تحميل رواية «الابواب الخمس» PDF

#الابواب_الخمس

البارت الرابع والعشرون /الجزء الثاني

للكاتبة Reem

باچر تگضي واتذكر سوالفكم

واجي والگة الفشل كل حيلة تارسكم

باچر روسكم بالملگه ما تنشال

تدنگ والحچي الينگال يوجعكم

دك تلفون بان جانت حوري اخذته منها واسمعها تبجي

لج شبيج گلبي انقبض

حوراء : لج ناي سيف انتل وهو بلمستشفى هسه

ناي : جن الدنيا افترت بيه وجسمي ثلج لا مو ثلج گب نار كمت حتى مااميز شديصير بيه فاقده كل الي اتذكره اريد ابني بحضني اريده كمت اعيط

ولج وين جنتي عنه هيج وصيتج

سديته بوجهه وكمت اروح واجي مثل المخبله واضرب على راسي اجه الكل على صوتي

بديعه : شبيج يمه الرحمن ولج بان شبيهه ناي

بان : ابنها منتول وبلمستشفى

بديعه : سوده بوجهي اباوع على ناي متعرف شسوي بس تملخ بوجهه وتصيح ودوني اريد ابني صيحولي يونس

حاولت الزمها ردتها بس تكعد راح تتخبل وشرهب تحاول تكعدها ماكو فاقده مو بوعيها

راح اخابرلج عمج ياخذج لان يونس بغدا بين مايجي وياخذج كومه وكت

ناي : فدوة عمه دخيل الله استعجلي ولكم ابني

عمشه : يمه شربت الزمي اخيتج راح اطيح دخيلك ياابوفاضل نجي الوليد هاي البت تخبل لون صار بولدها شى سترك ياستار

ناي : كعدت بلكاع وابجي والوب واتخيل شون لزم الكهرباء وروحي تفرفح يمه ترف مايتحمل كمت اضرب على وجهي

شرهب : ركضت لزمت ايدها يمعوده شبيج كولي ياالله ان شاء الله مابيه شى

ناي : بيه گلبي حاس اني كعدت من الصبح الوب مثل الغصه بلعومي شرهب اذا صار بأبني شى اموت لج هذا الطلعت بيه من الدنيا علموده تحملت اليسوه والمايسوه

شرهب : ان شاء الله مابيه شى لتفاولين عليه بلموزين شو كومي خلي البسج والبس حتى اروح وياج كمت لبستها جبه وشال لان حتى مابيها تشيل ايدها واني بدلت حطيت شال اخذته من بان لان ورانه طريق وبقينا ننتظر عمو وعمه بديعه خبصته بلتلفونات وين صرت وين صرت وهاي ناي تصفن وترجع تعيط وتبجي

طب عمو فلاح

فلاح : يله بتي جبت تكسي بلباب ينتظر گبل نطلع لديالى وخابرت يونس يلحكنا هناك

ركضت ناي گبلنا ورحت وياها مااكدر اعوفها

حاطه ايدها على راسها وجهه على الجامه تباوع وعيونها مابطلت بجي عمو خابر على خالو عمران وكال تعالو مباشره بلبيت وكلشي ماحجه گلبي لعب لان وجهه عمو فلاح انگلب وسكت ورجع خابر يونس وكال روح لبيتهم مباشره لوتني بطني من الخوف هي جانت ممركزه فاصله والطريق صار شطوله

من السيطرات والازدحام اخذت بطل مي وشربتها كوه شربت اباوع شفتها ترجف وايدها ثلج ناي تسمعيني عفيه لتخوفيني بيج شى

اشرت براسها يعني ماكو شى ياربي مكتوب علينا شلعان الگلب شون جانت الصبح مزوهره وهيه تنتظر ابنها وصلنا بعد ساعات زهكنا رغم السايق جان يمشي سريع

لكينا يونس واصل گبلنا واكف بلشارع يدخن ومدنك وسيارات هوايه ورياجيل والدنيا مكلوبه نزلت تركض واني اركض وراها راد يلزمها يونس مكدر دفعته وطبت تركض

ناي : اباوع بلوجوه وين ابني وخرو واوخر بكل واحد واكف بدربي صوت العياط للشارع هذا صوت وداد وحوراء طبيت للبيت جان الباب مفتوح وهواي ناس واكفه كرايبهم ونسوان شفت وداد ملخه بشعرها وحوراء تعيط ولازميها نسوان وام عبد وام صلاح يبجن

وكع الشال من راسي واني باهته وين ابني وين سيف

اجت حضنتني ام عبد

ام عبدالرحمن: يساعد گلبج بنيتي ويعوضج ابنج طير بلجنه

شرهب : هنا ناي كلشي متتذكر خلي اني اكول الكم شصار بأختي

شفنا هواي بحياتنا من قهر وطرد وجوع واذيه ومذله ومهانه وفقدان وغدر وعديناهن بس هلمره الضربه اقوى من كل مره هلمره ناي خسرت ابنها وكعت من طولها ولا ايد ولا رجل طفرت عليها مدري ابجي على حالها لو على ابن اختي صدك يعني بعد منشوفه ولا نسمع صوته وضحكته جان دمه يلعب ويه الهوا وكح ويكمزن ويبوس جان فرحتها وفرحتنا والي مثلنا مامكتوب يفرحن لهذا راح واخذ روح اختي وياها

وحده من الواكفات جابت مي وطشته على وجهه وفزت فتحت الجبه وفتحت سحاب الدشداشه وافرك بصدرها لان مكعد تكدر تتنفس هلمره تعيط وتدفع بينا تريد تكوم وهي كل حيل مابيها

باوعت على وداد الجان وضعها صعب الصراحه يبقى حفيدها وهي كلش تحبه دوم تكول ناي رغم خباثتها وحقارتها ويايه بس روحها بسيف حتى هو الوحيد الي يطب بغرفتها يكسر يخربط ولا تحجي وياه

ناي شافت وداد جان تجيت عليها تريد تضربها لزمناها اني وام صلاح وام عبد

ناي : ارتاحيتي موتي اول ماحبلت بيه لطمتي لان حبلت هاج ارتاحي مات كله من وراج الله لا يوفقج انتي وحده حقيره جلبه نكيتي حتى اولي من هذا المهجوم عساه انهجم فوك راسج وراس ابنج انتم ناس متخافون الله الجلاب المسعوره بلشارع ارحم منكم مرتاحيتو اله ضيعتوني

شرهب : حطيت ايدي على حلكها اريد اسكتها النسوان كلها تباوع وهاي وداد بس تبجي وتصيح بأسم سيف حتى مجاوبت ناي

ردت دفعت ايدي وتعيط ولك يمه سيف يومي گبل يومك وعمري على عمرك لكم شون مات عفته امانه يمكم

لج حوووووراء وين ابني هاي وصيتي الج كتلج حرك عينج عليه ليش غفلتي وعفتي

شرهب : كامت حوراء تريد تحضنها وهي فارطه من البجي دفعتها ناي حييل

ناي : ايااج تلزميني كله من وراج وره امج واخوج انتم حيووانات ردتو تاخذون ابني مني وهاكم الموت اخذه ارتاحيتووووو

وتلطم على وجهه كعدتها كوه ولازمه ايدها وابجي على لوعتها

ربي شسويت وهيج تاخذ روحي والله مااذيت احد من يوم مافتحت عيني وانت تلطم بيه مابقيت على حالي حال جن بس اني مولوده للعذاب جن انخلقت المصايب بس الي شسووووويت ربي شسوووويت

ام عبدالرحمن:استغفري ربج بنتي هذا امر الله ولكل اجل كتاب عمره هيج من هو بطنج مكتوب يموت بهيج عمر

ناي : لا مامكتوب ذني موتنه ابوه گتله حتى يكسرني لك مهددددي موتت ابنك

شرهب : كافي فدوة اروحلج راح تموتين

ناي : اريد ابني شرهب لج ماشبعت من ريحته اخذوه من حضني حرموني شوفته صوته لهسه وهو يدك الباب ويصيح مامه اتح يعني افتحي

شرهب : حضنتها حييل واشهك وياها كامت وخرتني وطلعت وجروها النسوان لان بره بلكراج متروس زلم

ناي : عوفوني اريد اشوفه اريد اشمه واحضنه

ام صلاح : راحو يدفنوه ماقبلو ياخذون احد من النسوان

طلعت تركض ومهتمت لكلام احد

ركضت ناي على يونس جان واكف بلكراج من شافها اجه عليها حضنها وتبجي بحضنه كعدت بلكاع بلممر بين الحديقه والكراج وهو كعد وياها وحاضنها ويبجي تقربت منهم وكعدت هاي احنا اليتامه مامكتوب النا الفرح اباوع على اختي واخويه وحالي ولا واحد بينا مرتاح وشايف يوم عدل واذا شافه لهذا اليوم وراها يزوعه دم ويخلي متلوع وملجوم

يونس : كافي حبيبتي ابنج طير بلجنه ميصير هيج تسوين

ناي : انت مو تكول شتردين اسويلج اريد ابني رجعلي سيف والله بعده صغير شون ينام جوه التراب يختنك يونس ميتحمل

يونس : لا اله الا الله

ناي : ماخلاني اشوفه راح دفنه حتى لا احضنه واشم ريحته شفت هيج نذاله اريد اشرب من دمه كله من وراه كله حرمني منه وبقاه وحده حتى يموت هو كعد ينتقم مني

يونس : اششش كافي كومي واذكري الله خابرته كتله ينتظرج كال مااكدر اخليها تشوفه تتأذه

ناي : يطبني طوب هو شعليه ابني هذا يانااااس ابني حتى لو اموت فوكاه هو شنو

شرهب : كامت تملخ بشعرها ولزمت دشداشتها تريد تشگها لزمها يونس وكومها لان الرياجيل كلها تباوع وهي بله حجاب ودشداشتها ملخ صدرها واني وام عبد وام صلاح اخذناها من عنده ودخلناها

انمله البيت نسوان ولا اعرف وحده بيهم واني حاطه ناي بحضني ساعات مرت وهي بس تبجي وساكته عبالك الكلام اختفى اسمع النسوان الي تكول شون مات وين امه عنه بله ذني الواحد شيحجي وياهن

الي عرفته من ام عبد جانت حوري تحضر غراضه علمود ياخذه خالو عمران ويجيبه لناي بدلت اله وخلته بلهول وهي صعدت للغرفه حتى تحط كم حاجه من ملابسه وحفاضات تكمل جنطته وتنزل وره مامكمله نازله ادور عليه ما لاكيته وهو طالع للحديقه ولازم ماطور المي اكو واير مجلوخ ومحد منتبهه عليه ولازمه الماطور الي جان يشتغل شايفته حوراء وضاله تعيط وعلى عيطتها اجه مهدي وخالو مطفين الكهرباء وشايلي ركض للمستشفى وهو اصلاً ميت توقعو يسون اله انعاش بلكت يعيش بس هو صغير ومامتحمل هيج نتله وميت

جانت ناي تسمع شون ابنها مات وتفتح وتغمض عيونها ادري بروحها كعد تتخيل الصار بيه

صار المغرب واحنا على نفس الكعده هواي ناس راحت والي بقوو كرايبهم حيل كم وحده باقيات يطيبن بخاطر وداد وحوراء ونظراتهم على ناي مثل الي محمليها الذنب محد يعرف الشافته اختي والوضع الي هيه بيه وصارت هوسه بره يمكن اجوي طب مهدي وذني الكاعدات اخذن خاطره

باوع على ناي جان مهدي حيل تعبان مهما كان ابنه ومترب صاح ناي اندارت وانتبهت على وجوده وهاي صار كل الحيل بيها كمزت وجيتت عليه خرمشت وجهه وهو لزمها

ناي : لك ليش ياظالم النفس الله ياخذك موتت ابني ارتاحيت

مهدي : ليش هو مو ابني

ناي : لا مو ابنك هذا ابني اني التعبت بيه ٩ اشهر وهو بطني اني الصار سنتين ونص اسهر واداري واوكل ومن يمرض اتمرض وياه

انت كتلته انت

وردت تريد تضربه حضنها حيييل وكام يبجي وهي تضرب على ظهره

مهدي : شون اكتله وهو اعز من روحي تدرين شصاير بيه واني ادفن قطعه من روحي حتى الجفن جبير عليه اذب التراب على راسي قبل مااذبه عليه

ناي : ليش مخليتني اشوفه اريد احضنه واشمه شكد ماعندك رحمه الله ياخذك كون تطلع منا وتموت وادفنك بصفه انت ليش عايش وهو ميت انت تستاهل الموت مو هو

من حقارتك حتى ماخليتني اشوفه اودعه املي عيني منه ولك مااااات واني بحصرته كون تضل بحسره الهوا مثل ماضليت بحسرت شوفته

مهدي : شون اخليج تشوفي غير تموتين مشفتي حالته وشكله شون صار جان ماضل عقل براسج والله خفت عليج

ناي : وخرر وخر مني اكرهك احتقرك الله يشيلك دم ابني برگبتك وركبت اهلك

شرهب : دفعته حيل وخرت منه واندارت على وداد

ناي : انتي دوم تكولين امي اخذت رجلج منج ارتاحي وانتم اخذتو ابني مني هااج ابنج رجع الج وادري بيج مراح تتهنين بيه وكون مثل ماانحرمت من شوفت ابني وطردتوني بطرك ملابسي كون تنحرمين منه الله ينتقم منكم دنيا واخره

طلعت من البيت جريتها وين رايحه

ناي : اريد اروح اشوف ابني

شرهب : تعالي نرجع نايه الدنيا ليل صارت

اجه صلاح وعبد من شافونا لزمت صدرها وحاولت اسد السحابه همزين انسدت ونزعت شالي وحطيته على راسها وغطيت صدرها

صلاح : البقيه بحياتج

ناي : اريد تاخذوني على سيف

عبدالرحمن: ناخذج باجر والله بيدي اخذج

اخذي اختج بسرعه ناس طابه طالعه

ناي : ماادخل لذاك البيت لو اموت

صلاح : وديها لبيتنا منا للصبح ناخذج

ناي : مااريد اشوف مهدي

عبدالرحمن: صار مااشوفه الج والله شوفي حالج راح تموتين اخذيها شرهب اما لبيتنا او بيت عمي ماكو فرق وغسليلها وابقي يمها

شرهب : ماشي

ناي : باقيه هنا مااتحرك

تقرب صلاح وكال

صلاح : احلفج بسيف وهو اغلى من نظر عينج روحي ادخلي وارتاحي والتردي يجرالج

ناي : شهكت واني اسمع يحلفون بأبني

شرهب : اخذتها ورحنا بأتجاه بيت صلاح وكفنا بلباب ماكو احد لان امه هناك بيت مهدي اجه صلاح فتح الباب وطبينا

كعدتها بلصاله على القنفه

صلاح : روحي جيبي مي الها وحاولي تغسليلها واني مراح اخلي احد يوصل لهنا

شرهب : عفيه بلذات مهدي هي تشوفه تنكرص

صلاح : ماشي راح اسد الباب ورايه

شرهب : حسيت بمغصات قويه حيل بس مهتميت اني بحال روحي لو بحال ناي وضعها

دخلتها للحمام مكدرت اسبحها لان ماعندي ملابس بس غسلت الها جانت ورقه يابسه واكعه من شجره واني كل مااحركها تتكسر بيدي ويوكع شى منها

رجعنا للصاله شويه واجت ام صلاح وجايبه اكل حاولنه نوكلها ماقبلت تحط لكمه بحلكها تالي حطت ايدها جوه راسها وتمددت على ايدها وبقت ساكته وصافنه

اختي منهاره ومتعرف شسوي الصار جبير عليها ومكعد تكدر تتحمله

بدت النغصات واللويات تكثر وجعي يزداد واني ادوس على نفسي اتحمل واتحمل لحد مافرغت طاقة التحمل عندي من وره هبطتي على سيف وحركت گلبي على ناي صار هيج بيه ومنا الطريق طسات وحركتي وركضي وره ناي خلاني اتوجع ااااااخ

ام صلاح : شبيج ماما

شرهب : خاله بطني كعد تتكطع

انتبهت ناي عليه وكامت وتباوع على ملابسي غركانه بلدم

ام صلاح : لازم ناخذج للمستشفى انتي حامل

شرهب : اي خاله ااااااااااااااخ

ناي : شبيج شرهب

شرهب : داتكطع بعد مااتحمل

ناي : سودة بوجهي كله من ورايه كومي خلي ناخذج

شرهب : ابقي هنا هسه اروح ويه ام صلاح انتي وين بيج حيل تتحركين زاد وجعي واجت ام صلاح كالت صلاح ومهدي بلباب

باوعت عليها ادري بيها متريد تشوف مهدي طلعت ويه ام صلاح لكيت يونس واكف اتوقع مقبل مهدي يوديني من شفته كلش ارتاحيت رغم الالم الي احسه واخذوني للمستشفى طول الطريق متوجعه واعض بردني من الالم لحد ماوصلنا ودخلنا الطوارئ واجت دكتوره كالت عندي اسقاط

حطولي مغذلي وضربوني ابر جنت اتكطع من الالم سولي سونار وثبت عندي اسقاط

وبقيت بيد المقيمات الدكتورات من وحده لوحده انلعب بحالي لحد ماسكن الالم وسقط

لكيت ام صلاح يم راسي

ام صلاح : العوض بسلامتج بنيتي

شرهب : الله يسلمج

ام صلاح : متفهمني شنو هذا الحظ عليجن وحده تدفن ابنها الظهر والثاني تسقط بليل عين وصابتجن دخيلك الهي

شرهب : ياعين خاله على شنو يحسدونا على عماراتنا واملاكنا هو هاي احنا هيج مدوم النه والله لو عشر جهال بطني ميتين ولا سيف ميت

ام صلاح : موزين عليج لتبجين

شرهب : اريد ارجع لناي ضلت وحدها

ام صلاح : لتخافين ام عبد راحت يمها وانتي الصبح تشوفج الدكتوره وتكتبلج خروج وخلي يخلص المغذي هم ينطيج حيل دمج تصفى

شرهب : جريت نفس وغمضت اريد ارتاح من الوجع الصار بيه بالي افكر شراح يسوي عدي ذيج المره هو السبب ومات هلمره اني شراح يخلصني من لسانه

غفيت من المسكنات للصبح وكعدت مستحيه من ام صلاح خطيه منامت المره شنو ذنبها بقت ويايه بلمستشفى كتبولي على خروجيه وطلعت وصلاح وحده جان منتظرنا لازمتني واسحل بروحي

صلاح : الْحٍمَدٍ للـّہ على سلامتج

شرهب : الله يسلمكم يونس وين

صلاح : راح ساعه ٧ الصبح على ناي لان تريد تروح تشوف گبر ابنها وكتله روح اخاف تتخربط واني ارجعج للبيت

شرهب : تعبتكم ويايه وخجلانه منكم حيل

صلاح : يمعوده حالج حال سدره انتي هم اختي قربت السياره حتى متمشين هوايه

شرهب : رحمه الله والديك مقصرت

رجعنا للبيت هوسه وجاين ناس ياخذون من خاطرهم طبيت لبيت صلاح وناي جانت ماكو مبين رايحه

ناي : النومه ماعرفت طعمه خابرت ام عبد على ام صلاح طلبت منها حتى اطمن على شرهب وعرفت سقطت لمت نفسي لو مجايبتها ويايه جان هسه كلشي مابيها كله من ورايه بقيت للصبح انتظر اول خيط شمس يطلع اول ماطلع فتحت الباب وكعدت بلحديقه على الثيل وصافنه على مكان الماطور هنا ابني انلزم هنا طلعت روحي بلحظتها لعب الشيطان براسي وردت اروح الزمي لو اموت نفسي اقلها اندفن بصفه ومينام وحده فزيت على صوت خالو عمران وايده على راسي

عمران : اريدج قويه مثل ماشفتج اول مره

ناي : ماضلت بيه قوه اني لو بيه خير وقويه مجان سمحت لمهدي ياخذ ابني مني ولا ضليت جم يوم بدونه وضليت ملطشه بيده

عمران : كلها اقدار ومكتوبه علينا ولازم نحمدالله هاي امانته وردت اله واي اعتراض منج معناها اعتراض على حكمه

اني قصرت وياج سامحيني بنتي وكتاب الله جنت جاي وجايبه الج بس الموت جان اسرع مني

ناي : وديني عليه خالو ومااريد مهدي ويايه مااريد المحه

عمران : يجرالج كومي اخذج

ناي : طب يونس هاا شونها شرهب

يونس : ساعتين وتجي ليضل بالج

عمران : اطلع السياره

ناي : يونس تعال ويايه

يونس : مااعوفج جيبي ايدج

ناي : لزمت ايده ونزلت دمعتي اااخ ياخويه اخيتك ضاع حلمها وضاع كلشي حلو بعمرها

صعدنا بسياره خالو اني ويونس ليوره وعبد ليكدام بصف ابوه

وصلنا لمقبرتهم بديالى عبالي دافني بلنجف

نزلت ادور على ابني اشرلي خالو

واني الرجل تتعثر اكوم واوكع

وكعت على وجهي واشم ترابه طفل ماشاف من عمره شى يندفن يمه حبيب امك سيوفي كوم اجت ماما كوم ياروح امك وعمرها

تعال بحضني مو تحب تنام يمي على الجربايه تعاال انومك والله مااشيلك بعد ولا اخلي واحد يتقرب منك بس تعال شكالت روحك وانت تنتل تأذيت حبيبي تأذيت ياروح امك

ذبيت تراب على راسي ولك كووووم سمعني صوتك عياطك كوم كسر وعيط وخرب ينكص لساني اذا عيطت عليك ملخ شعري كوم بوسني وكعدني الصبح لج يممممممه ابني يمج يوووم اجاج حفيدج مارحموني يمه موتوه حتى اضل العمر كله الطم عليه

يونس : على كيفج ناي حرام والله هيج تسوين

ناي : ومو حرام ابني هنا بنص التراب مولازم بهذا الوكت كعد اريكه واضحك وياه مو جان المفروض انت خاله وتاخذه من ايده وتشتريله شراح تسوي هسه اطلع ثواب اله

يونس : استغفر الله العظيم شوو كومي وكافي عياط جريتها حييل وهي ترافس بيدي والتراب تارسها ترس كوه لزمتها

خلي نروح هاي اذا تبقى هنا ياتتخبل ياتموت واني مامستعد اخسرها

عبدالرحمن: اني هم اكول هيج شوف حالها يخوف

عمران : الله يبرد نار گلبج ويصبرج على مابلاج

يونس : جريتها حيل واباوع لايدها كلها تراب بكل ايد صم تراب وتشم بيهم

عفتها المهم اصعدها بلسياره

رجعنا واني حاضنها اخاف عليها

شرهب : انتظرت ناي وبهذا الوكت اجت عمه بدعه وبان وبيبي ماطبو لذاك البيت صلاح مباشره جابهم ليمي شافوني متمدده وعرفو سقطت وهاي بيبي گلبت الدنيا بلبجي كوه سكتتها

بديعه : لتنقهرين احبيبة بعدج صغيره وربج يجبر بخاطرج

شرهب : اني همي ناي هسه حتى الي بطني من نزل ماانقهرت كثر ماانقهرت على اختي

بان : هي وين هسه

شرهب : راحت للمقبره

عمشه : صاحبت المكابر ياضوة العين

ترجعك يمة الي وية اليرجعون

دللو يالولد ماتسمع الصوت

دللو حظني وحشة ورايح الحيل

خذاك الموت غفلة بيوم ردناك

يوم الطاح حملي وردتك تشيل

بديعه : عفيه عمه انتي مريضة والطريق تعبج لتوكعين نحير بواحد بأثنين

عمشه : البنيات طايحات ومامش حيل الاولي واساعدهن عيفيني انعي على حظهن الردي مايوم شافن خير ضال الخير يتبده لامهات الكمل والرجل المفطره وذني شحلاتهن وشريفات تشيل الدنيا واطيح بيهن

بديعه : كلمن وقسمته بعدهن صغار والله يعوضهن لاتزيدها دخيل الله

طبت ناي كمت على كيفي وحضنتها

ناي : شوفي هذا ترابه شمي شكد طيبه ريحته

شرهب : تعالي حبيبتي

عمشه : يايمه يابويه راح وليدج بزرت گلبج

ناي : اي بيبي راح تعبي وسهري وبياض عيني

بديعه : صدك جذب عمه شوفي حالها وانتي تشيشيها بلزايد

ناي : شجابكم بيبي تعبانه

عمشه : اعيفج وحيدج چا انه من عرفت وحك علي طحت على وجهي عبن اعرفن رويحتج معلكه بولدج

ناي : كعدت يم رجل بيبي وكتلها

شفتي ابن صالحه وابن وداد شسوو بيه واحد طعن بشرفي والثاني كتل ابني

بديعه : يابتي هو شعليه قدر وصار هو غير ابنه الله اعلم شنو حاله

ناي : دك ماانطيج ابنج وماانطيج لوه ايدي بيه وتاليها كسرها الايدي وخلاني عاجزه

بديعه : تعالي جبت ملابس ويايه خلي اسبحج كلج تراب ونروح هناك العالم جاي تعزي وتاخذ من خاطر عيالج واجت حوراء كالت خلي تجي

ناي : مااسبح خابرو يونس خلي يجيب سياره ونرجع

شرهب : وين نرجع

ناي : نرجع للبيت ماابقى لحظه بهذا البيت كل ركن بيه اشوف ابني يكمز ويضحك رجعوني لكربلا اذا ابقى ليله هنا احرك روحي وانتم بعد بكيفكم

شرهب : يمعوده بان خابري يونس خلي نولي ليروح يصير شى ونتعزه ونتصخم

خابرنا على يونس وره نص ساعه كال جبت كيه لان عددنا هوايه عمو فلاح ويونس وبلال وبان وبيبي وعمه واني وناي

اجت ام عبد وام صلاح وخالو عمران والولد كلهم رادو نبقى وخاصه ناي وهي غير كلمة ماابقى متفارك لسانها

دخل مهدي حتى يفتهم الديصير

مهدي : وين رايحه

ناي : هاي كدام الكل وتراب ابني وفتحت ايدي بيه تراب اذا ماطلكتني احرك روحي وخطيتي برگبتك اني بعد مااريدك ولا اريد اشوف وجهك الجان تهدد بيه دفنته بيدك البارحه عوفني بحالي وانساني ماعندي شى يذكرني بيك ولا عندك خالو خلال كم يوم اريد ورقتي ليش اطلع كدام الزلم واسويلي هوسه وافضحكم

عمران : التردي يصير اخذ اختك يونس وتوكلو بالله كلها جم يوم تفض هاي الناس واخلي مهدي يمشي معامله ويطلك

يونس : يله السايق ينتظر تكدرين تمشين شرهب

شرهب : اي اكدر طلعنا كلنا مرينا بصف باب بيت مهدي جانت حوري واكفه ومنتهيه من البجي حاولت تتقرب من ناي دفعتها ادري محملتها الذنب صعدنا وتوجهنا لكربلا وكل وحده بينا تسأل روحها وبعدين شراح يصير بينا

ناي : فقدت لذه الحياه صار الليل والنهار واحد عندي ماكو غير ذكريات ابني تحومي براسي كطعت الاكل كمت احسه مر زهر وبيبي من تتخربط يله اكل لخاطرها

عمه خوله يوميه تخابر احجي شويه وياها واسده بيبي حملتها كلشي مثل كل مره رغم مالها ذنب اما اني حملت مهند ومهدي كلشي الصار بيه

ويه اليوم صار ١٠ ايام لا سامعه صوته ولا ضحكته ولا اشوفه من يلعب ويكمز بسبب قلت الاكل وكعت وصارت المغذيات هيه تسندني مرات اكول ليش عايشه على شنو لا ابن ولا عائله ولا دراسه ولا مستقبل شو الماضي اظلم والحاظر مدمر والمستقبل ضايع اكثر من مره فكرت انتحر واخلص من عيشتي

شرهب : رجعت لبيتي وبلغت عمي وعمتي على الاسقاط والسبب ماكسرو بيه وبوسوني واخذو بخاطري اما عدي ولا اهتم ولا عبالك سقطت يمكن هذا الشى انسب الي مابيه حيل مشاكله وطولة لسانه بقى ملتهي ويه طلابه والطالبات ويدرس وياخذ بهلفلوس ويضم بيهن بقى بالي يم ناي وخاصه كل مااخابر وضعها يتراجع تمنيت اعوف الكل واروح اداريها استغربت على يونس صار اسبوع ماوصل لناي ولا سأل حتى عليه مااجه ولا شال تلفون شجاه معقوله تعب من عدنا

ناي : متمدده واباوع على بلال يلعب بلمكعبات والسياره واتذكر سيف وامسح بعيوني الي حتى كمت مااشوف بيهن رفعت ايدي مورمه من الكانونه والدوخه لاعبه بحالي حاولت اعدل نومتي مكدرت

اندكت الباب وراحت بان تفتحها رفعت عيني اشوف يونس طب

تقرب باسني

يونس : شون صرتي

ناي :بعدني ماميته زين تذكرت اختك

يونس : بان حضري غراض ناي راح اخذها ويايه

ناي : ركزت بكلامه وكتله وين ماخذني

يونس : راح تجين تعيشين يمي صار اسبوع اركض مثل المخبل حتى بس الكه مكان واجره واجيبج عندي مااكدر ابقيج هنا وازيد حمل عمي وهم اريدج كبال عيني عفت الشقه لان العماره ماينسكن بيها فوكاي مخازن ولد طابين طالعين اجرت طابق ثاني بيت جوانه مره جبيره بلعمر وبتها معوقه واحنا الطابق الفوك ايجاره زين وقريب على المحل

ناي : اخاف اتعبك واصير حمل ثكيل عليك خليني هنا

يونس : اشيلج على راسي اذا حملج ثكل تره انتي من ريحة امي لو نسيتي صيري بطله وساعديني وساعدي نفسج هاي النومه والمرض مو الج يله ناي شديلي حيلج

بديعه : وين ماخذها

يونس : تعيش يمي عمه خليها ونس وياي

بديعه : شوف حالها تتحرك منا توكع منا شلون تكدر اداريها

يونس : لا ادراي ولا شى بلعكس هي راح اداريني هاي أًختي السباعيه من اني وصغير من اوكع الكيها نايمه يم راسي هيج وحده ماينخاف عليها من طلعت من السجن تكول هاي تجربه وعدت والعاشته تجربه وعدت واريدها توكف على حيلها لتشمت بيها احد

بديعه : اقلها خليها بعد وضعها موزين ياابني

ناي : اروح ويه يونس مااريد ابقى

يونس : شفتي هاي غصن بردي ماينكسر يميل ويه الهوا لو عله

عمشه : چا وانه تعيفوني

يونس : تعاي ياريت يوم عيد وتعيشين يمي

بديعه : لا عفيه خلي عمه يمنه وهم بعدكم منعرف الحال شيصير وعمتي يراد الها رعايه هوايه وعلاجات خليها يمنه

عمشه : احد صخم وجهج وكال الج انه اريدن اضل هنا

بديعه : عمه شوفي حالهم من يستقر اخذج الهم

عمشه : لون جذبتي الطمج على فجج اجسره تجسر

بديعه : شتردين سوي اذا ما وديتج

يونس : بلا امر عليج بان حضري غراض ناي خلي اخذها وارجع اريد يوم نبات بغداد

بديعه : هستوك اجيت بعدك كلاص ماي ماشربت

يونس : عايف المحل والشغل ولازم ارجع وهم اكو شغلات لازم اشتريهم اجي غير مره وانبات يمكم

ناي : طلعت ومتوجهه لدنيا جديده دنيا مابيها صالحه ولا ساهره ولا عمامي ولا مهند ولا وداد ولا مهدي ولا كل واحد أذاني اخذني يونس من الضياع اي جنت ضايعه وتايهه وادور من يلزمني ويصحيني

بعد ساعتين وصلنا للمنطقه الجديده جان الهوا بارد يرد الروح وصوت العصافير مسمع وكت عصريه والحمام تارس السما

باوعت بيت زين مو قديم حيل بابين باب صغير ودرج يصعد للطابق الثاني والباب الجبير للطابق الارضي اعتقد بيه المره والبنيه هو بيتهم وماجرين الطابق الفوك

صعدت وغراضي قليلات مابيهن علاكه كل غراضي بعدهم هناك بديالى ولا همني لان لابسه اسود على ابني جنت حيل دايخه ويونس لازمني طبينا للبيت

وفتح الباب اول مندخل هول حجمه زين وسط لا جبير ولا صغير وغرفتين نوم وصاله وحمام مرتب ونظيف

هاي انت نظفته

يونس : جلفته اني ومصطفى بربج مو خوش غسل

ناي : عاشت ايدكم

وهاي الغراض شوكت اشتريتها

يونس : صار يومين اشتريت الاساسيات وبعدين اذا الله مگني اكمل الباقي

ناي : الله يرزقك ويوفقك ارتاح وارتب الغراض

يونس : هذا بيتج بعد اريد يوميه من ارجع الكه اللكمه الحلوة من ايدج والبيت مرتب وكل جمعه اجيب شرهب تبات يمنا

ناي : اي والله ياريت

يونس : رايح للمحل واجيب عشى ويايه من اجي

ناي : ماشي طلع وسد الباب واني بقيت افتر بلغرف خال جربايه ام النفر خشب وكنتور ابو البابين بكل غرفه هيج مخلي

وفارش الجرابي وكامله

اما المطبخ بيه كاونتر مستعمل وطباخ وثلاجه هم مبينه مستعمله

والهول بيه قنفه جبيره وكرسين وهم مستعملات رغم بساطه المكان والغراض كلها مستعمله بس اعتبرته جنه لان مابيه شخص يأذيني اني واخويه وبس

ثاني يوم اجتنا شرهب جابها يونس وحيل جانت فرحانه ورتبت ويايه ويونس متسوك مواعين وجدوره وطوس غراض هوايه وجايب مسواك السواه خلاني اطلع ولو شويه من القوقعه الحبست روحي منها

دك تلفون شرهب

شرهب : هذا مرتضى الوو هاا ولك كول بنات عمي وينهن ماتن عاشن جان اسمع صوت ايييع اموت منه

صالحه : كالو مات ابن ناي وابنج يااا عساجن تضلن بليه خلفه

شرهب : شتردين

ناي : منو

شرهب : مرت عمج البعير على كولت بيبي

ناي : انطينياها اخذت التلفون شرايده شكوو مخابره

شرهب : افتحي الحاكيه خلي اسمع افتحي حبابه

ناي : فتحت الحاكيه واثنينا نسمع

صالحه : هاااا مات ابنج وابن ذيج الوصخه ام الگلك تتذكرن من موتن ابن سما هاااج هاي حوبتها

ناي : اول مره ادري للكحاب حوبه والله زين

صالحه : انجبي ادبسسز ترحن ڤدوة لتراب رجلها شفتن ضليتن بحسرة الخلفه

ناي : تتشمتين

صالحه : وكعد اطك اصبع خلي عمتجن الزركه الفلتت وعافتجن تخليجن تخلفن ولو هي هم مثلجن ماحوت لا رجال ولا طفل وانتن عليها

ناي : اذا احنا بحسره الخلفه انتي بحسره الشرف لان لا انتي ولا بنتج عدكم شرف

شرهب : ايييي فدووة للسانج اروح اديها

صالحه : متحركين دمي لان فرحانه بيجن يبووو مي بارد نزل على گلبي انتي راح ترجعين اديحين بلبيوت وذيج مكفخه لرجلها البخيل

ناي : الي عدها اخ مثل يونس تنام رغد والي علمج اني احسن منج اقلها كاعده بجاه اخويه معززه مكرمه اويلي عليج انتي ضاله بيت رجال متزوج عليج وحده تسواج وميت عليها يباوع على حلكها تأمر ويكول الها تدللين وفوكاها مشتريلها بيت بفلوسج وسجله بأسمها والله سالفتج تموت ضحك اني لو منج اروح اطمن روحي حيري بضرتج يعمه

صالحه : مسجله بأسمها منين جبتي هذا الحجي بربوك تردين تحرگين دمي

ناي : يااااا ولج شرهب عمتج ماتدري انضربت بوري بكد بوري المجاري على راسها غير بيت رجلج صار بأسم ضرتج ياعيني ماتدرين يله تكبرين وتنسين

روحي لعبودي ضربي على ايده وكوليله عيب هيج تسوي بصلوحتك اديحها بليه فلوس وبيت اووف تكسرين الخاطر ياام مهند عود من يشمرج بلشارع شكو اكل بايت وخبز يابس المه الج وادزه مهما كان تبقين مرت عمنا وصله الرحم واجب جان تتفل عليه وسدته بوجهي

شرهب : هههههههه خرب عمي اول تالي هيج تحجين

ناي : حركت گلبي من حجت على ابني جاي تتشمت هاي عرفت من ابن عمج الخيخه مرتضى اكيد هو كايل الها

شرهب : اله اخابره وارزله شون ينطيها التلفون وتخابر

ناي : هو من زمان هيج مرتضى بيد امه وخالته وماعنده كلمة

شرهب : بس شنوو ار بي جي مو مثلج بلكصه فت انطيتيها

ناي : تستاهل مبين متدري بسالفه تسجيل البيت اني عمه كالت اليه خلي اخابر عمه اخاف تزعل لان حجيت

خابرت عمه وبلغتها

خوله : زين تسوين شتردين احجي ولا يهمج احد

ناي : راح ترجعين فلوس جوحي

خوله : اي بعد جم يوم وكطعت منه فلوس التحويل وفلوس الفاتوره مال الرصيد قابل اصرف عليه مكافي تحملت مخابراته وعياطه وفشاره هو سمع راد ينجلط تالي مابيده شى خله وسكت هاي ملايين حلوة هسه اذا اكول اله صيح هوو هووو مثل الجلب هم ينبح علمود ارجع فليساته

ناي : عساه بلحرك هو ومرته

خوله : خابرني مهند

ناي : لتجيبيلي طاريه عمه

خوله : خلي احجي انطي صبر ضل يبجي مات قهر من سمع بأبنج

ناي : والخلقج اذا يجيبوه بتابوت اهلهل من كثر ما كارهته

خوله : يريد يروح لمهدي ويبيض صورتج كدامه كتله لتروح اذا رحت راح يحط طلقه براسك احجي وياه بلموبايل احسن

ناي : لا يروح ولا يوصل وميهمني بعد اي احد ذوله بلذات سبب تعاستي ومااريد اسمع حتى اسمهم لزمني گلبي واني احجي نغزات كعد تتكرر

خوله : شبيج نايه شو صوتج راح

ناي : لا هيج ماكو شى اروح عمه بعدين نتخابر

خوله : الشهر الجاي ادزلج فلوس واشتري تلفون

ناي : الله كريم سديته منها ادور على شرهب راسها بلجدر جنت مسويه تمن باكله

شرهب : يخبل فد شى

ناي : اكلي بلعافيه مبقى شى ويجي يونس

شرهب : اكل تصبيره

ناي : ٣٥ يوم اكيد ايام عاديه عند كل الناس ايام وساعات تمر محسوبه من العمر بس الي مفارك مثل حالتي وابني نايم وحده يحس بلوعه صار ٣٥ يوم اشتاقيتله اريد اشمه حتى قطعة ملابس ماعندي اله اريد تلفوني كله صور ماخذتله من نايم ومن ياكل ومن يلعب

اريد املي عيني منه طلبت من يونس يروح لديالى يحول الصور ويجيبلي ولو قطعه من ملابسه وكال احنا بالاربعين رايحين والتردي اخذي غصب عنهم

طلبت منه هم يتصل بخالو عمران لان خلاها صنطه ليش لهسه ما طلك اعرف مرات يخابر خالو على يونس يطمن عليه بس اني مااريد ابقى على ذمته

تعلمت على البيت والعيشه هنا وبعدني مشايفه المره الجوانه وبتها كال يونس خوش مره حبابه كلت فد يوم اسوي حلاوه لروح ابني وانزل عليها واتعرف بيها

كملت طبخ ونضفت وكاعده اقرا قران من اكعد وحدي حيل استاحش وافكر بسيف وابقى بس ابجي لهذا كمت كل مااختنك افتح القران واقرا احس براحه وبين مايجي يونس ونتغدا اقرا كم سوره اندكت الباب كلت اكيد هذا هو لان سمعت صوته بس اكو صوت غريب وياه صدقت وكمت فتحت الباب صارت بوجهي حوراء وراها مهدي واكف

يتبع .....

#الابواب_الخمس

البارت الخامس والعشرون /الجزء الثاني

للكاتبة Reem

(بارت طويل لعيونكم )

مشيت ومحـد بضــيمي يـدرباي

الـدمـع ناعـور بجفاكـم يـدرباي

وعلي ماكــمت اوچـدنك يـدرباي

مـثل يعقوب واكثـر صـار بيـه

كملت طبخ ونضفت وكاعده اقرا قران من اكعد وحدي حيل استاحش وافكر بسيف وابقى بس ابجي لهذا كمت كل مااختنك افتح القران واقرا احس براحه وبين مايجي يونس ونتغدا اقرا كم سوره اندكت الباب كلت اكيد هذا هو لان سمعت صوته بس اكو صوت غريب وياه صدقت وكمت فتحت الباب صارت بوجهي حوراء وراها مهدي واكف فتحت عيني جافله من وجودهم حوراء مباشره ذبت نفسها بحضني اعرف بروحي جنت قاسيه وياها بس مو بيدي الصار مو هين عليه

حوراء: والله طك گلبي عليج واشتاقيتلج

ناي : حاضنتني حييل وتبجي حوراء جانت الاخت والصديقه الي خففت سنين عني هم وداد وبرود مهدي مكدرت وبادلتها الحضن اني هم مشتاقتلها واني حاضنتها اجت عيني بعينه وجهه تعبان ولحيته طولانه مو هذا مهدي الي يلمع وكشاخ جان ميطلع اله يزين وعلى اخر حبه من الكشخه والعطر جن شخص ثاني كدامي مكدرت اباوع بوجهه وخرت من حضن حوراء وسحبتها من ايدها وطبينا لغرفتي حتى مكتله تفضل

طبينا للغرفه وسديت الباب كعدنا على جربايتي واول سؤال سألتها شعجب خلوج تجين 

حوراء : راح تستغربون اليوم اني احجي يمكن اجه الوكت الي لازم تعرفوني زين ‏راح احجيلكم شويه عني

اني حوراء بت خال ناي وحماتها فتحت عيني واني يتيمه الاب كل الاعرفه والي جنت اسمعه من امي عمتج موتت ابوج وخلتج بليه اب وتكوم وتكعد تحجي عليها حتى توصل مرات للدعاء عليها وهي مره ميته

امي تحب مهدي اكثر مني مو بس تحبه روحها بيه اذا تمرض لازم البيت كله يتمرض وياه واذا وكع يبووو بذاك الوكت ندخل انذار صحتها واهتمامها ودلالها وفلوسها كله لمهدي واني ابقى هيج اتفرج رغم اعرف متحبني مثل اخويه وهذا الشى جان يحز بگلبي بس مهدي زين ويايه طيب وحنون ودوم يحاول ميحسسني بسوالف امي ومحبتها اله ومع الاسف يفشل لان ميكدر يداري دلال وداد اله الي حتى خالي جان يتعارك وياها ويكول الها راح تخنثي للولد من دلالج وخوفج عليه لحد ماقرر خالي ياخذه وياه ويه ولده عبدالرحمن وعبدالله وابن خالي صلاح  حتى يشتد عوده ويصير رجال يتحمل المسؤوليه وبدا يعيد تركيب شخصيه مهدي حتى بعطلة المدارس ممنوع يلعب يشتغل ويتعب ومن يوكع ممنوع يبجي ويشكي لامه واذا سوه شى غلط يتعاقب اشد عقاب وخلال مراهقته غير شخصيته وسواه رجال يعتمد عليه وصار حسب كلام خالي نسخة ابويه كلشي تغير بيه اله حنيته عليه وحبه لامي ولبيبي

بسبب حب وتعلق مهدي لبيبي جابها تعيش ويانه وصارت بيبي امي الي تعوضني عن تفرقه وداد وبرودها وقلة اهتمامها بيه

جنت اشوف بعيون امي كل الكرهه والحقد على عمتي الله يرحمها وبحكم من تسمع الموضوع من طرف واحد اكيد تصدك لحد مايوم تجرأت وسألت بيبي عن عمتي ردت اعرف منو هاي المره وليش ضيعت ابويه وخلتنا يتامه

وبدت بيبي تحجيلي عن عمتي صارت سلوتي كل مااضوج اكعد ويه بيبي واكول الها احجيلي عن عمه ذكرى ودوم جانت تكولي انتي هواي بيج شبهه منها وحتى تبوسني من تشتاق الها اشوف بيبي مرات تشهك من البجي عليها وعلى ابويه ودوم تصيح لعمه المظلومه وتغيرت نظرتي على عمه الله يرحمها وحبيتها حييل واني مشايفتها وزاد حبي الها يوم ماشفت ناي ودخلت بيتنا اول مره من اجت تشوف بيبي

اني طبيعتي اضحك واتشاقه ومااحب النكد ولا الزعل حتى مرات امي تصيحني سفيهه من كثر مااضحك على اتفهه الاشياء ودوم تفشلني اذا اكو خطار او كدام خاله ام عبد او خاله ام صلاح لازم تحجي شى يغثني واني حتى ماازعل نفسي اكوم اضحك بس داخلي ينقهر واكول دنيا متسوه واحد يزعل نفسه يله حوري لتهتمين

اني فاشله دراسياً اعترف مااحب الدراسه كوه كملت لحد السادس اعدادي بدفرات وكعدت وبسطت بلبيت گابلت وداد وتعيرها شوفي سدره احسن منج شوفي فلانه بتها دخلت كليه شوفي علانه صارت دكتوره يابه اني شعليه بلعافيه على الناس الله يزيدهم اني مااحب اقره هي كوه حارت شسوت حتى تحسسني اني فاشله واني مثل الفرجه شتحجي امسحه بلحايط

ومن ناي تزوجت  مهدي يمكن اني الوحيده الجنت فرحانه ولو بيدي اركص بلشارع لان ردتها تكون ويايه وخاصه بعد فشل علاقه سدره واخويه خفت امي تزوجه وحده حقيره او شايفه نفسها وتأذيني تمنيت اما سدره او ناي وصارت نايه زوجة اخويه ومن يومها اعتبرتها الاخت المجابتها امي وسرنا واحد سوالفنا ضحكنا اكلنا حتى من ماتت بيبي شكد تأذيت بس خف الوجع بوجود ناي وجود سيف الي اعتبرته ابني

وقبل بيوم من موتت سيف الله يرحمه اتصلت بيونس وبلغته بجيتهم لكربلا خفت ليتعاركون وحلفته ميكول اني خابرت حتى لتصير مشاكل

ومن رجع مهدي وخالي والولد وحجو الصار امي شبت نار وگلبت الدنيا على شلون تنطي سيف لناي وتعاركت ويه خالي بس خالي انطه كلمة وبطبع مهدي اذا خالي كال شى ميتثنه حيل يحترمه

وامي كالعاده استلمت مهدي اكلت راسه حتى ليودي سيف وهو كال خلي اودي الطفل خطيه يريد امه جم يوم وهم اجيبه خلي فتره يمها وفتره يمنا

جنت مستمعه اخاف ادخل لتذب حرگتها بيه فرحت لان ناي راح تاخذه رغم اني متعلقه حيل بيه كلت هيه امه واسمعها بلتلفون شون مفرفحه روحها وتطحن من وراه

وبيوم اعتبره اسود يوم بعمري كعدت الصبح ابوس بسيوفي واكوله راح نروح بسياره عننن لماما نروح وهي يضحك ويصيح ماما ويصفك ريكته وسبحته وبدلت اله حتى عطر خليت كلت حتى ناي ترتاح من تشوف شون مهتمه بيه

شبعته بوس لان راح اشتاقله طلعت من الغرفه على صوت امي وهي تتعارك ويه مهدي لان راح يدز سيف واجه خالو وكال يله حتى اخذه

واستلمتهم امي ردت احظر ملابسه كلت لامي عينج عليه

يمه عينج على سيف بس احظر غراضه

وداد : وجع وين موليه ياغراض خو انتي طابكه وياهم تركضين ركض حتى ادزي

حوراء : مالي دخل هذا مهدي هو ابوه واني العليه احظر غراضه متردون تودوه ابقى اداري بعيوني لاتذبين عصبيتج بيه

عمران : روحي خالو حضري الغراض ومالج دخل بأمج

حوراء : هسه اجي عينج يمه عليه ليوصخ نفسه ما اتأخر بسته وصعدت احظر

كملت كلشي ونزلت وبعدهم على نفس العيطه والهوسه وامي مستلمه خالو ومهدي واشكال تحجي على ناي حتى بشرفها تطعن وتعير ومهدي يعيط على امي ويريد يسكتها ميكدر اباوع بين رجليهم ماكو سيف هذا وينه طبيت للغرفه هم ماكو اصيح سيوفي سيسوو ماكو ذبيت الجنطه من ايدي كلت اهووو بس لا طلع للحديقه يلعب بلطين والمي لان هو كلش حرك ماينترك ولازم اكعد اغسل وابدله

طلعت اركض للحديقه والكاه خشبه صاير وخشمه وحلكه كله دم وعيونه تخوف وطاك دم بيهم اني شفته عطت كلها اجت على عياطي ردت اجيت عليه خالي عاط بيه حتى لا الزمه طفو الكهرباء وشالوه واخذوه بس اني اشوفه جنه لعابه بيدهم اي نفس ماكو وايده محتركه

بلحظتها كعدت بلكاع والطم تهسترت

وامي هم گلبت الدنيا مثلي جانت فاجعه وكعت على راسنا التمو علينا اني كمت ركض وخابرت على ناي ردتها تجي متوقعت يموت

ومن خابرو وكالو مات عقل ماضل بيه كل الي اردده اني كله مني شون اعوفه

ومن اجت ناي رفضتني ابد ماانقهرت منها ولا ضجت لان حقها هي امنته يمي واني خنت الامانه اني بيدي سلمت الامانه للموت

وبعدها راحت ناي وجنت اتمنى احضنها وابقى اعيط وابجي بحضنها لان جان ابني وابنها وره ٣ ايام ومن وفاة سيف جنت نايمه بفراشي وحاضنه المخده وابجي ومن اريد اعيط احط حلكي عليها وبكل حيلي اعيط اريد ناري تطفه هلمره تزداد من اشوف ملابسه والعابه بكل مكان حتى ملابسه الوصخه الي نزعتهم اله وبدلت جدد بعدهم على فراشي دك تلفوني باوعت يونس مباشره جاوبت خفت لا ناي بيها شى

حوراء : صحت الوو وخنكه البجي بعدها بصوتي

يونس : توقعت بعدج تبجين

حوراء : بيها شى ناي

يونس : مثلج تبجي وتلطم وحالتها تعبانه

حوراء : شهكت بصوت عالي وكتله

اني كتلته كله من ورايه

يونس : ليش انتي ملك الموت لو رب العالمين حتى تكتلي كل انسان اله اجل واله موعد يموت بيه لا بكيفج ولا بكيفي يمكن لو حاطته بقوطيه وحابسته اذا الله راد ياخذ عمره راح ياخذها لتصيرين مثل ناي وتعترضين على امر الله

حوراء : استغفر الله اني مو اعترض بس هو اهمال مني شون عفته

يونس : كلها مسببات لا تلومين بروحج يجوز جان مات بحضن ابوه او مات يم ناي هذا الطفل من هو وبطن امه مكتوب هلكد عمره وانتي لاتحملين نفسج وتأذيها لان مراح يرجع لو البجي واللطم يرجعون الميتين جان العالم خلصتها بجي ولطم حتى ترجع احبابها

حوراء : سكت واني مستمره ابجي

يونس : يابه ابجي شكد متكدرين بلكت ترتاحين اهم شى تشيلين فكرة انتي كتلتي لان كعد تكفرين وتعترضين على امر الله ادعي الله يبرد گلبج وگلب امه

حوراء : انت ليش خابرت

يونس : شفت حالتج بيوم مااجيت وشفتج شكد متأذيه وردت اطمن عليج

حوراء : ناي بعد متحبني وكارهتني

يونس : مستحيل ناي تحبج وتريد خاطرج بس جرحها بعده ماطاب خلي فتره واحجي وياها اكيد راح ترجعون مثل قبل هاي الافكار شيليها من راسج انتي ام ضحكه الحلوة يصير هيج بيج

حوراء : شكرا لان خابرت وطيبت خاطري

يونس : ميحتاج تشكريني انتي صيري زينه واوكفي على حيلج حتى تساعدين ناي منو لعد يوكف وياها انتي مو تكولين ناي اختي

حوراء : واعز والله انت وين هسه يمها

يونس : لا اني بغداد كعد ادور على البيت راح اخذها تعيش ويايه

حوراء : ليش مناويه ترجع لمهدي

يونس : هاي الامور متنحجي هسه المهم عندي صحتها وراحتها صار جم يوم ادور على بيت حتى اخليها ترتاح بيه كوم الكه مااريد اعوفها هناك اذا بقت بكربلا راح تتأذه اريدها تحس بأن هيه صاحبه بيت واكو من يعتمد عليها ومحتاجها مااريد تبقى تتصفن وتتذكر كل الصار

حوراء : ناي محظوظه بيك انت صدك نعم الاخ

يونس : وانتي هم اختي حالج حالها شتحتاجين اني حاظر رقمي يمج وشوكت ماتخابرين وتكولين يونس محتاجه فلان شغله احسبي بس الطريق واني يمج

حوراء : متقصر رحمه الله والديك

يونس : اكدر اخابر كل فتره اطمن عليج

حوراء : اي عادي غير انت ابن عمتي شوكت متحب وشكراً على سؤالك

سديته من يونس واني شوي هادئه

وبعدها بيومين هم اتصل وبقينا نسولف جان من يرجع من المحل يخابر ويطمن ويطيب خاطري مرات يلكاني ابجي ويحجي عليه ويسكتني ومرات يحاول يفتح مواضيع بعيده عن موت سيف وأذيه ناي حتى يطلعني من الجو الاني بيه

وعرفت حصل مشتمل طابق ثاني وكعد ناي جان يوميه يحجيلي ناي شسوي وشطبخت وشصار حسيت روحي عايشه وياهم حتى شغله يسولف شصار بيه ومرات اذا سكت اني اسأله وهو هم يسألني عن صحتي اكلت لو لا بجيت لو لا تفاصيل بسيطه ويجوز الغير يعتبرها مو مهمه بس للي مثلي جداً مهمه وتحسسني بالاهتمام

واحلى شى من تجي ناي يمه يبقي الخط مفتوح حتى اسمع صوتها ومايوم كال الها اني اخابر حوراء

وشهر كامل تحول من كل كم يوم نسولف الى يومياً

وبيوم قررت اروح لناي امي اعترضت وگلبت البيت على راسي سكتت وبس اجه مهدي طلبت منه هو سكت ومجاوبني اعرف حاير

لان مهدي طول هاي الفتره تعبان حتى بيات ميبات بلبيت اكثر وقته ويه صلاح وعبد حتى لغرفته كام ميطب واذا يريد يبدل يطلب مني اجيب ملابسه يسبح ويبدل ويطلع

كاعده العصر اقرا قران وفاتحه شمعه وابجي تذكرت سيوفي طب مهدي مفور صدقت وكمت مخروعه شبيك

مهدي : مو ردتي ترحين لناي باجر نروح الها خالي كال كاعده بغداد يم يونس

حوراء : صار شى فهمني

وداد : هااا يمه خيرك شبيك ترجف وعيونك براسك

مهدي : باجر رايح ارجع ناي واياج ياامي تحجين وياها كلمة وروح ابويه اخذها واطلع من البيت

وداد : هاااا سون الك سحوره وراح تركض وراهن هذا دربهن اعرفه

مهدي : ياسحوره انتي من كل عقلج

وداد : ليش مو من كل عقلي قبل شهر جنت تتراجف منها وتريد اطلكها وهسه تتراجف عليها شغيرك وحده ساقطه ضاله من حضن لحضن وتالي تريد تردها لحضنك مستحيت على نفسك

مهدي : ييييمه اياج تجيبين طاريها بلموزين ومرتي شريفه ماعدها قصور

وداد : لك الطم اشك هدومي وابن عمها مو بنفسه كلك عدها علاقه بيه

مهدي : خابرني الكواد قبل شويه وكال جنت اريد اطلكها منك واتجنيت عليها وبت عمي ماكو اشرف منها ومالامس شعره منها ولان ابنها مات ردت اريح ضميري

وداد : وانت صدك ياعين امك مووو

مهدي : وليش مااصدك مو هو نفسه ذب تهمه عليها وخلاني أذيها يابه وروح ابني وهاي اول مره احلف بيه وجن سجينه طلعت من لساني واني احجيها لو مهند كبالي لا اشرب من دمه حتى لو اعرف ادخل اعدام من وراه على السواه وشون طعن بيها بس هو جبان مخنث يذب التهمه بلتلفون ويبريها بنفس الطريقه ماوكف بوجهي وصار كدها يتختل مثل النسوان لو بس لازمه اااااخ جان عرفته اليطعن بلشرف شنو هيه عقوبته لا ارجعه بطن امه هلساقط الارعن

وداد : من عزة العزاج وداد خوش امها تاخذ ابوك وهيه تاخذك واني اضل الطم عليكم اثنينكم الله بلاني بشله ساقطات وحدتهن تسوي المصيبه وتعالي ياعمي شيلني

مهدي : اسكتي يمه كتلج مرتي شريفه واني الغلطان بحقها كون ترضى تسامحني وترجع ويايه

وداد : هااي فوكاها روح عيني بوس راسها وايدها وطيب خاطرها وخليها تركبك وادندل رجلها اني اربي واتعب واشيل وانطي لبت ذكرى

مهدي : اني مايوم انطيت بيج ولا عاندتج واحاول دوم اتجاوز هواي سوالف تسويها بيه او بناي حتى من اطلعيني من طوري اعيط وراها اجي ابوس راسج واطيب خاطرج وماانومج زعلانه مني حتى لو مأذيتني بس هلمره يمه اعذريني اذا بدر شى منج وأذاها قسماً بالله اخذها واطلع

وداد : تهددني يبن بطني

مهدي : بكيفج اعتبري تهديد طلب بلي يريحج ناي من اليوم صارت خط احمر كافي الشافته مني ومنج ونتيجه كل الصار ابني سكن المگابر تردين انعيش على حب الله وابقى يمج لتندكين بناي

وداد : اذا رجعتها لا انت ابني ولا اعرفك لك مااريدها هاي من طبت لبيتي هجمته اكرهه اموت منها ردتها هي تموت مو سيف  معودت خلصت منها وكلت كشره واخيراً ولت واخذت الشر وياها تريد ترجعها

مهدي : براحتج لعد اخذها واطلع بيها خلي بالاول تقبل ترجع واني ساعه مااضل الج بلبيت

وداد : واني اتبرى منك ليوم الدين على كبري متوكف واذا توفقت عود تعال واجهني

حوراء : طبت امي وركعت الباب صدك تاخذ ناي وتطلع

مهدي : امي واعرفها مراح تسوي شى حتى لا اطلع جر بوشها هسه وراح تبدي تخاف لتحجين اي شى وياها حتى لتتعارك وياج و

حضري نفسج باجر رايحين لبغداد

حوراء : تندل بيتهم

مهدي : لا بالاول نروح ليونس اندل محله وهذا هم لازم اواجهه والله ولا الي خلك اتعارك واتناقش كون ميسوي مشاكل مااريد اعقد الامور

حوراء : الله كريم نروح ويصير خير

اصبلك اكل تاكل

مهدي : لا بس اصعدي جيبيلي فلوس من الكنتور واليوم راح ابات يم صلاح

حوراء : مااشي صعدت جبت اله وانطيته وبس طلع دخلت للغرفه اركض ودكيت على يونس

يونس : هلوو حوري شعجب داكه كل مره اني اخابر وبهيج وقت معناها صاير شى

حوراء : انت مو كلت اذا اطلب منك شى تسوي الي

يونس : أمريني

حوراء : مايأمرك عدو وظالم هو طلب ولتردني اترجاك

سولفت اله كلام مهند شون برأ ناي ومهدي يريد يجي يطلب تسامحه ويرجعها كاام يعيط

يونس : لو يموت مااخلي يتقرب منها مكافي السواه اخوج تره لهسه ساكت لان مقدر الوضع واله لوما سالفه سيف جان الي حساب ويااه لا عباله من ضربها وهانها تعبر هيج

حوراء : لتعيط فدوة وعلى كيفك

يونس : اخوج لا يوصل ولا اريد اشوفه تره تصير موزينه مو تكولين مكلت والله ادمي واطلع حركت اختي كلها بيه جاي بكل رحابه صدر والله ارجعها مو هيه هينه عباله كلشي يمشي على مزاجه اذا وصل اخوج باجر اطرده

خلي يحترم نفسه ويطلكها وكل واحد يروح لدربه

حوراء : اني راح اجي ويااه

يونس : انتي تعاي هله بيج نشيلج على راسنا اما هو مامرحب ابد بيه

حوراء : يونس

يونس : هاااااااا

حوراء : اهدأ مجاي اتعارك وياك طلب وطلبته منك وعبالي عندي خاطر يمك ومتردني تعشمت زياده وطلع مالي اي خاطر ومعزه

يونس : لتخربطين بلحجي خاطرج على عيني وراسي بس اخوج نذل دك الناقصه بأختي وسوايته ضيعت كلشي حلو بيها تعاي شوفي حالها وردة ويوميه تذبل كدامي وكمت حتى اخاف انام اله تنام هيه واشوفها غاطه بلنوم يله اغفى اخاف لتسوي شى بروحها وتالي يجي اخوج يله مصار شى تهمه وراحت واختك وانضربت وانطردت وانفضحت بين اهلي وابن عمك كال الحق وطلعها شريفه خلي ارجعها خدامه لامي وكلشي يرجع لمكانه موووووو

حوراء : خلي اروح انت صاير اعصاب ومتتفاهم يله باي وسديته اني كلش عذرته وحقه كل الحجاه صحيح لان تخيلت يصير بيه نفس الصار بناي اكيد مراح يكون شى سهل بس مااكدر اكول ليونس حقك حتى لتصعب الامور

لليل صارت ساعه ١١ هذا وقت اتصاله مااتصل كمت الوب اباوع كل شويه على التلفون واذبه سويت الغرفه ميه مره يارايحه ياراجعه صارت ١١ ونص تالي متحملت وخابرت من اول دكه شاله وسكت اني حجيت بصوت هادئ وكتله

حوراء : ليش مخابرت مثل كل يوم

يونس : كلت اكيد متردين تحجين ويايه

حوراء : لا اريد بس كول انت الي متريد

يونس : اوووووف وطكيت جكاره واخذت الباكيت وطلعت على السطح ادخن

حوراء : طلعت للسطح موو

يونس : اي شمدريج

حوراء : من ادخن تطلع

يونس : ناي تضوج من ريحه الدخان وخطيه البيت منظفته ومعطرته اطلع لخاطرها

حوراء : ولخاطري شتسوي

يونس : كتلج التردي عدا سالفه اليوم مااستقبل اخوج لو السما تنطبك على الكاع

حوراء : واني ماتستقبلني

يونس : افرشلج الكاع ورد وياس

حوراء : مااريد لا ورد ولا ياس اريد بس تتحمل مهدي يحجي ويه ناي خلي هيه تتخذ هذا القرار حتى لا بعدين تلومك

يونس :متلومني لان اعرفها زين متقبل بمهدي لو شمايسوي

حوراء : اذا تدري وثاق بهذا الشى خلي هيه تحجي وياه ويسمعها كلشي مااريد منك حتى لا تسلم على مهدي ولا تحجي ويااه الي اريده وصلنا للبيت خلي يكعد وياها ساعه وحده وراها اطردنا راضين

يونس : ينكص لسان الي يطردج الطرد لاخوج وبس

حوراء : هااا شكلت

يونس : شغلت الجكاره الثانيه واخذت نفس منها وذبيته بلجوو هاي البنيه ليش هلكد تأثر بيها من احجي وياها ارتاح بشكل عجيب واشتاق الها اذا راحت ولو اني ويه شيار هم صار نفس الاحساس بس حوراء عبالك گلبي يدك سريع ويه اول كلمة الو اسمعها منها مااريد اضعف واحب اني كل مره اوكع بنكره واكول اتوب وارجع اوكع بنكره اكبر

حوراء : وين رحت

يونس : وياااج

حوراء : بس هلمره لخاطري

يونس : هااي لخاطرج حتى لتكولين طلبت وماقبل مهدي اذا حجه حجايه غثتني قسماً بالله اطيح حظه وخلي نصير دم ولتجين تعتبين عليه

حوراء : ميحجي لتخاف بلعكس يجوز يعتذر الك

يونس : لا اريد اعتذاره ولا كلشي منه خلي اتفض السالفه ويروح كلشي منريد منه

حوراء : خوش انتظرنا باجر

يونس : انتظر يابه انتظر شعندي غير الانتظار

حوراء : بقينا نسولف ساعتين وراها كاال روحي نامي وراج طريق وتعب سديت التلفون ورحت مباشره نمت وثاني يوم مهدي جان يم خالو والولد وكال الهم على سالفه ناي وكلهم كالو نجي وياك نعتذر الها بس هو راد وحده وكال اذا قبلت ارجع الكم واجيبكم ويايه مااطلعها من بيت اخوها اله بحضوركم

وهذا الشى فرحني حسسني هاي المره مهدي حيل تغير وحس بقيمتها

طلعنا وره ساعه ١١ لان السوالف اخذتهم وطلعنا لبغداد وصلنا الظهر لمحل يونس بقيت بسياره شفت محله ومكان شغله الي دوم يشرحلي عنه

ابتسمت بعد من يسولف اتخيل المكان صح

يونس : كاعد واباوع على الساعه تأخرو كمت الهي بروحي بلشغل لحد ماسمعت السلام عليكم انداريت شفت مهدي جاوبت من وره خشمي وسويت نفسي متفاجأ بجيته

