تحميل رواية «الامارة» PDF

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

آنه اخاف مِن

الامان المّاهو يمچ

آنه كُل خنگاتي

چي مَجاي اشوفنچ

شلي بعيّوني؟

يَبعد عيوني اذا

مو بيها أضمنچ .♥️

━━━━━━ ♛ ━━━━━━

-حبيبة: يمممماااا امييييي يمممما كووومي يممماااا

عياط هوسة هرجة وصوت حبيبة يزرف طبلة اذاننا وگلبنا، ركضت خالة رسمية على سلوى السبحت بدمها وكل البنات ركضنا نتورشعها.. محد من الولد هنا بس علي الحـق واكف يتفرج ويرجف من العصبية تخبلت من الشفته مدا اصدك الصار!

-تَـمني: علي الحـقق تعاال خلينا ناخذذها للمستشفى!!

ويه عيطتي دخل تقي وجمدت رجله بالباب من شافنا بهالحال، ماطول ثواني وركض علينا ميعرف شيسوي شاف حبيبة بهالحال نايمة على جسم امها وتبجي افتهم الصار وتخببل..

-علي التـقي: تخبللللتتت ولك حققق تخبببلت انتَ

-علي الحـق: هدددني مااعليك انتَ وييييين عبببق ولج كووومييي

راح لجسم سلوى يريد يرفسها برجله وتقي دفعه بعيد يعيط متسودن..

-مااا تخاف ربك انتَ ماااا تخاف الله

-وووولك وينهااااااا

سحب اقسام من مسدسه يريد يكمل عليها خلانه نموت بمكاننا والله رجليه بعد متشيلني وخالة رسمية انهارت راح توكع علينا، لگف تقي السلاح من ايد اخوه على غفلة وشمره جوه الدرج وصار يتعارك وياه ويتصارع يريد يثبته ويعيق حركته ميكدر علي الحق صار انسان ثاني وعيونه متشوف غير سلوى يريد يذبحها..

-حققق اصحححى علي الحـق!!!

-ووخررر مااالك غرررض هددني تقيييي ولك تقيييي

-عليييي والله ابوك يذبحككك والله هييييد واعقللل

ضربه على صدره ضربة قوية خلاه ينرد ليوره واللتفت تقي على سلوى وحبيبة الي انتهت من البجي، جرها من امها جر ونصى على سلوى وشالها يركض بيها يطلع من البيت، هرولت رسمية تلبس عبايتها وجابت وحدة لحبيبة وطلعن سوه وره تقي، لحگتهن شمس تريد تروح وراهن وعاط بيها علي الحـق صووت فززنا..

-علي الحـق: اوكفي شمممس

اللتفتت تباوعله والدموع مغطية وجهها، باوعلها مخنزر عيونه راح تطلع من وجهه وتقدم عليها بخطوات سريعة واسعة..

-عبق وين؟!!!

-شمس: ماعرف

-شمس راح اسأل مرة وحدة وراح تجاوبيني بدون مطمطة! عبق وين؟؟؟؟

-شمس: مااعرف والله ماعررف

خزرها بحدة اكبر وهي ظلت تبجي وتهز براسها متعرف بس ما طولت هواي بسكوتها وما اللومها، خزرته وملامح وجهه تخوف حتى الممسوي جريمة يعترف على روحه ويكول سويت..

-شمس: علي الحـق يشهد الله ودااعة البطني ماعرف عبق وين بس اعرف بسلوى تكرهها وسوت المستحيل خاطر تأذيها

-شسوتتت؟؟؟

-عاين انا مادري اذا الموضوع.. اذا.. الموضوع اله ربط بـ عبق بس بآخر فترة.. بآخر فترة صارت تتردد علينا مرة و.. وتحچي ويه سلوى.. هي حرمة تلبس بوشي وتغطي حتى عيونها

-اي؟؟؟

-وعلى مرة شفت سلوى تنطيها فلوس ومن شافتني لگفتها خافت كلش ووجهها انخطف لونه وهددتني اذا حجيت تخرب بيتي

توسعت عيوني بصدمة ودرت وجهي لـ رفل المستغربة، بچت شمس اكثر بقهر واضح وجهها صاير كلش احمر ولازمة بطنها حيل خفنا عليها لا يصير بالطفل شي وهو هم ما طوخ وياهة بالاسئلة هز راسه وعافنا وطلع من البيت كله..

-ليلة: شمس ليش سكتي كل هالفترة وما حجيتي؟؟

نزلن دموعها مرة ثانية وكعدت على القنفة مهدود حيلها، هزت راسها تعبانة وكالت..

-شمس: هددتني.. انتم ما تعرفون سلوى شني من بشر ما تعرفوها

-رفل: نعرفها وعاشرناها سنين مو امس اجتنا سلوى

-شمس: لاا انتم ما تعرفوها سلوى شيطاانة ماعدها ذمة وضمير مرة يتعلم منها ابليس!

-سبأ: اي والعباس

-ليلة: حتى لو سلوى شيطانة جان لازم تحجين شمس جاان لازم تحجين

-تَـمني: على كيفكم بنات وياهة ثانياً هي شمعرفها الموضوع اله ربط بـ عبق؟ شنو تشم گفه ايدها!

-رفل: صحيح كلام تَـمني بس هسة لازم نعرف علي الحـق شسامع وطب علينا هالشكل وليش تهجم على سلوى هيج

هزينا روسنا مأيدين كلامها ونفكر شلون راح تصفى، سلوى راح تعيش لو لا؟ وعبق راح ترجع لو لا؟ وعمو علي شنو راح يكون موقفه من الصار!

تأخر الوقت وصعدت لغرفتي تعبانة رحت لتلفوني شفت خمس مكالمات فائتة من الامير ومكالمات من تالة وخالتي وكومة دازيلي رسائل.. فد مرة تعبانة وماعندي طاقة اجاوب احد كلمن دزيتله رسالة ابلغه راح انام وسديت تلفوني وحطيت راسي ونمت..

ومثل كل يوم دخلت بعالم الاحلام واستقبلني كابوس مرعب، صار اسبوع ما تغفى عيني اذا ما اتحلم بشي غريب او اتحلم بأضغاث احلام.. احلامي عبارة عن خربطة بخربطة اشوف محسن يبجي والامير يعيط عليَّ وخالتي تتعارك ويايه وولد مسعود يتفرجون عليَّ من بعيد وافز من نومي مخترعة..

بديت اتعود على هالوضع وصرت ما اشاركه حتى ويه خالتي.. كعدت ثاني يوم على صوت صياح ومن نبرة الصوت عرفته شيخ علي خفت حتى انزل من العياط المخيف شكدما عالي واصل عندي.. كمت بسرعة من الفراش بس غسلت وجهي وحطيت شال على راسي ومديته من المحجر شفت الصالة محتركة شيخ علي لازم عگاله بأيد والشماغ بالايد الثانية ويهدد..

-قسماااً بجااه الله لو شفتتته معتتتب باااب هالبيييت احش رجلييه حششش

-علي التـقي: بوية صلي على محمد شساالفة

-شيخ علي: ولااا چلمممة بعلييي اچفص ببطونكم ولددد العااار تسودنتووووا استفحلتوووا **** بچبيركممم المااعرف يضبكممم هاي وانا بعدني ماا فطستتت ووليتوناا ولييية چااا لو انگبررت شتسوون

-ابا الحسن علي: شيخنا اهده وجر نفس لا يصيرلك شيي

-علي التـقي: بوية علي الحـق غلط ادرري غلط بس لا تأذي رويحتك مو زين عليك

-شيخ علي: ويينه المسوووي روحه زلمة ونافخ عضلاته على نسوان بيتتته اسمع ولك تقييي بلغه وگله ابوووي ما يريد يشوف چهررتك بعدد روووح ولي بعيد عنه يحررم وجوده بهالبيت بعدد فهمت لو لااااا

-رسمية: فهم شيخ فهمم والعباس فهم بس ارتاح انت

-شيخ علي: ولج لووو ميتة وين نودي وجووهنا ويننن انطي وجهي ودخيلة بيتيي اعتدوا عليها ويييييين

-رسمية: ما ماتت ابوي انتَ ما صار بيها شيي علي الحـق مو غبي ويعرف وين يضرب

خزرها عمو خزرة سكتها وسكت حتى ولده الكل انضرب لاصق على حلوكهم ووكفوا على جهة خانسين وهو طلع من البيت واكييد متوجه للمستشفى.. توترت من الصمت وما ردت ابقى هنا وحدي ورجعت لغرفتي اتصفن بالحيطان وافكر وهيج مشى يوم جديد بدون عبق..

ثالث يوم رجعت سلوى من المستشفى واني مو لخاطرها اكيد رحت اتحمدلها على السلامة وانما لخاطر حبيبة الماتت على امها، كعدت وياهة اصبرها وادعي لامها حتى تكون بخير بس يا خير چنها صل كلشي مابيها كاعدة على حيلها ومن يجي شيخ علي تلزم بطنها عود متأذية لانها انضربت هناك..

للعصر اجن العمات ومثل العادة رجعت الحياة طبيعية كدامهن وخالة رسمية حبست سلوى بغرفتها متخليها تطلع، ارتاحيت من طلعن بسرعة بس شربن چاي وراحن لان عدهن واجب وحدة من صديقاتهن مزوجة ابنها ويردن يرحن يباركنلهم..

-رسمية: يا علي دخيلك تعبنا

-تَـمني: خالة ماكو تطور؟

-رسمية: خابرت تقي يكول ان شاء الله خير

-ليلة: يعني شنيي

-رسمية: مادري ما رضى يحجي زايد

-تَـمني: ان شاء الله خير

-رسمية: كومن يمه سون لكمة ناكلها صار چم يوم متبهذلين والويلاد جواعة بلچن ياكلون اليوم

-رفل: صار، يلا بنات

كمنا سوه للمطبخ نسوي عشا وماعدنا غير موضوع عبق نحجي بي، اباوع لـ حبيبة انطفت وجهها شاحب وعيونها ذبلانة تعبانة كلش لا تقبل تحجي ولا تشارك بالحديث..

-ليلة: حبيبة نسوي طماطة گلي؟ عبق جانت تحبها

هزت راسها حبيبة حزينة وشفت شفايفها تبرطم، انكسر گلبي وظل بالي عليها ما بقى شي لزواجها وانكسرت فرحتها بغياب اعز صديقاتها وبالصار بين امها واخوها.. تنهدت ضايعة مادري افكر بـ عبق عزيزة گلبي المعزتها وحبها من حب تالة اختي وبت خالتي لو افكر بمصايب هالبيت المتخلص سبحان الله شنو هالمكان الغريب والعيشة المنحوسة؟

-رفل: صوت باب الحوش اظن رجعوا الزلم

هدينا من ايدنا وكلمن راحت على شالها تلبسه، دا احط الدبوس بالشال وسمعت صوت الزلم من الباب يصيحون "يا الله"..

-رفل: تفضلوا تعالوا

-علي التـقي: سون درب يا نساوين

افتهمنا قصده معناها جاي ضيف ولازم نطب جوه، ركضنا وحدة وره الثانية نريد نطلع من المطبخ وبعدنا بالباب ما ملحكات نختفي ودخلوا علينا الزلم..

-حبيبة: يااا ياااا شمالهم اخوتي چا غيـ.... هاي عبق!

اللتفتنا كلنا على صوتها وشفنا المنظر الچنه نتمنى نشوفه صار ايام! شفنا عبق كدامنا لابسة عباية سودة وحاضنها علي الحـق لجسمه حييل..

-تَـمني: عبق يا رووحيي

ركضنا عليها نسلم ونحضن ونبوس وهي ترجع تحضننا وتبجي بصوت عالي، لزمتها حبيبة تضمها لصدرها وتمسح على راسها وتبجي بگلب محروك وتبوس براس عبق كأنها بنتها وجانت مضيعتها..

من الفرحة ماعرفت شسوي جسمي ظل يرجف موقف صعب ويرهب عبق رجعتلنا اي والله هاي عبق كدامي البزونة الحلوة رجعت نورت البيت.. مسحت دموعي وباوعت لـ علي الحـق المبتسم بس تعباان كلش تعبان ووجهه صاير ليمونة من الصفار وشفايفه بيض، حطيت ايدي على گلبي وتنهدت مرتاحة اخيراً خلص هالكابوس ورجعتلنا عبوقة..

دخلوها جوه والولد دخلوا وراهة، اباوعلها من بعيد وافكر وين جانت وشلون لگاها علي الحق وليش تهجم هيجي على سلوى؟.. استقبلتها خالة رسمية بالاحضان والتهليل ووكعت بيها اسئلة وين جنتي وشصاير بيج وليش هيجي ضعفانة وليش ذبلانة..

-علي الحـق: يوم على كيفج ويه البت ما تشوفيها مريضة

-رسمية: ولك گلبي خلص وين جنتي ولج عبيقة ويين

ظلت ساكتة متجاوب احد ورجعت لحضن حبيبة، سندت راسها على صدرها ومقبلت تبتعد عنها طول ما احنه ملتمين بالصالة ونسأل ونستفسر..

-رسمية: ما تحجي حقق وين جانت البت؟؟

-علي الحـق: ما راح تصدكين وين لكيتها

-رسمية: يعني صدك انهزمت ويه زلمة؟؟

-علي الحـق: لااا يوم شسالفة! انتِ مصدكة هاي الرسالة ال***! انا اول ما قريتها عرفت مو عنق الكاتبتها اعرف اسلوبها مو هيج

-ابا الحسن علي: اخذوا البت خليها ترتاح هسة مو وكتها

وافقه علي الحـق وراحلها يريد ياخذها وخالة رسمية اعترضت طريقه متقبل هو يصعدها وكالت لـ حبيبة وليلة ياخذنها وهو يبقى يفهمها الموضوع.. استجابن البنات بسرعة واخذوها فوك ردت اصعد وراهن بس فضولي عن وين جانت كل هالفترة تحكم بيه وخلاني ابقى جوه وأسمع لحديثهم..

-علي الحـق: لگيتها بجناح ^^^^^ بالشماعية!

دگت صدرها خالة رسمية شاهگة، عيونها صارت بگصتها وعلي الحق وجهه صار دممم.. دورت عيوني بيناتهم ممفتهمة وبدون وعي مني سألت..

-تَـمني: شبي هالجناح؟

سكتوا كلهم محد حچى، دورت عيوني بين سبأ ورفل وشمس استفسر بس كأن هنه هم ممفتهمات.. بعد ثواني من الصمت المميت تحسر علي التـقي يفرك وجهه بتعب وجاوب سؤالي..

-علي التـقي: هالجناح خاص للمرضى النفسيين الحالتهم تكون خطرة والي اغلب الاحيان يكونون هناك بسبب حالة جنائية

-تَـمني: يعني مجرمين او سجناء؟!

-علي التـقي: اي بس الي عنده خلل بعقله ويحتاج علاج نفسي يتواجد هناك، هذول مرضى يأذون نفسهم ومحيطهم واشبه بالمجانين كلشي بهذا الجناح غير حرس حواليهم ويعاملوهم بطريقة تختلف عن باقي المرضى توصل بيهم يهينوهم ويعنفوهم!

-سبأ: سودة بوجهيي

-علي الحـق: مو بس هيج! ما يسمحولهم يختلطون بالباقين بيبانهم حديد مزنجلة وشباچ صغير موجود بغرفهم ويكون بـ جام مضغوط خاطر ما يكدرون يكسرونه.. مكانه كسيف ويحرگ الافاد وعبق جانت هناك كل هالفترة!!!

-رسمية: عمت عيني عليج يا بنيتي شوداها هناك يا علي شوداها

-علي الحـق: شوداها؟؟ عليج علي تسأليني شوداها؟؟ ما اظن ينرادلها سؤال ليش ياهوو يندل درب الشماعية وشامر اخته هناك غير ذيج الب*****

-رسمية: زين شلون لگيتها علي الحـق؟؟

رخت اكتافه وتعكمشت ملامحه مال واحد متوجع، حط ايده على خاصرته واتوقع جرحه ديأذي لزمه تقي من جهة وابا الحسن من جهة وگعدوه على القنفة حتى يرتاح شوية..

-رسمية: سودة عليّ يوم بيه ولا بيك يا بعد هلي

-علي الحـق: اسم الله عليج يمة

-رسمية: ارتاح حبوبي نام وليداتي تقي جيبله مخاد خلي ينتچي

-علي الحق: لا ماكو داعي.. حسن سولف لامي شون لگينه عبق

-ابا الحسن علي: گبل يومين اجتني رسالة على موبايلي من حساب انستكرام كاتبيلي..

"الصوچ كله من العايشة بيناتكم وتثقون بيها"

-رسمية: يعني شني؟؟

-علي الحـق: بوكتها ابا الحسن شوفني الرسالة ورأساً اجت ببالي سلوى انا گلبي ناغزني منها اعررفها هي السبب واحلف عليها وداعتج يا يمة احلف هي الخطفت عبق!

-رسمية: وتالي؟؟

-علي التـقي: حق استعجل واجه تهجم على سلوى وسبب مشكلة ويه ابوي من وره الصار

-علي الحـق: تقي ابوووي ما يعرف طينة الحية العايشة بيناتنه مااا يعرف

-رسمية: ولكم جاوبوا هسة شون لكيتو البت؟ ياهو دلاكم؟

-ابا الحسن علي: يومين انا ادور على صاحب الحساب دخلت عليه وهكرته بس يقرالي الدولة بلجيكة مو هنا، شبه أيست اللگاله اثر بس استغربت لان وره هاليومين رجع دزلي عنوان وكتب..

"هنا موجودة التدورون عليها"

-علي الحـق: ودازله عنوان الشماعية الرحتلهم ثلاث مرات اسألهم عن عبق وما يدرون وينهي!

-ابا الحسن علي: وره ثلاث ساعات من تاريخ اخر رسالة رجع كتبلي موجودة بجناح ال^^^^^

لطمت صدرها رسمية مذهولة ومو بس هي مذهولة كلناا مصدومين من الموضوع كله! شنو هالتلاعب الديصير ومنو هذا اليعرف مكان عبق وين وشنو غايته من دزلهم رسالة يدليهم؟!

-رسمية: وما عرفتوا ياهو؟؟

-علي التـقي: جاي نشتغل على الموضوع

-رسمية: بعد عينييي ضباط ومحامي بعد عيننييي

-ابا الحسن علي: يوم ماله علاقة لا الضباط ولا المحامي احنه هكرنا الحساب وطلعلنا يقرا غير دولة معناها رقمه المسوي بي الحساب مو عراقي ولا يقرا موقع صاحبه الحقيقي خاطر ما ينعرف

-علي التـقي: تدرين شكد قضايا عدنا على هالسالفة؟؟ محققين صارلهم سنين بهالشغل وما جاي يكدرون يحلوها!

-رفل: يعني ما راح تنحل؟ راح يبقى اليتلاعب بيكم شخص وهمي؟

-علي الحـق: وراس امي ما اخلي هالعار يشم الهوا ما دامني موجود!

-رسمية: ااااخ راسي اااخخ

ماتحملت ردة فعل خالة رسمية وفطستتت ضحك، اللتفتوا كلهم عليَّ يباوعون واني اريد اللزم روحي بعد ماكدر ظليت اضمضم بحلگي وادير بوجهي عنهم واضحك بالسكتة.. شفت تقي ابتسم وخفاها بسرعة حتى محد ينتبه وخالة رسمية هم ضحكت تفر بيدها..

-رسمية: لا تعاينولها هيج صدگ والله حگها تضحك چا سنين جاي تكولون محققين يشتغلون على هالقضايا وما جاي يلگون مشعولين الصفحة يريد يجي وليدي المگنزع بيومين يلگاه

-علي الحـق: رحم الله والديج يوم تستهزأين بولدج بس ميخالف تمونين امي وتمونين

-رسمية: غصباً عليك

-علي الحـق: يمة شسالففة!

-رسمية: لا تعلي صوتك ولك

-علي التـقي: يمة حبيبتي انتِ ليش بعدج ضايجة؟ الحمدلله عبق ولگيناهة بعد شبيچ

-رسمية: انتَ انجب واوكف على صفحة

فتح عيونه تقي مصدوم واللتفت يباوع لـ سبأ الواكفة وراه ولگاهة هم صافنة، نصت رفل يمي وهمست بضحك..

-لا تضحكين لا يلوحنا طشار

-تَـمني: لا لا ماضحك

-ابا الحسن علي: ام علي ضايجة علينا شبيچ حبيبة گلبي شنو المزعلج

-رسمية: انتم

-ابا الحسن علي: افاا وانا اخو الامير زعلانة من عدنه؟

-رسمية: ايي زعلانة من هذا التمساح ولك حويق شون راح تراضي ابوك وترجع للبيت بوجوده؟؟

-علي الحـق: ابوي انا اعرف شون اراضيه لا تخافين يمة

-علي التـقي: ولك حلف ما تطب للبيت بعد

-علي الحـق: يصوم ثلاث ايام هسة شكو

-رسمية: انچب انچبب بعده صلف وعينه گوية ابن الغبرة

-علي الحـق: يمة انتِ ليش هيج وياي تره بعدني مريض وجرحي ما طاب وعلي كوة كاعد على حيلي

-رسمية: ايييي من اجيت يمي صرت كوة كاعد على حيلك هاي لو جانت عگروگتك هناا تظل تگمز منا ومناك خاطر تحصل منها حبه

وهنا محد تحمل يسكت والكل ضحك بصوت عالي ولا كأن قبل شوية چنه متأثرين بـ رجوع عبق، غلس حق على ضحكاتنا وكلام امه وعافنا وصعد فوك، طفرت خالة من مكانها وراحت يم الدرج وكفت على اول باية وصارت تصفك بيدها وتغني..

-تسرسر يمة تسرسر ولا تهتم النا تسرسر يمة تسرسر

-ابا الحسن علي: هههههه يمة شبيچ وياه شادة حزامج

-رسمية: عبنه سويقط ورادها من الله اجت البت ذبلانة خاطر يكدر يسوي اليعجبه

-علي التـقي: لا تظلمي يمة تره حق يحبها ما راح يسوي شي يضرها

-رسمية: ادري يحبها ادري وعبنه يحبها راح يستهتر تعلمني بأبن بطنيي؟

-ابا الحسن علي: عوفونا منه هسة، چا وينه نور ما مبين؟

-رسمية: خيولي ذاك الططوة لا يلفي عليّ مزاعلته

-علي التـقي: شمسوي بعد

-رسمية: يريد يهج من العراق ابن الفايخة

-علي التـقي: صدگ!

-رسمية: اي بعلي اجاني امس يبجي ويتبچبچ ماريدن ابقى هنا اريد اسافر

-ابا الحسن: يعني يروح يشوف سور وحويدر قصده مو؟

-رفل: لا ما يريد يعيش هنا امس بالليل اجه لعمتي وگاللها بس اخلص امتحانات اهجن وما تلكولي اثر

-علي التـقي: هاا

-ابا الحسن: اممم

-رسمية: شني هاا ومادري شني شو مكيفين انتم؟؟

-علي التـقي: لا يمة هاي هرموناته گابه مالج غرض

-ابا الحسن: غياب سور ضارب فيوزات عقله لا تخافين هسة بس يتشاوفون يرجعله الحنين الى الوطن

-رسمية: خايبين چا جيبوا سوير لا يروح هذا من ايدينا

-علي الكـرار: ياهو يروح من ايدج؟

دخل كرار الصالة وهو يكول هالجملة وشايل بيده علاكة ادوية خالة رسمية، حطها يم امه وكرر سؤاله..

-شو خنستوا ياهو اليروح من ايد امي؟

-رسمية: علي النور يريد يهاجر خارج العراق

-علي الكـرار: الله اييي خليني اروحن وياه چا

-رسمية: ووولك

-علي الكـرار: والله يمة اريد اهج انا ما اظل هنا

خزرته امه حتى يسكت وهو ممهتم، كعد جوه رجليها ومد جسمه بالكاع يكمل..

-اذا زواج ما ترضين تزوجيني شعندي ظال هنا كلنا نعرف محد يربط الزلمة غير مرته

-رسمية: ازوجك

-علي الكـرار: چؤ فات الاوان

-رسمية: خايب ازوجك احلى البنيات شمالك

-علي الكـرار: لا ما يفيد بعد راح اسافر

-رسمية: يا يمة يا وليدي وين تولي ياهو يلفيك بالخارج شعندك هناك اهل؟ سند؟ مرة؟ شغل؟ كلشي ماعندك تروح غريب وتنذل

-علي الكـرار: اتزوجلي اجنبية حاتة مناك تصيرلي اهل وسند وحتى شغل لا تخافين عليَّ ما احتاجكم

غندبت خالة رسمية معصبة ولزمته من اذاناته ثنينهن تجره منهن بكل قوتها، عاط متوجع ولزم ايدها يريد يفلت نفسه منها بس ميكدر لان كلما يتحرك تنجر اذانه وتتشگگ خالة لازمتها بقوة حتى ايدها مترخيها..

-علي الكرار: ااااااااخ يمة اذاناتي يوووم ااااخخخ هاي شبيييچ ترره بالعباااس اشرد منكمم وما تلكولي اثر ااااااااخخخ خرب روووح اخوتيي

-رسمية: هاي خاطر ماا تظل تكمز على راسي ابن الثولة يريد يبيع اهله بأجنبية

-علي الكـرار: يووم اتشااقه شبيچ وعلي اضحك ااااخ اذني ياا يمة انشكت اذنيي ولكم ساعدونييي راح اموتنن مو ام هاي هجوم المغول كله كاعد فوك راسي

عفناهم يتعاركون ورحنا اني وسبأ ورفل وشمس نكمل العشا، فرشنا السفرة وسوينا لفات وصعدنا لغرفة عبق لگينا حبيبة وليلة وعلي الحق يمها محاوطيها وهي نايمة..

-تَـمني بهمس: شلونها؟

-ليلة: من جبناها لحد هسة هي نايمة

-تَـمني: ميخالف اكيد تحتاج راحة

هزن راسهن اي واستحينا نبقى كلنا هنا وعلي الحق ويانه فـ عفناهم وطلعنا لغرفنا، لزمت التلفون الهاملته صاير امير يضوج لانه يتصل هوايه واني ماكو واذا جاوبته دقايق قليلة واسده فـ قررت اتصل بي هسة واسولف وياه مشتاقتله..

**

"حــبيبة"

ثلاث ايام مرت على رجوع عبق وعبق ما رجعت نفس گبل، لا تحجي ولا تكوم من فراشها بس نايمة لو من تكعد تبقى صافنة.. ثلاثة ايام انا يمها ما عفتها بس من انزل اتطمن على امي التعبانة واتكدر كلش من اروحلها واشوف وجهها ثگيل عليّ چنها مزاعلتني..

-حبيبة: يمة ليش ما تسولفين وياي

-سلوى: ماعندي سوالف

-انتِ زعلانة عليّ؟

-لا

-چا شبيچ

-ماكو شي

-احلفج بداعتي وغلاوتي عندج تسولفيلي البيج

عاينت لعيونها الدمعت وعقلي طار كعدت يم رجليها اتوسل بيها تحجيلي المضوجها وهي باقية ساكتة ودموعها تكت..

-يمة احجي

-مقهورة انا حبيبة

-شبيچ يرويحتي من شنو مقهورة

-انذليت وانا امج، انذليت ببيت الشيخ

نزلت دموعي وياهة وحطيت راسي بحضنها مقهورة ضعف قهرتها، مهضومة من الصار كله ومن الموقف المهين النحطت بي امي والمشكلة الذلها واعتده عليها اخوي..

-بيمن احلفلكم انا مالي غرض بروحة عبق عجزت وتعبت من هالسالفة، حبيبة صح انا اكره ام عبق الله لا يوفقها ولا يذكرها بخير بس عبق مالها ذنب

-تعبتي عبق يوم هواي تعبتيها

-ادري واعترف تعبتها بس ما توصل بيه اهجول البت واخذها للشماعية شني ماعندي رحمة؟ ماعندي بت بعمرها واخافن عليها؟

-يمة..

-مشكلتي كلها ويه شذى الله لا يوفقج يا شذى ولا يسهلج حياة وكون حرگة گلبي منج ما تضيع يم ربي

بلعت ريكي ماعرف شحجي خفت اگللها ام عبق طلعت من الشماعية اول امس وعلي الحق گعدها بشقتنا ببغداد خاطر ترتاح  وتكمل علاجها بره وامي تنهار علينا..

-امج انذلت يا حبيبة ببيت ابوها وببيت زلمتها، داسوا على كرامتها وجرحوها عبنها حرمة طلعوا سباعيتهم على حرمة لا حول الها ولا قوة

-ما عاش اليذلج وانا موجودة يوم

-انتِ كله چم يوم وترحين لبيت زلمتج منو يبقى هنا يحبني ويخاف عليّ

-ابوي

ضحكت بتعب تحرك راسها بـ لا، رفعت نفسي من حضنها اعاين لعيونها واردفت..

-ابوي يحبج يمة ولا تشككين بهالشي

-ادري يحبني

-چا ليش حسبالج ما يوكف وياچ؟

-ابوج هم يجيله يوم يتعب ويضيج صدره من المشاكل ويشيل ايده مني ويسلمني لولده اليشوفون دم سنونهم ولا يشوفوني ببيتهم

-الامير يحبج وما راح يخلي لاحد يأذيج

-الامير؟؟ حبيبة امير اكثر واحد يكرهني وجان كاره وحاقد عليَّ بصغره لا تخليني احجي

-معقولة؟

-اي معقولة! باليوم الاجيتكم وشيخ علي عقد عليّ الامير سوه عركة الها اول مالها تالي حرگ البيت حرگ علينا وطلع بعد ما شفت وجهه غاب چم شهر من البيت ما راضي بالصار وترك حتى ابوه وامه

-يمة والله انا احبج بس حگه يضوج انتِ تعرفين اخوتي يكرهون عادات العشاير صح ربوا عليها بس ولا جاي يتقبلوها عقليتهم ما تقتنع

-اي قنعي روحج بهالحجي

-هسة الحمدلله كل هذا راح وانتهى خلينا نفتح صفحة جديدة عبق رجعت بالسلامة و..

-واخوج الراد يذبحني؟!! هم افتح صفحة جديدة وياه!؟

-دار عتاب طويل بيني وبين علي الحـق هواي حجينا كلش هواي وحلفلي هو مقلل كمية البارود من الطلقة خاطر ما تتأذين ويكون جرح بسيط وكال عرض نفسه للخطر من سواها عبن هذا شغل مختصين مو ياهو الجان يكدر يقلل البارود وما ينفجر بيده

-تهييي بهييي فوكاها مسوي عليّ منية

-لا يمة مو منية وانا لليوم ما احاچي ومزاعلته على سوايته بس علي الحـق ما يريد يذبحج والله ماريد يسويلج شي

-خوش خوش

-يماا

-لا تلحين كافي

-حاضر

-هذا زلمتج ما رجع من مصر شني ذب صرته هناك؟؟

-راح يرجع گبل العرس بيومين

-وراضية على هالوضع يا غبرة؟؟

-لا ما راضية وگتله بس كال اذا اجه وعاف الدورة يتعاقب وتره هو راد يعوفها لخاطري بس.. بس..

-بس شني؟

-بس انا ما رضيت وكتله عادي اكمل جهازي ويه امي ومرة ابوي

-اهمدااااج

غمت وجهي بكل حيلها وطردتني من غرفتها، تنهدت ماعرف شكول وشسوي ادري منتصر طولت سفرته ووكتها كلش غلط بس اعرفه مجبور يروح وماريد اوكف بطريق نجاحه وبنفس الوقت ابوي ما يرضى اطول الخطوبة اكثر ويريدني اتزوج ساعة گبل..

رجعت فوك اروح لعبق ووكفت بمچاني من سمعت صوت علي الحـق جاي من الغرفة والباب شوي مفتوح اكدر اسمعله من يگول..

-تره انا ما تغديت شوفيني شون ضعفان وفاشة عضلاتي

تمنيت اسمعها تجاوبه بس مثل الايام الفاتت بقت ساكتة ولا چن واحد يسولف وياهة، ابتسمت من اردف حق يگول..

-مو خوش مرة انتِ شفق عايفة زلمتج جوعان طاگة الجوع

مرة ثانية "صمت.." ماكو تعليق منها بس هالشي ما خلاه يسكت ويعوفها واستمر يسولف وياهة..

-هسة مال سمچ مسگوف وتمن احمر وطرشي ووياه راس بصل احوووووي

ضميت حلكي وضحكتي من اردف..

-وغسق تسويلي لگم وتوكلني بأصابعها المدوحسات وامطگ بيهن من تخلص وابوسهن واعضعضهن واملخهن و*******......

فكيت عيوني من نزل بكلامه يسولف بالطيحان الحظ وهي ساكتة لا ردة فعل ولا استنكار مو مثل عادتها من يفشر كدامها..

-علي الحـق: وراهة تجي سوزان وتفركلي رجليناتي بأيدها الترفة وتبوسني بـ.....

-عبق: اطلع بره!

شهكت فرحانة من حجت وبسرعة فتحت الباب عدل وطبيت للغرفة، عاينت لوجهها مغندبة وعاكدة حاجبها وعلي الحق واكف كدامها مبتسم بأنتصار چن مسوي انجاز من حچاهة وهو صدگ انجاز..

-علي الحـق: ما اطلع

دارت وجهها عنه ضايجة وچتفت ايدها لصدرها دليل انزعاجها، عاينت لـ حق المكيف على الوضعية وزادها من كعد على جربايتها وگال..

-سوزان اتصلت بيه اول امس كلت اجي ابلغج لا تسويلي سالفة بعدين

ركزت أنظاري عليها بلكت تسأله بس ما حجت بالعكس تمددت بالفراش وغطت راسها بالبطانية..

-علي الحـق: شكلتي من خطيبها الاغبر يريد يرجعها وجاي يهدد بيها ولاعب خلقة بالبت سودة عباة امي..

سكت يعاين عليها خانسة وباقية مغطية راسها بالبطانية..

-كتلها تكدر تشتكي عليه اذا عدها دليل على تهديداته وكالت عدها بس تحتاج زلمة عنده معارف وواسطات يعينها وانا تبرعت...

يحجي ويباوعلها يريد ردة فعل منها ماكو، حچى بعد عن وضع سوزان وداس بالحجي وعبق عبارة عن جماد منطيته اذن الطرشة وتوقعتها راح تبقى هيج بس تغير كلشي من كال..

-اللتقينا امس ببيتها رحتلهم و....

وخرت الباطنية من وجهها وفزت من مكانها فززة خازرته بعيونها الچبيرة وگازة على سنونها لدرجة راسها يهتز من العصبية، رفع حق حاجبه الها وزاد على النار حطب من كال..

-عنق راح اعترف خاطر تسمعين مني مو من غيري انا تعشيت عدهم امس و...

-عبق: اطللللععععع براااااااا

-چؤ

گالها ببرود قاااتل ومذبل عيونه التمساحية عليها يستفزها اكثر خله وجهها ينكلب احمر تسودنت الفرخة..

-عبق: حبيببببة اخذذذذي هذا الرجال برررررررا

-علي الحـق: واذا ما طلعت

-عبق: اني اطلع!

نترتها ووخرت البطانية منها خاطر تكوم من الفراش وهو ما سمحلها، شمر روحه على الفراش بصفها متمدد وحضنها بأيده ورجله يقيّد حركتها ويداهر بيها خلاها تلبط من القهر تريد تكوم ما تكدر.. استحيت من المشهد وحسيت وجودي هنا غلط وطلعت من الغرفة اخليهم وحدهم..

**

"عـــبق"

نااار بگلبي احس جمرة عملاقة حاطيها فوگ صدري اختنكت اني منا وضعيتي مو تمام والدنيا طالعة من عيني وانوب زادها عليَّ بسالفة سوزان خبلني خلاني اشوط من الغيرة..

-علي الحـق: ههههه ولج سوادين ثبتي ما رحتلها والله ماا رحت.. ولك عگروگ لا تدفر ما رحتت جذبت عليج

دفعته بقوتي البايدة بس ماكدرت اوخره مني طاقتي مصفرة ايدي كوة ارفعها وعظام رجليه ترجف، استسلمت بين ايده مهدود حيلي وهو اغتنمها فرصة شدد على جسمي بقوة وگال بصوت هادئ كلش..

-ما اللتقيت بيها ولا سولفت وياهة وعيونج الاحبهن لا جاوبت اتصالها ولا الي شغل بأي شي يخصها وكل الحچيته جذب بجذب تأليف مني

تنهدت مغمضة عيوني ماعندي تعليق على كلامه اصلاً عقلي فاصل تعبان وميكدر حتى يفكر..

-ماعندي غيرج قبق ولا راح يصير عندي اريدنج تثقين بيه ولا تتخيلين بيوم ابدلج بثانية وراس ابوي الماكو اعز منه انتِ وبس والباقي طماطة وخس

ضحكت خفيف على عبارته وهو هم ضحك ودارني خلاني انام على ظهري وهو استهتر طبعاً بنومته بس مابيه اتعارك هسة واوخره..

-اشتاگيت لشفق القديمة يمته ترجع

-هسة شوية وتجي

-ههههههههههههههههههههه خرب عرضج عبق

ابتسمت هالمرة وتحسرت وراهة، غمضت عيوني ودرت وجهي عنه بس وين يقبل اذا ميلطش وجهه بوجهي، جر وجهي وغصب عني خلاني اواجهه وافتح عيوني اباوع بعيونه..

-عبق تره انا ما احب النكدية ترجعين مثل گبل لا اطلگچ

-طلگ

-بت الاوادم ما صدكت على الله

-شتريد علي

-يروحلج فدوة علي بس حاچيني

-تعبانة اريد انام

-ميخالف تحملي شوي

-ماريد

-بداعة المسموط هشومي

-هههه علي وخر

-بعدج راح تتعاقبين على الرسالة صبريلي بس صيري زينة بعلي الا اطلعها من خشمج

-امم

-بزونتي

همسها يفرك خشمه بخدي وطبع قبلة خفيفة عليه، ذب حسرة عالية قبل لا يگول..

-هديتي حيلي بغيابج عبق كلما اصفن واتخيل ما راح اشوفج بعد گلبي يريد يوگف وحگ هو علي ابن ابي طالب

نزلت دموعي من تذكرت المر عليَّ وكتمت شهگتي بصعوبة، مسح دموعي بأبهامه واردف بخفوت..

-قسمت قَسَم ابقى ادور عليج لحد گطع النفس ما اعوفج وحيدج وين ما چنتي، حلفت اكضج حيل وادفنچ بين ضلوعي خاف تردين تنهزمين وتعوفيني بيوم والعباس ما اهدچ

-قابلة

-غصباً عليج

-ظلام ضلوعك ولا ظلام ذيج الغرفة

-يا غرفة

-الحبسوني بيها

-ما جنتي تطلعين منها؟

-لا

غصيت بدموعي منهارة، روحي دتتكطع من جوه حضنته من رگبته بكل قوتي واردفت برهبة خوفي العشته..

-ميقبلون يطلعوني علي الحـق توسلت بيهم وبجيت هواي.. هواي بحيت لحدما اغيب عن الوعي وارجع اللگه روحي على چرباية ومشكلين بيدي مغذي.. ماعرف شنو چان يصير بيه ريحة الغرفة تدوخ وتخليني اتعب جسمي ماكدر احركه من التعب اريد اهرب لأي مكان بس ما اللگه غير النوم اهربله وحتى اكل ماعندي شهية اكل و...

شهگت بدموعي ولزمتني الكحة رئاتي منتهية بسبب المكان الجنت بي احسني دا اتملخ من جوه، ظل علي الحق يضرب على ظهري وشربني مي ياله ارتاحيت شوية..

-علي الحق: عمت عيني عليج

-علي.. فكرت بيك كل يوم والله كل يوم افكر واكول هم راح ارجع اشوفك هم راح اكدر ابررلك واگولك انتَ الرجال الوحيد الحبيته والعشقته، الوحيد الشافني بكل حالاتي بضعفي وقوتي بكشختي وبقمة بهذلتي وحبني مثل ما اني.. علي اني.. اني احبك

-يا بعد اهل علي

-هههههه احبك امداك

-ههههه اليوم انعل والديج

لزمني من رگبتي حيل و...... ولوما راجعلي التركيز والوعي چان رحنا بعييد كلش بعيد بس هو الوخر بسرعة قبل لا احجي شي وفز من الجرباية يگوم على حيله يدگم بقميصه..

-عبق: علي شنـ...

-علي الحـق: رايح اجيب الغده خاطر ناكل سوه

طلع من الغرفة بسرعة مخلاني حتى احجي بالموضوع، بطني خبطت متوترة وخايفة ماعرف شصارلي غطيت روحي بالبطانية اتناسى واطمن روحي ما صار شي ولا افكر زايد وبدون لا احس غفت عيني وحسيت على ريحة اكل وعلي الحق راجع بالغرفة، رفعت عيني للساعة شفت مرت فوك الساعة..

-عبق: شو تأخرت

-علي الحق: غير نعلتي شرفي انتِ

حچاهة بـ ونة متحسر وقسم من الخبزة يحطلي بيها دجاج وقدمها الي، خنست خجلانة واخذت منه اللگمة بس ما قبل اخذها وجبرني افتح حلكي وهو يوكلني بيده صار يسويلي لگم ويحطهن بحلگي وهو ياكل ويايه..

شهيتي صفر وكتلني كتل يغصبني اكل حتى يرجع الدم لوجهي يجيب ويدحس بحلگي ويداهر ويتحارش مثل عادته كل ساعة ومسويله حركة يخليني اطفر..

عشرة ايام مرت اني بفراشي يا دوب اكوم اسبح وابدل ملابسي وارجع انام، نفسيتي تعبت مو شلون مچان وتعبت اكثر من عرفت بموضوع الرسالة الماعندي أي علم منو كتبها وشلون انكتب بخط ايدي ولگوها على چربايتي بالغرفة من اختفيت..

الرسالة وسلوى وعركة علي الحق ويه ابوه ومنافسته على ان سلوى الها ايد بالصار ووگف ضد الكل علمودي اذاني وتأذيت اكثر من دا اشوف معاناته واتصالاته ويه جماعته علمود يعرفون صاحب الحساب مال انستا منو بس مدا يوصلون لنتيجة..

بس كل هاي السوالف بچفة والعشته قبل بچفة ثانية مدا اكدر اتخطى الصار بيه عشت اسوء ايام حياتي بذيج الغرفة المظلمة، فارغة مابيها بشر ولا اثاث مينسمع بيها بس صدى صوت بكائي وعياطي المتواصل وابر المغذي تزرف بيدي..

علي الحـق تعب ويايه كلش خطية يوكفلي بالباب من ادخل اسبح ويطلع يوكف بباب الغرفة من اريد ابدل ما فارقني ولا دقيقة ولا طلع من غرفتي.. ماعرف شلون صالح ابوه وقبل يبقى بالبيت وميطلع حسب ما كالت حبيبة عمو علي حلف ميدخل حق للبيت بعد بس هسة اقتنع وعلساس صام عمو ثلاث ايام كفارة حلفانه..

عرس حبيبة عگب باچر وكل شوية تدخلي وحدة من البنات من يطلع علي الحق يهزن يم فراشي شوية ويردحن ويطلعن من يرجع مادري اشايفاتني ديسكو واجن يطلعن مواهبهن يمي..

-علي الحـق: يلا عگروگ كومي

-عبق: وين اولي

-نطلع نشتريلج نفنوف

-ماريد

-انجبي وكومي

-ماريد

-تكومين لا اكومج بطريقتي

-مابيه حيل ماريد

-ما انطيتيني حل ثاني

شهكت من مد ايده عليَّ يلمسني بطريقة محلوة خلاني اطفر واعيط مثل المخبلة، خزرته اريد اتعارك وياه بس قبل لا اللحگ افتح حلگي طلع من الغرفة يضحك واخذ البطانية والمخدة مالتي حتى ما ارجع انام..

نفخت هوا مزعوجة اني طالعة روحي مالي واهس اتحرك من الفراش مو انوب اروح للسوگ واصلاً كرهت شي اسمه سوگ! بس من فكرت بـ حبيبة وفرحتها ما ردت اعوفها وحدها بهيجي اجواء وهي دائماً واگفتلي، شجعت روحي ودخلت سبحت حتى اصحصح وبدلت ملابسي ونزلت للبنات شفتهن بالصالة، تفاجأن من شافني واكفة كدامهن وضحكت على ردة فعل تَـمني من شهكت وضمت حلگها بيدها بدرامية لطيفة..

-تَـمني: عبببق اخيراااً نزلتي يمنا

-شمس: والعباس هسة نورت الصالة

-ليلة: مرت الحلو چا ليش من اتوسل بيج تنزلين ما ترضين وهسة من صعدلج التمساح اجيتي ركض

-حبيبة: اششش اششش سكتن اكيد نزلت لخاطري موو

ابتسمت وهزيت راسي بـ اي، كبرت ابتسامتي من اجن يحضنني وحدة وحدة ويتحمدنلي على السلامة وختمتها خالة رسمية حضنتني لصدرها وباست راسي وگالت بلطف..

-چنتي البطة والله الچ غيبة

فرحت بكلامها ورجعت بوستها، دورت عيوني بالصالة ادور على سلوى بس ما لگيتلها اثر لا هي ولا رفل وما احتاجيت اسأل لان ليلة من وحدها كالت طلعن علمود يشترن نواقص صينية حنة منتصر..

-حبيبة: چا يلا ما نلحگ بنات بقت بدلتي ما تأكدت من قياسها اخافن ما يضبطوها

طلعنا سوه من البيت ووصلنا علي الحـق، بقى ويايه خطوة بخطوة ما عافني ولا دقيقة حتى من اعوش ويخرب واهسي واخبصهم اريد ارجع للبيت ميقبل يبقى لازم ايدي ويشتريلي اغراض وشنو يشتري يگول للجهاز مالتي بحساب عرسنا وره الامتحانات الي لسه ما فتحتلهن كتاب..

-ليلة: حق اريدن عبق شوي

-علي الحـق: اي جايين

-ليلة: وين جاي انتَ

-علي الحق: مو تردين عبق؟

-اي اريد عبق ما كلت اريدك

-چا انا وعبق واحد

-ليلة: من يمته عشتو؟

-من اول يوم شفتها بي

-ليلة: عاين خوية كلاوات المخطوبين مشيها على غيري هسة انطيني الفرخة اريدنها

هدني گوة ولگفتني منه ليلة قبل لا اشرد بعيد، لزمتني من ايدي حيل وگالت بخبث..

-كضيييتج

-عبق: ليلة ماريد مااريد

-هو انتِ شفهمتي وصحتي ماريد

-لان اعرف بسوالفج السخيفة مااريد

-بالعباس تردين امشيي

-ما اشتري ولج شبيچ تهيلكتي انتِ عيبب

-خاب انچبي هي راح تموت من الوناسة وتصيح عيب امشي يلا

جرتني جر تسحسل بيه لمحل للالبسة النسائة ودشدايش النوم وهالسوالف الطايح حظها ودكت رجل الا تشتريلي، وكفلنا حق بالباب بدون لا يدخل يغمز ويلمز ويسوي حركات واني غايصة بهدومي شلون ثنين اللتموا عليَّ..

ليلة الادبسزز اختارت وين المستهتر والمشلتح جرته وحطته على الميز، اباوعلهن كلهن مخازي بمخازي كله اسود واحمر وسوالف فساد، قكيت حلگي من اشرت على قطعة عيب اگول عنها دشداشة وگالت لام المحل نريدها ووكفت تحاسب..

-عبق: ما راح اللبسهن

-ليلة: تلبسيهن غصباً عليج

-ما اللبس هو بكيفج

-انچبي حبي

-ما اشتري وخري لا تدفعين شيي

-مو انا الادفع زلمتج راح يورق ويرجعلي ربع ربع بس بعدين

-عبق: بلا زحمة رجعوهن ماريدهن

-ليلة: لا حبي خليهن بعلاكة اريدهن انا

-عبق: اي اخذيهن الج اني ما اخذ تره من هسة اگلج

-خوش خوش

-ما دام هيج عيني انطينا السيت الماروني هم بلا زحمة والنيلي هم

-ليلة: ذن المن؟؟

-الج حبي

-انچبي عبق

همستها وگرصتني خازرتني ضحكت فرحانة لان متكدر تحجي كدام المرة وتتفشل واني استغليت هالشي وكمت اجيب واحطلها..

-عبق: بعد اسود عيني اي اي هذا ايييي فدوة لايدج يخبل هذا

-ليلة: عززا بعينج ولج عببق

انتعشت روحي احس بالانتصار عليها، خليتها بموقف محرج كلش ويه المرة وتاليها دفعت الحساب واخذتهن غصباً عليها وطلعنا من المحل..

-ليلة: اي شنو يعني حسبالج راح اللبسهم؟ تحلميين حبي تحلمين

-عبق: نشوف عود

-ليلة: هسة اخذ فلوسهن من ابو لسانين واحرگهن

-عبق: اي براحتج

-ليلة: هه عود هي جاي تحرجني ام بريص ولج انا لييلة تعرفين منو لييلة

-عبق: ليلة انجبي وامشي راسيّ يوجعني مالي خلگج

-ليلة: خوش وهسة دفعيلي فلوس سلاباتج

-اني شعليه اخذيهن من حق

-ليلة: اي هم صدگ بس فشلة اگله فلوس ملابس النوم راح اگله دفعتلج مال ملابس الطلعة لو شتكولين؟

-بكيفج

-خوش خوش.. وينك ابو الحقوووق

راحتله الرعنة تاخذ منه الفلوس وخلته يدفع اكثر من الحساب تگله هاي مال اتعابها وتقنيعها الي، فريت ايدي عليها افكر شوكت تكبر هالبنية وتبطل خبال مادري..

رجعنا للبيت لگينا سلوى واكفة تسوي بصينية الحنة ورفل وياهة مخبوصة وليلة وتَـمني طبن بنصهن يردن يشوفن اما سبأ ظلت واكفة على جهة وبس تباوع من بعيد.. تعبت من الفرفرة وصعدت للغرفة انام، غفت عيني بسرعة وحسيت نص الليل على شخص خانگني من عطره عرفته علي الحـق نايم بصفي وحاضني بقوة ورايح بسابع حلم..

باوعتله وابتسمت ما هان عليَّ اگعده واطلعه من الغرفة شكله نايم بعمق ومرتاح بنومته فـ غمضت عيوني ورجعت انام بحضنه مرتاحة..

-امچ طلعت من المستشفى

فزيت من مكاني اباوعله حچاهة مغمض عيونه، بقى على وضعه وابتسم عبالك ديشوف ردة فعلي المصدومة وشلون فاتحة عيوني..

-امي وين؟؟

-بشقة بغداد طلعتها گبل اسبوعين تقريباً

-اسبوعين امي طالعة وما گتلي علي الحـق!

-بعدها جاي تتعالج نامي نامي......

**

"لــــيلة"

خوف، قلق، توتر، اكتئاب، اوهام، انتقام، خبال، عصبية.. كل هالمشاعر جاي اعيشهن صار اسبوع راح انفجر، صار اسبوع من دزلي ناظم رسالة يريدنا نتشاوف بمطعم خاطر انطي الفلوس والموعد الحدده هو اليوم! بليلة عرس حبيبة!

لبت محتارة ماكدر احجي ويه احد ولا اكدر افضفض لبشر غير عبق ماكو غيرها تتفهمني بس عبق وضعها ما يسمح تفكرلي بحل البت يا دوب جاي توكف على رجليها حتى دراستها هملتها سودة عليَّ امتحاناتها بعدلها چم يوم وكتاب ما فتحت لحد هاللحظة..

غمضت عيوني بفراشي اريد انام بس شادة على اعصابي ومعدتي تفوور اريد اتقيء وكوة كاضة روحي، ارتاحيت من ابا الحسن اليوم اتأخر بلچن يرجع وانا غافية ما جاي اكدر حتى اتجاوب وياه واتعارك مثل گبل من وره الخوف وهو جاي يحس بيه..

طفرت من فراشي من حسيت بمعدتي تگلب وركضت للحمام اتقيء شكو شي اكلته بالعشا، شون بيه يا علي شيحلها هاي اذا ما اروح لـ ناظم يفضحني ويخزيني وبنفس الوكت ماكدر اروحله لا يلگفني احد و انفضح واتخزه!

غسلت بساع من سمعت صوت طگطگة بالغرفة معناها رجع ابا الحسن، طلعت من الحمام شفته بالشورت يفتر ويدور على حاجة ما حاچيته ولا سولفت وياه ورحت للجرباية نمت وغطيت روحي..

-ليلة شفتي حاسبتي ال Dell؟

-هاي

-وين

-هاي كبالك

-وينها

-هاي هاي شبيك على الميز يمك

-ماشوفها ولج وين

-اوووووووف

گمت من الفراش غصباً عليَّ ورحت يم الميز واشرتله عليها ونترت..

-هاااي

-وينها

-ابا الحسن لا تخبلني هااي هااي شوفها

-ماشوف اظن عبن ظلمة

-مستحييل صدگ تحجي انتَ؟؟ جا هاي شنيي

شلتها من الميز بكل قوتي وحطيتها بوجهه بعدني ما فكيت حلگي وحجيت شي انقسمت الحاسبة نصين وطاحت من ايدي..

-ابا الحسن علي: حاسبتيييي

-لطااام والله مادري ماعرف شلون هيج انكسرت

-لاا انتِ متقصدة ليلة! متقصددة! كل شغلي المهم بيهاا

-لا والله وداعة امي ما متقصدة صدكني حسن انا مالي غرض معليه

نصيت اشوفها الشاشة بمكان والكيبورد بمكان صايرة نصين حرفياً احس گلبي الي احترگ مو گلبه من شفتها بهالحال..

-ابا الحسن: وين انطي وجهي ولج باجر الشغل مطلوب مني

-حسن مادري والعباس مادري

-استغفر الله ياربي شلون ليلة هاي

-مادري ما قصدت والله ما تقصدت شلتها وطاحت من ايدي حسن

نفخ هوا وفرك وجهه محتار اول مرة اشوفه بهالشكل وبهالقهره، تأنيب الضمير موتني دخت وتهت ماعرف شون اتصرف واحلها كعدت اللملم بيها وادوس دگمة التشغيل بلكت الشاشة تعتلك بس ماكو ماكووو احتركت..

-عوفيها ليلة احتركت

-ابا الحسن انا اسفة والله اسفة

ما كدرت اسيطر على نفسي ودموعي صارت تصب ماعرف شبيه اريد اوكف بچي ماكدر الموقف صعب وانا شايفته يشتغل على هالحاسبة ليل نهار اكيد كلشي بيها ووگعتها هسة راح تأثر على شغله وانا السبب انا السويت هيج..

-ليلة جاي تبجين؟؟

-شسوي واساعدك

-ولج شني هاي دموع صدگية؟

-چا چذبية

-لا لا ما اصدك طلعت عندج مشاعر وتحسين؟

-لا تظل تضحك عليَّ وانطيني حل اساعدك بي

-ماكو حل ليلة خلاص راحت ختولي فدوة الج

-لا لا لازم اكو حل

-ماكو قضايا الناس راحت وكلشي خرب

-اكو حل لازم اكو چا انتَ شون محامي! شون تتخلى عن الناس هيج!

-شسويلهم ياهو گللهم يجوني

-يااااع

-والله شسوي عود اگلهم مرتي ثولة وطيحت الحاسبة

-ابا الحسن صدك جذب تحجي!

-اي ليلة چا شسوي؟ بالعكس زين طاحت اربع قصايا طلاگ عندي خليني اأخرهم چم يوم بلچن يتصافون ويرجعون سوه

-انتَ جاي تحشش؟

-لا احجي صدگ، المحاكم انترست بالمطلگين ياهو تكضه يگلك رايح للمحكمة اطلگ

صفنت عليه ماعرفت شحجي مسحت دموعي وترجع تنزل وهو يسولف ولا چن طاحت حاسبته وخرب شغله وانا هم غلست ما جنت اعرف حاسبته مكسورة من البداية وسوه هالفلم وياي بس حتى نحجي ويه بعض..

-خايبين انثبروا ببيوتكم تحملوا شكو بيها اذا الغده تأخر لو زلمتج ما طلعج اليوم لو زلمتج حلق لحيته لو كضيتها تبوگ من جيبك چا مو انتم واحد لو هو بس حچي

-اممم

-هي خربت من الزعاطيط كامت تزوج وتفتح بيوت

-احم اي

-اي وهسة نرجع للحاسبة شون بيه؟

-مادري توقعت ما متأثر كلش

-وشلون استنتجتي هالشي؟

-شو شفتك انفتحت بالسوالف عوزك بس استكان چاي وحب شمس

-خوش روحي سويلنا چاي وجيبي حب اليوم للصبح اشغلج عقوبة هالطيحة

-شسوي

-روحي سويلي جاي وتعاي اعلمج

ضيگت عيوني اعاينله بـ شَك شو احسه ملعب هذا وراح يسويلي شي بس همزين ما طولت ظنوني السيئة لانه خزرني ونتر..

-امشييي ما اللحگ الشغل باجر لازم اسلمه

-اي اي رايحة

جريت ربطتي وركضت جوه امسح دموعي بيها والله حرامات هالدمعات طاحن عليك يا حسيون هو اصلاً مادري ليش بجيت من يمته وجاي اعوي انا هاي هم هرموناتي گابة هالفترة..

سويتله چاي وصبيته بكوبين وصعدت مرة ثانية شفته كاعد على الجرباية وبحضنه ملفات ومجلد لونه اسود جبير ومتروس اوراق..

-تعاي

-ما جبت حب

-هذا عندي هنا تعاي هم ياله نلحگ

هزيت راسي وگمزت على الجرباية اربع رجليناتي، حط بيدي دفتر جبير اوراقه بيضة كلش وما مخطط چن مال رسم بس هذا اسمن انطاني قلم جاف وفتح كدامي فايل اشر عليه وكال..

-كتبيلي الموجود هنا

-كله؟؟؟

-چا نصه يلا ليلتي يلا اشتغلي

-طفت ليلتك يا حسيون

-يلا يلا بلا لغوة

خزرته ضايجة وبديت اكتب كلشي موجود وعلى نفس الترتيب ما ميلت خطي كله خط واحد امشي من گدما مركزة احس عيوني انحولت.. مرت ساعات على گعدتنا وكل شوية انزل اجدد الچاي واكرز حب وياه واسئله على القضايا ويسولفلي، فكيت حلگي من گال..

-مرة اجتني قضية وحدة تريد تطلگ من زلمتها عبنه مشعر

-مشعر يعني عنده شعر هواي؟

-اي

-چا ما تطگله مزيل وتستچن

-هههههههههه مسودنة وعلي

-والله شبيك هسة انتَ لو مشعر هم اطگلك مزيل شكو بيها

-چا ما تطگيلي

-اگعد هنه شعرتين بيدك وثلاث شعرات برجلك وينك وين الشعر

-عندي تساقط بشعر راسي

-طبهن طوب

-هااا!!

-والله ياهو ماعنده تساقط اكعد واسكت

-هم صدك

هزيت راسي وكملت اكتب وظليت كلما ارفع راسي انتبهله صافن عليَّ ومن يشوفني اللگفه يسوي روحه يباوع للورقة البيدي يتأكد من شغلي لحدما اخر مرة من رفعت راسي شفته صافن بس ما وخر عيونه عني وظل يباوع لوجهي..

-ليلة: شبيك

-تذكرت شي

-شنو هو

-من چنتي اصغر واسألج شنو تتمنين تصيرين من تكبرين تجاوبيني "اتمنى اللبس الروب الاسود واتعارك ويه القاضي"

-هههههه اي جنت انسى اسمها محامية بس اتذكر اتعارك ويه القاضي

-بعدج تردين تتعاركين ويه القاضي ليلة؟

-هاا؟

-بعدج تحبين تصيرين محامية؟

-مادري.. يعني اي.. مادري

-اذا رجعت اسألچ نفس السؤال هسة واگلج شنو تتمنين تصيرين ليلة شنو جوابج؟

ابتسمت ودرت وجهي اعاين للروب الاسود الخاص مالته معلگه على زاوية الباب وبدون لا احس على روحي رجعت اعاين لعيونه وكلت بصوت ناصي متحمسة..

-اللبس الروب الاسود واتعارك ويه القاضي

ضحك خفيف يهز براسه اي ورجع يشتغل بالاوراق البيده، مادري بروحي سرحت بأحلامي بعيد وظليت أفكر بالموضوع واتذكر ليش حبيت هالمهنة من الاساس.. انا حبيتها بسببه جنت اشوفه من يطلع من بيتهم وبيده الروب وعلى چم مرة شوفني فيديوات وهو يتناقش ويه المتهمين وانا جنت حسبالي يتعارك ويه القاضي وظلت براسي.. شفت نفسي بمچانه وتمنيت اكون واكفة هناك واكون شي جبير بهالدنيا شي اكثر من كوني بت كاعدة بين الحيطان تنتظر رجوع ابوها العصبي..

-ان شاء الله اسجلچ هالسنة ويه دفعة عبق

فزيت ويه جملته وعاينت لوجهه اتأكد من السمعته صدگ لو تخيلت؟؟

-ليلة: شنو

-نشوف معدلج يقبل جامعة حكومية لو لا واذا ما قبلوج نشوفلج الاهلي

-شني يعني مافهمت

-نسجلچ جامعة خاطر تكملين

-اكمل يعني اصير شني

-تصيرين مطي

-ها؟

-ولللج تدرسين جامعة تصيرين محامية و تتخرجيين

-عليك العباس؟؟

-اي

-ابا الحسن لو جنت تضحك عليّ والزهرة ما اعاين لوجهك بعد

-ما اضحك، عبق هالسنة راح تسجل وانتِ تسجلين وياهة انتن مو صديقات؟

-اي ايي

-چا خلص تسجلن سوه ونخلص منچن

-ابااا الحسننن بالعباااااس انتَ زلمممممممة

-تفلتي بنص عيني بس شكراً

-والعباااس انتَ زلمة وفححل تنگطط منك الرجولة هيج مناا ومنااك تنث كل مكاان ينراد احطن جواك زبيل اللملمها لا تطيح على الذكور وتجرح نعومتهم

-مو چنچ رحتي زايد؟

-اي صح عبن تذكرت انتَ تزوجتني غصب، خلص اسحب كلامي مو زلمة انتَ

-طاح حظج يا نذلة

-صدگ على طاري النذالة ورق خوية ورق

-خوا الخواج لشني اورق؟؟

-اشتريت نفنوف يشگ العين شگتين من جماله

-وشسويلج

-ورق چا مو زلمتي انتَ وجيبنا واحد لو هذا بس حجي

-جيبنا واحد من يصير فراشنا واحد

-استغلالي طماع

-هذا العندي

-هه عود حسبالك ما اخذ منك؟ والله اقطك قط اصلاً محفظتك يمي

-لا تجذبين

-والله العظيم

-ليلة رجعيلي المحفظة

-ما ارجع

-اخذي منها فلوس النفنوف ورجعيها

-هاا؟

-اخذيهن امري لالله

-اخذ فلوس الحذاء هم!

-اخذي

-وفلوس الجنطة الشتريتها

-استغفر الله اخذذذي

-وفلوس الصاية الجديدة

-مو چنها مصخت؟

-هم الك عين وتحجي؟؟ تره انتَ تزوجتني بلا مهر على هاي حطيت عينك!

-يلا يلا اخذيهن وخلصيني

-اريدن مليون

-شتسوين بي؟

-احتاجه

-لشنو

-مهري

-چا مهرج مليون؟

-لا عمي گال مهري 15 مليون وما ناسيتهن هم اخذهن بس هسة كلش محتاجة المليون ابا الحسن

-غير افتهم المن

-لامي محتاجة فلوس وابوي فگري ما جاي ينطيها

هز راسه متفهم وگام للقاصة حاطها بكنتوره، وگفت وراه ارجف ماعرف شبيه خايفة هالمليون اريد انطي لـ ناظم بلچن يسد حلگه ويعوفني وماعرف شلون راح اوديهن اله..

ثاني يوم من الصبح طلعنا للصالون وحطيت الفلوس بالجنطة، اليوم عرس حبيبة الكل ولعبنا لعب بالصالون كلنا رحنا وياهة وترسنا الصالون بس النا وسوينا كل اليعجبنا..

مكيجنا ولبسنا البدلات هنا حتى ياخذونا للقاعة الزلم وبقت حبيبة اخر وحدة بالمنزع ووياهة عبق وامها ورفل يساعدوها، وكفنا ننتظرها على نار نريد نشوف طلتها الاخيرة وما تأخرت دقايق وطلعت بالبدلة البيضة بطولها الحلو وسمارها الفاتح...

-تَـمني: اللهم صل وسلم على سيدنا محمد شنووو هالجمااال

-ليلة: ما شاء الله حصنتج بأسم الله حبيبتي ان شاء الله مهناية

مَلكة ماعرف اوصفها غير بهالكلمة، من صدگ ملكة بجمالها وفخامتها ومكياجها وبدلتها المنفوشة.. كلشي بـ حبيبة حلو خِلقة واخلاق صح انا ما مقتنعة بـ منتصر واشوفها تستحق احسن بس ما اتمنالها غير السعادة والراحة وياه ما دامها تحبه ربي يهنيها..

لبسنا احجبتنا بساع بساع وطلعنا بسيارات سوه، ابتسمت على شهگة تَـمني من شافت الامير واكف ينتظرها بسيارته ضحكت بصوت عالي مثل الجاهلة وراحت تركضله تصعد السيارة.. عرفت ما راح يگللها رجع راد يسويها الها مفاجأة بلغني ابا الحسن امس وكال كلهم راح يرجعون اليوم خاطر العرس ما يردون يزفون اختهم وهمه ما موجودين..

وصلونا للقاعة وبده العرس لعبنا لعب الفرحة تطلع من الحياطين مو بس من عيوننا واجسامنا، الفرحة بعيون حبيبة تتسولف عمررر جانت طايرة مثل الفراشة كاضة بنات منتصر كل وحدة من ايد وتركص وياهن بحب واضح..

-ليلة: سبأ چا رهيفة ما تجي؟

-سبأ: كالت تجي بس مادري شو تأخرت

دورتها بين المعازيم وياهة وشفناها من بعيد كاعدة على جهة لافة روحها بعباتها ما نازعتها بس ذابة الشال، اشرت لـ سبأ ورحنا نسلم عليها مشتاگتلها هالملسونة صار شكد ما شايفتها..

-ليلة: يا هلااا ومسهلا بأم لسان رهيفة

سبقتني سبأ وراحت تسلم على اختها تحضن وتبوس بيها بحرارة المسكينة صارلها شكد ما شايفة اهلها وبآخر فترة صارت تتواصل ويه رهف من موبايلي تتصل على صابرين امهن وتنطي الموبايل لرهف خاطر يسولفن..

-ليلة: خايبة وخري غاد خليني احبنها

وخرت سبأ تضحك وتمسح بدموعها ورحت لـ رهف، سلمت عليها وعاينت لوجهها وتفاجأت من شفت عيونها صايرات فصوص حمر يخوفنن جفن عينها مورم وبياض العين منگلب ماروني..

-ليلة: رهف شبيهن عيونج؟؟

-رهف: مابيه شي.. اظن حساسية

-سبأ: ولج غاديات جمر ليش هاملة روحج شلون بيج انتِ شلون

-رهف: مابيه شي بنات هسة اغسلهم

عافتنا وراحت للحمامات ولحگتها سبأ، عفتهن واللتهيت ويه العروس رگصناها ودبچنا وردحنا لحدما تعبت رجلينا.. شوي وگالو لبسن عبيچن يا نساوين راح يطب منتصر خاطر يلبسها الذهب..

لفلفت روحي بالعبا وحطيت شال فوك راسي وركضت اوكف بالنص خاطر اصور واخذلي هزة ويه البنيات من يدور وجهه منتصر عنه، سوينا مجال من صاحوا بالسماعات راح يجي العريس وخففوا الاضوية يسووله دخولية اظنهم تيهوا وحسبالهم هو العروس..

دقايق بسيطة ودخل منتصر بعگاله وبشته وطوله وعطره اليهفهف، ركضن بناته يستقبلن ابوهن وتلگاهن بحضن وشالهن كل وحدة من جهة مبتسم ويبوس بخدودهن..

گفلات، هوسات، ردح وفرحة استقبلنا العريس لحدما وصل لـ عروسته وحب راسها، ابتسمت حبيبة منزلة عيونها مستحية وكعدوا على الكوشة، سووا كلاوات العرسان مال وكلني واوكلك ولبسني واللبسك وحبني واحبك والمصورات بكل جهة يصورن الاجواء..

مشت دقايق بسيطة على وجوده هنا وچان يبدي الردح على اصوله.. علگت ام القاعة اغنية ترگص الصخر مع العلم خالة رسمية ما رضت يفتحون اغاني بس شيعاندنهن فتحن وخلن حتى العجوزة تدبچ بمكانها..

خففوا الاضوية خاطر النسوان تركص براحتها ومنتصر ما يشوفهن بوضوح وكلل صديقات ونسوان اخوة حبيبة طبن بوسط الستيج يرگصن وياهة، العروس داخت ما تعرف ويامن تركص وگضتها تضحك فرحانة ما تعرف تعبر عن شعورها غير بالضحك وانا من اشوفها هيج گلبي يرفرف من السعادة واظل ادعيلها واقرا المعوذات عليها..

تعبنا وفرغ شوية الستيج من بدن البنات ينزلن بس شفت وحدة هستوها اجت وصعدت تعتلي المنصة برزت بيناتنا، وكفت بالنص ضبطط گبال العرسان وجه بوجه صارت وياهم حاطة شال فضفاض على راسها والعباه على چتفاها وبدت تتمايل وتحرك بعباتها وايدها ويه نغمات الاغنية.. كل النسوان استغربوا عبنها واكفة كبالهم ضبط وشعرها طالع من الحجاب وتتمايل بدون قيود چنها اخته.. صار عندي فضول اشوفها عن قرب الاضاءة خفيفة ماكدرت اعرفها الا من تقربت كلش عليهم ياله انتبهت وكدرت اميزها... هاي رهف!

رهف واكفة هالوكفة تتمايل كدام الكل وتركص من كل گلبها ما مهتمة لحجي النسوان ولا لوجه منتصر الي انبلع بلعع من شافها، حاله كله تغير ظل يبلعم ويدور بعيونه عنها بس حبيبة جانت فرحانة ووكفت تركص وياهة تشاركها..

-رهف: مهنااااية يا بت عميي مهنى يا ابن عمييي عساه زواج الدهررر عسسى اشوفن الوليد بحضنچ يا رويحتييي

كضت حبيبة حييل ضاغطة على متونها وجرتها تبوس بيها وتكول..

-رهف: تستاهلين الاحسن واحسن واحسن واحسن واحسنننن من منتصر يا حبيبة عمري ويا حبيبتنا هنياله بيج الدكتوووور

-حبيية: هههههه حبيبتي رهيفة منتصر هم ماكو منه

-رهف: يااااا خية تعلميني بي زلمة والنعمممم منه ززززلمة ابن عميي

عكدت حاجبي مستغربة من نبرة صوتها تحجي بحرگة وشفت چف ايدها الشالته من زند حبيبة يرعش، دارت وجهها على منتصر ومدت اصبعها عليه تكول بصوت عالي خاطر يسمعها..

-حطهااا بعينك يا عوينتي حطها ببطن عينك ما تستاهل حبيبة تتوجع وينكسر گلبها!!

-حبيبة: بعد روحي رهف فرحتيني بجيتچ

ودعتها ونزلت رهف من الستيج، عاينت لوجه منتصر ظلت عيونه تركض وراهة ووجهه مگلوب گلاب بس حبيبة ما منتبهة حايرة تسولف ويه خوات منتصر الحاوطنها من كل جهة خاطر يلبسوها الذهب..

ظل بالي على رهف ماعرف حسيت بيها شي غريب، صح اعرف رهف اجرء وحدة من بنات عمي وتطلع منها هيج طلعات بس نبرة صوتها وحچيها ويه حبيبة چان بي شي ونادر احساسي يخيب بهيج سوالف..

رحت لـ سبأ شفتها كاعدة وتلوب مادري شماكلة ومعدتها ضربت جاي تتوجع، جبتلها سفن من مطبخ القاعة خاطر تشرب وكعدت يمها..

-سبأ: شكول اعراس وكشخة انا دشداشة ووصلة لافتها على راسي هواي عليّ

-ليلة: انچبي وشربي هسة تصيرين زينة

-اوووف جاي اتوجع ليلة مادري شمالني

-تحملي تحملي تقي بعده ما شافچ چا غير تراوي كشختچ

-اي اي

-النفنوف شافه لو بعده؟

-لا ما شافه ولا جاي نلتقي يرجع للبيت متأخر واغفى ما احس على روحي

-شجاچ سبأ!

-والله شكد اسهر خاطر نتلاگه بس ما اتحمل وانامن

-يلا ميخالف اليوم ان شاء الله تصير احواء بيناتكم

-ااااخ بطني خبطت سكتي ولج

-ههههه اگلچ اختج وين راحت؟

-مادري اظن اجوا عليها اخوتي

-هاا، چا شبيها احسها مو طبيعية

-شبيها؟؟

-مادري چن باچية هواي

-هاا لا خية حساسية تكول بعينها طاب تراب من نظفت السطح اليوم

هزيت راسي ما مقتنعة بس شعليه انا احط روحي خليني حايرة بضيمي، لازم اللگه طريقة اطلع بيها من العرس بدون لا يحسون عليّ انطي الفلوس لـ ناظم وارجع بسكات..

لبست الشال على راسي عدل وحطيت عباتي على راسي حتى اطلع بس الحظ سواها واجتني خالة رسمية تسحسل بچناينها تراويهن للنسوان وتعرفهن علينا..

-ليلة: تَـمني ماريد اجي انا غطي عليّ حبابة

-تَـمني: اني هم ماريد بس خالة رزلت شمس قبل شوية تگوللها ابرار بتعبها وبحالتها النفسية المتدمرة وهستوها رجعت من المطار وما نست الاصول وراحت تسلم انتن شبيجن

نفخت هوا مستسلمة ورحت وياهة اسلم على النسوان، احسني واگفة على ناار كل ساع اكول هسة يروح ناظم لابا الحسن وهسة يدزله كلشي عني ويطيح حظي خصوصاً وهو محمل عليَّ من عرفني تزوجت صاير سماني اكثر من گبل الله لا يوفقه..

مشى الوكت وبده يخلص العرس الحمدلله اخيراً، صاحوا بالسماعة راح يطبون ابوها واخوتها يودعوها وكلنا لبسنا ووگفنا على جهة محد تقربت من الستيج.. انتظرنا فترة بينما الكل تحضر وتلفلف زين ياله سمحولهم يدخلون وچان المشهد مهيب!

دخل عمو علي اول واحد بعگاله وبشته والسبحة حاطها بأيد وبالايد الثانية العوچية ووراه طبوا التوأم علي الدر وعلي البدر بلبسهم العربي وكشختهم ويسحلون بكرسي حيدر المتحرك.. تبعهم علي التـقي والتوأم ابا الحسن علي والامير علي وراهم دخلوا علي الحـق وعلي الكرار واخر شي شرفوا زوج المشاكل علي السور وعلي النور "زوج المطيرچية"..

وگفوا صف واحد بعدما سلموا عليها واحد واحد ومطروا منتصر بتوصيات تورشعوا من كل جهة مثل الصگوره واللتموا على فريسة، ظل منتصر يأشر على عيونه واقرا شفايفه يگول "احطها بعيني"..

رجعوا عمو علي وولده التسعة يوگفون گبال الكوشة وحبيبة صارت بنصهم، حاطين على چتافاتها عباية سودة وكاضتها حيل تخاف لا تطيح كدامهم عبن بدلتها مكشوفة.. وگفوا خاطر ياخذون صورة جماعية وضحكت من اشرتلي تَـمني على حويدر سودة عليَّ كاعد وبيده كلينسه يمسح عيونه وخشمه يبجي متأثر بزواج عمته..

كملوا تصوير ومشت خالة رسمية للستيج بيدها علاگة چبيرة مال ذهب، مدتها لعمي علي وهو طلع منها هديته لوحيدته وبنيته وحبيبته الاعز من روحه.. طلع منها سلاح ذهب ينلبس جانبي طوله متر هدية زواجها ووراه بدوا اخوتها يطلعون هداياهم كلمن جايبلها حاجة ذهب..

سلامهم ووداعهم لـ حبيبة طول اكثر من نص ساعة كل واحد بيهم حضنها على صدره بحنية يبوس بيها چن راح تسافر وتعوفهم واكو بيهم بچوا على فراگها وشفتهم يمسحون بعيونهم خصوصاً سور ونور ماتوا من البچي حتى وجههم صار احمر..

وگف علي الحـق گبالها متكدر ومكسور خاطره يخاف ما تودعه عبنها مزاعلته بسبب الصار، جرها من زندها وشمرها على صدره يحضنها ويمسح على ظهرها ويسولف وياهة شي ما نكدر نسمعه بس نشوف عيونه خبطت بالدمع متأذي وحبيبة بس تهز براسها ودموعها تنزل..

-تالة: اوووف متنا بچي كافي

-ليلة: هههههه شكد فاهيات

-تَـمني: بس الماعنده گلب ميتأثر ليلة الله يساعدهم شلون راح يفارقوها ولج احنه شلون نكعد على سفرة وحبيبة مو ويانه عمت عينك بسام

مسحت دمعتي گبل لا تطيح ودرت وجهي عنهن، خلصوا وداع وياهة وره ما خرب مكياجها وتخربط ويه كل واحد تودعه تبچي من كل گلبها وكل ساع امها منتبهتها على المكياج خرب من دموعها..

طلعوا الزلم ولبسناها الكبوس الابيض زين وحطوا فوگاه عباه وطلعها منتصر واحنه وراهة نروح زفافة، ما ردت اروح وكلت لابا الحسن يرجعني للبيت گلبي راح يوگف من الخوف اريدن بس ارتاح اخاف اتلاگه ويه ناظم بالزفة ويفضحني..

بس يا ريتني ما رجعت للبيت.. ويا ريت ما صارت الزفة.. وياريت ما تزوجت حبيبة وطاحت على مصيبة جديدة.. ولا تلاگت عين تالة وكرار وصد وجهه عنها.. ولا ضحكت تَـمني للامير علي وگالتله رجعني للبيت اريدن اشبع منك.. ياريتنا ما طبينا ذاك اليوم للبيت سوه وكلمن راح لغرفته.. وياريت ما اهتزت موبايلات التوأم برسالة اجت بنفس الوكت وقروها!.. يا ريتني ميتة ومگبورة ولا شفت عيون ابا الحسن تبحلگ بالموبايل هالشكل......

يتبع 👑....

━━━━━━ ♛ ━━━━━━

البارت الجاي..... 🥲🔥

معنى سلاح ذهب: هو عبارة عن زنجيل طويل كُلش ومشكل بي قصبات جبيرة ينلبس بشكل جانبي وهاي صورة توضحه (هذا مو مال حبيبة) 👇🏻

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

يصبرني المايدري بقصتي ويگلي اتهون..

━━━━━━ ♛ ━━━━━━

-تعالي شسمج.. تعالي هاي شسمها نسيت

حسيت على نغزات بچتفي واللتفتت، شفت فراقد وراي واكفة بس وجهها مگلوب، ابتسمت وجاوبتها..

-اسمي تالة خالة

-اي تالة تعاي هاج اخذي هاي لاختج

-تَـمني مو اختي بت خالتي

-نفس الشي خايبة لا تلحين واخذي الها طاح من جنطتها

-عاشت ايدج

اخذته من ايدها وانتبهتله شريط الادوية مالتها شوگعه هذا، حطيته بجنطتي وطلعت من القاعة ويه الزفافة من الهوسة والازدحان تيهت امي وتيهت البنات الدنيا كلها جايه لعرس حبيبة اول مرة بحياتي اشوف هيج عرس مزدحم يمكن العراق كله جان معزوم..

شفت ظهر رفل تصعد وحدة من الكوسترات الجايبيهن للنسوان وعلي الكرار واكف على جهة يحجي ويه مرة جبيرة، لميت اطراف فستاني اخاف اعثر بي ورحت اهرول للسيارة اصعد، وصلت للباب وردت اصعد بس فستاني گصيف من جوه ودست على الاطراف بالغلط ووكعت چفي على وجهي شاغت روحي وخشمي راح بـ دچة السيارة..

-الله الله الله اسم الله خيتي بيج شي

ركض عليَّ رجال من صوته ميزته عرفته هذا كرار بس وجع خشمي صعد لعيوني ظلت عيوني تذب دموع بدون لا ابجي، اللتفتت عليه ودا اجاوبه اني زينة بس صدمني من باوعلي وعرف اني منو رأساً دار وجهه عني مغلس عليَّ بطريقة تقهر.. مادري شصار بيه من شفته هيج سوه گلبي مردني مرد وبدون لا احس على روحي عطت بي..

-شكد ماعندك احساااس

مسحت دموعي مقهورة نار بگلبي اشتعلت ظل داير وجهه عني ولا باوعلي ولا اهتم وهالشي جرحني بالزايد، حطيت كلينسة على خشمي وعطت بي قبل لا اصعد السيارة..

-هاي الرجولة التربيت عليها!

ويه صوتي اللتفت خازرني وراص على اسنانه حييل، الدنيا مكلوبة حوالينا والكل يكدر يشوف ويلاحظ الديصير بسبب موقعنا صايرين ببوابة السيارة.. واهمداني لان ما فكرت بهالشي اهمدااني لاني استفزيته لدرجة الزلم الحوالينا عبالهم تحرش بيه وهذا السبب عطت بي، ثواني مرت وما حسيت الا برجال طويل وضخم جر كرار من خوانيگه من وره وضرب ظهره بالسيارة وطير وجهه ببوكس فلش وجهه..

شهكت ضامة وجهي ماعرف شسوي، تورشعوه الزلم من كل جهة وكرار يصيح ويتعارك وياهم يريد يفك نفسه منهم ميكدر باقي وحده والمحاوطي خمسة..

-تالة: هدوووه عوفوووه هو معليه مسوالي شي والله مسووه

بس ماكو محد بيهم ديعوفه اصلاً ميكدرون يسمعوني صوت الموزيقا عالي جايبين فرقة كاملة وكرار وحده ولا واحد من اخوته موجودين وولد عمه ماكو ما شفت ولا وجه مألوف واكف يمنا كلهم جماعة منتصر..

-رفل: هاي شني صارت عركة؟

-تالة: رررفل لحكي هذا كررار!! ديضربون علي الكـرار

-رفل: شنوو؟؟؟ لييش

-عبالهم تحارش بيه ولزموه يتعاركون وياه ولج مدا يسمعولي راحوا بعيييد

-سودة بوجهج كوون تالة شبييج چماله اخوته مو هنا!!

نزلت من السيارة مغشية وجهها بالعباية، دورت عيوني اريدلي وحدة عرف ماكوو وين ولن ذني وين راحن وامي وييين!.. يأست اللگه وحدة وركضت وره رفل التعيط بيهم حتى يعوفوه شفتها كابة اكثر وزلم متدخلين يفاككون بس همزين من استجابوا لصياح رفل وخفت بيناتهم الى ان ابتعدوا وعافوا كرار بالكوة واكف على حيله ووجهه كله دم..

-تالة: ماا تحارش بيه والله ماا سوالي شيي

گلبي موتني من الوجع احس ضربات وجهه كلها صارت بيه، ركضت اريد اساعده ولزمتني رفل خازرتني متقبل اتقرب اشرت على السيارة ونترت..

-رفل: ما رايدة سمعتج انتِ؟؟ رجعي للسيارة بسااع

-ونعوفه هييج؟؟

-هسة يرجع حيله زلمة ويكدر يعين نفسه امشي نرجع

سحلتني من ايدي سحل ضوجتني كلش بحركتها وظليت اباوعله ميتة قهر كوة گام يمشي من اجوله شباب يساعدوه احس مكسور خاطره من الصار.. ركبت السيارة وعيني تباوعله من الجامة اشوفه راح يطگ من العصبية وجهه كله دم ودشداشته متدمرة وعكاله بالكاع..

-تالة: رفل ليش خليناه وحده لييش

-رفل: ما يصير يا امي انتِ بت شون تطبين بين زلم وحيدج فوكاهة بلا حجاب يعني شكلج كلش بارز

-هسة عباله اني متعمدة اخلي بهالموقف

-بعدين شرحيله اصلاً راح يعصب زايد اذا رحتي تساعدي

سكتت من شفتها قافلة مالي واهس حتى بالزفة اريد ارجع للبيت بس وينها امي وين راحت وعافتني وحدي، تحركت سيارات الزفة وكرار بقى بباب القاعة ما رجع لبيتهم.. تخربطت اوضاعي والضوجة صعدت عندي وضجت اكثر من شفت تلفوني اكثر من 15 مكالمة فائتة من امي بس جان صامت وما حاسة عليه واخر شي دازتلي رسالة كاتبتلي..

"اني صعدت ويه عمتهم ابتسام شكد دورت عليج ظل بالي بس ارتاحيت من عبق كالت صعدتي ويه رفل"

دزيتلها "👍🏻" وسديت موبايلي مغثوثة، اغاني وركص وهوسات بسيارتنا كلهن صديقات حبيبة وامهاتهن وناس غربة منعرفهم الوحيدة الاعرفها هنا هي رفل وهم كاعدة وساكتة مثلي..

-رفل: چنهم راح يوكفون العريس يرگصونه

باوعت من الجامة وشفتهم صدگ وگفوا سيارة العرسان ونزلوه منها نفسهم الضربوا علي الكـرار الحقراء شلون ما عرفوا يصير ابن عم العريس شلون هيج تجاوزوا عليه الله ياخذهم همه وشواربهم المگملة..

-رفل: شو بساع رجع

-تالة: اتوقع العريس تعبان

-رفل: اي اظن هو حتى بالقاعة وجهه مگلوب مادري شماله

-معقولة تعاركوا هو وحبيبة؟

-لا ما اظن

هزيت راسي ساكتة ورجعوا حركوا السيارات حتى نروح للفندق الحاجزيه، تچيت راسي على جامة السيارة وسرحت بتفكيري ماعرف بشنو دا افكر بالضبط بس بالي مو ويه الزفة ولا منتبهة للاجواء الا من ضرب سايقنا بريك قوووي ردت اطير من الكرسي لولا رفل اللزمتني بكل قوتها ترجعني لمكاني وتصيح..

-يااااا علييييي

-تالة: شصار؟ هاي شصار!!

السيارة انكلبت كلاب كلها كامت من مكانها تباوع من الجامات واني ورفل من ضمنهم، شهكت مخترعة من شفت سيارة العرسان مضروبة ووكفوا بنص الشارع ونزلوا كل الشباب من سياراتهم يشوفوهم..

-رفل: دخيلج يا الزهرة كون ماكو شي

كعدنا على نار نريد نفتهم شصار بس هوسة كلشي ما افتهمنا، نزل السايق مالتنا وظلن الي بالسيارة كل شوية وحدة تنطي رأيها وتحلل الصار وحدة تكول شفت سيارة تضربهم وتشرد ووحدة تكول همه انضربوا بالسيارة ووحدة تحجي على سايق سيارة العرسان علساس مطفي واشكال حجي صار وما عرفنا الحقيقة الا من رجع سايقنا وسألناه شصار جاوب..

-السايق: واحد بسيارة رياضية ضربهم وفلت

-يعني متعمد؟

-السايق: اظن اي

-رفل: صار شي للعرسان؟؟

-السايق: لا خيتي مابيهم شي الحمدلله بس سيارتهم انضربت ضربة قوية

تنهدت مرتاحة ان مابيهم شي بس هم ممرتاحة من الصار خصوصاً من السايق كال مال واحد متعمد، انكسرت الزفة وبسرعة بسرعة وصلوهم للفندق واحنه رجعونا للقاعة شفنا اخو رفل عباس واكف منتظرنا ومن شاف اخته خزرها توقعته راح يحجي وياهة او يكول صعدوا ويايه بس ما عبرنا ولا اهتم لاخته وعافنا نرجع ويه ابن عمهم صمد..

