تحميل رواية «أهُنتُ عليك؟» PDF

أهُنتُ عليك؟

للكاتبة Nha-d-h

رسل

مرت الايام

والحال على نفس ماهو عليه لكن ماما بدت بهاي الام اشوفهة هواي تدوخ وتطيح

اسألهة تكول عندي دوار بالاذن الوسطى

واختي رفل من ذاك اليوم واني علاقتي بيهة متضعضعة

مرة قررت ان اخطي الخطوة الي لازم اسويهة من زمان

رحت لكلية رفل وبقيت بالباب مقبلو يدخلوني فكلتهم اني اخت رفل محمد بكلية القانون وذكرت المرحلة والله ورة شوية واجت رفل وعيونهة تجدح نار

رفل-انتي شجابج هنا

رسل -شبيج ضايجة اجيت اسأل على اختي حبيبتي

رفل-خوماكلتيلهم انتي اختي وعرفوج

رسل-وليش يمة ما اكول انة اختج لوخايفة من عندي

رفل-نصي صوتج ويالله امشي ولي منا

فضحتيني جنج مگدية بهذني ملابس

رسل بوكتهة اني عرفت رفل جانت مستنكفة ان يعرفون اني اختهة

رسل -هاي مشكلتي مو مشكلتج سامعة

شوية وطبكت قريب علينة سيار جكسارة حديثة نزلت جام السيارة شفت شاب كاعد بيهة ويمة شاب ثاني نزل الجامة وحجة وية رفل

يالله ماتمشين ترة صارلنا ساعة منتضريج

رسل جريت رفل من ايدهة -والله اليوم الا احجي لامي عليج شدتسوين من وراهة

رفل -اعلى مابخيلج اركبيه بكيفج تردين تموتين امي وتقهريهة هذا الشي راجعلج

وعافتني وركبت بسيارت الشاب

بس متت قهر

بعدهة مرت سيارة شفت بيهة لمى صاحبتي وية اخوهة راكبة شافتني ودارت وجهة بس قبل لاتدور ابتسمت

لان كانت بنفس الجامعة

والله متت قهر وعرفت اختي ضاعت والله اليستر من الجاي

مرت السنين واني تخررجت من معهد التمريض واختي رفل اتخرجت من كلية القانون واصبحت محامية

بعد سنة

رفل اتعينت بشركة اهلية كلش معروفة تعينت بواسطة عن طريق صديقتهة حسب ماتدعي

واني اتعينت بالمستوصف الي بمنطتنة

وبقيت مستمرة بنفس طريقي وكلما اشوف يوسف

ياربي شوكت تفرجهة علية حتى الاحبة يصير الية

كل يوم اردد هاي الكلمات

صار حبنا بس بالعيون احس بنظراتة اكو بيهن اعجاب بتجاهي وصرت اتمنى يحجي وياي

على الرغم انة مو النوع الي يحب التكبيل بس وية يوسف الشغلة غير

رفل -ماما عندي ايفاد للبنان ولازم اروح اني وكم زميلة والمدير بشغل جدا مهم

امي-لايمة مااعندنا بنية تسافر لوحدهة بديرة غرب

رفل -اهووو يمة اني جبيرة وواعية ومسؤلة عن تصرفاتي مو مراهقة وجاي تحجين وياهة هذا الكلام اني ماجاي اخذ رايج اني جاي انطيج خبر حتى تكونين على علم

الام-عزة العزاج ياصلفة ولج اليوم الا اوكلج تبن شنو ولج شفتي نفسج كبرتي حسبالج كبرتي علية

وركضت امي وضربت رفل بالقوري

وجة براسهة

اتفاجئت من شفتهة هي ورفل دخلت علية بالمستوصف حتى اضمد الهة الجرح لان نبع الحنان فاتحة راسهة بالقوري

بس خطية جان وجه امي اصفر

وبوكتهة رفل ما سافرت بس البيت بذيج الايام انكلب جحيم

مرت فترة وصادف وقت شتة والجو جدا بارد يجرش

خطية جنت ارجع من الدوام مالتي الكة امي مشغلة الصوبة وخالة عليهة جدرية لبلبي الله واوح اغير مبلابس واكعد يم الصوبة واصبلي كاسة لبلبي حارة واخذلي صمونة واكعد اكل واحجي لامي عن يومي لكن اليوم جان جدا مميز

شفت يوسف اليوم جاي بالمستوصف وجايب امة كانت امة قوية زينة موجبيرة بالعمر جان جاي يجيك ضغطهة

واني كمت بيهم بالصلوات وجيكت ضغطهة ووهو يباوعلي ويبتسم

امة من طلعت ماطلع وراهة بسرعة

يوسف -احم احم ممكن سؤال

رسل رفعت راسي من المكتب جنت جاي ارجع جهاز الضط لمكانة -نعم تفضل

يوسف-انتي مرتبطة

رسل وبخجل-لا مو مرتبطة

يوسف -عادي اذا واحد يتقدملج

اني -عادي ذاك بيت اهلي وهلة بيهم اذاكان انسان محترم ليش لا

الله يارب شكد تحبني

يعني يوسف راح يصير زوجي والله الصبر حلو

من يتكلل بالزواج بعد انتظار

كانت رفل اختي خلال هاي الايام اشترت سيارة حديثة وامي كعدت تستجوب وكعد السين والجيم يشتغل على راس رفل

