تحميل رواية «الابواب الخمس» PDF
بقلم ريام هادي
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
اختر مجموعة الفصول للتحميل (كل ملف حتى 10 فصول)
عن الرواية
البارت الاول للكاتبة Reem الحجي مثل الوجع فتره ويروح مايعور الكاع من يدبي النمل الحجي بليه اسباب مو لابن الاصول الزين يكعد عدل ويسولف عدل انه ادري من الحجي ميبطلون عيشة التمساح على الماي الضحل الوادم تكاطف صخر على الطير ليش جنت ماادري واحير من انسأل صدفة ذاك اليوم سيرت المضيف وعله سالفتي نشدت شايب كهل وكلي ناسك تبي اتطير وي اليطير ايغثهم اجناح اليدج عليه نسل الطير منهم ماسلم ناسيش هاي بل الحقد عدهم طلع سن العقل هيچ اكو اوادم وحق ام البنين يدفنون الميت بلايه غسل كرهت كلشي بسبب شى ملموس صار ناس عل...
رواية الابواب الخمس الفصل الحادي وثلاثون 31 - بقلم ريام هادي
#الابواب_الخمس
البارت السابع والعشرون
للكاتبه Reem
الصاير بيك حقك لمن تكول
الصارن بيه ماينحسبن هواي
انه من البيت اطلع شايل هموم
وارد شايل هموم شلونك بهاي
لا جنحاني عانني وطرت فوك
ولا رجليه عانني ع ممشاي
وايدي اليسرى كصرت بعد متلوح
واكصر منها جا شتلوح يمناي
كلش مالي واهس والخلك خيط
وصارت زرف ابره بعيني دنياي
حزني شلونه حزني اشكال والوان
شنو نوع الفرح تعذرني من هاي
ناي : يوميه اشوف يونس شون يرجع تعبان حتى الاكل كوه ياكله من التعب احس اخويه گبر قبل وكته هيج وقت لازم يكون بلمدرسه يكعد سابح ودفيان ولازم كتابه ويقرا مو يطلع من الفجر بعز البرد يروح يفتر بلعتيك
جنت يوميه من يرجع استقبله بلباب وگلي قهر واسوي نفسي فرحانه ومابيه شى مااريد يحس بقهري
يونس : نايه وينج
ناي : دخلت للغرفه اركض هاا عيني
يونس : تعالي فرگيلي جسمي ولج متكسر تكسر اليوم شلت كواني كومه
ناي : تمدد على بطنه واني بديت افرك بجسمه واسولف وياه ياكواني
يونس : اجه رجال كال لبيبي عندج حمال واذا الولد بيه حيل يشيل انطي خوش اكراميه
ناي : وين بيك حيل تشيل هيج
يونس : شسوي كيفت كلت اكيد راح يراعي تعبي وهنه جم كونيه وعينج متشوف غير مخزن متروس كواني اني شفته لو حتى حيلي راح بس شسوي الرجال اتفق ويه بيبي وبديت احمل من خلصتهن حتى حلكي انشل من التعب
ناي : سوده عليه وتالي انطاك تعبك
يونس : انطاني بس مو هوايه يكول اخرتني شغلك ثكيل مو سريع وحرك شسوي الاكدر عليه مقصرت ماعبالي هلكد كواني
ناي : زين كواني مال شنو
يونس : اشكال عتيك على مواد غذائيه تمن وشكر ممبقي شى محاطه بلكواني كملتهم ورجعت
ناي : يويو
يونس : احجي من نبرتج بيج شى
ناي : عوف هذا الشغل والله گلبي نار عليك
يونس : وبيش انعيش
ناي : مو عمه بدعه كالت شنو تحتاجون ترحون لعمو نجم وعمه خوله خلي نروح الهم
يونس : هم فتره ويتعبون بابا احنا ٤ نفرات منو يتحمل هذا العدد اكل وشرب وملابس ومصرف زايده ناقصه حتى اذا تحملو سنه بعدها يملون كافي صار كم سنه متحملين مسؤوليتنا ومخلصيها من ايد لايد
ناي : شكد تغيرت
يونس : شغل الشارع يغير ويعلم ويگبر صار كم شهر من بديت اشتغل واحس روحي صار سنين اقلها هسه الفلوس الاحصله انطيهم الج مصرف يسدون حاجتنا ومااوصيج على كيفج بلمصرف اخاف واحد من عدنا يتمرض شى اقلها منكول لذوله على فلوس
ناي : جامعتهم وهمزين الاكل بيبي متكفلته
يونس : الله
ناي : حلوو افرك جسمك
يونس : ولا احس بيدج شكد فاهيه كومي لج تكول كاعد ادغدغ
ناي : هههههه هاي شبيك والله ذابه كل حيلي
يونس : خلي حيلج الج وكومي سويلي لكمه اكلها اي شى سهل لتعبين نفسج
ناي : لتنام
يونس :ماانام لان جوعان كلش
ناي : نزلت اركض فتحت الجدر لكيت مركه بتيته حميتها هيه والتمن وكرصت خبز وصبيت وصعدت اله فتحت الباب لكيته نايم على بطنه ويشخر من التعب صحت يونس يويو مكعد ولا رمش كعدت يم راسه بوست راسه سوده عليه شكد تعبان كوم فدوة لتنام جوعان اشر بيده مااريد وبقى نايم دمعت عيني على حالته شسوي واساعده لو بيدي اشيل تعبه كله وماااخلي هذا حاله
يونس : صاعد على العربانه الي يجرها المطي وبيبي يمي اتنقل من منطقه لمنطقه انجرحت مرتين مهتميت وجبت وصله وشديت ايدي
عمشه : يمه يونس انرد للبيت
يونس : لا بيبي بعد وكت
عمشه : يمه اليوم كضيناها گلها بالاورفلي
يونس : وين تردين نروح
عمشه : يمه انه وراك وين تسير وياك
يونس : ليش مااطلع وحدي شعندج ويايه كعد اتعبين
عمشه : يايمه بعدك لحيمه وعظمك رچيج وماتكدر وليدات السوك والشارع وانه اخافن عليك چا سنين كضت يله انه وعمامك كدرنا نسايسهم
يونس : علمودج لان اشوفج اتعبين
عمشه : يا انه زوينه وكلي حيل لاتهذري يبن ذكرى
يونس : بيبي اريد اشوف امي ازور گبرها
عمشه : ياا شذكرك چا چم مره رحنا ومارضيت ويانه تشوفهه هيه وابيك
يونس : البارحه اجتني بلحلم تلعب بشعري واتبوس بيه ومدمعه عيونها كعدت مخنوك واريد اشوفها
عمشه : چاسهله انه اخذك للنجف نزورها ونزور ابيك
يونس : مالي دخل بكبر ابويه ولا اريد اشوفه
عمشه : يااا غير ابوك شجرالك تسودنت
يونس : كل الصار بينه من وراه هذا حالي وحال خواتي هو وذني نسوان ابنج الحقيرات موتن امي
عمشه : يمه واليرحم والديك لا تسولف هيج چدام احد اخافن عليك ذني مايركدن ودربهن اسود وانته بعدك ماعودك نشف
وعمامك صخول ويسرحن بيهم مااريدن يتعاندون وياك
يونس : عوفج منهن شوكت نروح
عمشه : الجمعه هم زياره وهم تسياره وناخذ اخياتك ويانه
يونس : الله كريم
ناي : اليوم بيبي طالعه وماطول طالعه وما موجوده لازم امسح البيت كله لزمت الوصله والسطله وبديت امسح
صالحه : طبي لغرفتي مسحيها بدربج
ناي : عمه اتعب والله بعد البيت كله
صالحه : هي كشه صغيره لتضلين كل مااطلب شى منج تتعايرين بسرعه مسحيها وكملي باقي البيت
ناي : هسه امسحها
جانت غرفتهم جبيره ومقسومه اثنين جهه مهند وحده ينام بيها وفاصليها وجهه صالحه وعبيد وسما بلكاع تنام لكيت سما واكفه گبال المرايه وتعدل بشعرها دخلت امسح وتباوع عليه من فوك ليجوه
اكو شى
سما: يونس اجه
ناي : وشتردين من يونس
سما: هاي شبيج بس سألت قابل كفرت
ناي : ذبيت الوصله من ايدي وتمشيت بأتجاهه فدوة سما عوفي اخويه
سما : باع هاي شعندي وياه
ناي : اني خايفه عليه من امج اذا شافتج وياه راح تگلب الدنيا احنا ممسوين شى وكل الوكت تتعارك ويانه وتريد بس زله علينا
سما : تره كلامج ماصخ هاي بس لان سألت عنه صارت عيني عليه يابه دولي وكملي مسح وبعد ولا اسألج
ناي : واني مكلت شى حتى تصيرين عصبيه كتلج مالج دخل بأخويه لتسوينا مشاكل مناقصين لسان عمه
سما : شسوي بيج امي تستاهلين امشي وخري مني ودفعتها وطلعت من الغرفه
ناي : جريت نفس مخنوكه هاي مراح تكعد راحه شفتها اكثر من مره تباوع على يونس ومرات تنتظره من يرجع الله يستر منها
كملت تنظيف البيت جنت اتعب كلش بس اخاف احجي لان مهدديني حتى ليونس مااكول
رجعنا للدراسه اشوف بعيون يونس القهر من كلنا نكعد نقرا وهو الوحيد الجان يلتهي يرتب السكراب والغراض حتى ثاني يوم يبيعهن رغم اخويه ميضحك هوايه بس على الاقل جان يكعد ويانه يسولف ويسمعنا هسه ابد وعيونه دائماً طافيه
بديت اداوم اول متوسط اقرا مو لخاطر نفسي اقرا لخاطر يونس وتعبه وحتى اقري شرهب حتى تنجح ومنخلي ينقهر من عدنا والمصرف الي ينطي الي والها الفلوس مالتي اضمهن اكول هو طالع بهذا البرد والتعب واني اشتري على الحاظر
هيج ايام لازم يدرس للبكلوريا
كاعده بلبرد بصف السكراب وحاطه ايدي على خدي جنا سنه ٢٠٠٢ نهايه الثاني بعد جم يوم السنه مال امي اشوف يونس يلوب عليها وكال هاي السنه لازم ازورها افكر شون اشوف كبرها شنو احساسي
صار عمري ١٣ سنه واني مااتذكر غير ملامح بسيطه ومرات مااتذكر اصلاً
اما يونس صار عمره ١٦ سنه ولهذا اليوم من اسأله شتتذكر منها يكول شون ابويه دفعها وكعها والدم الترس طولها مرات اكول اله سولفلي عنها ميحجي يغمض ويختنك ويكوم من يمي لحد مابطلت اسأله
صافنه وانتظره شو هذا تأخر
شرهب : تعالي قريني عندي علوم
ناي : شوي واجيج
شرهب : اجي يمج اكعد وقريني
ناي : بارده ادخلي جوه هسه تتمرضين
شرهب : بلبل خرب كتاب مرتضى
ناي : ضربت على وجهي ولج شجابه على كتب مرتضى
شرهب : ماادري شفته طلع وبيده الكتاب مشكك
ناي : اوف منج ومنه اخاف انتي شاكته
شرهب : والله مو اني
ناي : والكتاب وينه
شرهب : ذبيته بلزبل وابتسمت
ناي : اي خوش حتى كتلج يصير جماعي شو كومي شوفيني وينه
كمت لزباله المطبخ لكيته مشمور شسوي هسه وينه بلال
شرهب : ختل جوه الجربايه وحط ايده على وجهه وخايف حيل
ناي : هسه ساهره تلعب جوله شو وخري مني وطبيت للهول لكيت مرتضى نازل من فوك عصبي ويصيح وين خليته كمت وحطيت ايدي وره ظهري
مرتضى : نايه مشفتي كتاب الاقتصاد مالتي
ناي : لا
مرتضى : شبيج وجهج اصفر وشضامه وراج
ناي : عفيه لتعيط وتصيح امك والله تشرني على الحبل
مرتضى : شكو احجي
ناي : طلعت الكتاب من وره ظهري
مرتضى : هاي منو شككه هيج شرهب
ناي : بلال عفيه لتحجي واني جامعه مصرفي وانطي الك اشتري واحد جديد اكيد اكو بلسوك مثله
مرتضى : وبلال وين
شرهب : ختل جوه الجربايه كوه طب واني ادفع بيه حتى يختل زين
مرتضى : يلذكيه وشنو فايده ادفعي وانتي كلتي وين مكانه
شرهب : اوكفو هنا راح اغيره مكانه ومااكول الكم
مرتضى : وين رايحه اوكفي
سحبت الكتاب من ايدي وصعد فوك واني وشرهب وراه
دخل مرتضى يصيح وين الاخذ كتابي وينه
نسمع صوت جوه الجربايه دنك عليه وشرهب دنكت ويااه
شرهب : لك غبي كتلك ضم وجهك زين راح يشوفوك جان يضربها على راسها مرتضى والله ماكو غيرج الغبيه تعاال بلبل
يهز بجتفه ميقبل يطلع
مرتضى : تعال مااضربك
بلال : متدلبني (متضربني)
مرتضى : لا تعاال مو انجعصت راح تتعور ويطلع دم ويصير اواا
جان يمد ايده وطلعه سحبه حيل وكعده على الجربايه ينفض بملابسه
مرتضى : ليش هيج شكيت كتابي بيش اقرا بعد
بلال : اليد اقله (اريد اقرا) وشوشه ماتقبل اخذ تتبها (كتبها)
مرتضى : وتاخذ كتابي وتشكه ميصير هسه بيش اقرا
بلال : العفو
مرتضى : اذا عدتها اكول لساهره
بلال : لا لا تتدلبني بلنعال وابجي
حضنه مرتضى لبلال وباسه مااخلي احد يضربك بس انت هم لتتقرب من الكتب واني باجر اجيبلك كراسه ودفتر رسم واقلام شخبط بيهم بكيفك
بلال : اني احبك
مرتضى : هههههه واني هم
ناي : اني انطيك فلوس واشتري الكتاب
مرتضى : شوف هاي ام الفلوس خليهن الج اني باجر اسلمه للمدرسه اعرف المعاون ابنه صديقي واخلي يبدله اليه
ناي : شكراً والله خفت تصير مشكله
مرتضى : ليش شصار كتاب وراح لتنسين هذا هم اخويه
ناي : بس امك متعترف بيه
مرتضى : مالي دخل بيها ولوما ادوخ من المشاكل وابويه يشد ويايه جان اخذه يمي انومه
ناي : هو تعلم علينا وتشوفه حتى ميقبل ياكل من ايد احد
مرتضى : اني اريد اجيبله شغلات ومااعرف شون انطيهن الكم بدون محد يحس
ناي : مثل شنو
مرتضى : ملابس او شغله اشتريها حلويات هيج شى
ناي : يونس ممقصر لا وياه ولا ويانه
مرتضى : يونس سبع ورجال واعرف ممقصر بس هذا اخويه وما اريد بيوم الوم نفسي لان مساعدته
ناي : اذا تحب تنطي شى عادي واذا سإلوني اكلهم يونس جابها
مرتضى : ياريت
ناي : مهند شخباره
مرتضى : وشلج دخل بيه
ناي : مكلت شى بس ردت اعرف اخباره صار جم شهر من راح للكليه وعاش بيت جده مااجه ولا نسمع اخباره
مرتضى : غير قبوله طلع البصره هو صوجه كاتبها ثاني اختيار
ناي : انت هم مبقى شى كلها كم شهر ودخل كليه مثله وتروح للبصره
مرتضى : قابل زوج اني غير بغداد مااروح
ناي : ليش شكو بيها هذا مستقبلك
مرتضى : روحي معلكه هنا ومااعوفها
ناي : ياروح
مرتضى : مالج دخل انتي المهم روحي هنا ومااكدر اعوفها اخاف عليها
ناي : مفهمت
مرتضى : لتفتهمين احسن وكومي كملي قرايتج
ناي : منتظره يونس تأخر حيل جان نسمع عيطت بيبي
نزلنا نركض كلنا
يونس : جنت اشتغل مثل كل يوم والجو بارد يكرص من البرد لاف على وجهي لفاف بس عيوني طالعه حسيت روحي مصخن دايخ يمكن فلاونزا او بدايتها ومن ادنج والم بلغراض تفتر الدنيا بيه
عمشه : هااا حبوبه شنهي اليوم مدوهن ومالك حيل
يونس : اي والله بيبي جسمي متكسر ويمكن مصخن
عمشه : اضنهه فلاونزا
يونس : يمكن
عمشه : نرد يمه لا توكع واحيرن بيك
يونس : بس نكمل ذيج القطعه والوراها ونرجع
عمشه : ضل هنا وانه اسير الهن
يونس : لا وياج وراح اروح قبلج وانتي تعالي ورايه بلعربانه شلت الكونيه بيها نص وحطيتها على ظهري و
مشيت سريع كلت حتى اسبقها واروح الم الموجود حتى نرجع من وكت وصلت راس الفرع ومثل التقاطع سيارات رايحه جايه هو دااعبر اختل توازني ودخت وماشوف غير واحد بكل سرعته شمرني ليغاد محسيت شكو بدنيا بعد
ناي : دخلت بيبي تعيط على عبيد
عمشه : عبيد وينك يلمصخم وملطم
عبيد : هاا يمه خيرج
عمشه : كعدت بلكاع وتضرب على رجلها ولد صمد بلمستشفى الوليد مدمى سحكته سياره
ناي : اجيت ركض على بيبي واعيط اخويه بيه شى
عمشه : چاانه شدراني السحكه خله بوجهه وفلت وانه تسودنت والوادم الخيره شالوه للمستشفى الحك لابن اخيك
عبيد : اي يمه هسه ابدل واجي
ناي : فدوة بيبي يونس بيه شى
عمشه : يايمه ياحبيبه تعالي انشدي عليه اليتيم راح يضيعن من يدي
اجت شرهب وحضنتني خايفه
شرهب : اخويه راح يموت
ناي : اسم الله مابيه شى لتخافين
ركضو كلهم جوحي وعبيد وبيبي ومرتضى وياهم نزلن ذني يتمخطرن
ساهره : خيره حتى هاي مادبرها وصاير بيها رجال واني واني
ناي : ابوس ايدج عمه لتحجين عليه
صالحه : شكالت ولج قابل سبته
ناي : مكان متدعون اله
صالحه : انتي ادعي ميحتاج ندعي
ناي : حتى المدعوم مينكسر گلبكم عليه الله اكبر شنو هاي القسوه شنو السوينا الكم وتكرهونه هيج
ساهره : نصي صوتج لا بلنعال على حلكج صايره نمرة وتعيطين وتجاوبين لج اذا محد يضبج اني اضبچ واكسر راسج وجرتني من شعري
ناي : عوفيني شسويت اني شفتكم فرحانين لان اخويه اندعم
صالحه : انعل ابوج لابو يونس بت الگلب شتردين نشك هدومنا والله اخوج اندعم بلقير حيل بيه
ناي : حسبي الله عليكم تسبون الميت
ساهره : لج هاي تتحسب هاي عليمن وجان تنزع النعال ودك على راسي وايدي وصالحه تضرب وياها واني كعدت بلكاع طكيت بجي
شرهب : عوفو اختي
صالحه : وخري لج ودفعت شرهب حيل بلكاع وكعت على ظهرها وكامت تبجي اجه بلال جاب طبله وراد يشمرها عليهن وخرن مني
صالحه : هلمره المنغولي علينا
ناي : العفو بعد مااحجي عوفوني ولازمه شعري المكفش وافرج بجسمي وابجي
ساهره : اذا سمعنا صوتج عليتي على وحده بينا هناا ادوسج وتأشر على رجلها
جري عدل حتى لتتأذين ولسانج تبلعي واياج تكولين لاحد ضربناج
ناي : مااكول والله كمت وسحبت شرهب وبلال وصعدت ركض للغرفه كمت اشهك مدري على اخويه المااعرف حالته لو على ذني الحقيرات
بقيت اليوم كله اخاف انزل وشرهب مخلوسه وساكته وبلال نام سمعت صوت سدت الباب الجوه فتحت باب الغرفه على كيفي ومديت راسي من الدرج واسمعهم
ساهره : هااا بشر شصار
عبيد : مابيه شى بس كسر برجله قوي وجبسوها اله ورضوض وجروح بوجهه
صالحه : عبالي مات
مرتضى : شلج خاله بهذا الفال
صالحه : كالو انسحك وبيبيتك سوتها سالفه شكبرها صدك هيه وينها
عبيد : امي بقت وياه بلمستشفى
ساهره : ومنو راح يدفع تكاليف علاجه
عبيد : اكو غيري رجلج طفر من سمع ولو هيه مستشفى حكومي بس طلبو كم شغله بسيطات
ساهره : وليش يدفعله هو مو ميشتغل ويه امك واكيد ضام جم فلس خلي هو يصرف على روحه
عبيد : من كثر معاشرتي جوحي صرتي مثله
ساهره : غير رجلي وابن خالتي
مرتضى : رايح لو لد صاحبي اجيب كتاب منه واجي وطلع مرتضى
عبيد : من شفت حالته انقهرت والله فكرت انطيهم لنجم وخوله وهمه يحيرون بيهم
صالحه : ايااك غير اگلب الدنيا عليك
عبيد : بس لو افهم ليش متقبلين صار سنين ماكله گلبي من باب مترديهم ومن باب ثاني تتخبلين من اگلج خلي انطيهم لنجم
صالحه : تريد تنطي ولد اخوك للي بسببه انكتل هذا واحد ماعنده حرمه حط عينه على مرت اخوه وحبها والله اعلم يجوز غواها وهو سبب موتتها تريد تسلمه جهالها
عبيد : ولا مقتنع بكلامج هيج گلبج عليهم
ساهره : عيني تنطي بنات اثنين لخوله حتى يطلعن مثل اخلاقه وكاحتها خليهن هنا كدام عينا
عبيد : ولجن محد يعرفجن بكدي اكص ايدي اذا ادورون مصلحتهم انتم تخافون يطلعون براسهم خير ويكملون دراسه وتتعدل امورهم ويصيرون احسن من خلفتجن لان تدرن خوله ونجم راح يتعبون عليهم
صالحه : اهوو كام يتفلسف ويدور سوالف مالها طعم خليهم هنا وسد الموضوع واخاف امك تفتحه سكتها مااخلي جهال ذكرى يرحون لذولاك لو اعرف احرك البيت حرك
ساهره : عمتي اكيد راح تفكر بهيج وانت لتنطيها مجال
عبيد : خطية هاي الجهال برگبتجن
صالحه : يله عيني يلحنين خليها سكته مو اذا احجي ازعلك
عبيد : لتحجين ولا ادوخيني ماانطيهم لخوله ونجم وسدي الموضوع
ناي : مسحت دموعي وشكد حقدت عليهم يعني لهاي الدرجه يكرهونا
وشنو هاي سالفه عمو نجم معقوله يحب امي سمعت صوت درت وجهي لكيت سما هم تسمع ويايه وعيونها حمره مبينه باجيه
اجيت يمها شبيك
سما : اخاف يونس يصير بيه شى عفيه لتحجين عليه والله اخاف عليه
ناي : حضنتها وهاي اول مره اسويها لان شفت حالها كلش تعبان
ان شاء الله مابيه شى سمعتي مجرد كسر برجله
سما : جنت انتظره من تأخر عرفت بيه شى
ناي : ان شاء الله يكوم بلسلامه لتخافين
سما : يعني شوكت يرجع للبيت
ناي : بلكت باجر
سما : راح ابقى ادعيله حتى يطيب
ناي : اي عفيه محتاج الدعاء كلش روحي غسلي وجهج لتجي امج وتحس
سما : اذوج من ضربوج
ناي : دنكت خجلانه ومقهوره
سما : مكدرت اطلع اخاف امي تضربني ومتقبل احجي وياج
ناي : اعرف بيها روحي للغرفه يمكن صعدن
طبيت ركض وسديت الباب ومن سمعت صعدن رجعت نزلت اسوي اكل لشرهب مااريدها تنام جوعانه
فتحت الثلاجه وگليت بتيته وطمامه وسويت لفه الها
مرتضى : مالي لفه
ناي : انداريت جنت ابجي واشتغل
مرتضى : شكو ليش تبجين
ناي : خايفه على يونس
مرتضى : مابيه شى كلش زين وضعه وباجر يطلعوه واني من الصبح رايح الهم ويله جوعان مبينه طيبه مسويتها
ناي : هاااك
مرتضى : صايره اطبخين
ناي : هنه جم شغله اسويهن تعلمتهن من بيبي والباقي كلشي مااعرف
مرتضى : تتعلمين
ناي : طول ماامك وخالتك ورايه يجوز حتى يخلن اخبز
مرتضى : يجي يوم واخلصج منهن
ناي : انت تخلصني شون
مرتضى : حطيها ترجيه بأذنج اخلصج من هذا البيت
ناي : واخوتي
مرتضى : هههههه من تكبرين اكثر افهمج شلون وليش مترهم اخذ اخوتج
ناي : هاك لفتك وهاي كلاص جاي خلي اسوي لشرهب
مرتضى : وانتي هم اكلي
ناي : اي راح اكل صعدت وكلت شرهب بلكوه جانت ضايجه ومتحجي عفتها مالي خلكها ونامت بلكاع واللفه بيدها ودمعه صغيره تنزل من عيونها اختي نامت وتحس روحها مهضومه القهره مال قبل شويه بعدها بگلبها شمرت غطا عليها ونامت تمددت بصفها وغفيت ردت ماافكر شيصير اريد يطلع الصبح حتى اشوف اخويه
يونس : فتحت عيوني وجسمي كله يوجعني وجع فضيع عطت من الالم
عمشه : دخيلك ياابا الحسن ها يمه يونس شون كيفك
يونس : بيبي متأذي حيل ليش مااكدر احرك رجلي ثكيله كلش
عمشه : ياوليدي جبسوها وان شاء الله ترد احسن من گبل
يونس : منو دعمني
عمشه : زلمه ميخاف الله شافك طحت وفلت بجلده النذل عساه بحضه وبخته ويتلكاها بعافيته وليد يتيم على باب الله تضربه وتشرد
يونس : منو جابني
عمشه : الوادم يمه
يونس : اريد ارجع للبيت هسه البنات يخافن
عمشه : ماعليهن شى يمه حير برويحتك سوده عليه حنين مايصخه بخياته
باجر من صباحيات الله نطلع ونرد للبيت ارتاح يايمه لاتوجع والجرح ينلجم
يونس : جان الالم فضيع اعيط منه اعض المخده واشيل روحي واحطه والجو بارد احس سجاجين بعضمي وبيبي حاطه الفوطه على وجهه وتبجي الدكاتره حارو شيسون تالي ضربوني بلمغذي ابر مسكنه يله هدا الالم ونمت
كعدت ولكيت جوحي ومرتضى فوك راسي
عمشه : هاا يمه صحيت صبحك الله بلخير
يونس : اريد مي عطشان
هاك اشرب شربني مرتضى واني كوه ابلع
شوكت نطلع
جوحي : الدكتور الاخصائي يشوفك ونروح
اجه الدكتور وكتب على ابر وعلاج مال الالتهابات ولازم تنضرب اخذ الورقه جوحي وحطها بجيبه وحدد اوقات للمراجعه والمعاينه اخاف يصير شى وبعد شهرين افك الجبس مال رجلي ويجوز اكثر حطوني بكرسي ورجعوني للبيت
جنت افكر هاي كعدتي كلها منو الهم وشون راح تفض ومنا مصاريف العلاج شلت هم الفلوس قبل مااشيل هم رجلي وحالتي
ناي : اجه يونس هو دخل لو نركض نبجي اني وشرهب اول مره نحس يونس ابونه مو بس اخونه لان يوم واحد بدونه تهنه وضعنا بست ايده
يونس : مابيه شى لتبجون
ناي : خفنا حيل عليك
شرهب : توجعك ومدت ايدها على وجهه كله مورم
يونس : ااااخ ولج
شرهب : زين وهااي ومدت ايدها على ايده المجرحه
يونس : كله يوجعني والله بس لطخيني
شرهب : خلي اكعد بحصنك حلو هذا الكرسي
ناي : اكعدي اخوج مريض
عبيد : عينج على اخوج منا وهيج يرادله مداراه
ناي : عيوني اله
عبيد : وانت هاي الفتره لتتحرك هوايه حتى اطيب
يونس : ماشي عمو
جوحي : طيب بسرعه وعلاجك اخذه بوكته هذا كله بفلوس تره مو بلاش
يونس : اذا طبت واشتغلت ارجعهن الك
جوحي : خوش اعتبرهن دين عليك
عمشه : يااكون تحطهن على كبر مريتك چا ابن اخيك يتيم وتحاسبه لون مرتضى تعتبرهم دين يلغمه
جوحي : هاي شبيج يمه غير حق قابل اني الدعمته
عمشه :اااخ كون اكضك وافتح راسك واحطن بمجانه راس مطي عبن احن منك
جوحي : مااريدهن يله ارتاحي
عمشه : چا هو منهي ينطيهن الك امشي ولي چا زين سوت بيك خوله من خذتهن وخلتك تطلك مثل المره المتعسره
جوحي : لتذكريني لهسه معدتي محتركه من اذكرها لو بيدي احركها لبتج
عمشه : اگلن تبن وكض لسانك ولي لشغلك ماوراكم غير الهم من اشتعل شيب الطلعت عليه
صالحه : حقه ياعمه قابل الفلوس تجي بلهين
عمشه : چا انه مااخلص من مريته تنطين انتي عبن وحدتجن تافله بحلك الثانيه ياهي تروح الثانيه ادافع الها
صالحه : غير اختي وهو رجل اختج
عمشه : انعل شيب اصلج واصل اخيتج واصل رجل اخيتج يله گلكم سوه
يونس : صعدني مرتضى اذا مصارت زحمه عليك
مرتضى : لازم تبقى جوه الحمام قريب عليك صعبه تنزل وتصعد ميصير تتحرك هوايه
عمشه : تعال بغرفتي انومك جاري يمه
ناي : خلينا يونس بغرفه بيبي وكمت انزل واصعد علموده
اول ايام مينام حيل يتعب من الالم احط راسه بحضني ويبجي ينكسر لبه الگلب
وبمرور الايام تحسن والالم بدا يخف
جنت بلمطبخ اسوي جاي حليب اله اخذته بكوب وبيبي طلعت للشغل قبل مااوصل للغرفه سمعت صوت فتحت الباب لكيت سما كاعده گباله وتبجي
سما : اشتاقيتلك كلش
يونس : خفتي عليه
سما : فوك متتصور واخاف انزل لتشوفني ماما هسه بس طلعت للسوك هيه وعمه ساهره نزلت ركض
يونس : روحي اصعدي اخاف تشوفج
سما : شون صرت عفيه
يونس : بعدها توجعني بس احسن من اول ايام
سما : صير زين حباب حتى اكدر مثل قبل اشوفك براحتي
يونس : لتبجين بغلاتي حيل اتأذه من اشوفج
سما : ليش بكيفي حتى من اروح للمدرسه مااركز اخذت ٤٠ بالاحياء لان مقاريه كامشه الكتاب وافكر بيك
ناي : صفنت شنو بين يونس وسما لان طريقه حجيهم مال دوم يسولفون واكو شى بينهم زين شوكت مسولف وياها ومبين يحبها عزه يايونس مالكيت غير بت صالحه
دخلت صالحه وساهره يسحلن بلعلاليك
صالحه : شو واكفه هيج شكو تعالي ساعدينا مو واكفه مثل الطنطل
ناي : ارتبكت وخفت كتلها بس اودي الكلاص واجي ودخلت ركض عليهم وسديت الباب طفرت سما من شافتني
امج هنا
سما : راح تذبحني اذا عرفت نزلت ياربي وين اروح وين وتروح وتجي تريد تبجي من الخوف
يونس : على كيفج هسه تصعد واصعدي وراها وكولي الها جنت بلحمام
سما : وين اختل عفيه
ناي : اشش صوتج هسه تسمعج
صالحه : لج نعاال وينج ومنو يمج
ناي : طلعت اركض من الغرفه وسديت الباب
اجيت اجيت
صالحه : منو جوه غير يونس
ناي : هاااا ماكو احد
صالحه : سمعت صوت وحده سما هنا
ناي : لا شيجيبها هنا
صالحه : شو وخري ودفعتني ودخلت
وينها
يونس : منو
صالحه : سما سمعت صوتها
ناي : كتلج عمه ماكو احد جنت اسولف اني ويونس
صالحه : انجبي انتي وطبت للغرفه ادور وجان تريد تفتح الكنتور كام يونس ويتحرك كوه مجبسه رجله بعدها وكف گبالها
شتردين عمه
صالحه : وخر مني لا ابتلي بيك انت واختك
يونس : مااوخر
صالحه : اطلعي سما لا اكضي بيج التوبه ولج احطج بيد ابوج واخوج جان تنفتح باب الكنتور وتطلع تشهك وترجف من الخوف فدوة ماما لتكولين لمهند
صالحه : بت الزفره مو كتلك ماكو نزله شعندج هنا بت عبيد اله اتوبج من النزول وسحلتها من شعرها وعياط سما يسمع البيت كله اجت ساهره تركض
ساهره : على كيفج وياها
صالحه : هاي عنوديه اذا مااكصكص جناحه راح تلعب بكيفها وخرو مني
ناي : عفيه عمه على كيفج وياها ماعدها شى اني صحتها ردتها تساعدني
صالحه : كتلك قبل مده اياك توصل يم بتي عيونك افكسها وانت ماتبت اني الك يبن ذكرى
يونس : لتجيبين اسم امي على لسانج
سما : ماما عوفيني
ناي : سحلت سما من شعرها حسيت فروة راسها طكت بيد امها متحمل منظرها يونس وكام وراها واني تخبلت ممنوع يتحرك ابد لان كسره خطر وهو شاف سما تنضرب لو نسى حتى كسرت رجله ويسحل بروحي ويروح وراهم
ناي : وين رايح موزين راح تتأذه رجلك اركض وراه وميته خوف صعدت صالحه وسما وهو يتجه خطوه خطوه على الدرج واني احاول الزمه دخيلك ياربي
اجيت اركض من الجهه الثانيه حتى الزمه فركت رجله وكع وعاااط
من خوفي كمت ابجي ادور احد يساعدني
يونس : اااااااااااخ رجلي
ناي : متكولي شكومك قابل امها راح تموتها هي كم ضربه وتسكت دخل عمو جوحي
جوحي : شبيهه واجي يركض يساعدني
يونس : رجلي عمو حيل تأذيني
ناي : عمو بداعت ابنك شوفه شبيهه نايم بلكاع ويعيط
حاول ياخذه وسنده وجبت الكرسي حطه واخذه ركض
صعدت اركض الهن فتحت الباب
ارتاحيتي كتلج ابتعدي عن اخويه شرايده منه هسه رجله الله اعلم شراح يصير بيها
صالحه : هو اخوج الادبسسزز يرسم للبعيد اذا مبطل يركض وراها لا اذبه بهبيه اخليج العمر كله تبجين عليه
ناي : نزلت وعفتها ردت بس واحد ينصفنا بهذا البيت بيومها تأخرو والكل انتظر
رجعو وكال عمو طك الكسر مالته ورجعو بنوها ولان جوحي ابو فلس ويخاف يخسر هوايه مودي لمجبرجي عاوي مو مستشفى
شفت يونس لا ايد ولا رجل وروحه مايعه
شبيهه اخويه
جوحي : مابيه شى بس طكوها اله ومتحمل
عمشه : شطكو ولك
جوحي : الرجال كال مبنيه غلط واني راح ارجع ابنيها صحيح وهو ميتحمل الم ضل يعيط لحد ماخرب وتالي صحه وجبته
ناي : اخذته من ايد عمو وادفع بيه بلعربانه جان اخويه ساكت ومنتهي الوجهه اصفر والشفهه بيضه
جبت مي شربته وغسلت وجهه شبيك ياروح اختك
يونس : أذوني نايه حيل تأذيت
ناي : بيه ولا بيك وحضنته وابجي
يونس : أذتها امها
ناي : خلي تولي كله من وراها انت شعندك ويااها
يونس : احبها
ناي : شنو ياحب يونس وملكيت غير بت صالحه
يونس : هي هم تحبني
ناي : شجاك انت حتى متتقرب منها
يونس : من سنتين واني احبها
ناي : انتم بعدكم صغار
يونس : والصغير يگبر
ناي : امها لو تموت متنطيها الك حطها بالك
يونس : اخذها غصب عنها واحرك گلبها
ناي : مناقصنا مشاكل اروحلك فدوة هاي مكان متفكر شلون نخلص منهم
يونس : خلي بس الله يكومني واني اشتغل واتعب نفسي لحد مااكدر اكون نفسي واطلعكم منا واخذها وياكم
ناي : هاي احلام مستحيله صالحه تدفنها ومتزوجها الك
يونس : اله اخليها تفر براسها لا ليلها ليل ولا نهارها نهار
ناي : عفيه لتسوي هيج
يونس : اااااااااخ رجلي بيها ناااااار
ناي : بقيت اسوي كمادات لراسه لان صخن
اسبوع مر ويونس يوميه تسوء حالته
اني وبيبي حايرين شنسوي اله وكل منكول لعمو عبيد يتهزم وجوحي كال مالي دخل صرفت هوايه انطته بيبي فلوس بس هو مقبل
عمشه : انه ادزن على نجم ياخذه الوليد ذوله البهايم ماوراهم رجه
ناي : فدوة بيبي روحيله راح اخويه يسكط شوفي شون يلوب
يونس : ناااار برچلي نايه داموت
ناي : حضنته وابجي هسه بيبي تروح
عمشه : انطيني عباتي اروحن لنجم
ناي : فتحت الكنتور وانطيتها وهي طلعت
اخذيني ويااج ردت اندل بيتهم بدون محد يعرف
عمشه : امشي وياي
ناي : جنت مركزه حيل بلطريق اريد اندل وينهم حفظت كل مكان نصعد وننزل بيه
وصلنا لعماره سألت بيبي شدلاج للطريق جايه قبل
عمشه : چا انه وليداتي مااندلهم عيبه بحگي
ناي : اذا هيج تحبيهم ليش ميرجعون للبيت
عمشه : هاااي سوالف جبيره عليج يمه تكبرين وتعرفين
خوله : جنت اغسل ملابس نجم واندكت الباب مسحت ايدي بملابسي وطلعت امشي فتحت الباب وصارت امي بوجهي صار جم سنه مشايفتها جفلت واني اشوفها گبالي
عمشه : اخيج وينه
خوله : طالع صاير شى
عمشه : شوكت يرد
ناي : اباوع على عمتي ومتإكده معرفتني اخر مره شافتني واني عمري ٨ سنوات عمه بدعه بسكوت جابتنا اني وشرهب
خوله : اباوع بنيه واكفه هستوها البلوغ مبين عليها عرفتها من عيونها لان نظرتها ولون عيونها نفس امها
انتي ناي
ناي : اي عمه جرتني من ايدي وحضنتني وطكت بجي
خوله : نفس عيون المرحومه شونج حبيبتي
ناي : الْحٍمَدٍ للـّہ عمه فدوة الحكينا
خوله : شصاير
ناي : اخويه يونس موزين انكسرت رجله وجبسوها اله ورجع وكع عليها وهم انكسرت ومن يوم ماعادو الجبس واخويه مصخن لو يون من الالم
خوله : جايه وياكم
عمشه : شنهي انه اجيت على نجم موش عليج
خوله : يمه رحمه لابويه وابوج مو وكت سوالفج الله يخليج اشوف يونس شبيهه وراها لتخافين اني مااطب بيتج حالفه يمين وهسه راح اكسر اليمين لخاطره بس اشوف شبييه وراهه مااطخ عتبت بيتج
سكتت بيبي لان عاطت عمتي حيل بيها
ركضت جابت عبايتها ونزلنا سوه مشت شويه لاسواق وطلبت تلفون منهم ارضي خابرت واجت
عمشه : شنهي وين وليتي
خوله : نجم منطيني رقم اذا صار شى ادك عليه وابو الاسواق عنده تلفون ارضي وخابرت منه حتى يجينا
يله امشن
ناي : جنت اشوف عمه خوله شون حركتها سريعه وشون لسان ومتخاف تمنيت اصير مثلها دخلنا للبيت اباوع على وجهه كوه تجر النفس واختنكت فتحت عيونها وسدتها
خوله : لا هله بهذا المهجوم
عمشه : ادخلين لو تولين
خوله : دخلت رغم كسرت يميني واول مدخلت اجتني الحسره والقهره ونفسي ضاق طبيت ركض على يونس
هااا حبيبي شبيك
يونس : عمه داتملخ
خوله : انطني ملابس وخلي ابدله هسه يجي نجم وناخذه للمستشفى نهجم راس ولدج كون مكدر واحد گلب منهم ياخذه لو يعرفون بس لنسوانهم
عمشه : بسچ ولاتسوين طلابه
ناي : انفتحت الباب ودخل عمو نجم يركض يله التكسي بلباب
يعني بسرعه نقلووه جنت اشوف بعيونهم الخوف والحرص عرفت ليش ذني ميردن نروح يمهم حتى ليصير براسنا خير
توسلت بعمه لزمت ايدها اجي وياج
خوله : تعالي يله حطي شى على جسمج وامشي
ناي : نركض بيه بلمستشفى واخذوه لقسم الكسور وكالو لازم عمليه رجليه مبنيه غلط
نجم : شكد متكلف نسويها بس خلي يصير زين
ناي : بقو بلمستشفى لان باجر العمليه جانت الاخبار مطمن لان رجل يونس العظم بيها متأذي وخايفين مترجع مثل قبل
رجعت للبيت ويايه عمه خوله وجانت صالحه وساهره كاعدات يكرزن حب ولا يمهن ويباوعن تلفزيون طبت عمتي اخترعن اول مره اشوف صالحه وساهره وجوهن صفره
خوله : هااا ولجن برابيك بعدجن عايشاات مبين عفتجن زايد كاافي مو ارجع احسن
ناي : هااا عمه راح ترجعين تعيشين هنا
خوله :عفتهن يرتاحن هواي ويلعبن بكيفهن
صالحه : مو بكيفج مترجعين عمتي مترجعج
خوله : عدجن وحده من اثنين يااما ارجع واطين عيشتجن لو تنطوني الجهال
يتبع ...
