تحميل رواية «الامارة» PDF

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

شحلاتك من تمر على البال وكلها تصيح بالك وين.. ♥️

━━━━━━ ♛ ━━━━━━

"حــبيبة"

چتفي راح من گرصات امي راح تنجلط ومرة ابوي وجهها اصفر ومغشية روحها بالشيلة وفراقد تعض بأصبعها وتشمر بيدها عليَّ وتگول..

-فضحتينا يمعزااية فضحتيناا

غمضت عيوني طالعة روحي منتظرة مفعول الابرة يمشي بيه، غلست عنهن اريد انسى ابوي واخوتي ومنتصر وحاكم واگفين بره اريد انسى انا انفضحت وانشهرت وخليني مركزة بالوجع اشرفلي..

كضت ايدي حور تواسيني على رزالات امي ما سكت لسانها وهي تغرد..

-سلوى: ماعدها مستحه مااكو الحياء نقطة وشلتيها من گصتچ موو يمة؟؟ مو يا بت ابوچ موو؟؟

-حبيبة: يمة مابيه احجي

-سلوى: شتحجين ولج شتحجين ابوج واخوتچ وجههم هاگدوته صار گدام الزلم عمتت عينج يا سلوى بنيتچ فضحتج وخزتج

-حور: خالة انتِ لو شفتي حالتها متحچين هالحچي والله متنا خوف عليها واخوية مقبل يرجعها للبيت من شافها هيج تخربطت

لطمت امي رسمية على رجلها وفراقد رجعت تشمر بيدها عليّ وعلى حور هالمرة، اشرت لـ حور وهمستلها "ميخالف" خاطر ما تزعل بس البت زعلت واخذت على خاطرها هي شعليها فراقد استلمتها..

ضجت وگمت وره ما حسيت روحي احسن ولفتني امي بعباتها وتگرص بيدي وانا منزلة راسي مالي عين اعاين لوجوه الزلم الواگفين.. طلعت منزلة راسي ورفعته ويه صوت اخر بشر متوقعة اشوفه..

-غفار: عمييي ليش تچذبون عليّ ليييش چا مو هاي حبيبة طلعت مرريضة

نزيت انا وحور من سفطه الامير على الحايط مفلحم من العصبية، كضه من ياخته مخنزر ونتر بي..

-گلناا مابيهاا شي لااا تلححح

-غفار: شبيك عصبي غير تفهموني شبيها تحچوون لا اروحن للطبيب افتهمم

-الامـير علي: انتَ روووح خاطر ارجععك لابووك مگصبب

عبرناهم وسور ونور اجوا ورانه، عاينت بطرف عيني منتصر واگف وما يباوعلي وحاكم على بُعد منه جاي ينتظر اخته.. راحتله حور كضت ايده وطلعوا يمشون گدامنا وانا صرت وراهم..

ركبت سيارة سور وامي تلفلف بيه بعباتها وما ملحگة وانا اضمضم بوجهي عنهم، گعدت بالكراسي الوره بس سور ما طلع بينا بقى يسوي شي بتلفونه، طگت روحها لفراقد ونترت بي..

-ماا تطلعوون شبيكم حنفصتووا

-علي النور: حنفصتوا شني لو هاي چلمة جديدة منچ؟

-فراقد: اطلع اطلع ابن الهاير

-علي السور: خالة بلا زحمة عليج فد قاموس خاطر نفتهم شتحچين هم حگنا هذا نخاف لا جاي تفشرين علينا

يحچون طبيعي احسهم ما يدرون شبيه وشوي صار عندي امل يكونون الباقين هم ما يدرون شكو وعبالهم بس متخربطة، ارتاحيت اكثر من اللتفت سور عليّ وگال بزعل..

-بالعباس ما ادري بيج مريضة هيج چان اجيتچ وطز بأبو الجملة

-سلوى: لا لا مابيها شي لا شنيي

-علي السور: عايني وجهها اصفر ليمونة عمت عيني شني مابيها شي

عصر ايدي بين ايده مقهور ورجع يگعد عدل بكرسيه من مروا من يمنا حور وحاكم، يماااا غصت بهدومي من فتح سور الجامة مالته وصاح..

-رحم الله والديك دكتور حاكم زحمناك خوية

تقرب حاكم من سيارتنا مبتسم ووگف قريب جامتي يا يممة يا بوية راح اموتن وعلي، عكس عينه يعاينلي ورجع يباوع لـ سور..

-حاكم: لا خوية شسويت قابل الف سلامة عليها

-حور: شكراً لان اجيتوا عليها خطية هوايه توجعت

بهت حاكم يباوع لاخته النبزت تحط روحها بالنص وسور ونور ظلوا صافنين، ضميت وجهي بين ايدي ابلع ضحكتي سودة عليّ هاي خاف عبالها انا مضطهدة بالبيت واهلي ما يهتمون من يسمعون بيه مريضة وما يجوني..

ابتعدت بسرعة تركض لسيارتهم وحاكم رفع ايده يسلم على اخواني وراح، باوعتلهم منا اشوفه مبين جاي يدردم عليها على الموقف الصار لان ظلت تضحك وضامة وجهها بيدها مستحية..

-علي السور: هاي البت وياچ بالجامعة حبيبة؟

-حبيبة: اي

-علي السور: تصير اخت الدكتور؟

-علي النور: شكو شكو كل هالاسئلة بس لا تنازلت عن رهف؟؟

-علي السور: فحطتني بـ رهف خووية ماا احبهاا مو ببالي مااا رايدهاا

-رسمية: ولك نور انا چم مرة گتلك توب من سالفة رهف!

-فراقد: عوفكم من رهيفة شني اليوم ما ترجعونا للبيت مو خسنا هنا

-علي النور: جاي ننتظر حويدر

-سلوى: وين تگعدون حويدر بحضني

-رسمية: اي بعلي هو احنه هنا ووحدة بحضن الثانية صايرات وين نودي حيدر

-علي النور: هذا طلع هذا

اللتفتت اشوف حيدر جاي يطلع من المستشفى وبيده چيس مادري شحاط بي، ضربت فراقد على كرسي علي النور وگالت بصوتها الخشن الينزز..

-امشيي عوفه وامشي

-علي النور: خايبة شني نعوفه هذا الضلع الما ينشلع ما اعوفه

-فراقد: سوير تعوفوه لو اخزيكم؟؟

-علي السور: دخيل علي بس لا تريعين هنا وترجين المستشفى والبيها

حرك السيارة بسرعة لان نعرف فراقد ما تتشاقه وتسويلها سالفة تفشلنا هنا، طلع من الكراج وحويدر يصيح من بعيد..

-هيووووو هيووووووو سوووور اجيت اناا اجيييت

طلع سور راسه من الجامة يجاوبه بصوت عالي..

-اعذرنااا يابن اخوي حكم القوي على الضعيف فراقد السحارة وياانه

-فراقد: سحارة بعينك ابن الفايخة

-حيدر: چا معذوورين خوية رووحوا وداعة الله

طلع بينا سور للبيت واني بوجهي لغرفة امي رسمية مابيه اصعد فوك، نمت بفراشها ولفلفت روحي مستحية ماريد اشوف اخوتي ولا احط عيني بعينهم بعد.. غمضت عيوني وبساع خذاني النوم ورجعت حسيت على ايد حنونة تمسح على راسي وبوسة خفيفة تنطبع على گصتي، عرفته ابوي من عطره وماكدرت افتح عيوني من الفشلة..

-سلوى: ابو علي مابيها شي والله

-شيخ علي: ليش طگيتيها بالمستشفى سلوى؟؟

-سلوى: هاا؟ انا؟ انا طگيتها؟؟ لا ابد يمته هاي

-شيخ علي: حسبالج ما شفت وانتِ تگرصين بيدها؟؟ انتِ شوكت تتوبين سلوى شووكت!

-سلوى: فضحتنا علي غير اربيها چا مو انا امها

-شيخ علي: شتربين منها ولج؟؟ البت تخربطت وخذوها للمستشفى لاا تظلين تحمليها مسؤولية شي مو بيدها!

دمعت عيوني وانا اسمعه يحجي بالهمسة ويه امي واعرف اجه هنا يحجي بالتحديد خاطر اسمع وما استحي منهم واظل اكل بروحي، اروح فدوة لحنيتك يا بوية..

-سلوى: انا بس ما ردتها تخزيك بين الوادم

-ولج بنيتي تشرفني ما تخزيني! ماكو يوم نزلت راسي لا تلوصين بالحجي!

-سلوى: شيخ الصار جبير وادري بيك تفشلت ومقهور وحازة بگلبك شفت وجهك هناك شون تغير ليش تدوس على نفسك لخاطرها وتحمل روحك اكثر من طاقتك

-استحيت وتفشلت عبن بنيتي مرت بهيج موقف زين وبعدين؟؟ جاوبيني وبعدين؟ شني اذبحها؟؟ لو اغسل عارها؟؟ ولج هي شسووت؟

-مادري مادري

-سمعي يا سلوى وعلي وراس ويلادي علي لو سمعت لو حسيت بيچ طاگة حبيبتي بالعباس ابو فاضل اردچ لهلچ لا تكولين ما گلت!

-تردني لاهلي الباعوني علي؟؟ ما غزرت بيك العشرة ما غزر وياك تعبي وخدمتي والضيم الكليته من خواتك من يوم طبيت بيتك!

-وانتِ ما غزر وياچ شي انا عزيتچ وجبتچ لهالبيت مو دخيلة انا جبتچ مرة! دست على ام ويلادي الحاربت الدنيا لخاطرها خاطر ما اطلعج من بيتي مذبوحة! ما غزر بيج هذا ولعبتي لِعب ببيتي وشفتي نفسچ على الباقيات وعلى اهلچ الي هم اقرب الناس الج!

-سلوى: هَلي باعوني برخيص وانتَ شريتني بغالي لا تندم علي ابوس ايدك لا تندم لان تزوجتني

نزلت على ايده تبوس بيها وعلى رجله هم اكدر احس شنو جاي يصير بدون لا افتح عيوني، حسيت بنفضة ابوي يشيلها من يم رجله ما راضي..

-كافي سلوى لا تسوين هيج

-محد وگفلي مثل وگفتك ما انسى فضلك وياي للموت.. اختي باعتني وتهمتني باطل وانتَ سكتت حلوچ الوادم وثبتلهم انا بت وشريفة

-لا تبچين سلاوي مسحي دموعچ ام حبيبة لا تحس بنيتج وتخترع

-اعشگك انا علي لا تبيعني بيوم بالعباس اذبح روحي واسگي ساحة بيتك بدمي

-اسم الله لا تكولين هيج بوية ما يصلح

-اختي الي هي من دمي ولحمي واقرب بشر عليّ باعتني وانتَ السترت عليّ

-باعتچ وانتِ ربيتي بنيتها عبق وما خليتيها حايرة جبتيها هنا يمچ وحافظتي عليها وين اكو مثل گلبچ ما تگليلي؟ چا شبيچ ويه حبيبة تزعليها

-ما ازعلها التوبة بعد

-عفية سلوتي كلشي ولا حبيبة ابوها گلبي يوجعني من اشوفها ضايجة شون لو افتهمت بيها انطگت بعلي ما اسكت المرة الجاية وانا حلفت..

نزل على راسي يبوسني مرة ثانية وطلع من الغرفة وامي اجت تبوسني، كل هذا وما گعدت ولا بينت انا سمعت حديثهم الصدمني.. ام عبق هي الفضحت امي! هي الخلتها تطلع من بيت اهلها شبه عريانه! هي السبب الخلت جدي ابو امي يريد يدفنها وهي عايشة!

صح امي تصالحت ويه اهلها واكبر دليل خطبت بت خالتي شمس لـ علي البدر بنفسها بس بقى جدي ما تحچي وياه وهو ما يعاين لوجهها، رجعت علاقتها بخواتها واخوتها بس جدي ما يطيقها وحتى انا ما يحبني..

غفيت من التفكير وگعدت على صوت امي رسمية تگومني وجايبة صينية بيها شياش معلاگ وگلاص عصير برتقال، دخلت مبتسمة وگالت..

-الامير جابه الچ مخصوص

لطمت على وجهي گدامها وهي ماتت ضحك، حطت الصينية يم راسي وگالت وعيونها مدمعة من الضحك..

-رسمية: ولج تخزينا خزي اليوم تجرصنا بالسلف

-حبيبة: شكد عيبب يمة راح اموتنن

-رسمية: يلا يمة انگضت لا تفكرين بيها، اموري طلع جاب چبدة ومعلاگ وحطهن على الميز وگال سووهن لـ حبيبة ههههههه حچاهة مدنگد راسه وركض يصعد لغرفته

-حبيبة: يمااا وين اودي وجهي منه

-رسمية: خايبة بس الامير وابا الحسن وبدر عرفوا الباقين ما يدرون حسبالهم متخربطة من فقر الدم

سكتت ما حجيت شحچي شگول خليني مچبوبة وكاعدة هنا اشرفلي، سوتلي لفات وجبرتني اكل بس وين اكل وانا نفسي ما طايقتها هسة تعبانة والوجع رجعلي.. كملت اكل وانمطلت بمكاني اغطي راسي جوه البطانية وجريت موبايلي اشوف شكو ماكو..

تنرفزت من دورت بين الاشعارات وما شفت رسالة من منتصر مادري ليش تخيلته راح يراسلني يسأل عني بس ماكو كلشييي ماكو.. سديت الموبايل ما مهتمة لرسايل احد ثاني وگعدت گالبة وجهي والوجع يفور بگلبي..

طنطن تلفوني بأشعار جديد من حاكم على الماسنجر، انا منا ضايجة وطاگة روحي ومنا رسالته طلعت بوجهي و كاتبلي..

"وينچ حبيبة؟؟؟؟؟؟؟"

"؟"

"؟"

"؟"

"؟"

"؟"

"؟"

"؟"

"؟"

"؟"

دزولي وراهة برسائل منفردة علامات استفهام نرفزنيييييي، فتحت رسالته وشفت خمس رسائل فوگ كاتبلي عفتهن كلهن وكتبتله..

"شكووو!!!"

"انتِ بخير؟"

"شعليك؟؟؟"

شاف الرسالة وما جاوب، شمرت التلفون ضايجة من نفسي ومن جوابي الناشف ومن منتصر! عود ليش ما راسلني؟ ليش ما مهتم؟ معقولة لهدرجة انا ما اهمه؟... زين لحظة انا شبيه ضايجة ومقهورة يجوز الزلمة خجل وما راسل خاطر لا يحرجني.. اي اكيد ما راد يحرجني عيب لو راسل شني وين گاعدين احنه..