والله حرام عليهة شلتة لحال امي

رفل -شبيج ماما هاي سيارة جنت مقدمة عليهة بالتقسط بس للموضفين مسموح الهم ياخذون واشتريتهة لان تفيدنا

وكالعادة عبر الموقف علية وعلى ماما

لكن ورة شهر اختي رفل اتغيرت احولهة وصارت ما تاكل وبس تفكر

واني اختهة وتؤامه احس بيهة لان مهما كان تبقى اختي وجان شكلهة يكسر الخاطر اسمعهة بس تبجي بالليل

بعدهة اجت رفل وبيدهة جنطة

وخلاهة بالكنتور مالتهة وقفلتة بالسنتين الاخيرات تعودت على رفل اختي صارت دائما تقفل الكنتور

رفل-رسل بس لحظة عوفي البيدج وتعاي محتاجت بشغلة

تركت الجلافة على السنج ونشفت ايدي ورحت وراهة

شفت اوراق مطشرة على الميز مالت الهول واشرتلي وهي لازمة ايدهة

كالت عفية كتبي عني ايدي مخلوعة عندي شغل مكتبي كلش مهم ولازم اخلصة اليوم والله وكعدت اكتب ومبين عليهة كلة شغلات تخص القانون ومن علي السوالف

والله خلصت شغلهة وسئلتة -اجيبلج دهن امرخ ايدج خاف تأذيج

رفل-اي والله ياريت خية

رسل الله صارلي شكد ما سامعة هاي الكلمة -هسة دقيقة

رحت سويت الهة حليب واجيت وجبت المرهم

رجعت لكيتهة غافية على القنفة شكلهة يكسر الخاطر وهواي ضعفانة

رفل بالفترة الاخيرة هواي تغير اسلوبهة وتصرفهة وية امي وخطية اشترت النا غسالة اوتماتيك وثلاجة بدل الثلاجة جانت كل فترة لازم موديهم لمصلح

واشترت سبلت لامي وسبلت لغرفتنا

وكالعادة غراض بالتقسيط المريح وحتى الذهب صار عندهة هواي ذهب

رفل-رسل اليوم حضري روحج اخذج وياي للحلاقة

رسل -خاف امي ماتقبل ولج

رفل-شنو امي ماتقبل انتي جبيرة ولج بنات بالمتوسطة يحفن ويلعبن طوبة وانتي بكد السليمة وتخافين من امي

والله عاد كدرت رفل تقنع امي وتاخذني للحلاقة وكعدت الحلاقة تشتغل بيه اربع ساعات غسل وتشحيم يعني حف على شيرة على كص على صبغ من كمت من الكرسي والله اتفاجئت بشكلي حتى نزيت يمة هاي اني

الحلاقة-ولج شنو جنتي دافنة نفسج بالحياة هذا الجمال كلة وهيج هاملته تعاي شوفي البنات بحسرة هذا الجمال وما كاعدات راحة وانتي مبينة طيبة وعلى نياتج

رفل-سولاف عوفي اختي بحالهة ترة ماتعرف شتقصدين لو تحجين منا لباجر ما راح اخليج تقتربيلهة كافي عليج انة

رسل ما افتهمت حجي اختي

وبذاك اليوم العصر اجن نسوان وكعدن يحجن ويباوعلي وعرف ان همة خطابة جايين من طرف يوسف

يالله اجيت ابجي من الفرحة

اباوع للمرة الي اجت وية ام يوسف بس تتلمس بية وتصح صلوات على محمد خالة هذا شكلج كلة طبيعي لو عمليات تجمل ترة ياخالة صارت بينا خوفة من البنات

بالله خالة شو كومي امشي كدامي جنت لابسة دشادشة قصيرة لطش على جسمي صايرة عبالك فستان

كمزتني من كرصتني من الخلفية مالتي وتكلي يمة هذا طبيعي لو ابو السفنج

رسل بستغراب-خالة ما افتهمت شتقصدين

امي -كولي خية ما شاء الله طبيعي هذا

رسل

ادري ام يوسف جايبة هاي المرة حتى تفحصني عوزهة بس مادخلتني للغرفة وكشفة علية

استغفر الله

حجت ام يوسف -عيني الباجر الولد يجي يشوف البنية

امي-ان شاء الله على بركة الله

يوم العرفت بي رفل بالناس الي اجونة لعبت طوبة بالصياح

ما اعرف ليش

رفل-ولج عوبة تدفنبن نفسج بهيج مكان ليش

رسل-همة خوش ناس والولد محترم وشنو يعني اذا كان نفس منطقتنا

رفل-ولج تدفنين نفسج بالفكر

رسل -اني ماتهمني المادة يهمني الشخص الراح اتزوجة

رفل -ما راح اخليج تتزوجينة لو على كص رگبتي

رسل -لاحبيبتي هذا الشي راجعلي مايخصج فاهمة ولاتدخلين نفسج وكوني ولو مرة وحدة بحياتج غير انانية وتصرفي تصرف عدل يخليني اذكرج بخير

للكاتبةNuha-d-h

يتبع

أهُنتُ عليك؟

للكاتبة

Nuha-d-h

رسل-لا انتي كلش زودتيهة رجاءا ثمني كلامج قبل لاتحجيه لان راح تبيعين صداقتنا بهذا اسلوبج

لمى -لاحبيبتي اني مثمنة كلامي بس انتي حضرتج الي فضلتي ان تتغاضين عن تصرفات اختج وادري بيج كلش زين انتي بنفسج ما مقتنعة بيهة