رواية الابواب الخمس الفصل الثاني وثلاثون 32 - بقلم ريام هادي
#الابواب_الخمس
البارت الثامن والعشرون
للكاتبه Reem
أثاريني " بواچي"
شما حضيت بخد
وأثاريني حچي ،
ب گلب الرساله،
الـ ما قراها أحد
شثگل حزنه ؟؟
اليطشر واهسه أعله البوب ؟
ويرد تاكل بگلبه حچاية الـ محد
خوله : هااا ولجن برابيك بعدجن عايشاات مبين عفتجن زايد كاافي مو ارجع احسن
ناي : هااا عمه راح ترجعين تعيشين هنا
خوله :عفتهن يرتاحن هواي ويلعبن بكيفهن
صالحه : مو بكيفج مترجعين عمتي مترجعج
خوله : عدجن وحده من اثنين يااما ارجع واطين عيشتجن لو تنطوني الجهال
ساهره : اثنينهن نكعيهن وشربي ميهن لان لا عمتي ولا الولد يقبلون لج نسيتي سوايتج جنج نسيتي يخوله واذا ناسيه اني اذكرج
خوله : مناسيه ولا راح انسى كلشي صار بيه او عليه لتعبين نفسج وحيري بهمج
ساهره : ليش يمه شعندي هم الْحٍمَدٍ للـّہ حالي احسن من حالج بيت ورجال ولد قابل مثلج بايره مطلگه محد يگلبج
خوله : ولج او اضل العمر كله بليه رجال ولا اتزوج واحد مثل جوحي انت شلون عايشه وياه واحد كرميده يموت على الفلس لروحه ميهل يشتري شى بخيل فلوس واخلاق وطباع ومشاعر انتي مامتزوجه انتي مبتليه هذا بلاء والله باعده عني وباليج بيه وعساج وابو زايد ولو اني احجي عليه وانتي انكس منه يله تدهدر الجدر ولكَه قبغه
صالحه : هسه انتي شكو جايه
خوله : بيت امي مو بيت الخلفوج وشوكت ميعجبني اجي
صالحه : وامج مو هنا ولو تدري اطيح حظج ارجعي من وين ماجنتي
خوله : اسمعن لجن لهسه ضابه لساني وبالعته لان تعبانه ونعسانه ورايه كعده من الصبح اذا سمعت صوت وضوجتني تعرفني مخبله هسه اسويلجن كارثه بهذا المهجوم هسه مثل الحبابات تصعدن لغرفجن ومااريد اشوف طولج المحلو وامي من تجي عود هيه تطردني واخاف يوزجن صاحبجن الشيطان لان انتم كرابه اذا مراضعين من نفس الحليب وطالعين اخوه اخاف يوزجن وتگببنها عركه من يجون اخوتي الزلم الحوك
تره اني وحده ماباقيه على شى اخزيكم واعزيكم وبنص الشارع افضحكم لهذا صيرن حبابات وحسجن مااسمعه
صالحه : منفوش ريشج من وره نجم لان لفاج لو ضاله بلشوارع جان هسه خوش مكسوره عينج
خوله : ماعاش ولا انخلق الي يكسر عيني ولج صالحوو تره قبل وله واذا جنتي متخافين على نفسج خافي هسه على خلفتج
صالحه : انتي مره والزمي واحد من عدهم حتى احركج
خوله : هههههه تدرين بروحج جبانه ولوما السحوره والطريق الاعوج انتي اجبن من اسماعيل ياسين
ساهره : شتردين من عدنا
خوله : تصمن لسانجن وتسكتن تضلن بموقع المتفرج ولتدخلون ابد
صالحه : مندخل على شنو
خوله : اي شى يصير منا وهيج مااسمع حسكم كافي ذيج السنين كلها عايفتجن
صالحه : هاي الهوسه كلها علمود جهال ذكرى
خوله : اعرف بيجن ساس البله كل صغيره وجبيره بهذا البيت انتن وراه وحتى هسه كسرت يونس من وراجن
ساهره :حتى واذا كلنالج مو احنا هم تذبيها براسنا بله شنو مجبوريتنا نعيش جهال مو جهالنا والعيشه صعبه هياالله نكدر على جهالنا
خوله : ليش بلال مو ابنج لو نسيتي خاتون وهم شامرته انتي ورجلج وذبيتو حمله بلبدايه على فلاح وهسه على يونس
صالحه : تره لغيتي هوايه امشي ساهره هاي ماعدها شغل وعمل وجايه تضيع وكتنا
خوله : اي حقج من الشركات والمعامل بأسم غنيه ماعندج وكت تسولفين اااخ منك يلساني
صالحه : تجي عمتي وهيه تحلها
خوله : عفيه تجي عمتجن واني وياها نتفاهم او نتكافش المهم مااريد اشوف خيال وحده بيجن
طلعن صالحه وساهره
ناي واكفه بصفي انداريت عليها شفت وجهه شون تباوع عليه ابتسمت اريد احجي جان عيون تنتبهه على طفله صغيره كاعده بلكاع متربعه وحاطه ايدها على خدها والابتسامه شاكه وجهه وخصل شعر ملولوه نازله على عيوونها
انتي منو
كامت وكفت واجت يمي وكالت
شرهب : انتي منو
خوله : هااي بت منو
ناي : هاي شرهب عمه شنو معرفتيها
خوله : هيج كبرانه ماشاء الله تعالي ولج ابوسج وسحبتها وحضنتها
شرهب : انتي منو
خوله : اني عمتج
شرهب : مثل عمه صالحه وساهره
خوله : لا غدي مو مثلهن اني عمتج اخت ابوج
شرهب : وين جنتي
خوله : بعيد وهسه اجيت
شرهب : اريد اصير مثلج من اكبر اعيط عليهم ويسكتون
خوله : هااي مبين مستويه من هسه
ناي : ههههه اي وكحه حيل
خوله :ماميه منو امها
ناي : تعالي عمه بغرفتنا حتى انام ونرتاح
شرهب : عمه لتروحين
خوله : دنكت بمستوى طولها وابتسمت وكتلها تحبيني
شرهب : لا بس حتى عمه صالحه وساهره ميضربونا
خوله : منو يضربكم وباوعت على ناي ليش تخليهن يمدن ايدهن عليج
ناي : اخاف منهم
خوله : كولي لامي اطيح حظهن
ناي : مااريد مشاكل ومن يوم مايونس كام يطلع للشغل اتجنب المشاكل حتى ليتعب فوك تعبه
خوله : لازم اسوي حل
ناي : انتي بس لتعوفينا هو هذا افضل حل
خوله : خلي نصعد نرتاح ورانا باجر روحه للمستشفى
ناي : سحبت شرهب من ايدها وهي صافنه على عمه
دخلنا للغرفه وعيون عمه تلالي حسيتها تريد تبجي بس حاصره دمعتها تباوع على كل ركن بلغرفه
بلال جان نايم انتبهت عليه
خوله : هذا ابن ساهره
ناي : اي هو
خوله : كبران خطيه كلكم كبرتو بسرعه
ناي : وياريت مكبرنا اقلها من جنا صغار كلشي منعرف
خوله : تعالو بحضني
ناي : كل وحده من عدنا نامت على ايد عمه اني من الجهه اليمنى وشرهب على الايد اليسره يمكن هاي الحنيه صار فتره محاسين بيها
غفيت من التعب وكعدت على حركه ايد عمه وهي تلعب بشعري
نايه تجين ويايه للمستشفى لو تبقين نايمه
ناي : طفرت من مكاني اجي اجي
خوله : اشش على كيفج ليكعدون
ناي : كمت على كيفي حتى لتكعد شرهب وبدلت ونزلنا اني وعمه
خوله : تعالي نتريك
ناي : مجوعانه والله اريد بس اروح ليونس قلبي يوجعني عليه
خوله : هسه انروح بس ناكل بالاول
ناي : راح اسوي هسه
خوله : اني اسويلج
ناي : صافنه على عمه تحضر بلريوك وابتسم على حنيتها كعدت اتريك وياها وحاسه بشعور غريب يمكن تصرفها عادي عند غير ناس بس عندي شى جبير لان محرومه من الكلمة الحلوه ومن المعامله الطيبه
كملنا ورحنا للمستشفى دخلنا لكيت عمو نجم وبيبي كاعدين ومتوترين
ناي : شكو وضعكم مو طبيعي
خوله : نجم شصاير
نجم : دخلنا للعمليات بس الدكتور من وره الاشعه مطمني
خوله : ليش ياستار
نجم : الولد مكسور عظمه مرتين وملتهب والكسره الثانيه سببت مدري شنو انفصال عظمات صغيرات وملتحمات بلغلط شغلات حجاها الطبيب مفهمت منها غير رجل يونس مراح ترجع مثل قبل
خوله : لطمت على وجهي سكط الولد
نجم : ماادري خوله لتزيديها عليه متعرفين شصار بيه من كال
ناي : شكو عمه احد يحجي
عمشه : يمه اخيج سكطت رجوله عساها بحضه وبخته الوليد مثل الورد وهيج يصير بيه
خوله : كله منكم
عمشه : چا شنهي انه الدعمته
خوله : انتي ولدج الخلو صغير يعوف دراسته ويخلصها بلعتيك وتالي من اندعم ابنج الچلب وداه لواحد مطي مثله
عمشه : بسچ تلومين بيه انه شدراني هيچ يصير
خوله : تقربت منها وجنت حيل اعصابي مدمره
مكافي يمه عنادج شفتي خطيه هذا الولد برگبت منو ولو اني اشوف كل الصار بسببج انتي
عمشه : تردين اشب برويحتي عبن ترتاحين
خوله : انطينياهم يمه اني اداريهم اني ونجم
عمشه : وليدات صمد مايطلعون من يمي لون اموتن اخذيهم
خوله : ليش هذا العناد لخاطر الكعبه شوفي روحي ادخلي للعمليات شوفي عنادج شسوه بينا
عمشه : انه احبنهم وبعزيت رويحتي ومااريدن يبعدون عني وهذا قدر مكتوب چا شنهي گلشي يصير وانه الصوج
نجم : وتالي يمه تره ادمرو والله وكله لان تحبيهم شحصلو من حبج غير الضيم عوفيهم يمه النا واني شوكت ماتردين اجيبهم الج والله
عمشه : انه گلت ماانطيهم ولاتكدرون خاطري انه گلبي موجر على يونس بسگم وليدات صمد يمي يضلون والمايعجبه يطخ راسه بلحايط وانه زايده مني وديت عليكم
خوله : خليج بعنادج محد طيح حظنه غير العناد مالتج
خوله : ماشي مناخذهم بس ارجع للبيت وابقى وياهم
نجم : وين ترجعين
خوله : ماابقيهم الوضع هناك لايص نجم ومال ابقيهم وحدهم مترهم بعد تشوف امي معانده ماكو غير ارجع للبيت واداريهم
عمشه : مالج مجان يمي انه گلت ماتردين اله على موتي نسيتي سالفتج يخوله يجتاله اخيج
خوله : مو اني الكتلته سوالفه هي الكتلته هو الدمر كلشي جنج نسيتي يوم هو الگتل ذكرى واني حجيت الحق وبس
عمشه : والحگ خسرني اخيج
خوله : هذا قدر مو توج گلتي على حادثه يونس قدر موت صمد هم قدر
عمشه : ماتردين ولا اشوفن رگعت وجهج بلبيت
خوله : يعني لاتقبلين ناخذهم ولا تقبلين ارجع للبيت
عمشه : ماارضه وطخي راسج بلطوفه وهاي المره بالعتج وصاكه على رويحتي ومتحمله وجودج مره النوب المجان البيه انه مااريدن خيالج
خوله : سمعي يم عبيد خلي يطلع الولد من العمليه سلامات واطمن عليه وحطي بالج اذا رجله سكطت اني اصير رجله وارجع غصب عنج وعن اكبر واحد
عمشه : يااا دهر صابج تحطين راسج براسي
خوله : اي احطها واسويها عزه عليكم
ناي : اشوف بيبي وعمه كلمة بكلمة يتعاركون جان عمو نجم يباوع عليهم بدون ميتدخل وعيونه على صاله العمليات احسه مو يمهم اصلاً واني هم عفتهم ورحت وكفت يمه
عمو
نجم : هااا حبيبتي
ناي : راح يطيب اخويه
نجم : ان شاء الله بس صيري سباعيه وساعدي وارفعي من معنوياته وقوي تره يونس راح يتأذه هوايه من حالته وانتي اقرب وحده اله
ناي : لا مو اني اقرب وحده
نجم : منو لعد
ناي : سما
نجم : بت عبيد
ناي : اي
نجم : وشجابه عليها
ناي : بسببها وكع الوكعه الثانيه عمو يونس يحبها وباله يتزوجها
نجم : هذا تخبل اكيد وينه وين الزواج وهاي الشغلات بعده صغير مراهق وملكه غير سما غير صالحه تگلبها للدنيا
ناي : لهذا كتلك عفيه احجي وياه خلي يبطل منها خايفه عليه اذا بقى عليها شمدريني بعدين شيسون بيه
نجم : خلي يصير زين واني احجي وياه وانتي ابد لتحجين لاحد
ناي : ميحتاج هي امها حاسه وخالته هم
نجم : خرب غيرتك يايونس عفت هاي البنات المكومه وحبيت هاي هسه هيه هم بنت اخويه وعيب احجي عليها بس ماطول امها صالحه وابوها عبيد هنا لازم يحسبها الف مره ماكو واحد يشمر روحه للتهلكه
ناي : اخويه شمرها واريدك انت اطلعه
نجم : يصير خير
ناي : بقينا ننتظر كل دقيقه وساعه تمر تأذينا وتقلقنا لحد مطلعوه جانت لفتنا جبيره حتى نعرف حالته وحجينا ويه الطبيب وطلع كلامه قبل العمليه صحيح رجله مراح ترجع مثل الاول ويكال خلي يحمد الله بقت رجله موجوده
نجم : يعني يكزل
الطبيب : اي هو العظم المستأصل بسيط بس ترك اثر بحركته مو اثر جبير بس من يمشي مو بأستقامه مثل قبل ودائماً لازم يحافظ عليها من البرد ومن الوكعات ومن الحوادث راح تبقى هاي الرجل معرضه لاي خطر ديرو بالكم عليه
عمشه : يايمه ياوليدي منين اجتك هااي
خوله : منج ومن اخوتي نزلت دموعي عليه شنو ذنبه يصير هيج بيه
ناي : كعدت بلكاع واني اتخيل شكله شون راح يصير ونفسيته شكد راح تتعب حطيت ايدي على وجهي وكمت ابجي بصوت عالي
عمشه : كومي بنيتي سوده بوجهي انه ادري هيج يصير واسيره وياي
ناي : فدوة بيبي ابوس رجلج خلي عمه خوله ترجع تعيش بلبيت
عمشه : يااا هاي شجابهه على هاي
ناي : محد يدارينا بكدها ويونس هسه راح يتعب اقلها هي موجوده عفيه بيبي لخاطر يونس اذا تحبي احلف بروح بابا وماما موتكولين احب امج لخاطر محبتج الها رجعي عمه متعرفين شكد محتاجين الها
عمشه : يمه لاتضغطين على گليبي وتكضيني من يدي التوچعني انه گليبي رچيج عليكم عبن احبنكم ومااريدن اچسر خاطركم لچن خوله مااريدنهه ترد انتم ماتعرفون شعملت من طلايب هاي ضيعت وليدي
ناي : لعد لتضيعينا احنا هم اذا رجعنا بدونها والله نتأذه
عمشه : منهي يجيس شعره منكم انعل ابو اصله وشيب الخلفه
ناي : يكدرون كلشي عفيه اترجاج ولزمت ايدها وابوس بيها وابجي واتوسل وعمه تباوع عليه مقهوره
عمشه : كومي بنيتي يجرالج ترد المسودنه عبن خاطركم عزيز عندي
ناي : فدوة لعمرج بيبي وكمت من الكاع وشمرت نفسي بحضنها
عمشه : ترد لكيم موش ليه لاتكربين مني لو اموتن مالج شغل بيه
خوله : اني مااتقرب لا منج ولا من احد بلبيت بس كون جناينج يكعدن راحه
ناي : صاحنا عمو نجم نشوف يونس رحنا وجان يون كله ونه منه احسها بروحي
كعد من البنج ساكت ميحجي وخاصه بعد ما الدكتور شرح اله حالته عمو مقبل على الدكتور بس هو كال لازم يعرف بحالته حتى لينصدم وره ميفتحون الجبس مال رچله
ثاني يوم طلعونا وحددو شهرين يله يفتحون الجبس وهاي المره لازم ابد ميتحرك ولا يذب حيله وثكل جسمه على رجله
اول مدخلنا جان الصبح ومرتضى وساهره وصالحه وسما وبلال وشرهب كلهم كاعدين على الريوك بلهول اما عمو عبيد وجوحي طالعين للشغل جان عمو نجم يدفع العربانه ودخلنا كام مرتضى ركض
مرتضى : هااا الْحٍمَدٍ للـّہ على السلامه
يونس : الله يسلمك
مرتضى : ردت اجيك اتريك واجي
يونس : ميحتاج مشكور
مرتضى : انطيني عمو اني ادفعه
نجم : روح كمل ريوكك عمي اني موجود
صالحه : هله بنجم عاش من شافك
نجم : قبل جم يوم جنت هنا بس انتي ماكو وقبلها بشهر شفتيني بعد على شنو عاش من شافك
صالحه : وشبيك اكلتني حاصل فاصل فوك مااشتاق لابن خالتي
خوله : متشتاقلج العافيه وكافي لغوه راجعين تعبانين
ساهره : عمه اول البارحه اجت هاي وسوت هوسه وباتت وگلنا تجين وانتي تحليها وياها هسه شجابها
عمشه : خوله ردت للبيت
صالحه : شنو عيني بعد السوته
خوله : شسويت
ساهره : لتخليني احجي مو الكل موجود
خوله : لا احجي منو شنو خايفه ويونس رجال صار وناي عين الله عليها مره والجهال ميفهمون شى
ناي : قصدها لان رحتي لخالو فوزي وكتيله على موتت ماما وشون بابا دفعها
صالحه : ولج يخنيسه منين تعرفين
ناي : عمه بدعه كلشي حجت الي
ساهره : وعمتج بدعه مكالت الج شسوت امج وليش ابوج گتلها
عمشه : بصوت عالي عاطت بسچن جفن كون اليجفنجن هاي الطلابه ماتخلص انه موش گلت ماتذكرن گلشي
صالحه : يابه سكتنا بس رجعت خوله
عمشه : انه رديتها والشور مني والمايلود على خاطرها تاخذ زلمتها وتولي البت ردت عبن جهال صمد محتاجيها
ساهره : مو ناي موجوده شكو بعد
نجم : انتن شعليجن ام البيت وكالت ترجع انتن شكو
صالحه : طلع صوتك ابن خالتي
نجم : مااحجي وياج الج رجال ينحجي وياه ولو غاسل ايدي منه
يونس : عمو تعبت
نجم : يله عمو امشي
ناي : دخلنا بغرفه بيبي عمه تغير شكلها واحسها ممرتاحه وتباوع على الغرفه بنظرات غريبه
عمه بيج شى
خوله : اني صاعده فوك
ناي : بس يونس منكدر انصعده
خوله : من تحتاجين شى صيحوني
طلعت تركض شبيهه
بقينا اليوم كله الوضع متوتر بس ساكتين حاولت احجي ويه يونس ميجاوبني
نجم : اني رايح يمه
عمشه : وين يبعد رويحة امك
نجم : راجع لشقتي
عمشه : چا ماترد ويه اخيتك
نجم : لا يمه ماارد هذا مو مكاني وتعلمت هناك باجر اجي اخذ خوله حتى تاخذ غراضها
عمشه : ماالله يهديك يايمه وتزوج
نجم : الله يهديج انتي وتبطلين تحجين بهاي السالفه ويمه مااوصيج لتأذين خوله تره الصار من سنين وهي اكثر وحده تأذت من كلشي
عمشه : انه گلبي موجر منك ومايسامحها ليوم الدين
نجم : براحتج يمه لان الحجي وياج ميفيد المهم متصير مشاكل وعياط وذني يتشمتن بيها
عمشه : ماشي يمه احاول اكض لساني
نجم : بداعت نجم عندج على كيفج وياها والله خوله طيبه وانضلمت ولوما الجهال ماارجعها لو الدنيا تنگلب
عمشه : يوم ماترد ويبرد نار گلبي
نجم : الله كريم اروح اني
ناي : كعدت بصف يونس حاولت احجي وياه ساكت بكل الطرق يسمعني وميجاوب ميحجي عفته براحته بيبي اخذت عبايتها ومدري وين راحت واني طلعت من الغرفه
رحت سويت اكل اله اجيت لكيت شرهب حاطه راسها على صدره وتحجي ويااه
شرهب : خفت يويو متجي بعد هاي الحقيره عمه تكول ميجي اخوج بعد مات
يونس : مد ايده على شعرها يوخره من عيونها دنك باس راسها وحجه وياها بهدوء تحبيني
شرهب : اي هوايه هوايه وبلال هم يحبك ويبجي عليك
يونس : وينه هو
شرهب : يلعب دعبل خسرته كل دعابله واخذت الجبيره الفرفوري وكام يبجي ورجعتها اله
يونس : لتبجي خطيه وصيري عاقله
شرهب : العب بلعربانه مالتك
يونس : لا ميصير
شرهب : من تصير زين اخذها واخلي بلال يدفعني
يونس : كومي تعبان اريد انام
شرهب : رفعت نفسها وباسته من خده طبيت اني وبيدي الاكل
طلعت شرهب اعز مني
يونس : اثنينكم نفس المعزه
ناي : روحي صعدي فوك عمه تريدج طلعت ركض واني اجيت وكعدت يمه على الجربايه وحطيت الصينيه وكتله
لا بهاي جذبت لان حجيت وياك مجاوبتني وهي جاوبتها
يونس : تعرفين اذا مااجاوبها تحط اصبعها بعيني لو بخشمي او بحلكي لحد مااحجي واني جسمي كله يوجعني ومابيه حيل اصابعها
ناي : طلعت بس هيه دواك
يونس : شيلي الاكل مجوعان
ناي : ميصير حباب اكل جان اطب سما
دخيلج اطلعي لتجي امج وتسوينا سالفه شكبرها من وراج ذيج المره وكع مترتاحين اله تسوين مشكله جبيره
يونس : عوفيها
ناي : خلي تروح ميصير هيج
يونس : كتلج عوفيها تعاالي
اجت تركض لحد يمه تبجي كلت والله ولا اطلع اذا اطلع هسه اصيح امها اكلها تعالي اخذي بتج مو تالي تذبيها براس اخويه بقيت واكفه واسمع واريد اشوف شراح يصير
يونس : شبيج تبجين
سم كله من ورايه
ناي : زين تدرين
يونس : نايه عوفينا شويه
ناي : والله ولا اطلع ضاله هنا
يونس : ضلي واسكتي سماوي شبيج
ناي : امممم سماوي واهز بيدي خزرني يونس
سما : من سمعت وكعت دكيت ولطمت
يونس : مابيه شى شغله بسيطه
سما : يابسيطه وماما تكول رجلك سكطت
شمدريها امج
سما : بابا راح للمستشفى البارحه بليل وسأل عمو نجم وكال اله
يونس : وعرفتي بعد ماامشي عدل راح تكرهيني
سما : بلعكس احبك اكثر لان من ورايه صار بيك هيج
يونس : ولا راح تعوفيني
ناي : يوم عيد وتعوفك ونخلص
يونس : ناي اطلعي بره
ناي : مااطلع وتره اصيح امها
سما : شبيج ويايه ليش تكرهيني
ناي : هو اني لو انتي ام خشم اليابس وكل مصيبه منج ولا الثاني واخيرها هاي كدامج اخويه لوما طالع وراج من امج كتلتج مجان وكع وهذا حاله يعني بقصد او بدون قصد الاذيه دوم منكم
سما : اروح لتجي ماما وتأذيني
يونس :كل ميصيرلج مجان تعالي حتى اشوفج
سما : صير زين لخاطري حتى ترجع مثل الاول واحسن
يونس : ماارجع مثل الاول ابد
سما : ميخالف احبك بكل حالاتك
ناي : اممم على كولت بيبي يسوي الشط مرك والزور خواشيك
كامت سما وباوعت بوجهي بحقد وطلعت
يونس : اليوم لسانج طولان لو كدرتج عليه
ناي : والله هاي سما من يوم وكعتك حيل حقدت عليها
يونس : على كيفج وياها تره طيبه وحبابه وگلبها ابيض
ناي : والله ماكو غير گلبك الابيض
يونس : حاسج مرتاحه
ناي : ليش ماارتاح اخويه الله نجاه بلسلامه وعمه خوله رجعت تعيش ويانه
يونس : لتخلين عمه تطاخخ وياهن ومشاكل
وصي شرهب هم بليه هوسه
ناي : صار اخويه العاشق
صعدت لعمه لكيتها ترتب ملابسنا وشرهب مكيفه بيها وياها وبلال مستغرب منها وميعرفها ويتختل منها
بلبل هاي عمه
بلال : عمه محلوه
خوله : ليش ابن الزفره مو احلى من امك
ناي : ههههه لا حبيبي تخبل شوفها وتحبك
بلبل : اليد العب وياهم
خوله : تعال العب هو تصفيط الملابس لعب
ناي : بديت احس براحه عجيبه لان وجود عمه مهم كلش
مر اسبوع والبيت كلش هادئ وذني يطبخن وينضفن وكلمن تصعد لغرفتها حسيت بفرق مو اول اسبوع
خوله : اختنك من البيت واتعب بس ماابين لاحد كل شويه ترجع الي الكوابيس واشوف شغلات مرعبه لو من انام احس واحد يتلمس بيه او يطخني حتى افز
بديت احس بسجن كاعده وعلى اعصابي وبيوم نايمه ومخنوكه واحد لازم رگبتي وينبت اضافره بيه فزيت اريد هوا اتنفس بقوه حتى بس احسب ويدخل الرئه مالتي
باوعت البنات نايمات نزلت على كيفي ودخلت للمطبخ وشربت مي باوعت للساعه المعلكه ساعه ٣ ونص الفجر حسيت صوت طكطكه فتحت البرده على كيف گلت اخاف حرامي لكيت صالحه متربعه وكاعده بلحديقه وتحفر وحطت شى بيه قماش ودفنته انرعبت من منظرها وتذكرت سوالف تفووو عليج متوبين من سوالفج شسوي بله هسه اطلع وافضحها خاف تحور الشغله مثل سالفه ذكرى الله يرحمها واروح بلرجلين
رجعت للغرفه والف حسبه ابالي حتى منمت وبس طلع الصبح بدلت والكل نايمين عدا الولد طالعين للشغل رحت لنجم للشقه
دكيت الباب وره وين فتحه ادري بيه نايم
نجم : صار شى شجابج
خوله : من البارحه منايمه زين ولازم تسويلي حل
نجم : خير
وحجيت كلشي اله
نجم : فد يوم البيت فارغ واشوفلي واحد يفك هاي السوالف
خوله : يعني منحجي وياها
نجم : اياج ذني حيايه هسه يلوفن الشغله
خوله : نفس الي بالي والله ومنين راح تجيب هذا الرجال
نجم : ذاك اليوم حجه صديق يمي على سيد معالج مرته من هاي السوالف اخذ عنوانه واروح ويمكن اكول اله عليج
خوله : طفرت من مكاني خايفه اني لا
نجم : ليش
خوله : مابيه شى
نجم : اثنينا ندري بيج اشياء لا عبالج هاي السنين كلها غافل عنج واشوف سوالفج وخنكاتج وعياطج مرات وانتي نايمه بس مابيدي علاج واعالجج عسى ولعل هذا الرجال بأذن الله بيده العلاج وهم نشوف ذني الجلبات شمسويات
خوله : عوفك مني وحير بذني
نجم : اشوف وانطيج خبر رجعي للبيت
خوله : محتاج شى تنظيف غسل هدوم
نجم : اوكفي وراح جاب فلوس وحطهن بيد خوله خليهن عندج شيحتاجون الجهال اشتريلهم
خوله : الله يرزقك
ناي : كعدت الصبح ادور على عمه ماكو نزلت اسوي ريوك وجان تلزمني ساهره
بت ذكرى لا عبالج عمتج المخبله تحميج
ناي : شعندي حتى تحميني
ساهره : اي حطيها بالج بيوم جانت عمتج شايفه نفسها وراسها براسنا وعقوبة هذا الشى خليناها متندل الرجل من الايد لتسوين مثلها تره اخليج نسخه ثانيه منها
خوله : هاي منو تحجي ام الگمل
ناي : فزيت شفت عمه ورايه
ساهره : وين دايحه من الصباحيات لا عبالج مثل مجنتي يم نجم اطبين واطلعين بكيفج
خوله : نايه امي تعالي نسوي ريوك هاي مرت عمج كبرت واخرفت والمخرف ناخذه على كد عقله
ناي : خفت من ساهره بس من شفت شون تكدر تسكتهن حبيت اتعلم منها واخلي عمه الظهر الاحتمي بيه من شرهن
كمنا يوميه نقاش وجدال صار البيت كل الوكت بيه هوسه عمامي تعبو وكامو ميدخلون ولو اصلاً همه لا يحلون ولا يربطون
هاي الفتره سما ويونس علاقتهم قوت كلش ومكدرت ادخل وخاصه من اشوف يونس شون ترد روحه من يشوفها كلت اقلها بين ميتعود على حالته
واليوم فتح الجبس ولازم علاج طبيعي جانت نفسيته صفر ودموعه بعينه منظره يقهر ويگسر الگلب
يونس : اشوف حالي شون كمت امشي واعرج وهذا الشى دائمي حسيت بروحي نقص واني انسان مو كامل بديت اكرهه كلشي عيشتي وحياتي حتى سما مااريد اشوفها عيونها تستغطيني وهذا الشى المعذبني كمت اعيط على الكل ومااتحمل الحجايه الطيب خاطري حتى اليبقى يمي اعيط عليه حتى يطلع وبلعلاج الطبيعي اتأذه واعيط لربي من الالم ويزيد تعبي وكرهي للدنيا وبيوم مغربيه سمعت الاذان گلبي وچعني وچن امي اجت گبال عيني غمضت وصحت
عمه عمه
خوله : هااا حبيبي
يونس : اريد اروح لامي
خوله : رجلك بعدهز حبيبي
يونس : وديني لامي واني ارتاح
خوله : باجر ادز خبر لعمك يجي ناخذ منه فلوس ونروح اني وياك
يونس : اريد وحدي اني وعمو
خوله : جنه عمك ميروح
يونس : ليش
خوله : ميروح حبيبي لتسأل
يونس : اريد اشوفها
خوله :العصر اروح لعمك اجيب فلوس ونروح
يونس : ميحتاج عندي جم فلس ضامهن يم ناي ناخذهن ونروح لتكولين
خوله : ماشي
طلعت ضليت افكر شون اخذه لازم رجال ويايه لكيت مرتضى يقرا
ولك مرتضى
مرتضى : كولي عمه
خوله : باجر تجي ويانه للنجف
مرتضى : منو مات
خوله : نزور گبر ام يونس اني وياك ويونس ولتكول لاحد
مرتضى : سهله تدللين
خوله : جنك بيك حظ احسن من امك وابوك
مرتضى : ههههههه انتي وياهم مالي دخل
خوله : عينج على اخوتك ما اتأخر
ناي : ليش مااجيت وياكم
خوله : ميريد احد غير مره اخذج ويايه
ناي : براحته
اخذت يونس وطلعنا من الفجر وهمزين مرتضى ويانه مااكدر اتچي لان بعدها رجله مطايبه وصلنا للمگبر بحدود ساعه ٧ ونص الصبح
تقرب يونس من گبر امه ودموعه تنزل نام على گبرها وعاط عيطه احس المگبره مال النجف كلها سمعته
يونس : يمه وين عفتيني مكلتي هذا منو اله حتى مشبعت من ريحتج ولامداراتج يتمتيني من وكت يمه لهسه احس ايدج تلعب بشعري واطبطبين على ظهري من اريد انام كلها تصيح يوم ويمه اله اني خلصتها اباوع بلوجوه وادور عليج هنت عليج ناي هانت عليج تدرين كبرنا وتايهين بلياج هاج شوفي رجلي لو انتي موجوده يصير هيج بيه لو انتي يمنا اشتغل بلزبل والعتيك مجان هسه نايم ودفيان بحضنج وريحتج
خوله : حبيبي يونس خطيه هيج تأذيها لتعيط وتبجي اقرا الها قران
يونس : لعد اني مو خطيه عمري ٧ سنين وامي تعوفني ومتترك بس صوره دمها بعيوني باوع بأتجاه گبر ابوه كله منك شفت هاي تاليهه حرمتني منها عساك تنحرم من ريحه الجنه شردت منها ارتاحيت هسه واحدنا ضايع وضالين تحت ايدهم ياهو اليجي يكفخ بينا
خوله : كوم حبيبي كافي عياط بلاعيمك اطك بعدك مريض
يونس : عوفيني عمه اشكي حالي لامي بلكت تسمعني بلكت تحس بيه بلكت عدها علاجي يمه ابنج ضايع من كلشي لا شهاده ولا شغل ولا صحه وحتى الشى الوحيد الطلعت بيه من الدنيا صحتي هم ادهورت وهاج رجلي سكطت شنو الجنيته ويصير هيج بيه كتبتي على كصتي الفگر والضيم وكدامج عايشهم كلهم كومي يمه حاجيني
عندي عتاب وياج ابرد روحي بغيابج سنين واني انام واكول هسه اكعد والكاها كدامي والشفته بدمها حلم مال صغار وراح اكعد
تالي اكعد من الحلم وانتي ماكو
خوله : مرتضى كومه فدوة هذا راح يطك
مرتضى : خلي عمه يحجي حتى يرتاح مبين محمل وتعبان اني راح اوكف الكم هناك وانتي عوفي يحجي كلشي
خوله : شفت يونس رغم عمره ١٦ وراح يدخل بال١٧ سنه وهو طويل وكبران شفته ابن ال٧ سنوات يناشغ من البجي عفته ساعه ونص لحد محسيت حتى دموعه نشفت سحبناه كوه وغسلنا گبر المرحومه جنت حيل متأذيه بس بالي يم يونس وراها اخذته للزياره وبقينا لليل ورجعنا جان ساكت ولا يحجي ودخل بفراشه مباشره من التعب نام
ناي : بعد روحة يونس لقبر امي حسيته تغير صار ساكت اغلب الوكت وملتزم بلعلاج الطبيعي ومن بدا يتعلم على رجله وطريقه مشيه قرر يرجع للشغل
عمه مقبلت وگلبت الدنيا بس هو مقبل وكال مااريد صدقه من احد حاولت تفهمه ومفاد اصر يرجع للشغل
ورجع ويه بيبي وذب حيله كله بلشغل ويرجع ينام كمنا حتى منشوفه
كل هاي المده وساهره وصالحه ساكتات حتى مني وميحجن بلشغل ابد
وعمه خوله جانت تفتر بلبيت واذا وحده حاولت بس تحجي ويانه تلطها على حلكها
اما بيبي ساكته وعيونها على خوله ادري بيها تحبها بس تگابر
رجعنا للمدارس وبين حياه الدراسيه اخذتنا من همومنا وذبيت حملي على دراستي وشرهب عمه ادرسها حسيت عمه نعمه من الله ودزها اليه حيل جنت فرحانه بيها وبنفس الوقت بالي يم عمه بدعه النقطعت اخبارها ومدنحصلها وحيل خايفه عليها بس ماكو اي عنوان نوصل الهم
دخلنا ٢٠٠٣ وبنص الدوام وهوسته والامتحانات صارت اخبار العراق راح يدخل حرب اول شى عمامي سوه دورو مكان يختلون بيه حتى ليطلبوهم للتجنيد وساهره وصالحه اخذن ملابسهن وراحن للبصره وسما وياهم مرتضى مقبل يروح وبقى هنا
عمري صار ١٤ سنه بدت علامات البلوغ عليه وبلغت وعمه اتكفلت تحجيلي كلشي عن الراح يصير بيه تحجي واستحي بس حمدت الله هي موجوده لو ماكو المن اكول
وصارت الحرب والناس كلها خايفه وبلبيت اني واخوتي وعمه ومرتضى وبيبي وعمو نجم يروح ويجي علينا
ويوم ٤/٩ صبحنا كالو سقط صدام شون مالون مندري الدبابات الامريكيه تفتر بلشوارع
الناس بلبدايه هوست وفرحت عبالهم خلصو من الظلم وبنفس اليوم واليوم البعده انگلبت بغداد صارت كلمن اله المصارف انهجمت الدوائر الحكوميه انهبت
جنا خايفين ليصير كتل بلشارع الي مثلنا ماعنده شى يخاف عليه غير روحه
واحنا مجموعين وعمه تسوي اكل تمن وروبه (لبن) لان ماكو اكل نسمع طكطكه مفهمنا شكو انفتح الباب وطب جوحي بيده كونيه وراه عبيد
كامت بيبي عليهم
عمشه : يايمه ضل بالي وانه اكولن وليداتي وينهم
عبيد : ماكو شى يمه لتخافين
عمشه : شنهي هاذ شايلي
جوحي : ماكو شى غراض
عمشه : غراضيش وتراجفون عليها
جوحي : يايمه مو گلنا غراض وصعدو ليفوك وره شويه حطو غراض بلكراج تبريدات على ثلاجات ونواعم اشكال
لطمت بيبي
عمشه : انهجم راسكم شنهي هاذ
عبيد : غراض مال ولد صاحبنا يخاف عليهن وجبناهن يمنه
عمشه : گليبي يلعب منكم يولد عمشه
ناي : صعدت عمتي ركض لغرفه عبيد ونزلت بيدها فلوس كومه
تعاالي يعمشه يلي مخلصتها بلعتيك ولدج حراميه شوفي الفلوس الفوك تاليها باكو الدوله والناس والله اعلم شسوو بعد
جوحي : انجبي لج اذا فتحي لسانج وحجيتي احط القندره بحلكج
عمشه : نعله الله عليكم بزره تاكل حرام چا خلصنا عمرنا مانضوكه
عبيد : لتضوكي انتي يمه هاي الفلوس النا واليحجي كدام احد والله اذبحه
خوله : هاي البقت تاكلون حرام حتى اطبون لجهنم من اوسع ابوابه
نجم : لتعبين نفسج بعد طمسو بيه وخلي نسوانهم تهلهل
جوحي وعبيد صارو حواسم
يتبع ...
رواية الابواب الخمس الفصل الثالث وثلاثون 33 - بقلم ريام هادي
#الابواب_الخمس
البارت التاسع والعشرون
للكاتبه Reem
حنيِ حني ِ
شـوية يآ عين آلمـهآ ..
خزرآت آلمـعآتب جوني
مـن گثر مـآلوم ..
حتة اهلي اصبحتَ
جزعانة مني ..
اآخخ مـني
واخ من روحي الكضت
هذآ آلعمـر بس بلتمـني ..
خوله : هاي البقت تاكلون حرام حتى اطبون لجهنم من اوسع ابوابه
نجم : لتعبين نفسج بعد طمسو بيه وخلي نسوانهم تهلهل
جوحي وعبيد صارو حواسم
جوحي : وانتم شعليكم واحدكم صاير سيد براسي كلمن يحير بروحه ومااريد اسمع حجي زايد
عبيد : اسمعو كلكم اريد اسمع واحد مطلع حجايه وكايل اخذنا وروح ابويه اذبحه
عمشه : والغسل يالمصخم وملطم چا هيه فخر ونتفاخر بيه انه الدولبني شون كدرتم تمدون يدكم انه ماموكلتكم حرام چا منين بطونكم ادوره
جوحي : ومنو كال حرام
عمشه : لا يمه حلال ولكم من دهر طركم لاتگلبوها بينه هاي فلوس كلها دم لاتورطون رويحتكم
عبيد : يمه رحمه لابويه لتدخلين مو بس احنا كل الناس اخذت روحي شوفي الشوارع انگلبت گلاب هذا حقنا صار سنين محرومين وهمه متمتعين وعايشين بخيرنا اني الم عتيك وهمه عايشين بقصور اني اخذت حقي وبس وكل الناس مثلي
نجم : مو كل الناس تاخذ مو شفت نفسك دنت على الحرام عبالك الكل مثلك
عبيد : لتدخل انت مجاي يمك لتجي يمي ومن ذيج المره كتلك اياك بيوم توكف بوجهي ولا تجادلنا اخاف عبالك نسينا سوايتك
عمشه : چا خوش افتح دفاتر عتيچه ونعوفن طركاعتكم
ناي : صافنه على عمامي يعني صار عدهم فلوس اكيد راح يطلعون منا بعد يمكن كل واحد يفكر هاي الفلوس حلال حرام اله اني افكر اخلص من ساهره وصالحه باوعت على يونس الجان صافن
تقربت منه بيك شى
يونس : لا مابيه
ناي : وضعك مو طبيعي
يونس : افكر لو اخذ مثل ذوله مو راح يتعدل حالنا واكدر اخذكم واطلع من هذا البيت حتى شغل بعد مااشتغل بلعتيك
ناي : ماادري هو حلال لو حرام
يونس : متسمعين يكول حلال وحقنا اريد اخذ مثلهم حتى بعد منحتاج احد
ناي : اني هم مااريد نحتاج احد واريد يصير عندك فلوس وبعد متطلع للعتيك بس بنفس الوقت اخاف عليك اذا صار شى بيك احنا منو النا
يونس : خلي افكر واشوف شون اخذ
خوله : شبيكم
يونس : ماكو شى عمه هيج سوالف عاديه
خوله : تعالي ناي نسوي اكل وسحبت ناي للمطبخ
احجي شجنتي تسولفين انتي ويونس
ناي : عمه يريد يونس ياخذ مثل عمو عبيد وجوحي
خوله :خلي ينجب
ناي : ليش عمه شكو بيها مو يكولون حقنا وفلوسنا
خوله : ذوله عمامج زمايل بكيفهم يحللون ويحرمون اني مو قويه بلدين بس الحرام مبين والحلال مبين وذوله حتى يسكتون امي يحاولون يقنعوها وانتم صغار شمدريكم عبالكم حلال
ناي : بس احنا محتاجين
خوله : المحتاج مو يبوك ويكول حلال
ناي : هاي مو بوكه
خوله : اسمعي كلامي نايه انتم شباب صغار مراهقين وهوايه امور بعدكم متعرفوها هاي بوكه ومتقبل شك شوفتكم لذوله الشفيه هي الي أثرت عليكم اخوج من الشافه يريد يصير عنده فلوس وهذا حقه بس مو بهيج طريقه
ناي : وشنسوي هسه
خوله : راح احجي ويه يونس وانتي هم الزمي احجي وياه ودوم ذكري هذا حرام وعقابه عند الله عظيم واذا طبت لكمه حرام بطنكم راح تحرك الحلال كله واذا بلبدايه تتوفقون بعدين تفتر عليكم ويطيح حظكم
ناي : احجي ويه يونس
خوله : نروح هسه ونحجي ويااه امشي طلعنا من المطبخ وبعده جوحي وعبيد يحاولون يسكتون عمشه
عبيد : يمه سدي الموضوع اني راح اصعد الغراض والجبتهم فوك وياويله اليوصل يمهن ويباوع على خوله
خوله : لتخاف اكو الاقوى مني راح يطيح صبغك ويرجعك تتمنى الفلس ربك موجود بلعافيه اكلو حرام هو هذا الجان ناقص ويكمل سيت الدخول لفندق خمس نجوم بجهنم
عبيد :بس كرمونا بسكوتكم ولحد يدخل
خوله : يطبكم طوب حجيتها بصوت ناصي وعفته ودرت وجهي على يونس تعاال وسحبته من ايده ودخلنا للغرفه
يونس : خير عمه
خوله : الي تفكر بيه غلط وعيب وحرام اكعد واسكت ابني
يونس : ومو حرام حالنا واحنا نلكط بلزبل حتى ناكل
خوله : لا مو حرام شغل حلال ورزق من الله مالك دخل بذوله المشرشبين من يومهم يحبون الطريق الاعوج ولو قبل بيها مجال يبوكون جان باكو واجتهم الفرصه واخذو
وتاليها يصيرون مثل الچلب
يونس : لهسه ماشفت ظالم لو حرامي تأذه احنا الماشين عدل ومناكل حرام وطريق عدل محترك اهل اهلنا
خوله : لتصير مثل عمامك وتظلم روحك وتظلم خواتك اذا اكلت انت حرام هنه هم راح ياگلن شنو ذنبهن
يونس : عمه والله تعبت من كعدت الفجر وتعبت من الدوراه بلزبايل والعتيك والخرابات تعبت من التفكير بيوميه الشغل راح تكفي اكل وشرب ومصاريف لو متكفي
وهااج هذا الحلال رچلي سكطت منه
خوله : كل صح وحلال دربه صعب امك الله يرحمها جانت عزيزه نفس مايوم طلبت فلس من احد ولا دنت نفسها على شى جانت تلزكها تلزك حتى توكلكم وتحرم نفسها من اللكمه واللبسه حتى تلبسكم لتضيع تعبها حبيبي
ناي : واكفه واسمعهم وبقت عمه تسولف وياه لحد مكدرت شويه تهدي ومتخلي يفكر يطلع من البيت ويسوي سوايه عمامي
جانت ايام صعبه حرب نفسيه والسبع اليطلع منها سليم وعمه مخلت يونس ابد يطلع حبسته حسره يريد يروح لمكان اله تروح ويااه
لحد ماوكف النهب بلدوله يله فكت منه عبيد وجوحي اختفو من يومها
مرتضى جان يدرس سادس اعدادي بكلوريا وعيونه بلكتب
واني اقرا للامتحانات ثاني متوسط كالو امتحان نص المواد اقرا وكاتله روحي اريد انجح مو لخاطر نفسي لخاطر يونس الرجع يتعب مثل قبل بلشغل وطافي حيل لان يحس بروحه مايوم يتعدل حظه او يتغير
شرهب : ناجحه عمه رحت للرابع
خوله : عفيه بلبطله هااج مال نجاحج
شرهب : اشتري لبلبل ويايه
خوله : اي اخوج اشتريله
شرهب : انطيني بعد
خوله : مو انطيتج
شرهب : ذني مالاتي انطيني بعد
خوله : هااج ولا تنغلبين وارجعي بسرعه
طلعت تركض شرهب واني صحت على ناي تمنيت عندي فلوس هوايه وانطي لناي وافرحها
بلخير حبيبتي النجاح
ناي : شكراً عمه
خوله : شكد جان عاجبني اشتريلج هديه لو انطيج فلوس اطلبيني
ناي : ههههه والله ياعمه المفروض اني انطيج لان لو ما انتي جان هسه نسوان عمومي حتى مبطلاتني
خوله : شحدهن
ناي ماكو شحدهن هذا الجان صار اخر فتره قبل لتجين حيل اتأذيت منهن
خوله : الله لايردهن صار مده مرتاحين منهن
ناي : هسه يرجعون قابل يبقون العمر كله بلبصره
خوله : وين مرتضى
ناي : فوك بلغرفه ديقرا عكب باجر امتحانه
خوله : صعديله هذا الجاي بين مااكمل الغدا
ناي : انطيني
اخذته من ايد عمه وصعدت دكيت الباب
مرتضى : تعال
دخلت وعيوني على الكلاص اخاف يوكع
مرتضى : ليش تعبتي نفسج جان صحتيني
ناي :عمه كالت اخذي
مرتضى : تعالي اكعدي
ناي : تقربت وكعدت يمه
مرتضى : هاااج
ناي : باوعت على ايده هاي شنو
مرتضى : هديه نجاحج شى بسيط تعرفين اكثرها معزله كوه لكيت مكتبه
ناي : شكراً واخذتها منه وفتحتها جانت علبه دفتر ملونه اوراقه وبيه قفل ومفتاح واقلام ملونه
كلش حلوات
مرتضى : نايه
ناي : باوعت بأبتسامه عليه
مرتضى : اني احبج
ناي :مثل اختك غير
مرتضى : لا اني احبج مثل الحبيب والحبيبه
ناي : كمت من مكاني استحيت وخفت من كلامه
كام ويايه ولزم ايدي
مرتضى : وين رايحه بعدني ممكمل كلامي
ناي : عفيه اريد انزل هد ايدي
مرتضى : ليش ضجتي
ناي : عوفني مرتضى وبعد لتحجي ويايه
مرتضى : غير افهم ليش
ناي : بعدنا صغار شنو تحبني واني بت عمك وتربيت وياك مثل اختك شون تحبني واذا سمع يونس راح يتعارك وياك
مرتضى : ادري بيج تخافين بس ليش هذا الرجف قابل اني شكلت كتلج احبج لا طلبت شى منج موزين ولا سويت شى الج يأذيج
ناي : خلي اروح
مرتضى : اوكفي خلي اكمل كلامي وسحبني من ايدي حيل وحاوطني راد يحضني حيل خفت وكمت ابجي
عفيه عوفني لحد يجي
مرتضى : هااي شبيج نايه ردت اتفاهم وياج ماله داعي البجي ومد ايده على خدي وخرت وجهي منه
ناي : انت مثل اخويه وهاي السوالف بعدنا صغار عليها وعيب تتقرب مني
مرتضى : مو صغار وماطول تعرفين هاي السوالف عيب وميصير اتقرب معناها احنا كبار وهواي بعمرنا عدهم علاقات واحد يحب الثاني ويبقون سوه لحد ميتزوجون واني مو صغير سنه الجايه كليه ابويه بعمر ٢٠ سنه اتزوج ولزم شعري
ناي : دفعته على كيف وخرت منه عفيه بعد لتعيدها انت حالك حال يونس رجع تقرب بهدوء مني وبيني وبينه مسافه بسيطه كلش
مرتضى : اخاف حاطه عينج على مهند
ناي : لتحجي هيج ويايه والله كعد تزعلني منك انت ومهند نفس المعزه واخوتي وماعندي اي شى وياكم وبعد مااتقرب منك ولا اكعد وياك
دفعته ودخلت لغرفتنا غرفت انزل جوه وعمه تنتبهه اجر بنفس بخوف هذا شجاه
بلال : نايه لعبي ويايه
ناي : مااكدر بلبل وخر مني
بلال : حبابه حبابه وتقرب باسني رغم هو متعود وعادي ويه بلال لان اخويه وحالته خاصه واني متوتره من مرتضى وخايفه من باسني ضربته راشدي
فزيت على نفسي شسويت هو لزم خده وكعد بكااع ويبجي
طفرت من مكاني وكعدت كباله والله العفو مو قصدي
بلال : مااحبج ولي
ناي : لتبجي عفيه مو قصدي وحضنته دفعني وكاام كعد بلجهه الثانيه ودموعه تنزل ويمسح بخشمه ويرجع يحط ايده على وجهه منظره يكسر الگلب شكد كرهت نفسي لان اذيته بله شنو ذنبه المفروض هذا الراشدي لمرتضى مو اله رجعت كمت وتوجهت للمكان الكاعد بيه وبجيت حيييل والله مو قصدي جنت خايفه وضربتك اني احبك
بلال : لتبجين وحضني حييل
ناي : لتزعل مني وبست راسه وايده ومسحت دموعه بيدي ابتسم بوجهي وكال
بلال : نلعب
ناي : ابتسمت وبعيوني الدموع اي نلعب
راح جاب مكعبات ويصفط بيهن واني اصفط وياه اختنكت من سوايتي وبنفس الوقت افكر بمرتضى اكول لعمه عنه اخاف تصير مشكله اسكت ومااوصل اله بعد
ركزت بلعب ويه بلال جان اسمع صوت شرهب جوه تبجي هسه اجيك بلبل ونزلت عليها لكيتها واكفه گبال عمه وتحجي بعصبيه وتبجي
شرهب : اني ماما نفسها مامات يويو ونايه
خوله : بس كوليلي يامره حجت وياج بلشارع
ناي : شبيهه عمه
اجت تركض عليه
شرهب : ماما مو اسمها ذكرى وهي امي وامج وام يويو
ناي : شنو شجاب هذا الشى بالج
شرهب : داشتري واكو مره لزمت شعري تلعب بيه وباستني وكالت انتي شسمج
كتلها شرهب صمد كالت تعرفين اني منو
خوله : اي كملي عمه سوده عليه جري نفس حبيبتي لتبجين احنا يمج
حضنتها لشرهب حسيتها حيل خايفه اكثر من خوفتي قبل شويه
شسوت المره بيج وهيج خايفه
شرهب : تكولي اني امج عطت بيها وكتلها ماما ماتت بلكبر عند الله وانهزمت منها بس هيه كاطعه الطريق واكفه باب الدكان جان تكولي اني امج
ناي : بعدها تحجي اندكت الباب طلعت عمه عليها
خوله : اوووف منخلص من قذارتك ياصمد حتى وانت ميت عرفت هاي جليله فتحت الباب وصحيح طلع اعتقادي
لا هله بت ام السمج شذبج الهوا علينا
جليله : هله خوله شونج وتريد تبوسني جان اوخر منها
فضينا شتردين
جليله : اجيت اشوف بتي
خوله : يابت
جليله : شرهب شفتها قبل شويه بلشارع
خوله : بله من كل عقلج جايه وره ٩ سنوات ادورين على بتج انتي مو ذبيتيها وكلتي اذا متاخذوها اذبها بلشارع
جليله : جنت ضايجه من صمد الله يرحمه وسويت هيج وهذا الحجي قديم وجنت صغيره وافكر بنفسي
خوله : وهسه تغيرتي وتعالو رجعولي بتي مو هيه لعابه انضمها الج بلبوفيه (مكتبه)وشوكت ميطخ عقلج تجين اطلعيها وتلعبين شويه وياها وترجعيها لنفس البوفيه
جليله : خليني اشوفها احضنها ردت بلشارع ومااجي عليكم بس هيه خافت وانهزمت
خوله : مبين مو كبرتي وعقلتي كبرتي اخرفيتي اطلعين لطفله عمرها ٩ سنوات وتكولين اني امج وترديها تبوسج وتحضنج والله الافلام ابيض واسود مأثره عليج
جليله : خليني اشوفها واروح
خوله : وين ماكو طبه اجيناج بيوم اني والمرحومه وبدعه والمرحومه حارت شسوت حتى بس تاخذيها زين كوليلي تدرين بصمد مات
جليله : اي ادري
خوله : شوكت سكتت وبقت تباوع بوجهي احجي شوكت
جليله : من مات وره شهر
خوله : وعرفتي زوجته قبله مااتت هزت راسها يعني اي
خوله : وجايه هسه بعد ٩ سنين ادورين بتج ماخفتي انذبها شو ابوها ومات والرادت تربيها ماتت قبله مكلتي هاي وين راح يخلوها شون نمتي لججججج شوووون غفيتي على المخده وغمضتي عيونج العساهن بلفكس وشوخرتي وبتج متدرين شبيهه مابيه اكلت نامت تمرضت ماتت شمرناها بدار ايتام
جليله : اجيت سألت وراها وعرفت مرت عمهم مسؤوله عنهم
خوله :عضيت شفتي حييل وكتلها شايفه اذا مرحتي هسه شسوي بيج
جليله : مارايده شى منكم ومنها والله بس اشوفها
خوله : اعتبري روحج بذاك اليوم ذبيتيها بلزباله روحي دوري عنها هناك وسديت الباب بوجهه
ضلت ادك حيييل ولج خوله فكي الباب والله اشتكي عليكم
امشي لج ام الفطور ام ريحة الجايفه جايه تهدد غيرج وحده تستحي ادك هذا الباب ولو المثلج زايعه المستحه وبايعتها
جليله : كتلج مارايده بس اشوفها
خوله : وماعدنا بنات للشوف روحي منا مابقت علينا بس بت ام السمج من احتركت لشتج انتي وامج خرعتي البنيه
حاضنه شرهب والعب بشعرها هااا عمه راحت
خوله : اي تعاال ولج
راحت تركض بحضن عمه
شوشايه شفتي هاي المره ديري بالج منها هاي سعلوه تاكل الجهال اخاف تشوفيها مره ثانيه انهزمي منها وتعالي للبيت واذا مكدرتي اشمري حجار عليها لتخليها تحضنج تره تاكلج
شرهب : اي عمه وبلعوده هم اضربه على ظهرها
خوله : اي سباعيه
شرهب : يعني هيه مو ماما
خوله : لا مو امج انتي مو اخت ناي
شرهب : اي
خوله : وناي شسم امج
ناي : ذكرى
خوله : شفتي معناها هاي مو امج
شرهب : اروح ادور على عوده بلسكراب واحضرها وركضت ادور بلطرمه
ناي : اخاف تاخذها
خوله : هاي وحده مخرگنه ومارايده شرهب بس حنت الها لان بتها واجت تشوفها وتروح وحده انانيه متكول هاي طفله واخاف تستوعب غلط هسه هم لو جايه تاخذها وتربيها اكول امها وصحت على زمانها واجت تصحح غلطها هلمره جايه تهدم الطفله وتشوفها وتولي
ناي : تتوقعين تجي
خوله : كلشي اتوقع هسه غير تكبرن وتعبرن السن القانوني ونخلص وكل وحده منجن محد يكدر يطالب بيها
ناي : مو كدامج كبرنا
خوله :اوف هم الي عمر واشوفجن گبار وعرايس وتخلصن من هاي النماذج
ناي : العمر الطويل عمه
خوله : دوم اكعدي ويه اختج واحجي وياهه ونبهيها حتى كل متشوف جليله تضربها وهمزين انتي تعرفين كلشي جان هسه اكعد اشرح والغي للصبح
ناي : ميحتاج عمه بدعه كلشي كالتلي
خوله : اوف يابدعه كطعت فد كطعه هسه غير يجون يحجون صار مده كلش طويله تلفون ماكو منها
ناي اني هم اشتاقيت الها وبالنا يمها اني ويونس
خوله : صيحي مرتضى كمل الغدا
ناي : هااا انتي صيحي عمه
خوله : ولج مايسمع اله اصعد
ناي : اروح اشوف شرهب شتسوي وانهزمت.
