تحميل رواية «الابواب الخمس» PDF

البارت الاول

الابواب الخمس

للكاتبة Reem

الحجي مثل الوجع فتره ويروح

مايعور الكاع من يدبي النمل

الحجي بليه اسباب مو لابن الاصول

الزين يكعد عدل ويسولف عدل

انه ادري من الحجي ميبطلون

عيشة التمساح على الماي الضحل

الوادم تكاطف صخر على الطير ليش

جنت ماادري واحير من انسأل

صدفة ذاك اليوم سيرت المضيف

وعله سالفتي نشدت شايب كهل

وكلي ناسك تبي اتطير وي اليطير

ايغثهم اجناح اليدج عليه نسل

الطير منهم ماسلم ناسيش هاي

بل الحقد عدهم طلع سن العقل

هيچ اكو اوادم وحق ام البنين

يدفنون الميت بلايه غسل

كرهت كلشي بسبب شى ملموس صار

ناس على الشيطان ضلت تتكل

فتحت الباب الرئيسي ودخلت على كيفي امشي بهدوء بس صوت مشيتي اسمعها وانفاسي العاليه وعيوني تتنقل بكل ركن بلبيت خطواتي احس بيها عمر سنين وايام وساعات مشت بينا يله وصلنا لهنا

اندار على كل باب موجود بلبيت اكو بيبان جان لازم متنفتح ولا احد يتقرب منها مو كلشي لازم نعرفه راح نرتاح بمعرفته اكو شغلات لو باقيه مضمومه هواي احسن انعرفت وانفتحت جهنم وياها

كعدت وحطيت ايدي جوه خدي واخذتني الصفنه من جنا صغار بدايه التسعين وبيبي عمشه  لامتنا كاعده بلكاع على الجودليه (فراش) وقريب منها صوبة علاء الدين وعليها قوري الجاي وبصفها طاسه بيها ستكاين حتى شوكت ميعجبها تصب وتشرب  چاي مهيل الجو بارد ومطر والكهرباء طافيه وبس ضوا اللاله مضوي المكان لامتنا حتى تحجي قصة كفاحها اكلت راسنا اكل بيها تعيد وتصقل ولا تكل ولا تمل لابسين بجايمنا البازه واحد يكفخ بلثاني ونريد بس نكوم ونخاف منها لان تضربنا اذا كمنا وعفناها وهي تسولف مجبورين كلنا على هاي الكعده نخاف من ضربتها ايدها ثكيله تكفخ الواحد تخلي يوم كامل يون من الضربه ايد الزلمه مو مثلها

عمشه : ولكم منعولين الوالدين اكعدو راحه انتي بت صالحه اثگلي

سما :اني شعليه بيبي هذا مهند هو يكرصني من ظهري ويخليني اكمز

مهند : والله بيبي كذابه هذا يونس كرصها

يونس : مو اني والله مو اني

عمشه : اش لا بارك الله بيكم خلفه سكط على امهاتكم

نزلت من الدرج ويه كل بايه تنزل منها ترجها

رج وكفت بلنص بدون متكمل الدرج وحطت ايدها على خصرها ومعاجبها الحجي وبصوت عالي هااا عمه بس لا تقصديني ويه جناينج

رفعنا عيونا عليها غير هاي صالحه من تحظر الملائكه كلها تطافر خفنا وسكتنا كلنا

عمشه : ومنهي وياج نبصتي بلنص عفيه مره فوك واذنج يمي

صالحه : غير صوتج عالي ياعمه يجيب التايهه واعرف بسوالفج لازم تذكريني متكدرين

عمشه : غير احبج ولازم انبش اهلج الخلفوج

صالحه : شنو عمه مسمعتج

عمشه :هاي ماعجبتج وماسمعتيها مو وياج  مو وياج

صالحه :تباوع صالحه ومعاجبها الوضع وعاطت انتم يله كومو انخمدو شنو كاعدين لهسه

مهند : بعد وكت يوم

صالحه : انجب واخذ اختك واصعد فوك وانتم كل واحد على امه اذا هنه عايفات الجهال ونايمات بحضون رجولتهن

عمشه : جاا وحد وانتي هم جنتي نايمه بحضن عبيد

صالحه : غير رجلي قابل صاحبي ياعمه خو انتي بس عينج ورايه وعوجت حلكها

عمشه : لا وراج ولا كدامج اخذي زعاطيطج ولي دخت اريد انام

كلها كامت تركض اله وحده مكابله بيبيتها وصافنه عليها

عمشه : هااا يمه ماي ماتكومين تنخمدين مثل اخوتج

بصوت طفولي وبأحرف متكسره بيبي اثمي(اسمي)  ناي مو ماي

عمشه : غير ابوج المطبل وامج الكيوليه(راقصه)  سموج اسم مال رواكيص

شنهي ناي هو هذا هم اسم خلصت اسامي الخلك ونسمي على الرواكيص

واجه بصوت عالي وكف يم راس ناي وكال

لعد اسمج الحلوو عمشه

عمشه :حجه ابن ساهره العرمه وشبي اسمي ابن السطل طالع على امك لسانك شطوله ولي  وشيلها وديها وياك وعينك عليها اعرفك مخنث وخفيف هسه اطيح منك

ناي: اني امشي اعلف (اعرف)

مرتضى : اني اشيلج واصعدج

يونس : عوفها اني اخذها يله نايه

لزم ايدي اخويه يونس وصعدني لامي فتحنا الباب ومثل كل مره جان ابويه يعيط وامي هادئه ساكته كاعده على الجربايه وتصفط بلملابس ومتباوع حتى بوجهه

اسمعي لج روحه لاهلج ماكو واذا وصلتي بعد رجلج اكسرها

: هزت راسها امي بدون حتى مترد

طلع بابا وركع الباب حيل وسحبتني وحطتني بحضنها وتحاول متحسسنا بلي يصير

فدوة للبنات عشره واكول گليلات وتبوس بيه

ناي : تباوع بعيون بريئه على اختها الصغيره النايمه بلكاروك والي اسمها شرهب امي جانت دوم تحب الاسامي الغريبه والنادره لهذا سمتني ناي واختي شرهب

ماما  يونس افرش الك ولاختك ونامو

يونس : هسه افرش

نمنا ومندري اطفال وكلنا امل بلدنيا واااخ منها للدنيا 

نرجع لقبل اكثر من ٢٠ سنه لعمشه وحياتها الي موعه اذانه بيها حسره تلكانه مجموعين اذا ماكعدت تسولف الصار ولازم تموع اذانكم مثلنا لعد بس احنا نتحمل عمشه وسوالفها

عمشه من الناصريه يتيمه الام والاب عندها بس اخت اسمها غنيه  زوجها ابوها وهي صغيره لابن صاحبه بلبصره واستقرت هناك وابو عمشه توفى  وبقت عمشه  وحدها تكفل عمها بتربيتها ولان عنده بس ولد اثنين كام وزوجها لواحد من ولده  اسمه فرج مره قويه صارمه تربت تربيه الولد سباعيه ومتخاف من احد خلفت من فرج ٥ ولد وبنيه وحده

جانت حياتها بين حش الزرع والحلال (الحيوانات) شايله كاع رجلها فرج شيل ايد بأيد وياه وتركض بين بيتها وبين الكاع والوضع زين والعيشه ماشية لحد مابيوم وكع فرج لا حس ولا نفس تگلبه يمنه يسره طاح وماضل نفس بيه

عاطت وهزت القريه كلها بذاك الوكت وماضل واحد مااجه ينشد على فرج وليش طاح وشنو الموته وبيوم وليله لكت عمشه روحها وحدها وبركبتها ٦ اكبر واحد بيهم عمره ١٠ سنين الي هو عبيد

تنوح وحاضنه فروخها (جهالها) وره مافضت الوادم وانتهت الفاتحه ضلت وحدها بلبيت ومتعرف وين تنطي وجها اندكت الباب عليها وطفر عبيد فتحه وطلع عمه فلاح

عمشه : هااا خويه فض گلشي

فلاح : فض والحمدلله بدون طلايب والوادم كلها تدعي لاخوي بلرحمه الله يرحمه

عمشه : الله يرحمه كسر ظهري ياخوي حطت الفوطه على وجهه وتبجي

فلاح : ضل شى واحد

عمشه : نزلت الفوطه وتباوع بعيونه شنهي الضل

فلاح : اسمعي عمشه انتي هسه مره عزبه ومالج والي والوادم تاكل وجوهنا عبن ضليتي وحيدج

عمشه : يااا جاا شنهي وهاي الفروخ موش بعينك عندي خمس زلم يسدون الشمس

فلاح : تقشمرين على رويحتج انظريلهم گلهم صغار وحيدهم عبن جااع يبجي

عمشه : شتريد مني فليح سوالفك هاي عورت گلبي شنهي وراك من طلابه احجيها ولا تردها

فلاح : اعگد عليج وتعيشين ويه مريتي وجهالي واتكعدين واتسكتين والكاع انه اشتغل بيها واداري ولاد اخوي ويصيرون ولدي

عمشه : شنهي تخبلت انه اعرس وفرج ترابه ماناشف صگد انت ماتستحي ولك اخيك ماصار جم يوم دفناه تركض وره مريته

وتعال ليه انت ماميت على وليدات اخوك انت تراجف على الكاع

فلاح : لاتنسين هاي گاع ابوي

عمشه : وخذاها فرج وانطاك حگك لاتلعب بلنار يفليح

فلاح : بليه سوالف ماصخه وره عدتج ماتخلص  اعكد عليج وچلمه مااسمع

عمشه : انت زلمه من ظهر زلمه وسويها لا اخلي طشارك ماله والي

فلاح : هين يعمشه نتلاكه

عمشه : روح اطلع لا بارك الله بيك وبجيتك مااستحيت على شاربك ولك انه بعدني العده ما لازمتها عبن اليوم كفت الوادم وانت جاي بعين كويه تريد گلشي تاخذ لا والنايم بلتراب وماخضر ترابه مايصير الي تريده وكول حرمه وكالتها

طلع فلاح ومتحلف بعمشه وهي لان تعرف ماكو احد وراها ويتيمه واختها ماتتكفل بيها ولا راح تستقبلها وفلاح ميخاف الله ويكدر يأذيها قررت تنهزم تاخذ جهالها

عبيد : يمه وين نروح

عمشه : لارض الله الواسعه لم وياي الغريضات

عبيد : نروح للعماره

عمشه : عمك عنده زلم هناك وناس هواي يعرفهم ويوصلنا مانكدر نولي ليغاد

عبيد : چا وين نطي وجهنا لخالتي غنيه

عمشه : خالتك ماتحن عليه مات زلمتي وماجت خلي تولي مااريد خوتها نهج لبغداد جبيره ومايحصلنا

عبيد : وارض ابوي

عمشه : اطلعهه من عين الخلفه بس اكبرو وانه اعرفن اخذ حگي منه يله بساع ماضل وكت لايطلع الفجر والوادم تحس علينا

وبليله ظلمه هجت عمشه لبغداد وماعدها غير جم قطعة ذهب وست جهال كايدتهم وبمدينه ماتعرف بيها بشر

اول ماوصلت راحت للكاظم بس هذه المنطقه بغداد تعرفها اسمها الكاظميه لان مره جابها عمها وفرج زياره بيوم متزوجت

وهي تعرف الامام وحافظه اسم المنطقه

وراحت لاقرب صايغ ورغم متعرف لا تقرا ولا تكتب بس جانت ذكيه وميكدر يغلبها واحد

باعت الذهب وحطت الفلوس وضمتهن بصدرها ولزمت ولدها وبقت ايام كاعده يم الامام تسأل وتستفسر عن مناطق بغداد وعبيد محاوط اخوته اخاف واحد منهم يضيع لحد مسألت كيم هناك بلحضره وحجت كلشي اله ودلاها على منطقه بيها كياعين رخيصه ورجال خير تكدر تعتمد عليه وراحت للعنوان الكاله الكيم الها وشافت الرجال المنطقه اسمها تل محمد  وحجت قصتها وعرض عليها كاع وبيها هيكل مكامل محتاج هواي شغل على كد فلوسها قبلت واشترته وسجلته بإسمها وهي ذكيه جانت كل خطوه تسويها تسأل بيها

الناس على فطاريتها وطيبتها القديمه من شافو حالها وعدها يتامى ساعدوها ونزلو السعر الها وصار عدها سكف يلمها ويلم جهالها غطت البيبان والشبابيج بلسعف والوصل القديمه حتى يحميها من الشتا وبرودته والمنطقه اكثرها جانت ممبنيه وشوارعها طين ممبلطه بس لحاله عمشه جان يعتبر جنه مو بيت 

عبيد :يمه شنسوي وين ننطي وجوهنا

عمشه : نشتغل يمه

عبيد : بشنهي انه مااعرف غير بكاع ابوي والزرع

عمشه : بلعتيج شفت نسوان تلم عتيج وتبيعه واندور بين الوادم وبلزبايل وبكلشي

عبيد : يمه واخوته

عمشه : ويانه انه اريدن جوحي وياك لا اتركه

عبيد : وفلاح وصمد

عمشه : ويايه يضلون اووف كون اغير اسم اخيك فلاح عبن يذكرني بلخايس عمك الله لايهني دنيا واخره كله من فرج دك اله اسمي على اسم اخوي ارتاحيت يفرح هججنا بليله ظلمه اخيك اااخ كون اگضه اطلع حليب امه منه

عبيد : يجي يوم وناخذ حگنا منه بس گليلي نجم  وخوله اخوتي منو الهم صغار مايضلون وحيدهم

عمشه : نتساعد يمه بيهم لحد ماربك يفرجها عينك على خوتك يعبيد مالهم احد غير الله وانت جبيرهم

عبيد : تآمرين يمه

وبدت عمشه تشتغل بلعتيك وكلشي ينباع ويطلع فلوس جانت الحياه صعبه حيل عليها قاومت وتعبت وكدرت بمرور الايام تكمل الهيكل ولدها كبرو ويشتغلون وياها

جانت حسره عليها الفلس دينار متصرف على نفسها لحد مكملت البيت

وكبرو وكل الواحد بيهم يشتغل شغله الي بلعتيك ويه امه والي بلبناء عامل وانعرفو بلمنطقه بأسم بيت عمشه ام العتيك

كلهم خلصو المتوسطه وكعدو مكملو اله واحد جانت ادك وتكول لازم اشوف عنده شهاده واتفاخر بيه وهو نجم بزر الكعده وحبيب گلب عمشه وبنتها الوحيده خوله

لان شاطره خلتها تكمل

واجت حرب ايران وانطلبو تجنيد ومن ولدها بس عبيد وجوحي لان اعمارهم مناسبه اما الباقين بعدهم مبالغين

دوام عبيد صار بلبصره وجان يعرف اسم منطقة بيت خالته بس مرايح الهم دفعه الفضول يروح وخاصه المنطقه جانت قريبه على منطقة بيت صاحبه ومن وصل سأل ودلوه على بيت ابوجاسم وبسبب هذا الفضول شافها وياريته ماشافها صالحه بنت خالته اخذت عقله اول ماوكعت عينه عليها

مو من حسنها لا عجبته وكاحتها وجرأتها ومتهاب احد

رجع طاير لبغداد ولامه يصيح لو هي لو مااتزوج

عمشه : من دهر صابك كون ولك وين لكيتهم شجابك عليهم لو هذا حظي المصخم الدولبك وخلاك جايني طاير تريد تعرس عليها

عبيد : يمه وروح ابويه گلبي يهواها مااريد مره غيرها

عمشه : عساك لا ردت ولك هي اختي بنت امي وابوي ما سأت عني ولا عرفتني هجيت بليله سوده مانشدت ولا كالت اخيتي وين راحت ماتت صار عله جهالها شى تكول غريبه عنها وهسه اخذ بتها جنه الي ولك عبيد احركك وعلي وما اخلي بت غنيه تخش داري

وبيوم وليله تدخل صالحه جنه لبيت عمشه اتزوجها عبيد وطاير بيها تكول بس هي مره والباقي خس وصار محبس بيدها تكوله يمنه يروح يمنه تگله يسره يروح يسره وصاحت الغوث منها عمشه و المجانت متوقعته بعد سنه تدخل اختها ساهره جنه الثانيه وتتزوج جوحي وصارن بنات غنيه يصولن ويجولن بلبيت

وبنص الثمانينات زوجت ابنها الثالث فلاح من بنت الحارس مال المدرسه القريبه  اسمها

بديعه وبهيج صار البيت بيه تلث جناين 

صالحه وساهره وبديعه

بشوارع تل محمد وبجو الربيع الطيب بشهر الرابع جانت بنيه تمشي لابسه زي المدرسه وشايله شعرها بكصايب اثنين وجنطتها على ظهرها صار كبالها ولد شاب عمره مقارب لعمرها ابتسم بوجها ومد ايده وكال تفضلي

ذكرى  : بنظرات استغراب هاي شنو

نجم : دفترج البارحه وكع منج وركضت وراج وانتي ماشاء الله شاده محرك برجلج

ذكرى : اخذته بتردد وهمست شكراً ومشيت رجع وكف كبالي وكال

نجم : احنا جوارينكم واشر على بيتهم ذاك بيتنا انتم الناس الجدد النزلتو قبل شهر

ذكرى : اشرت براسي اي ومشيت سريع مستحيه شلون اوكف ويه ولد بلشارع

بقيت ايام اشوف الولد يمشي ورايه بس ميحجي واني اموت خوف لحد يشوفني وخاصه اخويه الجبير فوزي اذا شافه ورايه يمكن يذبحه

فات شهر وبعده شهر وهذا الولد مابطل يوم ميجي ويشوفني مرات يوكف باب بيتهم ومرات براس الفرع ينتظر واذا تأخر عيوني ادور عليه وبيوم واحد من جماعته صاحه وعرفت اسمه نجم اسمه حلوه وشكله هم حلو ومرتب

بعد شهر ونص امتحان نهايه السنه واني اقرا بلدفتر الوكع مني ومندمجه اتذكرت هو جان يمه وابتسمت وبقيت اگلب بالاوراق لحد موصلت الورقه ماقبل الاخيره وشفت بيها گلب وسهم وحرفي وحرف N بالانكليزي عرفت هوه مسويها ابتسمت بفرح مراهقه واشوف شاب معجب بيه خوف وتردد وقلق ومشاعر نظيفه خلت گلبي يدك اله بدون حتى ميصير كلام بينا

خلصت الامتحانات وعطله نهايه السنه والحرب وهوستها وايدنا على گلبنا ليصير شى او صاروخ يوكع علينا ورجعت السنه الدراسيه تعلمنا على المنطقه رغم اختلاطنا قليل بيها ومن اول يوم عيوني ادور عليه شفته واكف وحاط ايده بجيبه ويبتسم واني بادلته ودنجت فتت من يم بابهم ومثل الاشهر الفاتت غير النظره مصارت بينا وبيوم

راجعة من الامتحان وهو ماكو عيني لا ارادياً صارت على بابهم شفت مره كاعده بلباب بيدها ستكان جاي وتكرز حب باوعت عليه من فوك ليجوه كصتني كص اني مشيت سريع وطبيت للبيت

عمشه : صالحه يمكموعه

صالحه : هااا عمه خير مو كعد اسوي غدا شتردين

عمشه : فاتت هسه من الدرب بنيه حليوه طبت بذاك البيت اول مره اشوفها تعرفيها بت ياهو مو ذوله الوادم الجدد

صالحه : اي عمه بيت ابو فوزي وعندهم بنيه حديثه اسمها ذكرى تدرس اصغر من خوله

عمشه : ماينطوها لولدي

صالحه : ياهو منهم بله هو البيت انترس المن بعد تردين تزوجين

عمشه : مو هو بيت غنيه ومعاجبج الوضع امشي ادخلي كملي الاكل لايجون الولد ويضلون بلايه غدا انه صوجي نشدت عليج ولي

دخلت صالحه وادردم وصاحت عمشه

بت الفكر صوتج مو جاي اسمعج

وبنفس اللحظه فاتت ام اسماعيل الحفافه

تعالي خيه اكعدي

خيه مستعجله

عمشه : اريدن اعرف گلشي عن ذاك البيت

ام اسماعيل : تردين بتهم كون

عمشه : ليش مااريد چا شبينه مانعجب

ام اسماعيل : البت تدرس وماينطوها

عمشه : شدراج

ام اسماعيل : دزت علي وحده من الطرف اخطبها لبنها ومانطوها

عمشه : مو عمشه التخطب وماينطوها روحي لشغلج خيه مشكوره

كامت دخلت عمشه تنتظر ولدها دخلو مكسورين الظهر جرت صمد للغرفه

عمشه : اسمع ولك صمد لكيتلك بت ترد روحك شطب ريحان

صمد : يمه مااتزوج واليرحم ابوج عوفيني وين اخليها شوفي البيت قبط بس غرفتج ضلت واني نايم بلهول ونجم وياي  وين اعرس عليها بلحمام

عمشه : والغسل اگلني وشربني اسمع مني ولا تاكلني بلسانك انطيك غرفتي تعرس بيها

صمد : وانتي وين ترحين

عمشه : انام بلهول  انه واختك ونجم لحد ماالله يفرجها

صمد : وشجابرني اكوم ناس فوك ناس وجهال وجناين وصايره بلنعل

عمشه : نعل براسك اسمع كلامي انه الوليد يصير ٢٠ لازم يتزوج وانت هسه ٢٢ يمه اريد وليداتك يكبرون وياك

صمد : يمه گلبي يلعب شتفكرين

عمشه : مالك دخل اروح باجر اخذ اخيتك ومرت اخوك المسمومه واخطبها الك

صمد : تدرين مسمومه المن ماخذتها

عمشه : شيخلصنا من لسانها هااا اتوكل

صمد : توكلي يمه امري لله عاد حلوة لو عوبه

عمشه : اگله شطب ريحان ومتعلمه بيك بخت لون صارت الك

ذكرى : اندكت الباب ودخلن نسوان اثنين ومره وامي رحبت بيهن جان عمري ١٧ سنه

احتاريت ذوله منو

وره مراحن كالت ماما خطابه وتفاجأت من كالت جوارينه ردت اعرف منو منهم ومن عرفت البيت رجفت من الفرحه يعني دز اهله يخطبوني امي لاحظت هذا الشى بعيني وكالت

كطينه وشيليها من اذنج تعرفين بيت منو ذوله

ذكرى : شسويت يوم وتحجين هيج

ام ذكرى : مبينه من وجهج ذوله اهل العتيك بيت عمشه ناس هوسه وبيت ٢٤ ساعه بيه عياط ومكافش بيه تلث جناين وجهال وامه وحده بت سوك وكحه واني ماانطي بنتي لهبج ناس ميناسبونا ناس همج واني اريدج تكملين دراستج وادخلين كليه مو اتعب واربي واكبر وانطي لعمشه ام العتيك

عافتني امي وطلعت حتى بدون متسألني

رجع الخبر بلرفض وتخبلت عمشه وعاطت بنص البيت ولج صالحه

صالحه : واكفه باب المطبخ وبيدها السجينه خير عمه

عمشه : تقربت منها وكالت اريد ذكرى لصمد

صالحه : واني خال وليد عم بنيه واني شعليه

عمشه : مالي دخل اريدها جنه لبيتي افتهمتي

صالحه : ابتسمت بخباثه وكالت

شتنطيني

عمشه : التردي كون نهايه هذا الشهر البت زافتها لولدي

صالحه : اريد تشتريلي ترجيه ضاله اذني فارغه

عمشه : نهايه هذا الشهر افتهمتي

صالحه : اعتبري صار بلخير عليج عمه وباستها وتضحك

وخلال اسبوع ادز عمشه مره ثانيه خبر يردون ذكرى لابنهم والمفاجأه موافقه اهل ذكرى وهذا الشى حتى ذكرى متعرف شلون صار وخاصه ابوها واخوها من عرفو اول مره ضحكو وكالو على اي اساس ننطيها

ذكرى : رجعو  طلبوني مره ثانيه الكل وافق حتى بدون تفكير واني من سألوني كلت الهم بكيفكم

فرحت لان الانسان الاحبه صار من نصيبي بدون مشاكل ولا عراقيل ودخلت امي تكولي بلخير بنيتي يكولون صمد خوش رجال والله يسعدج وياه

وكفت فاتحه عيوني صمد منو

ام ذكرى : ابنهم

ذكرى : مو اسمه نجم

ام ذكرى : لا كالت صمد ابنها الرابع

ذكرى : انعكد لساني وخفت اكول لامي مو هذا الاريده مو هذا الاحبه طلعت امي من الغرفه ومباشره كمت ابجي واضرب على وجهي لحد محسيت على روحي وكلت اكيد جنت متوهمه هو ما معجب بيه لو عنده ذره مشاعر اتجاهي مجان خطبوني لاخوه وسكت شسوي اخاف احجي واهلي انطو الموافقه الهم واعرفهم ميتراجعون وهذا فوزي ميتفاهم اذا حجيت اله وشكول اكوله عبالي اخوه الخطبني اااخ ربي رحمتك ماعندي غيرها  سلمت امري لله

بيت عمشه :

اجتمعت بلولد وبلغتهم ونجم نايم وراسه بحضن امه

عمشه : المشيه باجر حظرو نفسكم

عبيد : بيت منو غير نسأل نعرف اصلهم فصلهم

عمشه : بيت ابو فوزي بنيتهم ذكرى

طفر نجم من مكانه

عمشه : اسم الله الرحمن يمه شجاك

العيون كلها صارت عليه

نجم : بتوتر ينطقها الناس الجدد

صمد : اي ليش تعرفهم عندك شى وياهم

نجم : هااا لا ماعندي كام من مكانه وطلع

ساهره : شبيهه نجم تكول انتل من سمع

بديعه : فرحان لاخوه كلشي ماكو

عمشه : شدردمن احجن بصوت عالي خلي اسمع

ساهره : ماكو شى عمه سلامتج عبالي نجم بيه شى

عمشه : مالجن دخل بنجم جم مره اكولها

ساهره : العفو عمه سبينا العنب الحلو

عمشه : كومن كل وحده لغرفتها وباجر لاتنسن تحظرن نفسجن وهناك لا تخزني اركدن شوي

وصارت المشيه ونجم محضر وتحجج مريض واكيد محد يجبره وصارت الخطبه

والكل يهلهل وفرحان اجت الجنه الرابعه اله ذكرى ونجم گلوبهم تبجي دم ومحد يعرف بيها

واكف نجم ويشوف حبيبته تنزف لاخوه وراح تعيش وياه بنفس البيت كوه حاصر دموعه ويمثل فرحان حتى لحد ينتبهه ميدري اكو عيون تراقبه وتريد توكعه

جابو ذكرى للبيت دخلت وطب نجم سلم على اخوه وباركله ومد ايده بأتجاهه وكال بصوت مخنوك مبروك

يتبع ...

بارت تعريفي عن عمشه من باجر نفتح اول ابواب بيت عمشه وجناينها

#الابواب_الخمس

البارت الثاني

للكاتبة Reem

وخلها

راح الچان تك روحي...وخلها

جفاها وحط مرض بيهه...وخلها

يهل تنشد عليه اسكت...وخلها

بقت بس رحمة الله تحيط بيه   

واكف نجم ويشوف حبيبته تنزف لاخوه وراح تعيش وياه بنفس البيت كوه حاصر دموعه ويمثل فرحان حتى لحد ينتبهه ميدري اكو عيون تراقبه وتريد توكعه

جابو ذكرى للبيت دخلت وطب نجم سلم على اخوه وباركله ومد ايده بأتجاهه وكال بصوت مخنوك مبروك

ذكرى : رفعت راسي وصارت عيني بعينه مكدرت اطلع صوت بس همس وكلت شكراً

دموعي رادت تخوني وتنزل قويت نفسي وبگلبي اكول لتبجين اسكتي ميصير هذا حماج بعد مو حبيبج دنكت حتى لا اثير الشكوك وبقيت اسمع هوساتهم ودبجاتهم والكل يهوس وفرحان

اجت يمي امي باستني واخذتني من ايدي وياها زوجة الجبير عرفت اسمها صالحه ودخلوني بغرفه

صالحه : بلخير خيه وبلتمام منه المال ومنج العيال

ذكرى : افرك بيدي من التوتر جرتني امي وكعدتني على الجربايه وبدت تحاول تهديني

صالحه : اذا تحتاجين شى بس صيحي تلكيني يمج بلحظه

ذكرى : رفعت راسي وكلت ليش انتم باقين هنا بلبيت

صالحه : وين نولي خيه غير بيتنا وغرفنا وغراضنا لو بعدج بسم الله وتردين تهججينا

ام ذكرى : عيني ام مهند مو قصدها بس هي متعرف وسألت لان اول ليله توقعت ماكو احد يبقى بلبيت

صالحه :اعرف ماتقصد بس علمي بتج بهيج ليله لطلع صوت وتفضحنا تره البيت اذا يفرغ بيه ١٠ انفار وحموينها هنا عيب يسمعون صوتها ولا تشلع گلب العريس هي جم دقيقه ادوس على نفسها وراها كلشي سهل لا تتعاير

ذكرى : بلعت بريگي واجر نفس قووي

ام ذكرى : شبيج يمه

صالحه : شبيهه قابل انتي بس عوفيها وتعالي نطلع بره حتى العريس يجي ويستعجل بياضها

ذكرى : اشوف شلون صالحه سحبت امي واخذتها منطتها مجال حتى تكعد ويايه وحدنا وعيوني تستنجد بأمي وطلعن وسدت الباب  شراح يصير خايفه ومرعوبه ومااعرف غير شى بسيط عن هاي الليله حجته الي زوجة عمي

كمت اقرا ايات بعدني هستوني ودخل صمد هاي اول مره وحدنا كلشي صار خلال شهر واحد هي خطوبه وعقد وزواج حتى ملحكت افهم منه شى ولا افهم طبعه حياته رجال غريب وخلوني وياه بغرفه وحدنا

كعد بصفي وكال بصوت خشن

صمد : شلونج

ذكرى : هزيت راسي بخوف

صمد : احجي شبيج خرسه قابل

ذكرى : زي زي زينه

صمد : بس لا تعتعتين

ذكرى : شنو يعني

صمد : يعني الكلمه متنطقيها كامله تشعلين اهلها يله

ذكرى : رفعت راسي وكلت لا والله احجي عدل

صمد : هههه شبيج ترجفين

ذكرى : رجعت دنكت وسكتت

صمد : اسمعيني ذكرى عدنا نص ساعه نكمل كلشي اذا مو اقل

ذكرى : ليش شكو

صمد : نلعب دعبل هاي شبيج امج محجت وياج

ذكرى : ابتعدت منه وكفت وبتردد وخوف كلت عفيه خليها باجر

صمد : اسمعي يابنت الناس اني مو طبعي القوه والاذيه بس اذا ضليتي هيج معانده اخذج بلقوه كله ولا يكولون صمد مابيه خير اخوتي كلها بساع بساع ورفعو روسهم زلم حوك وماتأخرو تردين يكولون صمد مابيه حظ واصير علج بحلك النسوان

ذكرى : وهاي شلها علاقه بلرجوله

صمد : انتي مبينه تحبين المناهده واني مالي خلكها شو تعالي

ذكرى : سحبني من ايدي وجر البركع من راسي وانجر شعري ويااه حيل اذاني شاغت روحي حتى البدله بلقوه نزعها اليه  جان ويايه مؤذي مارحم عياطي حاولت اكتم صوتي مثل مكالت صالحه بس مكدرت هو مرحم طفولتي وقله خبرتي سد حلكي واخذني ومباشره سحب البياض وعافني اتلوه على الفراش لبس دشداشه وطلع وركع الباب وراه والهلاهل اشتغلت

كرهت نفسي وقسمتي والساعه القبلت بيها ضليت لازمه رجلي وابجي واناشغ محد دخل عليه حتى امي توقعت اطب تاخذني بحضنها بس ماصار هذا الشى

اندكت الباب خفت ورجعت ليوره وغطيت جسمي بلفرشه مال العرس جان اطب وحده من الجناين اسمها بديعه شافت

حالي ركضت عليه

بديعه : ياااصخام بوجهي هاي شصاير بيج

ذكرى : نزلت دمعتي الحابستها من الظهر لهسه وكتلها عفيه اريد اروح حمام

بديعه : كومي حبيبة كومي هذا شجاه ماشايف مره شعامل بحالج

ذكرى :لزمت ايدها عفيه وين الحمام راح اموت من الالم

بديعه : تعالي اوديج عليه

ذكرى : همه وين

بديعه : منو

ذكرى : صمد واهله

بديعه : كلها بلهول فرحانين وياكلون واني كلت اطب اجيبلج اكل اخاف جوعانه وشفت حالج سمي وكومي

ركضت بديعه جابت دشداشه طويله ولبستني وحطت روب فوك ملابسي وطلعتني واني لازمه بيدها مثل الطفل الصغير

بديعه : خيه لتوكعين شبيج ترجفين الجو مو بارد مال رجف

ذكرى : عفيه مستحيه واخاف صمد يأذيني بعد

بديعه : لا تخافين صمد خوش صمد بس هو طباكات شوي بس گلبه ابيض وانتي اكيد عاندتي واذاج

ذكرى : شسوي هسه

بديعه : امشي اوديج اغسلي اكو مي حار بلجدر بلحمام حضرته كلت اكيد تحتاجوه

اغسلي وتعلي وسمي على جسمج واني هسه ارجع اجيبلج ملابس هاي توصخت هسه على جسمج ومن ترجعين للغرفه اجيبلج اكل راح تصحين وترتاحين

ذكرى : هزيت براسي ومحجيت شى ودخلت للحمام جان قديم وبس لبخ حتى ما مصبوغ  كعدت على التخته ولزمت الطاسه

واذب مي على راسي وجسمي وابجي لحد مغلست شعري وجسمي واندكت باب الحمام مدت بديعه ايدها تنطيني الملابس

انتظرج بلغرفه

ذكرى : ماشي نشفت جسمي لبست وطلعت صارت بوجهي ساهره

ساهره : بلخير عيني وتعلج وتباوع من فوك ليجوه

ذكرى : شكراً مشيت سريع وطبيت للغرفه همزين الحمام قريب من الغرفه اسمع صوت ضحكهم وسوالفهم مشطت شعري ودخلت بديعه جايبه صينيه اكل حطتها وطلعت ورجعت بيدها طفله صغيره عمرها اشهر

ذكرى : هاي بتج  شكد حلوة 

بديعه : اي بنيتي اسمها بان عمتها سمتها ردتها نرجس مارضت تالي سكتت وخوله سمتها على اسم صاحبتها

ذكرى : الله يحفظها الج

بديعه : الله يرزقج مثلها اكلي وقوي نفسج انتي عروس ولازملج قوة

ذكرى : متأذيه عفيه

بديعه : تحملي كلنا بلبدايه هيج وراها عادي تعوذي من الشيطان ولاتفكرين بشى هاج اگلي

ذكرى : مديت ايدي واخذت اللفه من ايد بديعه جنت حيل جوعانه اكلت لكمه وبعدني مبالعتها

جان يطب صمد من خوفي بلعتها وذبيت اللفه بلصينيه

صمد : روحي بديعة رجلج يريدج

بديعه : تمسون بلخير

ذكرى : وخرت الصينيه وحطيتها بلكاع واجه كعد بصفي صمد سحبني بهدوء وباس راسي

صمد : لتضوجين مني جان لازم يصير هيج حتى نخلص وهسه براحتج مااتقرب الج لمن ترتاحين

ذكرى : مااعرف شون اشكرك

صمد : انتي حليوه بس دمج بارد ليش هيج جامده

ذكرى : يعني شسوي

صمد : لا تسوين شى طفي الضوا اريد انام تمدد وانطاني ظهره وعافني اباوع عليه وحايره بزماني وبلرجال الي انكتب عليه

سمعت صوت هوسه كمت على كيفي ادور على اللاله الكهرباء طافيه شغلتها  اباوع للساعه المعلكه بلحايط اربعه ونص الفجر هاي شكوو

صمد : طفي اللاله يمعوده

ذكرى : شصاير عفيه هوسه بره

صمد : تعالي نامي ماكو شى وتعلمي هاي الهوسه يوميه

ذكرى : ليش شصاير

صمد : الله مطولج ياروح بابا هذا شغلنا نطلع من الفجر حتى انلحك انلم العتيك ونبيعه

ذكرى : انت هم وياهم

صمد : لا اني وزير

ذكرى : عفيه شبيك ويايه بس سألت

صمد : طفي اللاله وتعالي افهمج

ذكرى : طفيتها واجيت امشي على كيفي وكعدت يمه وفهمني طبيعة شغلهم

وامك تطلع وياكم

صمد : نوبات تطلع ونوبات لا گبل مايفوت اليوم اله وهي ويانه هسه كل يومين والثالث تطلع وعندج فلاح يطلع بنه (عامل بناء)

يشتغل ويه خلفه ليغاد من منطقتنا وكت نزلته من العسكريه

وانه وعبيد وجوحي ويه امي والصغير بزر الدلال نجم نايم للظهاري مخلصها دياحه عود يدرس تكول دكتور مابيه حظ

ذكرى : نبض گلبي حيل وحسيت ضربه بمعدتي من جاب طاريه خفت يسولف بعد عنه وتفضحني عيوني غيرت الكلام

بسرعه

ذكرى : اكلك امك شكلها مو جبير بس متعوبه وانتم ماشاء الله كبار

صمد : اي امي تزوجت عمرها ١٣ سنه بس بلغت وعدها عبيد وعمرها ١٥ سنه متشوفيها صغيره مو حيل جبيره الزمن اكل بيها هيه هسه عمرها يمكن طخ الاربعين

ذكرى : وانت متروح للجبهه

صمد : اني فرار

ذكرى : لطمت على صدري صدك تحجي

صمد : وجع على شنو تلطمين كالو يجي عفو والتحق لا تنگين راد للجبهه منتظر القرار واسلم نفسي عيفج من هذا الموضوع

ذكرى : خفت ليجون الانضباطيه وبنفس الوقت حايره بحال ابويه واخويه معقوله مسألو عنه شالوني وشمروني اله هيج اختنكت حيل ومابيدي غير اسكت وابلع گلشي صرت مرته بعد راحت صفنتي من كاال

من هسه اگلج امي اياج تلاسنيها واخوتي مالج دخل بيهم ونسوانهم لا تندكين بيهن

ذكرى : يعني احبس روحي بلغرفه

صمد : ماكلت هيج اريدج هاديه مالي خلك كالت امك وكالت اختك وكالت مرت اخوك

ذكرى : صدك اختك وين شفتها بس مره وحده

صمد : تدرس وماضل شى وتتخرج من المعهد

ذكرى : انيالها تمنيت ادرس مثلها واكمل حتى لو معهد

صمد : ماعندي مره تطلع لعتبت الباب تنجبين هنا ونكعدين

ذكرى : حاظر

صمد : انتي ليش هيج مايعه احسج مو مره حوك حتى بلحجي تجرين الحجايه جر

ذكرى : خجلت وكتله شفت مني حتى تحكم عليه هيج 

صمد : نجرب ونشوف اكلج ارتاحيتي ونمتي بعد كافي دلال

ذكرى : لا عفيه مصار كم ساعه وبعدني ممكمله كلامي رجع تقرب مني هلمره جان اهون من القبلها بس اكيد ماعندي اي مشاعر وياه وحتى هو تأديه واجب وغريزه وبس

عمشه : كاعده بلهول بلكاع وتحسب بفلوسها وتحطها بلصندقجه (صندوق ) مالتها وتباوع يمنه يسره اخاف احد يشوفها جان تكعد بصفها ساهره

عمشه :سلاماً قولاً من رب رحيم لا هله شتردين

ساهره : شبيج خاله فززتج

عمشه : وخلخاله تعمه بعيونج واطير كون عمرج انه جم مره حاجيه وكايله مااريد لا انتي ولا صويلحه تنشدن عليه بخاله گله عمه

ساهره : غير انتي خالتنا اخت امنا ولساني ماخذ هيج

عمشه : لزوم اكطع لسانج واتوبج انه مااريد اذكر امجن من اذكرها كون الزم بخوانيكجن

واغم كصتي عبن دخلتن داري واخذتن ولدي

ساهره : وتاليها ياعمه شون بيج ماتنسين صرنا جناينج وانه وصالحه كل وحده صار عدها وليد وانتي لهسه تندبين على ولدج

عمشه : انوح العمر كله عبن اخذتن تعبي وشگاي اسكتي مالي ضيجت حال شتردين فضيني

ساهره : بعد مااصيح خاله والله مرات انسى موبيدي

عمشه : بت غنيه فضيها شرايده

ساهره : عمه اروحلج فدوة شفت صالحه لابسه ترجيه جديده وسألتها وكالت انتي مشتريتها الها والجنه الجديده طكيتلوها محبس وكردانه واني ضليت بلظيم

عمشه : وزلمتج ليش مايشتريلج

ساهره : سوده عليه منيله مو كدامج ياعمه الحال تعبان وحسره علينا الفلس

عمشه : اي بهاي حكچ مو جوحي يطبب كواني التمن وكواني الطحين وما ملحك لعيشتنا كومي ولج مني هاي قشامرج مو عليه زلمتج يكبس الفلوس على گلبه فلس مايطلع منه وتتزوهرون ويانه بعد وين ما ملحكين للعيشه

ساهره : فدوة عمه حتى لو ترجيه صغيره

عمشه : وهسه تجي بدعه(بديعه)  تريد

ساهره : لا متريد

عمشه : عبن فقيره وعلى كد ايدجن ادمغن بيها كومي مني لااشعل اهلج نفر نفر

اتعب واطلع من صباحيات الله واصوخلجن ذهب غمت كصتها وكالت اهمداني ماحطيت بيدي ملوي برجلي جنجل (حجل) ضاله اعلف بيكم كومي يله وجيبيلي المدكوكه اريد اكل واذا مابيها راشي لا تراويني وجهج

ساهره : هسه متشتريلي

عمشه : من يطلع ورث غنيه اشتريلج

ساهره : دومج هيج تفرقين بينا

عمشه : المدكوكه لاتنسيها بنت المدكوكه

ذكرى : مر اربع ايام على العرس وخلصتها بلغرفه مااطلع بس على كد الحمام وبليوم الخامس طلع صمد للشغل ومكعدني كعدت من النوم لبست دشداشه ومشطت شعري وشلته وطلعت صارت بوجهي ساهره مسلمت كلت صباح الخير

ساهره : ياخير صار الظهر جناين تالي وكت وتهز بيدها وراحت للمطبخ

سمعت صوت امهم

عمشه : تعالي يمه ذكرى

تقربت منها وبستها وكعدت بصفها

عمشه : شلونه وياج صمد

ذكرى : بخير والحمدلله

جان اسمع صوت خوله وهاي اول مره نلتقي وجهه بوجهه شفتها بس بقرايه الفاتحه والعرس شوفه سريعه بوستني

بلخير الله يسعدكم

ذكرى : يوم الالج

خوله : الله كريم وكالت لامها

يوم رايحه لامل ما اتأخر

عمشه : اخوتج على جيه وانه مالي دخل اذ شافوج بره تعرفين بعبيد مايرضى طابه طالعه

خوله : هو عبيد كادر بس عليه

عمشه : ام لسان اسگتي ولي ولا تتإخرين

ذكرى :  طلعت ركض خوله وسمعتها سلمت وجان يطب نجم جمد من شافني كاعده بصف امه مكدرت ارفع عيني بعينه وكال بصوت هادئ

السلام عليكم رديت وعليكم السلام

عمشه : هله بسورها ونورها هله بلجاي وجايب رويحتي فتحت ايدها حتى تحضنه وبعدها كاعده بلكاع  تعال يبعد امك هيج تعوفني وتروح شجاك شدولبك ورحت عني يبعد جبدي

نزل بمستوى كعدت امه وحضنها وعينه على ذكرى

نجم : ماكو شى يمه كتلج اغير جو يم صديقي بكربلا رحت جم يوم واجيتج

ذكرى : من رخصتكم

عمشه : وين رايحه چاتستحين من حماج هذا اخوج

ذكرى : اكيد اخويه واتشرف بيه وعلى راسي اني اريد اروح اساعد البنات

عمشه : تلحكين على الكراب اگعدي

ذكرى : كعدت بصفها نفس مكاني وهو كعد بلجهه الثانيه

مجرد كعدتي يمه احس روحي تطلع واقرا ايات واتعوذ من الشيطان

جان يكول

نجم : مرتاحه

ذكرى : هاا

نجم : مرتاحه ويانه

ذكرى :  الْحٍمَدٍ للـّہ

عمشه : شبيهه جنهه ورد حير بروحك يمه وبعلامك تحصل الشهاده منا ازوجك منا

ذكرى : كمت  بسرعه وكلت بتوتر

اخذو راحتكم وطلعت حتى بدون ماانتظر جواب عمتي

كعدت بلغرفه واتنفس بخوف وگلبي دكاته عاليه واضرب على خدي يلخبله شبيج هذا حماج حماج واعيد بلحجايه اروح واجي

ردت بس اهدا لحد متعبت وكعدت شلت هم شون يوميه اشوفه لازم اتعلم لازم انسى كلشي احسه اتجاهه الهي ساعدني

وره اسبوع من زواجي تقسم الشغل

صالحه : تعرفين تخبزين

ذكرى : لا بس اعرف اشلع خبز ويه ماما

صالحه : هاي الضاله نخبزلج ونوكلج هم اسمعي خيه هاي سوالف الدلال والتمعقج انسيها ذاك بيت ابوج وراح هذا بيت عيالج واليجري علينا يجري عليج

كل يوم على وحده الخبز

ذكرى : كتلج والله مااعرف

بديعه : اني اعلمها

ساهره : انتي اسگتي وحيري بلشغل العليج

بديعه : اعلمها وراها مالي دخل بيها

صالحه : تعلمي بسرعه لا اطولين افتهمتي عليه الغدا وعليج انتي وبديعه العشا وغسل المواعين ومسحت العصر وساهره عليها الريوك ومسحت الصبح البيت مرتين ينمسح هوايه احنا وبسرعه يتوصخ وجهال يتحركون ويوصخون

ذكرى : مجال عندي غير هزت الراس والموافقه وتعلمت والصار الخبز يوم عليه ويوم على بديعه وهنه بس الجمعه عليهن شفت بديعه شكد تخاف منهن واني هم قررت ابتعد ومااريد مشاكل جانت مشكلتي الوحيده نجم وجوده بلبيت

وبعد شهر ونص عرفت بروحي حامل اخذتني عمشه للجده وفحصتني وبشرتها

واول مدخلنا جان نجم كاعد ورافع رجله ويقرا مباوع ابد بأتجاهنا ولا كأنو دخلنا

عمشه : وينجن يمكموعات بصوت هز البيت

نزلت صالحه وساهره وبديعه طلعت من المطبخ خير عمه

مرت صمد حبله

ذكرى : عيني مااجت اله على نجم الوكع الكتاب من ايده بلحظتها خفت لحد ينتبهه بس هوسه عمشه وهلاهلها غطت على جفلته

صالحه : كون تجيبين وليد مو بنيه مثل بدعه

بديعه : وشبيها البنات رزق وخير من الله وشالت بتها الكاعده بلكاع وباستها

عمشه : بيج خير واحبلي مو ضاله على الوحيد وتلاسنين

صالحه : ومنو كلج ياعمه ضاله على الوحيد اني حامل وعليه ٣ اشهر

ساهره : ياااا وماحجيتي

عمشه : منو امها بعد غنيه لاتعرف خوه ولا حنيه

بديعه : بلخير تكومن بلسلامه اروح اكمل مواعين

ذكرى : كل هاي الهوسه وبالي يم نجم الطفر وطلع بره مرات الوم نفسي ليش افكر بيه واكول مو بيدي ماطول كدام عيني ومرات اكول عيب عليه هذا بحكم اخويه

باركت لصالحه حتى مجاوبتني واخذتها ساهره مبين راح يتعاركن مهتميت الهن بالي كله بغير مكان الوحيده الجانت هادئه ومالها حس بلبيت هي خوله تدرس لو يم صديقتها امل حتى متدخل بسوالف الجناين رغم صالحه وساهره دوم بالهن يمها ويحجن هاا طبت هاا طلعت هاا لبست ميتات منها موت وهي مطنشه الكل تحسها مو من اهل هذا البيت اصلاً

واجه صمد ومن عرف حامل كلشي ماكال بس كون يطلع ولد مثل اخوتي مو مثل فلاح

حسيته دوم يقارن بينه وبين اخوته

بكلشي

وره فتره صار تفتيش قوي على الفراريه واشتدت الحرب وقرر صمد يسلم نفسه لان اذا لزموه يعدموه لان يعتبر متخاذل لان الدوله طابه حرب

وبلرشاوي والمعارف رجع والتحق وياه عبيد وجوحي

البيت بقى بيه فلاح وجبته عكس اخوته ونجم الجان يدرس ومالتقي بيه اثنينا نتحاشى الكعده سوه

عيشتي من الصبح لليل شغل وكراب وهوسه النومه حسره عليه الاكل قليل وهمه هوايه مرات استحي اكل اضل اعلس خبز من الجوع لو من اروح لبيت اهلي اكل زين

امي تكول تحملي هاي قسمتج

مرات اكول لو رافضه ليش خفت وسكتت وليش وليش وياريت يفيد الليش وره ميوكع الفاس بلراس

انظف وراهم كل شويه وصالحه وساهره مايشتغلن بس من عمشه موجوده لان تلعب بيهن طوبه واليوم التطلع بيه للشغل يحطن رجل على رجل ودك سوالف وتبسبس وتأمر حتى الجهال يوصخون يكسرون ولا يمهن واني وبديعه نوكع بيها من البيتونه مسح وكنس للطرمه واني حامل كل شويه اكول راح اطرح من التعب وفوكاها صمد اذا اجه وراد يتقرب مني وكتله تعبانه يستلمني دك رزايل وياخذ حاجته ويكوم برضاتي او بدونها ماارتاح منه بس من يلتحق اقلها كراب وشغل بلنهار وبليل اذب روحي على الفراش مثل الميت

وارجع الصبح نفس المنوال واذا حجيت شى وياهن يستلمني اثنينهن ومن اشكي لصمد يسكتني لدوخيني وانتن نسوان بينجن شفته لا ابالي كمت مااشكي وابلع وانجب واسكت واكرب كرب المطي حتى بس ماتصير مشاكل وطلايب واذا شكيت لعمتي يبوو يضمنها اليه ويطلعنها ويخلني اصيح التوبه اذا احجي هاي حياتي بيت عيالي ٧ اشهر شفت الويل والله اعلم شمضموملي

بطني واصله لخشمي عليه سبعة اشهر وتعبانه واكفه على التنور اخبز والحر والشمس براسي ردت اشيل العجين ثكيل وكع من ايدي وصار بلتراب وعاطت صالحه وهي على ابواب تجيب ومجازت مني تفتر ورايه شسوي تعيب وتتأمر واني ابلع واسكت