ضحكت على روحي بهالحجي ورجعت لموبايلي اشوف باقي الاشعارات من صديقاتي ومن تَـمني وتالة و حور هم مراسلتني هواي تسأل عن وضعي، فتحت رسالتها وجاوبت..

"انا زينة حبي لا تخافين"

هم فتحت الرسالة وما جاوبت شكيت بشي بس استبعدته بساع وگمت لغرفتي، سبحت وبدلت ملابسي وفتحت ملازمي اقرا شوي قفلت الباب على روحي عندي امتحان مهم هو بقى بس باجر واعطل انطونا عطلة زيارة الاربعين..

شوي واجوني البنات يتطمون عليّ ضحكوني كل وحدة جايبة بيدها شي، عبق بيدها عصير برتقال وتَـمني بيدها نساتل وتالة وشمس جايبات حب وابرار صعدت نفسها تلعب بعدها هستوها گاعدة وتقيأت على فراشي..

انخبصنا بيها وما رضت تبقى نزلت تكول تريد تنام، من شافوني البنات كاعدة اقرا عافوني وكلمن رجعت لغرفتها تگابل ملازمها وعبق امي صاحتها خاطر تنظف السطح..

-حبيبة: والله لو بيه حيل اجي وياچ عبيقة

-عبق: لا يمعودة شينرادله هسة بسرعة اكمل ما اطول

نزعت ربطتها ولفتها ليوره مثل عادتها من تشتغل وطلعت من غرفتي، كملت قرايه تعبت وعطشت ونفسي ما تريد عصير محتاجة ماي.. طلعت من غرفتي اتسحب على اطراف اصابعي ماريد اتواجه ويه اخوتي بس سمعت اصوات سور ونور وحويدر ومرة ابوي وفراقد جاي من جوه..

-علي النور: شون صارت حبيبة

-رسمية: زينة جاي تقرا فوگ

-علي السور: يمة والله انا اگول لو نسفرها خاطر نتطمن شو الطبيب هذا ما صدگت بي احس بيها شي

-رسمية: لا يمة ما يحتاج

-حيدر: حبوبة شني ما يحتاج وجهها اصفر مال موته خفت عليها وعلي اليوم كله افكر بيها

-علي النور: حتى انا خصوصاً من شفت دكتور حاكم ما يحط عينه بعيونه حسيت بيها شي وما يسولف

-علي السور: ولك انا هم انتبهت ومنتصر وجهه غادي دم ويضرب صفنات گلت ذول اطباء ويفهمون اكثر من عدنا

-حيدر: حبوبة كل هذا وتردون تسكتون؟؟ شنييي ننتظرها تموووت

-رسمية: ولكم كاافي مابيها شي البت لا تفاولولها

-حيدر: يا العباس دخيلك عمتي الحبيبة لو ماتت ياهو يوگف بوجه امي من انكتل بعد

-علي السور: يمة لازم نسفرها وناخذها للبنان لازم

-علي النور: اي يوم خاف يطلع بيها سرطان واحنه ما ندري وتموت حبيبة تروح بعد ماعدنا حبيبة

-حيدر: حبوبة هسسسة تحضرون الجنط وتاخذوها هسةة وينه جدي اليوم ما اسكت اليوم..

-رسمية: ووجعععع انچبووا كاافي بزعتونه

گمز حيدر بنصهم معصب ويأشر بأصبعه..

-حيدر: هذا هذا عمي بدر اجه هذا تعال اسمع عمي حبوبتي ما تريد نعالج حبيبة!!

-علي البدر: نعالج حبيبة؟؟ ليش شبيها؟؟

-حيدر: سرطان

-علي البدر: ياااا عليييي

-رسمية: سمم الحسن ابن الغبرة سرطان بعدوينها ان شاء الله

-علي البدر: فهمونا السالفة يمعودين!

-علي السور: بدر اظن حبيبة مريضة اليوم وگعتها ما عجبتني وخذت حيلي وياهة

-علي البدر: مابيها شي لا تحطون ببالكم

-علي النور: عااين المن حچيناا لبدر الصخررر

-علي البدر: ولكم.. ولكم اششش يلا ولو هناك لا تلغون لا يجي احد

-علي السور: واذا اجه احد؟ حتى بالسرطان صرتوا تستحون منه!

-علي النور: انتم من باا ملة انتممم حرررام الله يرزقكم ببنات حررااام تعوووفوهن هييج

-فراقد: ولكمم عليها الشسممه ذييج ذيييج مال النساوين

لطمت على وجهي حيل ومديت راسي اشوفهم منا بشكل اوضح، فجرتها فراقد بوجوههم عفية هالمرة ولا تستقر وتلصم حلگها انوب اخوتي ظلوا واحد يعاين للثاني وحويدر بعده ما مفتهم السالفة..

-حيدر: يعني شني

-علي السور: لا بروح امچ!

-فراقد: اي كافي طولتوها وهي گصيرة

-علي النور: وهاي امة لا اله الا الله وحاكم ومنتصر ما يحطون عيونهم بعيوننا عبنهم يعرفون؟؟؟

-فراقد: اي

-علي السور: ولك گابلني نووور گابلنييي احوووو احووووو

-علي النور: لطمننن حيل ويااانه.. حووو حووووو

تگابلوا يلطمون على چتافهم ويطفرون مثل لطم النسوان وعلي البدر يفر بيده ويغم بيهم وحويدر ما يدري شكو بعده ما واصلتله الاشارة بس شاركهم باللطمة..

-حيدر: لطمن خايبات لطمن.. لطمن حيييل كلچن ريحة زباالة لطمن حييل

-فراقد: زبالة ريحتك يا خايس رسمية شمالج ما تحاچيهم ذول البريعصية

-رسمية: راسي دايخ مالي خلگهم بدر گوملهم كلمن رگعه نعالين واشمرهم بالساحة

-علي السور: ولج يمة يبووووووو انفضحنااا يبوووووو

-علي النور: شلون اعاين لوجه منتصر بعد يبوووووو

-حيدر: دخيلكم لحد يذبحها راضي يصيحولي المگرن وين ماروح بس اليمد ايده على حبيبة اكسرهاا وعلي

-فراقد: عاين هذا الصرصور عاين ليش نذبحها ولك شمصخمة البت

احس حرارتي صعدت والله گوة رجلي حاملتني، شردت لغرفتي وحبست روحي هنا لحد ثاني يوم طلعت ويه علي الكـرار ولابسة مناظر شمسية خاطر ما يشوف عيوني ولا انا اركز بعيونه..

وصلنا للجامعة ونزلت اول وحدة اركض، طبيت للقاعة حضرت محاضرتي وطلعت لحديقة القسم انتظر حور اليوم ما تلاگينا الصبح.. شفتها من بعيد تمشي ويه وحدة من بنات قسمها بعدها جديدة على المكان وما كونت صداقات بس فرحت من شفتها تمشي ويه وحدة..

رحتلها مبتسمة ولابسة جنطتي على ايدي وملازمي بالايد الثانية، وگفت گبالها ضبط وسلمت بحرارة..

-هلو حبي شلونچ شو ما شفتج اليوم

-حور: هلو

-كملتي محاضراتج؟

-لا

-چا زين خاطر اعزمچ على لفة گص ومقبلات هنا لفاتهم تخبل

-لا شكراً

انتبهت لجوابها بارد چن ما تريد تحچي وياي، استغربت وحزت بنفسي بس خليتها براحتها.. ابتسمت طبيعي وودعتها ورحت اگعد ويه صديقاتي بس عقلي كله وياهة شبيهة؟ معقولة ضاجت من ردة فعل فراقد امس من عاطت بوجهها لو اكو شي ثاني شاغل بالها؟

طبيت للمحاضرة الثانية وما تحملت ابقيها بگلبي واغلس، يجوز الغلط مني خاطر اعتذر منها ابوي دائماً معلمني الاعتذار من شيّم الكبار وما يصير نخجل من كلمة اسفة بالعكس تكبر شاننا وتسهل حياتنا..

ادري بيها عدها محاضرة بكتريا اليوم وبقاعة رقم 4 بالتحديد يحضروها جماعة المرحلة الثانية، وگفت انتظرها علما بدوا الطلاب يطلعون من القاعة وشفتها تطلع بس وجهها مگلوب..

-حور

اللتفتت تدور ياهو يصيحلها ومن شافتني ضحكت فرحانة بس بساع خفتها چنها تذكرت شي وهنا تأكدت هي ضايجة من موقف صار امس..

-اگدر احاچيچ حور؟

-اي

تمشيت انا وياهة لنادي القسم، اشتريتلنا گهوة وگعدنا على طاولة، ما مدت ايدها على كوب السفري مالتها ولا لمسته لحدما سألتها..

-شو احسچ اليوم ضايجة صاير شي مزعلچ حور؟

-تردين الصراحة؟

-اي

-اي اكو

-خير ان شاء الله

-حبيبة البارحة كلش انقهرت من رسالتج حسيت بأحساس كلش مو حلو

-يا رسالة؟

-تطولين بالحروف عبالك دتنترين بالحجي ومزعوجة واني بس ردت اتطمن عليج

-هاي يمته؟؟

-البارحة من كتبتلي "شكووو" و "شعلييييك" هذا مو حاكم الديراسل هاي اني وحاكم چان گاعد بصفي يشوف ردچ وشفت وجهه كلش انقهر حسيته خجل

بهتت ملامحي ساكتة، عرگ وجهي وايدي من الخجل ونبرة صوتها وشلون تحجي بزعل زادت وضعي سوء.. اردفت بصوت ناصي تگول بأبتسامة خجل..

-حبيبة حاكم معليه وگلي لا تراسليها من تلفوني بس من شفتچ متجاوبيني ظل بالي وگلت يمكن تجاوبين حاكم بسرعة لانه رجال وتستحين منه..

-حور انا اسفة والله مادري هاي انتِ

-ماشي حبي اني طز بيه بس والله يا حبيبة اخوية رجال محترم درس وتعب على نفسه وعلينا وهاي اول مرة اشوف بنية تحچي وياه بهالطريقة خصوصاً والرسالة المكتوبة من حسابه واضح مال انسان قلق وظل باله

غطيت بهدومي اول مرة اعجز اجاوب بشر، فتحت حلگي اريد انطق اريد اسولف بس ماكو ظليت امطمط بالحجي..

-صح كلامچ حور وحگكم عليّ انا بس چنت تعبانة كلش و.. و..

-حور: لا حبي عادي لو انتِ حاچية ويايه هيجي اصلاً ما ازعل بس لان اخوية وشفته شگد انكسر وره رسالتج واعرف حاكم شگد گلبه طيب وتظل الحجاية تحوس بگلبه ويفكر بيها

هزيت راسي ساكتة ماعرف شسوي، اعتذر منه؟ بس اذا اعتذرت خاف تبين غير شكل وخاف نظل ناخذ وننطي بالحجي وتمصخ السالفة بس هم اذا سكتت فشلة..

-حور: شوف ابن الحلال بذكره هذا حاكم ديتصل بيه اجاني، باي

-حور

-ها حبي

-تكدرون توصلوني؟

مادري ليش طلعت من حلگي وشنو هالجرأة مني امس متخربطة گدامه وفاضحة روحي ومضوجته واليوم اريده يرجعني للبيت!، هزت راسها حور مبتسمة واشرتلي بيدها حتى اگوم وما ترددت شلت جنطتي وملازمي ورحت وياهة بدون لا اتصل بأخوتي وابلغهم وهالشي بحيااتي ما مسويته..

ركبت حور بالصدر وانا وگفت بره مترددة هسة ياله استوعبت صخام وجهي شموديني وياهم خرب راسج المحجرر حبيبة، استسلمت بالاخير ودخلت سلمت ورد السلام بهدوء ونصى القصيدة الچان فاتحها بمسجل السيارة..

-حور: حاكم نوصل حبيبة لبيتهم عفية

-حاكم: تمام

-حبيبة: راح ازحمكم خوية

-حاكم: لا

جاوبني بس بهالكلمة ومن وره خشمه يبووو هذا منفوخ عليّ صدگ چذب هو انا محتاجة واحد يراضيني مو اگعد اراضي بالوادم..

-حور: حكومي طلعت حبيبة تعرف هاي اني الراسلت من حسابك تگول عرفت اسلوبج هههههههه

ابتسمت ممتنة لانها دافعتلي بس حاكم سكت وما انطى ردة فعل وحور هم سكتت، اكيد جاي يگول بعقله شون عرفتها وانا كتبت "شعليك" بصيغة مذكر؟..

-حور: حبيبة ملازم الفسلجة مجبتيهن مو؟

-حبيبة: لا والله نسيت باعي اذا تردين نزلي وياي لبيتنا انطيهم الج وتغدي يمنا فرد نوب

-حور: اي ايي اجي خليني اروح يمهم حاكم

-حاكم: لا

-حور: حباب حباب هاي لييش اريد الملازم

-حاكم: ماكو داعي

-حور: لعد شلون ادرس

-حاكم: عود اني اجيبلچ غيرهن

سكتت حور واندارت الي تعاينلي، هزيت راسي متفهمة ضوجته وحچيت من مكاني..

-دكتور حاكم انتم راح تستقرون هنا؟ لان سألت حور وتگول ما تدري الموضوع وراك عايفي

-حاكم: مادري

-حور: حبيبة دتسأل علمود جامعتي تگول غلط اذا ابقى اتنقل بين الجامعات راح تتيه عليَّ المواد وتتخربط

بين كلامها واهتز موبايلي بيدي بأسم "منتصر" شهگت جوه انفاسي وجاوبت بساع وبنفس اللحظة حاكم رفع عيونه للجامة يسألني..

-حاكم: ليش تتخربط عليها المواد؟

حرت مادري اجاوبه لو اجاوب منتصر الظل يصيح "الو" بالموبايل، اشرت لـ حاكم بأصابعي بحركة انطيني ثواني وجاوبت منتصر..

-حبيبة: هلو منتصر

-منتصر: شلونچ حبيبة؟ ان شاء الله بخير

-بخير تسلم وانتَ شلونك

-انا زين وجايين لبيتكم اليوم على الغدا

-صددگ؟

-اي وگلت اتصل بيج اشوف تلحگين علينا لو بعدج بالدوام

-لا لا هاي انا بالطريق هسة جاية، اگلك بناتك وخواتك وياك؟

-اي كلنا جايين

-هلا بيكم

-هلا بيج ام راس.. يلا لا تتأخرين جاي ننتظرج

-هههههه خوش مسافة الطريق وانا يمكم

ودعته وانتبهت لضحكتي من الاذن للاذن وحور دايره عيونها عليَّ وتضحك بالهمسة، دارت عينها لاخوها العاگد حاجبه وساكت ورجعت عيونها عليَّ، غمزت وگالت بأبتسامة..