وره كم يوم اجه نجم صحته
اخو اكلك نجم تتذكر الدفن السوته صالحه صار كم شهر ويوميه تگلي باجر احسن من هاي الفرصه ماكو تشوف كدامك دوم البيت هدوء وامي ويونس يطلعون وذولاك كلهم مرجعو لهسه استعجل فدوة اروحلك
نجم : ابالي والله وحجيت ويه صديقي ومنتظر جيتهم باجر ارجع اروح للولد واشوف نتيجه منه بلكت يرضى يجي ويايه
خوله : استعجل لتصير فاهي
نجم : ان شاء الله وانتي
خوله : اني شبيهه
نجم : ميكشف عليج
خوله : ولا يوصل يمي
نجم : ليش يمعوده معودنا نلكه واحد ثقه وخير
خوله : اذا اجي ليمي اطرده
نجم : هذا هو المهم يشوف صالحه الحقيره شمسويه
ناي : ابتعدت عن مرتضى كمت اذا اشوفه اتختل منه وهو انتبهه على هذا الشى خفت ليحس يونس وتصير مشكله
يونس : الشغل تعبني ومدااشوف نتيجه يوم بعد يوم العيشه اصعب كاعد بلشارع على الرصيف والسيارات تروح وتجي وبيدي كرصه خبز وتمر اكل واباوع على الطيور اكو واحد يطير بلشارع المقابيل منظرهن حلو احسدهن ماعدهن هم عيشه ومصرف وقهر طول الوكت بس طايرات بلسما
عمشه : هااا يمه كضت سالفتك
يونس : اي بيبي هسه اكمل لكمتي ونكوم انلكط بذيج الجهه
عمشه : يدك زينه لو تذب دم
يونس : باوعت على ايدي المجروحه وملفوفه بوصله وصخه راح بيبي وكف
واني اكل واباوع لمحت مخزن جبير وعمال تشيل كواني
بيبي هسه اجي
عمشه : يمه وين مولي
يونس : نفضت ملابسي ورحت ركض اسحل برجلي هسه اجي اوكفي
لكيت رجال بالخمسين واكف يشرف عليهم
السلام عليكم عمي
وعليكم السلام
يونس : عمي اني محتاج شغل ومستعد احمل ويه الولد جربني متخسر
شون اجربك واني مااعرفك الوضع هسه مو مال اجيب واحد من الشارع واشغله لازم كفيل
يونس : انطيك عنوان بيتنا وتعال شوف اهلي وذيج بيبيتي واي كفيل مستعد اني برگبتي عائله وبنات صغار يتامى تكسب اجر لو شغلتي والله متندم جربني وشوف
ركز على رجلي وكاال
يابه لتزعل مني رجلك ثكيله والشغل يرادله حركه وبهاي حركتك راح تأخرني
يونس : اسحل بيها وادوس عليها وما اخرك والله محتاج الشغل مستعد من الصبح لليل اشتغل اني تعبت من شغل العتيك واريد شغله شريفه اشتغل بيها واوكل خواتي مطالب بس تجربني حتى يوميه لتنطيني هسه
اعذرني ابني وضعك ميساعد
يونس : جريت نفسي واني الملم بروحي الي انكسرت مشيت وجان يصيحني
تكدر تنظف
رجعت بسرعه اكدر كلشي والله
شوف راح اجربك اسبوع اذا شغلك زين ابقيك موزين الزمك الباب
يونس : ان شاء الله ابيض وجهه
وره ميكملون الولد يوميه يبقى المخزن وصخ ويرادله تنظيف وجلف اريده يلهث
يونس : صار عمي
متريد تعرف شكد يوميتك
يونس : مو مهم اي شى نعمه من الله
بيض وجهك واني اداريك
يونس : صار عمي باجر من الصبح اني يمكم
توكل بس معرفت اسمك
اسمي يونس
يله يونس روح لدربك وباجر من الصبح انت هنا
رجعت فرحان بشرت بيبي حضنتها وباستني
عمشه : على عمه عيني يايمه مطلعتك ويايه عبن العيشه مره وجدامك
يونس : بيبي اذا يوميتي زينه بعد مطلعين للشغل
عمشه : يااا وبيش نعيش
يونس : اني اجيب يوميتي وانطيها الكم انتي كعدي وارتاحي
عمشه : ماسواهه وليدي من بطني وانت بزره تسويها
يونس : يله يعمشه نرجع للبيت
عمشه : يبعد رويحتي وهلي يله نرد اروحن فدوة لضحتك غايبه من مده
يونس : من التعب والقهر ادعيلي تمشي الشغله بيدي واني اصير زين
عمشه : داعيتلك يمه صبح ومسيه
ناي : رجع يونس مرتاح لان لكه شغل فرحت حيل اله ودعيت يبقى ويتحسن وضعه
خوله : وره اسبوع بلغني نجم باجر الرجال راح يجي طلبت من ناي تخلي شرهب وبلال يمها بلغرفه وتسد عليهم وهيه وياهم وتطلب من امي تروح للسوك واعرف بيها اذا راحت اقل شى ساعتين اني مااكدر اطلب منها لان لهذا اليوم وهيه متحجي ويايه ومرات تضطر كلمة تطلب بيها التريده وتسكت واني ملاحه عليها عايفتها براحتها
كملت كلشي امي بره البيت الجهال بلغرفه ومرتضى يقرا فوك ومينزل
اندكت الباب ودخل نجم ويه رجال نهايه الاربعين دنك من شافني
السيد : بويه اطلب من اخيتك تغطي شعرها
نجم : روحي البسي ربطه
خوله : وهو شعليه بيه جاي عليه لو على البيت
نجم : امشي واسمعي الكلام
خوله : رحت واني انفخ من الضوجه لبست الربطه وعبايه وطلعت
اباوع عليه يفتر بلبيت وبيده السبحه ويستغفر
نجم : هااا سيد بشرنا
السيد : لا اله الا الله موخوش بشرى عندي البيت وضعه تعبان سنين يدفنون ويرشون بيه وهيج بيوم صعب فتحها بسهوله
نجم : والحل
السيد : كله بأمر الله بس النسوان البيه مراح يكعدن راحه لان السحر والاعمال الشيطانيه تمشي بدمهن واذا نظفت البيت راح يعرفن
خوله : قابل يعرفن الغيب
السيد : هنه سواياتهن لتسهيل امر كلشي يتعرقل عدهن ركضن سون اله لحد مصارت عاده ومرض عدهن وهذا الشى بسبب مجاوره الشيطان والابتعاد عن الله والدين
واذا نظفت البيت راح يحسن بتغيير وهذا الشى مراح يخليهن ساكتات وراح يلتجأن لسوالف اكبر
خوله : يعني من خلال كلامك نكتلهن خلاص وندفنهن يله نخلص بله هذا حجي صار اشهر منتظرتك حتى تكول هيج
باوع عليه وكاال
البيج ميخليج ليش هيج عايفه نفسج ومستسلمه الهم
خوله : انقبض گلبي وكتله المن مستسلمه
السيد : للي يوميه يأذوج ويضربوك وانتي نايمه لو يخنكوج وانتي تسمعين القران لشوكت راح تقبلين بالاذيه
خوله : درت وجهي منه وكلت نجم كول للسيد خلي يحير بلبيت ماكدر يسوي شى خلف الله عليه ومشكور على الجيه
السيد : لتضيعين روحج وارجعي لربج وقاومي انتي قويه واقوى منهم بأيمانج وصلاتج والتزمي بلقران يعالجج من كلشي
خوله : مشكور
السيد : اعرفج تردين تتعالجين بس ميخلوج يجي يوم وبنفسج تجين اطلبين المعالجه انداريت عليه وصفنت بوجهه وهو اشر براسه وحركه بهدوء وكال تجين يخوله وراح ابقى منتظرج هسه خلي اشوف الشغله الدفنتها
مرت اخوكم
خوله : طلعنا وطلب مني ادخل ومااشوفها بس الفضول قاتل كعد اباوع من الشباك وبدا يرش شغلات على مكان الحاجه الدفنتها صالحه وطلعها وخلاها بجيس واخذها وراح
بقيت صافنه على كلامه وصدري ضاق كلشي بيه كام يوجعني وبيومها الكوابيس كارثه اجت بس مااكدر اسوي شى
مر ٣ اشهر على السقوط واحنا هسه نهايه شهر السابع
يونس ملتزم بشغله واحسه مرتاح
كاعدين نتريك جان يطبون
صحت بصوت عالي لا هله شجابكم
صالحه : مجايين لبيتج
عمشه : چايه لبيتي
صالحه : شونج عمه
ساهره : مرتضى وينه حيل بالي يمه
عمشه : زين عرفتي عندج وليد
نزل مرتضى وباس امه وابوه
عمشه : اجيتو تاخذون غريضاتكم وتولون
ساهره : وين نروح عمه
عمشه : چا ماتدرون زلامكم حوسمت وضل كوم فلوس عدهم گل وحده تاخذ زلمتها وتولي انتم وفلوسكم الحرام
ساهره : منكدر نطلع هسه
عمشه : چاليش تضلين هنا اخافن يبخل عليج جوحي عبن اعرفنه كرميده ولو يملك الدنيا كلها يكعدج بصريفه
عبيد : يمه منكدر نطلع لان اكثر الاخذو فلوس كام يدورون عليهم واحنا نخاف نوكع بيد الناس ويأذونه تحملينا مده ونطلع
عمشه : انه گتلكم انتم وحلالكم بره مااريدن اشوف رگعت وجهكم ترستو بطونكم حرام
جوحي : فتره بروح ابويه ونروح
عمشه : انه اعرفن ماتضلون عبن وحدتجن تريد تفلت بريشاتها وعابت هيج ريش عدكم جم شهر وراها بلقنادر اطلعكم واكلكم وحيدكم مااريدن فلس حرام منكم
صالحه : بعد احسن
عمشه : من گبر الياخذج مابيجن وحده خيره فوخن وليداتي واخذتوهم وانه ماضل طارش بينا كلها مده وبعدها لا اشوف جهرتكم الخايسه ولا اريدن اسمع طاريكم
ناي : صعدو لغرفهم ومنتظرين شراح يصير
مرجع مهند وياهم باقيه علمود دوامه
اما مرتضى منتظر النتيجه وطلع ناجح ماانسى نظره يونس والقهره الي بگلبه جان يونس اشطرهم وتالي هو كعد وهمه كملو
مرتضى : طلع ٨٣ لان الغش بفلس وكدر بلغش يطلع معدل حتى باركت اله من بعيد ولا تقربت منه دوم اتهزم من عنده واحس عيونه تلاحكني
جنت اتمنى يونس يرجع لدراسته بس هو قافل تماماً ودوم يكول اريد اكون نفسي حتى اعوض الراح
الكل مبتعد وبس نسمع نقاشات بين جوحي وعبيد يردون يسوون مشروع بلفلوس وميشترون بيت ويضلون لحد متنجح هاي المشاريع ويوميه گآبه هوسه
جنت احاول منتقرب منهم وخاصه سما جانت تحاول دوم بس تشوف يونس وحده تجي اله
بيوم كعدت من النوم يونس ماكو باوعت للساعه عابره ٢ بليل خفت عليه هذا وينه
كمت على كيفي جان عمه خوله تحس
خوله : هااا وين كايمه
ناي : اشوف يونس ماكو
خوله : اني انزل اشوفه
نزلت بعيوني كلها نوم ادور على يونس هذا وينه باوعت ماكو احد بلمطبخ ماكو البيبان مقفله اخاف بلسطح ردت اصعد وشفت ضوا غرفه نجم مفتوحه منو بيها نجم ميدخل بيها ابد
توجهت للباب حطيت اذني على الباب اكو حس بسيط وما مفهوم فتحته منفتح گلبي لعب صخام بوجهك اذا صدك دكيت الباب على كيفي
افتح يونس ادري بيك هنا
افتح تره اعيط والم البيت عليك انفتح الباب ودخلت لكيت سما واكفه وترجف من الخوف
ولكم انتم شنو تخبلتو
يونس : صوتج عمه
خوله : وغمه بعينك جايب بت عمك بتالي الليل وقافل الغرفه عليكم شسوون
يونس : اعرف بيج تدرين احبها واريدها واشتاقيت الها واجت تشوفني واشوفها
خوله : تدري لو واحد غيري حاس عليكم شجان صار والله ذوله المخابيل الفوك يذبحوك بسجينه عميه
يونس : روحي سما اني احجي ويه عمه
خوله : تريد تطلع ولزمتها حيل من ايدها اسمعي لج بت صالحه العرمه ولو انتي طلعتي اكثر عرامه من امج عايفه ابوج وامج نايمين وماخفتي بيت بيه كوه ناس ونازله تتمعشكين بلغرفه ويه هذا المطي
اذا عدتيها مره ثانيه مااطلعج هيج بهدوء افضحج فضيحه اخلي ابوج يذبحج واذا الدثو ابوج ماذبحج اخوج جري عدل واياج تنجمعين وحدج ويااه يله ولي ودفعتها حيل وطلعت تركض
وانت يارجال يلكبرت وكمت تحصر بنت عمك ولك مستحيت مو عندك اخت ربك يسلط يلارعن
يونس : اريدها زوجتي واي شى اسوي وياها اعتبره حقي
خوله : انجب انجب بكد فردت القندره ويدور حقوق ولك اني اكول انت فقير وحباب وماعندك دغش واذيه تالي تطلع كل البله منك
يونس : عمه بس اعبر ١٨ سنه اخذها لسما
خوله : ومنو يخليك ولك اصحى على نفسك تره انت بعدك صغير وهاي مراهقه ومحاس بروحك بعدين تتندم بكد شعر راسك
يونس : انتي ليش متصدكين احبها
خوله : لان غلط وهاي بذات متفيدك بطل سوالف الجهال وصير رزن هاي السوالف تقلل من قدرك لو اختك شافتك شتكول عليك عيب يونس جنت اكول عقلك جبير طلعت اي عقل ماكو طايش وادور سوالف مكسره تقلل من قيمتك
يونس : كعدت بصف عمتي وكتلها
حركت گلب صالحه بتها
خوله : وانت شعليك بصالحه
يونس : ليش هاي مو نفسها الي تبلت على امي وهي بسببها صمد شمرها لو نسيتي
خوله : لتكولي تأذي صالحه بسما
يونس : ماعندي شى ويه سما احبها وتحبني بس امها مااطلع رجال اذا ماابجيها دم عليها
خوله : صخام الصخمك ولك يوميه صادمني بيك
يونس : خلي تعدي هاي الفتره ويصير خير
خوله : عافني وطلع
خلاني افر بدماغي هذا شديسوي
ناي : بعد كم يوم انظف كل وحده بجهه لكينا جوحي وعبيد طابين يدكون على راسهم
عمشه : وحمس الحمسكم شبيكم تجوعرون
عبيد : يمه فلوسنا راحت
نزلت ساهره من فوك وصالحه جانت بلمطبخ طلعت تركض شكوو
جوحي : دخلنا بمشروع ويه واحد عود مقاول نشتري عماير كل واحد عماره وبيت وانطيناه الفلوس وقعنا تالي طلعت العقود مزوره والعماير مو اله ولاهو مسؤول عنهن
صالحه : عاطت وتلطم يعني راحن الفلوس يبوووووو
عمشه : كللللللللللوووووش رايه الله بيضه
خوله : حيل تستاهلون
جوحي : يمه تهلهلين على كسرتنا كلشي خسرنا
عمشه : چاانه لو بيه حيل ادبج للصبح عبن هذا الحرام مايجي من وراه خير
كعد عبيد بلكاع ويدك على راسه وصالحه مكابلته ولج راح التعب راحن الملاييين
ناي : اجت شرهب وكفت يمي وتضحك
شرهب : عمو يلطم مثل النسوان صار عمه مو عمو
ناي : اششش عيب اسكتي
شرهب : هسه يشك ملابسه ههههه
ناي : اصعدي فوك لج
شرهب : عمو الطم بعد حباب شكلك حلوو
ناي : سحبتها حييل من ايدها وصعدتها
صالحه : بت جليله بعد تفوو على امج وعليج
شرهب : تفوو عليج عمه
ناي : لزمت حلكها وصعدتها ركض عيب ولج اذا عدتيها والله اضربج
شرهب : عمه تكول الي يغلط عليج اضربي وعمه صالحه غلطت وهي طويله ومااكدر اضربها اتفل عليها مثل ماتفلت عليه
ناي : اكبر منج ميصير عيب واذا عدتيها اخلي يونس يضربج
شرهب : اهوووو مااسويها بعد
ناي : امشي وكلي بلال وشوي واجيكم
شرهب : اريد اشوف
ناي : شنو التشوفي كتلج ابقي يم بلال يله بله عناد ودفعتها بلغرفه ونزلت اركض اشوف شكوو
عمشه : يمه ضل نوح واندب حظك وشك زيجك عبن هاي سوالف المره ماخذها من مريتك
عبيد : رحمه لابويه اسكتي اني راح انجلط من القهر
صالحه : يعني ولا فلس بقى
عبيد : البقى تفاليس الثكال راحن يصالحه راح يگلبي يوكف
ناي : عمو خطيه راح يبجي ويدك على راسه وعمو جوحي هم هم مقهور
خوله : اكص ايدي اذا عمج جوحي خسران فلس واحد
ناي : مو كدامج يلطمون
خوله : عبيد اي خسر ومبلغ جبير بس جوحي لا ولج لو خسران هاي الملايين جان هسه هو بالانعاش هذا كله فلم برعايه جوحي اعتقد طمع بأخوه واخذ فلوس منه شوفي حتى قهرته تحسيها تمثيل هذا جوحي الربع دينار يحسب اله الف حساب يله ينطي مو عاد ملايين سكط اخوج علمود جم فلس تردين يضيعن ملايين وباقي واكف على رجله مستحييييل وهذا عبيد خبل وميفهم وبس هوسه وقرايته ضعيفه وتلكين جوحي مسويله شغله مرتبه اكل اخوه وكعد مسيطر
ناي : قابل مينكشف
خوله : اخوتي واعرف دماراتهم كلهم جوحي هم اكل عبيد وزادن فليساته وهم حتى يبقى يلم اكثر لان طماع ومايملي عينه وساهره متضيع فلوسه وكل شويه تطلب منه وعنده قابليه يبقى العمر كله بهاي الغرفه المعفنه بس حتى ليضيعن هنا وهنا وهم حتى لا احد يحط عينه عليهن ويحسده يعني كلشي يناسب جوحي صار
ناي : هيج عمو عنده قابليه يبوك اخوه
خوله : الحرام يسوي كلشي وهذا اول الدرب ينايه
ناي : بقت الايام البعدها عزه عدنا صالحه تمرضت وساهره شاده راسها وتفتر بلبيت وعبيد متهستر وجوحي مثل مكالت عمه القهر مبين تمثيل وبيبي تمشي وتهلهل ومتشمته بيهم
كاعده اغسل مواعين واساعد عمه لان ذنيج مكامن ينزلن
دخل عمو نجم باسني من راسي
هلوو عمو شونك
نجم : هله بيج عمو
خوله : شو ماكو ضل بالي صار كم يوم
نجم : جنت اركض على شغله ومن رهمت كلت اول وحده ابلغج
خوله : خير
نجم : بعد مده راح يفتحون السفر
خوله : وين
نجم : لهواي دول
خوله : واحنا شعلينه
نجم : اني راح اسافر
خوله : واحنا تخبلت شون تعوفنا
نجم : ماابقى بعد هنا خوله لو تجين ويايه لو اروح وحدي اكثر شى اروح للاردن
خوله : والجهال منو الهم
نجم : رحت لكربلاء وشفت فلاح وقنعته يرجع
ناي : وين عايفينا
نجم : ماابقى بعد تدرين شون عايش تعبت حيل تعبت ومااتحمل ابقى وبكيفج خوله لو تجين ويايه لو اروح وحدي وحطي بالج رجعه لهنا ماارجع بعد
ناي : باوعت على عمه وكتله راح تعوفينا
يتبع ...
رواية الابواب الخمس الفصل الرابع وثلاثون 34 - بقلم ريام هادي
#الابواب_الخمس
البارت الثلاثون
للكاتبة Reem
ياناي سولف حزن سولف حزن ياناي
ع الراحوا وما اجو وانت البقيت وياي
ياناي شوف الهوى عايل علينه هواي
خلينه نعزف سوى ويجمعنه هذا الراي
انت التحن للگصب واني الاحن لهواي
نجم : ماابقى بعد وبكيفج خوله لو تجين ويايه لو اروح وحدي وحطي بالج رجعه لهنا ماارجع بعد
ناي : باوعت على عمه وكتله راح تعوفينا
خوله : نجم انت شارب شى قبل كم يوم جنت هنا ومجبت طاري هذا الموضوع وحاير شون تلكه شغله ليونس احسن من شغلته البيها هسه وتختفي جم يوم ترجع تگلب الامه على راسي وتكول نسافر
ناي : عيوني تتنقل بين عمو وعمه ودگات گلبي ادك بصدري تكول الگلب يريد يطلع من مكانه
نجم : تعالي ويايه
خوله : وين اروح
نجم : تعاي شبيج عمو ناي ابقي هنا شويه وجايين
ناي : اخذها لعمه وراحو لغرفته واني رحت وراهم بس سدو الباب من خوفي ردت بس اعرف شصاير مجرد فكرة عمه ماكو تحسسني مثل واحد بعز الشتا الدنيا تمطر وترعد والجو ثلج وهو دفيان بفراش نظيف يسحلوه من عز نومته والدفو الهو بيه ويشمروه بلشارع ويكولون اله نام هنا
يباوع يمنه يسره ميلكه بس الجو اظلم والهدوء والهوا البارد الي يلامس كل مكان بجسمه ويكص بيه والمطر والجلاب السايبه الي ادور اللحظه المناسبه حتى تنهش بيه
هذا احساسي من عمو كال نسافر
حطيت اذني على الباب جان صوتهم كلش واضح لان عمه تحجي بصوت عالي ومتوتره وعمو يحاول يفهمها
خوله : احجي بله شجاب الصخام السفر على بالك
نجم : الوضع الي احنا بيه
خوله : ياوضع وشنو الجديد هسه يله تفطنت على حالنا مصار سنين هذا وضعنا شنو جنا لازمين الرياسه (الرئاسه) وطارت من عدنا لو بعثيه ويركضون ورانا شو فتحنا عينا ناس فقره على كد حالنا عتاكه وانت الوحيد من اخوتي كملت دراسه واشتغلت عامل بمكتبه واني اخذت الشهاده بطلعان الروح وشمرتها بلمجر شنو بعد الي تغير وكعدت من السبات الي انت بيه وتريد تثور على وضعنا
نجم : اني من زمان تمنيت اهج من العراق كله وره موت المرحومه وجنتي شايفه حالي بس سفر ماكو ومستحيل ردت اغير كلشي حتى الشوارع الناس خوله محد حاس بلي احسه اني من اجي هنا جن تيزاب ويصبوه على گلبي وصدري اشوف مكانها حركتها اذا انتم نسيتوها اني لهاي اللحظه صوتها بأذني كل مكان بهذا البيت اشوفها بيه حتى الشارع من امشي بيه اتذكر من جانت طالبه ورجلها ادوس بكل خطوه امشيها لو بيت اهلها افوت منه كل مااجيكم اوكف اباوع على البيت وابجي رغم مهجور ومحد بيه بس احسها بيه روحها بكل مكان يدور ويايه ومجبور كل فتره اجي هنا واشوف طيفها واسمع صوتها واعيش نفس الاحساس وارجع ابجي وانهار وهذا كل وحدي اعيشه تعبت والقران تعبت صار ٩ سنوات تعرفين شنو ٩ سنوات يوميه ماانام اله اتذكرها وابجي عليها لج حتى دموع ماضل عندي هذا دمي احسه نشف من كثر البجي وتأنيب الضمير الماكلني لا اني ميت وخلصان من هذا الوجع الاحسه ولا اني العايش مثل الناس ومتأقلم واعتبرها ماتت الله يرحمها لهسه مااكدر اوصل لكبرها احسها راح تطلع وتحاجيني وتلوم بيه ومااكدر اجاوبها وانتي توقعي شكد متأذي
خوله : وانت خوش جازيتها تعوف بزرتها جوه ايد ذني حتى يصيرون مكفخه
نجم : كل هذا الحجيته وانتي مافكرتي بيه
خوله : انت جبير ورجال وهذا نتيجه افعالك وكل انسان مسؤول عن قراراته واختياره بس ذوله جهال شنو ذنبهم من هسه يدمغون بلدنيا انت مشفت شجان يصير بيهم هسه يله حسيت ناي وشرهب ردت الروح بيهن ما احمدلك بنفسي بس على الاقل مانعه ذني الحيايه عنهن
نجم : مااكولج كلامج غلط بس احسبيها ويايه اليوم اني سافرت وحدي لان مال ابقى كطنه وشيليها من اذنج وانتي بقيتي هنا وضليتي تحاربين بذني على كولتج الحيايه سنه سنتين وبعدها ناي تتزوج وشرهب وراها هم تتزوج ويونس يعيش حياته ويتزوج زين وانتي وين من كل هذا وخاصه اذا الله لايقدر امي ماتت قابل تضل العمر كله عايشه منو يلفيج وربج وره كم يوم من وفاتها يبيعون البيت وين تنطين وجهج منو راح تتحملين تعيشين وياه حتى لو البنات قبلن ياخذنج رجولتهن راح يعارضن
خوله : حيييل وانت هيج حسبتها وزوجتهن وخليت عوائل براسهن وحدتهن بعدها طفله
نجم : السنين تركض ركض ذاك اليوم عبالك البارحه من ماتت ذكرى ومن اصفن الها ولا اصدك ٩ سنوات صار وبعد مده نطب بلعاشره وناي بت ال٥ سنوات صارت ١٤ ويونس ولد شاب كلها سنه ونص اذا مو اقل يبلغ سن الرشد وشرهب الجانت بلكماط راحت خامس ابتدائي لتكوليلي حيييل غمضي فتحي تلكيهن عرايس ولو هسه ناي عروس وكبرت الله يحفظها كلشي الواحد لازم يفكر
خوله : وهمه منو الهم شون اعوفهم لك احجيلك احجايه عدله من شعلت اهل اهلي
نجم : رحت لكربلا على فلاح وشفت حاله تعبان
خوله : خو هذا الثاني اخذ مرته وبنته وطفر مثل متسوي انت هسه وفوكاها حتى مرته كطعت شجاها
نجم : وبهاي طفرته ماحصل شى اشتغل ولم جم فلس ومكيف وتالي مشتري كاع ورايد يبنيها صار السقوط والرجال اليشتغل عندي بعثي جبير مكتول وضل فلاح بليه شغل والي جامعهم صار اشهر ياكل بيهن وتعرفين شغل ماكو بهاي الاوضاع ظال يطحن بروحه ومن حجيت على رجعته جنه فشلان ومنتظر واحد يكوله ارجع بحيث مااخذت وانطيت وياه بلحجي شويه وكال راجع
خوله : وبدعه ليش متخابر من خوفنا كمنا نفكر بسوالف غريبه عجيبه
نجم : من شافتني طكت بجي جنهه غركان وتعلك بكشايه وحتى مكالت شلونك سلمت وكالت الجهال شلونهم گلبي نار عليهم عاتبتها اذا انتي تحبين الجهال وهيج گلبج محروك عليهم ليش متخابرين تطمنين
خوله : وشكالت المسعده
نجم : فلاح جاوب كال اني مانعها
خوله : ايا ناقص على هاي الدكه بله شجاه تخبل تالي عمره
نجم : حسب كلامه وعقليته يكول هي تخابرهم وتضل اليوم كله تبجي وتعبانه ويصعد ضغطها ومرات تتخربط مره مرتين وعبرتها تالي كامت حيل تتأذه وتأذينه وياها لان الظاهر تاكل گلبه حالف عليها اذا خابرت يطلكها
خوله : يااا والغسل على كولت امي اي وتالي
نجم : المره شسوي كاعده وساكته وسلمت امرها لله لهذا بس شافتني كت دموع وتريد تعرف اخبارهم واحد واحد ومن وافق فلاح بلرجعه لو بيدها تبوس ايدي لان اجيت
خوله : ااااخ من اخوتك لك تريدلك واحد خير ماكو يابه ذوله يتامى ولد اخوكم هيج ماكو محنه وتالي طلعت انت اضربهم
نجم : لو احجي منا لباجر ميفيد الحجي وياج خلي بالج اني اذا مو اليوم باجر بعد سنه مسافر بس تتيسر الشغله وينفتح السفر واكو شغله ثانيه لازم تعرفيها
خوله : شنو بعد
نجم : السيد الاجه كال البيت ميتنظف لان البيه ناس متصلي ودربهم اعوج وماطول ايمانهم ضعيف وماكو التزام مراح يتخلصون من السحوره والسحر الجان مدفون الج ولامي وخاصه الج تدرين شكد بيه مصايب ذيج الايام من راسج يوجعج ونوم متنامين هو تأثيره عدا الكوابيس واذيتج واذا هلمره كدرتي تتحملين السونه مره ثانيه راح يقضون عليج ابسط شى يخبلنج بلسحوره مثل مصار بيج قبل وانتي هم لا صلاه ولا عباده لهذا بسهوله يشتغل عليج
خوله : يعني شون منخلص منهن
نجم : الخلاص الوحيد تبتعدين منهن وطول ماانتي ند بند وياهن مراح يعوفنج وراح تشوفين العجب والاذيه خوله تذكرين قبل كم سنه من اجيتج لبيت صديقتج امل شكلتي
لتعوفني واني كد كلمتي وماعفتج اكدر اسافر وما اجي احجي لحد موعد السفر بس روحتي وحدي معناها مو كد كلمتي وياج
واعرف اذا رحت وعفتج راح تضلين وحدج هنا نهايتج يامتخبله على ايد ذني الچلبات يا مشموره بلشارع محد يلفيج
خوله : عوفك من كل هذا والجهال
نجم : رجعنا لنقطه الصفر كتلج فلاح وبدعه راجعين وهمه كبرو واذا على المصرف بس اشتغل هناك واستقر كل شهر ادزلهم مااعوفهم وناي مثل مكتلج عروس ويونس شاب وكبر وهو هسه متحمل المسؤوليه
اني راح اعوفج تفكرين ولتاخذج العواطف اليوم باجر تتندمين بكد شعر راسج لو اكو سند هنا وياج والله اكلج ضلي مراح اخاف عليج بس اعرف الموجودين محد راح يرحمج واذا على الجهال هم مدايمين الج كلمن راح يعيش حياته وتبقين انتي الخاسر الوحيد وتره كدامج كم شهر مو باجر راح نسافر هاي بحال اذا قبلتي تكدرين تعلمين ناي كلشي
خوله : ااااخ حطيت ايدي على راسي ماادري اختنكت
نجم : لان تدرين كلامي صحيح ومحتاره ادري بيج وبعد انتي بكيفج
ناي : صعدت ابجي واني حسيت راح اخسر عمه جانت طوق النجاه بلنسبه اليه
دخلت للغرفه وحطيت راسي على المخده وابجي حسيت ايد على راسي
بلال : شبيج
ناي : رفعت راسي ودموع بعيني واباوع عليه مابيه لتخاف
بلال : ضربوج
ناي : لا حبيبي ماكو شى روح العب
بلال : اريد اطلع بلشارع
ناي : اخاف عليك ابقى هنا
بلال : حبابه حبايه اروح اشوف شوشه
ناي : عفيه بلبل لتشلع گلبي كتلك متطلع
بلال : مااحبج وبرطم وكعد بلكاع وشمر ملاعيبه جريت نفس حتى اسيطر على نفسي ومسحت دموعي وكتله روح العب
بس لتتأخر ولتروح بعيد
بلال : احبج واجه يركض حضني وباسني ونزل صار عمر ١٢ سنه كلامه نوعاً ما مفهوم بس عقله مال اطفال وحالته خاصه نحاول اني ويونس منخلي يحتاج شى وتمنينا اكو واحد اهتم بيه وسجله مدرسه اقلها يلتهي آفضل من حبسته بلبيت
كمت لملمت ملاعيبه وعدلت الغرفه كعدت بلكاع وخرت البرده وفتحت الشباك ردت هوا يطب للغرفه ولصدري اريد اهدأ وافكر صفنت على حالنا الى متى نبقى انذب حملنا على غيرنا اتذكرت كلام يونس من بطل من المدرسه واشتغل ومقبل يعتمد على احد ضحى بمستقبله حتى اني وشرهب منحتاج شى ومحد يبطلنا بحجة الفلوس
وديتعب ومكسور ظهره ومعايش مثل غيره حتى اني واختي انعيش
انفتحت الباب ودخلت عمه خوله وجنها حاسه بيه مدرت وجهي عليها وبقيت اباوع من الشباك كعدت بصفي ولزمت كصيبتي
خوله : ادري بيج شتحسين وحقج اذا حقدتي علينا لان تحسين بينا خذلناج اني مااعوفج والله ولا اعوف اخوتج حتى لو على حساب نفسي اني شئ على شئ ماعندي حياه ولا بيت ولا جهال ولا استقرار وحده عايشه ليومها وبس فقدت كلشي يوم متمرضت وغبت عن الدنيا ومابيها وفتحت واني بحضن رجال بعمر ابويه ويوم مردت افرح سلبو فرحتي قبل يومين من عرسي من عدها عرفت اني حظي بلدنيا قليل وجودي وعدمه ميإثر على احد
ناي : انداريت عليها ومسحت عيوني وكتلها يأثر عمه لو ما انتي جان هسه متأذيه منهن صح الوقت البقيتي يمنا قليل بس تعلمت هواي شغلات منج كافي من احتاجيتج لكيتج
خوله : ياوقت قليل
ناي : روحي عمه ويه عمو نجم كلامه صحيح يجي يوم وتبقين وحدج واني ماارضالج هيج عيشه انتي مشفتي من الدنيا شى لتضيعين الباقي بيت كله اذيه وجذب وكره
خوله : منين متعلمه هذا الحجي تره هذا الحجي اكبر من عمرج
ناي : الي يعيش بيت عمشه يگبر گبل عمره
واني كبرت يوم ما عمه بدعه عافتنا واني صغيره امسح بيت يرادله نسوان اثنين وينكسر ظهري واسمع ضحكهن وسوالفن ولا دايرات بال ويحاسبني على كلشي كبرت يوم مااوكف على الطباخ حتى اوكل اختي واخويه لان جوعانين وماكو احد يسوي الهم لكمه
خوله : كافي مو كسرتي گلبي لتحجين هيج
ناي : هذا الصار عمه وكله على ايدج ليش تضوجين وتنقهرين هاي حياتنا هو احنا لو عدنا حظ جان من الاول بقت امنا على راسنا وجان حياتنا هسه طبيعيه ومنحتاج احد بس الماعنده حظ اي دوه مايرهم اله
واحنا مالنا دوه غير نعتمد على نفسنا وبداها يونس بلشغل والحمدلله هسه هاي الفتره اكلنا وعيشتنا كلها عليه وتشوفي شون يتعب
ولازم اوكف ويه اخويه اريد منج تعلميني كلشي اقلها اعرف اسويله اكله زينه علميني الطبخ هسه التنظيف وغسل الملابس زينه بيهم بقى بس الطبخ علميني وخليني اشيل اخوتي وانتي عمه روحي ويه عمو تره ذني مراح يسكتن والله اعلم شراح يسون بيج ويأذوج
خوله : مااعوفكم لو شميصير وباقيه وياكم
ناي : اذا تحبينا روحي لتخلينا بيوم تحمل ذنب أذيتج لان جيتج لهذا البيت بسببنا ولتخافين عمه بدعه هم راجعه
خوله : الطبخ والتنظيف يهون اني بالي كله يم ساهره وصالحه شون راح يعوفوكم وخاصه انتي
ناي : اوكف بوجوهم تعلمت منج يمكن مو مثلج بس تعلمت هواي شغلات وبيبي موجوده وهاي الفتره كامت متطلع للشغل شيصير اروح الها
خوله : ليش مترديني ابقى
ناي : لمصلحتج اذا اني وشرهب ويونس بيوم انكتب النا نطلع من هذا البيت انتي اخاف عليج ليسون شى موزين بيج
خوله : خلي نتفق اتفاق ابقى هاي المده ويروح نجم قبلي اذا الوضع تحسن رايحه اذا لا مااروح
ناي : خوش حل وانتي تبقين تعلميني كلشي
خوله : مااريد بس كوني قويه ولتضيعين حقج
ناي : علميني عمه اني اخاف اوكف بوجهن
خوله : اعلمج يله تعالي ننزل نسوي الغدا واعلمج على الطبخ ماطول عطله
نزلت وياها وكعدنا نشتغل كملنا الغدا واجت بيبي
عمشه : خايبات جيعانه ماكملتن طگني الجوع
ناي : اي بيبي هسه انصب
خلي اطلع على شرهب وبلال اصيحهم طلعت للطرمه وفتحت الباب ومديت راسي للشارع
اباوع يمنه يسره ماكو لا شرهب ولا بلال
ذوله وينهم
جان اكو جهال يلعبون صحت واحد من الجهال وسألته مشفت شرهب وبلال كال راحو مناك واشر على نهايه الشارع طبيت ركض لعمه
عمه عمه الحكي
خوله : ياستار شكو
ناي : بلال وشرهب طالعين لراس الشارع
خوله : شوداهم اكيد هاي سوالف شرهب شكد حركه هاي البنيه ركضت سحبت عباتي وطلعت امشي سريع واباوع يمنه يسره بلكت الكاها وصلت لراس الشارع وهم ماكو جنهم فصل ملح وذاب دخل الخوف بگلبي ذوله وينهم امشي واسأل الجهال الي شافهم واشر وركضت والي مشافهم وساعه كامله ادور وماكو رجعت للبيت اركض اصيح احد ويايه
ناي : عمه تأخرت واني كمت ابجي من الخوف اعرف بيهن بلال ميفهم وشرهب وكحه وهم متندل حيل دخلت عمه والقلق ماكلها
هاا عمه بشري
خوله : ولج ماكو
عمشه : شنهي حسجن ليغاد
خوله : يمه الجهال ضاعو
عمشه : من دهر الدهرج وين ولو
خوله : هو اني لو ادري وين اجيج
نزلت ساهره تتمخطر ادور اكل تصب
ساهره : شبيكم مخبوصين
ناي : عمه مشفتي بلال وشرهب
ساهره : لا شبيهم
ناي : ماكو اندور عليهم ماكو
ساهره : وين جنتي عنهم ثوله وتعوفين طفله وطفل مو صاحي بلشارع كله منج اذا صار بيهم شى انتي ام الصوج
خوله : وهي شعليه العتب عليكم انتم الكبار ولا واحد منكم عينه عليهم
ساهره : ضلي دافعي عنها وطلعي عينها بله شغل ومكعد تشتغل ودراسه وماكو وين بالها ليش محطت عينها على اخوتها والله اعلم هسه همه وينهم
خوله : لتنسين واحد منهم ابنج غيرج وحده حتى شعرها تكطعه من حركت گلبها على ابنها
ساهره : اي انتم ضلو حايرين شيصير وكلتو ابنج مو من زمان ذبيته وبدعه مقبلت ودكت صدرها وكالت اخذه وتالي عافته وراحت اني بعد شلي علاقه
خوله : انيااال گلبج لو عندي گلبج جان هسه ذابحتكم واحد واحد على القسوه البيه شو وخري ودفعتها عمه
ركضت صعدت فوك بدلت ونزلت اركض
خوله : وين رايحه
ناي : ادور عليهم هسه كاتلهم الخوف نزل مرتضى يريد يفهم شنو هاي الهوسه
ساهره : شرهب وبلال ضايعين
مرتضى : صدك تحجين
ناي : درت وجهي منه وكلت لعمه خلي نطلع وكلمن من جهه يدور
مرتضى : وين رايحه اني اطلع
ناي : متطلع وحدك ذوله اخوتي واني ادور عليهم
خوله : لتتعاركون انتم من جهه واني من جهه واذا اجه احد من الولد بلغيهم
ساهره : واني راح ادك بيبان الجيران اخاف خاتلين بيت ويلعبون
عمشه : يمه وليداتنا راحت يمه تفرهدو المكاريد انه وياكم اروحن للسوك اخافن رجولهم سيرتهم ليغاد
ناي : كل واحد راح من جهه جنت لازمه نفسي حتى لا اعيط بلشارع وابجي المشكله الشوارع تخوف وكلها امريكان تفتر والوضع مو امان شمدرينا شصار بيهم
مرتضى : تعالي منا
ناي : فات رتل وجنت اخاف من الامريكان بشكل مو طبيعي لزم ايدي مرتضى مكدرت اسحبها منه لان الخوف مسيطر عليه بلعكس لزمته حيل وچلبت بيه وامشي واكوله عفيه امشي سريع ليدعمونا
مرتضى : شبيج خايفه ميسون شى
ناي : شون ميسون وهمه يكولون حتى على البيوت يطبون ويبوكون بنات
مرتضى : لتصدكين كلشي امشي اندور بهذا الفرع
بقى لازم ايدي ونتمشى واندور هنا وهنا سحبت ايدي منه كاال بقيها اخاف عليج من الشارع باوعت عليه بقى يمشي ولازمها تكول اخاف اطير منه
شرهب : بلبل يمكن تيهنا
بلال : منا منا
شرهب : ولك كلها منا منا وانت متندل اني جعت وعطشت اريد ارجع للبيت
بلال : منا منا
شرهب : هديت ايده وكعدت على الرصيف اباوع على البيوت والشوارع كلها مااعرفها
كعد بصفي بلال وحط وجهه على جتفي
تعب من المشي وبدا ينعس
شرهب : اريد ناي
بلال : نروح نشتري
شرهب : ولك يانشتري تيهنا وين بيتنا وكمت ابجي
باوع عليه بلال وكام يبجي مثلي انت ليش تبجي احجي ويااه واشهك
بلال : انتي تبجين
شرهب : كله من وراك ضعنا
اجت مره تشوفنا
شبيكم ليش تبجون
شرهب : خاله ضعنا
تعالو اوديكم لاهلكم
شرهب : كمزنا اثنينا اي عفيه خاله هناك بيتنا
جيبو ايدكم اخذتهم المره وتمشي بيهم
شرهب : خاله تعرفين بيبي
هااا اي اعرفها
شرهب : شسمها
شمدريني نسيتها هسه
شرهب : وين بيتنا
غير هنا وكفت شرهب وباوعت بوجهه المره
انتي شريره خاله تاكلين الجهال
ولج منيلج هذا الحجي
شرهب :عمه تكول اذا ضعتو اسألو الي ياخذكم من الشارع شنو اسم بيبي اذا معرفو انهزمو منه هذا شرير ياكل جهال
لك اركض بلال وعضت شرهب ايد المره وسحبت بلال من ايدها وتركض وبلال يبجي
لك بسرعه راح تجينا راح تاكلنا
ناي : ادور بلشوارع مثل المخبله راح يصير الغروب وهمه ماكو كعدت بلشارع ابجي بعد مااتحمل اكثر من ساعتين اندور
ضاعو اخوتي مرتضى
مرتضى : ماكو شى هسه نلكاهم لتنسين بلال اخويه يعني مو بس اختج ضاعت
ناي : بلال وشرهب نفس المعزه واذا ركزت على كلامي كتلك ضاعو اخوتي
مرتضى : كومي نروح على جهه السريع بلكت نلمحهم
ناي : كمت ونفضت ملابسي مد ايده يلزمني سحبتها بله اني بيا حال وهو تفكيره وين
خوله : حرت وين اروح واني امشي وادور وگلبي نار على الجهال بعد مسافه بعيده عن البيت شفت اكرم حييل صار سنين مشايفته متغير والشعر بيه ابيض وكبران وصلت قريب منه تجاوزته وكفني
اكرم : شونج خوله
خوله : وكفت وكتله اهلا
اكرم : عاش من شافج
خوله : انت العايش شكراً من رخصتك
اكرم : بيج شى مو على بعضج صاير شى
خوله : لا ماكو شى مشيت عنه ولحكني احجي شصاير محتاجه شى
خوله : محتاجه تعوفني لان مستعجله
اكرم : بس فهميني شصاير
خوله : اوووف نفخت بضوجه وقلق وكتله ولد اخويه ضايعين وشرحت اله اوصافهم عسى ولعل يلكاهم او شافهم
اكرم : تعالي بسيارتي اندور عليهم
خوله : اعذرني مااصعد ويه غريب
اكرم : يابه قابل راح اكلج واحنا جيران وحق الجار على الجار وكعد تكولين صار ساعه ونص ادورين معناها راحو مسافه ابعد ومو مال تكسي بهيج ظروف تاخذين وحدج وادورين امشي ولتعاندين اندور عليهم وبس تلكيهم عود انزلي حتى بدون سلام عايل وياج
خوله : مااكدر اصعد كتلك
اكرم : لتعاندين خوله ذوله جهال والمغرب راح يصير وممنوع تجوال ذوله اذا منلكاهم الله اعلم شيصير بحالهم
خوله : خفت حيل عليهم من كلامه وكتله يله بسرعه
اكرم : ذيج سيارتي واشر على سياره طابكه وصعدت وياه وبدينا اندور وكل شويه ننزل بمكان نسأل الناس البيه
جنت مرعوبه ليفوت الوكت وما نلكاهم
شرهب : اوكف بلبل تعبت
بلال : اليد ارجع
شرهب : واني هم تعااال سحبت بلال من ايده وكعدنا جوه شجره
تعاال نام على رجلي
بلال : اخاف يجي عوو ويعضنا
شرهب : ميجي اني اضربه بلحجار ورحت جبت كم حجاره وصفطتهم بصفي
يله تعاال نام
تمدد بلكاع بلال وحط راسه بحضن شرهب
شرهب : اقرالك قصه
بلال : اي ليله والذئب
شرهب : اني ليله وانت الذئب
يونس : رجعت البيت تعبان روحي ماشايلها وظهري يوجعني طبيت لكيت صالحه وساهره وسما كاعدات وشكلهم مو طبيعي
السلام عليكم سلمت وتعديتهم اصعد فوك جان تكول صالحه
صالحه : تره شرهب وبلال ضايعين مو تكول مكلت
همه هيج كالو لو روحي انهدت
وين ضاعووً
صالحه : على كيفك وليش تعيط قابل احنا ضيعناهم شوف وين اخذتهم رجلهم وعمتك وبيبيتك واختك راحو يدورون
يونس : طلعت اسحل بروحي وخايف حيل لا صار شئ بيهم بله اليرجع تعبان يرتاح ياكل ويسبح وينام مو ينهبط هسه وين الكاهم
شرهب : بلبل ولك زمال اكعد
بلال : هااا اجو
شرهب : منو اجه
بلال : حلاميه (حراميه)
شرهب : راح يجي العوعو اذا مكمت
بلال : جووووعااان
شرهب : وجع اني هم جوعانه كوم نكول لعمو ابو دكان ينطينا اكل
بلال : الوس ماكو (فلوس)
شرهب : شو كوم رجلي وجعتني راسك شكبره
دخلنا على عمو ابو الدكان عمو عمو اريد بسكت
عدكم فلوس
شرهب : لا
رحو منا
عمو ضايعين ومنندل
وين بيتكم
شرهب : هناااك
وين هناك
ماادري
روحو منا يله اذا بقيتو واكفين اكتلكم
شرهب : طلعت لساني وعيبت عليه وركضنا
ضلينا نمشي ونخاف وبلال لازم ايدي
مرتضى : امشي نروح للجامع هم يصيحون
ناي : امشي عفيه
خوله : بقينا نفتر بكل مكان مبقينا محل مفتح يعتب علينا مسإلنا عليه وصلنا مسافه بعيده حيل عن البيت ونزل اكرم كال لتنزلين كل شويه صاعده نازله اجه يركض
خوله : هااا بشر
اكرم : يكول ابو الدكان قبل شويه اجوي يردون يشترون وماعدهم فلوس طردتهم
خوله : من اشتعلو اهله شافهم جهال وحدهم غير يسلمهم شرطه يبقيهم كم ساعه امانه بلكت اهلهم يدورون عليهم
اكرم : الناس تخاف يگلك اخاف اساعد واتورط
خوله : استعجل فدوة
شرهب : نمشي كوه خايفين وجوعانين فات واحد يبيع شعر بنات وكفنا نباوع عليه بلال راح يركض عليه
عمو انطيني
عندك فلوس
بلال : لا
ماكو شعر بنات
شرهب : كمت ورحت لابو الشعر بنات عمو والله ضايعين وجوعانين
وين اهلكم
شرهب : منندل
شطلعكم بهذا الوضع
شرهب : تعال بلبل نكعد سحبته من ايده وكعدنا على الرصيف نريد نبجي
تقرب ابو الشعر بنات وجر وحده الي وحده لبلال وبيده علاكه صغيره طلع خبزه وكصها
هاكو اكلو واشبعو
اخذناها من ايده يمكن جانت اطيب خبزه ناكله لان ميتين من الجوع
متندلون وين اهلكم
شرهب : لا
بلال : بعد عمو جوعان
والله لو عندي خبزه انطيك هااك شعر بنات
خوله : لمحت الجهال يم رجال يبيع وكف السياره اكرم واني اعيط ذوله ذوله
وكفها ونزلت اركض
شرهب : اجت عمه ولك اجت عمه
ركضنا على عمه حضنتنا وترجف
خوله : وين رحتو وشجابكم هنا
اكرم : بعدين احجي وياهم امشي نرجع
شكد عمي حسابك
لا عمي ماكو اي حساب ذوله مثل جهالي عينكم عليهم الدنيا متتأمن
رحمه الله والديك
خوله : امشو احسابكم بلبيت
شرهب : مو اني هذا بلبل
خوله : اصعدي هسه وبعدين اني الج
مرتضى : خلي نرجع للبيت بلكت احد لكاهم
ناي : واذا رجعنا وطلع ماكو شلون
مرتضى : امشي مخسرانين شى
ناي : رجعنا نتمشى وكل شويه فكره بالي تاخذ روحي ساعه افكر اندعمو ساعه افكر انباكو كل شويه بالي يروح لمكان
لحد ماشفنا يونس
يونس : شعدكم هنا
ناي : اندور على شرهب وبلال
يونس : جنت ادور ومالكيتهم
مرتضى : نادو بلجامع بلكت احد يلكاهم
يونس : امشي ناي
مرتضى : مو اجت ويايه ترجع ويايه شبيك بس شفتها انگلب وجهك
يونس : امشي ناي
ناي : اشرت لمرتضى يسكت وبديت امشي ويه يونس ومرتضى قريب منا يمشي ومتعصب وصلنا قريب البيت وكفت سياره بابنه
خوله : يله انزلو شكراً اكرم وانداريت انزل جان يكول
اكرم : خوله
خوله : انداريت عليه نعم
اكرم : اريد احجي وياج عندي موضوع مهم
خوله : ماكو اي مواضيع بينا انت صفحه وانسدت روح لمرتك وجهالك ولدور دفاتر عتيكه ترستها العثه والصار اليوم لوما مضطره ولا اصعد وياك بس سمعت كلامك من كلت الجاره للجار وانت مجرد جار لا اكثر ولا اقل وتعبناك ويانه