رسل -اسفة لمى بيتنا يتعذرلج انتي ما احترمتي حرمتنا وتجاوزتي حدودج ما اسملحلج تطعنين باخلاق اختي

لمى -لج الثولة انة شحجيت وانتي گبيتي بوجهي وهم ياريت تستاهل تدافعين عنهة تردين تطرديني عادي اصلا اني راح اطلع بدون ماتحجين لان ما راح اتحمل عنادج وتغافلج بحق اختج المتستغلتكم انتي وامج

وسمعيهة مني اختج لاعبة شلم بلم بالكلية وما ظال واحد مالاعبة عليه حبيبتي روحي سئلي قبل لاتجين تدافعين عن شرف المصونة اختج

بس تعرفين شنو القاهرني قاهرني انتي وامج مسوين نفسكم متدرون وهي على مستوى من الانحراف

رسل بقهر-لمى طلعي برة وبعد انسي عندج صديقة اسمه رسل

رسل من بعد كلام لمى عن اختهة ظلت تراقب بيهة وتشوف تصرفاتهة بس ما لاحظت عليهة شي يخليهة تشتبه بيهة.

رسل-رفل منينلج هاي الملابس

رفل-مو مالاتي مالت صديقتي واني اطلب منهة والبس لو حتى هاي ماتقبلون عليهة لاتقبلون تشترولي ملابس ولاتقبلون اطلب من صديقتي. يعني لا انطيك ولا اخلي رحمة الله تنزل عليك

بوكتهة عرفت رفل سالكة طريق خطاء وان كلام لمى كان صحيح

على الرغم من بساطة العيش لكن احب من ادخل للبيت اشم ريحة مركة السبيناغ الي تسويهة امي بحيث من باب البيت اشم ريحتهة امي حبيت گلبي هي التخلق النا الجو الدافي داخل البيت واتذكر من نكعد ونسهر اني وياهة ورفل على فلم خصوصا اذا كان الفلم نهاية حزينة نظل وحدة ماتباوع لوجه الثانية بس من نشغل الضوة ونباوع لشكولنا وعيونا وخشومنا شلون حمر نظل نضحك

رفل وبيدهة علاكة-هاج اخذي ضميهة للسهرة اليوم خميس لاتنسين عليج الشامية انتي تسويهة

الام اي صدك اليوم بيت خالكم يجون

رسل وبفرح -يمة بيت خالي كلهم راح يجون؟

رسل اني احب بيت خالو اسعد واحب بناتة كلش حبابات واحب گعدتهم وسوالفهم هنة مثل حالنة لاطلعة ولامشية واذا رادو يطلعون من بيت لبيت تصير طلعتهم مثل حلاتنة. واذا كلش كلش طغينا نروح سفرة للسندباد وناخذ غدانة ونروح

الام -اكلج رسل كومي يمة لبسي عباتج روحي اشتريلنة ربع كيلو لحم مثروم حتى اسوي كباب عروك للعشا

رفل-عوع كباب عروك شنو لاماما حبوبة روحي اشويلنة كباب عند الكصاب القريب عالسوك

الام -لايمة منيلي فلوس ووبيت خالج جايين واحنة كومة هسة لو بس انة وانتي واختج حان رحت لبست عباتي وشويتلج

رحت لبست عباتي وجنت امشي بالمنطقة كان اكو بيت ركن بي شاب مرتب اسمة يوسف هيج يصير عمرة ٢٥

جنت كل ما افوت من بابهم الكاه كاعد ودائما الكة يمة عدة مال تصليح سيارات

جنت معجبة بي بيني وبين نفسي وجنت كلما احط راسي علمخدة اظل اتخيل نفسي ان هو يجي يتقدملي ويكول لو هاي البنية لو ما اتزوج جانت احلامي بسيطة

جان اكبر همي امي وشوكت اكون عائلة خاصة بية

جان الولد جدا خلوق ومحترم وابد مايوم سمعني كلمة مثل الشباب البقية الي من اعبر عليهم لازم يصجموني

اني اشوف روحي عادية مو ذاك الزود وبنظري ان اختي رفل احلى مني بقاطات بس لمى جانت دائما تكول انتي احلى من رفل وتقاسيم جسمج نادرة الامتلاءات كلهة بالمكان الصحيح اني مايهمني لاتقاسيم ولا موصفات اني يهمي هذا الحلو الگاعد بباب بيتهم وجاي يشتغل بالعدة مالت السيارة وخدة بي لطخة دهن اسود مالت السارة وايدة كلهة زيت اسود

اني امشي واباوع عليه اخ الله شلون شكل طالع اشو الصخام زادة وسامة من فدوة رحت لامة

اخ لوبيدي اروح اكللهة خالة ما تردين جنة اوف اوف

بس الحلو بالموضوع من امر من يمة يظل بس يباوع علية لكن ابد ما فديوم سمعني حجاية

اتقربت على بيتهم امر من يمة سمعتة جان يحجي وية ولد من مريت من يمهم شفتة سكت هاي الحالة دائما تصير كلما اعبر من بيتهم وهو موجود اكثر من مرة

اني هذا الموقف اظل اجمعة وية المواقف البقية واظل اتحلم بي كل يوم احس مثل الي عندهة محصلة وتجمع بيهة فلوس واگعد اجمع هاي اللحظات