-وجهچ يضحك حبيبي

عضيت على شفتي ونزلت عيوني للموبايل اضيعهن من نظراتها ونظرات حاكم الي صار يباوعلي من المراية، الطريق اخذناه على الصامت لحدما وصلني للبيت تشكرت منهم ونزلت اركض وتلگني بنات منتصر بالساحة يلعبن..

ركضت اسلم عليهن وابوسهن بس ما يحبني وهالشي كلش يزعلني، طلعلنا منتصر وامي والامير وابوي بره سلمت عليهم وگضيت باقي الوقت كله ويه بنات منتصر شبعتهن حلويات ولعب وما طلعتهن من البيت الا خليتهن يبوسني ويحضنني ويگولن "احبچ".. صدگ لو گالو الجاهل يتقشمر بساع..

مشت الايام سريعة وخالة تَـمني انتقلت لبيتهم الجديد وتَـمني اغلب وقتها ويه خالتها حتى الامير ما يشوفها زين واخذتلها اربعة ايام تبات وياهن خاطر يرتبون البيت بس شنيي الامير لو اكضه ينفجر من القهر والمشكلة ما يگدر يمنعها لان محتاجات مساعدتها..

وگف ابوي على حيله وصار ما يحتاج عكازة يوم 17 صفر وياا فرحتنا ويا سعادتنا، رجع لهيبته وكشخته وحياته القديمة واخذ الديوان حاصل فاصل فرحان برجعته ونوى باچر نقرا ببيتنا ونسوي قراية..

بدينا نحضر نركض ركض ما نلحگ ماكو وكت وابوي مُصر الا باچر المجلس، خابر اخوتي الملتحقين ورجعهم غصب من واجبهم ومادري شلون رهموها بأجازة ليومين بدون لا يحصلون عقوبة..

اجتمعنا كلنا بالصالة من دون امي وابوي ملتمين وفرحانين بجيتهم، افترت شمس على الكل تنطي گلاص عصير والضباط بعدهم ينگون..

-علي الدر: وكت مجلس هسة؟ كلش ما مناسب روحي طلعت محد يرضى على الاجازة

-علي التـقي: چا الذروة هاي انذار ليل نهار، من رحنا للواء حسين صار يقسملنا وعلي الحق الچلب دگله اليتيمة گاله ابوي موات ولازم ننزل

-علي الحـق: چا غير اخافن على صحة ابوي لا ترجع تنتكس اذا ما اجينا

-علي التـقي: شگد چذاب اليسمعه يصدگ جاي لخاطر ابوي

-علي الحـق: اي جاي لابوي چا المن.. اگلج حبيبة چا قبق وينهي؟

-حبيبة: قبقك ببيت عمي ناصر راحت من الصبح

-علي الحـق: شتسوووووي هنااااك بسيطة يا عنقق بسيطة!!

-علي التـقي: الله يساعدها لـ عنق كل شوي مخترعلها اسم كرهتها حياتها

گام حق ما مهتم من كل عقله يريد يروح لبيت عمي ناصر يشوفها وبنفس اللحظة كرار طلع من غرفته يگرط بخيارة ويگول..

-علي الكـرار: شني هذا وين راح حق بنص الليل؟

-حبيبة: لبيت عمي ناصر يجيب القبق مالته

-علي الكـرار: چا شوكت انا يصير عندي قبق واتلهف على شوفتها

ضحك علي الدر وهمس بصوت ناصي بشي لـ بدر وذاك ضحك واشرله بأصبعه علامة "لا" واشر على شمس افتهمت جاي يحچون على الحب بس محد ركز على حركاتهم غيري انا وابرار الي وجهها تغير..

-ابرار: من رخصتكم

-علي الدر: وين ام حيدر؟

-ابرار: تعبانة رايحة انامن

انتشر الصمت بالصالة من طبت لغرفتها ابرار چن حسوا بيها شي، باوعلي در واستغليت نظرته عليّ واشرتله يروح وراهة للغرفة دار وجهه بساع يسوي روحه يلعب بموبايله دقايق وترخص وگام لغرفتهم..

-علي الكـرار: حسيت روحي بمسلسل تركي وتزاعلوا العشاگ

-علي السور: ومن گام در لغرفته خلصت الحلقة ولازم ننتظر الحلقة الجاية من يطلع

-علي النور: بس خاف تگب العيطة جوه وبساع يطفرونه للحلقة الاخيرة؟

-حبيبة: فال الله ولا فالك خلينا ننتظر الحلقة باجر.. يله گومو ننام

-علي البدر: اي والله نعسنا

اشر لـ شمس وگامو لغرفتهم وزوج المشاكل صفنوا على باب غرفتهم يتهامسون بصوت مسموع بيناتهم..

-علي السور: اظن شمس شايلة خرزة

-علي النور: لو مسويتله سحر محبة؟

-الامـير علي: بعد شيسكتهم وشيطفي عيونهم

-علي السور: خوية چنك مضروب بوري انتَ مريتك استقرت ببيت خالتها يساعدك الله

-علي النور: حلوين الجماعة هنا ما تعبونه بساع طفروا على الحلقة الاخيرة واتطلگو

نصى الامير على نعاله ينزعه من رجله وتطافروا سور ونور يركضون خايفين بس هم انشمر تك على كل واحد بيهم وحصلوا المقسوم..

-الامـير علي: ادبسزززية خليني اشوووف چهرة واحد بيكم هنااا بعدد

عفتهم ىصعدت فوگ اضحك على وجوههم الامير منفوخ معصب وابا الحسن ما يتحچى وعلي التقي ماخذله ركن يضرب صفنات وعلي الكرار گاعد ويجر حسرات وحيدر نايم على القنفة وحاط الكوشة على راسه..

ثاني يوم رجعن عبق وتَـمني واجن تالة وخالتها خاطر القراية وبنات عمي كلهن وبنات خالتي هم اجن واللتمينا، فاتحين بالمسجل قصيدة "احنه غير حسين ما عدنا وسيلة" وملتهيات نرتب الاستكانات والصواني ونحضر قواري الچاي..

طب حويدر للمطبخ فدوة لطوله لابس دشداشة سودة وشماغ لافه على شكل چراوية على راسه وجايب بيده كراتين ماي، نزلهم بالگاع ووگف بصفي يم الكاونتر يهمسلي..

-حبيبة علي النور مزاعلني واريدن اراضي

-حبيبة: شمسوي؟

-حيدر: فد شغلة صارت بيناتنا وهو زعل مني

-يعني انتَ تشوف نفسك غلطت بحگه؟

-اي اظن

-چا راضي نور ماكو اطيب من گلبه بساع يرجع يصاحبك

ابتسم وهز راسه فرحان، عصرني بحضن وباسني بخدي حييل وظل يشمشم بيه مثل الچلب..

-حبيبة: چلب مثل الچلب بالضبطط يشمشم

-حيدر: افييييش چكليت وعليي

-روح ولك

-مو بت ضيييييم

-ههههه يا ادبسز خلي يسمع ابوك

-والعباس لو تسمع امي تطيح حظي تگول تتغزل ببنات الدنيا كلها وامك عايفها مثل الصخلة الزهگانة

-خطية حيدوري شوي شوي على امك لا تزعلها

-ما ازعلها والله بس يا حبيبة امي تغار من الذبانة لو غمزتلها شسوي انا

-ابرار ماعدها غيركم انتَ وابوك ومستعدة تقدم حياتها فدوة لخاطركم

-ادري وانا احبها واعشگها واروحن فدوة لتراب رجليها والعباس الا اروح أشفطها هسة

عافني وراحلها للغرفة وانا من فضولي ما اكدر افوت هيج مشهد حلو الا اشوفهم واتونس على حبهم، رحت وراه ومتت ضحك على سوالفه وعلى ضحكة ابرار ترن رن وحيدوري يتحارش بيها ويبوس بيدها ورجليها ويجعصها بحضنه..

-ابرار: ههههههه ولك مخبل شبيك

-حيدر: احبج يمة تروحلج فدوة مرتي المستقبلية

-ابرار: يا بعد امك انتَ يا روحها وتعبها

-حيدر: يوم اذا اجه هذا الفريخ الخايس بس لا تحبوا اكثر مني؟

-ابرار: ولك انتَ الاصل حويدر ياهو يجي مچانك

بوسته بخدوده ثنينهن وحطت راسه بحضنها تلعب بشعره بس هذا وين بهيد حويدر چنه سبرنگ ينطط كل مكان گومها وطلعها بره لان يعرفها معتكفة وگاعدة وحدها مثل عادتها من ننجمع كل البنات، حضنها لصدره يمشيها ويسولف لحدما طلعوا للصالة..

-ابرار: اي يمة راضي عمك، نور وين اكو منه ليش تزعله وتضوجه منك حيدوري

-حووووووووويدررررررر

فزينا كلنا على صوت علي الدر اليرعد جاي من بره، جفل حيدر بمكانه ما يعرف شيسوي وامه بساع ضمته بظرها خايفة عليه، طب در ووراه بدر والامير وتقي وابا الحسن منفعلين..

-علي الدر: ابننننن الچلبببببب ويننننك ولللك

-الامـير علي: درر عوف ابنننك بعدين تفاهم ويااه

-علي الدر: اليوووم انعل والدددديك اليوووم رووووحك اطلعهااا

-ابا الحسن علي: علي الدر لااا تخجله گدام البنياات عيبب ابنك صار شاب!

بس ماكو علي الدر عيونه صارت بگصته فاقد وهذا عيب اخوتي من يعصبون ما يشوفون بعيونهم بعد، نزع حزامه من بنطرونه وراد يهجم عليه وحضنه بدر يمنعه يتقدم على حيدر.. منعه بكل اصرار والامير كضه من وره يصيح..

-الامـير علي: بداعة امك لااا تسويهاا

-علي الدر: هددددني لااا تكضنييي

-الامـير علي: ماااا اسمحلك تططططگه مااا ارضى والعباااس اخذذ حگه والعباااس

-علي البدر: دررر لا تتسودن الموضوع ما يستاهل لاا تفشل ابننك

حيدر مهبوط ووجهه انبلع ما يدري شمسوي وخلى ابوه بهالحال، تجمعن البنات كلهن بباب المطبخ حاطات ايدهن على حلگهن خايفات واجت امي رسمية تركض تريد تفهم شكو..

-علي الدر: ولللك انا تسوود وجهييي گدااام مدير مدرستك والمدرسيين انااا اخلي واااحد ما يسوووه نعااالي يحچي عليّ يگول ماا عرفت تربي ابنننك وابنك يشرد من المدرسة كل يوووم يطفر من الحايط ويه ولدد زايعتهمم الدنياا ومصفرريك بكل امتحاناتك!! ولك اناااا!!!!

-حيدر: چذب والزهرة چذب بوية وراس امي چذابين هي مرة.. مـ.. م

ما لحگ يكمل الكلمة ودفع در اخوتي عنه وصلخ رجلين حيدر خلاه يطفر يصيح من الوجع، اجوا اخوتي الباقين يتراكضون وسور صد الضربة الثانية عن حيدر اجه الحزام بي..

-ابرار: لاااا تطگه وخررر عنه وخررر

-علي الحق: علي الدررر هذااا وحيييدك اصحححى

-ابرار: اذا تطگه طگنييي وياه وولك طگنييي

صارت تضرب على وجهها وعلي الدر لزمته رجفة العصبية، جروه اخوتي عن حيدر وايده تهتز كضه بدر من ياخته يهز بي ويصيح بوجهه خاطر يعوف ابنه وحيدر وجهه انطعن احمر وحتى عيونه دمعن گدام البنات يممة روحي راحت من نزلت دمعته ودار وجهه عنهن..

-حيدر: والله العظيم بس مرة وحدة طفرت و...

-علي الدر: شاااالك الله!! شاااالك الله يا حيدر وخلصني من ضيييمك شاااالك الله!!!

-رسمية: لااا تدعي على وليددك ووولك لا تدعيييي

ضربته على صدره ضربات متتالية وابرار تبجي بحرگة ميتة قهر على الصار بأبنها گدام الكل وفشلته گدام البنات، راحن البنات للمطبخ كلهن وطلع در من البيت ومحد من اخوتي راح وراه كلهم ما طايقين تصرفه حتى توأمه بدر..

تقدم الامير شبگ حيدر ويبوس براسه وحيدر طگ بچي صار عنده انهيار وجسمه كله يهتز، متت بچي وياه وامي رسمية تضرب على رجليها وابرار تشهگ..

-الامـير علي: لا تبجي بعد عمك لا تبجي حويدر زلمة انتَ زلمة يا رويحتي

-حيدر: طگني عمي.. طگني ابوي گدامهن وفشلني

-الامـير علي: يخسى اليفشلك وانا عمك يخسى عزك الله وليدي انتَ امسح دموعك ابوي.. امسحهن عمي امسح

مسحله دموعه بيده وبوسه بخدوده وكل اخوتي حاوطوه يسولفون وياه وبدر كضه يحضنه حييل ويبوس براسه، همسله شي بأذنه وحيدر يهز براسه اي..

طب للغرفة شوي وامه راحت وياه والولد طلعوا من البيت راح تبدي القراية ويوصلون الناس، رجعت للمطبخ والبنات كلهن طبيعي ولا چن صار شي محد بيهن فتحت الموضوع..

-تَـمني: بنات هاي اجن نسوان بالحديقة واگفات

-حبيبة: اي رايحة افتح باب الاستقبال

فتحت باب الاستقبال الهن وبدن النسوان يجن وحدة وره الثانية لحدما انترست الاستقبال وفتحنا الهول "غرفة علي الكرار الحالية" خطية فرغها ودنه چربايته خاف ما تكفي الاستقبال وصدگ ما كفت وبنات البيت وگرايبنا القريبين كلنا گعدنا بالصالة حضرنا القراية..

**

"تَـمني"

الاجواء حزينة وتجنن لبست فستان اسود طويل رداناته تول وحطيت شال على راسي وگعدت استمع للمحاضرة مال المُلا.. ما شاء الله ملا وره ملا قرن گالو ذني يعرفن شيخ علي ومن صارت بي الجلطة نذرن اذا گام بالسلامة يقرن ببيته بأسم الامام الحسين (ع)..

گمت سلمت على حور جايه وياهة اختها حلا يصيرن خوات حاكم، اخذتهن حبيبة وفرتهن فر واجن باقي صديقات حبيبة واللتهت كل وقتها وياهن..

