني واكفة بعجز مكتوفة الايدي .

احتاريت شنو أسوي بهاللحظة ، وهو منعزل عني بغير عالم ، عالم كله الم ووجع بسبب ناس متخاف من الله .

دقيقة واجوي اثنين اعرفهم واحد ممرض والاخ صيدلاني يعرفوه الظاهر لان صاحوه بأسمه

دكتور صفاء ..

كومو من الكاع كوة ، اخذوه ورجلي تخط بالكاع

وبس يون ويتألم .

بقيت متفرفرة وروحي معلكة ، لا ادري اتبعه لا اكدر اروح واعوفه ، حتى نفسي ضاق بصدري .

فززني صوت العامل مال الكراج وهو يوجه الي سؤال

شيصير منج الدكتور ؟

باوعتله فتحت حلكي ها!! مااعرف شنو اجاوب تملصت من الاجابة ، مسحت دموعي الي غسلت خدي بحركة سريعة مستعملة ظاهر كفي ، وحاولت اخفي دموعي الي تجمعت بعيوني ، دنكت راسي للكاع ، فتت بالسيارة بسرعة وسديت الباب .

خليت ايدي ع الستيرن وشهكت بقووة ، والايد اللخ على قلبي وظليت ابجي بحركة وقهر ، صورته متفارك خيالي ، رجلينه وهنه يسحن ع الكاع منظرهن طابع بعيوني .

لزمت الستيرن حيييل بيدي وخليت راسي عليه وكملت بجي ، وصوت شهكاتي مسموعة ، ممهتمة اذا احد شافني ، حبي الي تعبت عليه هيج صاير بي

الله لينطيكم ظليت ادعي عليهن .

فكرت بسرعة صفاء خطية وحده هسه خلي اخابر اهله

لالا خلي اخابر بابا يكوللهم .

جريت الجنطة طلعت النليفون وايدي ترجف ومبللة ببقايا دموعي ، نوحي وانيني مافارقني ، طلعت رقم بابا واصابعي مبللة بدموعي والفون شكل ، مسحته بملابسي واتصلت ببابا وظليت احاول اتنفس واتخلص من بقايا شهكاتي الي تطلع بحركة وحزن  .

اجاني صوت بابا وهو يكول آلو ها زهورة ..

حجيت وبعدها نبرة البجي مسيطرة عليه ..

الو بابا اااااا ..

حسيته انتفض ؛ خير زهرة شكوو شبيج ؟ خو ما سويتي حادث خو ما احد تعرضلج ..

شهكت بجي .. وهو يحجي .. بنتي احجي شبيج لتخليني قلق عليج احجي بسرعة .

حجيت وبعدني ابجي وابجي واحجي بكلمات  متقطعة ؛ بابا اني زينة بس صفاء وكع وتخربط خابر على اهله خليهم يجون للمستشفى ** ..

_ انت يمه هسه زهراء ؟ اجيج اني هسه ؟

_ ‏‏୪ بابا ‏‏୪ اني هسه راجعة للبيت ...

كال بنبرة سريعة ؛ تمام هسه اخابرهم حا‏‏୪ بس انت شكلج تعبانة تردين اجي عليج ارجعج للبيت ؟

_    ‏‏୪ بابا حبيبي مبيه شي بس انصدمت لمن شفته

_ ارتاحي وشربي مي ولتسوقين وانتِ بهيج حالة ومن ترجعين للبيت تحجيلي كولشي يله بنيتي ما اوصيج على نفسج بعد .

ماشي بابا ، ختمت المكالمة ويه بابا ، فعلا حسيت ريكي ناشف ، عندي بطل مي جرعت منه شوية

حسيت راح اغص بي بعده قلبي يوجعني على صفاء

غمضت عيوني استغفرت ربي ، دعيت اله بالعافية ترجع اله ع الاقل لخاطر ابنه ، حركت سيارتي ومشيت

..

مشيت بالسيارة فاقدة حسيت حرر وخنكة حتى نسيت اشعل تبريد ، مديت ايدي شعلته ، واني بنص طريقي رن تليفوني ، فزز كلبي خاف خبر من صفاء ، لساني ظل يتمتم بلا وعي مني يارب مابي شي .

اخذت الفون وعيني ع الشارع ، بنظرة خاطفة على شاشة الفون شفت بابا حبيبي  يتصل رديت عليه بسرعة وبلهفة وبخوف ؛ ها بابا خو ما صار لصفاء شي طمني فدوة .

حسيت على نفسي بالغت بردة فعلي ونسرعت

عضيت شفتي بندم .

اجاني صوت بابا بحنية ؛ ୪ بنتي اني اتصلت اطمأن عليج بالي يمج من صوتج مبينة تعبانة ، صفاء مابي شي اطمأني ، انطوه مسكنات وخلوله مغذي بالمستشفى خابروا عليه وجاوبهم وهسه رح يرحوله .

_ ها بابا اني زينة رح أوصل للبيت هسه حبيبي ليظل بالك .

_ اذا شفتي نفسج متكدرين تكملين سياقة اوكفي بمكان واني اجيج .

_ حبيبي بابا تسلملي يا نور عيوني انتَ ليظل بالك مبيه شي رح اوصل .

_ يله لعد توصلين بالسلامة بنيتي الله وياج .

_ الله وياك بابا .. سديت المكالمة ، اتنفست بعمق اجيت انجلط عبالي بي شي ، حبيبي بابا باله يمي

ربي يحفظه إلي ويطول بعمره ..

مسافة الطريق وصلت للبيت ، نزلت من السيارة فتحت الباب ركعتني الشمس ، حسيت بدوووخة قوية ، اختل توازني ،  لزمت بالبنيد واحس انجوت ايدي لان حار .

وخرت ايدي بسرعة وفوتت السيارة جوه واحس الدنيا ظلمة بعيني ، دخلت للبيت كوة مسيطرة على نفسي .

تلكتني أُمي ؛ هلو ماما ..

هلا زهورة خير شبيج شكلج  تعبانة صوتج مو تمام عيونج حمر ؟ باجيه انتِ بنتي ؟

محجيت بس كعدت ع اقرب كرسي منهارة ، خليت اديه على وجهي ، اجاني صوت ماما ..

_ اسم الله ، اسم الله ، شبيج يوم احد مضايقج احد متعرضلج شجاج ؟

جابت كرسي وكعدت يمي وتحاجيني بخوف وهلع ..

قهرتني نبرة صوتها ماردت اضوجها اكثر

حجيت بقهر وحركة ؛ ماما صفاء وكع كدامي ..

لطمت على رجلها ؛ عزااا وين وكع شجاااه ..

نزعت شالي حسيت حرارة محاوطتني عبالك كاعدة بنص تنور ، شمرته ، خليت اديه وره رقبتي عركت احسس ناررر ..

كومتني ماما من ع الكرسي ، اخذتني للصالة

كعدتني ع التخم ، وحضنتني ، تاخذ كلنكس وتمسح وجهي فضت من العرك ،  اجتي مريم

شافتني منهارة عاطت شبيج زهراااء ؟

ماما اشرتلها جيبي مي بسرعة ..

راحت جابت مي وكعدت واني ظليت احجيلهم واني ابجي ..

مريم ببلاهة كالت زهراء بعدج تحبي ؟

ماما جاوبتها ؛ حتى لو بطلت تحبه ابو ابنها هذا متريد يصيرله شي لخاطر همام ع الاقل ..

كمت ع حيلي عطت ؛ همام وينه وينه همام ؟

ماما كامت لمن كمت كالت مطمئنة ؛ على كيفج يوم اهدي ليصيرر بيج شي ابنج نايم بغرفتج .

طلعت من الصالة رحت للغرفة ، ماما ومريم اجوي وراي ، فتت للغرفة مالتي  كفخ بوجهي هوا التبريد

باوعت ع السرير حبيبي نايم وممتغطي .

شمرت نفسي يمه وغطيته بالشرشف ، اخذت ايده وظليت ابوس بيها ، ماما كعدت ع طرف السرير

سألتها متغدي ؟

_ اي حبيبة شون ما اغدي ..

_ خو ما ظل يبجي ؟

_ لا ميبجي بس يسأل يكول ننه وتفتف ع طول الوقت يحجي بيكم .

اخذت ايده شميته وبستها همست بمرارة"حبيبي"

مريم بقت واكفة كالت ؛ وين شفتي صفاء ..؟

_ بالمستشفى ...

_ وهذا شعنده بالمستشفى الي تشتغلين بيها خاف مراقبج وتابعج ومن شافج تستغلين بيها نقل نفسه الها .

ماما كالتلها ؛ عيني سيادة المحقق روحي حضري لاختج لكمة تاكلها متشوفيها شحالها وتعبانة .

_ لا ماما ماريد ما أشتهي والله ..

_ ليش يوم وجهج اصفر وتعبانة اكلي بلكي ترتاحين 

_ اي ماما وجهي من الهبطة ارتاح واكل هسه ماريد .

_ براحتج حبيبة ..

_ عبير وين ؟

_ طلعت وي قسور يحللون عمود العقد مال المحكمة ولهسة ماكو مابينوا ..

_ اي نسيت كالت البارحة يمكن يتغدون بره او بيت عمه لتقلقين عليهم .

_ اووف عمتج الله يهديها .. كالت هيج تنهدت وكامت وحاجت مريم ؛ يله بنتي عوفي اختج ترتاح ليكعد همام من صوتنا  خليها تنام على نومته .

اخذت مريم وطلعت واني تمددت بملابسي مالة الدوام باوعت لهمام وظليت ابجي بحركة واحاجي بصوت اشبه الهمس حبيبي هيمو ابوك مريض سودة عليه مرضنه المايخافن من الله الله ليوفقهن ان شاءالله ..

                               *****

عبير .. بعد المشية خابرني قسور وأأصّر إله نعقد ..

جاوبته ؛ بس احنا ما اتفقنا هيج قسور كتلك ماريد مظاهر فرح اله بعد دوران سنة مها .

_ إي اني كايلج دُكَي وركصي لو هلهلي وحتى لو ماكو حزن عندج هم محسوين هيج الدك والركص بس الي شكلج مفرحانة ابد لج بابا عقد عقد اجيب سيد لبيتكم واعقد عليج وااالاسبوع البعده نمهر محكمة افهمي لج عبير اريد امتلكج قبل لا تغيرين رأيج لج الاوضاع موزينة خاف اموت واني محروم منج .

_ لا عفية قسور شنو هالحجي الله يخليج لاتجيب سيرة الموت على لسانك ترة متعقدة من هالسالفة اني حباب .

_ اي ياروحي وانفاسي والله لا ركص ولا دكَ وهم عيب من كرار وزحمة .

_ مو بس عيب منه ترة مها صديقتي قبل حتى ليعرفها كرار وتعنيلي هوايه .

_ اي لعد هذا هو عبيري بس نعقد واطمأني امي مراح تهلهل .

ضحكت ؛ ايييييي من حبها الي حتى تهلهل زين منها وتجي .

_ معليج بيها عليج بيه شكتلج اني من قبل عبير  انت تريديني لو لا ؟ تحبيني لو لا؟ حتى اكدر اكولج لخاطري .

_ اي ..

_ اي شنو بالله هذا الي عندج لج بحبحيها شجاج كولي احبك اموت عليك كولي شي صخام مو تعبتي كلبي .

بضحكة مكتومة ؛ اي قسور اي ....

عاط الله يصبرني يربي منك الصبر ....

ظليت اضحك ... كال اي هاي هيه مدام ضحكتي كلش كافي ضحكتج اووووف ضحكتج عن الف كلمة احبج يكفيني اشوفج سعيدة ...

ختمت وياه المكالمة وهو بلغ بابا ع العقد ..

بنفس الاسبوع جاب سيد ووياه اهله واحنا وعمامي

لبست فستان اسود قصير للركبة ، فتحت شعري وسويته بيرمن ، ومكياج كلش خفيف ..

اجت امه واخواته بس احس وجهن ثكيل .

خو عمه شبعتنا اني ومريم خزر بس احنه كضيناهه ضحك وتحشيش بيناتنا وهيه عبالها عليها تفر بديها وماما تخزر بينا ...

تالي لبست ودخلوني ع السيد وعقدنا وطلعت اجه يمي للصالة كعد بصفي ولبسني الذهب ، جان كلش فرحان

لدرجة محتار شيسوي ، يلزمني ايده ترجف مو ثابتة ممصدك ، بوسني على راسي وطول ببوسته وكام باس امه ورجع يمي ، همسلي كومي سلمي ع امي .

همستله غير هيه تجي تباركلي .

ميخالف عبير ميخالف ابدي انتي بالصلح  وبداية خير

ان شاءالله .

هزيت راسي وبقلبي كلت امري لالله ، كمت بوستها وهيه هم بوستني بس شالفايدة القلوب شايلة والوجوه ثقيلة .

رجعت يمه ، كعدت بصفه ، هو عدل كعدته ، اخذ ايدي باسهه حيل ورجع باس راسي ، همس بإذني

احبج حيييل احبج امووت عليج ولج جنتي حلم وردي احلم بي كل ليلة هسه ممصدك صار حقيقة .

رفعت راسي اله مبتسمة ..

همس ؛ اووف ياضحكتج دوة جروحي الما استغني عنها يكفيني تضحكين الي والله والباقي كله يهون .

جنت مخليه عيني بعينه مباشرة من حجه هيج نزلتها ومستمر ابتسم وخجلانة بس احس كلامه يسقي بأعماقي ويحصد مشاعر حلوة .

"وبنفس الوقت خايفة من هذا الحب"

قرب يصير المغرب وهو كاعد بصفي ماقبلت احد يشغل دي جي واغاني ابد .

يكفيني غزله الي ترس اذاني كلام ماينكال بأحلى الاغاني واروعها ..

اجته أُمه وكفت كبالها وخيم ظلها علينا ؛ يله يمه كوم عبالك كاعدين بعزا .

عمه ام كرار كلتلها اسم الله ليش تكولين هيج ..

اي خيه ماتشوفين لا صفكة لا هلهولة شعندك كاعد يله كوم .

جاوبتها عمه ام كرار ؛ خيه احنه رخصناهم وحتى كرار كال خلياخذون راحتهم هو غير الحزن بالقلب ويبقى بالقلب بس هيه خطية مقبلت هم حقها صديقتها وعشرة عمر .

جاوبها قسور يوم روحي اني اجي وراكم ..

جاوبته بنتر ؛ منو يوصلنه وثاني شي عيب من خالك شيكول عليك صارله ساعة لازك يمها .

تباوعلي وتعوج حلكهه .

ماما جاوبتها  ؛ اي غير صارت مرته بعد ، وتره تحسين مو من هذا النوع وهو واثق من قسور وقريب اله ويحبه .

؛ اي بس خلي يكوم يوصلنه ..

كالت هيج ودارت  وجهه .

دغيت قسور باوعلي ، ترجيته بملامحي بأن يستجيب لأمه ويروح وياهه .

تنهد وكام ، كمت وياه ، اخذ إيدي باسها وباس راسي وراح ويه امه ..

زهراء .. وره مخلصت حفلة العقد مالة عبير طلعت انظف الطرمة المغرب سمعت صوت زوج رشا ابيت عمو

استغربت هذا شوكت اجه ؟

انوب فززني صوتها تصيح حيل بصووت عالي ..

_ اي عيني اي بعد هاي السنين جايني اكيد متزوج هناك ومتقبل تسحبني يمك موو ؟؟شوف اكولك جهالك مااخليك تشوفهم افتهمت لوو ୪ اله لمن تسجل البيت بأسمي وتكابلني وتكعد بعد متطلع من بغداد افتهمت .

هزيت بيدي وفتت جوه انقرف من صوتها .

عبير .. بعد العقد داومت لابسة الحلقة ، شافني أسامة ظل يباوع على ايدي وصافن ، فتت من يمه داافوت للقسم همسلي للضابط مو ؟

اللتفت اله باوعت بعيونه ثواني وبعدت نظري متفاجأة

جاوبته ؛ شكَلت ؟

_ انخطبتي للضابط مو ؟

هزيت راسي وكلت بلي ابن عمتي .

_ الله يسعدج ..

_ تسلم ..

بعدها بأيام اخذني  قسور ورحنه نحلل دم وجان كل  حجينه عن امه والتصرف الي تصرفته بيوم العقد

هو بدا الحجي عنها وظل يطمني معليج منها واني راح ادللج وهي بمرور الايام تتقبلج اكيد ..

ويرجع يتغزل بيه واضحك وهو يضحد وياي

ويكول بعد عمري هالضحكة """"" ونرجع نضحك سوه ..

خلصنه التحليل كال ها شنو رأيج نروح نتغده ابيت اهلي ؟

اي خاف امك تسمعني حجي امشي انته ويايه تغده..

_ متسمعج حجي  لتهتمين وتعودي عليها احسن ..

ضحكت قصدك اتعود على حجيها و بساميرهه ؟

ضحك لج ୪ مو هيج قصدي يعني رجعي علاقتج بيها نفس قبل من جنتوا قبل لا افكر اخطبج .

_ اي هيه هم جانت تحبني وتعزمني ع دولمة بالضلوع  بس لمن خطبتني انت تغيرت ٩٠ درجة لو مخاطبني احسن وضحكت ..

حسيته ضاج خطية عرفت نفسي جفصت ظليت اباوعله وابتسم بخجل واحراج وهو يحك بشعره

بعد لحظة صمت كال يله المهم اني احبج وما اعتقد جانت تحبج بكد ما احبج هسه اني .

رحنا لبيتهم ، فات قبلي بقيت واكفة اباب الاستقبال استحي افوت اصلا صار كومة مجاية الهم حتى احس البيت غريب عليه وعبالك اول مرة افوت اله .

هو اشرلي كال فوتي وطب يصيح يووم ايناس وينكم

سمعتها جاوبته من المطبخ كاللها جبت عبير ويايه

كالتله ليش مكتلي ممسويه غده .

لزمت الجنطة عصرتها حيييل استحيت وضجت انوب صوتها عالي واحسها تسمعني ...

هو طلع باوعتله بقهر ، هو حس بيه سمعت

ابتسم بتوتر ، تقرب مني اخذني من اكتافي للصالة

كعدت شويه ونزلت ايناس سلمت عليه وكعدت تسولف ويايه ، وره وين يله جتي عمه وسلمت وتالي كامن اثنينهن وكعدنا وحدنا ..

لزم ايدي سحبتها منه وشويه ابتعدت عنه .. عرف اني ضايجة من الي سمعته ، بقينا ساكتين اثنينا التفتت اله ..

كتله قسور اريد اروح للبيت ..

كال شفت بيت قريب على منطقتنا وحلو عجبني

ترحين تشوفي وياي ؟

_ اي بس قسور ما اتفقنا هيج وممبلغة ماما وبابا رجعني لبيتنا ..