نزلت وسديت الباب عباله هين اكعد بصفه واني اتخيل مرته بمكاني هو عايش وصار عنده عائله واطفال اله اني بقيت عايشه على الاطلال
ناي : ركضت بلشارع ولا حاسه بروحي وشرهب وبلال حضنتهم جنت ميته خوف عليهم
يونس : طبي جوه بلبيت مو هنا بلشارع
ناي : تعالو وين جنتو وسحبتهم للبيت
اول مطبينا اجت ساهره حضنت بلال
كلنا تفاجأنه بيها وهي حسيت على روحها وخرت وهو هم وخر يخاف منها
يونس : وين لكيتيهم عمه
خوله : يفترون بلشوارع بغير منطقه
يونس : وشعجب جنتي صاعده ويه اكرم
صالحه : يااا اكرم ولج خوله بس لا حبيبج القديم
خوله : انجبي وضبي لسانج حبيبي القديم شنو شو انتي متستحين
صالحه : خلينا المستحه الج يمه صاعده ويه رجال غريب وتفترين عمي كويات گلشي يكدرن يسون
مرتضى : خاله ماله داعي هيج تحجين احنا جنا وياهم اني وناي وبنص الطريق نزلنا حتى نصير اكبر عدد
صالحه : هااا ولك ادافع لعمتك
يونس : قابل شسوت حتى ايدافع وحتى اذا صعدت قابل صغير ونحاسبها وحاله طارئه وصارت
خوله : هاااج ولد اخوتي جاوبوج
ساهره : عمتي وين
جان تدخل عمشه
عمشه : ياا حمس كون بكرگ براس گل واحد بيكم چا انه ادور ومتسودنه عليهم وانتم هنا
شرهب : اجتي عمه ونقذتنا من الاشرار
عمشه : شنهي اشرار يمه
شرهب : مثل عمه صالحه وساهره
عمشه : يعني مدهربات ومكموعات
شرهب : اي بيبي
صالحه : وجعي انتي الثانيه طفله ممتربايه
خوله : اخذي اخوتج واصعدي وبدلي لبلال ملابسه متوصخه
ناي : اي عمه
سحبتهم وصعدت كعدت وياهم اثنينهم رزلتهم وكتلهم مالكم فلوس لاسبوع ولا تشترون ماطول راحو بعيد ردت اخوفهم حتى ليعيدوها
بيومها نمت بصفهم مزروع بيه خوفه ضيعتهم
يونس : الشغل تعبني ومااكدر اشگي احمل على ظهري مرات واكثر الاوقات اغسل وانظف المكان جنت اخاف اخذ يوم اجازه ليجيب عامل بمكاني
اليوميه على الاكراميه اكدر امشي نفسي ومصرفنا
اما سما جنت اشوفها بسكوت كل كم يوم خمس دقايق وتروح
ناي : هاي الفتره جنت بحرب نفسيه منا عمه خوله وسالفه سفرها ومنا عمه بدعه المنتظره جيتها بس مجنت متوقعه جيته بعد هاي المده الطويله
بعد اسبوع وتخلص العطله وتبدي سنه دراسيه جديده جنت اشر ملابس ونازله اجيب الوجبه الثانيه هدومي كلها مي وشعري مهوس ونعالي تك وتك واسحل بيه سحل وكل شويه يطفر من رجلي لان تك مالتي وتك جبير سمعت دكت الباب صحت عمه افتحي الباب
خوله : بيدي الاكل اطلعي انتي
ناي : اهوووو ولج شرهب وينج محد يجاوب
عمشه : يااا وطرش ولجن صرعتنا گل وحده تمشرها على الثانيه مگرمات انه افج الباب
طلعت بيبي واني بعدني بلحمام اعصر بلملابس سمعت صوت تبوس وهله بيك يمه هذا منو شلت الطشت وبيه الملابس وطلعت وجان يصير مقابيلي هو شافني ابتسم
مهند : شونج نايه
ناي : وكع الطشت من ايدي من المستحه بله صار سنين مشايفته وتالي يشوفني هيج صايره فلم هندي
مهند : هااا سلامات تعورتي
ناي : شونك مهند الْحٍمَدٍ للـّہ على سلامتك
مهند : الله يسلمج
خوله : شلونك عمه شذكرك بينا
مهند : عندي اسبوع اخلصنا هنا وارجع
خوله : خوما بيك شى
مهند : هاي شنو عمه متردينا
خوله : لا ولك بس مستغربه
عمشه : تعال يمه اكعد چاري وسولفلي شونهه صحتك عافيتك
ناي : باوع عليه وابتسم وكال ماطول شفتكم اني بخير
ناي : شلت الطشت وصعدت واني على الدرج طفر نعالي الجبير خرب حظي الازرك هسه وكتها والله فشله عفته وصعدت تك حافيه وتك بنعال مااندار لو الدنيا تحترك صرت طماطه من المستحه
كملت شر ملابس بلسطح شوي وسمعت صوت انداريت وشفت مهند گبالي
مهند : اساعدج
ناي : ابتسمت وكتله اكو واحد يجي من سفر طويل وصار سنين غايب ركض للسطح وشر الملابس خلي تشوفك امك اله تشرني على التيغه (سياج السطح)
مهند : شحده واحد يمد ايده عليج واني موجود
ناي : واذا انت ماكو
مهند : اجمعيهن اليه واخذلج حقج كل ماانزل
ناي : شلونها گليتك
مهند : ماشيه تدرين شى
ناي : شنو مديت ايدي على شعري اتذكرت كفشتي كمت اتبلعم نسيت نفسي فوكاها واكفه بثقه
مهند : اكثر واحد اشتاقيتله بهذا البيت هو انتي
ناي : ليش
مهند : بدون ليش هاااج
ناي : شنو هاي
مهند : هديه نجاحج ولو اطلبيني هواي لان جم سنه نجحتي
ناي : شكراً مااكدر اخذها
مهند : ليش متاخذيها
ناي : لان مااكدر اجيب هديه الك مثلها
مهند : ومحد طالبج بهديه
ناي : مااخذ شى اذا ماانطي شى مقابيله
مهند : شوفتج احلى هديه
ناي : ابتسمت واخذتها منه باوعت جان سوار فضه ناعم بيه حرفي
مهند : جيبي البسه الج
ناي : استحيت امد ايدي كتله اني البسه
مهند : خلي اشوفه على ايدج
ناي : مديت ايدي جان تجي عمه خوله
خوله : هااا حبيبي شو هنا مدخلت على امك
ارتبك مهند وكال
مهند : هو رايح الها
خوله : روح الها لتعرف جاي ومخلصها بلسطح وتشمرك منه
ناي : انطاني السوار ودخل واني بقيت بلسطح اباوع على عمه الجانت عيونها بيها الف كلمه
خوله : بت ذكرى جنج راح تحركين الاخضر واليابس
ناي : ليش عمه شمسويه
خوله : راح تسوين المحد كدر يسوي من سنين راح تعلك بين ساهره وصالحه من وراج
ناي : استغربت وكتلها من وراي
خوله : ديري بالج بنتي ذني كلشي سوي الهن بس لا ولدهن
ناي : مدافهم والله
خوله : يجي يوم وتفهمين انزلي وشوفي منو جوه اجه اليوم يوم الخطار العالمي الفاقدي من سنين كامو يهلون
ناي : نزلت اركض وعفت الطشت وحافيه لان تك وتك نزلت ولكيت عمه بدعه حاضنه شرهب وبلال وتبجي
بديعه : يمه نايه تعالي حبيبة روحي انتي
ركضت بحضنها ابجي جان يطب يونس يعرج ومبين مجانت تدري هي شافته لطمت على وجهه شبيك يمه
يونس : اسكطت يعمه
جان تنزل دموع بان
يتبع ......
رواية الابواب الخمس الفصل الخامس وثلاثون 35 - بقلم ريام هادي
#الابواب_الخمس
البارت الواحد والثلاثون
للكاتبه Reem
كل الگلت عنهم غوالي
بچفية رگصوا للجرالي !
ماصح بشر يرحم بحالي
عان الله كلمن مالة والي
يونس : اسكطت يعمه
جان تنزل دموع بان
بديعه : ييييييمه سوده بوجهي وحضنته حييل من شفت شگله حيلي راح هذا حبيب گلب ذكرى هيج يصير بيه عساها بحض وبخت كلمن اذاك وخلاك تنجبر تطلع بهيج شغل
يونس : كافي عمه قابل متت هياتني يمج كامل مابيه اصبع نقص
بديعه : يمه من عمري على عمرك وليدي
يونس : شونج بان هاي شنو انتي هم تبجين
بان : مندري هيج حالك
يونس : شنسوي كله مكتوب الْحٍمَدٍ للـّہ كبرانه ولج بس بعدج زقجه شوكت اطولين
بان : لا يونس طولانه شوف وافتريت كدامه جان تنزل سما وتوكف بأول بايه من الدرج وايدها على خصرها
يونس : كصيره بس صايره حليوه ابتسمت وباوعت عليها وكلت
شونج سما
سما : هله شنو رجعتو
بان : اي عندج اعتراض
سما : واني شكو قابل بيت ابويه
بان : عفيه هيج ضلي فكري هذا مو بيت ابوج
اندار يونس عليها وهي ابتسمت
بديعه : يمه يونس تعال اگعد واريد اعرف بلتفاصيل
عمشه : چا وانه ماتسولفين وياي يلچلحه
بديعه : اشتاقيتلج ياعمه
عمشه : جذابه چا اليسمعج مكطعه التلفون وترن ترن
بديعه : حكم القوي ورفعت عيني على فلاح جان واكف
عمشه : وانت يبزر بطني ماعندك ناموس ماعندك غيره چا ادير وچهك وتولي ماگلت امي وجعانه ماتت مالها حس تطمن اذكر اخوتك چا حليبي ماغزر اللكمه ماغزرت
فلاح والله يمه شغل وتعب شسوي الركض على العيشه كلها تعب ماكو وكت
عمشه : انهجم بيت الدكاكين المكومه ماضلك وگت وتنشد امك وين الدهر صابها
فلاح : رجعت راح اگابلج واكعد
عمشه : اكعد يمه والرزق على الله ولجن خايبات جعنا مامش خبيزه نعلسها
ناي : كلنا كاعدين وسوالف وعمه مره تحجي ويايه ومره ويه يونس وشرهب بحضنها وبلال لازمها ميقبل يعوفها مثل امنا جانت مسافره وهسه رجعت
نزل مهند سلم عليهم وساهره وصالحه الكل ماعدا مرتضى
صبت الاكل عمه وانجمعنا سوه ودناكل طب مرتضى
مرتضى : هااا خونه تتغدون ومتنتظروني
هااا منو عمه بدعه وعمو فلاح الْحٍمَدٍ للـّہ على سلامتكم سلم عليهم والضحكه شاكه وجهه اندار وشاف مهند مباشره اختفت ضحكته
شعجب جااي
مهند : ليش عندك مانع
مرتضى : بس سألت
صالحه : جنك مفرحان غيرك واحد ياخذه بالاحضان مو يجفل من يشوفه
ساهره : هاي شبيج ساهره شكال واكلتي حاصل فاصل
ناي : رفعت عيني شفت مرتضى يباوع عليه مهتميت ورجعت دنكت اكل
عمشه : بسچن بنات غنيه جنجن ديوچه هراتي وتعاركن اگعد يمه جااري واكل ذني تسودنن مالهن رداد عبن ابيك وعمك غمان كاضين مثل الجلاب يلهثون وره الفلوس
مرتضى : اي بيبي راح اكعد
ناي : صار گبالي وياكل وعيونه منزلت مني رغم ماارفع راسي بس حااسه وكل ماارفع عيوني الكاه ياكل ويباوع عليه
مهند : اني شبعت
ناي : باوعت بأتجاهه ليش كام حسيته ضاج
ردت اكوم اشوف شبيهه اشرتلي عمه خوله بعيونها يعني لتكومين رجعت كعدت
مر اليوم بين فرحتي برجعه عمه وبان وبين بالي على مهند الي بدل وطلع ولهسه مبين
دخلت عمه علينه وبلال حاضنها
بلال : متعوفينا
بديعه : لا مااعوفكم يمه وليدي صاير رجال وتبوس بيه
شرهب : واني
بديعه : تخبلين عروس
شرهب : عمه بلبل كسر الميز مالتج
بديعه : فدوة اله ميعيدها بعد
ناي : سمعت صوت بيبي ومهند كمت
بديعه : هااا وين
ناي : اروح للحمام هسه اجي
كمت نزلت ركض قبل محد يشوفني جان نصير وجهه بوجهه
مهند : خير شو نازله تركضين
ناي : شبيك اليوم ضجت وكمت من الاكل
مهند : ليش ضل بالج
ناي : كلش اخاف الاكل معجبك
مهند : بلعكس كلش طيب
ناي : اني اساعد عمه بلطبخ بس اكيد مو مثل مهارتها
مهند : كلشي من ايدج طيب باوع على ايد ناي وابتسم
لابتسمه السوار
ناي : ابتسمت وكتله اي عجبني كلش حلو ذوقك
مهند : بلعافيه يوم ماتتخرجين ويتحول ذهب
ناي : مو مهم فضه ذهب كافي ذكرتني
مرتضى : ليش اني مو ذكرتج
انداريت ولكيت مرتضى ورايه
مهند : هااا ابن العم خيرك
مرتضى : هو اني لو انت الجاي حامي
مهند : شمسوي
مرتضى : اسأل روحك
خوله :هااا خوش واكفين سادين الدرب
ناي : خجلت من عمه وضليت صافنه عليها صعدت الدرج وجان تلزمني من ايدي يله شباب من رخصتكم وسحبتني من نصهم
وقبل لندخل الغرفه كالت بصوت عصبيه
خوله : اذا وكفتي هاي الوكفه بنصهم بعد اكسر رجلج بله اخوج الي اجه مو اني شجان كال مو جان طيح حظج
ناي : ممسويه شى والله جنت اسولف ويه مهند واجه مرتضى
خوله : هاي الوكفه متتكرر لان وراها مشكله حبيره
ناي : ليش
خوله : اسمعي كلام ولتناقشين
ناي : ماشي
دخلت ضايجه وكعدت وياهم متحملت من الضوجه نمت
يومين واني ابتعد من مهند جنت قبل اتهزم من مرتضى هسه مهند ومرتضى مااريد اترزل من عمه
كاعده وبان انطتني دشاديش من عدها
ونسولف حسيتها مقهوره
بيج شى اخاف لان رجعتي
بان : بلعكس حيل فرحت متعرفين هناك شون وحشه وحدنا وعلاقتنا بلجيران شبه ماكو وميقبل نطلع من كل جهه مخنوكه وكيفت حيل من رجعنا جنت اتهزم هناك بلقرايه
ناي : اذا تردين شى اني موجوده
بان : متقصرين اني مكسور گلبي على يونس كل مااتذكر اموت قهر
ناي : اووف حال الضيم حالنا لحد ماعدت ذيج الايام متنا
بان : الله يحفظة
ناي : جنت لازمه خبزه بيها عروك وطماطه وخضره واكل وكلاص الجاي بيدي وكاعده بصف السكراب تكول عبالك كاعده يم برج ايفل اكل ومتونسه وكت عصريه طب مهند شافني وكاال
مهند : تره جوعان
ناي : هههه هااك وقدمت الخبزه
دنك واكل من نفس المكان الماكله بيه اني توقعت ياخذ اللفه من ايدي
هااك اكلها كلها
مهند : ردتها من ايدج واكلتها
ناي : حسيت بنار وخجل كلامه هادئ والبحه الرجوليه بصوته خلتني اخجل لان مصاير هيج موقف قبل ويايه
مهند : اني نهايه الاسبوع ارجع
ناي : ملحكنا نشوفك
مهند : طريق ورايه مااكدر ابقى محتاجه شى
ناي : بعد وين نشوفك سنتين يله
مهند : تردين اروح واجي ماعندي مانع مستعد كل شهر اجي جم يوم بس أمري
ناي : ابتسمت وكتله لا اخذ راحتك الله ينجحك وتتخرج
تقرب وكعد بصفي راد كلاص الجاي يوكع من ايدي من التوتر
مهند : متوقعت ارجع واشوفج هيج كبرانه ومتغيره
ناي : نفس اني ممتغير
مهند : مو على الشكل والحلاه انتي بعيوني من زمان اجمل بنيه بس اقصد على سوالفج حركاتج كعدتج كلشي بيج متغير
ناي : وهذا الشى موزين
مهند : كلش زين اريد طلب منج نايه
ناي : شنو
مهند : ابتعدي عن مرتضى
ناي : مرتضى ابن عمي حاله حال يونس
مهند : ابد لتنجمعون سوه وحدكم وهذا اعتبري طلب واذا مقبلتي اعتبري امر
ناي : صاير شى
مهند : لتعاندين وتسألين هوايه لتكعدين وحدكم وخلص وخلي كلامج وياه محدود
ناي : ان شاء الله
مهند : مااعيد بعد مرتضى لتتقربين منه
ناي : اي كتلك ان شاء الله
مهند : شو جيبيها لازمتها خليتيني اجوع اكثر
ناي : ابتسمت سحب اللفه من ايدي هااك كملها ويه الجاي اطيب كعد ياكل ويسولف ويايه جنت مرتاحه من كاعده يمه وتاخذنا السوالف لحد ماسمعت صوت عمه خوله خليت ودخلت مااريد مشاكل
مهند : لتنزعين السوار
ناي : هههه احاول عفته ودخلت
بقى بعدها يومين وراح رجع للبصره مصار اي حجي بعد بس نظرات جانت عيونه ادور عليه وهذا الشى حيل حسيته
اما مرتضى كل مكان انجمع بيه ويه مهند يحاول يثير مشكله واني حتى اتلافاها اعوفهم واصعد فوك
رجعت عمه بدعه نورت حياتي وحياة اخوتي وخاصه يونس صار شغلها الشاغل اهم شى يونس حتى ملابسه متقبل احد يغسلهن هو وبلال
شوي الحمل خف عليه وخاصه بلال عمه حيل تفتهم بحالته وكامت هي تهتم بيه
مر شهر كامل بين الشغل والدنيا البدت تظلم الامريكان والشوارع متنطاق وبدت سلسله الاغتيالات وكامت الناس تخاف بس على كوله بيبي احنا ناس عتاكه شجابنا على هاي السوالف من شنو نخاف قابل عبيد بوش ويغتالوه لو جوحي صدام ويكضوه
لهاي اللحظه منعرف عمه خوله تسافر او لا واخاف افتح الموضوع وتكول قررت مااريدها تروح تعلمت عليها وبنفس الوقت اريدها ترتاح وهنا بلبيت ماكو راحه ابد
خوله : ايامي بهذا البيت كعد تصعد وتصير خنكه بس مااحجي اكول جم يوم ويتحس وضعي ومع الاسف حالتي بلنازل
كمت الوب نار بصدري احس البيت بگبره صار گبر اليه اصعد وانزل مااعرف شريد اخر شى طلعت للطرمه الجو جان متغير خريف وبيه نسمة بروده غمضت واتنفس وافرك بصدري مثل الواحد لازمنه من رگبتي وخانكني لا بيه اشكي ولا بيه احجي كعدت بلكاع مددت رجليه وتجيت ظهري على الحايط وعيوني على السكراب وكل قطعه بيه اتخبل كل هذا السكراب ينغز بجسمي واجفل وتگلب معدتي من سنين محاسه بهيج احساس يأذي
ناي : ادور على عمه ماكو وين راحت صعدت بلغرف ملكيتها طبيت على عمه بدعه
عمه مشفتي عمه خوله
بديعه : مدري شبيهه طبت شوي وطلعت اخاف جوه
ناي : ماكو نزلت لا بلمطبخ ولا بغرفة بيبي
بديعه : اخاف كاعده بلطرمه
ناي : هاا يجوز نزلت ركض وفتحت باب المطبخ وطلعت لكيتها كاعده بس وجهه اصفر وشفتهه بيضه وتفرك بصدرها مبينه وضعها مو طبيعي طبيت جبت كلاص مي وكعدت بصفها هااج عمه
خوله : شمدريج اريد مي
ناي : من شكلج اشربي عفيه مبينه تعبانه
شربت الكلاص كله ورجعت راسها ليوره
شبيج عفيه صاير شى
خوله : مخنوكه وفدشى على صدري كاعد والوبه بروحي صايره وكارهه الدنيا والي بيها
ناي : احد ضوجج
خوله : لا بس صار كم يوم وضعي مخربط وكلت هسه اصير زينه اخذ مسكن حبايه وجع راس وانام واكعد زينه كمت انام اكعد متكسره وكوه اكوم ومن اتحرك جني شايله جبل على ظهري لو صاعده ركض مكان عالي حتى مرات اكعد الهث من التعب
ناي : نروح طبيب يونس ضام جم فلس يمي ناخذ منهن ونروح
خوله : عندي مصرف بس الشغله مو مال طبيب
ناي : وشراح نسوي خوما تبقين هيج
خوله : ماادري خلي اشوف اليوم بلكت اصير احسن راح اطب اسبح واطلع اصعد انام بلكت اصير احسن
ناي : اني اسبحج
خوله : ابتسمت على حجايتها ليش هيج وضعي يخوف
ناي : لا والله بس اخاف عليج
خوله : جنج امج هم من اتعب اداريني الف رحمه على روحها
ناي : الله يرحمها كومي يله ومديت ايدي وكومتها وصعدت جبت ملابس الها والمنشفه ولكيتها متقيأه بلحمام واكعه بس صاحيه طبيت ركض ميته خوف عليها عفيه شبيج خلي اصيحهم ناخذج للمستشفى جان تلزمني من ايدي وكوه تحجي
خوله : لتصيحين احد ولا تحسسيهم بس كوميني واذا تكدرين سبحيني واذا متكدرين صيحي بدعه
ناي : اكدر عمه شون مااكدر كومتها وكعدتها على التخته وفتحت البوري البارد والثاني الحار وكعدت اكاسر بلمي بلطشت لحد مصار مناسب ورفعت دشداشتي ودنكت حطيت الطاسه الصغيره بلطشت وذبيت المي عليها كلت بسم الله الرحمن الرحيم مباشره عاطت لتسمين لتسمين
جفلت منها وخفت اكررها وذبيت الطاسه وبقيت صافنه عليها كورت نفسها وحطت راسها ودنكت وتون
عفتها شويه من الخوف تالي قوي گلبي لان وضعها موزين عفيه عمه عدلي نفسج بعد مااسمي
رفعت راسها ودموعها تصب يأذوني اطلعي بره
ناي : لا مااطلع وراح اسبحج بدون مااحجي شى وعد حركت راسها بحركة تعب ويأس وبديت اغسل الها خفت اسمي او اقرا شئ وتإذي نفسها ويجوز حتى تإذيني
سويت الي رادته وسبحتها وهي هادئه كلش ولا جنها عمه خوله ام صوت الي يلعلع كل الوكت
كملت غسل ونشفت جسمها وبدلت الها وهي طول هذا الوقت ساكته وتساعدني من البسها خليت وطلعتها
نزلت عمه بدعه
هاااا خيرج
باوعت على عمه وكالت بصوت ناصي اريد نجم
بديعه : صاير شى
ناي : والله ماادري سألتها مجاوبت
خوله : جيبولي نجم
بديعه : خلي يجي فلاح وادزه تعال نصعدج فوك حتى ترتاحين
خوله : جنت امشي وياهم واني حيل مابيه مثل العاجز ويمشوه يمكن اذا لزمو جسمي وكطعو لحمي مااحس جسمي خدران وبنفس الوقت گآبه نار مثل الصخونه الداخليه وكل شويه عقلي يوكف عن التفكير واشوف شغلات مااريد اشوفها اتعب من اشوفها واتأذه وافقد احساسي بلداير مدايري كل ماانسحب لذاك العالم احرك وجهي او اعيط حتى ارجع للوعي مالتي بقى الشى الوحيد بالي واردده حتى لا افقد اريد نجم
ناي : كعدناها لعمه وفتحت المنشفه من راسها وجبت مشط وامشط الها اباوع خصل طوال توكع من شعرها خفت من منظره ياخصله الزمها كومه يوكع كمت احط الشعر بيدي اخاف تشوفه وتخترع
بديعه : رايحه اسويلج شوربه اخاف معدتج استبردت
خوله : كلشي مااريد صيحولي نجم
ناي : ماكو احد بلبيت جان صحناه
بديعه : شويه ويجي فلاح وادزه وعيونج بس ارتاحي
ناي : ساعه ننتظر عمو فلاح وخلال هاي الساعه انذكر اسم نجم اكثر من ٦٠ مره كل دقيقه صار هوسها نجم
ركضت عمه من سمعت صوت فلاح ودزته
سحبت راسها بحضني وبديت العب بشعرها وادلك راسها وهي ساكته وعيونها مترمش
عمه تسمعيني
هزت راسها اي
احجي خلي اسمع صوتج
خوله : ديأذيني
ناي : منو يأذيج
خوله : ميقبل يعوفني
ناي : منو هو احجي فدوة غمضت عيونها واحس معالم وجهه مثل الواحد عنده مغص كل شويه تنعقج ضربت بهدوء على وجهه عمه تسمعيني اريد اصحيها خفت تنام وتفقد رفعت ايدها بهدوء وحطت اضفرها على رگبتها وادوس حييل هنا خفت اعوفها لو شسوي سحبت ايدها من رگبتها وهي تقاوم وتدفع اضفرها برگبتها
ياربي دخيلك عمه فدوة صحصحي وضليت اضرب على وجهه وماكو فايده وخرت راسها من حضني وجبت دولكه قريبه محطوطه بلكاع بيها مي وحطيت شويه بيدي وسميت
بسم الله الرحمن الرحيم اللهم صلِ على محمد وآل محمد كررتها ٣ مرات جان تنزل ايدها مرعوبه وخايفه وماافهم بس شايفه عمه بدعه من جان واحد بينا يصخن تغسل وجهه وتسمي وتصلي على النبي
بدت ترمش بعيونها وتون باوعت على رگبتها شون الاضفر نابت
اجت عمه وكالت خليت العدس على النار شويه وتكمل الشوربه
ناي : ياشوربه هو قبل شويه صرنا شوربه
بديعه : شصار
ناي : حجيت لعمه وارجف
بديعه : سلام قولاً من رب رحيم وشون بقيتي واكفه ولج مخفتي
ناي : متت رعب وبنفس الوقت مااكدر اعوفها خاف تإذي نفسها
بديعه : شجاها صار سنين البنيه طبيعيه
ناي : احجيلي قصه عمه
بديعه : مو هسه يمه تكبرين بعد واكول الج
ناي : صرت ١٥ سنه شوكت بعد تكولين اليه
بديعه : من تكبرين بعد اكثر هسه مو حجيت الج قصه امج
ناي : بس مكتيلي عمو نجم جان يحبها
بديعه : منيلج هذا الحجي
ناي : ذاك اليوم سمعته شون يحبها لهسه شون امي تحب عمي وابويه مو حرام مو تعتبر خيانه
بديعه : امج اشرف منها ماكو وعقلج ليوديج لبعيد
ناي : انتي حجيتيلي وكلتي على زواج بابا من مره ثانيه وهي جليله وخلفت شرهب وعرفت هي اختي من بابا وشون ماما الله يرحمها اخذتها وربتها وراها صار الوضع موزين بينهم وصارت عركه بين ابويه وامي وابويه دفعها بلحظه عصبيه وحجيتي شون ماتت وشون عمه خوله كالت لاخوها واخوها شون كتل بابا وانعدم بس ماكلتي سبب العركه شون ودوم ساهره وصالحه يبسمرن وامج السوته وبس لا اطلعين مثل امج امي شمسويه عمه
بديعه : ليش تلحين ياعيني مو كتلج ماكو اشرف من امج
ناي : تدرين من سمعت عمه نجم شون متأذي على ماما كرهته هيه غير مرت اخوه شون هيج يحس اتجاهه
بديعه : لا مبين عقلج شاطح هوايه خلي يجي نجم علمود خوله ونفض سالفتها واسولف كلشي الج لا انتظر تكبرين ولا بطيخ عقلج مبين رايح لمكانات بعيده واذا سكتت راح تنلاص اكثر
ناي : اي عفيه تنلاص
اندكت الباب وطب عمو نجم درت وجهي منه ضايجه من كلامه اريد افهم شنو الصاير والصحيح تقرب من عمه وحط اذانه يم حلكه
خوله : وديني بعد مااتحمل
نجم : وين
خوله : للسيد الجبته
نجم : شصار احجي احد أذاج
خوله : مااعرف بس وضعي حيل تخربط
نجم : اندار نجم على بدعه وناي
من اشوكت هيج
بديعه : صار كم ساعه ولو من يومين وضعها مو راحه
نجم : بدلو ملابسها وخلي اخذها
بديعه : وين
نجم : افرها شويه تغير جو
بديعه : بربك وكت فر هسه
نجم : يله بسرعه بدلولها
خوله : لبسوني البنات بدت اوعى واحس على نفسي وقبل لا اطلع سحبت ربطه واخذتها ويايه مابيه حيله يحجي عليه ويكول البسي ربطه
تمشينا مسافه بدا الهوا يتغير عندي واهدا وارتاح والخنكه تخف تدريجياً
صعدنا تكسي وطول الطريق فاتحه الجامه ومطلعه نص وجهي اشتم هوا اوف شكد الهوا عزيز ميحس الواحد بعزيته اله يختنك
وصلنا ونزلنا لباب بيتهم بعد مطلعت روحنا لان نص الشوارع مكطعه لو امريكان سادين الطريق
نجم : يله انزلي
خوله : نزلت وجان باب بيتهم شبهه مفتوح دك الباب نجم باوعت على البيت انكرب گلبي امشي نرجع نجم
نجم : شنو دنلعب
خوله : عفيه امشي نرجع
نجم : شبيج خوله كولي ياالله ورجع دك الباب
خوله : صرت زينه امشي نرجع جان اسمع صوته هاا وين رايحه طلع من باب الاستقبال مالتهم جان بيت بسيط فتح الباب وعلى وجهه ابتسامه هادئه وكلها ثقه مثل واحد ينتظر واحد لابس دشداشه سودا ويشماخ اخضر
السيد : تفضلو
خوله : لزمت ايد نجم بخوف اجت عيون السيد على ايدي اشر تفضلو
دخلنا وجانت عيوني تتنقل بكل مكان البيت بسيط ونظيف وكله ريحه طيبه مااعرف مال شنو يجوز ريحه بخور بس جنهه مو بخوف ردت اسأله هاي الريحه منين بس استحيت دخلنا بغرفه بيها كعده عربيه
كعدنا وهو گبالنا ضل يسولف ويه نجم واني عيوني تتنقل من مكان لمكان جان اسمعه يكول
اختنكتي مو
خوله : اي اول مدخلت جنت مرتاحه وراها بديت اختنك مثل مجنت بذاك البيت
السيد : هاي كلها تراكمات مال الضربه القديمه وذني العدكم بلبيت مديبطلن شعوذه واكو رش جديد مبين وضعيتهن هاي الفتره مامستقره وبدن يشتغلن ثكيل
خوله : شلون اخلص منهن تعبت وحيل مبقى بيه ساعه صحتي كلش زينه اركض ركض واشتغل واتحرك واتعارك واعيط وساعه ايدي مااكدر اشيلها
السيد : لكل داء دواء وكل داء الله خلقه وخلصه السحر دواه القران والالتزام بلصلاه وانتي ذني اثنينهن مبتعده منهن شون تردين اطيبين وانت متاخذين العلاج
خوله : انطيني اي شى مستعده اخذ اتعس علاج لو مر زهر بس الصلاه مااكدر التزم بيها والقران من اسمع صوته تتهستر اعصابي
السيد :انتي من البدايه متعالجه صح مجان وصلتي لهاي النقطه
خوله : غير من وره الميخافون من الله ضيعوني ومن وره السيد الله لايرحمه ولا يشم ريحه جنه كل الساده كلاوجيه
ابتسم السيد ودنك وكاال مشكوره رحمه الله والديج حسيت على روحي وخجلت
العفو مو قصدي بس قاطعني وكال
السيد : مو معناها واحد ماعنده ضمير واتصرف وياج غلط معناها الكل موزينين بكل مله اكو الزين واكو الشين اني نجم حجالي كلشي عنج واذا تحكمين على السيد المات مو خوش انسان وأذاج وكلاوجي مثل متكولين لتنسين ابنه شلون بدا العلاج وياج وجان سيد محترم ويخاف الله مو كل اصابيعج سوه
خوله : اي الله يذكره بلخير صدك خوش انسان عفيه اني اريد اطيب
السيد : واني هم اريدج اطيبين واول طريق للعلاج لازم تأمنين بأمر الله علاجج كلشي بلدنيا يمشي بأمره الواحد الاحد
وبعد الايمان الالتزام بلصلاه
خوله : مااكدر التزم
السيد : تكدرين كلشي تكدرين
خوله : كتلك مااكدر امشي نجم نطلع
نجم : اوكفي شبيج
السيد : على كيفج لتتعصبين
خوله : احجي وياك ومتفهمني
السيد : بلعكس اني اكثر واحد فاهمج شوفي اختي كل سحر اله علاج بلقران والالتزام بأيات معينه تنقري بأوقات معينه وصلوات وركعات وتسبيحات هي اول مراحل العلاج
تدرين شنو مشكلتج ومشكله هواي ناس مثلج
ميحبون الله
خوله : هااا شون منحبه حرام تكول هيج
السيد : احجي واقع محبه الله هي الطريق للالتزام هواي ناس تصلي تخاف من النار والعقاب مو تصلي لان تحب الله وتتمنى رضاته وشوفته اكو فرق من تحب واحد ومن تخاف منه يوم متحب راح تسوي المستحيل لو على حساب نفسك لو كل الناس تحب الله مثل ميحبون اولادهم ابائهم امهاتهم احبائهم جان ولا واحد تأخر عن الصلاه ولا تركها طبيعة البشر من يحب يضحي بوقته وساعاته وكلشي يملكه حتى يرضي محبوبه واني احجي عن المحبه الكامنه من القلب الي تأدي الى العشق راح يفقد حتى روحه لارضاء المحبوب زين ليش منرضي اعظم حبيب وهو الله ليش منحبه ونسوي الشئ الي يحبه وهي الالترام بلصلاه والابتعاد عن كل شى محرم ويغضبه وقت مراح نحبه ونرضي راح يرضى علينا بسم الله الرحمن الرحيم
يَاأَيُّهَا الَّذِينَ آمَنُوا اذْكُرُوا اللَّهَ ذِكْرًاكَثِيرًا . وَسَبِّحُوهُ بُكْرَةً وَأَصِيلًا . هُوَ الَّذِي يُصَلِّي عَلَيْكُمْ وَمَلَائِكَتُهُ لِيُخْرِجَكُمْ مِنْ الظُّلُمَاتِ إِلَى النُّورِ وَكَانَ بِالْمُؤْمِنِينَ رَحِيمًا . تَحِيَّتُهُمْ يَوْمَ يَلْقَوْنَهُ سَلامٌ وَأَعَدَّ لَهُمْ أَجْرًا كَرِيمًا}
المطلوب منج حبي الله ومن تحبي من گلبج متحسين روحج غير اطلبين رضاته ورضاته ماكو اسهل منها الالتزام بلصلاه والابتعاد عن المحرمات وانتي مامسويه محرمات يعني باقي بس تصلين وتصومين وتقرين قرأن
خوله : واذا مصليت
السيد : مراح اطيبين
خوله : اغير المكان العايشه بيه
السيد : ما اكول الج المكان ماله تأثير اله بس بنسبه ٢٥٪ والباقي انتي العله بيج السحر بيج وبسبب تأخر العلاج من سنين زادت الحاله اختي شدي حيلج ويايه حالات اصعب منج وطابو ورجعو لحياتهم بس حسنو الظن بالله وحبوه وادوا الواجب عليهم فَاذْكُرُونِي أَذْكُرْكُمْ
خوله : جريت نفس محتار وبنفس الوكت كلام السيد صحيح
اكو شى اريد اكوله
السيد : احجي اي شى يجي بالج واذا منحرجه كولي لنجم وهو يكوله
نجم : احجي كلشي لتستحين
خوله : احس الي يصلي حظه قليل لو تضل الدنيا تكفخ بيه لو ميتوفق وبس المشاكل والبلاوي يعني الملتزم ويخاف الله ويصلي ويصوم دوم الدنيا عاوجه ويااه اخاف اصلي وتعوج ويايه اكثر ماهيه عوجه
ابتسم بهدوء وكال
بسم الله الرحمن الرحيم
وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ}
البلاء والمصايب واعوجاج الدنيا يااختي اختبار لصبر المؤمن وعزيمته
قد مايكون البلاء عقوبة او اذيه للمؤمن يجوز يكون خيرًا لهم لرفع درجاتهم وإخلاص قلوبهم لله تعالى حتى يزدادون لله قربًا وتضرعًا، ومن يزيد الايمان بقضاء الله ورضا العبد بكل شى يجي ويصير بيه هو مفتاح رضا الرب فإذا رضي الرب رفع الكرب
ابسطها الج انتي هسه خريجه كليه مو صح
خوله : لا معهد
السيد : ماكو فرق يعني اقصد دارسه وممتحنه وشايفه اشكال شنو الي يفرقج عن زملائج اليوم الاستاذ طب شرح وانطه الماده وطلع شنو الي يميزج ويخليج تستاهلين تروحين للمرحله الدراسيه الي بعدها انتم كلكم نكول بيكم ٣٠ طالب ياخوله شنو الي يخليج تتميزين عن ال٣٠ طالب
خوله : ماادري
السيد : الامتحان تقرين واتعبين نفسج وتسهرين الليل واحتمال من القلق حتى اكل متاكلين والاستاذ يجيب اسئله صعبه اتجاوبين عليها واذا جاوبتي صح نجحتي ورحتي مرحله جديده رسبتي ضليتي بمكانج
المؤمن نفس الشى ربج يدز اله البلاء ويبتلي بنقص بالاموال والانفس وغيرها حتى يشوفه راح يستاهل ينجح ويصعد مكانته لو يبقى ميطول من رحمته شى
واذا بيوم شفتي ظالم مرتاح ومتهني لتحسدي اياج متعرفين رب العالمين شنو الظامه اله واذا مو بلدنيا بالاخره كلنا نشوف الامور من جانب واحد ونحكم على اساسه وهذا اكبر غلط انتي مالج دخل بهذا وذاك ادي الي عليج والباقي عند الله جزائه
خوله : رجعت راسي للحايط وغمضت حسيت بألم براسي فضيع
السيد : ابدي بشي سهل هااج
خوله : فتحت عيوني وحط سبحه بيدي
السيد : سبحي واذكري الله وراح تهدين
خوله : اتعب ويأذوني ونزلت دمعتي
السيد : وانتي سباعيه واقوى منهم ورب العالمين ميعوف عبده المظلوم وانتي انظلمتي قوي نفسج بأيمانج ومره تتأذين ومره توكعين لحد ما شوي شوي تتحسنين واني انطيج شغلات تشربيها بأوقات محدده مختوم عليها ايات قرأنيه وشغلات تسبحين بيها ومن شويه تتغير حالتج انطيج احراز تلبسيهم وذوله كلهم ايات من القرآن بس توكلي وكولي ياالله
نجم : اني مفكر اسافر واخذها
السيد : هو الابتعاد عن ذاك البيت من جانبها لان الظاهر الجماعه عدهم شغل قوي وكعد يأثر عليها
خوله : مالهن حل سم شى اكتلهن واخلص منهن ماكو هيج نسوان لا يخافن لا يملن لا يتعبن
السيد : وَمَنْ يَتَبَدَّلِ الْكُفْرَ بِالْإِيمَانِ فَقَدْ ضَلَّ سَوَاءَ السَّبِيلِ
صدق الله العظيم
الهم يوم يااختي وهذا الشئ عند الله علمه
خوله : تعبت اريد اروح
السيد : الزمي السبحه زين
خوله : لزمتها وبديت اتأذه واقاوم احاول اسمع كلام السيد وكوه ينطق لساني اسم الله بس اجبر نفسي قرا على راسي حدود نص ساعه جره وحده بلبدايه حيل تإذيت وگب نار جسمي وراها برد وهدأت حتى نفسي انفتح وكال وراج جلسات هوايه هذا الشى بسيط
طلعنا منه واني تعبانه ونعسانه
نجم : ارجعي اگلي يله تنامين
خوله : مااشي اخذنا تكسي ورجعنا
ناي: كعدت عمه بدعه تسولف كلشي على ماما وعمو نجم وبابا حجت القصه كلها ساعه انقهر وساعه ابجي وكل ساعه انطي الحق لواحد لو الوم الثاني وصلت اخر شى وعن قناعه امي المظلومه الوحيده بهذا البيت كله ومااتت موته تقهر حقه يونس ميحجي بلموضوع ودوم يتخيل شكلها ويتأذه
بديعه : وداعتج وداعت بان كل كلامي هذا صار والكل يدري بيه وامج ماكو بطيبة گلبها وحنانها صاحبة اخلاق وكلمة حلوة هاديه نسمه طيبه كل مغثه منها ماشفنا
ناي : وشحصلت تاليها سكنت النجف واحنا البقينا وحدنا اندور حنان هذا وذاك
بديعه : هااا ولج اني هذا وذاك
ناي : مو قصدي عمه شون افهمج
بديعه : حضنتها وبستها ادري بيها مكسوره ويوميه واحد يخذلها
ناي : كون مو جم يوم ويكول عمو امشي لكيت شغل وتعوفينا
بديعه : شحده هلمره بعد ماامشي بشوره شحصلت من روحتنه هاي الجم سنه رجعنا ايد وره وايد ليكدام بس الكاع ضلت كاتلها الوصخ والعلاليك مال زباله
وحرمني منكم وهمزين بان وراح يصير عمرها ١٨ سنه وبعد ميكدر يجبرها وياخذها وياه اذا سواها
ناي : ان شاء الله تتعدل اموره هنا وميحتاج ياخذكم
بديعه : امين اي يمه ادعيله انتي يتيمه ومكانتج عند الله جبيره
ناي : ادعيله والله ولخاطرج بلذات
بديعه : كومي أحبيبة نكمل شغلنا
طبت بان
بان : هاي انتن هنا واني كاعده اشتغل
ناي : اجينا
بان : عقوبه عليجن غسل مواعين الغدا
بديعه : تخافين على اظافرج ادري بيج
بان : غير كوه طولتهن
ناي : تعالي شوفي اصابيعي جريدي وماكل اضافيري
بان : بعدج تاكلين اضافيرج
ناي : من اتوتر واخاف لو اتعب ماعندي تسلايه غيرهن اكل بيهن مرات اذا مقهوره حيل حتى دم يطلع منهن
بان : مصاصه دماء صايره
ناي : هههههه شنسوي لو هيج لو اتخبل
بان: ميفيد الحجي تقشمريني المواعين عليج
ناي : تدللين
هاي الفتره حسيت بان تتقرب مني جنت مستغربه تقربها هي بطبيعتها هادئه وبارده وعلى كد السؤال تجاوب بس من رجعت تضحك ومن تشوفني بلمطبخ تكعد تساعدني وتعلمني هيه كلشي تعرف عمه معلمتها
واني ماعندي احد احجي وياه واسولف حبيت تقربها مني وكمت اضحك واشاقه وياها ياريت تبقى هيج دوم
رجعت عمه وجانت ساكته
بيج شى
خوله : نعسانه
بديعه : وين رحتو عفيه
نجم : خلي تنام وترتاح وهي تسولف الكم اني اروح تأخرت على شغلي
بديعه : الله وياك
نجم : بيج شى عمو شو احسج ضايجه مني
ناي : لا ماكو شى
نجم : متأكده
ناي : هزيت راسي اي جنت ضايجه منه لان احس هو هم يتحمل مسؤوليه موتت امي
نامت عمه واني نزلت يم بان نكمل شغلنا واجت سما
سما : اكلج ناي يونس شوكت يجي
ناي : فتحت عيني هاي شجاها اول تالي تسأل عن يونس وهيج علني وكدام بان
شمدريني نفس وقته كل يوم
سما : مو ضل بالي عليه
بان : سلامة بالج
سما : اكو شى
بان : كتلج سلامة بالج
وابتسمت بان ودارت وجهه تكشر بتيته
سما : من يجي كوليله سما سألت عليك
ناي : اني مثل الهبله بلنص بس اهز براسي شصاير
طلعت من المطبخ سما جان تندار بان تضحك
باي : گلبي ممرتاح اكو شى والله هذيج علني تسأل عن يونس ومخايفه لا تسمعها امها وانتي تضحكين وتجاوبيها شصاير
بان : بت عمج الطفله الزعطوطه عبالها اني احب يونس وغارت عليه
ناي : وشجابج على يونس وليش هيج حست
بان : يمكن لان شافتني مرتين اسولف واضحك وياه وهاي شبت نار خليها متونسه على غيرتها
ناي : وانتي متحبين يونس
بان : شوف الثانيه صدك مراهقات بابا يونس اخويه واصغر مني اني احبه اكثر واحد من ولد عمي لان طيب وعاقل ورزن واتحمل مسؤوليه وهو صغير والصراحه جنت احسدج انتي وشرهب عليه اكول لو عندي اخ مثله ومن اشوف شون حباب ويايه وميفرقني عنجن اكول يله هم اعتبر اخته لان تربينا سوه
اني كعد اضحك والعب بأعصاب المسمومه بت المسمومه اما يونس اخويه وحيل اعزه واحترمه وكال اخاف تحتاجين شى بلدراسه اكو مدرسه بنهايه شارعنا لان هلسنه سادس بكلوريا ولازم معدل اوديج الها متاخذ هوايه خلف الله عليه دومه حباب وصاحب واجب
ناي : دومة شايل هم غيره
بان : الله يرزقه يله لتجي بدوعه وترزلنا
خوله : كمت امشي على كلام السيد واتأذه وابجي واشكال تصير بيه سوالف قررت اطلع من البيت بعد ماشفت ناي وخواتها مستقرين ويه بدعه ومرتاحين اعرف ناي تلوب وحتى صايره من تنام تتقصد تنام يمي حتى تحسسني شكد متعلقه بيه عبالها ماادري بس بقائي صار مؤذي واخاف يتأذون ويايه ضليت ايام افكر شون اقلل من عذابهم هذني ساكتات هسه لان اني وبدعه بس اذا رحت وطلعت بدعه فقيره مراح تگيش وياهن
رفعت تك حاجب ماكو غير هذا الحل اروح ويانه نجم اذا سافر بس قبلها اضعف اساس العدو واطبق قانون فرق تسد
اليوم جمعه والولد مطالعين بلبيت وجوحي فوك بغرفته وساهره يمه وابنه جوه ويه بان ويونس صعدت استغليت كلهم جوه دكيت الباب
ساهره : تعاال
خوله : اجي ليش لا
ساهره : ياستار شكو جايه هداده
خوله : شعندي وياج قابل لو اجي هداده ادك الباب من كل عقلج
جوحي : شرايده خوله فضينا
خوله : راح افضك سديت الباب وطبيت وكعدت بصفه على الجربايه جان متمدد ومبين النوم بعينه هستوه كاعد وساهره يمه عود قيس وليلى عشتووو
ساهره : شتردين اول تالي صاعده وهيج بكل اريحيه متعيطين
خوله : شوف ياخويه وانتي اسمعي وياه لان اثنينكم مشمولين تلم غراضك وخلال اسبوع تطلع من البيت
كعد على حيله بعد مجان متمدد هاااا اطلع من البيت شتحجين تخبلتي وانتي منو اطلعيني من البيت
خوله : اذا مطلعت اكول لاخوك الجبير على سوالفك شون لعبت عليه وطمعت بحصته واكلت فلوسه وحطيتهن على گلبك وهو مسح ايده بلحايط وكل الصار تخطيط منك لانك واحد طماع حرامي مردت الخير اله وتعرف عبيد واحد اغم عربانه بدفعه يسويها دم
ساهره : يافلوس وين عدنا فلوس
خوله : اذا تعرفين بكل الحجيته عقلي رجلج واطلعو من البيت احس مطلعون بجلاليق متعرفين بدكت رجلج معناها شكد خوثه وطرنه ومابيج نفع بحيث رجلج وابو ابنج وصار ٢٠ سنه وياه ومتدرين بكلاواته
جوحي : ميصدكج عبيد واني هم فلوسي راحت ويااه
خوله : هههههه لك شايفني زوج لو اتقشمر مثل الزواج الجوه من وجهك عرفت جذب جوحي ضاعت اله ملايين وكاعد وساكت اني متخبله ذوله شون صدكوك
ساهره : ماعندج دليل على كلامج
خوله : اي هيج احجي مكشوف توقعت تدرين بدكت جوحي بعدين حياتي ميحتاج دليل كافي احطها باله وانت شوف شراح يصير وصلوحه مراح تسكت راح تلعب جوله والبيت اظلم حتى سحوره غنيه تشغلها عليج لتجعصج مثل الطماطه بلباميه وداعتج ومااحلف بيج صدك
ساهره : اكيد تخبلتي
خوله : اي اني وحده خبله واذا مطلعتو الجمعه الجايه بنفس هذا التوقيت اني بغرفة عبيد
ساهره : تخبلتي اكيد غير يتمالخون
خوله : نسيتي تاريخي الاسود لو اذكرج مو اني نفسي الي سلمت صمد لفوزي لو مو اني يعني ماكو اسهل منها اسلم جوحي لعبيد وبذاك الوكت اخلص منكم كلكم لهذا جفو الشر واخذ مرتك وابنك واطلعو من البيت
جوحي : وانتي شتستفادين
خوله : هيج ابرد راسي منكم لعبتوها لروحي معدتي كعد تگلب منكم شوف وهاي كدام مرتك اليوم جمعه عندك الجمعه الجايه انت ماكو
جوحي : وشكول لامي واخاف عبيد يحس ميكول منين جبت فلوس وطلعت من البيت
خوله : هاي مشكلتك مو مشكلتي عندك دخل هواي البسطيات وشغلك يدري بيك بخيل وتجمع مو شى جديد كول الله هداني ولو استبعد هذا الشى هداني واريد اطلع ابني صار بطولي او شوفلك اي فلم قشمره بيه مثل مااكلت ملايين منه والغبي صدكك
ساهره : شوكت الله ياخذج
خوله : يومج گبل يومي حياتي العندي كتله الجمعه الجايه تطلع واستر على نفسك تره عبيد انت اكثر واحد تعرفه من يتعصب ميشوف كدامه وهاي اذا مااخذ فلوسك كلها افلت بروحك وبفلوسك الحرام واطلع من البيت
عفتهم وكمت واحد صافن بوجهه الثاني وطلعت لكيت مرتضى طب يركض عليهم حتى طخني بجتفي من استعجاله هذا شجاه
وابوه عاط اطلع بره لان اكيد كاعدين يفكرون شيسون واسمعه يكوله
اريد اخطب ناي اذا متخطبوها اليه احرك الدنيا
يتبع .....