خير

مهدي : اعرف بيك شايل مني وغلطت بحقك وحق ناي والله مااعرف شكول وشحجي بنص هدومي كدامك

يونس : شتريد بدون مقدمات

مهدي : اريد اشوف ناي ورجاء اخوي لتمنعني ولا تتعارك لان كدامك هذا حالي الطريق كله شايل هم شون افتح وياك الموضوع ومن وصلت طار الحجي كله

وهذا مكان رزقك صعب نتناقش هنا كدام الناس خلي نروح لبيتك وهناك اتعارك نعاتب حتى لو نتضارب

يونس : مصطفى عينك على المحل ساعه وارجع بقى صافن لان مناقشته

شوف ويايه لتحجي اي شى ومااريد اسمع منك حجايه وحده لان بس انفتح عليك امددك هنا بلشارع نوصل للبيت تكعد ويه ناي الي تريده كوله واسمع ردها وراها الله وياك

مهدي : ميخالف خلي نروح

حوراء : فتحت الباب حتى انزل واكعد ليوره عيب لازم هو يكعد بصف مهدي اشرلي يونس ماانزل

صعد ليوره بس كال السلام عليكم واني جاوبته وعليكم السلام

كاعد ورايه واني گلبي يدك يدك صخام بعيني هذا شبيهه ابو النبضات يتراكع من شافك

وصلنا بسرعه لان قريب فتح الباب وكال تفضلو صعدت اني ورايه مهدي وفتحت الباب ناي اول مشفتها متحملت شمرت نفسي بحضنها

ناي : شعجب خلوج تجين

حوراء : عوفج مني مشتاقتلج

ناي : اني هم

حوراء : حضنتها ورجعت ابجي والله جنت حاطته بعيني وحق الله ماعفته لحظه بس رحت جبت الملابس وصار هيج

ناي : اعرف بيج تحبي ومتأذيه مثلي كاافي تبجين هو راح واخذ ضحكتي وعمري وياه لو نبجي العمر كله مراح يرجع

حوراء : هاي شصاير بحالج ضعفانه وجهج تعبان

ناي : من السعاده والراحه لازم يصير هيج

حوراء : سوده عليه نايه زعلانه مني

ناي : لا

حوراء : الله عليج مزعلانه ولا كارهتني

ناي : لج انتي اختي حالج حال شرهب والصار بيومها جنت فاقده ومو بوعي انتي لتزعلين مني

حوراء : حضنتها وابوس بيها ممصدكه هيج بسرعه گلبها صفه مني

ناي : ليش ماوصلج مهدي وراح شعنده صعد

حوراء : يريد يحجي وياج

ناي : واني مااريد

حوراء : لازم تحجون وهذا تلفونج

ناي : مااريد بس الصور الي بيه لان بيه كل صور سيوفي

حوراء : اخذي وبله عناد اخاف نحول وينحذفن وجبت علاكه بيها كم قطعه من غراضج وياه تيشيرت لسيف اعرفج مشتاقه لريحته

ناي : اي لج عيني ميته على ريحته

حوراء : مهدي كال مااعزل كل ملابسج واجيبهم لان متأمل ترجعين

ناي : ماارجع

جان تندك الباب تفضل

يونس : تعاي ناي مهدي يريد يحجي وياج

ناي : واني مااريد

يونس : احجي وشوفي شيريد عيب هو بيتج

حوراء : عفيه خلي يجي هنا حتى يحجون براحتهم

ناي : لا مااريد مكان مسدود يجمعني بيه كدامكم الحجي يصير

حوراء : بس هلمره اسمعي يبقى رجلج ومو عيب اذا بقيتو وحدكم

يونس : اني مااريد اسمع اي شى منه اخاف اتعصب واجرم بيه

حوراء : شفتي خلي اصيحه واحجي وياه واني ويونس ننتظركم بلهول واذا معجبج الوضع اطلعي من الغرفه واحنا هنا كاعدين

ناي : سكتت لان مااريد يتعاركون خلي افهم شكوو المن جاي وطلعت حوراء ويونس اندكت الباب وطب مهدي

كمت سحبت كرسي موجود بلغرفه  وحطيته بعيد عني بصف الكنتور واني كاعده على الجربايه

باوعت بوجهه ردت اشوف روحي شدااحس من اشوفه كح وكاال

مهدي : شونج

ناي : عين بعين ويااه وكتله يم الله

مهدي : صحتج شلونها

ناي : ممكن تختصر وتكول المن جاي وليش لهسه ماكو ورقتي

مهدي : اجيت ابوس راسج واعتذر لان غلطت بحقج

ناي : رفعت ايدي وسكته وكتله

تعتذر عن شنو بلضبط

مهدي : الخايس العار مهند خابرني وگلي

ناي : كلك ناي شريفه وماعندي شى وياها

مهدي : وانتي شمدريج

ناي : متوقعه هذا الشى لان اكيد عرف بموتت وجريت حسره وغمضت وفتحت عيوني حتى اكدر اتحمل كعدتي كباله وكملت كلامي موتت سيف اكيد ضميره كام يوجعه ولو هيج واحد اشك عنده ضمير

مهدي : غلطت بحقج وأذيتج وتجاوزت عليج ومديت ايدي من قهري وغيرتي

ناي : كل الضرب الي ضربته الي نسيته او اكدر انساه بس ضربت الروح شينسيها انت ضربت روحي وملختها بليه رحمه يوم ماطردتني من بيتك واني بطرك ملابسي وماسمعت مني سديت اذانك وصدكت مهند

القاهرني اختك وخالك وحتى ولد خوالك محد صدك الي انحجه بحقي ودافعو عني اله انت صدكت يمكن ردتها حجه حتى تخلص مني

مهدي : ليش اخلص منج بلعكس ناي اني تعلمت عليج وصرتي حيل قريبه مني وكمت اشوفج

ناي : شتشوف هااااااا تشوفني حبيبة مستحيل اربع سنوات اني عندك مايوم شفتني حبيبة ولا راح تشوفني انت يااما تقشمر عليه لو تقشمر على روحك وهذا كله عوفه نكول لحظه شيطان وانت رجال ومتحملت خلي اضحك على نفسي وانطيك عذر مو من حقك بس انطيك زين ابني شعليه حطيت ولويت ايدي بأبني لييش شسويتلك حتى هيج تعاقبني تشوفني مفرفحه عليه ومتخلي يدخل عليه اتوسل وابجي دنكت بست ايدك حتى اخذه ويايه وانت معاند وراكب راسك  جنت مستعده حتى ابوس رجلك في سبيل اخذه ويايه شون كدرت تنام وانت تشوف ابنك بليه امه ماكسر خاطرك وانت تشوفه يفتر بلبيت ويصيح عليه ماكلت هذا طفل شنو ذنبه بلي صار خلي اودي لامه ومااخذه بذنب امه هاي لو عندي اصلاً ذنب

مهدي : ساعه شيطان وسيطر عليه انتي ليش تلوميني عبالك اني اجيت هيج من الشارع ضايج وشبعتج كتل وطردتج بليه سبب لج بابا اني رجال دمي حامي مااتحمل واحد يحجي على عرضي يعني ابن عمج يجي يوصف مكان بيج ويكول جانت استغفر الله مااريد اكمل حتى لا اتعصب واعيط اني من اتذكر الدم يصعد براسي يعني يارجال عنده غيره على عرضه ومرته ويقبل بلصار يمكن اني سيطرت على نفسي وماكتلتج خلاص ناي اجاني ابن عمج المتربيه وياه وكتلج من ذيج المره لو واحد من الشارع احط شاجور بحلكه وهسه اذا الزم ابن عمج وروح ابويه مااخلي عايش ساعه وحده واحد طعن بمرتي ودمر حياتي

وفوكاها يريد اطلكها حتى يتزوجها

ناي : واني شنو ذنبي هو واحد طايح حظ وسخيف وماعنده غيره اذا هو سوه هيج حتى يطلكني منك انت سويت الاتعس منه وصدكته انت ملاحظ نفسك مجلب بسالفه مهند وناسي اهم سالفه ابني الي مات من وراك

مهدي :شوفي اتحمل كل الحجي مالتج وعاذرج اله هاي الحجايه مااقبلها منج ولا اسمحلج تعيديها مثل ماانتي امه اني ابوه وانتي مدمره من وره سيف اني مثلج تدرين شصار بحالي واني اشيل ابني بليه نفس واتوسل بالاطباء بس خلي يعيش لج بجيت وعيطت مثل النسوان من كالولي ابنك مات اخذه ادفنه سيف اعز من روحي ماشفتي ولا راح تحسين بليه حسيته يوم مادفنته بيدي اني لهذا اليوم نوم ماانام واذا غفيت احلم شون اذب التراب عليه شكله لهاي اللحظه مفارك عيوني اني ليش مخليتج تشوفي من خوفي عليج لو شايفه وجهه شون صار جان تخبلتي ردت يبقى بالج شكله الاولي وخدوده وعيونه وضحكته متشوفي من انتل ومات ماردت تغمضين عيونج ومايجي كدامج غير شكله وهو ميت متعيشين الي عايشه بهاي الفتره

اذيتج اعترف ضربتج بدافع الغيره عليج وقسيت من قهري بس ابني مو اني كتلته قدر وصار مووو انيييي سمعتي لو اعيط بعد

ناي : نزلت دمعه مني لاارادياً من ذكر سيف مسحت عيوني وبحه مخنوكه كتله

شتريد مني

مهدي : ترجعين ويايه وجرحي على جرحج انضمدهن واعوضج عن كل لحظه اذيتج بيها

ناي : اجيت متأخر وطلبك مرفوض اذا تريد اداوي جرحي طلگني وخليني اعيش بعيد عنك وعن امك وعن كلشي يذكرني بيك

مهدي : واني شاريج ومامستعد اتنازل عنج

ناي : ليش بله لان ظلمتني

مهدي : اني تايه من يوم الصار حتى ماابات بلبيت صوتج وصوت سيف بأذني روحي اسألي حوراء حتى للغرفه ماادخل

ارجعي ويايه ومستعد انطيج كله الضمانات الي تريحج بأن ميبدر مني بس الخير خليني انسيج الصار وانسى وياج موتت ابني اعتبري الصار درس اليه وابدي اتعلم شون ارتب حياتي وياج بلي يرضيج ومتشوفين مني غير المداراه ولحنان انتي مو تحبيني وين حبج اليه اول مره اغلط بحقج الي يحب يسامح ناي وادري بيج گلبج جبير ويحبني

ناي : صفنت بوجهه وكتله

لو مو احبك لو اموت على التراب التمشي عليه ماارجعلك وياريت تخلي العشره الي بينا كدام عينك وتراعي الله بيه واطلكني كلشي بداخلي الك مات يوم ما مات ابني والحب الي تكول عليه تبخر بلجو وراح لهذا ياابن خالي خلي الوجوه طيبه والنفوس هادئه ولتصعب الامور يوم مااجيت مهزومه اتزوجتني غصب هلمره ياريت اطلكني برضاتك حتى ابقى اتذكرك بلخير اني عيشه وياك لو بلجنه مااريدها لتعب نفسك وجيتك هنا مالها داعي ياريت ماتتكرر بعد

ومن رخصتك تعبت ومااريد احجي خلص الحجي سمعت ردي على طلبك

مهدي : اعوفج تفكرين مااخذ رد نهائي منج اني ارجع واكرر شاريج واريدج برضاتي مو غصب مثل متكولين هلمره اريدج ام بيتي وشريكه حياتي واطلبها بلساني ومستعد اترجاج لحد متوافقين

ناي : ميحتاج روح عيش حياتك والله وياك اني ماافيدك ولا اريدك اهم شى حطه بعقلك اني مااريدك

مهدي : يجي يوم ويبرد گلبج ويرجع يحبني

ناي : محد عم عليك غير ثقتك الزايده بنفسك ياريت انطيتني منها ولو ربع وثقت بيه وبحبي الجان الك وماسويت كل الصار جان هواي امور تغيرت بس سبحان الله لكل شى سبب والصار بيه صالح الي حتى اخلص من كل عله ومر عشته هناك انت متستاهلني خصم الحجي كله وحرامات اخلص الباقي من عمري ويه واحد اناني مثلك روح ياابن خالي الله يوفقك

عافني وطلع ذبيت الشال الجان على راسي وكت من جنت اقرا قران هسه يله انتبهت هو على راسي لان اختنكت

وبقيت اتنفس شهيق زفير حتى لا ابجي وانهار

حوراء : بقيت اني ويونس وهو عينه على الباب وكل شويه يريد يدخل على مهدي ويطرده واني اسولف ويااه حتى لا يدخل

حوراء : بيتك مريح

يونس : خلف الله على ناي تنظف وترتب اله اني مسوي فندق اكل ونوم

حوراء : ميخالف المهم موجود وياها وتساعدها

يونس : باوعت عليها وادقق بكل تفصيله بوجهه مثل الي يريد يحفظ شخص لان راح يروح ويعوفه

حوراء : شبيك صفنت

يونس : اريد احفظ شكلج

حوراء : تريد ترسمني

يونس : ياريت اعرف ارسم جان رسمتج

حوراء : احمممم اي شخبار شغلك

يونس : مجاوبتها وبقيت اباوع عليها

حوراء : تره استحي والله ليش هيج مركز

يونس : يابه مو كلت احفظ شكلج حتى من اخابرج اشوف وجهج گبالي

حوراء : صريح

يونس : قابل اجذب عليج

حوراء : شكراً لان استقبلتنا

يونس : بس مافرشت ورد وياس

حوراء : كافي تقبلت جيت مهدي لخاطري هذا الشى جبير كلش عندي

يونس : لو ماانتي جان عرفت شسوي بيه

حوراء : والله مهدي تغير وندمان وحاسه كام يحب ناي حتى مرات يغلط من يصيحني ويصيح بإسمها

يونس : هاي السوالف متهمني ولا تأثر اني بالي لا ناي ترجع مااريدها ترجع وياه

حوراء : بقينا نسولف هواي بهذا الموضوع لحد ماطلع مهدي ومبين حيل مختنك

مهدي : يله حوري شكراً يونس ماقصرت

حوراء : خلي ادخل اسلم عليها

ركضت دخلت بستها وكتلها هاا مترجعين

ناي : خلي يطلكني حوري فدوة لعمرج خلي يعوفني

حوراء : الله كريم احجي ويااه سمعت صوت مهدي يصيح يللله

بست ناي وطلعت

ناي : الصوت اختفى عرفت نزلو طلعت اشوف العلاكه مهمني غير ملابس سيف كعدت احضن وابوس بيهم فتحت التلفون وشفت صوره متحملت وكعت بلكاع ابجي واشهك

طب يونس مخروع شبيج

ناي : شوفه شوف وجهه الحلوو شصار بيه هسه اكله الدود موو

يونس : معودت شويه صحتج تحسنت لتسوين هيج باوعي على صوره بوسيها بله عياط وتتخربطين شكلج مهدي

ناي : يريد يرجعني

يونس : وشنو ردج

ناي : لو يموت ماارجع

يونس : اي هيج اريدج قويه واني بظهرج هو مو كال اطم روحي وازين شواربي واكعد بين النسوان اذا رجعتها نسيت قبل مايطلع اكول اله يله لك زين شواربك وطمها لروحك اجيت تسحل روحك وتتوسل حتى ترجعها وتالي مارضت بيك خلي اخابره واكول اله

ناي : لزمت ايده وضحكت لا فدووة لتسوي مشكله

يونس : اذا بجيتي والله اخابره واعلكها

ناي : ههههه ماابجي هااك مسحت دموعي

يونس : ميت جوع طلي مستعد اكل لان ابن خالج اجه يتوسل وكسرتي خشمه

ناي : مسويه غدا خلي نتغدا وعوف ابن خالي الله يجازي كلمن بطريقه بعد اكو شى انتبهت اله

يونس : شنوو

ناي : حوري

يونس : شبيهه

ناي : عندك حجايه وياها

يونس : هاااا وين احجي وياها

ناي : ماادري حسيت بنظراتها اكو شى

يونس : خيالج واسع امشي صبي خلي اكل وارجع لشغلي عفت المحل وحده

ناي : دير بالك اروحلك فدوة اني احب حوري اموت عليها بس ماترهم الك هاي بت وداد يعني لو تذبح روحك جوه رجلها متزوجها الك لا كل ماتحب وحده اصعب من الثانيه والله موتتني ماحبيت وحده اله وراها طلابه شكبرها

يونس : يابه شبيج البنيه يمها اني لتسوين افلام براسج وادبلجيها كومي سوي اكل لو اروح اكل بلمحل

ناي : كمت لتروح

ناي : ماادري افرح لان ظهرت برائتي لو انقهر لان ثمنها ابني عدت الايام وصار اربعين ابني

رحت للمقبره اني ويونس بدون منبلغ احد رحت وره الاربعين بيوم لان كلت اكيد همه موجودين مااريد اشوف احد بجيت وذبيت قهري على ترابه ورجعت اجر بروحي جر

شرهب كل جمعه يجيبها يمنا يونس تبقى تبات والسبت يرجعها تعلمت على البيت وصار بيتي ويونس دوم بليل يااما يسد الباب واسمع يتبسبس بلتلفون لو يطلع للسطح گلت ياريت يحب ويعيش بس لا حوراء لان طريقه مو صعب بس كله جمر ومااريد يمشي بيه

كامت صحتي تتعب ودوم دايخه لو اريد انام وضاله اتشهه كل شويه اكله شكل انتبهت الدوره اختفت كلت يجوز الهبطه مال موتت سيف تسوي هيج شغلات بس طولت حيل صار ٣ اشهر ماكو

گلبي لعب وخاصه بعد حجايه شرهب

شرهب : جنت يم ناي وجهه مبلوع وبس ادور اكل لو نحلانه باوعت عليها وكلت لج اخاف حامل

ناي : ياحامل عوذه منج

شرهب : ليش بلعكس متكيفين

ناي : لا طبعاً اريد اخلص من مهدي اجي اخلف منه وثاني شى ماخذه احتياطي من جنت وياه مااترك المانع ابد

شرهب : هواي سامعه نسوان تحبل على المانع مو فد معضله مسويه

ناي : اسكتي گربتي گلبي

شرهب : امشي نروح نحلل اكو مختبر عبور الشارع هو تحليل حمل ب٥٠٠٠ نسوي ونجي

ناي : گلبت معدتي مجرد مااتخيل طفل يربطني مره ثانيه بمهدي ويرد يلوي ايدي بيه انجن

ناي : كومي نروح خلي اخابر يونس وابلغه راح اكول التحليل الج

شرهب : اني شكوو

ناي : استحي اكول اليه حبابه

شرهب : يله امري لله الي بس امشي

ناي : خابرت يونس وبلغته وطلعنا جنت مااندل وشرهب تمشي وادليني احسن مني تندل المنطقه

وصلنا للمختبر ودكات گلبي بمعدتي حتى ظهري كام يوجعني من القلق وادعي يارب لا تربطني بيه مااريد طفل منه

لحد ماطلع النحليل مبقيت نذر مانذرته مااريد اصير حامل

جان يكول الولد الي بلمختبر حامل

ردت اخرب واوكع على وجهي حتى الولد استغرب هذا اخاف عباله مسويه مكسوره

شرهب : امشي فضحتينا عباله عندج شى لو الي بطني من حرام خرب عمي امشششي

طلعت واباوع على الناس والسيارات والجو وساكته

شرهب : توقعت تفرحين ليش هيج وجهج انگلب

ناي : هذا الطفل لازم ينزل مااريده

شرهب : يااااا تخبلتي شنو ينزل تكتلين روح بيدج لوما قبل شهرين ونص فقدتي ابنج

ناي : هو لان فقدته مااريد اعيد ذيج الايام اني منتظره مهدي يطلك اذا عرف حامل مراح يطلك

شرهب : وليطلك طبه طوب اشلعي گلبي وبقي الطفل عندج

ناي : كتلج مااريده لازم اخابر عمه خوله ادزلي فلوس حتى اشوف دكتوره تنزله مااريد يونس يدري ونروح اني وياج نزله ونرجع بحجه رايحين للسوك او اي عذر

شرهب : وشكد شايفتنا سباعيات نروح نفتر على عيادات الدكتورات ونطلب منهن ينزلن الطفل اكيد شخطتي والي تسوي اكبر حرام واله اكول ليونس عليج واني مااروح وياج لو تموتين وعود خططي ام العيادات شون تنزلي

ناي : تعرفيني وحدي

شرهب : لا كعد اعقلج لان تفكرين بيه حرام لتخلين الله يغضب عليج

ناي : متعرفين اذا اجه للدنيا هذا الطفل شيسوي بيه راح يدمرني ويخليني تحت رحمه مهدي واهله من جديد

شرهب : ميسوي شى يعوضج عن سيف وتحسين بأمومه وتسمعين كلمة ماما من جديد ويصير اعز من روحج وتعيشين وتكونين نفسج لعيونه هذا راح يكون قوتج مو دمارج

لعيونه راح تواجهين الدنيا كلها وهم تكسرين عيون وداد وصالحه وكلمن تشمت بيج لتتسرعين اذا گتلتي هذا الطفل يجوز الله يعاقبج ويحرمج من الامومه كلها شنو ذنبه يموت وهو مشايف النور بعده انتي الصدمه مأثره عليج اكعد وفكري وراح تشوفين حجي مالتي كله بمصلحتج

رجعنا للبيت واني بالي كله يم ناي اخاف تسوي شى خابرت يونس وبلغته حتى يحط عينه عليها وجان بالي يضوج بس بلعكس تفكيره مثل تفكيري وهذا الشى ريحني

ومن رجع بليل فرحان وباس راسها وحسسها هو شكد فرح من سمع الخبر

يونس : اي ولجن ولا وحده بيجن بيها حظ وتسويني خااال اريد اصير خال تره اركع راس براس شلعتن گلبي

شرهب : هههههه يمه فدوة للخال الحلوو وشوكت تصير اب

يونس : مو هسه دربي طويل انتن صيرن شاطرات وسوني خال وعوفن الاب مو وكته

ناي : صافنه عليهم محد حاس بلي احسه اني مااريده اخلفه للعذاب والقهر واكوم يوميه اجاك الذيب اجاك الواوي

يونس

يونس : هااي عيني

ناي : اريد ارجع ادرس اريد هاي السنه اقدم خارجي سادس واقرا وانجح

شرهب : تكدرين وكت التقديم والامتحان احتمال بطنج كدامج او جايبه وعندج طفل

ناي : اريد اقدم وعوفكم من الطفل هسه

يونس : هاي سهله نشوف التقديم منين واني اشتريلج ملازم  واكعدي اقري ومني الج درسين صعب انطيج فلوسهن ادخلين خصوصي بيهن

ناي : ميحتاج اني شاطره واكدر اكعد وحدي اقرا انت بس وافق وان شاء الله مااضيع تعبك

يونس : ادري بيج سباعيه ومينكدر الج وانتي شوشه مدرسين

شرهب : ليش ادرس وعندي رجال يعلم الاجيال وقايم بواجبي واجبه

يونس : لا والله بدون شقه

شرهب : ياريت بس عدي ميقبل خلي تكمل ناي وبلكي اكدر بيوم اقنعه

يونس : اعرف رجلج بخيل كول المصاريف كلها عليه بس خلي يقبل

شرهب : هو ميريد ادرس حتى لا اصير احسن منه اعرف بيه هم سالفه بخل وهم حتى ابقى تحت ايده يله كلمن وحظه خلي اختي تاخذ الشهاده وعود اتفاخر بنوايه

ناي : نوايه شنوو ولج

شرهب : ادلعج وابنج انسمي تمرايه

ناي : الله كريم

خابرت عمه خوله وشرهب بلغتها وباركت اليه حست من صوتي مراضيه وبدت تقسم ولعبت بيه طوبه من سمعت اريد اسقط ردت اغير الموضوع وكتلها شخبار صالحه

خوله : اشواق خابرتني كالت صالحه مبلغه عبيد بأن راضيه بضرتها ويوم يمها ويوم يم اشواق وهذا الشى لعب گلبها لاشواق صالحه وراها درب ثاني مراح تكعد راحه ابد

ناي : مبين واله شون ترضى بضرتها وخاصه عرفت البيت بإسمها

خوله : نكعد جنب الحيطه ونسمع الزيطه خليهن وحده تاكل الثانيه ومتأكده صالحه راح تسوي مكسوره وهلمره مراح يصير الوضع لجانبها غلطاتها كثرت وكعتها قربت واشواق مو فقيره ومبينه مراح تسكت عساهن خليهن

ناي : وساهره رجعت

خوله : اي رجعت وهاي الثانيه متأكده راح تأذي جوحي بس يرادلها صبر

ناي : شوكت اشوفهن متأذايات عمري متمنيت الاذيه بكد ما تمنيتها لصالحه وساهره وداد

خوله : يجي يوم ربج منطيهن شكد ميردن حتى وكت الوكعه تكون قويه ميكومن منها

ناي : يـِْ♡̨ـِْا رَبّ شووكت راح يخلص عمري وهنه بعدهن عرج ميطكهن

خوله : حيري بنفسج وبطلي خبالات وانتبهي على صحتج

ناي : ماشي عمه بوساتي

خوله : الله وياج حبيبتي

بقيت اليوم ويه شرهب ويونس سوالف واكل وعقلي كله بسالفه الحمل  وثاني يوم راحت شرهب وبديت اخطط شون اسقطه كمت اشيل شكوو شى ثكيل دبه مال غاز وافتر بلبيت لو العب حبل لو ادبج من الجربايه للكاع ردت بس يوكع يومين واني حيلي انهد وكلشي ماكو

اندكت الباب فتحتها وطبت مره مفوطه لابسه اسود من فوك ليجوه

شونج بنتي

ناي : هله خاله

اني ام حسن صاحبه البيت

ناي : هله هله خاله تفضلي

ام حسن : زاد فضلج بنيتي اني بس ضل بالي صار يومين دب مادب كل فوك راسنا وهاي بتي مريضة وتعبانه ومااعود انومها وتفز عدكم شئ تعمير شيل غراض

ناي : دنكت خجلانه كتلها لا خاله هيج جنت ارتب البيت لزمتني لويه من بطني ااااخ

ام حسن : بيج شى يمه

ناي : بطني وجعتني

ام حسن : ماكله شى

ناي : لا حامل وردت اسقطه ويمكن راح يوكع ااااخ  مدري شون طلعت من حلكي هاي المره جمدت بوجهي

جان تجرني من ايدي سدت الباب وتنومني بلكااع

وراحت ادور على وصله وجابت شالي جان معلك وربطت بطني واني صافنه هااي شسوي

وبدلت ادلك بظهري وتقرا ايات كل متقرا احس جلدي يكرمش واعضائي تنمل

بقت اكثر من نص ساعه جره وحده تقرا بالايات وتنفخ على بطني  وتسمي وتنخي بأهل البيت لدرجه خلت دموعي تنزل حيييل واشهك واندم على سوايتي

وكل متعيط تنخي السيده زينب وام البنين سلام الله عليهن خلتني انتهي من البجي

لحد ماحسيت بطني مثل المي البارد نزل بيها وهدأ كل الالم

اركض وراه ولك يمه تعااال مو شلعت گلبي

يونس : عوفي يمي يلعب

ناي : لا عفيه يونس خلي ياكل بس يفوت الوكت بعد ميحط لكمه بحلكه ورايه امتحان اريد اقرا باجر لازم اروح للكليه من وكت البارحه تأخرت من وراه

يونس : مهدي يريد يجي ياخذه

ناي : يجي يشوفه هنا ماكو مياخذه لو ينط

يتبع ....

#الابواب_الخمس

البارت السادس والعشرون /الجزء الثاني

للكاتبةReem

(بارت طويل لعيونكم )

واشاقيهم ، واسولف ،

چلمة الـ مرتاح.!

بس هي المصيبه الروح متعوبه.

اركض وراه ولك يمه تعااال مو شلعت گلبي

يونس : عوفي يمي يلعب

ناي : لا عفيه يونس خلي ياكل بس يفوت الوكت بعد ميحط لكمه بحلكه ورايه امتحان اريد اقرا باجر لازم اروح للكليه من وكت البارحه تأخرت من وراه

يونس : مهدي يريد يجي ياخذه

ناي : يجي يشوفه هنا ماكو مياخذه لو ينط

يونس : مرمرتي الرجال جم مره يطلب مني ياخذه ويحلف الف مره ميعوفه من ايده

ناي : واني كتلك الف مره يايونس ابني ميروح الهم وشيسوي خلي يسوي

اباوع على ابني الصار عمره سنتين وجهه جنه تفاحه يخبل كله خدود والشعر كيرلي ماخذ شعر شرهب وهي مكيفه لان نفس شعرها وتصيحله شبيهي اما يونس ميعوف خدوده طاب طالع يكرص بخدوده ومتعلق حيل بيه قلبي  يتراجف على ابني اخاف عليه اكثر من روحي اباوع عليه شون يكمز ويلعب ويه خاله وميقبل ياكل اخذتني الصفنه لشهر الخامس ٢٠١٠ من جنت حامل بيه واريد اسقطه بليوم الي تخبلت وفكرت اتخلص منه

قبل اكثر من سنتين تحديداً شهر الخامس ٢٠١٠ :

صوت شهكاتي علت اكثر واني حاسه بتأنيب الضمير وخايفه لا يسقط اباوع على هاي المره الي اول مره اشوفها ويجمعني بيها هيج موقف جنت دوم افكر انزل واسلم عليها واتردد لحد ماهيه صعدت اليه تشكي صوت الهبط والتكمز وتريد تنوم بتها المريضة جن رب العالمين دزها اليه حتى يكتب لابني عمر جديد ويبين اليه شكد تصرفي غلط وحرام بعد ماقرت الايات وبدت تنخي مي بارد نزل بيها وهدأ كل الالم

تقربت مني ام حسن وكالت

ام حسن : بنتي انتي تصلين

ناي : مسحت عيوني مستغربه سؤالها اي خاله اصلي اكيد

ام حسن : يعني تعرفين الله ومؤمنه بيه

ناي : طبعاً مؤمنه والحمدلله

ام حسن : بس المؤمن بالله مايغضبه مايعترض على امره ولا يقتل روح رب العالمين امر ان تنولد وتجي للدنيا انتي بتصرفج هذا عصيتي وتحديتي وانطيتي لنفسج الحق تگتلين روح مالها ذنب

ناي : رجعت ابجي واني بعدني مدده بلكاع ودموعي تنزل من عيوني على الكاشي واحجي بقهر

متعرفين ظرفي خاله لتحكمين عليه اني مصار كم شهر خسرت ابني وحتى مالحكت اشمه واحضنه

ام حسن : شكد عمره

ناي : سنتين ونص انتل ومات حتى من دفنوه ماشفته خاله اني بيه هم وضيم يهد جبال وماردت يصير طفل يجبرني ارجع لابوه لان هواي اكو شغلات تمنعني ارجع اله

ام حسن : ابنج طير بلجنه ومن راح دزلج العوض بمكانه وانتي مكان ماتفرشين سجادتج وتسجدين شكر وامتنان لله على هديته و كرمة وعظمته ادفرين هديته برجلج وبگل دم بارد

ناي : كتلج خاله لاتحكمين عليه متعرفين بشنو مريت

ام حسن : ابقي نص ساعه هيج نايمه لتتحركين وراها سمي بأسم الله القوي وكومي  وانتي تتحركين حطي ايدج على بطنج وادعي

احفظي ورايه

اللهم أعيذ ما في رحمي بكلماتك التّامة، ومن كلّ شيطان وهامّة، ومن كلّ عين لامّه، اللهم أسألك أن تحفظه وتجعله معافى كامل الخلقة، اللهم حسّن خَلقه وخُلقه، وسهّل حمله ومخرجه، واجعله قرّة عين لي، واجعله من عبادك الصّالحين

وصلي على محمد وآل محمد٧ مرات وارجعي كولي

اللهم إنّي أستودعك جنيني الذي في رحمي، أنت الذي لا تضيع ودائعك يا الله. اللهم احفظ جنيني واحمه، وأمسكه أن يسقط، وأتمّ حملي على خير

وارجعي صلي على النبي ٧ مرات

وبعدها اقري سوره الفاتحه ٧ مرات

والاخلاص ٣ مرات والمعوذتين كل سوره مره وحده افتهمتي

افتهمت بس الدعاء بعدني محافظته

ام حسن : ارتاحي النص ساعه وحاولي تنزلين يمي واني تلكيني كاتبته الج

ناي : رحمه الله والديج خاله مااعرف شون اشكرج

ام حسن : راح انزل جوه انتظرج

ناي : نزلت وبقيت نايمه على ظهري مثل مكالت واني الرعب والندم ياكل بيه اكل لحد مامرت النص ساعه وسميت وكمت على كيفي جنت امشي على كيف واكول شون تجرأت سويت هيج حطيت شال على راسي وشمرت العبايه الاسلاميه على جسمي ونزلت على كيفي طلعت خطوتين الباب الي بصفنا باب ام حسن همه الطابق الجوانه من البيت لكيت الباب مفتوح دكيته سمعت صوتها

ام حسن : تعاي بنتي

ناي : طبيت كراج صغير يكمل باب خشب مفتوح وهول طويل سميت ونزعت نعالي وطبيت باوعت البيت اثاثه مرتب مو جديد بس بنفس الوقت مو حيل قديم نص تخم ومكتبه وتلفزيون وجربايه محطوطه بلهول باوعت بنيه نايمه تطلع اصغر من شرهب بسنتين هيج شى يعني بنيه شابه متغطايه وشكلها حلوو بس حلكها اعوج

سميت بأسم الله وحمدته على نعمه الصحه جان تجي ام حسن

ام حسن : اكعدي

ناي : اشرت على التخم مقبلت اكعد يمها بلكاع

مدت ايدها وانطتني الورقه مكتوب بيها الدعاء وعلمتني عليه

ام حسن : هاي بنتي زهراء ولدتها وعدها مرض نادر اول يوم جابوها اليه كالو متعيش واذا عاشت بمرور الوقت تشلل وماتكدر تتحرك ولا تمشي وتصير الحاجتين جواها الله يرحمه عمي ابو رجلي من سمع هيج  كال ذبيها شسوين بيها هاي سگط ومالها نفع بس امراض اني حضنتها وبجيت وكتله لو اخلص عمري اداريها مااقصر ولا اشمرها شون اشمر دمي ولحمي ورجلي من شاف حالتي وتوسلي بيه سكت وحمد الله على نعمته ويوم بعد يوم بدت تكبر وكلام الاطباء طلع صحيح مهتميت كلت هاي البنيه امتحان رب العالمين اليه ولازم افوز بالامتحان حتى يجازيني خير يجوز بسببها الله يكتبلي الجنه كل ابتلاء يابنتي امتحان والدنيا صفوف كل متمر السنوات بينا ندخل صف جديد وامتحان اكبر واصعب وهنياله الي ينجح بيها 

ناي : الله ينطيج الصحه والعافيه خاله ياريت كل الناس مثلج

رفعت عيني على الحايط صار بوجهي صورتين شباب اثنين يخبلون يعني مثل منكول نور بوجهم مو طبيعي واحد منهم عيونه خضر صدك يصفن جمالهم

انتبهت وين اباوع ابتسمت بقهر وكالت

ام حسن : حلوين مو

ناي : دنكت خجلانه كلت الها الله يحفظهم ولدج خاله

ام حسن : اي حسن وابو عيون الخضر بكر  ولدي اكبر من زهراء فرحت عمري تشوفيهم بعد وفاة ابوهم صارو نفسي اليصعد وينزل حسن عمره ٢٨ سنه وبكر ٢٥ سنه

انتي جنتي فوك تبجين لان ابنج عمره سنتين ونص مات الله يرحمه يبقى ابنج وقطعه من روحج والعمر كله متنسي واني حاسه بيج ويمكن اتأذه اكثر منج لان الفرق اني كبرت وسهرت ودرست وشفتهم شباب اقيس طولهم سنه وره سنه وانتظر اليوم الي افرح بيهم وازوجهم واشوف جهالهم يلعبون يمي واعيط على هذا واضرب ذاك واحضن هاي وتالي الليل افتر عليهم واغطيهم لان اخاف عليهم واحبهم اكثر من روحي  واكول همه لو طحت راح يداروني بگبرتي لو متت يشيلون تابوتي وبيدهم ينزلوني تالي اني نزلتهم

ناي : انقبض گلبي كتلها مفهمت

ام حسن : يطلعون يشتغلون على باب الله عدهم سياره سواق طرق خارجيه بين المحافظات جان حسن يشتغل وذابح روحه على الشغل لان خاطب ويريد يتزوج

اربع ايام اله و٣ ايام لبكر والرزق على الله وماشي حالنا ويه التقاعد مالتي بخير وبال٢٠٠٧ اثنينهم طلعو وكال بكر اروح ويه حسن لان متواعد ويه صاحبي لكالي سياره بسعر مناسب بلكي اشتري حتى هاي السياره تضل لحسن ويشتغل براحته گلبي وجعني وغيمت الخنكه على صدري كتلهم يمه ليش مايجي لبغداد الولد ليش اله انتم ترحون كالو صاحبنا ونعرفه والطرق تخوف ميقبل يجي لبغداد كتلهم لعد شون ترحون انتم كالو احنا الطرق مال المحافظات نندلها كلها حتى الحصوه الي بلشارع حافظين مكانها اكلوني اكل بلسانهم بوستهم وحضنتهم گلبي يگلي تخليهم يرحون وعقلي يكول لتعرضين الهم خليهم براحتهم شو همه يوميه رايحين راجعين قابل جديده وگلبي تالي طلع الصح وطلعو ومارجعو

ضليت ٣ ايام مثل المخبله ادور عليهم وعمامهم ويايه ورابع يوم اجه عمهم الصغير كال لكيتهم بلطب العدلي ذابحين ولدي اثنينهم وماخذين الفلوس والسياره وشامريهم بلشارع اذا انتي ماحضنتي ابنج قبل مايندفن اني اثنين شباب وجهم مايبين من جسمهم من التعذيب المسوي بيهم

ياريت ماشفتهم قبل مايدفنوهم جان على الاقل يبقى شكلهم بعيني يوم ماودعتهم

لهسه من اباوع على صورهم اشوفهم كلهم دم وزراك واصابع مكطعه مااشوف الي انتي هسه تشوفي

ناي : طكيت بجي واني اتخيل شون حالهم

يعين گلبج ياخاله والله مااعرف شكووول

ام حسن : كولي  الْحٍمَدٍ للـّہ ولااعتراض على حكمك ياالله ومشيئتك

ناي : باوعت على ايمانها وقوتها كتلها شون اكدر اجتاز الصار

ام حسن : حسني ضنج باالله ودوم كولي هو الطف بيه من عباده هو يعرف مصلحتي سبحانه راح يكرمني ويجازيني  على تعبي وصبري مرات اكعد وانوح وابجي الگلب ينمرد ومايتحمل من الشوق وارجع افتح القران واقرا كلامه واناجي واكول اله جازيني صبري بأن تجمعني بيهم

ناي : الله ينطيج الصبر خاله ويجازيج خير كافي السويتي اليوم ويايه

ام حسن : انتي بعدج صغيره وهواي شغلات بعدج معايشتها لا كل وكعه تأذين نفسج بيها صيري قويه حتى تكدرين تعيشين الله اكرمج بطفل ثاني حطي عطيته بين عيونج وكومي واكعدي اشكري لاتضلين تندبين حظج

سولفيلي شنو الخلاج هيج توصلين

من كثر مرتاحيت الها كلشي سولفت الها من يوم وفاه امي لحد مادكت بابي الله ذب بگلبي تجاه هاي المره راحه عجيبه وهي دوم مااسولف تسبح وتستغفر

جانت بتها فاتحه عيونها وتسمع بس متكدر تحجي اي شى

ام حسن : اخيج وياج وساندج ذبي حملج عليه واوكفي على رجلج اني يوم مااجاني الدلال وكال لكيت مؤجر وجاب يونس بس باوعت بعينه عرفت بيه طيبه وماعنده دغش

جانو قبلكم عائله واطفال هواي عدهم شيلتهم من هوستهم ومشاكلهم ومن كال بس اني واختي كيفت ومرات اغسل الطرمه الصبح اشوفه من طالع ويسلم ذاك السلام الحلوو ويسألني خاله محتاجه مسواك غراض اجيبلج ويايه عرفت معدنه طيب وكمت لا ارادياً ادعيله الله يحفظه

ناي : اي والله ياخاله اخويه طيب ودوم يوكع بمصايب مو دربه

ام حسن : الله الحارس بنيتي وهاي انتي صرتي مثل اخيج بگلبي وادعيلج الله يبرد نارج وتولدين وتفرحين ويعوضج كل خير

ناي : مشكوره خاله اندكت الباب كامت فتحته طلع يونس

يونس : شونج خاله

ام حسن : يم الله ابني تعال طب اختك يمي

يونس : ضل بالي عليها من صعدت ومالكيتها

ناي : هياتني شفته شون خايف ولمت روحي لان كعد احمله هم زياده

ام حسن : ضلو على الغده ويانه شون شيخ محشي مسويه يلوك لحلكم

ناي : بلعافيه خاله غير مره

طلعنا منها وصعدنا فوك وحجيت كلشي ليونس وانقهر مني وعدته بعد مااعيدها ومن يومها صارت ام حسن قريبه حيل اذا اضوج او اختنك انزل يمها سوالفها تخبل تخليني انسى الهم وحتى الوكت وياها وكامت تعلمني على شغلات بلطبخ اني اعرف اطبخ بس هيه نفسها بالاكل مو طبيعي وتعلمت اكلات منها

وحتى من اشتهي اكله تسويها اليه

جنت اشوفها شون تشيل وتحط بتها كوه تمنيت اساعدها بس هيه متقبل لان حامل وتكول ناذره بنتي محد يساعدني بيها لحد ماينكسر عظمي وانام يمها جنت اتعلم صبرها وقوتها وايمانها ومنا سوالف عمه خوله وتدريبها وعقلها الرهيب تكول لازماتني وينفخن بيه منا وحده ومنا وحده كمت انتبهه على هواي شغلات غلط بشخصيتي ولازم اغيرها

شرهب تعرفت على ام حسن والحلوو من تروح شرهب تخلصها ضحك وياها ويه زهراء

دوم ام حسن تكول اختج ورده نبتت بنص شوك لهذا صامده وقويه وعقلها اكبر من عمرها

وهاي الخبله تجاوبها تكولها

شرهب : بس هااا خاله تره ورده بيها ريحه طيبه مو فاشوشي بس شگل

ام حسن : ورد جوري عطره يفوح بكل مكان

شرهب : اي خاله تغزلي بيه اروحلج فدوة بيه تصحر من وره الاستاذ الفاضل رجلي الموقر

حاير بدروسه وطلابه موتني

ام حسن : الله يهدي عليج جوريه

شرهب : هله صار اسمي جوريه موو نوايه

ناي : شفتي خاله تصيحلي نوايه

ام حسن : وشبيه النوه من النوى يطلع الزرع والشجر هو اساس كلشي بليه النوايه ماينبت زرع

شرهب : اروح فدوة لهذا اللسان اتعلمي مو بس ضاله تحجين عليه وابنج تمرايه كون يطلع يشبهني يارب واضل احرك بگلبج

ناي : طول ما مكابلتني وكاعده اكيد يشبهج

خابرت بيبي وعمه بديعه وبلغتهم عمه ماكدرت تكتم فرحتها وهلهلت رغم حزني جانت فرحتهم احسها رغم البعد البينا وبيبي تهوس وتصفك

والكلب مليان بفرح خل تسمع الشماته

واني اضحك على سوالفها گلبي مقسوم اثنين نص يبجي على الراح ونص فرحان بلجاي

بعد مده اجتني سدره وتفاجأت بيها جانت مستحيه لان مااخذت بخاطري بوفاة ابني كالت خفت تطرديني لان ماخذه موقف منهم وتالي حوراء فهمتها وماخذه العنوان منها واجت زارتني اني سدره ماشفت منها غير الخير والاخلاق الحلووه ورحبت حيل بزيارتها واخذت رقمي الجديد لان بدلته ومرات نتراسل تطمن عليه بقت علاقتي بيها طيبه

مرت الايام وبطني بدت تكبر صار عليه ٥ اشهر وكم يوم احسب على الرزنامه ودوم اقرا الادعيه الي تكول عليها خاله ام حسن الجو حار تموز واني كوه ادنك بله بعدني بلخامس وهيج حرگتي ثگيله من اوصل للتاسع شون

دك تلفوني حوراء

هلوو حوور

حوراء : انتي صدك حامل

ناي : شنوو شمدريج

حوراء : لتجاوبين بسؤال انتي صدك حامل

ناي : تنفست بضوجه اوووف اي حامل

حوراء : وليش ماكلتي

ناي : مااريد اكول

حوراء : وهاي شغله تضم من كل عقلج

ناي : مو اضمها بس على الاقل هاي الفتره مااريد اتعب واتوتر جاوبتج على سؤالج جاوبي منين عرفتي انتي عندج اتصال بيونس

حوراء : توترت من كالت هيج وكتلها

هاااا مجرد خابرت اسلم عليه وسإلته وكال مشيتها ثكلانه من الحباله خله شعر راسي يوكف وفوكاها عليج ٥ اشهر ونص انتي شون ساكته لخاطر الله

ناي : لتكولين لمهدي عفيه معودت صار مده ماكو ومرتاحه

حوراء : مهدي بلشمال صار شهر ونص ومجاي لديالى غير التلفونات بينا وكل ميخابر يسألني عنج شون صارت بله اذا خابر هسه شكول اله تعال خويه تره مرتك بعد ٣ اشهر ونص اتجيب

ناي : اكعدي واسكتي مااريد يعرف

حوراء : هذا مو قميص تشتري وتضمي هذا طفل وابوه لازم يعرف

ناي : وان عرف شراح يتغير اني رجعه ماارجع اله

حوراء : تره مهدي تعبان ومكسور والقران مثلج ليش تصيرين انانيه على الاقل خلي يفرح ويحس راح يرجع يصير اب متوقعت منج هاي الدكه

ناي : عفيه لتلوميني تعرفين كلشي لتضلين اطلعين اخوج ملاك واني شيطان هذا ابني الي وحدي وماله حق بيه

حوراء : اني الشيطان يله ارتاحي وراح اخبث وابلغه يله باي

ناي : الوووً يمعوده حوري رجعت دكيت انطتني رفض وراها طلع مشغول مبين خابرته

حيل ضجت لان راح يعرف وبعدين كعدت بيني وبين نفسي الى متى اضمه صدك على كولت حور قابل هو قميص خلي يعرف واني اعرف شحجي ويااه بعيني

خلال يومين اجاني اتصال من يونس يكول باجر عمران ومهدي ولد خواله جايين

لوتني بطني رجعنا لا هله خابرت عمه خوله وبلغتها

خوله : انتي تردين مهدي لو لا

ناي : لا واريده يطلكني

خوله : طلاك مراح يطلك بس احجي بهدوء وياه وبعقلانيه التردي وصلي بطريقه بسيطه بدون مشاكل اي خلاف وعركه وياه مو بصالحج راح تتأذين وترجفين واخاف يأذي الطفل

ناي : لعد اسكتله خلي يولي اني مااريده ولا اريد اشوف شكله اكرهه عمه

خوله : انجبي انجبي اكرهه لو يمي اله الطج على وجهج ليش تكذبين اصلاً تموتين عليه يلخوثه وروحج هيج تطاير من تسمعين اسمه بس كولي اريد اربيله گلب اريد يحس بيه اريد اعيشه الي عشته اصدكج بس مال اكرهه مو عليه بت ذكرى

ناي : نسيتي السواه بيه

خوله : اني مناسيه ولا انتي راح تنسين بس سالفه اكرهه بطليها تردين تبنين حياتج بدونه من حقج تردين ابنج يضل وياج وتعيشي الحرمان العشتي هم حقج بس كلشي يزيد عن حده ينگلب ضده اذا الج نيه تنتقمين بس وراها ترجعين لحضنه لتكطعين كل الخيوط اما اذا تردين تعيشين صدك بدونه اتصرفي صح وبرزانه لان بينكم طفل خطيه ينداس ويضيع بينج وبينه فكري بمصلحتج وبنفس الوقت بمصلحة ابنج يبقى هذا ابوه لو تضمي بجام خانه وتحطين حرس عليه هم يبقى ابوه ومن حقه يشوفه اسسي حياتج الجديده من البدايه بأساس مرتب وقوي حتى لا ينهد البنيان فوك راسج وقرري بعقلج مو بگلبج وعاميج الصار اول شغله لازم تحطيها بالج انتي شتردين من صدك مو بدافع الانتقام تردين مهدي او لا ومن تقررين خابريني اكلج شتحجين يلرعنه يلمابيج خير بس تعوين

ناي : شكد تحبين ترزليني

خوله : تستاهلين لان متعرفين تتصرفين من تقررين نكعد نسولف شتحجين وياهم حتى لتگلبين الكل ضدج

بقيت افكر واحسبها من كل الجهات وقررت واتصلت بعمه وبدت تعلمني شون اتصرف لحد ماتعبت مني وسدته كلامها منطقي جنها كاعده بگلبي وتعرف شريد

ثاني يوم اجت شرهب تساعدني لان يونس كال لازم اكل عيب جايين طريق بعيد وهاي شرهب تكمز كل ميجون لازم ياكلون شطلعت هاي همه جايين يصالحون ناي لو يتغدون ويرحون

سكتها يونس وكال عيب ميصير صعدت ام حسن تساعدنا وطبخت ويانه وضلت تكول لتتعصبين حتى ابنج ليتأذه انطتني ارشادات مثل كل مره تخليني ارتاح  ونزلت لبيتها

كاعده بلغرفه انتظرهم انفتحت باب الهول ودخل يونس واسمع اصواتهم

اجاني يونس حتى اطلع الهم لبست العبايه والاسلاميه والشال وطلعت اول مشافني مهدي فتح عينه على بطني لان جانت جبيره

عمران : هله يابه شونها الهزامه الناسيه خالها

ناي : شونك خالو تقرب وباسني من راسي

شلونك عبد وصلاح شلونك

سلمو جان يكول خالو

عمران : ورجلج ماله سلام

ناي : شلونك مهدي باوعت عليه مورث من الاعصاب

مهدي : زين انتي شونج

ناي :  الْحٍمَدٍ للـّہ درت وجهي على خالو

عمران : هيج مالنا خاطر عندج بحيث راح تنرزقين بطفل واحنا مندري متردينا نفرحلج لو شنو سالفتج

مهدي : متريدني اعرف حتى تحرك گلبي اكثر ماهو محروك

ناي : مو هيج خالو اني جنت تعبانه ومصار شهرين من عرفت

مهدي : وشوكت ناويه تبلغيني وره متجيبين لو من يدخل للجامعه احسن على وجهه حتى نروح نخطب اله

ناي : حصرتني الضحكه ودنكت

عمران : على كيفك ابني خلي نفهم سولفي بنتي

ناي : ماعندي شى اسولف بيه هسه انتم عرفتو اني حامل وجايين وهله بيكم هذا بيتكم شنو المطلوب مني

عمران : المطلوب منج ترجعين لبيتج لرجلج

ناي : قبل ٣ اشهر اجاني مهدي وحجينا بلموضوع وميحتاج اعيد الي حجيته لان هو يعرفه وكثر الحجي بنفس الموضوع يتفهه واني الصار بيه لا شى قليل ولا تافهه لهذا مااريد احجي واعيد واصقل والنتيجه وحده

عمران : شنو النتيجه

ناي : يطلكني

مهدي : من اجيت وحجيت وياج مجان اكو طفل يجمعنا وعفتج هاي المده كلها كلت خلي ترتاح بلكي يبرد نارها وتعقل وتفهم وجهت نظري بس هسه اكو طفل وهذا ابني مثل ماهو ابنج ومثل متردي بحضنج اني هم اريده بحضني ومااقبلج تتصرفين بكيفج

ناي : شوف مهدي هاي كدام خالو والولد واخويه اياك تفكر تعيد الصار وتاخذ ابني مني او بنتي لان لهسه مااعرف شنو جنس الطفل اياك تفكر تلوي ايدي قسماً بالله وروح امي وروح سيف الي لهسه ناره شاعله بفادي وتحرك بيه صبح وليل لا اخذ طفلي وانهزم بيه واخليك العمر كله تتحصر على شكله  واني اليه سوابق بلهزومات لو نسيت من جنت مراهقه اخذت اختي وانهزمت من محافظه لمحافظه واجيتكم يعني مااخاف

عمران : ناي ميصير هيج الحجي تهددين واني كاعد

ناي : لعد قابل على كلامه بعدنا بسم الله كاعد وشايل خشمه ويحجي بأعصاب تكول مسوي منيه على جيته

مهدي : شنو شايل خشمه احجي عدل متستحين

ناي : كوم يله اضربني ولو انت تعلمت تمد ايدك عليه

مهدي : استغفر الله لج شبيج بابا انتي راح تخبليني شتردين وتصفين من ناحيتي مستعد كلشي اسوي حتى گلبج يرجع يصفى

ناي : اطلكني

عمران : ميصير بنتي انتي حامل طلاكج يصير باطل

ناي : قابل العمر كله راح ابقى  حامل كلها ٣ اشهر ونص واجيب وخلي يطلك

مهدي : طلاك مااطلك وهاي كدام الكل لو توكفين على تك رجل العمر كله ياناي طلاك مااطلكج واله اعوفج هيج وروحي محاكم اشتكي شتردين سوي طلاك مااطلك

ناي : توترت جريت نفس بهدوء وحجيت بثقه

ولطلك عادي ابقى على ذمتك مو مهم قابل راح ينقص من طولي اذا مطلكت اهم شى ميجمعني سكف واحد  وياك وابنك تشوفه ضمن مواعيد اني احددها ومتاخذه ابد لديالى الي يريد يجي يشوفه هنا عندي بيت اخويه مفتوح للكل شوكت متحب تعال شوفه والله وياك

مهدي : سامع خالي شنو تحجي

عمران : يعني انتي حتى محاطه خط رجعه ومحاسبه حساب لجيتنا كلنا اجينا حتى يعتذرلج كدامنا ويرجعج معززه مكرمه وراضي بكل شروطج وجايبنا شهود حتى تصدكين  وانتي حتى منطيتي مجال مباشرة ناهيه الموضوع وحاطه شروط

ناي : ماكو رجعه خالو ترجيتك اكثر من مره

منهن من توسلت علمود ابني وكلت الموت سبقكك ومكدرت اجيبه اليه وعذرتك ورجعت ترجيتك حتى تخلي مهدي يطلكني وهم كعد اشوف واكف بصفه ولهذا اليوم ماوفيت بكلمتك ويايه الاريده ولاخر مره منك بأن مهدي يحترم قراري مااريد اسوي شى يزعلك مني لان كافي تعبت حسووو بيه اني بشر مو حجار تجون وتذبون فوك راسي راح واحد مني ليش تردون تاخذون الثاني  شسويتلك حتى كل ميصير بيدك شى تلويني وتكسرني تستغله ابشع استغلال

مهدي : ناي اني لا اريد استغلج ولا أذيج بلعكس اريدج ترجعين لبيتج وهذا الطفل ينولد بحضنج وكدام عيني اني هم خسرت ابني ومن حقي اعيش هاي الفرحه بجيه ابن ثاني وكدام الكل اتعهدلج ماأذيج بلعكس احترم العلاقه الي بينا وحسب شروطج وتعرفيني كد كلمتي بس لتمنعيني من ابني

ناي : محد مانعك ماكتلك لتجي تشوفه تعال شوفه بس مااعيش وياك مااكدر البينا بحر لا اني اريد اعبره ولا اسمحلك تعبره وتجي اذا الي معزه بگلبك لتضغط عليه وخليني اشوف حياتي وارتبها

بقينا اكثر من ساعه نعيد بنفس الحلقه ونرجع لنقطة الصفر ويونس كال تبقى يمي عوفو الامور على حالها لحين ماتهدا النفوس

عمران : ماطول متمسكه برأيج نعوفج هاي الفتره والبي خير الله يقدمه الله يكومج بلسلامه

يونس : وين خالو ماكو روحه تتغدون يله

عمران : دايم خيرك ابني ورانه طريق توقعت ناي اطيب خاطري وترجع ويايه اثاري گلبها حيل شايل

يونس : والاكل شعليه ياخالي ترضى اطلع من بيتك بوكت الغدا

عمران : غير مره ابني النه زيارات هوايه الكم

بقى يونس متمسك بيهم ومقبلو اما مهدي يباوع عليه واني عفتهم ودخلت مااريد ابقى واكفه واسمع شى يغثني

بيومها ماقبلو يبقون واعتقد خالو زعل متوقع رفضي

شرهب : اكلج خيه هذا الاكل الضل وين نودي خير من الله يوكلج غدا لمده اسبوع انتي ويونس

ناي : اخذي الج ولعيالج بثواب امي وسيف وهسه اطلع جم ماعون اوزع لجم بيت يمنا ثواب ولخاله ام حسن والباقي اشيله بلفريز

شرهب : حرامات التعب يله ناكله احنا

شهر بعد شهر وبطني تكبر عشت حياة هادئه مابيها اي مشاكل وصوت وصياح ولا اوامر وطحن وتفكير بهاي الفتره نتخابر دوم اني وحوري وتسألني عن صحتي مرات احس المايك مفتوح وعبالك واحد يمها وابقى اسولف عادي ردت اوصل اله فكرة تره مامتت وراك ولا راح اموت وعايشه ومستقره

يونس دوم يخابر واسمع يسولف ويضحك وما اتجرأ اسأل اخاف من الي بگلبي وتطلع حوراء ويوكع اخويه الروميو بمطب جديد

شرهب : اكلج اخوج يمكن يحب

ناي : اكيد مو يمكن

شرهب : واتوقع بت خالج حوراء

ناي : شمدريج

شرهب : عيونه تلمع من ينجاب طاريها

ناي : صخام وعزه اذا صدك معناها وكع وكعه ويه وداد اني بس لو افهم اخوج ليش يشتري المصايب شرايه

كل فتره حابلي وحدي گلب لو كوستر

شرهب : انه الشاب العراقي بأمتياز ذوله گلبهم مايفرغ واذا فرغ يحب روحه مايكدر يااختي مرض بيهم

ناي : والحل اني ماعندي اعتراض يحب ياريت ويتزوج ويستقر بس اخوج يركض على شكوو وحده صعبه مستحيله

شرهب : هو حب سما حب مراهقه وشيار مجرد اعجاب وانتهت القصه قبل لا تبتدي خوفج من الثالثه سامعه الثالثه ثابته هاي حبها بعد فشل بحياته وبعد اغلاط هواي صارت وتعلم منها و گبر هسه وعقله تغير يعني اذا طلع صدك يحب حوراء اخاف ذيج راح ويه جاسم الله لايرحمه وكع نفسه بمصيبه هاي لعيونها يحرر العراق من الامريكان

ناي : هههههههه والله اخوج راح يشل گبدي من اختياراته العجيبه اني احبها لحوري وصدك توالمه حبابه والضحكه متفارك وجهه وحنونه وكلش زينه امنيه عمري بس وديد تقبل عدها قابليه تحرك حور وتشوي على جثتها سمج وماتنطيها ليونس يبوو لابن ذكرى مجرد مااتخيل الفكرة يصير خفقان عندي

شرهب : نحجي وياه

ناي : ماطول مكال النه معناها ميريد يحجي مااحب اخجله

شرهب : يله كصه بكصه انتي لمهدي وحوري ليونس واني اطك اصبعتين بلنص

ناي : لو اموت ماارجعله

شرهب : نشووف

اعيط ولازمه ايد ام حسن واتوسل بيها الالم يكطعني طبيت بشهري  شهر ١١ ب٢٠١٠ يونس يتراكض كدامنا بلمستشفى لان فجأه مي الراس طك واجتني الطلوكه اني قبل لا ادخل بشهري اخذت سونار وعرفت بيه ولد جنت حيل فرحانه وبنفس الوقت خايفه لا رب العالمين ميتمم الفرحه اليه

فتحت عيووني اووون ومااميز منو اليمي

كل الي اريده مي ريگي ناشف واصيح سيف وينه سيف

شرهب : موجود گلبي  الْحٍمَدٍ للـّہ على سلامتج

ناي : ابني وين اااااااخ

شرهب : شويه ويجيبوه

ام حسن : بلخير بنتي على الرزق الجاج يتربى بعزكم

اني لازم اروح زهره مااكدر اعوفها هواي

شرهب : روحي خاله خلف الله عليج تعبناج

خلي يونس يوصلج

ام حسن : لا ميحتاج تكسي من باب المستشفى لباب البيت اني عفت ام حيدر يم زهره بس تعرفين اخاف عليها

شرهب : مشكوره خاله ينطيج العافيه اخذي راحتج اني يمها

ناي : بديت اصحى واركز يونس وين

شرهب : بره كاعد لج ابنج يخبل مدنفش شجنتي توكلي منفوخ نفخ

ناي : صلي على النبي خبله

شرهب : بس اذا الي بالي صحيح اضل اشمت بيج العمر كله

ناي : شنو

شرهب : يمكن ابنج شعره عليه

ناي : ولج وين يبين بعده ابن نفاس حتى شعر  ماعنده قليل كلش وميبين

شرهب : لا عيني شعره مبين كون كيرلي يارب

ناي : شيطلع خلي يطلع بس كون عافيته زينه

جابو وحطوه بحضني واني دموعي متوكف شميته افيييش ياريحتك مثل ريحه اخوك من حضنته اول يوم

شرهب : لتضلين تبجين وتفاولين عليه مصره تسمي سيف

ناي : اي مصره مااريد ينكطع اسم سيف واني ابقى ام سيف

شرهب : براحتج

كل شويه اغفى من البنج لان هلمره ولادتي عمليه مو مثل ذيج طبيعيه

جنت شبهه واعيه واسمع الداير مداير بس عيووني ثكيله مااكدر افتحها سمعت صوته

شرهب :تفضل مبروك على الطفل

مهدي : الله يبارك بعمرج

شرهب : عيونه ادور على ابنه اشرت اله راح بأتجاهه جان محطوط مثل جربايه كاروك صغير مال مستشفى دنك شاله وباسه اني تعمدت انتبهه عليه لكيت عيونه مدمعه

ومخنوك يريد يبجي

مسح عيونه بطرف ايده ولازم الطفل وخايف عليه اندار عليه

مهدي : شسمته

شرهب : سيف ومقبلت غير اسم

مهدي : هذا هو  الْحٍمَدٍ للـّہ هااا بابا سيوفي حبيبي ودنك يبوس بهدوء بيه

لزمه وكبر بأذنه ويه كل تكبيره جان جسمي يقشعر لان تكبيرته جان بيها دموع

ناي : جنت اسمعه وحاسه بيه مردت اشوفه حتى لا اضعف واشمر نفسي بحضنه ردت ابقى على وقفي وماانهز لهذا فضلت بهيج موقف الهروب بس السواه خلاني انهز اكثر

شرهب : رجع الطفل لمكانه وتقرب لناي الجانت مغمضه واكص ايدي اذا مو واعيه

دنك وباس راسها وخدها عود اني استحيت ابد والله ولا اندار هيج مشهد ميصير بس بلمسلسلات التركيه وافوته امداني بقيت مركزه بالخمس حواس وطلعت الحاسه السادسه وياهم حتى تكمل واشوف الموقف كله ورجع باس خدها الثاني وهمس وسمعته وداعت عمي الغالي عبودي كال الها

مهدي :  الْحٍمَدٍ للـّہ على سلامتج ام سيوفي الغالية يتربي بحضني وحضنج ويجي يوم وارجعج لحضني لان متعرفين شكد مشتاقلج

شرهب : دخل يونس خرب ام اللحظه هسه وكتك لو شويه منتظر نشوف شيصير لقطه بشده  مو كعد نتعلم اااخ من التصحر اشتعلت عدي اسمك رجال ورجل الكرسي احسن منك

يونس : مهدي ليش دفعت الحساب

مهدي : اني بكلشي مدخلت ولا اجيت ولا اعترضت على كل السوته طول هاي الاشهر بس مال ابني ينولد وانت تدفع حسابه مااقبل مو ميت اني حتى تاخذ مكاني

يونس : محد كال اخذ مكانك هي اختي واني مسؤول عنها

مهدي : وهي مرتي وهذا ابني يعني اني اتحمل كلشي يخصهم ومشكور ماقصرت

شرهب : عفيه صوتكم لتكعد

مهدي : شوكت اطلعوها

شرهب : باجر ان شاء الله

اني جاي الصبح

شرهب : هله بيك

بس طلع ويونس ويااه مهدي فتحت ناي عيونها تبجي

على شنو تبجين غير لو التلفون يمي اله اصوركم مهند ونور مو مثلكم

ناي : ليش هيج يسوي

شرهب : شسوي قابل اغتصبج هي بوسه وتحمدلج بلسلامه ولوما يونس الله ينطي العافيه مااكول غير شى جان سمعنا جم كلمة رومانسيه

ناي : ذكرتيني بحوري هم مثلج تموت على هاي السوالف العوجه

شرهب : اخوج هسه مشبعها خافي عليه المخلصتها احضن المخده واشوف مسلسلات تركيه والطم على حضي

ناي : لتضحكيني عفيه بطني توجعني

شرهب : شابعه بوس وتبجي والله كوه تخليني اتنازل عن اخلاقي واحجي

ناي : ثاني يوم طلعنا جنت اباوع على سيف اريد اضمه بروحي شرهب شايلته اول منزلنا

لكيت سياره مهدي ركزت بلباب ويمه رجال وعبد وصلاح والرجال مدد اثنين طليان

عدلت شالي وشلت سيف تكول راح ياخذه مني

شرهب : يمعوده متكدرين الدرج تصعدين خلي اشيله اني جيبي

مهدي : صباح الخير  الْحٍمَدٍ للـّہ على سلامتكم

ناي : الله يسلمك اشر مبين هذا كصاب وذبح جوه رجلي على سلامتي

وجوه رجل شرهب لان شايله الطفل والسخيفه مكيفه

بيوم ولادتي ونورت الدنيا محد ذبحلي ايباااه الدنيا صغيره وره ١٨ سنه ذبحو جوه رجلي

عبدالرحمن: يوم مايذبحوج انتي وگوشتج الي كل مااشوفج كبرانه اكثر حطي شى على شعرج لو اله اطلعين شعرج للناس  