_ لج شنو تخافين مني مالج ثقة بيه واذا ممبلغتهم يمج الفون خابريهم هسه واذا مقبلوا نرجع للبيت شكو بيها .

طلعت تليفوني خابرت على ماما متجاوبني توقعت اكيد ملتهية ويه همام ، او نومته ومسويه الفون صامت ، دزيت الها مسج وخابرت بابا حجيت وياه

كال ميخالف روحي باباتي .

هو خابر على الدلال مال البيوت اخذني ورحت وياه

اخذ المفتاح منه ورحنه ع البيت ، دخلنا بي ، حلو مرتب بناءه جديد وصلنه للدرج باوعتله

هذا شنو الدرج باياته جبيرة ؟

_ معجبج ؟

_ لا بس باياته جبيرة ..

حك مؤخرة راسه ؛ يعني متكدرين تصعدين .

ما احس اله شالني عطت عزاااا قسوور نزلني شدتسوي ..

لجج اصعدج الدرج شبيييج فضحتينه ، شايلني ويصعد بيه الدرج واني احوس وهو يصيح عليه

لج اسكتي صوتج شعلوه لج لاتحوسين لنوكع ونتكسر ويزفونه ع كراسي متحركة ..

وصلنه لنهاية الدرج نزلني كال اي والله صدك حقج هذا يتعب الدرج ..

باوعت للفوك كتله ماكو غرف جوة موو ؟ بس فوك

وظليت افتر اجه ورايه كال اي اثنين غرف فوك .

وكفت باوع قسور البيت حلو وعجبني بس الدرج يراد سنة يله اصعد مو من نتزوج ونعيش هنا وانت فوك واني جوه تصيح تريد تشي تكول ليش تأخرتي من هسه اكولك .

كام دنك وباسني بخدي ، انصدمت عطت عزااااا قسوور شدتسوي ونزلت اركض من الدرج بسرعة ...

نزل ورايه يضحك ؛ هاا اشو نزلتي بسرعة البرق هسه ..

_ منحررررف امششيي وديني للبيت يله ...

ضحك واخذني للمطعم تغدينا لان يعرف اذا رجعني لبيتهم مراح اكل لووو اموت ..

خلصنا غده رجعني للبيت ..

زهراء .. داومت وراها بس مالي خلك ابد ، ويايه صديقتي ياسمين ظلت ايام تلح عليه شبيج وشبيج سولفتلها كل شي ..

كالت عزاااا لج هذا من صدك مسحور هاي انت شون مأمنته يمهن لج السحر يوصل لدرجة ينهي حياة الشخص يمعودة ارجعي لرجلج خطية وانقذي من هالحيايه هاي ..

يمممه صدك تحجين لا عفية اسم الله ماريد ابني يعيش يتيم ..

لج عزا اعرف كوومه يموتون بالسحر واكو يتلكوهه بعافيتهم ويأثر عليهم نفس زوجج بالضبط واكو لا بسبب السحر يتلبسهم جن وهم يموتون وظلت تشرحلي عن السحر وشيسوي بالواحد ..

اخذها الواهس وعلت صوتها ، سمعها حسن زميلنا هم محلل كاللها بضحك ما شاءالله خبرة بالسحر انتي ..

انداريت عليه بعصبية : وشكالولك عني اسوي سحورة مو ؟ هيج تقصد انته ؟ وشعدنك خال ذانك يمنه شنو ناسيها ولعلمك اني لو اسوي سحورة جان ما شفتني هسه يمك لا والله جان هسه متزوجة احسن واحد يصرف عليه  معيشني ملكة الملكات ، جان هسه احسن بيت عندي احسن سيارة عندي ..

ظلت تخرط واحنه صافنين عليها خو حسن حسيت بي ظل يلعن الساعة السودة الي فتح حلكه وحجه بيها

تالي كاللها بنتر اشش سكتي يا حجايه ردي لمكانج دنشاقة ..

كالتله شبيك تصيح ممتعامل ويه انثى من قبل ؟

انت انثى انتي ؟ انت انثى الغراب انثى البومة انثى السحلية سعللللوة ..

وانت ذكر !!!

اششش سكتي سكتتت ودارت وجهه عنه ..

واني ظليت سارحة بكلامها لايربي ୪اااااا ماريد صفاء يموت دخيلك ربي دخيلك ..

دخلت دكتورة كالت زهراء ممكن تتفضلين ويايه شويه ؟

تقدمت باتجاهه نعم دكتورة ؟

الدكتور صفاء محتاجج بشغلة قبل ليدخل لصالة العمليات ..

ترة اني محللة مو ممرضة او دكتورة حتى يحتاجني اني شغلي هنا ..

افتهم بس هو حيدخل كمريض لو مو كدكتور عنده كلام وياج يريد يكوله قبل ليدخل للعملية ..

عملية ؟؟ صفاء حيسوي عملية ؟ عملية شنوو ؟

نزلت دموعي بسرعة وقلبي اريد اسيطر على نبضاته مااكدر ...

يتبع ..

البارت هدية لخالة ام ايمن السيلاوي ⚘😍 شكد احبها قمة بالاخلاق يربي ربي يحفظج خالة ، اعتذر البارحة المفروض البارت الهدية الها بس لان البارحة عذبني بالنشر وهيه فازت بالمسابقة بالكروب وحصلت ع التغشيشة ، فديت بنات كروب فراشات ممقصرين بالتفاعل ع القصة واحنه ان شاءالله ممقصرين بالتغشيشات 😁💚

وتحياتي لكل المتابعين للقصة 😘وتحية خاصة للسوريين الكيوت 🥺🥺 ولكل العرب المتابعين ويانه..

اليوم وانا دا اكتب الحوار الي بين زهراء وابوها اتصل زوجي كتله ها بابا 😂من كد ممندمجة وياهه

انوب يكولي شبيج متيهة شكاتبة على رقمي  🤣

شريعة _ العشق

بارت ٦١

نورا ناصر

_ عملية ثقب بالمعدة!!!

جاوبتني الدكتورة باقتضاب وأنفة وهي تقرا علامات الحزن على ملامحي وكملت بتساؤؤل

_ حتجين لو لا ؟

وانطتني ظهرها وكأن ملامحي اكدتلها جوابي بإي ..

تبعتها استخرج صوت مسجون بدهاليز ضاقت من العبرات ؛ دكتورة حالته شلونها ؟

جاوبتني ؛ ما ادري اسألي الدكتور مالته ..

_ وينه هسه هو  ؟

_ بغرفة التخدير ..

سكتت واني اتبعها واللتهيت امسح دموعي ، فتت من باب بس الاطباء يفوتوله ، شفته ممدد ع السديه ولابس ملابس العملية انكسر قلبي عليه .

هو شافني باوعتلي ابتسم والدمعة بطرف عينه

ماكدرت اخفي دموعي ولا اسيطر ع الغصات الي حشرت بحنجرتي و ‏‏୪ كدرت اسيطر  على كبوة مشاعري كدامه .

ناداني بصوت راجف ومتكسر ؛ زهراء!! توقعت متجين اذيتج اني زهراء اذيتج ..

خنكت العبرة صوته .

خليت ادي على حلكي اكتم شهكة فرت من حنجرتي

وضاقت بيها انفاسي .

كمل .. زهراء سامحيني اريد ادخل للعملية مرتاح .

.. سهلة بسيطة ان شاءالله ترجع ءءء لابنك سالم ..

بس لابني زهراء والج ماارجع زهراء اني مستحيل اطلكج .

صفاء حباب مو وكتها انت تعبان هسه وراك عملية فدوة لاتسوي هيج بيه وبنفسك ارتاح ..

انت ريحيني زهراء ريحيني ..

زدت بجي احس عاجزة ، اباوعله حالته ضعفه يموتني ويدمرني ..

كمل .. زهراء من رحتي لليوم اني اموت بعيني كل يوم اموت وكاره نفسي زهراء اعرف اني مو طبيعي لج زهراء والله وخاف متصدكيني اني كل صبح اكعد احس مو صبح احس بعده ليل ظلمة بس انت الجنتي نور بحياتي .

كافي حباب صفاء كافي لتعب نفسك وراك عملية انته ارحمني وارحم نفسك ..

قربت منه لزمت جبينه ، غمض عيونه ، مد ايده لزم ايدي وابتسم وابتسمت وعيوني كلها دموع

ظل هو يطمن نفسه ؛ ادري بيج تحبيني ادري متأكد اني .

دخل طبيب التخدير ؛ يله دكتور صفاء جاهز .

ترك ايدي وطلعت من يمه ..

اخذتلي نوبة بجي قبل لا ارجع للمختبر ، شفت عمو ابو احمد وبهاء ، حاولت اتهرب منهم مااريد يشوفوني بهالحالة وبنفس الوقت عيوني بقت تدورها وينها

ادور الاخذته مني مدري الاخذته منها .... مشفتها استغربت ورجعت للمختبر .

شفت  ياسمين صافنة وحسن ديشتغل لمن وصلت يمها كالت هيه مو البومة بومة يعني انثى هو شكو يحط مصطلح انثى قبلها هذا شيقصد وباوعت على حسن خزرته هو شافها رفعلها تك حاجبه .

كتلها بمرارة هيه هاي اكبر همومج ؟

لج لا البارحة طلعت من المستشفى فتت ع محل دااطلع شفت واحد صاك نزل من سيارة كولش طاكة واخر موديل

وكفت اباب المحل اباوعله هو اجه باتجاهي واني بقيت مصفصفة بمكاني هو كال وخري شويه .

باوعتلها كتلها اي !!!

كالت لج لازمة صدريتي البيضه يعني اني مو شكول دكتورة ؟ الله عليج طلي بوجهي مو شكول دكتورة ..

اني وين وانت وين دخيلج ؟

اي يعني لو شكول دكتورة جان كالي من رخصتج دكتورة وخري دكتورة مو صح ؟

فريت ايدي ولج اني بيا حال ..

صدك شرادت منج دكتورة رهام ؟

حجيتلها وكوة مسيطرة على نفسي ما ابجي ..

كالت يا عزااا هاي من كد السحورة حتى معدته ثقبنخا المايخافن من الله طيح الله حظهن وانت شلون ساكتة هنيالج على برودج .

غمضت عيوني وعضيت شفتي ..

فززني صوت حسن وهو يكول انتن مو لاهيات تحجن بالسحورة وعايفات الشغل عليه

اندارت اله ياسمين كالتله شتقصد عيني يعني احنه امهات سحورة ؟

والله ما ادري اناي ادرى

يعني انت بعدك مقتنع بيه اسوي سحورة مو ؟

اي والله مبين عليج خبرة بهالمجال صرعتي راسها للبنية واني رايح للكافتريا وانتن كملن الباقي .

رجعت للبيت حجيت لماما كل شي ظلينه نصلي وندعيله ، ربي يخلصه من شرهن ..

  يوم ثاني اجه بابا كال صفاء طلعوا للبيت امشوا نتحمد السلامة اله خطية حالته حاله وتعبان ، بالبداية رفضت بداخلي وبقيت ساكتة ..

ظلوا يباوعولي ها زهراء شكلتي ؟

روحوا انتوا ..

ماما ؛ لايصير قلبج قاسي بنيتي هذا قبل كل شي ابن عمج وابو ابنج ولاتنسين حبج اله .

اي حبي اله الي دمرني ..

بابا كال ؛ احنه منكولج رجعيله لا بس دنروح نشوفه وخلي ابنج يشوفج ويه ابوه وهو مريض حتى لو دقيقة وحدة .

ابني طفل وميفتهم ..

انت تشوفي طفل وتشوفي ميفهم بس تره يحس ويعرف بس ميعرف يعبر عن دواخله وهذا كله وكل الي دتمرون بي يأثر عليه اذا مو هسه بالمستقبل .

جريت نفس بعمق باوعت بعيونهم ثواني وكمت على حيلي ونظراتهم تطالعني ..

اني راح اللبس واجي .. عفتهم وفتت للغرفة واحس نفسي بدوامة وافكار مقتحمة مخيلتي ، يربي الي دا اسوي صح لو غلط واني متأكدة انو اهلي صح اكيد ومستحيل يفكرون بشي مو من مصلحتي واني كلي ثقة بيهم .

بدلت اني وهمام كعدته من النوم كعد مزعوج ويخوزر وانوب طكهه بجيه كوة غسلتله وانطيته موزة ظل ياكل بيها لان يكعد جوعان وهو يحب الموز اكل نصها ، غسلتله مره ثانية ودا ابدله نحسس وظل يبجي

لمن كتله حنروح لبابا كيف ووكف مثل الصنم بدلتله وطلعنه ماما وبابا ينتظرونه ..

رحنه لبيت عمو بعد اشهر اني مافايته لبيتهم ولا امي ولا ابويه ، عمه وجهه متفشل ومتحط عينها بعينه

بابا كاللها جايين عمود ابو حفيدي ..

هي فهمت وفوتتنا على صفاء مخلينه جوة بالصالة

ميكدر يصعد فوك شكله تعبان من شافنه ابتسم وهمام

ركض يريد يشمر نفسه عليه لزمه عمو بسرعة ..

طك بجي ويريد يروح لابوه ويصيح تفتف اله ما تفتف

عمو اخذه فهمه انو ابوه مريض وكاله اكعد يم راسه بوسه من راسه حتى يطيب ويصير زين ..

هو اخذ كلام عمو وراح باتجاه ابو يمشي على كيفه ويمسح دموعه كعد يم راس صفاء ويبوس بي

وصفاء اخذ اديه ويبوس بيها ويباوعلي بس ميكدر يتحرك ابد .

واني ظليت ادور بعيوني عليها وينها ماكو ممبينة

انزرعت بداخلي امنية بس شنو الفايدة الي انكسر

مايتصلح ..

اجت عمه كوة تمشي جايبه العصير وخلته يمنه

محتارة تكعد لو لا متفشلة كلش من اهلي .

وجيتنه فشلتها اكثر .

صفاء صاحني اكعد يمه بقيت صافنة مرحت

بابا اشرلي اروح يمه .

تنهدت كمت وتقربت منه همسلي تدورين عليها مو ؟

ترة كسحتها لاهلها واحتمال جبير مترجع بعد .

بلعت ريك وظليت اباوع بالارجاء ماعداه هو ماباوعله

خايفة ينكشف فرحي

جاوبته ميهمني والي انكسر ميتصلح

كال زهراء

قاطعته كمت رحت كعدت يم اهلي ..

لمن جينه دنطلع همام سوالنه حفلة اله يبقى يم ابوه

عمه كالت والله ما اكدر ابقي يمي والله لو تاخذونه احسن لان بس وحدي والخطار رايح جاي وصفاء شوفة عيونكم لا ايد لا رجل وابوه اذا غفى ميحس بنفسه وميكدر يداري الطفل .

بابا جاوبهه بسخرية لعد بنت اختج زوجة الدكتور وينها ؟

ها والله يم اهلها ..

شعجب زوجها مسوي عملية وهي يم اهلها ؟؟ غير مرة هاي ..

اي مو ابوها مريض ..

وبنتج السباعية ام عضلات ماكو ؟

قصدك رشا ..

ليش اكو غيرهه البلوى هاي ..

والله مشاكل وي زوجها الحقير هاي كم سنة يله رجع وميقبل ياخذهه ويا ويريد توكيل منها تخلي ياخذ الجهال بعد هالتعب عليهم تصرف عليهم كله من راتبها وهو كله هناك حتى ميسأل عنهم .

بابا ظل يحك بلحيته بتفكير واكتفى بقول إي ..

كوة شلعنه همام منهم وطلعنه ، طلعت واحس اختنكت زاحمتني  ذكرياتي بهذا البيت الي جنت جزء منه ..

امنية بداخلي اتمنى ارجع بس وارجع الزمن وياها هالرجعة ..

اخذته ورجعت للبيت وهمام ماسكت الا للمغرب يله نلم وحتى بدون اكل ولمن كعد هم خبصني بابا وبابا

اخذته عبير و صعدت تسكته ، كعدت محتارة وافكر واخطط ، طلاك خليته اخر شي ومستحيل افكر بي

اسراء مموجودة واحتمال هو كالي يطلكها ، رشا ملتهية بمشاكلها هالمرة معقولة تسافر ويا زوجها ياريت والله تسافر وارتاح ياريت .

صعدت فوك دخلت لغرفة عبير سمعتها دتخابر قسور وتحجي وياه وهمام نايم بحضنها وبعده شهكاته مسيطرة على مخارج انفاسه موتني قهر ..

دااريد اخذه هيه ختمت المكالمة ويا قسور

كالت اصبري وين ماخذته بقي يمي ..

ليش سديتي جنت راح انزل ..

لا خلصنا حجي ..

ما اكل همام شي ..

كولشي ما اكل ابنج راح ينتكس مرة ثانية خاصة ابوه مريض وميروح يمه هالفترة ..

درت وجهي محتارة .. نزلت جوه حيرة يربي ابني وحبي بوقت واحد الله لا ينطي للي كان السبب ..

دخلت الغرفتي ، رن تليفوني باوعت

  صفاء يتصل بيه ،  دااريد انطي رفض فتحت خط بالغلط تنفست بضيق وبقلة حيله خلي اشوفه خاف محتاج شي ..

خليت الفون على إذني بسرعه حجه

_بداعة همام عندج لتسدين الخط بوجهي بس هالمرة اسمعيني

سكتت سمعت صوته مال واحد عبالك ديبجي همست : صفاء دتبجي شعدنك بهالليل كاعد وانت توك طالع من عملية

_اي كاعد مجايني نوم من لمن طلعتي العصر من يمنه لهسه واني الوجع اكلني اكل .. زهراء البيت اظلم بدونج والله مابي حياة فدووة ارجعي وشتريدين أني حاضر  والله زهراء اني دااموت الف مووته باليوم لج من صدك داامووووت ..

صوته يبجيني خفت لا اشهك بجي وابين ضعفي سديت الخط بوجهه وظليت افكر الليل كله افكر ومانمت ..

الى ان وصلت لحل...

الفجر نمت و من كعدت الصبح طلعت من الغرفة فتت ع المطبخ ، لكيت عبير  ويمها همام وكبالهم صينية الريوك

بس جانت معصبه عليه وتخوزر بي  وهو حبيبي بس شافني ظل يباوعلي مبرطم ..

شلته واخذته شبيج ويا ولج ؟

وكع الحليب ع الكاع وخزرته اشو انخلس....

اخذته  غسلتله واحاجي .. ميخالف حبيبي ودليت ابوسه كال بابا تفتف وطك بجي ..

عبير اخذي الليل كلساع كعد وكال بابا وصفصف اني راح ارجع انام ..

صعدت فوك

وره يومين من السهر والتعب والارق والتفكير

حاجيت ماما وبابا كتلهم اني قررت ارجع لصفاء ..