وصلت للكصاب وطلبت منة ربع كيلو لحم انطيتة الفلوس وانتظرتة يرجع الباقي سمعت من وراي احد دخل للمحل وكعد يحم حم -احم احم -عفية فدوة ابوشاب وين صار كباب الشوي مو گلت ربع ساعة وتعال درت وجهي وشفت يمة هذا يوسف اجة وراي يمة گلبي شفتة اتفاجئ من شافني يعني جانت صدفة مو جاي وراي يالله احسن من ماكو رب صدفة خير من الف ميعاد

الكصاب -ماعندج ٥٠٠ دينار جوة ايدج حتى ارجعلج ٥٠٠٠ الاف

رسل -ماعندي

دخلت علينة مرة اسمهة ام قصي تصيرمن نسوان المنطقة بس ثقيلة جدا

رسل وبگلبهة اهووووو شجابهة هاي حظي

ام قصي-هلة برسولة شلونج يمة وامج البذاتة شلونهة

يوسف-احم احم انة عندي جوة ايدي ٥٠٠دينار هاك

رسل -لالا اخوية ميحتاج هسة هو يرجعلي حتى لوخردة

بس عودك انة شنو من حجة يوسف هيج عبالك ماكال عندي خردة لا عبالك گال هذا المقدم مالت العروس جا غير اتخبلت جاغير حبيت ام قصي ومتت عليهة وردت احضنهة من الفرحة

ام قصي-منو يمة هذا خطيبج

عااااااا لا لا ام قصي راح اسميج بعد كلة ملاك الحب

اني بخجل ابو الحلك المشكوك بس بصوت عالي -لاخالة موخطيبي اني مو مخطوبة

ام قصي -چا شبيهم العرسان انعموا مايشوفون هذا الجمال كلة

لالا بعد هاي هي كعدت اهتف فلتحيا ام قصي حبيبت الكل

انطاني الفلوس الكصاب بس خردة ونصهن مشكك بس ميخالف اهم شي حصلنا شوفت العزيز

رسل -خالة حبيبتي عودك هم مري علينا نشوفج ونشوف البنات

اي رسل هاي من ليمتة انت هيج حبابة

وعفتهم ورحت

والله وجاي امشي بالشارع واشتريت وياي صمون بدربي واشوف واحد يركض وراي ويصيح بسمي التفتت واشوفلك يوسف لا لا هذا اليوم ناوي علية بسكتة قلبية

احم عودك سويت روحي ابيع ثكل وبالك عني شفتة اقترب مني ويبتسم يمة عزة العزاني هسة راح يكلي وين بيتكم اريد ادز الولدة تطلب ايدج

يوسف-اسمج رسل

رسل بخزرة مصطنعة -اي نعم شرايد ليش تتبعني ترة موحسبالك عبرت علية سالفة الكصاب وشفتني ماعبرتك

وهسة جاي راكض وراي

يوسف وهو يضحك -اي والله دوختيني من طلعتي

رسل گلبي گام يگمز -شنو قصدك دوختك احترم نفسك

يوسف ويمد ايدة الية حتى اخذ منة شي

يوسف -هاج اخذي لزمي

رسل-لالا احترم نفسك اني ما اخذذ ارقام من ولد

يوسف -هو شنو فتهمتي والله خبصتينا بس لوك لوك لوك انطي مجال خليني احجي

هاج لزمي علاكة اللحم نسيتيهة عند الكصاب

يبوي يبوي دورولي حفرة اطم روحي بيهة

رسل وبفشلة -احم احم اة شكرا

بس عودك اني شصاربية درت وجهي وكبل مايشوف بس غباري عبالك مثل هذا (البيببيب)

رسل

دخلت للبيت واحجي وية نفسي واغمهة

والله عوبة چاهي العوبة شلون شكلهة يصير

الام-هاخيرج شبيج تحجين وية نفسج شنو جبتي اللحم

رسل -اي هياتة بالعلاكة

والتهيت وية امي بالمطبخ اثرم الكرفس وبالي وية المحبوب اخ هسة شيكول علية بس والله من الفشلة بعد ما اراوي وجهي بعد كلة اطلع من الفرع الورانة حتى ما اشوفة بس كم يوم علما ينسة بلكي

رفل -اكلج يمة راح انضف بس الهول غرفتج خليهة على باجر اطلعهةً

الام -اهووو بدة شغل التلزك اريد مرة تكملين شغلج على اكمل وجه ماكو

رفل-يمة شنو بس تحجين علية انت قسمتي البيت انة علية شغل البيت ورسل عليهة المطبخ زين ليش من ست رسل تدخل لشغل المطبخ الكاج وياهة تساعدينة وانة اكرب كراب المطي ما فديوم سمعتج كلتي تعاي اساعدج

والله ظلم هذا

الام-يمة يمة اكلتنة بلسانهة هاي كلة هيج تكضيهة بس تتبكبك والله عمي بهذا السانج صدك تستاهلين تصيرين محامية لانج ام السان (حشة اخواتنا المحاميات )

اجو بيت خالو اسعد

وكلش تونسنة وياهم حطينة العشا خطية خالي جان جايب وياه ركية

ورحت قطعتهة وزعته بصحون ونزلتهة علسفرةز

بعدين من خلصنا راحت رفل وطلعت جيس كرزات وجبس حجم عائلي وكاكوبانواعة وعصاير وكعدنا نكرز واني اباوع لرفل هذني الغراض منين اجن بس ماگدرت احجي لان بيت خالي عدنا