صالحه : وثول كون غير تنتبهين

ذكرى : كعدت بلكاع احس ظهري راح ينشلع متشوفين شون ثكيل

صالحه : صيحي ساهره بدعه لو متقصده توكعين العجين حتى رجولتنا من ترجع ترزلنا اعرفج خبيثه سكوتيه من جوه لجوه

ذكرى : كمت ابجي تعبت حيل تعبت

صالحه : وجعت امي شبيج تونونين

ذكرى : عفيه ابوس ايدج عوفيني ظهري مااحس بيه من الوجع والطفل احس راح ينزل

صالحه : يمه يمه من عياره النسوان كومي وارجعي اعجني لا اشيل العجين واحطه فوك راسج منا للغدا كون كامل وضربت ذكرى على جتفها حيل وتأشر بيدها كووومي جان تضربها برجلها على ظهرها وتعيط بعلو صوتها اذا متكومين امسح بيج التراب گله

ذكرى : صوت البجي مالتي صار عالي انهارت اعصابي وهاي فوك راسي تعيط وضربتني على جتفي وتسحل بيه من الردن مال الدشداشه وشاغت روحي من ضربت ظهري  متحملت طلعت ركض لبيت اهلي بعد عنهم اربع بيوت ايد لازمه بطني وايد لازمه ظهري ودخلت اركض الهم بدشداشه العجين وحالي يصعب على الكافر

ام ذكرى : ياستار شبيج بنيتي

ذكرى : كعدت بلكاع بلمطبخ وادك على راسي والله بعد مااتحمل راح اموت خلصوني من ذاك البيت تعب

كعدت ماما بصفي وحضنتني وتبجي ويه بجيتي جان يطب اخويه فوزي شاف حالي تخبل

فوزي : مالج رجعه بذاك البيت خدامه الهم وليش متكولين شمسكتج

ذكرى : نفس السكتكم وخلاكم تنطوني لهيج ناس

فوزي : والله مقبلت وگلبت الدنيا وابويه وامي سكتوني مردت الج هيج ناس ذوله مو من ثوبنا ويباوع على امي حسيت اخويه مكسور ومهموم ومتأذي عليه كومني من الكاع وبيده غسل وجهي وحضني وطلب من امي توكلني تمددت على الكرويته (القنفه) اريد ارتاح اريد اغمض وافتح والكي كل هذا حلم مصاير من التعب والبجي غفيت وفزيت على دكت الباب

وسمعت صوت عياط عمشه وصمد

دخلو وصمد اجه ركض ولزم ايدي وعصرها

صمد : شون اطلعين من البيت بليه علمي

ام ذكرى : ابني على كيفك وياها شوف حالها بطنها واصله لخشمها لتأذيها

عمشه : ماتكولين لبنتج الطلعت بطرك ثوبها وبليه علم زلمتها ومطيحه العجينات بلتراب موش حرام موش نعمه الله هاي عبن ماتعبانه بيها

ذكرى : اااخ ايدي عوفني باوعت على عمشه وكلت وحاصرتني الدمعه والله عمه وكع من ايدي ممتقصده

عمشه : صالحه تكول كمت تعيطين مااخبز وشمرتي نعمه الله بلكياعين وطلعتي

ذكرى : والله جذابه وكع من ايدي وهي تعيط عليه وتتأمر وضربتني على ظهري برجلها شيغت روحي والله عمه وداعت الجهال الي بطني عساني لا ولدت اذا كذبت

هدأت عمشه وكعدت وسحبت صمد من ايده وكعدته بصفها

وجان يطب فوزي يعيط

فوزي : امشو اطلعو بره مالكم مره عندي

ام ذكرى : فوزي شجاك اسكت

صمد : مو هي تايهه الك وبكيفك هاي مرتي وحلالي واني المسؤول عنها امشي لج وسحب ذكرى من ايدها ومتحمل فوزي لزم صمد وتضاربو وعمشه وام ذكرى يعيطن

ذكرى : بين اخويه ورجلي كل واحد يسحب منه جهه واحد ضرب الثاني متحملت الديصير كمت اصرخ بعلو صوتي كافي ارحموني والله راح اموت وصارت تقلصات بطني كلت هذا هو راح اجيب من شافو وضعي هيج حارو بيه وركضو للجده جابوها واجوي ومن فحصتني كالت تقلصات مال تعب

باوع صمد وخزرني وكال يله كومي لبيتج هناك ارتاحي

فوزي : كلت مالك مره عندي ومن اليوم اذا عتبت الباب اكسر رجلك منطيك مره لو خدامه لجيفتكم

ذكرى : رجعت الهوسه وطب ابويه سكتو اثنينهم باسني وسألهم شصار جان يكول صمد

صمد : ماكو شى عمي جاي اخذ مرتي واروح

ابو فوزي : باوع على بنته وتقرب منها وكال ترحين بابا لبيتج

ذكرى : صفنت على حالي قابل اطلك والي بطني شنو ذنبه كلت بصوت ناصي اي باوع بابا على صمد وكاال اخذها يابه وعينك عليها

فوزي : يابه شلون ياخذها

ابو فوزي : رجلها ومن حقه  كافي حجي صوتكم للشارع المره تاليها ومرجعها لرجلها يله روحي بنتي لبيتج

عمشه : عين الماصلت على النبي يله كومي ولاتخششين الشيطان بين زلمتج واخيج

كمت ولبست نعالي وبنفس حالتي رجعت للبيت وعفت اخويه واكف بلباب مورث من الاعصاب يباوع بقهر على حالي

دخلت وحسيت الوجوه مگلوبه

اجت عمشه وصاحت وينج عتوي

عبيد نزل وكال لامه

تعبانه يمه ظهرها

عمشه : يبعد امك تعال اكنس وامسح بمجانها چا انت العتوي كرت عيني

عبيد : شبيج يمه شگلت اني

عمشه : صيح مريتك لا اصعدلها وتعرفني من يطكن خبالات عمشه ابويه مااعرفه

عبيد : صاعد يمه لا تصعدين

شويه ونزلت وكفت على الدرج

صالحه : خير عمه محتاجه شى

عمشه : الصار اليوم مايصير بعد التغلط بيجن اسحل بيها الخرابه كلها

صالحه : اني شعليه مشفتي شسوت

عمشه : اسكتي بت غنيه تعلميني بيج اركدي شوي لاتخلين عگلي يگلب عليج وانت يازلمه البيت وجبير اخوتك ضب مريتك شوي طايحه بنات الوادم خدامه حاجيها هاي المره مالي حيلجن مره ثانيه اركع راس براس والزمجن الشارع

وانتي بدعه وساهره يشملجن الحجي لا تكولن ماكالت عمشه

ذكرى : نظرات صالحه تخوف دخلت لغرفتي وصمد عافني وطلع حتى مكلف نفسه يطيب خاطري تمددت ومهتميت ردت بس ارتاح ويوم كامل نايمه شصار مصار ميهمني

وثاني يوم كعدت واجت بان تركض صايره تمشي حليوه سمره والشعر تمري والخدود متفحه تنحب حيل كل مااشوفها اكرصها من خدها

نزل عبيد وكال

شون صرتي

ذكرى :  الْحٍمَدٍ للـّہ احسن

عبيد : لا تسون مشاكل انتن خوات

ذكرى : بگلبي اكول ياخوات وتريد مرتك تشرب من دمي هزيت راسي وكتله الله كريم

طلع عبيد وجوحي وصمد رحت وره البيت اجيب الصونده حتى اغسل الطرمه جان تلزمني صالحه من رگبتي وخنكتني

صالحه : اسمعي لج لا عبالج السويتي اعبره الج اني اترزل من وراج لج ادوسج بنعالي هنا واخلي ايدج من رجلج ما تميزيها بعدج متعرفين صالحه

ذكرى : عوفيني اختنكت اتنفس كوه واحجي

صالحه : تشتغلين خدامه جوه رجلي وصوتج ميطلع الا والله اگلبج شاذي وميصيرلج دوا طول حياتج

جان تنجر صالحه بقوه من ايدها وحصرها بلحايط واني اكح حيل اريد هوا ركزت واشوف نجم لازمها من ايدها حيل ودافعها للحايط ويحجي ويصك على سنونه يريد يكطعها

نجم : هلمره لزمتيها مره ثانيه اسويج اني شاذي اكول مرت اخويه الجبير وبت خالي وعيب ادخل بالع سوالفج وحركاتج التخزي واكول يله تكبر وتعقل بس لهنا وبس اذا لمستي شعره منها وتراب ابويه لا طلاكج على ايدي وكولي نجم المدلل على كولتج سواها

صالحه : عوف ايدي اله اكول لاخوك عليك واخلي اليوم يهطرك

نجم : ذاك عبيد كلها جم ساعه وتلكي راجع للبيت  واني احجي وعبيد يحجي ونشوف عمشه المن تسمع ويه منو تطبك تردين تجربين

اباوع على صالحه وجهه اصفر دفعته وطبت

نجم : اجه تقرب مني وعيونه كلها خوف

بيج شى

ذكرى : شكراً لوما انت يمكن جان ذبحتني

نجم : خلي تولي هاي بوخه بس حجي ولغوه وتهديد

ذكرى :اخاف منها تعرف شون تأذيني

نجم : لتخافين محد يأذيج واني اشتم الهوا ادخلي غسلي

ذكرى : باوعت عليه وكتله انت هسه مثل اخويه مثل الردت اصحي واصحي نفسي

وجان يكول

نجم : وانتي مرت اخويه واختي ومثل ما احامي لخوله احاميلج وافهم قصدج انسي القديم كله ذاك راح وماانظرلج بغير الخوه

روحي ارتاحي

ذكرى : دخلت اجر بروحي وماانكر خوفي من صالحه رغم محاوله نجم يهديني

وبقى بالي تهديدها

مر اسبوعين وجمعت عمشه ولدها وكعدتنا كلنا وكالت

عمشه : عين الله عليكم كبرتو وتزوجتو وانه دوم اكولن عندي خمس زلم گلتها لفلاح من اشتعلت لشته وين ما وله واكولنها اليوم صرتو زلم وكاع ابوكم ضلت للغريب انه من يوم ماهجيت بيكم اعتبرت ابن عمي وعمكم فلاح غريب

اريدن كاع المرحوم تردوها

عبيد : يمه انسويها مذابح ويه عمي

جوحي : هاي فلوسنا وكاعنا لزم ترد النا سنين ياكل بخيرنا واحنا الفلس بعازته

فلاح : اني اكول ندز جماعه يتحاجون ويه عمنا ونحلها ودي

عمشه : وانت صمد

صمد : اني وياج يمه شتامرين

باوعت عمشه على نجم

نجم : الحل مالتي ميعجبكم

عمشه : كول يبعد امك

نجم : نبيع الكاع لحجي ريسان هذا يكره عمي ودوم يريد اذيته نبيعه الكاع اقل من سعرها بشوي ونخلي عمي وريسان يطاخخون بدون ماندخل لتنسون المنطقه كلها لعمي يعني حتى لو نسويها دم منربح هواي رياجيل وفلح عنده نطلع بمبلغ زين بدون اي مشاكل من بعيد لبعيد

عبيد : وليش نبيعها نرجع لكاعنا ونزرعها

نجم : وتتوقع عمك يقبل غير ثاني يوم يحركها النا هاي اذا مصفانه واحد واحد

جوحي : اذا خايف ضل بحضن امي

نجم : اني ماخايف على نفسي اني شعندي اخسره اني خايف عليكم كلكم عدكم عوائل وجهال اذا صار واحد بيكم عليه شى مرته وجهاله شلون بيهم واذا احنه نحير بيهم شنو فايده الكاع واحنا منطين دم اخويه بيها بله نفخ وتبيعون بطولات فكرو بيها زين هذا اسلم حل ناخذ القليل ونكسب روحنا

عبيد : اني ماارضى اريد كاع ابويه كلها ونرجع للناصريه

نجم : ومنو يخليك ترجع عمك من كل عقلك

جوحي : لتدخل نجم انت بعدك صغير وماتفتهم وهاي سوالف المتعلمين خليها الك

عمشه : لا والله انتم كلكم ماتفتهمون وانه ويه نجم حجيه مال دواوين وموزون هذا هو نبيع الكاع لحجي ريسان واليطلع نشتري بيه الخرابه البصف البيت ونكبر هذا البيت

جوحي : وحصصنا يمه مناخذ حقنا

عمشه : هذا ياهو اليحجي بلحگوك مالكم شى عندي تنباع الكاع ونشتري الخرابه البصف البيت ونبنيها ويه هذا ونكبر البيت وجلمه زايده اتبره منكم ليوم الدين وعود خلي عمكم يحلها ليكم

عبيد : ميصير يايمه غير ناخذ حكنا كلت نبيعها وكلمن ياخذ فليساته

عمشه : كامت عمشه وبيدها المسواك تفرك سنونها تفلت وكالت نجم يمه شوف الحجي ريسان دزله طارش وبيع كاع ابوك اذا انتم زلم فهاي الايد السوتكم زلم لا تتمرجلون على امكم واذا على الحك انه الوحيده الالي الحك بيها انه تعبت ويه ابوكم وانكسر ظهري وضاع شبابي بيها

حجي زايد مااسمع كلمن ياخذ مريته ويولي

اريدن انام

ذكرى : الكل طلع ضايج ومخنوك لان متوقعين الكاع تنباع وتتوزع الفلوس اما صالحه وساهره عيونهن نار الوحيده الجانت ساكته هي خوله حتى منطقت بكلمه

ونجم ركض بلبيعه وخلال سبوعين انباعت الكاع والكل وقع وهو الممنون ومحد كدر يفتح حلكه وعمشه اشترت الخرابه البصف البيت وبدو يكبرون البيت

وبهذا الوكت صالحه ولدت وجابت سما

وبعدها بمده ولدت اني وجبت يونس

اول فرحتي وفتحت عيني

اكو باب جان لازم ماينفتح

اني خوله البنيه الوحيده لعمشه فتحت عيني واشوف امي واخوتي يطلعون من الفجر للشغل يلمون العتيك والفافون والبواري وكلشي قديم ومستهلك ويبيعوه

جنت اشوفهم شلون يتعبون ويلمون الفلس على الفلس حتى بس يكملون البيت ويصير عدهم فلوس اليسمع اني على خمس ولد يكول انيالها اكيد مدلله بس الحقيقه غير اني حالي حال اي وحده اذا مو اقل الي مدلل بينا هو نجم تكول مو بشر نجم ونزل من السما وحط بحضن امي كلشي اله مجاب حتى دراستي مكملتها اله نجم كال لامي يله قبلت

جنت امشي واروح والبنات كلهن يعيرني بأمي بت عمشه ومجنت اهتم اكول الشغل مو عيب ولا حرام وخاصه بظرف امي تعبت وشافت الويل ومامدت ايدها لبشر وكالت انطيني ولا سوت شى بلحرام لهذا اعتبر شغلها شرف  دومي هادئه وماادخل بأي شى اعرف نسوان اخوتي حيايه وتمشي بلكاع متجنبه الكل الزينه والشينه وحايره بروحي وشاريه راحة بالي لحد ما اجه اليوم الكرهت بيه امي واخوتي وقررت مااخليهم يعيشون مرتاحين

يتبع

#الابواب_الخمس

البارت الثالث

للكاتبة Reem

تاه احسابنه شنحسب

عليمن تشرح وتـعتب

دنيا وضــــاع بيها الزين

واتساوه الگشر واللب

ناس وعايشه بوجهـين

حيرة شتكره وشتحب

خولة بنت عمشه

اني توليد الناصريه ١٩٦٥ وحيده عمشه على خمس زلم على كولتها ماحسيت بيوم افرق عنهم لان اليجري عليهم يجري عليه

الشى الوحيد الجنت اتميز بيه اكمل دراستي وهذا الشى لو ما نجم يطلبه من امي هم جان مصار

كمت السنه اكملها كوه ودفع وره ماتزوج عبيد واجت صالحه كورها وكوري تكول ماخذه ورث ابوها وكملت يوم مادخلت ساهره للبيت وجنت بحيه صارن اثنين ومن حبلن اخوتي اتفقو اكعد اخدمهن وامي ماكالت لا لان هي فكرة الدراسه متحبها بس حبيبها نجم طلب منها ولوما هو جان من زمان بطلتني

وتركت سنه بين ما جابن واني اكرب وارجع ليوره ومتحملت الوضع توسلت بنجم ارجع لان نقطه ضعف امي هو ورجعت بس ماسلمت من لساناتهن ليش لابسه هيج ليش حاطه هيج كرهني بروحي قررت مااجاوبهن لان جربت مره اجاوب وهيج صار

موقف قديم :

جنت نازله من غرفتي بلطابق الثاني لمن جان عندي غرفه قبل ليتزوج فلاح وتاخذ الغرفه امي وتنطيها اله وتنومني يمها

مبدله وطاكه التنوره والقميص الابيض وضفيرتين شعري مسويته وعندي امتحان وبالي كله يمه حتى اكل ماكدرت اكل واني انزل جان تلزمني صالحه

صالحه : وين موليه من الصبح

خوله : غير للمدرسه وين اروح

صالحه : ماكو روحه اليوم

خوله : وليش عيني

صالحه : بكيفي مترحين ونصي صوتج لا افرك حلكج

خوله : انتي مره وسويها حتى منا اشمرج

طلع عبيد من الغرفه

عبيد : خير شبيجن من الصبح

خوله : شنو اليوم مطالع ويه امي

عبيد : وانتي شعليج تحاسبيني

خوله : بس سألت استغربت وجودك

صالحه : عبيد شوف اختك ولسانها الزفر شلون تلاسن كتلها اليوم لترحين حتى تساعديني بمهند مريض والليل كله منام محتاجتج تكولي يطبج مرض مالي دخل بيج انتي وابنج وتهدد تشمرني منا ترضاها تتجاوز واني اكبر منها

خوله : فاكه حلكي عليها هاي شتحجي

جان يجرني من شعري عبيد عطت بصوت عالي جانت الجره قويه حيل

عبيد : منو هاي الطبها مرض شو مترحين واريد اشوف يابنيه تعتب الحوش اله اكسر رجلها بعدج بلبيضه وطلعلج حس صوج امي خلتج اداومين منجبه هنا وبلبيت هاي الخري مري ماتصرفلي

خوله : عفيه عبيد عندي امتحان مهم واذا ما رحت ارسب

صالحه : مترحين لان مو ادميه شردت منج بس تساعديني بأبن اخوج هيج حاقده نسيتي هذا ابن اخوج الجبير جان لازم تحطي على گلبج

عبيد : ولي لغرفتج بدلي وسويلي ريوك

خوله : كامت تبجي وتتوسل

عفيه عبيد والله باجر مااداوم اذا تريد بس خلي اليوم اروح

صالحه : حتى باجر مالج روحه حتى تتعامين شلون تلاسنين

خوله : اباوع على عبيد نظراته بأتجاه مرته ينتظر الاوامر منها

عرفت اذا ابقى اعاند هاي راح تبطلني من وره الطلي اخويه

خوله : وجهت الكلام لصالحه عفيه صالحه بداعت مهند عندج خلي اروح ومن ارجع انومه يمه واليوم كله شتردين اني حاظره

مباشره تفح وجهه صالحه وحست بإنتصار على خوله وكالت اي هيج من الاول وجري عدل اله بالاهاين

خوله : اروح هسه عفيه تأخرت

صالحه : روحي عساج لا رجعتي

خوله : ركضت بكل حيلي حتى بس الحك وحتى منداريت ورايه وعبيد حتى معلق على كلام مرته ومن يومها قررت اشتري راحه بالي وماادخل بيها لان جبيرنا طلي بيد مرته كلت بس على الاقل اكمل دراستي بليه مشاكل وساهره نفس الطينه بس سكوتيه ذيج تلدغ واتضم راسها وحتى من تزوج فلاح رغم مرته فقيره ابتعدت عنها تركت كل البيت بمشاكله ومصايبه حتى اخلص دراستي

اليوم اتخرجت من معهد اداره قسم محاسبه سنه ١٩٨٧ ولزمت الشهاده بطلعان الروح بعد ماتركت سنه ورسبت سنه مو مشكله المهم كملت خلصتها اروح بدربي وارجع بدربي وبس صديقتي امل ويايه ومااحب اختلط حتى ليحرجوني من يسألوني اخوتج شنو يشتغلون مردت ادخل بمواضيع راح تضايقني لهذا جنت انطوائيه  بلمعهد سنتين وخلصت منهن

واكفه اباوع على اخوتي كل واحد منهم شون تغير وكلمن حاير بروحه لوما امي جان اطشرو

استلم الفلوس نجم مال الكاع وانطاها لامي واشترت الخرابه وبدت تفتح البيت على الخرابه حتى يكبر والي يشتغل اخوتي وكم صديق لفلاح يعرفوه لهذا اجوي يساعدون بلبناء حالنا كسيف تراب وصخ بس متحملين لحد ميكمل كلشي يوم يطلعون ويه امي للعتيك ويوم للبناء عدا ايام الالتحاق مالتهم لهذا سالفه البيت مطوله ومتقبل امي تجيب عمال تكول ماعندي خلصن الفليسات على الكاع وعلى مواد البناء وخلتهم يكربون صبح وليل حتى نجم وياهم يشتغل

جانت امي كاعده متربعه بلكاع بلحوش وبصفها كونيه وايرات وبواري مزنجره وحدايد وتفصل بينهن حتى تبيعهن

كعدت يمها

اگلج يمه

عمشه : مدي ايدج وعينيني (ساعديني)

وسولفي

خوله : مديت ايدي ولازمه حزمه وايرات وافتح بيهن وكتلها

يمه ليش مانطيتي كل واحد فلوسه وخليتي يكون نفسه شمرت البيدها وباوعت عليه بخزره

عمشه : هااا بت عمشه شجرالج مصبحه عليه تردين تهجمين داري

خوله : هو مهجوم ميحتاج اهجمه يمه انتي تكرهين صالحه وساهره وذني طلايبهن ماتخلص خلي يولن ويطلعن من هذا البيت

عمشه : واعيف وليداتي الهن دهر صابج تسودنتي

خوله : لتعيطين ابوس ايدج افهميني ذني مشاكلهن يوميه تكبر اكثر وشفتي ولدج محابس بيد نسوانهم واذا متردين الكل يطلع على الاقل طلعي ساهره وصالحه وبقي فلاح ومرته وصمد ومرته هم يخف البيت وهم تقل المشاكل جان تجر الوايرات من ايدي وضربتني على ظهري بيهن وعطت ااااخ يمه شبيج

عمشه : نار كون وشبت بيج يلخوثه انه اعوفن تعبي وكسرت ظهري لبنات غنيه من اموتن العبو بكيفكم انه ما هجيت بليله ظلمه عبن اربي واتعب وانطي وليداتي لامهات السحوره

خوله : هاااا شفتي تعرفين بيهن يسون سحوره ودربهن اعوج المن حاطتهن بينا

عمشه : چااعوفهن يزكن ولدي حرافيش واسگت واكولن يله هاجن فوك وليداتي فليسات كاعي واسرحن وامرحن وين ماتردن لا وحك من اخذ روح فرج وروح ابوي مااخليهن يتهنن

خوله : اوف يمه راح تجنين علينه بهاي سوالفج تعرفين كل دماراتهن ومخليتهن بنصنا

عمشه : مو انه ماكتلج

خوله : ليش انتي تحجين شى جان تضربني بلواير مره ثانيه اااخ

عمشه : اركدي واسمعيني

خوله : اذني وخشمي وحلكي كله وياج بس لتضربيني بروح ابويه

عمشه : انه لكيت مره خيره تعرف تفك طراكيع النسوان وسولفت گلشي وكالت تعاليلي ليغاد وتنطيني شغيلات افكن ضيم صالحه وساهره من وليداتي

خوله : وانتي صدكتي

عمشه : چاليش مااصدك المره كلها تحمد بيها وبشغلها انتي اسكتي وضلي صاموط لاموط ولاتفگين حلجچ (حلكج) وانه اعرفن شون افكن وليداتي منهن ولج ياخليله عبن افكن سحورتهن وليداتي يردون لحضني لا اصوغج ذهب من راسج لجدمج

خوله : مو تكولين ماعندي فلوس وتبجين بوجهه الله حسره اريد دينار منج منين تصوغيلي جان تنزع النعال وتركعني على راسي كومي لابارك الله بيج لسان عمج گبحيه وعينج ضيگه

خوله : اني اذا ابقى اشبع مسبه وكتل اروح انخمد احسن تردين شى

عمشه : مابيج بخت انشديلي على ذكرى وينها اريدن جاي مهيل

خوله : هسه اكلها

عمشه : هاااج اخذي هاي وياج

خوله : شنو هاي

عمشه : قروانه شحلاته (اناء كبير)

خوله : غير مزروفه شنسوي بيها

عمشه : متعافيه بت فرج تفيد اخذيها وانطيها لبدعه واسكتي وهاج هااي التنگه (أناء فخاري)

خوله : مكسوره يمه شجاج

عمشه : نحطها علاكه تطلع احلى من وجهج ماتشوفين العراق انهجم الوادم تسودنت تنگه شحلاتها بس راسها طاير احط ليها جويس ترجع جديده ذابيها ليش هاي الوادم مطيره نعمه الله ماتشوفين غضب علينا ونخش بحرب وندخل بحرب وليداتنا خلصت

خوله : اشك هدومي يعني حرب ايران من وره تنگه مكسوره

عمشه : لا من وره خوثتج يلفاهيه ولي وانشدي على الجاي لا اصبنه على راسج

عفت امي ودخلت وانطيت الغراض لبدعه حتى متسأل شسوي بيهن تعرف امي شتريد لهذا تسوي الشى بدون حتى متسأل

عفتها ورحت للمطبخ و

دخلت على ذكرى شفتها تغسل مواعين كوه وشايله يونس على خصرها على ساعه يوكع وهو اشهر عمره حتى لزمه مابيه

جريته منها فزت

ذكرى : والله فزيت محسيت بيج من دخلتي

خوله : ليش هيج شايلته

ذكرى : يبجي خطيه وحده وعندي شغل فكيت الكماط وشلته

خوله : جان انمتن على هاي لزمتج ويضل يصرخ الليل كله انطينياه انومه يمي

ذكرى : اي والله تسوين فضل بس اكمل البيدي واجي اخذه

خوله : هو الغدا مو على صالحه

ذكرى : سوته وكالت عينج عليه لحد ميستوي وصعدت وكالت اغسل المواعين الي استخدمتهم ونظفي المطبخ

خوله : وليش بله مكملت كلشي

ذكرى: تكول سما تبجي ومهند تريد تنومه هزت ايدها خوله ومعاجبها الوضع وطلعت

بدون متعلق على كلام ذكرى

ذكرى : مرت سنه واني بيت عيالي هسه احنا ب١٩٨٧ يونس عندي عمره اشهر متغير شى غير زاد التعب والكراب والشغل شغلين صمد دومه يابلشغل يانايم واذا بجه يونس تكب القيامه يعيط سكتي تعبان اريد انام اخذه واطلع من الغرفه واضل افتر بيه بلترك والمصيبه كله تراب ومواد بناء وشياش حديد وعتيك وسكراب وظلمه ماعندي مكان اسكته

ومثل كل مره افتر بيه مرضعته بس يعيط ويبجي وحايره شلون اسكته

من حيرتي احجي وياه ماما شبيك حبيبي اوف سوده بوجهي بس لو افهم شبيك رضاعه ورضعتك ونظيف ماموصخ وكماطك مضبوط شسوي ياربي من حيرتي وتعبي كمت ابجي وياه واروح واجي جان اسمع صوته صار اكثر من شهر مشايفته لان يطلع للشغل ويرجع بليل ينام حتى اكل مياكل بلبيت

نجم : شبي يونس

انداريت عليه ودموعي اتصب

نجم : انتي شبيج

ذكرى : ابجي عليه مديسكت

نجم : ههههه انطينياه

ذكرى : عفيه اخاف توكعه

نجم : جيبي ولتخافين اخذه مني وباسه وهو يصرخ حاول يسكته مسكت

نجم : اكعد امي هي تعرف شبيه

ذكرى : لا عفيه هسه عمه تعيط عليه

نجم : مكتلج كعديها اني اكعدها

اخذه وراح لعمتي واني امشي وراه فزت على عياط يونس وخوله نايمه مسافه عنها فزت ومن شافتنا رجعت غطت راسها ونامت

عمشه : دهر صابكم شبيه الفرخ

نجم : يمه اكعدي وشوفي شبيهه

عمشه : امه وينها لو مخموده ماتدري بولده

ذكرى : هياتني عمه ومديت راسي شافتني ودارت وجهه على نجم واخذت يونس منه

فكت كماطه ومدت رجلها وحطته على رجلها وكامت تطبك ايد بأيد وهو يصرخ بعلو صوته احس گلبه راح يوكف ورجل برجل حيل واني ابجي وياه واعيط دخيلج عمه انمرد الولد

عمشه : طركاعه الفتج اركدي الوليد ممتون من لزماتج الغلط

نجم : وهسه يمه نودي للجده

عمشه : چا وانه مو بعينك يايمه خلفت سته مانمتن وحيد بيكم مافكيت عظامه جا انه مثل هاي الفاهيات عبن علف ونوم ذني مو نسوان بله ازرك كلشي لا نفع ولا دفع حريمه بيهن الفروخ هاي

ذكرى : مشكوره عمه شتحجين احجي بس خلي يطيب يونس

ذكرى : جانت عيون نجم تتنقل بيني وبين امه وكل شويه يأشرلي على كيفج جنت خايفه من ايدها احسها مردته راح انجعص وره شويه كمطته حيل مو مثلي كماطي راهي وانطته الي كالت تحركي شوي بيه وطبطبي على ظهره ردت ادنك اخذه دنك ويايه نجم واخذه من ايدها ومنطانياه

وكام يروح ويجي بيه خلال كم دقيقه نام يونس مسحت دموعي بفرح جان يكولي نجم

هااج اخذي وادخلي نامي

ذكرى : رحمه الله والديكم شكراً عمه

عمشه : اريدن انام ورايه شغل طفي اللاله وياج

ذكرى : طلعت ويمشي ويايه نجم همس بهدوء روحي ارتاحي عيونج دم صارن هاي اذا كل مايبجي يونس تبجين وياه ماتضل عيون عندج

ذكرى : شسوي اخاف عليه

نجم : جر نفس بهدوء وكال انياله لان انتي امه حنينه وطيبه ادخلي نامي وعافني ورجع للهول يم عمتي ينام ضليت اباوع عليه لحد متمدد بفراشه بلكاع درت وجهي و دخلت لغرفتي شفت صمد يشخر غطيته وتمددت بصفه والكاروك من جهتي حطيت يونس بيه وبقيت اتفرج على نومته الحلوه وغفيت

بدا شغل البيت يزداد عمال وصاخه واذيه والكل شاد حزامه وساهره وصالحه يوم ينظفن وعشره لا واكع التعب براسي وبراس بدعه

كاعده اغسل الحوش واندكت الباب نزلت الدشداشه الجنت رافعتها حتى لتتوصخ وصحت منو

اني افتحي الباب

تقربت وفتحت الباب ولد غريب تفضل اخويه

انتي مرت صمد مو

ذكرى : اي منو انت

اني جاسم اخو صالحه وساهره ابن خاله رجلج

ذكرى : هاا تفضل اخويه هله بيك

طبيت ركض صحت صالحه ام مهند

طلعت تتمشى بهدوء وكالت شكوو شبيج صوتج واصل للشارع

اخوج جاسم اجه جان تكمز يااا جسوم اجه ولج ساهره تعاالي اجه ابن ابوي ونزلت تركض وذيج ساهره هم نزلت واباوع عليها يحضنن بيه ويبوسن بجتفه سحبنه من ايده وصعدو فوك تلاثتهم

عفتهم وطبيت للمطبخ

بديعه : لا هله

ذكرى : ليش

بديعه : اجه وجهه الكرطه

ذكرى : اول مره اسمعج تحجين على واحد وتكرهي

بديعه : هذا البله الثالث من هاي العائله فد واحد عوينجي ومكروه لطلعين طول ماهو موجود خلي يولي

ذكرى : شلون عوينجي

بديعه : لج عيونه مابيها ملح ولا عنده غيره يباوع ويفصل الوحده من فوك ليجوه جنت عروس وطلعت اسلم عليه غير ابن خاله رجلي شو هذا كصني كص وطول مااني كاعده يباوع يا على صدري واذا اندار تعرفين وين يباوع

ذكرى :عزه العزاه شو حسيته حباب

بديعه : والله ماكو غيرج الحبابه بعدج ممنتبهه عليه هو كل سنه يزورهم كم يوم ويروح وكمت مااطلع طول ماهو موجود

انتبهي عليه وهسه تكولين صدك كالت بديعه

ذكرى :عفيه عائله كلها سكط ولا واحد زين ذوله من يا مله

بديعه : مالهم مله اسأليني عنهم اوف منك يلساني خليني اكمل شغلي الله يبعد شرهم عنج وعنا وصيري مثلي سدي حلكج وغمضي عيونج ومالج دخل بگلشي

بقيت افكر بكلام بديعه

مشكلتها تحجي كم كلمة وتسكت متفهمني كلشي

صالحه : من طبيت جنك العيد يبعد گلب اختك

جاسم : امي تسلم عليكم ودزت هاي الغراض شلونه وضعجن

ساهره : بخير كلها شهر شهرين ونجي للبصره كون نخلص البناء شدعيلج خاله كون ينشلع گلبج مثل مشلعتي گلبنا

جاسم : مابيجن خير وحدتجن بس لسان شلون تقبلن حقك رجولتجن يضل عند عمشه

صالحه : هي تنكدر وهذا عبيد حشيت براسه لمن مليت ومافاد

ساهره : واني جوحي ضلت يكرمط بروحه وراد بكل طريقه يحصل فلس منها ماكو واك راحت اشترت مواد البناء بنفسها وساحلتهم وياها وماتقبل تنطي فلس لواحد منهم كله بيدها

جاسم : لان ولدها مو زلم حوك اخذ الفلوس غصب عنها شنهي مره تتحكم بيه حتى وان امي

صالحه : اسكت طحنا وعجنا روحنا ومفاد گلي شكد باقي هنا

جاسم : جم يوم وارجع اگلجن وينها

صالحه : منو

ساهره : ام خشم اليابس اكو غيرها جابت اخوج واجه عليها عبالج جاي علينا شوفي من دخل وعيونه مثل المطيرجيه ادور عليها

صالحه : شحاب منها الزركه امده حظك

جاسم : شبيجن وياها

ساهره : وحده خايسه وجامده وشايفه روحها شوفه بت عمشه ام العتيك لو اهلها افنديه جان شسوت بطرك المعهد وخابصتنا بيه تكول دكتوره مايعجبها العجب

جاسم : گلبي يرف عليها جنت انتظرها تكمل ومصدكت اخذت شهادتها حتى اخطبها

ساهره : لطمت على صدرها تتزوجها

جاسم : لا اخذها اتفرج عليها

صالحه : يلوك لام شلوك وامي شكالت

جاسم : مااعترضت وكالت بلي يعجبك

ساهره : اني ماراضيه ياخويه هاي تشلع گلبك وتدلل عليك شايفه نفسها احسن منك ومنا گلنا

صالحه : شيلها من راسك وازوجك اغاتها والله

جاسم : مااجيت حتى تلعبن بعقلي اني لو خوله لو مااريد مره اذا تحبن اخيجن خلنها تصير مريتي واني اربيها من جديد وداعتجن

صالحه : وان ساكتك وصرت جوه ابطها شون

جاسم : خسه مو جاسم الي تسوكه مره اني اجيت واريد خياتي عون الي انتن مو تردن تكسرن خشمها

ساهره : يوم عيد اطش جكليت بلحضره كون ينكسر راسها وخشمها واشوفها ذليله

جاسم : عوفنها يمي تصير بيتي ومرتي وتشوفن اليرضي گلبجن هاا شكلتن

صالحه : مانكسر بگلبك ولو ماتستاهلك بس نسكت لاجل عيونك

جاسم : واذا مقبلت بيه

ساهره : شحدها خلي متقبل واني الها

جاسم : عفيه بخياتي هيج اريدجن

خوله : كاعده احوك تعلمت شويه من امل اخربط وافتح وارجع اضبط مره تجي بيدي ومره لا سمعت صوت بره ومطلعت رجلي خدرانه من كعدت الكاع ومابيه اكوم اشوف منو وراها صار هدوء مهتميت وبعد ساعه واني مندمجه بلحياكه جان يدخل جاسم عليه

شلونج خوله

خوله : جفلت من مكاني وعدلت دشداشتي الجانت صاعده شويه من رجلي

انت غير تكح ادك باب يله اطب

جاسم : قابل اني غريب

خوله : لعد ابو البيت اكيد غريب

تقرب وكعد بصفي كمت من مكاني جان يجرني من ايدي

خزرته بقوه وكتله هد ايدي

جاسم : جاي عليج من البصره لبغداد وهذا استقبالج اليه

خوله : نفضت ايدي حيل منه وكتله وشتريد يمه اخذك بالاحضان

جاسم : اكعدي عندي حجي وياج

خوله : ماكو حجي بينا واخوتي ماكو المفروض لو تطلع من البيت لحد ميجون لو تصعد بغرفة وحده من خواتك وتنتظرهم متفتر هيج بلبيت وبيه بس نسوان

جاسم : اكعدي خوله ولدوخيني وياج اسمعيني وراها وين مترحين روحي واذا تردي اطلع لحد ميجون اخوتج اني حاظر

خوله : مااكعد ابقى واكفه احجي وبسرعه خلصني ليجي نجم ويشوفنا وحدنا وتصير هوسه

جاسم : ياريت يجي اقلها يصير الحجي كدامه

خوله : احجي وفضني

جاسم : اني رايدج مره اليه اذا قبلتي اليوم اخطبج من اخوتج

خوله : انت من كل عقلك

جاسم : وليش شبيهه

خوله : انت وين واني وين مو كتلك ابتعد عني

جان اطب صالحه مبين جانت تتسمع لكلامنا

صالحه : خلي رجلج بلكاع يمه بت صدام حسين

خوله : كون يسمعوج الانضباطيه وياخذوج ويخلصوني منج

جاسم : اطلعي صالحه خلي احجي وياها ولتدخلين

صالحه : لك عوفها الي هاي وحده عينها صلفه متجي بلعيني واغاتي شايفه روحها فد شوفه بت ام العتيك

وكفت خوله متخوصره وبصوت عالي كالت

خوله : ام العتيك التحجين عليها سويتي سحوره حتى بس تعيشين بيتها وتاخذين ابنها انتي واختج الثانيه كتلتن نفسجن على عيشتها وتالي تعيريني بيها وهي تسوه راسج وراس امج

جان تهجم على خوله ولزمت شعرها ودك ضرب على وجهه وخوله مسكتت ترد الضربه بضربه والعياط قوي اجت ساهره وبديعه وذكرى يتراكضن وجاسم يحاول يفاكك بينهن

كوه جر وحده من الثانيه وساهره لزمت صالحه وذكرى وبدعه لزمن خوله

وجاسم بنصهن

جاسم : كافي استحن موعيب واني واكف

خوله : والله وزين تحجي عن العيب لكم انتم ناس العيب اخر شى تعرفوه

صالحه : هديني عليها اليوم انعل شيب الخلفها

خوله :مو ابوج ميت لتخليني اسبج واسبه جان يعيط جاسم بيهن اثنينهن

كااااافي طايحات الحظ هاي البقت وحده تسب الثانيه خلي اسمع صوت بيجن والله اركع راسها بلحايط

خوله : يله ابن ابوك والزم شعره مني حتى ترجع للبصره على عربانه واخواتك بيدك مطلكات مو تايهه الك اني

صالحه : خلي يجي عبيد اذا ماخليته يشمرج من السطح واندمج شلون تمدين ايدج عليه ساقطه

خوله : هههههه يله سويها وكوليله

وشوفي شسوي اله اكله ادخل اخوها عليه ويريد يتحارش بيه وتعرفين نجم شكد يحب اخوج لا اسويها دم وروح ابويه وكله ولا نجم يصير عصبي وعمشه تشوفه يتضارب لا تنومج انتي ورجلج بلشارع عود خلي يفيدج اخويه الجبير

ذكرى : لزمت حلك خوله اريدها بس تسكت اول مره اشوفها هيج شرسه وعصبيه دوم متعلمه عليها ساكته وهادئه

جاسم : اطلعو كلكم بره وعوفولي خوله

صالحه : انت شبيك صدك تحجي دتشوفها شلون تهين بختك وانت بعدك رايدها

عاط بصوت خشن وعالي بخواتي وكال اطلعن بره

ذكرى : طلعنا كلنا وخوله ضلت واكفه والشعر منكوش وتعدل بيه وصالحه وساهره الي يكلهن هلو يذبحنه وجهه صالحه مخرمش وشعرها مكطع اني وبديعه اثنينا دخلنا بهدوء بغرفتي وننتظر شيصير

خوله : واكفه وعيونها تطلع شرار وجهه دم من راشديات وتحاول تفتح ضفيرتها حتى ترجع تضفرها من جديد تقرب منها جاسم ابتعدت

جاسم : اني مكتلج شى حتى تسوين هاي العركه كلها اني ردتج على سنه الله ورسوله شنو هذا اللسان الطويل متستحين واكف گبالج ولسانج رشاش

خوله : اسمع جاسم هاي ثالث مره تكولها اليه وكتلك قبل دربي غير دربك وكتلي انتهى الموضوع وبعد مااوصل يمج واليوم رجعت فتحته وتكول اخطبج

جاسم : وليش مترديني

خوله : لان انت واحد ملعب ومتكعد راحه وعينك فارغه وفوك كل هذا اني اريد واحد يفهمني عقله مثل عقلي مو حاير بس بطنه وبسوالف المكسره

جاسم : لج ليش هيج ماخذه نظره محلوه عليه

خوله : تره اني بت خالتك مو وحده من الشارع وجاي تقشمر عليها وتسوي نفسك روميو وكلك حسنات حتى تتزوجها كلي شنو الزين بيك

شرب وتشرب كفران وتكفر نسوان وادور وفوك كل هذا لسانك زفر وماعندك جبير صغير لتسوي نفسك افندي وتمشيهن براسي

جاسم : اتوب من الشرب ومن ازوجج ابطل كل النسوان وشتردين وياج من ايدج هاي لايدج هاي بس اقبلي اني احبج خوله وحبج معشش براسي اتغير لخاطرج وافقي وجربي

خوله : ابو طبع مايتغير وهذا انت من سنين وكلنا ندري دربك اعوج ويوم تشتغل وعشره كاعد واي وحده راح تتزوجك امها داعيه عليها

جاسم : هاي السوالف مداخله عقلي والحجج مالتج مااشتريهن بدينار اخاف ترديلج ابو شهاده

خوله : وليش مااريد شنو ناقصني تعبانه على نفسي وعندي شهاده محاسبه وانت سادس ابتدائي ممخلص

جاسم : لتنفخين ريشج بت عمشه ابو الشهاده يدور ناس مثله مو وحده اهلها ٢٤ ساعه ايدهم بلزبايل والخرابات والعتيك والسكراب وامها تفتر بعربانه يجرها حمار تبيع فضالات الوادم

خوله : سبحان الله نفس طبع اختك اثنينكم تعيروني بأهلي وانتم تتمنون عيشتهم

اسمع جاسم لو تصب روحك ذهب مااصيرلك مره واذا فتحت الموضوع بعد اسويلك مشكله شكبرها واحرم بغداد كلها عليك

جاسم : تهدديني يبت عمشه

خوله : اي تهددك بت ام العتيك بطل مني يااخي مااريدك هي كوه

جر ايدها ولواها وكال بصوت تهديد اي كوه ولو الي لو متصيرين لغيري ودفعها حيل وطلع

خوله : اااخ وتفرك بيدها كون انكسرت ايدك صاير رجال براسي ابو العرك

صالحه : وكفت على حيلها من شافت اخوها هاااا بشر بست ايدها مو

جاسم : مو جانت اذنج يمنا ليش تسوين روحج كلشي مسمعتي

ساهره : تعالو فوك لنحجي هنا

صعدو فوك وهدأ البيت

ذكرى : شو هدوء

بديعه : الله اعلم شيخططن

شوي وانفتحت الباب وطبت خوله

خوله : وحده منجن تضفرلي شعرلي اتكطع من وره هاي الحقيره

ذكرى : تعالي اني امشطه الج واضفره هنديه

كعدت بلكاع وذكرى على الجربايه وبدت تفتح شعرها شوي شوي حتى ليتكطع ومشطته وبديعه تلعب بيونس وبان وعيونها على خوله

بديعه : خوله

خوله : هااا

بديعه : ديري بالج منهن لا عبالج يفوتن الصار

خوله : هنه واللابسته شيسون خلي يسون

بديعه : ميخالف هم ديري بالج

ذكرى : اجوي الولد وامهم وخوله فرشت بغرفتي بلكاع كالت مااريد اشوف احد ويسألني اريد اشوف صالحه شتكول بله

اني وبدعه جبانات ونخاف ننتظر العيطه نزل جاسم طبيعي ولا كأن اكو شى حتى صالحه نزلت معدله نفسها ومن شافها عبيد وعمشه وسألوها عن وجهه كالت سما بأضافيرها جان تكولها عمشه

عمشه : هااا بت ابني هيج سوت چا اضافيرها هيج طوال

صالحه : اي عمه وقرضتهن

عمشه : سلمت ايدها

صالحه : منيه

عمشه : الي بالي صبن الغدا كتلنا الجوع واندارت على جاسم الجان يسولف ويه جوحي وعبيد وكالت

زين اجيت ساعد نسيبك ولد خالتك بلبنه لو بس كرعانك شطولها ومابيها نفع

جاسم : صار خالتي

عمشه : لاتكول خالتي انشد عليه وكول عمتي عبن امك هنا وتأشر على بلاعيمها مااجرعها ولا اريد خوتها

جاسم : تآمرين ولو امي تحبج وتريد رضاج وشكد حاولت تصالحج وانت قافله

عمشه : مااريدن خوتها وانت لا تصدع راسي بغنيه تضل ساكت هنا تشتغل ويه الولد ماتكدر ولي ارجع لامك

جاسم : هذا هو عمه تآمرين اسكت مالي دخل المهم رضاتج

طب نجم شاف جاسم سلم من وره خشمه واجه للمطبخ

جنا كلنا نحظر الاكل ونصب اخذت صالحه الجرايد تفرشهن حتى نشيل المواعين وساهره وياها بيدها الخبز والخضورات واني اصب التمن وبدعه بصفي تصب المرك (مرق) جان يكول

اكلن هنا مااريد اطلعن

انداريت عليه وكتله هو اني وبدعه ناكل هنا

نجم : وخوله هم وياجن وينها ماشفتها

ذكرى : بغرفتي نايمه

نجم : ولطلعن تفترن بلبيت تكملن شغلجن وكل وحده لغرفتها وخوله نومنها يمجن

ذكرى : راح تبقى يمي منا لحد ميرجع صمد من العسكريه

نجم : زين

عافنا وطلع

بديعه : شفتي مو كتلج حتى نجم يعرف جاسم

ذكرى : شو شفت فلاح مامهتم

بديعه : كلهم يحبون جاسم حتى رجلج اله نجم يموت منه بس يبلع جيته لان بلسنه يجي كم يوم ويروح منشوف جهرته

ذكرى : الله يعدي هاي الايام على خير

صرت حبيسه الغرفه حتى شغل نجم ميخليني اشتغل اله جاسم ماكو جنت اشوف حرصه عليه وعلى بدعه وخوله وهذا الشى خلاني اشوف شكد هو شهم وخلوق ويخاف على عرضه ومافرق بيني وبين خوله حتى على بدعه يحاسب ميقبل تطلع

اما خوله بقت متحجي لا ويه ساهره ولا ويه صالحه وعمشه ساكته جنها تعرف شى والله عمتي حتى وهيه ما موجوده احسها تعرف كلشي بلبيت

مر اسبوعين وخوله بغرفتي ويايه جانت هادئه وصوتها ميطلع لو تلعب ويه يونس وبان لو تحوك متتقرب ابد من مرتضى ابن ساهره ولا جهال صالحه رغم هم ولد اخوتها بس ابد متتقرب منهم

تمنيت عندي اخ ثاني ازوجها اله اخويه فوزي متزوج وعنده ولد وبنيه بس مرته زعلانه صارلها ٣ اشهر وامي كالت قرر يرجعها لخاطر ابنه مهدي لان حيل متعلق بيه وهو صار بلمدرسه وميقبل يداوم اله ابوه يوصله تمنيت اروح لاهلي وابات يمهم ولو يوم واحد صمد ميقبل اطلع طول ماهو ماكو وحتى من موجود لازم ساعتين او ٣ ساعات اقصى حد وارجع

طلبت من عمتي اروح اشوفهم واسلم على مرت اخويه وارجع

ورحت واول مدخلت احس حتى الهوا بيت اهلي يختلف استقبلني فوزي من الباب يحضن بيه ويبوس براسي اخذ يونس مني وباسه وبقى شايله

فوزي : هيج تعوفين اهلج كل هاي الفتره لو ما بفرع واحد يصير هيج والله كلت منا للجمعه اذا مااجيتي لا ازعل منج وحتى تحلمين بعد تشوفيني لج انتي ليش كطعيه ومايوكف بعينج صله الرحم

ذكرى : على كيفك ويايه على عيني مو تعرف بصمد وسوالفه

فوزي : انتي منطيته عين شنو اهلي بنفس الفرع مااروح الهم احجي وياه تعاركي ميصير مقلله من نفسج هيج

ام ذكرى: على كيفك ابني غير رجلها شنو تتعارك وياه

فوزي : كله من وراج وره ابويه رجلج ورجلج لحد مخليتو البنيه تخاف من خيالها وحتى متحاجي شيسوي بيها تسكت ذنبها بركبتكم

ذكرى : فدوة لتتعصب اجيت اشوفك واشوف مرتك مشتاقه الها وينها

فوزي : هسه تنزل

ذكرى : نزلت زوجته وباستني ورحبت بيه رغم علاقتي مو حيل قويه بيها شفت مهدي كبران ولازم اخته حوراء بسته وانطيته يشتري حلاوه رجعته

مهدي : مااريد عمه

ذكرى : ليش حبيبي

مهدي : عيب اخذ من بنيه

ذكرى : ههههههه لك منين جايب هاي السوالف ليش عيب

مهدي : اني رجال وانتي بنيه اني انطيج واني ماعندي بابا انطيني فلوس انطي لعمه

ذكرى : ههههههه سحبته وحضنته منو معلمه هيج

فوزي : من خواله سوالفه مال كبار ومن هسه دمه حامي خبلني

ذكرى : يمه قربانه للرجال

مهدي : بابا خلي اشيله

ذكرى : خاف يوكعه عفيه

فوزي: لتخافين ميوكعه

عيني على يونس اخاف يوكع حيل اخاف عليه بس مردت اكسر بكعدتنا ومهدي حطه بحضنه ويبوس بيه

