تحميل رواية تاروت بقلم زيـنـب علـي 🦢 pdf

#تاروت

03.03

بقلمي: زيـنـب عـلـي

حبايبي لا تنسون متابعه الحساب+تصويت+تعليق بين الفقرات

احبكم♥️

♣️━━━━━━━━♠️━━━━━━━━♣️

رواية ستاخذنا الى احدى البيوت البصريه نغوص بأعماقها لنكتشف بين طياتها ذالك الحدث الغريب الذي يقلب حياة الجميع بـ ليلى وضحاها

تعالوا معي نكون احرف ثم كلمات ثم جمل تترابط مع بعضها لـ تصبح قصه ذات طابع غامض ومميز للغايه

مجرمون ابرياء

خائنون اوفيـاء

متعجرفون بسطاء

تواضع كبرياء

حب جفــــــاء

الغاز كثيره في ورق تاروت هذه الروايه

رهبان ثلاث لكل منهم حكايه

قلوبهم صرح ميدان اسهم ورمايه

انكسروا بالبرود والطغيان منذ البدايه

نسائهم تكوننّْ من عاصفه الخذلان حتى النهايه

الراهب الاول:

واكفه بالمكان الي المفروض اليوم يظهر بي الحق وتتحقق العدالة اختي گاعده بصفي التفتت عليها باوعت بعيوني بحيره وكأنها تسألني ليش وحدنا جلت صوتها وحجت

- وينه لهسه ماوصل ؟

مسحت على وجهي بحيره وقلق حتى انه بديت اقلق طلعت نقالي واتصلت عليه مغلق

- هاا ميجاوب

- لا مغلق يلا بعد گدامنه وكت هسه يوصل تلكي محبوس شوف بيا ازدحام

- بس راح يجي

- اكيد يا يوم هو خيب ضننا بي

مر الوكت وهو ماكو مااجه خذلني ماتوقعتها منه لا ياربي كل شي ولا هو ماريد انكسر منه منو يبقالي وين اروح صفنت وتذكرت كلامه البارحه من گال

- ألم الدنيا بصدري باجر اخذلج واعوفج باجر اكسر ضنونج باجر روحي تطلع ويا دمعة عيونج

صار دورنا ودخلت بخيبه والصدمه اكثر ان اني دخلت بخيبه وحده وطلعت بخيبتين بهذا اليوم حسيت الدنيا طفت بعيوني اباوع الاختي دموعها بعينها صرت ادير أنظاري حواليه بالمكان ناس داخله وناس طالعه الا احنا وحدنا همست اختي بخيبه ودموع

- بقينا وحدنا

اتقدمت لزمت ايدها وعتصرتها بديه حيل حاولت انطيها قوه حجيت بحزم

- ماريد دمعه منج تنزل احنا مو وحدنا رب العالمين ويانا وحقنا ناخذه بيدنا ممحتاجين وكفه احد افتهمتي

طأطأت راسها بخيبه رفعت راسي صارت عيني عليه يباوع علينا من بعيد وكأنه يسألني

خسرتج نفذتي تهديدج وحرمتيني منج

گلبي نغزني واني اشوف عيونه حايره اذا هيج تحبني ليش ضيعتني ليش خليت نفسك وخليتني بهالموقف !!!

سويت نفسي ممهتمه هزيت راسي بحركتي المعتاده من اريد اعدل شعري لزمت ايد اختي وفتت من عنده ولا كأني اشوفه تعديته مسافه ووگفت حجيت واني منطيته ضهري

- لا على بالكم لهنا وكلشي انتهى هسه يلا بدأ اللعب ....

━━━━━━━━

مقتطفات من العمق :-

اتقربت خليت ايدي على صدره همست

- دائمًا خليني هنا

- حضنج وبيتج لحد گطع النفس تبقين هنا

━━━━━━━━

جاي امشي ودموعي وحده ورا الثانيه شهگاتي عاليه همزين محد موجود الشارع فارغ هيج وكت كلها نايمه حست صار ضوه سياره على عيوني جايه بتجاهي نزلت على ركباتي بنص الشارع وصرت ابجي بصوت عالي ونحيب نزل من السياره واجاني يركض نصه گبالي لزم ايدي الترجف غلفهن بديه ميل راسه يباوع بوجهي وحجه بنبره مليانه حنيه

- دموعج يغسلني فزه گلبي

━━━━━━━━

نقر بأصبعه على انفي اثار تساؤلاتي من گال

- انتي مثل الگهوه

- ليش ؟!

گرص خدي وهو يحجي

- مره بس تعدلين مزاجي

━━━━━━━━

قهقه بخفه رفع راسه وگال

- انتي بقمه الا مبالاه

فريت خصله شعري على اصبعي وحجيت بغرور

- مو مهم المهم انه بالقمه

━━━━━━━━

الراهب الثاني:

طلعت من المستشفى اسحل بروحي من وموضوع الرقم كلش قلقني اني متأكده هو بس شلون دخل للبيت شلون كتب الرقم على ايدي واني نايمه فتحت باب السياره وصعدت جانت ظلمه دنيا ليل تعبت من التفكير سندت راسي على ستيرنك السياره

بقيت فتره على هالحاله رفعت راسي بتثاقل عقدت حواجبي ركزت زين اكو ورقه مثبته على بنيد السياره بسرعه نزلت اخذتها بتردد درت عيني اباوع حواليه وجسمي ثلج من الخوف اكيد جاي يراقبني ليل والشارع فارغ بسرعه رجعت ركض للسياره

نفسي متسارع قفلتها عليه غمضت عيوني وزفرت النفس براحه فتحت الورقه ووسعت عيوني حسيت الدم صار يجري براسي اسمع صوته

كالعاده مكتوب بيها نفس الرقم

لميتها وعقجتها بيدي حيل واني احجي

- لهنااا وخلصص خلصص الموضوع زاد عن حده

شغلت السياره وانطلقت بيها

بسرعه وكفت من حسيت اكو شي بالسياره مالحگت التفت صارت همسه بأذني وانفاسه الحاره لفحت بشرتي وهو يحجي

- اششش بلا نفس تحركي

━━━━━━━━

شغل اغنيه كاظم الساهر شؤون صغيره واتقدم وكف گبالي عقجت وجهي ورفعت انظاري اله شفته واگف بوگفته المعتاده فاتح رجليه مبعدهم عن بعض ولاوي ركبته حجيت

- شنو ؟؟

ضحك بضحكته الشريره مو معقول هالانسان حتى ضحكته الها الف تفسير اتقدم عليه اخذ الكتاب من ايدي باوع عليه عقد حواجبه هز راسه وسوه حركه بحلگه بمعنى جيد شمره وجر ايدي وكفني مقابيله مد ايده على نظارتي مال القراءه نزعها وشمرها ورا حجيت بغضب

- راح تكسرها من اريده اقره شنو البس

خله ايده بايدي والثانيه على خصري بوضعيه الرقص باوع بوجهي عبس حلگه ورجع لوه رگبته

- لا تسوي هيج

- شمسوي !!

- لا تلوي رگبتك گدامي

فرني گدامه وهو يحجي

- تدللين روح گلبي

بقيت اتحرك ويا واتمايل ويا كلمات الاغنيه باوعت بعيونه ضايعه وهايمه بتفاصيلي هالعيون شكد شايله أسرار وخفايا شلون الانسان طبيعي يگدر يضم كل مشاعر روحه البشعه خلف نظرات الحب والابتسامه الكاذبه

شدني اله وهمس بأذني اخر مقطع من الاغنيه

- وحين نكون معا في الطريق

وتأخذي - من غير قصد - ذراعي

أحس أنا يا صديقتي ..

بشيء عميق

بشيء يشابه طعم الحريق

وأرفع كفي نحو السماء

لتجعل دربي بغير انتهاء

أبكي بغير انقطاعِ

لكي يستمر ضياعي

شؤون صغيره تمر بها انت دون التفات

تساوي لدي حياتي ... كل حياتي

رفع راسه جمدت من الخوف من ووجه الي سؤال

- وين جنتي اليوم

تلعثمت وانه احجي

- للـ لـ ... ليش

تحسس طرف شفته بلسانه واتقرب حجه كلام حسيته مثل الصاعقه نزل على مسامعي وخاصه من گال ...........؟!!!

━━━━━━━━

الراهب الثالث:

جسمي كله يون عليه ويرجف بخوف بعد ماتعبت من البجي والصريخ هديت من وحدي تمددت على الارض البارده حضنت رجليه الصدري ورجعت دموعي تنزل بهدوء ساعه تجر ساعه واني على هالوضع الى ان سمعت صوت خطواته تقترب ناحيه المكان الي اني متواجده بي انتفض جسمي برعشه غريبه ماگدرت اسيطر عليها ودموعي الجمر زادت بالنزول وكأنها تتسابق منو بيهم تجوي وجنتي اول وحده

عدلت نفسي بيه مابيه ولميت روحي بالزاويه واني احاول استر نفسي بقطع ملابسي اللممزقه اكثر من گلبي

فتح الباب مارفعت راسي اخاف اباوع الوجهه

اسري وحش كاسر مرعب متجسد بهيأت امير وسيم حسن المظهر يغطي بشاعه افعاله خلف اناقته المبالغ بيها

نظري بقى شاخص على رجليه وحذائه الرياضي الاسود اقترب وقع صوت خطواته وهي تتقدم ناحيتي ويا كل خطوه منه وتيره القلق والخوف تتزايد بگلبي جنت مرعوبه مرعووببه الدرجه حتى الدموع تحجرت بعيوني وصارت ماتنزل استقرت خطواته گدامي

بقيت هادئه وقاطعه النفس خايفه يرجع يعيد الي سوا البارحه اباوع الرجليه الدم نازل عليهن على هيأت خطوط وميبس اديه ووجهي وجسمي كلهن اثار وكدمات

قرفص گدامي وحجه بنبره حنينه

- شلونها بنيتي

مجاوبت ضميت راسي بين رجليه حسيت بي رفعني جارني من شعري بحده وحجه بغضب يكز على اسنانه

- من اوجه كلام الج تجاوببيينيي مفهوم

شهگت بلا دموع حجيت بنبره ترجي

- فدوه خليني اروح

قهقه بخفه وحجه بهدوء

- مسموحلج ترحين بس على گليبي مو الغير مكان

- كافي السويته بيه شتريد مني

رفع وجهي من ناحيه حنكي بأطراف اصابيعه مسح على شفتي المجرحه درت وجهي منه برفض رجعت نظري عليه عض على شفته السفليه وحجه

- كلج اريدج *****

حجه كلمه بالفشر نزلت دموعي يأس وخوف ورفض كلشي بيه رافض جسمي ينفر لمساته اذني تكره تسمع صوته گلبي يتقلص بمجرد سماع كلماته وكأنه يريد يتوقف كلشي بي يصيبني بالوتيره والجنون حتى رائحه عطره حجيت اترجه بي

- فدوه خلص رجعني البابا هسه يدور عليه

- اششش اني بابا ماعندج اب غيري

صحت بحرگه

- بسس انيييي عندييي اببب غيررككك اني من لحمه ودمه

نفخ بغضب وتحول من الهدوء للعاصفه اعتصر وجهي بيده وملامحه ظلمت بس بياض عيونه الفاتحهم يبين صار يضربني راشديات متتاليه ويحجي

- ماعندج احد غيري ماعندج نسيتي جنتي طفله وماتنامين اله الزم ايدج واغنيلج نسيتي ماتاكلين الا اني اوكلج وماتقبلين احد غيري يتقرب منج نسيتتييي العز والفلوس خلاج تنسيينن منو اني

دفعته بروح مسلوبه ونفس عالي گوه اجره كمت واني الزم الحايط حجيت بدموع منهاره

- هاي مو اني مو انييي انت متوهمم اني مااعرفك ولا عمري شايفتك شجاي تحجي انت

دفعني على الحايط وخنگني بيده بخفه يباوع عليه بغضب حسيته يسدد نظراته الملامحي مثل السهام وتخترقني من حدتها

لاول مره اسويها واباوع بعيونه بنفس الحده بلع ريگ وقربني عليه سند راسه على راسي وغمض عيونه دموعه صارت تنزل واني هم صرت ابجي حجيت واني اشهگ

- ليش هيج تسوي

همس

- اسف

حجه الكلمه وراد يوصل الشفايفي تحركت برفض همس

- اشششش اسف

- وخر

ضربني راشدي بقوه شهگت وثرت اكثر اريد اتخلص منه مگدرت حسيت بي بده يقسه عليه كل مااعاند اكثر جمدت بمكاني وهو اخذ شفتي يعذب بيها كالعاده وكمل مشواره

مابين الرعب ... والقسوه

━━━━━━━━

مقتطفات:

همس بتعب

‏- حيلي مٌمكن تِفتحلي باب الحياة ؟

صفنت عليه همست

- هاا شلون يعني

- فتحي اديج واحضنيني

━━━━━━━━

-تعبت الله يخليج خليني اطلع منا بعد ماكدر اتحمل اكثر

كامت وضربت على الحايط حيل صدمتني بكلامها ماتوقعت هيج راح يصير ....!!!!!

━━━━━━━━

سألته واني اباوع بعيونه وكلي ارجف بغضب

- واناااا انااااا شنو بالنسبة الك

خله گلبي ينتفض ويدك بقوه من اتقرب عليه باوع بعيوني وگال

- مجرد حب كسر كل القوانين وخرج عن سيطره گلبي

━━━━━━━━

همس

- شسوي بناس مابيهم ضوه عيونج

♣️━━━━━━━━♠️━━━━━━━━♣️

بقلمي: زينب علي

التاروت عبارة عن 78 ورقة، تحمل كل صورة رمزية ورقمًا، وتنقسم الأوراق إلى مجموعتين، الأولى تضم 56 ورقة وتسمى السر الأصغر والثانية تضم 22 ورقة وتسمى السر الأعظم، بالاضافه الى ورقه واحده تسمى بورقه المهرج ولهذه الأوراق ترتيب معين يمكن للملمين بالتاروت أن يجدوا فيها قصة كاملة

معثورات گلبي قصه حقيقيه جديده اذا حبيتوها دزهوها الاشخاص حابين يقروها وياكم

اصنفها: #غموض #مافيا #رمانسي

احبكم كلش هواي 🫂♥️

Soon

#تاروت

البارت «1»

حلواتي لا تنسون التصويت+تعليق بين الفقرات ♥️

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

منذ زمن بعيد حيث الأمل كان يطغى على ملامحي

المرهفة بالسعادة ، كنت هناك اقف عند مقدمة الحلم

لا اعلم كيف انجرفت الى تلك الهاوية بسرعة البرق،

ثم سقطت في ظلام دامس اشبه بذالك الظلام القابع داخل قلبك المريض ....

واكفة على شاطئ البحر الرمال الدافية تغطي رجليه بنفس الوقت يهب نسيم عليل بارد يداعب خصلات شعري القصيرة ويتغلغل داخل صدري غمضت عيوني مستمتعة بصوت الامواج وهي ترتطم ببعضها اثر المد والجزر فتحت عيوني اباوع الناس من حولي فرحانة وصوت ضحكاتهم العالية تخترق مسامعي

ابتسمت واخذت نفس بقوة وصرت اتقدم بتجاه البحر بخطوات متناغمه ووشاحي الابيض الفضفاض يتطاير بالهوى بدأ الماء يلامس اقدامي ويرتطم باطرافي بقوة ردت اتوقف ماكدرت اكو شي بداخلي يدفعني ويحثني على التقدم وكأني فقدت السيطرة على نفسي صرت منصاعة الاوامر الصوت البداخلي اريد ارجع ماكدر احاول انطق اريد استغيث صوتي ميطلع حسيت اصوات الناس بدأت تتباعد واني انجرف الداخل البحر الظلام صار يغطيني انحسر النور ونقطع التنفس وصرت اسمع بس صوت البحر وهو ينادي بأسمي ... خيال .. خيال

فزيت من حلم اليقظة الجنت عايشته على صوت ولد گلنا تدخلون بعد متخلص هاي القضية جاوبته بالقبول

فتحت النقال باوعت بي اشوف والوقت صارت عيني على التاريخ 2014/12/31 شبسرعه مر الوقت ومرت سنة وانا اليوم واكفة بالمكان الي المفروض يظهر بي الحق وتتحقق العدالة اختي گاعده بصفي التفتت عليها باوعت بعيوني بحيرة وكأنها تسألني ليش وحدنا جلت صوتها وحجت

رميم: وينه لهسه ماوصل ؟

مسحت على وجهي بحيره وقلق حتى انا بديت اقلق طلعت نقالي واتصلت عليه مغلق

رميم: هاا ميجاوب

خيال: لا مغلق يلا بعد گدامنه وكت هسه يوصل تلكي محبوس شوف بيا ازدحام

رميم: بس راح يجي

خيال: اكيد يا يوم هو خيب ضننا بي

مر الوكت وهو ماكو مااجه خذلني ماتوقعتها منه لا ياربي كل شي ولا هو ماريد انكسر منه منو يبقالي وين اروح صفنت وتذكرت كلامه البارحه من گال

- ألم الدنيا بصدري باجر اخذلج واعوفج باجر اكسر ضنونج باجر روحي تطلع ويا دمعة عيونج

صار دورنا ودخلت بخيبه والصدمه اكثر ان انا دخلت بخيبه وحده وطلعت بخيبتين بهذا اليوم حسيت الدنيا طفت بعيوني اباوع الاختي دموعها بعينها صرت ادير أنظاري حواليه بالمكان ناس داخله وناس طالعه الا احنا وحدنا همست اختي بخيبه ودموع

رميم: بقينا وحدنا

اتقدمت لزمت ايدها وعتصرتها بديه حيل حاولت انطيها قوه حجيت بحزم

خيال: ماريد دمعه منج تنزل احنا مو وحدنا رب العالمين ويانا وحقنا ناخذه بيدنا ممحتاجين وكفه احد افتهمتي

طأطأت راسها بخيبه رفعت راسي صارت عيني عليه يباوع علينا من بعيد وكأنه يسألني

خسرتج نفذتي تهديدج وحرمتيني منج

گلبي نغزني وانا اشوف عيونه حايره اذا هيج تحبني ليش ضيعتني ليش خليت نفسك وخليتني بهالموقف !!!

سويت نفسي ممهتمه هزيت راسي بحركتي المعتاده من اريد اعدل شعري لزمت ايد اختي وفتت من عنده ولا كأني اشوفه تعديته مسافه ووگفت حجيت وانا منطيته ضهري

خيال: لا على بالكم لهنا وكلشي انتهى هسه يلا بدأ اللعب

التفتت عليه شفته واكف يباوع عليه بتعب وعيونه حمر حتى شفته ترجف اتقربت منه وحجيت بحرگه گلبي احسه يتمزق وانا أأشر عليه باصبعي

خيال: خذلتني ووهمتني حتى بس تحمي اخوك شنو من بشر انت شگلت النفسك ضميرك وين فهمننييي

جنت احجي واحس الدم يغلي براسي حتى صدري صار يوجعني ماگدر ماگدر اتخيل الخذلان ممكن يجيني من عنده شعور الخذلان بشع بساعتها حسيت نفسي مثل اخرس بنص بحر جاي يغرگ ويلوح بأيده وماكو احد گدامه غير شخص اعمى ...

نزعت الحلقه وشمرتها بوجه وصحت

خيال: الحمد لله الف الحمد لله رب العالمين لان خليت شرطي الزواج يصير بعد المحكمه ومادنست نفسي بيك ولا بقذارتك

بقى ساكت ماحجه ولا كلمه بس يباوع بعيوني وساد على ايده حيل

شطت احس روحي تتگطع من هول الصدمه والموقف ماعرف بسرعه اخذت ايد رميم ومشيت سريع لان ماضمن نفسي احتمال ارتكب جريمه بنص المحكمه حاولت بشكد ماكدر ماتزل دمعتي باوعت الرميم شفتها تباوع عليه

حجت بدموع

رميم: هو اخو طلع مو

هزيت راسي بقبول مسحت دموعها وهي تتوعد اخذنا تكسي ورجعت للبيت من الصدمه ثنينا ساكتين نزلنا من التكسي توجهت للبيت دكيت الباب حيل بكل قوتي ورميم تحاول تهدي بيه لكن انا نهاريت بعد ماگدرت اسيطر على نفسي انفتح الباب وخاله حكمة صارت گبالي اول ماشافت حالتي ضربت خدها وحجت مخترعه

حكمة: يمااا صخام بعين العدو شنهي هاي حالتج

ماگدرت احجي غصيت بشهگاتي ودخلت بنوبه سعال حسيت روحي رادت تطلع صارت رميم وخاله يصرخون سحبتني ودخلتني للبيت جلست على الارض وانا منهارة وراحت خاله حكمة تركض للبيت جابت مي غسلت وجهي وتحجي بلهفه وخوف

حكمة: ولجن احجن شصار بالمحكمة رميم احجي

رادت تحجي بس انا قاطعتها وصحت بعصبيه وصوتي بي شهگه اسحب نفس واحجي

خيال: اعزاز گلبج الشفيه طلعوا ورا الموضوع كللههه

حكمة: منو اعزاز گلبي ولج خويله تسودنتي شمالج يمان وينه

رميم: بقى بالمحكمة

صاحت بينا بعصبيه

حكمة: ومحمد اذا مافهمتني السالفه هسه ايبس ضلوعجن بالنعال

گمت بستعجال دخلت للبيت وعفت رميم مدري شتحجي وياها دخلت للغرفه وطلعت جنطة وصرت الملم ملابسي دخلت وراي شهگت وتقدمت عليه لزمت ايدي وهي تصيح

حكمة: ولج يمه شمالج تسودنتي ياا بعد سبوع على عرسكم وين تردين ترحين منو الج غيره واختج بعدها صغيره ماتخافين عليها

خيال: وخري مني خاله مابقى دقيقه هنا عسى مابقى بالشارع عسى ما تاكلني الچلاب مابقى

حكمة: غير افتهم السالفه خليني اعرف راسي من رجليه واندل دربي

لزمت راسي وهدأت من ثورتي وانا احجي

خيال: راح تصدگيني راح توكفين وياي ضد ولد بنت اختج

جلت بنبرتها المستفسره وعلى ملامحها علامات استغراب

حكمة: منو ولد بنت اختي يمان واخو مسافر ولج شنهي السالفه

گعدت وحجيتلها كل الصار بالمحكمة اباوع عليها بقت ثاغرة بوجهي وتباوع عليه بصدمه

خيال: وكف ويا الباطل وعافني خاله عافني بنص الطريق عافني واحنا مباقي على زواجنا غير سبوع واحد كل هذيج المدة جان يلعب بمشاعري ويستغلني حتى أأمن بي وهو يلعب بكيفه

اشرت على نفسي وتمتمت بقهر

خيال: بعيوني شفته يحتضن اخو والفرحه على محياه والضحكه من الاذن للاذن

اباوع عليها گامت تلطم على رجلها بحيره ماتعرف شنو تسوي تباوع عليه وعلى رميم اخذت نقالها واتصلت بماعرف بمنو طلعت من الغرفه وهي تحجي اخر ما سمعته من كلامها

حكمة: گله يتأكدلي من هذا الاسم

ونطته اسم ثلاثي ورجعت حجت

حكمة: ويدور عليه يشوفه شوكت رجع للعراق ووراها تدزلي محامي شاطر .....

طلعت من الغرفه اشرتلي هسه اجي شمرت الجنطة من ايدي وگعدت بالگاع اجت اختي شمرت نفسها بحضني وصارت تبجي وتشهگ

رميم: بعد لا تنهارين والله گلبي جاي يتگطع

رفعت ردن القميص مالتها وحجت بدموع وهي تمسح بيهن تحاول توضح رؤيتها

رميم: شوفي هذا الاثر من هذاك اليوم الهذا اليوم هو مانطبع بس بأيدي وصار علامه لا صارت علامته بگلبي هنااا بگلبي

تحجي وتأشر على گلبها لميتها الحضني اهدي بيها جريت ايدها تحسست اثر الجرح حجيت بقهر

خيال: شكم مرا گلتلج نسويله تجميل ماقبلتي

رميم: اسويلها تجميل حتى انسى الصار هيهات انا اصلا عايفتها حتى كل ماشوفها يصير عندي دافع للانتقام

عافتني وگامت طلعت من الغرفه وانا بقيت على گعدتي صفنت وتذكرت البارحة من اجه تقريب ساعه 12 بالليل جنت متمدده منتظرته يتصل اول ميرجع الشقته متعودة مثل كل يوم بس هالمرة تفاجأت من وصلني مسج منه ( انا برا اطلعيلي ) استغربت ليش جاي بهذا الوكت باوعت رميم نايمه كمت بعجل طلعت شفته جان واكف بالباب ابتسمت وهمست

خيال: شعندك هنا هسه تطلعنا حكمة وتبقى تحجي

ابتسم نصف ابتسامة بتعب وفجأة سحبني من ايدي الحضنه وعصرني حيل وكأنه يريد يدخلني الگلبه رفعت ايدي حاوطته

خيال: شبيك حبيبي صاير شي

يمان: مشتاگلج خيالي الواسع

ضحكت ودفنت راسي برگبته استنشق عطره همست بضحكه

خيال: هسه تطلع خاله تطلع هذا الاشتياق من عيونا

ماحجه شي كلش استغربت حالته بالعاده مايسكت وخاصة من نكون مع بعض سحبني ويا گعدنا على كرويته خشب موجوده بالحديقه

يمان: تعاي نگعد هنا

خله راسي على صدره وياخد نفس من شعري

خيال: شخبار المحامي

يمان: كلشي تمام

رفع راسي يسمح على خدي بحنان حجه بتنهيده

يمان: منا الباجر كل شي يخلص وينتهي

خيال: الحمد لله

بقت عيونه تباوع عليه وتفتر على ملامحي فجأة حجه

يمان: اذا انخذلتي مني فد يوم شتسوين ساعتها

خيال: شلك بهذا الكلام هسه

باس ايدي وحجه

يمان: نفترض صارت مجرد سؤال

ابتسمت وحجيت

خيال: اعرف بيك مراح تسويها بس اذا صار وسويتها راح احرمك مني وتحلم بعد توصلني لو تجي وجايب نجوم السما وياك

رفع حواجبه متعجب بطريقه كلامي وگال بصدمه

يمان: الله كل هذا تسوينا ؟؟؟؟

خيال: كل شي ولا الخذلان وخاصة اذا من أشخاص اعتبرهم بمثابة روحي

غمض عيونه وهمس بتعب وصوته يختفي ويرجع

يمان: ألم الدنيا بصدري باجر اخذلج واعوفج باجر اكسر ضنونج باجر روحي تطلع ويا دمعة عيونج

ردت احجي وما حسينا الا حكمة فوك راسنا خربت كل الكلام

حكمة: ولكم سيبنديه شسوون بنص الليل وحدكم گاعدين

گاملها وحجه بستهزاء

يمان: حكوم شبيج مسويه حظر علينا غير مرتي

حكمة: ولك شلايتي ماتستحي حاصر البت وتمطگ بيها بنص الليل اصبر سبوع واخذها اشبع بيها براحتك

بس حجت هيج هو بسرعه باوع عليه ونظراته حزينة احسها تحجي عكس ابتسامته حسيت بشعور مو مريح لكن تجاهلته

يمان: وهسه من هاي ضايجة تعاي انتي هم خل امطگ بيج شويه

ولزمها من وجها يبوس بيها حيل صرت اضحك على منظرهم وهي وجها صار احمر مختنگه من الضحك تدفع بي وتحجي

حكمه: غدي ميل لا خلف الله عليكم يالسربتيه انوب رد عليه

بقوا يتداهرون هو وخاله وهي شويه ودخلت جوه بعد مااكدت عليه ادخل وراها بسرعه قبل لا يروح مد ايده بجيبه انطاني مفاتيح

خيال: شنو هاي المفاتيح

يمان: شقتنا الي قررنا نگعد بيها صارت بأسمج وهاي مفاتيحها خليهم يمج

تخصرت وحجيت معاجبني كلامه

خيال: شكو اليوم كلامك كله ملغم والغاز شنو جاي يصير من وراي

يمان: حبيت اسجلها بأسمج ومفتاحها يمج خاف يوم من الايام تحتاجينها هي الج صار وعود احنا نتزوج ونستقر بيها فتره وبعدها ننتقل البيت

مديت ايدي اخذت المفتاح منه لزمها وسحبني اله بلا مقدمات لاول مرة يسويها بعد يوم العقد اخذ شفتي يتفنن بيها بلهفة حتى مانطاني مجال امانع رفعني شويه اله وسندني على الحايط بصف الباب وكمل رفعت اديه حضنت وجهة وندمجت ويا بنفس طريقة لهفتة واعتلت قلبي دگات الجنون مو افضل من دگات گلبه الي احسه يدگ صار بصدري بصوره جنونية ابتعد وقرب وجهي الوجه صرنا ناخذ نفس واحد

يمان: خليج متأكدة انا روحي معلگه بروحج وابقى احبنج منا اليوم الدين

حاوطت رگبته وحجيت بدلع

خيال: ليش تگدر تسوي غير هيج ؟!

ضحك وقربني عليه يهمس

يمان: لا يبويه شحدي اتنفس غير گلبي بيتج وانتِ دوم راح تبقين مقيمه بي بعيدة قريبة بكل الاحوال

اخذ نفس عميق يشرح لهفتة ويترجمها نطق بكلماتة المعتادة وهو يقرب شفتة يم اذني

يمان: ولقد بنيت لك بين اضلعي منزلا

فعسى المقام بالمقيم يليق

فترد ذكراك بين مقيم اضلعي

فكان الشهيق على الشهيق يضيق

احتظن وجهي وبقى يوزع بوسات متفرقه عليه اخر شي احتظني واخذ نفس من عطري ودعني وراح بقيت واگفه بالباب اباوع عليه الحدما طلع من البيت واختفى ........

نفضت راسي من الذكريات وانتبهت على صوت خاله حكمة تصيح بعصبيه بسرعه مسحت دموعي وطلعت من الغرفه شفت رميم گاعده بمقدمه الدرج ومخليه ايدها فوگ راسها وتسمع صياح خاله حكمة ويمان وكفت يمها اسمع كلامهم اسمعه يگل الخاله

يمان: حكمة جاي تسمعين شنو احجييي گلتلج طلاگ مااطلگها

حكمة: بعد السويته بيها مو بكيفك تطلگها وغصب عليك وانا اخذهن وامشي ماخليك بعد تلمح ظلها

يمان: وانا گلت مايتحركن البنات منا وبعدين انتي واكفه وياهن لو ويانا

حكمة: انتم زلم كل واحد بگد الحولي اخاف عليكم ولو اخاف على بنيات محد الهن بهالدنيا غيري من بعد رب العالمين

صار هدوء لحظات بعدها حجه بصياح

يمان: وانا گلتتتت طلاگ مايصير

ماتحملت نزلت بعصبية روحي شايطه مامتحملة اسمع حتى صوته مقرفة من روحي الدرجة الاشمئزاز شلون امنت بي شلون گدر يسيطر عليه شلون گلبه قبل اله يخذلني واني ماعندي غيره شلون

دفعت الباب ودخلت للاستقبال بلا اي مقدمات رحت عليه وانا منهارة صرت اضرب بي حيل واصيح

خيال: حقييرر حقير الله لا ينطيك دمرتني موتتني اكرهك اكرهك

حاول يلزمني ماسيطر عليه صرت اسحل بروحي واتلوه بين اديناته حتى لا يلمسني قيد اديناتي وحضني من ورا يهمس بأذني

يمان: احبج والبخت

صحت بنهيار ونبضات گلبي تتزايد وهو مقيدني بحضنه ومثبت راسي على صدره

خيال: چذذاابببب انت موتتني ارتكبت بيه جريمة ابشع من الجريمة العشتها

دفعته حيل وابتعدت منه لملمت نفسي مسحت وجهي من الدموع وحجيت بنبرة حازمه

خيال: من اليوم انت متت بالنسبة الي متت

باوعت وراي شفت خالة حكمة گاعده ومخليه ايدها على خدها صافنة علينا ورميم واگفه بالباب تبجي حجيت موجة كلامي الخالة

خيال: انا اخذ اختي واطلع منا ماعتقد بعد اكو داعي الوجودنا يمج خالة كفيتي ووفيتي طول هالسنه العشناها هنا مالومج اصلا اذا وكفتي وياهم مهما يكن نبقى غريبات

تجاهلت كلامي ووجهت كلامها اليمان وهي تحجي ببرود

حكمة: اطلع برا وبيتي يتعذركم لا انت ولا اخوك

يمان: يمه خل افهمج السالفة

صاحت بي حيل

حكمة: شتفهنييي هاي مجازات ارباي تمشون بالدرب الاعوججج عبالك ماعرف بشغلكم خايب يويمن انا حكمة لو نسيتني جنت اجذب على روحي ومصدگه بشغلك الظاهري

ضربت على گلبها حيل وتحجي ويا بحرگه

حكمة: ولكم سنين وانا اغشم بروحي خاطر ماشوفكم تصغرون بعيوني بسس اليوم هذا حدي وياكم لهنا وخلص وهسه تطلع برا بيتييي ويا ويلكم لو اشوف چلب منكم يگرب يم البنات اگلب عاليها واطيها على روسكم وراس الخلفكم

انصدمت ابد ماتوقعت حكمة هيج تحجي ويا وخاصة هي تحبه اكثر من روحها رجعت نظري اله علامات التعب مرسومة على وجه ويباوع علينا ثلاثتنا وحدا واگفه ورا الخ راد يحجي بس هي قاطعته بصيحة

حكمة: اطلع براااا بيتي

مسح على شعره بحيرة وحجه بحدة موجه الكلام الي

يمان: طالع بس خل يكون بمعلومج طلاگ مااطلك وهذا انا خبرتج

طلع من البيت ورگع الباب ورا حيل اباوع خاله حكمة موتت نفسها بالبچي

اتقربت كعدت يمها حضنتني وحجت وهي تبجي

حكمة: شفتي ضيمي سنين اربي واتعب واركض على عيشتهم تالي تطلع رباتي ماتغزر بيهم ولا انا العرفت اربيهم

كلش انقهرت عليها ولا عندي كلام اگدر اواسيها بي انا هم محروگه روحي اكثر منها گومناها انا ورميم لان داخت ويمكن وضغطها ارتفع بسرعة اخذتها للمستشفى قاسوا ضغطها وسوولها الازم ورجعنا بقينا محتارين وحدا تباوع بوجة الثانية اخر شي قررت خاله ننتقل من هذا البيت الغير مكان ...

صعدت للغرفه ورميم صعدت وراي تحجي

رميم: شلون ننتقل منا ومدرستي

نفخت بتعب

خيال: هسه هي هاي هم مشكلة نسويلج نقل دام بعد وكت خاله تحلها

رميم: برأيج خاله حكمة راح تتخلى عن ولد بنت اختها الربتهم الخاطرنا

خيال: انا اعرفها توگف ويا الحق لو على گص رگبتها غير هيج هي صارت تعرف هم شجاي يلعبون ، مراة صايمة مصلية وتخاف رب العالمين اكثر من اي شي لا تخافين وياها سدنا امين

ردفت كلامها بحزن وحيرة

رميم: الى متى نبقى مستندين عليها

حضنتها وحجيت اطمنها واحجي وياها بتفهم

خيال: بس تخلصين مدرسة وتتخرجين كلشي يتغير نرجع من جديد غير هيج انا اكمل ماجستير قانون بهاي السنتين حتى بعدها اشوفهم اللعب على اصوله مو خيال الينوخذ حقها وتنخذل من اقرب الناس وتاخذ دور المتفرج

حجيت واني ابوس بيها محاولة اكسر الجو

خيال: يلا امشي غسلي وبدلي وعلى النوم بسرعة وراج دوام باجر

عافتني وراحت صح اتصنع القوة گدامها بس اني كل قوة ماعندي احس نفسي خاوية من الضعف البداخلي ....

مر كم يوم وانتقلنا الغير منطقة والغير بيت وخاله حكمة حتى محد من گرايبها انطته العنوان ولا خلت واحد يعرف مكانا وين .....

❛❛❛❛

يمان:

بعد مرور شهر على المحكمة وبعد كل الصار جنت گاعد بالمستودع الي دائما نلتقي بي انا والولد دخل صديقي گعد گبالي وحجه

فرات: هاا طلعت اخوك وبقيت هنا گاعد جنك وحدة مطلگها رجعلها بليلة الدخلة

حجيت بتذمر

يمان: فرات مو بديت روحي گوه حاملها

فرات: ولك الهسه مامصدگ يول ولا اگدر اتخيل شكلها بالمرافعة هي واخيتها وانت واگف بصف اخوك وبكل برود القاضي يحكم له برائه ينفطر گلبي همزين ماحضرت ولا شفت جهرتك الزفرة ولا جهرة الخوك الخايس ولد الچلب

خليت ايدي على راسي

يمان: ولك عفتها مثل التايها تدور بعيونها وانا اباوع عليها ماصدك ماصدك شلون هيج كسرتها وهي جانت كل املها بيه فرات ماعرف شسوي احس روحي جاي تطلع اريدها

فرات: انا اگلك شسوي احفر گبر وطم روحك وخلي اخوك العار يفيدك

اندفر الباب حيل ودخل اخوي يصيح

باتر: يابه وجان يجيكم العار شخصيًا وروحها الامي

گام فرات وحجه بستهزاء

فرات: ديلا اجاك جنه وحده ولاده

باتر: وين بعد وكت يمعود لو من تحضر الشياطين تهرب الملائكه

اشر بيده وحجه

باتر: اعرف اعرف بالمگلوب بس انا ماجاي اتخيل نفسي ملاك وسيراميك مكه

هز ايده بحركه ماعاجبه عافنا وطلع اتقدم باتر انطاني اوراق وحجه

باتر: بلا شوفلنا هاي الاتفاقيه دزها الشاهين حتى تراجعها هو متفق وياهم البارحه بالليل

يمان: جيب الشاهين هم صاير هواي يفلت

باتر: ايي وداعة الكيتلي

يمان: انت ماتبطل لشوكت تبقى بهاي التفاهه مالتك

باتر: لا بس اذا معاجبتك التفاهه عندي برتقالة تريدها

سكتت منه يحجي ويحشش وملامحه جدية حتى مايضحك

گلبت بالاوراق ونصدمت من الصفقة الجديدة احتاريت كل شويه اگلبها ماكو غلط

يمان: شني هاي انا متوهم لو الصفقه صحيحه انت تعرفها حجالك عليها

باتر: لا بس گلي بالليل نأمن طريق الشارع **** لان الجماعة بضاعتهم هناك تدخل

گمت وحجيت بعصبية

يمان: ولك تعرف شنو يردون يدخلون لوو لاا

باتر: اكيد اسلحة لو مواد ممنوعة داخلة عن طريق الميناء

يمان: غبببييي بناتتت صفقه بناتتت سبايا مشترينهن من الموصل باااتر لا تخبلنييي يردون يتاجرون بيهن والمصيبة هذا موقع ومتفق على كلشييي

باتر: ولك انلاصت وحزام الحمزه

طلعت نقالي واتصلت على الشاهين

يمان: غبيي انت غبييي شلون توافق على هيج صفقه

الشاهين: على كيفك قابل انت مشتريهن هو بس تأمنلهم طريق وبعدين هن صغار يعني بسرعه يدخلن

يمان: شوف وحق الحق اذا ماطلعت البنات وسلمتهن للشرطة الكفك لو تطير للسما كلششيي ولا هاي السالفهههه لا تخبلني انوب يگلي صغار كلشي ولا هاي السالفه شاهييننن

الشاهين: وين اگدر اطلعهن اگدر الغي الاتفاق بس

صكيت على اسناني بغضب وسديت الخط بوجه بقيت محتار شسوي شلون اتصرف مالگيت غيره بس هو الوحيد اليگدر يساعدنا

اخذت سويجي وعفت باتر رجع اتصل بالشاهين وطلعت متوجة البيته ماعندي غيره

وصلت وبسرعة نزلت دكيت الباب فتحلي لابس بس شورت

يمان: هاي اي واحد يجيك هيج تطلع اله شبيك مطلع عضلاتك علينا نعرف بيك رياضي

باوع عليه ببرود عاف الباب مفتوح ودخل بدون مايحجي وياي شي دخلت ورا اباوع البيت مالته الجديد غريب يمثل شخصيته الغريبة الاطوار

جدران نص اسود واحمر وعلامات الجوكر بكل مكان وكل حايط عليه عبارة مختلفة مثل

"تبدو فارغًا ، وبداخلك ضجيج العالم"

"في الليل فقط تزورني كُل تلك الذكريات"

"سيئ جداً ومضطرب عقلياً إياك والعبث معي"

رموز غريبة وعبارات اغرب

وصوره رسمة جبيره مال بنيه بسرعة اتقدم بستعجال غطاها بجرجف ابيض وحجه بحده

دائب: خير شكو جاي

يمان: محتاجك بسالفة

دائب: اضن بعد ما كتلت الوالد المحترم خلصت كل السوالف بينا

يمان: عوف كلشي على صفحة الموضوع مايتحمل تأجيل

گعد گبالي ورث جگارة وباوع عليه بمعنى اسمعك كل فعل يصدر منه يدل على شي بديت اشرحلة كل الي راح يصير بالتفصيل واكو بنات لازم يطلعن

دائب: تعذرني انا ماتدخل بشغلكم خلي الشاهين يفيدكم

يمان: بس انا محتاجك احنا هالمنطقة مانعرفها انت وجماعتك اكثر شغلكم بيها وعصاباتها خطره مو بالسهوله نگدر ندخل

گام وگف وحجه

دائب: شوفلك غيري صاحبي مافيدك انا

حاولت ويا بكل الطرق وهو ولا حرك ساكن جان رافض رفض قطعي كمت وحجيت

يمان: خوش انا طالع بس هالمره صدك اعتبر كل اللبينا انتهى ومن هاللحظه عتبر نفسك عدو يصير خير تحتاجني

طلعت من عنده وانا اغلي وقررت مستحيل اعوف الشغله ولا انفذها لازم ندخل هالعملية وحدنا بلغتهم رتبنا خطه ودخلناها 3 انا وباتر والشاهين وصلنا المنطقة الي سموها شارع **** والشاهين صار يدخلنا بشوارع وفرع ضيگه وكل ماندخل ونتعمق اكثر نشوف بلاوي ناس مكبسله وناس سكرانه طافيه وناس فوك ناس صايره حمس لعبت روحي