-رفل: مال الوجع

-تالة: هذا مو اخوج ليش ما رجعنا وياه؟

-رفل: خيولي عار

غلست ماحجيت ورحت ويه ماما حتى يرجعونا لبيتنا، طول الطريق بقينا نحجي بالحادث وفاجأتني ماما من كالت..

-ولج ضربوا طلقات على السيارة هم

-تالة: صدك عود؟؟ شو مسمعنا

-حنين: اتوقعه مسدس كاتم والله بس شفت اثر الطلقات زرفت السيارة مال منتصر لان احنه چنه نمشي قريب منهم

-عزا يا ستار منو هذا وليش هيج سوه!

-حنين: عمتهم ابتسام كالت اكيد جماعة مسعود لان ابنه غفار رايد حبيبة وما انطوه

-ويجي يدعمهم ويضرب عليهم طلقات! شنو من بشر ذولة!

-عقل ماكو براسهم يمة مجرمين ذولة ما محسوبين على الناس الطبيعية...

**

"حـــبيبة"

گلبي وگف من الخوف ورجليه بادن مابيه حتى انزل من السيارة، كضني منتصر حيل من ايدي ومشاني يطببني الفندق.. الصار اخذ ثلثين حيلي كلشي صار سريع ما لحگ عقلي يستوعبه انضربت سيارتنا من وره ضربة خلت راسي ينضرب بسگف السيارة والتاج انبت بيه بس ما لحكت اصيح ااخ وحسيت بسيارتنا تتزرف بچيلات من جانب منتصر..

وخرت البركع من وجهي محتارة اعاين لمنتصر وجهه انخطف نزلوا من السيارة رادوا يلكفون السوه هيج بس ماكدرنا نعرفه فلت بساع ينهزم، بدون لا احتاج افكر اجه ببالي غفار حسيت هو اله ايد بهالتصرف جنت حاسة ما راح يمشي عرسي على خير اعرفه مخبل وما متقبل زواجي لحد هاي اللحظة..

رجعت للواقع انا بالغرفة و صوت هدية اخت منتصر فوگاي جاي تنزعني الكبوس من راسي وتوصيني ماعرف شتكول ظليت بس اهز براسي اي، غرفة الفندق انترست نسوان الغربة والكرايب كلهن هنا بس امي ما شفتها وتوقعتها ما تنزل وياي عبن للاسف عدنا عيب تحضر الام بزفة بتها..

-فراقد: حطها بعينك منتصر انتبه على حبيبة گلبنا

-ابتسام: شيخة انطيناك عاملها على هالاساس يا بعد عمتك

-منتصر: بعيني لا توصون حريص

تورشعنه الباقيات وابتسمت على توصياتهن كلمن كضته من جهة توصي بي وتعلمه شون يتصرف وياي ولا يضوجني بيوم ويزعلني، شكدما متوترة وخايفة بس فرحتي مانطيها لبشر احسني فوك الغيم اخيراً حلمي تحقق وتزوجت حب حياتي..

ودعونا النسوان وترخصن يطلعن عافونا انا وياه وحدنا، ارتبكت من الاجواء هاي اول مرة ينسد باب علينا وحدنا راح اموع من الخجل ماكدر حتى ارفع عيني عليه..

-منتصر: راح اوصي على عشا بلچن يرجع الدم لوجهج

-حبيبة: لا لا انا زينة.. عمة زهرة جابت جنطة كالت بيها اكل

-هاا صدگ؟

-اي هاي

-خوش طبي سبحي اذا تردين انا راح احطه على الميز

هزيت راسي اي وكمت اخذت جنطتي البيها احتياجاتي وطبيت للحمام، فكيت سحاب البدلة بسهولة وطاحت مني شلتها وشمرتها بره الحمام ورجعت خاطر اسبح.. مسحت المكياج وسبحت وبدلت هدومي لسيت اوف وايت طويل وعطرت روحي وطلعت من الحمام..

ابتسمت من شفته محضر الاكل وكاعد ينتظرني هو هم مبدل هدومه لابس دشداشة بيضة، لفيت شعري بمنشفة عبنه ناكع ورحت اكعد يمه تعشينا مثل عادتنا چن ايام گبل ما حسيت بتوتر والخوف كله راح مني من استوعبت انا خلاص صرت مرته وهو صار الي..

-منتصر: بخصوص الصار انا ما راح افوتها ومن باجر ا...

-حبيبة: لا نحجي بهذا الموضوع هسة خيولي

-لا حبيبة الصار ما ينسكت عنه

-ادري بس يعني مو وكته خلي بعدين نتناقش بي

هز راسه مأيدني وكام للحمام يغسل وره ما خلص اكل، لميت السفرة بسرعة بسرعة ايدي ترعش وبطني تخبط مادري بشنو جاي احس وماعرف شلون اشرح وضعي.. ضميت كلشي وكعدت وسكتت على القنفة انتظرته علما طلع ينشف بأيده ويمسح وجهه بالمنشفة الصغيرة..

-اكيد نعسانة مو؟

-اممم

-اليوم هواي ردحتي

حچاهة بضحكة واشرلي بيده اروحله، بلعت ريگي وظليت كاعدة بمكاني ماكدر اتحرك غمض عيونه وذب حسرة عالية واجه هو كضني من ايدي يگومني على كيفه ويكعدني على الشازلونة القريبة من الجرباية..

-حبيبة

-هاا

-شبيچ ترجفين

-مادري

-انتِ عزيزة عليّ حبيبة

-وانتَ هم

-كبرتي گدام عيني وصرتي مرة ما شاء الله جمال وكمال وحشمة من كلها لامتها

ابتسمت خجلانة وصرت اللعب بطرف الثوب مالتي، رجعت رفعت راسي من اردف بصوت ناصي..

-اذكر من چنتي جاهلة واجي لبيتكم، تتلگيني من الباب تصفگيلي وتهوسين وترگصين فرحانة و تقريلي "هلا بيك هلا.. وبجيتك هلا"

-ههههه اتذكر

-ايام حلوة جانت حبيبة

-اي كلش.. ان شاء الله يجي يوم ونسولفها لجهالنا

ابتسم ساكت وگبل لا اللحگ اگول كلمة زايدة كظ وجهي بين ايده و..........

حرفياً عشت احلى لحظات حياتي وياه واغلاها.. اغلاها لان من گام مني واخذ دشداشته وراح للحمام عافني وحدي اضحك للهوا وابتسم للمخاد النايمة عليهن، غمضت عيوني اتنهد وامسح على گلبي اليريد ينفجر من الفرح، عصرت عيوني ودعيت كون ربي يتمم فرحتي وابقى حياتي كلها عايشة بهاي السعادة والاستقرار النفسي..

فكيت عيوني متشتت تركيزي على صوت موبايله اجاه اشعار رسالة، ما اهتميت انا بطبعي احترمه واحترم خصوصيته ناوية ما اعاين لموبايله ولا يجي يوم افتش بي.. تكررت الاشعارات وصارت تجي وحدة وره الثانية بشكل مزعج مبين گروب وكلها كاعدة تسولف هسة بسبب الرسائل، لميت روحي ونهضت نفسي خاطر اسوي صامت وصدفة عيني صارت على شاشة جهازه..

شفت الاشعارات صدگ من گروب طبي مبين مال دوامه بس الي جذبني مو هالگروب الجذبني اشعار رسالة جاي من رقم "صابرين" مرة عمي مسعود ام سبأ ورهف.. صابرين شتريد بهالليل سترك ربي!

بدون تردد كضيت جهازه وفتحت الرسالة خايفة لا يكون مسويتلها سالفة وتريد تطيح منتصر مثل عادتها خفت لا يتعكر مزاجه ويضوج بعد ليلتنا الحلوة بس الي صار العكس.. الي صار صدمني وخله عيوني تصير بگصتي بعدما قريت الرسالة مكتوب بيها..

"خان العشرة وانطاني الليلة ظهره الگال اسندنچ العمر كله واحطچ ببطن عيني"

گلبي ظل يدگ حيييل قريت الرسالة مرة ومرتين وثلاثة وعشرة واحس ما جاي افتهم شبيها صابرين شني تسودنت؟! شفت دايرة محادثة بيناتهم من گبل وصعدت اريد اقراها بس تراجعت من وصلت منها رسالتين جديدة كاتبة..

"مادري ادعي عليك لو على زماني الاغبر، المشكلة گلبي ما ينطيني ادعي احس جاي ادعي على روحي كون روحي وگلبي احترگوا ولا صدگنك.. چان لازم اعرفك مو گد حچايتك وتتممها وياي بس ميخالف.. ميخالف عبني استاهل الجرالي استاهل لان صدگت واحد نفسك خان العشرة بين ليلة ويوم وضحك عليّ وعلى گلبي!"

"تعرف شنو اكثر شي يوجع منتصر؟؟ اكثر شي يذبح انك خنتني ويه بت احبها! والمشكلة لو دعيت عليك چن ادعي عليها وانا ماكدر ادعي عليها ماكدر حبيبة ما تستاهل غير السعادة.. روح يا منتصر عساك مهنى وسعيد وياهة بس لانها نقية وخوش بت ما تستحق البهذلة عسى سنة التجي اشوفن وليدك بحضنها واجي احبنه واشمنه واگمطه بيدي"

الضغط وصل لخشمي من الصدمة ما جاي استوعب القريته حقيقي الا من صعدت بالرسايل وشفت بيناتهم محادثات ذبحتني.. محادثات حرگن گلبي ومعدتي وعقلي وكلشي بيه، دموعي صارت تنزل وحدة وره الثانية ما اكدر اسيطر على نفسي من اكتشفت من خلال الرسايل اليحجي وياهة رهف! بت عمي رهف! رهف الركصتلي وهلهلت يمي وصفكت ودعت ووصته عليّ!

راسي طاح على المخدة منهارة احس النفس ضاگ بيه من شفت مراسلاتهم القديمة، حب وغرام وهيام وعشگ واحلام واوهام وتخطيط للمستقبل! روحي رادت تطلع من شفت اخر مرة راسلها امس! يا بوية امسس بيوم الحنة كاتبلها..

"رهف بداعة امج جاوبيني بس خليني افهمج الصار!!"

ضربت على رجلي حيل من صعدت بالرسايل اشوفنه يتوسل بيها تفك منه الحضر مبين حاضرته صار هواي وهسة ياله فكت الحضر، اشوف كتاباته وكلشي بيه يرجف راح اتقيء ما جاي اتحمل هالحرورة الصعدت الزردومي.. انفجرت بالبجي بصوت عالي ادگ على صدري فاقدة من قريته كاتبلها..

"والعباس الچفل زينب انحطيت بموقف ما اتمناه لبشر رهف! والزهرة ام الحسن احبج الج ولج عااشگج انا ميت بيج مييت فكي الحضر خليني افهمج الصار! ولج ماا احبها والله العظيم ما احبهاا حبيبة اختي تعرفين شنو اختي؟؟ بس انحطيت بموقت محرج ويه عميي حسبالي انهي عليها ويجبرني افكها بساعتها مادري راح تتطور واتزوجها ولج رهف جاوبي بداعة اعز بشر عندج"

شمرت الموبايل من ايدي متسودنة ماعرف وين انطي وجهي كمت من الجرباية اللملم بروحي واضرب على وجهي حيييل اعاقب نفسي على غبائي وطيحان حظي، ابجي بحس عاالي واللوم بنفسي عمتتت عينج يا حبيبة شسويتي بروحج عمممت عينج فوكما هي عمية..

-منتصر: حبيبة شبيچ ليش تبجين

-هدني منتصر هدنيي

-ماهدج ولللج شصايرر اهلج بيهم شي؟؟؟ احجييي

دفعته مني بعنف واخذت هدوم ورحت للحمام، طبكت الباب وقفلتها وفتحت الدوش وطحت بالكاع ابجي واضرب على گلبي استذكر الرسايل واللطم على وجهي وصدري.. رسايل بيناتهم مال شهوور هاي اذا مو سنين واليذبح واليكتل واليموت العلاقة من طرفه هو! هو اليحبها وميت بيها واستقتل خاطر تلين اله وتبادله والحظ الزفت من بدت تبادله وتحبه وتعلقت بي خطبني وتزوجني!! ااااااااخ يا وجع گلبي ااااااخ..

-حبيبة فتحي الباااب.. حبيبببة خليني افهمج بس فتحي الباب

-روح منتصر ماريد اشوفك رووح

-حبيبة بروح ابوي ما قصدت اضوجچ وازعلج فتحي الباب خليني افهمج الصار

-تفهمني شنوو؟؟ تفهمني امس كاعد بحنتك تتراسل وياهة وتتوسل بيها تفك عنك الحضر!! روووح منتصر وخليني بكسرتي رووح

-حبيبة وراسج وراس بناتي وروحه لابوي ما عندي نية اكسرچ واللعب بيج بس كل الصار غلطط كل الصار سوء تفاهم طلعي خليني اشرحلج يا عيوني

يضرب على الباب حيل ويتوسل خاطر اطلع بس شطلع بعد؟ شطلع والمن اطلع؟! الرسايل الشفتهم دمرني حرگني بدون نار انطبعن براسي طبعع حفظت حتى حروف الحب الي انكتبت بيهن..

-خوش حبيبة.. خوش اخذي راحتج ارتاحي شوي سبحي كملي وانا كاعد هنا منتظرج

-لا تنتظرني

-انتظرج مالج غرضض

ضرب برجله الباب متعصب شفتها تتحرك بس ماهتميت وظليت كاعدة جوه الدوش متبنجة حتى الوجع الچنت احس بي بگلبي راح بس وين راح ماعرف عبن جسمي كله صار يوجعني.. ظليت هنا ما طلعت لفترة طوويلة عقلي فاصل ما جاي اكدر افكر بشي ولا افرزن باقية بس اتصفن بالحايط وگلبي يبچي..

حسيت بأيدي تنمل كل ساع تخدر وتفك تكررت عندي اكثر من مرة دعيت كون ياربي يصير بيه شي واموتن واخلص من هالعذاب.. هملت روحي وتچيت ظهري على الحايط من حسيت الماي بده يقل من الدوش كعدت افكر واحلل شنو لازم اسوي بس غير اكدر اوصل لشي؟؟ ماكو ماكدر گاضيتها بس ابجي وامسح بعيوني التحرگني...

أيست من كعدتي هنا وكمت نزعت هدومي الناكعة وبدلتهم بغيرهن وطلعت من الحمام، فزيت من شفته كاعد على الجرباية ينتظرني ما انطيته اهمية وعبرته اروح لجنطتي ادور حجابي..

-شنو جاي تسوين؟

ما جاوبته وطلعت الشال الاحتياط الجايبته، وخرت الخاولي من راسي واجيت احط الشال بداله ونتره من ايدي مخنزر..

-شنو هالتصرفااات حبيبة!!

-معليك

-شنو معليك؟؟ المن لابسة ربطة مني؟!!

-مو منك من الشارع لبست

-شجاب الشارع هنا؟!!

-راح اتصل بأهلي يجوني

فتح عيونه مخترع وكض شالي بأيديه ثنينهن ومزگه نصين وشمره بعيد، شهكت فاتحة حلكي ما متخيلة منه هالتصرف بس ما انطاني مجال احجي لان بساع كال..

-حبيبة لاا تسويلنا فضيحة خليني اشرحلج الصار والتردي يجرالج

-الفضيحة مو عليك عليّ ومالك غرض بيه

-شون مالي غرررض شووون ولج انتِ موو مرتيي وبت عميي شرفج من شرفيي!

-شرفي من شرفك؟ هو انتَ خليت بيها شرف منتصر!!

-حگچ شتحجين هسة حگچ بس انطيني فرصة اشرحلج.. تعاي خلينا نكعد ونسولف على كيفنا تعالي

-ماريد اكعد وياك

ضرب على رجله متعصب وهاي اول مرة اشوفه بهالشكل، انطيته ظهري ما مهتمة وهو راح يكعد على الجرباية يلطم على رجله ويتحسر..

-اااخ منج اااخ ولج لو بس تفهمين الجرالي والعباس ما توكفين هالوكفة

-هههه

-لا تضحكين لا تضحكين.. حبيبة انا انظلمت اخذت حياتي هاي كلها طول بعرض مظلوم والدنيا تعوج وياي لا تصيرين انتِ والزمان عليَّ!

-انا ما ظلمتك بشي منتصرر فهمنييي بشنو ظلمتك اناا!!

-هالمرة مو انتِ ظلمتيني حبيبة انا ظلمت نفسي

اللتفتت احطن عيني بعينه ارجف من العصبية، تهت ماعرفت شكول من الصدمة والضياع الجاي احس بي اول مرة ماعرف شكول وانلصم على حلگي..

-حبيبة انا غلطت اعترف واكلچ غلطت غلط ما يتصلح انا...

-ليش خطبتني اذا تحبها؟

-حبيبة

-منتصر جاوبني ليش خطبتني اذا رايد بت عمي؟؟

-خاطر ما تتزوجين واحد انتِ ما هاويته

-يعني شني

-انا نهيت عليج لاني اعرف عمي راح يجبرني افك النهوة بساعتها اعرف ابوج واعرف تفكيره يتخبل من سوالف النهوة وما يعترف بيها.. وانا من نهيت جانت ببالي خطة متأكد منها راح تنجح، اضرب عصفورين بحجر هم انهي حتى اخرب خطبتج من زين العابدين وبنفس الوكت انا افك النهوة منج وما تخرب حياتج ويه زلمة انتِ ما تردي بس صار العكس.. كلشي عكس وياي

حطيت ايدي على گلبي اعصره حييل متوجعة، حيلي راح ما جاي اكدر اظل واكفة تمشيت على كيفي وكعدت على الشازلونة اسمعله وهو يكمل..

-انصدمت من رضى ابوج ينطيني بشرط اجيبله مشية، انحطيت بموقف محرج ومخزي حرت ماعرفت شتصرف اخاف لا اكول لعمي انا ليش نهيت عليج من البداية لا تخرب علاقتي بي وبأخوتج وخفت لا اتمم الموضوع واظلمج وياي

-بس ظلمتني

-وحگ الحسبن يا حبيبة ما تقصدت.. ما تقصدت اضرچ ولا اجرحچ عبنچ عزيزة عليَّ

-وانا ماريد اصير عزيزة! مااريد اصير عزيزززة ماريد!! انا اريد زلمتيي يشوفني حبيبة وزوجة وصديقة وكلشيي ماااريده يشوفني بسسس وحدة عزيزة على گلبه!!

-اوعدچ ما راح يجي يوم اظلمج بي وشاربي مو عليّ اذا ما عيشتچ عيشة تتمناها كل بت

-ورهف؟؟ رهف منتصر وين مچانها بگلبك؟؟ لو گلبك نص الي ونص البت عمي؟؟؟

-حبيبة انا ا...

-ليش ما فصخت الخطوبة؟ ليش تزوجتني لييش؟؟؟

-كتلج السبب

-تخاف من ابوي واخوتي لا يعادوك؟؟ چا وانا اناا شنو موقعي شنو ذنبي خربت حياتي؟؟

-لاا انا حفظت شرفج وسمعتج يا عيوني والله العظيم سمعتج اهم من كلشي عندي حالياً! انا لو فاصخ الخطوبة ما راح تخلصين من حجي الوادم النااس راح ياكلون وجهج وانتِ تعرفين مجتمعنا وتعرفين تفكيرهم الغربة ما يرحموهم مو انوب اولاد عم وفصخوا

-مو مبرر هذا موو عذرر

-مو مبرر الج عبنچ ما دايسة دواوين الزلم وسامعة الحجي الما ينلبس عليه ثوب من ينجاب طاري بت وشرف بت! وانا ماا اسمح ينجاب طاريچ بديوان وينحجي بيج ماا ارضاها عليج

-طلگني منتصر ولا تظلم نفسك ورهف وياي

-حبيبة!!

-طلگنيي وخلشوف يااهو يجيب حروف اسمي بديوان!

-ولج شنيي تردين تدمرين سمعتج انتِ؟؟

-عندي عشررر زلم بظهري منتصر يغطون ضوا الشمس لو وگفوا حداي! يشگوون حلگ السبع لو جاب طاري اسمي بمچان لا تخاف عليّ!

-تردين تطلگين خاطر ما تظلميني بس تظلمين نفسج عادي؟

-ما اظلم روحي ما راح اموتن لا تخاف لا حسبالك جنت عايشة بسجن گبل لا تتزوجني

-ادري بيج حبيبة بس...

-منتصر لا نطولها وهي گصيرة انا ما ارضاها اخذ زلمة بت عمي وصديقتي واخليها تموت على البطيء! ماكدر اركص وادبچ على وجع گلبها انتَ بهاي سوايتك دمرتني ودمرت نفسك ودمرتها تدري لو لا؟؟

-ما جاي تفهميني

-افهمكك انا الفاهمتك بس ليييش لمستني اذا عقلك ويااهة ليييش ما فهمتني گبل لا تكضني!!!

-حبيبة وداعة بناتي الماعندي اعز منهن سويت كل هذا لخاطرج قسماً بجاه الله ماعندي نية سوء وياچ ونويت اعيش وياچ واتزوجچ و...

-وانا ما اريدن هالشي ما جاي اكدر اتحملك.. ماكدر اتقبل زلمة گلبه ويه وحدة ثانية ما اتقبلها على روحي انا استاهل زلمة گلبه فارغ ومابي غيري منتصر! واذا انتَ هسة جاي تكول ماتريد تطلگني خاطر سمعتي؟ فـ اگلك خوش هذا هو مثل ماتريد اكمل وياك چم يوم وانا بنفسي اخترعلي سالفة ويه اهلي واطلب الطلاگ منك بدون لا اسببلك مشاكل وياهم خليها وراي

-حبيبة ليش جاي تصعبيها اكثر!

-مالك غرض ولا تتدخل بقراري.. تبقى ابن عمي الربيت وياه والوگفلي وگفات حلوة بحياتي لا حسبالك راح اعاديك وره ما نتطلگ بس افهم يا منتصر انا جنت مغمضة عيوني كل هالايام وهسة فتحت ماريد اكمل بهالزواج افهممم....

**

-هسة غير يگعد راحة

ضحكت وضحك ويايه اكثر، رفع راسه السانده على ايدي يباوع لعيوني وگال بحاجب مرفوع..

-انا اگعد راحة ولج فهاوي؟

-تَـمني: لعد منو ابوية

-خايبة ليش ما تستچنين اليسمعج يكول مغصوبة

-تَـمني: اممم لا ممغصوبة

-امييييييير اشتاقيتلك امييييير

متت ضحك من صار يقلد صوتي وحركاتي يحرك بيده بمياعة تنافي رجولته، لزمت ايده اضمها بين ايدي وخزرته حتى يبطل يتنمر عليّ بس شو هذا رجعلي الخزرة ولزمني من فچي، جفلت خايفة من حركته بس فاجأني من گال..

-اشتعلوا عشيرتج على هالعيون

-اميييييير متت من الخوف هاي شبيييك

-ولج شوكت تبطلين تنزين وترجفين مني شوكت

-مادري مو انتَ.. انتَ.. عندك شوارب

ضحك وحضني يمرد بيه اختنكت من ثكل جسمه بس محچيت لاني فرحااانة.. كلللش فرحانة وسعيدة لانه اجه وسواهة الي مفاجأة لسه مدا اصدگ اني بحضنه وكاعدين نتداهر سوه وكل شوية يتلمس غمازاتي ويزرفهن بالزايد..

-اووف امير

-ها خير

-اني فرحانة

-عساها دوم يا بعد امير

-احب وجودك بحياتي هنيالي بيك

-يا بعد راسي

-انتَ مثل طعم الككو اليحطوا فوك الكابتشينو حلو ويضيف لمسة لطيفة.. شكراً لانك ككو حياتي

-جسر للطيبين

گالها بضحك وقضينا باقي الوقت ويه بعض برومانسية...... وبنص جلستنا الحلوة اجاه اشعار على تلفونه طفر مني شلون المخروع وگال..

-عذريني حبيبي بس اشوف هالرسالة اظنه طبيب حيدر يدزلنا نتيجة التحاليل

-اخذ راحتك حبيبي

حسيت على روحي من كلت حبيبي طلعت من حلكي بالغلط بس همزززين ما انتبه لانه جان مشغول يفتح تلفونه، ماعرف شبيه استحي اگوله كلام حلو احس ماعندي جرأة..

-ها بشر؟

-جاي يحمل هذا اظن فيديو

ظلت عينه بالتلفون ما وخرهن خطية كاعد على نار منتظره يفتح ومبين حمل لانه داس الفيديو وطلع منه صوت.. بس الصوت غريب صراحة ومو بس الصوت غريب حتى نظرات امير غريبة لانه عگد حاجبه وتغيرت ملامحه مال واحد مستغرب كللش..

وكأن العدوة انتقلتلي واني هم عكدت حاجبي مستغربة من وره الاصوات الدتطلع من الفيديو! اصوات قبيحة كللش مال شغلات مو زينة ومبين الي بالفيديو ناس فاسقين بسبب الفشار والضحك المستهتر والاصوات المو حلوة الدتطلع منهم..

-امير هاي شنو؟؟

-ولد الچلب دازيلي فيديو اباحي

-انطيهم بلوك خيولون

هز راسه بـ اي وبنفس اللحظة وصلتله رسائل اكثر من نفس الرقم، صابني فضول ومديت راسي اشوف وما خلاني فز من مكانه مبتعد مني ووجهه رأساً تغير وگام ينطي اللوان خفت من منظر وجهه وخفت اكثر من سمعت صوت عيطة رجال عالية اجت من الغرفة البصفنا.. غرفة ابا الحسن وليلة!

-تَـمني: هاي شصار

-يا علي دخيلك

-روح امير روح شوف شبي اخوك

-لا لا اششش مالنا غرض احنه اششش تَـمني سكتي

-يااا

-سكتي سكتي ولا چن جاي نسمع تعاي يلا خلينا ننام

-يااا شنو ننام شبيك امير

-باجر عندي شغللل خلينا نناااام

صاحها بوجهي خرعني مادري شبي ظل يرجف ووجهه انطعن ظل يراوح بمكانه ميعرف شيسوي، خربط شعره بيده وكل ساع يباوع لايده الشايلة التلفون ويوخر عيونه يعصر بيهن مع العلم التلفون شاشته سودة كلشي مدا يشوف بس شبيي!

-امير شسالفة شبيك

-ليلة: خلينييي افهممك ابا الحسنننن اوووكف ااااخ چتفيي حسننن

انتفضت من مكاني على صوت ليلة تصيح بخبال صياحها ممزوج ببچي عالي، خفت عليها وكمت من مكاني اريد اروحلها ولزم ايدي امير ميقبل خبلني بالزايد..

-متسمع صوتهااا امييير البنية متأذية واخوك ديتعارك وياهة شنو انتو ماعدكم احسااس

نترت ايده مني ولبست صايتي وحجابي وطلعت من الغرفة وهو اجه ورايه بس امير مو نفسه امير الاعرفه هذا واحد تايه وميعرف شيتصرف كدامي يمشي خطوة ويرجع نفس الخطوة ويفرك بشعره وبأيده محتار..

-ابا الحسن علي: اااخ يا زينب اااااخ دخيلج يا الزهرة

من سمع اخوه يصيح هيجي ياله تشجع وكمل طريقه ودك باب غرفتهم بقوة يصيح بأسمه..

-ابا الحسنن ابااا الحسن خوووية فك البااب.. ليلة تستري راح اطب لييلة

-ليلة: ابا الحسن والعباس الچفل زينب احلفلك وداعة اميي جيب القراان احلفلك عليه انا ما عليه مااا عليَّ

چفت الامير يدخل لغرفتهم ممهتم لصياح ليلة ورحت وراه همزين شفتها حاطة شال على راسها بس ابا الحسن اووويلي يا ابا الحسن وجهه صاير ازررررگ يخوف بحيث الامير تخبل صابه انهيار من شاف اخوه بهالشكل خفنا عليه ينجلط لان حتى حجي مدا يكدر يحجي ولا يتنفس ذب روحه على امير يسند روحه عليه وامير لزمه حيييل حضنه لصدره ويحجي بأذنه شي محد يكدر يسمعه غيره..

باوعت لـ ليلة وكعت بالكاع وتبجي بجي هز الغرفة، كعدت بصفها حضنتها لصدري امسح على راسها وعقلي تدور بي طواحين هوائية اريد افهم شنو الموضوع مدا اكدر..

-ابا الحسن علي: جذابين.. جذابين.. جذابـ.. چذابين

صوته مبحوح كللش مبحوح كوة يحجي متت خوف وامير انخبص ويه اخوه، جره جر يطلعه من الغرفة بس ابا الحسن مدا يكدر حتى يوكف على طوله مجنت اعرف عنده ضغط وسكر ثنينهن لولا امير صايح بي..

-ووووولك امشي للمستشفى لاااا تموووووت

-چذابين.. امير چذابين

-اي اي چذابين اييي بس امشيي

سحله سحل يطلعه من الغرفة غصب عنه هو ميقبل ومعاند مو شلون مچان ظلت عينه على ليلة راح يبلعها وهاي بيدي باقية بس ترجف وتبجي وايدها على خاصرتها.. طلعوا امير وابا الحسن سوه من الغرفة بقينا بس اني وياهة هنا كاعدات..

-ليلة شبيكم

مقبلت تجاوبني وركضت للحمام تتقيء، صوتها عالي تبجي وتتقيء وطولت هواي خفت عليها لا يصير بيها شي ودخلت للحمام بالباب ظليت واكفة..

-ليلة هوايه دتتقيأين هالفترة منتبهه على نفسج؟

كذلك مجاوبتني واستمرت على وكفتها منصية على المغسلة وتتهوع وچتافها تهتز ببچي متواصل، عفتها براحتها وطلعت من الحمام جبتلها خاولي صغير ورجعت انطي الها، اخذته من ايدي تمسح وجهه وحلگها وطلعت ويايه راحت تكعد على چربايتها ساكتة..

-تردين اعوفج براحتج ترتاحين؟

-لااا

لزمت ايدي حيل متخليني اكوم ورفعت عيونها المدمعة الي تتوسل..

-لا تعوفيني تَـمني حبابة

-تمام ما اعوفج حبيبتي ارتاحي

هزت راسها اي وابتسمت من تدنت عليَّ وسندت راسها على چتفي، حضنتها الي امسد على ظهرها احسسها بوجودي وبقينا هيج لفترة من الوقت قبل لا تكول..

-جبت لروحي مصيبة

-تنحل والله اشكال دخلت بمصايب اني وانحلت الحمدلله

-تَـمني انا غبية.. والله غبية

-ولج انتِ ليلة علم العشيرة منيلج غبية هههه

وخرت من چتفي تبجي بالزايد اخترعت عبالي كلت شي غلط بس توضحلي لا اني معليه وهي دتبجي بسبب مصيبة حقيقية جابتها لروحها..

-ليلة: شلون راح يصدگني انا بريئة شلوون

-تَـمني: المشكلة ماكدر انصحج لان ماعرف شنو الموضوع

بلعت ريگها تهز براسها اي، نزعت الشال من راسها ومسحت دموعها وكالت..

-تعرفت على بت على النت اسمها جنات البت بلسم على الجرح كللش حبابة وحبيتها من كل گلبي وتعلقت بصداقتنا

-حلو

-هالبت عدها اخو اسمه ناظم جانت دائماً تسولفلي عنه بشكل مفصل وانا جنت اتعجب ليش دومها تسولف بي حتى بديت اضوج من الموضوع وگلتلها جنات انا ماريدج تحجيلي على اخوج هاي خصوصياته انا شعليه يمته يطلع ويمته يرجع وشياكل وشيشرب

-هم صح

-اي بس انا ما جنت ادري بـ ناظم يجبرها تحجيلي عنه حتى عود احبنه وهي هم ما حجتلي الا وره شكددد من صداقتنا فتحت الموضوع وياي وعساس تريدنا نلتقي سوه واخوها يوصلنا

-بس لا قبلتي؟؟؟

-لا اكيد شني مخبلة انا ما رضيت كلتلها اهلي ما يقبلون فـ سدت الموضوع هي بعد.. بس وره فترة تغيرت جنات وصارت تحجي وياي بشكل ما متعودة عليه وتلح بمراسلاتها نص ليل ربع ليل اول الليل كل شوي تدزلي وتكتبلي مشتاگتلج لو دزيلي صورة اريد اشوفج وادزلج صورتي

-ودزيتيلها!

-تَـمني انا من اول ما تعرفت عليها ادز صوري الها عادي وهي همات تدزلي صورها، كومة عندي بس انا جنت احذفهم اول بأول وهي همات بساع تحذف لانه متفقات

-وشصار بعدين؟

-الصار ان اكتشفت بهاي الاوقات مو جنات الجانت تسولف وياي ولا هي الادزلها صوري جنت ادزهم لاخوها ناظم! مخترق حسابها ويراسل بيه كل وكته

-وهي محست؟؟

-حست وتعرف وبعدين من واجهتها بچت وتعذرت مني تكول اخوي ماكدرله هو يحبج وعجبتي وهددني اذا حجيتلج يكسر ظهري

-عمت عينننه

-ناظم واحد مسموم وما يخاف ربه لابعد الحدود شكد حجتلي عنه ومن جانت تسولف بي تحذف محادثتنا خاطر ما يشوف بس بآخر فترة اكتشف وحرمها حتى من الموبايل بس انا ما جنت اعرف و..

-وظل هو يسولف وياچ على اساس هو جنات مو؟

-اي

-وانتِ تدزيله صور وتحجيله كلشي وهو يدزلج صور اخته مو!

-اي ايي

-وما انتبهتي ولا ميزتي هاي مو هي؟

-ابدد ومن اسئلها شبيچ متغيرة تگلي لو مريضة لو تعبانة لو مكتولة من اهلي ومن هالحجي وانا الثولة اسولف وادعيلها واخاف عليها

-زين شلون عرفتي هذا ناظم وشلون هي حذرتج اذا تلفونها مو يمها

-بآخر فترة بدت تجز روحي منها شو صارت تدزلي صور مو حلوة جسمها طالع لو صدرها مكشوف وتگلي انتِ هم دزيلي بس انا ماعندي هيج الصور وجنت ارفض واطلع من المحادثة لحدما بده يتطور الموضوع وصارت هي تدزلي صور لنفسي! الي انا بهيج وضعيات شلون ومنين جابتهن وشلون حصلتهن ماعرف تَـمني انا بعمرري ما ماخذة صورة مو حلوة ولا بوضعية سخيفة هاي شلون حصلتلي هيج صور مادري!

-عزا بعيني!

-صور وصور وصوور تدزلي تخبلت والعباس شعراية واتسودن منين ذني وشون لابسة هيج ومسوية هيج انا اصلاً ماعندي هيج ملابس وظليت بهالحيرة والخوف لحدما بيوم جنات باكت موبايل اخوها ودزتلي بصمة تشرحلي كلشي تتعذر وتبجي وكالتلي احضرها وما ارجع اراسلها بعد لان راح يكون ناظم مو هي..

-وحضرتيها؟

-اي حضرتها بس صار يدخلي من غير حسابات وشكدد سوه ارقام كومة كومة وبكل رقم يدخلي يدزلي صورة وصار يحطني ويه زلم بالصور ويهددني ينشرها لو يراويها لابوي وانا اموتن من الخوف.. ماعرف شسوي لا مجتمعنا راح ينصفني ويصدكني ولا اهلي الصور چن الي انا كلشي يوحي هاي انا الجسم ولون البشرة والشعر كله انا

-وشصار؟؟

-بده يهددني اذا ما انطي فلوس ينشر ويفضح وانا مثل الحمارة انطي كلت هي مرة خليني انطي واخلص منه بس شو هذا ظل يلح زايد وبكل مرة يهدد بصور اكثر ورسايل علساس بيني وبينه يفبركهن ويهلس بيه بهالفلوس وما ملحك

-شلون چنتي تنطي الفلوس

-هو يندل بيتنا جنت انطي من حايط المنور الصاير وره البيت احطهن بچيس اسود واشمرهن وهو يجي ياخذهن لحدما اجه يوم تجاوز وصار يريد يشوفني وجه لوجه تخبلت دكيت ولطمت شسوي بروحي ووين انطي وجهي

-وشسويتي؟؟

-غلست عليه وما رحتله وهنا جانت الطركاعة دزلي فيديو..

قطعت كلامها وصارت تبجي بصوت عالي كلش ضمت وجهها بين ايدها منهارة، انطيتها مساحتها الخاصة تبجي وترتاح وحدها لان حتى اذا أريد اواسيها ماعرف شكول.. كمت صبيتلها مي وقدمته الها بس ما اخذته من ايدي وظلت تبجي وتكول..

-دزلي فيديو.. فيديو مو حلو تَـمني كلش مو حلو

-على كيفج هاج مي اشربي وسولفيلي

-لا لا ماريد ماريد

-ليلة على كيفج اخذي نفس ويايه يله حبيبتي اخذي نفس

-تَـمني دزلي فيديو وحدة نفس جسمي نفس بياضي نفسس شعري حتى نفس الوحمة الموجودة بزندي عاينيها (وخرت الصاية تراويني) انا مسولفة لـ جنات عنها ومصورتها الها فد مرة.. البت الي بالفيديو نفسي بكلشيي بس وجهها ما طالع وجانت.. جانت..

-جانت شنو؟؟

-جاي تسوي شغلات مو حلوة تَـمني فيديو +18 واصوات تقزز وفشار قوي وضحك مال ساقطات

-عززاااا بعينيي

-ودزه لابا الحسن

-عزااا العزاانييييي

-ولج دزه دزززه شافه حسن شااافه وتخربطط الزلمة راد ينجلططط

-ولج بسسس لا الفيديو الشافه امير قبل شوية؟؟

-ياهو

-امير دزوله فيديو گلب حاله گلاب اني مشفته بس اصوات الفيديو تلعب النفس وتكزبر الجسم

شهكت فاتحة عيونها ولطمت على وجهها بكل قوتها لدرجة طبع خدها بأصابعها، ظلت تضرب حييل وتبجي وتغلط وتسب بروحها مفرفحة وجهها احمر ورگبتها انصبغت دم وكلها شرايين زرگ..

-عمتتت عينيييي عمت عينيييييييي

تضرب حيل حيل على وجهها عيونها راح تنقلع، جريت ايدها اقيدها ماقبل تضرب نفسها بس متخليني متخبلة البنية فقدت عقلها ظلت تهلس بشعرها وحتى صوتها تغير صار خشن من العياط متت خوف عليها..

-لييييلة اهدي حبااابة

-ووولج وين اودي ووووجهييي ويننن انطي وجهييي ويييين يا سواااد وجهيي كسرررت ايدي ان شاء الله ولااا راسلتها اشتعلتتت روحيي بذيج الساعة الصادقتج ياا جنااات

-بس انتِ مالج ذنب لا تظلين تلومين بروحج كله كذب بكذب وفبركة ليلة

-ولج ياهووو يصدگنييي ياااهووو الله لاا يوفقك يااا ناظم ولا يريحلك بال عسااها بحضك ووبختك عسااها بصحتك وعافيتك ان شاااء عسى ربي يضوگك مرارة الجرالي بعزيز گلبك

حضنتها حيل بين ايدي ماعرف شلون اساعدها واخفف عنها البنية راح تموت، بقيت حاضنتها بقوة وهي تبجي بونين كلما تريد تضرب نفسها امنعها واقيد ايدها بين ايدي بس ماكدرلها اقوى مني يأست منها ولزمت ايدها وكعدت عليها خلشوف شلون تضرب نفسها بعد..

-وخري تَـمني وخرررري

-انچبيي كاافي وجهج ملختي كاافي الصار مو ذنبج

-اي والله مو ذنبيي موو ذنبي وينهمم جيبيهم گليلهم مو ذنبييي جيبي القران الكريم احلف عليييه

دموعها عشرة عشرة وتتوسل بيه اجيبهم واشرحلهم، تعبت على تعبها انهد حيلي واني أحاربها وظلينا شكدد هيج تعبت كللش هلكت اعصابي تلفت..

-هددني تَـمني والله هددني هو السبب بكل الصار بيه هوو السبب بدماري ودمار اختي هو السببب

حسيت بمعاناتها ويأسها وظليت بس اواسي بيها، مجنت اعرف الحقير النذل الخسيس هو الي غدر بيها والصار بيها هي ورفل كله من وراه..

-ليلة: والله هو هددني اذا ما انطيته فلوس واجيت اشوفنه وره بيتنا يدز الفيديو لاهلي.. وانا سويت اليريده وطلعت اريد اشوفنه وره البيت كالي من الحايط بس يشوف وجهي ويروح ما يسويلي شي وبعد ما يرجعلي ويحذف الفيديو بس الحقير غدر بيه ودزلي زلمة غيره واليكتل هالزلمة چنه يعرفني ويعرف اختي رفل وظال يصيح بأسمائنا ولگفنا ابوي بيومها وصار الصار من سحلنا لهنا وحلف يذبحنا

-ليلة سمعيني هذا الحجي كله الگلتي راح تنقلي لابا الحسن ومتنسين كلمة فهمتي لو لا!

-ومنو يكول يصدكني تَـمني

-هو يحبج ولج ابا الحسن يحبج وراح يصدك! لازم تسولفيله كلشيي وتفهمي خلي هو يعالج الموضوع

-والامير.. امير شون يصدك شوون يعرفني شريفة انفضحت انا انفضحتتت

-ولج لا تفكرين بأميرر هسة فكري بزوجچ هو اهم لـ...... ليلة؟؟ ليلة شبييج ليلة ولج لييلة

متت خوف من تگلبت عيونها فجأة ووكعت عليَّ غابت عن الوعي، نيمتها على الفراش اضرب على وجهها حتى تصحى هدت حيلي بس هاي العايزة بعد البنية يصير بيها شي واني وياهة وحدنا بالبيت..

كمت اريد اجيب تلفوني بس قبلها فكرت ارش على وجهها مي وهمزين من سويتها لان رجعت لوعيها وفتحت شوية عيونها، ارتاحيت وگومتها على كيف اشربها مي متقبل حتى تفتح حلگها شكد حاولت وياهة ماكو قافلة..

-ليلة بس صبري شوية علما اتصل بأمير يجينا

-لا

-شنو لا؟ خلينا ناخذج للمستشفى

-لا.. لا

لزمت ايدي تغمض عيونها وتبلع بريگها، جبرت نفسها جبر تكعد على حيلها وجرت كلاص المي تشرب منه وكالت..

-انا زينة

-وجهج اصفر ليلة

-زينة.. مابيه شي

-وجهج اصفر وشفايفج بيض خاف عندج فقر دم؟

حركت اكتافها بطريقة ماعرف وكامت على حيلها وبسرعة لزمت ايدي رادت توكع مرة ثانية من الدوخة، سندتها عليَّ وكعدتها على الجرباية مرة ثانية وكمت اجيب تلفوني..

-لا ترحين

-بس اجيب شغلة واجي

-مابيه شي.. صرت زينة

-صاير وياچ هالشي من قبل؟ تدوخين وتغيبين عن الوعي؟

-ادوخ هواي اي

-عندج مشاكل بالضغط؟

هزت راسها على كيف بـ "لا"، سكتت وظليت كاعدة بصفها ما كمت بعد لان شنو الفائدة حتى لو جبت امير متقبل تروح وياه وهو هم هسة مخبوص ويه اخوه.. تحسرت اباوع لوجهها شوية افكر بتاليتها واثناء ما اني صافنة عليها تذكرت ليلة صارلها فترة تتقيء وتلعب نفسها من كلشي! وهي دتكول تدوخ هواي واني ملاحظتها صايرة تتعب بسرعة مو نفس قبل ودائماً معصبة ومزاجها ضارب وهالشي ممكن اله تفسير..

-ليلة راح اكول شي بس لا تعصبين

-همم

-انتِ.. احم.. لا اوكفي ماعرف شلون اصوغ السؤال

-شنو تَـمني

-انتِ وابا الحسن شلونكم يعني زينين؟

-لا

-هاا يعني متنامون على نفس الفراش؟

-لا

-ها

-ليش

-مادري اجه ببالي ممكن تكونين حامل

صفنت بوجهي بعيونها الذبلانة من البجي احسها تريد تهفني براشدي بس مستحية، ابتسمت بوجهها واردفت..

-گلتي تدوخين واشوفج هوايه تتقيأين ونفسج تلعب وهرموناتج ضاربة واني اعرف هاي اعراض حمل

-لا مستحيل

-ماشي

هزت راسها وسرحت بنظراتها بالفراغ، انتبهتلها بالها شرد وظلت تبلع بريگها وتفرك بيدها ثنينهن.. حسيت هي هم شاكة بس تخاف تعترف..

-شنو رأيج تسوين تحليل حمل منزلي حتى تتأكدين؟

-لاا! لا تَـمني لا انا مو حامل والله شبيچ

-ها تمام مو اني بس كلت علمود ترتاحين لان اني نفسج اذا تجيني اعراض اكيد راح اسوي تحليل

-تسوين عبن زلمتج موجود بحياتج وبيناتكم شي بس انا لا

-صحيح

سكتنا ثنينا لفترة بس منتبهه لحركاتها ظلت تلوب وتاكل بشفتها مال وحدة كلش متوترة، مرت خمس دقايق على كعدتنا الهادئة وهي من وحدها كالت..

-اگلج

-ها گولي

-عندج هذا المدري شنهي

-شنو هو

-هذا مال ذيج السالفة

-يا سالفة

-تَـمني تحليل حمل شبييج

-هااا اي عندي ليش

-شون يسوونه

-ترديني اعلمج؟

-هاا؟

-اعلمج عليه تسوين؟ سوي بس حتى تجربين لا تخافين مو شرط تطلعين حامل

-مادري اخافن

-لا تخافين الموضوع وراج وراج

سكتت شوية قبل لا تهز براسها اي، ابتسمت وكمت جبته من غرفتي اشتريته قبل كم يوم من رحت للصيدلية اجدد علاجي وصراحة ماعرف ليش اخذته بس تأملت تصير عندي اعراض شي يوم واجربه..

رجعتلها وعلمتها عليه وخطية ظلت ترجف خايفة وكل شوية تكول بطلت بعد ماريد، شلعت گلبي ياله راحت للحمام تسوي وطلعتلي حتى ننتظر النتيجة..

-ليلة: خط واحد يعني مو حامل شفتي

-ولج بعد مو هسة يبين

-چا شوكت

-هسة شوية لازم ننتظر بعد

-تَـمني لاا مو حامل شبيچ خذاج الواهس

-ولج فضول عندي هسة اخذيني على كد عقلي اريد اعيش الدور

فرت بيدها ما عاجبها واني اضحك على سوالفها، روحها طالعة وشعرها منكوش وصوتها مبحوح گوة تحجي ووكفنا ننتظر النتيجة.. مرت اكثر من اربع دقايق ياله بده يبين شي بالجهاز حاطته بيدي ومركزة بكل قوتي وبدون لا احس شهكت اعيط من ظهر الخط الثاني..

-حاااامل انتِ حااامل ليلة حامل

-شنيي

-ولج خطين ظهرن انتِ حاامل مبروك

جريتها ابوسها واباركلها وهي صافنة بغير عالم، انتبهت لايدها بدت ترجف وجرت جهاز التحليل من ايدي تشوفه عبالك ممصدگة، صفنت بي ثواني تعصر بعيونها وترجع تفتحها وشهكت شهكة قوية من ركزت وانتبهت للخط الثاني، ضربت على وجهها بيدها بقوة وصرخت..

-صخاام الصخمممج يا ليلللة

-ولج لييش

-الله ياااخذني واخلص الله يااااخذنيييييي

تلطم على وجهها وصدرها وصارت تضرب على بطنها بقوة جننتني، دفعتها على الحايط ودرتها اچتف ايدها مدا اعرف شلون اتعامل وياهة راح انجلط..

-ليش ليييش ليلة ليش تأذين نفسج حراام

-ووولج مااااريد مااااريد احمل مارريددد شسوي بروووحي شوون اطيحه

-لييييش حرام عليججج ليش هيج دتسوييين غيرج يتمنىىى

-تَـمني انااا ما اتمنى ماريدد فوگ مصيبتي جبتلي مصيبة لخ عمتت عينييي

-كااافي ولج مخبلللة كافي تسودنتييي هاي وانتِ متزوجة وكلشي صار بالحلال!! هذا رزق من الله رززق ليلة كاافي اصحي يمكن هالطفل يشفعلج ويخلي رجلچ يصدگ بيج شمعرفج!!

-ماكدر استحمل ماكدر..

رخيت ايدها ومديت ايدي لوجهها امسح بدموعها وسولف وياهة..

-اعرف موقفج صعب واعرفج خايفة ووضعكم ممستقر بس يا حبيبتي هالطفل ماله ذنب.. انتِ متعرفين يمكن الله رزقج هالطفل حتى يگلب حياتج للاحسن

بقت تبجي وتلوم بروحها روحها مفرفحة، محسيت على روحي من كعدت ابجي وياهة محروگ دمي.. نص ساعة بقينا على هالحال هي تبجي وتشرحلي سبب متريد اطفال لانها لحد الان مدا تتقبل زواجها من ابا الحسن وشنو عاشت من جابها ابوها هنا وشلون حست بالاهانة وشلون صار هالطفل من الاساس بجت هوااايه وهي تشرحلي هالطفل صار غصب عنها.. تعجبت من كالت هي رضت بداخلها من تقرب منها ابا الحسن بس حتى ميحصلون حرام ويعتبر زنا بس ولا مرة حچتها بلسانها وگلتله بهالشي..

-تَـمني: الله يساعدج يا حبيبتي

ذبت روحها على چربايتها منتهية شكد توسلت بيها انزل اسويلها شي تاكله وبطلاع الروح خلتني على الاقل بس اجيبلها كلاص عصير، طلعت من غرفتها ونزلت جوه وتفاجأت من شفت الامير هنا كاعد بالصالة الجوه..

-امير

-ها ابوي

كام على حيله تعبان ويتحسر، تقدم مني وجرني من ايدي على كيفه وحضني لجسمه ماعرف ليش سوه هالحركة بس بادلته الحضن وخليته يرتاح شوية بحضن حنون..

-تَـمني: اخذت ابا الحسن للمستشفى؟

-چؤ

وخرت راسي عن چتفه بس بقيت بين ايده ما ابتعدت، باوعت لوجهه الصاير احمر وتسائلت بنظراتي بدون لا احجي..

-ما رحنا للمستشفى ما رضى اخذه

-لعد وين چنتو

-بالبيت هنا ما طلعنا

-شنووو

-ابا الحسن سمع كلشي تَـمني

-سمعتوا كلشي؟؟

-اي

-شلون اقتنع يوكف يسمع بدون لا يتدخل؟

-انا جبرته، چنت متأكد ليلة راح تحچيلج وگتله راح تبيّن الحقيقة بهاي الساعة لا تضيعها من ايدك.. بهاي الساعة انتَ راح تقرر مصير حياتك الجاية كلها لا تستعجل وتخلي عصبيتك تتحكم بيك واسمع بأذنك انتَ محامي وراح تعرف اليچذب من نبرة صوته

-ابووووووسه لعقلللك حبيبيييي

جريت وجهه وبسته حيييل فرحااانة ضليت اضحك مثل المخبلة وابوس بوجهه بسعادة وهو صافن مستغرب بس شوية شوية بدت تتغير ملامحه ورسم ابتسامة خفيفة على وجهه..

-شييييخ امير انتَ شيييخ

-تَـمني على هونچ لا تستعجلين

-يااا بس لا ما صدگها؟؟

-ما علق بشي وخله وطلع من البيت

-زين وانتَ؟

-شبيه انا

-تحسه اقتنع لو لا؟

-مادري والله

-شلون متدري امير انتَ مو توأمه!

-تَـمني توأمه بالشكل مو بالعقل

-لا لا انتو لازم تكونون استنساخ بكلشي اصلاً انتو نفس الشكل بالضبط

-خالوو هالشي ماله شغل بالتفكير كلمن وشخصيته وقراره بعد

-زين انتَ صدگتها؟

-انا شعليه مانطي رأيي بهيج سوالف

-امير شبيك جاوبني بس الي عاد

-تردين الصراحة؟

-اي اكيد الصراحة

-اي صدگتها والي اكدلي چلامها صح ابا الحسن ظل يتفرج بالصور ويگول عنهن چذب كلهن چذب

-قصده مفبركات؟

-ماعرف بعد بس هواي هالشي صاير مال صور تتفبرك وياما بنيات راحن بين الرجلين وانا حضرت گعداتهن بسبب هالموبايل الاغبر

-اممم زين شنو جانت ردة فعله من عرفها حامل؟

-ياهي حامل

-هي ليلة

-ليلة حامل؟؟

-اي لعد وين چنتو

-ولا ندري حرام! احنه ما طولنا اول ما خنس حسها ابا الحسن طلع من البيت وانا نزلت

-اي ليلة حامل وخطية البنية كلش تعبانة اتوقع لازم تشوف دكتورة كل شوية دتتخربط

-خوشن بس يجي ابلغه

-لا امير خليها هي تگله حتى تصير مفاجأة كيوت

-تَـمني يا كيوت رحمة لوالديج افاده مشتعل هسة هو

-هم صح بس هم خليها هي تبلغه حباب

-بكيفجن

-اروح اسويلها عصير وارجع انتظرني هنا....

**

"سبـــأ"

رجعنا ابن عمي صمد للبيت فايت وكت، البيت اظلم يصيح بوجوهنا هاي وحبيبة ما صارلها هواي من طلعت منه.. محد اله خلگ احد خصوصاً وره الحادث الصار الطريق كله سلوى وعمتي رسمية يسولفن بي وحاطات ايدهن على گلبهن..

-رسمية: ابو علي طلع للنجف مختنگ وره ما زف بنيته باجر بس يرجع اسولفله كلشي ما يصير هالحجي كافي ملينا

-سلوى: لو تسولفين للولد بلچن واحد منهم يشوفلنا چارة

-رسمية: اي لزوم اگللهم بس همه وينهم شو البيت يصيح بوجهنا

عفتهن يتناقشن وصعدت فوك تعبانة تعب ما صاير ورجلي تموتني وجع من وره الكعب حتى بطابيط اظن طلعولي.. كعدت انا وكشختي والمكياج والبدلة انتظر علي التـقي يمته يجي اليوم لازم ابقى سهرانة عسى ما للخمسة الصبح ما يهمني..

كعدت وصارت ساعة تجر ساعة ساعة تجر ساعة وتقي ما بيّن شبه ايست يرجع اليوم وردت اگوم ابدل بس استحملت وضغطت على روحي وبقيت انتظره.. عيوني من التعب ظلت تلزگ الساعة عبرت 3:30 بالليل والكل نام بس انا كاعدة مثل البومة انتظر زلمة ما معبرني من گبر لفني..

تثاوبت بنعس وسندت راسي على المخدة بس اريح عيوني وماعرف شون خذاني النوم وغفيت على كعدتي مكسورة رگبتي.. فزيت مرة اللخ مخترعة على صوت طگة بالغرفة فتحت عيوني اعاين الغرفة مظلمة ومفتوح ضوه اصفر خفيف وجسم علي التـقي منصي بالگاع جاي يشيل شي والجكارة مشكلة بين شفايفه من ركزت بي انتبهت هاي كرزات طايحة بالكاع هنه وطاستهن وهو جاي يلمهن..

-وخر انا اللمهم

رفع راسه يعاين بأتجاهي وماعرفت شونها نظرته عبن كمت من مكاني بساع ورحت انظف الكاع بس ما رضى يروح وظل ينظفها وياي، ضحك مال واحد مستحي وكال بصوت ناصي..

-گعدتج؟

رفعت عيوني اعاين لعيونه وتهت مادري شصار بيه من شفت وجهه بوجهي، صارت عندي ردة فعل غبية وبدون لا احس تقدمت بأتجاهه وردت اطيح على وجهي وكمشت بياخة دشداشته اقربه مني اكثر، ضحك مستغرب وگال..

-لا يالكعبة

هديت ياخته مستحية كللش ماعرف وين انطي وجهي، كمت من مكاني ارعش من فوك ليجوه ظليت اتلفلت بالغرفة واراوح بمچاني اريد اشرد بس وين اروح ماكو غير الحمام.. ركضت اريد اروح للحمام وانلوت رجلي بالكعب ولولا سرعته البديهية وانتباهه چان طحت بالكاع بس هو اللگفني وكضني من خصري حيل گبل لا اوكع..

-علي التـقي: هههههه اليوم كله افلام هندية

استحيت اكثر من حچايته خرب روحي هسة عباله جاي امثل عليه، كضيت ايده اوخرها من خصري بس ما رضى ومشاني للچرباية يگعدني وبقى يضحك ويستغفر بصوت ناصي.. كعد بصفي يتنهد ويفتح بأول دگم دشداشته..

-رجلچ انلوت؟

-احم.. لا لا

-اكيد؟

-لا اقصد اي اي

-هسة اي لو لا

-مادري انتَ تريدها تنلوي؟

-ههههههه خرب ببليسج سبأ

نزلت راسي غديت مي ماعرف شكول شلون افتح وياه موضوع واخلي يسولف وياي شلون تصير عندي شخصية واجذبه الي؟

-شو رفعيها نشوف

مد ايده على رجلي يريد يرفعها يحطها على الجرباية وتذكرت رجلي التعبانة ومخشنة، جريتها هي والكعب بعيد عنه واشرت بيدي وانا اكول..

-لا لا مابيها شي

-خليني اشوف خاف انفصخت

-لا ختولي عادي فدوة

-شبيچ سبأ شني فدوة المن فدوة؟؟

جرها غصب عني رفعها على الفراش خاطر يشوف، عضيت على شفتي حيل منتظرة تعليقه عليها لو واحد يدغني هسة ابجي كوة كاضة روحي.. نزعني الكعب وشمره بالكاع وكال..

-يا بووية هاي شصاير بيها

-كتللك لا تشوفها مااريدك تشووووف

بچيت مقهورة كارهة الموقف وغطيتها باللحاف بسرعة، درت وجهي عنه ماريد ابجي كدامه ماريد اشوه صورتي اكثر ويكول عني ضعيفة وغبية ماعندي غير البجي..

-سبأ ما يصير هيج يا عيوني، يعني هسة انتِ غطيتيهم حتى انسى اثر الكعب الحافر رجلچ لو شني؟

رفعت عيوني عليه ما اكدر اشوفه زين الدموع مغوشات نظري، مسحتهن بوجه المخدة ورجعت اعاينله ما مفتهمة هو على شنو علق بالضبط..

-سبأ: يعني شنو

-يعني ليش لابسة حذاء هيج عالية وضابة رجلج؟ كوة تردين تسوين بيها گنگري؟

-شني هذا

ابتسم يهز راسه چن واحد مأيس ووخر الغطا من رجلي، انخطف لوني مرة الثانية اعاين لوجهه اشوف تعابيره شونها وشنو راح يكول بعد..

-هاي بطبوطة هم طالعتلج صدك جذب تحجين

-مادري

-من اشتريتي ما كدرتي؟

-لا

-چا شون الواحد ياخذ عمياوي؟

-لا

-هههههه استغفر الله

-ليش تضحك عليّ

-انا ما اضحك عليج انا اضحك على اجوبتج

-شلون

-ما فد يوم حجيت وياچ بشي وجاوبتيني تگضيها بس صفنات وترجفين چن راح اخذ روحج

-شسوي مادري

-لا تسوين سكتي

-اي

-ههههههه شفتي!

ضحكت منتبهة على روحي مادري شمالني كاضيتها وياه اي ولا چا شوكت اسولف اذا اريده يحبني؟

-هسة هاي رجلچ يحتاج اغسلها بماي بارد تعاي

شهكت بدون صوت من مد ايده عليَّ يريد يشيلني ومن غبائي وتوتري دفعت ايده مني بقوة خليته ينرد ليوره ويوخر عني..

-اسف ما قصدت شي.. بس حسبالي ماتكدرين تمشين

-هاا؟ لا.. اكدر امشي اكدر

-چا يلا گومي للحمام

هزيت راسي بس بداخلي اللوم بروحي على عقلي الخايس يا ثولة يا غبرة شبييج ما خليتي يشيلج عمى العماچ على هالفهاوة.. گمت على كيفي وحسيت وجع بسيط بيها فكرت ليش ما امثل كدامه ماكدر امشي واخلي يشيلني لو بعد عيب؟

-ها شو وگفتي؟

-مو.. مو ماكدر امشي توجع

-اخذج للطبيب؟

-لا بس اغسلها هسة اصير زينة

-چا يلا

ظليت واكفة على تك رجل واعاين عليه مادري انزلها وامشي عدل لو ابقى امثل توجعني اوووف وينج يا رهيفة وتجين تعلمين اخيتچ العوجة..

-توجعج مو؟ ماتكدرين تدوسين عليها

هزيت راسي اي وظليت اعاين لوجهه، ضميت وجهي خجلانة وروحي رفرفرت من نصى عليَّ وحط ايد جوه ظهري والايد الثاني جوه رجلي وشالني واخذني هو للحمام.. ظليت الطريق كله بطني تخبط احس بيها شي يدفر بس ماعرف شنو..

-گعدي هنا بينما افتح الماي

كعدني على دچة موجودة بالحمام وفتح ماي الصوندة، جابه يحطه على رجلي وگعد مگنبص جواي يرش عليها ماي.. رجلي جمدت من البرد بس ما حجيت وظليت اتفرج عليه شون مركز بالجاي يسوي تمنيت نبقى هيج للابد ابقى اتفرج على وجهه واشبع شوف واروي گلبي المتعوب بسماره المعذب گلبي..

-اليوم طالعة غير شكل

جفلت من رفع وجهه يعاين عليَّ مبتسم، ظليت سارحة بوجهه لا اخذ ولا انطي ما كدرت اجاوبه ماعرفت شكول اصلاً، كبرت ابتسامته وراح للصوندة سداها ورجعلي مد ايده وشالني نفس گبل شوي يطلعني من الحمام..

-شني ما تاكلين انتِ شو بخف الريشة

-هههههههه

مادري ليش ضحكت بس اجتني الضحكة من الفرح يمكن، ضحك وياي ونزلني على الجرباية ورجع يكعد يمي وهالمرة نزع دشداشته كلها وشمرها بالكاع ومادري شبيه وشصارلي بس وجهي اشتعل شعلل وحتى لوجهه ماكدر اباوع بعد..

-البيت وحشة بدونها

-اي

-ما شاء الله البيت متروس بنيات بس ماكو مثل معزة الاخت

-الله يسعدها بجاه الزهرة

-صدگ سبأ امي حچتلي الصار بالزفة شهدتي الصار مو؟؟

-اييي يا بوية شصار تقي غير احس الدنيا انكلبت بينا

-لا صدگ!

-والعباس ابو فاضل لو تشوف وجوهنا شون انگلبت متت خوف متت

-اسم الله عليج

-اي بعد شسوي خفت چا شني هينة هي

-اي صح

-والله خوفة خوفة انتَ ما جنت موجود تقي طبعاً ما تحس

-اي ما تنلامين

-بس كله بي صالح تدري

-صالح مات وفطس هو شني الصالح بالصار سبأ؟؟

-مادري والله

-هههههههههههه تحجي كل اليجي براسها

-ههههه اي شمدريني هاي من الخوفة

ضحك اكثر ورجع ليوره يتمدد على الجرباية، خطفت منه نظرة ورجعت وجهي مستقيم من حط ايده جوه راسه وگال بأبتسامة..

-احب شلون تستحين مني

غمضت عيوني مبتسمة ومنطيته ظهري، وجهي بوخ من كمل يكول..

-الحياء صفة حلوة عند البنات تبرز بيها انوثتهن

-علي التـقي

-نعم

-انتَ متعشي؟

-لا ليش

-اگوم اسويلك لگمة؟

طگ ضحك بصوت عالي وانا لو بيدي اكفخ روحي تكفخخ على حچايتي هو ويننن وانا وين ياربي شوكت اتشجع ويصير براسي حظ شوووكت..

-لا ماريد اكل سبأ شبعان انا

-چا اكوم اسويلك شربت

-لا ماريد عاشت ايدج

-چا...

-خايبة ماريد

انداريت عليه منحرجة وهزيت براسي اي، گلبي نبض بقوة من طبطب على الجرباية بصفه وكال بنفس الابتسامة..

-تعاي نامي

-لا.. مو نعسانة

-تعاي سبأ

-لا لا

-تعالي ولج ما راح اكلچ

سحبني من ايدي يجرني للفراش يجبرني انام بصفه بس بيناتنا مسافة، صكيت نايمة على ظهري ما تحركت وهو نايم على صفحته اليسره بقيت على هالوضع فترة ومادري شلون غفيت وحسيت الصبح هو بصفي نايم قريب كلش حاضن المخدة ونايم مرتاح..

درتله وجهي مبتسمة صرنا وجه بوجه كلش قريبين على بعض، تجرأت شوي ورفعت ايدي اتلمس خده على كيفي واعدل حاجبه الطويل متخربط من النوم.. اويلي يا تقي لو بس تعرف شگد اعشگك ولك والله گلبي يفز على طاري اسمك شلون هسة وانتَ بوجهي ونايم حداي..

اجاني شعور مميت اريد ابوس خده بس اخاف يحس، شجعت روحي وكلت لا ما اظن يفز وقربت وجهي منه وبست خده بوسة خفيفة، ضحكت على كيفي ما مصدگة سويتها والصار حقيقة.. تحمست كلش واحس نبض گلبي صعد لراسي من الفرحة، قررت اتجرأ اكثر واسوي البخاطري فـ بلعت ريگي وتقربت زايد صرت اشوف كل جزء من وجهه.. ابتسمت طايرة من السعادة ومديت نفسي عليه كلش وبعدني جاي اسوي الخطوة وجفلت طايح گلبي من فتح عيونه وكض وجهي بين ايده..........

يتبع 👑...

━━━━━━ ♛ ━━━━━━

عظم الله اجورنا واجوركم بأستشهاد الامام الحسين عليه السلام واهل بيته ♥️🏴

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

وانا فاضحني حزني عليك شما لبست اللوان

يبقى اللون الاسود تارس خيالي... 💔

━━━━━━ ♛ ━━━━━━

"قبل اكثر من سبع سنوات"

-خايب روح ما اجي والعباس

-ابو كربله: يهلك تعوفنا وحيدنا

-انچب وادعبل منا مالي خلگ نعسان اريد انام

-الامـير علي: ضرغام اذا ما اجيت بعد لا اعرفك ولا تعرفني وانعل ابو اليحاچيك بعد

-ضرغام: هاا! يعني غصباً عليَّ تاخذني!

-الامـير علي: اي چا بس انتَ من تريدنا نديح وياك تاخذنا غصباً عن الخلفنا؟!

-ابو كربله: عوفه خيولي خلي نايم بالبيت مثل العجيزات

-ضرغام: اكل تبنن انا انام بالبيت مثل العجايز؟؟ طالع طالع من انعل عشيرتكم

ضحكنا منتصرين وابو كربله ظل يهز بچتافه فرحان، اليوم عيد ميلاد "ليث" ابن عمي مسعود ونريد نفاجئه وناخذه لمچان نتونس بي ومناك نطلع نتعشا، ليث الوحيد من ولد مسعود احبنه ومصاحبه وزلمة من صدگ واخو خيته وگفلي وگفات حلوة رغم كرهي لـ مسعود وولده بس ليث يختلف عنهم..

-ابو كربله: ضرغام هم صاير خايس وما يتحچه بس لا يطلع عاشگ واحنه ما ندري؟

-الامـير علي: خيولي ياهي تگلبه راسه راس الفجله

-ضرغام: غبت عنكم دقيقتين گصيتوني انتم شون صحبان مادري

حركنا دراجاتنا وطلعنا نضحك ونمشي على كيف خاطر نكدر نسولف سوه وما نضيع دقيقة، بالطريق اتصل بينا ليث وسأل عن مچاننه وضرغام گال..

-خلي نروح لكهوة وراهة نطلع نتعشا

-ابو كربله: هذا هو صايرين

-الامـير علي: لا انا اريد اطير تاير ونتونس

-ضرغام: لا امير انا گتلك مواعد اهلي ماعيدها بعد

-ابو كربله: هذا هو عوفها عود غير مرة نروح اموري

-الامـير علي: والعباس الا اروح ما يعجبكم لا تجون طبكم مرض

-ضرغام: امير ابوك ما يرضى تلوت بالدراجة شبيك انتَ ما رايد حياتك؟؟

-الامـير علي: چا هي الحياة شبيها اذا ماكو ونسة المن عايشين امشوو امشوو لا تصيرون نثايه

-ضرغام: اموري برگبتي عائلة اذا متت ياهو يفيدني

-الامـير علي: العار ما يموت

كلتها وضحكت اطلع منطلق كدامهم وفوراً رفعت دراجتي على تاير واحد اركبها، روحيي بالدراجة النارية وماحب أي دراجة احب الضخمة والسبورت احب صوتها يوصل لسابع جار من علاته وتايراتها تفحط من امشي..

اخذتلي جولة بالشارع ورجعتلهم لكيتهم واكفين يم دراجاتهم وليث هستوه واصل، نزع الخوذة وعلگها على الدراجة وكعد على الرصيف..

-هاا ليث

-ليث: هلا بأبن عمي

-الامـير علي: شبيك شو ضايج

تحسر وتلفت يعاين لـ ابو كربله وضرغام عرفته يستحي يسولف كدامهم فـ تقربت منه وكعدنا ثنينا على الرصيف، اشرلي على وجهي وكال..

-ليث: شون بيك ما تلبس خوذة انتَ الا تسويلنا قدر

-كلمن ويومه خالوو

-ليث: امس اجتنا فراقد للبيت وكعدت تحجي براس امي تريد تگلبها على ابوي ومن ابوي افتهم طيح حظها وطردها من دارنا

-الامـير علي: بس لو افتهم هاي شكو مگابلتنا وكل يوم داگتلها باب واحد بينا ارتاح

-ليث: اموري ابوي غلطان وابوي مو خوش انسان ادري عنده مكسرات وسوالفه ما ينلبس عليهن ثوب بس امي تدري بهذا الشي وراضية ياخوية راضية وتكول لو ابوكم كومني براشدي وكعدني براشدي هم ماعوفنه وبكل مرة تجي فراقد تحجي براسها وتوزها وامي تنگلب على ابوي وتنكتل وتكعد وتسكت وره الكتلة لا تاخذ موقف ولا تضوج منه هسة انتِ من ماعندج نية تعوفين هالزلمة وتعرفين ما راح يتغير وراضية بي ليش كل مرة تجيبين الاهانة لروحج؟؟ امير انا هم تحز بگلبي من اشوف ابوي يكتل امي كدامنا ويشيل الصوندة علينا يكتل بينا وراهة لو تدخلنا وفاككناهم

-والله مادري شگلك ليث انتم عيشتكم كلها غلط بغلط

-ليث: شنسوي خايب هذا هم حظي انولدت بهيج عائلة

-ميخالف محد اختار اهله بس ديربالك تمشي على درب ابوك واخوتك تره اخرتهم معروفة شني

-لا شني تخبلت انا لو ملت شوي حلم عمري بعد اخذها هي هيج وما راضية بيه انوب اصير سرسري

-ههههههه بعدك عاشگ زهراء بت عمي صمد

-ولك اتنفسسس زهراء انا اشههگ بأسمها

-چا ما تسولفلها يا ليث لو الا تروح من ايدك ياله ترتاح

-بعدها صغيرة اموري مو مال هالسوالف وانا ادري بحظي بس تفتهم بيه رايدها تنچلب عليّ بالزايد

ضحكت اهز براسي مأيده لان صدگ بنات عمي بس يفتهمن واحد رايدهن وعاشگهن ينفرن منه مادري شسالفتهن هذا ابا الحسن اخوي مگطع روحه على ليلة وهي تمشي وتصيحله خوية..

-ابو كربله: شو گضيتوها سوالف وعفتونا ولكم سرسرية

-ضرغام: خليهم براحتهم يجوز امور عائلية

-ليث: امور مسعودية صح

-ضرغام: هههههه حي الله عمي مسعوود

-ليث: شكد عار

-ضرغام: ولك امير وينه ابا الحسن بعلي ما تحلى الكعدة بدونه

-الامـير علي: خيولي الخايس مزاعلني

-ابو كربله: اوووف يعني اليوم تنام بره الغرفة؟

-الامـير علي: انام بعتبة بابه بلچن يلين گلبه

-ضرغام: شمسويله ولك

-الامـير علي: ما مسوي شي هو كله شلت جهاز الاتاري مدري شسمه مالته ورگعته بالحايط وفلشته قابل شسويت

-ليث: ابد كلشي ما سويت

-الامـير علي: اي هو يبالغ گابه هرموناته هالفترة

-ابو كربله: بس لا حامل؟

-الامـير علي: حامل هموم وبواري

ضحكوا على اخوي المهموم واحس گلبي لچمني شجاني وضوجته اليوم وهو چان متحمس على طلعتنا ومحضر روحه من امس، طلعت موبايلي اتصل بي چم مرة بس ما يجاوب واخير شي طلعلي الرقم غير داخل في الخدمة العار شون يهله گلبه يزاعلني..

-ليث: هاا شباب راح نبقى كاعدين على الرصيف ويكتلنا الحر ما نگوم لمچان بي سگف عاد

-ابو كربله: اخر جولة ياهو يسابقني؟

-ليث: انا!

-الامـير علي: انا!

-ضرغام: شباب شساالفة شمالكم وياي جاي اگلكم بطلت وتبت ما اسويها بعد

-ليث: هي مرة شبيك ولك

-ضرغام: خرب روحكم بس مرة وبعد ما عيدها من هسة اگلكم

تحمسنا وكلمن ركب دراجته وانطلقنا نتسابق ومثل كل مرة لو انا لو ليث نغلبهم والعزيمة تطيح براس ابو كربله هو يدفع العشا..

-ليث: يلا اصلاً اليوم ميلادي اول تالي ما راح ادفع فلوس العشا

-ضرغام: صار وبعيني

ابتسمت وشفت ابو كربله يغمزلي، هزيت راسي مفتهم قصده وكملنا طريقنا للكهوة الي دائماً نكعد بيها وبصفها صاير واحد يبيع كباب شوي وتكة نحبها.. وصينا كلمن نفر كباب وكعدنا ونسة وضحكة وفرحة وعلى كل لكمة أتنغص لابا الحسن عقلي وياه ومتمني يكون ويانه..

-ابو كربله: يلا شباب عزيمتكم عليَّ اليوم

-الامـير علي: نص بنص انا وياك

-ضرغام: لا شني انا هم وياكم

-الامـير علي: عود على المرة التجي انتَ ادفع العزيز

-ضرغام: وهاي نظل كل مرة نطلع تعيدلي نفس الحچاية ماكو انا ادفع هالمرة

-ليث: خايب انتَ ليش مطي؟ رزق واجاك لا تظل *****

سكت بس وجهه انگلب ما حچينا بعد بالموضوع بس ظل الكعدة كلها ضايج وحسيته تحسس من چلامنا وافعالنا وياه بكل طلعة، ما يرضى ندفع فلوس عشاه وصاير حتى طلعة ويانه كوة يطلع بسبب هالشي بس احنه نعرف حياته ونعرف عيشته شكد صعبة ويلم الربع على الربع خاطر يجيب لاهله لگمة من شغله بهالدراجة..

-ضرغام: وين رايحين

-ليث: اغسل واوصيلنا چاي

-ابو كربله: جاي وياك

گاموا وعافونا وحيدنا وچن ضرغام ما صدگ بيهم گاموا واللتفت عليَّ وبدون مقدمات كض ايدي وحط بيها عشرة الاف وكال..

-بداعة امك تاخذها مني ولا تخجلني امير

-شكو اخذها انا عازمك

-امير لا تحرجوني ما ارضى بهالوضع كافي مصخت

-مصخت عبنه نعزمك لو مصخت صداقتنا؟

-انتم صحباني والنعم منكم والكعبة لو افتر الدنيا كلها ما اللگه خوة مثل خوتكم بس ما جاي اتقبلها كل مرة تدفعولي جاي احس بروحي ثگيل وانا ماحب هالشي

-كل هذا علمود نفر كباب ولك ضرغام؟

-اي

-ولك حسبتك من حسبة اخوتي شتحجي انتَ؟ هذا ابا الحسن يا يوم طلع وياي ودفع حسابه؟ ماكو كل مرة شامرها براسي بس انا ادفعله وما اهتم عبنه اخوي وصاحبي ويشهد الله انتَ بحسبته ما افرق بيناتكم ولا بشوي

-ادري امير اعرف بيك والزهرة ادري بگلبك ونفسيتك شكد حلوة بس انا استثگلها اذا تريدني اظل اطلع وياكم ترضى تاخذ مني هالفلوس حلفتك بداعة امك

-جيب اذا هالشي يرضيك جيبهن

ابتسم فرحان من اخذتهن منه وذب نفس مرتاح، حطيتهم بجيبي ووصيت على نراگيل الي واله وللولد ودفعت فلوس الكل خاطر ما يحسني مميزه عنهم..

رجعوا الولد كعدوا شوي ويانه وكاموا يسلمون على جماعة اجوا يعرفونهم ورجعنا بقينا وحدنا انا وضرغام، جريت نفس من النركيله وسألته..

-الامـير علي: شلونهم الصغار؟

-ضرغام: يبوسون ايدك

-بعدهم وكحين نفس زوج المشاكل العدنا

-ولك يا وكاحة غير راح يجلطون رضيعتي

-الله يساعدها

-مو طبيعيين امير كل يوم حاطيها وكاتليها وتجيني تبجي عمت عيني وما استحمل اشوفن دموعها اروح واكتلهم ويهجمون عليَّ ثنينهم ويرجعون يكتلوني

-ههههههههههه

-وعلي هيج مكضيها اكتلني واكتلك

-ميخالف خوية صغار من يكبرون يصيرولك سند ان شاء الله

-وهذا المصبرني اعرفهم صغار وراح يتغيرون من يكبرون ولا تنسى ماتوا اهلي الله يرحمهم وهمه صغار كلش ووكعت المسؤولية كلها براس اختي توكل وتشرب وتنزع وتلبس البت تركت دراستها لخاطر اخوتها ماعرف شون اجازيها

-الله يحفظكم ويستر عليكم بجاه علي

-الله يسلمك حبيبي

-بعد همه الصغار هي هاي مشاكلهم چا سور ونور شلعبوا بينا لعب كرهونا الدنيا حتى هسة من كبروا بعدهم لاعبين بينا فلك وابوي يومية كاضله واحد يكتل بي ووره نص ساعة يروح يراضيهم ما يتحمل زعلهم

ظلينا نسولف هواي واخذتنا السوالف وشوي شوي بده ضرغام يحجيلي عن معاناته وشنو جاي يعيش ويسولفلي عن عمته ام فاضل حرمة جبيرة ويوم زينة وعشرة لا بس مضطر يصير زين وياهة ويصرف عليها وياخذها طبيب خاطر تعين احته "وديان" واخوته الصغاو وما تأذيهم..

-ضرغام: ياخوي الحمل صعب والدنيا ساحلتنا ماعرف شون راح تنگضي هالعيشة

-لا تفكر لها مدبر خوية وانا موجود شتريد بس دگلي موبايل برمشة عين تلكاني بسدك

-يا بعد روحي ما تقصر اموري بعلي انتَ اخوي وصاحبي وحياتي ومستقبلي وعرضي وبيتي كله اأمنه يمك

-عزيز گلبي يشرفني

-ماطولنا فتحنا هالموضوع اأمنك على اخوتي اموري خاف يصير بيه شي

-شني شطاري عليك ولك

-مانعرف يمته يجي يومنه ولازم واحد دائماً يوصي

-عمرك طويل ان شاء الله وتكبرهم وتزوجهم على ايدك لا تحجي بالموت ضرغام توجع كلبي

-اموري الموت ويانه بكل لحظة و اريد اوصيك الك بالذات مو لغيرك اريدك معين الهم لا تعوفهم بيوم اأمن على اخوتي وعمتي عندك اموري لا يجي يوم وتنساهم تره ماعدهم احد لا عمام ولا خوال كلها مودعة وباقين جوه رحمة رب العالمين وهالچم فلس الاطلعهن من الدراجة وتوصيل الطلبات بين المحلات

-ببطن عيني اخليهم لا توصي حريص

ابتسم يهز براسه وحسيت بحلگه حچي بس ماريد اسمعه، ماحب طاري الموت وما يعجبني اسولف بي بس ضرغام دائماً يذكرني بالموت كلما اأخر صلاتي يذكرني بالموت كلما اعاند ابوي يذكرني بالموت ويگلي شون لو الله قبض روحك وابوك ما راضي عليك من تروح يم رب العالمين شتگله؟.. كلما نغلط لو اتفه غلط وذنب نسوي ينصح بينا انا وجماعتي وابسط شي هي الاغاني چان ابو كربله اوقات يعلگ بسيارته وضرغام يسولف وياه بهالموضوع.. يگله تخيل هسة الله ياخذ روحك شتسوي؟ وشون تبرر فعلتك يم ربك؟ تريد يكون اخر شي سويته بالدنيا هو الاستماع للاغاني؟ اذا تريد فـ بالعافية عليك واذا ما تريد بعد انتَ تعرف شنو لازم تسوي..

-ليث: هاااا امير الامارة الجديد شو انفتگت بالسوالف من ما شفتنا كاعدين

-ابو كربله: چا غير امير ويشيل خشمه علينا

-الامـير علي: اهوووو هو انا شارد من البيت من وره هالسالفة تجون انتم تفتحوها هنا

-ضرغام: ابوك قافل عليك مابيها مجال

-الامـير علي: بعلي الا اچفص بنص الامارة اذا خلوني بديل لابوي

-ضرغام: احهههه انا ينصبوني امير واگلهم ماريد؟ من انعل ابوي لو سويتها

-ابو كربله: والله ياهو محصلها وهذا كاعد يتبطر على نعمته

-الامـير علي: شباب انتم لا عبالكم راح اللبس عكالي وبشتي وانفخ روحي بصدر ديوان واأمر وانهي وشغلي اقط فصولة من العالم! تره السالفة مو هيج ابدد السالفة جبيرة يومية جايك واحد يگلك تعال حلي فلان سالفة وتعال شوفلي فلانة ليش شردت وتعال دگ صدرك لفلان وتعال فلي گصايب علان

-ليث: اي عادي ادگ صدري لفلان وافلي گصايب علان واهزله خصر هم

-ابو كربله: مطي ما يعرف بمصلحته خايب هاي سمعة هذا جااه هذا منصب هذا حكم الوادم تمشي وتحبب بيدك وتركض وراك وتتوسل بيك وكل ساع جايلك واحد مألفلك شعر وشامرلك ابوذية

-الامـير علي: ماريد خليها الكم

-ضرغام: راح تريد بس مو هسة، هسة بعدك زعطوط

-الامـير علي: ابدد ولا راح يتغير رأيي، انا ماحب هاي العيشة انا ماريدها احب اصير طير حُر احب اتونس احب اسافر احب اتزوج واخلف واشتغل بعيد عن عيون العالم ماريد هاي الحياة انا ضدها وبعمري ما راح تعجبني

-ليث: هاي وانتَ ربيت وكبرت على هالعيشة والعادات والتقاليد چا لو جنت اجنبي شتسوي

-الامـير علي: اشگ زيجي واكعد يم فراقد

فطسوا ضحك مادري على شني بس يجوز عبن ذكرت اسم فراقد وانا هم مادري شمالني جبت طاريها شكد فشلة.. ساعتين مرت على كعدتنا وابو كربله كال يرجع تأخر الوكت وليث هم دگ عليه اخو غفار وگاله ابو معصب واذا ما يلكاهم بالبيت ينكتلون..

-الامـير علي: يلا چا احنه هم نكوم شعدنا وحدنا

-ضرغام: خلينا شوي الجو حلو

-باجر هم نطلع كوم

-لا بعد شوي امير اكعد شبيك خلينا متونسين

-اكعد بشرط نلوت بالدراجات

-خرب رووحك

-هههههه هذا العندي

-ولك انتَ ناوي على منيتي اليوم

-بكيفك بعد

-مو حالف ومواعد اخوتي ما اسويها شون؟

-ادفع كفارة يلاا ولك يلاااا

جريته وياي وكام يضحك، ركبنا كلمن دراجته ورحنا لشارع فارغ ووگف فجأة ونزل من دراجته وكال..

-هاي الخوذة جاي تحز برگبتي

-انزعها تولي

-لا ما انزعها لو اموت شون لو صارلي شي

-شكد جبان

-امير مو جبان اصلاً انتَ ماعرف شلون تركب دراجة بدونها

-ختولي شتسويلي قابل لو ردت اموت ما راح تحميني خوذة

-هاا؟

-والله

-يعني انزعها؟

-بكيفك انا معليه

هز راسه ونزعها بس چنه ما مقتنع، غيرت الموضوع بساع لان اعرف راح يوكف ساعة يفكر يلبسها لو يظل نازعها ويضيع وكتنا وانا اتخبل من واحد يتردد بتصرفاته..

-الامـير علي: نعبر الشارع كله على عجلة وحدة والي يخل بالاتفاق من صدگ يعزم الشلة كلها على العشا باجر

-هذا هو

-اوكف هذا موبايلي

طلعته من جيبي وشفت ابا الحسن مراسلني وكاتب "ابوي يريدك ضروري ارجع"..

-اگلك ابا الحسن راسلني يكول ارجع للبيت ابوي يريدك

-ما نتأخر يمعود يلا خلينا نروح متحمس

-اوكف ضرغام لا مبين السالفة ما تتأجل لازم اروح

-هاي شبيك امير شسالفتك!

-شبيك نحس يجوز هاي اشارة من رب العالمين

-هاا ياهو هسة متردد بتصرفاته؟!

-لا صدگ احجي ختولي نأجلها من يجون الولد لا نروح وحيدنا هسة كلشي يصير

-زودتها خايب

-مادري گلبي خمشني فجأة ماريد بعد

-هههههه جبان

-انچببب

-چا يلا نروح

هزيت راسي اضحك وركبنا دراجاتنا متحمسين وضرغام ضحكته ما فاركت وجهه مشتاگ للتلويت (يسوق الدراجة على تاير واحد) صارله اكثر من 8 اشهر تايب وما مسويها بسبب اخر مرة وكع على ظهره واخته تخبلت وحلفته ما يرجع يعيدها بس هسة ما جاي يكدر يكض حماسه..

-الامـير علي: وااحد.. ثنييين.. ثلاثة!!

دست بانزين حييل وانطلقنا وبحركة سريعة رفعت الدراجة على التاير الخلفي وبديت اسوق بي وهو سوه نفس حركتي، يسوق ويضحككك من كل گلبه ويصيح..

-علييييي شگد مشتاگ لهاااي الاجواء

ضحكت على ضحكته وونسته وسبيته من شفته غلبني.. خرب عقله راجع بقوة دست بانزين اكثر وفجأة حسيت بدراجتي صارت تگمز وماكدرت اسيطر عليها، دست بريك خلفي اخفف من حركة العجلة الخلفية وهبطتها بساع اسوقها على العجلتين بس توازني اختل وبدون لا احس دست بريك قوي ونامت الدراجة وانا وياهة انگلبت..

-ااااااااخخخخ

صحت بصوت عالي من وجع ايدي طحت عليها وانحكت بالصبة وبنفس هاللحظة ضرغام دار وجهه خايف عليَّ وداس بريك خلفي وبرمشة عين، بلمحة بصر، بجررة نفس وحدة ويه دورته لوجهه گام محرك دراجته ودفعه ليوره وخلاه يطيح على ظهره والدراجة بثگلهاا بمحركها بعجلاتها كلهاا طاحت عليه وعلى وجهه ومردته مرددد سوته ويه الكاع كدام عيني..

-ضرغااااااااام

صحتها من غمج روحي وفزيت من مچاني متسودن ما مهتم لوجع ايدي ورجلي، ركضتله بحيلي المهدود ورحت عليه اشوفن وجهه ضايعه علومه والدراجة بعدها مشتغلة والدخان شعل الدنيا.. طحت على ركبي يم راسه وظليت اصييح بعلو صوتي بأسمه اصيح واضرب على خدوده اريده بس يفك عينه بس ما فتحها.. ما فتح عيوني عزيزي ما فتحها..

