تحميل رواية «الامارة» PDF

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

حربٌ تُقام عليها وهي لا يُهمها حتى القائد! 👑

━━━━━━ ♛ ━━━━━━

"حـبيبة"

كلشي هنا حلوو ووناسة كلشي جاي يمشي نفس ما خططت وچان كلشي تم على خير لولا فراقد تفتح جنطتها وتصيح بصوت فزز الدنيا وزوعنا العافية وگلب السيارة گلاااب...

-يمممااااااا دخييييييلك يا عليييييي

طلعت من جنطتها شي طوويل ورفيع لونه اسود ما لحگنه نشوف شنو وشمرته ليوره وبعد مينسمع غير الصياح والسيارة انخبصت خبصص..

-ليلة: حييييية بحضنيييي حييييييية

-رفل: يماااااا وخري عنييي لحگونااا

گمت اطفر بمكاني وتَـمني وعبق يلطمن يردن يطلعن من السيارة، وگف ابا الحسن علي وشال الحية من راسها ساد حلگها وصاح..

-ابا الحسن علي: افتح الشباچ اميير اشمرها مناا

-الامـير علي: ولك ما جاي ينفتحح

-شيخ علي: حجي شني الشبابيج ما تنفتح؟؟

-السايق: شنييي ما اسمع؟؟؟

-شيخ علي: الشباااچ الشبااااچ

-السايق: ها لا خوية ما ينفتحن مجيمات

-الامـير علي: اطببگ على جهة حجييي

بنفس اللحظة فلتت نفسها الحية من ايدين ابا الحسن ووگعت بالكاع وصارت تتزابگ بيناتنا يا يمممة شصار بينا صارو واحد فوك الثاني والزلم يتصايحون والبنات كل وحدة لزمت واحد تچلب بي..

عبق طفرت على فراقد وليلة طفرت على رفل ورفل هي واختها ثنينهن طفرن على امي وتَـمني طفرت على ابا الحسن علي عبالها الامير..

-ابا الحسن: خايبة يبوووو مو الامير اناا

-علي الحق: تطشر عرضك اميير

-الامـير علي: شني شكوو شصايرر

ما منتبه ديدور على الحية اللتفت شاف تَـمني ترجف ولازكة بأبا الحسن مكمشة بسترته وگف على حيله ولطم وجهه وراح يجرها منه..

-تَـمني: انقذنيي انقذنييي

-الامـير علي: شني حررب وانقذج

-شمس: بدوري اخاف فدوة نزلني

-علي البدر: ولكممم نزلو السيارة مريتي تخاااف

-تَـمني: امداااني امداااني

-ليلة: امدانا جميعااً

-شيخ علي: هااي اجت يمي الصايعة

نزل ابوي يريد يشيلها من الكاع بس ما لحگ عليها وزحفت بين الكراسي وهالمرة زلم نسوان گمنا نصيح والحية تلعب جوه رجلينا..

-علي الكرار: خايبينننن راح نموووووت راح تلدغنااا ونمووووت

-علي السور: ولج يمااااا انكطعت خلفتي يمااااا

-حيدر: بوية ما تكضها انتَ مو ضابططط

-علي الدر: ابن الچلبب واذا ضابطط ليش جاي نلگاهة احنه

-تَـمني: اميرر مو انتَ الشييخ متلزمهااا

-الامـير علي: خ** على الشيييخ

-شيخ علي: ولك امييير

-الامـير علي: لا بوية محشوم مو عليك... كضيتتتج

نزل بسرعة وشالها من راسها، سفط السايق السيارة على جهة من الطريق ونزل الامـير علي يذبها بگاع زراعية، اخيراً جرينا نفس وكلمن گعد بمكانه يستراح ورجع امير يصعد السيارة..

-تَـمني: شلون شمرتها هناك بله اذت احد؟

-الامـير علي: هاي الگيعان متروسة حياية

-علي السور: مثل گيعان فراقد ادري شنيي جايبة حية صوغة وياچ تختبرين رجولتنا وتخزينا كدام البنيات؟؟

-فراقد: دخيلك يا علي روحي راحت انطيني ماي ولك ولا تظل ترطن

-علي النور: هاج شربي شربي واحنه انمسحت بشواربنا گاع السيارة

-علي الكرار: غير يستچن الاملس

-علي النور: يابة ذليتوناا ماحب الشوارب هي گووة

-ليلة: يمة بعدها الرجفة بعظامي

-ابا الحسن علي: سلامتج انزل اشتريلج عصير منا؟

هزت راسها بـ لا وبقت منطيته گفاها، غم الامـير ابا الحسن وقريت شفايفه يگله..

-ما تتوب انتَ

وابا الحسن يحط ايده على گلبه ويهمس..

-احبهاا احبهاا

-الامـير علي: ظل ظل ماكل بواري منها

واكيد يحجون كله بالهمسة بس اعرف اقرا شفايف ومتعودة على هالوضع..

-رفل: شوكت نوصل؟

-حبيبة: بعد بعد

-علي الحق: علگولنه شي نسمعه

انطه الامير موبايله لابوي حتى يشده بالسيارة وفتحلنا مولود "عنك اذا سألوني" فوراً تَـمني اللتفتت عليه مبتسمة بسعادة وهو بادلها بنفس الابتسامة..

**

"تَـمني"

رغم مأساة الحية بس طريق هالسفرة يجننن كلش تونست بي، كلما اللتفت اباوع للامير اشوفه يركز بشفايفي ويدور وجهه ويمكن بسبب الحمرة الحمرا الحاطتها؟ مادري..

انسجمنا كلنا ويه المولود وللغرابة الشديدة الكل حافظه على غيبه وصار حماس ومسابقة منو صوته اعلى ويقراهة بشكل احلى وما شاء الله على الاصوات شگد جميييلة! ركزت ويه صوت صوت وواحد صوته احلى من الثاني وكأن شيخ علي جايب اللات موسيقية مو ولد..

زاد الحماس من شيخ علي انضم يقراها وياهم ويهوس بشماغه، والكل تخبل وصارو يقروهة بطريقة كلها مكر ويباوعون لـ علي البدر وشمس من اجه المقطع..

"بدر وشمس واتلاگن ... و صار الوجه مضيافك

من وجهك او أنواره .... اتغار الشمس وتخافك

هالعالم ابكل حسنه .... إلهامه من ألطافك

للحسن تفصيلاته .... والمختصر بشفافك

حتى إلي ما يتغزل.... يتغزل ابأوصافك"

حتى ابوهم وامهم يقرولهم وشمس وجهها صاير احممر دم خجلانة وبس تضحك وعلي البدر يقرالها وياهم ويزيد من خجلها..

اخيراً وصلنا للمزرعة تعبنا بالطريق بس تستاااهل شگدما اكول المزرعة حلوة وعامرة اكون مقصرة، كلهاا نخل واشجار وورود وحتى بيها نهر.. نزلنا البنات كلنا نركض على جهة النهر والولد راحوا يرتبون الاغراض بالبيت يردون يشوون سمچ وتكة لحم وتكة دجاج..

-شمس: عبق شوفي ذيج البطة تشبهجج

-عبق: حرام عليج شمسسس

-رفل: ههههه شني ما تعجبج البطة ولج؟ عاينيها شحلاتها شلون بيضة ومتفتفة

گعدت على الدچة اباوعلهن ومبتسمة، حبيبة وليلة يركضن وره عبق يردنها تمد رجليها وياهن بالنهر وعبق تخاف، تحمست اباوع راح يگدرنلها لو لا ووالله گدرولها سحلنها سحل وگعدنها بالكاع ومدن رجليها وهي تصيح..

-لااااا دا احس بالسمچات تلعب برجلي لااااا

-حبيبة: هههههههه كضيها ليلة كضي هالچذابة

-ليلة: عمت عيننج والسمچات عافن كل الطحالب بالنهر وما عجبنها الا رجلين عبق

-حبيبة: سمچات زاحفات ذني يحبن اللحم الابيض

ضحكت وياهن ودرت وجهي لـ رفل وشمس هم ملتهيات بجهة ثانية، غمضت عيوني ورفعت راسي استمتع بهالجو الحلو صح دنيا ليل بس اضوبة هوايه هنا موجودة شيخ علي حاسب حساب كلشي..

حسيت بوحدة اجت تگعد بصفي، فتحت تك عين وشفتها ابرار، فتحت عيوني ثنينهن وانتبهتلها الوحيدة المدا تتمشى ولا تلعب بالمي ولا تستمتع عايشة بقوقعة تعاسة وحدها ولاحظت هالشي من اول مرة اجيت ببيتهم..

صح مسمومة ابرار بس تقهرني كلش احسها وحيدة وماعدها احد وخلافها ويه علي الدر وابتعاده عنها جداً مأثر بيها اوقات انزل اشوفها تبجي وحدها بالمطبخ من دتنظف او تمسح..

-تَـمني: ليش متكومين ويه البنات ابرار؟

-لا ماريد

-ليش باعي الاجواء شكد حلوة صدگيني راح تتحسن نفسيتج بس حاولي تستمتعين

-ان شاء الله

بلعت ريگها وحسيتها بلعت غصتها هم، وجهها صاير احمر شوية مال وحدة تريد تبجي وگوة حابستها ماتحملت اشوف حالها هيج مهما يكون تبقى انثى وعدها مشاعر رقيقة، تجرأت وحطيت ايدي فوگ ايدها الحاطتها بحضنها وگلت بأبتسامة..

-ابرار انتِ بخير؟

-احم.. اي

-اذا تحتاجين تفضفضين ويه أي احد ما اگولج اني موجودة لان اعرف متثقين بيه بس استغلي كعدتج هنا واحجي بالفضاء راح ترتاحين

-شني مسودنة واسولف ويه روحي

-لا ليش هذا مو خبال بالعكس راح ترتاحين وينشال حمل من صدرج

رفعت عيونها تنظرلي بنظرة مطولة، شفت دمع بده يلمع بعيونها ونزلتهن بسرعة.. بلعت ريگها للمرة الثانية وهمست بخفوت وخجل..

-شلون اتغير؟

-اكو هوايه طرق للتغير ابرار

-شلون اكون متفائلة واضحك وانا الحزن تارسني

-محد مرتاح بهاي الدنيا بس نفسنا امانة عدنا ولازم نخفف عنها

-عمتي تريد تزوج علي الدر

-شنووو

فوراً نزلت دموعها وشهگت..

-شافتله بت صغيرة وعجبتها سمعتها تحاچي فراقد عليها ويردن يخطبنله هالچم يوم

-وعلي الدر شنو رأيه؟

-بعده ما اظنه يعرف

-وتتوقعين راح يقبل يتزوج عليج؟

-اي!

-ليش؟

-لاني نكدية ونمامة وحساسة وماعندي اسلوب من احاچي يشوفني در وحدة همجية وماعرف اتصرف

-هو گال هالحجي؟

-لا بس اشوفنه بعيونه

-مو شرط يكون هالشي صحيح ممكن انتِ توهوسين

-قصدج ما يشوفني همجية؟

-اي لان اني ماشوفج همجية صراحة اشوفج اندفاعية واكو اختلاف بين الثنين

-نفس الشي المهم ما يحبني

-منو يكول ابرار منو يكول هالشي؟؟

-تَـمني در تارك فراشي صار اشهرر شتحجين انتِ

-اي بدال متبجين وتظلين تلطمين رجعي

-شلوون

-استغلي فرصة وجودنا هنا وحاولي تتقربين منه

-ماعرف شلون ماعرف شتصرف

-تدللي وتغنجي وخبلي بسوالفج خلي يحسج رجعتي ابرار بت الـ 18 سنة

-ماعرف شلون اصير هيج وما يرضى احط مكياج من اطلع

-سهلة حبيبتي مو ضروري تحطين مكياج اصلاً انتِ جميلة بدونه

-چا شسوي علميني

-انتِ تردي لو هم مزاعلته؟

-اريدنه چا شون والله علي الدر ماكو منه زلمة تتمناه كل البنات، شهم وصاحب غيرة وحبوب وشخصية بس اناا العوبة الضيعته من ايدي

-عادي نرجعه مو صعبة هاي

-شسوي

-كوني هادئة بوجوده ولطيفة، اهتمي بلبسج وعطرج ونظافتج.. اسمعيله من يحجي وحاولي تفتحين مواضيع حلوة وياه لا تحجين بس بالمشاكل وتخلي يضوج بس مو معناها متشاركي مشاكلج! لا تشاركي بس اختاري الاوقات المناسبة

-زين وبعد شنو

-اقضي وقت وياه من انتو هنا گعدي بصفه على العشا هسة وضحكيله، طلبي منه يسويلج لفة وتدللي عليه

-بالعباس راح يفك حلگه ما متعود هو على هالسوالف

-خو عودي يا عيني عودي يهتم بيج ويبقى قريب منج ويساعدج بأغلب امورج لا ارادي راح تعشعشين براسه وراح تبقين بباله مينساج لان يعرفج محتاجته

-عمي هنيال نعمة جان مدلل على هالنصايح

-لا تذكريني كل هالنصايح ما طبقتهن

-چا حارمته وتعلميني

-يا اختي هو حرم نفسه نعمة الله يرحمه مچان رجال طبيعي حرامات على النصايح التعلمتهن من خالتي ونرمين

-شلون متحملة انتِ؟

-متحملة شنو

-تتعلعلين هيج، زلمتج مات وتغربتي وانگطع تواصلج ويه خالتج وبين ليلة ويوم تزوجتي واحد ثاني وبعدج تضحكين وعايشة حياتج

-لان عندي امل وثقة راح تنحل كل اموري وراح ارجع لخالتي بسلام

-والأمير علي؟

-ابرار هسة هذا مو موضوعنا اهتمي بنفسج وابدي من هسة رتبي الخطة براسج

-اي اي صار خلص

-يله كومي تونسي ويه البنات حتى يجي يشوفج فرحانة وممهتمة لشي

هزت راسها مبتسمة وگامت تركض وياهن، تأملتها وهي تروح بكل حماسها وكأن انشحنت طاقتها.. ما اللوم ابرار لان دتعاني ويه علي الدر لان فعلاً شخصياتهم مختلفة كأختلاف السماء عن الارض..

اجو علي الدر وعلي البدر يصيحولنا ندخل جوه لان اجه ابو كربله ركضنا كلنا ندخل بالبيت الموجود، بيت بسيط بس كله دفو والحنية مغلفة جدرانه مأثر بي حب اصحاب البيت وطابعة شخصياتهم هنا..

-سلوى: يبنيات تعالن ساعدن بالزلاطة والمقبلات

نزعنا احجبتنا ودخلنا المطبخ سوه نتساعد ونسوي كلشي تطلبه من عدنا سلوى بدون لا نسوي مشاكل، اسمع لسوالف عبق وليلة ناصبات على علي الكرار ويحجن بشي ما فهمته..

-سلوى: يلا تَـمني يلاا شني هالفهاواا

خفيت ايدي كملت الزلاطة وحطيتها على السنك تملحها حبيبة، غسلت ايدي ورحت للصالة شفت الامير وابا الحسن ثنينهم هنا دتسولف وياهم فراقد..

-فراقد: شمالك يمة انتَ ما تعلم اخوك شلون يعامل النساوين

-ابا الحسن علي: اي خالة هاي بعد الامير تطعني بگلبه وما يعلم احد

گعدت على التخم ساكتة وانتبهت لغزوة هم كاعدة وياهم وطول ما اني هنا هي صافنة عليَّ، توترت وسويت روحي مدا اشوفها وطلعت موبايلي اگلب بي ماعدهم اشارة مال نت هنا مليت ورجعته بالجنطة، گمت للغرفة احط جنطتي هناك خاف تضيع واللتفتت على صوت الامير دخل للغرفة ووگف بالباب..

-الامـير علي: مكثرة بالمرگة چنچ

-تَـمني: شوكت؟

-اليوم

-لا اصلاً اليوم الغدة چان برياني

-حمرتچ تَـمني حمررتچ چن ماكلة طلي هو ودمه وناسية تغسلين

-ايييع امير شنو هالتشبيه اكيد ما راح اكل طلي هو ودمه!

-اللهم لا اسألك رد القضاء ولكني اسألك اللطف فيه

-شنو قصدك؟

-خففي حمرتج بلا امر عليج يا بعد راسي

-ليش؟

-لانها تجيب التايه

-اوووي صدوووك

-لا چوذوووب

-ههههه اميير

-خففي خايبة چنچ اشارة مرور من بعيد العين عليج

طلع كلينسة من جيبه وحطها على شفايفي يمسحهن، دفعت ايده بسرعة مكشولة..

-حلگي انشششگ متأكد هاي كلينسة مو حجارة؟؟

-اي ودليل عطست بيها مرتين

-اييييييييييع

-هههههه مسحي يلا

-ما امسح

-مسحي

-ما امسح

-مسحي ولج

-لو تموت

عفته وطلعت من الغرفة، هرول ورايه وجرني من ايدي يرجع يطببني جوه..

-عايني عايني خلينا نتفق اتفاق يرضي الطرفين

-شنو هو

-انتِ تمسحين الحمرة وشنو تردين يجرالچ

-قصدك شنو اطلب منك تسوي؟

-اي

-موافقة جيب

جريت الكلينسة منه مسحت حلگي وهو يضحك ويفر بيده، غمزتله وضربت صدره بعكسي..

-ها اموري طلعت تقاار اموري القيوور

-چا وين اكو زلمة ما يغار على عرضه

-هلووو صرت عرضك ابو القيرة

-بطلي تكولين قيرة وطبعاً عرضي چا غير خاطبين احنه

-اووي يعني اني ختيبة الشيخ القيور؟

-اهووو شيخلصنا بعد

طلع من الغرفة واني امشي وراه واهمس واهز برگبتي على كيف..

-ابو القيرة اليقرقر ابو القيررة عرراقي ابو القيرة وشيخ بعد شريد اكثر ختيبي ابو القيرة ابو القيرة هلا ابو القيرة هلا ابو القيـ.....

سكتت بسرعة من عبر من عدنا شيخ علي وسلوى، ركزت اباوعلهم من فوك ليجوه اتأكد سمعوني لو لا وفجأة حسيت بهمس يم اذني متت خوف..

-ما سمعوج ام القيرة

-اممممير گلبييييي وگففففففف هو هيييچ تخرعنييي

-بس اكيد هسة سمعوج

اللتفتت عليهم شفت شيخ علي فاتح عيونه عليَّ وسلوى تضحك وتفر بيدها، بلعت ريگ خجلانة ماعرف شجاوب بس صدگ اخترعت من همسلي هيج..

-الامـير علي: انا خوفتها بوية ما تدرون بـ تَـمني بساع تنهبط

-شيخ علي: شجاك يا بوية مو زين على البت

-سلوى: هسة شكو شسوالها قابل

-الامير علي: اي هي رقيقة ما تتحمل شي

ابتسم شيخ علي ودخل للغرفة وسلوى وراه، طلعنا اني والامير بره شفنه البنات والولد كلهم هنا، الولد قسم منهم ديشوون ويلعبون كرة قدم گلبي فزز من الفرح وتمنيت اكون وياهم بس استحيت اشارك..

-تَـمني: حبيبة لعد وينه ابو كربله؟

-حبيبة: رجع امه تخربطت

-يااا خطية

هزت راسها تأيدني وبقينا نتفرج عليهم يلعبون وبنص اللعبة جذبوني علي الدر وابرار هي گاعدة تباوعله ومبتسمة وهو يضحكلها طررت فرح ونزلت اهمس بأذن حبيبة..

-تصالحو ابرار واخوج؟

-حبيبة: اي شو يضحكون سوه مادري شعجب

-يا الله الحمدلله

-بلكت تصالحوا وترجع علاقتهم نفس گبل

دعيت بگلبي يبقون هيج لان ابرار ما بطلت تضحك وكل شوية يجي يحجي وياهة وهي تجاوبه وعيونها تلمع فرح، قاطع نظراتي بيهم صوت صياح گبت مناگرة بين حق وكرار على الگول ورادوا حكم يحكم بيناتهم، فجأني علي التـقي من صاح من مكانه..

-تَـمني تحكم انتِ مو تحبين الرياضة؟؟

-علي الحـق: ولك شمعرفك بيها تحب الرياضة

-علي التـقي: مرة گالتلي، يله تَـمني چنتي تتابعينا برأيج گول هذا لو تسلل؟

انحرجت كل الانظار توجهت الي، ابتسمت على انظار علي الكرار وعلي الحق وكأن راح احكم على حياتهم وهالابتسامة تحولت الى ضحكة عالية مني ومن البنات من تقربت مني عبق وهمست..

-عبق: حبابة گولي تسلل خلي هالمغرور ينكسر خشمه شوية

الولد ضاجو من شافونا نضحك عبالهم عليهم، تخصر علي الحق تك ايد وگال بأنزعاج..

-اگص ايدي اذا قبق ما حشتني هسة

-علي السور: على طاري قبق انا بعدني ما جاي افتهم ليش صديقة حبيبة عايشة ويانه

-علي التقي: باع هذا وين جنت نايم انتَ

-علي النور: لا خوية گاعدين چنه بس ما جاي نتخطى اكو هيج بت عايشة ببيتنا وضاحكين علينا كل هالوكت

عبق وجهها ولع احمر ونزلته منحرجة، شفت ابتسامة انتصار تعلو وجه علي الحق خرب ذولة صايرين واحد يتشمت بالثاني بس عود عباله راح يفوز عليها؟؟ لا والله!

-تَـمني: تسلل!!

-علي التـقي: ووووولك ايييييييي

-علي الدر: اشررف حكم شافته عينيي وعلييي

-علي الحق: لااا هذا تحيز ما يصير هييج

-تَـمني: تسلل اخي تسلل مو بنات لو شتكولون؟؟

-رفل: تسلل وعلي

-منتصر: تسلل خايب انچب وخلينا نكمل لعب

ضحكنا ضحكات انتصار لان علي الحـق ضايج، اجت بنت منتصر سكينة وگعدت بحضني وجابتلي قراصتها..

-ثويلي حبابة

-اوووي شكد حلوة هالبنوتة تردين ستوتة؟

-اي نفث رقية

لو بيدي اگرطها سويتلها مثلما تريد وراحت تلعب ويه اختها، كملوا شوي الولد وفرشنا السفرة كلنا سوه ضحك وونسة و حق وتقي ثنينهم يضحكون على كرار وخلوا يگوم من الاكل ضايج تالي ثنينهم اخذوله اكل وراحو ياكلون وياه وحدهم..

بعد العشا سوه الامير چاي على الفحم وانطانه القوري نصبه بأستكانات، هم اللتمينا نشرب الچاي سوه.. اباوع بالوجوه واكول بالعافية عليهم هذا الحب والتألف بيناتهم ما بطلنا ضحك طول ما احنه كاعدين شيخ علي ينصب على ولده وهمه يردوها اله بس بأحترام طبعاً..

-علي البدر: لا بوية بعد راحت عليك صرت شايب

-شيخ علي: هااا ولك هيج صارت بدير

-حيدر: جدي چنك على مرة ثانية؟ يمي السالفة عوفها انا اخطبلك مدرسة اعرفها هي ميتة ورجلها باقي

-شيخ علي: هاا صدگ

-رسمية: هااا ابو علي وره هالعمر تتزوج تريد

-شيخ علي: بنفسي اكمل فريق كرة القدم العندي واسويهم درزن

ضحكنا وحتى رسمية تضحك وسلوى بس ساكتة اتعجب شلون رسمية متغار منها بس يمكن لانها تعرف شيخ علي يعشقها وميفضل احد عليها وهالشي واضح وضوح الشمس..

-علي النور: اوگفوو اوگفووو شكلت ولك حويدر؟؟ هي ميتة ورجلها باقي؟؟ ايا سرسري

-حيدر: چا هسة ياله وصلتك الاشارة هههههههههههه

تأخر الوقت واحنه كاعدين كللش تعبنا ومحد يقبل يفوت ينام الا من رزلنا شيخ علي وغصباً ما على الكل دخل جوه وكلمن راح لمكان نومته..

البنات كلنا انطونا غرفة والولد ناموا بالاستقبال والكبار نامن بغرفة ثانية وشيخ علي وسلوى بغرفة، بقينا نسولف لفترة طويلة بين بعض واسمع عبق تحجي لـ ليلة وتشكيلها الولد لحد الان ينظرولها بنظرات غريبة ممتعودين على وجودها وهالشي ديحرجها..

-ليلة: يمعودة شعليج بيهم، اگلچن تشربن شي؟

-حبيبة: اي ببسي جيبيلنا

گامت تجيبلنا ببسي، تمددت بفراشي وحطيت ايدي جوه راسي صارت نومتي بصف رفل..

-رفل: اييي شلون العشاگ عينييي

-تَـمني: منو

-انتِ والامير ولج چا منو

-ياا عشاق يمعودة واحد شايل سيف على الثاني

-ليييش شجاچ والله الامير حبوب لا تضيعي من ايدج

-مادري احسني بعدني ممتعودة عليه ما انظرله بنظرة خطيب

-چا بنظرة شنو

-احسه صديق او اخ

-نچبييي مع احتراماتي بس اي انچبيي تَـمني شبيچ ولج ديرباالج تگليله هالشي تره ينفر منج

-گتله

-اي لا تعيديها تره الامير مو من النوع يركض وره الشخص الما يريده هو هم ما يتقرب منه

-اني مدا اتقبل علاقتنا بسبب الكلام الدا اسمعه يسم الگلب

-والسحر الي لگيتوه بيوم العقد هم اثر عليج وادري حگچ ما ترتاحين

-مقبل يگولي منو سواه من سألته گال راح يفك السحر اول ما يجي صديقه من السعودية هو شيخ ويفتهم بهاي الامور

-امممم

-محچالچ شي انتِ؟

-لا ماعرف شي انا الامير دگ عليَّ من الصبح وحچيتله الي شفته

-شنو شفتي بالضبط؟

-بساعة العقد شفت رهف بنت عمي مسعود تصعد فوگ تعجبت شعدها فوگ وحبيبة جوه؟ تسحبت وصعدت وراهة وانتبهتلها طبت لغرفة الامير علي

-ما طبيتي وراهة؟

-لا لان صاحولي بس حسيت اكو سالفة ورجعت بالليل ابلغ الامير بالشفته بالوكت الي انتِ دگيتي بابه جايبتله العشا

-اي اتذكر

-چان يسبح بوكتها ظليت كاعدة انتظره يطلع بس طول گلبي لعب بس ماكدرت ابقى اكثر اجه ابوي ورادني ارجع للبيت اجونا خطار واللتهيت بعد ما كدرت اتصل بي وابلغه

هزيت راسي متفهمة وحايرة بنفس الوقت، رجعت ليلة تجيب الببسي انطتنا كلنا وگعدنا نكرز حب ونشرب ببسي لحدما اذن الفجر گمنا نصلي بس احس براسي انتفخ وجع مو طبيعي صار بي..

توضيت بسرعة بسرعة ورحت للغرفة صليت وفوراً حطيت راسي على المخدة محتاجة انام وفعلاً غفيت وجريتها ما كعدت الا بـ 12:30 الظهر راسي يدگون بي چاكوچ وجعع مينحمل ومعدتي تفووور، ماكدرت حتى اطلعلهم دخلت للحمام وضليت اتهوع واتقيء روحي راحت گعدت بأرضية الحمام ولميت رجليه لجسمي احضنهن وسندت راسي عليهن ارتاح..

خمس دقايق بقيت على هالوضع واندگت باب الحمام گمت گوة افتحها وشفت علي التقي بوجهي ويضحك بس شافني اختفت ضحكته ونطق مصدوم..

-تَـمني شبييج

-مابيه شي

-شبيها عيونج

-شنو شبيها

رحت للمراية اشوفهن غايرات وذبلانات، صاح علي التـقي لـ حبيبة تجيني واجن وياهة رفل وعبق يساعدوني..

-بنات مابيه شي والله بس شوية تعبانة

-رفل: انا ما كعدتج كلت تعبتي من البارحة عفتج ترتاحين

ابتسمت وهزيت راسي دخلت للغرفة اخذت ملابس ورجعت للحمام اسبح بس چان بعده علي التقي هنا انتظرته علما طلع اتطمن عليَّ وسأل عن وضعي وخلاني ادخل للحمام..

سبحت بمي دافي ارتاحيت شوية بدلت وطلعتلهم محد بالبيت كلهم بالمزرعة يفترون وارتاحيت من عرفت محد درى بالصار بيه بس معقولة حبيبة تشوفني هيج وتسكت؟ هيهاات ما خلت وحدة ما گلتلها من النسوان..

-رسمية: سودة عليّ شجاچ يمة اسم الله عليج

-تَـمني: عادي خالة احتمال من وره التعب هسة اني احسن بهواي

تحمدولي كلهم على السلامة والبنات گالن الولد دينتظرونا من الجهة الثانية للمزرعة، وضعي تحسن هوايه ورحت وياهن اتمشى على كيف، شفتهن دخلن لمكان شلون البيت الصغير بس من طابوگ مبني دخلت وفتحت عيووني مبهورة من شفت عدهم حصان!!

-تَـمني: حبيبة عدكم حصانااات

-حبيبة: ايي عدنا

-علي التقي: تعااي ام حصانات شلون صرتي

-الامـير علي: شني شبيها؟

-علي التـقي: چا شكد مطفي غير تخربطت الصبح

-صدگ؟؟

-تَـمني: اي بس صرت احسن

-علي الكرار: زيين چان فاتتج الونسة

فرحت بالاجواء اجه الامير يتطمن عليَّ ما طولت وياه وگتله صرت زينة ورحت اتونس ويه البنات.. خفت اركب الفرس بس حبيبة ركبت عليها وانطلقت بيها وشگد حلوووو منظرها تجننن شلون مسيطرة وتعرف شلون توجهها وشلون تمشي، ابتسمت من ليلة گالت حبيبة من صغرها متعودة تركب الفرس ومتدربة..

-تدرين ليلة اني دا اتعجب صراحة ابد ما توقعت انتو عايشين هيج

-ليلة: يعني شلون؟

-يعني مادري اني سامعة بأهل الجنوب كلش متشددين وكلشي عيب وممنوع والبنات ديعانون بسبب المجتمع الي هنا

ضحكن ليلة ورفل وحتى عبق، اشرن لـ حبيبة ترجعلنا واجت تلهث طفرت من الفرس ووگفت يمنا و ليلة نقلتلها كلامي وحتى حبيبة ضحكت..

ماعرفت سبب ضحكهن شنو بس ابتسمت وياهن على الواهس ورحت اگعد بعدها رجلي ترجف ماتحمل اوكف هوايه، صاحو صار الغدة والبنات ما رادن نرجع سون لفات وجابوها ناكلها هنا..

-حبيبة: ما جاوبتج ليلة مو؟

-لا

-لان كلامج نصه صح والنص الثاني غلط

-وضحيلي اكثر

-اكو ناس فعلاً هيج عايشين متشددين واهلهم خانگيهم ومن هالناس بنات عمي كلهن عدى بنات عمي مرتضى اما الباقين كلهم هيج عدهم البت مكانها البيت ولو خلوها تكمل دراسة همه متفضلين عليها خو عمي ناصر حتى دراسة ما يرضى يكملن رفل و ليلة مع العلم ثنينهن كلش شاطرات

-خطية

-انا ابوي غير من اول هو هيج منفتح وعقليته مو مغلقة يحب يدللنا ويعيشنا عيشة كريمة حلوة بس عنده حدود.. ومن هالحدود يعني هسة لو چان اكو غريب بيناتنا لو منتصر ابن عمي لو اموت ما يرضى اركب الفرس گدامه

-منطقي بحساب تمدين جسمچ

-اي واساساً ابوي يختلف بهووواي امور انا من دون بنات عمي مسموحلي اطلع واتونس شوكت ما يعجبني بس ويه امي لو مرة ابوي، كملت دراستي واشتغل ويسفرني كل سنة مرتين وما اقصد اتباهى بس من صدگ مدللة احلى دلال من اخوتي وابوي

-فدوة تستاهلين ان شاء الله دوم

-يا بعد روحي

-يمكن لانج البنية الوحيدة مو؟

-مادري والله بس كلنا اخواني ابوي انطانه هالحرية اخوتي كل واحد درس بمحافظة بس انا ما قبل اطلع خارج محافظتنا ادرس

سكتت من اجه علي التقي شايل بيده قوطية ببسي وگف بمكانه من شافني وگال..

-مادري بيج هنا جبت بس لـ حبيبة

-حبيبة: عادي انطي الها انا ماريد

-تَـمني: اني هم ماريد شكراً تقي

اخذتها حبيبة من ايده وباسته بالهوا، كفخها على راسها خفيف ضحكت على حركاتهم وهي تضحك وتصيح..

-الااا اكول لابوووي

سوالها حركة بأيده عود خايف ويرجف وراح يضحك، اللتفتت الي وگالت..

-شفتي هالموقف؟

-تقي جابلج ببسي اي

-ولد عمي لو تذبحيهم ما يسووها ويه خواتهم اصلاً خواتهم يعاملوهن معاملة الخدامات بالبيت

-عزااا

-والله ظلم بظلم عايشات بس انا جاي احاول اطلعهن وياي كلما اطلع لان لو يبقن على اهلهن يعيشن ويموتن بنفس مكانهن لا طلعة ولا طبة ولا حتى طبيب من يمرضن

انخمش گلبي مقهورة گمت ارجع جوه حتى الحصان ماريد اركب عليه بعد، گعدت ويه النسوان الكبار بينما البنات بقن بره يلعبن.. محسيت من غفيت بمكاني وحسيت على صلاة المغرب ضجت اكثر شلون غفيت شبيه هو اني جاية انام!

صليت ورحت اساعدهم بالعشا ومشى الوقت مثل البارحة بالليل سوينا چاي البنات وگعدنا بغرفتنا نشرب بي ونسولف...

**

"عــــبق"

فزيت بالليل على باب غرفتنا ينفتح على كيف وتطلع وحدة من البنات، جريت تلفون حبيبة شفت الساعة فوگ الثنتين بالليل.. ضويت بالتلفون على البنات شفتهن كلهن هنا بس فراش تَـمني فارغ..

ماكدرت انام ظل بالي عليها الا ترجع ياله ارتاح وتغفى عيني، احسب دقيقة دقيقة وماكو تَـمني ما رجعت خفت لا يكون تخربطت نفس البارحة، گمت من فراشي وطلعت من الغرفة ادورها مظلمين البيت بصعوبة اشوف رجعت للغرفة اخذت تلفون حبيبة وظليت افتر بالبيت ادور ظلها..

بس ماكوو البنية فص ملح وذاب مالها اثر لا بحمام ولا بوحدة من الغرف، دگ گلبي متوترة وين راحت تَـمني انوب خفت من سمعت صوت عركة بزازين يم باب البيت، ماهتميت وعبرتهن اطلع من البيت ادور بالمزرعة واهمس اسمها..

-تَـمنييي.. وينج تَـمنييي

افتر بالمزرعة واصيحلها وفجأة...! فجأة انجريت من ايد شخص وسحبني يضرب ظهري بالحايط وايد قوية انلفت على رگبتي..

-عبق: اااخ

-هاي شنو.. هاي انتِ!

باوعت بوجهه لگيته علي التـقي يباوعلي محتار، هدني بسرعة وصار يفرك بوجهه وينافخ، ارتبكت من وجودنا وحدنا هنا بنص الليل ابتعدت عنه كم خطوة وهو گال بصوت ناصي..

-شفت واحد يفتر بهالوكت خفت لا يكون حرامي مادري هاي انتِ

باوع على وجهي وجسمي وگال وهو يفر بيده..

-حتى ما ركزت بيج بت لو زلمة

-اني كمت بس حتى ادور على تَـمني

-شبيها؟

-مادري اختفت طلعت من الغرفة وبعد ماعرف وين راحت

-صدگ چذب وين تروح يعني

حركت اكتافي بحركة ماعرف بينما هو ظل يفكر وين ممكن تروح بس طبعاً عبق حظها مستحيل يگعد وياهة ويخليها تتهنى لازم تطلعلها مصيبة من العدم!!

-سلوى: عبق؟؟؟

انتفضت واگف گلبي ويه صوتها تصيح بأسمي، واگفة بباب البيت ماشوف ملامحها بس عرفت نبرتها الحقيرة.. اللتفت علي التـقي يباوعلها وسمعت صوت لطمتها على وجهها من شافتنا قريبين على بعض بعد ماعرف وين اشرد ووين اروح..

-سلوى: صخااام الصخمنيي شجاي تسوون هنا وحدكممم

-علي التـقي: يمعوودة

-سلوى: يمة تعزيناا انفضحناا وللج بت الچلببة تعااالي

تنتر بيه نتر كمت ارجف من فوك ليجوه وركضت بأتجاهها بس اريد افوت للبيت وسدني جسم ضخم صار فاصل بيني وبين خالتي بعد لا اني اشوفها ولا هي تشوفني، تهت وحسيت راح يغمى عليَّ من دققت بي وشفته علي الحق!!

-علي الحـق: ها سويتيلي چاي؟

-عبق: شـ.. شـ.. شنوو

-علي الحـق: صار شكد ننتظره شسالفة عنق

-سلوى: شنو جاااي يصير هنااا

-علي الحـق: نريد چاي خالة

-سلوى: چا شتسوي هالمعزاية بنصاص الليالي هناا

-علي الحـق: چا ياهي تسويلنا چاي وحبيبة نايمة؟

-علي التقي: انا شفتها گعدت تروح للحمام وگلتلها تسويلنا

-سلوى: هااا

-علي الحق: بعدين كملي عملية البحث مالتج قبق راسي راح يطگ سويلي چاي چبدي

فتحت عيوني خازرته والخبيث غمزلي، ماكدر اباوع لوجه خالتي بعد والله تموتني خرب روحك علي الحـق على شنو ناوي؟؟

-سلوى: چا تعاي سويلهم شعندج هنا تفترين

-عبق: دا ادور تَـمني اختفت

-سلوى: وين اختفت شفتها نايمة راس بچعب ويه ليلة

-عبق: صدگ؟؟

-اي شبيچ عمية يله امشي سوي الچاي

دخلت اهرول للبيت وركض للمطبخ طلعت القوري غسلته وارجف لا تكتلني هنا وتفشلني گدامهم، بقت واگفة بباب المطبخ تنتظرني وتباوعلي بنظرات كلها شَك، ماتوقع سمعت حق من گال "چبدي" لان مستحيل تفوتها..

-صايرة سفردحي تطلعين گدام الزلم شفتي شوية انطيتج مجال صرتي برب**

مجاوبتها وحفظت ماي وجهي حتى ما تتجاوز اكثر، رفعت راسي ويه صوت علي الحـق واگف بباب المطبخ و يحجي من وراهة..

-والله يا خالة مثل ادب عبق انا ما شفت اظنج مشتبهه ويه برب** ثانية

انخلست خالتي وما جاوبته بقت منطية ظهرها ووجهها ينطي اللوان، سند روحه على الباب مچتف ايده وگال بأبتسامة جانبية..

-شمگعدچ خالة بنصاص الليالي؟

-سلوى: الشيخ.. الشيخ گعد صدره يوجعه وراد اسويله يانسون

فعلاً انتبهت لـ دلة اليانسون موجودة بالمغسلة، تحمحم علي الحق وگال..

-جيبيلي الچاي بره

-سلوى: انا اجيبه الك يمة

طلع ممهتم الها نترت بيه خالتي اعوف الچاي وارجع انام هي تكمله، سمعت كلمتها ورجعت للغرفة وبيدي تلفون حبيبة رجعته لمكانه وحطيت راسي على المخدة ارجع انام ناسية سالفة تَـمني من الهبطة..

نص ساعة مرت جفى عيني النوم ومن العدم طخت براسي تَـمني كمت اتأكد منها نايمة يم ليلة لو لا شفت علوة مال شخص نايم جوه رجلين ليلة، ابتسمت ووخرت البطانية من وجهها وتفاجأت من شفتها مخدة!

-تَـمني وين!!

همستها بيني وبين نفسي مو بس مرعوبة مييتة من الخوف مستحيل هالشي طبيعي تَـمني وين راحت؟؟

ما طقت ابقى ساكتة نويت ارجع ادورها واذا ما اللگاهة اگعد حبيبة تكول لاخوانها، طلعت اضوي بالتلفون خايفة خالة بعدها كاعدة بس همزين البيت فارغ..

عبرت باب البيت اطلع وانتبهت لبقع حمرة وكأنه دم بالكاع! كمت ارجف من فوك ليجوه وركضت بكل سرعتي اتبع اثر الدم الى ان انقطع وبعد ماكو اثر بالكاع.. بقيت افتر بالمزرعة مخلوسة واللهث من الخوف الى ان سمعت صوت بچي وصراخ جاي من مكان الخيل..

ركضت بكل سرعتي هناك وشفت شي يطلع من الباب الثانية مال الاسطبل مثل الخيال بس ما لحگت افكر بي لان لكيت تَـمني كاعدة بالكاع وحدها وتبجي، بعد رجلي متشيلني علما وصلتلها بس اريد افتهم شبيها وكعت بالكاع بصفها لزمتها من ايدها ثنينهن واهمس برجفة..

-تَـمني تَـمنييي شبيچ شصارلج تَـمنيييي

-اريد خالة.. اريدها اريدها اريدهاا

-تَـمنييي شبيچ ولج منين هذا الدم ببجامتج تَـمنييي

بجامتها من جوه كلها دم رفعتها اشوف رجليها مجروحات وطابه بيهن سلايات لطمت خدي شجابها هاي هنا وشصاير بيهاا!

-امشي كومي وياي كوومي نرجع للبييت

-ماريد ماكدر ماااريد متوجعة

حضنتني تبجيي بصوت عالي وتدفن وجهها بصدري، فقدت عقلي هاي شبيها البنية من لا وعي فتحت رمز تلفون حبيبة واتصلت على رقم اول شخص اجه ببالي، جاوبني بصوت ناعس..

-ها حبيبة

-اسفة خوية اني عبق.. بس تَـمني تَـمني هنا بالاسطبل بس تبجي وماعرف شسوي

-جاي جاي

سد التلفون بوجهي وبقيت مكعدتها بحضني وبس تبجي، فاجأتني من وخرت راسها من صدري تباوع لوجهي وجرت خدي وباسته..

-احبج عبوقة انتِ اختي

-ولج شديصير وياچ احجيي راح اموت

-اريد عصير رمان

-يمممة

تهذي بكلمات وجمل منها المفهوم ومنها لا، لازمة ايدي بقوة وتحسب اصابعي من واحد للعشرة وترجع تعيد تحسب وتعيد خفت لا يكون طاب بيها جني وهو مسوي بيها هيج؟!

-شنو شبيهاا تَـمني

نزيت ويه صوت الامـير علي المرعوب اجه يركض علينا وجرها من ايدي بسرعة حطها بحضنه، يگلب بوجهها ويحاچيها بهمس بس ابد مجاوبته..

-شبيها عبق احجييي

-والله العظيم ماعرف بالليل كعدت وطلعت من الغرفة ويمكن اجت هنا وحدها بس شفت خيال هنا يطلع من هاي الباب

-خيال؟؟.. تَـمني شبيچ شو حاچينييي

يحرك بوجهها يريدها تجاوب بس البنية ذبلانة مفتحة عيونها وكلشي متحجي، دفنت وجهها بصدره وهمست..

-انتَ كذاب

-انا؟؟ لييش

دفعته منها بعنف ووخرت من صدره وتقيأت كلشييي ببطنها، تتقيأ وتبجي روحي راحت وگلبي نمرد، الامير مگنبص بصفها يريد يسيطر عليها وهي ما هدأت من التقيء وتصيح راسي..

-الامـير علي: عبق امشيي كعدي امي بسااع

هزيت راسي اي وركضت قبلهم، شفته شالها وضام وجهها بصدره واجه يركض ورايه، دخلت للبيت بس اريد أوصل لغرفة خالة رسمية اتعثر بخطواتي، وصلت لغرفتهن ودخلت بدون لا ادگها شفت عمة زهرة گاعدة تسبح..

-زهرة: يا ستار شبيچ يمة عبق

-عبق بهمس: عمة.. عمة تَـمني وضعها مو زين الامير كال اكعد خالة رسمية

اللتفتت بسرعة على خالة رسمية رايحة بغير عالم دتشخر، كامت زهرة تهرول تكعدها وفزت مخترعة خطية، سولفتلها مختصر مفيد عن الصار وكعدن غزوة وفراقد هم، كامت رسمية تركض وتلف بشيلتها..

-يا علي دخيلك شمالها البت اللهم صل على محمد وال محمد دخيلك يا محمد العربي..

ركضت للصالة شفنا الامير على حطته حاطها بحضنه ويمسح على شعرها ويقرالها ايات قرانية، قميصه متدمر من وراهة تقيأت حتى عليه..

-شنيي يمة امير شبيها مرييتك

-مادري يمة مادري تعاي شوفيها

نزلها على القنفة وكلنا حواليها، صاح بينا نوخر حتى يجيها هوا وعلى اثر صوتنا كل البنات گعدن وحتى شيخ علي وخالتي اجو يهرولون خايفين عليها..

-غزوة: دخيلج يام البنين شبيها البت

-زهرة: خاف مسحورة!!

-فراقد: لا موش سحر هذا ما يصير هيج

-رفل: شمعرفج خالة؟

-فراقد: خبرة انا خايبة شبعت سحورة بزمن المرحوم

-سلوى: يجوز صدمة صايبتها هي اخترعت؟؟

-ليلة: لا عمة كلشي مابيها الليل كله نسولف وناكل ونشرب چاي كلشي ما صار حتى تنصدم منه

بقينا بهالحيرة ناس يكولون يمكن مخربطة بالاكل وناس تكول أخذوها للمستشفى واكو يكولون هي متتحمل ودلوعة وناس تكول يمكن تدور اهتمام بس اني ما أايد أي احد هنا لان الشفته مستحييل يكون تمثيل!!

للصبح الامير بقى كاعد يمها نيمناها بالصالة وبعد ولا كعدت، عالج جروحها على كيفه طلع السلايات وجاب كحول وشاش عقم رجليها ولفها.. حبيبة سهرت وياهم واني هم ماكدرت ارجع بالي بقى يمها ومركزة بيها خايفة..

بالسبعة الصبح بدت تصحصح، فتحت عيونها تون فزينا على صوتها وگعدنا عدل مركزين وياهة، مجرد شافتنا دارت وجهها من الجهة الثانية متقبل تباوعلنا انوب كبر قلقنا عليها..

-الامـير علي: تَـمني

مجاوبته فوراً اخذت دقايق ياله دارت وجهها تواجهه، صفنت شوية على مكانها وتباوع لوجوهنا مستغربة، عگدت حاجبها وگعدت فازة..

-تَـمني: شصار

-الامـير علي: مصايب

-بس لا اني اجيت هنا؟؟

-چنچ متعودة على الوضع

-عززااا

-حبيبة: شنو شبيچ

عدلت گعدتها وتسحب بشعرها وره اذانها، حطت راسها بين ايدها ثواني ووخرتها من گلت..

-عبق: لكيتج بالاسطبل كاعدة وتبجين

-تَـمني: خرب

-الامـير علي: غير نفتهم شبيچ

-صار هوايه ما صاير ويايه هيج اسفة اكيد خوفتكم

-عبق: شنو يعني؟

-اني.. اني امشي واني نايمة

فتح عيونه الامـير علي واني وحبيبة وحدة ظلت تباوع على الثانية، ابتسمت خجلانة وهمست..

-بس لا سويت شي اتندم عليه؟

-الامـير علي: تقيأتي عليّ

-تَـمني: ها عليك؟ يله انتَ عادي

-الامـير علي: خرب راسج هديتي حيلي

-حبيبة: تَـمني معقولة يعني انتِ متعودة على هالوضع؟ تحجين وتبحين وتمشين وتتقيأين وانتِ نايمة؟؟

-تَـمني: اي والله قبل جنت اتعس حتى اطلع للشارع وما احس

-حبيبة: بس هالشي مو طبيعي تَـمني

ظلينا مبحلقات عيوننا عليها ما مصدگات اول مرة تمر علينا هيج حالة، حسيتها كلش خجلانة ومتعرف شتكول..

-تَـمني: من كبرت راحت مني هالحالة بس يمكن من التعب رجعتلي

-الامـير علي: الحمدلله نايمة ولا غير شي

هزت راسها مبتسمة بس بعدني ممرتاحة واحس اكو غلط بسبب الخيال الشفته بعده ببالي واتوقع الامير عنده نفس الاحساس لان بقى ساكت ويباوعلها مرتاب وكأن عنده احساس تَـمني مچانت نايمة..

گعدوا الكل وسألو عليها الامير ما گللهم چانت نايمة بس طمنهم وضعها احسن وماكو شي يدعو للقلق.. اللتمينا كلنا على الريوگ ورجعت لمتنا كلش اهتمينا بـ تَـمني خفنا عليها بعدها الرجفة بيها واعصابها ترتعش..

-الامـير علي: وين رايحة تَـمني؟

-تَـمني: شبعت الحمدلله عاجبني اطلع أتمشى بره

-خوشن شوية ونجي وراچ

ابتسمت تهز براسها وطلعت تفتر بالمزرعة، عشر دقايق وگام شيخ علي من الريوك وصاح الامير يجي وراه، بعدهم ما طاببن الغرفة وابا الحسن گال..

-هذا شنو الصوت بره؟

-شيخ علي: صوت سيارة يمكن رجعوا الولد بوية

-الامـير علي: اي اظن، رايح اشوفهم وجايك بوية

راح يستقبل اخوته الطلعوا صيد (علي الدر وعلي البدر وعلي السور والنور وحيدر ومنتصر وياهم) گام ابا الحسن علي راح وياه، ثواني وگبت العيطة بره گام عمو علي يركض يشوف شنو والبنات كلنا رحنا نباوع من الشباك وچان نلگاهم البلاااء بيت عمهم مسعود!!

-شيخ علي: مسعود هلا خوية

-مسعود: هلا

-شيخ علي: حي الله من جانا

-مسعود: الله يحييك، اجيت اتونس انا وهلي ببيت المزرعة

-ابا الحسن علي: بس احنه بالمزرعة غير تتأكدون ماكو احد گبل لا تجون

-مسعود: وشكووو اتأكد مزرعتي وبكيفي شوكت ما يعجبني اركب سيارتي واجيها لو همم گولوو الگاع گااعكم ولفطووها

-شيخ علي: لا خوية الگاع الك حصة بيها بس عيالي اليوم هنا بس نرجع هلا بيكم

-سلطان: عمي احنه اجينا نتونسس بمزرعتناا وگاعناا واليووم نفرش ونگعد بيهاا عجبكم يااا هلا ما عحبكمم لمو چوالاتكم ورجعوو لبيتكم

-الامـير علي: لسااانك لاااا اگصه

-سلطان: لييش تگص لساني؟؟؟ لو ما يعجبكم حچي الحگ!!

هجم علي الحق يريد يلوحه وتقي لزمه صار يعيط ويفلت روحه من تقي فايرر نار..

-علي الحق: هدنييي افرررك حلگه بالقندرررة هالعااايب

-شيخ علي: كااافي حقققق

-مسعود: علي ولدك ما متربااايين يتجاوزون ولسانهم زفررر ربيهمم وعلمهم الاحتراام شوي

-شيخ علي: مسعوود لا تتطاول وتخليني اهينننك

-مسعود: چا اشوفن ولدي ينهانون وتريدني اسكت؟؟ طبووا يا ولد الگاع گاعنا والبيت بيتناا واليمنع دوستكم باب هالبيت نكسر رجللله

حچاهة بتحدي وضحكة حقييرة وولده سبعتهم تدافعوا ويه ولد عمو علي يردون يفوتون وصارت لووصة، شهگت رسمية وصاحت بينا..

-تستررن يمة تسترررن هدوا علينا ولدد الچلب

منسمع غير العياااط والفوضى صارت بره ناس تحجي على ناس وناس تسب وتفشر على ناس وولد مسعود جايبين وياهم ثلاث شباب ما شايفتهم من قبل، شهگت اضم حلگي بيدي من سلطان غافلهم واجه يركض على باب البيت دفرها برجله ودخل للصالة يضحك..

-رسمية: اطلععع ابن العااار لو عنددك غيرة ما تطب على بنات عمك هالشكل

-سلطان: عجووز الناار نهايتكمم على ايدناا لا تظلين تخرطيين

-يااهي تخرط ولللك *****

متنا خوف من دخل علي الحق للبيت ولزمه من خوانيگه وجره سحل، دفره ببطنه وعلى ركباته خلاه يفقد توازنه ويوگع، نام عليه ودددگ كتل يضرب بوكسيات بخبال على وجهه وصدره وكل مكان تلوحه ايده..

-زهرة: يبوووو ولك يمااا راح يموووت

-علي الحق: واشررررب من دمممه ابن العاااار هذا

يضرب بوحشية وسلطان ولا استسلم النذل، گلب حق على الگاع وصار فوگاه يدافع عن نفسه ويرجع الضرب العنيف ويضحك ويكول..

-سلطان: تخاف لا نشوف اختتك؟؟ بس خوش شفت وجوه جديدة حلوة هناا يفيدن نتونس بيهن اليوم ههههه

صاح حق صوت روحي راحت بيها، دفع سلطان عنه ورجع هو يتحكم بالضرب، دخل كرار يريد يوخره عنه بس هذا فقدد حتى عيونه تگلبت، بنفس اللحظة دخلوا سيف وغفار سحبوا سلطان بعيد وهجموا على علي الكرار..

كل خلية بجسمي ترجف وشفت حال البنات مو احسن مني صاحت بينا سلوى نطب للغرفة وركضنا كلنا بعدني ما لحكت ادخل للغرفة وانجريت من حجابي حييل طگ الدبوس ووكعت الربطة من راسي.،

-علي الجق: ووووولك اليووووم موووتكم على ايدددددي اليوووووم

بعد ما شفت شي كللشي ما شفت غير الغواش والدم يتطافر من خشم سلطان اثر بوكس وبنفس اللحظة سلطان طلع سچينة ودچها بزند علي الحق، صرخت مرعووبة ووكفت بزاوية الصالة عاجزة.. سلوى ورسمية يفاككن علي التقي من غفار وغزوة وزهرة وفراقد ثلاثنهن على سيف ومدا يگدرنله نايم نيوم على كرار ويخنگ بي..

-عبق: علي الحققق انتَ زينن

-علي الحق: طبيييي للغررررفة

صاح وهو نايم بالكاع وسلطان يضرب بوكسيات ببطنه ووجهه تخبلت وظليت أراوح بمكاني، حسيت على حبيبة تطلع من الغرفة وتجر بيدي تريد تسحبني جوه متدري شديصير بره..

-عبق: حبيبة اخوووج راح يموووت

جحظت حبيبة متعرف عليمن اقصد ظلت بس مبحلقة عيونها وسلطان الكلب بعده يتعارك ويه حق ويستفزه بالكلام..

-سلطان: لعابتك خايفة عليك خوش صيددة صايد ههههههه

-علي الحق: انععععل ابوك لابووو الجااابك ابن ال**** ال**** سرسررري سربووووت اليووم اشگك واشگ الخللفكك

دفعه عنه ومستمر يصيح ويفشر وزنده ينزف والسچينة صغيرة بعدها مشكلة بي، روحي راحت ويه ضربهم بحياتي كلهاا ما شايفة هيج عنف وعشت هيج رهبة!! داائماً تصير عركات بين بيت مسعود وشيخ علي بس هاي اول مرة اشهد عركة والمشكلة محد اكو يفاككهم اخوة علي الحق كلمن لازم واحد يتعارك وياه والدنيا محترگة بالبيت!!

ركضت حبيبة بعدما تخطت صدمتها تريد تفزع لاخوها وصدمني علي الحق من دفعها دفعة قوية وگعتها بالكاع وصاح بهستيرية..

-علي الحـق: طبنننن جوووووووه گلتتتت

جريت حبيبة الي انهارت على اخوتها وجهها صار عبارة عن ليمونة وعيونها ما رجعن انسدن من قوة صدمتها شفايفها يبسن وصارن بيض، ليلة ورفل حارن بيها وهي متقبل تبقى بالغرفة تريد تطلع تفزع لاخوتها..

-رفل: حبيبببة ويننن تكدريلههم ولد مسعود سبببعة وجايبين ولد خالتهم وياااهم ما تشوفين الدنيا محترركة كعددي

-حبيبة: هدديني رفل هدوووني اخووتي لا يموتوون

لزمتها من متونها وصحت بوجهها..

-اهدددي اخوتج راح يحلون الموضوع اهدددي

-حبيبة: ما يكدروون بس خمسة منهم هناا وولد مسعود سبععة وولد خالتهم جايين ويين يكدرون يدافعون عن نفسهم؟؟

خنست وخنسنا كلنا على صوت علي الدر يرعد بالصالة ماعرف شنو صار ولا شلون صار هدوء بالصالة بعد صيحته..

-رفل: اجووو اخوتج حبيبة اجووو رجعووو

-ليلة: ايي بس تَـمني وين؟؟ بنات وين تَـمني؟؟

-عبق: هي طلعت وما رجعت بعدد بنات

-حبيبة: عبق امشي نطلع نجيبها

-عبق: خاف نترزل من علي الحـق؟

-حبيبة: ماعوفها وحدها ما امن بأحد امشيي

جرتني من ايدي وطلعنا من الغرفة وشفناها بالصالة ويه خالة رسمية، ذبينه نفس مرتاحات مبين هستوهم مطببيها جوه لان وجهها مخطوف لونه وترجف..

الصوت بره البيت هدأ وخف عرفنا بطلوا عرك شلون انحلت المشكلة ماعرف بس مو مهم المهم سكتوا، الصالة فرغت بس النسوان بيها وشفت مرة عمهم مسعود وبناتها رهف وسبأ هنا وخالة رسمية تهد وتنثني عليها والنذلة تضحك وتسويلها بيدها "على عنادج"..

فوضى وهوسة ووحدة تهدد بالثانية وتعاير بالثانية راسي انفخ، للظهر همه يتعاركون والطرفين محد يتنازل، بالي ظل ويه علي الحـق مادري داووا جرحه لا بس ارتاحيت من حبيبة ورفل طلبن نرجع لان تعبن من العركة وميردن يبقن بعد خايفات، گالو لموا اغراضكم حتى نطلع بعد شوية..

**

"تَـمني"

الهبطة بعدها بيه چنت واگفة اتفرج على الورد وحسيت بشخص ورايه، اللتفتت اباوع منا ومنا بس ماكو احد غلست ورجعت افتر بالمزرعة بس بقيت احس بأحد يراقبني، بگت طن هوا وقررت ارجع للبيت.. ماكو ثواني وگبت العيطة بين بيت مسعود وشيخ علي، بينما اجاني ابا الحسن ورجعني للبيت اني روحي راحت..

دخلت للغرفة اللم اغراضي بس معدتي ولا دتهدأ جو هالمزرعة ابد ما ناسبني، مادري بشنو افكر بالعركة لو بالصار البارحة ماعرف شنو سويت وگلت بالضبط ومستحية حتى احجي ويه اهل البيت، تذكرت بنطروني غسلته وشريته بره ما ردت اني اطلع اجيبه بس المن اگول فشلة..

طلعت من الغرفة للصالة شفت بس بنات مسعود ومرته وغزوة كاعدات، انصدمت بـ سلوى طلعت من غرفتها متوجهة عليَّ وتقصدت تدفرني بچتفها وتعبرني..

-سلوى: الداايحة بت الفگرر

-شبييج انتِ

-سم وزحيير ان شاء الله

غمتني ورجعتلها الغمة ممهتمة للموجودات هنا وطلعت اجيب بنطروني، امشي على اطراف اصابيعي خاف اللگه واحد من ولد مسعود شكد اضوج منهم رغم ماعرف غير عاصف بيناتهم بس شكلهم مو راحة والسووا اليوم والعركة القامت دليل خبثهم..

-شتسوين هنا؟؟

طفرت مخترعة وحطيت ايدي على گلبي، وجهه احمر دمم وخده ينزف دم..

-شنو تعاركت وياهم؟

-لا چنت ادغدغهم

-شبيك امير اني شعليه تطلع حرگتك بيه

زفر نفس وفرك وجهه تعبان، تقربت منه اكثر وباوعت لوجهه المخدوش..

-شبيهم ولد عمك؟

-چلاب بشرية

-سبحان الله

-شلون صرتي؟ احسن؟

-اي احسن الحمدلله

-ما شفتي شي من المزرعة وراح نرجع

-عادي تونست كلش

-چنچ حبيتي مكان الحصانات ورحتي تشكيلهن همچ بالليل

ضحكت من كال "حصانات" يعيب عليَّ، مدلي ايده وگال بأبتسامة ولا كأن قبل شوية صارت حرب..

-تعاي وياي

-وين

-للحصانات

-هههههه اميير

-يله ام امـــــييير

مادلي ايده حتى اللزمها ترددت قبل لا احط ايدي بنصهن احس بأحساس غريب من اكون وياه، من شاف ترددي فوراً حط ايده بجيبه واشرلي براسه حتى امشي وياه..

عضيت لساني متندمة لان فشلته وما انطيته ايدي بس هو ضيعها من طلع كلينسه من جيبه ومسح خده..

-ماعدنا هواي وكت علما يلمون اغراضهم احنه نرجع ماشي؟

-بس هسة صارت عركة الك واهس يعني؟

-عادي متعودين على مشاكل مسعود احنه

هزيت راسي ومشيت وياه، الهوا يخببل يلعب بملابسي لعب وهو شعره يطير ويه الهوا، تمشيت قبله للاسطبل صح رجلي توجعني وگوة امشي بس ماهتميت، اخذتها ركضة وهو اجه يهرول ورايه شوية وحسيت بشالي ينجر ولفه الامير على ايده..

-مو انتَ شيييخ وصاحب قيرة

-ماكو احد ام القيرة

هزيت راسي مبتسمة ودخلت لمكان الخيل صغير مو جبير بس شكله يونس، عدهم ثلاث احصنة هنا بس البارحة چانن اربعة مادري وين راح الرابع..

-تعاي نصعدج على الفرس مالتي

-مالتك مالتك هاي؟

-اي هدية من ابوي

طلعه من بيته والحصان يصهل فرحان بوجوده، شكله حلو لونه بني وشعره اسود سرح، فرحت كلش ما اشوف هيجي شغلات بالعادة على ارض الواقع وفرحت بشوفتهم عبالك يفتهم هو اجه وعرفه..

-شوف يعرفك

-تعرفني اي هاي فرس انثى مو ذكر

-هم مسميها نفس جماعة هات الخمر يا غلام؟

-هههههه چا شلون هاي فردوستي

-اسمها فردوس؟؟ الله كللش حلو

-تركبين عليها؟

-مو اخاف

-انا وياچ على كيفنا

هزيت راسي على كيف مستحية، شدلها سرج وركب عليها وگعد عدل، مدلي ايده يساعدني كمشت بأيده وشهگت من رفعني بحركة خفيفة وسريعة وگعدني گدامه مو وراه..

رجفة سرت بعظامي من ضربت انفاسه رگبتي لا ارادي كمشت بالسرج حيل وضغطت على اسناني، مد نفسه لاذني وحچى بخفوت..

-جاهزة؟

-احم.. ا.. اي

-يلا بسم الله..

ضربها بالحبل خفيف وفوراً طلعت تركض من الاسطبل عطت بصوت عالي وكمشت برجله خايفة اوگع..

-اخاااف اخاااف حباب نزلني اخاااف

-راح تبطأ لاا تخافين

-اميير اخاااف

شلت ايدي وكمشت بقميصه من يم صدره ومغمضة عيوني ارجف وهو ظل يضحك ويحركها وين ميعجبه، شوية شوية حسيته بده يخفف من السرعة الى ان صار الهوا يجنن يطب بريتي وصار عندي توازن..

-فتحي عيونج تَـمني

فتحت عيوني على كييف كلش ورفعتهن اباوع لوجهه، نزل وجهه يباوعلي مبتسم واشرلي بعيونه بحركة "شوفي"..

عدلت گعدتي وانتبهت لقميصه تعقچ من يم الصدر بسبب ضغطة ايدي، هديته بسرعة وباوعت للمزرعة واشوف جنة الله في ارضه، روحي انشرحت ولا ارادي تنهدت بسعادة عجيبببة تغلغلت جوايه..

الفرس تركض بس مو قوي وشعرها الاسود يطير والامير يتحكم بمشيتها بأيد ومشدد على خصري بأيد خاف اوگع وشالي بعده مربوط بأيده، تعدينا من جوه النخل واجتني الضحكة من ضربت وجهي ذبانة مادري نحلة بس چبيرة چانت وتطير..

-هههه شبيچ تضحكين ولج

-يمكن انضربت بوجهي نحلة

-حگها عبالها وردة

فتحت عيوني على غزله عيني عينك گرصت ايده وگلت بطريقة اتصنع الضوجة..

-شگد عيب مو انتَ شيخ

-هههههههههههه كرهت كلمة "شيخ" وعلي

ضحكت وياه واول ما فتنا من يم النهر وخر الشال من ايده وحطه على راسي ولفه عليَّ خنگني...

-لحگونيييي يريد يموتنيييي

-لبسيي عدل لبسييي بت الاوادم

-مو محجبة انييي

-اااخ اشتعلت لشتك بسام العار

لزمت الشال عدل حتى ميوگع ونزلنا قريب النهر، شد فردوس بشجرة وگال نتمشى هنا..

-تدري امير احسك جاي من مسلسلة بدوية

-يعني ما ارهم من مسلسلة اجنبية؟

-لااا وينك وينهم

-اللهم صل على محمد وال محمد ذكريني احرملج تَـمني

-ليش

-خاطر ما تنسحد صلافتج

عفته وركضت للنهر كفيت بنطروني ومديت رجلي بي اللعب بالمي، گعد بصفي بدون لا يمد رجله وطلع الفيب من جيبه يدخن..

-شلون حليتوها ويه بيت عمك؟

-طردناهم

-يااا لعد ومرته وبناته؟

-عافهن العار نساهن

-صدگ تحجي؟؟

-اي والله

-عجيب لعد شلون راح يرجعن؟

-عود نشوف

-اممم، الاجواء مال عصير رمان

-لاا دخيلج

-شنو ليش

-بسم الله الرحمن الرحيم دخيلك يا علي ابن ابي طالب اللهم ارحمنا اللهم استر علينا

-شبييك امير لتخوفني شكوو

-صايرة تشتهين عصير رمان هالفترة مو؟

-اي اني اصلاً احبه

-يا علييي

-لييش احجي

-انا ماحبه بس صاير هم اشتهي

-عادي يعني واذا

-خايبة من اثار سحر المحبة تگومين تحبين عصير الرمان

-كذاب

-بكيفج بعد

-دتكذب عليَّ مستحيل هالحجي

-كيفج خالوو انا شعليه بس لازم اتلاحگ لروحي

-امير انتَ شمعرفك بهالشي يعني سائل؟؟

-اي صاحبي ابو السعودية گال تحبون عصير الرمان وتگومون تشتهون الشونذر

-عزااااا

-هاا شكو

-صايرة احب الشونذرر البارحة ضگته وعجبنيي

-يا ابو فااضل دخييلك

-امير احلف مدا تكذب والله راح اموت خوف

-لا تخافين نلگه حل

-مو اخااف احبك

-چا ليش تخافين ولج

-مو انتَ مو ستايلي

-صلافتج عبرت القارات

-لا خلص خلينا ننسى الموضوع احسه كذب ومبالغة خلينا هسة نستمتع بالطبيعة

-خوشن

-تتذكر من گتلي امسح الحمرة وتسويلي شي بالمقابل؟

-عرفتي شنو تردين بالمقابل؟

-لا بعد انتظر مو هسة بس دا اذكرك خاف تنكر

-لا انا كلمتي وحدة

-اي مو انتَ شيخ

اهتز جسمه بضحكة بدون صوت، ضحكت ارجع راسي ليوره واطبش بالمي مستمتعة.. ظلينا نسولف بأمور عشوائية لفترة واجه ببالي سؤال..

-انتَ شمخلص دراسة؟

-خريج

-لااا مستحيل شيخ وخريج؟؟!!!

-خاب انچبيي

-يااااا

-عذريني بس عليتي گلبي

-تره زعلت

-زعلة البزازين السود

-اوووف شگد مزعج يله جاوب خربج شنو

-شنو تتوقعين؟

-مهندس

-لا

-اممم فنون جميلة

-شمعنى

-لانك رسام

-صح بس لا مو خريج فنون جميلة

-لعد شنو والله حرت

-انا خريج كلية اداب قسم فلسفة

-تشاقة اكييد

-لا صدگ

-انتِ فيلسوف؟؟

-فيلسوف من باب الشرجي

ضحكتتت من كل گلبي ولا توقعته خريج فلسفة، ابتسم واردف..

-ما چنت احب الدوام اصلاً ماردت اكمل دراستي بس شايفة هاي اذني

اشر على اذنه اليسرة، هزيت راسي اي وكمل..

-اذني انشگت من وره ابوي كل يوم يجرني منها ويفرني انا واذاني حتى ادرس واداوم ومن كملت سادس هو راح يقدملي وشمرني ببغداد يدري احبها يگول بلچن تكمل ويصير براسك خير هو ما يدري انا ادوام بس بالامتحانات ومگضيها اشتغل ببغداد

-بس حلو على الاقل كملت

-بالدفرات اي

-الفيلسوف الامـير علي شيخ الامارة

-اممم

-انتَ متواضع

-لا صدگ

-والله يعني منو ميعجبه يكون شيخ او امير عشيرة؟

-انا

-لعد ليش قبلت تكون شيخ

-بعدين نسولف بهالشي احجيلي عن نفسج

-اني تَـمني

-يعني مو مرگتي؟

-اهووووو عود يحشش هو

-ههههه كملي

-مرحلة اولى تربية رياضة امووت على الرياضة روحي بيها وهنا احس كلش محتصرة لان مدا اللعب كرة او اروح جم مادري حياتي كلها تغيرت بين ليلة ويوم

سكت منزل عينه يباوع للنهر، اني هم سكتت احس ماعندي شي ثاني احجي بي وهيج اخذنا الهدوء لفترة من الزمن قبل لا يكسر حاجز الصمت امير من گال..

-نكدر نرجع حياتج القديمة اذا تردين

-شلون

-تردين كرة؟ نجيبلج كرة والبستان كله الج تلعبين بي، تردين جم واجهزة رياضية نجيبلج بالبيت ونسويلج احلى نادي رياضة

ابتسمت ممتنة، درت وجهي اباوعله وهو هم اللتفتلي يباوعلي صرنا وجه بوجه عين بعين ودا اشوف الصدق ينبع من عيونه..

-صدگ تسويلي كل هذا؟

-ما ينرادله شي

-يعني سهلة؟

-كلش

-بس اني ما راح ابقى هنا اريد ارجع لبغداد

هز راسه موافقني وبقى مواجهني، كسرت عيني عنه من طولت صفنتي وفاجأني من لزم طرف حنچي على كيف بأصابعه ورجع يخلي وجهي يوازي وجهه..

-نسويلچ بغداد ثانية هنا

-مترهم

-كلشي يرهم وياي

تنفسي اضطرب وحسيت بضغط كلش قوي صار على عيوني اريد اغمض وماگدر، عيونه حرگتني احسهن ليزر ومركزات بعيوني، زفرت نفس خفيف وعضيت شفتي اسيطر على اللاشيء ماعرف على شنو لازم اسيطر بس كلش مرتبكة، ابتسم واردف بخفوت..

-حلوة بغداد تَـمني بس مو احلا من وجودج بيناتنا

-ماريد ابقى بيناتكم

-بس انا اريد

-ماحبك

-عادي

-انتَ تحبني؟

-لا

-هاا همزين

-اممم

-لعد شتسوي بيه لا اني احبك ولا انتَ تحبني

-نخلي السحر يشوف شغله تمتم

-شلون..؟

-بحياتي ما انحطيت بهيج موقف صعب بس...

بؤبؤ عينه تركز على مكان واحد بوجهي، گلبي صار يدگ بجنون واحس بأطرافي رخت وعيوني بدت تغوش، شهقت جوا انفاسي جافلة من تلمس طرف خدي بأصابعه ونزل نفسه عليَّ و....

يتبع 👑....

━━━━━━ ♛ ━━━━━━

😶🔥!!

توقعاتكممم 👀✨🩷؟؟؟؟

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

چا شيصير من تفگدني بشلونك؟

چا شيصير من تشيل هاي الناس وتخليني بعيونك؟.

━━━━━━ ♛ ━━━━━━

بؤبؤ عينه تركز على مكان واحد بوجهي، گلبي صار يدگ بجنون واحس بأطرافي رخت وعيوني بدت تغوش، شهقت جوا انفاسي جافلة من تلمس طرف خدي بأصابعه ونزل نفسه عليَّ ومجرد حسيته راح يخطي خطوة غلط فوراً وخرت ايده من وجهي وگمت اوكف على حيلي ابتعد عنه..

-تَـمني

-احنه بيناتنا اتفاق امير شنو دتحاول تسوي؟

نظرلي نظرة مطولة على الصامت، ما نطق بكلمة وحدة رجع الڤيب لجيبه وگام من الگاع ينفض بملابسه وتمشى يرجع لـ فرسه فردوس، اللتفتلي طبيعي ولا كأن صار شي هسة وگال..

-يلا نرجع

ترددت اروحله اطرافي بعدها ترجف واخاف لا قوتي تخوني، اشرلي بيده "تعالي" يشجعني اتقدم، بلعت ريگي وتقربت منه هادئة، ضميت شعري الطلع من الشال وگلت بخفوت..

-ركبني وراك ماريد گدام

-صار

ركب الفرس ومدلي ايده يساعدني، انطيته ايدي جرني منها وركبني وراه وگال بدون لا يلتفتلي..

-كضيني لا توگعين

سويت مثل ميگول ولفيت ايدي حول خصره والفرس تتمايل بمكانها وتتحرك، ضرب ظهرها بالحبل على كيف وانطلقت تركض ترجعنا لمكان الاسطبل..

كمية الغرابة والشعور المزعج والنفور الاحس بي مأذيني، مأذيني لان اعتبر هالانسان اخ وصديق عزيز شخص صح فرض عليَّ انخطبله بس ابد ما حقدت عليه حقد حقيقي وكلما اريد ازعل واضوج منه بشكل غريب انسى الصار وارجع اضحك وياه بس الصار هسة استغربته.. كلش استغربته!

ما حسيت تقربه مني بدافع الحب بس ما انكر كلامه چان حقيقي وصادق بس اخر موقف وتقربه من وجهي وكأنه يريد يبوسني چان مو صادق، شي بداخلي يگول الامـير علي تقصد يسويها ويمكن چان منتظر يشوف ردة فعلي..؟

وصلنا للاسطبل نزلت قبله ورجعت للبيت، دخلت جوه شفتهن متجهزات وليلة ورفل مطنگرات وحدة على الثانية..

-حبيبة: انتن ليش مزعطة؟ لشوكت تبقن بهذا العقل الزعطوطي؟؟

-ليلة: هسة ابا الحسن علي يحكم بيناتنا هو حكمه صح وابد ما ينحاز لاحد

-رفل: خايبة انچبييي اختارت اكثر واحد ميت عليها ومستعد يموت روحه بس حتى تحبه وترضى تتزوجه

-ليلة: صوووتچ غبية لا يسمعوج

-حبيبة: باع هاي البطرانة ليش منو بالبيت ما يدري بـ حسن عاشگچ؟!

-ليلة: بنات كافي خلص اسحب كلامي بعد ماريده يحكم بيناتنا، رفل انا غلطانة وتعاي احبن راسج بعد روحي

تسالمن ووحدة حضنت الثانية ورفل بسرعة رضت مع العلم ضايجة بس والله ضحكني وشكلهن لطيف، مافتهمت سبب عركتهن ومالي واهس اسأل.. تذكرت بنطروني العفته بره وحتى هذا مالي واهس اجيبه خيولي ماريده..

اجو الولد يطلعون الاغراض للسيارة وانتبهت لزوجة عمهم مسعود وبناته ماكو، سألت حبيبة عنهن گالت رجع عاصف اخذهن وابوها ما خلى الولد يتعاركون وياه راد بس يتچفى شرهم..

-مبينين شرانيين بيت عمج

-حبيبة: شرانيين؟؟ حبيبتي كولي وحوش كولي ناس ما تخاف الله كولي همج رعاة مخابييل كلشي متاح لان عمي مسعود اصلاً شاخط وعقله بي مشكلة

-بي مشكلة صدگ يعني؟

-اي واكع على راسه بمغربية ولايحه خيط

-عزا صدگ تحجين شو ماتذكر نعمة كال اخوه بي شي

-باع هاي صدكت لاا ولج اتشاقه بس صدگ هو مخبل وخبل ولده وياه احنه ابد ما نتوالم وياهم واخواني يشوفون دم سنونهم ولا يشوفون بيت مسعود

-مبين متعلمين على العركات اشوفكم طبيعيين وممتأثرين

-بهاي صحيح كلش متعودين على سوادينهم تدرين گبل چم شهر حرگو حلالنا الي بكربلاء بس لان كرار دز واحد يخطب بنيتهم سبأ

-عجيب شجاهم ذولة

فرت بيدها تضحك مستهزأة دا اتعجب من الاوضاع هنا وكل يوم أنصدم بشي جديد والسبب نعمة چان قليل الكلام عن اهله وچنت متأكدة يكره اخوانه وميحبهم لان داائماً يغلط عليهم ويسبهم الشخص الوحيد الجان يحبها اخته غزوة..

صاحولنا نركب السيارة وانطلقنا نرجع للبيت، الطريق صار سريع الولد يسولفون سوه ويحششون ولا ضايجين ولا كأنما تعاركو وتلاطمو قبل شوية الوضع عدهم طبيعي، تعجبت من اخذو راحتهم بالسوالف بس فطنت السايق عنده ضعف بالسمع رجال چبير يصير من اصدقاء شيخ علي والا تصيحون بأذنه ياله يسمع..

-حبيبة بهمس: تَـمني شبي الامير؟

-شبي

-شو ما يحجي وخانس صار شي بيناتكم گبل لا تجون؟

-لا عادي

-سألت بس لان اقلق ويظل بالي عليه

ابتسمت وهزيت راسي متفهمة، طلعت تفاحة من جنطتها واندارت عليه كاعد ورانه مباشرة هو وابا الحسن علي..

-حبيبة: اموري اشتهيتلك هالتفاحة

-ماشتهي حبيبتي اكليها انتِ بالعافية

-فدوة لا تردني اخذها

اخذها من ايدها وهالمرة دارت كل جسمها عليهم تسولف ويه التوأم واكثر شي ابا الحسن يجاوبها بقى الامير هادئ..

-حبيبة بهمس: صدگ حسن ردت اسألك شي شوكت عرس منتصر؟

سألت هالسؤال وحسيت بالتردد والوجع بنبرة صوتها بس الفاجأني هو ابا الحسن من كال بأستغراب..

-عرس منتصر؟؟ يمته هاي

-حبيبة: خواته خطبوله

-ابا الحسن علي: صدگ عود امير؟

-الامـير علي: مادري انا هم تعجبت

-ابا الحسن علي: هيووو نصيير ولك راح تتزوج وما تحجي يالعاار

-منتصر: ياهو يتزوج ولك الضيم كاتلني

-ابا الحسن علي: شو يكولون راح تعرس ابن الحلووة

-منتصر: زيج بيك وباليريد يزوجني شكول زواج انا وذني قرداتي نايمات على خوانيگي

السيارة كلهم ماتو ضحك من رفعن راسهن بناته ثنينهن يباوعن لابوهن مبوزات ورقية تكول بلسانها الطويل..

-رقية: اذا احنه كردات انتَ هم كرد

-منتصر: ايا...

-سكينة: مو لان انتَ ابونا ولازم تثير هم قرد

-علي الكرار: وجهة نظررر تنبااااااس وعلي

-علي التقي: خرب عقلك منتصر ولك شني هالبنيات شهالطرگاعة

-منتصر: مو اگلكم بس محد يصدگ عندي بنيات لسانهن اطول منهن

رجعت حبيبة تكعد وابتسامتها من الاذن للاذن كل حالها تغير والضحكة ما فارقتها، فرحتلها كللش ونزلت اهمس بأذنها..

-شفتيي ما راح يتزوج ذني خواته وحدهن يحچن

-اي ايي الحمدلله يارب

-بناته يخبلن ولا اصدگ عمرهن بس ٣ سنوات

-اموت عليهن انا بس هنه ما يحبني مادري ليش

-يااا معقولة؟

-والله كلما اگلهن تعالن يمي ما يرضن بس يحبن امي وعبق

-خاف احد معلمهن؟

-مادري والله بس تحز بخاطري تَـمني

ايدتها صدگ شي يحز بالخاطر من اطفال بريئين ميحبوك شنو السبب يا ترى معقولة خوات منتصر الهن ايد؟

-تَـمني: ان شاء الله يجي اليوم وهالتوأم الحلو يحبنچ وتصيرين مرة ابوهن

همستها همس وغمزتلها، ضحكت تضرب على زندي خجلانة وتنهدت بأبتسامة..

-حبيبة مو چنه عدكم هوايه توأم بالعائلة؟ انتو عدكم وراثة لو شنو

-اي وراثة حتى ابوي عنده توأم

-مستحييل

-والله هو وعمي مرتضى "ابو منتصر" يكونون توأم

-شگد حلوو

-حتى من جهة امي عدهم هواي توأم فـ الوراثة من الطرفين

-هم تتمنين لو چان عندج اخت توم؟

-يختي ماريد توم اريد بس اخت طگت روحي وانا مگابلة تسع ولد زين ما صرت زلمة نفسهم

-والله صح

ضحكنا ثنينا واللتفتت على عبق الكاعدة ورانه منسجمة ويه ليلة يسولفن، كسرت عيني على الامـير علي شفته يباوعلي وعاگد حاجبه مادري ليش بس يمكن استغرابه بسبب ضحكتي ولاني طبيعية وما ضايجة ومتأثرة من الصار هالشي خلاه يتفاجئ؟

-رسمية: يمة تقي بس نوصل اخذ اخوك للمستشفى يشوفون جرحه بعد روحي

اللتفتت على علي الحـق وشفت عبق تباوعله بأهتمام، رمقها بنظرة ويه ما امه حچت وهي دارت عيونها بسرعة واول شخص صابني الفضول اشوفه اذا منتبه وياهم لو لا هي سلوى وفعلاً سلوى چانت تباوع لـ عبق بنظررة لئيمة حقييرة خازرتها وتتوعدلها بعيونها..

-علي الحـق: لا يمة ما يحتاج انا زين

-رسمية: يمة وليدي لا بعد امك يظل بالي وياك روح ويه اخوك يمكن تحتاج خياط فدشي لا تهمل روحك حبيبي

-علي التـقي: انا اخذه يمة لا تخافين

-رسمية: عفية بالسبع ابن امك انتَ يا بعد گلبي

ابتسمت استمع لكلماتها الحنينة ويه ولدها وحطيت راسي على كتف حبيبة ومادري شلون وشوكت غفيت، حسيت بيها تكعدني وتكول وصلنا..

مطيت جسمي ونزلت من السيارة وبوجهي صعدت فوك لغرفتي وقفلت الباب ورايه، شمرت روحي على الفراش اكمل نومتي وما گعدت الا على التسعة بالليل تعبااانة وجسمي متكسر وبطني تلويني من الجوع..

گمت لميت شعري واخذت ملابس ورحت للحمام اسبح، ازعج شي بغرفتي ماكو حمام واضطر اطلع لحمام الصالة الفوگ وابدل هنا مو مال اطلع بالبرنص خاف يطلع واحد من الولد بوجهي..

كملت وبدلت لتراك بيت وطلعت من الحمام ارجع للغرفة صليت ومشطت شعري، تمكيجت خفيف وتعطرت ونزلت جوه على كيفي رجلي بعدها توجعني ومجرحة، شفت البنات ديسون العشا بالمطبخ وكل الانظار صارت عليَّ من دخلت..

-ابرار: گلت ما راح تگعد اليوم وتجرها للصبح شجاچ يمعودة

-تَـمني: صايرة هوايه انام استغل العطلة ما بقى شي ويرجع الدوام

ابتسمت تهز براسها، كعدت على الكرسي شفت محضرين بتيتة يردون يگشروها ويگصگصوها اخذت المگشارة اني اسويها واسولف ويه حبيبة وعبق وشمس واوقات ابرار تدخل وتشاركنا بالحديث..

طبعاً هووايه شخصيتها ونفسيتها تغيرت من تصالحت ويه علي الدر حتى ملابسها تغيرت هسة واكفة تسوي عشا ولابسة دشداشة حمرة مخصرة كلش حلوة عليها ومرتبة شعرها بطريقة مختلفة بالعادة تسوي ظفيرة..

-تَـمني: بنات شو انتن حليانات اليوم شسالفة

-عبق: وينه الحلاة باعي جرودي يمعودة

-شمس: عبق لو تلبسين گونية بتيتة هم تطلعين حلوة حبي القالب غاااالب

-عبق: خجلتيني عابتلج

ضحكنا سوه وكملنا العشا، صبينا بمواعين واخذنا السفرة بينما يجون الولد كاعدين بالديوان ويه ابوهم، ركضن البنات يلبسن حجاب وصايات فوك ملابسهن بس عبق صعدت فوك للمخزن لحد اليوم متكعد ويانه على اكل ولا تتواجد بمكان بي الولد تجنباً للمشاكل..

الامير علي ما موجود بس الباقين كلهم هنا، اكلنا سوه وكملت اول وحدة كعدت على القنفة اتفرج عليهم بينما سلوى مثل العادة قبل لا تخلص اكلها تكوم تسوي الچاي، كملوا اكلهم وگمنا البنات ننقل الاكل للمطبخ وبسرعة وگفن شمس وابرار يغسلن المواعين عدنا جدول هنه عليهن مواعين العشا واني وحبيبة وعبق علينا الغدة بس اكثر وحدة تشتغل وتكرف بالبيت عبق متكعد ولا ترتاح ولا مسموحلها تكول تعبت من وره سلوى!

رحنا اني وحبيبة نكعد وياهم بالصالة ونستمع لاحاديثهم، گامن غزوة وزهرة گالن يردن يرجعن لبيوتهن تعبن بس عمو علي ما قبل وطلب يباتن هنا اليوم..

-غزوة: چا سلوى وينهي

-زهرة: تصب الچاي اظنها

گامن ثنينهن للمطبخ ورسمية راحت وياهن شوية ورجعن يسولفن سوه وسلوى بيدها صينية الچاي قدمتلنا كلنا بالسرة صرت اني اخر وحدة...

شربت الچاي وبالي سارح افكر بأمتحاناتي شلون ومنو راح ياخذني وقاطع صوت افكاري حبيبة تگول وهي تحط چيلة شكر بالچاي مالتها..

-حبيبة: اهووو باجر العزيمة وحايرة شلبس

-تَـمني: بس باجر مو جمعة

-حبيبة: اي ادري هاي غيرها امي صارلها يومين تعزم بالنسوان

-بس احس خالة مالها واهس

-اي من وره الصار اليوم بس بعد عيب نلغيها

-شنو مناسبتها؟

-لخطوبتكم انتِ والامير

-بس هي العزيمة مو تصير وره الزواج؟

-لا احنه عدنا وره العقد ووره الزواج لازم وعيب لوما سوينا، حرامات ما لحگتي على عزيمة عقد علي البدر وشمس چانت كللش وناسة بس هسة اجه دورج تتونسين كشخي احلى كشخة وضغطي الحياية

ضحكت على حماسها وزادت ضحكتي من جرتني من ايدي تصعدني فوك لغرفتي تختارلي ملابس..

-تَـمني: باعي اشتريت هوايه فستانين من بغداد كلش حلوات اختاريلي واحد

-لاا لا تلبسين فستان هيج گعدات نلبس بيها لبس عربي دراعات مرتبة لو قفطان

-بس ماعندي وما اللحك اطلع اشتري

-انطيج مني هسة شكو تعاي شوفي واختاري

-لا حبيبة اللبس من فساتيني احسن باعي هذا حلو

-تَـمني كل العيون راح تصير عليج وكلها حادة سنونها يردن يشوفن خطيبة الامـير علي الكتل نفسه عليها لا تخليهن يحچن عليج ويعيبن ادري بيهن سلابيح ويردنلهن سالفة يسولفن بيها

-خاف امج تسويلنا هوسة لان اللبس من ملابسج

-لا ما تحجي بالعكس لان هالكعدة مهمة تعاي يله

اخذتني لغرفتها وفتحت كنتورها وما شاااء الله على كمية الملابس العدها، تهيم العين وتصفن على الصايات الخليجية الثگيلة والدراعات والفساتين وحتى الدشدايش يخبلن وكلهن مبين من ذني الغاليات..

-تَـمني: حبيبة وعبق شلون؟

-انطيها دراعة جديدة امي ما تدري بيه اشتريتها لان وصيتها من بيج وتقي استلمها يله يله شوفي واختاري التعجبج

گلبت بيهن وحدة وحدة استمتع واتفرج على الملابس الحلوة، رفعت راسي بالكنتور عدها خانة طويلة كلش متروسة جنط وماعندي شك جنطها متكون ماركة لان شكلهن كلش حلو ومرتب وشايفتهن هوايه على النت.. نزلت عيوني للخانة الجوه كلها احذية شيعجب الواحد موجود فلات ورياضي وكعب ودبل كعب الخانة متروسة وعدها بعد كشوانية صغيرة بغرفتها هم متروسة احذية..