أهلي ظلوا صافنين عليه واني كملت كلامي أرجعله بس بشرط الطابق الثاني كُله يعزله اليه ويطلعلي درج ع الحديقه وشغلي ميبطلني منه ..

أني دااحجي انتبهت اهلي صافنين عليه باوعت عليهم

_شكو دااحجي شي غلط

حجت ماما : زهراء أنتي كد قرارج هذا ولج خاف ترجع مرته وين تتحملين وجود أسراء أنتي تغارين ع زوجج من الهوا مو انوب تشوفي يطب ويطلع وياها ويعاشرها

بابا : شوفي أني مو ضد قرارج أبد بس ادرسي قرارج صح بالنهاية اذا انفصلتوا محد خسران غير أبنكم

_أي بابا ولذلك أني حرجع علمود أبني صحته بالنازل أني ممستعدة أخسر أبني علمود صفاء أرجعله بس علمود هيمو بس هو ماعنده شي يمي أبد واني اكوله ع كل شروطي واريد اكعد وياه ع انفراد

تمام يجرالج بابا وعفية عليج انت قوية ان شاءالله واحنا وياج بلي تردي وتشوفيه مناسب الج ولابنج .

اوكي بابا شوكت راح تكوله ؟

هسه اخابره واسولف وياه ..

تمام بابا اني رايحة لدوامي .. رحت بدلت وداومت

كضيتها صفنات خايفة من قراري الي اتخذته ما ادري صح لو غلط ..

للظهر خلص الدوام ورجعت للبيت ، رحت بدلت وكعدت بالمطبخ يم ماما وظلت تحجيلي عن مكالمة بابا وصفاء ..

_ ابوج يكول صفاء كل فرح لمن كاله زهراء حترجعلك .

_ ماما فدوة ادعيلي ما اندم بعدين ..

_ لا عليش الندم ماكو شي ان شاءالله واهم شي صحة ابنج دااشوفه يذبل يوم عن يوم ، خو صفاء بحث اخر واحنه وياج بنتي لتخافين  ..

تنهدت الله كريم ..

اكلت و رحت ارتاحيت شويه .. غفيت يم همام ، فزيت على صوت الباب ينفتح ، كمت شفت ماما بالباب ، تمططت حجيت وبعدني نعسانة  ؛ ها ماما اكو شي ؟

صفاء حيجي هسه توة خابر ابوج ....

وين يحي هو توه مسوي عملية يعني صار زين ؟

هو كال لابوج حيجي حتى يسمع منج ..

تمام كايمة .. كمت انتظره بالاستقبال ..

اندكت الباب راحت مريم فتحته اله وفات

يمشي وايده على بطنه ومبين متألم ..

كام عليه بابا سأله ؛ -أبني بيك شي هاي شصاير بيك ولك مدام بعدها عمليتك توجعك ليش اجيت جان ارتاحيت ولا حكين نحجي بالموضوع ؟

تكلم بتعب ؛ لا عمي ما اريد شي يتأجل فدوة اروحلك

كافي تعبت والله .

باوعتله جان شكله يخوف حتى اوردته بارزه من كد مضعفان ومحدب من يمشي ومو ذاك صفاء الانيق أبد صاير من يمشي يسحل برجليه سحل

من شفته بهالوضع لزمت قلبي أحسه يريد يطلع من مكانه هذا حبيبي الفتحت عيني عليه اخذوا مني وعذبوا شصاير بي دمعت عيني من شفته وبقيت باهتة

وهو عبالك ديحس بيه رفع رأسه من شافني أبتسم وكمل مشيته وصل يمي سلم عليه بلهفه

_شلونج بنت عمي شلونج يابعد عمر صفاء وروحه شلونج أبويه أنتي

جاوبته اتصنع البرود ؛ الحمدلله بخير

_عساج بخير يالبعدج ماشفت الخير

دنكت راسي وتنهدت ،

اخذه

دنكت راسي وتنهدت ،

اخذه بابا ودخلوا للاستقبال يحجون واني رحت لهمام سمعته يبجي رحت اخذته وظليت احاجي

حبيبي بابا هنانه اهدأ يله خلي نغسل ونبدل حتى نروح يمه ، هو ظل يصيح بمرح وفرحان .

غسلتهله وبدلتله ملابسه ، وطلعت دا اخذه طلع بابا من الاستقبال تلكاني وقبل لا ادخل للاستقبال لزمني وحطني جوا كتفه وظل يحجي ويايه

_باباتي ديري بالج ع أبن عمج ترى وضعه تعبان وماعجبني حتى أكل مااكل معدته توجعه زين حبيبتي

_صار بابا

اول مدخلت للاستقبال هو بس شافني كام من مكانه واجه اتجاهي يسحل بروحه سحل دنك على همام ويه مادنك كال متوجع اخخخخ بويه .

كتله على كيفك ..

باوعلي وابتسم بس حتى مكدر يشيل همام

بس لزمه من ايده واني كلبي يتكطع وروحي دتمووت على هذا حاله

.:زهرتي عمي كال تريدين تحجين ويايه أمريني شرايده بس لتكولين طلكني ترى ومحمد مااطلكج

أبتسمت: لا مااكولك طلكني أسمعني أني قررت أرجعلك

بعدني ممكمله كلامي عاط: وعلي شتردين يجرالج محبوبتي

اجه ديريد يحضني اشرتله بمعنى اوكف ظل بمكانه

وأني كملت كلامي : بس بشروط

بصدمه: شروووط!!!!

_بلي شبيك متعجب لعد تريدني ارجعلك واكولك شبيك لبيك عبدك بين اديك شوف ياابو أبني تعزلي الطابق الفوك اليه وحدي وتنزلي درج ع الحديقه ومااريد اشوف شكول أختك ومرتك

من حجيت كلمة مرتك احس سجاجين دتكطع بگلبي بس محبيت أبين ضعفي كدامه وكملت كلامي ؛ وشغلي استمر بي ..

_أي من حقج شغلج  واني ممانعج بس شغلة اعزلج الطابق الثاني شلون وانتي تعرفين احنه بناء بيتنا كله بالطابق الثاني يعني الارضي مابي غير بس غرفة الوالد

_امممم قصدك أنت وأسراء اذا رجعت وين ترحون أوكي اخذوا غرفتكم والباقي تعزله اليه

_مترجع ان شاءالله اطلك شيليها من بالج

انت تدللين و صار يجرالج بس شوكت ترجعين؟

_ميهمني دارجع عمود ابني طلكتها او لا وارجع

بعد متعزلي البيت أكيد لان ما اضمن تطلكها

وهسه من رخصتك

طلعت وصحت بابا راح يمه ....

عبير .. بذكرى سنوية مها رحنا للمقبرة نزورها

جان قسور نازل باجازة وراح ويانه

كعدنا يم قبرها اول موصلنه انهارينه يمها

خو كرار انتهى ظل يصيح بصوت مبحوح

ومليان بالعبرات ..

لج مها صار سنة عايفتني مااشتاقيتيلي ؟

ماتوقعتج هيج قاسية معقولة متحبيني وهاي الاربع سنوات احنه سوة وقبلها حب وخطوبة ماشفعتلي

لج مشتاقلج يااا الله مشتاقلج وضرب الكاع بقبضة ايده .. لزمه قسور يهدأ بي ويخفف عنه ..

واني فقدت خليت راسي ع القبر وبس شهكات بكائي مسموعة ، ماحسيت بس لمن قسور يوخرني من القبر

و يغسل وجهي ويخلي بيدي قرأن صغير بي عدد سور من القرآن ، فتحه على سورة الملك ولزمه الي وظلينه نقرأ اني ويا وكلساع يمسح دموعي ..

خلصنا صلاة وقراءة قرآن ، غسلنا القبر وطلعنا من المقبرة نريد نتوجه لكربلاء ، داانزل من السيارة عثرت

السيارة عالية واني كمزت ، قسور جان كبالي

كال خو ماتعورتي باوعتله وابتسمت

جاوبته بهدوء لا ماصارلي شي ..

كال فدوة لطولج ..

كرار توه دينزل من السيارة سمعه يحجي ويايه ..

كال وهو ديفتح الباب لأمه عاد شونه طولها كلها مابيها شبرين ثلاثة .. ومد لسانه

اندارله قسور وضربه على كتفه ؛ اششش لك انت كلك  تروح فدوة لطولها ..

جاوبته معليك بي هو من يوم يومه يعيب على طولي ..

قسور كال شحده يعيب منا وجاي ...

رفع راسه كرار ؛ اي وشسوي يابه ؟

جاوبه من هسه قبل لنرجع احفرلك كبر هنا

عمه ام كرار صاحت يمه اسم الله عليه ان شاءالله الي يكرهوا ..

جاوبها قسور ؛ خالة ترة والله ما ااكرهه اني ..

ماما كالتله ؛  اسم الله عليك يوم الله يخليك لشبابك ..

زرنا ورجعنا لبغداد وصلنا راسي صاير شكده من البجي

ركضت للحمام سبحت ورحت نمت ...

كعدت على حس همام يمي يكعد بيه كعدت لزمت راسي ، شفت زهراء دتريد تاخذه

كتلها عوفي عوفي بعد كعدت شيرجعني على نومتي ..

لج والله غلبني مكدرت الزمه شونها زيارتكم ؟

شونها بعد لج والله ممصدكة صارت سنة ممصدكة ..

الله يرحمها الوقت يمر بسرعة وكله من عمرنا ..

اي زهراء وينها الامانة مالة مها رجعيلياهه اريد اشوف شنو بيها ..

انت مستعدة ؟؟

توترت ءءء ...

انجبي عبير وراج عرس مبقى شي خطية قسور ماصدك تصيرين اله لتعكرين مزاجج هسه .

لج خاف بيها شي مهم ..

لج عبير الحي ابقى من الميت خطية قسور فكري بي ادري بيج هسن تنهارين خليها لغير وكت ..

صفنت بوجهه ، يوم ثاني خليتها تروح للدوام وتوجهت لغرفتها دورتها مالكيتها مادري وين مخليتها ..

من رجعت نسيت اسألها عنها ...

وره السنوية بكم يوم اجتي عمه تتفق ويانه ع تحضيرات الزواج ..

كعدت معاجبها بس ماما همستلي اهم شي قسور خطية الولد اثث البيت وممقصر بتنفيذ طلباتج ..

هزيت راسي بس ممرتاحة لعمة .

عاد هيه كالت ترة قسور هواي متكلف البيت هواي كلفه يعني متحتاج حفلة خطوبة نسوي عرس بالقاعة وهاي هيه ..

اريد احجي كرصتني ماما ... وجاوبتها

_ عيني هاي الشغلات كلها ماتكبر بخت البنية واحنه شارين الولد درة مال الله وينحط ع الجرح وممقصر وياهه واني اسويلها حنة بالقاعة شكم عبورة عندي اني ؟ وباوعتلي وابتسمت ..

ضحكت بوجه امي وباوعت لعمه قسور كال نروح اني وياه نختار البدلات عمه منريد نتعبج ...

تعبوني لو متردوني وياكم ودارت وجهه ..

ماما كالتلها يا عيوني ياخذوج انت الاصل والخير والبركة جبتي وربيتي وتعبتي وسهرتي شون لعد ..

اي قنعيني بحجيج هذا قنعيني ..

اريد اكول شون بلله سكتتني امي ..

طلعت عمه واني رحت اريد اخابر قسور شفت زهراء محضرة روحها دتروح ترجع لبيت صفاء ..

باوعت الها ها انت كد قرارج ؟ حتروحين يعني ؟؟

جاوبت اي لخاطر ابني ماريد اخسره ..

ابقي يمي عاد بينما اعرس وكرصتها ..

يمج هنا اني مو بعيدة وبوستني ...

.......

اجه عليه صفاء بابا كاله : ميحتاج اوصيك لان وصيتك قبل وخوش صنت الامانه ماقصرت أما هسه ماعندي أي وصية الك لان انت سويت الممسوي بشر بس هالمرة أذا اجتني زهوره و جان سبب دموعها أنت او وحده من نسوان بيتكم ذيج الساعه يا صفاء أحفر لحدك بيدك خوووووش

صفاء ماحجه بس هز رأسه

وباس أبويه وطلعنا قبل لنطلع بابا كال : زهره أخذي سيارتج باباتي العدهن سيارة مو أحسن منج

صفاء ظل صافن صعدت بالسيارة مالتي وخليت غراضي بيها اجه صفاء صعد يمي كال : شدعوه ترى هياته البيت حايط ع حايط

_ميخالف اخذ سيارتي ويايه

رحنا لبيت عمو سلمت ع عمو وعمه وصعدت لشقتي طول ماصفاء جان يشتغل حتى يعزلها اني مااجيت

شفت الاثاث كله من الراقي ومرتب ،  عرفت صفاء حيصعدلي قفلت الباب وظليت ارتب باغراضي ومن كملت كمت نظفت الشقه ورحت للمطبخ فتحت الثلاثه لكيته متسوگ حتى نساتل وجبس هم مشتري .

سويت غداء واكلت اني وهمام ونومته وتمددت بصفه ظليت افكر ياترى قراري صح لو غلط

سمعت الباب تندك كمت ع كيف من يم همام حتى ليفز ورحت فتحت الباب صار صفاء بوجهي

حجه وعبالك يترجاني : بس خلي أنام هنا والله مااضوجج ولا أاذيج زهراااااء تعباااان أريد اشرد من كولشي خليني أنام حتى لو هنا بالصاله وعد مااجي يمج

_أمشي انزل صفاء مااتفقنا هيج أبد

_اعرف والله اعرف دااكولج تعبااان ماعندج رحمه

أنتي ؟

ظليت ساكته تركني ونزل مديت رأسي اباوعله من دينزل عثر بالدرج صحت : الله

التفتلي مبتسم وكمل طريقه

ورا شويه سمعت صوت أسراء تعيط وصوت زلم الظاهر اخوتها جايين وياهه

انصدمت هاي شديصير  !!! ....

......

يتبع ..

شريعة العشق

بارت ٦٢

نورا ناصر

♡~~~~~~\\\\~~~~~~♡

فتحت باب الشقة وظليت اطل ، وصوتهم يجيني يعاتبون صفاء بصوت عالي ونتر ..

صوت واحد من اخوتها يرعد ؛ انت شون تعوف اختنه صارلها شكد زعلانة وترجع مرتك شنو كاخذهه احتياط اريد افهم بالله ...

واخوها اللخ يكوله شنو نسيت نفسك من جيت تتبجج وتتوسل تريدها هسه شنو الي تغيير فهمنيييي ..

صفاء يجاوبهم بصوت متعوب ، خفت عليه خاف لايأذوونه ، خليت ايدي على قلبي ، اخخ منك ياقلبي اخخخ ولا تجوز ولا تتوب ، رغم كل شي سواااه هم بعدك تحن اله .. تحبه وتخاف عليه .. عضيت اصبعي .. بندم .. على حب تعبني ودمرني استنزف طاقتي وعاطفتي ومشاعري ..

طبكت الباب حيل سديته وزادت نبضاتي ويه انفاسي المتوترة ، حسيت بدموعي تبلل خدي ، عضيت على شفتي السفلى حيلي ، واني اجر بالتشيرت مالتي من دلعته يربي منك الصبر منك ..

حسيت الصوت تلاشى وصوت سيارات طلعت

فكرت يمكن اخوتها اخذوهه وراحوا ، بس الي خوفني اكثر صوت اسراء تعيط جوه وصفاء يجاوبها وعمه وعمو بيناتهم هم صوته طالع ..

يكوللها معليج ولتتدخلين مثل ما انت مرته هيه هم مرته عجبج خير على خير ماعجبج الباب يفوت جمل تبعي اخوانج كبل لا يوصلون لبيوتهم خابريهم خلي يرجعون ياخذوج ..

اسراء تطاولت على عمو وجاوبته معليك اني وزوجي

ثواني واسمع صوتها تصرخ وتستنجد بعمه ..

وصوت صفاء يصيح ويسب بيها ويغلط عليها

فتحت عيوني مصدومة  ركضت للغرفة كلش اخاف من الصوت العالي وخاصة خايفة لا يلوحني فد طشار ..

دخلت للغرفة كلبي كوة هدأت دكاته ، دقايق مرت هدوء ، اندكت الباب واحس الي ديدكها معصب ..

بس لا هذا صفاء اجه مرة ثانية ، زادت الدكات ع الباب كمت بتوتر وخوف امشي مترددة وتوجهت افتحها ..

فتحت الباب وانصدم باسراء كبالي ، اول ثواني خفت من منظر وجهه مبينة مكتولة ، ظليت اباوع عليها خدودها اثار طبع ادين ، وشفتها دتورم ..

بقيت مصدومة اباوع عليها وفاتحة عيوني ..

دفعتني وظلت تفتر بالشقه وتصفك بأديها وتصيح

_ والله حلووو ومأثثلها من الراقي اما أسراء فلازم تكتفي بغرفه وتنجب وتسكت مووووو

أجاني همام يركض شلته وضميته لصدري وهيه تباوعلي تريد تفترسني بنظرات الحقد الي تنبثق من عيونها ،  رحت عليها جريتها من اردانها وادفع بيها .

_أمشي اطلعي لج وسختي بيتي ترى أنتي الفرضتي نفسج شتريدين مثلاً يبنيلج بيت ملكي يلا يلا أنزلي من كد ماقذرة حتى الطفل أخترع من صوتج

أندفر باب الشقه ودخل صفاء وهمام فز عاط : ماااااماااا

ولو بيده يمكن يدخل باضلاعي من الخوف صفاء اجه على اسراء صرخ بوجهه شعنددج هنااااااا؟

جاوبته جاي اشوف شون مدللها واني شامرني يم اهلي بلا سبب ..

صفاء توجه الها رفع ايده صرخ همام مفزووع ومرعوب  التاف على  أبنه لمن شافه  هيج أجه اخذه مني وشاله وظل يبوس بي وبعدها انطانيا ..

اسراء واكفة تباوع بكره وقسوة وتفر بيدها معاجبها وتدردم ، جرها  من زندها ونزلها هو مو نزلها بشكل عادي وانما سحلها سحل وجان يسب بيها ويفشر عليها ، سديت الباب وظليت اسكت بهمام بعده مرعوب

دقايق  واندكت الباب مرة ثانية رحت فتحتها طلع صفاء صار بوجهي تقرب بخطواته مني ، ظليت رافعة راسي اباوع لمستواه ونظراتي تتحداه.

بنظرات راجية وبنبرة متوسلة تكلم وياي

_ حبيبي اعتذر عن الصار بس اوعدج ان شاءالله ميتكرر

ابتعدت عنه وتكلمت بحزم وصرامة ؛ صفاء أني مرجعت حتى ابدي بدوخة الراس والمشاكل اني رجعت علمود أبني وبس واذا بقى الوضع هيج صدكني ماابقى يمك شنو ذنبه هالطفل ديرجف من الخوف شوفلك حل مو قبل رشا وهسه صارن اثنين حيايا ويايه

وهمست بصوت ناصي : والله مو اثنين ثلاثه لعد أمه شنو

بس هو مسمعني أجه ديحضني بعدته عني : خير سالمين لتروح زايد ماماتي

بعصبية عاط ؛ ماماتي شنو هازه كاروكي ؟

مجاوبته ؛؛  جر نفس بعصبية باوعلي بعدم رضى

ونزل .