من طلعو

اني كبل رحت ورة رفل ودخلت عليهة بالغرفة وسديت الباب-رفل من وين جبتي فلوس هذني الغراض

رفل-اهو اشتغلت رحمة الله

انتي تاليتهة وياج بابا توبي مني وخري عن طريقي

رسل-لا والله ما اوخر عنج واشو الاتگليلي منين جبتي فلوس هلغراض

رفل -تدرين شنو صوجي اني الي فكرت بيكم واتنغصتلكم عليهن وحبيت تاكلون منه

رسل انت هواي تخنكيني بهاي التحقيقات مالتج اني هم اختج بس اشو ما ادخل بحياتج وبخصوصياتج

تدرين شنو مرات احس بيج مو اختي احس بيج حجر عثرة واكفلي بكل طريق

رسل -انعم الله عليج خية ماتقصرين

للكاتبة

Nuha-d-h

يتبع

أهُنتُ عليك ؟

للكاتبة

Nuha-d-h

رسل

سمعت طلب الولد

جاوبتة ببرود - اخي متوهم اني مو منظفة وعفتة

سمعتة حجة من وراي-عمي سترالله على المنظفة

بعدهة سمعت كلام ولد جان كاعد بصفة -بس والله حاتة دشوف. جسمهة شلون يملخ وهاي هي لابسة جبة

يمة اني سمعت كلامهم واني رجلية گامت تطك رجل برجل

انتبهت على رفل ولمى واكفات قرب شلة مختلطة واكفين على جهة معزولة بزاوية بنهاية القاعة

شفت رفل تضحك وتسولف وية ولد وهويباوع عليهة بنظرات غريبة اشوف هي تحجي وهو يباوع على جسمهة شفتة شلون مد ايدة على خلفيتهة واختي ملتهية وية البنات بالسوالف شفتة اتمادة وكرصهة من وركهة ورفل كمزت وظلت تباوع عليه متفاجئة بحركتة وياهة

بس انصدمت من ردت فعل اختي رفل من ابسمتلة بخجل

رحت اقتربت منهم وخزرتهة

رسل-رفل امي تريدج تريد ترجع للبيت يالله

رفل وبعصبية وبارتباك -يالله يالله جاية

انتي روحي واني اجي وراج

رجعت واتذكرت لازم ارجع بطريق هذا المكروه وعديت عليه واني مدنگة راسي سمعت الولد يكلة ولك لوهيج خلفية لوماكو دباوع باوع شوف رحمة الله

والله لو ما اخاف جان نزعت قندرتي وعلى حلگة الادبسز

هذولي شنو من بشر والله عالم غريب

رجعت وشفت صديقتي سما كامت تركص سلو مع زوجهة

الام-هَـا ماما لگيتيهة

رسل -اي ماما كاعدة وية صديقاتنا وهسة جاية وراي

اجت رفل وهي بس تنافخ وضايجة مني حيل

رسل-الحمدلله والشكر يعني الج عين وتحجين

رفل برتباك -اش نصي صوتج لاتسمعج امي

مرت الايام ومضت

وتفارقت الطرق

اني نجحت من السادس وجبت معدل ٩٠ورفل نجحت وجابت معدل٧٦

امي كالت لازم وحدة بيكم تدخل كلية لان ما اكدر على المصاريف كسران ظهر

وخالكم يگول خلي رسل هي التكمل دراستهة لان شاطرة وسباعية وماراح تضيع فلوسنة بيهة

رفل سمعت كلام امي وهي حركت البيت حرك وظلت تكسر الصحون وتصيح

اخذتلهة فترة صارت جدا متمردة

ووكعت مريضة واخذناهة للمستشفى وطلعت حالتهة النفسية تعبانة

اخير شي اضطرت امي تستسلم لارادة رفل مثل كل مرة

رفل قدمت على كلية قانون واني قدمت على معهد تمريض

صادف مكان المعهد يكون قريب علينا واروح مشي للدوام على الرغم حلمي انبتر وماكدرت احققة لكن كلة يهون لاجل اختي لان اني استحمل واقوى منهة واكدر اتعايش بسرعة ويه الظروف

ومن بعد مشكلته الاخير وية امي صرنا نتجبهة وما نزعجهة

امي صحيح مرات تعصب علينة وشديدة ويانة لكن هي تموت علينا وتخاف علينة من الهوى الطاير تربيتهة النة كانت حب مع بعض الصرامة والقساوة

لاحظت على رفل اختي بعض التغيرات من بعد عرس سما صديقتنا

مرة بالليل ردت اروح للحمام شفت رفل خالتة جوة الدرج وتهمس اقتربت علصوت سمعتهة تحجي وية واحد بنقال ماما

رحت عليهة بوقتهة وطيحت حظهة على التسوي

هو يا ريت كان بس كلام بالنقال مع الولد لا اللي خبلني كانت تتكلم وياه بالفاظ قذرة مقززة واسمعهة تگلة بس شوية اصبرلي حبيبي

رسل -اخر حيوانة شنو هاي التصرفات الحقيرة انتي ماتستحين

رفل وهي تحط ايدهة على حلكي -اش اش صوتج فضحتينة

دخلتني للغرفة وسدت الباب حتى امي ماتسمع حجينا

رفل -شوفي حبوبة اني ماخايفة منج وما عندي شي اضمة لكن اني ومروان اتفقنا بس اخلص كلية يجي علية يخطبني يعني هو هسة بمثابة خطيبي