اختاريت فستان حبيبة تكول يسموها دراعة بس والله شكلها فستان بس المهم اخذتها للغرفة وفتحت كنتوري ارهم وياهة اكسسوارات، رتبت ملابس العزيمة وحطيتهن على جهة وكعدت بالغرفة اگلب بتلفوني وراهة صحت لـ عبق نكمل مسلسلتنا لحدما غفينا ثنينا بغرفتي..

من الصبح گعدت على صوت سلوى طابة بغرفتي ولازمة بيدها مكناسة ام السعف مبللة وترشگها بوجوهنا لعبت نفسي وحتى لحافي السمائي تدمر صارت بي نقاط جوزية..

-تَـمني: هو هيييج يگعدوون

-سلوى: سمممم الحسننن بت الچلب ما تگوومن الوصخاتت للظهاري نايمااات

-تَـمني: والله ماكو وصخة غيرج طلعيي بره غرفتي

-سلوى: ادبسززز لسانج طولان ينرادله گص بالقندرة

صارت تضربني بالمكناسة على راسي وجسمي تخبلت عليها واخذت المكناسة من ايدها وشمرتها بعيد وهجمت عليها اكفش بيها وهي تدافع عن نفسها بس خررب روحها طوويلة وضخمة ولا اگدرلها وحدي وهاي عبق صايرة بنصنا تفاكك لحدما سلوى رفستها بصدرها شفتت روح البنية تطلع من عيونها..

-تَـمني: حررام عليج ياااا زبااااالة

صفگتني راشديات ونامت عليَّ نيوم اختنگت والهوا ضاع مني ومتقبل تگوم، بصعوبة كللش جريت ايدي من جوه جسمها وبعكسي ضربتها بوجهها انردت ليوره وصاحت بخبال..

-ااااااااخ خشمييي طگ خشممممييي كسرت خشمممي بت الزماايل

-تَـمني: اجيتينا من الصببح مثل المخابييل ادري انتِ همجية؟؟ وين رابية بالشوااارع؟؟؟

-سلوى: على الاقل انااا بت عالم وناااس مو بت نغل ما معروف اصل ابوي منين

-تَـمني: ابوية يشررفج ويشوف عشررة من امثالج يا بربرية

-عبق بتعب: كااافي حبابات كاافي خالة شبيچ ويانه

-سلوى: ووولج انتِ لو اكضج رووحج اطلعها وحگ زينب اموووتج بيدي واگصگص لحمج بسنوني

نبتت اظافرها تگرص بأيدين عبق وعبق تفلت نفسها وتصيح، فار دمي صعدت على الچرباية وطفرت بكل جسمي وثگلي فوگ سلوى وعضيتها من چتفها..

-ااااااااخ چتفيييي خايبيين راح اموووتن جوه ايد بت عييسى الارملللة

-تَـمني: ارررملة واخذت شيخ عشيرتكم واميركم وعلى اعنااادج

فكت عيونها مصدومة وبعد كلمة ما حجت طلعت من غرفتي لازمة خشمها شوية صار بي زراگ ونزلت تدردم وتحجي علينا وتدعي وتتحسب..

-عبق: فدوة لحلگج اييي والله

-تَـمني: ملييييت منها مليييت والله لو بيدي اطردها بالشوارع تهيت متستاهل تعيش ببيت شيخ علي المحترم

-عبق: خليني انزل انظف قبل لا تصيرلي مصيبة حبيبة دوام بالمستوصف اليوم

-تَـمني: لا تنزلين ختولييي

-يمعودة انتِ لا تنزلين اني لازم اروح عود تعاي تريگي ولا تعنفصين

-ولج كتلتناا وتردين تنزلين تنظفيلها؟؟

ضحكت وسوتلي بيدها "باي" ونزلت جوه والله لو اموت ما انزل ختولي مو مال واحد يحترمها وينظف بيتها المعفن خليها هي محتارة هسة شوية واصيح لعبق تجي..

رحت للحمام غسلت وسبحت ورجعت للغرفة طلعت حلويات من كنتوري وكعدت اكل بيهن، انتظرت نص ساعة ومديت راسي من محجر الدرج اصيح لـ عبق..

-سلوى: شكووو شتردين جاي تنظفف

-اريدها تساعدني

-امشيي لج وانتِ ياهوو وتساعدج

-اگولج داده انتِ شبيچ متنرفزة من الصبايحات؟! صعديلي عبق ومعليج

-ولي وليي

-عببببق اريدج عبوووقة

-ما تجي مو بكيفهاا وبعدين انتِ ساعدي روحج لو مگرررمة

-تره العزيمة مسويها علمود خطوبتي اني واموري راح يزعل اذا يعرف دتضوجوني وما دزيتولي مساعدة فوگ وبعد بكيفج

-ولي وليي خليني اناا اتفاهم ويه الامير

-اوكي حبي

گدامها طلعت تلفوني واتصلت بي، ظلت معلگة راسها تباوعلي من محجر الدرج وعيونها بگصتها راح تموت، توترت من فتح الخط واجاني صوته عزا بعيني ولا توقعته راح يجاوب، فتحت مكبرة صوت وگلت..

-الوو هلو امير شلونك..

-الامير علي: هلا بيج.. انتِ شلونچ شلون صارت رجليج؟

-تَـمني: زينة زينة..

-الامـير علي: محتاجة شي بوية؟

-سلوى: عبييييييقة تعااي شوفي تَـمني شرايدة منج

-تَـمني: هاا.. لا حبيبي هيج ولا شي سلامتك يله باي..

طبكت التلفون بوجهه كردة فعل ورجعت للغرفة، ثواني واستوعبت اني گتله حبيبي؟؟؟ اني گلت لامير حبيبي؟؟؟ يا گاااع انشگي وبلعيني عزا بعييينج تَـمني!!

دقايق وصعدتلي عبق لافة ربطة على شعرها بالعكس شلون باب الحارة ضامة شعرها وطالعة رگبتها وتنشف بأيدها بالدشداشة..

-عبق: ها حبي بشنو اكدر اساعدج

-عبق عبق عبققق

-ها شبييج

-گلت للامير حبيبي!!

-چذااابة

-وحق الله عزاا بعيني

-الله وهو شگال؟؟

-لج ما لحكت اسمع جوابه وطبگت التلفون بوجهه

-هههههه تلگي مكيف، هسة كوليلي بشنو ترديني اساعدج خالتي خبصتني

-اريدج ترتاحين

-ما فهمت

-تساعديني من ترحين تسبحين وترتاحين وتتحضرين للعزيمة تعالي اني اسوي مكياجج

-لا تَـمني خالتي تذبحني والله

-معليج بيها ختولي اذا سوتلج شي اتصل بالامير وهم اگوله حبيبي لخاطرج

ضحكت تهز براسها تعجبت ما لحت مثل كل مرة بس الظاهر هالفصعونة هوايه تحب الامير وتحتمي بي..

-عبق: لعد رايحة اني اكمل واجيچ

-انتظرج

طلعت واني اللتهيت ارتب نفسي العزيمة غدة وما ظل شي ويوصلون المعازيم، طلعت الدراعة مال حبيبة او خليني اگول هي عبارة عن فستان طويل مخصر لونه وردي فاتح مطعم بذهبي من الردن والياخة ونازل من الوسط كله شغل ناعم بالذهبي وفصوص صغيرة كلش نفس اللون..

بدلت بيها ولان اني سمنانة هالفترة طلعت شوية ضابة عليَّ وگعدت بشكل احلى، ابتسمت معجبة بروحي ليش اجذب وأتواضع طالعة اخبل بيها شكلها راقي قماشتها ستن ناعم والشغل مطرز بدقة..

سويت شعري كيرليات كبار ومكيجت لروحي مكياج ذهبي وتعبت على عيوني طلع المكياج يخبل، فتحت المجر اشوف اكسسوارات شنو يرهم وقررت اللبس محبس التخم مال مهري والحلقة والسوار بس متحتاج كلادة لان شغل بيها بالصدر..

لگيت عندي بين اغراضي خلخال "حجل" شكله عبالك ذهب ينلبس على كل الرجل وبي محابس للاصابع خمستهن ونازل زناجيل ناعمة يغلف الرجل شكله كلش حلو واكتملت اللبسة..

بينما تعطرت وحطيت حمرة سمعت صوت باب الحوش ينفتح، فتحت الشباك اشوف منو لگيتها حبيبة هستوها راجعة، بنفس اللحظة دخلت عبق لغرفتي هم مبدلة بس بدون شعر ولا مكياج..

-عبق: تَـمنيييي شنو هالجمممال

-والله؟؟

-والله العظيم تخبلييين تخبلييين تعالي اصورج حرامات كل هالكشخة ومتاخذين صورة

-لعد يله

گعدت على الچرباية واخذتلي كم صورة وانوب طلعت لصالة الطابق الثاني وهم اخذتلي صور، كملت هي وبقيت اني اخذ سلفيات، اخذت صورة لعيوني وشوية من شعري طالع كللش حبيتها، كتبت عليها..

"‏أكثر مَا يميزها عن غيرُها

‏تفاصيلها ، ‏لقد كانت الأجمَل حُزنًا

‏والأشدّ فتنةً إذا ضحكت .🖤"

نشرتها ستوري وگمت اسوي مكياج عبق وراهة اجت حبيبة تريدني اسويلها مكياج وثنينهن سويتلهن شعرهن طلعن وحدة احلى من الثانية..

-تَـمني: اللهم صل وسلم على نبينا محمد بنات طالعات كلش حلوات

-حبيبة: لا عزاء للحياية

علگت المولود "عنك اذا سألوني" وگعدنا نصبغ اظافرنا وهمزين كلنا توضينا قبل، احس بسعادة من اشوف عبق تضحك وفرحانة ولاحظت حبيبة عيونها تلمع كلما عبق تروح للمراية تباوع لشكلها وتمدح روحها فرحانة بشكلها..

صلينا الظهر ونزلنا من صاحتلنا رسمية الظاهر مچانت بالبيت وهسة ياله اجت وياهة العمات وفراقد ونسوان عمام حبيبة، رحنا حتى نسلم وفرحت كلش بردة فعلهن الهلاهل من كل جهة تتراگع ويسلمون عليَّ بحرارة ويمدحون ملابسي وشكلي وترتيبي..

-زهرة: حگه الامير متسودن عاينن هالحسن اللهم صل على محمد وال محمد

**

"عبـــق"

اركض منا ومناك لابسة وكاشخة وخالتي ما خلتني اكعد حالي حال البنات معتبرتني خدامة بهالبيت، تعبت شكدما دعيت ربي يخلصني منها وماعرف راح اشوف هاليوم لو لا..

-فراقد: ها عبيقة شو هنا ولج

-عبق: ادوغ دهن للتمن خالة

-فراقد: خوش صبي چاي واخذي للولد فوگ كاعدين

-هسة اصيح لحبيبة اوكفي

-روحي انتِ حبيبة گاعدة ويه النسوان

-مو خالة سلوى متقبل اني اصعد رايحة اشوف حبيبة ثواني

-ووولج

انخلست من جرتني من ايدي وگرصتني بنفس الوقت، خزرتني ونترت بين سنونها..

-انتِ الخدامة هنا مو حبيبة وهذا شغلج!! امشي ولي اخذيلهمم الچااي

دفرتني بعيد ونفضت ايدها مكشولة لان لزمتني، بلعت ريگي وغصتي وياه ميتة قهر، عضيت على شفتي اسيطر على دموعي لا ينزلن وهزيت راسي اي، صبيت الچاي الهم وحطيت شال على راسي..

-فراقد: افتري على واحد واحد مو تحطي بالصالة وتنزلين

مجاوبتها وشلت الصينية وصعدت فوگ، اول من رحتلهم الامـير علي وابا الحسن بس مموجودين ثنينهم، رحت لغرفة تقي مبدل يريد يطلع وما راد چاي.. عفته وجريت نفس عميق ودگيت باب غرفة علي الحـق..

-تعال

مسحت جوه عيوني خاف سالت كحلتي ومبين باچية ودخلت لغرفته، بدون لا اباوعله عرفته بدون قميص مثل عادته ومتمدد على الفراش..

-جبتلك چاي

-انطينياه شكراً

حطيته على الميز واللتفتت اطلع، ضحك وگال..

-يمعودة مابيه اكوم جيبي بلا امر

شلت الكوب ووديته بصفه على الميز ومنزلة عيوني اخااف ارفعها ويحطني بموقف محرج..

-شكر اكو

-بي شكر

-احبه حلو

حطيتله خاشوگتين شكر من الشكردان، متوترة وايدي ترجف نص الخاشوكة الثانية وكعت بالكاع على زوليته..

-اسفة.. هسة.. هسة انظفها دقايق

-فدوة الج ما صار شي

ركضت للصالة جبت المكناسة والمكرافة ورجعت اكنسها بينما هو يشرب الچاي مالته، ارتباك وتردد يصيبني من ادخل غرفته اريد بس اطلع..

-ماكو الحمدلله على السلامة

رفعت عيوني اباوعله ابتسملي وبرزن اسنانه البيضة كلش، صرنا عين بعين ومادري شجاني وظليت اباوع لعيونه لونهن يجذب ولا ارادي الشخص يظل صافن بيهن..

-بشري شطلعت

-شنو هي

-الخيرة

نزلت عيوني بسرعة عاگدة حاجبي منحرجة، گمت من الگاع ومن الثوالة دا اطلع وانرگعت بالكنتور مالته ورجع تطشر الشكر بالكاع من المكرافة..

-علي الحـق: عوفي قبق انا اللمه

-لا لا اني

نزلت اكنسه، گام تقدم بأتجاهي وگنبص بصفي سند عكوسه على ركباته وظل يباوعلي، نَفَسي كلما جايله يضيق حتى كنس مدا اعرف اكنس، اوشكت اكمل وانتفضت بقوة من طخ ايدي الشايله المكناسة..

-لا تلمسنييي

-ما كضيتج جاي اخذ المكناسة من ايدج

-گتلك اني اكنسس ليش تعاند؟؟

-وانتِ شبيچ متسودنة اليوم!!

-شعلييك جبتلك چاي وتطشر الشكر اني اكنسه انتَ شكو

-وجعع اي والله انا شكو مو شكول واحد يساعدها

-ماريد مساعدتك لان كلما تساعدني لو اني يصير بيه شي لو انتَ!

-هاا وحضرتج خايفة عليّ هسة؟

-خايفة لا تورطنا بمصيبة!!

-مصيبتيش خرب عرضج يعني شني تتوقعين يطبون علينا بالغرفة ويكولون چانو يـ......

قطع كلامه جاحظ عيونه ما فهمت شنو راد يگول وما اهتميت، گمت من الگاع وبيدي المكرافة والحظ همم وگعت من ايددي!!

-علي الحـق: اححح

-اوووووف

-فاهية صايرة عنق شمالج

-وخر هناك امشي اكعد على جربايتك

-چا تعاي غطيني

-يلا روح كدامي

راح لچربايته واني من التوتر جريت الغطا اغطي، باوعت لوجهه لگيته يضحك وهسة ياله استوعبت شنو دا اسوي ذبيت الغطا من ايدي وشمرته بعيد..

-ولج لييش غطيني

-مو طفل انتَ

-بيج حنية ام تعالي يمة غطيني اروح فدوة لخدودج

تأفأفت مزعوجة واخذت المكرافة والصينية اعوف الشكر هنا عود بعدين انظفه من يطلع..

-چا والشكر ما تلمي

-لمه انتَ

-مو انا مريض ما تشوفيني

-مابيك شي

-كحكحكح مريض انا

-علي الحـق!!

غمضت عيوني نافذ صبري حطيت الاغراض على الميز ونزلت اكنس بسرعة بسرعة وهم اجاني، طگت روحي ورفعت راسي عليه خازرته ضحك بصوت عاالي ونزل نفسه ياخذ بوكس صاير بصفي ديشيله من الگاع وبنفس اللحظة انفتحت الباب علينا!!!

-عبق!!!

روحي خرطت ويه صوتها وشهگتها ودگة صدرها العالية، ما رفعت راسي اباوعلها وظليت اكنس والفرجة تختض بيدي من الرجفة..

-علي الحـق: ها سلاوي شو بغرفتي؟

-سلوى: عبق شتسوي هنا علي الحـق؟؟

-علي الحـق: ردت منها چاي

اللتفت يأشر بيده على كوب الچاي مالته، رفعت عيوني على خالتي اشوفها خازرتني عيونها راح يطگن.. لميت الشكر وگمت اخذت الصينية وطلعت اهرول من غرفته عبرت الصالة اركض للممر ثواني ولحگتني تمشي ورايه وتنتر..

-اوووگفي اوووگفي

-خالة عندي شغل

-اووووگفي لا اطييحه لحظج

تصنمت بمكاني منهارة گوة واكفة على حيلي، هستوني دا اللتفت عليها وما حسيت الا براشدي شعل خدي وجرتني من اذني تنزل راسي لرجليها..

-شااايفة هاي اذنج؟؟؟ والعباس الچفل زينب اشلعهاا شلععع واطبخهاا لولد شيخ علي ياكلووها

-خالة والله اني....

-انچبيييي انچبيييي

تنتر بهمس وتكفخ بوجهي وراسي لحدما وگعتني بالكاع، بجيت عاجزة كاتمة صوتي واجت بكل حيلها تدوس على راسي بشحاطتها..

-امووتج اشررب من دممچ تتلوگين للولدد تردين تلوفين عليهممم

-لا لا والله لاا فراقد جبرتني اصعد الچاي الهم

نزلت لمستواية ترفع راسي وتجر بأذني من جديد، لزگت وجهي بوجهها ونترت..

-تودين الچاي واسمع ضحكته ليوين واصلة؟؟؟ اسمعج تصيحيله علي الحـق وتتدلعين عليه؟؟؟

-لا والقران وروحه لابوية مچنه نسوي شي

-ادووس بگلبج لو سويتو شي!! سمعي ولج عبيقة سمعييي زييين وحطي چلامي ترچبة بأذنج

تحجي وتجر بأذني وتوديني منا ومنا احس اذني انشگت وراح تنشلع اشتعلت نار، اردفت بهمس ناصي..

-انعل امج على ابوج لو سمعتج تصيحيله بأسمه مرة ثانية فهمتييي

-ما اصيح والله ما اصيح

-كلهمم اذا سمعتج تصيحين لواحد بأسمه روووحج اطلعهاا ومحمدددد

-خلص حااضر صار

-الضباط سيدي، ابا الحسن تصيحيله المحاامي علي البدر استااذ ونور وسور وكرار هم تلگيلهم لقب والاميرر شيييخ فهمتيييي

-فهمت والله

-طابتله مزوگة هي وكحلتها وحمرتها بت الچلببب تريد تغري الخدااامة الساقطة الرخييصة

دفرتني برجليها وداست على صدري بكل حيلها، صرخت متوجعة رايحة روحي لميت جسمي بأيدي ابچي بالخنسة، عبرتني وقبل لا تنزل كملت بحقارة..

-نزلي كملي شغلج مچانچ هنا خداامة لا اكثر ولا اقل يلااا....

**

"تَـمني"

نزلت عبق من فوگ خدودها حمرر دم وشعرها نصه طالع من الشال ومهووس، ركضتلها اني وحبيبة وسلوى وگفتنا متقبل نروحلها..

-حبيبة: يمة هددينيي

جرت ايدها من امها وركضت لـ عبق تسألها شبيچ وعبق بس تمسح بدموعها، ما خلوني اروحلها رسمية تريدني وياهة ظل گلبي نار عليها وتفكيري كله بيها..

بدوا الناس يوصلون وفرشوا السفرة باوعت لعبق وضعها احسن ارتاحيت من شفتها تبتسم ويه ليلة وتجاوبها من تحجي، البنات هنا ما شاء الله يروشن كلهن شابات وملابسهن كلش حلوة ومثلما گالت حبيبة الكل لابس دراعات..

تغدينا وردت حبيبة وعبق يگعدن بصفي، تونست هوايه لان محد چان ينظرلي بنظرة "ارملة نعمة" كل كلامهم وكلشي بيهم تغير حتى نظراتهم اكو بيهن حتى حسيتهن يجاملن زيادة عن اللزوم لدرجة رفل همست بأذني تضحك..

-اللواگة فوول

-تَـمني: هههه لا يمكن هي لطيفة

-ختولي هاي اكبر حية اعرفها

سكتت ما اجاوب واللتهيت اكل، كملنا وساعدت بشيل السفرة بس محد خلاني محد ابد وخالة رسمية لازمة ايدي وتفتر بيه بين النسوان مكيفة، صراحة حسيت روحي متزوجة مو مخطوبة لان الكل ديدعيلي بالذرية الصالحة والسعادة..

-رسمية: ام عمار عايني لشيخة الامـير علي شحلاتها

-ام عمار: يا بعد روحي شون بنيات حليوات ذني تعاي حبوبة احبنچ

نزلت ابوسها وحسيتها تگرصني من زندي بقووة، عطت بهمس متوجعة ورسمية وام عمار ثنينهن ضحكن..

-ام عمار: ههههه يا بعد گلبي عاينيها فاهية

ابتسمت ممفتهمة سالفة الگرصة بس بعدين حبيبة گلتلي يؤمنون بخرافة كل بنية تتزوج او تنخطب من واحد زين وقسمتها تكون حلوة يگرصوها حتى ياخذون شوية من حظها لبناتهن..

تملصت من النسوان وصعدت فوك تعبت من المجاملات، اخذت تلفوني ونزلت اكعد بالمطبخ ويه البنات وفتحت تلفوني اگلب بي، شوية وفز گلبي ويه رسالة حساب بالريكوست معلقلي على الستوري وكاتب..

"مشتاقلج موت!"

كلشي بيه گام يرجف انهبطت ما حاط صورته الشخصية ولا يوزر حسابه بأسمه، فتت على حسابه وگلبي وگف من شفته محسن! هذا منين لگه حسابي الجديد خرب!!

شلته من المتابعين وحذفت رسالته وسويت حسابي خاص، ارتاحيت شوية ورجعت على الستوري اشوف منو شافها بلكت تالة تكون منهم بس حرامات ماكو حسابها ولا دليل على وجودها..

سديت تلفوني ضايجة لا تالة ولا نرمين ولا احد اعرفه شوكت ارجع لبغداد واروح لـ نرمين واجبرها تسوي حسابات مثل الاوادم حتى اكدر اتواصل وياهة لان ماعدها مواقع تواصل غير الواتساب وما حافظة رقمها وباقية تايهة بدونها وبدون اخبارها..

-ليلة: بنات اجت الملا گومن گوومن

گمنا سوه للصالة ويه ما بدت الملا مچنت اعرف جايبين واكو هيج اجواء، قرت عن الامام علي لان جاي عيد الغدير سامعة بي بس ماعرفه زين بس واضح هو عيد مهم بالنسبة الهم لان الدنيا انگلبت هنا فرح وسرور وهلاهل..

للمغرب الرقص والفرح قائم، صورت شوية الاجواء كلش عجبتني بس الملا شكلت الذمة يطلع أي تصوير لانها تستشكل، بينما اني اصور اجاني اشعار على تلفوني من حساب الامـير علي كاتب..

"گلبي يوجعني"

عگدت حاجبي مستغربة وفتحت رسالته، كتبتله مستعجلة..

"ليش؟؟"

مجاوبني، رجعت كتبت..

"شبيك ليش گلبك يوجعك؟؟"

هم ميجاوب انوب اني گلبي لزمني، گمت لغرفة خالة رسمية اريد مكان هادئ، دگيت عليه يررن وميشيله انخلست والف فكرة اجت ببالي، دگيت مرة ثانية وثالثة ميجاوب خفت صايرله شي وميكدر يجاوب التلفون فوراً اتصلت بأبا الحسن..

-ابا الحسن علي: الو

-الو هلو ابا الحسن انتَ وين؟

-بالمكتب ليش خوية محتاجين شي؟

-لا باوع امير دزلي رسالة گلبي يوجعني ومن جاوبته ميرد وحتى اتصالاتي ميجاوبهن خاف صارله شي؟؟

-صدگ عوود؟؟؟

-اي والله انتَ تدري بي وين؟؟

-اي بالمحل هو هسة اروحله واشوفه يمكن ضغطه لا يظل بالج خيتي ولا تبلغين احد

-تمام انتظرك فدوة مو تتأخر

-لا هذا طالع

سديت الاتصال منه وبقيت گاعدة هنا ادعي ميكون صايرله شي ولا ادري بي عنده مشاكل بالضغط بس يارب يكون مو شي خطر، عبرت نص ساعة واتصل بيه ابا الحسن علي جاوبته بسرعة..

-ها ابا الحسن؟؟

-رحتله للمحل ضغطه معلگ وكاض گلبه الحمدلله من لحكت عليه

-لييش هيجي صار ما عرفت؟؟

-مادري شحاچي وياه ابوي بس اكيد على سالفة المشيخة ادري بأبوي ماعنده غيرها

-هسة انتَ اخذته للمستشفى؟ اكول لخالة نجيكم؟

-لا لا ما يحتاج هسة بس تكملون العزيمة اجيبه يجي يرتاح بالبيت

-جيبه هسة ندخله من شباك غرفتي

-شني؟

-شباك غرفتي بي درج مناك خلي يصعد

-لا شني نتختل ما يحتاج هسة اخذه لبيت ابو كربلا

-تمام

سديته منه افكر شنو الوصله لهاي الحالة وشنو الشي الي گله ابوه خلاه يتخربط هالشكل؟ طلعت من الغرفة للصالة وعفست وجهي من شفت زوجة عمهم مسعود وبناتها جايات، كللش مبين على وجه خالة رسمية ما بالعتها بس بقت تجاملها گدام النسوان حتى مينفضحون..

-صابرين (مرة مسعود): ها هاي العروس صلاوات شني وين خاتلة حبيبتي ما تخلينا نشوفج

-رهف (بنت مسعود): اظن شفتها طلعت من غرفة عمة رسمية

-صابرين: هاا تخلين سحورة هههههه

جحظت عيوني مصدومة من جملتها واليذبح حچتها بصوت عالي خلت النسوان كلهن يلتفتن يباوعولي حسيت وجهي صار هطوله من الفشلة، استجمعت قوتي ودا اجاوبها ووگفت خالة رسمية بمكانها وگالت بتعالي..

-رسمية: لا خية مو دروبنا السحر بس بعد معروفة كلمن يرى الناس بعين طبعه

-صابرين: مو دربكم؟ هههههههههههههههه

ضحكتها رناانة وعاالية تجذب الكل بحيث خالة رسمية نطت عيونها على جرأتها من كملت..

-صابرين: رسمية خية ماكلين من نفس الطاس ونفس الماعون كلنا نعرف بعض ونعرف شسويتي بيوم مهر ابنج

-رسمية: طلعي برااا للللچ

عاطتها بعلو صوتها واشرت بأصبعها على الباب النسوان صارن يبسبسن ويه بعض متفاجأت وصابرين مستمرة بالضحك، تفر بيدها وتخرخش سوارات الذهب بيدها وتكمل..

-صابرين: خابزيكم وعاجنيكم بيت عليي لفطتوا فلوسنا وفلوس نعمة من خذه وليدج ارملته

-رسمية: بيج خيير اوصلي لربع من وليدي التحجين عنه راعبكمم ومرجفكمم تتراعشون من طاري اسمه تعرفووه صگاركم وفنه زلمتج لو فك حلگه ويااه

-صابرين: طبعاااً طبعاااً چا امه سحاارة وملچمة حلوگ الزلاام طبعاً ما يكدرون يفتحون حلوگهمم ويااه اكيد مسويتله عمل لو شايل خرزه حتى يصير اميير الامارة ويضحك على الموجودين

تحجي بحرگة وصوت مسموع كل الموجودين ظلوا يحجون ويحاولون يهدأون الوضع بس ولا سكتت..

-غزوة: انلصميي صابرين ولملمي كرامتج وطلعي بره!! ظلي نبحي هنااك بالشارع وحدج ويه الچلاب الهايته

-صابرين: عاينوو عاينووو ياهي تحجيي غزووة اخت زلمتيي وتاج راسيي غزووة انتِ مچانچ على راسي وما اردنچ عبنچ اكبر مني وافهم بس هاي ام السحورة رسميية ما اسكتلهاا واطلع كل خياسهاا

-رسمية: ام الخياااس كاعدة ببيت زلمتي الكاتلج وحارگچ وتلعلين مثل الهوواييش

-صابرين: زلمتج الاخذ دخيلة عليج؟؟؟ لو الباااگ اخوانه؟؟؟

صياح وهرجة صرنا فرجة لكل النسوان رسمية تخبلت تطرد بـ صابرين وذيج متقبل تكوم وسلوى تهد وتنثني وفراقد شالت عوچيتها وضربتها بظهر صابرين انوب هاي انجنت نزعت عبايتها وشيلتها وشگت ثوبها طلع جسمها وتضرب على صدرها حيييل وتصيح..

-باگوناا يا وليااان خذوو حلال ولددي وخبلوووهمم يبووو يا شيخ عليي حوبتنااا ما تتعداااك عساهة بحضككك وبختك وقسمة ولدك عساااك بنااار ما تطلع منهااا عساهة بعزيز گلبك حييييدر ابن علي الدر

-ابرار: وووولج لا تدعيننن على ابنييييي بت النعاااال

هجمت ابرار كدام كللل النسوان على صابرين ملختها تملخ ورهف وسبأ بنات مسعود يفاككن والنسوان كلها تحاول تهدي الوضع والقيامة قامت بالبيت انفضحنا وانشهرنا، ركضنا اني وحبيبة ورفل نفاكك بين ابرار ورهف وحدة موتت الثانية وجه ابرار كام يصب دم وبالغلط ضربت عين رهف وانفگست عينها..

-صابرين: يبوووووو ضربت بنيتيي فگست عينهاا تريدها تبوور على گلبي ام السحوررة

-تَـمني: بالغلططط ضربتها لا تعيطيين

-صابرين: بالغلطط سمعوها سمعوهاا لبالها تمشي علينا هالسوالف بت عيسى

دفعتها حبيبة بقوووة وصاحت بعلو صوتها...

-حبيبة: لهناا وبس!!! حطي لساانچ بحلگچ واخذي بناتج وطلعيي بره هالبيت گبل لا اغسلج غسسل بالاهاين!!

سكتت صابرين ملصومة، بلعت ريگها وبقت تباوع لـ حبيبة الترجف من العصبية، شالت شيلتها تلفها على راسها وتلبس عبايتها، انصدمت من تصرفها وانصدمت اكثر من الكل سكت وره ما حچت حبيبة، مچنت اعرف ليش يصيحولها "الشيخة" بس هسة وبعد الهدوء الصار ويه كلامها عرفت بالضبط ليش..

-صابرين: الچ الحشيمة يالشيخة صح انا مرة عمج وطردتيني بس اظل احبنچ

-حبيبة: مرة عمي تجي لبيتي بأحترام احطنها على راسي وبيدي اوجبها واضيفها! بس مال تحچين علينا وتجيبين طاري اهلي واخوتي لااا لهنا وعذريني عمة والبيت يتعذرج!

هزت راسها صابرين تلم عبايتها على جسمها، گعدت حبيبة ساكتة ورجعت البلبلة بالبيت تصير الكل يحجي والفوضى رجعت گبت، اشرت صابرين على بناتها يجن وراهة وتمشت بين النسوان تطلع وره ما الكل تفرج عليها وهي تنطرد..

-صابرين: اريد اگولن شي گبل لا اطلع وخلي الكل يسمعني زين

-فراقد: بت الزماال انتِ ماعندج حشيمة لنفسج؟؟ مو چم مرة انطردتيي لو الا تنداسين بالنعال مثل السلابيح ياله تولين؟!

-صابرين: اي اي اطلع بس گبلها اريد اضحك من كل گلبي على الشيخ وابنه الامـير علي الخطب بت واحدد سحار گضى عمره بالبتاويين بين السربتية والسكرچيية!!

صمت! ما صار غير الصمت بالصالة الي چانت مقلوبة رأساً على عقب! احس بگلبي راح يطلع من صدري من قوة نبضاته وجهي صعدت الحماوة بي وكلشي بيه صار يرجف.. اباوع بالوجوه كلها تباوعلي حتى اهل البيت محد نطق شي بس يتفرجون عليَّ، روحي طلعت من اردفت صابرين تكمل بخبث..

-تَـمني بت السحار عيسى بت الطعش وتزوجت واحد بكبر ابوها! كتلته تالي خذاها امير الامارة الجديد متفقة وياه بس يموت زلمتها يتزوجها هو ويتقاسمون الورث!

-غزوة: طلعيييي بررااا

-صابرين: طالعة وندري بيج تَـمني مو خوش بت وملعبة بس امانة سلميلي على ابوج من تزوري بالگبر هو اكيد جاي ينشعل هسة بس ما يهم

طلعت تضحك ضحكات رنانة وتصفگ بيدها والسوارات تخرخش تسمع حتى الاطرش، قوتي بادت والكلام ضاع محد حچى كلمة وحدة ونظرات النسوان ما انشلعت من وجهي، تمنيتني ميتة ولا هالموقف تمنيتني ببغداد هسة راضية ارجع لجحيم نعمة ولا احد يباوعلي بنظرة "تَـمني بنت السحار عيسى"..

-هدية (اخت منتصر): صدگ ابوج سحار تَـمني؟

كسرت الهدوء وسألتني گدام الكل، نبض صار براسي وبطني تلويني من التوتر راح اموت عجزت الحروف تجاوبها، النقذني من الجواب حبيبة من گالت وكل الانظار توجهت عليها..

-من كل عقل هدية؟ لاا وانوب تسألين؟ تَـمني صارت مرة اخوي من تنذكر راح تنذكر على انها مرية امير الامارة الامـير علي وبس!

انصدمت اكثر من النسوان هزن روسهن يوافقنها بس لانها هي الحچت وردت هدية محد ناقشها بعد وتطاول بالحديث، تغير الموضوع من رفل وليلة وبنات عمهم الثانيات راحن يجيبن ضيافة ودخلن بالضحكة والسوالف.. بقيت بمكاني كاعدة ماعرف شسوي اكوم لو اكعد اشرد لو اطلع من هالبيت بكبره!

-هذا حجلچ ذهب؟

نبهني صوت المرة الجبيرة الكاعدة بصفي، باوعتلها بعدني باهتة والدم يابس بعروگي، هزيت راسي بـ لا مو ذهب فرت بيدها وگالت بأستهزاء..

-مرة الامير وتلبس شبه من قِلة فلوسه شماله ما يشتريلج

مجاوبتها ماطيق احد بعد، گمت اريد اصعد فوگ واسمع الحجي والهمس يتطافر عليَّ مجرد ما گامت حبيبة رجعن يحچن بيه..

-تَـمني اسمج مو..؟ ابوج ميت لو عايش

سألتني بنية شابة ومن دققت بيها انتبهت هاي نفس البنية مدام نفيخة الشفناهة اني وتالة بعرس علي البدر وشمس الچانت تحجي بالشرف..

-تَـمني: ميت

-هاا حريمات بس اكيد هو علمچ على چم عمل تمشين امورج بيهن مو؟

-احترمي نفسسك لللچ

-ليش ليش انا شحچيت چا شون حصلتي على الامير غير سويتيله عمل؟

وتجاوبها المرة الي بصفها..

-اي والله صدگ بس ام علي فقيرة ما تعرف لهالسوالف وما انتبهت

-تَـمني: اشايفاتني انتن؟؟ صدگ متستحون گاعدين ببيتي وتلغون هاللغوة!!

-بيتج الموتي زلمتج وخذيتي املاكه؟

-تَـمني: تحترمين نفسج وتصيرين ادمية وتسكتين لو تطلعين برا البيت لان وجودج كللش مو مرحب بي!!

-يممماا تطرديني؟؟ يمة سمعي تطردنا بت السحار كومي كومي نطلع

يحچن بصوت ناصي حتى ميسمعوهن اهل البيت، لبسن عبيهن وطلعن واني بقيت اتگله من القهر مادري اصعد لو ابقى هنا اذا صعدت راح يكولون خافت لو استحت وراحت تشرد وماريد اصغر نفسي اكثر..

بقيت كاعدة بيناتهن بس ايدي ترجف رجف ويه كل حچاية اسمعها، كل كلمة وكل جملة سم وسممن گلبي گوة لازمة روحي ما اتعارك وابچي بنص الصالة تمنيت اختفي ومحد يلگالي اثر راح اتخببل!!

بينما طلعن النسوان ظلمت الدنيا ركضت فوگ قبل لا يواجهوني بالحقيقة واحد يسألني، دخلت لغرفتي قفلت الباب وگعدت بالگاع ارجف وگلبي ينبض بجنون احس الدنيا سودت بعيوني ووجع ببطني گطعني..

گمت للچربابة تمددت عليها اني وملابس العزيمة وعصرت عيوني بس اريد انام اريد اغفى اريد انسى همه عرفوا ابوية منو وعرفوا حقيقة اهلي التفشل.. عرفوا حقيقية "عيسى سحار البتاوين" يصير ابوية السحر يمشي بدمه وويه جرته للنفس ومعروف على مستوى..

مات وما ماتت سمعته وياه انطمغت بيه! غزوة خطبتني لـ نعمة من عرفت ابوية منو وچانت متأكدة ما راح ارفض لان تعرف مستحيل احد راح يتزوجني بالمستقبل من يعرفون اني منو وبنت منو الكل يخاف من اهل السحر وخلفة اهل السحر..

غفيت والدمعة بعيني مترضى تنزل وفزيت على صوت شي ينقر بشباك الغرفة الجبير، كمت بسرعة من مكاني اركض اشوف شنو فتحت الشباك وانتبهت حمامة هاي تريد تبني عشها هنا..

ذبيت نفس مرتاحة ورجعت اريد انام بفراشي، شلت تلفوني اشوف ساعة بيش وانتبهت الساعة عبرت العشرة ونص بالليل مو مال ارجع انام.. بقيت كاعدة بالغرفة اتصفن واتفرج على روحي بالمراية سايلة كحلتي وحمرتي رايحة، گمت ارتب مكياجي متناسية الصار اليوم واطمن روحي كلشي راح يكون بخير لازم انسى الصار لاازم..

طلعت چبس من الكنتور اكل جعت وماريد انزل ورجعت اتصفن وحدي، تذكرت امتحاناتي ما گلت لاحد ياخذني قويت نفسي وگمت لـ غرفة حبيبة، وكفت گبال باب غرفتها ساعة مترددة اطرقه ماريد انحرج وياهة وتتغير تظرتها الي، همست "بسم الله" ودگيت الباب، فتحتها بسرعة وابتسمت من شافتني..

-صح النوم يا حلوة

-هلو حبيبة

-هلا يروحي

-حبيبة ادري مو وقتها بس امتحاناتي ما بقالهن شي وظل بالي منو يگدر ياخذنا؟

-علي التـقي علساس يكدر گالو

-تجين ويايه مو؟

-اي طبعاً بس عبق كون امي ترضى تجي ويانه

-خاف اخوج ميقبل ياخذنا وراح ينجبر يروح علمودي؟

-تعاي نشوفه

رحنا لغرفته دگينا الباب وانتظرناه علما سمحلنا بالدخول، صاح تفضل وفتحت الباب حبيبة دخلت جوه واني وگفت بالباب ما طبيت..

-علي التـقي: ها ولچن شو مگابلاتني

-حبيبة: تقتق انتَ تاخذنا لبغداد موو

-علي التـقي: شعدچن ببغداد

-يمعود امتحانات تَـمني چا شون ما تمتحن الفرخة

-نسيت اي اي خوش اخذكم بس تَـمني حاچيتي الامير؟

-تَـمني: هاا.. لا نسيت

-چا شون غير تاخذين اذنه وخشمه وحلگه وگلبه

گال "گلبه" وغمز ضحكت حبيبة واني ابتسمت ارتاحيت لان حاچاني بشكل طبيعي معناها امهم محاچيتلهم الصار، وگف على حيله يروح للكنتور يطلع ملابس وكمل..

-اطلع السبت الفجر حضرن نفسچن بالعباس التظل نايمة اغلس عليها واروح

-تَـمني: لا لا مننام اصلاً كلشي ولا يروحن عليَّ الامتحانات

-علي التـقي: هسة يلا هي رياضة شينرادلها

-تَـمني: يااا تره والله ندرس ونمتحن حالنا حال باقي الاختصاصات

ضحكو هو وحبيبة بس ضجت حسيتهم ديهينوني مو بس يهينون اختصاصي مادري شبينا نشد حيلنا اذا واحد حچه على كليتنا عبالك جهالنا مو مجرد اختصاص..

-حبيبة بضحك: تَـمني عود صدگ زعلتي يمعودة والله نتشاقة

-تَـمني: حسيتكم دتحجون على ابني

-علي التـقي: چا شبيه انا اكيف اذا واحد حچى على شغلي بالعكس اگابلهم واگعد واطلع كل خياساتنا

-تَـمني: واضح ما داخل كلية عسكرية عن رغبة

-علي التـقي: ابد علي الدر ورطني اغراني بالرتبة والراتب ونسى يگلي راح يشتعل جد جدك

ضحكنا كلنا هالمرة وحسيت بشخص يوگف ورايه مباشرةً، لمعت عيون حبيبة بفرح وگالت بأبتسامة واسعة..

-اموري شوكت رجعت

-هسة

جاوبها ومد ايده يسندها على الباب بصفي مباشرة لدرجة دا احس بحرورة جسمه..

-الامـير علي: تضحكون ومتونسين ان شاء الله دوم

-حبيبة: تقي جاي يسولفلنا معاناته بالدوام

-هممم

همهم بخفة ودا اللاحظه يباوعلي دا احس بنظراته ودا احس بتأملاته كلها، نسيت اسئله عن صحته ونسيت اصلاً هو تخربط اليوم ومن قوة صدمتي بالصار ويايه راح من بالي موضوعه، بدون لا اللتفت گلت وبعدني منطيته ظهري..

-تَـمني: چنه دنتفق على روحة بغداد علمود امتحاناتي

-علي التـقي: اي امير البنيات يردوني اخذهم لبغداد عندك مانع؟

سكت لدقايق بدون لا يصدر هسس، ابتسم علي التـقي وگال بطريقة يقنعه..

-خطية امتحاناتها لا يروحن عليها

اللتفتت اباوعله لگيته صافن بيه بس نظراته باردة مابيهن حچي، هز راسه بـ "اي" وگال..

-اخذهن

راح لغرفته وحبيبة ضحكت وطفرت على اخوها فرحانة..

-تقيييي اريدك تفرني بغداد كلهاا

-دواام رايح دوام وين اكدر افرچ ام راس

-حباب حباب چا شعندي رايحة

-يلا ادعبلن هسة خلوني اسبح و انام عندي شغل

-بس تفرني بغداد مو تلعب علييَّ

-تأمرين امرر

طلعت حبيبة تدفع بيه فرحانة لان راح نروح لبغداد سوه بس مادري ليش عندي احساس يگول الشيخ ما راح يعجبه روحتنا وحدنا هناك..

-حبيبة: اوگفي اظن موبايلي يدگ تَـمني

ركضت لغرفتها تشوف تلفونها واني رحت للحمام اريد اغسل مكياجي واتوضا، تذكرت مزيل المكياج بغرفتي رجعته اليوم ورحت اجيبه، مجرد فتحت باب الغرفة نزيت من شفت الامير علي هنا وكاعد على چربايتي..

-خرعتني

رفع عيونه عليَّ يباوعلي ببرود ماكو أي تعابير بوجهه، فتح اول دگمتين من قميصه وگام يوگف على حيله..

-محتاج شي مني؟

-شوكت چنتي ناوية تگليلي راح ترحين لبغداد؟

-بس انتَ تعرف اني لازم اروح

-وتطلبين من اخوي ياخذج؟

-لا مو اني حبيبة كالت تقي ياخذنا

-وانا شني هنا خراع خضرة؟

ميحجي بعصبية بالعكس بارد وهادئ، رحت للميز انزع اكسسواراتي وگلت بتعب..

-تكدر تجي ويانه اذا تريد

-ها والله؟

-والله

باوعتله من المراية بعدها عيونه عليَّ، ضحك تك خد مستهزأ وتقرب يوگف ورايه..

-شنو سالفتج انتِ؟

-ما فهمت

-اليوم تتصلين بيه الظهر حبيبي وسوالف وهسة ما تتحچين ليش

-گلت حبيبي بالغلط

-وهسة ليش گالبة وجهج

-مگالبة وجهي اني بس تعبانة

-هسة گعدتي من النوم

-مدا اشبع نوم

-ليش؟

-مادري

رفع حاجبه متنرفز راح للشباك شوية فتح البردة يباوع منه ورجع يوگف ورايه بالضبط، فرك وجهه وگال بأنزعاج شدديد..

-عندج اگصف من هاللبس بعد؟!

-اي

-تَـمنيييي

-شبيك امير ضايج واجيت تطلعها بيه؟ شنو مشكلتك شتريد؟

-مشكلتي انتِ!! انتِ مشكلتيي تَـمني! مشااكلي الباقية بالنسبة الج هااكبرها (واشر بأصابعه مسافة صغيرة)

-ما دامني مشكلتك اني رايحة لبغداد ومناك اگول لـ تقي يدورلي على خالتي لان واضح انتَ ما ناوي ترجعني الها

-انااا وين وانتِ ويييييين

-اشرحلي شبيك بدون صياح

-خالوو انتِ ما عايشة بيت وحدج تلبسين وتتزوگين وتتعطرين مثلما يعجبج انتِ ببيت كله زلم شلون تطبين لغرفة اخوي بهالحال انتِ جااي تشوفين نفسج؟؟؟

-تمام صح كلامك

اختصرت المشكلة والعركة بهالكلمات مابيه اناقش والدمعة بعيني اخاف احجي وابجي كدامه، اخذت مزيل مكياج امسح مكياجي بعدني ما حاطة القطنة على وجهي وانجريت من ايدي وسحبني يديرني عليه..

-شبييج؟؟

-فهمت امير خلص حقك راح انتبه لملابسي اكثر

-لااا شبيچ ليش ايدج وصوتج يرجفون؟؟؟

-ماعندي اعصاب

-لا تجذبين احجي صار شي بالعزيمة؟؟

-لا

هديت ايدي منه ورجعت امسح بمكياجي وجهي انگلب احمر من كتمتي للدموع وراح يفضحني، ايدي متثبت ترجف رجف والغصة لزگت ببلعومي..

-راح تحجين لو اروح اسأل امي؟

-كاااااافي اميررر كاااااافي عوووفني فدووووة

توسعت عيونه مصدوم من ردة فعلي بس خلص طفح الكيل ومادري شصار بيه من جاب طاري امه تهت وحرت ايدي متثبت واكدر اكمل مسح مكياجي ذبيت القطنة على الميز و وحطيت ايدي على راسي ابين عود يوجعني بس بالحقيقة دا احاول احبس دموعي حتى متنزل..

حسيت بي يتقدم مني اكثر وسحبني من چتفي ناحيته يدورني عليه، وخر ايدي عن وجهي ورفع راسي يباوعلي بقيت منزلة عيوني ما احط عيني بعينه، مسح على خدي بأبهامه خفيف وتفاجأت من شال القطنة من الميز يكمل مسح مكياجي..

باوعت لوجهه مقهورة لان صيحت هيج وتأنيب الضمير زعلني اكثر هسة مادري ابجي على الصار بيه وفشلتي لو على تأنيب الضمير..

-الامـير علي: راح اعرف منو السبب بحالتج هاي وراح يتحاسب

-امير

طلع اسمه همس مصحوب بغصة، شكد حاولت اسيطر على دموعي بس فشلت ونزلن دمعتين من كل عين.. جفل يتوقف عن مسح وجهي وقربني عليه اكثر يجرني من خصري ويسأل بعصبية مكتومة..

-احچيلي منو ويااج وعليي اشعله شعلللل

-امير مادري شنو صار وشلون..

-احچي كلشيي ولا تضمين

شهگت منهارة اتذكر الصار وكل كلمة انحچت عني بوجودي وكدام الكلل ودموعي تنزل اختنكت راح اموت دفعته عني ومشيت بعيد اريد هوا اريد ابجي براحتي واشيل هالحمل من صدري بس ما خلاني، رجعني لمكاني ونتر بعصبية يرجف منها..

-تبچييين تَـمني؟؟ ولج منوو وياااج حاچينييي

-راح.. ر.. راح احجي بس.. بس لا تعصب

-احچييييي

-حچو.. حچو عليَّ النسوان وانفضحت كدام الكل.. كلهن صارن.. يضحك عليَّ

-شگالت؟؟

-اميرر

-شگااااالت

-ماكدر.. ماكدر اكول ماكدر

هدني بسرعة وطلع يركض من غرفتي رحت وراه اركض خايفة واصيحله بس اريده يوگف..

-امير بداعتي.. بدااعتي لا تسوي شي

-ووووولج يماااااااا

-لاااا امير تعاال

-يمممممممة سلوووووووى حبيبببببببة وينچننننننن

نزل جوه يرجف رجف وجهه صار احمر وعروگ رگبته وصدره وگصته كلهن برزن، اجن كلهن يتراكضن وشفت وجه حبيبة مبلوع خايفة وامه ترجف وسلوى واكفة بعيد تباوعلهم وتبلع بريگها..

-رسمية: هاا يمة هاا يا بعد روحي

-الامـير علي: ياااااااهو مزعل تَـمني؟؟؟؟؟؟ يا چلبببة بت چلبببب مبچيتهاااا؟؟؟؟

-رسمية: يمة حبيبي انتَ يا بعد عيني وروحي وليدي السبع لا تعصب انا رديتهن وطيحتلك حظهن لا تضوج

-الامـير علي: رديتيهننن والبت فحطتتت من البچي؟؟؟؟ فضوووني منووو الحچت عليهاااا حبيبة احچيييي

-حبيبة: هنه هوايه

-انطينييي اسمااااء اروح انعععل الخلفهنننن انطينييي

-رسمية: اميييير لا تصيح بوجه اختك النسوان اثرن علينا وانفضحنا كلناا مو بس مريتك

-ايييي احجييي گوووولي منو هنه اروووح اجيبهااا من بيتهااا احرگهااا گدامچن احجيييي

-رسمية: هيج اميرر؟؟ هيج ابوك رباااك تتجاوز على النساوين وتريد تحرگهن؟؟ مو انتَ الشيخ العااقل الفااهم لو تَـمني شخطت عقلللك وخذته بعيد؟؟!!

-الامـير علي: تَـمني شعليهاااااااا عررررضي هااااي اليحچي عليهااا چن حاچييي عليّ والي ينزززل دمعتهااا انعل اممممه على ابوووه وادوووس بگلبه

عيوني تحرگني والرجفة بيه لا البيه اكمل طريقي واروح اهدأه ولا امه دتگدرله ولا حبيبة، سلوى واكفة بعيد تفرك بيدها وخازرتني وشفت ابرار وشمس واكفات بباب غرفتهن ميقبلن يطلعن..

على اثر صوت الامير نزل علي التـقي يركض شعره مبلل وقميصه مفتح مبين چان يسبح، ركض يفتهم شصاير وبعده ما مفتهم ومحد حاچي شكو تخبل ويصيح..

-ولكممم ما تحچووووون وعلييي اروح افضحكم واخزززيكم بديوان ابوووي احجي يمممه شكوووو

-رسمية: انفضحنا وييينك يا شيخ علي وتجي تشوف ولدك يرجفون على مرررة

فتح عيونه تقي مصدوم من عرف الموضوع يخصني والامير تخبل تخبل تخبل تخبللللل!! امه زادت مو بس نفط على النار زادت بانزين ونفط وكلشي يشعل النار ويهيجها بجملتها..

-الامـير علي: لااااااا تسودنينييييي هوووووو شعليييييييه بيهااااااااااا

يصيح والبيت انگلب على روسنا، اجتني شمس تركض وتهمسلي..

-روحي حاچي رووحي

-تَـمني: ماكدرله شمس عصبي مااكدرله

-شمس: تَـمني رووحي گبل لا يتطاول على امه وتصير مصيبة

ركضت عبق تنزل من الدرج وگفت ورايه وجهها احمر وبعيونها دموع مخترعة، لزمت ايدي تشجعني اروح ووكفت على جهة تتكتر وضامة جسمها بيدها مرعوبة..

هزيت راسي مستسلمة بس شنو غير متت بدمي اخاف اروحله وانوب انكتل وتصير مصيبتي مصيبتين، تقدمت كم خطوة وارجع لمكاني وارجع اتقدم وانوب ارجع وهيج بقيت اراوح خايفة والدنيا محترگة هنا الامير ما خلى واحد ما قسمله وسقطه عمه مسعود على نعمة على شكو ساقط بهالدنيا كلهم حطهم وطيح حظهم بالحجي..

-علي الحـق: هاي شكو شصاير؟

دخل علي الحـق للصالة هستوه رجع يدور بالوجوه ويتسائل، باوع لوحدة وحدة من عدنا ووگعت عينه على عبق الخايفة، عگد حاجبه وسأل..

-شني شبيها عنق؟؟

-رسمية: مووو عبق مرررة اخوووك اليرجف عليهاا تعاال شوفه تعااال راح يتسوودن عليناا

ويه صوتها دخلوا باقي الولد وخاف رادتهم يهدأوه ويسكتوه؟ لاا همه شعلوه وطيحوا حظنا كلنا خصوصاً من علي الحـق صاح..

-اكييييد بيت مسعووود اگص ايدددي وراسييي وياهة لو مو همه السبب بالصااار

-علي السور: امشووو نشگهم نصييين ذولة السرسرية

-علي النور: ررايح اجيب القامة

-علي البـدر: درر سلاحك جيبه

-رسمية: يبوووووو راحو ولدددي ولكممم مو بيت مسعووود يبووووو على راااسنااا

لطمت على راسها وصدرها ركضنلها حبيبة وشمس وابرار يرجفن كلهن وما اللومهن الخوف والرهبة بالبيت متتسولف، تسع ززلم وعاشرهم حيدر گلبو الدنيا بصياحهم ووعيدهم البيت تزلزل بأصواتهم..

باوعت لـ عبق تأشرلي اروحله وتأشرلي بيدها ترجف راح تموت من الخوف، بلعت ريگي واستجمعت شكو قوة عندي وهرولت بأتجاه الامير لزمته من ايده اندارلي بسرعة وجهه يخوف حسيته راح ياكلني..

-امير اهده حباب

سكتوا الكل صافنين علينا عزا ليش الكل صفن وهذا ليش عصب بزيادة واحسه راح يلتهمني؟، جر ايده مني ونتر بين سنونه راح يطگ..

-هدددديني تَـمني ورجعييي فووگ

-شبيك امير

-ووولج رووحي

-انتَ لازم تهدأ ميصير هالعصبية.. يااا انتَ اصلاً مو اليوم وجعك گلبك شوف هسة تذكرت

-علي الكرار: امير شبي گلبك؟

خزرني بحدة اكبر واشرلي اروح هناك، بوزت بوجهه مقهورة ورجعت لمكاني بس على الاقل مماطلتي وياه بالحديث جابت نتيجة والحمدلله والشكرر من اجه شيخ علي وشهد على الوضع، سأل شصاير وسولفتله رسمية مختصر مفيد وتشكيله من ولدها..

-شيخ علي: ما تستحون انتم؟؟ الامـير علي ماا عنددك احترام تصيح بووجه امك؟؟؟

-الامـير علي: اميي الهاا الحشيمة والاحترامم بس ما جاي ترضى تكووول ياهو حاچي عليناا

-رسمية: ااخ يمة راسي راح يطگ ااخ گلبي اااخ يمة حتى چلاويي ورئاتي يوجعوني

-علي النور: يمة دثبتيلج على شي حتى نصدگ

-شيخ علي: وووولك

-علي النور: حگك بوية بس غير نفهم ياهو حاچي علينا لو عادي ينحجي بشرفنا وعرضنا ونسكتله؟

-الامـير علي: لاااا وعلي ماااا اسكتتت وحگ الحسيييين الشهيييد انععل والددديه واسمطه بفصصل وفضيييحة اخلي يفرررفر بأذانااته حااير شلوون يطلع منهااا

-شيخ علي: امير بوية مو هيج تنحل الامور خلينا نكعد نسولف ونفتهم وحگكم يرجع يا ولد وكل الي مس نساوينا بچلمة نردها بعشرة بس بالعقل

هدأو الولد غصباً عنهم بس الامير غادي نار گوة سيطر على نفسه وگعد على التخم، ابوه يحجي وياه على كيف وهو يرجف وسارح يفكر حسيت اصلاً عقله مو ويانه وعصبيته مو بس لان اني بجيت اكو سبب ثاني مأثر بي وديضغطون عليه من خلاله وطلع توقعي صح مية بالمية!

ثاني يوم صارت گعدة بينهم وبين بيت عمهم مسعود، شيخ علي چان ميريد توصل الامور لهاي المواصيل لان تعتبر فضيحة مسعود يصير اخوه بس ولده دگوا رجل الا يفضحون عمهم بما ان هو عازل نفسه عنهم ومسويله امارة من كيفه وقاسم العشيرة..

صدموني من كسروا ظهر عمهم بفصل وحسبوا كلام زوجته تطاول على حرمة الشيخ وكذب وافتراء وتجاوز واتهامات باطلة بدون لا يذكرون شنو هالاتهامات بالتفصيل بس كل الشيوخ وگفوا ويه عمو علي وأيدو هالشي حقه واقل ما يطلبه هو فصل..

رجع عمو علي مقهور وضايق صدره من الگعدة كللش متألم وسمعته يگول لخالة رسمية هو خجلان من اخوه ويحس نفسه صغير بين الشيوخ لان اضطر يخليله حد گدام الكل..

محد جاب طاري كلام صابرين مرة مسعود عن ابوية كدام الولد امهم چذبت عليهم وگالت التجاوز صار لان اني ارملة وعلساس لاعبة على الامير ومو خوش وحدة، وعلى اساس هالكلام صارت الكعدة بس يااابة الحقد الحاقدي عليَّ ما شفته بعيون احد من قبل..

سلوى تريد تاكلني وحتى العمات ضاجوا مني ونفروا ورسمية تحجي ويايه ببرود، انمردت مرد واحسني غريبة بيناتهم ومالي مكان هنا الوحيدات البقن طبيعيات ويايه حبيبة وعبق وشمس احياناً تصعدلنا..

صعدت فوگ احضر جنطتي باچر طالعين لبغداد واخيراً راح اجر نفس، حضرت اغراضي كلهن واخذت كل ملابسي على امل اللگه خالتي وحطيت الجنطة على جهة، بالليل كلش دگ باب غرفتي الامـير علي..

-ها امير

-اريد احاچيچ

-تعال گول

-تعالي نكعد بره

عكدت حاجبي مستغربة هو دائماً يدخل غرفتي بس صارله يومين يطلب يحجي ويايه بالصالة وميدخل هنا، ذبيت من ايدي ورحت وراه گعدنا بالصالة وانتظرته يبدي يحجي بس ماكو.. ما حچى شي مرت الدقيقة والثنين والخمسة دقايق والعشرة والنص ساعة وهو هادئ ويباوع بالگاع..

-امير

بلل شفايفه بلسانه وحمحم بصوته، طلع من جيبه فلوس ومدهن الي يكول..

-انتبهي على نفسج وهذا مصروف يمكن تحتاجين شي مناك

-شكراً بس عندي فلوس

-اخذيهن تَـمني

-تمام شكراً

اخذتهن من ايده مبتسمة، ما بادلني الابتسامة هالمرة شكله كلش مطنگر..

-شبيك مبوز شيخي

-مابيه، لا تبقين بمكان وحدج ويه تقي مو قصة ما اثق بيكم بس ما يصلح دائماً گعدي ويه حبيبة

-اي تمام، بس امير ابوك حچى شي على روحتنا؟

سكت ميجاوب وميحتاج يحجي لان عرفت الجواب واضح شيخ علي معترض على روحتنا وحدنا ويمكن يفضل اعوف السنة واعيد المرحلة الاولى هنا..

-انتَ متجي؟

-احاول

-اها

-شنو

-توقعت راح تجي اول متخلص شغلك

-اشوف وضعي مو فارغ عندي شغل اهم

حزت بخاطري حچايته بس سويت روحي طبيعية وهزيت راسي "اي"، طگطگ اصابعه وذب حسرة قبل لا يگول..

-روحي للطبيب هناك سألي عن وجع بطنج وراسج شوفي شنو السبب

-تمام

-چان خذيتج انا بس ماعندي وقت

-خوش افتهمنا كافي!

-شنو شبيچ

-ماعندك وقت الي! وصلتت شبيك كل شوية گايلها

-انا بس مشغول

-مشغول بس ويايه من تروح لابو كربلا كل يوم ممشغول مو؟

-وانتِ ليش معصبة

-معصبة لانك خطيبي! حتى لو بالاسم مخطوبين بس ابقى مسؤوليتك ومحسوبة عليك والظاهر انتَ خطبتني وتورطت اميير

-اي والله

فتحت عيوني مصدومة الغصة تصعد وتنزل ببلعومي قهررني وراح انفجر، سيطرت على غضبي ورجعت الفلوس بأيده ماريدهن وگمت ارجع لغرفتي، طبگت الباب ورايه ميتة حرگة اكييد عرف بسالفة ابوية شديصير وياچ تَـمني كل البيت ميردوچ وكارهيچ وبعدج هنا!؟

نمت ليلتي بس اريد ارجع لبغداد محتاجة اتنفس واستقر واللگه خالتي، متأملة منتظرتني حياة افضل هناك بس ياريتني ما رجعت لبغداد ولا عشت العشته وراهة ولا تحملت حجم الصدمات والمصايب اللفت على راسي واول مصيبة وگعت بيها هي ويه علي التـقي بشقة بغداد......!

يتبع 👑....

━━━━━━ ♛ ━━━━━━

يمممممة ماعرف شكتب 😰♥️♥️✨

لا تنسون التصويت يقلبيي مهممم 🩷 وخنشوف توقعاتكمممممم 👀🩷!!؟

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

مَنا وهَيج بَعد تَلكاني مَتباعد

وحَتى لو تحَبني بعد

حُب من طَرف واحد

خَاف انت بَارد جَنت

انا اخَس منك صَرت

يحسَدني كام الثَلج

كد ماصَرت بارَد . ✋🏻

━━━━━━ ♛ ━━━━━━

"تــالة"

من قوة كلماتها وقساوتها الرجال بهت وضاعت معاني وجهه، جفل يراقب ملامحها الكارهة ونفرانها منه وخلى وطلع من الغرفة، هرولت اركض وراه وعبرته اوگف مقابيله ضبط وبالغلط ضربت صدره بيدي اوگفه بمكانه ما اخلي يعبر ويروح اكثر، وخرت ايدي بسرعة وگلت..

-امير والله متقصد تَـمني متققصد

-سويلي درب خووية خليني اروح

-لاا وين تروح امير والله العظيم تَـمني نفسيتها تعبانة

ما قبل يسمعني وطلع من السويت فاير ومقهوور كلش، اني ماعرف هالرجال ولا جامعني وياه حديث حقيقي بس اعرف هو انسان زين وساعد تَـمني هووايه وعيونه ونيتة صادقة وياهة لا ملعب ولا زعطوط!

رجعت لـ تَـمني بالغرفة ردت افوت ولگيت الباب مقفول، دگيت الباب حتى يفتحوه واجاني صوت امي تصيح..

-طلعييي بعدين تعالي

-تالة: ماا اطلع اريد افتهم شبيها تَـمني تصيح هيج وليش هاجمت خطيبها هالشكل؟؟ يعني هاي بدل ما يتزوجون بسررعة ويحلون موضوع الطفل راحت هي تطفره منها؟؟؟

-حنين: تاالة طلعييي هسة

-تالة: موو صوچكم والله بس احنه غبرااات وميلوگلنا الززلم الزينة والمحترميين نبقى مدمغاات وامثال نعمة وبسااام يكفخون بيناا

عفتهن ورجعت للصالة ميتة قهر اول مرة بحياتي هيج انقهر واتأذه لهدرجة، اني من عرفت ابوية مسجون ما تأذيت هيجي بس هسة ماعرف شبيه راح انفجر..

اكذب اذا اگول ما طمعت بالامير علي واهله واكذب اذا گلت ما شفت حياة احسن بوجودهم، چنت متمنية تَـمني تتزوج الامير وننتقل نعيش بنفس محافظتهم ونكون قريبين عليها على الاقل نگدر نستند على الامير واخوته وابوه ويصيرلنا سند حقيقي ومنبقى حايرات وملطلطات بالفنادق التعيسة هنا..

ربع ساعة مرت وطكت روحي، رجعت للغرفة ونويت اتسنط عليهن اريد افتهم شنو ديحچن بس ماكو ولا كلمة گدرت اللگف، گعدت بمكاني متربعة وفتحت تلفوني وتذكرت الاشعار الاجاني هذا ابو علامة استفهام، فتحته وعگدت حاجبي مستغربة من شفتني معلقة بالخاص عنده برسالة..

"خخخخعع"

طلعت من اسمه بسرعة ورجعت مثل المخبلة ادخل على المحادثة اتأكد هاي صدگ اني دازتها لو هو؟؟ زين ليش اني معلقة بهيجي شي على الستوري مالته؟ وليش علقت اصلاً؟

اخذتلي صفنة اتذكر يا ترى شلون صار هالشي معقولة احد هكر حسابي؟ طلعت للاعدادات اتأكد بس ماكو محد مهكرني وكلشي على حطته، بينما اني دا احاول استوعب ليش هيج كاتبة تذكرت امي! امي من خمطت التلفون من ايدي چنت فاتحة ستوري علي الكـرار وظل بيدها بدون لا تغلقه واكيد اصابعها انداسن على هالاحرف واندزت الرسالة..

ضربت جبيني بغباء مستحية الخلل من عندي واني گلت عليه بگلبي زاحف ما صدگ شفت الستوري مالته ودخلي خاص يسأل، رجعت لمحادثته وكتبتله..

"اسفة بالغلط كتبتها ممنتبهة"

بقيت بالمحادثة انتظره يشوفها بس طول دقايق ياله فتح الرسالة، تحمست اعرف شنو راح يجاوب بس صدمني من حط لايك على الرسالة وطلع من المحادثة!!

-تالة: نعمممم شو هذا شايف روحه؟؟؟؟

ذبيت التلفون ضايجة كللش شنو بس يحطلي لايك شو ميستحي هذا يفشلني هيج؟! ما كلف على نفسه وكتب كلمة "عادي" هي العادي شنو راح يشتريها بفلوس قحطط شكد بخيل!

گمت من الگاع ورحت للصالة اتحلطم واقنع روحي الموضوع مو فشلة وعادي وهو يمكن ثگيل وميحب يحجي ويه البنات واني احترم هالنوع من الرجال فـ سامحته اي خلص تالة سامحي مبين خوش رجال..

رحت للمطبخ جوعانة طلعت معكرونة اطبخها كتلنا الجوع، حطيت المعكرونة والجدر گبالي وصفنت عليهن شلون ابدي ومنين ابدي هاي اول مرة احاول اطبخ بحياتي.. تنهدت وسميت بالله وطلعت وصفة على اليوتيوب وبديت اطبخ المعكرونة..

هلكت بيها وطولت هوووايه بس راضية بالنتيجة، عفتها على النار حتى ينشف المي ورجعت للصالة وبنفس اللحظة طلعن امي وتَـمني من الغرفة..

-تالة: ها شلون صارت؟

-حنين: هاي شحلاتها مابيها الا العافية تعالي امي گعدي ويانه

تجر بأيد تَـمني السرحانة ورايحة بغير عالم وگعدنا على القنفات بصف بعض، لزمت ايد تَـمني امسح عليها بلطف مبتسمة، رفعت عيونها الدامعة تباوعلي ونزلت دمعتها مقهورة، فاجأتني من همست بصوت مبحوح..

-امير راح؟

-تالة: اي راح

نزلت دموع اكثر من عيونها وشمرت راسها تسنده على كتفي، مسحت على شعرها على كيفي واسمعها تحجي گووة خاف هي چانت تحجي طبيعي ومو فاهية هسة مشغلة وضعية السلو موشن سودة عليَّ..

-تَـمني: اكيد زعل مني تالة بس.. بس اني مقهورة

-تالة: يا حبي ليش مقهورة شنو صاير توتة يعني انتِ شتوقعتي من تممتي زواجچ منه غير يصير حمل وراهة

طفرت من مكانها تباوعلي بعيونها صايرات حمر من البچي، وخرت شعرها من وجهها وگالت بسرعة..

-لا تالة لاا والله لا اني ما تممت زواجي منه اني مصدومة بهالحمل حالي حالكم اني مدا اگدر اتخيل شلون صاار تالة شلوون

-تالة: لعد شلون حملتي من الهوا؟

-مادرري راح اموت والله، تالة ما ناقصني انتِ هم تشككين بيه وروحها لامي وداعة خالتي وراسچ يا تالة اني ممسلمة نفسي لاي رجال

صفنت محتارة تحجي تَـمني وتشهگ بالبچي ممرودة روحها، باوعت لامي محتارة ومتعرف شتگول ظلت بس تهز براسها وتتحسر..

-تالة: الا الچان اكو غلط بالسونار؟ ماما ممكن الدكتورة غلطانة لو شتگولين؟

-حنين: يجوز بس الدكتورة شافته للطفل بالسونار شلون غلطانة؟

-تالة: لعد شلون تَـمني تگول ماكو شي بينها وبين خطيبها لعد هذا ابن منو؟؟

-حنين: اني اگول ابن الامير هذا

-تالة: ياا ماما دتگولچ ماكو شـ...

-حنين: ماخذ اليريده منها ماما بدون متدري

بچت تَـمني اكثر تحرك راسها نافية وامي كملت..

-انتِ مو گلتي عشتي بشقته اسبوع ضبط وره ما اخذج من بيت بسام الخطفج بي؟؟ تَـمني جاوبينييي

-تَـمني: اخذني ايي اخذني بس چنت واعية

-حنين: بيوم الاخذوچ من الشارع مچنتي واعية وگلتي گعدتي ولگيتي روحج بشقته وبغرفته بالتحديد ولبستي من ملابسه!

-تَـمني: خالة...

-حنين: كاافي تَـمني واضحة وضووح الشمس الرجال متمم سالفته وياچ والطفل ابنه! اذا مو ابنه ابن منو يكون قابل عندج سوالف مكسرة انتِ؟؟

-تَـمني: لاا اكيد لاا

-حنين: خلص لعد ومبين ما راح يعترف بأبنه ويخليج مكسورة رگبة وملطلطة منا ومنااك

-تالة: لا ماما هو خوش رجال اكيد يعترف بأبنه

-حنين: ولچ ماما شييخ يعني صمااخ جبير والكل مفتحة عيونها عليه ومنتظرين عليه الزلة تردي يعترف بأبن تَـمني؟؟

-تالة: وليش مضطر يعترف امي! خو يتزوجها بسرعة ويفضون السالفة!

سكتت امي تفكر وتَـمني ابدد كلشي ماحچت رجعت تسرح وتمسح بدموعها محتارة، بعد فترة من الصفنة امي عصرت عيونها وگالت بصعوبة..

-حنين: واذا الطرگاعة طلع مو ابنه؟

-تَـمني: يعني شلون؟؟؟

-حنين: مااما يمكن يطلع مو ابن الامير ومن نبلغه بهالشي نبتلي!

-تَـمني: تشكين بأخلاقي وشرفي خالة؟؟

-حنين: لا وروحها لامچ اني مربيتج على ايدي واعرفج شنو بس المصيبة لو طلع مو ابن الامير وغيره المعتدي عليج وانتِ متدرين بروحج

-تَـمني: شتحجين خاالة اشايفة كدامج زعطوطة وينضحك عليَّ بكلمتين؟؟

-تالة: مو زعطوطة تَـمني بس انتِ عشتي ببيت كله ولد وتبهذلتي بينهم يمكن صاير شي هناك وانتِ محاسة

-تَـمني: ولج شلوون ما احس شلوون تحجون صدگ انتو؟؟ الامير واخوانه كلشش خوش ولد وابد ماعدهم سوالف نسوان عشت وياهم بالشهرين ماكو واحد حاول يتجاوز حدوده ويايه!

-تالة: لعد شلون والله حيرة

سكتت تَـمني محترگة حرگ، حطت ايدها على حلگها وسرحت بعيونها تفكر واخذتلها فترة طوويلة على هالوضع لحدما امي طلعتها من صفنتها وگالت حاسمة الموضوع..

-هذا هو تَـمني تنزلين الطفل وكلشي ينتهي لا من شاف ولا من درى ولا هالفضايح والبهذلة

-تالة: مو خاف يطلع ابن الامير ويزعل

-تَـمني: ماكو مرة تقرب مني الامير بهالطريقة اصلاً هو چان يكرهني والمرة الاخذني بيها من المطعم چانت اول مرة يعترف هو يحبني ومعجب بيه حتى اني انصدمت

-تالة: ويجوز ميحبج هم ويطلع تأثير السحر

-تَـمني ببكاء: على گولتچ يطلع تأثير السحر وانوب اني اروح اگله اني حامل بأبنك غير حتى يطردني ويگول تتبلين عليَّ

-حنين: من الاخير كافي توقعات وگاعدات وتحللن تَـمني تنزل هالطفل وتنفصل من الامير ونطلع من بغداد نهج منها بعيدات وسعيدات مالنا خلگ مشاكل

-تالة: ماما صدگ تحچين!

-حنين: اي صدگ! بس خلي تَـمني تكمل امتحاناتها لا تروح عليها السنة وراهة نروح للدكتورة ونستفسر عن عملية الاجهاض

-تَـمني: ماريد اكمل امتحاناتي

-حنين: انچبي مو بكيفج راح تكملين امتحاناتج ونروح للدكتورة تجهضين هالطفل ونجيب الامير يطلگج ونخلص من هالسالفة

-تالة: وين نروح؟؟

-حنين: نرجع للسليمانية نبدي حياة جديدة هناك اني وياچ تعرفنا على خوش ناس هناك وصارو عدنا اصدقاء عود همه يساعدونا

بچت تَـمني ولمت رجليها تحضنهن لجسمها، تنهدت محتارة وين نروح للسليمانية وهاي البنية شنو سهل تنزل طفلها وتنسى كل العاشته؟ شو امي مادري شلون دتفكر بس المشكلة ماريد اواجهها كلش معصبة وخاف تنفجر بوجهي..

-حنين: شنو هالريحة الغريبة؟

-تالة: يا ريحة

-حنين: ريحة حرگ عبالك

-تالة: المعكروووونة

ركضت ركض للجدر وچان اشوفه مشعوط والدنيا مشتعلة هنا خرب حظي عود نويت اطبخ واسوي شي بي خير، شلت الجدر وذبيته بالمغسلة وفتحت البوري انوب صار المطبخ مدخنة..

-حنين: هاي شنوو شمسوية انتِ تاالة

-تالة: ماما عود دا اسوي معكرونة

غمتني وطلعت من المطبخ، وگفت لا ساعة ولا ثنين اجلف بالجدر انظفه واطلع المعكرونة المحترگة منه وگعت ايدي من التعب، كملت وغسلت ايدي ورجعت للصالة ادور تَـمني..

-تالة: ماما لعد وين راحت تَـمني؟

-بالغرفة

رحتلها للغرفة شفت التلفون بيدها وصافنة بي ما حست من دخلت الغرفة الا من طبگت الباب نزت وذبت التلفون من ايدها تبحلق بعيونها الذبلانة..

-تالة: كشفتتتچ

-تَـمني: تالة شبيچ انتِ شبيييچ هسة شسويت

-شتردين تسوين ولج هااا هااا شتردين

-اريد... ماعرف شريد

-سولفيلي شبيچ

بلعت ريگها ونزلن دموعها من جديد، شهگت وحچت بحسرة..

-البيه طفل ما اعرف منو ابوه

-تتوقعين الامير ابوه؟

-اتمنى

-ليش؟

-على الاقل يكون استحق الكلام القهرته بي

-تردين الصراحة تَـمني؟

-اي

-كلش قسيتي عليه احس الامير ميستاهل

نزلت راسها وزادت بالبچي، يهتز جسمها بقوة وتبچي بحرگة، رحت احضنها بلكي ترتاح وتخفف عن نفسها واتوقع هالشي جاب نتيجة لان صارت تفضفض والحچي يتگطع من شهگاتها..

-تَـمني: اريد اعتذر منه تالة.. هو.. هو ميستحق.. هو رجال زين

-مبين عليه

-ماعرف لـ.. ليش هيچ حچيت وياه مااعرف

-ردة فعل صارت عندج توتة

-قبل لا يجي خالة.. خالة رسمت بعقلي هو الي سوه بيه هيج واني غبية تالة.. كلش غبية مفكرت بكلامي

-ميخالف حبيبتي هو اكيد يعذرج

-منو يكول يعذرني

-ولج خبلة هالرجال يحبج شبيچ انتِ

-اثار سحر المحبة هاي بس تروح يرجع يكرهني

-وليش تخلين هالسحر يروح؟ چلبي بي بأيديچ ورجليچ تره هيج زلم متنعاف الرجال على گولتهم اخو خيته

-اني غبية

-ادري بيج

-مدا اگدر احبه

-ليش؟ شنو السبب الي ديخليچ هيج كارهته ونافرة منه؟

-تالة اني ما اكره الامير.. اكره محيطه ناس صعبين مزعجين يحبون يتحكمون بكلشي، السم يمشي بعروگهم وديضغطون عليه بشكل مو طبيعي حتى يعوفني وهو ميقبل

-ماطوله هو المتمسك ورايدچ لتخافين

-راح يجي يوم ويمل، يمل ويبزع ويشوفله بديل يريح راسه وتكون على مرام اهله واني الآكلها

-تتوقعين هالشي راح يصير؟

-دائماً هالشي يصير بعالمهم تالة

-مادري تَـمني اني هم حرت مثلج

-راح ادگ واعتذر منه

وخرتها من حضني اباوع لعيونها، لزمت ايدي تتوسل بنبرة صوتها..

-حبابة خليني ادگ عليه واعتذر منه

-شتگوليله؟ هم اكرهك وماريدك بعد؟

-لا

-لعد؟

رجعت تبچي وتَـمني من تبچي تموتني من القهر شكلها يصير بريء، تبرطم ودمعتها چبيرة من تنزل وتضل تشهگ  وتنشر، همست بخفوت..

-تَـمني: اگله اكرهك بس لا تعوفني

-ههههههه ولج اكو وحدة هيچ تحجي من كل عقلچ تَـمني؟

-لا لا ماكول اكرهك دا اچذب راح اعتذر منه وبس.. هاا شتگولين؟

-حنين: لااا

نزينا ثنينا على هجوم امي للغرفة فتحت الباب حيل وخزرتنا، راحت لـ تَـمني جرت التلفون من ايدها ونترت..

-متتصلين بي ومتتواصلين وياه بعد! تَـمني لاا تزيدين صخاام وجهنا صخاام كافي بنتي

-تَـمني: بس اعتذر منه خالة ماكول شي والله

-حنين: تعتذرين منه وبعدين؟؟ ما راح يسألج منو التردين تكتلي؟ عبالج راح يغلس ويعبر هالسالفة؟

سكتت تَـمني مبرطمة، طلعت امي وبيدها تلفون تَـمني وحرمتها منه واني حلفتني ما اتواصل ويه حبيبة ولا اجاوب رسائلها من تدزلي على الانستا واغير رمز موبايلي وما انطي لـ تَـمني ابد..

**

"عــبق"

من بلغونا بـ علي الحـق نجحت عمليته وصحى احس بگلبي طلع من صدري وحق الله!! بدون ما احس صرت اضحك مثل المخبلة وابچي بنفس الوقت، ركضت لحبيبة التبچي وحضنتها لصدري اهدأها بس اني المحتاجة احد يهدأني..

-علي التـقي بضحك: يمعودات اليشوفچن يخاف، حسبالهم مات اسم الله عليه

-حبيبة: الحمدلله يارب الحمدلله والشكرر حق بخير

ضحك الامير فرحان وتشكر من صديقه دكتور حاكم خطية ميشتغل هو بهالمستشفى بس اجه لخاطر الامـير علي، عبر الدكتور من يمنا يطلع من الغرفة ورحنا نستفسر منه..

-الامـير علي: دكتور نگدر نشوفه؟؟

-الدكتور: احنه راح ننقله لغرفة خاصة ونخلي يرتاح كم ساعة وراهة مسموحلكم تشوفوه

-الامـير علي: يعني هسة وضعه بخير؟؟ نتطمن؟؟

-الدكتور: بخير بخير لا تخافون

تشكروا منه الولد والدكتور راح اخيراً جرينا نفس وگدرنا نهدأ، حاكم وابو كربلا راحوا حتى يخلونا براحتنا لان شافو الامير وتقي متضايقين من وجودنا ويه بعض وممرتاحين فـ بقينا بس احنه الاربعة وحدنا هنا..

-علي التـقي: همزين ما بلغت ابوي امير چان صار بي شي بالطريق وين يتحمل

-الامـير علي: ياكل روسنا من يفتهم حسبالك يمشيها بدون لا يعاتب

-علي التـقي: هسة خلينا نشوف حق والله كريم.. خوية انتَ روح لمريتك اشوفك تلوب عليها

-الامـير علي: لا شني ماعوفن حق وحده

-علي التـقي بضحك: چا ياهو گبل شوي يگللها بيا طبيب انتِ حتى اجيچ

ما جاوب الجاوبت مكانه حبيبة، مسحت عيونها من الدموع ووگفت بنصهم وگالت..

-حبيبة: الامير ما يرتاح كلما تَـمني تطلع من الفندق يظل يلوب وگلبه يغدي نار

-علي التـقي: ليش؟

-الامـير علي: لان گلبي ما مرتاح تقي ابد ما مرتاح

-علي التـقي: شسالفتك امير شبيك ويه البت؟

-مشكلتي مو وياهة انا اخافن عليها هالبت يتيمة ومسجل بأسمها ثرووة كلمن يعرف بهالشي راح يطمع بيها ويحاول يستدرجها ويأذيها

-حبيبة: صحيح وتَـمني ماعدها زلمة بظهرها وحيدها هي وخالتها وبت خالتها

-الامـير علي: گلبي كاضني هالبت اذا ما صار بيها شي فـ راح تنهزم! وكلما اتصل وما تجاوب موبايلها اگول تَـمني راحت ويه خالتها وما ترجع بعد

-علي التـقي: امير انتَ ما تگدر تظل وياهة على الدعسة البت هم تبزع انطيها فنتگ

-حبيبة: صحيح كلام تقي اموري وانتَ عاملها بشكل طبيعي ولا تظل خايف، تَـمني لو رادت تنهزم چان راحت بنفس اليوم الوصلت بي خالتها

تنهد ساكت وسرح بالفضاء، حبيبة وعلي التقي گلوله يروح يشوفها بلكي يرتاح ما قبل بالبداية وظل يدگ عليها ومتجاوب على وگفتنا يمكن فوگ الخمسين اتصال اتصل بيها وهي ماكو، كلنا قلقنا وبعد اللحاح تقي عليه راح وبقينا احنه ننتظر حق يصحى ويسمحولنا ندخل..

مر الوقت بطيء، تعبنا كلش بس حبيبة متقبل نرجع للشقة الا نتطمن على حق واني اأيدها ماكدر ارجع وارتاح الا اشوفه مفتح عيونه التمساحية كدامي واتأكد هو عايش..

-حبيبة: شو الامير ما رجع تقي صارله هواي من رايح؟

-علي التـقي: خلي يتونس يم خطيبته يمعودة شنريد منه

هزت راسها توافقه شوية وطلع الدكتور من غرفة علي الحـق وگال حق فتح عيونه وديسأل على اخوته، كيفوا حبيبة وتقي وبسرعة دخلوا لغرفته الا اني بقيت واگفة بره خجلانة ادخل، عشر دقايق واللتفتت على صوت حبيبة..

-حبيبة: ليش واكفة هنا تعالي فوتي جوه

-لا خليني حبيبة انتو اخوان واخذو راحتكم

-شناخذ راحتنا صدگ تحجين تعالي حبيبتي تعالي

فركت ايدي مرتبكة، عدلت حجابي ودخلت وياهة للغرفة لگيته متمدد وديحچي ويه تقي عن الصار، دخلت بدون لا اسلم كالعادة واصلاً ما انتبهوا لوجودي حايرين يحچون ويه بعض..

-علي التـقي: ان شاء الله نعرف منو السوه بيك هيج حبيبي ارتاح هسة انتَ

-حبيبة: تقي جيب الابرة الدكتور گال

-اي رايح اجيبها حبيبة هنا وياك أي شي تحتاجوا بس اتصلوا بيه

طلع تقي وتقدمت حبيبة لاخوها، گعدت بصفه مبتسمة وصارت تلعب بشعره، ردلها الابتسامة وغمض عيونه تعبان..

-حبيبة: تعالي عبق

فتح علي الحـق عيونه بسرعة ورفع راسه من المخدة يدور على مكاني، توترت من تصرفه وتوترت اكثر من صارت عينه عليَّ..

-عبق: احم.. الحمدلله على سلامتك

ظل يباوعلي بدون جواب ضجت بس ما خليت يبين عليَّ، تقدمت اتقرب منهم وگعدت على الكرسي من الجهة الثانية..

-حبيبة: شلون صرت علاوي

-زين

-متوجع يا روح اختك

-لا حبيبي

-والله متت خوف عليك گلت راح طاووس بيتنا اسم الله عليك

ابتسم وحط ايده فوگ ايدها التلعب بشعره، بادلته ابتسامة وظلت تسولف وياه وهو يجاوب على كيفه مبين تعبان كلش..

-علي الحق: حبيبة اريد ماي

-اي حبيبي صار

گامت تصبله مي من الموجود بالغرفة ما قبل وطلب يريد من البرادات مال المستشفى حتى يكون بارد..

-رايحة اجيبلك حبيبي واشوف بدربي اشتري ماي من الكافتيريا

-لا تروحين وحدج لا

-اخذ عبق وياي

-لااا لاا عوفيها هاي

-چا شون اجيبلك الماي حق خليني اروح شبيك

طلعت قبل لا تخلي يعارض واني بقيت گاعدة بمكاني، حسيت بي ديباوعلي ما حبيت الوضع وگمت بسرعة اريد اطلع من الغرفة وصاحلي..

-علي الحـق: شتسوين هنا عنق؟

-اجيت انظف المستشفى

-ها؟

-اي شفتها شوية وصخة گلت اجي انظفها قابل شعندي

ضحك ضحكة عاالية لدرجة لزم مكان جروحه متألم، ابتسمت ودرت وجهي اضمها عنه، هدأ نفسه من الضحك ومسح على وجهه وذقنه..

-والله يا عنق تونسين

-قرقوز گدامك؟

-شو فكيت عيوني واستلمتيني بلسانچ حتى الحمدلله على السلامة ما سمعت منج

-تره گلت الحمدلله على السلامة

-حسيتها ما طالعة من گلبچ

عصرت عيوني بأصابعي حتى يدمعون وبرطمت شفايفي وگلت بزعل مصطنع..

-الحمدلله على سلامتك ردت اموت وراك تدري بهالشي؟؟ انهاربت انهياار عليك

ابتسم وبرزن سنونه، حرك راسه مأيس وگال..

-تقي شرگ بالماي فزيتي وثبرتينا الحمدلله على السلامة واسم الله عليك وانا اندچيت سچين وحضرتچ تستهزأين وما مهتمة؟

دا اجاوبه ودخلت حبيبة بيدها المي، راحتله تصبله بكوب بلاستك وگومته على كيف تشربه، بقى يباوعلي طول ما هو يتكمع بالمي عفته ورجعت اكعد بمكاني..

-حبيبة: صحة حبيبي صحة

-علي الحـق: على گلبچ چبدي، حبيبة انتم ليش هنا؟ ليش ما رجعتوا للبيت؟

-حبيبة: والله ولا گدرت اروح حق غير متت خوف عليك انا

-اي بس ما يصير بنيات حديثات بمستشفى الرايح والحاي يتفرج عليچن

-لا تخاف تقي وامير خنگونا خنگ وتقي نزل يگعدنا بالكافتيريا عبن ماكو زلم

-زين يسوي

رجع تقي بيده العلاج وظلوا يسولفون شوية، نعست كلش وتعبت ظليت اتثاوب وابلعها كل شوية عيوني گامت تلزگ..

-علي الحـق: رجعوا للبيت تقي بعد عبق ما تتحمل تگابل چهرتي اكثر

انتفضت مصدومة من جاب طاري اسمي گدامهم، ضحكوا تقي وحبيبة واردف علي الحـق يكمل..

-والله ولا تطيقني هالبت

-علي التـقي: چا ياهي الچانت تبچي عليك خالتي

-علي الحـق: لااااااا بشرفكك

-حبيبة: هههههه والله العظيم عيونها نشفت من الدموع

متت بدمي من الخجل ظل حق يباوعلي مصغر عيونه ونظراته كلها مكر بلعت ريگ فشلانة شبيها حبيبة فضحتني..

-علي الحـق: وانا عبالي تكرهني

-علي التـقي: لا اخيتك ان شاء الله عبق شني تكرهك

-علي الحـق: ماعندي غير حبيبة اخت

حچاهة ورفع حاجبه يباوعلي، انتبهوا كلهم على نظراته المريبة عبالك لزمني بالجرم المشهود، حبيبة جرت وجهه تخلي مقابيل وجهها وكالت بأبتسامة..