شرهب : حجه لازم تذبلك حجايه متكدر

عبدالرحمن: وليش محد ذبحلج من اجيتي للدنيا

شرهب : منتظرين طيورك تكبر ويذبحوهن جوه رجلي

عبدالرحمن: كورج ويه كور الطيور لان احلى منج طبي لا اجيب السجينه واكص لسانج

شرهب : باوعت صفح وهزيت ايدي وطبيت وبيدي سيف

ناي : لزم ايدي يونس وطببني وبديت اصعد على كيفي والالم فوول كوه صعدت ردت ابجي نص الدرج وكفت مااكدر جان يكوم ويشيلني مهدي وصعدني واني قطره دم مابيه وهي شرهب تغمز لو بيدي ادفرها على عيونها

مهدي : وين اخليج

ناي : بغرفتي

طببني للغرفه ونزلني على الجربايه على كيف

مهدي : تأذيتي

ناي : لا شكراً تعبتك وكلفت نفسك

مهدي : نسيتي انتي منو

ناي : شرهب انطيني سيف

اخذته وحطيته يمي هو دنك وباسه وطلع

شرهب : صاير رجلج جنتل مان ويبيع بطولات مداعرفه

ناي : فرحان بأبنه مو بيه تأذيت حييل عدلي مكان سيف وفراشه وخلي ارضعه يمكن جوعان

بيومها وزعو اللحم على الناس المحتاجه هواي ناس تعرفهم ام حسن وهي تكفلت بهذا الشى وعبد يفتر وياها بسيارته

بكراج ام حسن لان جبير حطو منقله وكعدو يشون تكه ومعلاك وصعدولي معلاك اكلت شويه مااشتهيوالولد كلهم اكلو وحسبو حساب خاله وشرهب للعصر صعد مهدي حط فلوس جوه راس سيف مقبلت

تقرب مني وكال

مهدي : جنت اعرف اعنوديه وراسج كوي وحسبت حساب لهواي شغلات بس متوقعت هيج كويه صايره اني مراح ادخل بيج حتى لتنفرين وتسوين مشاكل باقيه هنا مراح احجي براحتج عيشتج على اخوج ومترضين شى مني هم ابلعها واسكت بس مال ابني اخوج يعيشه لو مو تعيطين لو تملخين روحج مااقبل فلس ينصرف على ابني كل شهر ادزلج مصرفه حفاظات حليب ملابس لاسامح الله طبيب اي شى يخص سيف اني اتكفل بيه

وحجايه ثانيه ازعلج

ناي : سكتت ودرت وجهي وهو طلع شفته خال ٥٠٠ الف جوه راسه اني صفنت على كلامه يونس على كد حاله وصاحب ايجار محل وايجار بيت وعيشه مامجبور يتحمل مصرف سيف ومهدي يبقى ابوه خلي يصرف

مراح احجي مااريد ازيد على راس يونس هم اريده يگون نفسه

ابني بحضني وارضع بيه وابجي من الفرح وبنفس الوقت اتذكر ابني الجبير ويعتصر گلبي

شرهب بقت يمي هاي الفتره هواي تجي عمتها زينه وحبابه ومتكول شى اما عدي عايف شرهب براحتها وهذا الشى هم محيرها لان تعرف طبعه وهم يريحها لان خلصانه من النك مالته

اجتني بيبي وعمه وبان بقو ٣ ايام يمنا حيل فرحت بلمتهم وبيبي تعرفت على ام حسن وحبتها وكالت الله عوضج عن مره طيبه يمج

وصتها عليه

وراها بكم يوم اندكت الباب وطبو الجوك كله خالو عمران وام عبد وام صلاح وحوري وسدره خالو جايبهن وجاي فرحت حيييل بجيتهم لان همه ناس اوادم ودوم تعاملو ويايه بكل محنه ومايوم جرحوني بكلمه ودخلتهم عليه خلت گلبي شكبره من الفرح كل ذوله اجوي اله عمتي ولا وصلت

بعد احسن مااريد اشوفها

ترسو الكاروك فلوس وهدايا فرحانين حييل بولادة سيف وبيومها جلبت بيهم يباتون وخالو قبل بس هو بات يم كرابتهم ويونس نام بلسطح مدخل بيومها تأكدت حوري ويونس على علاقه وهي نامت بفراشه مفضوحه حييل شوقها وحبها اله ردت احجي وياها بس ماكو فرصه كلها موجوده يونس ماقصر من مسواك واكل حتى شلت من الفلوس العندي وانطيته وهو مقبل ولحيت وزعلت عليه تالي اخذ نصهم لان مصرف ثكيل عليه وقبلها بيت بيبي هم ٣ ايام باتو مصاريف اشكال  انقهر دوم گلبي ينمرد عليه من يتعب واني اصرف تعبه

ثاني يوم ودعوني وجان يوم حيل حلوو

بهاي الفتره صار التقديم الخارجي ويونس يركض بيها قدم معامله حتى امتحن تمهيدي حتى ادخل وزاري  رغم بلبدايه خفت لان طفل وبعده صغير ويرادله اهتمام

تشجعت وقدمت وجان امتحاني بشهر الثاني يعني يلحك شويه سيوفي يكبر جنت اكعد اقرا وكتي قسمته بين سيف وبين الدراسه والبيت اتعب بس على گلبي مثل العسل

عمه يوميه تخابرني جنت اسألها عن صالحه وساهره وتكىل كلشي ماكو هدوء وهذا الشى الصراحه يوتر ميريح لان معناها وراهن شى موزين

بقت تاخذ الاخبار من اشواق الي هيه هم منتظره رد صالحه على سالفه زواج عبيد

طرحتها وضربتها وسوت مشاكل بس اكيد هذا مو اخر شى تسوي اما مهند عاف امه وعاف العراق ورجع لتركيا وحسب كلام عمه كايل الها اليوم الي اسمع ناي اطلكت ثاني يوم اني راجع للعراق وهذا الشى كرهني بيه اكثر غير يجوز مني ويروح

طبينا ٢٠١١ امتحنت التمهيدي وطلعت بدرسين وكدرت ادخل وزاري واليوم اخر امتحان اليه بلوزاري تعبت حييل الدراسه صعبه ومنا اركض شغل ومسؤوليه

عمر سيف صار ٧ اشهر

روحي طير تفتر وراه اخاف عليه حتى من نفسي اقرا وعيني عليه اذا وكع اكمز گبله حريصه لدرجه الهوس

مانسيت ابني رحت اكثر من مره لگبره بديالى واخلي سيف الصغير اما يم شرهب او يم خاله ام حسن اخاف عليه من الطريق واتوكل ازور ابني الجبير

واكعد انوح عليه هذا فرحتي اول فرحه ولجمه الگلب لو الف طفل ميعوضني عنه جنت اروح ويه يونس ساعات انام واحط خدي على گبره واتمنى اشمه واسمع صوته سميت اخوه نفس اسمه حتى اشوفه بيه وكل ماارجع من عنده اكون منهاره واخلصها مريضة بليومين

اكثر من مره يجي مهدي يشوفه ويطلب مني ياخذه لديالى واني مااقبل يعني امه ماكلفت نفسها تجي وتشوفها تستنكف الاخت وتريد ابني يروح لحد يمها حتى هم تهمله ويصير بيه شى اكثر من مره نتجادل واتعصب وتالي يخلي ويطلع مل من كثر مايطلب مني ياخذه واني ارفض الي يريد يشوفه يجي هنا

عرف مهدي بموضوع دراستي رغم مااخذت رأيه ومحجه اي شى ضاج ومكدر يدخل يتعامل ويايه بحذر

طلعت النتيجه ومع الاسف رسبت بجيت بجي بيومها انتهيت حسيت كلشي انتهى بعد مالي حق ادرس واحقق حلمي وكلها تحاول تهديني واني تكول ميتلي واحد

ماامتحنت دور ثاني لان معدلي بلخمسين حتى معهد ميجيب اليه

وسلمت امري وذبيت حملي اراعي ابني وهجرت الدراسه والكتب كلت ماطول جربت ومافلحت اكعد واسكت

بدا ابني يكبر كدام عيني حركاته ضحكاته سنونه وهو يكزكز حتى يعض اما شعره قضيه ثانيه طلع مثل مكالت شرهب كيرلي يخبل ومتخليني اكصه تگلب الدنيا

جنت دوم اباوع على اختي تكبر وماكو شى جديد بحياتها تمنيت تطلك وتجي تعيش يمنا وتعوف عدي شنو وجوده أذيه مو نفع بس هيه ساكته ودوم تكول خلي يونس بوحده صعب يصيرن اثنين رغم لسانها وضحكها وهوستها تكتم وتضم وتأذي داخلها وتظهر النا غير الحقيقه الي عايشتها

كامت تبات يومين بدال اليوم تجي الخميس العصر وتروح السبت العصر حاولت احجي وياها وهي متقبل اختي واعرفها حساسه ومتريد تشيل يونس حملها

شرهب : عدي ملتهي بلتدريس وبحياته وتعلمت على بخله وتصرفاته اليابسه ويايه صرت اشطب يوم من عمري وماافكر بيه حتى لا انقهر عمي وعمتي احبهم ودوم وياهم ومدلليني اما بتهم ابتسام من يوم طلعتها من البيت ومااجت ولا احد شاف خيالها انيال گلبها الي عدها هيج اب وام حنان شون تكدر بدونهم

حياتي ويه عدي اوامر وطلبات وتقضيه حاجته بعد الاسقاط الي صار اليه ماحبلت رغم تاركه المانع ماحبلت مرات اكول هذا الشى لمصلحتي المن مخلفه للفگر ومرات من اشوف سيوفي اريد اصير ام طفل يصيحلي ماما وافرح بيه والعب وياه وانومه بحضني اعوض بيه عن النقص العايشه بيه

طلبت من عدي اروح دكتوره كوه بلمشاكل والعركات قبل وانطاني فلوس الكشفيه بعد ماعيرني الف مره بأن اني ارض بور مااخلف يابه والي وكعو شنوو چكليت غير جهال والله ماقسملي ومن رحت للدكتوره انطتني علاجات ومقويات ومنشطات رجعت للبيت ويه عمتي لان منطاني فلوس العلاج انطيته الراچيته حتى يشتريها اليه رجع يعيط

عدي : اله تخبلت اشتريلج دوه ب٣٥٠ الف اتزوج وحده ثانيه ارخص

شرهب : ليش تتزوج صخله ب٣٥٠ يامره تقبل تتزوج بهيج مبلغ

عدي : خصم الحجي علاج ماكو هاااج

كام وشك الراجيته وذبها بوجهي

شرهب :ليش هيج اقلها جان جبت نص

العلاج

عدي : فلس ماادفع بيج خير احبلي حتى الجلاب الي بلشارع تحبل احسن منج  دوا وهاي السوالف التعبانه متمشي براسي تردين شوفيلج عطار مره تقرا عليج وتخليج تحبلين اطباء وفلوس ماكو سمعت كلامج وانطيتج فلوس كشفيه وبعد مااعيدها

شرهب : هي ٢٥ الف شكد انطيت

عدي : ميعيشنج ٢٥ الف ٣ ايام تتزوهرين بيهن بعد ماكو فلس لو تحبلين طبيعي لو تنجبين وتكعدين

شرهب : انجب واكعد احسن انت مو مال تصير اب ضل هيج

عدي : اجي اركع راسج بلحايط اكسر سنونج وافلج وجهج انتي موخوش مره عايبه طفل معرفتني تجيبين وجاي تذب الصوج براسي قبل امهاتنا لا اطباء ولا شى ميلحكن على الجهال وانتي حضرت بت الباشا تردين تخلصيها اطباء وفلوس مو اشتغل لحلكج الجايف

شرهب : كااافي مااروح ولا اخذ علاج كاعده وساكته بس اسكت انفكيت شيسدك بعد من خرب عمي على العيشه الزفره العايشتها

عدي : مو على اساس جبتج من اليرموك الاربع شوارع وعيشتج عيشه موزينه لوما اهلج اهل الزبل والعتيك شجان سويتي ذبوج عليه ذب بس تزوجها

شرهب : عفته ونزلت وحلفت حبايه مااخذ واحبل منه ويطبه طوب

ناي : سنه ٢٠١١ ركضت بينا كل شهر بعد شهر

لحد مصار شهر ١١ دخل عليه يونس وهو مقدم معامله مره ثانيه حتى امتحن غوركت عيني وحضنته

يونس : يله بلسباعيه اريد هلمره ارفع راسي بيج واكول نجحت وعلى عنادكم الدنيا مخلصت واذا رسبتي مره عيدي مره واثنين و٣ لحد متنجحين وهلمره سيف كبر واكدر اخلي يمي وتقرين براحتج لتفكرين بأي شى غير بدراستج ومن اني ماكو خلي يم ام حسن تعرفين بيها شكد امينه وحريصه وتحب سيف

ناي : ان شاء الله هلمره ارفع راسك

عرفت ام حسن وكيفت وثاني يوم اندكت الباب صوتها فتحته الها بيدها علاكتين شكبرهن

شنو ذني خاله

ام حسن : ذني ملازم مال احسن اساتذه بتدريس السادس الاعدادي جيرانه بدايه الفرع الصيدلانيه الي كتلج عليها

ناي : اي اعرفها

ام حسن : رحت باركت لبتها نجحت وطلعت معدل طبيه ومن كلتي راح تمتحنين لبست عباتي ورحت وطلبت منها ملازم بتها لان جانت حاطه الها اگفأ اساتذه بملايين حتى اطلع معدل كل الدروس ومن حجيت الها عنج ماقصرت المره لمت الملازم كلها ورحت اليوم جبتها بس طلبت تحافظين عليهن لان كرايبهم سنه الجايه سادس ويردون ينطون الملازم الها

ناي : حضنتها وبستها الله دزج نجده اليه شون اجازيج عفيه والله كعد تخجليني ياخاله

ام حسن : ادرسي وانجحي وخلي اخيج يفرح بيج

اخذت الملازم وكعدت اقرا ذبيت حيلي وصحتي بلقرايه عبرت الامتحان التمهيدي وهلمره ناجحه

ودخلت وزاري تفرخت لدراستي وساعدني يونس بشكل مو طبيعي كام مهدي من يجي مااطلع اله لان حايره اقرا بس طلبه دوم ينرفض ممنوع ياخذ سيف

اقرا وعيوني راحت كمت انام ساعتين بليوم بس ويونس سجلني دورات تقويه واروح وارجع هلكانه من التعب واذب روحي على الجربايه ماادري شكوو بلدنيا وراها اكعد مخروعه على سيف الكاه بحضن يونس نايم

كام حتى هو يوكله ومن يروح للشغل ينزله يم خاله ام حسن

دخلت ٢٠١٢ واني صرت نص بشر من التعب والسهر والقرايه حتى اكل قليل اكل ومرات انام على روحي من التعب وامتحنت وخايفه ومرعوبه لا يتكرر الصار وارسب بس متأكده كلش زين جاوبت منتظره النتيجه واضافيري اكلتهن اكل وين صرت يايونس وينك راح يجيبها  اجه يونس يضحك ويبوس بيه

ناي : هااااا بشر

يونس : ٨٢ معدلج رفعتي راسي

ناي : من الفرحه حضنته وابوس بيه وسجدت لله شكر شويه وخاله ام حسن صعدت تبوس بيه

ام حسن : لوما حالفه مااهلهل وره روحه الولد والله جان هلهلت الج من كثر مافرحانه

بلحظتها دخلت شرهب وعمتها ثاري عارفه النتيجه يونس مخابرها والجكليت والهلاهل مالتها ترس البيت وسيف يكمز ميعرف شكوو

واخيراً بعد سنتين تعب وقهر ودراسه وقله نوم وتفكير ومحاربه دخلت كليه علوم تطبيقيه جامعه التكنولوجيه 

بت ذكرى صارت طالبه كليه وتحقق اول حلم لامي

فزيت من صفنتي واني اركض وره سيوفي لان

ميقبل ياكل ورايه باجر دوام وبعدني بأول ايام ومااريد اتأخر او اكسل

يمعودين فضوها اريد اقرا

دك تلفوني باوعت شرهب جاوبتها واني زهكانه هااا يمعوده

شرهب : الحكيني نااااي عدي راح يموووووتني

يتبع .....

#الابواب_الخمس

البارت السابع والعشرون /الجزء الثاني

للكاتبة Reem

(بارت طويل لعيونكم )

#_صفنتلها

والكيت الدنيا عطوه وثار

الكاتل عايش ومرتاح

واحنه الفقرة فصاله....💔

دك تلفوني باوعت شرهب جاوبتها واني زهكانه هااا يمعوده

شرهب : الحكيني نااااي عدي راح يموووووتني

شرهب : كل الايام الفاتت گلبي يلعب من عدي مرات اكول شيسوي خلي يسوي ايطبه طوب ومرات يحترك گلبي اريد اعرف ليش هيج متغير كمت اراقبه ماعنده شى يروح للدوام ويرجع ظهر يتغدا والعصر لليل يخلصها دروس خصوصيه وياويل الواحد من عدنا يدخل عليه للغرفه وهو يدرس سواء اني او اهله يكوم يعيط ويتعارك لحد مابطلنا ندخل ولا نتجرأ نوصل يم الغرفه تكول عبالك غرفه استخبارات مو مال دراسه وحتى نخلص من عصبيته ولسانه كمنا ابد مندخل ولا نصيحه واذا انلاصت فد مره ومضطرين اندك الباب يله وهذا الحال من الظهر لحد ساعه ٩ ونص بليل جوك طلاب طاب وجوك طالع بنات على ولد ابتدائيه على متوسطه وهو معروف عنه بلمنطقه استاذ شاطر وكل سنه نسبه نجاح طلابه ١٠٠٪؜ اضافه لسمعته الزينه بأن هو ملتزم ويحب القرايه وخلكه طويل ويه الطالب وميجوز منه اله يخلي يفتهم وينجح ويدرس مو بس رياضيات وياه علوم وللمتوسطه فيزياء وكيمياء بتاع كلووو الاخ علمود الفلوس شون يلحك ماادري انهجم راسه تكول اخطبوط

محد يعرف خيسته غيري الناس عليها الظاهر محد يعرف شون معيشني يمكن حتى نسوان يحسدني على لسانه واخلاقه مرات امهات يجن يجيبن ولدهن وهو ذاك اللسان يمااااي لخاطر الفلوس يغرد عسل وهنه ذاك المدح بيه مرات اضل صافنه ياااا هذا رجلي الي يكومني برزاله ويكعدني بكفخه عدا بخله الي كل متزيد فلوسه تحله بعيونه و يزداد البخل وياه

واني اكلها وصلت مرحله حتى مااطلب منه اذا اطلب يسويها عزه

تبت من الطلبات وعايشه على عمي وعمتي ومرات يونس ينطيني مصرف وناي خطيه هم تناوشني ملابس على فلوس مااقبل وهي تذبهم عليه وتبقى تعيط اذا مااخذهم وماشية العيشه

الي خلاني اشك بعدي تصرفاته الاخيره كام ميركز ويايه وشوكت مااكول اله اريد اروح لبيت اخويه روحي بدون نقاش ومكان مايوم ابات صار يومين وعادي والي خله الفار يلعب بعبي كام ميتقرب مني بالاسابيع ولا يهتم حتى لو لابسه احلى شى طبعاً من ناي ماخذتهم واله هو مايشتريلي اني اخلص ارتاح بعد احسن بس الفضول دوخني شگلبه وشهر وره شهر واني ملازمه اي شى عليه مرات اكعد واسكت لان امل ويفوت كم شهر وارجع اراقب وماكو اي شى جديد

لحد مايوم لاحظت طالب جان العام يدرسه سادس ابتدائي رياضيات وعلوم

هذا من دون كل الطلاب يقري وحده مره سألته ليش مدرسه ويه باقي الطلاب هو مو جان يدرس ويه مجموعه كالي امه متقبل انطتني زايد حتى ادرسه وحده لان غبي ومايستوعب ونجح الطالب وراح متوسطه وبعد مشفته اجه طالب ثاني خامس ابتدائي ياخذه بنفس توقيت ذاك الطالب وهم سألته انطاني نفس الاجابه امه متقبل عبالك نسه اني سابقاً سألته عن ذاك الطالب مشيتها وكلت يجوز صحيح كلامه ومرت الايام الي خله راسي يفتر مره ثانيه كام ياخذ الولد لو من الصبح ساعه ٨ بأيام الجمع والسبت واني اكون مموجوده لان بايته بيت يونس لو اخر واحد هم ساعه ٨ بليل يوم الثلاثاء يعني هذا الطالب ياخذه ٣ مرات بالاسبوع شون انتبهت ياخذه من الصبح بهاي الايام تحديداً مرتين مرحت بتت يم يونس لان ناي جان عدها دراسه ومردت اعطلها وهو من سمع مااروح مثل الضاج كلت هذا شجاه ومهتميت وثاني يوم نزلت الصبح وجنت مطفيه افرك بعيوني اريد ادخل حمام سمعت صوت باب الغرفه الي يدرس بيها انقفل زين ليش قفله اول تالي وخاصه عمي وعمتي بلسوك يشتغلون على باب الله واني يدري بيه نايمه مااكعد هيج وكت المن قافله هنا الشيطان تربع براسي وكعد يكرز حب ويتفل ويكوول هااا ولج ركزي يلثوله

ارجع استغفر ربي اكول هسه الرجال بخيل وافتهمنا لاهو اول واحد ولا اخر واحد ميت على الدنيا واهلها هذا عمي جوحي نسخه منه ولو عدي ضارب الرقم القياسي حتى عمي ميلحكه وبيه صفات طايح حظها هوايه لسانه الزفر تعامله الجاف مرات ينگلب حيوان عادي بس مو معناها يسوي شى موزين ويدنه نفسه على طفل

وانجبيت وصعدت للغرفه حاولت انام طكت روحي ساعه اتگلب النوم طار ونزلت دخلت سريع للغرفه لكيت الباب مفتوح وعدي يقري الولد والوضع ماكو شى سويت نفسي ماادري عنده طلاب وجرني من ايدي وطلعني ولعب بيه طوبه حتى على ظهري ضربني وكاال اياج تعيديها واطبين هيج كتله التوبه وخليت وصعدت لغرفتي

واجه الاسبوع البعده والجمعه والسبت هم بقيت مارحت لبيت يونس وصارت عيونه براسه هنا بعد كلت مصخت اكص ايدي اذا مو اكو شى ياعدي ومااطلع شرهب اذا مااعرفه اتوه عنه هذا عنده شى ضليت افكر واطحن واخطط شون اعرف شديصير واول شى سويته اخذت مفتاح الغرفه وضيعته گلب البيت عليه سويت نفسي ماادري بيه واعرف بيه ميهل گلبه يصرف ويبدل الكيلون مال الباب وبقى يدور گلب البيت كله اني حتى لا يلكه المفتاح شمرته بلمجاري وبهيج ضمنت ميقفل الباب

واجه الجمعه وحتى يوم السبت تقصدت اكعد الصبح وعود اشتغل بلمطبخ واطكطك وهو كل شويه يطلع شعندج مترحين تنامين واني اكول اله شبعانه نوم وهو يتأفأف ماطول خنكته هليومين معناه اذا عنده شى راح يسوي الثلاثاء مجرد فكرة يتحارش بطفل خلتني مااكل وحتى من تجي بالي السالفه مرات اتقيأ واشمأز منه ومن اكعد واصفن اكول اخاف عقلي مريض وتهيألي هيج شى حتى حرام عليه بس بقيت مصره اعرف شكوو حتى ارتاح راح اموت من الشك

وكلت يوم الثلاثاء وكت جيه الولد بس معقوله يسوي شى واحنا كلنا موجودين لا مامعقوله بله الجمعه والسبت ضامن البيت فارغ الثلاثاء اني وامه وابوه تالي تذكرت ابوه ينام وره ال٨ وامه تتمدد على التلفزيون وبعد ماتتحرك ومرات تنام على كعدتها واني ضاله فوك ماانزل يعني هم فرصه وصار اسبوعين كاتمه اني على انفاسه معناه اذا عنده شى مراح يتحمل

ويغلط اليوم نزلت سويت نفسي اغسل مواعين العشا صحته واجه

اني عفت الك العشا مغطه على الطباخ

عدي : ليش وين موليه منو يحمي اليه

شرهب : نعسانه حيل وجسمي متكسر يمكن فلاونزا راح انام عفيه بس اليوم

عدي : اخاف اصعد والكاج كاعده اكسرج تكسر اذا تكذبين

شرهب : اكله جسمي مفلش مو بس متكسر ويابو الزم المخده واشخر للصبح بس هلمره عفيه عدي

عدي : روحي نامي نامت عليج طابوكه

شرهب : رحمه الله والديك عادي كلنا انام وتاليها يصفطون الطابوك علينا

عفته وصعدت وأمنته حدود الثلث ساعه نزلت على كيف حافيه باوعت عمي شخبره واصل لدهوك من التعب وعمتي غافيه وايدها جوه راسها ولا تدري شكوو بلدنيا مثل كل يوم والتلفزيون صوته عالي

ايدي على يدت الباب وخايفه الي بالي صحيح كمت ادعي مو صحيح عمي راضيه بخله بسوالفه العوجه بس ليكون عنده شذوذ

ويتحارش بلجهال

فتحت الباب وجان اشوفه حاصر طفل بلزاويه ومنزعه نص بنطرونه ويتحارش بيه اني هيج شفته متحملت كمت اتقيأ مو بيدي الموقف مقرف حييل هو شافني اخترع ولبس والطفل هم لبس وجره من ايده وطلعه من الغرفه واخذه لبره واني كعدت بلكااع اريد اسحل روحي فز عمي وعمتي عليه

ام عدي : شبيج يمه

شرهب : أشر على عدي اريد احجي مااكدر

بلحظتها رجع ودك ادفر على بطني وظهري اريد اجر النفس منا اني روحي مسحوله ومنا الصدمة بعدها بيه جره ابوه اريد بس اخذ نفس

ابو عدي : شبيك تخبلت

عدي : اليوم اكتلها خلاص باكتني

شرهب : فتحت عيوني وذبيت ثكلي على عمتي الي تريد تكومني اريد اكوم واكول الهم جذب هلحقير مابگته سحلني من شعري وشاغت روحي ابوه حيل دفعه وامه ركضت شربتني مي وكمت اعيط

شرهب : يافاسد ياابن الشارع يازباله لك اني بگتك لو شفتك حاصر طفل وتتحارش بيه

نزع نعاله وركعني اجه بوجهي تأذيت حييل وابوه وامه جمدو ميعرفون شيسوون دفع ابوه وكعه ودك كتل وين مايوجعني اني ركضت حييل وامه لازمته من ايده صعدت ركض قفلت باب الغرفه وجريت التلفون وخابرت على ناي لان اخر مكالمه جانت وياها مو مال اكعد ادور رقم يونس واني بهيج حاال

بقى يدك بلباب

عدي : لج ساقطه چلبه اليوم احرك اهلج يابنت الگلب اني تبوكيني

شرهب : مصر اني بايكته اني الساقطه لو انت الشاذ لك حرامات كاتبين على هويتك رجال المفروض يكتبون حيوان لا والله تروح فدوة للحيوان وصاخته ياقذر لك الله يشيلك تدنه نفسك على طفل انت مريض ولازم تنشنق على سوايتك اله افضحك بلمنطقه واخزيك الناس تأمن جهالها يمك وانت تتحارش بيهم

تهسترت اعصابي كمت اعيط بلغرفه واضرب بلغراض الموقف صاعقه نزل على راسي جان يجيب جاكوج ويكسر بلباب عزه اذا فتحه راح يخرب وجهي بيه اذا ماكتلني خلاص حتى يداري فضيحته بقيت ادور مكان اختل بيه وين اروح ياربي خفت منه لان هيج واحد خسيس كلشي يطلع منه رجعت خابرت واعيط وين صرتو

ناي : طفرت من مكاني من خابرت شرهب كووم يونس

يونس : شكوو شبيج

ناي : هاي شرهب تعيط عدي ديضربها

ركض يونس جر قميصه واني جريت العبايه وبيدي سيف دكيت الباب على خاله ام حسن طلعت خطيه تفرك بعيونها

ام حسن : هاااي يمه بيج شى

ناي : فدوة خاله بس خلي سيف يمج ما اتأخر

ام حسن : صاير شى

ناي : هذا رجل شرهب ضاربها ورايحين الها

ام حسن : الله يهدي النفوس يابنتي

اخذت سيف وطلعنا نمشي سريع اني ويونس للشارع اخذنا تكسي وگبل لبيت شرهب قريب حسبة ١٠ دقايق احنا يمها

واني بلتكسي رجعت خابرت واني تخبلت كلت معناها ديأذيها فدوة استعجل

يونس : هاااا خابرت مره ثانيه

ناي : اي

يونس : رحمه لموتاك اخويه استعجل

شرهب : بدا يكسر الباب ودفره هو طب واني مثل المخبله مااعرف وين اروح صعدت فوك الجربايه جان يشمر الجاكوج عليه الحمدلله مااجه بيه جان فلشني

عدي : اليوم اذا مااذبحج ياشرهب مااتسمه عدي

شرهب : لك لو اعرف اعفط جان عفطت صاير رجال براسي عار اخوتك ولو انت ماعندك اخوه بس هم تبقى عاار

ابو عدي : عيب بنتي شنو هذا الحجي اول تالي تحجين هيج

شرهب : من حركت گلبي عموو هذا ابنك الي فرحان بي مربي الاجيال اسم الله طلع فاسد لا يربي ولايعلم ضال يقشمر بلجهال ويتحارش بيهم ولد هلمره يدور ولد ولك احرك روحي امداني شون ضليت ويه واحد خايس مثلك كل هاي السنين

عدي : جذابه يابه هاي وحده حراميه ذيج المره باگتني وكدامك وهلمره باكت ٤ ملايين مني تعلمت ومن لزمتها ذبت هاي التهمه براسي حتى تخلص من السالفه كلها تصدكون اني اسوي هيج هاي وحده مو شريفه شوف المن انطت الفلوس لصاحبها لاخوها لازم اليوم اذبحها

شرهب : تروح فدوة لشرفي ياعديم الشرف باع منو يحجي بلشرف هي هاي الضلت انت واحد شاذ وحلال ذبحك جان يجيت عليه وركضت ولزمني من دشداشتي ودك برجله وايده وين متوكع بجسمي واني ادافع واضرب خرمشت وجهه حيييل وعضيته من جتفه بكل قوتي وعاااط وجان بيده شبعني راشديات ثور وهاااج ميعرف شيسوي حتى يسكتني ابوه وامه فوكانه مكعد يكدرون يوخروه مني

وكعت بلكاع وهو فوكايه ويخنك بيه لزم رگبتي وبكل قوته كطع الهوا مني بلحظتها تشاهدت ورب الكعبه تشاهدت لان روحي رادت تطلع بيده من حلات روحي دفرته حيييل برجلي مدري وين صارت بسبب ضربتي رخت ايده وراد يرجع يخنكني وابوه صار فوكاه لان هلمره راح اموت بيده لا محاله

سحلت روحي وكمت اكح اريد هوا ودموعي تصب لان مخنوكه واسمع صوت قوي مال الباب مبين يونس وناي اجوو هلمره اريد رجلي تعيني حتى انزل افتح الهم وانقذ روحي

عدي : عوفني يابه اليوم مااخليها عايشه اليوم ادفنها

ابو عدي : تخبلتو انت تكول بايكتني هي تكول شغلات العقل ميشيلها شجاكم

عدي : يابه تتوقع اني هيج اسوي المنطقه تحلف براسي مايوم طفل شكه مني تالي وكت هاي الجايبها من الزبايل تلوث سمعتي وخر مني اريد اشرب من دمها

شرهب : كمت اسحل بروحي وطلعت من الغرفه جان كل قطعه بجسمي تملخني من الالم والحرگه

نزلت درجه درجه ركضت امه ورايه مكدرت انزل سريع وهذا بعده يعيط هلمره اذا لزمني انتهي ابوس ايدج عمه افتحي الباب

ام عدي : يمه شجاج اخذتي منه فلوس مو تعرفين بيه مخبل كله ولا فلوسه

شرهب : بله هاي شحجي وياها مصدكي وما مصدكيني كتلها واني مستمره اكح بس روحي افتحي الباب لخاطر الله

نزلت امه واني كوه سانده نفسي على الدرج طلع من الغرفه فلت من ابوه واجه لزمني من شعري جلبت بأيدي بسياج الدرج لك عووفني

بلحظتها صار يونس فوكانه دفعه حيل وضربه على خشمه خلاه يخر دم

ناي : جنا نسمع عياط بس الحجي مامفهوم واندك بلباب كسرناه محد فتحه لحد مااجت ام عدي طبينا نركض لكيت شرهب صايره فلم هدومها مشككه الشعر مكفوش الوجهه مشخط واحمر دم وعدي لازمها من شعرها ويجر بيها يونس ركض وضربه واني ركضت وسحبتها وحضنتها ونزلتها

شرهب : طلعوني منا راح يموتني

ناي : انكسرت ايدك هاي انت شمسوي بيها

يونس وعدي واحد يضرب الثاني وعدي متخبل وبعلو صوته يكول اختك حراميه باگتني

ناي : صدك

شرهب : باوعت عليها و القران جذاب مابكته لكفته لازم طفل ويتحارش بيه

ناي : جمدت عزه هاي شتحجي اباوع عدي حييل كام يضرب يونس لان يونس باله يم شرهب من سمع حجيها لزمه ودك كلات على وجهه كعده بلكاع خله وجهه كله دم وابوه وامه كبار بلعمر ومابيهم حيل وكعو دخيل ليونس يعوفه

شرهب : فدوة خلي نطلع

يونس : اذا طخيت شعره منها احركك ومن باجر اطلكها لا احط طلقه براسك

ناي : وين عباتج

شرهب : اشرت على الغرفه

ناي : صعدت ركض فتحت الكنتور وسحبت العبايه وموبايلها مشمور اخذته ونزلت

يونس : ابو عدي كول لابنك خلي يطلك لا افضحكم بلمنطقه

ابو عدي : ياابني لهسه مامفتهمين منو الصاج ومنو الجذاب

يونس : اختي متجذب ولا تمد ايدها واذا بيوم مدتها فلخاطرك لان لو ما هيه مجان انت هسه واكف على رجلك ومجذبها ومطلع ابنك السكط هو الحقاني

يله امشن

ناي : حاضنتها وامشي بيها جانت كوه تسحل بروحها

شرهب : قوتي انتهت كعدت بلشارع مااتحمل امشي لهسه اكح والهوا يطب يجرح الرئه مالتي

يونس : عينج عليها خلي اجيب تكسي

ركض يونس يجيب تكسي

كعدت بصفها واعدل بعبايتها

جري نفس شهيق زفير والهوا شويه بقي بصدرج

شرهب : أشر بيدي مااكدر

ناي : حاولي فدوة نوديج مستشفى

شرهب : هزيت راسي لا تالي رفعته لراسي واجر الهوا واحاول اخفف الرجفه الي بيه

وكفت سياره تكسي وبيها يونس نزل فتح الباب الخلفي وصعدنا

جنت اباوع عليها وحيل خايفه شكلها يخوف وخايفه ليصير بيها شى

وصلنا للبيت وصعدتها على كيفي

اول مدخلنا تمددت على القنفه

شرهب : اااااااخ جسمي يون عليه من الالم كسر كون بيدك وراسك ياعدي الچلب

ناي : خلي اجيبلج مي لو اسويلج عصير يسند گلبج

شرهب : اريد مي نشف ريكي الله ينشف روحه

كمت جبت الها مي ونزعتها ملابسها ولبستها دشداشه من عندي وشلت شعرها

شرهب : ااااخ على كيفج فدوة فروة راسي متجرحه من الجر مالته

ناي : تكدرين تغسلين

شرهب : لا لان يحرگني

ناي : اباوع على رگبتها زركه وبيها طبع اصابع ايدها ورجلها كلها زراكات هذا مخبل اكيد مو صاحي ارتاحي وبعدين نسولف جري نفس عيونج دم صايرات باوعت يونس ماكو وين راح شوي واجه

وين جنت

اخابر بره كومي شرهب بسرعه

شرهب : وين عفيه

يونس : هذا عدي وره مطلعنا رايح للمركز يشتگي عليج وعليه عود انتي بايكه فلوسه واني هربتج منه بدمه رايحه حتى ممغسل حتى تثبت زين

ناي : صخام الصخم وجهه منو گلك

يونس : هسه ابوه خابرني يتراجف رايد يوكفه مكادر اله

شرهب : وين نروح

يونس : خلي اطلعج منا انزلي يم ام حسن لان ماالحك اخذج مكان ثاني

ناي : شنو الشرطه واكفين بلباب استعداد ينتظرون عدي حتى يطلعون دوريه ويجون علينا

يونس : مو وكت السوالف كومي يله منعرف شراح يسوي وخاصه رايح بدمه يجوز يستخطوه ويطلعون بسرعه ويااه

شرهب : وهو بهيج سوالف استاذ لسان محد يكدرله

ناي : الله يقبلها فوك مامطيح حظ اختي وموصلها للموت يروح يشتكي عليكم

يونس : لبسيها وخلي انزلها يم خاله ام حسن

ناي : اخاف هم يفتشون بيتها

يونس : هسه نشوف شلون استعجلو

شرهب : كمت على كيفي مابيه كل حييل وحطيت العبايه ونزلت دكينا الباب على ام حسن

ام حسن : تعالو طبو يمه ليش بلباب

يونس : خاله خليها يمج رحمه لولدج هذا رجلها مشتكي ومااريد توصل مركز وناي هم خلي تبقى أمن اكثر اذا باتن اليوم يمج

ام حسن : احطهن بعيوني

ناي : زين وانت

يونس : باقي هنا انتظر ونشوف الوضع

ناي : عفيه خاف ياخذوك

يونس : طبن جوه ولا وحده بيجن تطلع لو الدنيا تحترك ام حسن البنات بأمانتج

ام حسن : بعيوني ابني ذني حالهن حال زهره بس اني هم راح يضل بالي عليك

يونس : ان شاء الله ماكو شى راح اخابر ولد صديقي اخوه ضابط بلكت عنده معارف ونشوف هذا عدي شمخربط

ام حسن : الله يجفيك شر بني آدم تعالن يمه طبن وخلن اخيجن يحل السالفه

ناي : جنت حيل خايفه على يونس واخاف هم ياخذوه سجن

باوعت على شرهب لزمت ايدها مثلجه شبيج عفيه

شرهب : اخاف يصير شى على يونس من ورايه

ناي : ماكو شى ان شاء الله تعالي طبي ارتاحي

ام حسن : تعالن يمه

طبينا وكعدنا

ام حسن : شنو الصار وخلاها توصل بينكم مراكز

شرهب : بديت اسولف كلشي وخاله وناي يدكن على راسهن

ام حسن : لا اله الا الله عساه بحضه وبخته شنو ذنبهم الجهال اليتحارش بيهم يتعقدون ويتمرضون ويفقدون ثقتهم بروحهم

ناي : زين اهلهم وين عنهم ميسألوهم الطفل ميعيط ميكول لاهله راح اتخبل شون المعلم مالته هيج يسوي بيه والطفل يبقى ساكت

شرهب : شمدريني لتساليني اي شى لان منظرهم لهسه بعيوني واحس دماغي راح يوكف وينكطع الخيط البيه واتخبل

ناي : ماكو غير يهدد الطفل لو ينطي فلوس ويقشمره لو اهله من النوع الي ميدققون وره ابنهم ذبه يم المعلم وراح وبعد ميدري شصار بيه اكيد عدي يعرف يختار الطفل الي يتحارش بيه وميفضحه لج يمه الله يساعد گلبج شون شفتيهم هيج

ام حسن : هذا زاني واحد نكس لازم ماتبقين وياه بنتي

شرهب : ابقى وياه اله اخر يوم بعمري هو اني بليه شى باقيه وياه من وره خشمي هلمره طلع هيج شدعيلج ياصالحه على سوايتج بيه لكم خلصت الادعيه مال المسلمين والمسيح عليها وعرج ماطكها

ناي : شكد حقير وفوكاها يكول باگتني حتى يغطي وحده بوحده

شرهب : خلي يسوي شى بيونس وداعت حرگت گلبي منه لا اوكف بنص الشارع واعزي وافضحه واخلي الكل تسحب الجهال منه

وبيه زود خلي يوصل يمي

ام حسن : هذا مو هين راح بدمه يشتكي وانتي ماعندج اثبات بهاي سوايته وماشاء الله اكو ناس باطله جم فلس تگلب الحق

شرهب : بهاي السالفه ارتاحي خاله فلوس مينطي لو يعفن بلسجن

ناي : ويجوز يدفع حتى ينقذ نفسه دخيلك يارب منين اجتنا هاي الطلابه من صخم الله وجهه

دخل يونس وكعد ويه شرهب وعادت كل الكلام بلتفصيل وراها طلع

بقينا حدود الساعه وسمعنا صوت هوسه ردنا نطلع لزمتنا ام حسن

ام حسن : وين رايحات يمه ماطلعن وطبن بغرفه ولدي وقفلن الباب

ناي : اخاف اجوي على يونس

ام حسن : وشسوين توكفين بنص الزلم حطي ابنج بحضنج واكعدي واسكتي مثل مكال اخوج واني راح البس عباتي واوكف بلباب اشوف شكوو

يونس : خابرت صديقي وبلغته وهو خابر اخوه وكال خلي يعرف بيا مركز اشتكه حتى اشوف معارفي كلت اكيد مركز بغداد الجديده لان تابع الهم

بقيت واكف بلباب احش جكاير وافكر شون افض السالفه كلها واني لحد هسه مفاهم شى

دخلت سمعت من شرهب والدم صعد براسي اني لو مدمي بعد هلقذر صعدت فوك ونزلت فلوس حطيتهم بجيبي اخاف احتاج ورديت نزلت وكفت بلشارع جريت التلفون وراسلت الروح مالتي حوريتي وبلغتها خفت عليها لتعرف وتتأذه وهم خلصتها مناحه تكول رايح للجبهه كوه هديتها

مرت ساعه واجت دوريه طبكت بلباب ونزلو منها اني جنت منتظرهم لان وين اروح بهذا الليل وابهذل خواتي خلي ياخذوني وانطي جم فلس واطلع بعد ماعرفوني سألو عن شرهب وكتلهم مو عندي طبو فتشو البيت وملكو احد واخذوني للمركز

ناي : دخلت ام حسن وجهه ميتفسر هاا خاله

ام حسن : اخذو اخوجن

ناي : حيلي راح من كالت هيج ركضت على تلفوني المن اخابر دكيت على مرتضى كال اني بلبصره مو بغداد سديته منه اخابر عمو فلاح هذا فاهي ومايحلها دخيلك ياربي لتلجم گلبي بيونس

شرهب : خابري مهدي

ناي : ماادري شتكولين اخابر لو لا

شرهب : تره الشغله جبيره اعرف بسوالف عدي لج حتى عليه مشتگي الحقير يريد يدخلني سجون شفتيلج هيج واحد ناقص واحنا ماعدنا احد نحتمي بيه واذا كعدنا وحطينا ايدنا على خدنا مو بعيد الدوريه الجايه عليه ويسحلوني من شعري خابري مهدي اقلها عنده معارف وخواله واصلين بلكي يحلوها لازم يحس عدي ورانه رياجيل حوك مو وحدنا لان يعرف عمامج مابيهم خير ومحد يسأل علينا ولا يهتم حتى لو نموت اقلها من يشوف مهدي واهله بلكي يخاف ويتنازل ويبقى مهدي ابن خالكم مو غريب هسه عوفي سالفه هو رجلج مو وكتها

ناي : هم صحيح دكيت على مهدي صار شكد مامتصله بحيث بسرعه جاوب

مهدي : هااا نايه سيف بيه شى

ناي : لا لتخاف الْحٍمَدٍ للـّہ مابيه شئ

مهدي : مو من عوايدج تخابرين بيج شى

ناي : يونس اخذوه الشرطه

مهدي : ليش شمسوي

ناي : راح احجيلك شى مختصر

حجيتله وهو مباشره كاال انتم وين هسه

كتله بيت ام حسن

مهدي : لطلعون ابد وخاصه اختج واني راح اجيب خالي والولد ونجي

ناي : بهذا الليل

مهدي : بعد وكت كلها ساعه احنا بغداد ما أمن عليكم وحدكم اخاف هذا الحقير يسوي شى يجيكم يأذيكم

ناي : ماشي انتظركم سديته منه

وبقينا كاعدين

ام حسن : تعاي يمه شرهب حطي راسج هنا

شرهب : جنت حيل دايخه من الضرب وجسمي ينفض وراسي راح يطك ويمكن خاله انتبهت حطيت راسي على رجلها وبدت ادخل اصابعها بين شعري وتفرك براسي وتقرا

يافارج الهم وكاشف الغم يارحمن الدنيا والاخره ورحيمهما صل على محمد وآل محمد وافرج همها واكشف غمها ياواحد يااحد ياصمد يامن لم يلد ولم يولد ولم يكن لهُ كفواً احد ، اعصمها وطهرها واذهب ببليتها

اقري بنتي ويايه آيه الكرسي والمعوذتين وقل هو الله احد

شرهب : اقرا وياها ودموعي تنزل اريد اغمض عيوني وافتحها والكه كل الصار بيه والي عشته كابوس وانتهى والله تعبت ماعندي طاقه بعد زاد الامر عن حده حتى الجبل من كثر المطر هم ينهار واني انهاريت ومامستعده اتحمل اكثر

ام حسن : رددي ويايه

يامقلب القلوب والابصار يامدبر الليل والنهار يامحول الحول والاحوال حول حالنا الى احسن حال برحمتك يا ارحم الراحمين وصلى الله على محمد وال محمد

عيديها شكد متكدرين

شرهب : اقرا واعيد وياها تالي كالت

ام حسن : رددي لحد ماتعبين

الله لا اشرك به شيئا توكلت على الحي القيوم الذي لا يموت

حسيت بنعاس ورخت اعصابي وتعبت غمضت عيوني

ناي : اباوع عليها كبرت وكبر الهم بگلبها ضاعت احلى سنين عمرها ويه واحد ميسوه اضفر رجلها شكلها خله دموعي تنزل قهر عليها جانت مرايده غير تكمل دراستها وتبقى بحضني وتالي المتخاف الله شمرتها بلنار

ام حسن : لاتبجين محلوله بأذن الله ماتضيق يابنتي اله ماتفرج

ناي : انقهر على حالها وحياتها لو انقهر على اخويه

ام حسن : التجأي الى الله هو مدبر الامور وقادر يغير الحال لا تيأسي من رحمته

ناي : ونعم بالله

ام حسن : اكوم اسويلجن اكل

ناي : لا خاله ماكله وجنت اوكل سيف وخابرت همزين نايم جان خبص الامه

ام حسن : وكلته ونومته

ناي : ينطيج العافيه ويحفظج كمت وبست راسها هاي المره نعمه من الله النا

صارت ساعه ١٢ ونص وخابر مهدي جاوبته

مهدي : احنا بلمركز يم يونس ليضل بالج

ناي : عفيه بيه شى

مهدي : كلشي مابيه وباجر نحاول انطلعه كفاله لحد منشوف شيصير بلكي نخلي عدي يتنازل

انتي نامي وباجر لترحين للدوام لحد متفض

ناي : لا يادوام اكيد مااروح وانتم وين تباتون

مهدي : بيت كرايب خالي منتظرينا الجماعه عينج على سيف وشرهب ولتفكرين بشى وديري بالج على نفسج

ناي : شكراً لان اجيت بهذا الليل وماعفتنا

مهدي : هو اني للغريب اركض مو عاد لمرتي ام ابني

ناي :سكتت مااعرف شجاوبه وتالي كتله باي

مهدي : الله وياج

الليل منمته وافكر شراح يصير اباوع على شرهب النايمه وسيف قريب منها واغطي بيهم مرات احس شرهب بتي الجبيره وسيف ابني الصغير من كثر مامتعلقه بيها ومحروك گلبي حيل عليها

طلع الصبح وبالي يم يونس ومنعرف شراح يصير للكليه مرحت اجه ابو الخط طلعت اله وكتله مااداوم

كعدنا كلنا وام حسن تتوسل بينا ناكل لا اني ولا شرهب نكدر نحط لكمه بحلكنا

اباوع وجهه اليوم اتعس من البارحه الحمار والزراك حيل واضح جوه عيونها وارم شفتها من الجهه اليسره وارمه ايدها ورجلها مليانه كدمات من خرب غيرتك اذا عندك غيره ياعدي شمسوي بيها خابرت اكثر من مره على مهدي وكال دنمشي بالاجراءات مبقى شى ويسده وماافهم شى منه

للعصر اندكت الباب وطلعت خاله سمعنا صوت يونس طلعنا نركض

حضناه وكمنا نبجي جنا حيل خايفين عليه

يونس : شبيكم قابل رحت اعدام هو ليله غيرت جو واجيت حنيت لمكاني القديم سلمت وطلعت

ناي : ان شاء الله ماطب اله ابد

يونس : امشو فوك لان الجماعه اجوي وباقين بلشارع يريد خالو عمران يحجي ويه شرهب

ام حسن : صيحهم ابني هذا هم بيتكم

يونس : مشكوره خاله ماقصرتي كافي امنت البنات يمج

ام حسن : لتشكرني ابني غير حسبت ولدي انتم

يونس : رحمه الله والديج يله بنات

ناي : دخلت لبست عباتي وشرهب هم وشلت سيف اخذه مني يونس طلعنا من بيت خاله ودخلنا لبيتنا باوعت شون مهدي نزل من السياره واخذ سيف من يونس ويحضن ويبوس بيه

صعدت فوك بسرعه لملمت ملازمي وكتبي الجانو بلكاع وشلت غراض والعاب سيف عيب البيت هوسه

اندكت الباب وسمعنا كلمة ياالله

تفضل خالو

عمران : شونها بنيتنا

ناي : الْحٍمَدٍ للـّہ تفضل سلمت عليه دخل عبد وابوه ومهدي وكعدو

عمران : وينها الوكحه

شرهب : هياتني خالو

تعالي بنتي

شرهب : جنت حيل مستحيه من شگلي وخاصه من ركز عبدالرحمن على وجهي كوه لزمت نفسي ماادخل واعوفهم

عمران : رجلج مشتكي وكال انتي بايكته

شرهب : جذاب ومستعده احلف فلس ماماخذه منه

عمران : اني فهمني الموضوع كله يونس واني مصدكج هسه لازم نهدي النفوس حتى الشغله متكبر ولا انتي ولا يونس توكعون بيها وهو يطلع الخير الصار ماكو اي دليل لو شاهد حتى نطلبه ونثبت التهمه على عدي حتى ابوه وامه كالو ماشفنه شى بعينه ويبقى ابنهم وخاصه من عرفت الج سابقه بطلعت بتهم من البيت ومامن المعقول يكررون السالفه ويضحون بأبنهم وهاي المره السالفه حيل جبيره لان اذا عرفو اهل الطفل بسوايت عدي بيه اكيد يگتلوه ويحركون بيتهم

ومحد ينطي ابنه للموت

شرهب : رجعه ماارجعله اموت وماارجع ساعه يمه

عمران : اكيد هذا الشى متأكد تردين تطلكين احنا راح نلزمه من ايده التوجعه انتي تعرفين اهل هذا الطفل

شرهب : لا

عبدالرحمن: شون متعرفين وين جان بالج

شرهب : هذا شبيهه عاط بيه مجاوبته وباوعت على خالو وحجيت اني شمعرفني اذا هو بليوم طلاب كلش هوايه تجي ومن هواي مراحل اجي الزم طالب طالب وين اهلك وابن منو انت مستحيل

عمران : اني ردت اهدده بأن نروح نبلغ اهل الطفل حتى يخاف ويسحب الشكوه

شرهب : عادي اروح للمدرسه مالته اني اعرف الطفل خامس ابتدائي وادور بين الطلاب واعرفه ونسأل المديره او الطفل نفسه وين اهلك ونندلهم

عمران : اذا شفتي تعرفي

شرهب : اميزه بين الف

عمران : احنا منسوي هيج بس نهدد عدي يسحب الشكوى ويطلك وراها اني اعرف شون اطلع السواه من خشمه

مهدي : تعاي ناي اريد احجي وياج

ناي : كمت من عدهم وعفناهم يحجون ودخلت لغرفتي وسيف بيده

مهدي : هااج

ناي : شنو هاي

مهدي : مصرف

ناي : ذاك اليوم انطيتني وبعده الشهر مخلصان

مهدي : من انطيج لتردين ايدي وذني اخذي شغلات لشرهب وعوفو كل ملابسها وغراضها خلي يولن مااريد توصلون لذاك البيت هي اكيد ماعدها ذهب هناك

ناي : لا منين عدها كله ماخذه منها

مهدي : اشتري كلشي تريده لتقصرين عليها

ناي : يونس ممقصر واكيد يشتريلها

مهدي : اعرف بيه اخو خيته وسبع وميخلي خواته بحاجة احد هاي مو مرتي مصاريفها وكليتها ولبسها حتى الخط هو شايله

ناي : خوش تبسمر

مهدي : جذبت

ناي : لا مجذبت بقى صافن وابتسم بوجهي

هزيت راسي شبيك يعني ليش تبتسم

مهدي : صايره كيك واكعتلج الدراسه

ناي : ليش احد كال الك اني عوبه وصرت هسه حلووة جان يتقرب مني وهد ايد سيف وصرنا وجهه بوجهه

مهدي : احب عنادج وهاي النتره بلكلام تخليني اكزكز عليج

ناي : وجهي گب ناار مدري شبيهه عزه معقوله استحيت منه دنكت

مهدي : من كثر ماعفتج براحتج نسيتي حضني وكمتي تستحين مني بعد سنه اذا عفتج تتبوشين مني

ناي : جيب اخذت الفلوس من ايده اكو شى بعد وخزرته تقرب باسني من خدي وطلع

كمت ابلعم هذا شجاه اول تالي هيج يسوي

طلعت من الغرفه وبيدي سيف وهو ركض على ابوه كعدت گباله وهو حاصرته الضحكه

شون وين اودي وجهي عيوني لا ارادياً تروح عليه

طلعو كلهم وراحو لبيت عدي بس مقبلو ياخذون يونس حتى ليتعارك وتنلاص الشغله

حوراء : سمعت سجنو يونس لو تخبلت بجيت بجي شهكت طول هاي السنين الفاتت اني وياه بلبدايه تعلمت عليه وصارت حاله تعود وراها صارت ادمان وراها حب لدرجه اليوم ميفوت اذا منحجي بيه اقل شى ساعتين نزلت برنامج الفايبر يونس سمع من ولد صاحبه عن البرنامج بأن رسائل مجانيه وكمنا نتراسل بأستمرار وين راح طب طلع شأكل صرت عايشه بيت اهلي جسد وعايشه ويه يونس بروحي

حنيته وطيبته وغزله خلتني اعشقه بجنون وصار هو شغلي الوحيد بلدنيا

ويوم ماعرفت بسالفه شرهب بلغني وكال ليضل بالج ليله وراجع بقيت ابجي وحبست روحي بلغرفه حتى امي متعرف ولا تشوفني وتسألني شبيج

ومن عرفت بمهدي وخالي رايحين اله حييل ارتاحيت بس مستحيل تبقى الراحه مستمره امي اجت وگلبت الدنيا شون يروح لبغداد شعنده والمن راح لان مهدي من طلع ماكلها على يونس

وداد : وانتي شبيج جن ميتلج واحد

حوراء : مابيه جنت اباوع فلم وطلعت لقطه تقهر وبجيت

وداد : اي فايخه لا هم ولا غم اكل ونوم

حوراء : شسوي تردين اطلع عماله واشتغل من الفجر

وداد : انجبي اني محد داقني غير اخوج موتني ليل نهار احجي واعارك

حوراء : ياامي شتردين منه عوفي

وداد : شون اعوفه وهذا حاله منتظر بت الباشا تحن عليه عبالج اخوج طبيعي احلف عليه اخوج مسگي مشرب مسوياتله سحر اكو واحد ينتظر وحده سنتين وعايف مرته وابنه براحتهم

حوراء : لا مسحور ولا شى مهدي كام يحبها لناي وميريد يخسرها

وداد : يااا عشتوو ماحب اله هاي بت اهل العتيك شاف منها لا خلقه ولا اخلاق كله من وره خالج كسر بخت ابني وزوجة هاي وتاليها كاعد ينتظرها وبت الگلب متقبل اشوف ابنه وحارگه گلبي

حوراء : جم مره گلج مهدي تعاي ويايه نروح نشوفه توصلين لبغداد وتزورين كرايبج ومتقبلين ترحين تشوفين سيف

وداد : اني اطب برجلي لبيتهم اله تخبلت

حوراء : لعد لتحجين ياماما لتضلين يوميه نفس الاسطوانه ياناي ويامهدي عوفيهم همه يعرفون مصلحتهم وابنج مرتاح هيج وعاجبه الوضع ومايوم شگالج

وداد : خو انتي ولا عبالك بنتي تكول بتهم وجايه عايشه هنا حسره احجي تصيرين محامي الهم

حوراء : نعست خلي انام شمرت روحي على الجربايه هاي الاسطوانه اذا مو يومياً اسمعها مايقل عن بين يوم ويوم تكوم وتكعد تسب بناي وتحجي عليها وتوز مهدي حتى يطلكها او يتزوج عليها ويكسر خشمها وهو منطيها الاذن الطرشه

ثاني يوم دك تلفوني شفته يونس

هااا حبيبي

يونس : حوريتي ونفس ريتي شلونها

حوراء : موزينه

يونس : ليش ياروح يونس

حوراء : بالي يمك وخايفه عليك طمني شصار

يونس : دخلت للتوقيف كلت شون اخلص اليوم شلون يايونس غمضت وتخيلت حاضنج وفارش شعرج على ايدي واشمه وابوس بيه وجان انام كعدت صار الصبح بستج بلهفه وعضيتج من خدودج وصبحت عليج وطلعت من التوقيف اكو احلى من هيج ليله

حوراء : ناصب عليه أذوك ضربوك الله عليك

يونس : كلشي ماكو وعيونج لتخافين واخوج فضها وتكفلني وركض بيها وطلعت

ردت اكله زوجني اختك اكسب بيه اجر

حوراء : ههههههه جان گتله حتى هو بيده يعدمك

يونس : هانت مبقى شى السلف الداخل بيهن بس استلمهن اجي اتقدم

حوراء :هاااا مو هسه بعد وكت

يونس : دومج تتهزمين خبلتيني صار سنتين ونص سوه وتكولين مو هسه شوكت لمن سنوني توكع وامشي على عكازه وعمري سبعين سنه

حوراء : عوفك من هذا الموضوع اكلت

يونس : اي الْحٍمَدٍ للـّہ ومنتظر اخوج وخالج راحو لعدي ونشوف شون تفض

ناي : اجوي وكعدو هااا خالو بشر

عمران : محد راد يخرب السالفه غيرك صوجي اخذتك ويايه

عبدالرحمن: مشفته شون كاعد يتأمر ويحجي معلك هيج واحد زايده عليه طلقه هذا بلنعال الزمه ودك على راسه لحد مايموت وتذبه بلزباله

شرهب : فدوة خالو تعاركتو

عمران : عبد راد يتعارك وياه وتلافيت الموضوع هو مصر بأن انتي بايكته واني كتله انطيك الفلوس الي تريدها مقابل اطلكها

يونس : ليش ياخالو اني متفقت هيج وياك

عمران : اني اريده يسحب الشكوه لتنسى حتى على اختك مشتكي وكال اجيب اختي ورجلها يشهدون وخاصه حيل يحبوها ويكيفون يردون الها السوته بيهم

شرهب : وعمي وعمتي

عمران : ذوله كبار بلعمر والدنيا ساحكتهم سحك والظاهر ابنهم العاق مهددهم لان سحبو ايدهم من الشغله كله كالو لانشهد ويه شرهب ولا ويه ابنه لان اثنينهم اعزاز عليهم

طفر عبد وكاال بس لو افهم شون جنتي عايشه ويه هذا الخنزير

شرهب : قسمتي

عبدالرحمن: ياقسمه الي تخليج تحت رحمه واحد بخيل ومنحط ومخلصه سنين وياه

مهدي : على كيفك عبد وياها متشوف حالها

عبدالرحمن: ولو حيل بيج ماطول قبلتي على نفسج هيج عيشه تستاهلين كل الصار بيج

شرهب : وكفت وعله صوتي عليه انت منو وتحكم عليه انت شتعرف عني وتحجي هيج ويايه وتحسسني راضيه ومرتاحه بالاهانه والضرب اني تحملت ضيم عدي وحياته مجبوره مو بكيفي لتشوف نفسك اجيت للدنيا بيت كله خير واهل يلبون كل طلباتك وتأمر وتنهي وتقرر بكيفك شون تعيش اني من دمي ولحمي عمي شمرني لحضن هذا الحقير ودار وجهه وراح انجريت من صدريتي ونزعونياها ولبسوني بدله وكالو روحي مالج عيشه يمنا وانت عدي هااك اخذها شسوي بيها سوي يطبها طوب منريدها

عمران : على كيفج بنتي وانت شبيك تخبلت

شرهب : لا خالو حقه عباله كل الناس انولدو بلعز وبحلكهم خاشوكه من ذهب واكو ام واب فوك راسهم وهمه يحددون يايعيشون بخير يايذلون نفسهم الي مثلي ومثل ناي ويونس والظروف الي عشناها زين من عدنا وماانحرفنا زين من عدنا واحنا البنات محافظات على شرفنا واخونا ماطلع حرامي لو قاتل احنا ربينا روحنا بروحنا يوميه من حضن لحضن محد احتوانا للاخير وكمل جميله ويانه كل واحد من اهلنا ياخذله سنه سنتين وراها يدير وجهه ويعوفنا ملطمين

ونرجع اندور الي يعطف علينا

ويوم مااخويه وكع اول شى سوه عمامي شمروني لعدي ورادو يشمرون ناي لرجال انكس من عدي لوما ابوك زوجها مهدي ولو مهدي هم ماقصر ويه اختي وخاصه امه جانت من السعاده والمحبه تكعدها بوسه وتنومها بحضنه

مهدي : هسه انتي كعد تتعاركين ويه عبد اني شكوو بلنص لو لازم تحليه الاكل مهدي

شرهب : حرك گلبي ابن خالك محملني ذنب كلشي وعيني عبد اذا ضايج ياريت لتجي بعد حتى لتنغث

عبدالرحمن: كون لسانج هذا مطلعته على عدي من احسن مامديتي هسه

شرهب : مو بس لساني طلعته حتى وجهه خرمشته حتى عض عضيته عبالك اسكتله

عمران : اكعدي بتي وصلي على النبي وكافي خلي نفهم شراح نسوي

يونس : فلوس مانطي وشيريد خلي يسوي

مهدي : اني انطي وخلي يطلك شرهب ويسحب الشكوه وتفض

شرهب : ياخذ سم وزمهرير بمعدته اياكم تنطوه فلس واحد تره هذا جبان عيطه يكوم يرجف هو بارز سباعيته عليه وشافكم مسالمين وتردون بس تفضوها استغل الموقف

عبدالرحمن: كتلك يابه خلي الزمه اطحنه بلكاع واخلي بكونيه واخذه للمركز يتنازل

شرهب : انت بلذات لا تدخل حتى لتضوج استاذ عبد

عبدالرحمن: استغفر الله اني جوه

خله ونزل وعافنه

بقينا نسولف وماوصلنا لحل وطلعو ومارجعو لديالى كالو اله نحلها وثاني يوم راح مهدي وعبد ويونس ولازمين عدي من طالع من المدرسه وماخذي بسيارتهم مهددي اذا مصعد يفضحوه بلمدرسه

يونس : اسمع لك اخاف عبالك انطيك فلس لو تموت

عدي : واني ابقى شكوتي عليك واخليك ترجع للسجن

مهدي : تدري نكدر هسه نجيب شرهب تعرف الطفل ياهو وناخذه لاهله ونكلهم على كلشي

عدي : ماعدكم دليل محد يصدك

عبدالرحمن: لك بابا يادليل وين كاعدين راشدي راشديين للطفل يزوع الاكو والماكو مو بعيد يكول انت وره احداث ١١ سبتمبر

صير عاقل ولفلف الشغله كلها طلك شرهب واسحب الشكوى وروح ولي مالنا دخل بيك تره سالفتك عوجه اهل الولد يحقوك عشائرياً وحتى يكدرون يهدرون دمك وعشيرتك تتبرى منك واهلك يتهجولون وتاليها شرهب تترمل لان اكيد بوكتها انت ميت عدا التعويض الي راح ياخذوه منك سد السالفه من بدايتها لتكبر وانت الخسران الوحيد بيها

عدي : واذا اندكيتو بيه او حجت شى

يونس : متحجي مالها دخل بيك ولا نريد نشوف وجهك

مهدي : عندك يومين وراها مو تلومنا على الراح نسوي وعود خلي تفيدك الشرطه

شرهب : العب ويه سيف وناي تقرا خطيه هاي الايام كلها ماوصلت للكليه وراحت دروس عليها

اجه يونس وكال

يونس : راح تفض سالفت الشكوى باجر وبعدها راح يروح يطلكج

شرهب : لا بربك صدك راح يطلك

يونس : بس اخذ من عدنا كلمة الصار كله مينحجي ونعوفه بحاله

شرهب : گلت بگلبي اخذ منكم مو مني

يونس : هااا شو ساكته

شرهب : لا ماكو شى شوكت يطلك

يونس : هليومين وتخلصين

شرهب : بربك استعجلو بسالفه الطلاك

يونس : منا وهيج مكانج يم ناي واذا الغرفه ضيكه نامي بغرفتي واني انام بلهول

شرهب : لا حبيبي ادفر سيف وانام بحضن نوايه

ناي : ليش ادفري ولج نامي انتي بجهه وهو بجهه

شرهب : اغاار اريدج الي وبس

ناي : ههههههه مخبله الج وليونس ولسيف

شرهب : ولمهدي موو وغمزت الها

ناي : امممم اسكتي لا اطفي عيونج

فض الاسبوع وهمه بين بيتنا وبين بيت عدي والف تعهد انطوه حتى مينفضح وتبقى السالفه مدفونه لحد ماسحب الشكوة وانسدت وبقت سالفه الطلاك ورجعت للدوام هواي محاضرات فايتتني ولان اول سنه استحي كلش اطلب دفاتر او محاضرات احد لحد متعرفت على بنيه ويايه بلقسم حبابه واسلوبها يخبل هي اجت وعرضت المساعده وانطتني محاضرات الاسبوع الفات

رجعت من الدوام اول منزلت بلخط شفت مهدي يحجي ويه يونس بلباب وميقبل يطب لان مستعجل

السلام عليكم

باوع عليه من فوك ليجوه والله حسيت روحي مصلخه

اكو شى

يونس : منتظرين تلفون مهم

ناي : راح اصعد مشيت خطوتين وسمعت صوته كاال

مهدي : نااي

ناي : انداريت عليه وكتله نعم

مهدي : ايدج

ناي : هاااا

مهدي : مدي ايدج

ناي : مديتها

مهدي : مو هاي اليسره اريد

ناي : مديت اليسره واني صافنه هذا شبيهه

مهدي : حلقتج وين

ناي : وليش البس حلقه

مهدي : ليش انتي مطلقه حتى متلبسين لو عاجبج بلكليه يتحارشون بيج

ناي : ليش احد گلك اني اداوم بسوك اني اداوم بحرم جامعي وماكو اي حرشه باوعت على يونس جان ملتهي يخابر

لزمني من ايدي ودخلني بلممر

هلمره راح اعبرها مره الثانيه تعمين على نفسج

ناي : باوعت بتحدي بعينه شسوي

مهدي : امنعج من الكليه خليني مگبر عقلي ويااج اذا صغرته اكرهج بليوم الي انولدتي بيه من باجر الحلقه تنلبس

ناي : ولبستها شنو يعني

مهدي : البسيها واشتري راحه بالج لو تردين مشاكل ماعندي مانع اشتريها شرايه المشاكل وياج اريد بس زله عليج حتى اعرف شون اجيبج لحضني

ناي : اجه يونس

يونس : خيركم

مهدي : لا ماكو شى بس ذكرت ناي لازم تلبس حلقه حتى بلكليه يعرفون هيه متزوجه ومحد يحاول يتقرب منها ويصارحها وهاي سوالف المرحله الاولى حجايتي بيها شى

يونس : لا مابيها

ناي : بگلبي اكول طبعاً تطبك وياه غير اخو الحب اني الك يونس

عفته وصعدت على الدرج

مهدي : من باجر سمعتي ماكو طلعه بلياها

ناي : اي افتهمت وصعدت

دقايق وصعد يونس ردت الزمه ازعل منه واعتب عليه لان طبك ويااه اول مدخل من الباب عااط شرهب

اجت شايله شعرها نخله واكفه يخرب ضحك شكلها وجان انصدم ابني هم مسويتله نفس النخله وشايلته ويضحك الفطير وياها

هااي شمسويه بأبني

شرهب : شعليج انتي من تعوفو امانه يمي يصير مالتي العب طوبه بيه مالكم دخل موو سيوفي تحب خاله وين بوستي

وجان يبوسها

ناي : ولك بسرعه بعتني

يونس : خلي احجي شرهوبه

شرهب : غير يحجي الدره مو موتني شكوو

يونس : طلكج عدي

شرهب : لا بربك صدك

يونس : هسه خابرني خالو راح وياه للمحكمه وطلكج صرتي حره

شرهب : كلللللللللللللوووووووووش

انجب يالشامت هذا اليوم لنفرح بيه

ناي : لج ابني انمرد لزمته وتهلهل وتكمز وياه وهو خربان ضحك

شرهب : لكم خلصت من عدي العااار لكم جيبوو المزايق واذبحو الذبائح تم اطلاق صراحي من سجن ابخل البخلاء واحقر الحقراء واجيف الجيفاء تره مترهم غير هيج على نفس الوزن مالكيت غير كلمة غلسووو

يونس : هههههههه

شرهب : صرت حره ياقووم

كلللوووووووش

ناي : يمكن صار سنين ماشفت هيج فرحه بگلبها من شفتها متحملت وكمت اكمز وياها واهلهل على فرحتها ويونس خربان ضحك ويهز بيده وهي لعبت لعب

بيومها الليل كله اطب وتطلع وتصيح نوايه اني اطلكت عمي والله ادري راحت ورجعت اكرصيني اخاف احلم خلصت من عدي

ناي : والقران ادري وخلصتي وبله رده

شرهب : اخاف بعدني نايمه كومي دوسي بطني خله اتأذه المهم اتأكد اني مو بحلم

ناي : يبوووو والله مو حلم شون بيج

شرهب : واخيراً خلصت منه نايمه بلكاع وبصفي سيوفي خطيه يونس كال باجر اشتريلج جربايه حتى تنامين مرتاحه ممصدكه اني حره وبعد ماارجع لذاك البيت

درت وجهي على الحايط اباوع اذا همه انطوه تعهد اني ماانطيت مستحيل اعوف حقي منك ياعدي ضيعت احلى ايام عمري كتلت طفل بطني مرتين وصلتني للموت عيشتني بخل وجوع وقهر واذيه ومذله كتل واكلت اهانه وانهانيت طفولتي ودمرتها حتى اغتصاب اغتصبتني حرت شسويت وتفننت بيه حتى ترضي حيونتك براسي كافي كبرتني فوك عمري وخليتني اكره كل ساعه جمعتني بيك ومن تتقرب مني تتلذذ بتعذيبي من كل عقلك افوت هاي السنين الحلوة الي حولتها جهنم واخليك تعيش مرتاح ومتونس بفلوسك وتلعب براحتك مو شرهب الي تعوف حقها بعيني اني الك

عفت جم يوم حتى تبرد السالفه وكلمن يرجع لمكانه ناي رجعت لدوامها ويونس لشغله وجماعه ديالى لبيوتهم ومشت الايام هادئه مرت ١٠ ايام ناي طلعت للكليه ويونس للمحل بدلت ونزلت خليت سيف يم خاله وكتلها اسوك واجي اشتريت من المكتبه محفظه واقلام

وگبل وعدل لمدرسته اعرف هذا اليوم من كل اسبوع درسه الاول والثاني وراها يطلع للبيت انتظرت عبرت العشره وشفته طلع من المدرسه طبيت للمدرسه وسلمت على المديره وعرفتها اني مرت الاستاذ عدي والمره رحبت بيه مبين مكايل الهم طلكني وكتلها اكو طالب عدكم بصف الخامس عدي ياخذه دروس وصاني انطيه هاي محفظته لان عنده امتحان نساها عدنا بلبيت

المره شكت بس استحت تردني طبيت للصف الخامس الف مالكيته رجعت طبيت للخامس ب دورت لكفته هو شافني اصفر

انطيته المحفظه وكتله وين بيتكم

بس خزرته كال ست اني بيتنا بصف المدرسه

بيت منوو انتم

امك ابوك شسمهم

ضل يرجف وخايف شبعت عدي مسبه بگلبي الله لاينطيك شمسوي بلطفل

كال بيت ابومصطفى

عفته وطلعت ورحت للمديره تشكرت منها وكتلها صدك بيت ابو مصطفى وين اريد امه لان هذا الطفل ولا يستوعب يراد احجي ويه امه تركز وياه خطيه

اني اعرف بيتهم قريب المدرسه بس مااعرف وين بلضبط

جان ادليني المديره على بيتهم والله مديره حجت كلشي بله اريد ابوك الطفل من كل عقلها تأمن بيه شكد مطفيه

خليت وطلعت من المدرسه وبوجهي لبيتهم دكيت الباب طلع رجال كتله بيت ابو مصطفى كال لا البيت الي بصفنا رجعت دكيت الباب الثاني جان تفتح مره الباب اي هاي شايفتها اكيد امه مره شفتها بابنه

تفضلي عيني

شرهب : اني مرت استاذ عدي اجيت احجي وياج بشغله تخص ابنج

يتبع ......