رواية الابواب الخمس الفصل السادس وثلاثون 36 - بقلم ريام هادي
#الابواب_الخمس
البارت الثاني والثلاثون
للكاتبة Reem
(بارت طويل لعيونكم )
كبر همنه يصاحب شفتهمنه
نعيش وماكو واحد يفتهمنه
دگلي احنه بعمرنه شفتهمنه
مغثه وقهر كل صبح_ومسيه
خوله : وابوه عاط اطلع بره لان اكيد كاعدين يفكرون شيسون واسمعه يكوله
اريد اخطب ناي اذا متخطبوها اليه احرك الدنيا
خوله : رجعت فتحت الباب عليهم ودخلت
لك شتريد
مرتضى : شبيج عمه
خوله : وعمه العماك اسمع لك هاي كدام ابوك وامك واعرف همه رايهم مثلي ناي تبتعد عنها اذا هيه بلشمال انت بلجنوب واياك بيوم تتقرب منها
مرتضى : مردت شى موزين اني احبها واريدها
ساهره : صخام الصخمك هاي البقت اخذ بت ذكرى
خوله : وشبيهه بت ذكرى عيني تسوه راسج وراس ابنج هذا
مرتضى : انتي ليش تكرهيني شسويتلج
خوله : اني مااكرهك بلعكس احبك بس اكره ابوك وامك لان مو خوش اوادم
جوحي : انجبي تره اكوملج
خوله : يابه دطير تكوملي ادري بيك ايدك والضرب ماعندك غير سالفه شوف مرتضى لو ناي تضل اخر وحده بلدنيا اياك تتقرب منها هاي البنيه متناسبك وانت تعرف امك متريدها مو تخلص عمرها متحمله الضيم وتاليها تصير جنه لساهره غير احركها لناي اذا تفكر بيك اصلاً
مرتضى : لعد ومهند مو هم امه متحب ناي وناي متحبها شمعنه ناي تفكر بمهند
خوله : منين جبت هذا الحجي
مرتضى : اني شفتها بعيني تحجي وياه وقبل شويه شفتها لابسه سوار هو جابه الها
خوله : وانت ابو العقل الصغير اجيت ركض تعالو زوجوها اليه والله شنو لابسه سوار ابن عمها ومثل اخوها جابه هديه نجاحها لك ادري بيك بعدك صغير وعقل مراهق بس متوقعت غبي
ساهره : جوحي احجي ويه ابنك هذا تخبل يريد يجلطني
جوحي : مو بكيفه انت بعدك صغير يازواج عندك فلوس تتزوج لو بس زوجوني
خوله : اي عفيه اخذ المفيد من ابوك لان ابوك سوده عليه ماعنده حسره عليه الفلس مخلصها يجدي من الوادم وانت تريد زواج وفلوس ومصرف وابوك اكطع من لحمه وذبه للجلاب ولا تاخذ فلس منه
جوحي : سدي حلكج وكافي لغوه ولي اطلعي حجيتي هوايه مالج دخل بأبني تره من قبل شويه ساكتلج ليش تخليني اكوم اطلع قهري بيج اني وابني انتي شكوو
خوله : يله على اساس ابن الجواهري وماادخل بيه وثاني شى مد ايدك عليه وشوف اخاف كتلك الجمعه الجايه اسويها بهاي اللحظه وخليها خوش تعلك ماطول الشغله حاميه
مرتضى : شكو الجمعه الجايه
خوله : ياااا ما كتلك غير ابوك وامك راح يطلعون من البيت وتكعدون بيت وحدكم انفكت الجبسه وابوك الشيطان كفخه على راسه وراح يطلع جم فلس من الدافنهن ويكعدكم وحدكم
ساهره : ماكو شيطان غيرج من يوم الشفناج ورجعتي لهنا ماشفته اي خير كل مااكول خلصنا منج ترجعين مثل ملك الموت وتنطين بنصنا
خوله : سهوره حبيبتي تردين تخلصين مني اخذي رجلج وابنج وعيشو بره هذا البيت راح يبرد راسج ومو بعيد يجي يوم تشكريني
مرتضى : اني مااطلع باقي هنا
خوله : لتعرض الهم اهلك ميضلون وانت سالفه ناي اشتري راحه بالك ولتفكر بيه تماماً
ساهره : هو بكيفه غير اتبره منه العمر كله مبقت عليه غير هاي وانطيها وحيدي
خوله : جنج امي خلصتها وحيدتي وحيدتي وطيحت حظي هسه انتي هم نفس الشى وحيدي وحيدي وراح تنعلين اهل اهله
مرتضى : شبيكم مماخذين الموضوع بجديه اكلهم اريد اخطب ناي اني احبها
جوحي : انجب ولتفتح هذا الموضوع ابد
مرتضى : واني اذا مزوجتوها اليه اگلب البيت عليكم
خوله : تقربت من ساهره وبصوت ناصي كتلها
اطلعي من البيت قبل ماابنج يسوي شى بنفسه حتى يتزوج ناي اذا بقيتو هنا راح تضيعي منج وهاا يمكن ازوجه ناي اذا بقيتو
ساهره : ليش تردين نطلع خبلتيني شنو غايتج
خوله : خليت الغايات والدسايس الكم مرايده شى اطلعي ساهره وتلاحكي للباقي تره رجلج وابنج على الحافه واحد اذا عرف بيه اخوه بايكه راح ينهي والثاني مراهق هايم وره بت عمه الي انتي متحبيها
خوله : عفتهم وطلعت بس واكفه اسمعهم زاد النقاش بين جوحي ومرتضى تالي كام جوحي وضرب مرتضى
مرتضى : حطو بالكم اذا ناي بيوم صارت لغيري اسويها عزه عليكم وعليها
جوحي : انجب شحدك اكسر راسك صاير رجال ويهدد الخايس احسن ماتهدد وتعيط بوجهنا روح اشتغل كون نفسك مو تريد ازوجك وانت كلك اول كليه واصرف عليك وعلى مرتك شعندي فاتح بنك لو وارث عمارات من ابويه وفوكاها يحجي بعنتكه ويايه
خوله : نزلت وعفتهم لكيت بدعه وناي واكفات بصف الدرج جوه يردن يسمعن
بديعه : شصاير نسمع صوت عياط
خوله : عائله متحابه اب وام وابن ويتناقشون بإمور الحياه لتخلون بالكم وياهم
ناي : سمعت اسمي
خوله : اذنج بيها مي امسحيها زين
بديعه : ناصبه علينا حضرتج
خوله : اهووووو اصعدي يمهم واكعدي بنصهم وافهمي شكوو لو اتصيحين سهوره وتسأليها ولدوخيني
بديعه : اكص ايدي اذا متعرفين شكوو
خوله : نايه كلاص جاي وحبايه براسيتول راسي راح يطك
ناي : اي عمه
بديعه : شوو تعالي وسحبت خوله وكعدتها بعد مراحت ناي شوفي هاي سوالفج مو عليه شجنتي تسوين يمهم وليش علكت
خوله : احجيلج وتحلين عني
بديعه : يوم كامل مااشوفج وجهي بس احجي
كعدت تسولف بهدوء ولا جنها گالبه الامه فوك وفوكاها تلعب بشعرها ومسترخيه جنهه وحده شافت حبيبها وسمعها كلام غزل وفرحانه
دهر الدهرج يلمسودنه
خوله : هااا عمشه شنو انگلبتي امي
بديعه : تخلين الطابوكه تحجي كل هذا سويتي فوك ونازله ولا جن الموضوع يمج
خوله : كتلج كلشي هسه انصرفي مااريد يوم كامل اشوف جهرتج
بديعه : اوكفي اوكفي خلي افهم اول شى شخبله هذا منعول اللشه وراد ناي وينه وين الزواج بعده هستوه طلع من البيضه
خوله : تره مرتضى مو صغير بعد سنه وابوه بعمره تزوج ساعه الكشره من اتزوج لو ميت بحرب ايران ولا ماخذ ساهره اقلها جان استفادينه منه سياره وكاع وراتب شمحصلين منه هسه
بديعه : كمت اخاف على ناي منه متوقعت حاط عينه عليها
خوله : وابشرج مهند هم حاط عينه يعني الاخوات الساحرات تاليتهن يتكافشن من وره هاي المكروده الي لا بيها ولا عليها
بديعه : رحمه الله والديج هبطيني بعد وسحلي روحي
خوله : غير ردتي تعرفين شصار
بديعه : عوفج من ناي والطركاعه الراح توكع على راسنا شنو غايتج من طلعة ساهره
خوله : طبقت قانون فرق تسد
بديعه : شون يعني
خوله : يعني يافهيمه طول ما ذني الحيايه سوه محد يكدر الهن ودوم بكلشي يدخلن واذا وحده غابت الثاني عينها بينا واذنها تسمع كلشي عنه من ابعد وحده من الثانيه قوتهن تقل ومو بس هيج راح تصير حزازيه بينهن لان هنه رغم خوات وگلب على گلب لازم يدخل الشيطان بينهن وخاصه من تشوف صالحه اختها الاصغر منها طلعت بيت وحدها ومرتاحه وعيشتها زينه الغيره مراح تخليها تتمنى الشى الزين لاختها وراح تصير حزازيات وهاي كالت وذيج جابت وهاي حطت وهذا الشى اول مراحل العداوه بينهن وهم انتم هنا ترتاحون من وحده لا اثنينهن سوه
بديعه : ولا اصدك بيوم ذني يصيرن عداوه
خوله : وربج يصيرن بسبب سوء اعمالهن ربج يسلط وذني نفسهن زباله وحقودات والحقد والغيره ماليه نفوسهن راح تگلب عليهن خلي اطلع ساهره واشحن صالحه يوميه ابسمرها وشوفي بعينج هاي عدا الشك الراح يدخل بنفس عبيد منين جاب الفلوس جوحي واشترى وراح يضل ينخور وراه لحد ميعرف وراها ركع نعوله تصير وانتي عليج اشتري شاميه وحب شمس واستمتعي
بديعه : اخاف توكع براسنا وهذا البيت يحرگنه علينا
خوله : ولا يكدرن وحدتهن راح تحير بلثانيه والجان يسونه بينه راح يصير بينهن بس شغله وحده قالقتني
بديعه :يرادلج هلهوله واخيراً كل الطحن الگلتي وتحجين بهدوء وما قلقانه بله شنو الي قالقج حضرت الاميره خوله
خوله : ناي
بديعه : شبيهه
خوله : هاي مراهقه ومتطلع ولا اطب ولا تختلط ودومها محبوسه بهذا البيت واذا طلعت للمدرسه وترجع وبنيه بدور مراهقه وياها اثنين شباب بلبيت يعني غصباً عنها تنحرف مشاعرها اتجاهه واحد بيهم هيج عمر متكدر تسيطر اذا متنعجب او تحب وذوله امهاتهم ينكطن سم تمنيت واحد منهم ابنج والله لا اخلي يعقد عليها اقلها ابن عمها واولى من الغريب بس مال تحب او تتزوج من ولد ساهره لو صالحه تضل بليه زواج العمر كله ولا تخلصه بين ذني البرابيك
بديعه : شسوي ياخيه قسمتي اضل على بان ومااخلف غيرها
خوله : الله يحفظها الج وتشوفيها عروس
بديعه : امين تدرين كمت اخاف من الحجي مالتج على ناي حتى على بان شنسوي
خوله : بان مااعتقد لان ماتحتك بولد عمها وهمه هم مايتقربون منها اله ناي تكول بس هيه بنيه بلدنيا وماكو غيرها هذا هم حظها حتى تخلي ذني يحطنها بالهن مكافي امهن المسكينه انكتلت من وراهن وهاي عود ما مسويه شى لعد ناي اذا خلت مرتضى ومهند يتكاتلون من وراها شراح يسون بيها لو يشونها بمكان المعلاك هم ميبرد گلبهن
بديعه : انتي ضلي خوفيني اخاف اني ناقصه
خوله : غير اگلج على القالقني
بديعه : ليش كلامج مال وحده مراح تكون هنا تفكر وتحسب وتخاف لان هي ماكو شصاير واني ماادري
خوله : اووووف رفعت راسي ليفوك وصفنت
بديعه : شكوو كملي المصيبه الضامتها اليوم ناويتها علينا بت عمشه
خوله : اكلج اكو بيت مال عنكبوت ذاك عود سعفي هاي الجهه
بديعه : الطم احنا وين وانتي وين
خوله : اي غير وصاخه وشفتها هاي شبيج
بديعه : لتغيرين الموضوع طلعيهن گلهن
خوله : راح اسافر ويه نجم
جان نسمع صوت الكلاص وكع من ايد ناي
طفرنا اثنينا عليها اخاف احتركت لان الجاي حار
خوله : بيج شى
بديعه : احتركتي يمه بله رجلج
ناي : راح تعوفينا
خوله : تعالي غسلي وبعدين نسولف
ناي : مجرد ماسمعت عمه تروح وتسافر حسيت رجعنا للضيم مره ثانيه صحيح عمه بدعه رجعت بس مو مثلها عمه خوله قويه وتكدر تسكتهن وتوكفهن عند حدهن حتى بيبي متحجي وياها تتجنبها حتى عمامي مو خوفاً منها بس يعرفون اذا حجت متسكت وتتعارك وتهوس لهذا يتجنبوها اما عمه بدعه فقيره حتى من يحجن تسكت
بديعه : نايه شبيج اصفريتي تعالي اغسلج
ناي : اني اغسل تحركت واني بالي الف فكرة واتخيل شراح يصير وكفت يم المغسله وغسلت طفر جاي على رجلي بس من الصدمه حتى حرارته محسيت بيه
رجعن كعدن واشرولي اكعد يمهن
خوله : تعالي اكعدي خلي احجي كدامجن اثنينجن
بديعه : شجاج ترحين ويه نجم كلت ولا تعوفينا وترحين
خوله :ليش هو اني اريد اروح بس الظرف حكمني احجي ومااخجل اني انسانه محطمه كلشي بيه عباره عن رماد ناعم مطحون بنسمه هوا بسيطه يطير صار مده احاول اتعالج والحاله مالتي صعبه وجودي هنا كعد ياكل بيه اني داموت موت بطئ يجوز تكولون انانيه مني اعوفكم انطوني حل واني ابقى حاولت اقاوم ونفس الشى وكل وماتزيد مقاومتي اتعب اكثر
ناي :احنا يمج منعوفج
خوله : يجي يوم والحياه تاخذكم وهاي مو بكيفكم سنه الحياه هيج اني لو انسانه طبيعيه وماعندي كل هاي العقد والمشاكل واضمن صالحه وساهره ميزيدن سحورتهن عليه مستعده حتى لو بعد سنين تشمروني بلشارع عادي المهم اكبركم ومااخليكم وحدكم بس من يوم رجعتي وذني مستلماتني يجوز منشوف بعينه سوالفهن بس الشى مبين ذيج الايام وصلت مرحله حمام مااكدر ادخل وحدي واذا ابقى مراح يجوزن مني لو يخبلني بلسحوره لو يموتني ويتبلن عليه مثل ذكرى الله يرحمها
بديعه : اول مره احسج خايفه منهن
خوله : عمري مخفت منهن ولا راح اخاف اني خايفه عليكم حتى يأذوني ويكسروني راح يشتغلن على نقطه ضعفي وحالياً عرفن شنو نقطه الضعف وهي ناي واخوتها لهذا اسلم الكم قبل متكون الي اطلع منا واني قبل مااسافر اخلي ساهره تطلع من البيت اقلها وحده تضل مو اثنينهن وبطلعت ساهره راح تقل قوتهن اني بس بالي ناي
ناي : اني شبيهه
خوله : هاي كدام عمتج وهيه هم مثل امج لا تحبين واحد من ولد ذني تره والله مايرحمنج
ناي : ياحب عمه هو اني مال هيج سوالف
خوله : عمرج ومراهقتج تجبرج تنعجبين وتنحرف مشاعرج ولان حظج اسود ماكو غير ذوله القروده يمج وراح مشاعرج تروح لو لمرتضى لو لمهند ومن جيت مهند عرفت عيونج وين راحت
ناي : عمه ماكو هيج شى
خوله : ولج عليه اني گلبي خلصان من هيج سوالف عبالج مااعرفجن وهذا شنو ورفعت ايدها
ناي : هديه
خوله :والجابها مهند وبقت بيدج اطلعي من هذا الجحيم اكو وحده عايشه بهيج بيت تفكر بواحد عايش وياها غيرج وحده تريد تهج منا تسوي المستحيل حتى تطلع هيه واخوتها مو تجي تكلبش حياتها هنا وتحكم على جهالها يصيرون نسخه منها اذا مو اتعس
ناي : يعني شسوي
خوله : الي بالج انسي لا مهند ولا مرتضى وبيج زود اقري وانجحي وادخلي كليه واخذي شهادتج ولتنسين اخوج وكسرت ظهره وضياع مستقبله حتى انتي وشرهب تكملن لاتكسرين عينه وتزيديها عليه تعرفين بيه علاقته ويه ولد عمه مو هلكد واليوم قبل باجر يريد يطلع منا مو وره هذا التعب كله تخلي مكسور الخاطر ويحس تعبه ضاع
ناي : هذا هو عمه بس والله ماعندي شى ويه مهند
خوله : لج يمه ادري ماعندج شى بس الي بداخلج ديكبر اتجاهه وهذا غلط كل متحسين بشى اتذكري منو امه منو ابوه منو خالته لتصيرين جوه رجلهن ذني الشيطان يصفن ويتعلم من سوالفهن ولا تتوقعين وحده من عدهن ترضى تصيرين جنه الها استري على نفسج وعلى اخوتج وكملي شهادتج واتزوجي الي يستاهلج ويطلعج من هاي المزبله والناس البيها
ناي : ماشي عمه وانتي
خوله : شبيه
ناي : شوكت ترحين وتعوفينا
خوله : بعد مو هسه بس حطو هاي الفكرة بالكم لان بس يصير وقتها اسافر ويوم مااصير زينه ارجع والله ارجع
بديعه : صاير اسم الله بحلكج بعد ما جنتي متنطقي واذا احد سمه بأسم الله تعيطين
خوله : اي اكدر وهم اسمع قرآن ومو حيل اتإذه بس من انام حتى ابويه اسبه لان خلفني الجماعه يسون حفله بكوابيسي وشكو شغله اكرهه اخاف منها تلعب نفسي تطلع كدامي عدا شغلات مااريد اخوفكم يعني وصلت مرحله اكره النوم بعد مجنت احبه
بديعه : اقري ايات ماطول كمتي تسمعين عادي
خوله : اقرا والساني احسه ينعكد عدا النسيان الي يصير اكلها اني عايشه بحرب والله بحرب ومحد يدري بيه
ناي : الله يشافيج عمه
خوله : ياا عمه شبيهه مخبله ويشافيني
ناي : والله مو قصدي اني اقصد جان تجرني بحضنها وطكتها بضحكه
خوله : شكد جبانه غير اشاقه ويااج
ناي : شكد راح اشتاقلج
خوله : تره بعدني ممحضرني جنطتي لو تردين بسرعه تخلصين مني
ناي : حضنتها حييل وبستها ياريت تبقين العمر كله يمي والله مااتزوج وابقى علمودج بس ابقي ويايه
خوله : شحدج متتزوجين لعد منو يلبسج البدله بيوم عرسج احظر والبسها بيدي
ناي : مااريد اتزوج اريدج الج
خوله : بعدج صغيره من تكبرين تردين تتزوجين وتصيرين احلى عروس وكتلج اجيج بيدي البسج
ناي : واذا مااجيتي
خوله : لج اني خوله كلمتي كلمة زلمه بديوان
بديعه : والنعم وين القبوط الاسود شو لبستي وانبلع ماكو
خوله : هاااج هاي النماذج الي تخرب كعدت الديوان لازم يكعد واحد اعوج يخرب الاول والتالي
ناي : هههههه لا هاي عمتو بدعه وين اكو مثلها
خوله :اي ماكو ثوله وطرنه العادي مالتها وفجأه تصير سباعيه ولسان متعرفين الدكمه مالتها منين وشوكت تطفه وشوكت تشتغل
بديعة : مو زين بعدني بعقلي بهذا البيت
خوله : بهاي حقج يله نخلص اليوم كلها سوالف نزل مرتضى ضايج وركع الباب وطلع
ناي : هذا شبيهه
خوله : شاخط مالج دخل بيه وانتي انزعي هذا البيدج ولتسوين فتنه
ناي : راح انزعه
كمت من عدهم واني احاول افتح قفل السوار اني صدك عندي مشاعر لمهند يمكن حجي عمه صحيح لان دوم افكر بيه ومن اجه حيل كيفت بس هو هذا يعني اعجاب وحب لو لان بعيد عنا ومتعلمه عليه واشتاقيتله نزعت السوار وخليته بلمجر
ضليت كاعده افكر شيصير جان اطب ساهره عليه تكول اعصار وطب وجرتني من دشداشتي
ساهره : بت ذكرى هاي السوالف بطليها
ناي : ياسوالف عمه شبيج عوفيني عفيه
جان تلزم كصيبتي وجرتها حيل شاغت روحي حسيتها راح تنكطع بيدها
ساهره :مرتضى اذا وصلتي يمه اكص راسج
ناي : اااااخ شعري والله مجايه يمه ولا واصله
ساهره : لج بعدج بكد قندرتي وادورين زواج وعفتي هاي الشباب كلها الضاله بلشوارع وركضتي على ابني
ناي : ماعندي شى وياه وروح ماما
ساهره : هلمره حذرتج مره الثانيه ياناي ابجيج دم اكول بعدج صغيره وماكو ام فوك راسج وضاله بيد هاي وذيج وذني اثنينهن وحده انكس من الثانيه وميعرفن يربن وانطيج عذرج وراح ابلعها وما إذيج مره ثانيه تشوفين شى محلو مني
ناي : عمه والله ماعندي شى حتى مااحجي وياه ومااكعد يمه
ساهره : اذا اجه او حجه وياج وانطيتي وجهه اطيح حظج
ناي : اي اي مااحجي ولا اوكف وياه واطرده
ساهره : اي هيج اريدج جري عدل ولتسمعين لكلام ذني الجوه تره يودنج للتهلكه
ناي : هي عمه متقبل احجي ويه واحد من الولد
ساهره : اسمعي كلام عمتج وخليج بعيده عن مرتضى وحتى عن مهند
ناي : دنكت وكتلها مالي علاقه بيهم دفعتني حيل انقهرت كلش من حجايتها ماكو ام فوك راسج جانت الحجايه حيل تأذي رغم هيه صحيحه
مبجيت ولا كلت لاحد مااريد تكبر السالفه خليتها بگلبي وسكتت
بديعه : كل يوم يمر واحنا بحاله ترقب ساهره راح تطلع من البيت لو متهتم لكلام خوله ومبقى بس باجر اليوم اربعاء وعكبه الجمعه واي بوادر شيله ماكو وخوله ساكته واعرف وره سكوتها شى
صبينا العشا وكعدنا ناكل والوجوه كلها مگلوبه
جوحي : يمه عندي شغله وياج
عمشه : چا ما ناگل ماتصير شغيلاتك اله ويه لگمتي
جوحي : هو اني وين شايفج شو يانايمه لو يم ام اسماعيل لو مدري وين طالعه
عمشه : اي يايمه مو انه اروحن اعد فليسات ابيك عبن گلهن بلكواني واحيرن وين اولي بيهن چا ماتسكت وتاكل تبن انه وجعانه ومجسره اعظامي سألت على امك محتاجه شى تاكل تشرب ماتت عبن حالك ومالك لمريتك وبزرتك وانه يطبني طوب تمر من جار غرفتي ماتمد راسك الجنه سطلة مسح وتكولن السلام عليكم چا تريد انه اصعد واهز طولي وانشد عليك
جوحي : غير اشتغل قابل كاعد وحيلي كله راح حتى اكدر الم حالي
عمشه : شنهي الجديد خلصت عمرك تلم وانه شمحصله منك
جوحي : يمه خصم الحجي اني راح اطلع بيت وحدي
عبيد : ومنيلك فلوس
جوحي : هاي شبيك عبيد قابل ماعندي شو سنين كلها اشتغل وارجع ليوره وهم بعت البسطيات مال السوك وجابن خوش سعر
واشتريت بيت صغير بعد جم فرع من هنا والجمعه اشيل اله
صالحه : شو ماكلتي ساهره اول تالي متحجين
جوحي : حتى ساهره متدري اني من وحدي قررت
ساهره : هاج كدامج وحالي من حالج اسمع تعرفين بجوحي مايحجي لاحد ولا ينطي سره لبشر
خوله : بيها الخير يعني راح اطلعون بيت وحدكم وعيشه براحتكم لا هذا ولا ذاك بلعافيه عليج سهوره يوم لصالحه ولو استبعد لان خطيه عبيد ماعنده وخسر كلشي وانتي الله يوفق رجلج واشترالج وراح تكعدين وحدج صدك كلمن وحضه بلدنيا
كامت صالحه من الاكل ضايجه وراحت وراها ساهره
عمشه : يايمه عتبت خير عليك اخذ غريضاتك والله وياك
جوحي : اني كلت راح تجلبين بيه حتى ابقى وتزعلين وتبجين شو جنج كيفتي بطلعتي
عمشه : چا غير حياتك ووليدك بطولك وانه اكولن كلمن يصير عنده يتوكل
خوله : شعجب قبلتي يطلعون ولدج من بيتج
عمشه : كضي لسانج يمدهربه لاتخليني اذبن جمره رويحتي بيج
خوله : وشنو الجديد خلصتي عمرج كله تحرگين بيه بقت على هاي الجمره ذبيها حتى ترتاحين
جوحي : لتدخلين ولتسوين مشكله اني جاي احجي ويه امي انتي شدخلج
خوله : غير اباركلك يوم لعبيد
عبيد : ليش حاس وراك سالفه عوجه مشتغل من ورايه
جوحي : يايوم مشتغل من وراك بس تدري جنت شون اضمهن ومااضرف فلس لهيج يوم
عبيد : وشجاب الطلعه على بالك
خوله : الله هداه والهدايه متجي كل وكت
جوحي : كومي اصعدي وفوك مو تزقنبتي
خوله : مكاعده يمك
عبيد : عوفك منها وجاوبني لتتهرب
جوحي : شبيك انت الثاني هاي عود المفروض تباركلي جان تحاسبني
خوله : حقه غير شريكك
جوحي : كووووووومي اصعدي
خوله : لتعيط صاعده هااا يمه شو صافنه على ولدج شفتي شكد حاولتي يضلون يمج راح يتسحبون واحد وره الثانيه واحد سكن الكبور والثاني هج وهاي الثالثه طالع بقو يمج اثنين وشمدرينا شوكت يفلتون بجلدهم وعود ذاك الوكت دوري عليه ومراح تلكيني
عمشه : لو اضلن وحيدي ماادورن عليج انه ماعندي بت هي وحيده وماتت
خوله : عفيه اتذكري ماتت والميت مايرد يعمشه خليت وكمت امشي بهدوء وصعدت للغرفه
ناي : جنت اباوع عليهم الكل مخبوص
شرهب : بعد ميرجعون
ناي : باوعت عليها شنو مفهمت
شرهب : راح يرحون وغرفهم تبقى فارغه
ناي : اي وشتردين
شرهب : غرفه وحدي العب بيها
ناي : لا هواي انطوج غرفه اشش كافي
شرهب : بيبي اريد غرفه مرتضى
عمشه : يايمه اخذيها ماتنعز عليج چا همه عدهم بيت مايلد عليهم بيت عمشه صار كخه
ناي : لج اسكتي
شرهب : بيبي كالت غرفه مرتضى اليه
ناي : ماكو نوم وحدج تبقين ويانه وكومي غسلي واصعدي نامي يله
شرهب : ليش حبابه
ناي : لا حبابه ولا دبابه يله واخذي بلال وياج
شرهب : كوم بلبل وانتي نايه مااحبج
ناي : لتحبيني اصعدي بسرعه
كامت تشرهب تسحل بلال وهو لزمها وصعدو كمت اشيل بلمواعين وكامت سما وبان يساعدوني
ورجعنا ناخذ وجبهه ثانيه داطلع جان يجرني مرتضى من ايدي
تعاال
ناي : وين
مرتضى : دقايق مااعطلج
ناي : مااجي وخر مني ودفعت ايده رجع حيل لزمني وجرني بره المطبخ ليم غرفة السكراب
ناي : شتريد مني مو عيب هيج تجرني
مرتضى : اريد احجي وياج
ناي : بسرعه ليجي احد
مرتضى : اني احبج
ناي : اعرف وكتلك انت مثل اخويه
مرتضى : مو اخوج اني افتهمي اني ابن عمج واحق واحد بيج واريدج اليه وكلت لابويه عليج
ناي : وشكال الك
مرتضى : كون نفسك واخطبها الك
ناي : اممم تخطبني بس هذا مو نفس حجي امك الاجت ذاك اليوم ورادت تضربني من وراك هسه انت تحب وتريد تخطب ومن حقك ليش اختاريتني ناقصه مصايب حتى تكملها عليه
مرتضى : اعرف امي متحبج بس من تصيرين مرتي اكيد تحبج
ناي : واني مااصير كتلك انت اخويه وماكو وحده تتزوج اخويه
مرتضى : ومهند
ناي : يبووو على مهند شعندي وياه حاله من حالك
مرتضى : جذابه وذيج المره من اجه عيونج الي ادور عليه
ناي : غمضت عيني بضوجه وخنكه وكتله بنبرة عصبيه
لا اريدك ولا اريد مهند ولا اريد بشر واذا حجيت ذيج المره وكعدت وياه لان صار اكثر من سنتين مشايفته وهو عزيز عليه ولو انت رايح سنتين هم نفس الشى
مرتضى : مااصدكج
ناي : عنك ماصدكت
مرتضى : اذا صار شى بينج وبينه أذيج تره ناي : عفيه عوفني بحال سبيلي امك تهدد وانت تهدد على اي اساس هسه اطب وكدام ابوك وامك اكلهم خلي يعوفني
مرتضى : ليش هيج تذليني لان احبج
ناي : الله اكبر اكله اني اعتبرك اخويه وميهمني اذا حبيتني او لا ومو اقصد اذلك هاي مو اخلاقي اني اريد بس تعوفني ومالك دخل بيه وهمزين راح اطلعون منا اقلها مااشوفك ولا تشوفني وياريت تراجع نفسك وتعتبرني اختك مثل مااعتبرك
ناي : جان اسمع صوت يونس عاط بأسمي
يونس : نااي شعندج هنا
ناي : ماعندي
يونس : وشنو هاي وكفتج
مرتضى : قابل واكفه ويه غريب غير اني ابن عمها
يونس : ماارضى توكفون هاي الوكفه واذا عندك سالفه شغله وياها تحجيها وهيه جوه وبنصنا مو تتختل بيها.