يمان: خب شني هاي الخيسه وين دخلتنا انت

باتر: بعدك ششايف دخلي ندخل البيت المنشود وراح تشوف الخيسه بالشكل الصحيح

الشاهين: هسه هي مهمة وانتهت والبنات دخلن للمنطقة شكو ماخذ دور البطولة بعد

زنگته من ياخته فور دمي

يمان: وانا شمحذر مو گلت دعارة وامور دعارة وهاي السوالف ماندخل بيها انوب من الموصل جايبينهن من الدواعش كلهن صغار اطفال احداث شوف كلشي مستعد اسوي الا اللعب بالاعراض مااسويها لو على گص رگبتي وهسه مثل الحبابين تسمعوني وتنفذون مثل مادخلتوهن صاغ سليم يطلعن صاغ سليم افتهمتتتت

الشاهين: ماخليت شي ماسويته هسه جاي تستشرف براسي

ماتحملت حمسته بوكس لزمني باتر ماخلاني اكمل عليه

باتر: هسه احنا جايين نخلص شغل لو تتعاركون ترا مو حالة هايي

دفعته مني بحده

يمان: وخر مني انت انا اعلمكم بعدين

مشيت وعفتهم وراي بقينا نمشي بافرع ضيكة اول مره ادخلها والاصوات المقرفة مدري منين ما منين تطلع الحد ما وصلنا للبيت المطلوب جان الشاهين وباتر مرتبين كلشي بسرعة دخلنا واستقبالهم النا غيرك دخلت وشفت المكان يعني شكد داخل ملاهي بعمري ماشفت مثل هيج مكان مقزز وتباوع الگاعدين كلها رتب وتجار وشيوخ

اتقرب باتر همس بأذني يحجي بستهزاء

باتر: بعد اخوك البنات المن تسلمهن دشوفها نص الدوله نايمة ببيوت الدعارة

يمان: لا اكو اكو انا اعرف ناس تكفلت بموضوعهن

اجتنا وحده يطلع عمرها بالخمسينات وحجت

: اهلا وسهلا اهلا وسهلا منورينا الباشوات تفضلوا عيني ليش واكفين بالباب

باتر: يزيد فضلج ام الفضائل المفضله

طكتها بضحكة عاليه وهي تحجي

: دمككك عسسلل

دخلنا ووانا گاعد على اعصابي قدمولنا شرب اباوع بالوجوه ولا وحدا صغيره من هذني الموجودات كلهن كبار وشكلهن گـ*** مو شكل موصليات

اشرت للشاهين راح شاور هاي الاجتنا بالبداية مبينه هي صاحبة المكان رجعت ضحكت بضحكتها المستفزه واسمعها تگله صيحله

اشرلي اتقربت يمهم وكفت يمي وحجت وهي تتفحصني

: گولي ماتحب المضروب وتريد كله صغير وجديد

يمان: بالضبط عدكم طلبي لو اروح الغير مكان

: اليوم وصلتني وجبه تلوك الهالوجه الحلو

تحجي وتعض بشفتها اتقربت ومدت أيدها تتلمس بجسمي دفعتها بقرف وحجيت بحده

يمان: تشوفيني العندج لو لا بسرعه مستعجل

: اعصابك بيگ صبرك عليه استشير المعلم

راحت ورجعت اشرتلي

مشيت وراها دخلتني الغرفه جانت بيها مجموعة من البنات باوعتلهن يمكن اكبر وحده بيهن عمرها 17 سنه ومبينات الخوف مرسوم بوجوهن ملبسينهن ملابس مخلعة فار دمي وغلطت على الشاهين الحد ما مليت ومابرد گلبي

: اختار الي تعجبك بس خلي ببالك بعدهن بالچيس يعني الدفع يكون اغلى حرك جيبك بيگ

يمان: مو مهم شكد المهم ونستي

حجيت واني ااشر على وحده مبينه اكبر وحده بيهن ماعرف ليش من شفتها اجت بالي خيال وتخيلتها وياهن روحي نسحنت

: فورا نجهزها ومن تكمل نصيحك بيگ

طلعت واشرتلهم على الغرفه وعدد البنات سته

رجعت گعدت گوه متحمل المناظر المقززه وكل شويه تجيني وحده اصدها الحدما صاحوني ادخل للبنيه بغير غرفه

دخلت وشفتها واكفة اول ما قفلت الباب حجت تتوسل بيه

: احلفك بيسوع احلفك بامنا العذراء لا تلمسني والرب مالنا كل ذنب

يمان: اششش شنو اسمج

: لا تتقرب فدوه لا

خزرتها وحجيت بحدة

يمان: من اسأل جاوبيني حتى ماتتأذين

: اسمي نورسين

تجاهلتها وشغلت جهاز مثل القلم للتشويش حتى يعطل شكو بالغرفه خاف اكو كامرات او اجهزه تصنت

حجيت وياها بحذر

يمان: ليش غير انتي هذا شغلج

نورسين: وامنا العذراء كذب احنا سبايا مخطوفات جابونا هين يتاجرون بينا

يمان: سولفيلي كل الصار وبلا خوف

عذبتني شويه بالاسأله بعدها من تطمت انطلقت تسولف حجتلي كلشي من اسروهم الدواعش الحد دخولهم بغداد وهذا المكان

يمان: اذا ساعدتيني اساعدج واطلعج منا

نورسين: صدك تساعدني فدوه

يمان: ايي بس بشرط تتساعدين وياي وتساعديني حتى نطلع باقي البنات شوفي كلمة وحده تطلع منج نصير بخبر كان انا وانتي وكل الوياج

نزلت على ايدي تريد تبوسها وتبجي بفرح بسرعه سحبتها منها

نورسين: شتطلب انفذ فدوه الك سيدي

يمان: اول ماطلع منا ترجعين يم البنات وكأن كلشي تم بس تسمعين صوت سيارات الشرطة ونفتحلكم الباب بسرعه تطلعن من باب الخلفي للبيت بلا تردد وتسلمن نفسجن للشرطة واكو ناس مهمتها جايه حتى تطلعجن منا مخصوص

بقيت فوك الساعة اشرحلها شنو لازم تسوي وفهمتها وطلعت

رجعت يمهم گعدنا 3 منتظرين مداهمة الشرطة للمكان اقل العشر دقايق ودخل واحد يصيح كبسه كبسه ياجماعة اباوع عليهم صار طشارهم بكل مكان من نص الهوسه ركضوا الشاهين وباتر للغرفة البيها البنات وكفوا بالباب وصار اي واحد يتقرب يشوشون عليه ويطلعونه من الباب الخلفي للبيت الي صاير قريب عليهم

الحدما البيت فرغ وصار اشتباكات ويا الشرطة برا اول ماندفر الباب ودخلوا احنا طلعنا من الباب الورا

وصرنا نركض بالافرع الضيگه واحنا المنطقة والشارع كله مانندله والعجيب الناس الجانت موجودة ماعرف وين اختفت ماگدرنا نطلع وصارت سيارات الشرطة تحاصرنا من كل مكان

الشاهين: ماكو غير نقاوم بالسلاح

يمان: لااا اياك اركضوا ومعليكم هسه نضيعهم

باتر: شتضيعهم وحده ثنين الشارع كله انترس

اشتد صوت الطلق والاشتباك واحنا اتحاصرنا يعني بعد مستحيل نطلع ولا نندل اصلا منين نطلع

فجأة سمعنا صوت صفارة شخص جان واكف على السياج لابس كله اسود وملثم بس لمحته عرفته هو اعرف بي مستحيل يعوفنا حجه

دائب: منا اصعدوا وراي

باتر: وهذا اجاك دائب في حبكي

صرنا نركض ورا وهو يندل الشارع شبر شبر ويتجنب الشرطة عبالك يعرف اكو اماكن مستحيل يوصلونها مو ولد جني دخلنا بفرع نهايته مسدوده وكفنا حجيت

يمان: ليش اجيت انت مو كلت مالي شغل بيكم

دائب: تگدر تعتبره دين يمكن احتجك بيوم

باتر: دينك برگبتي وسيراميك مكه مانساها الك

ابتسم ومد ايده سوينا حركه قبضة ثلاثيه وحجينا كلمتنا المعتادة

: الرهبان ......

مشينا ورا طلعنا من المنطقة ووصلنا سياراتنا اباوع عليهم يتداهرون هو وباتر ابتسمت وتذكرت اول ما التقينا بي شويه وصعد دراجتة عافنا وراح

باتر: انتم روحوا وانا ابقى اتابع موضوع البنات وانطيكم خبر

صعدت بالسيارة والشاهين يسوق غمضت عيوني بتعب وصار شريط الذكريات يمر گدامي

❛❛❛❛

1993 فى احدى ازقة الفيحاء

يمان:

جنت العب بالشارع ويا الجهال سمعت صوت صياح ابوي طالع من البيت كالعادة ولا يوم يمر علينا بهدوء ابوي اربعه وعشرين ساعة سكران ودايخ وشغله كله اعوج عفت اللعب ودخلت اركض للبيت

شفته لازم اخوي الصغير باتر مدده بالطرمه ويدك عليه بالخيزرانة وامي تتوسل بي ماتگدر تسوي شي وبس تتقرب تنكتل فوگه وهذا فرفح جوا ويصيح

باتر: والله بابا بعد ما اسويها والله بعد مااكل قبل موعد الاكل بس جنت جوعان

هو يدك عليه ويحجي

صمد: حتى بعد تتأدب ومن اگول شي يتنفذ وكلمتي ماتنكسر

اتقربت امي تحجي ويا وتبجي

ام يمان: يارجال متگلي شسوه جوعان صبيتله شويه مانگلبت الدنيا راح تموتههه عوف ابنيي عوفهه

حجت هيج لو بتلت على عمرها عاف باتر ورجع عليها ماگدرت اتحمل شمرت روحي بنصهم ادافع على امي واخوي

صمد: اليوم اجرم بيكم منو يخلصكم مني

يضرب ويضحك على صياحنا گطع الخيزرانة علينا كسرها وشمرها رجع جاب كيبل اسود مال كهرباء وصار يدگ علينا بي

وهاي يبقى هيج الحدما يتعب واخر شي يجر امي للغرفه الوحدها حتى يمارس ساديته المتوحشه عليها بوكتها جنا صغار وما نگدر نسوي شي ولا ندافع انا عمري 8 سنوات وباتر 6 جان الملجأ الوحيد هو اطلع اصيح خالة امي تجي تخلصنا من عنده لان امي جانت يتيمة الابويين وعمامها مايردونها كلمن محتار بهمه وماعدها بس خاله وحده وعمانا كلمن يگول ياروحي وطبعهم اخيس من ابوي

وهاي احنا مخلصينها ويا هيج على اتفه الاسباب ننهان وننضرب اتذكر مرا من المرات لان ضربني وقاومته حتى نتل نتلني بالكهرباء

غير هيج جان يجيب ويا نسوان للبيت ويجبر امي تخدمه هو واليجيلها ويا ويتعمد كلشي يسوي گدام عيونا بس امي جانت تدخلنا الغرفة وتقفل علينا رغم تتأذه وتنظرب بس تبقى ساكته ماتقبل تروح يم خالتها خوفا علينا من عنده

مرات هو نايم افكر انتقم منه واكثر من مره حاولت اكتله بس ماگدرت وجنت انتظر هاللحظه بفارغ الصبر

لكن الي صار بعدها شي فاق التوقعات وخرج عن منطق العقل فعل لا يوصف ولا انا اگدر اوصل بشاعتة بمجرد كلام الي صار جنون رعب رهبة .......

يتبع......

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

هذا البارت الاول نزل حسب طلبكم ،اعرف الاحداث متشابكة حاليا مفاهمين شي صبركم عليه بعدين يتوضح كل شي وتبدي القصة تسلسل ++

بعد مامقرره شوكت موعد التنزيل المنتظم

شنو رأيكم بالقصة والاحداث

توقعاتكم للمستقبل ؟

علقوا برأيكم كلشش يهمني حلواتي

ولا تنسون التصويت + متابعة الحساب + تعلقوا بين الفقرات شكد متگدرون ♥️

حسابي على انستگرام 👇

متابعة ممتعة ♥️

#تاروت

البارت «2»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

يقولون إن أمهر سفاحي العالم هم من صنيعة الظروف .... ماذا صنعت مني ظروفي ياترى ؟!

البصرة ( الحاضر )

يمان:

انتبهت من صفنتي على صوت الشاهين وهو يحجي

الشاهين: خربت عليهم شغل برأيك راح يعوفونك بحالك

يمان: ليش قابل انا بلغت عليهم احنا جنا گاعدين هناك حالنا من حالهم والشرطة داهمت المكان زائد انا طلعتهن ادري بيهن وين غير الشرطة خذتهن

الشاهين: هو انتم ياهو يگدرلكم

باوعت عليه صفح وحجيت محذره

يمان: حتى النوب لا تتصرف من دماغك شغلك الخاص ماندخل بي بس شغلنا المشترك مامسموحلك تخطي خطوة بلا ماترجعلي ، هالمرة اعديها الك بمزاجي المرة الثانية ماالك كل عذر شاهين سوالفك كثرانه

الشاهين: اگلك شني تهدد ترا انا ما اتهدد لو نسيت منو الشاهين

يمان: وكف السيارة وانزل

راد يحجي ماخليته حجيت بنفاذ صبر

يمان: بلا لغوه يلا كلت وكف السيارة ونگلع من وجهي

وكف السيارة على صفحة وهو ضايج نزلت اخذت السيارة ومشيت منه بقى يحجي ولا سمعتة ، مسافة واتصل بيه باتر خبرني البنات صارن بالمكان الآمن والصحيح...

رجعت للشقه وانا احس تعب الدنيا كله نايم بگلبي الى متى نستمر بهذا الوضع وياترى شني نهاية كل هذا

شمرت روحي على القنفة طلعت تليفوني شفتها حاضرتني من كل مكان

دزيتلها من غير رقم

" يگولون التحبه ضمه بالعين

انا بيا عين أضمك وأنت عيني ؟ "

وكالعادة ماكو رد ....

❛❛❛❛

(عودة الى الماضي)

البصرة عام 1997

يمان:

صار عمري 12 سنة صرت بصف اول متوسط  ومستمرة معناتنا ويا ابوي يمكن كل طفل بالعالم اذا عاش بنفس ظروفي مايتحمل يطگ ويموت اكثر من مرة وصلت بية الحالة افكر بالانتحار لو اقتله واخلص منه وخاصة من جنت اشوفه يدخل البيتنا أشكال وألوان وتصير مناظر مقززة گدام عيونا

بعدين صارت تتطور الامور صار يعزم رفاقة الحزببين ويا ويسوون سهرة بالبيت ويجيبون وياهم بنات ليل امي من شافت هيج الوضع جانت يومياً بالليل تگعدنا بغرفة وهي ويانا وتقفل الباب علينا وطبعا هو يحجي يدك الباب ويغلط يريد امي تطلع تخدمهم هو وجماعته ..

وبيوم كالعادة صار الليل وجماعته على جية يسهرون يمه واحنا امي قافلة الباب الغرفة وماتخلينا نطلع راد يفلش الباب علينا يصيح

صمد: نررججسس اطلعيي راح افلش الباب على راسج

اتقربت من الباب تبجي وتحجي

نرجس (ام يمان) : حرام عليك صمد تريد تطلعني للزلم اقدملكم سم ولك شنو من بشر انت حتى نخوة مابقت براسك

صمد: اطلعي بلا استشراف زايد يلااا بس حضري الميز ورجعي نگبري بغرفتج

جنت اسمع الكلام وانا افور اريد اسوي شي بس خايف على امي صار يدك الباب حيل ويدفر بي وامي تبجي رادت تطلع تخبلت تهسترت كلشي ولا امي وقررت اني اطلعله

اتقدمت للباب بعصبية اريد افتحه لزمتني تحجي

نرجس: وين طالع اگعد يمان لا تعذبني هسه يمل ويروح وانا بس احضرله السم وادخل قبل لا يجون

صحت بكل صوتي

يمان: لو على گص رگبتي ماتطلعييينن ، الى متى تبقينا عايشين تحت رحمته يمه كل ماتسكتين وتطيعينه راح يتمادى اكثر وخري خل افتح الباب واليريد يصير خلي يصير

وكفت گبال الباب تترجاني وتبجي واني اصيح

يمان: وخري يمه اريد اطلعله

اسمع صوته يصيح من ورا الباب

صمد: دطلع اطلع خلي اذب ضيم گلبي كله بيك اططللعع

گوه دفعت امي وتقدمت فتحت الباب هو بسرعة جرني من هدومي سحلني الخارج الغرفة وصار مثل الثور الهايج مثل واحد متعطش يضرب صار يضربني بكل قوته حيل

صمد: والله وكبرت وطلعلك اللسان صايرلي رجااالل توكف بوجهيييي چللبب

شمرت امي روحها عليه بس هو ماخلاها جرها من شعرها ودخلهم هي واخوي للغرفة وقفلها عليهم ورجعلي بيده حزامه گطعة عليه وانا نفس ماطلع مني ومتصنم بمكاني احس جسمي خدر من الضرب وامي جوه بالغرفة ملخت نفسها عليه وهو يضرب ويحجي

صمد: گول بعد مااسويها انطق ترجانييي حتى ارحم بيك

يحجي ويشيل ايده حيل يضرب بيه بالحزام على راسي وانا حرف ماطلع مني اخر شي تعب من الضرب وانا صرت انزف من خشمي وحلگي سحلني  للحمام يريد يخلي راسي بالتواليت لان ماتوسل بي حتى يعوفني ماعرف منين اجتني القوة وگدرت ادفعه

يمان: لو تموت ماتوسل بيك لو يبقى اخر يوم بحياتي ماراح تسمعني اتوسل بيك حتى تعوفنيي

تخبل رجع يضرب بيه جنزني ردت اموت صرت مااحرك لا ايد ولا رجل وعافني بالحمام وطلع رجع ورا فترة شمر عليه سطل مي حتى اصحى وجرني طلعني ويا وهو يحجي

صمد: وهسه كالكلب تگوم تحضر الميز وتبقى تخدمنا الحد ما نخلص سهر وراها تشوف شسوي بحالك اليوم

يمان: عوفني وخر ماجبور انفذ كلامك لو هسه تموتني هنا

ضربني حيل ببطني وحجه صاك على أسنانه

صمد: اذا ماخدمتني انت معناها اطلع امك

بسرعه فزيت احجي يعرف منين يلزمني

يمان: لا لا كلشي ولا امي انا اسوي كلشي تريده

دفرني للمطبخ وحجه

صمد: حضر الميز يلااا

جسمي كله مكسر من الضرب استجمعت نفسي بيه مابيه وحضرت اله الميز وجماعته صاروا يجون بقيت اخدمهم للصبح وكل شويه اروح يم باب الغرفة اطمن امي عليه حتى لا يطلع صوتها

شفت مناظر مو طبيعية كمية القرف البيها وتصير علني وگدام عيني نسوان وزلم باوضاع تشمئز الروح منها

للفجر يلا صاروا يرحون وهما سكرانين طينه وهو هم دايخ ومابي حيل يشيل روحه

وانا احس حيلي باد من الضرب والسهر وفوگاها عندي مدرسة الصبح ماداومت بقيت طول اليوم نايم وامي تضمد بيه وتسويلي كمادات وتدعي عليه

مر اليوم وتوالت الايام وصرت يوميا انا الاخدمهم بمكان امي قررت انا اتحمل كلشي في سبيل هي واخوي مايتأذون والجابرنا عليه ماعندنا غير مكان بيت جدي انكس من ابوي وامي بس خالتها وهم هي ماتگدر تسوي شي غير كل مره تاخذها يمها

وامي كل ماتريد تعوفه هو يرجع يبجي يتوسل بيها ويحلفلها راح يتغير ويصير زين ويانا كم يوم ويرجع الطبيعته مخدرات وكبسله وشرب ونسوان ...

وبيوم مليت كلش ولعبت روحي من الفلم اليتكرر گدامي يوميًا وقررت لو انا لو هو بعد مابيها مجال لان تعبت سهر طول الليل اخدمهم واروح للمدرسة وراها وبعدها ارجع عود يلا انام شويه وكعد اقرأ قبل الليل مليت منه كلشش وقررت اسوي البراسي

انتظرتهم يطلعون الفجر وهو سكران مايدري بروحه نايم على التخم بسرعة ركضت للمطبخ بحرگه گلب وجبت سجينة اجيته ردت انومها بنص گلبه بس فجأة ايدي انكضت وصارت صرخة امي بأذني تحجي

نرجس: شتريد تسووييي يمان

يمان: وخري يمه خلي نخلص من عنده هاي فرصتنا وخري مني خلي انومها بگلبه

نرجس: تريد تضيع نفسك وتقتل ابوك تريد تضيعني وياك يماانن

صرت اجر بروحي منها واصيح

يمان: هدينييي يمه وخري عوفيني

اريدها بس تعوف ايدي ماتقبل على صوت صياحنا رفع راسه يباوع علينا تفاجأ من شافني لازم السجينه موجها عليه وامي كاضتني

صمد: هاي شجاي يصير هنااا

دفعتني وحجت بأرتباك

نرجس: ماكو شي احجي على يمان حتى يبدل يروح للمدرسة

بعدها تحجي ركضت عليه والسجينة بيدي مالحگت امي تلزمني رادت الضربة تجي بي بس هو تفاداها مدري شلون واجت بالقنفة لزمتني امي تصرخ وهو فتح عيونه حيل متفاجأ بالسويته بس استوعب الصار اتحول وحش گام عليه خنگني وهو يحجي

صمد: تريد تكتلني ولك

نرجس: ابوس ايدك عوفه بعده جاهل شمفهمه بهاي السوالف

دفع امي حيل طيحها ورجع عليه يحجي وصوته يفح من العصبية

صمد: شردت تسوييي

رديت عليه بغيض

يمان: اكتلك حتى نخلص منك

بس حجيت الكلام دفرني مددني للگاع اباوع الامي شمرت روحها عليه وصارت تبوس بيده ورجله

نرجس: فدوه اروحلك اكتلني انا بداله فدوه ارحم بحاله ابنك هذا من لحمك ودمك حرام عليك ابوس رجلك عوف الولد

اتجاهل امي واخذني يسحل بيه للمخزن دخلني وقفل الباب جان منظر المخزن مرعب كله ادوات تعذيب وريحته بشعه بلا مايحجي جرني نزعني التيشيرت مالتي وربط اديه وصار يفنن بتعذيبي كتل جلد صعق بالكهرباء چوي وامي تخبلت تدگ بالباب واسمع صريخها يوصل يمنا وانا روحي بدت تنسحب وتطلع مني شويه شويه

عافني وطلع من صوت امي صار بعيد عرفها تريد تطلع بسرعة ركض وراها صرت اسمع بس صريخهم هي واخوي جاي يضرب بيهم ويغلط ويفشر صار صوتهم بعيد ورجع عليه من الضرب كل شويه ينغمي عليه ويرجع يصحيني مثل الواحد ولازمله مجرم ويحقق ويا مستحيل هذا الشخص انا طالع من ظهره ومن دمه ولحمه

جنت معلك فتح اديه وكعت للگاع جرني من شعري رفع راسي وحجه بغضب

صمد: راح تبقى محبوس هنا مثل الچلب ويوميا تاخذ المقسوم ولا اكل ولا شرب اريد اشوف روحك هيج تطلع گدامي تريد تكتلني خوشش انا الك

عافني وطفه الضوه وقفل عليه المخزن غمضت عيوني وبعدها مادريت شنو صار ...

گعدت على صوت ونين يجي من ورا الباب عرفتها امي صرت اگح بصوت عالي سمعت صوتها تدگ بالباب وتحجي

نرجس: يمه ابني حبيبي تسمعني فدوه جاوبني گلبي راح يوگف

صحت بصوت تعبان

يمان: يمه بردان تعاي غطيني

نرجس: سوده بوجه امك ينظر عيني محبوسه حالي حالك ولك يمه مايخلينا نطلع قافل الباب علينا ، شيوجعك يمه احجيلي

صحت بقهر

يمان: گلبي يوجعنييييي

حجيت الكلام وصرت ابجي وهي تبجي وياي واستمريت على هذا الوضع ليله ويوم نهار كامل بالليل كلش حسيت الباب انفتح عبالي هو هيأت نفسي للتعذيب وظلمه ماگدر اشوف بس حسيت على ايد ناعمة تمسح على وجهي عرفتها ايد باتر حجه بهمس

باتر: حبيبي تسمعني

يمان: باتر شلون دخلت لهنا امشي اطلع لا يشوفك يمي يأذيك

باتر: امي ودتني جبتلك وياي اكل

يمان: اريد بس مي راح اموت من العطش

سمعت خطواته راح شغل الضوه ورجع گعد يمي فتح بطل المي شربني شربته كله احس گلبي يبس من العطش فتحلي الثاني يشربني وبلل ايده يمسح بوجهي ويبجي

يمان: شلون گدرت تدخل امي وين

باتر: امي ويا بالغرفة انطتني المفاتيح وهي بقت يمه وجانت محضرتلك اكل ومي

گعدني گوه لان ماكدر اتحرك جسمي متكسر وصار يوكلني انتبهت على ايده بيها حرگ

يمان: هاي شبيها ايدك منو جاويك

باتر: هاي البارحة هو جواني

حجه الكلام وصار يشهگ بالبچي حضنته وحجيت

يمان: ميخالف بس هالفترة تحمل سبع انت ماتأثر بيك چويه

وكلني بيده وشربني مي واخذني للحمام گوه يسحل بيه ورجعني للمخزن ، لازم استغل هاي الفرصة لازم اسوي شي يطلعني منا فكرت بيها ماكو غيرها يگدر على ابوي باوعت الباتر وحجيت

يمان: دام المفاتيح عندك تگدر تطلع هسه ماتخاف مو

باتر: ايي اگدر بس وين اروح

يمان: تروح الخاله حكمة تندل بيتها

باتر: اندله

يمان: تروح وتحجيلها كلشي هي الوحيدة التعرف تصرف احنا مانگدرله وانا اذا بقيت هنا اموت

باتر: هسه اطلع اروحلها بس خاف يحس عليه

يمان: اطلع على گيفك ماراح يحس وهو البيت مو كلش بعيد تروح وتحجيلها كل شي

عافني وطلع بعد ماسد عليه الباب ماكو اقل الساعة وسمعت الهوسه صارت برا عرفتها اجت وحتى صوت سيارات الشرطة هم صرت اسمع صارت هوسه وصياح والاصوات تتقرب مني وهي صوتها صار واضح اسمعها تحجي وتهدد

حكمة: والله ثم والله اذا مسوي للولد شي افلش البيت على راسك واخليك تخيس بالسجون

انفتح الباب دفعته ودخل شغلت الضوه واول ما عينها صارت عليه لطمت

حكمة: يعل ايدك بالكسر هاي شعامل بحال الوليد

يمان: خاله خلصيني فدوه اروحلج

گعدت يمي خلت راسي بحضنها وامي فقدت من البجي والصريخ وياها

حكمة: صخام بوجهك صمد الچلب ابن الچلب اريد من الباري كون يطلع حوبة هالوليد بيك اليوم گبل باجر

نرجس: فدوه خاله خلي ناخذه للمستشفى ابني راح يموت

حكمة: ميليي انت ابقي بس ابجي ونوحي وخليج مچلبه بذلايل صمد

جاوبتها وهي تبجي

نرجس: وين اروح خاله ادري بس اطلع من شوره يموتهم ويحرگ گلبي عليهم ولا يرفله جفن

شويه ودخلوا ولد من الجيران شالوني حتى ينقلوني للمستشفى وهناك سوولي الازم بعد ماعرفت الامن لزموا قدمت بي شكوى وكلتلهم هو الي سوه بيه كل هذا بس هو كلشي مايفيد ويا الناس اليشتغل وياهم وجماعته كلهم بالامن طلع ثاني يوم مثل الورد اسهل منها ماكو

طلعت من المستشفى واخذتني حكمة وياها سبوع ورجعت للبيت ماكدر ابقى اكثر اخاف على امي منه عدت هاي السالفة وتوالت بعدها الضرب والاهاين يوم زين ويتوسل بأمي وعشره ينگلب علينا طنطل جزعت ومليت وكرهت حياتي اروح يم حكمة شويه تصبر عليه وارجع للضيم من جديد ....

وبيوم صار الجنت خايف منه صار ابشع منظر ممكن اشوفه بحياتي كلها الحد هاي اللحظه مامستوعبه

جنت راجع من المدرسة لسا مادخلت البيت وسمعت صوت صياح باتر يجيب التايه دفعت الباب وطبيت شفته كالعادة مطلعة برا البيت وامي جوة يضرب بيها بس شافني باتر اجاني يركض مرفح من البجي

باتر: يمان الحگ امنا اول مارجعت من المدرسة وهو مايقبل يدخلني وامي بس تصرخ

دفرت الباب وانا اصيح

يمان: فتححح البااابب جبااننن افتحهه عوفف امييي

مايجاوب واسمع امي تحجي بصياح

نرجس: صار بعد وانا هسه حامل گلي شسوي غلطي لو غلطك

صمد: منين صار ادرييي بيج وحده **** مستحيل مني هذا البطنج امووتج اليووم اشرب من دمج

يحجي ويضرب بيها وهي تصرخ وانا ماعرف شسوي اريدلي طريقة حتى ادخللها ماكو

يمان: باتر روح صيح حكمة على ما انا اشوفلي طريقه افتح الباب

طلع يركض وانا بقيت الوب شلون افتح الباب لكيت الكرك مشمور بالترك جبته وصرت اضرب وافلش بالقفل بلكي يفتح اضرب بكل قوتي الحد ما انكسر والقفل كله طلع بيدي فتحته الباب ودخلت وياريتني مادخلت ولا شفت الي صار گدام عيوني

اول مافتحت الباب شفته دخل الحربة ( سكين عسكرية) ببطنها ومشاها على طولها فتح بطن امي بالنص وگدام عيوني يمكن هذا المشهد كبرني سبعين سنة فوگ عمري من الذهول وقوة الصدمة حسيت حتى شعر راسي وگف

الدم غرگها اباوعلها صارت تشهگ وهو اول ما شافني شمر الحربه من ايده وطلع من البيت يركض مدري وين راح وانا بقيت على وگفتي رجلي صارت بعد ماتعيني حتى الدموع تحجرت بعيوني اريد احجي اصرخ اروحلها اي ردة فعل مانطيت غير الذهول ومن هول الموقف حتى ماستنجدت صار بعد مايطلع

مدري شلون اخذتني رجليه يمها

اباوع احشائها صار تطلع وهي متمدده على صفحتها احتاريت شسوي شلون اتصرف اديه يرجفن وعيوني صار تغوش وهي گدامي ترفرف مثل الحمامه ومذبوحه

گعدت يمها جريت راسها خليته بحضني ونزعت تيشيرتي وصرت احاول الم بطنها والجاي يطلع منها رغم الدم صارت تشهگ بصوتها وتمتمت بأخر كلام اسمعه منها

نرجس: يمان دير بالك على اخوك ضمه بروحك

همست بصوت مبحوح

يمان: يـ...يمه

نرجس: اخر وصية الي هي اخوك

شهگت بصوتها تحاول تاخذ نفس وصارت تحرك برجليها وتتلوه وانا ماعرف شسوي بس لازم راسها يمكن كل هذا الحجيته ماعبر دقايق بسيطة بس انا حسيته اعدال الف سنه عمر كامل عشته بهاي الكم دقيقة

فتحت عيونها حيل وسكنت عن الحركه ونفسها انقطع عرفت امي ودعت الدنيا وارتاحت من ضيمها  غمضت عيونها وبقيت امسح على وجها حتى دموع مانزلتلي وگلبي راد ينفجر

اندفع الباب ودخلت حكمة ووراها باتر اول ماشافتنا صرخت بكل صوتها

حكمة: يبووووو شني هااايي ولك شبيها امك

ماحجيت بقيت بس اباوع الامي

وهي طلعت برا تفزع وتصرخ

ورجعت گعدت گبالي وهي تلطم وتحجي

حكمة: كتلها يماااا نرجسسس كتلجج متتي حرمج من النفس هالظالم ولك يمان شني الصار

تحجي وتهز بيه حيل وانا بس ساكت اباوع الباتر واكف بالباب وبعده مامستوعب الصار ماعرف شنو صار بعدها مثل العايش بحلم مسرع ماحسيت بروحي غير وانا نايم على گبرها وحاضن ترابها وصوت القرآن بأذني

شلت اباوع الناس بدت تروح وباتر گوه شالته حكمة وگومته روحه رادت تطلع من البچي وبس يردد اريد امي

گوه سحبوا واخذوا وياهم ابتعدوا وانا صرت الوحدي ويا گبر امي حضنت گبرها حيل وشميت ترابها استجمعت نفسي وصحت بصوت يمكن فزز اهل الگبور وحجيت كلمة وحدة بس

يمان: يا يمه

ومن بعدها دخلت بنوبة بكاء هستيريه حضنت ترابها وحجيت

يمان: اوعدج اخذ حقج بيدي وهاي اخر مره تسمعين بيه ابجي واخر مره ينزلن بيها دموعي ، واخوي راح اضمه بروحي مثل ماوصيتيني ومااخلي يتأذه طول ماانا عايش

حسيت بأيد تمسح على ظهري وحجت بصوت مبحوح

حكمة: كوم يمه كوم وليدي وخليك على الوعد ويا امك وصير قوي اسند روح واسند اخوك وانا اسندكم

يمان: حكمة امي ماتت

حكمة: راحت يم الارحم مني منك عليها خليها ترتاح من ضيمها وسنين العذاب

گوه گومتني من گبرها گمت وانا احس روحي محمله فوك طاقتها صدك عمري مايتحاوز الـ 13 سنة بس حسيت روحي شايب كهل محمل جبال من الهموم والخيبات فوك ظهره

من بعدها خلصت الفاتحه وانفتحت قضية تحقيق بمقتلها بس هو جان شارد الاكثر من سبع اشهر وحكمة وكلت محامين لان تعرف بي ملعب وحتى اذا انلزم يطلع وبكل سهولة الحدما ثبتت التهمة عليه ولبستها اله وتم القاء القبض عليه ونحكم مؤبد ...

ومشت حياتنا واحنا يم حكمة عادية رجعنا الدوامنا ماتغير شي بس التغير انا صرت اكثر منطوي على نفسي وحتى كلامي قليل

گوه ايامي تمشي جزعت تمرمرت ولو ماوصية امي يمكن ماتحملت طگيت ومتت

وبيوم جنت طالع برا ورجعت البيت حكمة جنه گاعدين يمها شفت باتر گاعد بالباب ومخلي ايده على خده ضايج اتقربت من عنده استفسر

يمان: ياستار باتر ليش گاعد هنا شبي وجهك مگلوب

باتر: عمامك اجو يردون ياخذون بيتنا وحكمة تعاركت وياهم

يمان: شوكت هذا الحجي وهم هسه وين

باتر: ببيتنا

يمان: خوش ابقى انتظرني هنا

رحت ركض وصلت شفت سيارات بباب بيتنا عرفتها سياراتهم وهذول عمامي دخلت واسمعهم يحجون ويصيحون وصوت حكمة هم طالع اسمع عمي الجبير يحجي ويهدد

أيوب: البيت هو بيت اخونا فوگ ماهو بالسجن من وراكم انتم گاعدين ببيته

حكمة: بيت بنت اختي وولدها هذا اسمع ولك خاف عبالك تخوفني وتشوفني مرا ارمله ووحيده ولا وحق علي بيه حيل اطبگلي سبع زلام حوكه وافصم ظهورتهم

دخلت وحجيت

يمان: شجاي يصير هنا

أيوب: اهلا واخيرًا شرفت

يمان: خير شسون هنا

حجه عمي الثاني

سماعيل: النا حگ اجينا ناخذه هذا بيت اخونا وهو گللنا البيت حصتكم وهم راح يسويلنا تنازل عليه

يمان: هو خلك بيت مفلش شبيك راح تموت ترجف عليه

أيوب: اذا هيج جاا اطلعوا منه بالتي هي احسن بلا صياح وشوشره

باوعت الحكمة وحجيت

يمان: يلا يمه امشينا

حكمة: وتنطيهم بيت امك

يمان: البيت التلوث بدمها وبي ريحة اخوهم المجرم ماريده ولا رجلي تخطي عتبته مره ثانية انا طالع يمه لحگيني

عفتهم وطلعت وحكمة طلعت وراي تلوم بيه وتحجي

حكمة: ليش تنازلت عن حقكم الهذول الشلايتيه

وكفت باوعتلها وحجيت بغضب

يمان: تردينا ننذل وننطرد لو تردين ابقى ببيت بي ريحة دم امي الماجاي تطلع من راسي

اباوع عليها سكتت واعرف بيها شايله همنا لان هي وحيدة شتكدر تسوي وهم بيتها ايجار وفلوس الخياطه صارت ماتكفينا لهذا قررت يوميا بعد المدرسة اطلع ادور شغلة اشتغلها ولا ابقى گاعد

وفعلا من يومها بديت ادور شغل وكل يوم اشتغل يم واحد مرات صانع يم فيتر مرات اغسل سيارات بمطعم ماخليت شغلة ماشتغلتها حتى علاليگ بعت بالسوگ شبعت ذل ومهانه الفيتر الاشتغل يمه يضرب ويغلط على ابسط الامور بالسوك اتعرض الاشكال الكلام وماگدر احجي علمود اطلع فلوس اللگمه وندبر فلوس ايجار البيت اخر الشهر جنت احترگ اموت باليوم الف موته واسكت باتر مااخلي يطلع وياي ردته يركز بدراستة وبس رغم يلح عليه

رغم كل الاشوفه بس بنهاية اليوم من ارجع الگه امي حكمة محضرتلي الحمام والاكل ومو بس هيج تگعد وياي تساعدني بدروسي وتدلك على رجليه وتبقى ساعات تواسي بيه

رغم الذل الي اشوفه لكن گدرنا نجمع الفلس على الفلس انا اشتغل وهي تخيط وتطبخ بالبيت وتبيع للناس واخيرًا گدرنا نشتري البيت الجنا گاعدين بي ونخلص من الايجار

وهيج مرت الايام الحدما صرت بصف الرابع إعدادي ...