#الابواب_الخمس

البارت الثامن والعشرون /الجزء الثاني

للكاتبة Reem

صـباح الـ🥀ـورد والهنا لاحبتي اذا امكن ممكن تدعون لامي لان بعد كم ساعه تدخل عمليه وهذه ثالث عمليه لعيونها ممكن تدعون تكون الاخيره واطيب لان حيل تعبت بجاه هذا الشهر الفضيل تكوم بلسلامه واطيب لان حيل تعبانه علمودها ويشهد الله كوه كتبت بارت اليوم من القلق عليها لان مريضة مو بس بعيونها لهذا اطلب منكم لانكم عائلتي الثانيه بأن تدعون فضلاً وليس امراً وشكراً من قلبي على دعائكم

نرجع للبارت :

صرت گصبه

بزمن بي كثرت الرعيان

ومدري بيا حلگ راح اصفه باچر ناي

خليت وطلعت من المدرسه وبوجهي لبيتهم دكيت الباب طلع رجال كتله بيت ابو مصطفى كال لا البيت الي بصفنا رجعت دكيت الباب الثاني جان تفتح مره الباب اي هاي شايفتها اكيد امه مره شفتها بابنه

تفضلي عيني

شرهب : اني مرت استاذ عدي اجيت احجي وياج بشغله تخص ابنج

ام مصطفى : تفضلي عيني شفتج مره تغسلين الطرمه تذكرتج تفضلي هله بيج

شرهب : اكو احد بلبيت

ام مصطفى : اني وامي ولدي صغار رجلي ماكو اذا تستحين خاف عبالج اكو رجال بلبيت

شرهب : اي اذا اكو رجال اجيج غير وقت

ام مصطفى : مو كتلج رجلي ماكو تفضلي

شرهب : طبيت وياها رادت تفتح غرفه الخطار كتلها ميحتاج نكعد بلمطبخ هي جم حجايه مااخذ من وكتج هوايه

طبينا للمطبخ جانت تطبخ نصت الجدر واكو ميز بيه كراسي كعدت وهي قدمت ببسي وكعدت گبالي تطلع ام مصطفى بنت الثلاثين مو جبيره

اي عيني شبي ابني ولو رجلج الله ينطي العافيه من وره تدريسه ابني كام ينجح

شرهب : الله لاينطي العافيه جان تجفل وتفتح عيونها مستغربه مني

شوفي عيني ام مصطفى اني لا اعرفج ولا اكو صله دم بينا وهاي اخر مره تشوفيني اني اجيت لان استخطيت ابنج ومااريد بيوم احمل ذنبه او ذنب جاهل ثاني والدنيا سلف ودين ومااريد بيوم تفتر بيه او بأحد اعرفه

ام مصطفى : وكعتي گلبي شكوو

شرهب : بالاول اريدج تحلفين متكولين اني اجيتج ولا شفتيني ولا تعرفين اي شى عني

ام مصطفى : ليش احلف شصار

شرهب : احلفي بالاول واحجيلج اني مااجيت اضرج بلعكس جيت انقذ ابنج ويجي يوم تدعيلي لان جازفت بحياتي واجيتج

ام مصطفى : قطره دم ماضل بيه ابني شبيهه

شرهب : حجيت الها الشفته وهااي كامت تلطم على وجهه وتعيط

شرهب : على كيفج عفيه

ام مصطفى : ياعلى كيفي اليوم احرك رجلج واهله وانعل عشيرته

اجت مره جبيره بلعمر مخروعه وتصيح شبيج يمه شصار

كامت تبجي وتلطم مره على صدرها ومره على وجهه وتكولها على الي حجيته المره تخبلت مثلها شفت الوضع راح يفلت من ايدي ولو متوقعه هاي ردت الفعل كعدت وسويت نفسي اريد ابجي وخايفه حتى اهديهم

عفيه اني اجيت لان خايفه على ابنكم هيج الي يسوي زين توكع على راسه فوك مامجازفه بروحي

الحجيه كالت : انتي مرته

شرهب : جنت مرته اطلكت منه من وره هاي السالفه وذب تهمه براسي عود اني بايكته

ام مصطفى : ويجوز صدك وانتي جايه تذبين تهمه عليه وتوكعينه ويااه

شرهب : اني ما الومج لان السمعتي مو هين عندج ابنج اكعدي وياه وجري لسانه وحاولي لا تخوفي كافي الرعب الي عايشه من عدي لا تزيديها عليه واذا ابنج مطابق كلامه لكلامي مستعده لكلشي واتحمل كلشي

الحجيه : انتي ليش اجيتي وبلغتينا

شرهب : كتلها لبنتج الدنيا سلف ودين ومااريد انام واني شايله ذنب ابنكم اليوم تجرأ على مصطفى اكيد باجر يشوف غيره وغيره وكل طفل اني راح اتحاسب عليه لان لو ما سكوتي مجان تماده

شوفي خاله وبنتج تسمعني اني بنيه يتيمه وماعندي لا ام ولا اب شمروني شمر بيت عمي اله واني بت ال١٤ سنه ماافهم من الزواج شى وعشت وياه اتعس ايام عمري ورضيت وتحملت ويوم مالكفته ذب تهمه عليه واشتكه وراد يذبني سجن لوما الناس الخيره الوكفت ويايه وسحب الشكوه وطلكني

اكدر هسه ارجع لبيت عمي وانسى كل الصار ويجوز اتزوج واخلف واعيش حياتي بس انتم تاكلوها ابنكم يبقى متعه لطليقي وطفولته وحتى شبابه ينتهي لان اكيد راح يتعقد او ينحرف يعني اني سويت فضل الكم من جيت انبهكم

الحجيه : الله يستر عليج دنيا واخره

شرهب : امين خاله بس الستر مراح يصير اذا حجيتو وكلتو طليقته اجت وحجت وراح ينتقم مني واني بنيه بليه ظهر وحدي بلدنيه يتيمه انداس بلرجلين اخاف ذيج المره لكيت الي وكف اليه هلمره ماالكه لان الناس الي دخلت بشغلتي انطوه كلمة هذا الموضوع محد يعرف بيه واني كسرت كلمتهم واجيتكم لخاطر ابنكم ومستقبله يعني هلمره مراح الكه اليوكف ويايه ويجوز انذبح على ايده ومااعتقد انتم تجازون الناس الي تساعدكم وتردون الاحسان بالاساءه وتتحملون دمي

ام مصطفى :غير نريدج شاهد ويانه

شرهب : ماتحتاجين شاهد كل الي عليج تصيرين فطنه وتكعدين ويه ابنج وتجرين لسانه وكولي لزوجج جنت اسولف ويه مصطفى وحجالي واكبر شاهد هو صاحب الانه نفسها ابنج وتكدرين حتى تودي فحص طبي مباشره يبين واذا نكر عدي تكدرون عشائرياً تحقوه اذا القانون مانصفكم

الحجيه : والله يابنتي الشغله كلش جبيره وبلياج ماتنحل

شرهب : تنحل خاله متأكده ابوه سبع وراح يجيب حق ابنه اترجاكم واحلفكم بعزار گلبكم لتكسرون يتيمه اجت لبابكم حتى تنقذ ابنكم وادفنوها بيدكم ضاعت احلى ايامي خلو الباقي منها اعيشه بسلام

ام مصطفى : ماعندج اخ اخت ابن عم اهل

شرهب : عندي بس كلمن حاير بروحه ومحد يتحمل احد ولو عندي ظهر اتزوج هيج واحد واعيش وياه اكثر من خمس سنوات واني اطلع منكم اروح لبيت عمي وذوله هم مايرحمون راح يخلوني خدامه الهم هاي اذا ماشمروني بحضن رجال انكس من عدي حتى اخويه شايل ايده مني اني بلدنيا اتلطم وحدي واختي سنين ماشالت تلفون وكالت شلونج ولا تعترف بيه لان من غير ام ورغم كل هذا اجيتكم وماخفت لان اكيد انتم ناس تخافون الله ومتقبلون انجر بهاي السالفه وانداس كافي ماعندي اهل وضاله مكفخه

اني مطينه بكل الاحوال لاتزيدوها ابوس ايدكم لتورطوني وتخلوني اندم طول عمري لان حافظت على ابنكم

حجيت هيج حتى ينقهرون عليه لو يونس وناي يسمعون كلامي يابه يلزمون الماسحه يكسروها عليه ويعلكوني من كفشتي

الحجيه : هذا هو بنيتي احنا نحلها خلف الله عليج اجيتي وحجيتي خوما نأذيج

شرهب : خاله انتي رايحه لبيت الله

الحجيه : معتمره اكثر من ٣ مرات

شرهب : بلعافيه عليج احلفج بيت الله الزرتي ولمستي وقبر الرسول لاتجيبون طاري وتذكرو اني يتيمه واليتيم حوبته يم الله جبيره

الحجيه : عليه الصلاه والسلام هذا هو بنتي ولا جنج اجيتي

شرهب : وانتي ام مصطفى اباوع عليها هي بيضه وملخت وجهه صارت طماطه

ام مصطفى : هذا هو مااحجي وخلي يجي ابني واجر لسانه واكول لابوه سمعت منه

شرهب : يعني اطمن مايجي طاري ولا حتى لزوجج

ام مصطفى : هذا هو وعلى كولت امي خلف الله عليج اجيتي وجازفتي انتي هم مالج مصلحه غيرج وحده ولا ادير بال لان مو ابنها وعلى وضعج متورط روحها وهي مالها سند

شرهب : دنكت هسه غير تنزل جم قطره عود مقهوره وابجي خرب عندي عيون جافه ماابجي اله بأصعب المواقف كون عندي عيون ناي جان خلصت تانكي دموع هسه والله محتاجتهن حيييل شون ابجي عصرت ردت ولا قطره خرب عمي

تقربت الحجيه وباست راسي مشكوره بنيتي دنكت بست ايدها مشكوره انتي خاله لان مراح تأذوني والله يستر على جهالكم اكوم اروح لان ورايه طريق للنجف ارجع لبيت عمي ادعيلي خاله الله يصبرني على بليتي الثانيه بيت عمي  اني جنت بنيه وماحوني مو عاد هسه مطلگه

الحجيه : اوكفي يمه

راحت واني اباوع على بتها تصب دموع وصافنه

اجت الحجيه وحطت بيدي فلوس

والله ولا اخذهن

الحجيه : انتي مثل بنتي هاي كروتج وراج طريق

شرهب : اني اجيت اسوي شغله لله حتى اتوفق بحياتي وتنحسب حسنه اليه تردين تضيع مني

الحجيه : ولا تضيع عند ربج سوايتج جبيره وعظيمه وان شاء الله يجازيج خير عليها اخذي من ايدي واعتبريها من امج وديري بالج على نفسج الله خلصج من واحد قذر ان شاء الله يكتبلج القسمه الزينه الي تسر گلبج وروحج بيها مثل ماحميتي طفل الله يحميج من شر بني آدم 

ماقبلت اخذ الفلوس وهمه حلفوو مايحجون

طلعت واني اجر بروحي ومقهوره ومكسوره وعيوني بلكاع والخجل ينط مني نط  وبلباب رجعت حلفتهم وهمه تعهدو ابد ميحجون عدتها عليهم اكثر من مره وعود ارجف وخايفه مشيت واني مدنكه الي يشوفني يحط الف بيدي على شگلي اليكسر الخاطر بس عبرت فرعهم رفعت راسي والضحكه تشك وجهي شك روحي اكلها مدبسه ياعدي الجايف عبالك اخليك تلعب بكيفك وتضيع سنين الكحف العشتها وياك هيج بليه مقابل

يابو يشوفني شكلك وشراح يصير بيك

رحت للاسواق اشتريت جم حاجه وحلويات لسيف رغم عدنا بلبيت يونس يوميه يجيب النا بس خفت ارجع ايدي فارغه وتسألني ام حسن واني مااعرف اكذب اجط الحجي كله

رجعت للبيت واخذت سيف وتشكرت من ام حسن وصعدت فوك تمددت بلكاع واغمض واتخيل سحلت عدي واضحك مثل المخبله وهذا سيوفي يضحك ويايه وميعرف ليش

كمت كملت الشغل لتجي ناي تحجي عليه اذا مامسويه التمن كملت حتى الزلاطه وشغلت تلفزيون وكاعده اتفرج طبت ناي من الكليه تسحل بروحها من التعب

ناي : ميته جووع صبي

شرهب : اي هسه كمت صبيت وكعدنا ناكل

ناي : بيج شى

شرهب : هااا شبيهه

ناي : ماادري شكلج مال وحده عدها حجي واكف بلعومها

شرهب : شوفي اني تعرفين بيه مااضم عليج

ناي : ذبيت الخاشوكه من ايدي وباوعت عليها هااااا شسويتي طلابه

شرهب : وليش طلابه

ناي : اني اعرفج تسوين البليه وراها يله تحجين تعلميني بيج بيش هلمره راح نوكع من وره تسرعج

شرهب : حجيت كلشي لناي لو هاي كامت وكفت وتعيط

ناي : انتي متوبين يوميه موكعتنا بمصيبه تعرفين اذا عدي عرف شيسوي

شرهب : ميسوي شى خلي يتلاحك لروحه

ناي : واذا كتلوه خلاص تتحملين ذنبه

شرهب : تره عدي مارسب طفل واني فتنت عليه حتى اذا مات اكول شجاني حجيت ناي عدي اغتصب طفل ويمارس وياه ابشع قذاره بلدنيا هيج واحد حرام يشم الهوا

ناي : واحنا شعلينه ربج يجازي

شرهب : شون شعلينه واحنا نعرف شمسوي والله اعلم جم طفل قبل مصطفى وجم طفل بعده بربج لو سيف الرحمن عليه بمكان مصطفى تكولين هيج مالنا دخل

ناي : شلج بهاي الحجايه

شرهب : شفتي مارضيتي على ابنج ليش ترضي على طفل غيرج هيه امه شمدريها تريدله مستقبل زين ودازته يدرس تالي يرجع الها بعاهه اني خليت نفسي بمكان امه وحق الله كل مااتذكر الشفته اتقيأ منظر الطفل ميروح من بالي اقلها هسه من انام اكول العليه سويته واهله يحتارون بلباقي المهم مااتحمل ذنبه

ناي : يعني انتي ماردتي تنتقمين منه

شرهب : اي ليش اكذب اريد انتقم واذا مات اكول جلب وراح ويطبه طوب من ايده بس بنفس الوقت اريد الله يرحم بحالنا وينجينا من الوادم المتخافه سويت شى زين ومتأكده بيوم الله راح ينجيني من مصيبه او ينجي الي احبهم سواء انتي او ابنج او يونس ومثل ماوكفت ويه ذوله الناس وماسكتت عن الباطل يجي يوم الله يوكفلي الناس الطيبه ولو  الْحٍمَدٍ للـّہ بوجود الله وجودكم مااحتاج احد بس هم اعمل لدنيتي ولاخرتي اني هذا طبعي تعرفين بيه مااسكت وماانام اله اخذ حقي

ناي : واذا وكعتي بيها وصار عليج شى او سوه شى لاخوج راح تتحملين

شرهب : ميسوي لان انطوني تعهد اسمي مينجاب ولا ينذكر حتى كدام زوجها

ناي : والله گلبي راح يوكف من الخوف الشغله كلش جبيره وخايفه عليج

شرهب : تعاي اكعدي اگلي الاكل برد

ناي : يااكل منا لحد متفض هاي السالفه حتى المي مااكدر احطه بمعدتي

شرهب : يمعوده ماكو شى وهسه تشوفين اكعدي ام سيوفي الورد وصير گلبج حديد طول مااني وياج اتحداج تنامين مرتاحه

ناي : ضحكت واني خايفه عليها اي والله بس المصايب وراح زين مافكرتي بلزلم الي انطو حجايه

شرهب : واني شعليه بيهم همه انطو قابل اني انطيت محد عتب عليهم واذا انلاصت اكول الهم نسيت غير تأكدون عليه واذبها براسهم هااا شوني

ناي : كون عمتي هنا جان توبتج

شرهب : عمه اصلاً تصفكلي اذا ماتفاخرت بيه ويجوز تروح ويايه لبيت الولد هاي شبيج من كل عقلج تسكت زين مني وصبرت هاي الايام كلها عمه خوله من الفجر اطك عبايتها وتاخذني

ناي : اي والله مو انتي نسختها

شرهب : يله ام سيوفي اكلي محد يموت ناقص عمر خلي گلبج حديد

ناي : هو شضل بيه من الهبطات

شرهب : كلشي مابيج شحلاتج الگليه واكعتلج خلي يجي ابو سيف يشوف مرته صايره تبدع

ناي : اي ضلي بهاي سوالفج ضلي ااااااخ منج

كل يوم يمر واني بس افكر شصار من سالفه عدي وكل دكه باب اكمز اكول  اجه يأذيها

متحملت وبلغت يونس على الاقل اذا صار شى يكدر يتلاحك الها او اخاف يترصد ليونس ويأذي ومن سمع گلب الدنيا وكالمعتاد اكلتنا بلسانها خلته يسكت

ومتحمل يونس وهو راح يسأل علمود ليتفاجأ وبحجه العقد مالتها لازم يجيبه

يوم جمعه فارشه ملازمي وكتبي واقرا اجه يونس من وكت

الله يساعدك حبيبي شنو هذا البيدك

يونس : وين شرهب

ناي : شوشه تعاي

شرهب : من ينادي

يونس : هاااج

شرهب : شنو هذا

يونس : ورقه الطلاك جابها خالو عمران للمحل وراح

شرهب : ياااا ينطي العافيه همزين

ناي : اكلج اني نسيت شى هو مو عاقد سيد شون بعد محكمه ذاك اليوم تذكرت ونسيت اسألج

شرهب : غير صدق العقد مالتنا وسواه محكمه

ناي : شعجب

شرهب : ماميت عليه علمود الزوجيه يمكن بيها ٥٠ الف على الراتب وراح سواها وداعتج كلشي ماادري اخذها مااخذها بس عرفت صدق العقد واخذ المستمسكات مالتي

ناي : زين المؤخر والمقدم النفقه وهاي الامور

يونس : تدرين شكد المؤخر مال اختج

ناي : شكد

يونس : ٢٥٠ الف

شرهب : سعر طلي وهم مو طلي سمين بيه جم كيلو لحم اشتعلت عبيد وين ماحطيت رجلك

يونس : وخالو انطه فلوس لمحامي واستعجل بلطلاك خفنا لا يگلب وهو دينار ماصرف حتى الاستنساخ اخذ فلوسه

شرهب : شكد عيب من خالو

يونس : انطيته اليوم كل فلس صرفه مو اني الي اخلي الغريب يدفع لاختي هو ماقصر وفضله ماانساه العمر كله هو والولد بس مااقبل الفلوس هم منهم اني عندي والحمدلله وجنت متواعد اليوم وياه اخذت فلوس وانتظرته بلمحل لان كال مااكدر اتأخر وراه شغل واني زعلت وماخليته يروح اله ياخذ كل فلوسه

شرهب : ركضت وحضنته وابوس بيه اروح فدوة لاخويه

يونس : اريد شى منج

شرهب : غسلت هدومك والله ومسحت غرفتك

يونس : اريد ترجعين ادرسين مثل اختج

شرهب : ارجع اقرا وامتحن ماعاد الحيل الاولي

يونس : مو انتي عمرج ٩٠ ومتكدرين بله كسل واقري وامتحني واحنا نساعدج

شرهب : استحي امتحن ثالث بله ناي امتحنت مباشره سادس

ناي : شكوو بيها امتحني ثالث وراها سادس ليش حرامات

يونس : الاحد اروح اسأل بلتربيه اذا التقديم للخارجي بعده اقدملج حتى تمتحنين

شرهب : خليها السنه الجايه الله عليك مصار جم يوم من خلصت من عدي اريد اركص اغني اكمز

يونس : امتحني ونجحي وراها شسوين سوي اريد اتباهي بيجن ميحقلي اكول شوف خواتي مثقفات واصلات ويكدرن يعتمدن على نفسهن مااستاهل اشوف خواتي صاحبات شهايد

ناي : وانت متدرس

يونس : صعب كلش ادرس واركض على العيشه لهذا اريد اشوف حلمي بيجن

شرهب : راح ابجي هااي شنوو والله قهرتني

يونس : شكد لوتيه مبين من سنونج الي اشوفهن

شرهب : سديت حلكي هااا زين هيج

يونس : الاحد اروح واذا التقديم بعده حضري روحج

شرهب : خربت والحمزه

ناي :راح يونس وطلع التقديم بعده مفتوح نهايه الاسبوع ينسد وخطيه عاف شغله كله ويركض بلمعامله وكملها وحتى ملازم مال الثالث اشترالها وهي تباوع تك عين اعرف متريد تدرس من وره عدي كرهت حتى الدراسه بديت اشجعها ومرات افرغ نفسي واقريها هي حيل ذكيه وشاطره ومن تحط راسها بلدراسه تنجح

صار شهر على طلاكها بهاي الفتره مهدي يخابر ويسأل واني على كد السؤال اجاوب واحلى شى كل ميخابر وره ما يسأل عن سيف يكول لابسه الحلقه تكول هيه الي رابطتني بيه

امشي بلكليه ويايه صديقتي انراجع امتحان بعد شويه ندخل جان كوز يعني امتحان يومي

لمحت مهدي وصلاح جايين واني كمت ابلعم كلت صارت مصيبه

استأذنت من صديقتي ومشيت بأتجاهم

وجهي انخطف لونه وحيل خفت صاير شى

مهدي : وعليكم السلام

ناي : عفيه صاير شى سيف يونس

مهدي : ماكو اي شى شبيج جنت بشغله اني وصلاح بغداد وكلنا نمر نسلم ونروح

ناي : صدك تحجي

مهدي : مجذب قبل عليج

ناي : باوعت على صلاح مستحيه لان مسلمت شونك صلاح

صلاح :  الْحٍمَدٍ للـّہ انتي شونج ام سيف

ناي :  الْحٍمَدٍ للـّہ

مهدي : واني ماكو شلونك

ناي : هياتك كدامي كلشي مابيك

مهدي : خطار عندج اليوم متعرفين الاصول اعزمينا

صلاح : احنا نعزمها

ناي : اباوع عليهم ذله من كل عقلهم جيتهم ابد مو خاليه

ناي : عندي امتحان اكمله واعزمكم

مهدي : راح نروح للكافتريا وعود تعالي هناك

ناي : تندل

مهدي : احسن شى نبقى ننتظرج هنا ونروح سوه

ناي : حسيت بهذا تصرفه يخلي الطلاب كلها تشوفني ويااه

مااشي مااتأخر امتحن واطلع

رحت دخلت امتحنت ولا جاوبت رغم قاريه لان بالي يمهم طلعت اركض لكيته واكف ينتظرني وحده وين صلاح

مهدي : عنده صديق بقسم الهندسه راح يسلم عليه يله اعزميني

ناي : ليش اجيت مهدي

مهدي : مرتي واجيت اشوفها

ناي : كعد تسوي تصرفات غريبه مامتعلمه عليها منك شديصير

مهدي : انتي محمله الامور هوايه ومكبرتها اني اجيت اشوف مرتي بلكليه واكعد اشرب وياها جاي وارجع كفرت لو اجرمت

ناي : گلبي لاعب منك

مهدي : زين بعدج تسمعين الكلام وباوع على ايدي

ناي : مو لخاطرك حتى اتجنب حجايه او حرشه مثل ماكلت انت

مهدي : يله جعت تره

ناي : رحنا للكافتريا جان يمشي لزك ويايه شوي ويلزم ايدي كعدت وهو كعد وقرب الكرسي مني باوعت عليه وكتله قسماً بالله جيتك بيها انه ابتسم وكال

مهدي : جاي كهوه عصير ام سيوفي

ناي : اي شى ودرت وجهي منه لو افهم لوين تريد توصل جان ارتاحيت

جاب عصير ولفات اثنين وكعدنا ناكل الموقف كله غريب عليه وهواي طلاب من مرحلتي استغربو من شافوني كاعده ويااه لان بطبعي حتى سلام نادراً مااسلم

اجت صديقتي وعرفتها مكدرت اكول الها اقاربي لان تعرف بيه متزوجه

كتلها ابو سيف زوجي وهي سلمت عليه وانطتني ملزمتي جانت يمها وراحت

مهدي : همزين ماكلتي ابن خالي بس

ناي : وهاي الحلقه بيدي شنو للدعايه صفن بوجهي وكاال

مهدي : انت ليش متغيره

ناي : شون يعني

مهدي : عبالك كل مااشوفج اشوف شى جديد بيج مشفته طول السنين الي جمعتني بيج

ناي : لان جان بالك يم غيري لو نسيت

مهدي : كلتيها جااااان

ناي : انت ليش لهسه مطلكت

مهدي : مااطلك وكلتها قبل وعايفج براحتج ويجي يوم يخلص صبري وارجعج

ناي : شسوي بيه وانت متحبني

مهدي : لتحجين بكيفج ولتفكرين نيابه عني

ناي : متحبني انت مجرد مستعز بيه او مستخطيني وحاس بذنب اتجاهي

مهدي : يجوز بالاول صحيح بس اكو شغلات من تصير بعيده عنك تعرف قيمتها

ناي : شغلات مو بشر

مهدي : احنا بلكليه وهيج نقاش يوترني ويوترج اجيت اشوفج

ناي : وتثبت وجود تره اني زوجها موو

مهدي : اذا تعرفين هيج ليش تسألين

ناي : تغااار مووو

مهدي : اكوم اروح محتاجه شى

ناي : دومك خشم ومتحب تتنازل

مهدي : انتي ارجعي لحضني وشوفي التنازل شلونه

ناي : وليش صابر عليه

مهدي :لان اريدج برضاتج حتى ارجع اشوف الحب الي بعيونج من جنتي بحضني اشوف اللمعه الي هسه طافيه بيها بديالى اذا البرتقال كطفته گبل وكته مابيه طعم ولا ريحه يبقى اخضر ما مستوي واني اريد زرعتي يوم مااكطعها كله طعم وريحه ارتوي بيها

من العجله الندامه ياام سيف

ناي : ولا اخليك بيوم ترتوي

مهدي : شعندي صابر والي خلق هاي عيونج الجنهن سواد الليل بليل كمريه لا ارتوي بيج لحد كطع النفس

ناي : درت وجهي منه اضوج من يحجي بثقه

مهدي : مشكوره على الضيافه بوسيلي سيوفي

ناي : عافني وراح واجت صديقتي كعدت لان جانت كاعده ومن شافت مهدي راح اجت

رجلج حلوو وشخصيه

ناي : ايييي خاصه الشخصيه جبل جليدي

اجت دلال كالت منو هذا الكاعد ويه ناي وكتلها رجلها

ناي : مو بيدي حلقه اكيد رجلي وين احطها بعد على كصتي

لتتعصبين مبين الفضول كتلهم يله كومي ورانه محاظرات

رجعت للبيت ومبقى شى وندخل ٢٠١٣ كلها اياام

اجه يونس العصر مو من عوايده يرجع هيج وكت دخل وصااح وينج ام المصايب

شرهب : اكيد عليه ماكو غيري تسوي مصايب بهاي العشيره كلها

ناي : شبيك يويو صاير شى

يونس : رحت اتقص على سالفه عدي من يوم ماكالت ناي واني كل كم يوم اخذلي فره بلمنطقه وعندي ولد يشتغل بلشورجه اتسوك منه بيتهم بلفرع الي وراكم كمت اضطر اروح بحجة اسلم عليه وهم اشمشم اخبار

شرهب : فرحني بروح امك

يونس : داكين بيت عدي وصايره هوسه الجماعه مامشتكين بلمركز مسويها عشائرياً

ناي : اي وشصار

يونس :  البارحه صارت الكعده ويكلج ابوه جايب من كذا عشيره شيوخ

شرهب : اي عمي هواي بلسوك يحبوه ويردون خاطره اكيد نخاهم

يونس : وذولاك هم طلعو مو هينين رادو كتل وصفت بفلوس

شرهب : شكدددد

يونس : ٢٥ مليون ياشرهب مليون ينطح مليوون

شرهب : كللللوووووووًشششش

يونس : وجع فوكاها تهلهل

شرهب : اني وصلني للموت وكتل ابنه علمود ٥٠٠ الف متريد اهلهل وهمه ماخذين منه ٢٥ مليون يعني اذا عبرت عليه عشائرياً راح يجلط من وره المبلغ هذا ربه دينه الفلوس ابوه يموت كدامه عافه في سبيل ميدفع فلس موو عاد يدفع ٢٥ مليوووون بووووياااااي

يونس : مو بس هيج يطلعون من البيت ومن بغداد كلها صارتله فضيحه تسوه عمره لج دمرتي دمار

شرهب : شعباله ياكلني لحم ويذبني عظم انطوني درب العب جوله وخرووو

شغلولي ساجده عبيد اريد للفجر اهز وضاعن فليساتك اكلهن السبع وضاعن فليساتك

ناي : وعرف شرهب وراها

يونس : مااتوقع جان اجه

ناي : الله يستر هاي الخبله تردح واحنا خايفين عليها

شرهب : خلي يحير بروحه اذا ماانجلط

ناي : بقينا ننتظر اخاف يصير شى وهاي تكوم وتكعد تركص

مر كم يوم وماكو اي خبر من عدي

اغسل مواعين واغني ومندمجه وسيوفي يمي ياكل اندكت الباب مسحت ايدي بملابسي وطلعت اشوف منو نزلت من الدرج وصحت منوو

مرتضى : اني مرتضى

شرهب : يااا شعجب فتحت الباب هااا يمعود الچلب العضك كتلناه وين مختفي

مرتضى : كولي شلونك اخبارك اكلتيني وشربتيني نبقى هيج واكفين بلباب

شرهب : تعال طب

صعدنا ودخل للهول اوكف اجيب سيف واجيك

جبت سيف من المطبخ وكعدته

اي ابن عمي شلونك كول بنات عمي ماتن عاشن صار بيهن شى ولكم ولا واحد بيكم عنده ذره محنه خابرناك وكلت بلبصره كول وراها شصار بيهم اروح اسأل عمي خابر الله اكبر تلفون بيدك ومدك وتشوف حالنه ولو منو ابوك وامك

مرتضى : اني لو جاي وجايب ويايه سجينه حاده حتى اكص لسانج انطي صبر عرفي وين جنت عفيه بنيه لسانج سابق عقلج

شرهب : اي بيعهن علينا هاي كلاواتك اوكف يمكن اجت ناي

فتحت الباب طبت ناي

ناي : هاي منو عدنا مااصدك شعجب تذكرتنا

مرتضى : رحمه لجدي فرج لتعيدين النشيد نفسه هستوني اجيت واستلمتني اختج

ناي : ماطول استلمتك شرهب معناها كفت وفت اسكت اني شخبارك والله اشتاقينالك تعاال حبيب امك وحضنت سيف وبسته وخليته بحضني

مرتضى :  الْحٍمَدٍ للـّہ انتم شلونكم

ناي : ماشية

مرتضى : ماطول انتي هنا معناها اطلكتي

شرهب : لعد تريد ابقى على ذمته الخايس

مرتضى : فهميني شصار بوكتها كلشي معرفت بس عليكم شكووة ويونس اخذوه على شنو هاي الهوسه كلها

شرهب : شوف يامحفوظ البگه والسلامه

رجلي طلع مخنث وچلب وشاذ وشكوً شغله عوجه بيه وسولفت اله بشكل مختصر وهذا فاك حلكه

مرتضى : اني من سألت عنه كالو هواي ناس عليه واحد حقير وموخوش ادمي وبخيل واشكال السوالف اريد افهم الناس شون تأمن بهيج واحد وادز جهالها

شرهب : الناس بمنطقتنا مجموعتين ناس تحمد بيه وذوله اكيد جهالهم عنده ويدرسهم وينجحهم وناس تكوم تكعد تسبه وتموت منه ذوله لاهو عنده مصلحه وياهم حتى يجاملهم ولا همه عدهم لهذا يعرفوه على حقيقته لهذا من سألت بوكتها والناس حجتلك كالت الحق لان عدي واحد نكس وكل حقاره الدنيا ملمومه بيه تصور اكو وحده بمنطقتنا جهالها اثنينهم يمه من تحجي وياه بعد شويه وتسوي نبي استغفر الله من اللواكه وبس جهالها ينجحون وتخلص السنه تمشي وتحجي عليه مع الاسف هواي ناس بوجهين وكت مصلحتهم حتى الجلب يصيحوله سيدي وكت ماكو مصلحه يضربوه بلحجار وهو يعرف شون يداري خبزته لك نص الطلاب يرسبهم حتى ياخذون دروس يمه وراها ينجحون بدرجات عاليه لان يقريهم زين بلبيت شايف هيج بشر ومن يجون الاهالي على جهالهم ذاك الاسلوب والادب والاخلاق تنكط منه اضل فاكهه حلكي علمود جم فلس

مرتضى : بس سالفه يتحارش بطفل كلش جبيره ويستاهل الاعدام عليها

شرهب : هواي ناس تستاهل الاعدام كون هيج احطهم كلهم كدامي وبيدي اعدمهم ومن ضمنهم جان تكرصني نااي ردت اكول امك وخالتك وابوك وعمك بس ناي كرصتني وعضت شفتها يعني اسكتي

مرتضى : المهم خلصتي منه الله يعوضج بالاحسن منه

شرهب : التووووبه تعرف شنو التوبه ابقى هيج حره اني اتزوج اله تخبلت الي يعيش ويه عدي تحلف يمين متتزوج بعد اصلاً تكره الرياجيل كلها

مرتضى : هذا حجي لان هستوج اطلگتي

شرهب : خليني حره نفسي ماكو ثور يحكمني

مرتضى : خلف الله عليج صرنا ثيران

شرهب : اني كلت انت جبت طاري اسمك كو تحجيني

مرتضى : وانتي خاتون مناويه ترجعين لابو ابنج حلت الج الكعده هنا ابنج گبر ومحتاج ابوه وضاله لا مطلكه ولا متزوجه وهذا يونس كاعد وساكت غير يحلها

ناي : عوفك مني شغلتي مليوصه  انت شعجبت تأخرت يله رجعت من البصره وليش تأخرت علينا مايوم سويتها الله شاهد من نحتاجك نلكاك

مرتضى : همه منطيني مفكة بلبدايه روح لبيبيتك غنيه مريضة ومحد يوديها طبيب انطتني امي فلوس ورحت من بغداد للبصره حتى اوديها واكلت وحل روح وجيب وتعال وسونرات وتحاليل واشعه وادويه ومن طبيب لطبيب امي وخالتي يردن يرجعن غنيه عمرها  ١٣ سنه مراهقه يابه هيه المره جبيره وتعبانه واكيد تتمرض هوايه لا شوون امنا لازم متتمرض كون تلبس اسف يابابه واطلع بطنها وعلج وتفتر مايقتنعن هاي الامراض طبيعيه للي بعمرها ومنا موتت جاسم أذتها اكيد توكع لا ميصير روح افتر بأمنا ونريدها رامبو

شرهب : وتالي صارت هيفاء وهبي

مرتضى : لو اشتغل بيها ١٠ سنين سمكره وصبغ وبولش ماتصير محمد هنيدي مو هيفاء احوووي على هيفا هاي لو بيبيتي مثلها اكابلها واكعد حتى امي وابويه اتبرى منهم

شرهب : اني لو منك من زمان متبريه منهم

ناي : لج لسانج

مرتضى : عادي متعلم عليها عوفيها تحوص اذا مذبت حجايه بكد راسها مترتاح

شرهب : يمه اروح فدوة لابن عمي اليعرفني اي والله اذا مااحجي اطك واموت خليك هيج سبورتي واسمع مني من الاذن اليمنه وطلع من اليسره ولتركز

مرتضى : هو هيج اسوي وياج

ناي : زين كل هذا الوكت وانت يم غنيه

مرتضى : رجعت وراها لكيتها عالكه من الروس

شرهب : بربك شصاير

مرتضى : اخاف احجي وتوصلون وتسون مشكله

ناي : المن نحجي بربك شو كاعده وجهي بوجهه هاي الشعنونه ومن وره دوامي مكعد اروح لكربلا وعمه خوله اذا رادت تعرف شى تخابرك تنكتك نكت وتاخذ كلشي منك على الجاهز بعد المن اسولف قابل اروح لامك واكول الها مرتضى سولف النا

مرتضى : من خنكتي اجيت صار ٣ ايام افكر ادخل لو ابلعها واسكت

شرهب : غير يحجي الدره مالته ويفضنا

مرتضى : خلي اكوم اروح اشرفلي

شرهب : لزمت ايده بشرفك اكعد عليك الله والله احااول هااا احاول الزم لساني وماانبص بس احجي شصاير وجهك بيه كيلوات حجي واذا رحت وطلعت واني مااعرف شكوو وشصار تلكاني بلجمله العصبيه صاير بيه جلطه من التفكير

مرتضى : ياريت ونخلص منج

ناي : اكعد الله عليك الشغله بيها امك لو خالتك متقبل غلط جان يكعد وذب نفس بضوجه

مرتضى : موتني وحدتهن تشتري المشاكل والعركات شرايه صار جم يوم روح وتعال ابتليت بلوه ذاك المطي سافر وهج وعاف ابوه وامه براسي اني شنو ذنبي شيصير مشكله تعال يامرتضى واوكف بنصهم وفاككهم

شرهب : قصدك مهند

مرتضى : اكو غيره مطي هج وعافني وامه ادك وتلطم تريد بس تحجي وياه

ناي : عوفك من مهند لان الصراحه مااحب اسمع اي خبر عنه

شرهب : اني احب اسمع سدي أذانج كمل

مرتضى : تسمعين او متسمعين محسوب علينا ومن دمنا

ناي : عابت هيج دم

مرتضى : من يوم مصارت شغلتج وراها رجع لتركيا وهو ميحجي ويه امي كطع بيها كلش وكال الها اعتبريني ميت ماطول الشى الي يأذيني سويتي والصار كله انتي تتحملين ذنبه وخالتي تخبلت تريد بس تراضي لو تحجي وياه وهو قافل فد قفله عليها ارقامه غيرها واي خط رجعه ماخله ويه اهله بس اني خابرني وكال اخاف يصير شى عود قصده عليج انطي خبر

ناي : من تخابره كول اله تكول ناي تزوج واسس حياتك وعوفني بحياتي كافي السويته بيه كون حتى يوم القيامه ماانجمع بيك حتى لا اشوف وجهك اذا تلاكه المختصمون

مرتضى : السواه جبير بحقج بس من صدمته ليش واحد ينكر مهند حيل يحبج

ناي : عفيه مرتضى لتفتح جروح ماعودت انسدت شويه دخيل الله

مرتضى : يابه ماافتح نرجع لسالفتنا تالي خابرت على مهند امه باست رجلي اله شويه بس تريد تسمع صوته هو سمع صوتها تخبل وكال الها مالج ابن اعتبريني متت وسده بوجهه

شرهب : حييييل كفوو باوع مرتضى عليه حطيت ايدي على حلكي سكتت

مرتضى : هددني اذا انطيتها رقمي لو عدت هاي الحركة مره ثانيه اخابر من رقمي حتى تحجي وياه حتى اني يلغي التواصل ويايه تالي كتله يمعود هاي امك ميصير هيج تسوي ساعه ونص انشل حلكي من الحجي ومفاد كال اله اخليها بحصرتي مثل ماخلتني بحصرت ناي واتمناها

شرهب : وانت هسه ضايج لان هو قاطع امه

مرتضى : لا يمعوده واذا قاطعها اني شكوو ضوجتي عالكه بين امه وابوه وهو كال ماادخل وشال ايده نهائياً منهم وكل شويه امي روح الهم ولتخلي خالتك وحدها

ناي : ايييي ليش عالكه شصار

مرتضى : صار جم سنه الوضع هادئ مناوشات وعمي واكع بين مرتة وبين خالتي سممن عيشته اجت ايام ينام بلمحل من وراهن لان لا هاي تسكت ولا هاي

لحد قبل اسبوع جيرانه بيت مرته الثانيه اجه عليه كال اله سياره دوم تجي عليكم للباب وينزل ولد شاب وتطلع مرتك تحجي ويااه وجم مره يجي بليل ومره شفته دخل بيتك وساعتين يله طلع بنص الليل واني اعزك وماارضى الشى الموزين عليك ولا على سمعه المنطقه لان الكل بدا يحجي

ناي : لا بربك معقوله اشواق مصادقه على عمو

شرهب : حقها هو خالج هم رجال ايييع اشافت منه الرعنه

ناي : اسكتي انتي مهما كان ليش انتي مو عاشرتي عدي مجان سويتي مثلها

شرهب : يايمه لو اموت

ناي : شفتي شكد صعبه رغم رجلج نذل

وتالي شسوه عمك

مرتضى : لزمها شبعها كتل كسر ايدها ورضوض بكل جسمها وتمزق انلعب بيها لعب وجهه من كفاها مينعرف وشمرها بره البيت وطلكها

شرهب : واكيد خالتك ركصت الها بجفيه

ناي : البيت مو بأسم اشواق

مرتضى : اي بأسمها وهي بس صحت بلمستشفى اشتكت عليه واخذوه وعمجن هسه بلسجن بتهمه التعدي ومحاوله القتل

شرهب : العببب وحلوت الدنيا هنا مااسكت لو تحطون تيب على حلكي وكمت اطك اصبع

ناي : اااخ منج جريتها وكعدتها خلي نفهم وتالي

مرتضى : اني اروح واجي على المركز ورحت هم على جيرانه وكال اشهد وياه الدوخني مرت هذا الرجال طلعت اعرفها وطلعت صديقه امي

ناي : هاااا من هيج امبين ذابين تهمه على البنيه خالتك وامك يموتن على الطعن بلشرف

مرتضى : الرجال من حجه صحيح ماجذب صدك اكو هيج شى اني عندي صديق بنفس المنطقه رحت اله كلت هذا شاذي ويعرف كل صغيره وجبيره بلمنطقه ومنو مصادقه ومنو شريفه المختار مو مثله اكيد راح يجيبلي ساس الموضوع كله وردت هم اجمع شهود حتى نحط الحق على اشواق واهلها وانطلع عمو  من حجيت للولد طلع صحيح كلام الجار اكو شاب يتردد على بيت عمي ويعرفه ويعرف اهله بس طلع ميجي على اشواق يجي على اختها

شرهب : ليش اختها عايشه وياها

مرتضى : اي وامها مرات تروح لبيتها ومرات تبقى يم بناتها متنقله

ناي : يعني اختها تلعب وتصادق واطبب زلم واشواق اكلتها على الحاظر بس الرجال ليش كال لعمو مرتك مكال اخت مرتك يجوز متقصد وهي ماكو غيرها لو مرت الرجال مفهمه زوجها بأن اخت اشواق هي مرت عبيد حتى من يشوف هاي اللقطات كدامه يصدك هي موزينه لو قنعت رجلها يذب هاي السالفه براس اشواق لخاطر امك لان صديقات

مرتضى : هي مي خابط واشكال بيه وهسه مااعرف شون افضها

شرهب : لتعب نفسك وعوفهم همه يحلوها

مرتضى : ادري بيج تتمنين عمو يخيس بلسجن

شرهب : لا اتمنى ولا شى كلمن يشرب من كلاصه قابل اني صبيتله هو صب بيده وشرب

منو كال اله يتزوج اثنين

مرتضى : عمتي غير لعبت براسه خلينا ساكتين

شرهب : وهو كزه ياعيني ميعرف طفل تمشي خوله تاتي تواتي هو عمك كاتل روحه عليها ومصادقها لاشواق ومعود بزته عمتي وركض تزوج

ناي : وصالحه شكالت

مرتضى : كيفت تكول عيد عدها وحتى كالت عوف عمك هو يتجازه ويه روحه بس ابويه مقبل يعوفه وهم عالكه بيتنا لان امي هم متريد لا اني ولا ابويه ندخل

شرهب : ماشاء الله على حنية ابوك اكيد عنده مصلحه ويريد يطلعه

ناي :اااخ من خالتك كلت تضل ساكته هاي المده كلها معقوله ولو هي ماكعدت كل فتره حسب كلام عمتي تسوي ملعوبه بأشواق واشواق تركض للشيوخ وهاي السوالف تفك منها شافت اشواق هاي السوالف مكعد تمضي بيها فكرت بهوايتها الثانيه وهي الطعن بلشرف ولكت نقطه ضعف مع الاسف اخت اشواق خلت اختها لكمه سهله بحلك صالحه

مرتضى : عكب باجر راح ناخذ ناس ويانه ونروح لاهل اشواق بلكي تسحب الشكوة

شرهب : كون ماتسحبها ويبقى بلسجن يابويه سنه ٢٠١٢ سنه عظيمه هم خلصت من عدي وهم فرحت بعمي ربي ديمها نعمه يوم ماافرح بصلوح وب وحده بالي لتركز ويايه

ناي : كومي صبينا الغدا متنا جوع

مرتضى : اروح اني

ناي : والله ولا تروح تتغدا يمنا اليوم يونس كال مااجي على الغدا انت بمكانه

مرتضى : شمسويات اكل عاد تعرفن اطبخن لو من اطلع منجن اسوي غسيل معده

شرهب : مو اني الطبخت ناي اني بس التمن

مرتضى : ماطول تبريتي الله يستر

ناي : بقى مرتضى كاعد ويانه اتغدينا وضلينا نسولف الحلوو بمرتضى يمنا يسولف كلشي رغم يعرف نكره اهله بس عادي ممهتم لان شاف بعينه كل الصار بينا من جوه راسهم

شرهب : صدك شخبار سما ذيل امها

مرتضى : هاي الفتره امها سجلتها دورات مال دراسه تريد ترجعها كوه من سمعت ناي دخلت كليه طكن فيوزاتها

ناي : الله يستر من عيونهن قابل دخلت هيج شالوني ودخلوني للكليه غير تعب وقرايه

مرتضى : عجيب امرها لخالتي عقلها مدري شون ميوكف بگلشي يفكر تريد تسما تنجح وتدخل كليه والله شنو على اي اساس بت ذكرى احسن من بتي ومن جهه تفكر شون ترجع مهند لحضنها وهو نافر منهم وجهه تفكر شون تنتقم من رجلها ومرته كلها تريدها سوه وكون متخسر

شرهب : وامك

مرتضى : من يوم ماردها ابويه على ذمته وهي ابد مارجعت مثل الاول دوم تعارك وتهوس وتطلب شغلات هوايه منه وهو اكيد ميقبل وهي تعاند بيه وشكو شغله يكرها تسويها يعني البيت اذا يصفى يوم ثاني يوم محترك

ناي : وانت من هاي الهوسه كلها وين

مرتضى : اني ضايع عمري ٢٨ سنه لا عندي وضيفه ضال تحت رحمه ابويه وشغله ولا متزوج وعندي مره وبيت وجهال ومستقر ضال اتلطم هنا وهنا اختنكت حييل مرات افكر اهاجر وتالي اكول وين اولي واني حتى فلوس سفر ماعندي وذوله هم منو الهم

شرهب : ليش متتزوج احد لازمك

مرتضى : واجيب جنه لساهره غير ثاني يوم اطلعها بلقنادر ليش امي تعيش جنه وياها اني ابنها مرات اهج بالايام منها وماارجع لحد ماارتاح ليش اورط بت الناس ويايه واتحمل ذنبها

ناي : اشتغل بعيد عن ابوك افتحلك شغله واسترزق منها

مرتضى : ميخليني عبالج محاولت جم مره اشتغل ويخرب عليه يابه عوفني اكون نفسي مااحتاج منك ميقبل يريدني جوه ايده وبنفس الوقت بفلوس قليله هواي سوالف لو احجيها راح اضل شهر هنا

شرهب : ضل شعندك متونسين وياك والله اقلها نعرف سوالف ذاك البيت الخايس

مد ايده وضربني على راسي

مرتضى : محد عام عليج غير لسانج دمهن يمشي بيج

شرهب : منو هنه

مرتضى : عمتي وامج

شرهب : عمتي اي وافتخر الثانيه لا ومااعرفها ولتجيب طاريها

مرتضى : ضجتي

شرهب : اي ضوجتني

مرتضى : هههههه من اجيت لهسه بگلبج تسبين بأهلي وساكت وبس جبت طاري جليله طفيتي

شرهب : وحده بوحده تسويها

مرتضى : وياج انتي بلذات مااسوي وحده بوحده لان مااكدر للسانج يله اروح اني محتاجات شى

ناي : الله وياك وتعال زورنه لا تكطع بينا

شرهب : وجيب اخبار عمك ابو النسوان بلكت الجيه الثانيه تكول انحكم اعدام حتى اذبح لوجهه اضحيه واوزعها

مرتضى : ههههههه قابل كتلها خلاص لاشواق هو طبطبها هسه نحلها وعود وزعي مي

شرهب : المهم طب السجن ونام هناك تسوه عمره كدام جماعته والسوك مرته اشتكت عليه يبووو شكد حلووة الدنيا من تفتر كون ابوسج يادنيا

مرتضى : هاي اختج شاخطه عينج عليها

ناي : هههههه اي والله ولتخاف مراقبتها

شرهب : تغارون مني لان الي بگلبي على لساني اروح فدوة لنفسي الي تخبل ماكو مثلها يماااااي اجنن واهبل

مرتضى : الله يشافيج

ناي : راح مرتضى واني دخلت سبحت ونمت وعفت سيوف ويه شرهب هو هاي الفتره روحها بيه وهو هم متعلق بيها لان على خبالاته وهواه يكمزون ليل نهار بس دوم عيني عليه لان صارتلي خوفه من الي صار بيه قبل

كعدت من النوم وبعدني نعسانه اجاني اتصال من حوراء

هلوو حوري شونج سمعتها تبجي شكوو ولج

حوراء : عفيه نايه اني بورطه

ناي : ياستار شكوو

حوراء : عبدالله رجع

ناي : ياعبد الله

حوراء : ابن خالي عمران اللي بلخارج شبيج

ناي :  الْحٍمَدٍ للـّہ على سلامته وشبيج تبجين

حوراء : موووو

ناي : مووو شنوو يمعوده جمدتي دمي شكوو

حوراء : مو عبد الله قاري فاتحتي قبل ليسافرمن جان عمري ١٧ سنه وتوقعت بعد ميريدني لان انسد الموضوع ومحد فتحه والقران ماعندي شى ويااه ومااحبه ولا اريده حتى نسيت سالفه الفاتحه  واتفاجأت اليوم راجع يتمم الزواج

ناي : لا بربج ضربت على وجهي وعطت ويوووونس

يتبع ...

#الابواب_الخمس

البارت التاسع والعشرون /الجزء الثاني

للكاتبة Reem

مايحس بفراگك العنده بديل

لا تهم العايفك هسه بحضن

الدله عدها هواي ماتوگف عليك

الغيم ينطي بلا ثمن خلك  فطن

غيرتك ومناشغك ضمه لعزيز

الشوك  مرتاح التعب بس للگطن...