رسل-اي بس بعدكم ماكو شي رسمي بينكم يضمن ان هو صادق وياج

رفل -لا حبيبتي قابل شگلولج علية قابل اني رسل المطفية اني اعرف شلون اخلي يجي ويتوسل

وتصرفاتي وياه مجرد اغراء بس ما اخليه يطول شعرة مني الا وهو خال بيدي حلقة زواجنة

رسل-شوفي رفل اني والله اخاف عليج ومن الي جاي اسمعة من البنات وشنو جاي يصير من كوارث ومصايب ببنات العالم

انتي تعرفين محد النة بهاي الدنيا واحنة بس بنات خصوصا خالي من قدم على لجوء واخذ عائلة وهاجر

وبقة بس هذا خالي وهذا مايتفاهم

رفل -اهوووو رسل انت شكد سلبية وتكسرين مجاذيف الواحد يعني اني وين احجي وهي وين تحجي

انتي بس طلعي من السالفة وماعليج لان من تحشرين روحج بشغلة تخرب

رسل

ويوم عن يوم بديت اخاف على رفل من تصرفاتهة

بدة دوامي وباشرت بالمعهد وتعرفت على مجموعة بنات حبابات بيهن اثنين متزوجات وووحدة مامتزوجة بعمري

كان اسمهة ياسمين كان بيتهم يصير بطريقي مالت المعهد فقررنا ان كل امر عليها ونروح سوية

رفل كانت طايرة من الفرح بالكلية وجانت تحجي عن حياة الكلية ولبس البنات والشباب

من اول شهر بالكلية لرفل لاحظت التغيير على ملابسهة وستايلهة وكامت تروح للحلاقة وتسوي حواجبهة وكصت شعرهة صارت كل شي تسوي بعناد ماما

جانت ماما ماتقبل على تصرفاتهة بس رفل جدا متمردة

مرات احس امي مابيدهة حيلة حتى توقف رفل عند حدهة رفل سافرة ماتلبس حجاب بس انة لبست الحجاب

اني مو مثل رفل ما اميل للجانب الجمالي والعناية وسوالف البنات من حب التسوق والمولات يعني مو ما احب هاي الاجواء بالعكس اتمناهة لكن ما اهتم حتى لو ما توفرت ما اضوج لكن رفل تأثر عنده هاي الاشياء لان هي جدا طموحة

الام -يمة رسل ضميتلج لفة البيض والبتيتة بالجنطة ولفيتهة بجيس

رسل -اي يوم عاشت ايدج

الام-زين بس شربيلج كلاص جاي فتحي ريگج قبل لاتطلعين

رسل-لا يوم والله ما لحك

باست امهة من راسهة وطلعت تركض

الام-الله ييسر امرج يابت بطني

رفل بدلع-اي الدعاء والكلام الحلو كلة لست رسل واني بيت البطة السودة

الام-لايمة ليش هيج تحجين انتو اثنينكم اعزاز عندي اشعدي غيركم

رفل -يالله مامي چاو سلام

الام-بالله هاي شحجي وياهة هسة هذا سلام حتة لغة القران نسوهة الله يستر من جيل هلوكت

واسترمت الايام

لمى -رسل سمعي كلامي بس هلمرة والله الولد كاتل روحة عليج واكل گلبي اكل بس كون اخلي يحجي وياج حتى لو من نقالي بس يريد يفهمج

رسل وبممانعة-مستحيل شتحجين انتي لايمكن اقبل بهيج شي وعلى كلٍ هذا واحد صايع ومدلل امة وتلگينة متعود ياخذ اليريدة

لمى -ولج شبيج عوبة ولج حتى لو بس تحجين وياه وتضحكين وياه ولج يغركج بالفلوس ويعيشج اميرة

رسل -لاعيني شنو شفتيني قابل شكيتلج اشو الحمد عايشة وقانعة

لمى -يطبج طوب انتي مو وجه نعمة ضيعتي علية نقال ايفون حديث

رسل بشهكة-ايا حيوانة جاي تاجرين بعرضي والله قهرتيني

لمى -لا لا والله موقصدي هيج شنو انتي صديقي العزيزة قابل افرط بيج بس والله اتمنالج الخير واحبج تعيشين وتلبسين مثل البنات هسة موهاي اختج رفل شوفيهة شلون عايشة حياتهة حتى لو على حساب سعادت غيرهة لو تعرف تدوس عليج انتي وامج في سبيل الوصل لسعادته تسويهة وتدوسكم

رسل بغضب-لا انتي اليوم مو طبيعية وزودتيهة كلش

شنو معنى هذا كلامج اختي رفل مو هيج وما اسمحلج تحجين عليهة هي رغم تصرفات الرعنة بس تموت على امي وعلية

لمى بضحك-والله انتي مسكينة وعلى نيّاتج بابا دروحي سئلي على سمعة اختج بالكلية وبعدين كعدي احجي براسي

للكاتبة

Nuha-d-h

يتبع

اهنتُ عليكِ

للكاتبة

Nuha-d-h

-

رفل امشي بسرعة والله راح نتأخر علمدرسة

- اهوووو ولج والله مابية حيل لعد هاج لزمي انتي شيلي جنطتي

-جيبي خل اشيلهة امري لله بس امشي علسريع والله عندنة اول درس احياء وهاي ست فائزة عكرة

-ترة والله خبصتينا شكد تنگين

-اي انت ظلي هيج ومن يجي وقت الامتحان تكعدين تدگين يم راسي اليتيمة

(وهكذا مضيا يدا بيد مشيا في الطريق )