-لا تعاينلها هيج وعبوقة ما تكرهك هي بس تستحي منكم ومؤدبة كلش

-علي التـقي: ورد عبق

وجهي بوخ گمت بسرعة وطلعت بره الغرفة، وگفت بالباب دقايق وطلع تقي وياه حبيبة وگال راح يرجعنا وهو يبات ويه علي الحـق..

رجعنا للشقة فارغة خفنا نبقى وحدنا وتقي ظل حاير ما قبل يعوفنا الا من يرجع الامير، من التعب ماهتميت لشي وگبل للغرفة حطيت راسي على المخدة وجريتها نومة للصبح..

حسيت الصبح على صوت حبيبة تصيح، گمت مثل المخبلة لبست شالي وطلعت اشوف شبيها تالي لگيتها متكامشة ويه ابا الحسن علي ديتصارعون..

-حبيبة: يممماااااا لحگينيييي

-ابا الحسن علي: وينها امچ وتفزعلج وينهاا

-حبيبة: انتَ اجيت بس اذيية شعندك ببغداد هااا شعندك

ضحك وجرها من راسها متت ضحك من صرخت بعلو صوتها..

-راسيي راح ينگطممم

-ابا الحسن علي: ام راس المعنجرر وينهم اخوتچ وينهمم

بوس خدودها وراسها وعصرها بحضنه، ضحكت وبادلته حضن مبين هستوه واصل حتى طاب بحذائه على الزولية، تسائل عن اخوانه وحبيبة حچتله شصار البارحة تخببل وظل يعيط ويسب بالامير لان ما بلغه بالصار خله وطلع بملابسه للمستشفى..

-عبق: لو ما گايلتله حبيبة هبطتي الرجال

-اول تالي راح يعرف

-الامير ما رجع البارحة؟

-اي رجع متأخر بالليل بس شو چنه مادري شلونه عبوقة حتى گوة جاوبني من سلمت عليه

-يا ستار شبي؟

-مادري حتى طلع من الصبح للمستشفى ما تريگ

هزيت راسي واستفسرت عن وضع حق شلون صار گالت حبيبة هو احسن وراحت للمطبخ تسويلنا ريوگ.. يومين ياله طلعوه من المستشفى بس الشقة ولا هدأت ضباط رايحين جايين يزورون حق واحنه محبوسات بالغرفة، صاحولي مرة من اجه محقق ياخذ اقوالي حچيتله شنو شفت ورجعت للغرفة نتجسس عليهم اني وحبيبة نريد نعرف منو الطعن علي الحـق واستمر التحقيق والبحث خمسة ايام..

علي التـقي ما خلى دليل يعتب عليه، الكامرات حول العمارة كلهن مضروبات ويمتدن الكامرات العطلانة على بُعد شارع كامل كل محل وكل بيت وكل عمارة بصفنا الكامرا مالتهم لو محروگة لو مضروبة والواضح فعل فاعل..

علي الدر افتهم واجه هم ومن خلال معارف تقي ودر سوه واصدقاء علي الحـق الضباط گدروا يوصلون لدليل وهو كامرات الشارع بس الا سووا طلب للقاضي ياله قبلوا يفتحوهن ويشوفوهن وحتى بتصوير كامرات الشوارع الرجال ملثم بس بقوا يرصدون كلل الشوارع العبر من يمهن لحدما ذب اللثام ودخل لبيت وانصدمنا من اكتشفوا الرجال الي طعن حق هو..

-حبيبة: ابن عمي صلاح!!!

-علي الدر: اي ابن الچلب صلاح!

-ابا الحسن علي: امير انا من سالفته وياك وغدرته بيك ببيت نعمة گتلك نذبحه ونذبه بأقرب زريبة وانعل ابووه لابو الجابه هالسفلة بس انتَ عاندت وسويتلي بيها اشكالات شرعية وهاي سوالفك

-علي التـقي: ابا حسن هاي وانتَ محامي وتعرف عواقب القتل صدگ تحچي؟!

-علي الدر: خلاص سدوا الموضوع صلاح انلزم وراح نحقق وياه ونفتهم ويامن متعاون

گعدوا يقررون ويحچون حچي ما افتهمه كلش بس الكل شَك واتفق الموضوع هو رد كرامة صلاح شلون طلعه شيخ علي من العشيرة وتبروا منه كلهم وخلوا يتهذول وحده وينذل بعدما راد يعتدي على تَـمني ويخلي الامير يعتدي عليها وتحمل منه..

يوم يجر يوم واحنه على هالحال ما فرغت الشقة ولا عقلنا صفى، بدينا اني وحبيبة نقلق على تَـمني متتصل ولا تجاوب اتصالات حبيبة والامير علي هم نهاائياً ميجيب طاريها ومن نسئله عنها يغير الموضوع..

-حبيبة: اليوم الا اعرف سالفتهم شنو! تره صار عشرة ايام على هالوضع امير من رجع من بيت تَـمني ذاك اليوم لليوم هو ما يجيب طاريها ما يصير هالحجي هالبنيات وحدهن وماعدهن زلمة

-عبق: معقولة متزاعلين؟

-خايبة يتزاعلون كل هالوكت معقولة؟؟

-مادري بعد

-المهم انا اروح اسبح بينما يجون الولد

اخذت ملابسها والمنشفة ودخلت للحمام، رحت للصالة اگعد واگلب تلفزيون وبالي كله ويه تَـمني اتمنى تكون بخير.. علگت برنامج طبخ وگعدت اتابعه من الملل..

-حبيبة.. حبيبببة

طفرت اركض للحمام انبه حبيبة اخوها ديصيحلها، دگيت الباب عليها كسرتها ياله فتحت وبراسها الشامبو..

-هاااااا

-عبق: ولج اخوج يصيحلج

-روحيله عبق انتِ يريد علاجه

-لااا حبيبة حبابة ماريد اروح اني فدوة انتِ شوفي شيريد

-ولج جاي اسبح هوو علاج روحي انطي وطلعي من الغرفة بساع

-اهووووو حبيبة

رجعت للحمام وطبگت الباب وقفلتها دليل "ما راح اطلع لو تموتين" نفخت هوا عالي مزعوجة صار عشرة ايام مشايفته واتهرب منه وهسة رايحتله للغرفة انطي العلاج شلون حظ..

-حبببيية وينج يمعوودة

ركضت للغرفة اجيب شال وباوعت لدشداشتي كودري وتخزي اكيد راح يعيب عليَّ، لبست وحدة من صايات حبيبة فوگ ملابسي ومادري ليش عجبني اللبس من شالاتها لفيته بسرعة شلون ما كان وهرولت لغرفته..

دگيت الباب انتظره يسمحلي ادخل بس ما اجاني رد، رجعت ادگ بالباب واحمحم وماكو انشحط بلعومي واني اگول..

-احممممممم

-علي الحـق: ما تگحين ياهو كاضچ

حچاهة بصوت مسموع، ضجت وفتحت الباب ادخل ممهتمة وكالعادة متمدد على الفراش وبدون قميص..

-عبق: العفو

-علي الحـق: شكراً

-على شنو شكراً؟

-چا مو انتِ گلتي العفو

-اووووف اجيت انطيك اللطام

-لطام بعينج!!

-ما اقصد لطام طلعت من حلگي اعتذر اقصد العلاج

-شكو جايتني انتِ ماريدج

-ولا اني اريدك بس حبيبة دتسبح بالحمام

-انطيني العلاكة ذيج

طلع رجله من جوه الغطا ومد اصبع رجله الچبير واشر على العلاگة، خزرته مغثوثة من تصرفه وانوب بقت رجله معلگة يأشرلي على العلاكة ما نزلها..

-ايدك مشلولة متأشر بيها؟؟؟

-لا

-لعد!

-مابيه اطلعها من الغطا دفيان

گلبت عيوني عليه ورحت اجيب العلاگة مال العلاج، رجع رجله جوه الغطا بس بقت مكشفة، اشر بعيونه على الغطا وگال..

-عنق بشرفج غطيني عدل

جريت الغطا اغطي زين ودحسته جوه رجليه ثنينهن صار شكله يضحك عبالك مگمط چنه دولماية طويلة..

-علي الحـق: هههههه گمطتيني ولج

ماتحملت اكتم ضحكتي وضحكت گدامه، طلعت العلاج من العلاگة وحطيتهن على الميز بصفه، اشرلي بعيونه على شريط حبوب لونه احمر وگال..

-طلعيلي حبة من هذا شفق

طلعتله حبه حطيتها بيدي وفتح حلگه ينزل عيونه على حلگه حتى احطها بي..

-حطيها هنا

گلبت عيوني للمرة الثانية على عجزه ميقبل يطلع ايده عبالك مشلول، شمرت الحبة بحلگه وشلت گلاص المي اشربه..

-علي الحـق: عاشت ايديج چبيدي، بعد حبة من هذا الشريط الاصفر

طلعتله حبة وهم حطيتها بحلگه وعدت نفس الشي مال قبل شوية..

-عاشت ايديچ بزونات، بعد من هذا لابيض

وهيج گعدت اشربه علاجه كله وهو ويه كل حبة يطلعلي لقب شكل لحدما گال..

-عاشت ايديچ عگروگتي

-عگروووگة؟؟؟

-اي

-اني عگروگة؟؟ ليشش يمة

-چا لابسة هذا الحجاب الاخضر چنچ عگروگ

-اووووف اوووووف

-وانتِ تظلين كلما شفتيني وصحتي اووف شربيني الماي شربيني

ضجت وشربته المي بعصبية وبسرعة، طلعت عيونه يريد يلحگ على المي قبل لا ينكب عليه، اضطر يطلع ايده من اللحاف ويلزم الگلاص بس ما لحگ وغص بالمي وصار يگح حييل ويصيح متوجع من جرحه بنفس الوقت..

-عبق: يمممة صخاام ولطاام

طفرت اضرب بظهره حيييل خلي تطلع الكحة كلها ويرتاح وهو مستمر على الكحة ولازم بطنه وصدره..

-اسم الله اسمممم الله

واضرب بكل قوتي على ظهره بأيدي ثنينهن شادة حيلي..

-اييي گح بعددد ارتاااح ايييي اسم الله

-خررررب عرررررضج ظهرررري انخسففف

وخرت منه بسرعة ووگفت گباله اباوع لوجهه صاير دم ومبين متألم، ظل لازم بطنه وعاصر وجهه ويدردم..

-بت الحلوو طلعت كل ضيمها بظهري لعنة الله على ابليسج

-اي شبيك غير تگح زين وترتاح

-ارتاح؟؟ اي مو هي........

سكت بالع بقية الجملة ويباوعلي بنص عين، ذب نفس متألم وگال..

-والله لوما بت وشريفة الا ازوعهن كلهن گدامچ

-تزوع شنو؟

-كل انواع الفشاير والمسبات انقشلچ بيهن وادللچ هم

-سيدي انتَ جبتها لروحك شبيك

-سيدچ ز**** بحظه وبخته

تمدد بمكانه ووخر الغطا من بطنه طالع دم من الشاش، شهگت مخترعة وهو استمرت ملامحه ممتعضة كلش واضح عليه متألم..

-اوووف مبينة توجع

-خرب روحج اي والله

-لا تغلطط واحترم نفسك

-انفتح جرحي بعلي لوما شريفة الا .....

-مبين هواي تقضي وقت ويه البنات المو زينات!

-عبق شگيتيني شششگ عببق

-هسة گول ماكو بعد علاج انطيك؟

-جيبيلي شاش خليني اغير هذا تدمر اكيد انفتح الجرح

-اخيطلك جرحك؟

-اييي مو هو لبااس انفتگ وتردين تخيطي

-شگد يفششل هالرجال!

-جيبيلي الشاش عطر

-عطر شنو؟؟ اسمي عبببق

گمت اجيب الشاش معصبة وجبت كرسي اگعد قريب منه حتى اساعده، ضحك على ردة فعلي ونهض شوية من راسه حتى يسيطر يشوف مكان جرحه..

-اوكف اوكف ماتحمل اشوف الجرح اني راح اروح

-چا ياهو يساعدني عگروگ

-انتظر حبيبة تجي تساعدك

-ماكدر تلوخت دم يله چبد قوي روحچ وفتحيلي الشاش

هزيت راسي اي ومديت ايدي ترجف افتحله الشاش، ركزت بجرحه ممبين زين من الدم، زفرت نفس خفيف وجبت قطن انظفه من الدم ومركزة بكل حيلي ويه الجرح..

-يوجعك؟

-امم

-اتوقع تحتاج طبيب

-لا مو لهدرجة

نظفت الجرح زين وحطيت معقم ومحلول دوا احمر عنده فوگاه وجبت شاش اغطي الجرح بينما يتشربه الدوا زين..

-شدي حيلچ

رفعت عيوني اباوعله لگيته صافن عليَّ ومركز، حركت راسي بمعنى شنو، اردف يكمل..

-شدي حيلج للسادس يلوگلچ تصيرين دكتورة

ابتسمت فرحانة بكلماته وهزيت راسي بـ اي، وخرت الشاش من الجرح اشوف اكدر اللفه هسة لو لا..

-اني اريد ادخل كلية .....

-تحليلات ادري

-اي يعجبني هالاختصاص

-يلوگلچ

-ههههه شكراً

ابتسم ونزل عيونه على جرحه شوية، رفع عيونه الي مرة ثانية وگال..

-خفتي؟

-من شنو

-من طعني صلاح گدامج

-تريد الصراحة؟

-اي؟

-خفت كلش اي

-خفتي يأذيچ؟

-خفت يأذيني او يدخل على حبيبة وهي نايمة وانتَ تـ....

-انا شنو؟

بلعت ريگي مرتبكة، سكتت ناوية اغلس ورجعني صوته من كرر..

-انا شنو عبق؟

-خفت انتَ تموت

ابتسم وضاقت عيونه، نهض نفسه يعدل نومته وسند جسمه على عكوسه..

-اموت؟

-اي يعني خالة رسمية راح تزعل هواي واخوتك هم

-بس؟

-اي وابوك وحبيبة

-بس؟

-اي

-همم

توترت من نظراته اكلني اكل بيهن وعيونه تسحر الشخص وتخلي غصب يباوعلهن ويتأملهن..

-اريدج تعرفين شي قبوقة

-شنو هو

-ماريدج تخافين من شي ما دامني موجود

صفنت بجملته وعيوني بعدها مركزة بعيونه ما وخرتهن ولا گدرت اوخرهن ما رمشت ولا زحت وجهي عنه..

-الصار چان صعب مو عليّ لاني متعود على الغدرات بس صعب عليج وانا ما شفتچ بعد حتى اتشكر منج واحييچ على شجاعتچ وانتِ تنزلين وره الزلمة خاطر تعرفي ياهو وتساعدينا نعرف المجرم

-ماكو داعي تتشكر اني سويت الواجب

-لا عبق هذا مو واجبچ انتِ واجبچ تگعدين يم راسي وتبچين عليَّ وتدعيلي اگوم بالسلامة شعندج رايحة تنططين وره الزلمة لو مسويلج شي وين انطي وجهي انا؟؟؟

-هااي شبيك هستوك تشكرت مني ماتحملت مترزلني!

-اي ماتحمل اشايفة روحج انتِ چلب بوليسي وطگيتي نعالچ وركضتي وره زلمة شايل سچين بيده

-احتررم نفسك چلب بوليسي شنو! لاا انوب يگلي وضيفتج تكعدين يم راسي وتبجين ليش عيني خاف جابولي ابني شهيد واني مادري!!

-اهووو بعد شيسكتهاا

-بس والله مو صوچك صوچي اني الخفت عليك وبچيت هم!

شهگت مكتومة من لزم ايدي ثنينهن وجرهن يحطهن على صدره وگال بضحكة مكر..

-صدگ خفتي عليّ ولج عنق

-هاا.. لا.. لا هدني وخرر لا تجي حبيبة

-ايا عگروگة طلعتي تخافين عليّ وما تحچين

-هددني الباب يندگ الباااب

هدني يضحك بصوت عالي، عفته وطبگت باب غرفته وركضت افتح باب الشقة بس انتبهت للبسي عيب يجون اخوة حبيبة ويشوفوني لابسة صايتها هسة العگروگ ذاك عادي بس ذولة استحي منهم، رحت للغرفة نزعتها وبقيت بالدشداشة ولبست من شالاتي ورحت افتح الباب وچان تطلع بوجهي سوزان!

-سوزان: هلااو عنق شلونچ

-بخير الحمدلله انتِ شلونچ

-شلون صدفة حلوة هاي شفتج هنا فرحت والله

-حبيبتي

-علي جوه مو؟

-علي الحـق تقصدين؟

-اي اكيد

حچتها بضحكة ودخلت بدون لا اگوللها تفضلي، غلست وفتت وراهة عبرت الصالة ودخلت للممر تباوع للغرف..

-ياهي غرفته؟

-ذيچ

اشرتلها على غرفته ضحكت متحمسة وحمحمت بصوتها وصارت تعدل بشعرها، عبرت الممر تمشي بكعبها ما نزعته بالباب ودخلت بي وگفت مقابيل غرفته ودگت الباب عليه..

-علي الحـق: تعالي ولج

اللتفتت عليَّ مبتسمة بحماس وفتحت باب الغرفة، جفل حق من شافها وعگد حاجبه مستغرب من سلمت عليه بصوت يرجف مال وحدة راح تبچي..

-سوزان: الحمدلله على سلامتك علي متشوف شر يارب

-علي الحـق: الله يسلمج

-والله مچنت اعرف صاير وياك كل هذا اني چنت مسافرة ورجعت اليوم رحت لمكان عملك اسأل عنك وبلغوني

-رحتي لمكان شغلي!

-اي لان جبتلك صوغة واجيت انطيك مقصدت شي ثاني

-وانا اگول ذول المطاية شمالهم وياي مزقوني بالگروب

-سوزان: مفهمت؟

-علي الحق: سلامتچ بعد اخوچ

-سوزان: يمكن اني ضوجتك بجيتي بس والله هبطت عليك

-علي الحـق: اي سلامتج، عنق تعالي لفيلي الشاش بلا امر

هزيت راسي اي ورجعت اگعد على الكرسي اللفله الشاش، ارتبكت من انظار سوزان دا احس بيها عليَّ من جهة وعلي الحق هم مركز ويايه كلش من جهة ثانية..

-علي الحـق: على كيفچ لا تشدي حيل چبيدي

كملت لف الشاش وهمستله بخفوت اوازي هدوء الغرفة..

-خوما ديوجعك؟

-لا كلش زين هيج

-سوزان: عفواً عنق بس ممكن شي حلو اشربه او آكله كلش انهبطت واخاف اتخربط

وخرت عن حق وبلعت ضحكتي على اسلوبها بالكلام وشلون تنوص من تحچي تذكرني بـ تَـمني، عفتها وياه ورحت للمطبخ اسويلها عصير برتقال بلكي متتخربط هالمايعة..

واگفة اعصر البرتقال ودخلتلي للمطبخ شايلة بيدها جنطتها، اللتفتت ويه صوتها من گالت بأبتسامة حلوة..

-گلي من رخصتچ اريد ابدل

-ها

-شنو صار عنق تكدرين تسولفيلي؟

-والله ماعرف كلشي صار فجأة

-معرفتوا منو السوه بي هيج؟

-اخوانه ديشتغلون على هالموضوع ويدورون عليه

تنهدت وهزت راسها اي، كملت اعصرلها وصبيت العصير بگلاص وحطيتلها شكر..

-لا لاا فدوة شنو شكر حطيتيلي

-ها مادري بيج تحبين تشربي هيج اسفة

-بعد ماكدر اشربه عنق سويلي واحد ثاني

-بس مو كلش حلو حطيتله نص خاشوگة

-لا داده اني ماحب سُكر بالعصير احبه من المعصارة للكاسة بدون اضافات فـ سويلي واحد ثاني

استفزتني بحركاتها تحرك بأصبعها المصبغ للمعصارة وتتأمر، حطيت الگلاص على الكاونتر ورحت اغسل ايدي وگلت ببرود..

-خلصنا برتقال

-لعد وهذا الهنا شنو ليمون؟؟

-هذا مال الجيران

-وليش الجيران حاطين مسواگهم يمكم بس لا ثلاجتهم عطلانة؟!

-اگلچ حبي هذا البرتقال مو مالتنا وذني چانن اخر برتقالتين عصرتهن الچ عذرينا

-شبيچ انتِ تحچين من طرف خشمچ شدعواچ

-يا عيني دا اگلچ هالبرتقال مو مالتنا انتِ مو جاية تزورين حق؟ روحي شوفي شبعي منه رووحي

-انتِ اصلاً شجابچ هنا؟؟ ليش جاية لشقته وباقية وياه؟؟

-هسة شعليج بيه يا اختي انتِ جاية هنا تحاسبيني لو تشوفين مريض!!

-ولج انتِ غير خدامة صلفة باعي شكلچ باعي لبسج يخززي تفشليين والله تفشليين

انهضمت كللش من صارت تأشر بأصبعها على جسمي من فوگ ليجوه وتحجي بتقزز، بلعت ريگي استجمع قوتي ونترت بيها..

-عبق: شعليج بلبسي؟ صار اللبس هو الي يقيّم الانسان!

-اي يقيّم البشر الطبيعيين بس صح نسيت انتِ خدامة وزايد عليَّ قيمتچ هسة انتِ وهاي دشداشتج الكاتلها الضيم!

-انتِ وحدة قليلة ادب وما مترباية وزايد عليَّ احترمتج وقدرتج وسويتلج سممم حتى تشربي!

-تسويلي وغصبااً عليج لجج لا تصدگين نفسج زايد! واني اعرف سبب وجودچ هنا ببيت علي الحق انتِ خدامته والساقطة مالته بنفس الوقت!

-احتررمي نفسج للج ادبسزز والله العظيم اطيحه لحظظج لو فكيتي حلگچ وگلتي كلممة وحدة بعد

-بت لييل واجت ترادد تاج راسهاا روحي رووحي الولد الهنا شبعوا منج ولعبت نفسهمم الله يساعدهم على هالوجه والملابس انقرفووا

-وولج كلللبة

ماتحملت اسكت اكثر واتغاضى عن اهاناتها وهجمت عليها اعتها من شعرها وسحبتها اشمرها على گاع المطبخ، گعدت فوكاهة وصفگتها راشدياات افوخ گلبي بيها وهي تعيط وتستنجد بـ حق حتى يجيها..

-عبق: وولج منوو الاجت لشقة رجال عزابيي وحدهاا وگعدت بغررفته ولوما هو طارددج چان لزگتي هناك والله اعلم شسويتيي

-سوزان: بت ال**** هدينييي گوومي عنيي والله الا اگول لـ علي عليج اخلي يطرددج

-گووليله انيي اريدج تگوليله گوومي گووومي من الگاع لا تنگسيها بأنحطاطچ ولعباان النفس الديطلع منچ

گمت عنها ورحت للمغسلة اغسل وجهي اشتعلت شعل من القهر من وره هالحقيرة البلا اخلاق بس غير تروح؟ ولا تروح بقت واگفة بباب المطبخ وتهين بيه وتذلني بكلمات اجن سچاچين بصدري..

-خداامة وتشتغلين جووه الرجليين هاي وظيفتج تمسحين يقنادر اسيادچ وتعيشين على فضلتهم! تكرربين وتشتغلين و**** بيچ وياخذون كلشيي يردو منج ومتفتحين حلگچ لانچ خدااامة وهذا قدرچ ومكانج يا مجروددة ام دشداشة كوودري!!

الدموع جمدت بعيوني بس ارمش يوگعون، من قوة كلماتها الكلام ضاع بلساني ماعرف شجاوب وماعرف شحچي، اللتفتت عليها اواجهها واتحسب عليها وسكتت جافلة من شفت حبيبة واگفة وره سوزان ضبط ما داخلة للمطبخ واگفة بره والمنشفة ملفوفة على راسها..

-حبيبة: شصاير هنا؟

اندارت سوزان بسرعة تشوف منو وماكدر اسولف بمعانيها ووجهها شلون تغير من شافت حبيبة، رجعت تبتسم وتعدل بشعرها وتگول..

-هلو حبي انتِ اخت علي صح؟

-حبيبة: اي وانتِ منو؟

-اني سوزان

-حبيبة: اي؟

-سوزان: احم.. اني سوزان اصير صديقة اخوچ

-حبيبة: وشتسوين بالمطبخ يا سوزان يا صديقة اخوي؟

-عفواً منچ حبيبتي حبيبة بس اني اريد اشكيلچ من خدامتكم وحدة كلش رخيصة ومتستحي

-حبيبة: خير خيير؟؟ تشتكيلي من خدامتنا؟؟ يا خدامة هاي؟!!

-سوزان: هذي

اشرت عليَّ وگلبت شعرها كله للجهة الثانية واردفت..

-هاي القليلة ادب مدت ايدها عليَّ وهانتني وحچت حچي ثگيل بحقي حبيبة اعرفكم ناس محترمين وماتوقع تقبلون على خدمكم اذا تجاوزوا على ضيوفكم

-حبيبة: لا نقبل

-سوزان: شنو؟

-حبيبة: نقبل ويلا طلعي برا هالبيت

-سوزان: نعم؟؟ انتِ دتطرديني منا من وره هااي؟؟

-حبيبة: هااي تسوه راسچ وراس امثاالچ هااي تبوسين ايدها المرة الجاية من تشوفيها هااي تااج راسچ وراس كل وحدة تشبهچ يلا براااا

فكيت عيوني على وسعها ويه كلام حبيبة وعصبيتها، ظلت سوزان صافنة متعرف شتحجي وحبيبة مادة ايدها تأشرلها على اتجاه باب الشقة.. طلعت سوزان من المطبخ ترجف شالت جنطتها من الگاع وطلعت منا..

-عبق: حبيبة اني صح هنتها ومديت ايدي عليها بس لان هي...

-حبيبة: ولج لو ما كاتلتها وعلي انا الاكتلها هالرعنة

-يعني ما معصبة مني انتِ؟

-اعصب منچ شنوو عبق صدگ تحچين انتِ!! ولج هااي نعاال جوه رجليچ احطها لو فكرت تحاچيچ بهالطريقة مرة ثاانية

نزلت دمعتي ويه كلامها وبعد ماكدرت اسيطر على باقي دموعي، ركضت حبيبة للمطبخ تحضني وتمسح على ظهري وتحچي ويايه حچي خلتني افحط..

-عبق انتِ اختي وما اسمح لوحدة زبالة مثل هاي تتمادى وياچ والله العظيم گلبي يوجعني چن هاينيني الي لو وحدة سمعتچ حچاية وچن نزلوا دمعتي لو بچوچ وزعلوچ..

-احبچ حبيبة والله احبچ

-اموت عليج يا رويحتي انتِ عبيقة نظر عيني

-اني بدونج اضيع وانداس والله

-اااخ يا عبق لو بس اگدر اقنع امي تخليچ بحال سبيلج چان انا مرتاحة وگلبي بارد بس شسوي لامي شسوويلها

-خالتي اتحملها وتعودت عليها بس الغريب من يهينني ماگدر اتحمل لان الغريب دائماً يحجي الحقيقة الاهرب منها حبيبة

-انچبي حقيقة شنو؟؟ انتِ اختي وتوأم روحي وفنه اليفك حلگه ويگول غير هالشي

-طردتي صديقة علي الحـق حبيبة خاف يزعل

-هسة اروحله

طلعت گدامي من المطبخ واني مسحت دموعي بسرعة ورحت وراهة، دخلتله للغرفة واني وگفت بالباب اباوعلهم من بعيد.. وگفت مقابيله ضبط وگالت بجدية..

-علي اريدك تعذرني انتَ اخوي واحبك بس هاي البت لو چانت روحك متعلگة بيها هم ادوس عليها بنعالي واعبرها لو شفتها بعد!

ظل ساكت علي الحـق يباوعلها ثواني ودار عيونه عليَّ، رفعلي حاجبه وگال بعجرفة..

-اخذتي حگچ منها؟

-عبق: ها؟

-فوختي گلبچ بيها لو اگوم افوخ گلبي بيچ!

-عبق: فوخت گلبي واخذت حقي منها!

-علي الحـق: عفية

-حبيبة: طلعت البت مكفوشة منا خوش مريحة گلبها عبق تستااهل..

**

"تَـمني"

طلعت من اخر امتحان ورجليه ترجف متشيلني، كل يوم اطلع من الامتحان اتأمل اللگه الامير واگف منتظرني او جاي حتى يتطمن عليَّ ويخيب املي من ما اللگاه واضطر اكمل طريقي للبيت مقهورة..

انتقلنا لشقة نعمة السجلها بأسمي صار يومين وخالتي مخبوصة بيها ما قبلت نشتري اثاث ونبقى على اثاث الشقة الموجود، اكدت ما راح نعيش ببغداد وباقين بيها بس هالكم يوم بينما اسوي عمليتي واجهض الطفل وارتاح وراهة نسافر..

اخذت تكسي وبوجهي للشقة الطريق كله اباوع من الجامة ورايحة لغير عالم، عقلي فارغ من كلشي وبس فكرة وحدة تدور ببالي وهي "شلون حملت؟؟؟"..

-وصلنا عيوني

انتبهت ويه صوت ابو التكسي انطيته الكروة ونزلت للشقة، بعدني ما نازعة الجنطة من كتفي واجتني خالة تركض وتأشرلي بيدها..

-يلا يلا تَـمني

-شنو وين رايحين؟

-للدكتورة يلا مو خلصتي امتحانات

-اي بس خالة الدكتورات يفتحون العصر مو هسة

زفرت نفس مزعوجة ورجعت لغرفتها، ما اللومها لانها مقهورة ولانها زعلانة البيه مو هين ويكسر الوجه تخاف لا يكبر بطني ويبين عليَّ والناس تكتشف هو هسة واني سمنانة عن قبل وكل ظني سمني هو اكتساب وزن طبيعي طلع القهر بسبب الحمل..

رحت لغرفتي اني وتالة وبدلت ملابسي وتمددت على الفراش تعبانة كلش، اليوم رحت للملعب بالجامعة وركضته كله عسى ولعل انزف واجهض من وحدي بس ماكو صار عشرة ايام احاول انزل هالطفل ومو راضي ينزل، ما خليت تطفر ولا خليت قنينة الغاز ما شلتها ولا خليت ركض ولا رياضة وماكو فائدة..

-تالة: توتة سؤال

-امم

-ما شكيتي بروحج من ما اجتچ الشهرية؟

طفرت من الفراش خازرتها ضحكت خجلانة وحكت شعرها..

-تالة: شنو شبيچ

-تالة ليش اني متزوووجة حتى اشك بروحي؟؟! بشرفچ هذا هم سؤال!!

-لا يعني واحد هم يفكر ليش تأخرت الشهرية ويحاول يشوف طبيبة

-اني من قبل هيج مخربطة عندي كل اربعة اشهر خمسة تجيني مرة ومن رحت للدكتورة عليها قبل كالت هالشي طبيعي وما اشكي من شي بعد شنو اشم گفه ايدي اني تأخيرها هالمرة بسبب الحمل!

-اي صح

سرحنا ثنينا كل وحدة تفكر بعالمها لحدما صار العصر واجتني خالة حتى نروح، عفنا تالة بالشقة وحذرناها تقفل الباب ورانه واني اخذت جنطتي المحضرة بيها ملابسي لان خالة كالت يمكن يسوولي كورتاج وطلعت..

تمشينا بشوارع بغداد واحس بالهم والغم تارس گلبي، شگد چنت متحمسة وسعيدة راح ارجع هنا بس هسة اگول يا ريتني ما اجيت ولا وصلت ولا عرفت بالمصايب الي اللتمت على راسي..

حجزنا عند دكتورة غير ذيچ الرحنالها اول مرة وبسرعة دخلنا فارغة ماكو احد عليها سلمت علينا وچانت كلش حبابة، سألتني من شنو اعاني وهمست بخفوت ميتة خجل وقهر..

-دكتورة اني حامل

-الدكتورة: يعني اجيتي تطمنين على الجنين مو؟

-حنين: اي دكتورة ونريد نعرف بيا شهر هي

هزت راسها واشرتلي على السونار، سويت مثل المرة الفاتت وگعدت الدكتورة على الكرسي تباوع من الشاشة.. الدمعة بعيني وكارهة حتى بطني ماكدر انزل عيوني واباوعلها..

-حنين: ها دكتورة بشري؟

اللتفتت الدكتورة مبتسمة عليَّ، باوعت على ايدي الحاطتها بالجوانب وگالت متسائلة بس بطريقة لطيفة..

-ماشوف حلقة بيدج شنو زوجچ ميغار على هالجمال

عرفت ليش سألت هالشي تريد تتأكد بيه متزوجة لو لا وحقها، حقها لان خجلي ووجهي المشتعل ولهفة خالتي وارتباكها تفسر غير شي..

-تَـمني: يغار

-الدكتورة: حقه اني زوجي يخبصني على الحلقة

حچتها بضحك وخالتي ابتسمت وياهة مجاملة، رجعت تباوع للشاشة وفاجأتني من سألتني سؤال جديد..

-زوجچ شنو يشتغل؟

هالمرة ما سكتت ولا جاوبت بأختصار لان واضح هالدكتورة شاكة بيه ممتزوجة وهاي سبب اسئلتها الغريبة..

-تَـمني: خلفة ديكور

-الدكتورة: حلو، يشتغل عيادات؟

-مادري اسئله عود

-ياريت والله يقبل يشتغللنا بنايتنا

بدت تسولف ويايه بأريحية اكثر من عرفت شغل الامير، گامت من السونار وراحت للمكتب مالتها وطلبتني اتقرب منها..

-الدكتورة: تَـمني انتِ حامل عشرة اسابيع

فتحت عيوني على وسعها گلبي احسه راح يطلع من صدري من الصدمة وخالتي انخطف لونها، لزمت ايدي خالة تهدأني حتى ما انهار هنا وكملت ويه الدكتورة..

-حنين: والجنين زين وضعه؟

-الدكتورة: نعم حالته كلش زينة وكلشي ماشي عدل

-حنين: زين دكتورة سؤال عدنا

-تفضلوا

-تَـمني بعدها صغيرة وتدرس وزوجها مو من بغداد غير محافظة وكثير السفر يعني بعدهم ممستقرين بحياتهم وهالطفل صعب اذا اجاهم هسة فـ يردون ينزلوه

تغيرت نظرة الدكتورة للتفاجأ وبقت ساكتة، من شافتها خالتي هيج اردفت بسرعة..

-ماطولها بعدها صغيرة تعوضه بغير طفل بالسنين القادمة ان شاء الله

-الدكتورة: منو يگول راح تگدر تعوضه؟

-حنين: تكدر اكيد تَـمني صغيرة وصحتها زينة وزوجها هم ميشكي من امراض و...

-الدكتورة: ام تَـمني تفضلي استريحي حتى اوضحلكم شي

گعدت خالة بصفي على الكرسي وانتبهت ويه الدكتورة من كالت..

-الدكتورة: يجوز انتو متعرفون وماكو دكتورة بلغتكم بهالشي من قبل لان ميبين بالسونارات العادية بس تَـمني رحمها صغير

-تَـمني: يعني شنو؟

-الدكتورة: يعني راح اقربها الكم بعيداً عن الكلام العلمي، البنية بعد البلوغ رحمها يطگ وينقسم الى قسمين كأنه يصير عبارة عن تفاحتين بصف بعض

واشرت بقبضات ايدها لزگتهن وحدة بصف الثانية تراوينا شكله، اردفت تكمل..

-المراهقة او الفتيات الصغار رحمهن عبارة عن تفاحة وحدة وتَـمني شكل رحمچ هيچ ماتغير من بلغتي ولا انفتح لتفاحة ثانية يعني يعتبر رحمچ مراهق وجدااً صعب بي الحمل واذا اجهضتي هالطفل ممكن بنسبة كبيرة جداً تصير عندج مضاعفات وتنحرمين من الحمل مرة ثانية

وكأن راشدي بعد راشدي ودا يكفخون بيه واحد وره الثاني بدون لا اكدر اجر نفس، اختنگت والدنيا ضاگت بيه لزمت صدري متوجعة والدموع تصب من عيوني ماعرف شنو اگول وشلون اكدر افسر حالتي المزرية..

-الدكتورة: فـ اني كـ دكتورة ما انصحچ بالاجهاض اولاً حرام وميجوز هالشي خصوصاً وانتِ متشكين من امراض وثانياً حملچ هذا الحمدلله من صمد ومشى ويانه شهرين ونص بدون لا يسقط من وحده فـ ليش تضيعي وتجازفين بروحچ

-حنين: هي شالت قنينة غاز ولعبت رياضة وكلشي سوت وما وگع دكتورة يعني رحمها يتحمل وقوي

-الدكتورة: عيوني ام تَـمني الطفل باقي برحمها بحفظ رب العالمين وما وگع وره كل هالشغلات وبالعكس الله يحبچ تَـمني لان گتلج بعد اجهاضچ لهذا الطفل تصيرلج مضاعفات انتِ في غنى عنها

ماتحملت اسكت اكثر وانفجرت بالبچي گامت خالة حضنتني لصدرها وتمسح على شعري وتهدأ بيه، باوعتلنا الدكتورة مستغربة من وضعنا بس ما علقت بشي.. تشكرت منها خالتي وطلعنا من عيادتها بروح رايحة وعيون ظلمت بيها الدنيا..

-حنين: شلون حظ يا ربي شلون بخت عليج يا يمة

-تَـمني: شلون ما نزل ويه كل هالضغط الصار عليه

-لانه نغغغل لو چان ابن حلال چان بعطسة يوگع بس هذا نغل!

بچيت اكثر متدمرة احس حياتي انتهت وماكو شي راح يطلعني من هالورطة، بقينا الطريق كله نمشي ما اخذنا تكسي وماكو غير فكرة وحدة تدور بعقلي وهي..

-تَـمني: راح انزله خالة

-تخبلتي تَـمني؟؟ تنزلي وتظلين تعانين طول عمرج بدون خلفة والرايح والجاي يظلون يشمتون بيج ويلعبون على اعصابچ!

-لعد شسووي خالة انفضح احسن!!

جرتني من ايدي معصبة ناار غادية وظلت تمشي بيه هوايه لحدما دخلنا لـ مول، تسحسل بيدي ومن اتعب وماكدر امشي بعد تخليني ارتاح شوية ونرجع نمشي..

-تعالي شوفي هذا المحل

-مو وكتها خالة تعبانة

-امشي تَـمني امشيي

دخلتني لمحل يبيع داخليات نسائية ودشاديش نوم، سحبت دشداشة ستن كيمونة مدلعة كلش لونها نيلي وگالت..

-حلوة هاي مو؟

-شتسوين بيها

-معليج.. هاي قياسج؟؟

-خالة جاوبيني شنو هاي!

مجاوبتني وجرت دشداشة قياسي وانطتها لام المحل تشوفلنا سعرها، اشترتها وطلعنا من المحل وبقت تمشي بيه تهف گدام..

-تَـمني: خاالة كافي هديني وفهميني شدنسووي

-راح تتصلين هسة بالامير علي يجيچ للبيت! راح تعزمي على عشا وتصالحي مفهوم!!

-ليش؟

-راح تتغنجين وتتعدلين وتتدلعين عليه وتقنعي تزوجون مفهوم!

-خالة شلون اتزوجه واني حامل تردين تفضحيني انتِ!!

-لازم تخبلي بجمالج ودلالچ و تخلي يتقربلج اليوم تَـمني!!

-شنوووو

-وراهة تبلغي انتِ حامل بـ ابنه ونستعجل بزواجكم!

-خاالة شنوو هالحجي حرام علينا نسوي هيج حراام

-شنو الحرام هاا؟؟ وليش حراام ليش انتِ مو حامل؟!!

-حامل اي بس مو بأبن الامير! قبل عشر اسابيع اصلاً مچنت ببيت شيخ علي وچنت محبوسة بذاك البيت الحقير ويه رجلچ بساام والنذلة هناء ويجوز صار بيه شي هنااك من چنت متخدرة!

-تَـمني محد راح يعرف بهالشي امي انتِ ليش تردين تخربين حياتج وتتبهذلين؟ وهمي الامير الحامل بي ابنه ومن تجيبين راح نگول اجه للدنيا سبيعي واني اتفق ويه الدكتورة التجيبچ ونمشيها عليه

-لا خالة لاا

-ماما راح تتعززين وتتكرمين وتصيرين ام البيت متزوجة شيخهم وحامل بأبنه وتجيبيله الطفل بسرعة راح ترتاحين ومحد راح يعرف هالطفل مو ابنهم!

-ماكدر اغشه هيجي خالة ماتحمل والله الامير ميستاااهل والله

-تَـمني فكري بروحج هسة وعوفيي انسانيتج على جهة فكرري بروحج وبروح هالطفل الي ببطنج تظلون هيج تايهين والناس تعيبچ وتگول حملت بدون زواج!

-اتحمل اي واني انزله بيدي وانحرم من الاطفال طول عمري بس لا تخليني اغش هالرجال واضحك عليه خالة مستحيل اسويها مااكدر

-وشنو يفرق ابنه لو مو ابنه؟؟ تَـمني هو شلون راح يعرف بهالشي هو راح يربي على ان ابنه وانتِ مرتاحة وابنج وحتى الامير ما راح يعرف ولا يشك بشي يلا يا ماما قبلي وخلي يصير براسج خير

-ماكدر خالة

-تكدرين تَـمني تكدرين!! انتِ اذا بقيتي حامل بهالطفل راح تأثرين علينا وعلى بت خالتج تالة محد يدگ بابنا بعد ويخطبها! واذا نزلتي يمكن تموتين وانتِ بالعملية من النزف وبالحالتين اني خسرانة وين انطي وجهي لو صارلج شي وانتِ امانة امج تَـمني!!

بچيت عاجزة وگفت بنص الطريق ابچي دم والرايح والراد يتفرجون عليَّ ومستغربين، جرتني خالة للبيت ترجعني واحس بگلبي ميت واللعبان نفس ما راح مني تعبت والله تعبت..

دخلتني خالة للغرفة وطلعت تالة وگعدتني على الچرباية، بوستني وهمستلي بخفوت..

-فكري توتة فكري بنفسچ وبتالة وبيه فكري بينا لو نعيش مدللات وسعيدات لو ننذل لباقي عمرنا وننهان

-نسافر

-شنو؟

-نسافر بره العراق ومحد راح يعرف اني حامل بدون زواج اكذب على الناس واگلهم زوجي مات او انفصلت ونعيش كلنا مرتاحين بالفلوس الي نعمة عافهم وهذا الطفل هم يبقى ويانه

-تَـمني لا تستغبين!! نعيش بالخارج وحدنا شلون؟؟ ليش احنه مدبراتها نعيش ببغداد وحدنا حتى تردين نطلع بره العراق! اني گلت نطلع للسليمانية وره ما توگعين هالطفل مو انوب ناخذه ويانه!

-مو اني...

-سوي الگتلج عليه وارتااحي ارتاااحي وركبي على ظهر الامير واستغلي مكانه وحبه الچ وصيري شيخة عليهم وحچايتچ التمشي على الكل!

عافتني وطلعت من الغرفة، رجعت بيدها تلفوني حطته على الميز وطلعت مرة ثانية عايفتني بهالضيم والتفكير دمرني، عجزت وحرت ماعرفت شسوي مادري انهزم وحدي واطلع منا واعوف حتى خالتي وتالة بس اذا سويت هالشي هنه بشنو راح يعيشن وشلون؟ خالة معتمدة على املاك نعمة وفلوس المحلات واذا سافرت لازم ابيعهن كلهن وابني حياة جديدة بره وحدي!

للمغرب اني على هالگعدة فكرة تجيبني وفكرة توديني تعبت وراسي انفخ شكبره، ساعة اكول ابلغ الامير اني حامل وهو يلگالي حل وساعة اكول اذا گتله بهالشي راح تلعب نفسه مني ويعوفني وحدي هاي اذا ما امه فضحتني وشهرتني وتوصل بيهم يذبحوني ويتهموني خنت ابنهم..

عقلي هلك وتعبت من هالوضع، كمت للمراية اباوع لوجهي شلون تعبان وذبلانة ونزلت عيوني على بطني، لاول مرة من عرفت بروحي حامل احط ايدي على بطني واتلمسها واحس بوجود هالطفل..

خصمت قراري وجريت التلفون مابي شحن طافي، حطيته يشحن دقايق ورجعتله فتحته وشفته منفجر بأتصالات حبيبة واخوان الامير كلهم عداه هو ولا اتصال اكو ولا حتى رسالة، بلعت ريگي ورحت على اسمه ودگيت عليه.. ويه كل رنة بالتلفون احس بگلبي ينخمش وينعصر عصر ويه كل رنة ورنة احس بيناتهن عمر مو ثواني ويه كل كل رنة ورنة احس بـ....

-الو

شهگت بدون صوت ويه الـ "الو" مالته، غمضت عيوني ونزلت دموعي ميتة قهر اتذكر شلون حچيت وياه اخر مرة وشگد جرحته وطلع من عدنا وجهه ميتفسر، تمالكت نفسي بصعوبة وهمست..

-هلو امير

سكت ميجاوب بس الخط بعده مفتوح، بلعت ريگي واردفت بغصة..

-امير تگدر تجيني؟

اخذله فترة على الصامت ما رد، خفت ميجاوبني لان طول بس الحمدلله من گال..

-ليش؟

-محتاجتك

-صاير شي وياكم؟

-تعال للشقة واگولك حباب

-ما اندلها

-اني ادزلك اللوكيشن تگدر تجي بحدود العشرة؟

-اشوف وقتي

-فدوة تعال كلش ضروري الموضوع

-ان شاء الله

-شكراً

سديته منه وگمت اطلع من الغرفة ونزيت من شفت خالة واگفة بباب غرفتي شلون الچانت تتسنط، ابتسمتلي من شافت التلفون بعده بيدي وهزت راسها راضية..

-حنين بهمس: راح نطلع اني وتالة من البيت حتى تاخذون راحتكم، انتِ فوتي سبحي ورتبي نفسج تمكيجي وتعطري ولا كأن اكو شي ماشي ماما؟

مسحت على شعري وباست خدودي ثنينهن وراحت لـ تالة تبلغها راح يطلعن، اخذت ملابس وفتت للحمام اسبح واترتب وگلبي يتگطع كارهة روحي وجسمي ومتقززة من نفسي لاني راح اورط انسان خلوق وبريء ويخاف الله مثل الامـير علي بأبن حرام واقنعه هو ابنه..

كملت حمامي ولفيت البرنص على جسمي وطلعت للغرفة اشسور شعري واحط مكياج، ارسم بالكحلة وتخرب ويه دموعي، انظف مكانها وترجع دموعي تنزل وتلوصني.. گوة سيطرت على روحي ما ابچي وكملت المكياج ولبست الدشداشة الاشترتها خالتي مخازي تفشل مستحيل اكدر ابقى هيج گدامه وجسمي كله مفتح ومبين لبست فوگاها روب..

گمت للمطبخ اقطع فواكه وسويت مقبلات باردة وزلاطة معروكة وفتحت عصير اصبه بگلاصين ورتبت ميز بالصالة، ايدي ترجف وروحي رايحة گوة مصبرة روحي واضحك على نفسي هي مرة وحدة وهذا هو اگله نتزوج بسرعة وارجع اعيش يمهم واني زوجته وحلاله وهالطفل يتربى بمكان زين وميبقى متهجول..

كملت كلشي وباوعت للساعة عبرت فوگ العشرة وهو ماكو، قلقت ميجي وگعدت انتظره وايدي على گلبي خايفة، صارت بـ 10:17 واندگت باب الشقة فزيت من مكاني ارررعش من فوگ ليجوه والهوا ضاع مني مدا اكدر اتنفس بشكل طبيعي..

ركضت للغرفة اهدأ روحي واعصر بعيوني ما اخلي الدمعة تنزل والباب بعدها تندگ، باوعت لوجهي بالمراية ورسمت حمرة مرة ثانية وتعطرت وطلعت افتح الباب.. الطريق من غرفتي للباب مابي عشرين خطوة بس حسيتني دا امشي عشرين سنة ياله وصلت وفتحتها..

بلعت ريگ ويه ما شفته واگف وايد بجيب بنطرونه والايد الثانية رافعها ديريد يدگ الباب مرة ثانية، شفت البهتة والصدمة بعيونه من شافني گدامه بهالحال بس ما خليته يفكر زايد وتجرأت بروح ترجف وسحبته من ايده ادخل جوه بالشقة..

-تَـمني: تأخرت..

همستها همس ووگفت على اطراف اصابيعي وبسته بخده، فتح عيونه مو بس مصدوم لا مصعوق الرجال وحتى نطق مدا يگدر ينطق، ابتسمت ولفيت ايدي على ايده وگلت بأسلوبي الطبيعي بالكلام..

-خفت متجي امير وتعوفني

-تَـمني...

-قبل لا تحچي شي امير اني اسفة والله العظيم اسفة وما قصدت أي شي گلته هذاك اليوم اني بس چنت تعبانة وخالتي هستوها مرزلتني ووضعي مو تمام كللش اسفة والله امير سامحني اعتذر منك

حضنته من خصره ورفعت راسي اباوع بعيونه وماعرف ليش سويت هالشي مو من ضمن الخطة وطلع كردة فعل شخصية مني حتى يسامحني بس مخجلانة من حركتي وظليت اباوع بعيونه اريده يسامحني او ينطق بأي شي يريح گلبي..

-امير اني تجاوزت حدودي وياك وقهرتك بس والله العظيم وروح امي وابوية ما اقصد كلماتي وحقك عليَّ بس لا تبقى ضايج وماخذ موقف مني

-تمام

-تمام يعني تمام؟ هذا هو گلبك صفى ناحيتي؟

-خلي گلبي يصفى ويه الوكت تَـمني.. هسة گليلي شنو الموضوع المهم؟

-هذا

-شنو هذا؟

-ردت اعتذر منك واخليك تسامحني واعشيك مقبلات طيبة تعال تعال..

سحبته من ايده اگعده على التخم الباقي بالشقة، جبتله ماعون احطله مقبلات وقطع جبن صغيرة وزيتون، قدمتله الماعون واخذه من ايدي صافن عليه..

-شنو شبيك؟

-چنچ شايفتني بزون وتعشيني مقبلات

-هههههههه امييير شبيك

ضربت كتفه اضحك من گلبي واخيراً هو ابتسم وشال زيتونة يحطها بحلگه..

-فهاوي جايبتني تراضيني بمقبلات؟ عمي والله انا زلمة مظلوم

-يلا عاد عود بالجايات اسويلك اكل طيب

-ها الجايات؟

-اي لعد شلون قابل هاي اخر مرة تجيني هنا اظل كل فترة اعزمك لحدما انفخك وگوة اطلعك من هالباب

-تنفخيني بزيتونات وجبنات خرب راسچ تَـمني

ضحكت سعيدة لانه رجع يحچي ويايه تقريباً نفس قبل بس بعده مبين عليه ضايج ووجهه ثگيل، جبتله عصير وحاولت ارجع العلاقة بيناتنا واسولف وياه كلشي يجي على بالي وشرحتله ليش ما اتصلت بي كل هالفترة وبلغته خالة ماخذة مني الموبايل وماعرف رمز تالة وكلشي خرطتله الا موضوع الطفل وهو ما سألني عن الصار بذاك اليوم ولا طلب يعرف معنى جملتي من گلت "اريده يموت واريد اكتله"..

-الامـير علي: اممم مضطهدة سودة عليَّ

-والله كُلش تخيل عشت عشرة ايام بدون نت ولا برامج ولا شي مگابلة الملازم وگاعدة

-خلصتي امتحانتج؟

-اي الحمدلله

-جاوبتي بيهن زين؟

-اي انجح

-كفو

-شيخي احسك بعدك ضايج مني

-خاف ردت اراضيچ بس بهاي شيخچ رجعتي نعلتي خير خيري

-اسفة اسفة بعد ماكول بعد، اگلك شصار على موضوع علي الحـق عرفتوا منو السبب؟

-اي صلاح ابن عمي

انخمش گلبي من ذكر اسمه النذل ورجعت احس بكل اذية وقهر عشتها بسببه، كمل الامير يردف..

-تقي طلعله جلد جديد من الكتل يريده يعترف ويكول منو دازه وشنو غايته بس القندرة ولا حچى

-يمكن ماكو احد مشترك وياه والسواه اجتهاد شخصي؟

-مستحيل تَـمني تبعوه بالكامرات وشافوا يطب لبيت ومن راحوا يستفسرون عن هالبيت عرفناه يعود لواحد من اهالي الكوت ومأجره لـ صلاح ساكن بي بس من طبوا للبيت تفتيش شافوا عنده بوشي مال مرية وعبايات نسوان

-عزاا

-گلبي يلعب منه واظن السالفة ما راح تعدي على خير

-امير يمكن عمك مسعود اله ايد بالصار؟

-عمي مسعود وصلاح ما يتحاچون سوه

-والله حيرة

سكتنا نفكر واخذتنا السوالف ما انتبهت للساعة عبرت الـ 11:30، گام الامير يريد يرجع لان تأخر الوقت ووگفته..

-لاا امير اوگف

كمشت بأيده حيل امنعه يگوم، باوعلي منتظرني احجي بس ماكو الحجي لزگ بلساني ومو راضي يطلع من حلگي اختنگت والكلمة ما طلعت مني..

-تَـمني محتاجة شي؟

-اي

بلعت ريگي وزارتني رجفة قوية بعظامي، فتحت حلگي وماكو غير الهوا طلع منه، غمضت عيوني اركز واسيطر على اعصابي ورجعت فتحتهم اباوع لوجهه، تقربت منه لدرجة رجلي طخت برجله نزل عيونه على قربي من عنده ورجع عيونه لعيوني..

-امير انتَ وعدتني تسويلي شي بالمقابل اذا مسحت الحمرة الحمرا بالمزرعة ووعدتني مرة ثانية من حذفت الستوريات

-صحيح

-بعدك على كلمتك مو؟

-اكيد

-اريد اطلب منك شي ومستحية

-گولي ولا تستحين

-اريد.. احم اريد نتزوج

رفع حواجبه متفاجأ ولمحت طيف ابتسامة تنرسم على شفايفه، بلعت ريگي متوترة وخجلاانة كتيت بمكاني وگوة مثبته عيوني بعيونه..

-الامـير علي: عجيب

-ليش

-ظنيتج تردينا نفصخ

-صحيح بس.. بس..

-بس لا حبيتيني؟

ابتسمت على اسلوبه من حچاهة چان يتمسخر بالحچي وميقصد، نزلت عيوني خجلانة وهزيت راسي اي..

-اي امير

-شنو اي؟؟

-اي لهالسبب اريد اتزوجك

جحظت عيونه وفتح حتى حلگه ما مصدگ، تجرأت اكثر وحطيت ايدي على خده اجر وجهه قريب مني..

-امير شبيك

-تَـمني

-ها

-لا تجبرين نفسج على شي ما رايدته اذا عبالج انا بعدني ضايج منج وجاية تراضيني بهالحجي تره ما يحتاج وانا...

-امير مدا اراضيك اني صدگ احچي

-صدگ تحچين بشنو؟

-اريدنا نتزوج

-لانج تحبيني

-امم

-امم شني ليش ما تگوليـ....

سكتته من بسته ماتحملت مواجهته اكثر وهالشي الوحيد الاجه على بالي حتى ابدي الي لازم يتم اليوم، ماكدرت اكذب عليه اكثر وانطق عبارة الحب واعترفله بشي ما احس بي ماكدر اضحك على هالرجال الطيب اكثر، وخر مني يطفر من مكانه بعدما حس على روحه وانتبه لوضعه..

-الامـير علي: دخيل بختك يا حسين شسويتي بيه ولج مشعولة الصفحة

-شنو شبيك

-وين خالتج؟؟

-خالة وتالة طالعات

-چا انا اطفر ما اظل هنا بعد استر على روحي وروحج

-ياا اميير لعد تعوفني وحدي

-فهاوي لا تتفهين عليّ بعلي ماكدر اكض روحي بعد

-ههههه شبيك امير تعال اگعد

راح يگعد بعيد عني وفتح دگم قميصه يتنفس، وجهه صار شوية احمر وبقى ينقر بأصابعه خفيف على فخذه..

-الامـير علي: علگيلنا شي على التلفزيون نلتهي بي

-عوفك من التلفزيون مسويه جلي اروح اجيبه

ركضت للمطبخ اجيب الجلي وحرفياً قرفاانة من نفسي ما طايقة الدا اسوي فتحت الروب شوية وخليت وحدة من الردانات توگع من چتفي ورجعتله شفته فاتح التلفزيون والريموت بيده يگلب، رحت اگعد بصفه انطيته الجلي وما قبل ياكله واستمر يلهي روحه بالبرنامج المعلوگ..

-اموري

گلتها وكمشت بأيده مبتسمة، باوعلي وعيونه صارت على جسمي دار عيونه بسرعة وجاوبني بهمهمه وشفت تفاحة ادم تتحرك برگبته..

-شبيك متباوعلي امير

-تَـمني انا اروح بعد عندي شغل بوية

-ليش ليش ما گعدنا هواي

-لا.. لا احسن اروحن انا

-اووي امير والله زعلت منك

-يالحمززززة ماگدر اگعد وياچ بعددد ما استتحمل

-تتحمل شنو؟

-خايبين هالفاهية راح احطها وا.... روحي تَـمني رووحي هناك عني وستري على روحج

-اهوو روح امير اني زعلانة اكو واحد هيجي يحجي ويه خطيبته

گمت امثل الزعل وحرفياً جسمي ينخض من الرجفة، شهگت من سحبني من ايدي وجرني يگعدني على رجله وباوع لعيوني، كزبررت وحطيت ايدي على كتفه متوترة وظليت اتنفس بشكل سريع خايفة، زفر نفس وگال بصوت ناصي..

-تَـمني عيبه بحگي اتجاوز وياچ وانتِ بعدج ما لبستيلي البدلة البيضة لا تخليني اتصرف بشي ينزل من قيمتچ

صفنت بعيونه استوعب، الرجال هو بنفسه ديبتعد مني ويخجل ونفسه متنطي يسويلي شي واني خطيبته وبينتتا عقد شرعي بس لانه شريف ومتربي زين ميتدنه ويطور العلاقة بيناتنا الا نتزوج! تالي اجي اني اقدم نفسي اله واهين روحي هالاهانة!!..

-تَـمني: بس احنه اول وتالي راح نتزوج

-بس الخطوبة تختلف عن الزواج حبيبي.. الخطوبة فترة تعارف وحب نقي ما يصير يتطور الموضوع اكثر من هيچ وانتِ لا ترضيها على نفسج وتخليني احبچ حب من هذا النوع حب اريد منج حاجتي وبس

-امير

همست اسمه ونزلن دموعي ماگدرت اضمهن اكثر، حضنته حييل وبجيت على رگبته مقهورة ومكسورة متوجععة ومتگطعة من جوه..

-نوومه ليش تبجين يا گليبي

-امير لا تعوفني ابد فدوة

-اعوف الدنيا وماعوفج وعلي

-لا تتركني امير لا تروح ابد الله يخليك

وخرني منه يباوع لوجهي وابتسم بقلق، مسح دموعي بأبهامه وباس خدي على كيف..

-ليش تحجين هيج حبيبي منو مزعلچ

-اريدك امير.. اريدك

-انا يمچ يراحتي وين رايح

-امير.. اني اسفة والله

-تَـمني جاي تخوفيني شنو صاير وياچ؟

-انـ.. ا.. اني اني اسفة اني ردت استغلك اني..

-احچي تَـمني!!

-اني حامل....

يتبع 👑.....

━━━━━━ ♛ ━━━━━━

كُلش تأثرت واني اكتب هالبارت الله لا يعيش بنية حيرة تَـمني 🥹♥️🤲🏻🤲🏻

توقعاتكمممم وشنو برأيكم راح تكون ردة فعل الامير 👀🩷🩷🩷؟؟؟

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

عفتك مو كُره چان السبب واضح

نِمت مجروح بس انتَ نمت جارح.. ♥️

━━━━━━ ♛ ━━━━━━

-تَـمني: اني حامل

حچيتها بغصة ذبحت زردومي ذبح، صفن بوجهي بدون لا ينطي أي ردة فعل من الصدمة وما اللومه لان العقل ميعقلها..

-اني حامل بس والله العظيم اقسم بكل حرف من القران اني مالي ذنب وماعرف شلون صار هالشي امير ماعرف انتَ راح تصدگني لو لا بس اني مصدومة ومدا انام ليلي من القهر

تجعد جبينه محتار وشالني من رجله يوخرني عنه، وگف على طوله وابتعد مني كم خطوة حاط ايد على راسه وايد على وجهه مذهول..

-امير..

-حامل؟ گلتيلي انتِ حامل؟؟؟

بچيت اكثر بدون لا انطي جواب، فتح حلگه مصعوق وما طلع منه حرف صار يتنفس بشكل سريع وجاحظ عيونه الراح تطلع من وجهه، ظل يروح ويجي بالصالة مثل التايه..

-اني اسفة لان طلبت منك نتزوج اعرف اني...

-حامل تَـمني؟؟ انتِ حاامل؟؟؟ متأكدة من هالشي!!

-اي رحت دكتورتين

-لا لاا دخيلك يا علي لااا دخيلك يابو فاضل لاااااا

ضرب الحايط بكل قوته وعاط "لا" بصوت موتني خوف، لملمت نفسي وابتعدت اوگف بعيد عنه مرعوبة من عصبيته، بلعت ريگي وگوة طلعت مني هالكلمات..

-حقك.. حقك تعصب وتضوج مني بس...

-اضوج منننج؟؟؟؟ ولجججج هذا الچنت خاااااايف مننننه

صرخت روحي رايحة ويه ما شال المواعين الچنه ناكل بيهن وشمرهن على الحايط فلشهن، بچيت فاقدة كلشي فاقدة الامان الچنت اعيشه وياه والكرامة احس بالرخص محاوطني من كل جهة..

-امير اني ما خنتك والله العظيم اني ماعرف شلون مااعرف

-خررررب روووووحي انعععل عشيرررتي شعلووووو عررررضي نعللل على غيررررتي.....

مسبات وصياح وهرجة ويشيل بكلشي كدامه ويشمره على الحايط فلش الصالة تففللش، عجزت اهدأه واستسلمت للبكاء واگفة بزاوية الصالة واتفرج على عصبيته الي الكل يحچي بيها ويصفوها بالجنون، عطت فازة ويه ما شال ريموت التلفزيون وشمره على الحايط الا شوية راد يضربه بيه..

-امير اني خايفة حباب كافي

حچيتها بصوت ناصي ماعرفت شسوي وشنو اگول، اللتفتلي عيونه بگصته شكله يرعب شرايينه مطگگة ورگبته ووجهه صارو ددم يمكن ضغطه علگ، نزيت من ضرب على فخذه بككل حيله وصاح..

-اناااا ليش خطبببتج لييييش هنت نفسييي وابوووي بالديوووان وخليتنا علللچ بحلوگ الوادددم لييييش سويت كل هذاااا لييييش

كل ظني عصبيته وصياحه بس لاني غشيته ولعبت عليه مچنت اعرف وراهة شي ثاني الا من صاح..

-انااا خطبتتتچ لان خششش بعينييي وگال اخذهااا واخذ فلوووسها واهيننك وازززين شاررربك بنص ديوووان ابوووك ولللج اناااا ينلعب بيييه وبشررررفي انااا يزينون شاااربي واليسوه والمايسوه يتشمت بيييه

-مدا افهم عليك.. والله مدا افتهم

-صلااح الديوووث افتهمم بأبوي ما يخلييچ ونهايتچ الناا عررفه راد يزوجچ لواحد من ولده خاطر ما تنذلين وينلعب بيچ وانتِ يتيمة! هددني صلااح وحططط سلاية بعينيي من كتلته وطردته من العشييرة گلي اردهااا الك واكسررر ظهرررك واخذ حگي مننك وسووواها سوووواها ابن الچلببب سوااااها

يبس الدم بيه من ذكر اسم صلاح وروحي راحت، مچنت اعرف بشيخ علي مقرر يخطبني لواحد من ولده اول ما توفى نعمة ومدا افتهم صلاح شلون چان متأكد الامير هو الي راح يخطبني، احس بضغطي هبط ماتحملت ابقى واگفة ووجع قوي صار بصدري گعدت على القنفة اللقط انفاسي والامير كمل يصيح جملة افتهمها وعشرة لا..

-شگلتلچ الدكتوووورة؟؟؟؟

-اني حامل

لطم على وجهها بكل قوته خلف صوت عالي واصابعه تطبعن على گصته وخدوده، بچيت مفرفحة غطيت وجهي وصرت انوح مفتشلة وخجلانة وماعرف شسوي مااعرف..

-احچييي تَـمني شحچتتت بعد گليلييي

-گالت.. كـ.. گالت اني حامل صار.. صار عشرة اسابيع

فرقت اصابعي عن وجهي اشوف ردة فعله وليش سكت، شفته صافن يحسب ثواني وجحظ عيونه مرة ثانية وصاح..

-يااااابن الحرااااااااااام

-امير

-ماااا چنتي ببيتنا گبل شهرين ونص موووو؟؟؟؟

-لا.. لا مچنت

-اشتتتعل گلبك امييير زرفوووو افادددك يالاميررر انلعببب بحاللك واحوووالك خررررب شرررفي خرب......

رجع يسب بروحه ويضرب على راسه ووجهه محتار، نشفت دموعي گدما بچيت وانهد حيلي ظليت اباوعله ساكتة ومستسلمة خفت يفقد ويضربني مثلما چان نعمة يكتلني ويزورگني خفت حتى احچي وياه واهدأه، بعد دقايق من الهرجة المخيفة تجرأت وهمست بصوت ناصي..

-اني اسفة.. امير اسفة طلگني وارتاح من همي ومشاكلي

خزرني خزررة گلت عيونه راح تطگ، سكتت بسرعة بالعة صوتي ولساني ودرت وجهي عنه ماكدر اواجهه مستحية، رجعت عيوني اباوعله فازه من صار يصفگ أيد بأيد يضحك ويگول بحرگة وگلب ملچوم..

-مبرووك تَـمني مبروك دستيي على شاربي وهنتيني وخذيتي حگچ مني.. خذيتي حگچ وسويتي البراسچ من گلتي ما اتزوجك ونجوم السما اگربلك

-امير اني..

-انا ما قصرت وياچ بشيي هنت نفسي وصغرت روحي خاطر ما تتأذين! انا عقددت عليج وفشلت ابوي بديوان كله شيووخ خاطر احافظ عليج واخليچ بعييني وما اسمح لولد الحرام يستغلوچ ويلعبون بيچ على مرامهم!! عقدت عليج حتى ما اخلي ززلمة يفك حلگه وياچ لو يفتح عينه علييج انااا العاينلج بنظرره حطيت اصابعي بعيوونه شلعتهن شلععع من وجهه تالي هذا الاحصله؟؟

يحچي مفرففح حتى صوته انبح من القهر، ما قابلته بكلمات لان ماعندي كلمة تناسب الوضع الي احنه بي بقت دموعي تصب واني ساكتة..

-تَـمني انا خطبتچ خاطر احافظ عليج ببيتي وجوه جناحي اهتملچ واسندچ واصيرلچ ظهرر لچن اثاري طلعوا مصخمين وجهي الغشيمم گبل لا اعقد عليج

-بس اني مالي ذنب امير اني هم انظلمت

-واجيتي تضحكين عليّ وتستغلين عشگي الچ وتوهميني بالطفل الحامل بي ابني مو صح؟

-لو اعتذرر منك منا لباچر ما راح اگدر اعبر عن اسفي وندمي وضياعي

لزم گلبه متوجع وحرك راسه نافي، غمض عيونه يتنفس على كيفه يهدأ نفسه وتوجه لباب الشقة فتحها وطلع تاركني وحدي.. احترگت روحي من القهر ما حسيت على روحي الا واني اضرب على وجهي اللطم مثل المخبلة اللطم ضيم واذية وحرمان ويتم وفشلة.. شگدد صغرت بعينه وبعين نفسي شگدد!!!

عفت الصالة على هوستها والتكسير وفتت للغرفة شمرت روحي على چربايتي وبچيت بچيي بحياتي كلها ما باچية بهالوجع، بچيت وتمنيت تطلع روحي ويه صراخي احس ببلعومي تجرح وتملخخ من العياط بس مدا ارتاح مدا يبرد گلبي مدا انسى ردة فعل الامير وكلامه ويايه وحجم الاذية السببتها اله..

-تالة: تَـمني.. تَـمنييي ليييش تبچين تَـمنييي

ما حسيت شوكت دخلن تالة وخالتي اصلاً ما سمعت الباب ينفتح، مادري شحچت تالة ويايه ولا ادري بخالتي شسولفت عقلي فصل من كلشي وبس صوت الامير يتردد بأذني وهو يگول "دستي على شاربي وهنتيني"..

-حنين: يمممة سووودة بوجهي ووولج تَـمني جاوبينيييي شصااار

-تَـمني: اريد اموت

-تالة: اسمم الله عليج ولج لا تحچين هيج حباابة فهمينا شصار

-حنين: بس لا الامير افتهم؟؟؟

باوعت لخالتي الخايفة من جوابي وصارت دموعي تنزل شلال من عيوني، لزمتني من متوني ثنينهن وكررت سؤالها بخوف اكبر هزيت راسي بـ اي ودفعتها اصرخ..

-افتتتهم اي اييي افتتتهممم عرفنييي حااامل عرررفنيييي

**

"حبيبــة"

گاعدة اني وعبق نتابع فلم تافه من الملل ما نعرف شنسوي وشوكت راح نرجع بزعت روحي، اندگت باب غرفتنا عرفته ابا الحسن علي الوحيد البقى سهران گمت افتحله الباب وشفت بعيونه الحيرة..

-حبيبة ما تدرين بأمير وين؟

-لا والله اصلاً هو صارله چم يوم متغير وضايج يطلع من الصبح ما يرجع الا تالي الليل

-والله حيرني هالزلمة وما جاي اگدر ارجع واعوفه وحده هنا يظل بالي

ويه كلامه انفتح باب الشقة ركضنا ثنينا نشوف منو وكيفت من شفته الامـير علي راجع بس وجهه مغييم وصاير احمممر راح ينفجر من الضغط..

-ابا الحسن علي: اميير شبيك ولك شصااير

بدون كلام وبدون مقدمات تقدم الامير بخطوات بسيطة ووجه خالي من الملامح وجر حسن من چتفه وشمر روحه بحضنه.. تحاضنوا التوأم وهاي حركتهم متعودين يسووها من يكون واحد منهم تعبان ومحتاج يذب همه وضيمه على الثاني خاطر يشيله..

تفرجت عليهم متحاضنين ومحد بيهم نطق شي، مرت الدقيقة والثنين والثلاثة والخمس دقايق وهاي وگفتهم لا الامير وخر ولا ابا الحسن تعب ووخره عنه، بعد حوالي سبع دقايق كسر الهدوء حسن..

-شصاير امير

-تعبان حسن

جاوبه بصوت مبحوح حطيت ايدي على گلبي خايفة عليه، طبطب ابا الحسن على ظهره وگال..

-من حيلي على حيلك ياخوي

-تصفى بلا حيل

-يفداك خوية يفداك

-اااخ ابا الحسن

كمية الوجع بصوته تذبح، ابتعدت عنهم شوي انطيهم مساحة شخصية ادري بي ما يفضفض گدامي بس ما راح اگدر ابتعد هواي يظل گلبي يمه، وگفت وره الباب ما يشوفوني واكره من اتجسس عليهم بس شسوي ما اتهنى بنومة ولا بگعدة اذا ما عرفت البي واللگه طريقة اخفف عنه..

بقوا ساكتين دقايق وچنهم گعدوا على القنفات، سمعت صوت حسرة الامير شگدها وشعلوها.. طبطب ابا حسن على ظهره من جديد وسأل..

-حاچيني

ما جاوب بسرعة اخذله فترة ساكت ياله گال..

-تصخم حالي

-افااا

-مادري وين انطي وجهي

-افاا وانا اخو الامير وين تنطي وجهك شني ولك

-ما جاي اعرف افكر

-شوف انا احترمتك زايد تحچي لا بنعالي اهفك

-وزقنبوت ما تشوف حالي بالضيم

-حالك بالضيم يعني السالفة مرتبطة بالحب

-خ** على الحب وخ** على گلبي وخ** على الدنيا كلها

-والله صح امير لو اسولفلك ليلة شسوت بيه بالعباس تبچي على حالي

-ابا الحسن كلش مو وكتها گلبي انشگ

-چا سهلة هاي هسة نخيطه شينرادلها

-گمم گممم لعنة الله على راسك الخايس عود اجه يواسيني هو

-لا لا خلص راح اسكت يلا گول شمالك

-البيه ما ينحچي حسن عوفني وگوم

-اهوووو راح يبدي بكلاواته عود هو غامض وهالسوالف الخايسة احچي خلصني

مديت عيوني اشوفهم وره ما صار هدوء والامير ما جاوب ولا ضحك مثل عادته من ابا الحسن يترعن وياه بالعكس ذب حسرة ثانية ونزل راسه وچتافه سوه يشرح كسرته..

-ابا الحسن علي: شبيها تَـمني امير؟

هم ما جاوب رفع ايده ثنينهن يحطهن على راسه وباقي منزله ما رفعه..

-احچي شصاير لا تخوفني

-دوهني الوكت وياهة

-دخيلك علي

-مادري شسوي اول مرة اضيع وماعرف شتصرف

-افاا الامـير علي هو اليدور حلول للوادم يجوله ينخوه نخوة خاطر يساعدهم تاليها من اجت السالفة اله ما يعرف يتصرف

-من تجي السالفة لشي يخصها ماعرف اتصرف واتيه دربي

-ياهو صار بطريقكم امي؟

-صلاح

-منوو؟؟

-صلاح چان يدري ابوي راح يخطب تَـمني لواحد من ولده وراد ينتقم من عدنا

-لا امير صلاح يدري انتَ الراح تخطبها لو نسيت شگتله بيوم الجريته مثل الطلي من خوانيگه وذبيته بالبستان؟

-هالحچي قديم

-هالحچي يجوز هو الرباط بسالفتك! وره ما كتلته گلك اتزوجها واخذ فلوسها ويعيش براسها وانتَ شگتله؟ تتذكر شني گتله؟

جذبني كلامه ونبرة صوته احتدت، ضحك مستهزأ الامير وجاوبه بصوت مبحوح تعبان..

-گتله عناد بيك انا الاتزوجها وفلس احمر ما تشوف وتظل عايش بالفگر طول عمرك

-بالضبط يعني صلاح يدري انتَ الراح تعقد عليها وره ما تكمل تَـمني عدتها وصدگ هذا الصار انتَ وگفت بوجه ابوي وصحت بالديوان انتَ عاقد عليها حسبالك منذر ابن حجي ساجد اجه عن طريق صلاح وخطب تَـمني طمعان بفلوسها

-وطلع صدگ من جماعته وطمعان بيها لو نسيت صداقة منذر وصلاح وحاب اذكرك؟؟

-اتذكر انا الاتذكر جدر تدهده ولگه غطاه منذر وصلاح ادبسزية هتلية شلايتيه عايشين على الزنا واللعب

-چا اسكت ابا الحسن ولا تزيد ضيمي انا ما استغليت هالبت ولا طمعت بيها والحسين الشهيد كل السويته خاطر ترتاح وما تضيع وتروح بين الرجلين

-بدون ما تحلف اعرفك شني ومصدگك بس لا تنكر گلبك فز من عرفتها راح تنخطب لغيرك

-مو صحيح

-انچب امير انتَ مو بس اخوي انتَ انا بجسد ثاني اعرف شني يدور براسك واعرف ياهي معشعشة بگلبك...

نزيت مخترعة من شفت خيال جسم طويل بالحايط صار بالممر مال واحد جاي يمشي اكيد هذا علي الحـق گعد، فلتت للغرفة والفضول مشتغل عندي اريد اعرف شنو صاير بس اضطريت ابقى هنا وما اطلع لا يلگفني حق ويفضحني گدامهم..

**

"تــــالة"

مأسات عشنا هالليلة تَـمني ما هدأت ولا بطلت تضرب على وجهها وصدرها وبطنها مثل المخابيل اريد اللزم ايدها اريد اثبتها واسيطر عليها ما گدرت، تضرب بقوة على بطنها وتصيح بكل حيلها فرفحت روحها وامي تبچي وتفرفح وياهة..

-حنين: ولج مامااا كافي راح تموتين رووحج كااافي ملختيي ووجهچ

-هدددوووني وخرررو عنيييي وخروووووو

هلكنا واحنه نحاول نصحيها ونخليها تبطل تضرب نفسها بس ماگدرنا، خدودها غدن دمم واثار اصابعها تطبعن عليهن ورگبتها تزلغت تزلغ.. ما وكفت من العياط والبچي الا من امي ضربتها راشدي بكل قوتها ولزمتها من فچها ورفعت راسها فوگ تخلي عيون تَـمني بعيونها..

-حنين: كااافي موتي رووحچ كااافي محد يستااهل الدتسووي

-تَـمني: كله بسببچ.. كله من وراج انتِ السويتي بيه هييج انتِ الصغرتيني بعيونه ودستي على كراامتي خليتيني اقدمله نفسي واذل رووحي انتِ السبب بكلشيي

-تالة: شنو ماما؟؟ شدتگول تَـمني؟؟ شتقصد

-حنين: ولا شي ولاا شي متقصد شي متشوفيها تعبانة.. طلعي تالة خليني احجي ويه بنت خالتج وحدنا

-تَـمني: لاا تالة لا تطلعيين اريدج تكونين عقلي واني بهالحال عقليي مدا يشتغلل عقليي وگفف اريدج انتِ التعلميني شنو اسووي لا تروحين

-حنين: هيج صارت تَـمني؟؟ متثقين بخالتج الربتج؟ عموا گلبچ ذولااك!!

عافتها وطلعت امي معصبة وضايجة كلش، وخرت مني تَـمني وگامت تفتر بالغرفة ولازمة الروب حيل مشددته على جسمها ودموعها تكسر الگلب ما وگفت..

-توتة ليش تبچين غير افتهم شنو صار

-انيييي رخيييصة تالة انييي بدووون كرررامة

-اننچبيي ولج ليش هيج تحچيين على روحج

-معررفتي شنو ردت اسووي حقچ حقققچ ولللج لو اموت روووحي هسة هم ما ارتاااح

ركضت عليها بسرعة من رجعت تريد تضرب نفسها البنية فاقدة مو بوعيها من الضيم البيها خبلتني گوة جريتها جر اريد بس انيمها حتى ترتاح بلكي باچر تگعد احسن، ما قبلت تنام على الچرباية ونامت بالگاع جوه چربايتها كورت نفسها على شكل جنين وعصرت عيونها..

-اريد اناام لازم انام لازم

-نامي حبيبتي نامي ارتاحي وباجر يحلها الحلال

گعدت بصفها بالگاع وجرت ايدي تحطها على راسها تريدني اللعب بشعرها من صغرنا تحب هالحركة وتحب واحد يلعب بشعرها قبل لا تنام، ظليت امشط شعرها بيدي واباوع لوجهها الحلو شلون متدمر وصاير بي طبعات مال راشديات، شفتها السفلية بيها دم وعظمة خشمها بيها شوية زراگ..

-تَـمني..

مجاوبتني بقت على رجفتها حاضنة جسمها وتعصر بعيونها تريد تنام، استمرت على هالوضع الى ان صدگ غفت وراحت لعالم الاحلام.. گمت من مكاني جبت غطا اغطيها زين الگاع باردة اخاف لا تستبرد، دحست الغطا جوه جسمها ادثرها وطلعت من الغرفة اشوف امي..

لگيتها بالصالة دتنظف الهوسة الصايرة هنا، رفعت عيونها تباوعلي وشفت الدموع بيهن، نزلت انظارها تكمل تنظيف رحت اساعدها وبقينا اني وياهة على الصامت لفترة الى ان ما تحملت امي بعد وصار جسمها يهتز تبچي..

-مااما تبچين؟؟

-اااخ تالة اااخ

حضنتني تبچي على چتفي وهاي اول مرة امي تسويها اول مرة اشوفها تبچي وبهالضعف، چان ابوية يكتلها ويأذيها ودمعة متوگع من عينها گدامي طول عمرها چانت تخاف عليَّ ومتقبل تزعلني او تضوجني بس هسة دا اشوف وحدة ثانية مو امي القديمة..

-تالة: ماما شنو سويتي تَـمني شديصير بيها فهمووني

بعدتها عني افتهم السالفة منها ما قبلت تحچي بالبداية بس بعد اللحاحي عليها گلتلي وحچتلي الطرگاعة الرادت تسويها..

-تالة: لا ماما لااا اكيد تشاقووون

-شسوي تالة تضييع هالبنية تضييع لو ما تزوجت الناس راح ياكلوها اكل ويموتوها بكلامهم

-تضييع احسن ما تضحك على رجال وتگله هي حامل بأبنه!! حررام علينا يا اميي لو چان عندج ولد تقبليها عليه؟؟ تقبلين ينغش ويربي ابن مو ابنه ويتعب علييه ويصرف ويورثه؟؟

-حنين: تالة لا تصعبيها اكثر

-اصعبها ماما! اصعبهاا لان هذا مو تفكير حنين الحنينة التخاف الله مو تفكير حنين الزوجة الصالحة لابوية الي تحملت ضييم منه في سبيل ما اتبهذل واعيش بدونها!!

-تَـمني لازم تلگه حل ولج هاي بنيتي مو بت اختي والله

-تلگين حل اشجعچ اي بس ما فكرتي بموقف تَـمني لو انكشف هالشي؟؟ ما فكرتي شنو راح يصير حالها لو الامير عررف هذا الولد مو ابنه!

بچت بچي مهضومة ومكسور گلبها، اعرف امي تحب تَـمني حب ام لبنتها ابد ماكو يوم فرقت بيناتنا چانت تحميها وتضمها بين ضلوعها تخاف عليها من الهوا الطاير وحتى من زوجتها لـ نعمة زوجتها في سبيل تَـمني ترتاح من ظلم ابوية بس هم ما ارتاحت چانت تموت كل يوم وترجع تنحيي من تعرف نعمة ضارب تَـمني ومبچيها..

بهاليوم الليل ماكدرت انامه اول مرة احس اني مسؤولة عن تَـمني ومسؤولة عن قرارات امي ولازم ارگع الصار بأي طريقة كانت.. طول عمري عايشة بس للعب والمسخرة اللبس واطلع واطب وادرس بزود ابوية ماكو يوم عشت معاناة بس هسة لازم اكون جَدية واللگه حل..

ثاني يوم من الصبح اتصلت بالامير اخذت رقمه من تلفون تَـمني بس مجاوب، تواصلت ويه حبيبة وگالت اخوها من الصبح طلع ومتعرف وينه ويمكن رجع لمحافظتهم ويه توأمه متت قهر وحرت شلون اكدر اتواصل وياه..

ثالث يوم هم حاولت أتواصل وحبيبة اكدت اخوها ما رجع، سألتني شبينا وشصاير ولحت عليَّ بس ماگدرت احچي وكل هالايام تمشي وتَـمني منهارة لا اكل ولا شرب ولا سبح بس نايمة وتاكل بروحها دا اشوف بت خالتي تذبل گدام عيني مثل الوردة الحزينة..

رابع يوم اتصلت بـ حبيبة ويأست بالزايد من گالت هنه رجعن لمحافظتهم ومتدري بالولد وين، ماتحملت ابقى انتظر اكثر گمت بدلت واخذت تلفوني وجنطتي وطلعت اتسحب من الشقة خايفة امي تحس عليَّ وتمنعني من الطلعة..

اجرت تكسي ودليته على عنوان شقة الامير واخوته بس المشكلة حرت ونسيت شكل عمارتهم، ظليت فترة طويلة افتر واسأل بس مو هوايه ناس عرفوهم الا من گلت همه ثلاث اخوان ضباط واخوهم الرابع يشتغل بالديكور فوراً عرفوهم ودلوني..

وصلت لعمارتهم وابتسمت فرحانة اي هي هاي هسة تذكرتها، صعدت اهرول الدرج لحدما وصلت لشقتهم وگفت بباب الشقة متوترة ومحتارة شنو هالجرأة العندي اجيت لشقة شباب وحدي والله لو امي تدري تذبحني..

اخذت نفس عميق ودگيت الباب، وگفت انتظر احد يفتحه بس ماكو دگيته مرة ثانية ودست الجرس هم بس محد يجاوب ضجت وعرفت جيتي هنا على الخالي بلاش، اللتفتت انزل الدرج وجفلت من صرت وجه بوجه ويه الامـير علي هو ديصعد واني دا انزل..

-تالة: شيخ اميير

بهت من وجودي وعگد حاجبه باوعتله لابس تشيرت اسود وملطخ بالبورگ الابيض، اشر براسه وگال بأستغراب..

-تالة؟ شتسوين هنا صاير وياكم شي؟؟

-تالة: اي صاير

-خير يا ستار شنو صاير خوية؟؟

-فحطت عفية عدكم مي ماكدر احجي هيج

هز راسه اي وكمل يصعد الدرج، فتح باب الشقة ودخل ودخلت وراه تعمدت اخلي يدخل حتى اگدر احجي وياه براحتي وافهمه الموضوع كامل وهم اذا امي عرفت داخلة لشقة ويه رجال غريب وحدنا تصخمني وتعزيني..

گعدت على قنفة بصالتهم وبقيت انتظره يرجع، دقيقتين واجه جايبلي دولكة مي وگلاص متروس، شربت المي وحطيته على الميز وگلت..

-الحمدلله، شكراً اخي زحمتك

-لا رحمة

-احم.. امير اني اجيتك الك بالتحديد لاني ضايعة وماعرف المن اتوجه عمامي الله ياخذهم مو خوش شمرونا ولا احد بيهم سأل عنه واهتم بينا وخوال ماعندي امي وخالة ام تَـمني البنات الوحيدات

-فهميني شصاير؟

-تَـمني

من ذكرت اسمها تغيرت ملامحه، چان قلق ومتلهف يسمع شبيه بس من گلت "تَـمني" تغيرت نظرته للجمود والبرود..

-تَـمني امير كلش تعبانة والصار والله كله غصباً عليها

استمر بالهدوء ما قاطعني ولا حچى شي حسيته يريد يعرف اكثر وهذا سبب هدوئه..

-اعرف عيب احچي وياك هالحچي واني غاطة بهدومي من الفشلة بس والله ماتحمل اشوف بت خالتي تذبل وتروح من ايدي واني اوگف اتفرج، تَـمني حامل تعرف شنو شعور بنية باكر يگلولها انتِ حامل؟؟ هي زواجها من نعمة چان على ورق ما صار شي بينهم وما تحملت تبقى على ذمته تالي يجون هسة ويگلولها انتِ حامل وراح تصيرين ام!

توقعته راح يتفاجئ ويسألني بموضوع نعمة لان تَـمني اكدت هي ما حچت لاحد نعمة ما تمم زواجه منها بس حتى هاي ما سألني بيها وبقى ساكت..

-هي انظلمت كل الديصير بيها ظلم بظلم حرام والله العظيم هالبنية متستاهل شنو ذنبها تتحمل كل هالهم والضيم وحدها وهي بهالعمر الصغير

ذب حسرة وهز راسه بـ "لا" رفع عيونه لعيوني وگال بأستهزاء..

-تنظلم وانا؟ تچذب عليّ وتگلي اريدك تتزوجني خاطر يتسجل هالفرخ بأسمي هذا مو ظلم خوية؟

-ظلم واأكدلك ظلم وحقك لانك مزعوج و..

-مزعوج؟؟ تالة هذا شرررف هااي سمعة هاااي طرگااعة تدرين لو اكتشفت بعدين هذا مو ابني تَـمني تنذبح!! تنذببح تموت حتى لو انا سامحتهاا مجتمعي ومحيطي ما يساامح ياكلون وجهي ووجهها يكروهها عيشتها يخلوها تتمنى المووت

-ادري بس..

-بت خالتج استغلت حبي ولعبت عليّ ووهمتني هي عاشگتني كله خاطر اتزوجها رادتني اخذها گبل الزواج خاطر تحل هالمصيبة!

-انتَ گلتها! امير انتَ دتگولها بلسانك مصيبة! هاي مصيبة واذا انتَ عبالك تَـمني راح تمشي السالفة على ان هالطفل ابنك ومتعترف بالحقيقة فـ انتَ غلطان!! مستتتحيل راح تبقى ساكتة ومو لانها بت خالتي ادافعلها بس كللل اليعرف تَـمني وعاشرها راح يعرفها صاحبة ضميير انسانة يمشيها ضميرها وتخاف على مشاعر النملة البلگااع شلون لو كان بني ادم!!

-خوية من الاخير...

-اعذرني على المقاطعة من الاخير انتَ ممضطر تتزوجها ولا مضطر تساعدنا وجيتي هنا لا تَـمني تعرف بيها ولا امي اجيتك من وحدي لاني تعبت! تعبت ماعندي احد استند عليه ولا اكو احد ديلگالنا حل ويساعد هالمسكينة! اجيتك بصفتك خطيبها وشيخ وتعرف سوالف الشرف شگد تكسر الظهر وتاخذ من الحيل حيل!