ناي : مووو شنوو يمعوده جمدتي دمي شكوو

حوراء : مو عبد الله قاري فاتحتي قبل ليسافرمن جان عمري ١٧ سنه وتوقعت بعد ميريدني لان انسد الموضوع ومحد فتحه والقران ماعندي شى ويااه ومااحبه ولا اريده حتى نسيت سالفه الفاتحه واتفاجأت اليوم راجع  يتمم الزواج

ناي : لا بربج ضربت على وجهي وعطت ويوووونس

حوراء : ليش اني خابرتج شسوي عفيه

ناي : اوكفي خلي استوعب الحجي مالتج بالاول لشتي كلها ترجف انتظري رحت للمطبخ وشربت مي اريد اتنفس جن واحد وضربني على راسي

دخلت للغرفه مره ثانيه وكعدت

اول شى بطلي بجي وفهميني شون مخطوبه واني ٤ سنوات يمج وعايشه وياج وماكلتيلي

ولا بيوم سمعت لا منج او من امج وحتى من ام عبد اريد افهم خطوبتيش هاي محد يحجي بيها والكل ضامها

حوراء : جان عمري ١٧ سنه واجوني خطابه وخالو مقبل وكال حوراء بنتي ومتروح لغريب وطلب من عبد الرحمن يخطبني

ناي : عفيه عبد ياهو التجي تعال اخطبها وتالي لتبجين خلي افهم

حوراء : اي اي مسحت دموعي وكمت احجي

وتعرفين عبد ميقبل يتزوج وكال حوري مثل اختي رجع خالي طلب من عبدالله وهم مقبل تالي گلب الدنيا عليهم وكال الهم واحد منكم يتزوجها واله اغضب عليكم ومالكم عيشه يمي عبد الله جان يريد يسافر ويكمل دراسته وخالي ميقبل يخاف عليه ورافض رفض قطعي سالفه سفره تالي اجه عبدالله وكال اخطبها بس اسافر اكمل شهادتي وراها من اكمل اموري واحصل الجنسيه اسحبها وخالي قبل ورحب بلفكرة

ناي : وامج

حوراء : امي قبلت لان تحب خالي وهم كالت خيره ميروح للغريبه وعبدالله خوش ولد ومناسب حتى مهدي قبل واني بحكم عمري ولا اطب ولا اطلع قبلت كلت مابيها شى يبقى ابن خالي واذا صدق بكلامه اسافر وارتاح من هاي الخنكه

وقرت فاتحتي بينا بدون حظور احد جانت الفاتحه مثل ربط كلام  لان بوكتها جانت الظروف تعبانه والسقوط هستوه صاير وناس ميته وعمي ابو صلاح مصار شهرين من متوفي وحزانه عليه وعيب يكولون خطب لابنه واخوه مصار شهرين من متوفي الكل تكتم على الخبر وانقرت الفاتحه وطلبو من عبدالله من تعبر سنه خالو حازم ابو صلاح يجي ويعلن الخطبه ويسوي مهر وياخذ معاملتي ويااه

ناي : زين وشصار

حوراء : مرت سنه وماااجه عبدالله بحجه الدراسه ومااكدر اسافر للعراق والوضع تأزم اكثر وسنه بعد سنه وهنا امي تخبلت وكالت محد يجيب طاري الخطوبه واذا اجت قسمه زينه لحوري انطيها لان عبدالله مجان كد كلمته وامي جانت تاخذني وياها حتى عسى انخطب واني مااروح ومرات نتعارك وتاخذني بلكي تشوفني احد من كرابتها وانخطب حتى تحط خالي وابنه تحت الامر الواقع يايكمل كلشي عبدالله وياخذني ياتفض وانخطب لغيره وهي مجرد قرايه فاتحه حتى حلقه ماكو

ومحد تقرب ولا خطب اثاري اكو من سامع بسالفه خطوبتي بس محد يتجرأ يسأل او يحجي

ناي : زين اني ليش مااعرف بكل هاي السوالف وليش ماحجيتيلي لج ٤ سنوات وياج كله سوه سرنا كعدتنا اكلنا شون كدرتي تضمين هيج سالفه

حوراء : يوم ماتزوجتي مهدي امي لزمتني وحذرتني احجيلج واذا عرفتي اطين حياتي وخلتني احلف بروح ابويه وبكلام الله مااحجي وسألتها ليش مقبلت تجاوب واني التزمت بلحلفان ومرات السنين وبديت انسى وروح ابويه بديت انسى اني حتى سلام مصار بيني وبين عبدالله الولد دار وجهه وراح سنين وكمل الماجستير وقدم دكتوراه تصوري حتى اهله سدو الموضوع وخالي كم مره يتعارك وياه حتى يرجع ومرجع لهذا الكل سگت واني متأكده لو جايتني قسمه زينه جان انطوني لان الكل غسل ايده من رجعت عبدالله

ناي : وشصخم وجهه ورجعه هسه

حوراء : حظي اعرف بروحي ماعندي حظ كعدت الصبح على هوسه يابه شكوو رجع عبدالله من السفر ومزايق وذبايح حتى كيفت كلت بلكي راجع وياه مرته واطفاله لان مستحيل لهسه مامتزوج وحتى نفك هاي الخطبه الكشره الي انحسب عليه واني سنين ماشفت شى منها بس بالاسم وبدلت ورحت اسلم وامه واهله طايرين بيه طير وكمل الغدا وناس طابه وناس طالعه واني اساعد وياهم اجه سلم عليه واني بلمطبخ  وامه كدامي كالت شفت خطيبتك شكد حلوة صايره كال لعد ليش اجيت حتى هم اشوفها وهم اعقد واكمل كلشي واخذها ويايه لج حتى المواعين الي بيدي وكعت وتكسرت وطلعت اركض منهم مثل المخبله مشفت روحي غير مخابرتج

ناي : عوفج من كل الي كلتي ميهمني انتي شون ترتبطين بيونس وتعرفين بروحج مقريه فاتحتج

حوراء : والقران بس بالاسم وصار سنين

ناي : هذا العذر مالتج قشمري بيه نفسج حيل تعصبت عليها واني اتخيل اخويه شيصير بحاله اذا عرف هو مناقصه صدمات

عفتي كل الناس واجيتي على يونس لوما تعرفين بكلشي مر عليه زين شون تسمعين منه سوالف غزل وانتي المفروض لغيره ولتكولين نسيت هاي سالفه ماتنسي ومن تكولين هيج تصغرين بعيني اكثر على الاقل احجيله متجرأتي كولي اليه واني احجيله ليش تعلقين شاب كل ذنبه حبج واعتبرج حب عمره

حوراء : ابوس ايدج ناي لتأذيني اني هسه ميته والنبي ميته على ساعه يوكف گلبي

ناي : وگلب اخويه وگلبه ياحوراء مافكرتي اذا يعرف شراح يصير بيه وشراح يتصرف صحيح هو مكال ولا اعترف كدامنا بأن هو يحبج بس اخويه منجن بيج مرات يغلط بأسمي وينادي اسمج واغلس من كثر ماروحه معلگه بيج هذا شگول اله تعال حبيبي تره حبيبتك والي باني امال عليها وتريد تتزوجها تره طلعت مخطوبه وهااا تره ناسيه وهسه تذكرت لان خطيبها رجع من السفر عله صوت بجيها وشهكاتها مكدرت اعطف عليها مجرد ماافكر شراح يصير بيونس يخلي عقلي من مكانه يفتر سديته بوجهه متحملت احجي بعد وياها

طبت شرهب على عياطي

شرهب : شبيج تعيطين ويه منو

ناي : تعاالي شوفي المصيبه الجديده الوكعت على راسنا

شرهب : ياستار خير

ناي : حوري طلعت مخطوبه لعبدالله

شرهب : ياعبدالله وياحوري

ناي : ركزي ويايه مابيه حيل غبائج حوراء بت خالي

شرهب : حبيبة يونس

ناي : اي عفيه طلعت خطيبه عبدالله قاري فاتحتها من سنين وهسه اجه يتمم كلشي وياخذها

شرهب : لا لا عيدي

ناي : شعيد يمعوده

شرهب : تعرفين اذا يونس عرف شراح يصير بيه

ناي : سوده بوجهي راح يتخبل لج روحه بيها وكعد يجمع الفلس فوك الفلس لعيونها تصوري كلت احجي ويه مهدي واخطبها منه ومستعده ارجع اله وانسى كلشي المهم اخويه ياخذ الي يحبها

شرهب : وهاي الغبره بت خالج شون تضم هيج شغله

ناي : تكول نسيت

شرهب : عياره هي هاي سالفه تنسي قابل مشتريه حذاء وضمته ونست يالون والله حتى لو مشتريه هم متنسى بله خابريها اليه شبيت نار خلي اطفيها بيها هلگلبه هااي

ناي : عوفيها خابرتني تصارخ من البجي

شرهب : شووو جيبي جريت التلفون وخابرتها

ناي : يمعوده عوفيها

شرهب : والله ولا اعوفها دك كم دكه وجان تجاوب والصوت مخنوك

حوراء : هااا ناي

شرهب : بربج نسيتي تتزوهرين وتاكلين نسيتي تسبحين نسيتي تبدلين نسيتي تتنعوصين بحضن اخويه وتدلعين عليه والليل كله مخابرات ودك حبيات من يوميه رن ورن وياه ودك ضحك وسوالف وحبيبي وحياتي واحبك وروحي بيك وين رحت وين جنت هااي ماتنسيها  بس مخطوبه والله نسيت لج اذا عبالج احنا هنود وتعبر علينا اذكرج احنه منو

اسمع صوت بجيها الي يشك الگلب عطت بيها

وجع لتنوحين سالفتج عوجه ولتتوقعين احد يسامحج عليها ويوكف وياج يعني فوك ماطايح حظ اخويه ومن نكره لنكره وخلص عمره يوميه واكع بهبيه تجين وتلزمي وادفعي بوادي والله حرام عليج متعرفين شكد يحبج

حوراء : واني هم احبه وروحي بيه ومااتخيل روحي بلياه ردت جم مره اكول اله واخاف اخسره وصلت مرحله اقنع روحي بأن الخطبه كلها كلاوات وفضت وراحت وبديت انساها واعيش كل لحظه اتخيل روحي مرت يونس

شرهب : وبالاخير انضربتي على راسج وراح تتزوجين ابن خالج وهذا المكرود وين ينطي وجهه ومن يعرف من كل عقلج يسكت اخويه واعرفه من يحب ميشوف كدامه مااكول غير الله يطيح حظج على دكتج الناقصه

حوراء : شتكولين عليه راضيه بس ساعدوني مااريد اتزوج عبدالله ومااريد اخسر يونس

شرهب : شنسوي بله نگتل عبدالله لو نخطفج ونزوجج يونس

حوراء : متعرفين شحس هسه اني داموت شرهب شريان گلبي تكطع من القهر شسوي واخلص من الصار كله

شرهب : الزمي اخوج واحجي وياه وكوليله مااريد اتزوج عبدالله وتوسلي بيه ينهي الشغله كلها بحجه البنيه الها كرامه على اي اساس عايفها سنين وهسه تندرت واجيت تاخذها وسويها مناحه مثل ماتنوحين يمنا وعيطي ولطمي مااريده وخليها تفض اما مال احنا نسويلج شى مستحيل كله بيدج بت وديد

حوراء : اني ردت ناي تدخل وتحجي ويه مهدي

شرهب : شتكول اله بله حياتي اخويه مصادق اختك ومخلصيها حبجيه من سنتين ومكالت مخطوبه وكعدت من النوم وكالت النا وحتى نتلافه كل الصار زوج اختك لاخويه واني ارجعلك وعاشوو عيشه سعيده حلوة قصص والدزني

حوراء : على كيفج ويايه شرهب

شرهب : كامت تشهك كلت گلبها راح يوكف

وتعيط مااريد اخسر يونس احبه اكثر من روحي هو كلشي بحياتي وعوضني عن كل اهمال مريت بيه بعمري اني فتحت عيني امي هاملتني وماشفت حنيه منها وراها انخطبت وهم انهملت وماحسيت بيوم احد حبني او فكر بيه دومي وحدي ويوم مايونس دخل حياتي خلاني احس اني شكد محبوبه وحسسني بأنوثتي خلاني اعرف شنو معنى الحب والاحتواء والاهتمام شنو معنى واحد بكل ساعه يطمن عليج اكلتي شربتي نمتي من تتمرضين يتمرض وياج من تختنكين يواسيج وميروح اله يسمع ضحكتج من گلبج يهون عليج اصعب الاوقات حتى من اغلط بحقه يراضيني ويدوس على نفسه لاجل ماانقهر ويحسسني هو شكد شاريني وزعلي عنده يفرق مفضلني على نفسه بكلشي حتى من يوكع بأزمات يعوف كل الناس ويشمر نفسه بحضني ويخليني احس اني امه واخته وصديقته وكلشي اله انسى الدنيا واني ويااه اني صرت الام الي انحرم منها وهو صارلي  الاب الي فقدته كل واحد بينا بحياته نقص وكمله ويه الثاني لهذا خفت والله خفت يعرف ويعوفني لحد ماخليت عقلي الباطن يدفن كل الصار واكول اني ليونس والي داعيشه وياه من حقي لان تاليتي اكون اله

شرهب : قهرتني دموعها وحبها اله واني گلبي رهيف بهاي السوالف

استغفر الله شحجي بله ماادري انقهر عليج لو منج

حوراء : اني كل الهامني يونس اذا عرف شراح يصير

شرهب : عزه وصخام يصير حرب البسوس ترجع لج اخويه لسما العوبه طب سجن وجان مراهق مو عاد هسه وهو بعقله وكبر وحبج بعقله گبل گلبه الله يستر شراح يسوي اخويه خسر هوايه وهلمره اذا خسر راح تكون ضربه قاضيه

حوراء : اني راح احجي ويه مهدي بس اذا تخربطت كل الامور خلي ناي هم تحجي وياه

شرهب : على اساس اخوج شون يحب ناي ويسمع الها

حوراء : غلطانه اخويه كلش يحبها بس يگابر والدليل متحمل لهاي اللحظه وماطلكها وشتريد ميعارضها كافي حارمتنا من شوفه سيف وهو راضي في سبيل ميقهرها مو كل رجال يعرف يحجي ويعبر عن حبه ويتغزل اكو رجال تشوفي جامد بس تصرفاته تعكس محبته

شرهب : حيري بروحج وعوفي اخوج وناي هسه وشيصير خابري خلي نفهم مو بعدين تكولين نسيت فتحي عقلج المجيم شويه

حوراء : مااشي وعفيه لتكولون ليونس هسه لحد مااشوف شيصير

شرهب : الله كريم يله باي باوعت ناي فاتحه حلكها وتباوع عليه شبيج

ناي : تدرين جم مره غلطتي عليها وهي اكبر منج

شرهب : يمعوده اكبر بلعمر بس بلعقل سيف اكبر منها متسكتين اني ردت افلت لساني بعد وياها بس بجيها گسر گلبي ولو يمي امددها بلكاع ودك بلنعال وين مايوجعها حتى اتوب تضم وتكول نسيت

ناي : يمه يمه منج عوفينا منها يونس شلون

شرهب : ننتظر هاي الخوثه شراح تسوي واذا انلاصت ادخلي انتي ماكو غيرها

ناي : والله مستعده ادخل بس كون يونس ما يتأذه

شرهب : ياعيني قهرتيني على اساس ماميته على مهدي يماااااي منجن ومن عياره النسوان

ناي : هاااا عموشه جنها كدامي وتسولف

شرهب : كون اهد عمشه عليجن لاتمسح بغداد واطرافها بيجن نسوان مال حرك اروح اقرا المجال الكهربائي احسنلي لان هواي انتلت من حوراء ومنج

ناي : بقى القلق ياكل بينا حتى شرهب تقرا وبالها مو يم الدراسه وحدتنا صافنه على كتبها بس بالها بغير مكان اجه يونس واثنينا وجوهنا صوفرت

يونس : شبيكم صافنات وين العشا

ناي : اي هسه راح اسوي انت شلونك

يونس : شبيج نايه وضعج مو طبيعي

ناي : انت زين بس دااسألك

يونس : اي زين صاير شى

ناي : سلامتك

رحت سويت عشا وشرهب ويايه وحدتنا تتلاطم ويه الثاني تعشينا ودخلنا ردنا بس اليوم يفض بليلتها اثنينا مانمنا دك تلفوني مهدي

حوراء : سديت التلفون ويه البنات وبقيت افكر لازم احط حد للموضوع اجت امي مكيفه وجهه مورد

وداد : واخيراً راح تتزوجين وافرح بيج

حوراء : مااتزوج عبدالله وكولي اله ولخالي اني مو قميص اشتراه وذبه بلكنتور وهسه تذكره وعجبه يلبسه راح سنين وهسه تذكر يتزوج شنو ماعندي كرامه ماعندي احساس واقبل جان تلزم ايدي وتكرصني حيييل

وداد : انجبي لا اكسر سنونج منيلج هاي الصلافه

حوراء : مو صلافه بس حق هسه تذكر ابن اخوج خاطب وين جاي هاي السنين كلها مكال شنو ذنب بنيه خطبتها وعمرها ١٧ سنه وجاي هسه يتزوج وهي بنت ٢٦ سنه السنين العافني بيها وگف قسمتي منو يعوضني بيها

وداد : كافي راح ترحين وياه لكندا ياوجه الفگر وتعيشين احسن عيشه منو محصلها لهيج دوله

حوراء : لا اريد اروح لكندا ولا اي دوله اريد ابقى هنا

وداد : واني مااريدج تبقين لج امي افتهمي راجع وياه شهاده عاليه وخير وفلوس عدا خير خالج وتعرفين بيه شكد يحبج ليش تضيعين هيج قسمه من ايدج الف بنيه تتمناها

حوراء : واني مااتمناها ومااريده ولا اتزوج واذا مرحتي لتكولين لخالي اني اكول الهم وكدام الكل

وداد : لج بت وداد مو عليه هاي حرگت گلبج ورجفتج وراها شى مو خاليه

حوراء : ارتبكت من كلامها شنو قصدج جان حييل تعصر ايدي اااااخ ايدي

وداد : عندج احد

حوراء : وخرت ايدي منها وافرك بيها من الالم يااحد شبيج يوم

وداد : وشبت بيج هاي السوالف متعبر عليه اني ذيج الفترات انتبهت تتختلين هواي بلغرفه والموبايل بيدج ماتهدي اذا عرفت عندج شى وروح ابويه اخلي اخوج يعلكج

حوراء : هاي كله لان مااريد اتزوج عبدالله شيلتيني تهمه شكبرها وعندي واحد

وداد : خلي الكف عندج شى وشوفي شأسوي لا ازوعج دم واخليج تبوسين رجلي حتى تتزوجين عبدالله وتخلصين مني

حوراء : اريد افهم انتي مو امي ليش تكرهيني

وداد : بله حجي فارغ وهاي سوالف المزعطه تكرهيني ومتحبيني وليش هيج تتعاملين ويايه تعرفين بيه احبج واريد مصلحتج بس انتي مكعد تكبرين عقلج عقل المراهقات متعرفين الزين الج دومج ثوله ومتسمعين الكلام وهلمره ماامشي على هواج وتتزوجين عبدالله وحجايه زايده اذا سمعت أذيج وتعرفين بيه من اقفل شسوي

حوراء : مااتزوجه وشسوين سوي عفتها ودخلت للغرفه جان اطب ورايه وين تلفونج

حوراء : هاااا شسوين بيه

وداد : جيبي

حوراء : شتردين منه فارغ

وداد : كتلج جيبي

حوراء : ركضت اضمه جان تجره من ايدي واخذته

وداد : افتحي الرمز مالته

حوراء : ماافتح

وداد : افتحي لا امرغل البيت بيج

حوراء : والله ماافتح تردين كسري مااريده بس ماافتح

وداد : خلي الي بالي صحيح ياحوراء ااااخ شسوي بيج

حوراء : عافتني وركعت الباب وطلعت اني امسح دوم المحادثات بيني وبين يونس بس مال اليوم الصبح يطمن عليه مامسحتهن واكيد راح يدزلي لان متعودين نتراسل

خفت حييل مجنت متوقعه امي تاخذ تلفوني وشاكه بيه ضربت وجهي شجاني حجيت وياها لو منتظره مهدي وحاجيه اله

بقيت الوب بلغرفه انتظر مهدي واعرف هيج وكت يراسلني يونس اكل بأصابيعي والخوف خله حتى ضغطي يهبط صار الليل واني عيوني مابطلت تنرفع على الساعه

لحد ماسمعت فتحت الباب وطب مهدي طلعت اله

حوراء : اريد تلفونك

مهدي : شبيج حلمانه بيه اجيتي تركضين تلفونج وين

حوراء : مابيه رصيد

مهدي : المن تخابرين

حوراء : ناي عندي شغله وياها

مهدي : هااا مرتي هااج سلميلي عليها

حوراء : انت اذا هيج تحبها مترجعها

مهدي : لتدخلين

حوراء : كرص خشمي ويضحك وانطاني التلفون وصعد

دكيت على ناي

ناي : باوعت هذا مهدي كمت ابلعم

شرهب : منو

ناي : مهدي

شرهب : تتوقعين عرف

ناي : مااتوقع ولا اريد اتوقع فتحت الخط جان يجيني صوت حوراء هاا يمعوده وگعتي گلبي عبالي اخوج عرف

حوراء : امي اخذت تلفوني بلغي يونس ميخابر ولا يدز رسائل عفيه

ناي : علكت ياحوراء

حوراء : ماادري بس بلغي عفيه لتجي امي وتعزيني التلفون يمها

ناي : مااشي سديته منها وطلعت من الغرفه ودكيت باب غرفه يونس ملكيته عرفت يدخن بره طلعت وراه لكيته كاتله القلق

تراسل حوري ومترد

يونس : ادخلي نامي وراج دوام

ناي : تعال خلي نكعد كعدنا على الدرج الثاني الي يوصل بلسطح العالي اعرف بيك تحبها وتريدها

يونس : اذا تدرين ليش تغشمين نفسج

ناي : اختيارك غلط وجان المفروض ماتتقرب منها

يونس : وتقربت وحبيتها انتي جايه بلوكت الضايع نايه اني اريد حوراء ومااعوفها

ناي : واهلها نسيت امها منو

يونس : لا مانسيت ومتهمني اني احجي ويه ولي امرها ومستعد لكلشي متعرفين شكد تعبت حتى اكدر اجمع مهرها واتزوجها وخالها عمران يحبني ويحترمني وكلت اروح اله واخلي يوكف ويايه

ناي : خالو عمران كلش خوش رجال وطيب بس هلمره مااتوقع يوكف وياك

يونس : ليش

ناي : بله هذا شكول اله سكتت وكتله حوري خابرت وكالت امها اخذت التلفون اتوقع شاكه بيها لدز ولا تخابر وهدي اللعب اخاف ملحتك تأذيها

وكف على حيله من الخوف عليها

يونس : بيها شى

ناي : مابيها ياعيني بس امها ومن حقها تخاف عليها كلها يومين تلاثه تطمن ماعدها شى وترجع تخابرك

يونس : وانتي شون عرفتي

ناي : شبيك حبيبي مو كتلك خابرت

يونس : مو تكولين امها اخذت التلفون

ناي : من تلفون مهدي وبلغتني حتى اوصلك الحجي

يونس : گلبي لعب صاير شى مااعرفه احجي

ناي : لا مصاير وادخل نام واني اذا لزم الامر اخابر مهدي يصيح حوري وتسمع صوتها واطمنك عليها بس لتتراجف عليها هيج

يونس : راح اكلج شى يجوز تعرفي او لا

ناي : كوول

يونس : حوراء الرئه مالتي والانسان بليه الرئه ميعيش

ناي : دخيلك ياربي اخويه واكع وكعه معدله

كتله الله يجمعك بيها بلحلال طب حبيبي الجو برد

طبينا واعرف بيه ممرتاح

دخلت وشرهب هم كاعده وحجيت الها الصار وهي سكتت وحايره اثنينا منتظرين نعرف شراح يصير وخايفين على اخونا

حوراء : رجعت التلفون لمهدي ونزلت ردت النوم يغطي عيوني ماكو بالي وحيلي وحتى روحي طايره ليونس لحد وجهه الصبح يله غفيت من التعب اجت امي كعدتني وضلت تعيط تريد افتح التلفون الها وبقيت مصره ماافتحه ماجازت مني لحد مادك تلفونها خالي كال العصر جايين الكم

وداد : كومي لج نظفي البيت وراها راتبي روحج مبين خالج وخطيبج جااين حجايه زايده انعل سلفه سلفاج

حوراء : كمت نظفت بدون مااحجي اي شى وياها مااريد اتعارك

وراها سبحت وبدلت وكعدت اجه مهدي تغدا وامي يمي مدري شنو تحش براسه مقبلت اكعد واسمع وصارت ساعه ٤ العصر الباب اندكت طب خالي وعبدالله وعبدالرحمن وامهم وصلاح وام صلاح معدتي گلبت جيتهم كلهم وراها شى امي طارت بيهم تكول صار سنه مشايفتهم وهي كلها الليل مشافتهم كعدو يسولفون واني احظر الضيافه بلمطبخ طلعت قدمته الهم ومارفعت عيني بوجهه احد لحد مكال خالوو

عمران : اكعدي بنتي الحجي لازم يصير بوجودج

حوراء : كعدت كبالهم وبصفي امي وخاله ام صلاح

عمران : تعرفين بيه شكد احبج واعتبرج بنتي ويوم ماالعرسان دكو بابج حلفت متصيرين لغريب لان ردتج بنتي وجنه البيت وردت احفادي يكونون من ام مثلج لانج طيبه وحنونه وتربيتنا

وداد : بتك هاي ياخويه وطوع امرك

عمران : ميحتاج تكولين هيه تعرف غلاوتها عندي ابني قصر وياج من السما للكاع وعافج سنين ورغم كل هذا ماسمعنا صوتج ولا يوم اعترضتي وجنتي صابره وهادئه وهذا الخلاني يوم وره يوم ادعي رب العالمين يحقق حلمي واشوفج عروسه ابني واليوم جايب عبدالله واخوه وامه وابني صلاح وامه وجايين هم انطيب خاطرج وهم حتى نتمم الي اتفقنا عليه من سنين ومستعد لكلشي تريد مشيه رسميه اجيبلج العشيره كلها واخاف ذيج المره صارت الفاتحه بينا بسبب اخويه الله يرحمه هلمره اسدلج الشارع من الطول للطول سيارات وشيوخ لانج تستاهلين شيوخ تكعد بكطع حقج

مهدي : خالو احنا اهل وهاي الشكليات مو مهمه اهم شى عبدالله يعرف الجوهره الراح انطيها اله وميقصر بحقها واذا سكتت لان عافها هاي السنين لخاطرك ولان حوراء ماطلبت مني افصخ واتراجع معناها رضت تنتظره واني مااريد اكسر بختها اذا هيه راضيه بعبدالله

وداد : اكيد راضيه ابني لعد ليش انتظرت كل هاي السنين

عمران : بس انتي ماانتظرتي لا عبالج مااعرف سوالفج

وداد : غير بتي الوحيده ياخويه واخاف عليها انسى الفات وخلي نفرح بزواجهم

عمران : ماسمعت صوتج بنتي

حوراء : افرك بيدي من القلق وامرد اصابيعي وشفايفي ترجف شون كدامهم كلهم اكول مااريده

عمران : اريد اسمع صوتج

وداد : مستحيه ياابو عبد عوفها اني اكول الك هيه موافقه

عبدالرحمن: قابل لسانها مكصوص لج حوري احجي لعلعي كولي اي وخلي نولي نكمل شغلنا ورانه كومه اشغال

عبدالله : على كيفكم وياها صارت طماطه من التوتر هااا حوراء نتوكل لان لازم خلال شهر مكمل كلشي وماخذ معاملتج ويايه وبعدها بس تطلع الاقامه مالتج اجي اخذج

حوراء : رفعت راسي وباوعت عليه مكدرت اباوع على اي احد وكتله بصوت مسموع بس بيه توتر وخوف

اني مااريدك

الكل جفل من حجايتي

وداد : تخبلتي مالكم دخل بيها من خوفها هيج تحجي

عمران : خلي نفهم شبيهه

وداد : البنيه من المستحه متعرف شكعد تحجي

مهدي : خلي نسمعها يوم احجي حوراء

حوراء : مااريده

عبدالله : ليش بدر شى مني

حوراء : هاي المصيبه مابدر شى منك رحت ودرت وجهك وعفتني وسنين متعرف بيه ميته عايشه حتى تلفون ماكلفت نفسك تطمن عليه تسلم  خلصت ونستك ودراستك ويوم ماحبيت تستقر ادور على بت عمتك الي شمرتها تنتظرك بلعراق لان اكيد متتزوج مناك لازم وحده شريفه بت بيت تقاسمك حياتك ومافكرت هاي الي قريت فاتحتها شتحس وانت عايفها تتذكرك شون راح تتقبلك وره كل هاي السنين انت لو مربيلك بزونه هم تستفقدها اكلت شربت تمرضت مو بنيه شابه الها مشاعر واحاسيس

عبدالله : كل الي كلتي حقج بيه فعلاً اني قصرت وياج وكنت انسان اناني وفضلت مصلحتي على مشاعرج وعشت وافتريت وما فكرت منو عفت ورايه اني مااطلع نفسي انسان عصامي وخلصتها كلها دراسه بلعكس صادقت وتونست وطبيت وطلعت بس عمرج ماغبتي عن بالي

حوراء : انت خطبتني لان ردت السفر وخالو حطني مقايضه الك تخطبها يله تسافر وانت شفتها شغله ربحانه وخطبت وسافرت ولا مره طول هاي السنين رجعت المن راجع هسه وادور زواج مني وسالفه مارحت عن بالك رجاءاً شيلها لان حتى الطفل ميصدكها

عبدالله : اني مستعد اعتذر الج وكدام الكل واوعدج احطج بعيوني ومااقصر وياج وكل الي عشتي وحدج اعوضج عنه واحببج بيه  واراعي الله بكل تصرف يصدر مني ومايوم ازعلج بلعكس راح اعيشجج احسن عيشه

حوراء : وكفت وكتله وعيشتك مااريدها اني مااتزوجك ولا اريدك

عفتهم وطبيت

اسمع خالي يحاول يهدي الوضع وعبدالله يكول حقها السويته بيها أذاها ومقدر شعورها خلوها على راحتها واني احاول اطيب خاطرها بمرور الايام

امي مرغلت روحها تخاف لطير القسمه ومهدي ساكت سمعت صوتهم طلعو بقيت ابجي بلغرفه اندكت الباب وطب مهدي وامي

وداد : شفتها شون خزتنا هيج علمتج هاي تربيتي الج هاي تاليها حقيره صخمتي وجهنا

مهدي : عوفيني وياها يوم

وداد : شعوفك اريد اشرب من دمها على جرأتها ولسانها الطولان اول تالي توكفين هيج بعراميه واتلاسنين وتصغرينا كدام خالج

مهدي : رحمه لابويه اطلعي اريدها وحدها

وداد : خلي يكمل اخوج منج واني اعرف شون اعيد تربيتج واخلي هذا اللسان مينطق غير بحاظر وصار

حوراء : طلعت امي عدلت كعدتي كدام مهدي

مهدي : فهميني شنو الي بيج وخلاج هيج تحجين

حوراء : مسحت عيوني واريد توكف شهكاتي حتى احجي مكعد اكدر

مهدي : شبيج تتراجفين قابل بيدي سجينه واريد اكص راسج اني اريد افهم ليش مقبلتي اكو سبب ثاني لو بس الي حجيتي بره

حوراء : طلعت الحجايه من حلكي بلكوه بس الي حجيته بره

مهدي : اني مربيج بيدي حوراء واعرف كذبج من صدكج وعيونج كعد تكذب اكو شى ثاني احجي حتى افهم لان هاي اول واخر فرصه انطيها الج اذا اكو شى او عندج شى كولي لان اذا جذبتي وعرفت من غيرج أذيج ومااريد بيوم اتحمل ذنبج

حوراء : سكتت وهزيت راسي ماكو شى اني مااريد عبدالله مو تايهه اله شوكت ميريد يخطب وشوكت ميريد يجي يتزوج

مهدي : وهو كال اعتذر الها واطيب خاطرها

حوراء : واني مااريده ولا اريد اعتذاره خلي يخلصني منه ويعتبر الفاتحه الصارت انلغت فدوة مهدي اذا تحبني لتزوجني اله مااطيقه ولا اطيق لحظه انجمع بيها وياه

مهدي : وضعج دوخني

حوراء : اذا تحبني اعتذر من خالي وخلي كل واحد يروح لحال سبيله

مهدي : يصير خير كومي غسلي ولتتطاخخين ويه امي لان حاميه حيل عليج خلي اشوف شيصير هليومين واذا انتي غيرتي رأيج بلغيني

حوراء : مااغيره

عافني وطلع وامي من يومها علنت الحرب عليه طلعت حليبها من خشمي يوميه عراك ومشاكل وتكومني برزاله وتكعدني بلثانيه

صار اسبوع مااعرف شى عن يونس والتلفون يم امي

طبينا ٢٠١٣ شهر الواحد

ناي : اسبوع واني اشوف يونس متسمم على حوراء اخويه خلال اسبوع ذبل الجكاير متنزل من ايده نوم مينام حتى اكل كوه ياكل

اكثر من مره طلب مني اخابر مهدي واسأل عنها واني رفضت لان مردت مهدي يشك لحد مافاض الصبر عنده واجه يعيط عليه وهاي اول مره هيج يسوي

يونس : خابريها مو حرگتي اهل اهلي مطلبت شى منج بس اطمن عليها لج كتلج حوراء الرئه مالتي وانتي تتفرجين عليه شون اختنك وساكته

ناي : اي راح اخابر لتعيط جنت خايفه اخابر وتكولي اتزوجت من كل عقلي هيج افكر جبت تلفوني ودخلت للغرفه ودكيت على مهدي جاوبني

مهدي : شونج ام سيف

ناي :  الْحٍمَدٍ للـّہ انت شلونك

مهدي : بخير

ناي : انت وين

مهدي : ليش يفرق عندج شعجب سألتي

ناي : اريد حوراء مكعد احصلها

مهدي : واني اكول شعجب دكت

ناي : انت وين

مهدي :يم مرتي الثانيه بما ان المره الاولى ناسيتني ومتريدني كلت اروح للثانيه

ناي : ضجت من حجايته رغم ادري بيها شقه

مهدي : شنو رأيج اتزوج عليج واكسر خشمج رجال سنتين ونص ماعندي مره من حقي وهاي النسوان الحلووة ليش احرم روحي من حلال الله

ناي : روح تزوج شسوي سوي مو مهم والله يساعدها التاخذك ليش انت تنحمل حجيتها زهكانه جان يضحك بصوت عالي

مهدي : بعدج من تضوجين تنترين بلحجي غرتي والغيره من صوتج وصلتني

ناي : مغرت تريد تتزوج روح واذا تحب اني اخطبها الك

مهدي : هله بأم سيف المعدله اي هيج النسوان الحوك تروح بنفسها تخطب لزوجها

حضري نفسج يومين واجيج تخطبيلي

ناي : نغزني گلبي كلت بس لا يسويها

بله شقه ماصخ مااحبه متتزوج ادري بيك يحجي بأستفزاز وصوت هادئ وبضحكه

مهدي : وليش شبيهه ناقصني شى الف بنيه تتمناني

ناي : اي صحيح وانت هم طلكني واني الف رجال يتمناني هم اعيش حياتي قابل بس انت  جان يحجي بصوت تهديد وعالي واختفت ضحكته

مهدي : عيدي هاي الحجايه مره ثانيه شايفه وجهج الحلو اخربه الج وداعت سيف واخلي اكبر دكتور ميعرف خشمج من حلكج وين

ناي : من دك الباب سمع الجواب

مهدي : وهذا الباب اكسره على راسج اذا عدتيها

ناي : هسه اريد حوراء

مهدي : راح اوصل وانطيج صخمان

ناي : خلي تخابرني يله باي

مهدي : ناي

ناي : نعم

مهدي : فتحتي عينج عليه وراح تغمض عينج هم عليه حطيها بالج زين

ناي : باي وسديته خرب من يحجي بهدوء گلبي يدك سريع من اشتعلت امك

طب يونس عليه للغرفه

هاااا  وينها

ناي : راح يوصل للبيت وتخابرني لان طالع

شويه ودك جاوبت طلعت حوراء مباشره انطيته ليونس

حوراء : اخذت التلفون وطبيت لغرفتي دكيت طلعت ناي ثانيه وتحول التلفون

بس سمعت صوت يونس كال الوو

لو دموعي غركت خدي

يونس : احجي اروحلج فدوة من حتى الهوا ماله طعم بلياج حوريتي يبعد عمري سمعيني نبرت صوتج وحسج الي بسببه اكدر امشي يومي

حوراء : اشتاقيتلك مووت

يونس : اوووووف مو بكدي احجي مو حتى عروكي نشف الدم منها من وراج شصاير وخله امج تاخذ التلفون منج

حوراء : حست عندي شى وشدت ويايه عوفك مني شلونك وصحتك شلونها تاكل معتني بنفسك

يونس : ليش وانتي ماكو اكو صحه ليش روحي تهمني حتى اعتني بيها اني اذا جنت اداري بنفسي لاجل عيونج حتى لتضوجين وانت اسبوع بعيده عني شون تتوقعين احير بنفسي والاغلى منها بعيده عني وكلشي مااعرف عنها

حوراء : فتره وتمل وترجع التلفون اليه

يونس : شون اتحمل باعي اني تعبت وبعد كل طاقه تحمل ماعندي مامجبور اتختل واني رايدج بلحلال ذيج الفترات جان وضعي مامستقر هسه  الْحٍمَدٍ للـّہ مشت الامور وحالي تعدل احسبي حسابج نهايه الاسبوع جاي خاطبج

حوراء : لا عفيه مو هسه

يونس : لتخبليني عاجبج وضعنا اني كل لحظه تمر عليه احرك بدمي حتى اسمع حرف منج وامج مراح تعوفج ولا تفك ياخه منج ويمكن تحرمني كلش خلي اذبحها على قبله وافض الموضوع كله تحملت هوايه لان وضعي مايرهم اتقدم الج وهم حاس روحي مسوي حرام وغلط اذا انجبرت ذيج السنين

هاي الايام مامجبور اعيشها كتلج نهايه الاسبوع جاي لخالج ولمهدي

حوراء : فدوة لتجي بس خلي يفوت هلكم شهر

يونس : لج ياكم شهر اني يوم اذا بقيت عقل ميضل بيه

حوراء : يونس عفيه اسمع كلامي لمصلحتي ومصلحتك جيتك بهذا التوقيت بلذات راح تخرب كلشي

يونس : حجايه ومااثنيها نهايه الاسبوع يمج

حوراء : كمت ابجي يونس اسمعني جان يطب مهدي وسمع اسم يونس وشافني ابجي مباشره جر التلفون من ايدي كعدت بلكاع من الرهبه

يونس : كتلج مااسمع كلامج بعد نهايه الاسبوع جاي لخالج واخوج

مهدي : واني منتظرك

يونس : مهدي لتسوي شى جايك هسه وافهمك كلشي

مهدي : شتفهمني ياابن عمتي واني مأمن بيك اذا بيوم يصير عليه شى تصون اختي وتحاميها تالي انت دايس عرضي هاي تاليهه

يونس : وروح امي وابوك مادايس عرضك حشاك وعرضنا واحد وحوراء رايدها زوجة اليه ومستعد لكلشي تريده

مهدي : لو رجال صدك وجاي من الباب احسن ماتتختل وتحجي وياها جان شلتها بعبايتها وسلمتها الك بس ماطول طلعت حرامي وطبيت من الشباج ودنت نفسك وماحسبت حسابي ولا وكفت بعينك ولا احترمتني لا اخليك تحلم بيها

يونس : الووو الوووو

ناي : شكووو شبيك تعيط اجيت اركض

يونس : لج مهدي عرف وراح يأذيها

ناي : ضربت وجهي هذا الجنت خايفه منه

شوو جيب التلفون رجعت دكيت ادك ادك ميجاوبني

حوراء : لزمني من شعري وكومني

مهدي : جنت حاس اكو شى غلط امي تاخذ تلفونج ليش واسألها تكلي عطلان خلي اشتريلها غيره تكولي لا عوفها اجيت وكتلج ليش رفضتي عبدالله احجي مقبلتي هيج مستحليه الحرام

حوراء : والله مامسوي شى بلحرام

مهدي : من شوكت عندج علاقه بيه

حوراء : ابجي وساكته عااط حيل خوفني كتله صار سنتين

مهدي : سنتين وانتم تضحكون عليه سنتين واني مأمن بيج متنزلين راسي ولا تقللين من قيمتي ولا تسوين شى حرام واخذج بيدي لبيته مستحيتي مكلتي اذا اخويه عرف شنو منظره

حوراء : انت مو حبيت سدره ليش عليه حرام وعليك حلال

مهدي : اشفتيني احجي وياها بلساعات واتختل  ردتها بلحلال وكلت لخالي وكال تخلص دراسه واخطبها سنين احبها وماتجرأت بيوم اكعد وحدي وياها حتى اذا عندي حجايه بوجودج حتى لا اختلي بيها وتدنه نفسي عليها اكول اخاف الله يطلعها بعرضي ويوم مارفضت تعيش عيشتي عفتها لحال سبيلها ومايوم سويت او فكرت بسوايتج منين اجتج الجرأه سنتين وانتي وياه سوالف وحجي واشكال متأكد وبليل نروح انام واكيد تخلصي ويااه واني شاب واعرف بين الولد والبنيه اذا مرت سنين شيصير يونس ماخله حرمه لبيتي وهيج واحد مايتسمى رجال

حوراء : دنكت ابجي وخجلانه

مهدي : سوايتج مااسامحج عليها صغرتيني كدامه لان ماعرفت اربيج وصغرتيني كدام نفسي لان جنت مأمن بيج وبيه واخذج بيدي اله وبيته وتباتين يمهم واحتقرت كل لحظه جمعتني بيه وهو يباوع بعيوني وحاب اختي ويتغزل بيها بلحرام زواجج من عبدالله راح يتم وتولين وياه لكندا لان حتى اني بعد مااريد اشوفج

حوراء : فدوة مهدي وكعت على رجله ابوسها كلشي راضيه اكتلني كطعني بس لتزوجني لعبدالله

مهدي : هاي اقل عقوبه الج ومااسمح صوتج منا لحد مااخلص منج وهذا الچلب يونس حسابه عسير ويايه

حوراء : دفعني حييل انركعت بلجربايه طبت امي تعيط مبين جانت تسمع الحجي واستلمتني دك رزايل وضرب

وداد : مابقى غير ابن ذكرى عليه اني مااخلص من بتها اجي انطيج لهذا السكط الحافي اذبحج واذبج للجلاب ولا تتزوجي اشيلج بيدي وانطيج اله يبوووو عليج وعلى الخلفتج ياساقطه دكتج ماتتسولف شحبيتي بيه لا خلقه ولافلوس ولا مستوى واحد حافي غيره سزز تربه بلشوارع والسجون عائله مفككه مابيهم واحد شريف وبيه خير اشفتي منه يحيوانه

حوراء : مااتزوجه ولا اتزوج غيره بس عوفوني

وداد : مو هو بكيفج خلي اسمع رفض منج وشوفي شسوي بيج

حوراء : نزعت النعال ودك على راسي ملختني شعري تكطع بيها كل ضربه وياها غلط ومسبه عليه وعلى يونس وعلى عمتي ذكرى عبالك امي لزمت عمتي ودتطلع قهرها جان ضربها اليه انتقام تهسترت واني احاول ادافع عن نفسي من ضرباتها حيل أذتني

ناي : حركت التلفون حرك وشرهب لازمه يونس ليروح لديالى ويسوينا كارثه

جاوبني مهدي وره وكت طويل

احلفك بأبني وابنك لتسوي شى موزين

مهدي : جنتي تدرين وساكته

ناي : يحبها وداعت سيف روحه بيها

مهدي : واني اله احرمه من روحه شون مادنت نفسه واندك بعرضي لا اخلي يتندم على كل لحظه فكر بيها يعابي بيه

ناي : والله يحبك ويحترمك ورادها بلحلال بس امكانيته جانت موزينه ومكدر يتقدم الها

مهدي : لو اني مسوي بوحده من خواته ومصادقها سنتين ومخلصها حبجيات وسهر للصبح يرضاها اخوج احجي يرضاها

ناي : سكتت واعرف يونس جان سوه مثل مهدي واكثر

مهدي : الميرضاه على خواته ونفسه لا يرضاه على بنات الناس انتي مرتي وحلالي ومرات مااجي للبيت حتى اشوف ابني اله اخابره او امر عليه احتراماً اله اكول زحمه يجي ويلكاني يمها رغم انتي مرتي ومن حقي كلشي اسوي اخوج ناقص والناقص ماله مره عندي واذا وصل لديالى مااضمن الج شسوي بيه اذا لهسه مااجيت وحطيت طلقه براسه لان تعدى على بيتي وعرضي واكف بعيني ابني اذا يكبر مااريد يكول گتل خالي وضيعني وعافني اتربى وحدي

ناي : مستعده ارجعلك ومن باجر اصبح بيتك بس لتأذي يونس وخلي يتزوج حوراء

مهدي : المره المتعيش ويايه لان تحبني وترد لحضني لان راغبتني مااريدها وماابقيها على ذمتي لويت الايد مو الي ناي ولا اني الي اسوي وحده بوحده واذا صبرت عليج كل هاي السنين من محبتي الج وردتج تجين برضاتج وتحسين شكد تغيرت لعيونج ومستعد اسوي الي متوقعت بيوم اسوي لمره لخاطر اعيش عيشه حلوة وياج

بس ماطول سويتي هيج اني بعد مااريدج واياج تخابرين بعد غير بشغله تخص ابني وبس اخوج اذا وصل لديالى يتحمل كلشي يصير بيه ولتكولين ماحذرت

طبكه بوجهي واني ابجي طلعت على شرهب وهي تكمز

شرهب : ولج راح الهم لديالى بهذا الليل

ناي : رديت دكيت على مهدي مجاوب حالنا يبجي الصخر بلحظه حسينا اخونا ضاع

خابرت على مرتضى وكتله وتوسلت يروح وراه

عسى ولعل يلحكه

يونس : كل همي جان ميضربها ولا يأذيها مستعد لكلشي ولا يمسها الهوا حوراء فقيره مو مثل سما جانت ذيج شيطانه حوري حبتني وتخاف عليه اكثر من روحها هي سبب راحتي وسعادتي وحتى شغلي گبر وتحسن هلكد ماوجهه حلوو عليه حتى الصلاه جنت تاركهه  كمت التزم من وراها دوم تكول صلي حتى الله يوفقنا واذا خابرت وتعرف مامصلي تزعل وتشلع گلبي يله ترضى جانت تكول الميرضي ربه ميستاهل بشر يحبه كلشي بيها حلوو ترافتها ضحكتها فهاوتها خجلها عصبيتها لهذا تعلقت بيها بروحي

صعدت نفرات بليل واني مااعرف شراح يصير هناك كل همي اوصل الها واحاول اصلح الموقف حتى لو اتوسل بمهدي خفت عليها وماخفت على نفسي لان اعرف امها حقيره وتأذيها

كل ماتمشي السياره اباوع على الجام واتخيل يضربوها ويأذوها

معودت طبيت ديالى جان السايق يمشي سريع والدنيا ليل وقليل سيارات ساعه وربع اني بديالى

نزلت وركبت تكسي وگبل وعدل لبيتهم

اول ماوصلت دكيت الباب حيييل باوعت ساعه ١١ بليل ماهمني نايمين كاعدين نهايه شهر الواحد  سنه ٢٠١٣  الجو بارد وخاصه بديالى الزرع والهوا يصير يخلي ابرد من بغداد

ضليت ادك الباب حيييل كسرته طلع ولد مااعرفه ولا شايفه

عبدالله : تفضل اخي

يونس : اني ابن عمة مهدي وجاي من بغداد

عبدالله : ياهله بيك اني ابن خاله عمران عبدالله

يونس : اهلا وسهلاً اذا امكن تصيحلي مهدي

عبدالله : تفضل قابل تضل بلباب

يونس : دخلني وصلني بلباب ودك الباب اول مافتح الباب مهدي هو شافني لو تخبل

مهدي : شجابك اني مو كتلك متوصل

يونس : خليني افهمك بروح ابوك لتأذيها

مهدي : مالك دخل عسى مااذبحها امشي ارجع لا ارجعك للكبور لتختبر صبري وياك

عبدالله : شكوو وعن منو يحجي

يونس : هنا انتبهه مهدي على عبدالله وجهه گلب

مهدي : هااا ماكو شى

يونس : اني مجنت ادري وردت استنجد بأحد ولان علاقتي طيبه بعبد الرحمن توقعت اخوه مثله انداريت وكتله اني رايد بت خالي واحبها ومهدي ميقبل واريدك تصيح ابوك ومستعد كدامكم لكلشي

هذا بقى فاتح عيونه

عبدالله : يااخت

يونس : دفعني حييل مهدي وضربني على وجهي صار بينا هذا الولد ولزمني من قميصي رجلي ماعانتني وعثرت

عبدالله : قصدك حوراء

يونس : اي

عبدالله : وهي تريدك

مهدي : لك اسكت

يونس : جان يجيت هذا الولد فوكايه

ويعيط عندك علاقه وياااها احجي

يونس : وانت شعليك اريده بس يكوم مني

طلعت وداد وهي شافتني تخبلت عوفه يمه خلي يولي حوراء الك

يونس : اني هديت متحملت شنوو اله

وداد : هذا خطيبها من جانت بت ال١٧ سنه واجه ياخذها ويروح وانت مالك شى يمنا

يونس : حتى حجيها مركزت بيه مجرد مكالت خطيبها خلتني مثل المخبل وكمت اضرب بيه وعلكت والكل طلع يتراكض وكمت اعيط حوووواء اليه والي ياخذها اذبحه

ناس تفاكك بناس كل الي اتذكره الشيطان خلاني افقد واعيط هاي اليه مالتي وتحبني واحبها حييل خربطت من لوعتي واني اتخيل غيري يلمسها ردت اخذها حتى لو افضحها المهم متروح لغيري

محسيت غير حراره بطني ركزت عبدالله بيده سلاح وضربني وكومني بلكاع

يتبع ....

#الابواب_الخمس

البارت الثلاثون /الجزء الثاني

للكاتبة Reem

(بارت طويل لعيونكم )

انه العايش وحيد بدنيتك هاي

انه الماله صديج وصحبته هواي

انه المن يمر طاري المحد يكوم

لان من طحت محد واكف وياي

الي ذرعان تحضن بس اليروح

مارجفن وضاكن حضنت الجاي

وعلي ماشوفن مغوشتني الدموع

غواش الجام من يتبلل بماي

يجوز هواي ناس تلومني لان اتصرفت بتهور وقله عقل اني هيج طبعي هيج من احب اتصرف بدون تفكير جنت قبل اكول مراهق واغلط اني انطي اعذار لنفسي واقنع روحي جنت صغير وطايش ومحد علمني الصح من الغلط ماكو اب فوك راسي يوجهني ولا عم يعلمني ولا اخ يوكف بظهري لكيت واني ابن ال١٥ سنه روحي بلشارع اشتغل عتاك

وكعت بأول مصيده وطلعت منها بأعجوبه والخسائر هوايه وكلت هذا هو التوبه ومااغلط وانتبهه على تصرفاتي لان ورايه خوات محد الهن ومااريد اضيعهن اكثر ماهنه ضايعات لحد ماوكعت مره ثانيه بلحب بس هلمره الانسانه الي حبيتها تستاهل محبتي تستاهل جنوني

تعلقي بيها خلاني انسى حتى روحي اني خسرت هواي بعمري جبتها واني جاي من امي وشهادتي ورجلي ومستقبلي لهذا جنت مامستعد اخسر احلى شى صار بحياتي وهي حوراء

اعترف غلطت واستعجلت وما وزنت الامور بس اني مو ملاك حتى مااغلط وامشي بخط مستقيم اني بشر مرات الواحد يتصرف شغلات وره مده يصفن اني ليش هيج سويت ولو مسوي غير شى جان افضل يمكن النتيجه جان اختلفت ويبدي يفكر ويلوم بروحه لحد ميوصل لمرحله يشوف ماله داعي يفكر بعد لان فات الزمن على التفكير والندم

والمصيبه مايتعظ لو كل انسان خطأ واتعظ من اخطائه جان هسه العالم وردي ولا بيه جرايم ولا قتل ولا بوك ولا طلاك ولا هجمان بيوت هاي طبيعه البشر استاذ بلخطأ والقله القليل تتعظ وميعيدها والباقي شيل واشمر بلشط واني واحد منكم

عيوني ترمش ثكيله اريد افتحها مكعد اكدر والم براسي مو طبيعي جسمي مااحس بيه مبنج وشبهه فاقد المكان والزمان ابلع بريگي الناشف عبالك صار اشهر مشارب مي اريد مي واريد اتحرك واثنينهم مااكدر عليهن

ناي : نعاد عليه الزمن وكت ماخسرت يونس قبل سنين من جنت اكل بروحي واكول شوكت يرجع وتالي انسجن سنتين هلمره اخاف يروح وبعد ميرجع اني وشرهب وحده صافنه بوجهه الثانيه وكوه حاصرين دموعنا ونقنع نفسنا يونس مابيه شى وراح يرجع ويجوز يلحك عليه مرتضى جان التلفون مينزل من ايدي واني اخابر عليه وهو ميجاوب لحد ماانغلق رجعت دكيت على مرتضى

مرتضى : يمعوده مبقى شى شويه واوصل انطي صبر شعندي طياره واطير والزمه

ناي : تأخرت حييل كل مااخابرك بعدني وبعدني

مرتضى : شسوي سيطرات ودنيا ليل ويأكدون على العبريه هسه اخوج متخبل وصار قيس ومنتظر للصبح ميحلاله العشك اله تالي الليل هيج وكت الناس تنهجع وتنام واخوج يفتر من محافظه لمحافظه

ناي : فدوة استعجل

مرتضى : ايييي افتهمت راح اطير

ناي : بقينا نقرا ايات وشرهب حاضنه سيف وتحاول تنومه مثل التهرب بحضن طفل صغير اعرف شرهب حيل خايفه ويمكن اكثر مني لان احنا مصيرنا مرتبط بيونس والي يجرا عليه يجري علينا والي مرينا بيه بحياتنا يخلينا نخاف من خساره جديده لان الراح هواي اكثر من الجاي رجعت خابرت مرتضى هلمره هذا هم ميجاوب فرت وصرت نار حركت التلفون حرك وشتلنا فوك الساعه

ودك مباشره جاوبت وينك متكولي مو حتى دم مضل بيه

مرتضى : صوت مااريد اكعدي انتي واختج بلبيت منا لحد منشوف تاليها شيصير

ناي : شكوو صوتك متغير ومبين اكو شى جبير

مرتضى : يونس اتصوب

ناي : كعدت بلكاع مخترعه شنووووو

شرهب : شكوو عفيه شبيهه يونس

مرتضى : عايش ماكتلج ميت

ناي : منوووو ضربه مهدي احجييي وكمت اضرب على رجلي تخبلت واعيط

مرتضى : ابن خالهم عبدالله ضاربه طلقه بطنه مبين مطوخ هواي بلحجي

ناي : ويونس وين ماات مووو مااات اخويه والطم على صدري

مرتضى : بلمستشفى وبعده بلعمليات

ناي : يييمه اخويه من عمري على عمرك جرت التلفون مني شرهب واني ابجي اتخيله سابح بدمه

شرهب : مرتضى تعال اخذنا عفيه

مرتضى : وين اخذكم هو اني كوه وصلت لديالى قابل اني بمدينه الطب واجي اخذكم وشوفي الساعه

شرهب : واحنا نضل هنا واخونه مشمور بلمستشفى كتلوه خلاص ومحد يمه

مرتضى : وانتي جون سينا المصارع وادافعين عنه بله متسكتين اني يمه ومهدي وخاله وابن خاله هم هنا ليضل بالكم

شرهب : هو هذا الي مخوفني هم ضاربي وهم واكفين فوك راسه الله عليك تعال اخذنا

مرتضى : روحي شرهب مو وكتج

شرهب : سد الخط واني اباوع على ناي كطعت روحها من البجي ردت ابجي وياها واعيط هذا اخويه الوحيد بس يمكن من الصدمه حتى دمع منزل سيف كام يبجي خااف من امه اخذته للغرفه ونومته ضليت افكر بلي صار طبت ناي

ناي : باجر من الصبح نروح لديالى اني مال ابقى هنا واضل تحت رحمه مرتضى شوكت يدك مستحيل واريد افهم شنو الصار وليش ضربوه

شرهب : اني هم دافكر بهذا الشى ادعي يطلع بلسلامه

ناي : حسيت البيت فجأه ضاك عليه فتحت الباب وكعدت على الدرج مال السطح العالي وين جنت اكعد ويه يونس وضليت اناشغ من البجي يعني يايونس ماتفوت مده اله تتوجع لشوكت ياروح اختك ترتاح مو حتى حيلي خلص من وراك حطيت راسي على الحايط واشهك

شرهب : جنت ادور عليج

ناي : كاعده هنا وين اولي مخابر مرتضى طلع من العمليه گلبي حيل يوجعني من القهر مااصبح

شرهب : ياستار اسم الله عليح جيبي التلفون اخابر

خابرنه على مرتضى كال طلعو من العمليات

ناي : شوو جيبي اسمع مرتضى وروح امي اذا باجر متجي تاخذنا احنا مصبحين بديالى ناخذ سياره ونجي

مرتضى : لتحلفين وتهوسين اني عندي صديق عنده تكسي راح ادزه عليكم الصبح يجيبكم واني احاسبه وين تفترن بلعبيريه ادلي البيت ومن ساعه ٨ يجيكم زين هيج

ناي : الله عليك بداعت امك يونس زين لو تكذب علينا

مرتضى : وليش اكذب كتلكم زين الطلقه جايه صفح همزين ماضربت الكبد دخلوه الانعاش وضعه مستقر

ناي : لتعوفه فدوة وباجر احنا يمك

مرتضى : جيبو غراض وملابس اله

ناي : معرفت شنو الصار

مرتضى : من تجين تعرفين

النجوم مختفيه والسما مغطيتها الغيوم والهوا بارد كلش وعالي يضرب بلراس والجسم يقشعر من البروده رغم بروده الجو الهوا يدفه من يلامس جسمنا كثر ماداخلنا نار على اخونه الي مثلنا متعلكين بگشايه اذا راحت نغرك واذا قبل كدرنا نعيش بليه يونس هلمره مراح نكدر لان جربنا مره وخسرنا هواي صرنا مثل خيط العنكبوت الي معلك بين السكف والكاع اقل هويه تكطعه

بقينا كاعدين ساكتين وحدتنا تفكر شراح يصير وشون راح نطلع من هاي الطلابه كلها ومنو اله الحق ومنو المتعدي

وكل شويه نخابر على مرتضى لحد مازهك وغلقه

جريت شرهب بحضني احاول اطمنها اعرف داخلها وشكد خايفه اذا اني اترجم خوفي بجي واطلع الگبت الي بداخلي وارتاح شرهب تحبسه بداخلها وهذا شى حيل يأذيها

ساعات الليل غريبه مرات تركض بينا وكت منريدها ماتمشي

ومرات ابطئ منها ماكو لدرجه دگات الگلب تصير اسرع منها هيج الساعات مرت علينا بذيج الليله واخونه وحده غفت عيونه مجرد ساعه حتى نكدر نقاوم الطريق فزينا وحضرنا غراضنا وغراض يونس واخذت الفلوس الي جامعتهم وفلوسه اخاف نحتاج شى

شرهب : ليش منعوف سيف يم خاله ام حسن

ناي : لا شون اعوفه بله طولنا لا عيني اخاف عليه

شرهب : والطريق والمستشفى

ناي : اقلها گبال عيني وبحضني ماأمن اعوفه ايام واني بعيده عنه

شرهب : بكيفج

جان يدك مرتضى وكال الولد وصل لراس الشارع بس ميندل البيت نزلت عليه واشرت اله وشافني واجه وصحت ناي ونزلنا الغراض مرينا على خاله ام حسن وبلغناها وضلت تبجي لان تحب يونس وضلت تدعيله خلينا المفتاح يمهاوتوكلنا لديالى

ناي : منعرف البارحه الصار كل الي نعرفه اخونا جان مات واثنينا اعصاب نريد بس نوصل حتى نفهم كلشي

وصلنا حدود ساعه ١٠ الصبح للمستشفى لكينا مرتضى ينتظرنا

ناي : وينه يونس

مرتضى : صوتج منا العالم هسه اوديج خلي احاسب الولد ثواني

ناي : واكفين ننتظر مرتضى لمحت مهدي مشيت سريع وكفت كباله اريد اشرب من دمه شسويتو لاخويه

مهدي : جيبي سيف ودخليله كلشي مابيه

ناي : احجي وياك هاي تاليهه تردونه يموت

مهدي : اعتقد اني كتلج لتخلي يوصل وحذرت وتعالي كوليلي بيا حق واكفه كبالي وتحاسبين الي يسمعج يكول اني الي اجيته للبيت واندكيت بيه اخوج عايل من السما للكاع والسواه مال مزعطه ودوسه بيت وفضيحه وزين مني لهسه متحكم بعقلي وماأذيته

ناي : اكثر من هاي الاذيه وصلتو للموت

مهدي : هو وصل نفسه مو احنا اخوج معرف يتصرف اذا اني ردت الملم السالفه ومحد يعرف بيها بحركته هاي خلاني صغير كدام خالي ولده شكول الهم مافكرتي بيه مثل متفكرين بأخوج شنو منظري وابن عمتي واكف ويدك صدره ويكول على اختي حبيبتة وتحبه وتريده لج اني زين مني ماطبيت ذبحته المفروض تشكريني شايفتني ناقص عرض وغيره واقبل اختي تصير سالفه بحلك الزلم على مهدي معرف يربي اخته

ناي : كتلك يريدها بلحلال

مهدي : والحلال ماكو اسهل منه يجي يدك بابها مو شباجها

ناي : جان ظرفه مايسمح ويعرف امك متنطيها وادور فخفخه وفلوس وجاه وراد يلم مهرها وميقصر ويخطبها

مهدي : محد طرده حتى يمشي بهيج درب جان من الاول يجي ويفتهم مني يجوز اوكف وياه واساعده وانطي كلمة حوراء اله ليش استسهل الحرام هاي مو غريبه من الشارع هاي بت خاله ناي اخوج دنس شرفي ماخله حرمه ولا احترام اليه عجبته سالفه العشاق والتلفونات مافكر لحظه وكال هاي بت خالي لزمها اخوها شكول اله وفوك دكته الناقصه جاي هداد عليه والي حجاه يونس يخلي العاقل يتخبل وكدامج عبدالله متحمل يكمل كلامه وضربه تعرفين شنو منظري واني اشوف خالي ولده كلها تباوع على يونس والي حجاه بعد مجانو يحبوه ويحترموه ومن يسمعون صار عليه شى يجون گبلي يساعدوه هيج يجازيني ويجازيهم

بشنو قصرت وياه بشنو أذيته واذا أذيتج اني فهذا الشى بيني وبينج واجيت واعتذرت اكثر من مره وصبرت لخاطر مااكسر خاطرج وبقيت متحمل بعدج وبعد ابني واني اشوفه يكبر بيت غير بيتي وبالع وساكت ومن يكول اختي تبقى بيتي احترمه اكول يخاف على اخته ويريد يرد اعتبارها وحقه بيوم شفت بيه اخويه الصغير وعدت نفسي شوكت مايحتاجني اول واحد اركضله مو لخاطرج لخاطر الدم البينا تالي بعد كل هذا الطعنه تجي منه

ناي : جان يحجي بحرگة گلب حسيت على لحظه يخنكني بقيت ساكته واباوع عليه

مهدي : روحي شوفي اخوج وراح اخذ سيف ويايه للبيت

ناي : متاخذه

مهدي : جفي الشر وحيري بيونس ومثل ماسيف ابنج هو هم ابني ومن اليوم اخذه شوكت مااحب وحلكج متفكيه صبرت هواي وسكتت هواي وهاي نتيجتها انتي تماديتي واخوج قلل احترام

ناي : شوكت ترجعه

مهدي : وكت متردين ترجعين لبغداد ماادخله لمستشفى يمج مااريده يلكف امراض من المستشفى

شرهب : يله ناي ندخل

ناي : عينك عليه عفيه مجاوبني اخذ جنطت سيف  الصغيره من ايد شرهب وراح

شرهب : امشي نشوف يونس تره سيف راح ويه ابوه مو ويه رجال غريب

طبينا للمستشفى نمشي وره مرتضى قريب ردهت الانعاش بقينا كاعدين محد يقبل يدخلنا

مرتضى : لو منتظرات يومين من يصحى تعالن شوفنه

ناي : ليش نكدر شكالو الاطباء

مرتضى : عار اخوجن ميموت

شرهب : اسم الله الرحمن كون الي ضربه والي يكرهه شنو هذا فالك

مرتضى : بربجن ماعرفتن توكفنه لهذا الخبل رايح بنصاص الليالي يتهدد عليهم زين منهم نقلوه للمستشفى

شرهب : هم عايزه يتصفه دمه ويعوفوه

مرتضى : لا ياخذوه ويبوسوه ويكولن اله عفيه بلسبع شد حيلك واوكف بنص الشارع وشهر بينا وبعرضنا واحنا نطيك هديه نستله ام الربع ولجن اخوجن صخم الامه وخربط هواي بلحجي الناس على ديج ودجاجه تصير مذابح وزلم تروح بيها مو سالفه عرض ويلوم مهند من حجه بيج مو سوه نفس الحركه الخايسه

ناي : لا مو نفس الشى مهند طعن بشرفي واني مره متزوجه وام وذب تهم عليه مصارت وشوه سمعتي كدام رجلي وحجه شغلات الواحد يشمأز منها كله حتى اطلك بينما يونس من راح لان يحب ويريد يتزوجها بلحلال وميعرف بيها مخطوبه وراد يتفاهم وكبرت الشغله لتقارن مهند بيونس رجاءاً

شرهب : هو استعجل لان يحبها ويخاف عليها وهي الغبره كله منها مكالت مخطوبه الفاهيه شكد اكرهه فهاوتها تسل الروح

مرتضى : اثنينهم عقل براسهم ماكو وسكتن دوختني اني احير بأخوجن لو بعمي الخاس بلسجن راح البس عكال واكعد وافتحلي ديوان واصير شيخ عشيره واحل طلايبكم لو وراكم فلوس مصلحه ماانقهر بس تعب وصرف ومغثه طلايب العراق تخلص وتنحل وطلابت عمشه ولدها واحفادها ماتخلص متزقنبات لو لا

ناي : بحال اكل

مرتضى : رايح اجيب كل وحده لفه اكلن لتروح وحده منجن توكع والكعبه مااشيلها اشبعها جلاليق منايم من البارحه وفرج شفته بكبره من وراكم

شرهب : روح جيب احد لازمك هو من وصلنا بس انت تلغي ومسوي انجاز شون بتت هنا المفروض تشكرنا لان خلصناك من ساهره

مرتضى : ام عطوب ضمي لسانج

شرهب : دروح يله

ناي : بقينا كاعدين واجه مرتضى مكدرنا ناكل غير شوي كل ماالوكت يفوت نخاف اكثر ليش ماصحه شوكت يفتح عيونه حجه مرتضى العركه وشون من وصل لبيت مهدي مالكه احد لان ماخذيه للمستشفى ومبين طلعت ام عبد وبلغته لان كال مره بعمر عمتج وصفلي شكلها وكالت اله على مكان المستشفى

للظهر اني حاطه ايدي على راسي ومغمضه عيوني من الالم افتحهم واسدهم واقرا ايات بگلبي وادعي حاسه ضغطي صاعد

وشرهب تروح وتجي وساعه تكوم وساعه تكعد

سمعت صوت خالو عمران ويااه عبدالرحمن

عمران : هاا بنتي شونج

ناي : بجيت متحملت حسيت بهضم وقهر على اخويه وخايفه لا مايكوم منها واحنا وحدنا لا عم ولا جبير ويانه حتى الجنت معتبرته جبيرنا اليوم هو ضدنا

عمران : ليش تبجين

شرهب : فرحانه لان اخوها بين الحياه والموت وبسبب ابنك

عبدالرحمن: صوتج مكاعدين بلشارع

شرهب : وهذا الهامك الشارع والناس والي مشمور جوه ماهمك المن جايين تكتلون الواحد وتمشون بجنازته

ناي : اسكتي شرهب

شرهب : ليش اسكت اذا اخويه غلط ومعرف يتصرف فأبنكم مجرم وحرامات الشهاده الماخذها اذا ايده والسلاح شبقه للمجرمين اذا المتعلم يلزم سلاح ويگتل الكدامه لا عتب على الحراميه والارها..بين

عبدالرحمن: تردين اخوج واكف يحجي عن خطيبته ويسكت

شرهب : ياخطيبه والله عيب تكولون هاي الحجايه واحد قره الفاتحه من  من ٨ سنوات مدري ٩ ودار وجهه وطفر كعد الصبح وكال خلي اروح اتزوجها هو شيعرف عنها حتى يغار وتاخذه الحميه ويضرب يونس هو لو عنده غيره من الاساس مجان عافها كل هاي السنين

عمران : مهما كان بنتي تبقى بت عمته وغيرته مجانت غيره واحد خاطب وحده هو فار دمه لان يحجي على بت عمته الي تربت وياه

شرهب : وضربه شستفاد اخذ نوط الشجاعه ابنكم مجرم ولازم ينحبس

عبدالرحمن: هاي السوالف لتدخلين بيها يكعد يونس ونشوف حلها اخوج هم احنا نحقه عشائرياً لان هاي اسمها دوست بيت والتعدي على عرضنا  واذا اشتكي هم نحقه قانوناً لان هو اجه متهجم لبيتنا ونكدر نسويها دفاع عن النفس

شرهب : طبعاً كلشي تكدرون تسون حتى الحق تگلبوه باطل والفقير اله الله

عمران : كافي عبد لتجادلها اكعدي بتي انتي مالج ذنب واختج هم حجايتنا ويه يونس

ناي : ويونس اخونا والي يمسه يمسنا خالو اعرفك تحبنا وكفاتك ويانه ماتنسي ومايوم ردنا شى منك ورديتنا اخويه يريدها لحوراء بلحلال ومو قصده ابد يكسر هيبتكم او يوكف بوجهكم ساعده خالو اترجاك

عمران : متمشي الامور هيج سوايه يونس خلت هواي امور تتغير

عبدالرحمن: مالنه حجي ويه النسوان يابه خلي يكعد اخوهن والنه كعده وياه

شرهب : وشبيهن النسوان الي كدامك يسون الف زلمه

عمران : والنعم بنتي اعرف بيجن طيبات بس هاي الامور منحب نحجي بيها قبل مايكعد اخوجن

شرهب : كعدت بعد مسافه منهم ومحد حجه اي شى بس اني اريد اهجم على عبد كون املص رگبته مثل الطيور الي يربيهن واحد غثيث

ناي : خالو ساكت واعرف حاير كل مره هو بجانبنا هلمره ابنه الطرف الثاني وخالو حيل يحب اولاده

شرهب : خالو عمران اخذ مرتضى ومدري وين راح وكام عبد وياهم

عمران : انت ابقى هنا يم البنات

عبدالرحمن: مو وحدتهن بالف زلمه شكوو عليهن اذا بقن وحدهن محد ياكلهن لو بس وكت اللسانات الطويله والصوت العالي الف زلمه وكت ماوحدهن ياعيني يصيرن كناري

عمران : ابني ابقى وياهن ساعه زمان ونرجع

شرهب : هزيت ايدي باع هذا هم شايف نفسه

عبدالرحمن: اكو شى

شرهب : احد حاجي وياك

ناي : كاافي شرهب عيب

شرهب : ليش همه يعرفون العيب اخونا بسببهم جوه ولهسه مافتح عينه

عبدالرحمن: هم كالت بسببهم لج بابا انتي خبله بنص عقل متفهمين مجيم هذا الراس اخوج تهجم وطعن ومتحمل عبدالله المهزله الي دتصير وضربه

شرهب : وانت ليش حاط اذنك يمي والله هاي حلووة حجيت وياك كعد احجي ويه اختي

عبدالرحمن: صوتج مال دلاله عالي واسمعه

شرهب : من يوم ماشفتكم جنت اكول ماكو اطيب منكم ولا اكو بغيرتكم وكرمكم وجنت اكول ليش الله مارزقنا بعزوه مثلكم اهلنا من نفس الدم مو اهل مهدي ومن جنتو تجون ركض من يصير شى بينا احمدالله لان ملين گلوبكم علينا وبنيت الكم صورة حلوة بداخلي