مرحبا اني اسمي رسل وعندي اختي توأمي المتطابق اسمهة رفل نحن الاثنين نتشابه بالمعاني والشكل بس رفل شوية اطول واضعف مني مواصفاتنة عادية عيون كبار محاطة برموش كثيفة الي يشوفنا عباله ماسكارة وبشرتنة حنطية مائلة للبياض وفم ممتلئ واغلب الناس ماتكدر تفرق بينا

وعلى كد ما نتشابه بالشكل على كدما اطباعنة وشخصياتنة تختلف يعني الاختلاف بينا فرق السما عن الارض

رفل شخصيتهة قوية وعنيدة غير مسؤلة تحب امي وتحبني بس بطريقتهة الخاصة لكن انة شخصيتي اكثر رزانة وهدوء من رفل اميل شوية للعناد لكن صاحبة مسؤلية اتجاه اهلي

احنا عايشين بمشتمل قرب بيت خالي مع امي لان والدي استشهد واحنا صغار وانطو لامي قطعة ارض لان بوقتهة وزعو قطع اراضي على عوائل الشهداء

فأمي باعت نص من القطعة لخالي وبنت الباقي بفلوس القطعة و احنا من سكنة بغداد ووضعنا المادي تحت الوسط بس عايشين ومكفين احتياجاتنة ولاطالبين ولامطلوبين

كنا نعيش على تقاعد امي وخوالي طيبين على الرغم من حالتهم المادية اقل من عندنا بس ماتركونا دائما يسئولون عنا ويحطون مصرف بيد ماما و حالتنة المادية لاتسمح لنا بالتمتع بملذات الحياة من ملابس وموديلات وجنط وحضور حفلات

واغلب الاحيان من تجينة دعوة لحفلة زفاف تروح بس امي لوحدهة على الرغم احنا نتمنة نروح وياهة

ومرة من المرات تزوجت صديقتنا بالمدرسة تصير بنت جوارينا

وعزمتنا وكان ماعندنا حجة لعدم حضور عرسهة

انة مايهمني شنو راح البس بكد ماجان يهمني ان راح اشوف عرس لاول مرة بحياتي

يعني. راح اشوف عروسة لابسة ابيض ويوزعون كيك وعصاير هواي يعني شكد ما اريد اكل

وبنت خالي تكول يقدمون مرات حتى عشا صواني مفطح يعني تمن وعليه لحم الله

طبعا اني اموت على الاكل بس هَـا موسمينة جسمي تارس والمعالم الانثوية بارزة اكثر من اختي رفل

رفل بنزعاج-اوف يمة شلون نروح للعرس واحنا ماعندنا شي نلبسة

الام-ولج رفل انتي بالذات ماتحجين عن الملابس ولج موذاك اليوم اشتريتلج تنورة وقميص ماصلي شهرين من اشتريتهم الج

رفل -اوف يمة وهسة انتي جاية تحاسبيني على هذني الخرك دتعاي شوفي صاحباتي شيلبسن من ملابس تجنن كلة ماركة

الام-ولج يالمعزاية هذني الملابس الماعجبتج غيرج بطلاع الروح يالله يحصل عليهن

جا شكول على خطية رسل الماعندهة لبسة تروح بيهة للعرس

رسل -يمة عندي جبة كلش حلوة وكاعدة علية فيت انطتنياهة بنت خالي رشا

الام-لله يرضى عليج يمة خوش لعد من اروح للسوك اشتريلج شال وياهة واشوف شجيب لهاي الغبرة اكلت گلبي بس تون براسي

رسل گعدت بغرفي واني بيدي كتاب الاحياء اقرة

بلكي هلسنة اشد حيلي واجيب معدل علمود ادخل كلية زينة وتوظف واساعد امي

خطية امي هواي تعبت علينا وكافحت علمود عيشتنا

ربي لايضيع تعبهة

وكالعادة

دخلت رفل وشغلت المسجل وكعدت تركص وفاتحة شعرهة وهي بغير عالم اباوع عليهة ولاهامهة شي اصلا

لاتلزم كتاب ولاتفكر بدراستهة

رسل-رفل عفية طفي المسجل اريد اقرة مابقة وكت على الامتحانات

رفل بضجر-اي عودك من تجي الامتحانات اني اكعد اقرة على شنو كاسرة ضهري من هسة وبعدين جسمي وجمالي يخرب

رسل تهز بيدهة-والله موطبيعية انتي اشدخل الجمال بالشهادة

رفل -حبيبتي اني اذا بقى حلوة مو اي واحد راح يوصلني الا عندة فلوس اني عندي الجمال وهوعندة الفلوس تبقى الشهادة وسيلة حتى التقي عن طريقهة زوج المستقبل الغني

رسل-اللهم ثبت العقل والدين

رفل -وانتي ظلي هيج جنج غراب كلة عيب وكلة مايصير

الام-يالله عفية بنات استعجلو هم يالله نروح للعرس اي مو اتأخرنا

رسل-هياتني اجيت خلصت

رفل وين صرات

رسل-جاي تعدل نفسه

الام -صدك ماتستحي وهسة هي وينهة الخاتونة لحد هسة ما خلصت

نزلت رفل جنهة لعابة باربي بالترتيب والنزاكة

-يالله خلصت امشوناخل نروح اكلتو راسي

وصلنا لحلفة العرس لصديقتنا وجان زوجهة حالتة المادية كلش تـُـــوب كان مسوين العرس بنادي راقي بس الاغنياء يكدرون على تكاليف العرس بهيج قاعة

