تحميل رواية «الابواب الخمس» PDF

#الابواب_الخمس

البارت السادس والثلاثون

للكاتبه Reem

(بارت هديه ال2 مليون مشاهده شكراً من قلبي على تعليقاتكم وتصويتكم انتم سبب نجاح القصه وروعتها 🌹)

اخذ مني الدهر حظي وفر بيه

وبقه بيدي الفگر سبحه وفر بيه

شته غيري مطر يمطر وفر بيه

وانه قطرة مطر شحت عليه

ناي : هااا عمه اكو شى داقرا

صالحه : اجه العريس الكالت عليه ساهره جاي يشوفج هو واهله

ناي : ياعريس عمه

صالحه : شنو هاي العياره غير ساهره اجت قبل ايام وكالتلج على هذا جيرانهم ابو التكسي شو جنج اول مره تسمعين

ناي : اي وبوقتها عمه خوله كالت الج متتزوج

صالحه : عمتج خوله طارت بح راحت ولت عساها لا ردت لا كل شويه وتكولين عمه خوله كلشي كالته وسوته تنسي ذاك وكت وهسه وكت ثاني

كامت بان : من مكانها وطلعت وبقيت اني اباوع بوجهه صالحه ومااعرف شحجي دخل لگلبي الخوف حسيت بلحظتها اني وحدي مالي احد

ناي : عمه عفيه مااريد اتزوج ولا اريد انزل اشوف احد

جان تتقرب مني ودنكت عليه وبنبرت تهديد

صالحه : سمعي لج هاي سوالف المزعطه والمراهقه متمشي عليه اخاف ذيج الفتره سكتت الج وعبرتها مجنت فارغتلج بس مناسيتج لا عبالج ماادري شنو بالج ولشنو مخططه

ناي : شخطط

صالحه : تربيه خوله العگرب خلتج تتموعين لمرتضى وهو مطي وكع بيج وخبص الامه حتى يخطبج لج لو اخر وحده بلدنيا ساهره متاخذج لابنها اني اعرف هو فطير وكع بيدجن وشوف ذيج الغراب شعلمتج وخلتج هيج تتلزكين بيه ويجوز حتى خليتي يطخج وانطيتي مجال حتى يلزمج

ناي : لا والقران عمه مامسويه شى ولا لازم شعره مني وهو مثل اخويه وكتله مااريدك وحتى عمه خوله كالت اياج تتقربين منه بلعكس عمه متقبل بولد عمي

صالحه : اي مو واكع بيدها الچلبه يسوون راسها تخبلنا وناخذج لواحد من ولدنا شنو خلصن البنات

ناي : دنكت وحيل انقهرت غير تسكت مو لعبت نفسي

صالحه : امشي بدلي ملابسج هاي الخلاگين ومشطي شعرج وانزلي للعالم بلكت يرضون بيج وياخذوج ونخلص

ناي : ماانزل عمه عفيه لتسوين هيج بيه دخلت عمه بدعه مبين بان  صاحتها

بديعه : خير شكوو

صالحه : بله مالج دخل انتي الثاني لا كل شويه وحده مسويه نفسها هي امهم ومسؤوله عنهم

بديعه : غير افهم شكو وشبيج ضاله تتراجفين وصوتج عالي

ناي : كمت من مكاني ورحت لعمه ميته خوف واحجي

عمه يردون يزوجوني واكو ناس جوه يردون يشوفوني

بديعه : اي يمه شكو بيها انزلي شوف الناس الجاييج يجوز خوش ولد وتصير قسمتج

ناي :ياقسمه عمه شتحجين

بديعه : بنتي كلنا بعمرج تجينا قسم والزينه نقبل بيها ونتزوج هاي سنه الحياه اني وامج وكل نسوان الگبل هيج

ناي : بس اني اريد اكمل دراستي وهم يونس ميقبل

بديعه : اذا انتي قبلتي يونس اكيد ميعارض انتي هم حسي بأخوج وشيلي شويه من حمله ولتستعجلين الشغله يجوز متصير المهم هسه العالم تنتظر جوه عيب نخليهم هيج

صالحه : شعجب منج من الشيطان لو يضربوني على راسي ويكولون بدعه هيج تحجي مااصدك

بديعه : محجيت شى غلط عريس وجايهه تشوفه وتحكم

صالحه : طلعتي عاقله مو مثل ذيج البايره تنوح يمنا والغلط راگبها من ساسها لراسها وشيصير وصاحت بنات غنيه لو باقي هاي هم تبور مثلها ابقي هيج عاقله حتى نزوج البنات وكلمن تروح لبيتها ورجلها هو يحير بيها عيني بنات هذا الجيل ماينجرعن بكد البيضه ويدورن حب وتمعشك اذا متنحط براس رجال ماتنكرص  وتكعد وتسكت

بديعه : اي صحيح وانتي هم زوجي بتج لا بس كادره على بنات المرحومه

صالحه : خلي انزوج ناي ويخف حملها وراها يصير خير

ناي : اباوع عليهن فاكه حلكي قبل عيوني من الصدمه زين صالحه واعرف سوالفها عمه بدعه شجاها كعدت بلكاع واليأس سيطر على كياني واباوع على ايدي شون ترجف  وبگلبي اكول وينج عمه تعالي شوفي حالي مصار ايام من رحتي وهيج صار بيه

بديعه : كومي نايه عيب الناس تنتظر

ناي : عمه دخيلج

بديعه : كومي بتي وكافي دلع يله البسي اي شى نفنوف او بنطرون وقميص ومشطي شعرج وانزلي بان ساعديها

طلعن واني جامده اباوع عليهن

بان : هاي امي شجاها ولج اخاف بدلوها توقعت تگلب الدنيا وتتعارك

ناي : حظي هذا متوقعت عمه تنطي هيج بيه كلت راحت عمه خوله هيه موجوده تالي اول وحده تسلمني بيدهن

بديعه : هاااا كمتي لو لا

بان : شو كومي وتعالي بدلي وانزلي بلكت متصير

ناي : بعدني صغيره والله مااريد اتزوج حضنتني بان  وكمت ابجي

بان : هسه يونس ميقبل ويگلب البيت على راسهم

ناي : شمدريني يجوز هم يقبل اذا عمه بدعه اشعجت على الموضوع يجوز يحجون براسه ويقبل ااااااخ وينج عمه الحكيني

بان : كافي بجي وكومي بدلي وخلي نشوف شيصير

ناي : بدلت ومشطت شعري رجعت ضفرته الي بان  ونزلت على الدرج لاكتني شرهب

شرهب : وين رايحه اجي وياج

ناي : مرايحه خطار اسلم عليهم واطلع

شرهب : ليش عيونج حمر جنتي تبجين

ناي : هااا مديت ايدي ومسحتهم لا حبيبتي رمش دخل بعيني اصعدي فوك وكافي لعب بره ذاك اليوم مو كالج يونس عيب بعد اطلعين كبرتي

شرهب : صاحني بلبل وطلعت

ناي : صيحي يلعب فوك يمج ولطلعين

شرهب : انزل اسلم وياج

ناي : لا ابد اتصعدين بلغرفه ومطلعين ابد

شرهب : اي

ناي : اشرتلي صالحه ادخل ببسي الهم لزمت الصينيه ودخلت جانن اثنين نسوان كاعدات كبار بلعمر ورجال يطلع بنهايه الثلاثين عمره وعمه ساهره ردت واحد يجرني منهم يكولي شكعد تسوين بيبي وينها اوووف ياربي رجل تتقدم والثانيه تأخر والصينيه بيدي على ساعه توكع

قدمت وهو ضل يباوع من فوك ليجوه مثل البضاعه مال المحل لكه قميص يشتري لو لا ويتفحص بيه

ساهره : هاي ناي شفتوها تخبل صغيره وحليوه وام بيت ومتلوك غير لابو عمر

اي ماشاء الله عليها حليوه بس مو بعدها صغيره

ساهره : يمعوده ياخذها صغيره يربيها على ايده بنات هذا الوكت ماينحزرن هيج اضمن اله

ناي : خليت وطلعت دخلت بيبي ومثل كل ماتدخل تشمر العبا وتصيح

عمشه : يمدهربات عطشانه اريدن ميه وينجن كطيعه التكطع ارواحجن

ناي : رحت ركض الها بيبي الحكيني

عمشه : يايمه اسم الله شجاج

ناي : عمه ساهره جايبه عريس جوه اليه وخلتني ادخل واسلم عليهم

عمشه : ياهو  هاذ من يا زبل جابته عبنها مايجي الخير من وراهه

بديعه : هااج عمه المي

عمشه : والغسل چا انتي وينج ساكته وراضيه البت تدخل على الوادم واخيهه مايرضى

بديعه : عمه لدخلين بروح ابوج وخلي الشغله تمشي

عمشه : شنهي تمشي تسودنتي

بديعه : خلي العالم تطلع وراهه التردي سوي

ناي : احنا نحجي طلعو الناس وبيبي كعدت تربعت فتحت الفوطه مالتها وعدلتها زين والسبحه بيدها جان تعيط ولجن بنات غنيه العوبه وينجن يلبرابيك چايات تلعبن بگيفچن احد سود وجهجن وگال زوجو البت

ساهره : هاي شبيج عمه صوتج ليبره الناس جان سمعتج

عمشه : ياام العثوك المعفنه شجابج هنا ما وليتي لبيتج عساه انهجم على راسج شعندج خري مري يمنا

ساهره : ليش متردين اجي اشوفكم واشوف اختي

عمشه : چا انه ماتهنيت بفرگاج وارتحت من شوفت وجهج اليكطع النفس واكولن ربي عطيته جبيره عبن وليتي وخلصت من وحيده تالي گل شوي هازه طولج وجايه وشنهي سالفه العريس چا احد صخم وجهج وگالج نريد نزوج البت

صالحه : كبرت البنيه وصار عمرها ١٦ سنه على شنو باقيه بعد

ناي : بعد كم شهر يله اطب بال ١٦ بعدني ١٥

صالحه : لا ١٦ وكبرتي وبعمرج متزوجات

عمشه : چا وبتج ماتزوجيهه ولد عمها رايدها وهيه اكبر من نايه وحديثه وشحلاها

صالحه : بتي تريد تكمل دراستها

عمشه : وهاي البت گملتها بگعه صخيله وشعرهه مجرب ونشمرهه وحيدها

هاي البت ماتزوج اله برضاتها

بديعه : مابيها شى عمه اذا قسمه زينه شكوو بيها

ناي : كله بجفه وكلام عمه بديعه بجفه حسيت بلحظتها تريد تشمرني وتخلص مني يمكن ذني مااهتم بيهن لان اعرف يكرهنا وبس يردن يخلصن بس عمه تموت علينا ونعتبرها امنا شون هيج تذبني هاي الذبه

بديعه :تعالي يمه ناي

عمشه : شنهي ماخذتها وين موليه

بديعه : شويه ونجي

ناي : مشيت وياها ودخلنا غرفه بيبي كعدتني بصفها

بديعه : اقبلي بلجايج

ناي : شون اقبل عفيه ليش هيج تسوين اني مداافكر بس بطريقه حجيج وتصرفاتج هيج هنت عليج عمه اكبر مني وتصيحله ابو عمر يجوز متزوج وابنه بكدي يعني ليش هيج تردين تشمريني هاي الشمره

بديعه : بس ارضي وكولي اي ويصير خير

ناي : ياخير عفيه ياخير كمت اضرب وجهي لزمت ايدي

بديعه : ارضي بتي والله مراح تندمين تعرفين بيه أذيج

ناي : هزيت راسي لا

بديعه : كولي موافقه وشوفي شراح يصير لمصلحتج والله ومصلحه اخوج متردين يتأذه وافقي ولتخافين

ناي : بلحظتها ماعندي غير اثق بكلامها طلعت وعمه لازمتني

بديعه : نايه ماعدها اعتراض بس هم نشوف اخوها

ساهره : هااا ولج مدوده على الرجال مو كلت هيج وحده ادور زلم تريد تتزوج هي هاي شكول دراسه خليها تنستر وتولي عمه لتعرضين للقسمه وخليها تروح اول وتالي تتزوج شكو بعد مأخرين خلي يخف الحمل عليكم وعلى اخوها

عمشه : ياقسمه السوده عليجن يمه نايه ترضين چا انه تمالخ علمودج وانتي راضيه

ناي : مكدرت اجاوب بيبي العبره صارت بلعومي

عمشه : انه اكولن نشور اخيهه عبنه واليها وعمامهه ولد عمه چا ماله والي وتضل بيد النسوان كطيعه التكطع نفسجن

اروحن اتوضى واذكر الله ماتفيدوني بشى ميلو عني كامت بيبي ومراضيه على الصار  تمشي وتكول

يا ريت ربي لا خلگني ون تحت ذيل أمي خنكني

باوعت على ساهره وصالحه شون فرحانات وحده تباوع بوجهه الثانيه واني صافنه على روحي واكول شجاني وسمعت كلام عمه معقوله تسلمني بيدهن هيج ليش اني مو بتها يعني لو بان  تنطيها الهن دخل الشك بگلبي حتى بعمه وجان املي الوحيد يونس ميقبل وينسد الموضوع

اليوم خلص واني حتى مقريت عفت الامتحان والواجب وكلشي وشرهب مقريتها بان  قرتها وكل شويه بان تصفن بوجهي وكالت بيج شى جان جوابي الوحيد اهز راسي بلا لان شگول لو قواميس الدنيا كلها متوصف حالي

انتظرت يونس يجي واحجيله الكل نام بس اني عيوني بيها ملح ولا تغمض لحظة باوعت على الساعه عبرت الوحده  مسمعت صوت الباب من اجه خلي اكوم اشوفه

دخلت للغرفه لكيته نايم على بطنه وبهدوم الشغل حتى مسابح ويشخر من التعب انقهرت على شگله من الصبح لليل يشتغل ومكسور ظهره مره اكول اتزوج واخفف الحمل منه وارجع اكول ليش هاي قسمه جايبيها الي اكيد طايح حظها مبين من شكلهم تذكرت مهند من يسمع شراح يكول

غطيت يونس ورحت لبلال واباوع عليه انيالك متدري بلدنيا شكوو حاضن السياره مالته صغيره مال العاب ونايم غطيته زين وطلعت

رجعت لفراشي چني نايمه على حجار من گثر لوعه گلبي حتى فراشي الصار سنين انام عليه اليوم احسه متغير

كعدت الصبح اسمع شرهب تبدل وخابصه الدنيا

شرهب : يله نايه اكعدي نروح للمدرسه مضل وكت

ناي : مااداوم رجعت غطيت راسي انسحب الفراش

شرهب : شنو مداومين

ناي : كتلج مااداوم اغيب اليوم تعبانه

شرهب : مريضة

ناي : اي شويه كملي لبسج وانزلي لتتأخرين باستني ونزلت بقيت بفراشي وبان محجت شى غير عيونها القلقه عليه فاضحتها

بقيت بلفراش منزلت لحد ساعه ١٠ الصبح اسمع صوت عمه بدعه مبين درت اني ممداومه

بديعه : نايه وينج تعالي تريكي

ناي : اجيت عمه نزلت زهكانه وضايجه لكيت مهند يباوع مستغرب لان ممداومه

مهند : شعجب اليوم ممداومه

بديعه : تعبانه ميصير

مهند : لا عمه اقصد بعدنا بدايه السنه غير تلتزم بلدوام اذا من هسه غياب

بديعه : شسوي بعد بلشهاده

مهند : شنو هذا الحجي من الصبح صاير شى

بديعه : ليش متدري

ناي : نزلت حتى مسلمت وكفت على المغسله اغسل بوجهي وعيوني بلمرايه المحطوطه على الحايط اشوف انعكاسهم بيها

مهند : شكووو

بديعه : غير امك وخالتك جابو عريس لناي

مهند : ياعريس وينها وين الزواج

بديعه : كول لامك

ناي : باوع عليه مخنزر ويحجي ويه عمه

مهند : وناي شتكول

بديعه : ليش اكو واحد يكدر يرفض شغله جابتها صالحه وساهره غير يحركن الدنيا البنيه فقيره تعرف بيها ضلت ساكته وكالت موافقه

ناي : بلحظتها حسيت مهند يريد يشرب من دمي عااط حييل

مهند : واخوها شكاال وشون يقبل وانتي خاتون مو عندج دراسه

بديعه : شبيك ابني تعيط اخوها ميدري وحتى لو دره هسه عمامك يستلموه ويزوجون البنيه غصب عنه لتنسى ابوك الوصي عليها وهذا المكرود بعده معابر ١٨ شيريد يمنع واحد اثنين سلمت امرها خلي تفوت بفالها

اجه بأتجاهي وسحبني من ايدي گبال عمه حيل استحيت

ناي : شرايد

مهند : لج صدك موافقه

ناي : اوووف ليش اني امري بيدي

مهند : هاي المهزله اليوم تفض

جان تجي عمه وكالت

بديعه : والله يايمه مابيدنا شى كلشي بيد امك وخالتك بيك زود انت وكفهن ماتكدر عليهن خلي البنيه تتوكل وتشوف نصيبها

ناي : مهند محجه شى وصعد فوك ركض باوعت على عمه

بديعه : شكوو شو صفنتي بوجهي هيج وجهي حلوو شوفي مليان كلف وتعبان ميعجبج

ناي : تدرين راح تگب عركه شكبرها هسه

بديعه : تعالي تريكي احنا شعلينا بنيتي احنا ناس بحالنا وهمه عائله بحالهم والداخل بينهم مايتلكه غير الاهانه تعالي جبت جبن تركي جاي جديد ولج يخبل والجاي مخدر والخبز حميته تعاي اكلي ويجيج الصافي

ناي : حضنتني واخذتني للمطبخ واني مثل الهبله صافنه بوجهه وامشي وياها كعدنا بلكاع والصينيه محطوطه جبن وصمون وكلاصين صبت الجاي وبدت تسمي وتاكل وجان نسمع عيطه كمزت جان تجرني اكعدي مالج دخل اكلي

ناي : هوسه صارت اخاف تگبر

بديعه : كتلج اكعدي اگلي ولا جن الموضوع يمج واذا سألوج ماشفت مهند ابد سمعتي

ناي : اي

سحبت الكرصه واخذت شويه منها وحطيتها بحلكي

بديعه : ضوگي الجبن وركزي بلصينيه والفوك ماعسى يحتركون ادفي بنارهم

ناي : اكو شى ماافتهمه

بديعه : للعصر كلشي يفض اكلي

ناي : نزلت بان  تفرك بعيونها بعده منتظره القبولات مال الكليه

بان : هاي شصاير

بديعه : شسمعتي يمج الصوت اوضح

بان : مهند يعيط يكولها اذا زوجتيها اسويلج عزه هنا وانتي تحملي راح يصير

بديعه : وبعد

بان : وضل يعيط

بديعه : يلفاهيه جنج امج غير توكفين تسمعين الحجي كله

بان : هاي سما شافتني وركعت الباب بوجهي ومكدرت ابقى واكفه واسمع شصاير غير يفهمني

بديعه : مالجن دخل اتريكن وكومن خلصن تنظيف وتصعدن لغرفتجن لوكت الغدا من اصب يله تنزلن وانتي ناي اذا اجت صالحه عليج كوليلها مشايفه مهند ولا حاجيه ويااه

بان : ام بان  شنو الي بالج

بديعه : مالجن دخل وكملن بسرعه فضني

ناي : شربت جاي واكلت لكمه وكمت اريد افهم الصار راحت عمه لبست عبايتها وطلعت وفوك العياط مستمر مدنفهم شى اني خفت گلت لتنزل امه وتسويلي سالفه هلمره بيبي طالعه من الغبشه تتسوك ليونس غراض اله تساعده متكعد ابد وعمه طلعت يعني هسه صالحه اذا نزلت وسحلتني محد يفكني منها

لزمت الوصله وامسح وعيني على الفوك كل شويه واكول راح تنزل راح تصيحني حتى گلبي صار بمعدتي من خرب هيج عيشه مخلصتها بلهبطات واني امسح تزحلكت وكعت على ظهري كمت ابجي

بان : الله الله غير تنتبهين

ناي : ماادري اتزحلكت رجلي

بان : تبجين من العياط الفوك ومن صالحه لان وكعتج مو قويه امسحي دموعج ولدورين عذر حتى تنوحين

ناي : غير ينزل وافتهم لو امه تنزل وتسحلني واخلص مثل الواحد منتظر حكم الاعدام وساعه يكولون اله راح انعدمك وساعه افراج لحد مزهك وكال اعدموني وخلصوني هسه امج وين راحت هذا وكت طلعه

بان : غير راحت تتسوك

ناي : لو رايحه وياها كون اختل بمكان محد يندلني بيه ماكو كونيه تضميني بيها

بان : اني انضم بكونيه لان كصيره هاي رجلج مال زرافات شيضمهن

ناي : كصيهن ذبيهن للجلاب بس ختليني

بان : ههههههه شكد جبانه

ناي : دتسمعين الهوسه لو اطرشيتي غير صايره هيل مطحون فوك وهلمره الكلام ممفهوم

جان ينزل مهند عدلت وكفتي وباوعت بوجهه دار وجهه عني وطلع كلت خوش يله احسب من واحد للعشره وراح تجي اكريندايزر تمسح بيه البيت والدربونه والمنطقه وبغداد كلها ويجوز بدربها تاخذ البصره على الواهس

بان :رگبتج راحت شبيج معلكه عيونج فوك

ناي : انتظر صلوحه تلعب فلك بيه

بان : ماطول منزلت وره ابنها يعني هددها

والله وطلع اليصكرها لمرت عمج اني گلت مالها رداد اذا عمي طلي بيدها قريت السلام واحد يحكمها ويشكمها طلع ابنها بيه خير وكدر الها

ناي : منو يكول يجوز كعد اتحظر الطريقه المناسبه حتى اطلع قهرتها بيه

بان : هههههه ضلي بهاي التخيلات

ناي : كملنا الشغل على السريع وعفت الملابس والطرمه وصعدت وهاي بان تضحك عليه انفتح الباب طفرت عبالي صالحه طلعت عمه بدعه

وين رحتي

بديعه : شبيج انرعصتي وجهج مبلوع

بان : غير مشفتيها شون ترجف من صلوح

ناي : شصار عمه مدريتي

بديعه : كل خير يمه للعصر شغلتج تفض

ناي : عزه اتزوج

بديعه : يازواج باع هاي

بان : بدوعه احجي شضامه

بديعه : شويه وتجي ساهره وراح يسدن موضوع الزواج كله

ناي : شون

بديعه : سوده عليه عمتجن خوله والله عليها عقل وذكاء تسوه ميه مره بس الحظ ما عدل وكعد وياها

ناي : عمه شعليها

بديعه :خلي اخذ نفس سدن الباب وتعالن

كامت بان  سدته واجت كابلت امها وكعدت واني صافنه بوجهه انتظر الحرف منها

بديعه : قبل متسافر بليله كالت

رجعت بذاكرتي لكلامنا سوه

خوله : شوفه بدعه ذني راح ينتهزن فرصه اني ماكو ومن اروح راح يجيبن عريس لناي

بديعه : لا متوصل لهاي المرحله

خوله : شوف هاي غير ذني بنات غنيه لو نسيتي صالحه متدري مهند يريدها بس ساهره تدري مرتضى كاتل نفسه عليها واخاف ذيج الايام سكتت اكيد ادور الها طريقه متخسر ابنها وبنفس الوقت تخلص من اليتيمه وماكو غير تعگلها برجال واكيد تجيبه سحاله مثلها مال تجيب قسمه زينه مستحيل

وشفتي قبل كم يوم جابت ومن شافت ردت الفعل أجلت كلشي لان من سألت نجم يدرون راح نسافر كال اي كلت لفلاح وهو كايل لجوحي وبما ان وصلت لجوحي معناها لساهره ومن ساهره لصالحه وذني كالن خلي تروح واحنا نشتغل براحتنا

بديعه : قابل بكيفهن اگلب البيت والله عليهن حتى فلاح اتعارك وياه اذا قبل

خوله : هيج غلط راح تصيرن انتي وناي بوجهه المدفع ويجوز يدكن دكه موزينه سحر خباثه تهمه مااعرف هنه فنانات بهيج شغلات

اريد منج تقنعين ناي توافق

بديعه : لا بربج شون توافق

خوله : لج عيني اسمعيني من توافقن ماعدهن عذر ضدجن ولا راح يخبثن الي بلوجهه راح يصير مهند ومرتضى وره متخلين ناي توافق وانتي كدامهن موافقه ادفعي مهند ومرتضى بالاول مهند احجي وياه بهدوء مو شكووه گانو راضيه وقابله وتبلغي بس وهو راح يستلم امه خوش استلام

ونجي على مرتضى تلكي دوم بمحل الكهربائيات بلسوك القديم محل ابوه المصخم ترحين مثل الحبابه بحجه مسواك وتمرين تسلمين وتبلغي بضحكه وهو راح خوش يسوي عرس لساهره وذني جبانات وحدتهن تالي وكت كامن يخافن من ولدهن

ومن تصير مراكع ومكافش من الروس هنه من وحدهن راح يسكتن على سالفه ناي واكيد مراح يفكرن يعيدنها لان كل واحد من ولدهن راح يهدد شكل لج بدعه ذني خلصن عمرهن مالهن نقطه ضعف وربج هسه خله النقطه هاي ولدهن هاي وحيدها والثانيه نفس الشى لهذا شغله ناي متخلص اله اذا تلاطشو الولد وياهن واطلعون سالمين من كلشي لا راح يسون سحر حتى توافق ناي لان هيه موافقه ولا راح يشدون وياج لان انتي هم موافقه العله يمهن ولدهن وراح يحطن لحلكهن نعال ويبطلن سالفه العريس

بديعه : عقليش عندج متكوليلي

خوله : عقل مطي

بديعه : ههههه لا حشاج والله لو بعد عشر سنين ماافكر هيج

خوله : اني اعرف سوالفهن بطلت اضربهن مباشر هسه ولدهن يضربوهن وتصير الضربه توجع اكثر مااريد منج غير عينج على ناي لتغلط ويه واحد منهم وتضيع كلشي

نفضت ذاكرتي ورجعت للواقع ناي وبان يسمعن كلشي مني وحاطات ايدهن على خدهن ومندمجات

ناي : شمرت نفسي بحضنها وبست راسها

العفو عمه شكيت بيج

بديعه : يابنتي حقج غير بيدي خليتج اطبين الهم

ناي : ويونس عرف

بديعه : خلي بعيد ياعيني عليه حاير برزقه اذا ادخل راح تگبر وجنت حاطه ايدي على گلبي ليعرف ويخرب الاول والتالي

ناي :اااااه ياعمه حتى وانتي بعيده حاسبه حساب لكلشي

بديعه : ماعندي وكت هسه اريد احجيلج عن امج شويه

ناي : ليش

بديعه : هيج عاجبني اني محاجيه كلشي الج حابه تعرفين كلشي عاشته هنا

ناي : ياريت احب اسمع

بديعه : يوميه بليل اجي اسولف الج شويه خلي اكوم اكمل شغلي

بيومها بقيت بفراشي اخاف اكوم اجت شرهب مكيفه ماخذه ٩٠ بلتاريخ وتقرا بكل همه ومكعده بلال يمها وتشرحله وهو بس يهز براسه

للعصر سمعت صوت مرتضى واجت شرهب تكولي مرتضى يريدج نزلت واني متوقعه على شنو جاي سلمت عليه وكتله

اكو شى

مرتضى : شون تقبلين بواحد اكبر منج ب٢٠ سنه تخبلتي

ناي : امك الجابته اليه

مرتضى : وانتي صغيره ومتعرفين وشون اطلعين اله اصلاً اخوج الطرن شون قبل

ناي : لتحجي على يونس اصلاً ميدري هاي امك وخالتك طبخنها واني وكعت بيها

مرتضى : اني رحت لهذا ابو عمر وكتله ماعدنا مره وسديت الموضوع

ناي : وامك

مرتضى : متسويها بعد هي عبالها تزوجج ومتخليني افكر بيج

ناي : والله تسوي فضل اذا قطعت فكرك بيه

مرتضى : كل مترفضيني اجلب اكثر بيج

ناي : واني كل متجلب بيه المحبه الي بگلبي الك تقل اتمنى بيوم متتحول كره من سوالفك

مرتضى : شمسوي مو عايفج براحتج وحتى من البيت شلنا وقليل اجي حتى لتضوجين

ناي : امك من يوم معرفت بيك تريدني وهي تفكر شلون تتخلص مني عفيه خليها لتتقرب مني واني ولا اوصل يمك انت ليش متقتنع انت مثل اخويه

مرتضى : حجيت وياها وتعاركت وانطيتها كلمة مااتقرب منج

ناي : همزين

مرتضى :مااتقرب بس اجي اشوفج هاي معليها بهاي وسالفه مثل اخويه نكعيها وشربي ميهه

طب يونس وشافني واكفه

يونس : خير صاير شى

ناي : لا بس ديسلم

يونس : روحي اقري

ناي : رايحه عفته وصعدت دوم يونس ميحب مرتضى حتى اكثر من مهند رغم مرتضى مصدر شى منه موزين  جنت ضايجه من حجي مرتضى بس اعتبره هو والهوا سوه دوم ادعي بلكليه مالته يشوف وحده ويحبها واني ادري مصادق هسه بلدوام وياه اكثر من مره اسمع ساهره تتفاخر بعلاقات ابنها تكول عبالك مخترع الذره واكول بلكت يحب وحده ويحل عني

عبر اول يوم وصالحه شافتني ومحجت اي شى وثاني يوم لبست عبايتها واخذت سما وطلعن

نزلت اتريك هم مداومت لان بعدني خايفه ومافهمت شصار

لكيت مهند يشرب جاي وهستوه مكمل ريوك وعمه تخبز بره وهو وحده بلهول

ناي : صباح الخير

مجاوبني ودار وجهه

مهند شبيك مو كلت صباح الخير

مهند : لا عبالج السويتي البارحه ينسي بسهوله

ناي : تقربت وكعدت بعد مسافه عنه ياسوايه

مهند : شون توافقين

ناي : مجاوبت وضليت اباوع عليه وهو شنو اعصاب وحيل ضايج مني

ناي : لان اعرف انت راح تخربها ماردت مشاكل ويه امك وعمامي وادخل بسين وجيم وياهم  انت موجود تحل مشاكلي ومتأكده راح تسكت الكل

حسيت اعصابه رخت وهدأ وكاال

مهند : من يصير هيج شى تجين تحجيلي مو توافقين مثل الهبله واني اخر واحد يدري هلمره راح اعبرها مره ثانيه تصيرين موزينه

ناي : شسويت ويه امك

مهند : مالج دخل هاي الفتره مراح تتقرب منج متأكد اني عكب باجر راجع للبصره مبقى شى للدوام وانتي كافي فلتان غياب ماكو ارجعي لدراستج وبطلي سوالف الزواج وهاي الامور الفاكسه

ناي : ابتسمت وكتله صار

مهند : ديري بالج على نفسج وحفظي نفسج الي لان اني شاريج بروحي ماكو غيرج بداخلي حتى واني بعيد بس افكر بيج ومن انزل لعيونج ناي اعرف وضعنا صعب بس هاي يمي اني احلها الاريده منج لتنطين مجال لاحد يتحكم بيج حتى لو عمامج وخلي يونس يوكف وياج اعرفه رجال ويخاف عليج ويضحي بروحه الكم واذا مكدر خلي عمه بديعه دز خبر تروح لبيت ابو ناظم ابنهم ياسر ويايه وهو كل اسبوع ينزل جمعه وسبت ويرجع اكتبي شصار ودزوها بيده واني شوكت ميوصلي كلامكم ثاني يوم يمكم

ناي : الله كريم

مهند : نايه

ناي : نعم

مهند : اياج بيوم تحبين غيري لو تصيرين لغيري ماارحمج والله والخلقج ماارحمج

ناي : لتخوفني منك ليش هيج تكول

مهند : الصار البارحه خلاني اشوف وجهه ثاني بيه مااحبه من توصل لشغله ليمج انگلب واحد ثاني اني ادرس واشتغل هناك حتى استقر واكدر اتزوجج بدون مااحتاج احد ومن سمعت البارحه موافقه حيل اتأذيت وهاي اول واخر مره اقبل اذيه منج لتعيديها

ناي : ما أذيك بعد

عفته وكمت واني افكر بكلامه

عم الهدوء بلبيت مهند رجع للبصره بيومها مشفته لان طلع من الصبح و صالحه متحجي ويايه ابد حتى من تنزل تكمل الشغل اذا عدها شى متصخرني ولا تباوع بوجهي وتتقصد ادير وجهه عني يمكن هذا الشى اريح الي اكثر من الها

اما سما بعدها عيونها وره يونس ومرات اخاف يصير شى وترجع العركه من جديد هلمره محد يرحمه

اما ساهره تجي ساعه كل كم يوم

رجعت من المدرسه والجنطه على ظهري مكسور من وراها وصدريتي كلها تراب وتعبانه واجر بروحي جر وطبيت جان البيت هدوء بس صوت فوك صعدت حتى ابدل وانزل اغسل ميته جوع  لكيت ساهره وصالحه يتعاركن بس بصوت ناصي ولان هدوء ينسمع زين عمه وبيبي وينهن ركزت ويه ذني ردت افهم شبيهن سمعت كالت

شسويله ياعيني يكول مثل اختي ومالي نفس بيها گلت هاي منو مثل اخته جان صالحه تجاوبها ترضين بتي الوحيده التعبانه بيها وحالي ومالي كله عليها تروح لهذا العار السكط يونس ابنج اولى منه

حسيت الوكت وكف اريد استوعب يعني مرتضى يتزوج سما ولجن شدسون

لحد ماساهره كالت

نشوف الها غير واحد مرتضى ميقبل وصاير ارعن وصوته عالي وبس مشاكل ويه ابوه ومن فتحت الموضوع اله تخبل ويعيط ورادت تصير عركه لو ما اتوسل بيهم عيني ماناقصني مشاكل فدوة اروحلج اني اشوف رجال لبتج واسدلج الشغله

صالحه :تخافين من مرتضى خرفيتي يول

ساهره : مو خوف اني مابيه حيل مشاكل ويه ابوه مشايفتهم من يكعدون ديوچه هراتيه وهذا جوحي يحاسبه على الدينار وابنه ماطلع على گلب ابوه دوم ند ويااه ومنا سالفه سما خلته مخبل رسمي ياخيتي مايوم كتلج لا بس هلمره اعذريني مو حتى ترتاحين ينهجم بيتي اني اشوفلج عريس مرتب الها لتنسين سما هم مثل بتي

صالحه : لا مبين وخوش وكفتيلي وكفه هاي عود انتي تگي اختي وعفتيني حايره

ساهره : خلينا حبايب النسابه تخربنا

صالحه : بتي تستاهل الف شاب احسن من مرتضى صوجي اني دللت بنتي وكتلج تعالي اخذيها عبالي خالته وادريها احسن من الغريبه

ساهره : هاي شبيج زعلتي

صالحه : موزين اباوع بوجهج اكلها مااريد بتي لهذا الچلب واحد مهتلف حافي انطي سما تخبلت اذبحها وماانطيها اله

ساهره : كتلج الكالها عريس يستاهلها بس انطي درب ولتضلين تاكلين بروحج

توتر الوضع بينهن ركضت للغرفه اجر نفس  بان ترتب بلكنتور مالتها

بان : منو راكض وراج

ناي ماكو شى عمه بدعه وين

بان : راحت تجيب قميص شرهب من الخياطه

ناي : بدلت وغسلت ومحجيت هذا الموضوع لاحد وبقيت احتفظ بهاي السالفه حسيت اخر ايام علاقتهن مو مثل قبل حتى عمه بدعه منتبهه اعرف السبب اني اكيد صار زعل من اخر مره

رجعت للحياه ولمدرستي شغلت نفسي بدراستي حاولت انسى كل الصار اله شى واحد شاغلني عمه خوله شنو اخبارها

امشي بشارع قريب بيتنا وراجعه من امتحان وباجر عندي اثنين بدايه الشتا وبعد جم يوم ندخل ٢٠٠٥ واني افكر يادرس اقرا الاول عثرت ردت اوكع على وجهي بلعثره لكيت البوتين مالتي انشك

اووف هسه وكتك رجعت اجر برجلي وصلت لمحل يونس كلت اطب اخذ منه فلوس واخلي عمه تشتريلي

يونس : هااا الله يساعدهم

ناي : ويساعدك حبيبي شونه شغلك

يونس : والله يانايه مو هلكد بس نكول  الْحٍمَدٍ للـّہ اذا محتاجه شى عندي

ناي : هااا لا ممحتاجه الله يقويك ويرزقك

يونس : هااج اگلي

ناي : لا خطيه بيعها النستله

يونس : قابل راح نموت من الجوع اذا اكلتيها هي بربع هاج حلي حلكج وهاي لبلال وشرهب

ناي : تسلم حبيبي اخذتهن وضغطت على نفسي ومشيت عدل كدامه حتى ليحس اول موصلت الباب نزعته وطبيت حافيه مكدرت اكول اله اشتريلي هو ماعنده

سلمت ودخلت دورت على ابره وخيط ثخين مال لحف وكعدت اخيطه

بان : شدسوين

ناي : هيج اخيط البوتين

بان : عندي واحد البسي مالتي

ناي : لا عفيه ارتاح بهذا

بان : زين خلي ماما تشتريلج واحد

ناي : هذا مرتاحه بيه ليضل بالج فتره واشتري كعدت اغيط وشكله صار يلعب النفس شسوي اهم شى مااگلف يونس هو بيا حال جنت احاول دوم مااطلب منه وشغلات شرهب الضروريه بس نطلبها لان نعرف شكد يتعب وبيبي وياه ولا عافته ورزقه على كده

بعدها بأسبوعين

سما اجت تركض وتكولي

عفيه اريد احجي ويه يونس

ناي : اهووو رجعنا معودنا الوضع صار زين فدوة استري عليج وعليه

سما : والله خمس دقايق

ناي : وامج شون

سما : راح تروح للسوك اتجيب ملابس اليه مقبلت اروح سويت نفسي مريضة

ناي : شوكت تطلع

سما : دقايق وتطلع ومااكدر انزل اخاف احد يجي

ناي : يعني ضروري اصيحه

سما : والنبي شغله  مهمه كلش حياتنا كلها بيها

ناي : روحي لغرفتج لحد متروح امج واني اصيحه

بقيت اراقب الوضع لحد مشفت صالحه تروح وتطلع

رحت لمحل يونس اشرت من بعيد شافني واجه

يونس : هاا محتاجه شى

ناي : سما تريدك

يونس : صاير شى

ناي : شمدريني تكول ضروري كلش

يونس : دقايق اخلي ولد بلمحل واجي

ناي : بقيت اروح واجي وانتظره شافتني عمه

بديعه : هاا يمه شو تفترين صاير شى

ناي : ماكو شى جان يطب يونس وصعد فوك

بديعه : هم راح الها ميجوز ميبطل من سوالفه والله هلمره اذا لزموه يطبه طوب حيل بيه

ناي : هيه صاحته مدري شتريد

بديعه : ميصير ياامي حتى لو تصيحه عيب تبقى بت عمه ولازم يسوي حرمه

ناي : خلي نفهم شصاير حسيت سما حيل خايفه وترجف اكيد صاير شى جبير

يونس : شغلي ماشي صحيح الرزق بسيط بس مستوره واحسن من مذله الشارع والشغل عند الغير جنت احاول امشي العندي واشتري واشتغل ذبيت حيلي كله على المحل

صعدت بسرعه اشوف سما شتريد وهم مشتاق الها لكيتها خايفه هااا حبيبي بيج شى

سما : الحك عفيه

يونس : شصار

سما : امي طلبت من خالتي تخطبني

يونس : المن

سما : هو عدها غيره مرتضى وهو مقبل المشكله امي وخالتي مكعدن راحه

واليوم كالتلي اجاج عريس ابوه صديق عمو جوحي والولد امكانيته زينه ويريد يتزوج وعمو عود كايله بت اخويه وماما مكيفه شسوي يونس

يونس : غير اگلب البيت عليهم واخوج شكال

سما : غير هو بلبصره شمدريه عفيه يونس سوي حل عكب باجر يجون يشوفوني وراحت ماما تجيب فستان حتى اطلع بيه للعريس

يونس : حتى اشكه عليج ماكو طلعه ذوله بكيفهم

سما : اي بكيفهم وتعرف اهلي اذا حطو شى براسهم يسووه

يونس : امج مو تكول تكملين دراسه

سما : امي هسه تريد بس تزوجني شسوي عفيه

يونس : اليوم احجي ويه ابوج

سما : غير يتعارك وياك

يونس : ماكو غير حل اني خايف لان جاي من طرف جوحي معناها بيها استفاده اله لان هو ميسوي خير لاحد

خلي انزل قبل ميجي احد

ناي : نزل يونس وجان ضايج حيل لزمته عمه بدعه

يمه يونس مكافي

يونس : عمه يردون يزوجوها

بديعه : ياااا من شوكت وهذا منو الجايها

يونس : من طرف جوحي

ناي : وشراح تسوي

يونس : احجي ويه عمامي وادز خبر لمهند

بديعه : انت ليش متعوفها

يونس : وليش اعوفها غير احبها

بديعه : لك ادك والطم على راسي هاي البنات الضاله اشكال والوان مالكيت غير بت صالحه لو ما جنت واعي وكدامك صارت موتتها للمرحومه ولك نسيت ضليت سنين وانت نايم تحلم بموتتها وتكعد تبجي وكوه اسكتك لوما هنه جان امك هسه يمكم وهذا حالك غير حال وجان هسه كاعد تقرا حتى تدخل كليه مو حتى ادور زواج وعيشه

بديعه : كلشي منهن يجي أذيه حتى بتها شتريد توكف بوجهه عمامك لو بوجهه امها وخالتها يدوسوك مثل النمله ومايرف جفنهم

يونس : لازم مااخليها تتزوج

بديعه : لا اله الا الله تبقى بهذا عنادك بس لو افهم شصار بعقلك ساعه احسك اكبر من عمرك وتعرف تتصرف وساعه الطفل ابو الست سنوات يفتهم اكثر منك

عافنه وطلع واني اباوع عليها واكفه بدايه الدرج ودمعتها بعينها جان تندار عمه عليه

بديعه : اسمعي انتي الثانيه مو ذيج تسكن الكبور وتموت بعز شبابها وانتم تربطون عمركم ويه كتال امكم لكم دمكم ميحترك هذا حالكم عاجبكم

ناي : شمسويه اني ياعمه

بديعه : وغمه بعينج ادري بسالفه مهند وعمتج شكد حذرتج وانتي وذاك الطرن نفس العقل المجيم ذوله مايفيدوكم ذوله راح ينهوكم اذا مو بيدهم بيد امهاتهم اريد واحد بيه حظ منكم ماكو