وبيوم من الايام جنا طالعين انا وحكمة وباتر گاعدين بمنتزة العصريات كل فترة نگعد بي من يكون ماعندي شغل

فجأة صار صوت صياح قريب علينا انتهت عليه واحد لازم ولد يجي عمره تقريب بگد باتر وطايحله دگ ضرب بنص العالم

حكمة: ياا شماله هذا موت الولد من الضرب

يمان: خطيه انوب ايده شكبرها

رادت تگوم حجه باتر وهو يلزمها

باتر: يمه رحمة للعالمين اگعدي مو بكلشي مدخله روحج

حكمة: ولك وخر دشوفه راح يموت الولد

عافتنا وگامت راحتله رحت وراها خاف كلشي يصير اتقربت منهم خذت الولد من ايده وهي تحجي

حكمة: شجاك راح تموت الولد على كيفك وخر منه

حجه بعصبية

: شعليج انتي منين تعرفينه

حكمة: حتى اذا مااعرفه انكسر خاطري عليه ايدك جنها ايد بغل وانت طايحله دگ شبيك ويا

: دفع بنتي وهي گاعدة بالمرجوحة ووگعها لو صاير بيها شي انا منو يفيدني هذا المهتلف

بقت تردد وتحجي ويا ومخليه الولد ورا ضهرها اخر شي رزلت الرجال رزاله تسوه عمره گدام الناس واخذنا الولد وابتعدنا اباوع عليه صاير بركان من الغضب وكل شويه يريد يروح يهجم على الرجال وحكمة ماتخلي گعدته وحجت

حكمة: جاا هسه يلا صار دمك حار وينك من جان يضرب بيك دتعال اگعد وسولفلي شنو اسمك

: اسمي دائب

حكمة: واهلك وين

دائب: ماعندي أهل جنت گاعد يم جماعة انا ومجموعة اطفال يطلعونا للتقاطعات نجدي وشردت منهم

ضرب على خدها وحجت

حكمة: يا يمه سوده عليه ووين تنام شتاكل

دائب: بالشارع

يحجي وعبالك متعود او الي يسولف عليه شي طبيعي حتى مامتأثر بس عينه على الرجال الجان يضرب بي ويباوعله بحقد وغيض

حكمة: وهذا شيريد منك ليش يضرب بيك

دائب: دفعت بنته ورادت توگع من المرجوحة بس هي مو بنته

حكمة: جا بت منو

حجه بثقه

دائب: بنتي

حكمة: يا يا سوده عليه الولد دايخ من الكتل وصار مايعرف يحجي گوم وياي يمه كوم جانوا عندي ثنين ولد وهسه صاروا 3 هم ماتبقى بالشارع وهم انا اكسب الاجر بيك

رجعنا للبيت ومن يومها دائب صار بنصنا وواحد من عدنا

وهو جان عنده مستمسكات كامله باسم ناس ميتين وواصل للسادس ابتدائي ومبطلينه من المدرسه وهي بمعرفتها گدرت ترجعه مره ثانية

من بعدها تعمقت علاقتنا وقوت وصرنا 3 نطلع نشتغل سوا اي شغل يطلع بيدنا نفر السوك فر يوم حماميل يوم نبيع مخضر يوم بسطيه واليحجي ويانا يبتلي على عمره الكل صار يتجنبنا بالسوك حتى صاروا يسمونا الرهبان بأسم اول كشك مخضر فتحنا سوا وكتبنا عليه اسم "الرهبان"

واي واحد يحجي ويانا ثاني يوم يرجع يلگه محله صاير تراب متفلش وهو نلزمله الدرب ونسلبه كل فلوسه والوارد مالته وهاي هيج خلصناها كل مانتعارك ويا واحد

منا جانت هاي اول عمليات الرهبان

مرت السنين وبدينا نكبر وبسنة 2002  طلع صمد من السجن بعد ماصدوا العفو العام واخلوا السجون العراقية

ورجع صمد بس هالمره غير لگانا اقوى ومعتمدين على نفسنا ومو بحاجته وحتى ماسأل ولا سألنا عليه

خلصت سادس اعدادي ودخلت كلية وتخرجت من قسم ادارة الاعمال وراي بسنتين باتر تخرج من قسم المحاسبة المالية ودائب بالدفرات جبرته حكمة يكمل دراسته خارجي واخذ شهادة الثالث متوسط وگعد

( تم التحفظ على بعض التفاصيل الخاصة )

وبدينا نتوسع بشغلنا وسمعتنا بالسوك هي الاقوى الحدما صرنا نأمن طرق البعض التجار الي دخلون بضاعات ممنوعة ومضروبة بالسوگ وجنا نحصل ارباح من ورا هالشغله تعمقنا اكثر بهذا الشغل وكدرنا نوكف على رجلينا ونخلص من الذله الجنا نعيشها واحنا نشتغل يم هذا وذاك ونتوسل

كدرنا نحسن نفسنا ونقلت حكمة بغير بيت وبمنطقة ارقى وهذا كله وهي عبالها صدك تعينا بشركة اهلية

من بعدها انتقل شغلنا للميناء وصار عدنا رصيف خاص بينا من خلاله كدرنا نأسس شركة نفط اهلية ومعارض سيارات ومحلات ذهب وسلسله محلات ملابس رجالية بأسم ماركه معينة

من هنا كلمن بدأ يأسس حياته واسم الرهبان صار اقوى ومعروف اكثر وخاصة بين التجار الغير شرعيين

2013/1/7

گاعد بالمصنع ودائب يمي نتناقش بعقد بضاعة اليوم بالليل تنزل بالميناء ومحتارين شلون نعبرها

دخل باتر وويا الشاهين يسولفون ويضحكون

باتر: بعدكم محتارين ترا انا لگيت الطريقة

يمان: اتحفنا بلا خلي نسمع ولو ادري كل الطرق مالتك تودينا بالف داهيه

اتقرب يمي لوه رگبته بزعل سوه روحه مسكين ضحكت بعده على نفس السوالفه من هو صغير لليوم مايبطلهن

يمان: دحجي يمعود فضني

دائب: لو تحجي لو تخلينا نشوف شغلنا

باتر: انطوني فلوس اشتري بينهن واحجي

ضحكت مديت ايدي نطيته الف دينار وحجيت

يمان: يلا خلصنا

گعد وحجه برود

باتر: خلولنا واحد عرف بسيطرة .... وكالعادة بس نگله راهب يگلك البضاعة تعبر راح يمشونا

دائب: تبقى السيطرة الثانية

يمان: لا هاي محلوله هم راح يجون يطلعون بضاعتهم منها

الشاهين: ولا تنسون انتم شغلتكم مو متاجره تأمنولهم الطرق وبس

گمت وحجيت

يمان: هاي هي باجر الساعة سبعة تنزل البضاعة بالميناء نحملها ونوصلها الهم وناخذ عمولتنا

اتفقنا وعفتهم وطلعت رايح البيت حكمة صار أيام مشايفها بس اتطمن عليها بالتليفون

جانت ضهريه طبگعت سيارتي يم الاسواق اريد اشتري جگاير اشتريتهم وطلعت شفت بنيه واكفه بباب الاسواق تتعارك ويا مكينة القهوة وتحجي عليها وكأنها تسمعها مدري ليش بقيت واكف اباوع عليها

: هسه غير هذا الألف انتي ثوله اريد گهوة ليش جاي ترجعينه عليههه

اتقربت يمها خليت ألف وحجيت

يمان: الألف مالتج مشگوك الميكينة ترجعه عليج

حجيت بلا ما اباوع عليها

يمان: يلا حددي شتردين

تخصرت وحجت بأنزعاج

: وانت منو حتى تدفعلي وشني شفتني حافية لو مجدايه گدامك ممكن اعرف

باوعتلها اويلي سبحان الخالق همست

يمان: ما شاء الله سبحان الله

: خير شبيك لگيت الهدايه بوجهي

تجاهلت كلامها وحجيت بقلة صبر

يمان: اعتبريني فاعل خير وحددي شتردين او اكلج هذا انا راح اختارلج شوكلاته موزين الگهوة عليج

: خير خير ومنو انت حتى تختارلي شنو اشرب ومنو سمحلك تقتحم خصوصياتي

يمان: وهو بس حددتلج شنو تشربين ليش تحسسيني داخل عليج للحمام واني تسبحين

اباوع عليها فتحت عيونها السود بتوسع وحجت بحده

: صدك انت واحد متستحي

بقيت اباوع بعيونها خدودها صارن حمر من العصبية مدري من خجلت انوب لون بشرتها خمري ويا خدودها الحمر دخيلك ياربي

عافتني ومشت ابتسمت واني اباوعلها تمشي وتدردم وتعدل بشعرها القصير الحد رگبتها صعدت بسيارتي ومشيت على ماوصلت بيت حكمة هي دخلت النفس الشارع بس نزلت من السيارة اجتني بعصبية تحجي

: انت صدك واحد متستحي شبيك ابني مشايف تلاحگ بنات العالم خير امي شكو

يمان: ياهو الاحگج بس لا انا

: لا امي منو غيرك جان يم الاسواق وهسه هنا بس اريد اعرف اهلك شنطوك اذا ماعرفوا ينطوك تربية المن خلفوك

خزرتها وحجيت بحدة

يمان: شكد صلفه انتي منو يگول لاحگج يجوز بيتي هنا

: تره صار عمر گاعدين هنا ولا مره شفتك واضح من شكلك انت واحد لاحوگ اصلا اني اجيت انطيك المقسوم واروح

بعدنا نحجي نفتح الباب وطلعت حكمة حجت

حكمة: ياستار استرنا ولج شمالج نرعصتي بنص الشارع

حجت بفخر

: خاله مو يمج سويت الازم لا يبقى بالج

ضحكت يستهزاء وتقربت بست راس حكمة وهي هم حضنتني تسلم عليه رجعت عيني على هاي البعدها واكفه وفاتحه عيونها بصدمه

حكمة: خيال ليش واكفه تعاي تفضلي يمنا

حجيت مستغرب

يمان: شسمها ؟؟؟!

حكمة: خيال اسمها شمالك يمه

رجعت باوعتلها صار وجها اصفر من الفشله

حكمة: خويله تدخلين لو تضلين بالشارع اليوم

حجت مرتبكه

خيال: لا لا ماكدر هسه الوالد ينتظرني

عافتنا وراحت اتقربت يم الباب ورجعت باوعت عليها ضحكت بستهزاء واشرتلها بمعنى باي عافتنا ودخلت للبيت بسرعة ...

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

اعرف هذا البارت احداثه مسرعة بس اشياء ضروري تنذكر حتى بعدين من تبدأ الامور تتوضح مندوخ ونعرف شنو دايصير وخليكم على درايه ان جميع ماذكر بهذا البارت هو غيض من فيض بعدنا ببدايتها 😂♥️

التنزيل المنتظم

حتى اكدر اسيطر على الاحداث

التنزيل حيكون بين يوم ويوم الساعه عشره بالليل ينزل بارت

شنو رأيكم بالاحداث

توقعاتكم للمستقبل

حلواتي لا تنسون التصويت + تعليق بين الفقرات ومتابعة الحساب

احبكم ♥️

متابعة ممتعة

#تاروت

البارت «4»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

عندما تشعر بهاجس الخوف يقترب منك ... اياك والهرب واجه 😈

خيال -

ردت اطلع من ورا الحايط صار واحد بوجهي فتحت عيوني بخوف وجمدت بمكاني وهو سحبني من ايدي وحجه صاك على اسنانه

: شصخمين هنا احجيييي شجنتي تراقبين وشدخلج هنا ؟

بسرعة ابتعدت منه رجعت الي ورا ماعرفت شتصرف انوب اريد انطق ماگدر وهذا شكلة يخوف اجوا ثنين شافوني و تفاجئوا اتقرب واحد منهم يحجي

: الشاهين منيلك هاي الطيرة

جاوبة الثاني وهم عيونهم القذرة علية تتفحصني واني باقية مصكوكه ماعرف شتصرف بس اسمع دگات گلبي صارت بأذني

: مبينة خوش صيدة

جان صاح بيهم هذا الي اطلقوا عليه الشاهين بعصبية فززني 

الشاهين: هسه غييرر يسكتون وخلي اعرفها منو وشسوي هنا

اتقرب عليه يحجي

الشاهين: منين اجيتي يحلوة منين طلعتي منو جابج

حجيت محذرتة وصوتي بصعوبة يطلع

خيال: دير بالك تتقرب مني

اتقدم رجعت الي ورا حجة وهو يغمزلي

الشاهين: واذا تقدمت شيصير

باوعت حوالية ماكو مهرب المنطقة صناعية وكلها ورشات وحدة بصف الخ بس وراي اكو شارع ضيك وكلش صغير درت وجهي وركضت دخلت بي وصرت اركض بلا مااباوع وراي وبلا تفكير وانا حتى ماعرف الشارع وين يطلعني او ووين ياخذني بس اريد اضيع منهم وهم وراي مادري شجان احساسي بوقتها حتى صرخة ماطلعت مني اركض وادعي اتخلص منهم

اريد اطلع نقالي حتى اتصل على ابويه او اي واحد ماگدر لان اركض تعبت وصرت ماعرف وين اروح ماخذة الشارع واركض بي واسمعهم يحجون ويركضون وراي الحد ما طلعت وصرت على الشارع العام عبرته وصرت اركض اريد ابتعد عن المنطقة الجنت بيها شفتهم من صرت على الشارع العام وكفوا بالصفحة المقابلة يباوعون علية اشرت بيدي الاول سيارة اجرة صارت گدامي وصعدت بيها

خيال- امشي بسرعة فدوه خلي نبتعد منا

مشت السيارة واني عيوني بقت معلگة ورا اباوع خاف يلحگوني او سيارة تتبعني تطمنت ماكو شي گعدت عدل خليت ايدي على وجهي وبچيت حتى نسيت انا صاعدة بسيارة اجرة اجاني صوت السايق يحجي

: عمو بيج شي يوجعج شي نروح للمستشفى

خيال: هاا لا لا مابية شي

: وهسه انتي وين رايحة

انطيته عنوان بيتنا ووصلني للبيت نزلت واني اتلفت اباوع حواليه ماعرف شلون طلعت ووصلت البيتنا

جان الوقت قريب للظهر وبعد موعد روجوعي من الجامعة مو هسه فتحت الباب ودخلت محد بالبيت بس اني صاحت

هيلين: مين فتح الباب

حجيت بتعب واني اشمر الجنطة على التخم

خيال: انا يمه

طلعت من المطبخ وجها مستغرب حاجتني بخوف

هيلين: خيال اليوم من وكت شبيج حبيبتي شصاير

خيال: ماصاير شي امي تعبت شويه بطني توجعني ورجعت للبيت

هيلين: صعدي غيري ملابسج وهسه اسويلج شي تشربينه يخفف الالم

عفتها وصعدت للغرفة بقيت اباوع من الشباك خايفة ومرعوبة شلون لو طلعوا لاحگيني وعرفوا مكاني اصلا انا منين اجتني الجرئه ورحت ورا ضرغام مادري

بقيت اباوع للشارع تقريبًا فارغ ماعدا كم طفل يلعبون فجأة شفت سيارة سودة دخلت الشارعنا ووكفت مقابيل بيتنا عيوني صارت تغوش من الخوف بقيت اراقبها ماكو دقايق ونزل منها اخوي ضرغام وهو يضحك وماعرف شنو يحجي فتحت الشباك بلكي اسمعه شنو يحجي صوتهم كلش بعيد يوصلني بس صوت الضحك وكم كلمة اسمعها منه

ضرغام: بعد كل مايعاند مايبيعلي اجيك حتى تسحله .... ههههههه كفو والله ماقصرت وياي ، سلام باجر نلتقي بنفس المكان

عافه ودخل للبيت ماگدرت اتحكم بنفسي نزلتله وانا شايطة بودي اموته ومارتاح نزلت ويا دخلته للبيت صار بوجهي ابتسملي وحجه

ضرغام: خوخه اليوم بالبيت من وكت

صحت بحرگه وانا اتقدم عليه

خيال: انت وتاليهااا وياككك وين تريد توصل بهاي سوالفك تريد تضيعنا شتريد

تفاجأ بكلامي حجه ببرود وجه مستغرب

ضرغام: ومرض شبيج حامية لا يطكلج عرج

خيال: وحق الله ياضرغام وحق هذا الاذن الجاي تسمعة هسه اذا مابطلت سوالفك اليوم يجي بابا واحجيله كلشي

من حجيت هيج ملامح وجه تغيرت وصار يتنفس بغضب اتقدم عليه لزمني من رگبتي دنگ راسي الي جوه ويحجي

ضرغام: حتى ادفنج بمكانج اذا طلع حرف واحد منج اموتج

خليت ايدي على وجه خرمشته بسرعة ابتعد مني نهاريت اريد اطلع حرگتي

خيال: لو مو تموتني لو تذبحني هسه هم مااعوفك لازم توگف عند حدك خلص خلصصص راح تضيعنه اصحه

على صوت صياحي طلعت امي غرفتها وهي لابسه ازار الصلاة تحجي بخوف

هيلين: اللهم صلي على محمد وال محمد خيررر ياا شبيكم اول تالي تتعاركون

ضرغام: گلي البنتج المچلوبة اليوم مدري شبيها

خيال: مچلوبة لان اريد اوكفك عند حدك لان ماقبل تضيعنا بسوالفك العوجه

صاحت بيه امي

هيلين: خياااال احترميي اخووجج اكبر منجج

خيال: اكبر مني بس اذا ماوكف عند حده اني اعرف اوكفه ابو المخدرااااتتت

ماحسيت غير اجتني لكمة من عنده حسيتها كسرت خشمي على اثرها ركعت على التخم امي صارت تصرخ ولزمته تريد تبعده من عندي وهو تحول غير شخص ماگدرت تلزمه رجع عليه وصار يضربني حيل دفر برجله ويحجي

ضرغام: اذا طلع حرف واحد منج بعد اخلص عليج نهايتج تصير على ايدي

هيلين: وخررر راحح تموت اختك ضرغغامممم على بختك اختككك

امي تحاول تعده وهوه مستمر يركل بيه واني اقاومه كوه دايخه من ضربته على وجهي وخشمي صار ينزف حسيت الدم دخل الحلگي

انفتح الباب ودخلت رميم شافتنا على هاي الحالة اجت تركض وهي تصيح

رميم: ماما هايي شكووو خيال عززاااا

گوه بعدنه مني وهي وامي وهو مايقبل يريد يضربني بعد

رميم: تخبلتت شبيك هاي شمسوي بخياللل

ضرغام: وخري انتي الثانية لا تلحگينها

اتقربت امي يمي وهي تبجي لزمت وجهي وحجت

هيلين: كسر بيدك هاي شسوويتتت طايح الحظ

عافنا وطلع صاحت رميم

رميم: وين نقالييي هسه اخابر بابا

هيلين: اگعدي انتي الثانية وكافي مشاكل واتصلي على سيارة اجرة خلي ننقلها للمستشفى

بقيت ساكتة والدموع ناشفه بعيوني وايدي على انفي كلشي ماحجيت

رميم: يامشاكل ماما باعي شمسوي بيها هم تردين تسكتين وهم ترديين تسكتين والله راح تدمرينا بهذا التضمضم مالتججج

انفتح الباب وسمعت صوت ابوي يحجي

سليمان: خير شبيها اصواتكم طالعة

من سمعت صوته صرت ابجي بنحيب مثل الواحد هستوه تذكر صارت عيونه عليه وسعهن بصدمة

سلمان: شكوو خيال شكو بابا هييليينن شبيكم شصاير

هيلين: هاا خيال طاحت وصارت الضربه بأنفها

رميم: شطاحت ماما يعني تردين تضمين ضرغام ضربها لان جان طالع وهي حجت عليه

بس سمع هيج تخبل اتقرب مني يصيح ويغلط على ضرغام

سليمان: ايا طايح الحظ ياسرسري وصلت بي يمد ايده على اخته النذل وتردين تضمينها هيلين بعد وين توصل بي المواصيل من وراجج وينن

ماحجت امي بس تبجي گوموني هو ورميم صعدوني بالسيارة وامي وياي اخذوني للمستشفى وابوي طول الطريق يصيح ويحجي يحاول يتصل بي مايحصلة ولا هو يجاوب

بالمستشفى سوولي لازم وبالاشعة طلع خشمي مابي كسر بس رضوض وكدمات وبابا متخبل حتى راد يشتكي عليه وانا ماقبلت مستحيل هيج اسوي وخاصة ضرغام ابد مو من هذا النوع بعمره مضرب وحدا بينا والفعل الصدر منه جان فاقد مايدري بنفسه شيسوي ، كلتلهم وگعت وهيج صار

رجعنا للبيت قبل لا انزل من السيارة سمعت صوت حكمة طلعت من بيتهم وهي تحجي

حكمة: هاي شصاير ام ضرغام

هيلين: شگلج ياحكمة سالفتي ماتتسولف تلاغت هي واخوها وضربها

حكمة: ياا كسر بيده هي المثل خويخه تنطك شمالة الولد تسودن

سليمان: هم حظنا هذا يام يمان يمكن رب العالمين جاي يشوفنا عقوق والدينا بأبنا

بقت امي وخاله حكمة يحجن يم الباب وانا دخلوني رميم وبابا صعدوني الغرفتي بعدها رميم نزلت سوتلي اكل وجبرتني جبر حتى اكل

جان يوم طويل منا الهبطة الي اكلتها الصبح وانوب رجعت للبيت صارت مشكلتي ويا ضرغام غفيت من التعب.

گعدت على صوت نقالي يدك وصياح ابوي تارس البيت وتليفوني مستمر يفصل ويرجع يدگ نخبصت ماعرف شسوي انزل لو اجاوب جريت التليفون قررت اجاوب اول ما گلت الو اجاني صوته

يمان: سلام

خيال: خير شتريد

يمان: گلولي مكتولة گلت اتصل اتشمت بيج شنو هذا الصوت اليمج

خيال: مشاكل عائلية لا تدخل انت وبعدين شبسرعة وصلك الخبر شو مركز بحياتي اكثر مني خير

يمان: محد يگدر يساعدج بسالفة اخوج غيري اذا تردين تعرفينه وين اطلعيلي نحجي

گمت من مكاني وحجيت

خيال: وين اطلعلك من كل عقلك يعني گول هو وينه او اذا تريد تساعد مثل ماتگول تعال الابوي واحجيله كلشي تعرفه

يمان: اذا ابوج عرف هو وين هسه احتمال ينجلط كلت ادليج بمكانه انتي حتى اخليج تحجين ويا وتهددينه عرفتي مكانه حتى يطلع منه ويرجع للبيت

خيال: وشنو يضمنلي كلامك صحيح واصلا منو انت حتى اثق بيك

يمان: لا تخافين ما اغتصبج امي كلفتني اشوفلكم اخوج وين وبعدين تردين تصدگين خير على خير ماتردين تصدگين طبج مرض

زفرت بغضب وحجيت

خيال:وسم وزقنبوت مرض اليصيبك بگلبك

يمان: سحاية كون شبيج مچلوبة اهديي

خيال: سحاية التنخر راسك مالي خلك اخذ وانطي وياك دولي

سديته بوجه ونزلت جوه الوجوه متتفسر باوعت الساعة عشره ونص بالليل

سليمان: يعني وين يروح وين يولي بنصاص اليالي

هيلين: على كيفك يمكن خايف منك مارجع للبيت

سليمان: هو المثل ابنج يخااففف لو صدك يخاف مايسوي هذا كله

بقيت واكفه بباب الاستقبال ودموعي بعيني بيتنا جاي ينهار وانا مابيدي شي اسوي اتقربت مني رميم وكفت بصفي وحجت

رميم: جهازة الهسه مغلق وبابا حتى اتصل بالشرطة ماقبلوا يسجلون بلاغ الا تمر 48 ساعة واخوج فص ملح وذاب

خيال: خلي نتصل بجماعتة ندور بالمستشفيات

رميم: لج من العصر الهسه ماخلوا مستشفى ماسألوا بيها وجماعتة ولا واحد يعرف بي وين

اباوع الابوي يفرفح وامي موتت نفسها من البجي مابقى گدامي غير حل ، صعدت الغرفتي واتصلت عليه عبالك جان منتظر اتصالي اول مادك فتح خط وحجه

يمان: تفضل

خيال: وين الگاك

يمان: منو انتي؟

خيال: لا تثولها قبل شوية جنت تحجي وياي ماعندي طاقة للكلام رجاءً

يمان: خوش انا بالسيارة گاعد گبال بيت حكمة تعاي

خيال: هاي شبيك انت تريد اصعد وياك بالسيارة ومنا المنطقة والجيران مستحيل

يمان: ماترهم مو خوش راح ادخل للبيت وانتي تعاي نحجي جوه

غلقته من عنده بدلت ملابسي ونزلت وحجيت

خيال: انا اختنگت من البيت رايحه يم حكمة

محد جاوبني عفتهم وطلعت الشارع ظلمة ترددت اطلع انتبهت على سيارته شغل السكن مرتين يعني هو بعده بالسيارة ركضت بسرعة جان باب البيت مفتوح دخلت جوه دكيت باب الكليدور

حكمة: تفضل

دخلت لگيتها گاعدة كالعادة على تلفزيون وتباوع مسلسل تركي مدبلج العشق الممنوع

حكمة: هلا بخوخه تعاي جربي شني بعدكم على نفس الهرجه

خيال: بعده ماراجع للبيت

حكمة: هسه يجي يمان يفهمنا كال انا سألت عليه

دخل من الباب يحجي

يمان: ولگيته كاعد يم جماعة بشقه والمنطقة موزينة ويمكن حتى الشقة مشبوها يعني اخوج اذا نلگف هاي هي بعد يروح بيها

حكمة: دهر ولك منيلك هذا الخبر

يمان: يمه ولد اعرفه تأكدلي من السالفة

كمت وحجيت بخوف

خيال: لا عفية لا تگولها وهسه شلون اتصرف

باوع عليه انتبه على وجهي خشمي مضمد وجوه عيوني صاير ازرگ خله الجگارة بحلگه ورثها واخذ منها نفس شمره وحجه

يمان: هذا هو هيج مسوي بيج

تجاهلت شنو حجه

خيال: فدوه انطيني الحل خلي اروح

يمان: هسه راح اتصل بواحد ينطي التليفون وانتي احجي ويا بلا لف ودوران كبل هددي وكليله عرفت مكانك حتى يرجع ، طلع نقاله واتصل طلع برا شويه ورجع قدمه الي اشرلي بمعنى احجي

اول ماگال الو حجيت بلا مقدمات

خيال: ضرغام انا خيال عرفت مكانك انت وين وعندي اثبات دير بالك تسده هسه اروح الابوي واگله واشوفه الاثباتات على كلامي

ضرغام: يا ثباتات انا يم صديقي ومارجع للبيت حتى لا تصير مشكلة

خيال: ارجع للبيت اول شي وبعدين نتفاهم ماما وبابا راح ينجلطون من وراك ماريد اسمع اي مبرر ضرغام الك ساعتين اذا مارجعت انا مضطره احجي الابوي كلشي وانت بكيفك بعد

ضرغام: لا لا كلشي لتحجين راجع

غلقته من عنده وكمت

خيال: هاي هي شكرًا المساعدتك

ماحجه شي سلمت على خالة حكمة وطلعت بعدني بالحوش اجه وراي وحجه

يمان: خيال لحظة

خيال: نعم

يمان: اريد منج تدورين غراض اخوج واي علبة حبوب تشوفينها صوريها ودزيها الي أأكد عليج اهم شي العلبة

باوعتله عدل نفسه يباوع بعيوني حجيت

خيال: انت ليش جاي تساعدنا

حجه بلامبالاة

يمان: لان امي طلبت

عفته وردت اطلع من الباب شفت سيارة واكفه بباب بيتنا شكلها غريب وحتى جامها مضلل بسرعة رجعت دخلت وگلبي ينبض حيل من الخوف

اتقرب عليه مستغرب حالتي حجه

يمان: شبيج وجهج انگلب ولو هو مگلوب بس هسه صار مايتفسر

جاوبته بخوف

خيال: ااا سيارة غريبة واكفه ببابنا

عگد حواجبه بتسغراب وحجه

يمان: ايي وين المشكلة

خيال: هاا ماادري السيارة مضللة وشكلها غريب

اتقرب يمي باوع من الباب وبسرعة جرني دخلني جوه وحجه

يمان: الشاهين

باوعتله متفاجأة وخطر على بالي واحد من الاشخاص الحگوني يمكن صاحوله بهذا الاسم

خيال: وانت منين الشاهين

يمان: شني وانتي منين تعرفينه

خيال: هاا ماعرفه بس الاسم مدري وين مار عليه

يمان: دفوتي رجعي يم امي هسه اجيج

رجعت يم خالة حكمة الي شبعت نوم وهي گاعدة على التخم عود تباوع على التلفزيون

شويه ورجع صاحني فتحلي الباب وحجه

يمان: بوجهج للبيت ركض انا اعاينلج لا تخافين

طلعت بستعجال وصلت البابنا باوعت وراي صفت سيارة يم بيت حكمة ونزلوا منها ثنين ماميزتهم لان جان الشارع شبة اظلم بس سمعت واحد يحجي

: وسيراميك مكة هسه حكمة الا تنفذ بينا عقوبة صلخيه صار سبوع مامارين عليها

دخلت وشفت اهلي گاعدين وبعدهم على نفس الحالة كعدت بصف رميم وابوي يفتر وكل شوية مسوي اتصال

صارت الساعة 11 ونص وهو بعده مراجع ماكو دقايق ونفتح الباب ودخلت اول ماطب امي فزت وحجت

هيلين: ضرغام ولك يمه وين جنت

وابوي اتقدم علية بعصبية يصيح

سليمان: وين جنت ادبسيز طايح الحظ

اباوع عليه بقى ساكت مانطق بحرف اتقدمت لزمت ابوي وحجيت

خيال: على كيفك بابا مو هيج اتفاهم ويا

سليمان: شتفتهم ويا وين جنت ولك

ضرغام: گاعد يم ولد صديقي ببيته

اتقرب منه ضربه راشدي من قوته دوه بالمكان جره من ملابسه ولزگه بالحايط يحجي ويرجف من العصبية

سليمان: تمد ايدك على اختك جلب بعدني بالحياة مامتت وتمد ايدك عليها باجر عگبه من الله ياخذ أمانته شسوي دماغسز

هيلين: سليمان على بختك

سليمان: ماااريددد اسسمععع نفسسس

سحبه من ملابسه يمشي بي ويحجي

سليمان: تنگبر هنا بالمخزن واريد يطلعلك نفس

ابوي حجه هيج وهذا تخبل صار يصيح

ضرغام: شنو تحبسني انا عبد عندك لو طفل

سليمان: حتى تعرف الله حق وماتعيد السويته مره ثانية

دفعه للمخزن وقفله عليه وامي موتت روحها تتوسل بس حتى يطلعه ماسمعلها عافنا ودخل للغرفه وهو يغلط ويصيح

وامي بقت كاعدة بباب المخزن تبجي حاولنا اني ورميم نگومها ماقبلت بقينا كاعدين يمها وهيج انتهت الليلة بين صياح ضرغام وابوي ودموعنا

ثاني يوم اني ماداومت سوولي اجازه مرضية بقيت بالبيت والوضع مشحون على ساعة الساعة تگب

وشنو امي تجوز ثاني يوم بس طلع ابوي للشغل فتحتله باب المخزن وخلته يطلع برا البيت سكتت ماحجيت لان تعبت وامي ماتسمع

من بعدها مرت يومين ابوي وضرغام مايتگابلون ابد وبيوم ظهرية تذكرت كلام يمان من گلي دوري بغراض اخوج ودزيلي صور للعلب مال الحبوب

نزلت وسويت نفسي اعزل بالبيت لان امي ماتقبل واحد يدخل غرفة ضرغام هو موصيها بس اذا انضفها لا عادي

بديت من الاستقبال الغرفة نومهم بعدها دخلت الغرفته كلبتها على البطانة نثرتها نثر اريد اعرف وين يضمهن ماكو

اخر شي باوعت ورا تاج الجرباية شفت جنطة ظهر سوده سحلتها وطلعتها صعدتها على الجرباية وفتحتها انصدمت من كمية علب الحبوب الفارغة وكلهن نفس النوع منها وادركت ان اخوي فعلًا مدمن لان العدد فضيع مو مال شهر وشهرين يمكن من سنين

طلعت تليفوني وصرت اخذ صور كلهن نفس العلبة لكن انتبهت عليهم لصقات تختلف منها بلون احمر ومنها بلون اصفر اخذت للنوعين وكذا صورة رجعت لميتهن بالجنطة وشمرتهن بمكانهن

عزلت الغرفة وطلعت صاحت وراي امي

هيلين: ليش تعبتي نفسج خوخه بعد انفج مطايب

ابتسمت اتقربت منها بستها وحجيت

خيال: حبيت اساعدج حبيبتي شفتج تعبانة

هيلين: تعبي يروح من اشوفكم گدام عيوني ومرتاحين بلا مشاكل

خيال: وهو منو يسوي المشاكل غير ابنج

تنهدت وحجت

هيلين: ادعيله بالهداية والصلاح امي

خيال: امين

عفتها وصعدت فوك الغرفتي دزيتله الصور الاخذتهن وكتبت جواهم

" هذا الي لگيته بغرفة اخوي "

دقايق على ماشاف المسجات دزلي

" متأكدة بس هذني اللكيتيهن ماكو بعد منا منا "

رجعت كتبتله

" لا دورت الغرفة شبر شبر مالگيت غير هذني "

كتبلي

" خوش"

وراح مر الوكت وهو بعد ماكتب شي ولا اتصل ....

❛❛❛❛

يمان:

دخلت الغرفة باتر شغلت الضوه جان نايم گعدته

يمان: شو بلا اگعد عندي سالفة وياك

شال راسه يحجي

باتر: اكلكم شني سالفتكم اروح يم حكمة تلفزيونها صوته يجيب التايه اجي يمك كل شوية مگعدني وين اهج منكم اروح اجرلي فندق انام بي احسن

شمرت عليه التليفون وحجيت

يمان: اذا تعرف هاي العلب مال الكبسله المنو منين تجي

شال التليفون يباوع بي بنص عين رجع تمدد يتمعن بالصورة ويقرب بيها

باتر: منين جبت هاي الصور هاي مو حبوب كبسلة هذا كرستال من شكل العلبة اعتقد يجيبوهن من واحد اسمه عين الضبع هذولي جماعة شاهين ودائب هم يعرفهم اعتقد

يمان: بس شكل العلبة غريب اول مره اشوف هيج شي وعين الضبع مايتاجر بالكرستال على حد علمي

باتر: اسأل الشاهين هو ينطيك معلومات أدق لان هم جماعة عين الضبع كلهم اصدقائه

گلب نفسه وحجه بنعاس

باتر: وهسه خلي انام عليك سيراميك مكة لا تگعدوني بعد

يمان: انطمر **** شوكت تشبع نوم اذا انت سهر للصبح

باتر: طفي الضوه بداعة الكيتلي عليك

طفيت الضوه وطلعت من البيت رحت للشاهين سألته عن العلب واذا يعرف صاحبهن تهرب مني وگال ماعرفهن ماقبل ينطيني معلومة

طلعت محتار وين الكه هذا الاسمه عين الضبع انا بس مره وحده تعاملت ويا ماعندي بي معرفة شخصية

قررت اتصل بدائب بلكي يعرفه اتصلت عليه اكثر من مرة ما يجاوبني رجعت للبيت حسبالي موجود هم مالگيته وهو من يختفي طبعي الگاه بمكانه المعتاد رجعت للسيارة شغلتها باوعت الساعة 11 بالليل حركت ورحتله وفعلا لگيته طابگ سيارته وگاعد بيها

نزلت ورحتله دكيت عليه جام السيارة فتحلي الباب صعدت يمه وحجيت

يمان: اليوم من وكت

دائب: اليوم 3/13 يعني عيد ميلادها

باوعت ورا بالسيارة جايبلها هدية من كل عقله

يمان: شوكت تبطل من بنت العالم

ورث جگارة وحجه يباوع البابهم

دائب: قصدك بنتي مابطل منها

يمان: ومن كل عقلك جايبلها هديه شبيك ابني بحالك هي

دائب: تعودت كل سنه بعيد ملادها تفتح الباب تلگه هديتها بالباب

عافني ونزل اخذ الهدية خلالها بالباب دگه وبسرعة رجع للسيارة

دقايق وطلعت بنيه يطلع عمرها بـ 13 سنه وكأنها جانت منتظره اول ماشافت الهديه ضحكت بفرح وطلعت باوعت بالشارع منا ومنا اخذتها ودخلت

اباوع عليه ابتسم وحجه

دائب: اروح فدوه الضحكتج ياحيلي بنص روحي اضمها بنيتي

هزيت ايدي وحجيت

يمان: وهسه خلصت حفلة الميلاد مالتك

دائب: شبيك يمعود موعت اذني شتريد لاحگني حتى هنا

يمان: اجيت اسألك تعرف واحد اسمه عين الضبع

دائب: ايي جماعة الشاهين ليش ماسألته

يمان: سألته بس مانطاني معلومات بسيطة انا الك الشاهين

طلعت التليفون شوفته الصور بس باوعلهن حجه

دائب: هاي بضاعتهم بس هاي مواد مخدرة قوية منين جبت الصور

يمان: من صديق طلب مساعدتي حرك خلي نروحلهم

دائب: وسيارتك ؟

يمان: خليها هنا طايگة نرجعلها بعدين

حرك السيارة ومشه بلا كلام الطريق بعيد طلع المدينة وصار يمشي بطريق شبه مقطوع

يمان: هذول وين مكانهم

دائب: هذول لو تعرف شغلهم واجرامهم تكول لو انا منهم اعيش بزحل ولا هنا على جرائمهم اليسوونها اذا نصادوا يرحون ورا الشمس رئيس الوزراء بنفسه مايكدر يطلعهم

يمان: شنو شغلهم

دائب: حتى عمليات ارهابية ينظمون من هاي وقيس

وصلنا البستان جبير كلشش وعليه حراسة مشددة وكفونا قبل لا نوصله يمكن 500 متر بس عرفوا دائب فتحوا الطريق

ومن تقربنا كلش حتى تفتيش تفتشنا

يمان: متگلي عليمن داخلين على السلطان سليمان هو كله واحد عصابچي

جاوبني ببرود

دائب: العصابجي الماعاجبك عنده وزارتين من اهم وزارات العراق تحت امره وساسي معروف غير هيج عنده حصانة يعني بأختصار مايخلون الهوى يمر بي

يمان: وانت شلون صرت قريب منه الهالدرجة

دائب: اكثر من مرا نقلنالهم بضاعة وبضاعتهم دائمًا تنزل برصيفنا بس انت ماتدقق بهاي الامور

مشينا للداخل باوعلي وحجه

دائب: شو انا هيج جايبك على عمه عيوني حتى ماسألتك شعندك ويا

يمان: اريد اسأله عن شخص واعرف شنو سالفته لا اكثر

دخلنا جوه العنده طلع رجال جبير وجه مألوف الي يطلع عمره تقريب بداية الخمسينات رحب بينا واستقبلنا بشكل حار

عين الضبع: غير تگلولنا جايبن جان فرشنالكم الارض ورد

يمان: تسلم ماتقصرون

گعدنا وضيفونا جان بيته من كبره يمكن المدخل للاستقبال يضيع شهالعالم شهالثراء الفاحش

عين الضبع: أأمروني اذا جايين بشغل اعتبروا خلصان من هسه

يمان: بس ردت اتأكد منك هاي البضاعة تابعة الكم

شوفتة الصورة ضحك وحجه

عين الضبع: اكو واحد مايعرف بضاعتنا

يمان: زين تعرف واحد اسمه ضرغام سليمان ياخذها منكم شخصيًا لو عن طريق تاجر واذا عن طريق تاجر اريد اعرفه

عين الضبع: هسه تأكدلك تدلل

اشر الواحد جان واكف بالباب مدري شهمس اله طلع شويه ورجع بيده اوراق وسجلات فتحهن وحجه

عين الضبع: هذا التحجي عنه عليه ديون تجاوزت الـ 250 مليون ضيف عليهم شروط وتأخير بالتسديد يصيرن ضعف من غير وصولات الامان ومستندات باصم عليهن على بياض

تفاجأت من المبلغ والاتعس من هيج وصولات الامان يودنه بالف داهيه

يمان: اذا ماكدر يدفعهن والحل

عين الضبع: يعني انت جاي واسطة

يمان: لا اجيت اسأل اذا مادفع المبلغ شيصير

عين الضبع: يطير هو وكل اليعرفهم ورا الشمس

يمان: زين الفلوس مگدور عليهن بس وصولات الامان شلون

عين الضبع: مثلا واحد من السندات سيارة وبيت

يمان: والحل

عين الضبع: يدفعهن يوگعن اله

بقيت محتار مدري شجاوبه سلمت عليه وطلعنا نمشي حجه دائب

دائب: ياهو هذا وليش مهتم الامره

يمان: واحد يصيرون جيران حكمة وهي وصتني عليهم

رجعنا وانا بقيت محتار شلون ممكن اكدر اساعدهم ...

❛❛❛❛

خيال:

مرت خمس ايام وانا رجعت بدوامي بيتنا تقريب صاير بي هدوء نسبي وخاصة هالايام ضرغام خانس بالبيت وحتى من غرفته مايطلع

جنت طالعة من الدوام امشي تذكرت يمان من يوم دزيتله الصور بعد ماحجه وياي فجاة صفت يمي سيارة وخففت انتبهت عليه هذا يمان نزع نظارته وحجه

يمان: ممكن الرقم

حجيت بأنزعاج

خيال: مليق

ضحك وحجه

يمان: تعاي اصعدي عندي سالفة وياج

خيال: احترم نفسك

يمان: هووشش وين راح بالج اصعدي سالفة مهمة بخصوص اخوج

خيال: ترا ماكدر اصعد وياك وحدنا اذا تريد اتصل فهمني وروح

يمان: لو اريد اتصل جا اتصلت صعدي احجي وياج وافهمج يلا الطلاب تباوع علينا عبالهم اتحرش بيج

صدك بعده يحجي اجاني ولد زميلي حجه

: خوخه اكو شي

ابتسمت مرتبكه

خيال: هه لا ماكو الولد اعرفه گرايبي

اتفهم الموضوع عافنا وراح واني بسرعة اتقدمت بعصبية صعدت وسديت الباب حيل

اباوع عليه يباوع الي ورا على والولد ويحجي

يمان: خوخه ابو حلك اليلزگ

خيال: احجي شتريد خلصني

يمان: ايي خليل  شلونج

خيال: خليل بعينك ادخل بالموضوع

حجيت الكلام وطلعت كماشه من جنطتي شلت شعري بيها انتبهت على نظراته من وجهي تنزل الرگبتي

صحت بي

خيال: تحجي لو انزل

ورث جگارة وبدأ يحجيلي والمره صار يحجي بطريقة جديه وابد ماخله عينه عليه

من سمعت بسوالف ضرغام نصعقت يعني لو نبيع الفوگانه والجوانه مانگدر نسدد ولو جزء بسيط ومبين هذولي الياخذ المخدرات منهم مو سهلين ابد

ماعرفت شسوي بس حسيت نفسي مثل الواحد مربط احس حرارة گلبي صعدت لعيوني الصارن جمر ودموعي من وحدها صارت تنزل

تنهد بضيق انطاني كلينكس وحجه

يمان: هسه انا حجيتلج حتى تبجين لو حتى تشوفين حل تبلغين بي اهلج وتخففين عليهم الصدمة واذا سألوج منين سمعتي گليلهم من حكمة

زدت بالبجي واني احجي

خيال: ميتحملون والله ميتحملون بابا ينجلط ويموت وامي كذالك من غير ضرغام الماعرف شراح يسوون بي الحقير

يمان: عمامج وين مامعقولة مايدرون بيكم

خيال: هم منو عمامي اني بالصور مشايفتهم وحتى ماعرف بيهم شكد

يمان: انا اشيل نص المبلغ

من حجه هيج بسرعة انتبهت النفسي انا جاي ابجي يمه خاف عباله استعطفه بسرعة مسحت دموعي وحجيت

خيال: شكرًا الك ماقصرت العليك سويته وزيادة

يمان: خيال لا تفهميني غلط

خيال: لا ليش حتى افهمك غلط بس انت ممجبور هيج تسوي شكرًا الك

قبل لا يحجي فتحت الباب ونزلت من السيارة واخذت الطريق مشي امشي وافكر وابجي ابجي بحيث الناس البشارع انتبهوا علية وكل شويه يجي واحد  يسألني اذا محتاجة شي

واجاوبهم بالنفي الحدما وصلت قريب على البيت وادركت ان انا خلصت الطريق من الجامعة للبيت كله مشي وهاي انا صرت گبال بيتنا

مسحت دموعي ورتبت شكلي على گد ماگدر ودخلت للبيت تلاگت وياي امي انتبهت عليه شهگت وحجت

هيلين: خيال شبيج شبيهن عيونج

ابتسمت گوه عليه وحاولت ابين نفسي طبيعية

خيال: هه شبيج ماما مابيه شي بس اليوم تعبت شويه وضغطي هبط

حجت بلوم

هيلين: شلون متتخربطين وضغطج يهبط وانتي تشربيهن گهوا على الريگ وترحين للدوام بلا اكل

غيرت الموضوع وحجيت

خيال: رميم اجت من المدرسة

هيلين: من زمان وابوج هسه على جيه ادخلي بدلي وصلي وانا احضر الغداء

عفتها وصعدت رميم جوه جانت بالمطبخ وانا بدلت وصليت حتى فكري شارد يمكن 3 مرات عدت صلاتي

نزلت جوه اجه ابوي من دوامه گعدنا نتغدا كلنا اباوع الاهلي هالايام يلا رجعت الابتسامة والهدوء البيتنا شلون شلون اكدر اگللهم مثل هيج خبر ممكن ينهينا

اباوع الضرغام وجه صاير اصفر وحتى مايحجي ونظراته ضايعة اكيد يعرف بالمصيبة السواها

بقيت ساكته طول اليوم ماحجيت ولا شوفتهم وجهي وخلصت اليوم بس نايمة ماعرف شسوي احس نفسي عاجزة عن اي شي

كعدت على همسات رميم تلعب بشعري وتحجي

رميم: شبيها اختي الحلوة منو مضوجج

غطيت راسي وحجيت

خيال: رميم فدوه مالي خلك احجي

رميم: ترا كلنا انتبهنا عليج اليوم مو على بعضج

خيال: مابيه شي متوهمين عوفيني رميم اريد انام

حاولت رميم تحجي وياي بس ترددت احجيلها خاف متكدر تتحمل وقررت احجي ويا بابا بهدوء عسى ولعل يتفهم وتكون الصدمة قليلة عليه

صار الليل وقررت اروح الحكمة اول شي احجيلها بلكي ترشدني شسوي وشتصرف

بدلت ورحتلها حجينه وسولفتلها خطيه بقت تاكل بروحها وماخلت شي ماحجته على ضرغام اخر شي نصحتني اگعد ويا ابوي وافهمه بهدوء

طلعت من عدها الشارع جان ظلمة بس عبرته حسيت سيارة وكفت وراي وشخص نزل منها ردت افتح باب بيتنا اجاني صوت يحجي

: ديري بالج تتحركين خطوة وحدة 

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

شنو توقعاتكم للمستقبل

حلواتي لا تنسون التصويت+ متابعة الحساب+ تعليق بين الفقرات شكد متكدرون

احبكم ♥️

متابعة ممتعة🦋

#تاروت

البارت «5»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

اجاني صوت يحجي

: ديري بالج تتحركين خطوة وحدة

وسمعت صوت سحبة مسدس رجلية ثكلن ونملن من الخوف غمضت عيوني حيل من حسيت فوهة المسدس صارت براسي وصوت يحجي

: اذا سمعتلج صوت واحد اطشر دماغج هنا

بصعوبة تمتمت

خيال: منو انت وشتريد مني ؟

: ناخذج ضيفة يمنا جم يوم وترجعين لا تخافين وهسه نفس واحد منج انتي والعائلة الكريمة تصيرون ورا الشمس

حجة الكلام بعد ماتقدم عليه كلها ثواني وحسيت نفسي غمضت عيوني بعد مااخلة قطعة شاش على انفي ومادريت بروحي بعدها

غير من گعدت لكيت نفسي بمكان اظلم راسي ثگيل وعيوني گوة افتحها اريد اشوف روحي وين فزيت برعب من تذكرت وادركت الموضوع انا هسه مخطوفة عدلت گعدتي المكان كله ظلمة ماكو غير ضوه قليل يدخل من باب عالي يفصله عن الگاع درج صغير 3 بايات نازل الضوه عليهن مبينات واضحات

لزمت راسي وصحت بألم

خيال: اخخ ساعدوونييي منو يسمعنييي اني ويينن

ماكو رد گمت واحس روحي مسطورة تعثرت بالدرج صعدتة ادگ بالباب واصيح

خيال: منوووو هنااا ساعدوني ياناسسس

حست الباب جاي ينفتح ابتعدت بخطوات بسيطة ونزلت دخل شخص مو واضح المعالم الضوه صار بظهره اجاني صوته الخشن يحجي

: صوتججج ماريد اسمعلج نفسس

خيال: منو انت ليش انا هنا

رجف گلبي بخوف عيوني صارت تغوش من گال

: هسه يجي القرش يتفاهم وياج وهسه گعدي هنا مثل العاقلة ماريد اسمعلج صوت لو طلعلج صوت يحلوة مراح يصيرلج خير

حجه الكلام وبرز سلاحه الي بخصره وعافني وطلع بعد ما شغل ضوة بالمكان يبس حلگي من الخوف ودموعي مثل الجمر صارت تنزل مني المكان جان بارد ثلج وكآيب مثل الحفرة وما بي غير قنفة سودة جلد ممزقه وطالع منها الاسفنج وكرسي حديد وفراش بالگاع نفسه الي جنت عليه

خفت اطلع صوت وخاصة اسمع اصوات شباب طالعة وصوت ضحكمهم واغانيهم عالي گعدت بقيت ادك والطم وادعي ربي يخلصني تعبت من البجي شلون بيه وين اروح ومنو يطلعني منا ...