سمعت صوت  موبايلي يرن رحت اخذته

جانت ماما تتصل بيه حاجيتها طمنتها عليه

كالت سمعت صوت صياح وسيارات يمكم ..

ماما اسراء رجعت ..

ميخالف بنتي بس ديري بالج على نفسج اله مايفرجها الله بيوم تمام ..

ان شاءالله ماما لتخافين ..

طمنتها وغلقت الخط...

أحس بالملل بشكل فضيع بس همام جان شويه مونسني دخلت لغرفتي تذكرت لحظاتي ويا صفاء واحس الذكريات تخترقني وتمشي بدمي

اتذكرت  من جنت أفز بالليل والكي نايم ع شعري واظل اعيط عليه وهو يضحك ويكولي هذا مخدتي

اتذكر جان يشبر شعري خاف أكصه ويكولي : اكص ايدج اذا فد يوم لكيته ناقص سانتيم واحد

كمت فتحت كنتوري وكأن داادور ع ريحته أريد قطعة ملابس اله أشم ريحته ملكيتله اي شي منزلهم جوا لان أني شرطت عليه ميصعد يمي...

حضنت المخده الجان ينام عليها وظليت اصرخ واكتم صوتي بالمخده حتى محد يسمعني وعبالك دااخفي كبريائي اتمنيت تتوقف حياتي ع لحظة الصارحني بحبه اليه ...

صعب أنُ تخسر شخص تحبه وفتحت عينك ع حبه وتالي بلحظة تفز من غفوة اي جانت غفوة وتلكي الصار عبالك حلم كعدت من غفوتي لكيت حبيبي متزوج عليه ومنو متزوجها الانسانه الباعته...

مرات افكر بكلام عبير

تكولي :هاي جابته بالسحر وصدكي ميدوملها الا مايجي اليوم التنكشف بي

من اصفن ع صفاء اشوف تصرفاته اتجاه أسراء عبالك صدوك مسحور ساعه يحبها وساعه ميريدها بالاضافه الى وضعه الصحي اكل مياكل ابد عايش ع المي ...

داومت يوم ثاني واطكها صفنات ، جتي ياسمين

وكالعادة فضفضت الها .. كالت دوم فتحي سورة البقرة ببيتج وغسلي بمي وملح ورشي خل .. وظلت تنطيني نصائح ..

انتبهنا على صوت حسن ؛ اووو والله لعبتن نفسي ماعدجن غير سيرة السخورة بس تحجن بيها حسستني الزواج بس سحورة وجمالة امي تريد تزوجني هالفترة وبس تلح بطلت عمي بطلت من وراجن ..

جاوبته ياسمين ؛ وانت شعندك مخلي اذنك يمنه شنو مأجريها متاخذها ولاتسمع النا مدام تلعب نفسك وبعدين انته منو تكلبك منو ؟ متكولي اشو شايب فايتة القطار وبس يدخل بسوالف النسوان .

ماتشوفين روحج فاتج القطار وداس عليج همين عيني زهراء معليج بيها هايه ممخلية سحار يعتب عليها لاتحشي دماغج بهالسوالف وعوفج منها .

اووو صرعتني يله كملن شغل واني رايح للكافتيريا ..

ياسمين ؛ ايبااااه يكمل تحليلين وكال دخت وضجت واروح للكافتريا لا وجمالة امك تريد تزوجك انت وين تتحمل زواج انته ونوب يصير عندك طفل طفلين يمكن مرتك تجيللك طفلين والثالث متتحمل مسؤليته وتشمره على اهلها وتكوللهم صرعتوني كملوا المسؤؤلية عني ..

انتي اشش ام لسان معليج بيه يلله كملي شغل كملي حجي عن السحورة معليج بيه وبمستقبلي ..

لا والله وليش تصيح تعال اخذلك راشديين ودفرة فد نوب ..

تمطط بتململ وكام من الكرسي ؛  اييي والله هو يرادلج بس اني متعاجز من روحي اروح للكافتريا احسن خفت شكولج خففت ..

ظلت تفر بيدها معاجبها .. وهو طلع وكلساع يتلفت الها ويرفع حاحبه ، هالديوجه هذول صارعيني بعركاتهم ..

عبير .. اجه عليه قسور وأمه لحتى نروح نأجر البدلات

اجوي من الصبح الساعة ب ٨ .. واني جنت نايمة اجتي ماما كعدتني غسلت ونزلت جوه ، سلمت عليهم

عمه باوعتلي من فوك ليجوه ومتكدر متزفني مو ع ابنها لا وانما ع رزالة ..

عيني عروس جان كعدتي وكت متدرين بينا جايين عليج ماانطاج خبر ابني المحروس .

عمه مااخذ من وقتكم وبعدين ماادري شوكت تجون متوقعت حتجون متأخرين ..

اي اطردينا فد نوب اطردينا ..

قسور ؛ يوم شسالفة بعد وكت تره ، عبيري روحي اكلي شي خاف تجوعين لو تردين من نطلع اريكج بالطريق ننزل بمطعم كيفج .

قبل لا اجاوب انتبهنا لعمة شهكت ؛ لا شنو ماعدهم اكل ابيتهم فوتي اكلي بسرعة شورانا .

وكملت بسخرية وهي تباوع ع قسور ،

هه عبيري عبيره هيه ..

باوعتلها بعدم رضى وهو يباوعلي بملامح متوسلة .

انتبهنا على صوت ماما ؛ الريوك جاهز والله تتريكون وياهه خاف ممتريكين ؟

وشكالولج علينا يابه ترة احنه نكعد من وكت ونتريك مثل الاوادم .

قسور جر نفس بنفاذ صبر وتكلم ويه امه بصوت مصرور ؛ يووم نكوم ننتظر عبير بالسيارة ؟

عاطت بوجهه منتفضة ؛ ياا وشعندك حابسني بالسيارة على ما تخلص الخاتون تريدني اختنك وهذا بيت اخوي خليني كاعدة هنا ..

دفعتني ماما من ظهري قبل لااطلع باوعت لقسور وشفته يشاور امه مدري شيكوللها .. واني كمزت للمطبخ اكلت شويه وصعدت لبست وخليت مكياج خفيف ..

نزلت كتلهم اني جاهزة ، اجه قسور واقترب مني

لزمني من ايدي وطلعنا ، ماما مكدرت تروح ويانا

لان همام يمها وزهراء بالدوام وبلا مناخذة ويانا للسوك ونبهذله والجو حار ..

طلعنا وصلنا للسيارة ، عمه ظلت تباوعلي عبالك دتتحداني او تختبرني بنفس الوقت وتشوفني وين اكعد بالصدر لو بالوره ..

ماسمحت الها وحبيت اثبت الها انو اني مراح اخذ ابنها منها ، لا ابنها حيبقى ابنها وبنفس الوقت هو زوجي ..

فتحت باب الورة وكعدت ، قسور ابتسملي وبعثلي

بوسه بالهوا  ، ابتسمت بقلة حيلة ولخاطره يهون

كل شي هو مشتريني بروحه ويحبني وممقصر

ويايه ، مراح الكى مثله ، وهو قسمتي ومن سنوات

ينتظرني ، ما اريد اخذله ، بسبب امه الي هيَ عمتي اخته لبابا  .

ظل قسور كلساع يلتفت عليه شتردين وشمحتاجة

تريكتي يبعد روحي ؟ لو لا ؟

لزمته من زنده ودارته ؛ انتبه للطريق راح نندعم اكيد تريكت اكلت معدتها لو معدتك شعليك اذا تجوع تحجي عود مو طفلة هيه .

عرفت عمه من نوع الي تغار خلي ارفع ضغطها شويه عبالك ماخذة زوجها مو ابنها ، تقربت منه ابتسمت ابتسامة ترفع الضغط وتنزله بنفس اللحظة وهيه تباوعلي بطرف عينها .

حجيت بدلع اي حبيبي انته تريكت ريوك العافية على قلبي وقلبك سوا وان شاءالله من نتزوج ونعيش ابيتنا وحدنا اسويلك مثله هالريوك هذا .

ظلت عمه تتحرمس اعرفها ضايجة لان عزلني بيت وحد شسزيلها دقتني من الصبح لهسه والله اليعلم ششوف منها بعد .

ظل قسور يباوعلي مصدوم ونظراته تكولي منج من الشيطان .

وصلنه للسوك وفرينه كم محل ماعجبني اي شي وعمه تخبلت وين ما بدلة تخرع ومو ذوقي توكف يمها وتظل تنك اله اخذها .

واني شوني ويه العناد .... طلعنا من المحل

كتله قسور خلي نصعد فوك نشوف البدلات

كالت مابيه رجليه تردين تصعديني فوك وهذا الدرج عالي وهواي بايات بي مابيه ..

كاللها يمه ابقي هنا ..واحنه نصعد ..

كالتله اي مو اني الخدامة وتبقيني هيج بسرعة تتخلى عني بلله خطفوني والدنيا ما تتأمن ..

يمه فدوة اروحلج تحملي ميصير هيج خليها تختار الي يعجبها شكم مرة حتعرس هيه وباوعلي وغمرني بأحلى نظرة حب .

اخذته على صفحة ؛ مو مشكلة قسور نرجع للبيت عمة تعبت نجي بغير مرة بلكي جايبين بدلات احلى اني هم تعبت .

حسيت بيج واسف على كل شي وشكرا لان دتتحملين امي عمتج وتعرفيها اكيد .

اي يله نروح للبيت ..

وهي ظلت تباوعلنا ..

هو كال نروح للمطعم نتغده ونرجع اكيد جعتوا ..

لا قسور رجعني للبيت تعبت ..

عمه اكيد عكس الي اريده كالت لا اشو ودينه للمطعم نتغده صارلكم ساعة تفرووون بيه تعبت رجليني جوعانة .

كتله هاهيه براحتكم .. انوب اخذنا لمطعم بي طابق ثاني خاص بالعوائل عمه صعدت قبلنا ولا كأنو بيها شي اصلت صعدت ركض ووصلت قبلنا باوعت لقسور

هو ظل يترجاني بملامحه بمعنى ميخالف ..

تنهدت ..

كال غير مرة لمن انزل بإجازة اخذج تختارين البدلة مبقى شي وتخلص اجازتي .

لا يمعود اذا بقينا هيج اطلب بدلة من النت احسن هوواي والله من هالوضع ..

سهلة عمري اي شي يعجبج سوي وهم حيتأجل العرس للمرة الاللللللف .. كالها مزعوج ..

يله شورانا بس حيبدي الدوام هنا المشكلة مبقى شي للدوام ..

تنحل ان شاءالله .. صعدنا الدرج ، تعمدنا نصعد ع كيف حتى ناخذ راحتنا بالحجي لان عمه عظمة بالبلعوم بكل شي حاطة روحها بس اريد الله يصبرني .

تغدينا ورجعني للبيت بس هو ماكسر بخاطري هواي اشترالي شغلات على ذوقه .

زهراء .. ومر ع رجوعي لصفاء ٣ أشهر ، جان محترم رغبتي ابد ميغثني و ملتزم بالمسواك ويطلع همام مرات وياه واني يتوسل بيه اطلع وياهم مرات اطلع بعناد أسراء الي من تشوفني اطلع ويا صفاء تتخبل وبتالي الليل أسمع صوتها يلعلع

بالليل ماانام اختنك أظل ادور ع ريحة صفاء ادوره باشيائاتي القديمة استرجع ذكرياتي وياه لو اتفرج صور عرسنا ومحد يواسيني غير دموعي...

بالليل سمعت صوت حركة عرفت مصدرها شنو مديت رأسي وبالفعل جان مثل ما متوقع صفاء كاعد ورافع رأسه للشقه وكأن يعرف أني كاعده

ظليت أباوعله وهو مركز نظره عليه جان ديدخن نفث الدخان وعيونه جانت مدمعه سديت البردة ولميت رجليه لصدري وبجيت

واني اهمس : أنسي زهراء أنسي باعج وبدلج بالرخيص ميحبج هي كوة ميحبج لويش حتموتين نفسج عليه عيشي لنفسج ولابنج وعيشي حياتج كافي ذلة أنعل ابو الحب شحصلتي منه غير شلعان القلب والمذله والتعب والقهر ..

سمعت صوت صفاء ديتقيئ احس قلبي فز من مكانه ولا عبالك قبل شويه جنت دااقنع نفسي انُ انساه ..

قلبي يطلعله الف حجه والف مبرر ، طفرت من مكاني لبست ازار الصلاة ونزلت اركض وصلت يمه هو رافع رأسه واشرلي بيده بمعنى روحي

تقربت عليه كعدت يمه ولزمت رأسه دفعني ع كيف عباله تلعب نفسي منه فتحت المي غسلتله

همس بتعب : وخري عمر صفاء و روحه أعرف بيج ترفه وتلعب نفسج روحي اتركيني هسه شويه واصير زين

سألته: انت من شوكت هيج وضعك؟جيكت نفسك عمليتك تمام خاف مانجحت

_اوووو لج اني على هذا الحال من ساعة الطلعتي من البيت من رحتي حتى عافيتي راحت وياج

حجاها ودمعت عينه

دنكت رأسي انتبهت ع اصابع رجليه دينزفن دم من بين الفتحات مالتهن عبالي مجروح فزيت ورجعت ليورا حتى وكعت هو انتبهلي وباوع ع شنو دااباوع رفع رأسه باوعلي

_هاي أنتي اول مرة تشوفيني بهاي الحاله مو ؟

مجاوبته ظليت مصدومة من المنظر ، سحب الصوندا من ايدي وغسل رجليه واجه لزم وجهي

حجه بتعب: زهرتي راجعت ارقى الاطباء وحتى شكوا بيه كانسر وسويت كل التحاليل بس كلها نظيفه مابيه شي يعمري لتخافين

_شلون مااخاف عليك صفاء شوف بعدهم اصابعك يطلع منهم دم عزززا بعيني انت شصاير بيك

اجه كلام عبير برأسي من كالت اسراء ساحرته وكلاام ياسمين وماما ،  باوعتله : صفاء انت مسحور

ضحك : منيلج هالسوالف ومنو يسحرني وع شنو

_اي اي صفاء انت مسحور لتضحك باع وضعك ابد مو طبيعي ووجهك تعبان وشاحب وتحاليلك كلها نظيفة عملية للمعدة وسويت لعد شنو هالدم والتقيؤؤؤ فهمننننني

سد حلكي بيده : لجججججج اششش صوتج الناس نايمه شبيج تخبلتي

كومته ودخلته لبيتهم لزم أيدي : متخليني أنام يمج والله مااسويلج شي بس ع الاقل ارتاح أني وياج نفس بنفس المكان

اجيت دااحجي بس هو سبقني : بداعة همام عندج

سكتت صعدت وهو صعد ورايه دخلت للغرفه نزعت الجادر باوعتله : افرشلك بالصالة

هز راسه بتفهم  وحزن ؛ ميخالف

فرشلته ورجعت شفت هيمو جان بعده نايم ، ارتاحيت

بس  ظليت بقلق من وضع صفاء والشفته اليوم باوعت ع الساعه الوقت متأخر مو مال اخابر ع ماما أبد مااجاني نوم أذن الفجر واني كاعدة كمت صليت ورحت للصالة اشوف صفاء

اتقربت عليه دااريد اكعده حتى يصلي شفت المخده ناكعه دم!!!  متتت بدمي من الخوف خليت أيدي ع حلكي اكتم شهكاتي ودموعي مااسيطر عليهن

صارن يصبن على خدي بغزارة وحرارتهن تجويني .

صعبة من أشوف زوجي وابو أبني وحبيبي بهيج وضع ومااكدر مااساعده كنبصت كدامه وتلمست وجهه دااريد أشوف شنو مصدر الدم

انتبهت جانت اذنه نازفه وهو نايم ميدري من لزمته فز باوعلي خزرني ، انرعبت ثواني بعدها  ابتسمت بعده ع عادته اذا واحد كعده بس يفز يخزره

حك رأسه والتفت يباوع ع المكان سألني: بيش الساعه

_أذن الفجر صفاء كوم صلي

صفن ودنك : صفاء كوم غسل شو هاي اذنك نازفه هم شو تعال دااغسلك

مجاوبني بعدين نطق: زهراء أني صارلي اربع اشهر تارك الصلاة اخربط بيها ومن أصلي اختنك وسورة الفاتحه من اوصل (اهدنا الصراط المستقيم) اختنك واخربط وشكد أحاول بس مااكدر اصلي

سكتت وكأن كل شكوكي صارت يقين

_زين كوم غسل وخلي ابدلك فراشك

لزم أيدي : زهراء أريد اصلي احس نفسي قذر ولج حتى أبني من أبوسه احس وسخته اريد حللللللل ولجججج ساعدينيييي محد يساعدني غيررررج

_أصلي وانت عيد ورايه ماكو غير هالطريقه وكل ميأذن اصعدلي نصلي سوا

هز رأسه كام توضى واجه وبالفعل صليت وهو يعيد ورايه لاحظته من يوصل للاية (اهدينا الصراط المستقيم ) بالفعل يختنك وجهه يتغير لونه

كمل صلاة وعبالك اتذكر شي نزل يركض عرفته راحلها لاول مرة ماانقهر لان عرفت صفاء مسير مو مخير حسبي الله ونعم الوكيل عليج أسراء الله يدمرج مثل مادمرتي دعيت عليها وبقلب محروك ومتدمر

رحت تمددت غفيت كعدت ع لمسات ادينات ناعمات وصغار يتلمسن بوجهي غلست عنه ظل يبوس بيه : ننه دووعان دوومي حبابه

كمزت عليه رغم نعسانه وعيوني قافله شلته وظليت ابوس وادغدغه وهو يضحك بصوت عالي اخذته غسلتله وغيرت ملابسه ورحت سويتله ريوك واكلت وياه من كملنا اكل قبل لا اغسل المواعين ركضت خابرت ماما وحجيتلها عن صفاء ووضعه

جاوبتني : ماما هذا زوجج مسحور اتذكر جنة خالج هم وضعها بعد العرس صار مخربط ونفرت زوجهه وتالي خالج وابن خالج اخذوها لسيد بالشعلة خلي اسألهم واشوف وين عنوانه واحاجي ابوج حتى يقنع صفاء ويرحوله

اتفقت ويا ماما وغلقت الخط بس بقيت افكر ياترى صفاء حيقتنع ويروح للسيد لو يعارض اكيد حيعارض

مرت الايام واهلي حصلوا عنوان السيد بس مثل متوقعت صفاء رفض وحتى تعارك ويايه ووصلت بي المرحلة راد يضربني بس ماايست ظليت احاول وكل مرة يتعارك ويايه

مرة من المرات وقبل عيد الاضحى بأيام ماما دزت عليه اساعدها دتريد تسوي كليجه خابرت صفاء واخذت اذنه ولبست صايتي وبدلت لابني ونزلت شافتني عمه

سألتني : ها ع خير وين ان شاءالله؟

رجعت سلمت عليها جاوبتني : ولي ولج صارلج شكد هنا لاتنزلين لاتكولين عمتي عبالك كاتله أبوج

_عمه مااكدر ادخل لبيتكم وانتي تعرفين السبب واذا تريدين تشوفيني خابريني واني انزلج لو تخافين ع الرصيد

_بس فالحه بهالسان ولاينلام بيج من نزل ع رأسج ضرة امشي ولي طايحة الحظ

_اشكرج عمه

اجيت دااروح كالت : خلي همام يمي اريد أشوف أبن أبني لو هم ممنوع

ابتسمت: لا ليش ممنوع بس خلي اسأله خاف يكوم يبجي ويخبصج

_معليج بي يلا روحي

وجرت همام مني وشالته ظليت اباوعلها :بس عمه

مجاوبتني ودخلت وسدت الباب حجيت بداخلي : ديلا هو يم بيبيته وحده قابل شحيصير بي بس داخلي جان مامطمئن ابد احساس أم...