ناي : جان عقلي ميستوعب كلام عمه او يمكن بحكم عمري مااحسب الامور صح وانظر الها من كل الجهات لحد ما وكع يونس بمصيدة بنات غنيه وسون بيه المايتسوه لهذا الوكت يله وعيت جن واحد وضربني على راسي وصحاني واني اشوف اخويه بيد جاسم اخوهن

يتبع

مساء الـ🥀ـورد والهنا موعدكم اليوم ساعه ١٢ ليلاً مع بارت جديد ثاني

انتظروني

#الابواب_الخمس

البارت السابع  والثلاثون

للكاتبه Reem

اثارينه مثل عنبر ✨

يطش بينه الوفه ويكثر

مو مثل حيايا البر

وي كل لون تتغير 

ناي : جان عقلي ميستوعب كلام عمه او يمكن بحكم عمري مااحسب الامور صح وانظر الها من كل الجهات لحد ما وكع يونس بمصيدة بنات غنيه وسون بيه المايتسوه لهذا الوكت يله وعيت جن واحد وضربني على راسي وصحاني واني اشوف اخويه بيد جاسم اخوهن

نرجع لنهايه شهر ١٢ من سنه ٢٠٠٤ جنت بهذا اليوم اكرض بأضافيري من القلق والخوف على اخويه طلع وهو متحلف لعمامي علمود سما وعمه بدعه تروح وتجي تريد واحد يساعدها وكل شويه وكالت وينج يخوله تعالي شوفي حالي يمكن دوم بلمواقف الصعبه نحتاج عمه لان الوحيده التعرف تحلها بأقل الخسائر كاعده على الدرج وايدي بحلكي هاي العاده السخيفه ولا اتركها وعيوني تروح وتجي على عمه الماكعدت لحظه من طلعت يونس

بديعه : لج حتى ماقفل المحل عافه وطلع

ناي : اروح اقفله اكعد بيه شسوي

بديعه : باع هاي الثانيه هو مخلي ولد صاحبه بيه  اقصد حتى ماهمه المحل دخيلك يارب هسه وين انطي وجهي حتى عمتي تأخرت غير تعوف ام اسماعيل من تكعد يمها تنسى حتى نفسها

طبت صالحه وبيدها علاليك مبين مسوكه خوش مسواك على سالفه الخطبه

صالحه : شبيجن واكفات مثل خراعه الخضره

بديعه : مابينه

صالحه : وانتي الثانيه وخري من دربي خلي اصعد كطيعه وجوهكم تكطع النفس

ناي : كمت وكفت وخرت من دربها وهي صعدت

شنسوي عمه

بديعه : مابيدنا غير ناكل بروحنا هي هاي سالفه وخلي تنخطب قابل هيه منو والله اخوج يحجي الاخرس

طبت بيبي ومن باب الهول استلمتها عمه حتى قبل متنزع العبا مالتها

بديعه : الحكي عمه دخيلج

عمشه : ياادهر فرج شنهي گلبي طاح برجولي خليني ادش ارتاحن اخذ نفس

بديعه : مو وكتها والله ياعمه يونس مدري وين راح عرف سما راح يجون خطابه عليها

عمشه : چا وانه مااعرفن وياعريس هاذ موش ابن عمها هاويهه ذوله مناعيل الوالدين يخيطون ويخربطون

ويونس وينه

بديعه : والله مندري طلع بسرعه واخاف تصير مشكله

عمشه : صويلحه بت غنيه العوبه تعالي ليه صووويلحه

صالحه : هااا عمه خير

عمشه : چا اليشوف وجهج يشوف الخير چا لوابليس دخل الجنه انتن مااشوفن الخير منجن شنهي سالفه بنيتج

صالحه : شبيهه

عمشه : چايهه عريس

صالحه : غير بنيه ويجوها العرسان قابل وحد

عمشه : ولد عمهه موش هاويهه والولد مفرفح عليهه

صالحه : ياابن عمها فدوة هاي البقت ازوج سما اله لو يموت شناقص بتي حتى انطيها لهيج واحد

بديعه : وشبيهه يونس شو ولد حليو وشاغول والعيبه متطلع منه

صالحه : حطيهن بجيبج ذني مايفيدني  اني بتي اريد واحد الها بيه خير مو مخلصها مجاديه وكوه يعيشها اريدها تطلع من هذا البيت مو تعيش جنه بيه والاهم من كل هذا اني اخلي بتي تمشي ويه رجلها وهو يعرج وتصير مضحكه للناس

ناي : عيب عمه هذا الحجي شبيهه اخويه غير قدر وصار وقابل الناس هيج فارغه والرايح والجاي يباوع على رجله بلعكس الناس تنقهر من تشوف المثله وتحاول تساعد قابل الناس هيج گلوبها مابيها رحمه

صالحه : احنا كبار ونحجي انتي شكو حجيتي اضربج هسه على حلكج اورمه واطيح حظج

عمشه : من ظهر ابيج طالعه واضربيها عبن اشرج بأول تيل بلدربونه والوادم كلها تكاطفج بلحجار چا تايهتلج

صالحه : انتي ضلي دافعي بس لجهال ذكرى وجهالي تموتين منهم مايوم سمعتج جبتي طاريهم بخير

عمشه : انه گلهم احبهم عبن ولد ولدي ومايوم شلت بگلبي عليهم انه منجن تناغز گلبي وماارتاح لسوالفجن وكل ماتركدن تردن بطلابه جبيره عبن البيجن مايخليجن تموتن على المخابث وهااي الطلابه الجايه الوليد هاج ومانعرف وين دربه وگله منجن سما ليونس وتسدون السالفه گلها

صالحه : حجي يفيدج عمه وهسه يجي عبيد واسمعي منه همه اصلاً الخطابه مراح يجون لهنا اخاف تهددين مدخليهم بيتج راح يجون لبيت جوحي هم ارتب واحلى بياض وجهه لبنتي اجيبهم هنا على يا وبيت مهدم وعتيك

عمشه : چا موش هذا البيت كتلتي رويحتج انتي وذيج السلبوح سيان وسنين حرتن شسويتن الحين يبزز

صالحه : هسه يجي عبيد واحجي وياه مالي دخل

عمشه :هله وهلاله چا جاب التايهه جبيرنا عبنه بيدج وانتي تخوطين بيه چا كل هذا التهذري وتحطيهه براس عبيد اعرفنه وليدي غمه وذاك الثاني جوحي تسوگه سهيره انه غاسله يدي منهم انه الحين ضايج خلكي على يونس عبنه فقير ومن اهل الله ومايسلك امره وياجن بنيتج رادت ولد عمهه وماتصير لغيره

صالحه : تصير عمه وبلسانها تكول اريده انتم لتدخلون تبقى بتي واني ادرى بمصلحتها

عمشه : قابل العريس احسن من يونس چا وين تلكون منه

صالحه : يايونس عمه الولد يدرس جامعه وابن عائله وابوه امكانيته زينه

عمشه : اشاف من بتج چا من نسبهه من حسبهه المثله يدور ثوبه موش ابوهه يبيع عتيچ

صالحه : هااي قبل هسه ابوها عنده محل وراح يشتري الثاني

عمشه : من الحرام غير دافني جوه رجولنه موش حوسمتو واكلتو مال الوادم عبنه العريس نفس الطينه تلكين ابيه محوسم وكاتله الحرام من ساسه لراسه

صالحه : هذا شى يخصنا حرامي حواسم مالكم دخل اطلعو منها بتي عكب باجر نقرا فاتحتها وتنخطب لرجال يرفعها للسما مو يعيشها على الالف والالفين وحسره عليها اللكمه

عمشه : ياااكون نقرا عليج الفاتحه ويفوخ گلبي ونذر عليه اوزعن چگليت بلمكبره عبنهه فرحه واهليه امشي واطش

صالحه : شتدعين ادعي دعائج لراس الشارع مواصل اسمعوني اذا ادخلتو او سويتو مشكله او هذا يونس سوه شى والله العب بيكم طوبه واخلي يندم على يوم ولادته خليكم بحالكم

ناي : بقينا وحده تباوع بوجهه الثانيه بيبي لبست عباتها وطلعت ادور على يونس

شرهب : بيبي وين رايحه

عمشه : اروحن لبيت عمج شوي وارد

شرهب : اجي وياج

عمشه : ضلي هنا

شرهب : اجي وياج حبابه

عمشه : تعالي وياي

شرهب : طلعت ويه بيبي لهسه اتذكر شون تمشي وبعيونها ادور على يونس مثل الطفل الضايع عيونها من فرع لفرع وعلى كل باب نفوت من يمه وصلنا لبيت عمو جوحي دفعت الباب برجلها وطبت جنت احب حرگتها تكول ضابط وطاب

عمشه : وينكم

ساهره : هااا عمه هله بيج

عمشه : احترك ابو اصلگم وينه زلمتج

ساهره : ديسبح

عمشه : لك جوحي والغسل اطلع بسااع

ساهره : غير نفهم شبيج ياعمه طبيتي هداده وتعيطين

عمشه : كون اصفكنج بعجل واخلي اذانج تصوفر چا تطبخيهه ويه اخيتج وتهججون الوليد

ساهره : ياولد

عمشه : يونس ولد المرحوم

ساهره : واني شكوو عريس وجاي لبت صالحه قابل بتي

عمشه : انه اعرفنج ماتهب ريحه الخيس اله ويدج بيهه

جوحي : هااا يمه الله يساعدج

عمشه : ولا يساعدك چا يلحولي يلمابيك نفع ولا دفع ماتعرف تكض مريتك

جوحي : شسوت قابل ولج شمسويه

ساهره : ممسويه شى يمكن عمتي عرفت بسالفه الخطوبه مال سما واجت هداده

تكول عبالك اني الخطبتها لمرتضى

جوحي : يمه كلشي قسمه والولد الجاي زين وابن ناس مستورين

عمشه : بيش مستورين بفلوس الحواسم چا هو انت غركان بيه ترافچ واحد موش مثلك انه  ماهامني الحين لا انتم ولا ذولاك عساكم بلحرك انه همي اريدن يونس

جوحي : منين اجيبه قابل طفل وتايهه شوف وين راح وبعدين يرجع

عمشه : اسمعوني گلش زين هذا الوليد لو الهوا طخ ثوبه وحرگاه اشعل شيب الخلفكم

ساهره : وشبيج هيج ميته عليه وشعلينا احنه ذولاك عبيد وصالحه وانتي وياهم

عمشه : يمه ياعياره النسوان چا هاي موش اخيتج ودافنات طراكيعجن سوه الحين تبريتي

انه مااعرفن اريدن ولد المرحوم تكض ثيابك وتاخذ ولدك وتدور عليه ياجوحي مارد الوليد بيدي اسلمك للامريكان واكولن عنك تحوسم وجتالهم وحك علي يسحلوك من شعفتك

جوحي : يبووو عليه صار هسه ابدل واروح ادور عليه هاي البقت ادور على ابن صمد

شرهب : كاعده بصفي طبله وبيها مزهريه ماادري وطخيتها وكعت كلهم فزو جان تجي عمه ساهره وتضربني على راسي انقهرت بس مبجيت

ساهره : وثول غير تنتبهين

عمشه : ياا واتچسرت عظامج اطگين البت لخاطر هاي وكامت بيبي وتروح للمزهريه الثانيه وكسرتها وراحت شافت كاسه مال تقديم فاكهه لزمتها وطحنتها بلكاع جان يلزم ايدها جوحي وباسها

جوحي : يمه رحمه لابويه كافي كلها فلوس هااي ماعندي منين اشتري بعد وهااج عمي ابوس راسها

شرهب : واجه تقرب وباس راسي باوعت على عمه ساهره وابتسمت بخباثه

ساهره : ارتاحيتي هسه هو اني كوه جبتهن بيضت عيني يله قبل اشتريهن يعني فوك ماجايه هداده تكسرون البيت واطلعون

عمشه : عبن يدج السم ماتكض البت واطگها

وانت يله جدامي ادور على ولد اخوك وتكضه من يده وماترد لبيتك اله ويونس بايت بحضني

يله يمه شربت صعد الچالي بمعدتي عبن وجوه كلها مغثه والغسل هلشوفه

شرهب : لزمت ايد بيبي وطلعنا جنت امشي فرحانه لان حقي مراح اني مو قصدي اكسرها ايدي انطخت بيها

رجعنا نمشي وطول ما نمشي بيبي ياولد تشوفه تسأله عن يونس

ناي : كاعدين وحاطين ايدنا على خدنا  اجه عمو فلاح ومن الباب تلكته عمه بدعه حتى يدور على يونس وهو بسرعه طلع يدور واحنا كاعدين بلهول حتى التلفزيون مشتغل ولا واحد  باله يمه نسمع الصوت بس عقلنا نفكر شراح يصير نزلت سما تمشي ويه امها مدري وين ولن حتى بوجنه مباوعت وجانت عيونها حمره مبين باجيه

بان : اكلكم هذا منو الخطبها

ناي : تلكين واحد طايح حظ عنده فلوس لان امها اهم شى عنده فلوس

بان : هو الحظ يكعد للي مثلها اجه بابا

بديعه : هااا فلاح بشر

فلاح : رايح لبيت ابو ناظم مثل مكلتي لان مبين مهند موصي اذا احتاج شى يروح الهم ومنطي خبر لابنهم عدهم تلفون مدري شونه صغير مدري شسماه وخابرو عليه واعتقد مهند الصبح هنا

بديعه : زين هسه وينه يونس

فلاح : شمدريني هذا وين اختفى خلي بس الكفه اذا مااشبعه طن كتل

بديعه : هو بيا حال وانت تتوعد اله خلي الولد بحاله مكان ما توكف وياه شو هو سوده بوجهي لا اب لا اخ وانت عمه المن بعد يشهد ظهره اذا انت تضربه لعد جوحي وعبيد شيسوون بيه

فلاح : لج من خوفي والله عليه هذا صغير وبعده مشاف شى من الدنيا وماخذها بحيل صدر كلها جم سنه من يكبر عقله وعمره يغم نفسه على هاي تصرفاته

بديعه : الله كريم منا لكم سنه خلي نحل هاي السالفه السوده وعود وراها يصير خير

وره ساعتين طبت سما الوجهه محفوف والحاجب مشمور والشعر مكصوص ومرتب بين عليها الترتيب واني اخويه مدري وينه صالحه اخذتها وصعدت وبقينا على كعدتنا انطيت لبيبي حبايه وجع راس لان تأذت

خله يومنا اسود وطعم الاكل والشرب مر زهر اخويه منعرف وينه وكل شويه بالنا يروح لبعيد

وحل الليل وصار ممنوع التجوال وهنا خفنا اكثر لحد مسمعنا صوت الباب انفك وانسد ركضت اني وعمه على الباب

يونس : شبيكم

بديعه : لك ليش هيج لهاي الدرجه رخاص عندك احنا

يونس : شبيج عمه

بديعه : من ماتت عمتك كون حتى ترتاح وين جنت يول من الصبح لهسه مثل المخابيل اندور عليك

يونس : رحت اتمشى جنت مخنوك

ناي : واحنا ناكلها مبقينا مكان مدورنا عليك بيه عمو فلاح وجوحي گلبو الدنيا

يونس : وشيردون

بديعه : يابرود گلبك يعني تطلع تركض منا وبهاي الوضعيه التعبانه وتختفي وتكول شيردون

ناي : ليش تسوي هيج كله علمودها مفكرت بينا

يونس : تعبان وراسي يوجعني من البرد ومن الصبح لهسه مماكلي لكمه انام وباجر نسولف

عافنه ودخل صحت اسويلك اكل

يونس : مااريد

بديعه : شون هسه بينا

ناي : المهم رجع مابيه شى

بديعه : اخوج وراه سالفه عوجه الله يستر منه اني كلت هسه راح يكسر البيت ويگلب الوضع  جايني بارد ولا يمه

ناي : اصعد احجي ويااه

بديعه : عوفي

يونس : طلعت اركض شايط واريد اسوي حل اول شئ سويته رحت لجيرانه لان قبل ميروح مهند كال اخاف يصير شى انطيني خبر عن طريقهم ورحت وكتله لازم باجر يجي جنت ناوي اروح لجوحي واحجي وياه اعرف ميقتنع بس على الاقل اسوي هوسه وراها اروح لعبيد للمحل والله اخزي بلسوك من وصلت طلعت مرت عمي

ساهره : خير شرايد

يونس : عمي وين

ساهره : مجاي بعده شتريد

يونس : عندي شغله وياه اجي غير وكت

سمعت صوت رجال يمها ركزت بلصوت وخزرتها هي مبين حسيت سمعته يكول منو اجه

ساهره : هذا يونس ابن صمد

مد راسه رجال بعمر عمي اذا مو اكبر

جاسم : كبران ماشاء الله متوقعته رجال

يونس : منو انت

جاسم : اني خال ولد عمك اخو ساهره وصالحه وابن خالته لابوك

يونس : اني اتذكر عدهن اخ اسمه جاسم بس مااعرف حيل عنه بس اعرف صارت مشاكل قبل لان راد عمه خوله وهيه ماقبلت بيه وتقاطعو وصارت مشاكل ويه ساهره وصالحه بسببه وبعدها ماوصل لبغداد

مديت ايدي تسالمت ويااه

جاسم : تعال ادخل قابل اني اعزمك على بيت عمك

يونس : لا مشكور ورايه شغل

جاسم : شلك بيها ابو شاب تعال نشرب جاي ونسولف

ساهره : طب انت مو تريد عمك هو على جيه

يونس : طبيت كعدت وهاي اول مره ادخل بيتهم كعدت واباوع على كل ركن بيه مبين عمي صارف مدري شعجب

جاسم : الله بلخير

يونس : الله بلخير والعافيه

جاسم : شتشتغل لو تدرس

يونس : اشتغل فتحت محل صغير من البيت والرزق على الله

جاسم : ماشاء الله معتمد على نفسك رغم صغير

يونس : بقينا نسولف اني وياه جان اريحي وكلامه مريح صاحته ساهره وراح وبعدها اجه كال نطلع نغير جو صار سنين مجاي لبغداد وخاصه وره السقوط كالو تغيرت

يونس : اي للاتعس وضعها بلنازل

جاسم : اذا ما اكلفك واخذ من وكتك حاب اغير جو وهذا مرتضى  مابيه خير ولا فرغ نفسه وكال اروح ويه خالي اغيرله جو واني هم بمثابه خالك راح تصير مثل ولد اختي

بلكت يطلع بيك خير اكثر منهم هااا شرايك اني عازمك نتغدا بره ونسولف

يونس : انحرجت اول مره يطلب مني وخاصه ماكو ميانه بينا حتى ارفض وافقت

جاسم : رايحين ولتحسبين حسابي على الغدا

يونس : طلعنا من البيت جانت اكو سياره بصف جيران بيت عمي توقعت للجيران جانت سياره حديثه حتى مااعرف اسمها لان هاي الفتره كامت اطب السيارات الحديثه مشايفين منها قبل

جاسم : تعال اصعد

يونس : هااي مالتك

جاسم : لا مال الجيران واني بگتها ولك هو هذا سؤال

يونس : مو شفتها طابكه للباب الثاني

جاسم : هو طبكتها بعيد حتى لتسد الطريق

يونس : صعدت ويااه افترينا اكثر من مكان جان يسوق بأحترافيه ويندل شارع شارع

متوقعت هيج تندل كلت راح اتيهه

جاسم : مو لهاي الدرجه اكيد اتذكر شوارع بغداد تعال نضرب النا سمجه مسكوفه ونسولف

يونس : المفروض اني اعزمك

جاسم : الجيب واحد وكتلك اعتبرني خالك ولتستحي ابد مني شتريد بخدمتك

يونس : خادم ربك بقيت اسولف وياه وهو يضحك ويتشاقه ومنطيني مجال احجي لحظه حسيته بعمري بحياتي مصادفت واحد بعمره قريب مني دوم عمامي مااشوف منهم بس العياط والمشاكل

كعدنا بمطعم جان مرتب حتى استحيت من ملابسي واباوع يمنه يسره مباشره افتهمني

جاسم : لتهتم وتتوتر داخل انت بفلوسك ماعسى تجي مصلخ لتهتم بلناس عليك بنفسك ماطول جيبك عمران وبيه فلوس هاي الناس كلها تصير خدم الك

يونس : مجنت متوقع اطلع لهيج مكان طلعت من البيت مستعجل

جاسم : عادي تصير وجنك على ملابس محل كامل اشتريلك اكل ولتفكر بأي شى شوفها شون سمجه تلوك لحلكك

يونس : مجوعان اجيت على واهسك

جاسم : اذا هيج اني هم مااكل

يونس : نفض ايده من الاكل كتله لا راح اكل ومديت ايدي وسميت وخاصه منظر السمجه يرد الروح اكلت وتنغصت لخواتي ولا مره ماكلات سمج مسكوف تخيلتهم ياكلون وكفت اللكمه بلعومي غصيت وشربت مي

جاسم : كمل لتكطع لكمتك

يونس : بديت اكل ومستمرين نسولف على الاوضاع والامريكان والوضع بلبصره جنت منطلق وياه كملنا الاكل وكمنا غسلنا اشر يجيبون الجايات كاعد وحاط رجل على رجل ويأشر بيده

لحد مصدمني وكاال

جاسم : اني وصلت البارحه دزت عليه صالحه علمود خطوبه سما تعرف اني خالها الوحيد ولازم احظر سمعت رايد سما

يونس : نزلت استكان الجاي من ايدي وبقيت صافن بوجهه

جاسم : شبيك سكتت انت رايدها لو كلاوات احجي لتستحي مو كلنا اني مثل خالك وتعرف بيه اني اخوهن الجبير والي تأثير عليهن

يونس : بلحظتها اعتبرته طوق النجاه النزل من السما عليه حتى يحل شغلتي

شوف خالي راح اعتبرك خالي واحجيلك وهذا الحجي نفسه راح اكوله لعمامي

جاسم : احجي وسدك امين واعتبرني صديقك هم اني جنت بعمرك وهم حاب واعرف شنو من تريد وحده واهلها ميقبلون

يونس: خالي اني رايدها لسما واحبها وكلت للكل قبل مده وبديت احجي كلشي صار ويايه وهو جان هادئ وبيده الجكاره من قبل متخلص يورث الثانيه واستكان الجاي خلص نزل الثاني وبس يباوع عليه وكله تركيز ويايه

جاسم : خوش سمعت منك كلشي تحب تسمع رأي لو ابقي احتفظ بيه لنفسي

يونس : اكيد احب اسمعه ليش لعد حجيت كلشي كدامك ومستحيت

جاسم : انت ترضى هسه تزوج خواتك لواحد كوه مدبر العيشه وانت تعبان عليهن

يونس : اذا ابن اوادم واضمن يحبها وميأذيها وهي تريده ليش لا

جاسم : هذا حجي المراهقين والعقله صغير احنا الدنيا شالتنا وطبتنا اكثر من مره وعلمتنا مو كلشي الحب ومن ماكو فلوس اكبر حب ينكتل هاي بت صالحه طايره بيك لان متربي وياها ودوم متواجدين سوه وحبت شغله العلاقه بس خلي تكبر بعد وتشوف الشباب الزينه وسيارات وفلوس الف نعال تركعك مو قصدي اهينك اني احجي واقع لتضوج مني

يونس : كمل اسمعك

جاسم : سامع ماعنده قرش ميسواش قرش هذا الوكت الماعنده فلوس ميسوه فلس تريد تكسب گلب حبيبتك لازم جيبك مليان

گلي هسه انت لو عندك فلوس وسياره ومريش ومرتاح تتوقع صالحه ترفضك ومتنطيك بتها مستحيل تشيلها بملابسها وتسلمها الك ليش تكولك بنتي راح تعيش مرتاحه تاكل الاكله الزينه تلبس ملابس حلوة تعيش حالها حال الناس شنو مجبوريتها تدفن بتها بلفگر ابني شغله احبها وتحبني صارت عتيكه بلحب تكدر تشتري ذهب بلحب تكدر تشتري نيشان ملابس وتسويلها حفله

بلحب العندك تشتري غرفه وتسوي عرس وراها تصرف عليها اكلت شربت طلعت حبلت جابت كلها هااي فلوس متخلص منين تجيبهن من الحب والعشق والهيام

عصر انور وجدي وعبد الحليم راح الولد الفقير يتزوج الي يحبها صارت من الخيال

اليوم احنا بعصر عندك فلوس الف بنيه جوه رجلك ماعندك احقر وحده تتفل عليك

يونس : ليش تحسسني اني مالي قيمه ومو رجال ومااكدر اعيشها زين

جاسم : مكلت مو خوش رجال كتلك العيشه شون تصير انت عمرك ١٨ مو

يونس : اي تقريباً كم يوم وادخل بال ١٨

جاسم : على هيج منوال حتى تحسب وتمخمخ كلامي وتفهمه يرادلك ١٠ سنين

عندك حلين ماكو غيرهن

يونس : شنو الحلين

جاسم : اول شى تعوف سما تتزوج وتروح لطريقها وانت شوف دربك وحياتك والتهي بخواتك وعيشتك وعود بعد ١٠ سنوات الكاك بنفس المحل ونفس الحال

لو

يونس : لوووو شنو

جاسم : يصير عندك فلوس وحالك يتبدل وذاك الوكت هي صالحه بنفسها تزوجك بتها

يونس : منين اجيب الفلوس اركض صبح وليل ويادوب اطلع علاكه المسواك

جاسم : مو مهم الطريقه المهم الوكت انت محكوم بتوقيت زمني لازم بأسرع وقت يصير عندك واله تروح منك

يونس : ومنين اجيب قابل ابوك

جاسم : الفلوس متجي بس بلبوكه تجي من الف طريق وهاي الشغله عوفها عليه اني ادبرلك شغله تاكل ذهب منها

يونس : ياشغله هاي تجيب هيج فلوس

جاسم : اذا تخاف وبعدك صغير تكدر تنسحب وهسه مثل الحباب تروح للبيت تلف راسك وتنام ومن تصير خطبة سما تبارك الها وتنجب لان ماطول متجازف متستاهلها

يونس : على كيفك ويايه غير افهم

جاسم : شغلتنا يراد الها گلب ميت ورجال حوك مو طفل مراهق واني لان حبيتك وحسيتك رجال اجيت وجازفت واريد اساعدك شفتك توكف بوجهه عمامك گلت يستاهل واحد يوكف بظهره واني ماعندي ولد تمنيت واحد مثلك طيب وشهم وميخاف واذا راد شى يوكف بوجهه اكبر واحد والي ينخاه يكون تآمر هيج واحد شتسويله قليل بحقه واني مخسران شى شكد مراح يصير عندك وتكبر مردوده على بت اختي يعني الخير مطالع بره

يونس : اني وياك شتريد بس فضلي شغله سما

جاسم : شوف بالاول راح تخلي البنيه تنخطب

يونس : كمت على حيلي شنو تنخطب

جاسم : اكعد فضحتنا وجر ايد يونس وكعده خلي اكمل كلشي وانت فكر وردلي الجواب باجر

البنيه تنقري الفاتحه مالتها وتنخطب وراح احجي براس عبيد يخلي الخطبه فد ٦ اشهر بهاي الفتره انت حالك كله تغير وتوكف على رجلك

يونس : ب٦ اشهر يتغير حالي

جاسم : يمعود اذا تريد ب٣ اشهر تبقى وراك الشغله وتروح لابوها وامها وتوكف بوجهم وتاخذها خاوه منهم حتى لخطيبها نروح اله ونفسخها قابل ابوها جبير السالفه ماكو اسهل منها

يونس : وليش اخليها تنخطب من الاساس

جاسم : حتى تكسب وقت اذا سويت مشاكل راح يزوجوها گبل وتخسر كلشي سوي نفسك الوضع طبيعي ولتعرض انت احسبها عدل عمامك ضدك ولو تموت ميوكفون وياك وخاصه جوحي وراح تگب للستار هاي اذا ما طردوك من البيت والمحل وتصفى بلشارع وحتى خواتك يتإذن يعني مو بس اذيت روحك اذيت خواتك وياك ومستقبلك صفيت بلشارع وهم راح تتزوج سما رضيت وان مارضيت طخ راسك بلحايط بينما اذا سكتت وخليت كلشي يمشي صح راح يتغير كلشي لصالحك

مشي الامور واخدعهم بهدوئك  وبعدها من تلزم امورك وتتعدل العب بيهم جوله محد يحجي وياك فلوس واكو هاي اذا مو صالحه بنفسها نزعتها الحلقه وشمرتها بوجهه خطيبها وكالت الك تعال اخذها اختي ماديه ربها دينها الفلوس تعلمني بيها انت اسمع كلامي و٦ اشهر مزوجك سما وعود وراها صير ناقص مثل ولد اختي ولتسلم عليه ولا تعزمني

يونس : اشبعك عزايم بس ساعدني

بوقتها جان اليه الامان والفرصه والمستقبل جنت اشوفه انسان مثل البطل الراح يحل كل اموري سوالي البحر طحينه وكلشي سهل ومجاب طلع الفلوس يدفع الفاتوره اباوع جيبه مليان وكله اخضر بلدولار تخيلت نفسي مثله وهيج اطب عليهم واشمر الفلوس بوجهم وحتى اذلهم واخذ حق امي منهم واحرم صالحه من بتها طول العمر اخليها تبوس ايدي حتى بس تشوفها

طلعنا من المطعم وبقينا ساعات نفتر ونحجي بنفس الموضوع ولهاي اللحظه مااعرف شنو الشغله الراح اشتغلها واجيب كل هاي الفلوس

نفوت من يم السيطرات يطلع باج ويعبروه سلاح وعنده سألته انت ضابط شى ضحك كال هيه وينها الدوله حتى يصير بيها ضباط

رجعت للبيت بعد ما وصلني للبيت وطول الطريق ينبهني مااجيب طاري لاحد حتى ليعرفن خواته ويزعلن منه ومن سألته ليش تساعدني كال

جاسم : شفت بيك نفسي گبل سنين ردت الاحبها ومنطوها اليه بس الفرق هيه هم مرادتني واني مااريد يصير بيك نفس الصار بيه واحب سما احسها بتي وانت هم حبيتك وارتاحيت الك واثنينكم اريدكم ثخر اليه من اكبر عكازتي من تنحي الدنيا بيه خلفه وماعندي اريدكم ولدي وجهالكم احفادي هذا الخير كله تالي المن لمرتضى ومهند ميستاهلون من اتذكر اموت قهر حتى حنيه ماعندهم عليه بس سما حنينه وتسأل وانت اكيد تاخذ من حنيتها

يونس : ليش متزوجت وصار عندك اطفال

جاسم : تزوجت وماصار عندي كلشي رزق

يونس : ورجع اكد عليه محد يعرف واله يسحب ايده مني ولان جنت حيل مصدكه محجيت ورجعت للبيت حتى كتلهم مماكل حتى ليحسون جنت ويه احد لان يعرفون ماعندي فلوس طلعت من المحل بطرك هويتي

كعدت ثاني يوم وحيل مخنوك ساعه اريد اهد عليهم واسوي مشاكل وارجع اتذكر كلام جاسم والوعد والحياه الي تنتظرني وارجع ابرد

ناي ناي

ناي : هااا عيني محتاج شى شو لهسه ممفتح

يونس : مالي خلك راح اطلع ليضل بالكم

ناي : يا ميضل البارحه متنا من وراك

يونس : صغير كدامكم لا هيج تتصرفون

ناي : على كيفك لتعيط والله من خوفنا

يونس : سحبتها وبستها لتخافين عليه شويه تعبان فتره وتروح

باوعت لكيت سما تأشر

ناي راقبي الوضع

ناي : اهووووو وكفت اراقب وضايجه

سما : هااا شسويت

يونس : شويه صبر

سما : ياصبر واني خطوبتي باجر

يونس : هو غير يجي يشوفج

سما : اجه قبل مده من جنا بيت عمو وشافني من بعيد واني ماادري وباجر راح يلبسون حلقات

يونس : والله مااخليج تصيرين اله بس انطيني مجال خلي يعدي باجر وراها تصيرين اليه

سما : شون اصير وباجر حلقه غيرك بيدي

ناي : شفت مهند طب لو دمي نشف ركضت عليهم اجه مهند اجه مهند

طبت ركض سما واني وكفت بصف يونس عود اسولف وياه

مهند : السلام عليكم

يونس : وعليكم السلام  الْحٍمَدٍ للـّہ على سلامتك

مهند : الله يسلمك

ناي : باوع عليه كلت  الْحٍمَدٍ للـّہ على سلامتك جاوبني ودار وجهه حتى ليحس يونس

مهند : اجيت اركض علمود السمعته شون ابويه وامي ينطوها بدون ميكولًون اليه

يونس : شمعرفني روح وسألهم وياريت توكف هاي المهزله

ناي : دخل مهند عليهم ويونس بدل وطلع بيومها علت اصواتهم وجنا نسمع شون مهند مقابل على الوضع

بديعه : اخوج سالفته مو خاليه شفتي شون بارد ثلج وخله وطلع عيني گلبي ومعدتي نار يونس مايكعد راحه

ناي : شنسوي ياعمه

عمشه : شبيج جنج مره تطلك ومعصيه

بديعه : متشوفين كدامج ياعمه

عمشه : الوليد شحلاته والله مبرد گلبه چا اله تحطين بيهه انه

بديعه : مو انه وحده اكثر من وحده اخاف بيوم خطوبتها يسوي شغله موزينه

بان : اكعدو احجو ويااه تعوفوه هيج

بديعه : ليش هو وينه خله وطلع ولا جنه

شرهب : نايه

ناي : هااا

شرهب : نروح لخطوبه سما

ناي : شعدنا رايحين

شرهب : ناكل كيك وببسي ونضحك عليهم اكيد محلوه تطلع

بديعه : ام كفشه روحي كملي دراستج عندج امتحان

شرهب : بيبي حبابه خلي انروح اني وياج

عمشه : چا انه لون رحت اطگهم بچيله وانعل شيب اهلهم اشوفن حبيبة يونس يكضها رجال ثاني والوليد مفرفحه رويحته واسكت لا وحك الامامين اكضهم واركع راس براس

بديعه : لتروحين ولا توصلين مناقصين طلايب

ناي : يوم يمشي بدقايقه وساعاته وكلنا متوترين ومنعرف الراح يصير

لحد قبل بليه من الخطوبه بليل وره ساعه عشره كاعده لازمه الكتاب والصوبه يمي واگلب بأوراقه وبالي ابد مو يمه كل الاحرف اشوفها يونس شراح يسوي سما تبجي ساهره وصالحه يهلهلن هيج اشوف المواضيع

سمعت صوت مهند صاح على يونس

ودز شرهب جانت جوه عليه

شرهب : مهند يريدج

ناي : هذا شبيهه تخبل شون يصيحني هيج وكت ويونس هنا

طلعت من الغرفه لكيت يونس وسما وعمه بديعه اشرلي مهند وكال

تعالي حتى انتي هم شاهد على الحجي

دخلنا لغرفه يونس كعدنا وكل واحد بينا ميعرف الصاير

مهند : جمعتكم حتى الحجي يصير كدامكم اني قبل مده اجيت ليونس وكتله سما الك كلت لو لا

يونس : اي كلت

مهند : بس شرطت عليك لازم هيه هم تريدك صحيح كلامي لو بيه غلط

يونس : اوووف جريت نفس وكلت صحيح

مهند : وباجر مثل ماكلكم تدرون خطوبتها واني قبل شويه مقبلت لاهلي على سوايتهم وابويه حاججني وكال اذا ترضى سما بلخطبه يسقط حقك بلرفض واني جبت سما كدامكم وحتى مسألتها يم اهلي حتى لتخاف منهم وتحجي غير شى

شوف يونس اذا سما كالت تريدك باجر ماكو خطوبه وهذا شرطي ويه ابويه واذا كالت متريدك وراضيه براح يصير باجر كدام الكل تنسى سما للتالي وموضوعها ينسد وتعتبرها حالها حال شرهب وناي شگلت

يونس : عيوني تباوع عليها جنت متأمل كلش بيها لان قبل بمره انحطت بهيج موقف وكالت اريده وذاك جان اصعب لان كدام ابوها وامها وعمامها يعني هسه الشغله اسهل بهوايه

مهند : سما تردين يونس

بقت ساكته وعيونها تتنقل على كل واحد بينا

مهند : احجي وكلنا وياج وهاي اني اخوج واكف بظهرج مااريد بيوم تكولين جبرتوني وخطيتي برگبتكم ومو هينه عليه اوكفج هيج وكفه بس حتى لتكولين اخويه انطاني ظهره وكت العازه وحتى يونس هم ليكول انت مو رجال ومو كد كلمتك احجي التردي حتى تفض السالفه كلها من جذرها

سما : بصوت خافت ومتوتر مااريد

مهند : شنو متردين احجي عدل حتى الكل يسمعج

سما : مااريد يونس وانتهى كلشي وخلت وطلعت من الغرفه تركض

ناي : بلعت ريگي بخوف وعيوني تراقب حركات يونس الجان مدنك ويحرك بأصابيعه

مهند : سمعت كدامك هز راسه يونس بدون اي حجايه

مهند : فضت بعد وياريت مثل مجنت كد حجايتي وياك تكون كدها انت هم

خله مهند وطلع

بديعه : يمه يونس احجي بيك شى

يونس : جنت حيران بلحظتها السوته سما شنو معناه لهسه ممستوعب كلامها مردت استعجل وطلعت اركض

ناي : طلعت وراها عفيه وين رايح

يونس : ارجعي جوه ولتخافين اشتم هوا واجي

ناي : لتسوي شئ اترجاك

يونس : مخبل كدامج مااسوي وطبي جوه يله

يونس : طلعت من البيت وبوجهي بهذا البرد وجان اكو مطر قليل والجو بارد كلش واني بطرك البلوز وصلت لبيت جوحي دكيت الباب طلع مرتضى مستغرب جيتي بهيج وكت

مرتضى : صار شئ

يونس : صيحلي خالك

مرتضى : ياخال

يونس : شبيك جاسم

مرتضى : شجابك عليه

يونس : صيحه اريده بشغله

مرتضى : تعال طب

يونس : مااريد واكف هنا

افرك بيدي من البرد وانفخ بيها بس نار صدري طاغي على كل بروده تلامس جسمي

بقيت واكف بلباب لحد مطلع جاسم

جاسم : هااا خيرك شو هيج وكت

يونس : عقل مضل بيه ولو مجايك احرك البيت هناك

جاسم : صوتك منا الناس نايمه

تعال ادخل وفهمني

يونس : مااريد ادخل بيتهم

جاسم : اجيب سويج السياره ونكعد بيها نسولف وفهمني كلشي

يونس : بقيت انتظره وتالي اجه وكعدنا بلسياره وشغل تدفئه

سحب الباكيت وانطاني جكاره

هاااك

ماادخن

جاسم : هاي راح تريح النار بيك احرك بيها هسه ترتاح

يونس : اخذتها من ايده ردت شى يهديني واحد وكابه النار بيه شينطوه ياخذ

دخنت واول نفس سحبته اختنكت كلش مامدخن قبل

جاسم : تتعود وتصير صاحبتك ورفيقه دربك جر نفس على كيفك وراها راح تسلطن احجي بله شصار

يونس : كمت اجر النفس ويه كل جره كحه واحجي فتحت شباك السياره حتى يجيني هوا اختنكت حيييل وفهمته الصار

جاسم : عادي وخلي تصير الخطبه وهذا المطلوب تره اثنينا ندري هيه مجبوره على شنو مقهور بعد

يونس : انطت بيه شون ماانقهر

جاسم : اذا السجينه على رگبتها شسوي الله يعلم صالحه شسوت حتى تخليها توافق انت هم اذا تحبها انقذها منهم

يونس : شسوي

جاسم : باجر تعدي الخطبه ومن عكبه نبدي شغلنه اي يوم تأخير مو بصالحك

يونس : وباجر شون يعدي واني اشوفها كبال عيني تروح لغيري

جاسم : لخاطرك مراح احظر واخذك ونروح نسهر نغير جو ونخلص اليوم كله بلغ اهلك رايح فاتحه لولد صديقك ابوه مات حتى ليضل بالهم عليك

يونس : كل اصدقائي يعرفوهم

جاسم : ماعندك صديق منا منا يعرفون اسمه بس بعيد

يونس : اي عندي من جنت اشتغل بلمخزن

جاسم : كلش زين نروح وراح تنسى حتى اسمك

ناي : عيوني مااخذت نوم اله لحد مرجع ساكت ومقهور طب بفراشه دخلت وراه يونس حبيبي محتاج شى اشر بيده ما محتاج

خفت عليه حيل كمت جبت المخده مالتي واللحاف وفرشت بلكاع بلغرفه يمه وطول الليل عيوني عليه حتى من نام ويشخر عيوني مااخذت نوم گلبي نار

مدري شون غفيت كعدت على صوت منه يكعدني اروح للمدرسه

ناي : مااروح باقيه اليوم يمك

يونس : لا اني راح اطلع هسه وماارجع لباجر

ناي : ليش عفيه كمت من فراشي مخترعه

يونس : ماكو شى شبيج رايح لولد صاحبي بيتهم بحي الجهاد ابوه مات ولازم احظر الفاتحه صديقي حيل وكت ماجنت اشتغل بلمخزن ومسوي افضال عليه وراح ابات يمهم

ناي : ليش مترجع بليل

يونس : الطريق طويل ويخوف مااريد يصير قدر تالي الليل

ناي : هذا هو براحتك

بدل واخذ هويته وراح مكدرت اروح للمدرسه روحي باهته وخايفه يسوي شى هذا الهدوء والله مو طبيعي وعمه بديعه نفس وضعي

للظهر اشتغلت الهلاهل والهوسه مال صالحه واخذت بتها وطلعت حتى معزمتنا بس اجه عمو عبيد طلب من بيبي تحضر وهي مقبلت

وركعت الباب بوجهه

بقينا وحدتنا تباوع بوجهه الثانيه وايدنا على گلبنا

جان يوم متعب حيييل  قلق وتوتر محد مرتاح بينا جنا نكول هسه يطب واحد ويعيط يونس سوه كارثه الغريب عدا اليوم ومصار اي شى

وبليل رجعت صالحه وسما بيدها الحلقه لابسه فستان والتسريحه والمكياج بعده عليها منطاني گلبي حتى ابارك الها بس عمه وبان باركو

انتظرت يونس ورجع ثاني يوم ومفتح موضوع سما ابد

اسبوع مر واخويه عايف المحل بيبي تكعد بيه وهو يهج من الصبح ميرجع اله ويه حظر التجوال صار البيت فندق

وبعد الاسبوع بيوم اجه يونس يرجف وجهه اصفر وخايف ومرعوب

دخلت للغرفه عليه حسيته متهستر ويصيح

كتلوه كدامي مكدرت اكتله باوعت هدومه كلها دم لك هاااااي شنوو

يونس : ضربت الطلقه متأكد مااجت بيه

مو اني الكتلته والله مو اني

ناي : منو هذا جان كلامه ممترابط

يونس : باكوه وشدوه كدام عيني وكالولي اكتله مكتلته ناي والله مكتلته

يتبع .....