❛❛❛❛

رميم"

تاخر الوقت وخيال ماكو انتبهت على ابوي من حجه

سليمان: وين اختج مو جنها تأخر

هيلين: ايي راح تصير الساعة 12 خلي اگوم اشوفها شني اليوم تنام يم حكمة

طلعت امي تشوفها طلعت وراها وكفت بالباب اباوع عليها ماعرف ليش هاجس القلق انتابني فتحت الباب ودخلت البيت حكمة اقل الخمس دقايق وطلعت شايطة وحكمة وراها بعدها بنص الشارع وحجت

هيلين: اختج ماكو صعدي شوفيها خاف رجعت للبيت

رميم: شنو ماكو قابل رجعت واحنا ماشفناها

ركضت صعدت فوك ماكو الغرفة فارغة نزلت لگيتهم بالاستقبال امي وابوي وحكمة مخبوصين حجيت

رميم: ماكو يمه اختي وين راحت

سليمان: هي شوكت طلعت خيال مستحيل تتحرك بالليل تخاف

حكمة: اجتني سولفنا شوية وطلعت مني راح يصيرلها ساعة

اباوع الابوي صار وجه اصفر اخذ تليفونه يگلب بي اتصل عليها وامي تفرفح وتدعي وحكمة مدري عليمن تتصل

سليمان: يعني وين راحت جهازها وين

انتبهت عليه باقي على المعرض

رميم: هذا هنا باقي

انخبصنا وامي صارت تملخ بروحها طلع ضرغام من غرفتة وجه مستغرب

ضرغام: شكو

سليمان: اختك ماكو طلعت والهسه مارجعت

جاوب بدهشة

ضرغام: شنو ماكو خيال وين راحت يعني

حجه ابوي بعصبية وهو يطلع من البيت

سليمان: اندري انا وين راحت الحگني نروح المركز الشرطة بساع

طلع ورا واحنا بقينا بالبيت حالتنا حالة امي رادت تتخربط احتاريت بيها ماعرف شتصرف كلها دقايق والجيران نگلبت علينا الشارع كله گعد وصارت الناس تتسأل وتستفسر شنو صاير

اباوع الحكمة اخذت تليفونها وطلعت للترك عفت امي يمها نسوان جيرانه ورحت وراها سمعتها تحجي

حكمة: يمان تعالي بسرعة وين ماجنت هد البيدك وتعال ... مصيبة بنية جيرانه ماكو نخطفت مدري وين راحت البنية اريد تجيني خطية محد الهم

سدت التليفون وباوعت عليه دموعي صارت تنزل حضنتني تحجي

حكمة: خيبة لا تخافين وعلي عندي زلام يگلبون عاليها واطيها واخلهم يطلعونها من جوا الگاع

رميم: خاله بعد شنو نشوف باعي المصايب وحدا ورا الثانية

مشتني الداخل البيت وهي تحجي

حكمة: يفرجها ربج اصبري خلينا نشوفها وين راحت

دخلنا جوة شويه واجه ابوي ويا سيارة شرطة اسمعة يفرفح ويصيح لان مايقبلون يسوون شي الا يمر على اختفائها يوم اسمعة يگللهم

سليمان: اعتبروا بنتي مخطوفة والخاطفها بعد ساعة ساعتين يكتلها شلون ننتظر يوم كامل شللوننن

وكفت بباب المطبخ كلشي ماشوف وانا روحي جاي تحترك اريد اعرف شي ماكو ركضت صعدت فوك للغرفة فتحت الشباك صاروا كدامي مباشرة سيارة الشرطة وابوي والجيران ملتمة دقايق ووصلت سيارة سودة نزلوا منها ثنين شباب هيبتهم بارزة بين الكل عرفت واحد منهم يصير گرايب حكمة اسمه يمان بس الويا مو اضح شكله الي سلموا واسمع الولد حجه

يمان: خير حجي سليمان شني السالفة

جاوبه ابوي وهو على اعصابه

سليمان: والله يابني ماعرف شگلك يعني بنتي راح يصيرلها خمس ساعات مختفية ومحد يقبل يسويلي بلاغ بأختفائها

جاوبه الشرطي

: حجي هو هذا القانون مابيدنا شي نسوي

يمان: يعني جاي يگلولكم بنت ومختفية الساعة 12 بالليل وانت تگول هذا القانون متگلولي قانونيش هذا

جاوبه بحزم

: انا رجل قانون والجاي اسوي كله بموجب القانون يعني افرض سوينا البلاغ هسه وستنفرنا وبنتكم رجعت مابيها شي هيج راح يصير عليكم دعوة بازعاج السلطات

حجه الولد والويا يمان ماعرف اسمه

: خوش احنا راح نتصرف هسه بس اذا لگينا الخاطف احنا نتصرف ويا مو بعدين تجون على الجاهز تعالوا سلموا النا وحزام الحمزة ماننطي

حجه هيج والناس كلها صارت تأيد كلامة ماعدا ضرغام صاح بيهم بعصبية

ضرغام: خلوا القانون ياخذ مجرى شنو انتم تعرفون اكثر منهم خلونا نتعاون وياهم وانتم رحمه الله والديكم لا تدخلون

صاح بي ابوي بعصبية سكت ويمان تجاهله ولا اعاره اهتمام وطلع تليفونه ووكف يم ببيت حكمة يحجي ماعرف ويا منو

عفتهم ونزلت جوة بعدهم على نفس الحال ناس تواسي امي وناس تصلي وتدعي ، كلش اختنگت راح يصير الفجر وهي ماكو طلعت للحوش گعدت على بلوكة رفعت راسي للسماء بدت تكشف ويطلع الصبح دعيت من كل گلبي يحميها وين ما جانت ودموعي الجمر تنزل

رميم: فدوه اروحلك ربي رجعها النا اذا صار بأختي شي اموت ماتحمل ارحم بحالنا ورجعها النا سالمة يارب

دخلت جوة شفت امي متخربطة وروحها مايعة ركضت عليها بخوف لزمتها ابجي تخبلت

رميم: يمه شبيج شبيها امي احجوا شبيها

صاحت عليه حكمة شمرت المفتاح بيتها ناحيتي وحجت

حكمة: رميم اركضي فتحي بيتي جيبي مقياس الضغط خلي اقيس ضغطها يمكن ارتفع بساع

طلعت بستعجال حتى ماانتبهت على روحي طالعة ببجامة البيت مالبست شي فوگها باب بيتنا مفتوح مديت راسي اريد اطلع حسيت على صوت يحجي

: يبنية وين طالعة هيج

ماركزت علية حجيت واني هامه للطلعة

رميم: اريد اجيب مقياس الضغط من بيت حكمة فدوه وخر

: ابقي هنا انا اجيبة الج

بقيت واكفة بالباب وهو راح يركض دخل البيت حكمة ورجع بيدة المقياس انطانياة بلا كلام

سمعت يمان صاح علية

يمان: باتر امشي بسرعة لكيت طرف

ماركزت عفتهم ورحت قسنا ضغط امي مرتفع كلش وبابا وضرغام طلعوا ورا والولد ماعرف شنو صار بس صارتلهم هوسه

ورا شوية رجع ضرغام اخذ اوراق خيال الثبوتية وجنسيتها كلها صارت تسأله شصاير ماجاوب عافنا على نار وطلع ....

❛❛❛❛

خيال"

الحد هسه ماعرف بنفسي ليش انا هنا يربي معقولة من لحگت ضرغام بقوا يراقبوني زين منو هم التفكير اكل راسي وصرت اتخيل شغلات مقرفة اباوع حواليه اريد اسوي شي او على الاقل احاول اطلع منا مدري شسوي بس دموعي تنزل

كمت وگفت بسرعة من حسيت الباب انفتح علية حتى النفس گطعته من الخوف

دخلوا ثنين كل واحد بگد الحايط تصنمت اريد ابلع ريگ من الخوف ماكو حجه واحد منهم بنبرة مستفزة

: وهاي الحلوة صارت يمنا مثل ماامر القرش

جاوبه هذا النعته بالقرش وهو عيونه تتفحصني

القرش: كفو منكم ماقصرتوا

خرجت من صمتي وصرت اعيط واصرخ

خيال: منووو انتممم منووو ليشش انااا هنااا شتردوون منيييي شترددونن

نرسمت على وجه ابتسامة شريرة باوع عليه من فوك اليجوة نظراته مقززة انوب هو رجال جبير اكبر من ابوي افتر بالمكان رايح راجع وعيونه عليه

رجعت صحت

خيال: انت ههيييي وصمخخخ ماتسمعنييي صار ساعة اصيححح ليشش انييي هنااا وشتردوون منييي

راد هذا الويا يهجم عليه بس هو ماخلا لزمه وجاوبني

القرش: عدنا جم سؤال تجاوبين عليهن وتبقين ضيفة يمنا على ما اخوج العار ينطينا فلوسنا واذا قرروا اهلج يضحون بيج بعد احسن خوش فريسه تسوين فلوس الدنيا ومابيها

عض على شفته وهذا الويا طگها بضحكة عالية ونظراته الي حسيت بروحي واكفة كدامه عارية ماتحملت همجت عليه ضرب ملخت وجهة بضافيري وانا احجي

خيال: مجرمييين حقييير دمرتونااا دمرتوناا الراح يصير بينا كله بسببكم مجرمين

احجي واملخ بي بحركات سريعة حاول يتلافاني بس مايكدر وهذا الويا ركض مدري شيجيب حسيت دمه صار بأضافري فجأة صرت على الارض وخشمي طك دم من اثر صفعتة على وجهي ردت ارجع اگوم لكن حركته السريعة تغلبت على حركتي ونزل عليه خله ركبة رجله على راسي وقيد اديناتي ورا ضهري بيده

القرش: چلبة حقيرة هسه اعلمج القرش شيسوي بيج بنت الـ****

صحت بصوت مكتوم

خيال: حقرااااء مجرمييننن

حسيت حلگي نمرد صار يصيح

القرش: نضااااللل جيببب الحبل بسررعة

دخل هذا الي اسمه نضال بيده حبل اول شي سدوا حلگي بلاصق ومن بعدها ربطوني وقيدوني كلي اديناتي ورجليه صرت ابجي واناشغ واحرك نفسي مثل السمچه ومطلعينها من المي

اعتصر فكي وحجه يكز على اسنانه ووجه صاير خريطة من اضافيري والخرمشه

القرش: نفسس ماريد اسمعلج والا ماتعرفين هسه شني ممكن اسوي بيج افتهمتييي

جاوبه هذا الحقير الويا

نضال: دشوف شغلك وياها وفض السالفة مبينه هاي ماتتروض الا بالـ ******

حجه الكلمة باللغة الصريحة هنا حسيت الدنيا سودت بوجهي وشعر راسي وكف خصوصًا من قهقه وجاوبه

القرش: بعد گدامنا هواي لا تستعجل على رزقك

رفعني من شعري غمضت عيوني بألم حجه

القرش: يوم 2/3 من الشهر الفات جنتي بمنطقة _______ الصناعي شسووينننن شجنتوا تخططين انتي واخوج

فتحت عيوني حيل بصدمة بحركة خاطفة منه جر الاصق من حلگي عطت متألمة حسيت فكي بدأ يتهشم جوه ايدة

القرش: احجي شخططتوا شنو ناوين تسوون

حجيت بصعوبة

خيال: تتبعت اخوي ردت اشوفه شنو يسوي ويا منو يتعامل للاسف طلع يتعامل ويا ناس قذرة ومنحطة من امثالكم

مسح على وجه بحركة تدل على النرفزة اتقرب مني رفع وجهي معتصره حيل حجه من بين اسنانه

القرش: تحجين عدل لا اليوم يكون اخر يوم بحياتج

ماتحملت تفيت بنص وجه بحركة سريعة حسيت راسي انضرب بالحايط لان الحقير دفعني حيل

گام من عندي تمشى بالغرفة وبعدها رجعلي ونزل عليه راشديات الحد ما حسيت نفسي بديت ادوخ عافني سد حلگي وطلع

صرت اون من الالم ودموعي تنزل بغزارة بقيت على هاي الحالة مادري شكد مر وقت بس هواي كلشش تقريب بالاربع ساعات صار خيال ورا الباب وصار ينفتح اعتلت گلبي الرجفة ودگات الخوف بيه مابيه عدلت نفسي وگدرت اگعد سندت روحي على الحايط دخل هذا الاسمه نضال يباوع عليه ببتسامة مقرفه خلا يمي اكل وحجه

نضال: حتى لا تحجين على سوء ضيافتنا حتى اكل يوصللج وانتي گاعدة

فتح حلگي درت وجهي منه بقرف فتح اديه ورجليه صار گبالي وحجه

نضال: حرامات هالوجه الحسن يفلت من بين ادية لو ما القرش مخلي كاميرات مراقبه بالغرفة ومشدد علينا محد يطخج بشعراية جان عرفت شغلي عدل وياج

حجيت بحده واني اصك على اسناني

خيال: حتى اذبحك واشرب من دمك واكسر ايدك قبل لا تفكر تمدها عليه يامنحط يامجرم

كور ايده وبانت على ملامحه العصبية راد يضربني درت وجهي بخوف وسمعت صوت صاح نضاااللللل

عافني وطلع سد الباب لزمت وجهي بأديناتي كل صفحة بي توجعني بقيت ادعي واغط عليهم وادعي ربي يخلصني منهم ماتقربت للاكل گمت وصرت افتر بالمكان وافكر هسه اهلي شنو حالهم صحت بقهر

خيال: ربيييي خلصني ربيييي فدوه الاسمك خلصنييي ... مر الوكت وانا مادري بروحي وين وماعرف ليل لو نهار بس شغلوا الاضويه واختفى ضوء الشمس يعني ليلت ....

❛❛❛❛

يمان"

طبگت سيارتي وجيت ويا الولد وانا ااشر على بيت بمنطقة مگطوعة حجيت

يمان: هو هذا البيت الي بي البنت مووو

فز الشاهين من صحت بعصبية وحجه يمتمت

الشاهين: اكلك هو شبيك لا تصيح

نزلت من السيارة نزلته سحل خنگته من ياخته

يمان: شوف وعاين زين لو دخلت ولگيت صايرلها شي احسب الله ماخلقك وامك ماجابتك وانعل حتى ابو ذيج الساعة الي امك وابوك سووك بيها

وخر ايدي منه وحجه بعصبيه

الشاهين: وانا شعليه خاطفها موزييين ودليتك على مكانها هاي فوك امجازاتييي

يمان: لييش ماكلتلي انت شفتها هذاك اليوم بالصناااعييي وراكض وراهااا تضم عليه شاهين بسيطه

الشاهين: وانا شمدريني بيها تخصك وتعرفها اشم گفه ايدي لو مااشم گفه ايدي ، هسه من شفتك مخبوص وسألتني على سالفة اخوها عرفتها لان القرش صارله ايام يراقب بيتهم وحتى انا راقبتها اله وعرفتها اخت ضرغام وبعدين شبيك اول مره اشوفك محتام على مراة

رجعت خنگته

يمان: شاااههييننن

نزل دائب من سيارته توجه علينا بعدني من الشاهين وحجه ببرود

دائب: اغبياء وكت عركم هسه لو تردون تطلعونها يعني اذا تردون تتعاركون المن خبصتوني تعال وتعال

يمان: ماتشوف حجه المستفز انا عليها لو اريد اساعد الجماعة

غمزلي وحجه بشبه ابتسامة نادرًا ماتظهر على وجه

دائب: ادري بيك ، دتحركوا يلا خلي ندخلها

مد راسه باتر من جامة السيارة وهو يحجي

باتر: عليكم سيراميك مكة اريدها هيج مولعة كون طگ طگ

دائب: على گولة حكمة نگلب عاليها واطيها مايگدرلنا لا قرش ولا حوت

الشاهين: بس هذا داهية هسه تلگه يمه بالعشرين واحد واحنا بس 4 وباتر راح يظل يحرس ظهرنا هنا

سحبت سلاحي وحجيت

يمان: لو مية واحد كدامي هم ادخل واطلعها

استوقفني يحجي

الشاهين: خلونا نتصل بالشرطة نبلغ

انتبهت على صوت سحبة سلاح باوعت وراي شفتة دائب حجه

دائب: دمشييي لك شرطة هو ابو حلك عود هذول ربعك شبيك تتراجف شددد

هز ايدة بحركة ماعاجبه واتقدمنا يدلينا على المكان وهذا يصيح ورانا

باتر: اخوتي ياخوتي مو تنسوون هيج اريد اسمع طگ طگ

بيت قديم محاوطينه بسيم شائك وواحد واكف يم باب خلفي تقرب منه دائب ضربه على رأسه من ورا فقد الوعي وطاح دخلنا ...

❛❛❛❛

خيال"

رجعت گعدت بمكاني منتظره فرج رب العالمين فجأة انفتح الباب ودخل هذا الاسمه القرش باوعلي وحجه

القرش: انا اجيت

لميت روحي وصحت بعصبيه

خيال: انتممم شتردووونن منيييي تردون فلوسسس اتصلوا على اهلييي اتصصصلوا هم يدفعولكمم

القرش: انتي ليش مستعجلة على رزقج اتصلنا بي وسمع صوتج تصرخين لا تخافين رعبنا الوالد العزيز شوية حتى يدفعلنا كل ديونا وفوكاهن ضعف زيادة

خيال: نذلل

اتقدم علية خنگني من رگبتي حيل جحظن عيوني حجه وهو يضغط

القرش: هسه استحقيتي اتعامل وياج بالاسلوب اليعجبني واتونس بي

جرف كل جسمي بخوف رفع ايده الثانية لزم جتفي تحركت وانا ادفع بي والهوى مايوصلني فجأة صار صوت طلق حسيتة كلش قريب ودخل الاسمه نضال يركض يصيح على القرش بس هالمره صاحله باسم مو لقب

نضال: صمد الحك الحك مداهمة ماعرف من ياجهه وعين الضبع امر نخلي المكان باسرع وكت يمكن الشرطة بطريقها الهنا

وسع عيونه بصدمه وجرني ويا صاح بي

نضال: وين ماخذها تضيع وكتنا

القرش: ونعوفها

بعده يحجي سمعت دفرة باب واحد يصيح : اثبتتت ولكككك

اتقرب وحجه

القرش: بعد النا لقاء يحلوة لا تفرحين

عافني وطلع ماعرفت شنو صار غير الطلق ترس البيت حتى كلت يمكن هسه الگه روحي صرت منخل وهذولي ماعرف وين اختفوا فص ملح وذاب

اندفع الباب اعتلني علامات الدهشة من شفت يمان گبالي وصوت الرصاص بعدة مستمر طفر الدرج وصار گدامي قرفص لزم وجهي وحجه

يمان: خيال بيج شي سوولج شي

ماكدرت اجاوب حسيت نفسي روحي ساحت سندني وحسيت روحي صرت بحضنه لمني له ضرب على خدي يحجي

يمان: ساعديني گومي وياي خلي نطلع منا يلا خيال

سندني وگومني ويا صعدني بصعوبة وصار صوت الطلق عالي صرخت بخوف التفت عليه وحجه بثقة

يمان: احتضني ايدي وامشي وياي ومعليج بالباقي

مشيت ويا على كيفي طلعنا من البيت ماكدرت امشي بعد دخت وجانت باردة صرت اجرف برد وخوف حافية وبملابس بيت ماعليهم غير وشاح خفيف وكفني نزع قمصلته لبسها الي وشالني من الارض

من الخوفة البيه بكلشي مافكرت بس اريد شخص احتمي بي حاوطت رگبته وخليت راسي يرتاح على صدرة حسيت بحرارته غمضت عيوني وبس دموعي تنزل رفعني همس بأذني

يمان: اششش اششش خلصتي خيالي خلصتي كافي دموع

مشه بيه للسيارة ماعرف المنو صاح فتحله الباب خلاني كدام يمه وربط احزام الأمان

وافتر صعد بالسيارة ونطلق بيها بسرعة مد ايده يتحسس جرح شفتي باوعتله وتمتمت بدموع

خيال: اثر راشدي

هز رأسه وحجه

يمان: سهلة كلهم يتحاسبون على دمعة دمعة سهلة

وكف السيارة على صفحة طلع تليفون وحجه

يمان: حافظة رقم ابوج

خيال: ايي

يمان: هاج اتصلي بي وگليله بابا تعال أخذني انا شردت منهم وهذا رقم واحد لگيته بالشارع ولا تجيبين طاري ابد

وكفنا يم قطعة خضرة جبيره مكتوب بيها عنوان اخذت التليفون واتصلت على بابا جنت تعبانة حتى مافكرت بكلامه نفذت بلا كلام

دك بسرعة جاوب ويمان مد ايده فتح مايك التليفون حجيت بشهكه

خيال: بابا انا خيال تعال اخذني بسرعة بابااا

حجيت هيج وصرت انحب وهو صار يصيح

سليمان: خيااللل هاي انتيي وينج بابا منين جاي تحجين خيال الوو

همست بصعوبة

خيال: انا ماعرف ويني بس هسه واكفه يم قطعة مكتوب بيها عنوان ______ وهذا نقال ولد بالشارع

وينه الولد اطينيا احاجي اخذ التليفون مني قفله وحجه

يمان: شويه ويوصلون عائلة يوكفون يمج وانا راح اوكف السيارة بعيد اعاينلج على مايجي ابوج والشرطة تاخذج

رفع راسي بيده وحجه بنبرة مؤكده

يمان: خيال ديري بالج تجيبين طاري اسمي وفهميهم انتي شردتي لان صارت اشتباكات المكان واكيد الشرطة راح تحدد موقع البيت

غمضت عيوني بمعنى فهمت صفت يمنا سيارة بيها ولد وبنت وياهم طفل صغير نزلني گعدني بيها تطمن عليه وگلي راح ابقى اباوعلج من بعيد وراح

بقيت انتظر وخطية البنت كل تحاول تشربني مي لو تمسح وجهي ساعة تقريب ووصلوا بابا وويا شرطة

وشفت ابوي نزل من سيارته يركض بتجاهي

غمضت عيوني بعد ماحسيت بدوخة ماگعدت غير على نغزة إبرة بأيدي فتحت عيوني لگيت ممرضتين فوك راسي يحجن انتبهت عليه وحده منهن تحمدتلي بسلامة وطلعت دخلوا اهلي امي حتى خدودها مخرطتهن وابوي الوجه اصفر رميم وياهم ضرغام ماكو وهذا معنى ان بابا عرف كلشي

بس مصيبة تبرد مصيبة خطفي ورجوعي نساهم كلشي صرت ابجي گعدوا يمي منا ومنا محتضنيني ورميم لزمت ايدي تبچي

هيلين: سودة علية يابنتي ياعمري انتي عسى الشر بعدوينج ولا بيج

خيال: اسم الله عليج عمري

تحجي وتبوس بيه رفع وجهي بابا يحجي وياي

سليمان: يوجعج شي حبيبتي اصيح الدكتور

خليت راسي على صدره لمني اله حجيت

خيال: مابيه شي بابا بس طلعوني منا نروح للبيت

طلع بابا اجت رميم حضنتني وحجت

رميم: ردت اموت عليج بعد لا تسوينها وتطلعين وحدج

حضنتها اهدي بيها اجه الدكتور عاين حالتي والشرطة اخذت اقوالي حجيتلهم مثل موصاني يمان ان صار اشتباك وانا شردت ووكفت الولد وزوجته بالشارع اتصلت على بابا من تليفونهم

اخذوا اقوالهم وبابا تشكرهم وراحوا واحنا طلعنا جانت الشارع هوسه والناس كلها ملتمة بابنا مالي خلك سلمت وتحمدولي بالسلامة وصعدت الغرفتي مر اليوم وانا بس نايمة وافز كل شوية من الخوف اجت حكمة شافتني وراحت

وهيج مر اليوم في مابعد عرفت ان ابوي عرف بسوالف ضرغام وطردة من البيت كله روح انت دبر امرك تعبت من النصح بيك وانت ماتنصح وياي ، كلنا ماقبلنا على فعل ابوي وخاصة امي

مر سبوع تتصل بي يوميًا ومايقبل يجي يكلها مشكلتي وانا احلها وهاي احنا ويا باقين على نار وابوي مايعرف شيسوي اخر شي يعرض البيت للبيع مقابل ان يسدد ديون ضرغام ماكو غير طريقة وفعلا عرضه وصار يدورلنا على بيت للايجار وهو ماندري بي وين ماوين بس تصل على امي ...

رجعت الدوامي لان مابيها مجال اغيب اكثر وخاصة انا هاي اخر سنة الي واتخرج مابقى شي بس صرت اكثر حذر اروح وارجع بالخط واخاف حتى اتحرك او اطلع وحدي

وبيوم من الايام گعدت الصبح وكالعادة بدلت حتى اروح للدوام الصبح دك تليفوني جاوبت بعد ما شفت المتصل يمان

خيال: وينك يمعود صار سبوع اريد احصلك ماكو

حمحم وجله صوته

يمان: ليش لازم اشتاقيتيلي

خيال: باع هذا الاجگم مصدك روحك بس حبيت اشكرك على السوية وياي

يمان: اذا حابة صدك تشكريني انزلي انا اوصلج للجامعة وهم عندي جم سؤال وموضوع وياج تره شغلنا ماخلص وانتي بعدج ملاحقة

خيال: يعني شلون

يمان: يعني لا عبالج لهنا وخلص كلشي انتي وكعدتي بيد ناس بس الله يعرف نواياهم شني

بسرعة حجيت من الخوف

خيال: وين الگاك

يمان: راح اوگفلج على الشارع العام لان هنا ماتگدرين تصعدين وياي

خيال: عشر دقايق انتظرني

غلقته من عنده ونزلت صبحت على اهلي بستعجال حجه بابا

سليمان: وين مستعجلة بابا اكعدي تريكي

حجيت واني هامه اريد اطلع

خيال: اكل بالجامعة حبيبي لا يبقى بالك

طلعت من البيت واتصلت على ابو الخط كلتله عمو انا رحت لا تمر عليه طلعت للشارع العام شفته طابگ السيارة اشرلي رحت صعدت ويا وحجيت بخوف

خيال: امشي بسرعة وگلي شنو الموضوع وليش انا بعدني ماخلصانه

باوعلي بطرف عينة وحجه

يمان: صباح النور انا زين شكرًا على سؤالج

حجيت بملل

خيال: اهوو والله انت بطران وينه ووين هاي السوالف هسه

جاوبني

يمان: لا لا ابد مالها داعي تشكريني لان نقذتج واجبي هذا

خيال: اللهم طولج ياروح احجيي حباب

يمان: السانج الكلاشنكوف شوكت يسكت ولج انطي مجال شبيك خليلي ليش متوتر راح تموت من الخوف

خيال: خليلك بعينك واحجي

مشى مسافة بعيد عن المنطقة وكف السيارة باوعلي وحجه

يمان: ولج شلون قبل فترة رايحه للصناعي بمنطقة ____

خيال: وانت شمعرفك اصلا انت شلون نقذتني وليش ماتريد احد يعرف

ورث جگارة اخذ نفس ورافع عيونه اليفوك اول مرة انتبة لون عيونة مو اسود جوزي كلش فاتج مع رموش معقوفه للخارج طگ رگبته واحجه بحزم وجدية

يمان: حرف ماريد اسمع وهسه كلشي تحجيلي ليش رحتي هناك وشلون خليني اعرف راسي من رجلية

سولفتلة كلشي وليش طلعت وشنو شفت اباوع علية يسمعني ويضغط على الجداحة ويعتصرها بغضب فجأة صاح بيه

يمان: انتييي غبيية اريد اعررففف ولججج شلون هيج تسوين بروحج بعد شيخلصج منهم انوب فوك الضيم اخوها ضرغام

هز ايده وضحك بستهزاء

يمان: والله يالله

بسرعة باوعلي من سمع صوت شهگاتي طالعة صرت ابجي ماعرف على شنو بالضبط من الخوف على اخوي على وضع اهلي كلها اجتمعت دار وجه مني يدخن خلص الجگارة طفاها باوعلي وحجه بهدوء

يمان: خيال باوعيلي

جر ادية من وجهي وحجه

يمان: عليمن بجيتي اسف ما جانت نيتي ابجيج بس انتي غبية

خيال: شتريد اسوي اهلي متدمرين واخوي جاي يدمر نفسه ردت اعرف بي شجاي يسوي وماكو غير اتبعة واشوفه شيسوي

يمان: الف طريقة اكو غير طريقتج بس شكول اخخ اخخخ

حجيت بدموع

خيال: يعني بعد راح يخطفوني هالمرة يمكن يقتلوني واني حتى اثر الكدمات بعدة بوجهي وجسمي

عگدت الحواجب بينت عليه حجه مستفسر

يمان: شسوولج شصار احجي ؟!

خيال: ماصار شي غير الكفخ الاخذته على وجهي شيصير اسوء من هيج

رفع ايده يحجي بحرگه

يمان: هسه من اكفخج اطيرلج زوج سنون هم يلوموني

صحت بي

خيال: انت شبيك جايبني هنا تطمني لو تخوف بيه

سكت همست

خيال: هم راح يخطفوني بعد وين اروح

يمان: وينه ابن امه ابو يمر بيج وانا اشم الهوى

خيال: يعني شنو

يمان: يعني مسحي دموعج وانا احميج

خيال: ليش ؟

همستها همس وانا العب بسحاب جنطتي ماوصلني جواب رفعت عيوني اله شفته متجي اديناته على الستيرنك ويباوعلي بتمعن صافن بيه همس

يمان: عاجبني

خيال: شنو شبيك

يمان: اقصد امي طلبت وانا قررت اساعدج بس بشرط حتى اكدر احميج

باوعتله رجع كمل

يمان: انا اخذج واجيبج من الجامعة حتى اكدر احميج

بسرعة حجيت

خيال: انت امشي ورا الخط

يمان: مو سايق الخلفوج انا

سكتت خجلانه من نفسي وماقبلت على اقتراحه حاول ويقنعني طول الطريق للجامعة ماقبلت

مر الدوام عادي وطلعت امشي اريد اروح للخط مالتي وكالعادة صف بصفي وحجه

يمان: اصعدي

خيال: هاي بعدك مصر كلتلك مستحيل

فتح الباب وحجه

يمان: لا مصر ولا تونس اصعدي واسكتي يلا

ماعرف ليش احس بالامان ويا وانا هم جنت خايفه تأفأفت بملل وفتحت الباب وصعدت ويا ضايجه

حرك وحجه

يمان: من البداية وهيج صيري عاقلة

باوعتله صفح وسكتت وهو هم سكت وصلنا يم الشارع العام وكف السيارة وحجه

يمان: يلا ست تفضلي ويوميًا تلگيني على نفس التوقيت

خيال: ماعرف شكلك بس انت ليش هيج تسوي

لبس نظارته نزلها شويه باوعلي من فوگها وحجه

يمان: لان عاجبني

شغل سيارته وتحرك حتى ماخلاني احجي

وفعلًا صار يوميا الكاه بنفس المكان ويوميا يسألني على يوم الخطف واكعد احجيله الاشياء الي اتذكرهم وهو بس يستمعلي ومرات من اذكر اسماء وهيج يسجلهم ماعرف ليش

وبيوم جنت كلش كلش ضايجه وطالعة روحي من وضع البيت وهم بيتنا قرب ينباع صعدت ويا صبحت عليه وسكتت وانا الدمعة بطرف عيني

انتبه عليه وسألني

يمان: شبيج

خيال: ماعرف بس بدت طاقتي تخلص وانا اشوف اهلي بهالحال واخوي بصفحة وابوي بصفحة وبيتنا راح ينباع

ماحجه شي بس سألني على سعر البيت وسكت وصلني قريب للجامعة ردت انزل جان حجه

يمان: خيال

خيال: هاا

يمان: هم حسن وهم حزن على كيفج ويا گلبي

ماعرف شسوي بسرعة نزلت وبلا وعي رگعت باب السيارة حيل دنك يباوعلي وحجه

يمان: وعلى كيفج ويا سيارتي هم شبيج كل اشيائي مدمرتها

عفته ورحت ماجاوبته وماهتميت للموضوع هواي ومجان ببالي غير هو دايساعدني لان خالة حكمة طلبت من عنده وهم عدهم معارف بالدولة حسب قولها

ثاني يوم تفاجأت من بابا كال هو اشترى البيت وحنبقى كاعدين بي بس ندفع ايجار من سألته حان جوابة امي متعودة عليكم وسويت هيج الخاطرها

عديتها مرت الايام وابوي كدر يدفع جزء جبير من ديون ضرغام بقى بعد جزء وعاند وياهم گال مادفع واليصير خلي يصير وخاصه هم بعد بطلوا يداعون وضرغام صار يرجع للبيت بس ابوي ما يحجي ويا ويتخبل من يشوفه بالبيت

وبيوم جنت راجعة ويا كالعادة جان يحجي بالنقال وسمعتة ذكر اسم صمد بقيت افكر هالاسم وين سمعته

انتبهت على صوته حجه وياي

يمان: خليل وين صافن ضلعي

باوعت عليه وحجيت

خيال: جنك قبل شويه ذكرت اسم صمد لو انا غلطانة

رفع حواجبه متعجب وحجه

يمان: وانتي منين تعرفين هذا الاسم و وين سامعتة

غمضت عيوني استرجع ذاكرتي زين نفس الاسم لو لا

حجيت بدون اهتمام

خيال: القرش اسمه صمد

ماحسيت غير السيارة فجأة وكفت وصوت البريك صار عالي وصار بياض بعيوني مثل الدخلنا بشي مثل النور .......

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق على كل فقرة شكد متكدرون

احبكم ♥️

متابعة ممتعة🦋

#تاروت

البارت «6»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

سادتي المعذِرَة ما بَذيءٌ أنا إنّما وصَلَ القَيحُ للحُنجُرَة

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

ماحسيت غير السيارة فجأة وكفت وصوت البريك صار عالي وصار بياض بعيوني مثل الدخلنا بشي مثل النور صرخت بخوف افترت السيارة بينا فرة كاملة ووكفت بنص الشارع

الموقف كله ماتعده اجزاء الثانية ووكفت السيارة حتى دخان يطلع منها بقيت صافنة مامستوعبة الصار انتبهت من شخص دگ علينا جام السيارة يحجي

: انتم بخير شصار

اباوع عليه ملامحه كلها تغيرت وصار ينكث عصبية الدرجة ادية صارن يرجفن فتح باب السيارة مسح على وجه وحجه ويا الرجال

يمان: لا لا مابينا شي بس هذا ابو السمند وازاني وانا امشي سريع

: غير تنتبهون يابويه هسه لو مگلوبين شبعدلكم عليمن هالوزه

بقى الرجال يرزل بيه وانا مخليه ايدي على حلگي الهسه مامستوعبة الصار وشلون السيارة انتهى بيها المطاف واگفة بنص الشارع

حجه بعصبية

يمان: رحم الله والديك حجي مابينا شي

: اتصل بالاسعاف اسأل البنية خاف بيها شي

التفت عليه خله ايده على عيونه عصرهن وكال

يمان: انتي زينه نروح للمستشفى

باوعت حواليه مابينا شي جاوبت بنفي

خيال: لا زينه ماصار شي

سلم على الرجال والناس الملتمه راحت وكل واحد يحجيله سالفة شكل شي تكول يمشي سريع شي تكول يمكن نايم وهو يريد ينفجر من الأعصاب مافهمت ليش هيج صارت حالته وانگلب فززني من صاح بيه

يمان: شلون شكله

خيال: شنو

يمان: خيال ركزي وياايي شلووونن جان شكله هذا الاسمه القرش صغير چبير طويل گصير شيب الخلفنيي

خيال: لو سمحت لا تصيح وتعلي صوتك بوجهي وبعدين اريد افهم انت شبيك من سمعت الاسم اخترعت زين ما موتتنا ذكرني هاي اخر مره اصعد وياك

بعدني احجي ضرب على الستيرنك حيل بيده يصيح

يمان: ولججج احجييي شلون شكله

عطت بي

خيال: رجال چبير اكبر من ابوي شويه قصير مو كلش طويل وباقي ملامحه ماعرفهم لان ماركزت بشكله جنت خايفه

من حجيت هيج اباوع وجه نگلب وعيونه بياضهن اختفي صارن حمر ماعرفت افسر حالته واستغربت ليش هيج جاي يسوي نزل من السيارة للشارع مشه مسافة ساد على ايده حيل يضرب بجبهته بقبضة ايده اجه عليه فتح الباب اليمي وحجه

يمان: لزمج خيااالل هذا واحد مختل لزمجج سوالج اشياء مو حلوه ضربج عذبج احجيي شسوالج

خيال: انت شبيك شكد حجينه بهذا الموضوع مو كلتلك ماسوولي شي غير الحجيته

نزلت من السيارة وحجيت

خيال: انا رايحة ومره ثانية لا ترفع صوتك عليه والهنا وكلش كافي شكرا على اهتمامك بموضوعي واني ممتنه كلش لان حميتني وطلعتني منهم حسب ماطلبت منك حكمة

ردت اتحرك ماخلاني صار گبالي وحجه

يمان: وين رايحة بعدكم بخطر اصعدي خلي اوصلج للبيت بلا خبال

خيال: شكرًا هسه اخذ سيارة أجرة وهم اعتقد صار هواي احنا على هالحال والخط مالتي راح يبطل مني اهلي شگللهم

يمان: حقج يلا بس اليوم اخر مره على مااشوف حل يلا خيال صعدي مستحيل اعوفج ترجعين وحدج بهالظهرية

باوعت بعيونه جان نار خامدة احسه گوه مصبر على روحه وساكت غمض عيونه بقلة صبر وكال

يمان: يلا خيال وراي شغل ابقى منتظرج يعني

تأفأفت مشيت گدامه صعدت بالسيارة وصلني قريب البيت على الشارع نزلت وحجيت

خيال: شكرًا تعبتك وياي الايام الفاتت وكفتك وياي مانساها

يمان: باجر نحجي

خيال: بس انت گلت ....

بعدني ممخلصه كلامي شغل السيارة وراح زفرت بحيرة اباوع ورا ماعرف شنو سره وليش هيج جاي يسوي وياي ومهتم الامري وانا ليش هيج حاسه بالامان ويا رغم هو غريب عليه مالگيت جواب السؤالي ...

رجعت للبيت الوضع طبيعي رجع ابوي من الدوام ومر الوقت عادي نمت الظهرية گعدت العصر بيتنا هدوء بس رميم گاعدة تدرس وتتأفاف بضوجه وملل سألتها

خيال: شبيج

رفعت راسها وگالت

رميم: هاي جيرانا درة ام سالم صارلها فوك الساعتين يم امي

خيال: وانتي شمضوجج هسه موزين تسأل علينا

رميم: ميته علينا هاي جايه تشمشم اخبار وتروح شوفي هسه شجايبتلها من خبر

ابتسمت رميم من ما ترتاح الشخص هاي هي بعد تخلي علية علامة X وماتغير من وجة نظرها اله مهما يكون ..