-عبق: تَـمني الزلم يردون چاي اني گايمة اصب تجين ويايه؟

-تَـمني: اي اجي

گمنا سوه واجن ويانه رفل وليلة وكم وحدة من بنات خال الامير يساعدن، ودينا للزلم ورجعنا للصالة نقدّم للنسوان.. تعبنا اني وعبق من الصبح نشتغل فـ جبرتها نگعد نرتاح شوية والبنات ياخذون مكاننا، غشيت وجهي بالشال لان شفت الكل مسوي هيج من بدت الملا بالنواعي تقرا بطور حززين يگطع الگلب خلتنا غصب نبجي..

-المُلا: زيّنب رجعت لكربلا يتيمة رجعت وحيدة رجعت هالجبل الشامخ هي وايتام الحسين.. رجعت بت علي مكسورة خاطر مكسورة جناح من دون وليانها بدون چافلها.. بت علي فحل الفحول هيج يصير بيها؟ هيج يأذوها؟؟ هيج يسبوها؟ هيج يمشوها بطرقات الشام وبين الزلام هي وبنياتها؟...

النسوان يبچوون بچي وبصوت عالي ويلطمن على رجليهن حييل وهاي التصيح سودة بوجهي وذيج التصيح عمت عيني عليج يا زيّنب وغيرها التگول اروحلج فدوة بت علي.. مسحت طرف عيوني من الدموع ورفعت راسي اباوع للملا من قرت شلون القصيدة بس بدون لطم وصوتها ما شاء الله شكد ما اكول حلو وحنين اكون مقصرة..

"هنا يالنازلين هنا ... بگبر حسين دلوني

هنا يالنازلين هنا ... بگبر حسين دلوني

وتاليّ للمسنايه .... راعي الجود والرايه

اريد اروح شچاية ... واگله يابدر سعدي

رضيت الگوم يسبوني.. رضيت الگوم يسبوني!"

بدوا النسوان يقرون وياهة بطور حنين حزين خلاني ابچي هووايه كللش هوايه على كلماتها واتخيل السيدة زينب فعلاً دتگول هاي الكلمات ولمست حيرتها والوجع الحاوطها بفقدان اخوتها واحبابها، لمست الحزن والغصة الي بگلبها وهي چانت معززة مكرمة اميرة عند اهلها وبنت واخت رجال معروفين بقوتهم وشجاعتهم وغيرتهم تاليها هيج يصير بيها وهيج تنگلب حياتها؟..

"طاحت من عله الناگه ، تبعتها خوات أحســين

تتعثر وهَي تنادي ، يخويه أحسين گبرك ويـــن

جيتك باليتامى أگعد ، تلَگانه يا نور العــــــين

خويه يل متت ضامي ، دِگعد جيت بإيتــــامي

شوف إنتحلت إعظامي ، تراني من السهر يحسين

متشوف الدرب عيني ، متشوف الدرب عينــــــي"

نهت القراية بهاي الابيات الحزينة واجت ملا وراهة تقرا واني بقيت.. بقيت ابچي وابچي من كل گلبي لدرجة عيوني گمت ما اشوف بيها گعدت بزاوية بس ابچي مقهورة واحس بگلبي غصة ماعرف هالشعور بسبب اجواء القراية الي اول مرة احضرها لو بسبب المريت بي والجرالي وهاي القراية اجتني فرصة اطلع طاقتي وكل الحزن من گلبي..

كملت المُلا وبدن النسوان يطلعن وصار الوقت نوزع العشا، صح تعب بس تعب حلو ومابي ملل، ابتسمت من سألوا عني النسوان وخالة گلتلهم اني مرة الامير و سنية وحبيت احضر القراية صارت كل التتعده من يمي تمسح على بطني وتگول..

-تنطيچ مرادچ زيّنب

-يوم نشوف وليد الامير بحضنج السنة التجي

-عسى دمعتج تطفي نار جهنم يا بعد عيني

-عسى ما تشوفين غير السعادة ويه وليدنا الشيعي

تشكرت منهن وخالتي هم تتشكر منهن فرحت بكلامهن وفرحت ان محد جابت طاري اني ارملة عمه وهاي اول مرة اطلع لجمعة بمكان وميسألون عن هالشي بس... بس چني تأملت وفرحت زايد لان قريب لا يطلعن كل النسوان گعدن نسوان ويه خالة رسمية يحچون عن الموضوع وافتهمت بيهن يصيرن گرايبها..

-چا ما تزوجينه رسمية؟ خطية تورط بهالبت ولا هي الحبلت وجابتله فريخ ولا هي اللهلوبة ومكفيته شجاچ خية ما تدورين راحة وليدج

عبرت من يمهن اسوي روحي ما سمعت وفرحت كلش من خالة دافعتلي متقبل على كلامهن، دخلت للمطبخ احط الاستكانات بالمغسلة وغسلتهن ويه البنات شوية ورجعت للصالة اللملم اخر شي باقي بيها وشفت خالة رسمية گاعدة ويه مرة اخوها وبيدها موبايلها تراويها شي بي، بطني مغصتني من مرة اخوها گالت بصوت مسموع..

-شحلاتها اللهم صل على محمد وال محمد من جرمنها كتلتي روحچ خاطر ياخذها

-رسمية: اششش اي خايبة اي

سدت موبايلها وضمته وره ظهرها، عيني تعلگت هناك ما گدرت ابعدها صرت انظف بالصالة والف وسواس صار بگلبي بس اريدها تگوم اريد اشوف شنو بتلفونها.. اوووف لا تَـمني لا عيب شعليج انتِ شبيچ كلشي وربطتي بيج انتِ شعليج؟؟

نصيت امسح المي الوگع على الزولية وافكر بتصرفات خالة رسمية، سوت نفس الحركة ويه الامير هم راوته شي بالتلفون والامير انخطف لونه من اجيت وهسة نفس الموقف انعاد رسمية لازمة تلفونها ومن شافتني اجيت گلتلها اششش!..

ذبيت الوصلة من ايدي ورفعت راسي اشوف جهة الاستقبال اخيراً گامت خالة تودع اهلها وعافت تلفونها بنفس المكان، فكرت اروح اخذه بس شلون اللحگ ادور بي خاف تحس بيه؟

-شبيچ

عطت مخترعة ويه صوت رفل الهمسته قريب اذني، دفعتها عني اضربها على راسها وهي طگت ضحك..

-رفل: اااخ بت الفاهية شبيچ عيونج تطاير وراح تطلع من وجهج

-تَـمني: اختررعت

-رفل: اووووي

-اهوو وخري رفل

-شبيج وجهچ مگلوب؟

-ولاشي دا افكر بشغلة

-سريني وما اگول لاحد

-لا مو سر هو

-چا؟

-رفل خالة رسمية متغيرة لو بس اني دا احس بهالشي

-امممم.. لا صدگ متغيرة واحس وراهة سالفة رسمية مو خالية

-سالفة مثل شنو؟

-اظن والله اعلم تريد تخطب لواحد من الولد واظنن والله اعلم هالولد علي الحـق لان شفت مرية شيخ محمد هنا وخالة رسمية چانت تحاچيها

انهبطت بالزايد وبدون لا احس حطيت ايدي على گلبي، انتبهتلي رفل وعگدت حاجبها مستفسرة عن حركتي..

-رفل: شبيچ توتة

-تَـمني. مبيه شي.. مبيه اگلچ اني راح اصعد فوگ اريد ابدل احس احتريت

عفت الوصلة بيدها وركضت اصعد لغرفتي افتر بيها، افتر واعصر بأصابعي افكر شنو ديصير؟ معقولة خالة رسمية راح تخطب بت شيخ محمد لـ علي الحـق لو لغير واحد من الولد؟؟

شتت افكاري صوت الولد صعدوا فوگ وصوت رجليهم يدبچ على درج السطح مبين راحوا هناك، ثواني واجتني عبق للغرفة دخلت بدون لا تدگ الباب مثل عادتها..

-عبق: تَـمني

-شبيچ عبق ليش وجهچ مخطوف؟

-عبق: تَـمني.. تَـمني شفت خالة رسمية تحچي ويه مرة شيخ محمد وسألتها على بتها

-اي؟؟

-ايي احس.. احس مادري

-احجي ولج

-احس راح تخطبلها لعلي الحق

حچتها وشهگت ودموعها صارت تنزل دمعتين دمعتين من عيونها، صفنت بوجهها عاجزة انطي ردة فعل سريعة بس بعدين انتبهت لنفسي وحضنتها لصدري اخليها ترتاح وتبجي على راحتها حتى افتهم منها شلون عرفت بالضبط راح تخطبها لـ حق..

-عبق: سمعتها.. گالت لو اجيناكم وره صفر وخطبنا بنيتكم تنطوها؟؟

وخرتها من حضني اباوع لعيونها الكبار، مسحت دموعها بأصابعي وهمست بخفوت اطمنها..

-تَـمني: عبق علي الحق يحبچ ومستحيل يبدلچ بوحدة ثانية

-بس اني سمعتها

-يمكن مو لعلي الحق تريد تخطبها

-لعد المن

-مادري.. مادري عبوقة حالي من حالج محتارة اتوقع لازم نصبر ونتفاجئ بالراح يصير وره صفر

-والقران بس يتزوج حق اني اطلع من هالبيت.. والله العظيم ما ابقى هنا والقراان ما ابقى تَـمني ورووحه لابوية

-كافي حبي لا تبجين عبوقة صدكيني ميتزوج! ولج مخبلة هو نزل من دوامه واجاچ نص الليل لبيت عمو ناصر بس حتى يشوفچ وما فكر يرتاح لو ينام ببيته تتوقعين هالرجال يعوفچ؟

-واني غبية.. غبية

-ليش غبية؟

-هو اجه وظل شكدد واكف بالباب بس يريد يشوفني واني الغبرة حتى ما طلعتله ولا خليته يلمحني مادري شبيه انچلبت واستحيت من البنات

-عادي حبي هو يعرفج خجولة واكيد ما زعل منج

-تَـمني والله 55 دقيقة ظل واكف ينتظرني اشوفه من شباك غرفة رفل واكف بالحديقة يشيل رجل ويحط رجل من تعب واني ما طلعتله

-عادي عادي هو يحب دلالچ عليه

ضحكت من بين دموعها ومسحتهن بيدها، جرت خشمها بالكلينسه وگالت بأبتسامة خجل..

-صدگ تتوقعي يحب هالشي؟

-طبعاً يحب واني لاحظت شخصيته ميحب التذب روحها عليه هو من النوع عنيف ويحب الحرب بكلشي يتونس من يظل يقاتل على الشي حتى يحصله وانتِ اجيتي بالضبط على مرامه متشوفي مستقتل عليج؟

ضحكت فرحانة وتغيرت مية وثمانين درجة عبالك مسحت على گلبها وريحتها بكلامي واني ارتاحيت على راحتها، نزلنا سوه جوه وشفت باقية كم مرة بالهول گاعدات يسولفن وشفت الموبايل بنفس مكانه وخالة رسمية بالمطبخ.. ايي هاي فرصتج تَـمني!!

عفت عبق وركضت على التلفون اخذته وطبيت للحمام وقفلته ورايه، سويت الموبايل صامت وفتحت التلفون لان ماعدها رمز واول ما سحبت الشاشة طلعلي الأستوديو ومفتوح على صورة بنية بالتحديد..

صورة بنية شگرة وعيونها زرگ بحررر وعبارة عن كتلة من البياض والجمال، گلبي گام يوجعني من شفتها وگلبت بباقي الصور لگيتلها صورتين بالحجاب وبعباية وماكو قطرة مكياج بوجهها مبين ملتزمة كلش.. البنية شگدما حلوة عبالك جايبين الصورة من النت..

ايدي لا ارادي طلعتني من الستوديو واخذتني للواتس اب مالتها، دورت على اسم مرة شيخ محمد بس ماعرف اسمها شنو وما كدرت اللگاهة.. بقيت محتارة ماعرف المن ادور والمن اروح وخفت لا انلگف قررت ارجع التلفون لمكانه خاف تصيرلي مشاكل..

**

"احنه غير حسين ماعدنا وسيلة.. والذنوب هواي چفتها ثجيلة

وغداً يبدو لنا سداً منيعا... هذهِ آرائُنا فيهِ جميعا..

والذنوب         هواي چفتها         ثجيلة.."

حِس الرادود الحنون يدوي بالديوان وصوت لطم الزلم على صدورهم يرج بالبيت يقشعر الابدان، اضرب على فخذي بخفة واستشعر القصيدة والاجواء الحسينية ما بقى شي لزيارة الاربعين وللاسف ما نگدر نروح لكربلاء بسبب حالة ابوي ذيج المرة من رجع من النجف اجانه متخربط فرد نوب من الطريق فـ قرر يسوي مجلس للرجال بالمنطقة بالديوان حتى يبقى ذكر الحسين (ع) وما يموت..

اسمعله ورايحة بغير عالم ابتسمت لا ارادي مركزة بي.. اختلاف شاسع بين اسلوبه من يقرا قصايد ويكون بشخصية الرادود وبين شخصيته المرحة ويه ابوي واخواني.. ااخ يا منتصر لو بس تعرف شگد احبك وگلبي يفز على صوتك..

-شيخة.. وينها الشيخة؟؟

طلعني من جو القصيدة صوت ابوي يطب للبيت بهيبته ورزة شيوخ كاف عباته ولافها على خصره وسبحته تطگطگ بيده، عدلت الشال على راسي وطلعتله اركض..

-ها بوية صحتلي؟

-اي بوية وينهم الصايعين؟

-فوگ بوية

-شيسوون فوگ؟ شني هاي العالم كلها مو بعينهم ولد الزمال؟؟

-مادري بوية يمكن مشغولين؟

-مشغولين شني؟؟ ينرگلون اكيد انه الهم هالطايحين الصبغ

نزع عباته لا تتعقچ ولبسها الي، ابتسمت على حركته بادلني ابتسامة وباس راسي، رغم منزعج وجاي يرجف من العصبية بس ما ينسى يبوس راسي ويگول..

-شيخة الشيخات

-تروحلك فدوة بوية

-اخوانچ الصايعين يرحون فدوة لهالحسن..

طلعت امي وچم مرية گاعدة بالهول ما اهتملهن، عافنه وراح يوگف بنص الصالة ورفع راسه لمحجر الدرج يصيح منا بصوت قوي عصبي دب الخوف بگلوب امي وباقي النسوان..

-ولك علي الدر! علي البدر! علي الحق! علي التقي! علي الكرار! الامير علي! ابا الحسن علي! علي النور! علي السور!!