#الابواب_الخمس

البارت الثامن والثلاثون

للكاتبه Reem

منهو بحالنه احنه المساكين؟

احنه المحد النه..المدري امنين؟

ومن يسال علينه لمن نغيب؟

حتى لو غياب..يطول اسنين.

خلصنه عمرنه بالمحطات..

سفر..وبيوتنه..اسطوح الفراكين.

مرسومه بجلدنه ذيج الانياب..

الجرح لو طاب..هم يترك نياشين.

وين اهلي علي مادكو الباب..؟

تره صحتي عليله..وكلبي مو زين.

من اهل الله بعدنه..وناس طيبين,

مكتوبه بجناسينه..غريبين!!.

خسارتنه جبيره..وغشمه عالسوك..

بعنه اعقولنه..بسوك المجانين!!

يونس : ضربت الطلقه متأكد مااجت بيه

مو اني الكتلته والله مو اني

ناي : منو هذا جان كلامه ممترابط

يونس : باكوه وشدوه كدام عيني وكالولي اكتله مكتلته ناي والله مكتلته

ناي : حضنته حييل وهو يرجف بس على كيفك خلي افهم وين جنت وشنو الصار

يونس : مو اني همه رادوني وكالو اكتله

ناي : استغفر الله غير افهم اوكف

سحب ايدي مرايحه بعيد اجيبلك مي واجي

كمت ونزلت اركض دخلت للمطبخ واخذت المي وصعدت جان البيت هادئ واغلبهم نايمين

هااك اشرب حبيبي اخذ الدولكه كلها من ايدي وضل يشرب وكع على ملابسه سحبتها منه وحطيت بيدي شويه وغسلت وجهه ورجع اخذها وكملها كلها تكول صار شهر مشارب مي

كمت نزعته البلوز اللابسه حتى ليتمرض وطلعت بلوز ثاني وهو يرجف وماكو غير كلمة مسويت شى

لبسته وكعدت گباله احجيلي باوعت كل هذا وبلال نايم هو نومه ثگيل

شصار ولترجف عفيه حتى افهم كلشي

يونس : مااكدر احجي

ناي : ماشي دنام وباجر احجيلي

يونس : مااكدر

ناي : لا تكدر شو تعال سحبته وحطيت راسه على رجلي وبديت امسد بشعره واقرا ايات شكو ايه حافظتها اقراها شفت بيونس بيومها الطفل المكسور التايهه الميندل دربه

متركته بليلتها اعرف صار شى جبير ومو هين رجفته وخوفه وحتى دموعه البسيطه النزلت معناها اكو شى كلش جبير وره ساعات خدرت رجليه باوعت عليه نايم مديت ايدي للجربايه وسحبت المخده ورفعت راسه على كيفي وحطيته عليها كوه كمت رجلي نملت باوعت على وضعه مو مال اعوفه كمت على كيفي واعرج من الخدر دخلت لغرفتنا لكيت شرهب وبان نايمات سحبت المخده مالتي واللحاف ورجعت نمت بصفه دوم من يتعب او يصير بيه شى انام بصفه يمكن مو راحه اله هاي الراحه الي حتى لا اخاف واقلق عليه نمت وعيني تباوع على كل تفصيله بوجهه وگلبي خايف ومامطمنه اخاف تجي ايام اتحسر على شوفته

الشمس من خلال البردات لامست وجهي وفتحت عيني واني اشوف يونس محاوط رجله وصافن فركت عيني حتى اركز واصحى

رفعت عيني على الساعه المعلكه بلحايط شفتها ساعه ٦ ونص الصبح

صباح الخير شون صرت محجه شى بس هز راسه

كعدت عدل وعدلت كصيبتي وتقربت منه شوف يونس لازم تحجيلي حتى اعرف الصار بلكت الله اكو حل

يونس : ماكو

ناي : شمدريك ماكو انت مو دوم تحجيلي كلشي شصار البارحه وين جنت

يونس : جاسم

ناي : ياجاسم

يونس : خال مهند ومرتضى

ناي : شجابك عليه وشبيهه

بدا يونس يحجيلي تعارفه وشون وعده بسالفه سما

صخام ولطام ملكيت غير جاسم ليش انت متعرف هو شكد يكرهنا وشكد تأذت عمه منه

يونس : اني الاعرفه هو رادها زواج ومصارت وبس

ناي : معقوله متعرف بسوالف جاسم ياما وياما عمه حجتلي عنه

يونس : وعمتج محجيت اي شى عليه كدامي

ناي : وانت ليش سكتت ليش مكلت اني شفت جاسم شتعرفون عنه اسأل عمه بدعه بيبي اي احد اقلها تعرف ويه منو تمشي اول تالي تفوتك هيج سالفه

يونس : غبائي خلاني انعمي سوالي البحر طحين والدنيا راح تصير بيدي

ناي : معقوله يايونس انت ابن سوك وصار كم سنه عاشرت الشارع وشفت اشكال نماذج وشكول معقوله تنخدع بجاسم

يونس : عرف شون يطبلي واني مااعرف شى عنه ولعب عليه

ناي : كمل وشصار بعد ماشفته بخطوبه سما

يونس : اخذني بيوم الخطوبه من كتلكم رايح فاتحه لولد صاحبي عنده فاتحه تتذكرين

ناي : اي اتذكر ماال حي الجهاد

يونس : اي هيه هاي جذب اخذني بيت بيه شرب ونسوان وشكو شى موزين

ناي : وعادي بقيت هناك ومطلعت

يونس : شطلع اصلاً نسيت نفسي هناك وضحك وشقه

ناي : لتكول شربت

يونس : صارت بعد

ناي : ضربت على صدري مصدومه بكلامه ومااكدر الومه واضغط عليه اخاف بعد ميسولف ويسكت

ناي : اوووف ربي كمل

يونس : وبعدها تندمت وروح امي تندمت وكلت مااشرب هو طبلي من باب خطوبتها وهاي السوالف حتى انسى

ناي : من الله يشيلها هي واهلها وخالها محصلنا منهم بس الطيحان الحظ وراها شصار

يونس : كمت يوميه اطلع وياه لبيوت بيها سيارات حديثه وسلاح وناس مااعرفهم منو ندخل بفروع سنطه وبيوت گبار وناس ملثمه ومرات حتى لابسين زي مال دوله منا لعب گلبي لان اشوف يلعبون بلفلوس لعب وذوله كل شويه جايبين واحد منو ذوله وحس عليه ممرتاح وبين الخوف بوجهي متحملت وسألته كاال 

جاسم : ذوله خونه يعاونون الامريكان ويشتغلون وياهم واحنا كعد نصفيهم ولازم نطلع المحتل وبدا يشرحلي عود محبه الوطن وهاي الشغلات واخذتني الغيره ورجعت صدكته لج كلامه شون واحد ويغسل دماغج بحيث اصدكه بدون حتى ماارجع افكر شكال

وشال فلوس وانطاني ما اخذتهم وبقى يلح بحجه لازم اعدل اموري واتعلم حتى اطور وياهم

ناي : الله لايوفقه

يونس : وبديت اطلع وياه اماكن لليوسفيه والطارميه وابو غريب كومه اماكن حتى اكو بيهن اول مره اشوفهن  يوميه بمكان يلتقي ويه ناس ينطيهم فلوس وسلاح واني اكول ذوله مقاومه وحيل تشجعت وكتله اريد اتعلم اسوق حتى اني اصير السايق واطلع وياه براحتي

بس الصار البارحه

ناي : ايييي البارحه شنو الصار

يونس : طلعت من الصبح مثل كل يوم ورحت عليه وطلعنا بسيارته جنا نغير السياره بزيونه اكو بيت نبدل بيه السياره وبيهم عائله مثل الحراس وركبنا السياره الثانيه وطلعنا لمنطقة قريبه بس راقيه نباوع على بيت جبير هناك سألته كال نراقب واحد وضلينا وراه وهناك اجت سياره ثانيه بيها ٣ رياجيل كبار تابعين لجاسم واحنا على طريق شارع فلسطين  كطعو الطريق على الرجال ونزلوه وصعدوه بلصندوك كل هذا واني منزلت هو كال ابقى بلسياره صعدنا وطلعنا لمكان مثل الجوول

ماانسى منظره شاب يطلع عمره بال ٢٥ شبعوه گتل كسرو حتى ايده ورجله صوته لهسه ناي يرن بأذني شون يتوسل بيهم يعوفوه

جاسم : ابن الگلب ساقط تريد نعوفك هذا ابوك الكحف اذا مدفع ادزك بطرك الراس

يونس : ضليت مركز بكلامه شنو ابوك شنو مدفع زين ذوله مو خونه لو شنو

سحلوه واخذنا ورجعنا للبيت الاولي وذبوه بلكاع ورجعو مره ثانيه حتى خشمه كسروه انكسر گلبي عليه

جاسم : عينك عليه ١٠ دقايق ونجي

بقاني اني واثنين نحرسه ذولاك ملتهين يلعبون طاولي ويضحكون ولا جن اكو بشر ديموت بلكاع

الولد يتفل دم ويتوسل على كلاص مي

متحملت منظره وانطيته لزمني من ايدي وكال

ابوس ايدك هزمني انت مبين مو مثلهم

يونس : انت شنو سالفتك ليش تتعارن ويه الامريكان

لك ياامريكان اني ابويه دكتور وهددو يترك العراق ومن مقبل باكوني وهسه يردون ١٠٠ شده منه

يونس : تخبلت من كال هيج ومااعرف اواجهه جاسم لو شنو وهذا الثاني الواكع بلكاع ويتراجف

وره ساعه رجعو واني على نفس الوكفه صافن عليه اتخيل ابوه واهله وحالهم انمرد گلبي عليه اختنكت واني بعيني تجي امه وحالها سألته امك عايشه گلي اي مدري ليش تذكرت امي لج ناي لزمت گلبي والقران گلبي من ضلعي راد يطلع ضليت حاير شون اهزمه وشون ارجعه لاهله تندمت بكد شعر على الساعه السمعت بيها كلام جاسم وعرفت نفسي وكعت بشله حراميه

ناي :يحجي واني اتخيل الموقف وابجي

وبعدين شصار عفيه

يونس : شربته مي وغسلت وجهه وطب جاسم شافني لو تخبل عرف بيه بديت استخطي هذا الولد من الرهبه والرعب العايشه ضليت باهت بوجهه جر ايدي وحط السلاح بيها وعاط بيه كتله والله ياناي مضربته  بيش احلف الج مضربته هو داس على اصبعي حيل وطلعت الطلقه وضل لازم السلاح وهو بيدي ويضرب الطلقه الثانيه والثالثه وحده تجي بلولد وحده مدري وين تروح عطت بيه ودفعته حيل  بس الولد لاحس ولا نفس وسبح بدمه شمرت السلاح وركضت على الولد بلكت بيه روح كمت الطم وابجي مثل النسوان عليه

ناي : كمت من حيلي واضرب على رجلي ضعت يايونس شجاك ااااااخ وشون طلعت منهم لك شون مكتلوك

يونس :

سحلني من ياختي وطببني لغرفه الثانيه وحصرني بلحايط

جاسم : اسمع لك هاي سوالف الجهال وكلان التبن بطلها ماطول طبيت ويانه راح تضل ويانه والي يفكر يطلع من عدنا يلكه نفسه بلمجره ميكلفنا طلقه بالفين دينار جر عدل واستفاد بجم فلس ونشنش حياتك

يونس : اصك سن بسن وارجف مااريد كلشي منك اريد اروح منا ولا شفتك ولا شفتني

جاسم : مو كدامك هنود وتعبر علينا هاي السالفه حتى تطلع منا وتبلغ علينا

يونس : والله ماابلغ عنكم بيش تريد احلف ماابلغ ولا الي شغله وياكم وان صار شى انت تندل بيتنا تعال سوي بيه التريده بس عوفني ارجع لاهلي وخواتي اليتامه مالهن احد غيري

جاسم : انتم كلكم بيت عمشه بقندرتي مااشتريكم انتم اكثر ناس اذا اشرب من دمكم يوميه مايبرد گلبي وخاصه عرفت انت حبيب گلب عمتك شون تريد مااحرگ گلبها عليك هاي عمتك فد وحده ادبسسز جان امنيتي الزمها اشكها نصين واخليها تبوس رجلي حتى بس ارحمها وتالي ملكفتها بس لكفت الي يحرگ گلبها

لزمت هدومه وتقاويت اني وياه وضربته على وجهه حييل طبو الولد ولزمونا ولزمني من شعري توقعت راح يضربني يأذيني تالي گلي روح واذا حجيت شى هذا الولد انت كتاله علينا ماكو شى يثبت وكافي رساله وحده لابو الولد حتى خواتك يسحلوهن بلشارع هذا واحد اهله كلهم واصلين وناس فايخه وانت كتلت ابنهم الوحيد شوف شراح يسون بيك اذا عرفو

طلعت منهم اركض بلشارع مثل المخبل مدري شون وصلت اتصوري ابو التكسي اخذني وخايف مني لان هدومي كلها دم اجيت وماكو بعيوني غير تواسيل الولد وهو يريد يرجع لاهله

ناي : وين ننطي وجهنا ياربي لك هي هاي سالفه بربك شراح تسوي ماكو غير تروح تبلغ عنهم

يونس : اذا بلغت لو انكتل على ايدهم لو انحكم اعدام

ناي : انت مو تكول ماكتلته والسلاح بس جان بيدك

يونس : ومنو يثبت واهل الولد اذا عرفو منو اليه منو يوكف بجانبي عمو عبيد لو جوحي وهلمره اخوهن بلموضوع  يعني يخلن واحد من عمامي هو بيده يسلمني

ناي : والحل شنو تبقى هيج خاتل لو تشتغل وياهم كتال وذباح بلناس

كعد يبجي وخايف واني خايفه اكثر منه اذا ابقى الومه مااحصل شى بلحظتها يونس هو الي انكتل مو ذاك الولد الشاب

لازم نكول لعمه

يونس : لا لا مااريد اي احد يدري

ناي : وتبقى هيج

يونس : اذا عرفت مراح تسكت وراح تكول لبيبي ولعمو فلاح وذني راح يعرفن واكيد يكولون لاخوهن وراح يصفوني

ناي : والحل

يونس : خايف حييل

ناي : مو بكدي تعرف انت بسوايتك هاي مضيعت بس روحك ضيعتني اني وشرهب ولخاطر منو لخاطر الزركه المتسوه فلس والله شنو تحبها يااخي طز بلحب الي يخليك تضيع مستقبلك توقعتك اعقل من هيج ومتوقعت توكع وكعه هيج سهله انت ردت تكبر حتى لو بلحرام لان تعرف الحلال مايكبر وطريقه طويل وردت طريق كصير هااك استلم هذا الطريق عجبك حلوو مو

يونس : كاااااااافي على كيفج ويايه

ناي : وانت ليش مرحمتنا يوم محطيت ايدك بيد واحد قذر مثل جاسم متعرفه تعال اسألنا كول يابه اليوم طلعت ويه فلان تعرفوه سامعين شى موزين عنه وخاصه منو خواته ساهره وصالحه يعني مستحيل يكون هو خير وزين ضليت تضم ومتسمع الكلام وهاي النتيجه همه عايشين ومستمتعين وست الحسن والجمال تحضر لعرسها وانت مستقبلك ياميت يابلسجن واحنا نضل خدامات لساهره وصالحه مكفخه مالنا والي اذا والينا ذب نفسه بلنار لخاطر وحده متسوه ونسى خواته

شعتب عليهم من يأذونه

عافني وكاام وضليت متهستره المن اروح واشكي اذا اسكت گلبي يوكف من القهر والخوف واذا احجي اخاف أذي اخويه احتاريت كعد بلال وضحك من شافني ويدور على شرهب شلون اكدر اخفي معالم الدمار الي بداخلي

بديعه : هااا يمه نايه شو بايته يم اخوج

ناي : هااا جان مصخن وبقيت يمه

بديعه : وينه شو ماكو

ناي : كال عندي شغله واجي كعدو البنات

بديعه : اي وبدلن وانتي راح يروح الدوام عليك

ناي : عفيه عمه مالي حيل اداوم

بديعه : يابنتي غياباتج كثرن واخاف المديره تسويلج مشكله وتفصلج

ناي : اليوم خميس ودروس قليله وماكو فصل مو مثل قبل مديحاسبون

بديعه : بكيفج يمه انتي ادرى بوضعج

بلكت يرجع اخوج واشوفه ضال بالي عليه هسه غير يرجع يفتح المحل وين يسربت وعايف رزقه

ناي : بيبي كعد تكعد بلمحل

بديعه : ميخالف بس هو احسن وين يخلص الوكت

ناي : ماادري

بديعه : بيج شى حاستج مو طبيعيه وهاي من تاكلين اضافيرج معناها اكو شى غاثج لو متوتره

ناي : ماكو شى عمه عفتها وطبيت للغرفه

شافتني بان  حطيت ايدي على راسي وابجي

بان : ياستار شصار منو وياج

بان : راح اخويه بان  ضاع

بان : شكوو قابل علمود هاي سما يمعوده هسه يكبر جم سنه ويحب الف غيرها قابل راح ينتحر اذا ما اخذها

ناي : ياريت هيج السالفه اكبر

بان : صاير شى احجي

ناي : انتبهت على نفسي شخربطت وكتلها لا اخاف تتزوج وبيوم العرس يسوي مكسوره

بان : حيل هاي السالفه قديمه بلكارتون والافلام الهنديه والعربيه نشوفها البطل ينقذ البطله ومايحلاله الا وكت عرسها

انتي هم عقلج اضرب من اخوج ماكو شى وعيونج وكولي كالت بان 

ناي : رجع يونس والحيره بعيوونه جنت اشوف اخويه هايم بغير ملكوت اكل كوه ياكل الليل مينامه محد تقرب منه حتى جاسم اختفى اسبوع كامل والوضع هادئ بس داخلي وداخل اخويه براكين ومكعد تطلع محبوسه بصدرنا لانكدر نحجيها ونفجرها ولا نكدر نكتمها ونتحمل حرارتها

كاعده على الدرج جنت احب هاي الكعده اكعد بلبايه الاخيره ليفوك وابقى اباوع على كلشي وحاطه ايدي على خدي وصافنه وكل شويه يجي خيال زباله يوجع گلبي لحد مسمعت صوت كاال

مهند : انيال الماخذج وصافنه بيه

ناي : باوعت عليه ردت احجيله اشكيله بلكت يلكه حل لاخويه يبقى ابن عمه وهذا جاسم خاله وهو دوم يمهم بلبصره معقوله ميعرف بشغله خاله

ناي : اريد احجيلك شى وخايفه

مهند : كولي ليش تخافين شمسويه مكسوره

ناي : مو اني

مهند : لعد منو

ناي : يونس

مهند : خيره هو صار فتره ماكو شوكت لحك يسوي مكسوره

ناي : اريد احجيلك كلشي وتسمعني للاخير لان الوضع ماينسكت عنه وخاصه هسه هدوء مااريد يصير الهدوء قبل العاصفه واخويه يروح بلرجلين

مهند : شلشتيني شكووو

ناي : باوعت يمنه يسره كتله كووم ومشيت وطبيت بغرفه يونس جان مابيها احد واعرف مو وكت رجعته

مهند : اخاف يجي اخوج وتصير مشكله

ناي : هو وينه ياخوفي صار وياهم من جبانيته ويضيع الباقي من حياتنا

مهند : احجي

ناي : كلشي صار بيونس بلحرف الواحد گلته لمهند الجان مصدوم مثل صدمتي اول مره بس الفرق مبجه ولطم مثلي

مهند : شجابه على جاسم

ناي : نفس سؤالي

مهند : انتي تدرين جاسم حواسم وحرامي وشغله كله بلممنوعات

ناي : شمعرفني خالكم بعد

مهند : اني بلذات مو على صلح وياه ودوم مشاكل اخر شى عفت بيتهم واجرت شقه اني وصديقي وكاعدين بيها لان يوميه مشكله اني وياه واحد دوني حقير سوالفه ودكاته مال نواقيص وحتى كلت لامي اذا بيوم شفتج تحجين وياه اگلب الدنيا على راسج ومن صارت خطبة سما وكعت دخيل دم حتى بس اقبل يحضر الخطبه لان دريت بيها دازه عليه واستحلفت اطرده

ناي : واخويه وكع بيها ويجوز خالتك لو امك دفعته عليه

مهند : مو لهاي الدرجه

ناي : هاي الدرجه ونص لان جاسم كايل ليونس عرفت انت حبيب گلب عمتك يعني وحده منهن كاعده ومسولفه اله هذا كله واثنينا نعرف العداوه القديمه وارجع واكىل ميهمني الشى الوحيد هسه اخويه شراح يصير لحاله

مهند : خلي يجي يونس وافهم منه

ناي : اخاف يرزلني لان كتلك

مهند : تاكلين رزاله افضل مايضيع لان جاسم مايعرف يمه ارحميني هاي الفتره الي مثله عله شانهم وصارو يسرحون ويمرحون والدوله الهم والكتل عدهم ماكو اسهل منه لازم نتصرف صح حتى نطلع بأقل الخسائر

ناي : راح اطلع اخاف يجي ويشوفنا هنا وتصير مشكله

مهند : ماشي اطلعي نايه

ناي : هاااا

مهند : لتخافين الله موجود واني بظهرج

ناي : اعتمد عليك مهند هذا ابويه مو بس اخويه

مهند : تنحل اطمني وبردي اعصابج

ناي : اوووف يوم عيد هيج انام واكعد وهذا كله كابوس وانتهى يرادلها بخت

مهند : ان شاء الله خير

ناي : طلعت وعفته واجت سما كدامي لزمتها من ايدها كله من وراج عساج لا تهنيتي

سما : هاي شبيج تخبلتي

ناي :ماكو شى عدل منكم شنو من بشر انتم الزباله انظف منكم

سما : عوفيني ولتتجاوزين تره اخلي امي تلعب بيج طوبه

ناي : اي هيج طلعي وجهج الحلوو الحقيقي مااكول غير الله يطيح حظك يايونس على اختيارك الاغبر هذا دفعتها من سمعت صوت باب غرفة يونس انفتح عرفت مهند طلع خليت ونزلت

رجع يونس يطلع متحملت هاي المره اسكت اله

وكفته هااا رجعنا اخاف عجبك ذاك الدرب

يونس : هااي شبيج

ناي : شبيه نار وشابه بيه من سالفتك ليش رجعت تطلع هاي الطلعات المشبوهه

مهند : ادخلي وعوفي الي

انداريت لكيت مهند ورايه

تعال عندي حجي وياك

يونس : جنت اطلع افتر اخاف ابقى بمكان واحد اكول راح يگتلوني اجاني وره مده جاسم رادني ارجع للشغل ومقبلت وانطاني مهله لنهايه الاسبوع اذا مقبلت راح يسلمني

كلشي ضدي حياتي وضعي اختياراتي

كلشي يمشي ويايه بلعكس وانداس وارجع اوكف وارجع انداس لحد متعلمت مستحيل الدنيا تمشي عدل ويايه

اجه مهند وكعد من عيونه مبين يعرف كلشي

مهند : ماالومك ولا اعتب عليك لان كلشي ميفيد هسه علينا نشوف النا حل بهاي السالفه العوجه الوكعت نفسك بيها

يونس : شسوي من كل الجهاات حاصريني يااموت على ايدهم يا على ايد اهل الولد

مهند : يا تسلمهم وتبلغ عنهم

يونس : وراح يصدكوني

مهند : عندي ولد صديقي بلجامعه اخوه ضابط نسأله ونشوف

يونس : ضابط بلبصره خوما بغداد

مهند : غير عنده معارف اكيد اذا سلمناهم راح تنحل سالفتك بس بالاول تندل مكان تواجدهم

يونس : اي بس مو كلهن

مهند : مو مشكله المهم كم مكان نلكاه راح اتواصل ويه الولد وانطيك خبر

يونس : خالك منطيني مجال هذا الاسبوع

مهند : ماطل وياه وابد لتحسسه بشى حتى ليفكس بيك

يونس : وانت ليش تساعدني وتضحي بخالك

مهند : لان هو واحد كواد وعاق ويستاهل هواي اذاني قبل فتره وماكدرت اردها اله لان ماعندي دليل ضده وخوش فرصه اخذ حقي وحقك

يونس : وامك اذا عرفت

مهند : شمدريها واحد يگتل ويبوك ويسلب قابل نهايته جائزة الاوسكار اكيد الگتل نهايته

يعني الوضع طبيعي لتركز على شغلات مو اساسيه

يونس : مااشي

ناي : كاعده اسوي زلاطه وبيبي يمي وشرهب تلعب طبت ساهره

ساهره : هااا شونكم

عمشه : والغسل هلشوفه شنهي جنه العافيه چا مثلج صخله وتسرح بلخيس

ساهره :عبالج تضوجيني ابد خاصه اليوم

عمشه : چا شبيهه اليوم وزعو حلاوه وگليتي سم

ساهره : اليوم المهر مال بت اختي ليش متدرون

عمشه : وان درينه شيقدم بايره وضاله على گلوبنه وتولي لعيالهه عبنهه صالحه ومكسومه نصين غدي

ساهره : يابايره عمه اصغر من بان 

عمشه : انه گلت بايره لاتلوعين چبدي دشيتي ودش النحس كله وياج خذيهم ولي عبن مايحلى العرس اله بيت جوحي عشتوو اهمداه للوعث عبنه رفع المايسوه فلس وخلاه يكعد ويدندل رجوله

صالحه : هله ساهره كملنا يله يمه سما

شرهب : باوعت على سما شون تمشي وشايله خشمها وتنزل ومكيفه واتذكر البارحه يونس جان يبجي ونايه تسكت بيه مدري ليش يمكن عليها صعدت كم درجه وكعدت بلنص دتنزل حطيت الها رجلي وهيه لابسه شحاطه عاليه وطك طاك بس مديت رجلي بدون متنتبهه جان تتكربس وصارت بلكاع وعياطها گلب البيت

عمشه : يا وثول عبنج عميه ماتشوفين شمالج طاير العريس خايبه جنج مبرده مسكربه كاتلهه الزنجار وتلولح بلطين يله شحصلتي بلنص حبوبه لاتنوحين

سما : ماما رجلي توجعني مااكدر اكوم اااااااخ

صالحه : اسم الله بنتي العين الماصلت على النبي هاي من غيرتهم ميتين عساهم بوكعه مثل وكعتج تعالي ساهره ساعديني اكومها

عمشه : يااا ام الفطور كل فطر برجلج ينام بيه الچلب كضي لسانج لا والحسين اهبد الهاون براسچ وافگه نصين

سما : هاااي الخبيثه شرهب

شرهب : اني شعليه عمه مو كاعده وساكته اباوع عليكم

صالحه : لج بت جليله العايقه هلمره انتي عليه مااخلص من الحيايه الهنا اطلعين انتي

شرهب : نزلت سريع لزمتني من شعري وجرته حييل كلش تإذيت بس مبجيت وختلت وره بيبي

صالحه : عبالج اعوفج اليوم اشمرج من فوك مثل ما وكعتي سما

عمشه : كضيهه وشوفي شجيرالج

صالحه : مو كدامج وكعت سما

عمشه : يلمدهربه يلعوجه يلتمشين والعكارب تكاطف منج يل شوفتج تطرح البچر

جوزي من البت ماطيحتها هيه بتج ثوله تنزل وعيونها طايره لا گلشي وركضتي وره اليتيمه وتذكري

يا حافرالبير لاتغمج مساحيها خاف الفلك يندار وانت التكع بيها

ساهره : امشي يمعوده هاي عمتي محد ياخذ منها لا حق ولا باطل ورانه كومه شغل وجوحي ينتظرنا بلسوك

عمشه : حجت تك النعال الثاني دور حك ام حلك الاعوج ااااخ ياقسمتج السوده يعمشه چا لو نايمه ذيج الليل موش ابرك من جيت عبيد وجوحي شدعيلك فرج هاي خلفتك تسرح بيهم نسوانهم ولن واخذن سمجن تكدر خاطري

صالحه : عبالج اعوفج ارجع واني الج

شرهب : طلعت لساني اعيب عليها وخزرتني ناي

ناي : عيب

شرهب : مااا مو عيب

عمشه : عيفيها حبوبه تلعب چاتضل هيچ مكدره

ناي : تتجاوز على الاكبر منها عيب بيبي خلي تولي تتعلم

شرهب : مااتجاوز بس على ذوله مااحبهم

عمشه : اي حبوبه لا تحبيهم عبنهن ابليس راضع وياهن

ناي : شرهب مااكدر احجي وياها طول مو بيبي موجوده لان تاكلني اكل

عمه بديعه ملتهيه ويه بان  ادبر الها ملابس وشغلات للكليه لان انقبلت تربيه جامعه مستنصريه جانت حيل فرحانه ومردت اكسر واهسها بتها الوحيده خليها خطيه صار سنين مشايفتها هيج فرحانه ومنطلقه

دخلنا ٢٠٠٥ سنه عاديه كمنا ندخل سنه وره سنه ونعتبرها بس ايام من عمرنا وماكو اي تغيير بلعكس صار التغيير للاسوأ والوضع يوم بعد يوم يخوف صار اكثر الناس كامت تسافر الاغتيالات مشتغله والتسليب صار ماكو اسهل منه والشوارع تحسها تبلع الواحد محد يمشي اذا مايتلفت يخاف يصير شى

اما احنا بيت عمشه كلشي على حطته مهند كام يروح ويجي علمود يونس وجاسم مأجه على الموعد الي حدده يونس ومهند حيل هاي الفتره صار تقارب بينهم ومااعرف على شنو ناوين واني گلبي مقسوم جهه عايشه بيه وعيني على اختي والجهه الثانيه عيني على يونس ادرس وبالي مو يم دراستي بس مطلوبه مني شسوي لازم انجح حتى لو خمسينات المهم اطلع من هاي السنه وماارسب

نهايه شهر الواحد فزينا الصبح جنه يوم عادي يوم جمعه يونس طلع يتسوك واني وعمه انطف نزلت صالحه تهلهل

بديعه : خير منتوله من الصبح

صالحه : غير اليوم  زفة سما

ناي : فتحت عيني عليها متفاجأه جان المفروض خطوبتها ٦ اشهر بس مطولت شهر وصار الزواج

كلشي سونه بسكوت بدون مندري وحدتنا تباوع بوجهه الثانيه شوكت كملن جهازها عرسيش هذا خلال شهر واحد كله ركض بركض

جان همي الوحيد يونس ولو هو ملتهي بشغلته بس اكيد اذا عرف بعرسها مراح يسكت

الهلاهل تسمع سابع جار وساهره وصالحه مكيفات سمعنا غنيه هم جايه ومباشره عاطت بيبي

عمشه : ما ادش غنيه داري وحك علي اسويها دم للرچاب واخرب عرس البت

صالحه : ماتجي امي لهنا عدها بيت بتها لو نسيتي

بديعه : اي بهاي حقج عدها بيت ماشاء الله حظها احسن من حظج بلعافيه عليها يوم الالج

صالحه : بيتي وبيت اختي واحد

بديعه : هههههه مبين تقشمرين نفسج لو تقشمريني ساهره فلتت بروحها العزيزه وانتي ضليتي بهاي الغرفه حتى متكدرين تزفين بتج من هذا البيت لان تستحين كدام رجل بتج

روحي لبتج اخاف تحتاج شى بيت خالتها

صالحه : اعرف من غيرتج هيج تحجين لان بتي راح تتزوج قسمه زينه وبتج ضاله

بديعه : بتي بشهادتها تسوه الف رجال كافي تعتمد على نفسها وقابل التدرس مراح تتزوج يجوز الله يجازيها على تعبها رجال خير يفهمها وبذاك الوكت هيه وياه يتساعدون على الدنيا كافي من تخلف يعرفون امهم مدرسه واذا مزوجت عادي

مو كلشي العرس والرجال اني وابوها خلينا سلاح بيدها يگويها على زمانها تحمي نفسها وتسند ظهرها عود خلي نشوف رجل بتج راح يسندها لو يخليها خدامه اله

سما: ماما  تأخرنا

ناي :اباوع على سما شون فرحانه واني اخويه ضاع بسببها طلعت وراها واشوف ضحكتها شاكه وجهه ولازمه ايد امها وبيدها علاكه وغراض مبين رايحه للصالون الزفه تطلع من بيت جوحي رفعت راسي للسما الجو صافي والشمس طالع ونسمات الهوا البارده

ربي مالنا حوبه عندك دتشوف الي ظلمنا شون سعيد ومرتاح واحنا الضيم كاتلنا ليش هيج حالنا ليش همه كلشي عدهم ومرتاحين واحنا من قهر لقهر لشوكت نبقى هيج يارب حوبه يتيمه مكسور گلبها على اخوها عديها على خير بجاه حبيبك محمد

طلعت الصونده واغسل الطرمه والمي ثلاجه وقوي اصابيع رجليه حمر على زرك من البروده

بديعه : اكلج اذا درى يونس شلوون

ناي : والله هسه دافكر شون همزين العرس مناك مو منا

بديعه : معقوله ميعرف

ناي : لا واله الصبح بين عليه عمه ادعي تعدي على خير

ناي : للعصر اجه مرتضى كال مااكدر ابقى هناك عيب والبيت مخبوص كعد بلهول وشرهب تكمز يم راسه

مرتضى : متكعدين راحه مو كبرتي شبيج تكمزين

شرهب : وانت شكوو شعليك بيه اريد العب وهذا مو بيتك ميعجبك اطلع بره روح لبيتكم

بلال تعال جيب الطوبه نلعب هنا

مرتضى : شكد وكحه انتي محد لازم راسج وراكعه بلحايط حتى تسمعين الكلام

شرهب : مد ايدك عليه اله اكول لبيبي اطردك

مرتضى : شكد اكرهه وحده وكحه بعدج صغيره وهيج وكحه من تكبرين شون

شرهب : اصير اوكح اممممم عيبت عليه وركضت

ناي : كافي شرهب وادخلي اقري

شرهب : خلصت والله حفظت كلشي

مرتضى : كسوله مخلصتها لعب وتكمز انتي وهاي كفشتج ام سيم المواعين

شرهب : وانت هاي لحيتك جنها زوليه محتركه معطبه ايييييع محلووو

ناي : كااافي عيب لج

شرهب : يعيب على شعري لان احلى من شعره

ناي : عفيه مرتضى لتخلي عقلك وياها

مرتضى : هاي لخاطرج عفتها

شرهب : شوف هذا هم عاجبته روحه لخاطرج عفتها على اساس تكدرلي

مرتضى : اروح لصديقي دخت منج

شرهب : اي ولي

مرتضى : لج هاي عليمن ولي ولزم شعرها

شرهب : هدني

مرتضى : مااهدج اله تكولين العفو

شرهب : مااكول لو تموت

مرتضى : مااهدج

شرهب : خرمشت ايده حيييل وضربته برجله عاط وعافني ركضت وصعدت على الدرج وغميته وركضت

مرتضى : هاااا شنو اختج

ناي : عوفها فدوة لتتحارش بيها

مرتضى : خلي تولي لازم تعلميها تحترم

ناي : هسه تكبر شويه وتتعلم تعبت واحجي وياها وتسوي العكس

مرتضى : شبيج ترحين وتجين وقلقه اكو شى

ناي : لا سلامتك

مرتضى : محتاجه شى اجيبه ويايه

ناي : سلامتك

بيومها جان گلبي ينغزني اريده يعدي اخويه طلع يتسوك من الصبح وينه لهسه

خلص الظهر والعصر ودخلنا للمغرب وهو ماكو صحت على بيبي وعمه بدعه وهمه هم خافو مثلي عليه واجه الليل ويونس مختفي

بديعه : لج لا بقو فروع ولا سوك عمامج من كل جهه يدورون ويونس ماكو

ناي : مراح لبيت جوحي

بديعه : راح فلاح كال زفينا سما وكلشي ماكو

ناي : كعدت بلكاااع الطم اخويه ضااااع ولج يمه الحكيني وحيدج ضاااع

بديعه : شكووو ليش تلطمين

ناي : كمت ومحجيت شى كلت اخاف هج من وراهن ليش افضحه بس طلبت من عمه تروح لصديق مهند تبلغه عدهم هذا الاسمه طابوكه موبايل يخابرون بيه على ياسر وهو يبلغ مهند بلكت يعرف شى وعمه كل شويه تسألني شصار واني مااحجي عاطت رادت سكتت

لثاني يوم كاعده وصافنه نوم منمت الكل يدور على يونس وماكو للعصر اجه مهند وبيده جنطته ومبين عليه التعب لان طريق البصره طويل

اني شفته وفقدت كمت على حيلي من عيطتي نزلت صالحه وجانت بلهول بيبي وعمه وبان

مو كتلي لتخافين واني بظهرج وينك بس حجي اريد اخويه منك مهند

صالحه : وابني شعليه هااا ولج تردين تورطي بيكم وبمصايبكم معودنا خلصنا من مشاكله

ناي : كله منج انتي السبب موتي امي وضيعتي كلشي حلوو بينه علمود شنوو علمود هاي الخرابه شون تنامين انتي شوووووون  ودم وحده برگبتج ومكفاج دمها اجيتي على دم ولدها واولنا جان يونس ضيعتو دراسته ومستقبله وشغلتو بلعتيك وبسبب هذا الشى  صحته ادمرت وخليتو بيه عاهه العمر كله يبجي من وراها وبتج الگلبه علقته وخبلته وخلته يتصرف تصرفات مال جهال وميتحكم بعقله وتالي راحت اتزوجت غيره تتختل بلغرف ويااه واحبك ولتعوفني وتالي عافته وضيعت روحه

واخرها جاسم  الچلب اخوجن متأكده دفعتنه على يونس واله اخويه ليش اله بيوم عرس بتج يختفي انتي واختج متخافن الله كلجن سحوره وقذاره وجاسم اقذر منجن انتم عائله منحطه عاط مهند بيه وكاال

مهند : كاافي ناي هسه ادور عليه واجيبه لتخربطين والزمي لسانج مو واكفين ماعندج احترام

ناي : انت بلذات اسكت الله اعلم يجوز متفق وياهن يجوز انت راس الحيه وامك ذيلها

جان يضربني راشدي حيييل

مهند : عيب تتجاوزين نسيتي نفسج

صاير رجال براسي مووو اذا انت صدك رجال ومتقبل اتجاوز جيبلي اخويه ومثل مدكيت صدرك وكلت اني بظهرج صير كد كلمتك وبذاك الوكت احترمك اما هسه انت وامك وخالتك وخالك ذره احترام مااحترمكم وانتم والي برجلي وشيصير خطيتنا برگبتكم ويا مهند اذا اخويه صار بيه شى وداعت امي الي انحرمت منها وضليت يتيمه بعدها لا اسوي بيكم الماسوته خوله

بديعه : تعاالي بتي شجاج يمه نايه استهدي بلرحمن هسه اخوج يرجع

ناي : ذوله شياطين عمه ضيعو اخويه ضيعو يوووونس كمت املخ بشعري تهسترت لك يووووونس وينك

يتبع ....