فوزي : ابقي تعشي يمنا

ذكرى : لا مااكدر كولي روحي مبقى شى للمغرب

ام ذكرى : شفنا منج يابنتي حتى ابوج بعده مجاي مشتاق يشوفج يوميه يسأل ماجتي روحي الها

ذكرى : اجي غير مره ماما ورايه شغل هوايه

طلعت جان يحط بيدي فوزي فلوس وامي

هااي شنو

فوزي : مصرف الج

ذكرى : والله عندي

فوزي : بهاي ملابسج التعبانه من اتزوجتي ماشفتج لبستي شى بيه خير هاج اشتري الج ولابنج

ذكرى : عفيه مااريد صمد اذا عرف يتعارك ويايه

ام ذكرى : ضميهن

ذكرى : يدور بكل مكان مااريد مشكله

ام ذكرى : جيبهن يمه اني اروح للسوك واشتري الج ولابنج واريد اشوف شلون يفتح حلكه

ذكرى : طلعت من اهلي وايدي على گلبي اخاف من صمد دوم يكول اياج تاخذين شى من اهلج

رجعت للبيت لحياتي الاعتياديه وضيم العيال ومشاكلهم وهوسه الجهال المتخلص

ثاني يوم راح جاسم وخلصنه منه مرت الايام هادئه وبدينا نوعاً ما ننسى الصار اله بدعه تمشي وتصيح الله يستر خبلتنا

وره يومين اجه صمد وكالمعتاد بارد بس يتقرب مني ويعوفني حتى من احاول افتح مواضيع واسولف يكولي هاي سوالف النسوان مالي دخل بيها احب احجيله كلشي لان مااحجي لبشر ومااكدر اكول لامي لهذا اريد شخص اسولف اله وهو يصدني دائماً بحجه تعبان او نعسان او مالي خلك تعلمت السكوت دوم وياه حتى لا اضوجه

وره اسبوع جمعتنا عمشه البيت شبهه كمل طكو الحايط الفاصل وكبر البيت صار ٤ غرف فوك غرفه صالحه وساهره انطكت وحده على الثانيه وصارت وحده جبيره اكبر غرفه بلبيت اخذتها صالحه وبنو ٣ غرف جدد صار فوك ٤ واثنين جوه وصاله جبيره ومكان الحديقه بنت عمشه غرفه للعتيك والسكراب تجمع بيه صحيح البيت بس بياض بدون صبغ والكاع صبه مو كاشي بس على الاقل نفه وجبير والغرف اكبر

كالت بمرور الايام من يصير فلوس عدها تصبغ البيت واطبك كاشي وتحط محجر للدرج

جمعتنا كلنا وكالت من باجر كل وحده تشيل غراضها وترتب غرفتها

وسحبت استكان الجاي وتباوع علينا مجموعين اسمعن كل وحده ياتنطي حاجه ذهب منها لا فلوس

صالحه : ليش عمه شكوو

عمشه : وشكاكه هذا الموجود چا انه اتعب واصرف وتكعدن بغرف يسرح بيها الخيل وماتشاركن

ساهره : غير حصة رجولتنا بلكاع

عمشه : من تصير حصه غنيه عود حاججيني

لا تتفاصلن ويايه كل وحده ياتذب قطعة ذهب يافلوس القطعه اريدن اشتري كرويت جديد وفراش

جوحي : يمه منيلنا

عمشه : من الدافنهن يايمه طلعهن چا المن يضلن

جوحي : ماعندي وداعتج

عمشه : لا تحلف براس امك جذب لا اكومن اطيح صبخك تكول ماعندك مريتك عدها وينجن سهيره انطيني ترجيتج رجلج ماعنده

ساهره : هو اني كوه اشتريتها

عمشه : هااا هيج صارت تضلون گلكم هنا ولا وحده بيجن تصعد فوك

صالحه :يعني لو نطي لو ماكو غرف هو هذا هم حق

بديعه : هااج عمه وانطت فلوس القطعه وحطتها بحضن عمتها واخذت بتها وطلعت بدون حتى متجادل

عمشه : ربي انه شمسويه بدنياي ومانطيتني فد اربعه من بدعه چا بس وحيده انت كريم سويهن تلاثه وزيد كرمك عليه چا هي لو بدعه لو بنات غنيه وغمت كصتها همدا حضج يعمشه

ذكرى : شفت راح تصير هوسه تقربت من صمد وكتله انطي لعمتي حتى لتضوج

صمد : منيلي ماعندي انطيها محبسج

ذكرى : باوعت على ايدي بيها الحلقه والمحبس كلش احبهن باوعت على صمد وبهمس كتله والله احبه هذا المحبس ماعندك منا منا

صمد : كتلج ماعندي وصار صوته عالي سمعو كلهم فشلت وتقربت من عمتي ذبيت المحبس بحضنها وطلعت

خوله : بقن خوات ابليس

صالحه : هاي عليمن ولج

خوله : مو وياج احد وجهلج كلام بسرعه من يمج كمزتي

نجم : كافي شبيجن مو كاعدين

عبيد : صالحه اسكتي

صالحه : انطيني فلوس راحت كل وحده منهن انطت فلوس وحطنها بحضن عمشه وكالت صالحه

صالحه : ونجم ماينطي لو گلشي يطبك علينا وعلى نجم لا

عمشه : شلج دخل انتي داقج نجم ماخذ منج عايش بيت ابيج اخذها عبيد لمرتك لا ابيس بيها

ساهره : عفيه بيت مانكدر نحجي

عمشه :يمه خوله استكان جاي ثاني راسي يوجعني ودارت وجها ومجاوبتهن وهنه

صعدن بغرفهن وكل واحد منهم لحك مرته وبقى نجم وخوله وامه

نجم : يمه ماله داعي تسوين هيج وتاخذين منهن

عمشه : خلي يولن الفلوس على گلبهن يدفنن بيها وانه اطلع من صباح الله حتى اوكلهن واخوتك صايرين جلوفه يشتغلون ويضمون يمهن عبالهم مااعرف بسوالفهم

هاي الايد ربت وكبرت واعرف كل واحد بيكم

خوله : والله عاشت ايدها هيج يمه بيج مابيج بلذات صالحه وساهره طيحي حظهن

نجم : لتسوين مشاكل خوله

خوله : هو انتم سامعيلي صوت اكوم اسوي جاي

ذكرى : طبيت للغرفه مخنوكه واعدل بملابسنا واشيل وافرغ الكناتير حتى يفتحون الغرفه وينصبوها فوك وترجع هاي الغرفه لعمشه وخوله

ضليت اشتغل ودمعتي بعيني كلت لو ماخذه الفلوس من فوزي مجان انطيتهن لعمتي وبقيت المحبس بيدي

تندمت لان مااخذت

صمد كل الي سواه تعشى ولف راسه ونام حتى مكال محتاجه شى اساعدج ابد نومت يونس واشتغلت للوحده بليل دكني الجوع وطلعت اسوي كرصه خبز بيها جبن وجاي اسد بيها جوعي

طلعت ولكيت نجم كاعد وبيده كوب مال جاي وقلم ودفتر ويكتب ورافع رجله

مشيت ناحيه المطبخ ولكيت الجاي حامي صبيت وطلعت من جدر الخبز نص كرصه وجبنايه واكلت

دخلت عليه وكاال هاااج

باوعت محبسي

هاي شنو

نجم : ارجعي البسي

ذكرى : اني انطيته لعمتي

نجم : واني اخذته منها ماارضى تنزعي

ذكرى : مااخذه اسفة حالي من حالهن

نجم : ومنو كال انتي مو حالج من حالهن كلهن انطن فلوس وانتي هم رجعتي المحبس وانطيتي فلوس

ذكرى : بس اني منطيت شى

نجم : هااج اخذي وبله وجع گلب

ذكرى : مااخذه نجم

نجم : حيييل اسمه صار اشهر مسامعه منج

ذكرى : من رخصتك حطيت اللفه الي اكلت بس ربعه والجاي على السنك وردت ارجع لغرفتي جان يكول

نجم : اخذي من اخ لاخته لو فوزي متاخذين منه

ذكرى : ذاك اخوي

نجم : واني اخوج اخذي ولتكسرين بخاطري كلت لامي صمد انطاني الفلوس لان استحى يطلع كدام اخوتي ويريد محبس مرته واخذته اعتبري هديه ولادتج ولو متأخره ويونس مبقى شى ويمشي ههههه

ذكرى : دمعت عيني على طيبته وحنيته وكتله خلي الك يجي يوم وتهدي لزوجتك

نجم : واختي اهم من زوجتي هاج وكافي تردين ايدي عيب ابقى اكبر منج وبحكم اخوج

ذكرى : اخذت المحبس ولبست وكتله ونعم الاخ ان شاء الله بس يصير عندي فلوس ارجعهن الك

نجم : روحي نامي خيتي ولتفكرين

ذكرى : طلعت من المطبخ ابتسم وفرحانه لان رجعلي المحبس

يمكن الحياه الصعبه الي عايشتها خلت ابسط شى يصيرلي يفرحني

ورجعت مرتاحه والضوجه راحت وثاني يوم سويت اكل لصمد شافه بيدي وسألني كتله عمتي رجعته الي نجم انطاها وكالت من يصير عندج رجعي لفلوس لنجم

صمد : المن مرجعه قليل فلوس نجم شو جيب امي والصندقجه مالتها كلها تحت امره خلي يولي شوكت ميسألج او تسألج امي على فلوسه كولي ماعندي

واذا لحو انطيهم المحبس

ذكرى : ماشي باوعت عليه وتنهدت ماعندي غير اسكت وافوض امري لله بقسمتي العوجه

مر اسبوع وانتقلنا كل واحد بغرفته جان اسبوع دمار بمعنى الكلمة كلها تركض منا ومنا كل واحد يشتغل ويريد يكمل غرفته ويرتاح وبعد عناء كملنا واستقرينا وصار يومين انام بغرفنا رغم بساطتها بس مريحه

وبليله نايمين وسمعنا عيطه طلعنا كلنا نركض ونتسابق حتى نعرف منو يعيط جان العيطه تكول مال وحده محروكه

نزلنا كلنا ونشوف خوله تصرخ بعالي صوتها وتملخ بشعرها تريد تطلع بلشارع وامها كوه لازمتها واتسمي عليها وتنفخ وكل متسمع تكول نار واتذب بانزين عليها

عووووووووفوني مااريدكم وتملخ بوجها حضنها نجم وصمد يردون بس يسيطرون عليها لزمت دشداشتها وشكتها عليها ركضنا نغطي بيها جنها مو خوله قوه رجال بهيئه مره

انگلب البيت كله انداريت اجيب فدشى اغطيها بيه لكيت بدعه طاكه من البجي وصالحه وساهره ساكتات يباوعن گلبي لعب منهن بس مو وكت اركز وياهن ركضت جبت دشداشه لكيت كنتورها مفتوح وبيه ريحه تلعب النفس لا هي مجاري لا حيوان ميت ردت اتقيأ خفت الزم شى مدري ليش ترددت ركضت فوك وجبت دشداشه مني ونزلت لكيت اخوتها لازميها من ايدها ورجلها يتقاوون وياها وهي تكفر وتعيط وتسب فاقده تماماً والعيون دم من الحمار والشعر مكطع

وعمشه فتحت الفوطه وتبجي وادك على صدرها

وكعت من طولها لا ايد ولا رجل شالها نجم وحطها على الكرويته وذبو مي عليها واني كمت ابجي على حالها شصار بيها وليش هيج صارت مجرد ما قرت عمشه ايه الكرسي عليها واكفه فوك راسها وتقرا واتذب مي جان تطفر من مكانها ضربت امها ودفعتها وكعت بلكاع عمتي وهجت خوله بلشارع مثل المخبله والولد ركضو وراها وتعيط بعلو صوتها وخروهم منيييييييي وتشكك بدشداشتها

يتبع ....

#الابواب_الخمس

البارت الرابع

للكاتبه Reem

باچر تگضي واتذكر

مواقفكم

واجي والگه الفشل

كل حيلة تارسكم !

باچر روسکم

بالملگه ماتنشال

تدنگ والحچي

الينگال يوجعكم '

هجت خوله بلشارع مثل المخبله والولد ركضو وراها وتعيط بعلو صوتها وخروهم منيييييييي وتشكك بدشداشتها طلعنا وكفنا بلباب نرجف خايفين ومستغربين شصار بلبنيه وهيج وصل حالها وعمشه تلطم وفاكه الفوطه لزموها لخوله وتعيط بعلو صوتها : ولكممممم عوووفووي كواويد راح يأذوني عوووفوني

فلاح سد  حلكها وجوحي وعبيد شالوها واحد من ايدها والثاني من رجلها  ونجم وصمد يمشون وراهم وعيونهم على بيبان الناس اخاف احد طلع اكو كم باب انفتحت بس أشر نجم ندخل وكلنا دخلنا قبل ليشوفون حالنا وبقت عمشه بلباب لحد مطبو وشمروها بلصاله وهي تروح وتجي مثل المخبله

خوله : اكلكم عوفوني راح يأذوني شوف شوف اجه راح يخرمشني هاااك ذاك راح يعضني وتملخ بشعرها

عمشه : سوده بوجهي وجهه الخلفني بنيتي تسودنت يمه خوله حبيبه عاينيني (باوعي عليه) شجرالج

نجم : فاقده يمه متشوفيها

صالحه : احبسوها بلغرفه لحد متسكت فضحتنا

نجم : غير نفهم شبيهه

صالحه : هاي شبيك تعيط عليه شكلت اني شوفها جنها ثور شايش علينا

ذكرى : تقربت منها ردت ابدل ملابسها لزمتني من ركبتي وبدت تخنكني واضافيرها تنبت بيه الكل كاام يعيط ويجرون بيدها وكل ميجرون هي تزيد بلخنك مجنت احسها ايد بنيه والله احسها ايد رجال

اختنكت حيل والولد يحاولون يجروها مني لحد ما ضربها نجم راشديات وصمد يجر بيها من شعرها وفلاح يريد يفك ايدها ولا تكول بنيه عمرها ٢٢ سنه منين اجتها هاي القوه لحد ما كوه وخروها مني

وكعت بلكاع اكحح وهوا ماكو متحملت وركضت للحمام وبديت اتقيأ حيل أذتني

بديعه : على كيفكم وياها وتبجي وتباوع عليها

تمددت بلكاع خوله وحاوطت رجلها وتون بصوت عالي والكل داير مدايرها

عمشه : لا انه ماضل اشوفن بنتي هيج باجر من صباحيات الله اخذها لزم اعرف علتها

ساهره : هي شجاها ياعمه موجنتو نايمين

عمشه : عمت عيني عليهه عيوني توها تغمض وهي صرخت اريدن اكوم اندل دربي ماكو ربكم الكهرباء موجوده وفتحت الضوا واشوفن البنت تضرب بوجهه وملابسها مطشره شجرالها وشحصل ربج اليعرف

نجم : دنك على خوله يحاول يحجي وياها خوله تسمعيني احجي شبيج منو وياج شنو الكعد تشوفي

بس الونين بصوت مخنوك وتحرك بجسمها وهي بلكاع مثل الواحد الي يتلوى من الالم

ناخذها مستشفى

فلاح : شكلها مو مال مستشفى

جوحي : وين ناخذها غير تخزينا هاي اذا ماتخزينا صوتها سمع الجيران كله

ساهره : غير تلزموها زين انتم مدري شبيكم من شفتوها مو طبيعيه اشدها واشمرها بلغرفه

عمشه : هااي خوش بنات غنيه كل وحده بيجن تريد تربطها تكولن طلي وتردن تذبحنه امشن ولن لغرفجن مااشوف وحده بيجن

صالحه : شمسويات ياعمه دنشوف شبيهه البنيه واخاف تحتاجون مساعده

عمشه : جفني شرجن وجان تخزرهن وكالت ياويلجن عبن البالي صحيح اطين عيشتجن والخلق السموات بلايه عامود

صالحه : هو اكيد كل شى يصير لازم اني واختي الصوج

عبيد : مو وكتها صالحه اصعدي واخذي اختج

عمشه : هين يبنت غنيه من توگع على علّته تبين ملته

وانه اعرفن ملتجن زين ماضل شى للصبح وكلشي يبين يله يمه نجم شيل اخيتك ودخلها لغرفتي وانت صمد شوف مريتك اخاف طاحت مالها حس وانشدها ليه

وانتم يزلام ظهري كلمن لمريته وانه اعرف اختكم شجرالها

واحد يباوع بوجهه الثاني وخوله بلكاع على نومتها ونينها اشرت صالحه لرجلها اخذته وصعدت ولحكتها ساهره وجوحي وبقى فلاح صافن على اخته بلكاع وصمد باوع على امه وكال

صمد : رايح يمه اشوفلج ذكرى

ذكرى : كعدت بلكاع من الخنكه والتعب غسلت وجهي وباوعت على المرايه الموجوده على الحايط هي ربع مرايه مكسره ملزكه  بس احسن من ماكو شفت رگبتي دم ومخرمشه اندكت الباب

صمد : ذكرى بيج شى

ذكرى : فتحت الباب وعيوني ادمع واجر النفس بصعوبه  وكتله مابيه شى

صمد : امي تريدج

ذكرى : جايه روح گبلي

رجعت ذبيت مي مره ثانيه على وجهي وجريت نفس وطلعت حتى مامسحت وجهي من الخنكه ورگبتي تحركني موت

اسحل بروحي وكفت يم عمتي وكلت

هاا عمه

عمشه : اريدج ويايه نبدل للبت انه مااريد صالحه وساهره يطخنها وبدعه فاهيه

بيج حيل لو لا

ذكرى : بيه عمه

شالها صمد ونجم لخوله ودخلوها بلغرفه جانت حتى ريحه الغرفه مطيبه

ذكرى : عمه نوديها بلهول على الكرويته

نجم : لو بغرفتي

عمشه : لا انه اريدنها جدام عيوني

ذكرى : وهاي الريحه

عمشه : لا تمدون يدكم وافتحو الشباج تتهوى الغرفه وانه باجر انظف المجان

ذكرى : انظفه اني

عمشه : لا اياج تكمشي تعاي عينيني نبدل هدمتها لخوله

طلعو الولد ونزعنا الدشداشه جانت هادئه بشكل مخيف ولا تكول القبل شويه رادت تموتني

عيونها مرفوعه ليفوك ونفسها حاار وجسمها مجمر  بقى باب الكنتور مفتوح ومره تنزل عينها على الكنتور وترجع ترفعه بحركه سريعه

عمشه : اطلعي وسدي الباب وراج

ذكرى : تبقون وحدكم

عمشه : ربج موجود انتي اصعدي لغرفتج عالجي جرحج لا يصير بيج شى وابتلي شيخلصي من اخيج ابو لسان

ذكرى : ماشي كمت من يمهم وطلعت وسديت الباب اجه نجم بأتجاهي وجان ماكو بس هو بلهول

نجم : هااا صار شى

ذكرى : ساكته الله يستر من سكوتها البنيه ابد مو طبيعيه ويخوف وضعها

نجم : باجر لازم اوديها طبيب

ذكرى : شغلتها مو طبيب مبين سالفه ثانيه

نجم : سالفه شنو

ذكرى : عمتي تعرف من رخصتك

نجم : ذكرى

ذكرى : هااا

نجم : متأذيه ويأشر على رگبتي

ذكرى : بحركه لا ارادياً حطيت ايدي عليها وكتله مابيه شى

نجم : مبينه متأذيه بس تكابرين

ذكرى : خلي البنيه تكوم بلسلامه هاي سهله وتهون اروح اشوف صمد

عفته وصعدت دخلت للغرفه لكيته نايم ولك شبسرعه نمت لخاطر ربك انيال گلبك اختك وصلت للموت وانت تنام بهاي السرعه عفته ورحت بأتجاه الشباك فتحته جان شتا والجو بارد بدايه شهر ١٢ ل١٩٨٧

كمت اجر النفس بقوه واباوع للسما وبدا صوت الاذان يعلى قريب الجامع علينا

سمعت عيطه ونزلت اركض

گبل لغرفه عمتي شفت نجم لازم خوله من ايدها وهي تعيط سكتوه على الاذان وتفكر كفران مصاير لدرجه حطيت ايدي على اذني وابجي وعمتي تصيح استغفر الله بكل علوو صوتها

بقت تعيط وتشيل نفسها وتركعها بلجربايه لحد مكمل الاذان حسيت عظامها تفلشت من كثر متكمز بكل قوتها لحد ما هدأت وكامت تبجي مثل الجاهل حضنتها عمشه وتبجي وياها

نجم : هذا اذا تبقى هيج تموت بس يطلع الصبح انزلي ذكرى بدلي الها واخذها

عمشه : يمه بنيتي عساهه بحضهه وبختها السوت بيج هيج ربي وجرت دشداشتها من جهه الصدر وكفت بلشباك وتدعي بصوت عالي ويقهر هاي يتيمه واليتيم حوبته جبيره عندك ربي هاي وحيدتي هاي التغسلني هاي اعز من اخيتي بلياها اضل بيد الجناين ذليله ربي

ذكرى : على كيفج عمه ان شاء الله سالفتها بسيطه

نجم : روحي ناميلج شويه ومن تصير بال ٨ انزلي

ذكرى : ماشي ورجعت صعدت وبس افكر بخوله وحالها

غفيت والخوف ماكلني وهاي بدعه شكلها تعرف شى باجر ولا اعوفها والله اله الهم كلشي منها

كعدت ساعه ٧ ونص الكل اليوم محد طلع للشغل ومنتظرين شناويه امهم نزلت لكيت صالحه وساهره بلمطبخ يحضرن ريوك

صباح الخير

صالحه : ليش هو احنا نمنا انيال گلبج

ذكرى : عمتي بلغرفه

ساهره : ادخليلها عيني صرنا مانعجب وبس انتي على الگلب

ذكرى : دخلت ومجاوبتها ذني مبينات فارغات ويراد الهن حيل

دكيت الباب وطبيت لكيت خوله راسها بحضن عمتي وعمتي تمسح بلفوطه مالتها ونجم ايده على خده وصافن ورغم الغرفه بارده ثلج والشباك مفتوح بس الريحه بعدها

عمشه : بدليلها اخذها هسه ماانتظر بعد

باوعت على كنتورها شون عمه اخذ من ملابسها

عمشه : لا اصعدي اي شى من ملابسج وعباتج حطيها عليها مانعرف شيصير  اخاف هم تملخ رويحتها وتشك زيجها

ذكرى : صعدت ركض وجبت ملابس مني ونزلت بدلت الها وتقربت منها بهدوء وكتلها امشط شعرج

مجاوبتني بس هزت راسها بأي

اباوع شعرها معكد دخيلك يارب شجاه من شافتني عمه حايره واحرك خصله منا وخصاه منا  جان تكولي

عمشه : ديري بالج تقرين عليها هسه تگب عليج وعلينا خليها هاديه وشيلي شعراتها شون ماجان لا تضلين تصفنين

ذكرى : بس لميته وشلته بكم ماشه ولبستها

واجه نجم لزمها وعمشه لبست فطوتها و عبايتها وطلعو

رجعت للمطبخ لكيتهن ماكو وبس بدعه حاطه ايدها على خدها وصافنه وبصفها العجين هستوه عجنته كعدت يمها وكتلها

مكافي تضمين عليه صار سنه ونص بهذا البيت كوه اجر الحجايه منج اكو شى تعرفي ليش ساكته

بديعه : ماعندي شى احجي اكوم اغطي العجين

سحبتها من ايدها وكعدتها

متأمنين بيه والله وداعت ابني مااحجي

بديعه : اكو شغلات لا تعرفيهن احسن والله لان احبج واعتبرج اختي اضمهن عليج بس تعرفيهن راح تصير حياتج مثلي ويجوز اتعس كافي الانتي بيه وحيري برجلج وابنج ولا تحطين راسج براس ذني الفوك تره ماتعرفين شكد قويات وصلفات ومالهن رداد

ذكرى : ليش متحجين على الاقل اخذ حذري منهن واعرف منو صاحبي ومنو عدوي

بديعه : انتي بس صيري بعيده عنهن والباقي يعمر

كامت وعافتني والحيره زادت عندي

بقيت للظهر كوه رضعت يونس احس دمي شايط وبالي يمهم حيل تأخرو ولا واحد سأل شصار مصار كلمن تريك وطك الدشداشه والشحاطه وطلع ولا عبالك اختهم منتهيه

ولل٣ العصر دخلو ويسحلون بخوله ركضنا اني وبدعه عليها اخذناها من ايد نجم وهو كلشي مكال بس باوع بوجهي وطلع

انداريت على عمشه

هااا عمه بشري

الزمنها ودخلنها للهول لا بلغرفه وهسه اجي

ذبت العبايه بلكاع ونزعت النعال وصعدت ليفوك اني عفت ايد خوله على بدعه وصعدت وراها كلت لازم اشوف شكوو

بديعه : وين رايحه

ذكرى : هسه اجي الزميها زين وصعدت ركض واسمعها حاصره ساهره وصالحه بغرفه ساهره ويعيطن

عمشه : ولجن كحاب برابيك تسون سحر لوحيدتي هي هاي الضاله عندي تردن تتخبل وتضرب بيها وهنه يحاولن يتجنبن الضربه

صالحه : عمه فدوة احنا شعلينا

عمشه : ولجن رحت لام تحسين كالت البت دايسه ومزكيه ومدفون الها بميت ومگلوب عليها رادولها شى وصار غير شى وهاي مايصيرلها جاره شغلتها صعبه اليوم اذا ماتفكن سحورتجن عنها وحك ابو فاضل لا وحدتجن اعلكها بلتيخه

ساهره : واحنا شعليه هاااا احنااا شنووووو ليش اني واختي بكلشي حاطتنا

عمشه : چاانه مااعرف دربجن بنات غنيه

كله مدفون على ايدي شردتن من البنيه وخبلتنها انه اشوفجن تتبسبسن اكولن خوات وبيناتهن وهذا اخيجن النذل عينه على بتي اخاف ردتن تاخذنها اله وسكيتنها

وگلب عليها گلاب احجن اليوم انعنع ضلوعجن انه من وكعت اباوع عليجن بايكات هوا وعيونجن تتراكض هنا وهنا

صالحه : عمه والله ممسوين شى

جان تلزم صالحه من شعرها ولج انتي لو غيرج ام السحوره تكذبين علي مربيتلي حيه هنا لا عبالج تبدلين جلدج علي تبقين حيه ام راسين اليوم اخلي عبيد يشمرج بشارع ماتضلين ليله هنا

جان تدفع صالحه ايد عمشه وكالت الها بعصبيه وتحرك بيدها وتحجي

هسه صرت موزينه مووو هسه صالحه مو خوش وحده من جنتي تجين يمي وتلوين راسج من شغله متعجبج وتكولين سويها الي ياصالحه مجنت حيه

من خليتيني بليله ظلمه  اروح للنجف وابات هناك كله علمود اتزوجين ابنج صمد لوحده عود والله بت ناس وعدها شهاده وتردين تكسرين خشم اهلها لان مقبلو وركضتي عليه وكلتي نهايه الاسبوع اريدها تصير مجنت حيه يعني موكف بعينج اطلع توالي الليل ارش بيبان الناس على ساعه يلكفوني حتى بس يرضون وينطوها جنه الج و تكعدين يم ام اسماعيل وام علي وام ستار تتباهين بجنتج

المتعلمه هاي صالحه مانفعتج مووو هسه صرت ام راسين

ذكرى : متحملت حجيهم ودفعت الباب اعيط ولكم انتم متخافون من الله درب السحوره دربكم اني شنو ذنبي وذنب اهلي يوكعون بيد ناس متخاف الله واني اكول اهلي شجاهم لا يحجون ولا يسألون شالوني وانطوني وهمه مغمضين

عمشه : انتي شلون تسمعين علينا ماتستحين امشي انزلي جوه لا اكسر راسج

ذكرى : هو اني الما استحي لو انتم الله لايوفقكم دنيا واخره كسرتو بختي وضيعتو مستقبلي لان منطيناكم مره هيج تسوون متخافون من الله هاااج هاي بتج شوفي حالها من وره سحورتج وسحوره ذني المسمومات ربج ذوقج نفس السويتي بأهلي ولو مااحب اتشمت بخوله لان مالها ذنب الله وكعها بعائله ذره من الرحمه ماعدها

صالحه : باع هااي هم شايفه نفسج فد شوفه امشي روحي لغرفتج واكسري الشر احسن مااشوفج وجهي الثاني

ذكرى : شأشوف بعد اكثر من هيج والله ماابقى بهذا البيت ساعه وحده

طلعت وركعت الباب وسمعت عياطهن ديتمالخن وصعدت بدعه وصارت بوجهي واني ابجي كتلها تدري موو

بديعه : شأدري

ذكرى :امسويات سحر لاهلي حتى اتزوج صمد

بديعه : تعاالي

ذكرى : عوفيني اروح اجيب يونس ماضل دقيقه هنا

سحبتني من ايدي حيل لغرفتها وكعدتني

ذكرى : شتردين مني كتلج اريد اروح لاهلي اذا اضل هنا اتخبل لازم اهلي يعرفون كلشي

بديعه : وين رايحه يمعزايه انتي عبالج يعيفنج والكعبه لو بأخر الدنيا يجيبنج سحل استري على روحج شفتي خوله شسون بيها لان رفضت اخوهن لو ما كلشي على ايدج خلن البنيه حتى عقل ما ضل بيها

ذكرى : شنو تايهه الهن ابويه واخويه موجودين والله يطيحون حظهم يهجمون هذا البيت على روسهم

بديعه : مايفيد ياخيتي ذني ياريت درب العركات درب المشاكل جان سهله هسه اگلج روحي لاهلج واگلبي عاليها سافلها ذني دربهن درب الشيطان ولا انتي ولا اهلج مثل دربهم

ذكرى : يعني ترديني اسكت من كل عقلج

بديعه : اني من كل عقلي اذا مو لاجلج لاجل اهلج والله يزركوكم سحر يخلون ابوج وامج ساكنين المستشفيات

ذكرى : انتي شبيج جبانه ودوم ترجفين منهن والله اشتكي عند المختار والحزب والشرطه اخليهم يسحلوهن

بديعه : وشتكولين مسويات سحر لاهلي حتى اتزوج ابنهم شنو دليلج راح تصيرين مضحكه الهم

هاي اذا مشتكو عليكم وذبو ابوج واخوج بلسجن

ذكرى : يعني هيج اسكت واضيع حقي مستحيييييل اني مااصير قطعه ثانيه مثلج اني مو جبانه مثلج

بديعه : اشكرج خلف الله عليج

ذكرى : انتبهت شحجيت ولزمت ايدها وكتلها اعذريني متعرفين النار البيه والقران كاعده بصفج واريد احرك البيت والي بيه من القهر متعرفين اني شعايشه من وراهن ويومي شلون يخلص بلقهر والضيم والكراب ذني دمرن مستقبلي وحكمن عليه اعيش العمر كله ويه واحد مااحبه ولا يحس بيه ولامعتبرني زوجته وشريكة حياته حاطني للنومه والكراب وبس

بديعه : عاذرتج وحاسه بيج ومزعلانه منج راح اكلج شى اسمعيني واحكمي

وانتم هم اسمعوني

اني بديعه توليد بغداد ١٩٦٩ ثالث جنه لبيت عمشه واصغرهن

انولدت واني مااعرف شنو البيت شنو سكف وحايط البيت فتحت عيني وشبيت واهلي عايشين بمدرسه كل كم سنه نبدل مدرسه ابويه حارس ونعيش بصفين واحد نسوي كعده ومنام واحد مطبخ ابويه يحرس المدرسه وامي الفراشه واخوتي تلاثه يساعدون ابويه بكلشي واي شى مكسور يصلحوه وعايشين على الاكراميات

والراتب البسيط اليطلع لابويه وبدايه حرب ايران اخوتي اثنين استدعوهم للحرب عمرهم انطلب وهمه مو طلاب سحبوهم للتجنيد ماطول كم شهر اجه الجبير ملفوف بعلم استشهد وهو ابن ٢٢ سنه وبعدها بشهر اجه الثاني نص لشه حتى مو كامله وهم ملفوف بعلم وهو ابن ٢٠ سنه وهنا انكسر ابويه ولده اثنينهم راحو برمشت عين تمرض وامي انجلطت من القهر كمت انزل اني انظف بمكانها بلمدرسه

اخر مدرسه جنا بيها متوسطه للبنات  واني طالبه بيها كامن البنات يعاملني بأحتقار يذبن الكاغد والجيس وبرد الاقلام والمساحات الخربانه بلكاع ويصيحني تعالي شيليها كمت اشيل وانطف من جوه رجلهن ودوم يتقصدن يذلني وميصيحن بأسمي ابد كله بت الحارس لو بت الفراشه تعالي نظفي هنا وانزل انظف حتى جوه احذيتهن شفت انواع المذله حتى بقايا الاكل يذبنه ويكولن تاكلي لو نذبه واشوف بعيونهن التفاخر بحياتهن

واني حساسه جنت اختل بلحمامات بس ابجي وانقهر على حالي واكول ليش اني مو مثلهن وحدتهن حتى الگمل كاتلها وتتأمر عليه بشنو هنه احسن مني حتى اني اشطر منهن

متحملت لبدايه الثالث متوسط بطلت وكمت انزل انظف وره حلت الدوام العصر على راحتي انزل بلصفوف انظف حتى مااشوف اي وحده بينهن ويسمعني حجايه جنت الزم السبوره واموت قهر لان مراح اكمل دراستي واكعد اشخبط بلطباشير وعود ادرس نفسي واضحك واكمز وانطي لنفسي ١٠٠ من ١٠٠ واكتب احسنتي ياشاطره ومن تروح ضحكتي واشوف حالي اكعد وهذا كله خيال  ابجي جنت اغسل الصفوف بدموعي مو بس بمي البوري

وبعد فتره كالو لابويه راح ينقلوك لاعداديه مال ولد وحاول شكد يمنع النقل مفاد جان خايف عليه شلون بنيه مراهقه وياهم واخاف احد يتعرضلي رغم احنا قاطعنا معزول بس تبقى اعداديه مال ولد بيها غلط وافشار وضحك واشكال كام يحبسني وميخليني حتى انزل ودوم عيونه عليه قدم طلب للمختار واكو حزبي بلمنطقه عريضه بوضعه وشلون فقد اثنين ولد وبقى بس واحد وخاف ليروح للجبهه ويرجع مثل اخوتي بعلم اجه استثناء وفرح ابويه بس فرحته مكامله وكالو راح ينقلوك محافظات للبصره مدرسه اعداديه هم مال ولد

وبهاي الفتره زاد الحمل والهم وامي دوم تكعد ويه وحده من المنطقه اسمها ام اسماعيل الحفافه وبيوم شافتني انظف بلساحه العصريه مطولت وره يومين جابتلي عمشه وابنها وابويه طار بيهم لان اعتبرني هم على گلبه ويريد بس يخلص حتى يروح للبصره براحته وهم حتى يهتم بأخويه الباقي

اتصوري ياذكرى بيوم زفتي ابويه شگلي

ذكرى : شگال

بديعه : اياج ترجعين الي اطلعين منا لبيتج وبعد عمر طويل لكبرج مالج مكان يمي اني وامج واخوج رايحين للبصره ومنعرف حالنا شنو ومامستعد ترجعين وبيدج جاهل لو ترجعين مطلكه ابقى يم رجلج لو يكطع من لحمج تكوليله رحمه الله والديك

ذكرى : يمه الله يعينج

بديعه : وسمعت كلام ابويه وحمدت الله طلع فلاح خوش رجال وفقير وماعنده زايده ناقصه بس الحلو ميكمل لكيت كدامي صالحه وساهره وضيمهن وهم كل مااختنك واتعب منهن اتذكر حجايه ابويه

وكمت اشوف سوالفهن بعيني وابلع ومااحجي شلون يرشن ويدفنن واشكال سوالف لحد مايوم طك گلبي وحجيت لعمتي عمشه وهنه عرفن تدرين شسون بيه

ذكرى : شسون

بديعه : خلن فلاح يشبعني كتل

ذكرى : ليش

بديعه : بدون سبب والله دخل الرجال عيونه براسه ويعيط اريد افهم منه شبيه ماكو لحد ماعافني مجطله بلكاع مدمايه

ذكرى : فلاح صدك تحجين اني من اتزوجت لليوم ماسامعته يعيط

بديعه : سوالفهن وربج واجني كدامي وبليه مستحه كالنها هلمره ضربج مره ثانيه نخلي يشمرج بلشارع هزيت راسي وكلت مالي دخل بيجن وداعت بنتي ثاني يوم فلاح يبوس بيه ويكول مدري شجاني شلون امد ايدي عليج ومتخبل عرفت هاي عقوبتهن اليه لان حجيت لعمشه عنهن وادخلت بسوالفهن ومن يومها مغمضه عيني وساده حلكي ومنتظره الفرج من الله

ذكرى : حيل اختنكت من كلامها حسيت ساهره وصالحه شيطان واكف فوك راسنا وكتلها يعني ماكو حل الهن

بديعه : هيج بشر سلك درب الشيطان ونسه الله وصار عبد للشيطان محد يكدرله بس ربج لا اني ولا انتي وحتى عمشه الي تهوس فوك هسه يطكنها سحر يخلن الحاجتين جواها ذني سحورتهن كلها نكسه وصاخه وبلاوي سوده يسون

ذكرى : منين تعلمن هيج سوالف

بديعه : سمعت مره عمتهن اخت ابوهن تشتغل هي ورجلها بلنجف وتعلمن منها متشوفين كل شهر او شهرين لازم يرحن للنجف عود يزورن الامير علي بره منهن الامير هيج نماذج مايستقبلها ابا الحسنين اذا من رحمه الله مطرودات شلون يدخلن للحضره بكل قباحه

ذكرى : دمعت عيني وكتلها وهسه شسوي

بديعه : اكعدي واسكتي وجنج ماسمعتي شى روحتج لاهلج مراح تقدم ولا تأخر بس اذيه اهلج واخوج مصار كم شهر من رجع مرته استري على عائلته شفتي بأسبوع واحد خلن ابوج بيده يسلمج الهم وهاي عود راضين عنج ويردوج لعد اذا كرهنج شيسوون بيج وانتي بعد تزوجتي وعندج يونس يضل بليه ابوه مترهم ياعيني سلمي امرج لله هو قادر على كل شى يجي يوم ويوكعن بشر سحرهن وشعوذتهن

ابقي صلي والتزمي بلقران ولتتقربين منهن وداري رجلج وابنج والصار اليوم كله شيلي من راسج

ذكرى : صفنت على بديعه ولاول مره اخاف منهن صدك مو بس على نفسي على اهلي

واخويه طلعت منها وصارن بوجهي ومباشره كالت ساهره

ساهره : ماوليتي لاهلج

ذكرى : هذا بيتي وكاعده بيه

صالحه : مو سوينالج سحر مجان ركضتي الهم

ذكرى : جريت نفس مخنوكه وحاصرتني الدمعه وكتلهن اتزوجت بعد وعندي ولد منه الصار راح انساه

صالحه : اي هيج اريدج سباعيه وهادئه وهاي الهوسه مال قبل شويه لتعيديها وتضرب بوجهي بخفيه ايدها

وخرت ايدها على كيفي وكتلها صار عندج كلام ثاني

اباوع على عمتي اعصاب بس مابيدها شى اليوم عرفت حتى عمشه ماتكدر عليهن ومبين حجن وياها وسكتنها على سالفه خوله لان بعد ماسمعت صوتها الظاهر هم لازمات شغلات عليها عمتي مع الاسف استخدمت السحوره وياهن لهذا لازماتها من ايدها التوجعها والله اعلم شخافيات ولو ماكو شى ينضم يجي يوم ويظهر كلشي

سلمت امري لله وبقيت بلبيت وسديت الموضوع وحتى عمتي اتعامل طبيعي وياها وكمت اتجنبهن كلش حتى مرات سلام مااسلم عليهن حايره بشغل البيت والكراب وابني الكمت اخاف عليه اضعاف گبل حتى ويه جهالهم مااخلي يلعب

عمتي نظفت الكنتور ومكالت شلكت بلاوي وشسوت والمصيبه صالحه وياها يعني شكد سامعه ناس متخاف الله مثلهن مشايفه وهاي عمتي شجاها سكتت على اذيه بتها

والريحه اختفت كلشي رجع طبيعي اله خوله

دخلنا سنه ١٩٨٨ صار اربع اشهر حايرين بخوله طب الربيع علينا   ضلو يفترون بيها من سيد لسيد ومن شيخ لشيخ ومن مقام لمقام وماكو فايده ولان نجم دوم يعترض على هاي السوالف كامت عمشه متاخذه وياها وتاخذ ياصمد ياجوحي لان على كد الايد

طبت مره راجعه من سيد بلثوره اباوع عليها كوه تمشي والوجهه اصفر صارت نص بشر من الضعف اكل قليل نوم ماكو عدا العياط الي تعيطه كل ليله خلت خوله بشر ثاني تماماً حتى تخوف برائتها وهدوئها كله اختفه جفلت ونزلت اركض راسها محرك كل دويره براسها شكبرها

هااي شنو عفيه

جوحي : شنو شبيج

ذكرى : متشوفون راسها

جوحي : غير نعالجها

ذكرى : هذا علاجيش مخلين راسها محرك

جوحي : ماتعرفين لا تفتين بكيفج هذا تجوي حتى البيها يطلع وترجع صاحيه واذا عاى الشعر يرجع

عمشه : انه جبت الها علاج مال شعر بس اطيب امشط شعرها بيه

ذكرى : شطيب عمه هاي البنيه راح تتخبل اكو واحد يجوون راسه حرام عليكم والله ذاك المره وديتوها لواحد وكع دك بلعوده الها خله ولا عظمه سليمه وتون وتبجي حتى النطق فقدته شهر وهسه هذا يجويها شكعد تلعبون بيها حرام عليكم

جان يطب صمد ورإسن كال جوحي الله جابك تعال اخذ مريتك دوختنا عود هي عليمه هي واخوك الصغير صايرين براسنا متعلمين وهمه البغل يفتهم احسن منهم

صمد : اني مو كتلج لتدخلين

ذكرى : شون ماادخل شوفو حالتها

عمشه : مابيها شى ولج انتي ثوله اگلها هذا علاج رجال جبير فاهم وطيب كومه اوادم

صمد : مالج غرض بگلشي ادخلي غرفتج واسگتي هاي اختنا واحنا نتجازه بيها

ذكرى : والله خطيتها بركبتكم

رحت سحبتها من ايدها وهي بس تباوع عليه دخلتها للغرفه نزعت ملابسها اباوع جسمها مشخط زرورها وايدها وصدرها ملعوب بحالها لعب يكسر الخاطر حالها لبستها الدشداشه وردت اشيل شعرها خفت من منظره لا ارادياً نزلت دمعتي اتذكرت من جنت اضفر الها الضفيره الهنديه شلون شعر اسود وسرح يخبل وثخيل ضال بس خيوط وكله حفر مال حرك شهكت واني اشيله جان تلزم ايدي وكالت

خوله : راح يموتوني ذكرى انقذيني منهم

ذكرى : حضنتها وكمت ابجي بصوت اعلى من وره حال هاي البنيه المالها ذنب

وهي بجت ويايه

والله لو اكدر اخذج منهم مااقصر ساعه ماابقيج يمهم حكم القوي مو بيدي

مديت ايدي على راسها واني حاضنتها وابجي وشويه وقوت لزمتها وحضنتني حيل كمت اتأذه من حضنها ردت اوخر مخلتني واسمعها تهمس بأذني بس مو صوتها متأكده مو هيه الصوت خشن ومخيف جنه رجال وهوا من حلكها ريحته مطيبه وكالت بأذني دورج جاي

دفعتها حيل ومتت خوف اباوع عيونها حمرة كلش ولسانها طالع ليبره شكلها مرعب طلعت اركض وسديت الباب ورايه

انضربت بدعه

بديعه : اسم الله شبيج

ذكرى : مو مو مو

بديعه :يمعوده احجي

ذكرى : حجيت الها الشفته جان تكولي

بديعه : لطبين بعد يمها ابد البنيه تلبست جن وصارت خطر حتى اخطر من ذني السعالوه الفوك

ذكرى : شمدريج

بديعه : فلاح گلي عمتي حاجيه اله مگلوب عليها سحر نكس وساكنها جن وتاليها ياتموت ياتتخبل بس عمتي ما راضيه تقنع  وكالت لو اعرف افر ساده العراق گلها لحد مطيب

ذكرى : لا اله الا الله جنو عليها الله لاينطيهم

وذني ميكدرن يفكنه منها

بديعه : ذني يسون الشر بس يفكنه ميكدرن وفوكاها مگلوب يعني لو يموتن مابيدهن شى حتى جاسم الكاتل روحه عليها سمعت كعد يدورن مره اله يعني ضيعن مستقبلها وراح يعمرن مستقبل اخوهن عساه لا تهنى ولا تعمر وجهه الفگر گله من وراه طكنها بسحر ومن شافنها تمرضت صرف نظر عنها

ذكرى : حتى بعد مااجه لهنا

بديعه : شيجي على صخام وجهه البت وضاعت  بعد رحمه الله لهاي المسكينه لطبين ذكرى تره خوله مو خوله القديمه

ذكرى : شوكت اخلص من هذا البيت الكله شياطين من الجن والانس حتى الناس البيه شياطين والله

بديعه : روحي لابنج جان يبجي

صرت النسخه الثانيه من بديعه مالي دخل بكلشي ونجم دوم عايف البيت لان بس يجي تصير مشكله ويه امه علمود خوله

ومر شهرين وهذا الرجال الجان يعالجها طلع كلاوجي وبس فلوس ياخذ منهم ودزو عمشه لغير واحد وضلت المكروده تحت ايد عمشه وجناينها

كاعده اثرم بصل اكمل العشا مسويه عروك ولعبت نفسي صفنت صار شكد الدوره مجايتني حسبت صار شهرين ونص

ذبيت السجينه من ايدي وبقيت صافنه

بديعه :كملتي

ذكرى : يمكن اني حبله

بديعه : اي بلخير عليج خيه وتبوس بيه

ذكرى : ياخير بهذا البيت هو اني يونس واكول ياريت ماولدته

بديعه : لتحجين هيج حرام هذا رزق الله امشي باجر اخذج للجده تفحصج روحي ارتاحي واني اخبز واكمل العشا

ذكرى : اني اكمل مابيه شى

بقيت اليوم كله دايخه تمنيت مو حامل وضعي كله مخربط وثاني يوم رحت ويه بدعه وطلعت حامل

مدري افرح مدري انقهر بقت بدعه اطيب خاطري رحت لصمد وكتله

صمد : ماكدرتي تنتبهين

ذكرى : على شنو

صمد : مو وكت طفل هسه

ذكرى : ماكتلي جان اخذت احتياطي

صمد : بس هذا وبعد ماكو اتكطعين افتهمتي هو واحد كوه مدبر عيشته هلمره اثنين

ذكرى : خلي الله يكتبلي ويكتبله السلامه وعود ماانتبهه

صمد : تعالي رايدج

ذكرى : والله لعبانه نفسي وتعبانه

صمد : اهوووو بدينا عياره النسوان اسمعي لج حقي اخذه برضاتج غصب اخذه وراها عود زوعي شسوين طبج مرض لا تتعدين على حقي اني رجال اتعب اريد من ارجع مرتي حاضره الي مو مخلصتها تواليت ولعبانه نفسي والريحه مضوجتني تره اخليج تنزلي والله

ذكرى : لا عفيه هاي شبيك على كيفك ويايه يله تعال وقدمت نفسي اله حتى بس يسكت

مرت الايام وبطني بدت تعلى والحرب خلصت ١٩٨٨/٨/٨ والناس كلها فرحانه واخيراً ماكو حرب والولد تسرحو وكل واحد بيهم رجع لشغله بلعتيك وفلاح بلبناء ونجم تخرج ويشتغل بمكتبه ويه رجال جبير

وكل كم يوم اشوفه وبس السلام بينا

كاعده بلحوش وبصفي يونس ومرتضى وبان يلعبون وانضف التمن جان اطب عمتي وخوله وصمد

كلها ساكته مو من عادتهم

كملنا الاكل والكل موجود حتى نجم دزوله خبر كالو تعال نريدك عدا خوله نايمه بلغرفه

مثل كل مره وره الغدا تجمعهم كلهم وتوكف بنصهم وتأمرهم بس هلمره كلامها جان صدمه للكل

عمشه : تعرفون بوضع اختكم والصار بيها وصار سنه كامله لا خلينه سيد لا مقام لا حضره ما ركضنا عليها البت راح تضيع من ايدي

نجم : كله من وره سوالف الناس التعبانه الترحون الهم

عمشه : اكمل يمه اسگت تره انه گلبي موجر منك بعدين حسابك وياي

صالحه : الي يسمعها تكول راح اطرده

عمشه : سكت مريتك ياجبيرنا لا اسكتها بيدي

عبيد : يمه كملي صالحه ماتحجي بعد ويعض بشفته الها يعني اسكتي

عمشه : لكينا سيد صار شهرين يعالج بيها والرجال خير وجده رسول الله والكدر عليه سواه وحلف علاجها يمي

عبيد : اي ياالله ميعالجها شينتظر

عمشه : كال انه مااكدر اطخها عبن لازم يلزم مجانات محرمه عليه

فلاح : وشيريد

عمشه : يعقد على اختكم يتزوجها ويصير زلمتها وهو يعالجها

نجم : طفر نجم من مكانه لا اكيد تخبلتو شلون نزوجها لواحد منعرفه وهي مريضة يمه من كل عقلج هذا حالها مال زواج البنيه مو صاحيه وكل شويه تملخ بروحها وعلى ساعه تشمر روحها من السطح وتموت علمود تعالجيها تزوجيها

عمشه : ولك يمه اركد ولا تستعجل علاج موش زواج زواج عبن يكدر يعالج كلشي بيها

حلاله ويلمس كلشي ويقرا عليه حتى اطيب

عبيد : هذا هو يمه فوتي بفالج

نجم : باع هذا الثاني

عبيد : انجب شنو باع هذا نسيت اني اخوك الجبير

نجم : لا مانسيت بس يمكن انت النسيت شون تشمر اختك الربيتها بيدك بيد واحد يجوز يطلع كلاوجي سرسري شمدرينا الناس شنو

عمشه : يمه تف من حلكك هذا الرجال خير وكله بركه كافي سيد وجده رسول الله

نجم : واذا سيد قابل كلها خيره هم اكو بيهم ميخافون الله يعني شنو مو بشر ملائكه منزله

البنيه يكدر يعالجها وهذا وضعها كان بيها ميكدر خلي نشوف غيره

صمد : اني ويه امي خلي نخلص مو روحنا طلعت مو حقك انت ماتعبان وتفتر بيها صار سنه احنا حايرين بيها وانت حاير بشغلك وتكون بروحك واحنا عايفين كل حالنا

نجم : غير انتم متقبلون اعالجها وكلها صارت تفتهم براسي وجم مره كتلكم عوفوها اني اوديها لناس زينين يفتهمون مقبلتو

جوحي : انت لسانك طولان ويرادله بتر كدام اخوتك كلها الكبار واكف ونافخ ريشك انتم كلكم موافقين صمد فلاح عبيد

الكل هز راسه كال جوحي توكلي يمه والمايعجبه يطخ راسه بلحايط

نجم : متتزوج ولكم الله اكبر البنيه مريضة راح تأذوها بلزايد

عمشه : فدوة اروحلك لطولك يمه لا تعرض للبت كلها كم شهر وترجع

نجم : خوش يعني تعيش يمه ويلمسها بكيفه ويطلكها ومتزوج اكيد

عمشه : هي الثالثه بس ماتنحسب عبن مريضة

نجم : خافو الله ولكم هاي وحيدتج يوم ماعندنا غيرها

عبيد : وجع كافي تعيط يمه كولي للسيد يجي يعقد عليها وياخذها حتى لو تبقى مريته للابد واريد اشوف منهو يعارضني وانت معاجبك انجب وانطمر بغرفتك واذا حجيت بعد وروح ابويه الزمك الباب

ذكرى : الكل يعيط ويهوس وتالي محد نصف نجم والكل صارت ضده جانت عيونه تجدح قهر وخذلان وانكسار الكل اتفق على خوله بأن تنطي هيج لرجال عود شنو يعالجها

متحمل الوضع نجم واخذ ملابسه وطلع وعمشه لاول مره تسكت ومتوكفه

واباوع الكل فرحان تكول هم وانزاح منهم

وثاني يوم مباشره دزو خبر للسيد تعال اعقد عليها واخذها حتى بدون عقد محكمه للعصر كاعد وجايب شهود

وانفتحت الباب وطلعت خوله جثه تمشي بدون اي ادراك واي وعي وكالت انت وكيلي وعقد الها وصارت مرت السيد وراحت بملابسها ويااه حتى مو مثل البنات زفه وعرس وفرح انحرمت من اهم حق من حقوقها هو الزواج العلني كدام الناس وبدله العرس حالها حال كل بنيه راحت مكسوره لرجال الله اعلم شراح يسوي بيها

اباوع عليهم ذوله وحوش مستحيل ناس مثلنا شنو هاي القسوه عدهم حتى محد سأل من اخوتها شصار بأختنا ماتت لو عاشت اكلت شربت اذاها عالجها او موتها عود كم اسبوعين تروح امها ساعه وترجع نسألها تكول زينه غير شى متكول لحد ما الكل تحسه ارتاح للوضع صارت براس رجال وهمه طلعو منها

بس المجان احد متوقعه

شهر ١٢ ل١٩٨٨ ساعه ٨ بليل

كاعدين يشربون جاي وره العشا والي يسولف على السكراب والي يحجي بلبناء وعمشه تفرك بسنونها بلمسواك وتشارك سوالفهم وصوتهم عالي والجهال تلعب وتكمز وساهره وصالحه كالمعتاد يسولفن وحدهن واني وبدعه وحدنا وبطني كبرت والحمل متعبني بس متحمله 

ونجم من ذاك اليوم مارجع يبات يم صاحبه حتى حاولت امه ترجعه ومافاد

اندكت الباب كام صمد يفتحه شوي

وجان اطب خوله وبيدها بقجه ملابس ولابسه عبايه وبصوت هادئ ومسموع كالت

مات السيد ورجعتلكم

يتبع ...