**

"الحـــاضر"

-اميير افتح عيونك اميير عزا بعينيي خالة مدا يفتح عيونه

-ابا الحسن علي: بس سويلي مجال تَـمني سويلي درب خليني اعرف اتصررف

جرتني حبيبة جر عنه ونهضه ابا الحسن يريد يشيله بس ما كدر، تگابلنا كلنا عليه شلناه گوة وابا الحسن كملها وشاله على ظهره وطلعنا بي للسيارة ووياه امه واني وحبيبة..

ركبنا السيارة وبعده ما محرك ابا الحسن وفتح عيونه امير فاز بس شنو وجهه.. شنو جحظة عيونه وشهگته من فز شكله مخيييف راص على اسنانه حييل ويرجف رجف بين ايدي تخبلت، رجع نفس قبل شوية شلون غاب عن الوعي هم رص على سنونه حيل وتگلبت عيونه ووكع علينا، عطت بأبا الحسن يستعجل والامير شال ايده ولزم الكشن مال كرسي الصدر ويحرك راسه بـ "لا"..

-رسمية: ما عليك بي يمة مالك غرض اخذنا حسن لا يمووت

غمض عيونه مرة ثانية غايب عن الوعي بس من يغيب مو بشكل طبيعي الا عيونه تتگلب ويرجف كل جسمه، ذب راسه بحضني بجهة ورجليه بحضن حبيبة من الجهة الثانية واحس بگلبي راح يوكف اول مرة اشوفه بهالشكل مدا اصدك الامـير علي الي اعتبره اقوى رجل شايفته بحياتي هيج ينهار وميكدر يكعد على حيله..

وصلنا للمستشفى وطلبنا سدية وركضوا بينا، شاف الدكتور لون وجهه ولون جسمه الباهت وخله الممرضين يستعجلون ياخذوا للطوارئ..

-ابا الحسن علي: اخوي عنده ضغطط دكتور

-الدكتور: وضعه ما مستقر استعجلوووا

ركضوا بي ركض والناس كلها تباوع علينا وبقيت كلما ترمش عيني اكول راح افز من هالكابوس راح يمد ايده الامير مثل كل مرة ويكعدني ويحضني ويكول "اسم الله عليج ابوي حلم هذا لا ترجفين"..

-رسمية: نادي علياً مظهر العجائب تجده عوناً لك في النوائب وكل همٍ وغمٍ....

بعدها ما مكملة جملتها وقاطعها صوت بنية اجت من ورانه ووياهة واكف ولد مراهق..

-عساه بالموت

اللتفتت محترك دمي من شفتها البنية "وديان" وخالة رسمية تخبلت ركضت عليها وهمشتها من عبايتها وسحلتها للكاع شمرتها ورادت تدوس عليها وركض ابا الحسن والممرضات يفاككن ويتصايحن..

-رسمية: طلعوهاااا طلعوووا هالحية منااا طلعوهاااا الله ياااخذج خذيتيي حيله وعافيته سنييين وبعدج تحومييين فوك رااسه

-وديان: من ذبح اخوي واخذ عضيدي وظهري وسنددي ما گلتي شي بس من شوي ابنج انهز طوله وطاح تسودنتي مو؟؟؟

جرنها الممرضات يطلعنها من الردهة واخذها الولد وياه وعافتنا وحدنا نلوب ميتين قهر.. ماعرف شنو اكو بينهم بس ميهمني كل الاريده هسة الامير يتحسن ويطمنونه عليه والحمدلله والشكر ما انتظرنا دقايق وطلع الدكتور مبتسم وكال وضع الامير احسن بهواي..

-ابا الحسن علي: صدك دكتور؟؟ عليك العباس لا تجذب عليّ اخوي زين؟؟

-الدكتور: الحمدلله وضعه ممتاز واضح اخوك متعرض لصدمة نفسية وهذا الشي خله ضغطه يهبط

-ابا الحسن علي: هبوط صار عنده يعني مو ارتفاع؟؟

-اي صاير عنده هبوط بس ويه الابرة والمغذي راح يتحسن وتكدرون تاخذوا للبيت لا تخافون

عافنا وراح بس ابا الحسن أصر يحجزله غرفة حتى يرتاح جان خايف على اخوه لدرجة من طلع الامير بكرسي متحرك من الطوارئ حضنه وبچى بچي هز جسمه هز والامير بادله حضن خفيف بس لاحظته باقي مغمض عيونه ما فتحهن ابد..

-تَـمني: شلون صرت امير

همستها كوة الغصة ذابحتني وحطيت ايدي على چتفه احسسه بوجودي، هز راسه ساكت ما حچى شي وسحبه ابا الحسن لغرفته الحجزناها ووياه ممرض يمشي ويجر بستاند المغذي، ظلت عيني تراقبه اريده بس يفتح عيونه بس ما سواها حتى من دخلوا الغرفة وگومه ابا الحسن يكعده على السرير بقى مغمض عيونه وسند راسه على المخدة ودار وجهه عنه..

-تَـمني بهمس: شبي ليش مدا يفتح عيونه؟

-ابا الحسن علي: يجوز يوجعنه خلوه براحته

هزيت راسي اي ووكفت بصف خالة رسمية الكعدت على الكرسي وبقت تراقب ابنها التعبان، نص ساعة ونفسه ثگل نام وبدوا يجون ابوه واخوته واحد وره الثاني وكلهم مصدومين وومصدگين الصار بالبيت..

كلما اسألهم عن وديان ميجاوبوني جواب وافي وبديت انزعج لان شكل البنية مدا يروح من بالي وهي تكشف بجسمها كدامه وتگله "ضگت المر من بعد عينه".. طلعت من الغرفة مختنكة وگلبي بي نغزات رجعتلي هالحالة كله من وره العلاج الغبيي كله بسببه..

طلعت لحديقة المستشفى اجر نفس وكعدت على مسطبة ارتاح شوية، اخذت شهيق وزفير اهدأ نفسي لحدما تحسن وضعي الحمدلله، كمت من مكاني حتى ارجعلهم وانتبهت لـ وديان كاعدة على وحدة من المسطبات وكاعد بصفها الولد وهي منزلة راسها وتبجي..

رجليه اخذتني الهم بخطوات سريعة، وكفت مقابيلها ضبط اتفرج عليهم ساكتة، انتبهلي الولد واشرلي براسه بحركة "شنو" وعلى حركته رفعت وديان راسها بأتجاهي..

-وديان: شتردين!

-وديان على كيفج يا خوية

-وديان: اسكت قاسم خليني افتهم شتريد مني هاي؟؟

-تَـمني: اريد اعرف شبيچ

-وديان: خلي زلمتج يفهمج البيه!

-تَـمني: نايم بالمستشفى زلمتي مدا يكدر يحجي ولا يفتح عيونه اجيت الج اريد افتهم منج الموضوع

-عساه بهالحال واكثر! عساه ما تهنى بجاه ضلع الزهررة!

-لا تظلين تدعين! لا تدعيين وفهميني السالفة يمكن اكدر اساعدج!

-يعني ترجعيلي اخوي؟! ترجعيلي ضرغام الكتله امير؟؟

-شلون كتله فهميني

خزرتني معصبة حسيتها تستصعب تحجي بالموضوع ووضعها تعبان لدرجة عيونها مورمة ومدا تكدر تفتحها، تفهمت زعلها وعفتها ورجعت ادخل للمستشفى شفت الولد واكفين بالباب عدى ابا الحسن..

-علي التـقي: وين جنتي تَـمني گلوبنا طاحت عليج

-تَـمني: جنت بالحديقة كاعدة ليش امير بي شي؟؟

-علي الكـرار: لا بس ظل بالنا من ما شفناج وامي شبعتنا رزايل

-تَـمني: صح جان لازم ابلغ واحد بيكم بس جنت مخنوكة

-علي التـقي: مابي شي اموري لا تخافين وضعه زين نكدر نخرجه بس گلنه نبيته ليلة نخاف لا يرجع يصير عنده هبوط لو ارتفاع بالضغط

-تَـمني: اي زين تسوون

وكفنا فترة ننتظر اللاشيء والمشكلة ماعرف شبيه استحي اگوللهم وخروا شوية من الباب اريد ادخل اشوفه ظليت واكفة وياهم واتأمل واحد يوخر من ذاته وتأملاتي طولت كلش لحدما طلعت خالة رسمية من الغرفة وصاحتلي..

-تَـمني: اي جاية خالة

وخروا من الباب واني هرولت ادخل بخطوات سريعة توقعت اللگاه كاعد بس للاسف بعده نايم، كعدت على الكرسي بصف خالة اباوع لوجهه صفاره مخيف عيونه طامسة وشفايفه بيض مال موتى شكله يوجع الروح..

-رسمية: ابو علي تعب مو مال يبقى ينتظر بره ما يكدر يوكف هواي

-تَـمني: اي خطية

-اااخ اااخ عمت عيني عليك يا يمة

-خالة ادري مو وكتها بس اني بعدني ما مفتهمة الموضوع

-رسمية: ابا الحسن خلي يفهمج

-يعني اذا اسئله راح يجاوب؟

هزت راسها اي وذبت حسرة ومسحت طرف شفتها بالشيلة مالتها، اللقيت نظرة اخيرة للامير وطلعت من الغرفة دورت على ابا الحسن بعيوني ما شفته بين الواكفين..

-وينه ابا الحسن؟

-علي السور: راح يشتري چاي

-تَـمني: اني هم اريد رايحة اجيب وياه

-علي التـقي: انا اجيبلج اوكفي

-لا اني اريد اتمشى

شيخ علي ما قبل اني اروح وخله واحد بيهم يجيبلي، ماضجت من تصرفهم بالعكس بس تمنيت انفرد شوية بأبا الحسن حتى يسولفلي والحمدلله من سمحتلي الفرصة واجت على رجليها.. تقي اتصلوا بي يردوه هسة ببغداد وكرار اخذ حبيبة وشيخ علي حتى يرجعهم للبيت يرتاحون وبقوا سور ونور وبدر واكفين بالباب وكدرت افلت نفسي منهم شوية وتقربت من ابا الحسن..

-تَـمني: ابا الحسن اكدر احجي وياك شوية؟

-اي خيتي تفضلي

-اريدك تفهمني هالبنية وديان منو؟ والله عقلي تعب من التفكير

-حگچ بس لا تخافين الامير ماله غرض بيها لا من بعيد ولا قريب حتى من جان يساعدهم ويتطمن عليهم يسولف ويه اخوتها الصغار لو حفيدة عمتها بت صغيرة

-نفسها حفيدة ام فاضل الي عمرها 14 سنة؟

-اي هي سولاف بت صغيرة تعامله وياهة مو ويه وديان

-زين ليش يساعدهم صدك ماعدهم زلم بالبيت؟

-عدهم.. بس الله يسلمهم عيب علينا لو گلنا عليهم زلم، ام فاضل عدها ثلاث ولد واحدهم چنه بغل بس كل فايدة مابيهم واحد بيهم مسجون وذولاك يومية لو مسافرين لو گاضيها بأربيل

-زين ووديان؟

-شبيها

-سولفلي شلون تعرفتوا عليها؟

-تصير اخت ضرغام صاحبنا.. يعني ضرغام صاحب الامـير علي اكثر ويميل اله انا جنت اطلع ويه الامير فـ صارت عندي صداقة وياه بس قوية مثله هو

-ووينه ضرغام؟

-الله يرحمه

-ليش وديان دتكول الامير السبب؟

صفن بوجهي شوية وغمض عيونه يتنهد، فرك وجهه وكأنه ميحب يتذكر الصار وواضح التأثر بوجهه بس ضغطت عليه حتى يسولفلي وفعلاً.. سولفلي وحچالي الصار بالتفصيل الممل ومردني ويه كل حرف طلع، حطيت ايدي على گلبي جاحظة عيوني من كال بألم..

-رحناله بالمستشفى ملامحه ما تنعرف.. خشمه مكسور وعين من عيونه رايحة ونص جمجمته متهشم عبنه طايح حيل على راسه وما جان لابس خوذة

-يا يمة

-شسولفلج تَـمني من شفت حاله زلمة شونه ما ينعرف وجهه من گفاه وقفصه الصدري غادي تراب بسبب ثگل الدراجة

-والامير شافه بهالحال

-شافه وتسودن خابروني من المستشفى يبلغوني اخوك گوة جريناه من الجثة حاضنها ونايم عليه ما جاي يخلي الاطباء يشتغلون، ركبت سيارة ابوي وطرت للمستشفى مثل المسودن ما مصدك الجاي يصير رحت للردهة الهم بيها واشوفن اموري طايح على ركبه ويلطم على راسه وصدره بكل حيله ويصيح..

-ضررررغااام ولك اااااااخ يا خوية ضرررغام اكعد ضرررغام

-ابا الحسن: اميير امير شصاير؟؟ ولك فهمنيي احجييي

-راااح ضرغام راااح عزيز گلبي كتلته بيددي كتلته اناااا

صياحه رج المستشفى رج صارت الوادم واكفة وتعاين والشرطة هم اجوا وأمير فاقد اجه ابوي واخوتي والدنيا انكلبت كلاب وامير ياهو يكضه يگله انا السبب انا الجبرته نتسابق وهو جان تايب ومنطي وعد لاخته وديان ما يسويها بعد بس هو خلاه يكسر هالوعد وراح بيها

-تَـمني: ووديان؟؟ شنو جانت ردة فعلها؟

-وديان ما اسولفلج البت فقدت الوعي اول ما وصلتله شافت وجه اخوها وشافت الدماية ولحم راسه الطالع وما تحملت المنظر طاحت علينا وحرنا بيها، دقايق وفزت ما مصدكة كاضة امي وتصيح..

-رجعولي اخووي رجعولناا ابو بيتناا رجعوا سندناا رجعووا

انوب افتهمت ضرغام مات بسبب الدراجة لانه هو والامير يفحطون بيهن ويسوقون على عجلة وحدة تسودنت بالزايد صارت تلطم على وجهها وراسها وتدعي على الامير بكل حيلها دعائها كسر ظهرنا يا تَـمني الامير تسودن عقل ما ظل براسه وره هالحادثة دفن ضرغام وظل نايم يم گبره لا يرضى يتحرك ولا يرضى يسولف حتى دموع ما تنزل من عينه..

-لهدرجة چانو قريبين

-مو بس قريبين امير جان بير اسراره لـ ضرغام، شكو مصيبة شكو حاجة يحتاجها اول واحد يروحله امير ويفزعله فزعة اخو واكثر.. ااااخ استغفرالله ربي جنت مراهق وزعطوط واغار من علاقتهم احس ضرغام جاي ياخذ مچاني بگلب الامير وامير يداهر بيه ويگلي عزيز گلبي هذا توأمنا الثالث اعتبره

-بس ليش من يحلف يكول عزيز كلبي المغدور؟ شنو قصده بهالشي؟

-لانه صدگ طلع مغدور.. من خلال التحقيقات اكتشفنا البريك الخلفي مال دراجة ضرغام عطلان، يعني من داسه خاطر يخفف وينزل على العجلة الثانية ما مشتغل وفقد توازنه على الدراجة وانگلب على ظهره والتحقيقات اكدت عطل البريك هو  فعل فاعل چن واحد متصيده

-عزا بعيني وعرفتوا منو السوه هيج؟؟

-اي ابن عمته السبب، غدر بي بسبب شغلة تافهة بيناتهم واحد مداين الثاني فلوس ومتعاركين وهذاك النگس لاعب بالبريكات وكتل ابن عمته والاغبر هم كلشي ما حصل وانحكم مؤبد

-بس بقت وديان تلوم الامير مو؟

-بقت اي والامير سنيين اخذ يلوم بنفسه وما هداله بال، والي خبله بالزايد وخلاه يموت قهر هو موت ابن عمي ليث الله يرحمه بنفس الشهر المات بي ضرغام وره چم يوم ليوثي احترك ومات ببيتهم

-يمة گلبي

-الامير انتهى من اگلج انتهى فـ اعنيها لا ضحكة لا سالفة لا حجاية لا رواية لا سفرة لا شغل لا عمل كللله عافه واعتزل بغرفته ما يطلع لبشر واخذله على هالوضع بالـ 8 اشهر تقريباً لحدما ابوي جبره يطلع ويرجع لحياته الطبيعية

-ورجع لحياته الطبيعية بسهولة؟

-لا بالعكس ظل على كلشي يعصب ويكسر ويتعارك ويتضارب ويرجف غضب على اتفه الاشياء لدرجة اجت فترة من الفترات اسمع بنات عمي يصيحنله "المخبل" وامي ترزلهن وتلعب بيهن خلقة.. الوحيدة الجان يسكن وياهة ويهدأ شوي رفل جانت اقرب وحدة اله ويشكيلها وهي تسمعله بدون لا تقاطعه

-واضح الموضوع بعده ما راح من باله لان بعده عصبي وعلى كلشي يتنفرز

-لاااا تَـمني هسة ارحم بهواي امير انتِ ما شايفته گبل لا لا ما شايفته والله لا يراويج جان من يعصب كلها تشرد والزهرة حتى امي تسكت وتخنس ما تجاوبه وترادده

-لعد شلون عمو راده شيخ من بعده؟

-ابوي جانت عنده نظرة مستقبلية وقناعة الامير راح يتغير ويرجع نفس گبل، ضغط عليه بالكعدات والمشيات ويخلي هو يحجي بداله بالغصب خاطر يعرف يسيطر على اعصابه ويخلي امام الامر الواقع عبنه يعرف فشلة يتجاوز والشيوخ والوجوه المعروفة محاوطينه

-تدري ابا الحسن امير ما فد يوم حجالي عنهم؟ لا ضرغام ولا ليث اصلاً ميجيبهم بالطاري

-لو تصعدين للمرسم راح تشوفي كله صورهم خصوصاً ضرغام ودراجاتهم وحتى راسم وديان واخوة ضرغام الصغار، على كل مرة يلتقي بيها ويشوفها يرسم وضعها شون چان وحيرتها ويه اخوانها الصغار

بلعت ريگي واحسني احتريت شوية ماعرف السبب من غيرة غبية صابتني من عرفته راسم وديان ومركز بيها لدرجة راسمها لو ضجت من الموضوع كله واحسني انهميت وانغميت..

-تَـمني: اتوقع شايفة صورة ضرغام اني من قبل مرة شفت صورة رجال الامير راسمه ووياه رسالة مكتوب بيها "دمرت حياتي لو بينك وبين الجنة ذنبي هم ما اسامحك يا الامير"

-اي هاي رسالة من وديان

-يعني جانت تراسله؟

-يووووووه شكد تراسل وتدز بس كله لو تدعي عليه لو تشكيله فقدانها لاخوها وبكل مرة توصل رسالة للامير منها ترجع تنتكس حالته

-بس هم الله يساعدها

-اكيد تَـمني ما نختلف على هالشي والامير من يوم مات ضرغام هو متچفل بعياله وبعمتها ام فاضل

-وهسة هم ماتت ام فاضل لان وديان اجت بسبب موتها وجانت منهارة

-منهارة مو حباً بيها عبن ام فاضل جانت هم ظالمة بس يوم زينة ويوم لا

هزيت راسي وبقت الافكار تروح وتجي على بالي، اتذكر كلام ابا الحسن وارجع اباوع على باب غرفة الامير واستشعر بشنو ديحس هسة.. شنو حاله وشنو وجع گلبه اكيد رجع استذكر موته كله وهالشي دمره لدرجة من شاف وديان وشاف حالها وگع من طوله وضغطه صفر..

-تَـمني امير ما كتله والله العظيم مو هو السبب الخلل كله بالبريكات، حتى من حققوا وياه الشرطة اكدت هالشي

-اي

-صح الامير جان مستهتر بسالفة الدراجة انا اعترفلج اي وحتى هو من يتذكر شون جان متعلق بيها يعترف بروحه غلطان لدرجة من يوم حادثة ضرغام ما ركب دراجة بعد وابوي حرمها علينا كلنا

-بس انتَ كلت الامير گال لضرغام يتسابقون وبعدين بطل بس ضرغام ظل مُصر يريد يفحط ماعرف شيسوي؟

-اي صح

هزيت راسي ساكتة شوية وترخصت منه ودخلت لغرفة الامير لكيته اخيراً فاتح عيونه، طلعت خالة رسمية من شافتني واكفة بالباب تخلينا براحتنا، ابتسمتله من بعيد ورجعلي ابتسامة ضاعت بيها عيونه ورفع ايده يأشرلي اروحله..

تقربت منه بخطوات سريعة وكعدت على السرير بصفه، بقت ايدي بين ايده متحاضنات ونزل عيونه يباوعلهن فترة..

-شلون صرت حبيبي

-زين

-خفت عليك هواي

حرك راسه بحركة "اي" ورفع عيونه يحطهن بعيوني، تنهدت مبتسمة ومديت ايدي امسح على خده ونصيت نفسي بسته على كيفي وهمست بيني وبينه..

-الصار مو ذنبك امير لا تحمل نفسك فوگ طاقتك

عصر كف ايدي البين ايده بدون لا يفتح حلكه ويجاوبني، مسحت على شعره على كيفي وتمتمت بهدوء..

-الدتمر بي وديان صعب وحقها تصرفاتها متنلام عليها لانها ناتجة من خوف وضياع.. والي دتحس بي انتَ هم طبيعي وحقك عزيز گلبك الي مات مو انسان عادي

وخرت عنه بسرعة من شفت دمعة تنزل من عينه، نزلت هالدمعة ولحقتها دموع ورجفة جسد حزينة.. دار وجهه عني حتى يحرر باقي الدموع بدون لا يخجل وانطيته مساحته الشخصية نزلت عيوني افرك بيده على كيفي وكملت اسولف وياه..

-الصار وياك فاجعة والله يعينك عليها بس امير الموضوع صارله سنين

-چنه امس.. والله چنه امس

گالها بصعوبة ودار وجهه يباوع لعيوني، مسح وجهه ولحيته بيده واردف بصوت مكسور..

-انا كتلته تَـمني.. بيدي مات شفت روحه وهي تصعد سمعت شهكة الموت وهي تشگ صدره.. كله شفته وشهدته

-الله يرحمه حبيبي بعد هذا يومه

-انا السبب انا لحيت عليه لو راجعين للبيت وما ضاغط عليه جان ما صار كل هذا

-لا امير هذا قضاء وقدر وهاي منيته هالشي مكتوبله من قبل لا ينولد منيته يموت بهالعمر وبهالطريقة انتَ مالك علاقة...

ظليت احجي وياه هواي وهو باقي بس يهز براسه، ما خليت شي ما لغيته براسه حتى لساني يبس وكمت ماعرف شسولف اريده بس يغير جو وينسى..

-يلا اميري كافي عاد غير جو

-غيرت

-لا تستهزأ دا احجي صدگ

-خوشن

-ميخالف اقبل تسمي اببنا المستقبلي ضرغام حتى تتذكره كلما تشوف ابنك

ذبلت عيونه التعبانة وابتسم ابتسامة خفيفة، ذب حسرة عالية وكال بصوت مبحوح..

-لا نسمي ليث

-على ابن مسعود الله يرحمه؟

حرك راسه بـ "لا" واردف بنفس الهدوء..

-لا انا احب هالاسم من گبل وهو من اللقاب الامام علي عليه السلام

-امممم ماشي الله كريم عود نشوف

-شتشوفين؟

-يعني نشوف نسمي ليث لو سام

-سام شني؟!

-احب اسم سام اريد اسمي ابني سام

-واذا اجتنا بت نسميها مسمومة؟

-ههههههههه لااا امير هاي شبيك

-سام شنو تَـمني تحجين صدك انتِ تره مابيه حيل يجيني وليد مايع اريده زلمة

-اي سام هم يصير زلمة عادي

-سكتي سكتي لا ترفعين ضغطي انا مريض

-هاي شبييك

-اششش سكتي

-لا تأشأش امير راح اسمي سام!

-سمي البريعصي العايش بالمطبخ سام ابني مالج غرض بي

-اميييييير تره سام ابن النبي نوح!

-سلام الله على النبي نوح تَـمني سكتيي لا تخلينا نحجي زايد

-والله انتَ ماعندك ذوق ليش وين اكو احلى من سام

-وديان وين؟

-تره دنحجي بأبننا المستقبلي شعلينا بوديان؟!

-خالوو البت وضعها صعب ما يصير نعوفها وحيدها هسة هي صارت وحيدة حتى عمتها ماتت وماعدها غيرنا

-تره تكرهك هي اني معليه والله بس هي تكرهك بعد

-تَـمني!

-شنو شبيك

-مالي غرض تكرهني لو تحبني قابل راح اتزوجها انا

-نعم!؟؟؟

-تَـمنيييي

-احم.. اي صح مو وكتها يلا عود نأجلها

ضحك بخفة وجر وجهي عليه يبوسني، وخرت منه اضحك لانه دغدغني بشواربه وانتبهت عيونه بعدهن حزينات ومبين ديضغط على نفسه لاني كاعدة يمه ميريد يبين حزنه وقهره گدامي بعد...

**

"حبيبة"

طلع الامير من المستشفى وابوي رادنا كلنا نروح لفاتحة ام فاضل رغم السوته بينا وديان وغضب امي رسمية منها بس ابوي ما رضى وكال هذا واجب والبت بحاجتنا..

رحنا بيوم الثالث ووديان ولا يمنا استقبلت وبوست كل النسوان واحنه چن نكرة ما تقربت من يمنه وكلاص ماي محد جابلنا وامي رسمية كاعدة وتلوب ميتة قهر تريد بس تطلع وتخاف لا ابوي يزعل منها..

خلصت الفاتحة على خير وشالت امي مبلغ محترم وحطته بيد وديان وجبرتها تبوسها بس كدام النسوان عاد لا نتفشل، انتبهت لنظرات وديان على تَـمني وجانت نظراتها حاقدة وغريبة حتى من بوستها كضت ايد تَـمني حيل وحچت من بين سنونها..

-وديان: شكراً لان اجيتي

ابتسمت تَـمني وطلعنا من بيتها بسرعة ووصلنا علي الكـرار كالعادة خطية صاير سايق البيت سودة عليَّ، نزلنا للبيت وشفت ابوي كاعد بالصالة وگبل لا اصعد لغرفتي رحتله بوسته وكعدت بسده، مسح على راسي بيده الحنونة وكال بأبتسامة..

-شلونها شيخة البنات

-زينة بوية الحمدلله

-ويمته تريدني ارجعها لبيت زلمتها معززة مكرمة؟

-بوية

-ليش هيج يا بوية شجرالچ وياهو مزعلج من بيت زلمتج؟ بس كليلي بعلي اخسف بيهم الكاع

-محد صدگني محد انا ما مرتاحة ما جاي اتحمل العيشة هناك ماريدها

-نخلي يعزلج بيت حد بيته مو مشكلة

-لا بوية انتَ ما جاي تفهمني انا..

-حبيبة ابوي انتِ تره الطلاگ مو هين، الزواج موش لعبة شوكت ما نريد نتزوج ويمته ما نحب نتطلگ ما يصير حبيبتي

-ولانه مو لعبة انا ماريد اكمل هالزواج.. انا غلطت من تزوجت منتصر كلش غلطت

-حبيبة لا تخوفيني شمسويلج هالزلمة احجي؟!!

-ما مسوي شي وداعتك عندي لا هانني ولا مس كرامتي من يوم عرسي لليوم بس الصار كله غلط بغلط واذا تنطيني الصلاحية اسولفلك وافهمك الصار بدون لا تحقد على منتصر لان ما يستاهل احد يكرهه

-سولفي!

-بس بيناتنا يبقى الموضوع وما تضوج من منتصر؟

-احجي حبيببة!!

-اوعدني بوية!

-وعد يلا سولفي

ذبيت نفس وسحبته من ايده وگومته الاستقبال حتى محد يسمعنا، كعدت كبال هيبتي وسولفتله الصار من البداية للنهاية سولفتله بدون خوف ولا تردد حچيتله الموضوع بدون لف ودوران بس اكيد ما جبت طاري رفل من حاجت منتصر وسويته چن منتصر افتهم بيه ما رايده اتزوج الخاطبني وحب يساعدني من نهى عليَّ..

-تحجين صدگ انتِ؟؟؟؟!

-بوية لا تعصب دخيلك

-شنييي لعب جهال هو؟؟؟ شايفينا مزعطة حبيبة؟؟؟

-لا لاا والله لا بس.. بس منتصر راد يساعدني

-ليش هو يساعدج جا احنه شبينا؟؟ شنيي ماعندج اخوان؟!! ماعندج اب تجين تسولفيله ما تردين تتزوجين؟؟

-انا سولفتلك بوية

-يمته هاي؟؟

-والله حجيتلك وكتلك ما راضية وماريد اتزوج بس انتَ ما جنت تسمعلي.. اول مرة بحياتي احسك ضدي مو وياي وجنت ما تريد تعرف رأيي اصلاً وبس تريد تزوجني

-هاي انا؟؟؟!

-ماحب اگولها بابا بس اي، عشت اتعس ايام حياتي وحسيت روحي بسجن الدنيا طلعت من عيني وجنت متمنية تسمعلي وتلغي الفكرة بدون لا اضطر ازعلك مني

-يعني الصوج بيه صار!

-بوية.. ماعرف شگلك والله

سكت مخنزر بغضب فـ سكتت ونزلت راسي، كاعدة گباله افرك بيدي بتوتر واحس تندمت لان سولفتله ولو بالعتها وساكتة ولا هالنظرة الشفتها بعيونه..

-يعني هسة جاي تگليلي منتصر ما رايدج؟!

رفعت راسي ويه سؤاله النتره نتر وحرت اكثر وضعت شجاوب وشكول بالضبط بس خلص ما دام بديتها صار لازم انهيها..

-مو ما رايدني بس ما احسه يحبني مثلما انتَ تحب امي رسمية

-بوية هالحب يجي بالعشرة مو بيوم ويومين!

-بوية منتصر اظنه جان يريد وحده وهاويها گبل لا ينهي عليّ وبسبب النهوة والخطبة عافها ولليوم جاي اشوف الكسرة بعيونه وما يهون عليّ اظل ويه زلمة هاوي غيري حتى لو جان زين وياي

-اااااااخ حبيبة اااااااخ منج

-بوية منتصر ما غلط بشي هو يحبنا وراد يساعدني وما يرضى يطلگني عبن مايريد حياتي تخرب ومايريد يخسركم بس انا ما اريد ابقى وياه واذا صدگ عندي خاطر يمك بوية اريدك توكف وياي مثل كل مرة وتعيني على قراري

-ما اعينچ على خراب بيتج حبيبة

-ما يخرب بيتي وانتَ وياي، اكيد ما ترضى على زعلي وقهري العمر كله بوية طلگني منه هسة ولا تخلي باجر عكبة يتماده ويعشگ عليّ ويجي يحجيها بوجهي

-خاطر اكسر رگبته!

-اذا عفتيني وياه راح تكسر رگبتي الي، راح ترجعني مكسورة رگبة وبخت وانتَ ما ترضاها عليّ

فرك وجهه بقوة واستمر بالسكوت.. سكوت ابوي من يريد يفكر مريب لان احس اوقات حتى النفس يگطعه يبقى مثبت عيونه على شي ويفكر وما يسمح لاحد يقاطعه بس هالمرة قاطعته وختمتها وياه بـ...

-حجيت لـ منتصر وطلبت منه الطلاگ ما رضى بالبداية بس احترم رغبتي واظنه راح يقبل اذا انتَ حاچيته

-انتِ متأكدة من قرارج؟

-متأكدة

-ليش تستعجلين بوية ياهو يضغط عليج؟

-كرامتي

-انتِ جاي تكولين ما يخون وانتِ ما متأكدة عاشك گبلج لو لا ليش تستعجلين بالحكم عليه خوب نجيبه هنا ونواجهه!

-مالنا حگ نواجهه على ماضي ما اكتمل بس النا حگ نتصرف بالطريقة التعجبنا بدون لا نكسر ونحرج أي طرف من الاطراف

-دوهنتي حالي يابوية

هزيت راسي متفهمة حيرته وكمت اعوفه وحده يفكر على راحته بدون ضغط زايد، يومين اخذ ابوي يفكر وكضني اكثر من مرة يحاچيني وارجع اعيد عليه نفس الحجي واأكد عليه انا ما هاوية منتصر وماريدنه ولو عافني وياه راح يظلم بختي ويوجع گلبي وبسبب هالحجي اخيراً اقتنع!

اقتنع وكعد اخوتي كلهم عدى علي الحـق وعلي التقي الي ببغداد وفهمهم كلهم على موضوع الطلاگ، تخبلوووا والبيت كام ما كعد حسبالهم منتصر غلطان بحگي وگاموا سور ونور متسودنين يردون يهدون عليه وابوي وگفهم ما راضي..

-شيخ علي: انا سولفتلكم خاطر ما تلومون اختكم من تتطلگ وتسمعوها حجاية تغثها

-علي الدر: ابن امه يفك حلگه ويسمعها حجاية تغثها بالعباس افرك حلگه فررك

-علي السور: بوية اذا هي ما مرتاحة نطلللگ ايي ايي نطلگ وانعل ابو اليجبرها تسكت وتتحمل!!

هز راسه ابوي وابتسمت على فزعة اخوتي كلهم وگفوا وياي وهذا الجنت متأكدة منه، جنت اعرف محد راح يلومني ويوكف بطريقي خصوصاً وره ما ابوي خلصني من موضوع غفار وحلف كدام الكل لو اعترضلي يندم بيت مسعود كلهم..

ثاني يوم ابوي جاب منتصر وسولف وياه، جنت شايلة هم لا يشيلون غيض عليه بس الحمدلله مو كلش ضايجين منه يعني صح مو نفس گبل بس اشوى من تخيلاتي.. اعترض منتصر بالبداية وكال انا مريته وهو رايدني وحسيته حچاهة مجاملة بس كدام ابوي خاطر يعرف الطلاگ ما طالع منه وانا الي رايده بس انا بعد دكيت رجل بالزايد ما ارجعله..

جابوا صديقين من ابوي خاطر يصير الطلاگ كدام الكل وبالعلن وسمتعهم يسألون عن الاسباب وابوي فهمهم، استغفروا ما يعرفون شيكولون وبقوا ساكتين.. دقايق قليلة بقينا بهذا الهدوء گبل لا يجيني صوت منتصر وهو يگول..

-حبيبة... انتِ طالق

شهگت وچن جمرة وحطوها بگلبي من نطق منتصر الطلاگ، غمضت عيوني ونزلت دموعي الحارة تحفر خدودي، حاوطوني البنات كلهن يواسوني وامي رسمية حضنتني لجسمها تمسح على شعري وتهمسلي..

-يعوض الله يمة يعوض الله بالاحسن

بچيت بسكات مهضومة، مقهورة، مكسورة جنح وخاطر.. بحياتي ماتوقعت هيج يصير وياي وبحياتي ما ظنيت اتزوج حب حياتي واتطلگ منه بعد چم شهر من الزواج.. بچيت اكثر من دورت عيوني بالمچان وما لكيت امي واكفة وياي، امي كاعدة بغرفتها وما طلعت ولا چن بنيتها جاي تطلگ بعدها ما تسولف وياي وما تريدني..

-ليلة: وجعه التوجعها ان شاء الله لا تبجين حبيبة هي امج كلها خلگ وحدة مخبلة وكاعدة بغرفة لا تبجين عليها ما تستاهل

-حبيبة: سكتي ليلة

-ليلة: والله هسة شكلت انا

مسحت دموعي ومثلت القوة وصعدت لغرفتي، قفلت على روحي الباب واطلقت العنان لدموعي تودع حبيبها الي من اليوم حالفة اطلعه من گلبي ويه اخر دمعة تنزل مني..

كعدت ثاني يوم تعبانة ومصخنة كلش من البجي ونسوان اخوتي ما عافوني واجت رفل وياهن، ظلن يروشن كل شوي وحدة جايتني وبالليل كلهن باتن يمي وكعدنا نلعب بلي.. تونست وياهن وضحكت على مناگر تَـمني وليلة وعركاتهن وغصيت بالعصير من تَـمني كالت..

-وهسة دينتظرون جواب من خالتي وكلش محتارة

-حبيبة: تالة انخطبت؟؟؟؟

-تَـمني: اي ولو تعرفون منو خطبها متصدگدون

-البنات كلهن: منو!

-تَـمني: عاصف ابن مسعود

-حبيبة: شنوووووو

-تَـمني: اي والله اجت عمة ابتسام وخالاته خطبوله ورايحة خالتي سائلة عنه ومادحيلها بي وبأخلاقه ودتقنع تالة حتى توافق

-رفل: عذرناً على التدخل تَـمني بس خالتج عاقلة؟؟

-تَـمني: سكتن غير خبلتني ماعرف شلون دتفكر

-سبأ: اءء.. احم

-تَـمني: ياا اني نسيت عاصف يصير اخوج شنو رأيج بي سبأ انتِ تحجين الحقيقة اكيد؟

-سبأ: يعني مادري.. هو.. مادري صراحة

-ليلة: سولفي خية سولفي لا تستحين كلنا خوات

-سبأ: عاصف احسن من باقي اخوتي اي بس مال زين وماعنده مكسرات ما اظن

-تَـمني: يبووو جيبوا اليقنع خالتي

-حبيبة: زين تالة شتكول؟؟

-تالة متخبلة تدك وتلطم متريد بس خالة دتقنع بيها بحجة اذا متزوجين عاصف محد يجي يدك بابنا بعد

-حبيبة: ليش بوية محد يدك بابهم!

-تَـمني: لان ابوها مسجون خالتي صايرة عدها عقدة من هالموضوع

-حبيبة: لاا تَـمني تالة شنو ذنبها خو مالها ذنب اذا جان ابوها مو زين

-تَـمني: احنه هيج نكول بس الناس الهم رأي ثاني واقرب مثال الج هي اني لليوم اسمع النسوان يعيرون بيه ويكولون شلون الامير تزوج بت سحار

-ليلة: ياكلون تبنننن انعل ابوهم لابو اليحجون شعليج بالوادم انتِ شمالج فاهية وبساع تتأثرين؟

كضن تَـمني كل وحدة من جهة تحجي براسها وتقنعها تسولف ويه خالتها خاطر يرفضون عاصف وسبأ تأيدهن هنه يسولفن وانا بالي كله ويه كرار شلون راح اگله وشنو راح يتصرف من يفتهم..

انتظرته لليل علما يرجع وغميت روحي من تذكرت هو خفارة اليوم، نمت وبالي يمه انتظر يمته اكعد الصبح واشوفه احس السالفة مو مال موبايل اعرف بـ كرار متسرع ويجوز يسوي شي يندم عليه بعدين..

فزيت الصبح على موبايلي يدگ، مديت ايدي اسحبه من الميز وبعيني النوم بس فكيتهن على وسعهن من شفت المتصل "امي حبيبتي".. فتحت الخط بسرعة وكلت..

-الو

-حبيبة وينج؟؟ وينج لحكيني حبيببة

-شبيچ شصاير!

-تعالي.. تعالي مادري.. مادري شصار ولج تعااالي

-شصاار شكوو؟؟ انتِ وين؟؟

-مات ماات حبيبة ماات ماات ولج ماااات والله مو قصدي معليه ما ردت اسويهاا والله ماردت اسويها

-منوو ماات منووو احججيي فهمينييي

تصيح بكل صوتها وصوت لطمات قوية جاي توصلني، خبلتني طفرت من الجرباية ارجف كلني صحت بيها چم مرة اريد افتهمم اريد بس اعرف ياهو المات بس ما حجت مجرد گالتلي..

-تعاليلي لعمارة موجودة بالـ {^^^^^^} رقم الشقة ٣ تعالي حبيبة تعالي ولا تعوفيني فدوة

-يمة لا تخافين لاا تخافين جاية

-تعاي وحدج حبيبة لا تكولين لاحد والله يذبحوني والله

-يمة شوون اطلع وحدي شلوون

-ولج يذبحووني ترديني امووت؟؟ اذا ترديني اموت جيبي احد وياج جيبيهمم وكتلي امج!!

سديت منها التلفون منهارة ركضت لكنتوري جريت صاية لبستها ارعش رعيش، حطيت شال على راسي وخذيت فلوس و موبايلي ونزلت ركض مثل المخبلة وطلعت للساحة اللهث، وكفت بمچاني اراوح ماعرف اسولف لاحد لو اطلع يربي شسوي شنو هالمصيبة الطاحت على راسي شسوي!

قررت قراري ونويت اطلع من البيت وحدي وموبايلي بأيدي يصير ما يصير اتصل بواحد من الولد يجون، طلعت من باب الحوش على كيفي وجفلت صاكة بمچاني من شفت سيارة تشبه سيارة ابن فراقد تتقرب من بيتنا.. غشيت وجهي وفلتت اركض بين الاشجار الصغيرة المزروعة على رصيفنا وكوة ياله عبرت فرعنا بدون لا تشوفني..

ركضت اتعثر بأطراف صايتي بس ما مهتمة، وصلت للشارع العام ومديت ايدي طلبت تكسي وصعدت بساع وانطيته العنوان..

-خوية رحمة على والديك استعجل

داس بانزين ساكت همزين لا سولف ولا كعد يرطن براسي، دكيت على امي من جديد وما جاوبت دكيت مرة ومرتين وبالثالثة جاوبت بس تبجي ما افتهم عليها أي شي كلشي ما جاي اعرف لا شتكول ولا شسوت طاح گلبي ومن الخوف كمت اصيح بيها بالموبايل..

-لا تخبلينيييي وسولفي عدددل راح امووت احجي شصارر

-تعالي وشوفي

همستها بخوف وسدت الموبايل، ضربت الموبايل على رجلي حيل ميتة خوف ما عولت شوكت اوصل ومثل المسودنة اول ما دخلنا الفرع الخاص بالعنوان انطيت السايق فلوس ونزلت اركض.. طبيت للعمارة وشلت صايتي وركضت اصعد الدرج ولكيت الشقة بالطابق الاول..

ذبيت نفس مرعوبة ووكفت بالباب وطگيتها حيل وسريع، لزكت اذني بالباب اريد اسمع حركة ماكو طكيتها مرة ثانية ياله سمعت صوت امي ناااصي تكول..

-مـ.. منو

-انا يمة حبيبة انا

-يمة بنيتي

فتحت الباب الي وشفتها واكفة ولافة راسها بشيلة امي رسمية ولابسة عباة مچفنه روحها بيها.. بجت اكثر من شافتني وجرتني من ايدي تطببني للشقة وسدت الباب وراي وقفلتها..

-سلوى: حبيبة يمة ما عفتيني اجيتيني يمة بنيتي

-يمة فهميني وعلي ما ظل بيه حيل

غصت تغطي عيونها تبجييي بكل صوتها، روحي راحت بس اريدها تسولف تعبت من التفكير ومابيه استحمل اكثر..

-حبيبة: يمة على كيفج اهدي وفهميني

-سلوى: تعاي وياي

جرتني من ايدي واستغربت من برودة ايدها چن قالب ثلج كضني، غلست على ايدها وحرت بالطركاعة المنتظرتني، گلبي صار ينبض بقوة من سحبتني ووكفتني كدام باب مبين مال غرفة، عاينت لعيوني ونزلت دموعها مرة اللخ وكالت..

-والله غصباً عليّ جان ير...

ما سمحتلها تكمل ومديت ايدي ولويت يدة الباب افتحها وشهكت شهكة حسيت روحي طلعت بيها من شفته طايح بالكاع ودمه يجري..

-يمة

-سلوى: حبيبة راد يعتدي عليّ! راد يعتدي على امج ولج يمة والله راد يسويلي شيي وجرني للغرفة وجر عباتي

-حبيبة: زيد ابن عمي مسعود!

-حبيبة اعتددددى عليّ وكتلته وللج كتلته ادافع عن شرررفي عن شرفناا وشرف ابووج

-صخااام الصخمني صخااام بعيني عمتتت عيني يمممة عمتت عيني عمت عينيييي

لطمت على وجهي مبحلگة عيوني وانا اشوفنه نايم ودمه بطوله، تسودنت وظليت اصيح مثل المخابيل كضتني امي من زنودي ثنينهن وصاحت بيه..

-لاا تصيحين ولج لاا تفضحيناا سكتيي ساعديني نخلص منه بسااع

-شنووو شلوون

-حبيبة انا اممج ساعديني ولا تخليني وحدي ماعندي غيرج انا يمة والله ماعندي لا تكولين لاحد بداعتي عندج حبيبة بنيتي

-يمة شلوون ترديني اسكتتت شلوون كتلتيي فهمينيي شجابكم لهالشقة احجييي سولفيي شعندج ويه زلمة بشقة!!

-انا اجيت عبن......

گطعت جملتها وجفلت فاكة عيونها من اندكت باب الشقة علينا دگات قوية متتالية.......

يتبع 👑....

━━━━━━ ♛ ━━━━━━

الله يرحم ضرغام وليث ويرحم امواتنا جميعاً 🥹♥️♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

بحچاية منك ترد روحي..

حاچيني هواي يابعدي وبعد روحي ♥️..

━━━━━━ ♛ ━━━━━━

"حــبيبة"

تسودنت امي من اندكت الباب ظلت تطفر بمچانها وكاضتني من ايدي حييل تجرني وتحرك بيه مثلما تريد اول مرة اشوفها بهالوضع الصعب وصعبت حالي واحوالي وقراري صرت مثل التايهة ماعرف شسوي اروح افتح الباب لو ابقى هنا..

-سلوى: گلتي لاحد يجي وياچ مو؟؟ احجييي ولج بعتي امج حبيبة!!!

-حبيبة: لاا يمة لاا ما كلت لاحد والله ما حجيت

-چا ياهو اجانه ياهو

بجت تضمضم بوجهها وتنوح بالسكتة، چفوف ايدها ترجف ما ثبن وحالها بالضيم بس مو احسن من حالي تعبت على تعبها وحرت ازود من حيرتها..

-يمة خليني افتح الباب واشوف منو

-لاا لاا لا لا ولج يكتلوناا يذبحونا يجيبون علينا الشررطة يشتكون علينا

-يوم انطيني مجال خليني اطلع اشوف ياهو وارجعلج لا اطببهم جوه ولا افهمهم بوجودج

-وانتِ؟؟ ما راح يسألون شجابج لشقة وحدج؟؟

صفنت بوجهها ماعرف شجاوب صدگ اذا طلعت تطيح براسي وسمعتي تصير بالحضيض خصوصاً وانا هستوني متطلگة وابوي لليوم ما مقتنع بالسبب الحقيقي وره طلاكي اذا فتحتها راح اطبب روحي بسين وجيم..

-حبيبة: يمة جا شنسوي!

-اششش نسكت وساعديني نخلص من جثته نشمره بالحمام ولا من شاف ولا من درى

-يمةة تحجين صدك انتِ!!

سكتنا ثنينا مرة اللخ من اندكت الباب وظل يدكها هواايه، صمت حلكي امي من ردت افتحه واحجي وياهة وخزرتني بعيونها بمعنى لا تطلعين صوت، بقينا على وكفتنا نرجف ونفكر بالخمس دقايق ما تحركنا لحدما راح الجان يدك بالباب..

-سلوى: ساعديني حبيبة ولا تعوفيني وحدي بهيج محنة

-ما اساعدج يوم ماا اساعدج انتِ راح تدمرين نفسج!!

-والله دافعت عن نفسي والله دافعت عن شرفيي

طاحت بالكاع تلطم على راسها وتكرر بنفس الجملة "دافعت عن شرفي، جنت ادافع عن شرفي" بجيت وياهة منهارة وكل دمعة تطيح مني ترسملي طريق جديد، كل فكرة جاي تجي على بالي بهالساعة تأكدلي امي بورطة وما راح تكدر تطلع منها بسهولة..

-ساعديني حبيبة

درت وجهي اعاين لجثة زيد الممدودة وضميت حلگي بيدي احبس شهگاتي.. شون شاب راح بشربة ماي شون شاب كتلته امي والله يعلم السبب الحقيقي وره كتلته شنو!

تقدمت بخطوات بطيئة على جثته مهدود حيلي، مسحت دموعي الما جاي توكف ونصيت اكعد على ركباتي يم راسه..

-سلوى: شنو جاي تسوين؟؟؟

ما جاوبتها ورفعت عيني ادور على شي اكدر اغلف بيها ايدي، كمت من الكاع ورحت لمطبخ الشقة لفيت ايدي بشالي وصرت افتح بجرارات الكاونتر ادور على چفوف بس ما لكيت غير چيس نايلون اخذته ورجعتله، گنبصت يم راسه من جديد ولبست الچيس چن چف ومديت ايدي لرگبته اقيس نبضه..

-سلوى: حبيبة لا تسودنينييي شنو جااي تسوين!!

-جاي اتأكد من موته!! بلچن بي نببض ونلحك عليه!!

-شنوو؟؟ لا لاا لاااا شنو نلحك عليه لاااا

ركضت بأتجاهي ودفعتني عنه طيحتني بالكاع، شهكت مرعوبة من شكل امي وصرخت گلبي يريد يوكف من شفتها طلعت سچين من جوه عباتها ودچتها برگبته!! بنفس المچان الجنت اقيس بي نبضه!

-يمممماااا شسووويتيي

-لازم يمووت هذا لازم يموووت وينهدر دمممه شوون تدافعين لواحد راد يعتدي على امممج ماعندج غيررة عليَّ انتِ!!

-شسويتي؟؟ انتِ صخمتيي حالنا ولطمتي بالزاايد انتِ تخبلتييي!!!

-اي ايي تخبلت اييي مااا تعرفين شنوو عشت اناا ماتعرفينن

-ضيعتي حگچ من سويتي هيچ يمة! ذبحتي نفسج بيدج!!

-حبيبة لا تصيرين انتِ والزمان عليّ لاا تظلمينيي

-انتِ ظلمتي نفسج!! لو عاايش جان كدرتي تنقذين روحج وشرفج كدامي وكدام الكل! بس انتِ ضييعتي اثبات برائتج ضيعتيييي

بعد جملتي جفلت فاكة عيونها چن ضربتها على الوتر الحساس، نزلت دموعها من جديد ورفعت ايدها ثنينهن تشكيلي..

-والله مادري.. مادري يمة مادري شسويت بس من حرگة گلبيي ولج كضني وراد يطين شرفي حبيبة شسوووي

-يممة موو انتِ تكتليي حگج تدافعين عن نفسج بس مو توصلل نذبحيي خلي ابوي ياخذ حگج وينعل والديه بس مو انتِ!!

عفتها ورجعت على زيد اعاينله واضرب اخماس بأسداس شنسوي وشلون نحل هالسالفة لازم اجيب ابا الحسن او واحد من اخوتي الضباط يحلوها لاازم اقنع امي..

-يمة راح اكول شي بس لا تصيحين بيه!

-اياااچ تجيبين واحد من اخوتج حبيبة اذا جبتي واحد منهم لا انتِ بنتي ولا اعرفج بعد!

-چا شلوووون فهميني شلوووون نحل هالطركااعة

-اشش لا تصيحين ولج لاا تعلين صوتج لا ننلگف!

-انتِ تنگلفين! ومحد غيرج يروح بين الرجلين يوم! لا تدمرين نفسج وخليني اساعدج بداعتي عندج

-ساعديني اي اي ساعديني خلينا ناخذه للحمام ونطلع منا يلا

-وبعدين؟! بعدين شيصير حسبالج ما يلكون الجثة؟؟؟

-هاي شقة فارغة ولج اصلاً محد عايش هنا والله محد عايش ولا راح يعرفون يبقى هنا يعفن ويتحلل جسمه ومحد يلگاه

-والكامرات؟! ما راح يرجعولهن؟؟ فهميني شجابج هنااا احجيييي

-صوتج حبيبة ولج راح اموت صوتج

-اسكت بشرط تفهميني شجابج هنا!!

-اخافن

-من شنو؟؟

-اخافن ما تصدكيني

-كولي الحقيقة واصدكج!

-اي اي الحقيقة صدكيني الحقيقة راح احجيها

-كولي!

بلعت ريكها تفرك بيدها وتضمضم بشعرها الطلع من الشيلة، تعض بشفتها وجسمها يرجف چن سعفة وضربها الهوا..

-احجي يمة

-احم.. اءء.. زيد صارله فترة يحوم عليّ يريد.. يريد..

-شيريد؟؟

-يريدني حبيبة يريددني انطي اليهواه كل زلمة!

-شلووون؟؟؟

-اي وداعتج عندي يا يمة موتني وشلعه لافادي يهدد بيه ويكول اخرب سمعتج يم شيخ علي خاطر يطردج من البيت لو يذبحج اذا ما اجيتيني للشقة

-وانتِ رحتيله؟؟؟؟

-لا لا.. لا بالبداية انطيته اذن الطرشة وما اهتميت بس ظل يهدد هواي وصار يجي لبيتنا ويضرب شباچ غرفتي وابوج يكون موجود ونايم بصفي ولج يريد يفضحني كداامه

-من كل عقلج يمة؟؟ ليش ما سولفتي لابوي؟؟

-وياهو يصدكني؟؟ ياهو يصدك وانا دخيلة جايتكم بفضيحة؟؟

-يا فضيحة؟ ما جاي افتهم عليج ياا فضيحة انتِ مو شردتي من اهلج عبنهم يعنفوج؟؟

-اي

-چا يا فضيحة تحجين عنها؟!

-ماكو فضيحة ماكو بس ابقى دخيلة وعليّ العين والناس تدور الزلة عليّ

سكتت اعاين لوجهها وحركات ايدها وحسيتها جاي تجذب عليّ، امي واعرفها من تضم شي تضيع عيونها عني وما تثبتهن بعيوني لو الدنيا تنكلب..

-كملي

-اخر شي كالي اعوفج بشرط تجيني لهاي الشقة بس اسولف وياچ ونتفق اتفاق ولا تخافين راح يكون ويانه نسوان خاطر تأمنين

-وجاي تقنعيني انتِ صدگتي واجيتيله؟!

-اي صدكت عبنه راواني فتحلي كامرا وشوفني النسوان وبيهن كبار موجودات وانا كلت خاطر اخلص من نگه وتهديداته اجي واحل هالسالفة

-مستحيلة انتِ

-اخذت احتياطي والله! شلت وياي سچين من البيت حطيته بين هدومي خاف يريد يسويلي شي اهدده بيها

-والنسوان وينهن؟؟ ما جاي اشوفلهن اثر

-هي هاي المشكلة من اجيت ما لكيت احد غيره.. ما ردت افوتن وياه بس كال كاعدات بالغرفة وقنعني اطب ولكيته بس هو وبساع جرني من عباتي يريد يسويلي شي وانا طلعت السجين اهدده بيها بس ما اهتم وظل يتعارك وياي واضطريت اشيل السجين واحطها بصدره ورأساً دكيت عليج

اسمعها وفاكة حلكي اشوفها كدام عيوني منهارة وتنتفض، كل ساع عينها تصير على جثته وتشهگ خايفة بس المشكلة ما جاي اكدر اصدك.. مو ما اصدك زيد راد يعتدي عليها لاا اصدك هالشي عبني اعرف ولد عمي مسعود شنو بس احس اكو حلقة مفقودة! اكو شي ثاني بيناتهم وامي ضامته عني!

-يمة

-ها

-اذا تحبيني وترديني اساعدج تسولفيلي كلشي وما تضمين شي

-سولفتلج كلشي شبيچ ما تصدكين!

-خوش هذا هو ما دام سولفتيلي كلشي انا رايحه احچي لابوي وهو يشوفلج حل

-يذبحننني انتِ مسودنة؟؟ والله يغسل عاره ويشمرني بباب بيت اهلي!

-لا ابوي مو هيج

-يصير هيج من تجي السالقة للشرف! حبيبة اذا تساعديني ابقي ماا تساعديني طلعي ماريدج وياي!

-ما اطلع لمكان رجلي على رجلج كومي نرجع للبيت ونخلي الزلم يحلوها!

-ماااريدد طلعي بره طلعيي فوك ضيميي تزيديني ضيمم

كامتلي تجرجر بيه غصب لحدما طلعتني من الغرفة البيها زيد وطبكت الباب وراهة، وكفت بالصالة معاندة ما ارضى اتحرك وشبعت اهاين ورزايل وحتى كفخات منها تريدني بس اروح..

-كتلجج مارووح

-شتردين انتِ شترددين

-اريدج تجين وياي خاطر نحل هالمصيبة اللفت على روسنا!

-ما اجي روحي

-يمة تعـ...

-روحييي كلت واذا افتهمت بيج حاجية لابوج اغضب عليج يا حبيبة ولا انتِ بنيتي ولا اعرفج!

-حرام علييييج

-مو حرام دافعت على شرفي ونفسي ما خليت واحد نجس يكضني!

-حرام تظلمين نفسج بهالطريقة تكدرين تبررين تصرفاتج كلها كدام ابوي واخوتي وهمه يفزعولج ويحلوها

ضحكت مستهزأة ونزلن دموعها من جديد، تهت والحيرة كضتني من كل صوب اشرتلي بأصبعها اطلع وما رضيت اريد اشوف شنو تاليتها وشنو لازم اسوي بس ما سمحتلي واجتني عتتني من ايدي عت وفتحت باب الشقة وطردتني ومن كدما روحها تعبانة ما اهتمت اذا جان اكو احد واكف بره لو لا..

توترت من شفت روحي واكفة وحدي بمكان مجهول وعمارة قديمة، مسحت دموعي بالشال واللتفتت يمين ويسار اتأكد محد شافني ونزلت من الدرج اركض ومغشية وجهي بشالي ما مطلعة شي مني..

ركضت للشارع العام اخذت تكسي وكعدت بالسيارة ماعرف شكول، وين يوديني وشنو اتصرف من ارجع ماعرف.. استسلمت وعفت امي بشقة ويه ابن عمي الذبحته بيدها والكارثة انا الوحيدة الشهدت على هالجريمة وصار لازم انا الالگه حل!

-خوية ما گلتيلي وين تردين اخذج؟

-حبيبة: مادري

-شنو؟

-اخذني لـ.....

هز راسه وكمل يسوق وانا سرحت اعاين من الشباچ والف فكرة والف سالفة تدور براسي كل شوي اريد اگله رجعني للشقة واستچن اذا رجعت شسوي؟ شنو الاكدر اقدمه امي ما راح تسمعلي وراح تسوي الي براسها خليني ماعرف شي احسن لاني تعبت!!!

دليت ابو التكسي بيتنا وانطيته فلوس ونزلت من السيارة، فتحت باب الحوش من بره على كيفي خاطر ما تطلع صوت ودخلت جوه بس خفت من سمعت اصوات اهل البيت كاعدين..

فركت ايدي محتارة شلون ادخل بدون لا يحسون؟ عاينت لباب الديوان مقفولة وباب الاستقبال هم مقفول ماكو حل غير انزع الصاية والشال اشمرهم بالطارمة الثانية وافوت چن جنت بالحديقة كاعدة وحدي..

سويت الفكرت بي بسرعة ودخلت من باب المطبخ وجان فارغ استغليت الفرصة ورحت للمطبخ الحار اركض وفزيت من شفت سبأ بي وجاي تبجي!

-سبأ!!

دارت وجهها عني بساع تمسح بدموعها ورجعت اللتفتت عليّ ترسم ابتسامة چذابة على وجهها..

-حبيبة: شبيچ سبأ؟ ليش تبجين؟

-ماكو شي

-شبيچ حاجيني

-ماكو حبيـ...

-سولفنن لا تعلن گلبي

نترت بوجهها من جزعي بس تندمت لانها ردت تبجي مرة اللخ وانطتني ظهرها، ذبيت حسرة تعبانة وسحبتها من ايدها بخفة اخليها تواجهني..

-سبأ اسفة لان نترت بيج بس اضوج صايرة من اسأل عن حالكم ومحد يجاوبني

-البيج مكفيج حبيبة

-لا مالكم شغل بيه سولفولي چا اذا انا ما اسمعلجن واوكف وياجن ياهي توكف

-توكفين وياي ضد اخوج؟

-اذا هو على غلط اكيد!

سكتت من دخلت شمس للمطبخ الحار شادة شال ثاني على راسها فوك شالها وعيونها منفخة مال وحدة هستوها كاعدة من النوم وراسها يوجعها، شافت سبأ تبجي وتخبلت عافت وضعها وجبرتها الا تسولفلها..

-سبأ: راح اسولفلجن بس بيناتنا الحجي يبقى

-شمس: اي اي احجي

-سبأ: علي التـقي امس واحنه جاي نريد ننام تحسر بصوت عالي وگالي..

-علي التقي: ما يطلع منج شي انتِ طفي الضوه سبأ راسي مصدع

-صار

گمت من الفراش طفيت الضوه الجبير وفتحت الضوه الاصفر مال الغرفة يصير خفيف وهادئ متعلمة افتحه گبل لا انام وانا اسوي عنايتي الليلية العلمتني عليها شمس..

رجعت بصفه على الجرباية وفتحت الجرار الي يم راسي وطلعت الكريمات والسيرومات، المراية على الميز حاطتها بصفي ومسوية هيج خاطر خاف فد يوم اتعاجز واغلس كلشي يم راسي..

فتحت السيروم حطيت لوجهي وراهة المرطب وراهة رطبت رجلي وايدي كلهن بس كله على الصامت اشتغل ما طلعت صوت وهو نايم بصفي ومنطيني ظهره.. اخير خطوة فكيت شعري مشطته وجريت شيشة العطر اتعطر وما حسيت الا بـ تقي يفز من مچانه وينتر بيه..

-كااافي مااا تنامييين

-اي اي راح انام كملت

رشيت بساع من العطر مثل المسودنة وشهكت من جر العطر من ايدي حيل وصاح بيه..

-لااا ترشين من هالعطرر بعدد ملييته

انصدمت من تصرفه هاي اول مرة يعلق على عطري هالشكل وبهالطريقة العنيفة، انهضمت وهزيت راسي بـ اي ساكتة چا شسوي خليني بالعتها وساكتة احسن ما اعصبه وانكتل بهالليل..

دمعتي بعيني وماريد ابجي كدامه، كمت من الجرباية خاطر اروح لـ حبيبة لو اروح يم ليلة شوي ابجي براحتي هناك بس فاجأني مرة ثانية من جرني من اطراف شعري بدون لا يوجعني وزمخ..

-وين رايحة بهالليل؟!!

-ما رايحة

-چا ليش كمتي من الفراش؟

-ماريد انام هنا راح افرش بالكاع

-ليش بوية؟؟

-ظهري جاي يوجعني وما مرتاحة بنومتي

-طبعاااً ما ترتاحينن طبعااً اذا ناايمة بحافة الجرباية لو سويتلج هييج طحتيي طبعاً ما راح ترتاحييننن

يصيح بكل حِسه معصب وروحه طافرة، بلعت ريگي ويه دموعي ورجعت اكعد على الجرباية وكضيت المشط اللهي روحي بي وامشط بشعري..

-نامي!

-اي

-تعاي نااامي

-اي بس امشط

-جيبيي

خذاه من ايدي غصب وكض شعري يمشطه بس شني احسه تكطع هاي وشعري مشطته وسرح بس مبين ما يعرف يمشط الشعر الطويل وبهذل حالي وهم بقيت بالعتها وساكتة..

-يلا نامي

-ما انامن

-شني؟؟

-ما انامن ماريد انامن يمك

-لييش؟؟؟

-ماريد ما جايني نوم انا رايحة يم ليلة اباتن اليوم

-سبأ لااا تفحطيني بهالليل تعااي نامي!

-مااريد!

خذيت مشطي وياي وطلعت من الغرفة واسمعه يصيح بصوت عالي كلش..

-انااا اعلمج سبأ اطلع **** اذااا حاچيتچ بعد!!

طلعت ابجي ميتة قهر ودخلت لغرفة ليلة لگيتها نايمة، حطيت راسي على المخدة بصفها وللصبح عيني ما غفت اتذكر شلون حاچاني وشلون يفشر على روحه اذا حچى وياي بعد وازيد بالبجي..

-ليلة: يا بومة نايمة بصفي

فزيت مخترعة من حجت وهي مغمضة عيونها، مسحت دموعي وهمست بصوت ناصي..

-انا سبأ

-الله لا ينطيك يا تقي

-انچبي لا تدعين عليه

-چا شكو نايمة يمي امشي رجعيله

-لا ماريدن

-ليش خية؟

-زعلانة

-چا الله لا ينطي واطيح حظج اذا دافعتيله

-تمام

-كومي غسلي ماكو زلمة يستاهل تبجين عليه

هزيت راسي ورجعت نامت ليلة وانا كتلج ما غمضت عيني وهاي انا هسة كاعدة هنا واستذكر الصار وابجي على حظي وبختي الضايع..

-حبيبة: اهمدااچ

صفگت ايدها سوه وغمتني بحرگة، استغربت من تصرفها وظليت فاكة حلكي ماعرف شكول..

-حبيبة: ولج انتِ ليش ما تفتهمين سبأ لييش

-سبأ: حتى انتِ عليّ حبيبة بس طبعاً تفزعين لاخوج

-خايبة انا محروگ دمي عليج اريدج ترتاحين وحالج يتغير للأحسن!

-سبأ: ما فهمت

-شمس: اوكفي حبيبة اوكفي اريد نجي لوحدة وحدة ليش كالج بالبداية "ما يطلع منج شي انتِ؟" شنو قصده بهالجملة؟

-سبأ: شمعرفني

-شمس: انتم تسولفون گبل لا تنامون او يعني.. احم.. فد سالفة فد موضوع تفتحون لو گاضيها على الصامت؟

-سبأ: لا ما نسولف

-حبيبة: لا بشرفج!

-سبأ: والعباس ولا نسولف عبن هو يتعب ودائماً ساكت فـ انا هم ما احجي خاطر يرتاح

-شمس: يصير انا اغمچ هالمرة؟

-سبأ: بنات شبيجن وياي فهموني

-حبيبة: خايبة تقي ما يحب يسولف؟؟ علي التـقي؟؟ اخوي روحه بالسوالف والافلام والنراكيل والضحك والتفرفش يكره ويضوج الشخص الهادئ ما يطيق يكعد يمه وانتِ عود مسويتله بيها فضل من ساكتة ااااخ لو اكضج سبأ اااخ

-سبأ: يا خية چا غير يرجع من بره تعبان

-شمس: راجع من بره وين خية جان يكرب هو؟ تره يطلع بالليل للكوفي ويه جماعته لا يحمل طابوگ ولا يطبگ سيراميك لا تخافين ومن يجي الزلمة لبيتج يريد يكمل السهرة وياچ ويتونس لا تشوطيني خايبة مو طلع بلساني شعر وانا افهمج وينهاا تَـمني خليها تنجلط وينها

-سبأ: اووووف مادري سكتن

-حبيبة: انتِ صدگ تنامين على حافة الجرباية؟

-سبأ: هاا

-شمس: جاوبي بصراحة

-سبأ: اي صدگ بس والله على مرتين نمت حده كلش بس بعد استحيت اعيدها وهم ما ردت اضوجه بنومته عبن شعري طويل ويزعج

-شمس: تستحين لييش خايبة انا اذا ما انام على خوانيك بدر ما ارتاح واتعمد احطن شعري على وجهه وايده خاطر من يفز يشوف اول شي شعري بعيونه ويشم عطري بخشمه

-حبيبة: سبأ ما يصير هيج حبي انتِ تجرأي شوي خلي يحسچ مريته عوفي المستحى ما يفيد والله

-شمس: حياتي حبيباتي رويحاتي يا سبيئة زلمتج طاگة روحه من جفافج خصوصاً وهو يشوفج تلبسين وتتعطرين وتتكشخين ولابسته چن مزهرية بصفج

-چا شسوي يعني اتعطر واعطره وياي لو شني

-شمس: اي عطري شكو بيها بخبخي لروحج واخر بخة رشيها عليه داهري بيها وخلقووا من هالشي حديث وموضوع وهي تفرج بعدين

-سبأ: لا لا استحي شني ارشله من عطري اصلاً هو عطره يخبل ماريد اغيره

-شمس: احوووووووووو حوووووو

-حبيبة: ههههههه ولج مو قصدها تغيرين عطره هي رشة شراح تسويله عود رشيها على الجرجف مو عليه بس قصد شموسة تبدين وياه حديث لان تقي حسباله انتِ ما طايقته وما تردينه

-سبأ: مو ماعرف شون

-شمس: انتِ بس ضحكي والله كريم وراهة

-سبأ: چا ما يسأل على شنو تضحكين؟

-حبيبة: وهو المطلوب راح يسألج ليش تضحكين وانتِ اخترعي أي شي خاطر تفتحون موضوع

-سبأ: هاااا والله ما مفكرة بيها من گبل

-شمس: فكري خية فكري.. ومن رخصتج حبيبة وادري تقي اخوج بس سبأ لا ترجعين تحاچينه اليوم وثگلي وجهج بينيله انتِ مقهورة من نترته امس خاطر يجي يراضيج وتسولفون

-حبيبة: اي لازم

-شمس: هذا صوت بدورتي يصيح امشن نتريك امشن

جرتنا انا و حبيبة الوجهها صاير اصفر وحالها مگلوب بس ما صارلي مجال اسئلها شبيج، فرشنا السفرة وحطينا الريوك وتوزعنا حول السفرة.. الكل موجود هنا عدى سلوى والامير علي ومرته..

-شيخ علي: ابا الحسن لا تعوف اخوك وحيده وضعه ما عاجبني

-ابا الحسن علي: صار بوية.. بس لا يظل بالك الامير كلما يشوف وديان لو يصير بيناتهم حديث تنتكس حالته

-رسمية: الله ينطيها العافية تَـمني وياه ما تعوفه مگابلته وكاعدة خطية

-شيخ علي: الله يوفقها ويستر عليها

غمست خبزتي بالمربى وبالصدفة رفعت راسي لـ تقي شفته يعاين عليّ ومن صارت عيني بعينه وخر نظراته عني بساع، توترت وكمت ماعرف شون اكل وانوب لزمتني الكحة وحبستها انذبح زردومي اريد بس اكح واستحي كدامهم..

-شيخ علي: حبيبة امج ليش ما كعدت؟ روحي شوفيها بوية

-حبيبة: هاا؟ مادري.. مادري بوية خليها يجوز بعدها نعسانة

-شيخ علي: لا هي من امس كالت راح تنام بغرفتج حسيت بيها شي مو طبيعي روحي صيحيها

هزت راسها حبيبة بس انتبهت لايدها ترعش حتى من جانت تاكل انتبهتلها عبنها كاعدة بصفي اعصابها تلفانة، كامت من السفرة وراحت للدرج خاطر تصيح امها من فوك همزين مبين تصالحن ما دام سلوى باتت بغرفة بنيتها فرحتلهن والله..

-رسمية: حبيبة شبيچ واكفة على الدرج

-حبيبة: هااا؟ مابيه مابيه شي

-شيخ علي: ليش وجهج اصفر بوية انتِ مريضة؟

-سلوى: لا بس امس رجعنا تناگرنا.. صباح الخير

شهكت حبيبة مبحلگة عيونها من شافت امها تنزل من فوگ وتلف بشالها، كلنا انتبهنا لتصرف حبيبة الغريب واخوتها ظلوا واحد يعاين لوجه الثاني.. نزلت سلوى من فوگ مبتسمة وكالت بضحكة..

-ما ارزلج بعد حبيبة امج لا تخافين هذا هو تراضينا

-شيخ علي: سلوى لا تزعلين بنيتي ما ارضى عليها

-سلوى: انعل ابوها التزعل بنيتك يا بعد هَلي

نزلت تضحك وصوت شحاطتها تضرب باية الدرج واضحة، وصلت لـ حبيبة وحضنتها نص حضنة وجرتها وياهة للسفرة وتسولف وياهة بصوت عالي..

-حبيبة امج وروحها انتِ گلبي مفرفح عليج

-علي النور: اشوفج اول وحدة وكفت وياهة من تطلگت

-سلوى: غير جنت مريضة ومالي خلگ قابل انا متعمدة

-علي السور: خوش خوش

-شيخ علي: بلا حجي زايد يلا تريگو وكلمن يطلع لشغله

-علي السور: تأمر شيخنا الطاگ

-شيخ علي: سوور!

-علي السور: هسة شني واذا گلت عنك شيخ طاگ بس لا ما تريد احد يفتهم بعت بستان كربله بسعر يشگ؟

يغمز ويحجي وياه وعمتي رسمية تضحك بس عمي علي بعده مخنزر، تربع علي النور وكال بحماس..

-اخواني اخواتي چنايني وأحفادي والحياية المتطشرين منا ومناك اود ان ابلغكم ان شيخ علي باع جزء من بستان كربله بسعر يسمحله ياخذنا كلنا وياه سفرة على حسابه

-حيدر: حييي الله جدددي

-علي البدر: رحم الله والديك بوية صدگ ينرادلنا سفرة

-علي الدر: اي والله النفسية محتاجة سفرة بس وين تريد تاخذنا حجي؟

-علي الكـرار: ياريت لو نروح لـ...

-علي النور: اذربيجان بوية بداعة الحياية ودينا هناك

-علي الكـرار: لا انا اكول لو نروح لـ...

-علي السور: لدبي؟ اي والله بوية خوش فكرة اخذنا لـ دبي عاين الدنيا كلها راحت بقت علينا

-علي الكرار: لا ولك انا اكول لو...

-حيدر: نروح للنمسا لان يكول ابو شادي الزبنطوطي الي يريد ولفه يحبه ياخذه سحل للنمسه

-علي الكـرار: وجعععع ولد الاوادم مو جاي اسولف كل شوي واحد مقاطعني! بوية انا اكول خلينا نروح للعمرة وناخذ خالة تَـمني وبنيتها هم خطية هم يتونسن ويانه

-رسمية: خوش نشوف عود

-شيخ علي: شو ذولة قرروا وعزموا واقترحوا دول وواحد يجر طول والثاني عرض چن صدگ راح اخذهم

-علي التـقي: ليش بوية ما تاخذنا شبينا شناقصنا وما نسافر

-شيخ علي: ما بعت البستان

-الولد كلهم: شنووو؟؟؟

-شيخ علي: استخاريت وطلعت الخيرة مو زينة وما بعت

-علي السور: ياهو هذا الاخذلك الخيرة؟؟ اكيد مسعود!

-شيخ علي: انچب لا تستهزأ.. اخذت الخيرة عد واحد صاحبي رجل دين وطلعت الخيرة مو زينة وما راح نرتاح

-علي البـدر: جا زين سويت من ما بعت

-علي النور: لا مو زين جا يمته نروح للنمسه

-حيدر: ويمته نطبق نصيحة ابو شادي الزبنطوطي؟

-شيخ علي: بحلمك طبقها جدي.. ويلا ادعبلوا كلمن يطلع لشغله ماريد اشوفن چهركم بالبيت

سكتوا كلهم وبقوا يبسبسون بين بعض ويضحكون بالسكتة، كضتني الضحكة على حركات سور ونور وهمه يداهرون كرار الضايج.. گمنا البنات شلنا السفرة وغسلنا المواعين بدون حبيبة وضعها مو زين ونفسيتها تعبانة من طلاگها.. اوكات من اعاين عليها انقهر واتأذه حبيبة ما رجعت حبيبة القديمة من يوم انخطبت لـ منتصر لهذا يومها..

-سبأ وينج

انتفضت من سمعت حس تقي يصيحلي من الصالة وذبيت المواعين من ايدي وركضتله وهمشتني من شالي شمس.. صحت مخترعة من حركتها واللتفتت عليها شفتها عاكدة حاجبها بعصبية وراصة على اسنانها..

-انا شحجيت ولج سبأ

-هاا؟ شحجيتي مادري نسيت

-مو كتلج ما تراضي بساع وتاخذين موقف؟؟

-علي التقي: سبأ وينج سبأ!

-سبأ: شمس جاي يصيحلي حبابة خليني اروحله

-شمس: روحي بس لا تترعنين وتستخفين حاجي على كيفج چنچ زعلانة

-سبأ: اي اي صار يلا هديني

هدتني تستغفر ما عاجبها ونويت ارفع راسها وما افشلها، رحتله شفته واكف وبيده الموبايل ووجهه مگلوب..

-شنو ما تسمعين؟

-لا اسمع

-چا ليش هيج تأخرتي

-غير جنت اغسل مواعين

هز راسه وصعد الدرج واشرلي اروح وراه، نشفت باقي الماي الي بيدي بالدشداشة وصعدت فوك، طب لغرفتنا وانتظرني بينما دخلت وسد الباب وراي، راح للميز اخذ باكيت الجكاير وطلع منه جكارة وگال بحسرة..

-سبأ

-نعم

-اريد افض سالفة اهلج تكدرين ترحيلهم اليوم؟

-اي

-يعني ماعندج مشكلة؟ ماريد اضغط عليج

-لا ماهتم

-شنو شبيچ

-شبيه

-شو گوة تسولفين

صفنت منتبهة على نفسي واصلاً چلامي طبيعي جاي احجي نفس كل يوم بس مادري ليش حسباله بيه شي.. تذكرت شمس وحبيبة وكلت هي اجت على رجليها خليني امثل ان صدگ ضايجة واشوف شيسوي..

-تعبانة شوي

-من شنو تعبانة

-ما نمت زين امس

-طبعاً ما تنامين زين غير عايفة فراشچ وركضتي لغرفة ليلة!

-اممم

-سبأ شسالفة!

-شنو

-ما تجاوبين!

-شجاوب كتلي اريدج ترحين لاهلج كتلك خوش بعد شترديني اكول؟

زفر نفس وجاي يريد يجاوبني ودگ موبايله البيده، گلبه يشوف منو وشفت اسم "علي الحـق"، فرك وجهه يستغفر بصوت عالي ضايج وكال..

-نأجل حديثنا عبن حق اجه ويريدني اصالحه ويه ابوي.. تعاي نزلي وياي

-لا ما انزل

-تعالي سبأ شبيچ!

جرني من ايدي غصب عني ونزلني وياه وظل كاض ايدي لحدما دخلنا الاستقبال، من شاف علي الحـق وعبق كدامنا ياله هدني وراح يسلم عليهم وانا هم سلمت عليه وعلى عبق بحرارة..

-سبأ: شونج عبق شخبارج

-عبق: بخير الحمدلله

-سبأ: ضعفانة كلش شبيچ خوما مريضة اسم الله؟

-علي الحـق: هااا قبق هااا؟؟؟

-عبق: اهووو بعد شيخلصني يمعودة ههههه

-علي الحـق: ما ترضى تاكل مورمة گلبي حايرة لو بالموبايل لو تتابع بهالمسلسلات وما ملحكة

عبست وجهها عبق ما عاجبها شلون يحجي عليها وضحك تقي على تصرفاتهم، ضرب زند اخو وكال..

-علي التقي: خايب ما تفرح انا اتوسل بـ سبأ خاطر نتابع شي سوه وما ترضى

-علي الحـق: لا هيج انجلط انا

ضحكوا سوه وعبق تضحك على ضحكتهم وانا كوة ابتسمت، حسيت چلامه بسمار الي چن هو ضايج عبن ما اتابع وياه شي وكلما يعرض عليّ اگله ما احب المسلسلات والافلام..

-علي التـقي: عاين حق لا تتسوفل راح اصيح لابوي خاطر اصالحكم حب رجيلاته ودياته وصير ادمي

-علي الحـق: احبه واراضيه بس بلاوي ما تجي يمي بعلي لو شفتها ادوس بگلبها!

-علي التـقي: علي الحـق ابوك اكيد راح يطلب منك تستسمح منها!

-علي الحـق: ختولي بت العارية انا استسمح من اخت حرملة؟؟

هز راسه تقي ما راضي على سوالف اخوه وعافنا وراح يصيح لعمي علي، كعدنا على القنفات انا وعبق المتوترة وتفرك بيدها وعيونها ما طاحت من الباب وكل شوية هامسة بصوت ناصي..

-علي على كيفك لا تكبر المشكلة ويه ابوك حباب

-خوش خوش

-علي لخاطري فدوة

-خوش عبق افتهمت

سكتوا ثنينهم من انفتحت الباب ودخلوا علي التـقي وعمي سوه، حسيت بعمي جفل مصدوم من شاف علي الحـق بوجهه وهيج افتهمت تقي ما كايل لابوه راح يجيبه خاطر يتصالحون وسواها مفاجئة بس حق ما انطاه مجال يفكر لان رأساً هجم على ابوه وحضنه حيييل واختنگت نبرة حِسه وهو يكول..

-شلونك تاج راسي

-شيخ علي: هلا

-حبيبي ابوي گلبي مفرفح على شوفتك

وخر منه يبوس راسه وايده ونزل يريد يحب رجله وعمي ما رضى كضه من زنوده ورفعه، وكف حق كدام ابوه يعاين لعيونه وشفت عمي يحارب خاطر ملامحه تبقى جامدة بس جاي يفشل لان ابتسامته الخافيها فاضحته..

-شيخ علي: شتسوي جاي هنا انا مو كلت ماريد اشوفن چهرتك بعد

-علي الحـق: عيوني التمساحية اشتاگت تشوف شيباتك بوية

-املصهن عيونك

-فدوة الك

-وادوسهن بنعالي

-وانا ادوسهن وراك يفدنك

-روح ما تمشي عليّ هاي سوالفك

-بوية حطلها ملح و يلا راضيني

-ولك ابن الچلبب قصدك انا ممصخها؟!

-لا حشااك ما اسمحلك تحجي على نفسك بوووية انا الغريب افرك حلگه لو جابك بطاري شون لو القريب حچه...

طگ ضحك من نزع عمي نعاله يريد يكتله وهو راح يشرد بالمنور، ضحكت عبق تغطي حلگها وحق يصيح بـ ابوه من جوه..

-بوية عيييب عيبب مو كدام النساوين لا تضيع هيبتناا

-شيخ علي: اطلعع خليني اچفص بنص هيبتك اطلعع

-ما اطلع

-اطلععع لك ارعن

-بوية زعلت عليك هاي وانا اجيت وحضنتك وصرت خوش وليد بس چنك ما تحب المؤدبين وتريدني ارجع استهتر

-شيخ علي: تعال احاجيك

-ما اطلع هسة تكتلني اخاف

-راح اجيك مناك وعلي

-بوية شبيك انا حامل

ضحكت عبق بصوت عالي وبسرعة ضمت وجهها، عمي علي ضحك على ضحكتها ونزل راسه يستغفر مأيس من خبالات ابنه واشر لـ تقي خاطر يخلي يطلع..

-علي التـقي: هههههه اطلع ابوي انطاك الضوء الاخضر

-علي الحـق: كول وعلي

-علي التـقي: وعلي

فتح باب المنور ومد بس عيونه يباوع لابوه، ذب عمي نعاله واشرله بيده اطلع..

-علي الحق: بوية اذا اكتشفت عندك سلاح ابيض ثاني بعلي ارفع بيك عقوبة

-تطلع لا ارفع روحك من جسمك اطلعع

-راح اطلع بس..

-علي التـقي: شو تعاال

جره من ياخته يطلعه وشمره على عمي ورجعوا تحاضنوا وحق مستمر بالمداهر، خبل ابوه وخلاه يشوط بس بساع يبرده ويصبغ بي وانوب يرجع يشمر عليه حجي..

-شيخ علي: طلعه مناا طلعه اخذي عمي عبق هاي شلون متحملته انتِ بنيتي ما تكليلي شلون

-علي الحـق: تعشگني بوية على عنادك

-شيخ علي: شتعشگ منك چنك گنفذ

-علي الحـق: هاا حجي چنك تغار من عيوني التمساحية

صفگه عمي راشدي على خده وعود بطل سوالفه؟ ابد ولا اهتم استمر وعبق بس كاعدة وتعض بشفتها عود كافي..

-شيخ علي: عمي ماعنده احساس هذا لا تعضيله شفه ولا تهتمين متعود على سوادينه

-علي الحـق: بوية صدگ على طاري السوادين سلاوي بلاوي السوتلنا السحر وكول علي الحـق ما كال

-هم رجعتتت؟؟

-انطيني صبر اجيبلك دليل يخدمك بس صبر اريدن

-ولي بره يلا.. عوف مرتك واطلع ماريد اشوفن وجهك لعبت روحي

-علي الحـق: خوش مع السلامة

-عبق: علي الحـققق وين رايح!

-علي الحـق: جا ابوي طردني شني ماعدنا كرامة احنه

-علي التـقي: من شال عليك النعال وختلت مثل الجريدية ما حجيت بالكرامة

-علي الحـق: مالك غرض انا وابوي نتمالخ نتلاطم نتصايح نتصلخ بيناتنا

نزل عمي شال نعاله يريد يكتله مرة ثانية وطلع علي الحـق يركض من الصالة ويضحك بكل صوته، من صدگ تونست عليهم وعمي علي ابتسامته وضحكته ما غابت من وجهه مبين عليه شكد فرحان بصلحهم ومرتاح..

-عبق: خالة رسمية موجودة؟ اريد اسلم عليها

-سبأ: اي بغرفتها جوه تعاي

اخذتها وطلعنا لكينا علي الحـق بغرفة عمتي حاط راسه على رجليها وهي تبوس بوجهه وخدوده وتغنيله فرحانة عبنه رجع..

-رسمية: وهلا بيك من اجيت.. علاوي شمعة البيت.. هلا بيك علاوي وهلا بيك علاوي

-علي الحـق: زلمتج طگني يمة

-ياا يمة يا يمة سودة عليّ عليك

-سودة على بلاوي اسم الله عليج انتِ يا بعد سلوى واهلها

سوت صوت عبق بالباب ودخلت تسلم عليها وانا عفتهم وصعدت فوك ارجع لغرفتي، اول ما فكيت الباب انرديت ليوره من صار بوجهي تقي واكف.. مادري شبيه ترددت وردت اشرد من الغرفة بس ما خلاني وجرني من ايدي حيل وشمرني على صدره يحضنني ويكول..

-انا اسف

فكيت عيوني مصدومة.. والعباس يمكن بحياتي ما مصدومة مثل صدمتي هسة ومن كدما مذهولة من الموقف كمشت بياخة قميصه وظليت ساندة راسي على صدره ما تحركت..

-انا امس جنت ضايج من شي وطلعت حرگتي بيج وانتِ ما تستاهلين

مسح على راسي وبمسحته جر الشال مني نزعه ووگعه على چتافي، وخرني عنه شوي يعاين بعيوني الضايعة واردف بهدوء وبطئ..

-امس ما كدرت انام عبنچ طلعتي من الغرفة زعلانة ويشهد الله عليّ ما احب ازعلچ لو اضوجچ بشي

نزلت عيوني من عيونه ماعرف شنو لازم احجي وماردت اخرب الاجواء بشي اثول فـ كلت اسكت احسن، رفع حنچي بيده يجبرني اواجه عيونه وگال بأبتسامة خجلان..

-ليش ساكتة؟ لازم بعدج ضايجة وما راضيتيني؟

-لا

-لا يعني تراضينا لو لا يعني ما سامحتك؟

-هههههههه

-هههه ليش تضحكين

-ماكو شي وسامحتك انا

كبرت ابتسامته وحررني من ايده فرحان، فرحت لانه فرحان وفرحت اكثر لان حسيت زعلي منه جان مضوجه وحاز بگلبه مع العلم لو اجي للواقع والله ولا حقدت عليه ولا حتى ضجت منه ومن كثر حبي اله لو ما معتذر مني هم جان سامحته..

-تحبين نروح لاهلج هسة؟

-بكيفك

-چا نازل اجيب السندات

هزيت راسي مبتسمة گلبي متفجره بي قنابل من الفراشات وقلوب الحب، نزل هو وانا اخذت ملابسي وطبيت للحمام اسبح وابدل ورتبت نفسي كلش زين علما كملت لكيته كاعد على الجرباية وحاط بيده جنطة سودة ولابس دشداشة زيتوني سحلني سحل بيها وعيوني الصلفة لزكت عليه ما جاي اكدر اوخرهم..

-ها جاهزة؟

-اي اي.. اي جاهزة

-يلا چا

طلع كدامي وعيوني تركض وراه اعاين لظهره وزنوده المعضلة واوزع ابتسامات، بقيت امشي وراه لحدما نزل وعبرنا الصالة وصعدنا السيارة، اخذت الطريق كله ابوگ منه نظرات واگرص بيدي اعاقب نفسي خاطر اثگل بس اوقات صلافتي ماكدر اتحكم بيها وهاي بس وياه هيج والله..