-تَـمني مو حليلتي

-شنو؟؟

-عقدنا اظن بي اشكال شرعي لان عقدت عليها وهي....

غمض عيونه ميگدر حتى يگولها مدا يگدر يحچي ويگول "عقدت عليها وهي حامل" هزيت راسي متفهمة وگمت من مكاني گوة لازمة دموعي متوگع وتفضحني..

-اني اسفة لان ضغطت عليك او يمكن تجاوزت بالحچي اعرف انتَ مالك ذنب تتحمل كل هذا الهَم بس ضاگت بينا الدنيا وتبهذلنا

وگعن دموعي وبسرعة مسحتهن وطلعت من شقته، وگفت على جهة ابچي متوجعة على وجع تَـمني گلبي ديتگطع ودا اعيش حيرتها وخوفها من المجهول ماعرف شنو بيدي اسوي واساعدها..

-سلامات.. خوية محتاجة مساعدة؟

اللتفتت ويه صوته ومسحت دموعي بسرعة، رجال شاب طلعلي من العدم ما انتبهت منين، هزيت راسي بـ لا ونزلت الدرج بسرعة ووگفت انتظر تكسي يمر..

وگفتلي سيارة بيضة مچنت ادري بي تكسي الا هو گلي وطلع اشارة التكسي حطها فوگ سيارته، انطيته عنوان شقتنا وفتت للسيارة، الطريق كله امي تدگ عليَّ اكيد عرفتني طالعة بس خفت اجاوبها وتنتبه لصوتي چنت ابچي..

-هاچ عمو

ركزت ويه ايده قدملي باكيت كلينس اخذت منه كلينسات ومسحت وجهي ودموعي وسرحت اباوع من الجامة للطريق..

-تفضلي

انتبهتله وگف بمكان غلط الشارع هنا فارغ مابي طير وبي عمارات مطشرة هاي مو عمارتنا وين جابني هذا؟

-عمو بس هذا مو شارعنا

-انتو مو بشارع {اسم الشارع}

-اي هناك بس اني ماندل زين لان جديد ناقلين هنا عمو متأكدة هاي مو عمارتنا

-عمو هذا العنوان النطيتيناه

-اي بس.. بس يمكن اني غلطانة دقايق اتصل بأهلي

-تمام

طلعت تلفوني ودگيت على امي، يرن ومتجاوب والرجال بقى يتأفأف متضجور لان طولت، توترت وامي مدا تجاوب اتصالاتي ماعرفت شسوي حرت..

-ها عمو بشري؟

-هلااا ابو حسام شلونك

ضحك السايق وطلع من سيارته يسلم على الرجال الي سلم عليه بره لابس كمامة وشفقة، بقيت گاعدة بالسيارة وادگ على امي ماما مو وكتج متجاوبيني موو وكـ...

-طلعي من السيارة

بحلقت عيوني مرعوبة من اجه نفس الرجال السلم على السايق وفتح الباب مالتي يأشرلي اطلع..

-تالة: ليش اطلع؟

-تطلعين برضاتچ لو اطلعچ بطريقتي؟؟

فتح سترته الخفيفة وبيّن جواها ضام سلاح، متت خوف وطفرت من مكاني ازحف للباب الثاني اريد افتحه واهرب منا بس الباب مدا تنفتح لازگة..

-تجييين لا اسحلچ من شعرچ!!

-منووو انتَ شتررريد منييي

عطت مفزوعة من صار يسحبني من رجلي عليه، تخبلت چلبت بالباب روحي رايحة واصيح بكل صوتي للسايق يجيني يساعدني بس ماكوو السايق راح وعافني، انهاريت ظليت ارفس بي برجلي افلت نفسي منه واصيح عسى ربي يدزلي احد يسمعني، ظل يسحل بيه لحدما طلعني من السيارة جرني من شعري وسد حلگي بأيده حيل وطلع شي حسيته نبت بخاصرتي........

**

-حنين: تَـمني!! تَـمني گووومي تَـمني

فتحت عيوني على صوت خالتي تهز بيه تگعدني ووجهها مخطوف لونه، وخرت الغطا عن وجهي وبدون لا احچي حركتلها براسي بمعنى "شنو"..

-تالة ماكو توتة ماااكو صار شگد ادگ عليها رووحي راحت گوومي شوفيها وين

-يمكن طلعت ويه صديقاتها؟

-لااا تالة متطلع وحدها بدون لا تبلغني اني اعرفها

-خالة لا تخافين هسة اتصل بيها واشوف وينه تلفوني؟

گمت ادور على تلفوني لگيته طافي شحنه مخلص، حطيته على الشحن وخالتي راحت لغرفتها تبدل ملابسها تريد تطلع تدور عليها، رحت وراهة بينما تلفوني يشحن لدقايق شفتها مخبوصة وترجف..

-تَـمني: خالة شبيچ اكيد تالة طلعت تسوي استمارتها مال الكليات لا تخافين هسة ترجع

-لا لاا گلبي ناار هي ممتعودة تطلع بدوني اني محذرتها اذا تريد تروح لمكان تبلغني اول

-تمام انتظريني ابدل واجي وياچ ندور عليها

-يلا بسرررعة

ركضت للغرفة ابدل ملابسي، لميت شعري كبة عالية وركضت لتلفوني اعتلگ، دگيت على تالة طلعلي مشغول ارتاحيت شوية ورحت ابلغ خالتي..

-حنين: مشغول يعني دتحچي بالتلفون مو؟

-اي او يمكن دتتصل على احد

-عليمن تتصل؟

-اكيد وحدة من صديقاتها خالة متعرفين بـ تالة منو تشوفها تصادقها وتنطيها رقمها

هزت راسها خالتي شوية مرتاحة بس هم قررت نطلع نفتر بالمنطقة شوية ندورها ندري بيها تتيه وما حافظة مكان الشقة عدل، رحت للصالة اجيب تلفون خالتي وشفت خمسة مكالمات فائتة من تالة بنفس الوقت الي اتصلت بي عليها معناها چانت تتصل على خالة واني عبالي مشغولة بأتصال..

-خالة هاي تالة متصلة بيج هسة

-يااا لعد ليش ما دگ تلفوني

-مسويته صامت خالاتي غير تاخذي وياچ للغرفة من تبدلين

دگينا عليها مرة ثانية متجاوب، طلعت ويه خالتي من الشقة نفتر قريب العمارة بدون لا نبتعد دخلنا للاسواق اشترت كم حاجة واني بقيت بره اباوع بالوجوه بلكي اشوف تالة من ترجع..

-حنين: ها ما رجعت؟

-تَـمني: لا هسة هم دگيت عليها متجاوب

-اوووف منها هاي والله خبلتني متعرف تگعد وتسكت

هزيت راسي اوافقها وسندت ظهري على حايط وكتفت ايدي لصدري، روحي طالعة وماعندي حيل لشي قوتي منهارة حتى حچي گوة احچي..

-حنين: توتة بينما ترجع تالة شنو رأيچ نروح نشتري لفات گص منا

-لا ماريد

-يلا يا امي صارلچ كم يوم عايشة على الخيار واللبن مو زين حبيبتي هالطفل محتاج غذاء

سكتت ما اجاوبها خالتي متدري ما طايقة هالطفل انوب تريدني اغذي واهتم بأكلي علموده؟؟

-حنين: يلا تَـمني لا تكسرين بخاطري

زفرت نفس تعبانة مالي واهس اجادل واشرتلها بيدي "يلا" ابتسمت فرحانة وطوقت ايدي تلزمها وتمشيني وياهة، وگفت گدام ابو الگص وطلبت لفتين گص دجاج وگعدنا على الكراسي والطاولة الموجودة..

-حنين: حبيبتي امي انتِ على شنو ضايجة وزعلانة يا روح خالتچ كلشي اله حل راح نشوفلنا حل ويه الي ببطنچ لا تخافين

هزيت راسي بدون جواب، جابولنا اللفات وجبرتني اكل منها ربعها ما كدرت ابلعها رأساً صار عندي لعبان نفس وانطيتها اللفة هي تكملها..

-حنين: يلا المهم اكلتي شوية، تالة وين صارت والله الا اطيح حظها من ترجع

گعدنا بمكاننا ننتظرها فوگ الساعة ما رجعت نتصل وهم متجاوب تعبت وقلقت عليها بس ما بينت گدام خالتي..

-حنين: راح يأذن المغرب وهالغبرة ما رجعت امشي يمة امشي نصلي وننتظرها بالشقة جوه

گمت وياهة بس ما ارتاحيت احس اكو شي غلط فعلاً تالة متطلع وحدها الا نادر شعجب هالمرة راحت؟ رحت للغرفة انتظر الصلاة ولزمت تلفوني اشوف اتصالات حبيبة ولا سكتت مبين الامير ما بلغهم لان بعدها تراسلني وتحاول تتواصل ويايه بس خجلانة اجاوبها خجلانة الامير يفهم غلط وعباله دا اتواصل ويه اخته حتى نتصالح لان اكيد حبيبة عرفت بينا متعاركين..

ذبيت تلفوني ويه صوت الاذان رحت توضيت وفرشت مصلايتي اصلي، كملت صلاتي وگعدت على المصلاية تايهة رفعت راسي فوگ ونزلن دموعي ماعرفت شگول وشدعي، شهگت بغصتي ضايعة شلون راح اگدر اناجي ربي واني حامل بطفل حرام، صفنت بسگف الغرفة وما طلعت من عمق گلبي ولساني غير كلمة..

-يا رب

غصيت ويه هالكلمة وخليت الي بالگلب بالگلب ربي اعلم ما بالحال ويعرف شنو الجرالي، دعيت بگلبي بدون كلمات هو يطلعني من الاني بي وينهضني من هالمصيبة لو ياخذ روحي ويريحني..

گمت من المصلاية لميتها ورحت للمطبخ اجيبلي مي وشفت علاگة العلاجات والفيتامينات الكتبتها الي الطبيبة، ضجت منهن خالتي وتالة كاتلاتني بيهن واحس تعودت لازم اخذهن..

شلت الچيس اشوف نصهن مخلصات همزين لان اني ضايجة بلكي انزل اگدر اتمشى شوية وحدي بحجة اشتري العلاج، اخذت جنطتي وتلفوني ورحت لخالتي لگيتها گاعدة بالصالة تسبح على مصلايتها..

-خالة اني طالعة اشتري علاجي من الصيدلية لگيته مخلص

-صبر اني اجي وياچ

-لا خاف ترجع تالة منو يفتحلها الباب

نفخت هوا ضايجة وتدردم على تالة وتهدد الا تطيح حظها من ترجع، لبست حذائي وطلعت من الشقة نزلت اتمشى بالشوارع ضايجة وافكر شنو راح يصيرلي بعد اكثر من الصار؟ الدنيا شضامتلي؟

-ااااخخخخ اااااخ يا يابة ااااخ

جذب انتباهي صوت رجال شايب لازم راسه ويفتر بمكانه متوجع، قهرني شكله خصوصاً من گعد على الرصيف لازم راسه ويون من الالم.. استعجلت بخطواتي ووگفت بصفه اتطمن اذا هو بخير لو لا..

-عمو سلامات شبي راسك؟

-اااخ رااسي راح يططگ رااسي وينج فنار ويينج يا بنتي وين رحتي وعفتيني وحدي هناا

كسر گلبي من صار يضرب على راسه ويصيح لوحدة اسمها "فنار" وحسب كلامه عرفتها بنته، نزلت اگعد بصفه على الرصيف قلقة خفت يصيرله شي وحده هنا والطريق فارغ..

-عمو شايل موبايل؟ خلينا نتصل بـ فنار تجي

-متجي بعد متجيي

-ليش؟

-فنار مااتت راحت بنتي مااتت اخذوها الما يخافون الله

يحجي ويضرب بقوة اكبر على راسه، تنهدت متحسرة ماعرف شحجي وشلون اخفف عنه بنته ميتة ودينوح عليها، شكله من ذولة الفقرة واهل الله زاد همي هم..

-عمو اخذيني لابني اريد ابني

-تندل وينه عمو؟

-لا ماندل بس شايل رقمه تساعديني؟

-نتصل بي تريد؟

-ماعندي موبايل شلون اتصل

-من موبايلي نتصل انطيني الرقم

مسح عيونه بردن قميصه شكله يقهر اشتهيت ابچي وياه هنا واخفف عن روحي بس مو وكتها تَـمني ساعدي هالمسكين وابچي ببيتج شگدما يعجبچ..

طلع ورقة من جيبه قديمة ومعقچة وكاتب رقم الولد واسمه "سالم" دگيت رقمه بتلفوني وانتظرته يجاوب وره رنتين رد..

-سالم: الو؟

-تَـمني: مرحبا اخي حضرتك سالم؟

-اي تفضلوا منو وياي؟

-اني لگيت والدك هنا على الرصيف لازم راسه متوجع منه وطلب مني اتصل بيك حتى تاخذه

-استغفر الله ابوية شطلعه.. رحم الله والديج اختي لان بلغتيني ابوية رجال كبير ومريض تكدرين تبقين يمه دقايق بين ما اوصل؟

-اي عادي

بقيت گاعدة بمكاني ما تحركت انتظر الولد يجي، شوية ومرت من يمنا سيارة بيضة وگف على بُعد كم خطوة من عدنا ونزل من السيارة شاب لابس كمامة وشفقة، باوعلي من بعيد وتنهد يهز راسه متحسر تقرب من عدنا وگال خجلان..

-عذرينا والله تعبناچ اختي

-لا ماكو تعب ربي يحفظه

ابتسم ونزل نفسه يجر ابوه من زنده يشيله، ابتسمت واني هم دا اگوم من الرصيف وانهبطت من حسيت بشي صار ببطني، نزلت عيوني وچان اشوفه مسدس!!

-صوووتچ ما اسمعه يحلوة وراح تمشين گدامي مثل الحبابة! حرامات بعدج شابة لا تضيعين حياتج بتصرف غبي هذا المسدس بخصرچ منبت هسسس اسمع واضرب نار اطشر امعائچ

شهگت واحس بگلبي صار بين رجليه، عبر من عدنا رجال ظل يباوعلنا تمنيت يشوف المسدس بس النذل ضامني بجسمه ميخلي يبين، لزگت عيوني بالرجال العبر اتوسل بي بنظراتي يفهم بس للاسف راح!

تشاهدت وعرفت قربت نهايتي، گام الرجال الشايب وراح كلشي مابي، نزلت دموعي بقهر الحقير چان يمثل عليَّ الله ياخذه..

-گوومي

نتر بيه ابو المسدس وگومني مشاني بأتجاه وحدة من العمارات ويضغط على خاصرتي بالمسدس، روحي راحت ورجليه بعد متشيلني من الخوف شفت شريط حياتي كله مر گدام عيني من دخلني لوحدة من الشقق بالطابق الاول..

فاحت ريحة الرطوبة من المكان تلعب الروح، رخى ايده مني شوية وفلتت نفسي منه اركض اهرب لمادري وين، رجعلي يعتني من شعري وضربني راشدي سفطني ويه الگاع..

-تردددين تموتييين انتِ!!!

-هددددني ابن الكلللللب شتريد منييييي هددددني

ضربني راشدي ثاني وثالث ورابع وويه كل راشدي راسي ينضرب بالگاع الصلبة لحدما سودت عيوني وبعد كلشي ما شفت ولا حسيت عقلي فصل وغبت عن الوعي..

فزيت مرة ثانية على گلاص مي بارد انشمر بوجهي، فتحت عيوني اشوف روحي بعدني بالگاع نفس مكاني والشقة ضواها مخنفس..

رفعت راسي يموتني من الوجع، حاولت انهض روحي بأيدي بس ماعندي حيل قوتي بادت، استجمعت كل قوتي و حاولت مرة ثانية ووگفني صوته الاخذ روحي من گال..

-تالة بت خالتج بقالها راشدي وتودع البطولة

فزيت من مكاني مخترعة مهبوطة مخلوسة مرعوبة مييتة من الخوف، اللتفتتله جاحظه عيوني ودموعي تحجب عني الرؤيا بوضوح، ابتسم بوجهي الحقير وطلعلي تلفونه يراويني صور لـ تالة رابطيها على كرسي ومنزعيها قميصها باقية بالبنطرون والحمالة وشعرها مغطي عيونها وادوات تعذيب مشمرات حواليها..

-لااا لاااا دخيلك لااا الله يخليك عوفهااا هاي طفللة الله يووفقك عووفها

-وشنو المقابل؟

-اخذوني اليي اني اخذووني كتلووني ذبحووني شتسوون سووا بس هاي متتحمل والله وامها تموت وراها

عيوني تصب واتوسل بي يعوفها، اتخيل حجم الالم الدتعيشه والله يعلم شسووا بيها عمتت عينج تَـمني الله يااخذج تَـمني دمررتي الدنيا كلهاا الكل راح يموت بسببج..

-لا تبچين لا تبچين مسحي دموعج وگومي غسلي وجهچ بذيج المغسلة

اشرلي على مغسلة صايرة بالمكان المتواجدة بي اني عبالك صالة، رجعت اباوعله ويه ما اردف..

-اريدج ترتبين نفسج وترتاحين ما راح نأذي تالة بس عندي شرط

-شنو گول

-نريدج توقعيلنا على كم ورقة وهذا هو منريد شي ثاني

-شنو هالاوراق؟

-امور عادية لا تخافين ما راح تموتين بسببهن ولا يصيرلج شي هاا شگلتي؟

گلبي نغزني وحسيت الاوراق يخصن املاك نعمة بس من فكرت بالموضوع تذكرت السندات وكلشي موجود بالشقة عندي بجنطة محفوظات شلون راح ياخذوهن وشنو الاوراق الراح اوقعهن؟

-تَـمني: ما اوقع على شي

-تمام

طلع تلفونه واتصل على رقم، انتظر ثواني وگال..

-اخذوا التردوا منها وذبحوها

عطت ويه جملته وگمت على حيلي ركضت عليه وجريت التلفون من اذنه اصرخ وابچي عرفت يقصد تالة وداا اسمع صوتها تصيح من التلفون..

-تَـمني: عوووفوهاااا الله يخليييك اتركهااا اسوي كل التريده بسسس عوفهااا

-تمام تمام نعوفها وره ما توقعين

-لاا هسة عوفوها والله العظيم اوقع والله بس لا تخوفوها هييج گووللهم يله گوووول

هز راسه اي وعدل الكمامة على وجهه ماشوف غير عيونه وكل رحمة ما بيهن، عت التلفون من ايدي صوت تالة يررن بأذني وصرخاتها خسفت گلبي، رفع التلفون لاذنه وگال..

-عوفوها هسة لا تسوون شي اني ابلغكم شوكت تكملون عليها

سد التلفون وشمره على الميز واشرلي اروح اغسل والمسدس بعده موجهه عليَّ، ركضت للمغسلة وافكر شيريد مني هذا وشنو هالاوراق؟ يربي بس بعد هذا العايزني اتهدد ويخطفون تالة..

-يلاا لا تتفهيييين

رجعتله اهرول والرجفة بعظامي كل شوية تزورني قشعريرة تهزني هز، اشرلي بالمسدس على راسي ونتر..

-فتحي شعررج

-شـ.. شنو

-فتحييي

رفعت ايدي الترعش وفتحت شعري اشرلي بيده على الطاولة موجودة جنطة باوعلي وأمر..

-فتحيها راح تلگين بيها اللوان النسوان مكياج وهالسوالف روحي لوني وجههج وتعالي بسرررعة

صفنت مستغربة ولمحت جنطتي مشمورة بالزاوية بعيد اووف لو اكدر اوصللها واوصل لتلفوني..

-يلااا لج

هزيت راسي اي وطبقت الراده واني ساكتة، سويت كلشي يريده بدون نقاش حطيت حمرة وكحلة بس ونزلت الجنطة من ايدي..

-راح يجون زلم ثنين ما راح يسوولج شي لا تخافين بس اذا شلعتي گلبنا وما وقعتي والله ثم والله *** بت خالتج وانععل شيب الخلفهاااا

-لا لا أوقع والله

فعلاً دقيقتين ودخلوا الزلم واحد شايل بيده جنطة ولابس قاط ومغطي وجهه بكمامة والثاني لابس دشداشة بيجية وملثم..

-امشي گعدي على القنفة

دفعني بأيده ورحت اگعد، اجو الزلم الثنين وكلمن گعد على جهة من القنفة واحد صار بصفي بس بيناتنا مسافة والثاني گبالي، طلع ابو القاط اوراق وقلم وحطهن گدامي ورفع راسه يباوعلي بدون صوت..

-نزلي عيونج على الاوراق راح ينزع الكمامة اذا رفعتتي عيونج والخلققچ **** عرضضضچ

هزيت راسي اي ومن هول الموقف والهبطة الدا اعيشها دموعي متنزل تحجرت بعيوني، نزلت عيوني على الاوراق ونتر بيه واحد منهم..

-ابتسمييي

-تَـمني: شنو

-ابتسمييي ولا ترفعين راسج

ابتسمت گوة عليَّ وسمعت صوت كامرة وكأنه اخذلنا صورة، فكيت عيوني مصدومة ليش دياخذلي صور؟؟ هذا شديسوي؟؟

-تعال انتَ هم اگعد يمهم ونزل لثامك وانتِ عيييينج بالاوراق

شال ابو القاط الاوراق وحطهن بحضني ولزمني القلم، كلشي يسووه واني عيوني ما رفعتهن من الاوراق خايفة لا اتصرف تصرف غبي وتالة تروح بيها.. رجع طگلنا صور على هالحطة دخت وحرت ماعرف شديصير..

-يلا لبسوا شباب، رفعي عيونج

رفعت عيوني عليهم هذا لبس الكمامة وذاك اللثام على وجهه واشرولي على مكان اوقع عليه، حاولت اقرا الموجود بالورقة بس كللشي مدا اگدر اشوف مغطين الورقة الاصلية بورقة ثانية فارغة ومطلعين بس مكان الي لازم اوقع عليه من الورقة الاصلية..

وقعت بسرعة وبصمني، انطاني بعد اوراق اوقعهن القلم يرجف بيدي واشهگ بدون دموع اختنگت وضاگ بيه النفس بس اريد هوا اريد اطلع مناا..

-تم استاذ خلصنا كلشي

الحچه ابو القاط، باوعت للي جابني هنا هز راسه واشر عليَّ..

-گومو عنها انتو الثنين وانتِ وخري الورقة الفوگ الاصلية وبدون لا تشوفين محتواها رفعي الاصلية البيدج ووجهيها للكامرا

-شنو؟

-لااا تصيرين فاااهية وجههههيييها للكااامرا اريد اصوورهااا

-تمام تمام

طبقت كلشي گاله ورفعتها بيدي، زفر نفس وگال جزعان..

-ابتسميي كأن دا اخذلچ صورة

ابتسمت بصعوبة واخذلي كذا صورة ويه الورقة، انتبهتله يأشر لابو اللثام بشي ما لحگت ادير عيوني عنه وما حسيت الا على ضربة قووية اجت براسي فقدتني الوعي..

گعدت من جديد موجوعة، دورت عيوني اشوف اني وين واكتشفت هاي مو الشقة اني بالشارع! حرفياً اني مشمورة بدربونة على جهة من الشارع منيميني وبظهري حايط ما ابين بوضوح للي يمر الا يدخل للدربونة، مغطين وجهي بشي اسود وخرته بسرعة عني مخترعة انتبهتلها سترة جلد مال رجال..

فزيت من مكاني اللهث عبالك صارلي دهر اركض، ادور حولي مثل المجانين اريد اعرف اني ووين وليش مشمورة هنا!! انتبهت لجنطتي مشمورة بصفي ما صدگت اللگاها نزلت بسرعة شلتها ودورت على تلفوني، طلعته وانتبهت راح يخلص شحن الغبية ما شحنته بالبيت زين.. مثل المخبلة ركضت على رقم تالة ودگيت عليها وگلبي يرعدد..

-الووو الوو تَـمني

-تالة؟؟ تالة انتِ ويينج انتِ بخير حبيبتي؟؟ تالة ويننج

-ببيتنا اني..

تحچي وتبچي وفجأة كأنما احد سحب التلفون من ايدها وگع گلبي خايفة تكون بعدها عدهم وجبروها تكذب عليَّ بس ما طول تفكيري هواي وانهارت بچي من سمعت صوته القلق بجيني من السماعة..

-الامـير علي: تَـمني؟؟ انتِ وووين احججحي تَـمنييي

-اني.. مادري ماادري بدربونة

-تَـمني.. يراحتي طلعي من الدربونة بس انطيني معلم مكان فدشيي اگدر اندله واجييچ

هزيت راسي اي وكأنه گدامي وديشوفني، حتى لو صارلي شي من اطلع من هالدربونة اني مرتاحة ومطمأنة ماطوله ويايه على الخط يعني اني بأمان.. شلت جنطتي واخذت السترة مال الرجال حتى من اشتكي للشرطة انطيها الهم وطلعت اركض من الدربونة ارجف..

-امير امييير هاي گدامي لافتة چبيرة اعلان مال حليب هاي مو بعيدة على بيتنا.. مو بعيدة راح تجيني امير؟؟ متعوفني وراح تجي مو؟؟

ما اجاني صوته بچيت خايفة ليش مدا يجاوبني، وخرت التلفون من اذني وشفت الموبايل انطفى خررب حظي خرررب مو وكتك تطفى ابدد مو وكتك!!

رجعت التلفون بالجنطة وصرت ادور بعيوني الشارع اكو سيارات دتتعده وكم شخص عبر منا تطمنت المكان حيوي نوعاً ما مو ميت فد مرة، مشيت اهرول لطريق البيت ما حسيت على روحي من صرت اركض بكل سرعتي حاضنة الجنطة والسترة على گلبي واركض..

وصلت قريب عمارتنا وشفت الامير طالع ويدور بعيونه الشارع ويلوب بمكانه، ركضتله اشهگ لو بيدي اطير واوصله، اندار بأتجاهي من حس بيه قريبة وبدون مقدمات وبدون لا انطي مجال يستوعب هاي اني شمرت روحي بحضنه وعصرته من رگبته حيييل وبچيت من كل گلبي..

-انتِ بأمان لا تخافين.. تَـمني انا هنا انا الاميير

يريد يشلعني منه بس ماكدر اتركه محتاجة احس بالامان محتاجة اشم ريحة شخص اعرفه وارتاح بوجوده، شخص اعرف ما راح يأذيني وراح يحافظ عليَّ..

ابتعدت عنه ويه صوت خالتي الخايفة وشفت تالة هم واكفة، ركضت على تالة ملهوفة اتفحصها واتأكد هي بخير لو لا..

-تَـمني: سوولج شي تالة؟؟؟ احجييي سوولج شييي

-تالة ببكاء: لا يعني مو هوايه بس صفگوني راشديات زورگوني

-الحمدلله راشديات ولا غير شي

بوستها وحضنتها لصدري، بچينه سوه وجرتنا خالتي تدخلنا جوه باوعت للامير الاجه ورانه واتسائل شلون اجه وشلون عرف شصار بينا..

صعدنا فوگ ولزمونا اني وتالة تحقيق، تالة گالت متتذكر شنو صار وياهة غمضت عين فتحة عين لگت روحها بغرفة ورابطيها على كرسي واني حچيتلهم الصار بالتفصيل وحتى موضوع التوقيع والصور حچيتهم..

-حنين: عمت عينننهم يمة بناتي الله ستر علينا ورجعتن بالسلامة

حضنتنا تبوس بينا وتشم وترجف دا احس برجفة ايدها المحاوطتني، رفعت عيوني على الامـير علي واگف على جهة ويباوعلنا محتار..

-حنين: سودة عليَّ خلف الله على الامير اتصلت بي و اجاني الرجال ووگفلي طول ما هدأ ولا ارتاح الا لگالي تالة وراد يروح لمركز الشرطة يبلغهم عنچ وانتِ اتصلتي بينا الحمدلله

دمعت عيوني متأثرة وتشكرت منه بنظراتي، عكس عينه عني وگال بجدية موجه سؤاله الي..

-ما شفتي وجه واحد بيهم؟

-لا مشفت ملثمين بس لگيت هاي الجاكيت فوگاية مغطيني بيها

مديتله الجاكيت وشفت علامات الاستفهام تنطط على راسه، سرح بالجاكيت شوية يگلبها بيده منا ومنا هز راسه وكأنه ممصدگ الديشوفه قلقنا بالزايد..

-تَـمني: شنو شبيك

-هاي قمصلة علي التقي

-تَـمني: شلون عرفتها

-لبستها انا گبل چم يوم برد الجو بالليل وچنت اشتغل بره هذا جلدها وهذا اثر البورگ بعده بيها

ظلينا وحدة تباوع للثانية دايخات شتسوي جاكيته هناك وليش اخذوا هاي بالذات وكأنهم يردون الامير يعرفها من اثر البورگ البيها!

-حنين: هسة عوفكم من القمصلة منروح لمركز الشرطة نشتكي على الخطفوا تَـمني؟

ذب حسرة تعبان وغمض عيونه، فرك وجهه وظل يراوح بمكانه كأنه ديفكر بشي، نبض گلبي بقوة من اللتفتلنا وگال بنبرة حاسمة..

-گلبي ما يرتاح ولا غيرتي تسمحلي اعوفچن وحدچن واروح حضرو اغراضكم راح تجون وياي لبيت الشيخ....

**

"عـــبق"

من يوم رجعنا للبيت لحد هاللحظة اني مكروفة سلوى طلعت القضى والمضى بيه تمنيتني ما رايحة لبغداد ومچبوبة هنا مثل الچلبة ولا هالذلة والاهانة والتعب الدا اعيشه..

-سلوى: ووووولج عبببببببق

-عبق: اجييييت

ذبيت الفرشة من ايدي وگمت من الگاع دا اجلف گاع المنور موگعة دهن ومجيمته بيها طلعت روحي ياله طلع، غسلت ايدي التلفانة واصابعي الصايرات سود من المنظفات ورحتلها للصالة..

-سلوى: وينج انتِ ادبسززز راح صوتي وانا اصييح

-چنت انظف خالة

-گبووور التلفچ وتلف امچ الساقطة امشيي ولي نظفي غرف الولد وغيري فرشاتهم كلهمم گبل لا يجون

هزيت راسي اي وصعدت لغرفهم واحد واحد شلت فرشته ونزعت شرشف لحافه ووجوه مخداتهم وبدلتهن بغيرهن، اشتغل والدمعة بعيني مقهورة حبيبة بالمستوصف وشمس وابرار كلمن بغرفتها واني وحدي الواگعة بيها..

طلعت من غرفة علي الحـق وره ما كملتها وعطرتها ورحت لغرفة ابا الحسن علي اغير فرشته، انفتحت باب الغرفة عليَّ ومدت راسها شمس ابتسمت ودخلت للغرفة بسرعة..

-شمس: اجيت اساعدج

رديتلها الابتسامة فرحانة ووگفنا نتعاون على الغرف، هي تنزع الفرشات واني افرش النظيفات..

-شمس: عبق

-ها

-تدرين بخالة سلوى حاچية لـ بدر وشاكيتله مني

-صدگ؟؟؟

-اي والله البارحة بدر انقهر واجه يحاچيني هو صح ما صيح بوجهي ولا تجاوز بس انهضمت هي خالتي اخت امي وتحچي عليَّ هيچ شخلت للغريب

-شگلتله؟

-گالتله تگعد للظهاري وما تعرف تطبخ وما تعاوننا بالبيت وتزعل بأقل حچاية وتحچي علينا عد اهلها وتطلع سوالفنا

-وانتِ صدگ تسوين هالشي؟

-لا ورااس ابوي ماكو مرة طلعت حچاية من هالبيت ونقلتها لبيت اهلي والزهرة ام الحسن كل الگالته چذب ومو صحيح

-وعلي البدر شنو گال؟

-گتلچ حاچاني مثل طبعه من اول بدر ما يعلي صوته وياي بس شفت الزعل بعيونه وما يهون عليّ يزعل مني لو ياخذ نظرة مو حلوة عليّ

-وشلون قنعتي الكلام چذب؟

-بس گتله هالحچي مو صحيح ويمكن خالة متوهمة صدگني

-هههههههههه لعد شكو زعلانة ماطول صدگچ بسرعة

-لان خالتي جاي تسوي فتنة بيناتنا هي ام بدر ما تحبني وما رايدتني لأبنها وما سوت سوايتها چا شبيها سلوى عليّ! وهي تعرفني اعشگه وهو يعشگني ومرتاحين سوه ليش جاي تسوي كل هالمشاكل؟

-والله يا شموسة مادري هالبيت كلمن يريد يمشي كلمته ويريد الناس تعيش على مرامه

-تدرين وحدة من عمات بدر شگايلاتله؟؟ والعباااس احتررگ دممي

لطمت على رجليها حيل وعيونها دمعت، ذبيت اللحاف من ايدي وسألتها..

-يا عمة من عدهن؟

-مادري ما عرفت ياهي منهن بس فراقد وصلتلي هالحچي بدر حتى ما گالي، يگلوله عماته شمس ليش بعدهي ما حبلت شو ابرار من اول شهر شالت ببطنها مريتك شمالها

-لااا عااد

-والزهرة ردت اموت من القهر والليل كله ابچي وبدر يراضيني بس گلبي ناار عبق نااار ما جاي اتحمل العيشة هنا

سكتت ماعرفت شگوللها اشوفها مفرفحة ودموع بعيونها وعاجزة اساعدها واخفف عنها، گمنا نرتب باقي الغرف ونزلنا ثنينا شفت حبيبة هستوها راجعة من المستوصف..

-عبق: ها اجت المسعدة

ضحكت وجرتني من ايدي وصعدتني وياهة لغرفتها عرفت عدها سالفة ورحت وياهة متحمسة اعرف..

-حبيبة: عبق حزري شصار اليوووم

-شصار

-اليوم منتصر مدحني هوووواي گدام المحللات والموظفات

-بس؟

-اي ولج حسيت روحي فوووگ الغيم والكشرة شگت وجهي افشل امشي واضحك ما مصدگة

-اي بس انتِ دائماً دكاترة الجامعة يمدحوج بدوامج والكل يمدحج هم هنا بالبيت ووين متروحين شنو الجديد؟

-بس منتصر من يمدحني غيررر عبق غيييير منتصر ماا يعجبه العجب ابددد وناادر يمدح شخص واذا مدح يعني صدگ هالانسان عاجبه ومنعجب بشغله

باركتلها وفرحتلها رغم ما اشوفه شي يستحق بس ماطولها فرحانة يعني هالشي مهم بالنسبة الها، گامت لحمامها واخذت ملابس بقيت كاعدة بغرفتها اگلب بموبايلها بينما طلعت مبدلة ومغسلة..

-شلون حظ لا عيد الاضحى احتفلنا ولا عيد الغدير الايام تركض ركض واحنه من سالفة لسالفة حتى عيد ما عيدنا مثل البشر ومحرم بعدله چم يوم يجي

-اي هاي اول مرة متحتفلون بعيد الغدير

-ابوي گال راح نسوي گعدة وعزيمة بس يكملون اخواني شغلهم

سكتت من دخلت سلوى علينا الغرفة خازرتنا، باوعتلي انوب دارت عيونها لـ حبيبة ونترت..

-بعدچن تسووولفن امشنن جووه اجن غزوة وزهرة وابتسام

-حبيبة: اي يوم جايات

-سلوى: انتِ على راحتج تعاي بس عبيقة گووممي سويلهن چاي

-حبيبة: يمة شسالفة انا جاية هااا اهااا

طلعت تركض قبلي، خزرتني سلوى بحدة وغمتني انقهرت وبلعتها كالعادة، نزلت جوه لكيت حبيبة حاطة القوري على النار ودتطلع ضيافة سلمت على عماتها حبابات ويايه مو كلش وحشيات..

-زهرة: بعلي الوصي البيت اظلم بدونچ يا روح عمتچ انتِ

-حبيبة: ههههه يبعد روحي عمة

-زهرة: والله گلت ولا اطبن البيت وحبيبتي مو هنا شني لزگتن ببغداد خوما لزگتن

-عمة چا انا صارلي يومين هنا انتِ ليش ما اجيتي

-وانا اشمن گفه ايدي رجعتي.. تعاي افيششششش ريحة علي وولد علي كلها بيج

بوستها وحضنتها وجرتها تاخذها وياهة للصالة، بقيت اني اصب الچاي واخذت الضيافة الهن وگعدت على جهة اتفرج عليهن يسولفن، طلبن عماتها يشوفن اغراض حبيبة الشترتهم من بغداد ركضت جابتهم من فوگ وصارت تراويهن والغزل والحب يتطاير من كل جهة..

-رسمية: شمعة بعد امچ شمعة اللهم صل على محمد وال محمد

-حبيبة: حبيبتي يمة والله اخوتي ما قصروا بشي دللونا دلال هناك

رفعت حاجبها سلوى تباوعلي بطرف عينها سويت روحي ممنتبهة عليها وبقيت اباوع لاغراض حبيبة..

-سلوى: شفت عند عبق ملابس جديدة انتِ اشتريتلها حبيبة؟!

حچتها بحدة حاولت تبينها طبيعية بس اني اعرف هالنبرة واعرف بسلوى اول ما وصلنا راحت تفتش بجنطتي ونفشتها تتأكد خاف حبيبة مشتريلي شي..

-حبيبة: لا يمة وين ترضى عبق اشتريلها شي هاي تَـمني خطية ماخذتهم الها

-سلوى: تَـمني؟؟؟

-حبيبة: اي جبرتها الا تشتريلها وردة هالبت الله يحفظها

-رسمية: اي چا شكو صديقتها وحبت تشتريلها زين تسوي

بقت سلوى تطحر وحدها راح تغص وتموت بـ سمها متگدر تتدخل لان تَـمني المشتريتهم ومتگدرلها تعرفها لسان والامير علي يتخبل لو احد ضوجها بشي..

-غزوة: گومي عبق شوفينا ولبسيلج شي منهن

ابتسمت وگمت بسرعة اجيبهن اراويهن قطعتين الشتراهم الي علي الحـق كلش حبوهن والسوت الي اشترته الي تَـمني، شالت زهرة الفستان الي اشتراه حق الي وكالت..

-لبسي هذا هسة كشخي بي المن ضامته

چنت متحمسة اللبسه بس استحيت خفت حبيبة تگول ما شايفة وما صدكت بسرعة لبستهن، صعدت بدلته بسرعة ونزلت طايرة فرح على مدحهم عجبهم وگالو طالعة مرتبة وحلوة كلش..

-حبيبة: عمة هي من الله عبق حلوة مو اللبس الي يحليها

ايدوها العمات ونزلت راسي خجلانة ماريد احط عيني بعين سلوى واشوف ردة فعلها، لليل رجعوا الولد وعمات حبيبة راح يباتن لان مشتاقاتلها ويردن حبيبة تنام بنصهن اليوم ويشبعن منها شوف، تعبت والوقت تأخر كل وقتي قضيته بالمطبخ وبالعشا انهلكت..

-سلوى: وينها بت البايررة

عرفتها تقصدني غلست عليها ورجعت للمنور اطلع الطاوات منا حتى اغسلهن..

-وولج انا موو وياچ نعععالة ما تجاووبين

-ها خالة محتاجة شي؟

-سممم امشي ولي فرشي الفراش ودوسي رجليهن شوي

ذبيت الطاوة بالمغسلة ميتة قهر طلعت صوت عالي من شمرتها بالمغسلة والدهن البيها وگع منه على الزولية مال المطبخ، شهگت خايفة ورفعت عيوني على سلوى النگلبت شيطان..

-ايااا بت الچلببب

ضربتني راشدي فر وجهي ما لحگت اتنفس وضربتني الثاني والثالث وتكفخ بيه تدخلني للمنور وتدفع بيه، صرخت متوجعة وابچي اختنگت والنفس راح مني من الكتل حتى ما اشوف بعيوني بعد..

-ادووس راسج بنعاالي بت المطيية رحتي تصيعيلي ببغدادد ويه الززلم عباللج ماا ادري وما توصلنيي سوالففج

دفعتها عني محترگة حرگة وبالغلط ويه دفعتها أنضرب ظهرها بتعلاگة صايرة لزگ على الحايط موجودة بالمنور، شاغت روحها لازمة ظهرها وصاحت..

-اااااخ يممممما

طلعت عيوني ميتة خوف، ردت اشرد وشطت من شالت الطاوة الي على الطباخ متروسة دخن وشمرتها على فستاني ورگبتي صررخت بكل حيلي ووگعت بالگاع لازمة رگبتي بيدي منهارة..

-سلوى: تستاهلييين يا النغغلة هااي حتى ما تعلين صوتج وتتجاوزين على اسيادچ

رفستني برجلها وعافتني بالگاع ابچي وروحي تريد تطلع، ما احس بحرارة قوية ماعرف اني فقدت الاحساس.. الدموع تطلع مني مو من الوجع تطلع من الذل ومسح الكرامة الدا اعيشه..

گوة لملمت نفسي وگمت من الگاع، نزلت عيوني اباوع للفستان ورگبتي اتفحصها اشوفني انصلخت محترگة لو شنو صارلي، رگبتي صايرة حمرة شوية بس مو مال حرگ تنفست مرتاحة وحمدت الله وشكرته الزيت مچان كلش حار لدرجة يخلف اثر على جسمي..

طلعت من المخزن اخط برجليه وابچي بالخنسة، ابچي حسرة ووحدة ووجع گلب وروح، غسلت رگبتي وعصرت الدهن من الفستان بالمغسلة ونفضته على جسمي الفستان فاتح والطگعة واضحة بي متت قهر وبچي عليه لازم اذبه الدهن شيطلعه انتلف بعد وراح ارجع لجرودي..

ركضت اصعد فوگ متگطعة و گلبي مزروف اباوع للفستان وروحي تنمرد عليه چان غالي وفرحت بي ما لحگت اتهنى حسبي الله ونعم الوكيل بيج يا سلوى عيى حوبتي متتعداچ..

وصلت للممر مال الطابق الثاني وهدأت نفسي خاف يطلع صوتي ويسمعوني الولد، هرولت للمخزن حتى ابچي براحتي واول ما فتحت الباب وگف گلبي ورجليه من شفته نايم على فراشي بالگاع..

-تأخرتي عگروگ

-انتَ.. انتَ شتسوي هناا

-اريد چاي

-وشكوو نايم على فراشيي

-غير تستچن اليسمعچ يگول فراشها فراش اليزابيث هو طابوگة وصاير ويه الگاع كسر ظهري

بعدني مهضومة ومختنگة مابيه اجاوبه اشرتله على الباب وبلعت ريگي وياه غصتي وگلت..

-اطلع عفية اريد انام

-ليش نفنوفچ وصخ

-اطلع الله يخليك اطلعع

نهض راسه من المخدة وسند جسمه على عكوسه يباوعلي، انطيته جانبي حتى ميشوف وجهي الماكلته الدموع ولا رگبتي الصارت حمرة..

-جاي تبچين!

-اطلعع

گام وگف على حيله وتقرب مني، غيرت مكاني بسرعة ووگفت بصف ميزي منطيته ظهري وگوة لازمة روحي ما ابچي..

-ليش تبجين عبق؟ منو وياچ؟

عضيت شفتي اسيطر على دموعي وغمضت عيوني اضيع حزني وافكر بشغلات ثانية..

-احچي شصاير ليش تبجين؟ صاير شي وياچ؟ احد معترضلچ؟؟

-لا.. لا اني..

حاولت قدر المستطاع اسيطر على دموعي بس ماكدرت مغمضة عيوني وينزلون مثل الشلال، حسيت بي ينغز ظهري بأصبعه حتى احچي واول شي اجه ببالي وشهگت بغصة واني اگوله هو..

-احتاج امي

نزلت راسي ابچي عاجزة، اكثر شي احتاجه هو امي احتاج احس بيها واحس بحنانها احتاج امي القديمة الچانت تفز من نومها لو گحيت وتحضنني لو رجفت شفتي..

بچيت وكأني واگفة وحدي بالمخزن ما سمعت غير صوت شهگاتي وما تلمست غير بدموعي الغسلت وجهي وخدودي، ما حسيت على روحي الا واني انوح مثل الحمامة العطشانة المحتاجة احد يسقيها جرعة مي قبل موتها..

-انا اسف...

جفلت كاتمة صوتي وانفاسي وحركتي، رجفة زارت عامودي الفقري من حسيت بأيدين قوية حاوطتني بأحكام وسحبتني لجسم ضخم تضمني بي تحسسني بوجوده، شلل صابني ويه ما سند حنچه على راسي وگال بهدوء يوازي هدوء المخزن..

-لو شما احچي ما اظن اگدر اخفف عنچ بس اريدج تعرفين.. انا وياچ وبكل مرة تلتفتين راح تلگيني وراچ

ضاعت حروفي والكلمات اريد ادفعه مني وقوتي تخوني مدا اگدر اسوي شي غير استسلم واسند روحي على ظهره وابچي بحضنه، شوية شوية حسيت بي يديرني عليه الى ان خلاني اواجهه واصير مقابيله ضبط.. رفع راسي يخلي عيوني بعيونه ومسح دموعي بأبهامه..

-لا تبچين يروح السلف واهل السلف فدوة لرسمة عيونچ

-سيدي...

ضحك لدرجة بينت سنونه، زفر نفس جزعان وگال..

-چن تسبيني من تصيحيلي سيدي

-انتَ شكو لازمني هيج متستحي على دمك!

-بت الحلو مو صار ساعة نواسي وتحملت الحرام خاطر مخاطينچ

-اي تمام واسيتني هذا هو شكراً يلا روح كافي عيب

-وجعة امي بكلب عدوچ شبي نفنوفج مطگع

تذكرت الفستان ومثل الغبية بچيت مرة ثانية مهضومة مدا اكدر اتخطى الصار جوه وتلف سلوى لفستاني..

-ولج عبق تبجين على نفنوف؟! وعلي باچر اجيبلچ اغاته

-لااا ماريد شي ماريد اني اغسله وانظفه

-چا انچبي وغسلي شكو هالعوي بعد

-اهوووو روح انتَ شكو مگابلني

-هاي فوگما واسيتچ؟

-راح يذلني عااد

-اي چا غير واسيتچ انا

-خلص كاافي شكراً والله شكراً لان واسيتني

-شكراً شني شسوي بيها هاي؟ شهالمياعة ما تنطين من روحچ شكد بخيلة

-شنطيك؟؟؟

-بعد انتِ وكرمچ

خزرته ويه ما ضحك، دفعته من صدره بعيد عني وانتبهتله لابس قميص شعجب شو صاير مؤدب اليوم..

-ليش تعاينين لصدري ولج

-شنوو

-ما تستحين انطيتج شوية مجال صرتي تعاينين لجسمي وتخيلين عليّ

-لاا اييع شنو اخيل عليك شبيك مچنت اباوع هنااك بس...

-بس شني؟ باعي عبق چن عندج نية مو حلوة تجاهي وانا ما ارضى بالحرام لازم نتزوج

-نية شنو علي الحـق لا تخبلنيي

-انا باچر اگعد الشيوخ واحاچيهم بهالسالفة لان جاي تزود عن حدها اخاف عليج من الحرام چبدي ما يصير نبقى هيج

-اطلع اطلعع برا اطلعع

-يعني ما احاچي الشيوخ؟

-لاا طبعاً

-چا همزين خفت اتزوجچ واتورط بيج مبين نكدية انتِ وانا احب الترگصلي

نفخت هوا ودرت وجهي للجهة الثانية ماتحملت ما اضحك بس ما ردته يشوفني منطيته مجال..

-شني هالصوت؟

-شنو يا صوت

-ها عذريني چنها هاي ضحكتچ العگروگية وگوة كاضتها

-اطلععع يمعووود

دفعته اطلعه بره ولازمة ضحكتي گوة يمعودة عبق تحكمي بروحج لا تصيرين خفيفة وياه، طلعته بالباب وخزرته من لزم ايدي ثنينهن بين ايده وگال بضحكة مكر شگد تلوگله الحقير..

-المهم ضحكتچ عگروگتي نامي وتغطي زين لا تخلين الشحم طالع

عتيت ايدي منه وطبگت الباب بسرعة وسندت ظهري عليها، حطيت ايدي على گلبي يدگ سريع واحس عرگت من التوتر انتبهت لروحي چنت مبتسمة بسرعة كفخت روحي حتى ارجع ادمية وما اروح زايد..

اخذت دشداشة نظيفة ورحت للحمام اسبح وبدلت بيها، رجعت لغرفتي وبسرعة غفيت گعدت الصبح على المنبه ونزلت بسرعة اسويلهم ريوگ بالمنور.. وگفت اگلي بيض عيون وصار صوت بالمطبخ شعجب مو من عوايدهم يگعدون بهالوقت من الصبح..

مديت راسي من المنور وتفاجأت من شفتهن تَـمني وخالتها وتالة والامير علي هستوهم ديدخلون للبيت وجايبات وياهن جنط، طررت فرح من شفتها وعفت البيض على النار وطلعت اسلم عليها..

-تَـمني: حبيبتي عبووقة مشتاقتلج كلش هواي

-اني اكثر والله وينج ولج گطعتي بينا

-تَـمني: شوية مريضة هالكم يوم مالي خلگ گوة اسحل روحي من الفراش

-يا عمري سلامتج

ابتسمت ورحت اسلم على خالتها وتالة تحاضنت وياهة وسلمت بثگل على الامير، رد السلام وصعد فوگ لغرفته واني رجعت للمطبخ شفت البيض محترگ عزا العزاني..

طلعته بسرعة وحطيته بعلاگة سودة وكبيته بسلة الزبالة خااف سلوى تشوفه والله تموتني، طلعت بيضات غيرهن ووگفت اگليهن وطلعت الاجبان والگيمر وحضرت الريوگ كله على اتم وجه..

كملت كلشي وحطيت القوري على الچولة حضرة جناب سلوى تحب الچاي يتهدر على الچولة مو الطباخ، دقايق واجتني المتتسمه ومدت راسها من المنور تشوف كلشي جاهز لو لا..

-عبق: اي كملت

-سلوى: چا خوش يلا صعدي للمخزن

عفته من ايدي وصعدت قبل لا يجون، مديت راسي من المحجر وفرفشت روحي على صدمة سلوى من شافت تَـمني وخالتها ظليت اطفر بمكاني من السعادة انلصمت وما طلعلها صوت وسلمت على تَـمني وبوستها وأهلت وسهلت بيها وهي الممنونة..

صعدت تَـمني وخالتها للغرفة وتالة وياهن صاحتلي اروحلهن بس استحيت يمكن يردن يرتاحن، گعدت بالمخزن بينما نزلوا الولد وطلعت مرة ثانية اگعد على محجر الدرج اتفرج عليهم وهمه يتريگون..

-شيخ علي: ها بوية جبت مريتك وياك؟

-الامـير علي: اي بوية هي وخالتها وبت خالتها

-شيخ علي: هلا بيهن

سولفوا شوية وخالة رسمية ابد ما حچت شي، شيخ علي سأل حبيبة على احوالها وكالعادة الكل يسكت يستمعلها بأهتمام وحب واضح..

-حبيبة: الحمدلله مرتاحة انا بوية

-شيخ علي: عساچ دوم مرتاحة يا بعد الكل

-رسمية: شيخ انا اريد اخذ رأيك بسالفة ما دام الوليدات كلهم هنا

-شيخ علي: گبل سالفتچ ام علي اريدن اگول شي..

صمت الكل ينتظره يحچي واني مديت راسي اباوعلهم بفضول من فوگ، شرب من استكان الچاي مالته وحط الخبزة على السفرة، رفع عيونه عليهم يدورها بيناتهم وگال بنبرته القيادية الحاسمة..

-شيخ علي: رسمية، سلوى حضرن البيت ورواحتچن اشترن كلشي ناقصچن وناقص البنيات نويت ان شاء الله نزف الامـير الجمعة الجايه.....

يتبع 👑....

━━━━━━ ♛ ━━━━━━

الامير يشعر بـ "دوخة فجه" 😭😂😂😂💗

توقعاتكمممم 👀🩷🩷🩷

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

هاي بوسة وشيلِي دمعچ

والحزن فدوة يروح

خاف روحچ ميته كلش

گولي وانا انطيچ رُوح

بس اريد اعرف بعطرچ

شو بوكت الفرح زاهي

وبالحِزن نفسَه يفوح.. ♥️

━━━━━━ ♛ ━━━━━━

"تَـمني"

البيت گب للظالين وصعدوا البنات كلهن فوگ، ركضت على جنطة السندات وطلعت سند نص هالبيت بعده عندي لعد شلون مسعود يگول هو مشتري؟؟

-حنين: تَـمني نامي مو زين تبقين تفترين

-تَـمني: اريد افتهم شنو يقصد عمهم من گال هو مشتري البيت؟؟

-تالة: يمكن كذاب شبيچ انتِ مو گلتي عنه مشكلچي؟

-گلت اي بس مو مال يدخل بكل هالثقة وانوب جايب وياه اغراضه يريد يستقر

-تالة: اوگفي اوگفي دتسمعون الصوت؟؟؟

هزيت راسي اي وهرولت بصعوبة اني وياهة نطلع، شفنا حبيبة وعبق وشمس وابرار مادات راسهن من محجر الدرج وابرار تدگ على وجهها..

-تَـمني: شصار؟؟

مديت راسي وياهن اشوف ولدنا متكامشين ويه ولد مسعود ودددگ كتل مادري منو يكتل منو ومنو طيح حظ منو.. علي الحـق چان اعنفهم كل راشدي وبوكس يرگعه لليتعارك وياه صداه يوصللنا، تدخل علي الدر صار بين عاصف والامير دفع واحد عن الثاني وصاح بعلو صوته..

-كاااااافي خلووونااا نفتتتهم السااالفة

-سيف: بالعباااس نگاومكم عشاائرياً اعتديتووا علينا واحنه ببيتنا وبهذلتووو نسواانه

-عاصف: ولكمممم مرية سلطاااان

صاحها بعلو صوته وبنفس اللحظة وگعت بنية شابة بالگاع عود اغمي عليها، فكيت حلگي على الكلاوات الصارت مبين ذيج وينها كذابة ودتمثل وين اكو وحدة يغمي عليها وبقت تحرك ايدها ورجلها!!

-سلطان: مررريتي ولكممم حرمتييي وگعتت والكعععبة اخسف بيكم الگاااع يا ولد عليي

الضجة زادت والعركة كبرت شيخ علي نزع عگاله وضرب ظهر سلطان وصاح بي صوت خلى الكل يوگف ويصفن عليه..

-ابن العاايب اخذ مررريتك واخوتك السرابييت وطلعووا منااا لا اطررركم نصين وعلي!!

وگف مسعود متحرگن ورفع اصبعه بوجه شيخ علي يريد يهدده بعده ما فاتح حلگه والشيخ ضرب ايده ينزل اصبعه ونتر..

-ورااس ولدي التسعة اگصه المرة الجاية لو رفعته يا مسعود وهالمرة ما يوگف بعيني دم!!

طردهم كلهم وطلعوا يجرون ببعض كل شوية سيف لو اخوهم الصغير يريد يهد وابوه يلزمه واسمعه يردد جملة "لو انا لو انتَ يا علي" رددها فوگ الخمس مرات وطلع هو وولده بس عاف بناته ومرته ما قبل ياخذهن ومُصر هذا بيتهن..

-ابرار: الچلب عافهن هناا على گلوبنا

-شمس: اظنه تعمد لو شتگولين حبيبة؟

-حبيبة: اكيد متعمد خاطر نسوي وياهن مشاكل وتگب وتصير گعدة ويفضحونا

-تالة: تصير گعدة علمود عركة نسوان؟؟

-ابرار: وين عايشة انتِ هنا يفصلون على دجاجة لو ضاعت

ظلينا نضرب اخماس بأسداس دخت وتعبت جبرتني خالتي ارجع للغرفة ارتاح، تمددت على الفراش وما حسيت من غفيت وجريتها نومة للعصر..

-تالة: صح النوم

-تَـمني: بيت مسعود رجعوا؟

-تالة: لا بس بعدهن نسوانهم هنا

-منو ومنو هنا؟

-بنات اسمهن رهف وسبأ وامهن

-وما حچوا بموضوع البيت بعد؟

-حچوا اي وابا الحسن علي رايح متفاهم ويه عمهم ومسعود مشوفه سند البيت وگال كلشي حقيقي وحسب الاصول مختوم والسند بأسم مسعود

-شلووون

-مادري حتى هو ميدري وضاحك على عمه گله سندك بي غلط يگول كذبت عليه بس حتى يكسب وقت ويروح يراجع الطابو حتى يتأكد من الموضوع

-زين مموجود اسم البائع؟

-موجود اي

-اسمي موجود؟؟

-لا اسمه محمود خير الله وگالو هذا مشهداني نسيت شنو معناها

-يمكن يعني ايراني من مشهد

-اي اي صح هيج گالو بس هو مجنس عراقي

-ولج منو هذا والله دخت

-مادري همه هم فد دايخين وشيخ علي تخربط كلش تعب خطية من الصدمة

-اني بس اريد افتهم مسعود شلون اشترا هالبيت وهذا محمود مدري شسمه شلون باعله!

-بعد ماعرف.. تَـمني دا افكر بشي صار يومين

-شنو گولي؟

-اتوقع احنه فگر

-تاالة

-والله فگر ولج من اجينا لسه العالم من مشكلة لمشكلة ما استقر بيتهم

-من اول ما اجيتهم لاحظت هالشي عدهم هوايه مشاكل

-اهااااا حليتها

-شلون؟

-انتِ الفگر

-تاااالة

-اسفة اسفة بس دا افكر شلون راح يحلون هالسالفة وگمت اللوص

سكتنا نفكر ثنينا بالسالفة معقولة توقيعي اله ربط بالصار جوه؟ والله حيرة..

-تَـمني: اگولج

-امم

-يمكن صدگ اني فگر

-اي مو گتلج

-طاح حظج خو جامليني وگولي لا

-ما اجامل توتة تعرفيني احچيها بالگصة حبي

-امداچ

-عوفي سالفة الفگر لا تخليها براسچ وبشريني شلون صرتي؟

-تعبانة كلش

-حبيبي سلامتج تگومين تسبحين بلكي تتحسنين؟

-اي بس ساعديني اگوم

-اسبحچ اني؟

-انچبي وبلا رعونية

-والله شبيچ لا تصيرين فرد مرة العندج عندي

-ماريد لا بس حضريلي ملابسي حبابة

-تمام

-اگولج وين خالة؟

-طلعت شوية للسوگ

هزيت راسي ومشتني تاخذني للحمام، طلعت جابتلي كرسي بلاستك مادري منين جابته.. باع اني نسيت ومتعجبة شلون تالة لگت الكرسي هاي تطلع الجني الازرگ من مكانه..

حطيته جوه الدوش وجابتلي اغراضي هنا وطلعت، سبحت على كيفي وراسي يفتر ماريد شي بس تروح مني هالدوخة واسترجع صحتي والله الصحة كنز واني چنت غافلة عنها الحمدلله..

**

"تــالة"

انتظرت تَـمني تطلع من الحمام وبقيت بالصالة مال الطابق الثاني خاف تصيحلي او تحتاج شي، اتصلت بأمي افتهم وين صارت تأخرت من الظهر طلعت للدلال تسأله على بيوت ايجار قريب هالمنطقة تستحي نبقى گاعدين هنا وره زواج تَـمني تگول فشلة وطبعاً لا تَـمني تدري ولا بيت الشيخ يعرفون امي طلعت تدور بيوت..

سديت منها التلفون وظليت اتصفن ملانة، فكرت انزل اسويلها اكل اكيد جوعانة ولازم تتغذى.. گمت للحمام دگيت الباب عليها وگلت بصوت مسموع..

-توتة تلفونج يمچ جوه عفته اذا احتاجيتيني اتصلي ماشي؟

-ماشي اي

نزلت الدرج البيت يصفر فارغ اتوقع الكل ينام العصرية هنا لان من اجينا لليوم البيت يفرغ وقت العصر بس من يجيهم خطار او عماتهم يطلعون من غرفهم.. رحت للمطبخ اخذ راحتي لان ماكو احد حميت الجدورة مسوين تشريب لحم بالخبز واعرف تَـمني متحب الثريد..

رحت للثلاجة اشوف شعدهم لگيت اكو تمن ابيض مطبوخ يمكن بايت مال البارحة طلعته حميته وطلعت وياه علبة الطرشي اطلع منها..

-امچ رايحة للدلال اليوم؟

اللتفتت على صوته مفزوعة طلعلي من العدم خرعني، ابتسم واشرلي بيده على كيفچ ذبيت نفس احط ايدي على گلبي وجاوبته..

-اي راحت

-علي التـقي: ليش؟ محتاجة شي؟

-اي علمود نأجر بيت نسكن بي ما راح نرجع لبغداد

بحلق عيونه عليَّ وكأن جوابي خلاه يستغرب، مسح على شواربه وهز راسه وگال..

-ابوي يدري؟

-لا

-ليش تسوون هيچ خوية گعدتكم يمنا مضايقتكم؟

-لا لا بس ماما متقبل نگعد ببيت ناس غربة

-هههههه صراحتچ حلوة

-صراحة منو حلوة ولك تقيووي

اللتفتنا ثنينا على الباب وابتسمت من دخل علي الكـرار ابتسملي مجاملة وركز بعيونه على تقي..

-علي التـقي: وليدي انتَ ليش ملگوف ليش؟

-علي الكـرار: ههههههه شبيك متنرفز اليوم

اخذ گلاص وصب مي من البراد واني اللتهيت اصب بالاكل..

-علي التـقي: لا ما متنرفز بس مشاكل بالدوام ضوجتني

-علي الكـرار: چا خليني اغير مزاجك واگلك شلگيت على حق

-علي التـقي: گول بشرفك

-شتنطيني؟

-نعال وياه وردة

-بعد گلبي العار ما تقصر

-شوف ابن الحلال بذكره هذا حق جاي يتصل عليّ

-شم ريحة فضيحة بساع اتصل

اريد افتهم شغلة وحدة اني شوكت ابطل هذا الفضول؟ شوكت ابطل هالحشرية؟ تالة انتِ شوكت تعقلين؟! بس والله ولا اگدر ارتاح الا اعرف شنو فضيحة حق اظل اللوب، لطشت يم الطباخ اصب بالاكل واسمعلهم يسولفون بأريحية ممهتمين لوجودي..

-علي الكـرار: لگيت نفنوف سمائي بغرفته الا يشگ شگ

-دخيل علي!!

-وعلي لافه بعلاگة حمرة وحاطة على الچرباية مالته شو طلعت من الغرفة رجعت ما لگيت العلاگة يجوز انطاهة للحبيبة السرية

-يمكن اختك تطلع هالحبيبة السرية اكيد حبيبة موصيته من النت ومنطية رقم حق

-لا لا رحت سألت حبيبة گالت ما موصية هچ نفنوف

-لا صدگ!!

-ولك اخيك طلع عاشگ ويضمضم بعشگه، اثاري من ورق ابو كربله خاطر يدعيله ينجمع وياهة ابن الحلو

-شعجب اول تالي حق تعجبه بت ويجيبلها هدايا

-مبين جَدي وياهة مو بيبيتي

-اظن والله

-ولو تعرف گبل فترة هم شلزمت عليه

-عاد انتَ ابو العلوم ماكو شي ينخفي عنك

-تقي انا هاي غرفتي جوه هوااي فايدتني همزين من نزلت

-نتبادل؟

-ما اتنازل عنها لو تگصبني، كضيت حق ويه بت بالحديقة بنصاص الليالي

-انچببب كرار مو لهدرجة

-والله شبيك بس ما چانو يتسوفلون لا تخاف بس يسولفون

درت عيني من الجانب وشفت علي التـقي يسوي حركة بأيده يمكن يريد يسكته لاني واگفة بعد وكت عيني بس هذا كرار ولا سكت وكمل..

-علي الكـرار: شبيك شبيك گتلك ما مارسوا الرذائل سوالف عادية جانت والبت مبينة مو منا

-چا منين

-مادري چانت مشلتحة وتضحك متونسة

-لا هالسالفة ما ينسكت عنها ما گتلي من گبل حتى اطيح حظه!

-لا عوفه ولك مو بعد راح ينتبه لروحه وما يسوي شي گدامي

حطيت الطاسة والماعون بالصينية والخضرة والطرشي والمي ونويت اطلع كافي عيب خاف هسة يگولون تتجسس علينا، شلت الصينية وبطلعتي اجت عبق تركض تهف بس شافت الولد شهگت ورجعت منين ما اجت..

-علي التـقي بضحك: تعاي تعااي عبق وينچ يمعوددة

مدت راسها من الباب خجلانة ضحكوا تقي وكرار ثنينهم من شافوها شكلها شگد لطيف چنها بزونة مستحية..

-علي الكـرار: ههههه خايبة انتِ ليش كلما شفتينا شردتي

-عبق: مو.. مو شفتكم تحچون اكيد تردون خصوصية

فكيت حلگي عليها خازرتها باوعتلي وفتحت عيونها مصدومة من شافتني واگفة على جهة هنا مچانت تدري بيه يبووو شلون موقف محرج..

-علي الكـرار: شلون اخلاق حلوة هاي

حچاهة بضحكة وباوعلي عود شنو هذا ديقصفني؟ والله ولا اخلي لزمة على روحي واتفشل وياهم..

-تالة: زين اجيتي عبوقة دا اصب اكل لـ تَـمني حبابة جيبيلي وياچ بطل المي واللبن

-عبق: اي صار

-علي التـقي: عبق شوكت يبدي دوامچ؟

-عبق: هالايام گالو

-علي التـقي: تجهزتي للمدرسة؟

-عبق: احم.. اي اي

-علي التـقي: بيا مدرسة انتِ؟

-هاي الي صايرة بالـ{اسم المنطقة}

-عندج خط مو؟

-لا اروح وحدي

-ترحين وحدج كل هالمسافة؟؟

بلعت ريگها متوترة وهزت راسها، عگد حاجبه وحتى كرار ميل زاوية فمه ما عاجبه الكلام..

-علي التـقي: هالسنة نحطلچ خط مو مال ترحين وحدج

-لا لا عادي اني اصلاً احب المشي

-اي ميخالف بس مو مشي فوگ النص ساعة

-بس...

-بلا بس واذا ما تحبين الولد ياخذوج منو متفرغ يطلع بوقت دوامج ياخذج بدربه حالج حال حبيبة

هزت راسها ساكتة ونزلت عيونها شكلها يقهر ما اللوم تَـمني من تگول كلما اشوف عبق تدمع عيوني..

-علي الكـرار: يلا انا افلت مع السلامة

-علي التـقي: الله وياك

شلت الصينية وعبق ركضت للثلاجة تطلع الگلتلها عليه واخذت گلاص من السنك واجت ورايه، وگفها صوت تقي ووگفتني وياهة..

-علي التـقي: جبتلج شي

اندارينا عليه شفناه ديكتب شي بالتلفون توقعته ديراسل وكلامه مو ويانه، كملنا طريقنا واردف يگول بأستغراب..

-شو ما رديتي عبق؟

-عبق: ويايه تحچي سيدي؟

-علي التـقي: وياچ اي

-العفو مادري عبالي بالموبايل

-لا وياچ.. جبتلج شي موجود بغرفتي فوگ

جفلت عبق متوترة باوعتلي ورجعت تباوعله، بلعت ريگها وحركت راسها بـ تساؤل..

-شنو هالشي؟

-شي ان شاء الله يعحبج استعانيت بذوق حبيبة

-لا لا شكراً ممحتاجة شي اني والله

-وانتِ عرفتي شني هالشي حتى ما تحتاجين؟

-لا وماكو داعي اعرف، صدگني ممحتاجة وكلشي عندي الحمدلله

-وحبيبة عدها كلشي بس اشتريتلها واشتريتلج وياهة شكو بيها؟

يحچي بأبتسامة صادقة لا ارادي ابتسمت وياه أشوف اسلوبه شكد حلو وناعم وياهة بس هاي خطية فاهية ووجها صوفر خايفة..

-حبيبة اختك و...

-لا تكملين، عيب تردين الهدية

-مو...

-خايبة سكتي شسالفة محسستني مشتريلها مادري شني روحي شوفيها وسكتي

نزلت راسها وعگدت ربطتها حييل ضحكت من ضبت خدودها وطلعن، البنية صارت حمرة متعرف شتحچي حكت ايدها مرتبكة وهمست بصوت بصعوبة ينسمع..

-عبق: شلون راح اعرفها

-ما اسمع

-شلون راح اعرف الهدية

-اول ما تفوتين للغرفة راح تلگيها على الميز

-تمام.. شكراً

-العفو وتتهنين

رفعت عيونها ميتة خجل ميتتة اول مرة تصادفني بنية لهدرجة خجولة، هزت راسها على كيف وهمست مرة ثانية بأبتسامة..

-شكراً

-هههههه العفو

جاوبها بنفس الهمس وغمض عيونه، جرت ايدي حيل وطلعت تهرول من المطبخ واني الصينية تنخض بيدي، وصلنا للدرج روحي راحت اخاف لا يتبدى التشريب..

-ولج شبييج تهفين

-راح اموت راح اموووت

-ههههههه وجع باع وجهها شلون انطعن

-مادري ليش صايرين يتواجدون هواي بالبيت مادري اني صلفة ودا انزل شوكت ميعجبني بدون لا احسب حساب يشوفوني

-شوف هاي امشي نشوف الهدية هسة

صعدنا ثنينا فوگ وحطيت صينية الاكل على طاولة الصالة وفتنا لغرفته، صدگ اول ما طبينا شفنا علاگة هاي مال هدايا لونها وردي وبيها وردات حمر چبيرة محطوطة على ميز العطور..

جرت العلاگة تفتحها وطلعت كارتونين فتحت الاول وطلع حذاء كعب كللش حلو لونه اسود ومبطن بأحمر..

-تالة: يموت!!!

-عبق: يممة تالة ليش جايبلي هيج هدية؟؟

-مادري هسة فتحي الثاني نشوف

فتحت البوكس الثاني طلع بوتين رياضي ابيض شركة اديداس، ضحكت فرحانتلها ولزمته بيدي اختبر الكوالتي مالته، طبگته منا ومنا ويلعب بيدي شگدما لين..

-عبق طبي هذا يجنن ما راح يأذيج

-تالة لييش جايبلي هيج

-شبيچ ليش زعلانة؟

-اخاف جابهن من شاف حذائي ببغداد يا ربيي تفشلت تفشللت

-ليش تفشلتي؟

-حذائي مگطع يلعب النفس المجدي ميلبسه اكيد شافه واستخطاني وجاب ذني

-او يمكن جابهن لانه يحبچ

شهگت وبنفس اللحظة غصت تگح، ضحكت اضرب على ظهرها وهي مستمرة بالغصة..

-على كيفج ما راح تتزوجون هسة عندج وقت على كيفج

-تاالة لا تعيدين هالحجي والله ازاعلج

-ليش

-لان.. لان.. لان عيب!!

-عيب شنو بنتي انتِ شفتي عيونه؟؟ والكعبة اكلتچ اكل والرجال مسلمها

-اششش صوتج نصي صووتج

-تره يجنن ومبين يموت عليج هم حتى خط للمدرسة يريد يخليلچ

-كاافي حبابة

-والله العظيم انتن متفتهمن متعافيات منو تحصل هيج رجال هالوقت وترفضه امـ.....

صميت حلگي عاضة لساني ويه ما انفتحت باب الغرفة وطل منها علي الحـق، دخل وعيونه الخضر مدري الصفر مستغربة وجودنا هنا..

-علي الحـق: شتسون بغرفة تقي؟

-عبق: ا.. اجيت انظفها

-وهاي شنو بيدج

-هيج

ضمت العلاكة وره ظهرها بس وجهها بسرعة يتغير لونه وهالشي اليفضحها، تقرب خطوتين داخل الغرفة وعاف الباب مفتوح..

-طلعي العلاگة اريد اشوفها

-عبق: مو مالتي هذا

-چا المن؟

-لـ حبيبة

-تمام انا اخذه الها انطيني

توترت وترددت گدامه مادري ليش ضمت عليه موضوع الهدية بس حسيتها مستحية منه، زفرت نفس خفيف ومدتله العلاگة اخذها من ايدها وعيونه ما نزلت من وجهها الابيض..

-علي الحـق: جابها مندوب؟

-امم

-وينه الوصل؟

-شنو

-وصل السعر والمعلومات وينه على العلاگة اذا جابه مندوب؟

شددت عگدة ربطتها متعرف شتجاوب وهو هم ما لح وطلع الاحذية من العلاگة يشوفهن، گلب الحذاء بالعكس ورفع حاحبه يشوف القياس..

-القياس غلط

-عبق: شنو

-قياس حبيبة مو 38 تلبس 37

-مادري

تقدم خطوتين جديدة عليها صارت متفصلهم مسافة چبيرة، ضيعت عيونها تطيرهن كل مكان بس هو بعده مركز بوجهها..

-علي الحق: حبيبة ما تحب الاحذية الرياضية

زفرت عبق بهدوء وغمضت عيونها، دا احس بالحرارة التطلع من هالرجال واذاناته دخنت، تقدم اخر خطوة تفصلهم صار گبالها مباشرةً لدرجة لو عبق تحركت تطخ بجسمه توترت واني معليه..

-علي الحـق: مالمن هذا الحذاء؟

-عبق: ليش لازم تعرف كلشي

-رفعي عيونچ وجاوبي مالمن هذا الحذاء!

-تالة: مالتي!

دار عيونه الي خازرني يمة شكله مخيف، استجمعت قوتي وكررت بصوت واضح..

-مالتي واجيت اراويهن لـ عبق لگيتها هنا بالغرفة دتنظف و...

-علي الحـق: وجبتي علاگة هدايا وبيها كارتونين احذية ورسالة لـ عبق حتى تراويها!

استغربت يا رسالة ديحچي عنها بس ما طول استغرابي لانه طلع كارت مال هدايا من العلاگة اني وعبق ما انتبهنا عليه، فتحه گدامنا وقره بصوت عالي..

"الوصل مال الاحذية بالعلاگة اذا ما عجبوچ تگدرين تبدلينهم"

-علي الحـق: ما شاء الله خوش حچي هذا چا شگد مراعية انتِ تالة حتى الرسالة جايبتها تراويها لـ عبق

-عبق: الاحذية الي

رجع عيونه عليها خازرها بقوة اكبر، حرك راسه مستفسر وعبق كملت..

-الاحذية اجوني هدية من شخص

-وليش ما حچيتي؟؟

-لان اعرف راح تعيب عليَّ

-اعيب عليچ؟؟؟

-اي

-انا اعيب عليج؟؟

-مسويها هواي شبيك مستغرب؟

حچتها بغصة وبلعتها بسرعة، ثبتت عيونها بعيونه واخذت العلاكة من ايده ورجعت بيهن الاحذية..

-علي الحـق: منو جايبهم؟!

-معليك

-احچيييييي

-خللص كافي انتَ شيخصك شعليك بيه

عطت مفزوعة من جرها من معصم ايدها ودفعها على الحايط فاقد، نتر وعيونه صايرة بگصته..

-احچييي لا احررگهنن واحرگ الجابهنن احچييي

عصبت وخفت عليها، رحت اريد اجرها منه وهي الدفعته عنها ونترت..

-معليييك

-والعبااااس ابو فاضل يا عبق لوما حچيتي.....

-لا تهدد لاا تهدد بطل هاللغة ويايه تحاسبني على كلشيي تعلم الهدوء تعلمم لا تعصب على كللشي

-احچي ياهوو جابهم وما اعصب

-اخوك جابهن!!

تنفسه سريع راح يلتهمها بنظراته الحادة، زادت الوضع سوء من گلتله اخوك جابهن شعلته اكثر.. ردة فعله على شي تافه مثل هذا يفسر شي واحد بس وماله تفسير ثاني..

-حلووو ست عبق صايرة تقبلين هدايا من اخوتي ومن انا اجيبلج تسويلي عزه!!!

-هو لح عليَّ واستحيت ارده

فزينا اني وياهة من ضرب الحايط بكل قوته متخبل والله متخبل، اشرتلي عبق نطلع ونعوفه قبل لا تكبر المشكلة..

-عبق: امشي تالة

جرتني من ايدي تطلعني بره الغرفة ومن گدما ضاغطة عليَّ احس اصابعها طبعن بمعصم ايدي، سحبتني للمخزن تدخلني وشمرت العلاكة بالكاع تحط ايدها على گلبها تداري دگاته..

-عبق انتِ بخير؟

-خبلني هالرجال خبلنيي

-والله شو داشوف انتِ الخبلتي

-اني شكوو اخبله شسوويت

-والله فاهيات انتن اووووف تحرگن الگلبب

-لج مخبل هذا عصبي ناار يتنرفز من كلشي واني الواكعة بيها

-غبية هذا مو خبال هاي غيرة!! هالرجال يغار عليج وراح يموت!!

-شيغار درووحي

-والله گلبي خلص منچن انتِ وتَـمني الثوولة ربي متدزلي وااحد يرجف عليَّ ومهووس بيه ربيي والله اني خوش بنية واستاهل

گعدت على فراشها من كل عقلها ضايجة شكد بطرانه، گعدت بصفها اتفرج عليها مبوزة وتباوع لعلاكة الاحذية..

-عبق

-خير

-فتحي عگدة الربطة اختنگت من يمي

-ما

-عبق

-هممم

-شنو احساسچ وانتِ موگعة اخوان ثنين في غرامچ؟

-تاااالة

-ها خير خير شكوو

-شبيچ انتِ شو تچذبين الچذبة وتصدگيها!!

-لعد شتفسرين الصار قبل شوية

-اولاً علي التـقي من اول ما عرفته هو حباب كللش وينحط على الجرح يطيب وسألي تَـمني وحبيبة حتى وياهن هيج يحجي

-زين وعلي الحق؟

-علي الحـق ميتحمل احد يگله كلمة "معليك" يتخبل اذا تردين تضوجي وتستفزي گوليها راح ينگلب طنطل

-لعد ليش گلتيله معليك؟

-خفت اگله تقي جابلي الاحذية

-من شنو تخافين

-اخاف يقهرني بكلمة من يعرف تقبلت اخذهن خفت لا يگول عني ممسوحة الكرامة

-صدگ تحچين!

-مادري اني.. اني كلش احتاط ويه علي الحـق شخصيته معقدة ومينفهم بسهولة متعرفين هو متقبلچ لو كارهچ

-امممم

-بس ما انكر هو گلبه طيب ويدافعلي بس يبقى عصبي واتحاشاه لان خالتي سلوى تتخبل اذا شافتني احچي وياه تطيح حظي

-بعد انتِ عايشة هنا واعرف بيهم.. يلا اروح اشوف توتة اكيد طلعت من الحمام

طلعت من المخزن واخذت الصينية ودخلت لغرفة تَـمني لگيتها ملفلفة روحها بالبرنص ومتمددة على الفراش عبالك متخربطة، حطيت الصينية على الميز وركضت عليها..

-تَـمني شبيچ شبييج

-بس اريد انام

-لازم تاكلين حبيبتي مو زين يصير عندج ضعف

-من اگعد بعدين

-گومي تَـمنييي

غلست عليَّ ولفت روحها باللحاف لا مشطت شعرها ولا بدلت الملابس الحضرتهم الها، عفتها ترتاح وتركت الاكل على جهة ورجعت اتصفن وحدي علما ترجع امي...

**

"حبيبــة"

حاطة راس امي بحضني ورجلين امي رسمية بصفي، راسي داخ من الون واللطم وحدة تجر طول والثانية عرض..

-سلوى: ضاع حلالك يا عليي راح تعبك يا بعد بيتيي

-رسمية: عمت عيني شگد گتله بيع هالبيت ماا نريد بيت ورثة والزلمة ما يرضى يگول بي ريحة امي وابوي ما ابيعه تالي اجه ابن الحرام خذاه على البارد يبوووو

-سلوى: ييوووووو على عمري ان شاء الله يبوووو تهجولنا

-رسمية: حسبي الله ونعم الوكيل بيك يا مسعود يابن زمردة ما شفناا منك شي حلو تفففف على تربيتك الخايسة

-سلوى: يحط راسه براس تاج راسه خية هذا زايد علينا مخلي عايش لييش شيخ علي ما كتله من اول مصيبة لفاها على روسنا

-شيخ علي حگاني ويخاف ربه ما تشوفين العار مسعود متسودن يريد يظل يلعب ويمشي ويفصل بالعالم بكيفه وينشر الفساد بالارض

-ااااخ يا علي يا بعد هلي ااااخ يا بعد روحي

-حبيبة: كاافي يمة كاافي حبابات راسي راح يطگ والله

-سلوى: انچبي وفركيلي راسي راح ينفجر

-حبيبة: يمة راسج يوجعج من اللطم من الصبح انتِ تونين وملختي روحج شجااچ

-سلوى: چا غير ابوج راد ينجلط الا شوي شنيي شو ماعندج احساس انتِ ولج؟؟

-حبيبة: انا الماعندي احساس؟؟ الله يسامحج يمة انا بس اخاف عليجن لا يصير بيجن شي

-رسمية: حبيبة بعد روح امج جيبيلي كلاص حامض بلچن راسي يفك

-صار

ما صدكت تگلي اريد بس افلت منا وامي لو اموت متخليني اگوم من وحدي لازم اگعد اللطم وابچي وياهن عبالهن يواسن ابوي بهاي السوالف..

شردت للمطبخ طلعت نومي حامض عصرتلها بكلاص ورجعت انطيتها وركضت اطلع من الغرفة گبل لا يكضني مرة ثانية، ضايجة وكلت اروح يم زوج المصايب بلكي يونسوني شوي..

طلعتلهم لغرفهم بالساحة مشمورين على گولتهم شامرنا ابوي هنا چن بينا جرب دگيت باب سور لان اكييييد نور عنده، فتحت الباب وفكيت حلگي وياهة!!

گاعدين على الكراسي گبالهم شاشة البلازما عارضين لعبة ومعمرين نرگيلة وحب وكرزات وچايات وحلويات ما مخلين شي يعتب عليهم ما جايبي..

-حبيبة: خاينين!!

-علي السور: لك هلااا هاي الحب اجتنا

-حبيبة: روحو انتم خاينين چا ما صحتولي اجي وياكم اتونس

-علي النور: ولچ ما گدرنا لو ابوي يدري مسوين كل هذا وما مهتمين لسالفة البيت بعلي يطبع نعاله على ظهورنا يسويلنا وشم نعالي دائمي

-حبيبة: بس صدگ احنه معزاين ومصخمين ابوي راح يموت من القهر وانتم گاعدين تتفرجون مباراة وتنرگلون اووووف لو شافكم الامير يلعب الصوندة على ظهوركم

-علي السور: بس اكيد امير ما راح يدري وانتِ الحلوة الحبابة اخيتنا الصغيرة الشيخة ما راح تحجين مو يبعد بيتي وبيت الخلفني والخلف خلفني والخلف خلف خلفني والخلف خلـ....

-حبيبة: افتهمت ولا ما راح اكول بس سوولي مكان وياكم ونسوني

-علي النور: افااا بنيتنا ضايجة ليش

-حبيبة: زعلانة على الوضع ومرة عمي مسعود وبناتها بالاستقبال كاعدات فشلة حتى ما رحتلهن وقدمتلهن شي امي وامكم ما يرضن اعتب باب الاستقبال وقفلن الباب عليهن وخذن المفتاح

-علي السور: امممم مو خوش سالفة هاي

-علي النور: صحيح يعني هنه شنو ذنبهن ينذلن اذا ابوهن عار

-علي السور: عندي مفاتيح الاستقبال الاحتياط اذا تردين نروح نفتح الباب

-حبيبة: صدددگ؟؟ يا بعد روحي اروحلك فدوة

-علي السور: اي چا ماتحمل اشوفج زعلانة شفتي شلون انا اخ صالح

-علي النور: بده بالتمسلت گوم افتح الباب وانچب

-علي السور: صبر صبر.. افتح الباب بشرط

-حبيبة: انوب صار يتشرط شبيك سور

-علي السور: شبيچ سؤال اريد اعرف جوابه وهذا هو، انتم شفتوا غفار بالمستشفى البارحة؟

انسطرت وانگطع نفسي ويه سؤاله، بلعمت وحرت ماعرف شجاوب فتحت حلگي اريد احجي بس ما طلع مني شي..

-علي النور: ليش تسأل؟

-علي السور: جاوبي حبيبة

-حبيبة: مادري يجوز هو شافنا

-علي السور: گال حچاية گبل لا يطلعون اليوم صفنتني

-حبيبة: شگال؟؟

-گال انتم خابصينا بالشرف والالتزام چا روح شوف اخوك شجاي يلوص ويه خطيبته والمستشفى شاهدة

زارتني قشعريرة بعظامي ظليت افرك بيدي مادري شسوي، عضيت شفتي مرتبكة وسور ونور بقوا يسولفون سوه..

-علي النور: تدري ابوي احسن قرار اتخذه من گال زفة الامير يوم الجمعة العالم صدگ دمرونا بالحجي

-حبيبة: احم.. ليش.. ليش معظمين الموضوع الامير مو اول زلمة يتزوج ارملة عمه

-علي السور: خوية اعتراضهم مو لانها ارملة عمه اعتراضهم كله لانهم عايشين ببيت واحد بدون زفة، انتِ ما تدرين مسعود من افتهم بيچن رايحات ويه تقي لبغداد ياااا بوية شسوه ما خلى تعيار ما عاير ابوي ما خله فشار ما فشر يگله انتَ مسوي ***** بييتك

-حبيبة: صخااام

-علي النور: اي وعلي چا ما شفتي ابوي دگ رجل الا يتزوجون خاطر يسدون حلوگ العالم ونخلص

-حبيبة: يا مسكينة يا تَـمني ما ظل واحد ما حچه عليها

-علي السور: حچو على الامـير علي اكثر

-حبيبة: شوكت؟

-علي النور: كل وكت هوواي حچو واكو يخشون بعينه يحچون حچي ماصخ يخلو يفور ويشيل روحه ويرگعها

-علي السور: وانتِ تعرفين الامير طبعه ما يسكت يرزلهم بأدب يعوفهم فاكين حلوگهم ويطلع من الديوان

-علي السور: هواي تحمل لخاطرها حبيبة هسة انا لو چنت بداله ما اتحمل شلي بهالوجع الگلب ويدوسون ببطني كل يوم ياهو يستاهل

-علي النور: اظن لانك ما عاشگ بس الامير عاشگ هالبت وميت بيها، اليتحمل حچي الوادم ويصبر بس اليحب من كل گلبه عشگه اكبر من حچيهم الماصخ

-حبيبة: صح والله، هسة يلا سور امشي نفتحلهن الباب

گام ويايه ونور بقى ينرگل ويتابع المباراة، تسحبت على اطراف اصابيعي وهذا يمشي عدل ولا هامه..

-حبيبة: سوور على كيفك شبيك تطگطگ من تمشي

-علي السور: نعالي ابو الطگة شسويله

-نزعه لا تسمع امي وتجينا تطيح حظنا

-حبي الانسان لازم يضحي خاطر انسانيته ومبادئه بالحياة ومثلما كال ابو شادي الزبنطوطي الزلمة مو بس حچي الزلمة گول ومشي

-خريطه هواي ابو شادي الله يحفظه

تسحبنا للاستقبال وفتحنا قفل الباب، دخلت عليهن وحدي بدون لا ادگ الباب خاف امي تسمع وسور بقى واگف بره، لگيت رهف نايمة وسبأ لامة رجليها لصدرها وساندة راسها عليهن وصافنة حتى ما انتبهتلي من دخلت..

-حبيبة: سبأ

رفعت عيونها فازة ثواني استمرت بالصفنة ياله استوعبت اني فتحتلهن الباب ودخلت، ابتسمت ابتسامة واسعة وگامت توگف على حيلها..

-هلو حبيبة هلوو هلا بيج

-حبيبة: شلونكم حبيبتي؟ وينها امج

-بالتواليت امي هلا بيج تعالي تفضلي

ابتسمت على ترحيبها ورحت اگعد على التخم بينما رهف خطية نايمة بالگاع ولافة روحها بعباتها..

-سودة عليّ بقيتن بلا غدة مو؟

-سبأ: لا عادي اصلاً مو جوعانات احنه

-يا بعد عيني چا باقيات على لحم بطنچن من الصبح رايحة انا اصبلچن اكل راح يأذن المغرب

-لا لا خاف عمي علي يزعل

-افاا سبأ شهالحچي مو عيب ابوي هو ابو الكرم والجود وصدگيني ما يدري بأمي قافلة الباب عليچن لو درى يگلب الدنيا

-چا اجي وياچ اصبن؟

-بكيفج تعاي

طلعنا سوه وعلي السور بعده واگف بالباب، سلمت سبأ عليه وغشت جزء من وجهها مستحية عجيب الفرق بينها وبين رهف من السما للگاع مع العلم سبأ الجبيرة..

-علي السور: چا وينهي اختج؟

-سبأ: نايمة

-علي السور: من تاخذين الغده گعديها خل تاكل خوية

باوعتله مضيگة عيوني حركلي راسه بمعنى "شكو" وراح، اخذت سبأ للمطبخ اصرت الا هي تصب وتسوي كلشي وتمشي مثل النسمة صوت طگة ماعون ما طلعت..