#الابواب_الخمس

البارت الخامس

للكاتبه Reem

‎اثاري الحِمل من يثگل

‎يشيلة القلب مو الچتاف "

‎خفت اشرد من همومي

‎ويصيحولي البشر خوّاف !

‎وخفت ابچي

‎ويبين كل صدگ قلبي على عيوني

‎وابو قلب الصدگ ينعاف ..

وجان اطب خوله وبيدها بقجه ملابس ولابسه عبايه وبصوت هادئ ومسموع كالت

مات السيد ورجعتلكم

الكل كام مفزوع من مكانه

عمشه : يايمه السيد مات يبووووو

خوله : ليش تعيطين هااا ليشششش على شنو لان مات لو لا رجعت الكم

عمشه : يمه غير رجل بتي وانطاج عمره عبن تردين اهلهل لازم اروح الاجي (تلطم وتعزي) بيت الساده

خوله : ميحتاج اكعدي واسكتي

عمشه : شنهي خبرينا الزلمه شجراله

عبيد : وانتي شلون تعوفين العزه وتجين وشوكت اصلاً اجه

خوله : تباوع بلوجوه ومجاوبت ومشت خطوتين وكال جوحي

مو يحجون وياج متجاوبين اخرسيتي شجابج بهذا الليل ومنو جابج وشنو الصار احجي انريد نعرف

خوله : تعبانه عود باجر احجيلكم

واندارت اطب للغرفه جان يجرها من ايدها جوحي حيل

صغار كدامج ومتجاوبين اليوم مطبين للغرفه اله نفهم الصار اكعدي واحجي

عمشه : يمه على گيفك ويه اخيتك ماتشوفها مدوهنه وماتندل دربها عبن مامصدكه ترملت وسحبت ايدها من ايد جوحي وخوله بس صافنه عليه

صمد : يمه هاي مو شكل وحده ضايجه لو بيها شى شكل وحده مرتاحه وهاديه احجي يمعوده شلون بله نروح لاهل الرجال نسأله تدرين هاي طلعتج عيبه بحقج وبحقنا يكولون ماعرفو يعلمون اختهم الاصول مات الرجال منا وهي طلعت منا واله اخاف مسويه مكسوره وجايتنا

فلاح : على كيفكم وياها تعال خوله حط ايده على كتفها ويحجي بهدوء

احجي شنو الصار تره من خوفنا عليج نحجي هيج

خوله : فلاح تعبانه ومابيه احجي

فلاح : ميخالف اضغطي على نفسج وبس فهمينا شلون السيد مات ومنو جابج هنا

خوله : كعدت الصبح وهو نايم بصفي قبل مينام كال كعديني من وكت كعدته صحت عليه ميجاوب لزمت ايده حتى افززه لكيته ثلاجه والوجهه ازرك نزلت لابنه اجه صعد

وكال اطلعي بره كعدت بلهول شويه ونزل يركض صاحو ولد عمه واخوته دقايق وصار عياط وكالو السيد مات

عمشه : هيج بليه گلشي دهر كون اخاف الزلمه مريض وماتدرين

خوله : صارت الهوسه والي يلطم والي يعيط عفتهم وكعدت بلحديقه وره شويه شافني ابنه وكال اصعدي بغرفتي وحضري نفسج ارجعج لاهلج

صالحه : وانتي مابجيتي مالطمتي عفيه گلب اكو مره يموت رجلها وتطلع بلحديقه تكعد غيرج وحدها حتى شعرها تملخه غير رجلج والله ياالله ويكولون علينا ماعدنا گلوب

جان تباوع خوله على صالحه بحقد وصالحه متقصده تنرفز خوله وتباوع بشماته

ساهره : وتالي كملي

ذكرى : تره مبين عليها التعب خلي تنام وباجر اتكمل

صمد : مالج دخل انتي

كملي خلي نفهم نجر الگلمه كوه منج

خوله : التهى ابنه بلهوسه وهسه وصلني ورجع الهم

عبيد : وليش مابقاج غير مرته انتي ولازم تبقين شو مامقتنع

عمشه : حبيبة بروح ابيج هيج صار لو

خوله : لو شنو يمه قابل اني الكتلته واحد واجه اجله اني شنو وابنه مرادني ابقى وصلني وراح

عمشه : تهدي يمه غير اخافن عليج يابنيتي واريدن اعرف گلشي

خوله : لا بالله تخافين عليه اول مره ادري

عمشه : يااا شجرالج چاانتي بنيتي الوحيده عبن مااخاف عليج عليمن اخافن

خوله : عرفتو كلشي والي يريد يتأكد ذاك بيت السيد ويروح عوفوني اولي وانام

دنكت واخذت البقجه من الكاع ودخلت للغرفه وركعت الباب

ذكرى : كمت وراها جان اتجرني بديعه

بديعه : وين رايحه

ذكرى : اشوفها اخاف جوعانه محتاجه شى

بديعه : هسه احنا شفهمنا البنيه صار شهرين هناك يمهم عالجها لو لا شو جنها بعدها

ذكرى : لو بعدها متكعد هيج وتسولف وتحجي طبيعي نسيتي من طلعت منا حتى صوتها اختفى وبس صافنه بلوجوه وهسه ناقشت اخوتها وسولفت طبيعي يجوز طيبانه خلي اشوفها واجيج

بديعه : ادورين المصايب دواره يذكرى عوفيها وحدنا واستري على نفسج اخاف بعدها مريضة وانتي حبله وهسه تسوي كارثه بيج

ذكرى : ماكو شى ربج موجود هو الحامي

كامت ذكرى وفتحت الباب بدون مدكه خوله تبدل جان تغطي جسمها بفزه

ذكرى : صفنت عليها الجسم ملخ تملخ ضرب وجروح قديمه واكو جديده فتحت عيوني من الصدمه هااي شنوو

خوله : غير ادكين الباب قبل مدخلين

ذكرى : سديت الباب وتقربت منها مرعوبه واحجي بخوف عليها هااي شصاير بيج

خوله : روحي اطلعي ولتسألين

ذكرى : جريت الدشداشه ولبستها الها ركزت على شعرها بعده مكطع لتخافين مااضوجج بس ضل بالي وكلت ادخل اشوف حالج

اجيبلج اكل

خوله : مجوعانه

ذكرى : سحبتها من ايدها وكعدتها بلكاع على المندر وكعدت بصفها ضلت تباوع عليه وباوعت على بطني

خوله : شوكت حبلتي

ذكرى : عليه سبعت اشهر عكب باجر اطب بلثامن

خوله : تكومين بلسلامه

ذكرى : اريد اسألج ومستحيه

خوله : احجي ضلت عليج هو اني راح اخلصها اجاوبكم شتردين

ذكرى : انتي طبتي يعني واعيه بلي يصير

خوله : واعيه وياريت ماوعيت

ذكرى : احجيلي گلبي نار عليج والله وشكد اسأل عمتي عنج تكول زينه وتسكت

خوله : ليش شمرتوني هاي الشمره بشنو أذيتكم ماخفتو الله لو مربين حيوان هم تحنون عليه

ذكرى : والله حجيت وبجيت وتوسلت حتى بس ميزوجوج وحتى اخوج نجم تعارك وياهم وميفيد تصوري من يوم ماطلعتي هو طلع ومرجع بعد للبيت

خوله : جان المفروض ياخذني وياه مو يعوفني الهم ينهشون بلحمي

ذكرى : اكو شغلات مو بيدنا وتعرفين بيه من زمان اني بهذا البيت محد يسمعلي وبدعه هم احنا نسوان علينا الطبخ والكراب وتالي الليل راحه لرجولتنا غيرها اذا نفتح حلكنا نترزل احجي عفيه شنو الصار من رحتي منا

خوله : اني ماوعيت اله وره شهر من عيشتي بذاك البيت

ذكرى : شلون ما واعيه

خوله : لتسأليني بشئ مااذكره بس اتذكر يوم مافتحت عيني ولكيت واحد يقرا عليه ويذب مي جان صوته جهوري حيل وقوي وكل ايه يقراها احس لحمي يتكطع بيها توسلت بس حتى يوكف وميكمل وبقى يقرا لحد مفقدت الوعي وراها فتحت عيني وسألت انتم منو

جانت مره وشاب بصفها نفسه الجان يقرا

ذكرى : السيد الي تزوجتي مجان شاب

جان عمره بنهايه الاربعينات اذا مو بلخمسين

خوله : الجان يقرا عليه ابنه مو هو

ذكرى : اي كملي

خوله : سألتهم وين اهلي تعرفين شنو شعوري من كالو انتي بيت رجلج وهذا رجلج ويأشرون على صوره بلحايط لرجال مشيب

ومن كتلهم انتم منو الولد كال اني ابنه والمره كالت اني ضرتج

من الخرعه بقيت بس فاتحه عيوني اريد افتهم الصار منهم ودموعي تصب تمنيت بس اتذكر ولو شى بسيط

كعدت المره تسولفلي شلون اجيت لهذا البيت وهي تحجي طب السيد شافني صاحيه تخبل وكام يعيط على ابنه وضرته

كمت وختلت وره ابنه من خوفي جان عصبي ويخوف

يابه على كيفك البنيه صحت والحمدلله

السيد : ومنو كلك تقرا عليها مو توبتك ذاك اليوم وكتلك لتتقرب منها

احمد ابن السيد: يعني تبقى مو واعيه مو حتى حرام الديصير بيها

السيد : انجب ولتدخل واياكم تتقربون منها وانتي تعالي ويايه

سحبني من ايدي واني مثل النعجه امشي وكلشي مامفتهمه كأني بگابوس ومنتظره افتح عيني منه وصعدنا طابق ثاني دفعني على الجربايه جانت حديد وبيها فراش خفيف بحيث من ذبني عليها احس ظهري انكسر

ااااخ على كيفك انت منو وديني لاهلي

السيد : انتي مرتي ومالج رجعه لا عبالج طبتي ادري بيج بعدج مسكونه وهاي السوالف ماره عليه

خوله : شنو مسكونه رجعني لاهلي عمو وارجف من الخوف منه وشفايفي ترجف واطك سن بسن

السيد : عمو انجبي اكلها رجلج تعالي وجان يسحبني من هدومي وشكها عليه حسيت ديغتصبني المشكله مجنت بصحه اكدر ادافع عن نفسي اسحل بروحي سحل جسمي كله يون وضعيف مابيه طاقه كمت اعيط كلت راح يأخذني راح افقد شرفي صلخني وجاب عوده رفيعه بس قويه ويضرب برجلي وبظهري وبطني وبكل مكان تجي الضربه بيه اصرخ لربي واباوع بوجهه بكل قوته يضرب تكول عدوته ويشيلني ويركعني ويرجع حيل يضرب واصرخ وراها صوتي انبح واختفى وهو بقى على نفس ضرباته

لحد ماانتهيت بس واعيه لزمني من شعري حيل وتقرب مني حسيت بأقرف شعور ممكن احسه بحياتي كلها ومن كاام كلت هسه الكه روحي فايضه من الدم ملكيت شى كوه طلعت مني كلمة انت نايم قبل ويايه

عاط بصوت عالي اكلج مرتي صار شهر

خوله : لطمت على وجهي وسحلت نفسي كوه لرجله وابوس بيها بس رجعني لاهلي ليش عافوني الك

السيد : اذا سمعت صوتج شايفه هاي العوده اكسرها تكسر عليج واشدج هنا بليه مي واكل مثل الجلبه لحد متموتين

خوله : شسويتلك اني وهيج كارهني اذا متريدني رجعني

السيد : صار شهر متحمل خبالاتج والجن مالتج ويوم متصحين اعوفج اله اطلع حليب عمشه من خشمج ودفرني حيل على وجهي اجت بخشمي شاغت روحي فوك ماهيه شايغه

بقيت اتمرخل بلكاع مصلخه وحال الضيم حالي والكاع بارده بقيت وقت طويل بلكاع كوه شلت نفسي لما سمعت دكت الباب واحد يصيح خوله خوله

باوعت على جسمي مصلخه والله اسحل مثل الجاهل بلكاع حتى بس الكه شى يستر جسمي

ذكرى : سوده عليه زين معرفتي ليش هيج سوه وياج ليش حاقد

خوله : هو اني جنت بيومها حتى ما مستوعبه شنو الصار صحيت لكيت روحي بغير بيت ويه ناس مااعرفهم ورجال جبير يصيح مرتي ويتقرب مني مثل الحيوان ويضرب بكل حقد الحك اكوله ليش حاقد

وليش هيج تسوي بيه خلي استوعب شنو الصاير وبعدين أســأل

ذكرى : كملي وشصار بعد

خوله : لفيت الجرجف على جسمي وتمشيت على كيفي اسحل برجلي وفتحت الباب شافني هذا الولد الكال ابن السيد ومن شاف حالي دار وجهه وصاح امه اجت تركض

اوف ربي شوكت نخلص تعالي اغسلج

اخذتني للحمام وسبحتني واني مثل الجاهل بيدها بس ابجي لج ذكرى المي هذا المي جان تيزاب ينزل على لحمي من الجروح البيه

المره مقصرت سبحتني وسمت عليه ولبستني وغطت راسي وطلعتني ودخلتني بغرفه ثانيه جان الولد الشاب كاعد وبيده قران

تعالي اكعدي

خوله : عيوني متوكف من البجي ومرعوبه من الكل

احمد : لتبجين خوله انتي صاحيه كعد تسمعيني زين

خوله : اي والله اسمعك بس ودوني لاهلي

ام احمد: ليش هو بكيفنا حتى ابااحمد يشمرنا بلتنور

خوله : اقلها فهموني انتم منو وشلون وصلت لهنا

وكعد احمد يحجي ويكول

ابويه اتزوجج حتى يعالجج واهلج سلموج اله ودارو وجهم وراحو ومن يوم مادخلتي للبيت صارت مصايب لابويه حتى محله احترك وجان عازم يضرب الجن البيج ومع الاسف ابويه كان يتصرف غلط بعلاجه حاولت افهمه بس رفض وحذرني اتقرب منج بس وضعج يوميه يصير اتعس ومكدرت اشوفج واسمع هلوستج وعياطج وماادخل وكمت اني وبمساعده العلويه امي كل ميطلع اقرا عليج وارجعج للغرفه قبل ميرجع

خوله : شنو جن بيه وين اكو هيج حجي

احمد : احنا نسمي بلعاميه بيه جني او ملبوس او انضرب بسحر وانگلب عليه ودخل بيه شيطان بس هو مس مو دخول بلمعنى الصحيح والناس على فطرتها تكول هذا تلبسه الشيطان وانگلب

خوله : شنو جن شنو مس تضحكون عليه هاي خرافات

احمد : وَمَا خَلَقْتُ الْجِنَّ وَالْإِنْسَ إِلَّا لِيَعْبُدُون

الجن مذكور بلقران والمس مالته مؤذي للبشر

وبسبب العلاجات الروحانيه الغلط الصارت بيج صار المس اقتران بجسمج وهذا الشى خلاج فاقده للعقل والادراك

خوله : مااصدك بكل كلامكم وماكو شى اسم جن ومس اني بحلم مو وراح اكعد منه

احمد : حقج ماالوم وضعج لان طول الفتره الفاتت حالتج ممستقره بس اريد اسألج سؤال انتي تقرين قرآن

خوله : اي جنت اقرا

احمد : اكيد قاريه وَإِماّ يَنَزَغَنّكَ مِنَ الشّيْطَانِ نَزْغٌ فَاسْتَعِذْ بِاللّهِ إِنّهُ سَمِيعٌ عَلِيمٌ * إِنّ الّذِينَ اتّقَواْ إِذَا مَسّهُمْ طَائِفٌ مّنَ الشّيْطَانِ تَذَكّرُواْ فَإِذَا هُم مّبْصِرُونَ‪{‬

‪بسوره الاعراف قاريتها مو ‬

‪خوله : اي اتذكر هيج سوره يعني هسه اني بيه جني مو صاحيه ‬

‪احمد: بيج مس وحاولت بكل قوتي اشافيج وراح استمر وياج المطلوب منج تساعديني تره شغلتج مو هينه غيرج وحده جان تخبلت هسه ‬

‪خوله : منين اجالي ‬

‪احمد : من ناس متخاف الله من السحوره والشعوذه كل العليج هسه تتحملين ويايه واذا سألج ابويه شى كولي اله ماطالعه من الغرفه ولا شايفه احد واياج بيوم تحجين شى كدامه ‬

‪خوله : واهلي ‬

‪ام احمد : همه وينهم امج من يوم مااجيتي شفناها مره وحده عشر دقايق وطلعت ‬

‪خوله : يعني محد سأل عني اخوتي شى ‬

‪ام احمد : خليني ساكته لوما انتي بكد بتي ولا اخلي احمد يتقرب منج بس شفت حالج وشفت بتي المرحومه بيج ونخيت احمد يعالجج ‬

‪خوله : زين وهذا الاسمه رجلي ليش معالجني وليش تزوجني اصلاً وهو يدري حالتي هيج ‬

‪ام احمد : عينه فارغه ‬

‪احمد : علويه اذكري الله ‬

‪ام احمد : قابل جذب كل فتره جايبلي وحده وكال اقرا عليها واني اطيبها واستحرم الزمها ولازم اعقد عليها وماكل بعقل الوادم حلاوه ويتزوج ويضل يتونس بيها وتالي شمرها وتعالي لملمي مصايب وراه رجال عينه فارغه ‬

‪احمد : لا اله الا الله وتالي علويه ‬

‪ام احمد : سكتنا هو شطيح حظي غير السكوت عيني خوله تردين ترجعين لاهلج اسمعي الكلام ‬

‪خوله : هزيت براسي ‬

‪ام احمد : يوميه وره مايطلع السيد تغسلين هسه اعلمج غسله الجنابه وتسمين وتغطين شعرج وتجين لازم على طهاره بلكت الله اطيبين وترجعين ‬

‪احمد : تحملي وخلي ايمانج بالله جبير وان شاء الله خير ‬

‪خوله : ان شاء الله كمت على كيفي جسمي يون عليه ورجعت للغرفه صافنه على كلشي صارلي ‬

‪ذكرى : وعالجج ‬

‪خوله : وراها شفت الي مراح اشوفه بحياتي بليل ضرب مره بعوده مره بحزام مره بنعال واغتصاب وقهر وبلنهار قرايه قران وتعزم حتى يطيبوني من المس وكال الجن البيه قوي ومتمسك يمكن جن عاشق يوميه اسم شكل ‬

‪ذكرى : الرحمن دخيلك ربي وعفيه شصار بعد ‬

‪ارتبكت وعيونها تروح يمنه ويسره وكالت هاااا بقى يقرا عليه وكال طبت واليوم صبحت السيد ميت واحمد وصلني للباب وراح ‬

‪ذكرى : الله يرحمه توقعت هو الي طيبج ‬

‪خوله : ابنه وزوجته خوش ناس الله يوفقهم خلوني على الاقل احس على نفسي واوعى ‬

‪ذكرى : مو تكولين طيبني ‬

‪خوله : اي اي طيبني ‬

‪كافي عفيه تعبت اريد انام ‬

‪ذكرى : نامي وارتاحي تعبتج تقربت منها بست راسها وكتلها انسي الصار وعيشي حياتج رجعتي لبيتج والحمدلله هسه لازم تلزمين عده لان متزوجه وراها ارجعي لحياتج بعدج صغيره والعمر كدامج ‬

‪خوله : شنسى ياذكرى السحر لو الضرب لو من فقدت عقلي ومحد قدر حالتي واتحملني لوشمرت اخوتي الي لواحد خلصها بس يتمتع بجسمي وحتى ماكلفو نفسهم يعرفون اختهم وين جرت نفس وكالت روحي لغرفتج ‬

‪ذكرى : كمت وبستها مره ثانيه وطلعت ‬

‪متت بدمي عليها كوه حصرت دمعتي هاي البنيه اشافت هناك الله اعلم بعدها بعز شبابها وادمرت ‬

‪طلعت وكلها تنتظرني‬

‪عمشه : هاااا سولفت گلشي ‬

‪ذكرى : مكالت شى ‬

‪صمد : صارلج اكثر من ساعه جوه وتكولين مكالت شى ‬

‪ذكرى : ضلت تبجي وتعبانه واريد ارتاح وبقيت افرك راسها حتى تنام ‬

‪ساهره : مو كتلكم مراح تحجي هذا السكوتي دومه مسموم ‬

‪ذكرى : خلف الله عليج اني مسمومه ‬

‪صالحه : لتغيرين الموضوع واحجي شصار جوه ‬

‪ذكرى : مصار شى وعفتهم وصعدت ‬

‪صالحه : خوش احترام عدها حموينها ورجلها وعمتها واكفين وتصعد وتعوفكم ‬

‪عمشه : اركدي بت غنيه اركدي لا تشعليها عبن هي شاعله ليجدام انه هسه بنيتي مدوهنتني لا تضلن ادردمن مثل العجايز ‬

‪وانتم تسيرون باجر من صباحيات الله لبيت السيد وتعزوهم وتفتهمون منهم گلشي انه اريدن اعرف الزلمه شجراله وشنهي ولده مارضى اختكم اتضل بدارها وتحضر عزه زلمتها ‬

‪فلاح : باجر اني اروح ‬

‪عمشه : گلكم ترحون اربعتكم ومااريدن واحد منكم يملص تسيرون سوه وتردون سوه انه اريدن گلشي صار گلشي ‬

‪ذكرى : اجتني بدعه وسولفت كلشي الها وانقهرت مثلي على خوله ‬

‪بديعه : بس هم ديري بالج لان شبسرعه عالجها هيج امور تره اطول تاخذ اشهر واسنين واكو بيهم اصلاً ميتعالجون ‬

‪ذكرى : صاحيه وتحجي طبيعي ومبينه متكذب ‬

‪بديعه : الحذر واجب ياخيه لا تأمنين ‬

‪ذكرى : الله كريم ‬

‪ثاني يوم الظهر كاعده اشر ملابس ودخلو الولد نفضت من ايدي ودخلت للهول اشوف شصار وكايل الهم ابن السيد ابويه ومات وماله داعي بقائها ومحد يدري بيها زوجته ومراد اهله وعمامه يشوفوها ‬

‪واني اسمع وكلنا واكفين صاح السلام عليكم اندارينا ونشوف نجم جاي ‬

‪كامت عمشه وفتحت ايدي ‬

‪هله بسورهه ونورهه هلا بنجم بيتي ودلال گليبي تعال يبعد امك اشم رويحتك عبن طاك گلبي عليك ‬

‪حضن امه وسلم على اخوته من بعيد بدون حتى ميتقرب منهم وكاال ‬

‪نجم : وينها خوله ‬

‪عمشه : شدراك ردت ‬

‪فلاح : اني كتله يمه رحت للمحل وبلغته ‬

‪نجم : وينها وعافهم ودخل الها ‬

‪فتح الباب وشافها كاعده وتحوك ‬

‪باوعت عليه ومهتمت ورجعت عيونها على السناره البيدها كعد بصفها وسحب راسها وباسه ‬

‪شونج خيتي ‬

‪خوله : ليش اني اختك ‬

‪نجم : حقج شتكولين ماالومج بس والله حرت شسويت حتى مااخليهم يتقربون منج ‬

‪خوله : ليش مااخذتني غصب عنهم ليش ‬

‪تشوفهم يسحبوني للموت وادير وجهك وتروح ‬

‪نجم : حتى عراك تعاركت وعفت البيت الهم ‬

‪خوله : وشحصلت اني تاليها شمروني بيد واحد حتى الله ميعرفه انطاك گلبك تنام واختك بيد رجال بكد ابويه اقلها تعال زورني شوف شسوه بيه حركني أذاني شمرني بلشارع ولكم ولا واحد بيكم عنده نخوه تنامون ومتعرفون عرضكم وين كوم نجم وروح لحضن امك نام وتغطى بفوطتها واتركني بحالي ‬

‪نجم : مكدرت عليهم خوله اخوتج اكبر منج وكل واحد منهم يشوفني الصغير ومالي حق حتى احجي واعرف بيهم يكرهوني شلون تردين ادافع عنج وهمه اصلاً ميسمعولي ولا يحترمون رأي ‬

‪خوله : انت نجم حبيب عمشه لو ساحبني من ايدي وماخذني ومنهزم بيه قابل شيسوون الك يذبحوك طبعاً لا ليش هو يكدر واحد يلزم شعره منك وحتى وان لزموك واخذوني منك بعد مااصحى على زماني اكول نجم حاول وتعب وتحدى وصار ظهر الي بس همه غدروه وراح اعذرك والله اعذرك بس مو مثل الجهال تزعل وتلم ملابسك وتعوفني وحدي وادير وجهك والله اني حجيت وعيطت ومنطوني مجال لازم انهزم وحدي وطبج مرض يخوله سويت العليه بله متسكت ‬

‪نجم : لهاي الدرجه سقطت من نظرج ‬

‪خوله : كلكم مو بس انت ‬

‪كوم مني ولو شترجى منك هو انت مو نفسك الي عاف حبيبته وحب عمره تتزوج اخوه وسكت ومدار بال وحتى مكلف نفسه يوكف الزواجه ويكول هاي البنيه احبها او اقلها يكول لعمشه تخربها ردت فعلك الوحيده تبات بره البيت وبجيتلك كم دمعه وانتهى يعني الشغله مو جديده عليك ‬

‪نجم : كام نجم وباوع عليها مصدوم من كلامها شنو هذا الحجي ‬

‪خوله : مو حجي واقع يبن ابويه عبالك ماادري كلشي ادري وكدام عيوني ‬

‪نجم : تقرب عليها بعصبيه وكاال احد يعرف ‬

‪خوله : هذا الهامك يعرفون او لا ‬

‪نجم : احجي احد يعرف ‬

‪خوله : لو حاجيه مجان ذكرى هسه حبله بلطفل الثاني من صمد ‬

‪نجم : خوله اياج بيوم احد يعرف بهذا الحجي احلفج بكل عزيز عندج ‬

‪خوله : هزت راسها ورجعت تحوك ‬

‪فتح الباب وطلع دايخ من كلامها وجان تكول ‬

‪ماعندي عزيز يبن ابويه ‬

‪ثاني يوم عمشه جمعت الجناين وكالت ‬

‪عمشه : اسمعن وما اعيد احجاياتي خوله مااطخنها ولا تكربن ليها البت تعبانه وشتامر تكولن تآمرين ‬

‪صالحه : خوش والله بعد تردين نغسل رجليها ونكعد حرس يم رجلها ‬

‪عمشه : بت غنيه تسكتين لا اطلع ضيم گلبي گله بيج انه ماناسيه جفيني شرج واجفيج شري وحيدتي تمسنها بماي امسجن بدم ذيج المره وبلعتها هاي المره مااسكت وحك ام البنين اسويها دم للرجاب وما ابيتجن انت وزلامجن بلبيت استرن على رواحجن ‬

‪ساهره : شنو عمه متحامله علينا هاي مو بدعه وذكرى شو متحجين هيج وياهن ‬

‪عمشه : چا منهي بيهن فجت حلچهه وراددت غيرج انتي واخيتج عبن طركاعه موش نسوان تراجفن عبن خوله بلطاري ‬

‪تسكتن وخوله ماتكربن ليها ‬

‪دارها ماادخلن ولا تكربن حتى لغريضاتها ‬

‪وياويلها التگسر جلمتي احطها واهطرها هيه وزلمتها ‬

‪بديعه : هذا هو عمه لتصيرين عصبيه ‬

‪صالحه : حجت اللوكيه منتقرب عيني صار عمه تدللين بعد عندج شى‬

‪عمشه : دهر صابج كون ولن لشغلجن ‬

‪ذكرى : ايام مرت البيت هادئ والكل ساكت وخوله حابسه روحها بلغرفه ولازمه عده محد فتح الموضوع وعمشه دايخه بيها هسه طابت لو بعدها وكل ميسألوها الولد خوله حجت شى تكول لا ‬

‪الكل كال ماطول طبيعيه وتاكل وماكو اي هوسه منها وصاحيه اذاً خوله طابت ‬

‪وسدو الموضوع وتعامل الكل عبالك اي شى مصار ونجم رجع للبيت وصار مكان ميتهزم مني يتهزم مني ومن خوله ‬

‪صمد اريد اروح لاهلي ‬

‪صمد : شعندج مو ذاك الاسبوع يمهم ‬

‪ذكرى : يعني بربك بيت اهلي بعد عني كم بيت وبنفس الفرع وكل اسبوعين مره اروح الله يقبلها هسه لو بعيد لو ابات حقك هو اني اروح كم ساعه وارجع ‬

‪صمد : ماكو روحه وهذا اخوج فوزي على شنو شايف نفسه ذاك اليوم يفوت يسلم من وره خشمه ‬

‪ذكرى : فوزي اخويه بلعكس طيب وحباب وعمره متعامل هيج ‬

‪صمد : اكيد لان اخوج ادافعين عنه لو بيج خير جان كتيله هذا رجلي ومااسمحلك هيج تسلم عليه ‬

‪ذكرى : هسه هو سلام ياعيني قابل رايح خطار الهم وما مستقبليك حتى تزعل ‬

‪صمد : هم عايزه ميستقبلوني زين حتى اخليهم يحلمون يشوفوج ‬

‪ذكرى : هسه شكلت والله ما اتأخر ‬

‪صمد : ساعتين وترجعين ‬

‪ذكرى : جريت نفس بضوجه وكلت ميخالف هم نعمه الله راح ابدل واخذ يونس واروح ‬

‪نزلت وبيدي علاكه والبيد الثانيه يونس ‬

‪لكيت خوله تروح وتجي ‬

‪هااا محتاجه شى ‬

‪خوله : اي محتاجتج بشغله ضروريه ‬

‪ذكرى : عيوني الج ‬

‪خوله : تسلم عيونج بس اريدج ترحين لامل صاحبتي خليها تجيني ‬

‪ذكرى : ماشي بس ابلغ صمد ‬

‪خوله : لا لتكولين اله اخاف ميقبل هو بعد كم بيت عن بيت اهلج بس كولي الها خوله تريدج ضروري واليوم تجي ‬

‪ذكرى : ماشي مردت اكسر بخاطرها ورحت لامل صديقتها وبلغتها وكالت البس واروح الها ورجعت لبيت اهلي واول من استقبلني مهدي واخذ يونس مني حيل يحبه ومتعلق بيه بقيت ويه امي ومرت فوزي ساعتين ونص ورجعت جان البيت هادئ كل واحد بغرفته ‬

‪مر اليوم عادي والبعده وشهر كامل دخلنا سنه ١٩٨٩ شتا والكل خاتل بغرفته بس على الاكل ننجمع اي مشكله ماكو وصالحه وساهره خانسات ولو بدعه تخاف من يخنسن ‬

‪الي لاحظته كثرت جيات امل كل يومين جايه ومحد اهتم بلعكس كالو ياريت تجيها حتى تغير خوله جو وياها ‬

‪طبيت بشهري شهر الثاني من سنه ١٩٨٩ وبطني نزلت وعلى ساعه واجيب ‬

‪صالحه وساهره قررن يرحن للبصره يزورن اهلهن وهاي من زواجي لليوم ماشفتهن رايحات وحسب كلامهن شهر يله يجن والله فرحت من گلبي راح اخلص منهن شهر ممصدكه ‬

‪وحسب كلام بدعه اخوهن جاسم يجي ياخذهن وطب جاسم اني وبدعه انهزمنا لان الولد ولا واحد بلبيت كلهم بلشغل وياهم عمشه وصالحه وساهره يحضرن غراضهن ومكيفات وانفتحت باب خوله هااي شلون تطلع والعده مخلصانه شجاها اجيت يمها وكتلها خوله عيني ميصير اطلعين ‬

‪خوله : مالج دخل ذكرى واصعدي لغرفتج لابنج ‬

‪ذكرى : مردت اضايقها اباوع عليها لابسه فستان مورد وشايله شعرها وحاطه مثل الربطه الصغيره حتى تغطي الحفر الي براسها ومطلعه برجم صغير وعطر طيب وكحل خاطه عيونها صار سنين مشايفته هيج مرتبه ‬

‪ودخلت على جاسم ‬

‪شلونك ابن خالتي ‬

‪بيده الجاي ويشرب غص وطفر عليه ‬

‪اسم الله صار بيك شى ‬

‪جاسم : هااا لا مصار بس تفاجأت من شفتج شلونج خوله ‬

‪خوله : صرت زينه بشوفتك ‬

‪جاسم :بيج شى ‬

‪خوله : مشتاقتلك طولت الغيبه ‬

‪جاسم : لا بيج شى اكيد ‬

‪تقربت خوله منه حيل وبهمس كالت ‬

‪مشتاقيتلي ‬

‪جاسم : ميت عليج شو حليانه ‬

‪خوله : اني حلوه بعيونك جسومي ‬

‪جاسم : اويلي يابه صرت جسومي من اشتعلت عشيره جسومي جان اطكها بضحكه خوله ‬

‪جاسم : على كيفج ويايه تره مااتحمل ‬

‪خوله : سمعت خطبت ‬

‪جاسم : مو غبي شمدريني راح ترجعين ‬

‪خوله : متبات عدنا ‬

‪جاسم : لازم ارجع للبصره اليوم واخذ خواتي ‬

‪خوله : وديهن وتعال باجر او عكبه ‬

‪جاسم : شيوديني ويجيبني الطريق بعيد ‬

‪خوله : ليش خوله متستاهل تتعب الها ‬

‪جاسم : اخاف اجي وتلبسين وجهه الجينكو عليه وتگلبين ‬

‪خوله : تعال وشوف المهم تبقى كم يوم عدنا مشتاقه اسولف وياك وتحجج مريض حتى متطلع ويه اخوتي اخاف يردوك بلشغل ‬

‪جاسم : هله هيج رايدتني اجي ومااتأخر لان بعد اسبوعين عرسي ‬

‪خوله : روح وتعال يجوز اصير اني العروس ‬

‪جاسم : وين جنتي اشتعل جدج كون ‬

‪خوله : ههههههه عادي تزوج واني موجوده ‬

‪جاسم : اي هيج تمام باجر بليل يمج ‬

‪خوله : اروح للغرفه اخاف خواتك يجن دير بالك تكلهن ازعل عليك ‬

‪جاسم : مخبل واگلهن سرج بير ‬

‪خوله : راح اشتاقلك جسومي ‬

‪صالحه : اني رايحه لاهلي عينجن على البيت ولا تنسن حموينجن ‬

‪بديعه : توصلون بلسلامه ‬

‪ذكرى : لتخافن احنا هنا ‬

‪ساهره : جوحي اغسلن ملابسه وحتى عبيد مو بس اكل واتشردن لا تضلن فاهيات ‬

‪ذكرى : صار ‬

‪بديعه : شاورت ذكرى وكالت انتن بس روحن وخلصنه ساعه الكشره ‬

‪راحن واني وبدعه لو بيدنا نهلهل البيت نحسه يخبل نفهه ومريح حتى عبالك صار جبير خرب بيهن هنه نفرين مهوسات البيت ودخلاتنا انذار ‬

‪امشي وعلى ساعه اجيب وثاني يوم تندك الباب ويطلع جاسم كلت هذا شجابه ‬

‪وخوله كالت لبدعه مالجن دخل بجاسم اكله وشربه يمي ‬

‪بديعه : اكص ايدي اذا مسوت شى ‬

‪ذكرى : يمعوده شسوي قابل تسمه وتموته والله عقلج متأثر بأفلام فريد شوقي ‬

‪بديعه : اني گلبي حاس خوله ماتعديها بخير البت من يوم مااجت وهي تتصافن بلوجهه تكول عبالك منتظره شوكت تخلص منا ‬

‪ذكرى : لهنا وكافي بدعه لان هادئه صارت موزينه خلي نمشي مثل متحب عمشه كالت ولا وحده بيجن تندك بيها لو نسيتي ‬

‪وعمه كعد تشوفها وساكته ‬

‪بديعه : الله يستر ‬

‪اربعه ايام خوله هي حايره بشرب واكل جاسم وهذا مبين من عيونه طاير بيها طير من يتواجدون اخوتها تختفي بلغرفه ومن يطلعون الكل للشغل نلكاها يمه بلهول بلساعات وبدعه تطحن طحن شلون كاعدين وحدهم اني مدخلت ولو بديت مثل بدعه اتضايق لان خايفه لا جاسم يسوي شى موزين الها ‬

‪خامس يوم واجتني الطلوكه عطت وركضت عليه عمشه وبدعه وخوله واكفه هادئه تباوع وتبتسم ‬

‪صمد : جيبو علاكتها ناخذها للجده ‬

‪ركضو بيه ومي الراس طك وانخبصو رحنا للجده وعمشه خبصت الدنيا ادفعي وماادفعي جانت ولادتي صعبه مدري ليش الطفل رغم نازل وطك مي الراس وميرضى يطلع واربع ساعات اطلك وجان يسحبون الطفل واجت للدنيا سمعت اول مره بجيتها حتى صوتها من تبجي حلوو ‬

‪اجت بتي وقطعه گلبي الثانيه بعد يونس وسميتها ‬

‪ناي لان احب صوت الناي وسميتها على اسمه (ناي) ‬

‪مقبل صمد اروح لاهلي حتى يداروني شكلت احاولت اقنعه مقبل واني نفسه ومابيه اتعارك كالت بدعه اني اداريج وامج تروح وتجي عليج صمد دوم ميحب اهلي ودوم محاربهم بيه يمنعهم من شوفتي رغم همه ابد ما يوم سمعو حجايه او غلطو بحقه ‬

‪رجعت للبيت وفرشوله بلهول لان مااكدر اصعد وانزل والحمام جوه وصعد جاسم بغرفه صالحه وكامت خوله تنتهز كل فرصه مابيها اخوتها وتصعد يمه واني الباب كبال الدرج لهذا اشوفها من تصعد ومايوم صعدت اله بيدها ياجاي ياشربت يااكل وكله تسوي بيدها ‬

‪وطول ١٠ ايام يمنا حتى عمشه اختنكت منه وكامت تسمعه حجي ‬

‪ ‬

‪امي تروح وتجي تشوفني ودوم تحجي على صمد لان مقبل ابقى يمهم حتى فوزي مااجه يشوفني كال ماادخل بيت ذاك الحقير حسيت بهذا التصرف زادت العداوه بينهم حاولت اهدي الوضع بس مفاد ‬

‪وبيوم ارضع ناي ويونس نايم بلكاع بصفي وبان بصفه اجت بدعه تركض ‬

‪بديعه : الحكي ‬

‪ذكرى : شكوو ياستار صوتج الجهال نايمين ‬

‪بديعه : هاي خوله مدري شتحط بأكل جاسم دخلت للمطبخ واشوفها مدري شرشت وخاطت الشربت ورجعته بصدرها ‬

‪ذكرى : دهر صابها على كولت عمتي وتالي شلون نكول لامها ‬

‪بديعه : اني معليه بعدين تگلب عليه شيخلصنا منها ‬

‪ذكرى : يعني نسكت صار شى بيه ‬

‪بديعه : نراقب ونشوف ‬

‪وره ايام راح جاسم وخوله اشوفها مرتاحه وتسولف ويه الجهال وتكعد وياهم شويه وترجع لغرفتها اما اخوتها ابد متحجي وياهم وامها على كد السؤال والجواب ‬

‪واليوم ديحضرون يرحون للبصره علمود عرس جاسم الولد كلهم يرحون عدا نجم وعمشه واني وبدعه بقينا اما عبيد وجوحي وصمد وفلاح حضرو نفسهم حتى يرحون ويحضرون العرس الغريب خوله فرحانه وتغني ‬

يفر بيه هوى المحبوب يايمه

يفر بيه وانا الماتوب يايمه

ياعيني وعليه انشد ياعيني ولون يبعد

وانا بلياه عرفت الاه

زماني دمعة عيوني  هلي والناس لاموني

وانا  وقلبي على الهجران مابيه

تظل روحي ليالي الشوق منسيه

يفر بيه هوى المحبوب

بديعه : دشوفين بعينج الوضع ابد ميبشر بًخير

ذكرى : الله يستر اني هم گلبي يلعب

كعدت ويانه تاكل وبحضنها يونس وتوكله واني وبدعه انراقب بيها

نجم من يوم رجعته حتى بوجهي ميباوع بس باركلي علمود ناي وطلع يركض ومن نكعد على الاكل ولا كأني موجوده هيج احسن مااريد ارتبك بوجوده

وطول اليومين الفاتت عمشه حايره بلجيران فلانه جابت وفلانه تعاركت وفلانه راح تتزوج مخلصتها جاي وجذب بلباب ويه ام اسماعيل الحفافه مختار المنطقه انسميها لان تعرف كل صغيره وجبيره بلمنطقه

وكل سوالف الدربونه عدها وميحلالها الحجي اله ويه عمشه يتسلمن الفرع بلسره

اربع ايام ورجعو الولد اول مدخلو الوجوه مگلوبه

عمشه : هااا خيرگم يولد عمشه شنهي رايحين عزه موش عرس

فلاح : والله يايمه هو عزه اله شويه

عمشه : ياااا شنهي شجرى

صمد : جاسم ماكدر ياخذ عروسته يوم يومين ينتظرون والرجال لا حس ولا نفس ماكو بياض واهله اكلو وجهه تالي الغبي من خنكته عايط بيها وكايل الها من وراج وهي مجاوبته كايلتله انت مابيك خير متحمل وضاربها وذب حركته بيها ورم وجهه تورم

عمشه : ههههههه دخيلك سيدحمدالله اي كمل

عبيد : شنو يمه فرحانه بكسرته

عمشه : انت اسكت اعرفن بيك عبن خي حرمتك وتراجف عليه

عبيد : وابن خالتي

عمشه : لا تخليني اسبك واسب خالتك

وانت الثاني چا شنهي اسحب جلماتك گوه

ذبهن كلهن

فلاح : يمه البت طلعت بطرك ملابسها لاخوتها مدمايه وفضحته واجوي شبعو جاسم كتل وصار علج بحلك عشيرته كلها مو رجال ومايكدر ياخذ مرته وخالتي ماتحملت لان اخوتها سته ولزمو جاسم شوي ويموت بيدهم سحلو من البيت بنص الشارع شبعو كتل انجلطت خالتي من الهبطه وربج عدت على خير بس بعدها بفرشتها وبعد كم يوم اهل مرته راح يفصلوه وعفناهم مهجوم بيتهم وكلها تعير بجاسم انت مو زلمه وانگلب العرس عزه يايمه

خوله : بلجهه الثانيه واكفه خوله تسمع كلام اخوتها وحاطه ايدها على خصرها وكالت بصوت هادئ هين والجاي اقوه يولد عمشه

يتبع

#الابواب_الخمس

البارت السادس

للكاتبه Reem

بطلت الفرح ظليت أبيع هموم

واسعار الهموم مسجله بخدي

الرايد حزن خلي يجي ياخذ دين

والرايد فرح يعذرني ماعندي💔

خوله : بلجهه الثانيه واكفه خوله تسمع كلام اخوتها وحاطه ايدها على خصرها وكالت بصوت هادئ هين والجاي اقوه يولد عمشه

عمشه : تعالي يمه اسمعي شجرى وافرحي

خوله : وليش افرح شعليه اني

عبيد : شنو يمه خوله شعليها

عمشه : اسگت انت

عبيد : ليش اسكت وخوله شجابها على جاسم

خوله : مو كلشي خوله خوله جوزو مني مكافي الصار طبت للغرفه وركعت الباب

عبيد : شفتيها لسانها شلون طولان خلي اروح اطيح حظها حتى متعيدها

عمشه : خايب بسك منها وحير بمريتك شنهي مااجت وياك

عبيد : لا متجي بقت هي وساهره امهن وضعها موزين والبيت مگلوب شلون ارجعها ويمكن ارتاح يومين وارجع الهم عيب نعوفهم اني وجوحي

عمشه : اي يمه عيب واكفه تضل هنا والوادم هناك تذابح انه اريدنك تگابلهم وتگعد ومن ترد سالم تسولفلي گلشي عبن هذا خي مرتك عضيدك توكفله وكت الطيحه وتهز بيدها

جوحي : يمه جنج تحجيها من وره خشمج

عمشه : چا شتريد اتحزم حزام يبن غنيه

جوحي : شنو يمه ابن غنيه

عمشه : چا انه اربي واتعب وظهيري يتكسر وكضيتهه بلعتيج واكل اليابس عبن زلامتي تگبر واشد بيهم ظهري واكولن ياعمشه خمس ويلاد (اولاد) عندج يسدون الشمس تالي يامن تعب يامن شگه وغنيه على الحاضر لگت سدو زرف الحايط موش الشمس لا والحظ وتضرب ايد بأيد

جوحي : شمسوين يايمه غير ابن خالتنا واكع بضيقه والكرايب كلها حاضره قابل راح ننطي فلوس هو بس نبقى كم يوم وياهم كماله عدد ومن تفض نرجع

عمشه : اعرفنك يبن بطني ماتنطي فلس لون اخيك طايح بشده موش جاسم

تموت على الفلس اكثر من رويحتك

جوحي : تعبي يمه ما ماخذ من احد

عمشه : وانت يمه صمد ويه اخوتك

صمد : لا يمه مااروح بعد اخوتي كافين اني اطلع وياج للشغل وفلاح لشغله

عمشه : بيهه الخير عبن اثنين على گلبي واثنين بلخيس

عبيد : رحمه الله والديج يمه اصعد ارتاح تعبان

عمشه : روح يمه حكك مكسور ظهرك على جويسم

عبيد : استغفر الله اعرف بروحي مراح اخلص اروح انخمد

جوحي : واني هم تعبان

عمشه : حرام الربى بيكم ودارت وجهه منهم

بديعه : اجت من المطبخ وكالت للولد تتعشون عبيد وجوحي هزو راسهم بلا والباقين كالو ناكل

كعدو بلكاع والصينيه انحطت

بديعه : خوله خوله

خوله : هاااا شتردين

بديعه : تعاي تعشي

خوله : مااريد

عمشه : يايمه تضلين على لحم بطن تعاي أكلي شوي ويانه على الواهس

خوله : كتلكم مااريد ورجعت للغرفه

صمد : حقه عبيد يضوج من تصرفاتها على شنو متشمخره ومتباوع بوجوهنا

عمشه : هدها بضميها ولا تكربون عليهه البت مكسوره ومتكدره البيها كافيها يايمه اگل وهدهه لا گل شوي واحد منكم حاط عقله وياهه

صمد : هاي هم نجم ولازم منحجي ونسكت

عمشه : يبوو على ضيمج يعمشه چا شنهي اهج من الديره كلها عبن تركدون

صمد : سكتت يمه بس لتعيطين

ذكرى : جنت اسمع كلامهم وساكته عدلت نفسي حتى اكدر اكل واني مديت ايدي وبعدها اللكمه بيدي اندار عليه صمد وكال

صمد : ماخلصت نومتج تضلين هنا نايمه لشوكت

ذكرى : باجر اصعد لغرفتي صرت احسن

صمد : اي كافي مبطوحه هنا والرايح والجاي كدامه

عمشه : شمالك يصمد لاتنسى ذوله خوتك حسبت خوتهه لاتغنتب

صمد : ميخالف يمه كافي صارلها ١٠ ايام نايمه قابل بس هي جابت كلها النسوان مثلها كلها يومين وتكوم وهاي مو اول بطن حتى نكول متعرف