صاح لأخواني التسعة الي متأكدة مليون بالمية هسة گاعدين بالسطح ينرگلون ويتابعون مباراة ريال مدريد، ثواني وما اسمع غير ركضة حصونة صارت بالسطح ضحكت من اجو كلهم يمدون روسهم من المحجر واحد صار فوگ الثاني وجاوبوا كلهم بصوت واحد..

-نعم بووية؟؟

-شيخ علي: و تتتفگ وينكم ولكم هتليية

-علي الدر: بوية چنه نصلي مو شباب؟

-علي الحق: اي بوية

-شيخ علي: شتصلون بالتسعة بالليل؟

-علي السور: شيخنا صلاة الليل شمالك ما تشوف السبحة بيدي

-ابا الحسن علي: عوفه علاچي محد يقدر انفاسنا وجهودنا واحنه واگفين ندعيلهم بنصاص الليالي وعايفين اشغالنا

-علي السور: بوية انه گطعت صلاتي لخاطرك واجيت شني هاي

-شيخ علي: اي و...

صاح علي البدر يقاطع ابوي يسوي روحه ما يسمع..

-علي البدر: شباب سمعونا صلوات بنية التعجيل.. اللهم صل على محمد وال محمد وعجل فرجهم يا كريم

-شيخ علي: ولـ....

-علي التقي: الثااانية على حب الحسن والحسيننن

-الولد كلهم: اللهم صلِّ على محمددد وال محممممددد

-علي الكرار: الثالثة على حب....

-شيخ علي: و تتتفگ انچلبوو ولد الفايخخة

-رسمية: ابو علي ليش تحچي عليَّ شمالك

-شيخ علي: مرمروني ولدچ العارات، نزلوا لا اصعدلكم بالحزام.. وينه علي؟؟؟

-علي الحق: نعم بوية

-علي الدر: ها بوية هنا

-علي البدر: هاا هاا

-شيخ علي: وجعع مو انتوو وينهم ذولاك علي السور وعلي النور؟؟

-علي السور: انه هنا چا مو صارلي ساعة انهق بس تَكي ضايع

صارو واحد يباوع بوجه الثاني يدورون على تك علي السور الشال گلوبنا، عدل علي الكرار العرقچين الي على راسه وسأل مستغرب..

-شباب وينه هذا؟ اليوم كله ما شفته؟ ووينه الامير...؟

بعده علي السور جاي يجاوبه وما نسمع غير صوت الصياح يجي من بره البيت، هرول ابوي وانه وياه ونزلو اخواني يتراكضون، طلعنا للحديقة ووگف گلبي وانه اشوف الامير علي شايل بيده واحد مدمى من فوگ ليجوه، لطمت على وجهي اصيح وابوي يرعد..

-شيخ علي: وللللك علييييي شصااااير علييييي

-الامير علي: وعلي والسمااني علي اليوووم اشرررب من دمهممم وروحه لعزيز گلبيي المغدوور!!

ركضله علي الحق يفتهم منه واخذ الجثة الي بين ايده، جحظت عيونه وعاط متخبل حرگ البيت حرگ بصياحه، اجو الزلام يتراكضون من الديوان طببوني جوه غصب املخ بروحي اللطم لطم على وجهي وگابلت امي الوگعت من طولها، اسمع لوعيد اخوي وگلبي ينزف.. وعيد خسف گلبي وعيد يكسر روس وخشوم..

-مااا نرضى الا بدددم لا فصلييية ولا فصصصل وعلي دممم بدممم انععل عشيررتهم واحرگ الاماارة على روسهمم واجيب راااس شيخهم وادوووسه بالقندرة!!

انهاريت متت تخبلت عقلي فصل صرت ما اشوف بعيوني وانا اشوفن حيدر مدمى بيد الامير، اجت ابرار تركض تشوف شكو ما كدرت احچي ما گدرت اتنفس انبح صوتي ويه صوت علي الدر يصيح بحِس شلع گلبي شلع من مكانه..

-حيييييدر ووولك حوووووووويدر بوووووية حيييييدر جااااوبنيييي حييييييدر يا بعد عينييييي وووولك بوووووية....

**

"عـــبق"

الصدمة اخذت حيلي وگعت بالگاع فاتحة عيوني ما مستوعبة، طلعت ابرار مثل المخبلة من البيت بدون حجاب والزلم تارسين الحديقة، قويت نفسي وگمت وراهة اسندها واجانه حق يركض يرجعها بس متقبل وگعت بالگاع ولطم لطم لطم لطم لطم على وجهها طفت عينها طفي..

-علي الحـق: رجعييييي للبيت رجععععن عببق اخذيهاااا

يصيح منهار وهي بغير عالم واني بغير عالم، مدا اكدر اركز بشي مدا انتبه على شي عيوني على علي الدر النايم فوگ ابنه ويضرب على راسه ويبجي بكل حيله صوته وصريخه حسيته طلق وطب بنص راسي..

-شيخ علي: ولك ااااااااااااخ يا حيدر اااااااخ يا جرح گلبيي

طلعوا الزلم الغربة من الحديقة من شافونا وطلعت حبيبة ويه امها وخالة رسمية مملخات نفسهن و عمو علي نزع عگاله بالگاع ويضرب على راسه روحه راح تطلع، لزمه علي الكرار يرجف وياه وسور نايم ويه در على حيدر ميقبلون يتحركون.. اجاهم تقي يريد يگومهم بس انهار من شاف وضع حيدر ظل يضرب على صدره ويصيح..

-علي التـقي: ياا بوية يا وحيدنا حيدر انتَ تجينه سابح بدمك.. ولك حيدر ابو ضحكة الحلوة وليدي ابو الفزعات گوووم حيييدرر..

ويه صوت الصايح والدموع ظهر من وره الباب علي النور، اجه والدم مغطي من راسه لرجليه اجه يعرج برجله گوة يسحل بروحه وگع بالباب يلطم على راسه وصدره ويصيح..

-من وراااي راااح من ورااااي اجه يراضييينيي

انخبصوا خبص الدنيا اشتعلت شعل والبيت ينزف حزن على حيدر.. على وحيد بيت شيخ علي المدلل من عمامه والماكل كتل من ابوه چان يريده دائماً يكون مثالي ميريده يغلط وميريده يعاني بحياته يريده يعيش وراسه مرفوع ومرتاح ومحبوب وين ميروح..

-منتصر: وخرووو سووا مجاال سوولييي مجااال حاكم وووينك

-حاكم: اجيت اجييت

دفع الكل منتصر وطب بنصهم، جر حيدر من ابوه جر ومدا يفلته شكد رادوا عالجوا وياه ميقبل فاقد ويحضن ويشم بأبنه، لزمه علي البـدر من ياخته گلبه متوجر ويصيح بوجهه..

-دررر ارجع لووعيك يا خووية خليهم يشوفون وليدك علي الدرر

-منتصر: خلينيي اجس نببضه بسسس انطونيي مجاال

-حاكم: لا احد يحركه هده علي الدر لا تحرك الولد يمكن يطلع بي نببض

نزل منتصر على ركباته يفحص نبض حيدر والدنيا متجمهرة فوگ راسه، شيخ علي وگع على علي الكـرار والامير اختفى من البيت ما شفناه بعد بس جاب حيدر وطلع هو وابا الحسن واخذوا ولد عمو ناصر وعمو صمد وياهم..

-منتصر: جااي احس بشي.. نبض خفيف كللش.. چنه...

سكت مركز كلش وكزبر جسمي ويه صوت علي البدر العالي فتح دگم دشداشته مختنگ وگعد بصف علي الدر ويدعي..

-علي البدر: دخييلك يا ربي.. دخيل علي واهل بيته دخييلك يا حسين بجاهك وجاه هاليوم بجاه زينب وستر زينب.. بجااه العباس عضيدك والاكبر حبيبك لاا تفجع گلوبنا بوحيدناا دخيلك يا علي..ياا ربي دخييلك يااا ربب

لا ارادي صرنا نردد وياه "دخيلك يا رب" ودموعنا تجري، كلنا مركزين ويه منتصر اليتلمس بمعصم حيدر يتابع نبضه وحاكم الي گعد گباله وصار يدوس على صدره بيده يسويله انعاش قلبي..

-منتصر: ياا علييي بي نبض بيي نبض بسيطط لازم نلحگ عليه گبل لا نضيعه هسة ضروووي

-علي البـدر: سمعتت؟؟ در سمعتته بي نببض بيي نبض ما مات ووولك دررررر

رگعه راشدي وهذاك بغير عالم صايبه انهيار، بس علي التـقي وعلي الحق سباع وما قبلوا يظلون يتفرجون اتصلوا بالاسعاف يجون بس بعد ما گدرو يتحملون تگابلوا على حيدر ويه حاكم يشيلوه على كيييفهم كلش وحاكم يوجههم شلون يدخلوا السيارة يخافون ميلحگون عليه اذا ينتظرون الاسعاف..

الحمدلله بلمحة بصر وصلت الاسعاف چانت قريبة علينا، نزلوا يركضون يشيلون حيدر ونقلوه بيها واخذوا وياهم علي البدر وتقي علي الدر هالجبل البارد هسة انهار ومدا يكدر يگوم من مكانه..

-علي الكـرار: بوووية گووم بوية طالعين للمستشفى گوووم حيدر بي نبض يمكن نلحگ عليه

كرار گوّم ابوه وحق گوّم در يسنده وسور راح على نور الي لسه محد افتهم سالفته، ركضن حبيبة وامهاتها يردن يروحن وياهم ومحد اعترض لبسن عبيهن وطبن واني بالسكتة صعدت وياهن بدون صوت بس دموعي تجري ما اكدر ابقى هنا انتظر احد يطمني مااكدر گلبي مينطيني حيدر عزيز گلوبنا كلنا..

اندحسنا كلنا وره وطار بينا حق طيوور للمستشفى وعلي الدر ما سكت لسانه عن..

-كسر بيدي يا بوية.. طگيتك؟ قهرتك؟ كسرر بيدي عساها بالكسر عساها شلل يا وحيدي

يحجي ويبجي جسمه يهتز وصوت نحيبه عاالي بچه السيارة كلها حتى علي الحـق يسوق ويمسح بدموعه وهاي اول مرة اشوفه يبچي، علما وصلنا للمستشفى رواحنا طلعت نزلنا نركض وكرار هم طبگ ينزل ابوه واخوته الباقين، الاسعاف طلعت واصلة قبلنا ودخلوا حيدر للانعاش بسرعة..

-علي الحـق: بشروو

جاوب بدر بعيون عبارة عن فصوص حمر من البچي، عصر عيونه بين اصابعه ولزم حق على جهة يحجي وياه حتى ميسمع علي الدر..

-علي البدر: مرتين گلبه وگف بالاسعاف وصعقوه بصعقات كهربائة

حط حق ايده على راسه حاير ووگف على جهة ما نطق كلمة، اباوعله واگف على بُعد مترين مني بس عبالك بغير عالم الصار هد حيل الكل..

-علي التـقي: منو جاي يحصل الامير؟؟ ما يجاوب على اتصالاتي لا يروح يسويلنا طرگاعة!

جاوب شيخ علي وهو گاعد على الكرسي منزل راسه ما رفعه..

-خلي يسوي

-علي التـقي: بوية صدگ تحجي؟؟

رفع عيونه الشيخ مخنزر على تقي، وگف على حيله ونتر بحقد وغضب..

-ما راحلنا چلب! لو حيدر صارله شي بالعباس ابو فاضل بداال الواحد ناخذ عشرة!!

سكت تقي يعوف ابوه يعرفه عصبي وما واعي على كلامه لان شيخ علي مستحيل ينسى دينه وديانته ويقتل عشر زلم بدم بارد بدال حيدر، مهما چان حفيده عزيز عليه بس دينه ومخافته من الله اعز..

مرت ساعة ومحد طلع يطمننا على حيدر گلوبنا راح توگف من الخوف والكل شاد على اعصابه، علي النور گاعد وينزف ما قبل حتى طبيب يشوفه الا يتطمن حيدر مابي شي، گاعد يبچي ويعض بأصابعه من الندم ويگول..

-ااااااخ كله منيي كللله مني اجه وراي عباله مزاعله اااااخ

-علي الكرار: فهمنا شصار؟؟ منو السبب بكل هذاا فضناا احچي!!

-علي النور: بيت مسعود! بيت مسعود نصبولنا كمين....

**

"ســـبأ"

گاعدة بغرفة امي اخيط وياهة ورهف متمددة على الچرباية تلعب بموبايل امي، سخرتني امي احيبلها بكرة سودة وگمت اجيبها من قوطية الابر حاطيها فوگ الثلاجة، فتحتها ادور بيها وطاحت من ايدي بالغلط..

-صابرين: ثوووول الفاهية طاح حظج هاي ما دبرتيها

سكتت ما جاوبت لان اندگت باب الحوش وطلعت امي تفتحها، طبت فراقد تدردم وتحجي علينا مادري ليش تجينا اذا هي ما تحبنا وما تطيق بيتنا ولا ابوي يطيق شوفتها ويتخبل اذا افتهم بيها هنا مستعد يذبحها بمكانها..

-فراقد: بت الكربة ما تفتحين الباب لو الا يروح حيلي ياله تجين

-صابرين: ما سمعت الباب شبيچ

-فراقد: سبأ جيبيلي گلاص ماي الله يزوجچ

-سبأ: صــ....

گطمت حچايتي وصحت بصياح معزايات ميتة خوف على صوت الرمي الصار يجي من بره بيتنا، امي وفراقد تسودنن وصارت امي تصيح وتلطم على وجهها مثل المخابيل..

-راااح يوووگع البيت عليناااا لحگووونااا يا اهل الغيييرة

-فراقد: ولچننن شنييي هاي شصاااير

تخبلناا چن گاعدين بجبهة مطر مطرر الچيلات ترمي واجهة بيتنا والجام يتكسر علينا، صرخت خايفة من طبت طلقة ضربت كتائب الشباك انرج الشباك كله ورن رنين يخوف..

-سبأ: يوووم يمممةة شنو جاااي يصير يمممةةة

-صابرين: وووينهم اخووتچ ولججج روووحي خابرريهم لااا يطبون عليناا

روحي انخمشت وعيوني مبحلگة گلبي راح يوگف خايفة خاايفة مرعوبة بيتنا راح يوگع على روسنا انخل نخل الطلق ما وگف واخوتي مو بالبيت ووحدنا بس نساوين گاومونا واحنه وحدناا استفردوا بينا يا علي..

-فراقد: كللل هذااا لخاطر مررررة ووولكممم مرررررة تمسححح بشواربكمم الدواووين يولد الانجااااس

-صابرين: تففففف على غيرتكممم تهدووون على نساوييين تفوووو على شواربكمممم

ظلن وحدة تصد والثانية ترد وفراقد متأكدة الي بره هدوا علينا بسبب واحد من اخوتي يكون مصخمها ويه بت من العشاير واجوا اهلها يگاومونا ياخذون بحگها..