وتالي من وره  البارحه صارت الصوره ظلمه القاهرني لهسه ولا واحد منكم معترف بغلط عبدالله وكلكم طابكين وياه وخايفين عليه ومحد فكر بليتيم الي جوه اذا مات او اسكط منو يتحمل ذنبه لان اكيد اخوك يرجع يسافر ويعيش حياته وينسى كل الصار والخاسر الوحيد يونس واحنا

تقرب وكعد بعد مسافه قريبه مني

عبدالرحمن: شوفي يابنت الناس اني مااكول الج راضي عن تصرف اخويه لا غلطان وميصير هيج يستعجل ومثل ماتكولين اخويه غلط اخوج هم غلط بهاي العركه كلها ماكو حق ضايع بين الرجلين وحتى تمر السالفه كلها سلامات المطلوب لاانتم تزيدون الحطب على النار ولا احنا وخلي نلمها اذا كبرت اول واحد يتأذه هو يونس مثل متكولين اخويه يسافر ويعيش حياته ويونس يضيع اكثر ماهو ضايع

شرهب : خلي يكوم بلسلامه وراها الله كريم ولو اني اتمنى ينسجن اخوك يستاهل واحد شايف نفسه عباله كل الناس اقل منه

عبدالرحمن: هو انتي وين شايفه اخويه وحكمتي هيج عليه

شرهب : ميحتاج انت كدامي واكيد يشبهك

عبدالرحمن:اعرف لسانج متبري منج وحده جسره وراح اخذج على كل عقلج

شرهب : اذا تاخذني على كد عقلي يرادلك الف عقل حتى تستوعبني

عبدالرحمن: انتي عليمن طالعه

شرهب : ليش

عبدالرحمن: جاوبي عليمن

شرهب : درت وجهي ومجاوبته

عبدالرحمن: الصبر ويهز برجله

ناي :كاعدين على نفس الكعده وخالو ومرتضى لهسه مااجو خابرت على مهدي حتى اطمن على سيف ميجاوب ليش يحرك بدمي اكثر ماهو محروك

اجتني رساله منه سيف زين ميحتاج تخابرين اعرف يسوي هيج على القصد حتى يأذيني

شرهب : مدنكه العب بأضافيري من التوتر انمد كلاص ولفه

عبدالرحمن: هاااج اكلي

شرهب : مجوعانه

عبدالرحمن: من الظهر على نفس الكعده مستحيل مجعتي

شرهب : مااريد شكراً اكلهم انت

عبدالرحمن: بله راس يابس اكلي

شرهب : مو بحال اكل اني اريد يونس يصير زين

عبدالرحمن: يصير زين الدكتور كال ساعات ويفتح عينه

شرهب : اخذت اللفه منه اكلت شويه وعفتها بس الجاي كله شربته لان راسي يوجعني ردته يفك وناي مقبلت تاكل بس اخذت الجاي

اجه عمران ومرتضى سألت مرتضى وين رحتو كال جنه بيتهم لان اجوي عمامهم مبين السالفه طشت ويردون يعرفون شنو السبب عبدالله ضرب يونس

ناي : ومنو طشها

مرتضى : منعرف ابوعبد ضيع السالفه كال جانو يتشاقون وطلعت بلغلط بس الظاهر محد صدك الشغله بدت تكبر حيل

ناي : لتبلغ بيبي اذا سمعت تتخبل واصلاً عمو فلاح اذا عرف راح يصير ضد يونس مو وياه وابوك ميحب اخويه ولا راح يساعده لهذا بقي الشغله صنطه لحد منعرف شيصير

عمران : كون بويه روحن ويه اخوجن عبد للبيت

ناي : وين نروح خالو منتظرين يونس يصحه

عمران : صار الليل وين اخليجن تباتن هنا وكلها زلم ومرافقين وانتن بنات صغار جنت ساكت لان نهار ويمشي الوضع بيات هنا مااخليجن

ناي : مااكدر اروح لهناك

عمران : حتى مهدي خابرني وگلي متبات بلمستشفى

ناي : مو بكيفه

عمران : لا بكيفه وهو رجلج لا تنسين وبليه عناد روحن ومن الصبح تعالن واني وابن عمجن ضالين هنا شيصير نطيكم خبر

ناي : دك تلفوني مهدي جاوبت

مهدي : رجعتي

ناي : اريد ابقى بلمستشفى

مهدي : عندج حلين ياتجين للبيت هنا تباتين وترجعين الصبح للمستشفى ياترجعين لبغداد وتكعدين بلبيت تنتظرين اخوج

وحجايه ثانيه الغي الحل الاول وارجعج بيدي لبغداد

ناي : ماابات بيتكم اروح لبيت خالو عمران

مهدي : عادي المهم متبقين بلمستشفى

ناي : ماشي سده باوعت على شرهب يله كومي

شرهب : طلعنا ويه عبد ناي كعدت ليكدام واني ليوره عبد وجهه المرايه عليه صرت عين بعين وياه مباشره كتله خيرر اكو شى مضيع شى

ناي : شبيج

شرهب : الظاهر اكو واحد مضيع فلوس بوجهي ويريد يلكاهم

ناي : باوعت على عبد الي رافع تك حاجبه وبده يدوس راسها جوه التاير عرفت تقصده

عبدالرحمن: جنت اعدل المرايه ماقصدج على شنو اديرها مشايف كفشتج لو حلوة جان شسويتي

شرهب : غراب يكول لغراب وجهك اسود

عبدالرحمن: ويايه

شرهب : لا درت وجهي على الجامه وفتحتها

غير تفض ونرجع للبيت من ساعه الكشره عليج ياحوراء هي تحب وتتمعشك واحنا ناكلها

ناي : وصلنا للبيت صار اكثر من سنتين ماواصله هنا گلبي انقبض وانعاد كلشي صار بيه بديت استغفر بگلبي واحاول اتحمل

طبينا لبيت خالو استقبلتنا ام عبد بس هلمره وجهه ثكيل مو مثل كل مره لان ابنها هو طرف بلمشكله

دزيت رساله لمهدي يجيب سيف

بقينا كاعدين مثل الخطار منتحرك ابد

عبدالرحمن: تكدرون تباتون بغرفتي واني ابات يم عبدالله

شرهب : ليش اخوك المجرم هنا

عبدالرحمن: يعني هم بيتنا وهم تتجاوزين

شرهب : جذبت مو هو ضرب اخويه

عبدالرحمن: ماموجود والافضل اطبون للغرفه حتى متشوفوه

ناي : اريد سيف عفيه روح جيبه

عبدالرحمن: رايح

ناي : جان يطب مهدي ولازم ايد سيف طفرت من مكانه احضن بيه عبالك سنه مشايفته

مهدي : ساعات متحملتي بلياه واني حارمتني منه سنتين

ناي : شتريد تتعارك

مهدي : لا اتعارك ولا اتجادل وكت تطيب الخواطر راحت وكتلج شوكت مااحب اجي اخذه

جبته الج لان كام يبجي ويريدج ومردت اشلع گلبه عود بمرور الايام اعلمه عليه وبعد اخذه يمي

ناي : اخذته لسيف وصعدنا اني وشرهب بغرفه عبد خلصنه الوكت شون مجان حتى اكل مانزلنا ناكل جانت الوجوه كلها ثكيله واحدنا يريد حجه حتى يتعارك

والصبح نزلنا

جانت ام عبد كاعده تسوي ريوك ولدها اثنينهم كاعدين متحملت وكفت بلباب مااريد اشوف عبدالله

دكيت على مهدي مبين نايم جاوبني

صباح الخير

مهدي : صباح النور اكو شى

ناي : تكدر تودينا للمستشفى

مهدي : ساعه بيش صارت

ناي : بال٨

مهدي : اغسل واجي حضري سيف

ناي : اريد اشوف حوراء

مهدي : ماكو

ناي : ليش بله

مهدي : كتلج ماكو يله شويه وجاي

شرهب : شصاير

ناي : مبين حابسين حوراء

شرهب : حيل بيها تستاهل كل الصار من وره راسها

ناي : لج خطيه والله حبابه حوري وماسوت شى غير حبت يونس ميصير احنا هم نصير ضدها الله اعلم وداد شسوت بيها اكيد عدمتها العافيه وكلت اشوفها وماكو احسن من هاي الفرصه ومهدي مقبل

شرهب : تردين تشوفيها

ناي : اكلها مهدي ميقبل شبيج طرشه

شرهب : خلي يطير بكيفه شوو تعالي

ناي : سحبتني من ايدي ودكت الباب جان تصير وداد بوجهنا

وداد : يامصباح الاكشر شوفتكم شرايدات وجهه الفگر

شرهب : انريد نسلم على حوراء

وداد : ماكو وروحن منا جان تسد الباب لزمته شرهب ومخلته ينسد

شرهب : نسلم ونروح ليش نسوي هوسه من الصبح

ناي : نزل مهدي سمع صوت شرهب

مهدي : هااا خير

شرهب : حوراء صديقتنا والصار مالنا دخل بيه انتم زلم حلوها بينكم لتذبوها براسنا واحنا مرايدين غير نشوفها ونسلم عليها ونطلع خمس دقايق منطول

ناي : باوع عليه ضايج حيل

وداد : ميطبن للبيت وحوراء مالجن دخل بيها اكيد انتن لعبتن بعقلها بتي فقيره وانتن دربجن اعوج وردتن اتضيعن مستقبلها تغار منها

شرهب : خاله اني مالي حجي وياج اني احجي ويه رجال البيت والمسؤول عنها ابو سيف مطالبين هوايه منك نشوفها ونروح واذا تريد ابقى واكف يمنا

مهدي : تعالو ادخلو

ناي : حطيت رجلي بعد مطلعت من هذا البيت مطروده الزمن عجيب مرات يرجعك لاماكن ماتتوقع بيوم ترجع

طبينا لغرفتها وهو اخذ سيف مني وصاح امه لان رادت اطب ويانه

تقربنا منها سمعت صوتنا فزت رفعت راسها واشوف وجهه خريطه من الضرب والخراميش متشووه عزه هااي شنوو

حوراء : بيوم جيت يونس جنت ابجي وخايفه وماعرف شراح يصير لحد مندكت الباب كلت اكيد احلم هذا صوت يونس معقوله اجه طلعت اركض من الغرفه امي جرتني من شعري

وداد : وين بت الزماله تردين اطلعين اله حتى اتفضحينا

حوراء : مااطلع والله بس اشوف شكوو

وداد : طبي لا اكطع النعال على راسج شوو تعالي

حوراء : جرتني ودفعتني للغرفه

وداد : ايااج اطلعين لو اشوف خيالج

حوراء : ركضت على الشباك اريد المح شى جان بعيد بس الصوت واضح لان بعياط والليل هدوء يعني كلشي اسمع سمعت يونس شون يحجي بحركة ومنهار ومن كال تحبني وتريدني واني متفق وياها على الزواج كمت ادك على وجهي لان حيل صعب الوضع كبت الهوسه مهدي يحجي ويونس وعبدالله الي حظي المصخم رجعه تلازمو بالايد واني ارجف وابجي وادعي تفض لحد ماسمعت صوت طلقه هنا متحملت وطلعت اركض حتى بليه شال بس فتحت الباب لمحت يونس بلكاع ويردون يشيلوه بليه وعي كمت اعيط من الخوف امي شافتني جرتني من دشداشتي

وداد : كله منج راح يضيع ابن خالج من وره واحد ميسوه التراب اليمشي عليه

جانت تضرب بيه حييل ردت اكوم افلت من ايدها عثرت وكعت على المكتبه راسي جره دم وجازت ابد مجازت رجعت ادفر برجلها وتفشر على يونس واهله متحملت الضرب دفعتها اني مو قصدي ادفعها بس اريد اخلص روحي منها اثناء مدفعتها وكعت على ظهرها زحفت حتى اكوم هي عاطت خفت ليصير بيها شى رجعت الها اجيت يمها ردت اكومها دنكت خرمشت وجهي نبتت اضافرها شاغت روحي بيومها مو امي جانت لا عدوتي وحتى العدو هم يرحم ماكفاها سكطت وجهي كامت وجرت  الشاحنه وطبكت الواير ودك على ظهري وايدي ركضت منها ودخلت للغرفه وبقت تعيط اليوم اموتج بيدي

غرفتي مابيها مفتاح اخذته من يوم مااخذت الموبايل حتى لا اختل واخابر اخاف عندي غير جهاز

لحكتني للغرفه حصرتي بلزاويه

بروح ابويه كاافي راح اموت بيدج

وداد : عساج تموتين واخلص منج حرامات انتي بتي فضحتينا وكسرتي وجهنا كدام خوالج ردتج احسن من بت صلاح وبت عمران تالي طلعتي على عمتج العايقه شكد ردتج اطلعين مثلي وعليه تالي حظي الفگر خلاج نسخه منها من انبش گبرها ماتت وماخلصت منها مره بتها ومره انتي طلعتي عليها وجايتني تحبين ابنها اسمعي لج الحجي الكاله يونس تنكري واذا سألج خالج كولي جذاب ويتبله عليه ايااج ياحوراء تأكدين كلامه لا وروح ابوج المات وضليت بحصرته اعلكج ولو انتي صايره مطي مال ضرب تتحملين افتهمتي جذااب محاجيه ويااه ولا تعرفين عن شنو يحجي الكواد واكف بكل رحابه صدر ويتباهه بعلاقته بيج من گبر الياخذه كون يموت ونخلص منه السگط ابن السگط مبقى عليه غير تربات السجون والشوارع ادفنج ومتصيرين اله اخاف ذيج المره سكتت على مهدي هلمره لا مااسكت ويااني ياانتي

حوراء : كل الضرب الي اكلته ماهمني كل همي يونس وشراح يصير بيه

كمت احط المخده بحلكي واصرخ اريد گلبي يوكف اريد اموت كله من ورايه اذا صار شى بيونس اموت والله اموت

صار يومين مااعرف شى عن يونس اكل والمي كطعتهم امي اطب وتطلع تغلط عليه ومنبهه عليه مااطلع غير للحمام وكالت اياج يشوفج مهدي حتى من سيف اجه ماخلتني اشوفه

اسمعها تبوس وتحضن بيه ومكيفه ولا جن اكو شاب بين الحياه والموت بلعكس تمشي وادعي عليه وتنذر اذا مات توزع جگليت كل كلمة تحجيها تكطع من لحمي

لحد مافزيت على صوت ناي وشرهب ماصدكت جنت محتاجه احد اشكيله ابجي بحضنه ومتوقعت الله يدزلي خواته من ريحته ودمه اني شفتهن شمرت نفسي بحضنهن

ناي : انكسرت ايدهم هاي شمسوين بيج

حوراء : يونس شونه عفيه

ناي : بعده بالانعاش وهسه رايحين اله يكولون معدي مرحله الخطر

حوراء : لعد ليش بالانعاش

ناي : مااعرف يجوز يخافون لتصير مضاعفات منو هيج ضربج مهدي

حوراء : لا امي

شرهب : هااي امج مال حرك فد وحده مقرفه كفار قريش يدخلون للجنه وامج متدخل

اكو ام تسوي بتها هيج مخافت تموتين بيدها صاير وجهج يخوف من الضرب

حوراء : طبني مرض المهم يونس عفيه شون بيه

ناي : الشغله حيل جبيره حوراء انتي حاولي تسكتين حتى لتتأذين لان مبين امج مراح تخليج تتنفسين وراح تبقى تأذيج ومهدي شونه وياج

حوراء : ميباوع بوجهي

شرهب : لج هيج تحبين اخويه

حوراء : روحي بيه والقران

شرهب : واني ليش الله مادزلي واحد يحبني ويموت علمودي ويعيط شرهب متصير لغيري واشبع كتل ودفرات ويصير شگلي مثل الصخله الشاميه من الكتل خرب عمي حتى بهاي حظي بنزرقي

ناي : رعنه احنه وين وانتي وين شوفي حالها

شرهب : شبيهاا مكتوله من وره الحب اكو احلى من هيج شى واخويه مدد من وراها قابل مثلي دزلي واحد يدور ولد لو مثلج واحد شايل جبل احد على راسه وميطخ خشمه الهوا هو هذا الحب دفره على كتله على طلقه ويتزوجون وتاليها تصير بلنعل ويعيشون بثبات ونبات واحد يغم الثاني لان تزوج ااااااخ احلى عيشه

حوراء : ابتسمت واني شكد متأذيه

شرهب : اييي هيج ضحكي وطز بأمج والدنيا اعذريني احجي على امج البيه مايخليني

هي تحجي الاخرس  واكفه بلباب وتعيط شون ناي عاشت هاي السنين وياها ماادري

ناي : نروح احنا انتي ديري بالج على نفسج

شرهب : حوري رغم دكتج الناقصه بأخويه بس ادري بيج تحبي واخويه عاش وياج احلى حب وغيرتي هوايه والصار قدر  لتحملين نفسج اكثر ومااكول غير الله يعينج ويعينه على الجاي لتأذين نفسج اذا صار بيج شى يونس يتخبل هو انضربتي اجاج من بغداد طاير مو عاد يصير بيج شى حاولين تاكلين وتسبحين حتى ترتاحين وامج ابتعدي عنها مبين السالفه مليوصه وناويتلج نيه موزينه

حوراء : سلمولي عليه وكولو اله اني احبه ومو قصدي اكذب واضم عليه

ناي : الله يهدي الگلوب ويجمعكم بلحلال

حوراء : يارب والله مستعده كلشي اسوي بس اصير ليونس

ناي : يله شوشه امشي نروح

طلعنا من الغرفه صار بوجهنا مهدي

يله امشي اوصلكم للمستشفى

ناي : وسيف

مهدي : يبقى هنا

ناي : اخاف عليه مهدي ليصير شى

مهدي : امشي ناي

طلعت وراه وداد واكفه وحاطه ايدها على خصرها وجهه محتقن غمتنا واحنا طالعين مهتميت الها خلي تولي بالي يم سيف ويم يونس

وصلنا والطريق كله ساكتين

اول موصلنا لكينا مرتضى وعبدالرحمن مبين جاي قبلنا وهذا مو طابق الانعاش

ناي : ليش هنا

مرتضى : كعد يونس ونقلوه للغرفه طبوله بهاي الغرفه

ركضنا عليه جان يرمش ويون

لزمت ايده ابوس بيه حبيبي تسمعني

يونس : ااااااخخخخ

شرهب : كون بگلبهم تسمعنا يويو حبيبي  الْحٍمَدٍ للـّہ على سلامتك

يونس : تعبااان

ناي :سوده عليه كون بيه ولا بيك

كاعدين يم راسه يكعد شويه يخربط بلحجي ويرجع يغمض وبقينا على هذا الحال اكثر من ٥ ساعات لحد مابدا يستوعب

يونس : شجابكم

شرهب : حظنا غير من وراك بله صار بيك شى منو يفيدنا

ناي : اششش اسكتي

يونس : مابيه شى مامتت

شرهب : وخرت على صفحه وكمت اشهك ردت اطلع الي بيه حييل خفت عليه

يونس : احجي بثكل كوه اطلع الكلمة شهكات شرهب حيل قهرتني لان اعرف بيها نادراً ماتبجي كافي شبيج شوشه

شرهب : انت متحبنا لو تحبنا متشمر روحك بلموت بله شنو ذنبنا منو النا لو صار بيك شى

ناي : كاام يكح ويتأذه سكتت شرهب بعده صحته موزينه

دخل عبد وتحمداله بلسلامه ومرتضى هم

شرهب : امسح بلدموع وطب هذا الغثيث صفن بوجهي لان عيوني حمر اشرت براسي شكووو كون حاجي حجايه حتى اطلع ضيم گلبي كله بيه دار وجهه وسوه نفسه يحجي ويه يونس

وطلعو واني بقيت كاعده مسافه عن ناي ويونس خلص اليوم كله ينام ويكعد ومستمرين اله الممرضين علاج ومغذيات ولان الغرفه بلطابق الخاص قبلو نبات يمه بقه مرتضى بره تعب هوايه ويانه وماعافنه

ثاني يوم كاعده امسح براسه اليوم لسانه ينطق احسن رغم يتوجع بس احسن من البارحه مافتحنا اي موضوع ويااه لحد مادك تلفوني اباوع عمه خوله

شكوول الها جاوبت وسويت نفسي كلشي ماكو

هااا عمه شونج

خوله : وغمه ولج شون اتضمين عليه ضربت يونس

ناي : شمدريج

خوله : خابرت مرتضى اسأله عن سالفه عبيد وحجالي كلشي

ناي :  الْحٍمَدٍ للـّہ عدت سلامات

خوله : وينه اكدر احجي ويااه فتحي الحاكيه حتى انتن هم اتسمعن

فتحت الحاكيه واستلمتنا

خوله : يمه حبيبي يونس تسمعني

يونس : اي عمه

خوله : حبيب عمتك وگلبها شلون صرت

يونس : زين لتخافين ليش تبجين

خوله : هبطت عليك وحتى لساني انشل من الهبطه زين انت بروح امك

يونس : والله زين وبمرور الايام ارجع شويه الم بطني وبلمسكنات يمشي الوضع

خوله : ماطول زين اسمعني لك انت تخبلت من رحت هديت على الناس

شرهب : انلعب بعدادات خوله استلم غيرت الموجه

خوله : انجبي اني مو موصيتج شيصير تنطيني خبر اول بأول حسابج بعدين

شرهب : حيري بيونس وعوفج مني يونس شغلته اقوى

خوله : شجاك يابت صالحه يابت وداد ادور على الطلايب دواره

يونس : عمه تعبان ومابيه احجي

خوله : لان الحجي ميصرفلك يمصخم شجابك عليها حتى اكبر منك

يونس : بكم شهر وهذا الشى مو مهم

خوله : وياك حتى لو بكم سنه هم مو مهم بس تعرف هيه بت منو ماشبعت مصايب مشبعت ضربات مشبعت وكعات على راسك خلصتها وانت جاي ماكو مصيبه ماركضت ركض الها وتالي تروح تهد بتالي الليل وتعيط وتصيح

يونس : خفت يأذوها والله ماادري بيها مخطوبه ومجان بنيتي افضحها ردت احجي ويه مهدي وهو مطاني مجال

خوله : شتريد يسمع الخريط مالتك والله احب اختك ومصادقها حتى الناقص غيره هم ميقبلها على عرضه تريد مهدي يقبل

يونس : شتردين عمه حتى جرحي هااج عليه

خوله : شكوه ماتشتكي

شرهب : ليش خلي يدخل عبدالله السجن ويعفن بيه

خوله : لتدخلين انتي بس راس حتى عقل ماكو ولكم نسيتو ابوهم شسوالكم منو شال امي على ظهره وصرف ملايين حتى اطيب بلوكت الي ولدها واحدهم يباوع عليها وينتظر موتها نسيتو يجي من ديالى بعز الطائفيه حتى بس ياخذها للطبيب وهي لا امه لا تكربله ولا اكو صله دم وياه لوما هو جان امي هسه مدفونه بلنجف

لو نسيتي ياام راس من عدي هد عليج وعلى اخوج وشون وكف بوجهه عدي ويركض بلمحاكم حتى يطلكج منه لكم ليش الحسنه ماتضل بگلبكم ليش ناكرين المعروف

ناي : وكفات خالو هوايه ومتنسي

خوله : وانتي خاتون حطج بيته وامن عليج وماسلمج بيد عمامج وجبر اخته تقبل بزواج ابنها حتى لينكسر بختج وتتزوجين واحد مثل عدي اذا مو انكس

يجوز ماانسعدتي ويه مهدي بس على الاقل مجان مثل عدي ولا قصر وياج ولا بيوم سمعج گلمة موزينه وجان رجال صاحب مواقف شوكت ماتنخي اول واحد واكفلج واذا على مشكلتج وياه هاي بسبب الخبل الثاني مهند مو الله بلاني بولد اخوه واحد ارعن من اللاخ

الرجال ماقصر وجان الكم حزام ظهر وسند وماردكم بيوم ولا انطه بيكم ولا تعاجز من مشاكلكم ولو نرجع للحق انت العايل والغلطان تسد السالفه وتعتذر منه واطيب خاطره

يونس : اني هم فكرت هيج بس حوراء شون

خوله : حوراء سالفتها غير حل الموضوع ويه ابوعبد وسد سالفتك  الْحٍمَدٍ للـّہ ربك دفع عنك وماطول نجاك لازم ترد جمايل هاي الناس عليك وماكو غير تعوف ابنهم بحاله حتى توكف بعينهم ويحسون انت رجال

يونس : هذا هو عمه واني بس اطيب ارجع افتح موضوعها ويه مهدي

خوله : ابني ليش متعوفها والله متناسبك متعرف منو امها من كل عقلك توافق اخاف صارت مال ناي ذيج غلطه وضلت متندمه عليها والي مثل وداد متعيد الغلط مرتين

يونس : حوراء اليه ومتصير لغيري

خوله : انهجم راسك شبيك معلك بيها هيج اريد اسألك بله لو صاير بيك شى مافكرت بذني اليمك ماكلت منو الهن گبل رحت وشفت شصار بحالهن هلمره شون يايونس وحده مطلكه والثانيه زعلانه وحتى لو اجيت اني وعشت وياهن تتوقع عمامك يعوفونا وحدنا وساهره وصالحه ميدفعوهم علينا وخاصه ساهره وصالحه امنيتهن يلزمني بعد سوايتي الاخيره بيهن ماكلت اذا صار بيك شى ذني يتلاطمن بلدنيا ويصيرن جوه رجلهم

يونس : عمه حيل تعبت

خوله : تعرف حجي مالتي كله حق والحق مامريود حط بالك انت تتحمل ذنب ذني اليتيمات لان جازفت بروحك ومافكرت بيهن جنت تكولي راح اعوضهن واعوضهن خوش عوضتهن ذبيت روحك بلنار خلف الله عليك يمه كفيت وفيت

ناي : باوعت على يونس اختنك حييل عمه غير وكت نتخابر

خوله : عينج عليه وخلي يتصرف بهدوء لا ياخذنه بعضلاته شفتي طلقه وحده كومته وخلته لا ايد ولا رجل اكو امور متنوخذ بلنفخ واني واني الله المن انطاك عقل حتى تفكر وتتصرف بهدوء مو بغباء ياغبي

يله يمه اروح ماعندك اله العافيه

شرهب : ضلت عافيه بعد الرزاله الناشفه هاي لو مضروب ١٠ طلقات ولا رزالتج

خوله : اصطبري اني اعلمج انتي بلذات مشايفه الرزاله بعد

شرهب : اهووو راح تذبها براس ناس تحب وتنگتل واني اترزل يله عمتوو بوساتي الله وياج سلميلنا على الحلوين اليمج

سدي يمعوده راح تستلمنا

ناي : سديته هااا يونس راح تتنازل

يونس : اي لازم اني مو بالي اشتكي مرايد بس اكعد وياهم واتفاهم

مر اسبوع واحنا بين المستشفى وبين خالو جان الكل ساكت وينتظرون يونس يكوم بلسلامه خالو ماوصل للمستشفى ابد بعد ماصحه يونس وجان يسمع الاخبار من عبدالرحمن الي جان متواجد يوميه وحتى مهدي موصل ولا شاف يونس

اما اخويه جانت حوري متوكع من لسانه ويلوب يريد يعرف اخبارها احنه كلناله شفناها وزينه خوما نكول شبعانه كتل حتى يتخبل وكل هذا من اباوع عليه احسه كاعد على بركان بلحظه ينفجر

اجه الطبيب وسأله علمود يبلغ اذا حادث قتل وكال يونس طلقه تايهه ماادري من وين وخاصه بهاي الفتره الطلق التايهه بالاعراس والاحزان وبكل وقت لهذا الطبيب ماعلق ومبين ماصدك بس اكتفه بجواب يونس وانطو فلوس لواحد عرف هناك حتى ميصير تحقيق وسين وجيم وتنسد السالفه كلها وماطول شغله بيها فلوس اكيد تنسد وينشرب مي وراها هم

كاعدين انلم غراضنا حتى نرجع لبغداد حال يونس  الْحٍمَدٍ للـّہ وبدا يمشي بس على كيفه ولازم بطنه واحنا وياه مرتضى راح يومين لبغداد ورد رجع

كملنا كلشي وتكفل عبدالرحمن يوصلنا

خابرت مهدي دزلي سيف بيد عبد ومااجه هو ولا شفته ولا حتى شال تلفون عليه وكال شنو محتاجه عفته براحته

رجعنا لبغداد وره ايام كلش صعبه اتبهذلنا وتعبنا عدا القلق والخوف والبجي الطريق كله احمدالله لان رجع يونس ويانه

مابلغنا عمه بدعه ولا بيبي البيهم كافيهم

وعمه خوله يوميه تخابر وتطمن

دخلنا لبيتنا كون صعدنا يونس لان متأذي من وره الطريق

مرتضى وعبد تساعدو وصعدوه جان عبد ساكت ولا جن اخوه الي ضرب يونس تحسه شخص محايد وماله علاقه

لاحظت عيون عبد على شرهب الجانت هيه وياه توم وجيري واحدهم لازم سجينه وره ظهره ياهو الي يحجي الثاني يدچه بيها اثنينهم لساناتهم متبريه منهم بس الي دوخني من تنشغل شرهب عيون عبد متفاركها هذا الشى وترني همزين شرهب ولا منتبهه لان اعرف عبدالرحمن ابو نسوان ويوميه ويه وحده مابقي وحده تعتب عليه جانت حوري تحجيلي عنه وميعترف بشى اسمه زواج لهذا خفت عليها ولو هي مينخاف عليها بس الحذر واجب

رجعنا لبيتنا وطول هاي الفتره مداومت واجاني انذار من الكليه خفت انفصل ويضيع تعبي كله رجعت للدوام وشرهب اداري بيونس وبسيف وخاله ام حسن يوميه تصعد تقرا قران يم راس يونس وهاي شرهب السخيفه تكلها خاله تره مميت حتى تختمين اله

وخاله تضحك تكلها القران للحي والميت هو دواء الروح وفعلاً من جانت تقرا يمه ينام ويرتاح

صار ١٥ يوم وبدا جرحه يلم صحيح مرات يتأذه اذا حركة فجأه او يتحرك سريع بس اهون من اول ايام مصطفى العامل كل كم يوم يمر ينطي الوارد مال المحل همزين هذا الولد امين وحباب وشايل شغل يونس لوما هو جان اضطر يعزل

اجانه مرتضى يطمن على يونس وكال باجر اهل ديالى هنا مغصتني بطني شكوو مو تنازل يونس شصار بعد

ناي : منو راح يجي

مرتضى : بس ابو عبد وابنه الجبير عبدالرحمن وصلاح

ناي : ومهدي

مرتضى : مااتوقع لتنسين الشغله تمس اخته زحمه يجي

ناي : ردت فعل يونس السكوت اليوم كله ساكت

وثاني يوم جانت نهايه شهر الواحد ٢٠١٣ اندكت الباب وطب خالو وصلاح وعبد كعدو سلمو ويونس ومرتضى كاعدين

اني وشرهب بلمطبخ نسمع الي ديصير

عمران :  الْحٍمَدٍ للـّہ على سلامتك 

يونس : الله يسلمك خالو

عمران : ادري بيك منتظر جيتي

يونس : الصراحه اي وكلت منا لجم يوم اذا مااجيت اني بنفسي اجيك وابوس راسك واعتذر الك

عمران :اكو شغلات ياابني ماتفيد بالاعتذار اني جنت اشوفك حالك حال ولدي وقدرتك واشوفك رجال يعتمد عليه وحتى كلت لمهدي يونس احنا ظهره وعزوته ويايوم راد شى اياك ترده

يونس : اعرفك خالو متقصر والشهاده لله اعتبرك خالي وغالي عليه والك هيبتك وكلمتك وحيل اقدرك

عمران : بس انت دست هيبتي ودنست كاعي وخليتني اجذب على اهلي وناسي حتى اداري الفضيحه الي سويتها

يونس : غلطان بحقك واعتذر الك بس الوضع مو هيج

عمران : خليني اكمل اني اعرف كلشي وسمعت من كل الاطراف وانت ماخليت جبير بعينك واجيت تهوس عبالك البيت مابيه حرمه مثل الشارع ياهو اليجي يهوس بيه

يونس : خالو خليني افهمك

عمران : شتفهمني تكولي البنيه تريدك وعندك علاقه بيها من سنتين وتحجيلي شيصير بينكم حتى تخرب سمعتها اكثر

يونس : لا مستحيل شون اخرب سمعتها هي بت خالي وعرضي

عمران : لو مفكر بهاي حجايتك مجان تجرأت توكف وتعيط بنص البيت وكدامي وكدام ولدي واخوها

احنا مابدر منا قصور قدرناك وحبيناك واعتبرنا اهلك  اهلنا وخواتك بناتي وفتحنا بيوتنا كلها الكم ومايوم انسد باب بوجهكم والنتيجه دفرت الزاد والملح الي بينا وضربتنا بظهرنا واحنا ناس اهم شى عدنا الشرف والسمعه الطيبه والامانه وانت خنت الامانه

يونس : خالو وروح امي مااعرف بيها مخطوبه ومن اجيت متقصدت اسوي فضيحه ردت احجي ويه مهدي وافهمه وراها اجيك واكعد وياك واخليك واسطه خير حتى اتقدم الها بلحلال

عمران : شوكت تتقدم وره متتعارك وتهوس انت لو مفكر بالاصول جان اجيت بلنهار مو بليل مثل الحرامي وكعدت ويايه واستأذنت مني احنا معايشين بغابه كلمن اله لو ماعدنا اصل وفصل واهل وعشيره حتى بكيفك تتصرف اذا عمامك ماعلموك الاصول وماعلموك تحترم حرمه البيت الي اكلت وشربت بيه اني اعلمك

كلشي تتصرفه ينعكس عليك وانت مو طفل حتى اعذرك انت رجال وشايف وعايف اشكال وابني اذا غلط واستعجل وضربك لان انت تجاوزت كل الخطوط الحمره حتى مااحترمت وجودي ولا عبالك من تنازلت راح اهتم حتى لو ساجنه عادي لان كل انسان لازم يتحمل نتيجه تصرفاته

وعليه من اليوم مالنا شغل بيكم انتم بدرب واحنا بدرب الجمعنا بيكم راح ينكطع اليوم وبلنسبه لحوراء راح تتزوج ابن خالها

يونس : وكفت على حيلي وجعني گلبي گبل جرحي وعطت متتزوج وحوراء اليه

عمران : لان بيتك مااريد اتجاوز عليك تدري من وره سوايتك طشت بين عمامي وحتى اسد لساناتهم لازم ازوجها عبدالله حتى لحد يحجي بسمعتها وسمعتنا واذا تزوجتك راح أكد الصار

يونس : مصار شى بلحرام حتى هيج تسوي اني رايدها بلحلال ومن حقي

عمران : حقك خسرته من تسرعت وتهجمت وهددت وفضحت والخساره هاي من ايدك ومن تسرعك والبنيه سألتها وكالت مجرد اعجاب ماكو شى بينا وافقت على الزواج واذا وصلت يايونس او حاولت توصل لهناك هلمره بيدي اگتلك خلي الك شويه معزه بگلبي لاتدفر كلشي لان تصير موزينه

يونس : شسون سوو حوراء اليه ومتتزوج ابنك

عمران : اكعد بله وعوف العياط وكدام ابن عمك والولد اسألك وجاوبني جواب رجال

لو عندك اخت وتقدم الها اثنين واحد خريج سجون وخلص مراهقته بلشوارع وبليه شهاده وضعه تعبان وعائلته عتاكه والثاني ابن دواوين ومخلص دكتوراه وابن خير وعايش بلخارج المن تنطي اختك وكتلك جاوب جواب رجال مو سوالف الجهال والمزعطه والمسلسلات الخربت عقلكم اريد جواب عاقل واوزن الامور بعيد عن العاطفه المن تزوج اختك

يونس : يمكن لو باقي يحجي ويعيط ويتعارك جان اهون عليه من سؤاله هذا السؤال خلاني انلصم ومااعرف شجاوب جتف ايدي وشك گلبي لان الجواب مو بصالحي

مباشره وكفو

عمران :وصلني جوابك وياريت من تفكر تسوي مشاكل تذكر سؤالي وهم تذكر احنا منو وشنو نكدر نسوي انت لعبت بلنار ومكان ماتستفاد منها لشغله تنفعك حركت روحك بيها اختيارك من الاول غلط وياريت نصيحه مني تفكر الف مره قبل متختار وانت كبرت مو مثل قبل نكول عليك جاهل وميعرف يتصرف الحرف اذا طلع منك تتحاسب عليه

وبلغ اختك ترجع لبيتها زعلها طول ومهدي يريد ابنه يتربى بحضنه خلي كل واحد يكعد بمكانه كافي خرابيط

واياك يايونس تسوي مشاكل لان كتلك هلمره اني بوجهك مو ابني

ناي : جنت اسمع كلامهم تخبلت خالو عمران كلامه جاف وجارح ويه يونس متوقعت هيج يحجي مبين السالفه خربانه يمهم همه حيل يهتمون للقال والقلت واهم شى عدهم محد يجيب طاريهم بلموزين وحيل يحبون المظاهر ولازم يبينون همه نموذجين حتى عركاتهم ميخلون احد يدخل بيها حتى لحد يتشمت بيهم

طلعو واني وشرهب طلعنا ليونس الجان حييل متأذي وميعرف شيسوي

خله وطلع ومرتضى ويااه اني وشرهب سكتنا منكدر ندخل ولا حتى نحجي حرف

وخلال يومين يندك تلفوني وجنت هستوني طابه من الكليه تعبانه وزهكانه من الامتحان والبيت مغيم من القهر جاوبت الوووو

حوراء : هلوو ناي

ناي : هاااا حوري هذا رقم منو

حوراء : تلفون سدره رقمها الثاني فدوة اريد احجي ويه يونس تلفونه مغلق

ناي : سمعتي بلصار

حوراء : مستعجله ناي انطيني يونس

ناي : دخلت لغرفته

جان حاط ايده فوك عيونه

وخر ايده من شافني هيج دخلت

هاااك حوراء

كاام من مكانه بكل لهفه يمه اخويه متلوع بحبها

يونس : ايامي سوده بلياها جنت افكر والليل كله احش جكاير اريد اوصل لطريقه اهدي النفوس بيها واكسب عمران اليه حتى اخطب حوراء لحد مااجاني تلفون منها ماصدكت راح اسمع صوتها

بس سمعته لو كل الي مريت بيه من الم وجع وحرگان اعصاب تبخر

هاااا ياريتي الي بلياج مااتنفس شونج حوريتي

حوراء : شهكت بقووه واني اسمع صوته

سدره : يمعوده ليسمعوج

حوراء : يونس

يونس : عيون يونس انتي گلبه الي ممرتاح وهو ميعرف شى عنج ريحيني وطمنيني عنج أذوج من انكسرت ايدهم اذا انمدت عليج

حوراء : دموعي ترست وجهي وبدلتي وكوه طلعت من حلكي اليوم المهر مالتي

يونس : محسيت بروحي غير افشر واكفر تهسترت لججججج شون المهر مالتج تروحين لغيري

حوراء : عفيه على كيفك

يونس : ياكيف تحجين بيه مخابرتني تبشريني شون انطيتي بيه

حوراء : وروح بابا هددوني يأذوك واني شفت بعيني شون ضربوك طلقه شون ارضى تموت من ورايه

يونس : وهسه مراح تموتيني لججج كلشي اتحمل واكول تهون لعيونها تالي بنص الطريق تهدين ايدي اني افكر شون اخذج من عيونهم وتالي تبيعيني

حوراء : مااكدر هواي شغلات صارت مااكدر احجيها الك  خابرتك حتى تبريني الذمه

يونس : الله لا يوفقج وماابريج الذمه ليوم الدين والنار البيه عساها تحركج لججججج حووووراء لتعوفيني

ناي : واكفه اسمع وابجي وهو يركع راسه بلحايط ويعيط وبعده يحجي

حوراء : انت اول حب بعمري وماحبيت احد بكدك والصار لمصلحتك اني اسفة حبيب عمري تبقى اغلى من روحي وبس الموت يطلعك من گلبي الله يوفقك

يونس : الووووو الوووووو حوووواءءء

ناي : عفيه على كيفك حتى جرحك راح ينفتح

يونس : نااي هاي راحت راح تتزوج المهر مالتها اليوم

ناي : على كيفك فدووة اباوع خشمه طك دم يقطر ضغطه صعد ميعرف شيسوي حاله انگلب

لك عفيه راح تموت وين شرهب اكيد جوه يم ام حسن دكيت عليها جاوبت تعاااي بسرعه فوك شفت يونس طب للغرفه سحب قمصلته ويريد يطلع

لزمته وحضنته

عليك گبر امي عليك بدمها الطاهر احلفك بموتتها لتطلع ولا توصل الهم البنيه مو قسمتك وحتى اذا رحت راح تكون عاقده وصارت بذمه غير رجال احنا مالنا احد غير الله وغيرك لا ادوس خواتك

شرهب : شكوو شكوو شصاير

ناي : حوراء اليوم المهر مالتها ويريد يروح

شرهب : خلي يروح

ناي : شبيج تخبلتي

شرهب : رووح يله واذبح خواتك بيدك ضربته على صدره مو كلت اني سندج اني راح اخليج تكملين دراسه واتباها بيج ينلام بيك عمران من كال سوالف مزعطه انت مو رجال انت جاهل انباكت منه لعبته ويبجي عليها

جان يضربني راشدي

فر وجهي فر

اضرب بعد يله عادي بقت عليك الدنيا ياما وياما ضربتني من ام شمرتني ومارضت ترضعني لحد رجال يتلاعب بيه وهسه اخويه باعني ويريد يموت ويعوفني اتلطم بلدنيا واصير مطمع للي يسوه والمايسوه لخاطر وحده عافته اذا الدم البينا ماوكف بوجهك وخواتك اليتيمات ماكسرن خاطرك اني هم اخ مثلك مااريده

ناي : كعد بلكاع يبجي وجر شرهب باسها من خدها الي ضربه وجرني حضني ويشهك مثل الجاهل اااااخ ياخويه شكد تعذبت

اثنينا حضناه نريد بس نسكته

بقينا دقايق هيج وتالي كااام ونزع ملابسه وطب لغرفته

ناي : ليش هيج حجيتي ويااه

شرهب : حتى يصحه حيل خفت عليه واذا امنعه مثلج راح يعاند ردت اصحيه بس اكلت راشدي منه

ناي : تأذيتي

شرهب : لو يكطع من لحمي فدوة اله هذا ابويه قبل ليكون اخويه وحاله هدني قبل ميهده بس ماعدنا حل غير نهون عليه الايام الجايه وعسى كلمن كسر گلبه ينكسر اكثر منه

بعد شهرين :

حاطه ايدي على خدي وصافنه

شرهب : نايه زينه انتي

ناي :شسوي لج يريد يطلبني بيت الطاعه لو ياخذ سيف مني

شرهب : توقعت يسويها وخاصه بعد عركتج ويااه

يتبع ......

#الابواب_الخمس

البارت الواحد والثلاثون/الجزء الثاني

للكاتبة Reem

(بارت طويل لعيونكم )

شتخسر يازمن لو فرحتني بيوم ..

خلص عمري حزن وبعازت الفرحه.

خلي ترتاح روحي من الهموم اشبيك

وخلي يطيب كلبي ويلتحم جرحه ...

رافكني الحزن من زغري ضل وياي..

وفوكاها الدهر حط بالوسط رمحه..

عندي عتاب يكتل يازمن وياك ....

فدوه لاتقسي عليه بسنينك الوكحه

سنة ٢٠١٣

عمر يونس : ٢٦ سنه

عمر ناي : ٢٤ سنه

عمر شرهب : ٢٠ سنه

عمر مهدي : ٣٢ سنه

بعد شهرين :

حاطه ايدي على خدي وصافنه

شرهب : نايه زينه انتي

ناي :شسوي لج يريد يطلبني بيت الطاعه لو ياخذ سيف مني

قبل شهرين :

بيوم ماحوراء اتصلت وخبلت يونس بسالفه مهرها واحنا داخلين انذار كلام شرهب نوعاً ما صحاه وخلاه على الاقل يلزم نفسه ومايتهور يمكن ماراح ولا سوه شى يأذينا بس أذه نفسه صار ايام ويونس بس جكاير اكل شبهه انقطع ومسكنات وجع الراس صارت كرزات اله اخويه متأذي حيل لان حس روحه ضيعها هواي اغلاط صارت منه ومن حوراء وحتى مني يوم ماخيرت مهدي بسالفه رجعتي شكد بنيت هاي السنين حتى اخلي مهدي يتنازل ويتوسل حتى ارجع ضاع ورجعنا لنقطه الصفر

وهلمره الفجوه كبرت وصارت بيها عداوات

جنت امتحن وبالي كله يم اخويه الي حتى بطل يروح لشغله لان صحته مكعد تسمح اني وشرهب ماعدنا غير نراقب وضعه وابد منغثه بحجايه جان الوحيد الي يكدر يدخل لغرفته ويضحك وياه بدون ميطرده هو سيف

يكعد ويسولف ومرات اتقصد احط تفاحه لو برتقاله بيد سيف واكله روح اكل انت وخالو حتى ياكل من ايده لان ابد ميرد ايده حيل يحبه ومتعلق بيه

شرهب : شون انضل هيج

ناي : خير

شرهب : مكعد اكدر ادرس وامتحاناتي ماضل عليها شى

ناي : يمعوده ادرسي بلكي من تنجحين تفرحي

شرهب : البارحه طلع ورجع من جنتي بلكليه رايح لهذا المعهد الجديد الي بعد شارعين مسجلي على درس خصوصي

ناي : يادرس اني اقريج

شرهب : انكليزي كلشي مدافهم وقبل لتصير سالفه العوبه حوراء كتله وخطيه منسه ورايح مسجلي ولازم باجر اروح حتى الحك ويه الطلاب

ناي : اني اخاف من الدروس الخصوصيه نسيتي سالفه عدي

شرهب : الله لايرده هذا المعهد يختلف مدرسات ومدرسين مثل المدرسه الصغيره واجورهم زينه يعني مااروح لبيت مدرس وحده

ناي : ليش مااقريج اني

شرهب : بهاي هوستج هو انتي لحكي على دروسج

ناي : اي والله كلش صعب عود اني مكيفه خلصت من السادس طلع السادس بروفه للكليه موت احمر من الصعوبه

شرهب : اي عفيه رفعي من معنوياتي حتى ابطل ماامتحن

ناي : لدورين حجه فارغه واقري

شرهب : شنو رأيج نروح نزور

ناي : شوكت

شرهب : الجمعه هم نزور وهم نروح لبيبي وعمه بديعه صار هوايه مشايفيهم وهم حتى يونس يغير جو

ناي : خوش فكرة بس كون يقبل

شرهب : اني احجي ويااه

ناي : ودروسج

شرهب : اروح هليومين واكعد جمعه وسبت شگلتي

ناي : كون يقبل يونس اني اكيف

شرهب : رايحه اكول اله

طبيت لغرفته جانت عباره عن مدخنه صافن على السكف ويدخن

كعدت يم راسه

يويو

يونس : هااا

شرهب : اريد شى منك

يونس : كولي

شرهب : نروح نزور حباب وهم نشوف بيبي وعمه صار شكد مرايحين

يونس : مابيه غير وكت

شرهب : الله عليك يويو قبل امتحاناتي اريد هيج ادعي حتى انجح لان اذا مرحت ورسبت انت السبب

يونس : تردين تذبيها براسي انتي كسوله ومتقرين اني شعليه

شرهب : انت وديني وراها اني اتحمل كلشي

يونس : مالي خلك وعيونج

شرهب : حباب حباب وكمت اكمز يم راسه

يونس : ماشي شوكت

شرهب : الجمعه

يونس : حضرو نفسكم الجمعه نروح اطلعي وطفي الضوه وراج

شرهب : الغرفه خنكه تره

يونس : شرهب بليه لغوه واطلعي وطفي الضوه وسدي الباب

شرهب : طلعت وسويت الي راده ميخالف المهم نروح للزياره بلكي يرتاح من يطلع

ناي : اليوم يمر مااحس بيه اركض بين الكليه والقرايه وسيف وشغل البيت لحد مااجت الجمعه كعدنه وره صلاه الفجر كال يونس حتى نوصل من وكت استغربت هياتها كربلاء المن طالعين هيج من الفجر بعدين كلت يله المهم الله هداه ويودينا اخذنا غراضنا مال يوم واحد ونزلنا جان جايب تكسي للباب

صعدنا

شرهب : والله ميته نعس اكو واحد يطلع الفجر شكوو نبيع گيمر

ناي : مو ردتي ترحين اسكتي

شرهب : خلي انام حبابه احط راسي على جتفج ومن نوصل كعديني

ناي : نامي اباوع سيف بحضني نايم وشرهب راسها على كتفي

الطريق طويل جن مرايحين لكربلاء ادك السياره مرت ساعتين واحنا ماواصلين

مديت ايدي دغيت كتف يونس الجان كاعد ليكدام

وين رايحين وليش ماوصلنا

يونس : رايحين للنجف بالاول وراها لكربلا

ناي : ليش

يونس : مشتاق لامي

ناي : عرفت يونس واصل مرحله بلخنكه مو طبيعيه لهذا جاي للنجف رجعت راسي وبقيت اباوع على الطريق مرت ٣ ساعات وشويه وصلنا للمكبره كعدت شرهب

شرهب : وين احنا

ناي : بلنجف

شرهب : شوو النجف

ناي : يونس راد يزور امي يله نروح لبيت بيبي

وصلنا للمقبره وكف التكسي على الشارع ينتظرنا لان مكدر يطب نزلنا شرهب شيلي سيف لتخلي يدوس على المكابر

شرهب : تعاال حبيبي

ناي : وصلنا لكبر امي اوووف يايمه

يونس : صباح الجنه يايمه هااا ياترفه وكلج حنان حتى وانتي بكبرج احسج تكومين وتحضنيني من اجيج

جاب مي ورد وغسل كبرها وضلينا نقرا قران يم راسه ويونس واكف يباوع عليها لحد ماحسيته اختنك حيل كمت وكفت على صفحه ونفضت عباتي من التراب جان ينام يم راسها ولازم ترابها ويحاجيها

يونس : يمه اجيت اشكيلج محد يحس بيه غيرج يمه عيروني وكسرو گلبي واني مالي ذنب بكلشي عيروني بيه

الشهاده عفتها وانت تدرين من وره العوز وماردت خواتي يضلن بعازه عمامي وينذلن وعيروني بلسجن واني طبيتله مظلوم

وبلفقر وهذا رزق الله وشكد حاولت اشتغل واتعب محد يرضه يشغل واحد رجله سگط يعرج ويوم مااشتغلت واشتميت نفس شويه خنكوني بيه ترضيها يمه ابنج الجنتي تخافين عليه من الهوا يصير بيه هيج ليش عفتيني ورحتي لو باقيه مجان هذا حالي نمتي هنا وعفتيني اتلطم بلدنيا حتى الدكيتها بصدري اهضمتني

مانصفتني الدنيا ولا الاهل ولا حتى الاحبها يييمه تعبااان حيل وظهري محني ردتج تمدين ايدج على ظهري تعدلي واطيبين خاطري وتمسحين دمعتي وانام بحضنج واشكيلج حالي وتكولين اليه تهون ابني اني يمك ومااعوفك

ااااااااخ يايمه لو تعرفين بلنار الي بيه اطلعين من گبرج وتحضنيني

ناي : حضن كبرها ويبجي حييييل اني وشرهب كعدنا على صفحه ونبجي منكدر حتى نتقرب منه بقى على هذا الحال لحد ماهلك يسولف مره ومره يعتب ومره يبجي

يونس : وحك ترابج وريحتج الي انحرمت منها مااخلي واحد بعد يكسرني تعاليلي يلحبيبة اريد اشوفج صار هواي مجايتني زعلانه من ابنج كل الناس تزعل اله انتي تعالي محتاجج ضليت بليه ظهر وبليه سند جيه منج ترد عافيتي لو تجين تبردين گلبي لو تاخذيني يمج

ناي : كمت يمه وكتله اسم الله من عمرنا على عمرك كوم فدوة اروحلك هاي الكعده موزينه على جرحك

يونس : هذا الجرح طاب بس جرح الگلب شيطيبه

ناي : يطيب وحتى اذا ماطاب يلم مايبقى مفتوح كوم بروح امي واسند ظهرك احنا وياك اذا الكل عافك اني وشرهب منعوفك يله حبيبي حضنته ياابونا واخونا انت بيك احنا واكفات بوجهه الكل واذا همه عيروك احنا نتباهه بيك ونفتخر لان عدنا اخ مثلك الله لايحرمنه منك ولا من حنيتك علينه يله امشي نزور وراها نتوكل لكربلا حتى نوصل من وكت

دنك باس كبر امي ومسح دموعه على اسمها

طلعنا من المقبره ماوصلنا لكبر ابونه لان لهاي اللحظه محملي ذنب كتلت امنا ولوما هو مجان صار هذا حالنا توجهنا لامير المؤمنين دخلنا وزورت سيف جنا اني وشرهب ماندعي لنفسنا اثنينا ندعي ليونس تعدي هاي الفتره على خير لان نعرف بلياه اني وياها نضيع

صلينا وقرينا دعاء الزياره وطلعنا لكينا كاعد ينتظرنا وبيده السبحه ويسبح وجهه اصفر وجوه عيونه سود والجكاره متفارك ايده

يونس : خلصتوو

ناي : اي  الْحٍمَدٍ للـّہ دنك وشال سيف ويسولف ويااه اشتراله سياره صغيره وحلويات وسيف طاير ويه خاله ومكيف

رجعنا للسياره الجانت منتظرتنا وتوكلنا لكربلا مناك المسافه قريبه مو حيل بعيده

وصلنا ويه صلاه الظهر

كلنا نرتاح ونغسل بيت بيبي والعصر نروح للزياره

حاسب ابو التكسي ودكينا الباب سمعت صوت بان

بان : منووو

شرهب : قوم بني شفلحه هو منو يجيكم غيرنا

بان : هاااي منووو ممصدكه

ناي : سلمنا على بان جنا حيل مشتاقين الها

ودخلنا ريحه الاكل ماليه المكان والبيت نظيف ودافي افييش ياعمه

هاي ريحه النظافه والاكل بيا مكان ترحين اليه بيها

بديعه : هله بلجاينه ممصدكه حن گلبكم واجيتو

شرهب : جبتهم سحل وداعتج واجيت

بديعه : اي هيج ولج صيري سباعيه وسحليهم

ناي : حضنه عمه بديعه وبوسناها احنا كل كم يوم نتخابر بس نتشاوف قليل

بديعه : تعاال حبيبي ابوسك مشتاقتلك

يونس : هله عمه شونج

شبيك يونس وضعك مو طبيعي وليش هيج وجهك وصاير عوده اخوجن مريض احجن

ناي : مو وكته عمه اجينا تعبانين وجوعانين

بديعه : وراكم طلابه من وجوهكم

يونس : بيبي وين

بديعه : تصلي جانت يمكن كملت ادخل الها وانتن غسلن واذا جايبات ملابس اسبحن اكو مي حار

شرهب : اي اريد اسبح شعري الجميل انترسل رمل من المكبره

بديعه : ليش رحتو للمكبره وانتي شون اطبين بليه ربطه

شرهب : لابسه والله مو كدامج حتى عبايه بس تتزحلك وهوا عالي وشبعت دفرات بلزياره كلت اسبح حتى ارتاح يله مااريد اسبح بطلت

بديعه : طبي حتى اختج وراج واريد افهم شصاير تعاال حبيبي يمه لج هذا كبران صاير يخبل

ناي : فدوة لگلبج  بووس عمه حبيبي نزل بلبل كبران ومباشره حضنا وخاصه شرهب حيل يحبها واخذ سيف يلعب ويااه خليتهم كدامي لان اخاف عليه

يونس : طبيت لبيبي لكيتها كاعده على جربايتها وفاتحه الفوطه مالتها وكصايبها البيضه الرفيعه منا ومنا وتريد تعدل الفوطه وتلبسها شافتني عافتها وفتحت ايدها

عمشه : يبعد رويحتي وعضاي تعاال احبنك لك انشعل افادي وانه اكولن يونس تبطى عليه ومانشد على حبوبته

يونس : بست ايدها وراسها وحضنتها شونج بيبي

عمشه : انه بخير لون انت بخير

يونس :  الْحٍمَدٍ للـّہ

عمشه : ارفع وجهك اشوفنك چا انه مااعرفنك شنهي الجره حالك مگلوب وجهك مدوحس وماله لون

يونس : ماكو شى بيبي تمددت وحطيت راسي بحضنها

عمشه : منهي الكدرك وطيح الهم على راسك لا تبط جبدي وسولف انه ريچي مرمر من صباحيات الله ومن شفتك يتلاطم وجهك عرفت المرار حسيته گبل جيتك سولف يمه

منيش ضايك خلكك بروح امك شنهي الجره

يونس : بديت اسولف كلشي لبيبي عدا سالفه ضربوني طلقه  بس كتلها تضاربنا وهي ساكته وهاي اول مره ماتعيط ولا تعد وتغلط

هااا بيبي شوو مالمتيني ولا عيطتي

عمشه : لون تفيد الملامه وترد الراح چا اخلص العمر كله الومن بهلي الجابوني

اعرفن الگل كطعت بيك وحادين سنونهم ويلوجون بلحمك عبن سالفتك عيبه وطلابتك اطير بيها رگاب وحالك كاسر خاطري ماازيدن همك يبعد رويحتي البيه انت يسوه الف جتله ودم يطلع منك اعرفن كليبك يوجعك وكارهه عباد الله كلها ومكدر خاطرك منهم انه اكولن شى واحد عيش يمه وداري نفسك ولاتحني ظهرك الزمن مايرحم المحني يضل ايدك ايدك لون مايكسره وكلمن عاباك كله مشكور ورحمه الله والديك الايام طويله واشوفك العيرته شيعمل

ثبت رويحتك ومن عيبك سوي العجب ولون انت ضليت وحيدك ربك موجود وياك واليه وياه ربه مايخاف خلي الوادم جيوش كلها وياك وربك مو وياك شنهي فايدتهم

انت اكوى منهم حنيتك وخوفك من الحرام وعارف حقوق الله هاي گلها تسوى ابوالشهاده والمال والخلق حوراء خالق غيرها وربك يعوضك بالاحسن منها مامات واحد وره محبوبه الي يموت من صدگ الي مايعرف تدابيره ومضيع حياته يركض وره تراب وكل ضنه من يگضه يتحول ذهب التراب يضل تراب يايمه تلهث وتتعب وتاليها بشويت مي يصير طين مايسندك وكت عازتك انفض رويحتك من گلشي أذاك وذب احمولك على الرحيم  قادر يريحك ويزيل همك ولا تضل تطحن وادچ دچ بدمك لا البت راح تردلك ولا الوادم تساعدك

وهاي البنيات بركبتك ويشوفنك شئ جبير لاتكسر بختهن وهنه مظلومات انت واليهن

لا اطيح عبن مايطيحن وياك

وعمران اعرفنه معدنه زين ورجال صاحب نخوه وابن اجاويد ولون أذاك عبن تصحى على رويحتك چايلمصخم تشك زيجك وتصارخ اريد البت وتريد الزلمه ياخذك بلحضن چا زين منه وماذبحك صايرلي عاشك اهمده بختي انت وكرعانك شطولهن شصاير بحالك جنهن كراعين الباجه المعصيه

يونس : هههههه مشكوره بيبي

عمشه :اركد يمه وراعي الله بحالك وبلبنيات واطلع على رزقكك لاتضيعه الرزق لون راح مايرد لاتضل عايف مالك سايب هنا وهنا مايحرك دمه على حالك ومالك غير نفسك

تعوذ من ابليس وتوكل على الله وربك منه التساهيل ومد رجليك على كد غطاك لا گل مره تغلط وتختار المايرهم صوبك وبعيد عنك وتضل تندب حظك صير گوي يمه الدنيا ماتحب الضعيف  وميل مني اروحن انعنع ضلوع خياتك عبن مانشدني شصار بحالك وضامات عليه

يونس : روحي طيحي حضهن بيج مابيج اهم شى  مااترزل اني

عمشه : يااا غير انت العزيز اذب ضيم گلبي بيهن واجيك

يونس : طلعت بيبي بقيت متمدد على الفراش مديت ايدي على تلفوني فتحته جان مغلق لكيت رسائل واتصالات مصطفى العامل ولد بلمنطقه اصدقاء اعرفهم واهل الجمله الي اتسوك منهم ولكيت رساله من رقم غريب فتحه

حوراء : شلونك حبيبي يمكن هاي اخر مره اكولها الك ومتأكده سمعتها بصوتي

اعرف بيك متأذي من كل الصار اني مو بس متأذيه اني داموت يونس ماتغفى عيني اذا مااطك من البجي من كثر مامشتاقه الك اني اليوم مافقدت حبيب بس لا فقدت اب واخ وصديق وحياه اتمنيت اعيشها اعتذاري مراح يقدم شى ولا راح يداوي جرحك ولا جرحي بس اريدك تعرف اني مقبلت اله بعد ماتهددت يگتلوك خوفي عليك خلاني اقبل بكلشي ولا اقبل افتح عيني بيوم وانت مو بلدنيا يكفيني انت تتنفس وعايش

غلطي ميغتفر لان ضميت بسالفه الخطوبه وروح ابويه والكعبه اليزورها ملايين الناس ماردت اكولك حتى لا اخسرك ومجنت معتبره روحي مخطوبه لان هي جانت شغله شگليه لهذا حبيتك من گلب صافي وحلمت اكون زوجتك وام بيتك وخنت الوعد

وكلش زين ادري مراح اشوف يوم حلو بحياتي بعدك وراح اتعذب وراضيه بس كون تسامحني مجرد فكرة انت كارهني كعد ادمرني

ابريني الذمه اترجاك مو حتى اعيش مرتاحه الراحه الي بعدك مااريدها ولا اطلبها  اني اريد بس انام وبالي گلبك صافي ومكارهني ولا حاقد عليه

وحط في بالك ماحبيت احد مثلك ولا راح احب وابقى العمر كله انوح على حبي الك وعلى قسمتي المصارت الك ضكت وراح اضوك بعدك كل دمع بيه مرار لانك مو بحياتي

ابريني الذمه لخاطر العشناه سوه ولتكرهني يااحب الناس واغلاهم

يونس : امسح دموعي الي وكعت واني محاس واقرا كل كلمة منها طلعت صورتها المخزونه عندي وبستها وربج ماابريج الذمه ليوم الدين حتى لتعيشين بعدي مرتاحه وتبقى نفسي بيج انتي زرعتي الي تعبت واني ازرعها وارويها وتالي اجه الي كطعها واخذها على الجاهز والي يبوك شى مايشوف خير بيه وعساه لا تهنى بيج ولا تهنيتي ياحوريتي

شكد مشتاق لضحكتج وصوتج ياعلت گلبي

وهلاكه شافج شاف شعرج طولج لزم ايدج ولبسج الحلقه اااااخ ياگلبي ابرد ولو شويه راح توكف من گثر متفكر بيها

ناي : كاعدين كلنا على الغدا بعد مابيبي استلمتنا وخاصه شرهب وعمه عرفت بكلشي وبقت تلوم بينا

يونس : حتى اذا بلغناكم قابل عمو فلاح راح يجي يركض ويحلها مراح احصل غير تعب بيبي وتتخربط وانتي تبجين وتلطمين

بديعه : ياابني غير نوكف وياك نساندك بله ضربوك أذوك

ناي : عدت سلامات عمه اباوع على شرهب تلوب تريد تكول مضروب واني اخزر بيها

كملنا الغدا وعمه عجنت كباب وگلته وسوت لفات واخذناه ويانه وبدلنا وطلعنا كلنا للزياره

زرنا الامام الحسين والامام العباس عليهم السلام جنت اشوف يونس يدعي بخشوع مانزل عيونه من الاضرحه لحد ماتعب ويمسح بعيونه الي تغير لونهن من البجي كملنا الزياره وكعدنا بين الحرمين جان الجو بارد بس يخبل اصوات الدعاء والاناره ترد الروح

بان تخرجت وادور على تعيين هاي الفتره ادرس بمدرسه اهليه وراتبها قليل بس شايل ويه شغل ابوها تمنيت يونس حبها بدال حوراء اقلها من ثوبنا وتعرف طبعنا وعمه تحب يونس جان هواي تغيرت امور صحيح اني هم احبها لحوري بس مترهم النا ابد وخاصه امها وداد

خابرنا عمه خوله وعرفت بينا بين الحرمين كامت تبجي تريد تزور وبقت تدعي الله ينطيها العمر وتنجمع بينا هاي الفتره رجعتها للعراق صعبه بسبب عبيد وجوحي لان اثنينهم حالفين يأذوها

اتعشينا وبقينا كاعدين للعشره بليل ورجعنا

جان يوم كلش حلوو وحسيت يونس ارتاح وحتى اكل ويانه هذا الشى ريحنا كلش وبطريق الرجعه يونس اشتره لبيبي دشداشه وفوطه ولعمه دشداشه وربطه ولبان تراك للبيت وشال للدوام ولبلبل بلوز وبنطرون ولعبه هو رادها كال ملحكت اشتريلكم من بغداد وشرهب اخذت حلاوه وتراك للبيت واني اخذت ايزار مال صلاه مردت اكلفه هواي اشتره

وبليل فرشنا كلنا بلهول بس يونس يم بيبي

واسمع شرهب تحجي ويه عمه بديعه

شرهب : عمه والله امنيتي هيج اصير بنيه رقيقه هادئه استحي هيج الي يشوفني يكول الله على هدوئها ونزاكتها واخجل حتى الخجل مشيول اخاف اني ولد وانگلبت

بديعه : هههههههه شجاج ولج تخبلين شبيج

شرهب : مابيه بس لساني مترين واتعارك ويه ذبان وجهي والي يحجي ويايه كون احط سجينه بطنه عادي موو كلش طبيعيه حالتي احرك روحي اكلها اريد اصير كيوت بريئه رقيقه