ذكرى : ياعيني كتلك باجر اصعد هذا هو

بس لتصيح

كوه بلعت اللكمه استحيت لان كدام فلاح يحجي بله بدعه وعمتي عادي بس فلاح استحي منه واعرف لان تحاجه ويه امه راح يذب حركته بيه باوعت عليه بدعه حستني اختنكت كالت

بديعه : انطيني يونس اوكله

ذكرى : اخذي انطيتها يونس واني بحضني ناي

كلها سكتت بس كل واحد براسه الف حسبه وحسبه

ثاني يوم لميت الفراش ويه بدعه وصعدت لغرفتي فرشت بلكاع ليونس والكاروك مالته صار لناي

نظفت الغرفه واندكت الباب

تفضل

خوله : نايمه

ذكرى : لا كاعده تعاي

خوله : اجيت اشوف ناي

ذكرى : فدوة للعمه الحنينه تعالي شوفيها تردين تشيليها

خوله : هااا صغيره بعدها اخاف توكع من ايدي

ذكرى : اني يمج متوكع كعدت على الجربايه

شلت ناي مكمطه وحطيتها بحضنها اباوع بعيون خوله الحنيه شالتها بهدوء وباستها ومررت ايدها على خد ناي وتسولف بكل هدوء واني اسمعها

انتي هم مسكينه مثلي ويجي يوم وتنظلمين

ذكرى : اسم الله ليش هيج تكولين خوله شجاج

تسولف وعيونها على ناي وكالت

خوله : بهذا البيت يادايس يامديوس

لو تصيرين شيطان وتخلصين عمرج بمكايد وخطط ومصايب لا تضلين مكفخه ومتحجين اي شى

ذكرى : اعرف الصار بيج مو هين بس مو معناه هيج تتشائمين

خوله : ليش انتي من كل عقلج بعدج عندج امل بهذا البيت لو عميه انتي لو تسوين نفسج عميه هنا ناس تاكل بناس حتى اختهم الوحيده ما رحموها

ذكرى : ياعيني مو كتلج غير علمودج هيج تصرفو عبالهم السيد يطيبج همه لهسه محد يعرف شصار هناك بيج ولو يعرفون

جان

خوله : جان شنو هااا الرجال ومات شيسون يرحون يغسلون كبره بنفط هو عايش وشمروني يمه ومحد دك بابي وكال وينها الحيوانه الي انطيناها الك تردين هسه من يعرفون شسوه وهو ميت يسوون شى والله انتي مرات عليج فهاوه تشل الروح

ذكرى : اي والله صدك فاهيه ومابيه خير

خوله : عبالج اكول حشاج لا والله ولا اكولها انتي صدك مابيج خير اكو وحده عايشه مدلله بيت ابوها وحيدت اهلها تجي بيت العتاكه

ذكرى : قسمتي بعد

خوله : مو قسمه قلة عقل وسحوره صالحه

ذكرى : تدرين انتي

خوله : اثنين بلبيت كلشي يدرن اني وبدعه

ذكرى : هههه اي والله تباوعن بعيونجن ومتحجن بس كلشي تعرفن

خوله : واعرف جنتي تحبين نجم الغبي الضيعج من ايده

ذكرى : جمد دمي من كالت هذا الشى وارتبكت شبيج تخبلتي

خوله : لتخافين محد يعرف لان اكيد راح تسأليني مثله احد يعرف

ذكرى : مفهمت

خوله : نجم يحبج ومو حب عادي انتي حب عمره بس غبائه خلاه يسكت ويضيعج من ايده

ذكرى : خفت من كلامها وكمت امتمت بلحجي

عفيه خوله لتحجين هيج لحد يسمع ويصدك نجم تره اخويه حاله حال كل اخوتج واني مرت صمد واحبه

هاااج وانطتني ناي اخذتها بلكاروك وكوه اجر النفس من كلامها هاي اخاف تفقد بيوم وتحجي

رجعت كعدت يمها وكتلها بهدوء خوله حبيبتي انتي متوهمه ونجم اخويه وماكو اي شى بينا

خوله : الكدامج مو طفله لتنسين اني اكبر منج ومنه وجنت اشوفه شلون ينتظرج باب البيت وانتي تمرين من يمنا وكل ميشوفج يطب للبيت يكمز من الفرحه حتى مره سمعته يكول لصديقه بس تكمل سادس اخطبها عدا الدفاتر مالته التارسها اشعار وگلوب وحرفج وحرفه

ذكرى : دمعت عيني لا ارادياً اعرف غلط بس اكو امور الگلب هو متحكم بيها

خوله : غلطتي من وافقتي على صمد جان المفروض تهوسين تگلبين الدنيا ومتقبلين اكو وحده تتزوج اخو حبيبها وتعيش وياه بنفس البيت مو كتلج فاهيه وبتج بس لا تطلع عليج ومتعرف تاخذ حقها وتنداس بهذا المهجوم

ذكرى : كاافي اترجاج بروح ابوج انسي كلشي اني هسه احب صمد ونجم اخويه افتهمتي اخوووووويه

خوله : باوعت على ذكرى وكالت لتخافين سرج بير

ذكرى : ماعندي سر والگلتي كله مصاير

خوله : بكيفج

كامت وطلعت من الغرفه واني كمت اخماس بأسداس ياربي دخيلك هاي اخاف تسويلي كارثه وتحجي لصمد كمت اروح واجي مثل المخبله انشلشت انفتحت الباب وطب صمد فزيت من دخوله

صمد : شبيج فزيتي

ذكرى : شعجب رجعت من وكت

صمد : جبنه شليف ملابس مال باله

انزلي شوفيلج جم قطعه للجهال والج حتى متكولين مجابلي وضاله تاخذين غراض من امج

ذكرى : هزيت راسي باوعت على الجهال نايمين نزلت ولكيت عمشه كاعده بلكاع ومطشره الملابس وتگلب بيهن وبديعه تلكط بلملابس

عمشه : اكعدي هواي ثياب الج وللصغار عبن گله جديد اخذن الزينات وعيفن المركعات لبنات غنيه

بديعه : اخاف من يرجعن يكومن يحجن

عمشه :يطبهن عرج چا گل مره ياخذن الزين ويعيفن الشين الجن وانتن الخوثات تسكتن

ميلي مني غاد اريدن اروح انشد على خوله

يمه خوله تعالي ليه

خوله : هاا يمه

ذكرى : كامت عيوني تتهزم من خوله وكأني مسويه مكسوره

عمشه : تعالي ليه يمه ثياب تلوك لطولج

خوله : خليها لجناينج مااريد

عمشه : يااا وانتي

خوله : عندي مااريد

عمشه : يمه خوله تعاي اگعدي يمي اجت خوله وكعدت بلكاع بصف عمشه

حبيبه شجرالج لا تاكلين ويانه لا تكعدين خلكج ضيج ومهمومه

خوله : من الراحه من السعاده ياام نجم

عمشه : شنهي يرضيج وانه ارضيج وروح ابيج الغالي السكن الگبور التردي

خوله : اريد اروح احف

عمشه : يااا فلك طرج شنهي الحفافه مو ليج بعدج يمه حديثه

خوله : ليش نسيتي اني ارمله مو بنيه

عمشه : والسنه مامرت على زلمتج

خوله : يازلمه هذا لخاطر الكعبه الي شمرتيني بحضنه وهو بكد ابويه لو الجان يضربني مثل الحمار حتى يريح نفسه بيه ويتمتع بعياطه وتوسلي بيه

عمشه : خايبه اسكتي قسمه وصارت شمدريني هيج يابنيتي

خوله : هاي مو قسمه الله هاي قسمتكم انتم تعرفين جناينج أذني شيسون هنا

المن ملفيتهن بلبيت شنو تكافئيهن لان اذن بنتج وسون سحر الها

عمشه : موش هنه يمه حلفن الف يمين موش هنه

خوله : كالو للحرامي احلف كال اجاني الفرج

مو هنه لعد منو ذني وتأشر على ذكرى وبدعه

ذني الرجل دجاجه ميحلن واثنينا نعرف شنو ذني بقيتي بس انتي اخاف انتي يمه

عمشه : لطمت على صدرها وكالت يااا تعزيت وتصخمتي يعمشه وحيدتج تذب البلا عليج تسودنتي انه اعرفن عگلج ما رد الاولي

خوله : اي عفيه عقلي مارجع الاولي جوزي مني انتي ولدج وخلوني بحالي

بديعه : على كيفج خوله مصار شى هسه على الحفافه اني احفلج

عمشه : الدچ واترس حلگچ ضروس چاانه اتهاوش وياهه ومااريدنهه تحف وانتي تعوجين فجج انه احفلج يخوله والغسل كوون

بديعه : ياعمه هم خطيه شوفيها وجهه متروس شعر وحواجبها عمرها محافه خلي شوي تحس براحه وتغيير

عمشه : انه عبن احبنج ومااريد يتكدر خاطرج حفي لا تضوجين يمه

خوله : راح اروح لامل اخذها واروح لام اسماعيل

عمشه : مو هاي بدعه تحفلج هنا واطلع مجهج كيمر السده

خوله : لا اريد عند ام اسماعيل

عمشه : انه مااكسر بخاطرج بس لا تنسين نفسج وتسولفين ام اسماعيل ماتعرف شى عنج

خوله : هااا شعجب انتن مو وحده بحلك الثانيه و٢٤ ساعه تحشن بلناس

عمشه : چا احش بلوادم موش بوحيدتي

خوله : لتخافين مااحجي اتزوجت ومات رجلي وخلصنا

ذكرى : مدنجه على الملابس حتى مااريد ارفع راسي واشوفها مدري شصار بيه لهسه الرجفه تسري بدمي

خوله : شتكولين ذكرى شو ساكته

ذكرى : رفعت راسي وكتلها بكيفكم

خوله : خوش اني راح ابدل واخذ امل واروح

عمشه : لا تتأخرين يمه اخوتج مايرضون

خوله : عود كوليلهم نايمه همه اصلاً يسألون عليه حتى يعرفون طالعه لو مو طالعه

عمشه : خايبه موش لسان تفكه صايره

خوله : تربيتج يايمه

بدلت خوله وطلعت تتمشى بلشارع على كيفها وصافنه على حالها قبل سنه ونص جانت طالبه وزاهيه الدنيا الها وهسه ارمله وملعوب طوبه بيها راحت لامل واخذتها وهنه يمشن اكو قطعه كاع تنبني بنفس الفرع بنهايته يسولفن وما منتبهات جان يشمرون وصاخه مال بناء من السطح للكاع وكله اتراب اطيار عليهن وتخبلت خوله لان توصخت وكامت تعيط

خوله وجع متشوفون وبقت تنفض بملابسها هي وامل

امل : امشي نروح والله متقصدين

خوله : ناس زباله لو ما زباله ميشمرون هيج جان تسمع صوت وراها واحد يگلها اشكرج

اندارت وصار بوجهه شاب طويل اسمراني معاني وجهه مرتبه ولابس لبس عماله

عاطت بيه خوله

بله متستحون دنيا عصر مكلتو احد يفوت ويتوصخ

اكرم : اسف اختي مجان قصدي قبل شويه مديت راسي ملكيت احد وعبالي الشارع بعده فارغ

خوله : اي مو هو الشارع مالتكم لازم كل الوكت فارغ

امل : كافي خوله امشي نروح

اكرم : اعتذرت شتردين اسوي

خوله : مااريد شى افتح عينك وركز زين

اكرم : اعتبري صار اكو شى ثاني بصوت عالي عبالك واحد يريد يضرب

خوله : امشي ناس همج

مشت خوله وراحت للحفافه وحفت الها وام اسماعيل اكلتها اكل بالاسئله بالاخير طك گلبها لخوله وكالت الها

خاله رحمه لموتاج جوزي مني تره اني واصله لخشمي واذا اعطس تطلع روحي شتردين تعرفين ذيج عمشه واخذي التردي منها اني كلشي مااعرف

ام اسماعيل : هاا شبيج بنيتي غير اطمن عليج واعرف شصار بيج ماصار امج بكلشي تحجي بس بشغلتج تسكت ليش ماادري

خوله : اول مره تسوي شغله بيها حظ

ام اسماعيل : يااا هيج يخوله ماتردين اعرف شبيج مابيج وليش ترملتي

خوله : رجال تزوجته والله اخذه قابل اسأل الله ليش اخذته حتى اجاوب ام اسماعيل اخاف تسألني

ام اسماعيل : يمه بنيات هذا الوكت ماينوخذ منجن احجايه تبرد الگلب

امل : خاله كملي عفيه تأخرنا

خوله : هسه تسكت ومتحجي بعد وتكملني مو خاله

ام اسماعيل : عوجت حلكها ومعجبها وضلت تحف

طلعت خوله ورجعت لنفس الطريق جان اكرم واكف بلباب مغسل ومبدل واكف على الانقاض يباوع على خوله وامل وخوله مهتمت بلعكس لو بيدها تشرب من دمه

امل : شفتي شلون يباوع

خوله : خلي يولي الوصخ هو هاي اني شكو واحد زايعته الكاع جايني ويجوز واكف يباوع على الرايح والجاي مو شرط علينا شيلتيني ذنبه

امل : يجوز

ذكرى : رجعت ذكرى وشكلها ارتب واحلى من قبل هي سمره وعيونها كبار سود وطويله ومن حفت بينت عيونها وملامح وجهه شفتها وكتلها نعيماً اني وبدعه ابتسمت ودخلت للغرفه

بديعه : وضعج معاجبني بت ام فوزي شصاير احجي

ذكرى : مصاير شى سلامتج

بديعه : حالج مگلوب وتتهزمين من خوله حجت شى ضوجج

ذكرى : لا لا ماكو

بديعه : يجي يوم وتحجين اعوفج براحتج واشوف بنتي وينها

ذكرى : كعد تلعب ويه يونس جوه الدرج

بديعه : اشوفهم واجيج

ذكرى : وكفت وغمضت عيني اريد اخذ نفس واهدا بين عليه التوتر واني واكفه وجان يطب نجم وتفاجأ بيه لان مغمضه

ومباشره كال بيج شى فتحت عيونه وكتله لا مابيه

نجم : ليش وحدج وين بدعه وامي

ذكرى : بدعه راحت للجهال تشوفهم وامك طلعت للجوارين

هاااج ومد ايده وانطاني علاكه بيها مخضر خيار وطماطه وبتيته اخذتهم منه وراد يطلع وتجرأت وكتله

نجم اريد احجي وياك

نجم : رجع بأتجاهي وكال

محتاجه شى

ذكرى : اي لازم احجي وياك ضروري

نجم : اسمعج

ذكرى : لا مو هسه اخاف بدعه تجي

نجم : تعالي بلهول خلي افهم

ذكرى : اخاف احد يسمع

نجم : هيج الموضوع مهم

ذكرى : اي

نجم : بليل مو ينامون اطلعي انتظرج هنا بلمطبخ

ذكرى : ماشي

ردت بكل الطرق افهمه جنت خايفه من خوله لا على ساعه تتخبل وتحجي

انتظرت اليوم يخلص بطلعان الروح

وكملت العشا وكل واحد راح لغرفته وصمد نام نزلت على كيفي امشي بأطراف اصابعي اخاف احد يحس مديت راسي واباوع على البيبان الكل مسدوده بابها رفعت راسي الساعه بال ١ بليل دخلت للمطبخ لكيت نجم واكف وظهره على السنك ومنتظرني

نجم : تعالي هياتني

ذكرى : تأخرت عليك

نجم : والله مو تأخرتي ضل بالي شبيج

محتاجه شى صمد مسويلج شى

ذكرى : وكفت گباله افرك بيدي خجلانه حيل ومحتاره شون افتح الموضوع

نجم : احجي داسمعج ليش هيج ترجفين

ذكرى : خوله

نجم : شبيهه

ذكرى : كالتلي ودنجت مكدرت اكمل

نجم : شكالت ليش سگتي

ذكرى : اني خايفه منها

نجم : غير افهم شكالت وخفتي منها

ذكرى : كالت عود انت جنت جنت

نجم : استغفر الله شجنت

ذكرى : طلعت من حلكي بأحرف كوه تنطق وكلت تحبني

حسيت وجهه مباشره انگلب واتوتر اكثر مني

راح بأتجاه باب المطبخ ورجع

نجم : وانتي شكلتي الها

ذكرى : كتلها ماكو هيج شى نجم اخويه

نجم : وبعد

ذكرى : اني خايفه لتحجي كدام احد ويصدكوها

نجم : محد يصدكها لتخافين

ذكرى : شون محد يصدك ومااخاف كلمة منها صمد يذبحني

نجم : ليش اكو واحد يكدر يلزم شعره منج

ذكرى : مو بكيفك ولا بكيف احد هذا رجلي واخوك الجبير ومحد يلومه اذا طلعت خوله هيج تهمه

نجم : اني احجي ويه خوله روحي نامي وارتاحي

ذكرى : حلها فدوة ميته خوف منها

نجم : احلها ليضل بالج

ذكرى : مشيت داطلع جان يكول

نجم : يمكن الراح اكوله حرام عليه وميصير بس هاي اول واخر مره تسمعي مني ومن اطلعين من هذا الباب تنسي تماما

ذكرى : شنو

نجم : اني اول ماشفتج حبيتج وگلبي انفتح الج صرتي اعز من روحي كمت من اسمع اسمج على ساعه يطلع گلبي من ضلوعي وردتج وروح ابويه ردتج حلالي وگلت تكملين الاعداديه ادك بابج واخطبج بس ملحكت لكيت اخويه خاطبج ومكدرت اوكف گلشي وخاصه من اجت امي وكالت البنيه موافقه تمنيت يكولون مقبلت رفضت اقلها احس ترديني ومجنت متوهم غلط وجان اسوي المستحيل لحد متصيرين مرتي انكسر حيلي وگلبي من عرفت بيج راضيه بأخويه مثل واحد زنجلوه من فوك ليجوه وشمروه بلشط وكالوله انت حير بروحك وطلع نفسك

جنت اشوف عيونج ادور عليه وابتسامتج تضوي يومي من تشوفيني وتبتسمين گلت اكيد بداخلها مثل البداخلي وبنيت امال واحلام وكلت هاي هيه حبتني مثل ماحبيتها

ومن وافقتي على صمد جنج وقعتي على اعدامي كلت جنت احلم والبنيه مو يمي واني واهم نفسي وسكتت لان لو عندج ولو ذره مشاعر اليه جان مقبلتي بأخويه

قبولج بيه اكبر رد بأن انتي مترديني

ذكرى : دمعت عيني شگول وشحجي لان ميفيد الحجي وبقيت ساكته اسمع اله

نجم : ومن صرتي مرت اخويه من يومها حلفت ماانظرلج بلحرام وحالج حال خوله واخاف عليج مثلها وتحرمين عليه هم مثلها اني كتلج هذا الحجي اخاف بگلبج شى او سؤال ليش جنت اوكف بلباب وانتظرج لان حبيتج بوكتها وردتج الي ملكي وماصار النصيب

ذكرى : رفعت راسي وكتله الجنت تحسه اني نفسك احسه ومغلطت بأحساسك ونفس الحلمت بيه اني حلمت ومن اجت امك تخطبني عبالي انت وقبلت وبعدين يله عرفت اخوك الجاي يخطبني مو انت ومكدرت اعترض لان وافقت بالاول ضرب على الحايط وصار عصبي

نجم : اكو وحده يخطبوها متعرف شسم الخاطبها

ذكرى : صوتك عفيه ليسمعوك هذا شى راح وانتهى ومثل متكول هسه اني مثل خوله وانت هم مثل فوزي انسى كل الصار عفيه وخلي خوله هم تنسى هسه اني احب صمد وعندي ولد وبنيه منه وعايشه والحمدلله لتخربون حياتي اندار وذب مي على راسه واندار والمي ينكط عليه وكاال

نجم : روحي ذكرى ليضل بالج ومثل مكتلج من اطلعين من باب المطبخ تنسين كلشي سمعتي

ذكرى : وانت هم انسى الي سمعته مني

جان نحس احد واكف باب المطبخ الداخلي مو الي يطلع على الشارع الثاني داخل البيت اندارينا اثنينا لكينا خوله واكفه وحافيه مبتسمه وكالت

خوله : شدسوون

اني بلحظتها قطره دم ماضل بيه يمكن شويه وانجلط

نجم : تعالي خوله اريدج

خوله : اجيت اشرب مي شتريد مني

نجم : وليش حافيه

خوله : اريد بروده وردت امشي حافيه حتى احس بروده الكاع ليش بيها شى

نجم : مو استغربت متمشين حافيه مايوم شفتج هيج

خوله : تحاسبني لان حافيه ومتحاسب نفسك انت ومرت اخوك وحدكم ساعه وحده بليل بلمطبخ وتتبسبسون

ذكرى : اني صاعده طلعت اركض جان تلزمني من ايدي وكفتني تقربت مني وكالت

خوله : روحي نامي بحضن رجلج واستري على نفسج

ذكرى : فهمتي غلط والله

نجم : روحي ذكرى اني احجي ويه خوله

خوله : لتعيديها وتتختلين ويه حماج وغمزت لذكرى

ذكرى : صعدت اركض واسمي وارجف مباشره دخلت للغرفه نمت بفراشي بصف صمد بقيت الوب من الخوف

خوله : تريد شى يابن ابويه

نجم : ليش حاجيه ويه ذكرى بموضوعي

خوله : اجت شكتلك

نجم : تره الي بالج ماله وجود

خوله : مبين من وكفتكم هسه

نجم : اجت تكولي احجي وياج اخاف بالج شى موزين تره والله هي مرت اخويه وحالها حالج

تقربت خوله من نجم وكالت

يم العقرب لا تقرب يم الحيّه افرش ونام

نجم : شنو قصدج

خوله : قصدي لتخاف مني خاف من نسوان اخوتك اذا درن شراح يسوون

نجم : وشمدريهن

خوله : لتعيدون هاي وكفتكم حتى ليعرفن هنه هسه بلبصره وخالي الجو الكم المره الجايه صالحه تشتمكم شم دير بالك لتوكع بيدهن

نجم : اول مره اوكف وداعتج وداعت عمشه والبنيه اجت تكولي احجي وياج حتى تنسين الموضوع

خوله : اكو شغلات متنسى ولا راح تنسي روح نام والله يستر عليك وعليها

طلعت خوله ورجعت للغرفه وضل نجم دايخ منا كلام ذكرى ومنا خوله وقرر لازم يسوي شى حتى يبعد الشك عنه وعن ذكرى

ذكرى : ضليت اربعة ايام حتى معدتي كالبه من الخوف والكل انتبهه عليه وضعي مو طبيعي عبيد وجوحي راحو للبصره من قبل ايام والبيت بقه بيه اني وصمد وفلاح وبدعه وعمتي وخوله ونجم من يوم ماحجيت وياه يجي تالي الليل بس ينام

رغم حالي وخوفي بس جنت مرتاحه لان لا صالحه ولا ساهره

وخوله تبقى بلغرفه وادز على ناي يمها تلاعبها ساعه وادزها

اجت امل واخذتها لسوك بغداد الجديده وعمشه سكتت وماحجت هم اخوتها ونسوانهم ماكو محد يسأل عنها وهم حتى شويه تغير جو

خوله : طلعت وجنت محتاجه افتر واشوف شكو بلسوك صار سنتين ما واصله تمشينا والهوا طيب وصلنا ليم السينما مال بغداد الجديده

واني امشي واباوع على الناس والشارع امل ضربتني بيدي

هاا شكوو

امل : شوفي منو

باوعت واشوف نفس الولد القبل مده تحاجيت وياه

مشينا من يمه جان يكول السلام عليكم

امل وكفت واضطريت اوكف

ومجاوبته بس امل ردت وعليكم السلام

اكرم : خوش صدفه حبيت اعتذر منج ذاك اليوم تعصبت وعليت صوتي

امل : لا عادي تصير

اكرم : مدااسمع صوت الاخت مبين بعدها زعلانه

خوله : باوعت عليه وزهكانه وكتله مصار شى من رخصتك يله امل وجريتها جان يوكف گبالي وكال

اكرم : راح اصير جيرانكم ومااحب جيراني ياخذ نضره محلوه عليه اقبلي اعتذاري واذا تحبون نشرب شربت عازمكم عربون اعتذار

خوله : مااكعد ويه غريب

اكرم : حقج خوله تضوجين

خوله : منين تعرف اسمي

اكرم : لتخنزرين بعيونج ذاك اليوم صديقتج صاحت بأسمج وضل بالي

خوله : جريت نفس ضايجه

اكرم : ضوجتج مو

خوله : الصراحه اي

اكرم : حلوة صراحتج اخذي راحتج اني اكرم اذا متعرفين اسمي واكيد سميتيني اسم مزعج لان ضوجتج ذيج المره غيري الله عليج لان اكيد يلعب النفس

وابتسم خوله لا ارادياً ابتسمت

اكرم : الحمدللة واخيراً شفت سنونج

خوله :يله امل من رخصتك ياجارنا

وعافو ومشو

امل : والله جنه الولد معجب

خوله : باع هاي هي مال معجب بهذا حالي

امل : والله خوش شاب واضحوكي ودمه مبين خفيف

خوله : امشي ام دم الخفيف

كملو فرتهم ومن رجعو شافو اكرم واكف وحاط ايده ومتكتف ومنتظرهم وبس شافهم ابتسم وخوله دنكت مبتسمه ومشت

مر اسبوع ورجعت صالحه وعبيد وساهره وجوحي والبيت انگلب

عمشه : كاعده بلحوش تفرغ بلكواني مال سكراب وعتيك وتفصل ناس عن ناس جان يطبون لا هله من جاينا غدي كون الجاي يرد ونجفي شره

صالحه : هاي علينا

عمشه : شنهي انه جايبه طاريج

عبيد : هله يمه وباس راسها وجوحي هم باس راسها

عمشه : عمت عيني على ولدي يارايحين يارادين من البصره لبغداد النسوان كولبت بيهم وتسرسح من مجان لمجان

ساهره : ياعمه جنا نلعب قابل ليش مصيبتنا هينه مكان متسألين علينا وشلونه واختج شحالها واخويه وطلابته كل همج ولدج

عمشه : چا انه خلفت وتعبت لامكم وطلايبكم اخيج موش زلمه وليداتي شلهم بهاي الطلابه

صالحه : اخويه رجال وطالع من ظهر رجال ومااقبل احد يحجي عليه

عمشه : انه شلي دخل يابت غنيه مريته الجديده فضحته يله يكبر ويتناسى وكرت عين امج بولدها

صالحه : مبينه متشمته وفرحانه بلصار بينا

عبيد : ادخلن وكافي سوالف بلحوش الناس كلها راح تسمعكم

صالحه : اوكف عبيد خلي افهم عمتي ليش هيج فرحانه بكسرت اخويه ومرض امي

عمشه : اخذ مريتك يمه عندي شغيلات مااريدن ادوخ راسي عبن هاي السوالف عيب تسولف لايسمعون الوادم ابن اختي موش زلمه

ساهره :متسمع امك شو ساكت

جوحي : دايخ من الطريق امشي ادخلي ابنج نايم بحضني طول الطريق وتعبني

ادخلي وبعدين سولفي

عمشه : ادخلن يمه البيت يبجي عليجن مشو يدخلون وجان تكول عمشه والغسل كون رديتن لا هله

صالحه : سمعناج عمه

عمشه : اعرفن اذانجن يمي وهذا الزين

ذكرى : رجعن من وكت والوجوه تجدح نار سلمنا عليهن وهنه كوه ردن الجواب وحتى مسألنا شصار بسالفه جاسم خايفات لا يذبن سمهن بينا

بعد يومين كاعدين على الغدا وسألت عمشه والعرفناه جاسم راح يطلك مرته وفاصليهم ذهبها ومهرها وفلوس فوكاها

ومنطيهم مهله اسبوعين يدبرون مهرها والفلوس

عمشه من الفرحه مكدرت تكتمها وضلت بس تضحك وذني متحملن عافن الاكل وكامن وجانت خوله تباوع على امه وتبتسم ابتسامه خفيفه

عدت على جيتهن ٤ ايام وكالو راح نرجع للبصره لان غنيه تعبانه حيل وجاسم هاج من البيت ويدورون عليه مختفي كلنا اني وبدعه همزين بلكت هلمره صدك شهر يروحن ميرجعن

ثاني يوم گبت العيطه جنت ارضع بناي ويونس يلعب يمي كمت بسرعه شلت ناي ونزلت اشوف شكو لان الصوت عالي وعياط قوي لكيت بدعه بيدها العجينه وصافنه مثلي على عياط ساهره وجوحي وخوله وعمشه

جوحي : اذا مطلعت فلوسي وتراب ابويه احرك البيت عليكم

خوله : واني شعليه مو عيب عليك تتهمني وشمدريني عندك فلوس

ساهره :اني شفتج بعيني البارحه طلعتي من غرفتي وسألتج شسوين كلتي ادور على مرتضى اول تالي تسألين عليه هو انتي اذا شفتي مدمه متسألي شبيك تموتين من ابني وجهال صالحه تحبين جهال ذني وتأشر على ذكرى وبدعه

جوحي : اني مالي دخل بسوالفجن اريد فلوس واله الزمج هسه واحركج ومايرفلي جفن گله ولا تعبي لا يوكف بعيني اخت ولا اخ ولكم فلوووووسي هاي اذبح واصلخ اذا ماطلعن اليوم

عمشه : يمه جوحي تهدى بلرحمن اخيتك ماتسويها مايوم مدت ايدها لدينار فليساتي يمها الصندقجه كلها جدامها وماتمد ايدهه

جوحي : منو اخذها تكول ساهره شافتها البارحه بلغرفه احجي لج وجرها من شعرها حيل ويضرب على راسها وهو اطول منها صايره كتكوت بيده

خوله : ااااخ عوفني مو اني كتلك مو اني وليش متكول مرتك

ساهره : انجبي قابل اني حراميه مثلج انتي وحده مخبله ومو طبيعيه بيج جن ويجوز تسوين هيج حتى تأذينا

خوله : اي انتي حراميه عوف شعري تعيط وتحجي بصوت يهز البيت كله

متكولي شجابهن من البصره لهنا مو على اساس شهر يبقن شرجعهن وليش رجعن كم يوم وراح يرحن مره ثانيه حتى يبوكنك ويذبنها براسي وينطن تعبك وفليساتك لاخوهن ويطلعنه من عاره ومصيبته

وبهيج راضن اخوهن وأذني وقشمرن عليك وضل انت تلاطم راح تعب عمرك گلي اني شمعرفني وين فلوسك بيوم ضاع دينار منك سنين تضم فلوسك ماضاع منهن شى ومنو من عدنا يعرف عندك فلوس وين ضامهن ليش هسه وبهذا الوكت انباكن وبمصيبة اخوهن ولك جوحي حط الله بين عينك مرتك بايكتك ورايحه للبصره تنطيهن لاخوهن وذبت بلاها عليه

صالحه : لا تصدكها هاي وحده خبيثه حاقده مبين هيه واذا مو خوله نفتش كل الكناتير والغراض لازم وحده بيهن اخذت الفلوس

عمشه : والغسل على هلحلك تراجفين عبن تهمو ساهره وتردين تلبسيها بوحيدتي وجنايني واطلعن منها انتي واخيتج لو تموتن ماتفلتن هاي النوبه

يمه انه اكولن حجي خوله گله صچ اخيتك ماتمد ايدها ومريتك واهلها واكعين بضيج وماكو غير فليساتك تسد بيهن ضيجتهم عاف جوحي شعر خوله وجر ساهره من ايدها

ساهره : والقران مماخذه فلس ليش اني لو اريد قابل متنطيني

خوله : لا مينطيج وتدرين كلش زين مينطي دينار وشكد عزيزات عليه اعز من ابنه لهذا بكتيهن دور بغراضها لازم بيهن فلوس

ركض جوحي ليفوك بلعلاليك مالتهن المفروض ياخذوهن ويرحن للبصره طشرهن كلهن وبأخر علاكه لكه جزء من فلوسه ونزل يركض لزم ساهره وسحلها من شعرها وهي مثل الطلي بيده ترافس وجاب واير بلكاع بصف الباب ودك ضرب ويعيط وين اخذتي فلوسي بت الگلب بت الزمال طلعيهن الباقي وينه

جيت عبيد وصالحه عليه حتى يعوفها ويوخرون منها وهو ثور وهايج بيد لازم شعرها وبيد الثانيه يضرب بلواير ملخها

واني بدعه ردنا ندخل جان اتأشر عمشه وفتحت عيونها علينا يعني لتدخلن

كوه فكون منها ودفرها على خاصرتها وكال لعبيد تاخذها وتولي لاهلها وابنها يضل هنا وماتشوفه اله ترجع فلوسي

ساهره تعيط وتلطم على وجهه والله مو اني وداعت ابني مو اني اكمعه اذا اخذتهم ولك هاي اختك السحاره

جوحي : اسمعي لج لحظه متضلين هنا اذا مارجعت فلوسي تحلمين تشوفين ابنج شوف عبيد تاخذها هسه بطرك ملابسها حتى هدوم ماالها ومن ترجع فلوسي كلها ولا دينار نقص يله اشوفها ابنها وهذا البيت يحرم عليج افتهمتي وضربها برجله على ظهرها

كام وسحب مرتضى الجان يبجي وهو يشوف امه تنضرب

ذكرى : البيت انگلب بلحظه طلعو ساهره بطرك ملابسها وصالحه تعيط اله اخذ حقها وسحبهم عبيد وطلعو حتى محجه بعد ويه جوحي لان حيل صاير بارود وجوحي يكسر بغراض غرفته نسمع بس الصوت كل هذا وخوله راحت جابت رمان وكعدت تاكل ولا عبالك قبل شويه جان انگتلت

تقربت مني بدعه وكالت

بديعه : السره الجاي عليمن

ذكرى : هااا ياسره حجيت بصوت مسموع جان تباوع خوله علينا وتاكل وتبتسم

بدعه مباشره كمزت وكالت رايحه اكمل العجين

توني اصعد اول بايه جان تندك الباب حيل بدعه بلمطبخ ركضت فتحته جان تندفر الباب ويطب جاسم ويعيط ولج خووووووووله

يتبع ......

صـباح الـ🥀ـورد حبايب اذا امكن متابعه لحساب الكاتبه المبدعة مريم السعدي

user50497755

#الابواب_الخمس

البارت السابع

للكاتبه Reem

تبارينه الذمم و الحب طويناه ..

و شمرنه الذكريات حجار بالبير

ما دام النهر ضيك عبرناه

و كلمن خلي يذكر صاحبه بخير

صدك عدنه هدف بس ما وصلناه

مشي الحفاي نمشي اعله البسامير.

توني اصعد اول بايه جان تندك الباب حيل بدعه بلمطبخ ركضت فتحته جان تندفر الباب ويطب جاسم ويعيط ولج خووووووووله

ذكرى : نزلت اركض وعمشه طلعت من الغرفه وهو من اعصابه وسرعته ملحكنا عليه  مباشره لزم شعرها وكومها من الكاااع

خوله : عوفني حقير ااااااااااخ عوفننني الحكوني

جاسم : شسويتيلي احجي اني مابيه شى اجيت هنا يمكم كم يوم واسگطيت اني متإكد انتي مسويتلي شى 

كامت عمشه تدفع بيه واني شمرت ناي على بدعه وادفع بجاسم حتى يوخر منها بس هو رجال واقوى من عدنا وصاير اعصاب ومدنكدر نوخره منها وهو كطع شعرها ويعيط بكل علوو حسه شسويتيلي احجييييي

عمشه : طرگاعه تلفك كون  عيف خوله

من اشعل ابهاتك لا تكضها هيج

جاسم : اليوم مااعوفها اله افهم شسوت بيه

خوله : ماسويت شى انت واحد عار ومابيك حظ ومو رجال اني شنو

جاسم: اليوم اشوفج منو الرجال

ذكرى : جان يضربها على ظهرها وهي تدفه بيه خرمشته بوجهه وبهاي اللحظه طلع جوحي من غرفته ونزل يركض ودخلو صالحه وساهره وعبيد علينا شرجعهم مندري

جروه منها

وهي واكفه وتعيط

خوله : تستكوي عليه صاير رجال براسي ولك لو بيك خير مجان صرت فرجه لعشيرتك ومرتك فضحتك هي واخوتها بنص الشارع

واكلتلك كتله بعد سنين متنساها عدا الفضيحه يارجااااال

صالحه : فهمونا شكوو شبيك جاسم من راس الشارع شفناك ورجعنا نركض

عبيد : انت شلون تمد ايدك عليها وفوكاها مامراعي حرمه البيت

عمشه : يرادلك هلهوله يايمه چا زين من حجيت وطلعت الچلمه من فجك 

عبيد : يمه هذا وكته حتى تحجين عليه

عمشه : چاانه انتظر زلامي ترد هذا المصكوع وتنعل شيب الخلفه عبن كض اختكم  وتناوشها مكافخ وزلامي واكفه صافنين صفنة مطي مايحوده صاحبه

عبيد : دار وجهه من امه ومجاوبه وعاط بجاسم وكله شعندك ويه خوله

جاسم : اني اجيت قبل عرسي بكم يوم يمكم تذكرون وضليت ١٠ ايام اكل واشرب من ايدها متأكد هيه حطت شى الي اني اعرف نفسي كلشي مابيه شجاني وصرت هيج شجانييي

خوله : جذاب اني شعندي وياك حتى اوكلك واشربك من ايدي هو اني لروحي مااسوي اكل اسويلك الك

صالحه : والله عرفت الشغله مخاليه وانتي ساس البله بيها مثل سوايت قبل شويه من وكعتي ساهره بمصيبه وطلعتيها حراميه وبواكه واحنا متأكدين انتي بگتي جوحي وذبيتيها براسها

ساهره : عبالج اسكتلج وحق الامير علي اله اندمج ياخوله

عمشه : لا تلبگن لبك بنات غنيه چا امجن تخلف سگاطه وحده ايدهه اطول من التيل والثاني يسمونه زلمه وموش زلمه  يدك حدادي وتذبن بلاجن على خلفتي

ساهره : لدافعين عمه عنها هاي بتج تخبلت من يوم سالفه الجن ويجوز حتى رجلها هيه كتلته شمدرينا

جوحي : اني مو كتلج مطبين لهذا البيت شرجعج

ساهره : مراجعه عليك راجعه على اخويه نشوف اختك الحقيره شسوت بإخونا

تقرب جوحي يريد يضربها لزمه عبيد ودفعه

عبيد : مو وكتك جوحي عوفها

جوحي : شرجعكم مو جنتو مولين للبصره

عبيد : لمحنا جاسم جاي ورجعنا نركض صار كم يوم يدورون عليه مو تدري ومن شفناه مكدرنا منرجع

ساهره : انت بعد مصدك بهاي المخبله موو لك هاي حيه بايكتك وكاتله رجلها وهسه مسكطه اخويه ومسويه روحها فقيره وشريفه

خوله : شريفه وعفيفه غصبن عنك وعن  اخوجن ومالجن دخل مات رجلي كتلته حيرن بروحجن وبمصايبجن والله متستحون هم نزل وهم يدبج على السطح اخذن اخوجن ولن

جاسم : اذا ماكلتي شحطيتي اليه احركج هنا واكضي بيج التوبه

خوله : باوعت على اخوتها وكالت شو ساكتين تردوه يحرگني ولو شترجى منكم مو گبل هم شمرتوني شمره الچلب ودرتو وجهكم مو بعيد هسه يحرگني كدامكم وانتم بيدكم تنطوه النار

عبيد : شحده يلزم شعره منج ولك جاسم شو انت ماتحترم امشي اطلع بره واياك تعيدها مالك رداد ولك دخلت بهوبزه وتعيط وتتجاوز ولا وكفنا بعينك هسه اذا الزمك واسحل بيك البيت احد يلومني

صالحه : هاي مكان متكول لاختك شسوت بأخويه  وتحاسبها تطرده جاسم من البيت

عبيد : مالج دخل بلي يصير وكعد تشوفين اخوج يتجاوز ويعيط وساكتين اله بس الشغله زادت عن حدها وكلمة بعد اني اوكفله واريد اشوف شلون يمد ايده عليها

جاسم : شنو زادت بربك عبيد يعني شفت شصار بيه ولك سمعتي صارت بلحظيظ وكلها بلمنطقه تسولف بيه صرت مثل النسوان اتختل واشوف بعيون الناس الضحك والشماته والاستصغار انت مو مكاني مو تذبحها وماتخليها تشم الهوا تكطع من لحمها وصل وميبرد گلبك

جوحي : ومنو يكول خوله هيج سوت بيك يجوز انت بيك العله

جاسم : لتعيدها جوحي تعرفني كدها والصار بيه شغله مو طبيعيه وتصفن العاقل ولك اني قبل بيومين من جيتي لبغداد جنت بحضن مره والاسد مو مثلي

عمشه : ياااا زاني عذه منك عذه تف تف لا ويتابهه من غسل لهلحلك ياهو الوزك على حرام الله وانه اكولن مابيك حظ عبن الحرام يسري بدمك وهاي تاليهه

جاسم : مو هذا مربط الفرس خالتي اني گلت هيج حتى افهمكم مو اتفاخر

اذا انتم متقبلون اختكم تنضرب ولا تنهان خلي تحجي شسوت بيه حتى افتهم واعرف علتي اقلها اعالج نفسي

خوله : روح عالج نفسك بعيد عني اني لا وكلتك ولا شربتك شى وانت من فشلتك ادور على حجه ومالكيت غيري اذب الصوج بيها

صالحه : لا والله اني هسه من تصرفاتج تأكدت الج ضلع بيها ولج خوله اذا اخويه صار بيه شى اشوف دمج مسرسح بلكاع ميكفيني بيج

عمشه : چا وانه اعوفنج تكضيها وانه اتفرج واگلج زيديها بعد ايدي  انه امك يعبيد چا غير البصره گلها اشعلها على راسج وراس امج والعباس ابوراس الحار يابنيات غنيه الي تكض بتي وتوصل حدرها لا اكضي بيها التوبه وأچله من لوزته أچل

ساهره : هاي انتي دومج هيج يعني تشوفين كدام عينج سوايات بتج ومتحاسبيها

جاسم : لو اعرف اليوم اسويها دم وياكم وانسى كرابتكم وحتى خواتي اخذهن واطلكهن منكم

عمشه : خايب فضل عمري ماانساه چا تخلصني منهن اخذ رويحتي ومااعزها عليك هيچ وبنيات غنيه يولن يرادلها بخت ساده

صالحه : مااعوف بيتي واطلع هاي البقت اعوف كلشي لذني هاي البقت وانتي لج 

احجي شسويتي بأخويه

خوله : ليش تكذب هااا اذا انت مو كد الزواج المن تزوجت اصلاً تعرف مابيك خير لهذا اجيت هنا كم يوم اول تالي تبقى يمنا بدون خواتك هاي حجه حتى من يعيروك تعرف براس منو تذبها

جاسم : ولج خوله هسه اذا الزمج اشكج نصين لج شحطيتي بإكلي

وبهاي الحجايه طب نجم وسمعه وهو اصلاً يكرهه منطاه مجال ولا يعرف شصاير لزمه من ياخته وضربه حيل على خشمه اختل توازنه لجاسم وناس كامت تضرب بناس والعياط وصل للشارع  وحتى جاسم ضرب نجم وأذاه بس نجم يضرب حيل واسرع منه  ويصيح ولك هاي منو الي تشكها ناقص سرسري عديم الغيره اليوم اشوفك شلون تتجاوز بنص البيت العتب مو عليك على الكباريه الواكفين ويسمعون وساكتين

عمشه خلصتهه يبووو راح وليدي وتلطم

كوه فاككوهم  وجاسم وجهه انترس دم ويتفل بلكاع ويعيط اختك دمرتني هي سبب علتي لك خلتني عاجز مالي دوه هاي شيطان لازم تتربى اريد اعرف شحطت اليه ليش صار بيه هيج

خوله : لك الف مره اكولك محاطه شى الك ولا تقربت منك

نجم : تقرب من خوله ولزمها من ايدها بقوه وكاال شجابج على جاسم

خوله : ولا واصله يمه من كل عقلكم مصدكي

نجم : باوع على ذكرى وبدعه وكال الهن

انتن جنتن بلبيت وياهه هم شفتنها سوت اكل اله شربته كعدت ويااه

عيون خوله توجهت على بدعه وذكرى وتخزر بيهن وكأنها تكول اياجن تحجن بدعه مباشره كالت

بديعه : ولا واصله يمه طول ماهو هنا تلاثتنا يا بلمطبخ يابلغرف

نجم : واكله وشربه

بديعه : ويانه جان ومرات ياكل بره وخوله ماوصلت يمه ابد

جاسم : جذابه والقران جذابه

نجم : اسكت انت لتحجي خلي نفهم

نجم : وانتي ذكرى

ذكرى : بقيت اباوع على خوله وبدعه خفت اكول الصار وخوله تشد ويايه مبين وضعها مو طبيعي ومستلمه الكل تسوي الهم مشاكل واني البيه كافيني كلت

الكالته بدعه صحيح خوله ماوصلت ليم جاسم ابد

خوله : هاااا شفتو هذا اخوكم الدثو يذبها براسي كتلكم مشفته ولا الي دخل بيه

عمشه : عبيد اخذ مريتك واختها واخوها ومااريدن اشوفن واحد منهم عيوني تسوربت  وراسي وجعان گل السواه جاسم

يتلكاه عند ربه وهاي المره اعديها يجاسم

مره الجايه اهجم بيتكم واكض واحد واحد وابيس بيكم عليش انه ساكته عبن اكولن مريض وحگه تعديت حرمه البيت وهاي عند عمامنه دوسه والدوسه وراها فصول يبن غنيه والبيك كافيك حل طلابتك بالاول يله تهد على الوادم

جاسم : يعني بعدكم ممصدكين هاي سبب الصار بيه بيش تردون احلف هي جانت توكلني وتشربني ومن يومها صحتي راحت وحالي تغير

خوله : مو كاعد بفندق واوكلك واشربك شوفلك كذبه ارتب

عمشه : موش خوله روح شوف منهي زكتك ولعبت بحالك ولاتذب تهايمك بتي وانتن يامدمغات ترحن جم يوم وتردن لهنا واي جلمة اسمع وروح فرج تردن مطلگات ياانه ياانتن بهذا البيت

جوحي : مترجع ساهره اله ترجع فلوسي

ساهره : وداعت مرتضى مااخذتهن ليش متصدكني وكامت تبجي

جوحي : كتلج مترجعين للبيت ولا تشوفين ابنج اله ترجع فلوسي

ساهره : زين دور بغراضها مثل مدورت بغراضي بلكت تلكاهن

ركض جوحي ودخل لغرفه امه وفتح الكنتور وطشر ملابس خوله كلها وفتشها كلها وملكه شى

ذكرى :تقربت من بدعه الي نست حتى العجين من وره العركه وبيدها ناي الصافنه على الوجوه وكتلها بصوت ناصي كلش

مصيبه اذا لكاهن جان تكول بدعه بصوت انصى

لو يموت ميلكاهن

وكلام بدعه طلع صح كلشي ملكه

نباوع على جاسم الازم الخاولي ويمسح بخشمه ويباوع على خوله يريد يشرب من دمها وهي واكفه هادئه ونجم عيونه عليها وعلينا وكإنه يكول ليش كذبتن

دنكت واخذت ناي من ايد بدعه وصعدت جان تكول صالحه

صالحه : هااا خلصتي فرجه تونستي وراح تصعدين بمهجومج

ذكرى : ليش ونسه بلعكس كلش مقهوره على الصار مااكول غير الله يهدي البيناتكم ويطفي النار وترجعون سالمين والگلوب تتصافى

صالحه : رفعت حاجبها وكالت هاي النار التحجين بيها مراح تسلمين منها وراح يجي يوم وتتندمين لان طبكتي ويه هاي الحيه وكذبتي

ذكرى : من رخصتكم وصعدت اركض

خوله : هسه بعد عدكم شى تذبوه براسي

عمشه : يله عبيد اخذهن ولاتضل بلبصره وتنسى رويحتك عدنا شغيلات نكملها وعيشه نركض وراها

نجم : وانت جاسم اذا اجيت بعد لهذا البيت اخاف هلمره ضربتك مره الثانيه اكتلك خلاص

ساهره : خوش والله ياهو التلزمه يهدد

نجم : اخوج التعدى وزين من عدنا راح نطلعه يمشي على رجله لهسه واكفه بعيني هو ابن خالتي لو غريب اله اطلعه على سديه

صالحه : يله جاسم كوم احنا نعرف ناخذ حقك زين

عمشه : چا صدگتي هيه ضلت بيد النسوان

حطت الفوطه على حلكها وبصوت ناصي كالت چا غير هو اختجن الثالثه

صالحه : شنو عمه شگلتي

عمشه : الله وياجن وردن الباب وراچن

وسحبت عمشه خوله ودخلت للغرفه

اخذو جاسم وطلعو وجوحي صعد لغرفته شويه ودخل نجم لغرفه امه

نجم : هاي الافلام السويتيها قبل شويه متمشي عليه احجي الج ايد بمرضه

خوله : شوف نجم مو كل واحد سواله مكسوره بهذا البيت ذبها براسي كااافي والله مللتوني حابسه روحي ومااطلع ولا اشوف احد وهم ماخلصت منكم يعني وين انطي وجهي اله اهج واكسر وجوهكم

نجم : حتى اذبحج بيدي

خوله : لعد كافي مصايبكم خلوها الكم لا كل شويه خوله وخوله اعتقد يكفي الصار بيه من وره اهمالكم المفروض عليكم هسه حتى عيونكم مترفعوها بوجهي على سوايتكم بيه

ولا واحد منكم استحى على نفسه وكال اختنا الوحيده وظلمناها ولازم نراعي الله بيها ونعوضها بكل عين صلفه كل واحد منكم عنده بليه وكارثه وعاط هاي من وره خوله اتقو الله يامتعرفونه اصلاً

نجم : تعالي اضربيني بعد عياط وصوت عالي

خوله : ليش الصار قبل شويه قليل لو جاسم يعرف ورايه اخوه حوك مجان تجرأ يدخل البيت ويضربني

نجم : ليش مو من سمعته شبعته كتل

خوله : عكب شنو مانضربت ونهانيت وكدام الجناين وذولاك اخوتك البعران يتفرجون

عمشه :يا دهر الصابچ لسانج لا اكضه واحشه ذوله اخوتج واكبر منج والهم هيبتهم

خوله : ياهيبه بله صافنين عليه شلون انضرب واحد حجاله حجايه ومرته خزرته وسكت والثاني حاير بفلوسه لو بيده يشك دشداشته ويطلع مصلخ لان فلوسه راحن