-فراقد: بيييكم خيير برگعووو نسوانكممم كضووهنن ولا تخلووهن فررجة للرايح والرااد السلف كله يحچييي بيهننن

تصرخ وترزل بيهم وهي ما مفتهمة شكو، اجتنا رهف تركض وجهها اصفر وتسأل ما تدري شصاير، مجد جاوبها وجرتنا امي وفراقد يطلعونا من المطبخ نتراكض وطببتنا لحمام غرفتها.. گعدت بالكاع ارجف رجليه ما تحملني احس لساني انبلع من الخوف، شبگتني رهف لصدرها وعيونها على امي الكاضة موبايلها تدگ على اخوتي..

-صابرين: ووينكممم ولكم هدوووا علينا ولد الحرااام راااح نمووووت لحگونااا

-رهف: تهديد.. تهديد يوم هذا تهدديد

-سبأ: يـ.. يعني.. يعني شني؟

-رهف: يعني الله يعلم ابوي واخوتي شمسوين وهدوا على بيتنا يرمونه! معناها ما راح يسكتولنا!

-فراقد: همه ابووج واخوتج شجايبيلنا غير القهررر

-سبأ: وگف الصوت.. وگف.. وگف مو؟؟ بطلوا وراحوا مو؟؟

ثواني ورجع الطلق صلي على بيتنا وصوت زلم تصيح بره يهددون، صحت بكل صوتي اضم راسي بين رجليه من تكسر جام الحمام علينا انتهيت حيلي باد وردت اطيح مجلوطة.. بقوا يرمون فوگ النص ساعة واحنه ميتات من الرعب.. خبصة وهوسة وخووف وهلع كلشي عشناه هالليلة..

گبت بره وصوت عاصف مبين بيانتهم جريت نفس مرتاحة من رجعوا اخوتي وفراقد لمت عباتها وطلعت من الباب الوره گبل لا يشوفها واحد منهم راحت ام المصايب! راحت ام البلاوي راحت ام المشاكل كلها!، طلعت امي من الحمام تجرنا وراهة ترعش وعيونها راح تطگ.. راحت للمطبخ تدور وتصيح..

-صابرين: وووينهم.. وينهمم ويلاددي

-سلطان: هناا احنه يمة.. يوووم وينها مرتييي وينهااا

-صابرين: مو هنا ببيت اهلها لا تخبصنااا وحير بيناا

-سيف: يمة بيت عليي ذول بييت عليي بالعباااس الا اهد على نسوانهم **** عليهنن

-صابرين: رووح يمة رووح ورجع حگنا وحگ خواتك

طبوا عاصف ورزاق يتصايحون وبيدهم سلاح واجه ابوي وراهم العيون تتجادح وروحه طافرة، كض سيف من ياخته وشمره بالگاع وصار يدوس بگلبه وببطنه برجله بكل حيله..

-صابرين: لااا تكتل ابنننك مسعوود وخررر عنه وخرررر

-مسعود: امشيي هناااك لا اطلع ضيمي بيج.. وولك انتَ لشوووكت تبقى غبييي لشوووكت

جروه عاصف وسلطان وباقي اخوتي عنه وابوي يشيل روحه ويرگعها، هد على سيف مرة ثانية وسيف وگف يتصايح وياه ويهدد يذبحهم كلهم وابوي ما تحمل شاف گلاص چبير محطوط على المجمدة شاله ورگعه براس سيف كسره عليه..

-صابرين: يممممة ابنييي

-مسعود: ابنننچ ال**** ورطنااا ويه عليي ورطنااا والله يستر لووو مات ابنهم من ورانه بالحسييين بالعباااس بعلي راااسك انطي الهم يا سييف بدديل لابنهم!!

-صابرين: تقدم وليدك فدوووة لابن عدونا؟؟؟

-مسعود: ***** من وليدي الماا يعرف يتصرررف انا دزيتك تكتله تتعاررك ويااه مو تذبحه وتشرررد وللك هسة لووو وگعووا البيت على روسنا وطبوا على نسوانه هم مااا نكدر نفك حلوچناا

عافهم ابوي وطب جوه يصعد للسطح يشوف شنو تضرر، عنده بضاعة يخليها فوگ ويخاف عليهن لا يصير بيهن شي..

-سيف: رااح الجبان راح خايف على بضاعته! منو يجي وياي نرجع حگنا من بيت علي؟!

-زيد: انتَ مخبل؟؟ وره الصار بعدك تريد تاخذ حگنا؟؟

-سلطان: اگعد سيف لا تبلينا اگعددد!

-سيف: ما يهمني وانعل ابوو غيرتكم الديااثة گامت تطافر منكم! اروحن انا ماطول زلمهم بالمستشفى و**** الخلفهم

-عاصف: ووين ترووح ولك لا تتسوودن

-سيف: اروحن وعلي واطبن من شباك غرفة مرة الامير واحرگ بيتهم عليهم وو*****.....

نزل اشكال فشاير عليهم ويهدد شنو راح يسوي ظلينا انا ورهف نتطاگطگ ووحدة تعاين للثانية خايفات ومتنا رعب من طلع سيف من البيت ناويها.. ناوي يعتدي على نسوان بيت شيخ علي ويحرگ بيتهم وهنه بي!

**

"تَـمني"

بقينا اني وشمس ويه ابرار بالبيت والمسكينة لا ايد ولا رجل هبط ضغطها وغابت عن الوعي خالتي فوگ راسها وتالة وبنات عم وخال حبيبة مخبوصات هاي التبچي وذيچ التنوح..

فزيت من مكاني ويه صوت الامير جاي من الصالة وصوت ابو كربله وزلم وياه يحچون..

-ابو كربله: نخلنا البيت نخلل عد عينااك يا خوي تريد نطب نجرهم من نحورتهم ونذبهم حدر رجليك؟؟

-ابا الحسن علي: لا امير كافي لهنا خلينا نرجع للمستشفى حيدر بي نبض بجاه الله ورسوله يرجعلنا!

-الامـير علي: روحوا گدامي ابدل واللحگكم

صح ارتاحينا من عرفنا حيدر بي نبض بس الخوفة ما راحت من گلوبنا، خابرنا سلوى وگالت الدكاترة گالو موات واذا نجى منها فـ يمكن يعيش بـ عِلة تهدم شبابه..

اختفى صوت الزلم ومديت بس راسي اشوف الصالة فرغت منهم، طلعت من غرفة ابرار وصعدت فوگ اركض لغرفتنا اشوف الامير اريد افتهم منه شنو صار.. دخلت للغرفة وشفته نازع ملابسه وشامرهن قريب باب الحمام كلهن دم..

درت وجهي خجلانة بعدني استحي اشوفه بهالحال بس هو عبالك ما انتبه لوجودي لانه دخل للحمام يسبح، رحت للكنتور طلعتله ملابس وحطيتهن على الچرباية انتظره يطلع، دقايق ما اتأخر وطلع من الحمام وهم ما حچى شي وما انتبه اني مطلعتله ملابس راح للكنتور يريد يطلع منه..

-محضرتلك ملابس امير

اللتفت يباوع وينهن وهز براسه اي واخذهن يوكف ورايه يبدل، عفته على راحته يبدل واني دايرة وجهي حچيت..

-شصار امير؟ بشر حيدر شلونه؟

-مادري

-يعيش؟

مجاوبني بس ذب حسرة عالية، درت طرف عيني اشوفه لگيته مكمل وديريد يلبس القميص گمت من مكاني ورحت اوگف مقابيله مباشرة اباوع لوجهه مطعون وعيونه دم من حبس الدموع وايده ترجف تلفانة اعصابه..

هستوني دا احچي وقاطعني رنة تلفونه بجيب دشداشته المدماية، ركضت اني اجيبه شفت المتصل "ابو كربله" يممة گلبي گام يوجعني وهو هم حسيت روحه راح تطلع من الخوف..

-جاوب امير

-اخاف

-جاوب حباب ان شاء الله خير

رص على اسنانه والنفس يرگص بصدره، بلع ريگه وفتح الاتصال فتح مكبرة صوت..

-الامـير علي: ها

-ابو كربله: البشااارة اريددن البشااارة اميرر نجحت عملية حّيددر رجعلناا الوليدد

شهگ الامير ووگع على ركباته، حط ايده على وجهه وجسمه صار يهتز يبچييي، يبچي بنحيييب وصوت عالي گطع گلبي گعدت وياه بالگاع اضحك وابچي فرحانة ومتأثرة اخذت التلفون منه وسديت الخط من ابو كربله ولزمت ايد امير اهني..

-الحمدلله على سلامته الحمددد لله والشكر الحمدلله...

هز راسه بـ اي بدون لا يوخر ايده عن وجهه، جريت ايده اريد ابعدها ما خلاني وسحبني عليه يحضني ويدفن وجهه برگبتي ويبچي من كل گلبه، بادلته حضن حنون وامسح على شعره من وره واسولف وياه..

-امير حيدر مابي شي الحمدلله رب العالمين لطف بينا الحمدلله من رجعلكم ورجع لاهله دعيت هووايه والله العظيم هوووايه دعيتله

وخر وجهه عن رگبتي يلهث يتصارع ويه النفس عبالك صارله سنين ما متنفس، ضحكت من لزم وجهي يبوس بوجهي وراسي ورگبتي وخدودي وكل مكان يگدر يلوحه اكلني اكل هو مخبوص بيه واني اضحكك من كل گلبي سعيدة ما اتخيل فرحة ابرار شنو هسة..

وخر عني والدموع تجري من عيونه ولا نشفت، اخذ تلفونه وگعد على الچرباية وظل فترة يتصل من واحد لواحد ويبشروه العملية نجحت بس شنو اضرارها بعدهم ميعرفون الا يفيق من البنج..

-الامير علي: الحمدلله والشكر ربي ما قصر ابو الحسنين ما قصر

-تَـمني: الحمدلله والله حيدوري ماكو منه گرة عينكم اموري

باوعلي مبتسم والدموع بعدها تنزل منه، تجرأت ومديت ايدي امسح عيونه وخدوده ولحيته من الدموع وهو جر ايدي يبوس بطنها وظهرها وصدمني من هِمس هَمس شفايف كلمة..

-احبچ

جفلت وبلعت ريگي اباوعله ماعرف هو گال احبچ لو خايلي، اضطرب تنفسي وبقت ايدي بين ايده ما حچى ويايه شي بعد ولا باوع لعيوني سرح بعقله كأنه ديفكر بحيدر.. الف لوبة صارت بيه اريد اتأكد هو گال احبچ؟ وبهيجي ظروف بالتحديد لو اني تخيلت؟ بله اسأل لو اغلس؟ بس لا لا كللش مو وكتها هسة تسألين تَـمني مو وكتها!

-راح اروحن للمستشفى لا ترجعين لبيت خالتچ امنية

-لا ما اروح

-انتبهي على ابرار ابوي وشنو تحتاجن اتصلي بيه

-صار

ذب نفس وعصر راسه بين ايده متأكدة ضغطه صاعد لان وجهه كلش احمر وخشمه من جوه عبالك بي دم، گمت جبت كلينس وحطيته على خشمه وهمست بصوت ناصي..

-اسويلك عصير ليمون تشربه قبل لا تروح؟

-لا لا

-زين ارتاح شوية لا تتخربط وانتَ تسوق حباب لا تروح وحدك وانتَ بهالحال

-لا اروح گلبي نار

-تمدد شوية كم دقيقة وگوم بس خلي يستقر ضغطك

بعد اللحاح مني قبل يتمدد بمكانه بس ما قبل يحط راسه على المخدة جرني من ايدي نيمني بصفه ونام على صدري الراح ينفجر من دگات گلبي المضطرب..

-تَـمني

-همم

سكت ما جاوبني بسرعة، اخذله دقايق على الصامت قبل لا يهمس بخفوت..

-انتبهي على نفسج

-بعيني

-لا تباتين بره بيتي بعد

-تمام

-ولا تعانديني بعد

-امم

-ولا تحمضين بعد

-اهووو

رفع راسه يباوع لوجهي مدلغم، ابتسمت اجعص خده الايمن بأصبعي وگلت بهدوء..

-گتلك ارتاح ولا تفكر بشي وانتَ الله يسلمك ما خليت شي ما فكرت بي

-ترديني ارتاح؟

-اكيد

-تدورين راحتي؟

انلصمت ماعرفت شحجي هو قريب مني ونظراته تتوزع على وجهي كلش ارتبكت، بلعت ريگي اوخر شعري عن وجهي وگلت بثقة..

-اي امير اكيد اريدك تكون مرتاح وسعيد بحياتك

هز راسه ساكت بس مدا اعرف بشنو يفكر عجزت اقرا تعابير وجهه، گام من الفراش ومسح الدم السال من خشمه واني هم سندت نفسي على ايدي دا اگوم وفجأني من جرني عليه وباسني على خدي و........

الدنيا دارت بيه ولثواني نسيت كلشي، نسيت وعقلي فصل ويه همسته وهو يگول بلوعة..

-انا الچان يدري عيونچ تطيحه وعشگتچ

غرگت بجملته وغرگت ناسية ولوما تلفونه يدگ چان رحنا بعيييد كلش بعيد بدون لا احس على نفسي.. انتبهت لروحي وفزيت ادفعه عني بسرعة ودرت وجهي اتنفس سريع وحاطة ايدي على گلبي..

گام هو بسرعة يفرك بوجهه ونزل شال تلفونه وطلع من الغرفة بدون لا يحجي شي ويايه، باوعت لظهره وهو يبتعد واحس ببطني گطعتني من الخجل ماكدرت حتى اگوم من مكاني وبقيت هنا فترة استوعب الصار.. عزا بعينج تَـمني عزا بعينج! عزااا بعينج الله سترچ وتلفونه نقذچ!

انتبهت لنفسي وتذكرت ابرار، نفضت راسي انسى الصار وگمت غسلت وجهي كم مرة بلكي الرجفة تخف مني، اخذت شهيق وزفير اطمن روحي كلشي ما صار كلشي بعده بمكانه.. طلعت من الغرفة اسوي نفسي طبيعية ولا كأن راح اتقيء من الرعب العشته قبل دقايق..

بطلعتي من الغرفة سمعت صوت طگطگة اجت من غرفتي القديمة طگطگة كأن اكو احد بيها، غلست عنها ومشيت اعبر صالة الطابق الثاني ونزيت على صوت جام يتكسر من الغرفة..