#الابواب_الخمس

البارت التاسع والثلاثون

للكاتبه Reem

تعال أوزن هموم وجيب ميزان

وشوف شگد عذاب الروح زايد

أنسحبوا من حياتي هواي خلان

بقيت بهاالزمان  الوحدي أعاند

سواد الليل يبقى وتطفي الالوان

وأعيد بذكرياتك والمشاهــد

أذا كل طير عنده ثنين جنحان

أنا مكسور وعشت بجناح واحد

بديعه : تعاالي بتي شجاج

ناي : ذوله شياطين عمه ضيعو اخويه ضيعو يوووونس كمت املخ بشعري تهسترت لك يووووونس وينك

بديعه : حضنت ناي وابجي وياها لزمت ايدها حييل لج شجاج على كيفج

صالحه : يمه العياره لج خنيسه هاي الهوسه على شنو قابل هو صغير وضاع شوفي وين دايح بيا شارع مو تعلم على الصياعه وتعالي گليلي  اخويه شعليه كل شويه وذابات شغله براسنا يابنات غنيه ويابنات غنيه وهسه صفت على جاسم هو جاي يمكم كرباكم  صار سنين عتبت هذا البيت ما واصل شذكركم بيه لو مالكيتي غيره وتذبون بلاكم عليه نفس عمتج الگلبه صدك تربيتها العوجه

عمشه : ياعوجه يابت العوجه يابت الصخل چا واكفه وتراددين عليش تشوفين البت مفرفحه على اخيها چا مجان مااطيبين خاطرها تزيدين نارها وتعدين وتصفين عليهه وعلى عمتهه

صالحه : متشوفين لسانها شطوله عليه وعلى ابن عمها المفروض تكومين تركعيها على حلكها وتكصين لسانها الزفر هاي وحده مشافت العين الحمره وهاي تاليهه على الجبير تتجاوز وانتي عفتي كل حجيها واجيتي مثل كل مره على صالحه مو هو ابويه مكادر بس على امي

عمشه : لاتخليني انبش ابيج بگبره الزلم نام وخلص منجن ومن سوالفجن العوچه عبنه خير توكل وعافها ليجن تسرحن وتمرحن چا ملچ الموت لا خذاجن ولا خذا امجن خذاه هو المكرود

صالحه : هسه انتي عفتي كلشي وجلبتي بأبويه اكلها هاي الطايحه الحظ تتهم اخويه بله هاي هم خوله ويتحارش بيها

عمشه : يمه نايه شنهي سالفه جويسم عبنه اسمه مايجي بلطاري اله وراه بليه سوده

سنين وانه افادي تمرمر من طلايبه وعبنه ولي كلنا ارتاحينه شرداه على يونس

مهند : ماكو شى بيبي الشغله يمي

صالحه : شنو الشغله يمك وشدخلك انت بيها وشجابك من البصره وانت عندك دوام

مهند : يوم كتلج الشغله يمي ولحد يدخل وانتي تعالي

ناي : مااجي واحجي كدام الكل شسوه جاسم بيونس

عمشه : چا شنهي تلامزون وتكاطفون بلسوالف جويسم شلطم منعول الجلوه

مهند : مالكم دخل وانتي لتعاندين وتعاي

ناي : سحبني من ايدي قووي واخذني لغرفه بيبي واني حاقده حتى عليه

دخلت وياه ودفعت ايده

مهند :اول تالي يعلى صوتج وعليه ناي اني راس الحيه لهاي الدرجه ماعندج احترام

ناي : جانت اعصابي منتهيه واني احجي ويه مهند بوقتها اريد بس يونس وميهمني لا احترام ولا شى لدرجه رجعت رفعت صوتي عليه واعيط لو بيدي اشرب من دمه لان جنت مأمنه بيه وحطيت رگبت اخويه بيده

كتله واني اعيط بوجهه

ادور احترام واني اخويه مااعرف وينه مهند اجيتك وامنت بيك لو اعرف هيج راح يصير ويوكع هو بيها مااجي

مهند : هسه انتي شفتهمتي وتعيطين من دخلت لهسه عياط وصياح ولطم

ناي : تعبت حقك متحس بنار فكدان الاخو اني النار كعد تحرك كلشي بيه اخويه صار من اول البارحه ماكو اندور عليه بكل مكان ومختفي وانت تعرف ذوله ناس زباله ومجرمين وايدهم والگتل يعني ماكو اسهل يحطون طلقه براسه ويذبوه زين اني شحصلت اذا صار بيه شى اجيتك ردت حل منك مو توكع اخويه بمشاكل اكبر احنا مالنا غير يونس بعد الله اني وشرهب هذا سندنا وحامينا منكم ومن الدنيا يعني اذا صار بيه شى انضيع اني وياها

مهند : نصي صوتج بابا تره بديت اتعصب عليج اني مقدر مشاعرج بس احترمي حتى افهمج

ناي : هذا الحاير بيه نصي صوتج احترام تريد ابوس ايدك حتى ترتااااااح اكله اريد اخويه يووونس ماكو شسويتو بيه

مهند : ماسوينه شى اتفقت ويه اخو صديقي ودزنا على ضابط بغداد وحولونا على واحد اعلى واتفقنا يدليهم على اماكن تواجدهم ويعتبروه شاهد

ناي : وبعدين

مهند : اول ايام الوضع مشه ودلاهم على اكثر من مكان بس تعرفين اكو علاسين حتى من الشرطه والمغاوير اكيد عدهم ايد وتوصل الهم اخبار اخر مداهمه ملكو شى وجاسم طفر

ناي : صخام الصخمني اكيد اخويه انكشف وجاسم مراح يهده

مهند : يابه صبر شويه اني عرفت الضابط دز على يونس وهسه بس اغسل اروح اله وافهم وانتي بس دخلت من الباب عياطج اخذ الدنيا

ناي : اسمع مهند مثل مااجيت وسلمتك اخويه بيدي وكلي ثقه بيك ترجع اخويه بيدك ومااريد اي اعذار

مهند : تدرين متفاجأ منج متوقعتج هيج اعصاب وجريئه

ناي : هااي مو جرئه هذا حقي وما مستعده اتنازل عن حقي صفن بوجهي وكاال

مهند : شوكت كبرتي وصرتي ادورين حقوق

ناي : من الضيم ومن المصايب المكعد تخلص يوميه الي مثلي تكبر من اول هبطه تصير بيها واني كبرت من زمان

مهند : بس بعيوني بعدج طفله صغيره

ناي : باوعت بعيونه وبصوت هادئ كتله كبرت الطفله مهند واذا مرجع يونس راح تشوف وجهه مني مراح تحبه ومثل مكالت امك تربيه خوله وتعرف عمتي شنو  اترجاك لتضيع كلشي حلو بينا ورجعلي اخويه وخلي يبقى الطيب بينا

مهند : شعتبره تهديد تره هاي النبره مااحبها

ناي : اذا يرجع اخويه اي تهديد اني هسه اشوفكم كلكم اعداء واذا تريد ترجع بگلبي مثل قبل رجعلي يونس وراها اني بنفسي اجي واعتذر الك واطيب خاطرك اما هسه اعذرني

غير هاي النبره ماعندي عفته وطلعت صاحتني امه

صالحه : شعندج ويه ابني

ناي : انداريت هو طلع من الغرفه وكتلها ذااك ابنج وسألي

عفتها وردت اصعد حطيت رجلي على اول درجه جان اسمع بيبي تكول نايه انداريت عليها اشرت بيدها وكالت  تعالي جاري

نزلت وكعدت بصفها مهند صعد وامه صعدت وراه جان تحضني بيبي

عمشه : يايمه طلعتي دمج حامي وانه اكولن البت خوثه وفقيره ولاتحل ولا تربط رجل دجاجه عبنهه خفينسه (خنفسانه) تگلب على ظهرها ماتعرف تكعد عدل تكضيهه تلاطم رجولهه

ناي : والله يابيبي بيتج هذا حتى الملاك يگلب شيطان

عمشه : چا يمه هذا حالنه مابيدنه شى انه هسه گليبي موجر على خيج عبنه فقير ومن اهل الله وانه لسه مااعرف جويسم البين شعمل بيه حبوبه گليلي الوليد شورطه بلفسيفس جويسم

ناي : ورطه جبيره وكله من وره الحقيره سما هاي تاليهه هي متزوجه ومتونسه ومرتاحه واني اخويه الله اعلم شصاير بيه هاي اذا عايش

عمشه : كش بره وبعيد لا تفاولين على الوليد

سليمه كرفتهه لسما وامهه وخالهه چا غير بطيتي جبدي تحجين بنكاط مثل ناكوط الحب چلمه چلمه نسحبهه منج

بديعه : اوكفي خلي اكعد واسمع شصاير

ناي : جريت نفس والقهره بگلبي واتذكر حال اخويه من اجه وسولف الي كعدت احجي بلتفصيل الصار وكل شويه ادعي عليهم لان استغلوه

بديعه : دخيلك ياابا الحسن ولج كل هذا صاير وانتي ساكته شجاج شون مااجيتي وكتيلنا

ناي : كلت لمهند وهو كال الشغله كلها يمي

بديعه : ومنو يكول مهند يسوي شى الشغله جبيره مو مال تضل بيدكم واذا مهند يعرف احد يبقى مو مثل عمامج

ناي : عفيه عمه لتحسسيني عمامي راح يدكون صدرهم ويكولون احنا نحميه والله لو

لو عارفين بيدهم يسلموه لو لجاسم لو للمركز نسيتي سواياتهم كلها اني وانتي وكلنا ندري عمامي وبلذات جوحي وعبيد يموتون من يونس ولا تكولين ولد اخوهم ويردون على ساعه يوكع ويتشمتون بيه

عمشه : چا وليداتي غمان وساگتهم نسوانهم والبت تكول الصچ مابيهم رجه وانه عتبي على يونس شون يطيح هيچ طيحه ويه جويسم چا مالاكي غيره انه لو حاط يده ويه ابليس ابرك انه گلبي لعب وهاي السالفه جبيره وموش شغله وينسكت عنهه وبنات غنيه اكص يدي  لون مالهن يد بيهه ذني حيايه يلتفن ويخنكن ومايرحمن اليطيح بيدهن ويونس من راد سما حقدن عليه وصالحه ماتعبرهه ليه هيج وخافت لا يخرب گلشي بيوم عرسهه وزت اخيهه الخايس ابو ريحه تگتل المعفنه يحومي على اخيج وهذا رچيج وموش حوك طاح بيهه 

بديعه : وشكلج مهند هسه

ناي : انتظر واشوف شراح يسوي

بديعه : خلي يجي فلاح هم نكوله

ناي : كل واحد يكول ياروحي حتى عمو فلاح مايوم حسيته يحب يونس

بديعه : ليش تكولين هيج بنتي اليوم وضًعج كله مخربط تره فلاح يحبه ويعتبره مثل ابنه ومايوم حجه شى موزين بحقه بلعكس يكول شاغول وحباب

ناي : وشنو الفايده ماوكف وياه بأي  شى ماخذ موقف المتفرج ياهو اليجي يدمغ على اخويه وهو ساكت عندي اربع عمام ولا واحد خاف الله بينا ولا واحد وكف ويه هذا اليتيم وعلمه وفطنه يونس هو ربه نفسه وتعلم اشكال بلشارع انطيني عم لزمه وكال اله تعال احجيلي احد ضايقكك احد تعارك وياك تحارش بيك محتاج شى صاير شى وياك ومتعرف تحله ابد بلعكس كامو يحطون راسهم براسه ويحاربوه بكلشي عبالك بعمرهم لو عدوهم ويردون ينتقمون منه

بديعه : كدامي خوله مو ناي

ناي : جانت عمه دوم تكعد بلساعات تسولف عن اخوتها وشون تكرهم وحاقده عليهن واكول بگلبي معقوله الواحد يكدر يحقد على اخوته معقوله مينسى اذيتهم لخاطر الخوه البينهم جنت اشوف عمه گلبها اسود ومتسامح والومها بس بعد الشفته لا والله حقها من السما للكاع ولتزعلين مني بيبي ولدج مابيهم كل خير بس الاذيه والكطع والقهر ونسوانهم اتعس منهم وحتى عمو نجم الي المفروض هو اكثر واحد يبقى ويانه ويحاميلنه ويصير ابونه بعد ما تيتمنا دار وجهه وراح وما كفاه اخذ عمه ولو عمه حقهه تروح ماالومها بس هو مو برئ كل واحد من ولدج اله ضلع بأذيتنا بس بطريقه مختلفه

بديعه : شكد شايل گلبج يلحنينه بعدج صغيره لتسودين گلبج من هسه هذا مو ثوبج بنتي 

ناي : خلي نشوف شيصير وبعدها اشوفه يسود لو لا

كمت من عدهم وبدت بيبي  مثل كل مره من يضيق بيها الحاال تشعر

ريض ياعزيز....... الروح يمناي

أبشرك راح مني.... الچان يمناي

شبه راعي أصبحت مطروح يم ناي

يعزف والونين ......ايحيط بيه

انداريت على بيبي وكتلها اي بيبي يعزفون بيه واني كل عظمه تون عليه اذا يونس عزيز عدكم اني وشرهب يونس حياتنا كافي لا ام ولا اب هلمره بليه اخ تره هوايه مو كلش هوايه

صعدت للغرفه وبصعدتي نزل مهند درت وجهي منه منتظره اشوف شراح يسوي

دخلت لكيت شرهب حاطه القلم بحلكها وشعرها نازل على وجهه وصافنه على الدفتر

بيج شى

شرهب : راح يرجع يونس مو

ناي : اووووف ماادري كعدت بفراشي وهي اجت شمرت نفسها بحضني

شرهب : اني خايفه

ناي : مديت ايدي على شعرها وخرته من عيونها وكتلها ليش خايفه

شرهب : اذا يونس مرجع راح يأذونه اني دوم اتحامه بيه وبيبي

ناي : ان شاء الله ماكو شى كومي اقري وراج امتحان وهاي وزاري مو لعب

شرهب : جنت اشوف بعيون ناي الخوف وادري اتضم عليه يمكن هيه خايفه اكثر مني بس تسوي نفسها طبيعيه

ناي : دنكت بست راسها يله بلسباعيه اقري

شرهب : وانتي

ناي : واني هم جيبي ذني الكتب خلي اقرا

كعدت اسوي نفسي اقرا علمودها حتى لتخاف اكثر عيوني بلكتاب وعقلي ومشاعري ضايعه ادور عليه طبت بان : علينا

بان : هاكم

ناي : شنو هاي

بان :  نساتل طيبه اشتريتها اليوم وحسبت حسابكم

ناي : شكراً مااريد مجوعانه

بان : اكلي ليهبط السكر مالتج من الرجف والبجي والعياط مال قبل شويه بس والله طلعتي قويه شنو هااي رامبو خيه اني كلت راح تهف مهند براشدي تصوفر اذنه

ناي : ابتسمت بقهر وكتلها تالي هو ضربني

بان : على اساس قصرتي انتي هلمره صوتج صار اعلى وتهددين الصراحه عجبتيني ولو عمه خوله هنا جان صفكت الج وحضنتج وكالت تربيتي

ناي : ههههه كومي بان  مالي واهس اضحك حبابه

بان : لتتشائمين الواحد لازم يتفائل بلخير رغم كلشي وبيد الله لو اجتمع الجن والانس ويردون يضرون واحد ميضروه اله بأذن الله ويونس ماعنده اذيه ولخاطر دعائكم راح يرجع شوفي شرهب شون خايفه من تشوفج تعبانه تتعب وياج واني هم والله أتأذه وياكم هو هم اخويه لتنسين ماعندي احد غيركم وشيصير بيكم يصير بيه حتى الدوام طفت فرحتي منه لان انتم مقهورين

ناي : اعرف گلبج طيب وتحبينا ولتطفين كومي حظري ملابسج والله يوفقج واشوفج احلى مدرسه وادرسين للطالبات وتعيطين عليهن

بان : مابيه خير وداعتج من اول عيطه يجوز ابجي اذا عاندن مااتحمل

ناي : تتعلمين شاطره اعرف بيج

بان : هااج لتردين ايدي اكلي شويه

ناي : اخذت النستله وفتحتها انتبهت شرهب مااكلت  اله اني فتحت النستله مالتي

كملت قرايتي ولا حرف اتذكر بس حتى يمشي الوكت وشرهب قرت ونامت وبان حظرت كلشي للدوام مالتها

مكدرت تغفى عيني ومصيره مااعرف وين طلعت اتمشى بلهول ماكو احد الكل نايم ومهند مبين اباوع الوكت صار ساعه ١٢ بليل هذا وين راح الثاني ردت بس خبر عنه

انتظرت لل٢ وماكو تالي صعدت للغرفه وبقيت اتگلب وشوكت غفيت مااعرف

كعدت الصبح نزلت اشوف اكو خبر شى محد يعرف لكيت الكل موجود استغربت مو من عوايدهم ساعه ٧ ونص الصبح الكل موجود والاغرب اندكت الباب وطب جوحي وساهره ومرتضى لزمني گلبي صار شى اكيد

اباوع بوجوهم اريد واحد يبرد النار البيه

شصاير

بديعه : والله لايمه ماادري كعدت من النوم حتى احضر الجن الريوك لكيت مهند مكعد ابوه وامه وداز على عمه

ناي : باوعت على مهند شصار احجي

مهند : لكيت يونس

ساهره : واحنا شكوو داز علينا من الصبح لكيتو بيها الخير شداخل بجيسنا

ناي : وينه

مهند : بلسجن

عمشه : ياطركاعه  ولفت علينه الوليد شدخله

مهند : اخر مداهمه بلتحقيق جايبين اسمه وشاهدين عليه

ناي : انت مو كلت راح يبقى شاهد ومينظر

مهند : الشغله جبيره  هاي عصابات كتل وتسليب وتصفيه كولي  الْحٍمَدٍ للـّہ تلاحك لروحه وبلغ تدرين لو محاجي شئ يروح بلرجلين

عبيد : وهسه شفتهمنا جاسم شجابه بلنص

مهند : يشتغل وياهم وجاسم عيونهم بلبصره وذيج الفتره صارت وشه عليه وفلت لبغداد وكمل شغله وياهم وكع بيده يونس وجر رجله 

ساهره : لاتذب تهمه على خالك شجاك تره جاسم ماكو انظف منه

عمشه : بيش حگه هذا منهي نظيف جويسم چا ريحته فايحه من البصره لهنا عبنه نكس وكل سوالفه عوجه وانتن دومجن ادافعن اله انه من زمان غاسله يدي منه عبنه غدار وموش زلمه حوك انلام من اسميه اخيتجن الثالثه

صالحه : بله عمه رحمه لموتاج اسكتي مو وكتها هسه وانت مهند منين جبت هذا الحجي شون تنطي بخالك هذا مثل ابوك وسنين عايش يمهم هاي جزاتها فوك متوكف وياه وانت تعرف شكد يحبك تحجي عليه وتساعد يونس يبلغ عنه

مهند : واني مااحبه ودوم مشاكل وياه لو نسيتي ومامتبلي عليه هذا الصار واكثر من مره من تجون للبصره بيبي غنيه تشكي منه وتعرفين انتي وخاله سوالفه كلهه ليش تسون نفسكم اول مره تعرفون ومصدومات كله على ايدجن وانت عمو جوحي مو كلت لابويه اريده يطلع من بيتي اخاف يوكعك بهبيه لو يجر رجل مرتضى لهذا شغلت مرتضى بلمحل حتى ميشوف خاله ويحتك بيه

جوحي : ماكو هيج شى اني مردته يمي لان يصرف وميساعد بمصرف البيت مخلصها اكل وشرب بلاش

مهند : هااا يابه شو عمي يجذبك

عبيد :شتريد مهند تريد نتعارك من الصبح هسه جاسم وطفر وله شكوو بعد

مهند : بقى ابن اخوكم بلسجن

جوحي : من سوالفه محد ضربه على ايده هو راح وياه هسه مو مرتضى مو انته مو خالكم مجان مشيتو بطريقه

مرتضى : مامشينه لان نعرف سوالفه وانتم هم مخليتونا ومثل مكال مهند انت حرت شسويت حتى بس اشتغل يمك وخالي مينفرد بيه ومهند اصلاً من زمان مو على صلح وياه بقى يونس الميعرف گلشي جم مره سألتك يابه يونس شعنده ويه خالي تكولي ماعنده شى لو تكولي ديساعده بلمحل لان يتيم كتلك گلبي لعب ما مرتاح هاي الفتره كلها سوه عطت عليه لتدخل ومالك شغل بيهم

ساهره : جاي تحاسب ابوك

مرتضى : اعرف بيج تعرفين كلشي وساكته بس لو افهم ليش تكرهون يونس شمسوي

ساهره : لا اكرهه ولا احبه ومالنا دخل بكلشي يله كومو نرجع لبيتنا جايه من الصبح وعايفه بيتي عباله شو شصار

مهند : كل هذا ومصار شى الولد احتمال ينحكم لان هواي شهود ضده وهمه عدهم ايد جبيره بلدوله ومال يطلع يونس منها هاي شغله مستبعده كلش

عبيد : وشنو المطلوب من عدنا

مهند : اني خليت صاحبي محامي وبشهاده الضابط نقلل الحكم عليه الرايده منكم جم فلس حتى اصرف على الدعوه ونطلع يونس من الحفره الوكع بيها بسبب جاسم

جوحي : اني ماعندي المحل وشغله واكف شوفولكم غيري

ناي : كاعده وحاطه ايدي على خدي اريد اشوف شراح يصير كل واحد منهم يريد يفلت منها اشوفهم شياطين وكاعدين يسولفون

مهند : لا واكف ولا شى عندك خير من الله لازم تدفع اني لو عندي اجي اطلب منكم فلوس

عبيد : انت مو تكول هو بلغ يعني مينحكم عوف الدعوه هيه تمشي وراح يطلع المن بعد دافع

مهند : اكله الشغله حايكيها عليه اذا مو محامي لوتي ميطلع منها وهذا الشى يرادله مصاريف ورشاوه اذا اني حتى بس اشوفه دفعت ١٠٠ الف

ناي : كمت من مكاني وبلهفه رحت بأتجاهه شفته شلونه

مهند : مابيه شى والله زين وسلم عليكم وكال ليخافون ان شاء الله تفض

فلاح : اني عندي جم فلس اخذهن يابه وربك يعوضني خلي بس يطلع

مهند : وانت عمو

جوحي : شنهي فاتحه وتلمها براسي اكله ماعندي

مرتضى : اني عندي وانطيك

ساهره : يااا انت مو جامعهن للسياره بيضت عينك وانت تجمع بيهن

مرتضى : الفلوس مالتي واني حر بيهن فد شويه اروح واجيبهن الك يجوز مو هوايه بس احسن من ماكو

ساهره : خوش والله هو يسوي مكسوره بكبر راسه ويصخم وجهنا واحنا انذب فلوسنا عليه يطبه مرض شيصير بيه شنو صغير ونعلمه جان المفروض نتبره منه على السواه

صالحه : مهند اطلع منها مالك دخل يمه واخذ غراضك وارجع لجامعتك وراك امتحانات وتخرج عوف هاي السوالف كلها والي من ايده الله يزيده بيه خير خلي يطلع نفسه منها

مهند : شون اعوفه اذا مااطلعه ماارجع لو اعرف السنه تروح مني ميهمني

عمشه : الله يهد حيلجن تعرفن گلشي ودفعتنه على اليتيم چا الله منين يشويجن لومتن عساها بختجن لا تتهنن لا دنيا ولا اخره

اخيجن ذبه بنگره وانتن اطمن النگره وماتريدن ولد عمه يساعدوه وانتم چا واحدكم شواربه ينحلف بيهن ساكتين ونسوانكم ترادد عبنكم غمان ومخرگنين ضاله كل وحده بيهن تسوحل يمنه يسره بشواربگم  وفالحين مالنه دخل وموش ذنبنا چا ذنبي انه الخلفتكم يلسكط اسمعوني عدل والحسين الشهيد والضيچه الوكع بيهه اليتيم ماتساعدوه ابيعن البيت وفليساته انطيهه لمهند يطلع يونس من ضيجته وانه اخذ الباكي واشتري عسى ما غرفه وألمهم  بيهه وانتم تحيرون برواحكم ويطبگم  عرج  عساكم تشرتو مايرفلي جفن

صالحه : خوش والله صار يونس اهم من عدنا

عمشه : چا انتم ونعالي شمحصله منكم كضيتهه فگر والسحوره والقهر وحرگان افادي

ويوم ماتيسرت عليكم كضيتوهه حرام وچمالتهه وماتذكرون امكم لا خليتو حشيمه ولا كدر وانه جدامكم حبوبه مهند سالفه ابن عمك ماكضت ومانطوك فليسات تعال ليه ابيعن البيت وطبهم حريشي لا اريدن منهم لا بخيرهم ولا شرهم وفض گلشي

وبذاك الوكت وحك كل تعبي بيكم اتبره منكم ليوم الدين ومااشوفن وجهكم وماتوكفون على جنازتي انه مره حلفت وحيدتي شردت مني وانتم موش اغلى منهه تولون ماتهموني

جوحي : يمه على كيفج وكعتينا دك انطينا مجال

عمشه : انت اسگت ابوراس البله عبنك دجاج تموت وعينك على الزبل چا المن تجمعهن  للنايمين للظهر تركض وتلهط وتاليهه متر بمتر وماتفيدك فليساتك لون ابنك موش تصرف دم گلبك ولو انت مابعينك لا ولد ولا شى غير الفليسات ماتعرف امك وابوك هنه

جوحي : انطي هذا هو بس اسكتي

عبيد : واني هم انطي ولتبيعين كلشي

عمشه : موش فضل منكم غصبن عنكم عبنه الطاح ولد اخوكم والطيحه نسيبگم ونسوانكم وانتم تدرون ومانعتو وگلكم تحملون الصار ويله فضوها مااريدن اشوف وجوهكم التسد النفس ضيچتو خلگي

ساهره : والله مو حق هذا هلمره من جيبنا ندفع كومه فلوس

عمشه : من اتجيبين ورث غنيه العوبه عود رفعي رجولج من الكاع وتشرطي هاي موش منج ولا من اخيتج يله ولي لبيتج ومااريدن تجين بابي مسدود بوجهكم وانتي الثانيه تشوفين اخيتج ترحين الها وتولين هنا مالهه مجان

ساهره : ومن يريد هذا البيت عساه بلحرك

ناي : خلت وطلعت وعافت جوحي ومرتضى

كمت من عدهم وكعدت بلمطبخ صافنه على حالنا اكيد يونس راح يتخبل لان صرفو عليه اعرف حبيبي نفسه عزيزه

بديعه : شبيج نايه

ناي : راح يتخبل يونس من يعرف الفلوس منهم

بديعه : طبهم مرض كله منهن يدرن بأخوهن هيج دربه وسكتن وعبالهن يخلصن من يونس همزين مهند وكف الهن

ناي : كون وره هذا التعب كله يطلع

بديعه : الله كريم يطلع ان شاء الله

مهند : ناي حضريلي ملابس اله وملابس داخليه وخاولي حتى اوديهن

ناي : اي كمت بسرعه حضرت كلشي اووف ياخويه ابوس بملابسه وحطيت بلوزات حتى ليبرد

نزلت وانطيته غراضه ومرتضى راح ويااه

جنت اتمنى ميعوفوه ابد لحد ميخلص كلشي

المحبوس يدور ساعه الحريه يشتريها بروحه وميعرف قيمتها اله من يفقدها هذا اني محبوس بين اربع حياطين ويه ناس اشكال ومتعرف منو على الحق ومنو المجرم ايدي على الباب انتظر الفرج وكت ماطلعت من البيت اتوسك وشالوني من راس الشارع كلت انتهيت ومن عرفت افترت السالفه عليه خفت ذوله ناس كبار ودربي غير دربهم وشكد مااكون على حق عدهم قابليه يگلبوه باطل بفلوسهم ونفوذهم

اول مره من اشوف مهند افرح توقعت محد راح يعرف اني وين ولا احد يسأل عني اذا اني بنصهم عايش ومحد بيوم كال شلونك مو عاد بلسجن وتفاجأت من شفت مهند ومرتضى يركضون على شغلتي رغم مااحب احد يسوي فضل عليه بس هلمره السالفه تختلف مو وكت عزيه نفس لان تكلفني سنين من عمري

كل همي جان خواتي ناي وشرهب وعيشتهن منو الهن ومن اتخيل نفسي محبوس هنا اكول   راح يبطلن من المدرسه ويروح تعبي كله

كاعد بين ١٥ واحد كل واحد قصه شكل بيهم الظالم وبيهم المظلوم ومن اصفن على حياتي وكلشي مر بيه اكول اني شسويت بنفسي ليش هانت عليه ومفكرت بروحي لوين ردت اوصل من ضحيت بنفسي لخاطرها ونسيت اهم شى خواتي ومحسبت حساب بعدي شراح يصير بيهن مرات غلطه وحده تصحيك على زمانك بس هاي الغلطه تكلفك كلش هوايه ومتكدر تدفع الثمن ولازم تتحمل كلشي يصير وتسد حلكك وتتحمل الصحوه جانت متأخره وبسببها كلفتني سنتين من عمري بلسجن بين اشكال النماذج السكرجيه والشمامه والقتله والمجرمين بكل الانواع سنتين لازم ادفعهم حتى اطلع يونس ثاني ودعت بيها اخر قطره من طيبتي

ناي : شهرين  ونص يركضون على شغله يونس حتى مهند ومرتضى عافو كلشي والتهو بيها والمصاريف هوايه وكل كم يوم تگب عركه وتاليها جوحي وعبيد يستسلمون وينطون وخاصه مرتضى ومهند جانو واكفين الهم مثل السجينه بلخاصره

وصدر الحكم بعد شهاده الضابط وتقدير لعمره سنتين انحكم مع الاسف بسبب تأخر القضيه تحولت شغلته من الاحداث الى السجن العاام لان عبر ١٨ سنه وانحكم گانه بالغ

يوم مسمعت الخبر جانت صدمه اليه سنتين مراح اشوف اخويه سنتين راح انحرم منه ولخاطر منو  ولشنو التزمت الصمت وتركت كلشي دراستي واختي وكلشي لو نايمه لو ساكته وايدي على خدي

شرهب : يوم بعد يوم ناي تتعب الوجهه صار اصفر ومتحجي ويه احد واكلها قليل ودوام مداوم وحتى متجاوب اذا احد حجه وياها جان حالها بلنازل  اني مااعرف شوكت يرجع يونس بس سمعت دخل السجن وراح يبقى سنتين

يجوز بسبب عمري مامقدره الوضع الاحنه بيه بس بنفس الوقت اعرف مراح اشوف اخويه بهاي الفتره كلها

ناي : متمدده وعيوني بلسكف حسيت احد يباوع عليه درت وجهه شفته مهند بقيت على نومتي لان متغطيه ومطالع شى مني لهذا مهتميت

مهند : راح تبقين هيج مبقى شى للامتحانات النهائيه مالتج راح تضيعين السنه منج

ناي : وهو هم راح يضيع سنتين منه

مهند : وتالي وياج ناي كلنا حاولنه نحجي ومتسمعين المن تعاندين نفسج ولشنو تعاقبيها لو يونس موجود يقبل تسوين هيج والله لو يدري يگلب الدنيا عليج

كومي غسلي وكعدي اقري مبقى شى للامتحانات تلاحكي على البقى وهمزين هاي السنه فالتو ميركزون حيل على الحظور والغياب واني اكثر من مره رحت للمديره مالتج وشرحت حالتج وقدرت مشكوره بس اذا بدت الامتحانات تره متقدر تطلع الشغله منها

ناي : انطيته ظهري ومحجيت شى

مهند : اني راجع للبصره امتحاناتي راح تبدي وبالي يمج وحاير شسوي ابقى هنا لو اروح

ناي : انداريت عليه وكتله روح لكليتك

مهند : وانتي

ناي : ماعليه شى مراح اموت تره

كعد بمستوى نومتي وتقرب مني وكاال

مهند : ليش احسج كارهتني حتى بوجهي متباوعين والله وعيونج هاي سويت كل الاكدر عليه والذنب مو ذنبي

ناي : روح لدوامك الله يوفقك

مهند : جاوبيني ناي انتي تكرهيني مو

ناي : رفعت عيني وصرت عين بعين ويااه وكتله

مااكرهك وبنفس الوقت مالك اي مشاعر بداخلي

مهند : يعني شنو

ناي : يعني روح لدربك والجنت متأمله راح

مهند : مااخذ بكلامج اعرفج تعبانه

ناي : الي ينبني على غلط ينهدم بسهوله واذا بيوم اثوليت وفكرت بيك مااعيد هذا الشى نسيت انت ابن منو ومنو امك وابوك وشنو الصار بسببهم وبعد سالفه اخويه انتهت صفحتك من حياتي تبقى ابن عمي وبس ومشكور مقصرت على تعبك ويه يونس

مهند : من يبرد صوابج احجي وياج هسه الحجي وياج ضايع وحطي بالج انتي اليه برضاتج غصب عنج اليه

ناي : درت وجهي ومجاوبته وطلع وركع الباب

سراب صحراء وكلها رمل وزرعها عاگول هذا اني ماعندي شى انطي حياتي بيوم وليله تحولت

مصحيت اله على عيطت شرهب وكمت من فراشي وبذاك الوكت حسيت اكول من برگبتي ولازم احافظ عليها طفرت اريد اشوف شبيهه

شرهب : عوفيني گتلج مو اني اخذتهه

صالحه : جذابه حراميه منو اخوج اكيد تعلمتي منه

شرهب : اخويه احسن منج

صالحه : بت الگلب تعيطين عليه

ناي : لتسبين مااسمحلج

صالحه : هله والله صحيتي من سباتج وعكفتج

ناي : شبيج شرهب

ركضت عليه

شرهب : تكول جزدانها ماكو واني معليه بيه ومشفته

ناي : مو تكولج مشفته ليش تذبيها براسها

صالحه : لان اعرفها عينها فارغه واكيد باكته حتى تاخذ الفلوس اليه بيه

شرهب : اني مو حراميه

صالحه : حراميه وچلبه واليوم انعل والديج اذا مرجعتي الجزدان والفلوس الي بيه

ناي : اذا سبيتي بعد ارجع المسبه لتنسين ابويه وامي ميتين

صالحه : شونهم عااد ملائكه الرحمه اسمعن لجن اذا متجرن عدل الزمجن الشارع اديحن بيه واخلي الرايح والجاي يلعب بيجن

ناي : مو احنا سما ويلعبون بينا

جان تضربني وجرت شعري دفعتها حييييل عثرت وانلوت لابسه شحاطه كعب عود هيه صغيره كوه تسوي روحها بعدها شابه بلويه اختل توازنها وكعت على راسها وعاطت

بديعه : لجن شصار

شرهب : وكعت عمه وحيل بيها

بديعه : امشن روحن يبووو شراح يخلصنا كومي صالحه

صالحه : اليوم يجي عمجن والله لا اخلي يلعب بيجن طوبه

بديعه : عقلج ويه عقلهن

ناي : صوتنا عالي وصالحه تبجي من رجلها متكدر تكوم وعمه تساعدها جان اطب سما لابسه عبايه والوجهه ازرك احمر والشعر منكوش كعدت بلكاع تلطم وتصيح يمه الحكيني

من شافتها هيج صالحه نست حتى رجلها وكامت على بتها احنا هم ردنا نشوف شبيهه لان حتى ملابسها مشككه عليها والعبايه ساتره حالها

صالحه : شجاج يمه ومنو سوه هيج بيه

سما: هذا الناقص قاسم شبعني گتل يمه يجيب گحاب عنده شقه وتالي طلع متزوج وجابها يمي ويكولي راح تعيش وياج واذا فتحي حلكج اكطعج تكطع من مقبلت ضربني ولزمني الشارع ولوما جيرانه سترت عليه وانطتني العبايه وفلوس التكسي جان الله اعلم شصار بحالي

ناي : ابتسمت بشماته حقي اتشمت وجان اسمع هلهوله تضحك انداريت شرهب تهلهل وتصيح حيل هاي لان أذيتي اخويه تستاهلين تف عليج وانهزمت

صالحه : جيبوها اليه بت جليله العايقه

ناي : حيري بتج وعوفي بت جليله وذكرى وهاااا سما  الْحٍمَدٍ للـّہ على سلامتج تعيشين وتاكلين غيرها هههههههههه

عفتهن وحده تعد والثانيه تغلط واني اضحك وعمه بدعه حاصرتها الضحكه مبين مثلنا متشمته

قررت من اليوم اصحى وارجع ادرس واكمل هاي السنه واساعد بيبي بلمحل خطيه هيه لزمته بعد روحه يونس وتكفلت بعيشتنا لازم اوكف ويااها

بعد شهرين فرحانه بلنتيجه مالتي ناجحه وشرهب وبان مثلي

مضاع اي تعب النا

هاي الفتره هدوء بلبيت وسما بقت زعلانه وزوجها حتى مااجه يصالحها وعمه بدعه وصتنا مالنا دخل بيها وفعلاً ابتعدنا كلنا بحكم دراستنا بس انام واكعد ويونس بگلبي ومشتاقه لشوفته وصوته وكعدته ومرات من اشتاق حيل اروح انام بمكانه

اجت شرهب تتسحب بهدوء وكعدت وجهه مو راحه هاااااا شسويتي

شرهب : ما سويت

ناي : شرررررهب شكووو

شرهب :اكو واحد جانت تحجي ويااه سما بلباب مدري منو

ناي : خاف زوجها اجه

شرهب : لا وانطاها ورقه وراح وهي قرتها وضمتها وبقيت اراقبها وبگت الورقه هاااج

ناي : مو حرام تبوكين شون اطبين بغرفتها شو جيبي فتحت الرساله وبديت اقرا جفلت صخام الصخمج فتحت عيووني مصدومه ولعبت نفسي  سما وحماها وعلاقه محرمه بينهم ومكتوب لازم تجين باجر اشوفج البيت فارغ مشتاق لنومتج

لطمت على وجهي

شرهب : هاااا شكووو

ناي : ماكو شى بس سما راح تنداس بلقندره

يتبع .....

#الابواب_الخمس

البارت الاربعون والاخير

للكاتبه Reem

علمني الوكت اصبر على الراح

واعيش بهل الزمن واتنعم بقهري

وأكابر عل الجرح وامسح دموع العين

واجوي النار بيدي وانجوي بجمري

مشيت ويه الحزن من الصغر لليوم

وتحملته رغم طعناته البظهري

وتكول الناس يضحك ابد مامهموم

مايدرون همي مخزن بصدري

الدنيا وياي تمشي مكلوب

تسرك ضحكتي وتتحكم بعمري

ناي : مو حرام تبوكين شون اطبين بغرفتها شو جيبي فتحت الرساله وبديت اقرا جفلت صخام الصخمج فتحت عيووني مصدومه ولعبت نفسي  سما وحماها وعلاقه محرمه بينهم ومكتوب لازم تجين باجر اشوفج البيت فارغ مشتاق لنومتج

لطمت على وجهي

شرهب : هاااا شكووو

ناي : ماكو شى بس سما راح تنداس بلقندره

شرهب : حيل بيها تستاهل

ناي : تعاالي بله اكعدي سحبتها من ايدها وكعدتها بصفي على الجربايه

اريد تحجيلي كلشي وبدون كذب

شرهب : تعرفين اني مااكذب بس اضم

ناي : ادري بيج متكذبين يابه لتضمين زين هيج

شرهب : اي زين

ناي : احجيلي شون عرفتي هذا الولد غريب مو زوجها وانتي مشايفه رجلها ابد وشون شفتي سما اصلاً من اخذت الورقه

شرهب : شوفي خلي احجيلج الصار بس مو تعيطين

ناي : هسه اني معيطه ياشرهب احجي وفضيني

شرهب : شفتي عيطتي

ناي : يله بعد مااعيط حطيت ايدي على حلكي

شرهب : بلال جان يلعب بغرفه سما وكسر علبه مكياج صغيره مالتها

ناي : وشجاب بلال على غرفتها اول تالي يدخل هناك

شرهب : مو هيه من زوجت جان يطب هوايه واني اطلعه وهلمره من رجعت حطت غراضها على ميزها هو كل فتره يطب يلعب بيهن وازعل عليه ويطلع يركض اني اخاف لا يلزموه ويضربوه جنت اسبح وطلعت اجي عليج حتى تمشطين شعري شو هذا طب يرجف وخايف ولازم العلبه بيده عرفت اليوم راح تشوي على راسنا بصل سما وامها وخطيه بلبل مااريد يأذوه

ناي : ليش مااجيتي عليه

شرهب : انتي هم تعيطين وتزعلين اني دورت على سما ماكو عرفت هي وامها طالعين رجعت العلبه لمكانها وانتظرت ترجع وفلتت للمحل يم بيبي واراقب من الشباك مال المحل

ناي : اليشرف على الطرمه

شرهب : اي هو كلت اذا عاطت اختل يم بيبي وهيه ادافعلي

ناي : واذا سألوج منو كسرها

شرهب : هو لازم يذبوها براسي حتى لو بلبل فأني كلت اختل يم بيبي واذا سألوني اسكت وخلي تعيط بيبي ترزلها وتسكتها وتطردها من المحل

ناي : خوش ماخذه بيبي ساتر حمايه الج كملي

شرهب : ضليت اراقب وبيبي مخلصتها سوالف ويه ام ستار وام عبد كاعدات جوه المحل وناسيه كلشي وبالها مو يمي

طبت عمه صالحه وسما من السوك شفت علاليك كومه شايلات شكد يشترن مشايفات ولا يشبعن

ناي : مالج دخل يشترن ميشترن  كملي بليتج السوده

شرهب : بقيت انتظر هسه تگب العيطه هسه تصير هوسه كلشي ماكو ردت اطلع من المحل واجان اشوف سما تتلفت جنهه بايكه بوكه كلت راح تجي وتكطع النعال عليه واشرت مديت راسي اشوف المن اشرت اجه ولد وكف بلباب وجانت حيل خايفه بس كالت اله روووح وادفع بيه ومبين ضايجه لو خايفه منه انطاها ورقه بيدها ورااح

ناي : محد لمحها

شرهب : هي بيبي ملتهيه وجوه بلمحل والشارع مابيه بس كم جاهل

ناي : زين شمدريج هذا مو رجلها

شرهب : مو اني شايفه رجلها

ناي : وين شايفته ولج

شرهب : بصور العرس مو عمه صالحه من جنتي مريضة على يونس طلعت البوم العرس ومكيفه بتها وشوفته لعمه وبان وبيبي وبوكتها شمرت الالبوم بلكاع وضاجت وغلطت عليها وطبت للغرفه اني لزمت الالبوم وشفتها شلونها بين ميخلصن عركه وجانت طالعه حلووة وشفت العريس سمين وعنده كرش شكبره القميص كوه ساده وضليت اضحك عليه وعمه صالحه ضربتني على راسي لان ضحكت عليه ومن شفت الولد اليوم جان طويل وضعيف واصغر من رجلها واهم شى ماعنده كرش عرفت هذا مو قاسم

ناي : يمه الله يستر منج ولج بعدج شكدوتج وتنتبهين على كلشي

شرهب : شنو شكدوتني صرت اول متوسط

ناي : العفو يلجبيره سؤال قريتي المكتوب بيه

شرهب :  هااااا

ناي : كلتي مااكذب

شرهب : واني ما كذبت كلت هااا

ناي : قريتي

شرهب : اني طبيت وراها وهي ركضت لغرفتها وسدت الباب وامها صاحتها وطلعت كلت بلكت الكه الورقه بس فتحت كنتورها لكيتها جوه بجايمها شفتي الثول اكو واحد يضمها هيج مكان

ناي : غير متعرف اكو شيطان يراقبها

شرهب : اني شعليه قابل اني كتلها تصادق اخو قاسم

ناي : اي هيج كولي معناها قريتي

شرهب : اخذت الورقه ودخلت للحمام وقريتها واجيت عليج لان خفت حيل

طبت بان جان تطفر شرهب من الفزه

بان : شبيج ولج هاي فزتج وراها مكسوره

شرهب : هاي شبيكم ويايه كادرين عليه روحو لسما الادبسسز

ناي : اشششش وخزرتها

بان : اوكفي اريد افهم شكو وضعجن مو طبيعي

ناي : اني أمن بيج واعتبرج اختي الجبيره اريد احجيلج بس تحلفين متحجين لاحد

بان : احلف بس شكوو

ناي : هاج اقري

لزمت الرساله بان  وبدت تقرا وجهه انگلب مثلي

بان : لج هاي شمسويه بروحها الغبره

ناي : والله گلبت معدتي من قريت البيه

بان : بس مبين الشغله وراها انه لان كاتب حتى لو متقبلين غصب عنج اجيبج والصار مره يصير مره ثانيه

ناي : وفوكاها كاتب اخويه ممقدر النعمه الهو بيها العنده مره مثلج ميخونها بس هو من زمان زمال ومو وجهه نعمه يعني والله لو مكاتب هيج مجان عرفت هو حماها

بان : شون بله كمت ارجف من الخوف يعني هو هسه وباوعت على شرهب

كومي شرهب حبيبتي انزلي جوه يم ماما

شرهب : شنو قابل ماادري هو اني جبت الرساله

ناي : وابشرج قرتها

بان : ميخالف شوشه شوفي الوضع وتعالي

شرهب : اهووو مو صوجكم اني صوجي جبتها

ناي : طلعت شرهب وجان تكول بان

بان : هذا نايم وياها مبين وخاينه رجلها والشغله لو هو غاصبها لو بعد مصار الشى البينهم تندمت ونفرت منه