رسل

اول مادخلنا اني وامي ورفل للقاعة ماشاء الله عبالك قاعة حفلات اميرات (وول دزني )تجنن ظليت بس فاكة حلگي على الترتيب والفخامة

رحنا كعدنا على ميز كان من جهة اقارب العروس يعني اهل العريس على جهة واهل العروس بجهة الظاهر همة مرتبيهة هيج جنا اول الحاضرين للقاعة هههههه مامصدكين رايحين عرس امي اختارت ميز يصير مكانة بالزوية يعني ماعليهة الانظار

رفل-ليش ماما هنا نكعد خل نتقدم شوية كدام حتى نباوع زين على العرسان

الام-لايمة نكعد هنا احسن خاف يصير تصوير ونطلع بي

رفل-اي وشنو يعني خلنتصور حالنة حال الناس قابل بايگين

الام-يمة انة لو بس اعرف هذا السانج عليمن طالع هيج طويل وينرادلة كص جان ارتاحيت يالله انطمي وسكتي وكعدي هنا

رسل

بدت الناس تجي وكعدت اشوف البنات شلون اية من الجمال بالفساتين والذهب تكول وحدتهن عبالك طالعة من مجلة (لك سيدتي)

اشوف رفل شلون كعدت تكمز من شافتهن

رفل-امدة حظي واني امي مگابلتني وكاعدة كلساعة تعيرني بهذن الخرك دتعاي شوفي هذني البنات شلابسات هذولي يسمونهم ملابس مو هذني (تاشر على ملابسهة)

ورة شوية دخلت صديقتنا سما هي وزوجهة وطالعة تجنن عبالك برنسيس بالنزاكة وزوجهة كان اكبر منهة بالعمر كان الفرق واضح بينهم

وكعدو المعازيم بالتوافد على قاعة العرس كان مختلط و

كان واضح على اهل العريس اغنياء فاحشين الثراء

بدة الركص والاغاني واباوع عليهم عادي عدهم الولد والبنات يركصون سوية عكس اهل سما شفت بناتهم وصديقاتنا يركصون على صفحة مو وياهم

اجت صديقتنا لمى وكعدت يمي.

لمى-هلة رسل البقية بحياتج

رسل بستغراب-عليمن

لمى-على المروحم رجلج الراح شهيد وهو بعز شبابة

رسل -شبيج لمى شاربة شي

لمى-اي مو دشوفي شكلج عبالك مرت شهيد وعندة كومة جهال ادري هي هاي هم ملابس جاية بيهة للعرس ولج هذني حتى فاتحة استحي اطلع بيهن

رسل

لمى صديقتي وياي بنفس الصف بالسادس علمي ونسيت اكلكم ان رفل داخلة للسادس ادبي

لمى حالتهم المادية زينة وكلش حبابة بس بيهة خصلة مو حلوة هي التهور اشوفهة مرات تكگعد وية شلة سمعتهة مو زينة وتجي يمي تحجيلي عليهن شيسون بالولد والكبلات وشلون مستغلين الولد حتى يصرفون عليهن اني من اشوف لمى تگد وية هاي الشلة اتخبل اگوم عليهة وارزلهة رزالة معدلة مااقبل عليهة لان مجرد الجلوس وية هاي الشلة تجيب الشبهة للبنت

رفل -لمى امشنا هناك خلنشوف شلون راح يقطعون الكيكة وعوفي هاي المعقدة هنا گاعدة

رسل

اباوع لرفل اخذت لمى صديقتي وراحت هناك وكانت تتجه لصفحة المعازم الخاصة بأهل العريس

وشفت بدوا يقدمون الاكل اول شي قدمو صحن بي مقبلات بعدهة اشتغلت الموضفات المهتمات بالتقديم بدفع العربات بيهة جميع اصناف الطعام يعني مثل البوفيه المفتوح وانت تختار

واني الحمدلله من وصل لحد عندي التقديم ماقصرت وترست صحني بماتشتهيه النفس واخذت حصة لرفل العوبة ولمى الراحن ولحد هسة ما رجعو

امي وهي تضربني بالعكس بخاصرتي - بالله گومي شوفي هاي المگموعة وين صارت والله هاي تاليتهة تموتني ناقصة عمر من وراهة ادري الناس كلهة هادت

رسل -اهوو يمة هسة تجي قابل راح تطير خليني اكل قبل لاياخذون الصحون

الام-بس گومي شوفيهة

رسل

رحت ادور على رفل واتوجهت للمكان الي اخر مرة شفتهة بي واني امشي شفت وگعت بالگاع جداحة لونهة ذهبي گدام صارت يم رجلي

دنگت اشيل الجداحة

ورفعت راسي صارت عيوني بعيون لونهة عسلي شفتة رجال گاعد على ميز بس مميز الظاهر عذا الميز خاص بس للشخصيات المهمة

باوعلي من فوك ليجوة. بتكبر

انطيتة الجداحة ردت اكمل طريقي سمعتة يصيح

-انتي يبنية

رسل وهي تأشر على نفسهة بستفهام -تحجي وياي؟

-اي وياج اكو غيرج منظفة هنا

رسل بتردد

- شيلي هاي الصحون من گدامي ونظفي الميز

للكاتبة

Nuha-d-h

يتبع