-سبأ: جاي نزحمكم يبعد روحي حبيبة

-حبيبة: لا خية شني البيت بيتكم

صفنت سبأ على جملتي وانا هم صفنت! يمةة بس لا صدگ يطلع الهم حصة بالبيت ويجيب مسعود ولده ويعيشون هنا بعلي تصير دماية بينهم وبين اخوتي..

اخذت صينية الغدة وراحت للاستقبال تذكرت حمامهم يجوز مابي صابون نسيت اخلي البارحة من نظفته، ركضت للدولاب طلعت صابون سائل وصابون عادي ورحتلهن للاستقبال هستوهه گاعدة رهف وبدت تاكل..

سلمت عليَّ وعبرتهن اروح للمدخل الي بي الحمام، حطيتهن بالباب خاطر مرة عمي من تطلع تشوفهن و تحطهن، درت وجهي جاي اطلع و استغربت من صوت حچي جاي من الحمام چن صابرين جاي تسولف ويه احد، گلبي لعب منها بس ما يصير اتسمع عيب عيبب حبيبة عيب!!

عفتها وفتحت باب المدخل اريد اطلع ونزيت واگف گلبي من طلعت بوجهي سبأ هي تريد تطب هنا.. رفعتلي اصبعها وحطته على شفايفها وهمست..

-اششش

-حبيبة بهمس: شنو

-تعاي

جرتني من ايدي ووگفتني بباب الحمام، اشرتلي على الباب ورجعت تأشر على اذنها بحركة "سمعي" تعجبت ليش تريدني اتسمع على امها؟

اجلت تساؤلي هسة وبقيت واگفة وسبأ بصفي كاضه ايدي، نزلت عيوني اعاين لاصابيعها وايدها صايرة عبارة عن خريطة مجرحة واصابعها مشگگة واماكن التشگگ صاير اسود وأظافرها هم مسودات من الشغل تكسر الگلب..

عفت ايديها لان جذبني صوت امها چنها تسولف بأمي! سمعتها تگول "سلوى"! فكيت عيوني واذني بكل حيلي اريد اركز واجمع الحچي..

-صابرين: چا ما خافت الله ببت اختها الفقيرة احنه لو نفضحها صدگني محد يگدرلنا بعد وبت اختها ناخذها لـ سيف ونكسر راسها الخايسة.... ليش لييش جاي تأجل لييش!!..... سلوى تاريخها كله يمك ليش ما راضي تستغل هالشي لصالحك گليّل السوته؟!.... يلا يلا هلو يلا...

جرتني سبأ من ايدي وركضت بيه بره المدخل، اشرتلي اطلع من الاستقبال بيدها ورهف صافنة علينا ما تدري شكو، طلعت بسرعة منا وايدي على گلبي شنو قصدها وبشنو تريد تفضح امي؟؟ وعبق شجابها بالنص!

طلعت من الاستقبال گلبي خلصان من جهة غفار عرف بـ تَـمني چانت حامل اكيد ومن جهة صابرين متحلفة لامي بمادري شنو وتريد تكسر ظهر ابوي بيها ومن جهة سالفة البيت وشلون عمي گدر يشتري..

حرت شسوي وقررت كل الصار اصبه بأذن الامـير علي هو لازم يعرف ويوصل الحچي لابوي بس سالفة امي خايفة ومترددة احچيله لازم اواجه امي اول واشوف خاف صدگ لازمة عليها لزمة صابرين الحقيرة..

-علي التقي: حبيبة وينهم اخوتج؟

اخترعت من طلعلي من العدم، حطيت ايدي على راسي وذبيت نفس تقدم عليَّ قلق متفاجئ من ردة فعلي..

-شني شبيچ تعبانة؟

-اي شوي

-تعاي نگعد سوه گلبي مفرفح عليج

ابتسمت ورحت وياه خذاني لغرفة علي الكـرار، طبينا عليه وگعدنا نسولف كلنا سوه شوي نسيت الصار وصفيت عقلي..

-علي التـقي: حبيبتنا ضايجة كرار صير قرقوز وضحكها

-علي الكـرار: قرقوز بعينك، خليني انطيج خبر راح يخليچ تهزين خصر هنا

-حبيبة: شنو گول گوول

-علي الكـرار: قريباً راح نسمع كللوولوووشش

-حبيبة: يا كللولوش يمعود اظن راح يتأجل عرس امير وتَـمني من وره سالفة البيت

-علي الكـرار: خايبة الكللولوش مو للامير هالمرة الكلولوش لـ علي الحـق

-حبيبة: چذذذذذب

-علي التـقي: كرار شاف حق ويه بت گبل چم يوم بالحديقة

-حبيبة: صخااااااام

-علي الكـرار: لا لا شريف اخيچ ما كض حتى ايدها بس سولفو بره

-حبيبة: چا احنه وين چنه شون ما حسينا من طببها؟؟

-علي الكـرار: ليش انا سمعت الباب وطببها للديوان شوي وطلعت للحديقة تسولف وتضحك وياه

-حبيبة: والله لو ابوي يدري

-علي الكـرار: ما راح يدري بير اخيچ بيير كله اسرار اخوته عنده

-حبيبة: شون چان شكلها؟

-علي الكـرار: مشلحة

-حبيبة: صواب

-علي الكـرار: استغفر الله طبعاً انا ما عاينت ما يجوز بس چانت لابسة ثوب گصير ومطلعة الكراعين ولابسة حذاء عالي ترتر وشعرها طويل وحاطة هذا الطاگ مدري طوگ ترتر على راسها واظافرها اطول من لسانچ و...

-علي التـقي: لا ابد ما عاينت عليها

-علي الكـرار: نظرة اخي نظرة واحدة والنظرة الاولى حلال

-حبيبة: بيضة لو سمرة؟

-علي الكـرار: لا بيضة ولا سمرة چن حنطية

-علي التـقي: اللهم صل على محمد وال محمد النظرة الاولى حلال مو؟

-علي الكـرار: نعم نعم نظرة واحدة عيوني دمعت ردت ارمش بس خفت افوت شي فـ حاولت اصمد

-حبيبة: عرفتها!

-علي الكـرار: هلاااا مني هااي

-كراار!!!

وهالمرة ثلاثتنا انهبطنا من دخل علي الحـق يهف لغرفة كرار بدون لا ينطي مقدمات لدخوله دفر الباب وطب، تفاجأ من شافنا مخترعين وظل يزرزر بعيونه بيناتنا..

-علي الكـرار: بعلي انا معليه انتَ ساقط شسويلك

-علي الحـق: شني شبيكم

-علي التـقي: هو هيج يطبون للغرفة ولك

-علي الحـق: چا شون

اجه يگعد ويانه وجر النستلة من ايد تقي اكلها مبوز اهووو انوب هذا شبي يربيي..

-علي الكـرار: البوز سبع اشبار شكو بس لا ضجت لان فضحتك گدامهم؟

-علي الحـق: ما سمعتكم، شحچيتو؟

-علي الكـرار: حچينا على عيونك التمساحية التشگ شگ

-علي الحـق: اممم

-علي التـقي: شبيك ضايج

-علي الكـرار: بس لا متزاعل ويه الحب

رفع عيونه بطريقة سريعة بأهتمام عكس عادته ولا يوم انطى ردة فعل بموضوع يتعلق "الحب" بهالطريقة الواضحة..

-علي التـقي: واضح صدگ السالفة متعلقة بالحب

-علي الحـق: لا شكو

-علي الكـرار: سولف خوية سولف شمالها المشلحة

-علي الحـق: يا مشلحة؟

-حبيبة: خلونا نغير الموضوع ونسولف بأبا الحسن منو عنده اخباره يفضحلنا شمسوي هالفترة

-علي التـقي: مگابل باب بيت عمي ناصر وگاعد يكش الذبان الفوگ راس ليلة خاف يزعجها

ضحكنا نحشش عليه وعلي الحق گضاها ساكت، ذب الكاغد مال النستلة على تقي وتقي خذاها عادي وراح يذبها بالزبل متعود على عجوزية حق..

-علي الحـق: ليش گمت تذبه؟

-علي التـقي: چا اخلي بحضني ادفي؟

-علي الحـق: متعود تدفي الكل بحنانك بقت على الكاغد

ضحك تقي ورجع يگعد بمكانه بس چن حق حچاهة مزعوج حتى كرار باوعلي بنظرة "انتبهتي؟" وهزيتله راسي بمعنى انتبهت..

-حبيبة: حق شوكت تلتحق

-انتظر علي التـقي

-علي التـقي: شني ما تكدر تعيش بدوني

-ابد

-شون بيك باجر عكبة لو تزوجت واللتهيت بمرتي وجهالي

وكالعادة تقي حچاهة بأبتسامة يداهره بيها بس علي الحـق ما ضحك ولا تذمر مثل كل مرة اللتزم الصمت ساكت..

-حبيبة: شعجب تقي چنك مفكر بالزواج هالفترة

-علي التـقي: اي مادري براسي الموضوع صارله فترة

-علي الحـق: بس انتَ تكره الزواج!

-علي التـقي: وهسة حبيته

-علي الكـرار: كفو من شاربك الطويل تزوج خوية بلكت تنفتح قسمتي چن الامـير علي فگرني بخطوبته

-حبيبة: ههههه ما تتزوج انتَ ياهو كاضك بس تبچي وتشكي

-علي الكـرار: ولج امي ما ترضى كالت الا الكبار يتزوجون تالي يجي وكتي وحظي الفگر گبلي ثلاث عزابية علي التـقي الچان يشگ زيجه من يسمع طاري الزواج وابا الحسن الي ليلة ضاربته بوري وعلي الحق اليركضلي وره المشلحات

-علي الحـق: حبيبة صدگ تذكرت لگيت حذاء بالصالة جديد هذا الچ؟

-علي الكـرار: ولك مو جاي نحجي بالزواج شجاب القنادر هسة!

-علي الحـق: خلينا نفتهم هسة ها مالتج الحذاء؟

-حبيبة: حذاء جديد بالصالة؟ لا ما مشترية حذاء هالفترة

-علي الحـق: غريب لگيت ثنين واحد رياضي وواحد نسائي كعب

-علي التـقي: ولك لا هذا انا جايبه هدية لوحدة

-علي الحـق: لوحدة؟؟

-علي التـقي: اي ويجوز هي عافته بالصالة

-علي الكـرار: هلا هلااا ياهي هاي ولك اوگف افكر كم نثية عدنا هنا بالبيت اليوم..؟

-علي الحـق: شنو المناسبة جبته!

-علي التـقي: هيچ

-علي الحـق: ماكو شي اسمه هيج تقي شنو المناسبة؟!

-علي التـقي: هههههه شبيك شادها ولك بس لا تغار عليّ

-حبيبة: هاااا تذكرت يا حذاء بشر انطيته الها اليوم؟ شنو جانت ردة فعلها بله

-علي التـقي: وجهها گام ينفض دم وتتراجف چن گلتلها راح اعتقلچ بتهمة تجارة اعضاء

-علي الكـرار: مثل الاطرش بالزفة كاعد انا اول تاليي

-علي الحـق: اكو مناسبة وجبتلها الحذاء؟ يعني عيد ميلادها لو شنوو اكو؟؟

-علي التـقي: لا ماكو مناسبة بس عجبني اشتريلها ويه حبيبة

-علي الحـق: هي ما محتاجة صدقة ولا معتازة شي گالتلي كلشي عدها ماكو لزوم تجيبلها شي مرة ثانية

-علي الكـرار: ولكم هي ياااهي

-علي التـقي: البت فقيرة ومن اهل الله ما جبتلها الحذاء خاطر اهينها انا بس شفت حذائها شوي تعبان گلت يجوز ماعدها تشتري غيره وجبتلها

-خووش بس لا تعيدها بعد تتحسس!!

-تتحسس!!؟

-حبيبة: شبيكم شديتوها على حذاء

-علي التـقي: يشهد الله نيتي صافية ويه هالبت وما ردتها تضوج لو تزعل هي بلا شي كاسرة گلبي

-علي الحـق: تقي تره البت اصغر منك بهوااي!!!

-شعليه بعمرها؟؟ وين تريد توصل انتَ!!

-حبيبة: شبيكم يمعودين شسالفة

-علي الحـق: خلص انسى انا طالع

طلع من الغرفة ضايج اكثر من قبل شوية، اللتفتلنا تقي محتار وانا گلبي نغزني علي الحـق مو من عوايده يتنرفز من تصرفات تقي مهما كانت دائماً يأيده على الصح او الغلط اصلاً همه الثنائي الما يفترق ابد!

عفتهم وطلعت وراه اشوفه شبي لگيته واگف بالساحة يطحن بالجكاير يدخن، حمحمت اجذب انتباهه بس ما اللتفتلي وبقى منطيني ظهره..

-علي لا تضوج من تصرف علي التـقي والله نيته صافية تجاه عبق واذا انتَ زعلان لانه جابلها هدية بسيطة هو بس حب يساعدها لا اكثر

-زعلان؟!!

اندار وهو يگولها بعصبية، جفلت من شمر الجگارة وفتح عيونه ينتر بوجهي..

-ازعل على شنو ليش هو شكو؟؟ شكووو حبيبة شكوووو

-يعني گلت يجوز انتَ عبالك اكو غير شي او...

-غير شي مثل شنو؟؟ ليش هي بشنوو تهمني؟؟ كلها خلگ بت عايشة ويانه بالبيت ليش عبالج هي تهمني بشي؟؟؟

-مادري يعني.. مادري لا تعصب شبيك

-منييييييلي عصبييييي وينها العصبييية وينهااا لا تخبلوووني

-حق اهدأ فدوة شبيك تصرخ عدنا خطار

-خ** عليهمممم وخ** على الحذااااء وخ** على كلشيييي ما يهمني احدددد

-تمام تمام خلص اهدأ

-هممم گالت اهدده ليش شبيه؟ اشايفتني رحت دچيتتت تقي بگلبه؟؟؟؟ لو رحت املصصص راسها من جسمهااا؟؟؟؟

-حق شبييك تصيح عليّ ما متعودة عليك تعلي صوتك

-لا تستفزيني ومن اعصبب تجين تگليلي لا تعلي صووتك سويتيني اهتم لهاي البت وانا زعلان على قندرة!! من قندرررة بهيج بيييت خاايس

طلع من باب الحوش يصيح بعلو صوته، انقهرت وحزت بخاطري من صرخ بوجهي، رجعت للبيت لغرفة كرار اشوفهم سمعوا صياحه لو لا بس لگيتهم ثنينهم مو بالغرفة مبين ما سمعوه..

گعدت وحدي بالصالة مقهورة كلش بس ما خليت زعلتي تنسيني ابلغ الامير بكلشي، دكيت عليه چم مرة ما جاوب كتبتله رسالة طويلة ابلغه بكلشي صار وحتى غفار البارحة من اجه للمستشفى وشافني وشنو حچه بس سالفة امي ما حچيتها ودزيتله الرسالة..

گمت اللهي روحي بالبيت بينما يأذن، نظفت شوي وعقلي مشتعل بالافكار وين صارو الامير وابا الحسن همه گالو راح يتصرفون بموضوع البيت وابوي هم سودة عليّ من الصبح طلع وما رجع لحد هاللحظة..

اندگت باب الحوش كيفت ورحت طايرة افتح بجاه علي كون اخواني رجعوا ويبشرونا، وگفت بنص الساحة اعاين لغرف سور ونور خاف يطلعون ويرزلوني لان انا الفتحت الباب بس ما يهمني كملت الطريق وفتحت الباب ملهوفة وچان اشوف گدامي..

-منتصر!

-منتصر: بسم الله الرحمن الرحيم شبيچ مخترعة چن شايفة جني

ابتسمت منحرجة صدگ نطقت اسمه بطريقة غريبة، اشرلي بعيونه على البيت من جوه وگال..

-اخوتچ هنا حبيبة؟

-من شوي چانو هنا بس اظن طلعوا لان مو من عوايد سور ونور يغلسون على دگة الباب

-اي سور ونور شفتهم يطلعون من شوي المهم وينج انتِ ام راس شو اليوم ما اجيتي للمستوصف صايرة تغلسين

ذبيت نفس وابتسمت تعبانة رأساً تغيرت ملامحه للقلق من ردة فعلي، اشرلي بيده حتى ابتعد عن طريقه ويفوت جوه، سويتله مجال طب وطبگ باب الحوش وراه..

-شبيچ حبيبة صاير شي وياچ؟؟

-لا مو وياي بس عمي مسعود اليوم اجانه وكال نص هالبيت صار اله و...

كملتله السالفة شنو صار بالتفصيل، يسمعلي ويفور محترگ من القهر منتصر يشوف دم سنونه ولا يشوف مسعود وولده هووواي أذوه بصغره وره ما توفى ابوه عاش وياهم شهرين گبل لا يجينا وطلعوه عيونه من القهر..

-منتصر: لاا هالسالفة ما ينسكت عنها وانا البطران اجيت اعاتبج كلت ليش ما اجت خفت صايرلج شي

حسيت بخدودي تشتغل خجلانة وفرحانة هالجملة عوضتني على كل شعور تعيس عشته من البارحة لليوم، ابتسمت ساكتة الحجي ضاع مني خرب راسي..

-منتصر: عمتي رسمية هنا اسلم عليها؟

-اي تفضل موجودة

دخل ومشيت وراه اعاينله من وره انا ليش ادبسز وعيني صلفة ويه هالزلمة؟؟ ليش انتبه لشكله وملابسه المرتبة وريحة عطره الحلوة وحتى على حذائه النظيف من ينزعه ويطبگ واحد بصف الثاني ويحطه على جهة من الباب!

دخلته من باب المطبخ وگعد بالصالة ينتظرني اصيح لمرة ابوي، رحتلهن بالغرفة لگيتها متمددة ومغطية وجهها بالشيلة، گعدت على ركباتي بصفها وهمست..

-يمة يمة گومي منتصر اجه يشوفج

فزت مخترعة تباوع منا ومنا، صفنت بوجهي وعگدت حاجبها وگالت..

-ولج انتِ ياهو

-ههههه يمة كومي انا حبيبة بعدج نايمة انتِ

تثاوبت تفرك بعيونها هزيتها تصحصح ياله گعدت وانتبهتلي، عدت الگلته قبل شوية واستوعبت منتصر هنا منتظرها..

-رسمية: يا بعد بيتي منتصر وليدي اجه يشوفني بعد روحي ما ضاعت بي التربية

گامت متحمسة تشوفه ولفت شيلتها على راسها عدل، راحت لميزها تتعطر ولبست الهاشمي فوگ دشداشتها ضحكت وانا اتفرج عليها شلون تهتم لروحها من يجي منتصر دائماً تكول من گدما مرتب ويلمع الوحيد الاستحي من اطلع گدامه مرعبله وبملابس البيت..

اخذت عوچيتها وطلعتله تسلم عليه بوسته وبوسها وباس ايدها هي صح مرة عمه بس هو يشوفها بحسبة امه ومُصر عادي اذا يبوسها ويحضنها..

-رسمية: هلا بالدكتور هلا بوليدي العاشر يبعد بيتي منتصر

-هلا بيج يمة شلونچ شلونها صحتج

-زعلانة عليك شمالك ما تجيني اشوفك لو صرت دكتور وتكبرت علينا

-ههههه حشى والله خوب انا دكتور صار چم سنة بس والله ماكو وكت هالفترة شغل وبنياتي وكحات ما يگعدن راحة يومية مسوياتلي طلابة

-حبيبة: يمعود كله عمرهن ٣ سنين يا طلابة هاي اسم الله

-منتصر: هو هذا هم حظي كل اليسمعني يضحك وما يصدگ ما يدري بنياتي عمرهن ثلاثين سنة مو ثلاث سنين على لساناتهن وعقلهن شكبره

-رسمية: الله يحفظهن فطنات وذكيات طالعات عليك انتَ بصغرك چنت واعي واكبر من عمرك بهواي

-منتصر: يمة منتصر لحد هاللحظة هو واعي وذكي المستوصف كله معتمد عليه

حچيتها على لاهيتي ورفعت عيني على منتصر لگيته يباوعلي مبتسم انحرجت من نظراته واحس بگلبي راح يطلع من صدري وخرت عيني عنه بساع وهو ما وخر عيونه، ترخصت ورحت اجيبله ضيافة وافكر بنظراته الي ليش چان يعاينلي هيج؟ معقولة يحبني؟ لا لا شنو يحبني شبساع حبني.. كافي ما يصير اكون خفيفة لازم اثگل واسيطر على مشاعري وما افضح روحـ....

-انا رايح

وگع الشكردان من ايدي ويه صوته وجفلت اصفن بي، هرول بأتجاهي ونزل يلم الگزاز من الگاع واني چني ثولة واگفة ولا تحركت..

-منتصر: اسم الله شوي لا تتعور رجليج

-رسمية: يا ستار شصاير حبيبة يمة تعورتي؟؟

دخلت مرة ابوي خايفة عليًّ وهمزين اجت چان بدال ما اگله "لا عادي ما اتعور" اگله "احبك واموت عليك"..

-حبيبة: لا يمة ما صار شي اسفة وگع من ايدي الشكردان مالتج التحبي

-فدوة الج يروح امچ اهم شي انتِ سالمة

هزيت راسي خانسة ونزلت اللم الگزاز وياه ايدي من رجفتها ما جاي تثبت قريب مني كلش ونازل يلم وياي ما وخر حتى من امي گالتله يعوفه بقى يلمه على الصامت، رفعنا عيوننا ثنينا ويه صوت رهف طبت للمطبخ وگالت بتعب..

-عمة بطني راح اموووت

كاضه بطنها وعاصرة وجهها متخربطة، فز منتصر من مكانه يروح يشوف شبيها وراحتلها امي وانا هم گمت اسندها، گعدتها على الكرسي والبت تلوب من الوجع..

-منتصر: وين الوجع بالضبط اشريلي

-رهف: ااااخ هنا هنااا

مد ايده منتصر يضغط ع المكان الاشرت عليه وعلى صوت عياط رهف اجت امها تركض ورأساً لطمت على وجهها من شافت منتصر حاط ايده على بطن بتها..

-صابرين: ايدددددك وووولك ايدددك عن بنيتيي

-منتصر: شبيچ تخبلتي شبييچ بتچ متوجعة

-صابرين: عرررج ما بيها لا تكضهااا ادررري بسوالفك ابن مرتضىى ربيتك انااا وادري بعيونك النگسة

-منتصر: احترمي نفسج لا اشلع لساانچ يلاا ولي هناك ماريد اشوف وجهچ

جرت بتها وراحت تدعي عليه وتفشر على مادري منو ما تكول اسماء بس تفشر، راحتلها مرة ابوي تريد تكتلها وكضها منتصر..

-منتصر: يمة هي تتعمد تسوي مشكلة خاطر يگاوموكم عوفيها لا تنطيها التريده

-رسمية: يبعد عيني كل هالشهامة والغيرة وما متزوج باقي هيج وحيدك

-يمة شجاب الزواج هسة

-مو گلبي فرفح اريدك تتزوج

-شسوي بالزواج بس وجع راس

-لا يبعدي چا ما تريد وليد يشيل اسمك

-عندي بنيات ثنين يشيلن اسمي

-رسمية: ميخالف عروستك عليّ شون بت اعرف ترد الروح شوفتها غصن بان طول وجسم وجمال وحشمة وكلشي تشتهي نفسك

-منتصر: هاي حورية يمة مو بت

-هههههه اخطبها الك انتَ بس گول اي

-يمة دخيلج ذني خواتي گبل فترة خلني بموقف محرج رايحات خاطباتلي بت خطية ومأمليها ومتفقات ويه اهل البت العقد والزفة فد يوم وانا اطرش بالزفة مادري بالسالفة والعباس لوما ابا الحسن سائلني بيوم رحنا للمزرعة چا نمت وگعدت لگيت روحي متزوج ومخلف

هزيت راسي واصلتلي الفكرة، چان لازم اعرف خواته وره موضوع خطوبته بيوم عقد الامير وتَـمني وهنه من كيفهن متصرفات كللش قويات خواته ومن النوع يتدللن على اخوهن هوااي وهو يحبهن وميرفضلهن طلب بس همزين بالمواضيع الجبيرة وبالامور التخص حياته ميقبل احد يتدخل ويوگفهن عند حدهن..

ضحكوا يسولفون هو وامي شوي وودعها وطلع، صعدت لغرفتي حتى ما اتصادم ويه صابرين وقفلت الباب عليَّ توضيت وكعدت على سجادتي ودعيت بأنانية دعيت بحب تملك من كل گلبي ما يتزوج منتصر وما يشوف مرة غيري، بچييت هواي على سجادتي ودعيت يبقى عزابي طول عمره وانا ابقى عزبه ما اتزوج ميخالف راضية حتى لو ما انجمعنا المهم ما يتزوج وانذبج بخبر زواجه مرة ثانية..

طلعت من الغرفة وره ما كملت صلاة وصرت وجه بوجه ويه الامـير علي جاي يروح لغرفة تَـمني، سلم عليّ وتسائل شبيهن عيوني حمر..

-مابيهن متحسسات من الماي

-اذا وضعج هيج بسبب الرسالة الدزيتيها لا تخافين انا اتصرف

-ان شاء الله حبيبي

-تَـمني بغرفتها؟

-اي بس اظن خالتها رجعت وتالة هم يمها بالغرفة

هز راسه اي وطرق الباب عليهم عفته براحته ونزلت اسوي العشا ويه عبق، لليل رجع علي الحـق عبر عبق چن ما يشوفها وبدون مقدمات حضنني من وره وباس راسي يراضيني لان صاح بوجهي اليوم...

گال ما يريد عشا وعافنا وصعد فوگ، گلت اسويله زلاطة واخذها اله واسولف وياه افتهم شبي تسودن ويه تقي اليوم.. كملت الزلاطة ملحتها وصعدتله للغرفة شفته نايم على الشازلونه وجاي يرفع اثقال..

-هلو يا حلو

هز راسه وبقى يرفع بيهن، رحت اوگف فوگ راسه واخذت الاثقال من ايده شايفة روحي رامبو بس شو وگعت ايدي وردت اوگعهن على راسه..

-علي الحـق: الله الله خوما تعورتي؟؟

-لا حبيبي انا هم مادري شلوني وشلتهن

نزل الأثقال من ايده شمرهن بالگاع وشال مطارة البروتين مالته يشرب منها، باوع للزلاطة وگال..

-هاي الي؟

-اي گلت خاف تجوع

-ما اشتهي

-شبيك حق ليش ضايج؟

-ما ضايج بس تعبان من الشغل

-اكو احد غاثك؟

-چؤ

-اهووو حق شبيك اجر منك الحچي جر

قررت اطلع واعوفه خلي يرتاح وارجع احچي وياه، وصلت للباب جاي اطلع ووگفني صوته من گال بنبرة مغايرة عن نبرته المتعالية المعتادة..

-گلبي يوجعني حبيبة

اللتفتت مخترعة هرولت وگعدت بصفه على الشازلون افتهم شبي، جر تشيرته يلبسه فوگ جسمه وحرك راسه نافي چن اجت فكرة براسه ورفض ينطقها..

-اسم الله عليك حبيبي شنو بيك احجي

-الشغل الشغل

-طز بالشغل اليخليك بهالحال لا تتعب روحك ولا تجهدها صحتك اهم

-ما جاي اگدر اعوفه

-لا تعوفه حبيبي بس خفف ولا تخلي براسك كل وكت

-ماكدر معشعش براسي خرب روحه

-حق ندري شگد تحب شغلك ومتعلق بي بس...

-راح اتزوجها.. اتزوجها واضمها بغرفتي واكسر رجليها اذا طلعت بعد!!

-شنييي

-راح اموت والزهررة شلي بالشلعان الروح والتفرفح!! رضت لو رفضت راح اتزوجها وغصبااً عليها!!

**

"تَـمني"

نمت نومة مرتبة جريتها من العصر وما گعدت الا الدنيا ظلمة، مطيت ايدي تعبانة بدون لا افتح عيوني بلكي اگدر اغفى بعد بس گلت اشوف الساعة بيش اول، فتحت عيوني على كيف وفزيت مخترعة من شفت الامـير علي گاعد على كرسي گبالي ولازم بيده موس صغير..

-صح النوم

-اختررعت امير

-اسفين ست فهاوي

نهضت نفسي اضب الروب عليَّ ولميت اللحاف على جسمي، باوعت للساعة شفتها بالعشرة ونص اويليييي!!

-من شوكت انتَ هنا

مجاوبني بقى يباوعلي ويلعب بالموس الصغير بيده، اكو نشارة خشب صغيرونة على الميز الي بصفي وانتبهت لشي شايله بيده الثانية ركزت بيها اريد اشوف شنو بس مخلاني وضمها بجيبه..

-هواي تمشين بنومچ

-بس لا مشيت اليوم!

-اي گمتي افتريتي بستيني ورجعتي نمتي

-كذااااب

-هذا خدي شاهد

حط اصبعه على خده ويحچي بجدية، گعدت عدل اوخر شعري عن وجهي ممصدگة مستحيل اسويها..

-مستحييل

-كيفچ بعد

-احجي الصدگ حباب لا تضحك عليَّ

-افاا اكو شيخ يچذب؟

-اها صاير تعترف انتَ شيخ

-لا هاي بس وياچ استسلمت

-يلا لعد اعترف يا شيخ المستقبل الامـير علي ولا تكذب تره الكذاب يروح للنار وبعد بكيفك انتَ مستعد تعيش بالنار طول عمرك لو لا

-انا من هسة عايش بالنار

-خلص انسى وامسح مكان البوسة انساهة ولا تخليها بعقلك لان ما اقصدها تره

-خوشن

-وهسة گلي ليش اجيتني وشعجب داخل لغرفتي مو عدكم عيب انتو؟

-اجيت اريد اسولف وياچ بشي مهم

-يخص البيت؟

-اي

-شنو گول

-امشي وياي جوه ابا الحسن منتظرنا صار اربع ساعات راح يكفر بينا

-تمام بس ابدل

هز راسه اي وطلع، گمت بسرعة من الفراش وشفت صينية الاكل بعدها هنا واني بطني توصوص من الجوع، اكلت التمن وحده لان التشريب بارد وماحب اكله الا حار كملت الماعون كله وگعدت اگرط بالطرشي، كملت اكل وگعدت امشط شعري المنكوش ولميته.. جريت ملابس لبستهن وطلعتله لگيته گاعد بالصالة مبوز..

-الامـير علي: بعد وكت لو طالعة باجر

-تأخرت عليك؟

-لا بس ابا الحسن هسة سبني وسب جدي التاسع

-خطية مسكين يلا خلينا نروحله ونعتذر منه

-لا ماكو داعي تعتذرين انا اتفاهم وياه

نزل هو ونزلت وراه اتسائل وينهن خالة وتالة بس هسة مو وكتها لازم اعرف شنو موضوع البيت، اخذني امير للديوان لگينا ابا الحسن گاعد ووجهه ضااااايج كلش..

-ابا الحسن: بعد وكت لو ما جاي امير

-الامـير علي: شبيك واذا انتظرتنا شوي

-شوي؟؟ شوي؟؟ ولك من اذان المغرب انا كاعد انتظركم وعاين الساعة هسة بالـ11!!

-چا البت نايمة ما تشوفها مريضة وتحتاج راحة انتَ هم صاير مادري شلونك

-تعاي خوية عذريني صارت بوجهچ بس هذا زلمتج خوش ادمي ضمي بگلبج خوش يدافعلج

ابتسمت وكعدت على الكعدة العربية صايرة بالكاع، كعد الامير بصفي بس مو كلش قريب وابا الحسن بصفه..

-ابا الحسن علي: تَـمني الامير ما رضى ابلغ أي بشر قبل لا احاچيچ وافهمج الصار

-تَـمني: شنو صار خوفتوني

-ابا الحسن علي: مسعود مشتري حصتج من هذا البيت

وگع گلبي وجف حلگي اريد ابلع ريگي ماگدر، باوعت للامير حايرة هز راسه ساكت وگال..

-لا تخافين، كمل ابا الحسن

-ابا الحسن علي: طابقت السندات بالطابو والبيع معترف بي والختم موجود وكلشي متمم على اكمل وجه

-تَـمني: بس اني ما بعت والله العظيم ما بعت والسند موجود فووگ

-ابا الحسن علي: لعبوها عدل يا خوية والوقعوچ على هالسندات اذكياء ومو عقل شايلين طرگاعة طايحين الحظ

-الامـير علي: من تاريخ توقعيج وبصماتج لحد اليوم الصبح البيت تداول على ثلاث مشترية يعني انتِ بعتي لشخص وهذا الشخص باعه لواحد وهذا الواحد باعه لمسعود خاطر ما ينعرف ياهو الشتراه منج

-ابا الحسن علي: وكل البيعات مثبتة وصحيحة ومصدقين عليها مابيها أي مشاكل

-تَـمني: وهالشي يصير؟؟ يعني ما شكوا او شي

-الامـير علي: تَـمني العنده واسطة يخليج تبيعين بيت مثل هذا بساعات قليلة وصدقها بنفس اليوم والدنيا ليل والدوائر كلها معزلة يكدر يلعب ويبيعه لثلاث اشخاص وراه

-تَـمني: امير شسوي والله ما بعت ماا بعت اني كله بالغصب صار

-ابا الحسن علي: ندري تَـمني ورحت لصاحبي قاضي وحچيتله السالفة گال نرفع قضية وتكسبيها بسهولة تگليلهم چنتي تحت تهديد السلاح وينتهي الموضوع بس....

-تَـمني: بس شنو؟؟

-ابا الحسن علي: انا والامير ظلينا ندور على اول شخص اشتره منج البيت الزلمة الگلتيلنه ملثم ولابس دشداشة تتذكرين؟

-اي اي اتذكر اكيد

-دخلت چم شخص من معارفي وعرفنا تَـمني، هو ابن تاجر معروف بوحدة من محافظات الجنوب گدرنا نتواصل وياه ونفتهم منه السالفة واكدلنا البيع چان طبيعي وما حس بأي تهديد وعنده صور تثبت انتِ بعتي برضاچ ودزلنا الصور

فتح موبايله الامـير علي وراواني الصور يممة غير گلبي مات نفس الصور الاخذهن الي ابو الشفقة الحقير اني گاعدة وشعري عدل ومتمكيجة ومبتسمة طبيعي..

-الامـير علي: من سألناه ليش صورتوا گال البت طلبت هالشي الظاهر خافت لا اضحك عليها لو اغشها وما انطي اخوها الفلوس

-منو اخوية؟؟

-ابو الشفقة والكمامة منتحل شخصية على اساس اخوچ

-ابا الحسن علي: وللاسف تَـمني هاي الصور راح تطلع وتوصل للقاضي اذا اشتكينا وكلشي بالصور يثبت انتِ راضية بهذا البيع وماكو أي مشاكل

-تَـمني: منكدر نكول ذني فوتو شوب؟؟

-ابا الحسن علي: اكو فيديو بعد راويها امير

گلب بالصور وطلع فيديو الي گاعد بصفي ابو القاط ديأشرلي وين اوقع واني اوووقع مال كسررر لايدي واصابعي عزا بعيني على هالعملة شسوويت! نزلت دموعي محتارة وخايفة لا يكون اخذوا اكثر من هذا البيت راح اموت من القهر حطيت ايدي على حلگي اخفي شهگاتي وغصيت بكلمة..

-تَـمني: شسوي

-الامـير علي: تَـمني.. تَـمني لا تخافين احنه ما حاچيناچ حتى تلومين بروحج وتبچين

-والله العظيم مو ذنبي والله هددوني

-الامـير علي: مصدگچ والحسين الشهيد مصدگ وانا وابا الحسن علي ما راح نسكت ونظل وره هالموضوع حدما نعرف ابو الشفقة ياهو والمن تابع ونرجع حگچ وكلشي خذوه منچ

-امير حباب ساعدني ماعندي غيرك والله الكل راح يكرهني وعبالهم اني صدگ بعت البيت من يشوفون الصور

-انا وياچ لا تخافين ابن امه اليغثچ ويسمعچ حچاية تزعلچ وعلي افرك حلگه

-ابا الحسن علي: خوية انا ما وصلتها لابوي هسة بعد تعرفين زلمة چبير وما يتحمل ومسعود مشتري هالبيت بالحيلة والذكاء

-الامـير علي: وعلي والسماني علي ما اخلي يتهنى ولا اعوفه! لو اعرف احل الموضوع عشائرياً واوصل الدم للرچاب هم ما اسكت على هالسالفة!!

گام ابا الحسن يخلينا وحدنا واني بقيت كاعدة رجليه متشيلني من الصدمة راح اموت من الحرگة، ما حجيت شي بس دموعي تنزل مادري شسوي يمكن مو بس هالبيت اخذوه مني حتى املاك نعمة الباقيات كلهن..

-كافي بوية لا تبجين گتلج ارجع حگچ واحط اصابعي بعيون اكبر واحد

-ليش ديصير ويايه هيج اني شسويت يربي

-ارادة ربچ هاي تَـمني كلشي بي حكمة

-انتو راح تتبهذلون وعمو راح يزعل وخالة تتعب همه يحبون هذا البيت انتو كلكم تحبوه

غطيت وجهي بثنين ايديه وبچيت فاقدة الامل گلبي متگطع والنفس گوة دا اسحبه، عصرت عيوني مهضومة من حسيت بالامير يجر ايدي ينزلها ويحضن وجهي بين اييده، مسح دموعي بأبهامه على كيفه وحط عيونه بعيوني..

-انا احاچيهم واخفف عنهم لا تهتمين وتتعبين روحچ انتِ مريضة ما يصير الجاي تسوي

-كلشي ضاع مني

-نرجعه سوه

-تبهذلت والله وانذليت

-ما عاش اليذلچ وانا بظهرچ

-شسوي گولي

-لا تسوين شي انا الاسوي

-خاف تتأذه

-فدوة الچ

-هاي شبيك شو كلشي محضرله جواب حلو

-ههههههه خرب راسج تَـمني

-والله هسة حتى خجلت وراحت البچية

-انا أريدها تروح مو حلوة من تبچين

وخرت ايده عن وجهي وجريت كلينسه امسح وجهي وخشمي بس دموعي ولا دتسكت، هزيت راسي بـ لا وگلت..

-تالة تگول اصير حلوة من ابچي

-تچذب عليج

-ياااا

-تصيرين فراقد مصغرة من تبچين

-حرام عليك شبيك هسة دخليني ازعل لا تظل تضحكني

ضحك وسحبني يحضنني نص حضنة جفلت وتوترت، حتى الزعل والقهره نسيتها من وجهي صار بصدره الله شو ريحته حلوة ليش مملاحظة من قبل؟

-ضحكي ما يلوگ لوجهچ غير الضحكة والفهاوة

رفعت راسي اباوعله مبتسمة احسه بده يرجع امير القديم اليضحك ويايه ويكون لطيف وخفيف وشريف ومو شريف احياناً واحد يحير شيوصف شخصيته ويايه..

-كلش خايفة

-من شنو؟

-اخاف لا تنگلب بيه الدنيا اكثر ونهايتي اظل تايهة بالشوارع

-افاا وانا الامير! انا اخليچ تتيهين بالشوارع؟! هو انا بت غريبة ما اعوفها حايرة ترديني اعوفچ الج

-انتَ ليش مضايج مني؟

-هاي اول مرة اشوف وحدة تستغرب اذا الناس ما تضوج منها

نزل وجهه يوازي وجهي يحچيها بالضحك، خجلت من قربنا وابتعدت عن صدره اگعد عدل وارتب شعري..

-اقصد يعني صارت هوايه امور بيناتنا بس انتَ مزعلان شلون گدرت تنسى الصار؟

-ما نسيت

-لعد؟

-ما اخرب حاضري بأمور صارت بالماضي

-تكدر تتخطى بسرعة؟

-لا، محسوبچ اكثر انسان بطيء بالتخطي وبأكثر الاوقات ما انسى ولا اتخطى الصار بس انا بشر يتناسى

-اتمنى اصير نفسك

-تصيرين بس يحتاجلها تدريب ولا تخافين الدنيا تشبعچ كفخات وراح تبدين تتعلمين تطنشين هواي شغلات

-تتذكر من چنه ببغداد وگتلي حذفي الستوريات وشتردين يجرالچ؟

-الاستغلال عندج بفلس انتِ

-ههههههه اني شعليه انتَ گلت

-اي اتذكر والله يستر من طلبچ هالمرة

-هو مال الله يستر فـ اي صح الله يستر بس ما راح اطلب منك هسة انتظر وره منتزوج على الاقل اكون فايدتك بشي عاد

ابتسم ساكت، اخذ كلينسه يمسح العرق المتجمع على گصته رغم الجو كلش حلو ومو حارة بس عرگان، فكرت اطلب منه هسة يعرف منو الي اعتده عليَّ ببيت بسام وگلب حياتي رأساً على عقب ادري ما راح استفاد شي بس حازة بنفسي ومحتاجة اعرف حتى ارتاح وادعي عليه بالاسم واشكي لالله، جذب تركيزي وياه من هز راسه وگال..

-انا بعده گلبي موجر منچ

-ادري وحقك اني ردت استغلـ...

سد حلگي بيده بسرعة وفتح عيونه خازرني بس مو بحدية، خزرته هالمرة نهي.. ثبت عيونه بعيوني وگال بخفوت وبطئ..

-ابد لا تذكرين هالشي مرة ثانية ما ارضى ولا اسمح نحجي بهالموضوع بعد

هزيت راسي اي وفلت ايده من حلگي على كيفه، رجع ايده بحضنه وبالايد الثانية طلع الفيب من جيبه يدخن..

-لعد ليش گلبك موجر مني

-اگول وما تتحسسين مني؟

-ابد گول

-واذا رضيتي شتردين يجرالچ

-ههههه هم ردينا

-اي

-ليش دائماً تقدملي مقابل ويه طلباتك لهدرجة اني صعبة؟

-لا بالعكس بس انا احب اقدملچ مقابل لان اعرفج تستحين تطلبين مني وبس بهالطريقة جاي تطلبين

-بس اني دا اطلب مساعدتك هواي

-ماريد تطلبين بس من تكونين بحاجة مساعدة اطلبي مني الي يعجبچ بالوكت اليعجبچ

ابتسمت وهزيت راسي خجلانة، ريح ظهره على الگعدة وجر نفس من الفيب وزفره بهدوء..

-مگتلي شنو التريدني اسوي

-اتمنى تلبسين حجاب

حچاهة بسرعة وبدون مقدمات، سكتت هادئة بينما هو يردف..

-هسة تگولين انتَ خطبتني وانا ما محجبة شلون تريد تحجبني بس اطلب منچ على الاقل من نطلع تلبسي خاطر ما تجيچ حچاية مو حلوة

-تمام

عگد حاجبه مستغرب وعدل گعدته، ضحك بخفة وحرك راسه مستفسر سرعة جوابي بدون لا ينطق شي..

-واني من راح اتحجب مو علمودك بس اني اريد هالشي وعن قناعة راح اللبس الحجاب بس يعني شوف الموضوع ما راح يكون سهل فـ يمكن بالبداية ازوغل شوية مثلاً كدام اخوتك ما اللبس او..

-شنهاي خالوو

-والله شبيك يعني شوية شوية هم على كيفك ويايه انتَ شبيك شجعني صفگلي هوسلي ادبچلي وسويلي اغراءات حتى اتحمس

-اسويلج اغراءات شني اللبسلچ مشبچ

-ياااااااا

-بالمناسبة اظن المشبچ يناسبچ اشتريلج واحد

-عزااااا اسكت عزاا شبيك يااا

ضحك وظل يدخن عزا بعيني هذا شبي استخف يا مشبچ واحنه زواجنا كله ضحك وتمثيل..

-انتَ صاير متستحي شيخي ومتغير

-هاي اثار سحر المحبة

-اهووو ما راح هذا!!

-لا اظن بعده

-والله انتَ ناصب عليَّ ومسويني مضحكة واني الفطيرة اصدگك

-انتِ فطيرة؟؟ ولج انتِ توگفين سلف كله شيوخ تك رجل انتِ وهاي فهاوتچ

-لا تظلميني اصلاً اني فد حبابة وماعندي اذية على احد وبشهادة دكتور اياد چان يمووت عليَّ

-دكتور نعال منو هذا بعد؟؟

-لا اسمه مو نعال اسمه اياد

-وشصخم بأسمه شني هالسالفة الجديدة مال يموت عليج؟!

-تره دا استهزأ چان فد يضوج مني لاني دائماً سرحانة بمحاضرته

-خيولي لا تجيبين طاريه بعد.. بشري ما طلعت نتيجتچ ست ام الرياضة تَـمني؟

-والله مادري اصلاً ما تواصلت ويه احد طول هالايام

-ناجحة

-ان شاء الله يارب

-ناجحة خالو

-اي ان شاء الله الله يسمع منك

-ولج ناجحةةةة يالاسلااام يا المسيييح يا اليهووود يالصاابئة يالكفاار ناجحة انتِ ناااجحة

-يعني دتكول اني ناححة؟

-ااااخ گلبي عليتي گلبييي

-عزااا اني ناااجحة والله والله ناجحة؟؟ عرفت نتيجتي؟؟؟

-اي يا بعد راسي اي ناجحة

-يگلبيييي عمررررري يحياتتيييييي

-هاي المن؟

-لنتيجتي للنتيحةةة

-رحم الله والديج

-كللش فرحانة شكررراً امير والله انتَ ماكو منك الا ازوجك احلى البنات على هالخبر

-عمت عيني على هالخبر

-لييش هاي فوگما فرحتني بس انتَ بعدك ضايج مني ومتريدني افرح ميخالف راح اسامحك

-سودة بوجهي على هالخبر

-هههههه هاي حبيبة تگولها دائماً تضحكني تحس وجهك يصير اسود وراهة

-تَـمني روحي هناك

-رايحة اصلاً بدون متگول انتَ بعدك متغير واني عبالي رجعنا اصدقاء

مچنت اقصدها بس يمكن ما بيّن عليَّ چنت اتشاقه من حچيتها، گمت من مكاني وسحبني من ايدي يرجع يگعدني بصفه لزگ، اللتفتت اباوعله وفاجأني من گال بجدية..

-انتِ تشوفينا اصدقاء؟

-اي

سكت مركز عيونه عليَّ ارتبكت من نظراته العميقة، درت وجهي عنه وتدنيت ابتعد.. رجع عيوني وياه جاذبني من تحرك ومد ايده بجيب دشداشته وطلع منها شي، ركزت بيها عبارة عن قطعة خشب متينة ومدورة كأنها مقطوعة من غصن شجرة هيج فيكتها ومشكلة بيها مدالية..

-تَـمني: شنو هاي؟

-هدية نجاحچ

ابتسمت واخذتها من ايده بأطراف اصابعي، فارغة مابيها شي ومدالية عادية بس من لمست ظهرها حسيت بيها حفر، درتها للجهة الثانية ولا ارادي شهگت مبهورة من الشفته..

-عجبتچ؟

مجاوبت بسرعة بقيت اتأملها بأعجاب، عبارة عن نحت بالخشبة عين بنية مغمضة وحاجبها ورموشها وجزء من انفها وياهن، صفنت بيها مبتسمة تجنن ومنحوتة بدقة عجيبة..

-تجنن هذا انتَ ناحتها؟؟

-اي بس ما گدرت انحته غميج واللح وياه لا تطگ الخشبة وهم ما كملت الباقي لان المدالية صغيرة ما كفت

-الباقي مال شنو؟

-وجهچ

-هذا وجهي؟؟؟

ضحك على ردة فعلي واخذها من ايدي معترض، هدأ من ضحكته ورفعلي حاجبه ما عاجبه..

-ليش ما مبين هذا نص وجهچ وانتِ نايمة؟

-من شفت الموس بيدك بالغرفة چنت تنحت هاي؟

-اي

-ياا وهيج ركزت بوجهي غير تگلي على الاقل افتح عيوني

-ولا يهمج اسويلج وحدة وعيونج مفتوحة

-تجنن شكراً راح احطها مدالية لجنطتي كللش حبيتها كلللش

-تستاهليها

-انتَ مبدع الى درجة مبدع

-كافي لا انغر عليج

-لا انتَ متنغر اكثر انسان ناجح ومتواضع تشوفه عيوني

ابتسم وهستوه ديجاوبني وطفرنا ثنينا على صوت شي انهددم وما گبت غير العيطة بالصالة، ركض هو قبلي يطلع واني هرولت على كيفي رجلي مشكلة بصعوبة امشي..

وصلت للصالة واسمع الصريخ من الكل ولد بنات چناين او امهات، الكل متخبل ومتكدسين بمكان عجزت اشوف شنو وافتهم شنو صار، لزمت سبأ اسألها شكوو مجاوبتني وبقت بس تبچي..

دفعت رهف اتقدم بمكانها خايفة وادور على خالتي وتالة بعيوني، وخرت من گدامي صابرين مرة مسعود وانسطرت بمنظر وگف گلبي عليه، شيخ علي واگع بالگاع معوج حلگه وفاتح عيونه وولده حواليه يتصايحون ويضربون على راسهم....

يتبع 👑....

━━━━━━ ♛ ━━━━━━

علي الحـق يستاهل صفگة وهلهولة على اعترافه اخيراً 🤣🔥💃🏼💃🏼💃🏼

الامـير علي وتَـمني كتاكيتي اللطيفين 🥹💗 رجعوا نوعاً ما نفس قبل بس عاد ان شاء الله تدوملهم 🙂

شيخ علي اكثر بشر ميستاهلللل 😩

احم احم شفنا نظرات وسوالف بهالبارت والله يعلم منو الثنائي الجاي 😎😁

توقعاتكمممم وتعالو انستا مشتاااقة نسولف ونتناقش بالقصة سووه 🥹👀🩷🩷

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

تعالي احچيلي شيحلها؟

عيونچ ما تحبني الفدوة اروحلها

انا الخاطرچ گمت اعتذر من ناس

چانت لو تسلم ما اگوملها.... ♥️👑

━━━━━━ ♛ ━━━━━━

دفعت رهف اتقدم بمكانها خايفة وادور على خالتي وتالة بعيوني، وخرت من گدامي صابرين مرة مسعود وانسطرت بمنظر وگف گلبي عليه، شيخ علي واگع بالگاع معوج حلگه وفاتح عيونه وولده حواليه يتصايحون ويضربون على راسهم..

-رسمية: ابووكم ابووووكم... ابوووكم

فاقدة خالة رسمية وبس تصيح "ابوكم" الولد انخبصوا وحبيبة گاعدة بالكاع يم راسه وتبچي بصريخ وسلوى تخربطت وگعت على مرة مسعود والولد قسم يبچي وقسم يهدي الوضع يردون بس نبتعد من گدامهم حتى يشيلوه..

-تالة بصياح: وخررررن بنااات سووا مجااال خلي يطلعووه شبيچننن

ويه صراخ تالة ياله البنات استجابن وابتعدنا عن الطريق الكل مصاحبه الذهول، شالوه ولده وطلعوا تسعتهم وخالة رسمية وحبيبة يركضون وراهم يردن يروحن وياهم للمستشفى وعلي البدر ما قبل رجعهن..

گعدنا بالصالة كلنا ندعيله وايدنا على گلوبنا حتى صابرين مرة مسعود چانت ساكتة ومتعرف شتحچي ما ذبت سمها ولا قهرتهم بحچاية.. حبيبة ما نشفت دموعها ولا سكت لسانها وهي تگول جملة..

-نادي علياً مظهر العجائب تجده عوناً لك في النوائب كل همٍ وغمٍ سينجلي بولايتك يا علي يا علي يا علي....

تكررها بدون توقف وايدها على صدرها تفركه، گعدت بصفها من جهة وسبأ من الجهة الثانية نصبرها ونحچي وياهة تسمعنا وبس تهز راسها "اي"..

رسمية منهارة وسلوى متخربطة ورايحة روحها، خالتي وتالة وعبق اهتمن بيهن، راحت رهف للمطبخ تسويلهن عصير ليمون ورجعت تركض شفت امها تخزرها ما راضية بس رهف ما اهتمت وتقدمت تنطيهم العصير..

تعبنا من الانتظار لا تلفون الولد يجاوبون ولا گدر واحد بينا يرتاح، البيت انخبص وما هدأ الا دگت الساعة بالثنتين بالليل وسمعنا صوت سيارة تسفط بالگراج ركضت حبيبة قبل الكل تشوف منو اجه ورحنا كلنا للمطبخ نستقبلهم من هاي الباب..

دخلوا الولد وحبيبة تبچي وراهم دورت بعيوني على شيخ علي ومتت قهر من شفته گاعد على كرسي متحرك وعلي الدر يدفع بي.. شكله يكسر الخاطر حلگه معووج شوية وعيونه ذبلانة وشرايين ايده صايرات بنفسجيات وظاهرات كلش..

ركضت عليه خالة رسمية تبچي وذبت روحها بحضنه گدام الكل، محسيت على دموعي وهي تنزل من گدر يرفع ايده على كيف وحضنها، فرحت بحركته معناها وضعه مو كلش سيء..

وخروا الولد امهم عنه حتى ياخذوا جوه يرتاح، دخلوه لغرفته وخالة رسمية وحبيبة وسلوى وياهم دخلن.. گعدنا بالصالة ننتظر يجينا واحد من الولد يطمننا على وضعه..

-تالة: ليش طلعوه من المستشفى لو مبيتي احسن خاف يصيرله شي

-عبق: اني هم گلت بس يجوز هو ما قبل يبقى بالمستشفى عمو علي عنده ردة فعل من المستشفيات من توفى اخوه وتوأمه مرتضى (ابو منتصر)

-تَـمني: ياريت لو يطلع واحد من الولد يطمننا

ويه حچايتي طلع علي الكـرار وجهه اصفر ويعصر بعيونه، كلنا البنات گمنا نشوفه ونسأله نريد بس نتطمن..

-علي الكـرار: طلع على مسؤوليته الطبيب ما رضى بس بعد شيقنع ابوي

-تَـمني: اهم شي ماكو خطورة على حياته والله يكفي الشر

-علي الكـرار: والله يا خوية جلطة خفيفة حلگه انعوج وربچ ستر من لحگنا عليه الطبيب كتبله علاج وابر والله كريم

-تالة: معرفتوا سبب الجلطة شنو؟

اللتفت يباوعلها وحرك اكتافه بطريقة ميعرف، هزيت راسي ساكتة ورجعنا كلنا البنات نگعد على القنفات، قطعت الصمت الصار رهف من همست بصوت خافت..

-اجاه اتصال عمي علي گبل لا يكض گلبه وصار الصار

حسيت سبب الاتصال هو موضوع البيت وعمو افتهم مسعود مشتري صدگ وراح يتشاركون بي، تأخروا الولد وياه جوه وخالتي خطية غفت وهي گاعدة بدون متحس وصابرين اخذت بناتها ورجعن للاستقبال وعبق صعدت للمخزن فوگ حتى تگعد من وكت تسويلهم ريوگ، اشرت لـ تالة واخذنا خالة وصعدنا لغرفتنا..

فرشت تالة بالگاع متقبل تنام على الچرباية لا هي ولا خالة حتى ميزعجوني بالنومة بس استحي منهن وانوب اني اجي انام وياهن بالگاع والسرير يبقى فارغ..

رحت للحمام فرشت اسناني وغسلت وجهي ورجعت للغرفة، شگد حاولت اغفى ماكو ولا كدرت النوم طاير من عيوني وبالي ويه عمو وحبيبة و.. ولسبب غريب دا افكر بالامير علي..

اتگلب بالفراش الوب عيني تعلگت بالفتحة السفلية مال الباب انتظر اثر رجلين تعبر بلكي يرجعون لغرفهم واروح اتطمن، طگت روحي ومحد اجه قررت اني اروح انتظرهم..

طلعت من غرفتي اتسحب ورحت لغرفة حبيبة گعدت على الچرباية انتظرها، عبرت نص ساعة على انتظاري وحسيتها ما راح تجي يمكن تنام جوه ويه امها ومرة ابوها.. طلعت من غرفتها وصارت بوجهي غرفة الامير الف وسواس صار بيه اريد افوت بلكي اللگاه واگول لا عيب خاف يفكر بيه بطريقة غلط..

عجزت وتعبت من التفكير وگلت ادخل غرفته انتظره خمس دقايق اذا ما اجه ارجع انام، فتحت الباب ودخلت للغرفة ظلمة وريحتها حلوة مال ڤيب ونرگيله.. علگت الضوه ورحت اگعد على چربايته ابتسمت من شفت ميزه مخربط وكله عليه اوراق مرسوم عليها رسمات كلش عجبني اگلب بيهن واشوفهن بس مو وكتها هسة..

خمس دقايق مرت وما اجه يأست وگمت اطلع من الغرفة، طفيت الضوه بعدني ما لويت يدة الباب وانفتحت من الطرف الثاني وصار بوجهي الامير.. استحيت من طلعت بوجهه هيج وهو هم شكله استغرب من وجودي بس مخليت الموقف يزداد غرابة ونطقت فوراً..

-چنت انتظرك

-تنتظريني؟

-اي اريد اعرف عمو شلون صار ظل بالي ولا كدرت انام

هز راسه متفهم ودخل لغرفته تعبان فتح الاضوية وراح للميز مالته ينزع ساعته ومحبسه، تنهد يذب حسرة وگعد على الچرباية مالته يمسح وجهه..

-بشر شلون صار؟

-تعبان

-سلامته يارب

-الطبيب ما رضى يطلع من المستشفى بس ابوي عاند

-ماطول الدكتور رخصه معناها وضعه مو بذاك السوء

حرك اكتافه بطريقة ماعرف وبقى هادئ، تقدمت كم خطوة الى ان استقريت اگعد بصفه تفصلنا مسافة نفر..

-متأكدة عمو راح يتحسن ان شاء الله والبيت هم يرجع ومسعود ماعنده شي هنا بعد

-ابوي ما انجلط من موضوع البيت

-لعد؟

دارلي بس وجهه يواجهني بي وصفن بعيوني، ركزت بعيونه بفضول اريد اعرف السبب وما حسيت الا براشدي قوي تشكل على شكل كلمات صفعني بي الأمير من گال..

-ابوي عرف بسالفة الحمل تَـمني

شهگت ولا ارادي ضربت حلگي اخفي الشهگة من الصدمة، تخربطت كل اوضاعي وگلبي صار يدگ بعنف احسه راح يوگف، ضعت وحرت بكلماته خجلت والدنيا ضاگت بيه هي جملة بس چانت كفيلة تدمرني وماگدرت انطق كلمة..

-همسها بأذني همس گوة طلعت الچلمة من حلگه ما ينفهم شيگول.. بس گدرت افتهم وگدرت اشوف الفشلة بعيونه وانا ادري لو چان بوضع يختلف عن هذا چان تصرف غير تصرف

-يذبحني

اللتفتلي بكل جسمه مصدوم، حرك راسه بـ "لا" كذا مرة وجاوبني بسرعة ينفي تفكيري..

-لا لا تَـمني! ابوي عباله انا وياچ تزوجنا والطفل ابننا!

-انتَ متأكد؟

-متأكد اي چان ما عاد سالفة الزواج واصر يتم الجمعة

-هسة هم طلب منك هالشي؟

-اي الحچاية ما تطلع منه وهو بهالحال گال الجمعة الزواج وما يتأخر

-بس هو مريض شلون

-انا هم ما رضيت وگتله نأجله بس شيعاند ابوي وشيقنعه يبطل

-امير ينفهم كلام ابوك من يحچي؟ يعني لسانه عدل؟

-شنو قصدج؟!

-ولشي والله ولشي لا عبالك خايفة لا يفضحني بس سألت لان اعرف الي عدهم جلطة ميگدرون يحجون زين

-ما يحچي نفس گبل بس ينفهم شيگول

هزيت راسي ساكتة ومحتارة، شلون يسوون عرس وابوه بهالحال طلعت من غرفته اعوفه يرتاح وحده مبين عليه تعبان كلش واني رجعت لغرفتي..

يومين مرت وضعي تحسن بهوايه صرت اكدر اتحرك وامشي طبيعي واللم بطني اختفى، البيت بعده حزين وعمو ما رجع مثل قبل ثاني يوم حاله انتكس اكثر واضطروا يجيبوله دكتور وممرضة هنا يهتمون بي لان واضح هالرجال عنده فوبيا من المستشفيات لدرجة خالة رسمية كالت لولدها بس تاخذون ابوكم للمستشفى يموت هناك..

الخطار رايح جاي والچايات والجدورة ما انشالت من الطباخ حبيبة وعبق وبنات عمهم كلهن اجن يتساعدن خطية هووايه تعبن، حاولت اساعد بالاكدر عليه بس حبيبة متقبل اشتغل شي واستحي اذا ابقى بس اتفرج فـ تالة تاخذ مكاني وتغسل مواعين او تنظف..

ما بقى شي على الجمعة عگب باچر وخالة رسمية تريد يتم هالزواج لخاطر شيخ علي بلكت يتحسن، اجت على ولدها كلهم وبلغتهم بهالشي تريد زفة الامـير علي السلف كله يحچي بيها وويه كل كلمة تكول لخاطر ابوكم يتحسن ويفرح..

-ابا الحسن علي: يمة ارواحنا طالعة يا زفة يا صخام

-رسمية: ابا الحسن ابوكم يريد يزف وليده وما يأجل سووها لخاطر ابوكم يا بعد امكم ولا تزعلوه منكم

هزوا روسهم موافقين بس الامير هادئ جداً ما شفت بعيونه لا فرح ولا زعل شكله جامد بدون ردة فعل.. ثاني يوم الدكتور گال شيخ علي وضعه افضل والكل فرح بهذا الشي العلاج ديمشي بشكل ممتاز وهو هم ما شاء الله عليه عنده ارادة يتعالج..

اجت مرة عمهم ناصر ويايه حتى احف واجت ويايه خالة، تالة بقت وياهم تساعدهم بالخطار سويت تنظيف بشرة وحفافة ومچنت ادري بـ حبيبة حاجزتلي بكج كامل عناية ايد وقدم واظافر وتنظيف جسم كامل..

سويت كلشي طلعوني ابرگ برگ ورجعت للبيت، بعدني بالباب وضحكت من كل گلبي من استقبلوني البنات بالصفگات والهلاهل ورفل حاطة بحضنها صينية ستيل وخواشيگ وتدگ بيهن وعالگات الجو.. تذكرت عمو بالغرفة فشلة جريت حبيبة من ايدها انبهه ابتسمت وگالت وعيونها تلمع بالدموع..

-ابوي احسن تَـمني الحمدلله والشكر حتى اليوم حاچاني شوي وگال لا تقصرين ويه اخوچ ومريته

فرحت لان شيخ علي ما ضايج مني من عرفني چنت حامل وما انطى للسالفة ردة فعل قوية وطلب نتزوج ونفض الموضوع والاحلى مسعود من شاف اخوه بهالوضع ما فتح سالفة البيت بعد الظاهر أجل الموضوع لحدما يتحسن عمو هسة همزين من طلع ادمي شوية وعنده احساس..

صعدنا فوگ لغرفة حبيبة لانها اكبر غرفة بالبيت والبنات علگنها علگ رگص وطربگة ووحدة تمكيج الثانية ووحدة تحف للثانية والفرحة غامرة المكان.. ما سويت حنة ولا سووا حنة للامير افتهمت هو الي ميريد ومطلب حنة سوه بس عشا للزلم والولد اهتموا بكلشي غسل المواعين والجدورة ما تعبونا..

**

-منتصر: عمي علي الله يحفظه حتى وهو بهالحال يريد ونسة وفرفشة هههههه

-علي الكـرار: چا ابوي معروف ابو الضحكة الحلوة يموت من النكد والحزن ما يحبه

-علي الحـق: مسعود علگ ضغطه راح ينجلط البارحة يجيني سلطان الچلب يگول شيخ علي حتى بالمرض مچنص وحظه حلو انجلط وگام منها ما صارله شي

-ابا الحسن علي: وما كتلته؟؟

-علي الحـق: كتلته وطيحت حظه چا شون

-منتصر: مو اگول حق ينرفزوه بحچاية ويفوتها

-ابو كربله: لك هلاااااا بالحبايب شلووونهممم

-علي التـقي: هلا ولك وينك گلنه ما تجي

-ابو كربله: ما اجي وافوت حنة ضلعي السمبتيكي؟؟

-علي الحـق: ماكو حنة بس عشا الامير ما يريد هوسة گال

-ابو كربله: هو بكيفه؟؟ ولك حويدددر اعلگلنا الدي جي خلنردح

-حيدر: بعينييييي

-ابو كربله: وينه العريس ووينه.. اموررري الفرفوري وينك يخايب

-الامـير علي: هلا ابو كربله تعشيت؟

-ابو كربله: اتعشى بيك اليوم.. واووول منبدي وشنگووووول

-الولد بصوت واحد: لا اله الااا الله

-ابو كربله: والف الصلاااة اعلى الرسووول

-لاااا اله الااا الله

يقراله ويلحنله والامير مبتسم ويحط ايده على راسه ممنون، وحدنا واگفين بالبستان نغسل بالمواعين و الجدورة الناس طلعت واحنه باقين مكروبين هنا وابو كربله علگها..

-علي السور: وصلاوااات على النبي ويا عوينة تجنبي صلاواات على النبي

-علي النور: هاااي فرحتنا الچبييرة فرحت كل العشييرة وهاي فرحتنااا التمااام فرحت كل العماام

-علي البـدر: هلاااهل يا ولددد سمعووناا

گبت الهلاهل الادبسزية خوش يهلهلون، طلع ابو كربله چيس اسود من جيب دشداشته فتحه وگبت ريحة الحنة، حط حنة بأصبعه وحطها بچف الامير وصار يغنيله واحنه نردد وياه..

-الليلة حنتته وباچرر يزفووونه الليلة حنتته وباچر يزفوونه

-علي الدر: وفرحاان الولد بحنته هالليلة.. وما يدري العرس ينهدم حيله...

-علي البدر: خايب تفائل تفاائل.. مبروك يا بعد رويحتي اموري شايف كل الخير يوم النشوف وليدك يركض هنا بالبستان

-الامـير علي: بعد روحي بوجودك ان شاء الله

تسالموا ولزمناه دگ مباوس چن ما شايفي من گبل، نبارك ونهوس ونرگص ناسيين الدنيا..

-حيدر: عمي امير بعرسي هم تهوسلي وتشمرلي ابوذية؟

-الامـير علي: عرسك شني وليدي انتَ بعدك طهور ما مطهريك

-علي الدر: ههههههههه خرب ابليسك امير

-حيدر: يااا ناااس يا اهل السلففف هاي اول مرة اشوف ابووو يضحك على وليده ومسوي مييز

-علي الدر: بوية انا جبتك للدنيا خاطر اضحك عليك چا شون غير اتونس

-حيدر: بالعباس تزاعلنا بوية بعد ماحبك وعلي

-علي الحـق: اوووي

-حيدر: عمي چا شوف ابوي

-علي البـدر: در شبيك وياه صدگ چذب اذا ما تريده نذبه بالزبل ليش معيشه هالقلق النفسي

-حيدر: خايبين وين انطييي وجهييي

ضحك در من كل گلبه وجر حويدر يبوسه ويراضيه وهذا مثل البنيات يتزعل على ابوه ويتأمر يريد بلي جديد وموبايل جديد خاطر يرضى..

-علي الدر: اجيبلك حزام جديد ما مدشن اللعبه على ظهرك

-حيدر: چا بوية انا وحد عن جماعتي ماعندي موبايل جديد ليش عود

-علي الدر: ولك انتَ هذا الموبايل رابطه ويه موبايلي وما ملحگ عليك وعلى خياسك انوب تريد واحد جديد

-حيدر: وليش تربطه بموبايلك وتشوه عيونك يا بعد عيني يا بوية

-علي الدر: روح روح، روح شوف حبوبتك تنطينا شامبو مدري شسمه هذا... منتصر شماالك خلصته

-منتصر: مو صوچكم صوچي انا عايف نومتي العزيزة وباجر عندي دوام خاطر وجوهكم التجيب الهَم

-علي البدر: اسفين عيوني دكتور نعرف مو من مقامك تغسل مواعين بس راح تغسلهم وغصباً على راسك

-ابو كربله: يا ولد صبولي چاي

-منتصر: گم چنه نِفسه ما طالع اربعينها گمم صب لروحك

-ابو كربله: الدختوور يضرب امثله طبية نسائية بحتة خاف بنفسك تنفس حرمة ولك

ذب منتصر الجلافة من ايده وهد على ابو كربله وذاك ينطط مثل القرد، اتفرج عليهم واضحك من كل گلبي، خذيت الزاهي من علي الحـق محتاجه وكضه ياخذه من ايدي بعنف..

-علي التـقي: ولك اريد استعمله

-علي الحـق: ها مادري

-علي التـقي: شبيك انتَ متغير صارلك يومين صاير شي؟

-لا

-حبيبة تگول عنك تريد تتزوج شغلك ههههههههههههههه

-حضرتك تستهزأ؟!

-اي ههههههههه بالعباس گلت هذا لو سكران لو مكبسل وخبل البت وخلاها تنزللنا متسودنه

-ليش يا يوم شارب انا لو مكبسل تقي؟؟

-ولك اتشاقه خرب بيك شبيك ما تتحمل حچاية

-اي ماتحمل انا تعبان وماريد ادوس وياك بالحچي لا ازعلك

-يعني مشكلتك وياي

عاين بعيوني ساكت، عيونه مو مثل العادة تضحك وتحشش وياي وما يتكلف بالحجي كلشي يجي براسه يسولفلي بس صارله يومين متغير واظن صدگ مشكلته وياي..

-خوش على راحتك خوية

عفته ورحت اوگف على جهة وجرني من ايدي عليه، جاي ادير وجهي اشوفن شبي وفاجأني من شمر روحه بحضني يحضنني بكل حيله ويگول..

-اعذرني خوية.. مادري شون حاچيتك هيج

-شبيك حق ياهو وياك

-مو هسة نسولف خليها وره زفة الامـير

-لا تخليني افكر زايد عليوي احچي شمالك

-بعدين تقي بعدين

عافني وراح لـ كرار اليردح ويه سور ونور، كبر قلقي وهاي اول مرة اخاف عليه، حق سبع ويعادل عشر زلم بنظري عاقل وما يجذبه الشكر الي يلتم عليه النمل يحب الاشياء الفريدة والصعبة وهذا الي يريحني بشخصيته والمخليني ما اتابعه واركض وراه كوني اخو الچبير..

اللتفتنا كلنا على صوت دبچ صار ببداية البستان ضحك الامير من شافهم جماعته من ايام الجامعة جايين حتى يحضرون زفته، اعرف قسم منهم ناس من بغداد وناس من محافظتنا واللتموا كلهم سوا.. وگف واحد بيهم ورفع دشداشته وصار يدبچ بالگاع ويگول..

-هاا وهااا وهااا وهااا.. الصااحب ما يتعوض... الصاحب ما يتعووض شد حزامك بي.. الصاحب ما يتعوض شد حزامك بيي

-الامـير علي: بعد راسي وينكم گلت ما يجون ذول

-حاكم: شلون منجي ونفرح بعرسك شيخ

-الامـير علي: نورت دكتور بعد روحي

قاطع سلامهم الحار صديق الامير بغدادي وجاي لابس عگال ودشداشة ضحكنا كلنا من صار يدبچ بمكانه ويضحك ويگول..

-نقلدكم شوية.. واخوووته هواااي والشارع يسدووونه واخوته هووواي والشارع يسدووونه

-ابو كربله: الف مبرووك اگلك من گلب ولساان.. يا خلفة النشامة وخلفة الفرساان.. اهلكم بالمعارك ثبتووا النيشان..

-والف مبرووك للجينااه هالليلة والفف مبرووك للجينااه هالليلة...

هوسات ودبچات وهلاهل انترس البستان صوره علي الكـرار كله ويدزه لامي خاطر ابوي والنسوان يشوفون ويتونسون وهيج مشت ليلتنا ضحك وونسة واللتموا جماعتنا ولا چن گلنالهم ماكو عرس بس وين يرضون يمشون عرس الامير على الساكت..

**

-حبيبة: بناات يلااا فضوهااا ولج يالعرووووس يلااااا كرار بالباب منتظرنا

-تَـمني: اجيت اجيت.. تالة حبابة جنطتي مو تنسيها.. خالتي وين؟ وين خالة حنين

-حنين: روحي ماما وراج اني امشي فشلة من الناس اخرناهم

ركضت انزل الدرج مخبوصة نسيت روحي ودا اعيش دور العروسة الي اليوم عرسها ولازم تطلع اجمل وحدة والأنظار كلها تصير عليها..

طلعنا اني وتالة وحبيبة وعبق ورفل وليلة وخالتي كلنا ويه علي الكـرار بسيارته نروح للمركز "صالون" صرنا وحدة فوگ الثانية، دخلنا للصالون وطلبت مكياج معين راويتها بالصورة وگلتلها اريد شعري نازل لان من وصلت البدلة البارحة تندمت شگد ما چنت مثولة من اشتريتها مشفت ظهرها مفتوح فـ كلت انزل شعري حتى ميبين..

الكوافيره الي سوتلي مكياجي كللش لطيفة وظريفة كل شوية تحشش وتموتنا ضحك حطت دوبها من دوب حبيبة لانها صديقتها ويعرفن بعض من ايام المدرسة، لحت الا تسويلها مكياج ثگيل وتغمزلها وتگول..

-بلكي تصيديلج رجل

-حبيبة: ههههه ماريد رجل نرجس ماريد

-نرجس: خايبة شبيچ والله الرجل هالوكت صعب يتحصل وطبعاً جاي احچي بالرجال صدگ الذكور كوام كوام موجودين

-تَـمني: بهاي اتفق وياچ

-نرجس: اي عيني انتِ شكو على گلبچ خذيتي شيخ العشيرة چا مثل حظ هاي

وتأشر على رفل الي لا الها ولا عليها، ضحكت رفل واشرت بيدها لا وگالت..

-رفل: بررره ماريد اتزوج عووع شسوي بالرجل

-نرجس: بالعباس متعافيات انتن

-تالة: انتِ ممتزوجة؟

-نرجس: متزوجة

-ليلة: بعد شكوووو

-اي چا غير اسويلچن واهس تتزوجن وتخلفن

-ليلة: نرجس كملتي دراستج لو لا

-نرجس: لا عمت عينه العندي ما خلاني اكمل گعدني وره الثالث

-حبيبة: يا عمري ان شاء الله تتعوضين بشي احسن من الشهادة

-نرجس: اي صرت حفافة

متنا ضحك عليها واليضحك متهتم وتچطها بالوجه، حبيبة تگول من قبل هي هيج شخصيتها ولا نزعل منها لو داست بالحجي لان لسانها مو الها..

-نرجس: ضحكي حبيبة ضحكي چا كلنا شيخات نفسچ

-رفل: حطت عينها خررب روحج

-حبيبة: ههههه نرجوسة انا مو شيخة مجرد لقب واهلي وگرابتي يصيحولي بي عبن ابوي شيخ

-نرجس: لااا السلف كله يعرفج شيخة اتذكر والدچ الله يذكره بالخير بالمدرسة من چان يجي يگول "اريدن شيختي"

-بعد روحي ابوي بس والله مو شيخة انا يعني لا احل ولا اربط ماعدنا شيخة بنات بس زلم يصيرون شيوخ بأمارتنا

-نرجس: المهم الوالد الله يحفظه يشوفج شيخة ويصيحلج هيج كلش كافي، حبيبة الابو خيمة وهو اليرفع بنيته وهو اليكسرها

دمعت عيوني على كلامها وحبيبة ما تحملت وانفجرت تبچي وتشهگ من ذكروا ابوها، ركضت نرجس تتعذر منها وتستفسر ليش هيج تأثرت، همستلها رفل ان عمو علي مريض ووضعه مو زين وهذا سبب خوف حبيبة وكلنا دنلاحظها شگد مكسورة ومتأذية على مرض ابوها كلما تريد تنسى وتفرح فجأة تتذكره وتگعد تبچي وتدعيله..

-نرجس: فحل شيخ علي جلطة شني تأثر بي ولج هذا امير امارتنا ما يصيرله شي بجاه علي ياما وياما سند ناس وساعدهم وچفل ايتام ووگف ويه بنيات تهموهن بشرفهن ما انسى وگفاته ويانه وويه ابوي!

-تَـمني: عمو علي ماكو مثله وزارع بكل ولد من اولاده صفة حلوة من صفاته

كملت مكياجي طلبته وردي وگليتر طلع يجنن وشعري شلت منه بتسريحة بسيطة والباقي فتحته على طوله ولفيته كيرلي، لبست تاج لؤلؤ يناسب اللؤلؤ الي ببدلتي.. ابتسمت اتفرج على روحي بالمراية سعيدة بشكلي ومقتنعة كلش والزاد قناعتي هو تعليقات البنات واعجابهن بيه..

لبستني حبيبة الكبوس الابيض فوگ جسمي واستغربت من جابت شال وغطت وجهي بي، ما علقت ولا تسائلت ليش حطته لان شفتهن كلهن لبسن عبايات راس وتبوشن وعرفت السبب يمكن لان متمكيجات..

اضطرينا ننقسم سيارتين لان بدلتي چبيرة مو مال نندحس، حبيبة ورفل وليلة وعبق ركبن ويه علي الكـرار واني وخالتي وتالة اجانه الامير.. نزل من سيارته يساعدني ادخل لان كلشي ما اشوف، من ركبت السيارة شلت الشال عن وجهي مختنگة باوعت للامير من المراية الامامية عيونه مو ويايه على الطريق لحدما وصلنا للبيت نزلني بيده للحديقة والبنات استلموني..

استقبلوني اهل البيت بالهلاهل والهوسات وتفاجأت من عدد الناس الموجودين هنا مو على اساس گالو بس زفة؟ بس واضح انضربوا بوري نفس العقد وكل الي افتهم اجه يحضر العرس..

**

"عـــبق"

طبينا للبيت خالة سلوى عيونها صايرة بگصتها خازرتني وتنتر بيه حتى انزع العباية بسرعة واروح اشتغل واني اعرف سبب عصبيتها كله لان تَـمني عزمتني اروح وياهن وهي دفعت تكاليف الصالون كامل وخالة رسمية ما قبلت سلوى تروح ويانه واضطرت هي تبقى بالبيت تنظف وتستقبل الناس..

غلست على نظراتها وركضت للمخزن ابدل واتفرج على روحي فرحانة بشكلي اول مرة اسوي مكياج وشعر بره البيت وطالعة غير شكل، شعري فاتحته على طوله ومكياجي فضي حسيت روحي عروسة ومتت ضحك على تفكيري..

طلعت الفستان الجابه الي علي الحـق وترددت كلش قبل لا اللبسه بس ماعندي شي مناسب غيره، فكرت بيني وبين نفسي وگلت عادي اذا احد سألني منين جبته اگلهم تَـمني اشترته الي..

لونه سمائي نفس لون الفستان اللبسته بعقد تَـمني والامير بس هذا موديله يختلف، هذا مزند ويجي ضيق وطويل على طول الجسم وبي لمع فضي.. باوعت على الحذاء الجابه تقي وحسيت روحي اييع شبيچ عبق شنو دتلبسين ملابس جابوها الج زلم وتصدقوا بيها عليج وعلي الحق لو شافچ والله ميعوفني بحالي يظل يضحك عليَّ سنة..

قررت ما اللبسهن ثنينهن ورحت لغرفة حبيبة اشوفلي فستان منها ابدله، مديت روحي بالكنتور اگلب بملابسها واجتني تالة سألتني شبيچ وگلتلها دا ادورلي فستان غير اللابسته..

-بس فستانج يجنن كلش مناسب للعرس

-لا ممرتاحة بي گلت اشوف من حبيبة اخذ لان ممشترية غيره

-ووووولج عبببببق

فزينا ثنينا على صوت سلوى تهف ودخلت علينا للغرفة، سديت كنتور حبيبة مخترعة اخاف تشوفني وتفشلني گدام تالة..

-سلوى: شتسووين هنا عبييقة ليش بغرفة حبيبة شعدچن؟؟

-عبق: طالعات طالعات

جزيت ايد تالة وطلعت بيها اهرول وخالتي مستمرة بالغلط والاهاين، ردت ادخل للمخزن وعاطت بيه..

-نزليي گدامي

-بس اللبس حذاء خالة

-لبسيي راسچ فضينيي راح اوگفلج هنا خاف ناوية تشردين

زفرت طالعة روحي جريت الكعب الجابه تقي لبسته وطلعت ويه تالة نزلنا جوه، اللتهيت اوزع مي وعصير ونسوان كبار جايات يردن چاي تعبت كلش بس ما بينت وبقيت اشتغل على الساكت، دخلت للمنور اطلع عصير وانتفضت مخترعة من دخلت ليلة عليَّ ترجف..

-عبق: ليلة شبييچ

-ليلة: شافني شاافني

-منو شافچ؟؟

-ابا الحسن شافني ولج عبالي الامير ماادري بي هو

-وشافچ هيج؟؟ بهالفستان المشلح والدلع؟؟

-اي اي صخام ولطاام

-شگال؟؟

هفت وجهها وگعدت بالكاع ممهتمة يتوصخ فستانها مهبوطة وروحها رايحة وما اللومها اني لو شايفني رجال بهيج فستان مفصخ اكيد راح انهار..

-ليلة: طلعت اجيب ماي من الطرمة الثانية مادري بالزلم هم حاطين ماياتهم وعصايرهم هناك وطابين طالعين

-عبق: ولج مو گتلچن اني

-نسيت والله نسيت ولا ببالي.. اخذت صينية وياي وطلعت اجيب ماي منصية ومادة روحي اطلع البطالة من الجدورة الكبار.. ايدي شلهت من الثلج بارد ويگص بيدي رفعت ايدي جاي اشوفها صارت زرگة وبلحظتها شفت خيال زلمة طب للطرمة..

فزيت حاطة ايدي على صدري اضم روحي وفاكة عيوني دار وجهه بساع ما يعاينلي للحظة كلت هذا الامير بس من نتر بيه عرفته ابا الحسن..

-ابا الحسن: لييييييلة شووون تطلعين هيييچ

ركضت مثل المسودنة اضم روحي وره الحايط وفوگ طيحان حظي ظليت اتلاسن وياه وره الحايط..

-وانا شمدرينيي انتَ راح تجي غير تحجي غير تكوول

-الففف مرة لغينا وگلنا النسوان لا يجن هناا باالچ وين انتِ! ويامنن طاير وما سمعتيي

-ايي بالي سارح بأحدد بسس اكيد موو بيك!!!

اللتفتلي عيونه بگصته صميت حلگي خاطر اسيطر على لساني الطويل وما اچفص زايد وهو تخبل عليَّ وبده يغردلي بعد محامي ياهو يگدر يسكت لسانه..

-ابا الحسن علي: صيرري ادمية واحترمي نفسج ولا تظلين تچفصين چفصات اكبر منج!! لا تطلعين سمعة على روحج وانتِ ماعندج شي يا غبية لااا تأثرين على نفسج بس خاطر تغثيني وتشعلينيي من شعلچ البين يا ليلة وخلصت منج

-امييين يارب

-انچبيييي ولا تدعين على روحج لا اجييچ

-چا مو انتَ دعيت عليَّ حلال عليك وحرام عليَّ!!

-ولج انا دعوتي ما توصل لسگف البيت اشتعل ابوج

-لا تغلط على ابووي لا والله اتخببل عليك واطلع هيج كدام الزلم

-انتِ طلعيي خاطر ارجعچ للبيت تعرجييين

-بيك خير تعال سويها

-ولج وعلي اجيچ وررراس ابوي

-يوووه شگد مكرووه

عفته وركضت اطلع من الطرمة ولسانه بعده يغرد عليَّ، وگفت بالساحة الچبيرة واذني وياه يحچي عليَّ محترگ دمه ويصفگ بيده حييل..

-ابا الحسن علي: انا صوووچي المحترگ عليچ وميتت من اشتعل گلبيي وخلصني من هالضيييم خلشوووف يا عاار بعد يعاينلچ!!!

-عبق: حرام عليج تسوين بي هيج وانتِ تعرفين يموت عليج حررام

-ليلة: انا اتعمد احاچي هيج خاطر يكرهني عبق انا وابا الحسن ما نصير لبعض حلمم حلمم

-انچبي ولا تظلين تسويلي حلم ما حلم انتِ بس صيري ادمية واقبلي بي والله تعيشين احلى حياة هنا وتخلصين من ضيم ابوچ

-ماريد اخلص من ضيم ابوي ولو يموت ما اقبل بي خلي هيج متشعوط لحدما يمل ويطلعني من گلبه

-والله اني اشوف تطلع روحه ولا يطلعچ من گلبه يحبچ هذا يحبببچ

-عبق كافي حبابة شبيچ انتِ الوحيدة الاثق بيج واسولفلج كلشي لا تزعليني منج

-طبچ طوب زعلي ميهمني گلبي غده دم على هالرجال

-تزوجي انتِ

-دنچبيي تحرگين الگلب

ضحكت وگامت من مكانها تمدلي لسانها وطلعت من المنور غميتها مية مرة وما ارتاحيت، شلت صينية العصير وطلعت وراهة اوزعه واضحك واني اشوف تَـمني هلكت من السلام كل شوية وحدة تجي تريد تبوسها وخالة رسمية متقبل خاف يخرب مكياجها وگضتها سلام من بعيد..

اعتلّت الهلاهل ويه دخول فراقد جايه هي وجنطها مال السفر هاي رجعتها من المطار چانت بـ ايران طول هالفترة وهسة وصلت وبوجهها للعرس.. طبت ورگعتهم بالهلاهل وحدة اعلى من الثانية نزعت العباية وصارت تهوس بيها وتگول..

-فراقد: هم عررريس هم نشمييي هم امييير وهم ربعه يزفووونه..

كلشي مشى حسب الاصول اجت ملا ورگص وفرح ووناسة بس لاحظت خالة تَـمني متخليها تگوم هواي وترگص ويه البنات وكل شويه تهمس بأذنها شي وتَـمني تهز راسها بـ "اي"..

وزعنا العشا وگالو وصلت سيارات الزفة، ركضت فوگ اللبس شال وعباية فوگ الفستان ونزلت، الامير هستوه طب على تَـمني وتفاجأت من شفته لابس قاط الله شگددد شكله حلو بي وطالع رسمي وكشخة..

ابتسمت تَـمني من اجه وباس راسها ووگف بصفها يبدل حلقتها من الايد اليمنه ويحطها باليسرة بمعنى تحولت من خطيبته الى زوجته، باس راسها مرة ثانية وگعدو على الكوشة سوه ثنينهم هادئين ومحد يحجي ويه الثاني عكس العقد هوايه سولفوا..

صاحت امه صار وقت يطلعها للزفة، وگف الامير يلبس تَـمني الكبوس الابيض وحط فوگاهة شال وطلب عباية سودة هم فوگاهة اعترضت خالة تَـمني وگالت ماكو داعي وجاوبها الامير بأبتسامة..

-ميخالف حجية احسن

-حنين: بس هي مستورة ماكو داعي صدگني

-هسة اخذيني على گد عقلي وخليها تلبسها

ما غابت ابتسامته حتى من شاف اعتراضها واستغرابها منه، طلعها الامير مگبعة كللشي ميبين منها حتى چفوف ايدها ضامهن بالعباية ولازمها حيل خاف توگع.. مادري شحچه وياهة وتَـمني اشرت على الشال هزلها راسه وقريت شفايفه يگوللها..

"بس هسة كله زلم بره"

مشاها يطلعها للسيارة اليزفوهم بيها ركبوها بسيارة ابا الحسن علي حرگ الجو بالهورنات، طلعنا سوه وراهم ونشوف الشارع سادينه من الطول للطول كله سيارات وجايبين فرقة كاملة يدگون دنابگ وزنبور، طلعلهم الامير معترض ميقبل بهالوضع بس جماعته ما قبلوا وگالو هي بس ليلة نفرح بيها..

طلعوا شيخ علي بكرسي متحرك ونزل عليه الامير يبوس بيده وراسه ويسولف وياه والشيخ يهز راسه بدون لا يجاوبه مبينه عليه الفرحة بس بعده تعبان كلش، صعدنا للسيارات الكبار الجايبيهن وضحكتني تالة من كالت..

-تالة: ما اللوم ام الامير من خابصتنا بأبنها وتگول عنه امير وشيخ باعي الزفة

-عبق: هههه تره ميبالغون والله صدگ هو مهم بالنسبة الهم

اشرتلي بأصابعها على الذبايح الحاطيها قريب باب الحوش وجايبين جواميس هم، تسائلت تالة عنهن وصحت بأذنها بسبب الهوسة متسمع..

-ذني هدااايا

-هداايا من منو؟

-من معارفهم ومن شيووخ وجماعة شيخ علي وولده، اكو ناس تجيب هدية ذبييحة واكو فلوس

هزت راسها متفهمة ونزت مخترعة ويه صوت الطلق الصار بره، صليي طلقات وحدة وره الثانية وبنص الطلق يدبچون الزلم وهوسات وگفلات والجو اشتعل.. تالة ظلت ترجف خايفة وتلوب بمكانها تريد تنزل لامها واني وليلة نسكت بيها..

-عبق: مابيهن طلق ذني جذب بس صوت والله تالة مابيهن طلقات

-تالة: اخااف اخااف اريد امي وينهاا امي

-ليلة: جابوهن الهيالگ ولج ذني مو اسلحة حقيقية بس صوت شبيچ

-تالة: نزلوني لامي اخااف حبابات فدوة فدووة

-عبق: امج بسيارة العرسان ميصير يا حبيبتي هسة نحرك لا تخافين

-تالة بدموع: اروحلها اريد وياهم راح انزل اني معليه..