ناي: بكل الحالات هي خانت وهسه هو يريدها تجي للبيت حتى يعيدون الصار

شنسوي

بان : مالنا دخل نكعد ونسكت وهاي الرساله انرجعها ولا كأن عرفنا شى

ناي : جريت الورقه من بان  من كل عقلج افوت هيج شى تعرفين هاي شنوو هاي الراح تخلي صالحه وسما مكسورين العمر كله اخذ حق اخويه وامي منهم تردين اعتبر كلشي ماكو نسيتي سوايه سما من وراها اخويه انسجن وراح يخلص سنتين من عمره بين المجرمين والله اعلم من راح يطلع من السجن شون حاله ونفسيته وقبل اخويه امي صحيح ماتت واني عمري ٤ سنوات وماافطن هوايه عليها بس سبب كلشي الصار بينا هي موتتها لو عايشه جان هذا حالنا وفوكاها تهموها بشرفها ولهذا اليوم يصيحون ذكرى حبت حماها يعني شوفي ربج شكد جبير الصار بأمي صار بتها وتردين اسكت

بان : اخاف تفتر عليج ذني شياطين محد ينكدر الهن واي شى يدورن الف دوره حتى يطلعن منها ويجوز تكول الورقه مو مالتي ناي كاتبتها او تذبها براسي بان كاتبتها ويردن ينتقمن مني عبالج راح تكول سما اي هاي مالتي وحمايه دزها اليه اذا تتوقعين هيج معناها قمه بلغباء انتي

ناي : شسوي لعد اسكت واحط ايدي على خدي واني عندي شغله ادمرهن متعرفين شحس من ادخل يوميه بغرفه يونس وماالكاه واتخيل حاله شون تعبان لو من اشوف صديقاتي بلمدرسه عدهن امهات ويجون عليهن واني يصيحولي اليتيمه خطيه ماعدها لا ام ولا اب ومن يصير شى ويحجن على امهاتهن ويتفاخرن يكولن لتضوجين اذا حجينا كدامج لان امج ميته متعرفين حالي والله اكرهه روحي ومرات اطك بجي بسكوت حسيت اليتم عار واني حاملته

بان : غير اخاف عليج ياعيني تتذكرين امي من حجت بسالفه عمه ذكرى كالت شون فرنها للسالفه وامج وكعت بيها اخاف هم يفرنها وانتي توكعين بيها وهلمره لا يونس حتى يدافع الج ولا مهند حتى يوكف امه عند حدها ولا عمه خوله حتى تسكتهن يعني انتي وياهن ند بند واذا امي ادخلت راح يلعبن طوبه بيها ويجوز يستغلن الوضع ويوصلنهه لعمامج وطب متشوفين غير جايبين عريس الج حتى يخلصون من سوالفج الشريره واخاف فلتي ذيج المره هلمره متفلتين لو تنطين

ناي : خلي افكر بيها وانتي خليها صنطه ولتحجين لعمه ابد

بان : ولشوكت بله تفكرين

ناي : اني هسه ارجف من الخوف وبنفس الوقت لعبانه نفسي من الوضع كله

بان : حطي بالج اذا لعبتيها صح راح تنذبح سما واخاف تتحملين خطيتها واذا لعبتيها غلط انتي راح تاكليها بلحالتين لازم تتروين وعلى كيفج

ناي : ليش اتحمل خطيتها اني كتلها روحي خوني

بان : ميخالف بكل الاحوال لتستعجلين

ناي : مااشي

شرهب : مديت راسي هاااا خلصتو

بان : اكص ايدي اذا مجنتي وره الباب تسمعين كلشي

شرهب : بلبل وينك وطلعت من الغرفه افلت

ناي : جنت اراقب حركات سما قل تواجدها وحبست روحها بلغرفه رغم امها تصيحها تعالي انزلي وهي تتحجج بالف حجه حتى من تنزل تاكل ونكعد سوه عيونها على الكل تتنقل

كاعدين على العشا اني وشرهب بصفي وبان وعمه وعمو فلاح وبلبل

والجهه الثانيه بيبي وصالحه وعمو عبيد وسما

شرهب : مديت ايدي انطيت كباب عروك لبلبل يحب ياكله بله خبز

صالحه : خلي ياكل بلخبز شنو هذا التعلوم

شرهب : خطيه عمه ميحبه بلخبز يختنك

صالحه : وانتي شنو محاميه اي واحد يحجي عنه تكمزين شويه ثكل تره كبرتي لا عبالج مثل قبل نكول صغيره وناخذج على كد عقلج

شرهب : شسويت اني

ناي : اسكتي ولتجاوبين

شرهب : جريت اربعه كبابات وحطيتهن بيد بلبل عناد بصالحه هااك اكل

صالحه : شنو هذا العناد اكوم اكسر راسج هسه كلت مياكل هيج اله بلخبز شوو جيب

وجرتهن من ايده

ناي : دمع بلال ودنك واكو لكمه بيده ذبها

عمشه : بت الفگر ام نفس الدنيه عيف الوليد ياكل چا من جدچ وتحاسبين

صالحه : ليش هم رجلي دينطي مصرف ويتسوك

عمشه : رجلج وليدي موش من ابيج أكل يمه هني ومري وعساه سم ينزل ببطون ليغثگ شوو جيبي

شرهب : اني انوش بيبي هااج وشلت الماعون وقربته منها

عمشه : هاااك يمه واريدن اشوف وحيد يتلاطش وياك لا اشيلن الصينيه واركعهه براسه وراس الاسمع حسه بت الفگر مايصيرلها جاره عبن عيونهه ماتمليهه التراب

صالحه : شوكت الله يخلصني واطلع منا

عمشه : يااا انه ادعيلج من گلبي وافتح الفوطه وانذر عبن تولين من داري چا يرادلهه بخت

صالحه : واني هم انذر واخلص مثل ما ساهره خلصت وطلعت منا تفتهم حتى جيه كامت متجي المن جايه على يا ضيم

عبيد : كاافي وخلي نتزوهر لا كل شويه عركه يعني متكعدن بمكان اله تتعاركن

صالحه : قابل الصوج مني لو من امك

عمشه : چا شبيهه امه شحلاتهه مزيونه وترد الروح موش مثل ناس چنهم سمچه طاكه مرارتهه حرامات الفلوس بيهه ماتنوجل تاليهه للزبل

ناي : كمت من الاكل وعيوني على سما حسيت بالها يمي حيل غسلت ايدي وصعدت اجت ورايه

سما :شخبار يونس

ناي : وانتي شكوو

سما : غير ابن عمي واسأل عليه

ناي : خلف الله عليج زين وعايش بأوربا بأحسن عيشه عندج سؤال ثاني

سما : تستهزأين

ناي : لا العفو ست سما منو يكدر يستهزأ بحضرتج عفتها ودخلت للغرفه حسيت سما تعرف الورقه يمي طلعتها من جوه الدوشك حطيتها بصدري وانتظرت لليل والكل نام ونزلت بغرفه بيبي ضميتها كلت مستحيل تتوقع بغرفه بيبي وضميتهه وره الكنتور ورجعت صعدت وبيبي نايمه ولا حست بيه

مر اسبوع واني حايره شسوي وكل مااتذكر السالفه اشب نار حتى اليوم المفروض سما تروح بيه لحماها ولا طلعت من البيت اصلاً

كاعده بلغرفه امشط لشرهب

بس لو افهم ليش متشيلين شعرج تره صار طويل ميصير عايفته كل الوكت مفتوح

شرهب : اضوج من القراصه تأذي راسي احبه هيج هاي كل ماتمشطين شعري تعيدين نفس الحجي من اني وصغيره تكولين شيلي شعرج مو داشيله

ناي : بس بلمدرسه خلف الله عليهم واله انتي لو بيدج حتى بلمدرسه مفتوح واول مطلعين من المدرسه وتوصلين للبيت تجرين القراصه بعتبت الباب اصبري ادخلي غسلي ارتاحي تنزعين القراصه كبل الجنطه والملابس  متضوجين منه كل الوكت مكفش

شرهب : من ينشال عبالك واحد جارني من شعري  احبه هيج

ناي : كومي يله شلته

انفتحت الباب حتى بدون دك واشوف صالحه وسما يدورن

ناي : خير شكوو

صالحه : طلعن محبس بتي لا احرك اهلجن اليوم ولجن مال نيشانها شلون تاخذنه

ناي : محد واصل غرفتها باوعت على شرهب

شرهب : والله مطابه للغرفه

سما : لعد منو باك المحبس اني لو امي ونتبلى عليكم ماكو غيرجن بلبيت كل الوكت وغرفتكم قريبه على غرفتي وهاي شرهب متكعد راحه كل الوكت نازله صاعده هي وبلال اخاف همه اخذوه

شرهب : انجبي احنا مو حراميه ولا ناخذه

جان صالحه تضرب شرهب بسرعه جريتها من ايدها وعطت بيهن لتضربيها ادورين على المحبس الغرفه كلها كدامجن دورن ولتمدين ايدج على اختي

صالحه : خلي الكه المحبس عدجن مو بس امد ايدي حتى فلقه اخلي عمجن يشيلجن مربين حراميه بلبيت ولو منو اخوجن اكيد مثله

ناي : جانت سما ادور بكل مكان حتى بلدفاتر البقن مال السنه الفاتت فتحتها ودورت عرفت كعد ادور على الرساله مو على المحبس لان شيسوي محبس ذهب بدفتر

گلبن الغرفه گلها وگلشي ماكو

صالحه : اسمعن لجن منا لليل اذا مطلع المحبس احرم عليجن المدرسه يعني تخلص العطله ماكو دوام واخلي هذا البيت جحيم عليجن اخاف اني كوه بالعه وجودجن حتى خوش حجه عندي تبطلن واخليجن هنا خدامات كنس ومسح عدجن لليل اذا مطلع راح ابجيجن دم

طلعن من الغرفه بقيت حايره هاي شراح تسوي

شرهب : يمكن ادور على الرساله

ناي : انتبهت موو

شرهب : اي مبين منين راح انجيب المحبس

ناي : ماكو اي محبس ضايع هاي سما سوت بلبله حتى ادور بغرفتنا براحتها

شرهب : وهسه شون

ناي : ماادري خليها تعيط وتهوس ويصير خير

وفعلاً صالحه كومت البيت ما كعدته وكل شويه عيطه واني وشرهب نكول ما ماخذي وبيبي مقبلت عليها

ثاني يوم اجه مرتضى جنت كاعده صافنه بلطرمه اريد حل هم بسالفه المحبس وتهمتهن علينا وهم سالفه الرساله الما اعرف لهسه شصرف بيها طلعت عمه اخذت بان وراحو يأدون واجب جيران جايبه كالت تعالي ويايه غيري جو مقبلت اطلع دايخه ومالي مزاج كعدت وصفنت

مرتضى : شبيهه الحلوو صافن

ناي : هلوو مرتضى

مرتضى : هله بيج شو كاعده هنا مو حار الجو وذبان وانتي تكولين كاعده على الشط ومتونسه

ناي : محاسه بلحر

مرتضى : يمعوده تموز وتكولين محاسه مبين اكو حسبه بالج مخليتج متحسين بشى

ناي : صدك اريد استشيرك بشى

مرتضى : ياالله واخيراً ست ناي تنازلت وراح تكعد تسولف ويايه

ناي : كوم مااريد احجي

مرتضى : ههههه هاي شبيج اشاقه وياج احجي شصاير منو مضوجج

ناي : لا ماكو احد بس عندي صديقه ويايه بلمدرسه اخر يوم من رحنا استلمنا النتيجه شفتها تبجي

مرتضى : اخاف حبيبها ضاربها بوري

ناي : هي مال بوري خلي اكمل وافهمك

مرتضى : فهميني بله

ناي : هاي صديقتي زوجة اخوها خانت اخوها ويه اخوه

مرتضى : بطيخه

ناي : بطيخه شنو

مرتضى : مو حزوره هاي ذكرتيني بعادل امام بلواد السيد الشغال من يدوخ ويگلهم بطيخه من يردون منه يتزوج بتهم هسه انتي نفس السالفه سويتيها عليه فره شطولها بابا احجي عراقي مو هندي

ناي : مو وكت شقاك ركز ويايه

مرتضى : مركز والله بس انتي وحده وحده على اقل من مهلج ياست

ناي : جريت نفس وكتله شوف صديقتي نكول اسمها نور تمام

مرتضى : حلووه بربج اذا حلوه اصادقها بين متحنين عليه وتحبيني

ناي : كوم مرتضى مو صوجك صوجي اني جاي اخذ شورك

مرتضى : ههههه لا بطلت احجي

ناي : نور هاي عدها مرت اخ وهاي مرت الاخ خانت

مرتضى : ويه اخو نور الثاني

ناي : يراد اهلهل اي عفيه

مرتضى : والمطلوب مني شنو الكالهم مكان للخيانه

ناي : يمعود انطي صبر هي لزمت ورقه كاتبها اخوها الصغير لمرت الاخ وحايره شسوي تسكت لو تفضحهم

مرتضى : شوفي هيج وحده حرامات تبقى على ذمه اخوها لان وحده قذره دنت نفسها على حماها الي هو المفروض اخوه

ناي : ويجوز اخوه السبب تحارش بيها

مرتضى : لو هيه شريفه تكول لرجلها وتخلي يطيح حظ اخوه واذا مكدرت تواجهه زوجها عدها اهلها تكول الهم وهمه يحلولها واذا الاهل طايحين حظ تحافظ على نفسها بأن تهدد هذا الاخ تفضحه يعني تشوف الف درب وتوكفه عند حده الرجال ميتماده اله يشوف الوضع مسرتح اله وماكو رداد

وهاي صديقتج خلي تنهي كلشي احسن ماتكبر السالفه وتبلغ اخوها ويطلك مرته لان اذا قبلت على نفسها الحرام ويه حماها سهله تقبل الحرام من الشارع

ناي : هم صحيح

مرتضى : وانتي لتدخلين هيج سوالف اكبر من عمرج

ناي : لا بالله صرت ١٦ سنه ونص وانت تكول اكبر من عمرج

مرتضى : وهاي صديقتج خففي منها حتى لتجرج لسوالف مو بعمرج

ناي : شكراً للنصيحه لازم اخذ بيها مو انت عمرج ٩٠ سنه

مرتضى : لج عمري ٢٢ راح يصير احترمي لا اكسر راسج

ناي : باوعت صفح وهو يضحك سمعنا عيطت شرهب طفرنا اني ومرتضى عليها

شرهب : جنت اعلم بلال الاحرف الانكليزيه ميكدر يحفظ بس هيج اتونس ويااه وين اروح كامو يمنعوني اطلع بلشارع اخلص وگتي وياه كاعده بلهول والتلفزيون مشتغل وعين ويااه وعين على التلفزيون

نزلت صالحه من فوك وسما ويااها  وجرتني من شعري

صالحه : لكيت المحبس بملابسج

شرهب : يامحبس شو وخري 

صالحه : كتلج اذا الكاها عدكم اسود عيشتكم شووو تعالي جرتني حييل من شعري وشغلت الطباخ وتعيط اليوم اله احرك ايدج الي انمدت على غراض بتي دفعتها خفت حيل وعطت جان شعري من جوه اخذ ناار وكمت اكمز

ناي : طبيت لكيت شرهب مفرفحه حضنتها

شرهب : شعري احترك شعري نايه

ناي : باوعت ما محروك هوايه شويه بسيطه الاطراف عطت بصالحه ليش هيج شرايده منها

صالحه : اي عيني تعالي دافعي لاختج هاي اذا مو انتي البايكه

ناي : من البارحه اكلتي راسنا وكتلج مو احنا معلينا

صالحه : لكيته بملابس اختج الگلبه الحراميه

ناي : باوعت على شرهب جانت حاضنتني ولازمه شعرها والخوف مسيطر عليها بس متبجي

ناي : مو اختي شرهب متمد ايدها

مرتضى :  خاله يجوز متوهمه

صالحه : مالك دخل انت اطلع منها اليوم اطيح حظهن ذني عايقات مالهن لا اب ولا ام يشكمهن وجانن متسبعات بعمتك الشفيه وخلصنا منها بس ماخلصنا من ذني

جان يوكف بوجهه مرتضى

مرتضى : مو لكيتي المحبس كاافي

صالحه : اكله مالك دخل روح لامك اريد اربي ذني بالاول

مرتضى : واني مااتحرك منا ومااخلي احد يضربهن المحبس ولكيتي ماله داعي لهاي المشكله كلها واذا غلطت شرهب بعدها صغيره وتتعلم

شرهب : مااخذته والله مو اني

مرتضى : سمعتي خاله مو هيه

صالحه : اي مو جاهله كدامك واصدكها قابل المحبس يمشي من وحده وطب بملابسها

شرهب : هااي سما تكرهني وحطته حتى تضربيني هي حراميه و

جان تلزم حلكي نااي

صالحه : كملي وخري ايدج منها خلي تلعلع حتى اخاف شعرها شويه احترك احركه كله الها

مرتضى : خاله محبسج عندج والبنيه وبعد متعيدها خلي تولي السالفه كلها

صالحه : لا والله ولا اجوز منهن

مرتضى : خوش اصيح بيبي هم حتى تشارك بلشغله

صالحه : لك انت وياهن وياي غير اني خالتك

مرتضى : واني كتلج كافي وسدي السالفه واذا انعادت عود شسوين الج حق

صالحه : هاي لخاطرك اسكت

مرتضى : مشكوره وانتن تعالن

ناي : اخذت شرهب وطلعنا من المطبخ

مرتضى : جيبي مكص

شرهب : لزمت شعري شراح تسوي

مرتضى : اسويج كرعه حتى اتوبين تمدين ايدج

ناي : شبيك مرتضى باوع وغمزلي

تره يخوفج ماكو شى

مرتضى : لج مو غمزت الج ردت اخوفها

ناي : كافي الرعب الصار بيها من وره خالتك

مرتضى : لا والله مااشاقه جيبي المكص اعدله من جوه صار جنه مال طلي من يحركوه مال باجه وريحته تعيط

شرهب : حيييل تأذه

ناي : لا حبيبتي هيج شى كلش بسيط هسه بلمكص يتعدل جبت المكص واصر مرتضى هو يكص عدله الها من جوه همزين مابيه شى جان شخلصنا ورجعت تكمز كدامنا

مرتضى : ام كفشه انتي اخذتي المحبس

شرهب : لا والله وداعت يونس مااخذته

مرتضى : هذا هو صدكتج دير بالجن من خالتي مراح اتوب مبين من حركاتها

ناي :باوعت عليه وكتله اني اتوبها ومن لحظتها قررت احرك الاخضر واليابس وطز بيهم المن خايفه ومتردده

بقينا نضحك ونسولف ويه مرتضى وراح جاب حلويات لشرهب وبلال شفت مرتضى يحب اخوه واستغربت بلال هم يحبه جان بلال ميتقبل من الولد بس يونس هلفتره يحب مرتضى وياخذ من ايده كلشي ويبوسه

سألته

تحبه

مرتضى : غير اخويه الوحيد شون مااحبه

ناي : ليش بعيد عنه

مرتضى : مو اني الي بعدته عني الله يسلمهم الوالد والوالده بس والله احبه واحن عليه وتمنيت يعيش يمنا اقلها من ادخل للبيت مااحس وحدي اشوف حركاته وطيبته تخليني اتمنى وجوده عدنا ولو جان الامر بيدي اجيبه بس تعرفين جوحي مايرضه هو اني لو بيده يلزمني الباب كل مااخذ مصرف فلس زياده وعاط واذا اشتريت لفه وابتليت على عمري واكلتها بلبيت يستلمني ويكرهني حتى بلفه يزقنبني عليها هذا مو اكل بلبيت شنو هذا العفه وانت متخاف الله فلوس سايبه متعبان بيها ويطلع دفاتر عتيكه مال ٢٠ سنه فاتت تاليها اعوف اللفه وانام بليه اكل اكعد الصبح الكااه ماكلها

ناي : ههههههه الله يساعدك

مرتضى : تعلمت عليه كمت اكل واطب التوبه اذا ادخل اكل سفري للبيت عرس بذاك اليوم يصير اشتري راحه بالي كلشي اسوي بره ومن اطب مااسوي اي شى يخليه يعيط

ناي : زين تسوي

بقينا نسولف ونضحك تالي لليل راح

اجت عمه وبان وجنت منتظره بان كملنا العشا وغسلنا المواعين واكفه امسح الطباخ وهمست لبان

لتنامين

بان : نعسانه

ناي : شويه الدجاجه سهريها عندي شغله ويااج

بان : خلي اشر الملابس وانتظرج لو تعالي نصعد بلسطح ونسولف مو احسن

ناي : اي اوكفي مسحت الطباخ على السريع وغسلت ايدي

بان : شيلي النجانه مال ملابس

ناي : مابيه ولج ظهري

بان : لعد مااسمع كلشي

ناي : خوش استغلال

بان : لازم استغلج ابشع استغلال وراج سالفه عوجه مبين

ناي : صعدنا للسطح وانكطع نفسي وهاي تضحك بدت تشر ملابس واني اجر نفس

كتلها شوكت ترحين للكليه

بان : شعندي بيها مو عطله شنو اروح انظفها لو اوزع بيها مي

ناي : انتي مو كلتي لازم اروح علمود عندج اوراق لازم تنطيها لرئيس القسم اخاف تضيع وعيب منه

بان : عادي ضميتهن ومن تبدي الدراسه اوديهن

ناي : اريدج اطلعين حبابه

بان : شنو السالفه نايه

ناي : شوفي اني مااكدر اطلع من البيت ابد ومااندل الشوارع بس شارع المدرسه رايحه وراجعه انتي بحكم دوامج تصعدين نفرات وتندلين صرتي

بان : كولي طلعت وين اولي

ناي : تاخذين الرساله وتوديها لرجل سما

بان : عزه وكعت قطعه ملابس من ايدي بلكااع هااج اتربت

ناي : يمعوده اني ارجع اغسلها

بان : مااطلع لو تملكيني الجنه لج اكو واحد يروح للموت برچله

ناي : والله لو اندل جان رحت اني هو ماكو شى بس تنطي الرساله وتكولين هاي من اخوك لمرتك ضبهم زين وعوفي

بان : هاي اذا عافني اذا ماسحلني بلشارع وخلاني فرجه وتعالي گليلي ياعبقريه وين نلكه رجلها

ناي : انتي مو شايفته

بان : قابل افتر بلشوارع ياناس ياعالم منو شايف قاسم رجل سما نريد نطي رساله نشعل بيه اهل اهله

ناي : ضلي سويها مضحكه واني مشتعله نار

بان : والله بخطتج هاي راح تشوينه واحنا عدلين بابا انسي الشفتي ومالج دخل بيها الله يعاقبها

ناي : والله مايرضى بلظلم واني مجاي اتبلى عليها مثل ماامها كل فتره مسويه بلوه علينا بدتها بأمي ونهتها بشرهب اليوم

بان : اي سمعت امي كالت على صالحه وخبالاتها جان حركتها شكد ماعدها رحمه

ناي : وتردين ارحم بتها الخلت اخويه بلسجن وامي بلكبور فدووة بان ابوس ايدج لترديني وكمت ابجي

بان : ليش تبجين

ناي : لان بيدي اخذ حقهم وساكته ولو مره اريد انام مرتاحه وما مغبون حقنا مره وحده مرايده هوايه

بان : والله اخاف

ناي : حقج بس ماعندي غيرج

بان : كاافي تبجين اوووووف منج دموعج شط تنزل زين كولي قبلت العنوان منين خيه

ناي : سهله هو محله قريب محل عمو جوحي جم مره اسمع هيج همه شون متعارفين لان نفس السوك ونفس العماره

بان : واني اضل افتر عليه يامحل

ناي : لعد شووون لازم توصل الرساله اله

بان : كولي وصلت بعد صعوبات جهنميه منو يكول يصدك

ناي : ليصدك كافي يدخل الشك بگلبه واكيد يعرف خط اخوه اني مرايده يصدك رايده توكع الورقه بيده ويقراها وبس وهو اذا رجال وبيه حظ راح يطيح حظهم

بان : واذا مسوه شى وشگها وسما رجعت لبيتها ولا جن اكو شى

ناي : اقلها اكول سويت العليه وماعفت حقهم اروحلج فدوة بان ساعديني مو تكولين يونس مثل اخوج ترضين حق اخوج يضيع

بان : لا طبعاً شوفي لازم نحط اسوأ الاحتمالات بله اجه مثل الثور وكال هااي جابت الرساله خيه غير يصير كتلي مرافس

ناي : انتي صعبيها اكثر ماهيه صعبه ومليوصه

بان : شري الملابس وخلي افكر كمت اروح واجي بلسطح والجو حار يدبك والبك مسوي حفله علينا اروح واجي وهاي تشر ودمعتها بعينها لج لكيتها

ناي : وين الله وتفض احجي

بان : ادز زهراء صديقتي اني اكيد اذا اريد اروح للكليه امي متخليني وحدي اروح لزهراء اتفق وياها نروح ومن نرجع من الكليه نمر للسوك واخلي زهراء تسأل هو اسمه قاسم حسان يمكن هيج سامعه اسم ابوه

ناي : ماادري بأسم ابوه

بان : سهله وره منلكه المحل ادز زهورتي الحلوة تودي الورقه اول شى تسأل عن قاسم ومن تلكااه تنطي اله وتكوله هاي امانه احنا شنسوي انحط الرساله بظرف ونحط ورقه وياها ولازم تكتبها زهراء بخط ايدها ونكول شوف مرتك واخوك ونسد الظرف بين ميفتح الظرف احنا طافرين طفره البزون من تبوك لحمه من المطبخ وبهيج اذا اجه الثور هد علينا وطلعونا كلنا وسألوه منو من ذني اجتك للمحل راح يكول ولا وحده هاااا شوني

ناي : بشرفي بيج جينات عمه خوله

بان : هههههههه شعبالج من يشتغل دماغي يسوي كوارث والله مشتاقتلها منعرف اي خبر عنها مرات احلم بيها

ناي : واني هم طاكه روحي عليها اريد اطمن عليها مرايده شى الله يطمنا هسه نرجع لموضوعنا

بان : شكوو بعد فاتحه وكل شويه نقره الحمدو انطيتج الخطه وانتهت

ناي : شوكت ترحين

بان : لازم عكب باجر منتأخر لان بعد مااكدر اروح للكليه

ناي : حضنتها وبستها

بان : خوش لواكه ميعبرن عليه

ناي : هههههه والله مو لواكه بس مااعرف شون اشكرج لان تساعديني

بان : صدك ليش منكول لمهند هو هاي الايام على جيه

ناي : لا مراح نحصل شى يجوز صالحه تكذب الرساله وتصير خيره براسنه  وتگلب حتى مهند علينا ماكو غير خطتنا نمشي بيها وانتهى

بان : يله خلي ننزل كتلني الحر ليل وبوخه بلنهار شون

ناي : نزلنا وجنت احسب الوكت بلدقايق واني اكول ربي سهلها

بقينا اني وبان ناكل بروحنا الشغله جبيره واي غلطه انروح بلرجلين تمنيت عمه ويايه جان هواي فرقت حالتي وجان هي حلتها اما عمه بدعه تفتر ورانه وتكول بيجن شى ممرتاحه ودوم نتملص منها حتى لتضل تسألنه

واجه اليوم المنتظرته طلعت الرساله من وره الكنتور وانطيتها لبان وكتلها اشتري ظرف من مكتبه وخلي تكتب زهراء وسدي الظرف بان حييل خايفه يمكن اذا اذبحها من الوريد قطره ميطلع دم منها

بيومها لا تريكت ولا حطيت مي بحلكي منتظره بان  رعب وخوف مسيطره على كل شبر بيه

لحد مصارت ١٢ وربع الظهر جان اطب

جنت منتظرتها بلمطبخ بحجه اساعد على الغدا عمه كالت عينج على الجداري بين مااصلي واجي واني ردتها من الله كابلت شباك المطبخ واباوع لحد منفتح الباب وطبت بان واني ركض

هاااا بشر ي

بان : خلي اخذ نفس يمعوده

ناي : يانفس اني حتى النفس كطعته احجي شصار

بان : لج هذا شنو رجل سما فد واحد عوينجي نصب على زهراء وصجمها الغبي ومن كالت عندي امانه استغرب انطته الظرف وفلتت

واني واكفه الها براس الشارع

ناي : المهم كلشي مشه صح

بان : الله يستر بعد العلينا سوينا واذا قويسم ماسوه شى بعد صالحه وسما اياج تندكين بيهم

ناي : اكعد واسكت شسوي بعد كون يطلع عنده غيره

بان : جنه مطي راسه شكبره والرايحه والجايه يباوع عليها وزهراء اجت لعبانه نفسها منه تكول شون بت عم صديقتج اتزوجته

ناي : ياصديقه

بان : مو اني كتلها صديقتي بت عمها وهي طلبت مني هيج لان مأذيتها مكلت بت عمي هي مرت قاسم الصراحه استحيت شفتها عيب بحقي بت عمي وحده زنت ويه حماها اضطريت اكذب

ناي : اي صحيح صعبه

بان : جوعانه طاكه اريد تصبين غدا وبيدج اتجيبي

ناي : هههههه واني مي محاطه بحلكي تعالي ناكل سوه واكعد شرهب لان لهسه نايمه

لحظات الانتظار صعبه لشخص منتظر ياخذ حقه كل الناس تباوع على الساعه بذاك اليوم لان عدهم مجرد وقت الي منتظر مسلسل والي متواعد والي يريد يخلص شغله وهواي امور اله اني جنت منتظره اشوف حق اهلي بيد ناس مايوم عرفو الله

يمكن اصفن على الصار كله واكول ١٢  سنه من ماتت امي والكل عايش وتمشي حياتهم ولا كأن صار شى دفنوها وراحو ونسو الله حق واذا البشر نسه حقه الله سبحانه وتعالى ماينسى

جنت اتأمل بيوم يطلع حق امي منهن بس الي متوقعته بنفس الطريقه طعن بلشرف يمكن لو واحد مسولفها اليه مثل الفلم او قصه بكتاب او مسلسل اكول من خيال المؤلف لان مامعقوله ينوخذ الحق بنفس الطريقه بس تغيرت الازمان والشخوص هذا الصار تغير الوقت بعد ١٢ سنه عمر طووويل

حيييل لكن الشخوص اعز يعني لو شمراح يصير بصالحه بذاك الوكت مجان تأذت مثل الصار بسما لان صالحه نقطه ضعفها اولادها

ورغم رب العالمين عادل

وَلَا تَزِرُ وَازِرَةٌ وِزْرَ أُخْرَى وَإِنْ تَدْعُ مُثْقَلَةٌ إِلَى حِمْلِهَا لَا يُحْمَلْ مِنْهُ شَيْءٌ وَلَوْ كَانَ ذَا قُرْبَى

رب العالمين ميحاسب احد بذنب غيره حتى وان كان قريب ابوه او امه حتى وان كانو مثقلين بلخطايا والذنوب كل انسان يتحاسب على عمله ولو سما كانت نظيفه وانسانه طاهره وبعيده عن المعاصي ومااطبعت بأمها جان موكعت هيج وكعه لكن هذا زرع صالحه وكلمن يحصد الزرعه

مر اليوم الاول واني اباوع على عبيد كاعد يم بيبي ويسولف والسبحه بيده مسويها كشخه حتى ميسبح بيها وجوحي يلف براسه اكيد يفكر بلفلوس جاي يشوف امه وايد وره وايد كدام وفلاح يتثاوب كاتله النعس وعمه تسوي جاي الهم وشرهب وبلال يباوعون فلم اجنبي واثنينهم كلشي مايفتهمون منه اما اني وبان وحده تباوع بوجهه ثانيه منتظرين نشوف شيصير

بدينا نيأس يصير شى لان هاي اليوم الثاني واي ردت فعل ماكو نزلت صالحه مكيجه وطاكه العبايه الخليجيه والشحاطه ام الاصبع

وسما مكيجه ولابسه بنطرون وقميص طويل ولافه الشال على راسها وتعلج

صالحه : بدعه بدعه

بديعه : هااا شتردين

صالحه : اخاف عبيد يرجع كوليله اخذت سما للمختبر

بديعه : ليش شبيهه

صالحه : يمكن حبله الدوره مجايتها ونفسها تلعب ولو اعرف بيجن ماتدعن الها بلخير ولا تفرحن

بديعه : ليش منفرح الله يفرحها وتطلع حامل وترجع لرجلها

صالحه : وانتن مسمومات ماتدعن

ناي : باوعت عليها وعوجت حلكي معاجبني وكتلها كلمن ياخذ نصيبه عمه

صالحه : وكون نصيبج مثل امج ونخلص منج

ناي : شگت گلبي من كالت هيج بلحظتها تمنيت نفسي اقوى واكبر بلعمر لا الزمها واشبعها كتل

طلعن واني باوعت على بان

بان : مو كتلج ميفيد مصدكتي

ناي : حطينا عجين الكبه وبديت الف ويه عمه مره عدله ومره عوجه هلتجي بيدي اريد افرغ ضوجتي مااعرف حيل الف

طب عبيد يتراجف

عبيد : وين سما وصالحه

بديعه : راحن للمختبر

عبيد : فرغو الهول جاينا ناس

بديعه :منو ذوله

عبيد :كومي هسه وكت سؤالج

ناي : شلنا الصواني والطاوه مال اللحم والعجين ودخلنا للمطبخ دخل واحد مزورك وجهه ورجال جبير

بديعه : يااا هذا رجل سما وابوه بس ليش هيج وجهه

ناي : لزمني گلبي وباوعت على باان اثنينا وجوهنا گلبت الوان

اول مدخلو صار صوت عالي سادين باب المطبخ وفاتحين شويه ومادين راسنا نشوف 

بعدهم يحجون وطبت صالحه الوجهه عليه ضحكه شاكته من الطول للطول

هي شافتهم كيفت جان يكوم قاسم وجر سما من شعرها ودك وين ميوجعها وصالحه تعيط وعبيد يحاول يفك قاسم وابوه واكف يتفرج ولا ادخل كوه سحبو قاسم من عدها

صالحه : انكسرت ايدك ولك مرتك حامل هيح تسوي بيها

قاسم : مني لو من اخويه

عبيد : انجب طايح الحظ مااقبلك ابو قاسم شون تقبل حجي ابنك

ابو قاسم : اني كتلك اخوك جوحي يجي وينه

عبيد : دزيت عليه هاااك اجه

جوحي : السلام عليكم خير شصاير اجيت اركض طب مرتضى وجوحي ومستغربين الوضع

ابو قاسم : ابو مرتضى يوم ماجيت وكلت عندي بت اخويه بت بيت ومؤدبه وحبابه وباب الشارع متوصل اله صدكتك وحطيت ايدي بيدك واخذت مره على كلامك وخليتها مرت ابني رغم اني الغبي مكلت ليش مااخذها لابنه اثاري يعرفها بذره نكسه

عبيد : احترم نفسك من طبيت تتجاوز وابنك يطعن بنتي

جوحي : اوكف عبيد خلي نفهم شصاير ابو قاسم

ابو قاسم : بت اخوك زنت ويه منو ويه حماها شايف انكس من هيج وحده ساقطه وتربيه سكط

عبيد : ماكو سكط غيرك شنو تتعدى على بتي وكاام عبيد وتضاربو ومرتضى عمو جوحي يحاولون يفاككوهم وهذا قاسم عاف كلشي وسحل سما وعياط صالحه هرج الدنيا

ناي : الصوت عاالي وعركتهم تخوف عركه الرياجيل حيل تخوف طبت بيبي تعيط

عمشه : ولكم شجراكم مالكم حرمه للبيت مالكم غيره وناموس تهاددون على ولدي

ام قاسم : احضرينا حجيه

عمشه : يااا يسمع من حلكك الله واحج بيته

جوحي : اكعدو خلي نفهم

مرتضى : عوفها قاسم

قاسم : اذا اگتلها حلال

عمشه : يايمه عيف البت انكسرت يدك چا تايهه ليك هدها وراحت بيبي وسحبت سما من ايده

خذيهه ليغاد

ابو قاسم : لا متروح الحجي كله كدامها

جانت واكفه والشعر مكوش وتبجي وخايفه

جوحي : احجي شصار

ابو قاسم : اني لهسه باقي على صداقتنا وعرشتنا وغيري واحد يسويها بحر دم ويفضحكم بلشارع تشوف حال قاسم من وره بت اخوك لزم اخوه وتعارك وياه وتالي سحب سلاح وضرب اخوه طلقتين بطنه وهسه بلمستشفى حالته حرجه من وره منو من وره هاي الجلبه

عبيد : منو يكول بتي مسويه شى تره حجايه ثانيه اني افرغ السلاح بيكم وانوملك ابنك الثاني بصف الاول

قاسم : احسن ماتهدد ربي بتك هاااك لج ساقطه هاي الرساله كاتبها وسام الج مووو

ناي : اباوع على سما وكعت بلكااع تبجي

قاسم : هاي سوالف الساقطات والدموع متمشي بيه هاكم مرتضى شوف بت عمك اخويه ويااها

مرتضى : منو يكول اخوك يحجي صدك يجوز يتبلى عليها

ابو قاسم : مايتبلى وتكدرون تسألوها

سما : مامسويه شى والله

مرتضى : سما احجي الصدك

كام عبيد من مكانه وراح كبالها يريد كلمة وحده منها تشفي گلبه وتكذبهم

صالحه : بتي اشرف منكم انتم ناس مغلوانيين وتذبون بلاكم علينا متردوها كولو انطلكها وانعل اهلكم اذا دكيتو بابنا بعد

ابو قاسم : لو رجال جان عرفت شون اجاوبج والعتب مو عليج على الساكت ومخلي حرمه تحجي

اسمعوني زين بتكم زنت وابني بلسانه كااال

سما : والله مزنيت هو تعدى عليه

قاسم : هاكم استلمو احجي عيني يلشريفه

صالحه : لج شتعدى اسكتي

ام قاسم : ليش تسكت خلي نسمع مو صاركم ساعه ادافعون عنها

عمشه : من دهر الدهرج چا يطلع هيج منج تسودنتي

محجت بعد سما وبس تبجي وامها تباوع بحقد عليها

عبيد : اطلعو بره وطلكها منريد نسابتكم

قاسم : اني مااريد وحده ساقطه منكم شكد عاشرت كحاب مثلها مشفت لج تعدى عليج مكان متجين تكولين اليه تسكتين معناها عجبج الوضع مووو

ناي : الكل جافل واحد يباوع بعيون الثاني ميعرفون شون يلزكوها هي كالت اتعدى عليه وسكتت وهمه اعتبروها زنه حتى لو غصب عنها

ابوقاسم : كلتو البت حامل والله اعلم ابن منو هذا ينزل اليوم واذا طار النهار ومارهم اليوم باجر ينزل

سما : ماانزله هذا ابني

قاسم : لج اسكتي اااااخ بس لو الزمج اله اخليج وصلتين رحتي شفتي بلبيت موو متواعده ويااه

سما : والله مرحت والله هو اخوك حقير وتحارش بيه

قاسم : وانتي سافله لو شريفه تجين تكولين مو تسكتين لج كال مرتين نايم ويااج ياغصب بعد هذا كاام وجره جووحي وكعده

سما : والنبي جذاب وتبجي وتلطم ومحد داير بال الها

جوحي : وبعد شنو تردون وتسدون الموضوع بليه فضايح

ابو قاسم : اكدر هسه اسويها كعدت عشاير والسوك كله اشهده عليكم وامنعكم العمر كله مو بس من المنطقه حتى من بغداد وحتى بناتكم اذا عدكم مااخليهم يتزوجون وخيركم مااخلي يوصل الباب افضحكم فضيحه بس اني اشرف منكم والي اريده ينزل هذا النغل الي بطنها منعرفه منو وباجر مثل مكلت وقاسم يطلكها واي مستحقات مالها تتنازل عم المقدم والمؤخر وحتى الذهب اتجيبه

والبيت الي اشتريته ياابو سما

عبيد : رفع راسه عبيد متفاجأ

عمشه : يابيت

ابو قاسم : اشترى ابنج قبل شهر بيت بلمعلمين ومكيف بيه تتنازل عنه اليه تعويض عن الخساير الصارت اني ولدي تشردو واحد بلمستشفى والله اعلم شوكت يطلع منها وهذا الثاني اذا شاف اخوه يكتله واني اريد اسفر ذاك وكت ميطيب مااريد يصير بعد دم بينهم واذا سويتها عشائرياً اخذ حتى هدومكم واني مااريد فضايح مو لخاطركم انتم عائله جايفه مابيكم شريف لان معرفتو تربون بتكم اني علمود ولدي وسمعتهم

عبيد : لو تموت مااتنازلك عن البيت

ابو قاسم : براحتك اليوم اربعاء للجمعه اذا مدزيت خبر وافقت على كل شروطنا من ضمنها البيت السبت كوامه وياكم واعتبر روحكم هم فضيحه وهم بتكم تنذبح غير شى ماعندي واحمدو ربكم لهسه الشغله ملمومه وماتضل هيج لوكت طويل شروطي وكلتها ترضون بيها تشترون سمعتكم ماترضون بكل الاحوال اخذ فصل منكم وانعل اهل اهلكم وافرها عليكم اخلي يكولون بتكم هي تحارشت بأبني وكعته بلغلط حتى شهود اجيب بيك زود كذبني وطلع بتك شريفه

جوحي للجمعه انتظر الخبر منك

كووم قااسم مااريد اوصخ نفسي بعد وابقى هنا

ناي : طلعو وبس عبرو الباب عبيد وجوحي لزمو سما كطعوها ولاول مره اشوف صالحه تبجي وتلطم بدون مدافع عن بتها طلعنا من المطبخ لحظتها شفت منظر ماانساه بعمري شون سما بيدهم تصارع الموت وكل واحد منهم يتفنن شون يضربها ويأذيها حتى من صعدوها من الدرج سحل جسمها كطعوه وبيبي وعمه مكدرو على عمامي لان ذبو حركتهم بيها وصالحه تبجي ومرتضى يباوع عليه حسيت بيه يكول انت وراها مووو

مهتميت لوجوده

بقيت بس اباوع على حالها شون محد رحمها وخاصه ابوها وعمو

شكد مجنت حاقده عليهم بلحظتها انقهرت لان اني مو مثلهم ولا مثل گلبهم ولا مثل حقدهم

عيوني لا ارادياً راحت على صالحه وهي كاعده بلكااع وتلطم ومن جانت قبل ساعه كاشخه والمكياج وتتفاخر بتها هسه متعرف وين تضم روحها من وره فضيحتها طلع مرتضى وشويه ورجع وامه ويااه مبين هو كال الها

اجت ساهره وحده كابلت الثانيه يبجن

عاطت بينا ساهره اصعدن لغرفجن صعدنا بدون حجايه لان منريد يلكن حجه توكع براسنا

اليوم الوحيد الي ما عم الهدوء بيه حتى لليل يااما صريخ سما من الضرب والرضوض الصار بيها يااما لطم والنوح مال صالحه بيبي نزلت وعافتهم بدون متحجي شى باوعت عليه ودنكت مدمعه عينها جنهه تكول بينت حوبت امج بس اني امي حوبتها اكبر حوبتها مو بس بصالحه بهذا البيت كله لان كل واحد بيهم هو سبب موتتها

للفجر صارت سما نزيف واخذوها سحل حتى وهي تنزف مرحمو بحالها تكفخ من ابوها يمكن لو مهند هنا مجان انتظر يضربها مباشره يذبحها

خساره عبيد سواء سمعة بنته او البيت الي انكسر ظهره عليه خلاه يحقد على سما بشكل مو طبيعي ويمكن صالحه لازمته حتى ليذبحها

خلال ٣ ايام سقطت سما بسبب الضرب والبيت تم التنازل عنه وعن كل حقوقها وطلكها قاسم

جانت الخساره لعبيد بيت عمرة وسمعته بين اخوانه واهله

الوحيد المجان يعرف هو مهند وطلب من عدنا كلنا منجيب طاري لاي بشر الصار واذا رجع نكول تعاركت ويه رجلها وطلكها واثار الضرب لان حتى ايدها انكسرت وسنونها الاماميه الفوك ٣ تكسرن لان ركعو راسها بايه الدرج كل التشوهات الصارت الها بسبب الضرب لان تجاوزت عليه وفشرت وهو ضربها بقى عبيد يتوسل بجوحي ومرتضى ابد ميحجون وحتى بيبي واحنا كلنا بس ياترى لشوكت راح يبقى مهند ميعرف ومنو من عدنا راح بيوم يفلت لسانه ويحجيله 

بعد اسبوع دموي رجع البيت هادئ بس الگلوب مليانه دم صالحه حاقده على بتها ولهسه متعرف منو وكعها وصل الرساله لقاسم وخاصه سما كالت لامها الرساله جانت عدها وبهذا توجهت الانظار من جديد علينا

ماعدنا غير نسكت وننتظر رجوع مهند وهلمره رجوعه ابدي لان تخرج وراح يبقى ويانه بلبيت خاصه بعد خساره عبيد لبيته يعني راح يبقون عايشين ويانه

ولازم انتبهه مو بس من صالحه حتى من مهند

اما عمه خوله وعمو نجم مختفيه اخبارهم ومنتظره اللحظه اليجي خبر عنهم ويطمن گلبي

ويونس كاعد يحسب الايام حتى يطلع والله اعلم بعد ميطلع شون راح يكون منتظرتك ياابويه وسندي وباقيه محافظه على اختي لاجل عينك

اغسل بلكمبار (فرش) مال بيبي حالتي حاله ومصموطه صمط من الشمس بلطرمه نهايه شهر اب والجو نار وافرك واجتوفي راحن وشرهب تلعب بلزاهي تغسل شويه وترجع تكول تعبت

سمعت صوت سياره وكفت بابنه انتظرت يندك الباب وفعلاً اندك

في ديالى 2005 شهر الثامن

حبيبي وين رايح

غير الحجيه تريدهم 

بطرانه كل شويه وكالت راح اموت جيبوهم اليه

واني رايح اجيبهم

ناي : فتحت الباب باوعت شاب طويل اسمر شعره خفيف حييل شبهه ماكو اكرع ومسوي لحيه خفيفه وشوارب ولابس مناظر وكاشخ هيج نماذج مشايفه الصراحه باوعت عليه كاال

بيت عمشه ام عبيد

ناي : اي منو رايد

يونس موجود

ناي : انت منو

انتي اخته

ناي : اي مكتلي منو انت

اني مهدي ابن خالج فوزي

فزيت من صفنتي الجنت صافنتها اول مدخلت هذا البيت وفتحت الكم بيبانه ( بلبارت الاول )وابتسمت وانداريت وهو يصيحني

_هاااا خلصتي صفناتج

_لا بعد اكو بيبان لازم تنفتح حتى تنسد غيرها لتنسى هيه خمس بيبان

_وشوكت تفتحين الباقيات

_تنفتح مايضل شى مقفول ابتسمت بهدوء ورجعت نظري لكل زاويه بلبيت

لكل باب حكايه وبيباني لم تقفل وبيت عمشه لم تغلق ابوابه

خلف كل باب حب يولد وحب ينتهي وكيد ومكائد ظالم ومظلوم الى اين تأخذنا الدنيا وكم باب ستفتح وكم باب سيغلق

(الابواب الخمس)

يتبع ........