-شبيچ سبأ

-شنو

-شبيچ كل ساع تعاينيلي بيه شي؟

-انا؟

-اي انتِ

-لا ما عاينت

-لا كل ساع تعاينين حتى شكيت بروحي شنو اكو شي على وجهي؟

فتح المراية الامامية مالته وهو يسوق على كيفه، صار يعاين لوجهه منها ويعدل حواجبه وشواربه وعين على الشارع وعين على المراية..

-ما منتبه هاي حواجبي شو متخربطات چا ما تنبهيني

-ها مادري

-من غسلت وجهي تخربطن

-اي

-شلونچ انتِ خوما متوترة؟

-لا

-شوكت تردين ارجع عليج؟

-بكيفك

-فد ساعة؟

اللتفتتله بكل جسمي وبدون لا احس صحت..

-بس ساعة!!

-ههههههه يمعودة على كيفج جاي اسألج

-لا حباب عوفني يمهم اريد اشوفن امي ورهف

-صار بعيني

-من اكمل ادگلك من موبايل امي

هز راسه موافق وفهمني شنو لازم اسوي، انتبهت للجنطة السودة النزلها وياه جانت جنطة نسائية حطها بحضني وكال..

-كل السندات موجودات هنا ومثلما اتفقنا سبأ لا ترتبكين ولا تتوترين

-امم

-ادري صعبة عليج تلفين مشكلة لاهلج بس تره اهلج متورطين من اول وبدون لا نسوي هاي فيكة السندات ومادري شنهي اكدر اسجن اخوج وبكل بساطة

-چا ليش تريدني اخذلهم السندات وانتَ تكدر تسجنه بدونهن

-سبأ حكم السرقة يختلف عن حكم المخدرات والممنوعات ذنيج يخيسنا بالسجن هاي اذا ما انحكم مؤبد السرقة ياخذله چم سنة يتأدب بيها ويطلع واذا ابوي تنازله خوب بعد غير شكل

سكتت متفهمة بس والله يصعب عليَّ ادوهن حال اهلي واخربط حياتهم، بالبداية جنت ما اهتم واكول طز بيهم يستاهلون بس كلما جاي نتقرب من بيتهم كلما گلبي جاي يرف عليهم واحس ماريد اسويها بعد..

-سبأ

-كول

-انتِ راح تسويها مو؟

-ان شاء الله

كلتها ودرت وجهي للجامة اعاين للطريق وهو چلمة ما حچى بعد، طبينا لفرع بيت اهلي وسفط بالباب وكال..

-انا انتظرج هنا

-لا روح خاف اتأخر

-لا ماعندي شي ابقى هنا انا

-لا تقي روح

ضرب على الستيرن ضايج ونزلت من سيارته عايفته وحده، ضميت الجنطة جوه عباتي وكلشي بگلبي وعقلي يكول سبأ لا تبيعين اهلج لا تسويها، شتكولين للناس باجر عكبة انتِ السبب بموت امج من القهر وسجن اخوتج؟

تمشيت لباب البيت ووكفت كبالها اعاين لضخامتها ولضخامة بيتنا وجماله وفصاله وبنائه الحديث واللوانه التفتح الگلب بس كل هذا غلاف.. كله جذب بجذب برگع ابوي مبرگعه يضحك على الوادم ويخدع ابصارهم يخليهم كلما يعاينون لبيتنا يكولون هنيال العايشين بي وهو العكس تماماً..

رفعت ايدي الترجف ودكيت الباب على كيفي حيل مابيه، اللتفتت لسيارة تقي شفته بعده واكف منتظرني، تنهدت تعبانة ورجعت دكيتها اقوى وجان يفتحلي الباب اخوي سالم..

-سالم: هاي شجابج انتِ حسبالي زيد رجع

-سبأ: لا هاي انا

-شكو شعندج؟

-اجيت ازوركم

-والسندات وين؟!

-خليني افوت تقي واكف بره ماريده ينتبه علينا

هز راسه سالم ما عاجبه وفوتني جوه، عبرت الساحة برجلين كوة شايلتني وطببني من باب الاستقبال مو من باب المطبخ..

-طبي فضيني

-وين امي ورهف؟

-مو هنا

-صدگ والله؟؟

-طلعي السندات وخلصيني

-ما اطلعهن الا اشوف امي ورهف

فزيت من انشمرت على القنفة براشدي صفر اذني من قوته، طحت عليها مختل توازني وحطيت ايدي على خدي الحار خايفة..

-لج **** هم صاير عدج لسان لو هذا ديوثچ منطيج مجال؟؟

فكيت عيوني ورفعت راسي اله بعدني ما فتحت حلكي بچلمة ثانية وانلطمت مرة اللخ على شفتي وكضني من رگبتي يعصرها حييل بين ايده ضاع نفسي..

-السندااات وين؟؟؟

-سـ.. سـ.. سالم.. سالم

-بالعباس ابو فاضل سبأ اذا طلعتي جاي تلعبين وياي اكتلچ وادفنج هنااا جوه رجلي ولج السندااات وييييين

اشرت بعيوني الذبلت على عباتي ياله هدني، كضيت صدري وركبتي اكح بكل حيلي روحي حسيتها رادت تطلع وعيوني نطت من وجهي، .. ما اهتملي اخوي ولا اهتم لحالي وفتح عباتي وجر الجنطة الضامتها جوه..

ارتاحيت شوي ورجعلي النفس وانتبهت لـ ابوي واكف بباب الاستقبال يعاينلي من بعيد وسلطان واكف بصفه، خفت من نظرة عيونهم الشرانية وكمت من القنفة بساع ابتعد منهم..

-سبأ: كلشي موجود بالجنطة كللشي والله كلشي

-مسعود: متأكدة؟

-سبأ: اي وداعتك يا بوية

-سلطان: چا شيخ علي ليش لهسة عايش؟

-سبأ: يعني شني

-سالم: يعني يا خيتي الچلبة انا جبتلج ابرة تكتل علي بمچانه وما يصبحله صبح ثاني بس عجيب محد جابلنا خبر موته؟!

-سبأ: مـ.. مـ.. ماعرف.. ماعرف ماعرف انا سويت.. سويت كلشي كتولي عليه

-مسعود: شسويتي بالضبط؟!

-سبأ: رحـ.. رررحت رحت لغرفته ودجيت الابرة بي وبگت السندات

-سلطان: ومرته وين جانت؟

-سبأ: ماعرف.. ماعرف ما جانت وياه بالغرفة وحده نايم لان بالاساس سلوى صايرة ما تبات وياه بغرفة وحدة

-مسعود: امممم هاجرها يعني

-مادري بعد

-سلطان: يعني الخِلة منك سالم يا مطي! الابرة ما موتته وانتَ خبصتنا خبصص تكول جبتها من اكبر تجار المخدرات وينها؟؟ وين فائدتها؟؟ هذا علي العاار بعده على رجليه؟؟

-مسعود: اسكت انتَ مو وكتها هسة المهم السندات يمنا وعاين سالم من باجر تروح انتَ وزيد تصرفوهن وتدفعون للديانة

-سالم: هو وينه زيد ما رجع

-مسعود: وين ولى هالخنيث؟!!

-سالم: مادري تسألني الي

-سلطان: هسة يرجع بوية لا تهتم واذا ما رجع انا اطلع اجيبه واسحله حدر رجليك

-مسعود: خوش.. وانتِ سمعي ترجعين لبيت زلمتج تقنعي يساعدنا بمعارفه لا يظل متنحس علينا احنه المن منطي مرة؟؟

-سبأ: اي صار

-مسعود: يلا ولي طلعي

-سبأ: بوية اريد.. اريد اشوف امي واختي

-مسعود: ولي ماعندج ام واخت يلا بررره

-سبأ: والله حرام عليك بوية

-سالم: الظاهر جلدج يحكج انتِ تعاااي

ما انطاني مجال ابرر وملشني من الشال وصفگني راشدي وره راشدي وره راشدي احس راسي انسطر وعيوني بعد ماشوف بيها، صرت ارفس جوه رجله وابجي واتوسل بي يعوفني وتكابلوا عليَّ هو وسلطان وابوي واكف يتفرج علينا..

-سبأ: خلووني ارووح ماريد اشووف احد ماااريد بس خلوني ارووح ابوس ايددك يابوية

-سالم: انچبييييي سكتييي ماريد اسمع حسچ

رفسني برجله شاغت روحي، صحت واحس گلبي يريد يوكف من شالني من عباتي سلطان يوكفني كباله ورفع ايده يريد ينطيني بوكس ينهيني وماعرف شلون كدرت افلت نفسي من ايده وشردت بره، طلعت من بين ايده وعبرت الساحة عايفتهم وراي يصيحون ويفشرون عليّ وفتحت باب الحوش وانهزمت اركض من البيت مثل المسودنة..

وانا اهرب شفت سيارة تقي باقي على وكفته بره، بجيت بحس مبحوح وركضتله بدون حذاء حافية وشمرت روحي شمر على سيارته، فتحت الباب وطبيت اشهك بكل صوتي وابجي..

-سبأ شبيييج شصاار سبأ؟؟؟

-اطلعع تقي اطلععع مناا

صحت مخترعة من انضربت جامة سيارته من جهتي جاي اخوي سالم وكاض بيده سچين يهددني بيها، تقي شافه هيج وتخبل فتح الچكمچة اليم رجلي وطلع مسدسه يريد ينزل من سيارته يتعارك وكضيته كوه بثنين ايدي ارجعه..

-لاا تقي لاا بداعة ابووك بداعة اختك بداعتي لا تروح لاا

-هدديني سبأ هدددينييي

-تقي لاا تسويهاا مخابيل اخووتي كلهم هنا هاي خطة منهمم

-هدينييي

-لاا تنزل لا يكتلوووك

دفعني بكل قوته ضربني على الجامة ونزل لـ سالم، تخبلت ظليت اللطم على وجهي من شفتهم تكامشوا وطلعوا من البيت بقية اخوتي سلطان وعاصف وغفار ورزاق.. كض تقي سالم ومطله بالكاع ورفس اخوي بوجهه رفسة ضيع علومه بيها..

-غفار: ياااابن العاااار

هجم غفار عليه من جهة ومن الجهة الثانية عاصف وسلطان ورزاق نزل يساعد سالم، انهاريت متتت بدمي من شفتهم كلهم على واحد مستحيل راح يكدر يفلت نفسه منهم..

-سلطان: اذبببحك من الوريد للوريددد وخلني اشوف زلمةة يطلع وراك

استجمع قوته تقي بكل ماعنده من طاقة ودفع بس عاصف عنه عبن هو الجاي يتعارك وياه يريد ياخذ السلاح من ايده بس تقي مچلب بي مثل روحه واكثر، ضرب عاصف بنص صدره بوكس خلاه ينرد ليوره ورفع ايده الشايلة السلاح وضرب طلقات فوك بالهوا وحدة وره الثانية خلاهم كلهم ينردون ليوره..

-غفار: نزل سلاحكك جباان

-علي التـقي: والزهرة ام الحسنن شاربيي ازينه اذا ما سحلتكم يا ولد مسعود العار!!

-غفار: انچبببببب لك *********.......

نزل عليه فشار ومسبات وهجم مرة اللخ يريد يتكاتل وياه وكضوا عاصف ورزاق خايفين من السلاح الي بيد تقي لا تضربهم بيه، هز راسه زلمتي متحلف بيهم وعافهم وصعد السيارة وانطلق بينا نطلع من فرعنا يرجعني لبيتهم..

الطريق كله ايدي على كلبي وابجي وهو الوجه مكلوب وغادي دممم، ما طول دقيقة ورجعني للبيت وسفط السيارة ينزل منها ركض اجه على جهتي فتحلي الباب واجه نزلني بس كلشي يسوي بسرعة بسرعة، كضني من ايدي وطببني وياه للحوش وراد يطلع مرة اللخ..

-وين رايح ويين

-هسة راجع ما اتأخر

-لا حباب لا تروح الله يخليك لا تروح تقي

-سبأ ما اتأخرررر

هد ايدي وطلع من باب الحوش بساع يركض وعافني بالضيم اللوبن عليه، دخلت جوه للبيت واستقبلتني عمتي والبنات وانصدمن من شافن وضعي وحالتي كلتلهن رحت ازور اهلي وكتلوني وتكامشوا ويه تقي خليت عمتي تفرفح عمت عيني..

ما استحملت نظراتها التوجعني وصعدت اشرد فوك انتظره بالغرفة، نزعت العباه والشال شمرتهم وظليت اراوح بمچاني اروح واجي اروح واجي وعقلي وگلبي وكلشي بيه يريده ويفكر بي..

صعدولي البنات بس طاقة ماعندي ماكدرت حتى اسولف وياهن شي بقن كاعدات يمي والدقيقة تجر دقيقة روحي تطلع ويه كل لحظة تمر وهو بره.. مرت اكثر من ساعة ياله سمعت صوت رجلين تصعد الدرج ركضت حطيت الشال على راسي وفتحت الباب بلچن يكون هو و....

-علي التـقي

صعد تعبان ويذب حسرات، انهاريت وانا اشوف رگبته مخرمشة ومتدماية وقميصه ممزوگ ما استحملت احس روحي راحت ركضت عليه وحضنته بثنين ايدي مچلبه بي وابجيي مفرفحة روحي خايفة ومهدود حيلي..

-مابيه شي سبأ ما صار شي بوية عدت

حاوطني من خصري يرجعلي الحضن ويسولف وياي على كيفه، صوته ناصي واحس بأيده تصعد وتنزل على ظهري يمسح عليه..

-احم سبأ

وره ما حمحم انتبهت لروحي كاضة الرجال من خوانيگه راح اكتله والمشكلة استحي اوخر عنه واستحيت بالزايد من همس بصوت ناصي كلش بأذني..

-العربان كلها هنا سبأ صرنا فرجة

هديته بساع واللتفتت اعاين اشوف البنات كلهن واكفات، ليلة صافنة وتمص بليمونتها وتَـمني واكفة وحاطة ايدها على كلبها وعيونها تطلع كلوب وشمس واكفة مبتسمة بفخر چن جاي تكول تدريباتي وخططي نجحت وابرار وعبق كلساع يرفعن عيونهن يعاينن علينا وينزلنها مستحيات..

-علي التـقي: من رخصتكم

وخرن بساع عن باب الغرفة وهو طب، بقيت واكفة بره امسح بدموعي وجامدة ماعرف شتصرف..

-شمس: روحي وراه ولج

-سبأ: ليش

-ليلة: يا سبأ وداعة هاي الليمونة اذا بقيتي واكفة هنا كدامي چنچ عجل خايف اتبره منج

-سبأ: يعني افوت؟

-البنات كلهن: اييييي

ضحكت بين دموعي متحمسة ونويت اروح وراه، فتحت الباب على كيفي ونزيت من شفته واكف بوجهي ضبط.. شردن البنات يتراكضن من عرفنه واكف قريب من الباب معناها سمعنا وانا صرت بنص هدومي ماعرف وين انطي وجهي..

-علي التـقي: اتفقن عليَّ فتيات القوة؟

-لا لا منو ذني لا

ضحك وانطاني ظهره وراح لاتجاه الحمام، تنهدت احط ايدي على راسي تعبانة وگمزت مخترعة من اللتفتلي بحركة سريعة وگال..

-شلونچ

-زينة.. زينة

-شنو شبيچ تلهثين

-مو اخترعت منك شبيك

ضحك مرة اللخ ودا اتفاجئ من ضحكاته المتتالية يمة شبي هاي وهستونا طلعنا من عركة مو مال ضحك وونسة..

-نتابع فلم سبأ؟

-لـ.. اي عادي اتابع

-صدگ؟؟

-اي

-كولي والله يعني عادي تابعين وياي؟

-اي والله اتابع

-چا تعااي

جرني من ايدي بحركة سريعة وشمرني على الجرباية، جفلت مخترعة من حركته وهو راح على جهته من السرير وكعد متربع هو ودشداشته، جر الحاسبة حطها كباله واشرلي اتقرب..

-تعاي خاطر تشوفين زين راح افتح فلم يخبل

-تمام

تقربت شوي منه بدون لا اطخه بس مستغربة ما سألني شصار ولا استفسر مني انطيتهم السندات لو لا كلشي ما حچى وياي بخصوص الموضوع وعلگ الفلم على الحاسبة..

-تعاي تقربي شون تشوفين هيج

-جاي اشوف

-تعاي تعاي

جسمي كزبر من سحبني عليه لدرجة ظهري ضرب بركبة رجله، كعدني كباله ضبط واحس بگلبي راح يوكف ما جاي اكدر حتى اتنفس خصوصاً من بده الفلم وحسيت بأيده تنلف عليَّ ويحطها على بطني..

-تچي نفسج عليَّ لا يوجعج ظهري

-لا.. عادي

-يوجعج تعاي

خلاني اعدل گعدتي شوي بس ماعندي الجرأة اتچي نفسي عليه ماكدر، ما جاي استحمل احس اريد ابجي من الخوف والسعادة والحماس والتوتر كلها اجتني هسة..

-اگلج

-ها

-هاي انتِ جاي ترجفين لو اكو هزاز بالفراش؟

-لا لا مو انا

-شو عايني عليَّ

رفعت راسي اباوعله وكضني من حنچي مثل عادته يجذب نظراتي يخليني احط عيني بعينه، ابتسم يداعب خدي وكال..

-ليش ترجفين سبأ؟

-هاي مو انا

-صدگ؟

-اممم

-شو خليني اتأكد

غمضت عيوني حيل من نصى عليَّ وباسني على خدي بوسة مطولة، عصرت الچرچف الكاعدة عليه بيدي اسيطر على رجفتي لا اهزه وياي من قوتها وحسيت بروحي راحت من باسني بالخد الثاني، ضحك يمسح على شعري وهمس بيني وبينه..

-صار اكثر من شهر اتمنى نكعد هالكعدة

-يعني شنو

اخذ نفس غميج وسرح يعاين عليّ، ابتسم ابتسامة جديدة ما شايفتها على وجهه من گبل وهمس بنبرة حنونة يجاوب..

-يعني.. نكعد هيج سوه انتِ بين ايدي واعاين لعيونج المتروسة رموش وابوسن خدج.. تاخذنا السوالف بعييد وتسولفيلي شنو تحبين وشنو ما تحبين وشنو هي امنياتج خاطر احققها

-انتَ شنو امنياتك

سألته من العدم وماعرف ليش لفت السؤال عليه، ضحك يفر بعيونه على كل وجهي وشعري وللغرابة الشديدة سكنت وهدأت لا خايفة ولا مرتبكة ولا عندي تردد وخجل اريد اسولف وياه للصبح واسوي كلشي يتمناه..

-ما جاوبتني

-تردين تعرفين امنيتي؟

-اي

-امنيتي بيت ومرة احبها وجهال صغار يلعبون بالحوش وامهم تركض وراهم وتتعب عليهم ومن يجي الليل تجيني تلبد بحضني وتگلي جهالك والشغل تعبوني! وانا اجاوبها يخسى الشغل يا ام فلان لو جاس التعب عيونج

ابتسمت على جمال أمنيته وسرحت بعقلي بعيد افكر بيها، رجعني وياه من باسني بطريقة خلت گلبي ينبض بجنون وهمسة همسها بأذني خلتني اذوب..

-تحققيلي امنيتي سبأ؟ ترضين احبچ ونجيب فلان وفلانة ونشوفهم يلعبون ويكبرون بحوشنا الصغيرون؟

غمضت عيوني مبتسمة وراضية.. كل خلية بجسمي تصرخ اني راضية بيك يا علي التـقي وراضية بحبك وحنانك وهمساتك ولمسات ايدك الحنونة.. راضية تكون حب طفولتي ومراهقتي وشبابي ولحدما يدفنوني.. راضية بگلب وعقل فارغ من كلشي وما تارسه غير خيالك، راضية استسلم بين ايدك بهاي اللحظة وابدي وياك من هالدقيقة بداية جديدة، بداية جانت اول جملة تنگال بيها هي...

-علي التـقي: الله يشيل عدوچ شلعتي افادي، خايبين مو شعر ضيييييم............

"شحلات الناس لو كلهم يشبهونچ؟ گلبچ، طيبتچ، لونچ وحچي عيونچ.. ♥️"

**

-ابا الحسن!

اللتفتلي مخلوس چن لگفته جاي يبوگ من الغرفة ولا عبالك هاي غرفته الصارله شهور محرمها عليه وما يطبلها ما دامني موجودة بيها..

-ابا الحسن علي: اجيت اخذ شي ضروري منا واطلع

-ليلة: هاا

وكفت على صفحة يم الكنتور اعاينله من بعيد يدور بين المجرات على شي ومبين مهم بسبب حركاته السريعة، كحيت وسألته بهدوء..

-على شنو جاي تدور

-فدشي

-لا صدگ!

-والله

-هاا، چا دور الفدشي بذاك الميز يجوز تلگاه

هز راسه مقتنع من كل عقله وراح يدور فوك الميز المكوم عليهن اوراق وفايلات ابد ما اتدنى عليهن ولا اگلب بيهن، چان عندي امل هو يصعد للغرفة يصفي اغراضه بس ولا سواها طول ما انا هنا ما سواها..

-بشر؟

-ماهو

-چا شني من فدشي وكح هذا

ما اندارلي ولا جاوب انقهرت على نفسي وعلى وضعنا وظليت اعاين عليه منصي يدور بالاغراض ومن كدما ضايجة منه اجتني فكرة اروح اطفر على ظهره وافطسه بمچانه بس تراجعت عن الفكرة من تذكرت انا حامل..

بس لحظة.. انا حامل! اي اي ولج انتِ حامل فكري على هالاساس ايي، رحت بخطوات سريعة للكنتور وگنبصت اسوي روحي جاي ادور بين الفايلات الضامهم هنا وانداريت عليه اشوف شنو جاي يسوي، لگيته ما منتبه عليَّ ولا يمه ولا چن شافني اجيت ادور بسيطة يا ابا الحسن..

-ااااخ ااااه ولجج يمة ااااه

اندار على صوتي فاز وشمر الجان بين ايده واجاني يركض ومن استعجاله صعد فوك الجرباية يركض عليها يجيني ما فكر يدور حولها..

-شبييج ليلة شبييج شصاير ولج شبييج

-اااه يمممةة الفررخ يمممة وليدي رااح يموت ااااه

-ولج شكووو شصار احجييي

-اااه يا يمة يا بعد روحيييييي يا بعد عينيييييي يا بعد چلاووييييي وليداتييييي

-نعله عله شرفي احجيييي

-انا شرفك احترم نفسك ولك

-شبيچ ولج احجيي

-جنت جاي.. ااه.. كنبصت واجيت جاي ادور بين الاغراض وكمت بحركة سريعة واحس اااخ يا يمة اااخ راح اموتن

-خررب ولج مسودننة شلون تسوين هيج شلوون تعاي تعاي سندي روحج عليّ خلينا نروح للطبيبة

-لا لا هسة اصير زينة

-انچبييي وسندي روحج عليّ

-احترم نفسك عيب هسة الطفل يتعلم

-چا گومييي

-شيلني انتَ خايب ماكدر

نصى بسرعة عليَّ وشالني من الكاع وركض بيه يريد يطلع وكمشت بباب الكنتور ما اخلي يطلعني من الغرفة..

-ولج هددددي

-مااا اريد طبيبة مااريددد

-هدددي چنچ بريعصي لاطش هددي

-ما اهدددن

-ليلللة لا يموت الفرخ شبييج

-صرت زينة والعباس ابو فاضل

-ميخالف نروح نتطـ...

-ماريد اتطمن خليني اتمدد هسك ارتاح

زفر نفس ضايج كلش واخذني للجرباية مستسلم، مددني على الجرباية وعدل المخاد الوره ظهري وجر اللحاف السفطته گبل نص ساعة خاطر يغطيني بي..

-ليلة: والكعبة ما اسفطه بعد انتَ تعدله

-اسفطه ميخالف بس سكتي

-خوش

-شون صرتي

-احم صرت زينة لا تخاف

-خليني اخذح للطبيبة نتطمن يا ليلة

-لا لا زينة انا هذا فرخي كلشي مابي شحلاته

-اويلي يا ليلة شسويتي بحالي

-يلا ميخالف هي هاي الدنيا هبطات

فرك وجهه ضايج وكام من الجرباية يريد يعوفني ويروح، انخبصت وكضيته من ايده بسرعة وكلت بدون لا احس على روحي..

-اااخ

-تره انتِ كاضتني مو انا

-قصدت.. قصدت ااخ يعني راح يجيك.. شسمه.. راح يجيك اخ

-شنو راح يجيني اخ

-اي شبيك راح يجيك اخو

-امي حااامل؟؟؟؟

-لااااع يااا شبيك شنو حامل شلون تحبل اصلاً وهي بهالعمر

-چا شني

تنهدت ضايجة وذبلت عيوني تعبانة، مسحت على وجهي ونزعت الربطة ذبيتها على الجرباية وكلت بغصة..

-راح يجيك ولد

-انتِ حامل بولد!

-اي

نزلت دمعتي الماعرف منين طلعت بس كلش مقهورة مو شلون ما جان مقهورة منه، تمنيت ما اگله انا حامل بولد بهالطريقة تمنيت نكون زينين ويه بعض واحجيها وانا فرحانة..

-رحت للطبيبة وبالسونار كالت طلع ولد

-الحمدلله والشكر شنو يجي من الله يا محلاه

-الحمدلله

-لا تزعلين ليلة رزق ربج هذا

-اي

-ادري انتِ تردين بت وتحبين البنات بس بعد...

-شنو؟؟

-ادري بيج ضايجة عبنه ولد مو بت بس بعد رزق هذا

-لا! لا لا مستحيل اضوج على هيج شي انتَ شتحجي كله خير وبركة ولد بت كلهم حلوين وينرادون اهم شي تمامة الخلقة

-عفية عليج

-انا زعلانة عبن.....

گطعت چلامي على صوت علي الكـرار يصييح صياح من جوه، يصيح بصوت وصل لغرفتنا وخلانا انا وابا الحسن نطفر نركض نشوف شبي.. طلعت تَـمني من غرفتها وطلع تقي من الغرفة يلبس بدشداشته ونزلنا الدرج كلنا نتسابق ونسمعه يكول..

-هسسسة ترحييين تخطبيهاا الي يوووم هسسةة

-رسمية: صخام الصخمني ولك وين نروح بهالليل

-مااا يهمنيي هسسةة نرووح نخطبهاا!!! ما تشمرين بيه بعددد ولللج يممممة ترديهااا تروح من ايددي؟؟؟ والعبااااس اللعب جوولة لبسيييي عباتج وامشييي نرووووح.....

يتبع 👑...

━━━━━━ ♛ ━━━━━━

امشن نروح على الواهس 🙆🏼‍♀️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

گلي شبَعد شتريد؟ الردته اخذته!

كونك نويت تروح خليها سكته

تنشد على الجتال والجاتل انتَ!

━━━━━━ ♛ ━━━━━━

"حــبيبة"

ركضت للديوان ارجف تخبلت من سمعت صوت صياح امي جاي من جوه وصوتهم وهمه يكتلون بيها، فتحت الباب على وسعها وتسودنت وانا اشوف ابوي مملخها تملخ وجاي تشاهد بين ايده..

-بوووية لاااا

شمرت روحي عليها كون الكتل يصير بيه وهي ختلت بظهري تبجي وتنوح، كضت ملابسي من وره حييل تستنجد وتكول بصوت عالي..

-لحگينيي حبيبة لحگي اممچ يا يمة

-الامـير علي: حبيبة وخرري من هالچلببة وخرري

-حبيبة: ماا اوخر عوفوها لييش بوية لييش تمد ايدك عليها انتَ مو معلم اخوتي الحرمة ما تنطگ؟؟ مو گايللهم عيبة الزلمة يمد ايده على مرة!

-شيخ علي: ولج عاايني شلون تدافعلج عااايني چان غزرر بيج

-سلوى: حبيبة امج لا تخليهم يطگوني حبيبة

-علي التـقي: والله حراام عندج بت مثلها حررامات عليها حرامات!!

جرني منها تقي جر وما رضيت اوخر چلبت بأمي بالزايد وحضنتها لصدري احافط عليها منهم..

-رسمية: ولج وخررري ما تستاهل هااي وخرري عنها

-الامـير علي: بعليي يا حبيبة لو ما هديتي امج تنطگين وياهة!!

-حبيبة: طگوني!! طگوني بس عوفوهاا تقيي انتَ مو دگيتلي صدر وگلت تحلها؟؟ مو گتلي ما نسويلها شي ونساعدها لييش خلفت بوعدك لييش؟!

-علي التـقي: عبنها ذبت الصوچ بـ...

-شيخ علي: اسكتتتتت تقييييي واخذ اختك بررره

-رسمية: ليش يسكت؟؟ خليها تعرف امهاا شنو لا تضم عليها ماا تستاهل هالحبيبة هيج ام نذلة!

-حبيبة: فهموني شصاير!

-شيخ علي: طلعي بوية لا تبقين هنا!!

-حبيبة: ما اطلع بدون امي!

-الامـير علي: حبيبة امچ...

-شيخ علي: طلعيييي واخذي امچ وياچ!!

اللتفتوله امير وتقي ثنينهم مبحلگين عيونهم مصدومين بس ما اهتميتلهم وگومت امي وشردت اطلع بيها من الديوان وركض اخذتها لغرفتي فوك، قفلت الباب علينا واللتفتت عليها اريد افتهم بس فاجأتني من طاحت على رجليه وكالت وهي تشهگ..

-سلوى: انجبررت والله انجبررت حبيبة انجبرت اچذب عليهم ما چان بيدي شي اسووي

كعدت بالكاع يمها اوخرها عني بس ما ترضى خبلتني فوك خبالي، گوة جريتها وگعدتها على حيلها اريد افتهم شنو صار جوه..

-يمة لا تبجين وفهميني الصار

-ااااخ يا حبيبة ااخ كلهم ضدي كلهم

-انا وياچ يا رويحتي وياچ لاخر نفس بس لا تبجين

-لا لا ما اظل هنا والله ولا الي گعدة بهالبيت بعد

وخرت مني وكامت فتحت كنتوري وجرت عباتي وشال جديد مني لبستهم زين ولفت روحها بالعباه بس كلشي بيها يرجف ايدها ما تثبت وخطواتها مو رزنة..

-سلوى: انطيني فلوس يمه خليني اروحن

-وين ترحين!

-لبيت اختي ما اظل ببيت هانوني بي

-يمة حبيبتي يا اخت ما تگليلي يا اخت يرضى زلمتها تكعدين وياهم

-اختي نهى چا مو واگفتلها طول انا!

-خالتي ام شمس هم حال الضيم حالهم يا دوب مدبرين عيشتهم ماريدج تنذلين يم احد يوم

-ما انذل حبيبتي انطيني فلوس وخلشوف ياهو يذلني

-چا ما راح تفهميني الصار جوه؟

-انطيني الفلوس وافهمج خليني اجرن نفس

-روحي غسلي وارتاحي بينما اجيبلج من ابوي

-لااا لاا وين رايحة شني من ابوج چا ماعندج هنا انتِ؟؟

-عندي بس خاف ما يكفوچ

-لا يكفون

رحت للكنتور وطلعت من جنطتي كل الموجود بجزداني حطيتهم بيدها وضمتهم بمخبأها السري وعافتني وراحت للحمام تغسل وجهها، شوي وطلعت مغسلة وفچها يرجف..

-يمة يلا سولفيلي رااح اموت!!

-اسولف شمالج خبصتيني هاي فوگ ضييمي!!

سكتت ميتة قهر اريدها بس تحجي وهي تماطل راح انجلط، وكفت كدام المراية تعدل الشال وكالت بصوت ناصي شي بس ما سمعته..

-حبيبة: شگلتي؟ ما سمعت

-اهوووو حبيبة انا روحي طالعة لا تصيريلي فاهية!!

-علّي صوتج يوم غير افتهم!

-عايني.. انا.. انا انجبرت وداعتج يا يمة انجبرت

-على شنو!

-وانا ما حجيت هيج الا وانا اعرف ابوج واخوتج ما يسوولچ شي ولا يأذوچ بالعكس يساعدوج ويبررولچ الصار انا متأكدة بس اذا ظليت ساكتة على روحي يذبحوني والله! همه انا حجيت هيج وروحي رادوا يطلعوها

-شحچيتي يما!

-هاي صوتهم اجوا؟؟ هاي صوت ابوج يصيحلج؟!

-اي صوته اي بس حاچيني شگلتيلهم خليني افتهم!

-لا لا حبيبة ما اللحك ما اللحك هسة يحبسوني هنا وما يخلوني اطلع انا رايحة يمة انتبهي على نفسج

-يمممةة

ما اهتمتلي وفتحت الباب وطلعت من الغرفة وركض على درج السطح صعدت، رحت وراهة بس ماعرفت شنو سوت لان ثواني ما طولت ونزلت مرة اللخ ما لحكت اشوف شبيها وشعدها فوگ.. نزلت الدرج تركض وراحت لغرفة تَـمني القديمة، ركضت وراهة وشفتها فتحت الشباچ ومدت جسمها تنزل من الدرج المتصل بي..

-يمة لا تخبلينيي شنو طالعة هيج مثل الحرامية حسبالج ما يلگوچ!!

بچت بدموع حارة ومسحتهم بالشال، حضنتني لجسمها وشددت عليَّ تبوس براسي ووجهي وتعتذر بس على شنو تعتذر مادري ما جاي افتهم شي، وخرتها مني كاضة بيدها حييل اعيق حركتها ما اهدها اليوم الا افتهم..

-يمة ما ترحين ماا ترحين گبل لا تفهميني!

-احبج بنيتي والله الصار غصباً عني الله يوفقج ويسعدج يا حبيبة وانا راضية عليج دينا واخرة

خنگتني العبرة ودموعي تجمعت بعيوني حسيتها جاي تودعني، دموعها تهمل على خدودها وخشمها وخدودها صايرات حمر واثار الطگ على وجهها مبينة.. حضنتها بكل حيلي اشدد عليها وتوسلت بيها تبقى..

-انا وياچ يوم لا تخافين انا وياچ انتِ راح ترجعين حبيبتي

-وراسچ يا يمة ونظر عيني وسهر ليلي عليج انجبرت اسوي شي ما رايدته وندمانة بگد شعر راسي بس مو بيدي

-يوم..

-روحي يا حبيبة كون الله يحفظج ويرعاچ يا يمة ويعوضج خير ويستر عليج ويرزقج بزلمة يستاهل طيبة گلبچ يا بعد گلبي

وخرتني عنها بحركة سريعة وشالت ذيال عباتها ونزلت تركض من الدرج، گلبي طاح من شفتها شون تنزل سريع خفت عليها تعثر وتطيح بس الحمدلله نزلت وراحت تسحب للطرمة الثانية تطلع مناك..

عفتها.. عفت امي وما نزلت وراهة يجوز طلعتها من البيت راح تهدي الاوضاع وتحافظ على حياتها بلچن ابوي يلگه حل ويرجعلي امي، مسحت دموعي الما جاي توگف وفركت صدري اليوجعني ونزلت جوه شفت الوجوه مگلبة والبيت مشتعل الامير يرفع وتقي يكبس وابوي كاعد على القنفة منزل راسه وساكت..

-الامـير علي: هسة اصعد اصلخهاا صلخخ هالبرب** بووية لا توكف بوجوهناا لا توووكف

-علي التـقي: انا ما جاي افتهم انتَ ليش ساكت؟؟ بوية هااي لو عفناها ببيتنا تنزل راسنا! اتبره منهاا وخلصنا عااد!

عافهم يتصايحون واخوتي الباقين ما مفتهمين شكو، رفع راسه الي ومدلي ايده وكال..

-شيخ علي: حبيبة تعالي لابوچ

هرولت عليه بخطوات سريعة وكعدت حده ضبط، حاوطني بين ايده يحضني ويمسح على راسي ويبوس بي، ذبيت روحي على صدره ونزلن دموعي الحاولت ما اطيحهن گدامهم..

-شيخ علي: كل الكون بچفة وانتِ بچفة يا بوية

-حبيبة: بوية لا تحارب امي.. ادري هي غلطت بس لا تأذيها فدوة امي ماعدها غيرك

فزيت على صوت لطمة الامـير علي على رجله حييل، رفع ايده عليَّ وگال محترگ..

-عااين شلون تدافعلهااا ولك بوووية هااي الچلبة تسكتلها؟؟؟ حرااام والعباااس حررام

-شيخ علي: امير كافي

-الامـير علي: شنوو كافي؟؟ شنووو بوية تحجي صدگ انتَ!! شمالك ملجمم لسانك شبيييك

عافنا وطلع منا غادي نار كبرة، اخذ دوره علي التـقي عصب وگلب البيت وراه واخذ سبأ وصعد بيها الدرج وگبل لا يختفي عن عيوننا رفع اصبعه وگال بنبرة قوية..

-انا اعرفك خايف على حبيبة وخايف لا تنجرح بس انتَ بهذا تصرفك راح تعم على الكل!! على كل هالبيت وعلى سمعتنا وسمعة بنياتنا! الجاي تسوي غلطط بوية غلط!

كض سبأ من ايدها وجرها وراه يصعدون والباقين ظلوا يتسائلون ومن ما يشوفون احد يجاوبهم عصبوا وربثوا البيت بصياحهم در وبدر تگابلوا يتصايحون وابا الحسن واكف ويفر بيده وسور ونور كعدوا على القنفة ينحشون بأبوي وعلي الكرار ختمها من گال..

-هاي الحيرة البين عيونك اعرفها بوية واتذكرها.. اتذكر من اجت سلوى لهالبيت دخيلة وشفت نفس هالنظرة بعيونك وانتَ تركض وره امي خاطر تعذرك وتعذر موقفك من تزوجت عليها! لا تعيد الصار مرتين وحل السالفة انتَ شيخ علي امير امارة الـ[اسم الامارة] والوادم يتعنولك من غير محافظات خاطر تگطع بينهم ما توگف بوجهك حرمة الله يعلم شمسوية

هزوا روسهم كلهم يوافقوه وتفرقوا كلمن راح لغرفته عايفينا انا وابوي وامي رسمية وحيدنا، تحسر ابوي مرة اللخ يمسح على زندي وگال بتعب..

-شيخ علي: ام علي

رفعت عيوني على امي رسمية الساكتة وگاعدة على القنفة گبالنا ما حچت ولا علقت على شي طول ما اخوتي يتصايحون.. ثواني وگامت من مچانها على كيفها وگالت بهدوء..

-رسمية: لا تندهلي علي مافيدك بشي انا، اجه الوكت تلبس عگالك وبشتك وتصير شيخ ببيتك وتحل هالمشكلة اللفت على روسنا

-شيخ علي: رسمية!

-وجوب تتحمل نتيجة افعالك وتصححها بدون لا تمس سمعة احد من هالبيت محد يستاهل يتبهذل لخاطر دخيلة!

جملتها قوية واثرت بأبوي بس ما اهتمت وعافته وراحت لغرفتها، وخرت من صدر ابوي اعاين لوجهه صاير احمر خفت عليه ضغطه ارتفع وركضت اريد اجيبله ماي وعلاجه وكضني من ايدي يرجعني لمچاني..

-بابا اجيبلك علاجك

-گعدي بنيتي اريدچ بچلمة

-لا تضغط على نفسك حبيبي ارتاح الحچي ما طاير

-حبيبة گعدي!

هزيت راسي وكعدت بمچاني انتظره شيگول، جر حسرة قوية وما انتظرني اجر نفس اضافي وشلع گلبي شلع من گال ببحة..

-واجهت امچ بموت زيد وذبت الصوچ بيچ حبيبة، كالت انتِ تطلگتي لخاطره ورحتليه لشقة ومن اختلفتوا ذبحتي واتصلتي بيها خاطر تساعدچ..

شهگت من غمج گلبي نفس حرگ زردومي، بحلگت عيوني ضايع الحچي مني رجعت چن طفل انفاس مايعرف يحجي ويدافع عن نفسه من الصدمة.. كضني ابوي بين ايده وگال بقهر..

-لا عبالچ صدگتها حبيبة ابوچ انا اشك بالدنيا كلها ولا اشكن بيچ بس امچ لعبتها صح وتحجي بزودها مرتبة امورها ووضعها وعدها دليل على كلشي حچت بي.. تهمتچ انتِ الجاي تلعبين بعقل مرة اخوچ وانتِ الغايرة منهن وتردين تخربين بيوت اخوانچ وتفرقيهم عن نسوانهم وانتِ الكتلتي زيد وجبتيها لذيج الشقة

-امي؟..

-يشهد الله ما ردت اكسر گلبچ واخليچ بهالحال، يعز عليّ وحيدتي وبنية گلبي تزعل بس لازم تعرفين الحقيقة.. حبيبة امچ موش ام موش سند وتچوة تسندين روحج على صدرها بوكت العازة

سباق دموعي تتسابق تنزل وحدة وره الثانية ما تنطيني لحظة ارتاح بيها واتنفس، فصلت عنه وضميت وجهي بين ايدي اشهگ وانووح چن طير وگصوا جناحاته.. طير عافته امه بعش طُعم لصگوره تنهش بلحمه..

-حبيبة لا تبجين انا وياچ بوية لا تحرگين روحي بدموعچ.. حبيبة حاچيني.. حبيبة!

-اااااخ بوووية ااااخ

-يا بعد ابوچ انتِ لا تهتمين تروحلج فدوة سلوى والخلفها لا تبجين

-گلبيي.. گلبي.. گـ.. گلبي بوية گلبي راح يوگف

-اسم الله عليج اسم الله بنيتي من عمري على عمرج تنفسي حبيبتي تنفسي بنياتي.. حبيبة شو حاچيني!! ولك علي الدررر بدررر كرااار لحگووني ولكممم وينكممممم

طلعوا اخوتي وامي رسمية يتراكضون ويتسائلون اريد اجر نفس اريد احجي اريد اسولف ماكدر.. صدري قبط وظليت اهمش بيدي انفي الموضوع واعصر بصدري حييل وابوي تخبل عليّ..

-علي الدر: بوية شبيكم؟؟ شصاير شبيها حبيبة شبيها؟؟

-رسمية: يمة بنيتي حبيبة شبيج يا يمة شبييج

-حبيبة: امي.. جذب.. چـ.. جذب ما كلت هيج ما كالت ما تكول امي ما تسويها

-ابرار: عمي خلونا ناخذها للمستشفى عاين وجهها صار ازرررگ

-حبيبة: اميييي وين امي جيبوهاا بوية جيبهاا جيبها خليها تواجهنيي خليها تحجي بوجهيي هالحجي

-رسمية: اشتعلت امج بجاه عليي ولج لا تهتميلها راح تموتيننن

-حبيبة: امي تبيعني؟؟؟ يمة امي تشوه بسمعتي وتنطي بيه؟؟ والله ما مسويتلها شيي ما مسوية

-شمس: حسبي الله ونعم الوكيل بيها حبيبتي اسم الله عليج يا رويحتي

-حبيبة: شمس انتِ شاهدة.. ا.. انتِ انتِ شاهدة وتعرفين كلشي.. عليج علي وداعة البطنج تحجين الصدگ انا مقصرة ويه امي؟؟ بوية والله انطيتها عافيتي وروحي وگلبي وكلشي تريده والله ما بخلت عليها بشي ليش هيج تسوي بييه ليييش

-شيخ علي: انعل والديها لامج ما غزر وياهة شي! حبيبة لا تبجين بوية كافي سكتي انا اخذ حگچ منها لا تهتمين وانا بظهرج!

-علي الكرار: گومي حبيبتي لا تبجين ما تستاهل هالبلوى تبچين عليها كومي ارتاحي بغرفتج وخليها وره ابوي هو يطيح حظها

-ابرار: سودة بوجهي حبيبة هاج بنيتي شربي ماي.. هاك در شرب اختك

-علي الدر: تعاي بوية تعاي لحضني عمت عيني عليج

اخذني لحضنه يمسح على راسي واحس بگلبي واطرافي ميتة، ما جاي اكدر اوكف على حيلي ذبيت روحي عليه يسندني وغمضت عيوني وادعي كون ياربي حلم.. كون ياربي حلم واكعد منه واللگه امي حبيبتي بصفي وحاضنتني بأيدها واشبع شم من عطرها..

دگات گلبي جاي تبطئ ونفسي يضيج، دموعي ما سكنت وعقلي يعيد ويزيد بالگاله ابوي وما جاي اصدگ مستحيل، اكيد عدها تبرير امي ما تبيعني ما تبيع وحيدتها هالشكل ما تسويها وتكسر گلبها فوگ كسرتها بطلاگها..

-علي البدر: هششش حبيبتي هيدي بسم الله الرحمن الرحيم.. قل اعوذ برب الفلق ‏& من شر ما خلق...

فتحت عيوني اهدأ نفسي وركزت بالمحاوطيني من كل جهة، شفت علي الدر حاضني وبدر كاض ايدي وعلي الكرار حاضني من الجهة الثانية وتقي وابا الحسن گبالي يسولفون وياي بس ما جاي افهم شيحچون وسور ونور گاعدين جوه يم رجليه كلمن كاضني من جهة وحيدر كاعد على كرسيه وعيونه حمر وابوي وامي رسمية يعاينون عليَّ ويواسوني بنظراتهم.. نزلت دموعي من جديد ويه حس ابوي القوي وهو يكول..

-شيخ علي: دمعتچ غالية يا حبيبة وطيحتها ما تروح هدر، ما اتسمى علي اذا عفت حگچ وما خذيته من عيونها ورجعتها مثل الچلبة لهالبيت!..

**

-نعست رايحة انام اني بنات عود قفلوا البيبان مو تنسوها

هزيت راسي اي ورجعت خالتي تباوع لـ تالة المگابلة تلفونها وما مهتمة، كررت كلامها خالة توجهه لـ تالة بس هم ما اهتمت ولا باوعت لوجهها..

-حنين: ولج اني مو وياچ؟؟!

-تَـمني: عوفيها خالة ميخالف

-حنين: خليها تنچب! تبيع امها علمود رجال الغبية!

-تَـمني: خالة عوفيها يا عيني

-حنين: كله هذا تتندمين عليه بعدين تالة كله!!

تحچي ومحروگ دمها وتالة ابرد منها ماكو، تالة لا باعت خالتي ولا تعاركت وياهة كل ما بالموضوع من يوم رفضت خالة علي الكـرار وتالة عالنة الصمت.. متحجي كلمة بالبيت صح تشتغل وتساعد امها بس ميحچن سوه لدرجة حتى ملابس للعام الدراسي الجديد ما طلبت من خالة تاخذها للسوگ وتشتريلها..

راحت خالتي لغرفتها مقهورة بس مالي واهس اواسي احد وضعي مو احسن منهن وتالة هم صايرة مادري شلونها احسها متعاركة حتى ويايه متسولف.. گامت قفلت البيبان وراحت لغرفتها تنام..

تنهدت ضايجة وحدي وگابلت التلفزيون وكعدت بس والله بالي مو ويه الفلم مادري اصلاً على شنو يحجي عقلي كله ويه الامير وشنو ديصير وياهم.. من جابني لبيت خالتي تلفوني ما سكت من اتصالاته واني مغلسة بس الغريب بالموضوع اخر محاولة اتصال منه چانت ساعة بـ 10 وبعد ما اتصل ولا دز شي واحس ظل بالي عليه..

عبرت الساعة بـ 2 بالليل وبديت انعس بس عندي ارق مدا اكدر اغفى، طفيت التلفزيون ورحت للمطبخ فتحت الثلاجة اشوف شبيها ولگيت خالتي عدها مگدوس، طلعته وحطيت بيذنجاناية بصمونة واكلتها عن وحشة الليل والضوجة..

كملت اكلي وحسيتني بعد جوعانة، طلعت اكثر وسويتلي لفة ثانية اكلتها بس بعدها معدتي بيها مجال.. وطبعاً كل هذا بسبب العلاج دا اكل بشكل مو طبيعي ولوما الرياضة الالعبها بالبيت والشغل چان صرت فيل بس هي الساترة عليَّ شوية رغم هم سمنانة..

طلعت حلويات تالة من الكاونتر وكعدت اكل، اكلت چبس ونستلة وطگيتلي قوطية عصير شربتها، باوعت للنستلة الثانية وظليت اتحارب ويه نفسي اكلها لو لا وبينما اني بهاي الحرب گمزت من سمعت صوت موبايلي يدگ..

اخذت النستلة وركضت عليه وشفت المتصل "شيخي" عفست وجهي وفتحت النستلة اكلها وموبايلي عايفته يدگ.. عضيت عضة جديدة من خلصت الدگة ودگ مرة ثانية كعدت افكر اجاوبه لو لا واخذتلي بالدقيقتين افكر لحدما استقريت على رأي.. دگ للمرة الثالثة ياله جاوبته بصوت ثگيل..

-الو

-الامـير علي: شلونچ امنية

-الحمدلله كلش زينة

-عساچ دوم

صوته ناصي ومبين ضايج كلش، انقهرت بس دست على قهرتي بالنعال وكملت بنفس النبرة..

-خير امير محتاج شي؟

-اي

-شنو محتاج؟

-فتحيلي الباب وهسة تعرفين

-يا باب؟ باب بيت خالتي؟؟

-اي انا بالباب فتحيلي

-ياا شعندك بهالليل هنا!

-فتحيها وتعرفين خايبة شبيچ انتِ

-مو احنه متزاعلين شلون

-ما يهم نبقى متزاعلين

-ها؟

-اي چا شنسوي

-يلا راح افتحها

سديت الاتصال وشمرت چيس النستلة بالحاوية وركضت افتحله الباب طلعت اهرول حافية لباب الحوش وفتحتها على كيفي، مديت راسي وعطت مخترعة من حط ايده بوجهي ودفع راسي جوه..

-رااسچ لا اگصصه

-هااي شبيييك

-طالعتلي هيج بدون شال شني تردين الوادم يتفرجون عليج!

-تره بالثنتين بالليل منو كاعد؟

-انا!

-وشسويلك حبيبي؟؟

-طبي جوه تَـمني اريد احاچيچ

-ما اطب!

-استغفرالله ربي واتوب اليه.. تَـمني اريد احجي وياچ چلمتين سويلي درب ما اطول لا تخافين

-الموضوع يخص بلاوي؟

-اي

-لعد تعال بسرعة

دخلته للبيت وركضت قبله اتأكد خاف خالتي او تالة گعدن بس همزين ثنينهن نايمات ومع ذلك ماريد اجازف ودخلته للمدخل وطبگت الباب علينا..

-ها شسويتوا؟

ذب حسرة عالية وفرك وجهه مهموم ومغموم، وجهه صاير احمر على بنفسجي مبين ضغطه صاعد كلش وميتحمل شي زايد فـ حاولت قدر المستطاع اكون هادئة وما اعصبه..

-امير رايحة اجيبلك كرسي واجي

-لا ماكو حاجة.. اليوم واجهنا سلوى بكل خياساتها وذبت الصوچ بـ حبيبة

-يعني شنو!

تحسر بصوت اعلى وبده يسولفلي الصار، شلون تهمت بنتها وشلون برئت نفسها وتكول عدها ادلة وشلون عمو علي ضربها والامير راد يضربها وابوه ما قبل.. كلشي حچالي كلشيي وويه كل حچاية اني فاكة حلكي ممصدگة الدا اسمعه حقيقي!!

-كذااب!

-والحسين هذا الصار

-لا لا كذب مستحيل امير!

-والله تَـمني انا هم مصدوم حرگت دمي الله يحرگها

-عزا بعينها على هالخباثة والحقارة! شلون تبيع بنتها بهالطريقة!!

-ااااااخ يالقهر

حسيت بكلامي زدتها عليه وخبلته بالزايد ضرب الحايط بچف ايده قوي معصب ووجهه صار لونه اسوء، عفت الزعل على جهة وخفت عليه لا ينجلط اعصابه تلفانة وايده ترجف ويمسح بوجهه العرگان..

-امير كافي لا تأذي نفسك زايد والله متستاهل

-واختي؟؟ تَـمني واختي هم ما تستاهل اعصب علمودها؟؟ ولج طعنت بشرفها بت ال***** طعنت ببنيتهاا الربتها على ايدها وتعرف اخلاقها!! شنو من بشر هالادمية ما تگليلي شنووو

-مو بشر سلوى حيوانة همها نفسها وبس! ومن واجبكم هسة توكفون ويه اختكم ومتعوفوها وحدها وتاخذون حقها من هالخايسة

هز راسه اي كم مرة متحلف، عفته واكف ورحت جبتله كرسي خليته يكعد ورحت مرة ثانية حتى اجيبله مي بس استوقفني من سحبني من ايدي وجرني عليه خله رجلي تضرب رجله..

-تَـمني

-خليني اجيبلك مي امير

-انا اسف تَـمني

-بعدين نسولف هسة ارتاح مو زين عليك تضغط على نفسك

-رجعي وياي امنية

-لا امير

-ليش!

-خليني هنا احسن اريد ارتاح

-يعني بعدج زعلانة مني

-عوفني امير حباب

-ما اعوفنچ سكتي

-امير اني مقهورة من الصار بعدني مدا اتخطى الموقف النحطيت بي

-حگچ بس اريدچ تعرفين سويت هالشي علمودچ انتِ، ادري بيچ زعلتي وحزت بخاطرج بس ماريدج تنسين عشگي الچ وتعلقي بيج.. مستعد اسوي المستحيل خاطر اعرف ياهو الجاي يأذيچ

-امم

-انا اتعب على تعبچ نوومه ما تهونين عليّ بعلي ما تغمض عيني وانتِ زعلانة

هزيت راسي ساكتة وفلتت ايدي من بين ايده ورحت للمطبخ اجيبله المي، طلعتله بطل من الثلاجة وحطيته بصينية ويه كلاص ووكفت افكر بكلامه.. ما افكر بالصار بيناتنا وانما افكر بـ حبيبة وحالها من تعرف امها تهمتها باطل..

ذبيت نفس زعلانة عليها ورجعتله وبيدي الصينية، صبيتله مي بالكلاص وما قبل يشربه عافه بالصينية وبقى منزل عيونه..

-امير اشرب المي وارجع يم اختك لا تعوفها هي محتاجتك

-وانا محتاجچ

-روح لاختك هسة واحنه بعدين نحل موضوعنا

حرك راسه مأيدني واخذ الكلاص من بين ايدي شربه ورجعه بالصينية وگام على حيله، شال الشماغ الحاطه على چتافه ولفه على راسه بشكل چراوية، كمل ووگف گبالي يباوعلي وساكت..

-شبيك

-منتظرج تجيبين اغراضج وتجين وياي

-لا امير گتلك ما ارجع

-ليش

-گتلك السبب اني

-يمته

-ياا مو گتلك مدا اتخطى الصار

-يعني مابيچ مجال؟

-ابد

-عليج علي؟

-اي والله

-ابد ابد؟

-ابد

-منا منا

-لا امير

-ما يشفعلي شي؟

-لا

-يعني معاندة

-اي

-يعني ما ترديني

-اي

-يعني هذا هو نتطلگ؟

-يااااا امييييير!!!

ضحك على كيفه ونصى يريد يشيلني، دفعته ماقبل بس وين اگدرله شالني غصب عني وگرصني گرصة خلاني اعيط واكتم صوتي بيدي حيل..

-ياا سخييف

-اششش خالتج نايمة عيب

-هسة اعيط وافضحك!

-تَـمني انا روحي طالعة تسكتيين لا اسكتچ بطريقتي؟

-عود شنو تهددني؟؟

-اشش سكتي مالي خلگج

-لا تأشأني ونزلني بسرعة!

-زوج لو نزلتج وفوتت اليوم عليّ

-ليش شكو اليوم عيني؟؟

-اليوم عيد زواجنا خالوو شني ناسية؟

-كذاااب

-شنو معقولة ناسية ولج؟؟؟

-لا لا كذب مستحيل شنو عيد زواجنا صدگ تحجي؟

-اي يلا خلينا نروح نحتفل

-من كل عقلك!

-لا من نصه

-شلون نحتفل وانتو بهالحال؟؟

-متعود على المشاكل انا عادي يلا امشي

-اووكف هاي شبييك ما اجي وياك والله

-تَـمنييي

-والله ما اجي والقران!

-عيد زواجنا ولج صدگ تردين تبقين زعلانة؟

-اي عادي واذا عيد زواجنا بعدني زعلانة لان ما رجعتلي كرامتي

-خايبة زوعت سلاوي العافية كل هذا وما رجعتلج كرامتج!

-اففف مادري نزلني ماريد هسة

-عادي لا تردين انا اريد

دفر باب الاستقبال مال خالتي معصب ودخلني بي وشمرني على القنفة، لطمت على وجهي اباوعله راح للباب قفلها ورجعلي..

-امير عزا شكد عيبب بله كعدت خالتي هسة شتكول

-رجال ومرته شكو اليسمعج يكول صاحبج وياچ

-باوع لوجهك شلون معصب ومتأثر من الصار امير شسالفة

-تَـمني لا تظلين تذكريني وتعبيني زايد انا اجي يمج خاطر انسى وارتاح

-يعني مسويني مخدة شوكت متتعب تجي تحط راسك عليها!

-ليش اكو احلى من هالشي

-عيب حبيبي ميصير شبيك انتَ

-يا علي ابن ابي طالب صارت بيها حبيبي يعني اكو امل

-لا ماكوووو

-اكو وغصباً عليج اليوم عيد زواجنا

-واذااا

-يعني لازم نتراضى وما يجي باجر واحنه متزاعلين ما يصلح

-واذا اجه باجر واحنه متزاعلين شكو بيها

-مو خوش فال تَـمني لا تعاندين

-شيصير نتطلگ يعني؟؟

-شمدريني بس مو خوش فال يلا خلينا نتصالح

-مـ...

-اششش ولا چلمة اعتذار واعتذرت وكرامتج ورجعتها امي تعرف بكلشي ووصيتها تسولف لكل البيت وسلاوي كتلتها ونعلت والديها وباجر اخذج وكدام الكل احچيها واكول تَـمني ما غلطت والصار كله خطة متفقين عليها بعد شتردين؟

-اريد هدية

-مال شني

-مو زاعلتني؟ غير تجيبلي هدية وتراضيني لو تريد تمشي عيد زواجنا هيج!

-خرب راسج تَـمني احنه بيا حال

-ادري وانتَ هم لا تزودها ومتجيبلي هدية

-صار ومن عيوني اجيبلج

-شتجيب؟

-مادري شتردين انتِ

-اريد.. اممممم... اريد.. اريد..

-استغفرالله ولج خلص الوكت وانتِ تكولين اريد فضيها خايبة

-اريد اسافر

-مو وكتها حبي

-ادري من ترتاحون وكلشي ينحل اريد اسافر لايطاليا

-اشتعلتتتت ايطاليا اختاري غيرها!!

-مااا

-تَـمني بالعباس ما اخذج هناك ديلااا

-لعد ما اصالحك

-تَـمنييي

-الا ايطاليا الا

-ما ينطونا فيزاا

-ينطون صديقتي نرمين انطوها شنو احنه وحد مينطونا

-خالوو صديقتج نرمين زلمتها تاجر بگد الدنيا اذا هو ما ينطوه ينطوني انا اللباخ!

-لا تستنقص من نفسك حبيبي والله تسوه التجار انتَ

-چا لا تحمليني فوگ طاقتي امنية والله لو نحصل فيزا بعيني اخذج ولا اخليها بنفسج

-لا خلص ماريد بطلت ماريد اضغط عليك

-ابوي مو على الفلوس وعلي مو على الفلوس الخير هواي بس انا علمود الفيزا ما ينطونا بس راح احاول اذا انطونا اخذج وعد

-شكراً امير

-تدللين يا روح امير اهم شي ترضين علينا

ضحكت وضحك ويايه خفيف، مدلي ايده بمعنى تعالي وگمت حتى اروحله.. حضني بين ايده بدلال وصار يلعب بشعري ويبوس بوجهي وخدودي ومكان غمازاتي ويسولف ويايه بصوت ناصي..

-خايبين اخرب واتكهرب على هالرصعة انا

-ههههه ابو عيون الچقل

-يروحلچ فدوة.. ان شاء الله رضيتي ابوي؟

-رضيت بس احس شويونة بعد زعلانة

-چا سهلة هاي.. تعاي......

**

"شمس"

الحمل صار ثگيل والمسؤولية الحطوها على چتافي اثگل، ثاني يوم من بعد العركة الصارت گعدت ولكيت علي الحـق وعبق يمنا وخالتي شذى هم جاية.. هم گبت هوسة جديدة وعركة لخ وعلي الحق رعد بالبيت رعيد وعاتب ابوه شلون خله سلوى تطلع وما كتلها بمچانها، گوة هدأه تقي وگال ما يكدرون يسوولها شي الا يجيبون عليها دليل واضح خاطر اذا صارت گعدة وانفضحنا نعرف شنو نجاوب الوادم..

الصبح رجع الامـير علي، راح على حبيبة يتطمن عليها وحاچاها شوي وگال كدام الكل تَـمني ما غلطت بشي وكل الصار اتفاقية بيناتهم وعافها ببيت خالتها خاطر ترتاح وما يلوحها شي وتتأذه نفسيتها..

-علي الدر: چا بشنو ردت تسولف ويانه امير وگتلي گعد اهل البيت كلهم؟

هز راسه الامير وطلب من عدنا نگعد كلنا بالصالة وبده يفهمنا الصار من البداية للنهاية، صدمة وره صدمة عقلنا وگف ما چنت اعرف بسلوى ذابحة زيد ولا اعرف شنو الجانت تسوي.. نفسي كامت تلعب وبطني رجعت توجعني من كل هالحقائق ووجعتني اكثر من گعدوني بالاستقبال علي البدر والامير وتقي وحق ورادوني اروح لبيت اهلي خاطر اشوف سلوى واحاول اجيب منها فدشي يفيدهم..

-شمس: مثل شنو اجيب؟

-الامـير علي: أي شي، فتشي مچان گعدتها او أي شي اخذته وياهة حبيبة تكول صعدت للبيتونة اخذت منها شي ونزلت بس ماتعرف شنو

-علي الحـق: گلبي يكول موبايل عدها موبايل ثاني وجاي تتمم خططها الاجرامية بي

-علي البدر: بعد هذا شغلج شمس انتِ لازم تعرفيلنا شنو هالشي

هزيت راسي مفتهمة وشروحلي بعد شنو لازم اسوي بالتفصيل، ترخصت وعفتهم ورحت لغرفتي حضرت جنطتي واغراضي ووصلني بدري لبيت اهلي..

دكيت الباب وگلبي يرجف مسؤولية صعبة وكلوني بيها وماعرف انا گدها لو لا.. استقبلوني امي وخواتي فرحانات بيه وطبيت وياهم لصالة بيتنا، گعدت على الكرويتة وسألت امي عن سلوى بساع وبدون لف ودوران..

-نهى: والله اجتنا امس نص الليل خرعتني كالت متعاركة ويه زلمتها

-شمس: اي صح

-نهى: شصاير يمة خوما شي جبير؟

-شمس: لا يوم بس خالة سلوى صايرة تتحسس من كلشي هالفترة لا تخافين كله يومين وعمي يجي يرجعها

-نهى: ياريت ومو القصد متعاجزة منها بس جاي تشوفين وضعنا يمة شموسة، ابوج يا دوب ملحگ يشبع بطوننا مو مال اجيب نفر زايد

-حگچ يوم حگچ.. وينها هي هسة نايمة؟

-لا فاتت تسبح

-وين هي بيا غرفة تنام

-هو ويه البنيات وين يعني

-ها.. چا انا فايتة امدد جوه شوي تعبانة

-براحتج يوم.. گومن بنيات روحن يم اختچن تونسن

ابتسمت وگمت للغرفة ولحگوني خواتي، تمددت على الچرباية وهنه حاوطوني يسولفن ويسألن على حالي وخواتي الصغار كعدن بصفي ونامن على بطني يراقبن حركة الجهال..

-شمس: ولجن اختنگت خايبات گومن

-هههههه شمسه والله وناسة عايني شون يتحركون هاي ما تتوجعين؟

-اوقات اتوجع اي يموتوني الليل كله ما انامن.. اگلچن خالتي سلوى وين تنام؟

-على القريولة ذيج

-هاا

اخذتنا السوالف شوي وگامت وحدة تعصرلي برتقال والباقيات بقن يمي يسولفن عن حياتهن وانا عيوني تفتر بالغرفة ماكدرت ارتاح اريد بس ادور بالغرفة واخلص من هالشي..

-شمس: بنات تكدرون تطلعون شوي اريد ابدل شو اختنكت بهدومي

-اي حبي براحتج

-شمس: زينة بس سلوى تطلع من الحمام دگي على باب الغرفة بدون لا تكولين شي خوش؟

-بعيني

طلعن وركضت على الباب قفلتها وراهن وكعدت ادور بالغرفة، رحت لعباتها الملفوفة ومحطوطة على الميز ودورت بيها وانوب رحت للشال مالتها هم دورت جواه وكلشي ما لكيت.. صفنت بالغرفة افكر يجوز ضامة شي بالكناتير بس اكيد ماعندي وقت ادور هسة خليها بالليل احسن..

بدلت وفتحت قفل الباب ورجعت تمددت على الچرباية وعيني مادري شلون صارت على الچرباية الثانية، گمت على كيفي ورحت للجرباية التنام عليها سلوى ودورت بالبطانية المسفطيها بس هم ما لكيت شي.. شبه ايست اللگه حاجة هنا بس ما فقدت الامل ورحت اشوفن جوه المخدة كون اكو شي وصدگ لگيت! لگيت موبايل احمر نوعه گلاكسي بس بساع رجعته بمچانه من اندگت عليّ باب الغرفة معناها سلوى طلعت من الحمام..

ركضت ارجع امدد على الفراش وصحت من مچاني خواتي خاطر يطبون واجن ركض للغرفة مثل البزازين حاوطوني ورجعنا نسولف، دقايق واجت سلوى للغرفة وظلت تباوعلي صفح ما عاجبتها جمعتنا..

-شمس: هههههه كافي ولجن

-عليج الله سولفيلنا بدر شلونه وياچ؟ متونسة مو؟

-الحمدلله ماكو منه بدر كون ياربي يرزقچن زلمة يحبچن ويحترمچن بگده واكثر بجاه الحسين

-اميييين

ضحكت على حركتهن وسلوى فرت بيدها وطلعت من الغرفة، شوي وطلعنا نتغده واخذتنا السوالف للعصر سوينا چاي وسلوى بقت مگابلتني ما كامت وانا الف حوصة بيه صارت اريد ارجع للغرفة للموبايل..

-سلوى: شبيچ تلوبين كعدي لا يصير بالفرخ شي

-نهى: اي يمة شمسه كعدي مو زين على الجهال

-شمس: اي بس سمعت صوت موبايلي يدگ يجوز بدر هذا

-سلوى: گعدي انا اجيبه الج

-شمس: لا خالة لا تزحمين انا اروح

ركضت گبلها للغرفة بساع ورحت على تلفوني وصدگ بدري المتصل، فتحت الخط وياه وفهمته على الموبايل وگال حتى لو اريد ادور بي اكيد بي رمز وما راح نستفاد..

-شمس: چا شلون؟

-علي البـدر: اوگفي اشوفن علي الحـق

غاب صوته شوي ورجعلي گال علي الحـق واكف حده ويسمعنا..

-شمس: هلا بيك خوية

-علي الحـق: شمس عدكم حاسبة بالبيت؟

-شمس: لا والله ماعدنه

-مو مشكلة خيتي هسة بدر راح يجيچ ويجيبلج حاسبة علي السور وبس تستلميها دگيلنا نفهمج شتسوين

-شمس: ما ترهم ابوگ الموبايل منها بدون لا تحس؟

-علي البدر: تدبريها؟

-شمس: اي ادبرها واذا شكت بشي راح تشك بخواتي الصغار ماخذاته وضاماته عبن هاي سولتهن

-علي الحـق: ممتاز، اذا ما عرفتي تفتحين الرمز اخذي منها بس مو اليوم تاخذي اتفقي ويه وحدة من خواتج تاخذه منها باجر العصر خاطر ما تشك بيج انتِ بالذات الماخذته

-صار هذا هو

سديته منهم ورجعتلهن كعدت شوي وسلوى راحت ويه امي للمطبخ يحضرن العشا، گمزت من مكاني واشرت لاختي الجبيرة تجي وياي ورحنا للغرفة عود جاي نسولف سوه..

-شبيچ شمسه شو متوترة

-احچيلچ وما تكولين لاحد؟

-اي كولي

-انتِ يمته راح ترجعين لبيتج اليوم؟ لو تباتين؟

-لا ابات انا وانتِ؟

-انا ما ابات بدر ما يرضى.. عايني زيون صايرة مشكلة بين عمي وخالة سلوى وهسة اكتشفت سلوى عدها موبايل غير موبايلها الي نعرفه والمشكلة كلها صارت بسبب هالموبايل نريد نعرف شنو ضامته بي خاطر بلچن نحل المشكلة

-لا شمس وانتِ شعليج تدورين بموبايل الحرمة!

-فضول عندي راح اموت

-هههههههه خبلة شنو فضول زلمتج يعرف!

-اي يدري

-هااا!

-والله وهسة ساعديني خاطر افهمج السالفة كلها بس لازم نستعجل

-خايبة لا تلفين مصيبة على راسج سلوى مو سهلة كل البلا بيها

-ادري بيها تعلميني بيها خية

نفخت هوا ما عاجبها بس اعرفها ما تعترض وراح تساعدني، قفلنا الباب علينا لان متعودات من نكعد سوه نقفلها خاطر خواتي الصغار ما يجون ورحنا لموبايل سلوى لگيته نفس مكانه..

-زينة: شلون غباء عايفة موبايلها هنا وبي بلاوي

-شمس: بي قفل خية مأمنة

هزت راسها اي وحاولت افتح القفل والمشكلة مو رمز كتابة مسويته رسم الملعونة..

-شمس: ما توقعت تسوي رسم

-جيبي انا خبرة بلچن اعرف افتحه

ضحكت من تذكرت اختي ما فد يوم زلمتها خله رمز لموبايله وما لگفته عبنها شكاكة درجة اولى، كضت موبايل سلوى وكعدت تحاول وتحاول وتحاول وتحاول بس ماكو فائدة..

-شمس: خرب عرضها راح يقفل الموبايل وما عرفنا الرمز

-اوگفي اوگفي

رسمت الرمز الاخير وشهگت فازة، مديت راسي اعاين شبيها وشهگت من شفتها فتحته!!

-زينة: انفتح!!!

-شمس: صخاام الصخمج يا زينة فتحتي!

-ههههههههاااي خبرة خايبة انا مرگصة فهيد على تك رجل

-اروح لخيتي فدووة جيبي الموبايل اشوفه

حمدت الله وشكرته لانه سهلي الموضوع وعرفنه الرمز بسهولة معجزة هاي الحمدلله يارب.. اخذت الموبايل من ايدها وكعدت ابحوش بي، اول شي سويته رحت للاستوديو بس مابي غير صور صباحيات ومسائيات..

-زينة: عووع شكد اكررهن فهد خابصني بيهن

-شمس: عوفي فهد وخلينا مركزات

-يلا

طلعت منهن وشفت محملة واتس اب، فتت عليه وشفتها مراسلة ثلاث اشخاص مسميتهم "1" و "2" و "3".. طبيت على رقم واحد وقريت شكاتبين اخر شي بس كلشي ما افتهمت ورغم هذا صورته كله بموبايلي فيديو.. طلعت منه ورحت على رقم 2 هستوني جاي اريد اقره المحادثة وانتفضت طايح الموبايل من ايدي من اندگت باب الغرفة علينا..

-زينة: منوو

-سلوى: انا فتحن الباب ليش قافلاتها؟

-زينة: دقيقة خالة جاي احف لـ شمس

-سلوى: فتحي الباب وكملي اريدن شي من الغرفة

-شمس: لا خالة استحي فدوة ما ظل شي ونخلص

-سلوى: فتحننن الباااب

عاطت بينا وگمت اريد افتحها وزينة ما رضت اشرتلي بيدها غلسي عليها وهمزين من امي صاحت بيها من بره سمعتها تگللها هنه متعودات يگعدن هيج كل مرة وميطولن شوي ويفتحنها واخذت السعلوة يمها..

-شمس: يمة الحمدلله

-زينة: يلا ماعندج وقت بساع

كملت تفتيشي للموبايل ودخلت على رقم 2 وفكيت عيوني متفاجئة من شفت واحد كاتبلها..

"وينج عمري مشتاقلچ"

-زينة: صخاام!

صعدت بالموبايل ايدي ترعش مادري شصار بيه من شفت المحادثة، حبچيات وغراميات بيناتهم وهو داز صورة اله مبين ممرض من لبسه..

-زينة: ولج طفل هذا! عايني شگده!

-شمس: تخون عمي وياه!!

-زينة: صعدي بعد صعدي نشوف

صعدت بالمحادثات وشفته كاتبلها..

"حبي دزيلي صورتج مشتاق اريد اشوفچ"

وهي مجاوبته..

"حياتي ماكدر اهلي لا يلگفوني"

وهو يرجع يكتب..

"امانة دزيها وامسحها مني بسرعة"

"توعدني تمسحها؟"

"وعد يا روحي"

ومبين چن دازتله الصورة وحاذفتها من المحادثة لانه معلق على جمالها وبياضها..

-زينة: سلوى يمته بيضة؟؟

-شمس: مادري باعي شكاتب "اروح فدوة للگيمر اني"

بقينا مستغربات ونصعد بالمحادثة ونقرا بيها لحدما وگفت گلوبنا ثنينه من شفنا سلوى دازتله صورة بت.. والطرگاعة مو بت عادية لااا دازتله صورة ليلة!!!

-زينة: هاي مو مرة حماچ؟؟

-ولج ايييي هاي ليلة مرة ابا الحسن!!

-عايني شكاتبتله عاايني "شوفها واحذفها بساع فدوة"

-عمت عينيي يمة صخاام الصخمني صخاام

لعبت نفسي وگوة صورت الموجود وطلعت من محادثتهم ورحت على رقم 3 وچان اللگه الفاجعة الاطگع!! هم زلمة! هم زلمة هذاا وبيناتهم حب وغرام وسوالف ومسمية نفسها "توتة"..

-زينة: ولج هاي مو تَـمني؟؟؟؟

-يممااا

-خرب بروحها!!

-ولج ماكدر بعد ماكدر اكمل بطني راح ينفجر

-عوفي يولي عوفي يمعودة مو زين عليج

-ماكدر زينة كملي بدالي حبابة صوري كلشي واقري المحادثة زين فدوة

-يلا ارتاحي انتِ انا اكمل

رحت للجرباية مددت واجت زينة يمي تكعد، ضغطي هبط مادري ارتفع من الشفته واحس بمعدتي تفور وتگلب..

-زينة: ها خية شبيچ ولج

-مابيه شي كملي شوفي شنو اكو

-عايني هذا كاتبلها على واحد اسمه زيد

-شكاتب؟

-كاتب "راح ادز الباودر بيده"

-شنو هذا؟

-مادري اظن بيناتهم مكالمات هم لو هي سلوى تحذف بالمراسلات

-طلعي من الواتس وروحي للماسنجر شوفي

هزت راسها اي وسوت مثلما گلتلها وهناا شفنا الطراگيع على اصولها! شفنا نفس الزلمة الچان يحاچيها ومسميته رقم 2 وتدزله صور ليلة علساس هي موصيته على اختها شذى الي هي خالتي ام عبق كاتبتله..

"ماريدها تصحى حبيبي خبلها الي فدوة اروحلك وشگد ما تريد اني حاضرة"

وهو يجاوبها..

"دا انطيها علاج متگدر ترفع ايدها بعد وراه تطمني"

"خوما احد يحس بيك فيصل؟"

"ابد محد شبيچ بالرشاوي كلشي يشتغل حبي"

-زينة: هذا العار هو الجاي يخبل خالتي شذى!

-شمس: اي النذل ايي

-زينة: عايني شلگيت

اخذت الموبايل منها وشفتها مراسلة زيد ابن مسعود ومبين البيناتهم مو علاقة غرامية، البيناتهم شغل غميج وخطير والاكدلي هالشي هي رسالة..

"راح ادز ولد يذب الماي ببابهم بس راح يكلفچ هواي"

"بيش ما چان زيودي ما نختلف"

"اريد هسة تدفعيلي"

"ماعندي هسة اصبرلي انتَ سوي الگتلك عليه وتدلل"

"اذا حسيت بيچن جاي تلعبن عليّ وعلي اندمچن انتِ وزهرة وفراقد السحارات"

"لا هاي شبيك شنو تريده احنه حاضرات"

"چا خوش الباودر راح اجيبه باجر من الولد ولاگيني بالشقة خاطر انطي الچ"

"زهرة تكول هذا اقوى من القديم لو لا؟"

"اي اقوى هذا ينرش على مخدتها من تنام تستنشقه ويمشي بيها ويشخط عقلها"

"فدوة اروحلك يا بطل"

"بس عايني شوي شوي تبدين مو كل يوم لانه قوي ويجوز تروح بيها انتبهي"

"لا توصي حريصة"

اقرا المحادثات وعيوني راح تطلع من وجهي، صداع ضربني وعين من عيوني غوشت من الخوف.. اقرا وما مصدگة فراقد وزهرة وسلوى ثلاثتهن مشتركات بالجرائم الجاي تصير!

-زينة: شني هاي شكاتبلها هنا؟

"باچر اريد الفلوس راح اللاگيچ بالشقة والله اذا ما اجيتي اذبحچ"

"ماعندي زيد والله ماعندي كافي ما تشبع فلوس انتَ!"

"چا افضحجن واشهرچن والله كل سوالفچن اصبها بأذن شيخ علي"

"حرام عليك قطيتنا قط كافي اذيتنا يومية تبتز بينا!"

"انا اريد اهج من العراق تعاليلي باجر والله كريم نشوف شلون نحلها"

"شلون؟"

"احلها بطريقتي وهاي بس للاعزاز اسويها"

"اي شتسوي؟"

"ههههههه *****"

شهگت لاطمة وجهي من قريته شلون يساومها على شرفها وهي ما راضية بس بالاخير شكلها اقتنعت وهذا السبب ذبحته وصار الصار وراهة!

-زينة: هاي خطيرة شمس عوفيها لا تتورطين وياهة

-لازم اوصل هالمحادثات لعيالي زينة فتحيلي نت منج ادزهم

-ماعندي نت بموبايلي

-چا فعليلي بموبايلي

انطيته الها تفعلي وانا بقيت افتش بالموبايل واحس بروحي فرفحت، شفتها مراسلة على الماسنجر مرة اسمها "ام تبارك" ومحادثتهن كلها عبارة عن عبق! كلها ماعدهن غير سيرتها ومن خلال المحادثة عرفتها هي الحرمة الخطفت عبق وشمرتها بالشماعية وهذا الحقير فيصل الي تراسله مساعدها ومدخل عبق هناك بالحيلة ومنزلها بغرف المجانين..

-زينة: شموسة ذولة عصابة!!

-شمس: سكتي زينة راح اموت من الخوف

-زينة: شنو هالامكانية؟! شلون كدرت تخرب بين كل هالناس!

-عايني مبين مو وحدها واكو من يساعدها ويعينها على جرايمها

-زهرة وفراقد عمت عينهن شني من گلوب! ولج هاي زهرة ليش مو تكولين عنها زينة؟؟

-اي والله زينة بس الله يعلم شگلبها

فعلت نت ودزيت شكو شي شفته بموبايل سلوى لـ علي البـدر، ادز وايدي ترجف وبطني تخبط وهو جاي يفتح الرسائل بنفس اللحظة ويشوفهن..

-زينة: بقت ذني المحادثات ما فتحناهن شمس

-عوفيهن ما نلحگ اخذنا المهم الباقي همه يتصرفون

-بشرفچ خلينا نفوت على اخر وحدة

-لا زينة خاف ما نلحك هسة تجينا

-يلا يلا بساع

سويت مثل ما تتمنى وفتحت المحادثة ويا ريتني ما سويتها.. يا ريت اصابعي تگصگصت ولا فتحتها وشفتها شلون تراسل بزلمة وتتفق وياه على شي بس مو مفهوم لان مبين ذااك وينه بيناتهم اتصالات والذبحني بالزايد من شفتها دازتله صور بنيتها!! صور حبيبة دازتهن بس مو كاملات يعني اكو صور بس عينها طالعة لو جسمها شوي لو ربع من وجهها بس انا اعرف هاي حبيبة! متأكدة هاي حبيبة وحتى مسمية اسمها "غرام"..

سديت الموبايل لعبانة روحي ورجعته لمچانه وكعدت انا واختي زينة وحدة تصفن بوجه الثانية منتظرين ردة فعل شيخ علي واولاده...

**

"لـــيلة"

كاعدة بغرفتي ادهن بطني بزيت زيتون وفزيت على صوت صياح رج البيت رررج.. المشكلة ماعرف صوت منو هذا بسبب اصوات الولد الجاي تداخل جوه، ركض ركض گمت مسحت بطني ولبست جبة وشال ونزلت اركض اشوفن الدنيا مگلوبة وعمي علي طلع من غرفته وبيده رشاشة..

-ليلة: شصااير شبيهم سبأ شصايرر شبيچ تبچين شكوو؟؟

-سبأ: اخووي اخووي مات اخووي

تبجي وتلطم على وجهها استوعبت ان هي هسة ياله عرفت بـ زيد ميت الصبح تقي ما خلاها تنزل وتسمع من الامير حاچانه، رحتلها حضنتها اصبر بيها وعيوني تركض على خالة رسمية اريدها بس تفهمنا شكو..

-رسمية: سودة بوجهج يا سلوى شسويتي بحالنا سووودة بوجهج

گعدت ساكتة ماعرف شحجي وشسوي حرت ودخت وانا منا دايخة من وره هالفرخ زادوا دوختي بسعلاوي.. دقايق ورجع تقي يريد ياخذ سبأ لبيت اهلها خاطر تواسي امها واختها وهي صعدت مثل البرق بدلت ونزلت تركض وتبجي وطلعوا من البيت..

ظلينا على هاي كعدتنا فترة طويلة وماكو لا حس ولا نفس اجه منهم، ابرار تروح وتجي وعمتي رسمية روحها تلوب وعبق كاضة گلبها وترجف وحبيبة منتهية لا ايد ولا رجل راح تموت..

تعبنا من الانتظار وقررنا نگوم نسوي لگمة نسند بيها طولنا بس بطلنا من سمعت اصوات جايه من الساحة بره..

-ليلة: صوت الولد هذا! رجعوا رجعوا عمة

ركضنا عليهم للمطبخ ورحت انا للشباچ اشوف، شهگت ادگ صدري من المنظر الصار بوجهي وحبيبة طلعت مفرعة للحديقة تركض مثل المخابيل من شافت ابوها اول ما طبگ باب الحوش طب ويسحل بأمها من شعرها..

طاحت يم امها بالكاع وتلطم على وجهها وراسها لطمم حييل وتزلغ بروحها ومحد جاي يكدرلها من الولد.. شالها الامير شيول من الكاع وطببها للبيت وعمي جر سلوى الصوتها يزرف الاذن زرف وطببها للبيت..

-سلوى: هدوووونيي ما مسوية شيييي هدووووني

-شيخ علي: بعلييي اذبحج واخلص من عارچ بت ال*****

-سلوى: ما مسوووية شي عليييي حرااام عليك حرااام عليكممم

-شيخ علي: علي الحـق!! جيبلييي السچييييين

-سلوى: لااا لاااااا علييي لااا ابوس رجلك لااا ما مسوية شي انا لااا

-شيخ علي: تشاااهدي ولججج

-سلوى: لا بداعتي لااا حبيبة وينج حبيببة وين عفتي اممج

بچت حبيبة تشهگ و تضم وجهها بصدر اخوها وترفس برجلها حييل بالكاع، تخبلت سلوى من رفع عمي السلاح بوجهها وعاط بيها صوت خلس الكل..

-اختااري تموتيين ذبح لو رمييي!!!

-سلوى: حرام عليك.. تخش بخطيتي علييي والله ما مسووية شيي ذني خوااتك هنه راس البله اناا مالي شغل معليييه جيب القران احلفللك

ويه صوتها العالي ماعرف منين وشلون اجه صوت زلم خشنة من الساحة، دفعني ابا الحسن اطلع من المطبخ والباقين كلمن دفعله وحدة يطردها،، ما اهتميت وركضت امد عيوني من الباب اشوفهم وعرفتهم ذولة من اهل سلوى واحد منهم اخوها اسمه صباح وثنين منهم رجولة خواتها وثنين ولد عمها..

استغربت من شفتهم ذولة شلون اجوا وشلون عرفوا راح يصير هيج شي بس اظن ام شمس بلغتهم من راح عمي لبيتها وسحل مناك سلوى..

-صباح: شيخ علي مااا رجيناها مننك شييخ

-شيخ علي: اختك كسررت وجهيي اختك طينت شرررفي وما تستاهل تعييش

-اجتكم دخييلة ابو علي!! هيج تعاملون دخيلتكمم؟؟ يا عيبة العيبة!!

-شيخ علي: دخيلة اجت لبيتي خربته!! لعبت بشرفناا وعرضناا وما ينسكتلهاا هالعايبة الخاينة!

-رجعها النا احنه نربيها شيخ ولا تلوث ايدك بدمها

-سلوى: يمممااا لا لا لاااا علي لا تخليهم ياخذوني لااا

تخبلت سلوى وطاحت على رجلين عمي تبوس بيهن وتحب بقندرته، دفرها عمي منه لعبانة روحه وصاح..

-انا ذباحهاا هالساقطة!!

-صباح: لاا شيخ ما مسموح اجتك دخيلة ورجعوا اهلها يردوها! ما تريدها رجعها النا احنه نتصرف وياهة

-سلوى: ماريددد مااريدد لا تاخذوونييي

-شيخ علي: اخذوها

-الامـير علي: بوووية!!

-شيخ علي: اسكتتت لا احد يحجي!! أخذوها وافصلكم مربع على سوايتها اذبحها واخذ بدالها اربعة لولدي!

شهگنا كلنا وخالة رسمية ويانة، ضربت وجهها وحبيبة وجهها صاير اصفرر وگوة واكفة على رجليها راح تطيح بأي لحظة.. ابرار وعبق صارن يرجفن وروحهن خرطت والزلم بالمطبخ ضج صوتهم شعلوه ويه ابوهم واهل سلوى هم ما راضين على هالشي بس عمي علي معاند..

-رسمية: ابو عليي شيخ علي! ابو علي الدر!! ابو علي!!

صاحته عمتي من جوه بس ما استجابلها عمي وظل يتصايح وياهم، اجاها علي التـقي وعلي الكرار بس ما رضت بيهم ورادت الا عمي يجيها..

-رسمية: علي التـقي طبب الزلام للديوان خاطر يتناقشون وخلي ابوك يجيني

-علي التـقي: يوم ابوي معاند ما يرضى يجي

-رسمية: گله اذا ما تروح وتشوف امي من ترجع ما تلگاها ببيتك بعد

-علي الكـرار: يوووم وكت نكد هسة!!

-رسمية: روح سوي الگتلك عليه!!

راحوا ضايجين ومتنرفزين وصدگ دخلوا الزلم للديوان وسلوى حبسوها بالاستقبال وقفلوا عليها الباب خاطر ما تشرد ويستجوبوها.. نص ساعة مرت واجه عمي علي فااااير ووجهه ما يتفسر مطگع من القهر وگبل لا يحاچي عمتي راح لحبيبة حضنها لجسمه حييل وگال بحسرة..

-شلونچ بنيتي گالو اخوتج تعبتي

-حبيبة: بوية لا تذبحها.. شتسوي بيها سوي بس لا تذبحها

-شوهت سمعتج حبيبة تدزدز للزلم صورج بوووية ما تستاهل تعيش هااي

-ميخالف لخاطري عوفها شتسوون بيها سووا بس لا تموتها وتخش بخطيتها حرام

-شيخ علي: خليني اروح اشوف شتريد مني امج رسمية وراجعلج

هزت راسها حبيبة بس روحها طافية، دموعها زخ على وجهها وكوة كاعدة على حيلها كل ساع عيونها تتگلب واكول البت راح تطيح علينا..

طب عمي لغرفة عمتي رسمية وعيوننا تركض وراه ونار مشتعلة جوانه منتظرين التالي، خمس دقايق طول هناك مو اكثر.. خمس دقايق وطلع من الغرفة واحد ثاني.......