فلتت منه تنزل من السيارة تبچي خايفة اشرتلي ليلة نروح وراهة خاف يرزولنا لان عفناها خصوصاً وهي بدون حجاب بس شال مشكلته على راسها حيلة وشعرها كله طالع..

-ليلة: ولج امشيي نروح

اشرتلي اغشي وجهي بالشال جريته اضم حمرتي وعفت بس عيوني طالعة اما هي حتى عيونها غطتهن ونزلنا من السيارة نركض وره تالة..

-عبق: تاالة ولج تعاالي

سيارة العرسان كللش موگفيها گدام واحنه صايرات وره مسافة طويلة ياله نوصللهم والشارع كله زلمم متروس تررس كل النتعده منه يظلون صافنين علينا متت بدمي لا يشوفني احد واترزل وهاي ماكدر اعوفها متندل وخاف يصيرلها شي من الخرعة..

الطلقات مستمرة الجو احترگ عطاب رغم مو طلق حقيقي بس يخلف صوت ودخان، صرنا نتزابگ اني وليلة بين الزلم ونصيح بتالة..

-ليلة: بالبعااس لو ما وگفتي يا تالة املشچ من شعررج فحطتت

وكفت بمكانها واللتفتت علينا تفرك بيدها مخترعة ايدها ترجف رجف ووجهها شحب لونه مع العلم حاطة مكياج بس مبين عليها شگد مخترعة..

-ليلة: يا غبرة راح يوكف گلبج مو حقيقي هذاا

-عبق: تالة خلينا نرجع حبابة والله كله زلم ولو شافونا زلمنا يطيحون حظنا

ويه جملتي صادونا من بعيد سور ونور ويبوو على حظنا، فرحت من ليلة وياي على الاقل هي لسانها بطولها وتشرحلهم الصار بس تفاجأت من شفتهم يسحلون بوحدة من ذراعها وعلي السور عبالك ديرزل بيها..

-ليلة: عزا بس لا رفل هاي ولج!

-عبق: مو جسم رفل هاي.. هاي.. هاي رهف!!!

-ليلة: رهيفة بت عمي مسعود؟؟

-تالة: يا ادبسززززز

نزينا ويه عيطة تالة وهي تدفع برجال وتضربه بجنطتها على صدره، گمت اللطم على وجهي صخام الصخمنا اليوم تعزينا هذا شسوه بيها وخلاها هيج تصيح..

-ليلة: ولج شصاار

-تالة: ابن الزبااالة تحرش بيه تحرررش

-هيووو تره انتِ جبتيها لروحج چا شكو واگفة هنا بين الزلم

-ليلة: احترم نفسك وولك انتَ تعرررف احنه بنات منووو

-بنات دياثة و**** مبينات

-ليلة: ولچ هددديني افعص وجهه هدينييي

-عبق: بنات كاافي خلونا نرجع كاافي

ظل الرجال يضحك علينا ويسويلنا حركات وبقى يغمز لـ تالة، ذبت الشال ليلة عن وجهها ووگفت تريد تغردله وبلحظتها شفنا علي الكـرار ومنتصر يجون بطريقنا ما انتبهولنا ديمشون ويه جماعتهم بس فجأة دار وجهه كرار وصاد الرجال يضحك ويه ليلة ويأشرلها بيده..

شاااط وما شفنا غير بوكس اجه للرجال وگعه بالگاع، تورشعوا كرار ومنتصر وجماعتهم دگ كتتل وين اليوجعك والزلم اللتموا علينا واجو علي البدر وعلي التقي يركضون يردون يفاككون او يفهمون الصار واحنه بعدنا واگفات مثل شمعات الفگر..

-علي الكـرار: رووووووحن هنااااك

جر تقي ليلة من عبايتها واني من عبايتي ويعت بينا مثل الصخلات، عيونه راح تطلع من وجهه وتالة تركض ورانه تريد تلحگ بينا اصلاً مدا ينتبهون عليها لان مو نفس لبسنا ينسوها وعبالهم متعودلنا..

-ليلة: تقيي لا تجر بينه مثل النعجاات

-علي التـقي: ويييين واكفات هناك ووووين

-علي الكـرار: وووووينهن ذني

گمت ارعش من اجه كرار فاير ويرجف، صار المعاتب كله من نصيب ليلة خطية وهاي ابد متعرف تسكت گلت هسة يتمالخون بنص الشارع وتخنگه بشالها..

-تالة: لا تعيطون عليها الغلط مني اني

اللتفتوا الولد عليها مخنزرين، ضرب ايد بأيد كرار وعض اصبعه حييل يمنع نفسه يحچي شي وياهة..

-تالة: اني اخاف اخذني لامي عفية

-علي الكـرار: تخافين من شني

-تالة: من الطلقات

-مو حقيقيات ذني وهمي وهميي

-اي بس هم اخاف

رص على سنونه تخيلت يريد ياكلها من العصبية، خمطتها ليلة من شالها تجر تالة تصعدها للسيارة الچبيرة قبل لا تگب عركة.. دقايق ما تأخرنا وتحركت سيارات الزفة وصعدن حبيبة ورفل وبنات مسعود ويانه مادري وين چانن وولا اريد اعرف اريد بس تخلص هالليلة على خير..

الزفة متفرق وناستها عن قبل الزفة الجو احترگ جايين الدنيا كلها واغلبها شباب، كل شوية يوكفون السيارات وينزلون يركصون العريس وتگب الترابة تحجب عننا الرؤيا حرامات..

اخر مكان وگفوا بي هو گدام مصور، نزلوا تَـمني والامير وخالتها وخالة رسمية وحبيبة اشرتلي اني وتالة ننزل نشوف وياهم، فرحت لان حبيبة تذكرتني.. تذكرت ان بعرس بدر وشمس تمنيت انزل اشوف المصور وسلوى گرصتني ومنعتني اروح رغم البنات كلهن نزلن بوكتها..

دمعت عيوني من اشرتلي انزل ورحت وياهن فرحانة، دخلنا للستوديو جوه عبارة عن غرفتين كلش حلوات وبيهن هواي خلفيات مختلفة، تفرجنا على تَـمني والامير وهمه يصوروهم يخبلون وصورهم هم كلش حلوة ووضعياتهم تونس..

-حبيبة: بنات امشوا ننزل تقي يگول راح تتحرك السيارات اجو المرور

هزينا روسنا وگمنا وياهة هي ضمت وجهها كله نفس اول ما نزلنا واني بس غطيت حمرتي بالشال وطلعنا سوه، شفت علي الحـق وعلي التقي واگفيلنا بباب الستوديو، ابتسم تقي من شافنا بينما علي الحـق خزرنا يا ربي الاختلاف بيناتهم كـ اختلاف الجنة والنار..

ظليت اباوع لـ علي الحـق افسر نظراته وليش هيج حاقد عليَّ عيونه ما وگعت مني خازرني خزرة موت، انتبهت ويه صوت علي التـقي من صاحلي "ام عيون" اللتفتتله بسرعة اضحك وهو هم ضحك واشرلي على عيوني اغطيهن استحيت منه وذبيت الشال خفيف كله على وجهي اغطي ولا ارادي درت وجهي ارجعه لـ حق اشوف ملامحه تغيرت چان عصبي قبل شوية هسة شكله مصدوم..

ركبنا السيارات وانتظرنا شوية علما اجو العرسان، صعدوا سيارتهم وانطلقنا للفندق الي راح يزفوهم بي، ما نزلت للفندق بس حبيبة والبنات كلهن راحن بقيت بالسيارة ضايجة اتذكر نظرات علي الحـق وانقهر ليش هالرجال يعاملني بهالطريقة من دون اخوته والله تعبت منه..

خلصت الزفة بعد الف عركة والف خزرة والف حركة "اني اعلمج" من ايدين سلوى همزين خلصت طلعت روحي خرب مو زفة حرب رايحة.. رجعنا للبيت وحبيبة بقت يم امها جوه تنام واني بوجهي للمخزن فوگ نزعت الشال والعباية تعبانة اريد بس انام لو تشمر عليَّ قواذف خالتي هم ما انزل وانظف البيت هسة..

فتحت سحاب فستاني ابدله ورجعت سديتها من اندگ باب المخزن اهوووو يارب متخلصني منها وارتاح.. زفرت نفس ورحت للباب افتحها وتفاجأت من شفته علي الحـق بوجهي..

شهگت مخترعة وسديت الباب بوجهه بسرعة ما لابسة حجاب وباقية بالفستان مستتحيل اخلي يشوفني هيج بس ما لحگت اقفل الباب عليَّ وفتحه ودخل للمخزن وسد الباب وقفله معصب..

-اطلعع بره اطلللع

نزلت اجر الشال احطه فوگ راسي وأأشر على الباب ارجف، افكاري رسمتلي صور مو حلوة وتذكرت السواه من چنت بالديوان جوه وتحارش بيه، خفت نبقى سوه بهالوقت المتأخر وهو بهالوجه العصبي..

-اطللع بره والله اصيح والله العظيم اگلب الدنيا عليك

-علي الحق: سمعيني ولچ انا رووحي واصلة لخشمي راح تسكتين لو انا الاصيح واللم الدنيا علينا واسويلنا سالفة

-شبيك انتَ شبييك مخبببل

-اييي مخبببل ايييييي

يضرب على گصته وراسه حييل يخلف صوت قوي ويتقرب مني..

-مخخخبل انااا مخخخبل امووتج وعلي ابن ابي طاالب لااا تختبريني تره انااا مسودددن روحي سألي الكل عليَّ مااا اغشچ انااا مخبببل

-مخبل شسويلك شتريدد شنوو اخذك طبيب نفسي اعالجك؟؟

-لا انتظرج تصيرين طبيبة وانتِ تعالجيني

-حضرتك تستهزأ؟؟؟

-مثلما انتِ تستهزأين!! ثانياً هاي شنوو القندرة اللابستها شنوو هااي

خرعني من نزل يجر بالحذاء يريد ينزعه من رجلي، شردت لنهاية المخزن هذا شبي متخبل عليَّ شلون راح اخلص منه!!

-نززززعي

-ما انزعه انتَ شكوو رووح

-ما اطلع اذا ما نزعتي يا قببق

-اسمي عبببق

-نزعي الحذااء

-ما انزعه انتَ معلييك

-چا نزعي الفستاان مو انا الجبته يله نزعي وانطيني

-شنو

-نزززعي الفستاان يلاا

بلعت ريگي ميتة قهر خازرني ويأشر على الفستان، رجفت شفتي بعد ماتحمل اهانات اكثر وذل رحت لعبايتي جريتها لبستها فوگ جسمي وفتحت سحاب الفستان حتى انطي اله..

-شنو هاي شجاي تسوين

مجاوبته وبقيت اتمعچل بالسحابة بصعوبة دا افتحها اخاف توگع العباية وانفضح، كرر سؤاله مرة ثانية وماتحملت اللزم دمعتي اكثر ونزلت..

-موو احاچييچ شجاي تسوين؟؟

رفعت عيوني عليه خازرته، بلعت ريگي والدموع بعد ما اسيطر عليهن صارن ينزلن وحدة وره الثانية، غصيت بجوابي من گلت..

-انطيك الفستان

-عبق

-ممكن تطلع حتى انزعه براحتي

-عبق انا..

-اطلع سيدي عفية

-لا.. لا لا ما اطلع لاا

-شلوون راح انزعه گداامك

شهگت متفاجأة من هجم عليَّ وجرني من ايدي يحضنني، جحظت عيوني مصدومة لثواني من ردة فعله ودفعته عني بقوة بعدما استوعبت..

-هدني لا تلمسنيي هددني خليني انططيك الفستاان

-مارريده اسف والله اسف ماريده عذريني

رجع يريد يحضنني ودفعته من صدره ما اقبل، لميت العباية على جسمي ودرت وجهي عنه ما اخلي يشوف دموعي، تقرب مني حصرني بالزاوية بدون لا يلمسني جسمي كله صار يرجف من قربنا ومن كلماته..

-عبق وعلي عقل ما ظال براسي لا تلعبين بأعصابي

مجاوبته وبقيت دايرة وجهي عنه، اردف بصوت خالي من العصبية..

-ليش لابسة هذا الحذاء لييش؟

-عجبني

-انتِ تتونسين من تشوفيني بهالحال ادري بيج حفظتج وعرفت سوالفج

-اني شمسويتلك؟؟ اصلاً ما احتك بيك ولا اتقرب منك ماا الي شغل وياك!

-وهاي المشكلة! ما تتقربين مني بس تتقربين لاخوتي! تضحكين لتقي وتلبسين احذيته! تعاينيله وتوزعيله ابتسامات وحركات سخيفة!

-احترم ننفسك ماكو يوم تصرفت بسخافة ويه أي واحد منكم وما اسمح لبشر يشك بحيائي واحترامي لنفسي لو چان اكبر واحد!

-چا شتفسرين الصار اليوم؟؟ فهميني شنو تفسيرج!!!

-شصار اليوم؟ شصاار

-ام عيووون وام صخاام بوجهيي شنو هالسوالفف من يمته هيج علاقتتكم

-شبيك انتَ شبيك فهمني شبيك تره اني التعبت وتخبلت مو انتَ

-احسن

-احسن اذا تخبلت؟؟؟

-اي خاطر تنچبين وتكعدين وتبطلين تضحكين للرايح والجاي

-يبووو عليَّ اني ويامن ضاحكة شبيك انتَ تتحلم؟؟

-انا اعلمج عنق لو ما ربطتچ ونمت على خوانيگچ ما اتسمى علي الحـق!

-شنو صخلة وتربطني؟؟

-عگـ....

قطع كلامه ويه دگ الباب وصوت حبيبة يجي من بره، شهگت اضرب على خدودي بخفة واطفر بمكاني ميتة رعب..

-انفضحناا انفضحنااا

-الحمدلله والشكر ربيي الف الحمد لله والشكر

-شلون بينا وين تروح ويين اضمك شكبررك

-اظن فستانج بي فتحة اكفي بي تره

-موو وكت سخاافة حبيبة هاي حبيببة

-واذا حبيبة هسة افتح الباب

راح يريد يفتح من كل عقله، صوت حبيبة بعده بالباب تدگ روحي راحت انخبصت ولزمت ايده بكل قوتي وهمست بخفوت..

-لا تسوي هيج حباب ادري بيك مزعوج مني وتريد تنتقم بس مو بشرفي الله يخليك لا تخليهم يحچون بيه

-ما افتح الباب بشرط

-شنو گوول

-تصيرين الي

-نعم؟؟

بلعت ريگي مرعوبة من لزمني من متوني ثنينهن ودفعني للحايط، روحي خرطت من لزگ بوجهي وهمس بتحدي..

-تصيرين الي خاصة بيه انا محد اله شي يمچ ولا انتِ الچ شي يم احد! الاريده ترضين بي وما تعانديني وتشلعين گلبي! وشكو حلم حالمته بعيد عني تحذفي من راسچ وتنسي للابد!

شگدما الموقف صعب ووگفة حبيبة بره وطلعة علي الحـق گدامها من غرفتي وهي مقفولة صعبة بس طلبه بعد اصعب! طلبه حسسني شگد اني رخيصة وتافهة، حسسني اني لعابة ويتحكم بيها شوكت ميحب ويرضي غروره بيه، رغم وضعي المأساوي والذل العايشة بي بس لو اموت ما ادخل شرفي وكرامتي بالنص وراح ابقى احارب واحافظ عليهن لاخر نفس اتنفسه..

وخرت ايده عن متوني ودفعته عني متقززة من كلامه، عفته ورحت افتح قفل الباب جوه انظاره المصدومة، فتحت الباب وسمحت لـ حبيبة تشوفه بغرفتي جوه..

-حبيبة: شنو الموضوع؟؟ علي انتَ شتسوي هنا؟!

-عبق: حچه ويايه بموضوع يخص العرس عجبته بنية وسألني عليها

-علي الحـق: عبق لا تـ...

-عبق: ما راح اگول لاحد غير حبيبة لا تخاف

-حبيبة: وما رحت الا لعبق تسألها؟

-عبق: شافچ بغرفة امچ وما تحمل ينتظر اكثر واذا تسألين على قفل الباب فـ هو قفله مادري ليش

بقت حبيبة تباوعلنا وكللش ما عاجبها الوضع، جرتني من ايدي وياهة لغرفتها وعافت حق جوه بالمخزن، دخلنا جوه وبقت تلوب بمكانها محتارة اعرف الافكار تتناطح براسها ومدا تعرف شلون تسأل بس فجرتها بالاخير وكالت..

-عبق انا اعرفج من زمان كلش واعرف اخوتي شنو بس يا حبيبتي ابد لا ترضين لواحد منهم يختلي وياچ بمكان والباب مسدود ونهائياً لا تسمحيله يقفل الباب لو مادري شنو يصير لا تقفلون الباب عليكم وحدكم

-حاضر

-انتِ تعرفين امي تدور عليج الزلة انا اعرفج شنو واعرف اخلاقج وخجلچ منهم بس امي ما تهتم ولا مرة ابوي تعبر هيج سالفة انا اخاف عليج لا تصيرلج مصيبة

-صح كلامج

-المهم انسي السالفة، طالعة تخبلين اليوم بهذا الفستان شوكت اشتريتي؟

سألتني مبتسمة وتتلمس قماشة الفستان، حرت وماعرف اجاوبها الحقيقة لو اچذب، قررت اجاوبها نفس ما جاوبت الباقين واگول..

-تَـمني جابته الي

-اممم.. كلش حلو

-شبيچ حبيبة عبالك بعدج ضايجة مني؟

-لا مو وياچ جاي افكر بالاجت اليوم

-منو اجت؟

-سوزان حبيبة علي الحـق

-هاا!

-اجت وخشت بنص عيني تسلم عليَّ وتبوسني بكل صلافة!

-ما انتبهت عليها، هو عزمها؟؟

-مادري بس متخبل عليها لاحسة عقله يحبها ويريد يتزوجها تخيلي!!

-صدگ تحچين!؟

-علي الكـرار شافها جايتنا قبل چم يوم وحق مدخلها للبيت بدون لا يگول لاحد وانوب ذاك اليوم گال بلسانه راح اتزوجها واخلص من التفرفح

صفنت استوعب كلامها وافكر بتصرفاته ويايه قبل شوية، كزبر جسمي وعضيت شفتي متوترة ونغزات غريبة صارت بگلبي ضوجتني فوگ ضوجتي..

-حبيبة

-ها

-انتِ مصدگتني؟ مصدگة ماعندي شي ويه اخوج لو احلفلچ بروح ابوية؟؟

-مصدگتج بلا ما تحلفين اعرفج شني واعرف طينتچ ولو شفت بعيني هم اچذب عيوني واگول خدعني بصري

حضنتها ممتنة على الثقة المنطتها الي ورجعتلي حضن دافي اكثر وكله حنان سحبت شكو طاقة سلبية زارتني، تمنيت اگوللها والله يا حبيبة لو تعرفين شكد احبج وشكد اعزچ، انتِ امي وابوية واختي وبت خالتي وصديقتي وبير اسراري العالم بكفه وانتِ بكفه وحدج يا شيخة الشيخات...

**

"تَـمني"

وصلنا للفندق وخالة رسمية عافتلي شي يسموه تمتوعة ووصتني شنو اكل وشنو اقدم للامير وشلون ادللة، وگفت تسولف ويه ابنها شوية واجت خالتي مطرتني بتوصيات الي ما اتوقع راح اطبق وحدة منهن..

-رسمية: ام تالة اريدن چنتي بسالفة بلا امر عليج

-حنين: اي تفضلي حبيبتي

طلعت خالة من الغرفة توگف بالباب والامير راح للميز مادري شيسوي بتلفونه، حطت رسمية الچكليته ببدلتي وعضتلي شفتها وهمست..

-نفس يوم العقد

-لا خالة فـ...

-اششش يلا يمة مهناية يبعد روحي.. سبع سعادات يا بعد امك انتَ وليدي

بوستني وبوست الامير وطلعت، زفرت نفس وطلعت المطارة السوتها الي خالة رسمية عصرتلي عصير برتقال گالت ينطيني طاقة وهسة لازم اشربه لان وجهي اصفر، شربت نصها وگعدت على الچرباية ونزعت حذائي، اجه الامير يگعد بصفي ونزع جاكيت القاط ومد ايده..

-انطيني

-امييييير

-انطيني الچكليته ولا تسوين مثل ذيج المرة

-شهالاذانات العندك شنو رادار مشكل!

-انطيني الچكليته انطيني خلينا نتحلى

نفخت بوجهه وغمض عيونه يضحك، گمت اوگف بزاوية الغرفة وطلعت الچكليته ورحت انطيها اله، ضحك فتحها واكلها ظل يباوعلي ويغمز ويسوي حركات تحرجني، تفشلت وانطيته گفايه ما اجاوبه..

رجعت اگعد تعبانة ودايخة من الهوسة، نازعة الحذاء ومادة رجلية گدامي على الچرباية، اني والبدلة والتاج والبرگع كلنا گاعدين وتعبانين مابينا نتحرك..

-الامـير علي: ها خالوو راح تنامين بالبدلة؟

-يصير؟

-الا اذا چنتي تردين السيم يزرف گلبچ وانتِ نايمة

-حباب نزعني

-ها!

من ردة فعله انتبهت لچفصتي وگمت بسرعة اوگف بمكاني صامة حلگي بيدي، عزا بعينننج تَـمني ولج هذا مو تاالة ولا خالتج وينزعوج من تكونين تعبانة خررب لا لا لا اني وصلت لمرحلة ضروري اتعالج ضرورري..

-قصدت بس البرگع ساعدني بي

همهم بدون لا يجاوب ووگف فوگ راسي يشيل الماشات من البرگع ينزعني، اختل توازني شوية من جر التاج وياه وكمشت بسترة القاط مالته وابتسمت، گلت ومنصية راسي حتى يشيل الماشات براحته..

-حلو عليك القاط

-لبسته لخاطرج

-شلون يعني

-چنت لابس لبس عربي وگبل لا اطب عليج اخذج للزفة بدلت

-شمعنى

مبتسمة واحجي وياه، رفع راسي بأطراف اصابعه يخليني اواجهه وجاوبني ببساطة..

-خاطر ما يظل بنفسج

-انتَ متعود تلبس قاط؟

-ابد

-ما لابسه بحياتك؟

-بس مرة لبسته بتخرجي وبعد ما عدتها

-بس تلبس بنطرون وقميص هوايه اشوفك

-اي بس مو قاط لان ما ارتاح بي

-يجنن عليك شيخي

ابتسم ميحط عيونه بعيوني وكمل يشتغل بالماشات، زفرت نفس مرتاحة مادري ليش لا خايفة ولا متوترة ولا حتى خجلانة احسني بخير وصار فترة طويلة من حياتي ما حاسة بهذا الشعور وما حسيت بهذا السلام الداخلي..

-علي

-امم

-شكد غريب عندك اسمين هههه

-انتِ سكرانة لو شني؟

-مادري احسني فرحانة

-دوم ان شاء الله بس شنو السبب؟

-لان اثق بيك

وخر عني بعدما شال كل الماشات وراح للميز ينزع رباطه وساعته، جاوبني بدون لا يباوعلي..

-تقصدين موضوع الانفصال؟

-يعني اي ومو اي مفكرت بالانفصال هسة من حجيت وياك لان اعرف كلمتك وحدة ومتثنيها ومنتهين من هالموضوع، اني قصدي ان اثق بيك بكلشي ولو وگعت بمصيبة راح تساعدني ومتعوفني وحيدة

-بس تفكر بالمصايب هالبت

ضحكت بخفة وگمت للحمام اريد اسبح وابدل، قفلت الباب عليَّ ونزعت البدلة وشمرتها بره الحمام.. سبحت واحس بعيوني راح تنطفي اريد بس انام تعبانة كللش اليوم هلكت من الصبح لحد هسة دگت الـ 11:30 بالليل ياله جابونا للفندق وخلصت الزفة..

بدلت بالحمام ولبست تراك جبته ويايه وطلعت، تبادلنا اني والامير اني گعدت بالغرفة وهو راح للحمام هم يسبح، سندت راسي على القنفة انتظره يطلع حتى نتعشا واحسني فصلت.. وهاي اخر شي اتذكر سويته من وصلنا للفندق..

ماتذكر شي ماتذكر من طلع الامـير علي من الحمام وصاحلي اجيبله گلبيته ما اتذكر من رحت وديتها اله بيدي وضحكت واني انطيها اله وگتله..

-لا تلبس ابيض انتَ مو عريس حقيقي مو تصدگ احنه تزوجنا

-الامـير علي: ما اصدگ بس انطيني الگلبية خل اللبس

ما اتذكر من شمرتها عليه وتمددت على الچرباية وفتحت ايدي وغمضت عيوني، ماتذكر لان كلله الامير ذكرني بي ثاني يوم وحچالي والعرگ يكت منه..

**

"ما نقله الامير علي لـ تَـمني"

طلعت من الحمام وشفتها متمددة وشعرها مبلول، طلعت انشف بشعري ومشطت بساع واخذت خاولي ورحتلها، سحبتها من ايدها اگومها خاطر تنشف شعرها وحطيت الخاولي بيدها، ما رضت تاخذه شمرته بعيد وگالت..

-مابيه حيل تعبانة

-ما يصير تنامين هيج تمرضين

-عادي

شكد عنودية هالبت، جريتها وصرت وراهة وگعدت انا انشفه، ضحكت ضحكة عالية وگعدت عدل وانا بقيت اعصر شعرها بالخاولي، فاجأتني من صارت تتقرب عليّ وانا ابتعد تتقرب وانا ابتعد لحدما طخ ظهري بتاج الچرباية وتَـمني لازگة بيه شوي وتصير بحضني..

-الامـير علي: ها خالو

-تعبانة

-سلامتج تعاي نامي

-ماريد انام خليني هيج

-شنهاي

-بس شوية لا تصير نحيس

-خوشن

بقيت گاعد صابر شوكت ما يعجبها توخر خاطر اگوم عنها، ما ريحتني گعدتنا وطلعت موبايلي اگلب بي واشوف مباركات جماعتي والناس الاعرفهم..

-اموري

-نعم

-انتَ خوش رجال

-رحم الله والديج

-تساعدني هوايه وتهتم بيه

-جسر للطيبين انا

-يعني اني طيبة؟

رفعت نفسها ودارت روحها كلها الي، ثبتت ايدها على صدري تنتظر مني جواب وانا صفنت.. صفنت مادري شگول تهت وحرت والدنيا كلها افترت بيه.. همت بعيونها سرحت بيهن أتأملهن واحسب رموشها چم رمش عدها، سيطرت على روحي ودرت وجهي ارجعه لموبايلي وجاوبت..

-خوش بت انتِ

-يعني طيبة؟

-اي

-منو اطيب اني لو حبيبة؟

-شون سؤال هذا

-سؤال عادي ولان اني احب حبيبة حتى لو اختاريت حبيبة ما راح ازعل

-نامي نوومه

-ليش تصيحلي نوومه شنو نومي حامض اني؟

-مو دومچ تحمضين فـ يرهملج الدلع

-اني محمضة؟؟؟؟

-چا ياهي تطنگر يومية خالتي الشگرة

-يعني اذا اطنگر تسويني محمضة؟؟؟

-ههههههه ولج مو محمضة يعني ريحتج مو حلوة محمضة عدنا يعني وحدة هواي تضوج

-شهالكلمة محبيتها تلعب النفس

-صار ما نستعملها بعد

-شكراً شيخي

-هلا

-اگولك اني هسة مو مرتك؟

-اي؟

-يصير اگعد وياك بالديوان مو؟

-اي واللبسچ عگالي وبشتي

-لا احسه ميرهملي

-ولج اشاقيچ صدگ تحچين انتِ

-اي لعد غير صرت شيخة ولازم اگعد وياك

-تَـمني نامي بوية نامي التعب مأثر عليج

-اميييييير

-لا تمطين بأسمي مو مطيتي روحي

-اني زعلانة امير

-من شنو

-زعلانة لان مزعلتك مني انتَ كلش انسان عزيز على گلبي

-يعزچ الله ربي يسلمج

-عاجبني اقدملك هدية تقبل؟

-لا

-ليييش

-ماكو لزوم ما احب الهدايا

-راح تحبها هالمرة لانها مني

-ثقتچ حلوة

ضحكت بحماس وگامت من مكانها راحت للطاولة المحطوطة بوسط الغرفة وشالت باكيت الكلينس ورجعتلي، گعدت اقرب من گبل شوي وهالشي كللش ضايقني وما ريحني بس ما حسستها..

-هاي الك

-شنو هذا

-الك هذا شوفه

-هو شنو

-هذا شبيك هذا

تأشر على باكيت الكلينس وتحطه بيدي، استغربت من تصرفها بس خذيته من ايدها اگلب بي..

-عجبك؟

-هذا الباكيت؟

-اي

-احم...

-معجبك امييير

-لا لا.. حلو بس چنچ ناصبة عليّ فهاوي

-هههههههه تره حلو شبيك

-كلشي منج حلو

ضحكت اكثر وتنهدت مرتاحة، رجعت نفس گبل شوي تگعد وجرت ايدي على جسمها تخليني احضنها.. الاستغراب وصل وياي حده وهاي تتماوع عليَّ مو خوش سالفة هاي لا وعلي..

-اني سعيدة كلش

-دوم

-راح ازوجك وحدة احلى مني بعد

-رجعنا لهالسالفة

-اريد ازوجك واشوف اطفالك واني اربيهم ميخالف اخليهم حتى يصيحولي ماما

-تَـمني عوفي الموضوع

-والله اقبل تتزوج لا عبالك ازعل

-اي ادري خلص نامي هسة

-تنام يمي؟

-بكيفج

-عادي اقبل

-خوشن روحي نامي هناك

-لا خليني هيج

على حطتها تمددت نامت، وخرت عنها شوي ونمت بالطرف الثاني غطيتها وتغطيت، انتبهت للضوه مفتوح گمت طفيته ورجعت تمددت..

-اموري

-ها

-منعسانة

-اللوليلچ

-ياريت

ضحكت من كل عقلها هاي شبيها اليوم، وخرت ايدي ودحست روحها بحضني عفتها على راحتها مع العلم احس بيها شي مو طبيعي خصوصاً بقت تتنهد هواي چن ما جاي تگدر تتنفس عدل..

-تَـمني؟

-امير لا تروح

-بس اشوف شبيچ

-لا تروح حباب

-ماروح بس افتهم شسالفتج انتِ ما جاي تكدرين تتنفسين؟

-اتنفس

-چا ليش تتنهدين هواي؟

ما جاوبت وحطت ايدها على خدي وابتسمت، الف علامة سؤال صارت براسي شنو جاي يصير ما جاي افتهم البت تحجي وكلامها مفهوم لا تهذي ولا عيونها بيهن شي.. تَـمني بعقلها لو شاربة شي؟؟

فكرت بشي وباوعت لجنطة العشا الجابتها امي على حطتها ما ماكلين شي بعدنا وانا سألتها بالزفة واكدتلي لا شربت شي ولا اكلت ببيتنا چا ليش هذا حالها؟ رصدت عيني مطارة شفتها تشرب منها گبل شوي بس لا.....

-سمعت خالة اليوم تگلي شي

-امي؟

-اممم

-شگالت؟

-گالت حتى تخلين رجلچ يمچ وميعوفچ جيبيله ولد

-زين؟

-واني ماريدك تعوفني

-تحبيني تَـمني؟

-لا

-چا شتريدين مني

-اريدك بس تبقيني عندك

-واتزوج واخلف عادي؟

-اي

-وانتِ؟

-انفصل وابقى يمكم عادي

-ليش

-اخاف اضيع اذا تعوفني

-وتردين تجيبين مني جاهل خاطر ما اعوفچ؟

-اي

عگدت حاجبي على منطقها تأكدت مية بالمية هي مو بوعيها بيها بلَه لان هذا مو حچي تَـمني ولا تفكيرها.. صفنت افكر بكلامها ليا مرحلة واصلة من خوف الضياع وتريد تخلف مني ولد خاطر ما اعوفها وحدها، يمكن أي واحد بدالي راح يفرح بهالشي چا شمالني انا الهَم ترس گلبي!

وگف شعر جسمي من كمشت بزندي، باستني بخدي ووضعي انگلب انا منا روحي تريدها وتتمناها وهي منطتني مجال ماعرف شسوي وشتصرف، اخاف لا اسوي شي يخليها تكرهني باچر من تگعد واخاف اعوفها لا متصيرلي هالفرصة مرة ثانية.. كل تنهيدة منها ذبحتني دمرتني وخذت حيلي وياهة انا اعرف هي مو بوعيها واعرف صايرلها شي بس ما جاي اگدر امنع نفسي.......

**

"علي الحـق"

نزلت بوجهي لغرفة امي شفتها گاعدة بالگاع تصلي صلاة الليل، گعدت بصفها تعبان وروحي طالعة محتاج احاچيها خاطر گلبي يبرد وارتاح، روحي راحت ويه ما خلصت وسلمت خاتمة صلاتها..

-رسمية: الله اكبر الله اكبر الله اكبر

-تقبل الله يمة

-بعد روحي روحك

-دعيتيلي؟

-چا شون ما ادعي لوليدي الگمر

-شدعيتيلي؟

-دعيت ربي يحفظك ويحرسك ويرزقك ويبعد عنك ولد الحرام ويسهل حياتك ويبعد عن صدرك كل ضيج وحزن

-ما دعيليتي اتزوج يمة؟

-دعيت اكيد يا بعد امك ربي يرزقك ببت الحلال الترضيك وتترس عينك عن كل النسوان

-چا خطبيها الي

-ياهي

-بت الحلال الترضيني وتترس عيوني عن كل النسوان

-هههه ان شاء الله يمة بعيني بس خلي ابوك يصير زين انا بنفسي اخذ عماتك ونروح نخطبلك

-منو تخطبيلي؟

-بت شيخ محمد شون بت طول بجسم بجمال بعفة وشرف وصيت و..

-يمة انا ماريد بت شيخ محمد اكو وحدة ببالي اريدج تخطبيها الي

-ولك حق شني بس لا تدور خرابيط من ورانه؟؟

-لا يمة اريدها بالحلال خاطر ما اخربط وياهة انا رايدها وهاويها والله يا يمة ميت بيها

-اللهم صل على محمد وال محمد اذا خوش بت ليش ما اخطبلك يا روح امك گلي من يا عمام هي؟

سألتني بفرحة متحمسة تعرف جوابي، سكتت اعاين بعيونها ومادري شنو راح تكون ردة فعلها، امي راح توگف وياي لو تنگلب ضدي بس ما يهم لاني مقرر وحاسم الموضوع، حطيت عيني بعينها وجاوبتها بگلبي گبل لساني گلت وروحي مفرفحة..

-اريدن عبق يمة.. خطبيلي عبق

يتبع 👑.....

━━━━━━ ♛ ━━━━━━

علي الحـق وقبق 😔🦋♥️

مشكلة حقوق ميعرف يعبر لـ عبق عن مشاعره يچفص وياهة وهاي بنيتنا الله يسلمها مو سهلة 🥲

الامـير علي وتَـمني!!! 🔪🔪😰

ورسميية؟؟؟ 🤨

لا تنسون التصويت واطربونااا بتوقعاتكم الجميلة 👀🩷🩷🩷🩷🩷🩷

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

بكثر ما حاب اسمك واعشگ عيونك

وياك اللتفت من يصيحونك

وادور وجهك بعين لي يلاگونگ 💋

━━━━━━ ♛ ━━━━━━

"حبيبــة"

نزلت اشوف مرة ابوي گالت بس اكمل صلاة الليل وتعالي دوسيلي رجلي، طبيت لغرفتها وشفت علي الحـق گاعد يم رجليها وهي فاكة عيونها عليه..

-حبيبة: ها يمة تقبل الله

-رسمية: يممممة صواااب

ضربت على خدودها شاهگة، باوعت لـ حق گاعد ما تحرك من مكانه وعيونه مثبتهن على امي الله يستر بس لا حچالها على سوزان!

-رسمية: صخاام بوجهك يا عليي سودنتناا يا علي ولك تريد تموتنيي انتَ تريد تموتنييي

-علي الحـق: اموتچ لان اريد اتزوج؟ ليش؟ ليش كل هالعصبية والدگ واللطم انا شطلبت!

-حبيبة: يمة شبيچ على كيفج

-رسمية: تعااي يا حبيبة تعااي سمعي الفضيحةة تعااي سمعي الطياح حظ تعاااي

-حبيبة: يمة لا تصيحين دخيلج ابوي ما يتحمل هبطات

-رسمية: ولج يريد يتزوج من البرابـ** امهات السحوورة بنات المخبلات يبوووو على حظج يا رسميية

-علي الحـق: بسسچ يووم چن گتلج رايح اتزوج ****!!

-رسمية: ووولك خداامتك خدااامة هاي خداامة جوه رجليك تشتغغل خداممممة افهممم

-علي الحـق: لااا وعلي مو خدامة وتااج على روسهن احطهنا

-رسمية: نعاال برجلي اللبسها وروح ابووي

ركضت تريد تطلع من الغرفة مادري وين تروح وعلي الحق كضها يحضنها وچتف ايدها حييل..

-هدددني خلرووح اسبح بدمهااا

-وستر زيينب ما تصعدين وغلااوتج يا يمة ورااس ابووي لو رحتيلهاا بعلي هسة اروح اعقد عليهاا واگعدها شيخة بديوان ابووي

-عمتتت عينييي ووولك عمت عيننني ساحرتك هااي ولك سااحرتك عليي مسودنتك هذا موو علي الحـق وليددي العاقل

-العاقل تسودن بعشگها يمة هيددي ولا تخليني اكسر خاطرچ بهالليل

-وينننه ابوك ارووح لابوك اعززيكم اليووم طردتها على ايددي بت الشوارع هااي

عصرها بين ايده ونزلها على چربايتها اعاينلهم واتراعد من الخوف، اكل بأظافري وحايرة ماعرف شسوي..

-ماا تتزوجهاا عوود من امووت وانگبرر رووح تزوجهاا وخليها تخلفلك سرابييت يشبهووهاا

عافها تدعي عليها وطلعنا من غرفتها وقفل الباب عليها، نسمعها ما سكت لسانها ونحيبها وتعيد وتكرر..

-خداامة وجودها بهالبيت خدامة الله ياخذج يا مسودنة وليدي عمت عيننج وعين خالتج وعين امج وعشيرتج اللفووه

تحسر علي الحـق مغمض عيونه ويفرك بوجهه صار دم من العصبية، ضرب الحايط بقضبة ايده وسند راسه عليها من صرخت مرة ابوي..

-مو خوووش بت موو خوشش اليعوفوهاا اهلها بييت كله زلممم ما تتأمننن

-حبيبة: علي فهمنيي شصاير

-خررب روووحي خرررب

حط مفتاح غرفتها بيدي وعافني وطلع من البيت للساحة، ركضت وراه اريد اللحگ عليه ما لحگت طلع من باب الحوش فاير ضربت رجلي بالگاع ضايجة من الصار ورجعت للحوش..

گعدت بالصالة انتظرها تهدأ وبهالاثناء طلع علي الكـرار من غرفته يفرك بعيونه، اشر على باب غرفة امي وسأل وبعيونه النوم..

-هاي امي جاي تصيح لو جاي اتحلم؟

-لا ما متحلم هذا صوتها صدگ

-شبيها شصار؟

-حق گاللها اريد اتزوج

-چا واذا؟

-ما رضت بالبت الي يريدها

-حگها چا التشلتح واصل لابو موزة

-كرار روح نام روح

-ماريد انام ضايج رايح اشوف ابوي

-نام ابوي

-چا اروح اشوف تقي

-تقي هم نايم

-چا اروح...

-الكل نايم حبيبي انتَ هم روح حط راسك على المخدة راح تنام

-چا ماعندي حل غير اروح اضوج صابرين مرة مسعود بلچن تطلع من البيت

-ههههههه ولك اگعد راحة شبيك

-احبها واحب اللاشيها

عافني وطلع للساحة، عاينت للمفتاح بيدي وباوعت لغرفة مرة ابوي مادري اروحلها افتح الباب لو اغلس وافتحها الصبح؟ وگفت ببابها دقيقتين افكر وحسمت الموضوع فتحت الباب وطبيت انام يمها بالغرفة واقفلها علينا..

-رسمية: بس هاي العايزة بعد تسجنوني خاطر المسعدة عبق

-يمة وشبيها عبق ليش هيج وياهة

دگت صدرها وجحظت عيونها، ظلت تلطم چم مرة على صدرها وتنوعي وتجر بالحچاية بطور حزين..

-شفته گدامي مشه وبي انتخيت

گتله يا يمة انتظر تانيني

ومن شفت طوله وضحكته شگد بچيت

ونزلت دموعي جمر تچويني

-يمممة اسم الله شني السالفة!

-عاتبته وگتله اذكرك لو نسيت

سهري كله بكل ليالي سنيني

ارد اسأل من بعد حضني غفيت

وبحضن مريتك نمت ناسيني

-استغفر الله يوووم

-ولج گلبي محترگ راح اموووتن

ذبت روحها على الچرباية متخربطة وتلطم على رجليها، گعدت يمها افرك صدرها وعيونها تبچي شگد مقهورة..

-ولج طاووس هذا طاووسنا تاليته ياخذ خدامة عمت عينج يا رسمية لو رضيتي

-يمة العشگ مو عيب ولا حرام وانا اضمنلچ عبق ما عدها شي ويه اخوي

-سممم بگلبج يا سلووى بيوم الجبتيلنا هالنثية وولج اااااااخ شجاني وخليت اخوتچ يشوفوها شجااااني

-يمة كافي راح يوگف گلببچ

-حاچتني سلوى حااچتني گالتلي ام عليي البت حلوة وتجيب التايه لا تطلعيها وتشوفها عيون ولدچ تره تاخذهم بس ما سمعت اناا ما سمعت سودة بوجهيي

-يمة شتاخذ منهم چا زلام طول بعرض ما يعرفون يكضون رواحهم! شعليها عبق؟؟

-اي اي ابقي دافعيلها انتِ ابقيي ما اوصيچ هلهلي ودبچيله بيوم عرسه خاطر اكسرها لرجليچ وعلي

-يعني راح تخطبيها اله مو؟

-طييييف وعلي طيييف هالبت تدوس بيتي وهي چنة

-حرام عليج يمة

-اناا اخلي بت سلوى حالها حال نسوان اخوتچ؟؟ انا؟؟ سودة بوجهيي كون لو سويتها

-خلص خلص اهدي نامي يا حبيبتي مو زين لا يصير بيج شي

-اااخ صار بيه صااار بداهة امير ونهاها حق ااااخ يا يمة

-وشبيها تَـمني انوب!!

-چا شبيي وليدي وياخذ ارملة؟؟ شنااقصه؟؟

-يمة تزوجووا وبعدج تنحوين!

-لا ما انوح احبنها تَـمني خوش بت

-چا شكو بعد

-اي جاي احچي على گبل من چنت اضوج منها بس هسة شحلاتها حبابة

-وعبق حبابة وما عايزها شي

-اششششش اششششش وگررص سكتي وانطمري لا اطمرچ اناا

-يمة ليش تحاچيني هيج والله زعلت

گمت من چربايتها ومثلت زعلانة عليها بس حتى تهدأ وهالشي جاب نتيجة مثل كل مرة، گامتلي حضنتني لصدرها وبوستني تراضيني..

-لا تزعلين عليّ يا بعد امچ والله الضيم كاتلني على اخوتچ

-اخوتي كبار خلي قرارهم بيدهم واختيارهم بيدهم يا يمة لا تضيعين علي الحـق وتخلي ياخذها عناد بينا كلنا ويطلع من البيت تره والله تظلين بحسرته

-اسم الله الزهرة ام الحسن

-والله تره يصير هيج هاا اهاا جاي اشوفن المشهد بعيني حق طالع وكاض ايد عبق ووليد صغيرون يلعب بين رجليهم

-يمممممة

-هاا اهاا ذولة مكيفين وفرحانين وهاي چنها عبق حامل بالثاني اظنها بت

-سكتيي سكتيي فال الله ولا فالچ

-جاي اشوفن انا يمة شعليه

-سكتي خليني افكر شلون احل هالسالفة

-حلها تخطبيله عبق وبسس

-ولج اوووووف يا فشلتي گدام النااس شحچي شگول

-طُززز بالناس اهم شي وليدج فرحان ومتونس ويه مريته

-خدامة!

-خدامة لو شيخة بالحالتين ابنچ راح يخطبها وياخذها وانتِ تعرفين حق لو قفل على شي

-راسه يااابس ابن العوبة

-حشاچ يمة

-نامي نامي رفعتوا ضغطي انتِ واخوج

-يعني راح تخطبيله مو؟؟

-ناامي

-عليج علي جاوبيني

-چااا شبيدي غير اخطبله

-كللللللووووووووووووش كلووووووشششش شايففف خير ومهنى يا راعيهااا ما ينعرف خدها من تراچيهااا

-ولج نامي كافي

-خليني اروح ابشررره

-لا خلي انا من اخطبله افهمه بالسالفة وعبق لا تحاچيها بشي اذا افتهمت عبق تدري يا حبيبة بعلي ما اخطبها

-لا لا ما احچي لاحد فديتج يمة وفديت حنيتج علينا

-غصباً عليّ والله مو برضاتي

-راح تحبيها وراح تعجبج انتِ ما شايفة عبق واخلاق عبق شون مرتبة وبت بيوت

-شايفتها چان ما لفيتها ببيتي

-الحمدلله والله كللش فرحانة فدووة رحتلج

بوستها تبوس وهي تضحك على خبالي، من فرحتي احس طار النوم من عيوني فرحاانة كلش فرحانة وجاي اشوف حياة عبق شلون راح تتغير وترتاح اخيراً.. وفرحت اكثر من طلع ماكو شي بينه وبين سوزان وعبق الي راح تصير چنتنا الجديدة..

الليل كله ظليت افكر بيهم واتذكر من شفته بغرفتها وقافلين الباب، الملاعين يحبون بعض ويمثلون علينا اويليي لو اللزم عبق الا اشبعها عض..

ثاني يوم من الغبشة گعدنا رتبنا البيت وانا امشي واهز من الفرحة وعبق كل شوي تسألني شبيچ واجاوبها..

-فرحانة كللش للامير وتَـمني

-عبق: حتى اني يارب ينسعدون

-يارب يارب يوووووم الالچ عبووق

-حبيبة شبيچ صوتج شعلاته

-ههههه يارب اشوفج عروسة وللصبح اظل اركص بعرسج

ضحكت مستغربة وضربتني على ايدي تسكتني من اجه علي التـقي للمطبخ، راح يصب ماي من البراد وغمزلي وگال..

-طيور الحب شوكت يجون

-حبيبة: بعدهم بالفندق امي كالت على الغده يوصلون

هز راسه يشرب ماي، طبن رهف و سبأ بنات عمي مسعود للمطبخ ووگفن يتچن ظهرهن على المجمدة ساكتات ادري بيهن يضوجن لان ماعدهن وسيلة متعة غير الصفنة لا تلفون ولا تلفزيون بس يتفرجن بالوجوه.. ذبيت الوصلة ووگفت يم علي التـقي مبتسمة..

-حبيبة: وانتَ تقي ما ناوي تفرحنا وتتزوج؟

-ان شاء الله

-رهف: لو نويت تتزوج علينا العروس ابن عمي اخلي سبأ تخطبلك خاف العندك مابيهن خير

اللتفتنا كلنا عليها وسبأ وجهها بهت مصدومة من اختها وليش جابت طاريها بهيج سالفة، ابتسملهن تقي وطلع من المطبخ..

-سبأ: رهففف انتِ ما تستحين شكوو تجيبني بالطاري!

-رهف: چا مو انتِ جاي تخطبين لخوتچ اخطبي لـ تقي هم مو ابن عمچ

-سبأ: رهف لا تظلين تلوصين واحترمي انا اكبر منج!

فرت ايدها رهف مغثوثة وطلعت للساحة بينما سبأ ظلت يمنا وشگد اعتذرت على گباحة اختها وحلفت الا تشتغل ويانه.. خذت الوصلة من ايدي وراحت تجلف بالگاع وتگول..

-والله مستحية منچ حبيبة ومن اخوچ هاي رهف عبن ضايجة وتريد ترجع البيت جاي تسولف كلشي يجي براسها بس هي ماعدها شي وياكم والله وتحبج هواي

-حبيبة: ادري بيها ضايجة وانتن ما راضيات على الگعدة هنا لا تخافين تقي ما راح يزعل منها هو يعزچن

-رحم الله والديكم

ابتسمت ورحت اكمل شغلي وعبق وياي، لمعنا البيت تلمع حتى الحيطان جلفتهن اريد بس يمشي الوكت خاطر يجون امير وتَـمني..

-تالة: تردون مساعدة بنات؟

نزلت تالة من الدرج عطرها يهفهف والمكياج واللبس على اخر حباية، ضحكت عبق وتخصرت رافعة حاجبها..

-لا حبي نريد سلامتج تفضلي تفضلي ليش واكفة وتتعبين، گوليلي تردين چاي گهوة لو عصير برتقال طازج؟

-تالة: فريش اسمه عبق منو بعد يگول طازج اوي

ضحكنا على حركاتها تمثل بيدها عود هي من الطبقة المخملية ونزلت تمشي على اطراف اصابعها وراحت تگعد على القنفة تحط رجل على رجل..

-تالة: احم اريد حليب

-حبيبة: حبي الهايشة بره تنتظرج تحلبيها

-تالة: گعدن راحة ولچن هسة گولولي بشنو اساعدكم

-حبيبة: خلصنا والله بقى بس ننتظر الامير واميرته يجون

-تالة: واحنه كملنا نقل ملابس تَـمني لغرفة الامير

گعدنا ثلاثتنا سوه نسولف وطلعن شمس وابرار من غرفهن وبنات مسعود هم اجن، گعدنا دائرة بالگاع نكرز حب ونحش بالعرس البارحة واجتنا امي رسمية هججتنا رزلتنا رزالة جماعية وطفرتنا كلمن لغرفتها..

**

"تَـمني"

حسيت الصبح تعبانة وكأن ديدگون براسي طبل، مطيت ايدي بفراشي وبالغلط ضربت الامير بوجهه طب اظفري بعيونه..

-ااااااخ

-عزااااا

طفرت من مكاني من شفت روحي بحضنه نايمة، گمت مفزوعة ومفتشلة والاسئلة تدور براسي، غطى امير عيونه بيده متوجع وعاقچ وجهه..

-صباح فگسات العين ست فهاوي

-اني ليش هنا

-شنو

-ليش نايمة هناا ليش.. ليش على الچرباية اني نمت على القنفة شجابني هنا

-تَـمني

-اميرر احجي فهمني اني ليش على الچرباية وليش نازع قميصك وليش حاضنني؟؟

-انتِ لطشتي بيه شسويلج

-نعمم؟؟؟

-گمتي تبجين من وخرتج لزگتي بيه

-مو عيب تكذب!!

-تَـمني انا روحي ما طايقها لا تسويلي تكذب ما تكذب وتتماوعين احجي عدل

-عزاا انوب هو روحه مطايقها

-اششش

-لا تأشأشني!

گام من الچرباية ومط ايده فوگ، ظليت واگفة من الجهة الثانية وافرك بيدي افكر شجابني هنا وليش هيجي وضعنا واحد لازگ بالثاني..

-وين.. وين قميصك

-ما چنت لابس قميص للعلم

-المهمم وين ملابسك

مجاوبني وگام من الچرباية، عدل شعره ولحيته بيده وشال منشفة وراح متوجه للحمام..

-ويننن

-للحمام اسبح لو ما نسبح اليوم؟

-ليش تسبح؟؟؟

-انا كل يوم اسبح الصبح!

-لا.. لا تسبح بس غسل حباب

فر بيده ودخل للحمام وقفل الباب وراه، ركضت ادگ بالباب حيل فتحها وسوالي شكو بيده..

-ليش تقفل الباب؟؟

-چا شون

-لا تقفلها تجيب الشبهات لنفسك!

-تَـمني ترحين لا...

-لا شنو امير؟ يعني اني دايخة وراسي يوجعني وانتَ تهدد بيه مو حرام عليك

-روحي هناك يله خاطر ما تدوخين زايد

عفته ورحت اكعد على القنفة عيوني مفارقته من دخل الحمام لزگت عيوني بالباب متوترة كللش متوترة ودا اچفص واستغبي وياه من التوتر.. طلع من الحمام مغسل وشعره مبلل نشف وجهه وايده وراح للمراية يمشط شعره..

-احجي امير

باوعلي من المراية وذب حسرة يمة غير گلبي وگف، ركضت اوگف بصفه وهزيته من ايده..

-حباب لا تخرعني

-راح احچيلچ بس لا تتسودنين انتِ طلبتي مني

-شطلبت؟؟

-اسولفلج وتعرفين

بلعت ريگي منتظرته، گعد على القنفة واني گعدت على الچرباية وبده يسولفلي.. يحچي واحس بعيوني راح تطلع من وجهي من الصدمة حچالي حچي خبلني..

-اني سويت كل هذاا؟؟؟؟

-اي

-گول والله مدا تكذب

-والله ما جاي اچذب

-وبعدين نمت مو؟

-لا

-لعددد؟؟؟

-لطشتي بيه

-يعني شلون؟؟

ذب نفس وغمض عيونه وكملي السالفة عود اريد اخلف منه طفل حتى ميعوفني، گمت اكل بأظافري من الفشلة.. عصرت عيوني ماكدر اسمع الباقي بس بقى يحجيلي بالتفصيل شنو صار، ردت اموت من گال..

-وانا حرت وماعرفت شلون ارضيچ من اوخر عنچ تبجين ومن اتگرب منچ ماكدر اكض روحي وانتِ يمي ووضعنا معروف.. نَفسي تحكمت بيه وخلتني..

-امير والقراان لو صاير شي البارحة ما اباوع لوجهك بعد وحق الله!!

-ما صار شي لا تموتين!!

-ها؟

-ما اخذ وحدة تكرهني! لو اريد اخذچ! اخذچ وانتِ بكامل عقلچ مو بالحيلة واللعب!!

-امير اني..

-لا امير ولا انتِ، لا تشوفيني متلهف عليج حسبالج انا حيوان واستغلج وانتِ بهالوضع! لو كاتل روحي على هالسالفة چان من زمااان تزوجت وفضيتها!

-اسفة

-لا تعتذرين گومي بدلي خلينا نطلع

-منتريگ؟

فتح عيونه مصدوم مادري بشنو چفصت هالمرة بس يمكن لاني طلبت نتريگ وهو هستوه حچالي شسويت من فضيحة البارحة؟

-اني علمودك تره مو زين يبقى الشيخ جوعان

وهنا بعد ماتحمل وضحك داير وجهه عني يستغفر، ظل يهز براسه وما بطل استغفار، ابتسمت وهمست..

-مو الشيخ هو اسد العشيرة ولازم يبقى متغذي عيب اخذك لاهلك وجهك اصفر

-گولي انتِ جوعانة لا تذبيها براسي

-لا لا علمودك صدگني

-صدگتج

-اي يعني عيب اهلك يحچون عليَّ هسة

-خاف انتِ الراح تسويلي الريوگ عمت عيني؟

-ما اسويلك بس اخذك للمطعم واسويلك واهس تاكل

تنهد وبقى مبتسم، اخذت ملابسي ومكياجي وفتت للحمام اسبح وابدل، لبست فستان اوف وايت وشال نفس اللون حطيته على راسي وشمرته منا ومنا.. مكيجت مكياج ناعم وبرزته بحمرة حمرا وطلعت من الحمام، لگيته مكمل تبديل لابس دشداشة زبدة بيضة وواگف ديلبس ساعته ومحبسه..

-كملت اني

-تمام

رفع عينه يباوعلي ثواني ورفع حاجبه عبالك معاجبه، غلست على نظراته واخذت جنطتي ووگفت بباب الغرفة، اجه يفتح الباب وطلعت قبله للمصعد دسته وانتظرته يوصل..

-الامـير علي: استغفر الله ربي واتوب إليه

-شبيك؟

-اختنگ من الاحمر

-صدك؟

-اي

-ها خطية

-تَـمني؟

-ها

-ما احب الاحمر اتسودن منه

-اي افتهمت امير بعد هذا ذوقك وانتَ حُر

-چا انا ارجع للغرفة ما اگدر انزل للريوگ

-ليش ليش؟

-حاطة احمر وما اتحمله

-قصدك حمرتي؟

-لا حمرة امي تَـمني هذا هم لون رحمة لوالديج!

-هسة تروح من اكل، وصل المصعد خلينا ننزل يلا

-ماروح وعلي

-امييير

-اليوم لو انا لو حمرتج

-حمرتي

-وووولج

-امير شبيك هسة هي حمرة تحمل لخاطري حباب اني احب الاحمر

-تعاي للغرفة شوي دخت

راح قبلي للغرفة يرجع وهرولت وراه شكله صدگ دايخ وتعبان شنو السالفة كله من وره حمرة، دخلنا جوه وهو گعد على القنفة عاصر عيونه، گعدت بصفه قلقة عليه واتسائل..

-امير شنو صارلك ليش هيج دخت؟

-الاحمر.. الاحمرر

-انتَ بس تريدني امسح الحمرة مو؟؟

-مووو

-ما امسحها ماا

-تمسحيها!!

-ما امسحح

-تمسحيها لا امسحها بطريقتي

-امسحها بطريقتك خنشوف لو گدرت!

-تتحديني تَـمني!؟

-اتحداك!!

شهگت فاتحة عيوني من چتف ايدي ولمهن بحضني، صرخت من قرب نفسه عليَّ ودرت وجهي للجهة الثانية عاصرة عيوني..

-لا لااا راح امسحهااا

-يلا مسحيها گدامي

هد ايدي وجرلي كلينسه ينطيني، اخذتها من ايده مبوزة ومزعوجة كللش، مسحت الحمرة من شفايفي وانطيته گفاية مطنگرة..

-هم حمضت

-لعد شنو تخليني امسح الحمرة شنو هالتصرفات امير

-چا اتحسس شنو ترديني اموت؟

-رايحة احط وردي لعد

-لاااا بعلي امسحه بغير شي هالمرة

-هم عندك تحسس من الوردي؟؟

-اي!

-گول اغار وخلصني!

-اي اغار ارتاحيتي؟؟

-زين واذا احط بس ملمع هم گول اغار حتى اتخبل!

-اغار من كلشي يلمس شفافچ تَـمني

-تؤ تؤ هالكلام ممقبول عندي لازم اترتب والناس تشوفني حلوة

-كون الناس تشوفج هايشة بعيونهم بجاه علي

-اميييير كل هذا من وره الغيرة!

-تهي بهي تشوفين هاي غيرة؟ هذا كلان نعل عندي

-الله يستر من غيرتك الحقيقية لعد

گلتها بضحكة طبيعية وانگطع صوتي باهتة من جرني من معصم ايدي يلزگ وجهه بوجهي، بلعت ريگي مرتبكة اباوع لعيونه العصبية ونظرته الي احتدت.. نزل عيونه يباوع لملابسي ورجع رفعهن لعيوني ويدورهن بملامحي يتأملهن، گلبي دگ بعنف من گال..

-انصحچ لا تجربيها.. انا من اغار جهنم تتربع بصدري

حچاهة بنبرة صدگ انسان غيران ومشتعل، توترت وجريت ايدي منه وسحبت الدولكة من الطاولة اصبلي مي اللهي روحي، باوعتله من تحسر ساكت وانتبهت لفكه ينقبض كأنه معصب من شي، نزلت الگلاص من ايدي وگمت من مكاني واني اگول..

-يلا ننزل

رفع عيونه الي وهز راسه اي وگام ويايه، نزلنا للمطعم بس الامير ما حچى كلمة وبمرور الوقت وگعدتنا سوه اكتشفت سبب هدوئه هو لانه ضايج وعبالك ضايج مني وهالشي واضح..

-شبيك

-شبعتي؟

-بس انتِ ما اكلت شي؟

-ما اشتهي

يحچي گوة ويفرك بگصته، القلق غزاني دا اتخيل البارحة صار موقف او حديث بيناتنا يضوج والامير خفاه ما حچه بي..

-امير عندي سؤال

-همم

-برأيك شنو سبب حالتي؟ معقولة اني ونايمة سويت كل هالاشياء بدون لا احس؟

-لا

-لعد؟

-انتِ ما اكلتي شي البارحة بالليل مو صح؟

-اي ما اكلت شي

-ولا شربتي؟

-ولا شربت

-والمطارة الشفتها بالغرفة هاي شنو

-هاا اي تذكرت شربت العصير، خالة رسمية سوتلي عصير برتقال وگالت اشربه خاف اتخربط

-امي مسويته الج؟

-اي هي كالت عصرته بيدي

-امممم

-بشنو دتفكر؟

-لا هيج

-ليش احسك ضايج؟

مجاوبني وسرح بماعونه، ضجت وظليت ساكتة بس طگت روحي وبالاخير زفرت هوا متنرفزة.. رفع عيونه عليَّ وسوالي براسه حركة "شبيچ"..

-انتَ ملاحظ تبادلنا الادوار مو؟؟

-يا ادوار؟

-ادوار الضوجة! اني الي لازم اضوج منك وازعل مو انتَ!!

-من شنو تزعلين ليش انا شمسوي

-ابد بس البارحة فكرت بشغلات مو حلوة بيه وردت تتقرب مني!

-بس ما سويتها!

-بس فكرت!!

-چا حتى على التفكير نتحاسب؟؟

-ليش گتلي فكرت بيه هيج؟ راح تخليني اتوتر منك!

-تَـمني شسالفة هاي لان جنت صريح وياچ وحچيتلج كلشي ما يعجبچ؟ ثانياً أي زلمة طبيعي وتتقرب منه حرمة الشيطان يوسوسله وتجيله افكار هاي طبيعة البشر ما عليها چنتي انتِ لو غيرج چا ليش الله سبحانه ما يرضى الرجال يختلي ويه مرة وحدهم!

-اي بس..

-لا بس ولا شي انسي الصار البارحة واقسملچ قَسَم ازين شاربي لو عدتها بدون رضاچ

سكتت بدون لا ازيد النقاش وصعدنا فوگ نحضر اغراضنا حتى نرجع لبيت اهله، الطريق كله هادئ واكرر هدوئه ابد ما احسه بسبب نقاشنا بالمطعم عبالك اكو شي ثاني بباله..

وصلنا لبيت شيخ علي واستقبلونا بالهلاهل والترحيب الحار، ذبحوا جوه رجلي خروفين وجوه رجلين امير هم.. تسالميت ويه خالتي وتالة وام امير وكل البنات ما اعرف منو ديحجي ويايه ومنو ديباركلي من الهوسة الكل جاي العمات ونسوان العمام وبناتهم وفراقد وبنتها البيت مزدحم بالناس..

دخلنا للصالة شفنا شيخ علي گاعد على كرسي متحرك ورافع ايده، هرول عليه الامير بوسه وحضنه باركلنا بصوت ناصي واني بست راسه ورديتله المباركة..

-فراقد: بنيات ما تگعدن شمالچن تعبنا

-رسمية: تفضلوا خية محتاجات عزيمة

-فراقد: يلا فضوها صبوا الغدة متنا جوع

-حبيبة: بعد وكت خالة بالدعش هستوها

-فراقد: شني جايبينا تذلونا انتم؟؟

-غزوة: ما عاش اليذلج گومن صبن الغده

-فراقد: ما دام السوسة حچت ماريد بعد

-غزوة: انا سوسة؟؟؟

عوجت حلگها فراقد معاحبها، ضميت ضحكتي ونزلت راسي لا انفضح بس دائماً يضحكني هالثنين، بالعادة فراقد متحجي بـ كرهها لـ غزوة بس نظراتها تسولف شگد تموت منها مادري شعجب هالمرة بسمرتها..

گعدت بصفي خالتي قلقة ولزمت ايدي تسولف ويايه على البارحة، اشرتلها بيدي كلشي تمام ياله ارتاحت وجرت نفس..

-غزوة: سكتنن الشيخ جاي يحچي.. شني كلت خوية ما سمعتك؟

-شيخ علي: صـ.. صباحيتها

-رسمية: اي اي صار

راحت خالة رسمية لغرفتها گوة تمشي رجليها يوجعنها وطلعت من الغرفة بيدها علبة مقدفة، اجتلي وبوستني مرة ثانية وهمست بأذني..

-منتظرين الولد توتة

ابتسمت بدون جواب، وخرت عني شوية وفتحت العلبة گدامي طلعت منها سوار چف مال ايد سمتها "شباحية" يجنن يغطي الايد كلها يضمها ضم، اخذت ايدي لبستني وهلهلت والبنات يهلهلن وياهة..

-رسمية: مباررك يا بعد روحي هاي صباحية الشيخ لچنته

-حنين: الله يحفظه ويشافي ان شاء الله

تشكرت من خالة وردت اگعد والامير لزم ايدي يأشرلي بعيونه "بعد اكو گومي" استحيت من الموقف لان دتجي بأتجاهي عمتهم زهرة واني لبستها وگعدت شگد فشلة..

سلمت عليَّ عمتهم زهرة ولبستني محبس ذهب، اجت وراهة عمتهم ابتسام ولبستني سوار ووراهة اجت غزوة لبستني هم سوار.. من الخجل ماعرف شجاوبهم الامير يحچي نيابة عني ويگوللهم تزحموا ويتشكر منهم وهنه وگعن بي دگ بوس وكل الي تسلم عليه تغمزله وتگول..

-ننتظر الوليد

-الامـير علي: ان شاء الله عمة

باوعت للامير بمعنى اگعد لو اكو بعد؟ ضحك ونزل يهمس بأذني..

-چنچ طالبة العالم بطلابة شبيچ

-مو ماريد اتفشل

-بعد بعد اكو اخوتي

هزيت راسي وهو ابتسم لعلي الدر من بوسه وحط بجيبه فلوس، ما قبل الامير ياخذها بس در ما انطاه مجال واجه بدر وعاد نفس الحركة وهيج مشت لبقية الاخوان، تقي وراه ابا الحسن وراه علي الحـق وعلي الكرار.. سور ونور گالو مفلسين يموتون ضحك وگفوا بنص الصالة يدبچوله عود هاي هديتهم..

-الامـير علي: ههههه لعنة الله على ابليسكم والله تزحمتوا وماكو لزوم للهدايا وجودكم كافي

-علي الدر: يوم الولد الصالح حبيبي تستاهل كل خير

توترت من گدما كرروا سالفة الاطفال ونسوان عمامه هم لحن هووايه من سلمن عليَّ انحرجت من مرة عمهم صمد سألتني على البارحة گدام امير! هيج بدون خجل ولا حياء، صفنت بوجهها ماتحملت غمزاتها وحركاتها كلش لعبت نفسي ولولا الامير جارني من ايدي وترخص من مرة عمه عود يريدني چان رديتها..

-تَـمني: شبيها هاي!

-الامـير علي: لا تجاوبين هيج اسئلة عوفيهن

-تره هي حرجتني وتسويلي حركات بيدها!

باوعلي كوة لازم ضحكته انوب اني شفته هيج وطگيتها بضحكة، خزرني حتى اسكت بس مدا اگدر شكله يضحك من لازم ضحكته ويخزر بيه..

-رسمية: ضحكة خيير ان شاء الله حبيبتي ضحكة خيير

-الامـير علي: يمة نوومه فرحانة بأستقبالكم جاي تگلي اهلك هواي متكلفين

-تَـمني بهمس: ليش تكذب يمته گلت؟

گرصني بخفة حتى اسكت ورجعتله الگرصة، رجع گرصني ورجعتها اله.. هم گرصني ورجعت اريد اگرصه ولزم ايدي حيل يعصرها بين ايده واللتفت يباوعلي ابتسم وحچه بين سنونه..

-لا تفشلينا بعدين نكمل بعدين..

-ايدي اووي

-مرة عمهم صمد: هاا هاا عيني شنو هاي الحركات ههههههه

ضحك الكل وياهة رغم ميدرون شكو بس هاي المرة ولا حبيتها غثة، انطاهة امير نظرة وشگد اضوج من هاي نظرته يلزگها بوجه الميعجبه وميطيق تصرفاته.. فوراً سكتت مرة عمه اخيراً..

وره الصلاة مباشرة فرشوا السفرة وتغدينا ما اشتهي اكل والاكل كله ثريد وما احبه اني بس انحرجت منهم كل شوية واحد حاط شي گدامي والا تاكلين..

كملنا غده وگامن البنات يغسلن المواعين والولد كلمن طلع لشغله بقى بس الامير، كلما اريد اصعد فوگ عماتهم ميقبلن يردن يشوفني بعد..

-فراقد: چا ما شفنا هدية العريس لصباحية عروسته

حچتها بحاجب مرفوع غلس الامير عود ما سمعها وهي هم ما عادتها، شربنا چاي وبعد طفيت عيوني گوة فاتحتهم ترخص الامير منهم وگال احنه نروح نرتاح ولزمني من ايدي واخذني وياه وكذلك رگعونا بهلهولة من صعدنا الدرج سوه..

-تَـمني بضحك: هواي صرفن هلاهل

صعدنا سوه ومن وصلنا للطابق الثاني هديت ايده اريد اروح لغرفتي وصاح اسمي مستغرب وعاكد حاجبه..

-تَـمني وين رايحة؟

-اريد انام شوية

-چا شعندج هناك

-غير غـ...

-غرفتج يمي بعد يلا

-هاا؟

سحلني من ايدي لغرفته، خجلت كللش ورجليه جمدت متتحرك گوة عليَّ دخلت بس بسرعة راح مني الخجل من شفتهم ناصبين الغرفة الجديدة الي اختاريتها من طلعنا نجهز، دورت عيوني بالمكان مسوي بيها هوايه تعديلات ومشتري اثاث حلو.. تيبل لامب بالزاوية چبير يشبه لون الغرفة والستائر تول وكيبور مرتبات والزولية هم تجنن.. المفاجأة الثانية هي من فتحت كنتوري وشفتهم ناقلين ملابسي بي..

-تَـمني: شوكت سووا كل هذا؟

-هدومچ اليوم الصبح جابوهن بس الغرفة صارلها يومين منصوبة

افتريت بيها واكو فرحة بگلبي، فرحة ماعرف شنو سببها بس كلش جو الغرفة مريح واللوانها تهدأ الاعصاب.. مختارتها اللوان الاوف وايت والجوزي وهي شوية ضخمة بس گاعدة عدل بغرفة امير لان اصلاً غرفته چبيرة..

-عجبتچ؟

-كلش تعبان بيها عاشت ايدك

-تحمست زايد وردت اجيب بوفية بعد واخوتي نصبوا عليّ

-هههههههه بوفية هاي اليحطون بيها فرفوري واكواب؟

ضحك وهز راسه اي، ابتسمت وگعدت على الچرباية اتلمس الفرشة الاوف وايت الحاطيها، ذواقين بيت شيخ علي وهذا احلى شي بيهم يهتمون بالتفاصيل ومرتبين كلش وذوقهم نازك مو اوڤر..

-تنامين شوي؟ لان عازمينه على العشا بيت عمي مرتضى

-ابو منتصر مو ميت؟

-اي بس منتصر موجود بمچان ابوه

هزيت راسي اي واخذت ملابس وفتت للحمام ابدل، طلعت لگيته مظلم الغرفة ونايم على الچرباية بدشداشته ما غيرها.. استحيت انام بصفه ورحت اتمدد على القنفة الموجودة بالغرفة بس حطيت راسي عليها رحت لسابع حلم..

عگدت حاجبي من حسيت على ايد تصير جوه راسي وايد ثانية جوه رجلي كأنه يريد يشيلني، فتحت عيوني على كيف اشوف منو وانتفضت اصرخ من شفته عاصف!!

-هددددنيييي هدنيييييييي

-تَـمني.. تَـمني!!

-هدنننني شترررريد منيييي هدننييي اميييييير اميييييييييير

-انا امييير اناا هناا تَـمني گعدي انتِ نااايمة

-امييييير ليششش رحت اميييير

-گعدددي بوية انا هناا انا الاميرر تَـمني فتحيي عيوونچ

فزيت على راشديات تضرب وجهي، شهگت ميتة خوف من شفت الامير گاعد على ركباته بصفي ولازم ايدي.. حضنته من رگبته وبچيت مفرفحة روحي رايحة وجسمي كله مسنح من الخرعة..

-اسم الله بسم الله الرحمن الرحيم شبيچ ابوية

-ليش عفتني ورحت ليش

-ما رحت وعلي نايم على الچرباية ما طلعت من الغرفة

-خفت.. خفت

-حلم هذا حلم لا تخافين

بچيت على كتفه وسندت راسي عليه، نهضني يشيلني على حطتنا ثبت ايد جو رجليه والايد الثانية جوه راسي ما وخرني عنه واخذني للچرباية، نيمني بحضنه وجر اللحاف يغطينا.. منتبهت على روحي مشددة على ياخة دشداشته الا من هو شال ايدي عنه وحضنها بين ايده..

-بسم الله الرحمن الرحيم ، قل اعوذ برب الفلق ، من شر ما خلق ، ومن شر غاسق اذا وقب ، ومن شر النفاثات في العقد ، ومن شر حاسدٍ اذا حسد ، بسم الله الرحمن الرحيم....

اسمعه ظل يقرا هوايه ايات قرانية على راسي الى ان غفيت مرة ثانية.. حسيت من جديد وانتبهت لوضعي ساندة راسي على صدره وهو هم نايم، وخرت عنه بسرعة منحرجة وگمت للحمام اغسل وجهي وتوضيت..

باوعت لروحي بالمراية بعدها الرجفة بعظامي خايفة، شفت عاصف والله شفته وحسيت بلمسة ايده على جسمي وانفاسه تضرب وجهي چان يريد يشيلني من القنفة.. تعوذت من الشيطان وغسلت وجهي كم مرة الى ان هدأت وطلعت من الحمام، شفت امير هستوه گعد..

-شلون صرتي

حچاهة بصوت كله نوم ومطى ايده، هزيت راسي احسن وگعدت على القنفة اباوعله وهو يمغط نفسه، گعد على حيله يعدل شعره ودار نفسه الي..

-تگدرين تسولفين الصار؟

-اي

-احچيلي

-شفت عاصف

-ابن عمي مسعود؟!

-اي.. عاصف چان ديريد يشيلني من القنفة

فز يوگف بمكانه عاگد حاجبه، تقدم يوگف گبالي ضبط وحرك راسه نافي ويگول بعصبية مكتومة..

-حلم هذا.. چنتي تتحلمين مو حقيقة

-بس حسيته حقيقة حتى انفاسه حسيت بيـ...

-صلي على محمد يمعوودة صلي على محمددد

-اللهم صل على محمد بس والله حسيت...

فزيت من هرول عليَّ وسد حلگي بيده، فتحت عيوني مستغربة تصرفه واستغربت اكثر من باس خدي وراسي وظل يكرر..

-حلم هذا حلم لا تفكرين بي زايد يولي حلم

هزيت راسي اي ووخرت ايده عن حلگي، درت وجهي اباوعله ياا هذا شبي؟ هسة هو حلم صدگ چذب..

-تَـمني: تره حلم چان مو حقيقة

-اييي حلم

-لعد شبيك راح تموت

-شكوو تحلمين بذاك القندرة؟؟ شمعنى الا بي!!

-صراحة حتى اني مصدومة شكو احلم بذاك المزعج

-انسي الحلم وبعد لا تفكرين بي ابدد

-عود اشوف

-تَـمني!!

-هههههههههههههههه امير والله موتتني ضحك واني مالي خلگ عود صدگ تحجي انتَ؟

-صدك احجي بشني؟؟

-دترجف امير! لهدرجة تقار ابو القيرة؟؟

-يا غيرة ياا صخام سكتي

-هههههههههههه والله تصير كيوت من تغار

باوعلي بنظرة ابد مو كيوت بلعت ضحكتي وگمت من القنفة، فتحت كنتوري طلعت ملابس حتى ابدل وهو بعده گاعد على القنفة ما گام..

-لا تظل تفكر بالحلم شيخي

-خ** على الحلم

-هههههههههه

-ضحكي ضحكيي انا اعلمج الفاهية

-ههههههههه والله العظيم لطيف انتَ

-تحلم بنعال وقندرة چا ما تحلمين بيه لو ابزز انا؟؟!

-ههههه اي تبزز

-روحي بدلي طلعتيهاا لروحي رووحي

-سلامة روحك شيخ المستقبل اموري العلاوي

گام يريد يجيني وفلتت للحمام ابدل واتذكر شكله واموت ضحك، كملت وطلعت من الحمام ما لگيته بالغرفة، مديت چرچف بالكاع لان ماعرف وين المصلاية حاطيها وصليت صلاة المغرب، كملت وحضرت جنطتي اليدوية ونزلت جوه شفت الكل جاهز..

-تالة: گلت اليوم متنزل

-تَـمني: لا مو معزومين

-تالة: شلونها غرفتج الجديدة؟

-تجنن واسعة وحلوة كلش

-تالة بغمزة: وشلونه ابو الغرفة

-تَـمني: ههههههههههههههه ههههههههههههه

-حبيبة: ضحكة خير ان شاء الله

طلعت من المطبخ وعبق وياهة ثنينهن مبتسمات، سيطرت على ضحكتي وما بلغتهن الصار فوگ احس فشلة..

-تَـمني: عبق ليش ممبدلة؟

-عبق: اني ماروح لعزيمة منتصر

-تَـمني: ليش ولج!

-عبق: اريد ادرس اخاف ما اللحگ بنات

-حبيبة: جاي اگلج تلحگين شينرادله السادس لا تعظميها

-عبق: أخاف اخاف اريد اقرا عوفوني

-تالة: عوفيها حبيبة مراح ترتاح الا تدرس

-تَـمني: هلوو عينيي معرفتچ ست تالة؟

-تالة: احم احم مو محسوبتج صارت طالبة جامعية

-تَـمني: كذاابة طلعت القبولات؟؟؟

-تالة: اييي اييي الحمدلله

-تَـمني: اوكفي ليش انتِ قدمتي اصلاً؟ هاي شوكت؟

-وين نايمة انتِ لخاطر الله

-المهم يا كلية طلعتلج؟

-تالة: كلية علوم

باركنالها كلنا فرحانات بالنتيجة وعبق ترخصت وصعدت فوگ بينما الباقيات احنه كلنا طلعنا منتظرينا الزلم بالسيارات، توقعت راح نروح لبيت منتصر مچنت اعرفه عازمنا على بستانهم..

الاجواء تجنن والجو يخبل والنفوس طيبة، اللتمينا البنات سوه ورفل اقربهن الي ظلينا نسولف محاسين برواحنا الا من اجت حبيبة وگالت صار العشا.. رحنا نگعد وياهن على السفرة زلم وحد ونسوان وحد وگعدنا ناكل..

صارت گعدتي بصف سبأ من اليمين ورفل من اليسار، كل ثنين ثلاثة يسولفون سوه وياكلون من نفس السمچة الا سبأ مسمعت صوتها ولا سمعتلها هسس.. درت وجهي اباوعلها مبتسمة تاكل على كيفها ومبينة كلش خجلانة متقبل تمد ايدها على شي الا حبيبة تنطيها..

-تَـمني: تحبين اللحم سبأ؟ هاچ اخذي مالتي اني مو كلش وياه

-سبأ: لا سودة عليَّ حبيبتي بالعافية انا ماريدن

-لا حبي اخذي والله تره يبقى

ابتسمت واخذته مني وگعدت تاكل منه شبيه دمعت مقهورة مادري بس يمكن بسبب ملامحها وبشرتها السمرة التعبانة، سبأ بنية مبينة بسيطة ومتعوبة كللش، ملامحها عادية مابيها شي مميز وخطية ضربات الشمس مبينة بوجهها وتصبغات صاير عدها قوية.. انقهرت وتأثرت من امها اكثر من مرة صاحتلها "الجگمة" وواضح هالكلمة مأثرة بنفسيتها..

معاملة امها ويه رهف تختلف كلش عن سبأ، رغم رهف مجاية اليوم بس ما نزل اسمها من لسان صابرين.. رهف مدللة وكلش مهتمين بيها وما انكر البنية حلوة ومملوحة قوية و لسانها طويل وعدها حركات تجذب عكس سبأ.. بس من سولفت ويه سبأ هالليلة عرفت شگد الشكل مو مهم المهم الجوهر والقلب الطيب واللسان الحلو..

-تَـمني: گلتيلي عمرج 26 سنة؟

-سبأ: اي اظن لو 26 لو 28

-تَـمني: شگد مواليدج بالضبط؟

-سبأ: مو انا ماعرف لان كلما اگول عمري كذا ابوي يچذبني ويگول لا

-هاا

-وانتِ شكد عمرج؟

-اني راح ادخل الـ 19 بعد كم يوم

-بعد طولي شحلاتج

-هههه يعمري والله انتِ الحلوة

ابتسمت ونزلت راسها، كملنا عشا وگعدنا على جهة من البستان اني وياهة حسيتها تريد تحجي ويايه بعد بس تخجل لان ظلت كل شوية تفتح حلگها تريد تسولف وتسكت من يعبر من عدنا احد فـ قررت اني ابدي وياهة الحديث..

-تَـمني: شلون تقضين يومچ سبأ؟

-سبأ: ما اسوي شي مهم

-يعني شنو تحبين تسوي اكثر شي

-اكثر شي احبن اطلع للبستان واطبش بالنهر من يطلعون اخوتي

حچتها وعيونها تلمع بحماس، ابتسمت وهزيت راسي اأيدها..

-صدگ احسها وناسة بيت عمو علي هم عدهم بستان بس منطلع هوايه خالة رسمية متقبل

-اي ما ترضى عبن اخوتي يخبثون

-شلون يعني؟

-اخوتي شرانيين وهواي يخبثون ويه وليداتكم الله يحفظهم ما يحبوهم ويغارون منهم

-بس اكيد اكو سبب ميصير الكره من عبث

بلعت ريگها وباوعت منا ومنا، تقربت مني وهمست وهي تفرك بيدها المجرحة..

-السبب كله من فراقد هي راس البلا

-معقولة

-وعلي.. هي الفرقت بين الاخوان هي ما تحب لا ابوي ولا شيخ علي وتريدلهم السوء ثنينهم

-سبأ فراقد هوايه تجي لبيت عمو علي ماتوقع تكرهه؟

-چذابة تعلميني بيها فراقد ام البلاوي بس الكل مخدوع بيها

صفنت افكر بكلامها ومادري بي صدگ لو كذب بس سبأ تحجي بدون لا تحرك بيدها وچانت كلش حذرة بكلماتها، صدمتني من اردفت بخفوت..

-بسبب فراقد مات اخوي!

-عندج اخو ميت؟

نزلت دمعتها ومسحتها بسرعة، بلعت غصتها وهزت راسها تگول..

-اي سودة بوجهي اخوي ليث حنين اخوته.. چان يفگدنا ويخاف عليّ انا ورهف من الهوا الطاير بس معروف الموت ما ياخذ بس الزينين

-لا اعتراض على حكم الله حبيبتي بعد امر الله هذا

-امر الله اي بس فراقد السبب! هي الشعلت النار بالبيت وقفلت الباب على ليث وهو نايم!!

-يمممة

-حرگت گلوبنا گبل لا تحرگه بمچانه

-ليشش هيج سوت؟؟

-مادري ما نعرف السبب وماكو لزمة عليها بت اخوي الصغيرة تگول شافت فراقد تطلع من البستان بيوم الحادثة وحچت لابوي.. صارت گعدة يردون ياخذون حگ ليث وابوي قسم يذبح فراقد بيده ويشرب من دمها

-وتالي شصار؟؟

-صارت الگعدة وشيخ علي وگف ويه ابوي طول بس بنص الگعدة طبت عليهم فراقد تلطم وشگت زيجها گدام الزلم تحلف وتقسم هي مالها شغل ومو هي الحرگت البيت

-صدگوها اكيد مو

-مو بساع اجت گوامة طرف عشيرة ثانية و..

-شنو گوامة؟

-يتدخل طرف ثالث يحل المشكلة ويكون محضر خير، المهم اجوا وشيخهم بنفسه حچه ويه فراقد وابنها فرقد وشرحتله الصار وقسمت بروح ابنها وبنيتها هي ما حرگت شي وما تدري يمته شبت النار

-اي؟؟

-من شافتهم ما مصدگيهة استسلمت وراحت جابت سچينة وحطتها بيد ابوي وگلتله اذبحني بس تخش بخطيتي انا گرابتك وعرضك وتعرفني مظلومة اكتلني وخلي الدنيا كلها تگول ذبح اخته وهي مظلومة

-شلون موقف يا الله!

-ابوي تسودن وشيخ علي تدخل والسالفة هاي طولت چم سنة همه عداوة وابوي فلا برد نار گلبه على وليده بس عمي علي ما گدر يعوف فراقد اكثر خصوصاً من مات زلمتها وبقت وحيدة ويه ويلادها اجته نخته بصفته شيخ وهو تولاها

-وابوج حقد على شيخ علي مو!

-حقد اي بس مو هذا السبب الرئيسي لحقدهم اكو هواي سوالف ثانية

-شكلچ تكرهين فراقد سبأ

-اكرهها واشوف دم سنوني ولا اشوفها! ويا تَـمني احذرچ لو صارتلج مشكلة لو وگعتي بمصيبة بدنيتچ عرفي فراقد وراهة!!

-ليش تحذريني وتخافين عليَّ؟

-لانچ تعودين لـ حبيبة وانا احبن حبيبة

سكتت بسرعة ونزلت راسها تفرك بيدها من عبر من عدنا علي التـقي، ما انتبه لوجودنا لان صاير گدامنا كراسي واحنه گاعدات وراهن على الثيلة.. گعد هو على الكراسي مقابيلنا بس مبين باله سارح كلش ولا لمحنا، طلع جكارة من جيبه وگعد يدخن..

گمنا اني وسبأ نظهر نفسنا، اللتفت علينا يشوف منو وابتسم ابتسامة باهتة عكس عادته خو سبأ ما باوعلها اصلاً ولا عبرها..

-تَـمني: شلونك تقي

-علي التـقي: هلا بيج خوية

-تَـمني: چنه گاعدات وراك هنا بس منتبهت انتَ

ابتسم وهز راسه اي، ترخصت سبأ تركض بعيد واني هم ترخصت منه وردت اروح ورجعني صوته..

-انتبهي تَـمني

-شنو؟

-انتبهي المن تماشين لا تطوخين علاقتج ببنات مسعود

-متحبوهن انتو

-ماعدنا شي ويه البنيات بس ما نثق بيهن نخاف لا يوصلن حچي بيتنا لاخوانهن

-ماتوقع سبأ هيج

-شمعنى؟

-لانها لطيفة ومبين هي تكره اخوانها ومتطيقهم

-كلشي جايز

-اي

-عبق ليش ما اجت؟

-گالت تريد تدرس ماعدها وقت

-هي ماعدها خصوصي مو؟

-لا ماعدها

-ولا جهاز تكدر تقرا عليه؟

-لا خطية كلشي ماعدها على الملازم تقرا

-همم.. تگدرين تساعديني بشي؟

-شنو گول

عكست عينه ورايه كأن اجه احد، اللتفت اشوف واذا اللگاه الامير جاي بأتجاهنا رجع تقي عيونه عليَّ وگال بنبرة سريعة..

-اشتريتلها ايباد واريدج تاخذي الها علساس انتِ جبتي ابد لا تجيبين طاريي بشي اذا ما رضت تاخذه لحي عليها لحدما تاخذه، عفته الج بغرفتي على الميز عود اخذي من ترجعون لان انا اليوم اطلع واجب ما اجي وياكم

سكت بسرعة وحط الجكارة بين شفايفه يدخنها ويه ما وگف امير بصفي، باوع بيني وبين تقي وگال مستغرب..

-منتصر جاب نراگيل وحلويات تعال ليش گاعد هنا وحيدك؟

-علي التـقي: عافيات انا طالع واجب

-هسة؟

-اي ارجع للبيت اخذ اغراضي واطلع هم ياله اوصل گبل الفجر

هز راسه امير وودع اخوه، طلع تقي وره ما ودع الكل واني مشيت ويه الامير ارجعلهم جوه..

-شتاخذين من غرفته؟!

-شنو

-تقي عافلچ شي بغرفته شنو هو

-هاا لا هيج هاي

-اي شنو هو الهيج؟

ضحكت وخفيت ضحكتي هسة ليش اضحك من يحجي هيج مادري شكد سخيفة اني يربي، اللتفتت اباوعله وگلت بدون لف ودوران..

-تقي جايب ايباد لـ عبق ورادتي اخذه الها على اساس اني المشتريته

-لـ عبق؟!

-اي هوايه مهتملها اخوك

-خير ان شاء الله

-اكييد خير

-المهم لا تگعدون وحدكم بعد

-ها؟

باوعلي بنظرات جامدة، عدت تساؤلي عليه ووگفني بنص الطريق وحدنا الدنيا ظلمة وصوت الليل يدوي، جرني من ايدي وقربني منه وعاد بهدوء..