نزلت من الدرج واسمع المرية تحجي ويا امي وصوت حجيها واضح

ام سالم: ياا وانتي جايزه من بنتج شلون هيج گاعدة وساكتة صدك تحجين ام ضرغام

هيلين: والله خيه بنتي ماتضم عليه شي اول يوم رجعت بي گعدنا وياها انا وابوها وكلشي سولفتنا وبالمستشفى هم طمنونه على حالتها ماعتقد اله داعي هذا الحجي

ام سالم: حقج انتي غير گاعدة بالبيت ماتدرين بالكلام الجاي يطلع عليكم اشكال والوان وخاصة بنتج بعدها مامزوجه منو ياخذها بعد من يعرفون تعرضت للخطف منو يگول طلعت منهم سالمة يمكن البنيه خافت وضمت عليكم دسمعي مني وخلي مرت حماي جده تفحصها حتى خاف يصير شي بعدين تدخلين بعينهم

من سمعتها هيج حجت حسيت بجسمي صار يهتز مثل السعفاية والصدمني اكثر امي ساكتتلها وحتى ما عترضت وطردتها من البيت دفعت الباب ودخلت للستقبال احس دخان يطلع من اذني هستوها امي تريد تحجي صحت بيها وانا احجي

خيال: اطلعي برااا بيتنا

صاحت بيه امي

هيلين: خيااال تأدبي

خيال: لييششش اتأدب يمكن مصدگه بكلامها وموافقتها الرأي يمه گاعدة بنص بيتنا وتحجي وتطعن بشرفيييي لا يكون تردين تسويلي فحص

ام سالم: على كيفج عيني فهمتي غلط

صحت بيها

خيال: اطلعييي براااا يلاا يلاا افتهمت غلط صح هذا البيت يتعذرج مره ثانية افتهمتتييي

كامت وهي تحجي معاجبها كلامي

ام سالم: انتي صدگ ماتستحين ولا تعرفين العيب مو مأدبة

خيال: عفت المستحه الج والامثالج

عافتنا وطلعت وهي تحجي ودردم وانا رجعت الامي انهاريت بالبجي والصياح اول مره بحياتي اسمع هيج شخص يحجي عليه

خيال: ليشش ساكتة مامااا مصدگتها مو مصدگتها

بقت گاعده ومخليه ايدها على راسي تباوعلي متت تخبلت صرت اشيل نفسي وارگعها اخر شي ركضت فوك للغرفة تلاگت وياي رميم تريد تعرف شنو السالفة تحجي

رميم: شبيج خيال امي شبيها

تجاوزتها وصعدت للغرفة ركض اخذت القرآن ونزلت بوكتها جنت منهارة وماعرف بروحي شجاي اسوي الكلام السمعتة جان فوك مستوى ادراكي خليت ايدي على القرآن منهارة ابجي واحجي

خيال: وحق هذا كلام اللّٰه محد لمسني محد بيهم تعده حدوده وياييي يمه ليش ساكتة احجيلج شي

لطمت على خدها وحجت

هيلين: ولج الكلام الطالع مايتسولف الناس الها الظاهر انا امج اصدگ بيج الناس ماتصدگ

بقيت صافنة على امي اريد استوعب موقفها شنو

رميم: صدك تحجين يمه يعني ماتدرين بيها درة روحها بالغيبة والنميمة تلگين محد حجه هي من وحدها طلعت الموضوع

هيلين: اسكتننن راسي راح ينفجرر

بعدنا بهاي الاثناء دخل ضرغام للبيت هجمت عليه بلا مقدمات من حرگة روحي صرت اضرب بي واغلط وهو متفاجأ

خيال: حقير كله من وراك كله من وراك راح تدمرنا من ورا ادمانك هيج صار بينا

غمض عيونه حيل وجرني من اديناتي حضني يهدي بيه وصار ويحاول يفهم الموضوع فهمته امي كلام جارتنا ماقبل على كلامها گلب البيت بالصياح اخر شي رجع عليه جنت گاعدة بالگاع بين التخم والحايط گعد گدامي

يشهك ويحجي

ضرغام: ادري من وراي والله ادري ادعي عليه بالموت بلكي اموت وتخلصون مني

ماتحملت حاوطت خصره وصرت انحب واتوسل بي يتعالج من السم الي جاي ياخذه

حضني حيل يحجي

ضرغام: اهدي خيال انا مو مدمن منين تجبين هذا الكلام

لطمت على وجهي احجي

خيال: وهذا حالك ضرغام باوع الروحك بالمراية وشوف جوه عيونك شلون صاير نيل ازرگ ووجهك شاحب راحح تمووتتت اذا مو مدمن ليش هيج صاير بيك ليش احنا غاطين بالديون من وراك ليش ناس مجرمين وعصابات تلاحقنا من مكان المكان لييشش

هيلين: كافييي كافيي موتوا عوفوا ابني بحاله سوها مره وندم وتاب كافي

بعدها امي تحجي ماحسيت غير دخل بابا من باب الاستقبال سحل ضرغام من ياخته كلنا صرنا نصرخ نريده يعوفه بس هو ماسمعنا فتح الباب وطلعة برا البيت وحجة

سليمان: تريد تروح تشرب تدمن وتتعاطى بكيفك من هذاك اليوم وانا بري منك وهذا البيت يتعذرك اكسر رجلك اذا وصلت لهنا برااا لا بارك الله بيك ولا بشوفتك

سد الباب وامي رادت تحجي صاح بيها

سليمان: اذا سمعتلج حرف واحد وحق الا إله إلا الله ياهيلين تطلگين بالثلاث

ضربت على حلگها مرتين بحرگه وهي تبجي بمعني سكتت

سليمان: بنتي اليجيب طاريها بشي مو زين مايلوم الا روحه ارتكب بي جريمة ومايرفلي جفن جانت ومازالت خام ابيض واليگول غير هذا الكلام اكص السانه

جان يحجي بصياح كل صوته يمكن سمع المنطقة كلها عافنا ودخل جوه وامي تربعت يم الباب تبجي وتنوح على ضرغام باوعتلها رميم وگالت

رميم: انتي ابقي نوحي ولطمي لان طرده من البيت بس من صار مدمن ودمرنا ماحجيتي شي

اباوع الامي زادت بالبجي اشرت الرميم تسكت بس شيسكتها اذا نهدت رجعت حجت

رميم: دكافييي تسكتيني الى متى تبقى مدللته شيفيد دلالها اخوج ضاع ضاع وراح يضيعنا ويا وگولي رميم ماكالت

عافتنا ودخلت جوه كعدت بباب الترك گابلت امي خليت ايدي على راسي صافنه عليها وهي تبجي اخر شي اندك الباب فتحته صارت حكمة گبالي تحجي

حكمة: شجاكم نفلكتوا يوميه هرجتكم گايمة فوك من العالم

خيال: شكلج خالة ضرغام وسوالفه قابل جديدة

دخلت باوعت الامي تربعت گدامها وحجت

حكمة: ضلي وني خايبة ياما نصحت وعلمت بيج لا دللين الدلال يخرب ماسمعتي

عفتهن ودخلت جوه اشوف بابا وين دگيت باب غرفته اجاني صوته يگول

سليمان: ادخل

مديت راسي من الباب احجي

خيال: حبيبي انت زين

اشرلي بمعنى تقربي دخلت گعدت يمه جرني الحضنه يبوس براسي ويحجي

سليمان: تذكري دائمًا عندكم اب يبيع الدنيا ويشتري بناته بروحه لا تخلين كلام الناس يأثر عليج انتي اقوى من كلامهم المهم انتي تعرفين وانا اعرف بيج انتي شنو

خيال: ادري بيك حبيبي لا يبقى بالك كل مافي الامر كلام درة عصبني

حجيت الكلام وطبعت بوسه على خده غمض عيونه يحجي

سليمان: افييشش عافية هاي عافية

ضحكت بقينا نحجي شوية وتوسلت بي يطيب خاطر امي ومايعوفها زعلانة عفته وطلعت

صار مغربية وسمعت صوت الاذان صعدت اصلي وادعي ربي يطلعنا من هاي المحنه الاحنا بيها ..

❛❛❛❛

يمان"

بنفس اليوم للعصر گدرت اعرف صمد هو فعلا القرش طلعت من البيت شغلت السيارة وحركت وانا روحي مشتعلة

يمان: واخيرًا لگيتك صمد العار وين تفلت من اديه ويين

طلعت تليفوني اتصلت بالشاهين جاوبني ومبين صوتة جان نايم

الشاهين: ها يمان

يمان: انت تعرف واحد اسمه صمد مجيد ملقب باسم القرش

الشاهين: هذا الايد اليمين العين الضبع ليش شتريد منه ترى ابد موسهل

يمان: خوش رايح انا للمستودع اريدكم هناك بسرعة كدامك نص ساعة وخبر الولد بدربك

سديته منه والف فكرة انتقام تدور بالي وين الگاك صمد وين احضه بيك هسه اخخ لو تدري بناري الماتطفة تحركك وتحرك عشيرتك

وصلت وفتحت المستودع بعدهم ماواصلين شوية وصلوا اندفع الباب ودخل باتر يصيح ويعربد بصوته

باتر: شباب اذا يمان رادنا بالمستودع يعني السالفة كلش چايدة ووراها طگ للصبح وسيراميك مكه

باوعت بعيونه اختفت ابتسمامته وتلاشت من گلت

يمان: صمد موجود ولگيته

اباوع علية شنط عيونه يعاين عليه بخزرة لوه رگبته وحجه بعصبية خامدة

باتر: يعني شلون لگيته ووين

يمان: صمد هو نفسه القرش

اباوع علية كل جسمه تشنج واسنانة گد ما يصك عليهن صارن يطلعن صوت

اتقرب الشاهين وگال بستغراب

الشاهين: بس فهموني صمد القرش شيصير منكم

انتبهت دائب شمر روحه على الكرسي باوع الشاهين وگال

دائب: صمد مجيد يصير ابو الولد

يمان: شو انت جنك تعرف من زمان

دائب: لا بس واضحه مايرادلها روحه للقاضي جنت شاك بالموضوع من اشتغلنا اول مره ويا بس ماهتميت

الشاهين: هيهاايي القرش طلع ابوكم هو انتم هيج ماتنحملون انوب هسه جماعة عين الضبع كلها راح تصير رهن الاشارة

يمان: اريد اواجه

حجيت الكلام وباوعت الباتر الي صار مايتفسر افتر انطانا ظهره رفع رأسه اليفوك طگ رگبته وحجه

باتر: انا اعرف شلون اسحله

الشاهين: شتسحل منه هسه اذا دوره منا البعد سنه ماتلگاه الا هو يقرر يشوفكم

دائب: وهم مارح تگدرون تسوون شي هذا متحامي بجماعة عين الضبع يعني بعد السالفة الاخيرة الصارت هسه يمكن ضامينه جوه الگاع بالف متر

بقيت محتار اكل بروحي وافتر بالمستودع افكر شلون احصله وهم ساكتين يباوعون عليه منتظريني احجي

فجأه دخل علينا ضرغام هو يندل المكان دائما يلتقي ويا الشاهين بي گبل راح للشاهين لا سلام ولا كلام هجم عليه خنگه يحجي بصياح

ضرغام: اموتك بيدي اليوم **** واموتك ساقـ* ثقيت بيك تروح تدليهم على بيتنا ليشش

ردت ادخل بينهم ماحسيت الا باتر سحبه من الشاهين وطاحله دگ ضرب فقد عليه يضرب بلا مايحس بروحه طلع شكو بداخله من صدمه بالمسكين انا ودائب نريد نشيله منه مانگدرله يضرب ويغلط عليه

باتر: اي **** منو گلك تدمن وتتعاطى سم الهاري وترجع علينا

يمان: بااااتر عوف الولد راح يموت بيدك

باتر: سافل عافهم واجانه يجمز فوك روسنا

ماوخر منه الا ما دائب ضرب باتر لكمه قوية واخذه يسحل بي بره اباوع الهذا كعد بالكاع حلگه مدمه وصار يبجي بندم

الشاهين: هسه تندمت من جنت تجيني تتوسل تريد مخدرات وكبسله ماتتندم من اخذت ممنوعات بكميات چبيره ومبالغ خيالية ماتندمت

صحت بي

يمان: شاهين اطلع برا

عافنا وطلع مديت ايدي الهذا ماقبل ينطينياها گام وطلع طلعت ورا امشي شاف باتر دائب واكفين اشر على باتر وگال

ضرغام: اندمك على هاي سوايتك وداعت امي اطلع عار عن الزلم اذا مارديتها الك هسه تشوف

راد يروحله باتر دائب گوه لزمه ماخلا يتحرك عافنا وراح ضنيتها مشاجرة عادية ابد مااجه ببالي الراح يصير ابد ....

عافنا باتر وراح ادري بي من ينعزل معناها يخطط او يدبر الشي لو كلش ضايج ومايريد واحد يشوفه عفته براحته

دائب: وهسه شني راح تسوي ويا السيد الوالد المبجل

يمان: تستهزئ حظرتك

دائب: اگلك انا مايهمني لا عين الضبع ولا قرش طلقة وحده اخلص العالم منه ومن شره وهاي انتهت

يمان: دير بالك دائب دير بالك لهنا وحدك كلشي ولا صمد هذا انا اريده واريده عايش هم

خله جگارته بحلگه غمزلي صعد سيارة وراح

بقيت اطحن بروحي مادري وين اروح ماعندي غيرها بس حكمة تسمعني بلا تفكير توجهت الها

وصلت يم بيتها شفتها طلعت من البيت الي كبالها بعدها ماواصلتني وحجت

حكمة: هاا شلايتي اليوم لافي عليه من وكت

يمان: وانتي بعدلج شوية تعيشين ببيت حجي سليمان ماتلفين البيتج

اتقرب سلمت عليها وهي حضنتني فتحت الباب تحجي

حكمة: ولك يمه والجماعة مساكين مابقت مصيبة ماوگعت على روسهم

دخلنا وهي تحجيلي كل الصار ببيتهم اليوم من الصفر الألف

يمان: عود صدك هيج مطلعين حجي عليها

حكمة: لا ماظن لان كل المنطقة تحبهم وتحلف بيهم بس هاي درة تسوي مشاكل ، وشني عبالك هاي الفوصة خويله سكتتلها وداعتك خزتها وشهرتها شهيرة

جانت تحجي وتطلع غراض من الثلاجة تريد تسوي اكل گعدت وحجيت

يمان: ايي صدك مبينه فوصه

حكمة: ايي يمه ماينگدرن طاگ بيهن العرج الشامي

ابتسمت وحجيت بلا مقدمات

يمان: لگيت مكان صمد

نشغت وباوعتلي

حكمة: شنهي صمد منين طلع وين لگيته اخر مره عماتك گالن مسافر برا العراق

يمان: ايي يمكن رجع

حكمة: على شنهي ناوي يمان لا تشلع گلبي عوفه ربك يجازي

يمان: وامي الكتلها بدم بارد

حكمة: امك يم ارحم الراحمين هو ياخذ حقها

جرت الكرسي وگعدت كدامي بقت تحجي هواي سوالف وماخلت اية قرآنية ماحجتها بس انا جان بالي كله شلون انتقم منه حتى ماسمعتها اخر شي ملت مني عافتني وراحت تصلي

طلعت برا صار بيتها گبالي رفعت راسي اعاين على شباچها ، شكلك ياخليل هم راح تصير هم من همومي وانا وياك مستحيل نرهم

طلعت نقالي واتصلت عليها

خيال"

ارتب بالغرفة وسمعت نقالي يدك قبل لا اروحله جابته رميم تباوع بالشاشة عاگدة حواجبها حبست الانفاس من گالت

رميم: منو يمان

خيال: هاا محد انطيني النقال

غمزتلي وهي تحجي

رميم: علينا هي مال دروب محد دباعي وجهج صار فراولة والخدود وردن اول ما گلت اسمه

جريت النقال منها وحجيت بنزعاج

خيال: اهووو جيبي راح يروح الاتصال اصلًا انتي متعرفين شي بعدين احجيلج

فتحت خط وبقيت ساكتة منتظرتها تطلع وهي مبسمره كدامي حجيت

خيال: رميم حبيبي سمعت امي تصيحلج انزلي

اشرتلي بسيطة وعافتني وطلعت

خيال: انت تبقى تتصل باي وكت بلا التليفون مو عندي

يمان: وعليكم السلام انتي شلونج

خيال: كل شوية سلام

يمان: بعد روحي خليل انا هم مشتاقلك مو بس انت تشتاقلي

ابتسمت غصب عليه حجه

يمان: اذا انتي بالغرفة عايني الي من الشباج بلا

وخرت البردة وباوعت شفته واكف ومنتجي على سيارته ويباوع الشباكي

خيال: هاي انت هنا

يمان: اجيت لان العصفورة گلتلي خليلي ضايج كلت اشوفها شبيها

خيال: اممم شمعنى

يمان: مو احنا صحبان شبيك خليل بسرعة تنسى

خيال: شوكت صرنا صحبان

يمان: من اول ماوگعت عيني عليك

خيال: هاا ومنو گلك انا ضايجه

يمان: الشرقية نيوز اول ماشفتها كتتهن كلهن عليه

بقيت ساكتة ماعرف شجاوب همس

يمان: خليلي

خيال: هاا

يمان: ماريدك تضوج وجهك الحلو مايلوگله غير الابتسامة وتأكد مهما حجوا عليك انت تبقى نقي مثل الألماس تلمع بنصهم والگلوب تفز الك

ارتبكت كلش وخرت من الشباك غيرت الموضوع

خيال: ماگلتلي احنا مو اتفقنا بعد ماروح وارجع وياك شو غيرت رأيك

يمان: بس باجر خلي اتاكد بعد زال الخطر منك حتى گلبي يرتاح ويطمن عليك

خيال: انت ليش مهتم الهالدرجة بالموضوع

حمحم وحجه

يمان: هاي امي تصيحلي راح اروح انا وانت لا تضوج باجر الصبح اشوفك ونحجي

حتى ماكال باي بسرعة سده وراح مثل المتهرب من شي صفنت ويا روحي هزيت راسي وحجيت

خيال: اييعع شبية احب هذا الحقنة وافكر بي اصلا مستحيل

شمرت التليفون على الجربايه ونزلت مبتسمه شافتني رميم جانت تحضر الاكل بالمطبخ وامي اليوم معتزله كلشي زعلانه على ضرغام

رميم: وين العصبية وين النرفزة والصياح شو بكلمتين تغير المزاج وصار وردي والدنيا حلوت فجأة

باوعتلها

خيال: شقصدج ؟

رميم: استغفر الله حبي ماقصد شي بس اگول خيال الي اذا ضاجت من شي تبقى سبوع منفسة علينا اليوم صعدت للغرفة ونزلت الضحكة من الاذن للاذن

غمزتلي تندس بيه بعكسها وتحجي

رميم: اگلج يموني ابو طول الحلو المسرسح بنات المنطقة سيارته مريحه يگولون

سويت نفسي اقطع بالسلطة وحجيت بعدم اهتمام

خيال: انتي والله بطرانه

مافكت مني بعد رميم ولزكتلها بسالفة حتى واحنا على العشا كل شويه تذبلها بسمار تخليني اغص لو تكول اسم سيارته لو تسال بابا علية وتباوعلي من جوه الجوه الدرجة خفت امي تلاحظ

عاد بالليل بعد مامنها شردة حصرتني وجبرتني جبر اسولفلها كلشي صار وبقت تزن براسي طول الليل كل شويه ترفع راسها تگلي خاف يحبج حتى انا صدگت وانزعجت من هالفكرة معقولة يحبي

ثاني يوم الصبح كعدت وكالعادة رتبت نفسي حتى اطلع للدوام عفتهم وطلعت بسرعة حتى بابا لا ينتبه عليه وهالشي صار يضايقني ويزعجني ماريد اخرب ثقته بيه بس شسوي مجبورة وخايفه وهو گلي اليوم اخر يوم

لگيته واگفلي بنفس المكان وهاي يوميا يمشي وياي من بعيد اول ماطلع من بيتنا الحدما اوصل سيارته صعد واني هم صعدت صبحت بس جنت منزعجه

ماحجيت صرت اراجع على ما نوصل عندي كوز انتبهت عليه شغل اغنية وخلا الصوت واضح شويه جانت اغنية قديمة يلوموني والجو جان بوكتها بارد مع مطر خفيف الشوارع مبلله وشمس ماكو باوعت للطريق وسرحت ويا كلمات الاغنية

و يلوموني ..

أحسك تكبر بروحي و يلوموني

و انا بلا شوفتك شتنفع عيوني

يا شوكَي

و رجوتي

و دنياتي

و لوني

و عذابي و لهفتي و شكواي و ضنوني

يا خي عونك علية و بيك خي عوني ..

يا واهس تضحك الدنيا على شفافك ..

يا ابو ليل الحلو اليلعب على جتافك

أحس روحي تأمن بيك وتخافك !

و أحسك مدري شنهو انت

لغز لا حجي لا سكتة!

و لا غيرك نبع بالشوك يرويني

و توصيني ؟؟

لونك مو دمع ما شالتك عيني !

من گال " احس روحي تأمن بيك وتخافك التقت نظراتنا ثواني ثنينا ساكتين بس هو عيونه تحجي وانتشر بيهن حمار فجأة لبس نظارته بالرغم ماكو شمس عرفته يغطي نظراته مني

وصلني للجامعة قبل لا انزل باوعتله وحجيت

خيال: شكرًا تعبتك وياي

هز براسه بلا كلام ردت اسد الباب حجه مستوقفني

يمان: خليلي راح اشتاق العطرك وهو يترس السيارة من الصبح

خيال: عيب عليك تحجي هيج

يمان: ليش احنا مو صحبان

خيال: يمكن

حرك السيارة وهو يحجي

يمان: لا مو صحبان خليل گلبي انت

مالحگت احجي من ورى حركته البايخة يحجي الكلام وهو يمشي

داومت ومر الدوام عادي رجعت بالخط بس انتبهت على سيارته من رجعت واكفه باب بيت حكمة مر سبوع انا اروح وارجع بالخط حسيت نفسي هيج مرتاحة اكثر وهم مااضطر اجذب على اهلي رغم هذا احس اكو شي ناقصني

ايامنا تمشي مثل بعضها ضرغام بالبسكوت يدخل للبيت من غير ما ابوي ينتبه عليه بس ابوي كلش متوتر ودائما اشوفه مهموم ويفكر وتليفونه مايبطل اتصالات اخر شي نصب كامرات بالباب وشدد عليه وعلى رميم مانطلع والخط يأخذنا من الباب ...

❛❛❛❛

يمان"

گاعد على الشط ادخن الوحدي باتر صار يومين ماشايفه اتصل عليه يگلي انا زين من اهدا ارجع ادري بي موضوع صمد كلش يأثر بي وهو يتحول غير شخص اذا يضوج

رغم عنده جانب مرح بس الجانب الثاني منه كلش معتم وياويله اليلعب ويا ويخلي يظهرله جانبه البشع محد يعرفه الدرجة انا اخو ماعرف ولا شي عليه واليحاول يدور ورا يعتبر ختم على ورقة اعدامة بيده اخوي غريب الاطوار مو ...

فزيت من حسيت شخص خله ايده على جتفي گعد بصفي وحجه

دائب: يااخي اذا الهدرجة تحبها ليش ماتصارحها وتخلص روحك وتخلصنا وياك

يمان: منو گلك احبها انت متوهم

دائب: لسانك يحجي شي وگلبك ينفي

اخذت نفس من الجگارة حجيت وانا صافن على الشط

يمان: زين وانت مو هم تحجي شي گلبك شي

تمدد على التراب مخلي ايده ورا راسه ورغم الجو بارد واحنا يم الشط هو لابس تيشيرت اسود نص ردن حجه

دائب: انا بنتي بعدها صغيره خلي تكبر شويه عود منا الوكتها يصير خير

يمان: انت تبقى منتظرها الحدما تكبر

دائب: الاخر لحظه بعمري بنيت گليبي هاي

يمان: انت مريض بيها لا والله انت مهووس

زفر الهوى وحجه بهيام عيونه يلمعن

دائب: عافية اذا جان المرض منها

يمان: ولك انت شني سالفتك ويا هاي البنت راح تخبلني بنت الناس عدها اهل شوكت تفهم

گام وحجه وهو ماشي

دائب: يجي يوم وتعرف كلشي ، حضر روحك باجر عدنا عملية بلغ باتر بدربك

عافني وراح بقيت افكر بسالفتة گمت وحجيت ويا روحي

يمان: دحل سالفتك بالاول وبعدين حل سوالف الناس

تمشت شفت ولد مفتح يبيع مداليات ببسطيه بسيطه جذبتني وحده على شكل LOVE وكلها شذر مدري ليش اجه بالي خليلي بلا تفكير رحت شتريتها

وثاني يوم بعد مابيها مجال رحت وكفتلها يم الجامعة...

خيال"

طلعت وشفه واكف قريب الجامعة گلبي صار يدك سريع وانا اشوفه واكف مرتجي على السيارة كل شويه يباوع بساعتة بقيت واكفه بمكاني خفت اروح ويطلع مو عليه جاي واتفشل اول ما صارت عينه عليه ابتسم واشرلي بمعنى تعاي اشرتله يعني هسه يجي الخط صعد بالسيارة واشرلي براسه

باوعت منا ومنا محد منتبه عليه عبرت الشارع اركض صعدت ويا بسرعة حرك السيارة باوعلي وحجه

يمان: اشتاقيت خليلي وماتحملت اجيتك

خيال: احترم نفسك

يمان: خليلي اكثر من هيج ماكدر احترمها بعد

خيال: شبيك ؟

يمان: وداعت لونك الخمري مشتاق گلي شسوي

سكتت ماحجيت هو هم سكت وطول الوكت يباوع للطرق شويه ويرجع يباوعلي حسيت بشعور حلو ماعرف ليش

الحدما وصلنا ردت انزل انتبهت عليه من گال

يمان: البارحة شفتها واجيتي على بالي

حجاها وقدملي مدالية صغيره مال مفتاح اخذتها

خيال: شنو المناسبة

يمان: بلا مناسبة ، ماگلتيلي هي شمكتوب بيها

حجيت بلا اهتمام

خيال: احبك

يمان: وانا هم

فتحت عيوني متفاجأة عافني وحرك السيارة قبلي يمشي على كيفه على ما اوصل البيت

دخلت وسديت الباب يلا راح جان كلبي ينبض حيل وكل شويه اباوع للمدالية رغم ما جانت شي واو بس انا گلبي طار بيها

بالليل اتصل وبقينا نحجي وبلا مااحس على روحي من اول يوم بقينا للفجر مانمت غير ساعة ونص ورحت للدوام اسحل بروحي

تكررت الاتصالات صرت اشوفه وين ماروح بس من بعيد ...

وبيوم من الايام جنت احجي ويا وهو كالعاده گاعد بسيارته كبال بيت حكمة فجأة كال

يمان: خيال ابتعدي من الشباج بسرعة ركض انزلي جوه

خيال: ياا شبيك

صاح بيه

يمان: وخررييي من الشباج وانزليييي جوه بسرعه

ابتعدت من الشباك وطلعت من الغرفة بعدني على الدرج ماحسيت الا على صوت الطلق وجام البيت يتكسر نزلت اعيط بخوف تلگاني بابا جرني ونزلني للارض وصرت اسمع بس صوت السلاح والرمي وامي ورميم يعيطون حجيت بفزع

خيال: بابا امي ورميم وييننن

سليمان: لا تخافين بالمطبخ مابي شباك على الشارع

بقينا على هالحالة يمكن بالعشر دقايق بيتنا تزرف تزرف واحنا جوا

الحد ما هدأ الوضع وصرنا نسمع صوت سيارات الشرطة رفع ابوي رأسه وصاح

سليمان: هيليينن رمييممم انتم زينين

طلعت امي من المطبخ حاضنه رميم وثنينهن يبجن بفزع وامي تحجي

هيلين: سليمان هاي شصار

سليمان: اندري طالع اشوف

كلنا لزگنه بي نتوسله مايطلع

سليمان: لا تخافون بابا ماتسمعون صوت سيارات الشرطة بالباب اكيد راحوا

اندك الباب علينه يأكد كلامه عافنا وطلع واحنا بقينا مرعوبين والبيت كله كزاز من الشبابيك انگلبنا گلب صعدت فوك اباوع جام غرفتنا كله صاير طحين اتقربت من الشباك شفتهم ملتمين كلهم وجيش وشرطة والمنطقة كلها ببابنا بس كلامهم مامفهوم

نزلت جوه حجت امي موجهه كلامها الي

هيلين: تعاليلي اتصلي على اخوج شوفي اليه وينه بلا هاي الكافره تدعي عليه

بعد ماحجت كلامها دمغت رميم الي گامت وحجت

رميم: ابقي اكلي بروحج عليه وكل الجاي يصير بينا بسببه

عافتنا وطلعت اتصلت بي اكثر من مره مغلق وامي بقت تاكل بروحها حتى انا قلقت عليه

دخل ابوي من برا كلنا فزينا نسأل شكو بس مانطانا جواب شافي كل الگاله ان اكو دگه عشائرية على بيت جيرانا البصفنا وسكت

صعدت اتصلت بيمان اكدلي كلام ابوي وگلي لا تخافين

وبيومها كلنا اجتمعنا بمكان واحد ومانمنا للصبح من الخوف وحتى ثاني يوم ابوي ماداوم ولا خلانا نداوم ونطلع من البيت

لليل ويمان ماكو اليوم ابد ماتصل بيه على غير العادة استغربت وخاصة احنا البارحه عايشين برعب وقلق ...

يمان"

بعد ما خلصت سالفة الجماعة بالليل عرفت منو سببها والجان يضرب على البيت شكله واضح ومعروف بالنسبة الي لو يمر الف سنه هم ابقى اتذكر ملامح وجه المقززة

رجعت للبيت بعدني هسه دخلت للشقة ودگ نقالي شفتة الشاهين جاوبته

اجاني صوته المتقطع ويحجي بستعجال گلي خبر حسيت روحي طلعت ويا جمد الدم بعروگي

الشاهين: يمان الحگ باتر متعارك هو وضرغام وهذا ضربه سجينه بگلبه وهسه حالته كلش خطرة

يمان: شنيي ولك منو ضرب منو فهمنييي على كيفك

الشاهين: يمان شبيك ضرغام ضرب باتر وهسه ناقلينا للمستشفى وضعة خطر كلش ...

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

كلش حابه اسوي التنزيل يومي دام حگعد هالفتره ماعندي شي بس تفاعلكم ميساعد 🥲💔

+ تطلبوني بارتين اعرف سجلوهن عليه 🥺

بقلمي: زينب علي

شنو رأيكم بالقصة والاحداث

حلواتي لا تنسون التصويت+تعليق على كل فقرة+ متابعة الحساب ♥️

متابعة ممتعة🦋

#تاروت

البارت «7»

بقلمي: زينب علي

حلواتي لا تنسون التصويت+تعليق على الفقرات ومتابعة الحساب ♥️

يالرهميت

يامفتاح فضه ومارهم غيرك علي مفتاح

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

يمان"

وصلت للمستشفى مدري شلون سقت على عمى عيوني دخلت اهرول بخطواتي اسأل اي واحد يطلع گدامي

يمان: جابوا مصاب اليوم اسمه باتر صمد

جاوبتني وحده من الممرضات

- ايي قبل شويه نقلوا يمنا وهو هسه فوك بغرفة العمليات

دلتني المكان صعدت ركض شفت گدامي الشاهين ودائب واكفين رحتلهم وانا احجي

يمان: وينه ولكم احجوا شبي باتر

لزمني دائب يحجي

دائب: لا تخاف مابي شي شبيك

يمان: ولك شلون مابي شي والشاهين يگول السجينة بگلبه

دائب: لا بظهره من ورا لا تخاف بعيدة على گلبه بس لان الطعنة قوية ونزف هواي دخلوا للعمليات

يمان: جذاب تجذب عليه ادري بيك

جرني ويا يحجي

دائب: دتعال اگعد بيش تريد احلفلك مابي شي وجبته للمستشفى وهو بوعيه اصلا الشاهين ماشافه مدري منين سمع

الشاهين: اتصل بيه واحد من ربعنا شايفهم يتعاركون وگلالي شمدريني انا

مسحت على وجهي بحيرة احس گلبي ينازع بين ضلوعي

يمان: هذا ضرغام اريده تجيبونه الي سحل سهلة بس خلي باتر يطلع منها بسيطة

بقينا منتظرين نص ساعة وطلع الدكتور فزيت رايحله

يمان: دكتور طمني على اخوي

جاوبنيي ببتسامة مطمنه

- لا تخاف ماكو شي خطير الحمد لله الطعنتين ما مأثرة على الاعضاء والنزيف وكف لكن فقد دم هواي وفقد الوعي بسبب النزف وضعة مستقر يبقى تحت العناية كم ساعة وبس

زفرت براحه وتنفست الصعداء

تشكرت الدكتور وراح بقينا بالمستشفى ننتظره على ما يصحى من البنج ونقلوا الردها خاصة

جان بعده هسه صاحي من البنج اتقربت بسته براسه

الشاهين: سدوا حلگة هسه بس يكعد يفضحنا ويشهرنا

جر دائب الكرسي وكعد يمه يحجي

دائب: باتر شسوولك جوة

تمتم بألم كوه يجر الكلمه

باتر: هذا الدكتور ابن الـ**** نـ**** *** بالخياط يابه لا تبنج مايقبل

سديت حلگه اريدة يسكت ماكو وهذول ناصبين عليه الهتليه

يمان: عوفوا شهرنا

بعد وجه من ايدي وكمل

باتر: ابن النعال لزگ الا هو يخيطني اكله اريد الدكتورة ام اصابع الحلوة مايقبل ** عرضك

الشاهين: رحمة لامك اسكت راح يجي الدكتور

صاح بكل صوته

باتر: خاب ابو حلك زيج الك وللدكتور لا تخاف ماگللهم نشتغل ويا المهربين

گوه ساد حلگه وهو بعده يريد يحجي خزانا بنص المستشفى حتى دائب المايضحك فقد من الضحك على سوالفة اخر شي الشرطة رادت تاخذ اقواله اول ماحجه ويا الشرطي بسرعة گال

باتر: لا ترا احنا مانشتغل ويا المجرمين اجذب انا لا تسجنوني

ويصيح بكل صوته

باتر: وسيراميك مكة جذب مانهرب احنا

متت بدمي اريد يسكت ماكو سوانا فرجه العالم اخر شي داركت الوضع ورحت للشرطي

يمان: يعني شلون تگدر تاخذ اقواله وهو بهذا الوضع بعده تحت تأثير البنج ماواعي لليحجي

جاوبني بتفهم وطلع باوعتله وحجيت

يمان: تف عليك وعلى زولك فضحتنا

الشاهين: يابويه كلت رحنا بيها مابيها مجال

الثاني يوم بس انا بقيت يمه بالليل والولد الصبح اجو وبعدهم ودخلت امي تدك وتلطم مدري منين سامعة باوعلي دائب وحجه

دائب: اجتك حكمة استلم وشوف شراح يصير

دخلت تحجي

حكمة: ياااعع ولكم عزيز گلبي بالمستشفى وانا اخر من يعلم

اتقربت عليها احجي

يمان: يمه منين سمعتي مابي شي وماردت اقلقج

حكمة: ميل ولك شلون ماتگلي هيج صاير بحاله

اتقربت يمه شالت طرف عبايتها وهي تحجي

حكمة: انا امك ينظر عيني يعيلون بيك واسكت .. وهاا  اشتاگينه ليام الماو اشتاگينه

انوب تگابلت هي وهو وياها سسونا فرجه للناس الي بالمستشفى لزمتها احجي

يمان: حكمة بروح امي بروح ابو غايب اذا تحبينه بسج احنا بالمستشفى

انوب گعدت يم رأسه وصارت تنعي وتبجي

حكمة: عليه المر تعده وضكت مر البيه ... وبعد مابيع اخوي وللغريب اطيه ....الشجر لو طاح وركه محد يغطي

الناس ادور المفرد حته تعيل عليه

دائب: يامفرد يمه غير هو مايگعد يوميه طلابه شكل

حكمة: اسكت انت عبنكم رويسيه من زمان ماتحبه عمت عيني عليك عزيز گلبي

تحجي وتمسح بوجه بعبايتها وتبجي وهو يتمسكن عليها وكل شويه يصيح اخخ اخخ گوه قنعتها تطلع شويه خلي الشرطي ياخذ اقوالة ماردتها تسمع شي

طلعت وانا رجعت وكفت يمه اريد اسمعة شيحجي تفجأت من گللهم

باتر: مادري منو ضربني جنت اتمشى على الكورنيش وفجأة صار الي صار ماشفت وجه الفاعل

استغربت كلامه ردت احجي بس هو اشرلي اسكت وانا هم ماريد استعجل من طلعوا سألته

يمان: احجيلي شنو الموضوع ليش ضرغام هيج سوى

غمض عيونه يحجي بعدهم اهتمام

باتر: منو يگول ضرغام سواها

يمان: دائب والشاهين واكو ولد وهم شايفكم تتعاركون

باتر: لا غلطانين الضربني مو ضرغام واحد ماعرفه

جريت الكرسي گعدت يمه احجي

يمان: باتر لا تفور دمي اعرف بيك هيج تگول تريد انت تاخذ حگك بيدك فاذا صح مثل متگول على الاقل گللنا نسويله جرة اذان وخلي يولي

باتر: يمان تعبان اريد انام لا تلح گلتلها مو هو

غطى روحه وغمض عيونه سوه نفسه نايم گمت وحجيت

يمان: خوش انا راح اسد السالفة واصدك كلامك بس اي شي يصير بضرغام يا باتر لو تطخه شعراية راح احملك المسؤلية بسيطة

طلعت وحكمة استلمتني تلوب تريد تعرف منو هيج سوى بي حجيتلها الكلام الگالة حتى هي ماقتنعت عفتهم يمه وطلعت نزلت للحديقة محتار مدري شسوي وانا متأكد اذا جان فعلًا ضرغام ورا السالفة باتر بباله شي ومايعديها اله بسهولة مستحيل

اخذت نقالي واتصلت بواحد من جماعتي كلفتة بس يطلع باتر من المستشفى يدزلي واحد يراقبة الي

غلقته وشفت خليلي دازلي مسجات منهن كاتبة

" ليش ماكو صاير شي "

اتصلت عليها ماجاوبتني بقيت گاعد شويه گمت ردت ادخل هي رجعت اتصلت ...

❛❛❛❛

خيال"

جنت اغسل بالطرمة لان غيرنا زجاج البيت وجانوا عمال يرممون الباقي امي سوت علينا حمله

سمعت نقالي بالمطبخ يدك شمر الصوندة وردت ادخل صاحت بيه مانعتني

هيلين: اذا دخلتي وعفتي الطرمة على النص رجلج اكسرها

خيال: يمه ماتسمعين تليفوني يدك خاف وحده من زميلاتي او صديقاتي محتاجة شي

هيلين: اذا دخلتي بعد ماطلعين كملي شغلج

نفخت بملل ورجعت اغسل وادردم طلعت رميم تباوعلي و افعة تك حاجب حجيت بضوجه

خيال: وشبيج انتي الثانية هيج تباوعين

اتقربت مني تحجي بهمس وترگص بحواجبها

رميم: يموني ابو طول الحلو جان يتصل

شمرت الصونده من ايدي وحجيت

خيال: جذذبب

رميم: على كيفج لا يطگلج عرگ خلصي شغلج حياتي لا هيلين تطردنا من البيت

خيال: حبيبتي رمرم جيبلي النقال والسماعات حبابه بداعتي

رميم: انا معليه

خيال: بداعة خوخه

حجيتها بتمسكن واني اترجاها ضحت وتقربت جعصت خدودي تبوس بيهن وتضحك

رميم: اروح فدوه الخوختي كبرانه وصاير تعشك ولا مو اي واحد ثكيل وصاك المنطقة

ضربتها بالصوندة

خيال: نجبي هسه تسمعج امي وتصدك

رميم: جا جذب غير هاي الحقيقة

حجت الكلام ودخلت للبيت طلعت انطتني النقال والسماعات ودخلت تكمل تنظيف جوة

وفعلا لگيته متصل رجعت اتصلت عليه خليت السماعات بأذني والنقال بالمخبأ السري بس عند البنات جاوبني بس صوته تعبان ومبحوح

يمان: خليلي

خيال: وينك من البارحة ماكو

يمان: هالدرجة مشتاقلي وتدورني

خيال: ولا يستقر حلم البنات شو مصدگ روحك

حجه بحسره زفرة النفس وصلتني

يمان: اذا عندي واحد مثلك يدورني ليش ماصدگ روحي

ماعرفت اجاوب غيرت الموضوع

خيال: لا صدك وينك من البارحة ماكو

يمان: هيج صارت سالفة صغيره وخلصت على خير لا تشغلين بالج ، ايي ماگلتيلي شني هذا الصوت شجاي تسوين

خيال: عدلنا البيت وهسه جاي ننظف بي وانا اغسل بالطرمة

يمان: هسه ايدك لازمه بيها الصوندة والثانية بيها ماسحة والتليفون وين شلون مسيطرة

خيال: ينرادلها علم مخليه سماعات

سكت شويه بعدها ردف بصوت راخي اقرب للهمس

يمان: وين مخليه تليفونج

خيال: هاا اا شسمه ماگلتلي شصاير وياك

يمان: لا تغيرين الموضوع النقال وين مخليته

خيال: اكلك انا اروح امي تصيحني بعدين نحجي وانت هم مبين تعبان نحجي من ترتاح

يمان: ههههه براحتك خليلي تصبح على خير

خيال: وانت من اهله

غلقته من عنده احجي

خيال: الفاسق يسألني وين مخليه التليفون

بعدها سمعت صوت الباب تندك دكات متقطعة عرفتها دگه ضرغام اتقربت فتحت اله الباب دخل وجه مستفسر سألني

ضرغام: خيال هاي شصاير

رجعت لزمت الصوندة مكملة غسل

خيال: مثل مداتشوف زرفوا البيت علينا والفضل يعود الك طبعا

ضرغام: شنو بسببي شلون عرفتوا اجاكم تهديد لو شلون ؟!

خيال: لا وحتى بابا ماراد يخوفنا وگال على اساس عالبيت البصفنا بس احنا مو اطفال وتعبر علينا

تقربت منه اضرب على صدره بظهر كف ايدي واحجي بحرگه

خيال: يا اخييي احسس احس على نفسك راح تدمرنا والله والعظيم راح تنهينا

بعدني احجي طلعت امي صاحت بيه مسكتتني

هيلين: خيال شنو لزومه هالكلام هو شعليه قابل الطلق علينا لو على الي بصفنا

باوعتلها بطرف عيني رجعت عيني عليه شفته واكف يباوعلنا بصدمه ويباع ريگه بتوتر عفتهم ودخلت جوه افور من القهر وامي بقت تحجي ويا وتحضن بي مكيفه لان رجع اليوم

من بعدها دخل الفرفته وماطلع منها حتى بابا لا يشوفه ...