مرتضى : ليش حلال الك وحرام عليه من تتختل ويه سما
جان يلزمه يونس لمرتضى وضربه حيل على خشمه
ناي : عطت من الخوف
تلازمو واحد يضرب بلثاني جان مرتضى جر حديده بلسكراب وضرب رجل يونس وسوده عليه وكع وعاااط
دفعت مرتضى حيل لك حقير شسويت بأخويه
يونس عفيه شبيك
مرتضى : مو قصدي بس هو ضربتي بالاول
طلعو كلهم عبيد :شصار وركض على يونس
ناي : عفيه عمو شيله ديتأذه
عبيد : تعال جوحي ساعدني
مرتضى : اني اساعدك
ناي : دير بالك اطخ اخويه وخر ودفعته من صدره حيل لو بيدي اشرب من دمه
عمشه : ياطركاعت السوده شجاكم صوبت اخيك يبن ساهره هاي المرجيه منك
مرتضى : ماادري بيبي هو بدا الضرب
ناي : وانت حجيت عليه
يونس : طبي جوووووًه وانت حسابك بعدين
ناي : طبيت اركض وكوه كومو يونس وكدر يدوس على رجله بس تأذي صعدوه واني خايفه شراح يسوي بيه ركضت لعمه خوله
خوله : شصار صوت عالي بره
ناي : كله من وره مرتضى اللزكه وبسرعه حجيت الها
خوله : مو حذرتج
ناي : ليش اني ام الصوج هو والله جرني
جان يدخل كعدو على الجربايه
خوله : هااا حبيب عمتك بيك شى
يونس : مشكور عمو اخذ راحتك
طلع عبيد وصاحني
تعالي
اجيت تقربت خايفه
يونس : اكعدي گبالي
هو كاعد على الجربايه واني يم رجله
يونس : تشوفين هاي الرجل
ناي : اشرت براسي اي
يونس : هاي اسكطت لان ردت تكملين دراستج انتي وشرهب مو حتى تتختلين ويه مرتضى
ناي : والله ودمعت عيوني اشرلي اششش
يونس : هذا واحد سرسري وكلشي اتوقع منه واذا اني اتختل ويه سما مثل مكال فأني مامتجاوز حدي ورايدها بلحلال
خوله : وتره هو هم رايد اختك
يونس : لو اموت ماانطيها اله
خوله : ليش انت مو تريد بت صالحه هو ابن اختها مو غريب
يونس : اكتلها خلاص ومااخلي واحد منهم ياخذ خواتي مكافي امهاتهم اخذو امي وهي بعز شبابها هلمره انطي خواتي حتى يأذوهن
خوله : اذا انت هيج عاقل وتفتهم متكول لروحك وتبتعد عن سما قبل متحاسب اختك حاسب روحك انت هم طاب طبه طايح حظها تعرف صالحه متنطيك مره لتتأمل وتالي تلزمك الباب
يونس : عمه هسه اني مو بشغلتي اني بلوضع مال قبل شويه
خوله : مو انت لو ما تتختل ويه سما مجان اتجرأ مرتضى يحجي هيج وياك وجان حقيته من السما للكاع
يونس : عمه ويايه لو عليه
خوله : وياك ويه اختك لكم لتلعبون بلنار امكم راحت لان شويه انغثن منها انتم شيسون بيكم لان تتحارشون بخلفتهن اعقلو وانت بلذات اعقل واختك ممسويه شى واعرف القصور بمرتضى معرف يتصرف
يونس : واني اله بعد اذا ماانعل والديه
خوله : ميحتاج راح يطلعون لغير بيت اكعد واسكت
يونس : منو كال
ناي : قبل شويه صار الموضوع
يونس : كلمة وحده الج ومااعيدها
لتكسرين وجهي كدامهم تره مااستاهل اصير ونسه وشماته الهم
ناي : تقربت وبست راسه وكتله
اموت ولا اخلي احد يتشمت بيك
يونس : خلي نشوف اااااخ رجلي جان اطب شرهب وجايبه طشت بيه مي دافي
شرهب :حط رجلك هنا
يونس : هاي شنو
شرهب : عمو ابو الدكان شفته حاط مي دافي وطشت وسألته كال من اتوجع احطهم بيه ولازم ملح هم
خوله : فدوة للحنينه المعدله
حط رجله يونس ويتوجع
شرهب : هو كال ملح بس اني ما لكيت حطيت ليموندوزي يصير مو
يونس : اي مو رجلي دولمه وتحطين ليموندوزي
شرهب : تصير حامضه اييييع
ناي : ههههههه لج ام كفشه ولعبت بشعرها
شرهب : اشتري من الدكان ملح
يونس : لا مااريد اكوم اغسل من الحموضه الصارت من وراج
شرهب : عمه اشتري ليموندوزي لان خلصته كله وهسه عمه بدعه تحجي عليه
خوله : جم مره نضمه منج
شرهب : احبه طيب احطه بلرارنج واكله بلخاشوكه
ناي : من يمي معدتي گلبت حااامض شون تاكلي
شرهب : اممم طيب
مو بلال
بلال : ايييع مطيب
شرهب : انت ايييع
خوله : روحي لعبي ولتسوين مشاكل
شرهب : والمي
خوله : اني اذبه روحي
ناي : حسيت بعيون عمه اتهام واني ما مسويه شى بقيت بموقف حرج ولازم اسكت بعد وابتعد عن اي احد يثير مشكله
وراها خلصت الايام يانايمه يااشتغل بلبيت وياهم
طلعو من البيت عمو وساهره ومرتضى يمكن جان احسن توقيت للطلعه وخاصه بعد العركه اخذو كلشي يخصهم وراحو الغريب بلوضع صالحه جانت ساكته وبس تباوع حتى مساعدت ساهره بشيله الغراض
مبين بعيونها الغيره والضوجه حتى لو بينت عكس هذا الشى
ومن يومها ساهره تجي كل اسبوع كم ساعه وتروح
من اول اسبوع بين الفرق والهدوء اما غرفة ساهره اخذتها صالحه غرفتين جانن مال ساهره صارت لمهند لان جبيره وبقت الثانيه الاصغر مقبلت احد ياخذها لحد ما شرهب نزلت لبيبي
بيبي بيبي
عمشه : هاا حبوبه شجرالج
شرهب : اني مااحبج
عمشه : چا انه حبوبتج وماتحبيني يا والحظ
شرهب : كلتي انطيج غرفه مرتضى وعمه صالحه متقبل
عمشه : چا بكيفهه بيت امها
شرهب : متقبل واني مااحبج اله انام بيها
عمشه : صالحه وينج تعالي ليه
جان عمر شرهب بوقتها ١٠ سنوات وراح تدخل بال ١١ سنه لسان وكحه والي تريده تاخذه
نزلت صالحه هااا عمه شتردين
عمشه : الغرفه مال مرتضى لشرهب واختها
صالحه : اني اخذتها
عمشه : چا شنهي اخذي البيت كله ولزمينا الشارع
صالحه : اريد اعزل عمه
عمشه : اعزلي بيت امج الله وياج هنا مامش جنه تعزل
صالحه : كتله لعبيد وقبل وغرفه مرتضى اريدها مطبخ
عمشه : بطر وتبدى چا هذا موش مطبخ واطبخي احد كاضج هاي الغرفه للبنات وچلمة ثانيه ادزج وره اخيتج اكعدي جارها
صالحه : يعني طفله بكد زري تحركج عليه ياعمه
شرهب : اطول من زرج عمه اذا اوكف
صالحه : وسم بگلبج جنج امج وحده عينها كويه
عمشه : والغسل هلبراطم سم يسمم بدنچ ومايلاحكون عليج وتزوركين وياخذج ملچ الموت يدك على فركاج ويجفينا شرج لون انعادت هاي الجلمة انه اسمنج بيدي زرنيخ ورخيص وتوكلين ولا تخافين اسبوع واعرس عبيد على بت حليوه وبكبرج اقهرنج
صالحه : كله من وراج طلعتي عينها هاي وحده متنطي عين ومكان متربيها اطلعين عينها وشتريد تاخذ
عمشه : الغرفه لشرهب واختها وبله وجع راسي وان جنتي معانده يرد زلمتج وانه اكضه وانفضه نفض
صالحه : ميحتاج خلي تاخذها نار بگلبها
شرهب : ماكو نار وطلعت لسانها تعيب جان تحط ايدها عمشه على حلكها
عمشه : لج اركدي يماااي
طلعت صالحه وروحها بخشمها
شرهب : هسه احبج انطيني بوسه
ناي : تحولنا للغرفه الثانيه اني وشرهب بس بالنا يم بان لان جبيره وتنام يم ابوها وامها وطلبنا من عمه بدعه تنام يمنا يكفي نفرش تلاثتنا بلكاع وانام لان جرابي ماعدنا وكيفت بان وانتقلت يمنا وبقت غزفه ماما ليونس وبلال
اخذتنا الدراسه وبعدنا صغار نحلم بحياه حلوة كل وحده من عدنا تتمنى يصير شى زين وياها يغير حياتها ذبينا حيلنا على الدراسه نقرا ونتعب يمكن نحس بدراستنا هي الطريق الوحيد حتى نخلص من هذا البيت الجان كاسر خاطري هو يونس
يونس : حسيت شغل المخزن ميكفي المصاريف هوايه وخاصه عمو عبيد فصلو اكلهم وكام مينطي فلس واحد وعمو فلاح هليكدر عليه وخواتي رغم ميطلبن هوايه بس هي الحياه للي مثلي ابسط شى غالي عليه
قررت اشتغل شغلتين الاولى بلمخزن والثانيه وره الظهر ابيع كلينس وعلج ومرات علاليك يوميه شكل ولان الوضع صار موزين جان قليل يشتغلون شباب مثلي كمت اشتغل لحد ممنوع التجوال اركض منا ومنا مرات حتى انسى اكل يمكن حال رجلي والعرج البيه هو الي جان يخلي الناس تعطف عليه وتشتري مني جانت تحز بروحي بس شسوي هاي العيشه وهيج مطلوب مني اتحمل كلشي حتى اجيب فلوس تكفينا وكدرت اسيطر على المصرف انطي لعمه خوله وهي تتصرف واضم جم فلس للطوارئ
كمت اودي بان بطريقي ومرات اذا صارلي مجان ارجعها انقهر عليه فقيره وحبابه وتريد تكمل وتخاف من ابوها يبطلها لهذا جنت حتى اساعد بفلوس الدروس حتى لتبطل
وهذا الشى الي خله سما تتخبل ويوميه مسويه مشكله ويايه واحاول افهمها هاي حالها حال ناي وميفيد يوميه عركه
ناي : دخلنا ٢٠٠٤ يمكن اعتبرها اهدأ سنه النا او يمكن لان طلعت ساهره من البيت وقلت المشاكل
مرت ايام الشته صعبه نتجمع كلنا بغرفه حتى منصرف نفط هوايه حتى لنضطر نشتري ونكلف يونس اما عبيد شال ايده من مصرف البيت كله وعمه صالحه احسها دوم اكو حسبه بالها اذا هي حتى زياره متزور ساهره شجاها ماادري
بشهر الثالث راجعين صار اسبوعين من عطله نص السنه نداوم مدارس وبرجعتنا للبيت شرهب تسحل بلجنطه بلكاع واني اجر بيها لان نعسانه وتريد تنام وصلنا الباب لكينا مفرزه هستوهم طبكو
شرهب : عمو شرطي وين الامريكان
ناي : اشش بله خلي نفهم
وكفت وجانت عمه خوله واكفه والوجهه اصفر انتبهت بصف الشرطي هاي ام شرهب بلعت ريك من الخوف
خوله : اندكت الباب عبالي لو مجدي لو احد من الجيران طلعت لكيت جليله وياها رياجيل بزي شرطه
خير
جليله : جايه اخذ بتي
خوله : يابت هاي
اختي اجه بلاغ لهاي المره على اساس بتها يمكم وابوها ميت وتريد تاخذها
خوله : خلي تولي صار ١١ سنه شامرته هسه تذكرت عدها بنيه
اختي هاي الاوامر ولازم انطبقها واذا عدكم مستمسك يثبت هي متنازله عن حضانتها الكم شوفيني وهسه نروح
ناي : شيردون عمه
جليله : حبيبتي تعالي
ناي : ختلت شرهب ورايه شتريد انتي منها
جليله : اجيت اخذ بتي تعيش يمي
خوله : مالج بنيه يمنا روحي منا لا اعيط والم الشارع عليج
جليله : لمي عيني احد لازمج غير بتي واجيت اخذها صدك متستحين قابل بايكتج
ناي : امشي شرهب جريتها وندخل جوه جان تسحبها جليله من ايدها حيييل
شرهب : عوفيني مااحبج انتي شريره
جليله : اني ماما حبيبتي
شرهب : ماما يم الله بلجنه انتي تاكلين الجهال
جليله : شفت سيدي شون مغيرين بتي عليه
خوله : يابه شكد عرمه وصلفه وحقيره لج جانت لحمه حمره وشمرتيها وكلتي مااريدها منين نزلت عليج النداره والمحنه واجيتي ادور بنيه يمنا ذيج المره كتلج لتوصلين كلتي اشوفها وتولين منين طلعتي بسالفه تاخذيها
جليله : تعدلت اموري والله رزقني واكدر هسه اعيشها احسن من عيشتكم القذره
خوله : باع منو يحجي على القذاره بت ام السمج اخذي الجايبتهم وياج وروحي مالج بنيه يمنا
جليله : مااتحرك اله اخذها شبيك سيدي صافن بوجهي اخذها للبنيه
تعالي عمو
شرهب : ماااا مااجي
ناي : حرام عليج هاي اختي لتاخذيها مااكدر بدونها
جليله : عود تردين تعالي شوفيها بس تضل هنا يوم واحد مااخليها
خوله : دنكت نزعت النعال وجريتها من شعرها ودك على راسها مددتها بلشارع ويردون يفكوني منها مديكدرون حتى وجهه خرمشته
ناي : حضنت شرهب وهي ترجف ومجلبه بيه
جليله : ساقطه ام السحوره صرتي مره براسي وتضربين اليوم احرك اهلج
خوله : جرني شرطي حيل ودفعته دير بالك اطخني اشتكي عليك والله ولكم وليه مخانيث جارتكم هاي الساقطه واحدكم شواربه يوكف عليه الصقر وتالي ساحلتكم مثل الطليان تاخذون طفله من اهلها بعد ما شمرتها وهي عمرها يوم
كتلج مو بيدنا اوامر اجتنا هيج وبليه عناد ليش انسحلج للمركز وانأذيج
جليله : بعدك تهدد لك دجر الطفله منهم
ناي : كبت العيطه وجيتو اثنين اخذو شرهب من حضني واحس بلحظتها اخذو روحي انگلب الفرع علينا وعمه تعيط وطلعت عمه بديعه وياها بيبي جانت بلسوك تتسوك
وسحلو شرهب من حضني منظرها وهي تنجر اخذ روحي
شرهب : ناايه لتعوفيني ناااااايه اخاااف منهم مااحبهم نااااايه بلبل تعالو
ناي : كعدت بلكاع الطم وابجي اختي راح تروح من ايدينا من التمت الناس الشرطي والضابط الي وياه ضربو طلق بلهوا خله الناس تطفر سحل شرهب واخذها وياها وهي تعيط وخايفه عيونها وهي تستنجد بيه خلاني مثل المخبله اركض عليهم دفعني واحد من الشرطه وجليله صعدت وياهم
رجعت كمت وركضت وراهم وكعت على وجهي وعمه كومتني
خوله : نرجعها والله لتخافين
ناي : اخذتها عمه مني فدوة خلي يرجعوها اليه
خوله : وعيونج ترجع على كيفج ليصير بيج شى
بديعه : هلكلبه تالي وكت صارت ام
خوله : خلي يجون الولد والي حجايه وياهم تعالي ندخل صرنا فرجه للعالم اااخ لوما المخانيث الي وياها لا اسحل الشارع بيها
ناي : اباوع جنطتها بلكاع حضنتها وابجي دخلت للبيت وكعدت بلكاع اشهك واصيح اريد اختي رجعولي اختي
مدري شكد بقيت بلكاع واني بلصدريه وجنطتها بحضني لحد ماعمه كومتني وجبرتني ابدل
دخلت للغرفه الي كتلت نفسها حتى تنام بيها اباوع على مكانها شون انام اليوم بلياها شون اكعد بنص الليل والمن اغطي من اشوفها شامره الغطا ورجلها على بطني وادفعها واضوج لان الليل كله ادفر
حضنتني بان وتبجي ويايه
بان : كافي مو عيونج انمردن
ناي : اريد اختي مااريد شى بس شرهب
بان : هسه يجون ويرحون لامها على كيفج حتى شفتج صارت بيضه وجسمج بس يرجف
ناي : تخاف مشفتي حالها تبجي وتعيط وشون الجلاب سحلوها وهاي الي تسمي نفسها ام ولا دارت بال من اخذوها تشوفها شون روحها مفرفحه ولا يمها
بان : الله لايوفقها هاي منين طلعت هسه مو جانت مختفيه
ناي :سمعت صوت يونس جوه طفرت من مكاني
ا نزلت اركض عليه مبين عمه كالت اله حضنته واشهك
راحت اختنا
يونس : مو بكيفها
عبيد : اني ماادخل هاي وحده عايقه ولسان زفر ومااريد اتلاطش وياها
عمشه : چا نعوف البت تاخذها انه اروحن واشعل البيت على امها واصلخها بلشارع چا هيه تايهه تذبهه وتالي ١١ سنه ترد تاخذها
يونس : مااريد احد اني اروح اجيب اختي واجي
ناي : اجي وياك
يونس : ابقي هنا
خوله : اني اجي وياك عمه
بديعه : واني هم
يونس : محد يجي عوفوني ارجعها
خوله : متعرف جليله راح تضوجك هاي اذا ما طردتك
ناي : اخذ احد وياك عفيه
يونس : كتلكم اني ارجعها
صالحه : متعوفها لامها خفف الحمل عليك تبقى امها وانتن شنو هاي العياره گلبتن الامه قابل باكتها لو ذبتها بلشارع تبقى امها ورجعت لحضنها
خوله : اكرمينا بسكوتج ومنريد مداخلتج العظيمه رجلج كال ماادخل وياريت انتي هم واخذي ورونا طولكم المحلوو
يونس :رايح اجيبها
ناي : طير ومذبوح على النص وضاله الرگبه مدندله هاي حالتي واني انتظر رجعت يونس واكول راح يكدر على جليله ويرجع شرهب لو يرجع بطرك روحه
اباوع على فراشها ملابسها حضنت مخدتها ودموعي ترستها وعيوني على الساعه
وساعه بعد ساعه ويونس وشرهب ماكو
يتبع .....
رواية الابواب الخمس الفصل السابع وثلاثون 37 - بقلم ريام هادي
#الابواب_الخمس
البارت الثالث والثلاثون
للكاتبه Reem
نسيج من الحزن بالروح...ينحاك
وعظمي من شديد الحزن ..ينحاك
اذا انت طير انكسر ..جنحاك
انا جنحي وخاطري انكسرن سوية
ناي : طير ومذبوح على النص وضاله الرگبه مدندله هاي حالتي واني انتظر رجعت يونس واكول راح يكدر على جليله ويرجع شرهب
اباوع على فراشها ملابسها حضنت مخدتها ودموعي ترستها وعيوني على الساعه
وساعه بعد ساعه ويونس وشرهب ماكو
شرهب : هلوو شلونكم اني شرهب اكيد تنتظرون اكبر حتى تعرفون قصتي اهم شى لازم تعرفوه اني انسانه صرت بسبب نزوه اي نزوه حتى لو ابويه وامي متزوجين ماطول شمروني ومرادوني اعتبروني ساعه متعه وانتهت ولازم كلشي يجي وره هاي الساعه ينشمر بلزباله اذاً اني نزوه
وهذا السوته امي لو اكول جليله احسن جلول سوت سوايه الموزينات لمن يغلطن ويشمرن جهالهن بلمجره والي بلزبل والي بدار الايتام حتى يضمن العار والفضيحه بس امي بطريقه الطف لان متزوجه يعني شمره شرعاً مجرد فكرة اني انشمرت من اول يوم من حضنها وبدون حتى متكلف نفسها ترضعني تخليني احقد عليها العمر كله
اني وحده انحرمت من ابسط حقها وهو تصيح ماما وتحس بحنان الام الي كل ناس تحجي عنه ولوما ماما ذكرى والوحيده الصراحه تستاهل كلمة ماما لو ما هيه الله اعلم شصار بحالي رغم ما عشت يمها غير اشهر وماتت الله يرحمها مرات اصفن شلون كدرت تشوف بت ضرتها يوميه وتتعامل وياها مثل بتها وتقصر على روحها في سبيل اداريها وحتى من ماتت زرعت بولدها المحبه اتجاهي وكأني اختهم من نفس الام لهذا اعتبر الوحيده الي تستاهل كلمة امي
مشكلتي بلحياه صريحه ويمكن صراحتي عند البعض يعتبروها وقاحه شسوي مااعرف اجامل انطيها بلوجهه ومرات اجفص جفصات تخليني اريد اطم روحي وارجع كالاسد اوكف ولا جني مسويه شى وهم اجفص
احب شى لگلبي شعري اي شبيكم احبه من اني وصغيره احسه مثلي هوسه واحب يكمز ويايه واستاهل لقلب وبجداره ام كفشه
نرجع لطفولتي يله كلكم ويايه خلي نفتح بابي باب شرهب ادفرو برجلكم وسمو
من اني وصغيره اسمع من ذني الحيزبونات
يمه يابت جليله سوت بت جليله كسرت بت جليله ومن اسأل منو جليله يكولون اسم الثاني لذكرى طفله واصدكهم وارجع افكر ليش ناي بت ذكرى وليش اني بت جليله وهم يرجعون يكذبون عليه ويقشمروني وبحكم عمري اصدك واسكت وكت مشفتها بلدكان وهم تهزمت منها وقشمروني
ماعرفت اني صدك بت جليله وبأن هيه انسانه ثانيه اله وكت مااخذوني سحل من بيت بيبي
جان عمري ١١ سنه خامس ابتدائي ابجي واعيط واملخ بشعرهم ياهو الالزمه اضربه اريد ارجع لاختي خايفه منهم ذوله منو عمو الشرطي ليش اخذني واني اصرخ بكل علو صوتي ضربت واحد من الشرطه الكاعد ليوره جان بصفي لازم ايدي حيل ويحاول يسكتني بس هد وحده منهن جان اكوم واضربه على وجهه اصابيعي طبت بعينه اليمنى شيغت روحه كام وضربني راشدي بكل حركة اعصاب
من أذيتي كعدت عاقله وبس ابجي اباوع على هاي المره الاخذتني ليش معيطت على عمو الشرطي لان ضربني ليش سكتت اله وشافتني انضرب وعادي عدها
درت وجهي على الجامه واناشغ من البجي واكول هسه لو ناي او يونس او بيبي شافوني انضرب مجان كتلو لهذا وعمه خوله هم تكسر العوده عليه
جليله : كااااافي شكد تبجين اسكتي
شرهب : اريد ارجع
جليله : ماكو رجعه واسكتي عيب منا عمو يضربج بعد بس تبجين
شرهب : اريد نااي وبلبل ويويو
جليله : هذوله منو يمه بله متسكتين اني تعبانه ومن وراج من الصبح كاعده كاافي حبيبتي من نوصل اسويلج اكل واجيبلج مصاص ونستله بس اسكتي مو طرشتيني
شرهب : عاطت بيه سكتت وبقيت انزل دموعي واخاف ليطلع صوت وتعيط بيه لو تضربني وذوله اليمي يباوعون عليه واخاف منهم
وصلنا وسحبتني من ايدي ودخلتني من باب ضليت واكفه اباوع على كل مكان وخايفه حتى بردت رغم الجو طيب مو بارد
بقت تسولف وياهم بلباب
ام جايله . تعالي حبيبتي
شرهب : انتي منو
ام جليله : اني بيبي
شرهب : انتي مو بيبي عمشه
ام جليله : اني مثلها تعالي بحضني
شرهب : مااحبج مااجي اريد بيبي عمشه وكمت ابجي الخوف من ناس جدد ومكان جدد سيطر عليه وخلاني كل شويه ابجي
جليله : شكوو يمعوده بس تبجين تعالي طبي وسحبتني من ايدي ودخلتني جان بيت احلى من بيت بيبي عمشه وغراضه زينه مرتبه كعدت على الكرويته واباوع عليها شون تحجي ويه هاي المره الثانيه الكالت هيه بيبي
ام جليله : يعني جبتيها عاندتي واخذتيها من اهلها
جليله : كتلج من الاول اروح اجيبها شكو بعد كل شويه تعيدين نفس الحجي
ام جليله : متعرفين تتصرفين دومج هيج اتجيبين طين واتذبي على راسج وهلمره رجعتي ورطتي نفسج بطفله هو روحنا كوه شايليها هلمره انجيب حمل فوك حملنا
جليله : اهووو راح تچلب بعد البنيه وجبتها وكافي سدي الموضوع
اجت تقربت مني مدت ايدها على شعري وخرت الكم خصله النازلات منه على وجهي
جليله : تعرفين اني منو
شرهب : هزيت راسي بحركة اي
جليله : اني منو
شرهب : جليله
جليله : اي امج ولازم تصيحيلي ماما
شرهب : لا
جليله : ليش ولج غير امج اني
شرهب : ماعندي ام انتي مو ماما ومااحبج ورجعيني
ام جليله : راح تشلع گلبج جنهه انتي من صغيره رب العناد والوكاحه اووف تركضين للهم ركض
جليله :جوعانه
شرهب : اي
جليله : هسه اسويلج اكل
شرهب : مااكل منج اييييع
جليله : ليش ولج مو اني ماما
شرهب : ماااااا ودرت وجهي منها وخايفه بنفس الوقت لتضربني
جليله : ولتاكلين ابقي ميته جوع يله يمه صبي
بقيت معانده صبو الغدا وجان دجاج وتمن وهاي اول مره اشوف دجاج هيج شكله بعدين عرفت اسمه دجاج شوي لان مناكل منه ريحته جانت طيبه والتمن يطلع دخان وزلاطه جعت حيل بقيت اباوع على الاكل وابلع بريكي وبطني توصوص من الجوع
جليله : وتالي متاكلين تبقين معانده
شرهب : ماااا
ام جليله : تعاي بيبي اكلي ميصير توجعج بطنج تكوم
شرهب : انتي مو بيبي اني عندي وحده بيبي عمشه وهسه تجي وتاخذني
جليله : والله جنت خلصانه منها ومن ولدها الطايح حظهم
ام جليله : لعد شرجعج عليهم
جليله : الوكت الاغبر اني اكوم اروح البيت وانتي عينج عليها يوم لتروح تنهزم تطلع
ام جليله : متباتين هنا
جليله : لا اليوم يرجع ابوصباح للبيت ومن يلكاني ماكو ياكل گلبي ويحجي عليه تعرفين بيه هو الايام كلها يم مرته الاولى ويوم واحد بالاسبوع يمي واذا ملكاني يصير عصبي شلي بهاي الدوخه يمه عينج عليها واخاف يجي احد من عدهم اياج تفتحين الباب اله
ام جليله : هذا هو يمه توكلي
شرهب : مركزه وياهم واباوع عليهم شون يحجون تقربت مني وباست راسي دفعتها
جليله : اكلي مو متاكلين
درت وجهي منها وانطيتها ظهري عافتني وطلعت
رفعت رجلي من الكاع وتمددت على الكرويته (القنفه) انطيتهم ظهري حطيت ايدي جوه راسي واباوع على الحايط واتخيل اني كاعده ويمي بلبل وناي وناكل واني وبلبل نتعارك على الاكل غفيت من البجي والجوع واني بملابس المدرسه
فتحت عيني واني اسمع صوت يونس طفرت من مكاني اعيط يويو لكيت هاي المره الي تخوف تحجي وياه من وره الباب ومتقبل تفتح اله ركضت اضربها
افتحي الباب اريد اخويه
ام جليله : روح منا كتلك جليله ماكو باجر من تجي عود تعال
يونس : خاله بس افتحي الباب اشوفها والله مااخذها
ام جليله : امشي ولي منا لا اعيط والم الناس عليك واكلهم حرامي واخليهم يسحلوك بلشارع
شرهب : كمت اضرب بيها بأيدها دنجت عضيت رجلها جان تضربني على راسي ودفعتي
ام جليله : من اشتعلو اهلج بت الگلب لج هيج چلب وتعضين
شرهب : اريد اخووويه
ام جليله : ادخلي جوه لا اكسر راسج متنطين عين جرتني من الباب من هدومي وطببتني واسمع دكت الباب وصوت يونس نطت روحي واني ابجي اريد اطلع لاخويه
لحد ما الصوت اختفى وعرفت اخويه راح كعدت بلكاع شمرت حذائي ونمت بلكاع مقهوره
ام جليله : كومي من الكاع
شرهب : كمت مااجاوبها تحجي ويايه حتى مااباوع عليها
ام جليله : طابه انام اذا سمعت صوت الج اجويج صيري حبابه وباجر اشتريلج لعابه
شرهب : مهتميت لكلامها ودخلت لغرفه بصف الهول كمت على كيفي اريد افتح باب الشارع اباوع مقفول حطيت راسي على الباب وصحت يويو بصوت عالي اعرف اخويه ماكو بس طفله وادور على اخويه تطلع مني تصرفات عفويه بس المجنت متوقعته يجي صوته ويكولي هياتني يمج موجود هلمره كمت اكمز لو بيدي اطير واروح لحضنه
يويو تعال اخذني
يونس : من اخذت العنوان من عمه خوله اجيت ركض ملكيت هاي الاسمها جليله وامها متفتح الباب جنت اسمع صوت بجي شرهب وعياطها وروحي تگب نار لو بيدي اطفر من الحايط واطب الهم بس اخاف يتبلن عليه واضيع الاول والتالي دكيت ردت تفتح على الاقل بس اشوفها مقبلت مكدرت ارجع للبيت واني شرهب مو ويايه وخاصه وعدت ناي ارجعها كعدت بلباب اكو دچه بناء بصف الباب كعدت عليها انتظر بلكت هاي الاسمها جليله تبين وين راحت ليش هذا مو بيتهم
شويه وسمعت صوت شرهب بحرگة تكول يويو لو اخذت روحي وكفت على حيلي وحطيت وجهي على الباب واحجي وياها لان اعرفها خايفه هياتني يمج موجود
شوشه تسمعيني
شرهب : يويو تعال اخذني
يونس : اخذج والله بس لتبجين
شرهب : اخاف منهم
يونس : لتخافين هااي شنو شوشه السباعيه تخاف لا زعلت منج
شرهب : جوعانه يويو
يونس : مجابو اكل الج
شرهب : كالو تعالي اكلي واني مااكل منهم
يونس : هسه رايح اجيب لفه الج واشمرها من السياج
شرهب : اخاف تتوصخ وحرام توكع بلكاع
يونس : شسوي ياعيني غير جوعانه
شرهب : اي حيل جوعانه
يونس : ابقي هنا هسه اجي رحت امشي سريع ادور على مطعم مفتح ماكو كلها معزله وتالي لكيت مطعم صغير يبيع فلافل هيه تحب الفلافل سويت لفتين الها وحده الي لان جوعان وحطيتهم بعلاكه وضليت ادور بلشارع على واير حبل اي شى لحد ما لكيت اثنين مكطعات ربطتهم وصلت يم الباب كلت بس لا حسو عليها
شوشه موجوده
شرهب : اي اي
يونس : ربطت العلاكه بلواير وصعدت على الدچه ومديتها من الحايط على كيفي الزمي
شرهب : سحبت العلاكه واخذتها واني ميته جوع طلعتها كيفت فلافل وانت لفتك وينها
يونس : جبت والله هياتها داكل بيها
شرهب : اكل ويايه والثانيه اضمها نص لنايه ونص لبلبل بس اذا جعت اكلها
يونس : اكلي حبيبتي اني اشتريلهم
شرهب : كعدت اكل بشهيه ومكيفه ومخايفه اخويه يمي اكل وفرحانه مسحت دموعي وكعدت بلكاع وخرت شعري من عيووني واكل
يونس : شبعتي
شرهب : اي ونعست
يونس : روحي نامي
شرهب : اخاف
يونس : اني هنا بلباب احرسج لتخافين
شرهب : شوكت ارجع وياكم
يونس : شوفي شوشه اريدج بطله خارقه شون الكارتون ومتخافين ابد ومتبجين
شرهب : واذا ضربوني
يونس : ميضربوج واكلي ولتعاندين
شرهب : اي وباجر نروح مو
يونس : ان شاء الله
شرهب : مو تعوفني
يونس : مااعوفج والله
شرهب : كمت من مكاني ودخلت للهول ونمت بهدومي جنت تعبانه
يونس : منطاني گلبي ارجع للبيت واني ممسوي حل ومرجع اختي على كعدتي غفيت جانت نومه متعبه بشكل وانتظر الصبح ساعه ساعه حتى بس اشوف هاي جليله شتريد وليش اخذتها بعد كل هاي السنين
ناي : مرت الساعات ولا يونس ولا شرهب حتى النوم طار من عيني واصعد وانزل وكل شويه اتخيل الباب ينفتح
خوله : يعني مايفوت كم شهر نرتاح اله تجي مصيبه واطلع الراحه من خشمنا معودنا البيت هدأ وساهره ولت طلعتنا جليله
بديعه : اخاف مترجع شرهب هاي ناي تتخبل
خوله : غير افهم ليش اخذتها الگلبه يذبن ومن يكبرون يصيرون اعزاز
نزل بلال يدور على شرهب
بلال : وين شوشه
بديعه : باجر تجي حبيبي روح نام
بلال : اريد العب وياها اخذت سيارتي الصغنونه
بديعه : اني اجيبلك وحده باجر روح نام عيونك تقفل من النعس
بلال : دعدوني من تجي
بديعه : ميخالف انكعدك بس روح نام
ناي : عمه عفيه هلمره يونس ماكو
خوله : هو غير يسمع الكلام لا قبل احد يروح وياها ولا انطه مجال نفهم منه شون اروح وراه
بديعه : وين رايحه ممنوع تجوال والشوارع هندس تخوف خوش هلمره اطلعين بعد مترجعين
بان : تعالي ناي نامي
ناي : شون انام واخوتي مابينو
خوله : هلمره ضل بالي على يونس راح والروحه روحه وذوله اخوتي ولا واحد رجال بيهم ولحمته تغار ويروح وره ابن اخوه يشوفه وين
طلعت بيبي شاده راسها وتون
عمشه :
يگلبي بيش اخيطنك ولحماك
ولا واحد شگف عنك ولاحماك
يجيك الضيم من دمك ولحمك
من اقاطعهم تلوم الناس بيه
خوله : ماالومج قاطعيهم وارتاحي وخاصه ولدج الحوك خو ذاك ابو فلس الميت على الدنيا حتى مااجه ولا شفنه طوله وادري بيج دزيتي عليه
عمشه : ادكچ دگه وحك علي هذا الم راسي احطنه بيج چا ماتحسين انه گليبي موجر على شربت وانتي حايره بأخوتج
خوله : شون مااحير بيهم لو همه زلم وكفو ويه ابن اخوهم مجان هذا حالنا
عمشه : انه سنوني يطكن ورجولي تراجفن عبن الوليدات ماردو وانتي ضاله تكاطفين ويايه بلحجي
خوله : شوكت تحجين الحق بس لو افهم
عمشه : من اموتن ميلي مني خايبه باط جبدي وانتي مثل كراط الحجار بكل طلابه لسانج هاطوله انه لو كاضه جليله مااخليها تاخذها البت بتنا وهي ماتريدها وشمرتهه الحين صارت عزيزه شنهي العياره اااااخ كون اكضها تعالي يمه نايه مسديلي راسي عبن راح يطك منا ضيم شربت عمت عيني عليهه چا شون حالها ومنا ضيم هاي ام الدكايك عمتج چا انه كل يوم الدنيا تبز عيني وهاي المدهربه تذب الصوج بيه
بديعه : جوزي منها تشوفيها تعبانه
خوله : هيه جابت التعب لنفسها
بديعه : ميخالف كافي لتتمرض وتوكع
ناي : كعدت افرك راس بيبي وعيني على الباب شوكت يجون طب مرتضى
خوله : يااا اجه سوبر مان بيت عمشه هااا عمه شجابك بهذا الليل
مرتضى : هسه سمعت بسالفه شرهب شصار
بديعه : والله احسن من ابوك اقلها اجيت وسألت
خوله : الف عين لاجل عين تكرمون غير يتلوك مو كتلج سوبر مان بيت عمشه
بديعه : غير تسكت هسه وكتها
مرتضى : محتاجين شى
بديعه : لا ابني سلامتك
مرتضى : تعالي ناي عندي حجايه وياج
خوله : خير احجي قابل احد غريب عماتها وبيبيتها وبت عمك
مرتضى : حجايه عمه مااطول
ناي : باوعت على عمه خوله اشرت براسها روحي كمت ورحت وياه وكفنا قريب غرفه بيبي
مرتضى : اذا تحتاجين شى اساعد عيوني الج
ناي : شكراً
مرتضى : مبينه باجيه هوايه
ناي : شسوي غير اختي الوحيده وهلمره يونس ماكو حيل خوفني
مرتضى : انطوني العنوان وهسه اروح اشوفه
ناي : ياريت بس اخاف يصير بيك شى
مرتضى تخافين عليه
ناي : غير ابن عمي اكيد اخاف والصراحه هم اخاف من لسان امك شيخلصنا
مرتضى : مالج دخل بأمي
عمه انطيني عنوان بيت هاي المره
خوله : هاا رايح هداده عليها
مرتضى : اشوف يونس واجي
بديعه : وين رايح بهذا الليل غير اذا شافوك ياخذوك
ناي : اكعد عفيه منريد مشاكل
مرتضى : مااكدر اشوفج هيج تعبانه وابقى مجتف وساكت
ناي : بقيت بحيره اخاف يروح ويصير عليه شى ونبتلي وبنفس الوقت گلبي نار على يونس
خوله : هااك عمه هذا العنوان قريب
بديعه : لج ليصير بيه شى
خوله : هسه هو مو اجه من بيتهم علينا ماكو شى مستفادينا من خلفه عمشه نستفاد من ولدهم على الاقل
ناي : اخذ العنوان مرتضى وراح وره ساعه اجه
يونس : نايم واحس بأيد تكعدني يونس يمعود يونس
فتحت عيوني لكيت مرتضى شجابك
مرتضى : ضل بالهم عليك شسوي هنا امشي ارجع
يونس : مااكدر ارجع لان ملكيت جليله بلكت باجر تجي وافضها وياها
مرتضى : تعال ارجع للبيت وارتاح ومن الصبح ارجع لهنا قابل طايره الدنيا
يونس :ارجع انت وبلغهم اني زين وماكو شى وانتظر جليله
ناي :اول مدخل ركضت على مرتضى هااا وين يونس وگلي اخويه نايم بلشارع كله علمود شرهب اااخ يايونس وحنيتك
شكرت مرتضى وصعدت فوك ردت ابقى وحدي اختنكت مااريد اشوف احد
يونس : ثاني يوم صبح الصبح والشمس صارت عاليه تمشيت شربت استكان جاي حتى اصحصح ورجعت لنفس مكاني طلعت ام جليله وشافتني
هاااا بعدك هنا
يونس : ومااروح اله تجي بتج خاله رحمه لموتاج بس اشوف اختي
ام جليله : تجي هيه واذا قبلت ادخلك
يونس : احنا نسولف طبك تكسي ونزلت منه جليله لابسه عبايه خليجيه مخصره والكذله طالعه من الشال والحمره حمره والعلج
انطت الحساب لابو التكسي واندارت عليه انت منو
ام جليله : هذا ابن صمد
جليله : ياااا ولك صاير رجال وشواربك طالعه ولو جنهن مجره مال نمل بس يله تمشي راهمه عليك تعال طب ليش واكف بلشارع
يونس : من البارحه واكف
جليله : منو كلك توكف اخاف عبالك تاخذ شرهب
يونس : بس خلي اشوفها هسه
جليله : تعال طب وانتي يمه روحي اتسوكي كملي شغلج
يونس : طبيت للبيت لكيتها كافه على نفسها ونايمه والوجهه كلشي ممبين منه لان نازل شعرها عليه وخرته وبستها
شرهب : فتحت عيني واشوف يونس يمي كمت وحضنته راح تاخذني
يونس : اي اخذج
جليله : هوب هوب عيني شنو تاخذها هي بكيفك
يونس : انتي شرايده منها
جليله : كومي ماما طبي للغرفه
شرهب : اريد ابقى يم يويو
يونس : طبي حبيبتي واني اصيحج
شرهب : مو تروح
يونس : لا مااروح
يونس : كولي بقينا وحدنا ليش اخذتيها ولتكولين بنتي ومدري شنو لو تحنين عليها مجان وره ١١ سنه يله اتذكرتيها
جليله : شوف مبين انت ذكي رغم صغير اني جنت منتظره لو واحد من عمامك لو عمتك خوله او عمشه شو انت جيت وماطول هيج مستقتل على اختك راح اطلعلك بلنظيف واحجي من الاخير
يونس : ياريت
جليله : اني متزوجه واحد وهذا الواحد امكانيته زينه بس ميصرف مثل مااحب وخانكني وردت استفاد براسه تالي سمعت مشارك واحد ومشغلين فلوس هذا الواحد اسمه حجي سعدون هذا سعدون شريك عمامك
يونس : اي واحنا شعلينا
جليله : خلي اكمل عرفت عمامك حوسمو وطكو طكه معدله حتى عماره مشترين
يونس : وضاعت العماره والفلوس
جليله : وين اكو هيج حجي اني سمعت رجلي يحجي ويه سعدون ويگله من هذا الشهر راح احول الايجارات لجوحي
يونس : واحنا شكوو عمامي حوسمو او صار عدهم فلوس اني شعليه وخواتي وشرهب بلذات شعليها
جليله : اريد تحصلي منهم محل اسوي صالون بهاي العماره وماادفع ايجار ابلاش يسويلي عقد سر قفليه
يونس : وتنطيني شرهب
جليله : اكيد اخذها انت اخوها واولها بتربيتها
يونس : يعني هذا الفلم كله علمود محل اخذتي البنيه من عدنا وهبطتيها علمود تحصلين محل
جليله : شوف عيني هاي الدنيه اذا متاخذ حقك بيدك تنداس واني انداسيت هوايه ومامستعده انطي بعد من نفسي
يونس : وانتي من كل عقلج عمي راح يوافق هذا واحد اذا طلع الربع من جيبه مينام الليل واني وخواتي لو نحترك كدامه ميطفينا يخاف على دشداشته لتتوصخ ويصرف مي وتايت للغسل متعرفين بيه شكد بخيل
جليله : اعرف بيه واعرف سوالفه ابوك حجالي بس اذا عمشه تعاركت وياه وطلبت منه حتى بس ترجع شرهب راح يوافق
يونس : تعرفين اني شنو اشتغل حمال ومنظف والعصر ابيع كلينكس وعلج وعلاليك بلسوك كله حتى اوكل خواتي ومااخلي احد يحجي عليهن وتالي انتي اخذتي الصغيره وجايه تلعبين بيها منكسر گلبج عليها وهي تبجي
جليله : اني مسويت شى الها كلها كم يوم اذا سويتو الاريده ارجعها بلعكس خلي تعرف امها تره اني والله احبها واتمنى اخذها يمي بس ظرفي ميسمح وهي بعد تعلمت عليكم صعب اخذها تره الي داسوي تالي الها أمن مستقباها
يونس : اتضحكين عليه لو على نفسج شوفي خاله
جليله : وخل خاله شنو هازه كاروكك
يونس : اي هازته مو انتي اتزوجتي ابويه بعد زواجه من امي ب٣ اشهر يعني هازه الكاروك مالتي ماعلينا بهذا الحجي اني اريد اختي وذولاك عمامي شسوين سوي بيهم وحطي بالج تره احنا بلنسبه الهم عاله واذيه وميحبونا يعني شرهب لا تقدم ولا تأخر عدهم
جليله : بس تقدم وتأخر عندك وتكدر تتعارك وياهم تحرك بيبيتك عمتك المهم تسوي شى تخلي جوحي ينطيني هذا المحل تره هو محل واحد تدري العماره كم محل بيها فوك ال١٠ محلات عدا الشقق الفوك يعني المحل لا شئ مقارنه بلعماره
يونس : لعبتج فاشله وتره بيبي مو مثل قبل تاثر وماوكعت بهاي اللعبه غير هاي الصغيره
جليله : العندي كلته وانت تريد تسولف وتضيع وكتي تريد اختك تقنع عمك غيرها ماعندي تبقى هنا والله مااخليكم تشوفون اضفرها
يونس : خلي اشوفها واروح
جليله : طب جوه ولتتأخر
يونس : دخلت على شرهب جانت واكفه كدام المرايه تلعب بشعرها هي شافتني اجت تركض
شرهب : هااا نروح
يونس : حضنتها وجريتها وكعدتها بصفي
اسمعي حبيبتي راح تبقين كم يوم هنا
شرهب : لا عفيه عندي مدرسه الست متقبل اغيب
يونس : راح اجيبلج الكتب ويوميه الصبح اخذج للمدرسه وارجعج
شرهب : خلي نروح للبيت
يونس : نروح بس مو هسه اريد منج لتسوين وكاحه حتى لتضربج
شرهب : ونايه وبلبل وعمه وبيبي
يونس : كلهم اخليج تشوفيهم بس لتتوكحين
شرهب : اي
حضنتها وبستها وطلعت واني حاير بزماني اكثر من حيره العيشه هذوله شنو اقنعهم ينطوها محل رجعت خايب الامل وحاير شكول لناي دخلت واجتني بلهفه وعيونها ادور على اختها
ناي : وينها
يونس : ماكدرت اجيبها
خوله : مو كتلك خلي اسحلها مقبلت
يونس : عمه مو گلشي بعياط وهوسه هيه لعبتها صح بتها ومن حقها تاخذها
بديعه : هسه صمد لو مسجلها بأسم ذكرى جان يوميه يتهزم من الموضوع وهسه اگلناها بله نحجي عليه نترحمله كل سالفه مسويها تخلي حتى كلمة الله يرحمه ميستاهلها
ناي : شرادت اكعد احجي
جان يونس بعيونه قلت الحيله والتعب اخويه يمشي ويسحل بروحه لان يحس روحه عاجز سولف كلشي النا اني وعمه خوله وعمه بديعه
خوله : سهله ماكو اسهل منها
يونس : ياسهله عمه اكلها تريد محل وجوحي بلذات سكط رجلي حتى ميصرف يحي ينطي محل علمود اختي
خوله : وربك تهديد بسيط يسجل حتى يجفي شر عبيد اذا عرف عنده هيج عماره يابويه تصير بلكرك
انت عوفها عليه ومالك دخل
يونس : شعوف اخاف تنلاص
خوله : وربك متنلاص ذوله جبانيه شبيك انت بأسبوع واحد طلعت جوحي من البيت
يونس : ماادري عمه حيل احتاريت
خوله : عوفها عليه ومالك دخل واجيبلك العقد تروح اجيب اختك وتجي
ولجن انطني العبايه
ناي : اي عمه ركضت اجيبها
لتجي انت حتى ليحقد عليك ساعه زمان واني يمكم
خوله : طلعت من البيت واني احسب لكل كلمة اكولها اتمشى بلشارع واني بالي مو يمه لحد ما وصلت لبيتهم دكيت الباب طلعت ساهره
ساهره : ياستار شكو
خوله : هااا بت غنيه تعلمتي احنا ماكو الله يرحم جنتي محبوسه بغرفه مثل الجلب راسج كوه تمدي
ساهره : شتردين خوله مو عفنا البيت الج وهجينا
خوله : ياعيني على اساس رحتو للصين هو جم فرع بينا الله عليج متترحمين اليه لان طلعتي
ساهره : تعالي طبي مبين اكو شغله عاويه لان متجين بشى زين
خوله : عفيه قاريتني صحيح وين رجلج
ساهره : جوه ادخلي
خوله : دخلت لكيته كاعد على التلفزيون وبيده الريمونت ويگلب ومشتي ستلايت هاااا طك ابو العتيك ااااخ من طيح الله حظ الوكت الخلاك تلعب بلفلوس لعب شونك اخويه
جوحي : لا هله شصاير منو مات واجيتي
خوله :لا ادوخك ولا ادوخني اريد محل بعمارتك الجديده
جوحي : هههههه تخبلتي اكيد
خوله : هاي مرت صمد جليله اخذت شرهب ومترضى ترجعها اله بعقد سر قفليه لمحل بعمارتك ساومتنا ومع الاسف ماعدنا غيرك
جوحي : وعنها مرجعتها يطبكم طوب من كل عقلج انطي محل علمود ارجع شرهب الكم هي منو شرهب واضحي بمحل علمودها امشي لج اطلعي بره
خوله : وعبيد اذا درى
جوحي : طز بيج وبيه وخلي يدري ميهمني ادوسه بلقندره اذا حجه
خوله : مبين واكعلك على راس جبيره وتتحامى بيها
جوحي : اخاف ذيج المره عبرتها الج هلمره اطيح حظج وامش ولي بره
خوله : جرني وطردني كمت ارجف شسوي هذا كام ميخاف رجعت بسرعه للبيت جان يونس والكل منتظر الفرج مني طبيت وعيوني براسي اعيط اخليهم يتعاركون
يونس : ليضل بالج عمه اني احلها بس انطوني مجال
خوله : يمه يامجال وهذا الگلب جوحي كام ميخاف
يونس : تنحل
خوله : هسه اكول لعبيد وصالحه واخليهم دمايه
يونس : لا ميحتاج لتكبرين الشغله وهلمره يسويها عناد خلي اجرب اني ويصير خير
خوله : لكم ارجف اريد اطيح حظه طردني الحقير
بديعه : لتوصلين بعد هنا
خوله : وداعت حركت گلبي هسه اذا مااحرك بيته ومااخلي يتهنى
بديعه : عزه تحرگين بيته
خوله : مو بيد بيد ذيج الخانسه فوك هي كعد تستوي على نار هاديه خليها اني اعرف شون اضيع الراحه الشفت اليوم بعيون ساهره عبالها خلصت مني
ناي : جان عندي امل ولو صغير تنحل اليوم بس ماانحل كلشي
وبدت الايام تمشي وكل يوم يفوت ياكل بينا اكل يونس تكفل يودي ويجيب شرهب للمدرسه حتى متعوف هاي السنه وياخذ لفات منا حتى تاكل لان متقبل تاكل بذاك البيت
شرهب : طولت هنا صار اكثر من شهر وبديت اضوج وذوله مااحبهم ويحجون اشكال على يونس والكل
متحملت ابقى هاديه وكمت اسوي مشاكل بلبيت
ام جليله : ولج هاي شمسويه
شرهب : مو اني
تعالي يخايبه شوفي بتج شسوت
جليله : شكوو
ام جليله : ذبت ملابسي السود بلقاصر بله هسه خربن شلبس العصر واني عندي فاتحه
جليله : ليش ولج هيج تسوين هاي تعلوم يونس موو
شرهب : اخويه شعليه ومو اني سويت هااي حطته هنا وخربن
جليله : اسمها بيبي مو هاي
شرهب : عندي امتحان عفتهن ورجعت للغرفه وعفت امها تعيط عليها
كمت ارتاح من أذيهم واخليهن يتعايطن
ام جليله : شون بله هاي غضب ونزل على راسنا
جليله : يمه تره لعبتيها لنفسي كل شويه وعايطه شكو هسه
ام جليله : ادور على الجزدان لكيته مشكك والفلوس بيه مشككه شوفي جليله تاخذين بتج ياتوديها لشقتج يا ترجعيها لاهلها مااتحمله
جليله : شرهب وًينج
شرهب : هاااا
جليله : وجعععا شنو هاي الوكاحه ولزمت اذني مردتهن مرد
اذا سويتي شى بعد اجويج
شرهب : مو اني
جليله : وفوكاها تجذبين
شرهب : اي اريد ارجع لبيت بيبي
جليله : ماكو رجعه تنجبين وتبقين هنا
شرهب : خليت حياتهم سم لا بقيت ملابس ما خربتها فلوس اشكها تلفزيون جديد ذبيت عليه مي وحركته ومن تسبح ام جليله افتح المي البارد من جهه المطبخ واخليها تنسمط بلحار لان ينكطع اذا انفك خليت ايامهم سوده انضرب اكثر من مره وجنت كل ماانضرب ازيد اعناد ومشاكل
وبيوم اجيت مثل كل مره واخذت نعالهم وكطعته وشمرته وحطيت بجدر الاكل ملح كامل جيس وغطيته ورجعت سويت نفسي اقرا جان يكومن يعيطن
جليله : هواي سكتت الج بت الگلب شو تعالي
شرهب : عوفيني مااحبج مااحبج
جليله : واليوم اخليج تخافين من خيالج بس تشوفيني لج طلعتي الاسبوع سم وزهر علينا قبلها اسبوع كامل طلعتي روحنا حجيت وياج هددت ومافاد ورجعتي هسه انكس هاي سوالف اخوج المعوق الخايس اله اطيح حظج وحظه شو تعااالي
شرهب : سحبتني من ايدي للمطبخ وجابت سجينه صغيره وحطتها على النار اني شفتها لو كمت اكمز واصيح يويو الحكني نايه واعيط بكل صوتي وجان احس بنار بأيدي جوتني بجف ايدي واول مره اتعرض لهيج شى كمت اعيط وابجي لزمت حلكي وسدته ودخلتني للغرفه ابجي وحدي
اباوع على ايدي شون تحركت انفخ عليها وابجي
ام جليله : رجعيها لاهلها وفضيها
جليله : والله ولا ارجعها لو اعرف العمر كله اعوفها هنا مشايفه هيج طفله صلفه وكحه متخاف لا حجي لا ضرب خوش هسه جويتها اخليها بعد تخاف تسوي شى
شرهب : من فزت الجويه طلعت لطمت حمه بحلكي وصخنت وهاي ولا اجت ولا دخلت عليه بس امها جابت دهن وحطتلي مكدرت اعاند لان يحرگني وبس ابجي
شويه وبدلت وتعطرت وطلعت كرهتها لدرجه حتى اكثر من صالحه وساهره
ثاني يوم اجه يونس مطلعت اله بقيت مااروح للمدرسه بقيت بفراشي اباوع لايدي المحرگه وهي توجعني
يونس : طبيت على شرهب ادور عليها لكيت الوجهه اصفر والايد ممدوده ومحرگه وبيها دهن اني شفتها لو النار صارت بيه هاي منو وياج
شرهب : نزلت دموعي جانت بجيتي بجيت يتيم مأكول حقه ويدور بعيون الناس منو ينصفه منو يطبطب عليه منو يداوي جروحه
محجيت اي شى وحطيت راسي بحضنه ادور حنان الام وسند الاب وقوه الاخ بيه
يونس : كومي
شرهب : ميقبلون
يونس : كتلج كومي
كومني ودنك ولبسني نعالي ودور على ملابسي حطهن بعلاكه وسحب جنطت مدرستي وطلعنا من الباب جان تصير بوجهنا جليله
جليله : ولك وين ماخذها
يونس : للبيت يمنا
جليله : امشي لك زعطوط تاخذها واسكتلك كتلك شريد تنفذه انطيك ياها وبطيب خاطر متسوي الاريده امشي رجعها بعدك صغير مو وجهه بهذله وسجون
يونس : ماارجعها
جليله : يااا تخبلت هو اني صوجي خليتك تودي وتجيب للمدرسه لو حارمتك منها جان جريت عدل
يونس : صحيح اني زعطوط وصغير بس خوفج من الزعاطيط. اذا مااخذت شرهب هسه ويايه اروح لرجلج ابو صـباح واكوله مرتك تلعب عليك وتريد تاخذ محل من عمي وحاطه عينها عليه ويجوز تطلك منك وتتزوجه
جليله : ايا ابن الگلب عبالك يصدك واحد فاهي مثلك
يونس : يعرف سوالفج وسوابقج وماشاء الله السجل مالتج مليان كل فتره متزوجه واحد وهذا ابو صـباح اذا هددته اروح لمرته الاولى وافضحه لان متزوج عليها وخاصه هو يرجف رجف خوف من مرته الاولى راح يموت بدمه ويجي يطيح حظج ويلزمج الباب انطيني شرهب وروحي عيشي وانحرفي بعيد عنا وعنها شوفي حالها شكد الحال تعبان وعيشتنا على كدنا بس ولا مره اختي هيج حالها صار كلت بلكت انتي امها واداريها وتعوضيها عن يتم الام كلت وين الله واشوف صحكتها وتجي تكلي كمت احب ماما واريد ابقى وياها مو حتى اتخلص من مسؤوليتها مستعده العمر كله احطها على راسي بس ردت تحس بطعم الام وحنانها شون يصير وانتي بسوالفج كرهتيها حتى بكلمة ماما الله لايوفقج
جليله : رجعها يونس ولتسوي مشاكل
يونس : العندي كلتي واني واحد هسه مثل ذوله الانتحارين على الامريكان هسه اني انتحاري لو اخذ شرهب وارجع للبيت واياج اشوفج توصلين يمها لو اروح لرجلج ولمرته وهاا بيته بلمنصور اخاف عبالج مااندل مشيت وراج واندليت شقتج ومشيت وراه واندليت بيته الاول يعني تكسي هسه بخمس الالاف يذبني بابهم
هااااااااا شگلتي
ناي : كاعده اقرا ومالي حيل وكارهه حتى الدراسه وكل شويه يصير الم براسي من افكر بشرهب حيل اشتاقيت الها مبقى شى ونخلص امتحانات النهائيه وهي ماكو كل يوم اسهر للفجر ابجي حتى صلاه كمت اصلي وادعي واكول ربي دعوه يتيمه رجعلي اختي ومر شهرين واختي ماكو واني صافنه لازمه القلم واشخبط وماحاسه بروحي وفكري شارد بيها وبحالنا وشون اذا مرجعت
سمعت صووووووت عالي
وينكم
يتبع ......