اخترعت خفت تكون تالة بيها و ركضت فتحت باب الغرفة وشهگت من عمق روحي من شفته ابن عمهم سيف هنا وبيده مسدس ودايرلي ظهره ملتهي ويه الجام المتكسر..

عضيت لساني ما اعيط وانبهه بوجودي وقررت اهرب بس ما لحگت.. ما لحگت اشرد لانه انتبهلي وركض ورايه جرني من شعري من وره وشمرني بالگاع وصار يجرني من رجلي يسحلني يدخلني للغرفة..

-لااااااااا لااااااااا هدددنييي لااااااا

لصم حلگي بيده يلهث ويحچي بأنفاس حارة كلها خبث وحقارة..

-سيف: ايييي اخيراً!! تعبناا وياچ اشكاال حاولنا نطيحچ ونلعب بيج وبكل مرة تطلعين منها ويستر عليج العاار بس وعليي هالمرة ما اطلع الا واناا متممها وكاسر عينه!!

-هددددني حقييير متخاااف الله انتَ هدددني

-اليوم ***** بت ال*** بيوم الحاادث ما لحگت اسويلچ شي لحگتچ سبأ.. سبأ سترت عليج بس اليووم ياهوو يجيچ ياهووو اليوم **** بعرض الامير وشررفي

صحت من كل گلبي من حط ايده على رگبتي بدون لا يخنگني، صحت وصياحي غطى على صوت شمس الاجه من جوه تعيط وتگول "ناار، احترگناا شبببت نااار بالبيت"..

-تَـمني: هدددني وووولك عووفنييي اميييييير اللحگنييي امييييييييير امييييييييير

اصيح مثل المخبلة بكل صوتي والنذل يدوس بالمسدس بخاصرتي، صرخت واحس الدنيا سودت بعيوني، صحت مستنجدة بالمجهول مستنجدة بأسم ميوگع من لساني من اكون بمصيبة صحت بأسمه ومااعرف شلون راح يجيني هالمرة ويطلعني من هالمصيبة.......

يتبع 👑....

━━━━━━ ♛ ━━━━━━

نسكت والسكتة اوله... 🥲

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

احبچ واليحب بلوة.. وين الله وقسمتي تروح يم عيونچ الحلوة.. 🔥

━━━━━━ ♛ ━━━━━━

"رفـــل"

مسحت عيوني راسي صدع من البچي، رحت للمطبخ اسوي لـ ابرار عصير بلچن ترجع لوعيها وبعدني جاي اطلع البرتقال من الثلاجة وسمعت صوت صياح اجه من الساحة.. ركضت اشوف شكو ولطمت على صدري وانا اشوف النار شابة بالنخلة وشمس تصيح..

-نااار شبت بينااا احترگناااا...

ويه صياحها تداخل صوت مألوف بعيد وچنه جاي من فوگ، فزيت رافعة راسي لشباچ الغرفة اركز بس شمس والنار المشعولة خذت عقلي وعفت كلشي وركضت على موبايلي ارجف واول رقم صار بوجهي رقم الامير دگيت عليه وبالدگة الثانية جاوب صوته مبحوح مال واحد چان يبچي..

-ها رفل

-اميير شبت ناار امير اللحگ علينا

-نار؟؟؟ بشنوو شبت النار؟؟ ولج احجييي!!! الووو الووو رفل!! رففلل!!

جفلت من لقطت اذاني الصوت الجاي من فوگ صار اوضح ميزت التصيح جاي تگول "امير" شمرت الموبايل وكفيت صايتي وركضت اصعد مثل المسودنة.. عبرت ممر الدرج واشوفن سيف كاض تَـمني منطيني ظهره ويسحل بالبت ويتعارك وياهة وهي تصيح..

-امممميرررررر اميييييررررر

روحي فرفحت من المنظر اخذتني الرجفة والقهره عليها شفت حاطين دولكة ماي گزاز على طاولة الصالة بالطابق الثاني شلتها وركضت بكل سرعتي عليهم.. فز سيف منها يعاين وبعده ما ملحگ يصدني ويرفع ايده ورفعت الدولكة ورگعتها براسه فلشتها..

داخ كاض راسه مسطور واستغليت الموقف عفت تَـمني تلم بروحها وتبجي وتصيح فاقدة ونزعت نعالي وطگيته على راسه وظهره ومتونه حيييل وين اليوجعه..

-رفل: ابنننن الغداااار ابنن مسعووود الچلبببب

رجع لوعيه وكضني من ايدي يعصرها، فلتت نفسي منه ودفعته گدرت عليه عبنه دايخ من الضربة وراسه مدمى بس النذل قوي ورجع وگف على رجليه وكضني من ايدي يلويها.. صحت صوت روحي شاغت من الوجع حسيت ايدي طگت تخيلت خلاص راح يخلص عليّ هنا بس فاجأتني تَـمني من شالت نعالي وهي تصيح وتبجي منهارة وصارت تضرب بي من وره..

عافني واندار عليها يفشر وملشها من شعرها يفرها وصفگها راشديات، تسودنت على حالها وشلت گزازة چبيرة من الگاع وركضت عليه طفرت فوگاه ودچيتها بچتفه..

-سيف: بت ال*********

هد تَـمني يترنح بمچانه منتهي تخبلنا ثنينا عليه تگابلنا شالت تَـمني گزاز اكثر من الگاع وصارت تدچه بصدره وبطنه وتبچي بچيي هز الغرفة هززز..

-شصاااااااايررررر

طفرت عنه من سمعت صوت الامـير علي اجه يركض ما يشوف بعيونه، طب للغرفة وشاف سيف كاض بطنه بأيد والايد الثانية يريد يملش تَـمني بس ما لحگ لان الامير تولاه.. جر تَـمني دفعها بعيد وتوله سيف ونعلل والد والديه حطيت ايدي على گلبي اللهث وحضنت تَـمني لصدري ترجف وايدها مدماية من دم النگس سيف..

كض الامير سيف وجنزه تجنز طلع رووحه من مكانها ويه كل راشدي وكل دفرة وكل بوكس وكل رگعة راس افحط واصيح من بعيد..

-ايييي فدوة لايدددك ارووح فدوووة ولك ايييي

رگع راسه چم مرة بالگاع لحدما فقد الوعي سيف، وخر منه امير وفتح شباچ الغرفة ورجع على سيف شاله على چتافه وراح للشباچ يريد يذبه منا..

-رفل: لاااا اميييير

ركضت عليه اكض ايده اوگفه وهو ماكوو فاقد عيونه مدمايات وشياطينه طافرة، سديت الشباچ بجسمي ودفعته بكل حيلي اصيح..

-محددد ياكلها غيييرك امير محددد يتيه غير مرريتك انتَ مو تحبهاا؟؟ مو تحبهاا؟؟ امييير انتَ تحبهااا فكر بيهااا تنتهي هااي تضييع من دوونك تضيييع

ما سمعني ولا اهتملي ودفعني بكل قوته خلاني اطيح بالگاع وگزازه تطب بخدي، صحت بس ما صحت من وجع خدي صحت لان الامـير علي شال سيف وشمره من الشباچ انهبد جسمه على صبة الساحة الجوه!!

صاحت تَـمني متخبلة من الموقف والامير مو الامير مو امير الاعرفه غيير بشر غير واحد، شرايينه مطگگة وخشمه يكت دم ووجهه احمر راح يطگ..

عاف كلشي ولا چن طببنا بمصيبة جديدة وراح لـ تَـمني يشيلها من الگاع بدون لا يحچي شي واجاني يجرني من ايدي فوگ الصاية، الزلمة مختنگ لدرجة ما يكدر يفتح حلگه ويحچي.. جر مرته من زندها وحط راسها على صدره يمسح على شعرها وحچى بحس مبحوح..

-سوالچ شي؟؟ تَـمني سوالچ شي؟؟

-رفل: ما سوالها شي لا تخاف

-چا.. ليش ما تحچي؟

لزم وجهها يگلب بي والبت منتهية باقية تبچي وتحرك راسها بـ "لا"، كضيت ايده فوگ قميصه وگلت مستعجلته..

-ما تكدر تجاوبك بعدها مصدومة امير لا تخاف ما صارلها شي

هز راسه ورجع حضنها لصدره، ثواني وعافها ونزل يركض جوه يحير بالنار الشبت بالحديقة..

حطيت ايدي على راسي استوعب الصار بس ماعندي وقت لازم انزل اطفي النار وياه، جريت تَـمني وياي من ايدها ونزلتها الدرج نركض وشفت البنات طالعات من غرفة ابرار ويزرزرن بعيونهن خايفات..

-ليلة: رفلل شصايرر؟؟ ناار بالحديقة رفل!!!

-رفل: چااا وينچن مااا سمعتنا نصييح فوگ

-زهراء: سمعت صياح بس عبالي من الجيران

ما جاوبتها وركضت للساحة شفت زلم طابين للحوش ويتساعدون ويه الامير يطفون النخل والشجر الاكلتهن النار وجسم سيف بعده بالگاع طايح محد انتبهله..

النار بدت تاكل بالبيت وبالساحة الثانية وصعدت على الحيطان، رجعت للبنات ركض طلعتهن من البيت وابرار سحلناها سحل وگوة لبسناها حجاب ما ترضى تجي..

-ابرار: هدددينيي اريد امووتن خلينييي امووووت

-ليلة: ووولج ابرار تحتررگيين؟؟ تعرفين شنوو يعني تحترگين؟؟؟

-هالة: لا تتسودنين ابررار ابنج عاايش عااايش والله عااايش

-ابرار: حييييدر يمة وليددددي

گعدت بالكاع تلطم لطم سوادين على وجهها وشگت زيجها، تخبلت خالة تَـمني وكضتها من متونها تصيح بوجهها..

-ابراارر لازم نطلع مناا لاازم الناار وصلت للهول لاازم نروح

-ابرار: ابنييي وليدددي وحيييدي

ما سكتت من الصياح والبچي، وگفنا وياهة حايرات نريد بس نطلعها وطبوا زلم علينا يطفون بغرفة علي الكرار (الهول) ووياهم الامير وجهه مصخم وعرگان يرجف ويحجي گوة..

-ابراار امشي يا خوية خلينا نطلع مناا

-ابرار: ماا اروحن ماا اريدد ريحة ابنيي بالبيت مااريد اطلعع

طلع الامير كل البنات وشفت علي الكرار بالساحة اجانه ووياه اخوي عباس وابو كربله هم وياهم، طلعوا كل البنات وانا بقيت ويه ابرار حلفت ما اطلع الا رجلي على رجلها.. تسودن الامير وظل يلطم على راسه النار گامت تاكل بالبيت بسرعة جنونية..

-الامـير علي: امشيي اخذج لابنج امشييي گعد يريد يشوفج ابررار

-ابرار: چذابين.. چذااابين

-الامـير علي: بدااعة ابنج تجين وياي ابرار احلفچ بعزيز گلبج حيدر تطلعيين ويانه والله ابنج يمووت لو صارلج شي امشيي خوية امشييي

گومتها گوة بألف محمد يا علي گدرنا نطلعها من البيت والزلم بعدهم بره يطفون بالنار واجت سيارة اطفاء هم، اخذنا امير لسيارة كرار شفنا البنات وياه كلهن ومنتظرينه ما راحوا.. صعدنا السيارة وابرار تون وتهذي بأسم ابنها ما هادت ولا سكنت..

-علي الكـرار: ام حيدر والله حيدر نجحت عمليته والله العظيم عايش عاايش

الطريق كله گضته تبجي وكرار يحلفلها حيدر مابي شي ومنتظرين يفك منه البنج، ظل يفتر بينا بالسيارة وتوسلت بي ياخذنا لبيتنا عاد امي وابوي هناك.. خابر الامير يبلغه والامير وافق يجون بنياته يمنا بشرط كرار يبقى ويانه وما يرجع للمستشفى..

استقبلتنا امي الفطيرة من الباب وتگابلت ويه ابرار تلطم على وجهها زادت الضيم ضيم عليها موتت المرة وطاحت علينا، طببناها وحرنا بيها ضغطها معلك وتبجي تريدهم يأخذوها للمستشفى تشوف حيدر بعيونها..

متنا ياله قنعناها باجر يجي الامير وهو ياخذها بنفسه ونيمتها بغرفتي، طلعت من الغرفة هلكانه تعب وجسمي بعدها بي الرعشة نزلت للصالة شفت البنات كلهن گاعدات ويضربن صفنات خايفات وتالة حاضنة تَـمني وتمسح على شعرها..

وجه تَـمني اصفر وشفايفها بيض خفت يصيرلها شي ورحت ادور على برتقال اعصرلها بس ما لكيت تالي طلعت قوطية راني من الثلاجة واخذتها الها، فتحتها تالة تنطيها منها صح مو عصير طبيعي بس خلي سكرها يصعد..

انتظرتها علما ترتاح شوي وگعدت وياهة افتهم شنو صار بالتحديد ما گدرت تحجي وظلت بس تبچي خفت يكون سيف سوالها شي وانا ما منتبهة بس تالة طمنتني من همستلي..

-ما لحگ انتِ صعدتي بالوقت المناسب

-رفل: الحمدلله والشكر ربي

-تالة: رفل اني متأكدة سيف هو الچان يصعد درج غرفة تَـمني واني متأكدة الامير هم تأكد من هالشي وهذا السبب شمره من الشباك

-شلون عرفتي؟

-لان شمعنه صعد من هذا الدرج بالتحديد ليش ما حاول يطفر من الباب مثلاً؟ او من بيتونة السطح؟ ليش الا من هالدرج وكأنه متمرس يصعد منا والحقير اعترف بلسانه لـ توتة وگال اني اشكال حاولت اطيحچ وبكل مرة الامير يستر عليج ويساعدج

-والله مادري يا تالة خايفة يكون سيف مات ونبتلي

هزت راسها محتارة، لو مات سيف شيخلصنا شيفض هالسالفة وشيسكت مسعود! من الاخير الامير ينتهي! لو يذبحوه لو ينسجن وعمي علي الله يستر شيصير بي واخوة الامير يتدمرون هم على فاجعة حيدر وهم على مصيبة الامير يعني السالفة مليوصة من كل الجهات..

محد نام هالليلة من الهبطة الاكلناها، ليلة فرت على البنات كلهن تجيبلهن فراشات ومخاد بس محد رضت تحط راسها على مخدة وترتاح.. ناس تفكر بـ حيدر وناس تفكر بالحريق مال بيت عمي وتَـمني تفكر بالصار وياهة..