ثاني يوم داومت عادي واصلا مابقى شي على الامتحانات وبدأت احضر للتخرج مالتي

طلعت من الدوام واتذكرت اليوم لازم اشتري علاج امي وصتني عليه وبابا ما فارغ طلعت من الجامعة مستعجله ماشوف كدامي اريد اعبر للصيدلية

شفت ثنين اشخاص ملثمين ووجهم ممبينه مثل اليتختلون ويراقبون بيه يبس گلبي من الخوف تراجعت ماسترجيت اعبر الشارع خفت يصير شي

ردت ارجع للجامعة اهرول بخطواتي حتى اصير قريبة على الطلاب على الاقل سمعت صوت سيارة صارت بصفي وصوته وهو يحجي

يمان: وين شبيج مستعجله هالگدوتج وتركضين جنج برغي فالت

باوعتله خليت ايدي على گلبي وحجيت بنفس مقطوع

خيال: اشوه هذا انت

نزع نظارته وحجه

يمان: شبيج وجهج اصفر

ردت احجي قاطعني من فتح الباب وردف مكمل

يمان: اصعدي بسرعة

حجاها بخوف

صعدت ويا اجر النفس بصعوبه انطاني بطل مي شربت منه وحجيت

خيال: شفت ثنين قبل شويه انا ما متاكدة بس يمكن يراقبوني يمان خايفه گلبي راح يوكف

رفعت عيوني اله شفته صافن عليه ببتسامه

خيال: شبيك

يمان: اول مره تگولين اسمي

خيال: هاا انا

يمان: شو بلا عيدي

خيال: شبيك انا وين احجي وانت وين ملتهي ترا والله كلش خايفه

شغل السيارة ومشه

يمان: لا تخافين انا احلها

خيال: هو انت شنو شغلك

يمان: عندي معارض سيارات ومحلات ذهب والبسه رجالية مو تعرفين

خيال: وشدخلك بهاي الناس والعصابات

سوه حركة بحلكه تدل على عدم الاهتمام وگال

يمان: عندي معارف وناس تعرفهم لا تشغلين بالج ولا تخافين حلها يمي

سكتت وهو كالعادة يسوق وكل شويه يباوعلي ويبتسم الحدما وصلني للمكان المعتاد

لطمت على خدي وحجيت بفزع

خيال: صخام ولطام نسيت علاج امي ماشتريته اليوم تطردني من البيت

ضحك وحجه

يمان: انتظريني هنا هسه انزل اشتري الها انطيني اسم العلاج

طلعت قلم اكتب اسم العلاج واحجي

خيال: راح اتعبك

يمان: تعبك راحه خليلي

راد ينزل ستوقفته احجي

خيال: الفلوس

لبس نظارته تجاهل كلامي ونزل حجه

يمان: اعتبرهن دين وانا اعرف شوكت اخذه منك

قفل عليه السيارة وراح جاب الدوا ورجع انطانيا حجيت

خيال: يعني هسه ما الله يهديك وتاخذ الفلوس

يمان: لا وكافي يلا نزلي لو حلتلج الگعدة بسيارتي

خيال: اووي عابتلك مو صوجك

فتحت الباب حجه

يمان: خيال

خيال: هاا

يمان: انتي شايفه شلون يهتز گلبي من اشوفج

همست گوه صوتي يطلع

خيال: شلون؟

جاوب وعيونه هايمه بتفاصيلي

يمان: مثل فنجان ببيت ناس شيوخ

خيال: انا تأخرت

ضحك

يمان: انزلي وروحي وانا امشي وراج الحد ما تدخلين البيت

سلمت عليه وتشكرته نزلت مطمنه لان هو موجود يوميه ارجع خايفه واركض ركض وهم گلبي يرفرف من حجايته حسيت روحي مراهقه ولا يكول عمر 22 سنه مدري ليش ...

دخلت للبيت ومر اليوم طبيعي وعادي غير باخر اليوم كبت العيطه المعتادة بين ابوي وضرغام واصلا تعودنا على هذا الوضع امي تفرفح وابوي عصبي ويصيح وضرغام يسمع من اذن ويطلع من الاذن الثانيه وصرت من تصير هالحالة اكعد على الدرج وابقى اباوعلهم بلا مااحرك ساكن رميم كذالك

اصلا صرنا اذا ما صارت مشكلة بالبيت نستغرب ...

يمان"

رجعت انا ودائب بالليل البيت حكمة حتى اشوفها وباتر باقي يمها تداري من بعد ما طلع قفل موضوع ضرغام وبقى مصر ان هو ماسواله شي الضربه مايعرفه وانتهى ... بس انا اعرف جاي يلعب ومستحيل اخلي يسوي شي

اول مادخلنا للغرفة مالته شفنا غاط بالاكل والفواكه وحكمة نايمه على خوانيگه تبلع بي كوه

بلع اللكمه وحجه ستنجد بينا

باتر: ولكم الحگوليي وين عايفيني هنا وحدي وحزام الحمزة اذا بقيت بعد يومين اموت وخطيتي برگبة حكمة

حكمة: فلش عدوك الحمزة كون اكل ولك حتى تعوض الدم الراح منك

باتر: حكومه يعني اذا جنت خسران لتر دم هم من البارحة لليوم زدت خمس لترات والكيتلي

اتقرب دائب يحجي ويا حكمة

دائب: خلي يولي يمه وكليني انا

حكمة: بعد روحي اذا ماوكلك انت العاقل اوكل منو

باتر: شني قصدك هو عاقل جا وانا

حكمة: شلايتي ومسربت انت

كعدت يمهم احجي

يمان: حكوم اليوم ناويتها علينا

حكمة: عبنكم كلكم سربتية

دائب: اخ حتى انا

حكمة: انت اول واحد .. الا ما كلتلي شلونها بنيتك

دائب: احم زينه

باتر: يااخي انت ماناوي تبطل من هالطفلة المسكينه

تحولت ملامحة للجديه الحادة وجاوب بجمود

دائب: لا

باتر: شمستفاد عود

دائب: حكمة انا رايح غير مره امرلج

ماحجت شي لان تعرفة من هيج تصير ملامحه يعني بعد مايگدر يتحمل وعلى اي لحظة ينفجر

سلم وراد يطلع صاح ورى باتر بلوم

باتر: انت بقى بهاي معتقداتك ولا تتخلى عن بنت الناس

وكف بالباب وحجه ببرود

دائب: اكو واحد يتخلى عن اوتار گلبه

عافنا حايرين بسالفتة وطلع وحكمة بقت تحجي علينا لان ضوجنا

شويه وندگ الباب كمت حتى افتحه بس وصلت الباب اجاني نفس عطره المقزز انصدمت معقوله ويطلع هو واعرف شلون احير واتفنن بعذابة

بسرعة فتحت الباب وخابت امالي من شفت ولد ابو توصيل بيده باقة ورد جوري حجه

- باتر او يمان موجودين

يمان: ايي انا يمان خير

- هاي باقة ورد وصلكم مخصوص وويا هذا الكارت

اخذتهن منه تشكرته وراح فتحت الكرت مكتوب بي

" فرحت مو عبالك انا العلى الباب حتى تتفنن بعذابي تخسى توصلني هذا واجب بسيط الابني والحمد لله على سلامتة عود گله مره ثانية لا يلعب ويا الكبار والباقة غرگتها بعطري حتى اذكرك بزمن الذكريات الجميلة مع الست الوالدة "

عصرتها حيل وشمرتها بالزبل وباقة الورد بالشارع اخذوها الجهال يلعبون بيها ...

مرت الايام وباتر صار زين ورجعنا الشغلنا بس صرت ماشوف ضرغام واسأل عليه الشاهين يكلي لا ما شايفة

حتى خيال سالتها كلتلي يرجع للبيت ينام ويطلع وانا هم اراقب باتر مايسوي شي ولا حتى يراقب ضرغام رغم هذا ماتطمنت ابد

خيال"

دخلت للبيت فارغ محد موجود تذكرت اليوم اهلي بالزيارة وانا مارحت لان عندي فاينل ومخبوصه بالامتحانات بس ضرغام وبغرفته

دك تليفوني يمان بسرعة جاوبت اجاني صوته يگول

يمان: العصفورة گلتلي خليلي اليوم وحدة بالبيت

خيال: عفية عصفورة العندك ماتضملها سالفة ابد

يمان: غير تحبج وتسولفلي كل سوالفج يولو انصهر عليهن

خيال: احترم نفسك

يمان: شنو رأيج تفتحيلي الباب اجي يمج خاف تختفين

خيال: احرم نفسك

يمان: نسوي سهرة بهالظهرية واخليج بحضني نباوع فلم تايتنك

خيال: احترم نفسك عاد

مل وصاح بيه

يمان: خبب هووو شني علگ الكاسيت يمج ديري المحطة

خيال: انت صاير فد مره لا يكون مصدك بروحك ترا اني مماافكر بيك

يمان: بس من الصبح لليل

ضحكت فجأة اشتغلت يمه اغنية رياض احمد

واجب بالروحك اشريك

خيال: شكد تحب اغاني التسعينات

يمان: اكو احلا منهن اغاني هالوكت كلهن طربگه ذوق باتر

بعدني احجي فجاة سمعت صوت طبة قوية ببيتنا جوة شهكت بخوف

يمان: شكو خيال شبيج

خيال: ماعرف صوت طبه خلي اشوف صرغام شبي فدوه

يمان: خليج على الخط وانزلي واذا احتاجيتيني انا ببيت حكمة

عفت الخط مفتوح ونزلت اركض اريد اعرف شكو

فتحت باب غرفة ضرغام وصرت بفزع من شفته واگع مغمي عليه والميز بصفه مگلوب اتقربت منه اصرخ واحجي

خيال: ضرغام ضررغغاام فدوه شبيك جاوبني يمه اخوي مدري شبي

اتقربت خليت راسه بحضني وهو فاقد وصار يلطلع من حلگة ماده بيضه وجسمه ينكث مثل الواحد بي صرع اخذت نقالي وحجيت بفزع

خيال: يمان فدوه تعال الحگني اخوي راح يمووت مدري شبي

يمان: فتحي الباب جايج

شمرت التليفون ورجعت مدري شسوي احاول اصحي اضرب على خده اصيح بأسمه ماكو مثل الميت

شويه وصار الباب يندگ حيل وبقوة عرفته هو كمت ركض فتحته دخل يمان وورا حكمة تحجي

حكمة: خوخه شبي ضرغام

حجيت واني ابجي

خيال: ماعرف ماعرف فجأة لكيته واكع

حجيت الكلام ودخلت كدامهم اركض دخلنا للغرفة وهو بعده على نفس الحالة اتقرب يمه يمان وحجه

يمان: خابرت الاسعاف هسه يوصلون خيال جيبي مي بارد بسرعة

حكمة: يماا هذا راح يموت خلي ماخذه احنا ماننتظر الاسعاف

ركضت جبتله المي وروحي مفرفحه ماعرف شسوي غير اصرخ وابجي

صار يبلل وجهة واديه هو وحكمة الفرفحت عليه اخر شي باوع بالغرفة دور بالارض لگة سرنجه وغلاف ابرة فارغ

خيال: فدوه شنو هاي

يمان: هذا شبي اخوج يريد ينتحر هالدرجة

خيال: شنو هاييي

يمان: هذا اقوى انواع المخدرات انوب ماخذه ابره بالوريد

حجه الكلام واتقرب يحجي

يمان: ساعديني ساعديني هذا اذا بقى هيج هسه يتصلب وحتى النفس يگطعه

تخبلت اتقربت اريد اشيله ويا دك نقال يمان

كام وحجه

يمان: هذولي الاسعاف اكيد وصلوا خلي اطلعلهم

طلعلهم ماكو ثواني ودخلوا بعدوني واسعفوا بسرعة رحت لبست عباية من امي شلون مجان وطلعت اركض وراهم صعدت ويا بسيارة الإسعاف ونقلونا للمستشفى حكمة ويمان ورانا بالسيارة

نزلت وهو اخذوا مني وماخلوني افوت ويا متت من البجي كوه حكمة لازمتني

حكمة: گولي يالله شمالج هاي انتي القويه لو امج يمكن ماتت من الخوف اذا تسوي مثلج

خيال: بس اريد افهم ليش هيج يسوي بروحه شنو الفايده من الموضوععع

ساعة تجر ساعة وماكو خبر بديت افقد اعصابي ومااتصلت بواحد من اهلي خايفه

طلع الدكتور وحجه

- ماخذ جرعة مخدره كلش قويه وبكمية جبيره وجسمه مامتحمل الصدمه لهذا ساءت حالته

على اعصابي گاعده موتت نفسي يردون يهدوني ماكو الحدما گعد وانتبة احس روحي راحت

حجوا ويا ملو ان انت مدمن ولازم تتعالج وعو يحلف ويتكفر مو مدمن وان هاي اول مره يجرب بيها هذا السم

رجع طبيعي ولا كأن شي صاير حتى وجه الشاحب رجع طبيعي شويه ...

رجعنا للبيت بقيت اتعارك ويا اريده بس يسمع مني ويتعالج ماكو

اخر شي سمعته يتعارك بالتليفون ويكول

ضرغام: غبي جا المصلحتي همزين ما موتتني

مليت احس كل النحجي مايأثر بي ولا لحظه وحده ولا شويه

رجعت ادك والطم يم يمان من بعدها رجعوا اهلنا وهو أكد عليه مااجيب طاري الاي واحد سكتت بس انا ماگعد الا حجيت الرميم كلشي يلا ارتاحيت ...

يمان"

جنت واكف يم الجامعة اراقب الوضع من بعيد وهم مامطمن اخليها ترجع وحدها وفعلا شفت سيارة سودة واكفه تراقب تنكرت وجنت مغير سيارتي حتى لا تنعرف شفت السيارة وكفت تراقب من بعيد وشفتها هي صعدت بالخط مالتها وتحركوا والسيارة وراهم

مشيت اراقبهم من بعيد لبعيد على امل اطلع غلطان لكن الي صار وصلت للبيت والسيارة الي تراقبها وراها

فتحت عيوني بصدمة من شفت صمد نزل منها يباوع على البيت وحوالية وكأنه حفظ المنطقة ورجع صعد بالسيارة

بسرعة صعدت اريد امشي ورى

يمان: ايي واخيرا لگيتك اخخ لو احظى بيك الوحدك الا اشوفك نجوم الضهر

مشيت ورا الحد ما وصل بيت كلش جبير راد يدخل من الباب صحت علية بكل صوتي

يمان: صممددد

بسرعة التفت ورى يريد يعرف منو الصاح عليه من شافني تفاجأ وحجه

صمد: انت شجابك هنا

يمان: هاا زين تعرقني همزين طلعت نعرفني

اتقربت منه تقدموا 2 صاروا گباله

يمان: يعني هم مو رجال وهم تخاف من خيالك شعبالك لعد مالگاك وين تضم روحك بشيشيه هم اطلعك منها

صمد: نجب لك لا اخليهم يوكلونك وحل هسه

سحبت سلاحي من خصري وهم هم مدوا اديهم على اسلحتهم

ابتسمت فككت المسدس وخليته على بنيد السيارة وحجيت وانا رافع ادية

يمان: وهذا انا صرت من العزل اذا زلمك بيهم خير خلي واخد منهم يتدنالي

صمد: روح العب بيعيد

ردف مكمل فتحت عيوني بصدمة من كمل كلامة

صمد: اذا خايف على الحلوة انصحك نصيحة ابتعد مني لان كلش جاي تدخل بمزاجي وانا مابيه حيل للكتكوتات ودلعهن وخاصة انت اكيد ماناسي غرفتي الخاصة الجانت موجودة بالبيت

جان يحجي وانا احس الدم صار يفور براسي ويجري تذكرت غرفته وادواتة السادية النقرفة

صحت بي بكل صوتي

يمان: لا عبالك تلزمني من الايد التوجعنيييي وحق كلمن عنده حق اگلب الدنيا فوك راسك

حجيت الكلام واتقدمت هجمت علية لزموني هذولي مايخلون اوصله يدفعون بيه حاجاهم ببرود وستهزاء وهو يدخل

صمد: لا تأذونه هذا ابني ترى

خلاني شطت اريد بس اوصله بس دقيقه وحده احرمه النفس ماكدرت هذول هواي وانا واحد سدوا الباب

وانا بقيت بناري انوب يهددني بيها شسوي شسوي حتى احميها ماكو غير طريقة وحده ايي ماكو غيرها

لميت اسلاحي وصعدت سيارتي ومشيت گبل بوجهي البيت حكمة دخلت بهمه من الباب اصيح

يمان: يمه حكمة يمه

طلعت مستغربه من صياحي

حكمة: خير اللهم اجعله خير شني ولك شمالك

يمان: اريد اتزوج ....

  يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

اسفه على التأخير هذا الي گدرت اكتبة اعذروني قلبي والله مغمضه ومطفيه من النعاس وكاعدة اكتب + من باجر نبدأ بالتنزيل اليومي ويستمر منتظم دام ماعندي شي بعد واذا تفاعلكم حلو ويشجع 🙊

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ وتعليق على الفقرات ♥️

متابعة ممتعة🦋

حساب الانستا تابعوني

#تاروت

البارت «8»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

منذُ قُرونٍ وِلدتْ روحي منذُ قُرونٍ كانَ بُكائي

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

يمان"

حكمة: خير اللهم اجعله خير شني ولك شمالك

يمان: اريد اتزوج

صفنت عليه ثاغره بوجهي مصدومة من السمعته

حكمة: ها يويمن يمه متحلم بالمره البارحة

يمان: هسه گليلي تخطبينها الي لو لا اروح الوحدي

حكمة: صارت اخطبها الك يعني عندك وحيدة

گعدت على التخم وهي تحجي

حكمة: تعال بلا اگعد يمي وسولفلي مني هاي بنت امها وابوها السحلتك وخلتك تفكر بالعرس وانا صار سنين افتر وراك وماكو

تقربت قرفصت گبالها حجيت

يمان: بس كون ماتنصدمين من الخبر الراح تسمعينه

حكمة: خايب شنهي حزورة دحجي فتيت گلبي هسه تطلع وحدة موزينة وعلي اتبره منك

يمان: خيال بنت حجي سليمان

جاوبتني بصدمة مامصدگة السمعته

حكمة: اه الله عليك صدك يو تتكشمر وياي

يمان: يمه هي مال تكشمر البنية رايدها انا واريدج تخطبينها الي شتگولين

حكمة: شگول خلي البت تخلص امتحانات وتتخرج الله كريم

يمان: يمه باجر روحلهم

حكمة: اصبر جا هو حبها ولبط غير

عدها اهل خل نتاني جم يوم

يمان: خوش بعد ماوصيج يمه اعوفها وراج انتي رتبيها وگليلهم الي يأمرون بي انا حاضر

ضربتني وحجه

حكمة: شلايتي وانا اگول شعده الفر / خ لابد عدي طلع مخلي عينه على البت ماميت عليه

بست راسها وايدها

يمان: انتي الخير والبركة يمه ، انا رايح هسه عندي شغل وانتظر الخبر منج

حكمة: يمه منك دهربهن عليه وفلت

طلعت من امي ورحت للمستودع اليوم ينزلون بي بضاعة الجماعة شرحبيل مافهمت شي من دائب بس العرفته ان شرحبيل عدو اللدود الصمد العار

وصلت هناك سلمت عليهم جانوا ينزلون بالغراض وباتر ودائب وياهم اجاني باتر يحجي

باتر: خطر هاي تبقى الباجر المفروض اليوم نصرفها منا للمكان المتفق عليه

يمان: لا مستحيل اليوم تنصرف بعدنا كلشي ما مخططين اليوم بالليل اگعد واخططها الكم حتى يكون كلشي جاهز

باتر: بس انا سمعت اكو مخابرات قوية ليش ماتسمع مني ونگعد هسه نخططها يمان مامرتاح لا تجازف

يمان: باتر صاير شي وانت متأكد منه حجيك مو خالي

اباوع عليه اتهرب من الاجابه وحجه

باتر: لا ماكو شي اروح اشوفهم وين وصلوا

بقيت اباوع ورى سالفتة ابد مو خاليه انتبهت على صوت حجه

شرحبيل: يعني انت يمان

باوعتله مد ايده صافحته وحجيت

يمان: ايي انا تفضل منو حضرتك

شرحبيل: وياك عبد القادر الملقب بـ شرحبيل

يمان: تشرفنا

شرحبيل: ماتشبه صمد القرش اليشوفك ولا يگول ابوك

اتخبل ولا واحد يگول ابوك ، حجيت بحدة من بين اسناني

يمان: لا تگول ابوك

ضحك بكل صوته وحجه

شرحبيل: مبين كلش تحبه

يمان: اموت عليه احبه بگد دم سنوني

شرحبيل: شكد تدفع

حجه الكلام وغمزلي افتهمته يعني يجيبلي صمد

يمان: الضعف وبضاعتك توصل بالمجان بلا ماتدفع

شرحبيل: واذا خسرت بالمناقصة

يمان: انا سدادك

شرحبيل: متفقين هاي هي

يمان: هاي هي

سلم عليه عافني وراح رجعت افكر بسالفة باتر وهو اليوم ابد مو طبيعي دورت عليه بالمكان ماكو مالمحته سألت عليه واحد من الولد محد يدري بي وين

دخلت للمستدع شفته كاعد على وحده من كراتين منطيني ظهره مايشوفني ويحجي بالتليفون لفتني الي جان يحجي

باتر: اسمع لك بعدك ماتعرفني زين وكلامي هذا خلي يوصله ويتعدى وحق الحق افرها فر واخبطها بيدي واشرب صافيها ومايهز شعراية مني هالزعطوط

سكت شويه يسمع الطرف المقابل ورجع كمل

باتر: هاي الإبرة الاخذها خلي تكون جرة اذان اله وبعد حسابي ويا ماخلصان بس اذا خبر او صار للبضاعة شي مايلوم الا روحه

سد الخط والتفت يحجي

باتر: ضرغام الزعطوط عليه انوب هيهي هي

نصدم من شافني ورى اباوع عليه قبل لا يحجي صحت بي

يمان: ماريد اسمعلك نفس

باتر: يمان افهم الموضوع

يمان: فهمت الموضوع مايحتاج توضيح الإبرة انت دزيتها الضرغام موووو

صاح بيه

باتر: وشتريد اسكتله وانت تعرف بي شسوه

يمان: كنالك وحجينا وياك خلي نربي بس مو الدرجة تمووتتت الولد فوك الخيسه العايشين بيها تريد تصير قاتل هممم

دخل دائب على صوت صياحنا المله المستودع

دائب: شبيكم هرجتونا هيييي

يمان: هلا اجه الزين اكيد تعرف شمسوي مو

دائب: ومرض لا تصيح صار الي صار وانتهت السالفة

بعده ما مخلص كلام اسمع صارت هوسه برا وصياح وصوت شاهين طالع لحظات ودخل ضرغام يهوبز ويصيح وويا بعد واحد اباوع الباتر كبل هحجم عليه حتى مافهم السالفة ودائب هم

عفتهم وطلعت

يمان: يطبكم مرض عسى ما تتكاتلون مالي شغل

شغلت سيارتي ورحت للشقه كعدت اخطط حتى بالليل نطلع البضاعة بعد ماتتحمل تأخير ...

❛❛❛❛

خيال"

فزيت على صوت صرخه امي جنت فوك وسمعتها تصيح عبالي ضرغام رجع فقد الوعي نزلت اركض ورميم سبقتني شفتها لازمتة من وجه الصاير خريطة من الكدمات والدم جفلت من شفته وامي تحجي

هيلين: شنو هاي ولك وين متعارك شبيك مدمه هيج احججييي

بعد اديها بنتره وهو يحجي

ضرغام: وخري يمه ماكو شي حادث بسيط بالدراجة

لطمت على خدها تفرفح

هيلين: ولك يادراجة هاي الدراجة تزوگ عيونك شلعت گلبي ضرغام وتالي وياككك راح تموتني ناقصة عمر

ضرغام: اهووو يمه اخلص من ابوي تطلعين انتي الظاهر انتم ماتردوني ابقى بالبيت

عافها وطلع وهي بقت تفرفح وتنازع بروحها اتقربت لزمتها ورميم تهز بيدها بحرگه معاجبها رادت تحجي بس سكتت عافتنا وصعدت وانا بقيت اهدي بأمي الي ضغطها ارتفع وحتى خشمها صار يجري دم

ورغم كل هذا مانطت بي وبقت تخليله مبررات ونبهت علينا من يجي بابا مانحجيله شي ماجنت اريد اسكت بس خفت على حالتها

من بعدها كثرت مشاكل ضرغام واحنا عجزنا ويا وخاصه ابوي ماخلا شي مسوى ويا حاول بالتفاهم ميفيد بالعصبية هم ميفيد وصل بي الامر حبسه سبوع كامل وهو گعد بالبيت وهم مافاد بس يطلع بابا يرجع السوالفة وكل السبب من امي ضيعته بدلالها الزايد وصار مايسمع من احد وحتى شرب يشرب كم مره دخل للبيت سكران واسمع امي تدك وتلطم وضمت هالشي حتى علينا

وانا هم ماعرفت اتصرف يمكن صغيره يمكن مافتهم بقيت ساكتة

مرت الايام وخلصت امتحانات وتخرجت من كلية القانون خلال هاي الفترة وضع بابا ووضع البيت بصورة عامة كلش تأزم كوه خلصت امتحانات على اعصابي ويمان احجي ويا بين فترة وفترة و مرات اشوفه واگف بباب الجامعة صح مانلتقي هواي بس احسه يگلي اني يمج لا تخافين من شي وهذا الشعور كلش جان مريحني

وبيوم جنا گاعدين اني ورميم عطلة ودائما نسهر سوا جان الوقت مو كلش متأخر ساعه عشره بالليل

دك تليفوني حجيت بملل وعيوني على التلفزيون

خيال: اهووو هسه وكتك اريد اكمل الفلممم

جنت متربعه و رميم جانت متمدده بنص جسمها وراسها بحضني رفعه وحجت

رميم: هذا يموني الصاك يوميا هيج وكته

دمغتها وحجيت

خيال: انتي عندج سونار بعيونج تعرفين منو المتصل قبل لا تشوفين

رميم: مبين عيني هو منو يگلبج غيره

دفعتها وكمت وانا ادرم عليها شفت مكالمة فائته منه ورجع اتصل مرا ثانية بس جاوبت بسرعة حجه بدون سلام وكلام

يمان: انا ببيت حكمة تعاي اريد احجي وياج بموضوع مهم

خيال: لا لا وين اجي احجي هنا

يمان: موضوع مهم مو مال تليفون اريد اشوفج وانا احجي

خيال: فدوه يمان شكو

يمان: تعاي وبلا نقاش يلا منتظرج

حجاها وسد الاتصال

رحت الرميم قبل ماحجي گالت

رميم: سمعت بس شلون تطلعين هسه امي ماتقبل

خيال: وين اطلع مستحيل ماسويها

رميم: بلا يموني عنده موضوع مهم مثلا موضوع خوووطبهه

كلمتها خلت گلبي يرجف وتوترت كلش

خيال: لا شنو خطبة وقابل احنا شكو بينا هو مجرد كلام وديساعدني لا اكثر

سمعت امي تصيح عليه من جوه رحتها مديت راسي من الدرج

خيال: هاا يمه

هيلين: اخذي اختج وروحي يم حكمة مدري شعدها اتصلت بيه تكول محتاجة خيال بسالفة

صفت بوجه امي رجعت حجت

هيلين: بسرعة المره تنتظر عيب

ماكدرت ارفض دخلت لبست وشاح على ملابس البيت وطلعنا اني ورميم استوقفتني يم الباب وگالت

رميم: انا ابقى هنا انتي روحي افتهمي الموضوع ورجعي

جريتها من ايدها احجي

خيال: امششيي ولج اخاف اروح وين تردين توديني الوحدي

دفعتني طلعتني من الباب وهي تحجي

رميم: انا واكفتلج هنااا دمشييي شوفي شنو الموضوع واحجيلي ترى الفضول كتلني

مشيت وانا احجي

خيال: اووف منج اوف

اتقربت لگيت الباب شويه مفتوح انا متعوده دائمًا ادك الباب الجوة اول مادخلت ماحسيت الا نجريت من ايدي بقوة شهكت بخوف

يمان: كضيتج متلبسه وين متسلله البيتنا بنص الليل

حجيت بخوف

خيال: شبيك زين ما وكفت گلبي هو هيج

دنك حتى يصير بطولي باوع بعيوني وحجه

يمان: يابويه خوفتك خليلي انا اسف

خيال: وين حكمة تصيحني اريد اشوفها شتريد وارجع بسرعة

تجاوزته اردت ادخل لزم ايدي ورجعني المكاني جانت جگارة بيده اخذ منها اخر نفس وشمرها تقرب وحجه

يمان: مو حكمة تريدج انا اريدج

خيال: يعني شنو 

يمان: يعني انا اريدج

احس نفسي نكتم وصار مغص ببطني فهمت شنو يريد بس ردت اتأكد اخذت نفس عميق وحجيت بصوت يرجف

خيال: مافهمت عليك

جنا واكفين يم الباب وضوه الحديقة طافي ماكو غير الضوه الطالع من شباك المطبخ يادوب نبين بس عيونه يلمعن گدامي اتقرب عليه رجعت الي ورا احجي بخوف

خيال: يمان خليك مكانك لا تتحرك وفهمني شتريد ؟

تجاهل كلامي  رفع اديناته جانن يرجفن لزمني محاوط وجهي الضاع بين جفوفه همس

يمان: اريدك تصير خليلي وخليل گلبي يافزته

خيال: يمان

يمان: خيال احبج انا حيل احبج شاركيني عمري خلي نبني حياتنا سوه

ماعرفت ارد عليه هي صح لحظات بس انا حسيت الزمن وكف عندي والموضوع صار فجأة وبسرعة احس روحي ماجنت متهيئة اله كل الاحس بي رجفة جسمي ردت اتخربط ووجع ببطني ومعدتي صار همس

يمان: جاوبيني وكافي رجيف راح تموتين

نزلت اديناته من وجهي وحجيت

خيال: شجاوبك

يمان: ترديني مو ؟

رجعت نفسي على الحايط من تقرب عليه مخلي عكسه منتجي ابتعدت شويه

خيال: يمان الجاي يصير غلط انا من جنت احجي وياك ما بالي هيج تطور الامور بس هسه الجاي يصير غلط انا ماكدر اخون ثقة اهلي وخاصة ابوي يعني انت اذا صدك كلامك وتحبني مثل ماتگول بيت اهلي گدامكم مو بعيدين وشوكت ماتجون اهلًا وسهلًا بيكم واكيد  بابا يستقبلكم

ابتسم وحجه

يمان: انتي شنو منين الله خالقج

خيال: انا تأخرت لازم اروح

فتحلي الباب وحجه

يمان: احبج

ويا كل كلمة يگولها احس گلبي ينغزني

خيال: مع السلامه عفته ورجعت اركض

باوعت الرميم صافنه بوجهي ترمش بصدمة

رميم: الله عليج كل هذا صار بهاي الشوية الرحتي بيها

خيال: دسكتي انا الهسه مامصدگه اگول يمكن اتخيل بس السالفة صدگ

گمت فركت ايدي بتوتر ماعرف شسوي احس بقلق سمعت صوت تليفوني اجاني مسج شفته من عنده بسرعة فتحته كاتب

"  احبكِ من دون ان اعلم كيف اين و متى ؟ هكذا احبكِ ببساطة "

ورا شويه دزلي اغنية رياض احمد احبك ليش مادري ذوقة بالاغاني التسعينيه ياخذ گلبي ووراها كتب

" نامي لا تبقين گاعدة وتفكرين "

بقيت طول الليل اسمع بيها كل ماتخلص اعيدها واحس روحي تطير ويا كلماتها ماعرف بشنو جنت احس لكن الاحساس جان جديد عليه وگلبي طاير بي المهم بليلتها عشت بأحلام ورديه ورسمت حياة خيالية سعيدة بمخيلتي

ثاني يوم گعدت جان الوضع طبيعي والبيت هدوء نزلت الصبح رميم جانت نايمه وبس امي بالمطبخ تحجي بالتليفون اول مادخلت باوعتلي والابتسامة مرسومة على وجها استغربت حالتها

بس سمعتها تگول

هيلين: عيوني انتي ان شاء الله خير لا العصر ماعدنا شي تنورون شوكت ماتجون اهلا وسهلا بيكم

عفتها ورحت للثلاجه فتحتها اريد اسوي ريوگ اول ما لفظت اسم حكمة وگعت البيضة من ايدي للگاع وامي باوعتلي بخزرة سدته وحجت

هيلين: زفرتينا شبيج وجهج صار اصفر

خيال: ماكو شي هسه انظف المكان يمه

قبل لا اطلع من المطبخ حجت

هيلين: خلي نرتب البيت ونسوي ضايفة اليوم العصر جاينا ضيوف

خيال: منو الضيوف اول تالي يجينا خطار

هيلين: حكمة وعمات ابن بنت اختها جايينا موضوع خير ان شاء الله

جانت تحجي بأريحية والابتسامة مبينه على وجها غلست سويت نفسي مااعرف شي

مر الوقت وامي سحلت رميم سحل من الجرباية وخلتنا نسوي حملة على البيت وهي طلعت جابت ضايفة وانا الهسه مامستوعبة معقوله سواها بهالسرعة

اتصلت عليه اكثر من مره اريد اسأله ماكو جهازة مغلق

للعصر غيرت ملابسي ورتبت شكلي ونزلت شافتني رميم وحجت

رميم: لك شنو هاي الاناقة كلها علمود ...

خزرتها وسكتت لان امي واكفه

رميم: شنو هالترتيب المفاجئ

لميت شعري وحجيت

خيال: ليش يايوم انا جنت مو مرتبة

اندك الباب حجت امي

هيلين: اجوا الجماعة خلي نستقبلهم

اباوع الامي مخبوصة اليشوفها يكول بس تريد تخلص مني كل هذا وهي عبالها انا مادري على شنو جايين

استقبلناهم حكمة ووياها ثنين نسوان ماعرفهن ولا بعمري شايفتهن يم حكمة

سلمنا عليهم وحكمة تعرفنا بيهن

حكمة: هاي ام رضوان سليمه عمت ابني الچبيرة ، وهاي ام بسام حميده هم عمته

هيلين: اهلا وسهلا الف هلا مرحبا

مافهمت شي بس العرفته الاثنين عمات يمان

دخلنا وكعدنا يسولفن بس مبينه حكمة ماطايقتهن ولا هن طايقاتها والكلام ببينهم ملغم وحده تقصف وحدة حتى امي انتبهت

قدمتلهم الضيافة باوعتلي حكمة وحجت

حكمة: خوخه شو گربي يمي اليوم لا اجيتيني لا شفتج

خيال: جنت ملتهية خاله وامي كالت تجينا العصر مامريتلح اليوم اعذريني

حجيت الكلام وگعدت بصفها وباوعت عمته وحجت من ورى خشمها وحجت بستهزاء

ام رضوان: هي هاي المحامية لو الاصغر منها

خيال: ايي انا المحامية خيال سليمان اذا عدكم قضية اني بالخدمة

حجيتها بالشقة ردا على كلامها المدري شلونه باستني حكمة وحجت

حكمة: اروح فدوه الهاللسين ينگط عسل

حجت الثانية

ام بسام: ياا شو مبينه سمرة اختها احلى

فتحت عيوني حيل من وقاحة ردها وگدامنا حجتها عود بلا متقصد

ام بسام: هههه لا تفهموني غلط اقصد اخيتها حليوة

رميم: طبعا اصير حلوة عليمن اطلع غير على اختي

ندستها امي حتى تسكت بس هي ماهتمت وكملت

رميم: انتو جايينا ضيوف لو تقيمون جمالنا اذا ضيوف نخليكم على راسنا بس اذا تقيمن جمالنا فأحب اگلج خاله احنا مخلطين بين الجمال السوري والعراقي امنا سوريه واهلها من لبه الشام واكيد تعرفين الشاميات ينضرب بجمالهن المثل واكبر دليل امي كدامج راح تدخل بالثمانية واربعين واليشوفها يكول بنت العشرين سنه ،

اباوع الامي عطبت تأشر تريدها تسكت وهي ماتسكت مسترسله وحكمة تأيد بيها

رميم: والعراقيات هم ماقاصرات عن الجمال وخاصة الجنوبيات گد ماجميلات يسحرن النظر ونعشگن من النظرة الاولى وابسط مثال جيتكم اليوم فـ يا خاله يعني تخيلي هالجمالين الشامي والعراقي ينجمع ببنية وحده شراح تطلع اكيد ايه من الجمال

كامت حكمة وهي تحجي

حكمة: خايبين والعباس الا احبها على الحجي المعدل هذا

باست رميم وكعدت يمها وامي تباوعلهن وبقت تلطم بصمت الاوعلهن سكتن بعد ماحجن

حكمة: هسه عوفنه من الجمال انا جايين بموضوع ان شاء الله يكون خير وماتردونه

من حجت هيج حسيت نفسي احتريت وهوى الاستقبال خلص

هيلين: كولي حكمة ان شاء خلصان احنا اهل مابينا

ام رضوان: والله احنا اجينا وطالبين القرب منكم وجايين نخطب ايد بنتكم الابنا هو شايفها ومنعجب بيها

حكمة: وانا امنية حياتي اخلي وحده من بنياتج ببيتي وانتي تعرفين

اول ماحجن هيج بسرعة كمت طلعت من الاستقبال ورميم وراي تكمز من الحماس وانا بطني ماغصتني من الخوف وگفنا ورا الباب نسمع حجيهن 

هيلين: ان شاء الله خير ناخذ رأيها ورأي ابوها نرجعلكم خبر

جان تنط وحده من عماته وحجت

ام بسام: احنا اجينه خطبناها غير هو رايدها وهي رايدته على هذا الاساس هم مترايدين

هيلين: شنو قصدج لا عيني غلطانه احنا الولد حتى ماشايفينا بحكم شغلة هو مايتواجد هواي

من حجت هيج وگدام امي ردت اتخربط مدري شلون لملمت حكمة السالفة وگالت

حكمة: لا لا وين هو حتى ماشايفها انا قررت اخطبله بعد كبر ومالگيت احسن من بنات حجي سليمان ، وابني هم ماقاصر شغل مال وحلال وشجاعة والرجال ماينعاب بشكله

بقن شويه گاعدات يسولفن بعدها راحن جنت اتهرب من امي خاف تسألني على كلام عمته بس هي ماهتمت وعافتني براحتي

صعدت للغرفة لليل كلش مانزلت ولا هو دز شي حتى شكيت يمكن حكمة هيج سوت من وحدها وهو مايدري فجأة دك تليفوني وهو يتصل فتحت خط اجاني صوته مثل التعبان حجه مستعجل وسمعت ضربه باب السيارة

يمان: اسف حبيبي اليوم ماتصلت جنت مشغول وهسه يلا كدرت افرغ

خيال: شو انت ماخذ الدور

يمان: هاا ولج غير راح نخطب

خيال: منو گال اقبل بيك

يمان: مو بكيفج حياتي انا قررت وانتي راح توافقين ، اخخ خيالي اخخ اسويلج عرس هيج كون ماكو منه على النجمات امشيج انتي بس كولي نعم وخلي الباقي على يمانج

ابتسمت جان يحجي ومتأكد من قراري

يمان: بمجرد ما تبتسمن گلبي يفز حتى اذا جنت ماشايفج

خيال: وين شفتني ابتسمت

يمان: شفتج بگلبي

خيال: اوويي عفيه روح مو وكتها هسه

يمان: لا تنطريني هواي فوصه ردي جواب

خيال: قراري من قرار بابا

زفر بنفس قوي وگال

يمان: انتي بس رجعي جواب اجيبلج مشيه تسدلج عين الشمس زلم ونسوان وداعتج ...

غلقته من عنده بعد ما سمعت صوت ابوي جوه ومر اليوم عادي ثاني يوم بالليل يلا بابا فتح وياي الموضوع

وكلي براحتج ماضغط عليج فكري ورجعيلنا خبر ...

❛❛❛❛

يمان"

جنت گاعد ببيت حكمة تحجيلي على عماتي شسون من راحن وياها خطبن اندفر الباب حيل دخل باتر يصيح عليه

حكمة: وجعه بگلب العدو شمالك ولك

باتر: يعنيي انت من كل عقلك تريد تخطب وتتزوج اخت هذا العار

يمان: ومرض شبيك هرجتنا اذا هو عار انت عار اكثر منه

حكمة: انت تغار منه لان يريد يعرس دخل اخطبلك اختها وتعرسون بنفس اليوم

باتر: باع انا وين احجي وحكمة وين تحجي يحزام الحمزة تريد تناسبلي ضرغام وبعدين وينك ووين الزواج

رجعت نفسي على التخم وحجيت ببرود

يمان: ليش مو رجال قابل تريد اشوفك صورة كلي اذا تريد

حكمة: صارت بالتصاوير شنهي فلمكم انتم

كمت وحجيت

يمان: هيج يمه لا تخلين بالج عرگة زعاطيط

باتر: اذا سويتها صدگ مااحضر وياك لا خطوبة ولا عرس

يمان: براحتك بس تبقى اخوي ووصية امي

عفته وطلعت بقى يصيح وراي

باتر: انا الهم وهذا ضرغام انا اله اذا ماسويته رماد انا مو البتار يوصلك الخبر

ماهتميت الكلامة ولا خليته ببالي خابرني شرحبيل علمود نحضر ويا المناقصة وهالمرة الند مالته صمد اتصلت على الشاهين مايجاوب ودائب جهازة مغلق وهو من يغلق جهازة اعرف بي مگابل بيت المسعدة وگاعد

حركت سيارتي ورحتله وفعلا لگيته بنفس المكان جانت ليل وهو گاعد على بنيد السيارة شويه مسافة عن بيتهم نزلت ورحتله جگارته بيده اخذ منها نفس وحجه

دائب: هاا شو اجيت

يمان: گوم عدنا شغل

دائب: ادري اليوم المناقصة

حجه الكلام وفز بسرعة نزل من البنيد للشارع من شاف بنت طلعت من بيتهم راد يروحلها لزمته

يمان: شبيك وين رايح وراها

دائب: يمان عوفني راح تدخل للاسواق خلي اروح وراها اسمع صوتها وهي تحجي

مشيت ويا وحجيت بحيرة

يمان: شبيك متگلي شبيك ماجاوبني يمشي سريع يريد يلحگ بيها دخلنا للاسواق والبنيه هم حجت ويا الرجال

- عمو اريد معجون واريد معكرونه

- حاضر تدلل الحلوة

اباوع عليه مركز بكل حواسه وياها عيونه يتحركن ويا حركتها دخيلك ياربي شنو هالهوس هذا حتى ابو الاسواق انتبة وحجه

- تفضلوا محتاجين شي

يمان: احم ايي اريد باكيت جگاير مارلبورو

انطانياه وعينه على دائب يتفحصه بنظراته وهذاك هايم بالبنيه وحتى من تحجي يبتسم

طلعت وهو طلع وراها وانا سلمت على الرجال وطلعت ورا امشي

اتقرب يمشي بصفها هي من الخوف توترت ورادت توگع بسرعة لزمها وحجه بعصبيه

دائب: على كيفج بابا شبيج تركضين ركض انتبهي النفسج لا تتعورين 

اباوع عليه هزت راسها بخوف بلا ماتحجي

دائب: صارلج شي

- لا مابيه شي عوفني عفيه

دائب: ومره ثانية من تطلعين غيري ملابسج لا تلبسين شي ضيگ مفهوم

جان يحجي صاك على اسنانه وبعصبيه والبنية حاصرتها البجيه ماتعرف شسوي بس تهز براسها

اتقربت منه جريته احجي

يمان: يمعود شبيك تخبلت لا يطلعون اهلها

نتر ايده وحجه بعصبية

دائب: لا تگول اهلها ماعدها اهل

اباوع الها فتحت عيونها بصدمه باوعلها وصاح بيها

دائب: انتييي بعدج هناا طبيي جوه وبعد لا تطلعين اذا شفتج طلعتي اعلگج من اذانج ، و انا هناك گاعد

حجه واشرلها على سيارته ورجع صاح بيها

دائب: مفهوومم

عفتنا ودخلت البيتهم تركض

يمان: انت شجاي تسوي بالطفلة خليتها تكره حتى الساعة السودة الشافتك بيها

دائب: تعبتني كل شويه طابه طالعة هذولي ماعدهم واحد غيرها كل شويه مطلعينها

يمان: عمي لو انا بنيه وواحد يحجي وياي هيج الا اتفل بنص خلقتي اذا حبيته وفكرت بي

دائب: دمشي لك عود صاير تفلسف العريس

يمان: منين سمعت

دائب: امي تضملها شي خابرتني وكالت رايحه اخطب اليمان 

يمان: لا الشرقية نيوز وين تضم سالفة

اخذته ورحنا للمناقصة باتر مايحجي وياي وانا عايفه براحته اريد اشوفه شيسوي بلا ....