بان : وانتي شعجب هيج فكرتي

شرهب : رحت يومين للمحاظره الكشره اشوف البنات يتموعن ويحجي بصوت ناصي اله اني حسي مال جبار كزيزه يلعلع

كلت خلي انصي عيب واشوف شيسون اقلدهن ماكدرت نص ساعه واختنكت كمت اكح اريد هيج اكوم اعد وأصف هلمره مو بس الصوت الحركات تكول شويه وتموع بيدي وتسرسح بلكاع مو بنات جكليت عمه خرب عمي حتى بالانوثه ماعندي نصيب ليمي وسدو الگبنك مال المحل

بان : ههههههه ليش بلعكس بيج انوثه وحلووة وادخلين للگلب بسرعه

شرهب : قشمريني هاي مو انتي تحجين بصوت ناصي وتستحين وتسوين روحج رقيقه اسم الله حتى لو كذب المهم تكدرين

وتخافين اله اني تكول مولوده بسجن مال ذباحه حتى خوف مااخاف شون بيه الكولي حل اريد اصير نازكه اريد اصير انثى ياناس انوثتي تلطم بلزاويه وتشك بملابسها

بديعه : هههههههه لج كاافي گلبي راح يوكف من الضحك

شرهب : هذا الحصلته منج عمه تضحكين عليه

بديعه : لان ظالمه نفسج بلعكس شحلاتج وجهج المنور وملامحج تخبل وجذابه جنج ممثلات السينما وطولج ورشاقتج وشعرج جنج هاي المطربه شسمها يمه بانه مرام

بان : مريام فارس

شرهب : اني لو مثل مريام فارس حتى نوم ماانام يمكم من كل عقلكم توقيع مااوقع الكم  واشيل خشمي على الكل واخلصها سفرات شكوو دوله بيها حلوين اروح ازورها

ناي : همزين لعد ربج يعرف المن ينطي

شرهب : حجت محطمه المعنويات دنحلم الله اكبر حتى الحلم ميصير وياكم

بديعه : حلمي حلم معقول

شرهب : مااحلم بطلت اريد انوثه شلون

بديعه : من تصيرين عصبيه تعوذي من الشيطان ليوسوس براسج والزمي نفسج وشوي شوي تتعلمين وتصيرين هاديه

شرهب : بااع عمه غير الشيطان نفسه يلزمني ويكول ابو شكريه تهدا تعوذ مني واسكت واني اكله وخر مني اليوم اگلب عاليها سافلها وخطيه يضل حاط ايده على خده ويكول هاي شيعقلها تعب مني حار شون يقنعني حتى اعقل وتالي هو عقل واني تخبلت اذا بقيت بهذا المعهد انجلط لو اتعقد احسن شى اعوفه وخلي اطلع اكمال لو ارسب اهون عندي من يوميه اغم روحي لان مابيها انوثه

ناي : انتي تردين متقرين وادورين حجج

شرهب : خلي انام ناي راح تسوي بيه ذبحه وانتم ضلوو اضحكو عليه لحد ماتشوفوني رجال بلحيه واكفه بلمحل ويه يونس ابيع

بان : ههههههه والله خوش شغله اقلها تفيدين اخوج

شرهب : انتم المعلمين طاك گلبي منكم نامي صوجي احجي وياكم

بان : ترحيلنا فدووة جبار كزازه

ناي : نضحك لوجهه الصبح لحد معاطت بيبي بينا انخمدن جوعانات سوالف خفنا تطلع وشيخلصنا منها

رجعنا ثاني يوم لبغداد بعد ما ودعناهم

دخلنا لبيتنا اخذت حلاوه لخاله ام حسن سلمت عليها وكالت اجه ولد سأل عليكم وعاف هاي الورقه فتحتها بيها رقم ومكتوب عبدالرحمن ومكتوب جوه الاسم ارجو الاتصال

اخذت الورقه وانطيتها ليونس كال عندي رقمه خابره واحنا بعدنا هستونا نريد نرتب غراضنا

اسمعه يكوله ان شاء الله ابلغها

ناي : غير شكوو

يونس : مهدي داز عبد ياخذ ابنه كم يوم ويرجعه

ناي : مياخذه لديالى لو الدنيا تنگلب

يونس : ولشوكت تبقين بهذا العناد الرجال هم يريد ابنه

ناي : نسيت من بقيت ابني يمهم شصار

يونس : مو همه السبب ياعيني هذا قدره

ناي : حتى لو جان قدره ما أمن اعوفه يمهم انت تشوف شمسويه بشرهب كل شويه مخابرتها عينج على سيف لتعوفي وطول مااني بلبيت ويايه ويايه

يونس : ولشوكت هيج تحاوطين ابنج يجي يوم ويكبر لازم يتعلم ويبقى مهدي ابوه ترضين وان ماترضين

ناي : مااريد ياخذه يم وداد الحيه اريدها تموت على شوفته اخليها بحصرته

يونس : ومن يكبر يروح الها تبقى ام ابوه اكو شغلات منكدر نغيرها مشي المركب ناي حتى لاتنگلب

ناي : انت تكول هيج بعد كل السوه بيك

يونس : هااي مالها دخل بهاي لتجمعين كل الاوراق ابنج هو ابنهم وحامل اسمهم وهو جاي ياخذه كم يوم ويرجعه مراح ياخذه العمر كله منج وبلنسبه لشغلتي شيليها من راسج حتى لتعبين

ناي : تريدني ارجع اله

يونس : اريد ترجعين برضاتج وقناعتج وهاي كدامج سنين مايوم فتحت الموضوع وياج وكتلج ارجعي ودخلتي كليه وكتلج ابقي يمي بس ماكو شى يضل على حاله يااما تطلكين لو ترجعين اذا بقيتي سنه او ١٠ يجي يوم ولازم تخلص هاي الشغله مستحيل تضل معلكه هيج

ناي : واني ماانطي ابني وشيسوي خلي يسوي وبلغ عبد ليجي ولا يوصل يريد يجي يشوفه هنا ويروح

يونس : بعد الصار مترهم يطب للبيت

ناي : هذا الي عندي هو مو احسن من عدنا يكدر يجي وكت ماانت ماكو يشوف ابنه وانتهى المن دازه ابني بيد ابن خاله صار عليه شى بلطريق منو يفيدني مهدي لو وداد

هذا طفل وحرك مو مال يندز بيد واحد هو اني امه ومرات يفلت من ايدي شون تريد أمن من محافظه لمحافظه ادزه

يونس : والحل

ناي : يجي يشوفه هنا سيف ميطلع بره هذا البيت

خابر عبد وبلغه وسد التلفون ثاني يوم جان الاحد رجعت لدوامي وشرهب تروح للمحاظره وره مااني ارجع اما يونس صبح الصبح سبح وطلع لشغله فرحنه كلش بأن توكل على شغله على الاقل يلتهي

ثاني يوم خابرني مهدي يرعد بلتلفون جاوبته بهدوء

تريد تشوف سيف تعال هله بيك

مهدي : شون تردين اطب لبيتكم

ناي : يونس ماموجود

مهدي : لتلوين ايدي مااحب هيج تصرفات

ناي : انت لتتشرط عليه كتلك ماانطي سيف اني محارمتك منه بس لديالى ميوصل

مهدي : تخافين عليه لو شغله عناد

ناي : اخاف عليه

مهدي : وشغله عناد اعرف بيج

ناي : عندي دراسه مااكدر اطول وياك ورايه امتحان

مهدي : خلصي امتحاناتج ويصير خير

ناي : سديته منه ورجعت اقرا احاول انسى كلامه ورجعنا كل واحد بينا يركض على شغله يسويها اني ادرس وشرهب تجتاز الامتحان ويونس يشتغل رغم صار قليل الكلام والتواجد ويانه بس على الاقل ندري بيه زين

مرت الايام هدوء ومهدي ماوصل وبقى بس يخابر يطمن على ابنه حتى مجاب طاري ياخذه

شرهب طلعت اكمال بدرس واحد وكدرت تجتاز الامتحان التمهيدي وتدخل وزاري

فرحانه تكول ماخذه الدكتوراه

كامت بالاسبوع مرتين تطلع تاخذ المحاضرات مال الانكليزي وترجع حسيتها ارتاحت والاحلى من ترجع تحجيلي على البنات الي وياها وتقلدهم وتحاول تصير رقيقه مطول دقايق وعاطت هاي البنيه مالها جاره ذبتها هيج

وره شهرين اليوم مرحت للدوام ماعندي محاظرات مهمه وشرهب اقريها كيمياء وسيف يلعب يمنا دك تلفوني مهدي

جاوبته هلوو

مهدي : شونج

ناي : زين من تذكرت

مهدي : وانتي ليش متتذكريني بله متت مكلتي شهر وين راح

ناي : ملتهي غير

مهدي : جنت حاير بأمي سويت الها عمليه اخذتها لايران والبارحه رجعت

ناي : بگلبي اكول لو ميته وخلصانين

مكتله  الْحٍمَدٍ للـّہ على سلامتها على شنوو متستاهل بقيت ساكته ولا سألته عمليه شنوو

مهدي : راح ادز عبد اريد اشوف سيوفي بالي كله يمه

ناي : يوميه نفس القوانه كتلك ماانطي

مهدي : استغفر الله اكسري الشر يابنت الناس وخلي اخذه يومين وارجعه

ناي : ماانطي وشسوي روح سوي ايدك الك

مهدي : راح اشوفج ايدي شون الي

وسده بوجهي

شرهب : تمالختو

ناي : تعااي نقره وعوفي

رجعنا ولا كأن اكو شى لحد العصر اندكت الباب لبست شال ونزلت لكيت مهدي بلباب جفلت هذا شجابه

فتحت الباب طب حتى بدون ميسلم وصعد فووك اخذ سيف وباسه وهو شايله كاال حضريلي ملابسه

ناي : لا اله الا الله مو شفته المن ماخذه

مهدي : سمعي ناي سكتت الج هواي وتماديتي وبلعتها  تخلصين امتحاناتج وترجعين ويايه للبيت

ناي : من كل عقلك ارجع وين ليم امك ليش بله

مهدي : ذب سيف بلكاع بابا انتي مرتي وهاي كعدتج هنا مالها داعي واذا خليتج كلت بلكي ترتاح واكفر عن ذنبي وياها عفتج مكان السنه تلاثه لشوكت بعد مصختيها حييل

ناي : انت الي مصختها طلكني مااريدك هي كوه مااريد اعيش وياك

مهدي : اطلكج وابني

ناي : الحضانه من حقي واذا تريد نبقى على نفس الترتيب تجي تشوفه وتروح واذا تسوي مشاكل ماكو غير المحكمه هم يحكمون الك شوكت تشوفه

مهدي : تردين ادخلين محاكم ست ناي

ناي : جنت احجي بصوت عاالي وعيني بعينه من وراك كتلك مااعيش بعد وياك والي سويته أذاني ولهذا اليوم مااكدر اجتازه وانت باقي بخشمك اليابس تريد تمشي حياتي مثل متحب وهذا الشى ميصرفلي واذا عبالك اني احبك وبعدني عايشه على حبك غلطان اني يوم ماطلعت من بيتك واني اكرهك واريد اطلك منك مااريد شى يربطني بيك اذا ربطني سيف فهذا شى انجبرت عليه ولا عبالك مثل سالفه ابني المات تاخذه وتهددني لا عيني متاخذ ابني متر من هذا البيت ذيج المره جنت مجبوره هاي المره ماانجبر خلي ننهي كلشي بلحسنى طلكني ومتنازله الك عن كل حقوقي وابني تجي تشوفه بمواعيد محدده وكان الله يحب المحسنين

مهدي : سمعي لج طلاك ماااكو لو تطلع نخله براسج واذا ماارجعج للبيت غصب عنج واريد اشوف شون تمنعيني من ابني

ناي : قابل تسحلني منا مثل ماطردتني من بيتك

مهدي : اطلبج لبيت الطاعه واجيبج وانتي الممنونه

ناي : متسويها

مهدي : جربي

ناي : طلكني عفيه

مهدي : اخذ سيف مقابل الطلاك

ناي : مستحيل تريد تحرمني منه من كل عقلك هسه اني مااريدك طلكني يااخي

مهدي : اله اخلي الطلاك حسره بگلبج

ناي : انت مو متحبني شسوي بيه روح خلي امك تزوجك وحده على مرامها هو انت هيج مره تمشيك امك ومره خالك ضال بيد هذا وهاذ ماشفت الك بيوم قرار من ذاتك ضاله بيدهم لعبه باقي بس تفرض عضلاتك عليه

رفع ايده يريد يضربني حطيت ايدي على وجهي كلت فلشني

مهدي : لوما حالف بعد ماامد ايدي عليج جان ملخته لوجهج

دفعني واخذ سيف وطلع حتى بدون ملابس وغراض نزلت وراه اريد اخذه عااط بيه

مهدي : طبي جوه لا ابتلي بيج

دفعني حييل صار ظهري على الدرج حط سيف بحضنه وشحط السياره وراح بقيت ارجف نزلت شرهب

شرهب : تعاال اصعدي يمعوده صوتكم واصل لكل الجيران

ناي : اخذه مني

شرهب : يرجعه شبيج وين يودي يومين ويرجعه

ناي : اخاف يصير بيه شى

شرهب : ميصير ان شاء الله اصلاً مهدي يخاف على ابنه كلش وخاصه من اخذه اكيد ميريد يتكرر وياه الصار گبل لا سامح الله امشي خلي نصعد الشارع متروس ولد وانتي حتى الشال واكع من راسج

صعدنا وخابرت يونس حتى يخابر عبد ويطمني على سيف

بقيت كاعده وحاطه ايدي على خدي

شرهب : نايه زينه انتي

ناي :شسوي لج يريد يطلبني بيت الطاعه لو ياخذ سيف مني

شرهب : توقعت يسويها وخاصه بعد عركتج ويااه

ناي : شسوي من حركت گلبي على يونس وهم تذكرت كلشي سواه بيه ردت أذيه مثل ما أذاني

شرهب : بس مو هيج مهدي ميجي بلمشاكل والعركات واحد راسه يابس اذا مو بلتفاهم يعلكها عليج لوما معاشرته وتعرفي اني اعلمج بيه 

ناي : الي مخبلني ليش لهسه ممطلكني

شرهب : يحبج خيه

ناي : باع هااي ياحب هو ميحب بس نفسه

شرهب : لا يحبج وتدرين كلش زين بس انتي تردين يسحل روحه ويلطم ويخلصها بجي ويعيط بلشارع بحبك ياناي بموت فيك ماقدرش اعيش من بعدك دنا بموووت وانتي بعيده عني

ناي : تصنفين حضرت جنابج

شرهب : طبعاً اصنف الي بالج مراح يصير كلمن وطبعه ورجلج طبعه هيج وميتغير

بس اهم نقطه هو يحبج ومتحمل صار شكد حتى ترجعين برضاتج واله شنو الي صبره ٣ سنوات عليج غيره واحد يشتري راحه باله يطلك ويتزوج ويعيش حياته المن باقي بليه مره كل هاي السنين نوايه مهدي زين بغض النظر عن هواي امور صارت وارجع واكول يحبج اكعدي اتفاهمي وياه ولتنسين عندج ولد بينكم ماله ذنب ينداس حطي شروط تريح بالج تره اذا ركب راسه تصير مشاكل

وانتي بوضع مو مال مشاكل وقبل شويه هواي تجاوزتي عليه وهم بلعها كلشي بيه حد وبديتي تتجاوزين هذا الحد

ناي : اني ماعندي غير حلين اما يطلكني وكلمن يروح لحال سبيله اما ينفذ شروطي وبذاك الوكت ارجع

شرهب : الله يستر من شروطج

ناي : خلي اخابر عبد اني لان يونس عنده شغل

خابرت وجاوبني

عبدالرحمن: منوو

ناي : اني ماي

عبدالرحمن: هله ام سيف شلونج

ناي : زينه عفيه مهدي ماوصل

عبدالرحمن: اني ويااه بلسياره جنت بغداد اجه اخذ سيف منج ومر عليه جنت يم صديقي وبعدنا بلطريق

اسمعه يكول اله خلي تسده لا افر السياره وارجع ابتلي بيها

فدوة عبد طمني لان هو غالق تلفونه

عبدالرحمن: صارر

بعدها بساعه ونص خابرني وكال وصلنا وسيف زين

تشكرت منه واسبوع كامل وراني المر يله رجع سيف خلصته ابجي من انام وادور على ريحه ابني مصدكت وكت رجعته بلباب حتى منزل ويااه عبد انطاني سيف وعلاكه بيها ملابس جدد مشتريهم اله فتحت العلاكه بيها فلوس مباوع بوجهي واني هم درت وجهي منه وسويت روحي مامهتمه بقيت ابوس بسيف ممصدكه

مهدي : عبددد

عبدالرحمن: هااا

مهدي : خلي اطب وتبوس ابنها بلبيت مو بلشارع

عبدالرحمن: طبي جوه ام سيف مابينا حيل خبالات ابو سيف

ناي : مهتميت لكلامه شلت العلاكه جان يكووول حضري نفسج ايام ويجيج بلاغ من المحكمه

ناي : بادت ايدي ورجف گلبي عزه سواها صدك طبيت وصعدت ليفوك خابرت يونس واني ميته خوف لياخذني لبيت وداد

يونس : على كيفج ماله داعي هيج خايفه

ناي : شون مااخاف مو كتلك شيريد يسوي

يونس : اني احجي ويااه

خابرت على عبد وطلبت منه اشوف مهدي وخلي يتروه بسالفه بيت الطاعه

عبدالرحمن: اني عازمكم على سمج مسكوف يمكم بأبو نؤاس باجر واكعدو تفاهمو

لان مترهم بلبيت

يونس : اي مكان المهم تفض

ثاني يوم بدلت وطلعت وتواعدنا من وصلت مديت ايدي سالمني وهو ضايج مهتميت بس عبد لطف الجوو

مهدي : خير شتريد اني كلت لاختك على كلشي كعدتنا مالها داعي

يونس : شوف مهدي سالفه بيت الطاعه وهاي الامور محلوة بحق ام ابنك ماكو شى بلجبر وانت انسان مثقف وعاقل وماتقبل مره تعيش وياك بلكوه

مهدي : مااقبل اكيد وبنفس الوكت مااقبل ابني يعيش بعيد عني واختك مصختها واكفه وتتشرط

يونس : السويته بيها مو قليل لو نسيت

مهدي : واعتذرت وصارت ساعه شيطان ومن حقي شتريد اسمع كلام ابن عمك العار واسكت

يونس : لا اريد اطول وياك الحجي ولا افتح دفاتر عتيكه ناي ترجع لبيتك بس بشرط

مهدي : شنوو بله

يونس : اطلعها بيت وحدها مترجع ليم امك

مهدي : تريد اعوف امي وحدها

يونس : امك مو وحدها بصفها من الجهه اليمنه خالك عمران وعائلته وبلجهه اليسره بيت خالك الي بيه صلاح وامه يعني بنص اهلها ناي تأذت هواي من امك وشافت الويل وانت تدري وكدام عينك ومايوم دافعت عنها ولا طيبت خاطرها واذا رجعت بنفس الوضع القديم راح تتأذه واني ماارضه الاذيه الها كافي الي شافته

مهدي : واني طلعه وحدي مااطلع ترجع كان بيها مترجع المحاكم بينا

يونس : نسيت شغله بسالفه بيت الطاعه لازم توفر سكن الها وحدها ويكون موالم الها يعني بلحالتين اهلك لازم مو وياك اذا عبالك اني انسان جاهل وماكملت مثلكم اكو شى اسمه اسأل

واني سألت محامي وكالي على كل شروط بيت الطاعه يعني اجت برضاتها او مغصوبه بلحالتين بيت وحدها  نصيحه مني هاي القضيه خسرانه ومالها ربح الك غير ترجع مرتك مغصوبه على العيشه وياك وراح تحس بكل نظره كرهه الها عدا المشاكل الراح تعيشها اخاف عبالك ناي مثل قبل يندك على راسها وتسكت غلطان ناي كبرت وتغيرت ودرست واذا الله انطاني عمر مااقصر وياها يعني عدها كلشي الي يخليها توكف بوجهك وتقاتل لخاطر حقها اني احترمك واعزك رغم كلشي صار بينا واعرفك رجال وينشد الظهر بيك لو ترجع مرتك وابنك بيت وحدكم وتسد بابك وترتاح من كل هاي المشاكل ياطلكها وعيش حياتك وابنك مرجعه الك شوكت ميكبر اكيد يرجع لابوه هذا كل الي عندي

اروح من رخصتكم

عبدالرحمن: والسمج

يونس : اكلوو انتم بلعافيه

ناي : رجع يونس وحجالي كلشي كلت بلكي الله يهدي مااريد ادخل بهوسه ويااه

ومن يومها مهدي مابين ولا رد خبر على كلام يونس ولا حتى دز بلاغ بسالفه بيت الطاعه

التهيت بدراستي وامتحانات نهايه السنه وشرهب هم تمتحن

بشهر السادس بدينا نكمل والحمدلله بدراسه ماشييين بس سالفه مهدي مسيطره على كل فگري

اجه بليل مرتضى يسولف ويه يونس واحنا نحضر العشاا

مرتضى : نسيت ابلغج نايه

ناي : خييير

مرتضى : غير بيت جدج انفتح

ناي : يابيت

مرتضى : بيت اهل امج صار جم يوم صبغ وترميم مو اروح واجي على خالتي صالحه واشوفه عبالنا بلبدايه انباع تعرفين كم مره تأجر وراها انسد گلت اكيد نباع

ناي : وتالي باعوه

مرتضى : لا رجلج وامه واخوته اجوي من ديالى

ناي : شنوووو شجابهم

مرتضى : ماادري بس هوسه يمهم

يونس : معقوله صار شى

مرتضى : وشعدهم بهذا البيت بلذات اكيد صاير شى

ناي : خابر عبد وافهم منه

يونس : راح اخابر

جان بالي كله يم حوراء لان اعرف بعدها ما مسافره

دكيت محد جاوب مرتين وبقيت اروح واجي لحد مارجع دك عليه عبد سلمت عليه وسألته

عبدالرحمن: عالكه بديالى وصايره تصفيه على الهويه وعشيرتنا تورطت ويه جماعه وثار قويه بين الطرفين وخالي تخبل مترجعون اله تصفى يابه شنو كدامك نسوان وننهزم تالي جبرنا نجي لبغداد على الاقل هاي الفتره ومو مال نأجر بيت فتحنا بيت جد مهدي ونضفناه وكعدنا بيه مصار يومين منو كال الك

يونس : ابن عمي هسه بلغني مرتضى

محتاجين شى

عبدالرحمن: مشكور متقصر

يونس : كلكم اجيتو

عبدالرحمن: اي كلنا بس احنا الولد نروح ونرجع اهم شى النسوان جبناهن

يونس : ان شاء الله خير شتحتاج اني حاظر

عبدالرحمن: متقصر سؤالك كافي

ناي : طب يونس وبلغنا ماانكر خفت على مهدي رغم كلشي بداخلي مشاعر اله واعرفه عنيد وهذا مراح يكعد راحه راح يضل يروح لمحلاته وشغله

يونس : ثاني يوم حضرت غدا كلش زين يبيض وجهه واخذت تكسي ورحت دكيت بابهم انفتح الباب وصار بوجهي الخال عمران

استغرب وعكد حاجبه لان واكف بابهم

السلام عليكم مجاوبني ابتسمت بهدوء عدنا عاده الناس التنزل بيت جديد ضيافتهم علينا وانتم خطارنا وغداكم علينا وياريت مترد ايدي

عمران : شجابك يونس

يونس : ارد حك الخبز والملح الي بينا وكتلك اعتبركم جار وخطار وعيب على رجولتي اعرف خطارنا بغداد ومااقوم بواجبهم ولتهتم متشوف وجهي رجلي متجي صوبكم اخذ الضيافه وهاي تكفيني ولو انت بمكاني تسوي اكثر من هيج صفن بوجهي وكاال

عمران : مايرد الكريم اله البخيل

مقبوله ضيافتك

يونس : طلعت الصواني من السياره وصاح ام عبد وام صلاح واخذوها وعلاليك هوايه

عمران : ضيافتك ثكيله

يونس : اذا على القدر والمعزه فأني مقصر من السما للكاع واذا على الحال فعلى كد حالي بلعافيه من رخصتك

عمران : يونس

يونس : انداريت عليه ردت اكول اله هاا خالو ورجعت بحلكي

عمران : دير بالك على روحك

يونس : ماطول الروح بيد الله مينخاف عليها

عفته وصعدت بسياره التكسي الي اجيت بيها

يمكن ردت ارد ولو شويه من وكفاتهم او يمكن ردت احس بوجودها مااعرف بوقتها بشنو جنت افكر المهم الي فكرت بيه سويته

ناي : انتظرت اياام اي خبر من مهدي وخاصه هو قريب من عدنا حتى لسسيف مااجه

وهذا الشى قلقني معناه اكو شى باله

طلعت النتائج اني نجحت ورحت مرحله ثانيه وشرهب نجحت وعبرت الثالث متوسط

فرحت يونس جانت تسوه ابو الشهاده من يوم سالفه حوراء واني مشايفته هيج فرحان

وبليله نايمين خابروه كاام مخروع يركض كعدنا على عيطه بلتلفون وطلعنا للغرفه

شبيك يونس نباوع يبدل مثل المخبل

يونس : المحل احترك

شرهب : صخااام الصخمنا

يونس : ركضت حاافي من حلات روحي هو هذا مصدر رزقي الوحيد وكوه لكيت تكسي لان ساعه ٢ بليل وبوجهي للمحل لكيت الاطفائيه والمنطقه كلها طالعه اباوع ظلمه وماينشاف شى كعدت بلكاع فاتح عيووني يعني معقوله حتى بهاي ماعندي حظ

ضولي طلع نص المحل محترك موو كله بس الي متوقعته المحل الي بصفي هم محترك نصه وخلف الله على اهل المنطقه متلاحكين على المحلين وباقي المحلات

اجاني ابو المحل رجال جبير هو ولده يعيطون

يردون فلوس الخسائر وكلشي صار بمحلهم اني اتحمله لهسه منعرف شنوو سبب الحريق وهمه شيلوني الليله كلها بقينا نتعارك ونتجادل لل٤ الصبح اباوع نفسي وحدي بنصهم وذوله عشيره ولده واخوته ولد ولده واني بطرك روحي

وكفت بوجهه وكتله شووف عمي اني شاب لا اهل ولا عمام ولا خوال ولا اي احد عندي غير الله وماعندي غير هذا المحل رزقي عليه واذا اقدر الخسائر راح اشيل وانطيك كل الي جمعته وابقى اني بلشارع يااما تصبر عليه ادبرلك جم فلس يااما ذوله ولدك شيسون بيه خلي يسون لان ماعندي منين اجيب ابوك

ادخلووً المنطقه ومافضت بقت معلكه وهو بعده مصر يريد فلوسه رجعت كلي سواد هدومي وجهي ولابس نعال تك وتك انطونياه الجيران اول مدخلت شافني البنات

شرهب : بيك شى عفيه

يونس : كعدت وحطيت ايدي على راسي راح تعبي ورزقي

ناي : المحل حييل محترك

يونس : نصه بس الرجال الي بصفي يريد خسائر محله

ناي : خلي يولي قابل انت حركت محله مو حرام عليه يقبل عوض

يونس : خلي اسبح وارتاح وراها اروح اشوف شسوي

ناي : يومين يونس يركض وذوله لاذمه ولاضمير واخويه وحده خابرت عمه خوله وحجيت الها

خوله : فدوة اله المهم هو سالم اني يومين وادزله كل الجامعته

ناي : واني نيشاني بعده عندي يبيعه على الفلوس الي دزيهم ينطي لذوله الفلوس ويصلح محله مابلغت يونس كلت اخاف عمه تتأخر يله دز لحد مااجاني تلفون منها ورحت بنفسي استلمت الفلوس

يونس : كاعد حاير الفلوس الي عندي يادوب تكفي انطي الدين مال البضاعه منين اعمر المحل وهذوله وكعو عليه ٧ ملاييين منين اجيب ياربي احش بلجكاير وميت قهر

انحطت بحضني علاكه رفعت راسي هااي شنوو

ناي : هااي فلوس عمه دزتهن رحت استلمتهم اليوم وهذا نيشاني من زمان جابوه اليه مكدرت اكول اله حوراء اخر مره من جتي جابته اليه

اخذهم وصلح محلك وانطي الرجال فلوسه والله يعوضنا خير بيك

ناي : يونس يحجي ويايه ومااوجد الكلام اذني تصوفر وعيوني مغوشه ايدي اليسره خدرت اريد استوعب هذا شديكول شنو تصوب شنو ميعرفون شى عنه

عطت مهدددي وين

يتبع .....

#الابواب_الخمس

البارت الثالث والثلاثون /الجزء الثاني

للكاتبة Reem

صباح الـ🥀ـورد حبايب قلبي فضلاً وليس امراً اريد منكم دعوه لاختي واعز صديقه عندي باجر عدها مسحه خاصه مووو كو..رونا لا مسحه من نوع ثاني وخايفه حييل عليها گلبي نار  وهي هم متردده وخايفه واريد وكفت خواتي ويايه بلدعاء الها تطلع المسحه نظيفه ومابيها شى دعوه غريب لغريب مستجابه بأذن الله

وبجاه هذه الايام المباركه ليالي القدر  وبأستشهاد الامام علي (عليه السلام) يشافيها ويعافيها وتطلع كلشي مابيها

نرجع للبارت :

اشرد من عذابك وارجع لطاريك

وافكر بالبعد واشتاگ للملگه

واحتاجك هوى واختنگ ماالگاك

واشهك واختنگ والگاك بالشهگه

يل كلك احساس ارد افتهم معناك

گلبي بنار بعدك تگدر اتحرگه

ثق عندي گلب بس ينبض بطاريك

ويشتاق لحنانك ويه كل دگه.      

واذا رجعنا لديالى افصل الطابق الفوك عن الجوه نفس النظام وهناك ام عبد وام صلاح يساعدوها واكيد بذاك الوكت كامت على حيلها مراح تحتاج احد

وهم تبقين بطابق الفوك وحدج معزوله معززه مكرمه محد يوصل يمج شگلتي

ناي : بقيت فاتحه عيني مستغربه الحل وعقلي مشوش ومااعرف شسوي اني جنت افكر بيت وحدي مااجه بالي اكعد وياها بنفس البيت ومااتقرب منها وحجايته مال اخر حل وخيط بينا حسيت فعلاً هذا اخر خيط

مهدي : انت شتكول يونس شو ساكت اني شهدتك وهم اريد اسمع رأيك

يونس : يوم ماخابرتني وكتلي تعال اخذ اختك والعركه بوقتها وشفت حال ناي حلفت ماارجعها الك لان أذيتها بس سالفه الطفل الي بينكم هي الي وكفتني وخلتني طول هاي السنين ساكت لان انت مامطلكها لان مااريد اتحمل ذنبه وردت هي من ذاتها تقرر حتى لتكول بيوم احد جبرني مثل ماانجبرت تتزوجك شايف هذا البيت اني فتحته لعيونها جنت كاعد بشقه وكافيه وزايد عليه بس من اخذتها لكربلا وره المشكله وتوفه ابنكم فكرت مستحيل ابقيها هناك وتتعب نفسيتها فتحت بيت وتحملت ايجار لاجل عيونها حتى بس اشوفها مرتاحه وتضحك تعااي شرهب اكعدي واسمعي

شرهب : اي اجيت قدمت جاي لمهدي وكعدت اسمع

يونس :اني رجال بليه اخ ولا اب ولا عم وانت تعرف كلشي ذني خواتي اهلي وكل مااملك صحيح بنات بس يسون عشيره كامله عندي بيهن اقوى وبيهن انكسر ولعيونهن باقي لهاي اللحظه واكف على رجلي لهذا يامهدي في حال ناي قبلت ترجع وياك وبيوم شكت منك أذيتها كسرتها ثق بالله اضفرها متشوفه لو عندك عشر جهال منها

وانتي ناي لهاي اللحظه وبعد سنه وبعد عشر سنين ولحد ماالله ياخذ امانته سواء هذا البيت او الله رزقني بيت منعرف الوكت شظام  يبقى بيتج متردين ترجعين ويااه براحتج من باجر امشي معامله طلاك وكليتج تكمليها وحتى ادورلج على تعيين وابنج هو ابني وتبقين صاحبه هذا البيت والتردي على قول لسانج وتعيشين مدلله وتأمرين وتنهين والتردي اني وياج اما اذا اقتنعتي بحل مهدي ورجعتي شوكت متحبين وحسيتي روحج مظلومه ومتأذيه تلفون واحد منج حسبت الطريق اني يمج ساعه ماابقيج يمه انتي بعزية روحي وشرهب هم ومااريد بيوم وحده بيجن تنام مجبوره او مهمومه او حتى دمعه نازله منها وتحس روحها وحدها ومالها ظهر القرار الج وبلحالتين اني وياج مااريد غير فرحتج وتكونين مرتاحه اني رأي ماعندي الي تأشر عليه ناي هو هذا الرأي مالتي

ناي : دمعت عيني واني اسمع كلامه گلبي شكبره صار واني اشوف اخويه رجال اعتمد عليه واكف بوجهه رجلي ويرفع من قدري كدامه واعرف كل حجايه نطقها يونس طالعه من گلبه لان طول هاي السنين واني يمه رغم الحال على الكد بس عيشني اميرة شريد يجيبلي يقصر على روحه وماقصر عليه ولا على ابني بلحظتها ماخفت ارجع ويه مهدي لان حتى مهدي حس بكلام يونس وعرف هلمره ناي مو وحدها والها بيت يلفيها واخ يحاميلها مو مثل قبل هربانه من عمامها وتتحمل كلشي وتصبر وعندي شهاده وكرامه ومااتقبل بعد بشر يقلل مني

يونس : احجي الي بالج لتسكتين

ناي : اذا رجعنا لديالى اخاف امك متقبل نفصل البيت

مهدي : احد گلج اني مو كد گلمتي لو طفل

ناي : حشاك اني مااريد مشاكل وياها

مهدي : ماكو اي مشاكل سواء بغداد او ديالى تكعدين وحدج

يونس : اني مااريد احجي على امك لان تبقى مرت خالي ومبين انت تعرف شكد أذتها وشكد ناي صبرت على هاي الاذيه اذا تريد تشتري راحة بالك وتلم عائلتك التزم بالاتفاق

مهدي : كد كلمتي واذا رجعت ميكون خاطرها اله طيب كدام اخوج واختج اني اريدج وهلمره برجلي جايج لا خال جبرني ولا احد حجه براسي جاي بقناعه من گلب وعقل ارجعي وان شاء الله الاكدر عليه اسوي ومااقصر

ناي : بقيت ابااوع عليه عين بعين ااااخ يامهدي شكد انتظرت هاي اللحظه اشوف بعيونك التوسل حتى ارجع تحاول تراضيني وتحير شسوي حتى اقبل بقيت ايام وليالي اكول هم يجي يوم ويكعد كبالي ويسوي الي مستحيل بيوم يفكر يسوي لاجل عيني بدون ضغط من احد واجه اليوم واني اشوف بعيونك اللهفه والتوسل حتى ارجع

مهدي : هااا ناي

شرهب : يمعوده فضينا هذا هو ترجع

ناي : اشش لج

مهدي : هذا هو كلام شرهب ميصير اثنين

شرهب : اي فدوة لعينك هيج انفخ بيه اريد احد يسمع كلامي تكول مزهريه بلبيت

يونس : نايه ترجعين

ناي : اي ارجع

شرهب : خلي اهلهل يويو حباب

يونس : شسوين سوي

شرهب : كلللللوووووش

ناي : فضحتينا والله

شرهب : غير فرحانه لاختي

يونس : عندي شغله ثانيه مترجع ناي وياك اله تكمل البيت يعني متروح من هسه

مهدي : اني هم مفكر هيج اكمل كلشي واجي اخذها

يونس : هلمره راح تاخذها مني عينك عليها وراعي الله بيها

مهدي : ان شاء الله مااقصر

ناي : باوع عليه وابتسم بعد مجان متشنج عيونه فرحانه مثلي اذا مو اكثر

يونس : اني رايح اجيب عشا

مهدي : غير مره مستعجل

يونس : تطلع بليه عشا شون يصير

مهدي : الجايات هوايه تعاال بابا ابوسك

ركض سيف عليه شاله وباسه ويونس اشر لشرهب يدخلون وعافونا وحدنا

تقرب مني بهدوء وبينا سيف شايله

مهدي : هااا راضية

ناي : هزيت راسي بأبتسامه سحب راسي وباسه رجع دنك يريد يبوسني جان سيف يدفعه ميقبل

مهدي :ولك حتى انت ضدي

ناي : هههههه اي عفيه وليدي

مهدي : قابل ابنج يمنعني منج هاااج

ناي : اخذته من حضنه ونزلته

مهدي :ايام واجي اخذج محتاجه شى

ناي : سلامتك

تقرب باس خدي وطلع غمضت اويلي شكد حلووه من تكون من گلب يحب

فزيت على صوت الشعنونه تكمز وتهز بشعرها وتغني ساجده عبيد موتتني بيها

هذا لعبنا لا تكول استهتار

يونس : لا والله استهتار ولج كافي تكمز هسه اطك رگبتج وتضلين تونين

شرهب : غير راح ارتاح منها والغرفه تبقى اليه وحدي اذا متعوفوني ادبج هنا افضحكم وانزل للشارع

ناي : ضلي دبجي تجيج خاله ام حسن ترزلج هذا التكمز كله على راسها

شرهب : لا خطيه خلي اثكل عيب

ناي : اهااا ماعرفتج

يونس : مقتنعه برجعتج

ناي : اي لان صدك ماكو حل

يونس : لو نجي على الواقع ميصير يعوف امه اذا هيه موزينه وياج وياه احسن ام وتعبت وسهرت وكبرت وهلواحد عدها صعبة يعوفها ويطلع وانتي ام شتسوين مرجعه عليج بلمستقبل انتي خلي گلبج جبير اخاف تسمعين كلمة منها شى انطيها الاذن الطرشه سدي بابج ومالج دخل اهم شى زوجج وابنج

ناي : ان شاء الله حبيبي حضنته يمه من حجيت ردت ابجي

يونس : مو حجي هذا واقع اني وياج والي تأمرين بيه انتي من ريحة الغالية

شرهب : واني من بيت الجيران لومن زرف الباب

يونس : هههههه تعاال ام كفشه هو اكو اغلى منج

شرهب : قشمرني واكل بعقلي حلاوه

يونس : هو منو يكدر يقشمر شرهب اله امه داعيه عليه

شرهب : اي هيج جر عدل

ناي : مقبل نسوي عشا وكال اليوم اجيب الكم من بره بقينا نسولف ونخطط لحد مااجه وجاب وياه لخاله ام حسن وبتها كال ثواب لامي وباجر اذا بيجن حييل طبخن ثواب وخلي نوزعه كيفت لان هو دوم يحب يوزع ثواب لامي وخاصه من يصير عنده فلوس

ثاني يوم من الصبح سوينا غدا وزعناه وجعله واصل جنت اشتغل وافكر بكلشي عشته ويه مهدي وادعي الله يسهل ايامي ويااه مااريد ارجع للمربع الاول واتأذه

جنت جوه يم ام حسن هم اشوف زهره لان مريضة وهم اشوف خاله فرحت حيل من عرفت راح ارجع وكعد توصي بيه شون اداري رجلي ومندمجه وياها جان يدك تلفوني باوعت سدره جاوبتها من رخصتج خاله رحت بلمطبخ

هلوو سدوره

سدره : هلوو گلبي شونج

ناي :  الْحٍمَدٍ للـّہ

سدره : منو يمج

ناي : ماكو احجي اكو شى

سدره : شوفي اني مااعرف افتن بس مرات يخلون الواحد كوه يحجي

ناي : شصاير يمعوده وكعتي گلبي

سدره : عمتج ام راسين

ناي : منووو خوله

سدره : ياخوله لا اقصد عمتي وعمتج وداد

ناي : شبيهه

سدره : فرت راسي فر هااي شون عشتي وياها اني وجاهله شفت اشكال منها وحتى من كبرت واعرف دروبها بس اول مره اشوف دروب وافلام جديده الها

ناي : شسوت

سدره : يااحبيبة كاعدين على حب الله سوالف وضحك وامي وام عبد وهي وكلشي مابيها حرام اقوى مني ومنج بس حركتها بطيئه علمود العمليه وهي حتى فترت النقاهه راح تخلص المهم ياعيني نضحك وجان تكول راح اخطب لمهدي بت نجاة

ناي : هاااا بت نجاة منوو

سدره : هاي وحده كرابتنا تصير نجاه بت عمها وعايشين بأربيل من عرفو مسويه العمليه اجت نجاة وبتها حتى يشوفون عمتي وداد وبقو ٣ ايام يمنا وعمتي طارت بيها طير

صحيح البنيه حلووة ونازكه بس حيل بالغت عمتي بفرحتها بيها

ناي : انتي جاي تقهريني لو تبلغيني بخطوبه رجلي

سدره : هههههههه لج اصبري خلي اكمل 

ناي : كملي الزبده رحمه لابوج

سدره : احنا صفنا ياخطوبه هااي شتحجي جان يطب مهدي وجهه مرتاح منشنش مبين جان يمج

ناي : البارحه

سدره : اي عفيه البارحه هي شافته الضحكه شكت وجهه تعال يمه اكعد عندي شغله وياك وخالاتك موجودات

قبل لتحجي ذب الها القنبله

مهدي : اني عندي شغله وياج وهمزين الكل موجود احنا راح نشيل لغير بيت

ام عبدالرحمن: ليش ابني مضايقيك بشى اذا تريد اخلي خالك يدور النا على غير بيت وانت ابقى بيت جدك هذا بيتك

مهدي : لا خاله مو شغله مضايقيني بلعكس غير انتم اهلي بس اني راح ارجع ناي

ناي : عاطت اكيد

سدره : ياعاطت يالطمت تخبلت تكول كالو الها راح نحركج وانتي عايشه

والاحلى من كال الها الطابق الفوك الج والها الطابق الجو ومالها دخل بيج يييمه بقيت فاكهه حلكي شنو من قوه بلعافيه عليها اني لو منها ومسويه هيج عمليه مااتحرك سنه

ناي : وتالي

سدره : ياداده لزمت گلبها وسوت نفسها متخربطه وصلت الموت وتكوله اذا رجعت ناي لا انت ابني ولا اعرفك ومااروح وياك لاي مكان وحركات مستعمله هوايه

ناي : تسوي فضل اذا مااجت

سدره : وهو بقى يرضي بيها ويحاول يفهمها وسوت روحها اختنكت حرام ذيج هيه جذابه

ناي : شراح يخلصها وياها وشصفت

سدره : هيه هسه منهاره ودتموت ومراضيه عن مهدي هاي كلها كدامه وكدامنه تعبانه بس مو مثل كدام مهدي مواته تكول بس نجيب التابوت ونتوجهه للمكبره

ناي : شتريد مني لخاطر ربها متتعب مايهدها المرض

سدره : شوفي بداعت ابنج لاتنطيها مجال تخرب عليج

ناي : شسوي يعني

سدره : خابري مهدي تواصلي ويااه قربي منج خلي يحس بيج

ناي : قابل اتحارش بيه كوه

سدره : مو هو ابن الجيران وتستحين تتحارشين شبيج هاي اسمها دهاء امرأه مو حرشه انتي تحبين مهدي وهو هم متأكده يحبج وخاصه بعد سالفه العزل كله حتى يرجعج

ناي : واذا هو يمشي بكلام امه شسويله

سدره : لترجعين فاهيه عفيه مو كلت سباعيه وقويه وسويتي ويه مهدي الماسوته غيرج وغيرج اقصد اني من الاخير لان اعرف عقلج شطح

ناي : هههههه اي والله

سدره : معناها يحبج ومتمسك بيج اني تنازل عني مجرد كتله نكعد وحدنا او نعزل وقصه كلها تعرفيها اني مكعد اعيد الفات وداعت جهالي هسه مهدي حاله حال صلاح بس ردت اقارن الج وشون سوه لعيونج الي مسواه لغيرج وعود حب حياته معناها الفات انتهى وانسه وانتي هسه بگلبه مااريد عمتي تربح وتضيع كلشي حلوو بينكم بعدج ماعشتي ايام حلووة ويااه ذيج السنين جافه وماتركتي وبقيتي صابره تالي وكت متربع السنين ويتعلق بيج تعوفي لوداد

ناي : هي عركه اعوفه ويعوفني

سدره : اي عركه وهذا رجلج ابو ابنج ومثل ماامه الها حق بيه انتي وابنج الكم حق وهاي كعد تسوي افلام حتى مترجعين وتريد تزوجه اني اعرف ميسويها الي خلاه ينتظر هاي السنين كلها مستحيل يبدلج بس بنفس الوقت انطي دافع اشحني خلي يحس انتي تحبي مو يحارب لاجل ورده يابسه

ناي : اووووف مااشي احااول ومهدي وين هسه

سدره : وداها اليوم للطبيب انشلع گلبه وياها الطبيب كال اله زينه بس يراد الها راحه مو اكلج عياره تسوي حركات حتى مهدي يخاف عليها

ناي : كلش تحبين عمتج

سدره : هي تخلي الواحد يحجي عليها تشوفين ابنج يريد يرجع مرته وابنه شلج بهاي السوالف دومها انانيه وتريد كلشي الها ياداده من الاخير البيت محترك صيري انتي الطفايه والعبي بگلب مهدي وخلي وداد تنجلط بلزايد ههههههه

ناي : اويلي عليج وانتي شيصير كوليلي

سدره : اني باجر رايحه لبيتي الرجال راح يطك مني صار شكد عايفته بس لتخافين اخابر امي واسمع كل الاخبار منها وابلغج

ناي : اي عفيه اعتمد عليج

سدره : الله كريم بوسيلي سيوفي

ناي : يوصلي حبيبتي وانتي هم باي

رجعت كعدت ويه خاله ورجعت تسولف شون المره اداري رجلها ومن هاي الامور لحد مصار المغرب سلمت وطلعت

صعدت للبيت سويت عشا وانتظرت يونس اتعشينا كلنا سوه واني بالي كله يم مهدي شراح يسوي

بليل ساعه وحده ونص اباوع اضاءه الموبايل تطفه وتشتغل احطه صامت من انام انتبهت باوعت هذا مهدي شفت الوقت خفت جاوبت هااا عيني صاير شى

مهدي : اله اكو مصيبه يله اخابر

ناي : شفت الوقت

مهدي : اييي شفته واعرف كاعده وكلت اخابر مرتي

ناي : رجعت راسي على المخده والابتسامه بوجهي امممم مرتك وليش بهيج توقيت

مهدي : كلت بلكي ليل ويهيج عندج الحنين وتحسين بيه شكد مشتاق

ناي : ضحكت بصوت فزت شرهب

شرهب : بدينا بسوالف المراهقين اكيد هذا مهدي

ناي : اششش نامي

مهدي : خلي تنام ومالها دخل وتعاي ليش ضحكتي كلت نكته

ناي : والله بلنسبه اليه نكته

مهدي : هاااا ليش بله

ناي : لان قبل كم سنه جان نفس الاحساس عندي وانت ثلج ولا تحس المجمده تتحرك وانت لا

مهدي : كولي متشمته بيه

ناي : الصراحه ايييي وفول شماته

مهدي : تجين ليمي واشوفج شون تتشمتين بيه

ناي : نصيت صوتي وتذكرت كلام سدره وكتله من اجي يمك اخليك مو بس تشتاق تموووت شوق تذوب بيدي متندل دربك

مهدي : ليل والشوارع فارغه ١٠ دقايق يمج اذا بقيتي تحجين تعمين على نفسج رجلج منو يحقني اصعد واخذج ويايه كوه ترضين وان ماترضين

ناي : هههههه وامك شلون غير تبقينا بلشارع

مهدي : اكو شغله صارت البارحه لازم تعرفيها

حجالي كلشي واني سويت نفسي ماادري

والحل

مهدي : اني راح أدور من باجر واثث الطابقين ومنا لحد مااكمل كلشي تكون استوعبت الوضع ورضت

ناي : وان مارضت

مهدي : ماعندي غير حل ابقيها بيت جدي ويه خالي واخذج ونروح للبيت الجديد

ناي : يعني تكسر كلامها

مهدي : انتي شبيج بابا جاهل كدامج اني صحيح اراعي امي لان احبها بس مو معناها خرخاشه بيدها مثل ذيج المره ذبيتي حجايه اكبر من راسج من كلتي بيد خالك وامك وسكتتلج وخليتيني ردت اندعم من السرعه

ناي : ليش تعيط مو جنت تحجي حلوو

مهدي : هو انت تجفصين وتردين احجي حلوو

ناي : مهدي

مهدي : هااااااا

ناي : مهدي

مهدي : كلت هاااا

ناي : اشتاقيتلك

مهدي : جذابه

ناي : ليش جذبت قبل عليك سكت شويه مثل الواحد يريد يهدي روحه حتى يحجي وكاال

مهدي : بعدج تحبيني

ناي : لوما احبك ماارجع الك

مهدي : لوافهم شنو البيج يخليني مااشوف اي مره بلدنيا غيرج

ناي : منو يكوول يجوز خنتني مره وماكو يمك وبراحتك محد يحاسبك

مهدي : روحي نامي نعستي مبين

ناي : ههههه يله تغطى زين ابو سيوفي لتبرد

مهدي : ابو سيوفي مشتعل اهله وانتي اضحكي هانت اطلعها بيج ياام سيوفي

ناي : ههههههه باي

شرهب : ام سيوفي اليوم منام روحي يمه يمعوده شبعي بوس غزل وعوفوني انخمد

ناي : احبه

شرهب : واني شنو ذنبي ناس تحب وغركانه بلعسل وناس كل طموحها تريد تنخمد راح انام بلسطح اريح اليه

ناي : سكتت نامي

نمت وبوجهه الضحكه من سنين ممرتاح كلبي هيج وافكر شون اخلي يتعلق بيه اكثر مااريد اعيش حياة اللاوجود الجنت عايشتها الي اني والماكو سوه

صار اربعه ايام مبقى شى وارجع للدوام خابرني گلي نزل برنامج الواتساب اوضح بلمخابره والرسائل واني نزلته وكام يخابرني بس ميطول دقايق ويسده دوم احسه مستعجل واكول يجوز عنده شغل

دك التلفون شلته واسمع صوت اغنيه جانت

حـب حـب ويــــنك فـــدوة لعيــنك أإرجعلـــي

حــــب حــــــــب عيــــــني .لآتئذيــــني كـآفـــي عنــــآد  مال قائد حلمي

كتله هذا مو ذوقك انت متسمع هيج اغاني

مهدي : والله صحيح ولا احب هاي السوالف كله من وره هذا الفاسد عبدالرحمن

ناي : وانت ليش تسمع كلامه

مهدي : اگل گلبي ليش جامد اتشاقه وياها دزلها اغنيه راح تطفر منك

ناي : ههههههه وانت مصدگه

مهدي : شوفي من الاخير اني مااحب هاي الحركات وهلمره سويتها بعد مااعيدها

ناي : اذا هيج اغاني انصحك لتعيدها

مهدي : سمعت لك

ناي : هااا يمك

مهدي : اي كاعد بصفي والطريق كله لعبها لروحي خابرها وسمعها

عبدالرحمن: مو وجهه نعمه انتم ضلي ام سيف على مكعب الثلج ردت احركة الج واسوي رومانسي بس الظاهر اثنينكم نفس الطينه

ناي : راضيه بيه هيج

مهدي : شفت هذا الحجي المعدل

عبدالرحمن: يامعدل اذا مو جم شهر شردت منك اكص ايدي اكو واحد يخابر وحده يحبها يكلها هاا ام سيف شونج وگالب وجهه حسيت تكولها هاا خزعل شون الحصاد اليوم

مهدي : هذا يريد يخرب بيني وبينج عوفي

ناي : اي حبيبي هذا مخرب الجماعات طلعت حبيبي من حلكي وهوً كاال هااا بعدين اخابرج عرفت استغرب

عبدالرحمن: باع هذا سمع حبيبي غير تكلها حبيبتي ارتبك اني من اول تلفون اكول لصاحبتي اني احبج حتى قبل مااعرف اسمها

مهدي : مشوف طايح حظك ومتريد تتزوج

عبدالرحمن: بما ان ام سيف ماحبت هاي الاغنيه واكيد ماعدها ذوق شغلي الحب ابو جواد خلي اسلطن عليه

ناي : منو هذا ابو جواد

مهدي : كاظم الساهر

ناي : شرهب تموت عليه هو وهيثم يوسف

عبدالرحمن: هله بلذووق

ناي : شنوو

مهدي : موو يمج يله اني اروح نتخابر بعدين

ناي : الله وياكم

شرهب : شبيج ضحكتج واصله لبره

ناي : مهدي ويه عبد مدري وين رايحين

تعاي عندي شغله وياج

شرهب : خير

ناي : شوفي اني كلها ايام واروح شغل الاقساط راح اعوفه الج وكل الفلوس هم الج اني بس سحبت ال٩٠٠ وهم راح اعوف نصهن مااريد اي شى

شرهب : وانتي

ناي : اذا احتاجيت بيوم وين اروح لو اجي الج لو ليونس والشهاده لله مهدي بهيج سوالف كريم

شرهب : وتعبج كل هاي الاشهر

ناي : انتي اولى بيهن شوشه ارجعي قدمي سادس عفيه

شرهب : هو هاي السنه اقدم ان شاء الله ينفتح التقديم بال١١ مباشرة اقدم ليضل بالج

رجعت للدوام وبديت اداوم والدراسه صعبه بس اني ملتزمه بلمحاظرات واقرا بأستمرار

مر اكثر من ٢٠ يوم على جيت مهدي وسالفه رجعتي طبينا شهر الثالث ٢٠١٤ ماسألته اي شى شوكت ميكمل اروح وهاي الفتره قليل يخابر واني عايفه الوضع لان من خابرت سدره كالت امه مكعد تصفه وياه متريدج وهو مابلغني حتى لا انقهر او تتأزم الحاله

بليل كاعدين نكرز حب ونباوع على فلم عربي طلع يونس من غرفته بيده علاكه

يونس : هاااج

ناي : شنو حبيبي هااي

يونس : فتحيها

ناي : فتحت العلاكه بطنها علبه فتحتها بيها ذهب كلاده وسوار ومحبس وترجيه حلوات كلش فتحت عيني ذني شنوو

يونس : شوي اقل من ذهبج كل الكدرت اجيبه

ناي : انت من كل عقلك شون تشتري وانت ماعندك

يونس : تردين ترجعين لبيتج وذهبج ماكو ميسألج وينه واذا گلتي بعته ليونس شنو موقفي كاعد اصلخ واذبح كدامه وتالي ماخذ ذهبج واكفه بحقي حيل

ناي : اطلع الف عذر اكله عفته يم شرهب ضاع

يونس : لتتعلمين تكذبين لان لسانج يكوم ياخذ واذا عرف جذب تنزلين من عينه اني جنت ناوي ارجعه وهاي الفتره كلها الم لتصدكين اخلي نفسي ونفسج صغار بعيونه اريدج ترحين وانتي نافشه روحج عليهم مو خايفه ومتردده

ناي : سوده عليه حيل ضغطت على روحك مااريده والله

يونس : اني ماافهم حيل بلموديلات تخيلته عليج وشفته حلوو

ناي : يخبل والله اصلاً احلى من ذهبي القديم

الله لايحرمني منك

يونس : انطني حب خلي اكرز وياجن

كعد بنصنا واني احمدالله لان الله عوضنا بأخ حنين مثله

طلعت مرتين ويه شرهب اشتريت كم قطعة ملابس مال بيت مرتبه وهاي شرهب تخبلت اله تاخذلي شغلات جريئه تمشي وتكول نشفتي ريگه للرجال واني اضحك عليها اشتريت على ذوقها وحضرت كلشي ومنتظره منه خبر

صار شهرين وهو يخابر بين يوم ويوم دقايق ويروح بديت اضوج واختنك وحتى تندمت معقوله لان رجعت هيج يبيع ثكل عليه وينه اريدج واريدج وكرامتي تمنعني اسألة واكول اله ليش لهسه صنطه

دخلنا الشهر الرابع كاعده بلكافتريا اني وصديقتي ونراجع بلمحاظرات اخاف اكو نقص لكيته جاي عليه كاشخ لاخر حبه صديقتي عرفته كالت هذا مو رجلج رفعت راسي مستغربه كمت من مكاني ورحت الها اتلاكينا وجهه بوجهه خيير صار شى

مهدي : دومج بيج خرعه

ناي : مو استغربت جيتك

مهدي : اليوم اجيت اني ارجعج

ناي : مهدي الله عليك صار شى

مهدي : عندج محاظرات بعد

ناي : بس وحده

مهدي : مهمه

ناي : لا مو حيل

مهدي : امشي نتغدا وراها نروح للبيت تحضرين غراضج اليوم تباتين بيتج

ناي : اليوم انطي صبر غير تبلغني قبل يوم يومين

مهدي : اعتقد صار شهرين من بلغت

ناي : اليوم لا عفيه اني كلت يجوز لغيت فكرت العزل كلها

مهدي : بعدين افهمج ليش تأخرت عليج يله نايه اليوم اريدج بيتي

ناي : والله ماالحك

مهدي : اخذي نص وعوفي الباقي بعدين ارجعي اخذي

ناي : بله هذا شون افهمه اني مجاهزه مو شغله ملابس اني لامنظفه نفسي ولا جاهزه بقيت اعض بشفتي

مهدي : هااا صفنتي

ناي : بغلاتي بس اليوم وباجر دوام مااداوم وتعال الصبح

مهدي : هذا هو خلي اشوف تاليها وياج لوين

امشي نتغدا وارجعج للبيت

ناي : رجعت اخذت ملازمي وطلعت ويااه كعدنا بمطعم نتغدا وجان يكول

مهدي : راح نروح وحدنا للبيت

ناي : مفهمت

مهدي : امي هاي الفتره متجي

ناي : ليش هيج تعبانه

مهدي : لا زينه صحتها خليها يم خالي مرتاحه هي شوكت متحب تجي

ناي : بگلبي كلت هاي عالكه مبين متريدني

اكو شى صار

مهدي : لا ماكو ليضل بالج

ناي : امممم يله ناكل حتى نرجع بالي يم سيف

مهدي : اخاف باجر نروح للبيت عوفي سيف يم شرهب

ناي : ليش

مهدي : هيج يومين وناخذه لو متردين تبقين وحدج ويايه اله محرم

ناي : ابتسمت مااشي اكلنا ورجعنا وصلني لباب البيت وراح

صعدت بلغت شرهب وبديت احظر نفسي حتى اروح لبيتي بعد ٣ سنوات ونص زعل

طول اليوم اركض منا ومنا نمت على وجهي من التعب

اجه الصبح واسمع صوت الباب نزلت شرهب شويه وطب مهدي وياها

مهدي : صباح الخير

ناي : صباح النور

مهدي : كملتي

ناي : اي

مهدي : وين الغراض

ناي : ذني وبده ينزل جزء منهن

فدوة شوشه عينج على سيف

شرهب : روحي لحضن رجلج ولتفكرين بشى يله بليه مطرود

حضنتها وطلعت اخذني مهدي ويونس مقبل يكون موجود كال مااكدر اذا بقيت اخاف مااخليج ترجعين ويااه

الطريق كله ساكتين باوعت المكان مو حيل بعيد عنا بمنطقة المعلمين وصلنا لبيت

مهدي : يله وصلنا

نزلت اباوع البيت مرتب وبابين مثل نظام بيتنا (بيت يونس) الفرق هاي المنطقه اهدا وارقى والبيت اجدد

فتح الباب الصغير وصعدنا للطابق الثاني

من نخلص الدرج ممر طويل ومسافه مرتبه يله باب الصاله فتح الباب طبيت برجلي اليمنى وسميت بسم الله باوعت غراض جديده صاله كامله من تخم وبلازما وسبلت حتى الطبلات كلشي كاامل وراقي حيل الالوان الي احبهم المكان كلش حلوو

مهدي : هااا عجبج

ناي : كلش هاي شوكت لحكت وليش مكتلي اطلع وياك

مهدي : انتي دراسه وبيت وسيف اعرف اتعبين اذا شى معاجبج ابدله

ناي : بلعكس كلشي حلوو وراقي ومبين غالي هواي كلفت نفسك

مهدي : طبي كملي فر بلبيت بين ماانزل الجنط

اخذت فره بلبيت غرفه نوم صغيره ومرتبه والمطبخ احلى شى يعني صدك مأثث بيت كامل غرفتين وصاله ومطبخ الغرفه الثانيه فارغه

مهدي : يراد ترتيب على ايدج هاي اني وعبد رتبنا مات من التعب وشكد يلغي فلت منها صلاح لان مريض جان هم كربت عليه

ناي : لو كايل اني وشرهب انرتب

مهدي : منا وهيج بيتج شسوين بيه براحتج تعاالي خلي احجي وياج

جرني من ايدي وكعدني بصفه على التخم

اني نفذت كلشي طلبتي ومبين من فرحة عيونج كلشي تمام

ناي : اي عااشت ايدك

مهدي : اريد منج شى واحد

ناي : شنو

مهدي : اخاف امي ترجع حاولي لتتصادمين وياها

ناي : اعرف هيه مراضية برجعتي بدون متكول وهذا سبب جيتنا وحدنا

مهدي : مثل ماانتي تعبتي اني هم تعبان من المشاكل اخاف مرات انجبر ابات يمها جوه لتضوجين

ناي : يعني راح يصير عندي ضره

مهدي : تغااارين

ناي : لا

مهدي : مبين من وجهج الي انگلب

ناي : اتعلم واتجاوز هواي امور لخاطرك ماطول انت ممقصر ويايه

مهدي : ناي

ناي : هاااا عيني

مهدي : اني رجال مااعرف ازركش الكلام وارتبه واغازل مرات تطلع مفردات مني ومرات تشوفيني ساكت حرف ماكو يجوز ماامشي كل الوكت واتغزل بيج وتكولين بارد جامد متحس بيه هذا طبعي حتى من احب اكون قليل التعبير تخوني العبارات وبصياغه الغزل فاشل تكدرين تكولين رجال عملي  اهم شى لازم تتأكدين منه اني كلش احبج ولوما احبج مااصبر هاي السنين على زعلج

ناي : واني صبرت ٤ سنين على برودك لان هم احبك

مهدي :ورديتيها اليه وبلقاضيه

ناي : تعادل ولتنسى انت السبب بهذا البعد

مهدي : كلشي يصير اله سبب وحتى من أذيتج من غيرتي عليج بوكتها مااحبج مثل هسه بس تبقين مرتي واغار عليج ومااتحمل احد يوصف شى بيج ومن رحتي وعفتيني عرفت قيمتج

ناي : اريد اعرف شغلات عن مشاعرك تجاهي انت غامض كدامي من زمان مثل الكتاب المقفول بصندوك ومفتاح الصندوك مشمور بلمحيط

مهدي : بربج وكتها هسه

ناي : هههههه اي وكتها

مهدي : شتردين تعرفين

ناي : كلشي

مهدي : صعب

ناي : ليش

مهدي : لان اني نفسي مجنت اعرف شنو نوع الاحساس الي عشته وياج بديته من اول يوم فتحتي باب بيتكم وجنتي تغسلين فراشات مدري زوالي ومنكعه والوجهه طماطه

ناي : اي اغسل بلكمبار مال بيبي

مهدي : شفتج واني مطايق حتى اسمج ومجبور اخذج للحجيه الله يرحمها وكل يوم اشوفج بيه اريد اذبحج على لسانج وجرأتج والعناد

ويوم ماانهزمتي ردت اشرب من دمج شون اطلعين من البيت انتي واختج اثنين بنات صغار مراهقات من محافظه لمحافظه هواي امور خلتني اخلي علامات استفهام عليج

ناي : ومن جبرك خالو على الزواج

مهدي : كرهت كلشي داير مدايري وتالي سلمت يوم مابيبي لزمتني وكالت لتضيعها مثل ماضيعت امها (ذكرى) وسلمتها بيد واحد ضيع شبابها ودفنها وتالي حتى ابوك راح من وره هاي الزواجه

وصتني اتزوجج وحلفتني بأبويه وكالت اكيد راح يكون راضي عنك لان لو عايش ميزوجك غير ناي من كثر ميحب ذكرى اكيد يحب بزرتها وهاي يتيمه امانه عمتك وابوك لتخليها تنداس جوه رجل عمامها ونسوانهم

ناي : وانت اقتنعت

مهدي : اي وبوكتها ردت اجي على خالي وابلغه وصارت الهوسه من خلاني اجيب السيد واعقد عليج

ناي : يعني انت جنت مقتنع قبلها

مهدي : اي وتره سألتي هوايه

ناي : لا الله عليك كمل

مهدي : طايرين غير وكت

ناي : انت وصلت لاهم موقف وراح تفلت

مهدي : شتردين تعرفين

ناي : شوكت حبيتني

مهدي : ماادري لتباوعين هيج ماادري وداعت سيف كمت اشتاقلج واحب ارجع للبيت اشوفج صوت ضحكتج ويه حوراء احبه ليش اخذتج للشمال ردت اعيش وياج وحدنا واشوف هاي الانسانه العايش وياها اربع سنين وحبتني رغم مابدر اي حب مني وتعرف بيه وبسالفتي القديمه وتحملت شون اذا بادلتها شويه مشاعر شراح تكون

ناي : وشنو الشفته

مهدي : بلاوي جنتي ناار كتله مشاعر رهيبه كل مااشتاقلج اتذكر ذيج الايام

ناي : عفيه استحي مو هيج

مهدي : سألتيني وجاوبت ومن يومها وعدت نفسي اسيطر على مشاعري واطوي صفحه جديده وياج وملحكت اجه ابن الگلب اااااخ لو الزمه لاازوعه دم