رحت لبيتنا ساعدت ماما وظلت تحجيلي على عبير

وعمة وزواجهم الي يومية يتأجل .

قهرتني واني التهيت بهمي ونسيت اخابر عبير او بالاحرى جنت اخابرها بس بفترات متقطعه كملت شغل وصعدتلها شفتها كاعده ع جرباياتها وفاصلة عن العالم صافنه  رحت بوستها

سألتني : شوكت اجيتي

_من زمان وجنت دااشتغل ويا ماما وردت اصعدلج بس ماما كالت اتركيها خاف نايمه

_لا منايمه وسمعت صوتج بس تعاجزت انزل

_ياحقيرة وتكوليها بوجهي هههههه

_ ولج توه خلصت مكالمة وي قسور ..

_ شخبار العرس ؟

_ بعد مو هسه عندهم انذار ومو هسه ينزل وتعرفين سوالف عمتج يومية سالفة مطلعتلنا .

اي انت عندج عمة اني عندي رشا واسراء عن مية وحدة من عمتج هايه التحجين عنها .

ضحكت حجت وكانُ تذكرت شي ؛ صدوك زهراء شخبار صفاء البارحه شفته وضعه تعبان

تحسرت وكعدت اسولف الها .. كملنا سوالف ونزلت

طليت على ماما بالمطبخ ؛ ماما اني حروح محتاجة شي ؟

_ لا عمري بس تعالي اخذ هاي الكليجة هسه طلعتها من الفرن .

دخلت للمطبخ اخذتها من ماما تشكرت منها وطلعت رحت للبيت .. فتحت الباب اجاني صوت همام يبجي .

دخلت بسرعة لكيته  يصرخ وواكف بالشمس وحده

دنكت لمستواه مخرووعة باوعتله لازم ايده اخذت ايده باوعتلها  جان مسلوخ جلدها!!!!

يتبع .

السلام عليكم .... كللللش اشكركم على وكفتكم وياي ودعائكم الي يمكن تشوفون المشكلة كلش بسيطة بس الي صار هو نتج عنها عدة مشاكل مو مشكلة وحدة بسبب وحدة  يعني اول شي انا مااكتب شعر شعبي اكتب روايات وثانيا لو جاية كايلتلي لفلان شاعر جان ماخسرت شي لمن كتبت اسمه ابد ثالثا انا لمن شفته بدون اسم وخليته وي البارت يعني اذا موجود اسمه مستحيل احذفه  الي صار كلش عيب والله من مشكلة وحدة كبرت المشكلة وتدخلت بيها عدة اطراف وتحولت الى مشكلة عائلية  ،مااكول غير بس حسبي الله ونعم الوكيل ..

وافتخر كللش افتخر بيكم ووكفتكم وياي صديقاتي حبيباتي خواتي ما انسى هالوكفة ..

المتابعين للقصة اسفة ضوجتكم وانقطعت عنكم بس الي صار مو سهل ابد وهسه هذا جنت كاتبته بليلة الي صارت المشكلة ومكدرت اكمله وان شاءالله اعوضكم وكللللش احبكم امووووت عليكم  ❤⚘💚

وتره محد مهددني ولا تهددت المشكلة مشكلة عائلية الشماته ضحكتوني ع عقلكم المريض 😂لا احد هددني ولا انا اهدد احد ..

ومسيرتي متتفلش ولا حتى راح تتفلش رسمتها بتعب مو بحيلة ولا دورت طشة ولا جبرت احد يتابعني ولا روجت لنفسي مسيرتي ورواياتي الي اسميهم بناتي 😍هي نتيجة تعبي واوقات طويلة قضيتها اكتب واقرا حتى اطور نفسي والفضل يعود لمتابعيني وصديقاتي الي دعموني وكل الشكر الكم لو اشكركم منا لبعد اسبوع ميكفي .

وللبعض عيب تتهمون احد بدون دليل الي دزت السكرين مجهولة دازته ع سايت من مجهول اذا جانت نيتج سليمة تعالي وبرئي الي اتهموهم والا راح نظل نتحسب عليج ..

ملاحظة الشاعر اعتذر ع تصرفه وياريت نسد الموضوع هسه ونكمل القصة لان احنا بنهاياتها .

شريعة العشق

نورا ناصر

بارت ٦٣

على حالة ابني الي شفتها بعيوني ظليت ارجف ، حلكي نشف ، صوته بأذني يبجي ويشكي ويستنجد بيه .

"ماما ماما عمه عمه " ويأشر الي بيده المحروكَة...

لزمت ايده اباوعلها ، وكوة اتنفس كووة الهوا من كدامي تلاشى..

نزلت دموعي ، واني ادردم " ليش هيج طفل مإله أذية ليش يسوون بي هيجي ليش"

رفعته من الارض وتوجهت لبيتهم بلا وعي مني بس اريد افهم ليش هيجي يسوون بإبني ليش !!

هيه هاي الامانة ؟؟ يا به مو أمانة طفل طفل هيج يحركوا ويطردوا ، زين موو طفل ابنكم هذا دمكم

ولحمكم ، ليش شنو ذنبه لأن اني امه تشمرون سمكم وحقدكم على طفل بريء والسبب تكرهون امه .

اخذتني خطواتي لباب مطبخهم ، امشي واردد بصوت شبه مهموس " اللهم قوة "

وصلت للباب ظليت ادفر بي برجليه من جوه

وبيدي ، وهمام بعده يصرخ واني شايلته..

وايدها المحروكة معلكها بالهوا ، عبالك يخاف

عليها عن لا تنلجم واني اباوعله واموت من القهر.

زادت دفراتي ع باب مطبخهم ، وجسمي ماخذه الرجيف ، ونبضاتي سريعة واتنفس بصعوبة وعيوني رطبتها دموعي الغزيرة .

لحظات وانفتحت الباب وطلعتلي اسراء

صيحت بوجهه ؛ وينها عمة ولج ؟

_ وشكو دتصيحين ها ؟

_ سألتج عن عمة وينها جاوووبي .

_ طلعت اجه عليها بهاء وراحت وياه عمو يمهم متخربط ويريدها .

_ هاي منو مسوي هيجي بهمام منو حرك ايده اليوم والله احرگج اذا انت السبب ؟

_ وشكو دتحرگيني واني شعليه قابل حتى

احرگه !!  هذا قبل لايكون ابنج يصير ابن صفاء حبيبي مستحيل أذي ، لو تجيك التهايم وانتَ نايم ؟

صيحت بعلو حسي ؛ لعد إحجي منو سوا بابني هيج .

گُلت كلامي هذا وطلعت الحية الصفرة رشا ..

اجاني صوتها ؛ شكو اسراء هاي منو يمج يحجي .

         " كالت هيج ووكفت متخصرة"

دفعت اسراء وطبيت أرجف وگفت بنص المطبخ

وصيحت بصوت متكسر ومبحوح بس بعصبية

_ احجن ولجن منو سوه بأبني هيج منوو منجن اليوم اگلب الدنيه عليجن!!!

رجعت هزت نفسها وحركت اديها على خصرها

_ اني چويته ليش عندج مانع شكو متيهته ورايحة مدري وين ؟ جنه مخبل ضرب ابني خليني اادبه عمته اني .

جريت كرسي بسرعة وخليت همام عليه

تقدمت باتجاهه وصرت احاچيهه

_ لج ممخليته يم اني يم امج بس موصوجج صوجها خلته يم الحياية عديمات الضمير حقيرات اثنينجن الله لايوفقجن لج شوون تمدين ايدج على طفل وتچوينه هيج الله يحركج بنار جهنم ان شاءالله .

اشرت بيدها ؛ ديلله ولي يلله ماتخافين على روحج انتي طابة بنصنا مو اجيج هسه اذبحج وادفنج انت وابنج ولا منشاف ولا من درى .

_ لج عبالج اخاف منج مووو ؟ حقيرة مخايفة منج اني

سويتي بيه العجب واني ساكتة الج بس هسه لا بعد مااسكت على تصرفاتج ادوس عليج وعلى راسج بنعالي .

تقربت مني ودفعتني ؛ امشي للللج انوب عليه ال*****

دفعتني حيل ، سندت نفسي بالكرسي الي عليه

همام ظل يصرخ ويبجي بهستيريا وهاي مستمرة تفشر وتغلط عليه .

باوعت لاسراء تريد تاخذ همام من ع الكرسي

دفعتها حيل من زندها وصرخت بوجهه

_ وخري حقيرة اكسر ايدج اذا لزمتي ابني

ظلت تفر بيدها ؛ هاي فوكاهه بعد فوك ما اريد اسكته .

_ معليج بي اثنينكم مشتركات بالجريمة اليوم اله اوكف هاي المهزلة وكافي بعد ما اسكت .

اخذت ابني وبعده يبجي ويصرخ موجوع سودة عليه

ظلت رشا تدفع بيه ،عرفت نفسي وحيدة هنانه

اخذت ابني وطلعت من باب المطبخ ابجي وارجف وميتة قهر على ابني واسكت بي ، اخذته وبنيتي اروح يم اهلي بلكي بابا جاي اجيبه عليهن يطيح حظهن .

وصلت نص الكراج واندكت الباب ، كملت مشي

ورحت باتجاه الباب فتحتها وحالتي حالة .

صاروا مقابيلي عمو حسين وزوجته ..

فتحت الباب ودخلوا حتى ماسلمت عليهم

شهگاتي تكفلت بالموضوع وحچت الهم عن حالي ومأساتي ...

تفاجئوا عمو مصدوم يباوعلي سد الباب بيد وحدة وحاچني ؛ شكو بنيتي شبيج منو وياج وشبي ابنج .

عمه اخذته من ايدي لان شافتني ارجف ، اخذته وظلت تسكت بي .

ظليت احچي واشهگ ؛ عمو ترضاهه اختك چوت ابني

ليش شنو ذنبه هيچ تسوي بي ترة هو طفل ، بالله اني تكرهني وحاقدة عليه ابني شنو ذنبه هو مو ابن اخوها .

فتح عيونه على اوسعها بياضها اكتسب حمار من كد العصبية وعاط وهو نظراته على البيت وييينها هيه هسه وينها بعدها جوة بالبيت ؟

قبل ليسمع اجابتي دخل متعصب ، همام يأشرلي يريدني اخذه ، قبل لا اخذه شمر روحه عليه

اخذته من عمه وهي دفعتني بخفة من زندي ووجهتني للبيت وهي تردد لا حول ولا قوة الا بالله شجاهه هاي وين وصلها الحقد والكره حتجيب نهايتها هيجي

اهدي حبيبة لكل ظالم يوم هاي وصلت حدها وياهه .

دخلنا جوه وسمعنا عمو يصيح على رشا بعلو صوته

رشاااا اليوم احرگچ حررررگ......

ظل يحجي وياهه بصياح ويحقق وياهه ..

وهي مستمرة تتجاوز عليه ومعلية صوتها عليه ..

صاح عليها عمو حسين وكأنُه يضربها ؛ لجججججج بسسسسسس بنت الكلب بسسسسسس انعل ابوج لابو حتى الخلفج بس يعرف يخلف بس ميعرف يربي زلم مشوربه ربانه عدل الا انتي عوجه .

لججج كااافي تعبتينا انتي شنوووو متكوليلي سفر وسفرناج عبالنا تغيرين جو كلنا خاف مختنكه احسن معاملة عاملناج شفنا ماجاب نتيجه قسينا عليج وهو ظليتي عوجه لج انعدلي ترى ادفنج وانتي عايشة ومحمد كااااافي بزعتينااااا .

فتت واشوف عمو ديزين بشعرها وهيه تعيط وتتحرك وكومة شعر جواها ..

بقينا واكفين مصفنين .. جان لازمها معصب ومحد ير يتقرب منه الكل خايف ومصدوم ،  من خلص شمرها من زندها حاچاهه بقسوة ويحاول يتخلص من الغضب الي سيطر عليه ؛ حتى تصيرلج عبرة سكتنالج هواي بس وصلت حدها منو انتي حتى عمامي يعيرونا بيج ويكولون كومة زلم بس متعرفون تربون وعمكم تحسين رجال واحد وبناته ينحلف بأخلاقهن اني أعلمج منا وجاي الناس شمدريها احنه نكول اختنا وحيدتنا ومنكدر ننطي بيها كدام الجناين ولا عبالج مااعرف أنتي وهاي الفوك وين دتولن وهذا زياني الج جزء بسيط من العقاب الي ضامه الج...

اخذت ابني الي تعبه الالم والبچي ودااطلع من بيتهم

صار بوجهي صفاء فتح عيونه خزرته ، همام جان تعبان من البچي الا من شهكات ونشغات مؤلمة تطلع منه .

لمن شاف ابوه شمر نفسه عليه وظل يبچي ويشكيله ..

اخذ ايده طالعها معصب وفتح عيونه مصدوووم...

باوعلي وين رايحة ؟

جاوبته جيب ابني اودي لبابا يودي للمشفى اختك حركت ايده ..

اخذه وطار بي بدون ميسأل شكو .

واني اريد اتبعهم اشرلي بيده وكال بحدية

ارجعي .

رجعت بيأس ، وصعدت لشقتي . 

ظليت افكر بالصار اريد استوعبه مدااكدر صفنت ع كلام عمو حسين شيقصد وين ديروحن هي واسراء

بقيت دقايق طويلة افكر وبس ارجف بعده منظر ايد همام وهيه محروكة متروح من بالي ، سودة عليه لو بيه الالم ولا بي .

اندكت باب شقتي رحت فتحتها  طلع صفاء جايب همام حبيبي جان غافي وايده ملفوفه .

اخذته منه ودرت وجهي واني احچي شوفلي صرفة وي اختك ترة وربي اخذ الطفل واخليك بحسرته .

حسيته عصب بس كوة كاتم اعصابه ؛ شنوو هالحچي هذا صد رشا لا يكون هي الي سوت بي هيچ؟؟؟

قبل لا احچي نزل يركض وكانه تذكر الحچي الحچيته اباب البيت قبل شويه ، دقايق ويه نزلة صفاء وكبت العيطة من جديد ..

رحت خليت همام بسريره ، وراها صعد صفاء واجه يمي علمني ع العلاج مالة همام .

وكفت اباوعله بتحدي ؛ وتالي وي اختك شلوون ؟

كتلتهه هسه والتالي فهمني؟ اظل اني متعذبة هيج ؟ وابني ويايه ؟

وتنهدت بعمق وألم ودرت وجهي وادردم شوفلي چارة ترة وصلت حدهه والله .

كال بتوسل  ؛ زهراء بس اصبري عليه شويه تدرين بيه صحتي مو تمام هالفترة .

تحسرت ؛ من اول ماتزوجنا وهيه تأذيني يربي شسوي وتالي نهايتي لو نهاية ابني ع ايدها .

كال زهراء ..

جاوبته معصبة اسكككت صفاء اسكتت واطلع من يمي .

ماحچه بس ظل يتنهد وطلع من المطبخ ..

طلعت شفته متمدد ع التخم ظليت اباوعله بعدم رضا

..

رفع راسه كال: هااا خيررر شكوووو تباوعين

_حتنام هنا ؟

_ليش عندج مانع؟

سكتت خزرني رحت جبتله غطاء ومخده وانطيتهيا همس : طفي الضوء وياج

طفيته ورحت اسوي عشه ،  شويه وكعد همام ظل يصرخ وابوه هم كعد اجه دياخذه مني ميقبل ميريد أبوه الا أني ظليت افتر وهو ع صرخة وحده ابد ماسكت

ايدي خدرت اندكت باب الشقه راح صفاء فتحه لحكته دااشوف منو جانت عبير ومريم سلموا ع صفاء ودخلوا

سألت عبير : شو سمعنا صوتكم عالي خير

_ماكو شي حبي ليظل بالج

_شبي هيمو ليش ايده ملفوفه وديبجي

همام بس شافها جيت عليها اخذته شالته لزمت ايدي افركها خدرت من الشيل

ظل يبجي ويدردم يشتكي لخالاته نطت مريم : هاي رشا السعلوة جاويته موووو الحقيرة شلون تمد ايدها عليه عساها بالشلل ان شاءالله

خزرتها عبير وباوعت لصفاء سكتت مريم

جاوبها همام : ولتت اييي ميم اييي توتني عمه ع ايدي

ويمد ايده يشوفها لمريم وهاي الخبله كابلته وتبجي

صفاء طكها ضحكه : هاي شنو عمي تحسين عنده اثنين حنفيات عبالي بس العندي

جاوبته عبير : لا ثلاثه ماما وياهن لتنساها مااسمحلك تقلل العدد

ظل يضحك بقن البنات يمي ع العشاء وهمام نام بحضن عبير تعشت مريم بس عبير لا مااكلت بعدها سلمن وراحن

سمعت صوت عمه تغلط وتفشر عليه نزل صفاء سمعته يكولها : فوك متربين بنتج جايه تفشرين ع مرتي مااسمحلج تفشرين عليها حتى لو أنتي أمي زين منها ومتحملتني ترضى بنتج بهيج رجال متزوج عليها ومريض بنص عافيه حطي الله بين عيونج مو انتي صايمه مصليه ورايحه لبيت الله

شعندج رايحه لبيت الله وانتي باطلة

عاطت عمه : سحرتك موووو سحرتك

ضحك هو: ليش هي زهراء وين تعرف بسوالف السحر بس بنتج خبرة بيها

سمعت صوت عمو يحجي متعوب : كااافي ولج والله

لو مااكول عيب وخاف الناس تكول تخبل الا هسه ارمي عليج اليمين امشي فوتي لغرفتج الله لايبارك بيج ولا ببنتج

قفلت باب الشقه ورحت لغرفتي طفيت الضوء واخذت أبني لحضني ، عجيب امرها عمه هم عافت همام وحده وهم الها عين تحجي عجيب والله ويامن عايشة اني

ظليت افكر افكر الى ان نمت .