نجم : تقرب نجم من خوله وكاال بصوت حدي وبتهديد

اسمعي خوله اني متأكد الديصير اهنا انتي السبب منه بس مشايف بعيني يوم مااشوف اني اذبحج مو جاسم لتسوين مشاكل وابقي هاديه حتى لتتأذين

خوله : تهددني يبن ابويه

نجم : اهدد واكسر راسج من اشوفج تأذين غيرج وتردين تهجمين هذا البيت التعبت بيه امج سنين حتى يوكف على رجليه

خوله : كل همكم هذا البيت واخوتك ونفسك بس ماهمتكم اني

نجم : انتي لتسوين مشاكل وشتحبين اني وياج اليوم عدا منعرف اذا سويتي دكه ثانيه يجوز متفلتين منها اني لمصلحتج اخوتج حادين سنونهم ونسوانهم مو فقيرات وميكعدن راحه لتنطيهن الفرصه يأذنج

خوله : اكثر من الاذيه الوكعت بيها

نجم : اي اكثر واكثر استري على روحج ولتبقين ادورين مشاكل وانتي يمه عينج عليها واكعدي احجي وياهه وعيها على زمانها قبل مااخوتي توكع بيدهم ومحد يرحمها

عمشه : انه اسولف وياهه روح يمه لشغيلاتك لاتكدر خاطرك

نجم : وجناينج الفقيرات اليوم جذبن هم كولي الهن خلي يبتعدن عن المشاكل وليدافعن لخوله ويشجعنها على الخراب ويطمطمن سوالفها

خوله : ماجذبن حجن الحق بس انت صاير مثل اخوتك تشوف خوله شيطان

لزم راسها وتقرب منها وباسه وكاال لتصيرين شيطان خوله وارجعي الطيبه الهاديه ولتضعين نفسج اكثر ما ضاعت ولتنطين مجال لصالحه وساهره يأذنج

مجاوبته ودارت وجهه رجع باس راس امه وكال الله يهديج وطلع وسد الباب وراه

باوعت خوله على امها وكالت هااا يمه گملي بقت عليج

عمشه : انه جيعانه اكومن اشوف بدعه كملت الخبيزات

ذكرى : كعدنا نتغدا والكل ساكت حتى من رجع صمد وفلاح من الشغل محد حجه كدامهم شى

للعصر كعدت عمشه يم السكراب تلكط بيه وبان ومرتضى ويونس كاعدين يمها

خايبات چاي اريدن وين وليتن

جبت الجاي الها وكالت

عمشه : انشديلي على بدعه وخوله

كمت صحتهن وكعدنا يمها جان تكول

عمشه :بنات غنيه گلها چم يوم ويردن اريدن منجن تشدن حيلچن وماتغفلن عن سوالفهن ذني مدمغات وگلشي يطلع منهن

خوله : يجوز ساهره مترجع مو كال جوحي اله ترجع فلوسي

عمشه : ترد انه اعرفن اخيج ادولبه عبن اغم گلها چم يوم ويلوب عليها ويردهه لا تضنن راح يسگتن ذني يذبن سمهن ويه الهوا

بطلن فهاوه

خوله : طبهن مرض شيسون خلي يسون

عمشه : يايمه ماتعرفين شرهن لوين

خوله : اني بس لو افهم المن مخليتهن بهذا البيت

عمشه :اسگتي يمه ماتعرفيهن ذني مثل البير تترسه ومايشبع اهججهن من هذا البيت مايرتاحن اله يهججن الگل والوليدات تتكاتل ومايبرد گلبهن انه حرت بزماني كل ماانشد لوادم يفكن ولدي من سحورتهن يردن بسحر اگوى انه گلبي موجر منهن مو گلشي ينحجي يايمه اسگتي واليرحم ابيج حسبالج انه راضيه بيهن انه خلصت سنين بين العتيچ والعلويات عبن يفكن وليداتي ومافگن اركدي لاتلجمين گلبي يايمه

ذكرى :يوم بعد يوم اخاف منهن ومن الشغلات الكعد اشوفها كدامي

خوله : يجي يوم ويطيح حضهن مدوم لاحد ابد

عمشه : انه اريدن منجن تفتحن عيونجن وانتي يخوله لاتگربين من جمريتهن لا يلحركنج چا الصار بيج هين استجني لا يكضن بيج البله

خوله : الله كريم

عمشه : انه گلها بچفه وجويسم بچفه هههههههه الملطوم چاي عگب ماتسودن وجهه هاي حوبتي ذبت غنيه بنياتها وسمهن علي  انه عن الله الي حوبه لا تصفنين هيج

وضربهه بوليدهه

جان تباوع على الجهال وتصفك وتكول

يافحيل البش تبلبش يافحيل البش تبلبش

والجهال تكمز وياهه وميعرفون بس على واهسها

ذكرى : خلصنا اليوم بكل مشاكله واكيد راح نشوف العجب بالايام الجايه لهسه منتظرين عاصفه صالحه وساهره وكل وحده بينا تعرف مراح يسكتن

اني وبدعه محجينا اي شى بموضوع خوله لان اثنينا نعرف الكذبه الكذبناها حتى نتجنب شرها مو حتى نحميها

وره خمس ايام اني اغسل مواعين وبدعه تمسح الكاع الكل طالع للشغل حتى عمشه وخوله نايمه اندكت الباب وطلع مرتضى يفتحها وصاح

عمه بديعه يردوج

بديعه : يااا منو يريدني هذا شبيهه مرتضى ولك تعال منو يريدني

مرتضى : اثنين رياجيل

بديعه : تعالي ذكرى ويايه نشوف منو

طلعنا وبس شافتهم ركضت تبجي وتحضن بيهم

بديعه : يابه والله طك گلبي عليكم تعالو ادخلو ولك جبار كبران وصاير شاب ماشاء الله

ذكرى : عرفتني عليهم ابوها واخوها شفت فرحه بعيونها مو طبيعيه دموعها تصب وممصدكه اجوها حسب مااعرف صار اكثر من سنتين مواصله الهم ومن اسألها ليش مترحين تكول مااريد ازاحمهم لازم ابقى جم يوم واخاف ابويه ماعنده وينحرج وفلاح ماعنده ينطيني مصرف يكفيني لهذا باقيه وساكته ومتحمله فراكهم

عفتهم ورجعت اسوي الغدا اخاف يبقون على الغدا

بديعه : اكعدو والله ممصدكه

ابوبديعه: شونج بويه صحتج احوالج بنيتج

بديعه :  الْحٍمَدٍ للـّہ عايشين وبنتي تبوس ايدك يابه امي شونها صحتها

ابو بديعه : تحت رحمه الله زينه وتسلم عليج

بديعه : ليش مجتي وياكم

ابوبديعه : الطريق طويل وصحتها ما تعينها

بديعه : سوده عليه شكد مشتاقه الها ولريحتها ولحضنها

جبار : اني اجي اخذج وشوفيها

بديعه : مااريد اكلفك ياخويه طمني حالك وضعك شلونه وشعجب اليوم بغداد

جبار : اجيت على المره عقدت ونشوفج ونرجع

بديعه : ضليت صافنه بوجوهم متفاجأه شنو عقدت

جبار : مو خطبت بنيه من بغداد من الثوره قبل اربعة اشهر واليوم عقدت عليها وراس الشهر اتزوج

بديعه : وشعجب ماكلتو ماحجيتو من خطبت يعني قبل ٤ اشهر جنتو هنا بغداد واني ماادري

ابو بديعه : صارت سريع بنيتي وماردنا نتعبج

بديعه : ياتعب يابه وهذا اخويه وحيدي اذا اله ماافرح المن افرح واهوس وانت شلون انطاك گلبك تدخل على خطيبتك واختك مو وياك

جبار : صارت بعد واجيت اعزمج على راس الشهر العرس

بديعه : دنكت ابتسم بقهره والم وكتله

حالي حال الغريب

جبار : لا تحمليها يابدعه كتلج صارت سريعه

بديعه : هذا هو بلخير عليك ومهنى منك المال ومنها العيال

ابو بديعه : نرفع الزحمه لاتنسين موعد عرس اخوج وهاي ورقه مكتوب عليها الموعد والعنوان حتى لا اتيهين

بديعه : اخذت الورقه وگلبي ممرود ضل يابه على الغدا اشفت منكم

جبار : غير مره ورانا رجعه وطريق

بديعه : فدوة يابه ضلو بعد والله مشبعت منكم

ابو بديعه : غير مره بنيتي ديري بالج على رجلج وبيتج

بديعه : دايره يابه دايره

توسلت بيهم يبقون مابقو طلعت وياهم للباب واشوف برازيلي جديده فتحت باب السياره جبار وابويه كعد يمه

سألت مستغربه هاي مال منو

جبار : هاي انطونياها مكرمه مال شهداء صار سنتين عندي شنو متدرين

بديعه : لا والله ماادري ولو اني صار هوايه مجايه

جبار : وكاع هم لان اخوتج شهداء

اشوف ابويه ارتبك مثل الضاج لان كال الي

كتله الله يرزقكم بعدكم بلمدرسه

ابو بديعه : يله جبار تأخرنا

جبار : شغل السياره وكال لا بعنا الكاع ويه الفلوس النطوها النه واشترينا بيت صغير وكعدنا بيه حسيت مثل الواحد وضربني على راسي يعني اهلي متحسن حالتهم وهمه حتى مكلفو يبلغوني قابل راح احسدهم لو اطلب منهم بلحظتها عرفت اني مالي وجود بحياتهم جان ردي الوحيد واني اشوف ابويه يحاول يغير الحجي وارتبك

الله يحفظكم ويكثر خيركم توصلون بالف سلامه

ودعتهم والدمعه بعيني اول مدخلت اجت ذكرى فرحانه

ذكرى : هااا واخيراً شفتيهم

بديعه : وياريت ماشفتهم

ذكرى : ليش ولج

بديعه : ليش اهلي ميردوني بشنو قصرت والله ماسويت شى بيوم أذاهم ولا طلبت شى منهم جنت دوم طوع ايدهم روحي يمنه اروح يمنه روحي يسره اروح يسره وماكسرت الهم كلمة حتى على حساب نفسي ومن زوجوني حتى متنفست وكلت مااريد يعني ماشافو مني بس الطيب ليش احسهم كارهيني وارتاحو من زوجوني وخلصو مني عبالك حمل على كتافهم وزاحو  تحجي وتشهك بلبجي

ذكرى : على كيفج ياعيني شصار شو تعالي كعدنا بلكاع بلمطبخ وسولف اليه كلشي انقهرت حيل عليها وحضنتها

اني اختج وجهالي اخوه بتج لتهتمين ويجوز عدهم ظروفهم الخلتهم هيج يصرفون

بديعه : ياظروف عفيه وهمه سنتين ماسألو عليه عدهم سياره وماكلفو نفسهم يجوني عود اليوم وره اكثر من سنتين جاايين يعزموني حالي حال الغريبه وخاطبين لاخويه واصلين لبغداد وماكالو الي حتى من شالو مبلغوني بله رحت مره الهم ولكيتهم ماكو بلمدرسه مفكرو شنو حالي وشنو شكلي كدام رجلي ولج ذكرى ناسيني اهلي ناسيني

ذكرى : كافي ياعيني عيونج دم صارن كومي غسلي ولتفكرين كلمن وظرفه كافي احنا نحبج ومنكدر بدونج يله ياعيني هسه تجي عموشه وتفركع على راسنا بصل لان مكامل الغدا

بديعه : تكدرين تكملي وحدج مالي حيل اشتغل جسمي كله يرجف

ذكرى : اكمله بس تبقين هنا متصعدين بغرفتج ابد

بديعه : ليش

ذكرى : مااريدج تبقين وحدج وتضلين تفكرين وتبجين ابقي هنا ابجي يمي

بديعه : الله ميكطع دزلي اخت طيبه مثلج

ذكرى : بس فاهيه على كولت عمشه

بديعه : على گلبي عسل

ذكرى : والله انتي العسل هسه تجي عمشه وتشوف شلون وحده تمدح بلثانيه وتستلمنا

بديعه : اووف يعمشه ماترضى على احد گلها عدها مسودنين

ذكرى : ههههههه اي والله

بقيت اسولف واغير جو لبدعه لان حسيت اذا تبقى وحدها راح تتأذه الموقف الصار الها أذاها وحقها بس مابيدي غير اخفف عنها

اسبوعين والبيت هادئ صار جنه من ساهره وصالحه ماكو عبيد رجع وياه مهند وسما بقت يم امها الجهال مرتضى ومهند صارو برگبتي وكحين ويتعاركون كل وكت عمر مهند ٦ سنوات هاي السنه لازم يتسجل مدرسه ومرتضى ٥ سنوات

ناس تضرب ناس واني افاكك بيهم واخاف على يونس منهم صار عمر يونس سنتين يمشي وحرك ويحب يلعب ويه ولد عمه بس يأذوه واخاف ليأذوة عيني كل الوكت عليهم وايد وياهم وايد بشغل البيت

جوحي يفتر مثل الوحده عدها طلوكه متخبل لان فلوسه مرجعت ويطب ويطلع صاير نار وامه تحاول تهدي وهو ميفيد

جنا نشوف شلون حاله وكام يكول لازم ترجع ساهره واني اعرف شون اطلع الفلوس منها ومثل مكالت عمشه بدا يلوب عليها

هسه احنا بشهر الخامس ١٩٨٩ الجو حار وبدينا نحظر السطح وانام بيه نصعد اني وبدعه انرشه المغرب حتى يبرد ونفرشه ونعوف الفراش يبرد ومن نكمل العشا وشغلنا نصعد كلنا للسطح كل واحد نفرش اله على جهه السطح جبير ويكفي ونجم ينام بنهايه السطح بعيد عنا على برد السطح ونسمات القليله والنجوم الي تلالي انام اله خوله كامت متصعد تنام يمنا وتبقى بلحر تنام بلغرفه

مرات متاخذ عيني نوم وابقى صافنه على السما والنجوم واذا كمريه ابقى صافنه على الگمر وضواه جنت دوم اكول لو ممتزوجه من صمد جان شون صارت حياتي لو مبتعده عن هذا البيت ومصايبه جان هسه اني وين ومن اشوف نومه يونس على ظهره وفاتح ايده ورجله وناي تناغي اكول ذوله همه سعادتي بلدنيا اتحمل گلشي لعيونهم

صمد دوم ويايه جاف على كد نومته وطلباته مايوم كعد ويايه وسولف ولا بيوم حسسني اني مرته ولازم يشاركني حياته حتى من اسأله شلونه شغلك احجيلي يكولي تعبانه بيه حيل اسولف والله بطرانه واضطر اسكت تعلمت على طبعه لدرجه كمت حتى ماازعل منه

بيوم كاعدين الصبح حاله حال اي يوم عادي  توقعته بين الشغل والجهال وهوستهم والبدعه الصارت اكثر من اخت ويايه دوم اما خوله هاديه وساكته مخلصتها ياتحوك ياتطلع بلحوش تفتر وتدخل وتاكل وتنام وهذا هدوئه دوم يخوف بدعه المشكله صرت مثل بدعه اخاف من هدوئها

صحت على الجهال اوكل بيهم واحد يضرب بلثاني كعدتهم تلاثتهم مهند ومرتضى ويونس بلكاع واحط لكمه بحلك كل واحد بيهم جان تطلع عمتي لابسه عبايتها الجديده وشحاطتها والفوطه البريسم والمسچ تارسه روحها بيه  اني من اشوفها هيج معناها رايحه لمكان مهم

مسألت بس استغربت من شفت نجم وياها وطالع مرتب وعطره تارس المكان

طلعو بدون اي كلمة بقيت اوكل الجهال بس حسبه تودي وحسبه تجيبني

بديعه : اكلج وين راحو

ذكرى : والله ماادري

بديعه : شكلهم مال خطابه

ذكرى : خطابه المن

بديعه : هاي شبيج غير لنجم نسيتي بعده ممتزوج

ذكرى : لزمني گلبي شعور لا ارادي حسيت بيه حرام وميصير هذا العقل يكول بس الگلب شلون بيه اختنكت واتعوذ من الشيطان واردد هذا اخوج حرام تفكرين هيج

جان تطلع خوله

خوله : صباح الخير ردينا عليها صباح النور

بديعه : كاعده من وكت اليوم

خوله : غير من فرحتي

بديعه : ياا عساج دوم فرحانه بس ليش

باوعت على ذكرى وكالت

خوله : اليوم راح يخطبون لنجم امي راحت تشوفها

بديعه : عرفت والله شگلهم خطابه بلخير والتمام يستاهل نجم حباب وگلبه طيب

خوله : شو ساكته ذكرى شنو رإيج

رفعت راسي وكتلها الله يسعده وهو صدك طيب ويستاهل كل خير

خوله : راح تجي مرت حبيب الگلب وتكعد وتحط رجل على رجل بلبيت هاي مرت الغالي يجوز تضلن تخدمن بيها

بديعه : شنو السالفه مو لهاي المرحله يجوز البنيه تطلع بت اوادم وتحب عيشتنا

خوله : ليش هو بهذا البيت اكو عيشه زينه

بديعه : احسن من غيرنا اكو ناس حسره عليهم كسرت الخبز هاي احمدي ربج خوله ولا تكفرين بنعمته

خوله : ساكته ذكرى متشاركين ويانه

ذكرى : بدعه عفيه عينج على الجهال عندي شغل بغرفتي

بديعه : روحي اني اكمل كلشي

خوله : شو گمتي

ذكرى : گتلج عندي شغل فوك وهم اشوف ناي كعدت

خوله : الله يعين گلبج

ذكرى : بلعت ريك وعرفت شنو تقصد صعدت ومجاوبتها ردت بس اسيطر على نفسي صرت نصين نص يكون عيب عليج تفكرين هيج ربج راح يغضب عليج ونص ديموت من القهر والالم لان راح يتزوج

بقيت للظهر بغرفتي متمدده وناي ارضع بيها وصافنه عليها

سمعت صوت هلاهل جوه انخمش گلبي عمشه گلبت البيت بلهلاهل وبدعه وياها

كمت عدلت شعري ودشداشتي وشلت ناي ونزلت على كيفي وكفت على الدرج وهو گبالي من نزلت رفع راسه وصرنا عين بعين وكلت

بلخير عليك الله يسعدك ياخويه تستاهل كل خير صفن بوجهي شويه وراها جاوب وكال

نجم :شكراً ودار وجهه عني كملت نزلتي وباركت لعمتي وعمه كاعده وتوصف بحسن العروس وجمالها

اليوم كله بس تحجي بيهم وشلون امها تحبه لنجم العروس طلعت بت الحجي الي يشتغل عنده صاحب المكتبه وفرحو لان خطبها الظاهر يحبوه وجمعت عمشه ولده وكالت نهايه الاسبوع الخميس المشيه والنيشان

خلصت اليوم بطلعان الروح كل شويه مخنوكه وارجع اردد ربي دخيلك ابعد هذا الشيطان والوسواس عني

متحملت وطلعت للحوش شفت من بعيد خوله تشيل ورقه من الكاع ختلت اشوف هاي شسوي

حطت الورقه بصدرها وطبت ركض ياستار منج شناويه يبت عمشه

الكل مخبوص شيلبس اله اني ولا مهتمه

صمد : حضرتي الدشداشه مالتي

ذكرى : اي حضرتها

صمد : وانتي ملابسج ملابس الجهال

ذكرى : اني مااروح

صمد : ليش بله ماكو مترحين لازم تجين ويانه المن باقيه وحدج

ذكرى : راسي يوجعني ومالي خلك انتم كافي خير من الله

صمد : ترحين وبله دوخه منو يضل ويه امي ويساعدها اخاف تحتاج شى تضل حايره

ذكرى : هااا لخاطر امك مو لان متكدر تروح بدوني

صمد : شكو صغير واتيهه بدونج تره والله مرات عندج سوالف ماصخه يله كومي حضري ملابسج وانزلي على امي اخاف تحتاج شى ومن تصعدين اريد دبس وراشي وخبزه حميها زين جعت

ذكرى : مااشي مكدرت اجادل روحي ذايبه ومتألمه وكثره الجدال يزيد المي

نزلت احضر الدبس والراشي ولكيت نجم يشرب مي شافني وصفن عليه

نجم : فرحانه مو

ذكرى : باوعت عليه على شنو

نجم : لان راح اتزوج

ذكرى : اي ليش ماافرح غير اخويه وافرحله

نجم : تقرب منها وكال جذابه متإكد متأذيه وتفكرين وكل الي تحسي اني حسيت بأضعافه يوم منزفيتي على صمد اقلها اني جبت وحده غريبه اما اني الاحبها اخذها اخويه

ذكرى : ماله داعي هذا الحجي صار سنين عليه وهسه انت راح تكون عائله ومره حلوة والله يرزقك منها الخلفه الزينه عيب هذا الحجي وكفتنا ونحجي بهذا الموضوع اكبر عيب وحرام

نجم : بس حطي شغله بالج لجمتج بگلبي العمر كله متروح واذا اتزوجت وخلفت وصارت عندي مره مراح انسى العشته كل هاي المده واني اشوفج كدام عيني ترحين وتجين ويه اخويه

ذكرى : ذاك اليوم كلت بس اطلعين من المطبخ تنسين ومينحجي ابد بهذا الموضوع ليش هسه جاي تگلب بدفاتر عتك

نجم : اووووووف مايحس بحالي بس العاش مثلي ياريتج اتزوجتي بعيد عن عيني جان هواي تغيرت شغلات يمكن حتى جان نسيتج شوفتج تحرك روحي ياذكرى

روحي لرجلج روحي

طلعت اركض من المطبخ اخذت ماعون الدبس والراشي والخبزه بيدي حتى ماحميتها مثل مراد صمد ومن شافها مامحميه كام يعيط كلشي مجاوبته لان بيه بجيه يمكن للصبح مااسكت

ثاني يوم بدلت وحطيت شويه مكياج صار شكد محاطه ولبست الجهال وقبل لا ابدل هم بدلت لمرتضى وبدعه بدلت لمهند

وردنا نطلع جان اطب ساهره وصالحه

جفلنا من شفناهن

خوله : اجن السعلوات جنه مرتاحين منهن

راح يرجع البيت ينهجم

بديعه : يمعوده صوتج ليسمعن

خوله : شجابهن لخاطر الله مو رايحين لفرح اله يسونه عزه ميكدرن

صالحه : هااا عمه تردين ترحين وحدج لمشيه نجم

عمشه : شجابجن

صالحه : سمعنا بخطبه نجم وكلنه اخونه شلون مانحضر

عمشه : عليش متعبه جدامج

صالحه : اذا لنجم منتعب المن نتعب

عمشه : واخيتج

صالحه : اجت ويايه واكفه ويه جوحي بره تصالحو

عمشه : طكيتو بسحر يبت غنيه

صالحه : گلشي عندج سحر ليش متكولين يحبها ويموت عليها وميكدر بلياها والفلوس فدوة الها ورجعها

عمشه : نعلت الله عليجن بزره جايفه اعرفن ماتركدن وجيتجن مامريحه گليبي

صالحه : خلف الله عليج عمه اعرف بيج شنسوي وكلتي سحوره دومنا مظلومات بس يله عمتنا وتمونين ولخاطر رجولتنا والجهال نسكت يجي يوم والله يطلع حوبتنا بگلمن يأذينا ويحجي علينا

عمشه : هاي الضلت امهات السحوره عدهن حوبه انهجم بيت التبن

صالحه : كافي عمه كل ما حجيتي وكلتي سحارات قابل ساحرين الج لو ساحرين جان هسه انتي تموتين علينا

عمشه : چا انه لو صاحيه تضلون هنا اعرفن بروحي مدوهنه واسگت كوه عبن مصايبجن ماتخرس الواحد اله مزگي وانه دوم اسكت ومااعرفن ليش اعوذ منك يبليس مااريدن اكدر فرحتي بوليدي ميلي مني ودفعتها

ذكرى : الكل ضاج من رجعتهن بس مابيدنا شى موصلهن جاسم لراس الشارع وراح ايدنا على گلبنا لان طلعتهن اخر مره منا بهوسه ورجعتهن بهدوء اكيد وراهن شى

رحنا لبيت البنيه طبينا جانت صدك حلوة مثل مكالت عمشه اسمها سهاد

وعيونها تلمع بشوفتها لنجم فرحانه وتضحك

قطعو حقها ولبسها حلقه ومحبس وترجيه وزعو الكيك مسوي اهلها والشربت الكل يركص ومكيف وحتى العروس احسها طايره بنجم اله هو كاعد وساكت بصفها يبتسم شويه ويسكت واني بحضني ناي وكاعده گباله رفع عينه يدور مااعرف على شنو شويه وصارت عينه بعينه الهوسه كلها والردح والركص والهلاهل مامنعت نجم من نظرته وكأنه يودعني دمعت عيني وبقيت مركزه بعيونه توادعنا اني وياه بلعيون مثل متلاكينا بلعيون

واليوم نجم على ذمته مره ودخلت هاي المره على بيت عمشه والكل حاط ايده على گلبه هاي شراح تسوي وشلون راح تتعامل عمشه وياها الجنه الخامسه راح تجي للبيت ويا بيت بيت عمشه ام العتيك

رجعنا وره المغرب ودخلنا تعبانين بدلت وخليت الجهال يم صمد حتى انزل اسوي عشا نزلت واشوف

خوله جاي تلوب مدري شبيهه مو طبيعيه اطب وتطلع دخلت للمطبخ واباوع عليها من الشباك

صالحه انتبهت عليها ردت أشر الها ادخلي تره صالحه عينها عليج ملحكت امها صاحتها وهي عيونها على الباب بس دخلت للغرفه تشوف عمتي شتريد شويه وطب مهند وايده بجيبه ويصيح عمه عمه لزمته امه

صالحه : شتريد من عمتك

مهند : مااريد عوفيني اريد اروح لعمه

صالحه : بله شنو بجيبك حاولت ينهزم منها لزمته من اذانه حيل وكام يعيط ومدت ايدها بجيبه جان تلكه ورقه

ودفعته فتحت الورقه كل هذا واني اباوع عليها وبيدي البتيته اريد اكشرها ذبيتها ومشيت على خوله حسيت الشغله تخصها بعدني مواصله للغرفه جان تعيط صالحه بكل صوتها مال عرمات

تعااااااالوووووو ياولد خالتي شوفو بتكم المسويه روحها فقيره وخيره تلعب بسمعتكم جقه شبر الحكو لشرفكم الصار بلمنطقه بفلس ميسوه

الكل نزل من غرفهم وطلعت خوله وشافت الرساله بيد صالحه

يتبع ...

#الابواب_الخمس

البارت الثامن

للكاتبه Reem

لا تفرح يشامت بينه وتلوم

ولك دنياك خايب والله غدارة

يجيلك يوم تبجي وبالحزن مهموم

لان هذا الزمن ماتعرف اسراره

اذا شمتان بيه ومبتسم فرحان

لا تنسى ابد دنياك دوارة

اقسملك قسم ما تبقى هيج ادوم

يالگلبك علية صاير حجارة

بس انه اعذرك عقلك زغيرون

ما توصل لعقلي وتوصل افكارة......

تعااااااالوووووو ياولد خالتي شوفو بتكم المسويه روحها فقيره وخيره تلعب بسمعتكم جقه شبر الحكو لشرفكم الصار بلمنطقه بفلس ميسوه

الكل نزل من غرفهم وطلعت خوله وشافت الرساله بيد صالحه

عمشه : وغمه شنهي حسچ واصل للجيران تسودنتي

صالحه : تعالي عمه شوفي بتج الخيره الفقيره الي تحامين الها كل الوكت مطلعتني اني واختي سحارات وذيابه وهي النعجه الفقيره الماكليها

عبيد : تخبلتي شجاج وليش هيج تعيطين

صالحه : هااك اخذ عيني واقرا الغزل والحبيات لاختك شوف ياهو من المنطقه حاط عينه عليها ويتغزل بيها وانتم نايمين ورجلكم بلشمس

ذكرى : اني دمي نشف واباوع لخوله هاديه ولا جنها مسوي شى

جان يعيط عبيد هااي شنو ولج

خوله : هو اني فتهمت شبيكم انت تعيط ومرتك تعيط غير افهم شسويت لو مرتك شافت جذبه جديده حتى تذبها براسي

عمشه :ولك عبيد لاتشلع افادي شبيهه اخيتك

عبيد : هذا واحد داز رساله الها وكاتب بيها

صالحه : اوكف عيني خلي اقرالكم وسحبت الورقه من ايد عبيد وبدت تقرا بصوت عالي

عزيزتي خوله بعد التحيه والسلام

وصلني اخر مكتوب لحضرتك وانا احترم جداً رأيك لكن اتمنى ماتخونني الكلمات واكون قادر على ايصال مشاعري لا اطلب الكثير فقط اعطي مجال لقلبك وقلبي لكي يتحابان اكثر ولا تطلبي مني الابتعاد مهما كانت ظروفك سأكون لها عوناً الابتعاد عنك كأنه الابتعاد عن الحياه وانا متمسك بكِ لابعد حد اعطيني فقط فتره زمنيه معينه لايصال كل ما اشعر بيه وانا متأكد ستحبيني كما احببتك لا تعرفي منذ اليوم الذي رأيتك فيه وانا عيناي لاترى سواكِ ارجو من قلبك الطيب السماح لي بلسكن فيه وسأكون خير ساكن وخير رفيق انتظر اجابتك بفارغ الصبر

لاتتأخري بلرد على من عشق عيناكِ

تحياتي واشواقي

عاشقك المتيم

وحاط حضرت جنابه حرف A بالانكليزي وحرفها  جان تنزل الورقه من ايدها وعيونها تتشمت بخوله

صمد تقرب من خولها وعيونه براسه وجوحي وعبيد كلها نفخت ريشها واحدهم يريد يتسابق حتى يضربها هي مباشره عاطت

خوله : ومنوووو كال اليه ومنو يكول مالتي

صالحه : لا مال امي الرساله دزوها لامي واسمج عيني مو موجود عليها

خوله : انتي بلذات اسكتي لا كل شويه واحد منكم مسوي مكسوره وموكعها براسي تعرفون كلشي زين صالحه وساهره يردن ينتقم مني وحده لان باكت ورادت تذبها براسي ومكدرت والثانيه لاخوها المره الصاير رجال براسي ويذب بلاه عليه لعبتوها لنفسي ياهو يجي وعاط تعااالي خوله انتي هيج تسوين كااافي حرام عليكم ولكم لو مو اختكم جايبيها من الشارع ومربيها هم جان رحمتو بحالها وكعدت بلكاع تلطم وتبجي

ساهره : يمه يمه يلعياره لج شكد شايفه بنات خفيفات وحيالات مثلج ماشفت

ولج متفلتين هلمره منها اسمج عليها

خوله : واذا اسمي هسه اكدر اجيب ورقه واكتب كلام عليها واكتب اسمج لو اسم اختج واگلب البيت عليج واكول مصادقه على اخويه

ساهره : انجبي حقيره عبالج اني مثلج ام ولد وساقطه

جان تضرب عمشه ساهره على حلكها بطرف ايدها وكالت

عمشه : هاي بدال زلمتج الواكف ويسمع اخيته تناطحن عليها مريته واختهه ويذبن بلاهن عليها

ساهره : شفت امك شلون تمد ايدها عليه

جوحي : يمه تصدكين تجذبين شلون تمدين ايدج عليها الضربه لخوله مو لساهر

عمشه : دهر الصابك ولفلف عظامك تعال طگني يايمه حتى تفوخ مريتك

جوحي : يايمه مو هيج اني گلت بس هم ميصير تضربيها وانه واكف وكدام الكل

عمشه : چا تلاسن على اخيتك وتنشد عليها الساقطه واسگت اهمداكم من زلم مشوربه عبن النسوان راكبه ومدندله رجولتها ضال رجيچ على مريتك واخيتك ادوس على راسها

عبيد :موزين لهسه مذابحيها تعالي لج كومي وفهمينا هذا منو صاحب الرساله وهاي سوالف العياط واللطم مو علينا

خوله : شتريد اذب البله مال مرتك على الناس واكول فلان الدزها والله عيب عليكم تصدكون بنسوانكم

صالحه : ولج شلون ميصدكون وهاي الرساله بيدهم تعال ماما مهند منو انطاها الك

مهند : عمو هناك بلشارع

صالحه : وشكال

مهند : انطيها لعمتك خوله وانطاني فلوس

وكال لتنطيها لاحد وانتي اخذتيها بعد مينطيني من وراج

صمد : شوفي خوله اذا ماحجيتي منو هذا اخاف عبيد وجوحي يسكتون الج اني اذبحج كلشي نعبره ونبلعه اله سمعتنا تالي وكت تصير بين حلوك الناس خمس رياجيل بلبيت واختهم تصادق وتتملعب انطم روحنا احسن

خوله : شبيك صمد انت هم صدكت اكولهم والله مو الي احرك روحي يله تصدكون

فلاح : خوله الرساله بيها اسمج وماكو عاقل يصدك هي مو الج احجي منو هذا اقلها نروح انطيح حضه بيتهم والله انشيلهم من المنطقه بس كولي منو اذا انتي مالج ذنب مثل متكولين اقلها انربي اله ونشوفه شلون يتجرأ ويدز رساله زين منا لهسه وعاقلين ونسمع الج تره الشغله جبيره احجي منو هذا

خوله : مااعرفه وروح ابويه مااعرفه ولكم ارحموني ابوس رجلكم تعبت اله احرك روحي يله ترتاحون يوميه مشكله يوميه طلابه احلف واعيط ومحد يصدك شوكت تصدكون بيه خلصت عمري جوه رجلكم يوميه خانكيني وذابين بلوه براسي خليتوني حتى اكرهه عيشتي الله لا يوفقكم اله احرك روحي وخطيتي برگبتكم

وركضت والكل ركض وراها وسحبت دبه صغيره مال نفط بره بصف السكراب تريد اتذبها على نفسها وجان يلزمها جوحي وفلاح وسحبوها من ايدها ودخلوها سحل للهول 

ذكرى : لزمناها لخوله اني وبدعه وكعدناها وعدلنا شعرها حيل منظهرها يقهر

عمشه : يبووووو عليكم يولد عمشه البت

راحت من ايديه لا اعتراض على عطيتك ربي انطيتهم ليه وانه اكولن حزام  ظهر  ليه بكبرتي تاليها لنسوانهم ضلوو

عبيد : يمه كافي عياط خلي نفهم انتي وبتج اكلتونا اكل

من كل عقلج يايمه رساله واكعه بيدنا وبإسم خوله شتردين نطبطب عليها ونكول الها عاشت ايدج تمعشكي والهوا بظهرج

عمشه : اختكم شريفه وهاي الدروب موش دروبها ودومها محبوسه بهذه المهجومه ومايوم طلعت منها وراكده ومالهه حس ولا تخش بسوالفكم وهاي الورگه مريتك وراهه

صالحه : خوش والله هلمره اني السبب والله انتم ناس باطله اختكم تلعب لعب وانتم ادورون حجج حتى بس اطلعوها بريئه

ساهره : ذاك اليوم باكت اخوها وذبتها براسي والكل صدكها وسالفه اخويه صارو ضده ونجم طلع رجولته على اخويه وحاماها  وهسه هاي كدامهم ورقه وبإسمها ويطلعون حجج من جوه الكاع حتى محد يتقرب منها يمعوده ميفيد لو منكم اشد كرون واكعد واسكت

صمد : لج هاي عليمن احترمي نفسج تره ساكتلج من الصبح انتي واختج لان لهسه منعرف هاي الورقه المن بس تتجاوزين علينا لو مو رجلج واكف اطيح حظج واكسر سنونج بحلكج

جوحي : انت رجال ومد ايدك عليها حتى اذبحك بيدي مرتي وتتجاوز عليها كدامي

فلاح : حقه صمد مشفت حجايه مرتك شكبرها وانت عبيد مارديتها تقبل تشد كرون وتكود على اختك

عبيد : جوحي اذا متأدب مرتك واطيح حظها كدامنا تاخذها واطلعون من البيت المره الماتحترم حموينها وماتلزم لسانها مالها مكان بينا

عمشه : ارتاحيتن يبنات غنيه طشار الولد ماله والي عساهه بحضجن وبختجن جفن گون الجفنجن يبووووووو يفرج تعالي ليه وليداتك تمالخت طلايبهم ماتفض

حطت الفوطه على وجهه وكامت تبجي وتكول

عنبر زرعت الكاع شو خضر ادنان

مدري البزر بيه صوج مدري البخت خووان

جوحي : اعتذري ساهره

ساهره : يعني عفتو شغلة خوله وحرتو بيه على حجايه كلتها بعصبيه

صمد : مو كل حجايه تنحجي وتنعبر انتي تعديتي ولو مرتي حاجيتها وروح ابويه ليله متضل بيتي

جوحي :عاط جوحي بساهره وكاال فضينا واعتذري

ساهره : مو قصدي العفو منكم اخوتي انتم وعلى راسي اني من قهرتي هيج حجيت هاي اختكم تلعب بسمعتكم وانتم مصدكيها

فلاح : كلتيها اختكم وماله داعي الجناين ضالات هنا وحده تحجي والثانيه ترد كلجن على غرفجن مااريد وحده منجن هنا

صالحه : يااا وتريد نصعد ومنعرف شراح تسوون بخوله

فلاح : كلت كلكم يله بدعه ذكرى وانتي ام مهند اخذي اختج واصعدو احد بيكم يشوف كلامي غلط

عبيد : اصعدن يله

الكل صعد وضلو الاخوه ويه خوله وامهم

عمشه : اسمعو يولد عمشه اخيتكم ماتكضون شعره منهه انه اكعد وياهه واعرفن گلشي منها

عبيد : يمه غيرنا ناس تذبحها

عمشه : چاشنهي دجاچه وتذبحها دنعل الشيطان ولا تعيدها البت حلفت بروح ابوك الورگه موش ليها

صمد : اني اخذ مهند بيدي واتمشى بيه لازم يعرفه من يشوفه واذا عرفه لا اخلي دمه بطوله

عمشه : كضه للوليد وربك يحلهه  ولا واحد منگم يسولف لمريته كضو لساناتكم

تعالي يمه ليه كامت خوله وبعدها تبجي واخذتها امه ودخلن للغرفه

ذكرى : طبيت لغرفه بدعه والجهال يكمزون كعدت على المندر وبصفي بدعه وكالت

بديعه : تتوقعين هاي الورقه لخوله

ذكرى : اي الها وتعرفه

بديعه : مثلي توقعت هيج شفتها جم مره فوك السطح ومرات بلحوش تباوع على البيت الجديد المبني يم بيت اهلج مالمحت احد بس دوم عيونها طايره هناك

ذكرى : واني مره شفت شالت ورقه من الكاع وحطتها بصدرها

بديعه : بس والله صاير ممثله مرفت أمين مو مثلها وتحلف بالله وروح ابوها جذب

ذكرى : موقفها صعب اني كلت راح يذبحوها والله

بديعه : امها متخليهم وهم هي ذكيه عرفت شلون تلوفها

ذكرى : من راحت تحرك روحها متت من الخوف

بديعه : متسويها كلنا واكفين منو يخليها تسوي هيج

ذكرى : معقوله هيج تغيرت وصارت تكذب وتحلف بالله كذب وتمثل

بديعه : اني حاسه ممتعالجه وطايبه كلش لان مرات تتصرف شغلات احسها مو بوعيها وتتصفن هوايه وذاك اليوم بليل طالعه تفتر بلبيت حافيه وتوصل يم كل باب تفتحه تباوع  تصفن وترجع تسده من شفتها هيج ركضت ونمت وقفلت الباب وغطيت راسي دقايق وانفتحت الباب مالتنا ولان مقفوله مكدرت تدخل ومن يومها ماانام اله اقفله

ذكرى : لتخوفيني منها عفيه احنا منقفل الباب

بديعه : هو منو يقفله كلنا بس نسده من شفتها كمت اقفل الباب واقرا ايات يله انام

ذكرى : شكد كرهت هذا البيت ساعه السوده من اجيت بيه

بديعه : من رجعنا من الخطبه وانتي وضعج مگلوب

ذكرى : كدامج بيت كل الوكت مشاكل وطلايب ومتخلص هوسه ٢٤ ساعه بس وكت النومه يهدا وهلمره حتى وكت النومه لازم واحد يخاف لان خوله تفتر علينا والله اعلم شبيهه وشنو حالها وشناويه ومتردين اكره البيت

بديعه : قسمتنا بعد

ذكرى : اروح اكمل العشا هسه يعيط صمد جوعان

بديعه : صار هدوء جوه ذبحوها خلوها

ذكرى : لا خطيه ان شاء الله ماكو شى

بديعه : انزل وياج حتى بسرعه نكمل العشا

ذكرى : نزلنا لكينا الاخوه كاعدين ويسولفون وبدعه وخوله ماكو

كملنا العشا وصحناهم ساهره وصالحه مقبلن ينزلن والولد كعدو يتعشون وعمشه تباوع على كل واحد وياهم سويت لفه ودخلت على خوله  كلت اكيد جوعانه اول مدخلت سحبتني من ايدي وكعدتني بصفها

خوله : الله جابج همزين جنت حايره شون اصيحج

ذكرى : خير محتاجه شى هاج اكلي اكيد جوعانه

خوله : مااريد زقوم ركزي ويايه ذكرى باجر من الصبح ترحين لاهلج

ذكرى : هااا لاهلي ليش

خوله : راح تكولين كدام صمد وامي رايحه لاهلج ساعه وترجعين وتاخذين هاي الورقه وتنطيها لاكرم جيران اهلج البيت الجديد

ذكرى : لطمت على صدري عزه شتكولين يااكرم هذا

خوله : اسمعيني باجر لازم اكرم يختفي اذا لكفه مهند راح يكول هذا ابو الرساله وراح تثبت التهمه عليه لان صمد راح ياخذه ويفتر بيه

ذكرى : يعني تعرفين هي الج

خوله : اي الي

ذكرى : لعد ليش هاي الهوسه مال قبل شويه ولطم وحلفان وردتي تحرگين روحج

خوله : من كل عقلج اكول الهم الورقه الي لو اسكت جان ذبحوني جم دمعه على لطمه اهون من ضرب اخوتي واحتمال ذني الحقيرات يحركن اخوتي اكثر ويذبحوني حتى يخلصن مني

ذكرى : واني شعليه بكل هذا

خوله : ساعديني بهاي الورقه مفهمه اكرم كلشي ولازم يختفي هلكم يوم واني مااكدر اطلع ولا اكدر ادز على امل لان راح يعرفون ماعندي غيرج أمن بيها وتكدر توصل لبيت اكرم بدون متثير الشكوك

ذكرى : عندج علاقه بيه

خوله : والله مو علاقه هستوني حظي الفكر اتعرف عليه هو جان يذبلي الرسايل من الحايط الغبي هلمره منطيها لمهند يمكن لان شاف هوسه وخاف يذبها وكتل نفسه كم مره كتله اني مو مال هاي السوالف اني مااحب

ذكرى : هم جنتي ادزين اله شلون توصل رسالتج وانتي مطلعين

خوله : من يشوفني بلحوش من سطحهم ينزل واطلع بلباب بحجه اشوف الجهال اشمر الورقه واطب ومره كتبت اله اياك تكتب اسمك جان يكتب اسمه ويوقع وبعدها تاب واخر رساله كتله ظروفي صعبه واني مو مال زواج واني ارمله مو بنيه واجاني الرد بس هلمره بيد مهند والله ميفتهم واثول

ذكرى : عفيه خوله طلعيني منها اخوج اذا عرف اليه يذبحني

رفعت حاجبها خوله وكالت بهدوء واذا عرف بنجم هم يذبحج

ذكرى : شنو تهدديني وثاني شى اني ماعندي شى ويه نجم ذاك اخوج وروحي اله

خوله : متأكده تره اروح والله وهم حتى يلتهون بيكم ويفكون ياخه مني

ذكرى : دمعت عيني من الخوف وكتله شتردين

خوله : اسمعي كلامي ومتشوفين شى مني ميعجبج مطالبه شى جبير بحجة اهلج ادكين الباب راح يطلع اكرم بس انطيها اله كلشي لتحجين وياه وادخلي لاهلج واني مفهمته كلشي وحتى وصيته ابد ميدز شى بيدج حتى لتخافين وتنحرجين

ذكرى : ومنو يكول مهند ميعرفه ويندل بيت هذا الولد

خوله : لو يندل البيت جان اخذهم بلحظتها مبين منطي الرساله باب بيتنا وميعرف لا اسمه ولا بيته واذا وصلت هاي الرساله اله راح يختفي وميتواجد هلكم يوم وراح يدورون ويملون ويضطرون يغلقون الموضوع

ذكرى : جيبيها

خوله : لازم من الصبح لان وراها صمد راح ياخذ مهند وبذاك الوكت راح تصير مصيبه

ماوصيج يمعوده وتذكري شى اذا وكعت احرك الاخضر واليابس ويايه

ذكرى : عفت اللفه على الجربايه وكمت اخذت الرساله

وحطيتها بصدري والهوا كوه اتنفسه من الخوف اني بلا شى جبانه هلمره صارت هاي الورقه يمي كمت حتى من يصيحوني اجفل عبالي عرفو

بليل اجه نجم ودخل لغرفته والكل نايم ومعرف اي شى من الصار خلصت الليل كله منايمه حتى لبدعه خفت اكول لتروح لفلاح تحجي حسيت اني صاحبه الرساله واني الراح انذبح ساعه اكول اذبها وطبها مرض شسوي خلي تسوي بس من اتذكر قابليتها بلتمثيل وشلون دوخت اخوتها ومنطتهم حق لو باطل اكول خاف تسوي ويايه الاضرب

كعدت الصبح نزلت اسوي ريوك ساعه ٧ الصبح اغسل بلستكاين وكع من ايدي واحد

ساهره :  ثول فزيت شبيج وين بالج

ذكرى : هااا

ساهره : من الصبح مثوله هسه تجيج عمشه اطيح حظج وين بالج

ذكرى : تعبانه شويه

بديعه : صباح الخير

ساهره : زين من كعدتي تعالي لهاي مدري وين بالها كسرت استكان اخاف تكسر ماعون وتخلي مصباحنه اسود من وره عمشه

اروح اكعد جوحي

بديعه : شبيج ذكرى

ذكرى : مابيه بس گلبي على امي حلمت بيها حلم موزين ولازم اروح الها

بديعه : روحي شوفيها

ذكرى : اخاف صمد ميقبل

بديعه : دفعي عمشه عليه وهسه يقبل

ذكرى : اكمل الريوك واروح عينج على الجهال فدوة يونس البارحه بليل مصخن شلع گلبي يله نزلت حرارته

بديعه : ليضل بالج عيني عليهم

ذكرى : كملت الريوك والكل كعد عدا فلاح لان طالع الفجر عنده بناء وعبيد للسكراب

صمد : وين مهند

صالحه : نايم ليش

صمد : كعدي اريده

صالحه : من يكعد انزله الك بس ماكتلي ليش

صمد : اريده مو اله تعرفين

صالحه : غير ابني

صمد : واني عمه ورايده ولتدخلين

صالحه : الله مطولج ياروح

عمشه : بسكم تناكرون من صباحيه الله

صالحه : غير اعرف شيريد بأبني

عمشه : عمه وانتي شكو اسگتي ومن يكعد ولدج حدري لعمه ولاتكثرين سوالف يلغاگه

نفخت صالحه بضوجه ورجعت تكمل اكلها وتلوب تريد تعرف شعدهم ويه مهند

ذكرى : كاعده اشرب جاي واحسه تيزاب من الخوف كلت لصمد كدام عمتي

صمد من رخصتك ساعه اروح لاهلي وارجع

صمد : خيرج منو مات

ذكرى : اسم الله الرحمن عليهم ليش هيج تكول

صمد : لعد ليش ترحين شعندج ذاك الاسبوع رحتي

ذكرى : حلمت بأمي وگلبي نار عليها والله ما اتأخر

صمد : خوش والله هلمره كل ماتحلمين تركضين لامج لاتنامين بعد

عمشه : چاشنهي غير امهه

صمد : يمه ذاك الاسبوع جانت يمهم

عمشه : انه لو خوله متزوجه  وبنفس الدربونه يوميه انشد عليهه

صمد : مو تزوجت ومره وحده رحتي الها

عمشه : غير جانت مريضة ومعلوله والسيد الله يرحمه كال لاتوصلين تزيدين مرضها وانه وحك ابو الحسنين گلبي موجر عليها عبن كل ليله انوح لمن يطگ گلبي وانامن هاي وحيدتي ومريتك وحيدت اهلها ساعه زمان وترد

صمد : يمه اني مااريدها كل شويه وطافره لهناك

عمشه : كومي يمه وسلميلي على امچ

صمد : يمه

عمشه : وغمه اسكت ولك كوومي شبيج مدوهنه ولا تأخرين

ذكرى : صار عمه باوعت على صمد ضاج بس محجه بعد ماطول عمشه انطت الموافقه ركضت ليفوك وطلعت الرساله جنت ضامتها بملابسي وحطيت عبايه على راسي وبملابسي طلعت اركض شفت بدعه تنظف المطبخ وصيتها على الجهال وطلعت

بقيت امشي واتلفت اخاف احد يشوفني واكول بگلبي الله لايوفقج يخوله على هاي السالفه هسه اني بيها عليها ربي سترك

وصلت لباب اهلي وكفت واباوع يمنه يسره دنيا الصبح وماكو احد تحركت شويه خطوه لان بيت اكرم حايط على حايط ويه بيت اهلي دكيت  ويه كل دكه احس عظمه بجسمي تتكسر من الخوف

دكيت ودكيت هوايه وسمعت منوو صوت رجال

ياربي كون هو مو واحد من اهله دخيلك الهي

فتحت الباب ولد شاب استغرب وكفتي وكال

نعم اختي تفضلي

انت اكرم

نعم اني اكرم منو انتي

مديت ايدي وكتله هااك شمرتها عليه ودخلت ركض لبيت اهلي حتى منداريت اخذها او لا ودخلت لمطبخ اهلي الهث