خيال"

وهاي مر سبوع وانا مامرجعة اي خبر وهو مثل ماتفقنا مانحجي الحدما اخذ قرار جنت بالمطبخ تلاگه وياي ضرغام جعص خدودي وحجه

ضرغام: اختي الحلوة الجميلة اميرتي وسيدة قلبي

خيال: اهوو بلا لوگه واحجي شتريد

ضرغام: اخوج مفلس ولا ربع عندة اطلبي من ابوي فلوس خلي ينطيج انا لو ابوس السما ماينطيني ربع

خيال: من عمايلك

ضرغام: مو كلتلكم بطلت

درت وجهي امسح بالطباخ واحجي

خيال: كل مره هيج تگول

ضرغام: هالمرة غير

عفت من ايدي وصعدت عندي فلوس نطيتهن اله

ضرغام: يعني من اگول انتي احسن اخت بالعالم يلوموني

دخل ابوي ولا كأنه يشوف ضرغام تجاهله

سليمان: تعاي خوخه نحجي بموضوعج شويه صار سبوع والناس منتظرين زحمة

خيال: هاا بابا بكيفك

سليمان: انا سألت على الولد بالمعارض ويم محلات الذهب كلها تحمد بي ماعندة زله ويا احد واهل المنطقة بعرفونه بشكل سطحي

ضرغام: لحظه شنو خيال مخطوبه وانا مادري

دخلت امي تحجي

هيلين: سوده عليه حبيبي ماصارت فرصه احجيلك ايي تقدملها يمان گرايب حكمة

هي گالت هيج وهذا ثار يصيح

ضرغام: شلوونن هيجج تسوون وبعدين هو منو هذا حتى يخطب اختي انتم تعرفونه شيشتغل لو لا

سليمان: انت اخر واحد يحقله يحجي بخصوص هالموضوع افتهمتتت

ضرغام: انا اخوها وتسمع كلامي وترفض غصبا عليها

گام ابوي دفر الكرسي گوه لزمته امي حتى مايوصل الضرغام

سليمان: لو جنت اخ ادمي مثل العالم والناس نكول بيها مجال وكلمتك مسموعة بس من بعد عمايلك السويتها مالك كل حق تدخل ولا تحجي واطلععع براااا

ضرغام: تريد تزوج بنتك الواحد مهرب يشتغل ويا المجرمييييننن هو واخو العار

گبت العركه بينهم وصار صايحهم يجيب التايه اني ورميم واكفين على صفحة وامي بنصهم اخر شي انتهت العركه بطرد ضرغام من البيت طلع وهو يهدد ويعربد

هدأ الوضع وابوي هم طلع اباوع الامي گعد وصارت تدك وتلطم باوعتلي وحجت

هيلين: ترفضين مستحيل اخليج توافقين واخوج ماقابل ترفضين افتهمتي

حسيت بالاحباط وكل امالي تهدمت انتبهت على رميم تحجي

رميم: يعني يمه صدك تحجين توكفين بقسمة خيال علمود ضرغام افندي ماقابل

شمرت عليه البطل وحجت بعصبية

هيلين: انجبي واسكتي انتي محد طلب رأيج

رميم: والله واكولها اذا خيال رفضت رفضت وبسبب ضرغام تكون اكبر غبية

باوعتلي وحجت

رميم: ايي غبية اذا ترفضين والله شنو حتى استاذ ضرغام المبجل يرضى علينا

هيلين: اطلعييي مناا اطلعيي وانتي الثانية ترفضين فتهمتي هسه اخابر حكمة واكلها تسد السالفة ماعايزين مشاكل

خرجت من صمتي وحجيت

خيال: لا يمه لا تخابرين انا مارفض

هيلين: شلوونن ولججج تردين ابوج واخوج يصيرون دمايه

خيال: اذا هو مخرب حياته بيده هالشي راجعله اني بالنسبة الي ماريد ارفض

هيلين: وانا ماقابله ترفضين وغصبا عليج

دخل ابوي وصاح

سليمان: لا ماترفض وهسه تتصلين بالمره تنطينها الموافقة انا سمعت حجي خيال

حسيت روحي گبيت نار مدري شسوي لان ابوي سمع كلامي

شمرت التليفون وحجت

هيلين: مااخابر ولا ارجعلهم خبر

صاح بيها

سليمان: اذا ماخابرتيييي اعتبري كلشي ينتهي بينا هيلين لا توكفين ويا الباطل

اباوعلها تحسرت واخذت التليفون واتصلت على حكمة رجعتلها خبر بالموافقة وصوت هلهولتها وصلني

عفتهم وصعدت للغرفة حتى مافرحانه بس شعور الخوف سيطر عليه ماعرف شسوي صعدت وراي رميم تهدي بيه ورا نص ساعة سمعت نقالي يدك عرفته هو

جاوبته

يمان: العصفوره كلتلي اكو وحده طلعت تحبك بس ماتكول

خيال: هالمره عصفورتك غلطانة

يمان: مو عيب عصفورتي ماتغلط ، شبي صوتج

سولفتله على سالفة ضرغام وموقف بابا

يمان: دام ابوج قابل الباقي كلها هيج لا تضوجين وتخربين فرحتنا خليلي

خيال: بس يبقى اخوي

يمان: وانا اخوي هم ماراح يحضر خطوبتي بس يبقى اخوي نفس الحالة

مانطاني مجال احجي غير الموضوع

يمان: وهسه حضري روحج للمشية بعد يومين

شهكت بصدمة

خيال: يومين يمان شلحك اسوي بيهن

يمان: كلشي لا تسوين انا هيج عاجبني

خيال: شعاجبك حالتي حاله

يمان: لو تطلعيلي ببجامة النوم هم يعجبني القاضي راضي سيادة المحامية بلا دفاع

خيال: فدوه على الاقل سبوع

يمان: كلشي جاهز خليج وراي وما عليج ، يلا حبيبي تأخرت عندي شغل

مانطاني مجال احجي راح بقيت اكل بروحي بدي اموته وين الحگ بيومين شسوي بعمري

ورا شويه صعدت امي تحجي وتدردم لان موعد المشيه كلش قريب

ثاني يوم اجت حكمة وتفقت ويا امي وطلعت كلشي مجهزين حتى مركز تجميل حاجزتلي وكأنهم متأكدين من الموافقة بقينا صافنين الكلشي حكمة حاسبه حساب حتى الضيافة

للضهر رجع ضرغام وهم نفس العرك والهرجه وحتى امي تخربطت ونقلناها للمستشفى ماطلعت خطوبة الوقت ضيق كلش ومنا مشاكل ضرغام

رجعت للبيت بدل ما افرح خلصتها بجي لليل كلش جنت گاعدة بغرفتي منعزله وتليفوني غالقته مكتأبه من المشاكل وحتى فستان مالحگت اطلع اشتري اندفع الباب ودخلت رميم بيدها علبة كبيره شغلت الضوه وحجت

رميم: گومي عيني حبيب القلب دزلج هذا البوكس وويا رسالة هم

استغربت شنو بي صعدت امي وراها تحجي

هيلين: شدزولج شو شوفينا

كمت فتحت العلبة طلع بيها فستان يجنن مثل البدله قصيره لونها وردي ومتداخل بابيض ووحذاء كعب لونه ابيض كلش حلو

رميم: دهاج طلع نسيبي عندة ذوق وذكي الكلشي حاسب حساب

عفته وفتحت الكارت مكتوب بي " تزعلج الدنيا وانا ارضيج " وهواي شغلات بعد

الموضوع كلش غير من مزاجي رحت فتحت تليفوني وصلني مسج منه كاتب

" لا تركزين على خطي كلش مشغول وكتبت الكارت وانا اسوق "

اتصلت عليه مجاوب عفته وگدرت الفستان كلش حلو وجان مقاسي بالضبط ....

ثاني يوم الصبح رحت المركز التجميل وجهي جان منظف ميحتاج بس سويت تسريحه بسيطه بشعري لان قصير عفته مفتوح ومكياج بسيط ورجعت للبيت وفعلا اجت المشيه وترس البيت نسوان وزلم مثل ماگال كومه اجت ناس ومن اسأل حكمة تكول كلهم عمامة وگرايب ابو صح علاقته مو قويه وياهم وعنده خلاف ويا ابو بس جابهم الخاطرج ....

يمان"

جنت واكف يم دائب والشاهين گبال بيتنا قبل لا ندخل للجماعة فجأة الشارع انترس سيارات استغربت باوعت الدائب وحجيت

يمان: شني انت عازم واحد من جماعتك

دائب: لا وين محد يدري

فتحت عيوني حيل ونصدمت صدمة عمري من شفت صمد نزل يتبختر ويمشي براحتة واخوته يسلمون عليه مكيفين بي .....

   يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات ♥️

متابعة ممتعة🦋

هذا الكارت 🙊♥️

وهاي المداليه LOVE

#تاروت

البارت «9»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

مو بيدي التأخير والله بسبب النت من البارحة البارت جاهز للنشر اسفة 😔💔

وكل حروف الزهدِ تُناديكَ حبيب

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

شفت صمد نزل يتبختر ويمشي براحتة واخوته يسلمون عليه مكيفين بي

دائب: يعني شيريد يبين بهاي الحركة مالته

تقرب فرات وكف يمي وحجه

فرات: يمان اهدأ هذا يسوي هيج حتى يستفزك لا تسوي مشكلة وتضيع هاليوم عليك

يمان: فراااتتت وخروا من وجهي خلي يروح لا اخلص علية هنا بنص العالم

فرات: ميخالف ادخل للبيت وهسه نشوف طريقة نصرفه بيها

دائب راحله وفرات فتح باب البيت ودخلني جوه گوه بيتنا جان مگلوب گرايب صمد كلها هنا

فرات: يعني اذا ماتريدهم ليش جايبهم يحضرون وياك للخطبة

يمان: على سواد عيونهم جايبهم انا غير الخاطر خيالي

حجه ببتسامه

فرات: وانت من شوكت عاشگ شو مادري انا

يمان: مدري شوكت كل الاعرفة اريدها وبس وهذا صمد اذا خربها اشرب من دمة

سمعت صار صوت صياح بره وصارت هوسه طلعنا واشوفلك دائب نايم على خوانيگ صمد وطايحله دگ وعمامي والولد كلها ملتمين عليه بقيت واگف بمكاني اباوع عليهم ، راح اله فرات يركض بعده منه

فرات: هاي عود انت العاقل انا خليتك هنا حتى تتعارك

وهذا الثاني بنص الشارع ويصبح

دائب: لو ما *** عرضك ياصمد بسيطة انا الك ابو الگـ***

صمد: فتحت على روحك باب من النار

دائب: غير يستقر مالك خزائن جهنم دمشي لك دوده الـ*****

هذا يفشر وفرات يحاول يسد حلگه مايگدر وعمامي ملتمين عليهم والناس تباوع

شافني عافهم وتقدم علية يأشر بأصبعة بتهديد ويحجي

صمد: اسمع لك خاف عبالك كبرت وصرت تتسبع علية بأشارة وحدة هسه اخليك تصير ورى الشمس

اتقدمت وگفت گباله وحجيت

يمان: هو هذا اقوى شي عندك وانا حسبالي جاي وعندك سالفة بيها حظ

صمد: الظاهر نسيت منو صمد بسيطة خليك فرحان هسه الا اطلع هاي الفرحه من عيونك

يمان: انا وانت والزمن طويل ونشوف

اتقربت لزمته من ياخته وهو لزم ايدي حيل مشنط عيونه وكلها تتفرج حتى عمامي ماحجوا

يمان: بالنسبة الصمد انا مانسيته ولا بعمري راح انسى والساحة الك واعلى مابخيلك اركبه

صمد: اندمك على هاي حركتك

دفعته حيل وحجيت

يمان: يلاا منااا يلا ماتشرف لا بيك ولا بجيتك

ابتسم ابتسامة مستفزة فتح باب سيارته وحجه ببرود

صمد: اجيت اسوي الواجب بس انت ماتستاهل وتعرف عقوبه سخط الوالدين شنو وماراح تتهنى طول عمرك

اتقدمت عليه لزمني فرات يحجي

فرات: دعوفه شبيك اكله يريد يستفزك ماتشوفه ماسوى شي

اشر علينا انا ودائب سوه حركة براسه بمعنى بسيطة وصعد سيارتة ووله

عمامي صاروا يحجون بينهم بس محد حجه وياي سحبني فرات ودخلني للبيت وانا ادري بهاي السالفة ماراح تخلص ...

❛❛❛❛

خيال"

دقايق مرت واشوف الوجوه نگلبت صارت متتفسر وحكمة تاكل بروحها اباوع عليها تحجي ويا عمة يمان بحرگه وتعظ على اصبعها

كل الموجودين انتبهوا وحتى امي صارت تتسأل وتستفسر وگف گلبي عبالي ضرغام سواله سالفة وابوي مايتحمل تقربت رميم يمي شاورتني

رميم: المشكله مو يمنا بس يگولون يمان متعارك ويا ابو

خيال: ليش هم مو بينهم خلاف شجابه

رميم: سمعت حكمة تكول الام رضوان هو ما ميت عليه هو يريد يحرگ گلبه ويخرب الخطوبه ياترى ليش هالعداوه

سويت حركة بمعنى مادري لكن انا فهمت الموضوع حكمة مرا سولفتلي كل الصار بأمة سكتت ماحجيت اخذت تليفوني حاولت اتصل عليه مجاوبني

ورا شوية رجعت الامور طبيعية وحكمة وكفت بالباب وصاحت

حكمة: نسوانه حبايبنا صلن على محمد دخلت بينا عين حارة ماصلت على نبيها

تحجي وتباوع العماته وهن ناس تندس بناس استغربت شنو من عائلة حاقدة على بعضها

ورا نص ساعة صارت الهلال ترگع من گالوا انطوها تخربطت احاولي مدري شبيه اختنگت والدمعة صارت بطرف عيني وخاصة من امي اتقربت مني تحجي

هيلين: يلا امي گومي وياي تعقدون

خيال: ماما عفيه منا من ورا الباب

هيلين: لا جهزنا غرفة ضرغام يلا خمس دقايق مو اكثر

كمت وياها لبست فوك الفستان مثل الوشاح ابيض يغطيني حتى راسي بس وجهي طالع وسوولي طقوس المهر دخل بابا وويا يمان والشيخ وامي وحكمة

كعدت بسد بابا وهو كل شويه يتحرك يعدل نفسه يريد يشوفني خبثت ويا وصرت كلش ورا ابوي عقدنا وباركولي وطلعت

بدأت الحفلة والاغاني تصدح ببيتنا من صدگ جنت فرحانه احس بروحي طايرة وخبصة التوتر ومغص المعدة مافارگتني طول الوقت

اباوع الباب الاستقبال دخلت حكمة تهلهل وتهوس وهو وراها اتقرب وكف يمي

احتضن وجهي وطبع بوسه على راسي وهمس

يمان: مبروك يا فزة گلبي

رفعت عيوني عليه وتمتمت بصعوبة

خيال: الله يبارك بيك

يمان: على كيفج ويا گلبي شدعوة هالجمال كله

ابتسمت بخجل لزم ايدي حيل ووكفنا رميم تاخذلنا صور من بعدها حكمة جابت الخواتم حتى نلبسهم

حكمة: لبسها الحلقة وخلي نشرد بيها بعد ياهو الينطيها الهم

حجت الكلام وهوست

حكمة: قشمرنا ابوها نطوه فلوس مزوره

اخذنا شمعة بيتكم والفلوس متفيدكم

حجت عمتة

سليمة: 15 مليون منيلهن مزورة

حكمة: ايي وشني هم قليلات خوخه تستاهل اكثر

اباوع الامي صارت تمسح بدموعها خنگتني العبرة من تقربت يم يمان لزمته وحجت بدموع

هيلين: بعد ماوصيك ببنيتي هاي امانة برگبتك صارت وانت گد الامانة

باس راسها وحجه يطمن بيها

يمان: بروحي اخليها مو بس بعيوني اطمني ام ضرغام

هيلين: الله يسعدكم امي

اخذ الحلقة باوع عليه وحجه ببتسامة

يمان: كلشي ماجبتيلي حتى حلقتي انا اشتريتها

حجه الكلام ولبسني الحلقة طلعت كبيرة عليه حجيت واني اعدل بيها

خيال: هو انت نطيتني مجال اذا انا نفسي بعدني الهسه مامقتنعه بيك

اتقرب شاورني

يمان: بالليل من تروح الناس اخليك تقتنع بيه مو وكتها هسه لا تستعجل على رزقك خليلي

خيال: احترم نفسك

يمان: ماكو هاي الكلمه شيلها من القاموس صرت بس الي بعد

لبسته الحلقة بقى كاعد شويه وقبل لا يطلع وصاني ماابدل بس يروحون العالم يرجع وبقى يلح علية ويوصيني كل شويه يكول

يمان: ديري بالج تبدلين انا طالع لليل ارجعلج

باس ايدي وطلع بقوا تقريب بالنص ساعة وراحوا فرغ بيتنا دخل ابوي باركلي وطلع بسرعة من البيت ادري بي مايحب واحد يشوف مشاعرة وهو حبيبي جانت عيونه تلالي بالدموع من يباوعلي

ردت اصعد سمعت تليفون امي يدك وسمعتها تحجي

هيلين: ايي من حقه بعد صارت مرته يدلل

عرفتها على شنو تحجي صعدت بسرعة رتبت شكلي اتخربط شويه طوخت حمرتي وخليت حمره قوية القبلها جانت بناتية متماشيه مع لون الفستان هاي لا كلش بارزه رشيت عطر ونزلت تلاگت وياي امي گالت

هيلين: هاي بعدج مامبدلة راح يجي يمان يريد يحجي وياج

خيال: هاا صدك يلا هسه اصعد ابدل

طلعت رميم من المطبخ تحجي وتغمزلي

رميم: اكلج يمه هي ليش تبدل قابل هو غريب غير صار خطيبها تعودوا على هذا الوضع بعد

اندك الباب حجت مكمله كلامها

رميم: وهذا نسيبي اجه اروح افتحله الباب

هيلين: انا افتح انتي گعدي وسكتي

راحت امي فتحت الباب ودخل للاستقبال بقى فوك النص ساعة هي تحجي ويا وماتخليني اروح حتى هو مل كل شويه يدزلي تعاي

اخر شي رميم سحلتني ماحسيت بروحي الا وانا مدفوعة بنص الاستقبال خزرتني امي وگامت

هيلين: اجيبلكم شي تشربونه

عافتنا وطلعت حجه وهو يتقرب علي لزم ايدي فرني گدامه وحجه

يمان: صح انت لابس ثوب كل السحر بي

هلا يابو عيون وساع عيونك سبني

بس هو ماحلاك انت التحلي

حاوطني وصرت بين احضانة حجيت بصعوبة

خيال: فدوه يمان وخر هسه ترجع امي تدخل

يمان: ناويه تبيتيني يمكم اليوم مره ثانية من اجي اخذ موعد

خيال: عند امي كلشي بموعد

يمان: جا الله يساعد حجي سليمان

رفعت راسي اباوع عليه اول مره انتبة الفرق الطول بينا قبل جنت ماركز همست

خيال: انت كلش طويل

يمان: لا عليج الله

خيال: والله حتى اطول من بابا تدري من جنت صغيره عبالي بابا هو اطول رجل بالعالم

جنت مندمجه مدري شحجي كمت اجيب واخبط وهو لامني بحضنه واحنا واكفين محاوطني بأديناته رفع ايده خله شعري ورا اذني وهمس ببتسامه

يمان: ايي وبعد

خيال: ايي وحتى مره من المرات جنت صغيره ابجي على لعبة فله وهو طلع اشترالي بنص الليل

يمان: صدك

خيال: ايي والله و اخذها مني ضرغام بيومها

حجه بأسف

يمان: لاااا

خيال: اي تخيل

حجه بصوت ذايب

يمان: اي جاي اتخيل

رفعت عيوني اله جان يباوع الحلگي وانا احجي بقيت صافنه بي نصه عليه وهو مغمض عيونه اتملصت منه بصعوبة وبتعدت

راد يلزمني صرت ورى الطبله حجه

يمان: شبيج تعاي

خيال: لا لا ماريد خلينا هيج احسن انت واحد فاسد ومتتأمن

خزرني وحجه بعصبيه مصطنعة

يمان: ولج تعاي اگلها

حضنت الكوشه وحجيت

خيال: شبيك يمان احترم نفسك عاد

يمان: ليش ماحترمتي نفسج من البداية وماتغريني بلون حمرتج مال الـ ****

حجيت بتعجب

خيال: ياا انااا

يمان: لا انا بس تعاي مو حرگتي صمد وهو عايش

ردت اشرد ماخلاني حصرني على التخم گعدت وانا حاضنه الكوشه واحجي

خيال: والله هسه اصرخ والم عليك العالم انت ماتستحي مو عيب عليك

يمان: خل اشرحلج الموضوع

جر مني الكوشه وانا مجلبه بيها ماقبل اعوفها يجر بيها ويحجي

يمان: هديها راح اطيح حظج

خيال: ما ما والله ما واذا ماهديتها انا اطيح حظك

گعد يمي جرني حيل علية صرت بحضنه وانا بعدني حاضنه الكوشه بثنين اديه مثل الاحتمي بيها

خيال: وخررر شبيك انت مجلوب هسه تدخل امي

حضني حيل الصدرة يبس اظلاعي بقت بس الكوشه بينا حاضن نص جسمي والنص الثاني على التخم رفعني اله يحجي

يمان: تحملي انت الجبتبها الروحج

ردت احجي ماحسيته الا اخذ شفايفي بقوة اريد اتنفس ماكو وحتى اديه ماكدر احركهن الرعشه اعتلت جسمي ورجليه صرت احس بيهن صارن يرجفن گلبي صرت اسمع دگاته خربط احوالي شفايفي اشتعلن نار من قوة البوسة

خلص الهوى اريد يبتعد ماكو گوه يلا عافني من صرت اضرب بي برجلي ابتعد وحجه

يمان: لو صايره عاقلة هيج احسنلج

لزمت شفتي وحجيت

خيال: اخخ يماا شفتي انت شبيك مهموش هي هاي بوسة لو حجامة

ضحك يمسح على شفتي

يمان: بعد لا تخلين هاي الحمرة وتسويلي واهس

دفعته وگمت اريد اندل دربي ماكو مسطورة وكلبي گدما نبض اذاني رجع جرني من ايدي گعدت على رجله حجه باريحيه

يمان: شبيج نسطرتي

خيال: يمان وخر هسه امي تجي الا تطيح حضنا

يمان: غير مرتي امج شعليها

فزيت من خله راسه يمشي انفه على طول رگبتي وياخذ نفس

شهگت بخوف ادفع بي واحجي

خيال: يماااننن امييي

يمان: اشش ماكو امج تعاي اشاورج بسالفة مهمه

صعد انفة من رگبتي الخدي اتقرب يم اذني يهمس

يمان: ريحتج تخدرني من اول يوم صعدتي بي بالسيارة لليوم وين ماشمها ادوخ

خيال: ييـ...يمان

يمان: اجتني ايام انام بسيارتي لان ريحتج بيها موتيني دوختيني فززتي گلبي الميت

غمضت عيوني استمع الكلامة

يمان: حنيتج اريدها خليلي لا تحرميني منها خلي صدري ينرس بريحتج لا تبعديني

يحجي وياخذ نفس بعمق وانا احس بعد ماعندي قوة ولا سيطرة على مشاعري خدر مشه بكامل جسمي حسيت بنغزات لحيته وشواربة صارن على خدي وبوسات يطبعها برقة ونعومة الحدما وصل شفتي وباسني هالمرة بهدوء

تناغم صوت البوسه ويا نفسنا المتوحد وصرت كلي منصاعة الاوامر گلبي وعقلي ثنينهم يردنه

رفعت اديناتي تلمست فكه المشدود وهو سحبني من خصري عليه اكثر سويت مثل ماسوه وندمجنا مع بعض ....

ابتعد ماگدرت اباوع بوجه حضنته همس بأذني

يمان: هسه اقتنعتي بيه ؟

ضمت وجهي وحجيت ببتسامة

خيال: انت واحد فاسد

رفع ايده مسح على شعري وگال

يمان: والله حلوة هاي لابده بحضني وتحجي عليه

خيال: حتى لا تشوفني

ضحك وصار يبوس بأديناتي وحجه

يمان: يلا لازم اروح هسه تأخرت عندي شغل

گمت من عنده وحجيت

خيال: ماجبتلك شي تشربة

باسني بخدي بعدها وگف وگال

يمان: شربت حبيبي مالها داعي بعد

غمزلي وطلع يمشي ابتسمت طلعت ورا الحد الباب ودعني وطلع اسمعه يحجي

يمان: فرات بعدك هنا

فرات همزين تذكرتني انا كلت اليوم يبات يم الجماعة

دخلت للبيت امي تباوعلي وتخزر بس ماتحجي ورميم وراها تأشرلي على حلگي مافهمت بسرعة صعدت للغرفة باوعت النفسي بالمراية وشوف حلگي صاير فلم والحمرة واصله الخشمي

متت من الفشلة صعدت وراي رميم تستجوبني مانطيتها مجال اخذت ملابس ودخلت للحمام اسبح ....

مر يومين الوضع طبيعي بس ضرغام مامبين وامي تلوب تتصل علية جهازة مغلق ابد مافتحة بقت تاكل بروحها واليسمعها ولا يگول احنا تعودنا على هذا الوضع هو يختفي بالايام ويرجع وهيج مر سبوع

ويمان هم نشغل يتصل شويه ويروح وحتى ببيت حكمة نادراً يجي يمر يشوفني شويه ويروح يگول مشغول

الحدما فاجئني بقرارة ان يريد العرس بعد شهر هنا نفجرت ماكدرت اتحمل جنا نحجي اتصال

خيال: يمان صدك تحجي بعد شهر يعني شلحگ اني منا البعد شهر

يمان: ماكو وكت حبيبي افهمي عليه وبعدين منا البعد شهر هواي مجال

خيال: غير اعرف ليش مستعجل

يمان: جا غير اريدج انتي ماترديني ؟

يحجي ويحاول يقنع بيه سكتت ضايجة رجع گال

يمان: الصبح حكمة تجي تتفق ويا اهلج

خيال: ماعرف شكلك بس على الاقل خلي فد شهر ونص يمان جاي احس بروحي متزوجة زواج تقليدي

يمان: ليش يعمري

خيال: يعني فوك ما منلحگ وخبصه هاي الايام ماتتعوض

يمان: وهسه انتي عاد شني مشرمتها شو بس اوصل يمج تشتغلين هزاز لا إرادي وتسيحين بين اديه حتى بوسة ماتبوسيني

خيال: لان مامتعودة عليك بعدني احسك غريب ماجنا خاطبين على حب

يمان: على هاي اشبعج حب بعد الزواج بس صيري يمي

بقى كومه يحجي الحدما قنعني وسكتني بعدها گال

يمان: يلا انا وصلت يم الولد بعدين نحجي

غلقة وراح وانا خلاني بنار شلحگ منا بعد شهر

يمان"

وصلت يم الولد جاي يحملون بضاعة ثانية هم الجماعة شرحبيل وهو واگف يمهم

اول مانزلت من السيارة باوعلى وحجه

شرحبيل: هلا وصل الهيبة ابن صمد

يمان: لو تبطل هاي سالفتك تصير خوش ولد

شرحبيل: ماابطل مو تدري بيه احبه واحبك لان انت ابن صمد

باتر: جا وانا ابن البطة السودة غير هم ابن جبح

شرحبيل: انت تخوف خاف اكلك ابن صمد وسطرة وحده من ايدك تذبني فاطس

باتر: لا هو هذا هم حظي المصخم وين مااذبها سودة مصخمة حتى وياك

شرحبيل: منين راح تعبرون البضاعة

يمان: عن طريق منطقة صفوان

شرحبيل: والتأمين

باتر: هذا شغلنا لا تدخل بي ابو الشباب

صاح بيهم دائب حيل

دائب: اصعدووا هسه وكت سوالفكم

انتبهت على ادية مزلغات وحاجبه بي جرح مالحكت اسأله صعد بالسيارة هو يسوق والشاهين بصفه وانا وباتر بسيارة وشرحبيل وجماعتة 2 بغير سيارة

وانطلقنا نمشي جان ليل والطريق شبة مگطوع دخلن ويانا سيارتين وخففن يمنا

اخذت تليفوني واتصلت بـ دائب

دائب: هاا

يمان: هاي السيارة الي على يمينك انطي مجال يتجاوزك

اباوع للسيارة انطاه مجال بس هذا بقى ماتجاوزه

يمان: اسرع شويه

زاد من سرعتة وهذا ورى

دائب: هاي السيارة بيها شي

بسرعة لفت السيارة ونزلت على الترابي وانا احجي

يمان: دائب انزل من الشارع راح يضرب عليك بيدة سلاح

باتر: شني وين شفته عندة سلاح

صار صوت رمي طلق باوعت شفت واحد ماد ايدة ويضرب على السيارة البيها دائب

باتر: هذا كمين يماااان حاصرونا ولد الـگـ****

ماكو لحظات اشتبكوا على ما فتريت وصرنا نضرب عليهم هم سوو السيارة البيها الشاهين ودائب منخل وشردوا شرحبيل وجماعتة طلعوا وراهم وانا نزلت على الولد باتر كدامي يركض

من بعيد شفت السيارة گلت مستحيل هذولي عايشين مزرفة تزرف اتقربت لگيت بس دائب بيها متمدد على الكشن لازم رجله تنزف

لزمته احجي

يمان: دائب صارلك شي بغير مكان لو بس رجلك

دائب: لا بس رجلي شضية من السيارة مو طلقة والشاهين فتح الباب يضرب عليهم ووگع من السيارة مدري وين

نزل باتر يدور علية

يمان: انطيني ايدك هسه نروح للمستشفى

نزلته گوه مشيته للسيارة وباتر جاب الشاهين كلشي مابي بس من الطيحة مزلغ ومكرد

نقلناهم للمستشفى سوولهم الازم بالطوارئ

دخل شرحبيل اجاني معصب حجه بهمس

شرحبيل: هاي السيارة الصمد وجماعتة مستهدفيينييي يمان

حجه دائب بألم

دائب: لا مو انت انا المستهدف من العصر اشتبكت وياهم

يمان: وانت ساكتتت ليش ماحجيت شنو هالغباء

دائب: لان صمد صار حصتي انا المتهدد مو انت

يمان: لا ما تتقربله دائب ماتتقربله خووششش

دائب: معليك انت اطلع من الحمرة

صحت بي

يمان: اذا صار بصمد شي احملك المسؤلية وبعد لا اعرفك ولا تعرفني من هاللحظة

باتر: منا المستشفى صوتك تخبلت خلي يولي يكتله

يمان: يضيعنا ويضيع رووححهه صمد مو سهلل ورا عصابات واحزاب العراق كلها انا جاي احفرله لا تخربون الشغل عليه

اباوع عليهم بقوا ساكتين ودائب يباوع عليه ببرود اعرفه البراسه براسه يسوي لو احجي منا الف سنه ردت اطلع باوعت علية وگلتله

يمان: دائب اذا كتلت صمد اعتبر روحك غريب ولا اخوي ولا اعرفك هالكلام الكم كلكم

اشرت على باتر وحجيت

يمان: انت الثاني لا عبالك نسيت سوايتك هم حسابك يمي

باتر: عيش بخت موت بخت مگرود يالمالك بخت رجع عليه

عفتهم وطلعت مدري شسوي بصمد ووين اروح منه بعد كل هالسنين شيريد مني ومنين طلع من جديد

صعدت السيارة رجعت وعفتهم

ثاني يوم الصبح فزيت على تليفوني يدگ شفته رقم غريب بسرعة جاوبته اجاني صوت يحجي

- منا العشر دقايق لو تلحگ على الحلوة لو راح تصير بخبر كان

يمان: الووو منو ويااايييي احجييي

- فاعل خير اعتبرني

حجه الكلمه وسد التليفون صيحت انت منو ماكو طفرت لبست ملابس شلون مجان وطلعت ركض شغلت السيارة وبسرعة انطلقت بيها امشي سريع واتصل عليه ماكو يطلع خارج التغطيه

رجعت تصلت عليها جهازها مغلق وامي ماتجاوب نسيت ابوها بسرعة اتصلت على فرات جاوبني

يمان: فرات اطلع هسه روح ركض البيت حجي سليمان بسرعة

فرات: خير خو ماكو شي

يمان: مادري شصاير روح هناك واتصل بيه

سديته منه الدرب صار شطوله ....

خيال"

گعدت الصبح نزلت جوة شفت امي فرحانه وصوت ضحكتها واصلني عرفت يعني ضرغام رجع للبيت

نزلت وراي رميم تعدت مني وحجت

رميم: سمعتي صوت الضحك اليوم الامير وليم منور البيت

ضحكت على سوالفها ودخلت للمطبخ جان داير وجه حتى من صبحت مارد علية عفته ماحجيت ويا

هيلين: عوفي من ايدج وروحي الحكمة تريدج اتصلت كالت من تگعد خيال دزيها الي

اني هم بدلت وطلعت جان تقريب الساعة عشره الصبح دخلت لگيت حكمة جايبه كومه حلقات بيهن بالعشر انواع جانت مبسطة بيهن بنص الاستقبال

لان حلقتي كبيره عليه وماقبلت اطلع ابدلها جنت ضايجة من سالفة السرعة عاد هي اخذت قياسي وكالت امر المحلات الولد اغيرها الج

خيال: صباح الخير

حكمة: هلا بسورها ونورها تعاي انطيني حبه

بستها وگعدت يمها حجت

حكمة: اختاريلج وحدة

خيال: هذا كله جايبته شدعوه

حكمة: مو جنتي مدلغمة وضايجه هذاك اليوم كلت ماختارلها على ذوقي جبتلج أكثر من نوع اختاري

ابتسمت بقينا اني وياها نختار اخر شي اختاريت وحده بهذاك الوكت جان كلش دارج موديل الحلقة التركيه اختاريتها وبقينا شويه گاعدين نسولف اني وياها وتذكرلي ايام طفولة يمان وابو تذكرت انا مدري وين سامعة اسم صمد بس ناسية ماهتميت

سلمت عليها وطلعت راجعة البيتنا وشفت صديق يمان اسمه فرات دائما يحجي بي واكف بباب بيتنا وسيارة يمان دخلت للشارع يمشي بسرعة جنونية وكف السيارة ونزل منها جفلت وستغربت حالتة اجاني سريع مالحگت اعرف شبي سحبني من ايدي للبيت بسرعة

خيال: يمان شبييكك ايدي

دخل ورا فرات يصيح

فرات: ادخلوا جووااا يمااننن

سحبني بسرعة دخلني من باب المطبخ بلا مايحجي ولا كلمة وشفت فرات دخل من باب الاستقبال يركض بنص ماعرف شجاي يصير غير من صار صوت السلاح والطلق عالي صرخت بفزع نزلي للگاع وصاح بكل صوته

يمان: يمممممااااا لا تطلععييننن ديري بالج

واني اصرخ بفزع نعاد علية هذاك اليوم من صار الاعتداء على بيتنا نفس الحالة نفس الخوف والفزع متت صرت احس جسمي صار يرفرف من الرعشة والخوف والطلق مستمر

قيدني بحضنه يهمس بأذني

يمان: لا تخافين حبيبي ماكو شي هسه يسكت الطلق ماكو شي

لزمته حيل من ملابسه وصرت ابجي بفزع لمني اله يحجي يحاول يهديني

يمان: اششش والله بعيد بعيد مو يمنا لا تخافين

خيال: جاي يضررربوونن على البييتت

جيت الكلمه وجام المطبخ كله تكسر علينا

رجعت اعيط واصرخ وهو بس يهدي بيه واسمع صريخ حكمة جاي من جوه

تقريب بالعشر دقايق وراح الصوت هدأ الوضع بقت بس صوت عياطي انا وحكمة بالبيت دخل فرات وحجه

فرات: كون بيكم شي

يمان: لا عدت سلامات

اجتنا حكمة وحجت

حكمة: ولك شنهي الدولاب الطاح علينا منين اجانا يمه فلشوا بيتي

گام وگومني ويا بصعوبة واگفه على رجلية حجه وهو يتفحصنا

يمان: انتي زينه يمه

حكمة: زينتيش شني هاي اول تالي نوبتين شارعنا هيج يصير بي

يمان: اندري هي هالي البصرة قابل جديدة عليج

حكمة: بس منطقتنا مابيها هاي السوالف

سكت ماجاوبها جرت الكرسي وگعدتني عليه من الخوف حتى ماكدر احجي جابتلي مي شربتني وحجت

حكمة: البنيه راح تموت من صوت چيلتين 3 ثارن برة جا شلون راح تحملين الچيله الجبيره

اباوع علية قرفص گدامي يحجي بضحكه

يمان: مو وكتج يمه دشوفيها شبيها وجها اصفر

حكمة: من الهبطة لا تخاف

باوعت الفرات وحجت

حكمة: هذا السربوت هنا منين اجيت تعال انطيني حبه

فرات: شفت الوادم دخلت تركض للبيوت دخلت وراهم اركض على واهس

اباوعلهم يضحكون ولا كأن شيء حدث واني متخربطة من الخوف باوعت اليمان وحجت

حكمة: وانت شعندك جايني من صباحيات الله خير

يمان: هاا اجيت اشوفج

حكمة: بهاي حالتك

انتبهت عليه لابس تراك بيت وشعرة مهوس عكس العادة دائما يكون كاشخ على اخر حباية

انته عليه وصار يعدل بشعرة ويحجي

يمان: اجيت كلت هنا ابدل

شويه وصار الباب يندك راحت حكمة فتحت دخلت امي ورميم وياها يسألن شكو والناس بالشارع كلها نگلبت وكالعادة اجت الشرطة وراحت ومحد عرف سبب الاعتداء شنو

ونسدت السالفة البقى ببالي يمان شجابه من بعدها حاولت اسألة مانطاني جواب وفجأة غير رأيه وبعد موعد العرس وبعده 3 اشهر وصرنا نحضر على اساس هالشي

مرت الايام وبدأ الدوام بس رميم السنه الداوم لان انا تخرجت وضرغام بعده على نفس حالته الماتتغير وجاي تروح للاسوء امي دللته وابوي ماگدر يسيطر عليه ولا عرف يحتوي من البداية

وبيوم جنا طالعين العصر انا ويمان ورميم امي دازتها ويانا مثل كل مره الي خلصت المشوار كله تتعارك ويا يمان كل ما يريدها تعوفنا وحدنا تاخذ منه رشوه خمسه وعشرين اخر شي زهگ

يمان: طالعة ويانا تتونسين لو تذلينا

رميم: شوف حبيبي اذكم واتونس يعني انا ماعرف استمتع بالطلعة اذا مااقطك

بقوا يسولفون ويشاقون شويه بعدها دك تليفونه مدري ويا منو حجه وگله انا طالع ووصفله المكان يريد يشوفة ماعرفت منو بس جان ينعته بأسم دائب

شويه واجه وهو عافنا وراح على صفحه يحجي ويا ومبين صار عصبي ويصيح بنص الشارع انا اريد اعرف شكو وهاي صافنه بالولد

رميم: اكلج هو هذا هم گرايبهم لان شايفته ببيت حكمة اكثر من مره وهاي العائلة منين الله خالقها من السما حلقوم

خيال: تادبي

رميم: وانتي من تختلين بحبيب القلب ليش ماتتأدبين لو هي على ناس وناس دباعي الطول باعي الثكل والهيبة التسطر

جانت تحجي وعيونها تعلگن بالولد من تقرب سلم علينا بكل احترام وراح

ندستها حتى تنتبه ويانا انتبه عليها وحجه

يمان: مايفيدج مرتبط

رميم: ايي اذا هذا الكيك مايرتبط جا انا ارتبط

يمان: يفيدج واحد ثاني عدنا هم طگه ونص تتوالمون انتي ويا

افترينا شويه ورجعنا رميم نزلت واحنا بقينا بالسيارة نسولف ماكو عشر دقايق ودك تلفونه وجاوب بس سمع الطرف المقابل احسيته تحول الدرجة اديه صارت ترجف ضربت على السيارة حيل جفلني وشتغل الصياح كلشي مافتهمت منه بس اسمعة يصيح

يمان: ليششش ليش ولك شبسرعة لگاه قبل ساعة جان يمي ومنعته يروحله وين لگه صمد بعد .... بسيطه جايكم انا لا تتحركون ودائب هسسه وين اخخ منكم اخخ شرحبيل لا تخلي يتحرك خطوة وحده

سد التليفون وشمرة حجيت بخوف

خيال: يمان شكو

يمان: ماكو شي انزلي اريد اروح

خيال: ليش هيج صارت حالتك فهمني

بلا مايحجي مد روحه فتحلي الباب واشر يعني انزلي

خيال: يمان

صاح بيه

يمان: اهوووو كلتتت انززللييي ماريد اسمع صووتت

صيح علية وهاي اول مره يسويها ضجت كلش نزلت وضربت الباب حيل ماهتملي عافتي وراح

ركضت فوك الدمعة بطرف عيني ماحجيت ويا احد وهو حظرته من كل مكان

لليل كلش سمعت صوته جوه يحجي ويا بابا ورميم صعدت سحلتني رادت ماقبلت انزل كلتلها كليلهم نايمة

بقى گاعد جوة اسمع صوته يحجون هو وبابا الساعة 11 بالليل وماقبلت انزل اخر شي راح صعدت رميم تحجي

رميم: نسيبي يگول خلي تشيل الحظر وتصير خيرة والله كلتها الج بالخرف والواحد

حجت الكلام واخذت تليفوني مدري شسوت بي تبحوش وشمرته عليه وطلعت من الغرفة شويه واتصل شفته هو عرفتها شالت البلوك منه

بس جاوبت حجه

يمان: فتحيلي الباب انا جوه

خيال: انت تخبلت روح ماكدر اطلع اهلي منا

يمان: ناهبج غير حلالي

خيال: ميخالف يشوفنا بابا شيكول انا استحي منه

يمان: معليج انا دبرتها ويا رميم اطلعي راح اخليها تصعدني الج

نفخت بملل وكمت رتبت نفسي ونزلتله لگيتها واكفتلي بالباب دمغتها وفتت

اتقربت منه وحجيت

خيال: شتريد

يمان: دخيلك ربي هاي عود اول زعلة وصيحه صغيرة هيج تسوين لو اسوي شي جبير شيصير

خيال: امحيك من الوجود

جرني من ايدي حضني وحجه عاض على شفته

يمان: اويلي وبعد

خيال: ادمرك

يمان: وبعد

خيال: اندمك على الساعة الشفتني بيها

سكتني ببوسه سريعة وحجه

يمان: لا تصيرين جسرة ماتحمل وبعد شسوين

خيال: احرگك بالنار وانت عايش واطحن عضامك واذبهن بالشط

يمان: فدوه الج

دفعته وحجيت

خيال: وهسه شتريد

يمان: طحني عظامي بحضن خلي يطيح الزعل

لمني وهمس

يمان: اسف صيحت عليك خليلي بس جنت مادري بروحي شسوي

خيال: هو شصار

يمان: واحد من اخواني الشفتي اليوم تعارك ويا صمد

خيال: ابوك

يمان: واخوي لازمه مامخلي بي عظم صاحي

خيال: كتل ابووو !!