يتبع 👑...

━━━━━━ ♛ ━━━━━━

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

وراها تعيش لكن گلبك يموت

وأحساسك الطيب بيدي يفهم

ما تحلم بعد بالعنك يروح

وما مسموحلك يومية تندم

كل جروحنا وكل المعاناة

من ورة الناس البيها نحلم...

━━━━━━ ♛ ━━━━━━

"علي التـقي"

رجع ابوي للديوان وجهه مگلوب، يدبچ بالگاع دبچ ومحد عنده الجرأة يفك حلگه ويسأله شنو التالي لا انا واخوتي ولا اهل سلوى..

-شيخ علي: من رخصتكم يا جماعة.. علي التـقي، الامير، ابا الحسن وعلي الحق لحگوني

گالها وطلع گبنا وگمنا لحگناه، طبينا وياه لغرفة امي رسمية وشفناها واگفة وكاضة سبحتها بيدها..

-رسمية: تعالو يمة تعالو ابوكم ما جاي يحسب حساب باچر بأفعاله وهاي اول مرة اشوفنه متهور هشكل

-شيخ علي: چا فضحتنا وشهرتنا هالچلبة!! ترديني اسكتلها ولج رسمية؟؟

-رسمية: ما تسكتلها يا بعدي بس مو هيج تنحل المواضيع مو انتم بهذا تصرفكم راح تجيبولنا فضيحة الها اول مالها تالي

-علي الحـق: لو عفناها عايشة تجيبلنا فضيحة اكبر! هاي اذا مو بيت مسعود ذبحوها وخزونا كدام امة محمد والمسيح

-رسمية: يمة وليداتي انتم بأي تصرف تقدمون عليه خلوا اختكم بين عيونكم، حبيبة سمعتها اهم من سلوى ومن الكل اذا ابوكم سوالها شي شنگول للوادم؟ نگلهم شهرت بأعراضنا ونشرت صور بنياتنا؟ لو نگلهم كتلت زيد!

-الامـير علي: نگلهم كتلت زيد چا هذا الشي بسيط بنظرج يوم!

-رسمية: وانتَ شني تذبحها لخاطر زيد چا اهل زيد وينهم عنها؟ شمالكم انتم ما تفكرون مو هيج انتم راح تحطون علامة استفهام بكبر روسكم علينا!

-ابا الحسن علي: يمة انتِ بس تحبيها وخايفة عليها!

-رسمية: انچب انا وين وانتَ وين! احچيلك چلمة علي!

-شيخ علي: رسمية الجاي تگولينه صح وعلى راسي بس سلوى ما اسكتلها مااا اسكت لهاي المجرمة وامرر مصايبها مرور الكرام!

-علي الحـق: ايدي بيدك بوية امشي ننعل والديها!!

-علي التـقي: يا جماعة انا اكول لو نرجعها لاهلها ونخلص منها خليهم هم يتصرفون وياهة

-الامـير علي: وتشتغلنا من بعيد لبعيد موو؟؟

-شيخ علي: ارجعها بشرط اكسر ظهورهم بفصل اطرهم بي نصيين!

-رسمية: مو انتَ راح تكسر ظهورنا بهذا فصلك علي شمالك صاير متهور وماخذتك العصبية

-شيخ علي: سكتييي رسمية سكتييي امشوا يا ولد

-علي التـقي: بوية يواشك خلينا نتفاهم فدوة اروحلك

-شيخ علي: نتفاهمم على بلاويها؟؟؟ ولك انتَ مااعندك غيرة على اختك ونسوان اخوتك؟؟!

-علي التـقي: رحم الله والديك بوية سويتني ماعندي غيرة ممنون منك

-ابا الحسن علي: چا شتفسر برودك؟؟؟

-علي التـقي: خايبين مو باارد انااا والله موو بارد بس چلام امي عين العقل كلشيي نسوي راح يرجع بشكل سلبي على حبيبة انتم ما تعرفون سلفنا شنو من بشرر ملفي شمالكم!!

-علي الحـق: من الاخير سلوى ما راح تطلع منها وما تطمطم سالفتها لو مادري شيصير، اذا مو احنه طيحنا حظها فـ بيت مسعود ما يسكتون ويلعبون بينا وبيها فلك

-رسمية: خليهم.. اي لا تعاينون عليّ هالشكل خلي بيت مسعود هم يأدبوها بس لا تطلع علينا سمعة احنه الذبحنا دخيلة اجت لدرانا!

-الامـير علي: خوب انتِ يمة بس تفكرين بالنااس ما تفكرين بصخام وجوهناا والنعل الاكلنااهة بوجودهااا

-شيخ علي: بسس! امشوا نروح للوادم جاي ينتظرونه فشلة منهم

-علي الحـق: ادوس ب*****

خزره ابوي ما راضي وطلع واخذنا وياه.. رجعنا للديوان ورجعت السالفة انفتحت واخو سلوى دگ رجل هو يأدبها ويربيها بس لا نذبحها ونخش بخطيتها..

-شيخ علي: تره اختك ذابحة زلمة خاف ما تدري تاخذها وياك تلفيلك مصيبة على راسك مو تگول ما گلتولنا!

-صباح: ذابحة زلمة؟؟!

-الامـير علي: اي ذبحت ابن عمي زيد واهله اليوم افتهموا وماكو كلها يومين ويعرفون سلوى وراهة ويجوكم يدورون فصل

-صباح: لا خالي لاا احنه مالنا غرض لاا منين نجيب خليها تولي ذبحوها شمروها ذبوها بالسجن احنه شايلين ايدنا منها ومتبرين

-شيخ علي: چا مو تريدها انتَ وخايف على اختك!

-صباح: هاي گبل لا ادري بيها كاتلتلها زلمة هسة ما نريدها شيخ هي مريتك وانتَ اولى تتصرف وياهة

-شيخ علي: اخر چلام عندك؟

-صباح: اي والله هذا هو بكيفك شيخ هي دخيلتك عسى ما ذبحتها احنه راضين بعد هي بنيتكم صارت

-شيخ علي: خوش هذا هو

توادعنا وانهزموا من البيت يتراكضون من سمعوا بيها فصل وما اللومهم، ضحك علي الدر مستهزأ وفر بيده يكول..

-علي الدر: باعوا اختهم ولد العارية

-علي السور: بوية شنو راح تسوي هسة؟

-علي النور: بوية گبل لا تجاوب...

توجهت الانظار كلها على علي النور واولهم ابوي، اشرله براسه بمعنى "شبيك" وهذا اخوي وجهه صوفر، ذب حسرة وگال بتردد..

-علي النور: بوية ادري ما منتظر رأيي ولا تهتم تسمعه بس.. بس لا تسوي شي تندم عليه، سلوى غلطت وكلنا نعرف غلطها شكبره بس كلنا نعرف حكمتك ووعيك ومخافتك من رب العالمين اكبر

سكت وسكتنا كلنا ننتظر ردة فعل ابوي بس ما انطانه مجال علي السور وكمل وراه..

-علي السور: بوية نكره سلوى اي انا ما اطيقن شوفة وجهها بس انا ويه نور، عاقب سلوى بالطريقة التعجبك بس لا تكتلها ما تستاهل تلوث ايدك بدمها وتوگف باچر على السراط تتحاسب على وحدة ما تسوى نعالك

خزرهم علي الحـق خاطر يسكتون وبساع خنسوا، ما حچى ويانه ابوي شي ولا علق على حچيهم الاتفق وياه مية بالمية.. اول مرة زوج المشاكل يحچون شي بي خير واظن حتى ابوي مصدوم بيهم وما جاي يكدر ينطق..

-شيخ علي: عوفوها محبوسة بالاستقبال بينما افكر شني اسوي بيها

هزينا روسنا ساكتين ومحد بينا اعترض اصلاً محد بينا عنده الجرأة يتلاسن اكثر ويه ابوي وهو بهالوضع بعلي يشگ حلوگنا..

-شيخ علي: بدر گوم جيب مرتك من بيت اهلها لا تخليها هناك

گام بدر وگام ابوي وياه طلعوا ثنينهم من الديوان وعافونا نضرب اخماس بأسداس واحد يعاين بوجه الثاني وما قاطع صمتنا غير لطمة الامـير علي على فخذه حييل وگال بحس محترگ..

-انا لو بس افتهم شبي ابوي ارتااح شماله متردد هيج! من يمته ابوي يتردد بقرار؟؟

-علي الدر: امير لا تلومه تره جاي يحكم على مرته وام بنيته انتَ لو بمچانه هم هذا وضعك يصير

-علي التـقي: اموري انتَ ماخذ الموضوع بعصبية وغيرتك عامية بصيرتك أي خطوة غلط يتصرفها ابوي تنگلب ضدنا وضد كل نفر موجود بهذا البيت

-علي الدر: ثانياً لازم تخلي ببالك ابوي ماعنده دليل ملموس ضدها ويكدر يزامط بي كل الموجود مجرد محادثات ومن موبايل تكدر بكل بساطة تنكر يعود الها

-علي التـقي: خصوصاً وكل المحادثات لا اسمها مذكور ولا صورتها.. فلست المحادثات تفليس اريدلي واحد كاتب سلوى ماكو كلها اسماء مستعارة!

-علي السور: چا الله يلوم الي يلوم ابوي حگه من هيج متردد

-ابا الحسن علي: انا ما اللوم ابوي سلوى لو ما چانت دخيلة چان صار الموضوع هواي اسهل بس سالفة طبتها لبيتنا لغرض الحماية كاسرة رگابنا

-علي الدر: شباب لا احد يحجي بهاي السالفة ويضغط على الحجي بعد تره ابوي مو نفس اول.. الزلمة كبر والصدمة البي ما جاي تخلي يفكر زين بهداي عليه

-علي الكـرار: صحيح.. شيريد يسوي خلي يسوي عسى ما يسامحها احنه مالنا شغل

-علي الحـق: والله انتم تمخرطون هاي لو يمي بالعباس ما اخليها تشوف شمس باچر اشگها نصين...

**

"حــبيبة"

مأساة.. ماعندي مصطلح يناسب وضعي ووضع البيت غير مأساة، احنه بمأساة وورطة حقيقية السوته امي كسر گلبي وعيني گدام اهلي حتى ما جاي اكدر ادافعلها وافزعلها گلبي تعب منها، تعب وانا ادافع لغلط لا يغتفر..

ضربت مچان گلبي چم مرة اريدن الوجع يهيد ومسحت دموعي الغسلت وجهي وگمت ناوية اروحلها واواجهها اريد افتهم شنو السبب ليش كل هالحقد ليش جاي تسوي بينا هيج ليش تسوي ببنيتها هيج!!

-حبيبة: يمة وين قفل باب الاستقبال؟

-رسمية: ليش يمة شتسوين بي؟

-اريدن اشوفها

-گعدي حبيبة ولا تحرگين افادچ گعدي

-فدوة يوم فتحيلي الباب خليني اسولف وياهة وافتهم بلچن عدها تبرير

-ليلة: تبرير لشنو حبيبة؟ مو السالفة انعرفت وامج انفضحت هي السبب بكلشي جاي يصير بينا تَـمني تخبلت بسببها وعبق لولا ستر الله هم چان راحت بيها بسبب السحر الشمروه بباب بيتهم

-حبيبة: ميخالف ابوس ايدج يمة خليني بس احاچيها فدوة اروحلج بداعتي

-رسمية: ابوج ما يرضى والله ما يرضى

-ابوس ايدج فدوة فدووة

طحت على ايدها ابجي وابوس بيها اتوسل اريد اشوفها، گلبي يگلي هاي اخر مرة اكدر احاچيها واشوفن امي گلبي ناغزني عليها وجاي اموتن على البطيء اريد بس اسمع حسها..

-ليلة: عمة انطيها المفتاح خليها تشوف امها لاخر مرة

-ابرار: اي عمة ما يضر لو شافتها خطية لا تكسرين گلبها عايني لحالها

-رسمية: ولجن شلون بيجن انتن شلون

گامت مستسلمة وكمت وراهة اركض، طلعنا من باب الحديقة فتحت الباب لان مفتاح باب الاستقبال الداخلي عند ابوي وبس البره يمها، حطت المفتاح بالباب جاي تفتح القفل واندارت من سمعت صوت باب الحوش ينفتح..

-رسمية: هاي شني.. شجابها هنا

عكدت حاجبي مستغربة من شفت شمس وامها فتحن باب الحوش وطبن مخبوصات او خالتي ام شمس المخبوصة شمس جانت طبيعية..

-نهى: اختي وين؟؟ وينها سلووى شصار بيهااا

طبت تهرول وتتعثر بعباتها وتصيح وانا ما تحملت اكض روحي اكثر وطكيت من البجي، ركضت عليها حضنتها واصيح من كل گلبي منهارة.. اريدن هالجبل يروح من صدري اريدن امي القديمة ترجع تعبت محتاجتها..

-حبيبة: ياريتني ميتتة يا خالة ولا شاهدة سواية امي

-نهى: سودة بوجهي عليج يا يمة انهد حيلي عليج.. وينها امج حبيبة وينها؟؟ شصار بيهاا سولفيلي

-حبيبة: هنا هاي محبوسة بالاستقبال ابوي مقفل عليها وما يرضى احد يفوتلها

-نهى: ام علي فدوة لطولج مو سالفة هاي ما يصير هيج كلشي ينحل خية صح سلوى غلطت بس كلشي يتصلح والله

-رسمية: كلشي يتصلح الا سواية سلوى عيني ام شمس

-نهى: خليني اشوفنها بلچن...

-رسمية: لا عذريني الشيخ ما يرضى

-نهى: انا خيتها ام علي احلفج بويلادچ تخليني اشوفنها واحچي وياهة چلمتين

قفلت امي رسمية وظلت تعيد نفس الجملة "ابو علي ما يقبل" وخالتي بقت مستمرة تتوسل، طاحت على ركباتها تتوسل وتبجي بگلب ملچوم وامي رسمية ما رضت عليها گومتها على حيلها وكالت..

-ما يرضى نهى لا تحطيني بموقف محرج ويه الشيخ بعلي ياكل راسي

-نهى: اخر مرة ام علي اخافن ما اشوفها بعد

بچيت معصور گلبي من جملتها وشمس نزلت راسها مقهورة، هزت راسها امي بيأس وگالت بتردد..

-رسمية: عشر دقايق غيرها ما الچن سولفن وياهة ونطلع بساع، ام شمس لا تفكرين تساعديها بشي والله الويلاد كاعدين بالديوان بأقل حركة يحرگون البيت علينا ويكتلوها بمچانها

-نهى: لا وراس بناتي ما اسوي شي والله بس احاچيها

هزت راسها امي رسمية وفتحتلنا باب الاستقبال وطبن خالتي وشمس وهي.. طبيت اخر وحدة بيهن انا وخطيت للاستقبال بأصعب واثگل خطوات اخطيها بحياتي ماعرف شلون راح اواجهها شلون راح اكدر اخلي عيوني بعيونها وره السوته بيه..

-نهى: يمة خيتييي

صاحت من الباب وركضت على امي تحضنها وتبجي فوگ راسها وامي واكفة بوجهها الاصفر مبحلگة عيونها وتعاين عليَّ..

-نهى: شلونچ سلوى؟؟ شلونچ ولج حاچيني خيية

-سلوى: حبيبة

-نهى: اي هاي بنيتج حبيبة هم اجت تشوفج سودة عليه

طاحن دموع امي على خدودها ومدت ايدها الي وگالت بصوت مبحوح من البجي..

-تعاي يمة تعاي بنيتي

تبسمرت رجلي ما جاي اكدر اتقدم عليها، شهگت بدون صوت ودموع وظليت اعاينلها من بعيد وهي باقية تبجي وتأشرلي بيدها..

-سلوى: تعالي حبيبة

-نهى: روحي حبيبتي روحي لا تخليها بنفسها

-رسمية بهمس: روحي حبيبة لامچ

هزيت راسي لا ونزلت دموع جديدة على وجهي، مسحتهم بساع ارزل بروحي من جوه وادوس على گلبي بيدي حييل اسكت دگاته واخليهن يهيدن.. ما يصير اروحلها ما تستاهل هالانسانة ما تستاهل تكون ام..

-حبيبة: هاي مو امي

-سلوى: لا يمة.. لا بنيتي لا حبيبة انتِ بنيتي ووحيدتي لا تكولين هيج

-حبيبة: اجيت بس خاطر اسألچ سؤال حاز بگلبي واريد جوابه

-سلوى: كولي اسمعج حبيبتي

-حبيبة: انتِ...

سكتت بساع فازة من سمعت صوت ابوي يصيح لامي رسمية من جوه، انخبصت امي ماتعرف شتسوي وظلت تراوح بمچانها تروح وتجي..

-رسمية: حبيبة ابوج يندهلي يمة اأمنچ امانة تحچين وياهة شوي وتطلعين وتقفلين الباب! اامنچ حبيبة وانتِ تعرفين كلش زين شيصير لو ابوج درى بينا هنا والله تنهجم بيوتنا كلنا!

هزيت راسي بـ اي وحطت المفتاح بيدي وراحت تركض لابوي، غمضت عيوني مهدود حيلي وكعدت على القنفة اريح جسمي اليرجف..

-سلوى: حبيبة

-حبيبة: اششش

-سلوى: شبيج يوم احچيلي! سولفيلي يا بعد امج شبيچ مريضة؟ شو وجهج اصفر ولج سولفيي

-حبيبة: شسولف.. شسولف انتِ بقيتي بيها سوالف

-سلوى: انا معليه.. كل الصار مـ..

-حبيبة: ليش؟.. ليش بهذلتينا؟ ليش بعتي بنيتج؟ ليش سويتي كل هذا الشي ليش؟....

**

"لـــيلة"

رجعت عمتي للصالة تركض من سمعت صوت عمي يصيحلها وانتبهت عليها تغمزلي واشرتلي براسها على الاستقبال، لقطت السالفة وعرفت تريدني اروح وياهن فـ ملصت روحي عود علساس رايحة اجيب الهدوم من الحبل وركضت للساحة اطب من باب الاستقبال البره..

طبيت وشفت الوجوه مگلبة، حبيبة وجهها غادي دم وسلوى واكفة تسولف بكل صلافة وعرامة وتكول..

-حبيبة انا مالي غرض والله اصلاً مادري على شنو جاي اتحاسب مادري يمة شمسوية انا

-حبيبة: تره لگوا موبايلج الثاني!! لگينااه على شنو جاي تنكرين وانتِ انفضحتي!!

-سلوى: يا موبايل ثاني؟؟؟

-حبيبة: المخبيته ببيت خالة نهى!!

-سلوى: انا؟؟ انا عندي موبايل ثاني!!

-ليلة: اگلج بطلي هالسوالف تره تخزيتي والكل عرف بسوالفج

-سلوى: هاي ياهي ذبت هيج سالفة براسي؟؟ شمس؟؟

-شمس: انا شكوو

-سلوى: ماكو غيرج الچلبة!! ماكوو غيرج سويتي سوايتج وذبيتيها براسي!

فكيت حلكي على صلافتها وشمس شهكت ودگت صدرها، يتناترن مهامس من سمعن صوت عمي جاي من الساحة مبين جاي يريد يطلع من البيت..

-شمس: خالة لا تذبين الصوچ بيه حرام علييج خافي ربچ!

-سلوى: هاي سوالفج ام الگالات تعلميني بيج وببراعتج

-نهى: سلوى شبيچ!! شو ذبيتي الصوج بشموسة؟؟

ضحكت سلوى بصوت مسموع من امنت عمي طلع من البيت وصارت تكدر تحجي براحتها خصوصاً الولد كاعدين بالديوان وما اظن يوصل صوتنا الهم..

-سلوى: حبي ما اذب الصوچ بيها انا متأكدة هي السوت هالشي خاطر تطيحني وتخلي شيخ علي يطردني!!

-حبيبة: كاافي انتِ ما تمليين!!

-سلوى: حبيبة انا ما مسووية شي كله من شمس هي السبب بكلشي هي جاي تخرب سمعتي كدامكم!!

-شمس: احجي منا لباجر كل الي بالبيت يعرفون انا شنوو مستحيل يصدگوچ!

-سلوى: تره زواجچ صار على ايدي شمس لا تنسين انا خطبتچ وانتشلتچ لخير الشيخ من چانت دشداشتچ تنكث عليج من عتگها

-نهى: عيب عليج سلوى والله عيب تعيرينا بفرگنا

-سلوى: چا كضي بنيتج وخلي رجليها تلوح الكاع لا تنسى روحها وتصدگ صارت ام البيت تره مثلما جبتها اطلگها من بدر وانعل خير خيرها!

-شمس: لو تموتين ما يطلگني بدر انتِ هذا الكاتلج تغارين مني وتموتين حرگة من تشوفينه مدللني!

-سلوى: ايييييي مدللچ من وره سحورتچنن من وره سحورة امچ الزلمة راح يموت على ايدچنن وايد سحورتچن وسوالفچن مال مبايلات تجيبن وتدحسن وتشمرنها براسي

-نهى: ولج احنه امهات السحورة احنه؟؟! سمعي امج حبيبة سمعي مرة شيخ علي اليحلفون براسه الوادم!

-حبيبة: خالة اروحلج فدوة لا تهتمين هي بس تعبانة نفسيتها وما جاي تعرف شتحچي مسحيها بوجهي

-نهى: انا راح اسكت احتراماً الج ولبنيتچ بس لا تنسين سلوى انا اختچ الچبيرة وعيب هاي تصرفاتج

-سلوى: اختي الجبيرة كضي بنيتج المسموومة كضيهاا لا بعلي طلاگها على ايدي يصيير نهى هاي وانا حذرتج!!

-نهى: سلوى كافي شمس شمسويتلج ليش هيج وياهة شبييچ هاي وانتِ خالتها اخت امها!

-سلوى: چاا السوته گليّل؟؟ تذب تهمة بكبر راسها عليَّ وتكول انا عندي موبايل ثاني خاطر يذبحوني!

-شمس: عبن صدگ عندج موبايل ثاني! وغير الموبايل جاي تسوين مشاكل بين الچناين وبين الولد تردين تفرقينا يا حقيرة!

شهگت فازة من هجمت سلوى على شمس وهمشتها من شعرها وطيحتها بالكاع، عاطت شمس بكتمة وحضنت بطنها خايفة وامها وحبيبة تخبلن.. ركضت حبيبة تقيّد امها الهايجة وانا وام شمس ركضنا على شمس الطايحة وتشهگ بخوف..

-نهى: الله لااا يوفقج يا سلوى ولا يحفظج والله الاا اشچيچ يم زلمتها اخلي هو يتصرف وياج

-سلوى: هديني حبيبة وخرري خلني اچفص ببطن هالچذابة واطلع الفرووخ من حلگها

-حبيبة: يمممااا كااافي

صاحت حبيبة بكل حسها ولطمت على حلگها تخاف لا يسمعوها الولد، ما اهتميتلهن وگومت شمس من الكاع وگعدتها على القنفة البت بس تبجي حاطة ايدها على بطنها وتنوح وامها تلطم وتزلغ بخدودها خايفة عليها..

-سلوى: ساقطات بايرات لوما انا بدر ما يگلب بنيتچ الخايسة الكاتلها الضيم بس انا خليتها براسه اناا رسمتها بعقله وخليته يتسودن بيها انا ومثلما رسمتها بعقله اخلي ينساها واخلي امه تزوجه اغاتهاا

اندارت نهى على اختها انفاسها تلفح نار ووجهها ينفض دم، رصت على سنونها بحقد وگالت بصوت ناصي وجسمها يرجف..

-نهى: عايين من يحجي عاينو الطلعت من بيت ابوي مصلخة واجت تركض لبيت شيخ علي خاطر يسترها! النزلت راس ابوي وهي تسولف ويه زلامهاا وتتصلخلهم!

خنس الكل وره جملة نهى الصدمتنا حتى سلوى فكت عيونها على وسعها وراسها صار يهتز من العصبية.. فلتت نفسها من ايد حبيبة وهجمت على اختها تعاركها وركضت عليهن افاككهن.. حبيبة كضت سلوى وانا كضيت نهى البقت تفضح بسلوى وتحجي شغلات ما ينلبس عليها ثوب بس كل الحجي جاي يصير بصوت نااصي چن متحذرات لا يطلع حسهن..

-نهى: كل البيت مخدوع بيج واولهم شيخ علي يا سلووى!!

-سلوى: ولج هدددينيي اشرب من دمهاا

-حبيبة: خالة فدوة اروحلج كافي خاااالة

-نهى: امج دمررت اختها بيدهاا دمرت شذى وشمرتها بالشماعية بس لانها تعرف بسوالفها ولگفتهاا تحاچي ابن الجيران من السطح وتسوي وياه منكرر!

لطمت وجهي وسلوى ضاعت علومها وجهها صار هاكبره ظلت ترجف بيد بنيتها ودموعها تصب.. اندارت على حبيبة وكالت وهي ترجف..

-سلوى: چذاابة چذابة لا احد يصدگهاا جذاابة

-نهى: چذابة مو؟؟ روحوا تأكدو من ابووي چا ابوي لييش ما يعاين لوجهچ!! ليش تلعب روحه منج ومن بنيتج ما يريدكمم عبنچ انسانة فاجرة!!

-سلوى: لوو فاجرة ما يثبت برائتي شيخ عليي من اجييته بس انتم كلكم ظلمتوني!!

-نهى: سلووى مو علينا سوالفج انتِ لعبتي لعب من صغرج تعرفين سوالف اكبر من عمرج!! لعبتي جوولة بس چنتي تعرفين شلون تلعبيها صح وما تأذين نفسچ وينمس شرفچ وتضيعين المحافظة عليه كل بت!!

-سلوى: سكتوهاا جذاابة والله جذاابة ما مسوية شيي انا ما سويت

-نهى: ما تصدگوني؟؟ روحوا سألوا شذى هي شاهدة!! هي شافتج بعيونها! جانت صغيرة وما تفتهم ونزلت تصيح جوه مخترعة وخايفة من سمعت صوتكم وشافتكم ماا انسى السويتي بينا سلووى ما انسى ابوي الراد ينجلط من شافج بهالحال!!

-سلوى: لاااا ما سويت شييي شذى چذبتت هي چذبت على الكل عبنها تكرهني!!!

-نهى: محد جان يكرهج جنتي مدللة البيت ومدللة امي بس انتِ جبتي الضيم لروحج! سلوى چنتي من يوم يومج لئيمة وانانية وتفكرين بنفسج وبس وجبتيلنه الحچاية!

-سلوى: سكتيي جذاابة

فلتت نفسها من ايد حبيبة ومن الصدمة كلنا ظلينا فاكات حلوگنا ما مصدگات الجاي نسمعه وهي اخذت بحلگة عيوننا وصدمتنا لصالحها وركضت تزبگ تطلع من باب الاستقبال مهزومة..

-ليلة: لاااا رااااحت

ما صحت حبيبة من جمدتها چن رجليها بادن وبعد ما يحملنها، ركضت انا وراهة مثل المسودنة وشفتها وهي تطلع من باب الحوش تركض حافية وانا من سرعتي طار النعال من رجلي وطلعت اريد اللحگها.. بعدني بباب الحوش ما عابرة وسمعت صوت طلقات نار صلت وحدة وره الثانية..

صرخت شاهكة من حسيت بأيدين قوية تحضني من وره وتسحبني تطببني البيت، اللتفتت اريد اشوف منو وذبلت روحي من شفته ابا الحسن واكف وراي وحاضني بكل قوته ويلهث..

-وين راايحة بهالحاال ويين

-سلوى حسن سللوى انهزمت!!

-ادري ادري سمعنا

يلهث كوة يحجي وانا الرجفة بعدها كاضة جسمي ما فارقتني، وخرني من بين ايده واشرلي على باب المطبخ وكال..

-طبي جوه

-صوت طلقات صار ابا الحسن خاف بيت مسعود هدوا علينا!

-لا

-شنو لا

-لا مو بيت مسعود روحي ليلة

-شنو شبيك كوة تسولف ياهو چا؟؟

عافني بدون جواب وطلع من باب الحوش يركض، ما تحملت اسكت وارجع بدون لا اشوف شكو فـ مديت راسي من باب الحوش وچان اشوفن ولد عمي علي كلهم طالعين من الباب الصغيرة التخرج من الديوان وزلم كومة طالعين من بيوتهم..

-ليلة: هاي شصاير

ما جاي اشوف شي الوادم متجمعة بمچان واحد واسمع صوت صياح علي الحـق وزلمة وياه ما ميزت صوته، خفت يلگفوني وتصيرلي مصيبة فـ سديت باب الحوش واللتفتت للبيت وشفت حبيبة هستوها جاي تطلع من باب الاستقبال وتجر برجليها جر..

-ليلة: حبيبة شبيچ

-حبيبة: رجلي.. رجلي ما جاي اكدر أحركها

-ليلة: سودة بوجهي ولج شبيچ يمة

ركضت عليها اسندها على جسمي بس ما رضت وظلت عيونها على باب الحوش وتسأل على امها..

-ليلة: حلوها الولد لا تخافين امشي

-شصار ليلة

-مادري هسة امشي نطب جوه، وينهن خالتج وشمس؟

-بالاستقبال بعدهن

هزيت راسي وعفتهن هناك واخذت حبيبة وياي اطببها من باب المطبخ، استقبلتنا عمتي رسمية وجهها مخطوف وابرار وياهة وشايلة بنيتها الصغيرة بس شني وجوههن ما تتفسر..

-حبيبة: يمة..

-رسمية: سلوى نقلوها للمستشفى حبيبة

-حبيبة: شنو..

-رسمية: ماعرف كلشي مادري دگلي تقي وگال راح ينقلون سلوى للمستشفى

-حبيبة: صار بيها شي من طلعت تركض؟؟ سولفي يمما شصار بيها؟؟؟

-ابرار: مانعرف حبيبة وداعتج كلشي ما حچولنا.. اشش ماما اشش بنيتي

بنيتها فحطانة تبجي وحبيبة ترعش بين ايدي وانا بطني احسها تگطعني من الوجع بس ما حجيت شي مو وكتها..

-رسمية: ليلة جيبي حبيبة وتعالي.. وينها شمس؟ وين راحت

-ليلة: موجودة بالاستقبال عمة طيحتها سلوى وبطنها يوجعها

-رسمية: عسى ماااكو سلوى يجااه عليي

عاطتها وراحت تهرول تشوف شموسة وانا وابرار اخذنا حبيبة ويانه نطببها لغرفة عمتي، البت وجهها ما ينعرف لونه وعيونها فاكتهن بكل حيلها وجسمها كل ساع ضاربته قشعريرة وتنخض منها..

-ليلة: حبيبة انا رايحة اتصل بأبا الحسن خاطر نفهم شني السالفة

ما جاوبتني بعدها مو على بعضها فـ عفتها وياهة ابرار وصعدت لغرفتي اركض على موبابلي، دگيتله چم مرة ياله جاوب ومن جاوبني صوته كلش ما يبشر بخير وگوة تطلع منه الچلمة..

-ليلة: فهمني ابا الحسن تره اختك راح تموت!!

-ابا الحسن علي: شفهمچ ليلة! افهمچ علي الحـق ضرب طلق على سلوى من شافها انهزمت!

-ليلة: صخاااام وماتت؟؟؟

-لا ما ماتت هاي احنه بالطريق ماخذيها للمستشفى

-ابا الحسن والوادم شكالت من شافوا حق يضربها؟؟

-محد كال حسبالهم اجت طايرة من مچان ثاني وصارت بيها.. يلا ليلة يلا وصلنا احنه انا اروح

-حباب ارجع خابرني طمني

سد الموبايل بدون لا يجاوبني بس ظليت اللوب، عصرت الموبايل بين ايدي ونسيت كلشي جوه وعقلي وروحي صارت ويه اتصاله اريد بس افتهم شنو تاليتها وشلون راح تنحل..

كضيت بطني التوجعني من الركض وفكرت امدد خاطر اتحسن شوي ماكدر اضغط على نفسي اكثر خفت على الطفل.. غمضت عيني ثواني اريحهن ومادري شلون اخذتني الغفوة مو من عوايدي بس يجوز عبن كاعدة من الفجر اليوم..

فزيت مخترعة على صوت موبايلي يدگ حاطته بصفي، فركت عيني وباوعت للاسم وشفت المتصل "ابا الحسن" جاوبته بساع بدون تماطل..

-الوو ها حسن بشر؟؟

-وينج انتِ اختفيتي!! الففف مرة دكيت عليج!

-يمته هاي اول مرة تدك

-ولج عشرتالاف مررة اتصلت!!

-مادري ابا الحسن نايمة والله ما منتبهة على الموبايل

-نايمة واحنه الدنياا مشتعلة يمنااا

-شبيك شصاير؟؟ سلوى ماتت؟؟

-ياريت ماتت يارييت ولج الشرطة ترسوا المستشفى الدنيا مگلوبة

-الشرططة؟؟؟

-هاا خوية؟؟ جايك اي جاي جاي انا

-اوكف ابا الحسن وييين رايح ولك لاا تسده

ضربت رجلي بالجرباية من طبگ الخط بوجهي، ماكدرت اكض روحي ونزلت الدرج اركض اريدلي واحد يفهمني بس البيت يصيح بوجهي وماكو غير ابرار كاعدة ترضع بتها..

-ليلة: ولج ابرار افتهمتي بالصار؟؟

-ابرار: اي افتهمت خية افتهمت

-الشرطة شعدهم بالمستشفى ما فهمت هالسالفة؟

حطت فطومة على ملحفها وغطتها واندارت عليَّ بكل جسمها، فكت حلگها مستغربة وكالت بشهگة..

-چا وين چنتي انتِ خية مو الدنيا انگلبت من شوي!

-انگلبت وين

-هنا ببيتنا اجه مسعود يرعد رعد ومن شاف محد موجود من الولد حسباله مهزومين بس طلعتله عمتي وگالت همه بالمستشفى اخذ ويلاده وراح

-خرب حظي كل هذا وانا نايمة شون ما حسيت!

-لا عادي حگچ ما تحسين عبن اجوا من جهة الديوان وعمتي بساع طلعتلهم يعني محد راحلهم غيرها

-زين عمتي وحبيبة وين؟ وشمس وين؟

-عمتي وحبيبة طلعن للمستشفى وشمس راحت لبيت اهلها ويه امها كالت من تفض هالسالفة ياله ترجعها

-والشرطة لشني هسة غير نفتهم....!

**

-حبيبة!! حبيبة گعدي حبيبة!!.. سور ما جاي تصحى ولك سوور

-علي السور: وخر نوور اذا انتَ نايم عليها خنگت البت.. حبيبة ولج خايبة لا تموتينن

-علي النور: امشي جيب الطبيب امشيي

اسمع لاصواتهم فوگ راسي وامي رسمية كاضة ايدي حيل، احس بالدنيا تفتر بيه والتعب ماخذ من حيلي حيل.. فكيت عيوني على كيف ورجعت عصرتهن من وره صوتهم احسه طب بدماغي..

-علي النور: ولك كعدتت رجعت لوعيها رجعتت

-رسمية: الحمدلله والشكر حبيبتي الله لطف بينا الحمدلله

كضيت راسي اليوجعني كللش وانتبهت انا بدون شال، فزيت مخترعة ادور على حجابي وكضتني امي رسمية من ايدي تهدأني..

-لا تخافين ماكو احد يمة

-وين شالي.. ليش نازعته.. ااخ راسي

-علي السور: لا تتحركين هواي حبيبة راح تتوجعين

-حبيبة: شنو؟.. ليش

-علي النور: چا غير طحتي على راسح وانضرب بالحايط شني نسيتي؟

صفنت بوجههم اجمع افكاري واستذكر الصار.. رجعت راسي على المخدة متوجعة من تذكرت طيحتي وتذكرت كلشيي صار گبل لا اطيح وبدون لا اسيطر على نفسي بدت الدموع تتجمع بعيوني..

-رسمية: لا تبجين يمة لا تحرگين بگلبچ ما تستاهل

غطيت وجهي متكطعة تكطع من جوه بس ما نزلت دموعي، حلفت ما ابجي عليها بعد السمعته وشفته.. ما اذب دمعة وحدة على حرمة باعتني بأقرب واسهل فرصة اجت لايدها ما انزل دمعة غالية على وحدة ما مشتريتني بنعال!!

ما انسى من وصلت للمستشفى مفزوعة وتلگوني اخوتي يطمنوني ويگولون ما تأثرت كلش بالطلقة علي الحـق حرص ما يموتها والطلقة شخطتها شخط ومرت من يمها.. طبيت عليها الغرفة ارجف عليها واول ما شافتني بچت ومدتلي ايدها تريدني احضنها..

ذبيت روحي بحضنها ابچي وهي تبچي وتحجي ماعرف شتكول ما افتهم صارت الكلمات تداخل وياهة من الخوف بس كدرت اللقط صوتها من كالت..

-هربيني حبيبة يردون يذبحوني هربيني يمة

-حبيبة: شنو

-طلعيني منا بدون لا يحس احد بنيتي لا تعوفيني وحدي فدوة لطولج

-لا يمة محد راح يذبحج ابوي ما يسويها هو..

-ووولج يذبحونيي سمعتهمم سمعت اخوتج وهمه يتآمرون عليَّ والله

-لا مو بكيفهم يمة شبيچ ابوي هو اليحكم وقراره اليمشي

-انتِ غبييية؟؟؟ جاي اگلج الامير حاد سنونه عليّ ولو راد شيي يسوي غصباً ما على ابووه والكل!

-لا انا مـ...

عطت مخترعة من مدت ايدها وصفگتني راشدي على خدي، فكيت حلكي مصدومة من تصرفها وفزيت من نترت بحقد..

-طلعينيي منااا لا اغضب علييچ طلعينيي

-يمة

-وصمممه اشتعلت امج طلعينيي من خرررب روحج طلعينييي ولججج

-شلون اطلعج واخوتي بالباب واكفين مثل الحرس

-تصرفي حبيبة!! لاا تصيرين انتِ واخوتج عليّ چا ما غزر بيج تربيتي وتعبي!

-الجاي تطلبي صعب ماكدر اهربچ منا خليج هسة وضعج ما يسمح تطلعين من المستشفى عايني لحالج

-ما تطلعيني يعني؟؟ چا طلعي بره لا تگابليني

-شنو

-طلعييي بره ماريد اشوفن وجهج طلعيي

گلبي صار يدگ بسرعة وضعها يخوف ترجف وتحجي بهمس حجي مخربط ولونها مخطوف من الخرعة، عدلت الشال على راسها واشرتلي على الباب ونترت بيه..

-ما منچ فاايدة بعلي بس عِلة على گلبي كاعدة!

-شبيچ جاي اكلج ما اكدر اهزمچ ليش ما راضية تفهمين!

-انچبيي الله ياخدج ويخلصني من ضيمچ اشتععل بختي الخلاني اصير امچ!!

-حرام عليج شبيچ انتِ محاربتني بكلشيي ما كفاچ السويتي بيه!!

-سكتيي حبيبة سكتيي بطلي تتمسكنين على راسي

-اتمسكن وانتِ مشوهة سمعتي!! انتِ شلون ام فهميني شلوون

-ما ردت اصير اممم ماردت اتزووج ابووج ولا ردت اعيش هالعيشة الگشرة!! كرهت روحيي بيوم طبيت بيتكم وتزوجت زلمة متزوج گبلي!

-چا ليش رحتيله! ليش رحتي لابوي بالذات لييش!!

-خاطر اثبت برائتي واخش بعيون الحچوا على شرفي! ماكو غير شيخ علي وگفلي طول وصد ابوي عن ذبحي محد غيره وگفليي

-وهيج تجازينه! هيج تجازين الزلمة الوكفلج وستر عليج!

نزلت راسها تغطي عيونها وتتنفس سريع، ظلت تاخذ شهيق وزفير وجسمها ينخض خض مثل السعفة.. تقربت منها على كيفي ومديت ايدي على چتفها وضربت ايدي توخرها ما ترضى اللمسها..

-سلوى: وخري لا تكضيني

-شنو جاي تسوين بروحج يمة

-محد خبلني ودمرني غير مرة ابوچ واخوتج! محد داس عليّ وعلى كرامتي غيرهم وانتِ بكل مرة تفزعيلهم وتدافعيلهم ضدي!

-يمة عبنچ تغلطين كل غلط اكبر مني ومنج ومع ذلك اوكف وياچ واساعدج بس كافي مليت الى متى اظل اطمطم على سوالفج انا!

سكتت تمسح بدموعها الجاي تنزل وبقت على هالهدوء فترة، كعدت على السرير بصفها مكسور خاطري وگلبي من اسلوبها العنيف وياي بس انكسر گلبي من صدگ من بدت تحچيلي على ماضيها هيج من وحدها بدت تسولف چنها تريد تبرر لعمايلها بهالحچي..

-انا لو احچيلچ الجرالي ما توگفيلي هالوگفة، تزوجت ابوج وانا صغيرة.. تزوجت زلمة ما هاويني ولا رايدني، زلمة انجبر لو ياخذني ويثبت برائتي گدام ابوي لو انذبح گدام عينه وينهدر دمي بس چان كفو.. حبيبة ابوج من يوم يومه كفو وما باع بت اجته بنخوة، ما انسى شلون ابوي شالني من شعري من جوه رجلين شيخ علي وگاله هالبت ما تعيش وماريدن نفسها يصعد وينزل بصدرها اريدها تموت بس ابوچ ما رضى..

-حبيبة: وتزوجچ

-تزوجني اي بس هو ما رادني، اضطر وانجبر يتزوجني عبن ابوي دگ رجل وگال كدام الكل انا مو شريفة ولو مادري شيصير ما يصدگ انا بريئة وغير الذبح ما يبرد افاده وهنا وگف شيخ علي وگال البت اجتني دخيلة وانا ملزوم اثبتلك برائتها

هزيت راسي متفهمة وساكتة ويه صوت شهگتها العالية، بچت يهتز جسمها بقوة ولطمت على رجليها چم مرة وكملت..

-وصدگ عقد عليَّ وخذاني مرة وحدة بس.. بس هالمرة خاطر ما انذبح وبعد ما گربلي ولا شالني من گاعي الا من افتهمت بروحي حامل بيج

-من هالمرة؟

-اي.. حظي الفگر خلاني احبل بيج وبدت معاناتي الجديدة وسوالف السم يتطاير عليّ وين ماروح يصيحولي اجت الدخيلة الخربت بيت رسمية وراحت الدخيلة الطبت لشيخ علي مصلخة..

-ليش هيج يكولون

-عبن صدگ طلعت من بيت ابوي هدومي ممزگة على جسمي من الكتل، ابوي طلع روحي من جسمي ورجعها ما خلى وسيلة تعذيب تعتب عليه لحدما كدرت اشرد من بين ايده واروح لبيت شيخ علي عبني اعرف هذا الشيخ شكد حگاني ويخاف الله وهواي يسولفون بي بسلفنا

-نفس الصار بـ ليلة ورفل!

ضربت على السرير بيدها حيل ورفعت عيونها خازرتني معصبة، ضحكت مستهزأة وكالت بحقد مضاعف..

-لاا!! ماكوو مقارنة! ليلة خذت واحد يعشگ التراب التمشي عليها ورفل خذت واحد وگفلها طوول وما كضها وثبت برائتها غصباً على الكل!! لا تجيبيني لذني المدللات! انا تصخمت وتلطمت عمري كله ما عشت نفس البنيات وجنت بحسرة الحب والاحترام!

-بس ابوي حبچ يوم! ليش ما تصدكين هالشي

-حبني بس ما احترمني! جنت اخاف اعارضه بأي شي يكوله لا يشمرني بالشارع ويطلگني! جنت كلشيي يگوله سمعاً وطاعة انچب واسكت لا اعارض ولا اجادل حتى لو گالي روحي ذبحي روحج هم مستعدة اروح اسويها

-چنتي تحبين گبل ابوي؟

سألتها بدون مقدمات وبدون تردد عبن گلبي يگلي امي صدگ چانت عاشگة گبل لا يتزوجها ابوي وهسة تأكدت من هالشي.. سكوتها وصمتها الغريب ودمعتها الطاحت من عينها اثبتلي توقعاتي صحيحة..

-ليش دمرتي نفسج؟ شحصلتي؟

-اكرههم

-ليش!

-شنو ليش؟؟؟ طبيت لبيت كله ولد شباب واحدهم اطول واضخم مني، اشوفنهم شلون يفترون حول امهم وأبوهم والبيت يرهج بأصواتهم ومسوين عليّ حزب مخليني بخانة الشواذي! لا اكلي وياهم ولا كعدتي وياهم ولا الي چلمة بالبيت چانو يكرهون حتى صوتي!

سكتت فترة ماعرف شنو اعلق، سكتت عبني اعرف امي اول ما وعيت على هالدنيا وهي تخبث وياهم وتسوي مشاكل وتفكيرها شراني وابسط مثال گدامي چان هو تعاملها ويه عبق حقدت عليها على حقد امها ودمرت حياتها ولولا علي الحـق الله يعلم شنو جان صار بالبت.. جذبت انتباهي مرة ثانية من ذبت نفس ومسحت دموعها بگفه ايدها واردفت تكمل بنبرة كره عجيبة..

-حلفت ما اخليهم يعيشون متهنين مو سلوى التنذل وتبقى ساكتة! بديت اخبث وياهم واللعب بأحوالهم ووالله ما ندمانة!

-وانا!!

-ما ندمااانة

-انا ما ندمانة عبنج شوهتي سمعتي!!!

-عرج ما يصير بيج انتِ بت ابوج

-صدك تحجين انتِ!

-حبيبة اذا ما تساعديني طلعي بره ماريد اشوفن چهرتچ

-والعباس حراام عليج

-لا تسويلي حراام ما حراام انتِ لو تحبيني صدگ تطلعيني مناا!!

-جاي اگلچ مااكدر!! مااكدر ما كفااچ دفاعي عنج ووگفاتي الچ كل هالسنين!!

-شني مسوية منية عليّ عبنچ مدافعتلي؟؟ صدگ ما تستحين وادبسزز انتِ

-تدرين بآخر سنتين جنت كلل يوم اسأل روحي سؤال واحد!! سؤال واحد دمرني واكلني اكل من جوه اريد اعرف جوابه

-استغفرالله مالي خلگچ حبيببة

-چنت اسأل امي هم تحبني؟؟ هم تشوفني بتها لو ماخذتني درع لحمايتها وبس؟ امي لو صار بيه شي هم توكف وياي وتسندني لو لا!

-شكد تتفلسفين

-بس هالچم يوم عرفت انتِ شنو وعرفت طينتچ، عرفتج لا تحبيني ولا تهتميلي ما تحبين غير نفسج وما تدورين غير مصلحتج!

گلبي يرجف ويه اطرافي وصوتي يا دوبه يطلع من الغصة الذابحة زردومي، اختنگت مذبوحة من ما اهتمتلي ورفعت ايدها وسوتلي حركة "روحي" بدون لا تجاوب او تبرر حبها الي.. طاحن دموعي الاخيرة عليها وطلعت من غرفتها اشهگ وگلبي متگطع وذر وذر..

تلگوني اخوتي وسندي بهالدنيا وكضاني ابوي بين ايده يهدي بيه ويمسح على راسي، بجيت بجي عمرر على صدره بچي نشف دموعي واخذ ثلثين حيلي.. بچي نهايته چانت هو هدم الثلث الاخير من قوتي ويه ما شفت عمي مسعود وولده جايين ووياهم الشرطة وگبت بلبلة بيناتهم..

-مسعود: اجيت وجبت الشرطة وياي عبني اعرف ما راح تسويلها شي يا علي! اعرف راح تسويلي بيها حررمة وما يصير تنمس وسمعتها مهمة بس وعلييي ابن ابي طالب يا شيخ علي لفصلك فصل اكسر ظهررك وظهر ولدك بي ومرتك اسجنها بيددي!!

-شيخ علي: مسعود شبيك انتَ جاينا شايش فضحتنا شكو!

-رزاق: عاين لا تظل تسويلنا شكوو وشبيك كلشيي مكشوف وكلشي انعرف! دخيلة بيتكم ذبحت اخووي وعضيدي!

نط علي النور يريد يحجي وكضه علي الدر بيده يخزره خاطر يسكت، خنس الكل ومن ضمنهم ابوي وجهه گام ينطي اللوان ما يعرف شيكول من طلع الشرطي الامر مالته وگال..

-وياكم شرطة [^^^^^]، حجي عندنا امر اللقاء قبض صادر من قاضي التحقيق بحق المدعوة سلوى محمود صافي وفق المادة [^^^^]...

شهگت من غمج روحي واحس بالردهة دارت بيه، كضيت بأيد علي الكرار اريد اسند روحي وما لحكت على نفسي ظلمت عيوني وما حسيت بروحي الا وانا هنا.. بغرفة من غرف المستشفى وأمي رسمية كاعدة حدي وسور ونور فوك راسي..

-رسمية: يا يمة بسچ هموم امچ اختارت طريچهة وهي جابت هالشي لروحها

-حبيبة: ما شفتهم من اخذوها.. ما شفتهم

-علي النور: احسلچ خوية الله لطف بحالچ من غبتي عن الوعي چان ما تحملتي وصارت فضيحتنا فضيحتين

-علي السور: ابوي ما راح يعوفها حبيبة لا عبالج كال راح ابقى احاول بلچن نلگه حل ويه بيت مسعود

-رسمية: رغم كل السوته بس بعده ابوج يحاول لخاطرج يا يمة، بعلي گال لو اعرف ادوس على شاربي وكرامتي بس لا تبچي وحيدتي وينكسر گلبها...

**

"تَـمني"

وگفت گبال المغسلة اباوع لروحي بمراية الحمام واتنهد، اتنهد انتظار وترقب.. بيدي جهاز تحليل الحمل المنزلي وروحي تعلگت بي صارلها خمسة ايام فايتتني ودا ادعي ليل نهار اطلع حامل، يارب اكون حامل ياارب بجاه حبيبك محمد اطلع حامل..

بعد اللقاء القبض على سلوى محد گدر يسوي شي، عمو علي حاول بكل ماعنده من قوة وسلطة يقنع بيت مسعود يتنازلون ودفعلهم فصل مو بس يكسر الظهر اضطر يبيع بستان كربلاء حتى يوافيه بس ما قبلوا وگال ابا الحسن حتى لو بيت مسعود يتنازلون تنحكم حق عام وتنسجن..

سلوى انتهت بسبب التسجيلات المسجلهن عليها زيد، چان ذكي وسابقها بخطوة طلع محسب حساب كل شي يسوي وياهة وكل اتفاق دار بيناتهم چان يسجل صوتها ويجمع دلائل خاف تغدر بي حتى من هددته مرة من المرات تقتله وتخلص منه كله طلع بالتسجيل وچانت كل هالتسجيلات تتحول لاخوه وهالشي ثبت التهمة عليها وانحكمت على اساسها.. بس شنو الفايدة مات زيد وكلشي ما حصل!

وضع البيت مزري من بعد سجن سلوى، ما اعرف شسولف وشنو اكول اصلاً ماكو شي ينگال صراحة لان البيت عبارة عن كآبة.. حبيبة معتزلة بغرفتها متطلع الا بوقت الدوام نسحلها ويانه سحل حتى ناخذها والامير ياخذنا للدوام بيده ويرجعنا بيده ويجبر حبيبة تنزل تاخذ محاضراتها غصباً عليها وترجع، هو واخوته مراقبين حالتها ومنتبهين عليها كلش زين يخافون لا يصيبها انهيار..

محرم وصفر طبن منا طلعن منا والايام البعدهن هم ركضن ركض كلشي ما سوينا عكس السنة السابقة، لا قراية سووا بيت عمو ولا احنه طلعنا لقرايات خالة رسمية تكول لو بيدي اطم روحي وما اطلع من البيت واراوي وجهي للناس رغم محد ديحجي عليهم.. واستغربت صراحة خالة ام تالة تكول ما سمعت وحدة ذبت الصوچ ببيت الشيخ ويحجون بس على سلوى وسوالفها وكالو من قبل هي مبينة مو راحة..

فراقد تكسر راسها وطلعت كل المستخبي، راحولها عمو والولد لبيتها لعبوا بيها خلقة بس منعرف شسوولها بالضبط محد يقبل يكول بس كل الي عرفته ان هي اعترفت على سلوى وگالت كلشي صار ببيتنا سلوى چانت وراه..

خبطت بطني من گالت چانت تدخل وديان من درج غرفتي القديمة وتخليها تلتقي بيه وتلعب بعقلي وتروضني على اشياء ما رايدتها بس حتى تدمر حياة الامـير علي بس ما احسها تريد تدمر حياته گلبي يكول هالبنية تحبه ورايدته بس احتفظت بهالمعلومة لنفسي وما شاركتها ويه احد..

زادتها فراقد من گالت سلوى جان عدها تواصل مباشر وقوي ويه زيد ابن مسعود وهو چان يمشيلها كل التريده، شوطت الامير ورادت تجلطه من كالت من رحنا للمزرعة چانت عدها نية تجيب زيد حتى يعتدي عليَّ ويصورني ويهدد الامير بهالتصوير..

تخبلت واحس عقلي انشخط معناها بأسطبل الخيل فعلاً جان زيد موجود والخيال الشافوه حقيقي وتراجع من شافهم اجوا يساعدوني بس الفكرة بقت براسه وراد سيف اخوه يتممها لولا الامير ملحگ عليَّ..

تعبت من هالاخبار التعيسة وافتهمت بـ فراقد طلعت من المحافظة وراح تستقر بغير مكان عقوبة الها بس احسهم هددوها بشي ياله طلعت لان من اسأل الامير شنو صار من حچيتوا وياهة يجاوبني..

-الساقطة تكول انا مالي شغل كله من راس سلوى هي حاقدة عليكم وتكرهكم ورتبت كلشي وجبرتنا نصير وياهة وهددتنا

-تَـمني: فراقد تنجبر؟؟؟

-ختولي بت العار انا من اول ما ارتاحلها هالچلبة وما اطيق جيتها بس ابوي يااهو يكدر لابووي

-امير مدا اصدگ فراقد مو تحبكم!

-فراقد حسودة وغيورة وما تحب غير نفسها تبيع بزرتها بوكت العازة لو احتاجت!

-بس احس الها غاية ثانية من سوت كل هالاشياء بيكم

-تَـمني فراقد خرابة بيوت تموووت لو شافت ناس مرتاحة وعايشين حياتهم هي مريضة نفسياً! من اول انا منبه امي لا تطوخ علاقتها وياهة بس امي فقيرة وينضحك عليها بسهولة

-زين وهسة شنو سويتولها؟

-راح تطلع منا تشيل ابوي تبره منها وحچينا ويه ابنها والعينتين هم شال ايده من امه وكال روحوا فضحوها يم شيخ عشيرتنا خاطر تتأدب

-ابنها باعها!!

-اي هو يكول متعود على فواين امي وما كمت انصدم من سوالفها

-وتالي شسويتوا؟

-ابوي كال حرمة ما نحط راسنا براسها وانا اتفق وياه، صح اكره فراقد وما اطيق شوفتها وگلبي مجمر من وراهة بس عيبة بحگنا لو فضحناها مرجوعها النا ولعشيرتنا

-بس بعدها راح تطلع من المحافظة مو؟

-اي ابوي گاللها چهرتچ ما تنشاف بعد هنا وانطاهة المقسوم وطلع

-شنو المقسوم؟

-هيج سالفة بيننا وبينها

-شسويتو امير

-تَـمني لا تسألين زايد

-زين اوكي اوكي.. وصدگ طلعت فراقد حارگة بيت مسعود والسبب بحرگ ليث؟

-مادري بس ما استبعدها

هزيت راسي اتنهد وافكر بجرايم هاي المرة، عجيب شنو هالحقد والاذية؟ ليش سوت بينا هيج وهي تحب شيخ علي او خليني اكول مستفادة منه ومستغلته!

اما بخصوص عمتهم زهرة فـ وگعت على رجلين اخوها وماتت من البجي اول مرة اشوف عمة زهرة بهالوضع المأساوي، انهارت ودكت ولطمت على وجهها وحلفت على القران سلوى جانت تهدد بيها وكالت تفضح بنتها وتخرب بيتها (بنت العمة زهرة).. شنو نوع الفضيحة ماعرف وعمو علي ما قبل يحجيها لاي احد حتى لولده بس هم ما سامحها وطردها وكال مالج طبة لبيتنا بعد..

شوية انقهرت عليها لان عمو مبين جان كللش مقهور من طردها خصوصاً حسيته عرف السبب الحقيقي الجانت سلوى تهددها بي بس اضطر ياخذ موقف منها ويعوفها لان السوته مو قليل.. لعبن بعائلة كاملة كل هالشهور بدون لا ينلگفن هالشي وحده يصفن الناس من يفتهمون.. رغم محد افتهم ما طلع هالشي عمو بره البيت وحلف الكل محد يجيب طاري عمة زهرة كدام أي بشر..

اخيراً رجعوا كلهم لعمة غزوة الطردها الامـير علي من فترة طوويلة، رجعولها وتعذروا منها وباسوا حتى ايدها وغزوة جانت سعيدة بجيتهم ولمتهم كلهم لحضنها وما حقدت عليهم، صراحة فاجأتنا بتصرفها وكبرت بعيون عمو علي والكل..

وهسة خلوني ارجع للحاضر واركز بالتحليل الراح تطلع روحي واني انتظره.. اخذت شهيق وزفير وغمضت عيوني ادعي للمرة الاخيرة يارب كون افتح عيوني واللگه خطين يارب..

فتحت عيوني على كيف اركز بي ثواني وعضيت شفتي ميتة قهر من شفته بس خط واحد، وكعت دمعتي المشكلة بعيوني حيلة ومسحتها بسرعة ولفيت اختبار الحمل بالكلينسة وذبيته بالزبالة حتى ميشوفه الامير..

غسلت وجهي كم مرة وطلعت من الحمام وجفلت من شفته واكف يم مجر الميز، المجر الي احط بي احتياجاتي النسائية وشفته يدور بي.. رفع راسه من حس عليَّ طلعت من الحمام وگال بلهفة..

-سويتي اختبار حمل؟؟

-هاا

-ماهو اختبارج الحاطته هنا شنو حللتي؟

-وانتَ كلما ادخل للحمام تدور بالمجر لو شنو السالفة

ضحك خفيف خجلان ومسح على لحيته، حرك راسه بـ لا وكال..

-لا بس حسيت عبن اشوفچ متوترة هالچم يوم

-لا عادي كلشي مابيه

-ها

-مو حامل هسة حللت وطلع خط واحد

-هاا

-امم

-يلا كله رزق الحمدلله والشكر حبيبتي

-الحمدلله

-امشي ننزل نتعشا امي جاي تصيح اجت عمة غزوة وجايبة كباب سوگ وياهة

-لا ما اشتهي روح انتَ حبيبي اني اريد ادرس شوية وانام باجر عندي امتحان

-يلا امنية نزلي وياي

-لا والله مو جوعانة وشايلة هم الامتحان حباب

-خاف ضايجة على سالفة البيت؟

-لا والله

-اكيد؟

-اي

ذب حسرة ضايج بس ما ضغط عليَّ اكثر لان يعرف لو حچى حجاية زايدة راح انصبها مناحة واكعد ابجي لباجر، طلع من الغرفة واني رحت لجنطتي طلعت الملازم وتمددت على الجرباية عود ادرس بس بالي مو ويه المادة اصلاً..

افكر بسالفة حملي وبالنقلة، اتفق ويايه امير نأجل طلعتنا من البيت علمود الاوضاع العشناهة صح بالبداية ضجت بس عادي حقه هذا هم خايف على اهله وخايف عليَّ لا يصيرلي شي من هو يكون بالشغل..

نفضت عقلي اركز بالملزمة وربع ساعة واندكت باب غرفتي، كعدت على حيلي وعدلت شعري التخربط وصحت من مكاني..

-تفضل

انفتحت الباب على كييفها كلش ومن هدوئها عرفتها سبأ، ابتسمت من شفتها تمد راسها من الباب خجلانة اشرتلها بيدي وكلت..

-تعالي سوسو

ضحكت وطبت للغرفة تركض، ابتسمت من شفت وجهها يضوي اول مرة من بعدما عرفت بأخوها زيد متوفي اشوف ملامحها فرحانة وتضحك.. تقدمت عليّ وكعدت على الجرباية مالتي وفتحت شوية من ربطتها السودة بس عافتها على راسها ما نزعتها..

-تَـمني: خير يا طير اشوف الاسمر فرحان اليوم

-سبأ: هههههههه تَـمني هاي شمالج وياي

-ولج احجي احجي سولفيلي تره يكتلني الفضول اذا ماعرفت

ضحكت اكثر وتربعت تكعد عدل على الفراش، بللت شفايفها بلسانها كم مرة وحمحمت قبل لا تكول..

-نوومه

-امممم

-احم

-احجي احجي ولج

-تَـمني انا حامل

-كذاااابة

طفرت من الفراش ممصدكة وهي ويايه تضحك من كل گلبها وتكمز على كيفها، جحظت عيوني بفرح ماعرف حتى شكول وشلون اعبر لزمت ايدها بين ايدي بقوة وكلت من كل گلبي..

-الف الفففف مبروك يا روحي تستاهلين كل خير

-يا بعد روحي تَـمني ما جاي اصدك والله من الفرح انتِ وشمس اول ثنين اجيت ابشرهن

-حياتيييي.. بس اوكفي كلتي لـ تقي لو بعدج؟

-گتله گتله اكيد چا شلون

-يمااااا ولج سولفيلي شصاار وشسوه

-ههههه چا سمعي...

-حبابة اريد تفاصيل فدوة سبأ مو تشربتيني تشربت

-ياا خية سكتي استحي

-اهووو سبأ لعد مو تسولفين لشمس شنو اني وحد قابل

-خايبة مادري شمسه ما استحي منها عبنها سافلة

ضحكت من كل گلبي على جملتها وهي انتبهت لروحها شكالت وصمت حلكها متندمة على حچايتها، ضربت رجلها على كيفي وخزرتها وكلت بضحك..

-احچيلي يلا يلا

**

"ســبأ"

مشتاگة لامي ورهف صار اكثر من شهرين من اخر مرة شفتهن، من بعد فاتحة زيد ما رحت ولا وصلت بيتهم عبن ابوي طردني بس انا ما كلت لـ علي التـقي هالشي مستصعبة اخلي يعرف ابوي طردني بفاتحة اخوي وگوة خلاني اكمل الثالث واطلع من بيتهم..

صارلي ثلاث اسابيع ضبط معدتي تگلب وحالي بالضيم گوة عليّ اطبخ وگوة اتحمل عطور المنظفات وعطر علي التـقي، احس كلما يرش عطر اريد اتقيء وگوة عليّ مصبرة نفسي وساكتة بس بعد الحسيته امس والصار بحالي هو ما سكت على وضعي وكال..

-علي التـقي: شبيچ سبأ وجهج اصفر وتشردين كلما كضيتج؟

-مابيه شي بس تعبانة واريد انام

-احنه متزاعلين؟

-لا

-چا شبيچ انا جاي من بغداد مشتاگلچ صار اسبوعين ما شايفج

-اي.. ادري والله بس..

-بس شنو حاچيني؟

-مابيه شي والله تقي لا تخاف

-شو تعاي

تقرب مني وكض فچي يرفعه يخلي عيني بعينه، بلعت ريگي وغمضت عيوني اجتني النعسة فجأة واحس اريد انام هسة وانا بهالكعدة وهو كدامي دخت واريد انام..

-انتِ مريضة سبأ وضعج ما عاجبني؟ ليلة تكول ما جاي تاكلين زين وهواي تنامين

-لا لا مابـ...

-كومي بدلي خلينا نروح للطبيب

-مابيه شي والله

-كومي خلينا نتطمن

ما عاندته زايد وكلت هي اجت على رجليها خليني اروح اللگالي چارة مليت من وضعي التعبان هذا، بدلت هدومي ولبست عباتي وطلعت وياه اخذني گبل للمستشفى لدكتورة نسائية..

-علي التـقي: سولفيلها على وضعج خاطر نعرف المن تحولچ اذا العلاج مو عدها

هزيت راسي اي وكعدنا ننتظر شوي ودخلونا ما طولنا الحمدلله، دخلت يمها وسولفتلها على حالتي وسألتني چم سؤال تالي كتبتلي تحاليل وكالت اروح اسويهن..

طلعنا انا وتقي رحنا للمختبر سويت التحليل وكعدت انتظر النتيجة واشوفن تقي واكف على ناار، رايح جاي ما كعد على الكرسي ولا استراح استحيت اسأله شبيك فـ ظليت ساكتة واعاين لوجهه كل ساع يذب حسرة ويفركه حيل لو يدور وجهه الي ويكول..

-شو تاخرو

-سبأ: مادري والله

-خاف اكو شي؟

-اسم الله ان شاء الله ماكو شي

-لا لا ان شاء الله اكو انتِ كولي يا الله

-يا الله بس ليش تريدني امرض؟

-خايبة سكتي

سكتت صدگ وما علقت شو استحيت، مرت خمس دقايق اضافية وصاح الموظف اسمي..

-الموظف: سبأ مسعود علي؟

-علي التـقي: نعم نعم احنه نعم

هرول عليه بخطوات سريعة واشرلي اكوم، كمت وراه ووكفت خلفه مباشرةً مغشية وجهي بالعباه واسمع الموظف يحاچي تقي..

-حضرتك زوجها؟

-اي انا زوجها

هز راسه الموظف وابتسم، مد ايده وانطه لـ علي التـقي ظرف وكال ببهجة..

-مبروك عليكم زوجتك حامل

شهگت فاكة عيوني وعلي التقي تخبببل، حط ايده على راسه وكال والكاع ما سايعته..

-ياااا علي ابن ابي طالب صدددگ والله؟؟؟

-الموظف: نعم الله يتمم عليها بالخير

اخذ تقي الظرف منه ايده ترجف وانا بعدني جافلة وما مصدكة السمعته، انهضمت من اندارلي تقي عيونه مغورگة بالدمع وگال بهمس بيني وبينه..

-الحمدلله والشكر چنت شاك.. والكعبة چنت شاك

-انا حامل

-اي اي حامل اي الحمدلله والشكر يارب الحمدلله

ابتسامته من الاذن للاذن وابتسامتي انرسمت ضعف ابتسامته، كضني من ايدي يضحك فرحااان كلش فرحان ورجعني للطبيبة..

-علي التـقي: طبي واستفسري شنو لازم نسوي سبأ گليلها اكو علاج او شي خاطر نحافظ على الجاهل افتهمي منها كلشي ولا تنسين حاجة حبابة

-صار صار

طبيت للدكتورة چن فراشة طايرة من السعادة، انطيتها التحليل وباركتلي وگالتلي اصعد للسونار، سوتلي سونار وكالت مبين عدها انا حامل خمس اسابيع وانا الغبرة مادري بروحي وما منتبهة..

كتبتلي علاجات ومثبتات للطفل ووصتني على چم شغلة اسويها، اسمعلها وظالة بس اهز براسي واضحك للهوا وهي تضحك وياي اظن عبالها مسودنة حتى خجلت من نفسي بس ما جاي اكدر اسيطر على روحي وما اضحك..

طلعت منها وكضني تقي من ايدي مرة اللخ وصعدني السيارة، الطريق كله خذاه يغني ويصفگ فرحان والدنيا ما سايعته، اعاينله واضحك مثل المخابيل وهو يضحك على ضحكتي متونس..

نزلني كدام محل حلويات واشترالي كووومة اشياء الاحبه والماحبه جابه، كلشي اعاين عليه جابه الي واشكال عصاير وفواكه اشترالي واشتره لاهله ورجعنا للبيت..

رجعنا وشفنا الكل بغرفهم فـ كال باجر نسولفلهم وانا ايدته، صعدنا فوگ لغرفتنا ايد بأيد وبعدني ما واصلة للباب ونصى يشيلني وطببني جوه بالغرفة.. افتر بيه طاير وانا من الهبطة والخوفة كمشت برگبته واضحك مثل المراهقات..

-علي التـقي: ولج ماا مصدگ مااا مصدگ

-هههههههه انا هم والله

نزلني على الجرباية على كيفه وكعد بصفي ضبط، حط ايدي بين ايده وقشعر جسمي من صار يبوسهم.. ظل يطبع بوسات خفيفة على بطن وظهر ايدي ويسولف وگلبي يرعد رعد ويه سواليفه..

-فدوة لهالايد.. ولج اروح فدوة لهذا السمار السابينا سبي

-ههه.. اءء.. احم.. اگلك

-لا اگلگ ولا تگليلي سبأ من اليوم شغل بيت ماكووو افتهمتي لو اعيد؟؟؟

-لا لا افتهمت

-تلتزمين بالعلاج وتاكلين زين وتنامين زين وترتاحين زين ولوبة وكومة وكعدة ماريد افتهمتي لو اعيد؟؟؟

-افتهمت افتهمت

-بعلي يا سبأ لو افتهمت بيج متعبة روحج وانا مو هنا اللعب بيج خلقة والله

-لا لا صار هذا هو ما اتعب روحي والله

-عفية

كالها مبتسم ومسح على راسي بين ايده وتمدد بمچانه، جر الشال والعباه من راسي وذبهم بالكاع وجرني عليه وشمرني على صدره.. ارتاحت روحي من ثبت راسي وصار يلعب بشعري ويسولف وياي بهدوء..

-اريدج تنزعين الاسود سمرتي

-تقي لا انا..

-لا تكليلي حزينة سبأ، الحزن بالگلب مو بلون الهدوم.. انا ما جاي اگلج نزعي عبن عرفت بيج حامل انا صارلي فترة اريد افاتحج بهالموضوع ومتردد بس بعد ماكدر اسكت اكثر اتمنى تنزعين الاسود وترجعين لحياتج الطبيعية

تحسرت ساكتة ماعرف شكول، خلل اصابعه بين خصلات شعري وأردف بهدوء اكبر..

-الاسود ما يرجع الميتين سبأ وانا ادري مهما تكون علاقتج ويه اخوچ مو زينة اعرفج تحبينه وزعلتي على موته وعشتي بحالة حزن بس كافي.. كافي يا عيوني خلينا نرجع بهجة هالبيت ونسترجع ايامنا الحلوة

-ان شاء الله

ابتسمت من سوه حركته التعودت عليها كض وجهي من فچي ورفعه عليه وباسني بوسة دافية، ابتسمت مغمضة عيوني ولا ارادي عصرت قميصه بين ايدي من گال بصوت هامس لعب بحالي واحوالي..

-احبچ ام فلان

شهگت بكتمة بدون صوت.. شهگت ولزمتني گحة بنفس الوكت بس ماكدر اطلعها، ماريد اطلعها واخرب هاللحظة النتظرتها شهور.. يا بخت حالچ يا سبأ هاي اول مرة يكولها! اول مرة يكول "احبچ" ولج يااا كبر حظچ وعلي التقي يحبچ..

-چنها ما راح تجاوبنا ام فلان

ضحكت مغمضة عيوني ماعندي جرأة افتحها ولو فتحتها اعرف راح اتهرب منه واطفر فـ نويت ابقيها مسدودة واسوي الشي الصارلي عمرر اتمنى اسوي واعترف بي.. ذبيت نفس وقويت نفسي ونهضت روحي منه على كيفي، شجعت نفسي زايد وفتحت عيوني ببطئ وحطيتهم بعيونه العاشگتها، بلعت ريكي وكلت من غمج روحي من كل گلبي وعقلي وخاطري..

-ام فلان عاشگتك مو بس تحبك يا روحي

-لااا بشرفچ!

-هههههه

-هههههههه بت مسعود المسعور اليوم شيخلصچ مني

-ليش ليش شسويت انا

-انا اعلمچ شسويتي تعاالي.......

ضحكت من غمج گلبي وگضينا الوكت سوه، ظل للصبح يداهر ويضحك ويسولف ويتحارش وعلگلنا مسلسل احنبي وجبرني اتابع وياه خاطر يجي الطفل يحجي اجنبي مثلهم..

-علي التـقي: اريدن فرخي يجي اشگر وعيونه زرگ

-سبأ: منين يجي اشگر وامه وابوه چلحان

ضحك بصوت عااالي كلش ودفعني من چتفي دفعة خفيفة، ابتسمت وياه وبساع غيرت الموضوع متندمة على حچايتي وظلينا نسولف وبقت سالفة تجر سالفة وضحكة تجر ضحكة لحد ثاني يوم..

بشرنا اهل البيت بحملي وبشرت تَـمني وشمس وفرحن مثل فرحتي واكثر.. مشت الايام هادئة نوعاً ما ماكو مشاكل وراسنا بارد صح وضع البيت بعده خانس ومخنطل بس احسن من الايام الفاتت..

وبيوم مغربية اجاني علي التـقي وكال خلينا نطلع گبل لا ينزل واجب كيفت وركضت ابدل، طلعنا واخذني لمطعم مرتب كللش ديكوره فخم والكاعدين بي همين هيج، توترت وظليت اعاين للبنات هنا يخبلن كلهن حمر وزرگ وهدومهن حلوة حتى اللابسة عباية هم مهتمة بنفسها كلش ويبرجن برج، استحيت من نفسي وشكلي وتندمت لان رضيت اطلع كضيتها كاعدة ومغشاية بالعباه وهو ناصب عليَّ..

-علي التقي: خايبة بداعة الاعزاز وخري العباه من وجهچ

-سبأ: اي اي هسة

-ولج وخريها

-اي شبيك والله هسة اوخرها

هديتها من ايدي ونصيت عيوني للدفتر الگبالي "المنيو" دفنت وجهي بي وظلت عيوني تطاير منا ومنا اعاين عليهن واللوم بروحي شلون اريدنه يبقى وياي وهذن اللعابات گاعدات گباله..

-علي التقي: تؤ استغفرالله

-شنو

وخرت الدفتر من وجهي اعاين عليه لگيته يلوب ويدور بجيوبه، هز راسه معترض وتحسر وگال..

-موبايلي نسيته بالسيارة خاف يتصلون بيه من الدوام

-تروح تجيبه؟

-اي يلا نطلع سوه بس اجيبه ونرجع

-خوش

گمت وياه طلعنا من المطعم ونويت اگله نغيره لان ما مرتاحة كلش، رجعنا للسيارة فتحها ومد جسمه ياخذ موبايله وداس الدگمة يضوي الشاشة يشوف، تقدمت عليه جاي اريد احاچي على المطعم وسكتت من انتبهت لحاجبه ينعگد وملامحه تتغير..

-سبأ: شنو شبيك

-هاي امي

-شبيها؟

-متصلة عليَّ 17 مرة

-يا ستار خاف صاير شي تقي!

-مادري.. مادري يا علي دخيلك.......

يتبع 👑.....

━━━━━━ ♛ ━━━━━━

الصار بسلوى هو من اصعب المشاهد الاكتبها صراحة من بدت الرواية للان كُلش استصعبته وچان ثگيل عليّ وبچيت شوية هم يمكن لاني متعاطفة ويه حبيبة ومشاعرها وكُلش مقهورة عليها 🥹

وانتو شنو حسيتوا من قريتوا؟

++فرحتي بـ سبأ وتقي 🥹💕💕🦋🦋🦋🦋🦋🦋

بارت الجاي ان شاء الله..... تحضروا 🤌🏻

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

انه وگلبي النحبك طولت عنه

گلي شغيرك وصرت مو منه؟...

━━━━━━ ♛ ━━━━━━

"حــبيبة"

اجه عليَّ علي السور خاطر يرجعني من الدوام وگضينا الطريق كله سوالف بس اكيد ماعدنا سالفة غير موضوع الامـير علي وحالته الي بده يتخللنا الملل واليأس من گدما طولت والمشكلة ما جاي يطيب!

-علي السور: ما يرجع نفس گبل حبيبة ما يرجع

-حبيبة: سور ليش تتشائم شبيك انتَ والله لو يسمعك ابوي يطيح حظك!

-المشكلة بي لازم ابوي يستوعب الامير ما راح يرجع نفس گبل حتى لو رجعت ذاكرته ما راح يرجع طبيعي!!

-اهوووو اسكت سور ضوجتني بسلبيتك

-خايبة بزعت روحي حسبالج انا مكيف على وضعه؟ شني كلما اجي يمه وگالي شوكت كبرت وليش هيج متغير وشلون طلعتلك لحية وشارب

-اي ما يتذكرنا بهالعمر بس راح يقتنع احنه كبرنا وراح يصدگ هو الي متيه مو احنه وراح ترجع حياتنا نفس گبل الدكتور كال هيج والله وكال الموضوع يحتاجله وكت انتو بس تفائلوا بالخير

-ان شاء الله يارب

سكتت اهز براسي وافكر بكلام علي السور وبسرعة نفضته من عقلي، ماريد اتشائم ماريد،  امير راح يتحسن اني حاسة بهالشي الصار مجرد ينرادله وقت وصبر حتى تَـمني دائماً اذكرها راح يتحسن ولا تخاف وتتشائم..

-اگلچ حبيبو

-ها

-شخبار بيت عمي مسعود؟

-شمدريني

-سمعت شغلة بس ما متأكد من صحتها

-شنو هي؟

ذب نفس متردد وظلت عيونه على الطريق وايده على الستيرن، حك لحيته وگال شي بحس ناصي بس ما سمعته..

-شگلت؟

-جاي اگول جاي خاطب على بنيتهم هاي مدري شسمها نسيتها

-يا بت؟

-ولج بت عمنا مسعود

-هو منيلهم بت ما متزوجة غير رهف

-اي هي رهف

-چا ما تكول اسمها شبيك

-اي هو قصدتها بس شسمه.. نسيته اي

-تنسى اسم بت عمك؟؟

-اهووووووو عاد حبيبة لو لحت على شيي

-المهم شبيها جايها خاطب؟

-اظن اي

-نعرفه احنه مو؟

-اي

-ادري

-شني تدرين يعني تعرفين بالسالفة؟؟

-اي

-صدگ؟؟

-اي چنت شاكة خليهم الله يوفقهم ويسعدها ان شاء الله

-شسالفة حبيبة! شلون تنسعد ويه زلمة بكبر ابوها!!

-شنو؟

-خال غسان اصغر من مسعود بسنتين تره

-خال غسان؟ ياهو هذا

-خرب حظييي ولج غسان غسان ابن عمنا الاغبر اخو صلاح! الموجود بحياتنا وما محصلين منه شي بس اللعبان الروح وضيجة الخلگ!

-هو خاطب رهف؟؟

-حبيبة فتحي عقلچ وافتهميي جاي اگلج خالهم الخاطبها خال غسان وصلاح!!

-خالهم؟؟ ولك هو بس خال واحد عدهم وبكبر جدي

-اي هو هذا الخاطبها ومسعود يريد ينطيهم

-لااا صدگ!

-والعباس! حبيبة لازم تساعديها وتبلغيها ترفض خليها تصخم روحها تلطم روحها تزلغ خدودها تنتحرر المهم ترفض!!

-ليش هي رهف تكدر لابوها ياهو يگدرله مسعود

-تكدر لسان رهف محد يكدر يتحكم بيها بس لازم نبلغها گبل بوقت خاطر تسويلها خطة وما تنحط امام الامر الواقع ويطيح حظها

-ياربي شلون سالفة هاي خاف ابوها يجبرها سور؟؟

-اخذج لبيتهم هسة؟ اخذج خاطر تسولفين وياهة وتفهميها؟

-مادري سور خاف ابوي ما يرضى ومن يفتهم بينا رايحين يرزلنا ويكول احنه بيا حال

-من تفهمي بالسالفة صدگي راح يقتنع ويعذرنا

تنهدت اهز براسي مستسلمة صار لازم اخصمها واحچي وياهة بموضوع منتصر وافهمها عفته انا ومستحيل ارجعله لاني متأكدة اذا يفتهم بيها تنخطب لزلمة ثاني راح يروح يخطبها وهي ترفضه لان رهف بت عمي واعرفها عدل ما راح تقبل بي اذا ما فهمتها انا مطلعته من گلبي وما رايدته..

-حبيبة: سور

-ها

-انتَ ليش هيج مهتم لرهف؟

-شني؟

-ليش مهتم لرهف لهاي الدرجة؟

-ماكو سبب

-چا؟

-شني حبيبة بت عمي طبعاً راح اخاف عليها

-ليش معترف ببيت عمك انتَ وتخاف عليهم

-سكتي حبيبة واگفتلي على الچلمة

ضحكت على وجهه من كل عقله ضاج وكعد ينافخ ويستغفر، حسيت بي شي مو طبيعي بس ما طوخت وياه مبين نفسيته مو تمام هالفترة واظن الكل نفسه..

-علي السور: سيارات الولد ماكو معناها الكل طالع بس مع ذلك لا تطبين لبيتهم وحاچيها بباب الحوش

-خوش

-أي شي يصير بسااع تتصلين بعلي يا حبيبة اذا غلستي وكعدتي تتسبعين فوگ روسهم اموتج

-لا شبيك والله ما اطب جوه من الباب احاچيها واطلع

-چا يلا نزلي وخلي الموبايل بيدج

-اي

طلعت الموبايل من جنطتي وطلعت من السيارة، دگيت باب الحوش وكل ساع اتلفت على سور كاعد ويسويلي حركات "دگي الباب اقوى" هزيت راسي وهستوني جاي اريد ادگها بعد وانفتحت الباب وطلعت بوجهي رهف..

-حبيبة: شلونچ رهف

-رهف: صاير شي حبيبة؟؟ سبأ اختي بيها شي؟؟؟

-لا حبي لا تخافين

-چا شصاير؟

-شني يعني ما راح تكليلي تفضلي؟

-اي اي اكيد هلا بيج

فتحت الباب كلها وطبيت جوه بس بقيت واكفة بباب الحوش وما خليتها تطبگ الباب، ابتسمت من شفت ملامحها المتفاجئة يا الله شگد مشتاقتلها، بوستها وجريتها لحضني وشبگتها حيل..

-شلونچ رهوفة

-زينة

همستها بتردد وخفوت وخرتها من حضني وكبرت بسمتي على شكلها چن جنية واگفة گبالها عرفتها خايفة على اختها وحسبالها اجيت خاطر امهدلها موضوع يخصها خاطر ما تخترع..

-حبيبة اذا سبأ بيها شي احجي بساع!!

-هههههه شبيچ ولج مابيها شي والله اختچ وفرخها زينين

-فرخها؟

-حبيبة: اي چا مو سبأ حامل

-عليج علي؟؟؟

-هههههه اي والله

-صدگ تحجين!! اللهم صل على محمد وال محمد الحمدلله والشكر يا رويحتي فدوة اروحلها يمة خيتي حامل

-حامل وتسلم عليج هواااي ومشتاگتلج هم

-رهف: يا بعد حيلي فدوة اروحلها، شلونها هي؟؟ زينة؟ مرتاحة؟ وضعها مستقر هي وعلي التقي؟

-ليش ماعندج تواصل وياهة؟

-لا والله

-ليش؟ وموبايل امج شبي

-اخذه ابوي گبل فترة من تعاركوا وبعد ما رجعه الها

-سودة عليَّ لا تخافين عمري سبأ كلش زينة وهي وتقي كلش مرتاحين الحمدلله

-رحم الله والديج حبيبة الله يريح گلبج مثلما ريحتي گلبي بأخبارها

-يا رويحتي انتِ

-چان طببتج جوه بس اخافن لا يشوفوج جهال اخوي سلطان واسببلج مشاكل

-لا لا انا اجيت خاطر اطمنچ على سبأ واسولف وياچ بموضوع

-خير ان شاء الله خو ماكو شي حبيبة؟

-صراحة اكو..

مديت ايدي لشعرها اتلمسه على كيفي وذبيت حسرة، هاي وين شعرها الچان راح يوصل لركباتها شوصله لجوه اذنها؟؟ رهف الشعرها ينضرب بي المثل بالعشيرة بالطول والثخن هيج تبتره؟..

-حبيبة: عايني رهف اليوم سمعت عن شغلة وصراحة كلش ضجت وانزعجت

-شنو هي؟

-جايچ خاطب عن طريق غسان ابن عمنا

-هااا

-اي وصراحة الرجال چبير كللش چبير بگد ابوج او يجوز اكبر مادري هو يصير خال غسان

-صخام!

-وانتِ تعرفين ابـ..

-ابوي! ابوي اكيد راح يرضى ينطيهم!

-اي فـ انا اجيت ابلغچ خاطر تلگين لروحج حل اعرفج شاطرة وتكدرين تسويلج سالفة تتملصين من هالخطبة

-الف رحمة على والديج والعباس ماعرف شون اجازيچ يا حبيبة

-لا تجازيني بشي حبي.. ورهف عندي موضوع ثاني وياچ

-اي كولي؟

-انتِ اكيد عرفتي انا تطلگت من منتصر...

سكتت اعاين لوجهها اريد ادرس ملامحها بس رهف مو هينة وتكدر تتحكم بوجهها وتصرفاتها وما تبيّن بشنو جاي تحس..

-حبيبة: وماكو أي شي يجمعني بي بعد لا انا اريدنه ولا هو

-الله يعوضج بالاحسن حبيبتي

-امين.. بس رهف انا اكتشفت شي گبل لا انفصل

هنا تغيرت علومها، وخرت شعرها عن عيونها وبلعت ريگها مرتبكة، هزت راسها بـ معنى كملي بدون لا تنطق..

-عرفت انتِ ومنتصر تحبون بعض

-حبيبة والله انا..

-لا تحجين شي ولا تبررين رهف مو ذنبج كل الصار وصراحة الغلط من عندي هم چان لازم انتبه لـ منتصر وبروده وياي واربط ان اكو وحدة ثانية براسه

-جاية خاطر تگليلي خطب وراح يتزوج مو؟

-اي

ضحكت مستهزأة وظلت تهز براسها مرات متكررة، مسحت اسنانها بلسانها تخفف من توترها وكالت..

-الله يهني سعيد بسعيده

-رهف منتصر يريد يخطبچ الچ

-شنو!

-اجيت اگلچ يا بت عمي الزلمة طالع من گلبي ولا انا الرايدته ولا هو، كلشي ما يجمعنا بعد وزواجي منه چان غلطة وصححتها من تطلگت.. من الاول انتِ ومنتصر مكتوبين لبعض والله رايدكم لبعض واذا تكولين ابوج ما راح يرضى بي فـ ابوي يگدر يتدخل واذا ابوي ما يريد يـ...

-اوگفي اوگفي حبيبة

-هاا

-تدرين من شوي چنت جاي اشر الهدوم عايني ذنيچ

مدت اصبعها تأشرلي على الحبل بي چم قطعة ملابس مشرورة، هزيت راسي ورجعت اعاين لوجهها الجامد ومابي تعابير فرح ولا زعل..

-گلت هسة لو يخطبني چلب هم ارضى بي بس حتى اخلص من حياتي

-واجاچ دكتور

-لا اجاني انگس من الچلب

-ها!!

-حشى الچلب واقارنه ويه منتصر العار شني ذنبه تتشوه سمعته

-صدگ تحجين!!

-وعلي

-رهف منتصر يحبـ...

-والزهرة اذا كلتيلي منتصر يحبج وجهي ما تشوفينه بعد حبيبة!

-هو متندم

-على روحه

-يعني اذا يخطب ما تقبلين معقولة؟؟

-انا صارلي شهور ابچي واتعذب واموت الف موتة بسببه، چنت كل يوم اتحلم بي واكعد من النوم گلبي ممرود من القهر بس هسة بهاي اللحظة كل هذا راح وطبت

-ليش؟

-عبني عرفت الزلمة الچنت ابجي عليه وانوح مو زلمة! حرامات بي الشوارب واللحية

-رهف..

-داز طليقته خاطر تخطبله البت الچان يعشگها؟؟ اوووووع عليه وعلى رجولته وانعل ابوي لو رضيت بي

-هههههههه

مادري شمالني وضحكت.. والله ضحكت يمكن على حچيها لو على ردة فعلها لو على ملامحها المكشولة چن جاي نسولف بجريدي كاتله الوصخ..

-رهف: اسفة والله ماعرف ليش جاي اضحك

-رهف: ضحكي خية ضحكي ما يلوگلج الزعل تستاهلين زلمة ارجل من منتصر

-الله يعوضچ خير يا رهف ويريح گلبج

-عوضني حبي، چا مو خال غسان خطبني راح اتزوج باركيلي

-رهف گعدي راحة

-ما اگعد وراح اقبل بي عاد هذا شوي احسن من الچلب

-ولج زلمة بگد ابوچ!