-لا تگعدين ويه واحد من اخوتي وحدكم تَـمني

-بس احنه مسوينه شي؟

-ادري بس لا تعيديها خاطر ما يسمموني بحچاية ويخلوني اغرد

-اكو احد حچه عليَّ گدامك؟؟

-اي

-منو حچى؟

-شعليج انا حليت السالفة لا تهتمين بس انتبهي مرة ثانية نوومه

-امير مچنت اعرف ممقبول عدكم احچي ويه اخوتك تفاجأت

-احچي طبيعي بس لا تگعدون وحيدكم بمكان اذا تحتاجين شغلة ضرورية منهم گليلي انا لو حبيبة نجي وياچ

-تمام.. شكراً لان فهمتني

-جسر للطيبين

ابتسمت وتركته اروح ووگفني مرة ثانية من سحبني من خصري هالمرة، سرت قشعريرة قوية بجسمي وبحركة لا ارادية درت وجهي عنه مستحية صديته.. ماتنبهت بهاي حركتي زعجته وشعلت بي نار رادت تحرگني لانه ما بيّن على وجهه وحررني من ايده بسرعة ورجع يبتعد خطوة ليوره..

-تَـمني: اخاف احد يشوفنا

گلتها كـ تبرير لردة فعلي الغبية بس مجاوبني عليها مجرد حرك راسه يوافقني، طلع من جيب دشداشته النيلي علبة سودة وقدمها الي..

-ردت انطيچ صباحيتج

-جبتلي هدية؟

-ما صارت فرصة انطيچ الصبح غفيت گبل لا تطلعين من الحمام بدون لا احس

-اممم خاف جبتها وره مسمعتك حچاية فراقد

ابتسم وضاقت عيونه، ضحكت على شكله مينمل وجهه من يبتسم، حرك راسه بـ لا وگال..

-لا والله مشتريها من يومين والوصل يثبت.. فتحيها شوفي

اخذتها من ايده خجلانة ومتحمسة اشوف محتواها، فتحت العلبة وكبرت ابتسامتي من شفتهن گلادة وتراچي نفس موديل بعض وبيهن كرستالة لونها ابيض ضايفة لمسة حلوة للذهب..

-عجبچ؟

-كللش حلوات شكراً امير شگد ذواق انتَ

اخذها من ايدي عرفته يريد يلبسهن الي، لفت انطي ظهري حتى يلبسني الگلادة قصيرة شلون الخناگي بس شوية راهية متخنگ، لبسني ووخر الشال من اذني يلبسني التراچي..

-تستاهليهن

عجزت اجاوب ماعرفت شنو ارد عليه، الخجل حاوطني ووجهي اشتعل من تقرب وباس خدي بوسة بريئة، مادري شبيه وشصارلي ووگفت على اطراف اصابعي وكمشت بدشداشته ارجعله البوسة على خده، غمض عيونه يضحك ووخر مني يگول بجزع..

-اشتعلنا يا وليان

-مادري.. مادري ليش هيج سويت

-چثريهن خايبة شبيچ

-لا ما اكثر شي اسكت عيب

-انتِ لو طخة لو اكسر مخه

-لا لا بس.. بس هاي يمكن اثار سحر المحبة

-ههههههههههههههههههههههههه

توترت من ضحكته ودفعته وركضت ارجع جوه، متنددمة كللش لان بسته مادري شبيه شگد فشلة شبيه استخفيت وياه تَـمني لا ياخذج الواهس گعدددي وسكتي!!

**

"عـــبق"

ملزمة الاحياء گبالي گاعدة وادرخ بالتعاريف من طلعوا لحد هسة صارت بـ 12 اني ما طلعت من المخزن، بقوا بالبيت شيخ علي و خالة رسمية ورهف بالاستقبال بطنها توجعها وما راحت وياهم همزين بقن ذني الثنين عاد زينات ويايه..

سمعت طگطگة بالصالة الفوگ توقعتهم رجعوا، گمت فتحت باب المخزن اشوف منو وبسرعة سديت الباب ورجعت جوه من لگيته علي التـقي، حطيت ايدي على گلبي ويه ضحكته وسمعته يدردم عليَّ.. لا ارادي ابتسمت على نبرة صوته..

-علي التـقي: چنها بزون هالبت ما راح ناكلچ تره

ضميت حلگي بيدي اضحك صدگ كلامه كلما اشوفه اعيد نفس الحركة، افز مخترعة واشرد ارجع منين ما اجيت بس والله تصير لا ارادي ما اتقصد..

-علي التـقي: تگدرين تسويلي چاي دكتورة؟

دگ باب المخزن وهو يگولها، كبرت ابتسامتي وركضت حطيت ربطة على راسي وفتحت الباب، مجاوبته بكلمات بس هزيتله براسي اي ونزلت الدرج بوجهي للمطبخ..

حطيت قوري الچاي على النار ورحت للفرن اطلع كيكة العصر گصيتله قطعة وحطيتها بماعون وادري بي يحب الحلو كلش فـ جبت نوتيلا حطيتها فوگ الكيكة..

-عليييي شون دلال هذا

ضحكت من دخل للمطبخ وهو يگولها ويباوع للماعون، رحت اجيبله استكان وترسته شكر مثلما يحب، صفگ بيده وگال..

-تريد تكتلني الدكتورة عاشت ايدج

-لا اسم الله شنو اكتلك بس انتَ مو تحب الچاي حالي؟

-صح

ارتبكت خطوتي من تقرب يوگف بصفي كلش ومد ايده ياخذ الاستكان، رجعت خطوة وره ورفعت عيوني عليه وبنفس اللحظة هو نزل عيونه بدون لا يركز بيه چان يباوع لايدي الترجف..

-علي التـقي: يمكن الوقت مو مناسب حتى احچي وياچ بهيج موضوع واحنه وحدنا هنا بس..

گلبي راح يوگف بأي ثانية، بلعت ريگي ناشف كلش واحس بشي مو طبيعي ديصير.. شعور مخيف مخالط بالارتياح ماعرف شلون اشرح بس دائماً ماعرف اشرح شعوري من اكون واگفة ويه تقي، وگف گلبي من اردف..

-يجوز راح تكرهيني بس ماگدر مـ...

-تقي بعدك هنا؟؟

اللتفت ويه صوت امه الدخلت للمطبخ، ركضت ابتعد اوگف بصف السنك وحطيت ايدي على گلبي اتنفس بسرعة جنونية والتوتر يقرا عندي مليون..

-علي التـقي: اي يمة گلت اشرب استكان چاي واطلع

-مودع يا روح امك انتبه على نفسك وليداتي

-بعيني

-اقرا اية الكرسي للحفظ واول ما توصل دگ عليَّ لا تخليني خايفة عليك

-صار بعيني

-چا يلا اگعد اشرب چايك انا اصبلك بيدي

گعد على الكرسي وخالة رسمية صبتله الچاي، اخذته اله وگعدت بصفه تسولف وياه واني من گدما مرتبكة لزكت بالسنك همزين عاد اكو كم ماعون وگفت اغسلهن..

-رسمية: شلون چانت العزيمة؟

-حلوة فاتتكم انتِ وعبق

درت بس وجهي وابتسمت ممتنة لانه افتقدني، درت عيني على رسمية شفت شكلها مو مثل كل مرة هالمرة بوزت ودارت وجهها عني معاجبها..

-رسمية: بقيت ويه ابوك مو مال اعوفه وحده

-شلون صار ابوي؟

-كلش تعبان ابوك تقي كلش

-شبي؟؟ مو كال الدكتور وضعه احسن؟

-ما اظن.. اليوم راد الامير خاطر يوصي

-دخيل علي صدگ تحجين يوم؟؟

-اي والله بس انا ما رضيت وما بلغت اخوك ما ردت تنكسر فرحته بعرسه

-لا يوم شني تنكسر فرحته هالسالفة ما تتأجل چان لازم تحاچين الامير

-مو...

قلقت من نبرة صوتها واذني تعلگت وياهم، سألها تقي شبيها وشنو الخافيته ومن لح عليها ياله گالت بصوت يرجف مكسورة..

-ما يريد الامير يستلم المشيخة من بعده

شهگت جوه انفاسي وتوسعت عيوني من الدا اسمعه! معقولة شيخ علي تنازل عن الامير وميريده يستلم الامارة من بعده؟؟ بس ليش!! عمو علي اكثر بشر استقتل حتى يكون خليفته هو الامـير علي!

-علي التـقي: يمة شهالحچي!! ليش ابوي جاي يسوي هيج شسالفة!!

-مادري ولك مادري يا يمة گلبي انخسف من سمعته چان مقهور كلش وگوة حاچاني

-وينه ابوي جوه هسة؟؟

-اگعد تقي لا تروحله هسة هو نايم، اظن ابوك تعبان وجاي يخربط بالحجي من وره الجلطة

-اكيد! مستحيل ابوي يتنازل وينطي المشيخة لغير الامير تره ما يصير هيج مو لعب جهال هو! ليش يكسر بالامير گدام الكل ويصغره بيناتهم!

-مادري تقي ماادري خلي الامير يرجع وافتهم شني سالفته

-ما ينسكت عن هالموضوع لا تظلين تأجلين اليوم تفهمينه السالفة يمة اليوم!

-ان شاء الله هذا هو

گام تقي يصعد فوگ واني رحت امسح المجمدة، بقت خالة رسمية فوگ راسي تأشرلي شنو انظف وشنو اعوف..

-رسمية: سوي لگمة لـ علي النور راح يرجع جوعان من العزيمة ادري بي

-صار

-اي اشتغلي زين لا تظلين بس بربخة ونوم

انصدمت من حچت ويايه بهالاسلوب وبهالنبرة بالتحديد، رفعت عيوني اباوعلها بس ما بينت نفسي زعلانة هزيت راسي اي وطلعت كبة من المجمدة اگليها اله..

-عوفي الكبة بعدين كمليها تعاي اريدج بشغلة

عفت من ايدي ورحت وراهة لغرفتها دخلت جوه وطبگت الباب علينا، اشرتلي اگعد سويت مثلما تريد ومية الف فكرة اجت براسي وكل الافكار الاجتني تخرع وموتتني من الخوف..

-عايني عبق..

انتبهت وياهة مركزة بشنو تريد تگول، بلعت ريگي افرك بيدي ولا ارادي عگدت الربطة حيل عليَّ اختنگت بيها..

-جابتچ سلوى هنا انتِ توچ موردة اظن چان صارلج شهرين من بلغتي وبين جسمچ صح لو انا غلطانة؟!

-صح

-جابتچ لبيتي ونبهتها بيتي كله فحولة زلام ونَفسهم تغريهم ما يگدرون يسيطرون على شهواتهم وملذاتهم.. شيخ علي ربى ولده تربية خله السلف كله يحلف براسهم بس بعد الزلمة يبقى زلمة وينجذب للحم المكشوف

صدمتني عبارة "اللحم المكشوف" بس معلقت وبقيت اسمعلها وين تريد توصل..

-خالتج كالت تجيچ خدامة تشتغل بالبيت واخفيها عن عيون الولد انا ما رضيت بالبداية بس بعدين قبلت تبقين هنا بشرط تحافظين على نفسج وما تتقربين من ولدي

-وهذا السويته خالة

-لا تقاطعيني!!!

نترت بيه نتره مخيفة، عضيت لساني ميتة قهر ماريد الدمعة توگع هزيت راسي وسكتت بالعة صوتي..

-عايني انا ما احب احاچيچ بهاي الطريقة بس خالتچ گالتها! گالت عبق تجي خدامة! وجودها هنا خدامة مو اكثر! وولدي يشوفوچ خدامة الهم شفتي تقي شون طلب منج تسويله استكان چاي؟ هاي لو حبيبة گاعدة بغرفتها ما يسووها.. محد يطلب منها شي ويزعجها يخافون عليها بس انتِ ولا شي بالنسبة الهم

لهنا وبس دموعي ماكدرت اتحمل احبسهن اكثر وصارن ينزلن وحدة وره الثانية، جسمي يرجف اريد اصرخ واطلع البيه بس ماكدرت، ماكدرت لان المرة الگبالي بأي لحظة تطردني من البيت وتهيتني بالشوارع..

-الي يسألچ شنو وجودچ هنا تگليله انا خدامة!! أي واحد من ولدي يگلچ انتِ ليش عايشة ببيتنا تجاوبي خاطر اخدمك وبس فهمتي؟؟؟!

شهگت بدموعي ونزلت راسي ابچي بقهر، گامتلي وگفت گبالي ولزمتني من زندي، تنتر بيه..

-فهمتي؟؟؟

-فهمت.. فهمت

-عايني عبيقة خاف عبالج تغرين واحد من ولدي واسكتلچ؟! لا وعلي ابن ابي طالب ما اسكت ولا اخليج تتهنين وانا ادري بأبني رايدج بس خاطر يشبع نفسه ويتونس بيج چم يوم ياكلچ لحم ويذبج عظم!!

رفعت عيوني عليها تغوش من الدموع ما اكدر اشوف ملامحها عدل، خضتني تحرك بجسمي وهزتني هز بكلماتها من گالت..

-علي الحـق يريدچ حليلته! تخدمينه وتصيريله ونسس بالليل! تصيريله جارية جوه رجليه! لا عبالج اذا ياخذج يصير راسج براس چنايني؟؟ لا وعلي ازوجه اغااتچ وانتِ تبقين الخدامة التنظف وتكرب للصبح ببيته!

دفعت ايدها عني محترگة حرگ، نااار بصدري مدا تخمد تمنيت اطلعها واحرگ البيت والي بي واحرگ روحي وراهم، گمت على حيلي وسندت روحي بالحايط راح اوگع من قوة الكلمات ومن حجم الاهانة الدا اعيشها..

-توافقين لو لا؟؟؟

خزرتها بحدة ودموعي عشرة عشرة تنزل، حطيت ايدي على گلبي راح يطگ النار جاي تصعد لبلعومي حاجبه حتى الحچي عني..

-فضيهااا

-لا

-شنو؟؟؟

-لا.. ما.. ما اوافق

-تفتهمين

عفتها وطلعت من الغرفة ووگفني صوتها من گالت بنبرة لطيفة تختلف عن قبل شوية..

-احبچ لانچ ذكية وتفتهمين.. اعرفي ليش جبناچ وشنو سبب وجودچ، اوصيچ عبق لا تعاينين فوگ خاطر ما تنكسر رگبتچ انا اعرف وليدي زين واعرف شني يعجبه.. علي الحـق ما يبقى عليج يبدلچ بثانية وثالثة ورابعة وتبقين ملطلطة ببيته وتحوسين بين فروخه

ما اهتميت لكلامها وصعدت للمخزن فتحت الباب ورگعتها حيل ووگعت بالگاع موتت روحي من البچي فقددت اريد بس ابرد نار گلبي اريد اريح نفسي صرت اضرب على صدري حيييل وابچي بصريخ، نزعت الربطة وشگگتها بيدي اضرب على وجهي وراسي وصدري ملخته تملخ محتاجة هووا راح الهوا مني اختنگت..

ما انتبهت من انفتحت الباب عليَّ ولا ركزت بمنو دخل، ظليت عاصرة عيوني واشهگ اريد اجر النفس وافرك بصدري.. احس بأيد شخص لازمتني من زندي يردون يگوموني دفعتهم عني وطلعت من المخزن وحدي ركضت للدرج..

-اوووگفي

-هـ.. هـ هدني هدني وخر

-ولج حاچينيييي

-هدني..

دفعته عني بروح رايحة ونزلت الدرج برجلين ترجف ماعندي قوة وماعندي نظر مجاي اشوف شي گدامي الدرجة تتحرك جوه رجليه من الوضع الاني بي، عيوني توجعني من الضرب وصدري ينزف، كمشت بمحجر الدرج عدل اخاف اوگع وبالغلط دست على ذيال دشداشتي وما حسيت على روحي الا واني واگعة من فوگ ليجوه..

حسيت واني اتدحرج من الدرج وحسيت من صاحت رسمية وحسيت من طلعت رهف تركض عليَّ وحسيت من علي التـقي نصى عليَّ شالني وركض بيه.. حسيت من صرخت بي امه ينتظرها تجيب عبايتها وتجي ويانه كله حسيت بي كلللله بس ولا گدرت انطق.. استسلمت بروح رايحة ونفس مقطوع وغمضت عيوني..

-تقييي شصااير شنوو شصااااااير

بچيت ويه صوته هذا هو.. هو اجه هذا صوت علي الحـق.. هذا علي الحـق وديجرني من ايد تقي يريد يشيلني وتقي يمنعه ويتعارك وياه..

-علي التـقي: وخررررر حققق وخرررر البت راح تموووت

-علي الحـق: ووووولك وجهها ازرررگ لييييش يممة شصااااير يووووووم

-رسمية: سودة بوجهي ماادري ولك مااادري

غصب، جبر، سلب نزعني من ايد تقي نززع وجرني عنه يحضنني لصدره ويركض بيه لسيارته، بقيت مغمضة عيوني اسيطر على الهوا الباقي بريتي محتاجة احافظ عليه محتاجة ابقى عايشة لازم ابقى عايشة ميصير اموت امي.. امي تضيع.. امي تموت لو صارلي شي امي..

-سووق السيارة اطللععع تقي

عاصرني بين ايده واحس بأنفاسه تضرب وجهي، يمسح ع وجهي ويبوس براسي وينطق اسمي بلوعة ويگول "عبق حاچيني يرويحتي"..

اغيب عن الوعي وافز افقد الاحساس حواليه واگعد لحظات وارجع افقد.. بقيت على هالحال الى ان وصلت للمستشفى مادري شصار بالضبط وشسوولي لان بعد بكلشي محسيت..

استرجعت وعيي بعد ساعات وقناع اوكسجين على خشمي وحلگي، فتحت عيوني وشفت تَـمني وحبيبة ورفل وليلة وكل البنات محاوطيني قلقات وخايفات وحبيبة تبچي مخترعة..

-حبيبة: عبق يمة بنيتي عبووقة

سحبتني تحضنني لصدرها وتبچي فوگ راسي، ما قبلت سلوى يبقون عندي البنات ورادتهن يطلعن ويعوفني وحدي حتى ارتاح، تحمدولي على السلامة وفعلاً بدن وحدة وره الثانية يتسحبن..

غمضت عيوني مرة ثانية وسرعان ما غفيت من جديد من التعب، صدري محتصر وريتي تحارب حتى تتنفس.. بعد مرور فترة من الزمن بديت ارجع للواقع واتحسن فتحت عيوني ببطئ وعگدت حاجبي من شفت علي الحـق بوجهي، گاعد على سريري بصفي ولازم طرف دشداشتي..

-الحمدلله على سلامتج

مجاوبته تلمست ادور على جهاز الأوكسجين بس ما لگيته شايلي عني، درت وجهي عنه ماريد اشوف شكله ماريد اباوع لعيونه واتذكر كلام امه الذبحني وسوه بيه هيج..

-قبق شنو صار وياچ؟

كذلك مجاوبت، كرر سؤاله مرة وثنين وثلاثة وبكل مرة ما أجاوب.. طگت روحه مني وجر ايدي يحطها بين ايده وهالمرة ما سحبتها منه ما عندي طاقة..

-شبيچ چبيدي؟ لا تسوين هيج عبق سولفي وياي

-مـ.. ماريدك

-هاي السالفة بعدين نسولف بيها بس صيري زينة وعلي الا اطيح حظج

اخذت ايدي منه بعنف وضميتها جوه الفراش، تقرب مني اكثر لدرجة رجله طخت بخصري باوعتله متنرفزة وتوقعت راح يسممني بحچاية مثل قبل بس فاجأني وگطع انفاسي من نزل نفسه قريب وجهي وهمس..

-لا تخزرين لا اشلع عيونچ واجومهن بغرفتي

-روحي.. رايحة ما.. اكدر.. اجاوبك هسة

-لا تجاوبين لان لو جاوبتيني ما اظنج تطلعين منا صاحية

-اطلع.. بره

-اطلع روحج گبل لا اطلع واعوفچ

-وينهم

-بجهنم

-احجي.. عدل

-مادري عنهم ليش رفضتيني؟!

-حلو.. وصلك الخبر

باوعلي بنظرة مطولة ولانه قريب عليَّ كلش گدرت اشوف كل لون يخالط قزحية عينه.. شفت الاخضر والاصفر والرصاصي، شفت رسمة عينه وشمرة حاجبه، انتبهت لانفه المرسوم رسم ولتحديد فكه الحاد..

-ها انسحلتي ان شاء الله؟

-شنو

-هواي صفنتي

-لا.. يمته

-شني لا بس عوزچ تشفطيني ببوسة

-تأدب

-انا والادب مو صحبان

-تره.. انتَ مو حلو

صدمني من ضحك ضحكة برزت اسنانه المصفوفة صف واحد.. دفعته بضعف من صدره ابعده عني ودرت وجهي عنه، غصيت بلعابي من نبت خشمه بخدي وجر مني نفس قووي وهمس..

-حلو لو مو حلو.. مو علي الحـق اليتنازل عن شي يريده، لو انا اخذج يا عبق لو الله ياخذج!

رجفت من صار يمشي بخشمه على وجهي دفعته عني بقوة وگام مني، طلع جگارة من جيبه وحطها بين شفايفه بدون لا يشعلها وگال..

-انتظرج بالمخزن عَبقي دايخ ومشتهي عطرچ يصحيني..

**

"لـــــيلة"

الليلة چانت طويلة ومتعبة روحي راحت من گالو عبق متخربطة، اصلاً اليوم كله چان مادري شلونه بديناهة بعزيمة الامـير علي وتَـمني الظهر ونغزات فراقد لعمتي غزوة، وراهة لعزيمة منتصر الي گضتها حبيبة تلوب لان حضرة جنات منتصر ميباوعلها ولا حتى عبر وجودها وهاي الغبية تنتظر منه نظرة!

-ليلة: حبيبة بطلي غباء بطليي شون راح يعاينلچ واخوتچ موجودين فهميني شوون

-حبيبة: شبيچ ما زعلانة على منتصر شكو بي انا بالي هسة كله ويه عبق

-عبق ما بيها شي شفتيها باچر تگوم چنها حصان

-عينچ طفيها ليلة من طفت ليلتج وخلصنا مننچ

-على طاري طفت ليلتي وخلصتوا مني انا افلت اجه اخوج

-طاح حظج اي والله

عفتها تدردم عليَّ وركضت اضم روحي بمكان ما يشوفني ابا الحسن بي، وهمت رفل اريد اشرب ماي ورحت للبرادات لطشت هنا ما انشلعت شربت ثلاث گلاصات ماي بس اريد اشوفه يطلع من الممر خاطر ارجعلهم بس ما طلع خررب حظج يا ليلة!

افتريت قريب البرادات وجذبني صوت ثنين يسولفون، اصواتهم مألوفة تقربت اشوف منو ذولة وانتبهتلهم هاي عمة رسمية والامير واگفين يسولفون بشي، بطبعي ماحب اتجسس ولا عندي فضول بس لاني واگفة هنا گدرت اسمع لحديثهم الي ما فهمت منه شي..

-الامـير علي: بيدج عصرتي البرتقال يمة؟!

-رسمية: اي والله بيدي شبيك يمة شني تشك بأمك!

-يمة فهميني شنو جاي يصير يااهو يريد يخبل مريتي

-ولك شيخبل منها فهمني امير!!

قلقت وزاد انتباهي وياهم، ركزت بكل كلمة گالوها واسمع لصوت امير يحچي ويه امه بنبرة قلقة وچنه خايف كللش على تَـمني..

-شنو سويتي للعصير يوم؟ ضفتيله شي ثاني غير الشكر والماي؟

-ما حطيتله شكر اصلاً برتقال على صحيته شبيك امير

-احلفج بداعتي صدگ ما حطيتي شي ثاني؟

-وراسك وراس اخوتك بس عصرته وصبيته بالمطارة وشيبة ابوك ما حطيتله شي زايد

-ورأساً ضميتي لو انتظرتي شوي؟

-مادري ماتذكر بس اظن ابوك رادني وراهة ضميته بالجنطة

-اااااخ يمة ااااخ

-شبييك

-يمة اكو واحد جاي يلعب علينا! يردون يسودنون تَـمني حاروا شلعبوا بيها وانا واگف بس اتفرج على ضياعها ماكو بيدي شي ما جاي اعرف ياهو الجاي يسوي كل هذا

-فهمني ولك گلبي كضني

-تَـمني جاي تهذي عقلها مو وياهة.. مو وياهة يممة بيوم المزرعة من مشت لاسطبل الخيل بدون لا تحس والبارحة هم خربطت بالليل علما گالت بسس

-صوااب دهري شصار ولك؟؟

-هواي چفصت چن مشربيها شي وما صارت هيج الا وره ما شربت العصير

-قصدك انا مسوية شي لمريتك امير؟؟

-لا يا يمة بس جاي اگول يجوز انتِ تعرفين شي

-لا ومعزتكم وسنين رباتي الكم مادري بشي وحگ هو علي مادري يا يمة

-ابا الحسن علي: شتسوين واگفة هنا وحدج؟!!

نزيت نزة گلبي تدعبل ووگع بيها، حطيت ايدي على صدري خايفة وذبيت نفس.. ارتاحيت ثواني واللتفتت عليه اگول بضوجة..

-اشوفلي رجل

-ليييييلة!!!

-ابا الحسن انتَ تجيب الاذية لروحك يعني ما تشوفني واكفة يم براد الماي جاي اشرب

-چا ما تحچين لو الا تنتفيني

-انتفك شني شيرة انا؟؟

-خايبين هالبت ليش ما تستحي ليييش

يضرب على راسه على كيف ويلشلش بالعالم، فريت ايدي وگعدت على الكراسي اللم جنطتي لصدري..

-چا استخدم مصطلحات صحيحة عيب تگول تنتفيني

-ليلة انتِ اكثر بشر مستفز شايفه بحياتي كلها

-ادري بروحي شكراً

-ما تستاهلين واحد يخاف عليج تدرين؟!

-ادري

-وراح يطيح حظج لو بقيتي على سوالفج هاي تدرين؟!

-ادري

-وراح انعل والديج اذا بقيتي تكولين ادري تدرين؟!!

-ادري

-لييييييلة

-شنيي شني ليلة وليلة كرهت اسمي والله كرهته

عافني وراح يوگف بعيد عني شگد اضوج من نفسي من احاجي بهالطريقة وانا اعرفه متلهف عليَّ وخايف يعوفني وحدي بمكان كله زلم، ظليت اباوعله واكف ويلوب ويتأفأف متضجور..

-ابا الحسن

دار وجهه الي بدون لا يحچي، گمت اوگف مقابيله ضبط وگلت بأستفسار..

-انتَ ليش ما تكرهني؟

-لاني مطي!

-هاا

-ااااخ يا ضيم گلبيي

-لا لا صدگ احچي.. شوف حسونات الحبابات اريد اگلك شي

-ليلة انتِ تردين تنكتلين؟ صارحيني بوية تره انا ما اقصر

-اهوووو ما يخلي البشر يسولفون وياه واليكتل يحچي علينا

-غردي

-سمعت اخوك امير وعمة رسمية يحجون ان تَـمني جاي يصير وياهة اشياء غريبة وعلى اساس تهلوس ومن هالسوالف التعبانة مال مزعطة.. بس يعني مو تَـمني زعطوطة السوه بيها هيج زعطوط وعلي لو اكضه الا ازوعه حليب امه وانعل امه على ابوه هالخايس المگطن الـ..

-الزبدة؟

-اي المهم، شوف انا ما متأكدة من كلامي بس راح احجي الي اتوقعه

-شني تتوقعين؟!

طفرت من طلع الامير من وره ظهري ووگف بصف اخوه يباوعلي بلهفة، مادري شمالني صابتني الرجفة وبهتت ما كملت توقعاتي..

-الامـير علي: احجي ليلة شنو تتوقعين؟!

-ليلة: تره ما جنت اتجسس مو عبالك بس اجيت اشرب ماي وسمعتكم

-ابا الحسن علي: احجي بوية شسالفة غريبة انتِ قابل

-ليلة: اظن اظن والله اعلم.. ان جاي يخبطولها شي بالاكل وما توقعت هيج بس لانك كلت لامك على مطارة العصير انا اتذكر بالمزرعة من رحنا صار ويه تَـمني هالشي على مرتين

-ابا الحسن علي: شصار

-ليلة: اول مرة چانت تهذي گامت من مكان نومها ونامت بصفي وكررت اسماء ماتذكرهن شني بس اسم عاصف اتذكره واسم عمة غزوة

-الامـير علي: خ** بروووح عاااصف ولللللك لييش تهذي بأسمممه

-ابا الحسن: امير اصبر خلينا نفتهم

-خبلتنييييي عقققل ما ظل براسيي هالخايييس لييش الاا هوو تسولف بي!!

من گدما عصبي خفت اكمل سكتت ووگفت على صفحة ولولا ابا الحسن مهدأه وحاچي وياه حتى يصبر وينطيني مجال احجي چان بلعت باقي الحجي وما گلته..

-ابا الحسن: كملي ليلة شصار بعد؟

-وراهة گامت للحمام وظلت تتقيء هواي، البنات چانو نايمات وانا ظل بالي عليها ورحت وراهة لگيتها گاعدة بالگاع وكاضه بطنها وتبجي

-ابا الحسن علي: چا ليش ربطتي الصار بالاكل؟

-ليلة: لان اليوم كله ما چان بيها شي من رحت انا جبت ببسي مدري چاي ماتذكر شني شربنا بوكتها بس متأكدة انا الصبيته بيدي تَـمني هيج تخربط حالها

-ابا الحسن: يجوز مو من الببسي بما انچ تگولين انتِ صبيتي بيدج قابل انتِ تحطيلها شي بالمشروب؟

-ليلة: لا لا مو هيج قصدت بس انا من صبيته صاحتلي عمة سلوى رحت اشوف شتريد وعفت الببسي بالمطبخ اظن حطوا بي شي من عفت الصينية هناك

حطيت اصبعي على گصتي عود شوفوا تحليلاتي وتفكيري الذكي بس ابا الحسن مو ابا الحسن اذا ما فشلني وكسر جناحاتي النافختهن وگال..

-ابا الحسن علي: ليلة كل الموجودين ببيت المزرعة من گرابتنا ياهو يفيده يأذي تَـمني

حركت اكتافي بطريقة "بكيفكم" بس انا ما يهمني ابا الحسن يصدگني المهم الامير ينتبه ولاحظته سرح يفكر لان الي شفته ببيت المزرعة وحالة تَـمني وخربطة وضعها شي مستحييل يكون طبيعي وعلى يومين تكرر هالشي يوم وحدنا بالغرفة ويوم راحت تمشي لاسطبل الخيل..

-الامـير علي: ابا الحسن انا رايح لبغداد عندي شغل عينك على تَـمني ولا تخليها تاكل شي من البيت جيبلها من بره كلشي

-ابا الحسن علي: ولك عريس انتَ شون تعوفها وتروح هيج

-مهم ابا الحسن والله ما جاي انام ليلي محتاج اروح واريح گلبي، خلي عينك عليها اخيك

-واذا عبالها انا انتَ وتحصرني

سمطه امير براشدي شعل خده فطست ضحك عليه هذا عصبي نار وذاك مستهتر ويضحك، عافنه الامير وراح يدردم على ابا الحسن ويسب بي..

-ليلة: خاف يروح لبغداد ويخونها هناك ولك حسون؟

-لا ولج مو هيج اموري

-شو مادري شلونكم انتم تخوفون

-وصمخ منيلنه سوالف نسوان احنه

-چا انتَ مو لاطشلي شني مو مرة انا

-صخلة انتِ وينج وين النساوين

-شوف شوف شون يحاچيني ويگول انا حقيرة والله ماكو غيرك حـ....

خزرني وانتبهت ردت اچفص وياه، تأفأفت ولبست الجنطة على چتفي وگلت من وره خشمي..

-ردت اگول ماكو غيرك حلو

-ادري بروحي حلو

-اي خوش خوش.. اگلك حساني اريد اصير محامية فدوة حاچي ابوي اكمل دراستي

-تزوجيني واخليج تكملين دراستج

-ووويع ماريد تراجعت

-قزرقط مو صوچچ صوچي انا البطران اريد اتزوجچ خاطر تكملين دراسة

-عوفك من الزواج، حباب اريد عصير احسني دايخة مادري شبيه

-صبر اشوف هذا ياهو يتصل

-شوف شوف يفضل الموبايل على بت عمه الفقيرة العطشانة

ضحك وحط ايده بوجهي يسكتني بدون لا يلمسني، ابتعدت عنه اوگف على جهة خاطر نرجعلهم سوه وما يفضحني لان عفته ورحت وحدي، فتحت جنطتي طلعت منها چكليته لان صدگ دخت يمكن من الخرعة على عبيقة سكري هبط، حطيتها بحلگي ودرت وجهي على ابا الحسن وگلبي نغزني من جحظ عيونه وصرخ والرعب مآكل صوته.......

يتبع 👑.....

━━━━━━ ♛ ━━━━━━

الجمال لو تشكل فـ راح يكون الامـير علي وتَـمني ذااايبة بهالثناائي اني 🙂‍↔️💋🔥

رسمية بهالبارت زعلتينا منچ ايييي والله زعلتينا 🥲

عبق المگرودة وعلي الحق العنوودي جدااً 🫢

شنو تتوقعون امير رايح لبغداد يسوي 🤔؟

توقعاتكمممممم 👀🩷🩷🩷🩷🩷

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

هـو هـيـج اليـعشـگ يـذب روحـه حـيـل..؟ 🔥

━━━━━━ ♛ ━━━━━━

"لــــيلة"

ركضت وراه اريد افتهم شبي يهف گدامي ويجرني من جنطتي وراه خرب روحك ابا الحسن حتى وهو بهالوضع ما خلاني اوگف وحدي وسحلني مثل الصخلة وراه..

استسلمت استعجل بخطواتي وياه حتى ما اضحك العالم عليَّ، وصلنا للردهة البيها عبق ووگف يجر نفسه.. شافتنا عمة رسمية وهرولت بأتجاهنا تتسائل..

-شبيك ابا الحسن ليش اجيت تركض؟

-ابا الحسن علي: بيت مسعود يمة.. بيت مسعود طبوا على ابوي للبيت وكرار يگول ابوي وگع من طوله

لطمت على وجهها وعلي الحق ركض قبلنا ويه ابا الحسن يرجع للبيت، ركضت عمة رسمية وراهم تصيح بيهم تريد تروح وياهم ما رضوا وگالو ما يعرفون شنو راح يصير بيناتهم هناك يمكن تگب..

-رسمية: اااخ يا ولد مسعود المسعور ما شفنا منكم غير المصايبب

-صابرين: كضي لسانج ولا تتطاولين على اسيادچ

-رسمية: بعلي لوما انا رباة شيوخ چان سحلتج من شعفتچ هنا ومسحت بيج المستشففى

-صابرين: عييع خبصتنا رباة شيوخ ورباة شيوخ چن ما شايفة

-سلوى: يمة الغيرة راح تموتچ صابرين گرصيها وگعدي لا تخزين روحج زايد

-صابرين: عاين ياهي تحجي الدخيلة الطبت على شيخ علي مصلخخة

-سلوى: بت الـ......

تكامشن وصرت بنصهن ورفل وتَـمني وياي يفاككن خررب وين ينگدرلهن ذني وحدتهن شكبرها.. سلوى تريد تملش صابرين من عباتها وتسحلها هنا وذيچ لسانها ما يسكت انفضحنا وصارت العالم تتفرج علينا..

-ليلة: ولجن ويننن حبيبة بس هي تگدرلهنن

-رفل: جوه ويه عبق جووه

-شصااير شصاااير

ذبيت نفس مرتاحة من اجو سور ونور كلمن بيده لفة گص ردت اعيط بيهم هسة وكتهااا..

-رفل: تعالو لحگوو صرنا فررجة

-علي السور: نور كض لفتي خليني اغوص بيناتهن

-علي النور: انتبه خوية ذني يخوفن

-كض كض انا الهن الا احوس بفادهن

طب بنصهن يفاكك وصدگ گدرلهن وجر كل وحدة بأيد من عباتها، وخرن عن بعض مخنزرات يردن ياكلن بعض وعمة رسمية بس صافنة وحاطة ايدها على حلگها..

-علي السور: ما تستحن انتننن

-صابرين: الخاايسة دخيلتكم بدت

-علي السور: هي دخيلة وانتِ عرمة بت عرماان

-سلوى: هههههههه اي وعلي

-علي النور: سكتي انتِ سكتي سلاوي ام البلاوي

-سلوى: انچبب ادبسزز بحسبة امك اناا

-علي السور: حشمي روحج نفس امي ونحطج بحسبتها يلاا تفرقنن كلمن تروح لمكان.. بعد بس عوزنا مصاختچن

-صابرين: انا الكم بسيططططة الا اسولف لعمك كلشي اخلي يطرك نصيين

-علي السور: بووية رجفت يا يممة ما جاي اسيطر على رجف خصري

فطست ضحك على حركاته يهز بخصره عود جاي يرجف وهاي صابرين شاطت للسماء السابعة، عدلت عباتها وشالها وراحت توگف بعيد وذولة زوج المصايب بعدهم يحششون عليها..

-علي النور: چنها ستار ابو المولدة نفس الخشم سبحان الله

-علي السور: عمي اشاف بيها هاي وخذاها بس صدگ لو گالو من تلتم عليك المصايب والغضب الالهي تلتم

-سلوى: امه غصبته عليها هو چان يريد غيرها

-علي السور: لاا بشرفج ياهي هاي!

-رهف: انتم مزعطة!!

اللتفتنا كلنا من طلعت رهف من العدم، عاينت منين اجت اثاريها واگفة من الجهة الثانية تفصلنا زاوية..

-علي السور: احترمي نفسج رهف!

-رهف: احترم نفسي ليش؟! صدگ مزعطة وسوالفكم تغثث

-علي النور: خلينا مزعطة ومتونسين ولا نكون حرامية وولد چلب مسعور السلف كله يحچي بسوالفه!

-رهف: تعيّرني بأبوي علي النور!!

-علي النور: انتِ جبتيها لروحج وهسة يلا توكلي روحي هناك

راحت رهف مقهورة وعيونها مدمعة، اللتفت سور على اخوه خازره ومعصب، ضربه على صدره كم مرة وگال بحرگة..

-علي السور: نورر شبيك ويااهة شبييك!

-علي النور: عوفها سور هالبت سوسة على امها

-رسمية: ووولك سوّير شعنددك ويه بت الچلب هاي؟؟

-علي السور: ماعندي شي يمة مااكو شي

-علي النور: يوم سور عاشگ رهف

وهالمرة الشهگة چانت مو بس من نصيبنا عمة رسمية هم شهگت وضربت خدها حيل، جرت سور من ياخته عليها ونترت..

-بس عوزناا بنات العفطية السرسرية الـ...

-علي السور: يمة ما عاشگها هذا بكيفه يسولف

-رسمية: لاا تسوون اللاعيبكم وياي احچي الصددگ عاشگها لو لا؟!!

-علي السور: وغلاوتج يوم ما عاشگها ومالي شغل بيها انا بس انقهر عليهن وعلى چم مرة ساعدتها ونور چلب انتَ عاشگها ورايدها

-رسمية: حتى مساعدة ما تساعدها بعد فهمت؟؟

-علي السور: لاا بله ليش بوية

-رسمية: سوور لا تسودنيي.. وانتَ نور والعبااس بعد لو عدت سالفة عاشگها اطيحه لحظك

-علي النور: اوكي اوكي ريلاكس شوبيكي

-رسمية: وسمم ابوكم هادين عليه ولد المسعور وانتم واگفيلي هنا تتميوعون!!

-علي السور: يا مسعور منهم؟؟

حچتلهم السالفة عمة رسمية تخبلوا، بسرعة راح سور يوقع خروجية عبق واخذنا كلنا وياه قسم صعدوا بسيارة سور والقسم الثاني اخذوا تكسي ويه نور ورجعونا لبيت شيخ علي..

وصلنا لباب البيت وشفناهة گابة هنا، نزلنا من السيارة وما قبلوا الولد نتقدم الا يسوولنا طريق ويوخرون ولد مسعود.. اكثر ثنين شفتهم فايرين ويحاولون يهدأون الوضع بنفس الوقت همه التوأم علي الدر وعلي البدر..

اشرلنا علي الكـرار ندخل من الباب الثاني وگمنا نطب للبيت سره وحدة وره الثانية، عبق صعدت فوگ وتَـمني وبت خالتها وخالتها هم راحن وانا ورفل وحبيبة گعدنا بالصالة ننتظرهم يطبون خاطر نفتهم السالفة..

-ليلة: رفل انا اروح اشوف عبق من ترديني صيحيلي

هزت راسها اي وصعدت بوجهي فوگ للمخزن، وصلت قريب من الباب وسمعت صوت يجي منه چن وحدة تحچي، ركزت بالصوت افتهم منو عند عبق بهالوكت ومن نبرتها وحدة صوتها عرفتها سلوى!

-سلوى: بيج بخت رفضتي لو قابلة بي بس الله اليگدر يخلصچ من ايدي يا عبيقة

فتحت الباب وچفتت اطب عليهن، شفت سلوى لازمة عبق من ياختها وتعت بيها منا ومنا.. ركضت عليها وشلعت ايدها من هالمسكينة ودفعتها بعيد..

-ليلة: شبيچ شبييج مخبللة انتِ؟؟

-سلوى: هيج ربتچ امج؟؟ هيج يحاجون الاكبر منهم ليلة؟!

-امي ربتني احسن تربية بس گولي انتِ وين رابية وهاي تصرفاتچ!

-بت الساقطة...

مدت ايدها تريد تضربني راشدي وكضيت ايدها قبل لا توصل خذي، لويتها بين ايدي فاايرة ومحترگة منها ودفعتها على الحايط..

-سلوى: ااااااخ

-صيحي صيحيي خليهم يسمعون ويجون وتمسكني گدامهم وذبي دموع التماسيح بس وعليي يا سلوى ما اتسمى ليلة لو ما فضحت كل ساالفة خايسة سويتيها بهالفقيررة عبق!

-سلوى: فضحينيي فضحيي خنشوف ياهو يصدگچ!!

-حسااني يصدگني!! يچذذبچ ويچذب اهله ويصدگنيي فـ نصيحة مجانية لا تندگين بيه

-سلوى: هههههه انتِ **** لابا الحسن ماگول غيرها منطيته اليريده وهذا السبب يدافعلج ويدور رضااچ

-ليلة: كلمن يرى الناس بعين طبعه چبدي مو كلنا رخيصات ولا كل زلمنا حواوين ويدورون هالسوالف

رجف جسمها من العصبية وعضت اصبعها حيييل، وخرته من بين اسنانها وصفگت لـ عبق وتگوللها بأسلوب وصخ..

-خليج انتِ خلييچ محتمية بظهر ليلة خنشوف ياهوو الچ من تروح لبيتهممم

-ليلة: هيهييي حبيبة موجودة واذا حبيبة ما تگدرلج لانج امهاا فـ تَـمني موجودة وتالة ورهفف وعلي رهف ترگصج تك رجلل يا خداامة شيخ علي وذليلة رسمية!

سوتلي بيدها اني اعلمج وطلعت من المخزن مدخنة من القهر، اللتفتت لـ عبق خانسة وتزرزر بعيونها چنها طرنه..

-ولج عوبة انتِ ليش ما تدافعين لروحج لشوكت اظل اعلم بيج انا؟!!

-ليلة شبيچ ويايه والله طاگة روحي

-لو بس اعرف شلازمة عليج هالسعلوة ارتاح!! ااااخ لو بس تسولفيلي وعلي اگطعها تگططع بأسناني وادووس على خشمها العالي ام الوصخ

-عوفيها لا تضوجين روحج تعودت على سلوى اني

-بس انا ما تعودت ولا راح اتعود بت الفگر چن ما شايفة وشافت

-اگلچ عوفج منها شو صايرة تحچين بـ حساني وشادة ظهرج بي نهلهل لو بعد وكت؟

-لا شتهلهلين تره بس ردت اخوف السعلوة بي شوي واستخدمت اسمه عود ذكريني اگله جبت اسمك بالطاري خاطر ما يگول مستغلتني

-شكد مزعجة انتِ والله العندج ذهب مصفي ذهبببب

-معليج بـ ذهبي هسة سولفيلي خاطبج احد ورافضته انتِ؟!

-ليش تسألين

-سمعت السعلوة تهدد بيج لو رضيتي

-اممم

-منو خطبج؟

-لو گتلج متصدگيني

-اصدگج گولي

-علي الحـق

-خايبة انچبيييي

-شبيييج

-انتِ مچذبة مچذبة دچذبي بشي يتصدگ

-وحق الله مو چذب هو خطبني

-علي الحق ابو النسوان!؟؟

-اي

-علي الحـق التكرهي وما تطيقي!!

-ايي

-علي الحـق الموگف العشيرة تك رجل من عصبيته وخباله؟؟!

-اي اي اييي

-لا عبق لا سالفتچ داچة يا خية

-مو بله؟

-كلش والله.. زين ليش خطبچ انتِ بالذات شنو قصده من هالتصرف؟

-مادري ليلة هالرجال محيرني

-ليش محيرچ سولفيلي؟

-اليوم هو اخذني للمستشفى چان خايف عليَّ وشالني بيده وحتى من فتحت عيوني لگيته بوجهي وخايف عليَّ ووضعه مريب

-اااححح

-وگلي مشتهي اشم عطرچ ماعرف شنو.. ليلة شميني فدوة خاف ديصفنف عليَّ هذا

-ههههههه انچبي شحلاتج شكو يصنف، وانتِ شنو رأيج بشنو حاسة؟

-ماريد احس ولا اريد افكر لان اعرف اكو وحدة تحبه اسمها سوزان واجت حتى لعرس تَـمني

-اويليي

-شفتي؟؟ هذا السبب ماريد افكر بي

-بس يجوز هو ما يحبها وهي اللازكة بي، عبق من انا وياج نصيحله ابو النسوان ما ندري هو يصاحب لو لا احنه نگول هيج بس لانه حلو نتخيله من وحدة للثانية.. يعني بأختصار احنه طلعنا الاشاعة وصدگناهة يجوز الرجال صدگ يحبچ ورايدچ

-مستحيل

-ليش

-لان هو كلشي ميعرف عني شلون يحبني؟ واذا يحبني يجوز حب شكلي او شي ثاني مو مال يحب شخصيتي

-ليش انتِ منيلج شخصية وتردي يحبها

-ليييييلة

-ههههههه والله يا عبيقة انا اشوف قبولچ بهالزلمة هو الي راح يريحچ ويغير حياتج

-قصدج ابقى مذلولة ومكتولة كل يوم ينداس عليَّ وعلى كرامتي وعلى شرفي وسمعة اهلي اكثر واكثر

-اذا هو وياچ ياهو يكدرلچ هو يسندچ ويصير بظهرج

-ليلة علي الحـق ضابط كل وكته ببغداد واني باقية هنا جوه رحمة سلوى ورسمية وثنينهن ميردني انتِ لو سامعة الحچي الحچته ويايه رسمية والله گلبي بعده يوجعني من وراهة

-شحچت؟؟

جرت نفس وگعدت تسولفلي شنو صار بالضبط وشحچت وياهة عمة رسمية بوووية انا الشطت وروحي طلعت متت قهر عليها تحجي وعيونها تبچي من عمت عينهن الحياية المرمطنچ وتعبنچ يا عبق..

-ليلة: حگچ رفضتي وزين تسوين بس حق لازم يعرف امه حاچتچ هالشكل يجوز الزلمة ما راضي وامه وحدها تسولف

-ماريد احچي ويه بشر خليني هيج بعيدة ومرتاحة وحدي مالي خلگ حروب اصلاً اني مباقية هنا بس خليني اكمل سادس وادخل كلية اترك هالبيت واطلع

-وين توولين

-اروح لامي!!

-امچ العافتچ وشمرتچ ببيت كله زلم؟!! هاي الام التردين ترحيلها يا غبية!!

-سكتي ليلة سكتي لا تحرگين گلبي اني تعبانة وماتحمل شي زايد

-خلص خلص، ارتاحي هسة وقفلي الباب عليج من تنامين خاف صدگ يجيچ بالليل لا تحاچي الا من ترتاحين وتفكرين بخطوتچ الجاية لا تعقدين الوضع بيناتكم اكثر

-تمام حبي

-انتبهي لروحج وحاچيني باجر من موبايل حبيبة زين؟

-تمام

عفتها وطلعت من الغرفة گامت بسرعة قفلت الباب ورايه هيج احسن مهما چان يحبها ويخاف عليها ما اأمن يطبلها بهالليل وهمه وحدهم، نزلت جوه شفت الصالة فارغة وصوت الزلم جاي من الديوان.. ركضت اطب لغرفة كرار شفت النسوان هنا واگفات يتصنطن على كلامهم..

**

"في الديوان"

-مسعود: اسمع ولك انا جاي لبيتي وبكيفي لا تظل تگمز وتسويلي اطلع من بيتنا ونگاومك عشائرياً لانك دايس دارنا بعلي انتَ ودارك وابو دارك ماشتريكم بنعالي

-علي الدر: عميييي هذا هم حچيييي احنه مو اتفقنا نسولف على كيف ونحل الموضوع!!!

-مسعود: انتم ما تردون تحلونها سلمية وطالعين مظاهرات عليّ وعلى وليداتي شبيدي عليكم بعد

-عاصف: احنه ملينا واجينا نريد حگنا اشترينا هالبيت بدم گلوبنا وانتم گاعدين بي وماكلين حگنا؟ لا وعلي ما نرضى

-سيف: واذا ظليتوا تهوبزون وتخبصونا احنه النسويها عشاير ونفضحكمم يا ولد علي خلي العالم كله يعرفكم بگتو عمكم وولده!!

-علي الحـق: انچب لك بطراان عود انتَ جاي هنا تطفر مثل البريعصي تريد تخوفنا؟؟ خاااب گممممم

-سلطان: بالعباااس عشاير نسويهاا وخنشوف لو شارربك لو شاربيي يتزين بديوان ابوك!!

-علي البدر: اي نسويها عشاير! نسويها ونرجع حگ مرية اخونا البگتوه بس مو هسة خلي ابوي يصحى وهو يحودكم ويوليكم ولية

-مسعود: واحنه نگعد حاطين ايدنا على خدنا ننتظر ابوك يصير زين؟! باااچر الگعدة ولحد يفك حلگه بعد!

-ابا الحسن علي: انتَ متعمد تسوي الگعدة وابوي بهالحال عبنك جباان! تخاف منه لانك تعررف شيخ علي شني وشيطلع منه ما تندگ بي وهو صاحي!

-مسعود: ليش شني اميركم وين راح مو هو الشيخ بعد عين ابوكم؟

-علي الحـق: الامير مو فارغ لرعونتكم خلي السالفة بينك وبين ابوي حلوها ونصيحتي لا تفضح روحك اكثر مسعود انتَ بلا شي اسمك صاير على كل لسان

-عاصف: تتحدونا ولد علي؟

-علي الكـرار: نتحداكم!

-غفار: خوش چا بوية خلينا على هواهم خاطر ما يگولون خذيتوا البيت بالحيلة

-مسعود: انتظركم بشرط!

-علي الدر: صارت بيها شروط؟

-مسعود: هذا العندي عجبكم هلا ما عجبكم باچر نتلاگه بديوان شيخ منتظر هو اليحكم بيناتنا

-علي الدر: گول شنو شرطك؟!

-مسعود: المشيخة تصير النا وتسحبون نفسكم من لقب الامــارة!...

**

"تَـمني"

واگفة گبال شباك غرفتي اباوع للحديقة، اشوف كل شوية واحد من ولد مسعود يا طاب يا طالع وولد شيخ علي وياهم.. مرتين صارت عركة بالحديقة وعلي الدر يفاكك بيناتهم اساساً هاي وظيفته بالحياة يكون محضر خير بكل مكان يتواجد بي ويلطم الكل على حلگه..

اخيراً هدأت الاجواء شوية، مليت من الوگفة گعدت على دچة الشباك وفتحته شوية الهوا يخبل يداعب شعري وخدودي بشكل حلو.. انتبهت لشاب يطلع من باب المدخل المؤدي للديوان ماگدرت اعرفه منو لاف شماغ على راسه، وگف جوه النخلة ضبط وطلع باكيت الجكاير من جيبه يدخن..

مادري ليش صار عندي فضول اعرفه منو لزگت وجهي بالشباك وركزت بي بكل حيلي، تحرك من مكانه شوية وگدرت اشوف جزء من وجهه فوراً عرفته هذا عاصف ابن عمهم مسعود، ما استغربت من وگفته بالحديقة وحده بقدر مااستغربت ونبض گلبي بقوة من رفع راسه يباوع فوگ.. فوگ بأتجاه شباك غرفتي القديمة!

عدلت گعدتي وصار عقلي وياه.. مركزة بنظراته ووضعه وليش ديباوع للشباك هيچ؟ يا ترى بشنو ديفكر؟ معقولة ديشوف شي او منتظر شي مثلاً...؟

فزيت من دار عيونه يباوع لشباك غرفتي الحالية، صابتني ردة فعل غريبة وبطني مغصتني من شفت عيونه.. بلعت ريگ مرتبكة من ابتسملي وشال ايده يسويلي "هلو"..

رجعت ليوره بسرعة وسديت البردة، مانتبهت لوضعي المرتبك الا من وگفت على رجلي احسهن ميشيلني.. رحت للچرباية تمددت وحطيت راسي على المخدة اغمض عيوني، عصرتهن بقوة من انعادت صورته گدامي وحركته من يسويلي هلو..

مليت من التخيلات وقررت ما انام واسوي شي مفيد، رتبت اغراضي بالطريقة الصحيحة حتى اندلهن وما اتيه واغراض امير هم رتبتهن.. ظل بالي من ما رجع لسه وين راح وليش هالگد تأخر؟

طلعت تلفوني من الجنطة وانتبهت داگ عليَّ هوااية وكذا رسالة دازلي يبوو هم عفته صامت شجاني ما اتوب من هالحالة.. فتحت رسائله شفته كاتبلي..

"ليش ما تجاوبين؟"

"انتِ وين"

"بعدكم بالمستشفى؟"

"اخوتي ضامين عليّ شي ابا الحسن صوته متغير؟!"

"وينج نوومه"

"صدگ چذب ليش مغلسة تَـمني"

بين كل رسالة ورسالة فترة دقايق الى ان ختم رسائله بـ رسالة دزها من عشر دقايق كاتب..

"انا بطريقي لبغداد بس تشوفين رسائلي خابري"

بسرعة اتصلت بي وبنفس السرعة جاوبني، ما سألني وين چنتي وليش مغلسة عليَّ بس بلغني هو ببغداد وراح يتأخر يومين ووصاني على نفسي وبلغني ما اكل ولا اشرب شي من البيت ابا الحسن كله راح يجيبلي من بره، سألته ليش مجاوب غير بـ...

-احسن

-احسن ليش؟

-سوي الگتلج عليه تَـمني من ارجع افهمج كلشي

-تمام

-انتبهي على نفسج وشنو تحتاجين بس اتصلي بيه

-وراح تجي من بغداد لهنا تجيبلي الاحتاجه؟

-لا ادز ابا الحسن

-اممم

-شبيچ

-مبيه بس تعبانة يلا اخذ راحتك

ودعته وسديت التلفون شوية ضجت لانه راح لبغداد واحنه البارحة تزوجنا، ضجت لان اعرف راح يسمعوني حچي يضوج عود شلون عافني واني عروس.. وضوجتي هم ارتبطت ليش ما اخذني وياه لبغداد على الاقل اغير جو وهو يكمل شغله..

مشت يومين من حياتنا هوسة وفوضى محد شاف دربه ولا احد ارتاح بيها، عبق دائماً بالمخزن حتى تنظيف وطبخ متنزل تنظف ومحد يگوللها ويطلب منها لانها مريضة فرحت بهالشي وصارن شمس وحبيبة ياخذن مكانها..

متت قهر من خالتي گالت راح تطلع من البيت ولگت بيت ايجار قريب على بيت شيخ علي تگعد بي هي وتالة، تمنيت اتوسل بيها وابقيهن عندي بس استحي لان حتى نص هالبيت صار مو الي بعد ومالي حق بي بس الفرحني هو خالة رسمية مقبلت يطلعن من البيت وگالو ولدها البيت الاجرته خالتي بيت ورثة وعليه طلابة وراح تصيرلها مشاكل، حلفت رسمية عليهن ميروحن الا يتشافى شيخ علي وهو بنفسه يدورلهن مكان مناسب..

خالة رسمية يوم زينة ويايه ويوم احسها متطيقني واني هم مطوخت العلاقة وعلى گد الشغل واصعد لغرفتي.. الامـير علي طول ما رجع وصرت اقلق اكثر بسبب بروده من يجاوب رسائلي او اتصالاتي منحچي شي ومكالماتنا كلها على گد "شلونچ" و "محتاجة شي" ويسد الخط.. صرت احس بروحي ثگيله عليه خصوصاً من عرفته يتصل بأخوته وامه بشكل طبيعي..

اجه محرم وانشغلوا البنات بالقرايات ما رحت لولا قراية وياهن مالي واهس وعقلي مشوش وادري راح اسمع حچي يغث من النسوان لان لحد هذا اليوم اكو خطار يجيهم ويسألون عن شعجب امير متزوج ارملة عمه..

اليوم العاشر من محرم وعدهم حجة للصبح، محد نام ولا دقيقية وچانو كلش حزينين على مصاب الامام الحسين (ع) واهل بيته كلش تأثرت بالاجواء وسمعت المصيبة وياهم، ما عايشة اجواء محرم الحرفية من قبل چنت اشوف مواكب بالشارع ولطم وهاي الامور بس الوضع اختلف هسة وحتى مشاعري من اجيت لهالبيت تغيرت عشت ولمست حزن هالايام تخلي الواحد يبچي لا ارادي...

-رفل: شبيچ تَـمني؟

-تَـمني: ولشي بس متأثرة بالقصيدة

-رفل: هسة شغلنا القصيدة بس انتِ ضايجة قبلها صاير شي وياچ؟

-رفل

-گولي حبي

-يمكن مو وكتها بس اريد اسألج سؤال وامانة تجاوبيني بصراحة

-سألي اكيد اجاوب بصراحة

-تعالي هناك

جريتها للمطبخ نسولف ماردت احد يسمعنا، گعدنا على الكراسي وهي منتظرتني احچي، ماعرف سؤالي راح يصغرني گدامها لو لا بس حرت ومحتاجة اعرف شنو ديصير..

-امير هم يتواصل وياچ رفولة؟

-ليش تسألين

-هيج سؤال عادي

-يتواصل

-وبشنو تحچون؟

سكتت صافنة ثواني وضحكت ضحكة خفيفة، حركت راسها بحركات عشوائية وگالت بأستنكار..

-تشكين بيه تَـمني؟

-لا.. لا لا رفل اني لو اشك بيچ اصلاً ما اواجهچ بهالطريقة وما راح تشوفيني لينة لهدرجة وياچ

-تمام لعد ليش سألتيني هالسؤال

-لان امير متغير دا احس بي تعبان او اكو شي شاغل باله بس مدا يشاركني واني اعرفه ميحچيلي لانه يخاف على مشاعري وميحب يضوجني فـ اگول عسى ولعل انتِ تعرفين البي

-صراحة لا والله ماعرف واساساً مرة وحدة تواصلت وياه من راح لليوم واني الي اتصلت حچه ويايه سريع وسد الاتصال

-يعني حسيتي بي شي مو؟

-لا چان طبيعي بس سد الاتصال لان گال طالع عنده شغل مهم

هزيت راسي متفهمة لكن شعور مو حلو محاوطني، حاسني گلبي سبب تغير امير عليَّ هو شي اني حچيته من چنت فاقدة بالفندق بيوم زواجنا اكو شي ضامه عليَّ وما شاركني بي اني متأكدة!

رجعت للبنات گاعدات بالصالة يقرون دعاء، گعدت بصف تالة اللابسة احمر ومالها خلگ تگوم تبدل والبنات لزموها تصنيف..

-ليلة: كتلتني هاي چنها الشمر تفتر بيناتنا امشي ولي بدليي

-تالة: بنات حبيباتي الحزن بالقلب ماكو داعي ابدل ملابسي

-عبق: كلاواتچ بطليهن انتِ بس مالج خلگ ترحين تبدلين

-تالة: اي والله بس صدگ بنات اني حزنانة والحزن بالقلب ماكو داعي للرياء

-حبيبة: لا حبيبتي تالة لبس السواد والحزن على الامام الحسين (ع) واهل بيته ابد مو رياء بالعكس كله بي اجر وثواب وعدنا حتى روايات يحثون على التباكي يعني حتى لو تمثلين گدام الناس عود انتِ متأثرة وجاي تبچين على المصيبة هم تحصلين اجر عليها

-رفل: صحيح من بكى ومن ابكى ومن تباكى كلهم الهم اجر وما ينحسب رياء

-تالة: ها مچنت اعرف

-حبيبة: هسة المهمم، بنات تقي وحق راح يرجعون من الواجب وره ثالث الامام وگالو يردون يسوون طبخ يوزعوه اريدنا كلنا نتعاون خووش

-سبأ: صار حبيبتي من عيوني

-حبيبة: فدوة لعيونج بالعباس بس هاي المريحة گلبي

-رهف: وصل بسامرچ چبد

-حبيبة: انچبي رهيفة ما جاي ابسمر احد

-رهف: لا حگچ تبسمرين چا صارلنا اسبوعين عايشين يمكم ماعون ما ترضون نغسل تره طگت روح سبأ خلوها تشتغل شني هاي

-ليلة: خوب انتِ اشتغلي ليش كله على هالفقيرة ذابة شغلج

-رهف: هي تريد انا شكو سبأ احجيلهن امس من بچيتي

-سبأ: والله بنيات صح انا الاريد مليت من الگعدة لا دفع ولا نفع بس نبلع ومگابلات وجه فراقد اليلعب الروح

-حبيبة: هههههه يوووه لا تضحكني ولجن الليلة وحشة عمت عيني عليك يا مولاي

انوب ضحكتنا كلنا وشيسكتنا يا الله، تفرقنا كلمن بجهة حتى مياخذنا الواهس ونتخربط من الضحك من السخافة.. صعدت لغرفتي اخذت ملابس وفتت اسبح واصفي بالي واريح نفسي كلشي راح يكون بخير وماكو داعي لهذا القلق الدا اعيشه الرجال حُر يتصل او يهتم مو واجب عليه يقدملي شي السواه كلش كافي..

سديت الدوش ولفيت نفسي بالبرنص وطلعت من الحمام مصاحبني البخار الحار، توجهت للميز مالتي فتحت المجر اطلع المشط منه واللتفتت بسرعة البرق من انفتح باب الغرفة عليَّ بدون لا يدگوه..

انهبط گلبي ورخى كل جسمي متطمنة من شفته واگف بالباب، ذبيت نفس مبتسمة ونزلت المشط من ايدي، المسافة التقطعنا چانت رمشتين لا اكثر.. رمشتين رمشتهن وشفته بوجهي! گبالي! وبحضنه...

يبس جسمي وايدي مگدرت تحاوط جسده، توتر ممزوج بفرحة، خوف مخالط بالراحة واهمها غرابة محاطة بالامان من حط وجهه بشعري وجر نفس عميييق جداً، تنفسي اعتلى ورجليه رجفت خفت اوگع وافشل نفسي كمشت بقميصه نبتت اصابعي اللزمه وصرخت مفجوعة من حسيت برجلي تنرفع من الگاع عزا بعيني شالني!!..

-اميررر

-اششش

-لا تأشأشني

دفعته عني مستحية كلش من وضعنا، وخر بدون لا يلح ويايه ووگف على بُعد خطوات عني.. فرك وجهه وفتح دگم قميصه كلهن وراح يگعد على الچرباية..

-الحمدلله على السلامة

-الله يسلمج

-مگتلي راح تجي اليوم

-صارت بعد

-شلونك زين؟

-انتِ شلونچ

-بخير اني

هز راسه خفيف وخربط شعره بيده وذب روحه على الچرباية يتمدد بالعرض، اخذت ملابس ودخلت للحمام ابدل وطلعت شفته على حطته بس مغمض عيونه.. طلعت فرشة خفيف من الكنتور غطيته بيها ورحت للاضوية طفيتهن وتوجهت للباب اطلع اخلي يرتاح وحده..

-لا تروحين

انداريت على صوته ثگيل وبي نوم، وگفت بمكاني محتارة ماعرفت شسوي ابقى لو اروح.. وخرت شعري المخربط عن عيوني وتبسمرت هنا يربي الفهاوة ليش تزورني ويه هالبشر شلون بيه..

-نام

-تعالي

-ما

-تعالي ولج

-انتَ مو نايم شتسوي بيه

رفع جسمه يسنده على عكوسه وباوعلي بعيون مطفية، يدور عيونه على وجهي وجسمي من فوگ ليجوه ثواني استمر على هالحال ياله ذب حسرة وگال..

-تَـمني انا تعبان

نزلت عيوني وصرت اللعب بحاشية الزولية برجلي، اردف بخفوت..

-ادري ما تهتمين بشنو جاي احس بس اول مرة اعترف بروحي تعبان و طالعة الدنيا من عيني

-غلطان

-شنو؟

-غلطان، اني اهتم بشنو تحس وكلش هم

تجرأت ورفعت راسي اله شفته بعده يباوعلي ومبتسم ابتسامة خفيفة، تقدمت كم خطوة الى ان صرت مقابيله ضبط، گعدت على طرف الچرباية وسندت جسمي على ايدي اليسره..

-شديصير وياك امير؟

-لا تهتمين.. روحي براحتچ نزلي ويه البنات تَـمني

-انتَ مو تريدني اگعد يمك

-لا.. ماريدج بعد

-يااا ليش

-ما اضمن روحي فلتي بريشاتچ

-ماعندي ريش

قهقه بصوت ناصي وحرك راسه مأيس، دار وجهه عني من الجهة الثانية يضيع عيونه مني وگال..

-نعسان انا راح انام

-تمام بس راح ابقى هنا نسولف شوية

-بآثار سحر المحبة؟

-ههههههه اميييير

علت ضحكته وجر مخدة يحطها جوه راسه ينام عليها، عدلت گعدتي وتربعت بصفه، لزمت ايده احرك بيها وابتسمت بلكي يتحسن وضعه..

-سولف سولف بشنو زعلان ليش تضم عليَّ

-چا وانتِ ما تضمين عليّ

-اني كتاب مفتوح بس تباوع لعيوني تقراني

-صحيح وهذا احلى شي بيج

-ههههه شكراً

-انتِ شفافه ونقية، اوقات من تزعلين انسى روحي واحس جاي اراضي طفلة

-احم.. لا هاي ممقبولة منك اموري

-بالعكس حلوة الروح البريئة

كبرت ابتسامتي ممتنة لكلامه مع العلم ما احب البرائة وماحب الفهاوة العندي لان ماكو غيرها طيحت حظي وغيرت مجرى حياتي بس شي حلو من احد اخيراً حب هالصفة بيه ومدحها..

-هسة مراح تحچيلي المزعلك؟

-تَـمني انتِ مرتاحة وياي؟

تفاجأت من سؤاله بس مخليت هالشي بيّين عليَّ، بسرعة هزيت راسي اي وهديت ايده من ايدي خجلانة.. رجع سحبها وعصرها بين ايده اكثر..

-اي مرتاحة

-ناقصچ شي؟ محتاجة شي؟ دوامج شلونه؟

-مدا اداوم

-شني؟؟ ليش؟!

-مادري مالي واهس

-ان شاء الله انتِ مثل حبيبة ما تداومين الا ويه المرحلة الاولى

-ههههههه اي

-والمحاضرات والامتحانات تروح عليچن عادي مو

-اي عادي امير ماريد اداوم هسة خليني مرتاحة انام واگعد شوكت ميعجبني

-ماكو من باچر تداومين چا انا المن اركض بمعاملة نقلچ خاطر تگابليني وتگعدين

-صدگ نقلتني؟ شو مگلت

-اي نسيت ابلغچ

-نسيت تبغلني؟ اني توقعت متنقلني وارجع اداوم ببغداد

-لا نقلتج من باجر ترجعين تداومين

-امممم خوش لعد بس ممشترية ملابس بعدني

-لبسي الموجود عندج بينما اطلعج هالچم يوم

-خليني اداوم اسبوع الجاي عفية متسوه بعد خلص الاسبوع

-عليتي گلبي بفهاوتج تَـمني ولج دوام هذا كله غيابات تنحسبلج

-حباب حباب

-لا

-حباب الله يخليك

-لا

-فدوة فدوة

-بوسي

مدلي ايده يحطها بوحهي ابوسها حتى يقبل، ضربت ايده ووخرها مني يضحك بوزت بالچذب ودرت وجهي عنه عود زعلانة..

-هم حمضت بت عيسى

-اي احمض واگطن هم

-هههههههههه تريد تگطن ام ستوري

-راح اغيب والله يا امير باجر الصبح لو گطعت نومتي وگعدتني اسوي عزا بالبيت وانصب چادر

-غيبي غيبي خرب راسج العنودي

-احم.. تمام امير اريد اطلب منك شي وادري دا اثگل عليك

-گولي

-ماعرف شلون راح افتح هيج موضوع حساس وياك وانتَ هم تعبان بس.. بس اني ممرتاحة

-شبيج تَـمني منو وياچ؟؟

-محد محد ويايه.. بس دا احچي على الصار بيه قبل فترة وانت شهدت كلشي وعرفت اني مظلومة وكل الصار غصباً عني..

قاطع كلامي من قدم نفسه وحط راسه بحضني، جر الغطا يغطي نفسه وغطه وجهه وياه وهمس بنعاس..

-بعدين نسولف

-مو امير..

-بعدين حبيبي

بلعت ريگي من همس "حبيبي" عبالك حچاهة بدون لا ينتبه لروحه، نفضت عقلي انساهة ونفخت هوا خفيف افكر بسالفتي صار هوايه اأجل بهالموضوع اريد اعرف منو وره سالفة حملي اختنگت راح اموت بس الوقت تأخر وحقه نعسان اصلاً اني هم نعست من سبحت، باوعت للمخدة اريد اتمدد بس گلت خاف يحس فـ بقيت گاعدة حتى ياخذ راحته بالنوم..

**

"حبيبـــة"

طبخنا هالسنة غير مو مثل السنوات السابقة، گبل چان ابوي هو اليفتر بين الجدوره ويعلمهم شيسوون هالسنة نايم بفراشه ما يگدر يگوم..

وضعه متحسن والدكتور يگول ان شاء الله شهرين بالزايد ويگوم على حيله لان اخوتي كلش مهتمين بعلاجه والعلاج بالكهرباء هم هوايه جاي يساعده.. ماعرف شلون راح تصفى بين اخوتي وولد مسعود بيومها گبت عركة من طلب عمي الامارة و طلعوا بره كملوا نقاشهم، وبعد ماعرف لاخر ما توصلوله راح يتنازلون عن الامارة لو لا مادري..

نزلت قوري الچاي من ايدي ويه ما دخل علي الحـق بهدوم الدوام بس سلم عليَّ ووخرني عنه بساع وسأل بلهفة..

-وينها عبق؟؟

ذبيت نفس مقهورة على حاله شوكت راح يتخطى هالبت ما تريده ورفضته، رجعني وياه من هزني على كيفه وكرر سؤاله بقلق..

-شني قبق بيها شي؟؟

-لا لا مابيها بس طلعت ويه امي خاطر يجيبن نقوصات الطبخ

-ليش هي طلعت؟؟!!

-مرة ابوي رادتها تروح

-ومرة ابوچ ما عرفت تدز زلمة يجيب النواقص؟؟.. يممممة يوووووم يممماااا

طلع من المطبخ يصيح بأسمها، ركضت وراه اخلي ينصي صوته لا يخترع ابوي وهمزين بسرعة سكت من طلعت مرة ابوي من الغرفة، بوسها وسلم عليها وحَب ايديناتها..

-رسمية: بعد طولي گليبي مفرفح عليك شلونك يمة شلونه شغلك

-زين انا يوم.. يمة وينهة سلوى؟

-رسمية: طلعت تشتري لوازم الطبخ

-ومنو راح وياهة؟

-هاا..؟

-منو راح وياهة يوم؟ سور؟ نور؟ لو كرار؟!

-لا لا عدهم شغل ما راحوا

-چا طلعت وحدها؟!!

-لا

-چا؟؟؟

-راحت وياهة الخدامة

-عدنا خدامة وانا مادري؟!

-عبق

-هاا عبق مريتي قصدج؟؟

-مريتك شنيي منين صارت مريتك البت ما تريدك رفضتك

-بس انا اريدها وراح أتزوجها غصباً عليها

-علي الحـققق لا تتسووودن

-اتسووووودن واحرگ الدنياااا هالبت الييي عجبكم لو لا!! عببق ما تروووح لغيرري!!

-حبيبة: لا تعصب حبيبي انتَ تعبان هستوك رجعت من طريق طويل اصعد فوگ ارتاح وشتريد يجرالك

-علي الحـق: بس ترجع عبق تصعدلي الچاي لغرفتي بالعباااس يا يمة لو جابته غيرها هالبيت اگلبه گلاااب

-رسمية: شمسويتلك هااي وهيج لاحسسة عقلك شمسوووية

ما جاوبها وصعد فوگ ومرة ابوي ظلت تفور ميتة قهر، تضرب ايد بأيد وتعضعض بأصابعها..

-رسمية: تسودنوا ويلادي تسووووودنوا

-لا تجيبين التعب لروحچ وحاچي عبق وفهميها الزلمة هاويها ورايدها والله انا لو ما انتِ واگفة بوجهي ومحلفتني ما احاچيها چان من زمان قنعتها بي

-وروح ابوي اغضب عليج ولسااني ما يطخ لسانج يا حبيبة لو فتحتي هالموضوع ويه السووسة عبيقان

-ما حچيت ولا راح احچي معليه هي وياه يتصافون بعد

-امشي اخذيله چاي لا يخبصنا

-حتى يحرگ البيت على روسنا مو؟ گعدي يمة وستري علينا خلي عبق تجي توديله الچاي

-صخاام الصخمنيي يريد يخزينا هذا بعلي لو ابوج يفتهم هالاستهتار جاي يصير ببيته يطردنا كلنا للشارع

-يمة شبيچ يا استهتار هو تاخذله الچاي وتنزل وانا اضمنلچ عبق ما تبقى عنده ولا تسد الباب عليهم اعرفها عدل

فلتت منها گبل لا تجاوب وركضت اصعد فوگ، ما اللومها وادري بيها تخاف من الحلال والحرام وما ترضى زلمة يختلي ويه غريبة وحدهم بس انا اعرف عبق شنو واعرف اخوي ثنينهم ما يسوون الحرام ومتأكدة راح يحاچيها خاطر ترضى بي مو اكثر..

اخذت هدومي وطبيت سبحت خاطر اطلع للمستوصف ضايجة كلش وگعدة البيت صايرة تخنگ من المشاكل.. كملت تبديل ونزلت لغرفة علي الكـرار نايم البطران..

-علي.. عليووي گوم گووم

-علي الكـرار: شكووووو

-اخذني للمستوصف حباب

-بعدين

-حباب گوم گوووم

-اهوووووووو حبيبة وكت مستوصف بهالزلگ

-فدوة لطولك اخذني والله ضايجة وطاگة روحي

تأفأف ضايج اكثر وگام من فراشه يمط ايده، ما طلعت من غرفته الا شفته اخذ منشفة وراح للحمام، عفته ووگفت بالصالة انتظره وحاضنه جنطتي على گلبي..

ابتسمت ويه ما شفت تالة وامها ينزلن من فوگ مبدلات مبين يردن يطلعن، سلمن عليَّ بس شكل ام تالة مو تمام عبالك مريضة..

-سلامات خالة وجهج اصفر ان شاء الله ماكو شي؟

-تالة: متخربطة من الفجر ومتقبل نروح دكتور هسة گوة قنعتها اخذها

-حنين: مابيه ماما كلشي مابيه بس اريد انام

-تالة: ماما لاحگة على النوم.. حبيبة اريد طبيب زين عدكم هنا حبابة

-حبيبة: تعالي للمستوصف وياي منتصر موجود وطبيب شاطر كلش

-تالة: يلا بعد احسن

لزمت ايد امها ومشتها للمطبخ تگعدها على الكراسي، رحت لغرفة كرار ابلغه يستعجل صدگ خمس دقايق وطلع كاشخ ومرتب وضعه شلون يلحگون مادري..

-حبيبة: ناخذ تالة وامها ويانه حباب مو تداهرهن وتفشلهن

-علي الكـرار: لا شكو عرف ولف واداهرهن

هزيت راسي اي وطلعنا سوه، اجن تالة وامها ركبن السيارة وام تالة خطية بقت تتشكر منه هوايه وهو يرد عليها بأدب الحمدلله ما شاقاهن وتماصخ وياهن مثل عادته ويه الغريب قبل القريب، وصلنا للمستوصف وتالة همستلي بيني وبينها..

-تالة: اكو ماركت قريب منا حبيبة؟

-اي حبي ليش محتاجة شي؟

-اي محتاجة كم شغلة ضروري

-محتاجتهم هسة؟

-اي حبابة

-تمام هسة اكول لـ كرار ياخذنا بس گعدي امج هنا على الكرسي خاف مالها خلگ تجي ويانه

-تمام

راحت گعدت امها وگلتلها دقايق وترجع ما قبلت تروح وحدها بس من عرفت انا وياه وافقت، طلعنا انا وياهة لسيارة كرار چان هستوه يريد يحرك، وگفته ودخلنا سوه جوه..

-كروري ودينا للاسواق تالة عدها چم حاجة محتاجتها

حرك السيارة الى ان وصلنا للاسواق، باوع لـ تالة من المراية وگال..

-علي الكـرار: بس مو تتأخرين خوية لان عندي شغل والله وجاي ينتظروني

-تالة: لا ثواني ما اتأخر

-علي الكـرار: ثواني وترجعين؟

-تالة: اي ما اطول

-علي الكـرار: تره ثواني انتظر واعوفچ

حچاهة بأبتسامة وسفط گدام اسواق، ضحكت تالة ونزلت من السيارة وانا هم فتحت الباب اروح وياهة وتراجعت من انتبهتله يحسب..

-علي الكـرار: واحد ثنين ثلاثة اربعة خمسة ستة سبعة ثمانية تسعة عشرة..

-حبيبة: كرار شبيك؟

-جاي احسب

-شتحسب

-هي مو گالت ثواني ما تتأخر وهاا اهاا خلصت الثواني...

شهگت من حرك السيارة يريد يطلع بينا، لزمت ايده وصحت..

-كرررار صدددگ تحجي انتَ!!

-چا مو گالت ثواني

-ياهوو يتأخر ثوااني بأي شي يسووي بهاي الدنيا!!

-انا

-انتَ غريب اطوار!

-شكراً ويلا سدي الباب خلينا نحرك

-كرار تخبلتتت انتَ!

حرك وطلع بينا مسافة عن الاسواق من صدگ انصدمت، درت وجهي اشوف من الجامة طلعت تالة من الماركت وصارت تركض وره سيارتنا وتعيط..

-علي الكـرار: يا علي دخيلك

داس بريك قوي ووگف السيارة على جهة ونزل يروحلها، طلعت وراه معصبة منه وعصبت اكثر من شفت البنية تبچي مبين عليها خافت سودة بوجهي الطفلة وجهها صوفر من الهبطة..

-تالة: ليش تعوفني لييش حرام عليك

-علي الكـرار: ولج ما عفتج شسالفة

-تالة: لعد ليش حركت السيارة والله متت خوووووف

-علي الكـرار: بس ردت ابركها ما يصير اوگف هنا صدگ چذب على بختچ يمعودة

شفته يأشر على المكان الچنه واگفين بي وانتبهت واگفين گدام باب بيت ناس وبصفه كله بيوت ما يصير يوگف هنا وقدم السيارة حتى ما تجيله حچاية.. اووووف منك كرار ما تتوب من سوالفك وألاعيبك وياي!!

-علي الكـرار: اضطريت امشي بيها شوي خاطر ابركها عدل وانزل وياچن للاسواق خوما اعوفچن وحدچن

-تالة: خو چان اشرتلي ارجع چان نبهتنيي بس انتَ رجال غيير مسؤول ومتهتممم لغيرك!!

-علي الكـرار: وانا اشم گفه ايدي راح تطلعين تركضين من المحل تطاردين وتفضحينا

-حبيبة: حبيبتي تالة تتوقعيني اعوفچ؟ معقولة اسويها؟

-تالة: ما اتوقعها منج بس اي اخوچ يعوفني وگلي انتظرج ثواني بس!

-علي الكـرار: اللهم طولج يا روح بابا چنت اتشاقه ويااج! هيج اصير فااني ارسملج سمايل على وجهچ

عگدت حاجبها مزعوجة منه ورجعت للمحل، اشرلي بيده شكو من شافني اباوعله بزعل عفته ودخلت وراهة للمحل وهو اجه ويانه..

-حبيبة: تالة بعدج تبچين يمعودة هاي وانتِ القوية الما ينزل دمعتج شي

-تالة: شتسميني سميني جبانة لو دا ابالغ بس خفت حبيبة اول مرة هيج اخاف من شفته يحرك السيارة حسيت بالضياع لثواني وطلعت مثل المخبلة اركض وراكم

-سودة عليَّ يعوينتي والله ما يقصد كرار بس راد يبرك السيارة عدل

-اي عرفت والله وما احجي عليه او اللومه اني يمكن بالغت وتجاوزت حدودي من عيطت بوجهه عيب منه

-مو مشكلة انتِ بس خفتي تگدرين تعتذرين منه كرار گلبه طيب وما يشيل على احد

ابتسمت تهز براسها، طلعت من الممر الخاص بالكلينس وسوالف التنظيف وشفت علي الكـرار واگف من الجهة الثانية وواضح وضوح الشمس سمعنا من حچينا انا وتالة.. رحتله اريد احاچي وما انطاني مجال اشتره گهوة باردة اله ووگف يم الكاشيير..

اشترت تالة احتياجاتها وطلعنا سوه، الطريق هدوء محد بيهم حچى شي لحدما نزلنا للمستوصف هي راحت تگص وصل حتى تطب للطبيب وانا رحت للمختبر، سلمت عليهم ولبست اللاب كوت مالتي..

-رجاء: اليوم جايين هيئة الرقابة تفتيش على المستوصف

-حبيبة: ها

-رجاء: بس ها؟

-اي چا شكو هلا بيهم

-راح يجي ابن عمچ غفار وياهم تفتيش على المختبر

-اي شعليه بي

-حبيبة شبييچ جاي اگلج حتى تحاچي خاطر ما يظل يدقق على كلشي

-لا رجاء انتِ تعرفيني ما اتدخل بهيج سوالف واصلاً انا ماعندي علاقة ويه غفار هو صح ابن عمي بس بحسبة غريب

-فدوة لخاطري مو ذيج المرة تغاضى عن هوايه شغلات لان شافچ زعلانة وبلغ المستشفى راح يجيب لجنة يشتغلون ويانه فترة حتى يتأكدون من نظافة المختبر وهو چان من ضمنهم تتذكرين لو متتذكرين؟؟

-اتذكر اي اي بس فدوة لا تحرجيني انا مالي غرض بي خلي يجي يفتش مثلما يعجبه هذا شغله وجاي يأدي على اكمل وجه

-اوووويلي يا عنادج

زعلت مني وادري بيها ضاجت كلش بس غلست، ماحب ادخل حياتي الشخصية بالشغل واعرف غفار راح يلطشلي اذا طلبت منه شي خلينا هيج احسن..

للظهر اجوا لجنة التفتيش وهو من ضمنهم ومركزه چبير بيناتهم مو موظف عادي، دخل للمختبر وصاروا يفتشون كللشي بدقة ما فوتوا ولا شي.. من وصلوا لـ ميزي ما رضى احد يتقرب وهو بنفسه فتشه..

-رجاء بهمس: الله يستر

-غفار: هذا مالمن؟!

شال بأيده مرطب صغير مال شفايف بالكرز والطرگاعة واگع القبق منه، انهبطت من شفته هذا صارله دهر ضايع شلوون حظ ما وگع الا بأيد غفار فوگاهة واگع يم الاجهزة!

-غفار: مالمن هذا؟ ليش ما جاي تحچون؟

زفرت نفس وغمضت عيوني نافذ صبري، اذا ما اعترفت كل المختبر يتعاقبون مو وكتك يالمرطب تطيح هناك ابدد مو وكتك..

-حبيبة: مالتي

رفعلي حاجبه مستنكر چنه ما مصدگ هذا مالتي، بلعت ريگ واردفت بثقة..

-مالتي هذا دكتور دليل مشخط من جوه، طاح مني امس اظن

بقى حاجبه مرفوع وگلب المرطب بالعكس وشاف التشخيط مالته، هز راسه اي والواگف وراه فوراً سجل المخالفة كتب الشافه وراح يديحونا..

-غفار: لا تكتب شي

-الموظف: بس دكتور..

-غفار: لا تكتب بوية يعني طاح منها شون انتَ ما يطيح من جيبك شي؟!

-الموظف: براحتك بعد

-اي لا تكتب شي.. المختبر نظيف عاشت ايدكم

نزل يدور على قبق المرطب لگاه وسده بأحكام وحط المرطب بجيبه ما رجعه الي، طلع وطلعوا كل الموظفين وياه اخيراً جرت نفس رجاء وحضنتني تطفر بمكانها فرحانة وباقي المحللين فرحانين بالنتيجة.. باستني بخدي رجاء وهمست بيني وبينها..

-ميت بيج الزلمة مييييت

-حبيبة: اششش رجاء

ضحكت تصفگ بيدها واتفقوا قسمنا يسوون عزيمة على هالمناسبة، انحرجت من نظرات البنات كلهن افتهمن تصرف غفار بطريقة مو حلوة وكلش ضجت من هالشي..

-رجاء: بشروا بنات ودكتور منتصر اجتله مخالفة؟

-اكيد اذا غفار موجود اكيد ينطي عقوبة لانه يكره دكتور منتصر ويدور عليه الزلة

-حبيبة: بس مو غفار المسؤول عن تفتيش غرف الاطباء

-رجاء: صح جايين وفد من بغداد گالو همه المسؤولين عن هيئة الرقابة للمستوصفات الموجودة بسبب الامراض المنتشرة

ظل بالي خاف يحقرون وياه هو ماكو مرة اجته عقوبة لان شغله ممتاز وكلش حريص على المستوصف عبالك بيته يهتم بنظافته وبالمرضى ويشتغل هواي على تطوره..

طلعت من المختبر اروح لغرفته بحجة اشوف تالة راحت هي وامها لو لا ووگفوا بوجهي يسدون طريقي زلم ثنين..

-الموظف: ليش طالعة باللاب كوت هنا؟

-حبيبة: ليش حرام؟!

-مو حرام بس اللاب كوت ينلبس داخل المختبر خاطر ما يلم اوساخ المكان ما يصير تفترين بي كل مكان هو مو عباه

هز راسه الي بصفه واندار بوجهه لواحد وراهم ويگول بكل نذاالة..

-اظنها تنحسب مخالفة لو شتگول دكتور؟

-حبيبة: شدعوة!! شسالفة هاي اول مرة اعرف ما يصير نفتر باللاب كوت هاي جديدة انوب!

-الموظف: اي جديدة وراح تلتزمون بيها منا وجاي وهاي تعتبر مخالفة هسة!

-حبيبة: شني المخالفة بالضبط؟؟ ثانياً شمدريك يمكن هذا مو نفس اللاب كوت الچنت لابسته بالمختبر يجوز غيرته

-سبحان الله جايبه احتياط واحد تفترين بي وتتكشخين على المرضى وواحد ضامته تدفي بالمختبر مو؟

الي گال هالجملة السخيفة اللئيمة الدكتور الواگف وراهم، وخروا عن طريقه يسووله مجال وانا وياه ثنينا فكينا عيوننا من شفنا بعض! هذا حاكم صديق اخوي الامير!!.. ما طولت صدمته ثانيتين من شافني ورجع طبيعي يكتف ايده لصدره..

-الموظف: شنو اسمچ خيتي؟

سألني الموظف الي تجادلت وياه، زفرت نفس ما طايقة روحي وهذا حاكم السلنگح واگف گدامي نرفزني هو ووجهه المستطيل..

-حبيبة: حبيبة علي

-حاكم: عوف الموضوع رمزي ما تنحسب مخالفة هاي لخاطر اخوچ راح نفوتها هالمرة

-حبيبة: لا احسبها مخالفة عوف الواسطات

-حاكم: يعني گوة تردين تتعاقبين انتِ؟

-اي!

-حاكم: تره يجيچ فصل!

-ويجيني

-صدگ تحچين؟!!

-الموظف: دكتور هسة شكتب

-حاكم: اكتبها مخالفة! هي جابتها لروحها

كشولت بوجهه وعفته وعبرت، مشيت مسافة واللتفتت اشوفه لگيته بعده يعاينلي بسرعة درت وجهي وكملت طريقي لغرفة منتصر وچان اشوف غفار العلة هم هنا يبوووو اللتموا عليّ اليوم!