شافتني مرت فوزي وداد

وداد: شبيج ذكرى وجهج اصفر

ذكرى : مابيه مابيه

وداد: شو جايه من الصبح جهالج بيهم شى

ذكرى : انطيني مي عفيه ريگي ناشف

وداد: هااج اسويلج ريوك ويانه

ذكرى : لا متريكه اجيت اشوف امي وارجع

وداد : امج نايمه والكل نايم انتي تعرفين ساعه بيش هسه

ذكرى : اي اعرف يله اكوم واجي غير وكت

جان اطب امي حضنتها من الخوفه البيه تمنيت ارجع طفله واختل بحضنها ومااطلع منه

ام ذكرى : شبيج ماما صاير شى

ذكرى : لا سـلامتج گلبي نار عليج واجيت اشوفج واروح

ام ذكرى : جهالج زينين

ذكرى :  الْحٍمَدٍ للـّہ بخير ليضل بالج

فوزي : هله بهذا الصباح الحلوو هاي منو يمنه وسحبها وباس راسها

ذكرى : والله ماكو احلى منك ومن گلبك شلونك حبيبي

فوزي : بخير اذا انتي بخير

ذكرى : اني بخير وعافيه بحسك وحس ابويه الله يحفظكم اليه

فوزي : وداد احسبي حساب ذكرى ويانه اليوم الريوك ميحلى اله وياها

ذكرى : والله تريكت واجيت

فوزي : ماكو اله تتريكين ويايه اشتاقيت لكعدتنا سوه ونقسم الخبزه بيني وبينج

ذكرى : ياريتنا بقينا هيج اوووف

فوزي : بيج شى احد مضوجج ولو رجلج حقير ومابيه خير واكيد هو الي مضوجج

ذكرى : لا مو هوه ليضل بالك وراح اتريك وياك بسته وكعد يمه الله انطاني اخ حنين عليه حتى احن من ابويه وحيل يريد خاطري كعدت اتريك بنص اهلي وابويه هم كعد وسلمت عليه واكلت زين لان ارتاحيت بينهم

ومهدي يعيط يريد يونس كتله غير مره اجيبه الك

بقيت ساعه ونص ورجعت خفت لا هذا الاسمه اكرم بلباب وينطيني رساله طلعت مو امشي تكول سباق عندي بس ردت ادخل للبيت اول مدخلت

وصلت للحوش جان تنجر ايدي واشوف نجم كدامي جفلت وهو اعصاب ولو بيده يكطعني جان يجرني حييل من عباتي لوره البيت مساحه بيها سكراب وغراض وجان يلزمني من رگبتي حيل وخنكني

ااااخ نجم شبيك

نجم : شعندج ويه جيران اهلج احجي

ذكرى : كمت ابجي يعني شافني عوفني واني احجي راح اموت بيدك

عافني وشهكت من البجي

نجم : اذا محجيتي اروح هسه لصمد واخلي يذبحج

ذكرى : والله ممسويه شى

نجم : شفتج وكفتي بابهم وشمرتي ورقه جنت رايح للدكان وبرجعتي شفتج وركضتي لبيت اهلج يعني معقوله عندج شى وياه

ذكرى : لا وداعت جهالي ونظر عيني كام يضرب على راسه ويكول فهميني قبل مااذبحج وماادري بروحي

ذكرى : حجيت كلشي اله وكتله على تهديد خوله دفعني وركض عليها لزمت ايده

دنكت على ايده وابجي ابوس ايدك لتروح الها

نجم : اليوم اذبحها واخلص من مصايبها هاي شافت محد يكدر عليها

خوله : مراح تسكت نجم راح تحجي شغلات محلوه ومصايره بينا احلفك بكتاب الله لتروح

نجم : ولج وخري مني اليوم اعلكها وانعل الساعه الي اجت بيها للدنيا واريد اشوف شلون تحجي ودفع ايد ذكرى ورجعت جلبت بيه حييل

ذكرى :  ابجي واتوسل بيه

ابوس ايدك راح اروح بلرجلين احلفك بيه اذا بگلبك بعد الي خاطر

مباشره نزل لمستوى كعدتي وكومني

شبيج يعني راضيه كل شويه تهدد بيج

ذكرى : راضيه والله بس مااخسر جهالي تعرف شنو اذا حجت وكالت انت جنت تحبني واني احبك المصيبه مراح تكول الصدك راح تحرف واشكال اطلع كذبات اني شفتها بسالفه هذا الولد لو تشوفها شسوت بأخوتك راح تعرف قابليتها بلكذب لوين وصلت مو بعيده تحجي شغلات مسويتها وياك بلحرام وتحلف عليها اني سمعتها بأذني شلون تحلف كذب بأبوك وبالله يعني ماكو اسهل من الكذب عدها

نجم : لا اله الا الله واسكت الها لج هاي تخبلت لازم واحد يوكفها ويعيد تربيتها

ذكرى: بس مو انت اترجاك لان هيه لازمه هاي النقطه عليك وعليه جفيني شرها الله يجفيك نار جهنم

نجم : ليش هيج جبانه

ذكرى : اذا صارت وحجت وصدكوها اخوتك يعني صمد يكتلني خلاص واذا ماكتلني يشهرني ويدزني لاهلي وهاي فضيحه لاهلي شكبرها اذا مكالو مصادقه حماها بنفس البيت يعني ابويه يموت ميتحمل عدا اخويه الله اعلم شنو ردت فعله واكيد راح يحرمني من جهالي وانه موتني ولا انحرم منهم

كلمة منها راح ادمرني انت رجال مراح تتدمر بكدي

نجم : كافي تبجين كااااافي راح اطب اذبحها كااافي

ذكرى : سكتت بس لتحجي وياهه ولا كأنك تعرف شى وهيه تره ممسويه شى ويااه بلعكس طلبت منه يبتعد عنها وبعد هاي المشكله اكيد راح يبتعد نجم احلف بأعز شى عندك متتقرب من خوله

جر نفس بعصبيه وراح واجه وكفت گباله ودموعي تنزل على خدي والشهكه بصدري وكتله احلف

نجم : وداعتج مااحجي بس اسكتي واذا سوت شى ثاني خوله لو مو انتي بذاك الوكت لو اعرف انعدم اكتلها خلاص ورب الكعبه

ذكرى : مااشي ان شاء الله ماكو شى

عدلت العبايه ومسحت دموعي دنكت اكو بوري قديم مال مي فتحته وغسلت وجهي لكيت نجم صافن عليه

ذكرى : كد حلفانك

نجم : كده روحي ادخلي لحد يحس

ذكرى : طبيت حيل مابيه امشي لكيت بدعه بوجهي فتحت عيوني مصدومه كالت

بديعه : لتخافين جنت واكفه هنا خفت ساهره لو صالحه يطلعن ويشوفوكم

ذكرى : والله مو مثل ما بالج والله

بديعه : على كيفج راح تخربين اعرف لتخافين اعرفج شريفه وبت اصول والعيبه متطلع منج ومن انكمل شغل تعالي وسولفيلي

ذكرى : امشي واسب بگلبي بخوله وبلساعه الدخلتها بهذا البيت مخلصته بيها هبطات ومغثه

صعدت ليفوك لاكاني  صمد لازم ايد مهند مبين راح يفترون بلكت تنلكف وتنكتل كتله زينه والله من وره الهبطات مال اليوم تمنيت خوله يخبزوها خبزه معدله حتى تبطل هاي سوالفها

رجعت وره مرتاحيت حجيت كلشي لبدعه مردت تاخذ نظره عليه يمكن هذا السر جان المفروض ينضم بس ماطول خوله تعرفه ميعتبر سر لان راح ابقى تحت رحمتها

بدعه مظهرت اي ردت فعل محلوه بلعكس حذرتني من خوله وكالت ابتعدي عن نجم اكثر من قبل ودوم لتتواجدين من هو موجود وخاصه كدام ساهره وصالحه حتى اخاف بيوم تذب بلاها عليج الكل يشهد الج بأن انتي بعيده عن نجم

لاول مره ارتاح واني احجي اني طول حياتي ماعندي اخت وبدعه صارت الاخت الي ومن يومها ايدي بأيدها حتى نتجفى شر خوله الجاي يوم بعد يوم يزيد

اخذو  مهند ويومين يفترون بيه

وماكو اي نتيجه لزمت عمشه ولدها وكالت تسدون الموضوع وعبيد حاول ميسده بس كالت اله

عمشه : كضيتو الوليد سيحتو دمه وتاليها غير الفضايح والهرج مانحصل والوادم تاكل وجوهنا و علج بحلوك النسوان نصبح واولهن خالتكم غنيه وبنياتها

عبيد : لعد نسكت يايمه حتى عيبه بحك شواربنا

عمشه : چا شنهي البت ماسوت شى وراكده يمي وهي ورگه ولت وانه لهسه مامصدكه خوله انه اكولن هاي مريتك ولا تزيد وتعيد بيهه يبن بطني

عبيد : بس يمه

عمشه : ياطلابه ماتخلص اسگت ولك وانتم تسمعوني اخيتكم مريضة ومالها حيل گل شوي واحد طاگهه منكم لاتتسودن البت وتحرك رويحتها احلفكم بتراب ابيكم ميلو منهه البيه كافيهه

وحك الرضا الماشافته عيني واحدكم كض شعره منها لااشحتكم گلكم من البيت وحيرو بزمانكم

الكل سكت وخاف من تهديد امه وانسد الموضوع بس الكل من يشوفها يدير وجهه منها وهي ولا دايره بال

مر اسبوعين والكل ساكت وحايرين بعرس نجم المبقى كم يوم ويعرس خوله كاعده بلكاع بلهول وتاكل عسليه بلطحين حاطه الصينيه يمها وتاكل وتباوع علينا شلون نشتغل وهي ولا تمد ايدها والراديو الصغير يشتغل حاطته على الشباج وموخره البرده وساهره وصالحه يطحنن طحن منها وحدتهن اذا تلزم خوله تشرب من دمها

اني ابتعدت عنها تماما بس كتلها الرساله وصلت ومن يومها مالي دخل بيها

ساهره : متكومين تشتغلين ويانه لو رجلج محنايه ومتكومين

خوله : اربع جناين بلبيت المن كايمه اني

صالحه : مو خدم لحضرتج نشتغل

خوله :مو لاجل عيني تشتغلن وصاخه البيت وصاختجن انتن ورجولتجن وجهالجن انظف وراكم على شنو قابل اني الموصخه

واذا تردن اشتغل ترجع عمشه وكولن الها واني من عيني انظف من فوك ليجوه

بديعه تباوع عليه وتأشر راح تعلك

صالحه : يجي يوم ياخوله واكسر خشمج اليابس واردلج سوايتج بينا لا عبالج نسيت

خوله : ولا اني نسيت ياام مهند

ذكرى غيرت الموضوع وكلت

ذكرى : شوكت تجي العروس وتجيب جهازها

خوله : ماضل شى يامرت اخويه وتجي المسعده الراح تكش البيت وراعيته

وجان تطلع اغنيه كامت وجرت وصله وشدتها وتركص

حبيبي يا عيني يا عيني يا ليلي

يا مسهر عيني بنهاري وليلي

والله اشتقنا وحياة عيونك

يا مفارقنا اشتقنا لعيونك

المغنى حياة الروح

يشفي القلب المجروح

يالا نرقص ونغني

ونعيش بأحلى جنة

يالاه يلا يلا يالاه

يالاه يا حبيبي طبلي شوي

وجرت بان ومرتضى تركص وياهم وبدعه تصفك الها وتهلهل

صالحه : على شنو تهلهلين

بديعه : غير عرس نجم مبقاله شى ليش منفرح

ذكرى : اذكرت عرس اخو بدعه بعد باجر شو هاي ولا جابت طاريه سحبتها واخذتها للمطبخ

بديعه : هااا خير ولج ذني اذا ضلن وحدهن يحركن البيت

ذكرى : هسه تذكرت شغله شوكت تحضرين روحج

بديعه : على شنو

ذكرى : عرس اخوج عكب باجر

بديعه : الله يهني ولا اروح خليني كاعده وساكته

ذكرى : ليش ولج

بديعه : اهلي مايردوني وعزموني حالي حال الغريب والغريب مو اله يحضر.

ذكرى : لتكولين هيج اعرف بيج تحبيهم وتحبين اخوج

بديعه : وهمه مايردوني يذكرى الله يهني سعيد بسعيدته همه من يوم مازوجوني نسو عدهم بنيه اسمها بديعه المن مذكرتهم بعد امشي نطلع لنسوان حموينج لايلزمن خوله ويكتلنها

ذكرى : يعني هيج قافله مترحين

بديعه : قافله وداعت بتي خليهم براحتهم واني هم براحتي

ذكرى : اعرف بدعه متأذايه حيل بس هذا طبعها من زمان تضم بگلبها وتتحمل

رجعنا الهن وبعدها خوله تهز وذني على ساعه يلزمنها ويعدمنها العافيه وهي ولا يمها

مرت الايام ركض بركض وبين حياتنا بيت عمشه وبين ركضنا على جهالنا والعيشه

اليوم عرس الغالي على كولت عمشه

اليوم الكل مخبوص

كاعده البس جهالي ناي لبستها بدله مال حوراء بت فوزي اخويه وداد كالت مااحتاجها بعد حوراء كبرت ومتصير عليها لبستها لناي عمر ناي صار ٥ اشهر ونص

وهي مدبدبه على صدري تخبل ملامحها والشعر خفيف حيل بس مبين نكرو (كيرلي) مو سرح طالعه على اهل ابوها

ويونس لبسته ملابس مهدي هم صغار انطتهم اليه وداد لان صمد مقبل اشتري كال ماعندي منين اجيب وسمعتني وداد اسولف ويه امي من سألتني شراح اشتري وهي اقترحت الملابس شفتهن جدد ليش حرامات ومابيها شى همه ولد اخويه مو غربه

اباوع على جهالي اكول ربي احميهم واخذ من عمري على عمرهم

لبست فستان مشجر عندي من اني وبنيه بعده على كدي لان مسمنت رغم بطنين وفتحت شعري  وحطيت طاك و مكياج خفيف ودورت حذاء العرس لبسته طبت بدعه

بديعه : هاي شطالعه عيني تخبلين ولج انتي العروس

ذكرى : يمعوده الي يسمعج يصدك

بديعه : والله تخبلين احلى جناين بيت عمشه

ذكرى : لا العروس الجديده احلى

بديعه : اني عندي انتي احلى

ذكرى : لان تحبيني وانتي هم تخبلين طالعه

بديعه : يمعوده على كد حالي المهم نتونس ونرجع

ذكرى : يله امشي

بديعه : اريد اسألج شغله بس محروجه

ذكرى : مابينا حرج احجي احنا خوات

بديعه : خوما ضايجه على عرس نجم

ذكرى : جريت نفس وابتسمت وكلت بلعكس فرحانه الله يهني

بديعه : الله يريح بالج يله امشي نزلنا والكل متجمع ونجم عيونه حايره ومن نزلت رفع راسه وباوع عليه وكال يله امشونا

ذكرى : واكفه وشايله ناي وبيدي الثانيه لازمه يونس واباوع على نجم لازم ايد مرته ويبتسم بوجهه رجعت بذاكرتي ليوم زواجي وشون بارگلي يمكن مااحس بشعوره بذاك الوقت بس اليوم تأكدت جان شعور يأذي لدرجه تحس الگلب يريد يطلع من الصدر حتى النفس يدخل للرئه يجرح

تقربت منهم وبوست العروس وكال الها هاي مرت اخويه صمد

سهاد : اهلاً وسهلاً وابتسمت بوجهي

مديت ايدي وكتله بلخير عليك خويه

مد ايده وباوع بعيوني وكال شكراً

سحبت ايدي منه وطلعت بهدوء الناس فرحانه وهوسات ودبجات كامت عمشه وطلعت من جيب دشداشتها كلاده ذهب على شكل ليرات مدوره  ولبست العروس وهاي اول مره تسويها عمشه خلت الجناين وحده تباوع بوجهه الثانيه

وخوله متكتفه وتتفرج عليهن ومن لبستها طكتها بهلهوله وكأنها تكول النا شفتن مو كتلجن

اني مهتميت بس ساهره وصالحه مثل النار وذب عليهن نفط عيونهن بيها الغضب والغيره وجهن تغيرت ملامحه وحدتهن مكدرت تخفي الي بداخلها وخوله متشمته بيهن

اختنكت من الوضع ومن الكل وحتى من نفسي كلت لصمد اريد ارجع للبيت مقبل ارجع كتله الجهال ضوجوني كال اوصلج وارجع ورجعت للبيت وحدي اباوع شون هدوء بس اني بيه تتنقل عيونه على كل بيبانه وحياطينه كلت يابيت شراح تشوف بعد صعدت للغرفه وسديت الباب وحطيت الجهال يمي شويه ورجع الكل جان نجم الوحيد الي ينزف بفندق مراد بلبيت وعمشه معترضت رغم اخوته كلهم مقبلو بس عمشه ماكسرت بنجم والراده سواه وانزف للفندق وجانت خايفه من ساهره وصالحه لايسون شى بليله عرس نجم وتنعاد سالفه جاسم ويكسرن بعمشه وبفرحتها

يمكن هذا الشى بصالحي حتى اتعود على الوضع الجديد

ثاني يوم اجت العروس الجديده الجنه الخامسه لبيت عمشه دخلت وذبحو جوه رجلها كلشي جديد دنشوفه ولا وحده من عدنا سولها هيج وهذا الشى خله الجناين كلهن يضوجن

عمشه : يمه اخذ مريتك وخش بغرفتك

سهاد: شكراً عمه مقصرتي شكد حنينه انتي

ساهره : بدت اللواكه

عمشه : خيرج ساهره عندج شى

ساهره : لا عمه سلامتج فرحانه بلعروس الجديده

عمشه : استجني يبت غنيه

ساهره : مستجنه يعمه وعوجت حلكها معاجبها

ذكرى : سلمنا كلنا عليهم والجهال فرحانين بلعروس اخذ نجم عروسه وقبل ليدخل سألته امه وين بياضها طلعه وانطاها الها واشتغلت الهلاهل

وعيون عمشه على صالحه وساهره

دخلو غرفتهم واحنا التهينا بلشغل والطبخ ولازم نكمل الغدا لان اصدقاء الولد جايين يتغدون انكسر ظهرنا من الشغل حيلنا راح وخوله بس كاعده تكرط خيار ياتلعب ويه الجهال

كملنا يومنا بطلعان الروح ركض بركض جنت اذب روحي بلشغل حتى ماافكر وبليل انام على وجهي

وثاني يوم العصر كاعدين والعروس بنصنا وعمشه طايره بيها وسهاد مبينه حبابه ولسانها حلوو

نجم  طالع اجوي اصدقائه عزموه وفلاح وعبيد وجوحي راحو يبيعون عتيك استلموه الصبح ولازم العصر يبيعوه وفلاح نايم

اندكت الباب طلعت اني افتحها

اباوع نسوان اثنين وابنيه

ام عبيد موجوده

ذكرى : اي تفضلو

عمه نسوان عليج

عمشه : يااا منهي بيهن دخليهن

دخلو النسوان وبوستهن  واحنا وحده تباوع بوجهه الثانيه

صالحه : هذني منو اول مره اشوفهن

بديعه : واني هم اول مره اشوفهن

خوله كاعده وتمشط لبان ولا كامت حتى ولا باوعت عليهن كامت بدعه تسوي شربت وكامت وياها سهاد لان مستحيه ومتعرف الناس وضلينا احنا نسمع وكاتلنه الفضول منو ذني

جان المره الجبيره كالت خيه ام عبيد ياهي منهن خوله

رفعت راسها خوله مستغربه وكالت المره

ماشاء الله عين الله عليها حليوه وسمارها يسر النظر

عمشه : رحمه الله والديج خيه

والله ياام عبيد سألنا عنكم والناس حمدت بيكم واحنا رغم جدد بلمنطقه بس الزين من الشين معروف وانه اليوم اجيت اخطب خوله لابني اكرم

يتبع....

#الابواب_الخمس

البارت التاسع

للكاتبه Reem

هلا بالجان مرسوم بخيالي

هلا باليمشي ويضل عل بالي

انه لو عندي غالي بجيتك انساه

واجيت انت بوكت ما عندي غالي ..🍂🖤

عمشه : رحمه الله والديج خيه

والله ياام عبيد سألنا عنكم والناس حمدت بيكم واحنا رغم جدد بلمنطقه بس الزين من الشين معروف وانه اليوم اجيت اخطب خوله لابني اكرم

خوله : رفعت راسي اريد اركز على الاسم

وامي تأشر اطلعي

واني حتى متحركت من مكاني

ام اكرم : هااا خيه شگلتي

عمشه : والله ياخيه بعد بيتي اكرم خوش زلمه وانه اشوفنه من جان يبني بيتكم شاغول واخو اخيته

ام اكرم : يعني موافقين

عمشه : يااا چا شنهي انه منطيتج جيس نخاله  وهيج بساع بساع كون لزم انشد لاخوتهه ويتشاورون وانه ادزلج طارش

الوليد شيشتغل وهاا خوله ارمله موش بت اخافن ماتعرفين

ام اكرم : اعرف وسألنا على كلشي واكرم يشتغل بمحل اقمشه مال ابوه ابو اكرم قماش بلكاظميه وعنده محل واكرم وياه واخوه والحمدلله مستوره وهاي جنتي واشرت على بنيه كاعده

ذهب صافي ومثل بنتي وان شاء الله خوله بتي الثانيه

عمشه : بيها الخير خيه

ام اكرم : وعروستنا شتكولين شو صافنه

خوله : هنا يله حسيت على نفسي وكمت من مكاني اريد اوعى على السمعته اكرم اجه خطبني زين اشاف مني حتى يخطبني شعرف مني

دخلت للغرفه كاعده على الجربايه وصافنه معقوله ارجع اتزوج واحب ويصير عندي بيت مثل باقي البنات واعيش عيشه مال اوادم معقوله لو ينعاد عليه سوالف السيد وضربه واهاناته اكيد اكرم مو مثله هو شاب وحلو وكلامه مال مثقف وابتسامته اوف ربي تخبل ابتسمت واني اتخيل نفسي ابيت زوجي واضحك وياه واعدل بغرفتي وادلع عليه وشون يدلل بيه ويتغزل ويه كل كلمة منه ضحكه تطلع من روحي واداري عمتي واروح واجي لبيت اهلي واكول رايحه لبيت عيالي تأخرت حسيت واني اتخيل گلبي من الفرحه راح يطلع

عمشه : انه اكولن لاخوتهه ويصير خير

ام اكرم : نروح احنا ضلت يمج العافيه

عمشه : العافيه يمج وحواليج خيه هله بيج

ذكرى : وحده صافنه بلثانيه ومنعرف شيصير جان تطلع ام اكرم وعمشه جرت عبايتها طبت بدعه بيدها الشربت

بديعه : خيرج عمه وين رايحه والناس وينهم

عمشه : چابعد وكت الوادم فضت وانتي الفاهيه جايبه الشربت كون اديرنه على راسج

بديعه : غير ادور على مي بارد حتى اسوي

عمشه : ميلي مني ودفعتها وطلعت

بديعه : وين راحت

ساهره : اكيد لام اسماعيل مختار المنطقه تريد تشمشم اخبار منها وتعرف اصل الناس

شبيج صالحه شو صافنه

صالحه : گلبي ممرتاح يمكن هذا اكرم هو ابو الرساله

ذكرى :خفت بسرعه وكمت ابلع ريك كوه وصافنه عليهن ودخلت سهاد كعدت وصافنه على حجيهن مثلي

ساهره : ومنو يكول هو

صالحه : كوليلي شلون شافوها ومنين يعرفوها وهي لا اطب ولا تطلع خاصه وره سالفه الرساله انحبست فد مره  وامه مبين مشايفتها لان من دخلت سألت منو خوله يعني المره هاي اول شوفتها الها  معناها ابنها شايفها وماكو غير ابو الرساله شايف ست الحسن

ساهره : اي والله صحيح خلي يجي جوحي واكله اله اخلي يطيح حظها

صالحه : اني حاسه هاي جنتهم والمره الي وياهن معاجبهن الوضع حقهن اشافن بيت ام العتيك وراح ياخذون مره منهم

بديعه : مثل ماشفتو انتم واخوكم كتل نفسه عليها

ساهره : ولج بدعه طالع صوتج وطولان لسانج وجاي اطحنين حتى تتزوج شجاج

بديعه : الله اكبر شرايدات من البنيه خلوها تتزوج وتروح وتخلص من هذا البيت

صالحه : وانت شكو اخاف امها ومندري

ذكرى : صحيح كلام بدعه ليش تأذوها مكافي الصار بيها واجت قسمتها وخلي تتزوج حالها حال اي بنيه وتره خوله حلوة ومرتبه وصاحبه شهاده الف واحد يتمناها بس غير الحظ عوج وياهه

ساهره : يااا هاي منو طلع حسهه صح النوم

ذكرى : مو مال شقه هسه ليش تردون تحركون عليها حتى وان جان هو ابو الرساله طلع رجال وكد كلمته ودز امه يعني لاكذب ولا طلع خوان ويلعب هيج واحد ينطي مره وهو مأمن

صالحه : ولج ذكيره اخاف تعرفي ومندري

ذكرى : هااا لا شمعرفني بيه شنو هذا الحجي حسره واحد حجه شى وذبيتن تهمه براسه

ساهره : وشبيج تتراجفين قابل شكالت صالحه

ذكرى : مو طريقه حجيها مدري شلونها تتهمني باطل

صالحه : ماتهمتج سألتج وانتي انگلب حالج

ذكرى : اكوم اصعد لجهالي اخاف كعدو

عفتهم وصعدت اعرف بيهن مراح يجوزن من خوله

بديعه : انتن موتردن تخلصن منها خلي تتزوج وتروح تره اذا تبقى هنا راح يوميه تسوي مشكله

صالحه : وعلى اساس اني اخاف يااهيه والي برجلي على نفسها

بديعه : صالحه ادري بيج متخافين ولا ساهره تخاف بس ليش اتعبون نفسكم بمشاكل وطلايب وعمتي مبينه فرحانه وتريد تزوجها خلي تتزوج وتكف شرها عن الكل البنيه الصار بيها جبال متحمله

سهاد : شصار بيها

ساهره : وانتي شكعدج يمنه يمه كومي لغرفتج بعدج عروس لدوخين روحج بسوالفنا

سهاد : واذا عروس قابل مااكعد يمكم وهاي هم حماتي واحبلها الخير واريد اعرف شصاير بيها

صالحه : كومي حضري نفسج لرجلج ولتعبين راسنا وياج مو اجيتي مصار يومين وتردين تعرفين مال سنين بعدج بلبيضه من تفقسين عود نحجيلج كومي يله

بديعه : كومي سهوده عيني رجلج على جيه وشوكت متردين اني اسولفلج

ساهره : باع الثانيه تضلين هيج رعنه

بديعه : اي اضل يله كومي سهاد ولتضوجين يشاقن وياج

كامت سهاد والوجهه انگلب

انداريت عليهن وكتلهن

شجاجن ياستار اكلتن البنيه اكل هاي هم خوله

صالحه : بله اكرمينا بسكوتج ضاله ادافعين لهاي ولذيج عمشه ماسوت سوايتج

بديعه : الله عليجن لاتخربن الخطبه والله حاسه راح تتغير وتتحسن نفسيتها والبنيه ترجع مثل الاول انتي صالحه عندج بنيه خافي الله بيها

ساهره : همزين اني ماعندي وبارد راسي

بديعه : وشبيهن البنات غير حلات العمر ونسته

ساهره : هسه انتي عفتي خوله وجلبتي بلخلفه فگي ياخه عنا ومالج دخل بكلشي وحيري بلطبخ والخبز

صالحه : كومي بدعه كملي العشا الجهال جاعو

بديعه : احلفجن بروح ابوجن كفن منها وخليها تروح لحال سبيلها وتعيش حالها حالنا والله خطيتها برگبتكم اذا خربتوها

عفتهن وطلعت اوف عفيه نسوان يموتن على خراب البيت

ذكرى : بقيت فوك اروح واجي واذكرت مرشينا السطح ولا فرشنا صار المغرب وصعدت للسطح وياي ناي فرشت مندر وحطيتها بلكاع بين مااكمل رشيته وفرشت كلمن لمكانه بس لنجم ومرته مافرشت لان ماادري ينامون فوك لو يبقون جوه سحبت ناي وكعدت ارضعها ماكو احد وصافنه على السما اليوم مغيمه من الحر وماكو نسمه هوا والبك يكتل كتل بس شنسوي وين انام

اباوع على وجهه ناي احمر ومكرص دنكت بستهه اوف ياريحتج الطيبه غفت بحضني وبقيت على كعدتي

لحد مصاحت بدعه على العشاا  نزلت من السطح حطيتها بفراشها ونزلنا كلنا واني انزل صار بوجهي نجم وزوجته لازمته من ايده شافني وخر ايدها اني دنكت وكملت نزلتي

الجهال واحد بصف الثاني طول مامرتضى ومهند كاعدين لازم يتمالخون

الكل كمل اكل وبعدهم كاعدين كالت عمتي

عمشه : اكلكم يمه ماطول گلكم هنا انه عندي سالفه وياكم

عبيد : خير يمه

عمشه : اجونه اليوم خطابه على خوله

جوحي : منو

عمشه : بيت ابو اكرم امهم رادت خوله لولدهم اكرم

فلاح : وين شافها

عمشه : امهم شافتها وتريدها وانه اكولن تفوت بفالها عبن البت كبرت ومرجعهه لبيتها ولرجلهه

صمد : وهي شكالت

عمشه : ياا شتكول غير انتم تقبلون چاغير انتم وليان امرها

عبيد : بس السنه مال رجلها مطالعه شلون تتزوج شيكولون الناس علينا

عمشه : چا هو السيد دخيل بخته ينحسب زلمتهه تزوجهه للعلاج والله اخذ امانته

ساهره : ليش مو رجلها غير ضلت شهرين يمه وصارت مرتي شرعاً

عمشه : بحضج وبختج چا مرت جويسم هم تاخذلهه سنه يله تتزوج

صالحه : وهاي شعليهه عمه اسم الله قابل جاسم مات

عمشه :چا هو لو ميت استر عبن الصار ماينحجي اااخ منك يلساني

صالحه : ماله داعي كل ميصير شى وكلتي جاسم هاي كدام الكل اخويه رجال وغصب عن اكبر واحد ومااقبل احد يحجي عنه ولتنسون هو ابن خالتكم

عمشه : اهمداه الوعث شنهي يبت غنيه مالج رداد حسج عالي وحموينج موجودين مالهم حشمه وكدر

عبيد لا يمه الهم كل الحشمه بس صالحه انقهرت علمود اخوها وحقها

عمشه : رايتك بيضه يايمه چا هيه كوووه

قاطع نجم امه وكاال

اني عليه موافق وشوفي اخوتي الباقين كام وعافهم

عمشه : يااا بيهه الخير

صالحه : ها شنو عمه غير الولد هم ينطون رأيهم لو لان نجم كال موافق اعتبرتي الولد مالهم راي

عمشه : بت غنيه اكرصيهه واركدي ولا تحومين على خراب عشج

عبيد : اي يمه حجت الحق شو بس سمعتي موافقه نجم ورد وجهج

عمشه : ياا شبيك يمه الله ثاولك چا شفتني هلهلت طشيت واهليه گلها چلمه بيهه الخير چا اكولن بيهه مصاب لو عبن مريتك نطت وذبت سمهه انت لزم تباريهه

عبيد : والله يايمه اني شفتج كيفتي من كال نجم هيج گلت هذا هو بعد متريد رأينا

عمشه : اسمعنك يلجبير

عبيد : نسأل عنه ونشوف اصله وفصله واذا زين نوافق

ساهره : مو هيه دكتوره وتخافون تنطوها شلون مجان لو ما ارمله منو يگلبها بعد زين منو الرجال ورضا بيها

عمشه : ام رگبة العاريه چا شبيهه خوله عبن مزيونه واحلى منج تراجفين منهه

ساهره : وليش عيني اغار منها

عمشه : بسچ الغسل على هلحلك وانتم لا تشعلون افادي البت انه انطيتهه واريدن واحد يردني

جوحي : هسه احنا شحجينا وگمتي تعيطين

عمشه : انه اعرفن بيكم نسوانكم ماتريد الخير ليهه ولون ضلت عليكم البت تبور انه سألت ام اسماعيل واحمدت بيهم انتم ترحون وتسألون بلكاظميه بمحل ابوه وتردون بلخبر ليه

صمد : وخوله متاخذين رأيها

عمشه : البت يمي اريدن خبر منكم ومالكم دخل

ذكرى : كمت من الاكل ورحت اشوف الجاي حاطته على الچوله

حضرت الاستكاين وطبت سهاد

سهاد : اني اسوي الجاي 

ذكرى : انتي بعدج عروس تلحكين على الشغل

سهاد : اني احب اشتغل واذا عروس حابه اسوي الجاي لرجلي وحمويني بيدي اذا ميضايقج هذا الشى

ذكرى : باوعت عليها وكتلها لا عيني براحتج

كعدت تحط الاستكاين بلصينيه شويه وصبت الجاي وراحت قدمته

عمشه : چا شنهي المدمغات وينهن

سهاد : منو قصدج عمه

عمشه : ذكره وبدعه

سهاد : موجودات بس اني كلت اسوي الجاي بيدي تفضلي عمه

عمشه : لا تتعبين يايمه انتي عروس ووليدي اولى بتعبج

سهاد : هو جاي عمه ماكو تعب واندارت على الولد وانطتهم وراحت للغرفه بيدها استكان الجاي لنجم

عمشه :خايبات البت لاتعبنها مااريدن منا للسابع كشايه تشيل سمعتن لو طرشيتن

صالحه : والله وكت اني من ثاني يوم عرسي غسلت ملابسج وملابس الولد ماكلتي هيج عليه

عمشه : دهر الدهرج تذكرين موش راس عبن شغيلهه مابراسها حظ تذكريهه ومن اگلج على شغيله زينه تكولين ناسيتهه

صالحه : كلمن وحظه يعمه

ساهره : يله عيني جوحي نصعد فوك

عمشه : اصعد يمه مريتك كزه تخاف تصعد وحيدها

ساهره : لعد حلال للعروس وحرام علينا

عمشه : يعينك الله يايمه خذ مريتك ولي

جوحي : باجر طالع من الفجر اكو خرابه بيها خوش غراض البارحه لكطت بيها راح اطلع الها من الفجر باجر

عمشه : چا زين انه من صباحيات الله اسير وارد عبن عندي شغيلات مااريد ياخذني الوكت

ذكرى : عفتهم وصعدت للجهال وصعدت ويايه بدعه كلمن راح لغرفته واجه صمد

اكلك صمد شكلت على شغلة خوله موافق

صمد : وافقنا او لا ماطول نجم كال موافق احنا والحايط بعد

ذكرى : بس عمتي مكالت هيج كالت اسألو ونشوف

صمد : بابا هذا نجم من يكول لعمشه موتي تموت عيشي تعيش

ذكرى : مو شرط ذيج المره مو گلب الدنيا من زواجها من السيد وما سمعت كلامه تره عمتي تمشي بلي يصرف الها ونجم حاطته عذر اذا مشه وياهه كالت لعيونه اوافق واذا خالفهه تطبك وياكم وهيج مسايسه الامور

صمد : بكل الاحوال خلي نخلص من خوله وطلايبها يوميه هوسه بلبيت من وراهه الاحسن نحطها براس رجال حتى راسنه يرتاح

ذكرى : اني هم هيج اكول تتزوج وتنستر وهم البنيه تعبت خلي تعيش مثل الاوادم

صمد : انتي لتدخلين من يصير حجي جوه مااريد مشاكل

ذكرى : شوكت حاجيه متشوفني كل الوكت ساكته

صمد : ومرت نجم مالج دخل بيها تره امي مبينه من هسه شاده حزامها وادافع الها

ذكرى : اني  مالي علاقه بأحد وعلاقتي بس بدعه وبلشغل الميخلص

صمد : فرشتي فوك مو

ذكرى : اي من المغرب

صعدنا سوه والكل صعد لكيت سهاد واكفه حايره

هاا بيج شى

سهاد : وين انام

ذكرى : اني مفرشت الكم كلت اخاف تنامون جوه

سهاد : غير نجم كتله خلي نبقى جوه وهو مقبل

ذكرى : هسه اني افرش هو هنا ينام

سهاد : لا حبيبتي لتعبين اني افرش بس وين حاطين الفراش

ذكرى : بلبيتونه من صعدتي مشفتي

سهاد منتبهت

ذكرى : تعالي اني وياج نفرش

سحبنا فراش وكملنا فرش جان اشوف نجم صافن عليه ابتسمت اله وكتله اذا تحتاجون شى بس صيحوني

نجم : سلامتج ممحتاجين شى

سهاد : شكراً ام يونس متقصرين

ذكرى : انسحبت بهدوء ورجعت لفراشي تمددت بعد مسافه عنهم بليلتها منمت بس اتگلب مخنوكه ومااعرف سبب الخنكه شنو

وافكر بألف سالفه لحد متعبت ونمت

خوله : محد حجه ويايه بلموضوع لحد ماثاني يوم اجت امي وكالت

عمشه : جم يوم وتنقري فاتحتج

خوله : غير تاخذين رأي

عمشه : لا تزامخين بوجهي اطرج نصين وروح ابوي

خوله : يايمه هاي هم مثل سالفه السيد تشمريني

عمشه : لا تلعبيهه عليه يبت عمشه انه اعرفن اكرم ابو الورگه هاي سوالفج موش علي انه سوالف المسيجينه والتهذري ماتاكل عندي بصله الوليد طلع شريف وابن حموله واجه وطلبج استجني وحطي رجولج بلكاع كلها جم يوم وتنقري فاتحتج وتولين لبيت زلمتج ومااريدن اسمع حسج

خوله : شمدريج هو

عمشه : يااا والغسل چا انه خلصت عمري بلزبايل والعتيج وافرزن المصدي  من الچديد وتمشي علي دروبج اسكتي يخوله انه معبيه منج ولون اطگن اعلكنج بلتيل واعوفن الجلاب تنهش بيج چاهيه سالفه سالفتين خليهن بعبي لاتطلعيهن

خوله : حسيت امي تعرف كلشي واذا ازيد وياهه بلحجي راح تعيط

هذا هو يمه براحتج ويااج اني  موافقه

عمشه : وانه انتظر الفرج منج ميلي مني وبسچ وجعتي راسي اروحن لشغيلاتي ابرك منج ومن طلايبج

طلعت واني بقيت بلغرفه افكر شراح يصير بعد كم يوم

ذكرى : مرت ٣ ايام والكل ساكت الغريب ساهره وصالحه مسون شى ولا مشكله وهادئات وجوحي وعبيد سألو عن اكرم والولد كلها حمدت بأخلاقه وحتى بأبوهم يعني القسمه متنرفض يمكن اني اكثر وحده اريد خوله تتزوج خاصه بعد السالفه الاخيره

سهاد تفتر بلبيت فر نكلها اكعدي يمعوده عمه متقبل تشتغلين اله تشتغل تالي اني وبدعه ملينه وعفناها

عمشه : وينجن

ذكرى : هااا عمه خيرج شبيج تعيطين

عمشه : انه مو گلت مرت نجم ماتشتغل

ذكرى : والله عمه هيه متقبل اله تساعد

سهاد :لتحجين عليهم عمه والله اني اريد اساعدهن

عمشه : يمه بعدج عروس وانه اريدن تتعبين لولدي وتهني واتركي البيت ليهن هنه يعرفن شغلهن

صالحه : ليش بله على رجلها نقش الحنه لو بت الباشا

عمشه : انتي بلذات اسگتي گلبي موجر منج

صالحه : ليش عيني شمسويه

عمشه : رايده ذهبات من عبيد

صالحه : ليش وحد كتله اشتريلي محبس ايدي فارغه

عمشه : وهو منيله

صالحه : يجمع ويشتري لو بس جناينج عدهن محابس وانه لا

عمشه : منهي بيهن عدها

صالحه : هاي مو ذكرى لابسه ورجعتي محبسهه والعروس الجديده حتى كردانه لابسه

عمشه : محبس ذكرى نجم خذاه مني عبن انقهر تضل ايدهه بليها وصمد ردن فلوس المحبس لاخوه انتي شنهي وتدخلين

صالحه : هااا شو مندري

ذكرى : بلعت ريك واتوترت وكلت هو بوكتها صمد طلب من نجم لان استحه يكول لامه

صالحه : هو هذا نجم دوم يدافعلج لو نسيتي

سهاد : ليش قابل ميدافع للكل

صالحه : لا عيني مو للكل

ذكرى : اشوف الجهال وينهم اخاف يلعبون بلسكراب خفت من كلامها هاي شبيهه

صالحه : تعالي وين رايحه لو الكلام ميصرفلج

ذكرى : انتي وعمتي اني شكو

عمشه : لاتكافشن وانتي صويحله خفي على زلمتج ماعنده وحيله مكسور يبعد امه

صالحه :من يمي صار حيله مكسور من تردين شى منه متكولين حيله هذا هو يعمه انجبيت وسكتت

للعصر اشتغلت الهلاهل دزو خبر بلموافقه وبعد يومين المشيه مال خوله من فرحتي سجدت لله شكر ونذرت بس تتزوج خوله وتفض هاي السالفه على خير التزم بصلاتي

لان من يوم زواجي واني اكطع بلصلاه

بلبيت بس بدعه تصلي ومرات اشوف فلاح يتوضى وماادري بيه ملتزم لو لا  والباقي الكل محد يصلي حتى صمد جم مره اكوله ليش متصلي يكولي شوكت اصلي شو اطلع من الفجر ارجع الظهر وكلها بين الزباله وين اتوضى ويطلع الف عذر ويتهرب

اخبط بلشربت وفرحانه واخيراً اليوم مشيت خوله هيج وتكمل والله اله اهلهل مو مااعرف بس اله اهلهل

بديعه : كملتي

ذكرى : اي كملت

بديعه : روحي بدلي شوفي دشداشتج سيان

ذكرى : شسوي غير البيت كله غسلته

بديعه : هسه اني مو جنت وياج وسبحت وبدلت انتي هم روحي

ذكرى : ماااشي

طلعت من المطبخ لكيت سهاد تبوس نجم من خده وهو طالع من الحمام جفلت من شفتهم احنا رغم اربع جناين بس ماعدنا وحده ماخذه راحتهه هيج هي شوكت ميعجبها تحضنه حتى لو اكو احد رغم انتبهه عليه يخجل ويشاورهه وهي هم تعيد نفس الشغله وهلمره صار بيهه بوس خجلت وصعدت اركض فوك

نجم : كاافي سهاد جم مره كتلج عيب ميصير هيج تسوين

سهاد : غير رجلي قابل بايسه واحد غريب

نجم : رجلج بغرفتنا شتحبين سوي بس هنا وكدام الكل ماكو

سهاد : هاي شبيك تعصبت هو منو شافنه بس ذكرى واذا شافت هي قابل متبوس رجلها

نجم : كتلج ميصير اخوتي يفترون ونسوانهم هاي الشغله مترهم عدنا بطليها وهاي اخر مره احذر

سهاد : هذا هو عيني بعد منبوس ولا اتقرب منك

نجم : يكون احسن

ذكرى : صعدت وجبت ملابسي ودخلت للحمام اسبح سبحت سريع واني البس اسمع صوت ناي تبجي متإكده هذا صوتها كوه لبست من العجله حتى الدشداشه بلمكلوبي لان صوتها اختفى من طلعت اريد الحك عليها دخلت للغرفه لكيت مرتضى شايلها ويفتر بيها ويبوس بخدها

مرتضى : عمه تبجي

ذكرى : وكع گلبي جيبها حبيبي همزين اجيت عليها

مرتضى : خليهه بحضني مااوكعهه والله والله

ذكرى : هههههه خليها بحضنك بين ماابدل

اخذها ويفتر بيها بين غرفتي وغرفه اهله واجه مهند عليه يعيط انطينياهه

مرتضى : ماا ماانطيهه انجب ولي

مهند : اكل لامي عليك تكتلك

مرتضى : روح كول الهه ماانطيهه

ذكرى : طلعت عليهم خفت يوكعوها

مرتضى : عمه نايه المن

ذكرى : هههههه شنو المن

مرتضى : نايه اليه

مهند: لا الي وتلعب ويايه

مرتضى : كتلك الي وهي صغيره بعدها ماتعرف تلعب اني اشيلهه مااوكعهه

ذكرى : لا الك ولا اله شو جيب لتروح توكعها اخذتهه من مرتضى وجان واحد يلزم راس الثاني وتمالخو من الشعر

صالحه : ولكم شبيكم انتي مكعد تشوفيهم

ذكرى : غير بيدي الطفله وردت افاككهم ولدكم وكحين

صالحه : شجاكم وجرتهم صالحه وعاط مهند

مهند : اريد ناي الي ومرتضى حقير ياخذها

صالحه : خوش والله بعدها بلكماط وتتعاركون عليهه ولد الزفره امشي كدامي بدلو تعالي ساهره اخذي ابنج من هسه هداد ويسوي مشاكل على بت ذكرى

ذكرى : رجعت للغرفه كملت شغلي ونزلت

لكيت سهاد محضره الكلاصات وترتب بلمطبخ المشكله متشتغل اله كدام عمتي يعني احنا من الصبح لهسه نكرب كراب وعمتي طالعه تجيب نفنوف خوله من الخياطه وبس اجت كامت تتحرك وتسوي نفسها تنظف بلبدايه منتبهت بعدها بدعه كالت وصدك طلع كلامها واني استحي احجي وضاله ساكته كل شويه نترزل من عمتي

جان تصيحني خوله وهاي صار شكد محاجيه وياهه دخلت لغرفتها واشرت اسد الباب

هاا عيني

خوله : اريد تسويلي شعري ضفيره هنديه ولو شعري مراجع مثل قبل بس حاولي بيه

ذكرى : راح ارتبه الج لان كصير ميصير كصيبه

خوله : لزمت شعري واباوع عليه نزلت دمعتي من اتذكر شكد جان ثخين

ذكرى : لتبجين عفيه هسه عندي مثل الطباكات ناعمات راح اشيل شعرج وارتبه ويطلع حتى احلى من الكصيبه

خوله :شفتي مو حقي اكرهم

ذكرى : ماله داعي ياعيني هذا الحجي رايحه انزلهن وارتب شعرج وصعدت ركض ونزلت رتبت شعرها ولبست النفنوف وحطيت احمر خد وكحله وحمره خفيفه طلعت مرتبه

وطلعت وياهه من الغرفه جان تستقبلها عمتي وتكول

يااهل الخير اجت بتكم تلكوهاا

يااهل الخير اجت بتكم تلكوهاا

وياها بدعه تكمز وتهلهل والجهال داير مدايرهن ولاول مره هلهلت صح طلعت جنهه وحده منتوله بس هذا نذر واني لازم اوفي نذري

خوله : هههههه اول مره تهلهلين

ذكرى : اذا الج ما اهلهل المن لعد يستاهل

كعدنا ونزلت ساهره وصالحه وجوهن تضحك ياربي ذني على شنو ناويات

وكامن يكمزن ويصفكن مكيفات ويه عمتي جان عمتي تكول وتكمز وتهلهل

العگرب لو حاس اندوسه

العگرب لو حاس اندوسه

وتباوع عليهن وتهز جتف واني وبدعه نضحك

شويه وسمعنا هوسه اجوي المشيه ولان البيت قريب اجوي مشي والشارع انگلب

باوعت بعيون خوله تنط من الفرحه

دخلنا نركض للمطبخ نسوي شربت واني اصب جان يجي مهند

مهند : عمه عمه وين عموو صمد

ذكرى : ليش شتريد منه

مهند : العريس هو النطاني الورقه وعمو كال بس تلكاه انطيك دعابل ومصياده

جفلت منه داحجي وياه جان تلزمه امه عرفت سمعته

صالحه : اسمع لك اذا حجيت هذا الشى لعمك ازين شعرك واخلي الولد بلدربونه كلها تضحك عليك

مهند : ليش ماما شمسوي اني عمو كال

صالحه : انجب ولزمت اذنه حيل ايااك افتهمت هااك طلعت الفلوس وانطته

هااك اشتري ولتشوفني وجهك لحد متروح الناس يله

طلع يركض مهند جان تكول صالحه وانتي هم اياج تحجين لاحد ولا جنج سمعتي شى خلي البنيه تروح وتتزوج ونخلص من هاي الدوخه كلها

ذكرى : اي والله ام مهند رحمه الله والديج

عافتني وطلعت من المطبخ باوعت الكلاص البيدي مليان شربت شربته كله من الهبطه

خوله : دكات گلبي ويه كل صوت اسمعه ترتفع النبضات مااريد اغمض عيني كل مااغمضها اتذكر عذابي وقهري وكلشي عانيته

افرك بيدي من التوتر والقلق اريد اليوم يخلص ومدنكه واباوع على اصبعي بعد شوي ويصير بيه حلقه اي من حقي افرح من حقي البس الحلقه مو انجر مثل الطلي على المذبح واكون تحت رحمه رجال بكد ابويه اريد اطلع من هذا البيت الكله حقد وشر وحسد وأذيه اريد اغير حياتي الجنت دوم اكول بشهادتي اغيرها واطلع من هذا الضيم وتالي الميخاف الله بليله ويوم كسرن كل احلامي

واني افكر وصافنه رغم كل الهوسه الداير مدايري صياح ضحك كولات هوسات وسوالف بس اني احس روحي بعالم منعزل وافكر بهدوء مفزيت من صفنتي اله وام اكرم تبوس بيه وكعدت گبالي اجت امه واخته ومرت اخوه وخالته وعماته اثنين تعرفت عليهم عن طريق امه حسيت وجوهم مفرحانه مثل وجهه امي الطاير من الفرح وحتىً نسوان اخوتي فرحانات لان خلصن مني

دقايق وكالو هلهلو والهلاهل ترست مسامع اذني ودخلت لروحي وكالو العريس راح يدخل مشاعر مخربطه شكد شفت مواقف صعبه بحياتي مثل هذا الموقف ما حسيت لان خليط فرح على توتر على قلق على خوف

كعد بصفي وباوعت عليه ابتسمت بس شفته تقرب بهدوء وكال

اكرم : من اول يوم شفتج كلت هاي البنيه اليه وصرتي الي غصب عن اليرضا والمايرضا

خوله : مجاوبته من الخجل صوته هادي وطريقه كلامه كلها حب يمكن هاي اول مره احس اكو واحد يحبني ومبين من كلامه اكو شى صار ومو بسهوله صارت الخطبه مثل مصارت يمي بلبيت

ذكرى : سبحان الي يغير الحال ولا تكول هاي خوله الضحكه تارسه وجهه والخجل زايدها جمال واكرم مبين فرحان حيل بيها طلعو الذهب وجان محبس وحلقه وترجيه ولبسوها

خوله : لبسني وتقصد يلزم ايدي حسيت بحراره بكل جسمي كوه كاعده من الخجل لبسته وباس راسي نسوان اخويه مقصرن كله هلاهل وادبج اما اهله باركو وطلعو

بعد نص ساعه الكل طلع وهو طلب من امي يحجي ويايه وحدنا اني كلت هسه امي تلزمه الباب وتنزع الشحاطه ودك على راسه

جان تكله حكك يمه ودخلتنا بغرفه نجم لان جديده ومال عرسان لان الهول هوسه ومتكدر اطلع الكل

كعدنا على الجربايه واحد بصف الثاني والخجل مسيطر عليه حاولت اتمالك نفسي وتالي كلت هاي فرصتي لازم افهم منه