-چا ابقى خايسة هنا ببيت اهلي الهمج؟؟ ولج تلعب روحي اعاين لوجه ابوي واخوتي خليني اتزوج واخلص منهم بلچن ارتاح

-چا ارضي بمنتصر هو...

-نعااالي على منتصر سكتي سكتي لا تجيبيلي طاري اسمه

-رهيفة لا تتهورين وترضين بذاك الزلمة!

-اشوف شيصير وياي حبي الله كريم

-حبابة حاولي ترجعين موبايل امچ وتتصلين بيه تطمنيني

-بعيني

-يلا انا اروح، بس اوكفي امج بالبيت؟

-اي موجودة

-چا شعجب ما عدها فضول تشوف منو من اندكت الباب؟

-باع هاي حسبالها امي مثل عمة رسمية تهتم

-هم صدگ.. يلا مع السلامة

-الله وياچ حبي وامانة سلميلي على سبأ وشبگيها بكل حيلچ

-تدللين من عيني

فتحت الباب وطلعت لـ سور شفته واكف يم سيارته وبس شافني اشرلي استعجل، هرولت عليه ودرت وجهي شفت رهف مادة عيونها تودعني بنظراتها..

-علي السور: بشري؟؟؟

-خليني اركب السيارة يمعود

فتحلي الاقفال ودخلت اكعد بكرسي الصدر بس ما خلاني اجر نفس ورجع سأل..

-سولفي حبيبة راح تقبل؟؟

-عاين انا گلتلها وبالبداية البت ماتت قهر وانصدمت بس بعدين رضت بي وكالت اوافق

-صدگ تحجين؟؟؟؟؟

-اي والله

-عليج العباس حبيبة افتهمتي على البت عدل لو بس جاية تشوطيني!

-ولك اي ايي افتهمت عليها عدل شبيك

-خرب خرب خرب خرب خررررب

-شكل شريطك لو شني

ما جاوبني وحرك السيارة يطلع بينا للبيت، وصلني ونزلت حسبالي هو هم ينزل بس داس بانزين وطلع من فرعنا والله هذا اخوي هم صاير ما ينفهم..

طبيت للبيت وبوجهي للاستقبال شفت امي وعلي النور كاعدين ويه الامير على الصامت، شكلهم يضحك كاعدين وصافنين بالكاع كلهم چن كاعدين بعزا..

-حبيبة: سلام

-رسمية: هلا هلا يمة عليكم السلام زين من اجيتي

-حبيبة: ليش يمة خير صاير شي؟

-رسمية: اي تعاي گعدي يم اموري شوي مشتاگلچ هو

رفع عيونه يباوع لامه بنظرات تنفي تماماً هو مشتاقلي بس على الاقل ما علق ولا گالها بلسانه وظل ساكت..

-حبيبة: والله حتى انا گلبي مشتاگ

گعدت گباله على القنفة وبقى هو يباوعلي خانس لا طلع حسه ولا صوته طول ما احنه كاعدين وحتى من تداهرنا انا وعلي النور بالعادة گبل جان ما يرضى ويفاككنا ويرزل نور عبنه يضوجني بس هسة كلشي ما سوه وظل صافن علينا..

**

-وجع وجع مو طبيعي الوجع

-عبق: خاف راح تجيبين ولج

-ليلة: لا خايبة الدكتورة كالت البچر يتأخر

-عبق: والله مادري بس احس وضعج ميطمن مو مال تكعدين على روحج وتغلسين

-ليلة: هو من ارجع للبيت اگول لعمتي واشوف شتكول

هزت راسها عبق وانطتني ظهرها تكمل تگطيع البيذنجان، اليوم اجيت لبيتها اغير جو شوي بيتنا صاير يخنگ ابا الحسن ما يسولف وياي من جهة ووضعه بالنازل على اخوه وعمي ما يتحچى وعمتي رسمية كاعدة ويه العمات ويومية يسولفن بنفس المواضيع..

-ليلة: تدرين عبق انا كلش مختنگة من الجاي يصير

-عبق: حتى اني صراحة ومو بس اني وياچ مختنگات حتى امي رغم هي متعرف الامير كلش زين بس متأذية عليه

-الله ياخذ سلوى حرمتچ من هيج مرة كل هالسنين

-يوووه لا تجيبين طاريها بس اسمع اسمها جسمي يكزبر

-اي والله

-اگلچ ليلة شصار وياچ انتِ وابا الحسن؟

-ما صار شي

-لا بشرفچ!!

-والله

-ولج مو كلتيلي وضعكم ديتحسن وراح تتصالحون؟؟

-اي بس طلعت غلطانة لان بعد هو ما حاچاني

-ومنتظرته هو يحجي وياچ

-اي

-صراحة ليلة صح انتِ صديقتي واحبج بس هالمرة اني مو وياچ گلتها قبل وارجع اعيدها الغلط بده منچ فـ انتِ لازم تنطي ريگ حلو حتى تتحسن علاقتكم ومتبقون هيج

-ادري عبق بس..

-بس شنو؟

-كرامتي ما تسمحلي

-علي الحق: طاح حظج وحظ كرامتج خووووش؟

فزيت من سمعت صوت زلمة جاي من وراي، اللتفتت وچان اشوفنه علي الحـق هستوه كاعد وبعيونه النوم ويعاين عليّ بضوجة..

-ليلة: احترم نفسك ولااااك

-علي الحـق: اشش اشش لعبتو ارواحنا ما تصالحين الزلمة وتخلصينا

-ليلة: وليش مو الزلمة هو اليصالحني؟؟

-علي الحـق: ليلة طفت ليلتج يا ليلة وخلص ابا الحسن منج

-ليلة: عبيقة كضي زلمتج لا اتعارك وياه انا وفرخي

-علي الحـق: استچني وصيري ادمية عيب كبرتي راح تصيرين ام

-ليلة: يمته ما تصير انتَ اب انا اكبر

-عبق: منو گال هو مو اب هسة؟

-علي الحـق: لا لا اصبري قبق ولج ليلـ..... اوكفي شني؟

بحلگ عيونه الجانت عوصة من النوم ودار بكل جسمه عليها، ضحكت هي خجلانة ونزلت عيونها للگاع چنها بطة مستحية..

-ليلة: عاينو ولكم انا روحي طالعة مو مال هالسوالف

-علي الحـق: عنق انتِ حامل؟؟

-ليلة: ولك لاا جذابة هاي حچت هيج عبن حسبالها جاي نتعارك

-علي الحـق: عليج الله؟

-ليلة: والله

-علي الحـق: چا لا ولج شفق ما جاي نتعارك هاي ليلة اخوي العاشر

-ليلة: رحمة الله على والديك عزيز وغالي

-علي الحـق: فرخچ بعد روحي، صالحي اخوي عيب ما يصلح تظلون متزاعلين

-ليلة: راح أفكر بالموضوع خوش

-علي الحـق: يعشگچ وداعة عيونه العسلية اخذيها مني

-ليلة: هاا؟

-علي الحـق: وعلي

-ليلة: مو اروح اصالحه ويفشلني حويق انا على مسؤوليتك راح اتصرف

-علي الحـق: روحي وبهالرگبة بس رجعي لبيتكم لعبتي روحي

-ليلة: لا راح ابات اليوم كلت لعمتي

-علي الحـق: عين غطا وعين نعال

-ليلة: هههههههه يا بعد روح عبق ضحكتني فدوة تروحلك سوزان الخايسة

-عبق: هَييييييييي!!!

-ليلة، علي الحق: شكو

-عبق: شو عفتوني وكعدتوا تدگون فچ!

-علي الحـق: بس لا تغارين؟ ولج ليلة اخوي العاشـ...

-عبق: يبووو لا قصدي على موضوع الحمل

-علي الحـق: يعني شني؟

عكدت حاجبي اعاين لوجهها الابيض خدودها صايرات طماطات وعيونها مدمعة مادري شمالها، فلت عكدة حاجبي من رفعت ايدها تمسح عيونها وضحكت بدون لا تحجي وعلي الحق تسووودن..

-علي الحـق: عبق انتِ حامل؟؟؟؟؟

-عبق: هههههههه اي.. اي

-علي الحـق: لااا بشرف امج؟؟؟

-عبق: هههههه والله اي حامل

-ليلة: دخيلك يا علي ولج من يمته؟؟

ما لحكت تجاوبني بسبب ركضة علي الحـق عليها، حضنها وشالها على وگفتها بين ايده ويضحككك بكل صوته ويصيح..

-انتِ حااامل ولج حاااامل اكييد حامل؟؟؟

-اي هههههه وداعتك اي

دمعت عيوني الصلفة وانا اعاين لفرحتهم، مسحتهن بساع گبل لا تطيح الدمعة وبقيت اتأمل اشكالهم.. علي الحـق ما نزلها الگاع بقى شايلها ويبوس بخدودها ويعصرها بين ايده وضحكته تزلزل البيت من السعادة وعبق چنها طير يرفرف..

-ليلة: خرب ولكم بچيتوني

طاحت دمعتي ومسحتها بگفه ايدي وابتسمت سعيدة، اول مرة من شهور احس بسعادة حقيقية سعادة خلتني اقرا على صاحبتي وزلمتها الفلق والناس اخاف عليهم من عيوني لا تحسدهم..

-علي الحـق: ما مصدك والزهررة ما مصدك ولج قبببق

نزلها من ايده وعاينت لوجهه يزخ عرگان ودموعه بعيونه ما يرضى يطيحهن، مسحت عبق دموعها النزلن شلال من عيونها وكالت بحس مبحوح..

-عبق: خفت متفرح والله حتى ماردت اگلك

-علي الحـق: اناا ما افرح؟؟ ولجج شلون تظنين بيه هيج شلوون

-عبق: دا اشوفك شلون مقهور ومخبوص على اخوك ودا اشوف الوضع كلش ميسمح احمل هسة بس بعد صار ماعرف شلون خصوصاً واحنه متفقين بس بعد الله راده

-علي الحـق: الحمدلله والشكر الحمدلله نعمة هذا عبق لا تحجين هيج الحمدلله يارب

-ليلة: شمالچن انچلبتن على الحمل خايبات ياهي تكضها تگلك حامل دخليني اجيب اول شبيچن

-علي الحـق: هاي بدال چلمة مبروك؟

-ليلة: چا مو باركتلكم بگلبي هو طلابه

-علي الحـق: هم صدگ انعم الله عليج مرة اخوي ما تقصرين

-ليلة: هلا بيك حماي وابن عمي.. هسة شفق ما تسولفيلنا شلون عرفتي بروحج حامل؟

-علي الحـق: اي شلون؟؟

-عبق: امي انتبهت عليَّ گلتلي عبق انتِ كلش ذبلانة ووجهچ متغير لونه شبيچ بس اني ابد ما خطر على بالي اني حامل فـ كلتلها من وره الديصير ببيت عيالي تعبانة على تعبهم

-علي الحـق: يا بعد حيلي حيلچ

-عبق: عمرري انتَ

-علي الحـق: اموت عليج وعگال ابوي افديچ بكلشي عندي

-عبق: اوووي علي

-علي الحـق: يروحلج سحل علي ورمشاته

-ليلة: انتم صدگ ما تستحون

اللتفتوا ثنينهم عليَّ متسائلين، چتفت ايدي لصدري وگلت ووجهي مگلوب..

-ما تگولون هالبت گابه هرموناتها وجفافها العاطفي واصل لابو موزة؟

-عبق: من ايدج حبي تستاهلين

-علي الحـق: اي بعلي

-ليلة: طبعا انتَ تفزع لاخوك... اااه

-علي الحـق: شنو شبيچ؟؟

-عبق: ليلة شبيچ ليلة!!

-ليلة: ااه رفسة الفرخ رفسني صلف على امه

-علي الحـق: خرعتينا يمعودة

-ليلة: ااخ خرب هسة الفرخ گالي شي ويريدني اوصله الكم

-عبق: شنوه

-ليلة: يكول احترموا رواحتكم وبطلوا سخافة گدام الوادم عدكم غرفة روحوا خربطوا بيها

ضحكت عبق خجلانة وعلي الحـق وياهة يضحك بكل صوته، هز راسه وگال عود مستحي..

-حگچ والله بس هاي من الفرحة نسيت العيب والاحترام

-ليلة: لا بوية اتشاقه صدگ جذب غير انا ردت اجيب من الفرحة

ضحكوا ثنينهم وانا وياهم، ودعها علي الحـق وكال لازم يروح يشوف الامير گبل لا يلتحق باله يمه عبنه اليوم كله ما شافه وعبق شجعته خاطر يروح..

-علي الحـق: لا تتعبين نفسج عنق كعدي ارتاحي عوفي المواعين

-عبق: هاا هاي من عرفت بيه حامل تريدني ارتاح بباقي الايام تكرب عليه جنت

ضحك بدون صوت وعض على اصبعه متحلفلها، ودعنا وگبل لا يطلع كفخها خفيف على راسها وهي رجعتله الكفخة على زنده، سوالها بيده حركة انا اعلمج وسلم علينا مرة ثانية وطلع..

-ليلة: كلش فرحتلج عبيقة تستاهلون كل خير

-عبق: حياتي يوم تجيبين بالسلامة ونخلص من نگچ

-ليلة: امين اميين

-عبق: اگلج رايحة اشوف امي صارلها هوايه نايمة مو زين هالكد

-ليلة: خوش انا هم راح ارجع للبيت

-لااا ليلة شنو هاي لعد مو كلتي تبقين على العشا؟؟

-خية كعدي يا عشه رجلچ ما يرضى تتعبين كعدي

-ولج والله ما راح اتعب قابل شمسوية هو تبسي احطه بالفرن واكعد

-على الجايات ان شاء الله، يلا خية گعدي ويه امج شوي واقري عندج دروس لا تلتهين

-ماشي حبي بس والله مو خوش طلعة هاي ليلة

-راجعتلج لا تخافين انام على افادچ بالايام الجاية

ودعتني للباب وطلعت لكيت علي الحـق هستوه جاي يحرك سيارته اشرتله ينتظرني وهرولت اصعد وياه خاطر يوصلني فرد نوب..

-علي الحـق: شبيچ ليلة؟

-ليلة: مابيه شي بس شوي وجع

-اخذج للمستشفى؟ شكلج كلش ما يبشر بخير

-لا خوية مابيه شي هسة ارجع للبيت انام وارتاح

سكت بعد ما علق على شي ووصلني بدربه للبيت ومثلما توقعت ترزلت من عمتي عبن علي الحـق وصلني وحده وما اجت عبق ويانه ما ترضى ابد واحد من الولد ياخذني وحدي تكول ما يصلح لازم اكو نفر ثالث بين كل ذكر وأنثى اذا ما جانت تربطهم خوة..

-رسمية: امشي روحي نامي ارتاحي بطنها واصلة لخشمها وبعدها تهمرع وتطلع ما تعرف تستقر

-ليلة: عمة ضايجة ضااايجة

-امشي امشي

تقبلت رزالتها بروح رياضية وصعدت لغرفتي، سبحت وبدلت هدومي وكعدت اقرا شوي بينما انعس وانام بس عقلي چان اله رأي اخر..

ذبيت الملزمة من ايدي وحطيت شال على راسي وطلعت من غرفتي لغرفة سبأ، دگيت عليها الباب وسمحتلي اطب لكيتها متمددة وفاتحة مسلسل جاي تتابع..

-ليلة: اول تالي سبأ تتابع مسلسل وزلمتها ماكو

-سبأ: لا شني ما اتابع بس الحلقة الگبل هاي خلصت على شي مشوق وفتحت الثانية اشوف التكملة خاطر اسولفها لـ تقي

-ليش تقي وينه؟

-نزل واجب من الفجر

-هااا هاي عبيقة هم زلمتها راح يروح واجب خطية

-اي بعد شنسوي

-امم.. اگلج سبيئة

-هاا

-ردت اسألج شي بس لا تترعنين وياي خوش؟

-خوش كولي شكو

-تعرفين وين ابو لسانين لو لا؟

-قصدج ابا الحسن؟

-ليش ياهو عنده لسانين غيره بهالبيت

-حرام عليج والله ابا الحسن وردة مـ...

-اي اي ادري هسة تعرفين وينه؟

-اظنه بالسطح

-شيسوي هناك!

-مادري بعد

-انا اعلمه شعنده كاعد هناك وحده خليني اروح اتعارك

-هههههههه

-على شني تضحكين

-تردين ترحين خاطر تتعاركين لو لان مشتاگة

-لاا شني انا اشتاگ لهذا؟؟ مستحيل لو اموووت

-چذابة

عفتها فاكة حلگها وتضحك وصعدت درج السطح بس كوة، لامة دشداشتي اخاف لا اعثر بيها واللهث چن صارلي ساعات اركض.. فحطت علما وصلت السطح ووكفت بالباب اجر نفس وارتاح..

استقر نفسي شوي وجذب انتباهي صوت طگطگة جايه من غرفة مرسم الامير چن بيها احد وصوت واحد يسولف، الفضول اشتغل عندي والشيطان بده يلعب فلك براسي بس لا الامير جاي يخون تَـمني؟ صخام لو صدگ يخونها..

مديت اذني للباب وعصرت عقلي خاطر افرزن الصوت والحديث بس ما احتاجيت اتعب هواي عبن الصوت اعتلى وكدرت اميز هذا علي السور يمه فوگ!

-علي السور: المشكلة اخاف اسولفلك وتگلي بطل تمسلت وانزل

-الامـير علي: لا كول

-علي السور: بس بطل تعاين لشواربي قلقتني تره

-ما اعاين كول

-امير انتَ اخوي وانا من گبل متعود من اطيح بمصيبة اجيك لو اروح لـ تقي

-خوشن

-امير

-ها

-متوتر خرب

-راسي بده يوجعني سور

-لا لا راح اسولف اصبر

-اي؟

-خوية انا عاشگ ومنعول خير خيري

شهكت بدون صوت والفضول اشتغل عندي اضعااف گبل شوي، عدلت وكفتي ومديت نفسي اكثر خاطر اسمع شيجاوبه بس ما فهمت شكال امير الحظ صوته ناصي وما لگفته بس سمعت من سور جاوبه وكال..

-علي السور: البت براسي صارلها فترة طويلة وما جاي اكدر افكر بغيرها وهسة اخافن تنخطب وتروح من ايدي وانجلط من القهر

-چا ما تخطبها انتَ وتخلص؟

-ياريت بس وين ابوي يرضى

-ليش ما يرضى؟

-يكول عني صغير ومو مال زواج

-وصدگ انتَ هيج؟

-يجوز چنت اي بس من عرفت البت الاحبها راح تضيع من ايدي مستعد اسوي كلشي خاطر انجمع وياهة

-حلو

-فـ انا اجيتك الك خاطر تقنع ابوي يروح يخطبها

-انا؟

-اي انتَ

-وياهو يكول راح يقتنع مني

-افااا وانا اخوك شون ما يقتنع منك انتَ الامـير علي على سن ورمح چلمتك ما تتثنى

-لا صدگ؟

-والحسين

-مادري سور انا...

-انتَ الامير مو ياهو الچان گدها والله ماكو واحد نخاك ورديته خايب

تحمست اعرف جوابه بس گمزت مخترعة من صار صوت مشي خفت لا واحد بيهم راح يطلع فـ بساع ركضت ابتعد من المرسم وفتحت باب السطح على كيفي كللش خاطر ما ينتبهلي ابا الحسن..

مديت بس راسي اتطقس وادرس موقع العدو وضيگت عيوني من شفته گاعد.. گاعد على الفراش المفروش ومنطي ظهره للباب وعالگ مباراة قديمة وجاي نرگل اييي انتَ تنرگل هنا وانا مسموط ابو ابوي..

-ليلة: احمم احممم

جذبت انظاره بالحمحمة مالتي ومن شافني واكفة رجل بالسطح ورجل بره اللتفت بكل جسمه يعاين عليَّ..

-ابا الحسن: شنو شبيچ؟

-مابيه شي

-چا ليش واكفة هنا؟

-عبن اريدك بسالفة

-شنو

-اريدك تجيبلي بند ورق خلصت مالتي

رخت ملامحه وذب حسرة وياهن، هز راسه اي وجر نفس من النركيلة ورجع انطاني ظهره يتابع المباراة.. تشجعت وقررت ما اظل واكفة بمچاني فـ كملت طريقي بأتجاهه وكلت..

-ليلة: هاي شني مباراة ريال مدريد

-قديمة

-هاا هاي من خسر فريقك

-امم

-وانتَ شني جاي تتابعها خاطر تحرگ بگلبك

-امم

-ليش تريد تحرگ گلبك؟

-حرگة المباراة ولا حرگة گلبي على اخوي

تنهدت ماعرف شكول صعدت شايشة عليه وشاكة بي جاي يسوي مكسورة وهسة تغير كلشي من شفت حاله، كعدت بصفه على المندر وذبيت حسرة محتارة.. اكثر شخص تأذه بالصار ويه الامير من بعد تَـمني هو ابا الحسن لا ليله ليل ولا نهاره نهار وگاضيها بس يتصفن ويدعي يرجع توأمه بخير وترجع ايامهم الحلوة..

-ليلة: هو بخير واظنه جاي يتذكر لان هسة سمعت صوت علي السور عنده بالمرسم

-يمثل

-ياهو؟

-اموري

-ليش تكول هيج؟

-عبنه بزع من امي وهي تعيدله نفس الأسطوانة يومية وتحاول تذكره بكلشي، صار يمثل هو زين خاطر يخلص من هالسالفة

-هاا

سكتنا شوي نتابع المباراة وهو يجر نفس وره نفس من النركيلة انا من يمي اختنكت هاي عود احنه كاعدين بالسطح..

-ليلة: چنتو كل يوم تسهرون هنا سوه تنرگلون ويه بعض وتسولفون

-اي

-ليش ما تجيبه هنا بلچن يتحسن ويغير جو؟

-ما يرضى

-يعني انتَ عرضت عليه؟

-اي

-وشكال؟

-كال ما تدوس رجله السطح الا يرجعون ضرغام وليث ونكعد وياهم نتابع المباريات

-اوووف

-الحمدلله والشكر شنكول غيرها خلي بالمرسم ترتاح نفسيته هناك

-بلچن يتذكر شي من يطبله كون بي صورة او شي يذكره

-شاف ليلة كلشي شاف

-مافهمت؟

-شاف صور راسمهم هو بنفسه بس نكرهن يكول هذا مو انا راسمهم وكلهم شالهم وشمرهم بره

-ما شگشگهم اهم شي؟

-لا ما شگهم

-اي همزين

-ليش عود

-معناها اكو شي بداخله جاي يگله الرسمات تابعات اله

-صدگ؟

-اي اي لو مو اله ليش ما شگهم؟ ليش ما حركهم؟ هو جاي يعاند نفسه وعقله بس الامير راح يرجع يتذكر صدگني بس محتاج وكت انطوه صبر وكلشي ينحل والله

-الله يسمع منج ان شاء الله

رفع ايده بشكل دعاء ونزلهم على فخذه يحطهم، دام صمت مريب بيناتنا وبديت احوص متوترة من الفكرة الگمزت براسي، گلبي صار يدگ يدگ چن دنبگ حاولت انساها بس ما كدرت، نبتت اظافري بيدي وذبيت نفس قوي وتجرأت ومديت ايدي الترجف وحاوطت زنده..

-ليلة: لا تخاف، گلبي جاي يگلي توأمك راح يرجع وترجع ايامكم الحلوة

خنس حسه حتى صوت انفاسه انگطع وانا بطني كامت تخبط شبي ليش ما جاي يتنفس صخام الصخمني شكو اكضه هيج شهالرعونية؟ يا علي شلون بيه ايدي ما جاي اكدر اشيلها چن تصمغت على جسمه..

-ليلة: احم..

-ابا الحسن علي: ان شاء الله من يجي امير الصغير للدنيا امير الچبير يكون متحسن

-اي اي ان شاء الله اي

هز راسه بدون لا يبتسم وجر نفس من النركيلة وزفره بهدوء كلش، تذكرت مياعة عبق وتَـمني على زلامهن وكلت شيصير لو انا نفسهن هم اتميوع يجوز نتصالح ونخلص من هالسالفة؟ فـ خلص نويتها اليوم لو لا انا لو هو..

-حسووووون

دارلي وجهه مخترع، اشرلي براسه "شبيچ" وكال بسرعة..

-شبيچ؟؟ متوجعة؟؟

-هههههههه لا اووي شبيك انتَ

-شني

-تدري شنو اتمنى

-يا ستار

-اتمنى يجي فرخنا.. اءء اقصد طفلنا عيونه نفس عيونك عسولي

-عسولي؟!

-اي وبعد شني.. يجي شعره ثخين وسرح و.. اممم و.. ههههه اووي نسيت

-اوي؟

-اوووي شبيك انتَ ههههههه

-دخيلج يا ام الحسن لا تفجعينا

-شبيك حسونيييييي ههههههه

-ليلة اذا ضحكتي هيج بعد مرة وحدة افر وجهچ براشدي اللزگچ ويه الكاع

-لااااا بله خوووووية؟؟؟؟؟

-اييي رجعي ليلة الاعرفها ولج ايييي

-خاااب بعلي مو شكول نعمة انتَ تدري لو لااع!!

-لاع؟ فدوة لحلگچ اروح

-هاي شني شمالك حسيون

-ليلة انا روحي تلعب من التماوع اكزبرر شعر جسمي يوگف من تتماوع بت عليّ لو بيدي اللطها على حلگها اكسر سنونها واخلص من حسها المايع

-چا شكد محمل على تَـمني انتَ

-هههههههههههههههههههه

ضحك من كل گلبه ضحكة طويلة وعالية وضحكت على ضحكته، حرك راسه بـ "لا" وكال بعدما هدأ من نوبته..

-لا والله اصلاً ما مركز بالبت حرام عليج

-حسن لا تقنعني ما منتبه عليها مستحييل اصدگ

-صراحة؟

-اي

-عيب احچي بمرة اخوي بس منتبه اي

-هههههههه احب من تكول امييييييير

-هههههه وامير يسترسح عليها ويغدي تراب

-تدري حسيون انا ما احب المايعات بس هالفاهية تَـمني احبنها واحب اسولف وياهة

-خوش بت اهم شي امير مرتاح وياهة

-يارب يرجعون نفس گبل ما يستاهلون

-اي بعلي

-شلون ينساها حسن؟ فهمني شلون ولك شلون ينسى هيج بت حليوة وحبابة ومتفائلة وتحب الحياة؟ شلووون؟

-قابل هو بكيفه نساها غير مريض الزلمة

-خطية فقيرة هاي.. تدري بيها ابد ما تزعل؟ ابد ابد وحتى من تزاعل زلمتها تكول اظل اللوب اريد نتصالح وما تطول بالمناگر تكره المشاكل

-اي مو مثل بعض الناس

-يا ناس؟؟

-خالتچ الشگرة

-ها خالتي افراح؟

-لا احزان

-ههههههههههههه حلوة حلوة بس لا تعيدها بعد

-اهمداچ

-لا تغمني الفرخ ما يرضى

-الله يساعد هالفرخ عليج خبلتي گبل لا يجي للدنيا

-روح امه هو مالك غرض بي خلي متونس على خبالي

-هم صدگ

-يلا حسن

-شنو

-يلا شبيك

-شنو شكو

-صالحني يلا

-شني؟

-اعتذر مني وصير حباب يلا ابو امير يلا

-اعتذر منج انا؟

-چا جدي

-شكو معتذر شمسويلج ولج

ماكدرت اجاوبه بسبب الكرفة القووية الاجتني حتى صوتي ما طلع بيها، كضيت بطني شايغة روحي احسها تريد تطلع وگلبي عصرني انمردت روحي مرد..

-مو عليّ سوالفج هاي گليلي على شنو اعتذر؟

-بطني

-بطليهن ليلة شبعنا

-ااه.. ا.. ااه

-ليلة

-بطني.. بطنيييييييي ااااااااااااه

-ولج ليييلة شبيچ!!

-راح اجيبببببب يبوووووووووو

-عمت عينيي ولج عمت عينييي شسوووي

-ااااه حسن راح اموووتت

-اسم الله اسممم الله لا تكولين هيج حبيبتي يومي گبل يومج تعاي.. تعاي سندي روحج عليّ تعاالي ولج اشتعل بختچ

مديت ايدي عليه خاطر يگومني بس فجأة راح الوجع واختفى كلشي، جمدت بمچاني ماعرف شسوي والمشكلة الفشلة سيطرت عليّ واستحي اگله صرت زينة وراح الوجع فـ رجعت امثل..

-اءء هاك هاك كضني

-تعاي بوية تعاي سندي روحج عليّ بسم الله

-ااه حسن

-ها هاا كولي

-انا ا.. اسفـ.. ااااه

-سكتي بعدين سكتيي

-لا لا.. عاين انا شسمه

-شني؟؟

-خايب ما تفهم شبيك هاي عود محامي

-ليلة بعدين نسولف بهالموضوع امشي اخذج للطبيب

-لا ماروح لمچان الا تجاوبني

-على شنو؟؟

-انا اسـ... ااخ توجع وعلي توجع الچلمة

-ليلة مو وكتهااا!!

-چا سامحني على الفات وارضى اروح وياك للمستشفى

-سامحتج يلا امشي

-عليك الله؟

-اي ولج انتِ مو متوجعة شني هالسوالف!!

-اگلك وما تعصب

-شكو

-راح الوجع فجأة

هدني من ايده مخنزر يبوو هسة هذا شيقنعه جنت صدگ متوجعة مو اجذب عليه، نفخ هوا ضاييج كلش وفرك وجهه يهز براسه مأيس.. دار وجهه عليَّ متحلف وبعده ما فاتح حلگه خاطر يغسلني بالرزايل جريته من زيج دشداشته ولزگته ببوسه اسكته بيها..

گلبي، عقلي، اعصابي، اطرافي الاربعة كلهن احسهن وگفن عن الحركة وماتن، نفسي ضاع وعيوني انسدت من وحدها من كضني من خصري بأيد والايد الثانية حطها وره ظهري يسنده..

سحبت نفسي عن ببطئ بسبب الدوخة الزارت راسي بس بقيت بين ايده خفت اطيح گدامه واتفشل ويعرفني تأثرت بي، ظليت مغمضة عيوني اتدارك الموقف وهمست بصوت ناصي بيني وبينه..

-حسن انا اسفة

انتظرت اسمع منه جواب بس ما اجاني حسه، جاي احس بأنفاسه بس صوته ماكو، فتحت عيوني على كيف وجفلت من شفته يعاين لوجهي يدور بؤبؤ عينه على كل جزء بيه..

-ابا الحسن

-ها

-سمعتني؟

-لا

-كول والله

-واللط

ضحكت ودفعته من صدره اوخره ورجع جرني من ايديناتي ثنينهم يعصرهم بيده..

-ويين رايحة ولج وييين

-هدني لاا

-بالعباس ما اهدچ اليوم

-اوكف اوكف هاي شني الاسود على راسك؟؟؟

-شنو؟؟ شنو اكو شنوو

صار ينفض بشعره ويمسح على راسه ويحركه حيل يريد يطيح الشي الوهمي الي واكف على راسه..

-ابا الحسن: طاح؟؟ وينج ولج طاح لو لا!

-ليلة: لا لا بعده بين شعرك صار نفضه زين

رجع ينفض بشعره وانا انسحبت انسحاب تكتيكي، مشيت على اطراف اصابعي اعوفنه وحده لحدما وصلت لباب السطح ياله انتبهلي جاي اشرد، صاح بيه يستوقفني وعفته وركضت اطلع من السطح وقفلت الباب وراي وحبسته هو بره..

-ابا الحسن: ولللج ليييييلة

-ليلة: هاي خاطر تتأدب

-ابا الحسن: مشعوولة الصفحة ياهوو باس منوو ولج ليييلة فتحي البااب

-ليلة: اصبر خوية شسالفة انطي صبررر

-خوه الخواچ يا ليلة يا الشالعة گلبي

-حسيون تره ارجع ازاعلك هااا انا كتلك بعد

-فتحي الباااااب

ضرب الباب برجله حيل وهي حديد طلعت صوت كلش قوي وسمعت صوت من مرسم الامير مال واحد جاي يمشي يريد يطلع، نزلت عيوني اعاين لدشداشتي مخازي لاطشة عليَّ تلطيش مو مال احد يشوفني بيها..

-ليلة: راح افتحح اي اي اجيت

مديت اذني لباب المرسم اتسمع وهمزين محد بيهم طلع بقوا جوه من سمعوا صوتي قريب، الف غمة غميت روحي على تصرفي السخيف وظليت اكل بروحي الغبرة.. وكفت اراواح بمچاني محتارة وگمزت من ضرب باب السطح برجله بقوة مضاعفة وصاح..

-والعباس يا ليلة اذا ما فتحتي اليوم....

ما انطيته مجال يكمل جملته لان بسرعة فتحتها وشردت اركض انا وبطني چني بطريق بس روحي خرطت من حسيت بروحي انرفع من الكاع وصرت بين ايده شايلني..

-ابا الحسن علي: اليوم احرگ الدنيا حراگ

-عاين و...

-انا گوة كاض روحي چلمة زايدة واندمچ على الساعة الصعدتيلي بيها

انلصمت خانسة اعاين لعيونه المتحلفتلي وابلع بريگي، نزل من الدرج يركض مراكض وكل وضعي تخربط من شفته يمد راسه يتأكد اكو واحد هنا لو لا عرفته ناويلي على نية خايسة مثل نظراته بالضبط..

-حسيون انا حامل اي من هسة اگلك حامل واظن راح اجيب اذا تاخذني للمستشفى تسويلي فضل

ما جاوبني وكمل طريقه يهرول للغرفة، جسمي كله كام يتراعد وصرت ارعش بيده، فلتت نفسي منه أريد اطيح روحي وهو كاضني حييل شلون مسيطر عليّ مادري..

-صبري صبري لا تستعجلين على رزقج

-حسن حامل انا خايب وديني للمستشفى! ابا الحسن شبيك تسمعني؟؟ الوو؟؟ الووو ولك حسيووون حااااامل انااا......

**

-تاالة خلصيني تره ماكو وكت راح تعوفنا السيارة!!

-تالة: اجيت والله

-حنين: اوووف شالعة گلبي هالبنية

-تَـمني: ليش مستعجلة انتِ خالة؟

-حنين: ولج السايق اتفقت وياه على الاربعة ونص يجينا باعي ساعة بيش هسة

-تَـمني: ميخالف هسة مو اتصل وكلتيله انتظرنا فد ربع ساعة

هزت راسها اي بس معاجبها، معاجبها تأخير تالة ولا عاجبتها روحة بغداد كشكل عام.. راح تروح هي وتالة لبغداد علمود تالة تشوف ابوها صار كم يوم تحلم بي ومكتئبة عاد قنعت خالتي تاخذها تزوره حتى ترتاح شوية بشوفته..

-حنين: يلا توتة گومي ماما

-تَـمني: لا خالة كتلج الصبح وارجع اعيدها هسة ما اجي وياكم اني

-حنين: لعد ويامن تبقين؟

-تَـمني: شنو ويامن ابقى؟ ارجع لبيت عيالي شعندي باقية هنا وحدي

-حنين: المن راجعة تَـمني لا تخبليني! باعي حالج باعي السواد الجوه عيونج باعي وجهج مبلوع بلع من القهر المن راجعة حتى تحركين كلبج من تشوفين رجلج بهذا الحال؟

-تَـمني: ميخالف خالة اريد اتطمن عليه

على اثر صوتها العالي طلعت تالة من الغرفة حاطة نظاراتها الشمسية على راسها ولابسة جنطة على الخصر..

-تالة: شنو شبيكم

-حنين: تعالي سمعي بت خالتج تعالي

-تَـمني: خالة اني قبلت ابقى هنا كم يوم بس حتى اكدر ارتب افكاري واعرف شنو اتصرف من ارجع ما رجعت حتى اعيش هنا واعوفه!

-تالة: منو گلج تعوفي؟؟ ماما رجعتي على هالسوالف!

-حنين: ولجن ما كلت تعوفه شبيجن اكلتني! دا اكول رجعتچ هسة بس راح تتعبچ ما راح تستفادين شي ولا هو يستفاد

-تَـمني: لعد شلون؟؟ خالة لا تخبلينيي اذا ما اوكف وياه بهذا الوضع شوكت اوكف وياه!!

-حنين: شتوگفين وهو ميتذكرچ!

-تالة: صراحة تَـمني هالمرة اتفق ويه امي، راح ترجعين بس تتأذين وتنقهرين لا زوجچ يقبلون تحجين وياه لان متكدرون تضغطون عليه ولا راح تستفادين شي غير شلعان الگلب

تنهدت تعبانة ماعندي حيل اجاوب، ماعرف شسوي شنو بيدي واكدر اخلي يتذكرني، جزعت وخلصت طاقتي بكل خطوة اخطيها بعيد عنه هو ويايه بكل حركة بكل جرة نفس الامير ميفارق خيالي ولا يفارق عقلي.. ادعيله بكل لحظة وكل ساعة اسرح بيها كون يرجعلي ويرجع لذاكرته بحق علي الي يحلف بي..

-حنين: ها حبيبتي تجين ويانه؟

-تَـمني: لا، راح اخابر علي السور يجيني حتى ارجع لبيتي

سكتن ثنينهن ما حچن واني اتصلت بـ سور، خمس دقايق واجاني ودعت خالتي بالباب وهي طلعت ويه السايق الاجرته يوصلها لبغداد واني صعدت ويه سور السيارة..

-علي السور: سبحان الله اليوم چنه بطاريچ على الغده

-تَـمني: الامير سأل عني؟؟

-علي السور: لا والله امي وابوي حچوا بيج اليوم

خابت امالي المعلگتهن بخيط انهكته الايام ودرت وجهي للجامة اباوع منها، ما صار عندي فضول اسأل شحچوا وبقيت ساكتة الطريق كله لحدما وصلني للبيت..

نزلت وهو نزل جنطتي الحاطة بيها اغراضي ودخلت جوه، سلمت على اهل البيت وخالة رسمية سلامها چان يختلف هالمرة.. حضنتني لجسمها حييل وظلت تمسح على ظهري من وره وتكول..

-هلا يمة هلا بيج هلا

-تَـمني: شلونچ خالة وشلونه امير

-رسمية: والله على الله

-تَـمني: الله كريم

-حبيبة: تحبين تشوفينه؟

-تَـمني: ياريت بس خاف هم ينفر مني

-علي السور: انا اكول لا نجازف عبن جاي يتحسن على العلاج وعصبيته هدأت شوي لا نأزم حالته من جديد

-تَـمني: بكيفكم

اخذت جنطتي وصعدت فوگ لغرفتي، رتبت كلشي لمكانه ورجعت الاغراض واللتهيت انظف بيها وامسح بالاثاث واكنس الكاع.. غيرت الفرشة ولبست كوشات الكراسي وجوه جديدة وعدلت كلشي على اخر حبة..

كملت واخذت البرنص ودخلت للحمام سبحت وكعدت جوه الدوش مباشرة، غمضت عيوني وصفيت عقلي من كل فكرة سلبية راودتني ونويت اعيش هنا مثل قبل اشوفه بس ما اخلي يشوفني لحدما تحن علينا ذاكرته وتخلي هو يسأل عني..

كملت حمامي وطلعت بدلت ملابسي ونزلت جوه سألت خالة على الامير وكالت بالمرسم كاعد ميطلع منه الا لليل، تنهدت وكملت طريقي للمطبخ شفت البنات كلهن هنا ومن ضمنهن عبق ورفل هم جايه وضحكتها ترن رن بالبيت ماعرف على شنو تضحك بالضبط، سلمت عليهن وحدة وحدة واخذت المكشارة من ايد سبأ ووكفت اگشر بالبتيتة بدلاً عنها..

-سبأ: يا خية خليني ماعندي شي انا والله

-تَـمني: كعدي ام فلان لا يجي ابو فلان ويطشرنا

ضحكن كلهن عدايه بس ابتسمت، وكفت اكشر واگصص بالبتيتة واسمعهن ناصبات على ليلة الوجهها صاير احمر وتعض بشفتها..

-رفل: هههههههه تالي طخيتي راسج ولج وراضيتي

-ليلة: انچبي انچبي هو راضاني مو انا

-عبق: صح صح من البوسة الخليتي يغص بيها

-ليلة: اهووووو انا صوچي رعنة وهيلگ وسولفتلچن ما تستاهلن وعلي

-رفل: عليج الله شنو سوالچ بعدين امانة سولفيلي مو انا اختج

-حبيبة: خايبات يبوووو لعبت روحي سكتن ماريد اسمع

-ابرار: هههههههه نسينا يصير اخوچ

-ليلة: اي والله صدگ؟ چا خليني اسولف بالتفصيل الممل اخذني للغرفة و..

ضربتها حبيبة على زندها تسكتها وشو هاي لزمت بطنها وعاطت بكل صوتها..

-ااااااه

-حبيبة: ضربتج على زندج خية كاضة المكان الغلط

-ليلة: ااااه يمة اااخخ ولجنن ااااخ

-تَـمني: عزا شبيها بنات

-ليلة: راح امووت يمممة يمممةةة ولج يوووووووم

-عبق: راح تجيب اكيد راح تجيب ولجن صارلها اسبوع متوجعة ومتقبل تروح للدكتورة تفحص

-ابرار: رايحة اصيح عمتي كعدنها هنا كومي رفل عيني اختج

انخبصت رفل ويه اختها وكوة جريناها تكعد على الكرسي متقبل تكعد تكول تتأذه، وخرنا عنها كلنا من اجت خالة رسمية تركض وابا الحسن نزل من فوك طاير ركضوا ثنينهم عليها وكنبص ابا الحسن كبالها ولزم ايدها..

-ابا الحسن: ليلة شبيچ حاچيني

-ليلة: يعني شبيييه راح اجيييييييب

-رسمية: يلا يا الله دخيلك يا علي، حبيبة ركضي جيبي عباتي وانتِ رفيلة جيبي لاختج عباتها بسااع

-ابرار: رايحة انا اجيب جنطة الطفل

ركضن كل وحدة بجهة وصوت ليلة يرهب كل صرخة تصرخها ترج البيت، البنية وجهها صاير ازرگ ويكت عرگ لازمة ايد ابا الحسن وروحها ترفرف من الوجع اول مرة اشوفها بهالوضع ومتت خوف عليها..

-شمس: شني ليلة راح تجيب؟؟

طبت شمس للمطبخ وبيدها واحد من جهالها وويه طبتها شفت الامير ينزل من فوگ على كيفه.. گلبي صار ينبض بجنوون وعيوني ما رمشت بعيد عنه بقيت اراقبه بكل حواسي لحدما دخل للمطبخ عاكد حاجبه مستغرب من الهوسة..

-الامـير علي: شصاير

اللتفتت امه عليه واشرتله على ليلة التعبانة، هز راسه متفهم بس شكله ما مقتنع ابد ايد ممقتنع مادري ليش نظراته غريبة وطلع من المطبخ وراح يكعد بالصالة وحده.. انقهرت من تصرفه مو لان ما قدم المساعدة لان اعرف لو أي واحد من اخوان ابا الحسن جان سوه نفس الشي ميبقى بمكان واحد ويه مرة اخوهم التطلگ لان اكيد تكون بوضع صعب بس حزت بنفسي لانه صرنا عين بعين وصد وجهه عني!

اجن البنات ولبسوا ليلة العباية وطلعوا بيها للمستشفى ورفل وحبيبة وام عبق وياهم، عفنه العشا وكعدنا بالمطبخ ندعي الله يسهل عليها ونقرالها سورة الانشقاق..

واكفة والوب عين بموبايلي دا اقرا على برنامج القران الكريم وعين على الصالة اباوع للامير الكاعد بهدوء وصافن بالكاع.. روحي تريد تروحله وتسولف وياه وعقلي يحارب يريدني ابقى هنا وانتظر خبر ولادة ليلة..

-تَـمني: بنات الولد راحوا للمستشفى لو لا؟

-شمس: اي بدر راسلني كال هو ودر راحولهم

-تَـمني: احم.. وامير؟ شنو رأيكم اگله حتى يروح؟

-ابرار: انا اگله مو احسن؟

-تَـمني: بكيفج

ابتسمت ومسحت على چتفي وراحت تحجي وياه، ما سمعتهم شكالو بس شفته يهز براسه وكام بسرعة وطلع من باب الاستقبال بس وين رايح وهو ناسي موقع المستشفى؟ ركضت على ابرار اسئلها وريحتني من كالت..

-هو صارله ساعة كاعد هنا منتظر واحد من الولد خاطر يروح وياهم عاد گتله علي الكرار كاعد بمحل صاحبه الصاير براس الفرع خلي يروحله

-اي زين

-ابرار: تعاي خلينا نكعد شوي تعبتي من الوكفة

ويه حچايتها دگ موبايلها الي بيدها باوعت للشاشة شفته "علي الدر"، جاوبت وقبل لا تكول الو شفت وجهها ينرسم عليه ابتسامة واسعة..

-ابرار: الحمدلله والشكر الحمدلله على سلامتهم ويتربى بعزكم ودلالكم ابو حيدر

-تَـمني: ليلة جابت؟؟

-ابرار: اي هههههه جابت.. بناات ليلة جابت وينچن

-شمس: يا بعد روحيي اللهم صل على محمد وال محمد

ضج البيت بالفرح بولادة ليلة وانترس بالسعادة من بعد ايام طويلة چانت عبارة عن كآبة.. تمنينا نروح للمستشفى نشوفها بس خالة رسمية ما قبلت كالت لان جابت بالمستشفى العام مو بالخاص فـ ممنوع الزيارات..

اللتهينا نرتب البيت وعدلنا غرفة علي الكـرار حتى هي وابا الحسن يكعدون بيها مو زين عليها تصعد وتنزل هواي واكيد خالة رسمية ما راح تخليها تروح لبيت اهلها عدها قانون الچنة تنفس ببيت العيال متروح لبيت اهلها..

-عبق: بنات واغراض كرار وين يروحن؟

-ابرار: هسة دگيتله يرجع خاطر ياخذ اليحتاجه ويفرغلهم الغرفة

وفعلاً اجه قبلهم ولملم اغراضه وظل يدردم على اهله لان دومهم مبهذلي من دون اخوته بس طبعاً كله بالضحك يحجي..

-علي الكـرار: مثل ام البزازين كل يوم شامريني بمچان

-شمس: على كيفك عيني على كيفك وين شامريك هاي وانتَ عندك اكبر غرفة بالبيت

-علي الكـرار: غرفة؟ غرفة؟ لا ام محمد ما مقبولة منج خايبة انا منطيني الهول لو واحد عطس بالاستقبال يوصلني صوته

ضحكنه على دردمته وكملنا ترتيب كلشي وكعدنا ننتظر رجعت ليلة والطفل على نار.. بليلتها محد بينا تعشت من الحماس كل همومنا انست وتفكيرنا بس بـ اموري الصغيرون نريد نشوف شلون شكله راح يطلع اتخيله يخببل على امه..

ثاني يوم بالـ 11 الصبح رجعوها واجت تمشي على رجليها ما شاء الله ولا كأنها البارحة جانت راح تموت من الوجع، بالباب ذبحوا جوه رجليها ذبيحة وذبيحة ثانية لسلامة الطفل ذبحوها گالو ذني هدية من علي الدر..

نباوعلهم من شباك المطبخ ونگمز نريدها بس تجينا متحمسات، متنا ضحك من سمعنا صوتها العايق جاي من بعيد تصيح..

-فرخي وينه جيبوا فرخي اريده

-ابا الحسن علي: هذا بيدي لا تخافين عليه

-ليلة: جيبه اريد اشيله

-ام ليلة: ولج يمة بعدين هسة انتِ بيا حال

-ليلة: كلشي مابيه جيبوا وينج رفيلة انطيني امير العنون

غلست رفل عليها محد قبل ينطيها الطفل لحدما دخلوها جوه، تحمدنالها على السلامة بسرعة بسرعة وعفناها وكلنا ركضنا على الطفل نشوفه ومثلما توقعت ما شاء الله عليه ينكرط..

استقرت ليلة بالهول اءء اقصد بغرفة علي الكـرار وابا الحسن وياهة جوه ويهتم بيها، قدملها اجازة من الجامعة وقبلوا ينطوها اسبوعين رغم هي ماقبلت وكالت وضعها كلش زين وخالة رسمية هم كالت ما شاء الله ليلة جانت كلش قوية ومو من ذني المايعات..

بقت ام ليلة عدنا ثلاثة ايام واجه عمهم ناصر ياخذها بقت بس رفل يمنا تهتم بأختها وبالطفل وهيج صار عدنا اربع عنونيين بالبيت ولد شمس وابن ليلة وبنت ابرار ومنتظرين بعد ثنين ينورون الدنيا جهال عبق وسبأ..

ابتسمت اتنهد واني اشوف الكل فرحان وبده يرجع لحياته الطبيعية حتى الامير صار يطلع وبه ابو كربله ويشتغلون بس بعده ميتذكر شي.. او بالاحرى ميتذكرني بس على الاقل ديلهي نفسه وابو كربله ما عايفه يومية يجي ياخذه بيده للشغل ويرجع وياه بالليل..

الايام تمشي والكل ديتطور وديعيش يومه وحياته ومنتظر ثمرة حبهم يكبر گدام عيونهم الا اني بده اليأس يسيطر عليَّ والكآبة تاكل وجهي الابتسامة صارت صعبة عليَّ ابتسمها واحس بروحي انطفت..

الامير قافل ترجعله الذاكرة مو شلون مچان وادري والله ادري مو بأيده هالشي بس شوفته بهالحال دتموتني قهر! ودا اموت اكثر من اشوفه كاعد بالطرمة البره كل يوم يسهر لوقت متأخر ويه ابا الحسن ورفل تطلع يمهم ويكعدون يسولفون..

بديت اتنرفز واضووج من تقربه من رفل بس حبيبة وعبق اكدولي همه من قبل هيجي علاقتهم ومستحيل يصير حب بيناتهم واعرف بهالشي لان اتذكر قبل لا أتزوجه شلون چانو قريبين بس من تزوجنا شوية ابتعدوا مو هوايه بس شوية..

نزلت مثل كل يوم بنص الليل على اطراف اصابيعي ورحت للمطبخ كعدت يم الشباك اسمع لسوالفهم واحرگ بروحي بس الديهونها عليَّ هي رفل دتحاول ترجعله الذاكرة بشكل مو مباشر وعلى كيفها وياه كللش..

وخرت التول حتى اشوفهم ولكيتهم وحدهم هالمرة كاعدين على الكروتية اليصير ظهرها على شباك المطبخ، حطيت كرسي وكعدت اراقبهم واسمع لكلامهم وضحكاتهم سوه.. 

-رفل: خوش خوش اوكف يعني تريد تقنعني ماكو بت عجبتك؟ ابد ابد؟ هاي السنين كلها ماكو وحدة باگت هالگلب

-الامـير علي: لا والله

-رفل: ما اصدك

-خاب ولي منتظرج تصدكيني

-لا يمعود شبيك عصبي بس جاي اكول مو معقولة تره انتَ جبير واشكال بيوت طبيت وكعدات حضرت ما صدتلك فد طيرة تطيّر عقلك

-لا

-شسالفة امير

-والله شبيچ يعـ...

سكت فجأة ورفع ايده يعصر راسه، هدأت رفل وما لحت عليه زايد وخلته يرتاح دقايق ياله كررت سؤالها..

-رفل: يعني ابد ماكو؟

-ماكو انا من اول ما اعاين للبنات مو دربي هذا

-انا حاسة اكو بت تحبك

-ياهي هاي

-علساس ما تعرفها يعني

-شمدريني بيها

-چا خليك لا تعرفها ما تستاهل حبها

-احسن

فرت بيدها ما عاجبها وسويت نفس الشي بس مو ايدي الفريتها راسي، حركت راسي مأيسة يتذكر او يقتنع چان متزوج وعايش احلى قصة حب ويايه..

-رفل: ما تشتاق لـ ليث وضرغام؟

استغربت من سؤالها المفاجئ واستغربت اضعاف من جاوبها الامير بصوت ناصي گوة لقطته اذاني..

-الله يرحمهم

لحظة شنو؟؟ الامير يعرف همه ميتين؟ يعني تذكر موتهم لو شنو! بس اي اي اكيد عرفهم ميتين چان ما گال الله يرحمهم بس ليش محد بلغني بهالشي!

-رفل: تذكرت الصار اموري؟

-چؤ

-شبيك

-مابيه

-امير شبيك وجهك تغير؟

-اختنگ رفل لا تجيبين طاريهم

گالها وگام عرفته راح للاستقبال بسبب صوت الباب سمعتها تنطبگ حيل، ركضت اطلع للحديقة اشوف رفل حتى اسئلها وخابت كل امالي من كالت..

-رفل: مو هو تذكر ابو كربله حاچيله گبل چم يوم من چانو بالشغل

-وانتِ شلون عرفتي؟

-هاا؟

-شلون عرفتي ابو كربله حاچيله؟

-شني شلون عرفت.. غير هو.. هو سولفلي امير حچالي

-امم

-يلا انا رايحة انام نعست تصبحين على خير

عافتني وطبت للبيت تركض حسيت بيها شي مو طبيعي بس ما لحيت، مزاجي ضارب واريد اكعد بمكان وابجي للصبح وما خليتها بنفسي صعدت لغرفتي وكعدت وحدي ابجي لدرجة كعدت الصبح عيوني منفخات وحمر حتى للدوام ما رحت..

مشى كم يوم جديد من حياتنا الكل ملتهي لو بأمتحانات نص السنة لو بالاولاد الصغار وبحياتهم واني مثل العادة كاعدة وحدي انتظر شي شبه مستحيل ينحل.. وهاي اول مرة راح اكولها اني تعبت! اعترف واكولها بلساني تعبت واحتاج ارتاح مدا اكدر اتحمل اكثر دا اختنگ وگلبي مقمووت اتأذه وانجرح مية مرة من اوكف كدامه وميعرفني..

انظف وامسح واكنس بالبيت الهي روحي بس ماكو فائدة، كلما يجي الليل ارجع لعزلتي ووحدتي ولدموعي ومخدتي.. تفاجأت ثاني يوم من اجتني خالة رسمية وعادت عليّ كلام ذيج المرة كالت مو ذنبي اتحمل كل هالضغط وتريدني ارتاح من كل هالاذية واروح كم يوم لبيت خالتي..

-تَـمني: ماريد اروح

-رسمية: يمة تَـمني حگج من تخافين تعوفي وحيده وترحين بس انا ماريدج تبقين بهالحال كافي يوم مو زين عليج عايني لوجهج شلون ذبلانة وخالتج هم مقهورة على حالج وتعبانة على تعبچ

-خالتي؟

-حگها خالتج مقهورة عليج تريدج ترتاحين جاي تشوف بت اختها تذبل مثل الوردة العطشانة، روحي يوم ارتاحي وطلعي وغيري جو وانا اوعدچ وعد واحلفلچ براس ولدي الامير اول ما يتحسن اول وحدة تخابرج تبشرچ هي انا

جنت شاكة بخالتي متصلة بخالة رسمية ورادتها تحجي ويايه حتى اعوف بيتهم وارجع يمها، بجيت مقهورة من حاچاني عمو علي وكال نفس الحجي وجان كلش متأذي وهو يحجي ويايه، كال يعز عليه يشوفني بهالوضع وصار لازم ارتاح كم يوم واخلص من هالتعب بعيد عنه وعن نظراته الباردة تجاهي..

هزيت راسي مستسلمة وصعدت لغرفتي رتبت جنطتي وحطيت بيها كل احتياجاتي بدموع تجري وحلگ متقوس بكسرة، وينك يا الامير عفتني انتَ مو وعدتني متعوفني للموت؟ شلون هسة واحنه دنصير عين بعين وتصد عينك عني وتكمل طريقك عايفني بروح مجروحة..

ودعتهم العصر حتى اروح لبيت خالتي بس خالة رسمية جانت مو طبيعية ابدد مو طبيعية متغيرة عن اليوم الصبح وهالشي قلقني، بقت بس تتصفن وتفرك بيدها وتذب حسرات ومن حبيبة او البنات يسألوها شبيچ تصيح بوجههن وتطب لغرفتها..

طلعت واني افكر شبيها وليش هيجي ضايجة وظليت يومين خايفة لا يكون الموضوع متعلق بيه وحاطة ايدي على گلبي اخاف اكو خطة يردون يزوجون الامير بس طلعت غلطانة! لان بعد هاليومين الكل انصدم من عرف سبب توترها شنو..

**

-يلا ولي نظفي غرف اخوتج

-رهف: نعاااال عليهم ما انظف لاحد خليهم يهزون طولهم ويلمون الزبل وراهمم

-صابرين: يلا يا رهف لا تعلين گلبي امشي يمة امشي لا يرجعون ويكتلوچ

دبچت رجلي بالكاع طاگة روحي وصعدت فوك انظف بغرف اخوتي الجرب، انظف زبالتهم من وره خشمي ما اتعب روحي عبنهم ما يستاهلون واصلاً ما يميزون نظفت لو لا هوش الله بأرض الله وجودهم..

نظفت غرفة غفار ركض ركض وتفلت على صورته المعلگها خفه لهالوجه الخايس امس كاتلني واليوم اجي انظفله غرفته ما يستحق اخت مثلي..

فزيت مهبوط گلبي من انفتحت الباب وطب عليّ الشيطان، حاجبه معكود ووجهه مطرود منه الرحمة سبحانك ربي مو زلام جنانوه وتمشي على الكاع..

-غفار: شعندج هنا ولج

-رهف: جاي امسح صورتك

بالوصلة البيدي مسحت التفلة بساع گبل لا يشوفها ووكفت عدل، ابتسمت بوجهه وكشر بوجهي لعبانة روحه..

-غفار: ولي بره

-رهف: اگلك غفار عندي سؤال

-انچبي وطلعي

فريت ايدي بدون لا يشوفني وطلعت من غرفته اكمل شغلي وصار بوجهي سامر واكف وساند ظهره على المحجر ويباوعلي من فوك ليجوه ويضحك بشماته..

-رهف: شبيك ولك

-سامر: ههههههه هذا گدرچ وهذا مچانچ مكناسة بيد اليمين ووصلة باليسار وتكربين ليل نهار

-رهف: طير عني لا اطير وجهك بالوصلة

-سامر: لو تعرفين منو كاعد بديوان ابوي

-شعليه انا روح سامر

عفته وعبرت ممر الدرج عبن اعرف ياهو جاي ماكو غير هذا العجيز اليريد يخطبني خال غسان بس الماعرفته والجمد رجليه وما خلاني اعبر خطوة ثانية هو من كال سامر..

-عمي علي جايب واجهة وجاي ويه ولده كلهم

-رهف: ليش؟؟ سبأ بيها شي؟؟

-سامر: عرج مابيها جايين لغرض ثاني

-يا ستار شصاير وياهم؟

-جايين يطلبون من ابوي شي وابوي رفض ينطيهم

-تعلمني ببخل ابوي

-ما سألتيني شطلبوا منه

-يذبحون غفار؟

-لا

-فلوس؟

-هم لا

-چا شني

-اجو يطلبوچ الچ

-يطلبوني؟

-اجه شيخ علي وجاب مشية وياه وخطبچ لوليده علي السور

-شني!!!

-لا تكيفين ابوي رفض

-اوكف اوكف اريد افتهم ياهو خطبني؟؟؟

-هيوووو طرررش شبيچ

-ولك على كيفك وياي سولف على كيف شبيك سامر

-وجع شيخ علي خطبچ لـ علي السور

-يمة

-وصمه

-ولك اظن هاي دعوات صلاة الليل

-وينج وين صلاة الليل

عفته وركضت انزل الدرج مثل المسودنة، طبيت للمطبخ شفت امي مشلهة ردانها وتتصايح ويه ابوي وعاصف وتكول..

-صابرين: الهممم عين جايين يخطبون من عدناا هالچلااب بعليي ما ننطيهم والزهرررة ما ننطييهمم

-مسعود: ايي ايي لا تخبصينا افتهمنا

-صابرين: چااا شكو كلتلهم نفكر؟؟ شكووو ما رفضت!!

-عاصف: يمة اكيد ما نرفض بساع چا جاب واجهة شيوخ ترس بيهم الديوان حطنا بموقف محرج

-صابرين: چا احنه مو حزانة؟؟ مو عييب جايين يخطبون شني الميت ماله حرمة؟؟

-سلطان: واذا حزانة شني تردين الوادم تموت؟

-صابرين: ايي عيب عيبب ما يعرفون للاصول هاي والميت يعودلهم!

-رزاق: يمة جاي نكلج راح نرفض شبيچ ضايجة وخبصتي الدنيا

بقيت واكفة بباب المطبخ اتسمع عليهم بدون لا ابيّن روحي وافتهمت ابوي راح يرفض باجر ويكول كدامهم سألني وانا ما راضية.. عفتهم وصعدت لغرفتي وكعدت أفكر واستوعب الصار! معقولة حبيبة خلت اخوها يخطبني وهي تعرف چنت عاشگة منتصر؟ معقولة ما نبهت اخوها!

طلعني من صوت افكاري صياح امي من جوه تريدني، نزلت اشوف شتريد وكالتلي اجي اساعدها بالخبز رحت وياهة بس شني وجهها ما يگصه السيف ما تتحچى ولا تعاين لوجهي..

-رهف: يمة شبيچ

-مااااابيه شي

-جيبي انا اخبز بدالج

-لا وخري انتِ بس شنگيلي

هزيت راسي وبديت اشنگلها العجين وارتبهن بالصينية وهي شعلت التنور، لفت راسها بربطه بالعكس وبدت تاخذ من العجين وتفرشهن على المخدة..

-يمة

-خيير

-سامر گالي على شي وانصدمت

-شكو

-علساس عمي علي جاي لابوي خاطر يخطبني لابنه

ذبت المخدة من ايدها وخزرتني حييل، خزرتني لدرجة عيونها راح تطلع من وجهها هزت راسها بـ لا ونترت بيه..

-چذاب!! چذاب محد اجه خيولي هالزعطوط لا تصدكين بي

-لا مو چذاب

-رهفففف

-يمة ليش عصبية شبيچ؟

-اموووتج رهيفة والعباااس ادفنج بيددي اذا....

-گبل لا تكملين غير تاخذون رأيي گبل لا ترفضون؟

-رأيج بشنوو؟؟؟ ماكوو رأي انچبييي

-لا اشو الي رأي وانا اريد افكر بالموضوع لا تستعجلون وترفضونه

-ولج تسودنتييي انتِ؟؟ من كل عقلچ انطيچ لرسميية الخايسة!!!

-جاي اگلج راح افكر ما كلت موافقة

-اذبححج ذبح خلااص لو فكرتي! رهف لا تجربينيي تعرفيني من اعصب اميي ما اعرفها ستري على رويحتج وكملي الخبز لا ابتلي بيج

-يعني هاي نهايتي؟؟ هاي بس انظف واطبخ واركض مراكض بين اخوتي؟؟ دراستي بألف يا علي ياله رضيتوا اكملها وبالبوكات والختلات اروح للدوام هسة حتى بزواجي تردون تحكموني؟؟

-لااا ما نحكمج لاا بس هذول ما ننطيهم لو تموتين فـ انجبي وكملي شغل

-ما اكمل!!

-شنووو ولج؟؟؟

-ما اكمل يمة! خاف من شوي كتلج اريد افكر ويجوز ارفضه هسة اگلج انا موافقة اتزوج علي السور واذا وكفتي بوجهي بالعباس ابو فاضل اذب روحي بهذا التنور واخلص وأخلصكم مني!

-چا يلا ذبي روحج وخلصينا ماكو زواج

-والله اسويها!!

-عود تهددين؟

-ما اهددج بس كافي بزعت روحي من هالعيشة كاافي

-ادفنچ محترگة بهذا التنور ولا ازوجچ لابن رسمية!

-يمة لا تتحديني والله اذب روحي!

-لو تردين تذبين روحج ما تحچيها فـ كلاواتج بطليهن رهف

استفزتني بأسلوبها تحجي ببرود وتگلب بعيونها چن تريد تثورني بالزايد، اخذت عجين من الصينية وفردتها على المخدة وگبل لا تمد ايدها لغطا التنور وترفعه انا كضيته ووكفت على اصابع رجلي اريد اشمر روحي بنص التنور..

-صابرين: رهفففففففففف

لگفتني بكل قوتها ودفعتني طيحتني بالكاع، صاحت بصوت يرهب وهي تلطم على وجهها حيل وتزلغ بخدودها..

-يمممة بتي يمممة ولج لييش رهف لييش محد بقالي غيرج لييش تسوين بأمج هييجج

-احرگ روحي والله اذا تحكمتي بيه بعد والله اشعل روحي واخلص من هالعيشة!

-سكتي اشش سكتييي لا تسودنيني

-راح تقنعين ابوي يوافق يمااا

-ولج لييش لييش لييش ليييش ليييش

تلطم بكل قوتها على وجهها زورگته وتصيح "ليش" حزت بخاطري اشوفها بهالحال بس جنت متأكدة راح تطلعني من التنور وما تخليني احترگ.. امي ما تهتم الا نضغط عليها هالشكل سبأ جانت ما تتأثر بيها ولا يرفلها جفن لو سوت بروحها شي بس انا لا تگلب الدنيا..

-صابرين: كومي طبي جوه كوومي

-ما اروح الا تقنعين ابوي!

-ويييين اقنعه ابوج ما يرضى والله يا يمة ما يرضى لا تأذيني رهف كومي

-تعرفين شلون تقنعينه ما تصعب عليج يمة

-ولج اوووووووف منج لو اللزمج الا اكطعج بيددي

ما جاوبتها وكمت من الكاع خاطر اطب جوه خلص بعد سلمت الموضوع يمها ان شاء الله يارب كون تكدر تقنع ابوي بطريقتها الخاصة..

-صابرين: رهف اوكفي!!

انداريتلها اعاين لوجهها مگلوب واثر اصابعها مطبوعة بي من الطگ، هزت راسها متحلفتلي وكالت..

-لازم عندج علاقة ويه سور وهيج كاتلة روحج عليه!

-تعرفين كلش زين ماعندي علاقة ويه بشر بس سور اهون بمية مرة من الزلمة التردوني اتزوجه

-هذا ياهو؟؟

-يوم هالسوالف مو على رهف ادري بخال غسان خطبني من ابوي وتردون توافقون عليه بس اذا سويتوها ورضيتوا يا يمة والچفل زينب مو بس احرگ روحي احرگ البيت عليكم واشعل ولدچ وياي!

عفتها فاكة حلگها وصعدت لغرفتي انتظرها تجيني تگلي قنعت ابوچ وراح يتم هالزواج.. والله لو اعرف انزف بعباتي السودة المهم اتزوج انسان بي خير واخلص من هالحياة الكافرة!

كل يوم يمر وانا ارسم احلام واوهام لحياتي الجاية وامي تمشي وترزل بيه وحتى كتل تكتلني بس عايفتها ما يهمني حاسني گلبي وضعي وحياتي راح يتغيرون للاحسن وابوي راح يوافق..

وصدگ ما طول موضوعي ثلاث ايام! وصعدتلي امي تغمني وتگول ابوي رضى وراح ينطيني، شلون رضى وشعجب وشسوت وياه ما يهمني! تنهدت مرتاحة امسح على گلبي ونويت من اليوم ابدي بداية جديدة واحاول احسن من وضعي.. سور خوش زلمة وعمتي رسمية احبنها وانا وسبأ راح ننجمع ببيت واحد شريد اكثر من هيج؟

باليوم الرابع اجه عمي لابوي خاطر يسولف بالمهر وتفاجأت من شفت حبيبة جاية وياهم ومن الباب كضتني من ايدي وجرتني تصعد بينا لغرفتي..

-رهف: حبيبة

-حبيبة: طبگي الباب خاطر محد يسمعنا

-عايني حبيبة انا اعرف انتِ ليش جاية بس...

-شلون تتزوجين اخوي وگلبج ويه منتصر رهف؟؟ شلووون!

-لا والله بس فهميني ولا تستعجلين انا منتصر صفحة سودة وطويتها من حياتي وداعة امي

-رهف سور ما يستحق ينلعب بمشاعره والله الزلمة شاريج!

-ادري گلبج محترگ على اخوچ بس ما راح اللعب بمشاعره والله.. ماريد عشگ منتصر يبقى طمغة بيه العمر كله انا هم استاهل اتزوج واعيش!

-ما  مرتاحة رهف اخاف على سور والله اخاف لا تلوميني اخاف تردين بس تقهرين منتصر بي!

-ادري وحگچ بس شوفي شلون راح اسعده تره سور ابن عمي وهم اخاف عليه لا عبالج استغله لو متزوجته خاطر اقهر بي منتصر لا والله شالني الو راس وسطرني لو فكرت هيج تفكير!

انتفضنا ثنينا شاهگات من انفتح باب غرفتي علينا وطل منها غفار! غفار واكف بالباب كدامنا وعيونه يتطاير منهن شرار....

يتبع 👑....

━━━━━━ ♛ ━━━━━━

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

عيونچ تضيع سلفنا، احنه الچنه معدلين.. ♥️

━━━━━━ ♛ ━━━━━━

-اجيتك اريدك انتَ ترجعلي زوجي، اريدك تساعدني ارجع زوجي الوعدني ميعوفني للموت يا الامـير علي

صفن بوجهي صفنة مطولة وعيونه تصعد وتنزل تراقب دموعي الجبيرة الدتنزل بغزارة، حرك راسه محتار وذب حسرة عالية بدون لا يحجي شي..

-تَـمني: راح تساعدني لو لا؟

-استغفرالله ربي واتوب اليه

-لا تستغفر وجاوبني راح تساعدني لو لا!

-المشكلة ماعرف اساعدج! ما جاي اعرف شنو المطلوب مني؟ شلون اكدر اساعدج وشلون ارجعلج زلمتج وانا ماعرفه!

-تعرفه تره

-عايني يا بت الناس انا لا يعجبني اضوجچ ولا اضوج نفسي اريدج بس تفهمين انا ماعرفج! والعباس ماعرفج ماعرف منين طلعتيلي انتِ

-بس اني اعرفك

-وانا ماعرفج!

-عادي نتعرف من جديد

-شنهاي!

-اي شكو بيها لو اني ماعجب ذوقك الجديد؟

-اااااخ دخيلك يا علي

-جاوب

-خالو نزلي جوه

-جاوب!

-خايبة ماريد اجاوب

-جاوب!

-ولج!

-جاوب!

-تَـمني!!

-ما انزل الا تجاوب!

-شجاوب غير افهم على شني!

-اعجبك لو لا؟

-ولج بابا عيب والله عيب

-جاوب

-خ** بيه اييي تعجبيني ايي ارتاحيتي؟؟

-يلا لعد خلينا نتزوج مرة ثانية

-يا بوووووية

-عادي ما اطلب مهر جديد لا تخاف بس خلينا نتزوج

-انتِ صاحية بنيتي؟

-اي

-والله اشك بهالشي

-على كيفك داده تره انتَ المو صاحي وناسيني معناها العلة بيك!

-خوشن ناسي انا شتسوين بواحد ناسي؟

-اريده معليك انتَ

-شتسوين بي!!

-احبه

-وهو مايعرفج خاطر يحبج

-كذاب

-عايني تَـمني انتِ مبين عليج بت حبابة وفقيرة و..

-وحلوة واجنن ومخبلتك چنت كله اذكرك بي كله بس انطيني فرصة خلينا نتقرب من بعض صدگني راح تتذكرني ثق بيه اميييير

تقربت عليه اكثر واني اهمس اخر كلماتي همس، صرت لازكة بي لدرجة رجلي طخت برجله وهو ما ابتعد مني.. جازفت بروحي وبردة فعله اكثر ورفعت ايدي على كيف وحطيتها على خده اتلمس لحيته، توقعته راح ينفر مني بس ما سواها وظل يباوع لعيوني وهالشي شجعني اكمل..

-امير انتَ احسن انسان دخل لحياتي، علقتني بيك وخليتني احبك هواي.. احبك لدرجة من مرضت لليوم اني لا ليلي ليل ولا نهاري نهار كلما احط راسي على مخدتي دموعي تنزل من وحدها واني اتذكر ايامنا وشلون چنه عايشين سوه

تنهد وغمض عيونه يحرك راسه بـ "لا" المشكلة نافي ومدا يقتنع ردات فعله وملامحه كلها تأكد هو ممقتنع بالاگوله بس اهم شي مدا ينكر ويعصب عليّ مثل قبل..

-چنت تدلعني نوومه وامنية وتومه وتمنه وفهاوي.. چنت تحبني من اكول اسمك وتضحك من تحجي ويايه بشي وما افتهم عليك.. احب من تصغر عيونك من تبتسملي وتباوعلي بعيون كلها حب، امير انتَ تحبني لدرجة تحاربنا من كل الجهات وما عفتني بقيت ويايه وسندتني وعوضتني على كلشي تعيس عشته

-ما اذكر

-بس اني اتذكر، المهم اني اتذكر واني اعرفك منو هالشي كافي والله

-وليش ترضين على نفسج تعيشين ويه زلمة ما يعرفج ولا يتذكرج؟

-لان اعرف هذا الگلب ذايب بيه حتى لو عقلك نساني

دست على گلبه بأصبعي ونزل عيونه يباوعله، رجع نظراته عليَّ وگال بهدوء واضح جداً بصعوبة مسيطر عليه..

-انتِ تكولين تحبيني صح؟

-حسب

-يعني شني

-يعني من تكون حباب ويايه احبك ومن تزعلني اكرهك

ضحك خفيف مستغرب من حركاتي واني اكول جملتي الاخيرة وماهتميت اني متعودة احجي وياه بهالاسلوب وبنبرة الدلع هاي..

-والله مادري شگلچ

-لا تكول بس ارجع اميري الحباب

-ولج سودنتيني بعلي سودنتيني

-عادي امير القديم جان متعود ويحب هالسوادين

-شني امير قديم وامير جديد تره ماكو هيج سالفة خوية!

-اكو اكو معليك انتَ

-اشش ماكو

-لا تأشأشني تره والله ازاعلك

ضحك مرة ثانية بس هالمرة بنفاذ صبر وفرك وجهه، ظل يذب حسرة وره حسرة ويستغفر على كيفه وهم ما اهتميت لان مبين الافندي عاجبه الوضع ومتونس على وگفتي گدامه ونسى الحرام والحلال واستشرافه وظل ياخذ وينطي ويايه واحنه واكفين وجه بوجه..

-بس تصير زين راح نتزاعل على تصرفاتك هسة!

-شني؟؟

-ليش واكف ويه بنية غريبة متتذكرها مو عيب عليك؟

-هو انا؟؟ انتِ اللاطشة بيه وتنوحين فوك راسي

-اي غير رجلي

-خ** على رجلج منيين صرت ولج

-معليك معليك انتَ زوجي حبيبي وراح يجي يوم وتتذكر وتعض اصابع الندم على الديصير بيناتنا هسة

-ليش بوية اعض اصبع الندم؟!

-لان نوميتك واكفة گبالك وما تداهرت وياهة

-نوميتي ياهي هاي

-اني

-لا صدگ!

-متصدگ مو؟ هاك شوف صورنا هاك

طلعت موبايلي من الجنطة وفتحته دا اشوفه وما قبل، لزم ايدي اللازمة بيها التلفون حيل وعصرها..

-تَـمني

-خليني أراويك الصور

-تَـمني سمعيني

-بس خلينـ..

-تَـمني انتِ عاشگتني؟

-اي

-تحبيني وتدورين راحتي؟

-اكيد اي والله

-چا عوفيني

سهم وحطه بنص گلبي ويه ما نطق هالكلمتين، بهتت وعجزت اتحرك احس براسي خدر وضغطي صفر، اخذ كل حيلي من اردف بنبرة مو هادئة..

-ماريد اضوجچ ولا اجرحچ واعصب عليج بس والله العظيم گوة كاض روحي ومتحكم بأعصابي مبين عليج بت ناعمة وما تتحمل ينكسر خاطرها

-لـ.. لعد ليش تكسر خاطري

-تَـمني لا تبجين دخيل بخت الحسين لا تبجين

لزم راسه يعصره بين ايده متوجع وانطاني ظهره، حاولت اسيطر على دموعي وما ابجي بس فشلت والله فشلت ضميت وجهي بين ايدي ابجي بوجعع گلبي الوجع البي يذبح، صرت اشهگ بصوت وگنبصت بالكاع اكعد محتاجة اسند طولي لا اوكع من الدرج..

-الامـير علي: دخيلك يا علي

-حـ.. حرام.. عـ.. حرام عليك

-والحسين انتِ بت يتمناها كل زلمة العيبة مو بيج وعلي بس انا تعبان.. تعبان وما جاي اكدر اتذكر شي تبهذلت وياكم تبهذللت

**

"تـــالة"

سمعت صوت بچي تَـمني عالي جاي من فوگ، متت خوف عليها وركضت اصعد الدرج الحديد شفتها مگنبصة بالگاع والامير واكف كبالها بس وجهه مطعون طعنن وايده ترجف مال واحد تلفانة اعصابه..

وكفت على اخر باية القريبة منهم لان مستحيل اكدر اخطي خطوة داخل المخزن ما اكفي، وكفت احجي ويه تَـمني من بعيد حتى تكوم وتجيني والامير بقى يسولف وياهة بصوت عصبي وعالي..

-الامـير علي: ماا اتذكر حتى روحيي! هذاا وجهي من اعاينله بالمراية ماا اعرف نفسيي لا تلوميني عبن ما اتذكرج!! ما اتذكركم ما اتذكر اخوتيي الصغار يمته كبروا؟؟ ولج حبيبة! جانت حبيبة تلعب بالساحة وترجع مطينه وتركض تلبد بحضني تخاف من سلوى لا تكتلها! يمته صارت بهالعمر وتزوجت وتطلگت يمته؟؟

دمعت عيوني على حيرته وايده الترجف وهي تمسح بوجهه وشعره ولحيته ويفتر بنفس الدائرة الواكف بيها كل شوية ينطي تَـمني ظهره وانوب يرجع يباوعلها ويذب حسرات، بقى على هالحال الصعب حتى من گال بحرگة والغصة تارسة صوته..

-صارلي شگددد انتظر اتصال من ليث وضرغام تالي يجوني يگلون اصدقائك ماتوا؟؟؟ ماتووا!!! ماتووا وما حضرت فاتحتهم ماا ودعتهمم ماا چنت وياااهم!!!

بنفس اللحظة دموعه كامت تنزل وضم وجهه ينطينا ظهره، تگطع گلبي على منظره ومنظر تَـمني مو احسن منه، مجرد شوفتهم بهالحال خلتني اأيس من الدنيا ويأست اكثر من كال بتعب..

-محد يحس.. محد يحس بالوجع والتعب الهلكني وانا اشوف كلشي تغير، بين يوم وليلة كللشي تغير لا انا انا ولا اهلي هم اهلي! كلشيي مو نفسه وتردوني اصدگ واتقبل هالتغيير چن ما صار شي!

-تالة: امير اني اعرف الدتمر بي صعب بس تَـمني هم تعبت، انتَ اكيد متتذكرها بس هي شنو ذنبها؟

-مالها ذنببببببببب

فزيت من عاطها بوجهي بعصبية مخيفة، هسة عرفت العصبية الجانت تَـمني تحجي بيها وتكول عنه يتخبل طلع صدك يتخبل..

-مالهاا ذنببب واناا جاي اگلهاا لا تبقى تبني احلااام واوهاام ويه زلمةة ما يتذكر نفسه!!!

-تالة: تتذكـ....

-اگدر اللعب عليهااا اكدرر اگلها اتذكررج واتونس ويااهة البت حلووة وتجيب التاايه بس مالها ذنبب ينضحك عليهااا حراااام

-تالة: تمام.. تمام هذا هو اهدأ اني راح اخذها هسة انتَ بس اهدأ

مشيت خطوة اضافية اكمل طريقي للداخل وگوة دحست روحي يمها المشكلة المواد الانشائية الموجودة هنا سادات المكان سد ومدا يخلينا نتحرك بأريحية، نصيت يمها ولزمتها من ايدها اگومها بس متقبل تكوم ما سكنت ولا انكطع بچيها جسمها يرجف وتبجي على حظها..

-تالة: كومي تَـمني كومي يا عمري خلينا نطلع منا

-تَـمني: خـ.. خلـ.. خليني.. خليني

استغفر الامير يلطم على رجله عصبي بس حسيت عصبيته مو منها ومن بچيها حسيته مقهور عليها وعلى نفسه لانه ميتذكرها، جبرتها تكوم وگوة جريتها جر ونزلتها الدرج انهد حيلي متقبل تتحرك نابتة بمكانها علما نزلتها اني روحي فاحطة..

-تالة: تَـمني لا تبجين خلص خلي راح يجي يوم ويتذكرج والله صدگيني راح يعرفج وتذكري كلامي

طلعتها من المحل مالته وشفت علي النور واكف بالباب ويهز براسه مقهور من شافها شلون تبجي، ما حجيت وياه شي مجرد رفعت ايدي اودعه ومشيتها اعبرها الشارع حتى نروح للسايق، تمشي وتبجي بنحييب دمر كل امل جان بگلبي والزاد وضعنا سوء هو وگعتها! برمشة عين ماعرف شلون داست على قيطان حذائها الرياضي وعثرت..

-تالة: يمممةة

صحت ممرود گلبي من وگعت على ركباتها وسندت روحها بيدها الثنين بنص الشارع.. الشارع انخبص كلها تصيح الله واسم الله واجوا زلم يردون يساعدوها لانها وكعت وبعد حيل ماعدها حتى تكوم البچي اذاها واخذ كل قوتها شكد ردت اكومها بس ماكو مدا تشوف بعيونها وبقت منصية راسها وتهتز چتافاتها بالبچي..

-تالة: تَـمني كومي انفضحناا تَـمنييي

-تَـمني: عوفـ.. عوفي.. عوفيني تـ...

-ما اعوفچ هنا!! امشي تَـمني حرام عليج الدتسوي بنفسج حرااام

تقدمن نسوان ثنين ويايه تگابلن يساعدني عليها وانتبهت لـ علي النور اجه يركض من بعيد يشوف شنو صاير همزين من انتبه علينا وعيونه ظلت ورانه من طلعنا وكدر يشوفنا..

-علي النور: شصايرر سلامات سلامات.. شوي خوي وخر بلا زحمة.. شني السالفة خوية ليش تكض بيها وخررر

-الرجال: البت طاحت

-علي النور: وشني تريد تشيلها انتَ؟؟ وخر خوية رحم الله والديك

وخر الرجال بسرعة وباقي الزلم هم ابتعدوا والحمدلله من تَـمني استجابت لصوت علي النور وكدرت تسند روحها تكوم، سودة عليّ چف ايدها مزلغ وبنطرونها مدمور ومحكوك ووجهها هم صاير بي دم ماعرف منين اجه..

-علي النور: انتظروا دقايق لا ترحون هسة اجيب امير

-تالة: لا لا وين تجيبه يمعود اصلاً هو السبب بحالتها هاي احنه نروح السايق واگفلنا على الشارع الثاني

-علي النور: يا سايق وهي بهالحال لا ما يصير، اوگفي بس دقيقة هنا انتظريني

عافنا وراح يركض على جهة المحل، بينما رتبت حال تَـمني ومسحت دموعها واخذت جنطتها من ايدها اني شلتها شفت علي الكرار يطلع من المحل يركض..

-تالة: عزا هذا منين طلع!

اجه يهرول بأتجاهنا وبدون سلام ولا كلام اشرلي بيده وكال..

-يلا يلا امشن للسيارة يلا

-تالة: وعلي النور؟

-نور بقى ويه امير يلا تالة امشي

هزيت راسي ومشيت واخذت تَـمني ويايه مثل اللعابة اني احركها منا ومنا تعبتني، وصلنا لسيارته وركبتها بالكراسي الوره واني كعدت وياهة هم وهو بكرسي السايق..

حرك السيارة كرار واني جريت من كدامي كلينس امسح وجه تَـمني وايدها وانفض بنطرونها وارتب وضعها لا تشوفها امي هيج وتتخبل..

-علي الكرار: اووووف شنو هالحالة استغفر الله ربي واتوب اليه

-تالة: تعبت المسكينة

-علي الكـرار: مو گلنا لا تروح

-تالة: وهيج تظل لا متزوجة ولا مطلگة؟ انتو شنو على گلوبكم محد تأذه غيرها وانلعب بأحواله!

-علي الكـرار: تره انا...

-تالة: بس حاضرين تگولون لا تتقربين منه ولا تحجين وياه وعوفي ومعليج بي بس الى متى؟؟ الى متى تبقى هيج لشوكت! تره الامير صارله بهالحالة اشهرر!!

-شبيچ اكلتيني وشربتني ما جاي اگول هالحجي بس لخاطره هو عايني لحالها!! شوفي وضعها هذا عاجبچ؟ شنو استفادت من راحتله فهميني!

-استفادت لان گللها ماريدج وعوفيني وهذا الراح تسوي!

-تَـمني: تالة

-تالة: اششش سكتي انتِ!

-علي الكـرار: هو بكيفج تعوفه!!

-تالة: اي بكيفيي

-علي الكـرار: تره زلمتهاا شني هي هيته الرجال مريض وما يتذكرها قابل هو متعمد

-تالة: كلكم متعرفون هالمسكينة شنو دتعيش محدد بيكم يهتم حايرين بس بأبنكم!

-علي الكـرار: عبن ابننا المريض! اخوي المريض وفقد عقله بين ليلة وضحاها حسبالج هالشي هين؟؟

سكتت مجاوبته اصلاً ماعندي طاقة اتناقش واحس كلشي احجي واگوله مابي فائدة بس اتعب روحي، مقهورة ومحترگ گلبي على بت خالتي الي انمردت مرد بمرض زوجها ومنو يلزمها يگللها عيشي حياتج طبيعي مثل ما هو عايشها همه ميدرون ديدمروها بهالحجي وكل يوم للصبح تظل تبجي ومتغمضلها عين!

رجعنا للبيت كرار وبالباب راد يوكفني ويحجي ويايه بس مالي واهس، تشكرت منه وكتله يتصل بالسايق يگله حتى يرجع نسيته هالمسكين وعفناه مصلوب بسيارته ينتظرنا..

-علي الكـرار: تالة اوكفي!

-تالة: كرار خليني ارجع تَـمني جوه

-تَـمني: اني اروح مابيه شي

فلتت نفسها من ايدي ومشت للبيت تمشي بخطوات بطيئة مكسورة وراسها منزلته، گلبي يفووور من اشوفها بهالوضع ماتحمل اتأذه واتگطع عليها..

-علي الكـرار: كلشي راح يتحسن تالة لا تظلين متشائمة

-تالة: ان شاء الله

-شبيچ كوة تحاچيني چن انا السبب بوضعهم

-مو سبب احد الصار بس اني تعبانة شوية

-سلامتج من التعب

-شكراً

-تالة شسالفة!

-علي اعذرني بس وضعي النفسي ممستقر، اعرف انتَ مالك ذنب بكلشي ديصير بس الدنيا بهذلتنا وكفختنا من كل جهة

-كولي الحمدلله والشكر يمعودة وضعنا احسن من هواي بشر

هزيت راسي مؤيدة وهمست "الحمدلله" تنهدت اخفف من تعبي والحزن العشعش بگلبي ورفعت عيوني عليه من گال..

-انا وياچ.. اقصد يعني وياكم كلكم أي شي تحتاجوه لا تترددون وتطلبونه تالة

-شكراً متقصرون والله

-صيري سباعية وصبري بت خالتج على مصيبتها لا تصيرين انتِ والدنيا عليها وتشجعيها تعوف زلمتها

-كرار تره اني اعز الامير كلش وزواجه من تَـمني چان احلى شي اشهده بس لكل انسان طاقة وهم يجي يوم يبزع ويمل ويريد يكمل حياته

-وانا؟

-شنو انتَ

-هم راح يجي يوم تبزعين وتملين من وضعنا وتكملين حياتج؟

-كرار..