-منتصر: هلا حبيبة

-غفار: خير خير؟؟ ما تستحون انتم ما تشوفون تفتيش!؟

-منتصر: شني سلاح مهربين قنابل جايبين احزمة ناسفة ضامين ترا كلللش زودتها

-غفار: هذا اجراء قانوني

-منتصر: واجرائك القانوني ما تطبقه بس على المستوصف مالتي! عايف باقي المستوصفات ماكلهن الزبل والوصخ والناس جاي يتمرضون بالجملة عايفهم وكل شهر نابصين يمي شكوو

طلع غفار مرطب الشفايف مالتي من جيبه وگال بأستهزاء..

-غفار: شفت هذا مفتوح وطايح جوه اجهزة بت عمك وتگول مستوصفك نظيف ومابي مشاكل

-منتصر: فدوة الها خوية سجله المخالفة عليّ قحطط هسة

-غفار: اسجله واسجل ابووه وعلي يا منتصر لو ما كسرت ظهرك وسويتلك استقطاع راتب ما يطلع اسمي غفار

-حبيبة: شكوو شكوو تسويله استقطاع راتب وعقوبة

-غفار: چا گال سجل المخالفة عليّ

-حبيبة: لاا سجلها عليّ انا الخالفت وانا استحق العقوبة!

-حاكم: ما اتوقع تتحملين عقوبة ثانية ست حبيبة علي

مدينا روسنا ثلاثتنا ويه ما دخل حاكم لمكتب "غرفة مراجعين" منتصر، ضحك منتصر وراح يسلم عليه وتباوسوا..

-منتصر: شلونك ولك شو ما گتلي جاي

-حاكم: والله گلبي ديگول راح ينقلوني هنا ولك منتصر ومنتظرني ضييم

-منتصر: لا الله لا يگولها بس اذا چنت باعرها فـ تستاهل

-حاكم: استاهل ونص لگفوني وعرفوا دا اخذ البورد وممقدم على اجازة وصارتلك لويصة

-منتصر: لعنة الله على ابلييسك گتلك خايب يلگفووك وتنكشف

-حاكم: يلا بعد شسوي

-منتصر: المهم ما فصلوك

-حاكم: والله خوية عقوبة اجتني وهاي لخاطر خالي لانه مسؤول قبلوا يتغاضون عن الموضوع

-منتصر: ميخالف چا شتسوي.. بعدين تعال ليش منطي مخالفة لعنونتي؟

بطني مغصتني من صاحلي "عنونتني" واشر عليَّ يمممة الگاع متشيلني من الفرحة ردت اصيح بنص الغرفة، رفع حاكم حواجبه ثنينهن متعجب وگال..

-حاكم: صدگ ما ربطت تصير بنت عمك صح؟

-اي چا مو الامير ابن عمي

-مربطت والله

-غفار: شني منطي حبيبة مخالفة دكتور حاكم؟!

-حاكم: هي طلبتها

-غفار: ليش شسوت؟؟

-حاكم: تعرف السوته

-حبيبة: لا والله دكتور انا اگول لو تگللهم شسويت بالضبط يكون افضل

حمحم وعدل رباطه ساكت، فريت ايدي بدون لا يشوفني ووگفت على جهة لحدما يكملون مناقشتهم ثلاثتهم.. شوية وطلعوا غفار وحاكم من الغرفة وبقيت انا ومنتصر وحدنا..

-حبيبة: والكعبة ما سويت شي بس هو شاد وياي

-منتصر: هههههههه ما سجلچ مخالفة چان يداهرچ

-حبيبة: سجل سجل شفته انا

-منتصر: لا والله حلف گال لو موجود عدنا مخالفات للتعنيف بالكلام چان سجلتلها بس للاسف ما عدهم هالصلاحية

-حبيبة: اووووي ما يتحمل النازوكي

-منتصر: لا حبيبة ما اسمحلج حاكم زلمة واخو خيته تعبان على روحه كلش

-اي مادري ليش هيج گلت بس معصبة شوي

-من غفار مو؟

-لا لا.. المهم تالة وامها راحن؟

-اي راحن امها صاعد ضغطها شوي مابيها شي

-ها الحمدلله، چا يلا انا ارجع لشغلي

-الله وياچ

عفته وطلعت من الغرفة متوجهة للمختبر، گلبت عيوني من شفت هيئة الرقابة بعدهم هنا صدگ مصخوها لاطشين يمنا بزعنا..

-غفار: ست حبيبة

وگفت ويه صوته وراي، درت بس وجهي اشوف شيريد واشرلي نمشي گدام..

-غفار: حتى ناخذ راحتنا ست

مشيت وياه كم خطوة لحدما وصلنا للحمامات وگفنا، لميت اللاب كوت على جسمي وسألته بدون مقدمات..

-حبيبة: گول غفار شتريد؟

-اريدج!

-ردينا لهالسالفة!

-انتِ ليش ما تفهمين ليييش

-ماريد افهم ماريد!

-چا مو بعينج هسة السويته وياچ؟؟!

-محد طگك على ايدك وگلك افزعلي واذا راح تذلني بمساعدتك عوفني مااريدك تساعدني

-انتِ وحدة ما تستااهل الاحترام! انتن النسوان ما تجن الا بالعين الحمرة والطگ!!

-نصيحة غفار فكر الف مرة گبل لا تحچي وياي بهذا الاسلوب اليلعب النفس! انا حبيبة مو وحدة من صاحباتك النگسات!

-ومنو حبيبة بوية؟؟

-شيخة ببيت ابوها واخوتها ويشربون من دم اليزعلها بحچاية!

-ابوج واخوتج ما اشتريهم بأظفر رجلي الصغير!!

-رسالة وحدة غفار!! بس رسالة وحدة ادزها لأي واحد من اخوتي وعلي ابن ابي طالب يجون يسوون للمستوصف نهر من دمك لا تندگ بيهم وتجني على روحك!!

-لو ما احرمچ من اخوتج وكسرت جنحانهم يا حبيبة! لو ما اجيبچ لبيتي وخليتج ذليلتي ما يطلع اسمي غفار!!

-خوش وبدربك روح سد ضوه الشمس بمنخل غفار!

عفته وتخطيته ابتعد عنه ورجعت للمختبر، گعدت ضايجة وافكر بكلامه والمرطب بقى عنده عووع لو اموت ما ارجع اخذه من هالبشر المقرف..

-عفواً ست حبيبة موجودة هنا؟

مديت نفسي اشوف منو ديسأل عني وزعت العافية من شفته حاكم وواگف بصفه ضابط تحقيق بالزي العسكري.....

**

"عـــــبق"

يومي يخلص ركض بركض ما اشوف منه شي، اقضي بين دراسة وتنظيف وتختل من رسمية ماريد لا اشوفها ولا تشوفني اخاف تسمعني حچاية تغث.. كيفت من خالتي گالت نطلع نشتري نواقص العزيمة طگت روحي من البيت اريد اطلع والغريب بالموضوع سلوى صايرة مو كلش وحشية ويايه نفس قبل..

-سلوى: ترديلج حاجة منا

-عبق: هاي وياي؟

-ايييي وياچ فضيني تردين اخذلج صدرية قميص سلاب تلبسي؟؟

لازم تخربها لاازم والله ابقى مجرودة طول عمري بالصداري القديمة ولا اشتري جديدة وتبقى تذلني بيها العمر كله..

-عبق: خالة انتِ الصدرية الشتريتيها الي قبل ثلاث سنين بعدج تحچين بيها

-طاح حظج بعد احسن اذا ما تردين اشتري حاجة لحبيبة عمري وبنيتي

هزيت راسي اوافقها اي احسن اشتري لـ حبيبة عاد تستاهل، اخذتلها فستان وربطة حرير وحذاء يخزي كتلت روحها عليه بس اعرف ذوق حبيبة متحب هالنوع من الاحذية وهاي لزگت الا تشتري..

-عبق: متلبسه والله

-سلوى: انتِ بس غيرانة منها وما ترديني اشتريلها

-بكيفج بس دا اگلج متلبسه

-عادي تحطه بكنتورها تدفي المهم اشتريلها شي

فريت ايدي على عقليتها وكملت مسواگ وياهة، اشترينا كلشي نحتاجه ورجعنا للبيت بعدني ما ذابة العباية ورسمية اجتني عاگدة الحاجب وراح تنفجر..

-رسمية: امشي سوي چااي للولد اجوا

-عبق: تمام

حطيت العباية على الميز ووگفت اسوي الچاي، اشوف رسمية بقت تلوب بصفي تروح وتجي لو تلزم شالي لو تتحسس بشرتي انوب ما اكتفت جرت ايدي تباوعلها منا ومنا وتگول..

-ليش اصابعچ مشگگة؟ هذا شكل ايد بت هذا؟؟

-غسلت بالقاصر البارحة خالة

-چا ما تعرفين تحافظين على منظر ايدج وتهتمين بيها تره النظافة مو بس سبح وعطر النظافة لكلشي

-ان شاء الله على الجايات اهتم بكلشي

-خوش.. عود هذا.. هذا شسمه الـ.. اووووف

-شنو خالة محتاجة شي؟

-الچاي الچاااي اخذي لغرفة حق

توترت من سمعت اسمه شوكت رجع هذا؟؟ بلعت ريگي ورجعت لطبيعتي صبيت الچاي بالكوب لان لو يموت ميشرب بأستكان بس من يظطر، حطيتله خاشوگة صغيرة وشكردان شكر لان يتخبل لو احد حطله شكر عبالك ديحطوله سَم مو شكر لازم الا هو يخلي..

-رسمية: تحطين الكوب على الميز وركض تنزلين والله يا عبق لو تأخرتي عنده شوفي شسوي بيج

-خالة انتِ اخذي اله احسن

-انا لو رجليناتي تساعدني ما اخليج انتِ ترحين

حطيت الكوب والشكردان بالصينية الصغيرة وصعدت، احس هالفرصة ذهبية حتى خاف يسألني او يعاتبني بموضوع الخطبة وليش رفضته افهمه امه شحچت ويايه بالضبط..

وصلت لباب غرفته ودگيتها على كيف، مجاوب ورجعت دگيتها اقوى وهم ماكو رد.. ظليت واكفة فترة وخفت رسمية تخبصني وعبالها دا اسولف وياه فتحت الباب ودخلت للغرفة فارغة بس صوت دوش جاي من الحمام مالته عرفته ديسبح..

حطيت الچاي على الميز مالته بصف تلفونه وضوه تلفونه بأشعار بنفس اللحظة، مادري شبيه فضولية ومديت راسي أشوف منين الاشعار چان من "ابو كربله" كاتبله..

"نتلاگه اليوم واذا ما اجيت ادعي عليك وعلى اخوتك بصحن الحسين (ع)"

ضحكت من تذكرت صداقتهم، عفت التلفون ودا اطلع من الغرفة ودگ موبايله بأتصال توقعت يكون ابو كربله ورجعت اباوع بي بس انصدمت من شفتها "سوزان"!!

مرارة تشكلت بحلگي وحسيت روحي شگد قشمر واضح وضوح الشمس عنده علاقة ويه هالبنية دليل جابها لبيتهم قبل كم يوم بالليل وهسة دتتصل بي! هه ويريد يخطبني الافندي ابو النسوااان!!

طلعت من غرفته ونزلت جوه بسرعة للمطبخ حتى تشوفني رسمية، ظلت تباوعلي بنظرات كلها شَك عبالك مادري شچنت اسوي فوگ غلست على نظراتها وبديت احضر لطبخ اليوم..

-رسمية: عوفي من ايدج سلوى راح تطبخ انتِ روحي ارتاحي

-عبق: شنو؟

-روحي ارتاحي يمة شبيچ.. وانا اكول احسن لو غيرتي جو ببيت ناصر تشوفين ليلة ورفل وتتونسين روحيلهم وادز حبيبة وراج من نكمل الطبخ

فاكة عيوني وحلگي عليها ممصدگة دتعرض عليَّ كل هالعروض المغرية اولهن الراحة واخرهن اروح لبيت ليلة ورفل..

-عبق: بس منو ياخذني

-انتِ روحي هذا وينه بيتهم اخلي سلوى توگفلج بالباب تراقبج للامان

هزيت راسي اي وركضت اصعد فوگ ابدل قبل لا تغير رأيها، بسرعة ذبيت الدشداشة ولبست صايتي وربطتي، اخذت ملزمة الكيميا ويايه وحطيت العباية فوك راسي ونزلت طيارة جوه..

وگفتلي سلوى بالباب تدردم شلون راح اعوفهم ومنتظرهن تعب الطبخ ما قابلة ومعترضة كلش.. عن نفسي احب طبخ محرم واتذكر حبيبة من تگول احصل اجر على كل تعب بس هسة واضح رسمية متريدني اتشاوف ويه ابنها ودتسوي المستحيل حتى تبعدنا عن بعض..

رحت لبيت عمهم ناصر والبنات انصدموا من شافوني بس كللش تونست وياهن، سوينا الغدة سوه على مزاجنا لان ابوهن مسافر واخوانهن مو بالبيت وياهم متزوجين وطالعين وامهم فقيرة كلش، گعدنا ناكل والعصرية ليلة سوتلنا كيكة وقضيت يوم من العمر كله حب ووناسة بين بنات عم حبيبة..

-رفل: بنات چنه تأخر الوقت انا اروح انام بعد عود طفي الاضوية ليلة مو تنسيهن

-ليلة: اي تمام

عافتنا رفل نعسانة وبگنا موبايلها وگعدنا نراسل حبيبة نشوف ليش ما اجت وقلقني صوتها من گالت تعبانة ومالها خلگ بس ما حبيت اضغط عليها..

-ليلة: عبيقة بيه هزززة تهز الگاع بشرفچ گومي علگيلنا شي نرگص عليه

-خرب ولج محرم شلون تركصين

-هااا اي والله شوف شلون نسيت خوش لعد راح اعلگ قصيدة ونلطم عليها

-هههههه مسودنة انتِ

ضحكت وهي گامت علگت التلفزيون وكنكته على النت وعلگت قصيدة ترگص الهوايش الي بالبستان وينها وين اللطم.. طبعاً ليلة فد وحدددة مخبلة وضاربة الدنيا بعرض الحايط مفعلة وضعية الـ "طُززز" بحياتها لدرجة تنكتل من ابوها تبچي وتروح تعلگ شي ترگص عليه بنفس الوقت..

-ليلة: شعرر شعرررر شعرررر حييييل اييي حييييل

-عبق: ولج دتلطمييين شعر شنووو

ويه صوتي اندگ شباك الهول الگاعدات بي احنه، نزيت مخترعة وليلة عقچت وجهها ضايجة منو هذا القطع متعتنا..

-ليلة: يا محمض هذا

-مادري خاف ابوج رجع؟؟

-ابوي تلگي ويه الحاتات بـ اذربيجان

-عزا بعينج ليلة حتى ابوج ما سلم منج

-اعرفه ابو نسوان مو جديدة عليَّ

فتحت البردة تمد راسها تشوف وفزت تبتعد بسرعة من مكانها، ضربت على خدودها حييل وصارت تطفر وتعض بأظافرها..

-شكوو شبيچ

-اجه ولج اجه اجه

-منو اجه

-علي الحـق اجااچ ولج

-چذاابة ليلة لا تجذبين شهالخريط شيجيبه بهالليل...

گطمت صوتي ويه ما اندگ الشباك مرة ثانية عبالك ديضرب الجامة بمفتاح صوته عالي كلش، سحلتني ليلة من شعري وحطت الربطة على راسي وكالت..

-طلعيييله

-ما اطلع شنو تخبلتيي وخري

-طلعي والله ننفضح وامي تكعد من النوم تطيح حظنا الف قصة راح تألف علساس حق يحبني واجه هنا خاطر يشوفني وراهة يفتهمون اهله واخوته و يتذابحون هو وابا الحسن وبالاخير يموت ابا الحسن وانجبر اتزوج حق بس هااا تره هم اخطبج اله لا عبالج تفلتين!

-ليلة بطلي تقرين قصص ولا تصخمينا اكثر ما راح اطلعله!!

حطت شال على راسها وبدون سابق انذار فتحت البردة تخليني ابيّن گدامه، جحظت عيوني من صرنا مقابيل بعض يفصلنا بس شباك... اللتفتت على ليلة اعيط بيها تسد البردة وعلي الحق يحجي من الحديقة..

-علي الحق: تعاالي عبق.. اريد احاچيچ تعاليي

-عبق:‏ ماروحله مااروح

اشرتله ليلة تنفي بيدها وتگول..

-ليلة: تگول ما تروحلك ما تروح

-علي الحـق: عبق وعلي اطبلچ اناا اذا ما طلعتي

-عبق: شيريددد مني

-ليلة: تگول شتريد منييي

-علي الحـق: فتحيلي الباب ليلة اريد احاچيها

-عبق: ممنوع ممنوع ازاعلج اذا فتحتيله الباب

-ليلة: تكول ممنوع منعوع تزاعلني اذا فتحت الباب

-عبق: منعوع شنو! شهالتچفص ولج

-ليلة: دطلعيله يا عيني ولا تمصخيها زايد

باوعتله من الشباك واگف وشكله معصب وضايج هذا مو صاحي خاف يفضحنا صدگ، هزيت راسي وهمست لـ ليلة حتى ميسمع..

-احاچي منا من الشباك ما اطلعله

-تمام

راحت فتحت الشباك اليفصلنا وطلعت من الهول تعوفنا وحدنا، تقرب يكمش بكتائب الشباك وبقى ساكت ويباعولي ما حچه شي لفترة.. ضيعت عيوني عنه علساس مدا اشوفه ولا انتبهت شگد لايگتله الدشداشة السودة والشماغ الذابة على چتفه سويت روحي طبيعية كلش وريلاكس..

-علي الحق: وينج اليوم

-موجودة

-وين موجودة؟ ما شفتج اليوم كله

-اي باقية هنا ببيت عمو ناصر

انطيته ظهري وگعدت بالگاع انتچي على الحايط ميگدر يشوفني زين بعد هيج احسن حتى اكدر أتجاوب وياه بدون احراج وما ارتبك من نظراته اليلزگهن بوجهي..

-ليش تتهربين مني؟ شنو جاي يصير وياچ؟

-مصاير

-چا شبيچ

-شتريد مني هسة جاي؟

نزيت من ضرب الشباك بأيده حيل وبعد ماتحمل يكمل يحجي بنبرة هادئة وانفجررر..

-الفففف فكرة اجت برااسي من ما شفتج اليووم كلما اروح لامي تكول لو نايمة لوو تسبح لو طالعة للسووگ رووحي طلعت گلت الا الجان البت صايرلهاا شي وما يحچولي تالي اجي هناا الگاج تركصيين ومتونسة وانا محتررگ؟

-والمن تحترگ؟ ثانياً مدا نرگص احنه بمحرم عيب

-گوووومي خليني اشوفج وحاچينيي لا تنطيني ظهرج

-واني ماريد اشوفك

-ولج لييييييييييش

فضحنا فضيحة وهرجنا يضرب بالشباك بكل قوته ويرج الكتائب، خفت ام ليلة تجي وتشوف هالمصيبة عصبت كلش من تصرفه وتمثيله علساس هو مهتم وخايف صدگ، ماتحملت وطگيتها بوجهه..

-روح لحبيبتك وعصب عليها شكو جاايني

-منيلييي **** منيييين

-اي صح ماعندك

-عبق احجي عدل لا تكفررريني بيج

-روح لسوزان علي الحـق هي تحبك وتريدك

-وانا مااريدها مااا اريدهاا

-حرام عليك تلعب عليها وتوهمها على اساس تحبها كون صريح وحقاني حرام الدتسوي

-حرام لان ما احبها وماعندي شي وياهة؟! حرام لان ما اجاوب اتصالاتها وما اهتملها؟! حرام لان ما احاچيها خاطر ما اعلگها بيه لان گلبي متعلگ بوحدة ثانية؟؟

سكتت استعمله بدون لا اجاوب، سمعت حسرته العالية وطگت جداحته من شعل جكارة.. بقينا على هالهدوء فترة ودخان الجكارة يجول بالمكان ماخذه راحته، دقايق وكسر الصمت من گال بخفوت تعاكس عصبيته المميتة..

-اول مرة بت تلعب بأعصابي وتدوس على گلبي وما احقد عليها

بلعت ريگي افرك بأصابعي واسمعه يكمل..

-انا بطبعي عجوزي وملول احب كلشي يوصلني بدون تعب ما احاول ولا اجاهد ولا اتعلق بخبال.. چا شمالني هسة وتسودنت بيج وما جاي اگدر اشيلچ لحظة من بالي

حطيت ايدي على گلبي اتنفس بصعوبة كلامه اثر بيه وخلق عندي شعور يشبه الدغدغة، انقطع صوته وغاب دخان جكارته گمت من مكاني ادور اثره وشفت ظهره يبتعد مني متوجه لباب الحوش يريد يطلع..

گلبي وجعني واختنگت تمنيت اصيحله وافهمه شگالت امه وشلون تعاملت ويايه افهمه رفضي اله مو لاني اكرهه رفضته لاني انذليت وانداس عليَّ..

-عبق.. عببق

رجعتني للواقع بعد فترة من الصفنة والتفكير ليلة لازمة تلفون رفل بيدها، مسحت الدموع التجمعت بطرف عيني وتنهدت..

-ليلة: عبق شوفي

-شنو اشوف

مدتلي تلفون رفل وداست على اسم حبيبة، شفت رسالة اندزت منها قبل دقيقة، قريت الرسالة وعضيت شفتي اخفي ابتسامتي لا ارادي..

"احبك لچن ما اگدر احاچيك.. واگضي الوكت كله شلون بشلون

وبس اصرف نظر لمن الاگيك.. وعلى دربك تصد وترف العيون..

لو تگليلي اكرهك مية مرة اگلچ احبچ ميتين.. لو ترفضيني الف مرة ارجع اخطبچ الفين، انا هايم ومبتلي بعشگ سودني.. عشگ باگ ليلي وزيّد وَني"

-ليلة: وولج هذا علي الحق!!!!

هزيت راسي اي ودموعي گامت تنزل، اضحك وابچي بنفس الوقت مثل المخبلة.. مشاعر فرح وسعادة وحب قوية اجتاحتني حسيتني خفيفية وطايرة بين نجوم الليل..

-ليلة: تره هو بعده واگف بباب بيتنا خاف عبالج راح

-لعد شلون دزلي من موبايل حبيبة؟

-يجوز هو گللها تدزها هسة خاطر ما يسبب مشاكل لـ رفل ويدز من رقمه.. روحي عبق رووحيله سولفي وياه وفهمي بشنو تحسين

-اخاف ليلة

-من شنووو

-اخاف لا تطلع هالفرحة من عيوني

-سولفيله كلشي وخلي هو يوگف الكل عند حده الزلمة الحقيقي لو حب يحارب الدنيا كلها علمودچ رووحي

هزيت راسي اضحك بخفة وربطت الربطة على راسي وركضت اطلع للحديقة، اول مرة اتصرف بتهور، اول مرة ما افكر قبل لا اخطي خطوتي، اول مرة ما اخاف من شي وما افكر بسلبية..

وگفت بباب الحوش وجريت نفس عميق وزفرته، مديت ايد ترجف للباب فتحته على كيفي ومديت بس عيوني وصدگ شفته واگف وبيده الموبايل.. بدون لا يرفع عيونه ويشوفني ضحك وگال بصوت يجننن...

-هلا بحيلي وبعد حيلي، ضوه عيوني وسهر ليلي...

يتبع 🙊.....

━━━━━━ ♛ ━━━━━━

احس انقهرت على علي الكـرار ديتشاقه وياهن وهنه استلمنه 🥹😂🤍

غفار اسلوبه ينرفززز 🙂

الامـير علي من شنو زعلان خوية شو عفتنا معلگين 🦦

علي الحـق وقبووقته 🦚♥️♥️🔥🔥

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

ويطشرني التعب وعيونچ تلمني.. 🩷

━━━━━━ ♛ ━━━━━━

"باقي الاشباه ♥️"

حطيتهم بالبداية خاف اكو مينتبهولهم بآخر البارت..

علي الكـرار يشبه هذا تقريباً خصوصاً من يم الحلگ وستايل اللحية اما العيون فـ كرار عيونه اكبر ومو هيجي ملونة 🕷️

حاكم ما تعبني لان كُلششش يشبه هذا 😄 وهو هم هيجي نفس الصورة شكله كشخة وشخصية

تالة تنطي شبه لـ تَـمني اول متشوفوها بس من تتمعنون بمعانيها لا مو كُلش، واني عن نفسي اشوف اغلب صورها تشبه هاي البنية ♥️

ابو كربله شكله عراقيي مأصل ومألوف جداً 😂

**

"عـــبق"

كررت المكتوب بالورقة الصغيرة "نوت" مرة ومرتين واهز براسي ما راضية، بعدني ضايجة ومغثوثة ومطايقة الصار جوه حتى وره ما كتبلي..

"الردت اخطبها انتِ! وكل چلمة حچيتها قصدتچ بيها گلت عنها سمرة خاطر اشوف غيرتچ واتونس بس چني مطي وگلبت السحر على الساحر وانتِ تونستي عليّ! تريد ترگص بعرسي اللعينة بعلي ارگصچ للصبح بيومها بسيطة يا قبق!!"

ذبيت الورقة وطلعت الايباد من البوكس مكيفة بي، حطيته على الشحن قبل لا افتحه لان اتذكر حبيبة هيجي تسوي من تشتري اجهزة جديدة وگابلته وگعدت انتظره يشحن وافكر برسالة ذاك العگروگ..

عود يريدني اغار بعد عيني والله لو تمووت ما اغار عليك انتَ وهاي عيونك التمساحية! بس هو هم صوچي انطيتك مجال اني لو عايفتك وما صبيتلك چاي اليوم چان ما ظليت مگابلني وگاعد بس اني غبرة واجيب السوالف لروحي..

ضجت وحتى اكل ماريد اكل بعد، گمت اروح للحمام افرش اسناني الباب تشلع الگلب اتمعچل بيها تمعچل ياله تنفتح، طبيت وقفلت الباب ورايه ووگفت افرش اسناني فتحت البوري اغسل حلگي واجتني لحظة ادراك خالة رسمية گالت للكل تانكي الطابق الثاني مخلص اهووووو..

تفلت المعجون من حلگي ودورتلي على بطل مي امضمض بي بس ماكو أيست ولبست ربطة ونزلت جوه، نزلت الدرج على كيفي وتصنمت بمكاني اشهد اغررب مشهد اشوفه.. علي التـقي مگنبص گدام بنية وهاي البنية گاعدة مادة رجليها وساندة ظهرها على الحايط..

مية الف فكرة اجت براسي منو هاي وشنو ديصير هنا؟ حبيبة مو هنا هاي منو الگاعدة هيج وتقي گبالها؟ مدا اشوف وجهها سادها بجسمه بس مبين كلش منفعل وياهة.. بقيت واگفة بمكاني ومن الصدمة بلعت المعجون ناسيته..

صوت ماكو ابدد كلشي ميصدر منهم بس من حرك چتفه يمد ايده يلزم وجهها بيّنت وگدرت اميزها هاي سبأ!!! انهبطت عليها ونزلت اهرول اكمل باقي الدرج ممهتمة لشي احبها سبأ وماتحمل اشوفها بهالحال واغلس..

-عبق: سبأ شبيها؟؟

اللتفت مفجوع يباوعلي، ثانيتين وحرك ايده بطريقة "ماعرف" عفته ونزلت اگعد على ركباتي بصفها واضرب على خدودها اريد اصحيها.. خفت عليها كللش خفت لا يكون صارلها شي هالبنية دومها معلعلة وملعوب بحالها..

من شافني عجزت اگعدها سوالي بيده حركة "انطيني مجال" ماعرف ليش مدا يحچي يجوز مهبوط، بس من نصى عليها وشالها يهمسلي بصوت ناصي كلش لدرجة گوة سمعته عرفته ميريد يحسس احد هي متخربطة..

-علي التـقي: تعالي ويانه عبق

هزيت راسي اي ورحت وراه صعد فوگ وتوجه لغرفته ما قبلت ندخل هناك سوه وحدنا بهالليل واشرتله على المخزن مالتي..

-جيبها للمخزن جيبها

هز راسه موافق ودخلها ينيمها على فراشي، مسح على وجهه عرگان كلش وابتعد منها يوگف على جهة واني گعدت بالكاع بصفها لازمة ايدها..

-لو ناخذها مستشفى حباب

-لا

-فدوة الله يخليك والله مسكينة سبأ مو مثل اخوانها

-هي سوت هيج بنفسها

-شنو قصدك؟

طلع سرنجة من جيبه وراواني السلاية مال السرنجة مكسورة باقي بس الانبوب البلاستك، باوع لعيوني وگال بعصبية مكتومة..

-رادت تطب لغرفة ابوي ولگفتها من اجيت اسألها شعندج رايحة هناك شالت هاي وحطتها بصدرها

-يمممة

-هاي الحبابة التحچين بيها الله يعلم شرادت تسوي بأبوي!!

سكتت اباوع لوجهها المتعوب الماكلته الشمس، عضيت على شفتي مقهورة وگلبي يوجعني عليها اني اعرف سبأ خوش بنية ومتأكدة من هالشي اعرفها شگد انسانة طيبة وتحب الخير للكل مستحيل يطلع منها هيج شي الا الچان....

-يمكن جابريها

-شنو؟!

-غاصبيها تسوي هيج اني اعرف سبأ شنو واضمنها

-تضمنيها وهي بت مسعود؟! حگچ انتِ ما تعرفين مسعود شني من بلا!!

-ادري اعرفه مسعود واعرف عداوتكم بس بناتهم ضدهم اصلاً هنه يكرهن ابوهن واخوانهن ويتمنن يطلعن من بيتهم اليوم قبل باچر وظنونك على سبأ ما اتوقع صحيحة

-عبق انتِ تسولفين هيج عبن ما تعرفيهم عدل مسعود دمرنا شوه سمعتنا وطيح وجوهنا بين الناس لعب بينا وبالعشيرة بسبب حقده ومربي ولده وبناته على هالحقد وزارعه بعقولهم

-شنو سبب هالعداوة؟

مجاوبني وفرك وجهه متحسر، وگف بباب المخزن بعيد عني ويتفرج علينا اني وسبأ، درت وجهي منطيته ظهري وبقيت افرك بيد سبأ بلكي تحس..

-عبق: مطولة چنها

-اظن خدرت نفسها

-صدگ؟؟

-اي لان وره ما دچت الابرة بيها طاحت ردت اخذها للمستشفى ما رضت وگالت ما بيه شي دقايق وغابت عن الوعي

-ياربي هسة غير تصحى حتى تفهمنا

-هلاااا هلاااااا!! هلاااا بأخووووي وعضيييدي هلااااا

فزيت فزززة احس بلعومي صار بمعدتي ويه ما سمعت صوت علي الحـق شعلاته جاي من ورانه، اللتفتت اشوفه وياريت ما اللتفتت عيونه بگصته مخنزر بكل قوته يباوع لـ تقي والي يدور عيونه بيناتنا..

-علي التـقي: علي الحـق لا تفضحنا...

-علي الحـق: تقيي لااا تلعب وياااي لاااا تلعببب بأعصابيييي

ويضرب على راسه بكل قوته متت خوف وانطيته ظهري مرعوبة بأي دقيقة هسة يهجم علينا ويطيح حظنا ثنينا ويلم علينا الدنيا، يمكن من عصبيته حتى مشاف سبأ المتمددة..

-علي التـقي: شكو

-علي الحـق: لا تجاوبني ببرووود

-علي التـقي: "شكو" وياهة صوبة

-علي الحـق: تحشش وانا مشتعل؟؟؟ لييش تسوي بيه هييج لييش تتلف اعصاابي انا مو حچيتلك عاشگ هالبت ورايدهاا ليش تتقرررب منهااا

-علي التـقي: وجع شني قابل لطعتها شسويت انا

-ليش واگف ببابها؟؟؟ وانتِ انتِ ايي انتِ ايييي (يأشر بأصبعه عليَّ ويحچي طالعة روحه) انتِ ليييش فاتحة الباب ومكيفة على الوضعييية

-علي التـقي: افتهم السالفة ولا تظل..

قطع كلام تقي ودفعه بعيد باب المخزن وطب جوه وقفل الباب علينا، شهگت وركضت عليه اوخره من الباب بس لططش وشيوخره بعد..

-وخررر حق افتح الباااب

-انا اعللمچ عبق اناا الچ

-علي التـقي: حق لا تتسودن افتح الباب

عطت بكتمة من اللتفت عليَّ ولزمني من متوني بقوة، يرجف رجف ووجهه صاير دممم مبحلق عيونه عليَّ وينتر بين سنونه..

-لييش يمچ شسووويتوا؟؟ احچييييي

-هذاا السويناه!!!

درت وجهي على سبأ المتمددة عجيبب شگد متهور لا شافها ولا فطن لوجودها عيونه متشوف من الغيرة انعمى..

-شنو هاي

-سبأ اتخربطت وگلت لـ تقي يجيبها للمخزن ترتاح

عگد حاجبه يباوع لـ سبأ مستغرب ويتنفس سريع يلهث وكأن صارله يركض شگد، رجع يباوعلي وصفن بوجهي ميعرف شيحچي بلع ريگه وذب حسرة عالية مغمض عيونه..

-چنت واضحة وياك وگتلك اني ماگدر اعيش ويـ....

سد حلگي بيده بسرعة ودفعني على الباب، رفعت ايدي ادفعه بكل قوتي ما خلاني قيد ايدي ثنينهن بأيد وساد حلگي بالايد الثانية، رفعت رجلي احارب بيها وتوقفت من همس بصوت تعبان..

-احلفچ بروح ابوچ ما تحچين شي عبق انا ماشوف بعيوني من تصيرين گبالي انعمي لا بصر يبقالي ولا بصيرة سكتي ولا تلعبين بحالي اكثر اغديلچ فدوة

رخى ايده وكدرت افلت ايدي منه، دفعته عني ابعده خطوة على الاقل ميبقى لازگ بيه، مسحت على وجهي بأيدي الترجف كم مرة وهزيت راسي لا.. ميصير هالشي لا..

-علم عيونك تشوف حتى متضيع الاول والتالي وتدمر حياتك بيدك!

-ما جاي تگدر تشوف غيرچ! والله العلي العظيم ما اشوف غير خيالچ وعيونچ وماريد عيوني تشوف غيرهن

-غلط! تفكيرك ونظرتك غلط! لازم تفكر لازم تنتبه لكلشي حواليك وينه علي الحـق الي الكل يحچي بذكائه وعقله وينه؟؟

-راح العقل راح من يوم شافچ خذيتيه وخذيتي گلبي وروحي وعافيتي! انتِ عبالچ انا متونس على هالوضعية؟ عبالچ مرتاح وعاجبتني؟ ولچ انا صاير كلما اشتاگلچ اشعل بروحي واشعل بهالجگاير روحي شوفي الگطوف التارسة غرفتي رووحي

-بس هالشي ماله علاقة بتصرفك قبل شوية ويه اخوك! هسة اني گول عني غريبة ومتعرفني زين بس هذا اخوك وصديقك واقرب بشر الك شلون تشك بي؟؟

-انا من اشك لو مو اخووي هم اشرب من دمه واسبح بي! انا ما شكيت بيكم بس ما اتقبل وگفتكم هيج سوه بتوالي الليل وحدكم ماا اتقبلهاا اختننگ!

-تختنگ وهيج تجرني كدام اخوك ماهتميت لسمعتي ماهتميت بشنو ديفكر هسة؟؟؟

-تقي يعرف انا رايدچ ويعرف مستتحيل اضرچ بأي شي! بس انتِ وحدة لعينة تطربين على عصبيتي وترگصين على غيررتي چن ترد روحچ لو استفزيتيني وگطعتي روحي!!

-هاا هم رجعت عليَّ؟ هم بـ عبق الصوچ موو؟ خوش علي الحـق تمااام اني اعرف شـ...

-اسكتي لا تكملين يلا يلاا خوش نرجع على اتفاقنا لا اشوفج ولا تشوفيني لوره صفر

-من كل عقلك انتَ؟؟ وره كل السويته وبعدك تريدني اقبل بيك؟

-چا ليش شمسوي انا

-ابدد كلشي ما مسوي سودة عليَّ وين اكو بفقاريتك

-فقير، عيوني تمساحية، واخبل وين تلگين مني

-هههههه ضحكتني والله ومنو يگول اني احب الرجال العيونه ملونة؟ اني اطرب على السمران والعيونهم سود

-ايا بت الصللللففف

لزمني يضب بالربطة يعگدها حيل ويعصر بوجهي، عضيت ايده عاط ودفعته عني فتحت الربطة مختنگة وظليت اتنفس سريع..

-بله اختنگت ومتتت وين تنطي وجهك بعدد

-لا تخافين عرج ما يصير بيج انا يمچ

-هو راد يخنگني ويصيح انا يمممچ

-اگلچ انتِ ليش تحبين المشاكل؟ ليش ما تصيرين نفس تَـمني لو تتلطم تلطم هم ما تفتح حلگها وتحچي الضحكة من الاذن للاذن

-حلوووو سيادتك صرت تقارني ويه مرة اخوك هاي بعدنا على البر وكلشي ما صار وتقارني بـ تَـمني!

-يا چبيدي غير من حبك لاشاك وانا اتونس من اداهرچ خليني من هسة اعودچ خاطر من نتزوج ما تستغربين

-مااا اتزوجك!!

-ديلا خوش

سوالي بيده وخري عن الباب، ابتعدت فاكة حلگي فتح الباب وطلع يضحك لـ تقي الگاعد على القنفة حاط رجل على رجل..

-علي التـقي: عار

-علي الحـق: ههههههههههه تقي لا تسويلك سالفة

-انچب وولي غاد ماريد اشوف چهرتك

-بالعباس ماروح انتَ ليش ما تحس بمعاناتي ما تدري بيه طگة ونص

-عبق: زين من تعرف نفسك

اندارلي مخنزر واني هم طگت روحي ورجعتله الخزرة وعلي التقي گاعد بمكانه يضحك علينا، عيوني يبست شگد ما مخنزرة ولا اني ارمش ولا هو عبالك عدنا مسابقة..

-علي التـقي: خرب ولكم رمشووا عيوني گامت تحرگني وانا معليه

-علي الحـق: رمشي!

-عبق: ما ارمش!!

-علي الحـق: رمشييي لچ

-مااا ارمش انتَ ارمش يلااا

-علي الحـق: رمشـ... لااااا تقي شني هاااي

رمشت ومتت من الضحك عليه، دفره تقي وخلاه يرمش قبلي غصب الله والله يوونس تقي شگد لطيف.. انحرجت ابقى اضحك هنا احس فشلة فاكة حلگي واضحك گدام تقي استحي هسة ذاك التمساح الزاحف عادي بس تقي لا عيب ميصير..

دخلت للمخزن وسكتت مركزة بحديثهم الي تغير وصاروا يحچون بـ سبأ، مديت راسي من باب المخزن حتى اسمع عدل وفاجأني من تقي وگف على حيله باوعلي وگال..

-تعالي عبق

-علي الحـق: هاا هااا شكو خو ماكو شي

-علي التـقي: خرب روحك روح هناك وخلصني منك

-علي الحـق: فضني گول شتريد منها عدها امتحان باجر لازم تنام

-علي التـقي: اريدج تنزلين تجيبيلي موبايل امهن وتجين

-عبق: اجيب موبايل صابرين؟؟؟

-اي

-لا فدوة لا تورطني اني اموت من امهن فد حية وسمانية مالي خلگها

-علي الحـق: شاك بشي انتَ؟

-علي التـقي: اي شاك اخوانها دازيها تسوي سوايتها وجاي يتواصلون وياهة من موبايل امها لان سبأ ماعدها موبايل

-علي الحـق: وانتَ شمدريك سبأ ماعدها موبايل

-علي التـقي: رهف گالت وهسة هذا مو موضوعنا عبق لا تخافين من صابرين انتِ شوفي الوضع وقيمي من يمچ اذا ما كدرتي تجيبي خلص يولي

زفرت نفس وهزيت راسي مادري شلون راح ادخل للاستقبال واخذ تلفون صابرين بله چانت كاعدة وتحس عليَّ؟ بس رغم هذا نزلت لخاطر اعرف شنو الوصل سبأ لهذا الحال.. نزلت على اطراف اصابيعي وتمشيت للاستقبال، لزگت اذني بالباب اتسمع يمكن احد گاعد بس ما وصلني غير صوت شخير..

لزمت يدة الباب على كيفيي ولويتها افتحها، دفعت الباب برجلي ببطئ ومديت عيوني اشوف منو نايم ومنو گاعد وللغرابة شفت رهف وامها ثنينهن نايمات وموبايل صابرين محطوط على القنفة وديضوي بأشعارات..

بكل سهولة دخلت واخذته بدون لا يحسن اصلاً التلفون محطوط بعيد عن صابرين على القنفة الي يم الباب، ضميته جوه ربطتي وصعدت فوگ اركض وعلي التقي وحق ثنينهم منتظريني..

-علي التـقي: بشري؟؟

-عبق: جبته

-علي التـقي: ولچ كفوووو

باوعله حق صفح معاجبه والله سوالفه تضحك مادري اني من ضيم سلوى والسادس صايرة تافهة واضحك على كلشي..

وگفت على جهة اشوف تقي يحاول يفتح التلفون، شفت الاشعارات جايات من سيف وواحد وره الثاني مينطي مجال بس منگدر نقرا شيكتب لان موبايلها من النوع متبين الاشعارات الا ينفتح رمز الموبايل..

-علي التـقي: حق ما تگدر تفتحه؟

-علي الحـق: اگدر بس شوي يطول وانتَ ماعندك وكت رجعه لا تحس صابرين وتصيرلنا سالفة يمعود

-علي التـقي: نتصخم ونتلطم لو افتهمت ماخذين موبايلها

عصر التلفون بيده مزعوج لان ماگدر يفتحه وكأنه روحه معلگة بهذا التلفون وبهاي الاشعارات الاجت من سيف بالتحديد، رجعه الي وطلب مني بأدب انزله اخذته من ايده وبعدني ما نازلة الدرج ودگ التلفون بأسم "سيف" ركضت ارجعلهم وانطيته التلفون اهمس..

-سيف يتصل سييف هذا سيف

-علي التـقي: جاوبي بسرعة

-علي الحـق: شسااااالفة تقيي

-علي التـقي: حق لو احنه بغير وضع ما ارضى تجاوبه بس هسة ثنينا راح نسمع وياهة.. يلا عبق جاوبي

-علي الحـق: بالعباس اشععل سيف والخلفف سيف انتَ تريد تسوددنييي

-حق مو وكت غيرتك الغبرة ماا راح يبلعهاا بس تگول الو هذا هو مانريد شي ثاني

-علي الحـق: واخلي سيف العار يسمع الالو مالتها؟؟ لا هذاا هو جيبلي مووس ودگلي شاربي صفرر

-عبق: اصلاً خلصت الدگة كله من وراك!!

-علي الحـق: حلوو ست عبق مكيفة على الوضعية

-عبق: اني شكو بيها عليها وتگول مكيفة.. اوگف هذا هذا دگ مرة ثانية

-علي التـقي: حق بعلي لو ما خليتها تجاوب من صدگ ازين شاربك بنعالي

-علي الحـق: زينه ولا يسمع صوتها هذا الخرگة!

-علي التـقي: شنييي راح يغتصب صووتهاا

انبلع وجهي من الفشلة وركضت للمخزن وهمه بقوا يتجادلون على الاتصال والتلفون بعده يرن..

-علي الحـق: انا اللگه طريقة ثانية افتهم بيها السالفة بس لا تدخل عبق اخيّك

-يا بوووية

-لو حبيبة هم تخليها تجاوب؟؟

-علي التـقي: اي اخليها! انا واگف فوگ راسها واسمع كلشي قابل راح يتغزل بيها! انتَ ليش معقد؟؟

-اي خوية انا معقد ورجعي وعقلي فاصل ما ارضى بمريتي تجاوب زلم غربة

-مريتك؟ من يمته صارت ولك

-من هسة بكيفي

-خرب عقلك المحشش خوووش؟؟

-خوش

-هسة شون نعرف السالفة!

-صيح تَـمني تجاوبها اموري خوش زلمة يرضى

-اي خاطر يدبچ بگلبي وبگلبك!

-تدري انا اشوفهم ثنائي مثالي ما شاء الله عليهم شگد حلو لا مشاكل ولا وجع راس ولا...

-اسفييين ست تَـمني اسفييييين نسيت احنه مااا نعجبچ انتِ تردين اجنبييي تردين ايطالييي مسويله عرف دييچ ويمشييي ترددين زلمة مااا يهتتمم ويلبسلچ گرووون ويگعددد وياااچ هنا بالغررفة

-علي الحـق: اسحب كلامي

صوت الامير شعلاته جاي من الغرفة الساعة صارت نص الليل وهمه يتعاركون يا ستار شبيهم؟ فتحت باب المخزن امد راسي اشوف تَـمني طلعت من الغرفة ما باوعت لـ تقي وحق الواكفين يم الدرج ولا انتبهتلهم.. وگفت بباب غرفتها وصاحت بصوت مو كلش عالي وبي رجفة..

-اروح انام يم خالتي احسن ولاا انام يمك هناا

-الامـير علي: اييي روووحي هو هممم صوچييي كاتل نفسييي انتِ هذا التردددي هذا التلوبين عليييه الغرفة تگرررصچ ما تتحملين تبقين وياااي بمچان وااحد

-تَـمني: من وره سوالفك! من وره عصبيتتك راح تجلطنيي

ظلت تدردم وفتحت باب غرفة خالتها وتالة ودخلت جوه والامير بعده يصيح لدرجة صوته انشحط.. طلع من الغرفة ورگع الباب وراه قووي وجمدت رجليه من شافنا كلنا گاعدين ونتفرج عليه، فلتت ادخل جوه وضميت روحي عدل اباوعلهم من فتحة الباب..

-علي الحـق: والزهرة گلت ما شاء الله انا معليه بعد

-الامـير علي: خررررب حظي المصخمممم

-علي التـقي: يمعود صلي على محمد تعال ارتاح هنا تعال يبعد روحي

-علي الحـق: هااا شكوو شو داگ ناعم وياه وخر ما ارضى

-علي التـقي: ولك مو وكتها

-علي الحـق: وكتها وكتها چا يمته وكتها هو مو عنده توأم ويومية يغورنا بي خلي يروحله تعال انتَ مالتي

-الامـير علي: وجع اليوجعك شگد بخيل

-علي الحـق: كلمن عنده واحد روح لحسونك خلي ينطيك حبه هسة تطيب

ما جاوبه وراح لغرفة ابا الحسن علي ودگها بقوة، بقى يدگ بالباب مالته لحدما فتحها بالدفرات برجله..

-ابا الحسن علي: هااااا هاااااا هاااااااا بالچوووول گاعدييين خيييررر ما تگولون بشررر نايمين

-الامـير علي: تعال اريدك

-ابا الحسن علي: نعسان ولك

-الامـير علي: مو صوچك وعليي صوچي انا المحترمك واجي اشكيلك معتبرك روحي الثانية بس انتَ ما تستاهل

-اميير عندك سبع ارواح غيري روحلهم وخليني انام چم ساعة باجر وراي شغل

-شغلك توگف ناطوور بباب بيت ليلة تحرسها من الچلاب

-اي احرسها من الچلاب ولك جاييها خطابة باچر عمت عيني

-تستاهل

-خ** عليك من اخو

-ولي اروح لـ علي الدر احسن منكم

-علي التـقي: حتى يزلزلك بـ زيج

-الامـير علي: ولكم اخوان انتم اخوااان

ضحكوا ثلاثتهم وراحوله يطيبون خاطره اني اعرفهم هوايه يتداهرون سوه بس يمكن الامير هالمرة كلش مقهور لدرجة ما ضحك وياهم، جروا يگعدوه على القنفات وهو بعده معصب وصاير نار كبره، گعد ابا الحسن بصفه ولزم ايده يفتهم شبي وهذا قافل ميحچي..

-علي التـقي: هسة شون نجيب مريتك تحچيلنا؟؟

-الامـير علي: اشگكم نصين والحسيننن

-ابا الحسن علي: چا احچي ولا تظل تهوبز

ويه حچايته طلعت تالة من الغرفة معصبة هي وخالتها ثنينهن، رفعوا روسهم يباوعولها اجت شايطة وگفت گبال الامير ساكتة وتباوعله بدون لا تحچي شي وخالتها هم بقت ساكتة وتنتظره هو اليبدي الحديث بس من شافوه ما نطق شي خالة تَـمني سألت..

-حنين: امير ما راح تحچي شصاير؟ تَـمني بس تبچي متقبل حتى تسولف ويانه

-الامـير علي: السالفة بيني وبينها احنه نحلها لا تخافين حجية

-حنين: بس اني ماقبل على بنت اختي تنام ودمعتها بعينها؟؟ اعذرني يمة اني احترمك واعزك بس هالشي ممقبول

-علي التـقي: يا جماعة صلوا على محمد ماكو شي ان شاء الله هاي المشاكل تصير بين كل ثنين متزوجين انا اشوف لو ما نتدخل وهمّه يحلوها بيناتهم احسن

-حنين: لو رادت تحلها بيناتهم چان ما اجتني تبچي والوجه احمر تَـمني بنيتي وممگطوعة من شجرة يا ام تقبل تشوف بنتها بهالحال وتسكت؟

-ابا الحسن علي: حگچ واحنه وياكم بس تَـمني شوي ما تتحمل كلشي يجوز بچيها لشي ما يستحق انا اگول لو ما نكبرها ويحلوها بيناتهم

-حنين: لا لا توتة اكيد بيها شي اكيد واني لازم اعرف شنو

-علي الحـق: حجية وينها هي صيحيلها خلي ترجع لغرفتها وتتافهم ويه زلمتها صدگيني بس تكبر السالفة تصير طويلة وعريضة خلينا لا نشجع على خراب بيتهم

كل هالحجي والامير ساكت ميحچي شي حسيته متندم لان صاح بصوت عالي واخوته شهدوا الصار احنه نعرفه من قبل عصبي ويگلب الدنيا على كلشي بس هالمرة دخل طرف ثاني بحياته وتزوج وبسبب عصبيته صارت عركة چبيرة..

دخلت تالة وصاحت لـ تَـمني طلعت عيونها حمر وشعرها مهووس وصاير على عيونها، وخرت گذلتها عن عيونها وسلمت عليهم وبسرعة راحت تگعد على القنفة متقبل تدخل للغرفة..

-الامـير علي: روحي للغرفة تَـمني لا نكبر السالفة

-تَـمني: اخاف

گالتها بقهر وبچت ضامة وجهها بين ايديها يا الله شگد شكلها يقهر ومبين عليها مكسورة خلت الكل ساكت ويباوعلها، زفر الامير نفس يفرك وجهه وخالتها من شافت بنت اختها بهالحال عصبت بالزايد وعلت نبرة صوتها..

-حنين: شصاير وهيج خايفة؟؟ امير ليش مدا تحجي گوول يمكن نكدر نحل الموضوع!

-الامـير علي: من رخصتچ ام تالة ما اريد احد يتدخل انا احل السالفة امشي تَـمني

گام وراحلها، راد يجرها من ايدها ماقبلت ولزمت بيد تالة تخليها گدامها تغطي روحها بيها، شوفتها بهالحال اذتني الف وسواس صار بيه شنو الصار والخلاها هيج خايفة ومتقبل تگوم وياه والمشكلة نظرات الامير ولون وجهه الاحمر هم ميساعد معصب وشكله يخوف..

-علي التـقي: احنه نترخص اخذوا راحتكم انتم

گامو يدخلون لغرفهم وعافوا الامير والبنات وياه، گعد على القنفة فااير بالمعنى الحرفي رجله ما ثبتت يحرك بيها ورافع حاجبه..

-حنين: تَـمني سولفيلي يا امي احچي لا تخافين

-تَـمني: راد.. ر.. راد يضربني

حچتها تشهگ وتالة وخالتها ثنينهن شهگن، رفع امير عيونه عليهن وگال بعصبية مكتومة..

-ماا طگيتچ ولا فكرت اسويهاا احنه مو همج ونطگ نسواان!!

-تَـمني: والقران ردت تضربني والتيبل لام شاهد بالغرفة مكسر

-شمرته بالحايط خاطر افرغ من عصبيتي وماا اكبر المشكلة!

-تالة: هسة غير نفتهم الصاير تَـمني احچيي خلصينا!

مسحت وجهها ايدها ترجف، ظلت هادئة شوية وتتنفس بجهد حتى يتعدل صوتها ومتنشر من تحچي وبدت تسولف شنو صار وياهم..

-تَـمني: طلعنا اليوم وره المغرب اخذنا لكوفي دخلنا وطبعاً هو چان ضايج بالبداية بس بعدين عادي.. كملنا اكلنا ودنريد ندفع الحساب وشاف واحد اسمه حجي قاسم وصديقه بس شكلهم مو راحة اعترف فـ صار حچي بين امير والحجي ومادري شنو همسله وخله الامير ينگلب گلااب..

فتح امير عيونه على وسعهن مخنزر والرجال ظل يضحك ضحكة مال واحد خايف او متندم لان حچى، رفع ايده يطبطب على ظهر الامير يتلوگ وگال..

-لا سبع انتَ سبع

دفع امير ايد حجي قاسم حيل ونتر بين سنونه..

-اووزن چلامك واعرف ويامن تسولف قاسم!! هالمرة اعديها لخاطر شيباتك عيب اجرك منا واتجاوز وياك گدام الوادم فشلة عندك احفاد!!

-حجي قاسم: لا امير لا ما مقبولة منك چنت اشاقيك

-شاقي الي بعمرك حجيييي ولا تظل تلووص

دفعه من صدره وطلع فلوس من جيبه وحطهن على الميز، جرني من ايدي يطلعني وياه من الكوفي ويمشي سريع رجليه انلوت اكثر من مرة واصيح امير اوگف اميير رجلي متأذية اصلاً ميسمعني..

-طبيي بساع

فتح السيارة وركبت بيها فحطانة السيارة مو كل كلش قريبة من الكوفي موگفها مشينا الها مسافة، حرك بسرعة عصبي وما حچى كلمة ابد طول الطريق هو ساكت، بعد تقريباً نص ساعة من الفره اللتفتلي وگال..

-تردين ترحين بعد لمكان؟؟

سألني بأسلوب عصبي، حركت راسي لا بدون لا اجاوبه بس ما اهتم وسفط گدام شارع يمكن سوگ بس مشايفته من قبل.. اشرلي انزل ونزلت بس رجلي توجعني دست على روحي وما شكيت منها وبقيت امشي وياه..

توترت من لزم ايدي وحطها بين ايده باوعتله منحرجة كلش مادري شبيه ويمكن حس عليَّ لانه گال ووجهه گدام..

-خاطر ما تضيعين

هزيت راسي على الصامت وافترينا بالسوگ شوية، اشترالي كم حاجة عرفت ماخذين طبع امهم على شنو نأشر عبالهم يعجبنا ويشتروه، كلشي اشرت عليه وسألت على سعره اخذه الي حتى على مكنسة كهربائية شفت عارضيها وتذكرت ابرار رادت تشتري وحدة سألت على السعر وشو امير گله جيبها نريدها..

-تَـمني: امير والله ممحتاجتها واصلاً مسألت علمودي

-چا المن؟

-لابرار مالتها عطلانة

-خوشن ناخذها لابرار.. احسبها النا خوية

ضحكت على اسلوبه يمكن مواصللهم شي اسمه بس نسأل على السعر واذا شفناه غالي نتحجج باللون ونگول لابو المحل يتوفر عدكم لون "بنزرگي"؟

عفنا المكنسة عنده دفع فلوسها وگال من نكمل تسوق ناخذها بطريقنا، مشيت گدامه لمحل تلفونات شفته مفتح دخلت وهو اجه ورايه لزم ايدي بسرعة ميقبل يهدها..

-موبايلج بي شي؟

-لا مو الي لـ تالة اريد اشتريلها هدية نجاحها من السادس

هز راسه وطلب يراوينا ابو المحل انواع، اعرف تالة روحها بالايفون اخذتلها واحد جديد وگفر وشاشة وگتله يحسبهن الي، غطيت بنص هدومي من الامير طلع محفظته هو يريد يدفع..

-تَـمني بهمس: لا حباب اني اريد اشتري الها من فلوسي

-ماكو فرق ابوية

-لا فدوة لا تسوي هيج امير لو ادري انتَ تدفع ولا ادخل للمحل

-مو عيب عليج؟ وخري غاد

وخرت اوگف على جهة واشتراه الها شگد استحيت التلفون اخر اصدار وغالي فشلة.. من دفع الحساب تذكرت اخوه عنده محل موبايلات وابتسمت ممتنة على تصرفه ما اشترالها منه لاني دخلت لهذا المحل واختاريته بالتحديد..

طلعنا سوه نفتر وايدي بيده، اشترالي شعر بنات وضمه ما قبل اكل واحنه نفتر گال بالسيارة.. اشتريت كم حاجة وطلعنا من السوگ ركبنا السيارة بس الامير بعده احسه مو طبيعي وضايج كللش بس ديحاول ميبين گدامي..

طلعت شعر البنات اكل منه وعطشت مي، رجعته بالعلاگة وگلت..

-امير اريد مي حباب

هز راسه اي وسفط يم الكوفي الچنة گاعدين بي صار على طريقنا، نزل يشتري مي ورجعلي بس ما ركب سيارته شو نصى يباوع لشي بالگاع مچنت اعرف صاير عنده بنچر وديباوع للتاير.. نزلت من السيارة اشوف شنو ووگفت بصف دعامية السيارة وويه ما دنگت اشوف التاير طلعوا حجي قاسم والوياه من الكوفي والرجال الي بصف قاسم صاح بحقارة..

-دخيييلك علي منورة العاصمة

رفع راسه الامير يشوف شكو وانتبه لوضيعتي ولعيون الچلب الصاح بصوت عالي خلى العالم كلها تتلفت علينا، وجهه الامير انگلب وعيونه نطت بدون لا يصدر حررف وبدون أي نقاشات ركض عليه وسفطه ويه الگاع براشددي شعلو صداه..

صاح حجي قاسم يجر الامير عن ابنه مادري ابن عمه بس امير فقد لزم حجي قاسم ودفعه من صدره خلاه ينرد وره ونزل على الرجال الثاني ودددگ راشديات وبوكسيات ميلحگ الرجال يتنفس ويسمطه بدفرة، مينطي مجال الرجال ينهض نفسه ويسطره ببوكس جديد..

اللتموا الناس عليهم يفاككون يردون بس يسحبوا منه مدا يگدرون، انهارييت ومتت خوف وگفت على جهة اكل بأظافري وافكر ذولة ليش بعدهم بالكوفي صارلهم شگد وشنو هالحظ ما طلعوا الا من رجعنا، عطت مفزوعة من طلع دم الرجال وصحت اتوسل..

-حباب عووفه امير فدووة عووفه لا يمووت الله يخليك

اللتفتوا الزلم يباوعولي وهو شاف الكل منتبه ويايه تخبببل گوم الدنيا ما گعدها شمر الرجال من ايده يرگعه بالگاع وهرول بأتجاهي لزمني من ايدي شنطها وركبني السيارة غصب وعافني يريد يرجعله.. ماتحملت الموقف شگد صعب چان ومخيف حسيت روحي بحلم، ما تقبلت ابقى بالسيارة ونزلت اعرج برجلي اريد اسحبه من ايده وانضربت بوجهي بعكس رجال ديفاكك بالعركة..

-تَـمني: ااااه خشمي

صرختها متوجعة وسمعت واحد من جانبي الايمن يضحك ويگول "اويلي عيني" شلوون امير سمعه وشلون انتبهله وشلون اصلاً لقطته اذنه ماادري! مادري والله العظيم مادري واصلاً شي ميتصدگ بس صار وانتبه للرجال اليضحك وانتبهلي واگفة لازمة خشمي..

اجاني ولزمني من زندي حيييل عصره بين ايده نبت اصابعه بي وركبني السيارة فاحط، عاف العركة وعاف الدنيا متجمهرة وركب بكرسي السايق ميت حرگة وما سكت صوته من العياط، يضرب على الستيرن ويصيح..

-انااااااا مو صعدددددتچ شكوووو تنزليييييين انتِ تردين تخبليييييني ليييييييش تلعبين بعداد مووووتچ تَـمنييييي

شهگت امسح بدموعي مستغربة اول مرة يحچي ويايه بهالطريقة خربطني من الخوف وحتى لساني انبلع..

-انااا استاااهل وعلي استاااهل من **** على غيرررتي ليييش وينها غيرتي؟؟ انا عندي غيررررة انااا؟؟؟ هم انحسب على الززززلم وره السويتيييي خ** بيه لو گعدتچ بهيج اماااكن بعددد

شفته عصبي ويسوق سريع كلش بلعت صوتي وسكتت لا جاوبته ولا راددت كلت من يهدأ احچي وياه على كيف وازعل هم بس هسة تَـمني ستري على روحچ وانچبي اوصلي للبيت وتفاهمي وياه على الاقل الكل موجود..

سفط بباب بيتهم ونزلت عايفة الاغراض بالسيارة، شفت الصالة فارغة والوقت متأخر هرولت اصعد الدرج ودخلت للغرفة وبوجهي للحمام ذبيت الشال وفتحت شعري وغسلت وجهي بلكي تخف الرعشة والعصبية مني..

فزيت ويه صوت رگع باب غرفتنا قررت ابقى بالحمام شوية ارتاح واسيطر على اعصابي، نويت استمر على هدوئي وما اعلي صوتي صح راح انجلط من كلامه واسلوبه بس ميخالف لازم ما ازيد النار حطب.. طلعت من الحمام شفته گاعد على الچرباية ماد رجل وطابگ رجل جواه..

صبيتلي مي من الدولكة شربته وعيوني عليه راح ينفجر، نزلت گلاص المي وگلت بـ جَدية..

-على شنو كل هالعصبية امير؟ والله الموضوع ميستاهل

-اي اي ما يستاهل ايي هاي يممچ ما يستاهل هاي يم ال***** المخانييث ما يستااهل ست تَـمني مو عنددي

-هسة ليش دتعيط والله عيب يسمعون اصواتنا بله احد گعد شنو هالهمجية؟

فتح عيونه على وسعها جاحظهن، خرررب خرررب خرررب ماعرف شلون طلعت من حلگي كلمة "همجية" يا ريتني مگلتها لان من وراهة گبت مشكلة اكبر..

-لاان دااافعت على عرضي صرت همجييي؟؟؟ لان ما رضيت واااحد نگسسسس يسمعچ حچاية صرت همجييي؟؟ بس انتِ وييين يعجبچ هيچ عيني ويييين

-شنو قصدك؟؟ اشايفني ادبسز لو ساقطة من الشارع حتى هيج تحجي عليَّ؟؟

-سكتيي تَـمني دمي يفووور سكتييي

-دمك يفور على نفسك!! احترم المقابل امير وتحكم بأعصابك لا تظل تشمر حچي عليَّ وتذلنيي بالصار ويايه قبل! قابل اني گلتلهممم تعالوولي لو اني الفتحتلهم ايدي واخذتهم بالاحضان من....

-ووووووولچ سكتييييييييي

شال التيبل لام ورگعه بيني وبينه شبر وچان لاحني وتكسر على جسمي، بعد هالموقف الصار رووحي احسها خرطت ورجليه متشيلني تخبلت انجنيت عقلي ضرب وعطت ورجفة الخوف بيه اخاف يگوم يكمل عليَّ بأي لحظة..

-وصلت بيكك تضربني؟؟؟ وصلت بيييك تريد تمد ايدك عليَّ اميير!! كلل هذا لان تحاارش بيه واحد ادبسززز واني مالي ذنب لا انيي الضحكتله ولا اني الدزيتله بوسة!! بططل الغيرة الزايدة بطلهاا تره موو حلوة تخننننگ

انتفضت ميتة خوف من گام على حيله وركض بأتجاهي ضميت وجهي بيدي احمي نفسي وارجف رجف اخاف يضربني صابتني ردة فعل وتذكرت كتل نعمة قبل.. گلبي راح يوگف..

-اسفييين ست تَـمني اسفييييين نسيت احنه مااا نعجبچ انتِ تردين اجنبييي تردين ايطالييي مسويله عرف دييچ ويمشييي ترددين زلمة مااا يهتتمم ويلبسلچ گرووون ويگعددد وياااچ هنا بالغررفة

باوعتله من جوه ايدي عيوني غرگانة دموع، استجمعت قوتي وطلعت من الغرفة بلغته راح انام يم خالتي وعود بطل صياح؟ بطل تهجم؟ ولا بطل فضحنا وشهرنا گدام الكل..

-تالة: كل هذا صار وياكم تَـمني!

-تَـمني: يشهد الله عليَّ مسويت شي ولا تجاوزت حدودي صح گلت همجي بس مچنت اعنيها وحچيتها كـ ردة فعل على كلامه والله هانني ومسح بيه الگاع

-الامـير علي: طبي للغرفة امشييي

-تَـمني: بعد ولا ارجع هناك يمك خليني ويه خالتي

انتفضت خايفة من هجم عليَّ يريد يجرني والقران عبالي راد يضربني وگمت اركض بظهر خالتي اختل، بهاي حركتي خبلت خالتي وخليتها تشوط.. دفعت امير بخفة من صدره متقبل ياخذني ونترت بكلام مؤدب..

-خليها تهدأ امير عوفها بس تهدأ واصيحلك تتفاهمون

جرتني اني وتالة ودخلتنا للغرفة وماتحملت انفجرت بچي، گعدت على الچرباية فاحطة وجسمي يكزبر ويفك ويرجع يكزبر من اتذكر الصار.. مو ايسكريم اكلنا زقوم چانت ببطوننا گلبت حالنا..

-تالة: توتة كافي بجي يا عمري مشكلتلكم بسيطة وتنحل صدگيني

-تَـمني:‏ ماريدها تنحل مااريد راح يظل طول عمره يذلني بالصارلي قبل مااريده

-حنين: بس ماما حسب كلامج هو ما ذكر الصارلچ قبل وكلامه يخص الموقف الصار ودليل گلتيلنا من ذكرتي الماضي كسر التيبل لام حتى يسكتچ وهالشي طبيعي توتة الرجال ميتحمل احد يذكره بشي يخدش رجولته

-تالة: الصارلچ قبل تَـمني باقي براسچ انتِ كل تصرف يصدر من زوجچ دتربطي ويه ذاك الموضوع ويمكن هو اصلاً مو بباله..

-تَـمني: لا لا احسه بباله

-تالة: حتى لو چان بباله برأيچ هو مذنب؟ مذنب لان يفكر بالسالفة وديضغط على نفسه حتى ميضوجچ بيها؟

-حنين: امي بنيتي انتِ احنه مدا نگلچ الصار هسة هو مغلطان لا غلطان وتجاوز بس هاي المشاكل تصير بين المتزوجين طبيعي وهو يغار عليج وكل الزلم هيجي يتخبلون لو احد سمع نسوانهم حچاية لو باوعلهن بنظرة مو حلوة ردة فعله وياچ صح قوية وتخوف بس ناتجة من غيرة عليج

-تَـمني: اريد ابقى هنا اليوم

-حنين: بعيني اخليچ حبيبة خالتچ ابقي اليوم ارتاحي وباجر حلوها

نمت هالليلة وياهن والشهگة بعدها بيه، مقهورة وممرودة روحي لان اليوم مشفت الامير گدامي شفت نعمة.. شفت اسلوب نعمة وشفت عصبيته وشفت عياطه وهمجيته حتى من يشمر بيده ويصيح نفس نعمة بالضبط هاي حركاته..

گعدت الصبح لبست ملابس من تالة وطلعت للجامعة وحدي ويه علي السور حبيبة اليوم ماعدها محاضرات مهمة وتريد تبقى بعد ببيت عمها.. هستوني نزلت للجامعة وخابرتني خالتي گالت الامير اجاهم للغرفة يسأل عني..

-تَـمني: وشگلتيله؟

-گتله راحت للجامعة

-تمام

-بس چان ضايج ومقهور چنه ما نايم هم

-خالة لا تبالغين

-والله ما ابالغ سألي تالة.. تعالي تالة سولفي ويه توتة

-تالة: ها تَـمني

-تَـمني: شمگعدچ من الصبح انتِ شعجب؟

-گعدت على صوت رجلچ شعلاته عباله ضاميچ عنه وراد يدخل للغرفة يدورچ

-يااا

-والله اخترعت وامي تحلفله طلعتي للجامعة ياله صدگ وراح

-ها

-عود خلي قيمة للزعلة مو بسرعة ترضين الفاهية وتطيرين الهيبة

-حنين: ولج تااالة

-تالة: ماما مو اعرفها هاي فطيرة هسة لو ينطيها چكليته هم تقبل وتراضي بسرعة

-تَـمني: لا ما اقبل والله ايدي بعدها مزرفة وتوجعني نبت اصابعه بيه ما اصالحه الا يعتذر مني ويبوس ايدي

-تالة: دنچبي تريده يبوس ايدها مو لهدرجة ولج

-تَـمني: اي صح طلعت من حلگي.. المهم هسة اني اروح عندي محاضرة

سديته منهن ودخلت المحاضرة رجلي بعدها توجعني انوب اني نسيت ولبست كعب من تالة وتعاحزت ابدله، كملت محاضراتي وطلعت شفت سور واگفلي سلمت ودخلت السيارة وضحكت فرحانة من شفت حبيبة..

-تَـمني: وولج ها بذاتة شلونچ

-حبيبة: هههههه مشتاقتلچ فهاوي

گامت من كرسي الصدر وگعدت يمي ليوره تسأل عني وتسولفلي شسوت ببيت عمها البارحة، فرحت من گالت زهراء بنت عمهم صمد البارحة اجوا زلم يخطبوها من ابوها وصارت موافقة منها ومن ابوها..

-حبيبة: اي وليلة هم جاييها اليوم

-ياااا واخوج!!

-سكتي راح يموت ابا الحسن هسة لو تكضي يصيح بيچ

-خطية الله يساعده وهي ليلة راح توافق برأيج؟

-مادري بعد

-زين ورفل شعجب متتزوج؟

-ما ترضى رفل تريده مواصفات معينة

-وشنو المواصفات الي ببالها؟

-تريده اشگر وعيونه زرگ وتره ما جاي اتشاقه والله هيج تريد وتريده بغدادي ومن ذولة المرتبين اهل القوط والبدل الرسمية وشغله مال نازكين

-هههههه ان شاء الله تحصل

رحنا لـ عبق بمدرستها لان طالعات من وكت فـ لحگنه عليها، اخذناها وسولفتلنا على سبأ انصدمنا وظلينا وحدة تباوع للثانية..

-حبيبة: وما حچت شي من گعدت الصبح؟

-عبق: لا والله كلشي مگالت بقت بس تبچي ونزلت للاستقبال وانوب اني الغبرة نسيت ارجع التلفون البارحة صحتلها وحطيته بيدها بكل صلافة

-تَـمني: ومسألت ليش ماخذته؟

-عبق: هم لا وتقي استلمها تحقيق وگاللها اذا ما حچيتي شعندچ اطردچ من البيت وهم ظلت ساكتة فـ طردهم

-حبيبة: تقي طرد صابرين وبناتها!!!

-عبق: اي والله گدامي هاي الصبح قبل لا اطلع للدوام سمعت الهوسة گبت بس ما لحگت افتهم الباقي لان طلعت بعد

-تَـمني: اني سمعت اصوات عالية بس توقعتها سلوى متعاركة ويه صابرين

ظل بال حبيبة وبقت تفكر هواي لحدما رجعنا للبيت واستقبلتنا هوسة جديدة علي الكـرار لازم تالة ويتعارك وياهة.. ركضت عليهم افتهم شكو وعطت بعلو صوتي خايفة..

-شبيييكم شنووو صايرر تااالة شنووو الموضوع

اللتفتلي كرار مخنزر راح ياكلني، لطم على وجهه بثنين ايده على كيف ونتر بين سنونه بخفوت..

-صوووتچ يام الغيرة صوووتچ

-تَـمني: ليش

-علي الكـرار: زلم جايين بالديوان گاعدين

-تَـمني: ها مچنت اعرف

اشرلنا ندخل ونتر بـ تالة بعصبية..

-طبي انتِ ام لسان

-تالة: نعم ام شنو؟!!

-تَـمني: تالة لا تعلين صوتج شبيكم انتو الثنين

-تالة: والله مبيه شي اني طلعت للحديقة قبل شوية وگعدت على المرجوحة امرجح شوية واندگت الباب راح حضرة جنابه هو يفتح الباب ودخلوا كومة زلم وشيوخ وبعد اني انحصرت بمكاني ماكدرت ادخل فـ بقيت كاعدة وشافوني الزلم

-حبيبة: صخاام الصخمني

حبيبة تباوع لملابس تالة من فوگ ليجوه وتضرب على خدها خفيف، انحرجت من الموقف خصوصاً تالة لابسة تراك مخصر عليها وفاتحة شعرها..

-علي الكـرار: خلت الما يشتهي يشوف ومن اگللها ليش ما طبيتي من اندگت الباب تتلاسن وياي!

-تَـمني: ميخالف كرار هي هم توازت ومتعرف وين تروح لو مبلغها انتَ قبل لا تفتح الباب احسن

-علي الكـرار: والزهرة ما شفتها يعني تتوقعين اشوفها واعوفها كاعدة

ماعرفت شگول وهاي لسانها طويل تالة ومتسكت وهذا معنفص وياهة مبين هالكرار ولا يحب تالة ميتوالمون ابد، دخلنا جوه البنات كلنا وگعدنا بالصالة محد بينا صعدت فوگ..

-حبيبة: منو جاي؟

-سلوى بأبتسامة: واجهة شيوخ جايين

-حبيبة: شنو المناسبة؟

ضحكت بدون لا تجاوب وشفت وجه حبيبة يتغير لونه، اصوات الزلم عالية وصوت شيخ علي يجنن بيناتهم شگد فرحت من عرفته طالع مستقبلهم وگاعد وياهم صح ميحچي هوايه وصوت الامير يطغي على صوت ابوه بس فرحت بهالتطور الله ينطي الصحة والعافية يارب..

صعدت اخذت ملابسي من الغرفة ما دامه مموجود ورحت اسبح، بدلت ونزلت جوه اتغده ويه البنات وافكر بالصار قبل شوية ويه تالة.. خالتي صايرة تستحي من گعدتها هنا وتحس بروحها ثگيله تريد تطلع وبعد الصار اليوم احس حقها وكلامها صحيح..

على گعدتنا دخلن فراقد وعمتهم زهرة وغزوة وابتسام ومرة عمهم صمد مشتريات فواكه حطنهن على المجمدة وراحن لخالة رسمية يسلمن عليها، كملنا غدانا وتساعدنا بغسل المواعين وتنظيف المطبخ ورحنا يم النسوان ديحچون عن بيت مسعود..

-فراقد: يااا لايطة يا نايطة هاي صابرين العايقة يمته تتوب

-رسمية: چنه تقي لازم عليهم لزمة وطردهن من البيت

-فراقد: عبيقة جيبيلي الفاكهة الشتريتهم.. اگلچ خية شلازم وليدج على هالساقطة

-رسمية: ما حچى شگد ردت عالجت ابد فلا حچى بس گال راح يرجع البيت من مسعود ويطيح حظهم واللزمه اللازمها عليهم تخرس لساناتهم

-غزوة: يا علي بجاهك تنحل

جابت عبق الفاكهة حطتهن گدام فراقد والبنات كلنا گمنا نريد نروح لغرفنا بس مقبلت الا نگعد وياهة لان مشتاقتلنا..

-فراقد: چا ابرار وينهي؟ صيحنها تجي تاكل ويانه

-سلوى: النساة اذتها ما تتحمل تاكل شي

گشرتلنا فراقد برتقال وانطت لكل وحدة بس منشتهي ناكل محد مدت ايدها، گامن البنات والعمات ومرة عمهم ويه خالة رسمية وتالة هم راحت وياهن يگلمن بامية ردت اروح وياهن وفراقد ما قبلت گعدتني يمها وسألت بيني وبينها..

-فراقد: شبيچ توتة

-مبية شي خالة

-شايلة شي لو بعدج

-شنو اشيل؟

-فريخ شتشيلين يعني

-هاا لا ماكو شي

-چا شمالكم انتِ وزلمتج ما تتحاچون لو شني؟

استغربت شلون احه ببالها اني وامير متعاركين بس مبينت روحي متفاجأة وجاوبتها..

-لا عادي ماكو شي بيناتنا

-لا تچذبين

-مدا اچذب خالة

-خاف ما تدرين انا من العيون اعرف العشاگ لو تزاعلوا

-صدگيني ماكو شي مجرد عصبنا، شوية وتروح لا تخافين

-ياهو عصب الامـير علي؟

-اي

-بس لا مد ايده عليج!!

-لا بس صياح

-خايبة انتِ هم تشوفين هاي عصبية؟ تهيييي بهييي انتِ لو شايفة الامير القديم بعلي ترعشين من فوگ ليجوه

-شدعوة

-لانچ ما تعرفينه شني گبل چان يرعد البيت رعدد ابوه ما يگدرله لو عصب وعنفص عليهم يشيل الدنيا ويرگعها ما يوگف بعينه احد وما يخلي شي ما يكسره يفقد وينگلب مسودن وانا ما احچيلچ عود رجولة وهالسوالف التعبانة جاي اگلچ عصبي عصبيي چبريت

سكتت اتذكر عصبيته البارحة واتذكر الصار ببغداد من عرف بـ حملي شلون كسر الشقة على روسنا.. فعلاً عصبيته مخيفة وتجبر الشخص يسكت لان لو بقيت تلاسنه اتوقع ماعنده مانع يمد ايده لحلگ الشخص ويشلع لسانه من مكانه..

-تَـمني: عجيب

-فراقد: اي چا ابوه ليش راده شيخ حتى غصباً عليه يتغير

-بس خالة اني اعرف الشيخ لازم يكون حليم وصبور ومو عصبي حتى يعرف يحل المشاكل بحكمة

-هو حكيم وذكي ويعرف يسولف ابن الحلوة لسانه بحدة السيف من يعصب وبـ ليونة الماي من يعجبه شي

-ليش شيخ علي راده شيخ من دون اخوته؟

-لا ليش حاچى علي الدر اول بس در ما رضى وحاچى بدر وهم ما رضى تقي من البداية بعد روحه وما تعجبه هالاجواء وصار الامير بالواجهة، واصلاً شيخ علي من البداية راده وتمناه يصير وراه

-وقبل الامير بسرعة؟

-لا شني غير صارتلج ذيج المشكلة وحلف الامير علي ما يستلم الامارة بعد عين ابوه وشيخ علي كضه گلبه وطاح راد يروح بيها، تالي لافت لافت لافت ورجعت للامير وانجبر يرضى بس بعده جاي يقنع بأبوه يشوف غيره بس علي معند ويه وليده

انطتني برتقال وتفاح اكلهن واسمعها وكومة اسئلة عندي، مركزة بيها واستمع ما ضيعت حرف..

-گلتي شيخ علي راده يصير شيخ حتى يتغير؟

-گتلج عصبي وتجيله نوبات غضب ما تسيطرين عليه يعني مادري شون اشرحلچ..

-ادري ادري شايفته من يعصب

-لا وييين خايبة هاي مقبلات اليمچ انا جاي اسولفلج عصبية مخابيل وابوه راد يگعده بديوان خاطر ينجبر يتغير لان لو عصب وگلب الدنيا ما يفشل غير روحه وصدگ جابت نتيجة گعدة الديوان

-بس غريب شلون جازف شيخ علي بله ما تغير الامير وبقى على حاله؟

-شيخ علي يعرف وليده ليش انگلب حاله وصار هيج وراد يطلعه من الصدمة الاجته من خلال الديوان مثل ما تعرفين الديوان يخرج شيوخ وزلام گد چلمتها

-يعني امير مچان بهالعصبية قبل؟

-لا صار هيج وتغيرت شخصيته وكلشي بي وصار عنييف بشكل من وره ذيچ السالفة انگلب الامير غير امير لا وعلي غير امير مات الوليد راد يروح من ايدينا

-يا سالفة؟

-ليش انتِ ما تدرين؟

-لا

-چا خلي هو يسولفلچ

-خو انتِ احچيلي

-لا هو يسولف احسن.. ايي خية وين چنت فـ انتِ من تگولين عصبي ويتصايح هاي زين الامير وياچ غير چن مو هو وحتى امه منتبهه، صار يصبر ويكض روحه من يعصب مو يهرجنا مثل گبل هواي تغير من تزوجتوا يشوفج مايعة وما تتحملين ومايريد يطفرچ

ابتسمت على عبارتها وبقيت اسولف وياهة، شفت علي الكـرار دخل للصالة وعرفت الزلم بدوا يطلعون.. نعست وصعدت فوگ انام نسيت اني متعاركة ودخلت لغرفتي وتمددت على الچرباية وغطيت روحي..

هستوها غفت عيني والباب انفتحت وخرت الغطا عن وجهي شفته هو دخل، زفرت نفس متضجورة وانطيته ظهري بينما هو دخل وسد الباب وراه..

-تَـمني گعدي خلينا نسولف

-اريد انام

-گعدي نوومه

-اني مو نوووومتك

-لا تصيحين

-ليش حرراام لو نوومه صااحت؟؟

-يعني انا اجيت اريد احل السالفة وانتِ ترجعين تگببيها؟

-اي اگببها لان البارحة اخذت دوري ومخليتني لا اعيط ولا اطلع البگلبي اخذتني حاصل فاصل

-خوشن طلعي البگلبچ خلصيني

-انتَ هوووايه دست بالحجي البارحة هوووايه

-صوتچ نصي واحجي انزرف راسي

-انتَ هم البارحة زرفت راسي

-خوشن يلا خلينا نتصالح

-اوكي

-تعاي انطيني حبه

-تعال انتَ لان انتَ المزعلني

تقرب مني ونزل يبوسني على راسي ضحكت وجريته من ياخته اداهره، ضحك خفيف ووخر عني يگعد بصفي..

-مسودنة ليش فضحتينا البارحة

-انتَ فضحتنا

-انا عايق انتِ شبيچ ما كضيتيني

-شلون اكضك يعني؟

-سكتيني ببوسة بحضنه بصخام لوجهي

-هههههههههههههه يا فاسق

-الضحكة ترن رن خرب روحج

-تعال ابوسك

-ها؟

-اي والله تستاهل لان اشتريتلي اغراض البارحة

-چا كل يوم اشتريلچ خاطر انباس

-اريد تاج ذهب

-هلاااا

-يعجبني تاج بنفسي باقي

-من اصير ملياردير تدللين

-ههههههههه تعال

جريته من قميصه وبسته بشفته فتح عيونه مصدوم واني هم مصدومة من تصرفي، ماعرف ليش هيج سويت وراسي مصدع ودايخة كلش..

-احم.. بالغلط صارت هنا والله

-الله يكثر من هيج غلط

-اگعد راحة

-ما تعيديها امنية وتريحين افادي

ضحكت ضحكة اعلى وجريته اعيدها وهالمرة استخفيت! استخفيت لدرجة بغمضة عين فتحة عين لگيتني جارته بصفي مخليته يتمدد..

-ولج سرسرية صايرة انتِ

-ليش ميعجبك؟

-يعجبني بس شبيچ انتِ چنچ تعبانة؟

-كلش اي..

-راح اگول شي بس لا تنچلبين عليّ

-هاي سلوى التنچلب مو اني

-لا ترحين زايد ولج مرة ابوي هاي

-اموت منها تأذي عبق

-ها؟

-احچيلي شنو ردت تگلي؟

-شو بساع صالحتيني شعجب ما عليتي افادي

-ههههههههه احضنني اريد انام

لمني بين ايده ويمسح على شعري من وره، رفعت راسي اله ومديتله لساني اعيب ومن صدگ ماعرف ليش عيبت..

-شو مطلعة اللسان خير

-اني بعدني زعلانة منك بس قررت اأجلها لغير وقت

-وشوكت غير وكت خالوو

-عود اشوف خليني افكر

-اممم

-اريد اسافر

-اللهم صل على محمد وال محمد صايرة الطلبات كلها بالعالي

-شبيك نحيس سفرني

-ما احب اسافر

-بس اني احب

مديت نفسي وبسته مرة ثالثة، رفع حاجبه مستغرب بس بقى يجاريني..

-وين تردينا نروح؟

-لايطاليا وياارب اتزوج ايطالي

-تَـمني!

-ها

-انچبي لا اچببچ بطريقتي

-خنشوف طريقتك ابو البورگ

-بعدين

-ليش مو هسة

-بعدين خايبة شبيچ مستعجلة هسة نامي وانا شوي وارجع

-لتروح

-شوي وراجع ما اتأخر

-ابقى يمي حباب

مديتله ايدي اجر بقميصه، رخى ايدي عن قميصه وباسهن يبتعد..

-دقايق نوومه انتظريني مو تنامين

-انام

-العناد ماكل راسج اكلل

**

-حبيبة: وما جاوبتي بالامتحان اليوم؟

-عبق: لا نسيت القصيدة كلها متت قهر

-حبيبة: ميخالف انتِ مجاوبه بالقواعد ترفعچ

-مدرستنا تضوج مني وماتوقع راح تساعدني

-ليش تضوج منج؟

-نسيتي من گتلج ذيچ المرة نمت بدرسها بس والله مچنت نايمة دقيقة وحدة ورحت للمدرسة غفيت بدون لا احس وگومتني شبعتني رزايل وتصيحلي مهملة ورادتني اجيب امي من گلتلها معايشة ويه امي كالت اريد ابوچ گلتلها ابوية ميت والبنات ماتن ضحك عليَّ والله يا حبيبة احترگ گلبي

-سودة عليَّ عبوقتي لا تزعلين انتِ ما تدرين اكو بنات سخيفات وعلى كلشي يضحكن

هزت راسها ساكتة احترگ گلبي من صدگ بس حاولت ما ابين گدام عبق وازعلها اكثر، نويت اگول لـ علي الدر يروح لدوامها ويسأل عنها بلكت من يشوفون احد وراهة ودر يشرحلهم وضعها المدرسات يساعدوها..

ذبيت السجينة من ايدي وگمت اغسل وصعدت فوگ لغرفتي اخاف يطلع شكي صحيح وذولة الزلم جايين يخطبوني من ابوي وتحصرني امي وتحرجني گدامه مثل العادة..

تمددت على الچرباية تعبانة وشلت موبايلي اشوف شكو ماكو قبلها، شفت من بين الاشعارات اشعار جايني على الماسنجر من حساب بنية، فتحت الرسالة شفتها كاتبة..

"منو انتِ؟"

فريت ايدي هاي شنو مكبسلة شو هي داخلة عليَّ وكاتبتلي منو انتِ، قبلت رسالتها وجاوبت..

"انتِ المراسلتني"

شافت الرسالة بساع ودزتلي سمايلات واحد يضحك وسمايل خجلان وكتبت وراهة..

"اسفة شفت اخوية مراسلچ عبالي انتِ حبيبته القديمة ورجعلها"

"اخوچ مراسلني؟؟"

"اي"

"منو اخوچ؟"

"حاكم"

ركزت بأسمها واجتني لحظة ادراك اي والله نفس اللقب ثنينهم والبنية مسمية حسابها "حورية الـ^^^^^"، صفنت شوية برسالتها وجاوبت..

"دكتور حاكم يصير صديق اخوي وساعدني بشغلة الله يوفقه"

"اي محادثتكم تبين ماكو شي عذريني والله اني بس ظل بالي لا تكونين حبيبته القديمة لان هي هم مسمية حسابها حبيبة"

گلت بگلبي وين اكو هيج كلاوات بس سايرتها اشوف ليوين توصل چذبتها..

"ها هم اسمها حبيبة؟"

"لا اسمها ناردين بس اهلها يدلعوها حبيبة او حبيبتنا فـ مسمية الفيس والانستا (حبيبة حبيبة)"

بكل فضول طلعت من صفحتها ورحت للفيس ابحث حبيبة حبيبة، طلعلي كم حساب وشفت حساب وحدة مسميته هيچ وتشتغل دكتورة بمستشفى ببغداد وكاتبة مواليدها يطلع عمرها 28 سنة اهااا يعني هالبت ما جاي تچذب بس شلون صدفة قوية..

رجعت لصفحتها گلت فشلة اعوفها معلگة، عدلت گعدتي وكتبتلها بدون مستحى..

"چا ليش تدورين وره اخوچ؟"

رجعت دزتلي نفس سمايلات فوگ واحد يضحك وواحد خجلان وكتبت..

"اخاف عليه منها"

"ها"

"ناردين اذت اخوية هوايه وصارلها فترة تتوسل تريدهم يرجعون وحاكم معارض لان السوته كسره"

"ها"

"اي فـ اني من وكتها افتش تلفونه بالخفية خاف تراسله وتكسر خاطره وينوي يرجعون سوه"

نسيت روحي وضربتلي عچس وگعدت ادگ فچ وياهة وهي هم اجتماعية وذبت ميانة بسرعة..

"بس اخوچ چبير وواعي اكيد هو ادرى بمصلحته"

"صحيح بس اخوية گلبه طيب اخاف لا ناردين تذبلها دمعتين گدامه وتتوسل زايد راح تكسر خاطره و يرجعلها"

"ولچ ليش واگفة بطريقهم خلي يشوف حياته"

"ولچ خلي يشوف حياته هسة اني شگايله بس ذيچ كلبة ومتستاهل واحد مثل حاكم ختولي كلش مو خوش بنية"