حجيتها بتعجب

ضحك وحجه

يمان: لا دائب مو اخوي صديقي بس رابين سوه من الصغر

خيال: لعد اخوك وين

تهرب وجاوب جواب مختصر

يمان: هاا اخوي مسافر مو هنا

خيال: وهسه شتريد

يمان: طاح الزعل لو اطيح حظج

ضحكت صار يبوس بيه ويحجي

يمان: اموت على الزعولي

بقينا نحجي شويه وبعدها ردت ادخل للبيت رجعت باوعتله بعده واكف منتظرني افوت

رجعت عليه اتقربت خليت ايدي على صدره همست

خيال: دائمًا خليني هنا

يمان: حضنج وبيتج لحد گطع النفس تبقين هنا

بسته بخده ودخلت جوه شفته من شباك المطبخ طلع من البيت

رجعت للمطبخ اريد اشرب مي وبيتنا جان هدوء كلها نايمه سمعت طبه قوية نزلت على الباب مثل الواحد وشمر شي وصار صوت

فتحت باب المطبخ ومديت راسي بخوف اريد اعرف شنو هذا الصوت احس اكو شي يتحرك يم الباب اتقربت ورجليه يرجفن باوعت من الفتحه الي تصير بين البابين كلشي ماشفت بس شي ابيض فتحت الباب شويه ونصدمت من الشفتة تخشبت بمكاني كلشي ماگدرت اسوي غير نزلت على ركباتي وصرخت بكل صوتي بفزع ......

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات ♥️

متابعة ممتعة🦋

#تاروت

البارت «10»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

سولف ياحبيبي ....

لا يجينة فراك يحجي وياك ..ويبوگك

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

نصدمت من الشفتة تخشبت بمكاني كلشي ماگدرت اسوي غير نزلت على ركباتي وصرخت بكل صوتي بفزع وانا اشوف ضرغام گدامي مامبين ومن كثر الدم صاير قطعة حمرة مدد گدامي جثه هامدة

اجاني صوت ابوي يصيح

سليمان: خياالل خيال شكوو بابا شبيج

ماگدرت احجي شي صرت املخ بنفسي اصرخ اكثر وعيوني شاخصة عليه انتبه على نظراتي وشاف ضرغام شمر بنفسه عليه يصيح

سليمان: ياا بوييهه ضرغاامم ولك ضرغاامم

طلعت امي شافته وصارت تملخ بنفسها وشعرها رميم تحاول تلزمها ماتسيطر عليها تهسترت وبابا حاضن ضرغام ويصيح

سليمان: إسعاف رحمة الله والديه اليطلبنا إسعاف

الناس التمت وبساعتها شالوا وراحوا وياهم امي وابوي نقلوا للمستشفى وبقينا انا ورميم نبجي بالباب ماعرف شنسوي والجيران كلها ببابنا

انتبهت على ورقة قريبة من الباب بسرعة شلتها فتحتها اقرأ بيها مكتوب

" هالمرة خليتلكم بس نفس المرة الثانية حتى النفس اگطعه منه واجيبه الكم "

رميم: شنو هاي خيال

لطمت على خدي احجي بنهيار

خيال: شمدرينييي ولج تهديد هذا تهديد اخوج مايرتاح الا يصفونه

گعدت بعتبة الباب ابجي بحرگه منظره مايطلع من بالي قرفصت يمي حضنتني وبقينا نبجي شويه

وحكمة طلعت من بيتهم تخرط بخدودها وتحجي

حكمة: هاا ولجن كتلوا انكتل راح بيها يلا ارتاح

حجت رميم بدموع

رميم: لا بعد بي نفس نقلوا للمستشفى عايش

خيال: شعايش على المنظر الشفته مستحيللل اخوويي يعيش

حكمة: وين راحوا يا مستشفى

رميم: ماندري خالة ابوي وامي ويا وطلعوا حفاي حتى تليفون ماخذوا وياهم يردون يلحگون عليه

گعدت حكمة بصفي تطمن بيه واحنا بقينا مانعرف وين راحوا حتى اسم المستشفى مانعرفها ناس والعالم هوسه كل واحد يحجي شكل واحنا گاعدين بالباب مانعرف شنسوي ...

❛❛❛❛

يمان"

طلعت منها لگيت فرات منتظرني اخذته ورحنا يم الولد كاعدين على الكورنيش مثل العادة وصلنا كلهم موجودين ماعدى باتر گعدنا باوعتلهم وحجيت

يمان: باتر وين يوميه هو اول واحد هنا

الشاهين: گال عندي شغل اخلصه واجيكم

سحبت تليفوني اتصلت عليه جاوبني

يمان: وينك انت

باتر: انا بالصناعي هسه جايكم

يمان: وانت شسوي يمك بهاليل

باتر: ليش تخاف عليه يغتصبوني لا تخاف حبيبي الا الشرف

جنت فاتح مايك اتقرب فرات يحجي

فرات: من تجي نفحصك ونشوف

صاح بي ينعم بصوته

باتر: لااااءااا الا الشرف البيت داطاهر

فرات: ولك سده هذا فضيحه

يمان: بسرعة تعال

غلقته من عنده وباوعت الدائب صافن باله مو يمنا ويدخن ومبين عليه بعد اله شوية وينفجر

يمان: وانت الثاني اليوم شاد الچينكو

دائب: مابيه شي

فرات: وهذا وجه واحد مابي شي

جاوبه بقلة صبر وهو يفز دخان الجگارة

دائب: فرات رحمة الاهلك مالي خلك اجادل روحي طافرة

الشاهين: عوفوا يمك اليوم ماشاف المسعدة

ماحس الا دائب كمز عليه سحله من ياخته يحجي بحدة

دائب: شلون ولك ماسمعت شكلت

الشاهين: نزل ايدك احسن الك

دائب: شوفني شسوي بلا

كمت جريته وفرات يجر بالشاهين ويحجي عليهم

فرات: منا الناس شبيكم

يمان: صدگ تحجووون شجاكم

صار مثل الثور الهايج دفعني وجر الشاهين حيل يرص على اسنانه ويحجي

دائب: هالمره جبت طاريها وحجيت بيها المرة الثانيه اكص لسانك واسوي گلادة برگبتك افتهمت

دفعه حيل كعد على الكرسي عافنا وراح

والشاهين بقى يصيح ويغلط

فرات: دگعد هسه بقيت تهوس على روسنا من سحلك مافگيت حلگك

كام وصاح

الشاهين: فرات هواي جاي تتجاوز دير بالك على روحك

فرات: شني شو نا خفت ط*** صار يرجف

صحت بيهم

يمان: شمالكم هييي اليوم صاريين تجيبون اليهد

سكتوا شفت باتر جاي من بعيد يمشي براحه

يمان: شرف الاخ وين جنت

جر الكرسي وكعد

باتر: جنت يم وحدة ا*جـه الا تطك بالگاع

فرات: الكيتلي عليك

باتر: وسيراميك مكة

فرات: مادبرلي اختها

باتر: عدها خالتها هم ايـ*ه باجر اشوفها الك

دگ تليفوني شفتها حكمة جاوبها وگلتلي على ضرغام بسرعة باوعت الباتر كلتلها هسه اجي وسديته كمت عليه سحبتة

يمان: انت وين جنت

باتر: شبيك هيي مو كلتلك بالصناعي عندي شغل

يمان: وشغليش هذا النص الليل هاا

فرات: ماتگلولي شمالكم اليوم لان انا طالع وياكم ياول حظ

صحت بي بعصبية

يمان: يعنيييي الك ايييد بكتلة ضررغغامم

فرات: انا غلام ابوي منو الكاتله هذا

يمان: جاي اسأل اخوييي الشفية الك ايد بالموضوعع اكييدد

باتر: اكلك انت كل سالفة تصير تذبها براسي

يمان: اذا عرفت الك ايد بالسالفة ماتلوم الا نفسك

باتر: اشو انا كتلته شسويلي بلا تطهرني مرة ثانية

يمان: باااتررر

نتر ايدي وهو يحجي

باتر: يابه دروحح اگله مو اناا يگلي الك ايد الي ايد ديلا شتريد تسوي سوي

عافنا وراح ردت الحگه ماخلاني فرات لزمني يحجي

فرات: دعوفه بعدين خلي نلحگ على الجماعة هسه

صعدت سيارتي ورحتلهم طول الطريق افور مدري شسوي اذا جان باتر السبب وانا متأكد هو ورى السالفة

خيال"

صفت سيارته ونزل منها اجاني بسرعة قرفص گدامي لزم اديه يحجي

يمان: شمگعدج هنا گلبي

حجيت بدموع وانا منهارة واناشغ

خيال: يمان ضرغام راح يروح يمكن ميت الهسه مانعرف خبر

يمان: على كيفج حبييي خل نفهم السالفة اصبري تعاي وياي گومي

گومني اني ورميم ودخلنا للبيت يهدي بينا لان من صدگ جنه مفزوعات باوع الحكمة وگال

يمان: حكمة ماعرفتي وين راحوا

حكمة: انا اجيت لگيتهم شايلينه وحتى تليفوناتهم باقيه هنا سودة علية ماشايفين دربهم راكضين بي بساع بساع

گالت كلامها وتربعت بالگاع تفرك بديه الصارن قوالب ثلج شافت الورقة وحجت

حكمة: شني هاي البيدج

تمتمت بتعب

خيال: ماعرف ورقة لگيتها ببابنا

اتقرب مني عاكد حواجبه مستفسر وگال

يمان: شو بلا اشوفها

نطيتها اله قراها ورفع حواجبه مستغرب اباوع عليه عقجها حيل بيده وتمتم

يمان: بسيطة

سمعته بس جان مابيه حيل اسأل او اجادل سكتت وهو طلع شويه ورجع گال

يمان: يلا عرفت هم وين انا رايحلهم واطمنكم

حكمة: اخوك وين

مسح على وجه بحيره وحجه بهدوء

يمان: يمه مو گلتلج باتر مسافر

تجاهلت كلامهم وگمت لزگت ويا الا اروح وياك اول شي ماقبل لكن انا اصريت تنهد وحجه

يمان: بدلي وتعاي وراي للسيارة

عفت رميم وحكمة بالبيت وبدلت شلون مجان وطلعت رحنا للمستشفى وصلنا نسأل عليه دلونا هم وين صعدت قبل يمان اركض بس اريد اشوف ابويه او امي

شفت بابا رحتله ركض ابجي بصوت واحجي

خيال: بابا شبي ضرغام وينه

حضني يهدي بيه جان صوته مبحوح وحالته حاله

سليمان: لا تخافين بابا عايش وضعه شويه حرج بس يطلع منها ان شاء الله

حضنته وانا اردد

خيال: الحمد لله الف الحمد لله

ماجنت مصدگه على الشفته كلت ميعيش رجع گال

سليمان: عنده كسر بالضلع والرجلين

خيال: الحمد لله على هيج ولا غيرها

سكت وغمض عيونه بتعب وهو حاضن راسي اتقرب يمان يحجي ويا ابوي وانا رحت الامي گاعده على الكرسي ولابسه عبايه متغطيه بيها وحدة من الجيران نطتها الها بالهوسه

گعدت بصفها خلت راسها على صدري وگامت تبجي وابوي هم گعد على صفحة وخله ايده على راسه اول مره اشفوهم بهاي الحاله اول مره اشوف ابوي وامي بهالضعف ، رفعت انظاري اليمان يمشي رايح راجع بالممر وساد على ايدة حيل

باوعلي ابوي وگال

سليمان: وين بقتي اختج بنتي

حجيت وانا امسح بدموع امي

خيال: لا تخاف حبيبي عفتها بالبيت وخاله حكمة يمها

سليمان: گومي روحي للبيت واخذي امج وياج

فزت امي تحجي

هيلين: ماروح ولا ارجع للبيت الا اطلع ابني وياي

گام وتقدم عليها بعصبيه وگال

سليمان: الحالة الوصل بيها بسبب منو مو بسبب دلالج الزايد جبتي عمرج تخفين وتطمطمين سوالفه عليه وبس من يصير شي تگعدين تبجين

صرت بينهم احجي

خيال: بابا فدوه احنا بالمستشفى

يمان: ارتاح حجي مو وكتها هسه انا اقنعهم يروحون وياي

حجه الكلام بعد ماگعد بابا على الكرسي ورجع علينا

خيال: مستحيل نرجع واعرف ابويه بهاي الحالة

يمان: هو بالمستشفى وانا اوصلكم وارجعله

خيال: اريد اشوفه قبل لا نرجع

اشرلي امشي ورى رحت باوعتله من جامه دائريه تصير بالباب شفته صدره كله ملفوف ورجليه هم ووجه صاير اسود على ازرگ مايبين گلبي تفطر على حالته ودموعي تنزل احس حتى النفس صار مايدخل صدري ماعرف شسوي اعاتبة لو روحي تنسحن عليه وعلى حالته ...

بعدها اخذنا يمان ورجعنا للبيت ابوي بقوا يمه كم واحد من اصدقائه ومن منطقتنا واحنا ماقبل نبقى كل شويه ينفعل ويصير عصبي لهذا رجعنا

الناس رايحة وبس رميم وحكمة باقيات وحده صافنه بوجه وحده

وهيج مرت ايام احنا حالتنا حاله وعايشين بخوف حتى رميم ماداومت ابوي وصه منطلع من البيت وهو حتى مايجي للبيت مگابل ضرغام وگاعد

وطول هالفترة يمان ماعافنا يخلص شغله ويروح للمستشفى ويجي علينا وحكمة يمنا اصلا

وهيج عشر ايام بقينا على هالحال الحدما طلعوا ضرغام من المستشفى امي جانت طايرة بي من الفرح وبيتنا مافرغ من الناس

شكد ما ضرغام عنده سوالف متسولف واربعة وعشرين ساعة جان مشاكل بابا ويا متخلص رغم مشاكله بس انتهينا عليه من صدك عشنا ليالي سوده وبيتنا صار مينطب من حسينا بنفسنا ردنا نفقده للابد والمنطقة كذالك رغم يدرون بي هو شكد عنده سوالف موزينه بس هم بقوا يموتون على بابا ويحلفون براسه لان يدرون بي انسان صايم مصلي ويخاف الله

حتى من طلع ضرغام وعرفوا بسالفة التهديد كل واحد منهم صار يعرض شي على بابا و اسمع مختار المنطقه يگله

- شتحتاج احنا حاضرين ابو ضرغام بس اشر حتى بيوتنا نبيعها ونسدد وياك

سليمان: كفوا منكم ماقصرتوا ياجماعة بس الموضوع الهسه انا ماعرفه شنو ولا سالفة التهديد شنو الغرض منها بقت يم الشرطة بعد

بيومها جان ضرغام هسه طالع من المستشفى ومسوين عشا الوجه الله بقت سالفة التهديد تدور براسي وكلشي مافهمنا منها غير القضية بقت مفتوحة وهاي هي

تذكرت بالعيد الفات قبل كم يوم هم اجانه تهديد بس ابويه ما اهتم اله باوعت الرميم جانت گاعده تدرس حجيت

خيال: رميم تتذكرين الوقة الي وصلتنا اول يوم العيد

رميم: ورقة التهديد

خيال: ايي بابا مدري وين تلفها جان قارنها ونشوف نفسها لو غيرهم

كامت فتحت الكنتور مالتها تدور بي وانا اباوعلها بترقب طلعت منه ورقة وحجت

رميم: ضميتها لان اعرف تفيد مومال واخد يشمرها

كمت بفرحه بستها حيل وگلت

خيال: ولج شنو من عقل انتي

رميم: عوفي عقلي واحتاري بعقلج شلون نقارن بين الرسالتين والثانية مو عندج

صفت شوية وحجت

خيال: ايي نطيتها اليمان اتذكر خلي اتصل بي

اخذت نقالي اخذتلها صورة ودزيتها اله بسرعة رجع اتصل بيه اول مافتحت خط حجه

يمان: شني هاي الورقة خيال شوكت وصلتكم

خيال: قديمة من العيد ودزيتها الك حتى تتأكد وتقارن بينهم بلكي نتوصل الشي يساعد الشرطة

بقى ساكت شويه بعدها اردف بصوت طبيعي خافت

يمان: انا اتصرف

سديته منها وكمت ادور على الورقة الثانية لگيتها بجيب قمصلتي وگعدت اقارن بين الورقتين نفسها تقريبًا وبهذا الوكت جان ضرغام وباتر هسه صايره بينهم المشكلة

طلعت من الغرفة ماشوف گدامي من الاعصاب مستحيل ماصدك باتر ورى كل الصار دفرت الباب ودخلت شفته نايم بلا تفكير سحبته وانا احجي

يمان: كوم

عقج وجه بنعاس وحجه بصوت خشن اثر النوم

باتر: شبيك يمعود مو نااييمم

يمان: عندي سالفة وياك

باتر: مواضيعك ماتتأجل للصبح

يمان: انت ورى كل السوالف الصارت الضرغام وحتى التهديد والضرب

دفعني يحجي

باتر: شبيك بابا انت ماعندك غير هاي السالفة ومنو ضرغام حتى احط راسي براسه

طلعت الصورة وحجيت

يمان: هذا تهديدك لو مو تهدييدككك انطققق

اباوع الوجة صار ميتفسر هدأ من عصبيته وحجه

باتر: اول وحدة انا بس الثانية مو الي

يمان: ثنينهن الك بااتر

دفعته وصاح

باتر: موو الييي گوه تريد تلبسها براسي لو خايف ومااحجي وبعدين منو هو ضرغام حتى ابقى افكر بي لو اريد جا سحلتة بساعتها مابقى اتختل واهدد

لبس تيشيرته واخذ تليفونه وجگايره بسرعة بسرعة وهو يحجي

باتر: جنت ناسي السالفة بس انت لحيت دشوف شراح اسوي اله اخليكم تتندمون كلكم واول واحد نسيبك العار

راد يطلع التفت عليه وگال

باتر: واذا طلعت انا ورا السالفة شتريد اسويلك حتى طـ*** اطلعه الك بالشارع بعد شتريد

عافني وطلع كعدت على السرير ادخن محتار شسوي ويا حتى اخلي ينسى السالفة ...

مليت واختنگت كلش وين اروح ماعندي غيره وهذا هم هالايام ماعرف شبي متخبل فد مره

اتصلت علية وگلي هو بنفس مكانه المعتاد رحتله وهو على گعدته صاف السيارة وگاعد على البنيد مالتها بس هالمرة يشرب استغربت حالته نزلت ورحت عليه بسرعة جريت منه قوطية المشروب احجي

يمان: انت شبيك تخبلت هسه يشوفك واحد من اهل المنطقة يشكول

حجه بملل

دائب: جيب يمعود ** اعراضهم

يمان: غير اعرف شمالك صاير هيج شني هاي حالتك

دائب: اريد اخذ بنتي

يمان: تخطبها؟

حجيتها بتسأل واستغراب باوع عليه صفح وهز ايده ماعاجبه

دائب: وين اخطبها ياهو ينطيها الي وبعدها صغيرة هم

يمان: شلون تاخذها ترى دخت

دائب: غير بنتي

يمان: غير عدهاا اهل

باوع للباب وحجه

دائب: ماعدها اهل بنتي وبسس

حجه الكلام وشافها طلعت من الباب تتململ وتنافخ گعدت على الرصيف گبال بابهم اباوع علية فز بسرعة راح فتح السيارة رش عطر وخله علج بحلگه وراد يروحلها لزمته

يمان: شبيككك انت صدك تخبلت وين رايحلها هسه يطلعون اهلها

دائب: مايطلعون بس اريد اسألها جم شغلة عوفني يمان لا تدخل

وخرني وراحلها بلا كلام گعد يمها على الرصيف جان ليل تقريب الساعة 11 محد موجود ومنطقتهم راقية كلش وهادئة وهي جانت گاعدة ومخليها ايدها على خدها بحزن

اباوع عليه گعد يمها وخله ايده على خدة يقلد گعدتها رفعت راسها باوعتله وهو هم باوعلها بلا كلام ورجعت الوضعها تنهدت بحسرة تقربت منهم اريد اشوفه شيحجي وياها

دائب: شبيها بنيتي منو وياج

جاوبته بلا متباوع عليه

- فدوه روح منا هسه تطلع امي وبس تشوفك تموتني كتل والله

دائب: هذا اليوم سمعت صوت صياحج ليش جنتي تبجين

- عمو روح منا انت تريد تسويلي مشاكل

دائب: اريد احميج بابا

عگعدت حواجبها وحجت

- منين تحميني

دائب: من الوحوش العايشه وياهم

- انت ليش تحجي على اهلي ترى ماقبل

گامت بعصبية لزمها من ايدها عصرها حيل وهي صارت تجر بيها وتحجي

- شتريد الله يخليك روح منا وبعد لا تجي

دائب: ماعندج اهل غيري فتهمتي

- اريد احلف عليك انت واحد مخبل عوفني

گام عليها جرها من اذنها يحجي

دائب: بعدج بطول النعال ولسانج شطوله

هزيت ايدي ماعرف شسوي الاثنين طلعوا واحد اخبل من واحد صارتلهم مطاحن بنص الشارع هي تغلط وهو يغلط اخر شي

دفعته وحجت

- مره ثانية اذا شفتك هنا اگول البابا عليك

رادت تدخل سحبها حيل من ملابسها تفاجأت من گال اسمها هو ابد ماجايب طاري وحتى انا عبالي مايعرفه همس من بين اسنانه

دائب: وتر لا تخليني اضطر اسوي شي ابد ماريد اسوي

فتحت عيونها حيل تباوع بوجه بصدمة حجت

وتر: انت تعرف اسمي؟؟

بسرعة باوع عليه وغمض عيونه حيل مسح على وجه وحجه

دائب: طبي جوه

رجعت وكفت گباله كتفت اديها وحجت بعناد

وتر: مادخل الا اعرف منين تعرف اسمي

دائب: راح ارگعج براشدي الا اخرب معاني وجهج الحلوة طبي جووه جاي اگول

وتر: هو انت مبين حرامي وتبوك جهال

تقرب منها يحجي

دائب: مو اي جهال بس الحلوين مثلج بنيتي

خزته ودخلت البيتهم تركض باوع عليه مشه وهو يحجي

دائب: انت ابقى ملاحگني مثل الظل

يمان: ياخي حيرتني والله شنو سالفتك ويا هالطفلة

دائب: بنتي شلحيت

يمان: شسويت ويا صمد

دائب: نهايته على ايدي جاي احفرله

يمان: وانا حلفت اتبره منك اذا سويتله شي

دائب: حقك غير والدك العزيز

يمان: ياصخام العزيز شبيك انت بس انا حالف اخلص عليه بيدي

وكف اندار عليه خله ايده بجيوبه وحجه بثقة

دائب: ياهو اليوگع بيده اول واحد يخلص عليه وتبقى انت وحظك

يمان: اعتبر كل البينا منتهي بهذيج الساعة

دائب: ماتگدر

عافني وصعد بالسيارة باوع عليه وگال

دائب: صمد جاي يجني على روحه كل شويه مودي تهديد ويهوبز وانا ساكت الخاطرك بس ماضن بعد اسكت اكثر

عفته وصعدت سيارتي حركت ورا امشي الحدما وصلنا الشقة وشفته صعد وانا رحت البيت حكمة ...

❛❛❛❛

خيال"

مر شهر تقريب على طلعة ضرغام من المستشفى الحمد لله مرتاحين لان مكسر ومايگدر يطلع ولا يتحرك امي ملتهيا بي وحتى احنا ماتخلينا نتدخل تحتار شسويله وابوي هم شويه مخفف ويا

جنت احجي ويا يمان الي هالايام ابد مو على بعضه وادئما مشغول جان يسوق حجيت

خيال: شو انت صاير فد مره

جان يدندن ويغني ويا الاغنية المشغلها من حجيت هيج سكت وگال

يمان: ياهو انا

خيال: جا امي اي انت وحتى صار اربع ايام ماجاي حتى تشوفني من صدك انتم الزلم مالكم امان احجي شجاي تسوي من وراي

ضحك وحجه

يمان: حبيبي انتي المفروض يمسحون نقطة من اسمج و يسمونج خبال مو خيال

خيال: هاي اني ديلا روح وهاي حظر هم

يمان: اهوو عمري مابيه حيل هرمونات فدوة الحلگج

خيال: مو على بعضك صاير شي

يمان: اطلع يلا اريد اشوفج وصلت

خيال: بابا هنا ماكدر

يمان: ناهبج غير مرتي اطلعي نكعد بالسيارة اشوفج ورجعي

سديته منه وغيرت ملابسي كلت الامي ما مانعت بس گلتلي دخلي بسرعة

طلعت لگيته موكف السيارة بباب بيتنا صعدت ويا قدم خدة حجيت

خيال: شنو ؟

يمان: بوسيني

خيال: بالشارع؟؟؟

باوعلي وحجه

يمان: يعني كلت بوسيني ماگلت ن......

عرفته شنو راح يحجي سديت حلگه وحجيت

خيال: ابوسك بس اسكت

بعد ايدي وگال

يمان: يلا

اتقربت بسته وحجيت

خيال: شلونك

تنهد بحسرة وحجه بتعب

يمان: اجيت اشوفج حتى اصير زين

لزمت وجه وحجيت

خيال: مو على بعضك صاير شي

يمان: لا شويه اكو موضوع شاغل بالي بس اتأكد منه

خيال: اله علاقة بابوك صمد صح

هز راسه مؤكد الكلامي بقينا شويه نحجي ردت انزل فجأة تذكرت اسم القرش رجعت باوعت عليه وحجيت بفزع

خيال: ابوك اسمه صمد نفس الشخص الخطفني

فتح عيونه متفاجئ وحجه

يمان: وين تذكرتي هسه

رجعت باوعتله خليت ايدي على حلگي احجي بصدمه

خيال: يعني صدك ابوك

يمان: للاسف

باوعتله وبقيت ساكته ماعرف شحجي لزم ايدي وحجه

يمان: خليلي هذا الشي مو بيدي اتمنى مايأثر هذا الموضوع على علاقتنا

حجه الكلام وصار يبوس بأديه حجيت

خيال: بس هالشي ميمنع ان هو ابوك

يمان: وهذا الي تگولين عليه ابوي مثل ماخطفج كتل امي وموتها گدام عيني شوفني المر عيشني ليالي سود يعني انا مامعترف بي ابوي لا الي صلة بي لا انا ولا اخوي

خيال: اعرف حبيبي

باوع عليه بسرعة وحجه

يمان: شگلتي

خيال: تاخرت امي وصتني بسرعة ارجع

ردت انزل ماخلاني جرني عليه وهمس

يمان: شگلت خليلي عيد لا تشلع گلبي

نزلت راسي وهمس

خيال: حبيبي گلت

رفع راسي عيونه تفتر على ملامح وجهي تقرب عليه وحجه

يمان: تحبيني

اومئت بـ ايي بلا كلام حاوط وجهي قربني عليه

حجيت

خيال: يمان احنا بالسيارة

يمان: محد موجود السيارة مضللة

خيال: يمان

يمان: اششش تعاي

سحبني حيل عليه حاوط راسي وماحسيت الا اخذني ببوسه مليانه مشاعر دافية وحب ، خربط احوالي وبتعد فتحت عيوني همس

يمان: گوليها

خليت ايدي على شفتي وحجيت بصعوبة

خيال: احبك

باسني حيل من حلگي بوسة سطحية وحجه

يمان: ياويل حالي جا انا اموت على ربك خليل گلبي

خيال: هسه امي تطيح حظي

ضحك وفتحلي الباب

يمان: هسه تلگينها ملتهيا بضرغام مو بحالكم حتى الحجي عايفته

خيال: ايي والله صدك

عفته ونزلت بعد ماوصيته يدير باله على نفسه دخلت للبيت وهو راح

صعدت للغرفة لگيت رميم تدور بتليفوني حجيت

خيال: شجاي تدورين

رميم: ادور بحساب الفيسبوك مال نسيبي اريد اشوف اخوانه عدهم صفحات

شهگت جريته من عدها وحجيت

خيال: شو انتي صايره فد مره طالعة عينج

رميم: ولج والله صكوك قابل شراح اسوي هو بس اباوع على إبداع الخالق بالخلق

كامت وكفت بالباب وحجت

رميم: وبعدين حبيبتي الي يتمعن بالجمال ويسبح بأسم رب العالمين هاي تعتبر عبادة خليها ببالج

شمرت عليه المخدة وانا احجي

خيال: امشي ولج زاحفة

رميم: اويي عيني نزول دادة من زحفتي على يموني ابو طول الحلو محد گلج على عينج حاجب

خيال: منو يكدر للسانج ام لسان ...

نزلنا جوه اني وياها حتى نشوف ضرغام هي راحت الامي بالمطبخ وانا ردت ادخل للاستقبال توقفت من سمعت ابوي يحجي ويا ضرغام ويگله

سليمان: من باجر اخذك واطلع الاربيل بس اسمع الكلام ولو مره وحده بحياتك

ضرغام: يابه انا هم تعبت بعد ماگدر باوع حالتي بس هذول ماراح يعوفوني بحالي

سليمان: شنوو تايه هي ماكو حكومة ماكو ناس خيره ان خليت قلبت خليها على ربك هو الحلال

عرفت وفهمت شنو دايحجون يعني بابا راح ياخذ ضرغام حتى يتعالج دگيت الباب ودخلت استقبلوني ثنينهم مبتسمين اول مره اشوف ابوي مبتسم والراحة على وجه من يوم ماضرغام بدأ يسوي سوالف ومكسرات لليوم كعدت يمهم بقنا نسولف اجت امي جايبه جاي ورميم شايله الكيك تاكل بي وراها

ضرغام: على كيفج لا تغصين محد ياكله منج

كعدت وحجت

رميم: خليت عينك على كيكاتي هسه راح اغص غصيت غصيت لحگوني بكلاص بيبسي

بقوا يضحكون عليها وبابا يشاقيها وهي تداهره لو ترجع على ضرغام المكسر وتگله خلي نلعب مصارعة وامي تحجي عليها

اباوع عليهم خنگتني العبرة من زمان كلش انا ماشايفه اهلي بهاي اللمة والالفه باوعلنا بابا وگال

سليمان: احسبوا حسابكم بعد ثلاث ايام أربعة اخذ ضرغام واروح الاربيل

فزت امي تحجي

هيلين: يمه وين ماخذ ابني

سليمان: على كيفج ام ضرغام ماماخذه للمصلخ اخذه هناك يعاينون حالته حجزت بمستشفى زين

هيلين: ماتتحرك رجلي على رجلك

ضرغام: شني السالفة يمه طفل

سليمان: وين ترحين ويانا ونتج عدها مدرسة

هيلين: وتعوفنا وحدنا

سليمان: ام يمان ويمان يمكم لا تخافون ماكو شي سبوعين 3 زمان ونرجع وان شاء الله ضرغام متعافي

حجاها وطبطب على ايد ضرغام وكام يرفع برداناته ويحجي

سليمان: داخل اقرا قرآن مابقى شي على الصلاة

اني ورميم بقينا ساكتين بس امي تلوب گوه قنعها ضرغام يلا سكتت

وفعلًا كم يوم مر واخذه وراحوا الاربيل بعد ما وصى يمان علينا

وضرغام نقلة بسيارة إسعاف على حسابه طول المدة محد جان يعرف غيري بس انا اتواصل ويا ابوي ويشرحلي حالته وشنو جاي يسوون ويا بأول فتره تأهيل نفسي فقط ماطول بيها لان هو جان مصمم على العلاج وهم جان نسبه الادمان والسموم كلش قليلة بالدم لان جان مايتعاطى هواي

بقت السالفة ببالي اذا مايتعاطى هواي ليش كل هاي كمية الحبوب الشفتها عنده شنو جان يفكر من يشتريهم ...

وبيوم كالعادة جان يمان يمنا على العشا اجه يشوفنا خاف محتاجين شي وامي تلزمت عليه الا يبقى

جنا ناكل امي مسويه معجنات وفطائر هو منطلق يسولف ويا رميم ويشاقون جان فجئة امي گالت

هيلين: هاي المعجنات كلها خيال سوتها

ماگدرت اتحمل غصيت باللگمه اريدها تفوت ماكو انطاني مي وحجه ببتسامة مبين ممصدك

يمان: هاج اشربي

رجع باوع الامي وگال

يمان: خوش تطبخ خيال عاشت ايدها الاكل كلش طيب

رميم: اصلا احنا ماناكل الا هي تطبخ لانطبخها من صدك ولا منال العالم

يمان: طبعًا واضح

هيلين: ايي المطبخ كله الها

حجتها وخزرت رميم حتى تسكت وهم يضحكون وانا وجهي صار ينطي الوان حتى ماحجيت

فجأة دك نقالة بس فتحه ماعرف شنو سمع تغير وجه 180 درجة وگام وكف سد الاتصال وحجه

يمان: تأخرت لازم اروح

هيلين: بعد وكت

يمان: تسلمين ام ضرغام صارت عندي شغلة مستعجله

ودعنا وطلع وامي تأشرلي اطلع ورى طلعت بعده يم الباب حجيت

خيال: حبيبي صاير شي

يمان: لا ماكو شي

عافتي وطلع بقيت صافنه ورا صعد سيارته وشخطها طلعت حكمة من بيتها جايه علينا شافتني وحجت

حكمة: شماله هذا ملگوف

خيال: يگول عندي شغل

اتقربت بوستني وحجت

حكمة: شغله مايخلص تعاي خل نتعلل شويه

دخلت وراها بس بقى بالى يمه ...

❛❛❛❛

يمان"

اتصل عليه الشاهين مافهمت منه غير دائب كتل صمد وجان صوته فحطان ويلهث

طلعت بسرعة رحتلهم وصلت للشقة الساكن بيها دخلت لگيت باتر گاعد وخليه ايده على راسه بحيره ودائب طلع من الغرفة يسحب بجنطتة وايدها ملفوفه معلگة برگبته ماتحملت همجت عليه خنگته اصيح واديه ترجف من الاعصاب

يمان: ليششش كتلتههه ليششش موته بهاي البساطة والسهولة نهيته بهاي الطريقة ليششش

دائب: شسويله جنا بالمهمه وطلع گبالي يعني لو ماكاتله جا كتلني والشاهين شاهد

جان يحجي ببرود

يمان: دائب لا تخببلنييي انت كلت وين ماشوفه اكتله

دائب: وهذا انا كتلته هسه شتريد تسوي تكتلني

صحت

يمان: شلووووون تكتله

كام باتر جرني منه وحجه

باتر: شبيك تخبلت فضحتنا وانت هيج ميت على صمد يطبه مرض جلب ومات

يمان: انت اسكتتت ماريد اسمعلك نفس

باتر: هسه شتريد تسوي كتله يطبه حريشي مات وشبع موت وجلابه خذته وطمطموا السالفة

يمان: يكتله بهاي السهولة ولكم سنين وانا اتانييي صمممد سنييينن وتاليها يموت وما اخذت حيفي منه ولا اخذت بثااارر اميييي

دائب: وانا ادري بيك لهذا ماردت اكتله بس لو ماضاربه جا هسه الطلقة جايه براسي مو جرح صغير بيدي والشاهين شاهد

ابتعدت منه وحجيت

يمان: من اليوم لا انت اخوي ولا صديقي ولا اعرفك اعتبر روحك ميت لا اعتبر روحك عدو

بقى باتر يصيح وراي عفتهم وطلعت مدري مين اروح النار البيه ماتخمد ماخذت بثار امي ومات وماتعذب مثلها بقيت اكل بروحي يمكن بليلتها فريت البصرة كلها وناري ماطفت ...

خيال"

بقى بالي يمه راح وبعد مارجع ولا طمني عليه اتصلت بي هواي وهو ماكو الحد ما شفت سيارته بالليل كلش ووكفت بباب بيت حكمة الجانت نايمه يمنا ونزل منها يلا طمنت اتصلت عليه ماقبل يحجي شي غير گلي تعبان ونعسان عفته براحتة يمكن محتاج يبقى وحدة

مرت الايام وهو مبتعد يتصل شويه يطمن علينا ويروح من بعدها رجع طبيعي ولا كأن شي حدث وقررنا نأجل العرس ونخلي على السنه الجديده هم على مايرجع ضرغام ...

مر تقريب اكثر من خمس اشهر على علاج ضرغام وطلع بيومها من رجعوا امي جانت ماسايعتها الفرحه وخاصه من شافت ضرغام متحسن ويمشي على رجلية والضحكة بوجه

وبابا هم مبين مرتاح الحالة ضرغام جنا مسوين عزيمه وذابحين وهاي جانت اول فرحه تدخل بيتنا من مدة طويلة كلش من بعدها مرت الايام مرتاحين لا طلايب ولا مشاكل ضرغام اكثر الاوقات بالبيت بس اشوفه مرات ينتكس ويضوج وخاصه من تجي اتصالات الدرجة غير خطوطة صح بعده مقابل على خطوبتي بس ساكت لان بابا مايخلي يحجي

مرت هاي الفترة مرتاحين كلش ماجنت اتصور ان هاي اخر راحة اشوفها بحياتي ولا جانت متوقعة الراح يصير شنو بعدها

يوم 2013/12/31 هذا جان اسوء يوم يمر عليه بحياتي كلها

بيومها جنا انا ورميم جاي نتجهز ونبدل نريد نطلع ويا يمان

وكفت يم المرايه ارتب وجهي وهي وراي دخلت امي باوعت علينا ببتسامه وحجت

هيلين: هاا ورداتي راح تعوفوني وتطلعون

باوعتلها وحجيت بزعل

خيال: مو نگلج اطلعي ويانا متقبلين

هيلين: لا امي مابيه حيل هسه انزل اتفرج شي وبعدها انام

اتقربت بتسامه حضنتنا انا ورميم وحدا منا ووحده منا وحجت

هيلين: اول عيد راس السنه مراح نعبرها سوه

رميم: امتي العزيزة كل سنه نعبرها سوه خلي هالسنه مختلفة

ضحكت باستها وحضنتها حيل وانا نفس الحالة نغزني گلبي شبيها امي اليوم بس ماحجيت حضنتني وگالت

هيلين: ديري بالج على نفسج وعلى اختج فدوه اروحلج بنتي ماوصيج

خيال: ماما شبيج

هيلين: ماكو شي حبيبتي يلا بسرعة هسه يمان ينتظركم

نزلنا جوه شفت ضرغام صار كبالي حضني وحجه

ضرغام: ديروا بالكم على نفسكم حبيباتي تونسوا

رحت البابا بسته وحجيت الطف الجو

خيال: وانت حبيبي ماوصيتنا ندير بالنا على نفسنا

ابتسم بوجهي ببتسامته البشوشه المتعتادة وحجه حاضن وجهي

سليمان: لان ادري بيج كد المسؤلية وديرين بالج على روحج وعلى اختج

بقيت صافنه عليهم تقربت رميم باسته بخده وحجت

رميم: من نرجع اريد احجي وياك موتنام

سليمان: منتظرج حبيبتي مانام

سحبت ايدي وطلعنا لگينا يمان منتظرنا افترينا اشترينا واكلنا وشفنا الالعاب الناريه مال رأس السنه بس انا طول الطلعة مبوزه ولا تهنيت بيها وكل بالي وفكري ببيتنا بس اريد ارجع حتى هو انتبه عليه وعلى حالتي وبقى يتسأل

على مارجعنا گوه خلص الوقت وكالعادة رميم نزلت قبلي وانا ويمان بقينا بالسيارة نحجي شويه وبعدها ادخل فزيت من سمعت صوت صرخة رميم وواحد طفر من السياج مال بيتنا

متت گلبي راد يوگف ماعرفت شسوي باوعت اليمان الجان صافن وفاتح حلگه بتعجب وعيونه يردن يطلعن من محجرهن صرت اهز بي واحجي

خيال: يمان اختي مدري شبيها وهذا منو الطفر من بيتنا يمماااانننن

انتبه على صوتي بسرعة فتح باب السيارة ونزل يركض وانا دخلت ورى شفت عساني لا دخلت لا شفت الصاير بعيوني تمنيت ميته ولا عشت هذا اليوم رميم بالحوش باقيه كاعده ولازمه ايدها تجري دم مالحگت اروحلها دخلت ورا يمان اركض للبيت

شفت اهلي كلهم بالصالة متمددين وكل واحد طلقة براسه او بأماكن مختلفة من الجسم ميتين....

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫

بقلمي: زينب علي

شنو رأيكم بالقصة والاحداث

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق بين الفقرات ♥️

متابعة ممتعة.🦋