شكراً من قلبي على تفاعلكم وتصويتكم للقصه 🌹🌹🌹
رواية الابواب الخمس الفصل الثامن وثلاثون 38 - بقلم ريام هادي
#ابي_والغزلان
مساء الـ🥀ـورد والهنا
محتاجين دعاء محبين حجي طه وبناته نريد دعاء جماعي لغزوله (غزل ) يرزقها بلذريه الصالحه قريباً عمليتها مال طفل انابيب بعد ايام بدون تحديد اليوم للحفاظ عليها
ادعولها تنجح العمليه وتقر عينها بلذريه
وتفرح فرحه العمر
البنات يتابعون تعليقاتكم وبالاخص غزل
وشكراً لكل ادعيتكم 🌹🌹🌹
رواية الابواب الخمس الفصل التاسع وثلاثون 39 - بقلم ريام هادي
#الابواب_الخمس
البارت الرابع والثلاثون
للكاتبه Reem
انه الـمچتوف ما يفـتك
انه الـينشاف چـنه بـخير انه الـچذاب مـن يضـحك
انه الـضايع كـحل بالليل
انه الـمبيوگ
انه المامـش
انه الـبس اسـمه بـشر عايـش
انه الـثگلت علـيه روحـه
انه الـكل تايـهه وكل عابـره تلوحـه
انه الـمتروس صـدره عـتاب
انه الـعينه اعله دگـت باب
انه الماادري اشـكبره
انه الباگـه بياض الـشيب من عـمره
انه الـضاعن احلامـه طـيور
انه الـخلصن اسنينه انـذور
انه الماله عـمر يـسوه
انه الـفدوه
انه الحته احله ايامـه گـضن كوه
ناي : كاعده اقرا ومالي حيل وكارهه حتى الدراسه وكل شويه يصير الم براسي من افكر بشرهب حيل اشتاقيت الها مبقى شى ونخلص امتحانات النهائيه وهي ماكو كل يوم اسهر للفجر ابجي حتى صلاه كمت اصلي وادعي واكول ربي دعوه يتيمه رجعلي اختي ومر شهرين واختي ماكو واني صافنه لازمه القلم واشخبط وماحاسه بروحي وفكري شارد بيها وبحالنا وشون اذا مرجعت
سمعت صووووووت عالي
وينكم
هاي صوتها شمرت القلم ونزلت حافيه اركض
وشفتها كبالي هيه وكفشتها من حلات گلبي ردت اوكع من الدرج
نزلت وابجي ممصدكه رجعت حضنتها حيل وابوس بوجهه وشعرها واشم ريحتها ممصدكه رجعتلي
شرهب : اااخ على كيفج نايه ايدي
ناي : وخرتها من حضني ولزمت ايدها على كيفي لج هاي شنو
شرهب : جليله حركتني
ناي : اكسرت ايدها هاي شصاير بيدك جان تجي عمتي من بره هي وعمه بدعه مبين جانو طالعين شافوها ومصدكو صارت شرهب من ايد لايد
شرهب : انمردت والله على كيفكم
خوله : هاي جليله العار هيج سوت بيج مو
يونس : مو وكتها عمه اخذوها وغسلو الها وياريت تشوفون حل لايدها اذا اكو عصاره دهن فدشى يطيبها مااريد اثر يبقى بيدها
بديعه : هسه يمه اشوف هاي جيرانا ذاك اليوم بتها احتركت رجليها وجابت عصاره من الصيدلاني كلش زينه
رايحه دقايق واجي
خوله : شلون جبتها
يونس : مو مهم شلون هسه اريدج عمه عينج عليها تره شرهب حيل تأذت من امها
خوله : وحده حقيره من يوم ماشفناها ولا شفنا الخير منها
يونس : اني لازم اروح لابو الشغل لان صار كم يوم مقصر واخاف يطردني
ناي قريها باجر اخر امتحان عدها
ناي : اي هسه ترتاح واقريها
تعالي حضنتها وصعدت وياها
قريب منوصل للغرفه جان تطلع صالحه
صالحه : هااا رجعتي لا هله
شرهب : بيج عمه
صالحه : وجع لج عرفتي شگلتي
شرهب : مكلت شى يله ناي قريني
صالحه : بت جليله شترجى منج منو امج
شرهب : انداريت عليها وكتلها ماعندي ام
ناي : امشي حبيبتي
اخذتها وبدلت الها جانت هادئه اجه ركض بلال عليها وحضنها
بلال : زاعلتج وين عفتيني
شرهب : رجعت لتخاف مااعوفك
بلال : عندي اتالي (اتاري) تلعبين ويايه
شرهب : غير وكت خلي اقرا وباجر من ارجع من المدرسه نلعب سوه
ناي : اباوع عليها ساكته وبس تقرا ومندمجه بلدراسه مو شرهب الي تكمز واسحلها كوه حتى تقرا
بيج شى شوشه
رفعت راسها والدمعه بعيونها
شرهب : لترجعوني يمها مااريدها
ناي : حضنتها لا حبيبتي منرجعج
شرهب : اخاف منها تأذيني
ناي : مترجعين ابد ماطول يونس رجعج مترجعين
شرهب : اكرهه هاي مو امي اني امي هي نفسها امج ذكرى انتي مو تكولين ماما ذكرى جانت تحبني
ناي : اي والله تحبج
شرهب : لعد هيه امي وهاي جليله مااريد اشوفها
ناي : متشوفيها وخلي تولي شو تعالي وسحبتها بحضني وخليت راسها على رجلي والعب بشعرها دنكت بست راسها اباوع على ايدها شون مجوايه احنا بعمرنا ما مدينا ايدنا عليها حتى من تسوي مشاكل وكاحه نحجي عليها بس منضربها تالي هيج يصير بحالها
ضليت العب بشعرها لحد محسيتها تريد تنام وعيونها تنفتح وتنسد
ناي : كومي حبيبتي نكمل امتحانج وراها نامي
بديعه : هااا احبيبات شو يمه اشوف ايدج
شرهب : هااج عمه بس لتأذيني حبابه
بديعه : شون أذيج اتخبلت هسه على كيفي ادهنها وتصير زينه
بان : ناي هاي سما تريدج
ناي : مطب احد لازمها
بان : شمدريني تكولي صيحيلي ناي
ناي : هسه اجيكم كمت وطلعت بره الغرفه
لكيت سما واكفه وتتلفت
هااا رايده شى
سما : شوكت يجي يونس
ناي : وهاي صايحتني علمود هيج عبالي بيج شى
سما : شون مابيه صار ايام اريد بس احجي وياه احسه يتهزم مني
ناي :صدك تحجين يعني مكعد تشوفين شديصير بينا وشون جان مخبوص بشرهب المفروض انتي اكل وحده تحسين بيه وتقدرين ظرفه وتوكفين وياه مو تلوميه
سما : عفيه تره البيه كافيني من يجي كولي اله سما تريدك مو ينام اليوم لازم
احجي ويااه
ناي : صار عندج اوامر ثانيه
سما : مو امر كتلج وصلي كلامي مو أمرج
ناي : وراح يوصل كلامج روحي لغرفتج لتجي امج ويطلع لسانها علينا
سما : مو تنسين
ناي : ماانسى باوعت عليها وهي تتهزم وتدخل غرفتها هزيت ايدي والله بطرانه احنا وين وهيه وين
يونس : طلعت بوجهي للشغل جنت حاس من اخر مره ابو الشغل مراضي عليه لان كعد اتأخر كلت ماطول رجعت شرهب لازم التزم مااريد اضيع شغلي عيشتي عليه
دخلت للمخزن لكيت صاحب المخزن وياه ولد يطلع اكبر مني كعد يعلمه على شغلات ويإشر
السلام عليكم حجي
هله بعد وكت جان خليتها لليل
يونس : والله ياحجي جان عندي ظرف والحمدلله اليوم فض
الحجي : واليوم شغلك يمي هم فض
يونس : شنو يعني
الحجي : مالك شغل يمي وروح لابو عادل ينطيك اجرتك ودور على باب رزق ثاني
يونس : دخيلك والله ارجع التزم كتلك اليوم فضت
الحجي : واني مااضل انتظر حضرت جنابك شوكت تخلص مشاكلك اني عندي التزامات مااكعد احط رجل على رجل وانتظر شوكت انت تفرغلي وتكمل المخزن حتى ذاك الوكت اجيب البضاعه هاي ملايين واذا مو كلشي بلساعه يمشي مضبوط اخسر كومه فلوس ومن وره حضرت جنابك اخسر ملايين ليش بله اجيت ١٠٠ اغاتك وينظفون وهمه الممنونين موزين مني صار سنين ملفيك
يونس : واني ممقصر اشتغل بكل حيلي ومايوم اخرتك او اذيتك او خسرتك وهاي الكم يوم الفاتو الله يعلم شجان صاير بحالي حجي رحمه لموتاك بس هاي المره والله مااعيدها متعرف اليوميه الي تنطينياها شكد فارقه عندي هيه معيشتني ومعيشه عائله برگبتي
الحجي : ها مشكلتك مو مشكلتي واني جبت واحد بمكانك روح الله يسهلك مالك شغل عندي
يونس :دخل اليأس بگلبي جنت حيل معتمد على هاي الشغله وطارت مني حاول مره ومرتين احجي اتوسل وميفيد اخر شى طلعت من المكان واخذت اليوميه الي صرفوها اليه وسلمت امري لله
امشي بلشوارع واعبر من سايد لسايد واباوع على المحلات والناس التشتري والي تبيع وصوت البياعه شون ترن بأذن الرايح والجاي حتى الناس تشتري منهم
امشي ورجلي متعيني اسحل بيها كمت بلا تعين ادخل على اي محل كبالي اسأله بلكت يريد عامل ومن يشوفون حالي مباشره يكولون منريد عبرت المحلات كلها وكمت اتمشى بين البسطيات حتى بسطيات المخضر اسأل تردون عامل واحد يكول مشكور حبيبي ممحتاج والثاني يكول هو وينه الشغل واجيب عامل والي يكول هو اني عامل يعني انسدت بوجهي من كل جهه ولو منو يشغل واحد مثلي
خلصت بغداد الجديده بلسايدين ردت واحد بس يشغلني حتى لو كناس الم زباله ارضى المهم مااضل بليه شغل ماكو لحد مصار قريب ممنوع التجوال رجعت مشي اريد اشتم هوا ولو الهوا بفلوس جان هسه حسره عليه
الدنيا مغرب وخيوط الشمس تتختل بين الغيوم ونسمه الهوا الدافيه تلوح وجهي والطيور الي تفتر حتى ادور مكان تنام بيه والشوارع الهاديه حتى جهال ماكو لان امتحانات نهايه السنه وكلها تقرا امشي وادفر برجلي اذ حصوه قريبه مثل التايهه كل الي بالي العيشه شون راح ادبرها ومنين اجيب هاي عود كلت بس تنجح شرهب اجيب الها هديه خطيه اطيب خاطرها الصار بيها مو قليل اختي واعرفها خاطرها مكسور طفله وشافت الاذيه وتمنيت اعوضها هلكدر عليه
وتالي ضليت لا شغله ولا عمله
مديت ايدي بجيبي حسبت الفلوس مايكفن ٣ ايام مصرف منين اجيب جريت نفس قوي والخنكه واكفه على صدري لوما العيبه ابجي
هسه لو عليه حتى لو مااكل عادي انام بلشارع مااهتم بس ذني مااريدهن يتأذن واحتاج احد وانذل اله حتى لو عمامي
ناي : جنت اسوي عشا اني وعمه خوله وبيدي السجينه اكص بلطماطه ودخل يونس حسيت وجهه مكلوب وتعبان
يونس : السلام عليكم
خوله : هله حبيبي وعليكم يله طب اسبح بين ميكمل العشا مو تنام
يونس : مجوعان عمه مااريد
ناي : ليش انت حتى غدا متغديت
يونس : اكلت بره ليضل بالكم شرهب وين
ناي : فوك يم بان كعد تقريها
يونس : وانتي شعندج هنا مو عندج دراسه
ناي : بس اكمل البيدي واصعد
بديعه : اجيت اني اساعد عمتج اصعدي انتي اقري
ناي : ذبيت من ايدي السجينه اشرت ليونس يطلع ورايه
يونس : هااا
ناي : هاي سما تريدك
يونس : مالي خلك لروحي شايفه هاي الملابس اللابسهم احسهم اثكل من الجبل
ناي : عفيه شبيك اول مدخلت حسيتك مو طبيعي
يونس : ماكو شى ليضل بالج بس شديلي حيلج واقري وانجحي
ناي : كعد اقرا والحمدلله مسيطره على المواد مراح تشوف سما شتريد
يونس : غير وكت صاعد انام ولحد يكعدني
عمشه : يمه يونس اريدنك بشغيله
يونس : هسه بيبي
عمشه :لا يمه السنه الجايه خليهه على العيد چا غير الحين
يونس : اجيتج صار
ناي : اجي اني هم
عمشه : شنهي حمص بلجدر ينبص اركدي اريدن اخيج موش انتي
يونس : روحي اقري ولتضيعين الوكت
تعالي عموشه نشوف شنو الشغيله العندج
لزمتها من ايدها ودخلنا سوه للغرفه
كعدت بلكاع على المندر واجيت حطيت راسي بحضنها مديت ايدها تلعب بشعري
عمشه : يمه نويس شنهي حالك
يونس : شبيهه بيبي
عمشه : وجهك ممرود ورويحتك مسحوله ومهتلف وكاضي كضيان چلب الشارع احسن من حالك چا شنهي كالو هيج تركض وتلهث وناسي رويحتك
يونس : خلف الله عليج عمشه ولو صدك چلب الشارع حاله احسن من حالي مكلتي شئ غلط
عمشه : انه اكولن لون تعوف هاي شغيلتك مجسره عظامك تجسر وتشوفلك شغيله على كدك
يونس : ميحتاج اعوفها هيه عافتني
عمشه : منهي عافتك
يونس : شغيلتي حبوبه اليوم طردني ابو الشغل ومن الظهر لهسه ادور وباجر اطلع من الصبح اروح ادورلي شغله واذا ماكو اشوف مسطر العمال واذا كلش مرهمت ارجع للعتيك هي جنها مكتوبتلي من اني وصغير
عمشه : يا بيها الخير يمه چا اجت من عبد الله
يونس : ياعبدالله
عمشه : چا كطع الارزاق موش من الله من عبده حشه لله يكطع رزق واحد هاي سوالف العبد يلعب لعب الخضير بشط
يونس : من الصبح اطلع ادور ادعيلي بيبي الكه
عمشه : چا انه لويش انشدت عليك انه عندي الك شغيله
يونس : بلعتيك اكو غيرها كفختني على راسي
عمشه : بسك وانطيني صبر
يونس : احجي
عمشه : الغرفه بلطرمه نفرغها من السكراب والعتيج وگلشي بيها نبيعه حتى لون بسعر التراب وتصير الغرفه فارغه ونغسلهه وانطك الحايط مالتها للشارع وتصير محل شحلاته ونترسه سوالف حمصات تمنات شرابت كلشي وكلاشي غذائيه واكعد بيه شتكول يمه
يونس : كمت من حضنها وكعدت عدل اريد استوعب الكالته ياغرفه
عمشه : شنهي يمه مچيم دماغك
يونس : يعني قصدج اسوي الغرفه البره محل اسواق وابيع بيه
عمشه : ذيب وكضها چا انه اسولف بلمكلوبي
يونس : ومنو يقبل اكيد عمو عبيد وعمو فلاح ميقبلون
عمشه : موش هو بيت الخلفهم ومايرضون البيت بيتي واريدن اشوف ياهو منهم يفچ حلچه لااحمس شيب اهله هذا بيتي وانه حره بيه وانت كاسر ظهرك على خواتك وانه وياهن چا همه المعيشيني لو انت واحدهم گال يمه محتاجه شى وجعانه اداريج هااج جم فلس اخاف محتاجه شالو ايدهم وذبو حملي عليك وذاك التفس جوحي شرد بمرته وابنه وضلت العچاچه وراه وماينشد عليه ولا گال تعالي يمه شوفي بيتي ضلي چم يوم يمي تكولن راكضين وراه بتوثيه
يونس : والله بيبي مااريد مشاكل هسه عبالهم اني كتلج على المحل
عمشه : لاتضل فطير انه وراك واليحجي ويهوبز عيفه ليه وانه اعرفن شون اكص لسانه توكل يمه وانه اساعدنك هلعدنه نشتري غريضات وبلتساهيل تكضي والله يرزقك ربك مايعوف حمل مطروح
يونس : دنكت بست ايدها اجه بوكته اقتراحها ممصدك مراح اطلع للشارع وافتح محل حتى لو صغير والغراض على كدي كافي مااتبهذل وانذل اكلج بيبي بس اخاف ممنوع واحد يفتح محل من البيت
عمشه : چا هيه وينهه الحكومه گلمن يصيح الي ضلت عليك يمكرود حالك حال هاي الوادم
يونس : هم صحيح ياهو الجاي يبني حتى عمارات كامو يبنون بلحدايق هذا هو اشوفلي شراي للغراض الي بلغرفه وشكد تطلع نتسوك بيهن واني عندي جم فلس خلي النكدر عليه نشتري ومنطقتنا تروش ويشترون واحاول اجمع واشتري غراض لحد مااترسه
عمشه : يرادلك ثلاجه ومجمده
يونس : اكو نص عمر اشوفلي مستعمله لحد مايصير عندي واشتري جديد
عمشه : الله يرضى عليك يمه كوم اكل لگمه وجهك صاير جنه كرصه خبز يابسه عاضها جريدي ويلوچ بيها
يونس : ههههههه والله يابيبي مرات تشبهين الواحد بسوالف صدك تضحك
عمشه : چا غير شگولكم تحجي الاخرس كومني اروح ليهن كتلني الجوع ذني الفاهيات مابيهن حظ
وينجن يامدهربات چا تسوون باچه كلها طماطيه وباذنجانه وبتيتات خلصتن الليل كله
تهفن صبن وفضنه
يونس : حيل ارتاحيت بشغله المحل بس بقى الخوف من عمامي ليطلعون صفح اليه ويعرقلون الشغله
طلعت من الغرفه وصعدت ومتعشيت ونمت واني احلم بلمحل وشون ارتبه
ناي : كالت النا بيبي على اقتراحها بسالفه المحل ياربي شكد فرحت كون يصير كلشي مثل ميريد يونس وعمه هم كيفت ومتأكده كلنا نفس التفكير اخاف عمامي يسون سالفه ويخربون كلشي كون ميصير شى موزين
خوله : اغسل بلطرمه وادندن
عليمن ياگلب تعتب عليمن
هويت وجربت وامنت بيمن
لا للحب امانة بس هجر وخيانة
لا للحب امانة بس هجر وخيانة
وعليمن ياكلب تعتب عليمن
ناي : عمه اليوم تغني
خوله : من ضيمي وين اولي انطف وادندن
ولج ديري بالج تحبين كلها تخون ترديلج رجال ميخون ماكو
بديعه : طلعت وبيدي صينيه صغيره بيها تمن العنبر دانظفه من الدنان كعدت باب المطبخ واضحك على سوالف خوله هااا اليوم شبيج من الصبح
خوله : بربج اكو رجال خير وميخون
بديعه : اي اكو لو خليت قلبت
خوله : الله صفكولها وانطوها هديه قراصه تشيل شعرها بعد مااكطعه الها
بديعه : هههههه غير حجيت الحق
خوله : حق بعينج هاي تشوف رجلها الفاهي مخاينها عبالها كلهم مثله ولج فلاح لو عنده فلوس يضل عليج
بديعه : ههههه يجوز خلي يتزوج شسوي اجلب بيه
ناي : لا عمه شون تقبلين يتزوج عليج
خوله :ديري بالج تصيرين مثل هاي الخوثه ترضى بكلشي صيري سباعيه اذا بيوم انكفختي وطاح حظج وكعتي بنكره الحب اياج تصيرين مثل هاي
بديعه : شبيهه يمه
خوله : مثال سيئ للمرأه الضعيفه عديمه الشخصيه
بديعه : اهووو كام تبيع ثقافه براسي خلي اكوم اكمل شغلي ماوراج غير شلاع الگلب
جان تطلع صالحه ومباشره كالت خوله
خوله : ولا تصيرين مثل هااي واشرت على صالحه مثال للمرإه الحيه الي تنكط سم
صالحه : سم الي يسمج هاي عليمن
خوله : تره اشرت عليج شنو مشفتي اصابيعي واني اكول هااي يمه كبرتي صلوحه وانعميتي
عساج كولن امين
ناي : دنكت اضحك
صالحه : وجع اكو شى يضحك لو تعلمتي السرسر لوغيه من عمتج ولو شترجى من وحده ممتربايه ومن ايد لايد
خوله : صلوحه شايفه هذا واشرت على خشمي
لهنا واصله منج اذا لغيتي بعد اطلع ضوجتي كلها بيج
صالحه : هواي صاير لسانج طويل وتتجاوزين خلي يجي عبيد ويسويلي حل
عمشه : قابل شيسوي ياعيني يشتريلج بيت وحدج ويكعدج بيه مثل اختج صدك نسيت اكلج غير رحت الها قبل كم يوم بلعافيه عليها البيت يخبل ومرتب وهي هم مرتاحه ومنشنشه وحاطه الاحمر والاخضر عالكتها اتجدد شبابها ويه جوحي ابن الملوح
صالحه : وشنو حاطه عينج عليها
خوله : وليش احط عيني كاعده بيت امي وساكته لا عندي ولد ولا تلد اويلي عليج انتي بتج بطولج وابنج رجال ينحلف براسه وانتي محصوره بغرفه بيت عيالج الحلو تزوجين ابنج بهذا البيت وتصير جنه زوجت ابنها وجابت جنه
صالحه : شمدريج ابقى بهذا البيت وازوج ابني بيه يجوز بعد مده اطلع منه
خوله : بيها الخير بس مااعتقد قابل مثل ساهره تلعب بلفلوس لعب وتضم حتى على اختها ولو حقها تخاف من العين والنفس اني لو منها اسوي نفس سوايتها لج عيني الواحد لازم يخاف على نفسه ويدور مصلحته وعود الاخت موجوده تتقشمر بجم كلمة مثلج وتسكت
صالحه : ليش احس كلامج بيه مسامير الي احجي طك بطك لتضلين برايحه والجايه تسمعيني حجي على ساهره عبالج اعاديها لان طلعت غير اختي والي يصيبها يصيبني وافرح الها لو تموتين الي بالج ميصير
خوله : يااا واني شكو يمه عشتوو انتي واختج ناركم تاكل حطبكم قابل اني كتلج عادي اختج لو احسديها لو اني الضميت عليج سالفه البيت من شالو لو اني الي من شلت لهذا اليوم بلجذب مجيت وطيبت خاطرج وركعتج عرض الحايط
صلوحه عيني انتي وساهره خوات ودوم سوه بكلشي والداخل بينجن متلوحه بس ريحه الخيس واني نفسي تلعب من الريحه المطيبه
صالحه : ماكو خيس غيرج الزمي لسانج لا اكصه الج
ناي : بدت مشاحنات وحجي قوي جان يطب عمو نجم
نجم : هاا خيركم
خوله : هله نجم الْحٍمَدٍ للـّہ على سلامتك وحضنته مسلمت صالحه وطبت جوه
بديعه : عاش من شافك
نجم : انتم العايشين شلونج عمو ناي
ناي : الْحٍمَدٍ للـّہ اخذت الصونده من عمه وكملت الغسل الشارع فاض لان الوكت كله يتحاجن والمي يجري
خوله : تعال طب دخلنا للهول وبدعه ذبت الصينيه واجت كعدت يمي
خوله : بله بربك هاي سوايه سوايتك تجي تكول اسبوعين وارجع وتروح شهر ونص مكلت اخاف يموتون يصير عليهم شى
نجم : مو كتلج راح اروح لسليمانيه على ولد صديقي علمود سالفه السفر بلكت يكملي كلشي ويلكالي عقد عمل شى مااروح واضل متلطم
خوله : اي كلت اسبوعين مو شهر ونص
نجم : صارت بعد شصاير
بديعه : كول شنو المصار
نجم : غير يحجن شصار
وبدت خوله تحجي كلشي من طلعت جوحي لحد سالفه شرهب ورجعتها على ايد يونس
نجم : كل هذا صار واني ماكو
خوله : وانت حتى مكلفت نفسي تخابر تشوف شصار
نجم : لج منين اخابر شو كل الخطوط انتهت اخابر بلصونده هاي شبيج خوله
بديعه : المهم هذا الصار
خوله : وانت شسويت على السفر
نجم : شبهه كمل كلشي كلها شهرين وانسافر
خوله : لوين
نجم : لعمان ومناك نقدم لجوء
بديعه : سالفه سفركم تگلب معدتي
نجم : شنسوي لازم نروح وين يونس هسه
خوله : راح يدور على واحد يشتري العتيك بلغرفه حتى يكمل المحل
نجم : راح ادخل للغرفه ارتاح شويه ومن يجي كعدوني
خوله : انت جاي تنام لو تشوفنا
نجم : انام
خوله : لا ربحنا
ناي : اجه يونس جايب رجال وياه واتفقو على السعر وباع كل السكراب بلغرفه وفرغوها وبديت اني وعمه بديعه انظفها صارت تلمع وهو صعد يبدل
شرهب : خلي انظف وياكم
ناي : شون جاوبتي بالاول
شرهب : كلش زينه
ناي : وايدج شون صارت
شرهب : زينه متحرگني
بديعه : راح ابقى احطلج دهن لحط مطيبين ولتمدين ايدج بلمي لان موزين
شرهب : رايحه اصعد ابدل
ناي : روحي حبيبتي
شرهب : صعدت ولكيت سما ويونس بغرفتنا
شسوون
يونس : اشش صوتج
شرهب : اصيح امج عليج حتى تضربج
سما : ليش شمسويتلج وتردين انضرب
شرهب : مااحبج خبيثه
يونس : شرهب عيب
شرهب : خلي تطلع من غرفتنا
يونس : روحي سما وبعدين نحجي
سما : مو تعوفني كم يوم ومتسأل عني
يونس : بعد منا وهيج مكابلج هنا
سما : وهذا احلى خبر
تقربت وباست خد يونس وطلعت
شرهب : شكد عيب متستحي اله اكول لامها
يونس : شوشه حبيبتي لتحجين لاحد
شرهب : مااا اكول حتى يضربوها
يونس : ويضربوني تقبلين
شرهب : لا
يونس : لعد لتحجين حتى لا ازعل منج
شرهب : سكتت
جنت مااحب سما دوم اشوف بيها امها بس اهدأ يعني طول الوكت ساكته ومتنحزر ومااحسها تحب الخير لاحد وغيوره
ناي : عمو نجم صار يونس علمود المحل واني وعمه خوله كاعدين
نجم : هااك ذني
يونس : شنو ذني
نجم : جم فلس تسوك بيهن
يونس : ممحتاج شكراً
نجم : ترد ايدي
يونس : مااردها بس ممحتاج مشكور عمو
نجم : ليش صاير متاخذ مني كل ماانطيك ترفض واطلع الف سبب
يونس : مو بس منك من الكل مااخذ شبيهه صغير واقبل صدقه من احد لو مااكدر اعيش خواتي الله منطيني الصحه واكدر اشتغل ومااحتاج احد
نجم : مكلت هيج انت رجال والنعم منك واني هم عمك وانتم مثل ولدي
يونس : مشكور مقصرت كافي من احنا وصغار شلتو مسؤوليتنا وهسه كبرنا ولازم نشيل مسؤوليه نفسنا وسمعت بيكم راح تسافرون يعني من هسه لازم الواحد يعتمد على روحه وميضل يذب حمله على غيره انتم هم الكم حياتكم ولازم ادورون راحتكم
نجم : هيج كول ضايج لان راح انسافر
يونس : عمي لا ضايج ولا شى بلعكس ادعيلكم الله يفتحها بوجهكم والى متى تضلون شايلين حملنا يوم دوم
خوله : لتحجي هيج كعد تمرد گلبي
يونس : سلامة گلبج يلغاليه وتقربت بست راسها محد راح يأذيني كعد روحتج انتي
خوله : مااروح لعد
يونس : روحي بس لتكطعين بينا
خوله : ماكو واحد يكطع بروحه وبولده
يونس : الله كريم اروح اكمل شغلي
خوله : اوووف اني بين نارين لا بيه اعوفهم ولا بيه ابقى هنا لان كعد اتأذه حيل
نجم : انتي حره بالاختيار مو بعدين تذبيها براسي
خوله : ما اذبها براسك بس اكوم واكعد احسب على نسوان اخوك الساقطات دمرن حياتي
نجم : اروح للشقه تعبان محتاجه شى
خوله : متنتظر امي يوميه تسأل عليك
نجم : اجيها غير وكت رايح
خوله : الله وياك
ناي : بدا يونس يركض منا ومنا حتى يكمل المحل وبعدها بيومين جاب عمال حتى يطكون الحايط ويسون واجهه للمحل جاام بسيط حتى يبين محل نظامي
اجه عبيد هداد
عبيد : شكعد تسوون
يونس : مكالت الك بيبي على سالفه المحل
عبيد : مكالت ويامحل وانت بكيفك امشي روحو لتسون شى
يونس : عمو مطلعهم بفلوس واذا راحو راح اخسر الفلوس بدون شغل
عبيد : يطبك طوب منو كلك تسوي شى بليه متبلغنا
يونس : بيبي كالت سوي اسواق واسترزق منه
عبيد : مو بكيفها امشي لك رجع هاي مواد البناء مالك محل والبيت طابوكه متفلش منه
ناي : ركضت على بيبي جانت تصلي اشرت الها صدقت
عمشه : شنهي صرعتيني
ناي : عمو عبيد ديتعارك ويه يونس ميقبل على المحل
عمشه : شنهي بكيفه ميلي مني
وكامت بيبي وهي لابسه ايزار الصلاه وطلعت عليه
عمشه : شنهي يعبيد شمالك تسودنت وتهد على ولد اخوك
عبيد : شنو ياخذ الغرفه ويسويها اسواق بكيفه
عمشه : بگيفي انه موش بيتك هذا وتحدد منهي ياخذ ومنهي ماياخذ
عبيد : واحنا النا حصص بيه لو نسيتي حصصنا مال الكاع
عمشه : تشوف هذا الحايط تركع راسك بيه مالك شى يمي البيت كله بأسمي وانه اخوطن بيه وبكيفي لو اعرفن اهده على راسكم والمايعجبه هذا الباب ياخذ جويلاته ويولي
عبيد : اطرديني يمه علمود هذا
عمشه : چا هذا موش ولد اخوك وحسبت ولدك غيرك واحد يحابي عليه وهو بيده يسويله المحل عبن الوليد شايل خواته وامك
وانت الجبير كون غيرك يشيلني بگبرتي موش يذبها براس هذا الصغير وجايني هداد مايرضى يسترزق وما ماخذ من جيبك بيك زود شيل حملنا وانه مااخلي يونس يكض طابوكه من البيت ويرد لمدرسته وانت گلشي عليك
صالحه : ليش عيني قابل خلفناهم ونسيناهم
عمشه : هااا اجت التكضك من رگبتك والتسوحل بيك وانه اكولن جاي هداد وتناكط من عيونك النار عبن بت غنيه بازتك
عبيد : مالها دخل صالحه وانتي ادخلي جوه ولتدخلين
عمشه : هاي سوالفكم باطه جبدي وشبعانه منها لمن ماله رويحتي عندك ياتشيل حملنا والوليد يرد لمدرسته وانت تصير جبير بصچ موش كلاوات يا تعيفه يشوف حاله ويحير بيه وبخواته
ناي : بقى عمي حيران والكل واكف منتظر جواب منه طب جوحي
عمشه : هااج اجه الصخل الثاني كرت عيني بيكم من اهمداني من اجيتو هلهلت عبن گلت وليداتي يشيلوني بگبري
جوحي : حجيت شى وگبيتي بيه
عمشه : اعرفن اجيت طيار ياهو النشد عليك وكال الحك راح اطير چم طابوكه واطيح على راسك وتخسرك فليسات من ورثك
جوحي : اجيت صدفه ماادري اجيت اشوفك
عمشه : صدكتك يايمه عبن مااعرفنك غريب عني اسمعوني ولا تشلعون افادي ياتشيلون حملنا ياتنجبون والوليد يكمل شغيلاته والمحل
جوحي : اني شعندي واشيل حمل غيري هو روحي وعائلتي كوه مدبرها
خوله : صدكتك راح ابجي
بديعه : جريت خوله عفيه اسكتي لتسوين مشكله عمه هي كعد تتفاصل وياهم
خوله : هسه مو ساكته صار ساعه بس هذا الحرامي يخليني كوه احجي
بديعه : اشش فدوة لطولج كافي
عمشه : شنهي اليوم نكضيها ملاطم وكلمن يحود النار لكرصته
عبيد : يمه عوفي المحل لخاطر الله
عمشه : اعيفه وانت من اليوم تنطيني مصرف انت وهذا الاغم
عبيد : اهوووو ماعندي منين اجيب
عمشه : يمه يونس توكل وطك الحايط
يونس : عوفي بيبي اني ادور على شغل
عمشه : وحك علي مااطكه اطردها كلها واسويها دمايه وياهم طكه واريدن اشوف وحيد منهم يفج حلچه
يونس : بقيت اباوع بلوجوه وحاير لحد معاطت بيبي
اشرت للولد واجوي وبدينا نفلش
عبيد : ارتاحيتي هسه
عمشه : ماي بارد وينزل على رويحتي يهلهل اروحن اكمل فرض الله ابرك منكم
ناي : طلع عمو عبيد وجوحي وصالحه صعدت وعيونها براسها وعمه خوله مكيفه
وبدو يشتغلون جنت اشوف شون يونس ليل نهار يشتغل بلمحل لحد مرتبه
وقبل ليروح يتسوك جانت الفلوس قليله متجيب مسواك بسيط لان خسر اكثر الفلوس بلتفليش والترتيب
الصبح كاعدين ويونس ممرتاح شرب بس جاي وكاام
خوله : وين رايح
يونس : اشوف السوك بلكت احد ينطيني جم شغله اشتغل بيهن المحل يصوصي وانطي على التصريف
سمعنا صوت هورن
خوله : اي ياالله اجن
يونس : خير
ناي : طلعنا نشوف شكوو وكفت سياره واثنين عمال نزلو ثلاجه جديده ومجمده
بقينا صافنين
خوله : الثلاجه هديتي والمجمده من عمك نجم
يونس : مااخذهم
خوله : هديه ولك قابل هاي هم صدقه حقير ذاك اليوم ضجت من حجايتك بس بلعتها يله طببهن واستفتاح خير عليك
وهااك
يونس : شنو ذني
خوله : جم فلس مني ومن بيبيتك رغم متحجي ويايه دزتهن بيد بدعه
يونس : هيه وينها
خوله : راحت تشمشم اخبار مو تدري لازم الصبح تفتر
وهاي من بديعه
يونس : شون اخذهن منكم
خوله : يمه احنا اهلك لتضل شون وشون اخذ واتسوك ولو ميجيبن مسواك قوي بس على الاقل يفتح باب زين الك
ناي : لهسه اتذكر فرحته من اخذهن وراح جان المحل نظيف وحطينا الثلاجه والمجمده والرفوف مرتبه وره ساعتين جاب كم كارتونه جبس على حلويات على عصاير على اجبان والبان نوع من كلشي صحيح المحل مو مليان بس خير من الله
شفت بعيونه الفرحه والراحه من سنين مشايفتهم وبدا يشتغل ومر اكثر من شهر يكعد من الصبح
ويعزل اخر واحد المنطقه كامت تشتري منه وبيبي تكعد بلباب وياويل طفل يشتري من غير محل اله تلزمه بلشارع اطيح حظه
وخلصنا امتحانات ونجحت والحمدلله وشرهب هم ومنتظرين بان الحاطه عيونها بلكتب ليل نهار تقرا اما سما بدت تقوى علاقتها بيونس وتستغل اي فرصه ماكو احد وتختلي بيه ودوم ايدي على گلبي ليصير شى
كاعده اباوع تلفزيون واكرز حب وشرهب وبلال يلعبون يمي سمعت صوت صالحه هله يمه وتبوس
ركزت وياها لكيت مهند دخل استغربت جيته
كمت وكفت من شفته
مهند : شونج ناي
ناي : الْحٍمَدٍ للـّہ على سلامتك
مهند : الله يسلمج
صالحه : تعال يمه ادخل ممصدكه اجيت اول تالي تخلص امتحانات وتجي
مهند : اشتاقيتلكم ويباوع على ناي
ناي : اجت عمه خوله وسلمت وعيونها عليه تكول مسويه جريمه وماادري بروحي
خليت وصعدت حتى المسلسل عفته
وماشفت مهند ٣ ايام طول الوكت يابلمطبخ ويه عمه يا بلغرفه حتى مرات ادوخ لان بان خطيه تقرا
رابع يوم نزلت وشفت مهند كاعد بلهول
مهند : تعالي
ناي : عليه
مهند : اكو غيرج
تقربت منه واشرلي اكعد بصفه كعدت واني مبتسمه بهدوء
مهند : ليش نازعته
ناي : شنو
مهند : السوار ماكو بيدج
ناي : ارتبكت من كلامه وكتله يضوجني بلشغل واخاف عليه ليوكع
مهند : متأكده مو غير شى
ناي : اي متأكده
مهند : احجيلي عنج شونج بلدراسه بلبيت
ناي : الْحٍمَدٍ للـّہ زينه
مهند : ليش صار كم يوم مااشوفج ليش حاس تتهزمين مني
ناي : ماكو هيج شى
مهند : ناي صاير شى مااعرفه
خوله : اي يمه صاير
ناي : باوعت هاي عمه رأسن معدتي وجعتني وكمت ارجف
مهند : شصاير عمه
خوله : ميصير ابني تكعد ويه بت عمك وحدكم انتم كبرتو والعين عليكم
مهند : ممسوي شى غلط وكدامكم كاعد
خوله : لو اجت امك وتشوفكم هيج شتكول
مهند : شتكول براحتها ممسوي شى غلط بت عمي وكاعد اسولف وياها
خوله : عند امك غلط وقبلها عند خالتك ساهره هم غلط
مهند : خاله ساهره ليش
خوله : مرتضى راد ناي
مهند : هاااااااااا رادها شنو
خوله : خطبها واهله گلبو الدنيا وكوه سدينا الموضوع
اندار عليه وبصوت عالي وبعصبيه
مهند : وانتي تردي
ناي : اشرت براسي لا
خوله : يمعود مو كتلك سدينا الموضوع وابوه مانعه من الجيه هنا وهم يجي
مهند : مو بكيفه خلي يشلها من باله اني اطيح حظه اذا وصل يمها
خوله : وانت هم متوصل يمها
مهند : لشنو تلمحين
خوله : عوف ناي ابني تره البيها كافيها لا كل شويه واحد منكم مخلي امه تذب حركتها بيها هاي يتيمه واما اليتيم فلا تقهر وانتم مسويها طوبه بينكم ياهو الي يفوز يحصلها
ناي : اني خجلت وجهي صار دم ونار هاي عمه شتكول يجوز الولد يعتبرني اخته شبسرعه حجت وياه وخجلته وخجلتني
مهند : اني مو مرتضى وامشي بكلام اهلي اني ردت اتخرج واعتمد على نفسي واشتغل واخطبها من يونس وماطول هيج تجرأ مرتضى وخطبها ماانتظر لحد التخرج
ناي : رفعت راسي عليه مصدومه هذا شيحجي
مهند : اليوم احجي ويه يونس حتى لو بس البس حلقات بين ماتكمل اموري
خوله : وامك وابوك راح يعوفوك بكيفك لك ابني هاي صالحه تعرف منو صالحه
مهند : اي اعرفها امي واني ابنها الوحيد وتريد راحتي وسعادتي واني غير ناي مااريد
ناي : واني مااريدك
صفنو بوجهي مستغربين كلامي
ناي : اي مااريدك ولا اريد مرتضى وعفيه لتوكعونا بمشاكل ويه اهلكم خلو اخويه يشوف رزقه هسه اذا صار شى راح يشدون وياه معودت صار وضعه زين
مهند : ليش هيج تحجين شحده اليحجي وياج لو ويه يونس
ناي : عفيه مهند اني كلتها گبل لمرتضى واعيدها الك لا انت ولا مرتضى اريدكم انتم اخوتي وياريت تحترم رغبتي عفته ومشيت
يمكن اصعب كلام اكوله من كلته لمرتضى عادي ومهتميت بس لمهند أذاني عرفت بيومها عندي مشاعر اله ومهند غير عن مرتضى تماما
بقيت الملم بغرفه يونس وبلال واحاول اشغل نفسي حتى ماافكر وانقهر وابجي
كاعده اشيل بلغراض من الكاع حسيت احد ورايه جفلت وانداريت لكيت مهند
اكو شى
مهند : الحجي الكلتي قبل شويه تنسي مااريد افتح نقاش طويل واضوجج اعرف انتي من زمان حاسه بيه وشون عيوني متشوف غيرج وحتى جيتي هاي الايام علمودج ناي تعرفين احبج ورايدج وادري بداخلج مشاعر اليه
ناي : اي اخويه
مهند : جذابه اني مو يونس اني ابن عمج وبيوم من الايام اصير زوجج
ناي : طريقنا مستحيل
مهند : واني رجال ومن واجبي اسوي المستحيل ممكن هذا الموضوع سابق اوانه مراح افتحه حتى ليأذون يونس مثل مكلتي بس حطي بالج بس اتخرج والكه شغل لو مو يونس لو بيت عمشه كله يحترك اطلب ايدج واتزوجج افتهمتي
ناي : عفيه اني
مهند : اششش وكملي شغلج وياريت ترجعين السوار بيدج احس روحي لازمها من انتي لابسته ولتكسرين بخاطري الطريق كله افكر من ادخل للبيت واشوف السوار بعده بيدج شراح احس وتالي ملكيته رجعي نايه وريحيني
ناي : بقيت ابلعم ومااكدر احجي والغرفه مره حاره مره بارده مدري اني ارتبكت وضعي تخربط من كلامه عافني وطلع حتى منتظر احجي
جريت نفس قوي شون بيه ليش سكتت ليش مبقيت مصره على موقفي
شديصير بيه
ناي : يومين واني اتهزم منه ومااريد اشوفه صدفه نزلت ولكيت مرتضى موجود ومهند كاعد وبيبي وصالحه وساهره مدري شعجب اجوي
كلت السلام عليكم ودخلت للمطبخ
شربت مي وردت اطلع اجه ورايه مهند بنبره امر وعصبيه
مهند : گبل ليفوك ومتنزلين بعد
ناي : شصار
مهند : بله حجايه زايده فوك ومن يرحون يله تنزلين اذا شفت خيالج تصير موزينه يله فووك
ناي : سمعت كلامه رغم المفروض مااسمع حتى ليحس هو مسيطر عليه بس اني وياه مااكدر اعاند او حتى اكسر كلامه صعدت ومنزلت بعد لحد مراحو
بيومها لمت روحي شون سمعت كلامه صافنه وشرهب تلعب بشعري وتضفره وبان تلملم بلملازم ساعه عبرت ال ١٠ بليل سمعنا عياط جوه
طفرنا نركض
جانت صالحه تعيط وعبيد لازم يونس من ياخته
عبيد : لك ساقط عااار تتحارش بتي
يونس : مامتحارش والله
صالحه : تتختل بيها وتقشمرها ماعندك عرض ياسكط انت سكط اخلاق وسكط حااال
شرهب : هيه سما تجي تختل يمنا بلغرفه وتحجي ويااه وادزني عليه روحي صيحي وهم تبوس بيونس وتكوله احبك
يتبع .....