انتهى الجزء الاول بواقع ٤٠ بارت

انتظروني بلجزء الثاني من الابواب الخمس

بدون اعطاء مده حتى لا اخلف معكم من احدد نزولها انزل اعلان

شكراً من قلبي لتفاعلكم وحبكم للقصه

تحياتي لًلًـّــ💎ــجٌٓمٍَُٓيِّعَْٓ

مساء الـ🥀ـورد والهنا اشتاقيتلكم

كثير منكم يعرف كروبي على الفيس ومع الاسف البارحه تم غلقه بسبب ضعاف النفوس

ولان مااستغنى عن لمتكم وجودكم سويت كروب ثاني اتشرف بوجودكم وياريت تضيفون اصدقائكم ومعارفكم حتى ترجع اللمه الحلووة وشكراً من قلبي لكل من يساعد في تكوين الكروب الجديد

اما بلنسبة للقصه ان شاء الله بس تكمل لمه الكروب خلال ايام ارجع معاكم للجزء الثاني من الابواب الخمس

هذا كروب الفيس الخاص بي 👇

البارت الاول/ الجزء الثاني

الابواب الخمس

للكاتبة Reem

رست بينة الهموم و'بَيَن الشيــب

و'مشت بوجوهنة صلفة التجاعيد

صفت عــين المراية تلچم الـروح

تشب حسرات بينة و'ترجع إتهــيد

تغص إصـدورنة بــ'آهات العتــاب

و'نِحِن لأحلامنة و'مرجوحة العيد

گـضينه أيامنة ونـنــطر للأفــراح

مثل عشـــاگ منتظرة المواعـيد

بــ'إخيوط الأمــاني إنشد بالأحــلام

يا مـــغـزل حلمنة إشـــمالك إبـعــيد

تفر بـــينة السنين بـــ'بحر الهــموم

إشما يگرب جرفنة تگــصر الإيـــد

و'رست أحلامــنة بــ'رف الخسارات

لا يرجع عــمرنة و لا بــــچي إيـفيد

هاااا خلصتي صفناتج

_لا بعد اكو بيبان لازم تنفتح حتى تنسد غيرها لتنسى هيه خمس بيبان

_وشوكت تفتحين الباقيات

_تنفتح مايضل شى مقفول ابتسمت بهدوء ورجعت نظري لكل زاويه بلبيت وعفته وكمت

اتمشى بهدوء وعيوني تتنقل على حياطين البيت التعبانه وعلى البيبان المسدوده ابتسم ابتسامه وراها الف حسره والم ابتسامه تخفي مشاعر سنين من القهر والعذاب عيوني تتنقل واباوع للطابق الفوك وكل باب بيه والدرج والبايات مالته 

وترجع عيووني تنزل على الجوه كملت مشيتي الهادئه  وصلت لباب غرفه بيبي عمشه فتحت الباب اباوع الحياطين كاتلها الرطوبه والصبغ الواكع والاثاث على حطته بس كاتله التراب وكل زاويه العنكبوت ناسج بيت اله ايدي تلامس الكنتور والميز وتنرسم اصابع ايدي وطبعاتها على كل قطعه اطخها كعدت على الجربايه الي ياما وياما نمت عليها ودمعتي على خدي رغم وصاخه المكان مهتميت هدومي النظيفه تتوصخ جان شى واحد يحفر بگلبي وهو ذكريات هذا البيت لاارادياً عيوني دمعت ورجعت لذاكرتي لشهر اب وحرارته التصمط صمط وتحديداً سنه 2005

اغسل بلكمبار (فرش) مال بيبي حالتي حاله ومصموطه صمط من الشمس بلطرمه نهايه شهر اب والجو نار وافرك واجتوفي راحن وشرهب تلعب بلزاهي تغسل شويه وترجع تكول تعبت

سمعت صوت سياره وكفت بابنه انتظرت يندك الباب وفعلاً اندك

فتحت الباب باوعت شاب طويل اسمر شعره خفيف حييل شبهه ماكو اكرع ومسوي لحيه خفيفه وشوارب ولابس مناظر وكاشخ هيج نماذج مشايفه الصراحه باوعت عليه كاال

بيت عمشه ام عبيد

ناي : اي منو رايد

يونس موجود

ناي : انت منو

انتي اخته

ناي : اي مكتلي منو انت

اني مهدي ابن خالج فوزي

لحظة صفنت بوجهه واتذكرت عدنا اهل غير بيبي عمشه وعمامي ونسوانهم  عدنا خال وابن خال وبيت جد ثاني بقيت ساكته لساني شبهه انبلع

مهدي : شو صفنتي اخوج وين  اكيد انتي ناي

ناي : مجاوبته وكفت بصفي شرهب وبصوت هادئ مثل تشاورني

شرهب : هذا الحلو منو

ناي : كرصتها اكيد سمعها

شرهب : ااااخ شكلت على كيفج انت منو

مهدي :اني ابن خال يونس وناي خرست من شافتني بله متكوليلي انتي وين يونس اكيد انتي بت عمه

شرهب : لا اني اخته

شرهب : تغير وجهه هذا الولد حسيت يريد يلزمني ويحرگني خنزر عليه ختلت وره ناي هذا شبيهه قابل سبيته كلت اني اخته قابل كذبت

ناي : فزيت من صفنتي جني ثوله واكفه كباله او يمكن انصدمت بعد كل هاي السنين يجون يسألون علينا حتى نسيت عدنا كرايب ختلت ورايه شرهب باوعت بعيون هذا الولد الواكف مخنزر على شرهب

كتلك يونس ماكو

مهدي : شوكت يجي واني انتظره

ناي : متكولي شتريد من اخويه وشذكركم بينا

مهدي : اجيت اخذج انتي واخوج لجديتي لان مريضة وتريد تشوفكم

ناي : لا باالله ليش جديتك على كولتك تتذكر عندها بنيه اسمها ذكرى وهاي البنيه خلفت اثنين زين ذاكرتها حديديه

مهدي : تستهزأين حضرت جنابج

ناي : لا استهزأ ولا الي حجي وياك ارجع لجديتك وكول الها ولد ذكرى ماتو ويه امهم وخلي تقرا الفاتحه واطلع ثواب بأسمنا حتى هم هي ترتاح وهم انت ترتاح من الروحه والجي لان لا اني ولا اخويه نجي وياك

مهدي : الحجي مو وياج مبين انتي طفله وزايده مني واكف وانطي وياج بلحجي يجي اخوج واتفاهم وياه

ناي : لعد راح تبقى سنتين واكف لان اخويه منا لسنتين يله يرجع

واني احجي جان اسمع صوت صالحه

صالحه : ولجن ويامن واكفات بلباب وتسولفن مكاميع

ناي : ردت اسد الباب حتى لتشوفه جان تصير ورايه مثل ابليس

صالحه : ياااا هذا منو ولجن اتجيبن ولد للباب

ناي : ياولد شبيج عمه

صالحه : وعمه العماج كون انت منو وجان بصوت عالي تعالي عمه شوفي بنات ابنج واكفات ويه واحد وطك سوالف

مهدي : هييي انت شنو واحد شنو طك سوالف هو انتي شعرفتي وكمتي تعيطين

صالحه : هيي بعينك بله منو حضرت جنابك الكسيف

مهدي : استغفر الله لوما مره جان عرفت شحجي وياج هذا البيت مابيه رجال احجي وياه

صالحه : ولجن هذا منو النافش ريشه علينا

ناي : انداريت على صالحه وكتلها واحد متيهه دربه وراح يروح

مهدي : انتي الثانيه احجي عدل انطيني مكان اخوج واني اروح اله وبله لغوة زايده

شرهب : اخويه بلسجن

مهدي : شنو سجن

ناي : دفعت شرهب وعطت بيها ادخلي جوه

صالحه : غير افهم انت منو وشرايد من يونس

مهدي : اني ابن خاله

صالحه : صخام بوجهك بس لا ابن فوزي

مهدي : وشبيهه فوزي

صالحه : يبووووووو ولج عمه الحكي ابن گتال ابنج جاي لبابج بكل عين صلفه

ناي : جفلت من عيطت صالحه وخفت تصير عركه وهذا مهدي بليه شى يحجي من وره خشمه ومعاجبه الوضع ومن عاطت عمه ملامحه تعصبت كلش جان تجي تركض بيبي عمشه حافيه والفوطه واكعه من راسها تريد تحطها ومستغربه العياط

عمشه : والغسل لهلكشره شمالج حسج يلعلع جنج صخيله وترافس جوه ذباحهه

صالحه : تعالي شوفي منو جاينه هذا ابن فوزي

عمشه : لطمت على صدرها ياااطركاعت السودة شرماك الدهر علينه يبن جتال ولدي

مهدي : اني جاي على يونس وناي ومرايد شى منكم وبله عياط ماله داعي

عمشه : ولي لديرتك وجفينه شرك لا وروح ابوي المن الوادم عليك وادزك لامك مجسر تچسر

مهدي : (بصوت عالي )شوفي حجيه لا اني جاي عليج ولا على هاي الصار ساعه تعيط وتهوس جاي اخذ ولد عمتي للحجيه ام ابويه ولوما مريضة وبفراش الموت رجلي مااطخ عتبت بابكم ولا اشوف جهرت واحد منكم ولوما انتن نسوان جان هم اليه تصرف ثاني

واذا اكو رجال بهذا البيت ياريت يطلع واتفاهم وياه لان لعبت نفسي من سوالفجن وعياطجن مالي حجايه وياجن

عمشه : بسك ترعد وتلاسن مالك يمنه التنشد عليه ومااريدن اشوفن خيالك بتكم وماتت ومالهه يمنه وليدات چا هاز طولك وچاي وتريدن اشيلن بزرتنه وهاك اخذهم وياك

هيج واطش واهليه لحبوبتك عبنهه نشدت عليهم لا وحك هو علي ماتكرب صوبهم ولا تلمح خيالهم اله اموتهه بحسرتهم عبن انه متت بحسرة ولدي وتيتمو وليداته واريدنهه تضوك سم الجرعته چا شنهي تايهه ليكم

مهدي : استغفر الله ليش تخليني انبش الفات ليش هو منو بده الاول شو تحجين جنه ابنج جان امام جامع وابويه كتله انتي اكثر وحده تعرفين خيسه ابنج وسوالفه وشون كتل مرته يعني شكد شايف ناس باطله مثلج مشايف

عمشه : ابو كراعين يملطوم  چا انه باطله اليوم احرك ابيك الجلب

ناي : اشتغل العياط وهذا الولد صار اعصاب من سبتة بيبي حتى خفت منه وكاام يعيط ويضرب بلباب برجله وجان اشوف اثنين شباب اجو يركضون اول مره اشوفهم

لزمو

عبدالرحمن: يمعود تخبلت شجاك مو عيب نسوان تريد تهد عليهن

مهدي : لك تسب ابويه

صلاح : مره جبيره مخرفه عوفها

عمشه : هاااي امك المخرفه يلمهتلف من خفت هلبراطم دنكت ادور على النعال ولكم وينه اريدن الزكه براسه وراس الخلفه

مهدي : هاااك استلم

صلاح : مشكورة حجيه شووو امشي

ناي : جروه حيل وصالحه مدت راسها جان اسمع عيطت واحد بيهم بس منو مااعرف وطبت وركعت الباب

صالحه : وجع بگلبكم شلون لسانات شفتي عمه ابن فوزي صاير رجال واحوال بس هاي سيارته لو سياره الولد وياه

عمشه : احطج هسه واهطرج وانعل شيب امج انه گلبي موجر وهيه حايره بلسياره كون سيارة بليه رقم ادوس على راسج وتجفيني شرج

صالحه : هو انت بس راكضه ورايه

عمشه : لشتي تراجف هذول شذكركهم بينه 

اسمعن ولجن ماتفتحن الباب ليهم واذا ردو تنشدوني وانه اخزيهم واعزيهم

ناي : اشرت براسي بدون مااحجي

صالحه : كملي غسل يله مو فاض الشارع شكد باردة ومابيج خير

عمشه : عيفيها وكملي انتي تعالي ناي عندي حجايه وياج

ناي : رحت وره بيبي اشوف شبيهه رغم عصبيتها بس حسيت خايفه من شى وجهه اصفر

شرهب : ردت ادخل وره ناي جان تعيط صالحه

صالحه : تعالي انتي كملي غسل اني مااشتغل عند جليله هااج

شرهب : شمرت الصونده والفرجه عليه وطبت

كعدت افرك بلكنبار واسمع صوت رحت سديت المي ومديت راسي شفت الولد بعدهم تلاثتهم واكفين رجعت راسي وسديت الباب بس الفضول كتلني رجعت فتحت الباب وهلمره نص جسمي مديته اريد اشوف شكعد يسوون جان يصيح واحد منهم تعالي يبنيه

درت وجهي للجهه الثانيه اريد اشوف ديصيح منو

عبدالرحمن : انتي ام كفشه

شرهب : اني

عبدالرحمن : اكو غيرج بلشارع بهاي الكفشه تعالي احجي وياج

شرهب : طلعت وبديت اتمشى على كيفي وصلت يمهم

مهدي : عوفها يمعود روحي رجعي للبيت ولطلعين من احد يصيحج

عبدالرحمن : انطي صبر خلي نفهم قابل ناكلها نسألها بس

مهدي : واني من هاي بلذات مااريد اعرف شى

شرهب : بقيت اباوع بوجهه هذا الولد شكد يخوف ومكروه وانداريت ارجع جان اسمع صوت عمه بدعه جانت طالعه للسوك ورجعت

بديعه : شرهب شعندج هنا

شرهب : هاااا بقيت حايره شكول لزمتني عمه حيل من ايدي وضايجه لان طلعت

عبدالرحمن: السلام عليكم

بديعه : وعليكم تفضل

عبدالرحمن: انتي كرايبها

بديعه : وانت شعليك

عبدالرحمن : شوفي خالتي اني ابن خال هذا الولد وهذا الولد هو مهدي ابن فوزي ابن عمته ليونس

بديعه : جفلت من شفته هذا ابن فوزي

عبدالرحمن: اكص ايدي اذا فهمت شى مني المره جمدت

بديعه : انت ابن وداد وفوزي

عبدالرحمن: نعمه من الله ماطول عرفت امك وصلنا

مهدي : اي اني

بديعه : اللهم صل على محمد وآل محمد صاير رجال عين الله عليك عفتك وانت ابن ١٠ سنوات مدري ١١ سنه جنت صغير هطولك

عبدالرحمن: وكبر وصار رجال قابل يبقى نفس الطول رحمه لموتاج خالتي مو وكت قياس طول ورانه ممنوع تجوال راح نبات بلشارع بس دلينه على يونس مو صار ساعه الف عركه تعاركنا انتي كرايبهم

بديعه : اني ام بان مرت فلاح جنتهم ومرت عمهم وسوده عليه ابن عمتك بلسجن

مهدي : ليش شسوه كالت هاي البنيه واشر على شرهب بلسجن ومصدكت

بديعه : سالفه طويله كلش مو مال وكفه انتم ليش هيج واكفين

مهدي : اجيت عليكم وتعارك ويه ام عبيد

بديعه : ليش انت مو تعرف الحال ياابني شجابك

مهدي : هو لوما جديتي اجي لو يصبون هذا الفرع ذهب ماادخله

بديعه : ياعيني ياام ذكرى بعدها عايشه والله مره طيبه وبت اوادم

مهدي : وحالتها تعبانه ورادت ناي ويونس تشوفهم وتبجي ليل نهار عليهم

بديعه : مراح تقبل عمتي لو تنگلب الدنيا البينا ياابني دم ومايصير الدم مي ارجع لاهلك ولعائلتك وانسى هذا الدرب ميفيدك

مهدي : ليش هو اني اريد هذا الدرب بس ااااخ كله من وره الحجيه

بديعه : ارجع ابني وكول الها ملكيتهم مسافرين اي حجه حتى تبرد راسك

مهدي : ويونس شون اوصل اله اريد مكانه بيا سجن محبوس

بديعه : هسه اجيبلج المكان بورقه وادزه بيد شرهب بلكت من يشوفك يحس عنده عزوه وظهر اوف لو تعرف هذا الولد اشاف من ضيم وقهر

صلاح : شنو تهمته

بديعه : يمه اني اجيب الكم مكانه وانتم روحو اله وافتهمو منه

تعالي شرهب

ناي : دخلت بغرفه بيبي وكعدت على الجربايه

عمشه : حطي وذانج وياي والچلمه تحطيها هنا براسج

ناي : شكو يابيبي احجي

عمشه :تنسين هذا الوليد مالكم اهل غيرنا لا تكربين صوبهم ولا يكربون صوبنا

ناي : بعد راح وانطرد شراح يرجعه

عمشه : يرد يبت صمد يرد انه شفتهه بعيونه هذا الوليد ماينكحم وراه طلايب والبراسه مايهود اله يسوي

ناي : راح بيبي ارتاحي واذا رجع اطرده بس اكعدي ترجفين

كعدت بلكاع وفتحت الفوطه وشمرتها

شردكم علينه چا انه ماعودت خلصت وبرد راسي منهم وينج يخوله چا من اريدنج تولين

ناي : اول مره تجيبين طاري عمتي اكو شغله براسج بيبي احجيلي صاير شى

عمشه : ميلي مني اريدن اگعد وحيدي

ناي : ماشي عفتها وطلعت شفت عمه بدعه رجعت وشرهب وياها صعدن فوك ورجعت شرهب نزلت بيدها ورقه طلعت وراها شفتها انطتها لمهدي اي يمكن كال اسمه مهدي ومن اجت شرهب كالت عمه كتبت مكان يونس مهتميت

وفتحت المي وكملت الغسل وشريت الفرش والف حسبة بالي

بليل اجوي عمامي كلهم وياهم مرتضى كلها كاعده وعمشه مجتمعه بيهم صار فتره مكاعدين هيج من سالفة سما

عمشه : اسمعوني گلكم هذا ولد فوزي يحومي على ولد المرحوم اريدن منكم لاتنطوه وجهه وان تعاند طكوه

صالحه : وشلنا بهاي الطلابه ياعمه يريدهم ياخذهم بلكت يطلع الهم ورث صخام نستفاد منهم بس اكل ونوم مسوين البيت فندق

عمشه : اركدي يصالحه لااحش زردومج شنهي كاعدين بيت غنيه وماكلين من خير رجلج چاالج عين وتراددين سكت مرتك يلجبير يلبعير چا الزلم ساكته والنسوان تلعلع

عبيد : يمه مخلصه من سالفه يونس هلمره ابن فوزي خلي ياخذهم ويخلصنا

عمشه : اي حكك موش انت تنگل بلخير والمسواك وتريد تبرد راسك من انهجم راسك انه لو منك اطمن روحي عبن سوايت بتك

صالحه : بله عمه حيري بسالفه ولد صمد وعوفي بتي بحالها لا كلشي وعيرتينا هي مو بت ابنج مو حالها حال ناي وشرهب لو اله اتمعشك مثل امهاتهن حتى بتي تعجب

عمشه : مايحتاج يبت غنيه بتج كفت وفت ويه حماها عووووع وغمه ولطم بمكبره كلها عكارب كون تكرص دودتج انتي وبتج

عبيد : يمه رحمه لابويه كااافي ادك على راسي احرك نفسي حتى ترتاحين وادفنيني بصف صمد مكافي ضاع تعبي تجين تكمليها عليه وكل شويه تذكريني بسالفه سما مو حلفت على القران وكالت اتحارش بيه

عمشه : چا انه ماابلعها انت قشمر چا انه مثلك ماصير

جوحي : جمعتينا حتى نتعارك لو نتفاهم يايمه فضيني تعبان واريد ارجع انخمد

عمشه : چلمة وكلمن يرد لمجانه مااريدن بيوم ولد صمد يحطون رجولهم هناك ولا ام ذكرى تلمح خيالهم چا انه مكسور ظهري عليهم وهي تاخذهم وتصير حنينه وتحش بروسهم علينا چا اموتن ابرك

جوحي : صار يمه تأمرين يله ساهره تعبان

عمشه : اريدن جم فلس منك

جوحي : منيلي احد كال الكم فاتح كاك مال فلوس مكافي مهند اخذ كومه مني علمود يونس

عمشه : وعرج كون يطكك وتذب كل فليساتك ومااطيب چا انه موش امك واريدن هدمه ليه چا بس تعرف تحش براطم سهيره

ساهره : خلصتي منهم كلهم واجيتي عليه

عمشه : تنطيني يو لا

جوحي : انطيج يمه بس اسكتي ولتتعاركين

ناي : بيومها الكل كاعد يسمع لبيبي كلها ما مهتمه بلعكس يردون كون انروح بلكت نحصل ورث شى منهم اله عمشه تتخبل اذا سمعت بطاريهم

كلمن راح لغرفته وجوحي اخذ مرته وابنه وراحو

اسبوع هادئ جان ايامنا مثل ماهيه بيبي بلمحل تبيع واني وعمه وبان انظف ونطبخ وسما لهاي اللحظه محبوسه على كد الحمام تطلع

اكثر شى ضل بالي رجعت مهند وخاصه عمو عبيد لزمنا واحد واحد وهددنا منجيب طاري شغله سما كدامه ونكول طلاك عادي وانتهى

ماانسى منظر عبيد من عرف طليق سما وابوه لعبو عليه لان لو صايره عشائرياً مجان كدر يحق عبيد وخاصه سما تكدر تتهم اخوه تعدى عليها وبهيج يصير الحق وياها بس ذولاك اذكياء يعرفون جوحي وعبيد مالهم بشغل العشاير واعرافهم ناس خلصو عمرهم يلمون عتيك وخلف الله على الحواسم خلت عدهم فلوس لهذا تقشمرو بكل سهوله وذاك الرجال اخذ ولده وباع بيته وبيت عبيد ومحلاته وطفرو وضل عمي الشفيه يدك على راسه مثل النسوان اخر شى تعارك ويه جوحي وخلت واحدهم ميباوع بوجهه الثاني

كاعده افلي بشعر شرهب اخاف بيها كمل من وره سوالف بلال بيده دهن ويلعب بشعرها متربعه بلكاع وهيه بحضني وبلال لازم النعال عود يضرب بلكمل اذا اكو واني شسوي حتى ليعيط اكله هاك اضرب يموت على هاي اللعبه انفتحت باب الشارع ودخل بيده الجنط رفعت راسي شفته مهند رجع بعد ما تخرج من كليته جنت اشوف بعيونه لهفه الي بس اني لهفتي طفت مو بيدي كسرت اخويه وضياع حياته خلتني اقفل منه واعتبره ابن عمي وبس

مهند : شلونج نايه

ناي :  الْحٍمَدٍ للـّہ على سلامتك وبلخير التخرج

نزلت عيني ومهتمت وبقيت على كعدتي وشرهب تريد تكوم ولازمه شعرها اكعدي

شرهب : شونك مهند

مهند : انتي شونج شرهوبه

شرهب : زينه

جنت مدنكه والعب بشعر شرهب وهو فوكايه اعرف شمنتظر مني واني ماعندي شى انطي تقرب مني باس بلال وبيني وبينه اصبعين ويطخ بيه حتى محركت عيني وسويت نفسي ما مهتمه اله خله وطب

شرهب : شبيج ويااه

ناي : مالج دخل وكومي اسبحج مابيج شى نظيفه

جريت نفس بخنكه مااريد مكان يجمعني بيه من اشوفه اتذكر حبست يونس كلها عايشه حياتها وهو بأتعس مكان وبسببهم

كمت اتهرب منه حتى اذا نكعد ناكل سوه ابد ماارفع عيني بيه يمكن احاربه بيه او احارب نفسي حتى انسى اي مشاعر باقيه بداخلي اله

جان همي كله بعمه خوله وين صارت وليش ماكو اي خبر عنها ويوم بعد يوم واني القلق ياكل روحي وبسبب تفكيري حتى عمه بدعه بدت تقلق

لحد مايوم واحد دك بابنه وانطانه ظرف بيه رساله منها من حلات روحي كمت اشم بلرساله وابجي كل حرف كاتبته احسه ياخذ روحي اشتاقيت الها واشتاقيت لضحكتها وحتى لعياطها وحسابها جانت بالاردن كدرت تستقر هيه

وعمو نجم

كل كلمة منها احسها تحضن وتبوس بيه وحاطه رقم تلفون عسى ولعل نحصل واحد ونخابرها كتبته وضميته اباوع على بيبي شلون عيونها تحجي وتكول طمنوني عليها كمت بدون متطلب مني ورحت ليمها وكتلها تره خوله زينه

عمشه : انه انشد على نجم شنهي خوله مالي شغل بيها

ناي : والله يابيبي گلبج نار عليها تعلميني بيج

عمشه : ميلي مني ولاتهذري انه گلبي موجر على وليدي وبس

ناي : براحتج المهم تره هيه زينه وابنج هم زين ارتاحي

بست راسها وكمت جانت شرهب تفرك برجل بيبي صعدت للغرفه بان  يم امها انفتحت الباب وطبت سما وهاي من يوم كتلتها اني مشفتها جان وجهه بيه زراكات من الضرب اكيد جان حيل مشووه هو صار اسابيع على الشغله ولسه اكو زراك جوه عيونها وشعرها مكصوص لعد شلاعبين بيها لعب

استغربت دخلتها

تقربت مني واحسها تريد تخنكني

سما : اعرف انتي وره سالفه فضيحتي

ناي : ارتبكت من كلامها ودفعتها وكفت موو اني

سما : انتي وبان متأكده مايوم أذيتج رغم مااحبج بس اكول مالي دخل بيها بس انتي تحارشتي بيه

ناي : امشي طلعي بره

سما : طالعه بس ترجيه وحطيها بأذنج اذا مااندمج واطلع كلشي صار بيه بيج عود تفلي بوجهي وكولي مابيج خير

ناي : فتحت الباب وكتلها اطلعي لا اصيحلج مهند واكول اله على كلشي

سما : سهله يناي سهله

ناي : طلعت وسديت الباب وراها كمت ارجف منها هاي شتريد تسوي قابل

حاولت اهدي نفسي واكول هاي بس حجي هيه محبوسه حدها للحمام قابل شنو بيدها نسيت منو امها وخالتها

شلت كلشي من راسي جيه ابن خالي الي اجه تالي وكت وتهديد سما وعيون مهند الي ورايه ورايه وكاعده ارتب بغرفتنا اجت عمه بدعه وكالت مرتضى راح يصعد يحجي وياج 

هنا بلغرفه اول تالي يطب هنا شيريد

بديعه : اني موجوده مااريد احد يسمع

ناي : يونس بيه شى

بديعه : لا اسم الله مابيه عدلي دشداشتج

ناي : عدلتها وحطيت الملابس على صفحه طب مرتضى سلم وكعد اباوع عليه بحيرة

مرتضى : لتباوعين هيج وادوخين نفسج اني جاي من يونس

ناي : طفرت عليه فرحانه شلونه عفيه

مرتضى : زين كلش زين ‏ويسلم عليكم واحد واحد وصاني بشغله لازم اوصلها الج

ناي : خير

مرتضى : يريد ترحين ويه ابن خالج لبيبيتج المره كعد تموت وتريد تشوفج بله اخوج بلسجن بس انتي هنا

ناي : مااروح اني مااعرفهم وتعال شمدري يونس

مرتضى : ابن خالج رايح اله وقانعه واجه عليه للسوك مهدي وكال يونس يريدك ومحصل موافقه ورحنا شفناه بلسجن وهو وصاني اكول الج روحي شوفي الحجيه ورجعي لان اذا اجه مهدي وبلغج مراح تصدكين

ناي : وبيبي شلون تقبل

مرتضى : منكول الها

ناي : شون اطلع من البيت وذوله بيتهم مو ورانه حتى ساعه اروح اشوفها واجي حسب مااتذكر عمه كالت بيتهم بديالى يعني يوم كامل هناك لازم اكضي منو يقبل ابقى بره

مرتضى : اني اتفقت ويه امي على اساس امي محتاجتج تنظفين وياها وتباتين يمنا وبهيج محد يعترض بايته يمنه

ناي : مااروح

بديعه : يمه المره خطيه ليش تتحملين خطيتها وهي دتموت

ناي : ليش هسه تذكرت عدها احفاد وين جانت كل هاي السنين شون جانت تاكل وتنام وعايشه حياتها ومتذكرنا خلي تبقي الكم يوم من عمرها بليانه

بديعه : سويها لله بنتي ميصير هذا مو طبعج انتي مو حقوده شجاج هاي صله رحم حرام تكطعيها

ناي : لو بس سائله علينه وشايفه حالنا مجان هسه يونس بينا يمكن يحنون عليه ويوكفون وياه ومجان وكع هاي الوكعه السوده عمه هاي الي ادافعين عنها دارت وجهه واخذت ولد ابنها وانطتنا ظهرها وعاشو بخيرها واحنا عشنا بلضيم وهسه جايه ادور حنينه وصله رحم

مرتضى : روحي يوم وارجعي وبعد لتوصلين

ناي : مااروح بقيت معانده ومرتضى يحجي وعمه تحجي

انت بله ليش ادافع وامك هيج زينه راح تقبل اروح بدون متحركني كدام بيبي

مرتضى : اني استحيت من ابن خالج الولد رزن وهادئ واخلاقه حلوة واجاني بكل ادب وطلب مني ورجع يونس أكد عليه تردين اطلع ماعندي كلمة كدامه وبلنسبه لامي اني حجيت وياها شغلتها يمي فضينا

ناي : قابل اروح وحدي

بديعه : منكدر نجي وياج اخاف احد يحس ومرتضى لازم يبات هنا حتى مهند ليسوي شغله ويجي يسأل عنج يمهم

مرتضى : ولو ماله حق يجي بس اعرفه مخبل ومااريد اسوي مشكله وعركه وتاليهه توكع براسج لهذا مضطر ادزج ويه مهند وحدج بس شرطت تجي مره وياه بالطريق متبقون وحدكم منا لديالى وكال راح اجيب اختي

بديعه : هاااا يمه شگلتي

ناي : كارهتم عمه والله كارهتهم

بديعه : بس هلمره اروحلج فدوة بروح امج اكيد امج ماراضيه على سوايتج بأمها تتوسل بس حتى تشوفج

ناي : دنكت مقهوره مااريد اروح وبنفس الوقت بقو يلحون عليه لحد ما وافقت

اخذ شرهب ويايه

مرتضى : مو انتي رايحه للزوراء هاي شبيج ناي اكلها انتي رايحه بحجه تنظفين بيتنا المن ماخذه شرهب و عمشه تجي وراجن خلي شرهب هنا اقلها تبقى تلهي بيبي

ناي : بقيت ساكته وطلعو وعافوني بحيرتي وثاني يوم عمه راحت للسوك واشترت اليه بنطرون وقميص طويل  صار اكثر من ٣ سنوات مامشتريه هدوم طلعه وحطتهن بعلاكه سوده وكالت من يجي مرتضى ياخذج بهدومج العاديه وترحين لبيتهم هناك تبدلين منريد احد يحس جنت حاسه روحي اسوي جريمه بقت عمه بديعه تحجي ويايه وتعلمني شون احجي وشسوي وكل شويه وكالت لتنسين هاي حبيبة امج راضي امج بكبرها وريحيها وصتني مااختلط بأي احد لحد ماارجع

ثاني يوم سبحت ومشطت ولبست ملابسي العاديه القديمه واجه مرتضى ياخذني جانت صالحه تباوع من فوك ليجوه ومعاجبها الوضع وبيبي كوه قنعتها اروح اساعد ساهره لان متقبل لوما عمه بديعه تدخل وتقنعها وكل شويه وعاطت شبيهن المدهربات اسكطن عساهن المعفنات كاتلهن الگلك (الوصخ) نزلت وجان مهند مموجود طالع بست شرهب وصيتها متسوي مشاكل باجر راجعه وهاي اول مره ابات بره بيتنا اشرلي مرتضى يله مشيت وراه جان تعيط بيبي

عمشه : يمه ناي لا اتعبين ذني مايستاهن تكضين ردنج وتجلفين خيستهن

ناي : مااشي بيبي مااتعب

عمشه : يبعد جبدي يتكدر خاطرج طكيهم بزبالتهم وتعالي لا تيبسين ريچچ

ناي : هههههه صار

مرتضى : بعد حضرت الجنرال عمشه اكو اوامر ثانيه

عمشه : چا امك لو مخلفتك بت موش ابرك چا هسه نايه ماتشتغل لامك المكوسحه

مرتضى : امشي يمعوده بعد شويه وتحط قراصات براسي

ناي : ههههه امشي بست بيبي من راسها

عمشه : هاااج يمه اعلجي عبن ريحة حلكج تصير طيبه كلها مسچ ترد الروح موش مثل سهيره جنه عتوي وميت بحلكهه

مرتضى : تمشين لو لا

ناي : ههههه يله اجيت

ناي : اخذت العلج وطلعت اضحك واخذنا تكسي ورحنا لبيت جوحي مقبل نتمشى مرتضى بلشارع يكول جماعتي موجودين شون امشي وياج كدامهم

وصلنا للبيت طبيت سلمت على ساهره

جانت حاطه رجل على رجل وساكته هاي متسوي شى بيه خير متأكده وراها شى

ساهره : ادخلي بلغرفه بدلي الناس جايه

ناي : طبيت بدلت ولبست ملابسي الجديده ولكيت دشداشه هم جديده ونعال ابتسمت خطيه عمه حاسبة لكلشي

عدلت ضفيرتي جنت ما محجبه بوقتها سمعت صوت هورن واندكت الباب

مد راسه مرتضى

مرتضى : يله اجوي عليج

اخذت العلاكه ورجل تقدم ورجل تأخر انفتح طلعنا للشارع نزل مهدي بكامل اناقته وترتيبه نزع المناظر وسلم على مرتضى

مرتضى : هاي امانه عندك

مهدي : واني كد الامانه ان شاء الله باجر هي يمكم

دنك مرتضى وشاف بنيه كاعده ليكدام اشر مهدي اصعد ليوره صعدت وكعدت بس كلت السلام عليكم

جاوبت البنيه بهدوء وعليكم السلام حتى مندارت صعد مهدي وتحركت السياره عيوني على جامه السياره جانت سياره حديثه وبارده مشغل تبريد مشينا وطلعنا من المنطقه وبس صوت انفاسنا تنسمع لحد مكسر الصمت مهدي وكال

هااي حوراء اختي

اندارت حوراء بهدوء عليه وبوجهه ابتسامه هادئه هلو ناي

باوعت ابتسامتها شكد حلوة وهي هم حلوة وبيضة ونازكه حيل بادلتها الابتسامه هلو حوراء

مهدي : اكعدي عدل حوراء منا الشارع

حوراء : كعدت والله

مشت السياره وطبك يم محل ونزل

رجعت اندارت عليه

حوراء : لتضوجين من مهدي هو هيج طبعه مثل طبع خوالي اكعدي عدل صوتج لتعلي يحاسب على كلشي تحسي حقنه بس والله حباب وگلبه ذهب

ناي : واني شعليه بيه

حوراء : مو نزل يجيب حجاب الج احنا ماعدنا بنات يطلعن شعرهن وهو من شافج طلعتي وشعرج طالع قبل مينزل يسلم على كرايبج كال هاي مااخذها هيج مفرعه

ناي : ضجت حيييل بعدني اريد احجي جان يصعد وينطي الشال لحوراء

حوراء : هاج البسي

ناي : بس اني مو محجبه

مهدي : واني مااخذج هيج

ناي : شبيهه هيج ملابسي بيهم شى حتى مستورات

مهدي : بله وجع گلب وحجي زايد البسي الشال وخلي نتوكل ورانه طريق

ناي : ماالبسه

جان يوكف السياره واندار عليه وهذا يريد يكطعني

مهدي : كتلج لبسي وبله عناد مالي حيل لسوالف الجهال لا عبالج اني مثل اهلج لا حسيب ولا رقيب طول ماانتي ويايه تسمعين كلامي هو يوم واحد وارجعج وراها شسوين سوي بيتكم

ناي : اختنكت وحصرتني الدمعه هذا شلون يحجي هيج ويايه شاف عليه حتى يكول لاحسيب ولا رقيب اندارت حوراء وتترجى بيه بعيونها اخذه سحبته من ايدها وحطيته على راسي

مهدي : البسي عدل مو الكصيبه طالعه من جوه والكذله تهفي

ناي : لزمت الشال واني مااعرف البسه حوراء بدت تعلمني واني كوه اعدل بيه واعاند بدمعتي لتنزل لبسته عدل وضميت كصيبتي بلقميص دخلتها وشعري كله ضميته هو اندار وشافني ورجع شغل السياره وساق

بدت تمشي واني مخنوكه لحد مقريت بغداد تودعكم متحملت رغم السياره بارده فتحت الجامه اريد هوا رب العالمين اريد ابجي اريد اضرب نفسي شجاني واقتنعت اجي

ذوله حتى ميستاهلون اسوي خير الهم يحجي ويايه لو بيده يشرب من دمي شكد كرهته ولو اني كلهم اكرهم

غمضت عيني واني اتنفس مردت حتى اباوع عليه اخاف ميقبل لان مشغل التبريد مهتميت وهو هم محجه اي شى

حوراء : ناي

ناي : فتحت عيوني لكيت حوراء مدت ايدها وانطتني بطل بيه مي اخذته منها وشربته ومدن ايدها وانطتني نستله

لا شكراً مااريد

حوراء : اكلي ويايه على الواهس حبابه لان مهدي مياكل حلوو ميحب النساتل وهاي السوالف

ناي : واني مجوعانه مااريد

حوراء : لخاطري تردين نوكف ناكل بس المشكله الطريق يخوف والمطاعم اكثرها معزله قريب منوصل بعقوبه يله تبين المطاعم الزينه

ناي : صدكيني مجوعانه ولا توكفون خلي نوصل عفيه

حوراء : لخاطري اكلي هاي النستله

ناي : لمحت يباوع عليه من المرايه مهتميت اله واخذت النستله فتحتها واكلت شويه وعفتها جانت معدتي تگلب مدري من الطريق لو القهره نزلت بمعدتي

ركزت بلطريق بقت السياره تمشي اكثر من ساعه اكو شوارع فارغه ومرات مناطق كلها زرع السياره لحد ما وصلنا لمنطقه وكفت السياره يم باب جبير دك الهورن انفتح الباب جانت شون المزرعه الجبيره سياج محاوط اكثر من بيت وتفصلهم الحدايق

حوراء : يله وصلنا انزلي

حطيت رجلي ونزلت ومشيت وره حوراء ومباوعت شكو داير مدايرنا كل همي اشوف الحجيه واخلص من هذا الموضوع كله وارجع لبيتنا والتوبه اذا اطلع بعد دخلنا بيت حلوو ومرتب كلش وجبير

جان تجي وحده تطلع بكد عمه بدعه الشعر احمر والترجيه الذهب شكبرها والايد كوه تشيلها من الذهب والدشداشه مرتبه حيل معتنيه بنفسها خوما مثل عمتي كاتلها التعب والطبخ باوعت عليه مثل الوحده داخل عليها شيطان خزرتني وكالت بصوت مشمأزه

وداد : لا هله سويتها يمهدي وجبتها بت اهل العتيك

يتبع .....