فزيت نص الليل ع صوت صفاء ظليت بفراشي همام جان حاضني ولاف اديه ع ركبتي سمعته يحجي بس مفهمت كلامه بعدت همام عني بهدوء حتى ليفز

كمت مشيت ع اطراف اصابعي سمعت صفاء جان ديحجي وعبالك يبجي معقولة صفاء يبجي!!!!

تقربت دااسمع شيحجي سمعته يكول : ولج ما حنيتي منيلج هالقسوة زهرتي طفلتي كل يوم أكول باجر تحن لا عكبة وانتي مثل ماانتي عبالك حديد ولج زهرررراااء بس كوليلي شتريدين واني خادم ألج ام وليدي

جاوبته بداخلي : انت الصنعت هالقسوة بيه أني مو هيج ولا عمري فكرت اصير هيج جنت اتعجب ع أختي لان قاسية بس هسه انت سويتني مثلها بعدك مشفت شي مني

انتبهت عليه صعد وظل يدك بالباب مال الشقه: ولج زهرة وينج دورت ع عطرج مالكيته صرت ادور ع ريحتج وادورج بين الوجوه حني عليه أبويه أنتي فدووة رحتلج

فتحت الباب باوعتله : سألته شعندك هنا شلون يعني ماانام ؟

_زهراء محتاجج والله محتاجج بهاللحظه هواي

_صفاء والله اذا بقيت كل يوم والثاني صاعدلي وتتحجج احرك نفسي وخطيتي بركبتك وداعتها لأمي أمشي انزل أنت مو جنت ميت ع أسراء واشهر مردتني علمودها شنو الي اتغير هسه ها شنووووو

_زهراء ماضي جان مااااضي ولججج وانتي الحاضر والمستقبل لا بل حتى الماضي انتي أنتي. گليبي ودكاته زهووره ميت أني بعدج ميييت ولج

_انت الردت هالشي مو أني صفاء انت تزوجتها بالسر بس الله كشفك لان أني ع نيتي

_اعرف والله أعرف والديصير بيه هاي حوبتج أنتي شيصير بيه أستاهل أعترف بس رجعيلي محتاجج زهرة أنتي ملاذي الوحيد

_اذا متروح هسه احرك نفسي والله

رفع اديه باستسلام : اوكي اوكي رايح بس لتأذين نفسج لان أنتي نفسي

ظل يحجي كلام ممفهوم وهو ينزل ع الدرج

هزيت راسي بعدم رضا ودخلت للغرفة .

بعد فترة واخيرا صارت حنة عبير ماما سوتها بالقاعة عوضتها عن حفلة المهر لان سوتها بسيطة ، رحت وياهه للصالون

لبست فستان اسود كصة وحدة قصير حد الركبة وبي لمعة خفيفة يبين من اتحرك او يطخ بي الضوه .

شعري صبغته دانتيل والتسريحة بف من فوك ومن جوه نازل وبيرمن ، رجعنا للبيت وعبير اخذوها للقاعة واني رجعت للبيت حتى اخذ همام من ابوه لان بقى يمه .

ركنت السيارة يم باب البيت وصعدت للشقة

فتت جوه الشقة هدوء وماكو صوت

قبل لا اوصل  للصالة سمعت صوت صفاء واسراء يحجون ومن حديثهم مبين هيه دتكوله على حملها .

وكفت بمكاني وعضيت شفتي حيل من جوه وبلعت ريك بقوة واحس ريكي نشف بلحظة واحس مرارة بحلكي .

وكفت واحس الدنيا وكفت تسللت كلمات من اسراء وهيه تحجي ويه همام تكوله حجيبلك اخو وهمام طفل وميفهم يردد وراها احو احو *اخو* .

وكعت دمعة من عيني اليسرى والعين الثانية الدمع تجمع بيها .

جريت نفس وبعمق اهدأ نفسي اهدي زهراء اهدي هذا الشي متوقع هم اثنين متزوجين اقتنعي اكيد يصير بينهم علاقة زوجية وينتج عنها طفل حالها من حالج .

تقدمت باتجاههم ببطئ وصوت الكعب ملئ المكان واني اخط بخطواتي ع ارضية الصالة .

فتت جوة وهم انصدموا بيه

ماردت اباوع بعيونه لكن عيوني تمردت ، استقرت نظراتي عليه لاجزاء من الثواني وبعدها شحيتها منه وصديت نظراته .

اجاني همام يركض ، حضنته لصدري ، اسراء باوعت عليه وطلعت من الشقة ، اخذت همام واني انزع بالصاية وشمرتها ع التخم واحس بنظرات صفاء تفترسني .

اخذت همام غسلتله وبدلتله ، لبسته قاط حبيبي طلع جنه عريس .

وظليت ابوس بي واني مخليت ع ميز تواليت وامشط بشعره وابوس بخده واديه .

واجه صفاء وكف بالباب لزم الاطار وظل يباوعلي

تنهدت ودنكت راسي ، اخذت الحمرة وخليتها على شفافي واحس بنظراته تحرگني حرگ..

لحد ما اجاني صوته ؛ كافي تره هيج هوايه .

باوعت بعصبية ؛ لا تتدخل انت معليك بيه قابل متدخلة بخصوصياتك اني اشو عايش حياتي ترة على اعصابي رجعتلك .

اجه سحبني من خصري اخذ قلم الحمرة وشمره ع الميز همس ؛ طالعة حلوة واني ما اتحمل .

خليت اديه على صدره وبعدته مني بقووى وهو لأن تعبان وعافية مابي بس ظل يتمايل لحد مالزم بالسرير وهو محني ظهره .

_ مرتك جوه روح الها .

اخذت همام وطلعت من الغرفة ، لبست صايتي وخليت شال ع راسي باهمال عمود التسريحة ، تبعني هو وصاحني واني داانزل من للدرج ، اكتفيت بنصف اللتفاتة ودرت وجهي واسمعه يحاچيني .

او‏گفي زهراء اني اوصلج انتظريني بس ابدل .

نترت بي ؛ ميحتاج شنو نسيت عندي سيارة .

_ بس متروحين هيج اوكفي اني اوصلج لج لايتحرشون بيج شفتي نفسج شلون طالعة انتي .

مهتميت اله وصلت لاخر بايه ولزمني من ايدي حيل صارت مقابيلي اسراء لازمة ظهرها عود شوفوني حامل وهيه بعدها حتى بطن ما عدها .

تنهدت بقووة واسراء ع وجهه ابتسامة صفرة

واني بقيت حايرة وصفاء بعده يلح يريد يوصلني .

احس تجمدت بهاللحظة واكتفيت بس هزيت راسي بقبول وهو راح بدل واحينا بقينا بالكراج ، الجو حلو نهاية شهر العاشر .

طب جوه يريد يبدل طبت وراه اسراء وعبالك تملكه الها وحدها ؛ تگوله اصبر حبيبي اني راح احضرلك الحمام واطلعلك ملابس والتفتت تباوعلي .

ظليت اباوعلها بجمود متصنعة عدم الاهتمام ، لازمة همام بيد والايد الثانية اعبث بخصلات شعري الشقراء المتمردة على جانب وجهي .

بعد ربع ساعة طلع صفاء وعطره يفح وياه ، نطيته ظهري ، اسراء وراه تمشي وتوصي حبيبي لاسوق سريع حبيبي خو مناسي شي .

هو اجه باتجاهي وميجاوبها ، اللتقط همام من الارض وشاله وكال يله زهراء .

مشه كدامي واني وراه ، كتله سيارتي بره خلي نروح بيها .

كال لا روحي فوتيها جوة ونروح بسيارتي .

اريد احتج خزرني ، رفعت تك حاجبي ورحت داافوتها  وهو طلع سيارته وبقى ينتظرني هو وهمام .

فوتتها ورحت صعدت بالوره وهمام كاعد كدام

اللتاف عليه اكولج اني السايق مالتج ؟

_ تره انت عرضت اله توصلني مجابرتك .

عااااط ؛ اشوووو كومي كعدي كدام !!!

كمزت من الوره وصعدت كدام ..

طول الطريق يباوعلي ويتحسر ..

وصلنا للقاعة ، دا انزل واخذ همام ويايه .

كالي طببي شعرج طالعةمن وره بالصاية

باوعتله شفته خازرني ، سويت مثل مكلي .

وهم داانزل وصاحني دكمي الصاية يله وهاي العطوب هم فوتيهن متشوفين يم القاعة واكفين ولد .

هم سويت مثل مكلي ونزلت همام ونزلت هو نزل ورايه ويخزر بالولد خاف يباوعولي كتمت ضحكة وفتت جوه .

استقبلني مريم وماما وظلت تحقق ويايه ليش تأخرتي

كتلها صفاء اخرني ، انطيتهم همام ورحت للحمام نزعت الصاية والشال ورتبت شعري ومكياجي وطلعت .

عبير طالعة تجنن بالبدلة الماروني والتسريحة

متوسطة القاعة وي صديقاتها وتركص .

طبيت وياهم ع الواهس بس احس جحيم جوه جلدي كلما افكر بحمل اسراء وافكر باشياء واسرح بخيالي هواي واتخيلهم سوه ، اهز راسي بقوة ابعد هالافكار واتحسر .

دخل قسور وجانت عيونه مقيدتها وتنبض وتشع بالحب تجاهه ، حنه اديهه وطلع .

خلصت الحنة واتصل بيه صفاء جاوبته

كال ها اني بره خلصتوا مو ؟ اطلعيلي .

_ صدك تحجي انت؟ اني ارجع وي اهلي ترة اليوم حنة اختي وراح ارجع وياهم للبيت ..

_ ميخالف بس اطلعي ويايه هسه روحي يمهم وبعدين  ترجعين للشقة .

_ لا ما اتفقنا هيج ..

قاطعتني ماما وخزرتني ..

باوعتلها اسألها بملامحي وصفاء يدردم بأذني بالفون .

وخرته عن اذني وظليت اسمع لماما شتحجي .

كالت زهراء ميخالف شيكولج كولي اي يبقى زوجج لاتعاندين وروحي وياه شوفي شنو يريد ؟

تنهدت وجاوبته باقتضاب ماشي .

كال لفلفي روحج زين لمن تطلعين ما اوصيج بعد زين ؟

جاوبته اي وبعد اوامر ثانية من حضرتك حتى ننفذها ؟

ضحك بصوت رنان واني تنهدت منزعجة .

لفلفت نفسي واخذت ابني وطلعت شفته ينتظرني بره القاعة ، عبر الشارع واجه اخذ همام من ايدي ولزم ايدي بيده اللخ وعبرني الشارع .

طول الطريق يحجي وياي لو اجاوب لو اغلس وطول الوقت شاردة وهو يكرر سؤاله مرتين يله انتبه

شاردة بموضوع حمل اسراء .

وصلنه لبيت اهلي وصلنا قبلهم وبعدين هم اجوي سوينه عشه للخطار الي بقوا عدنا وخلينه عشه دنتعشه وخابرني صفاء يلله شوكت تجين ؟

نتترت بي شسالفة صفاء ترة حنة اختي اليوم شبيك ماتحس انته ؟ وعدنا خطار وماما وحدهه دااساعدها .

اي لتعصبين سألت سؤال شجاج بالله ؟

اي مو كلساع تسأل وبعدين هياته البيت لمن اخلص اجي اني وياريت تجي تاخذ همام حتى تطمأن ارجع لان هرجنا بس يبجي ميحب الهوسة والناس الهوايه .

هو ماصدك كتله هيج بسرعة شفته اباب مطبخنا طلعت انطيت اله همام ، ظل يباوعلي بتفحص

كتله شبيك شكو هيج تباوع ؟

اي وين الفستان الي لابسته من قبل ؟

بدلت!!!! قابل اشتغل بي هيجي ؟ مو جنت  داسوي عشه للخطار .

اي اي دنطيني همام هسه ، انطيته اله  اخذه وراح ويتلفت الي ، سديت باب المطبخ وفتت جوه .

خلصت شغل ويه ماما وبعدها الحنة مخلصت ركصنا

ال دي جي لل ١١ بالليل وبعده يصدح ومحد ديشبع من الركص .

الا اني بالي يم همام ، رحت لعبير جانت دتركص ويا البنات بالصالة ، لابسه بدلي بنفسجي قصيرة وفاتحة التسريحة وشعرها مثل شلال على ظهرها .

جريتها بوستها اني رايحة ..

كرصتني ؛ لج لاحكة على صفاء الليلة حنتي ابقي يمنا .

_ لو ما همام يمه وماما دتلح عليه جان بقيت والله .

_ باجر تعالي من الصبح حبابة مو ترحين لدوامج انوب ؟

_ لج لا غير اخذت اجازة اليوم وباجر شبيج نسيتي ؟

اي حقج قسور مأثر عليج .

ضربتني بخفة على ايدي وهيه تضحك ..

عفته ورحت لبست صايتي واخذت اغراضي وطلعت من بيت اهلي وتوجهت لبيت عمو ، فتت جوه وصعدت لشقتي جان هدوء .

فتت شفت صفاء بالصالة مشغل التليفزيون ويتفرج ويمه حب شمس وكرزات وببسي ، خوش مسوي جو لنفسه .

تعديت عليه بدون ما اسلم ..

كال تره الناس تسلم اول متفوت ..

التفتت عليه ؛ شعجب مارحت للحنة مالة الولد بيت عمة ام قسور ؟

باوعلي ؛ دتشوفين شكولي مال حنة اني دخيلج اني صاير حنة .

_ همام وين ؟

_ لحظة اجيبه من جوه ..

_ وين جوه شيسوي جوه ؟

_ جان يم امي ..

_ اني امنته يمك لو يم امك اصلا عمه ماتحافظ عليه .

_ تره قبل شويه نزل شبيج انتِ ؟

تنهدت وباوعتله صفح وصديت نظراتي منه ..

كام على حيله ..

ديلله روح جيبه لا خاف هم يحرگوا مثل ذيج المرة .

_ شدتشوفين دااسوي ؟ ترة كايم اروح اجيبه لاتلحين .

مجاوبته هو نزل جوه واني فتت ع الحمام خليت ملابسي بسلة الملابس وطلعت جبت البرنص وسبحت .

لمن طلعت شفت همام بسريره نايم ، دنكت بوسته .

ووخرت باتجاه الميز التواليت ، جريت الخاولي من شعري وبلشت انشفه ، واني على هذا الحال فات صفاء باوعت بعيونه نظراته مليانة رغبة ، اعرفها هالنظرات كلش زين .

سد باب الغرفة ، رمشت عدة رمشات وفتحت عيوني على اوسعها بصدمة ، اشرتله صفاء اطلع بره .

گال ؛ أريدج!!!!!!

يتبع .

شريعة العشق

بارت ٦٤

نورا ناصر .

_ نعم ؟ حجيت هيج ودرتله ظهري ، ما اريد ملامحي تفضح حاجتي اله وصرت محتارة بين شعورين محتارة بين إي وبين ‏‏୪ ، جرح غائر بعده بداخلي محتاج كل خيوط الكون لتقطيبه  وهم ميتخيط مستحيل

لسه احس مجروحة منه ، رغم دااشوفه شلون يعاني

وشلون تعبان ومتهالك بس كسرتي بالروح ماتنجبر ولا بسهولة استسلم واشمر نفسي بحضنه  .

حسيت بخطواته يتقدم باتجاهي ، تملكتني رعشة بكل جسمي ، ايده حسيتها قيد زندي بيها ودارني عليه بقوة متهالكة .

باوعت بعيونه خزرته ، سحبني اله ، طخيت بي .

حاولت اتملص منه ، ترك اديه حوط خصري .

مد راسه برقبتي يشتمني ، غمضت عيوني لحظات

وبلعت ريكي يغرز اصابعه ببشرتي ويتلاعب بعواطفي كرهت نفسي لان مااكدر اسيطر عليها .

رفع راسه باوعلي وهمس بهيام ؛ احسج تنبضين بالحياة لمن اقترب منج .

ابتسمت بسخرية ونظراتي تتجول على وجهه

واردفت بنفس النبرة : هاي قبل هسه الي كدامك مو زهراء القديمة الضعيفة الي تغلط وترجعلك شوكت تحس اني هنا عمود ابني وبس .

حجيت هيج واني احاول اتملص منه وهو يشدد قبضته عليه وارجع اتملص منه ، اخلي اديه على صدره ويرجع يسحبني اله ، رجع خلاني ع صدره ويهمس بأذني زهراء سامحيني احبج والله مااعرف جنت مغيب بغير عالم مو حاسس بنفسي .

تلاشى صوته عن اسماعي غمضت عيوني بيني وبين الاستسلام اله شعرة وتخيلته وي اسراء يتغزل بيها يهمس الها بنفس الكلام الي جان يسمعه اليه

يحضنها ويخليها على صدره ، صوت صدح بداخلي انته مووو إليه هسه مووو اليه .

دفعته حيل باوعلي خزرني :  شبييييج!!!!!!

دفعته بقووووه اكبر واني احس منهارررة ..

وهو مابي حيل ولا قوة لزم بالتور مال الميز

وكعت منه العطورات ع الارض وانملت كزاز

خليت اديه على حلگي ودرت على همام لا يگعد

بسبب الضجة ، واسمع صوت صفاء عاط متألم .

باوعتله رجله كلها دم عطت عزااا صفاااء ورحت كنبصت كباله ، ديطلع كزازة من رجله .

وكف على حيله بعد مطلعها ، خليت ايدي على زنده متوترة ومترددة : صصفااءء .

عاط بوجهي : وخررررري عني ما اريد منج شي ووخررري .

تراجعت خطوات للخلف شفت همام كعد يبجي رحت اريد اخذه واتلفت لصفاء الي طلع يعرج من الغرفة .

قهرني منظره ونزلت دموعي بسرعة واحس بداخلي صوت صفااء لاتطلع لااااا ابقى دخيلك بس هالصوت انحبس بفعل كرامتي الي انهدرت من قبل وبقى حبيس جوفي .

اخذت همام وحضنته وظليت الوليله لحتى ارجعه على نومته ودموعي على خدي ولمن سمعت باب الشقة انطبكت حيل عرفته نزل زدت بالبجي وكرهت نفسي .