-لا خلص لا تجاوبين.. انسي سؤالي ولا تجاوبي

-لا كرار راح اجاوب، لا اني ما راح يجي يوم وامل بس بنفس الوقت ماريدك تتأمل

-گتلج لا تجاوبين!

-لا تضيع عمرك وتظل تنتظرني لاني اعرف امي شنو واعرفها لو قفلت مستحيل راح تغير رأيها

-يتغير يتغير لا تخافين راح يجي يوم ويتغير

-ميتغير واكدر احلفلك هسة! كرار لا تضيع عمرك تنتظر وهم كمل حياتك و.. كمل حياتك وتزوج بنية على ذوق امك وخليها تفرح بيك

-انتَ مخبلة؟؟ كتلج لا تتشائمين شبيچ هيج سلبية ماعرفتج هالشكل انا!

-الله وياك

-تاالة اووكفي مو احاچيييچ.. تااالة

عفته وهرولت للبيت وطبگت باب الحوش ورايه بقوة، نزلت دموعي مكسور گلبي بس بسرعة سكتت روحي ودخلت اكو وحدة حالها اتعس مني كاعدة جوه الليل مدا تنامه من حزنها...

**

-للوااه للواه يا فرخي للواه.. للواه للواه يا وليدي للواه

-ما نام هالصلف

-عيونه مفتحهن اكبر من عيونك العمص

-ابا الحسن علي: خايبة ماكو هيج جاهل صلف وعينه گوية

-ليلة: فديته ابن امه

-اريد اناااام تعبت تعبتت

-اسكت ياهو گلك سوي سوايتك وخلف اذا ما تتحمل

-سكتي ليلة لا اگوملج

-شتسويلي بله؟؟؟

-بس سكتي لخاطر الكعبة

-ما اسكت

-نعله علا روحج

كمزت اطفر من شال المخدة وشمرها عليَّ بعلي لو صارت على ظهري تفصخه مو مخدة طابوگة منطتنا عمتي رسمية..

-ليلة: امشي فرخي امشي نطلع ونعوف ابوك ما يحبنا هذا

-تعالي وين رايحين

-نروح يم سبأ وعلي التقي عاد ذولاك يحبونا

-الزلمة راجع من الواجب تعبان تعاي

-راجع من الواجب وراح يگابل اموري ويكعد بس يشوفه

-ليلة لا تتنحسين وتعالي حدي نامي

-مانريدك خوية هي كوة

-تجين وانطيج شي؟

-شني تنطيني

-اهديج هدية

-عليك علي؟

-اي تعاي

-والله يا حسيون اذا طلعت تقشمر عليَّ اتطلگ منك

-لا اقشمرج شني تعالي وشوفي بعينج

صفنت عليه افكر واقرر اروحله لو لا؟ خاف اروحله ويكول هاي ماعدها كرامة وتفضل الهدية على مبادئها؟ عمي والله حيرة..

-ما اجي كرامتي ما تسمحلي انتَ ردت تطگني

-انا؟؟

-اي چا مو ضربتني بهاي الطابوگة

-ههههههههه حگچ عليّ وهسة تعاي خاطر اراضيچ ام كرامة

تنازلت وحطيت اموري العنون بكاروكه ورحت اكعد بصف ابا الحسن على الجرباية، دگ چم مرة على گلبه بأيده بمعنى حطي راسج هنا بس ما رضيت وانطيته ظهري..

-شو انطيتيني گفاچ

-تأدب عيب

-شني عيب چا ياهي يومية تنام بـ...

صميت حلگه بيدي ما راضية يكمل عبن اعرف لسانه شطوله وراح يدلعه عليَّ، ضحك بصوت عالي ووخر ايدي من حلگه وكال..

-يلا ماحجي ماحجي

-ابو لسانين

-نتعلم منج خوية

-ههههههه اكرهك لا تحاجيني هيج

-ليش خيتي

-اسكت يلا مو اختك انا

-اختي ونص

-خوا الخواك وضيم اللفاك

ضحك بكل صوته وشبگني بين ايده وغصب نيمني بصفه، كزبر كل جسمي من شمني بشعري وباسني على كيفه.. كمشت بفانيلته الداخلية من وره وهمست..

-نام انتَ مو نعسان

-طارت النعسة

-اموري كاعد تره

-واذا

-اكعد راحة حسننن

ضربت ايده البدت تحارش وكمت اريد اوخر منه وما رضى رجع جرني وكال..

-خلص راح اصير عاقل بس لا تكومين

-شني هديتي يلا

-دقيقة

مد ايده للجرار اليم راسه وظل يبحوش بي بدون لا يشيل عيونه عني، توترت من نظراته التاكل وتشرب بيه، ابا الحسن بدون لا يحتاج يحجي شي اكدر اقرا عشگ ليلة المتداخل بعروگ عيونه..

-ليلة: احم شني شجايب وصارلك ساعة تدور

-كضيته

كالها وطلع من الجرار علبة مجلدة بجلاد هدايا لونه احمر، ابتسمت متحمسة ومادري شماله گلبي ينبض اريد اشوف شجايبلي وشنو المناسبة..

-هاچ

-شنو هاي؟

-فتحي

گعدت على حيلي بين ايده وصرت افتح بالجلاد بس على كيفي حرامات حلو لا يخرب يفيدني بعدين، ظليت اشيل اللزاگ منه شوي شوي وهذا كاعد ويتأفأف..

-شگي ليلة

-لا ولك يفيدنا

-شگي لا اشگ زيجي بشني يفيدنا ولج

-شكد نحس هالزلمة

شگيت الجلاد بضعف حماسي گبل شوي وشهگت من شفته علبة موبايل جديد!

-حسيوووووووون شنووو هذاااا

-والله زين ما يتسودن الفرخ على هالصوت

-عوف الفرخ عوفه هذا شني جايبلي موبايل جديد؟؟

-عجبچ حبيبتي

-ولك يشششگ

-الحمدلله من عجبچ

-ضلعي شنو هااي والله ولا ادري بيك رومانسي

-اعجبچ انا

-وانا حسبالي مشتري لصاحبتك الجاي تخوني وياهة

-لا شني اخونچ ليش منو توصل لاظفرچ واعاين عليها

-لا بله

-والله

-خوش زلمة عفية عليك

-اعجبچ

-زين واذا خنتني بعدين؟

-ما اخونچ ليلة شني متنسية على خيانة انتِ

-يعني مادري اگول محامي وحليو ولسانه طويل البنيات يحبن هالصفات

-البنيات يحبن يعني انتَ منهن صح؟

-لا مو شرط

-ولج بنات الدنيا كلهنن حبني وانتِ لا شسوي بروحي وتحبيني من خ** بروحيي

-لا لا ميخالف شبيك هو شني الحب ينوكل ينشرب خيولي المهم متونسين وعلاقتنا حلوة هذا كافي

-اهمداج

-بعد روحي

-هسة عجبج الموبايل لو اجيبلج غيره؟

-لا حلو شني غيره اريدن هذا بس شنو المناسبة؟

-هدية ولادتچ لاموري

-لا بله

-اي شبيچ

-چا فرخي ما تجيبله هدية شمعنى؟

-فرخچ جبتله ذبيحة شتردين اجيبله بعد

-لا تچذب علي الدر جاب مو انتَ

-والعباس حتى انا ذبحتله عقيقة بيوم طهوره

-هاا اي سودة عليَّ ردت اسويله حفلة بطهوره بس صار بسرعة بسرعة

-اعوضكم والله بس انتِ جاي تشوفين وضعنا شلونه

-اي صح جاي اشوف.. يلا ما يهم عادي

-ليلة

-ها

-انتِ ما زعلانة عبن ما سويتي عرس؟

-اي والله

-ما تجامل هالبت

-اي زعلانة چا شني اريدن حالي حال البنات اللبس بدلة وارگص واترعن قابل وحد

-زين شنو الحل شنو نسوي خاطر ما نخليها بنفسچ؟

-بعرس رهيفة راح اللبس بدلة بس مو بيضة فشلة منها واريد اروح صالون هم

-صار بعيني

-واريدك تحجزلنا فندق مثل العرسان

-خادم

-ونسافر؟ لو زودتها؟

-لا نسافر شكو بيها بس خلي اموري شوي يكبر خاطر تسيطرين عليه

-صدگ حساني تاخذنا لو بس تريد تسكتني

-لا وداعة امي اخذچ وبعيني حگچ هذا

-والله؟

-والله

-زين وين نروح

-انتِ وين تردينا نروح؟

-بنفسي اروح لايران بس عاجبتني تركيا هم فـ محتارة

-شنو رأيج نروح للرضا سلام الله عليه اول؟

-احسن يعني؟

-اي خاطر افرچ بيها فر ما اخلي مچان يعتب علينا

-اي اي اريد

-هذا هو چا حضري نفسج على العطلة

-بشرفك؟؟

-اي

-حسن العطلة ما بقالها شي صدگ تاخذنا؟؟

ضحك بزعانة روحه گدما حلف وشبگني مرة ثانية وحط راسه على صدري، ابتسمت فرحانة وكلني حماس ومن الفرحة مال الموبايل والسفرة غفيت واموري وابوه غفوا وياي..

حسيت من عز نومتي المريحة على صوت اموري ينوص بكاروكه، درت وجهي على جهة ابا الحسن ما لكيته بصفي والغرفة هم مظلمها هاي شكد نمت وما حاسة على روحي..

كمت من الفراش ورحت لابني شلته بين ايدي اهزهزه بس ما سكت مبين جوعان، رجعت على الفراش رضعته ونزعته الحفاظة وگمطته ونزلت بي جوه وره ما لبست حجابي وصايتي..

-ليلة: ذول وينهم شو البيت فارغ

ناص امير بأيدي ضايج ويتعارك بيده يريد يطلعهم من الگماط ولك هالگدوتك وما شاء الله هيج قوي چا لو كبرت شتسوي بينا..

-ليلة: كافي ولك.. هاا؟ اسكت لا اكفخك..

بچى بصوت عالي ويعصر بوجهه ما راضي ضحكت على حركاته الحلوة من فدوة لوجهه اروح، بسته بخدوده المعكمشات وحبيت عيونه العسلية على ابوه ونزلت اروح لغرفة عمتي رسمية ولگيتها هي وسبأ وعبق وحبيبة كلهن هنا..

-ليلة: ها ولچن شو هنا

-رسمية: هاي عليمن ولچن ولچ لويلوو

-على البنيات مالج غرض عمة لا تحطين روحج

-چا انا مو بت ولج؟؟

-ليلة: هاا هاا تردين نتعارك بهالمغربية؟

-رسمية: اصص سكتي لسانها شطوله ياهو يگدرلها بت نويصر

-ليلة: عمة هسة شتسون هنا ما افتهمت

-عبق: خالة جبرتنا نتعلم حياكة

-ليلة: شني؟؟

-رسمية: هدي هاذ من ايدج وتعاي تعلمي وياهن احسن من كعدتج بلا فايدة

-ليلة: سودة عليّ هاي منزلتهن من فوك وهاي جايبتها من بيتها خاطر تعلميهن حياكة عمة

-رسمية: اي وشكو احسن من النگ فوگ روس زلامهن

-حبيبة: بس انا ماعندي زلمة يمة

-رسمية: يصير عندج يصير

-ليلة: عمة خلينا نشرب چاي راسي دايخ انا، تعاي وخلينا نحش بالوادم

-رسمية: لا حرام كعدي

-ليلة: بس بهالسوالف تستحرمين من يومية كاضتنا وترزلين بينا ما تكولين حرام

عضت عمتي على اصبعها حييل واندارت عليهن تدردم عليَّ وتگلهن ياهو يگدر للسانها شطوله..

-رسمية: ما تصيرين مثل هالفقيرة سبأ حسها ما ينسمع بالبيت حبابة وسكينة مو مثلج صوتها يلعلع ومشكلة فرخها بخصرها ما تهده

-ليلة: اي سبأ احسن مني چا هستوچ دريتي

ضحكن البنات وحتى هي ضحكت وظلت تهز براسها وتهمس "اويلي منج" ضحكت عبن متعودة على هالمداهر يومية واتونس بي لا اضوج ولا اشيل بگلبي وهي نفس الشي، رحت يمها وحطيت اموري بيدها وكلت..

-عمة انا راح اطلع لبيت وحدي مو حالة هاي

-رسمية: شني ولج شني شني ما سمعت؟؟

-حبيبة: يمعودة ليلة سكتي لا يصير بيها شي

-ليلة: لا صدگ شني اريد استقر اريد نرتاح اريد انطي مساحة لفرخي يزحف ويركض براحته

-رسمية: شيركض ولج وهو بعده چنه گملة!

-ليلة: اقصد بالمستقبل عمة، ثانياً لا تكولين على امير گملة خطية يزعل

-رسمية: حفيدي وبكيفي!!

-خوش چا ابا الحسن زلمتي واريد اخذه واطلع من البيت وهم بكيفي

-اخذذذذي روووحوو اخذذذي ماريدكم كلكمم ماريدكمم

-ها؟

-روحو يمة شوفوا حياتكم رووحو چنها العيشة ويه رسمية صارت ما تعجب ومحد يريدها كلمن اخذله مرة ويريد يعوف امه وحيدها ويطلع من البيت

-ليلة: خوش راح نطلع احنه

-رسمية: وداعة الله يمة روحي ارتاحي بعيد، روحي حگچ هذا بعد محد يريد رسمية كلهم باعوها

حطت الطفل يمها على الفراش وكضت اطراف شيلتها ومسحت بيها عيونها من الدموع الچذبية، متت ضحك على سوالفها والبنات فاطسات خو عبق وجهها صار احمر من گدما حاصرة ضحكتها..

-ليلة: صدگ چذب عمة الخير والبركة انتِ ما راح اطلع منا چا بعد بوجه من اصبح وامسي واتعارك واتداهر كل يوم

-رسمية: لا يمة روحوا اذا تردون حتى انتِ سبيئة گولي لتقي طلعوا وعوفوا رسمية وحدها تاكل غداها وعشاها ويه البزازين

-ليلة: لا لا باقية انا اذا سبأ تطلع ما يهمني براحتها بس انا ابقى خاطر تكعدين ويه اموري الصبح من اروح للدوام

-رسمية: اي مو مربييية عندج!!

-ليلة: يا عمة يا بعد گلبي وين اكو منج انتِ بعلي احنه بدونج نضيع لو شتكولن بنات؟

-عبق: اي والله

-سبأ: واذا علينا انا وتقي فـ انا مرتاحة وين ما تقي يكون مرتاح

-حبيبة: ها يوم رضيتي هسة؟

-رسمية: اي يعني مادري مو انا ماريد اصير ثگيلة عليكم

-ليلة: عادي عادي تعودنا

گامت تريد تكتلني وشردت اطلع من الغرفة وكل البنات طلعن وراي وهي وياهن، ركضت للمطبخ اسوي چاي اسكتها بي وحطيت كعك وكيك بالماعون ورحتلهن، كعدنا كلنا سوه وطلعن ابرار وشمس من غرفهن واللتمينا ناكل ونسولف بأمور عشوائية..

-رسمية: هذا يا علي منهم بالمطبخ جاي يبحوش مثل البزازين؟

-حبيبة: اظن علي الدر

-رسمية: لا لا مو نصبته

-ابرار: يجوز حق؟

-عبق: لا حق ويه تقي وكرار طالعين

-رسمية: هذا جاي يتسحب مثل الحرامي ماكو غير علي السور! وووولك سووووووور... سوووور ليش ما تجاوب ولك سووويرر

-حبيبة: يجوز مو هو

-رسمية: لا هو ادري بي.. علي السور!!

-علي السور: مو انا هذا مو انا

-رسمية: تجي لا اگوملك

-علي السور: انا علي الكرار مو سور

-رسمية: جايتك

-علي السور: اهوووووو جاي جاي ما يخلون الواحد براحته بهالبيت الا اطلع منا واخلص منكم

طب للصالة مطنگر بس شني عطره يفحفح من وييين شميته والكشخة على اخر حباية طالع چنه تركي..

-رسمية: چنك طالع؟!

-علي السور: اي عندج مانع ام علي؟

-رسمية: وين مولي

-علي السور: والله حلوة هاي شو جديدة صايرة تسألينا وين طالعين

نصت تريد تشيل نعالها تكتله وصاح من مچانه ضايج..

-رااايح اشوف رهف

-رسمية: شعندك رايحلها هو كل يوم

-وين كل يوم حرام عليج خايبة خافي الله

-اي هواي تروحلها قابل جاي اچذب

-يمة!

-لا لا خلص روح شعليه بيك انا

رفع ايده بوداع وعافنا وراد يطلع بس شكله مقهور من تصرف امه وما اللومه عمتي رسمية لازم تستوعب سور ونور مو جهالها الصغار بعد وسور راح يتزوج ضروري تنطي مساحته الخاصة..

-حبيبة: علي السور

وگف بمچانه من صاحتله ورجع اللتفت علينا، ابتسمنا كلنا ومن ضمننا عمتي من كالت حبيبة..

-اليوم طالع كلش حلو

-علي السور: صدگ؟

-حبيبة: والله تخبل لو شتگولن بنات

-ابرار: فدشي

-شمس: العطر كلش حلو

-عبق: مرتب كللش

-سبأ: رهف راح تفرح هواي بجيتك

-ليلة: دللها ابن عمي تستاهل رهيفة

هز راسه يضحك بحماس وراح للمطبخ ورجع شايل بيده بوكيه ورد لونه احمر ووردي وعلاگة مال هدايا بس ما عرفنا شبيها، تقرب من عدنا وكال بفرحة..

-جبتلها ذني شوفن حلوات؟

-شمس: الله كللش حلوات والله ذواق

-رسمية: حلوات يمة بالعافية عليها

حنت نظراتنا لعمتي وسور كبرت ابتسامته وراح باس ايد امه وراسها فرحان عبنها علقت ويانه..

-علي السور: الله لا يحرمني منج يا الغالية

-رسمية: زينة رهيفة وياك

-علي السور: كلللش زينة

-ابرار: ما تسولفلنا چا شبيك هم يعجبنا نتونس على ونستكم

-علي السور: هههههه مادري شسولف

-حبيبة: خلوا بنات اخوي متسرسح على دلعها وياه

-علي السور: ولج حبيبة شني تتسنطين علينا من نسولف انتِ

-حبيبة: لا عيوني بس اعرف رهف شني

بقى يضحك وودعنا وراحلها واخذناه محتوى من طلع، گعدنا نسولف بي وبشخصيته شكد تغيرت من يوم خطب لليوم ومو بس احنه ملاحظين حتى عمو علي وكلش فرحان بهالشي بس عمتي رسمية احسها مقهورة عبنها تريده يبقى سور وليدها العنون بعيونها وتعامله مثل الطفل هو ونور..

اذن المغرب وتفرقنا ورجعنا مرة ثانية علمود العشا، ام الجهال كل شوية رايحة تشوف فرخها وترجع للطاوة والحوامل كاعدات يگصصن زلاطة وبتيتة وحبيبة واكفة على السنك تغسل بالمواعين التتوصخ..

-عبق: هاي الباب يجوز اجه علي الحق

حطت شال على راسها وركضت فتحت باب المطبخ وطلعت للساحة شوي ورجعت بس ما طب وياهة علي الحـق..

-حبيبة: ها وينه؟

-عبق: مو هو هذا علي السور رجع

-حبيبة: شعجب

-عبق: مادري بس وجهه چان كلش ضايج

-سبأ: الله يستر!...

**

"رهـــف"

كملت اخر لمسات مكياجي ونزلت ركض للمطبخ اشوف الاكل لا يحترك بالفرن، اليوم عزمت علي السور على العشا ومن الصبح لسه انا اركض وارتب واعدل واسوي بعشانا وعشا ابوي واخوتي..

بشلعان الروح ياله ابوي رضى يجينا للبيت خاطر يشوفني، كلما اگله يكول ذاك اليوم شافج بالباب كافي وعلي السور ما يقبل يريد يجي دائماً وهيج مشلوع گلبي..

اندگت باب الحوش ولبست عباه على راسي وطلعت اركض افتحها، ابتسمت من شفته بوجهي وشايل بيده بوكيه ورد يجنن..

-علي السور: السلام على وردة بيتي المستقبلية

-ههههه عليكم السلام تفضل سور تفضل

طب للساحة وحط البوكيه بيدي وبالايد الثانية انطاني علاكة هدية، ماكدرت ابقي واكف هنا هواي عبن اخوتي على غفلة يجون وخاف يسمعوه حجاية تغث فـ بساع طببته للاستقبال وقفلت الباب ورانه..

-علي السور: يا علي شو انقفلت الباب

ضحكت بدلع وكعدت بالقنفة الگباله وكلت بهدوء..

-امي كالت خاطر سامر ما يجي

-اممم.. تعاي كعدي يمي شني مشمورة هناك

-لا خليني مرتاحة

-تجين لو انا اجيچ؟

-اففف جاية جاية

ضحك ومدلي ايده، حطيت ايدي بين ايده بس كللش مستحية ماتوقعت لهاي الدرجة راح اخجل منه واستحي عبن من گبل اعرفه شخصيته فكاهية وما عنده رسميات بس تفاجأت من انخطبنا وتعرفت عليه اكثر شخصيته كللش حلوة وتنحب..

-علي السور: ماكو هيج گزازه تره

-هاا هاا بدينا

-ابدي ونص چا ترديني اشوفن هالچكليت وما ابوسه

باسني من خدي وشمني حييل، اقشعر جسمي وبساع وخرت منه من نزل يريدني يبوسني برگبتي..

-هم شردت

-لا سور ماتحمل

-شني ما تتحملين

-مادري بس.. بس مادري

-ههههه تموعين

-اسكت عاد

ضحكت وضربت چتفه على كيفي وكض چف ايدي يرجعه يخلي على چتفه، ابتسمت وعيوني نصيتهم مستحية من كمية الحب والاعجاب التارسة ملامحه..

-رفعي عيونج رهفتي

-علي السور

-عيونه

همسها وباس چف ايدي وجرني من خصري يلزگني بي غصب، ضحكت على كيفي واستقريت حده بدون لا اوخر وگلبت شعري كله على جهته، جاي احس بأنفاسه تضرب خدودي واصابعه تخلل بين خصلات شعري..

-علي السور: مثل خيوط الليل لمن يزاعله الگمر

-شعري؟

-ومثل ذنوب العاشگ الما راضي يتوب

-الله

-شدعوة هالكثر حلوة

-تحبني سور

-هذا هم سؤال ينسأل؟

-جاوبني

-شو مادري شمالني استحي اجاوب

-هههههههه شلون بيك انتَ

ضحك على ضحكتي وعدل گعدته يسند ظهره على التخم، دور عيونه بالاستقبال مالتنا وگال..

-شنو اسم الصبغ مالتكم؟

-شمدريني

-والكلوبات منين اشتريتوهم؟

-ماعرف والله

-والثريات؟

-ياا شجاك

-والقنفات؟

-يبووو كل هالاسئلة بس حتى ما تجاوب سؤالي

-لا لا اجاوب چا ليش

-اي؟

-احبچ اي اذا ما احبچ شكو خطبتج

-شكثر تحبني

-بكد حبي لفراقد

ما استحملنا وثنينا ضحكنا بكل صوتنا بس گطعناها بساع من اندگت باب الاستقبال..

-علي السور: بس لا رجع ابوج

-لا هاي امي دگتها خاطر تنبهنا صوتنا عالي

-وانتِ شني قريتي عقلها

-لا بس امي واعرف سوالفها

-يجوز

-اي هسة تحبني يعني؟

-اموت عليج

-يعني اذا طلبت منك شي تسوي؟

-عيوني الج

-والله؟

-اذا مكدور عليه ما ابخل عليج

-شو گبل شوي عيوني الج وهسة غيرت چلامك ليش

-مو حسب الطلب يا گلبي اكو ماكدرله وماريد يخيب ظنچ بيه

-تگدر لطلبي سور

-چا امريني

غمضت عيوني مقهورة ومكسور گلبي بس ما باليد حيلة، اخذت نفس عميق وهمست بخوف گووة كدرت اطلع الچلمة..

-اريدك تحجي ويه عمي علي خاطر يتنازل ويطلع اخوي سالم من السجن

-شنو

-سور هو اخوي وانا ماكدر اتزوج وافرح بدونه

-واذا ما طلعناه ما تتزوجين؟

-علي السور افهمني

-افهمج من تفهميني ليش تردين اخوج يطلع وانتِ بعمرج ما شايفة خيره

-يبقى اخوي

-لا تقنعيني

-يعني ما راح تحاچي ابوك

-جاوبيني واجاوبچ

-سور ليش صعب انتَ

-انا صعب؟؟ انا؟ رهف احجيلي بالخط العريض شني السالفة

-ابوي السالفة سور! ابوي رضى على زواجنا بشرط اقنعك تحاچي ابوك وتتنازلون على ثاركم ويه اخوتي

-شو صاروا "اخوتي"!

-تتنازلون عن سجن سالم و.. واحم.. و

-وشنو؟؟

-وتنسون ثاركم ويه سيف وترضون يرجع من السفر

-من كل عقلچ!!

-والله هذا ابوي مو انا صدگني

-يعني اذا ما سوينا اليريده يجبرنا نفسخ الخطوبة!!

-حباب افهمني

-ماريد افهم!! ماريد افهم وماكدر افهم رهف! انا مو الامـير علي وچلمتي التمشي ولا علي الدر وبدر خاطر ابوي ياخذ بحچيي ولا تقي وعلي الحق وعقلي يوزن بلد ولا كرار وابا الحسن واكل ابوي واشربه بلساني انا علي السور! علي السور وبس!

-لا تحجي على نفسك سور

-ما احجي بس هذا الواقع رهف! انتِ ذبيتي روحج على الزلمة الغلطط لو تردين زلمة تتزوجي على مصلحة خاطر يطلع اخوتج فـ انا مافيدج بشي!

-صدگني مو انا الاريد ابوي والعباس ابووي ليش مو راضي تقتنع

-ابوچ استغلالي يجازف بحياة بناته لخاطر مصلحته وانتن مطاوعاته!

-يعني شنو بيدي؟؟ جاوبني شنو بيدي شسوي؟ لا انا الاكدر اكسر چلامه وابقى عايشة وياه ولا انا الگادرة انهزم من وحشيته واتزوج بعيد عنه!

-مال اخوتچ يطلعون فـ هاي گطنة وشيليها من اذانچ رهف انا لو اطر روحي نصين ابوي ما يقتنع لا تعلگين امالچ بيه

-يعني ما تريدنا نتزوج!

-اتزوجچ بدون شروط تهز كرامتنا وكرامة ابوي ونسوان بيتي

-سور لا تفهمني غلط انا اريدك بس ابـ...

-ابوچ! افتهمت ابوچ من طرگاعة اللفته وخلصتنه منه

-وين رايح سوورر

-هديني خليني اولي

سمعت صوت غفار جاي من الصالة وخفت اتناقش ويه سور زايد ويتكامشون سوه هنا، خليته يروح زعلان وبدون عشا وانا رجعت للاستقبال قفلت على روحي وطگيت من البچي.. متت قهر من امي گالتلي امس شرط ابوي شنو والله لو اعرف شرطه هذا گبل لا انخطب لـ علي السور واتعرف عليه فلا ارضى بهالزواج بس همه لعبوها صح! خلوني انخطب خاطر اتعلق بي واتورط هالورطة!

**

"عـــبق"

شگد چنت متحمسة وفرحانة لليوم بس كل مزاجي انگلب بسبب البارحة بالليل، تفاجأت من عرفت بـ علي الحـق رايح لسلوى بالسجن ومحاچيها والحقيرة بعدها مُصرة وتكول ممتندمة على كلشي سويته وكل واحد بيكم يستاهل العاشه..

حرگت گلبي يكول حق وضعها بالضيم وكبرانة فوگ عمرها عشر سنين وبعدها صلفة، سألته ليش رحت وشحصلت من شفتها وجاوبني ما رحت لسواد عيونها ردتها تعترف ويامن چانت تتعاون ويساعدها غير ولد مسعود وعماته حتى نلگفهم ونطيح حظهم بس مجاوبته وظلت بس تضحك مثل المخابيل وتگله..

"مرتك وامها لعبوا بيهن طوبة بالشماعية"

شطت ومعدتي گامت تفوور من القهر خصوصاً من كملتها عليه وكالت الرسالة الي على اساس اني كتبتها بخط ايدي بيوم الي انحطفت بي فعلاً اني كاتبتها ومدا تقبل تعترف منو كتبها نيابة عني بس حق يكول مو صعبة تكدر توديها لأي خطاط وتاخذ دفتر من دفاتري وينسخ خطي نسخ بدون لا يبين اكو اختلاف..

تنرفزز هالمرة تنرفز! حسب كلام علي الحـق يكول ما تأثرت ولا انقهرت بأي شي سوته بس شاف عيونها شلون دمعت من گللها الثلاثاء الي هو اليوم يكون تخرج حبيبة من الجامعة، يكول بلعت غصتها ونزلت عيونها وكالت "الله يوفقها وين متكون وماكو يوم نستها من دعائها"..

نفضت عقلي من اخبار البارحة التعيسة ونويت ارجع انعش نفسي باليوم، اليوم تخرج حبيبتنا وبهجة البيت والكل الكل الكل بدون استثناء فرحان وطاير من السعادة علمودها وعمو علي كال يروح هو وخالة رسمية لجامعتها حتى تشوفهم وهي تشمر قبعة التخرج واخوانها كلهم گالو نروح احنه هم..

فرحت من علي الحـق كال اروح وياه علمود مناك ونطلع للدكتور نتطمن على الطفل، لفيت شالي عدل وشلت البلشر دا اريد احط وتذكرت الهوسة السواها الي حق قبل كم يوم سوالي عرس وطلع الطلعة كلها من عيني..

-علي الحـق: اللهم صل على محمد وال محمد قبق جاهزة گبلي؟؟

-عبق: اي عيني شعبالك لعد

-صلي على محمد

-اللهم صل على محمد وال محمد

-بعد مرة

-هههه شبيك اللهم صل على محمد وآل محمد

-اللهم صل على محمد وآل محمد بطنچ كبرانة شوي

-اوووي فدوة امي هم تكول بس شو اني مدا اشوف فرق

-لا اكو اكو

ابتسمت فرحانة ومسحت عليها بچف ايدي، كملت تبديل وشلت جنطتي دا اللبسها ونزيت من حسيت بعلي الحـق يشيلني ويبوسني من خدي حييل ويكول..

-بطة وشايلة بطة

-وراح تترس بيتنا كتاكيت

گلتها واني مبتسمة، من حملت لليوم لازم يغنيلي "بطة وشايلة بطة وراح تترس بيتنا كتاكيت" مادري هو اخترعها لو هي موجودة من زمان..

-والله زين حفظتيها

-چا شلون

-اروح فدوة للچا انا ام بطتيي

-اكلك علي انتَ ليش مُصر اني حامل ببنية؟

-عبن گلبي حاس

-واذا جان ولد

-ان شاء الله بت

-واذا ولد؟

-خاطر اذبه بالزبل

-علي شساااالفة

-لا والله اتشاقه بالعكس كلشي يجي من الله يا محلاه

نزلني من ايده ومشط شعره وطلعنا بعدما تطمنت على امي وشفتها نايمة، طلعنا بوجهنا للجامعة مال حبيبة وضحكت ممصدگة من شفت الكل هنا.. كل الولد وزوجاتهم وحتى تَـمني وتالة موجودات بس واكفات ويه سبأ وعلي التقي مو ويه الامير..

-عبق: الله همزين من الكل اجه شكد حلووو

-تَـمني: ماتوقع اكو احد يريد يفوت تخرج حبيبة

هزيت راسي مبتسمة ودرت وجهي اباوعلها من بعيد كلش واكفة على المدرج بين زملائها، لابسة روب التخرج ولازمة بيدها قبعتها وواكفة تنتظر المصور وهو يوجههم على وضعيات للصور..

-علي التـقي: ما اظنها شافتنا ما دارت وجهها لجهتنا

مشى بأتجاهها هو وسور ونور ويأشرولها بيدهم حتى تلتفت وماكو، خبصوا ارواحهم يهوسون ويطفرون وهي بغير عالم..

-علي الحـق: والله شريفة اخيتي ما دارت حتى وجهها

-عبق: شيخة الشيخات بعد

اخيراً ومن بعد عناء طويل وعلي النور ظل يصيح "هاا شيخ ولك شييخ عاين هنا" ياله حبيبة اللتفت لأتجاهنا وفوراً فتحت عيونها مصدومة ما متوقعتنا نجي..

نوّر وجهها بضحكة تجنن وضمته بين ايدها فرحانة، اللتفتت على صديقاتها وصارت تأشر علينا واقرا شفايفها دتگوللهن "اهلي"، "ذولة اهلي" ، "اجوا اهلي"..

-علي الحـق: بعد روحي روحج

همسها علي الحـق بينه وبين نفسه وهو يتأمل اخته من بعيد وسوالها بيده "هلو"، ظليت ادور بوجوه اخوانها وابوها وامها اشوفهم كلهم يضحكون فرحانين بيها وهي طايرة من السعادة بشوفتهم.. حاطة ايدها على گلبها وتحجي ويه صديقاتها كأنها تريد تصيح بعلو صوتها كدام الكل ذولة اهلي واجوني.. يا جمالج يا حبيبة ويا جمال گلبج اليوسع للكل..

شفت صديقتها حور واكفة من الجهة الثانية وبصفها اخوها حاكم هم واكف يباوعون للخريجين وثنينهم مبتسمين ويراقبوهم شوكت يتم رمي القبعات..

-تَـمني: شلون اجواء حلوة

-ليلة: وعيون ذاك الواحد احلى

-تَـمني: منو؟

-ليلة: امير يعني منو!

-تَـمني: شبي ما فهمت

ضحكت من ليلة غمت گصتها حيل تلطم وتَـمني بعدها ما مفتهمة شكو، عبالي بس اني انتبهت لعيون الامير وهي تركض وره تَـمني ويراقبها من بعيد بدون لا يتقرب.. يباوعلها بنظرات فضولية واحس احس احس ذني نظرات اعجاب هم لان اصلاً تَـمني طالعة تخبل اليوم بفستانها الماروني وشالها الاوف وايت..

-عبق: امير يباوعلج تَـمني

-تَـمني: كذابة!

-عبق: والله كل ساع يدورج بعيونه ويتلفت عليج

-سبأ: وبهالمناسبة الحلوة تَـمني وتالة تجون لبيت عمي على الغده اليوم مو؟

-تالة: عدكم عزيمة؟

-عبق: اي طبعاً عزيمة تخرج حبيبة عمو علي مسوي وعازم الكل بدون استثناء

-تَـمني: اي گلتلي خالة رسمية وعزمتنا بس احنه منروح

-تالة: ليييش تَـمني

-تَـمني: عدنا امتحانات تالة منلحك

-عبق: هسة شكد راح تطولون قابل يلا يمعودات سهلوها وتعالو

-تَـمني: لا والله عذرونا ان شاء الله على الجايات

هزيت راسي ساكتة وما لحيت زايد لان عرفت ليش متريد تجي كله حتى متتواجه ويه الامـير علي ويتأذون ثنينهم لان نظراته هسة ممفهومة شنو بالضبط وحقها من متريد تحازف بمشاعرها..

اللتهينا بتخرج حبيبة وشهدنا نجاحها لاخر دقيقة، شفناها وهي تشمر قبعتها بحماس وفرح وشفناها من نزلت للمدرج وحضنت ابوها واخوتها واحد واحد ودموعها شلال ينزلن من عيونها..

-شيخ علي: ليش تبجين بوية ياهو وياهة شيختي

-حبيبة: محد وياي يا روح شيختك، الله لا يحرمني منك يا هيبتي ولا منكم يا رفعة راسي

-علي الدر: بنيتنا واخيتنا وتاج راسنا انتِ

ابتسمت ومسحت دموعها الليلو ووكفت حتى تاخذ صورة وياهم كلهم، ما شاء الله اللهم صل على محمد وال محمد وكفوا كلهم عشرتهم صف واحد وحيدر على الكرسي وحبيبة وخالة رسمية حطوهن بنصهم واخذوا صور بعدسة وايد كال المصور حتى الكل يبين..

الانظار كلها عليهم واشوف منو يتعده منهم يأشرون عليهم ويبتسمون على منظرهم شكد حلو ويأسر العين، كملوا تصويرهم ووگف عمو علي يسولف ويه حبيبة على فدشي بصوت ناصي تخيلته ديحچيلها هو شكد فرحان وفخور بيها لانها جانت مبتسمة ولازمة ايده ورفعتها تبوسها بس بعدين كامت تبجي مهضومة واضح جاب طاري سلوى..

-تالة: يا روحي الله عوضها بأب حنون يسوه الف سلوى

-عبق: اي والله ماكو مثله عمو علي

نقلنا ونستنا وفرحنا للبيت وسوينالها عرس.. والله عرس هوسات وهلاهل وابا الحسن شايلها على چتافه ويهوس بيها وعلي السور لابس قبعتها ويدبچ وعمو علي قرالها هوسة تجنن، رفع بشته وايده وگال بصوت مسموع للكل..

-شيخ علي: هلا بالزين والغالي.. هلا ببهجة عيالي..

-الولد كلهم: اييييييه

-هلا ببت گلبي واخت رجالي..

-الولد كلهم: ايييييه

-بنجاحچ يا بوية اللتمينا.. بنجاحچ يا بوية اللتمينا..

وكلهم يرددون وياه ويدبچون بالكاع دبچة خفيفة وحبيبة بس تمسح بدموعها وتضحك، الاجواء تخبل صار هوااي بيتنا يفتقد هالفرحة واللمة والاحلى هو من علي الحـق راح جاب امي وانضمت النا وكعدنا كلنا نتغده سوه من ذبيحة تخرج حبيبة..

للعصر الولد طلعوا كلمن لشغله واني رحت للدكتورة، طمنتني على الطفل وكالت كلشي تمام بس جنس الطفل ماعرفته شنو ما مبين.. رجعنا لبيت عمو علي بعدما رجعت من الطبيبة واللتمينا على عشا هالمرة..

-حبيبة: والله مكان تَـمني وتالة خالي

-سبأ: ما رضوا يجون

-حبيبة: انطيني موبايلي رفل نتصل عليهن

دگت عليهن وفتحت سبيكر وصارن عبالك كاعدات ويانه، كعدنا كلنا البنات الشابات بغرفة حبيبة وتَـمني وتالة ويانة على اتصال وجانت كعدة من العمر كلها ضحك وفرفشة ووناسة..

تمنيت ابات يمهم اليوم بس گلبي ما هلي اعوف علي الحـق وحده خطية چنه يتيم واكفلي بباب الغرفة وبتوسل بعيونه حتى نرجع للبيت.. ضحكت على شكله واستسلمت وكمت وياه نرجع سوه حتى اتحضر لدوام باجر..

**

"حـــبيبة"

لو اشكر الله على نعمة وجود اهلي منا لباجر اكون مقصرة، انا ماعندي بس اهل انا عندي عزوة وسند وعكاز لايامي الصعبة.. شكد انهضمت اليوم على وحشة امي بس نويت اعوض مچانها بگلبي وبالبيت بأمي رسمية واخوتي والناس اليحبوني من صدگ..

تأخر الوكت ياله تفرقنا هذا الرجع لبيته وهذاك الراح لغرفته وذيج الرجعت لزلمتها وبقيت انا وحدي بغرفتي، تنهدت مبتسمة وتعبانة بنفس الوقت اريد بس انام بس ماكدر بدون لا ارتب الغرفة واللملم البيت ما دام الكل راح حتى باجر يخف الشغل علينا..

گمت اشيل بگلاصات العصير واحطهم بالصينية ولميت كواغد النساتل حطيتهم بچيس وبأثناء ما انا مشغولة اعزل بغرفتي اندگت الباب عليّ..

-تفضل

انفتح الباب على كيفه كلش وابتسمت من شفت وجه ابوي البشوش يضحكلي ويكول..

-شيخ علي: بس لا نايمة بنيتي

-حتى لو نايمة اكعدلك

ضحك خفيف وطب للغرفة، طبگ الباب وراه وتمشى وگف يم الميز مالتي وصار يوزع عيونه مستغرب وهو يشوف الهوسة مال الغرفة..

-حبيبة: لا تنصدم البنيات چانن يمي فوگ

-هاا مو اگول كل هذا اكلته حبيبة

-ههههه لا عاد بوية اشايفني

-غصن بان اشوفنچ يا بعد الكل

-تعال بابا لا تظل واكف تفضل هنا

-اي والله رجليناتي توجعني

-سلامتك افركهم الك؟

-لا بوية لا تعبين رويحتج

-افاا وانا بنيتك لا تكول هيج تمدد على فراشي تمدد حبيبي

ابتسم وسوه مثلما كلت بس ما تمدد بكل جسمه بس كعد ومد رجله على الجرباية وانا كعدت بصفه ادوسله بأيدي وامرغ اصابع رجله..

-شيخ علي: اااخ الله يرزقج الجنة يا بنيتي

-بوجودك ان شاء الله

-صعبة الجنة على امثالنا بوية

-لا تكول هيج شيخ علي، والعباس انتَ احسن رجال شافته عيوني

-الجنة تحب الفقراء، تحب الناس البسيطة مو الناس التحكم على حياة البشر وتفصل الوادم فصولة تكسر الظهر

-بس انتَ ما تظلم احد والكل يشهدلك

-حتى لو ما نكدر نحكم، محد يعرف المضموم والحكم الصح غير رب العالمين

-حتى لو ما رحت للجنة بوية انا اشفعلك

گلتها بثقة تضحك وغمزت اداهره، ضحك وگرص خدي بين اصابعه وكال..

-مو خاف تشفعين لزلمتج وجهالچ وتنسين ابوج

-شني بوية كل عقلك ابيعك لخاطر زلمة وجهال؟ يرحون فدوة لنعالك والله

-نشوف عود

-بوية اصلاً وينه الزلمة ووينهم الجهال انا باقية يمك هنا ما اروح لمچان

-لا ما ارضى بهالشي انا هم يعجبني اشوفن وليداتج وبنياتج كدام عيني ويترسون بيتي بوكاحتهم

-الله كريم بوية

-اكيد الله كريم بس الله هم يريدج تتقبلين الفكرة خاطر تخوضيها

-ان شاء الله خير

-واذا كتلج جايچ خاطب حبيبة

-لا بوية لا فدوة ابدد ما متحضرة

-يا بوية اسمعي مني وشوفي خاطر ما تتندمين

-مو..

-سمعي وانطيني جوابچ

-تفضل بوية

-الخاطبچ خوش زلمة ومشهودتله شهامته ومروته، ما شاء الله دكتور ومتعين صح ماعنده بيت بعده بس جاي يشتغل على روحه وان شاء الله يصير عنده

-اذا انوي اتزوج فـ من شروطي بوية يكون عنده بيت، ماريد اعيد نفس المشاكل العشتها ويه خوات منتصر

-حگج بهاي

-اي فـ يعني ما موافقة انا

-خوب نشرط عليه بيت

-واذا ما رضى؟

-لا انا اگلج دكتور حاكم راح يرضى

-دكتور حاكم!!!!

-اي

-دكتور حاكم صديق الامير؟؟

-اي شبيچ بوية انخبصتي

-بابا حاكم خاطب!

-شني؟؟

-خاطب الزلمة خاطب وراح يتزوج!

-معقولة؟ بس هو ما گال خاطب

-والله اخته گالتلي خاطب وراح يتزوج بس يجوز هسة فصخ مادري والله

-حتى لو فاصخ چا غير يكول لو هي هيتة

-مو يجوز ما حچى عبني مطلگة

-واذا مطلگة؟ هالشي يمنعه يصارحنا من البداية ويكول جنت خاطب وفصخت؟

-مادري بعد

-لا خلص عوفي يولي

-براحتك

سكتنا ثنينا واحتل الصمت الغرفة، انصدمت بالبداية من گال حاكم الخاطبني وحتى جرأة ما صارت عندي واسئلة شوكت طلبني فـ غلست على الموضوع بكبره ما دامه راح يرفض..

ثاني يوم انتظرته يحاچيني ويگلي رفضه بس ما سواها، اليوم الوراه هم انتظرت وهم ما حچى واليوم الوراه هم نفس الشي..

وره چم يوم صارت گعدة بين ابوي ومسعود وكل الولد حضروها، محد رضى يسولفلنا شنو الموضوع الا من رجعوا وانصدمنا من عرفنا صار بيناتهم اتفاق خاطر تكمل خطبة علي السور ورهف!

ابوها شارط الا ابوي يتنازل عن سالم وتنسد سالفة سيف ويرجعونه للعراق وابوي بثنينهن ما رضى بس من بعد حديث طوييل دار بيناتهم ابوي گاله يتنازل عن واحد منهم وشرط ابوي يختار منو منهم ووگع الاختيار على سيف.. گاللهم يرجع بس بشرط بعيد عن محافظتنا ومسعود قبل بهالشي..

امي بالبداية عصبت كلش بس كالت يجوز راد يرجعه خاطر اذا يموت لانه مريض سرطان فـ يندفن بالعراق يمهم، يبقى ابنهم ومحترگة گلوبهم عليه وابوي وافقها الرأي وكال هذا السبب هو رضى يرجع..

علي السور متفاجئ وما مصدك ابوي سمعله وسوه گعدة كاملة لخاطره وطبعاً چانت بوجود شيوخ من عشاير ثانية شهود، گضى اليوم كله يتصفن ويحس روحه بحلم معقولة ابوي اخذه على محمل الجد وسوه هيج شي جبير علموده!

-حبيبة: چا مو ابنه شبيك انتَ

-علي السور: ولج ما مصدك وعلي بعدني منثول

-علي النور: اي وعلي حتى ابو شادي الزبنطوطي ما مصدك

-علي السور: عاين شلون ابوي يحترمني هاي عبن خطبت انتَ هم اخطب خاطر تصير زلمة

-علي النور: ما اخطب ماريد

-علي السور: ليش ولك مو كافي صياعة

-علي النور: عود اخطب من يحن علينا اخوها

-علي السور:هاا عود عاشگ؟ هسة هم يطلع زلمة ولاعب عليك

-علي النور: انچبببب

-علي السور: عايني بعده مقهور على القط القطيته بي

-علي النور: كل هاي سوالفك اطلعهن كدام رهف اخليها تزوع بوجهك

-علي السور: ولك لاااا وينك تعاااال

ضحكت على خبالهم وعفتهم ورجعت للمطبخ اكمل العشا ويه البنات، مشى چم يوم من حياتنا ماكو شي جديد، ليلة شايلة فرخها وتفتر بي وتلعبه وسبأ كاضة معدتها وتلعب نفسها من كلشي وحامها كللش زاد من عبرت شهر الرابع لليوم وعبق تجينا كل چم يوم وشمس وابرار كلمن حايرة بحياتها..

نزلت من فوگ وبيدي اموري العنون وبالايد الثانية فطومة بت علي الدر چنت اللاعبهم واغير جو وياهم ملل وماكو شي اسوي..

-رسمية: وينج حبيبة تعاي، الشعبانية بعدلها چم يوم وابو علي يريدنا نسوي مولد بس محتارة شوكت نسوي وحويدر يريد يسافر؟

-حبيبة: يمة سويها عگب باجر واليوم وباجر نحضر خاطر نلحك

-هاا؟

-والله

-شمس: عمة المن تردين تعزمين

-رسمية: هو كلهن حبايبنا

-ابرار: حتى الزلم؟

-رسمية: لا الزلم شكو عود ابو علي يسوي بغير يوم

اتفقنا على يوم الحفلة وبدينا بالتجهيزات، اول يوم جان مخصص النا احنه طلعنا نشتري بي النحتاجه من ملابس وسوالف ثانية واليوم الوراه جان للبيت، وكعنا بي دك جلف وغسل هلكنا بي..

-ابرار: تَـمني وتالة راح يجون مو؟

-حبيبة: اي يجن گالن

كملنا كلشي ركض ركض ولحد ثاني يوم احنه ملتهيات بتجهيز البيت والاكل تعبناا تعب حتى الحفلة ما حسينا بيها من بدت الناس تجي، طبن هواي نسوان ماعرفهن بس ما تدخلت اكيد من جماعة امي رسمية اذا هي ياهي تشوفها تصاحبها وتطببها بيتها، ركضنا البنات كلمن لغرفتها تتجهز وتبدل ونزلنا نگابل الناس..

رغم التعب والهوسة مال اليومين الفاتوا بس الحفلة چانت كللش حلوة، ذكر اهل البيت والمواليد القرتهن الملا والحماس الي بصوتها يخبل حييّت المكان وخلت الكل يتونس ويعيش الاجواء..

-حبيبة: بنات گومن نتساعد ونوزع الضيافة

-تَـمني: اجي وياچ اني

اجت وياي والباقيات اللتهن كلمن بشي، وزعنا الضيافة ووراهة العشا وشوي شوي بدت النسوان تخف وتطلع لبيوتها فـ قررت نكعد انا والبنات بالمطبخ نجر نفس وناكللنا لگمة لان من الصبح ما ماكلين شي..

-حبيبة: رهف وين اختج؟

-رهف: فوك كالت تريد تغير نفنوفها جاي يحز ببطنها

هزيت راسي وعفت الباقيات كاعدات بالمطبخ ورحت للصالة، شفتها مكلوبة كلاب الفراش الچانن كاعدات عليه النسوان بعده بالكاع وينرادله تعزيل وكنس بس ماهتميت خليني اكل والله كريم وراهة..

-تَـمني: يلا حبيبة وينج

-حبيبة: يلا اجيـ...

گطعت حچايتي فازة ويه صوت الردمة القووووية الطاحت من فوگ ليجوه! اللتفتت اشوف شنو هذا وشهگت من غمج روحي من شفتها سبأ!! سبأ طاحت من فوگ محجر الدرج ليجوه ومباشررة لنص الصالة!!

-رهف: يممممة اختيييي!!!

صاحت رهف بكل صوتي وركضت عليها تشوفها اما انا.. فـ انا ماحجي على حالي رجلي جمدت بمچانها ماكدر احركها وبس اباوع بعيوني شلون مرة اخوي طايحة لا حس ولا نفس يطلع منها واختها تدگ وتلطم على راسها وتصيح..

-رهف: يممة اختييي ما جاي تتحرك اختييي ولج يممااااا.......

يتبع 👑....

━━━━━━ ♛ ━━━━━━

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

انا العايش على عيونك.. انا المايدري وين يروح من دونك ♥️!

━━━━━━ ♛ ━━━━━━

-انتِ تخبلتي رفل تخبلتييي!!

-رفل: لا تخبلت ولا شي انتِ المخبلة الكاتلة روحج على ارمل وعنده بنات ثنين

-حبيبة: عمي ماريد مااريده بعد بهالطريقة ماريده!

-ليلة: بس فهميني شلون اقتنع؟ منتصر دكتور يعني دارس وفاهم ومثقف مو زعطوط تجيبه وتودي حچاية

-رفل: بعدني ما قنعته بس گال راح يفكر بالموضوع

-حبيبة: صخااام ولطاام بوجهج يا حبيبة راح تعادين اخوتج ويه ابن عمهم ياا حبيبةةة

-رفل: لا يتعادون ولا شي ومنتصر مو اكيد يسويها هو صح انا گتله النهوة شي وقتي ويگدر يفكها وره يومين من الخطبة وتنتهي هالسالفة وما يتأثر ولا انتِ تتأثرين بشي حالچ حال الااف البنات النهوا عليهن ولد عمهن من اجه غريب يخطبهن

-حبيبة: احنه مو هيج رفل!! ابوي ما يرضى لا بالنهوة ولا الفصلية لان ثنينهن حرااام وتقلل من قيمة البت واهلها!

-ليلة: چا مو ابا الحسن نهى عليَّ

-حبيبة: ليلة ابا الحسن نهى عليج منا فكها مناك ما طول ساعة لان يدري بأبوي ما يرضى وراح يجيبله وجع راس اله اول ماله تالي وبالاخير ينجبر يفكها

-ليلة: هم صح

-رفل: حبيبة انتِ ليش ضايجة؟ خلي هسة راح تبين اذا هو هاويچ لو ما مهتملچ خليج مرتاحة وحطي ايدج ورجلچ بماي باردة

تحچي ببرود ولا خايفة ولا چن راح تصير طرگاعة لو نهى عليّ منتصر اووف منج يا رفل شگد گوية عين.. عفتها ورحت اگعد وحدي اتصفن وافكر شني تاليتها؟ منتصر صدگ ينهي عليَّ ويعادي ابوي واخوتي لو ما يجازف بعلاقته بيهم؟

تعبت من الفكرة وجسمي كله صار يرجف، جريت بطل ماي اشرب ونصه تبده عليَّ من الرعشة، سديته وحطيته على جهة والافكار تروح وتجي بعقلي.. گوة كاضة روحي ماروح اسولف وياه واگله ما عليك من رفل هاي ما تعرف عواقب فعلته شني بس من اتخيل يجوز بسبب عملته نهايتي اصير مرته وببيته ابرد واسكت..

نفضت عقلي بلكي انسى وطلعت موبايلي اگلب بالاشعارات مال صديقاتي، امي ما خلتني اكول لاحد اجيت للشمال تخاف من العين بس حور گلتلها وفتحت رسايلها..

"حور: ها الگاطعة شو ماكو"

"ملتهية والله.. شلونچ خية"

"ضايجة بدونج"

"يله كله يومين ونرجع ان شاء الله.. بشريني بس لا العصبي هم تعارك وياچ من رجعتوا للبيت؟"

"ههههههههههههههه"

"شو تضحكين"

"ما تعارك هههههههه بالعكس"

"چا شسوه؟"

"گالي حور هاي حبيبة شگد وكحة عبالك امير ودا اسولف وياه الفرق بس هاي بنية وصوتها ناعم وجميلة كلش"

فكيت حلگي اتخيل الجملة بصوته خرب عرضج حور ولا عدها بريك وكلشي تسولف ما تهتم..

"اخوچ السلنگح ما يستحي شون يعاين على اخت صاحبه"

كتبتها مبتسمة شافتها وما جاوبت حسيت چفصت وخاف تضوج عبن گلت عليه سلنكح بس صدمتني من كتبت..

"ههههههههه يگول لعد اغمض عيوني"

"ولج كلتيله؟؟؟؟"

"كاعد بصفي والله هو شافها اني معليه"

"خايبة شبيچ لا تخلين اخوج يقرا محادثتنا"

ما جاوبتني كتابة دزتلي بصمة فتحتها وضحكت من سمعتها..

"حبيبة اني شعليه هذا حاكم فضولي ومو اگوله لا تباوع بتلفوني يگول اخاف عليج من صديقات السوء"

"وانا صديقة سوء؟"

رجعت جاوبتني بصمة بس هاي شوي طولت بيها، فتحتها وشهگت من اجاني صوت حاكم يگول..

-صديقة سوء لانچ تعليمها تخبي على اخوها ليش ام بجامة المطي ليش هيجي؟ مو اني اعرف اخوج حباب وخوش رجال ويحبني انتِ شبيچ شايلة سيف عليَّ وتتعاركين كلما مريت من يمچ

-حور: حاكمم عوفها كافي

-دزي البصمة حور

-ما ادزها عيبب

-دزيها دزيها

-ماا ادز

-جيبي اني ادزها

وخلصت البصمة واندزت الي، كتبتلي حور وراهة بسرعة..

"اسفة ما سيطرت عليه مو هو عصبي"

ضحكت على سوالفها وضميت موبايلي بجيبي ورفعت عيوني على صوت رقية وسكينة بنات منتصر جاياتني يركضن وبيدهن تفاحات معضعضات، ابتسمتلهن وفتحت ايدي هالسفرة صايرات يحبني فديتهن..

-حبيبة حبيبة حبيبة

-ها يا روح حبيبة

-رقية: ابوي يگول.. يگول.. يگول اءء يگول.. نسيت

-حبيبة: هههههه يلا چا ختولي

-سكينة: لا لا ابوي يدول من نرجع للبيت سبحينا ميخالف؟

-حبيبة: من عيني هاي گبل هاي غير تدللن عليّ

-رقية: اي صاح هيچ گال.. لان عمة ماكو انتِ صيري بدالها عادي؟

-حبيبة: طبعاً عادي

-سكينة: بس شلون

-حبيبة: شنو شلون؟

تقربت مني وهمست بأذني وطبعاً ترستني تفال بس ما اهتميت للتفال بگدما اهتميت من كالت..

-سكينة: عمة هدية تدول حبيبة مو حبابة وما تحبتم (تحبكم) وانتم لا تحبوها ديربالتم (ديربالكم)

-حبيبة: هدية هيج تعلمچن؟؟

-سكينة: اي تدول عنچ مبتوته

-حبيبة: شنو مبتوتة؟؟

-رقية: يعني مبخوتة

فكيت حلگي مصدومة وهنه وحدة تباوع للثانية ويهزن بروسهن، شگد ردتهن يحجن بعد ويسولفن عماتهن شني يعبن براسهن بس قفلن ما قبلن يحچن شي اكثر وبقن يعضعضن بالتفاحة..

شگد ضجت وحزت بنفسي ليش يعبن براس جهال صغار وهسة عبنهن ما موجودات بساع حچن ونسن توصيات عماتهن.. ماعرف ليش بنات عمي مرتضى الوحيدات من بنات عمي ما يحبوني ودومهن يبسمرن بيه خصوصاً هدية وصفا يكرهني كره العمه واكثر من مرة سمعتهن بأذني يحاچن عماتي عن دلال اهلي الي ويگولن لا تنطوها عين زايد لا تكسر وجوهكم بعدين..

**

-رجلي ااه رجلي

-وين توجعج وين؟

-تَـمني: هنا شوف هنا اووي ورمت باوعلها

كف شوية من البنطرون ومغطيني بكل جسمه مع العلم احنه بختلة ضامتنا شجرات صغار ومصطبة، تلمس رجلي بأيد ومركز بكل حواسه يقارن بين رجلي اليمين واليسار..

-تَـمني: اكو ورم مو؟

-لا

-لا اكو!!

-ماكو نوومه الحمدلله يعني ان شاء الله مو شي خطر

-خطر واتوقعها كسر

-لاا خالوو كسر شني

-امير متوجعة

-يا بعده شبيدي عليج

عصرت عيوني اريدهن يدمعن بس يربي ماكو مدا تنزل الدموع بعد بردت، ماعرف شجاني وشلون اجه على بالي اكول رجلي انلوت بس من انتبهت عليَّ سلوى عيوني وره الامير ورفل وبدون لا احس الدموع تنزل ميتة من القهر اخترعت وسألتني شبيچ گدام الكل وما اجه ببالي غير جملة "رجلي انلوت" وطگيت من البچي وراهة مفرفح گلبي..

گام جاب بطل مي بارد كلش وحطه على رجلي يعني فوگ برودة الجو ورطت روحي برجل ملتوية ولازم اتحمل برودة مضاعفة عليها حتى ما افضح روحي!

-تَـمني: يووجع ماريد ماريد

-لازم تَـمني خاطر ما يصير تمزق

-لا ميصير نحطلها شي بارد مو زين امير وخرها

-لا عليج علي؟ هاي وانتِ اختصاص رياضة ما تگليلي شتسوين من ترحين للجامعة

-احط حمرة حمرا واصور

-خرب راسج وراس حمرتج

-عادي المهم صوري تطلع حلوة

ذب حسرة يدردم معترض على تفكيري وثواني ورفع راسه خازرني، هزيتله راسي بمعنى شبيك وفاجأني من گال..

-انتِ تطلعين من البيت بلا حمرا! ترحين هناك تحطيها؟؟؟

-هاا

-وجعاا

-لا تعصب حباب، اصبر وافتهمني امير

-امير لو صبر عليج بعد شوي يزين شاربه ويگعد يم امه!

-احس دتهينني بطريقة مبطنة فـ اذا زعلت لا تكول شبييچ

-واذا نتفت شاربي اليوم لا تكولين ليش ملطت روحك

-تملط روحك علمود حمرة حمرا؟ مع الاسف عليك شيخ المستقبل شلون تكعد بالديوان بشوارب محفوفة

عطت من لزم راسي يخضه ويودي منا ويجيبه منا وصار يضربني كلات خفيفة ويرص على اسنانه متحلف..

-وولج انتِ وووولج

-راسي راح ينگطممم

-ما ينگطم وارتاح منج

-الله وماكو بعد تَـمني بحياتك

-سكتي اشش

-لا تأشأشني

-سكتي ولج

-ليش تسكتني

-هسة غير تنلصممم

-عيب تلصمني

لزم شفايفي بين اصابعه يطبگهن وحدة على الثانية وخزرني عود سكتي، حركت چتافي بمعنى ميهمني ووخرت ايده من حلگي وسندت ظهري على المصطبة..

-بعد ما اخاف منك

-لا صدگ

-والله اصلاً متسويلي شي حتى من اضوجك

سكت يتنهد وسند ظهره يگعد بصفي، طبگ رجل ومد الثانية واخذنا الصمت محد بينا حچى شي لا هو ولا اني.. كل دقيقة تمر اگول هسة يگول شي بس ماكو مرت اكثر من عشر دقايق وهو على وضعه ما تحرك ولا فتح حلگه..

-احم

حمحمت اجذب انتباهه واشرتله على رجلي وگلت بتردد..

-رجلي توجعني

حرك راسه متفهم وگام من مكانه، رفعت راسي اشوف شديسوي ولزمت بيده بقوة من لاحظته راح يروح ويعوفني..

-وين رايح

-اجيبلچ شي اللف بي رجلچ

هديت ايده وراح مبتعد عني، اوووف تَـمني لازم تلگين حل تكسرين البرود المحاوطكم مو برودة الجو لاا برود مشاعركم بس شلون؟؟

گعدت اعصر بعقلي افكر شسوي وشنو ممكن يجذبه؟ كلام حلو؟ لا لا اني فاشلة كلش بهالشي وبس احط عيوني بعيونه اظل اچفص واخربط تخربط فـ نستبعد هالفكرة.. زين اسولفله شي يونس؟ مثلاً شلون زوج نرمين صديقتي اخذها سفرة للعمرة ومن راحوا هناك بلغته هي حامل؟ لا لا هسة يگول هاي تسمعني تريد تسافر وبس تريد تستغلني.. زين اگله...

-هاي جاروبة مال امي طولها سبعين مترة بلچن تفيد

لصمت افكاري ويه رجعته، نزل يگعد گبالي وبيده جاروبة سودة ثخينة وطويلة كلش متنعرف جاروبة لو كالون هاي.. اخذ رجلي بين ايده ولف الجاروبة عليها الله شعور يجنن ورجلي بدت تدفى..

اللتهى يلفها ويرتبها شلون الباندج وانتبهت لاصابع ايده صايرات زرگ من البرد ومن بطل المي البارد شگدما ظل لازمة وحاطة على رجلي، گلبي وجعني وكفختني مشاعر حنونة وماتحملت ما ابوسه على خده دليل الامتنان وهم بلكت نتصالح..

تقربت منه منصية اريد اسويها مفاجئة اله وبنفس اللحظة هو ديرفع راسه الي وانضرب راسه بخشمي شاااطت روحي من الوجع وعطت بصوت معزايات..

-خشمييييييييي

-خرررب ولج مادرري بالعبااس مادري شكووو حاطة وجهج يم راسيي

-ااااااه راح امووت دا انزززف داااا انزززززززف

-صووتج ولج صووتچ

-نزززززيف ددددم كل مكااااااان

-انفضحناا يالكاظم انفضحناا يااا عليييي

ما اعرف شديسوي وكلشي ماشوف ضربة خشمي اثرت على نظري وعيوني تزخ دموع وبس اشوف دم ينزل من خشمي، حسيت بي يحط شي على وجهي ويخنگني حيييل النفس گطعه تخبلت وظليت ارافس دفعته عني اعيط..

-راااااح اموووووووووت

-تَـمني بسس صوووتج

-خوية شصاير هنا ان شاء الله خير؟

فتحت عيوني ملصومة ويه صوت زلم ثنين اجه من ورايه يحاچون الامير، اشوف وجه امير انگلب ازررگ وگوة يجاوبهم شاد على اعصابه ويمسح على گصته عرگان..

-الرجال: هذا دم دينزل من وجهها؟ خوية محتاجة مساعدة؟

-الامـير علي: خالوو ماكو شي جاي اگلك خشمها طگ دم مابيها شي

-الرجال: اعذرني خوية شفت رجلها ملفوفة وملابسها ووجهها كله دم وسمعتها تحجي عراقي واخذتني الغيرة عليها

-معذور ورحم الله والديك

عافونا وراحوا وامير لو اطخه ينفجر عليَّ ويطيح حظي هنا فـ قررت ابلعها واسكت لا انفضح بالزايد.. طلع كلينس من جيبه وحطه بحضني اخذتهن ومسحت خشمي المدا يوگف نزيفه انخبصت وانترست دم ماعرف شسوي..

-رفعي راسج

خفت ارفعه سامعة هالشي مو زين فـ بقيت منصية وامسح بي، ماتحمل ينتظرني اكثر ولزمني من فچي ورفع راسي غصب وضغط على خشمي بالكلينسة ويستغفر طالعة روحه..

-شجاچ ما تگليلي شجاچ

همهمت متوجعة ومقهورة ليش مدا تضبط ويانه وتخرب بكل مرة؟ مو حالة هاي تره ومادري ليش عقلي راح لغير مكان وتذكرت يوم العقد مالتنا..

-امير

-نعم

-سحر المحبة دينگلب ضدنا

-ااخ يا تَـمني

-احنه بعدنا متزاعلين؟

نزل عيونه عليَّ ورفعت عيوني اله ابتسمت بين دموعي تحرگني وما بطلت تدمع، لزمت ايده الفوگ خدي وهمست بخفوت..

-خلينا نرجع اصدقاء

-خ** على الاصدقاء

-لعد نرجع اخوان

-تَـمني سكتي لا تجلطيني سكتي

-يااا لعد شتريدنا

-انا زلمة ما تمشي وياه اصدقاء ونعولة غير الحبايب ما اريد

سكتت وكالعادة مثل الغبرة لساني لو ينبلع لو يظل يچفص مثل الغبية..

-بردت

-وبردتتهمم

-امييييير

وخر مني جزعان ونزع جاكيته وحطها فوگاية، گعد بصفي منفس ورغم الاجواء يمنا متوترة بس ماعرف ليش ضحكت على وضعنا.. اني كاعدة ملوية رجلي بالچذب وخشمي يبس الدم عليه ولابسة قمصلة رجالية شكبرها وهو گاعد بطرگ البلوز ابو رگبة الجوزي وراح ينفجر من الضوجة..

-تَـمني: هههههههههههههههههه هههههههههههههه

-تضحك الفاهية

-ههههههههه امير انتَ ملاحظ شي

-ماريد اللاحظ أي شي

-اووووي امير هاي شبيك منفس

-فشيني بطريقتج

-اوكي

تقربت منه وبحركة سريعة بسته بخده ورجعت لمكاني اضيع عيوني عنه مستحية، عضيت شفتي اللعب بأظافري وافرك بيدي متوترة من ردة فعله ومنتظرته شنو راح يگول بس ما گال لان بنفس السرعة البست خده بيها لزمني من وجهي وباسني بنفس الطريقة وطول بيها لدرجة جسمي كزبر من شمني ونزل يوزع قبلات خفيفة على باقي وجهي..

-اشتعلت روحچ الحارمتني منچ

گلبي ينبض بجنون والنفس بده يضيع مني خفقان قوي تعبني وقربه الي اخذني لغير عالم.. لوما هو منتبه لمكاننا ويخاف لا احد يجي ويشوفنا ومبتعد چان اصلاً نسيت اني وين..

وخر مني يمسح على لحيته وشواربه وغمض عيونه يهز براسه محترگ، تحسر يزفر نفس قوي ودور على الڤيب بجيبه بس القديمة عند رفل فـ طلع وحدة جديدة من الباكيت وقبل لا يحطها بحلگه لگفتها من ايده واخذت منها نفس..

فتح عيونه مصدوم من حركتي واني مصدومة من نفسي بعدها ما مشتغلة ومابيها دخان ما اختنگت بس تصرفي چان متهور وما فكرت بي بس ظلت بنفسي اسوي هالحركة وسويتها اخيراً..

-ايا بت الـ... الحلو!

-بنفسي اجربها شيخي

ضحك وبعده فاتح عيونه متفاجئ، استحيت من نظراته واحترمت نفسي ورجعتها لحلگه جر منها نفس وهي بعدها بيدي، انتظرته يزفر الدخان بس بلعه وطلعه من خشمه..

-لك اوووف

فكيت عيوني مصدووومة من كلمتي وهو هم طگها بضحكة عالية كللش عزا العزااني على هالجرأة! لا لا اني ماكدر ابقى كاعدة هنا اكثر راح انفضح.. گمت من مكاني اركض بعيد عنه وهو يصيح عليَّ..

-ولج چاا ورجلچ!

-هاا هاا تذكرت آآآآيييي رجلي

-ايا ملعوونة

-رجلي امير اوووي ماكدر امشي ماكدر

-رجلها ام الكلاوات ما تكدر تمشي سوودة عباة امي

بقيت امثل دا اعرج وفلتت منه بالعة ضحكتي اختنگت، رجعت يمهم والكل انخبص بيه شلون صرتي وشلون صارت رجلچ والامير يباوعلي ومضيگ عيونه..

-تَـمني: اي متت وجع بس بعد قدر وصار الحمدلله

-حنين: شجاچ ماما الحمدلله والشكر من عدت على خير

-زهرة: عوينة خيتي اجتكم ووگعت بالفرخة سودة عليّ

-حنين: اي والله يجوز

-الامـير علي: من نرجع ذكريني ابخرچ امنية

-تَـمني: عن الحسد؟

عض على شفته ونصى عليَّ يسوي روحه يريد ياخذ بطل المي الي بصفي وگال بصوت ناصي..

-خاطر ما تنحسد صلافتچ

-اميرررررر

-خايبة انا همستها همس وانتِ فضحتينا

-ابتسام: ههههه شعدكم ولكم هاا تضمون علينا موو

-علي الكـرار: اگلچ يوم..

-رسمية: بالعبااس يا كرير لو كلت زوجيني هسة ادچك بهالسچين

-فراقد: اسم الله على الوليد رسمية شمالج

-رسمية: اي والله مادري شصابني اسم الله عليك يبعد امك تعال حبوبي بحضني

حضنته وبوسته وقرت على راسه وشالت السچينة وضربتها بالگاع ثلاث مرات وشمرتها بعيد، فروا بيدهم باقي الولد وعلي التقي گال..

-يمة لا تخافين على حبوبچ العار عرج ما يصيبه

-زهرة: اسم الله عليكم يمة لا تحچون هيج

ظلوا الولد يداهرون بعماتهم و گعد امير بصفي، مد رجله وعگد حاجبه يسوي روحه متوجع..

-اااخ اااخ رجلي ااخ

-تَـمني: لا تقلدني يا مقلد

ضحك خفيف وگال بغمزة..

-هاي بعد نحب نقلد الحلوين

-على طاري التقليد انتَ منتبه لملابسنا

نزل عيونه مستغرب باوع للبلوز مالته وباوع لملابسي، هو لابس بلوز رگبة عالية لونه جوزي واني هم وفوگاه لابس هو قمصلة جلد سودة واني لابسة جاكيت طويل اسود..

-يا مقلدة

-هاي بعد احب اقلد العيونهم چقل

ضحك يرجع راسه ليوره وضحكت على ضحكته اضم وجهي بقمصلته، ما انتبهت بالكل مركز ويانه الا من صوفروا سور ونور وحيدر الي حچى بيناتهم..

-حيدر: عمي امير مرتاح يم بعض الناس وبس يمي عاگد نونته

سكت امير عن الضحك يمسح على وجهه ويعدل حواجبه مغلس على نظرات الكل، رجع گال حيدر بأبتسامة لواگة..

-عمي چا ما تضحكنا وياك

-علي الدر: انتَ شني ولك شكو مدخل روحك بيناتهم

-حيدر: بوية مو روحي طگت انتَ سفرتني علاج وعمي امير اجه وياي وگضاهة بس معصب ويتعارك ويه الممرضات

-علي التـقي: يتعارك ويه الممرضات ليش؟

-حيدر: يردن يساعدني ابدل ملابسي وهو ما يرضى هسة يا عمي انتَ لا ترحم ولا تخلي رحمة الله تنزل علينا

-علي الكرار: لا امير لااااا ما حبيناها منك

-علي النور: ليييش تگطع سبيل المعروف اموري صدددگ چذب انتَ التعلمنا على المساعدة

-حيدر: اي بعلي وشون چانن مؤدبات عمت عليهن يشگن الراس شگ

-علي الكـرار: مؤدبات ويشگن الراس شگد ما يتناسبن بجملة وحدة حويدر

-حيدر: يتناسبن والله شني السالفة لو شتكولين يوم؟

-ابرار: بكيفك يمة

-حيدر: اي هذا هو يتناسبن

-علي النور: اشرحلنا عنهن اكثر حيدر يعني شني گالن شون يحچن

-علي السور: انا اسولفلكم.. طبعاً هنه شني شگر حمر والعيون زرگ والوجه چركاية والخد گيمر عرب والايد...

-علي التـقي: انتَ جاي توصفلنا لو تجوعنا؟

-علي السور: اي والله يا خوية هناك معمل كيك وكله يحچن وياك هلوو مستر وهلوو سير

-علي الحـق: اكيد چان قصدها سير نعال مو؟

-حيدر: بالضبط نعم صحيح

-ابرار: ههههههه

كلناا اللتفتنا على صوت ضحكة ابرار ولا ارادي انرسمت الابتسامة على وجوهنا، صار اياام مفتقدين صوتها وضحكتها ابرار موجودة بس مموجودة بس هسة فعلاً حسيناها ويانه ومنتبهة لابنها شديكول..

دمعت عيوني على علي الدر شلون يباوعلها وفرحاان ومكيف على ضحكتها صار يوزع ابتسامات للهوا والله تمنيت انبهه واراويها شلون سعيد لانها ضحكت وتبطل تشكك بحبه الها..

-علي النور: وعلى شرف ضحكة ابرار يگول ابو شادي الزبنطوطي الضحكة الحلوة ما تجي الا من حلگ ........ لا لا بطلت ما اكمل لا يكتلني علي الدر

-علي الدر: لا كمل

-لا ما اكمل

نزع حذائه علي الدر وگام متحلف..

-علي الدر: بعلي الا تكمل!

-علي النور: وعلي ما اكمل وقندرة فوگ ابو شادي الزبنطوطي الصايع

-علي الدر: اليوم قندرتي اگطعها علييك وعلى ابو شاددي البر****

فلت نور يركض وعلي الدر شال حذائه وشمره وراه بس ما لاحه، ضحك علي النور فرحاان وصار يدبچ ويرگص بمكانه يضحك ويهوس لروحه على هالانتصار..

-علي النور: كلللووووششش مااا لاحني وكللوووش ماا لاحنييي

گامله شيخ علي يصيح عليه فضحنا بين الناس صارت الدنيا كلها تباوعله ويضحكون وعلي السور يسويلهم حركة "اهدوأ" بأيده ويگول..

-ميخالف ميخالف عذرونا عنده مرض اسمه طيف التوحد الالنگي عمت عيني عليه هواي تعبه

وتجاوبه وحدة من العجايز الگاعدة على بُعد عننا..

-ياا يمة شون شاب خطية ما تشوفوله چارا

-حيدر: والله خالة عمي امير حاول يگشرها بس ما رهمت بلچن ياخذه لشريفة بت الحسن دخيل اسمها عسى يثگل شوي ويرجع ادمي

-فدوة لاسمها اي يمة لا تخلونه هيج

انهارينا من الضحك البنات صارت وحدة توگع على الثانية انوب العجايز مصدگات ويگولنله شلون يگشرون عقله وعلي السور گعدلهن ركبة ونص يفهمهن هذا مرض العصر الجديد..

-علي الحـق: ههههه شگد ادبسزية ذولة

-تالة: هههههه اني بس شغلة وحدة لاحظتها ان من تعاقبوهم لو تتعاركون وياهم ميزعلون بالعكس يضحكون ويلزگون بيكم اكثر

ضحكوا الولد يهزون براسهم وجاوبها علي البدر..

-ماكو زعل بين الخوان واحنه نداهرهم عبنهم بزر گعدتنا ونتونس على سوالفهم

-علي التـقي: سور ونور ولدنا ربوا على ايدنا لحد هسة اتذكر من امي گالت حامل بسور علي الحق شسوه هههههه

-علي الحـق: اسبوع انا هاج من البيت استحي أعاين لوجهها

-علي الكـرار: وختمتها من حبلت بـ علي النور گعدتنا من النوم تلطم و تزلغ بخدودها وتگول گعدو ولكم گعدوو امكم الغبرة حاامل گعدوو

-علي البـدر: الله لا يعوده ذاك اليوم ابا الحسن شوي وينجلط والزهرة

ضحكنا كلنا وعبالي ديتشاقون بس طلع صدگ ابا الحسن تخربط من الخبر ونقلوه للمستشفى يركضون بي يگولون ارتفع ضغطه وبوكتها زاعل امه ميحچي وياهة..

-رسمية: ويلادي شبعوني رزايل بوكتها طايحين الحظ

-ابا الحسن علي: يوم چا سور مشكل بصدرچ وواحدنا زلمة خاطة شواربه وتجينا تگليلنه حامل مرة ثانية شني منتظرتنا نهلهلچ؟

-فراقد: چا فايخة شني على گلبها امكم گاعدة ومترندحة وتزق بهالويلاد واحد وره الثاني

-ابتسام: شلون ويلاد جابتلنا فدوة لطولهم وشهامتهم عاشت ايد الربتكم يا يمة والكبرتكم.. طلبكم ابوكم من علي ورادكم تمشون على نهجه سلام الله عليه

-علي التـقي: بعد روحي عمة

-شيخ علي: اااااخ ظهرري ااااخ يا بوية ظهرري.. درر بدددر

فزينا على صوته وگاموله الولد كلهم يركضون يشوفون شبي، رفل عوجت حلگها وهمست بيناتنا..

-ما عدت دقيقتين وطگو ابو الويلاد عين شلت ظهره

-عبق: فاطمة بت عمة زهرة فد دقتنييي

-تَـمني: شسوت؟

-عبق: موتتني من البارحة لليوم تبسمر بيه وتگول گليلنه عد منو سويتي السحر واخذتي علي الحـق هي تحجيها بالضحك بس هاي خامس مرة تعيدها عليَّ

-ليلة: ختولي هاي خية عينها ضيجة عكس امها

لملمنا المكان ورجعنا للسيارات وره ما ارتاح عمو علي شوية خطية صار عنده تشنج بظهره وتأذه بسببه، رجعنا للڤلة وطبينا ويه صلاة المغرب بسرعة الكل راح يتوضى ووگف عمو علي يصلي بينا جماعة.. وگف ليگدام وولده تسعتهم وعاشرهم حيدر على الكرسي وراه وباقي النسوان خلفهم..

ابتسمت من كملنا صلاة المغرب والولد صاروا واحد يصافح الثاني بدوا من شيخ علي وعلي الدر ونهوها بين حيدر وعلي النور وكلهم بدوا يسبحون بيدهم ويه ابوهم حبيبة گالت اسمه تسبيح الزهراء..

تنهدت مرتاحة وبدون لا احس حطيت راسي على كتف حبيبة وجريت ايدها لحضني، نزلت راسها الي وهمست..

-ها معتي؟

-هممم

-خية موعي على اخوي مو عليّ لا تتيهين

-عابت

وخرت منها وگمت اكمل صلاتي نسيت الجماعة وبعد ماكدرت اگطعها ظليت واگفة هيج بيناتهم چني شمعة فگر والكل يتفرج عليَّ واسمع حيدر يسأل كرار..

-حيدر: اگلك اخواننا ما يتعبون من يچتفون بالصلاة؟

-علي الكرار: والله مادري ما مجرب اسأل تالة

-حيدر: تالة لو عمة ههههههههههه

-تالة: متضحك تره.. ولا منتعب

-علي الكرار: عذرينا تالة هذا هم لاحه طيف التوحد اللالنگي

ضحكت تالة واني بقيت اصلي حتى ماعرف شدا اكول من الخجل يمكن حتى شيخ علي ديباوعلي هسة ويحسبلي ركع..

كملت شلون مچان وركضت للغرفة بينما همه كملوا صلاة العشاء جماعة، اخذت منشفة ودخلت اسبح كملت بسرعة خاف يخلص مي الحار وغيري يريد يسبح وطلعت ابدل..

لبست فستان اسود بينصل وسترة صوف فضفاضة توصل لنص الفخذ فوگاه سودة ومقفلة بأبيض، نزلت اللبس جواريبي الصوف الحمر ولفيت شال جرجيت اسود على شعري ولاا اسيطر عليه يظل يتمزلگ والكب مادري وين يروح.. مادري شوكت اضبط الحجاب مو بزعت روحي من روحي..

رجعوا البنات وهم اللتهن يبدلن راح نطلع نتعشا بمطعم راقي على ذوق سور ونور يردون مكان بي صاكات وطبعاً هم گاملهم شيخ علي يهددهم بعصاته وتخبوا بظهر الامير..

-عبق: تَـمني اريد مسكارا منج

-حبيبة: خاطر حق يملص عيونج كعدي

-عبق: هم صدگ واني مالي خلگ نتعارك اليوم وافرح فاطمة بت عمة زهرة

-تَـمني: بنات احد شاف وين حمرتي الحمرا؟ نفشت الجنطة نفش وماكو

-حبيبة: احاا انوب الثانية تريد تگببها اليوم وتجلط اخوي

-تَـمني: لا احطها خفيف اسويها طبيعية بس لان جواريبي حمر تطلع حلوة

-رفل: انا بحياتي ما شايفه حمرة حمرا تصير خفيفة هاي بس عد تَـمني

نفخت بوجهها وگمت ادور بالجنطة الجبيرة بس ماكوو مالها اثر، دورت بجنطة تالة خاف متخربطة وصايرة عدها بس هم ماكو طلعت من الغرفة ورحت للامير اطلب جنطته هاي اكيد حطيتها هناك اني من رتبت اغراضنا اليوم الظهر.. شفته گاعد بالصالة يشرب چاي ويسولف ويه ابا الحسن..

-امير تعال شوية حباب

صحتله على كيفي واشرتله يجيني، نزل الاستكان من ايده وگام يرجع موبايله بجيبه واخذته ويايه للمطبخ نحجي..

-ها تَـمني

-احم.. باوع بس مو تعصب تره سؤال عادي جداً جداً

-الله يستر من سؤالچ

-شفت فد شي لونه اسود وطويل واگع بجنطتك؟

رفعلي حاجبه مستفهم يربي شلون راح اگله حمرتي الحمرا يمك لو لا يمكن يشمرني من الشباك لو گتله..

-شوف هيج يصير قلم اسود ومكتوب عليه بالاحمر كتابة انكليزي

-ما شفت

-ها؟

-ما شفت، شني قلم اسود ومكتوب بالاحمر قلم جاف هو

-يوووه امير حمرتي الحمرا هاي

-ما شفتها

-احسك كذاب

-ما شفت خالوو ليش اجذب

-اوووف خربت كل الستايل امير كله من وراك ومن وره عرضتك

-انتِ لو تالة تعورت صحتي كله من وراك

-عوف تالة وگلي شنو اسوي هسة؟

-تَـمني

-ها

-انتِ ليش تافهة بوية؟

-حراااام عليك

صم حلگي بأيده ونتر بصوت ناصي..

-خررب صوتها ينوص وشعلوه

وخرت ايده مني وعفته اطلع من المطبخ ورجع جرني، باوعتله منتظرته يسولف شفته كأنه يريد يكول شي ومدا يعرف يكون الجملة..

-شنو شبيك

-هم راح تحطين هاي الخرابيط على وجهج؟

-يا خرابيط؟

-اقلام الجاف

-اكيد قصدك حمرة و اي راح احط بيجي شسوي

-لا بيجي شني چن مطلعيج من الگبر بكفالة

-لاا امير والله كلش يلوگلي اصلاً احلى لونين عليَّ البيجي النود والاحمر كل صديقاتي يگولن

-لا مو حلو وحرامات تخربين شكلج

-زين احط وردي

-لا وردي شني چن ماكلة علچ بوبي

-يااااا

-والعباس مو حلو

-لعد اخلي جوزي من هذا الـ...

-جوزي شني؟ ماكلة ككو وناسية تغسلين؟

-كافي امير خربت واهسي

-امنية ابوي انتِ ما تحتاجين لا وردي ولا احمر انتِ من الله حلوة وتجيبين التايه ليش تخربين وجهچ

-لعد التايه غير ادلي امير هم خطية؟

بعده ممجاوبني وفلتت نفسي منه وشردت اضحك، عفته يعيط ويهدد بصوت عالي بالمطبخ وحدة..

-بالعبااااس امسسحه لو شنيي يصير لونه احمررر اصفررر ينمسح يعني ينمسححح وبطريقتييي خووب ما يحتاج اعلمچ بيهااا

عفته ودخلت للغرفة على ضحكتي وسكتت بسرعة من شفت النسوان كلهن يباوعن عليَّ وسلوى تعوج بحلگها وتفر بيدها معاجبها العجب مادري شوكت يجي يوم وتنعجب بشي غير بنتها هاي.. قررت فعلاً ما اخلي حمرة هالمرة على گولة حبيبة خفت لا ينجلط وما ردت اضوجه زايد فـ تنازلت هالتنازل العظييييم!....

**

-طاااااح حظكم طااااح حظكم من خلفة انااا الله بلاني بيكم بلوووا الله لااا ينطيكم يا بيت عليي يا كفاار يا زنادديق ياا راعين الملاهي والحاتات الله لا يوفقكم لعبتوا بحالنا وكسرتوا ظهروناا

-سلطان: يمة تعبنا كافي رحمي بحالنا بسچ ما مليتي صارلهم اسبوعين من ردوا من الشمال وبعدج تنوحين

-صابرين: املن؟؟ لا بالكاظم ما امل واظل گومة گعدة ادعي على بيت شيخ علي وعلى ولدي المرعبلين!

-زيد: يوم جاي نگلج ما گدرنا نسوي شي الولد اربعة وعشرين ساعة محاوطين بنياتهم ما عافوهن ولا دقيقة ما گدرنا حتى نتگرب

-صابرين: انتَ انلصم وينه غفاار وينه العاار وينك ولك طلعلي وجهك اعاين عليه خاطر اتفل بنصه

-غفار: سمعي من الاخير ولا تدووخيني انا گلبي موجر منهاا ومطيحة حظي متشيخة على راسي عبنها تشوفني عاشگها بس انا اعلمها لووما كسرت جناحهاا وگعدتها يمج تخدمج ما يطلع اسمي غفار

-صابرين: ههههههههههههاايي سمعتها من سنتين يروح امك سمعتهاا وما شفت غيرها الكسرت جناحك وخشمك

-غفار: الا انهي عليها وانعل والديها بسيطة

-عاصف: اگعد ولا تفشلنا وتفشل روحك اگعد

-صابرين: لاا ليش يكعد چا حگه ابن عمها ورايدها رووح انهي عليها يمة

-عاصف: يروحلج كامل يرجعلچ وصل وصل وبكيفج بعد

-صابرين: ولك انتَ هم الك عين وتسولف ولك عويصف؟؟ العار ابن العاار فوت شوون رمانة وحطهاا بحلگ الامير! يا اغبر بيت شيخ كوشووا على كلشيي خذوا مرت نعمة العار وخذوا فلوسه وبيته وكل املاكه وانتَ كاعد هنا مگابلنيي!

اسمعهم وروحي طگت من طاري بيت شيخ علي وحسد اهلي عليهم، هاي يومية احنه على هالرنة تعبنا ولعبت رواحنا.. صار اسبوعين من رجعوا زيد وغفار من الشمال علساس مسوين خطة مدري شني خاطر يحاچون حبيبة مادري يخطفوها والله مادري شني الخريط الرادوا يسووا بس فشلوا واصلاً گبل لا يرحون چنت اعرف راح يرجعون وايدهم فارغة..

طلعت من الصالة وصعدت لرهف سودة عليّ رجعت تلوب من وجع بطنها هاي تاخذلها چم يوم تصير زينة وترد توجعها، المسكينة بطنها انترست علاجات وحبوب ومرة وحدة ابوي جابلها طبيبة وحلف ما يكررها..