البارت الثاني / الجزء الثاني

الابواب الخمس

للكاتبة Reem

جتفني الوكت وكعدت مجبور

جن كعدة يتيم بحصة الجوع

يسألون ويحاذر يرفع الايد

مو كسلان بس ردانة مركوع

حطيت رجلي ونزلت ومشيت وره حوراء ومباوعت شكو داير مدايرنا كل همي اشوف الحجيه واخلص من هذا الموضوع كله وارجع لبيتنا والتوبه اذا اطلع بعد دخلنا بيت حلوو ومرتب كلش وجبير

جان تجي وحده تطلع بكد عمه بدعه الشعر احمر والترجيه الذهب شكبرها والايد كوه تشيلها من الذهب والدشداشه مرتبه حيل معتنيه بنفسها خوما مثل عمتي كاتلها التعب والطبخ باوعت عليه مثل الوحده داخل عليها شيطان خزرتني وكالت بصوت مشمأزه

وداد : لا هله سويتها يمهدي وجبتها بت اهل العتيك

ناي : انقهرت من حجايتها وبقيت صافنه هاي شبيهه منو وياهه وليش هيج تحجي

مهدي : حوراء اخذي ناي للحجيه

وداد : خوش والله تالي وكت اطب بيتي هيج شكولات

مهدي : يله شبيج واكفه

حوراء: اي اي يله ناي

ناي : جرتني من ايدي حوراء ردت اعرف هاي منو مشينا شويه وقبل لتفتح الباب حوراء كتلها هاي منو الجانت تعيط

حوراء: هاي امي

ناي : امج يعني مرت خالي زين ليش هيج تحجي عليه سويت شى الها

حوراء: لتضوجين ولا تفكرين فدوة تحملي هو بس اليوم تعالي ادخلج لننومه تشوفيها

ناي : ننومه منو

حوراء : جديتي اصيح الها ننومه وهي تحب هذا الدلع

ناي : هزيت راسي وتخيلت اصيح لبيبي عمشه ننومه حتى تركعني بلنعال على حلكي وتضل تعد ضحكت بيني وبين نفسي

بس فتحت الباب وشفت ام امي بلفراش اختفت ضحكتي وانقبض گلبي تقربت بهدوء منها جانت بلفراش اباوع عليها مره مو جبيره حيل بس تعبانه بيضه وجهه مدور رغم تعبها بس حلوة لابسه دشداشه نيلي والفوطه بيضه وفراشها حلو ومرتب امشي ويه حوراء وعيوني تتفحص كلشي بيها

حوراء : ننومه تدرين هاي منو

ناي : ركزت بيه ونزلت دموعها وفتحت ايدها وحضنتني حييل وتصيح يمه ذكرى لج ييييمه طاك گلبي عليج اروح فدوة لريحتج يوووم

ناي : جانت ردت فعلي ابرد من الثلج

مو بيدي اعتبر هاي المره غريبه عليه اصلاً اني مشايفتها ولا اعرفها اني اعرف بيبي عمشه ولدها وجناينها غيرهم اعتبر الكل غريب عني

بقت تبجي وتلزم بوجهي وتبوس بيه حتى كصتي باستها وهي على فد بجيه ونفس الاسم يتكرر يمه ذكرى عفتها حتى مكلت الها اني ناي مو ذكرى لزمت ايدي تبوس بيها سحبتها استحيت مره جبيره تبوسها شكد حاولت ابادلها الحضن او الحنان الجانت تحاول تحسسه اليه مكدرت كل الي سويته واكفه مثل الصنم واباوع عليها

حوراء كامت تبجي وحيل متأثره من الموقف

واني ولا يمي يمكن لو اشوف فلم عربي اتأثر بيه اكثر من هذا الموقف

حوراء: هاي ناي ننومه مو عمه ذكرى

ناي : حسيتها تعبت وكامت تجر النفس وتحجي على كيفها

ام ذكرى: ادري بنيتي بس من شفتها چني شفت بتي تشبهه من جانت بعمرها يمه بيج ريحه الغالية تعالي اكعدي احبيبة

ناي : كعدت بصفها على الجربايه نزعت الشال من راسي ولزمت كصيبتي تشم بيها وتبجي

حوراء: شفتي جابها الج مهدي تاكلين هسه

ام ذكرى : اكل من ذكرى تاكل ويايه

ناي : جريت نفس مخنوكه مااحب امثل وابين الاهتمام ذوله ناس غربه عني حست بيه حوراء

حوراء: فدوة ناي اكلي وياها صار مده اكلها كلش ضعيف ومصار كم يوم من صحت والله وصلت اسم الله عليها للموت ومعودنا صحت بس مابطلت تذكر اسم عمتي وتريدكم وحتى اكلها لو تاكل ربع وجبه لو متاكل اترجاج اكلي وياها معودت تقبل تاكل

ناي : باوعت على الحجيه لهسه مااكدر اكول بيبي شفت خدها مليان دموع والعيون تترجى بيه كلت جيبي الاكل اكل وياها

بس طلعت حوراء بقيت اني وياها وحدنا لزمت ايدي وكالت شلونه اخوج

ناي : ابتسمت وره ابتسامتي الف حسرة وقهر زين يم الله

ام ذكرى : زعلانه مني

ناي : اني مااعرفج حتى ازعل او ارضى عنج

ام ذكرى: اني ام امج شون متعرفيني

ناي : حتى مااعرف شصيح الج بيبي لو خاله لو شصيح بس اسألج سؤال شذكرج بيه وبأخويه

ناي :كامت تتعب وتجر بلكلمه خفت تتخربط وكتلها كافي مو هسه نحجي خلي ناكل وترتاحين وراها نسولف اشرت بيدها اعدل المخده الوره ظهرها عدلتها واندكت الباب وطب مهدي تقرب منها وباس ايدها وراسها وهي من شافته ابتسمت

مهدي : تأمريني بشى ثاني يلغاليه

ام ذكرى : الله يرضى عليك وليدي

ناي : وخرت منهم وكعدت على كرسي محطوط على صفحه

ام ذكرى : تعاي بنتي وين رايحه

ناي : كاعده هنا باوع عليه مهدي وكال

مهدي : ابقي هنا يم الحجيه وشتحتاجين وصيت حوراء وياريت مطلعين بره الغرفه اله للضروره مااريد حركة زايده بلبيت

ناي : اني منا مخنوكه منه من سالفه الشال ومخنوكه من الوضع كله حجيت بنتره وياه احد گلك اني جايه افرفر هنا اجيت اشوف بيبيتك ولوما توسلكم ولا اجي واذا اكو وقت هسه رجعني لبغداد اعتقد سويت العليه رجعني لبيتنا

مهدي : هييي صوتج شنو هاي العرامه وين كاعده بيت ام العتيك عمشه وهيج جساره عندج

ناي : كمت على حيلي وبدت دموعي تنزل حسيت كافي وصل حدها وكمت ابجي واعيط

شبيهم اهل العتيك على الاقل ماشمرونا بلشارع على الاقل ام العتيك ربت وسهرت وتعبت وكبرت تشلع من زردومها وتوكلنا مايوم اكلت گبلنا اذا متتأكد اكو اكل يكفيني اني واخوتي وماتشتري قطعة ملابس اذا متلبسني تطلع من الفجر تسحل بلعربانه بعز البرد بلشتا وبعز الحر بلصيف وهي مره جبيره الي بعمرها تكعد معززه مكرمه مثل بيبيتك ويجي الاكل ليمها بينما عمشه انكسر ظهرها بلعتيك حتى تلمنا وعمتي ومرت عمي انكسر ظهرهن حتى نكبر ومنحتاج احد اخويه يمد ايده بلزبايل ويلكط العتيك حتى يلم الالف والالفين ويه عمشه التحجي عنها وتالي اليوم يوكلونا بتعبهم لا باكو ولا نهبو ولا أذو احد

بنفس عمره انت جنت تبدل وتكشخ وتروح لمدرستك وترجع مدلل لبيتك تلكه كلشي جاهز لتعيرني بشى اني اعتبره شرف

ام ذكرى : يمه على كيفج لك مهدي البنيه راح يوكف گلبها من الرجف سوده عليه تعالي احبيبة

ناي : انتي بلذات تتحملين كل الصار هسه تذكرتي عند بنتج المرحومه ولد وبنيه صار اكثر من ١١ سنه شذكركم بينا شجاني قبلت واجيتكم اني مااعرفكم ولا اريد ابقى بهذا البيت لحظه وحده عفتهم وطلعت فتحت الباب انطخيت بحوراء بيدها الصينيه بس ما وكعت وهي حطت الصينيه بلكاع ودخلت للغرفه وصلت للهول (صاله) مالتهم لكيت امهم كاعده وتگلب بلريمونت ولا يمها اكيد سمعت كلشي غير صوتي يجيب التايهه ولا هتمت ولا كالت وين رايحه ولا جن اكو واحد فات منها طلعت للكراج بقيت صافنه وين اولي جان تنسحب ايدي جرني حيل مهدي

مهدي : وين رايحه يابه لوما الحجيه مريضة جان عرفت شلون اكص لسانج

ناي : تذكرت مهند من عطت عليه بله قابل هذا اعز من مهند الي تربيت وياه وجانت عندي مشاعر وقلبت البيت عليه هو هذا منو واسكت اله تجرأت وحجيت بوجهه كلت قابل شيريد يسويلي اقوى شى عنده يرجعني لبيتنا وهو هذا الي اريده اصلاً

مسحت دموعي بس الشهكه بيه وكتله شحدك هو منو انت وتكص لساني انت اجيت وتوسلت حتى اجي واجيت واول ماطبيت البيت امك هانتني وسكتت ورجعت انت عدت كلامها اذا اهل العتيك هيج تستعرون منهم وموخوش اوادم شجابكم علينا مو خلصانين من عدنا تريد انصي صوتي واحترم انت هم احترم الكدامك بشر والنه كرامه واذا الله اكرمك بلمال والجاه اني الله اكرمني بعزت النفس ومااقبل احد غريب يهيني

سمعنا عيطت حوراء وهذا طب يركض واني هم رحت وراه دخلت للغرفه شفت الحجيه بلكاع وفاتحين الدشداشه ويفركون بصدرها ويحطون بخاخ حتى تتنفس كلت خوش راح تموت وتنذب براسي هي هاي الناقصه

شالها كوه مهدي وركضت حوراء مدري وين واجه واحد من الولد الي اجوي ويااه ذيج المره شالها وساعده وامهم وياهم يمكن للمستشفى راحو اني تسحبت بهدوء وكعدت بلهول وجن الموضوع مو يمي وهاي حوراء طكت بجي

حوراء : عفيه ليش هيج سويتي والله ننومه كتلت نفسها بس حتى تشوفج

ناي : عفيه لتصيرين مثل اخوج لسانه شطوله وتالي يطلعني اني الغلطانه اخوج تجاوز عليه

وعيرني وقبلها امج اني مااجيت حتى اتعير واسكت بس الغلط مني اصلاً شون اقبل اجيكم امداني اي والله

حوراء : العفو والله مو قصدي اضوجج بس اني احب ننومه حيل هي اقرب عليه من امي هي الربتني وحيل اخاف عليها

ناي : واني ماسويت شى بحقها الغلط من اخوج جاي شايل خشمه ويحجي ويأمر ويريد اسكت ومن جاوبت هذا حقي وهي تخربطت لتخافين ان شاء الله تكوم بلسلامه

حوراء : امين خلي احمي الاكل الج اكيد كتلج الجوع

ناي : كلشي مااريد بس خلي ترجع الحجيه واولي لبيتنا ساعه الكشره من قبلت اجي هنا

سمعنا صوت صاحت حوراء تعال صلاح

دخل ولد تذكرت اجه ويه مهدي

صلاح : السلام عليكم

حوراء : وعليكم تعاال

صلاح : وين الولد اجيت كالو الحجيه متخربطه

حوراء : اي والله وراحو للمستشفى

صلاح : محتاجين شى

حوراء : سلامتك

ناي : شفت هذا الولد باوع عليه ركز بملامحي

ودار وجهه وراحت حوراء سدت الباب وراه

ناي : هذا منو

حوراء : ابن خالي وثاني اقرب واحد لمهدي همه الثلاثي مهدي وعبد الرحمن وصلاح دوم سوه بلعركات بلمصايب بلكعدات بكلشي تحسيهم اخوه ماشفت مثل صداقتهم رغم كل واحد طبعه شكل بس واحدهم ميستغنى عن الثاني

ناي : سكتت وبقيت اباوع على الساعه وبديت اجوع وحوراء حمت الاكل واني ماماكله من الصبح كلت خلي اكل قبل ليجون وانحرم من الاكل كله سويت لفه لحم وحطيت زلاطه بيها واكلت

حوراء : بس هااي يمعوده اشكال اكل برياني وفاصوليا وحتى كباب شوي اكو

ناي : هااي كافي شكراً تعبتج

اكلت وحوراء هم اكلت ويايه شويه واندكت الباب سمعت صوت رجال جبير طلعت اشوف لكيته رجال يطلع بكد عمي عبيد بس هذا وين وذاك وين صفنت عليه شلون يلمع لمع طول بهيبه الدشداشه تكول مالامسها الهوا والايد بيها محبس فضه جبير شكله انظف من حياتي ويسولف بهدوء

حوراء : تفضل خالو

عمران : لا خالو اجيت اشوفج واشوف خطاركم اخاف محتاجين شى شفت صلاح قبل شويه وكال على الحجيه وعرفت وحدكم تعالو لبيتنا ليش تضلون وحدكم

حوراء : ماعلينا شى خالو بلكي هسه يجون

عمران : مابيه اله العافيه ترد بلسلامه هله بويه انتي بت المرحومه

ناي : هزيت راسي بأبتسامه اول مره اشوف واحد من الله وجهه بيه راحه تحس الايمان ينكط منه

عمران : ماشاء الله عروس بنيتنا الله يحفظج لشبابج بنيتي محتاجه شى تره هاي البيوت كلها كدامج نشيلج على راسنا

ناي : شكراً عمو باوع عليه وابتسم بقهره

عمران : ارجع من يردون واذا احتاجيتو شى تعالي لاتنتظرين

حوراء : صار خالو

ناي : بس طلع كلت لحوراء لج هذا الهيبه خالج

حوراء : هههههه هذا خالي عمران كل صديقاتي بلمدرسه ميتات عليه ويمكن انتي صرتي مثلهن

ناي : لا ولج مو هيج قصدي انتبهت على نفسي وكتلها العفو مو قصدي اكول ولج طلعت من حلكي متعلمه ويه اختي احجي بميانه

حوراء : احجي براحتج ياريت عندي اخت واحجي وياها مثلج شوفي خالي عمران جبير هاي اللمه كلها محد يسوي شى اله بشوره عنده اثنين ولد عبدالرحمن والثاني عبدالله وبنيه بتول البنيه تزوجت وعاشت بغداد وعبد الله سافر وره السقوط للدراسه وضل بس عبدالرحمن هذا شالع گلب خالي تكدرين تكولين هو وخالي دوم مشاكل وطلايب ومايوم كعدو بمكان اله تمالخو ومرت خالي واكعه بيها المسكينه تكولين رويسيه وخالي يحب مهدي كلش ويفضله على عبدو

ناي : تصيحوله عبدو

حوراء : اي للسهوله وحتى صلاح خالي يحبه

ناي : واكيد عبدو يضوج

حوراء : ولا يهتم ولا باله بلعكس من يريد شى يكول اله روح لولدك مهدي وصلاح هذا عبدو انطي ضحك شقه سوالف مكسره يوميه مصادق وحده وطيور يبووو يعشق الطيور ويحبهم اكثر من نفسه وياما وياما مشاكل من وره الطيور مطيرجي اصلي

ناي :وصلاح وين اهله

حوراء : بصفنا خالي جان ضابط بلجيش رتبة عاليه واستشهد بالاحداث الله يرحمه قبل سنتين وعاف صلاح واخته سدره ومرت خالي

تشوفينا واحد قريب على الثاني وبينا حدايق وذيج الجهه بيت عمام امي يعني هاي المنطقه كلها كرايب

دنسولف وسمعنا صوت السياره باوعت على الساعه حيل صار اربع ساعات من راحو

دخلو شايلين الحجيه وگبل للغرفه اشرت حوراء عليه لان شافت امها طبت واكيد مراح تسكت اني هم مشيت وراها مااريد مشاكل اريد هذا اليوم المراضي يخلص يعدي ويفوت

بقيت واكفه على صفحه وهمه خلوها على الجربايه وجانت واعيه وعيونها ادور على شى طلعت ادور عليه اشرت بيدها تعاي رحت اتمشى بهدوء منها اشرت بيدها على فراشها يعني اكعدي يمي كعدت ومرفعت راسي جان اسمع مهدي كال يابه نعتذر اخاف ضوجتج

رفعت راسي لكيت يحجي ويعتذر من وره خشمه مبين الحجيه هيه الي طالبه منه

عبدالرحمن: يمعودين فضونا مو طيوري كتلها الجوع صار عليهن شى بعرضي ازوعك فلوسهن

مهدي : انطيك بس اسكت

عبدالرحمن: حور سويلي اكل جوعان

امشي ناكل اني هم جوعان

ناي : بقيت ساكته وهادئه طلعو جان تتقرب مني الحجيه وباست راسي غمضت وجريت نفس وحجت بصوت ناصي لان تعبانه وكالت

ام ذكرى : حقج عليه كله مني ضيعت امج گبل وهسه ضيعتج ماحويت خلفتها وربيتكم كله مني لو سامعه كلام عمشه مجان هسه انتي كوه جارعتني ومخنوكه مني

ناي : بيبي شعليها

ام ذكرى : هي تحجيلج تعالي اريد اشم شعرج جنه شعر امج ااااخ يانار گلبي خذت مني العزاز خلفتي بيوم وليله جوه التراب واني ضاله اشم بزرتهم وادور على ريحتهم لا اله الا الله ربي لا اعتراض على حكمتك

ناي : بقيت يمها وانطوها العلاج التزمت الهدوء ماكو ساعه والغرفه انترست كرايب وداد اجو يشوفوها اجت حوراء وانطتني الشال حطيته بدون كلام مابيه عركه لخ وكعدت على صفحه والكل عيونهم عليه تكول كائن فضائي ياهو اليجي يسأل هاي منو وداد متجاوب حوراء الي تجاوب لو الحجيه

طلعت من غرفتها لان ناس غربه هوايه

وكعدت بلمطبخ اباوع عليه شون نظيف وجديد وغراضه راقيه اني مو عينه فارغه بس الي عاشت مثلي اكيد من تشوف هيج مكان تحب تباوع وتشوف الناس شون عايشة

محسيت غير احد ورايه رفعت راسي لكيتها وداد سدت باب المطبخ واجت يمي

وداد : اني قبلت ادخلين بيتي لخاطر عمتي لان مره مريضة وتعبانه ومااقبل بعد اشوف رجلج اطخ بابي

ناي : ولا اني ردت اجي جان ادنك وتلزمني من قميصي حيل ماانكر مخفت منها جان شكلها من النوع الوكحه والصلفه نفس نسوان عمي بس نسوان عمي متعلمه عليهن هاي اول مره اتعامل وياها عوفيني

وداد : مخلصت من ملتكم تالي وره كل هاي السنين تجين لهنا سمعي لج اذا اجاج ابني او اي احد وكال تعالي تريد تشوفج الحجيه او اي عذر اياج تجين مااريد بيتي يتوصخ بيكم مكافي من وره امج انهجم بيتي

ناي : عوفيني عفيه بعد مااجي

وداد : هلمره حذرتج مره الثانيه انعل اهلج اني اكوم واكعد انبش بأمج مخلصت منها هلمره بزرتها

ناي : حرام عليج ميته ليش تحجين عليها

وداد: ضيعت رجلي ويتمت جهالي وعشت ارمله من وراها عسى كبرها اشتعل ومنطفه تردين تسلمين على نفسج لتشوفيني جهرتج بعد مبقى عليه غير اهل الزبل والخبز اليابس

ناي : دفعتها وكمت طلعت صار بوجهي مهدي حس بيه مو طبيعيه

مهدي : منو جان يمج بلمطبخ

ناي : عفيه وديني لبيتنا

مهدي : شصار احجي

ناي : مصار شى اريد اروح

مهدي : صار ممنوع تجوال مااكدر اطلع باجر اخذج امي حجت شى وياج

ناي : حتى وان حجت هو انت وامك نفس الشى عفته ورجعت للغرفه

انطخيت من ثوله وقهرتي بخالهم عمران

عمران : العفو بنتي بيج شى

ناي : عيوني تحجي بس لساني ميكدر ينطق مجاوبته ودخلت كعدت يم الحجيه بقى خالهم يباوع عليه دنكت بعد ومرفعت عيني جان يكول

عمران : يله يابه نعوف الحجيه ترتاح الكل طلع وسدو الباب تعبت اريد اغفى اريد ارتاح اريد عيوني تنسد وافتحها الكه الصبح واني نايمه بفرشتي يم اختي ويم بان

شويه واجت حوراء كعدت يمنا جابت فاكهه وكالت ضوكي فاكهة ديالى شكد ريانه وطيبه اجيت اكل وصارت شرهب كدامي تحب هاي السوالف لو يونس الجان يكص البرتقاله اربع اقسام الي واله ولشرهب ولبلال مكدرت احط لكمه وهمه مو يمي واكتفيت اشتم ريحتها وكلت ماطول مياكلون ويايه مااكل

رحت للحمام وغسلت وبدلت ودخلت للغرفه واجه العشا اكلت ويه حوري كمت اسميها حوري حسيتها كلش طيبه وحبابه مو مثل امها واخوها ابد

ناكل ونضحك والحجيه سولتها بضفيرتي وكل شويه ادمع عينها

اجه الليل واني بمكان مالي جذر بيه ناس متسمايين اهل وهمه مو اهلي نايمه بره بيتنا وماكو يمي شرهب ولا بان رغم الفراش كلش ناعم وحلو ومريح بس عيني مكدرت تغفى نايمه بصف الحجيه ردت انام بلكاع مقبلت اله يمها تكول راح اطير

بقيت اتگلب كل الليل مااخذت عيني النوم غير ساعتين اذا مو اقل شفت گبر امي يضوي ويطلع ريحه طيبه واكفه واباوع عليه وبليل واكول اني شجابني على المكبره بهذا الليل بس مخايفه لان الكبر مسوي ضوا بكل مكان حسيت ايد انمدت على جتفي انداريت شفتها امي تلعب بشعري وتبوس بيه وتكولي

ماكسرتي بخاطري واجيتي شفتيها

باوعت بعيونها وكتلها اني مااحبها لان شمرتنا ومسألت عنه

جان تكولي مجروحه بنتي لتنقهرين منها ام وضيعت ولدها وكعت بيكم خليها تجيني وهي مرتاحه تشوفيها شون تعبانه

كتلها اني شعليه

جان تبتسم ماما وكالت اذا ميبرد گلبج عليها راح تبقى تتأذه

فزيت من نومتي على صوت الحجيه وهي تحاول تصلي على كعدتها

شفت الساعه وكمت من الفراش باوعت ماكو احد بلممر دخلت للحمام وراها توضيت ادور على القبله وين كملت الحجيه وسألتها واشرت على كنتورها فتحت وطلعت سجاده وتربه وصليت

كملت وكعدت بصفها جان وجهه بيه صفار وتذكرت كلام امي واحتاريت گلبي مامرتاح ولا اكدر اصفه منها

وره ساعه سمعت دكت الباب عدلت كعدتي ودخل مهدي يصبح عليها اني بس كلت صباح النور وسكتت حتى بوجهه مباوعت اريد ارجع لبيتي كافي تعبت

شرهب : راحت ناي واني بقيت اتگلب بلبيت والعب ويه بلال والهي بيبي اخاف تفكر تروح لبيت ساهره علمود ناي امنعها وعمه بدعه تلوب تريد بس يفوت اليوم ويعدي كلشي على خير

تغديا والبيت هادئ شلت المواعين ويه بان وكعد تسوي جاي جان يطب عمو فلاح ويعيط

بديعه بان وينكم

بان : اول مره ابويه هيج يعيط دومه هادئ حتى من يتعصب بينه وبين امي عفت كلشي من ايدي وركضت وامي هم خطيه وجهه انگلب من الخوف جان وره ابويه عمي جوحي ومهند هااي شكوو

بديعه : خير شصار الرحمن ليش تعيط

فلاح : وين بنتج

بان : هااا بابا لزمني من شعري وهاي اول مره يمد ايده عليه اني مامسويه شى بس عياطه ولزمته الي خلت گلبي يوكع من الخوف

بديعه : شبيك وياها عوفها فلاح شسوت

فلاح : هاي تاليهه ولج حك تعبي وكسران ظهري عليج وايدي هاي التملخت من الخبط بلعماله واطلع من الفجر حتى الم فلوس دراستج تحطين راسي بلتراب واصير فرجه للوادم

بديعه : غير تفهمنا يارجال تعيط عوف البنيه تكط شعرها

بان : ملخ شعري واني ابجي اريد افهم اني شسويت وماما تريد تفك ايده مكعد تكدر

فلاح : جنت اكول همزين الله انطاني بنيه فقيره والعيبه متطلع منها ورافع راسي بسمعتها الطيبه تالي تطلع مصادقه كريم ابو الغاز

بديعه : لطمت على صدري يمه يامصداقه شكعد تحجي

فلاح : اليوم الساقط اجاني ويهدد لو تزوجها اليه لو افضحها بلمنطقه

بان : كعدت بلكاع ابجي واعيط والله مااعرفه والقران مااعرفه

جوحي : الْحٍمَدٍ للـّہ ماعندي بنات يوميه وحده مسويه طلابه

مهند : شنو قصدك عمي

جوحي : ماكو شى فلاح خويه ربي بتك واكسر راسها لو تزوجها وتخلصنه من عارها لو تكسر رجلها وتكعدها بلبيت لا كل شويه وحده مسويتنه فضيحه وتعال يجوحي طم راسك وضم نفسك من الوادم بله اني هلواحد ولد وخلصان لزمو بناتكم شويه عابت هيج تربيه سكط مدري بيش حايرين

بديعه : اتقي الله جوحي تعرف كلش زين بنتي اشرف من الشرف وينكص لسان اليجيب طاريها الله اعلم منو ذاب بلاه على هاي المكروده لان فقيره وحسها ميطلع انداريت على فلاح الزم بان ويدفر برجله على ظهرها كطع نفسها عوفها فلاح حرام عليك تعرف بتك ماعدها هيج سوالف

مهند : عمي خلي نفهم من البنبه هسه انت تضرب وهي تعيط وتبجي غير نفهم

كومي بان شوو باعي عليه ودفع فلاح ومد ايده وكوم بان وكعدها على القنفه

بان : ابجي واحجي مهند وروح عمتي ذكرى وداعت عمه خوله مااعرف هذا منو كريم اني اروح بدربي واجي بدربي مايوم حجيت ويه ولد حتى بلكليه وروح اسأل عني جان يجيت ابويه وجايب الصونده ويريد يضربني لزمه مهند

مهند : ياعمي اوكف يجوز بان تحجي الصدك وهذا كريم نعرفه واحد هتلي وساقط يجوز شافها حلوة وشريفه وراد يتزوجها ويدري مراح ننطي ذب تهمه عليها

فلاح : لك خليني ساكت لا اذبحها هسه

بديعه : حضنت بتي وميته رعب عليها وابجي ويه بجيتها والله مظلومه بتي واعرفها

فلاح : بتج ساقطه واله ازوجها كريم هو هذا قدرها زايده مني اعلم واكبر واتعب علمودها اليوم اروح لكريم واكول اله تعال اخذها بعبايتها

بديعه : حتى احرك روحي لك هاي تعب السنين هاي الوحيده عندك

فلاح : انجبي انتي كله من وراج محد طلع عينها غيرج انتن مو وجهه تعب

مهند : عمي واليرحم ابوك شنو تزوجها هذا العار واحد شراب عرك واهله موزينين حتى خواته موزينات خلينه ساكتين

فلاح : هيه تريد هيج

مهند : هسه انت انطيت مجال نفهم منها

بان : والله مااعرف مستعده اطب القران على عيوني اذا اعرفه او شايفته او سامعه هذا الاسم گبل

مهند : هااك شفت يعني اي واحد يجي يكول عندي علاقه ويه فلانه نصدكه تره هذا مو حجي عمي هاي عود انت العاقل الهادي

فلاح : لك مو الكواد حجالي شغلات وشوفي شغلات خلاني ادك على راسي

بديعه : وكعد فلاح بلكاع وهاي اول مره اشوفه هيج مكسور ويبجي عفت بان واجيت عليه حضنته الله عليك بداعت صلاتك لا تكسر بنتك والله شريفه وماضايع التعب عليها

فلاح : لج حتى شامه جتفها گلي عليها وشوفني قطعه من ملابسها عنده لج شحجي وشكول وكاام يضرب على راسه

بان : كمت اضرب على رجلي وابجي واتوسل واكول والله مااعرفه اريد بس ابويه يصدكني

بديعه : اعرف بتي ماعدها هيج سوالف واكيد احد يريد يضيع مستقبلها وماعندي احد يغار من بتي لان تدرس غير صالحه بس المن احجي ومحد راح يصدكني

جان اركض على عمتي بلكت تهدي طبيت للمحل عليها

فدوة عمه الحكيني

عمشه : ياوالغسل شجرالج تراجفين

بديعه : حجيت الها الصار بسرعه لان عياط صار قوي مال بان عرفت ابوها رجع يضربها

لبست عمتي نعالها وعاطت على واحد من الجهال ولك يل الاسيود يلجلح عينك على دكاني لاتبوك اجسر ايدك

اي بيبي ابييع واحطلج الفلوس هنا

عمشه : لاتاكل حلا ازوعه الك ولمك واخليك تروفس

لا مااكل

بديعه : يله فدوة عمه

اخذتها وطبينا مهند لازم فلاح وبان ترجف وتعيط من الخوف

عمشه : يالثور وهادينك شجرالك عججت الدنيا

فلاح : يمه رحمه لابويه عوفيني اليوم اموتها بيدي

عمشه : چا هيه فختايه (طير) وتملصها تهدا يعنتر عود شوفوني شرس وماانكحم كعدت بلكاع وفتحت الفوطه واشرت لبدعه انطيني مااي نشفتو ريچي

فلاح : يمه لعد تقبليها واحد عار يجي يهدد ويريد يفضحني

عمشه : ياهو ابن نعناعه هذا مهبل موش صاحي يمه يعلس بساطيل موش بعگله چا ياهو يهدد ويرعد نذب حيلنا بهاي الفقيره

فلاح : شبيه الولد لسانه شطوله ويهدد هو انتي خوفج من هيج ولد ميخالون الله وعدهم عرض البنيه رخيص ويشهرون بيها

عمشه : وانت يلفالح بين اخوتك تشيل البت وتنطيها ليه چا انت اغم عبن تشبهه اخوتك اريدن وحيد منك يفوخ گلبي مامش

فلاح :من الاخير باجر يجي يخطبها وتولي مااريد اشوفها

عمشه : چا هي بشه اشتريتها وماتعرف تسبح بلخيس تشيل وتذبحها اصفكك بعجل ابرد نار جبدي اكعد

انه احلهه مالك دخل

فلاح : شنو انتي تحليها

عمشه : ولك وروح العزاز اذا ماتسگت انعل شيب الخلفك خايب كوم يهوس وكاض البت عادم العافيه بيها عبن واحد اخوث ذب بلاه عليها مانعرف بتنا چا هاي بانه لوليه تلالي جنهه جماره العيبه ماتطلع منها شوف يابت چلبه لعبت براس الوليد وطاحت براس هاي المكروده

بديعه : حسيت عمه نفس تفكيري بس مهند هنا واي حجايه تصير كارثه ولو تستاهل يذبحها ويذبح بتها

مهند اخذ فلاح وطلعو وعمتي لبست عباتها ورحت وياها لازم اعرف شسوي

بان : كمت اعدل بشعري وابجي واحس بهضيمه طول عمري حتى بمراهقتي ماشلت عيني هاي تاليهه هيج اوكع وكعه

شرهب : رحت اركض على بان مقهوره عليها وكومتها تعالي نصعد فوك قبل ميجي عمو ويضربج

بان : صعدت ويه شرهب وصلت للباب طلعت سما وتقربت مني

سما : هااا شفتي من واحد يتهم واحد بشرفه شيصير بيه

بان : الله لايوفقج ياحقيره انتي وراها مووو

سما : اني شعليه انتي مصادقه ليش تذبين بلاج عليه هذا ذوقج ابو الغاز

شرهب : اذا مااكول لمهند عليج واخلي يشبعج كتل جان تلزمني سما من شعري حيل

سما : انتي احجي اله اخلي اختج تبات بلشارع عبالج ماادري بيها من راحت لبيت خالها وراح تبات يمهم وعدهم شباب الله اعلم شراح تسوي بليل اذا عرفت بيبي ومهند مو بعيد بيبي تطردها

شرهب : عوفي شعري حيوانه ودفعتها

سما : هاي جزات سوايتج من اخذتن الرساله مني

بان : اني مو خاينه وقذره مثلج انتي تستاهلين الصار بيج اني شريفه

سما : هههههه عفت الشرف الج

بان : عفتها وسحبت شرهب من ايدها ودخلنا جنت حيل متأذيه هاي اكيد امها ساعدتها واله سما متطلع لباب البيت شون ياربي دخيلك الاهي

بديعه : رحنا لبيت كريم وعمتي اول موصلت للباب جابت حجار وركع على بابهم طلعت امه تركض

خيه عمشه شنهي شجرالج تسودنتي

عمشه : ماتسودن اله ولدج كضي ولدج من بت ابني لا وحك علي ابلغ عليه واكولن علاس يلعس بلوادم واشهد الدربونه عليه چا فوك مايبوك قناني الوادم وساكتين وبناتج تسرح وتمرح ويه زلم ياصاعدات يانازلات وهو شاد كرون يلمعن بيه زود يكض خياته موش چاي يذب خيسته على بت ابني ويندك بينا ويزامط جنه بطل عرك مكسور انه جيتج مره ثانيه اجيبن المغاوير وياي

كضي وعگلي

صار خيه جفيني شرج وشر ولدج واني اعگله

بديعه : اخذت عمه بعد ماگلبت المنطقه عليهم وطلعو الجيران كوه المره سكتت عمه رجعت امشي وياها ودموعي تنزل

عمشه : شبيج تعوين يمي

بديعه : شفتي شصار بنتي ياعمه تعرفين بيها فقيره مو مال هاي السوالف

عمشه : هاي سوالف بنات غنيه الكرطه من كون اخذها هيه وبناتها ملچ الموت وخلصنهه من شرهن البرابيچ چا هاي الوادم الزينه تموت وضالات بنات غنيه يذبن شرهن علينه

الك بيها اراده ربي

بديعه : وهسه فلاح شراح يسكته

عمشه : انه اكض لسانه واكصه مالج دخل

بان : رجعت امي وحجتلي كلشي وبيومها حتى ناي نسينا موضوعها وتالي الليل ابويه قرر بعد مااداوم وحلف يمين اذا داومت يزوجني لاي واحد شكد حاولت امي واني حتى ايده ورجله بستها ماقبل وكال تكعدين بلبيت ماكو دراسه مالي حيل فضيحه ثانيه حتى بيبي حجت وياه بس هو كام يعيط وقررنا نسكت وتروح هاي السنه مني شنو ذنبي بكلمة من ساقط بله اخلاق دمر مستقبلي

ناي : بدلت واجيت على الحجيه بستها من راسها تذكرت حلم امي كلت خاف تموت وابقى متحمله خطيتها وهي باستني وحطت فلوس بيدي شمرتها بحضنها وكتلها مامحتاجه شكراً توسلت ومقبلت اخذ اي شى منها رغم مبين المبلغ مو قليل ورغم هذا رفضت تالي حيل حضنتني انقهرت عليها مو بيدي مشاعري جافه اتجاهه

حوراء اعتذرت متكدر ترجع ويايه وتعوف الحجيه باستني هاي البنيه حبيتها رغم يوم واحد انجمعت بيها

صعدت وباوعت على البيت كلت عسى مااشوفك بعد بعمري وحتى وداد مشفتها ولا اريد اشوفها

كعدت بصف مهدي وحسيت باب الصندوك انسد واجه خالهم عمران ونزلت اسلم عليه قبل مااروح

عمران : ماضيفناج بنتي وقصرنا وياج كلت بلكت تبقى يوم ثاني ونضيفج

ناي : شكراً عمو سؤالك كافي

عمران : مااريدج تردين ايدي

ناي : مفهمت

عمران : ماضكتي من خير كاعنا وحطيت شوي منه الج واعذرينا عن التقصير

ناي : باوعت حاطين سلال فاكهه تخبلت لا عفيه عمو مااريد

عمران : تردين عمج هاي ما مرجيه منج

ناي : بس

عمران : اذا مالي قدر عندج ذبيهن بلشارع

ناي : استحيت منه وسكتت

عمران : يله بويه مهدي توكل بالله وعينك على بت عمتك هاي امانه

مهدي : صار خالي

عمران : محروسين

ناي : وانطلقنا لبغداد اووف مثل السجين وهسه صار عنده افراج الطريق كله ساكتين وبس وصلنا بغداد ترحب بكم ارتاحيت

مباوعت ولا حاولت اباوع على مهدي جان بلنسبه اليه كابوس واريد اخلص منه

وصلنا لبيت عمي جانت ساعه ١١ الصبح

اول من منزلت عفت الشال على الكرسي

نزل هو ويايه حتى ايدك الباب وانتبهه ماكو شى على شعري

مهدي : شالج وين

ناي : مو مالتي وما متعوده اخذ شى مو الي خلي الك او ذبه من تتحرك منا درت وجهي منه يريد يجاوب جان ينفتح الباب

مرتضى يفرك بعيونه تفاجأت المفروض ينام هناك شعجب نام هنا منتظرت مباشره دخلت وهمه يسولفون

ساهره : هااا شرفت ست الحسن والجمال

ناي : عمو هنا

ساهره : لا عيني ليش بله

ناي : اريد ادخل ابدل واروح للبيت

ساهره : طبي عيني خوش والله كمنا انطمطم لحضرت جنابج

ناي : قابل اني سما عفتها وطبيت للغرفه ادور على ملابسي لكيتهم بلكاع لبستهم وطلعت لكيت صناديك الفواكهه وساهره طارت بيهم

ناي : ليش اخذتهم منه

مرتضى : يمعوده لح وكال عيب ومو منه من خاله ذبهم وراح

ناي : راح متأكد

مرتضى : اي والله شبيج

ساهره : اي عيني باع العز شنطوج ولج بلنص غير لو ما اني مترحين

ناي : مجاوبتها ورحت للمطبخ جبت علاليك وترستهم من كلشي نوع المن اعوف هاي الفاكهه لساهره تاكل سم هنه انحسبن عليه بعد

اخذت ٥ علاليك ترستهم ترس وعفت الباقي الها رادت تموت مقبلت اخذ بلبدايه بس مرتضى سكتها كال غير مالتها

ومرتضى شال ويايه العلاليك واجر تكسي ورجعت للبيت

اول مدخلت صار مهند گبالي عيونه تتطاير شرار منه

مهند : وين جنتي

مرتضى : يمنا بايته خير اكو شى

مهند : لك طايح الحظ ليش تكذب ولزم مرتضى من هدومه وكعت العلاليك من ايده

اجت عمه وبيبي يتراكضون

بديعه : شجاكم ياستار من الصبح

عمشه : يمه عيف اخيك

مهند : بيبي تعرفين بت ابنج وين جانت

عمشه : يمه غير يم عمها قابل بيت غريب

مهند : جانت بديالى يم بيت فوزي باتت ليله كامله يمهم جذبت على الكل وراحت هناك

ناي : صدمه اليه شون مهند عرف

بقى مرتضى يعيط ويهوس وكل واحد يحجي شى وبيبي صافنه بوجهي وكالت

عمشه : رحتي شعلتي النار يايمه وبهاي جيتج مراح تطفه ارجعي يمه من وين ماجيتي

يتبع .....