عبير . خلصت الحنة مالتي وعمة هم سوتلها زعلة وسالفة خابرت على ماما وظلت تحجي

ليش ما اخذتوا بناتي وياكم للصالون وليش رحتوا قبلنا للقاعة وليش وليش لمن شافت قرب العرس ورح نصير لبعض احتارت شسوي ، ماما برجاحة عقلها كدرت تحتوي غضبها وتاخذها ع گد عقلها .

يوم ثاني جان العرس وبيوم الحنة قسور ممصدگ ابد طاير من الفرح وحتى دكايك امه هم ممأثرة على سعادته .

العرس هم جان بالقاعة بدلتي جانت اوف وايت مفتوحة من الصدر والاكتاف وع الصدر گصة على شكل قلب الحب وردانات من الزنود  لحد العكس والظهر نصه مكشوف و التسريحة ملكية .

بعد جلسة التصوير اخذونا للقاعة وعلى انغام اغنية طلي بالابيض دخلنا اني وقسور للقاعة .

وكعدنا بالكوشة ، قرب مني همس بأذني

كل هالجمال اليه ؟

ابتسمت له : تريد اكرصك حتى تصدك ؟

ضحك : هاي كل قوتج ؟ هيه هاي رومانسيتج ؟

بعدني مبتسمة : اعجبك والله .

ضحك بسخرية ، اخذونا لوسط القاعة لحتى نركص

اجيت اعثر بالبدلة ، لزمني قوي من خصري ، ظليت اضحك ، قرب اذنه مني : ولج شوفي وهاي حسدتج اني مدري حسدوج ‏‏୪‏‏୪‏‏୪ هاي عيوني والله جان وگعتي والفشلة الزينة.

_ يله فدوة الك اني اروح بس شون ويه الشماته بالله .

_ ها قصدج امي واخواتي مو ؟

_ غير سوتلنه سالفة البارحة ؟

_ حبيبتي كل العرسان هيج يحجون لمن يركصون لو بس احنا ؟

_ ما ادري صراحة سؤال وجيه .

_ لعد دخيلج فكيني من سيرة امي بس هالليلة ممكن ؟

_ اي والله ممكن بس كون هي لاتطلعنا سالفة ثانية الليلة .

_ ها رجعنا لنقطة الصفر مو ؟ شكلنا راح نقضي الليلة هيج وشكالت امك وشكالت امي ؟

_ لا عاد امي حبابة وفقيرة وتحبك الا امك تكرهني .

_ واني اشهد لامج بس يا عبيري اني احبچ ،  حبي  ميكفيج ؟

باوعت بعيونه مبتسمة يا الله رنة اسمي بشفافه عبالك موسيقى عذبة تدخل اسماعي وتطربني .

هزيت راسي اومأت بأي واني اباوعله .

شعت من عيونه نظرات الحب وتلألأت بسعادة .

خلصت الزفة واخذونا للفندق زفونا ، همست الي ماما

ايدي على قلبي همزين عمتج مسوت شي مشكلة وفشلتنا ، ضحكت وبوستها حيل وهي باستني ودموعها غركتني حبيبتي ماما راح اشتاقلج واشتاق لبابا .

مسحت دموعها واني راح اشتاق لوكاحتج والله ولج شون اتحمل البيت بدونج .

قسور كاللها عمه ترة يمج احنه شارعين بس واحنه يمج او انت يمنا وها لمن اللتحق هم حتبقى يمج اكيد ما امن عليها وحدها .

دير بالك عليها قسور ولو انته مثل ابني واكيد مايحتاج اوصيك .

توصيني على عيوني عمه اكو واحد يصوونه على عينه لا ابد والله ميحتاج توصين .

_ الله يسعدكم ..

اخر وحدة طلعت ماما من غرفة الفندق وانسدت الباب وبقينا وحدنا ، نزع سترته واجه كعد يمي .

_ مبروك النا حبيبتي .

_ الله يبارك بيك .

مد اديه لزمني  من زنودي ولافني عليه واني كاعدة على السرير ، مرر اصابعه على طول رقبتي وصل لحنجي رفعه وصار يتأملني بقيت بس ساكتة وعيونه تتبادل النظرات اراقبه بافتتنان ويباوعلي بهيام .

كال والله لحد هسه اشوفج نجمة صعب اوصل الها لج شكد تعبتيني لهسه عبالك اني بحلم وردي .

مو اكولج خلي اكرصك حاى تصدك متقبل .

لج موووكت تحشيشج هسه ...

رن موبايله اخذه باوع ع الشاشة كال هذا كرار اكيد جايب العشه ..

جاوبه وتكلم وياه واني كمت ع المراية اباوع لنفسي ..

اجه كال كرار جايب العشه ..

لعد وينه ميصعده اي والله فد جوووعانة ..

ضحك كال خلي ارجعكم للبيت احسن وامن الكم من الفندق ..

عطت شنوووو يكول كرار افندي ؟

باوعلي متعجب شبيج شبيج ؟

حسيت على نفسي تخليت عن انوثتي للحظات رجعت هدأت وتكلمت بنفاذ صبر : شبي كرار شيريد يرجعنا للبيت ؟ هم دخل روحه ؟

_ غير يخاف على بنت عمه ديله بدلي خلي ننزل ينتظرنه جوه بسيارته .

باوعت لبدلتي : لا شنوو انزع هسه بعدني مشبعت من منها والله شهالحكم كم مرة حلبسها اني ،  هو شعلي كرار وانت ليش تاخذ بكلامه معليك بي .

_ ديلله يلله وعد عليه بكل عيد زواجنا اللبسج بدلة احلى منها بعد .

برطمت شفايفي وهو ظل يقنع بيه شرطت اله انزل بالبدلة وافق هو مجبور اخذنا كل اغراضنا ونزلنه .

والناس يباوعون علينا ، خجلت ولزمت بقسور قوي

وختلت وراه وهو يحجي وطابك اسنانه

شفتي شسويتي بينا ؟ الكل يباوعولنا هسه شيكولون .

همست اله كول هالحجي لكرار مو الي .

طلعنا من شفت كرار واكف يم سيارته  ومبتسم

باركلي ها بنت عمي الف مبروك شايفة كل الخير .

غلست منه مجاوبته معصبة وفتت للسيارة ، وقسور ظل يداري فشلة كرار وعود هو يجاوب مكاني وتقمص شخصيتي ويقلد صوتي : الله يبارك بيك ابن عمي ويوم الالك ...

ظليت انفخ متعصبة ، دخلوا بالسيارة اندارلي كرار

_ ها شبيج تنفخين ؟

_ هيه هاي سوايه تسويها بيننا كرار شكو مرجعنا للبيت

كعد بصفه قسور التفتله يأشر بيده عليه ويحجي

_ هاي شبيها مرتك؟

اشرله قسور واني فهمتها تقربت منهم وعطت بيهم

   _ هاا دتكوله ياخذني على كد عقلي مو ؟؟؟ هسه تاخذني على بيت اهلي حالا حالا

قسور باوعلي مصدوم تحجين صدك ؟

اي لعد مجذبة عليك من قبل ؟؟؟ يله رجعني ‏‏୪ اخابر بابا  .

كرار كاله : عوفهااا اجتها الحالة هسه تهدأ .

ياحالة شقصدك اني مخبلة ...

منو كال انتي عاقلة ؟

قسور : وكف السيارة لك اروح اكعد يمها صدك اني شكعدني يممممك .

وكف السيارة كرار و اجه قسور كعد يمي ابتعدت عنه

وحجيت بانزعاج : بعد وكت توك حسيت ؟

كرار جاوب من يمه : ترة لاتسوينها قصة مصار دقيقتين من حركت .

معليك انته كل الصوج منك ليلة عرسي خربتها عليه .

هسه شنووو بالله شصار هاي فوكاهه بعد حتى عشاكم عليه متستاهلون مو صوجكم صوجي اني الي خابص روحي وخايف عليكم .

قسور : ايباااه ظل يتمنن علينا ... دغني قسور بيده باوعتله وصديت نظراته بثواني درت اباوع ع الجامة واني ساكتة .

وصلنا لبيتنا نزلنا واني دخلت قسور باوع لكرار

ها هم تريد تفوت ويانا ان شاءالله .

اي والله بلا زحمة اذا بيها مجال اتعشى وياكم صار بنفسي اكل من المشاوي الي جبتها الكم هسه تغصون بيها ترة واني كتلكم وانتوا بكيفكم بعد .

عاط بي قسور دطييير لك يله وصلت كروتك لهنا حدك يله روح .

_ هيه كروتي لو كروتكم ؟؟

حبيبي كرار يله انكلع ماقصرت ويانا بس هسه الله وياك نفتح بغير وكت ديله روح عاد .

لا والله موصوجكم امداني اي والله ..

طب قسور للبيت واني واكفة اباوع ع الدرج

حسيته تقرب مني خلا راسه على كتفي همس

شبيها عبيري صافنة .

جاوبته بجمود هم هذا الدرج ؟

التاف وكف مقابيلي ويضحك بمكر .

فتحت عيوني على اوسعها عرفته على شنو ناوي .

شلت البدلة وعطت واني اركض لاااا حباب قسور لتشيلنييييي .

بس هو لحك بيه وشالني عطتت عزاااا قسووور وجلبت بقميصه يمكن خرمشته باظافري بدون قصد لان حسيته تأوه متألم ..

من وصلنا اخر بايه نزلني وكف يلتقط انفاسه

واديه على خصره واني لازمه بالدرج وايدي على قلبي بعدها الرعبة بروحي .

باوعلي يتنفس بصعوبة : انتي شكد وزنج .

رفعتله تك حاجب وجاوبت : ٦٠!!!

باوع للدرج مصدوم : يعني اني هسه جنت شايل ٦٠ كيلوووو ؟ ورجع باوعلي بنفس النظرة .

مشيت بفخر متوجهة للغرفة : قابل جبرتك وبعدين المفروض توديني لحد السرير مو لهنا وبس .

اجه صار كدامي يباوعلي بنظرات شيطانية

تردين اوصلج لحد السرير ؟ اني افرح والله .

عزااا حسيت على نفسي فشلت فشلة فتت بنص هدومي وين اروح يربي هسه وين ؟؟؟

لزمني من خصري وسحبني اله ، رفع راسي

طبع بوسه على كصتي وطول بيها ، وعطره

لفح انفاسي ، غمضت عيوني اترس ريتي منه ..

عطره كلش حلو ، بعد شفايفه من كصتي

واخذني للغرفة ..

غيرنا ملابسنا ونزلنا تعشينه .. اكلنا وخلصنا

ارتكى على الكرسي واديه وره راسه .

كال خطية كرار احسه عبالك يتيم شوفته شوفة يتيم من لمن استشهدت مرته لهسه .

تذكرت مها بهاللحظة نزلت ايدي حسيت بقهر

تحسرت اصلا طول الحنة والعرس واحسها موجودة بيننا عبالك عيوني تدورها وهيه تركص ويا البنات وفرحانتلي .

انتبه عليه قسور وتأكد بانو ضجت وعيوني دمعت

حاول يغير الموضوع ..

ها حبيبي خلصتي نصعد ننام وغمزلي ..

وعيت على صوته هزيت راسي كمت لميت السفرة وهو صعد فوك غسلت وفرشت اسناني وترددت اصعد

خجلت واستحيت وكفت يم الدرج واباوع ليفوك

اخر شي كعدت على الدرج واديه جوه خدي .

حسيت بخطواته ورايه دينزل ، كمت بسرعة والتفتت اله ابتسم بخجل وتوتر واحس خدودي تطلع منهن حرارة .

هو اجه باتجاهي يباوعلي مستغرب ؛ ليش كاعدة هنا حبيبي ؟ تخافين تصعدين الدرج .

وضحك باستهزاء .. ابتسمت ودرت وجهي استحي حتى اخلي عيوني بعيونه .

لا بس توة خلصت واجيت اصعد بسس .

بس شنوو ؟

باوعتله ابتسمت بوجهه ..

لزمني من كف ايدي وجرني وراه ، صعدنا فوك ..

توجهت للسرير كعدت خجلانه افرقع باصابعي

حسيته يباوعلي ، ابتسمت بتوتر ، اجه باتجاهي

ظليت اتنفس بصعوبة وحسيت نبضات قلبي تتسارع

استقرت نظراته عليه لاجزاء من ثواني حسيت نفسي بحضنه راسي على صدره واصابع ايده تداعب بشرتي .

رجفت باحضانه وخفت هو حس بيه زاد من شدة عناقه ولمساته وصارت جريئة بزيادة لامتصاص خوفي وتوتري ، مددني على السرير ، فتحت عيوني بدون مااباوع اله نظراتي استقرت على سقف الغرفة ، بلعت ريك ورجعت غمضت عيوني ، تقرب مني ، همس بأذني احبج ...........

                            ****

زهراء .. من بعد الي صار بحنة عبير ، صفاء ابد ما حاول بعد يتقرب مني .

بس مقصر ويايه ولا ويه إبنه وحاول ميبين انزعاجه

بسبب تصرفي اخر مرة .

وبيوم اخذ همام ونزل جوه ، واني انهمكت انظف بالشقة ، واني على هذا الحال سمعت هوسه وعياط

فتحت عيوني مصدومة عفية بيت نهار كله عياط وصياح ومشاكل .

انوب ابني جوه لا يخرعووونه طفرت جوه بسرعة

سمعت صوت بهاء هنانه واني لابسة برمودا وربع ردن

عزااا ركضت صعدت لبست بسرعة ونزلت جوه .

واسمع بهاء يصيح وصفاء همينه بس اريد افهم شي منهم ماكدرت ، دخلت جوه شفتهم بالصالة .

اسراء كاعدة ع التخم مدنكة وتعصر بديهه وعمه كاعدة ع الكاع وعمو كوه واكف ورشا واكفة ومتخصرة .

بهاء يكول مو عيب عليييج تروحين اماكن مشبوهه مشعوذين وسحارين  متستحين خزيتينا والتفتت لصفاء وانت ماتضب مرتك مخليها منا ومنا ولك شوف حالتك ولك حس على نفسك دشوف روحك شصاير بيها من اكولك اخذك تتعالج عند واحد يفتهم بالروحانيات متقبل وتعاند طلعت هاي الوكحة ساحرتك من امداك اي والله .

اخذت همام بسرعة ضميته لصدري جان بيناتهم صافن ميعرف شكو وعيونه مدمعة  ..

صفاء تقرب لاسراء يريد يضربها رفعت ايدها تحمي وجهه منه وتصيح والله معليه رشا دلتني عليهم والله .

رشا عزااا صخااام بووجهج اني لو امج والله معليه هاي خالة دلتنا واخذتنا والله .

بهاء تقرب من رشا وسحبها من ايدها بقووة ولج انت هم جاي احاسبج ولج ابن عمي مصورجن انتن الثلاثة عجوز البين خالتج وهاي النسرة وانت يالعوجة يالماعرفوا ابوي وامي يربوج .

عمو دنك راسه وظل يضرب على وجهه .

تقرب صفاء اكثر و يريد يضرب اسراء ، عمه صارت بيناتهم ظلت تحلفه لااااا عليك الله عليك النبي لاتضربها حامل .

عاط يمه وخررري خلي اكسحها لاهلها مااريدها بعد مااريدها .

لااااا عليك بهمام عليك بزهررراء لا تضربها ولا توديها لك حامل خاف الله بابنك.

وكف عبالك انصعق والتفتت ظل يباوع عليه مقهور نظراتها متملكها الندم والقهر ..

حسيت بغصة بقلبي ، كلت حسبي الله ونعم الوكيل واخذت ابني وصعدت فوك وبعدني اسمع صوت صياحهم بأذني ..

بعدها سمعت صوت سيارات وصوت زلم توقعتهم اخوان اسراء وزادت العركة وصفاء يصيح اخذووها مااريدها بعد .

يتبع ...

شريعة العشق

بارت ٦٥

نورا ناصر

صوت صفاء بقى بأذني يصيح خفت يأذونه وهو اصلا تعبان ، بس تذكرت بهاء موجود ومستحيل يأذو بوجوده .

اخذت ابني ورحت للغرفة عزلت نفسي عن اصواتهم وبقيت افكر يربي ليش هيج يسوون ليش ورغم يشوفون بعينهم صفاء منتهي بعدهم يرحون للسحارين مستمرين الحمدلله الله كشفهم والا جان صفاء راح بيها اسم الله عليه ربي يحفظه لأبنه .

ظل همام يلعب بألعابه واني متمددة ع السرير وجسمي بعده بي خوفة ويرجف ، سمعت صوت باب الشقة

كمت فتحتها شفت صفاء ، لازم بطرف الباب ويتنفس كوة وايده على صدره .

رفع نظره باوعلي بدون مايحرك راسه ، وخرت من كدام الباب حتى افتح له طريق يفوت جوه .

فات كوة يجر بخطواته وشمر نفسه ع التخم بتعب واحسه مختنك ووجهه احتقن فد نوب ، رحت مرعوبة كعدت يمه ..

صفاااء بيك شبي ؟؟

وظليت افرك بصدره وهو يگح .

بعدها كام بسرعة وراح للحمام وسمعته يتقيء

خليت اديه على وجهي وظليت ابجي على حاله واتحسب عليهن ..

طلع كوه يمشي سندته وديته للغرفة ونام على بطنه

غطيته  واخذت همام وطلعت وسديت عليه باب الغرفة ..

طلعت للصالة شغلت قرأن والتهيت اشتغل وفكري مو صافي ، افكر لبعيد وبحياتنا والي راح يصير واصفن .

لحد بعد ساعة او اقل سمعت صوت باب الغرفة طلع صفاء لازم راسه وكوه يتنفس باوعلي عيونه حمر تخوف صااح طفي هذا طفييييي .

همام ركض حضني من رجليه ، اخذته وديته للمطبخ

دخلته جوه ورحت لصفاء انت لازم تتعالج صفاء انت مسحور .

لزم راسه وكع ع القنفة وظل يتنفس بصعووبة

رفع عينه بعيني وخزرني كتتتتتلج طفي .

رجعت ليوره بخطوات مرعوبة وهو طلع من الشقة يركض .

كعدت محتارة سمعت همام يبجي ركضت جبته حضنته اخذت تليفوني خابرت بهاء وحجيت ويا كتله ضروري تقنع صفاء يتعالج ميصير هيج حالته حاله والله... وبابا يعرف شيخ مضبوط .

كال اطمئني ميصير خاطرج اله طيب واني هم مو ساكت اله ودااقنعه وان شاءالله هالايام اخذه للشيخ .

تشكرت منه وسديته . دقايق وصعد صفاء وكف مقابيلي واني اباوعله .

_ اسمعي زهراء اذا اجت اسراء او امها او حتى رشا تگوليلي رأسا دكيلي تليفون مفهووم ؟

هزيت راسي ...

اردف : كون قبل لا يدخلون للبيت وحتى متخلينهم يدخلون ومعليج بأمي افتهمتي ؟

_ صار ..