درت وجهي لكيته صافن مبتسم

اكرم : ولا توقعت ام لسان هيج جبانه وخجوله

خوله : هههه اني ام لسان

اكرم : اووو هو شوكعني غير لسانج اريد اتلاحك عليه تاكلين الواحد وتشربي اما بلرسايل كل كلمة تكوليها تخليني اريد ادخل لبيتكم اخذج من ايدج واتزوجج حتى لو بدون رضاتج

خوله : ههههه بس سوايه الرساله الاخيره وكعتني بورطه

اكرم : الغلط مني مجان لازم أمن لطفل شسوي من لوعتي ٣ ايام ادور عليج اصعد سطح اطلع بره وانتي ماكو ومن سمعت هلاهل كلت بس لا انخطبت اكلت هبطه معدله وتالي عرفت خطوبه اخوج متحملت كتبت الرساله ودزيتها

خوله : ليش خطبتني

اكرم : ليش مفرحانه

خوله : جاوبني ليش

اكرم : لان عجبتيني

خوله : وبس

اكرم : دخلتي گلبي خوله يمكن متصدكين بس خلال هاي المده البسيطه شكد شفت بنات محد دخل گلبي غيرج

خوله : غير افهم شون دخلت گلبك وخاصه اني مواقفي وياك تعبانه

اكرم : يمكن هذا الشى الميزج عندي لسانج وقوتج خله عقلي كل وكت يفكر بيج وبعد ماصارت سالفه الرساله وقريت كلامج كلت مستحيل اتختل مثل النسوان اني صحيح مخليت اخوج يشوفني ردت اقنع اهلي حتى اخطبج ومردت شى يخربط الوضع لان لو عرفني واحد من اخوتج راح تصير مشكله واحتمال اهلي يعاندون اكثر

خوله : ليش همه مقابلين

اكرم : مو مهم يقبلون المهم انتي صرتي الي حلالي

خوله : عرفت مقابلين من وجوهم حقهم انت ممتزوج وتتزوج ارمله جان يحط ايده على شفايفي وكال

اكرم : اششش شكد تحجين من اول يوم شفتج ولسانج ميسكت

خوله : هههههه سكتت تقرب بهدوء مني ولزم ايدي وسحبها وباسها حسيت بحراره بجسمي وصدري اختنك وبدا يتقرب يريد يبوسني من شفايفي

اجه بوجهي السيد كمت مباشره مفزوعه

اكرم : شبيج خوله

خوله : كافي عفيه روح

اكرم : مسويت شى ليش ضجتي

خوله : اخاف يجون اهلي جنت احجي ومنطيته ظهري مااريد اشوفه دارني بهدوء عليه

اكرم : شو خلي اشوفج

خوله : شتشوف مني انداريت عليه سحبني لحضنه وحضني زادت الخنكه اريد ابجي اريد اعيط كتمت مشاعري جان يكول بصوت هادئ وايده تتنقل على ظهري وحاضني بكل حنيه

اكرم : اي شى شفتي بعمرج اني اعوضج عنه بس انطيني فرصه

خوله : بجيت بسرعه عبالك جان يقرا الاحسه رفع وجهي بيده والايد الثانيه مسح دموعي

اكرم : تدرين اني ١٠ ايام هاج من البيت من وره هاي العيون ١٠ ايام مقبلت ادخل للبيت وحلفت عليهم العمر كله ماادخله اذا ميخطبوج الي وتالي تخلصيها بجي

خوله : لهاي الدرجه اهلك كارهيني

اكرم : مكارهيج ابد بس سوالف اهل لدوخين روحج بيها المهم تعرفين شى واحد اني هنا سندج وزوجج وغصب عنج تحبيني افتهمتي

خوله : هههههه صارت غصب

اكرم : اي راح اسوي وياج مثل الجاهل من يوكلوه غصب لان مياكل اني اخليج تحبيني غصب

خوله : واذا محبيتك

اكرم : ارجع اكرر المحاوله مره ومرتين وعشره لحد مااخليج تمشين وتصيحين اكرم اكرم اكرم

خوله : ههههههه مو لهاي الدرجه

اكرم : خلي نشوف اني لو انتي

خوله : نشوف كلتها بدلع

اكرم : لتسوين هيج متعلم عليج تعيطين وحبيتج هلمره تدلعين اخاف اني اخلصها اصيح خوله خوله

خوله : ههههههههه اي اتخيل شكلك صفن بوجهي وابتسم وتقرب مني حييل لدرجه صرت بحضنه

اكرم : تدرين ضحكتج تخبل

خوله : اول مره اعرف

اكرم : بيج شى من اشوفج مااسيطر على نفسي كلشي بيج اريده وارغبه خوله اني رجال بعمري محبيت شغل ابويه ودراستي خلو الحب اخر اهتمامي انت اول مره اريدها من گلبي

روحي گبل عقلي تعلقت وتمسكت لاخر لحظه بأن تكونين زوجتي وحبيبتي وام جهالي اذا الله رزقنا اريد منج تستوعبين احساسي وتكبري بمحبتج واهتمامج

خوله : وانت هم تحملني متعرف المريت بيه وشنو صار بيه ولتسألني لان مااكدر اجاوبك حالياً

اكرم : ميخالف الايام طويله كدامنا يجي يوم وتكعدين وتسولفين كلشي اليه

خوله : لزم ايدي ورجع باسها وحطها على صدره والايد الثانيه تمشي على خدودي رجع الخجل سيطر عليه جان يباوع على الغرفه

خلي اطلع احسن مااسوي شى اخليهم باجر يزوجوج الي وخاصه الغرفه تساعد الواحد على الانحراف

خوله : باوعت غرفه عرسان وسهاد فارشه فرشة العرس صدك تساعد ضحكت من گلبي لان هو انتبهه واني لا

اكرم : فدوة لضحكتج كوه كاعد عاقل خليني هيج حط ايده بجيبه هااج

خوله : شنو هذه

اكرم : هاي فلوس للجهاز اشتري الي تحبي اني اتفقت ويه اخوتج شهرين ونتزوج وقبلها اعقد محكمه

خوله : ان شاء الله اخذت الفلوس منه بلحظتها همست وكتله

خليني احبك ونسيني كلشي اكرم

اكرم : لا انسيج حتى عمشه بس اصبريلي

خوله : هههههه خلي نشوف

تقرب وجرني وباسني من شفايفي وخر بحركة سريعه

اكرم : هسه يله ارتاحيت

خوله : دنكت خجلانه وباس راسي وطلع

شكد كنت مخنوكه تمنيت يبقى بعد يمي بعدني مامتعلمه عليه بس حسيته اماني اريد اختل بحضنه من الناس كلها من كلشي شفته وعرفته اريد ابدي وياه وكأنو ماشفت كلشي قبله اريد انسى السيد وبيته وسحر نسوان اخوتي والمكايد وكلشي صار خلال السنتين الفاتت

طلعت من الغرفه والوجوه كلها صارت عليه ابتسمت ودخلت للغرفه مال امي مااريد احد يحجي ويضوحني خليتهم وحدهم مااريد شوفتهم حتى بلفرح

ذكرى : جنت حاطه ايدي على گلبي لا تصبر مشكله بس  الْحٍمَدٍ للـّہ عدت على خير وبدينا انرتب البيت صالحه وساهره اخذن جهالهن وصعدن وكع البيت براسي وبراس بدعه واحنا تعبانات حيلنا مهدود كوه اشيل الوصخ من الكاع واني مدنجه اكنس طب نجم

نجم : الله يساعدكم

ذكرى : ويساعدك

نجم : شو وحدج تشتغلين

ذكرى : بدعه بلمطبخ

نجم : والباقيات

ذكرى : بغرفهن

نجم : ليش بله مينزلن يشتغلن

ذكرى : لا عفيه خليهن خلصانه اشتغل بيدي احسن مما اشتغل وياهن وبس ايدردمن

نجم : وسهاد ليش متجي تساعد

ذكرى :  واليوم هم ساعدت باوع عليه ورفع صوته

نجم : سهاد سهاد

سهاد : طلعت من غرفتها وكالت هااا حبيبي تصيحني

نجم : مو تكولين احب شغل البيت

سهاد : اي

نجم : ذبي المكناسه

ذكرى : اني اكمل فدوة نجم اخذ مرتك وادخل الغرفه جان يدنك وياخذها من ايدي وحطها بيد سهاد

يله كملي كنس وانتي اصعدي على جهالج

ذكرى : عفيه نجم

نجم : على شنو صافنه انتي اصعدي وانتي سهاد كملي يله

سهاد : اي حبيبي اكمل قابل الشغل يگصر الطول لو ياخذ من العمر

نجم : اشتغلي بدون حجي

ذكرى : باوعت عليه ومراضيه على تصرفه اشرلي بيده اصعدي فوك جان ظهري مقسوم نصين خليت وصعدت لكيت صمد شايل ناي ويسكت بيها وهاي اول مره اشوفها شايلها

صمد : وين جنتي بتج طكت بجي

ذكرى : ياسوده عليه انطينياها هاي طكت جوع وكعدت ارضعها

صمد : يونس وين

ذكرى : ويه عمتي راحت لام ستار تجيب القماش منها وهو جلب وياها واخذته

صمد : كملي رضاعه وتعالي اريدج

ذكرى : فدوة صمد والله تعبانه

صمد : تعرفين بيه اكرهه هاي الكلمة كملي وتعالي وبلا لغوه زايده

ذكرى : اووووف بقيت ارضع لحد مكملت منطاني مجال وتقرب مني تعلمت على وضعه ويايه صار هذا حالي ومتقبلته

وره شويه اضطريت انزل اسبح ومن طلعت لكيت سهاد تشتغل وتباوع صفح

ذكرى : محتاجه شى جان تبتسم وتكول

سهاد : اي هيج كولي لا تعبانه ولا شى كولي مشتاقه لرجلي واريد اختلي بيه

جان يعيط نجم بيها

سهااد تخبلتي

سهاد : هااي شبيك جنت اتشاقه

ذكرى : سحبت يونس من ايد عمتي جان تكول

عمشه : تعالي اخذي المكناسه منهه وكملي الشغل انه مو گتلجن لا اتعبنهه

نجم : شنو السالفه غير حالهه من حالهن

عمشه : لا يمه غير عروس

نجم : صار اسبوع متزوجين شطلعت هاي العروس

عمشه : يايمه لاتدخل بشغل النسوان

نجم : وانتي هم يمه لتفرقين

عمشه : ياااا كون عرج يطگ عدوينك يمه انه افرق

نجم : اني طاب للغرفه ارتاح ومن تكملين سهاد الشغل اصعدي للسطح افرشيلنا

ذكرى : باوع عليه ودخل واني سحبت يونس وصعدت حتى لا اسمع كلام من عمشه يسم گلبي مابيه حيلها  صليت العشا وصعدت فرشت سألت صمد يريد اكل كال مجوعان اخذت الجهال ونمت حتى قبل الكل من التعب

ثاني يوم كعدنا والوضع مستقر طبيت على خوله اصيحها على الريوك لكيتها رافعه دشداشتها لحد فوك زرورها من شافتني نزلتها

صباح الخير عروستنا

خوله : صباح النور

ذكرى : شبيج وضعج مو طبيعي وجهج تعبان

خوله : أذاني حييل ذكرى حييل مارحمني

ذكرى : ياستار منو

خوله : حسيت على نفسي شكلت وحاولت اتلافه الموضوع

خوله : ماكو شى يله كومي نتريك وكامت وكفت

ذكرى : مااكوم اله افهم جريتها من ايدهه

وكعدتها

خوله : كابوس واحد يضرب بيه وضايج مني

ذكرى : تعرفي

خوله : لا

ذكرى : شوو بله ورفعت دشداشه ولكيت زرورها بيها مثل الخراميش ناعمه ياستار ياربي قل اعوذ برب الفلق هاي شنو

خوله : وخرت ايد ذكرى بسرعه ماكو شى

ذكرى : انتي متإكده طبتي من الصار بيج

خوله : اي طبت طبت شنو هذا السؤال السخيف

ذكرى : خفت عليج وعلى وضعج

خوله : مابيه شى

ذكرى : انتي ليش متصلين بلكت تروح منج هاي الكوابيس

خوله : مااكدر حاولت ابن السيد طلب مني اصلي اكثر من مره وكل مااصلي اتأذه وانضرب وهواي شغلات تصير بيه عدا النسيان والتوهان بأي ركعه اخر شى تعبت وتركت

ذكرى : الصلاه راح تخليج ترتاحين ويمكن الكل التشوفي يروح اجبري نفسج وحتى قرآن اقري بلكت الله هاي الخنكه تروح منج

خوله : الله كريم

مقبلت تتريك ويانه خليت الها الاكل وحدنا وبدينا رحله الشغل بلبيت

لحد الظهر اجه نجم ويصيح منو بلبيت

سهاد : بس النسوان اخوتك ولا واحد

نجم : وين الكاهم هسه

بديعه : خير خويه شصاير همه على جيه كلهم وامك وياهم

دنسولف جان يطبون ركض نجم وكال عمي تره على جيه

عمشه : ياعم يمه ابو مريتك

نجم : عمي فلاح

عمشه : يادهر صابه شدلاه على بيتنا يبو يعمشه تعزيتي وتصخمتي شذكره بينا صار سنين مايعرف دربنا

عبيد : هاي شبيج يمه قابل بعدنا جهال وتخافين منه واحدنا ياكله لعمي اكل واندوسه  برجلنا

عمشه : انتم لو جهال مااخافن اعرفن مايمسكم عبن جهال والطلابه ويايه

هسه زلم وخذينا الكاع منه اكولن مايردهه ساهل

صمد : وشون عرف طريقنا

نجم : الحجي ريسان دزلي ولد من طرفه وبلغني عمي وصل لمكانه ويمكن اليوم لو باجر بلزايد تلكااه بلبيت يمنا

فلاح : يابه الرجال هسه كبر وتعب ومو بمنطقته بغداد هواي شغلات تمنعه يأذينا ميكدر لو يمه بلناصريه بيها مجال بس هنا وماله لا عزوه ولا اهل صعبه

عمشه : ماتعرفون عمكم هذا ذيب غدار ماعنده غالي وعزيز ربي سترك وليداتي امانه عندك

نجم : ماكو شى ان شاء الله من يجي نكعد كلنا نحجي وياه

جوحي : خلي يولي قابل كاعه نطيح حظه اذا وصل حقنه واخذناه هم اله عين ويجي ويهدد والله بس يحجي شى موزين اگلب وجهه

نجم : هي الشغله مو سباعيه لازم نفهم شيريد من عدنا لتاخذونا بصوتكم لتنسون صار شكد ومانسى سالفه الكاع وصار سنين عنده وفجأه بعناها لواحد يكرهه واكيد الحجي ريسان ماقصر وطيح حظه لهذا تلكاه معبي من عدنا جيته طباب شر مو خير

اكعدو خلي نتفاهم اذا اجه شلون نحجي ويااه

بقو اليوم كلنا ناس تاخذ وناس تنطي وكلمن يحجي بكيفه اله عمشه جانت صافنه وساكته وحتى متشاركهم بلحجي  ولاول مره حسيتها خايفه

مر يوم وبعد يوم واي شى مبين لا عمهم مبين ولا اجه اي احد من طرفه لحد ما بعد اسبوع اندكت الباب حيل واندفرت كلنا نايمين بلسطح وسمعنا عياط خوله لان هي تنام جوه متصعد ويانه  بعدنا نكوم من فراشنا ونشوف السطح ملغوم انضباطيه

سحلوو الولد خمستهم وحتى النوم بعده بعيونهم نريد نفهم شكوو محد يجاوب كدام عينا شدو ايدهم وعيونهم واخذوهم سحل الولد يتقاوون وياهم يردون يعرفون شكو وليش جايين عليهم محد رد اصلاً وضعهم خلانا نتهستر وعياطنا مسمع المنطقه كلها وعمشه ذبت الفوطه وتعيط بكل علووو حسها يبوووو راحو وليداتي

يتبع ...

صـباح الـ🥀ـورد هذا البارت تعويض عن بارت البارحه وان شاء الله بليل بنفس التوقيت القديم البارت العاشر ينزل

شكراً من قلبي لكل تصويتكم وتفاعلكم الرائع والمميز مثلكم

احـٍُــبٌــ💘ـٍَــْگُِم

تحياتي لًلًـّــ💎ــجٌٓمٍَُٓيِّعَْٓ

#الابواب_الخمس

البارت العاشر

للكاتبه Reem

عريان يكول

شكَـثر متعوب من دنياي

واگول بخيـَر

للينشد.💔

عياطنا مسمع المنطقه كلها وعمشه ذبت الفوطه وتعيط بكل علووو حسها راحو وليداتي

سحلو الولد ليجوه واحدهم يتعثر بلدرج من عياطنا وبجينا واحد من الواكفين سحب الرشاشه علينا

كااافي ولجن التعيط هسه اخرطها

عمشه : يمه دخيل الله ودخيلك وين ماخذين وليداتي

مجاوبها ودار وجهه

كلنا كاتمين صوتنا ونزلنا وراهم واحد

جان تجلب عمشه بلضابط الواكف وتبوس بيده

عمشه : يمه اروح فدوة لهاي نجماتك وليداتي من اهل الله مالهم دغش يسيرون ويردون من شغيلاتهم بلعتيچ وكلمن حاير بمريته وعيشته والعسكريه مخلصيهه ماعدنا فرار وليداتي ساحليهم عليش

وخري حجيه تره ناخذج وياهم

عمشه : اخذوني احلفك بالله اخذني انه بلياهم اموتن احلفك براس ابيك اخذني

دفعها بلكاع وركضت خوله لزمتها

خوله : بصوت عالي تعيط على كيفك وياهه متشوفها شلون مفرفحه على ولدها انتم ليش ماخذيهم عدكم ورقه القاء قبض

اسكتي انتي الثانيه لترحين برجلين وبعدين اخليج اذا شفتي ورقه تنهزمين

رادت ترد جان عمشه تحط ايدهه على حلك خوله اسكتي

يمه ارحم شيباتي وگلي وليداتي وين ماخذيهم

الضابط : يله بسرعه صعدوهم اخذو ولد عمشه وانطلقت السياره وعمشه وراهم تركض حافيه وتعيط

وكعت بنص الشارع وركضنا عليها

كوه حركنا من الكاع ملخت شعرها وبس تحركت السيارات الناس طلعت

خوله : اجه اكرم يركض مبين جان نايم

اكرم : شصار خوله

خوله : ماادري والله جنا نايمين وجيتو علينا واخذو كل اخوتي ونريد نفهم منهم محد انطانه نجده

اكرم : هسه ابدل واطلع اشوف المركز الي يمنا اخاف اخذوهم هناك

عاطت عمشه جيبن عباتي ولجن

صالحه : شسوين بيها عمه

عمشه : انعل شيب اهلج جيبي العبا موش وكت سوالفج

ركضت صالحه وجابت العبايه ولبستها وراحت حافيه حتى مقبلت تلبس نعالها

بديعه : اني اروح وياهه لبست عبايتها وطلعت وره عمشه

ذكرى : حاضنه جهالي وابجي كل وحده بينا حتى صالحه وساهره الكل يبجي ويلطم والجهال مخروعه ويبجون على بجينا ولان منعرف شراح يصير بيهم وليش اخذوهم اصلاً خلت بينا حاله من الهستريه وسهاد كاعده بلكاع وتصرخ لحد معاطت بينا خوله

خوله : وجع كااااافي شبيكم

صالحه : شنو شبينه من كل عقلج انتي ولج اخوتج خمستهم اخذوهم غيرج وحده تكطع نفسها هسه لان اخذو اخوتها

خوله : اكطعها واملخها وبعدين راح يرجعون شوفن الجهال واحدهم انكطع گلبه من البجي عدا الخرعه الصارت بيهم الله اعلم شراح يصير بيهم وهاي الخرعه شراح تعوف بنفسيتهم

ساهره : باع هاي ياجهال اذا ابو الجهال راح تردين نحير بيهم ونعوف رجولتنا سوده بوجهي يجوحي كون عمري على عمرك يبو بيتي

خوله : الي يسمعج يكول طاكه العبايه وتفترين بلشارع عليه بله عياره ماكلت لتبجن بس على الاقل لا تلطمن هذا اللطم شنو

صالحه : اسمعي لج لتشوفين اخوتج ماكو واستفحلتي علينا الزمج هسه افصمج نصين لا عبالج البيت مابيه جبير راح تصيرين انتي الجبير وتأمرين وتنهين

خوله : امشي لج هذا ياجبير تحجين عنه حسستيني عبيد جان لازم العوده ويفتر علينا تكول ريس عشيره هو ميحجي بس وكت متحجين انتي حتى يأكد كلامج بله متركعين راسج بلحايط بلكت تصحين على نفسج

ذكرى : يمعودات هو هذا وكت العرك مصار الولد من ساعه اخذوهم وتتمالخن لو يبقون ايام شسوون

سهاد : ايام عفيه شتكولين انتي فال الله ولا فالج ليش تفاولين عليهم بلموزين

ذكرى : مفاولت كلت لو ودتشوفين كدامج راح يتمالخن واحنا الفجر مطالع علينا والشارع مخبوص بلصار تردون يسمعون صوتنا حتى خوش يستلمونا هاي عدا عمتي وبدعه المنعرف وين راحن عفيه خوله عوفي الي يريد يلطم يلطم واليسكت يسكت بليه مشاكل

خوله : لا والله متلطمن ابجن يطبجن طوب بس لطم ماارضى وجيبو الجهال انتن وحدتجن هسه صارت حنينه على رجلها وعايفات ذوله الصغار شوو جيبن وسحبت مرتضى ومهند وبان ويونس ودخلتهم غرفه عمشه وانتي جيبي ناي

ذكرى : على صدري اخاف تجوع

خوله : من تجوع اصيحج ترضيعها او لترضيعها اليوم دمج شايط اخاف الشوطه تصير بيها شوو جيبي وسحبت ناي من حضني واشرت على صالحه شايله سما هم اخذتها وجان تكول

خوله : هسه شكن هدومجن يطبجن عرج كون

طبت وركعت الباب وراها

خوله : من يوم متمرضت وصحيت كمت دوم احلم ناس تلطم كدامي وتضرب على صدرها واكعد الكه صدري احمر ومشخط رغم ماالمس صدري ابد وكلت للسيد احمد على الحاله وكام يقرا عليه ويشربني شغلات لحد مراحت هاي الحاله مال اللطم بس تركت اثر بيه اني الطم بلواقع عادي بس كون مو ناس تلطم اخاف منظر الجناين خوفني ذكرني بلحلم حسيت برعب وخوف وانعاد عليه مواقف جنت اشوفها واني نايمه باوعت على الجهال حسيت حالهم مثلي يخافون اذا مو اكثر مني اني جبيره وافهم الحال لكن هذوله ميفهمون واحدهم صافن بأمه شلون تملخ بصدرها والثانيه بوجهه عدا من كعدو من النوم وشافو ابوهم ينسحل وينشد كل هاي المناظر خلتهم يبجون ويناشغون اكثر من امهاتهم مكدرت اشوفهم واسكت اخذتهم حتى ابعدهم وابعد نفسي من هذا المنظر

كعدتهم بلكاع وفتحت الكنتور جانت عندي حلاوه تمر وشكريه وزعتها الهم

مهند : ليش عمو الشرطي اخذ بابا

خوله : صديقه حبيبي ويتشاقه وياه باجر يرجعون رايحين للشغل

مرتضى : بابا شدو ايده وعيونه

خوله : ديلعبون ختيلان

مهند : ماما تكول ابوك راح وميرجع

خوله : مالك علاقه بأمك هاي مخبله

يله اكلو هاج سماوي

بان: عمه ماما وين اني اخاف

خوله : تخافين حبيبتي هاج شيلي سما حطيها بحضنج واني ناي شوفي احنا البنات نشيل الصغار ونحطهم بحضنا

باوعت على يونس صافن بلوجوهه

يونس هاك اكل حبيبي جان يحط راسه بحضني مديت ايدي والعب بشعره بسرعه غفى

انقهرت على منظره وذوله هم ياكلون ويفركون بعيونهم

سحبتهم كلهم ونومتهم واحد بصف الثاني مطولو وكلهم نامو كمت وتمددت يمهم مثل الي يريد الامان منهم همه مو جهال وميفتهمون بس حسيت بالامان والدفو بنصهم

ذكرى : كل شويه وحده تنزل وتصعد اجه فوزي اخويه يتراكض فتحت الباب اله

فوزي : ولج شصار

ذكرى : كمت ابجي واحجي والله ماادري نايمين واخذوهم من نصنا

فوزي : اخاف اخباريه

ذكرى : شنو يعني اخباريه

فوزي : يعني واحد كاتب عليهم ضد النظام او سابين الريس وسحلوهم

ذكرى : عزه يمه لتكولها

فوزي : اششش على كيفج مو اكيده توقع

ذكرى : همه الاجو اخذوهم لا حجو شى ولا كالو سحلوهم سحل

فوزي : الطريقه هاي مطمن الله يستر جيبي جهالج وتعالي لبيتنا واني اسأل معارفي وعندي كم صديق يداومون بلحزب اشوف اخاف يعرفون شى

ذكرى : اي فدوة لگلبك لتعوفني بهاي الشده

فوزي : من كل عقلج اعوفج ولو رجلج ميستاهل بس لخاطرج ولخاطر جهالج يله تعالي ويايه

ذكرى : لا مااروح لاي مكان شلون ترضاها اطلع واعوف بيتي واعوف البنات خليني هنا ماعليه شى كلهن موجودات

فوزي : ياعيني يمنا أمن واحسن اذا عدهم شى موزين الانضباطيه مراح تعوفكم كل شويه تفتيش

ذكرى : ميخالف اليجري عليهن يجري عليه انت بس اسأل جماعتك بلكت الله احد عنده خبر شى

فوزي : اذا صار شى او احتاجيتي شى تجين ركض

ذكرى : اكيد اجي وين اروح و لتكول لامي وابويه الصبح كول الهم اخاف يهبطون بهذا الليل

فوزي : ادخلي يله وسدي الباب والله يفك ضيقتكم

ذكرى : امين

بديعه : امشي وره عمتي وهي فاقده وتهف بعبايتها احجي وياهه متجاوب اباوع على رجلها حافيه ومتعرف بروحها وين ادوس وصلنا لبيت المختار دكت الباب كسرته طلع المختار يركض هو ولده اول مفتح الباب وكعت على رجله

عمشه : دخيل الله مختارنا وليداتي خذتهم الانضباطيه وانه بشاربك

المختار : تعالي طبي

عمشه : مااريدن اخش اريدن وليداتي احلفنك بعزيز گلبك ابيك الخير

اشرلي المختار وكومت عمتي من الكاع وطبينا للهول

المختار : اسمعي عمشه اني اعرفج من اهل الله وعيشتكم على كدكم ومايوم اذيتو احد من المنطقه اجاني بلاغ ورادو تقرير عنكم واني وداعت ولدي شهدت الحق ماشفت شى موزين من ولدج بس مبين الكاتب عليهم واحد ثگيل لهذا اخذوهم

عمشه : وين خذوهم وليداتي فقره لا يمدون ايدهم ولا يأذون احد جدامك سنين شفت بيوم العيبه منهم

المختار : اني المفروض مااحجي كلشي بس لان صارلج عمر ويانه بلمنطقه وحك الجيره شغله وحده اكولها الج تلاحكي لولدج وشوفي بمنو تحارشو وهيج دكهم تره الساعه محسوبه عليج هيج تقارير يروحون بلشط مايطلعون

عمشه : يمه صخام الصخمج يعمشه انهجم بيتج على راسج يعمشه ابوسن رجلك ساعدني انه حرمه مالي والي

المختار : غير هيج مااكدر والله شوفي بيمن اندكيتو وهيج ردها الكم

عمشه : كومي

بديعه : وين عمه اشرت اليه وطلعنه من المختار وكلشي مفهمت منه بس هي مبين فهمت

رجعت تمشي سريع دخلنا للبيت

صالحه : هااا عمه بشري

طبت للغرفه

ذكرى : شصار

بديعه : والله ماادري حجه المختار شغلات عن تقارير ومدري شنو وهي بس صافنه وتالي كالت امشي ورجعنا

ساهره : غير تفتهمين دومج فاهيه

طلعت عمشه وكالت بصوت عالي وبأمر

عمشه : اسمعن گلچن حسجن مايطلع تركدن بلبيت وحدتجن ماتعتب الحوش لا اهلجن ولا كرايبجن بابجن ينرد وماتفتحنا للوادم وانه اروحن لشغيله وارد واريد اشوفن ياهي منجن تگسر چلمتي والشده الطاحو وليداتي بيها اشحتها من البيت وتحلم ترد اله وثاني يوم ازوج زلمتها

ساهره : غير نفهم ياعمه وين رايحه

عمشه : مالج شغل عليجن بوليداتجن ولا تهاوشن بينجن وخوله التكرب صوبها جنهه كربت الي وروح العزيز ازوعها دم افتهمتن

بديعه : اني وياج عمه

عمشه : چا شنهي شكالولج علي صغيره واتيهن

بديعه : شوفي عمه تعيطين تضربين رجلي على رجلج واوكفي ركضت جبت نعال ولبستها واخذت العبايه وباوعت على ذكرى وكتلها بتي عينج عليها

ذكرى : الله وياكم لتخافين يمي

عمشه : مااوصيجن اريدن ارد جنه البيت ماطلعو وليداتي منه

صالحه : كون ترجعين بيهم مو وحدج

عمشه : انه امك يعبيد چا انه شردت بروحي العزيزه بليله ظلمه واحابي عليهم عبن يعيشون وماياخذ حكمهم عمهم وينداسون تالي عمري اعيفهم هيج انه موش غنيه العافت لحمهه بلشارع يصالحه

صالحه : عوجت حلكهه وكالت ترجعين سالمه يعمه

عمشه : ارد بعون الله ارد وليداتي بيدي ومااشمت امج بيه يله يبدعه امشينا

بديعه : طلعنا وخيط الشمس توه يطلع الشارع هادئ وماكو احد امشي وياها ومااعرف وين رايحين ركبنا للنهضه

ومناك صعدتنا للناصريه فتحت عيني مستغربه وكتلها

شعدنا بلناصريه عمه

عمشه : چلمه ثانيه وانزلج انه جبتج وياي عون موش تاكلين راسي

بديعه : غير افهم ياعمه

عمشه : بسچ يبدعه انه گلبي موجر وحيلي مهدود على وليداتي ومالي حيل ضايج خلكي بسچ رحمه لموتاج

بديعه : هذا هو عمه سكتت

ادك السياره بينا ساعات من التعب غفيت شويه وكعدت وعمشه صافنه على الطريق وايدها على خدها واعرف الف حسبه بالها

محجيت اي شى لان حالها صعب شكد اني محروك گلبي على فلاح بس اكيد مو مثلها خمس ولدها اخذوهم الله يعين گلبها

وصلنا للناصريه بعد الظهر ومناك صعدنا بعربانه جنت اشوفها شلون تندل المكان ولا عبالك صار سنين تاركته وصلنا لبيت جبير هناك سألت على بيت الحجي ريسان ودلوها

طبت تمشي وتباوع بلوجوه اجانه ولد شاب كال تفضلو

عمشه : انه جايه على الحجي گله عمشه

الحجي عنده شغيلات يخلصها ويشوفكم

عمشه : گله الزلمه من جلمته ينلزم چا وين دكت صدرك ياابن الشيوخ

راح الولد وهو مستغرب شويه ورجع وكال تفضلو مشينا وطبينا مثل الخيمه الجبيره بس مبنيه من طين ومفروشه ومرتبه وريحه الگهوه تارسه المكان غطيت نص وجهي لان رياجيل حدود سته كاعدين ويمهم واحد جبير بلعمر بس هيبه

الحجي ريسان : ابشري يعمشه طالبتني

عمشه : انه مو طالبتك انه اريدن منك تگلي تم

الحجي ريسان : وانه مااقصر وياج گليلي وتآمرين

عمشه : دكيت صدرك عبن ابيعلك كاع زلمتي وجلمتك الي سيف انه دزيت طارش بيد وليدي نجم وردت الامان الهم وانت حلفت مايمسهم الهوا واليوم وليداتي خذوهم من نص بيتي وجدام عيوني وانت زليت بجلمتك وماوفيت

الحجي ريسان : منهي خذاهم

عمشه : الانضباطيه

الحجي ريسان : وشلهم دخل بلگاع

عمشه : انه اعرفن منهي أذاني وكسر ظهري بيهم عمهم فلاح وانت تعرف گلش زين ايده طويله عبن عرف مجانه وماوصل ولا هوس دز الاكوه منهه وذب باطل عليهم واني اريدن حگي منك تردهم ليه سالمين

الحجي ريسان : ومنو يكول فلاح هيج سوه بيهم

عمشه : چا شنهي يحجي هاي انت الجبير والتعرف گلشي تفوتك هاي الفوته انه سنين بغداد اسرح انه وليداتي مايوم طير حط على داري ويوم ماعرف فلاح مجانه وليداتي اسبوع ماضلو

الحجي ريسان : اروح اسأل واشوف والاكدر عليه مااقصر

وكفت عمشه وصاحت

لا يابن الشيوخ هذا مامريود منك انه وليداتي كل ساعه تمر يشوفون الموت الف مره وانت تسأل وتنشد وكاعد بمجانك انه اريدن وكفت زلم موش فض مجالس اريدن چلمة ابن الشيخ صگبان ابيك الله يرحمه چان يهز المجالس عبن لو خشت حرمه عليه وتنخاه وانه ناخيتك وان نخوتي ماكسرت خاطرك وماهزت شاربك اروحن للاكبر منك يردلي حگي

وكف الشيخ وعاط

ياحرمه كضي لسانج

عمشه : انه كاضته يبن الشيخ بحضك وبختك انه ماحجيت الحگ يوم مابعت الكاع مااريدن وليداتي يطاخخون عبن عمهم مايخاف الله واعرفن بيه مايسگت ونشدت عليك وأمنت بيك وانه اريدن تردلي الامان

واله كاع زلمتي ترد ليه

الحجي ريسان : انه چلمتي ماتصير اثنين

عمشه : وانه ناخيتك وبشاربك وبشارب هاي الوادم الخيره عمهم مايخاف الله ولايركد اله يشوفهم معلكين وانه متصخمه ومكسوره وانتم ماترضون بت ولايتكم تنكسر وعگلكم على راسكم

الحجي ريسان : افه عليج ابشري حكج مردود وانه بنفسي رايح للشيخ العاام وادز طارش لفلاح عبن بينا طلايب ماتخلص

عمشه : اليوم يحجي

الحجي ريسان : الحين اخذهم

عمشه : وانه وياك

الحجي ريسان : ضلي هنا وانه انشد عليج

عمشه : وحك المات بكاع طاهره رجولي على رجولك چا شنهي يشيخ ذوله خمس زلم موش واحد واثنين وانه ماضلن اخذني وياك بروح ابيك

بديعه : رحنا ويه الشيخ جنت بس امشي وره عمتي تحجي بقوه وياهم وهمه يسمعون الها وطبينا لمكان اكبر من المكان الجنا بيه وبقينا بره على صفحه كاعدين واباوع لعمتي المي محطته بحلكها اني جعت وعطشت وهي ابد بقت تفرك بأيدها وتفك فوطتها وترجعها لحد مالمحت فلاح من بعيد وكامت تعض بيدها

عمشه : اااااخ كون اكضه لااشلع زردومه گله

بديعه : على كيفج عمه هسه خلي نشوف شيصير وبقينا كاعدين على نار

ونلوب لحد مصاحونا ودخلنا جان الديوان مليان واني بقيت واكفه على صفحه وطبت عمشه بنصهم اول مدخلت عاطت

عمشه : انه بشاربكم يهل الرحم كاصدتكم لاتردوني

الشيخ : ابشري يحرمه

عمشه : هذا عم وليداتي وابن عمي حط ايده على كاع زلمتي من سنين وانه شردت بيهم عبن راد يتزوجني ومن كبرو وليداتي طالبت بحگي ومانطاني وبعت الكاع للحجي ريسان وانطاني چلمه يحامي عليهم عبن عمهم طباب شر ومايريد الخير ليهم واليوم وخيوط الشمس ماطالعه وليداتي انداسو بلرجلين گله من وره عمهم

فلاح : شنهي يعمشه تشگيني للشيخ مالج رداد

عمشه : اي اشگيك وانه بتهم واريدن حكي من عيونك ودخيله وانه اعرفن الشيخ يراعي الدخيله

فلاح : انه مالي شغل بولدج وسنين شايل ايدي عنكم لاترميني بلباطل

عمشه : چا انت الباطل نفسه يبن عمي

فلاح : روحي عني انه مااعرفن شى ومالي دخل بگلشي وانتي وهمه متبري منكم والكاع وانباعت مالج يمي شى انه ياشيخ بري منها ومن ولدهه

بديعه : اشتغل العياط والصياح وجانت عمتي ترد الگلمة بعشره لحد ماوكعت يم رجل الشيخ تبجي عرفت انتهت قوتها

عمشه : انه وحيده ومالي ظهر بعد الله غير زلامي الربيتهم والتعبت عليهم وانت ماترضالي الكسره والذله عكب ولدي مالي عيشه وان مارديتوهم ليه اگتلني ابرك

انه اليوم جايه واعرفنك ماترد مظلوم

الشيخ : كومي ياعمشه وليداتج يردون لحضنج احسبي اليوم مطروح ومصباح اليوم البعده ندور عليهم وبعدها بچم يوم بدارچ

بديعه : رغم فلاح نكر اكثر من مره بس الشيخ گله يرجعون لان حس كلام عمشه صحيح وهدده بفصل من العشيره ولان الشيخ عنده معارف بغداد ونسيبه حزبي جبير بلدوله كال بيدي امشي بلشغله وانخي نسيبي يساعدني وفلاح ويااه حتى يشهد

حاول الشيخ يضايفنا بس عمتي مقبلت كالت لا ماي ولازاد يدخل جوفي اله وليداتي يردون حاولنا وياهه ومفاد

اخذ فلاح واخذنا ويااه ورجعنا لبغداد وصلنا للباب بليل توسلت بيه عمشه يدخل ومادخل وقبل ليتحرك كالت اله

عمشه : اريدنهم منك يشيخ موش من احد

راحو واحنا دخلنا نسحل بروحنا

جان الباب مسدود دكينا وسمعت صوت سهاد اجت تركض تفتح الباب

سهاد : هااا شصار

بديعه : خلي نكعد يمعوده مو متنا من التعب

دخلنا جان البيت هدوء الوكت ساعه ١١ بليل

بديعه : وينهم

سهاد : كل وحده بغرفتها شسويتو عفيه

بديعه : سوت عمه العليها والباقي على الله ذب العبايه بلكاع وطلعت بلحوش كعدت

سهاد : ادخلي عمه

عمشه : يحرم عليه البيت وعمدانه مااعرفن شى عنهم

بديعه : طبيت سبحت وصعدت لاكتني خوله وساهره وصالحه كل وحده تجرني من جهه تالي جمعتهن بغرفتي وسولفت الهن

صالحه : تتوقعون الشيخ يصدك

ذكرى : اكيد ذوله ناس اهم شى كلمتهم

ساهره : لتنسين الشغله بيها الدوله يعني لا شيخ ولا بطيخ

ذكرى : كولو ياالله خلي ننتظر ونشوف

صالحه : عساك لاتهنيت ولا شفت يوم عدل ياگلب ابن الگلب يافلاح

تره مو على رجلج بدعه على عمهم

بديعه : اعرف يمعوده ااااااخ راسي راح ينفجر

ذكرى : عمه وينها

بديعه : متقبل تدخل البيت كاعده بلحوش خطيه لا اكل ولا شرب وضعها تعبان بيوم واحد احسها كبرت ١٠ سنين

صالحه : كله من وراهه وره نجم باعو الكاع لريسان وعمهم تخبل

ذكرى : لعد يعوفون الكاع اله لو يرحون يذبحوه اصلاً احسن شى سووه وجان متوقع عمهم يدك الناقصه

صالحه : اروح للجهال

ساهره : اخذيني وياج

ذكرى : اني نازله لعمتي راح اجيب الجهال يمج اخاف انام وحدي بلغرفه

بديعه : خوله وين

ذكرى : ولا طلعت من غرفتها غير مره وحده اجه اكرم الظهر جايب مسواك خلف الله عليه اشكال جايب اخذتهم منه وطبت وبعد مشفناها حتى اكل شويه خبز وفاصوليا اكلت وكامت وعشى مقبلت تتعشى

بديعه : همزين اني كلت هسه نوصل نلكه البيت مكافش

ذكرى : الكل ساكت منتظرين رحمه الله علينا

بديعه : خلي انام شويه جسمي تكسر

ذكرى : خليت الجهال يم بدعه لان منمنا بلسطح الجهال يخافون كل وحده بقت بغرفتها واني خفت انام وحدي نزلت

لعمتي لكيتها حاطه ايدها على راسها وكاعده بلكاع ومدنگه وتون

عمه عمه

رفعت راسها لكيتها تبجي

كعدت بصفها وسحبت راسها وحطيته بحضنه وكمت ابجي وياهه

عمشه : ولج العزاز راحو مني

ذكرى : لا ياعمي كولي ياالله ان شاء الله يرجعون سالمين لتخافين

عمشه : گلشي هان عليه سنيني وشبابي شفت المر والتعب وكسران الظهر وشغل المزابل والقله والجوع واكولن وليداتي سالمين يهون لتراب رجليهم

واليوم ضاله وحيدي مامنهم واحد ينشد

عليه

ذكرى : لا اله الا الله لتبجين عفيه اول مره هيج اشوفج دوم عياطج علينا وتغلطين وتضربين وتإمرين وكلها تخاف منج لتخلين احد يشوف ام البيت ضعيفه احنا بلياج ضعاف ومالنه حيل يعمه واذا الولد ظهر الج انتي ظهرنا فدوة كومي ادخلي جوه واكلي واشربي لتخلين احد يتشمت بعمشه ويكولون انكسرت دومج توكفين بنص البيت وتأمرين الرايح والجاي ابقي هيج عفيه حتى يوم ميرجعون الولد ميحسون تاهه البيت ونسوانهم بعدهم

عمشه : يحرم عليه البيت وهمه مابيه

ذكرى : لتكولين هيج بلعكس طبي وعيطي وأمري ومشي نسوان ولدج مثل متحبين بست راسها وكتلها يله ياام عبيد بنات غنيه ماينترك البيت الهن يصولن ويجولن

عمشه : فلك طرج موش فقيره طلعتي

ذكرى : ههههه والله حتى الغلط مالتج احبه

يله بداعت ولدج بداعت نجم عزيز گلبج كومي اسبحي واني احضرلج اكل اريد باجر الصبح يكعدن بنات غنيه يشوف عمتهن جبل مايهزها ريح لتخلين غنيه تتشمت وتحس روحها احسن منج وتكول هاي حوبتي من وره شغله جاسم

كومي عفيه

لزمت ايدها وكومتها وبيدي اخذتها للحمام

ورحت للمطبخ شغلت الجوله وحميت الاكل الها لكيتها هستوها طالعه تريد تمشط شعرها متكدر

ذكرى : وين خوله

عمشه : نايمه

ذكرى : انطيني اخذت المشط من ايدهه وكعدت امشط الها هي دوم تسوي كصيبتين وتطبكهن ليفوك وتلبس الفوطه

كعدت وصرت وراهه نزلت شعرها مديت ايدي على راسها وبديت افرك راسها وهي تون اعرف بيها يوجعها ضليت افرك لحد محسيتها ارتاحت

عمشه : الف رحمه على البطن النگلتج (الشالتج)

ذكرى : من عيووني عمه كملت الضفاير وشديتهم وكعدت اكلت وتمدت بلكاع حطيت مخده جوه راسها ونامت

صعدت على كيفي وتمددت بصف جهالي بغرفه بدعه ماانكر خوفي من الجاي ماعندي غير اشمر حملي على الله

وثاني يوم فزينا على صوت عمشه يرن بأذنه

عمشه : كومن يامدمغات شنهي نايمات للظهاري نامت عليجن طابوكه

ذكرى : ابتسمت واني افرك بعيوني كعدت بدعه وكالت

بديعه : هااي شبيهه عمتي من الصبح

ذكرى : هههههه بعد عمشه شتعرفين بيها

نزلنا وحده وره الثانيه وياهي التنزل تستلمها

حتى خوله كعدت

خوله : هااا يمه شوكت رجعتي

عمشه : چاانه لو ميته تجين وره الثالث يايمه شنهي هذا النوم

خوله : غير نايمين وين نروح

عمشه : چا هو النوم لو يفيد چان فاد اهل الكبور كومن گل وحده على شغلها يله

صالحه : عفيه مره مايهدج شى

عمشه : شنهي يبت غنيه

صالحه : صباح الخير عمه

عمشه : اخيتج الغاگه وينهه

صالحه : هسه تنزل

ذكرى : كملنا الريوك وانظف وهي طلعت على السكراب تعدل بيه الكل مستغرب منها اله اني اعرف هيج تسوي رغم داخلها نار على ولدها بس متريد احد يتشمت بيها

ومصار الظهر واندكت الباب

ودخل جاسم نافخ بريشه وجان تعيط عمشه

عمشه : وين وين

جاسم : هله عمه غير جاي عليكم اشوف شلونكم

عمشه : نجم اخر مره من هطرك (ضربك) موش كال ماتدخل البيت

جاسم : هو وينه نجم وهم ولدج ولا واحد على شنو بعد متردين ادخل

عمشه : وليداتي حسهم بلبيت وطول مايشتمون الهوا جلماتهم تمشي يبن غنيه ويله ولي ورد من وين ماجيت

صالحه : عمه غير جاي على خواته يشوفهن هاي مكان متشكري جاي يوكف ويانه

عمشه : الله لايعوزنه على اخيج جفينا شرج وشره تردن تشوفنه بلحوش مايدخل عتبت الباب

ساهره : والله حلوه هم عايزه تمنعين اخوتنا ليش مو اجه فوزي على اخته لو اكرم الغريب على بتج شمعنه جاسم گملته بگعه

عمشه : ذولاك زلام حوك انه ماالفي بيتي مخانيث

جاسم : عيب عمه هذا الكلام لو رجال جان عرفت شلون ارد عليج

عمشه : من دبش يرد عليه ابن غنيه مابيه اضحك وتهز بيدها

خوله : خير شكوو هذا الصوت

صالحه : كملت تعالي اطبكي ويه امج هي راحت الزلم وضلت بيد النسوان

خوله : تاج راسج النسوان التحجين بيهن من زمان احنا نحكم بهذا البيت لو نسيتي

صالحه : ماانسى وعيونج ماانسى

عمشه : بسچ يمه وادخلي غرفتج وانته يااخوهن شفتهن وحدتهن لسانها يحفر بلكاع حفر مابيهن شى مثل الصل يله رد لاهلك ولا تسويها وادوس عتبت هذا البيت وزلامه ماكو

جاسم : هاي اذا رجعو

عمشه : يردون لاتخاف وعود اختل يبعد امك واختك

اخذت ساهره وصالحه جاسم بره بقو بحدود النص ساعه وطبن الوجوه مگلوبه

كاعده اوكل الجهال وطلعت سهاد وبيدها علاكه ومبدله

عمشه : خيرج

سهاد : رايحه لبيت اهلي عمه ومن يرجع نجم ارجع

عمشه : چا هيه خان جغان (فندق) تردين وكت مايعجبج تايهه كون

سهاد : شسوي لعد هنا وهو ماكو

عمشه : حالج من حالهن اليسري عليهن يسري عليج يله خشي وان عدتيها ترحين ماتردين ابد ماعندي بت تطلع وزلمتها ماموجود مجان ماتضلين هنا تنتظري ترحين لاهلج نسوان تالي وكت وغمه كون

ذكرى : يومين كمنا كلنا انلوب وحالنا حال منعرف شنسوي تعبنا من التفكير والقلق

وعمشه الليل تخلصه تبجي ومنعرف المن نسأل

خوله : اكرم يروح ويجي عليه ميدخل للبيت يستحي بس يوكف شويه ويايه بلطرمه نسولف وراهه يروح

يخفف عليه ويضحكني ويبوس راسي ويروح حسيت بحنانه وطيبة گلبه حتى من عرف بيه مااكل كام يغصبني ومياكل اذا مااكل احساسي وياه يريحني ويطيب خاطري

اكرم : خوله حبيبتي تجين شويه يمنا تغيرين جو

خوله : لا استحي عفيه وثاني شى تشوف كدامك وضع البيت حيل صعب وامي اكيد متقبل اطلع

اكرم : ردت اكعد وياج ونسولف حيل مشتاقلج

خوله : واني هم والله و كلشي كدامك وضعي صعب

اكرم : ان شاء الله خير شكد سألت اني وفوزي مبقينا مركز يعتب علينا ومفاد جنهم فصل ملح وذاب

خوله : گلبي نار عليهم وماابين كدام امي البيها كافيها

اكرم : يرجعون بلسلامه محتاجه شى حبيبي

خوله : سلامتك

طلع اكرم وبعدني صافنه عليه اودعه وكفت بنيه تطلع اكبر مني بكم سنه لابسه عبايه ومطلعه كذله صفره وحاطه حمره طوخ وجريئه بلكلام

السلام عليكم

خوله : وعليكم السلام تفضلي

بيت ام عبيد

خوله : اي بيتها منو انتي

صمد موجود

خوله : ياصمد بقيت صافنه هاي منو

صمد ابنكم

خوله : هااا اخويه صمد خير منو انتي

اريد اشوف امج اذا موجوده

خوله : حسيت الوضع مو راحه گلبي لعب

كتلها لحظه

طبيت للبيت وصحت بدعه وكتلها تصعد ذكرى وتلهيها

بديعه : ليش

خوله : يمعوده بدون ليش هسه بس صعديها نسوان حموينج الحيايه وينهن

بديعه : فوك

خوله : وسهاد

بديعه : شنو السالفه تره وكعتي گلبي

خوله : لتشلعين گلبي وسهاد

بديعه : بغرفتها

خوله : اخذي ذكرى واصعدي ولتخليها تنزل ابد

بديعه : خوش بس تحجيلي

خوله : احجي بس يله استعجلي

طلعت للمره وكتلها طبي بعد متأكدت ماكو احد جوه بس امي

طببتها عليها وامي تفاجأت هااي منهي

كعدت البنيه كبال اني وكالت

اني اجيت عليج ومحد يحلي مشكلتي غيرج

عمشه : انه مااعرفج

اني مرت صمد

عمشه : طركاعه ولفت علينه

خوله : فتحت عيووني هاي شتحجي جان نسمع هوسه بلباب بلحظتها جان تندفع الباب ويطبون اخوتي

يتبع .....