رواية الابواب الخمس الفصل الأربعون 40 - بقلم ريام هادي
#الابواب _الخمس
البارت الخامس والثلاثون
للكاتبه Reem
علي ثوب الهموم مفصل فصال
وكلش ع كدي ولايك وياي
انه بدرس الفرح ماخذ صفر دوم
وميه بالحزن حطتلي دنياي
الناي شكد حزين يبجي الناس
وظل ياخذ درس من حزني الناي
ربى وياي حزني وكمت اماشي
وتعلم حته كام يبات وياي
صالحه : تتختل بيها وتقشمرها ماعندك عرض ياسكط انت سكط اخلاق وسكط حااال
شرهب : هيه سما تجي تختل يمنا بلغرفه وتحجي ويااه وادزني عليه روحي صيحي وهم تبوس بيونس وتكوله احبك
ناي : خزرت شرهب واشرت حتى تسكت
صالحه : انجبي لج انتي الثانيه مو طفله تكول وحده عمرها ٦٠ سنه كلج خباثه على امج تردن اتذبن بلاجن على بتي
ناي : جريت شرهب وحطيتها ورايه خفت تضربها جان تعيط صالحه
صالحه : شترجى منجن صدك لو كالو العرق دساس وحده بت ذكرى الحبت حماها والثانيه بت جليله الكحبه
يونس : احترمي نفسج امي اشرف منج
عبيد : لك هاي عليمن چلب
ناي : جان يجر يونس من هدومه وضربه راشدي وضل يضرب بيه حييل ويونس مارفع ايده بس يدفع بعمو حتى يحامي نفسه
خوله :عوفه انكسرت ايدك ودخلت بنصهم هذا عبيد استغلها وكام يضرب حيل بيه ويأذي
اجه فلاح يركض شكوو يمعودين
عبيد : لكم عوفوني اليوم اربي هذا الساقط هم يتحارش بتي وهم يغلط على مرتي
يونس : مرفعت ايدي عليه مو خوف منه اني بضربه مني اكعده بلكاع بس كلت عيب واكبر مني ويبقى عمي
عمشه : شنهي يعبيد عيف الوليد دهر الصابك چا كدرتك على هليتيم
عبيد : هذا الي ادافعين عنه واحد ساقط مامتربي وكله منج انطيتي عين
خوله : متربي احسن منكم لو لان فقير وميتجاوز تقاويت عليه
عبيد : لج انتي ساس البله وتقرب من خوله وجان يلزمها من شعرها حيل ويجر بيه
كله منج هاي السوالف التصير براسج ويجوز انتي الدفعتي على بتي مو اعرفج من زمان تكرهينا ويمشي بدمج الكره ليش مو انتي سلمتي صمد لفوزي غيرنا ناس المفروض دافنيج بصفه وانتي عايشه
خوله : اجه يونس بسرعه وسحب ايد عبيد من شعري ودفعه بحركه صغيره
يونس : لهنا وكافي صارلك ساعه تعيط وتغلط وتضرب وساكت وبالعها بس تمد ايدك على عمتي تصير موزينه
فلاح : تخبلت تهدد بعمك
عبيد : هاك كدامك الدايح ابن الشارع
يونس : مااهدد شفته كدامك ضربني وأذاني ومارفعت ايدي مو خوش تره بضربه افلش وجهك بس كلت رجال جبير وعيب بس تمد ايدك على عمتي واني واكف مااقبلها لو اعرف اوكف كدامكم كلكم
خوله: دمعت عيني على تصرف يونس وبگلبي اكول ماضاع بيك التعب صدك رجال على خالك لان اعرف فوزي الله يرحمه يدافع عن ذكرى جان وصاحب غيره مو مثل صمد ثلثين الولد على الخال اباوع شون واكف بنصهم ولا خايف جنه واكف بين ذيابه منتظرين شوكت ياكلون لحمه جان يطب جوحي هااك استلم اجه الذيب الامعط هي بقت بس عليه وتكمل شله الهتليه
عبيد : هذا ميضل هنا مكانه الشارع مامستعد اخلي واحد عار عفطي ويايه بلبيت حاط عينه على بت عمه جان لازم يخاف عليها هيه عرضه بس طلع غيره وعرض ماعنده اني اخاف عليها من الشارع تالي ابن عمها هو اليتحارش بيها
جوحي : امشي لك لم ملابسك وبره واذا شفناك ادوسك بلقندره مالك طبه بعد لهنا
عمشه : شنهي وليه وتوليتو وانت جاي حامي وداش بحيل صدر وماتدري شنهي الصار
جوحي : ميحتاج يمه سمعت متحارش بت عمه هم ادافعين اله هاي هم سالفه محل ورزق وهاي سوالفج التعبانه هذا مو وجهه نعمه سويتي ادمي بعد مجان بلزبل يلكط وفتحتيله محل وكعدتي وهاي تاليهه يتعدى على عرضه
عمشه : وانت هيج جنك ثور وهاديه لاتعرف وين دربك وماتعرف لويش هاديك من فشگ راسك عبن مطي ومتمدد بيه انه ضاله اعاينكم تكاطفون بلوليد وهو ساكت عبنه فقير ومن اهل الله وانتم تنكطون سلابيح اركدو واليمد يده على يونس انعل والديه انه مايوم سابه ابيكم لا تخلوني انبش كبره الوليد ماسمعنه منه وانت عبيد كضيتها تكفخ وتعد وتصف وهاي مريتك تراجف جنهي السالفه وشجاب يونس على بنيتكم وهيه وينهه
صالحه : عمه اني نزلت اسوي اكل وشفت يونس يسحب سما من ايدها ويدخلها لغرفه نجم وهيه ماترضى وسحبتها منه وصعدتها فوك وصحت عبيد عليه
عمشه : شنهي شفتي فوكاها كاضها بت عمه ومثل اخيته وعنده حجايه وياها چا كفر
صالحه : اكلها يجرها من ايدها ويدخلها لغرفه فارغه وانتي ادافعين اله
عمشه : انشدي لسما
صالحه : شرايده منها
عمشه : سما حبوبه تعالي غاد
صالحه : شتردين عمه منها
عمشه : بسچ لااجسر ضروسج
نزلت سما والوجهه اصفر وترجف وخايفه وكفت بينهم
عمشه : حبوبه شراد منج يونس
بقت سما ساكته وعيونها مدمعه ويونس مدنك وساكت تالي كال
يونس : الغلط مني بيبي المفروض احجي وياها هنا بلهول اني بس ردت احجي وياها علمود خواتي لان اشوف بان وخواتي دوم سوه وهيه وحدها كلت خطيه اخليهن كلهن صديقات
خوله : حتى اني دوم يكولي خلي تكعد ويه البنات ويصيرن صديقات
صالحه : لا عبرت علينا ولك قشمر كدامك صغار وتعبر علينا وانتي خوله لااطمطمين اله ادري بيه من زمان حاط عينه عليها وهي متنطيه مجال احجي ولج لا اطيح حظج متحارش بيج لو مثل ميكول
بقت سما ترجف وتفرك بيدها من القلق عاطت امها جان تمتمت وتكول اي راد يتحارش
صالحه : شفتي عمه لدوريلج حجج واعذار هذا مايضل هنا واحد اي غيره وحيه ماعنده وفوكاها خواته يجذبن ويردن يطعنن بتي بلموزين عبالجن انصدك هاي من غيرتجن منها
عمشه : عوذه يغارن يا والحظ چا موش صوجج يغلمه وغمت سما تعالي شربت
شرهب : طلعت اركض من وره ناي وكفت مبتسمه كبال بيبي ها بيبي
عمشه : يمه اروحن فدوة لهاوجهه جنه تفااح حبوبه هاي المكموعه
شرهب : سما
عمشه : اي حبوبه شتريد من اخيج ومن تجي بغرفتكم شنهي تنشد
صالحه : عمه صدك جذب تصدكين بطفله وتكذبينا كلنا
عمشه : گضي لسانج بت غنيه لا اكضج وازوعج العافيه الماتستاهليهه چا انه اعرفن منيلجن كل هذا الحيل عبنجن باطلات انتي واخيتج وگل البخت والحيل طايح عليجن احجي حبوبه هاااي وتأشر بيدها بأتجاه سما
شتريد من اخيج
يونس : بيبي ماله داعي يابه مستعد اعتذر وابوس راس عمي ومااوصل يمها بعد
جوحي : مو هيه هينه وبكيفك
عمشه : بسگم والاسمع حسه انزع البرجلي واحطه على راسه بسگم اي حبوبه
شرهب : بيبي تجي للغرفه وتكولي صيحي يونس واني اركض واصيحه وتكعد تسولف وياه ومن تطلع تبوسه من خده وتروح
عمشه : وبعد حبوبه
شرهب : ومرات تكولي اطلعي بره اريد احجي وياه واني مااقبل وابقى كاعده عناد بيها وهي صوتها ناصي تشاوره وهو يضحك
ناي : شرهب تسولف واني قطره دم ماضلت بيه غير تسكت ام لسان
عبيد : ماكو هيج حجي هاي معلميها هيج تكول
عمشه : چا انه اكولن عليك اثول وكديش ودومك تركض وره مريتك چا هيج الثول عاميك شوكت البت علموهه چا گبل شوي گبت هوستكم ومانطيتو صبر نعرف گلشي وانه ردت تفض وهاي مريتك العكربه مارضت بلطيب چا يطبكم طوب البت عايله انه مااكولن يونس خير هو الغلط راگبه لجن حط عينه على بت عمه وماصانها انه لو گايلي اريدنهه من باجر ازوجهه اله
صالحه : مو هيه بكيفكم هاي البقت ازوج بتي لهذا العتاك
خوله : اي مو رجلك وزير الاوقاف بله متسكتين خلصتي عمرج تسوين سحوره حتى هذا العتاك واشرت على عبيد يضل بيدج ومايعوفج ويشوف غيرج
صالحه : انتي لتدخلين ذوله مو جهالج وترجفين عليهم لو عندج بنيه مثلي تنطيها لهيج واحد لا شهاده وفگر وفوك كل هذا سگط رجله ويعرج شناقص بنتي وازوجها هيج واحد
ناي : انمرد گلبي على اخويه طول الوكت يباوع عليهم ومامهتم من كالت سكط رچله نزل عينه على رجله وباوع عليها بقهره
حجيت بحركة گلب اني اخاف بهيج مواقف بس متحملت اشوف اخويه هيج ينذل
ناي : ليش هو منو الخلاه يصير هيج مو انتم مو كلتو خلي يبطل ويشتغل بلعتيك شصار عليكم لو معتبري ابنكم حاله حال مرتضى ومهند ومخلي يكمل دراسه مجان هسه هو يقرا حتى يدخل كليه مجان هسه رجليه الي تعيرونه كل شويه بيها مابيها شى وحاله حال ولدكم شجان اخذ منكم جنا مستعدين ناكل وجبه بليوم ومنكلفكم واعتبروها صدقه لاولادكم وانت عمو جوحي علمود جم فلس ضحيت برجل ابن اخوك هااك شوفه شنو ذنبه شفادتك الفلوس وشصار لو متعب نفسك ومودي طبيب زين مجان هسه اخويه يمشي زين ومصار هذا وضعه خلي الفلوس عود تفيدك يوم القيامه كل الصار بيه تتحملون خطيته انتم تتحملوها وهسه جايين تحملو سالفه سما رغم هيه هم غلطانه مثله
خوله : تعاالي وحضنتها كاافي شفايفج بيضت من القهر
صالحه : هاكم واحد يرفع والثاني يكبس عصابه نسوان وحدتهن لسانها شطوله وانتم واكفين وساكتين
عمشه : يايمه باع المسيجينه صلوح اكرصيهه سليمه التكرفج ماوراج غير الضيم والطلايب
عبيد : يمه خصم الحجي هذا ميضل اليوم مايبات بلبيت وبعد ماله عيشه هنا وهذا الكالوه عن بتي مااصدكه ميطلع من سما وامها دوم وياها ذني خواته اكيد يجذبن علموده واني مامستعد اغلط وابقي هنا
عمشه : ياا وروح الحسين اشك زيچي بين الوادم واخزيكم عبن يونس مايضل هنا هذا رويحتي
جوحي : وسوايتك ومشاكله شلون انبقي وانت فلاح شو ساكت احجي اليوم سما تحارش بيها باجر بان
خوله : لتذب بانزين على الحطب يجوحي تره اني هم اذب واخليها هسه طشار ماله والي
دار وجهه وسكت وبعد ولا حجه حس من نبرتي تهديد اله راح وكعد وضلت عيونه تراقب كلشي ويحرك برجلي متوتر هزيت ايدي وعفته
فلاح : الله يشهد ماشفت من يونس غير الخير وحاير بان يوديها ويجيبها وصاينها مثل مصاين خواته ليش اني هسه صافن عليكم لان اعرف العيبه متطلع منه ومستغرب هسه
يونس : عمي مرحبا عليكم اني رايده سما على سنه الله ورسوله
صالحه : ههههههه والله خوش تضحك من كل عقلك انطيك بتي
يونس : اني ابن عمها واحق واحد بيها
فلاح : وانت بعدك صغير ابني وينك وين الزواج
يونس : انتم كلكم تزوجتو وجان عمركم ٢٠ سنه اني انتظر كلها سنتين وشويه واصير ٢٠ واتزوجها بين ماهيه تكمل مدرستها
عبيد : لو اخر رجال بلدنيا ماانطيك بتي هاي الضلت امشي لك ناقص
عمشه : انه اكولن نسأل سما ها حبوبه تردين يونس كولي اي وانه ازوجج ياه واشوفن ياهو يفچ حلچه لا احطن النعال طول وعرض بين ضروسه
صالحه : متريده عمه اكلها يتحارش بيها تردون تزوجوها اله
احجي لج وكفختها حيل امها نزلت دمعتها
بديعه : على كيفج وياها خطيه راح تخرب من الخوف
صالحه : مالجن دخل حيري بتج اليوم تحارش بسما باجر يتحارش بان
شرهب : لا هو ميحب بان يحب سما
خوله : شوشه اصعدي فوك امي يم بلبل
عمشه : شنهي صاعده تعالي جاري ركضت شرهب وكعدت بصف عمشه
سما تردين يونس مالج دخل بذوله الشواذي
ناي : بقت سما تبجي ومدنكه راسها بلكاع
عمشه : تعالي جاري اجت تتمشى وكعدت بصف عمشه من الجهه الثانيه
هااا يمه تردي اشري براسج ومالج دخل
بقينا ننتظر رد منها جان تإشر براسها اي
عمشه : تردي
سما : بصوت مخنوك اي اريده
صالحه : لج بت الگلب اليوم احركج حرك جان تركض صالحه وسحبت سما من شعرها
ركض يونس حتى يفاككها جان يوكف بوجهه عبيد
عبيد : اني الك عبالك تفلت منها اذا ماارجعك للشارع تجدي فلا اتسمى عبيد
ودفع يونس من صدره حييل راد يوكع لزمه فلاح
يونس : عمو راح يأذوها عوفني
فلاح : بتهم ومالك دخل ميموتوها حير بروحك هسه التهو عنك بيها اخاف بعدين يفروها عليك امشي اطلع على باب رزقك وبعدين نحجي
يونس : عمي اترجاك عوفني شوف عياطها وصوت ضربهم شون اعوفها
فلاح :لتعاند وروح مالك حق تدخل يبقون اهلها جفي الشر واطلع هسه اذا صعدت راح تگبر وراح يأذوها اكثر
خوله : اسمع كلام فلاح وروح لمحلك
يونس : شون اروح واعوفها فوك ما رادتني وكدام اهلها اجي اني انطي بيها واعوفها
عمشه : شنهي يمه تذابحو وانت تراجف كلها جم طكه وتفله وجلاق وترد البت گلشي مابيها
يونس : بيبي اروحلج فدوة اصعديلهم راح يأذوها حيل واني والله هسه اطلع للمحل وشتردون اسوي بس ليأذوها
خوله : خرب گلبك الفطير
يونس : عمه شفتي شسوت هيه جان تكدر تكول مااريده ومتعارض اهلها
خوله : اوووف حيره والله دروح لشغلك وهسه اني اصعد
يونس : ابوس ايدج لا انتي بلذات لا
خوله : ليش ولك
يونس : تشعليها شعل يجوز اجي بعد ساعه الكه لا ايد ولا رجل لسما
خوله : هههههه غير ازيد حماس اهلها هاي شبيك متحب الاكشن
يونس : بروح امي لتصعدين
خوله : يله لخاطرك مااصعد
عمشه : انه اصعد يمه واكض البت منهم ومايجيسوها توكل ولا تدخل لتالي الليل عبن لا يردون يفتحون الطاري وتعال يعمي شيلني
يونس : اليوم راح ابات بلمحل
بديعه : شون تبات انخاف عليك
يونس : هاي شبيج عمه قابل صغير راح ابقى هناك احسن لحد ميبرد الوضع
خوله : قابل رايح لامريكا هو المحل داخل البيت تريد تصير لوتي
يونس : ميخالف اهون ما افتر بلبيت
فلاح : روح عمو وبعد لتتقرب منها لو شميصير
يونس : اني رايدها بلحلال والله
فلاح : ميخالف شوكت متكون جاهز عود اخطبها لدور ختلات عمي عيب بحقك انت هم عندك خوات وهاي الدنيه دواره اليدك باب الوادم الله يدز الي يدك بابه
خوله : يوم متندك باب جوحي
جوحي : شعندي همزين ماعندي بنات
خوله : لتفرح اكو هواي بيبان تندك يبن امي
وغمزت اله
جوحي : اروح لبتي اكرملي صوجي اجيت
خوله : سلملي على حبيبتي سهوره كول الها شوكت نشوف طولج الحلو اشتاقينا الها شو طفرت ومالها حس
جوحي : لو بس الزمج لا افصم رگبتج من راسج
خوله : هههههه مو دجاجه اني سد الباب وراك
ناي : عمو فلاح اخذ بدعه وصعدو وياهم بيبي حتى يبطلون ضرب سما ويونس طلع بقينا اني وعمه وشرهب
خوله : ام كفشه تعالي
شرهب : هااا عمه
خوله : شو تحجين كلشي مخفتي
شرهب : لا مااريد يضربون اخويه
خوله :الله يستر منج من تگبرين
ناي : بعد لتحجين اي واحد يسألج كولي مااعرف
شرهب : قابل اجذب حرام
خوله : هههههه لتجذبين واحجي ولتخافين مالج دخل بأختج هاي فاهيه امر من گلبي
ولو اليوم حجت ومخافت هيج فرحت بيها اريدجن ابد لتسكتن اذا عدجن حق اخذنه من عين اكبر واحد العمر واحد و ينعاش مره وحده عيشي قويه ومسيطره وماخذه حقج من الدنيا كامل بحيث متكولين حرامات لو بوكتها هيج سويت لو بوكتها هيج حجيت راح تندمين اخذي الحق بلحظته ولتعوفي لبعدين اذا راح ميرجع وتخلصيها بلقهر والضيم والندم والبجي وتندبين حظج بيدج تسوين حظج حلوو وبيدج تسوي انكس حظ
شرهب : وانتي عمه حظج حلو
خوله : والله ياعمه ذني البرابيك لو عايفاتني اعيش حظي بدون سوالفهن المكسره وسحورتهن جان هسه اني وين وحياتي غير شكل ومتأكدة جان سويت حظ حلو بس اكو ناس متخاف الله هي ادمر گلشي ومتحب الخير لغيرها مااكول غير الله يبعدهن عنجن وتعيشن بحظ احسن من حظي وحظ امجن الله يرحمها ويطلع حوبتي بيهن لو اخر يوم بعمري
شرهب : عطت بلبل نسيته
خوله : فزيت اشتعلتي انتي وبلبل تعالي انطيني بوسه وشيلي كفشتج راح تگملين
شرهب : ميصير گمل بلبل يفليلي
ناي : يوميه لازم راسها ويدور بيه ومركز من كل عقله وكل شويه عود مطلع كمل ويصيح كتلتها وهو كلشي ماكو خلاني ذاك اليوم اكعد الظهر كله ادور بشعرها اخاف اكو تالي طلع شعرها نظيف وهي السخيفه تكوله اكتلها بلنعال حتى لتطير لشعري
خوله : خليهم متونسين يله اصعدي كعدي من النوم خلي اسويلكم اكل وتعالي نايه ساعديني
ناي : نشتغل بلمطبخ ونزلت بيبي سألتها على سما
عمشه : گلشي ماكو يمه كضوها عدموها العافيه والبت تون چا لو يگلولها الحين تردين يونس تگلهم مااعرفه
ناي : خطيه
عمشه : گلها جم يوم وترد سالمه واطورد وتفتر على اخيج چاغير طبع البدن مايغيره الا الجفن لا تشيلين هم مكضيه يمه انه جيعانه اريدن خبيزه تكسبيها كساب زين وماعون دبس وراشي عبن روحي هفت عليه
ناي : هسه بيبي
رحت سويت اكل لبيبي اكلت ودخلت لغرفتها وشرهب وبان وبلبل اكلو جانت بان بالها ابد مو ويانه وتكول ماطول تحبه تتحمل وسكتت ومافتحت الموضوع حاير بلملازم والقرايه لان اجلت درس نزلت وعفتهم
كاعده انظف الطباخ جان يطب مهند جريت نفس من المشكله نسيت هو هنا بغداد مو بلبصره عزه لو هنا وكت المشكله شجان صار
مهند : الحلوو صافن شونج
ناي : هااا زينه
مهند : اكو شى وضعج مدري شونه
ناي : شوف مهند راح احجيلك لان اخاف تصعد فوك وامك تشحنك على اخويه وتصير مذبحه معودنا هدا الجو
مهند : شصاير احجي
ناي : يونس يريد سما
فتح عيونه حسيته ضاج وملامحه تغيرت
وجان يحجي وياها وامك كبرت الموضوع وكالت يتحارش وبديت اسولف المشكله بس مذكرت كلام شرهب حتى ليتعصب اكثر لان احس عروك ايده راح اطك من العصبيه
مهند : وين اخوج هسه
ناي : راد يطلع وابد نيته مو خير لان حيل تعصب لزمت ايده بحركة لا ارادياً مني خايفه على يونس وكتله
لتتعارك ويه اخويه لتنسى انت هم نفس الشى ردت ومني ونفس الشى سويت ويايه لتحلل لنفسك وتحرم عليه اتذكر هو هم شاب ومن حقه يحب ويتزوج
مهند : بس هو بعده صغير وشون يقبل على نفسه يتقرب منها
ناي : هديت ايده وانتبهت على نفسي جريت نفس بضوجه وكتله
انتي هم عينك عليه بعمره اذا مو اصغر اني مااكول اخويه تصرفه صحيح بلعكس تصرفه كلش غلط بس بنفس الوقت على كيفكم وياه فهموه علموه مو اطردوه وتلزموه الشارع بأي حق ابوك يهدد بيه وامك تعيره بأمه الميته حتى مخلو حرمه للميت ترضى هاي تصرفاتهم لو انت صارت بيك ترضاها
عافني وتوجهه للسنك ذب مي على وجهه
وجر دولكه وشرب مي حسيته حيل اختنك
ناي : انت الجبير وبحكم اخوه علمه غلطه بدون متأذي اذا اهلك ميحبونا اني متأكده انت تحبنا
اندار عليه وباوع بعيوني
مهند : شون مااحبكم روحي معلكه بيكم
ناي : عفيه لتأذي يونس هذا ابويه واخويه اليوم منظره گطع گلبي كلها ضده همزين بيبي منطت بيه
مهند : بس سوايته مو هينه
ناي : كتلك تصرفه غلط بس علموه
مهند : خلي اصعد لاهلي وراها انزل اشوف الوضع
ناي : بقيت متوتره خفت لا صالحه تدفعه وترجع تگب العركه
بقيت واكفه بدايه الدرج اسمع اريد افهم شيصير اكو صوت كلشي ماكو لحد منزل وكف بصفي وكاال
مهند : حتى مفتحو الموضوع فوك مبين مرادو اعرف
ناي : تندمت لان تسرعت وحجيت بقيت ساكته متوقعت اهله يسكتون صوجي گلت
مهند : زين سويتي اني احجي ويه يونس وانتي تعيشي ونامي لتضلين سهرانه
ناي : شون انام واخويه راح ينام بلمحل
مهند : ماعليه شى رجال وكلشي يتحمل
ناي : الله كريم عفته وهو طلع
يونس : جان بالي كله يمها ومنظرها من كالت اي اريده ميروح من بالي اني سما احبها اعرفها طيبه بس امها مخربتها من احجي وياها واعلمها على طبعي بسرعه تستجيب جان گلبي نار عليها وخايف يأذوها كل شويه اريد ادخل واكول اخاف اعقد الوضع
اجاني مهند حسيته ضايج
هاا ابو الشباب خلصت شغل
يونس : يعني فتر هيج وكت قليل ناس
مهند : اريد احجي وياك بشغله
يونس : احجي اسمعك والتريده اسوي اكيد عرفت الصار
مهند : اني اخ ماعندي وانت هم ويمكن انت اكثر من مرتضى قريب عليه رغم هو مو بس ابن عمي حتى ابن خالتي وكدام عينك منكعد بمكان اله نتعارك وانت دوم تتفرج ومتدخل هادئ من زمان لهذا اعزك اكثر منه ماشفت منك غير الطيب بس سالفه اليوم كلش واكفه ومحلوه
يونس : حقك واني غلطان وكتلهم مستعد اخطبها وشوكت ميردون نتزوج
مهند : انت بعدك صغير والعمر كدامك كون نفسك واوكف على حيلك واذا هيه رادتك بيدي بملابسها ازوجهه الك بس بشرط هيه تريدك
يونس : واهلك
مهند : مالك دخل بيهم شغلتك يمي وعندي شرط ثاني واهم من الاول
يونس : شنو
مهند : متتقرب من سما ابد تعرف شنو ابد اذا تشوفها ادير وجهك اني مراح احاسبك على الفات لان اذا حاسبتك راح أذيك وراح تصير كلش موزينه بينه اذا مصار دم لتنسى هاي اختي وانت عندك خوات وقدر موقفي تريدها حقك بت عمك واولى من الغريب بس حسب الاصول
يونس : هذا هو مااوصل يمها لحد مايصير الوكت المناسب واخطبها وانتظر وكفتك ويايه
مهند : راح اخذ كلمة رجال منك لان الرجال ينلزم من كلمتة ترجع للبيت طبيعي ولا كأن صار شى وغلطه وحده يايونس ما ارحمك وربك اخلي دمك بطولك حير برزقك ومستقبلك واذا الك متصير لغيرك ولتسوي مشاكل ويه احد عدي هاي الفتره بليه هوسه حتى لا اضطر بنفسي اطلعك من البيت
يونس : هذا هو مااتقرب منها وان شاء الله اكمل كلشي واخطبها
مهند : ارجع نام بفراشك وعزل كافي ماكو رجل بلشارع الوضع موزين
يونس : شويه واعزل
مهند : انطيني هذا العلج
اخذه ودخل للبيت
ناي : اروح واجي ميته خوف
مهند : مو كلت نامي
ناي : شصار عفيه
مهند : مصار شى اشتريت علج تردين
ناي : عفيه احجي تعاركتو
مهند : ادخلي نامي نايه وانسي الصار
ناي : يعني شنو
مهند : جنهه راح تصير كصه بكصه وهاي المجانت بلبال
ناي : هم مفهمت
مهند : هههههه ادخلي نامي شكلج حلوو وانتي خايفه مو اني انصح اخوج واسوي اتعس منه
ناي : غير يفهمني شنو كصه بكصه
مهند : من تكبرين تعرفين تصبحين على خير
ناي : عافني وصعد واني واكفه بنص الهول وحدي اباوع على الحياطين طلعت بيبي
اي بيبي الله جابج شنو كصه بگصه
عمشه : يااا منين سمعتيها
ناي : هيج اجت بالي صديقتي بلمدرسه كالتها اخوها جان يحب وحده واخو هاي الوحده كال كصه بكصه
عمشه : يمه يعني انطيك اخيتي تنطيني خيتك وحده بوحده تروح مره وتجي مره
ناي : ابتسمت هذا هو بيبي فهمت
عمشه : يمكموعه شنهي وجهج ورد اخافن الشغيله الج
ناي : هااا لا مو الي شعليه اني اروح انام
عفتها وصعدت ركض وكل مااتذكر سوالف مهند اضحك كلهم نايمين سمعت صوت رجل يونس معناها اجه ينام بغرفته مردت اطلع واحرجه عفته على راحته بقيت افكر لحد متعبت ونمت
بقى الحال اياام هادئ وصالحه تنزل وتصعد متحجي ويانه واذا صار شى ولو بسيط تعيط وصيت شرهب هي وبلال ميسوون وكاحه اما سما تعاقبت بأن متطلع من غرفتها بس للحمام حتى الاكل يصعد الها متنزل تاكل ويانه اما بان امتحنت ومنتظره النتيجه مالتها
واجت النتيجه وطلعت ناجحه معدلها ٧٥ جانت حيل فرحانه كلنا باركنا الها شفت عمه بديعه دموعها تصب من الفرح لان نجحت واكول بگلبي شوكت اني هم هيج وانجح وادخل گليه وعمو نجم اجه اخذ عمه سوالها جواز ويركض بلمعامله ومن نسأله شوكت يكول بعد هوايه
يونس شغله يمشي وكاتل نفسه يفتح من الصبح ويعزل اخر واحد وكام ميدخل للبيت بس وكت النوم حتى الاكل كمنا نودي للمحل اله
حسيت عمه خوله وضعها تعبان ويوم بعد يوم تتأذه ومرات تبقى اليوم كله نايمه ومن تكعد تبجي وحدها وادور بجسمها اخاف اكو شى اني ما احسسها مراقبتها من خوفي عليها وهي ابد متبين لاحد شديصير بيها وتبقى سولف وتضحك ويانه حتى مرات ادمع عيني عليها شكد تتعذب وتسوي نفسها قويه
اما عمو نجم حاير يركض منا ومنا علمود سالفه السفر حتى الجيه قليل كلش يجي
امسح بلكاع وعمه بدعه تخبز وعمه خوله على الطباخ واكفه وصالحه بلحمام تغسل هدوم جان اطب ساهره العبايه جديده تلمع والشحاطه عاليه والمكياج
ساهره : شونجن
بديعه : عاش من شافج يمعوده هاي وينج طلعتي ودرتي وجهج ولا سألتي ولا جيتي
ساهره : اخلص من جهرتكم
بديعه : اي والله احنا هم خلصانين
ساهره : وين صالحه
خوله : لا هله واني اكول گبت ريحه مطيبه
ساهره : مااغث روحي وياج
صالحه : هااا شونج
وتباوسن
خوله : اول مره اشوف حيايه تتباوس
بديعه : ههههه صوتج ليسمعن
خوله : قابل جذب لقاء العملاقه اليوم فريد شوقي وزكي رستم
بديعه : ههههههه لج غصيت
ناي : عمه كملت شغلي تردين شى
ساهره : تعالي ولج اجيت عليج هم
ناي : استغربت شكوو عليه عمه
ساهره : اي جبتلج شون عريس قسمه زينه وتخلصج من الفگر العايشه بيه وكلت لعمج وقبل
خوله : اوكفي اضربي بريك ياعريس ياقسمه وهذا ياعم بله
ساهره : ولد جوارينه خوش ولد سايق تكسي ويدور مره وكتله على ناي
خوله : وانتي بكيفج احد صخم وجهج وگلج دوريلها على عريس
ساهره : غير بت حمايه ويتيمه ومالها احد مثل حالتها وبعمرها الزواج والستر احسن الها
وهم اخوها يخف الحمل عليه
بديعه : اخوهن راضي ليش بعد تدخلين
صالحه : حجي ساهره صحيح ليش متتزوج بعمرها هوايه بنات متزوجات وعدهن جهال
خوله : متزوجين بتج هي اكبر منها
صالحه : بتي عدها دراسه ومستقبل وراها
بديعه : وناي وراها عدس وماش غير هم دراسه والبنيه شاطره
ساهره : هاي شبيكم گبيتو عليه كلت راح تكيفن تتزوج وتستقر
خوله : سوالف بنات غنيه بطلنها ناي متتزوج اله وكت ما هيه تريد واخاف دروبجن القديمه تتذكرنها السويتنها بيه تعيدوها عليها قسماً بعرش رب العزه لا اذبحجن وادخل بيجن سجن عادي شبقى من العمر اخلصه بلسجن واني مرتاحه كافي خلصت من شرجن
صالحه : يابه خلي تولي هاي فوك متسوي زينه
خوله : الزين خلو الكم وامشي انتي الثانيه شكوو واكفه تسمعين هذا الكلام
ناي : سحبتني عمه من ايدي وصعدتني للغرفه حسيتها مرعوبه مو تكول جابن عريس اليه عبالك راح يموتني
خوله : اسمعي اكل متاكلين من عدهن كنتورج دوم مقفول يشتغل القفل مو
ناي : لا
خوله : انقلي بلخانه مالتي بيها قفل دوم اقفل وراج وملابسج تتأكدين منها اي شى يضيع تنطيني خبر
ناي : شصار عمه شكو عفيه
خوله : مو حاجيه الج شصار گبل اخاف ينعاد ذني ميكعدن راحه
ناي : لتخوفيني فدوة
خوله : لازم تخافين حتى تحذرين منهن گبل مدرت بال وكلت قابل شيسوون اليه وشفتي الصار بيه مااريده ينعاد
ناي : الله الحافظ
خوله : التزمي بصلاتك بعد ابد متركيها وايات تقرين شوكت ماعندج مجال وحتى من تنامين واي شى تحسين تكوليلي
ناي : حضنتها حيل وكتلها
شون بلياج اضل شفتي بموقف واحد شون تنقذيني
خوله : اووووف شبيدي لا عبالج مرتاحه مرات اكول مااسافر ومرات يجي السفر ياكل بروحي وضاله اطحن ومااعرف شراح يصير بيه
ناي : البيه خير ياارب يصير الج عمه بستها وبيومها نقلت غراضي مثل مكالت وبديت انتبهه على كلشي صدك خفت وترددت وكمت اتجنبهن
ساهره تروح وتجي صحيح مو مثل قبل كل وكت بس هم يكعدن بلساعات
مهند يطب ويطلع يسلم عليه يسولف شويه واحنا واكفين ويروح ابد متعدى حدوده حسيت شغله سما صحته
اما سما حيل تأذيت وجهه ازرك جانو حيل مأذيها وبيوم توسل بيه يونس اشوفله درب بس يشوفها امها طلعت للسوك واني اشرت اله يدخل
طب ركض واني واكفه انتظر
يونس : طبيت عليها بلغرفه گلبي نار اريد بس اشوفها
سما : شدسوي هنا فدوة روح اذا شافوك يذبحوني
يونس : بس اجيت اكلج شى واحد واروح والله
سما : بسرعه عفيه لتجي امي
يونس : انتي اليه ومااعوفج لحد كطع النفس وروح امي
سما : حطت ايدها على وجهه تشهك من البجي
سحبت ايدها وبستها لتبجين اروح فدوة لهاي دموعج قوي نفسج كلها سنتين بين متكملين دراستج اني اخطبج وعدني مهند يوكف ويايه
سما : عزه اخويه دره
يونس : لتخافين وعدته مااتقرب منج واخطبج بس يصير الوكت واذا وافقتي بيده يزوجج الي
سما : يعني قبل
يونس : بشرط انتي توافقين مو ادكين الناقصه بيه وترفضين
سما : ههههههه
يونس : مسحت دموعها اوف ضحكتج ترد روحي شمسوين بيج كون بيه ولا بيج والله جنت راضي بأي شئ بس كون ميلزموج
سما : ميخالف المهم انت زين ومطردوك
يونس : صايره مزعل الفيترجي كلج زراكات يرادلج جرح سجينه يم عينج اليمنى واطلعين التوم مالته
سما : ههههههه هذا الموجود ميعجبك بكيفك انت الخسران
يونس :اكو واحد متعجبه روحه ردت اضحكج راضي كلشي منج اموت عليه
سما : روح عفيه اخاف يجون
يونس : بعد مااكدر اشوفج مثل قبل وعدت مهند ومااريد اخلف وياه اجيتج اليوم بس حتى تعرفين اني شاريچ بروحي
سما : واني هم شاريتك بروحي دير بالك على نفسك واني من اختنك افتح الشباب واشوفك من تطلع من المحل
يونس : انيالي الگمر يباوع عليه
سما : هستوني جنت مزعل الفيترجي شبسرعه صرت گمر
يونس : يروحلج فدوة هو وعشيرته
سما : ههههههه كاافي وروح
يونس : ديري بالج على نفسج وشتحتاجين دزي ناي وصيتها عليج
سما : مااشي
يونس : سحبت راسها وبسته وطلعت
ناي : عفيه وين صرت
يونس : هذا هو كملت رايح للمحل
ناي : ارتاحيت
يونس : كلش عينج عليها نايه والله سما حبابه بس محد يعرفها غيري
ناي : لخاطرك ولخاطر راحتك شتريد يصير
يونس : الله يحفظج اليه
ناي : روح حبيبي ليجي احد ويشوفك
مرت ايامنا وكلشي طبيعي وكلمن حاير بروحه نحاول نتجنب الكل حتى لتصير مشاكل مرتضى كام ميجي ولا يوصل وهذا الشى ريحني كلش اما مهند وجوده دوم كدامي خلاني ازيد بتعلق بيه
دنحضر ملابسنا والجنط بدت السنه الدراسيه وباجر اول يوم
اني رحت رابع عاام وشرهب للسادس ابتدائي وبان منتظره قبول الكليه وسما للسادس اعدادي
دخلت عمه علينا وعيونها حمره مبينه باجيه
بان : شبيج عمه
خوله : كعدت بنصهن واني مقسومه اثنين والنار تحرك بيه حرك
تعرفون شكد احبكم وشكد متعلقه بيكم يمكن اني مخلفتكم بس والله اعتبركم جهالي دوم حظي اعوج بلدنيا ومن اشوفكم اكول لا هذوله الحظ الحلوو الراح اطلع منه
ناي : شبيج عمه خوفتينا
جان اطب عمه بدعه ودموعها على خدها غير نفتهم شكوو
خوله : عكب باجر اسافر
ناي : حسيت بلحظتها واحد شالني ليفوك وشمرني على كاع مليانه سجاجين ومواسه وكزاز بحيث اصرخ من كل مسامه بجسمي
مااعرف شنو اليوجعني الم گلبي لو روحي لو احساس اليتم الي كل جم سنه يتكرر عليه
كمت بهدوء منها وكعدت على صفحه مردت احجي شكول اذا ابجي لازم مااسكت وراح أذيها ومتروح تسافر واني اكثر وحده كعد تشوف شديصير بيها يوميه واصير انانيه اذا قبلت بأذيتها
واذا بينت اني فرحانه مبين جذب لان احساسي ميترجمه اي كلام واذا حاولت اخفي عيوني راح تفضحني لهذا اتخذت السكوت ردت فعلي الوحيده
خوله : بنتي نايه ليش رحتي بعيد تعالي
ناي : كمت وتمددت بفراشي وانطيتها ظهري مكدرت مو بيدي شون تروح هاي اماني هاي راحتي هاي سندي ظهري الي اسند عليه وكت ما يأذوني
شرهب : راح ترحين وتعوفينا
خوله : ارجع فتره وارجع والله
بديعه : بنات على كيفكم وياها والله طك گلبها من البجي جوه هو كال الها نجم لو تكت دموع على كيفكم وياها
خوله : تردون مااروح يطبني طوب ولا تنقهرن مني حتى لو اموت فدوة الجن
ناي : كمت من فرشتي وشمرت نفسي بحضنها لتكولين هيج والله من محبتنا مكعد نكدر نتخيل نعيش بدونج
خوله : ليش اني اكدر محد يعرف بگلبي شصاير هسه خلوني ساكته لا يوكف من القهر
ناي : روحي عمي وصيري زينه ارتاحي بس ارجعيلنا والله انتيهه بدونج
خوله : والله ارجع بس استقر وضعي يتحسن ادعولي واحاول اتواصل وياكم
ناي : بقينا الليل كله نسولف وساعه نبجي وساعه نضحك وبيومها باتت بحضنها اني على ايدها اليمنى نايمه وشرهب على ايدها اليسرى وبان نامت يم اهلها
واكفين بلباب واباوع على جنطها شون يطلع بيهم عمو نجم ويصعدهن بلتكسي اليوم موعد سفرها
جنت احس بعيون صالحه وساهره الشماته والفرح لان خلصن منها وبعيون عمشه القهر والاشتياق بيبي رغم متحجي وياها بس اعرف مرتاحه لوجودها حتى مرات تسوي نفسها تشتغل بشئ وتباوع على عمه ومن تتأذه او تتمرض تضل تلوب وتسألني شون صارت مترتاح اله من اكول الها صارت زينه تبقى بتها واعرف بيها تحبها بس الزعل اكبر من المحبه
حضناها ونبجي امنا وهاجرت من عدنا كل كم سنه نتعلق ونودع الي نحبهم مرات الوم الزمن لان حرمنا من امنا واله مجان حسينا بهذا الشعور احساس من تحب واحد وتتعلق بيه وتودعه صعب كلش صعب ومتعرف راح تشوفه بيوم او لا
خوله : عينج عليهم بدعه مااوصيج
بديعه : وعيونج لتخافين الحجينا بيه كله صار يومين اطبقه توكلي وشوفي حياتج الله يسهلج
خوله : اباوع على امي اريد اشمر نفسي بحضنها اريد اكول الها يمه اخذيني اسحبيني من ايدي وكولي لترحين خليني ابقى بحضنج وبينكم خليني اشم ريحتك اشتاقيت الها عيوني تتوسل بيها تحن عليه وهي دخلت لغرفتها وسدت الباب بس نجم طب باسها ودعها وطلع
ليش يايمه مو اني وحيدتج اوووف يعمشه راسج گوي واني ادري بروحي طالعه عليج اخذت شيلتها من كنتورها وهيه متدري قبل بليله وضميتها بلجنطه ويه غراضي ردت اخذ ريحه امي ويايه رغم كل الصار تبقى اعز من روحي
ناي : سلمنا على عمو نجم جنت اشوفه هو سبب كلشي مكافي موت امي هلمره اخذ عمتي مني لهذا متقبلت فكرة اودعه بطيب خاطر مجرد سلمت وخرت منه وبقى يودع بيونس ويوصي
كل واحد بينا باسها لعمه وباس ايدها وراسها ومنعرف راح ترجع النا خوله او لا
عيونها جانت متسكت وتتنقل بلبيت وبلدربونه جنها تريد تحفظ كلشي كدامها
لحد مصعدت بلسياره وشمرنا المي وراها ونكول بگلبنا ارجعينا سالمه منتظريج
اول ايام خنكه وتعب وقهر واليوم يمشي بطئ حتى البيت كرهنا بدونها صوتها يرج بيه
كاعده احظر واجباتي واقره العصر جان تدخل صالحه عليه
صالحه : كوومي
ناي : هااا عمه اكو شى داقرا
صالحه : اجه العريس الكالت عليه ساهره جاي يشوفج هو واهله
يتبع .....