نزل جوه تبعته ونزلت بالكراج طلعت عمه تحجي ويا ..

ولك انت شبيك تخبلت لك مرتك حامل دتفهم عليه لو لا حامل حااامل وشون تطرد اختك من البيت وتدري بيها كلش زين ماعدها احد وزوجها دايح بره وميقبل ياخذهه منو الها غيرنا ؟

عاط : اي من سوالفها عافها وهذا رجلها هم الي حجي ويا بسيطة اني اعلمه وبالنسبة لاسراء خلي تجيب واخذ ابني منها وختروح طبها ستين مرررض .

دخل بسيارته حركها وطلع .. واني دااصعد فوك واسمع عمه تدردم سكتت عنها ..

.........

عبير .. فتحت عيوني صار وجه قسور كبالي ، ابتسمتت وكمت تمططت واني اتمطط

كلت صباااح الخير ..

اخذ ايدي بوسها وكال صباح  النور ..

_ من شوكت انت كاعد ؟

_ اووو من ياادهر لج من الصبح واني صافن بوجهج .

_ شعندك صافن بوجهي مضيع شي ؟

مجاوبني كرصني حييل بخدي وباسني .

كال امي خبصت الجو بالمكالمات وهسه ساعة ١١ بس اني ماردت اكعدج من النوم واحرم نفسي من هالمنظر الحلو بقيت بالساعات واني اتأمل وجهج .

_ ليش مشايفني ؟ عزااا هسه الساعة ١١ ..

كمزت من السرير ..

عاط على كيفج لججج ..

رحت لتليفون لكيت ماما متصلة عليه مكالمة وحدة

توجهت يمه شوفته الفون باع ماما متصلة مرة وحدة شكد عدهه ذوق يربي .

طوق خصري باديه وسحبني اله وعبالك يشيلني من الكاع : لججج يعني امي ماعدهه ذوق موو ؟

_ تؤ تؤ تؤ اني جبت سيرتها لامك ؟

_ لا منين ديله هسه خابري عمتي لتظل قلقة عليج ..

كال هيج ونزلني منه ، خابرت ماما استلمتني رزايل تالي ضحكت لج نسيت تزوجتي كبرتي وصار عندج رجال ولج متعودة ارزل بيج من دون اخواتج مو بيدي حتى لو ممسويه شي .

ضحكت وحسيت ماما دتبجي وقسور يباوعلي يضحك وعود متشمت بيه ،  بعدها تكلم ويايه بابا باركلي وسأل عني كتله اني زينة..

كال عساج دوم زينة ..

ختمته وياهم .

باوعت لقسور كال الله ميطك بحجار حجيتي على امي واجتج رزالة من امج ..

برطمت : هاا تشمت بيه ؟

ضحك .. اجه اخذني اله حظني وبوسني ...

رفعت راسي اباوعله شوكت جبت سيرة امك اني .

لزم شفايفي باصابعه عود يسدهن عن لا احجي

وكال يلله ننزل ولج امي مسويه عزيمة خبصت الدنيا ترة ..

نزلت غسلنا وصعدت بدلت ملابسي ودخل قسور

كال اجو امج واخواتج جايبين الريوك ..

نزلت وراه ورحت لاهلي بوستهم ماما بعدهه تبجي مسحت دموعها وحضنتها حيييل وطمنتها عليه ..

تونا كاعدين دنتريك وهجمت عمه علينا خلتنا نكمز ..

طبت تصيح الساعة راح تصير ١٢ والناس ينتظروك هناك يردون يباركولك وانته لابسني هيج ولك قسور ؟

جاوبها يوم ترة صباحية عرسي هاي المفروض تباركيلي ..

اي شعندك توك يله تتريك وين جنت من الصبح ؟

تره جنه نايمين ..

كل هذا نوم ماشبعتوا من البارحة خنشوف بالله شكد راح تخلفلك على هالنوم هذا ..

طكيناهه ضحكة وهي معصبة زادت باعصابها

كالت وبعدين انته شجابك مو جنت بالفندق اشو نريد نروح عليكم كرار كال رجعتوا من البارحة ..

سحبها لحد السفرة وكاللها هسه كافي عصبية شجاج وتعالي اكلي ويانا خوش گيمر عمتي جايبه .

كاللها هيج واشرلي اكوم اسلم عليها كمت باوستها

كوة كالت مبروك ...

بعدها رحنه لبيتهم تلكونا خواته وعماته وعماتي واهلنا كلهم بالجوكليت والهلاهل ..

تغدينا يمهم والعصر رجعنا لبيتنا .. ..

...

زهراء .. بعد ما انطردت اسراء من البيت بهاء وبابا ظلوا ياخذون صفاء ويودوه للشيخ يقرا عليه .

وبيوم هو جان طالع واني وهمام العصر جوه بالحديقة

بعد زواج عبير قللنا روحاتنا لاهلي ، مريم هالسنة سادس وشادة كل حيلها حتى تطلع طبية وهمام خاف يأخرها عن دراستها وماريد هالشي يصير .

سمعت صوت الباب ينضرب حييل ، اخترعت وجيت افتحه صحت منوو ؟

جاوبتني من وره الباب انيييي .. عرفتها هاي ام اسراء صرت محتارة بين افتح الها وبين انفذ كلام صفاء لمن كالي لتفتحين الهم اذا اجو ولتطببيهم .

ثواني وطلعت عمه وصاحت منووو بالباب ؟؟

جاوبتها اختها اني عيني ام حسين ..

بقيت واكفة محتارة واجت عمه تتدعبل ونترت بيه لمن وصلت يمي شبيج ماتفتحين الهم الباب مو عيب مخليتهم واكفين بره .

جاوبتها بتوتر : اي بس عمه صفاء كال ...

نترت وخرري معليه بصفاء اني يريد يحرمني من اهلي وخواتي والله حلوة هاي بعد .

راحت بسرعة فتحت الهن الباب دخلن اسراء وامها خزرني وفاتن جوه .

جريت همام و صعدت فووك بسرعة ، اخذت تليفوني وخابرت صفاء كتله اسراء وامها هنا ..

كال جاي هسه ..

سديت الفون وكعدت وسكتتت فوك المهم الي عليه سويته بلغته بجيتهم .

سمعت صوت سيارة صفاء فاتت للكراج غلست ورحت خابرت عبير سولفت وياها الها ٥ ايام متزوجة ، سولفت وياها بس اريد انسى المشاكل الي دتصير هنا.

ختمتها وياها وكمت صليت المغرب وبلشت اسوي العشه ، سمعت صوت باب الشقة تندك وهمام صرخ بااااابااااا وراح يركض يفتحه ، حبيبي كبران وديفتح الباب وينوش المقبض مالته .

فتحه ودخل صفاء باوعلي صديت نظراته وفتت للمطبخ وهو اخذ همام وراح يلعبه بالصالة .

دقايق واجه ورايه للمطبخ ، جنت منطيته ظهري

لمن سمعته يحجي : عاد حسبتي حسابي وياكم ع العشه لو لا ؟

التفتت عليه جان مبتسم ، رجعت دنكت واني احوس بالطاوة الي ع النار  ..

الحمدلله نعمة وخير زايد .

_ يعني اكدر اتعشى وياكم مو ؟

التفتت عليه : اي قابل طارديك ؟

تقرب مني : لا ادري مرتي بنت أُصول مستحيل تطرد احد .

حسيته اقترب اكثر ، رجفت ، لزمني من زنودي ، غمضت عيوني وتنفست بعمق ، حسيت بانفاسه على رقبتي .

فلتت اديه منه وابتعدت .. ظل يباوعلي بنظرات حيرانة وتايهة ..

_ اسراء ظلت تتوسل ارجعها .

_ ميهمني رجعتها او لا شي بينك وبينها هذا .

_ زهراء كافي راح اطلكها لمن تولد واخذ ابني منها واطوي صفحتها وللابد ليش متصدكيني زهراء ترة ماادري شنو صار وتزوجتها .

_ انت تعرف ساحريك بعد ليش تنكر ؟ لو تحبني ميأثر بيك سحر بس انت تتمناهه طول عمرك واجتك على طبق من ذهب بعد شون تفوتها .

_ هذا ظنج بيه زهراء ؟ لج اني شون ابدل الذهب بالتراب لج انت ذهب صافي بس الي صار خارج عن ارادتي  كافي سامحيني دخيلج كافي قسوة .

التفتت عليه اباوعله بتحدي : للاسف ما اگدر موو هسه حاليا صعبة صفاء صعبة .

درت اله ظهري عضيت شفتي بقوة احس بوخز بقلبي الموجوع والمتشبع بالالم وروحي متشتتة وضعيفة ..

غمضت عيوني حيل واحس نفسي ضايعة.

ماوعيت اله على صوت باب الشقة ينرگع عرفته طلع

بس مو بيدي ابد مووو بيدي ما اگدر اتقبله بعد .

يوم ثاني الصبح گعدت وحضرت نفسي دا اروح للدوام

اخذت همام ونزلت جوه اريد اودي يم ماما اليوم دوامها عصري ، واني دا انزل سمعت عمه تحجي على صفاء وصفاء يريد يروح للدوام بس مو مهتم الها ورغم هذا ضايج ومخنزر وحالته حالة ومبين معصب كلش .

عمه تصيح هيج احسلك البارحة اجتك تبجي دم ومقهورة وانت بكل حقارة طردتها وهددتها تاخذ الطفل منها وشوف هسه شسوت بنفسها شمرت روحها من الدرج وسقطت الطفل ذنبها بركبتك ليوم الدين انت السبب خليتها تسقط .

فتحت عيوني على اوسعها تجمد الدم بعروكي وتيبست بمكاني اباوع لعمتي بثغر شبه متدلي من الصدمة ،  تقرب مني صفاء

همست صصصباح الخير ..

مخنزر عيونه كال صباح النور ، بوس همام

كال انتظرج بره وطلع وعمه بعدها تدردم .

باوعت لعمه بتوتر صباح الخير ..

عاطت منين يجي الخير منين فشلني كدام اخوتي فشلني كدام اختي البارحة حتى نزلت على رجليه بوستهم وهو ولا يمه ماربيته هيج گلبه اسوود

لعد ليش تزوجها منو جبره يتزوجهاا منوووو .

_ خير شبيهه اسراء عمه ؟

_ دولي شكد فاهية داكولج سقطت .

فرت بايدها وفاتت جوه ..

هزيت راسي بعدم رضا وطلعت من البيت شفت صفاء بره دينتظرني ، وديت همام لماما شفتها تنتظرني بالحديقة اخذته مني وهو منعس حبيبي خله راسه على كتفها ورجع لنومته .

طلعت صعدت بالسيارة كعدت بالصدر باوعتله

كتله الله يعوضك .. مجاوب اكتفى بس بهز راسه .

رجعت سألته شلونها هسه مارحت الها للمستشفى ؟

هز راسه بمعنى لا . وحرك السيارة وانطلقنا للمستشفى .. وطول الطريق هو بس يتحسر واحنا الاثنين بس ساكتين .

مر اليوم عادي واجه يوم الجمعة بابا سوا عزيمة لعبير وعزم الكل من اهلنا . ومن خلصت العزيمة  صاحني صفاء حتى ارجع وياه للبيت ..

بس بابا طلب منه ابقى يمهم هالليله عنده موضوع ويايه باوعلي صفاء محتار هز راسه  موافق ،  سلم وقبل ليطلع ظل يتلفتلي وتالي راح ..

بعد العشه نومت همام وصاحني بابا هو وامي للمكتب

فتت عليهم ، اشرلي بابا اكعد وسألني شلونج باباتي مرتاحة ان شاءالله ؟

جاوبته : الحمدلله بابا مرتاحه وماطول انت موجود مااحتاج أحد اني

_بس أني مدايملج باباتي

اجيت احجي سكتني : بابا أني من اشوفكم تتأذون أني وامكم الليل منكدر انامه ولاعبالج احنه مرتاحين ع هذا وضعج .

_ شسوي بابا الحمدلله على كل حال .

ماما : بنيتي أبن عمج صح غلط وبالنهاية هو بشر وممعصوم عن الغلط وحتى الانبياء غلطوا وربنا عاقبهم وبالنهاية غفرلهم وسامحهم اذا هو الرحمن ويسامح احنه ليش منسامح ياامي !!! ولتنسين زوجج يعشقج بس بنيتي انغلب ع أمره وانسحر وهياته كدام عينج لحد اليوم ديعاني من اثار السحر .

دنكت راسي وهزيته ....

كملت ماما ؛ انتوا بيناتكم طفل ردتي تنفصلين واحنه جنا وياج بس شفتي أبنج شصار بي ووصل الموت ياامي أحنه لازم نضحي ونتنازل اذا مو علمودنا علمود اطفالنا وبالنهاية الحياة تستمر وتمشي غصباً علينا واحنه لازم نعيشها بحلوها ومرها احنه كم مرة عايشين خلي نستثمر فرصة الحياة ونبتعد عن الزعل والحقد والكره

سامحي لزوجج واتعايشي وياه صفاء وردة ولو تدورين الدنيا كلها متلكين أحد يحبج بكده قبل شويه من أبوج طلب منه تبقين يمنه شفت بعيونه خوف الولد خايف ليفقدج مرة ثانية وشفت بعيونه حب الج

ماماتي فكري زين ولتخلين عائلتج تتطشر

معلقت ع كلامهم أبد لان هم أهلي واكيد يتمنولي الخير وكل كلامهم صح بس أني اكو شي بداخلي انكسر ومستحيل يتصلح واذا نفذت كلام أهلي فهذا الشي بس علمود أسعدهم وعلمود أبني لان بابا متأذي وبابا بعمري مشفت هيج نظره انكسار بعيونه .

ان شاءالله الله كريم تصبحون على خير ..

استأذنت منهم ودخلت للغرفه انام ..

ثاني اليوم الصبح خابرني صفاء جنت نايمه فززني صوت الموبايل سحبته من يمي رأسي قبل ليكعد همام هذا نومته نحسه بس يفز وهو مشبعان نوم يسويلي عرس وجيب اليسكته

باوعت ع شاشة الموبايل (الوهم) جنت كاتبه ع أسم صفاء هيج خفت كلت خاف بي شي وبدون سابق انذار جاوبته

_الوو صفاء بيك شيييي؟

جاوبني : اخخخخخ البيه انتي عسى بعافيته الفرقنا أبويه زهوره أني بالطرمه شويه واجيج

انتبهت ع الساعه ب٥ ونص الفجر

همست ليكعد همام : صفاء ساعه ٥ ونص شبيك حلمان

_بااع هاي ولج اني الليل منمته شمدريني بيش الساعه

همست: هيمو نايم

_أني اجي اشيله يلا يابه جايج

كمت من الفراش رحت غسلت ورجعت  لملمت اغراضي ع كيف وبدون حركة عبالك حرامي

دك موبايلي طلعت فتحتله الباب فات ويتلفت سألته : شبيك ؟

_هااا لا ماكو شي كملتي ؟

_أي بس البس صايتي وحجابي اخذ الجنطه وشايل همام ،  صعدت لمريم فتحت الباب عليها شفتها دتقرا هيه تكعد من الفجر تقرا .

كتلها رايحة اني كولي لماما خاف تسأل عني ..

كالت تمام الله وياج ..

نزلت بس مكعدت اهلي خطيه نايمين طلعت ويا صفاء جان وضعه غريب صعدت لشقتي هو حط همام بسريره وحك رأسه

_ااا زهراء

_ها

_ماكو شي

تركني ونزل ظليت صافنه شبي هذا؟

صفاء: من رحت اجيب زهراء أول مفتحتلي الباب اتخيلتها كلب أسود ومليان شعر اجيت اخنكها بس لعنت الشيطان واستغفرت ربي اخذتها ورجعت للبيت مكدرت أبقى يمها وجهه ساعه اشوفه بزون وساعه بقرة وساعه كلب خفت لا أاذيها تركتها ونزلت دخلت للاستقبال شغلت قرأن من سمعته أحس جسمي نمل ورأسي ظل يوجعني بس مطفيته ظليت استغفر .

زهراء : سمعت صوت صفاء ديكح قوي نزلت اركض حتى نسيت أبني لكيته ديتقيئ بس مكان التقيؤ مو  شي عادي انرعبت من الشفته رجعت ع الحايط وخليت ع ايدي ع قلبي مفزوغة ..

جان شعر ع شحم ووياه دم متتت خوف ودموعي بعد مااسيطر عليها  هو حس بيه حجه بتعب : شجابج ؟

مشيت اتجاهه غسلتله وسحبته للصاله تمدد ع التخم رفعت رجليه لزم أيدي : لتعوفيني محتاجج يابه

خليت أيدي ع كصته وهمستله : بس انزل همام واجي

ظل يتنفس بصعوبة واشرلي بعدم اهتمام وصعدت اخذت  همام و ملابس اليه ولابني فكرت بكلام ماما وبابا ووضع صفاء لعنت الشيطان مدااكدر اتقبله بعد الصار أعرف مسحور ومو بوعيه بس كرامتي انجرحت وكدام الكل ....

عبير .. عزمونا أهلي ورحنا دخلنا الكل موجود سلمت على أهلي وع الكل ، شفنا عمتي قبلنا ، بس شافتنا جرت قسور ها ولك نسيتني ماتعرف تجي على امك تاخذهه بالسيارة وتجيبها لهنانه ؟ مو تكسرت رجليه من المشي لحد بيت خالك ..

جاوبها : شسالفة يووم مو البارحة جنت يمج وهسه انت جايه قبلنا يعني ترة لو كايلتلي مجان قصرت .

وخرت من يمه منزعجة ، قربت منه همست بإذنه

لتهتم خل نتعود شبيك .

جاوبني بابتسامة ؛ اني اهتم وانت ويايه صدك جذب .

ضحكنا اثنينا واحنا نباوع لبعض ، تغدينا كلنا سوا

والعصر دنرجع للبيت سلمت على الكل ودااطلع

صاحتني ماما رحت الها كالت روحي للكنتور مالتي تلكين علاكة زركة بيها اغراض هاي الج اشتريتهم .

هزيت راسي ورحت داا ادور بالكنتور وصارت علبة مها مقابيلي بكنتور امي الظاهر زهراء هنا ضامتها .

جريتها من الكنتور وطلعتها كعدت على السرير وخليتها بحضني دكات كلبي عبالك صارت الف رجعتلي معاناتي لمن فقدت مها ياترى هسه تسامحني واني هملت امانتها ، مها سامحيني فقدج مو شويه .

فتحتها بسرعة وصارت مقابيلي حلقة زواجها وكلادة بيها حرف كرار بالانكليزي انصدمت ، باوعت وياهم ورقة ، مديت ايدي الترجف واخذتها بلعت ريك يربي

شنو بيها ؟

يتبع ..

الفديو تصميم meme60302416 عاشت ايدج يعمري 💚