مساء الـ🥀ـورد باجر ان شاء الله بارت بنفس التوقيت

تحياتي لًلًـّــ💎ــجٌٓمٍَُٓيِّعَْٓ

مساء الـ🥀ـورد والهنا لاحلى الناس جماعة الواتباد العشق كيف حالكم عساكم  

بًخٌـً☺️ـُيّر يـِْ♡̨ـِْا رَبّ

ياريت الكل يقرا هذه الملاحظه

اول شى اعتذر عن استخدام الفاظ معينه بلقصه وهذا الشى خارج عن ارادتي كون افراد واسر هذه القصه طبيعة حياتهم وكلامهم ومعيشتهم بهذا الشكل مااكدر اجمل ولا ارتب حياتهم واخليها كيوت ومثقفه كما هي احاول قدر المستطاع انقل حياتهم لهذا مضطره استخدم طريقه كلامهم وبالاخص عمشه 😁

ثانياً : اغلبكم يعرف مصار مده بسيطه سويت عملية فوق الكبرى وبفضل الله ودعواتكم كمت بلسلامه لكن حالتي الصحيه بعدها ما مستقره ولان اعطيت وعد اكمل القصه وما أجلها بعد اضطريت ارجع انشر لكن النشر هذه المره يختلف القصه راح تنزل بين يوم ويوم اعرف اغلبكم مراح يعجبه هذا الشى لكن يشهد الله مااحب يوميه اطلع عذر واخلف معاكم واتعب بلكتابه ضعف قبل كون صحتي مو تمام لهذا حتى التزم معاكم يوم اكتب ويوم ارتاح لكن وعد مني اليوم الي اشوف نفسي تمام واكتب انزل بارت احاول ما اتأخر ابد عنكم فقط ادعولي الله يعطيني العافيه واكملها على اكمل وجهه ومااقصر معاكم ولان اكدر اكتب اليوم ان شاء الله ينزل بارت جديد الليله

ارجع واكرر النشر بين يوم ويوم

متابعين الواتباد الراقين اهم نقطة لازم تعرفوها اني من انشر انتم قبل الفيس ينزل البارت عدكم لكن الخلل مو مني من البرنامج نفسه لهذا يجيكم الاشعار متاخر وقت النشر ساعه ١١ ونص ليلاً

القصه فيها احداث وعميقه لهذا مااختصر ابد واذا كان في مواقف تحسوها مو مهمه ومالها داعي تنسرد تجاوزوها اهم شى تعرفون هذه قصه مو سباق احداث وعركات ومصايب  اكيد اكو مواقف هادئه مواقف انسانيه وحوارات مهمه تعكس احداث بلمستقبل لهذا لا اختصر ولااسرد فقط المشاكل رغم كثير مختصره سالفه الحياة اليوميه الاعتياديه تجنباً للملل لكن ماتكمل اركان القصه اله بلحورات والسرد البسيط

المايتحمل التأخير ياريت يترك القصه ومن تكمل ينورني ويقراها بدون تجريح وان شاء الله ما اتأخر عليكم وارضيكم

هذا الحساب Wyaam1990

كل مايخص تفاعلكم وتعليقاتكم بلقصه المتابعه الرائعه وئام مشكوره عملت هذا الانجاز الجميل ياريت الكل يتابعه اسم الملف كل مايخص قصة الابواب الخمس منشورات الكروب وتعليقات الواتباد تجدوها هناك  واني كذلك راح انشر بحسابي اغرب التعليقات والتوقعات واجملها تابعوني

واخيراً وهي الاهم شكراً من قلبي على تفاعلكم وتصويتكم وتواجدكم المستمر معي وخاصه في جماعه يعلقون بلبيج الخاص بيه بلفيس ويرجعون يعلقون هنا ويصوتون فعلاً شكد مااشكركم قليل فْـْ(😚)ـْْـْْدْيْـ👈ـْتْكم

انتم سبب نجاح القصه وروعتها

انتظروني الليله

احـٍُــبٌــ💘ـٍَــْگُِم

البارت الثالث / الجزء الثاني

الابواب الخمس

للكاتبة Reem

انه همومي جهال وترضع ادموع

اكضي اليل الولي وماينامون

اغفي ابهذا يكعد ذاك ويلوع

ويفزون اعلى صوته ماينامون

الكبر منهم فطمته وياكل اضلوع

شسوي اشلون لو كلهم يكبرون

ناي : صدمه اليه شون مهند عرف

بقى مرتضى يعيط ويهوس وكل واحد يحجي شى وبيبي صافنه بوجهي وكالت

عمشه : رحتي شعلتي النار يايمه وبهاي جيتج مراح تطفه ارجعي يمه من وين ماجيتي

ناي : وكعت من ايدي العلاليك وكلشي اطشر مثل مطشرت ايامي هاي بيبي شتكول شنو ارجع وين اروح

بديعه : ياااا عمه كولي ياالله هو يوم واحد راحت شافت الحجيه واجت والله مرادت تروح لوما اني ومرتضى وكعنا دخيل الها ولا توصل

عمشه : چا انه لون اطكنج بنعال على حلكج يلوموني چا ساس البله انتي لابارك الله بيج انه اكولن مسيجينه والعيبه ماتطلع منچ تالي يبدعه تحشين براس البت وادزيهه لبيت الغربه عساج بحرگه ماتكومين منهه

بديعه : ياعمه وداعت عافيتي لوما المره مريضة وعلى فراش الموت ولا ادخل شتدرين بيه

عمشه : ماضل مستحه بيگم خيركم چلب وعضاض الادين ميلو مني مااريدن اشوف خلفكم وانتي يبت ذكرى ردي لبيت خالج مالج مچان هنا

مهند : مو هيج الحجي ام عبيد هسه اني كتلج حتى اتوبيها تجذب ومتطلع بعد مو اطرديها

عمشه : بسگ انت الثاني تهاوش منا وتحابي منا انه گلت مالهه مجان ترد وين ماجانت موش شافت عيشتهم ونامت بحضن حبوبتها تولي ليها مااريدنهه يمي

ناي : ركضت على بيبي بست ايدها وراسها دفعتني والله مردت اروح واليوم على اعصابي كملته

عمشه : شفتيهم ينايه عجبوج

ناي : لا والله بيبي حتى نوم منمت بس ردت ارجع للبيت عافتني وراحت لغرفتها وتمشي وتكول

عمشه : بلونه يالبرهان شاركني وياك انه على ولفي الراح وانت على دنياك

طبت وسدت الباب

بديعه : ارتاحيتو هسه شون

مهند : انت شون ادزها ماعندك شرف متستحي تبيتها بره

مرتضى : اني مادزيتها لناس غربه بيت جدها وخالها ولوما اخوها يكول ماادزها وهاي كدامج احجي الناس سولج شى تعرضولج

ناي : كعدت بلكاع ابجي هسه شسوي وين اروح يعني صدك اعوف هذا البيت بيبي اعرفها من تقفل تسويها وتطردني مو عمه خوله طردتها

صالحه : لكم يمه مرتضى مهند شجاكم تتهاوشون على هاي متستحون ولد عم وخاله وناس لازمه ناس كله من وراج عايقه مو بيدج راح يصيرون دمايه من وره سوالفج المكسره

بديعه : ليش تحجين عليها هي شنو ذنبها وانت مهند شصار عليك هيج تعيط وگلبت الدنيا جان بينك وبينها او على الاقل تطلع عمتي للمسواك واحجي وعيط وشسوي سوي بله هسه شلون نقنع عمتي متطلع ناي من البيت خربتها وكعدت على تلها يمهند

صالحه : ابني شعليه فوك مايضرب هاي الفلتانه بلبيوت حتى لتجيب سمعه موزينه النا

مهند : يمه كافي واصعدي فوك

صالحه : ليش اصعد حجي الحق ينزعل منه وانت ولك مرتضى شجاك تساعد هاي وامك الرعنه شون تسكت هاي استرعنت تالي وكت عمتي مو كعدت وكالت اياكم المره جم مره كالت ديري بالكم ناي تروح لام ذكرى والله شتسوي بيكم عمتي قليل بحقكم وانتي لج تستاهلين الشمر بلشارع ومحد يلفيج بعدج بگد القندره وتجذبين وتسوين افلام وتباتين بره من تكبرين وين نلكاج عيني بحضن الولد

مرتضى : خالتي متسكتين شنو هذا الحجي مالتج شو لا ابنج يحترم ولا انتي قابل اني مكرن وماعندي شرف وادز بت عمي لمكان موزين نسيتو اني بيدي دازها

مهند : وهذا الي مخبلني شلون ادزها

مرتضى : ودزيتها شتريد هسه تكص راسي هااك كصه يله وفض هاي الهوسه كلها وراها اقنع بيبيتك شون ترضى على ناي ولك يالاغم احسن ماتتعارك ويايه وتريد تشرب من دمي بدون فهم وعلم اكعد افهم مني ليش قبلت والبنيه شسوت تره اني وانت كلش زين ندري ناي ثكيله ومحافظه على نفسها والبيت الي راحت اله بيها عائلة امها ومن حقها تروح وتشوفهم لا اني الجرمت ولا ناي وبموافقة اخوها وبطلب منه يعني كلكم باطلين ومالكم حق تحاسبون وانت ماطول صرت ابن عمها وحامي سمعتها وسويت هوسه بكد راسك ترضى هسه ترجع الهم بعد ما بيبيتك طردتها

ناي : حاطه ايدي على راسي ودموعي تنزل بهدوء واجت شرهب باستني وكعدت بصفي حضنتها واسمع كلامهم وكلشي مااحجي

مهند : اكيد مااخليها تطلع للباب

مرتضى : ذيج عمشه وروح اقنعها اني مولي للبيت بعدني ممتريك وانتي ناي اذا صار شى تعاي يمنا اخلصي جم يوم من عدهم ولو العندي بلبيت نسخه من ذوله بس يله الي يشوف الموت يرضى بلصخونه على كولت جنرال عمشه

ناي : هزيت راسي وسكتت باوعت على مهند بحقد كله من وراها لو ساكت بله هسه شستفاد

بديعه : كومي فوك ارتاحي بنيتي تعالي يمه بان اخذي اختج وصعديها ترتاح وانتي شرهب تعاي ساعديني الم هاي الفاكهه سوده عليه البنيه طابه مرتاحه سممتوها

ناي : كمت واخذتني بان الجانت عيونها حمره والوجهه اصفر تكول ميت واحد الها هاي شبيهه

شرهب : بلبل تعال ولك ساعدني جنت اباوع لصالحه واني ميته قهر على ناي ومنتظره شيصير كمت لميت الفاكهه واكو فواكهه شايفته بس بحياتي مماكلتها مثل التفاح الاحمر والموز ريحتهم طيبه كلش خفت اكل وهاي صالحه تعيط

بديعه : هااج بنتي اكلي انتي واخوج

شرهب : اخذت من ايد عمه واخذت بلال وكعدنا بلكراج ناكل اكل وافكر شراح يصير اني مو صغيره بالاول متوسط بس احب العب واكمز اخلص وكت بس افهم كلشي يصير جر شعري بلال اااااخ شبيك

بلال: اتلي ( اكلي)

شرهب : اكل انت وبديت احط بحلكه وهو ياكل اثنينا مستغربين طعم الفاكهه

فكرت كلت اطب لبيبي احجي وياها بس هسه هيه عصبيه اخاف تركعني بلنعال انتظر لليل واشوف

ناي : كعدت وصحت بان وضعها مو طبيعي وحجت الصار كله جمد دمي واني اتذكر تهديد سما الحقيره ونفذت كلامها وبدتها بان راح تضيع سنه من عمرها حسيت اني السبب لوما طلبت منها توصل الرساله مجان صار كل هذا حضنتها وبستها اني اسفة كله من ورايه لوما طلبت منج هيج مجان سما حطتج بالها وضيعت سنه من عمرج

بان : ميحتاج تعتذرين شعليج انتي هي وحده حقيره وممتربيه احنا متجنينا عليها هي الله وكعها بيدنا حتى تنفضح والصار تستاهله ومندمانه لان سويت شى ولو يرجع الزمن هم اسوي وحده حقوده متخاف الله لاهيه ولا امها ويارب حوبتي وحوبتج تطلع بعد بيها لهاي اااااخ مااريد اغلط واوصخ لساني بيها خلي اسكت وانتي حيري بمصيبتج واكيد سما الي حجت لمهند قابل منين يعرف مشكل كامرات ويشوف تلكين هاي السوسه هي حركت فلمج بس تعالي احجيلي عنهم شونهم مالونهم حياتهم

ناي : شحجي وشكول شايفه الابيض والاسود هيج الفرق بينا وبينهم همه حياة ثانيه غير حياتنا وبديت اسولف الصار كله لبان وهي صافنه وكل شويه تسأل

بان : تتوقعين هم ترجعين الهم بيوم وتشوفيهم

ناي : دخيلج لا واريد ولا اوصل بس خلي تفض سالفه بيبي وتعدي سلامات اكص رجلي اذا فكرت تروح الهم

نزعت ملابسي ردت ابدل سمعت صوت بيبي وهي تعيط وتكول راحت حسيت جن وركبها تعيط ماتضل لحظه هنا

ناي : لج شسوي بان مااريد اطلع عفيه والله بعد مااروح هناك

بان : اكعدي بلغرفه ولتسوين شى هسه تجي ماما وهي تبلغنا

طلعنا من الغرفه ومدينا راسنا من الدرج حتى نسمع شديصير بره

مهند : بيبي البنيه صغيره وغلطت بعد متسويها

عمشه : كتلك ماتضل هنا وروح ابوها وامها ماتضل

مهند : غير افهم ليش

عمشه : انه تسودنت ومااريدن البت تضل

بديعه : ماشي بس لتعيطين على كيفج شوفي شون ترجفين

عمشه : يطبني عرج چا اليعيش وياكم مايكضه الرجيف بدعه والسماج بدعه لون ضلت ناي هنا احرك ابيكم واهججكم بليله ظلمه البت ماتضل

مهند : مااشي ماتضل ماتضل ناي وينج

بديعه : يااا شجاكم تره الشغله متسوى كل هاي الهوسه

مهند: ميخالف تردين تروح من بيتج

عمشه : اي والحين ماتصعد شمس الله ويوذن وناي جدامي

مهند : هسه اخذها ناي وينج

ناي : طفرت من مكاني ونزلت اول درجات

مهند : يله جيبي كم قطعة ملابس وامشي

ناي : وين اروح

مهند : امشي هسه ولتجادلين

ناي : صعدت والدمعه بعيوني لبست تنوره وقميص واخذت دشداشه الجنت لابستها بديالى ونزلت بيبي كاعده بلكاع وتفك وايرات ولا شالت راسها

متت قهر شون تطردني لزمتني شرهب

شرهب : عفيه لترحين بيبي لتخليها تروح

عمشه : كضي لسانج لا اشمرج وراها

ناي : لزمت شرهب وبستها اصعدي فوك ولتسوين مشاكل ارجع لتخافين بستها وطلعت لكيت مهند بلباب

مشيت وياه جان الشارع فارغ مابيه احد اباوع لحالي بله لو عندي ام واب جان هذا وضعي وانطرد ااااخ من اليتم شكد يذل دمعه منزلت مني لان حتى الدمع ميريح القهر الي بگلبي امشي ويه مهند وماادري وين ماخذني

مهند : شون ترحين بله متكوليلي

ناي : احجي ومااباوع عليه وكتله بهدوء انت اخر واحد اكول الك

مهند : ليش شنو السويته خلاج تكرهيني

ناي : منو كال اكرهك انت بس حط في بالك شغله وحده انت يامهند حالك حال مرتضى اثنينكم ولد عمي

مهند : بس قبل كم شهر مجان هذا كلامج

ناي : قبل كم شهر من جان اخويه فوك راسي وعايش حياته ومتأمل خير منك ومن اهلك تالي شحصل السجن من وره خالك وضياع حياته من وره اختك وامك وابوك كملوها بأذيتنا شنو الشفته منكم زين وتريد گلبي يحبك

مهند : بس انتي تحبيني

ناي : اول محسيت بشى الك كتلوه اهلك بيدهم اني اعزك واحترمك لان اكبر مني وابن عمي غير شى اعذرني اعتبرني مراهقه وكبرت وعت

مهند : منو حاجي براسج انتي متحجين هيج

ناي : والله محد حاجي ياابن الناس بس كدامك امك تكرهني وابوك الي هو عمي يموت من عدنا اختك تشوف دم سنونها ومتشوفنا على شنو اذب روحي بلنار ناقصني اذيه شو فتحت عيني على ساهره وصالحه يوميه طلابه يوميه مصيبه انطيني يوم عدل بهذا البيت ومن تقربت انت مني حارن شسون زين ياترى صالحه تقبل اصير جنتها

مهند : مو بكيفها اني احبج

ناي : لا بكيفها والله بكيفها

تعرف منو صالحه الموتت امي اذا امي چنه حالها من حال باقي الجناين مارحمتها تريد اني اخذ ابنها الوحيد وتستقبلني بالاحضان زين منها لهسه مذابحتني عفيه اسكت مهند البيه والله يكفي يضيع حتى عقلي منا بيبي الطردتني ومنا اخويه بلسجن ومنا گلبي نار على اختي وانت جاي تحجيلي بلحب

مهند : امي شعليها مو ابوج

ناي : كافي احلفك بأغلى شى عندك كافي والله من الرجف احس راح اخرب هسه بلشارع مابيه حتى امشي كولي وين رايحين

مهند : ماعندي مكان غير يم عمي جوحي ابقي اليوم ونشوف باجر شيصير اليوم اكعد ويه بيبي واحجي وياها وان شاء الله باجر ترجعين

ناي : كله منك والله

مهند : هسه اني ابو الغلط مووو مو اني الرحت لديالى بدون ماابلغ وجذبت

ناي : اووووف درت وجهي وبقيت امشي ومجاوبت وصلنا ودكينا الباب فتحه مرتضى

مرتضى : هااا انطردتي

ناي : تستقبلوني لو ابات بلشارع

مرتضى : افااا عليج يبنت العم اشيل على راسي على عناد ذولاك الناس ابيتج بغرفتي

مهند : وانت تجي تبات يمي وبله لغوه زايده

مرتضى : هههههه تعالو طبو خلي شويه امي تنجلط

ناي : طبيت الها وشافتني واخترعت تكول جاي اخذ بيتها

ساهره : هااا ولج شو رديتي

مهند : خاله اليوم ناي تبات يمكم بس اليوم وباجر اجي اخذها

ساهره : ليش عيني احد كال الك فاتحتها ملجأ

مرتضى :يمه البنيه تبقى هنا عيطتي هوستي هيه باقيه لتوجعين گلبج واتعبين لسانج ناي بايته هلكم يوم

ساهره : صخام ياكم يوم ولك هو يوم واحد مااتحملها

مرتضى : تتحمليها اعتبريها سما بت اختج لو هاي كملتها مخططه وذيج منقطه

ساهره : ولك انت وياي عليه

مرتضى : ناي باتي بغرفتي اخاف يكولون الهول بيه قوات المارينز وميكفي تباتين بيه لان اعرف امي حنينه كلش بهيج سوالف

ساهره : وانت وين تنام يلمصخم

مرتضى : بحضن حبيبي ابن عمي الغالي وابن اختج صالحه

ساهره : الله لا ينطيج هججتي الولد من بيته

ناي : انداريت على مهند عفيه وديني  والله هسه ابوس حتى رجل بيبي حتى ترجعني

مرتضى : يمعوده امشي

ناي : دفعني مرتضى وصعدت وياه ومهند ورانه

مرتضى : حارس انت مالتها

مهند : اششش وبله لغوه شكد تلغي

مرتضى : مو احسن مااهوس على الفارغ ومن يوكع الفاس براس ادنج راسي مثل النعامه

مهند : لك هاي عليمن

ناي : صرت بنصهم عفيه كاافي وينك يونس تعال شوف اختك شصار بحالها بلياك وكعدت ابجي

تقرب مهند ومرتضى مني

مرتضى : واحنا شبينا مو بعينج كافي بجي

مهند : لتبجين باجر ارجعج وعيونج تحملي بس اليوم

مرتضى : ناي امانه كنتوري بيه ملابس ديري بالج تلبسيهم اخاف امي تشوفج وهلمره تشمرج بلسطح

ناي : باوعت عليه وابتسمت لتخاف مااتقرب من غراضك

مرتضى : لج ضحكي هيه خلصانه شصير بعد اتعس من هيج

ناي :  الْحٍمَدٍ للـّہ على كل حال

مهند : محتاجه شى

ناي : هزيت راسي بلا

مهند : اني رايح اجيبلج اكل

مرتضى : ليش احد كلك كاعدين بلصومال

مهند : الصومال احسن تره هنا جوحي

مرتضى : بشرفي صحيح

ناي : كلشي مااريد بس اقنعو بيبي ترجعني

عافوني وطلعو وره نص ساعه جابو اكل وخلوه يمي ومرتضى حتى مي صعد يمي وكال اكو حمام فوك لتنزلين وادوخين روحج

طلعو وبقيت وحدي لكمه مكدرت احط بحلكي سمعت الظهر عمو اجه وهي ولا صاحت ولا كالت ميته عايشه

للعصر سمعت صوت ساهره

ساهره : لج ناي وينج

ناي : نزلت هااا عمه

ساهره : تعالي عيني بت الباشا نظفي البيت

ناي : انظف

ساهره : تره هذا مو فندق السعاده كل شويه هازه طولج وجايه يله اني رايحه لجيرانه ارجع الكه البيت يبرج برج واكو هدوم هم غسليهم اشتغلي زين مو مال جايفات

ناي : مجاوبتها ونزلت اشتغل والبيت جان بيه وصخ هوايه اجلف وارجع ليوره رجعت وهيه تباوع اخاف ممنظفه زين كربت عليه مجازت مني اله لل١٠ بليل هلكت حتى ظهر مبقى عندي والي خبلني عمي كاعد ياكل بلجذب مكال جوعانه عمو تردين اني خطار عندك وبنت اخوك ويتيمه حتى سلامه من وره خشمه اكل وكاام ومرته ويااه همزين اكل الظهر بعده موجود صارت دوخه بيه من الصبح مماكله وكاربه لمن ماله صعدت اكلت

جنت احط اللكمه بحلكي والدمعه اضوكها ويه الاكل شكد حسيت روحي تايهه وذليله ومالي احد بلدنيا

بديعه : كعدنا على العشا وناي ماكو حتى عمتي ما اكلت ادري بگلبها نار عليها شرهب مقبلت تاكل وهذا بلال شافها وهم مااكل وضليت اتوسل بهذا وذاك كوه اكلو البيت خيم عليه الحزن وفلاح وعبيد مدخلو بسالفه ناي حجايتهم الوحيده بكيف امي خبلوني ذوله من كل عقلهم لليل كمت الوب وين انطي وجهي ياربي هسه نامت اكلت اعرف بيت عمها بس المشكله هذا جوحي لو شافها ميته جوع ميدير بال حاولت احجي ويه عمتي منطتني مجال عاطت بيه وسدت الباب بوجهي

ناي : مرت ٤  ايام حتى ملابس بعد دزيت حسيت الاقامه راح اطول ٤ ايام واني بس اخدم ساهره شوت على راسي بصل تكعدني من ساعه ٨ الصبح اشتغل واكرب لليل مبقت لا زوليه ما غسلتها ولا ملابس ولا بردات ولا فرش طلعت كل وصخها براسي وفوك كل  هذا تعيط بيه مرات ابجي ومرات اسكت والولد كل ميجون

يكولون تحملي تعب والله مو ٤ ايام صارت عليه عبالك ٤ سنوات وخلف الله على مهند ومرتضى يجيبون اكل الله واكبر حتى اللكمه متنطيني اكل همزين المي من البوري بلاش جان حتى المي ممنوع اشربه ويگتلني العطش

بديعه : ايام احاول احجي ويه عمتي وهي متقبل لا تحجي ولا حتى تاكل ويانه كاعده بغرفتها وحدها حتى حبيبتها شرهب متدخل عليها وهاي شرهب بدت تبجي وتنقهر على اختها وحايره شلون اسكتها

شرهب : حسيت بأذيه واختي ماكو هاي ثاني مره انحرم منها اول مره من اخذتني جليله وهاي المره من طلعت ناي من البيت كمت مااكل والليل كوه انام اتخيل اختي تضربها ساهره واكعد مخترعه جنت كاعده وبلال يمي يلعب ويشخبط باوعت على فراش ناي احتصرت نزلت اركض من الدرج صار كبالي مرتضى

مرتضى : هوش هوش على كيفج لتوكعين

شرهب : بله متوخر مني ودفعته جان يلزمني من شعري ااااخ

مرتضى : ام كفشه وين رايحه تركضين

شرهب : رايحه ارجع اختي

مرتضى : اطلعين للشارع

شرهب : بااع هذا شو هد شعري عوفني لا اعيط والله

مرتضى : ههههه توسلي يله اعوفج

شرهب : هلووو اتوسل جان يجي مهند عفيه مهند خلي يعوفني

مهند : عوفها مرتضى ليش تندك بيها

مرتضى : شوكت تشيلين شعر الصخل هذا

شرهب : من يطلع عندك شعر بلحيتك

مرتضى : والله مال الزم شعرج واكصه

شرهب : شوو وخر ودفعته عثر ونزلت وغمه كون دفعت الباب وطبيت على بيبي

عمشه : شنهي تزكطين مزاكط وجايه هداده شنهي يشربت چاي على حبوبتج هيچ هاي تاليهه

شرهب : اريد اختي بيبي

عمشه : ولت انسيهه مالج اخت

شرهب : كعدت بحضنها وابوس بيها

بيبي اني ماعندي ام كلها تصيحلي بت جليله بس اني اكول امي ذكرى ويونس وناي اخوتي وماعندي غيرهم ينطيج گلبج انحرم منهم

عمشه : سوالف العجايز بطلي منهه ولا توغفين على جبدي اختج ماترد

شرهب : حطيت راسي بحضنها وفرشت شعري وجبت ايدها ابوس بيها

بيبي تدرين انتي احبج مثل مااحب يونس وناي وبلال بس انتي متحبيني

عمشه : صمي حلكج لا ترطنين انه رويحتي بيج وانتي تعرفين هاي السوالف ماتسير علي وهاي دميعاتج قشمري بيها الوادم موش انه وناي ماترد هنا

شرهب : اذا مرجعت ناي بعد لا اكل ولا اشرب واموت نفسي كمت من حضنها جان اطب عمه بديعه

بديعه : سمعت كلام شرهب واشرت الها تطلع لان شفت عمتي ساكته زينه تنطي وتاخذ بلكلام سديت الباب وكعدت كبالها

شوفي عمه اني فتحت عيني يمج واني بعدني حديثه مثل متكولين وعشت يمج اكثر ما عشت ويه اهلي الي ماادري شى عنهم لهذا يومج واعتبرتج امي ومايوم طلعت عن شورج ولا كسرت كلمتج بس هلمره ماترهم هاي ناي حالها حال بان وگلبي نار عليها واعرف بيج تحبين ناي وبعزيه روحج مثلي اذا مو اكثر ومترضين الها البهذله بله خوله من طردتيها جان سبب قوي انطت بأخوه وانكتل بس هاي طفله ماسوت شى ليش هيج گلبج اسود اني مراقبتج صار ايام حتى الليل كوه تنامي وروحج تلوب عليها بعد على شنو هاي الطرده احجيلي شنو بالج احلفج بعزاز روحج بلي دفنتيهم بيدج عليج اهل البيت شصاير وخلاج هيج تسووين

عمشه :چا انه مااخلص من ملحت ابن صالحه ادور تلفين عليه يبدعه

بديعه : اني حلفتج بعد وانتي بكيفج

عمشه : لاتضنين انه مرتاحه يشهد الله النار تسرح وترمح برويحتي عبن هاي الغالية هيه واخيتها قطعه من جبدي

بديعه : اعرف والله ليش مستغربه شجاج ياعمه اخاف ذني سون صخام سحر شى والله حار عقلي من الافكار تودي وتجيب ليش تخبلتي من راحت لبيت ام ذكرى هيه يوم ورجعت

عمشه : انه حلفت يوم ماتخط رجول ناي واخيها مايضلون بداري

بديعه : غير نعرف ليش

عمشه : انه يوم ما الوليد عاف علامه ودروسه واشوفنه يحط رجوله ويده بلعتيچ والزبل انمرد افادي اعاين عليه واطحن طحن واكولن هذا الحليو المعدل يكض وصخ الوادم وابن ساهره وصالحه يدرسون وعيونه تلاحكهم مايمر وليد لابس ثياب مدرسه اله وكف وطكت دمعته سوده بوجهي وانه اضلن افرك بيدي واغم كصتي عبن مابيدي شى

كضيت عباتي وطلعت بفجريه الله وسيرت لديالى وانه اكولن انحرم منهم ويعيشون بخير ولا اشوفن يونس طايح وعيونه مكسوره

وصلت ليهم وسألت الوادم ودلوني اكولن ذوله من ريحت بتهه وهمه ولد خير وناي ويونس يعيشون بخيرهم وانه شربت تضل يمي بيها شى

بديعه : لا مابيها اي كملي عمه

عمشه : يايمه وصلت ليهم وانه اكولن تاخذهم بالاحضان وتحب على يدي عبن اعوفهم ليها ودخلت عليهم والوجوه تصوفرت

بديعه : منو جان موجود

عمشه : ام ذكرى وهاي ام حلك المسلچ وداد خفت لشوفتهه جنهه مردانه مجعوصه

وانه بعدني احجي يحبيبة ومااشوفن غير وداد تهد علي وحسها يلعلع لذاك الصوب تكولين انكرصت 

وداد : هي هاي تاليهه خير رجلي وخير اخوتي يعيشون بيه اهل العتيك

عمشه : چاانه ماجايه لهاي الخلفه من خفت هلشوفه انه جاي للحجيه هااا حجيه موش ذول وليداتكم

وداد : مالج دخل بعمتي مره مريضة اني بمكانها

عمشه : هاا ياام ذكرى اگلج الوليدات كتلهم الهبري وليدات بتج ماتراعين الله بيهم انه على عمه عيني جايه وحك الحسين عبن همه رويحتي لجن الايد كصيره ويونس مااريدن يضيع

ام ذكرى : مااكدر اخذهم وين اخليهم

عمشه : چا وبيتكم موش موجود وخير من الله لفي البت والوليد وعيونج حنان وطيبين والعيبه ماتطلع منهم

وداد : يابيت عيني ام بيت الحجيه سجلته بأسم ابني هاي سوالف المجاديه وسوالف العتاكه بطلوها انطيناكم مره وكتلتوها وراها رجلي من وراكم انحكم وانعدم وعمي من قهرته مات ولكم متخافون الله فوك مادمرتو عائله بكاملها جايه بكل عين صلفه تردين تذبين ولدكم علينا حتى ياكلون خيرنا هاي البقت حتى احركهم الج واخليج تموتين بحسرتهم مثل ماعيشتوني العمر كله بحسرة رجلي

عمشه : انه لوما الحجيه كاعده جان كمت على حلكج اجسر ضروسج واسحلج للمكبره ادفن راسج بيهه ام الگلگ يلمعفنه ترحين فدوة لاهل العتيچ ولتراب رجولنا اكومن افصم ظهرج انه چايه لهاي المره وجنهه لا تحل ولا تربط

ام ذكرى : مااكدر اخذهم ذوله ولدكم انتي مره كلتي مالكم عدنا جهال وعفتهم الكم بتي وماتت ومات كلشي وياها وبعد مااريد تجين هنا وتسوين مشاكل كافي الصار من وراج وره ابنج كلشي منكم مااريده

عمشه : اكومن ارد لداري موش صوجكم صوج الوكت الاغبر الخلاني اجيكم واتوسل بيكم لجن سمعي هاي وحطيتها ترجيه بذونج اله اخلي وليدات المرحومه حسرة عليج واشوفنج ذليله تحبين الايد لشوفتهم وذاك الوكت تعضين اعصابيج وتكولين ااااخ شجاني ومارضيت يعيشون بخيري

وداد : قحط هم عايزه منريدهم ولا نريد جيتهم واذا سمعت اجيتي هنا اخلي اخوتي يسحلوج للشارع ويطيحون حظج وحظ ولدج

عمشه : چاانه اعرفن خيستج يوداد موش انتي رجعتي المرحومه بليله ظلمه

هي سمعت هيج جنهه رگبها چني وسحلتني من عباتي وطردتني واني اعد واصف ومايبرد گلبي ومااشوفنها غير وراي وتكضني من ردني

وداد :اياج ترجعين واسمع الخرابيط مال قبل شويه واله السويته بذكرى اسوي بتها واخلي گلبج العمر كله يبجي دم عليها ولتصيرين خيره براسي كله من وراج وره جناينج السحارات تره مو وحدي سويتها اذا گبل جنت صغيره واخاف من هيج شغلات هسه كبرت واني بيدي اذا واحد اندك بيه ادوسه وادوس اهله استري على نفسج وعلى ولد ابنج

عمشه : كضيتهه سحلتهه من شعفتها ودك بلنعال فوخت گلبي وشكيت ثوبتها مسحتهه مسح حتى نعالي انكطع وحطيت  بيدي واركض حتى الوادم لاتنلم ورديت لبغداد

بديعه : حيل بيها بس شسوت وداد

عمشه : يايمه چا المرحومه شردها وسودنها وتصيح اريدن صمد غيرها خليهه سكته الكضه مات

بديعه : لا عفيه عمه شصار

وبدت تحجيلي على وداد وشسوت تخبلت كمت اروح واجي مدري الطم مدري ابجي لو ادعي احترك گلبي

وانتي عمه شمدريج

عمشه : كضيت صالحه وسولفتلي چا انه لويش كاضه رويحتي عنها ومااطردهه عبنهه كادره ومتخاف الله وايدها والسحوره وانه اخافن على البنيات لا اطلع حركتهه بيهن

بديعه : شون منخلص منهن

عمشه : ربج كادر يخلصنهه

بديعه : بس قبل مو خوله ونجم توسلو بيج ياخذوهم وانتي ماقبلتي ليش رحتي على ام ذكرى جان انطيتيهم لنجم

عمشه : يمه نجم خلكه صغير موش حوك انه اعرفن ولدي على كد الهبه ياخذهم وراهه يدير وجهه ليهم ويردون بكسره اكبر هاج موش اخذ اخيته وشرد چا محد يعرف نجم كدي انه كلت ذوله خير من الله فلوس وكياعين وبيوت ومايكصرون وياهم عبن خيرهم هواي مايخلص

بديعه : وانتي طردتي ناي لان حلفتي ميشوفون ام ذكرى

عمشه : انه طردتهه عبن تحس بعيشتنه انه خفت شافت الخير والبت تسودن علينا وتشوف هذا البيت گبر ليهه ورويحتها تهفها لصوبهم وتروح من يدي واخافن عليهه من  وداد تكضي بيها التوبه تكرشهه وتكسر بختهه انه ردت اكرصهه لناي وتبطل تروح لذاك الصوب واعرفن مهند يسيرها لبيت جوحي وساهره ماترحمها ومن ترد هنا تركد وتنسى الشافته وماتذكر غير ساهره وسوالفهه الماصخه وكرابهه عليهه هاي حديثه والخير يلعب بعيونهه ومااريدن تسب حالنا وتبطر على رزقنا الگليل

بديعه : وصار ٤ ايام اكيد طيحت حظ حظها

عمشه : خليهه تكضي اسبوع عبن تستاهل لويش تنام يم حبوبتها چا انه موش احبنهه اكثر من ذيج

بديعه : هههههه هااا عمه تغارين جان تضربني على راسي

عمشه :وحمس ولطم كل المصايب من جوه راسج منهي صخم وجهج وخلاج ادزين البت ااااخ بيج كضه انعل شيب الخلفج

بديعه : هههههه انعلي بس خلي اجيبها الله عليج والله البيت بلياها مينراد

عمشه : تضل اسبوع

بديعه : عموشه ولج شرهب تعالي بيبيتج تكول لخاطر شرهب تجي ناي

شرهب : سمعت عمه صاحتني واجيت ركض وفتحت الباب وجيتت على بيبي ابوس بيك

عمشه : يااا صخونه انه گلت

شرهب : اي عفيه بيبي عفيه

عمشه : لك ابن صالحه وينك

شرهب : اني اصيحه مهند مهند تعال بيبي تريدك

مهند : هااا بيبي

عمشه : رد البت وانه ماراضيه

مهند : سهله عود انرضيج

عمشه : اريدن كيلو كباب ماترد اله بكيلو

مرتضى : چا جنج على كيلو وشرط من جوحي حتى يجلط

عمشه : ياااا من خفت هلشوفه هههههه اي يول من جوحي اريدن عبن امك البربوك ماترضى يصرف علي

مرتضى : باجر غداج كيلو كباب بس اريد ارجع لغرفتي ولكم صار ٤ ايام اسمع شخير مهند مدانام حسو بيه ياناس

ناي : متمدده بفراشي ساعه ٩ بليل اكلت شويه مااشتهي من التعب اندكت الباب منعرف منو اجه وخاصه ممنوع تجوال سمعت صوت الولد نزلت خفت حيل ذوله شجابهم هيج وكت

مرتضى : يله خلصت عقوبتج امشي انرجعج للبيت

ناي : صدك صعدت ركض جبت ملابسي الي ونزلت اركض

ساهره : خلوها لباجر تخبلتو بهذا الليل جايين تاخذوها

مرتضى : اخاف عندج فراش ممغسول بعد يمه ارحمي البنيه مو صارت وصله مال مسح من الكراب اني رايح ويه مهند اوصلهم وارجع

مهند : ليش احد كلك احنا صغار ونخاف وانت تحمينا

مرتضى : اهووو حجه لا اريد اكعد على گلبك حتى متسولف براحتك بلطريق خبيث شسوي بيه رس مال خباثه

ناي : يمعودين امشو بس ودوني جانت رجلي تركض اريد بس ارجع

طبيت للبيت لكيت عمه وبان وشرهب وبلال ينتظروني بقيت حاضنتهم وابجي لان شفتهم صدك تهت بلياهم ممصدكه رجعت

وين بيبي

بديعه : طبي الها للغرفه

انداريت على الولد شكرتهم لان جانو متحملين اكلي وشحتاج يجون ميتعاجزون

وطبيت لغرفه بيبي ولكيتها كاعده تعدل بلصندوك مالتها شافتني ودارت وجهه شمرت نفسي بحضنها والله اشتاقيت الها بقيت ابوس بأيدها وراسها فدوة لتزعلين مني مااوصل بعد بس لطرديني شون انطاج گلبج تشمريني بره بيتج باوعت عليه وكالت بصوت ناصي

عمشه : تنامين الليله يمي موش حبوبتج احسن مني

ناي : ابتسمت وحضنتها تروح فدوة الج ولحنانج كلشي محجينا ولا تعاتبنا لان اعرف بيبي تحبني وتحب اخوتي حيل

وبيومها اني وشرهب وبلال نمنا يمها كل واحد بجهه

غفيت براحه بعد ايام من شلعان الگلب بس الراحه مدوم هذا بيتنا مدري من وره السحوره هيج دوم هايج بس مصايب ماادري من قله الايمان واسم الله نادراً ماينذكر تحس البيت مابيه بركه شهر واحد كاعدين مرتاحين لا مشاكل ولا طلايب جان تگب عركه لا على البال ولا على الخاطر

بدايه شهر العاشر والجو بدا يتغير ويبرد والمدارس بدت وبان مكسور خاطرها بسبب السنه راح تروح منها شكد حاولت تقنع ابوها بس هو قافل وهذا الشى خلاها حتى اكلها قليل وكامت تضعف وتتأذه

سما بدت تفتر بلبيت ويعلى صوتها بعد مجانت محبوسه وخلصانين منها الظاهر اهلها نسو سالفتها العوجه وتعاملو ولا جن صاير شى وامها رجعت اطلعها وياها وابوها يشوفها وميحجي شى على كولت عمه بدعه امها زركت عبيد بسحر خلته يخرس

والصار سما كامت تبيع حقاره علينا

تكعد وتتشرط وتحط رجل على رجل وتتأمر واحنا انظف من جوه رجلها جانت بان كل متشوفها تموت قهر تكول السوت المكسوره كاعده متونسه وتفتر واني الشريفه ضاع سنه مني بلباطل

سما : لج شرهب تعالي نظفي الكاع هذا بلال ذب الشربت بلكاع وشوفي خشمه القذر نظفي

شرهب : ومتنظفي انتي شبيج

سما : وشبت بيج وليش انظف وراه هو مبقى عليه بس المنغولي اشتغل وانظف وصاخته

شرهب : لتكولين منغولي عيب عليج انتي المنغوليه

ناي : طلعت على صياح شرهب يمعوده شكوو

شرهب : شفتي تكول لبلال منغولي

ناي : عوفيها خلي تولي

سما : هاي منو تولي شو انتي طولان لسانج

ناي : والله انتي الطولان وصايره جسره وتفترين وتأمرين ولا هامج احد شنو فكو حبستج

سما : وليش ميفكوها قابل اني شمسويه

ناي : كلشي ممسويه عيني شفت امها تريد تنزل مردت انطي واحجي وياها وتصير عركه صحت على شرهب وسحبت بلال توقعت عدا هذا اليوم بس ماعدا وبليل بلال سولته بغرفه سما شكد نحجي عليه ميفيد نعلمه هم ميفيد لان يشوف على الميزتواليت مالتها اصباغ اضافر ومعطرات ومكياج وهو يحب يلعب لان ميعرف شنو ذني من الوانهن تجذبه

جانت سما تسبح وهو طب وكعد يفتح ويلخبط جنا نقرا لان بدايه سنه ودروس وملتهين منتبهنا عليه

وين يله شرهب كالت وين بلال

شرهب : كمت ادور على بلال ماكو سمعت صوت عيطته جوه نزلت اركض حافيه لكيت سما لازمه ايد بلال وجوته بلخاشوكه حاميتها على النار بلطباخ وحاطتها على ايده وهو يكمز دفعها حيل ويبجي وينفخ على ايده وهي تعيط عليه

سما : اذا لكيتك تلعب بغراضي بعد احط هاي على حلكك

شرهب : شفته هيج لو متت قهر كمت وضربتها على ظهرها جان تلزمني امها متوقعت ورايه ومن شعري وركعت راسي بلكاونتر

نزلو على عياطنا عمه وناي وبان وبيبي من غرفتها طلعت

عمشه : عساج بسرطان بيدج لويش يلعوبه

صالحه : تمد ايدها على بتي والله الي يمد ايده على سما احرك البيت عليه لا عبالكم مكفخه الكم وهذا الزموه تره اشده بلباب واخلي الجهال الرايح والجاي يضربه طابوك

ناي : اخذت شرهب وبلال ومحجيت اي شى وجوه صايره طماطه ناس تعيط على ناس جان القالقني شى واحد وهي شرهب هادئه وبس تحط دهن بيد بلال وتنفخ على ايده

بيج شى شوشو بله شوفيني راسج اخاف عنجر

شرهب : لا مابيه شى

بقت شرهب ساكته وبس تباوع على بلال الي خلص الليل كله يبجي ويصيح اووا حاار وهي تسكته وتقشمره بألعاب

كل شويه اسألها عفيه بيج شى زين اكلي تعالي نتعشى مقبلت تاكل بس وكلت بلال

عفتها براحتها وثاني يوم مقبلت تروح ويايه للمدرسه بستها الصبح توسلت بيها كالت مااداوم هي هاي السنه مرحله ثانيه بدت شرهب تگبر وتثگل بس تحب تلعب ويه بلال دوم تكول الوحيد الميعرف الكره والحقاره

عفتها وبدلت وتوجهت للمدرسه

شرهب : من شفت بلال وضعه احترك گلبي هو ميفهم وعقله على كده وطيب وحنون وماعنده اذيه تكدر تعلمه بأي طريقه مو تحرك ايده كل مااشوف ايده شون منفوخه نار تصير بيه وهاي سما صار مده لعبت روحنا

من شمخرتها ولسانها الزفر

متحملت وكلت لازم اطيح حظها اذا اضربها امها راح تأذيني وتگب عركه بلبيت اذا اخبث عليها مراح تهتم امها كلشي تجيب الها

تالي كلت مابيها مجال اذا مااحرك الاخضر واليابس ياسما عسى ماتموتين يطبها طوب

ماداومت وانتظرت مهند يكعد من النوم اعرف وقت كعدته وبس كعد صحته

مهند : هااا شرهب شو ممداومه اكو شى

شرهب : اي عندي شغله ويااك

مهند : محتاجه شى

شرهب : تعال واني احجيلك اخذته لغرفه يونس وسديت الباب حتى لحد يسمعني وكتله

اكو شى ضامين اهلك عليك والكل محذرنا منكول بس اني خفت ينعاد الصار لان مبين سما متجوز

مهند : شصاير

شرهب: وبديت اسولف كلشي لمهند الي انصدم لدرجه لوه ايدي عباله اكذب

والله مداكذب وروح اسأل ابوك وامك اختك مصادقه حماها وكشفوها وجانت حامل منه

يتبع ....