نزلت لابوي بلچن يلين هالمرة ويقتنع ناخذها للمستشفى، طبيتله للغرفة شفته كاعد يگلب بموبايله وبصفه حاط تعلاگة خفت اتگرب منه لا يهفني بيها فـ وگفت بعيد عنه ونزلت راسي وصحتله..

-بوية

رفعت عيوني على كيفي اشوفنه يعاين عليّ لو لا وشفته ما اهتملي، رجعت اصيحله وهم ما عاين لوجهي اخير مرة من صحت بي عاط..

-وجعععععع ما تحجييين

-ها.. بوية اعذرني حسبالي ما سمعتني

-ليش اصمخ وما اسمع؟؟؟ اللغي كولي شكو

-بوية رهف كلش تعبانة بلچن ناخذها لطبيب لو تخلي....

ما كملت جملتي وشال التعلاگة وشمرها عليَّ الچنكال مال التعلاكة طب بعيني واحسه شخط البؤبؤ رووحي فرفحت وعيني صارت تهمل كضيتها ارفرف و ابچي بسكات..

-بت النعاال انا مو كااايل مااكو طبيببب شنييي ماعدناا شرف والزلام تكضكض بأختج

جريت نفس اسيطر على روحي لا تطلع شهگتي كدامه وانكتل اكثر وجاوبته بساع..

-محشوم بوية.. بس والله متفرگعة من القهر عليها لو تشوف حالها انتَ ما ترضاها وعلي وانتَ معروف بگلبك شگد حنين ومدللنه وتخاف علينا وما تتحمل تشوفنا مريضات وتعبانات وتجيبلنا احسن العلاجات...

تعمدت اسولف هيج خاطر ارضي غروره، سكت يسمعلي وصفن يفكر بچلامي بينما كملت..

-انا اگولن لو نجيب طبيبة هنا احسن خاطر تسويلها فحوصات ومدري شني واذا تطور الوضع حتى لو ناخذها لهذا المستوصف اليم بيتنا مال منتصر

-خووووش

-يا بعد عيني يا بوية فدوة رحتلك

ركضت على ايده بستها ومدلي الايد الثانية، بست ايده وعيني المضروبة تذب دمع، طبت امي للغرفة وشافتني فرحانة راحت لابوي كعدت على الجرباية وكالت..

-شني شكو

-مسعود: راح اجيب منتصر يشوف رهيفة شمالها

شهگت امي داگة صدرها ومبحلگة عيونها، وگفت على طولها وصاحت..

-صابرين: تحچي صددددگ مسعوووود تجيب هالچلبب يكشف على بنيتتتك

-مسعود: هو طبيب وخلي اخوتها يكونون موجودين

-صابرين: لاا انتَ تعرف ولدك بس يتلاگون ويه منتصر يتناطحون انتَ تريد تعزينا وتصخمنا؟؟

-سبأ: يمة چا شون تبقى هيج

-ختوليي عرج ما بيها دلع بنات هذا هسة اسويلها نومي بصرة تصير زينة

عاينت لابوي اتوسل بعيوني ومادري شلون ما اهتم لچلام امي وگام اتصل بمنتصر يجينا وخلاها واكفة تدك وتلطم..

-صابرين: بالعباااس لا انا اشوفنه ولا ولددي عود انتَ گابله واگعدد

-مسعود: امشي ولي امشيي بت الزمال تهدد الرعنة

عافته وطلعت من الغرفة وانا رحت اريد اللحگها ووگفني ابوي، نزع دشداشته ولبس غيرها وگال..

-اوگفي فوگ راسه ولا تخلي وحده ويه اختج

-انتَ ما تجي؟

-لا عندي شغل

انصدمت منه شلون يعوفنا ويه منتصر وحدنا واخوتي اكيد امي ما راح تبلغهم هو جاي خاطر ما تصير الحرب العالمية الثالثة هنا، قررت اغلس على الوضع وما اهتم واروح اللبس رهيفة شال وانزلها للاستقبال..

-رهف.. رهف گومي خية راح يجي الطبيب يشوف شبيچ

ما جاوبتني وبقت تلوب متت قهر عليها وجريت شال لبستها وسحلتها جوه للاستقبال، نامت بساع على الگعدة بالكاع وغطيتها بچرچف، لبست ربطتي وعباتي وكعدت انتظر منتصر..

الحمدلله بيته مو بعيد منا ما طول خمس دقايق ووصل، تغشيت بالشال والعباه ضميت عيني ودخلته من باب الاستقبال ولا اخوتي ولا امي بينوا، سلم وطب جايب وياه جنطة سودة..

-هلا بيك خوية

-خير شبيها رهف؟

طب متوجه عليها ونصى يعاين على وجهها من شاف وجهها اصفر حط الجنطة بالكاع وگعد على ركباته يحاچيها..

-رهف.. رهف تسمعيني؟ رهف؟؟

فتحت عيونها على كيفها واستغربت من شافته گبالها، فزت من مكانها مخترعة ولملمت الچرچف على جسمها مخنزرة..

-سبأ: مو كتلج راح يجي الطبيب

-منتصر: مو وكت خزراتچ هسة گولي شبيچ شصاير وياچ؟

-رهف: بطني توجعني

-بعدها؟

-اي

-وما رحتي طبيب مو؟

-لا

-ولا سويتي فحوصات

-لا

-ولا..

-خايب گتلك لا شني السالفة

ضحك مأيس من لسانها الطويل وفتح جنطته يطلع سماعاته مال طبيب، لبسهن على اذاناته وحطهن على بطنها وصدرها انتبهت على حركته البطيئة ومركز يتسمع على كيفه ويتنهد من ثانية لثانية..

گعدت على جهة منتبهة لتحركاته ونظراته بنفس الوقت، عيونه ما وگعت من وجهها وعيون رهف تدور بالاستقبال ما تخليهن عليه الا من همس بأسمها واللتقت نظراتهم.. صفنوا واحد بوجه الثاني لحظات وعكس عينه منتصر منها بساع مرتبك وضم السماعة بالجنطة..

-منتصر: احم.. بلا زحمة تكدرين تجيبيلي ماي سبأ؟

-اي صار

كمت بساع حضرت الدولكة والكلاص وحطيتهم بصينية وخذيتها الهم، وگفت بالباب ما طبيت من سمعتهم يبسبسون يحچون بشي ويه بعض، ركزت وياهم بكل حيلي وگدرت افتهم شجاي يسولفون..

-تتمرضين من عنادج

وهي تجاوبه بضوجة..

-معليك انتَ

-صيري ادمية وجاوبي زين لمرة وحدة بحياتج

-شتريد منتصر؟ شبيك اجيت خاطر نتعارك لو تعالجني؟!

-مو شكول نعمة وحگ هو علي

طبيت للاستقبال انطيته الماي خذاه وشرب ثلاث كلاصات واحد وره الثاني فحطان، اعاين على اختي متوترة وتلعب بطرف الچرچف وتبلع بريگها حسيت بيهم مو طبيعيين واكو حركة غريبة بيناتهم..

-منتصر: تحتاج تحليل بس على الاغلب عدها رمل بكلاتها هذا سبب وجعها، راح ادز رسالة العلاج لعمي مسعود يجيبه و خليها تكثر من شرب الماي والسوائل كشكل عام

سد جنطته وشالها بدون لا يعاين لوجهي وگام يريد يطلع وعيون رهف وراه تركض، بعده ما خاطي خطوة برة الاستقبال وصاحتله..

-منتصر

وگف بمچانه يسمعلها بدون لا يلتفت عليها، نزلت عيونها على الچرچف البيدها وگالت بصوت ناصي..

-بوسلي رقية وسكينة

رجعت عيوني عليه شفت ملامحه العصبية تتغير وابتسم بس خفاها بساع وطلع من البيت، فكيت حلگي مصدومة ذول شبيهم ما جاي افهم سالفتهم؟

-سبأ: ولج رهيفة

-رهف: نعسانة راح انخمد

-ولج گووومي حاچيني

-نعسانة نعساانة

لفت راسها ونامت خرب حظج رهيفة راح تخليني افكر بيج واألف قصص بكيفي، عفتها نايمة ورحت اسويلها عصير برتقال وحطيته بالثلاجة.. عاينت للساعة عبرت الاربعة العصر واليوم ثنين معقولة اشوفه على النهر منتظرني لو مثل كل ثنين اروحن وارجع خايبة ما اللگاله اثر..

حطيت امل واحد بالمية يجوز يجيني وقررت اروحن ما دام امي واخوتي ملتهين يشنون حرب على بيت عمي علي، لبست عباتي على راسي وطلعت من البيت متوجهة للنهر، امشي وادعي بجاهج يالزهرة كون اشوفنه ولو من بعيد..

وصلت للنهر وشفته فارغ مثل عادته بهيج وكت، گلبي وجعني والحسرة ترست گلبي.. من يوم حادث حيدر لهذا اليوم انا ما شايفته لا يجي ولا يتگرب من النهر وانا مثل المطية مثل الغبية كل ثنين انتظره! انتظره مثلما انتظرته عمرري كللله!

افتريت بالمچان عسى اللمح طيفه وافكر بي.. من يوم دافعلي وانا بت السبع سنين من عيبوا على وجهي المچلح ولد عمي ناصر وطگهم لخاطري وانا گلبي اتسودن وتعلگ بي.. ما انسى شون وگف بصفي بيومها ومسح على گصايبي وگال..

"لا تهتميلهم ذول الحيوانات واحدهم وجهه وجه القندرة حشى خلقة الله ويعيب"

اتذكر من ضحكت خجلانة وشون غطيت سنوني المتكسرة مستحية منه، اتذكر من ضحكلي وطلع من جيبه چكليته ومدلياهة ينطيني وگال اكليها بسكات ولا يشوفج احد لا يحسدوچ..

خذيتها من ايده بگلب جاهلة فرحانة وشخص اهتملها، بوكتها ما كليت الچكليته وضميتها بين اغراضي فوگ الست سنين صارت الچكليته حجارة وما كليتها، اطلعها اعاين عليها اضحك وياهة مثل المسودنة واضمها بين اغراضي وچان بقيت محتفظة بيها لهذا يومي لوما رهيفة چانت طفلة شافتها وچلبت بيها تريدها وامي كتلتني خاطر انطياهة..

بچيت وانا اتذكر كل هالذكريات الحلوة وگلبي يتگطع، مهضومة عبن تخيلت اخيراً راح نرجع نتلاگه سوه وتتكرر بس ما اجه علي التـقي.. ما اجه وما راح يجي وحگه شيسوي جاي لوحدة وجهها محترگ ماكلته الشمس وايدها كاتلها الضيم من الحرث والحش..

گعدت بالكاع لميت عباتي على جسمي وخذيت راحتي بالبواچي افوخ گلبي واخلص من الغصة والحسرة الكاتلتني، عيني تون عليّ توجع وزيدتها بدموعي المالحة بس طزز عساني بالعمى عسااني ميتة ولا هالعيشة الكافرة..

-ليش تبچين؟

فزيت من مچاني مخترعة وگمت على حيلي، تعثرت بعباتي ردت اوگع وگوة سندت روحي ووازنت نفسي.. گلبي صار يدگ حييل وتخربطت احوالي مادري شسوي ماعرف وين اضم وجهي المكروب صرت اتغشى بالعباه وامسح بدموعي وخشمي وانطيته ظهري ارعش واتنفس سريع..

-علي التـقي: هاج

حسيت بحرورة جسمه يتقرب مني ويمدلي كلينسه من فوگ چتفي، خذيتها بساع وركضت بعيد عنه ولو بيدي اطبن للنهر واتغطى بي..

-تره ما راح آكلچ والله

-اءء.. انتَ.. انتَ هنا

-لا خيالي اجه

طلعت عين من عيوني ودرت وجهي اعاينله وبساع انطيته ظهري مرة ثانية مبتسمة، غمضت عيوني اتنهد وامسح على گلبي اليرجف التعبان..

-اجيت اسألج سؤال واروحن

بلعت ريگي متوجعة يا ظالم شلحگت اشوفك وتريد تروح بس هم رضيت الحمدلله والشكر شفته من بعد غياب مابي شي ويمشي على طوله الحلو كلشي ما رايده الحمدلله والشكر..

-اسأل لو ما ترديني احاچيچ؟

اللتفتتله بساع واعرف ليش سألني هيج عبن منطيته ظهري، وخرت العباه عن وجهي وگبل لا افتح حلكي واجاوبه جفلت من گال..

-هاي شبيها عينج؟؟؟

-مابيها شي.. فگستها انا بالغلط

ضميتها بأيدي ووترني من تقدم بخطوات سريعة يمد وجهه يريد يعاين عليها، ابتعدت منه خطوتين خايفة وبساع رجع هو لنفس مكانه من شاف ردة فعلي..

-شوفيلها قطرة ملتهبة عينج

-ان شاء الله

-المهم على سؤالي.. راح اسألچ مرة وحدة وجاوبيني بدون لف ودوران سبأ انتِ تعرفين العداوة البيناتنه وماريد الوضع يسوء اكثر

بلعت ريگي وهزيت راسي انتظر سؤاله بس صدمني من گال بنبرة واحد ما طايق شي..

-غفار اجه للشمال راد يسوي شي لاختي حبيبة مو؟!

-لا

-لا تجذبين!

-لا لا.. لا شني شيسويلها يعني

-شفته مرة من رحنا لمصيف چان يحوم! ومن راحت للحمامات شفته مرة ثانية يمشي وراهة ولوما انا ملحگ عليها چان حاچاهة لو الله يعلم شسوه! احجي شنوو براسه؟؟؟

خفت من نبرة صوته يعيط بيه ويحجي بنتر مو نفس تقي الاولاني چن واحد ثاني بس ما اللومه ولا اشيل بگلبي عليه المروا بي مو هين والسواه سيف اخوي دمر شكو شي زين بيناتنا..

-سبأ: ماكو شي براسه غفار يحب حبيبة

-ااااشششششش هااااي السالفة ماااا تعيديهااا خاطر مـ......

-صخااام الصخمنيي

لطمت على وجهي واللتفت على المكان الجاي اعاين منه وانصدم! انصدم من شاف ابن اخوي سلطان واكف بعيد ويعاين علينا.. انهاريت بعد ماعرف شلون اكف عباتي مااعرف شلون اضمن وجهي واركض بعيييد.. صرت اركض مثل التايهة ما اندل دربي عفت تقي واگف يحاچيني وماريد اسمعه ماكدر اوكف وافهمه بالمصيبة الطاحت على راسي.. اركض واطيح وارجع اوگف وهم اطيح ماعرف وين اروح وين انطي وجهي شسووي بروحي وشراح يصير بيه شسوي!!!

**

-وين رايحة ليلة؟

-هااا

-وين رايحة وشبيج طلعتي تسحبين من الغرفة؟!

جفلت مخطوف لونها واعرف ما ينخطف لون اختي الا من تكون مسوية مصيبة، مصيبة راح تطيح حظنا وتدمرنا ثنيناتنا..

-احچيي شكو!!

-رفل راح اگولن بس عليج العباس لا تعاركيني

-فضيني كولي شكو

-راح يجي.. يريد يجي ويحاچيني

-يممممممة

لطمت صدري بكل حيلي متخبلة، ركضت عليّ تتوسل وتگول..

-من الحايط تعاي وياي انتِ من الحايط يحاچيني تعاي وشوفي بنفسج

لبستني شال وجرتني جر وياهة وانا صافنة شني جاي يصير! شني السالفة ياهو هذا واول مرة ينضرب على عقلي وطلعت وياهة بدون لا اسألها شنو الموضوع بس يمكن صدمة اختي تريد تحاچي زلمة غريب من الحايط اثرت عليّ..

طلعت وياهة للمنور وره البيت وشهگت من شفت زلمة ماد راسه من الحايط يطلع اكبر من ليلة بثلاث سنين واگف وبيده وردة حمرة، لطمت على وجهي متسودنة وبدون حچي جريتها من ايدها ارجعها للبيت والحظ خلانا نصير وجه بوجه ويه ابوي..

-ناصر: شعدچن هناك

حچاهة بحس ناصي وبنفس اللحظة صاح الزلمة البره بأسمنا ويااا بوية وياااا يابة مااعرف شلون انگلبت الدنيا فوگ راسنا بلحظة.. طلع ابوي للمنور وشاف الزلمة واگف وكضه يريد يكتله وهرب من ايده واندار علينا.. كضنا وحطنا وحدة فوگ الثانية وكتلنا كتتل مووت شفت نجوم الليل بعز الظهر!..

جر موبايل ليلة من ايدها وجبرها تفتحه، ظلت تبجي وتلطم على وجهها ورجع يكتل بيها بخبال موتها، خلاني انا بنفسي افتحله الموبايل ومادري شني شاف ماادري بس الشافه سودنه علينا وراح جاب سچينة من المطبخ..

-رفل: بوووية والعبااس والزهررة والحسين الشهييد و.....

-ناصر: بتتتت العااااار شااالج العباااس شااالچن ابوو فاضل نزلتننن رااااسيييي

كضنا يجلد بينا بكل حيله بحزامه گطعه على ظهري وظهر ليلة، راح اموتن روحي طلعت احس الهوا ضاع مني صرت اشبح بيدي بس اريد احد يساعدني ويطلعني من جوه ايده اريد اساعد ليلة الراح تغيب عن الوعي من الكتل اريد اچلب بأمي الطاحت من طولها من شال ابوي السچينة وحطها على رگبتي..

-ناصر: اذبببحج من الوريددد للوريددد وروحه لابووي اذبحچننن واسويچن عبررة لمن اعتبررر

-رفل: تذذبح بنااتك هااي تاليتهاا هيييج بوووية تذذذبح بناتك الشريفاات بـ...

ضربني على حلگي بكل حيله احس الدنيا دارت بيه وطحت بالكاع، تعب جسمي من الكتل وتعبت واني اعاركه واحاول احمي روحي واحمي ليلة الورطتنا وجابت الزلمة لحايط بيتنا تحاچي مناك..

-ناصر: ولللجن اذبحچننن واغسل عااارچن گووووومنن گوووومن اغسل عاااري وارجع ماااي وجهههي گووومنننن

جرني من شعري وليلة من شعرها ويسحل بينا مثل الحواوين، شمرنا بالساحة على الصبة ما مخلي بينا روح ندافع على نفسنا.. جاب حبل وصار يربط ايدي واندار على ليلة يربط بأيدها وجرنا من شعورنا مرة ثانية يطلعنا من البيت..

-ام رفل: وووين ماااخذهن يا الماا تخاااف ربببك حسبييي الله ونعم الوكييل بييك يا ناااصر عسسسى حوبة هالبنااات ما تعددديلك عسااااك حطب لجهنممم

-ناصر: ررراجعلج انتِ ررراجعلج تفوووو عليج وعلى بناتج ال*****

جرنا يطلعنا بدون حجاب بدون شي يسترنا، عتنا بنص الشارع والله ستر علينا والشارع چان فارغ، طببنا للسيارة وتفل علينا وركب بكرسي السايق وطلع بينا لمادري وين.. مادري وين ماخذنا ماشوف بعيوني دم راسي جاي يطيح عليها وتحجب عني الرؤيا..

مسحت عيني بيدي بس اريد اللمح ويين ماخذنا بس لا البالي صدگ بس لا راح ياخذنا يغسل عاره! ظليت اطگن سن بسن من الخوف وحضنت ليلة حطيتها على گلبي.. شابگتها بكل حيلي وجسمي يهتز برد وخووف ورهبة وكل شعور يخوف جاي اعيشه..

لمحت بيت عمي علي وروحي تعلگت بي صرت اصيح وابچي بكل صوتي واضرب على چتاف ابوي اريده يوكف ارريدن اضم روحي بحضن عمي علي اريده هو يسندني ويوگفلنا ويساعدنا..

كض ابوي ايدي ولواها يصيح ويفشر عليَّ وعبر بيتهم، تسودنت وظليت اتعارك وياه بأيدي معارك.. وگف السيارة يخاف لا نسوي حادث واللتفت يريد يرجع يطگني وگبل لا يلوحني فتحت باب السيارة وشمرت روحي منها وليلة وراي..

ركضنا مثل المخبلات نشرد منه وچن رادها من الله ابوي جيتنا لبيت عمي علي، شهگت واحس بروحي تريد تطلع من كضني من شعري تگطع بيده وليلة سحلها من ايدها وخذانا لبيتهم.. تخبلت عقل ما ظل براسي من دفر باب الحوش برجله وتلگتنا عبق بالساحة واكفة ويه سلوى يتعاركن وسكتن من شافننا..

-عبق: عزااا ليييلة رررفللل

-ناصر: ووووخري انتِ

دفعها وگعها بالكاع من اجت تريد تحامينا وجرنا جر لديوان عمي علي، رجلي ظلت تطگ وحدة بالثانية والدنيا دارت بيه طحت بالكاع وگومني يجرني من ياخة دشداشتي وطببنا غصب لديوان عمي بهالحال! بالدشاديش وبدون حجاب، ايدنا مربطة ومدامايات من فوك ليجوه والسچين بيد ابوي يريد يذبحنا..

طحنا بنص ديوان عمي واحس بروحي تريد تنسحب والعباس ابو فاضل ملك الموت احسنه واگف فوك راسي مو ابوي الرباني.. وگف عمي علي على حيله وچان عنده زلام ثنين گاعدين وابا الحسن وعلي السور موجودين.. وگفوا كلهم مصدومين ومبحلگين عيونهم عاجزين يكولون چلمة..

-ناصر: اجيييتك يا خوووي اغسل عااري جداامك اجيت اگللك بناااتي رخييصات وبااعن شرفهنن طيحن ماي وجهيي وسودنه وموو ناصرر اليسكتت على بناااته الكسررن وجهه!!

-شيخ علي: نااااااصر صلييي على محمد واستهددي برحماانك

-ناصر: ابدددد بعلييي اليوووم لو انااا لو هالبنيات المااا عرفت اربيهننن وطينن وجهيي بيننن الناس!!!

يتبع 👑.....

━━━━━━ ♛ ━━━━━━

توقعاتكم.... 👀🩷🩷🩷🩷🩷🩷؟؟

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

بقيت ارسم صور وجهچ.. بل عيون

وابد ما ضل دمع مالح.. بل عيون

بسبب حبچ عمه وچلب.. بل عيون

ضرير أصبحت ويدلون بيه... ♥️

━━━━━━ ♛ ━━━━━━

"قــبل خمس ساعات"

نزلت من الدرج وناويتها والله ناوية اسحل ابرار سحل ونروح للصالون اخليها تحف وتصبغ الشيب الطالع براسها وتهتم بنفسها، من حادثة حيدر لليوم راسها متروس ترس شيب وكبرانة فوگ عمرها بعشر سنوات من وره حواجبها الثخان والحزن التارس وجهها..

سمعت صوتها جاي من الصالة جوه الدرج مديت راسي شفت حيدر گاعد شعره مبلل وهي فوگ راسه تلبسله ملابسه وتسولف وياه بس شافني انتفض وشال قميصه هو يلبسه مستحي مني واسمعه يكول لامه "وخري تَـمني اجت"..

درت وجهي بسرعة وصعدت كم باية حتى اخفي جسمي عنهم واخلي يكمل، اوقات استغرب ليش تبدله بالصالة من يكمل سبح؟ او ليش تاخذه لغرفة كرار لو غرفة سور او نور؟ بس عرفت هالشي كله مرتبط بوضعه النفسي، يوم زين ويوم لا ويتحجج على امه تحجج وكلشي يسووا ميعجبه واوقات توصل بي يقطع الاكل والشرب عناد.. مينعرف شيريد ومحد يلومه حتى امه بنفسها مطولة بالها وياه وتسوي كل اليطلبه لان الدكتور گال الديصير وياه طبيعي شاب وبيوم وليلة فقد رجليه شنو تتوقعون يصدر منه؟

-يمة شبيچ انا ابدل انا

-ابرار: بس اللبسك الجواريب يمة باردة

-يممممة كتلج ماااريد جواررريب ماا احتاجهنن مااا احس برجليييي انتمم ما تفهموون

عاطها بكل صوته وشال الكلاص الي بصفه وشمره على الحايط، طلعو علي الدر وخالة رسمية وسلوى من غرفهم يركضون وشمس وگفت بباب غرفتها حايرة متعرف تتقدم لو ترجع..

-علي الدر: شنو شصاير شبيك بوية شبي حيدر؟؟

-حيدر: مابي شييي بوية مااابي شي حييييدر

-علي الدر: شصاير وليدي ليش تصيح ياهو مضوجك؟

گعد على ركباته گدامه بس وجهه مطعون طعن در صاير غير واحد قبل چان هو وبدر يتشابهون كلش بس هسة مسمر وهالات جوه عيونه وضعفااان كلش مع العلم هو اضخم اخوته ومن الله متروس عضلات..

-حيدر: وديني لغرفتي بوية

-رسمية: اگعد ويانه يا يمة شعندك وحدك هناك

-حيدر: ماريد

صوته بي غصة مال واحد گوة مسيطر على روحه ميبچي بس دا اشوف ابرار واكفة وراه ودموعها تكت وتمسحهن قبل لا يشوفها ابنها..

-سلوى: وليداتي حيدوري لا تسوي هيج وتزعل اهلك يا يمة شوف امك حامل وتعبانة وجاي تتعبها وتزيد ضيمها و...

سكتت بسرعة من اشرتلها ابرار بأصبعها لا وفتحت عيونها تنهيها تكمل لان وره كلام سلوى حيدر صابه انهياااار، ضم وجهه بچتف ابوه وبچه بچيي رج الصالة رج گطع گلبي وگلب الكل، گعدت على الدرج اسمعله يحچي ويبچي وعلي الدر يسولف وياه على كيفه ويمسح على رجلين ابنه..

-لا تبچي سبعي لا تبچي وليدي انتَ

-حيدر: يا ريتني ميت يا بوية ولا هالعيشة

-ابرار: لااا يمة اسم الله عليك وليدي لاا تكول هيج حيدر بعلي تموتني والله تگطعني من جوه لاا تجيب طاري الموت

مسحت دموعي بأصابعي واسمعه يضرب على رجله حييل ويبچي بصياح خله حبيبة وعبق ينزلن مخترعات واشرتلهن يبقن بمكانهن لا يشوفهن ويتأذه اكثر..

-حيدر: على هالررجل طگيتني بووية گدام الكلل وفشلتني طگيتني ودعيت عليّ بالمووت لييييش انشليييت ما متت لييييش

حضنه علي الدر وگال بصوت مختنگ من القهر..

-كاافي بوية كاافي ابوس ايدك كاافي راح اموتن والعباس راح اموت من عمري على عمرك يا حويدر يا وحيدي

ظلوا نص ساعة يسكتون بي وامه هلكت اباوعلها بطنها بارزة ويا كايمة يا كاعدة يا راكضة يا تفتر بالبيت تحير شتسوي حتى يهدأ، تأذت خالة رسمية من الوضع وطردت الكل لغرفته حتى اهله ما خلتهم يبقون وبقوا وحدهم گاعدين هي وحيدر.. الصالة صارت هدوء واستمروا على هالهدوء لفترة وبس شهگات حيدر تنسمع..

-رسمية: حويدر

گالت اسمه وعرفتها ضربت على رجله بسبب صوت اللطمه القوية، من مجاوبها ذبت حسرة عالية وكالت بهدوء..

-حِيدر ادري المريت بي مو سهل وادري بگلبك موجر يَـ بعد حبوبتك بس لازم تتقبل الجرالك.. السالفة صعبة اي بس ملزوم انتَ وواجبك تلتزم بعلاجك وبأكلك اذا مو لخاطرك لخاطر هاليتيمة امك، ابرار ما عدها غيرك بهالدنيا معتمدة على الله وعليك، ربتك بذاك التعب اليهد الحيل ومن واجبك تردلها تعبها ولو بشي بسيط وهو تتوكل على ربك وتكمل علاجك وعملياتك بخير وسلامة وترجع على حيلك..

-حيدر: ماريد اتأمل

-تأمل وخلي ثقتك برب العالمين عالية.. حويدر الانسان من يدعي خلي يعرف ربه راح ينطي.. كون واثق يا وليدي من ترفع ايديناتك تطلب من الكريم راح يترسها وما يرجعها فارغة

-حيدر: ان شاء الله

-ادعي من گلبك ترجعلك رجليناتك حويدر وترجع على طولك الحلو اليحبه گلبي وان شاء الله بجاه علي واهل بيته بجاه حيدر الكرار وابوك سماك عليه يا حيدر ما يعوفك ويسندك ويسهل دربك ودرب اهلك ويخلصك من هالهَم التارس گلبك

-انا اخافن حبوبة.. اخاف لا ابوي وعمامي وجدي يصرفون على عملياتي وتاليها كلشي ما نحصل يذبون فلوسهم ببحر مالح

-لاا يمة لا حبوبي لا تگول هيج ابوك وعمامك وجدك من يحطون من جيبهم همه متأكدين راح ترجع على رجليك بحيل الله.. ما عدهم شك حالك يبقى هيج وثانياً انتَ وليدهم ووحيدهم اذا مو عليك يصرفون چا عليمن؟

-هم صدگ

-هههههه يلا يمة لا تظل تتنعوص على اهلك وارجع لهيلاگك ورعونيتك النحبها وفرح گلوبهم

-حبوبة شني السالفة جاي تمدحيني لو تذميني

-انچب يلا انچب وصير ادمي.. راح اصيح لامك وابوك حاچيهم وحِب ايد امك ولا تزعل بعد ولا تشيل هم خليت علي ابن طالب چفيلك وحاشاه يردني خايبة اطمن بعد

گامت صاحتلهم وفعلاً سوه مثل مگالت وحتى نبرة صوته تغيرت عن قبل شوية صار يداهر امه ويضحك وياهة وكأن خالة رسمية مسحت على گلبه بكلامها..

-حيدر: بوية يصير جماعتي يجوني؟

-علي الدر: اي چا ليش بوية خليهم يجون

-حيدر: عليييييييي هاي شنيي ما عرفتك بوية لو ادري بحالتي تخليك تحب جماعتي وتطببهم بيتنا چان من زمااان گرمت رجلي

ضحك علي الدر وكفخه على راسه خفيف وگام گعد بصفه يسولفون بأمور عشوائية وابرار گاعدة وياهم بس تتفرج عليهم مبتسمة.. علاقة علي الدر بأبنه علاقة تجننن صح شديد وياه وصح يعاقبه هوايه حتى على شغلات تافهة مثل ميگول امير بس حبه واضح وروحه الابوية ظاهرة عليه..

حچالي امير در چان صغير كللش من صار عنده حيدر بعده بعمر المراهقة وللجامعة ما داخل وكلشي ما شايف من الدنيا بس چان اب حازم وگدر يربي حيدر ويكبره ويصادقه هم.. رغم مشاكلهم ودومهم يتعاركون بس حيدر كللشي يحچي لابوه كل صغيرة وچبيرة حتى لو مسوي طرگاعة ويعرف راح ينكتل يجي يحچي لابوه وياخذ المقسوم ويطلع يضحك..

تغيرت نفسيتهم بسرعة وحيدر شرد بكرسيه المتحرك لغرفته الي بالحديقة وراح يستقبل اصدقائه هناك، شوية وطلع علي الدر من البيت ونزلن عبق وحبيبة واجت شمس ودخلنا عند ابرار بالغرفة صايرة غرفتها هوووسة..

-شمس: استغفر الله ابرار نظفي غرفتج خية شمالج تره كل هالهوسة تأثر على نفسيتج

-ابرار: مالي واهس

-حبيبة: گعدي انا انظفها

گامت تلملم بالغرفة وكلنا تساعدنا وابرار متمددة وبطنها طالعة مابيها حيل ترفع ايد، لزمت وصلة امسح بعطور زوجها عطر عطر ما شاء الله الميز كله لعلي الدر هي ماعدها غير عطرين وگالت تبدل بيناتهن..

-عبق: ذني ملابس رجلچ وصخة لو نظيفة؟

-ابرار: مادري

-حبيبة: صدگ تحجين ابرار؟ چا شون تردين حياتكم تترتب وعلاقتكم تتحسن وتصير حلوة اذا ابسط شي الي هي الغرفة ما مرتبتها وتهتميلها

-ابرار: عادي اصلاً هو جاي يخوني

-حبيبة: هم رجعنا على هالسالفة ابرار

-ابرار: چا عفته ثلاث اشهر حسبالج چان ينتظرني بيها؟؟

-حبيبة: خايبة الزلمة جان ما يطلع من البيت من القهر ودددگ عقوبات من دوامه محد يعذر! وكت عشگ وكت يتعرف على غيرج صدگ تحجين؟

-ابرار: لا لا هو يخوني انا ادري بي

-تَـمني: يعني شفتي شي عليه؟

-ابرار: لا

-عبق: لعد شلون شاكة بي؟

-ابرار: احس

-حبيبة: چا طفي احساسچ واسكتي

-شمس: ابرار انتِ تعجبيني ليش تجيبين الاذية لروحج گوة؟ ليش تتخيلين اشياء سلبية وتخلين حياتج عبارة عن مأساة ومعاناة وقهر ليش؟؟

-ابرار: ما يحبنييي

-شمس: يحبج والله يحبج بس يا حبيبتي يا عمري الزلمة تعجبه المرة المرتبة يحب من يرجع من دوامه يشوف غرفة ريحتها حلوة وهدمة نظيفة وحچاية تنزل عسل على گلبه والعباس يصير محبس بأصبعج

-حبيبة: واليكتل زلمتها شون زلمة الترتيب والاناقة كلها يمه العطر يهفهف والكشخة يتسولف بيها

-ابرار: اي چا اكيد يخوني بعد شكو

-تَـمني: اوووف سكتي سكتي تشلعين الگلب

-ابرار: انتن شمالچن وياي ليش بس تدافعنله

-تَـمني: لا خلص هذا هو مندافعله بس طبقي نصائح شمس لنفسج انتِ.. يعني اهتمي بروحچ لروحچ نفسيتج لا ارادي راح تتحسن وترتاحين

-ابرار: اي جاي اسبح

-حبيبة: خايبات رااح اموتنن

-ابرار: ولج شسوووي بعد

-تَـمني: كومي ويايه للصالون نحف

-ابرار: ماروح

-حبيبة: تكومين وغصباً عليج يلا

-ابرار: عوووع ماريد احف بيا حال انا

-تَـمني: ليش ولج والله راح تتغيرين وتتحسن نفسيتج امشي گومي ويانه گومي

جرجرناها تجرجر ويانه وگوة گامت متقبل الا اجت خالة رسمية ورزلتها حتى تروح، صعدت بسرعة ابدل ونزلت راح نروح اني وابرار وشمس وخالة رسمية توصلنا للصالون وترجع علينا من نكمل..

اخذنا تكسي ورحنا لمكان على ذوق شمس، وصلنا ونزلنا البنات سوه ودخلنا جوه اول مرة اجي هنا والمكان عجبني چبير وواسع وصاير شبه مركز تجميل متكامل، قنعنا ابرار تصبغ شعرها وشلعت گلبنا ياله اقتنعت تصبغ نفس لون شعرها وشمس سوت ميش وحفافة واني عجبني اسوي تنظيف بشرة واگص شعري على طوله مدرج ما اقصر منه..

بقينا نشتغل بوجوهنا وتأخرنا اكثر شي علمود شمس لان عدها ميش، كملت تنظيف بشرة وحفافة واجت تريد تگص شعري.. تگص بي وايدي على گلبي اخاف تگصره احب شعري واحب طوله ماريد اخربه..

-تَـمني: شنو كملنا؟

-اي الف عافية

-يعني صار تغيير شو ممبين؟

-هههههه عبن ما گصيتي گذلة ما يبين

-برأيج اذا گصيت تلوگلي؟

-كلش اي تگلب الوجه الگذلة

-اخاف متعجب زوجي؟

-تعجبه تعجبه اخذيها مني

-ها؟

-والله

-تمام گصيلي بس اريد هيج تغيير يخلي يتخبل ينجن بيه حبابة

ضحكت على حماسي واني هم انتبهت لروحي يااا شبيه استخفيت صدگ چذب شبيج تَـمني؟ بس البنية چانت كلش حبابة وگالت..

-اليوم الا نخبله بسيطة

ابتسمت ساكتة وبدت تگصلي غرة وسوتلي مدرج اكثر وشسورت شعري طلعت غييير شكل، ظليت اباوع لروحي بالمراية فرحانة يجنن التغيير وانغرمت بي وگفت على حيلي اگلب بي گدام المراية وافكر بردة فعله من يشوفني..

مشتاقتله كلش مو شلون مچان صارله اسبوعين ويه ابو كربله شغل ببغداد وباقين بس اتصالات ومراسلات بالليل وكلها عبارة عن شلونك وشلونج وهذا هو لان اغلب وقته تعبان ومهدود حيله فـ ما اللح وياه واخلي ينام لانه يگعد من الفجر علمود الشغل..

اليوم يرجع فـ قررت اسوي تغيير لشكلي ونويت اسوي سهرة بغرفتنا اغيرله جو وصراحة ماعرف وين راح تأدي هاي السهرة وخايفة كلش بس خلص لازم اتشجع وما ابقى اأجل..

طلعت حمرة حمرا من جنطتي حطيت منها واخذت تلفوني اصور روحي بالمراية فيديو وابين بي شعري، تقربت من المراية بتلفوني وهمست بصوت ناصي للتلفون..

-شنو رأيك امير؟

گلتها وصورت روحي لاخر مرة ووگفت الفيديو ودزيته اله، انتظرته يشوفه وما طول ثواني وفتح المحادثة وطلعلي "يكتب".. ظليت انتظر جوابه واكل بأظافري متوترة وتوترت اكثر من طول بالخمس دقايق تقريباً.. بلعت ريگي متندمة بس ما طول ندمي ثواني خصوصاً بعدما دزلي رسالة كاتب بيها..

"انا احترگ وهي ولا همها شي

وانا انتظر وهي تمدد سفرها..

يا سعود بعد غياب اسبوعين وشوي

اجتني تشاورني بگصة شعرها..

غابت وجرح الحب في خافگي حي

ينزف اذا عانگ خيالي صورها..

ليلي دموع براحتي وابله كي

وصوت الجفى للعين يدعي سهرها"

ضحكت وانتبهت لايدي ترجف من الارتباك، قريت الشعر مرتين وثلاثة وبعده يطلعلي "يكتب" كأن الشعر بي تكملة.. دقيقتين ودزلي..

"صارت حياتي بين (ويِّنك) و(إيّـي)

وأصبحت أنا مثل الغريب انتظرها..

أصدگ أعذارها وهي ما تـعـنِّي

وأضحك وهي كل الجروح استثرها..

أعطي وأنا كلي رجاء ما تخلِّي

وأشكي وأنا كلي طموح أظفرها..

أفرح إذا گالت: "أنا اليوم أدري"

وأحزن إذا گالو: "نسَتك وتذكرها؟"..

أرضى بواقعها ولو ما يهمّـني

وأتعب على راحتها لا شفت ضرها..

اچذب على نفسي وهي تچذب عليّ

وأصبر واگولن عسى اليوم ارتاح بخدرها"

تنهدت وسديت تلفوني طايرة فرح بجوابه، بقيت مبتسمة لحدما رجعنا للبيت والفرحة مبينة على وجهي خلت كل التشوفني تسألني شبيچ..

فرحت اكثر من البنات بالبيت شافوا شعري وعجبهم وخالة رسمية هم كللش هوايه مدحته وگالت لايگلي، تشكرت منهن وترخصت وصعدت لغرفتي ارتب نفسي وارتبها اكيد امير على وصول لان گال ميتأخر..

علگت الصوبة وفرشت فرشة اوف وايت بس حسيتها اوڤر عبالك معرسة ورغم هذا ما شلتها اي خليني معرسة شكو بيها.. حضرت ركن على الطاولة حلويات ونميات اشتريتهم بالطريق وصبيت العصير بدولكة كرستال اشتريتها من الشمال تجنن هي وگلاصاتها..

الركن صار حلو واللوانه تونس عفته ورحت اعلگ شموع معطرة وبدلت ملابسي، اكتشفت لونه المفضل هو الاحمر لان كلما اللبس احمر واريد اطلع لو انزل جوه يسويلي هوسة بس من اللبسه بالغرفة يبقى صافن عليَّ وعيونه تركض ورايه..

لبست فستان احمر مخصر وفتحت شعري ومكيجت مكياج ناعم واكيد حمرة حمرا، رطبت وتعطرت ورتبت نفسي وابتسمت برضا على روحي بالمراية كلشي يجنن ومثالي ومتأكدة راح يتعجب عليه وترتاح نفسيته..

طلعت على التلفزيون موسيقى هادئة لانه يستحرم وميسمع اغاني فـ طلعت شي هادئ وعفته ما علگته عود من يجي افتحها، خففت الاضوية وعلگت بس السبوت لايت وگعدت على الچرباية انتظره بگلب ينبض بجنون.. التوتر عندي يقرا ملياار وكل شوية اريد اگوم اخرب كلشي وابطل واصبر نفسي واگعد راحة، بقيت هيج على الدفو والريحة الحلوة لحدما غفيت بمكاني محاسة على روحي...

**

"عـــبق"

هستوني كملت غسل المواعين وصعدت للمخزن اكمل نقل اغراضي لغرفة تالة القديمة واجتني سلوى تسوي حركات بيدها وتعربد..

-هاا نقلچ يا الساقطة طلعچ من المخزن مووو

-اي فديته

-انچبيييي ادبسزز طايحة الحظ المنحرفة المخزن هواي چان عليج حرامات على علي الحـق مخدوع بيج وخذاچ! بس اكيييد يجيله يوم ويندم وعود اذكرج بهاليوم!

-خوش

تخبلت من شافتني باردة وجرتني من شعري ملختني، دفعتها عني متوجعة وياريتني ما دفعتها لانها نزعت شالها من راسها ولفته على رگبتي خنگتني بي خلتني ارفرف على نفس..

-بت الچلببة امچ روحهاا بيدي وعلي بتلفوون واحد انهيها انهيي وجودها ولاا حق يلحگ عليها ولا اكبرر دكتور

عيوني نطت ودموعي تصب راح مني النفس ظليت ارفس بيدي ورجلي ادفع بيها واحاول اصيح بس صوتي يطلع مبحوح وزردموي يملخني وجع..

-مووتي مووووتي وخلصيني منج موووتي

-حبيبة: يممممةةةة

فزت مخترعة على صوت حبيبة وهدتني خلتني اوگع بالگاع واگح بكل حيلي، املخ برگبتي محتاجة هوا يدخلي دا اموت وهي بقت تتجادل ويه حبيبة ويتعاركن..

-سلوى: ولج تعلين صوتج على امچ؟؟

-حبيبة: وصلت بيج مرحلللة تكتليها؟؟؟ تررردين تموتيهاااا

-سلوى: صووتج حبيبة صووتج لا يسمعون

-خليهمم يسمعووون كااافي تعبتيني كاافي الى متى تبقين هيج يممة ماا تمليين انتِ مااا تبزع روحج؟؟؟؟

-خلص خللص سكتي ما اعيدها بعد سكتيي

-بالعبااس ما اسكت ونازلة لابووي

ركضت عليها سلوى وجرت حبيبة من شعرها ترجعها، عاطت متوجعة وصمت حلگها امها وسحلتها ترجعها لغرفتها وفاتت وراهة، خفت عليها لا تضربها وشلون مچان استرجعت طاقتي وركضت وراهن شفتهن يتعاركن وسلوى تدگ على وجهها وتگول..

-حبيبة اناا امچ هيييج تسوين بيه تشكيني لابووج

-ما انطيتيني حل ثاني

-وتخلي يشمرني بالشارع؟؟؟ تعرفين جدچ ما يستقبلنيي وما يريدنيي هاي تاليتها تبيعين امج حبيبة

-حبيبة: انا تعبت من هالحال تعبت اتحمل سواد الوجه ويه مرة ابوي واخوتي وعبق تعبت يا يمة وما تحسين بيه

-بس انا امچ

-امي تجيب المصايب والاذية لروحها ولغيرها

هزت راسها سلوى وهاي اول مرة اشوف العبرة خانگتها، رجفت شفايفها ونزلت دمعتها تأشر عليَّ وگالت بكسرة..

-هاي التدافعيلها امها هجولت امج وذلتها هي الخلتج تصيرين بت دخيلة مو زوجة!

عافتها وطلعت من غرفتها ودموعها تنزل على خدودها، باوعتلي حبيبة وتنهدت تعبانة وحسيتها مُصرة تبلغ ابوها بالصار..

-حبيبة

-عبق انا اسفة.. والله اسفة

-لا تعتذرين حبيبتي انتِ مالج ذنب

-مادري شسوي تعبت والله تعبت

-الله كريم

-ما راح افوت هالسالفة وابلغ ابوي ماكدر اسكت بعد عن هالوضع

-لا حبيبة انتظري

-عبق سكتي كافي الى متى تبقين هيج؟؟

-سمعيني امچ اذا شكيتي منها راح تحاربني بأمي وعلي الحق رايح للمستشفى وشايف امي وموصيهم عليها بس حسهم يسلكون.. ما قبلوا يطلعوها لان گالو وضعها فد مرة سودة عليَّ و راح يغيرولها العلاج بس حق بنفسه ديگول ذولة مو امان ومبينين مدفوعين لان بالرشاوي كلشي يسوون فـ گال لا نستفز سلوى لا يكون عدها تواصل ويه فد مسؤول يشتغل هناك وتتصرف اسرع من عدنا

-معقولة علي الحـق كال هيج؟؟

-اي والله العظيم وحتى تعارك وياهم حتى يطلعوها وينقلها لغير مكان بس المدير تدخل وگال ممنوع حالتها سيئة ومچلبين بيها مو شلون مچان

-عجيب!

-سكتي حبيبة متت قهر واخوچ احترگ من شافني زعلانة تخيلي راد ياخذ دورية و يسوي مشكلة ويطلعها غصب عنهم بس تقي لزمه وگله راح يجيب لروحه مشاكل لازم ننطي صبر وندرسها عدل قبل لا نخطي خطوة

-معقولة امي عدها واسطة هناك وجاي يساعدها؟ زين منين جابتها وشلون؟؟

-مادري مادري

عفتها ورجعت للغرفة اباوع لاغراضي المنثرة كل مكان وارجع اباوع للمكان الخنگتني بي سلوى واختنگ بالزايد.. چنت اعرف راح تموت قهر من اشيل من المخزن وگلت لعلي الحق خليني ابقى هناك بس عاند وحلف اذا نزل وشافني بعدني بالمخزن يطيح حظي وهسة مادري احير بدراستي لو بأغراضي لو شنو..

نزلت على صوت تالة وامها جاي من الحديقة صار فترة ممتشاوفين من وره الدوام ومشتاقتلها، نزلت جوه اسلم عليهن وگعدنا سوه بالاستقبال..

-حنين: لعد وين تَـمني؟

-عبق: بغرفتها گالت تريد ترتبها

-تالة: رايحة اصعدلها اني

-حنين: لا ماما هي تنزل من تكمل گعدي

هزت راسها تالة موافقة وطبعاً هاي مو اول مرة خالة تَـمني تمنع تالة تصعد لغرفة تَـمني واحسها وره ما انتقلوا لبيت وحدهم صارت تتقيد من تجي هنا وتحاول تكون خفيفة ظل ومتفتر بالبيت براحتها الا من تَـمني تصيحلهن وما اللومها لان محد يجرع لسان سلوى الحاد..

گمت اجيبلهن ضيافة وره ما اجن خالة رسمية وشمس يگعدن وياهن، دخلت للمطبخ وطلعت عصير وكليچة مسوية شموسة وحضرتهن بصينية.. شلتها اخذها للاستقبال ودگ تلفوني البجيبي طلعته اشوف منو وابتسمت من شفته علي الحـق..

ركض وديت الضيافة وطلعت للحديقة احچي وياه شعجب متصل العصر مو من عوايده..

-عبق: الو

-يا بعد الالو والگال الالو والطلعت منه الالو ولج هلا بهالصوووووت

-شلونك

-هسة صرت زين

-ليش شبيك؟

-شغل من الفجر لحد هسة ما گعدت

-الله يساعدك

-حطي وياهة حبيبي

-عيب مو وكتها يمنا خطار

-وشصخملهم!!

-هههههه يمعود انتَ شلون بيك ويه عصبيتك

-منو يمكم

-خالة تَـمني وتالة وجايين زلم لعمو علي بالديوان

-شيخ فهد والعار اليريد يخطب حبيبة؟

-ليش تكول عنه عار علي الحـق والله الولد حباب

-وانتِ شمعرفج بي وگلتي حباب؟!!

-شكله مبين حباب

-ليش شفتي؟؟؟؟

-لاا هاي شبيك بس صورته شفتها

-وگعدتي تتمازين صورته؟؟؟؟

-لاااا اهوووو حق والله صوچي گتلك بعد شيخلصني

-اناا اعلمج قبق طالعة عينج انتِ!

-طالعة عيني لان شفت صورة ولد؟

-چا شبيهن صوري؟؟ ما تعاينيلهن وتتأملين چهرتي؟؟

-شابعة منك وحفظت حتى ملامحك

-چذابة بعلي

-والله شبيك حفظتك

-چم رمشة عندي؟؟

-علي الحـق!! شهالمبالغة ليش انتَ تعرف كم رمشة عندي؟

-اي

-شگد چذاب

-اذا الله ما يچذبني وچنت دقيق من حسبتهن عندج 142 رمشة بالعين اليسره و 157 رمشة بالعين اليمنى

-ما اصدگك لو تموت

-لا تصدگين اجي ونحسبهن سوه واثبتلج

-راح احطلهن زيت خروع حتى يكثرون واچذبك

-مو مشكلة نحسب شعر شواربچ

-ماعندي شوارب!

-متأكدة؟

-طبعاً

-هااا چا اكيد هذا شعر شاربي النغز خدي من بستيني

-اويليي عيني يا الترف

-چا غير مدوخچ

-هههههههه علي بطل سوالفك

-بعلي اگطع

-منيلك انتَ وعيونك التمساحية

-عيوني سحلتچ

-صدگ علي تذكرت خطيب اختك هم عيونه ملونة

-لا تكولين زبالة اختك!!

-تقبل الامر الواقع حبيبي اختك راح تتزوج والبارحة اجو النسوان حچو بمهرها

-ابن العار هذا كفو ياخذ اختي؟؟ بعلي ابوي مادري شون مقتنع بي

ضحكت على حرگته وغيرته على حبيبة وبالعكسس زين العابدين الرجال الي خاطبها مواصفاته فوول بشهادة عمو علي وكل الولد وحتى بشهادة علي الحـق بنفسه بس ميگدر يعترف بهالشي ويتعذب من نجيب طاري زواج حبيبة ممتقبل فكرة رجال ثاني راح يشوفها بلا حجاب ويلزم ايدها ويگعد بصفها..

-ما اسولفلك على حبيبة البارحة طبت للنسوان ترجف رجف من الخوف وبقت تتحجج بالمهر ساعة تكول اريد حجة بيت الله وساعة تكون قران وساعة تكول اريد مية مليون تخيل!!

-اي چا ليش قحط هي المية مليون لحبيبة؟؟

-حق هي بنفسها ممقتنعة بالمية مليون بس گالتها عسى ولعل يبطلون

-عبق احلفچ بداعة امچ حبيبة ليش رافضة هالزلمة؟

تنهدت تعبانة من اجابة هذا السؤال اخوان حبيبة كلهم ملاحظين نفورها وعجزوا ياخذون منها كلمة تبرد گلبهم، عمو علي مصمم على الرجال عاجبه كلش وهي كلها امل بنهوة منتصر بيوم الخطوبة الرسمي وهذا السبب ليش مدا ترفض رفض قطعي..

-عبق: هي بس.. خايفة

-من شنو؟

-مادري حق بعد هذا شعور كل البنات من ينخطبون

-يعني انتِ خايفة؟

-لا

-ها حسبالي مو لان گلتي كل البنات يخافن ونسيت انتِ زلمة

-ياااابةةةة

-هههههههههه ولج اموت عليج عگروكتي

ضحكت بصوت شوية مسموع وكتمتها من حسيت بشخص يگرصني من زندي، انداريت وچان أشوفها سلوى النذلة!

-عبق: اگلك اني اروح بعد باي وانتَ نام شوية ارتاح

سديته منه واللتفتت عليها گوة لازمة اعصابي ما انهار هنا واعيط وافضح روحي.. صار سنين متحملتها وساكتة بس بهالفترة كلش مدا اتحمل منها شي وحلم عمري أموتها بيدي..

-سلوى: ما تستحين تتمضحكين بالساحة وتعرفين بالشيخ عنده خطار؟؟؟

-عبق: صوتي ناصي وضحكت طبيعي ما كفرت

-انچبيي انچبييي لا تراددين طالعلچ لسان عبيقة رجعي لحلگج لا املصه من عرجه

مدت ايدها لحلگي تريد تجر لساني ودفعتها عني، تخبلتت من حركتي ورادت تهجم وتوقفنا ثنينا من فزينا على صوت الباب تنرگع ويدخلون عمو ناصر ورفل وليلة مدمايات تدمي..

گلبي وگف وركضت عليهن بس ما خلاني حتى اللمسهن ودفعني وگعني على الصبة، گمت بسرعة خايفة وركضت وراهم ما انطانه مجال لا اني ولا سلوى نحجي شي ودخلهن للديوان بهذا الشكل!! مفرعات بدون حجاب وبملابسهن المدماية..

-سلوى: صخام بعيني شصاير

عفتها وركضت ادخل جوه وفتت للاستقبال اتسمع منا، شفت خالة تَـمني وتالة وخالة رسمية وشمس مخبوصات ويتسائلن شكو..

-رسمية: الله يستر دخيلك يا داحي الباب يا علي

خنس الكل نتسمع نريد نعرف شديصير وانصدمنا كلناا من سمعنا عمو ناصر يحچي على شرف بناته ويگول بالضبط..

-ناصر: بناتي مو شريفات وشاربيي مو عليّ اذا ما غسلت عااري

گب الديوان والزلم الموجودين جوه علت اصواتهم، ما طقت ابقى واكفة هنا راح اتخببل هرولت للمدخل اباوع من فتحة الباب الصغيرة اكدر اشوف خيالاتهم تتحرك وجسد ابا الحسن علي يتقرب من البنات ويصيح..

-عميييي شجاااي تسوي بناتك رمزز للعفة والشررف لا تنززل من نفسك بهالحچييي

-ناصر: وووخرر انتَ ماالك غرررض اجيت بس انطي علمم لاخووي خاطر من يسألني وين بناااتك واگله مدفوناات جوه التراب يعررف ليييش

لطمت على وجهي منهارة فتّحت الباب فتحة بسيطة كلش گلبي يريد يوگف، اشوف ليلة ورفل واكعات بالكاع يبچن ونزل ابا الحسن يلبس شماغه لـ ليلة وعلي السور ظل يدور شي يستر بي رفل تالي نزع دشداشته وحطها على راسها وهو بقى بالفانيلة الداخلية والسروال..

دفعهم ناصر عن بناته وشال حزامه يريد يضرب ظهر ليلة وصارت الضربة بـ ابا الحسن حضنها حضن وضمها بجسمه يحميها ويصيح بعمه ويدفع بي عنهن..

-ناصر: انتَ لووو تعرفها شسووت بعلي ما تعاين لوجهها هال****

-شيخ علي: ناااااصر بالعباااس ابو فاضل اذا ما....

-ناصر: لا تحلف!! خوية لا تحلف خاطر ما اكسر حلفانك! بناتي كسرن وجهي ولو بنيتك مسويه سوايتهن بالعباس التحلف بي ما تخليها واكفة على طولها وتدفنها جوه رجليك!!

رده عمو علي والزلم والولد تخبلوا ظلوا يحچون وياه وهو قافل اجه وحط السچينة على رگبة رفل وشخطها شخط گامت الدماية تطلع منها والبنية لزمت رگبتها يمممة روحي راحت وياهة انهاريت اضرب على رجلي ووجهي وليلة متسودنة تصيح وتلزم اختها وتبجي وتلطم على راسها..

-ابا الحسن علي: تخبلتتتتتتتتت ولك تخبلتتتتتتتتتت انتَ بالعبااس لو صارلهن شبيي ما اخلييك عااايش

تقدم ناصر يريد يكمل عليها ودفعه ابا الحسن وگعة بالگاع وهجم عليه يريد يكتل عمه، شيخ علي رج الديوان رج بصياحه والزلم يهدأون بي وعلي السور لزم رفل يشوف اذا بيها شي لو لا بس الحمدلله مبين شخط براني مو شي عميق..

-شيخ علي: ووولك هيييد مخبببلل هيييد عررررضك ذني فشلتناا ونزلتتت روسنااا بعملتك ياااا عار ابن العااارية

-ناصر: تريدنييي اظل ديوووث نايم على اذاني والزلام تطب وتطلع لبيتييييي

گام عمو علي يدگ على راسه فوگ عگاله وعمو ناصر صابه انهيار لزم ليلة گطعها تگطععع وماكو واحد گدر يوكفه حتى ابا الحسن ظل يتمالخ وياه وسور بيناتهم يفك ليلة من ايد ابوها بس ماعرف منين اجت لناصر هاي القوة والبنية تروح وتجي بيده ميقبل يفلتها ولا يسمح لاحد ياخذها منه..

المكان صار عبارة عن ناار جهنم ناس تدفع بناس وعمو علي تخربط والزلم يتصايحون والبنات بيناتهم انداسن الف دوسة وابوهن مُصر ياخذهن يذبحهن وحلف بالاربطعش معصوم اليوم ميبقن عايشات اذا ما انثبتله شرفهن..

-رفل: بالعبااس ابو فاضل يا عمي احنه بريئات وشريفات وحگ خدر زينب وعفة الزهراء مااعدنا شي

-ليلة: وراس امي الماعندي اعز منها ورااسك يا بوية ماا كاضني زلمة بحياتي كلهاا والصار كله سوء تفاهم اكدر اشرحلك كلشي والله العلي العظيم اگد....

ما كملت حچايتها وضربها ابوها على حلگها وشال السچينة يريد يحطها ببطنها يموتها بمكانها، هااج الديوان وراج من جديد وقامت القيامة جوه واني كاعدة هنا اللوب ودموعي تجري ماعرف شسوي شنو بيدي شلوون اساعدهن.. من بعد العياط والخوف العشناه گال واحد من الزلم الواگفين رغم هو معليه بالسالفة بس شالته الغيرة عليهن وصاح..

-بنياتك جاي يحلفن ما مسويات شي ابو عباس لاا تظلم بختك وبختهن

-ناصر: كلللل البنات يحلفن ما مسويات شييي وعلي اخوتهن لو يعرفوون ما يخلون شمس باجر تطلع عليهنن گوووومنننن ولچنننن گووومن

-الرجال: خاب شني تذبح بنيات بريئات!! يا خوي كلنا نعرف الشرف غالي وما ينسكت عنه بس ما يصير تدفنهن بدون ذنب شون لو چانن صدگ بريئات!!

هز راسه الرجال الثاني الواكف وكمل..

-ياخوي يا مكثر الطبيبات اخذهن وتأكد بنفسك وارتاح ولا تظل تاكل بروحك بعدين

-ناصر: وانا اصدگ بطبيبات؟؟؟ كلهننن يدافعن على البايعااتت شرفهن عبنهن يدرن نهايتهن شني! بعلي ما اسكت ولا اعديهاا اليوم ما يظلم الليل وذن ال**** يبقن عايشاات

-رفل: بووية بيمن احلفلك بييمن اقسملك جيب القران احلف عليه مااعدنا شي ويه احد ماكو زلمة شايفنا ولاا طاب لبيتنا شسووووي وتصدگني شسوووووي

تلطم على وجهها وتبجي مفرفحة صوتها مبحوح وليلة زحفت شوية عن ابوها تخاف لا يرجع يضربها.. شعرها مهووس والدم ينزل من كل مكان منهن، دشداشة رفل مشگوگ ردنها وليلة صدرها ممزوگ وباقية تضم بي بشماغ ابا الحسن الراح يموت بمكانه..

-الرجال: شيخ علي ثبتوا شرف بنياتكم ولدك يسدون عين الشمس ما معقول تخلي اخوك يتهور ويغسل عاره بدون لا يفتهم شي وانتَ بيدك تثبت شرفكم وترجع كرامتكم!

-ناصر: ماكووو موو ذنبهم ياخذوون بنيات مو شريفاات ويلوثوون رواحهم ولد شيخ علي ينحلف براسهم ماا يستاهلون يتدنس شرفهم!

-شيخ علي: انچببب!!!

صاح بي صوت كل الحضور سكتوا وصفنوا على عمو علي وناصر بنفسه سكت مصدوم.. بلعت ريگي وعگدت ربطتي الحاطتها على چتفي ونذرت لام البنين لو مر اليوم على خير اسوي غده بأسمها..

بينما اني واگفة اربط وادعي وانخي فزيت وابتعدت من الباب مخترعة من دخل الامـير علي من باب المدخل هستوه رجع من بغداد واگف مستغرب وعاگد حاجبه يتسائل على هالهوسة..

-الامـير علي: منو يمنا؟

-عبق: اءء.. عمو.. عمو ناصر...

الجملة متطلع من حلگي مختنگة وصدري يوجعني كلش، ما طول زايد وسوالي بيده وخري عن الباب ودخل للديوان يشوف شكو بس ما وخرت وبقيت اباوع منا وضميت روحي عدل..

-الامـير علي: السلام عليكم

-الرجال: اجيت والله جابك يالامير ترضى بهذا الوضع؟؟ ترضى بشرفكم ينهان وكرامتكم تنداس؟؟

-الامـير علي: شصاير؟؟ عمي شبيهن البنيات؟ شنو هالحاااال؟؟؟

بچت رفل اكثر من شافته وهزت راسها ميتة من القهر، تخببل الامير من عمو ناصر طعن بشرف بناته للمرة المية واخذهن كدام الامير شالهن يطلع بيهن لمادري وين وعمو علي صاح..

-بالعبااس يا ناصر لو طلعت رجلييك احشهنن حششش وبعد لاا انا اخووي ولا اعرفك!!

-ناصر: وشرفي الـ...

-شيخ علي: چلللمة ما اسمممع منك!! اسكتتت لك اسكتت اناا اثبتلك شررفهن وانعل والدييه اليحجي على بنياتنه!!... علي السور!!

-علي السور: گول بوية

-شيخ علي: روح جيب السيد!

رجع ناصر يريد يحجي معترض وسكته شيخ علي من رفع ايده وگال بنبرة عالية ناهي الحديث..

-شيخ علي: انتَ مو تريد تثبت شرفهن؟ وانا اليوم مصمم اثبت شرفنا كلناا! ابا الحسن علي راح تعقد على ليلة! والامير تعقد على رفل!

شهگن ليلة ورفل خايفات ووحدة حضنت الثانية يبچن بصوت مسموع، جحظ عيونه الامير راح تطلع من وجهه وظل يباوع لابوه وللبنات ميعرف شيسوي.. بعده بملابس الشغل ووجهه احممر والتعب مبين عليه وتلگاه هيج خبر!

-الامـير علي: بوية انا متزوج لو...

ما خلوا يكمل جملته وصاح واحد من الزلم الكاعدين..

-افاااا يالامير واذا متزوج؟؟ هذا شررف هذا مووت وحيااة هاي كرامتكم! ياهو اهمم؟؟

-الامـير علي: حجي خليني اكمل چلامي وعلق! انا متزوج وعندي باقي اخوتي عزابية يگدر يجي واحد منهم يعقد على بت عمي وتفض هالسالفة

-واحنه ننتظر اخوتك يرجعون؟ تشوف هالوضع يستحمل تأخير؟ بس بعد اذا انتَ خايف من شي هذا بحث اخر!

كلام، اسلوب، نبرة كلها تلعب النفس! اني البنية التگول سلوى عني كلشي ما افتهم وافتهمت وانتبهت لاصابع الاتهام الوجهوها عليه وتشكيهم الواضح والصريح برجولته! كأنهم ديگولون متقبل تعقد عليها لانك خايف من شي وشيخ علي فقدد من كلامهم، خزر الامير خزررة ونتر بي..

-راح تعقد عليها امير وتثبت شرف بت عمك! اخوتك مو هناا ببغداد والوضع ما يتحمل تأجيل!

-ناصر: خليي شيخ خلييي لا تضغط عليه وتخجل وليدك

-الرجال: ابو عباس شني خوية انتَ مو تريد اثبات شرف هاا اهاا راح يثبت شرفك شيخ العشيرة من بعد ابوه الامـير علي

صدمة، خوف، رهبة ومشاعر مختلطة عشتها رغم اني معليه بكل هالوضع بس دا اتخيل شلون لو عرفت تَـمني؟ شلون لو اكتشفت الوضع؟ وشلون لو علي الحـق چان داخل من هالباب بدال الامير واضطر هو يتمم هالشي ويتزوج رفل!

طلعوا البنات من الديوان للاستقبال وهرولت عليهن، حضنتهن ثنينهن يبچن واني ابچي وياهن وانضمت النا حبيبة ميتة خوف والدموع تارسة وجهه..

محد من الباقيات تقربت منهن حتى خالة رسمية التعشقهن بس اشوف صدمتها والدموع الجامدة بعيونها خلتها تفصل عن الكل لغير عالم ظلت بس تباوع بالوجوه ومبحلقة عيونها ممصدگة الوضع الهمه بي والفضيحة الصارت..

اشرتلنا سلوى ناخذهن نغسللهن واستمر صياح ابوهن من الديوان ما قابل شلون غابن عن عينه، دخلت ليلة للحمام اغسل الدم من وجهها وحبيبة وابرار اخذن رفل..

-ليلة: عبق اريد اموت

-اششش ليلة تخبلتي انتِ؟؟ شسويتي بنفسج متگوليلي شسويتي

-ماريد اتزوج ماريد اخاف

-لا تخافين غبية ابا الحسن يموت عليج وراح يكون وياچ بكلشي

-ماريد مااريد

-انچبيي ليلة كاافي عاد! يعني تموتين غسل عار احسن؟؟ غبية مطيية انتِ!

-هدديني وخري

دفعتني وطلعت من الحمام تركض تريد تطلع من باب المطبخ ولزمتها، عصرت زندها بيدي ونترت بيها اهمس همس اخاف يسمعونا..

-وين مووليه لا تخبليني ويننن

-اشرد ما ابقى هنا اشرررد ما اتحمل ابقى هناا

-سلوى: ليش تشردين؟!

انتفضنا ثنينا مخترعات على صوت سلوى دخلت للمطبخ ورانه، ما عدنا قوة نجاوبها لان بطني خبطت على صوت علي السور يصيح وين البنات اجه السيد..

-ليلة: مارووح ماااروح ماااريد

-سلوى: من شني خايفة ولج؟؟ خايفة تنكشف صياعتچ مو؟؟

-ليلة: انچبيييي انتِ الصاييعة

-سلوى: اياا بت الزباالة هم ساقطة ولاگفيچ وهم بعدج ما ترضين تتوبين؟؟

-ليلة: عببق خليها تولي من وجههي هاي الحية عببببق

-سلوى: ادعي من الله كوون تنكشفين يا ليلة ويذبحوچ ونذرر عليّ ارگص على گبرچ للصبح!

سممتنا وعافتنا وراحت خلت ليلة تموت وتعض على اصابعها وتبچي، اجت خالة رسمية وسحلتها غصب عنها جريناها جر وهي تتوسل وتبچي متريد بس لا حياة لمن تنادي لان بده السيد يعقد لـ رفل على الامير وخالة تَـمني انجنت..

-حنين: لعد وتَـمني؟؟؟ تَـمني شلوون شدتسوون انتو!!!

-رسمية: ام تالة هاي قضية شرف البت تنذبح لو ما عقد عليها الامير!

-حنين: وعادي بنت اختي تنذبح من تعرف بزوجها تزوج عليها؟؟ عادي؟؟؟؟

مسحت دموعها حبيبة وجرتها على جهة تحجي وياهة بصوت مكسور..

-حبيبة: خالة اهدي فدوة لعينج والله گلبنا ممرود حگكم وحگ تَـمني ما ترضى بس هالقضايا اكبر مني ومنج ووصلت للزلم يعني تحولت لسالفة عشاير ولو الامير ما عقد عليها هم هي تروح بيها وهم هو تنمس رجولته

-حنين: لااا تقنعيني حبيبة لااا تقنعيني جيبووا أي واحد من اخوته يعقد عليها!! علي السور مو موجود؟؟ هو عزابي هو يعقد عليها وتفض هالسالفة شمعنى الا امير!

-رسمية: سور اصغر من رفل ونعرف عقله ما يتقبل هيج شي ويفشلنا ويه الوادم والبت تروح من جردنا! ام تالة اغديلج فدوة تفهمي الجاي يصير..

سكتنا من انتهى عقد رفل وبدوا بـ ليلة ونسمع ناصر يصيح من الديوان..

-ناصر: شيخ عليي احنه اتفقناا بشررط اروح وياهم للغرفة غير هالشي مااا ارضى!

-الامـير علي: انتَ تسودددنت كااافي عااد طلعتها من ماعوونهاا وبزعتنااا كااااافي

سكته امير لصمه وثواني واجانه للاستقبال وجهه ميتفسر چان احمر بس هسة صاير ازرررگ وعروگ گصته ناطة وبيده كلينسه متروسه دم من خشمه عرفنا ضغطه فول وبده خشمه ينزف..

-رسمية: رجع كرامتنا يمة اموري بت عمك هاي

ما سمع لامه وطلع من الاستقبال للصالة وخالة رسمية جرت رفل تاخذها اله، رجليه صارت تطگ وحدة بالثانية واباوع لـ حبيبة التفرك بيدها ودموعها تنزل..

اباوع لـ تالة صافنة وفاتحة عيونها كلمة ما حچت ووجهها صاير اصفر مال وحدة مهبوطة، ما قبلت خالة تَـمني تبقى بالاستقبال وراحت وراهم للصالة واني وحبيبة طلعنا وراهة بس ملحگنا عليهم لانهم دخلوا للغرفة وخالة رسمية وگفت بالباب مبتسمة..

-حنين: واضح القضية قضية شرف ام علي كلللش واضح على وجهچ انتِ مقهورة وزعلانة لانه تزوج الثانية!

دتريد تجاوبها خالة رسمية وطلعوا ابا الحسن يجر بـ ليلة وراه من الاستقبال، وجه ليلة مينعرفله شنو بس اگدر اگول البنية راح تموت! لو يذبحوها قطرة دم ميلگون بجسمها.. جرها يصعد بيها فوگ ودفعته عنها تصرخ وتبچي بخبال..

-هدددني هددددني مااررريد

-ابا الحسن علي: ليلة انا واصلة وياااي لهناا تمشين برضاتچ لو اخذج غصب!!

-ليلة: عووفني بداعة امك مااريد خليهم يذبحوني خليهمم

تخبلت تبجي وترجف مثل السعفة من فوك ليجوه خفنه عليها لا تنجلط لو يصيرلها شي بس ابا الحسن ما انطانه مجال وجرها جر يتعارك وياهة وصعدها فوگ..

اگدر اصنف اليوم كـ اسوء يوم بحياتي! سامعة بالعادات العشائرية واعرفهن كلش زين وعمو علي داائماً يذكر فلان ذبح بنته غسل عار وفلان نهى على فلانة وفلان جاب شيوخ والدنيا كلها حتى يثبتون شرف بنية بس ولا مرة شفنه هالشي وعشناه ببيتنا! ماكو مرة مرينا بهيج تجربة وهاي اول مرة بحياتي كلها اعيش هيج موقف ويه صديقتي واغلى من روحي "ليلة" واشوفهم يسحلوها مثل الحيوان ويخيروها لو تتزوجين لو تنذبحين!

عشر دقايق وطلع الامير من الغرفة ومينسمع غير صوت بچي رفل عالي جاي من جوه، ركضت سدت الباب عليها وقفلتها وهو غمض عيونه يذب حسرة عالية ومشى يعبرنا بدون لا يحجي شي.. بقت عيون الكل تلحگه لحدما رجع دخل للديوان وكلنا حطينا اذننا بالباب نتسمع..

-الامـير علي: بنيتك شريفة عمي

-ناصر: اريد اشوف بعيني!

وهنا ما تحمل الامير يكمل وياه بنبرة هادئة وزمخ بي يصيح..

-الامـير علي: شنيي زعطوط گدامك؟؟ جاي اگلك البت شررريفة وبطل تتهم بناااتك اتهامات بااطلة وتنزل من قيمتك وقيمتهن!!

-ناصر: ليش ما تشـ...

-الامـير علي: بدوون لا تكمل اجيت بنفسي وگتلك البت شرريفة عجبك لو لاا ما يهمني المهم اناا عرفت وتأكدت وبعد الكل يطلع منها!

-الرجال: هذا هو عمي كفو منك تتمهل ان شاء الله ويوم الولد الصالح

عافهم وطلع من الديوان بعدما باركوله ورجع للاستقبال وعاد نفس الصار قبل شوية وعبرنا يتوجه للصالة والكل طلع وراه، راح للدرج يريد يصعد فوگ وصاحت خالة تَـمني من مكانها..

-راح اخذ تَـمني!

جمدت رجليه على الدرج ثواني وكمل يصعد بدون لا يجاوبها، ركضت تصعد وراه وصاحت بصوت اعلى..

-متستحق تَـمني تعيش ويه ضرة ويحترگ گلبها راح اخذهاا!

عبرت منه وركضت تصعد فوگ قبله وبنفس اللحظة نزل ابا الحسن جوه حاله مگلوب ويمسح على وجهه معصب، دخل للديوان واثبت للكل شرف ليلة وطلع من البيت كله...

**

"تَـمني"

فزيت من النوم على باب غرفتي تنفتح بهمجية واخترعت من شفتها خالتي دموعها بعينها وترجف..

-گومي تَـمني گووومي نطلع منا

-تَـمني: شصاير خالة؟؟ تالة بيها شي؟!؟

-گووومي ماما گووومي لا تبقين هناا ويحترگ گلبج كوومي

گمت وياهة مفزوعة ممفتهمة شكو، راحت للكنتور مالتي تطلع منه ملابسي واني جافلة وصافنة.. دخل الامير للغرفة وابتسمت فرحانة من شفته بس غابت ابتسامتي بسرعة من نتر بخالتي..

-ام تالة لا تصعبين الموضوع اكثر وخليني اتفاهم وياهة!

-حنين: تحلمممم اعوفلك هالبنية ليييش شعايزها وهيج تتبهذل وينلعب بحالها؟؟؟

-تَـمني: شصاير مدا افتهم شبيكمم

-الامـير علي: ام تالة لاا تشجعين على خراب بيتها خليني اتفاهم وياها ونحل هالسالفة بالحسنى

-حنين: يا حسنى يمعووود انتَ تزوووجت عليهااا وتممت زواجك! انت جبت على راسهاا ضرررة

شهگت وكأن سطل مي بارد ووگعوا على راسي، باوعت للامير بعيون تايهة بعيون تتوسل يكذب كلامها بس ما طلع منه شي غير عيطة عاطها بخالتي واشر على الباب يگول..

-من رخصتج ام تالة طلعييي بره وخليني اتفاهم ويه مررتي

اعترضت خالة بالبداية وظلت تأشرلي اروح وياهة واني بدون وعي مشيت الها اريد اللمسها اريد اتأكد اني دا احلم لو حقيقة بس ما سمحلي امير وجرني من ايدي بقوة ورجعني للغرفة وطلع خالتي بره وقفل الباب علينا..

عصرت چفوف ايدي بين بعض وبلعت ريگي ناشف كلش، عضيت على لساني متوترة وماعرف شسوي ماعرف بعدني احسني بحلم والرؤيا مشوشة عندي..

-تزوجت

غمض عيونه وذب حسرة عالية وما احتاج يسوي اكثر من هالحركة حتى افتهم واعرف اني مو بحلم اني بواقع، خالتي جانت موجودة بغرفتي والامير رجع من بغداد وجابلي خبر زواجه صوغة..

-تَـمني گعدي خليني افهمچ الصار

غمضت عيوني ونزلن دموعي دمعتين دمعتين سوه، جريت نفس اسيطر على نفسي بس ماكدرت، ماكدرت واحس حيلي انهد وگعت بالكاع ضامة حلكي بأيدي و ابچي بالسكتة.. ركض عليَّ امير يگعد على ركباته وجرني لحضنه يبوس براسي ويحجي سريع يبرر..

-بالعباس غصب عني انحطيت بموقف ما اتمناه لبشر.. البت تموت تَـمني لو ما عقدت عليها تنذبح وعلي تنذبح

شهگت بين دموعي منهارة وگلبي گطعني من الوجع حسيت روحي تريد تطلع وكمشت بياخة تشيرته اريد اثبت نفسي بالكاع اريد اسيطر على توازني وما اوگع على وجهي چفي گدامه..

-ليش امير.. ليش

-والحسين الشهيد ما رايد ولا هاوي ومن شفت رفل بهالحال مادري شصـ...

نزيت من سمعت طاري اسمها، هديت قميصه وباوعت لوجهه مصدوومة..

-رفل؟؟؟ رفل الي تزوجتها؟؟؟ جاوووبني رررررفل؟؟؟؟

-تَـمني...

-وخرر عني وخررررر عنيييي لاا تلمسنيي

دفعته عني ارجف ومعدتي تگلب احس اريد اتقيء امعائي، لعبت نفسي ماريد ابقى هنا كمت بسرعة من مكاني طلعت جنطة من الكنتور وصرت اترس بيها ملابسي وابچي محترگة حرگ..

ماقبل وجر الجنطة من ايدي متخبل يحجي ويايه وماعرف شديكول اذني صفرت والنااار شابة بضلوعي احس دمي يغلي وراح ينفجر راسي ويطشر دماغي كل مكان.. راح اموت والله راح اموت..

-تَـمني سمعينيي خليني اشرررحلج رجعي لووعيچ وسمعي شنو جااي اگوول

-طلگني

-تَـمنيييييي

-ليش تزوجتهاااا لييييش الا ررررفل ليييييييييش

-لان چان انذبحت!! بت عمي واختيي الربت وياي چااان ذبحووها گدام عيني وعينج وعينن الكل ودفنوهاا بترابة جووه الكاع حتى گبررر ما الها!! تَـمني هاي السالفة ما تدرررين شكد خذت بناات بعمر الوررد من عدنا بنات بريئات شريفات ما چان الهن سند كفوو ولساان ينصفهنن ما چان اكوو زلممة وگف هالمهززلة ورضى تنذبح كدام عينه بحجة غسل العاار!! مسووين روحهم فدشي ومااخذين دور رب العالمين ويحكموون بكيفهم!!

دفعته عني روحي رايحة ماكدر حتى اناقش كلشي بيه يرجف ودموعي حجبت عني الرؤيا، دخت وگعدت بالكاع حيلي خاني وكعد هو بصفي يلزم ايدي ويكول..

-تَـمني انتِ ما شايفة ولا رابية بمجتمع يذبحون بنيتهم بدم بارد لو غلطت! ما شايفة تلال المخطئات چمم بت بـ بت اندفنت هناك بددم بارد وراحت بين الرجلين بجريمة شرف حتى الدولة ما تدخل! چم بت خسرت شبابها بذنب هي ما مسويته وهذا الصار ويه رفل وليلة! ابوهن حلف يذبحهن لو ما انثبتله شرفهن..

ضميت وجهي بيدي وبچيت بصررريخ ممرودة من استوعبت هو تمم الموضوع وخلص! رفل صارت مرته وزواجهم حقيقي مية بالمية ومابي خط رجعة.. بچيت اكثر من تخيلت بعد كم يوم تجي وتگول هي حامل! وحامل من منو؟؟ منه! منه هو!!

گمت من مكاني افوور ومشتعلة ماكو شي ديبرد ناري احس برگبتي مذبوحة وجلدي مصلوخ يچويني، رجعت على جنطتي اعبيها وبچيت واني اگول..

-سويت العليك امير.. شكراً لانك چنت احسن بشر يدخل لحياتي بس بعد ماكدر.. ماكدر اتحمل هالشي ماكدر راح اموت طلگني.. ماريد اكمل وياك طلگـ...

لزمني من شفايفي يسد حلگي غصب وجرني يطبگ ظهري على بطنه، غمضت عيوني احرر دموعي الباقية من حاوطني بأيده بقوة ونتر بيني وبينه يرجف..

-وراس ابوي وداعة امي وراس اخوتي الثمانية وانا تاسعه ما جستها ماا جستها ولا گربت منها يا تَـمني وراسچ يا نبض گلبي مثل ما عقدت عليها وطبيت وياهة الغرفة طلگتها وطلعت منها وحگ علي والسماني علي ما مچذب بچلمة وحدة واذا تردين نزلي تأكدي منها بنفسچ!

لزمت ايده اوخرها مني اريد اروح بس ما خلاني ودفعني للحايط على وضعني ماكدر اشوفه وجهي على الحايط وهو ورايه حاضني وكمل يحجي..

-ما شفتها بعيوني.. ما شافتها عيني غير اخت وهي ما تشوفني غير اخو.. اول ما طبيت عليها الغرفة چنت ناوي ابلغها بهالشي واطلع بس سبقتني و طاحت على رجلي تتوسل بيه ما اگرب منها عبني اخوها وما راح تتحمل لو صار شي بيناتنا..

-كذاب

-وداعة عيونج العاشگهن وروحه لعزيز گلبي يا امنية مااا اشوف بعيوني غيرج وما عشگت ولا راح اعشگ غيرج.. لا ترحين وتزيدين ضيمي ضيم وتذبحيني بمچاني

باس خدي كم مرة بلوعة ويبوس راسي ويحچي بأذني متأذي..

-اول مرة اطلب منچ توگفين وياي وما تصيرين انتِ والزمان عليّ.. محتاجچ تَـمني محتااج اتنفس لا ترحين

رخيت اكتافي تعبانة واحس عقلي مدا يخليني افكر بشي غير رفل تزوجت الامير، رفل دخلت وياه لغرفة، يمكن ديكذب عليَّ، يمكن كلامه بس حتى يهدأني وميخليني اروح، يمكن ويمكن ويمكن ويمكن ويمكن... يمكن راح اموت هسة من نار الغيرة الاكلت كل جزء من جسمي!!

اللتفتت عليه واني بين ايده تواجهنا وصار ظهري على الحايط، زفرت نفس وحركت راسي بـ "لا" ماعرف شنو احجي ماكو كلمة تسعف او تعبر عني هسة..

-امير انتَ تزوجت

-وطلگت بنفس الساعة

-لمستها

-لا وعلي لا والله العلي العظيم ما رفعت عيني لوجهها برغبة ولا راح يجي هاليوم

-لا تكذب عليَّ امير فدوة گلبي راح يوگف واموت والقران

-يومي گبل يومچ ابوي لا تحرگين افادي.. يا بت انا احبچ والعباس احبچ وگلبي يفز على طاري اسمچ وجاي اسوي المستحيل خاطر اثبتلچ بس روحچ مو راضية تصدگني

-تعبت امير.. تعبت اريد ارتاح

-ارتاحي يمي وبگلبي.. اسندچ بروحي يا روحي والله اسندچ بروحي

-تعبت مني دتأذي نفسك وصحتك دتجرح كبريائك وتغشم نفسك وتغمض عيونك على عاداتكم لخاطري امير

-كلشي يروحلج فدوة يا بعد امير

-انتَ ليش تحبني هالكد لييش

-اثار سحر المحبة حبيبي

-هههههه

-ضحكي وتونسي وانعل ابو اليزعلچ وانا بسدچ

دگ انوفنا ويه بعض وغمض عيونه، توترت وگلبي صعدت دگاته وحسيت شكو حزن وقلق وتعاسة عشتها قبل شوية تلاشت وانسحبت مني.. تنهدت وغمضت عيوني اسمح لنفسي ارتاح وما ابقى افكر افكار مظلمة تسود حياتي..

مسحت شكو سلبية من دماغي واستشعرت ريحة الغرفة الحلوة ودفو جسم الامير المقابيلي، شهگت بدون صوت مبتسمة وبلعت ريگ متوترة من مشاني متوجه بيه للنقطة الراح تبدي بيها حياتنا الجديدة ولاول مرة سمحت لروحي اعيش هاللحظة و.........

دگات قلب متسارعة وانفاس مضطربة، حرارة اشتياق وخوفة عشق، روح سعيدة وضحكات عفوية تداخلت ويه بعض، فرحة غامرة حاوطتنا لا تخلو من همسات الامان يطمني حياتنا راح تكون اجمل وحبه الي راح يكبر يوم بعد يوم ومينتهي بيوم..

-احبچ اليوم وباچر وعگبة وكل يوم.. احبچ يا امنية روحي الاخيراً حققتها

ضحكت خجلانة ودفعته من كتفه اضم وجهي عنه، حس عليَّ وضحك ينطيني مساحة شخصية استوعب.. گام من يمي واخذ منشفة وفات يسبح انتبهت للبورگ بعكوسه ممنظفه عدل مثل كل مرة واضح عليه اللهفة والاشتياق..

نص ساعة وطلع من الحمام، درت وجهي حتى يبدل براحته واسمعه يسولف بجمال الغرفة..

-تدرين وانا مخبوص ودايخ من الصار بس انتبهت على الغرفة وترتيبها من طبيت وحلفت ما اطلع الا ادشنها

-ههههههه اميير

-يا بعده وبعد عشيرته

-الا اگول لعشيرتك بعتهم علمود مرة

احچي وياه مغمضة ما فتحت عيوني، ضحك على كلامي وحسيت بي يبوس راسي وخدودي وهم بقيت مغمضة وما قبلت افتحهن الا من حسيته يفتح باب الغرفة.. فزيت من مكاني وجريت الروب مني لبسته بسرعة وگمت من الچرباية اركض..

-وين وين وين رايح وين

عبرت من بين ايده وسديت الباب بظهري اطبگها علينا وكتفت ايدي ضايجة..

-هههه شبيچ

-وين رايح

-اغراضي بقن جوه جبتلج شي وياي من بغداد

-ماريد

-چا خوش خليني انطيها لـ حبيبة

-اميييير

-لا تمطين اسمي ولج مو راحت روحي

-لا تنزل جوه لا تروح حباب

-چا شون اغراضي يبقن جوه

-اي خيولن

-خو چا انطيني دقايق انزل اشوف شصار ويه المصيبة اللفت على روسنا

-لا لا خليها بعدين.. بعدين بعدين خليها بعدين

دفعته للغرفة ارجعه ميتة خوف لا يصير شي جديد وهم يورطوه بيها يمكن هالمرة يجيبوله بت شيخ محمد وتعال يا الامير اعقد عليها لو بيدي اضمه واحطه بالغرفة واقفل عليه ما اخلي يطلع بعد.. من شفته مُصر يريد ينزل حتى بس يجيب جنطته ويراويني الهدية دفعته ومادري شبيه تخبلت لزمته بسته وهو تحمس زايد و........

**

"لـــيلة"

گاعدة بغرفته وعلى فراشه واعاين لدشداشته الچان لابسها معلگة على التعلاگة ودموعي تجري.. لملمت نفسي باللحاف ارجف وگلبي يوجعني، يوجعني وجسمي كله تعبان من الكتل ومن العراك التعاركته ويه ابا الحسن علي وعلى العياط والتهديد والدموع الصرفتهن وياه بس شنو الفايدة؟ وشنو تغير؟ انا هسة مرته وكلشي انتهى...

طلع من الغرفة بعركة اعترف تجاوزت عليه وصحت بوجهه وهددته اذا لمسني يحلم اعاين لوجهه بعد بس بقى مُصر يثبت برائتي وثبتها.. ثبتها وصدمني! ومن صدمتي عطت وملخت روحي تملخ وطردته من غرفته بخبال..

-مااريد اشووفك بعدد اكرررهكك

-طبي جووه لا تفضحيناا طبيي تستري

-مااا اطب والاا اطلعع كدام الكللل وافششلك

دفعني للغرفة وطبگ الباب وراه وقفلها، خبلني بالزايد وخلاني افرفح اشيل روحي وارگعها انا منا مصدومة من الصار الظهر وانصدمت عقدولي عليه بهالسرعة وانصدمت زايد من اكتشفت انا مابيه شي!