ناي : عوف هذا الموضوع وره العركه كمت تحبني

مهدي : كتلج مااعرف شوكت المهم خلال هاي السنوات طلعتي الاربع سنين العشتيهن ويايه  مربع عليه وخليتي ليلي من نهاري مااعرفه والي خبلني عايشه حياتج ولا بالج ادرسين ودخلتي كليه ولا عبالك تحبيني بلحظه صدكت نسيتيني وهذا الي خبلني وخلاني مااطلك خفت ترحين مني

ناي : ليش مااجيت واعترفت اليه جنت كل متجي شايل خشمك عليه

مهدي : كتلج اني بأظهار المشاعر ماادبرها وبنفس الوقت حبج سيطرعليه بشكل خيالي

وعقلي طار كلت اخاف ابين الها وتتكبر عليه ويزيد اعنادج عفت الوضع على حاله

ناي : ومن داومت كليه

مهدي : من داومتي ولكفتج بليه حلقه يمكن لو معانده اله اكسر اصبعج

لج خليتيني اجي من ديالى من الصبح اسحل المسكين صلاح حتى بس اشوفج بلكليه وادور واسطه ادخلنا لان ممنوع وكوه لكيت

واول ماوكعت عيني على ايدج لابستها لو لا

ناي : غرت مووو وابتسمت

مهدي :من اول يوم طلعتي من بيت يونس ورحتي للكليه واني الغيره خلت عقلي يوكف لو يمي اهون كدام عيني بس بيت اخوج وفوكاها كل مااشوفج ماكو على لسانج غير الطلاك شتردين مني مااغار وانجن

كاافي حجيت هواي وانتي كعد تضيعين وكت مني

ناي : ليش شعدنا

مهدي : تعالي جوه واني اكلج شعدنا

ناي : سحبني من ايدي واني ابتسم دخلنا لغرفتنا

جسدان يتعانقان بحراره بعد سنين من الالم والخذلان ويليها جرح وفراق

بعد كم المشاعر المؤلمه التي عشناها نعيش اليوم مرحله جديده من الشوق والحنان والحب اصبحتُ تحت يديه كما قال كتله من المشاعر ولكن هذه المره مشاعر من كلا الطرفين

كل لمسه منه كانت بحب اتنقل بين ايده برومانسيه ودلع مهدي اليوم الرجل الي تمنيته والي كنت انام بصفه واكول شوكت تحس بيه صبرت وتعبت وتأذيت و اليوم واني بأوج لحظات الحب والرغبه شفت رجال يعشق المرأه الي بحضنه قليل الكلام لكن كثير الافعال واحلى كلمة غزل سمعتها وهو يهمسها بأذني وايده اداعب بحب كل مسامه بيه همس

(انتي بداخلي اكثر مني )

شرهب : بقيت لاخر لحظه اضحك واتشاقه ويه ناي واهوس وابين الها اريد اخلص منها واريد الي الغرفه واني مشاعري عكس الي اسوي جنت ابجي قهر مدمره حيل

رمل كل لحظة تهب عليه نسمه قهر اطير بيه لان راح تروح ومردت اكسر فرحتها

من طلعت ويه مهدي رجعت للغرفه ونمت بفراشها واشهك مثل الجاهل اليوم رجعلي احساس اخذو امي مني مره ثانيه اني اريد سعادتها وبنفس الوقت اريدها يمي فكرة اكعد الصبح وحدي واكل بدونها وامشي يومي بلياها خلتني احط المخده واعيط بكل قوووه دموعي عزيزه بس اذا بجيت ابجي بحركة

محسيت غير ايد انحطت على راسي رفعت راسي لكيته يونس حضنته واشهك

يونس : عرفت بيج راح تتأذين من تروح انتظرت ياخذها ويروح وارجعلج

شرهب : شمدريك طلعو

يونس : مجنت بعيد يم ولد صديقي قريب المنطقه وخابرتها كالت طلعنا واجيتج

شرهب : راحت بعد متعيش ويانه

يونس : كافي حبيبتي ادعيلها الله يوفقها تعبت وابنها خطيه بليه ابوه وهاي الحياة لازم تمشي شكول اني اذا انتي هم عفتيني واتزوجتي

شرهب : اني مااتزوج واعوفك ابد

يونس : خلي اشوفج كد كلامج

شرهب : اي كده

يونس : امسحي دموعج كون اصورج وادزلها صورتج اكولها ام لسان تبجي عليج

شرهب : لا خطيه اني كوه سيطرتي على نفسي ماضربت مهدي وطردته

يونس : الله ستر وسيطرتي يول حتى فلوس ماعندي انطي فصول

شرهب : انطي ناي فصليه

يونس : هههههه غير مرته يله كومي غسلي وتعاي نتريك سوه اكيد مماكله

شرهب : اكعد سيف

يونس : كعدي خلي يتريك ويانه كلها يومين وتاخذه لوما العيبه جان بجيت وياج تسون سوايات انتن المن متزوجات ابقن يمي

شرهب : اني باقيه على گلبك بقى يلعب ويهوس بشعري يله جعت

بقى يونس ومراح للشغل وتغدينا سوه اثنينا واحد يصبر على الثاني ونمثل بأن الوضع طبيعي

خابرت عمه خوله وكيفت برجعتها وحتى بيبي وعمه كلها فرحت يخابرون عليها متشيله حايره بلحب اييي عيني محرومه خلي تجي اله العب عليها

ناي : يوم ماحسيت بساعاته وماميزت النهار من الليل خلصته كله بحضنه نسولف ونضحك كوه خلاني اخابر حتى اطمن على سيف دقيقه وسده وشرهب تكمز

حتى الاكل محضره ماطلع ابد

وراها طلب مني مااداوم هليومين حتى نبقى سوه وطلع حركت ال٣ سنوات ونص بيه

وحتى من نحتاج شى يخابر عبد يجيب النا تكول عرسان وربي هسه يله حسيت بكلمة عروس

خابروني كلهم ام عبد وام صلاح وسدره وباركولي حتى حوراء من الخارج خابرت مسألتها عن اي شى يخصها حجيت وياها دقايق وسديته محد اجه زارنا لان وداد حاطه يمين عليهم الي تروح متحجي وياها العمر كله وهي مستغله سالفه مرضها كعدو وسكتو ودزو هداياهم بيد عبد بس خالو عمران اجه دقايق سلم وبارك وراح

تعودت على بيتي وطايره بيه ومرات اقرا المعوذات اخاف احسد نفسي صحيح مهدي مقسوم بيني وبين امه بس اني اشتريت راحه بالي هي تتقصد كل شويه تخابره تخربطت تعال حتى يبقى يمها من اشوف هيج حاله اكول اله روح الها واذا تريد بات يمها وخلته متبهذل ومتقبل تجي تعيش بلطابق الجوه جان يطلع وقت طويل بين الشغل وبين امه بس ابد ماعافني بيوم ابات وحدي تالي الليل يجرني ويتعارك ويه سيف حتى ينام بحضني بهلكم يوم اكتشف انسان ثاني مو الي عشت ويااه والحلوو بيه يحجيلي عن شغله شغلات بسيطه ويحاول يتقرب مني ويحسسني شكد متغير ميعرف اني حسيت من يوم ماكعد كبالي وكلي احبج

اجتني شرهب مرتين للبيت بس يونس ميقبل يجي لان علاقته بمهدي بعدها مامستقره

اتفقت ويه مهدي الخميس اروح ابات يم يونس وشرهب وارجع الجمعه وهو يروح يبات يم امه حتى من تشوفه تسكت طبقنا هذا الشى شهر وراها هو لغاه من وحده بحجه اشتاقلج وكمنا اني اروح من الصبح لليل الجمعه بيت يونس وهو يخلص هذا الوقت بيت اهله وتالي الليل واحدنا نايم بصف الثاني

بدت الامتحانات النهائيه وادرس واركض على البيت وهو يحاول يساعدني

والحمدلله نجحت من الدور الاول وحبيت فرحته بيه وهديته جانت محبس ذهب واستغربت كل هاي الفتره ولا سألني عن الذهب وين وديته

ومن كتله ليش مسألت جوابه گبره بعيني

مهدي : الذهب مالتج اني شعليه بيه مهرج هذا تنطي تبيعي انتي حره

عليه بكل نجاح وشرط من الدور الاول حاجه ذهب الج واعرف راح تحافظين عليهن لان ذني هدايه نجاحج

سقطت الموصل وانگلب العراق بيوم وليله

وبعدها صارت فتوه الجهاد الكفائي ومهدي دك رجل اله يروح واني تخبلت كمت اتوسل بيه ميوصل وماسمع كلامي وقرر يروح لحد ماامه وكعت ونقلوها مستشفى وصلت للموت من وراه لان معناه راح يروح ميرجع

وهذا الشى الي خلاه يكعد بس جان عصبي حيل وميتحمل كلمة وكل مايحجي من وراج وره امي بس الصدمني اكثر واحد مااتوقع يروح سمعت بيه رايح وهو مرتضى

اجاني تلفون من شرهب وكالت مرتضى اطوع وامه متخبله وابوه يكله اذا بيها راتب خلي يروح

ناي : من اشتعل هو وفلوسه هذا مخبل

شرهب : تنلام عمه من اخذت فلوسه وخلته يكمز الحقير

شرهب : خايفه على مرتضى خطيه

ناي : الله يحرسه الالاف الشباب راحت

شرهب : يرجع بلسلامه اكلج نايه

ناي : خير

شرهب : اني ممتأكده

ناي : شكوو

شرهب : اكو رقم يدك عليه ويسمعني اغاني كاظم ومرات هيثم وكل مااحظر الرقم يدخل من رقم جديد و متأكده نفس الشخص والصراحه شاكه بعبد

ناي : شمعنه

شرهب : لان ذاك اليوم رحت اني وخاله ام حسن للسوك نتسوك لمحته ورايه والله ما متوهمه ومرتين لمحته

ناي : اكول لمهدي عليه

شرهب : لا عيب اخاف يطلع مو هو واتفشل

ناي : ديري بالج عفيه منه

شرهب : شحده يوصل مني عباله طير زاجل ويحبسه بيده ميدري بيه صگر الي يطخني املخه

ناي : صايره مثله تحجين بلغه الطيور

شرهب : وانتي ضلي لازمتني على الكلمة روحي لمهودي وعيفيني امخمخ لهذا الطير شون اكصكص جناحه واخلي يتوب يوصل يمي

ناي : ادري بيها سباعيه ومينخاف عليها بس مو بيدي خفت واجيت حجيت لمهدي انطيته كلاص الجاي كاعد يتفرج اخبار وسيف يمه يلعب

حبيبي

مهدي : هاا عيني

ناي : اريد احجيلك شى

مهدي : كولي

ناي : سولفت اله شكوك شرهب

مهدي : منو يكول هو

ناي : انت اكثر واحد تعرفه وهو مثل اخوك وسركم واحد اذا عبد خلي يبتعد عن اختي عفيه والي مرضاه ليونس لا يرضاه لنفسه

مهدي : سالفه يونس مااريد اسمعها

ناي : مو قصدي اجرحك بس هذا حق اذا هو خلي يبتعد عيب مو صغير ويتحارش بيها ويراقبها

مهدي : احجي ويااه واشوف واختج خلي اشتريلها سيم كارت جديد وتغير رقمها

ناي : اخلي يونس يغيره

كمت من عنده عرفت ضاج لان بسمرته على سالفه حوراء

شرهب : تكررت هواي سالفه المخابره والاغاني وردت اطلب من يونس يغير رقمي المشكله كل الناس الي تطلب غراض بالاقساط تعرف هذا الرقم وبيه باب رزقي شون اغيره قررت من اعرف هو مباشره اسده

سجلت دوره مال دروس من فلوسي ومقبل يونس تالي هو شال درس واني درس لان غاليين اخذت انكليزي وكيمياء وبديت يوميه اروح الظهر للمعهد قريب من عدنا مشي اروح ادرس ذبيت حيلي كله بلدراسه واني وحدي وماكو هوسه والبيت نظيف يعني حتى شغل قليل

الدراسه صعبه واني مقاريه هاي المواد ابد واول مره وراسي طبل يصير ومرات كوه استوعب هااي ناي شون نجحت

اول ايام اروح واجي بدربي ولا اركز بلشارع مدري شون بيوم ركزت واشوف سياره عبد واكفه بعيد براس الركن اعرفها مااجه ولا تقرب مني ولا حتى خلاني اشوفه من سيارته هذا شيريد مني خلي يشوفني شكله لو يحجي اله اخزي بلشارع

المصيبه بقيت ايام هيج المح سيارته وهو ماكو

كل ماتمر ايامنا بهدوء اكول ربي ديمها

لحد مااجت العاصفه واجاني مهدي وكال امي قررت تجي تعيش جوه

صار اكثر من ٥ اشهر راسي بارد ومرتاحه بس الظاهر شافت ابنها تعلق بيه ومعافني مثل ما رادت وحيله المرض مانفعت قررت تجي وتعيشني نفس المرار القديم كل اعتقادها بعدني نايه الفاهيه الي من تنهان تسكت متدري عديت هاي المرحله من زمان

واجت وداد للبيت وجايه وياها مره تساعدها بلشغل قررت اسد بابي واكعد ومالي دخل بس هي مستحيل تعوف ناي بت ذكرى بحالها

بعد اشهر :

واكفه على الطباخ اسوي التمن مابقى شى ويجي مهدي ومخبوصه دك تلفوني شرهب انطيتها رفض رجعت دكت هاااا يمعوده خلي اكمل واخابرج

شرهب : لج الحكي مرتضى طكت عليه عبوه وبلمستشفى حالته خطره لج يونس يكول لو يصبح لو لا

يتبع ...

#الابواب_الخمس

البارت الرابع والثلاثون /الجزء الثاني

للكاتبة Reem

علمني الوكت أصبر على الروح

وأعيش بهل زمن وأتعلم بقهري

وأكبر عل جرح وأمسح دموع العين

وأجوي النار بيدي وأنجوي بجمري

مشيت ويا الحزن من زغري لليوم

وتحملتة رغم طعناتة ال بظهري....

وتكول الناس يضحك أبد ما مهموم

ما يدرون همي مخزن بصدرررررري...

الدنيا عكس وياي تمشي بلمكلوب.

مرة تسرق ضحكتي ومرة عمري

بعد اشهر :

واكفه على الطباخ اسوي التمن مابقى شى ويجي مهدي ومخبوصه دك تلفوني شرهب انطيتها رفض رجعت دكت هاااا يمعوده خلي اكمل واخابرج

شرهب : لج الحكي مرتضى طكت عليه عبوه وبلمستشفى حالته خطره لج يونس يكول لو يصبح لو لا

تحديداً شهر ١١ لسنه ٢٠١٤

ناي : رجوع وداد خلاني ارتبك ومااركز گلبي يلعب منها اصفن مرات واكول امه ومن حقها واتخيل نفسي بمكانها وسيف يم مرته اكيد الي حق عليه واحاول اطنش ومااركز بحركاتها لحد مااجاني مهدي وطلب مني انزل اسلم عليها ترددت بالاول بس بعدين مردت يزعل مني ويكول نحسه يجوز المره تريد تبدي صفحه جديده ويايه ليش اشيل ذنبها

بدلت ومكيجت ورتبت نفسي وبدلت لسيف ونزلت

مهدي ويايه مو تعوفني

مهدي : شبيج ياعيني قابل تاكلج مو عشتي وياها اربع سنوات اول مره تشوفيها

ناي : ميخالف ابقى ويايه لتطلع

مهدي : هذا هو كملي وخلي ننزل

ناي : دقايق واكمل باوعت على نفسي بلمرايه شگلي مرتب لبست ترجيه وكلاده صغيره وطلعت من الغرفه مهدي جان جايب صينيه حلويات راقيه حتى لا ادخل عليها وايدي فارغه

طلعنا ونزلنا ودخلنا للطابق الارضي لكيتها كاعده على القنفه وبيدها برتقاله تاكلها وتباوع على التلفزيون شافتني سوت نفسها ولا يمها

شونج خاله الْحٍمَدٍ للـّہ على سلامتج

وداد : الله يسلمج

ناي : حطيت الصينيه بصفها باوعت عليها ودارت وجهه

مهدي : شونج اليوم

وداد : شوني تعبانه

مهدي : بلعكس اليوم الوجهه متفح وكل الصحه بيج

وداد : طبعاً تحجي هيج غير حتى تنهزم لبيتك وتعوفني وحدي

مهدي : وين مهزوم مو كل الوكت يمج ياامي شلج بهذا الحجي

وداد : فخريه وينج

فخريه : اي حجيه

وداد :جيبيلي مي

ناي : باوعت مره اصغر من وداد مبين هاي الي جابها تشتغل الها البيت حلوو وغراضه جديده مثلي ونظيف بقيت اباوع على التلفزيون جان تكول

وداد : شوكت اداومين

ناي : اسبوع الجاي ان شاء الله

وداد : مااخلي سيف يمي اني مره مريضة وتعبانه اضل اركض وره ابنج شعندج بلدوام قابل محتاجه شهاده مو كعد تاكلين وتشربين هلعياره بعد شكوو اكعدي بيتج وحيري برجلج وابنج

ردت اجاوب جان يجاوب مهدي بمكاني

مهدي : اني اريدها تكمل احب زوجتي عدها شهاده واتباهه بيها

وداد : شتتباهه ابني غير الاصل غلاب نسيت هي بت منو لو تدرس طب وتصير دكتوره تبقى بت اهل العتيك وابوها صمد وبيبيتها عمشه بت فگر مايصيرلها جاره

ناي : كمت اكل بشفايفي من التوتر بله هاي شجاوبها جريت نفس هلمره اني قاطعت مهدي وكلت

ناي : والي الفخر بت اهل العتيك والي ينگر اصله نغل اذا اني معاجبتج براحتج هذا رأيج وحره بيه يكفيني بعيون مهدي احلى واحسن البنات وبقى سنين ينتظر حتى ارجع اله وام ابنه ومدللني وبزود اخويه ورجلي وتعبي اخذ شهادتي الي غيري محصل ربعها

مهدي : يله ناي اصعدي خلي امي ترتاح وهم اني عندي شغل

وداد : تسمع مرتك ومتردها شفت لسانها شطوله المفروض تركعها على حلكها

مهدي : لو متجاوزه عليج مو بس اركعها افرك حلكها فرك بس ناي متجاوزت مجرد ترد على كلامج هي اجت تتحمدلج بلسلامه واعتقد وفت وكفت يله ناي اخذي سيف واصعدي

ناي : كمت كلت بهدوء اي حبيبي صاعده محتاج شى مني

مهدي : سـلامتج انتي محتاجه مسواك شى

ناي : محتاجه طبتك الحلووه عليه كلشي مااريد

امه گبت نار واني اضحك بداخلي

اخذت سيف وطلعت بعدني بلباب اسمعها تعيط وتكوله شفتها الگلبه هاي تسويها ام بيت براسي لك يمه طلكها واسمع كلامي قبل ميضيع عمرك ويه وحده مو من مستواك

رد مهدي برد گلبي كال الها بجمله بسيطه

مهدي : اني مقتنع وجوزي من سالفه المستوى اني وياها واحد وكتلج ياامي ناي احبها ومرتاح وياها بس شيليها من راسج انتي مره مريضة

هزيت ايدي هاي مريضة عمي اني المريضة كل الحيل بيها وربي

عفتهم وطلعت ورديت صعدت لبيتي

حسيت روحي دخلت بحرب ويه عمتي مرات اكول هاي ضرتي مو عمتي غير تجوز مني

كل مايصعد يمي ودكت التلفون تعال تخربطت تعال ضايجه تعاال ابقى يمي تعال طلعني تعال محتاجه غراض خلت كعدتنا سم وهاي يوميه اكدر براحتي اشوفه وكت منريد انام يله تفك من عنده ولو بيدها تنام بنصنا واني ساكته مااريد اكسر بخاطره اكول هو حاير بيني وبينها مااريد ازيد حمله اخاف اهوس ونتعارك وتتشمت بيه وداد خلي اصبر امري لله

شرهب : غسلت الملابس وشريتها ولازمه بيدي دفتر احل مال كيميا ورايه محاظره ساعه ٣ حتى غدا ماسويت المن اسوي شو وحدي يونس مايتغدا بلبيت سويت لفه جبن وخيار واكلت ومندمجه طب يونس

هااا الله يساعدك متوقعت ترجع حتى غدا ممسويه غير تخابر

يونس : اكلت مجوعان اجيت علمودج

شرهب : خير اكو شى

يونس : سمعت من ولد صديقي انفتح التقديم وكلت اخلص من المعامله واقدملج ماطول كعد ادرسين

شرهب : اي عاشت ايدك كملت المعامله

يونس : ميحق الج هاي السنه تقدمين

شرهب : يايمه صخام بوجهج يشرهب ليش

يونس : لازم تنتظرين سنتين يله تقدمين وانتي سنه وحده انتظرتي لازم تعبر هاي السنه يله بعدها اقدملج

شرهب : انت مو سألت ذيج المره وكالو يحق الها

يونس : اي ولد اعرفه من كتله على عمرج كال يحق بس من اجيت اقدم المعامله بلتربيه كالو ميحق الها

شرهب : كعدت بلكاع والطم على رجلي راح تعبج يشرهب ياشماتت الناس بيج واني اروح واجي للمحاظرات وذابحه روحي ذبح وتالي بوري لا فدوة يونس سويلي جاره

يونس : قابل وزير التربيه اني هي هاي التعليمات وعليمن هذا اللطم ابقي ادرسي لحد موعد التقديم

شرهب : وانتظر سنه كامله المن بعد اقدم شبقى من العمر

يونس : اي صحيح مو عمرج ٩٠ سنه وراح يصير ٩١ هي سنه وحده وراها تمتحنين

شرهب : لازم اكو حل لك عيني وين انطي وجهي والمحاظرات عزه دافعين فلوسها ذوله ميرجعوها

يونس : شبيج بابا روحي كملي محاظراتج واقري وتعبي روحج انتي مو تشكين كوه تحفظين هااج المده صارت اطول وراح ادرسين اكثر

شرهب : اطم روحي ضاع تعبي رجلي السافت من الروحه والجيه وشايله المحاظرات على گلبي كله التعب طار

يونس : مخبله شصار لكل هذا سنه وتأجلت اروح اكمل شغلي ولدورين حجه اكعدي اقري ومحاظراتج كمليهن وعوفي سوالفج التعبانه

شرهب : طلع يونس خابرت ناي واكمز على راسها وين اروح

ناي : ياشماته شبيج منو يتشمت

شرهب : خلي بلگلب يااختي بلگلب لج ناي مراح امتحن

ناي : الي يسمعج يكول عدنا ميت هي سنه هسه اني مو رسبت سنه وشديت حيلي ونجحت بلسنه الي بعدها انتي هم اعتبري روحج رسبتي وراح تعيدين

شرهب : لو ميتين عمامج ونسوانهم ولا هذا الخبر وين اولي ضاع مستقبلي المن اقره بعد حتى للمعهد مااروح

ناي : انجبي شرهب وهاي كلاواتج گلبنا خلصان منها اكعدي اقري وبليه فلته والسنه الجايه انقدملج عود خلي نشوف الشطاره مالتج هو هسه كوه تحفظين

شرهب : غير مواد جديده عليه ومقاريتها ابد احد كلج اني نيوتن وكعد امتحن ولازم احفظ من اول مره

ناي : اذا تعرفين نفسج المن گالبه الامه من تصير الامتحانات اسحبي الاسئله وحليها واعتبري روحج مقدمه ورسبتي

شرهب : حلها ارخميدس

ناي : انتي فايخه واني عندي الف شغله روحي ولي خلي اكمل

شرهب : ياشغله غير تتگلبين بحضن مهدي امده حظي عبالي تگابليني وتبجين لان مكعد اكدر ابجي اقلها من اسمع صوت البجي مالتج بلكت مشاعري تتحرك وابجي وياج

ناي : ههههههه والله مو صاحيه ابجي على شنو سنه الجايه تمتحنين وتنجحين ان شاء الله وتصير سوالف

شرهب : خلصتي عمرج تبجين ومن يمي نشفت دموعج هو هذا حظي هي كوه

ناي : هههههه ولي باي

شرهب : سدته العوبه كون ينام يم امه ويعوفج على دكتج الناقصه بيه ياناي هو شردت تتفاعل ويايه وتبجي

متأكده عبدالرحمن راح يتشمت بيه اااااخ وين اطم روحي زين هو شعليه خلي يولي ولا افكر بيه بس هم ااااخ راح يتشمت بيه كون يموتن طيوره ويحير بيهن وينساني

ناي : كاعد مهدي يشتغل على اللابتوب كعدت بصفه حبيبي

مهدي : هااا حبيبي

ناي : شو وضعك معاجبني

مهدي : ليش

ناي : صار كم يوم عبد الرحمن ماكو ولا تجيب طاريه وحتى ميخابر ذيج الايام كلها يمنا مايفوت اليوم لو تلفون لو يجي ياخذك واطلعون وصلاح وياكم بله صلاح ديخابرك منتبهه بس عبد ابد صاير شى بينكم

مهدي : لا ماكو شى

ناي : تضم عليه سدت اللابتوب واندار عليه

مهدي : لتفكرين ماكو شى تحاجيت شويه وياه

ناي : تعاركتو

مهدي : لا سوالف عاديه

ناي : شنو السبب

مهدي : خلي اكمل شغلي وروحي اقري

ناي : اممم متريد تحجي براحتك

مهدي : اي عفيه جيبيلي مي وياج وكون بارد

ناي : كمت من يمه وبالي الف شغله ليش متحاجين معقوله لان كتله على سالفه شرهب لا ما معقوله السالفه صارلها هواي وعركتهم مصار الها ايام المن دوخه نفسي

رحت جبت مي اله وكتله حبيبي

مهدي : اليوم مااشتغل

ناي : هاااي شبيك بس اريد استأذن منك اريد اعزم بيبي وبيت عمو فلاح وشرهب ويونس على الغدا

مهدي : ياعيني قابل مانعج البيت بيتج وشتردين سوي واذا على المسواك اكتبي ورقه واسوك الج وطبخي الي تحبي بس عوفيني اكمل شغلي

ناي : بسته من خده تسلم حبيبي

رحت خابرتهم وعزمتهم يونس مقبل كال مااجي وتوسلت بيه وماقبل لهاي اللحظه بس السلام بينهم واحدهم ميباوع بوجهه الثاني

كاعده اطبخ ومكيفه بيتي وعازمه اهلي

شرهب : اني ياناس اجيت معزومه المن اكرب واشتغل

ناي : اشتغلي بله لغوه زايده

شرهب : هم ضايع سنه من مستقبلي العلمي وهم اخلصها اكرب واغسل مواعين واشتغل ربي شسويت وهيج اتجازه

ناي : روحي مااريد شغلج اكعدي بلهول هسه تجي عمه وبان ويساعدوني

شرهب : حتى تعيريني لا عيني اشتغل بكرامتي احسن مااترزل من بيبي وعمه

روحي افتحي الباب مبين اجوي

شرهب : روحي شرهب تعالي شرهب الفلبينيه مالتكم اني نزلت فتحت الباب وهستوني الزم شعري اريد اشيله جان يصير بوجهي عبدالرحمن

عبدالرحمن: حتى هنا كدامي

شرهب : شنوو هو اني جايتك لو انت جاي لبيت اختي

عبدالرحمن: اجيت على مهدي

شرهب : طالع ما موجود اكو شى ثاني

عبدالرحمن: كاعد تقرين

شرهب : بيده جكاره يدخن ويذب الدخان بلجهه الثانيه ويحجي جاوبته انت شعليك والله هاي حلووه مااقرا وهلسنه ماامتحن بكيفي

عبدالرحمن: اكو واحد يضيع سنه من دراسته عناد

شرهب : اييي اني وبكيفي

ناي : مديت راسي اشوف شرهب ليش تأخرت وينج

شرهب : اجيت

عبدالرحمن: صار يومين مترحين للمحاظرات ليش

شرهب : باوعت عليه وبثقه كتله شتريد مني عبد اعرف بيك تراقبني من اروح للمعهد والارقام الغريبه الي تتصل بيها وتشغل مره هيثم ومره كاظم هم انت من الاخير بليه ماتوجع گلبي شرايد مني

عبدالرحمن: داخله عقلي حييل ورايدج

شرهب : تشوف هاي الشمس اشرت على السما

عبدالرحمن: اي وانعميت من وراها

شرهب : الشمس تصير بيدك واني مااصير وكل متتقرب مني متحصل بس العمه والتيفوو

عبد الرحمن :بطلي تحجين ومعاجبج احد موزين مني اباوع عليج

شرهب : متوسلت بيك حتى تباوع واي معاجبني احد وانت بلذات متعجبني ولا خلف الله عليك لتباوع مو كل طير ينصاد ياابو الطيور

عبدالرحمن: ملاحظة دوم تكولين ابو الطيور

شرهب : لان من كثر معاشرت الطيور نسيت نفسك ونسيت شى اسمه بشر اذا اني اعجبك هاي مشكلتك مو مشكلتي المهم اني منو يعجبني وانت بلذات بعيد عن ذوقي تماماً ومره ثانيه اذا شفتك قريب المعهد لو تخابر ابلغ يونس واخليها تصير طشار

ابتسم سحب اخر نفس من الجكاره نفخه بوجهي كحيت وعافني وراح ردت ارزله بس سكتت لان ناي نزلت

ناي : نزلت شفت شرهب واكفه وعبد ابتسم ونفخ بوجهه الدخان وعافها وراح وينج شعندج بلباب

شرهب : اكرز حب غير فتحته طلع عبد جاي على مهدي

ناي : وهلكد اطولين سوالف ويااه

شرهب : ماطولت دنحجي وجان نسمع هورن نزلت افلت من ناي طبت عمه وبان وبيبي صعدناها كوه همزين التهيت ناي بيهم ونست سالفتي

عمشه : يايمه بلخير عليچ مهنايه

ناي : الله يهنيج بيبي

بديعه : يخبل بيتج مرتاحه يمه

ناي : الْحٍمَدٍ للـّہ مرتاحه

عمشه : يونس وينه مااجه

ناي : ميقبل يجي

عمشه : تكرضم هذا الوليد دومه مشلوع افاده البت تزوجت وعاشت ويونس اظلمت دنيته

بديعه : بعده ميتحاجه ويه مهدي

ناي : على كد السلام

بديعه : خليهم هيج يمه واحدهم مناسي شصار لتحاولين تقربين بينهم اذا رادو همه يتقربون

ناي : اني هم هيج داسوي

عمشه : عمتج المدهربه مكطوعه الجلوه شحالها

ناي : زينه مابيها شى

عمشه : لاتأمنين ليها هاي وحيده تنكط سم ماترتاح لون تهجم بيتج

ناي : اي اعرف واني مبتعده عنها

عمشه : يمه ناي سويلج فريخ ويه سيف وكضي مهدي

بديعه : ليش هي بلجهال ياعمه اكو نسوان تخلف ٥ و٦ جهال والرجال يخون الرجال اذا راد شى لو عنده درزن جهال ميوكفون بعينه خلي تحير بصحتها وبدراستها وتراعي وادلله احسن ماتخلف هوايه لا تلحك لروحها ولا اله وتاليها هم يطفر

عمشه : چا تضل على الوحيد

ناي : مااضل بيبي بس مو هسه اتخرج واسوي طفل ان شاء الله وانتي بانه شونه دوامج

بان : زين مااشي مخلصه وكت بيه

شرهب : بان فدوة هلكتني ناي مارحمتني من الكراب تعاي ساعديني

ناي : والله جذابه شويه اشتغلت وكالت تعبت

عمشه : تعاي ليه ام شعفه كلها كملات

شرهب : حضنت بيبي بربج هذا الشعر الحلوو اشتمي ريحته كلها كمل

عمشه : ضليتي وحيدج تسرحين وتمرحين ماتجين يمنا المن ضاله هناك

شرهب : ويونس يبقى وحده مترهم بيبي

عمشه : شوكت اشوفنج عروس وازفنج بيدي

شرهب : عوذه ياعروس هي مال زواج بهذا الزلك كولي يارب تنجحين واطبين گليه

عمشه : وتاليهه تكضين الشهاده وتركدين بلبيت حالج حال النعجات اكل ونوم

شرهب : نعجه عدها شهاده احسن من نعجه ماعدها

عمشه : چا شنهي تصعد تنزل كلها نعجه غير الميييع مانسمع منها

ناي :هههههههه كومي نعجه ساعديني

شرهب : شفتي بيبي من وراج مراح اخلص

عمشه : چا تحجيني وتلوميني

ناي : بقينا نضحك ونسولف اليوم كله تونسنا حييل مهدي مااجه كال حتى تاخذون راحتكم جنت حيل فرحانه بيهم وتوسلت يبقون يباتون مقبلو اجه يونس اخذهم لبيته هناك يباتون ومن الصبح ياخذهم لكربلا اجوي بدون عموو فلاح لان عنده شغل

كعدتي بنصهم ردت روحي والاحلى جانت بيتي

الملم بلمواعين واشيل الزايد لان البنات غسلو كلشي يله راحو اندكت الباب مال الهول استغربت فتحت الباب صارت بوجهي وداد هاي شصعدها مو تكول مابيه حييل

طبت وتباوع داير مداير البيت

وداد : خوش والله مأثث الج بيت شكبره تحلمين بحياتج بغرفه بيه اوف منك ياابني يجيب من الزبايل ويحطهم ببيوت

ناي : اوووف صبرني ياربي سكتت ومجاوبتها طبت تفتر بلبيت حتى الثلاجه فتحتها

وداد : تعزمين اهلج مو هو بيت الخلفوج

ناي : صحيح مو بيت الخلفوني هذا بيتي واعزم الي يعجبني

وداد : لا عبالج تتهنين بيه سوالف السحوره الجبتي رجل ابني بيها اله اگلبها عليج واخلي يشمرج بلشارع الي جابج منه اني ساكته لحد مااكوم على حيلي وافرغلج وعود تعاي عاتبيني اذا ماشمرتج شمرت الجلب انتي وسحورتج

ناي : ياسحر لخاطر الله عبالج اني مثلج من رشيتي لحماتج وهججتيها بليله ظلمه

وجهه انگلب وفتحت عيونها تدرين الصار بينه كله من وراج بيومها لو مقابله ترشين لامي جان هسه هيه عايشه ومطلكه من ابويه وحتى خالو فوزي جان عايش وهواي شغلات جان تغيرت اذا صالحه سوت السحر انتي اتعس منها ساعدتيها بيومها لو جايه ومبلغه عمتج او خالو او حتى امي دير بالكم تره صالحه هيج طلبت مني ديرو بالكم منها جان هم كسبتي اجر وهم نقذتي وحده كل همها تخلص من رجال مأذيها ومشافت يوم عدل وياه وتعيش هيه وجهالها بستر وراحه بال الي يسوي العمل حقير بس الي يساعده احقر منه

وداد : ماكو غيرج حقيره بت گلب تذبين تهمه بكد راسج عليه حتى اطلعين منها سالمه تردين تحشين براس ابني عليه حتى يعاديني ويصير الج ولو منو امج مو نفسها الجابت العار النا وحبت حماها تردين تقنعين ابني اني رجعت ذكرى عيني امج رجعت علمود تتونس ويه حماها براحتها ويخلالها الجو

ناي :تعرفين بأمي اشرف من الشرف ومايوم سوت شى حرام وهذا الي داقج دومج تغارين منها وعبالج تخلصين منها تالي سبحان الله راحت واخذت احب ناس بگلبج كلمن يشرب من الكاس الي يشرب الناس منه

واذا على الحش لا احش ولا احرك واذا على مهدي فهو اليه اصلاً والدليل صارسنين ينتظرني وشكد حاولتي حتى يتزوج ومابدلني انتي صاحبه مرض خافي من الله حتى اطيبين ولو داشوفج ماشاء الله حيل بت ال١٦ سنه ضاله بس يم مهدي اوي واوي وتعبانه ومريضة اني لحد هاي اللحظه مراعيه انتي ام رجلي وبيبية ابني ومرت خالي وكل حجايه تكوليها ابلعها ومامتقربه منج ولا حتى اشوفج وجهي جوزي مني وياريت بعد متصعدين يمي حتى لاانغث ولا تنغثين مني وامي ايااج تجيبين طاريها على لسانج مااريد طاريها واسمها يتوصخ

وداد : مو هو بيت صمد واطرديني منه وهاي الصلافه والعرامه اله اتوبج منها

ناي : استغفر الله تردين تجين تعيطين وترزليني واسكت بس لو افهم شنو اللذه من اهانتي ليش تحبين تأذيني شسويتلج بس فهميني

وداد : اكرهج ومااريدج مرت ابني ميشرفني وحده مثلج تنحسب علينا واكبر غلطه يوم ماقبلت بيج كله من عمران كال ازوجه وحده ثانيه واكدلي مهدي بأن يتزوج غيرج تالي اثنينهم قشمرو عليه واله اني اسكت وابقيج بيتي

ناي :اني هسه مو بيتج اني بيت رجلي وهو بنفسه اجه اخذني واذا متردين انحسب عليج هذا شى راجعلج اني محسوبه رضيتي وان مارضيتي لان صرت ام حفيدج

وداد : واذا امه قابل فد نمونه يطلكج مهدي وازوجه وحده من مستواه وتصير امه

ناي : يابويه شكد احلامج ورديه وطموحج عالي عفيه ماتعبتي والله اني تعبت من الحجي متاكده انتي مسويه عمليه

وداد : اذا مابجيتج دم ومثل مجابج بيده يشمرج شون من طلعج بكتله

ناي : انت ليش متردين ابنج يرتاح عود انتي تحبي والله ولا تحبي انتي تحبين نفسج وبس لان لو عندج ذره محبه لابنج مدمرين حياته

جان يطب مهدي وهااي عاطت وسوت نفسي تبجي فكيت حلكي من الصدمه

وداد : الله جابك حبيبي تعااال شوف امك شون تنهان وتنطرد

مهدي : خير شبيكم

وداد : سمعت هوسه يمها وماصعدت لان جنت تعبانه وتالي ارتاحيت شويه وكلت اصعد اشوف بيتك واشوف ابنك واستلمتني امك انطردت من بيتك ترضاها

مهدي : صدك هذا الحجي ناي

وداد : وفوكاها تسألها قابل اجذب

ناي : باوعت على مهدي وكتله تتوقع مني اطردها بدون سبب او اقلل منها

مهدي : احجيلي الصار شنو

وداد : لك ابني اكلك طردتني وكالت لتجين لبيتي بعد ومهدي اليه واله احرمج منه وانتي رجلج والگبر موتي وخلي اخلص منج ودفعتني من جتفي ترضاها

ناي : وروح امي الماشبعت عيني شوف منها كل هذا جذب ومصار وداعت سيف وغلاته

هي اجت تهجمت وسمعتني اشكال الغلط والمسبه حتى امي مخلصت منها

مهدي : تعاي يوم انزلج مبين تعبتي

وداد : اكله مرته طردتني وغلطت عليه وانت تكول انزلج

مهدي : هااي راسج ابوسه وشحدها اطردج هذا بيتج وشوكت متحبين تجين وانتي ناي صوتج مااسمعه وامي شوكت متحب تجي اعتذريلها

ناي : مستحيل مااعتذر

مهدي : اعتذري ناي وفضيني

ناي : كلت مااعتذر وشسوي سوي عفته وطبيت للغرفه وركعت الباب

اختفى صوتهم مبين طلعو بقيت اكل بروحي وره نص ساعه صعد وطب بدل وتمدد وسحبني من ايدي تعااي

ناي : وخر مني

مهدي : لدفعين ايدي مااحب هاي الحركات

ناي : وحركاتك قبل شويه تريد عادي اتحملها

مهدي : ليش معتذرتي منها

ناي : مااعتذر لان مغلطانه

مهدي : اعرف مغلطانه واعرف ميطلع منج شى موزين

ناي : لعد ليش تنطي بيه كدامها

مهدي : لان مريضة ولان امي مااريد اكسر بخاطرها

ناي : واني طبني مرض تكسر عادي

مهدي : انتي اطيب خاطرج بوسه بحضنه

ناي : لا مهدي لتنطي بيه كدامها لان راح تبدي تتمادى اذا صدكتني ياريت تسوي حساب اليه ولكرامتي مااقبل انهان واسكت بحجه امك كلشي اله حد حقك تراضي امك وبنفس الوقت من حقي تراضيني امك اذا حست بيك متنطي بيه ومتصدك بيها كل الوكت راح تبطل تضوجني او على الاقل تكوم تقلل او تتجنب المشاكل ياريت تكون عادل هي امك واني مرتك وكلمن اله حق عندك لدوس وحده على حساب الثانيه

شبيك احجي شوو صفنت بوجهي

مهدي : كبرتي نايه

ناي : هاااا كبرت

مهدي : اييي كبرتي وبديتي توكفين بوجهي وتحاسبيني

ناي : حقي

مهدي : عمي حقج واني الممنون اني من سويت هيج حتى لتكبر المشاكل وحتى اغلق الموضوع كله كرامتج من كرامتي والي يمسها يمسني

ناي : عفيه امك مراح تجوز ويوميه راح تسوي مشكله واني گلبي خلصان لخاطري حط حد لهاي المهزله هسه اني لا نازله ولا واصله يمها خلي اتوب مني

مهدي : عتبي بشغله عليج

ناي : شنوو

مهدي : تحلفين بروح امج وبسيف ليش اني مو غالي

ناي : بله من هاي المشكله كلها اجت بالك بس هااي

مهدي : اي حقي مو ادورين حقوق ويايه اني هم ادور

ناي : تمددت بحضنه ولزمت لحيته العب بيها واكوول انت اغلى الدنيا كلها

مهدي : مبين

ناي : وعيونك انت روحي مهدي ونظر عيني

مهدي : اجيت طاير اليوم كله مشفتج اشتاقيتلج تعاي ارضيج مو زعلانه

ناي : هااا لا مزعلانه طفرت وجرني

مهدي : اني رجال حقاني راضيت امي وبست راسها بقى لازم اراضيج بس رضاتج من نوع ثاني تعااااي

ناي : صوت ضحكتي يمكن واصل لوداد

بقيت على هذا المنوال احاول اتجنب وداد شكد مااكدر وكمت اقفل باب الشارع وره ميطلع مهدي حتى لا اطب وتسمعني حجي يغث

كاعده ارتب الملابس اندك الباب طب عبد وحضن مهدي ويضرب بجتفه كيفت مبين تصالحو قدمت جاي وكليچه الهم وطبيت ردت اخذ سيف هوس البيت وخليهم على راحتهم ردت اطب مره ثانيه واسمع مهدي يكول لعبد

مهدي : اني حذرتك اذا وصلت الها تخرب كلش بينا

عبدالرحمن: انت واحد ناقص شلك دخل بهاي السالفه

مهدي : شون شلي دخل غير اخت مرتي شبيك بابا شارب شى

عبدالرحمن: بس مو بت عمتك

مهدي : لا اله الا الله انت عقلك المجيم راح يضيعنا يعني احنا مانقبل على الغلط نجي نسوي نفسه لو عرف اخوها شراح يسوي وحقه بلي يسواه تتذكر شصار بشغله يونس يلغبي يلمطي هيج ارد اكول شنو فرقك عن يونس بدكتك هاي

عبدالرحمن: لك مهدي هاي البنيه تلعب بگلبي لعب اني اشوفها اكزكز عليها بدي الزمها اكطعها دك كتل وابرد گلبي منها مو لسان رشاش

مهدي : انت تتراجف عليها لان نوع جديد عليك ماكو وحده ما رادتك اكو بيهن هنه يركضن وراك اجت هاي ردتك وماانطتك مجال ولبستك لهذا جلبت بيها

عبدالرحمن: من يوم ماكتلت رجلها واطلكت واني خشت دماغي اريدها تطلع من راسي ماكو

مهدي : واتفاقنا

عبدالرحمن: والله مشيت بيه يومين ومشفت روحي غير رجلي ماخذتني الها

مهدي : معناها امشي اطلع بره ولتراويني وجهك لحد متبطل ركض وراها

عبدالرحمن: هااي شبيك غير انت اخويه واحجيلك كلشي

مهدي : العندي كلته تجوز منها نرجع خوه تبقى على هذا دربك الاعوج انت بطريق واني بطريق لتخرب خوتنا عبد وابتعد عنها عيب حتى عليه اذا عرف يونس لتخلي يصير صاحب حق علينا

عبدالرحمن: اجرب

مهدي : مو تجرب كول هذا هو مالي دخل بيها

عبدالرحمن: افتهمنا امشي نغير جو المن كاعدين هنا

مهدي : خابر صلاح شوفه وين حتى ناخذه ونروح

دخلت للغرفه امشي على كيفي ياربي كون عبد يجوز من شرهب ولو مبين مهدي شاد عليه يارب امانتك اختي مابينا حيل طلابه جديده

مرت الايام ودخلنا ٢٠١٥ وداومت مرحله ثالثه جانت صعبه واقرا وارجع ليوره وايد بلبيت والثانيه على سيف كل همي انجح

وداد تستغل كل حجه حتى تجر مهدي يمها يوم وديني يم فلانه ويوم يم علانه واني ماادخل اشتري راحه بالي

شرهب : رجعت للمعهد ادرس شسوي ميرجعون الفلوس اليه مال الدروس حرامات يرحن عبد الرحمن مابطل سالفه جيته بس قلل هوايه مره اسبوع مااجه مو بيدي احسب اله بهاي الفتره تعرفت على بنيه حبابه ويايه بلمحاظرات ودوم تساعدني تنطيني دفترها اذا مااجيت بينا سوالف وضحك قبل ماندخل المحاظرات اسمها نور كملت الدرس وردت اطلع وكفتني نور

نور : شوشه هاي ماما

شرهب : هلو خاله

ام نور : هلو حبيبتي شونج بلدراسه

شرهب : الْحٍمَدٍ للـّہ بقت تاخذ وتنطي ويايه بلحجي واني تأخرت تالي جان تكول

ام نور : هواي سمعت عنج من نور وكلت لازم اجي اشوفج وماشاء الله مثل مكالت اطبين للگلب ركض

شرهب : تسلمين خاله

ام نور : اني عندي ولد مامتزوج ويدور على مره ومن كلام نور حبيتج ومن شفتج حيل ارتاحيت الج اذا اهلج ينطوج انطيني عنوانهم واخذي عنوانه وناس تسأل على ناس وبلكت تصير القسمه

شرهب : لا خاله ماافكر بلزواج بقت تلح ميصير وهاي سنة الحياه وتمدح بأبنها سوته ملاك فالت ركض من الجنه موعت اذني تالي كتلها خاله اني مطلقه

هاي المره كامت تبلعم واللسان الحلوو اختفى

ام نور : اذا انتي مطلكه ليش متكولين

شرهب : وليش اكول قابل المطلقه لازم تحط لافته على كصتها تره اني مطلكه لحد يوصل يمي

ام نور : على الاقل كولي لنور حتى لا اجي اني ماازوج ابني لوحده مطلكه شناقصه عيني الف بنيه تنجبر بيه انسي الحجيته كله

شرهب : ناسيته اصلاً وابنج الملاك دوريله بنيه من الالف الكلتي عليهم اخاف ابن امه يستحي يدور لنفسه عفتهم ومشيت حيل انغثيت منها جان تكدر تحجي بأسلوب احلى مشيت واني عاصره كتبي واريد الزم واحد ادكه بلشارع

صافنه ومغثوثه وجان يندك هورن قوي فزيت وكلت بصوت عالي وجع

شلت راسي شفته عبد نزل من السياره

عبدالرحمن: هااي عليمن وجع

شرهب : شوف عبد الشياطين كبال عيني كعد يكمزن اذا ماوخرت مني هسه اعيط واگلب الشارع عليك واطلع حركت ام نور بيك

عبدالرحمن: شكد احب اسمي من تحجي بعصبيه شبيه الحلوو ضايج ومنو ام نور هسه اروح احركلج بيتهم

شرهب :استقر عيني فاندام لاتحرك ولا تسوي بله وخر من دربي واكفين بنص الشارع شتكول علينه الناس

عبدالرحمن: حبيبتي وجاي عليها

شرهب : حبتك دوده تزحف متندل دربها شوو وخر عفته ومشيت زهكانه هلمره الجو بارد وخشمي طماطه صاير ومنشوله

دخلت للبيت لمحته براس شارعنا طبيت وركعت الباب

عفت نور وقاطعتها مااريد دوخه راس

بليل كاعدين واجه تلفون ليونس خلاه يتراكض

خير شبيك

يونس : واحد خابر كال مرتضى طكت عليه عبوه وحالته خطره جابوه لبغداد

شرهب : وانت وين رايح

يونس : غير للمستشفى

شرهب : انت تعرف هذا الولد منو اخاف جذب

يونس : اي اعرفه قبل مده خابرني مرتضى وكال عفت رقمك يم ولد صديقي اخاف يصير عليه شى يبلغك وهو هم ذاك مخلي رقم اهله يم مرتضى يعرفون بروحهم مواته لهذا واحد مخلي رقم عند الثاني

شرهب : الله يشافي

يونس : لتبلغين احد ابد منا لحد مااشوفه وافهم

شرهب : مااشي

يونس : قفلي الباب ورايه

شرهب : راح يونس والليل كله ادعيله وكل مااخابر يكول لهسه مااعرف وضعه لحد مصار الظهر وخابرني وكال لو يصبح لباجر لو ميصبح اصابته قويه

متحملت الخبر خابرت ناي وبلغتها

ناي : لا عفيه ذبيت الجفجير من ايدي وكمت ابجي بس لا يموت

شرهب : لتكولين هيج الله يحفظه ادعيله شون اخابر بيبي وعمه

ناي : تخابرين شتكولين غير تتخربط بيبي خلي نشوف الوضع يله

شرهب : كون ميموت والله مايستاهل حباب وطيب ودوم وكفاته حلووه اختنكت صدري كام يوجعني من القهره

ناي : ادعيله تعدي سلامات

شرهب : يارب

يونس : وضع مرتضى صعب كلش ماشفت منه شى مشدشد وكالو حروق قويه الولد كالو بيت مفخخ وناس كالو عبوه ماتنعرف الي صار اجه جوحي وساهره وصالحه وعبيد صار شكد مشايفهم ولا اريد اشوفهم كعدت على صفحه حتى سلام ماسلمت ساهره ادك وتلطم وصالحه تهون عليها وجوحي بلكاع يبجي مثل النسوان هسه صار عزيز مو دزيته بيدك

صافن حرامات مرتضى ابنهم

٧ ايام لا ليل نعرفه ولا نهار مرات اروح للبيت اكل واسبح وابدل وارد ارجع حتى المحل عفته وطول هاي الايام اشوفهم وادير وجهي منهم وحتى همه ماتقربو عليه شرهب عفتها يم ام حسن تبات يمها أمن الها لان مبين سالفه مرتضى مطوله

لحد ماصحى مرتضى معجزه بأن يعيش لان حالته كلش خطره ردت بس اشوفه حتى يحس بوجودي يمه مرتضى وكفاته حلوة ويايه ويه خواتي مكدر يغير هواي امور بس على الاقل مادار ظهره الهن والي يكدر عليه يسوي

عبيد : روح لبيتكم كعد المن بعد باقي

يونس : رفعت راسي عليه ٧ ايام ماتقرب مني وهسه تذكر وجودي كتله مجاي عليك ولا بيتك اني اجيت على مرتضى وبس هو يكولي روح

عبيد : عود تسوي روحك خير ورجال

يونس : رجال غصب عن اكبر شارب ولتندك بيه احنا بمستشفى ومااريد اعلي صوتي ارجع لمكانك ومالك دخل

عبيد : واذا اندكيت

يونس : كمت من يمه وكفت بره مااريد الزمه واركعه بلحايط حيل متحمل منه

ثاني يوم طلعو مرتضى من الانعاش ماقبل جوحي غرفه خاصه كال كلهن نفس الشى ونفس العلاج والدكاتره هزيت ايدي الخايس ابنك الوحيد جان مات متريد تصرف جم فلس على علاجه مكدرت ادخل كالو ينام ويكعد رجعت للبيت وثاني يوم اجيت

بقيت واكف فوك ال٤ ساعات لحد ما راح عبيد واخذ صالحه ويااه طبيت اله

كعدت يم راسه جاان يون هااا بطل كوه يحجي

مرتضى : يابطل صرت خرخاشه

يونس : تكبر وتنسى كول ياالله وشد حيلك

مرتضى : جسمي كله يوجعني يونس ويحرگني

حتى وجهي

يونس : اصابتك قويه الْحٍمَدٍ للـّہ من صحيت

مرتضى : من شوكت اني هنا

يونس : ويه اليوم ١٠ ايام

مرتضى : طارت رجل ايد لان بكلشي مااحس

يونس : سليم كامل الاعضاء

مرتضى : لعد ليش جسمي كله يحرگني

يونس : مو جنت تلعب اتاري واتصوبت غير انفجار هاي شبيك صدك هي عبوه لو بيت مفخخ

مرتضى : مشكل يالوز ولد الگلب استلمونا كمين وشعلو ابهاتنا بس احنا ماقصرنا وكعنا الهم دك

يونس : طيب واكعد واسكت ماكو روحه

مرتضى : اااااااااخ لك نار تاكل بيه

يونس : تهون ياخويه سلامتك خابرت بيبي وعمه وخليتهم يحجون وياه مدري منو كايل الهم واسمع بيبي تبجي عليه وتدعي على امه عبالك هي صوبته وهو ميكدر يضحك

خليته يرتاح واني هم ارتاح لان هاي الايام بس الله يعلم شون عدت عليه

شرهب : جنت ناذره لمرتضى اوزع خبز العباس وانطي فقره صدقه من فلوسي بس يصير زين وفيت نذري حيل فرحنا لان صحه

اجت ناي مكيفه وبقت يمنا

اكلج نايه خلي نروح نشوفه من يطلع من البيت

ناي : لبيت ساهره تخبلتي

شرهب : شكوو بيها خطيه متأكده راح يفرح بجيتنا

ناي : مااريد لا اشوف ساهره ولا صالحه

شرهب : ولا اني بس مرتضى شنو ذنبه نروح نشوفه نص ساعه ونطلع

ناي : خلي يجي يونس والله كريم

بقى مرتضى ٢٠ بلمستشفى جانت عنده حروق متفاوته مكانات من الدرجه الاولى ومكانات من الدرجه الثالثه متأذي حييل

ايده اليمنى محروكه حييل والعصب مضروب بيها ويرادلها عمليه

طلعو من المستشفى وبقيت لحد مادخلته للبيت ساهره متحجي ساكته ولا جوحي

لان لازم واحد وياه

مرتضى : ابقى بات يمي

يونس : هاي الفتره كلها عفت الشغل والبيت لازم ارجع

مرتضى : لك شون ادخل حمام والله استحي من ابويه وامي اقلها انت تساعدني

يونس : شون ابات بيت جوحي اخاف اتعارك وياه متشوفه شون يباوعلي يريد يثرد بدمي

مرتضى : مالك دخل اني احجي ويااه

يونس : لخاطرك ابقى لباجر

مرتضى : وكل ميصير مجال عندك بروح امك تعال اديح بلياك

يونس : سهله

يونس : شهر ونص مر والحمدلله مرتضى بدا يتحسن حاله اكو اماكن بعدها موزينه ويراد تداوي مستمر وعلاج عدا سالفه العمليه

اول فتره جوحي يجيب المضمد ويداوي مرتضى ومغذيات ودهونات وابر حتى ليلتهب مكان الحرك وساكت بعدها مل لان المصاريف زادت واسمعه يكول لساهره فلوسي خلصت طلعي من فلوسج مو بعتي ورثج اصرفي على ابنج لو هو بس ابني

شفت بعيون مرتضى الكسره وقلة الحيله وامه وابوه واحد يشمر علاجه على الثاني ولا جن ذوله نفسهم الي بلمستشفى كطعو نفسهم لان متصوب

اروح واجي عليه يوميه كلاص مي مااشرب بيتهم حتى لينحسب عليه ردت ابقى لاخر لحظه وياه ومااعوفه هلمره هو صارت روحه بيه حتى من اتأخر يخابر تعال

رجعت للبيت استقبلتني بلباب شرهب

يونس : خييير

شرهب : ودينا باجر لمرتضى نشوفه

يونس : ادخلج بيت ساهره من كل عقلج

شرهب : نص ساعه حباب اني وناي

يونس : خووش عصابه اكعدن واسكتن خابرو وتحمدو بلسلامه

شرهب : متفيد المخابره يله يونس لتصير نحس

يونس : نص ساعه

شرهب : اي نص وخمس دقايق

يونس : خابري ناي ناخذ تكسي ونروح الها ومناك نطلع لبيت جوحي

شرهب : هووا

واكفين اندك الباب اني وناي ويونس نايه عافت سيف يم ابوه خافت تاخذه اندك بلباب جان تفتحه النا سما يااا من خفت لهلوجهه

اخاف غلطنه بلبيت هاي شجابها

ناي : غير بيت خالتها

يونس : اششش

سما : هلاووووو شونكم

شرهب : يمه اسم الله ليش تتموعين عيني

سما : متكدرين اله تحجين

شرهب : اوكفي عدل واحجي بله متعوجين حلكج الازرك المفطر واني اسكت وارد على سلامج

يونس : اجينه على مرتضى

سما : تعالو ادخلو

شرهب : راح اضربها جلاق ادزها لاقرب فيترجي يعدل لسانها

ناي : يمعوده اسكتي هسه يونس يرجعنا

طبينا على مرتضى

شرهب : لك هله بحامي العرض رفعت راسنا عندي ابن عم متصوب

مرتضى : لو جايبيني شهيد شتسوين

شرهب : جان سويتلك صوره حلووه براس الشارع ولتخاف على حسابي لان ابوك كحف ميسوي

مرتضى : لتضحكيني لج ضلوعي كلها توجعني

ناي : الْحٍمَدٍ للـّہ على سلامتك

مرتضى : الله يسلمج والله فرحت بجيتكم توقعت ناقصات متجن

شرهب : ولو هذا البيت يبزز بس لعيون البطل نجي ونهلهل لسلامتك على عناد ناس فاحت ريحتهم

ناي : كرصتها غير تسكت

صالحه : هااااي منو هناااا

شرهب : علتج بلحياه جهال ذكرى

صالحه : بس انتي مو بتها

شرهب : ياااا هاي المعلومه ماادري بيها اول مره اسمعها تره عتكت هوايه شوفينا شى جديد حماسي

ساهره : جايين تشوفون مرتضى لو تتعاركون

يونس : البنات اجوي على مرتضى يطمنون عليه شرهب كافي

شرهب : سكتنا

صالحه : والله گلبج جبير لفيتيهم بيتج

شرهب : احد كلج جاي ناكل وانام يمها حتى تلفينا الْحٍمَدٍ للـّہ عدنا بيت يلفينا مكاعدين عند عيال وعلى ساعه ننطرد من البيت

صالحه : هذا بيت اختي واذا اريد هسه اطردكم منه وهو بيت ايجار كاعدين بيه قابل ملكم لتنفخين روحج بعدكم بلشوارع تره

شرهب : عاذرتج عمه من حركت گلبج خطيه والله انتي بيتين راحن منج مره من وره الغندوره ام حلك المايع سماوي ومره من وره عبيد وضرتج زين واكفه على رجلج

يونس : وتااالي كومن خلي نروح

ناي : اي نكوم احسن

شرهب : هااي شبيكم بعدنا مشفنه مرتضى

مرتضى : روحي ولج لتصير بلقنادر

ساهره : اطلعو من البيت ماطول شرهب ماتحترم صالحه

صالحه : بعد لو اني لوهنه هنا

ساهره : ولا تضوجين روحج راح يولون

يونس : يله بنات

ساهره : وانت هم بعد لتجي مرتضى صار احسن لا كل شويه جاي وداك بابنه عمك ميقبل

مرتضى : يمه شبيج غير اني اتوسل بيه حتى يجي هاي فوك متشكري لخاطري لان ساعدني وكف ويايه

صالحه : عيني هذا جااي لواكه يريد يعرف اخبارنا وسوالفنا حتى ينقلها لعمته البربوك ذيج الصايعه بلخارج الما الها رداد خلي تجي اله اشكها وصلتين

شرهب : كون تسمعج لا تسويج تشريب وعود خلي نشوف منو تصير وصلتين

مرتضى : اخذ البنات يونس ومشكورات على الزياره

يونس : امشن

ناي : طلعنا من بيتهم نتمشى لراس الشارع وكل الي كعدنا ١٠ دقايق خلصتها شرهب مالخ وياهن

يونس : هااي عود وصيتج

شرهب : ذني بلذات من اشوفهن لساني يحكني لازم اتعارك وياهن

ناي : هههههههه

يونس : شبيج انتي الثانيه

ناي : منظر شرهب ومنظرهن مثل عركه مال ديوجه هراتي

يونس : هااي مكان مترزليها

ناي : سحبت راس شرهب وبستها عااشت ايدج

يونس : بعد بلشارع اثكلن

ناي : ماكو احد بس جهال

شرهب : بلخدمه يااختي تردين ارجع اكتلهن

ناي : لا لا يمعوده هيج زين

يونس :ههههههه اااخ منجن مو بنات بلوه

شرهب : نخبل وربي

رجعنا للبيت وناي لبيتها

بعدها بكم يوم دك تلفون يونس اسمعه يحجي ويه مرتضى

هاا عيني بيك شى

مرتضى :مستحي منك بس رايد خدمه واتمنى متردني

يونس : أمرني

مرتضى : اريد اجي يمك بلبيت مااريد ابقى هنا

يونس : صار شى

مرتضى : تكدر لو متكدر منا لحد مااكدر اطيب واوكف زين على رجلي وارجع التحق

يونس : جاايك

شرهب : حضرت فراش لمرتضى حسب تعليمات يونس وفرشته يمه بلغرفه وره ساعه اجه ودخل ولد من المنطقه لان شالوه مكدر يونس وحده ودخلوه بلغرفه بس طلع الولد اني هم طلعت من الغرفه ورحت على مرتضى جان مهموم وحيل القهر مبين على وجهه

يونس : احجيلي شصار

مرتضى : تصور ميريد يسويلي العمليه ويكول هي اطيب بينما الدكتور كال اذا ماسويتها تسكط ايدك عز الفلوس على ابنه الوحيد شايف هيج اب

شرهب : اي ابوك

يونس : اطلعي بره

مرتضى : عوفها قابل جذب ابويه والله كرهته وكرهت حتى امي الي حتى محاولت تقنعه على سالفه العمليه ولهاي اللحظه من يسألها فلوس الورث وين وديتها متحجي وتكول راحن

شرهب : حتى امك عزت الفلوس عليك

مرتضى : خلي اكدر اكوم واتحرك خلي ايدي تسكط طبها مرض وارجع التحق بلكي هلمره اموت

شرهب : اسم الله عليك

يونس : ليش يهون عليه اعوفك تسكط من كل عقلك شكد العمليه

مرتضى : غاليه يونس بال٥ ملايين

يونس : تدبر عندي جم فلس

شرهب : واني هم عندي لتباوع هيج تره اني بسنس ومن سيده اعمال وعندي فلوس نسويلك العمليه من تكوم بلسلامه مااريد منك بس تغم ابوك وامك بأيدك الطابت

يونس : لججججج شرهب

شرهب : اكوم اسوي عشاا

مرتضى : رحمه الله والديكم ميحتاج

شرهب : بقى مرتضى يقاوم وبالاخير مكدر وكام يبجي اني كمت من يمي لان حسيته حيل خجل مني شكد جنت اكرهه جوحي هلمره اكرهه اكثر

يونس :دك تلفون مرتضى مقبل يجاوب جاوبت اني

الوووو

جوحي : منووو انت وين مرتضى

يونس : اني الي بيوم بخلت عليه بعلاج وسكطتني وخليتني العمر كله اعرج

جوحي :انطيني اعرف مرتضى يمك خلي يرجع بليه سوالف مال جهال

يونس : مرتضى ميرجع وان شاء الله يطيب ومااخلي الصار بيه يصير بيهه لو اعرف ابيع هدومي انت حرامات اب ولو انتم ولد عمشه كلكم سكط ولا واحد بيكم بيه خير

بعد لتخابر مالك ابن يمنا وخلي فلوسك تفيدك خلي من تموت هي تشيل تابوتك وسديت التلفون بوجهه

ناي : كاعدين على نار بلبيت وننتظر مكالمه من يونس اليوم عمليه مرتضى علاجات وركض وحجوزات لحد ماوصلنا لهذا اليوم

متحملت وخابرت واجاني صوت يونس

يونس : الْحٍمَدٍ للـّہ نجحت عمليته

ناي : ياالله واخيرا

لج شوشه نجحت عمليته

شرهب : الْحٍمَدٍ للـّہ والشكر

عيون يونس فاضحته عبالك هو الي مسوي العمليه فرحان وطاير لان كدر يساعد مرتضى وميعوفه بهاي الازمه

اسوي بلشوربه واوكل بمرتضى صار ايام من طلع من المستشفى يمعود اكل مو موتتني

مرتضى : شبعت والله مو حتى كرشي صعد من وره الشوربه مالتج غيريها قالوني انتهى من وراها العمليه بأيدي ياناس مو بطني

شرهب : مااعرف غير نوعيه لازم تاكل وبليه لغوه باجر اسويلك سوب لحم

مرتضى : اكوو صوت بره يمكن يونس اجه

شرهب : خلي اشوفه واجيك طلعت واني بكفشتي ودشداشتي الوصخه الممسوحه ويصير عبد كبالي كاعد ويونس يمه اني جفلت رجعت انسحاااب هذا شعنده جاااي

عبدالرحمن: ادري بيك مستغرب من جيتي وصار يومين اركض وراك علمود نتشاوف

يونس : اي والله مستغرب صاير شى كتلك تعال للمحل نحجي مقبلت اله بلبيت

عبدالرحمن: اني اجيت اخطب اختك شرهب

يونس : شرهب

عبدالرحمن: اي شرهب

يونس : واهلك وين وابوك

عبدالرحمن: اجيتك بطرك روحي وشاري اختك لدرجه اتخيرت بيني وبينهم واختاريتها

يتبع ......