ثاني يوم اجانه علي الحـق ركضنا كلنا عليه نفتهم حيدر شصار وياه وگال ما فاق من البنج وحسيته جاي يچذب بس حتى امه ما تنهار بس شنو الفايدة انهارت ابرار.. تدمرت ابرار.. تحطمت ابرار وراح حيلها لان وره ثلاث ايام افتهمنا بـ حيدر گعد وما يحس برجليه! الطلقة اجت قريب عموده الفقري وشلت حركته للاسف وفقد طوله الحلو حيدر..

مر شهر على حادثة حيدر ومشى هالشهر علينا مثل السم، محد يتحچى والكل اعصابه تلفانة، ليل نهار گابلت ابوي اسأل عن المستجدات وشنو جاي يصير ويجيبلنا الاخبار..

-ناصر: امس هم صارت گعدة والامير علي حرگ الديوان علينا ثلاث شيوخ عشاير تدخلوا يردون يهدون الوضع وما فاد ولا رضى يهيد

-رفل: حگه بوية چا الصار بـ حيدر مو قليل

-يا بوية صح وانا وياچ بس صارت وحدة بوحدة سيف هم تكسر ولا ايد ولا رجل نايم بالمستشفيات حاله حال الجاهل الما يعرف يتخطى

-بس ما بردت نارهم بوية الامـير علي من شمر سيف من الشباچ راد يكتله خلاص بدون رجعة بس ما مات خرب عرضه بزون بسبع ارواح

-ناصر: العار ما يموت بوية بس تكسر وصار عنده ارتجاج بالدماغ كل هذا والامير ما برد گلبه؟؟

-چا تهجم على مريته والله يعلم شراد يسوي بيها!

-يا بوية ما سوه والعباس ما سوه عرضه هاي مرية ابن عمه مسعود يحلف وليده ما سوالها شي وما تجرأ يسوي

-انا اگلك ما راح يبردون الا يكتلون سيف ويخلصون منه وهذا حگهم! هم تهجم على چنتهم وهم الخسيس يصعد من شباچ غرفتها يفتر بيها بكيفه وسواها اكثر من مرة وتريدهم يسكتون؟؟ لا ومرة بكل وكاحة عين مسوين عزيمة نسوان بيت عمي والدنيا مگلوبة وطفر من الشباچ وشافته تالة! بيت عمي ما راح يسكتون الا ينتقمون من سيف ويرجعون كرامتهم بوية!

-ادري چا غشمة احنه ما تشوفين مسعود سفر ابنه ما نعرف بيا ارض نايم هسة

-تعرف انتَ بوية بس متستر عليه!

-ما اعرف

-تعرف مچانه لا تلعب وياي انا رفل اقراك من عيونك واعرفك من تضم عليّ شي

سكت يحمحم ويعدل بگعدته، ابوي لو يچذب على الدنيا كلها بس ما يكدر يچذب عليّ.. انا اعرف سيف مكسر ونايم بالمستشفيات بس يا مستشفى مادري بالضبط وبيت عمي علي مگومين الدنيا ما مگعديها صارلهم شهر يردون سيف..

-ما راح تسولف؟

-ناصر: شسولف چا مو كسروا سيف واخذوا فصل يكسر الظهر على حويدر بعد شني

-رفل: بوية وين سيف؟

-مادري مااادري

-خوش بوية خوش

-ولج ادبسزز شني تهدديني؟؟

-لا حشى بس انا اعرف شلون اكتشف بطريقتي

گمت اعوفه وحده گاعد بالصالة وسويت روحي جاي اصعد فوگ وما احتاجيت اسوي غير هالحركة وخليته يصيح من مكانه..

-ويننچ تعااي

-ها؟

تأفأف وطلع جگارة يدخنها ضايج، حط رجل على رجل ولزم اصبع رجله الچبير يفحصه وگال من وره خشمه..

-سفروه علاج للهند بجنسية واسم مزور خاطر ما ينعرف بس همه ما اخذوه حتى يعالجون ايده ورجله خذوه عبنهم اكتشفوا ورم براسه صاير

-ورم!!

هز راسه ساكت وضرب ايد بأيد، رجعت اگعد بصفه اريد افتهم السالفة وهم ما تعبني ولبلبهن كلهن عليّ..

-طيحته من فوگ كسرت ايده ورجله ثنينهم وراسه من انضرب بالگاع خذوله اشعة وشافوا الورم.. اسم الله الرحمن والله يجيرنا الورم خبيث وواصل مرحلة متقدمة

-اسم الله ياربي! زين هو ما حس؟؟ ما صار عنده وجع راس؟؟

-صار وابوه گالي صارله فترة يشكي من راسه عبالهم شقيقة عنده اثاري طلع اسم الله ذاك المرض وهسة محتاج يضرب كيمياوي

ضربت على رجلي حييل متأثرة، مادري شبيه وگلبي وجعني لا اله الا الله سيف شون شاب وشون دمر نفسه بأفعاله وبالشرب الجاي ياكل بجسمه.. هزيت راسي مهدود حيلي ولا ارادي طلعت من حلگي جملة..

-هاي حوبة تَـمني والعباس

-انا هم گلت

-مو بله؟

-استغفر الله يا بوية ما يصلح نحجي هيج بس من حلاة روحي گتله لمسعود هاي حوبة هاليتيمة الراد يعتدي عليها وحوبة الامـير علي.. گتله الامير زلمة صايم مصلي يخاف الله ما تطلع منه العيبة وحوبته يم الله وعلي چبيرة! نبهته اكثر من مرة ولد علي يشورون احنه مو سادة اي ادري بس يشورون والزهرة وانا مجربهم!

-وتالي بوية تتوقع العلاج راح يفيده؟

-مادري رفل.. ما تشوفيني ساكت وما احچي اگولن هو يجوز موات خلي يموت موت الله ونطلع من خطيته وشيخ علي الله يصبرهم على مصيبتهم

هزيت راسي اوافقه واول مرة اوافق على تفكير ابوي، تنهدت صافنة اعاين بالگاع وافكر شني حال امه وخواته هسة؟

-بوية امه وخواته يعرفون؟

-لا محد يدري بس ابوه وسلطان الباقين عبالهم مسافر شارد من بيت علي

-احسن خلي لا يدرن خواته خاطر ما ينقهرن وهو ما يستاهل

عفت ابوي وصعدت فوگ لغرفتنا ليلة ممطولة على القريولة وصافنة بالسگف مهمومة وصراحة حگها يعني ليش ما تنهم وعقدها على اثير ما بقاله شي؟..

-رفل: ها ولج شبيچ ضايجة

-ليلة: رفل

-ها؟

-رفل ماريد اتزوج ابوس ايدج ماريده ماا طايقته

-شبيدي عليج ليلة ابوج قافل وراكب راسه مو زين الوادم رضوا يأجلون المهر كل هالفترة من شافونا مخبوصين

-ولج ما طايقته هذا اسيا مااا اريده!

-اسيا مني؟

-اثير

-هههههههههه طاح حطج والله

-لج حموووضة ما ينجرع

-انتِ جبتيها لروحچ

-اگلچ

-گولي فضيني

-هذاك ما اتصل بيج بعد

-ياهو هذاك؟

-هذاك ابو عيون عسلية

-اخوي عباس؟

-ولج لاااا

-چا ياهو

-توأم الامـير علي

-توأم الامـير علي ياهو؟

-رفللللل

-خوب گولي ابا الحسن علي وانچبي

-اي شبيچ هو اقصده

-لا ما اتصل ولا اظنه راح يتصل

-امم

-شو چنچ ضجتي؟

-لا ليش اضوج بعد احسن لا يتصل

-اي.. سمعت امه راح تخطبله

سكتت تعاين لعيوني بدون لا تنطي ردة فعل، طوخت شوي وياهة اريد اشوفها راح تضوج لو لا..

-والبت الخطبها تصير ويه وحدة من البنات بالجامعة شافوها وكلش حلوة ما شاء الله

-يعني شفتي صورتها؟

-اي شفتها عيونها نفسه هم عسليات

-هسة يجون اولاده عيونهم خضر

-شني؟؟؟

-اتذكر اخذنا بالسادس هالسالفة لو تطلع عيون فروخهم عسلي لو تطلع خضرة

صفگت ايدي بعصبية وغميتها..

-گبررر طمچ ولا مهتمة الغبرة

-شبيييييج

-انچبي ورجعي لصفنتچ فورت دميي

**

-تَـمني هم راح تباتين يمنا اليوم؟

-تَـمني: اوووف تالة دعوفيني

-تالة: وجع هاي شبيها معصبة

اباوعلها منفوخة نفخ متتحچى ما لحيت وياهة لان اعرف بشنو دتمر.. قبل من چنت ببيت شيخ علي واباوعلها چان عبالي تَـمني تخطت المر عليها ونسته بس من بدت تبات يمنا وننام اني وياهة بغرفة وحدة لاحظت لا ابد هالبنية ما تخطت الصار! وكل يوم تقضي فوگ الساعة بالحمام تبچي وتعيش حزنها وحدها، صرت افتهم من تاخذ منشفتها للحمام بنص الليل وتگول رايحة اسبح اعرف راح تطلع وعيونها غاديات دم..

تَـمني الي يشوفها يگول هاي متهتم وشخصية لا ابالية وفطيرة وبالحقيقة هي فعلاً فقيرة وفطيرة ومتبين زعلها بسهولة، انسانة متلح بالزعلة وتحاول تتخطاها بسرعة بس تبقى تعيش اثارها وحدها مثل مدا يصير وياهة هسة وقبل..

ضحكت على شكلها هسة تمشي ويايه ووجهها مگلوب وانتبهت عليها صارلها كم مرة من نروح للجامعة تتعمد تحط حمرة حمرا احسها تحطها عناد بس حتى الامير يحچي وياهة او يتعاركون على الاقل..

بس للاسف مدا تلتقي ويه الامير وحتى من يلتقون باله سارح ومينام يمها بالغرفة ساكن غرفة حيدر ينام ويكعد ويصبح ويمسي يمه ميعوفه ولا دقيقة..

اني ادري بيهم يحبون حيدر بس ماتوقعت يعشقوه لهدرجة كلهم تسعتهم عبالك مو ابن اخوهم كأن حيدر ابنهم هيج حزينين عليه وميتين قهر.. شهر ضبط نطب ونطلع عليهم ما شفت واحد من اهل البيت يضحك الكل حزين ومكتأب والامير حزين لدرجة ماله خلگ نفسه وصار على كم مرة يگوللها تبات يمنا حتى تغير جو ومتتأثر بمحيط البيت بس هي توسوس وعبالها الرجال ديطردها وميريدها بعد وعبالها مَل منها ومن المشاكل الي دتتورط بيها..

-تالة: بطلي هالتفكير تَـمني لا تصيرين غبية

-لا تالة اني متأكدة هو بزعت روحه ولعبت نفسه مني اني احس هيج

-دوليي شكو تلعب نفسه منج؟؟ حاصله وحدة هيج حلوة ومرتبة وحبابة وتهتم بأسط تفاصيلها؟

-اي حاصله

-اهوووووو دسكتي

-تالة انتِ متعرفين امير متعرفيي

-اي بله نورينا حبيبتي تَـمني عرفينا عليه؟

-رفل من زمااان گلتلي الامير ميحب المتحبه وميبقى يحاول ويه انسانة متريده وطبعه يمل بسرعة

-والله ما شفت أي صفة من هالصفات بي كل ما بالموضوع الرجال نفسيته تعبانة! افهمي توتة ابن اخوه الي يمووت عليه انشل! تَـمني شاب مثل الوردة يخبل يدنگ من يريد يعبر الباب من طوله هيج يصير بي؟ نهايته بكرسي متحرك وابوه يشيله حتى ياخذه للحمام؟!

-والله صح كلامج

حچتها ونزلت دموعها تبچي، ضربت گصتي بيدي جزعانة من هالمايعة وماتحملت ما انتر بيها..

-شكوو تبچين احنه شحچينا؟؟

-ولج ابجي على حيدر شبيچ

-هاا

-مقهورة تالة اموت قهر من اشوفه كاعد على كرسي گلبي يتگطع عليه

-الله يساعد امه

-شكد قوية ابرار ما شاء الله لليوم منزلت دمعة گدام ابنها حتى متحسسه هو بي شي، ولا مرة بچت گدامه بس من ياخذوه لغرفته تكعد وحدها تدگ وتلطم وتملخ بروحها

-ادري شفتها ذاك اليوم اووووف والله مو سهل الديمرون بي

تمشينا بالجامعة سوه لحدما وصلنا للنادي طلبت اكل لان ميتة جوع وهاي گعدت متقبل تاكل بس تتصفن..

-شبيچ

-زوجة محسن تتذكريها؟

-محسن الدكتور الچان لاطشلچ؟

-اي و محسن تره گرايبنا

-خيولون ماعندي گرايب اني كلهم زواع

-المهم هسة.. زوجته راسلتني بيوم السوينا بي حادث اني والامير كتبتلي "انتِ تَـمني عيسى؟"

-اي؟؟

-اي فـ ملحگت اجاوبها واصلاً ماعرفتها ونسيتها الا وره كم يوم رجعت دزتلي "اريد احجي وياچ ضروري اني فنار"

-هاا عود هي عرفت عن نفسها علساس راح تعرفيها

-بالضبط حتى اني كلت منو فنار وشنو هالثقة كاتبتلي هيجي فـ غلست عليها.. وره اسبوع رجعت حطتلي علامة استفهام وهم مجاوبت وراهة هم دزتلي رسالة وهم غلست وبقت فترة متدزلي ونسيتها شو البارحة كتبتلي رسالة شوفي محتواها..

"كاافي!! كافي ابووس ايدج كاافي راح اموت من وراه رااح اموت اختنگت منه! يشرب ويجي يهذي بأسمچ ومن اگله اني مو تَـمني يكتلني.. تَـمني اترجاچ احچي ويه محسن الله يخليج بس خلي يبطل مني"

-تالة: عزاااا

-تَـمني: ولج گلبي انخمش وفد خفت وباعي شدزتلي وراهة

عرضت صورة لوجهها تكزبر الجلد عينها صايرة زرگة وطرف شفتها مشگوگ، وصورة ثانية لايدها كلها اثار ضرب وتعنيف يخوف..

-تَـمني: دزتلي هالصور وكتبتلي جواهن..

"شوفي شيسوي بيه من احاول اصحيه واگله اني فنار يموتني كتل ويعوفني بدمي ويروح ينام وحتى بنومه يهذي بيج"

-تالة: تَـمني هاي تخوف لا تجاوبيها حبابة

-مجاوبت وباعي شكتبتلي بعد اليوم الصبح

"والله العظيم البارحة يجيني يگول سوي غمازة حفر بمركز او أي مكان اريدهن ثنين بخدودچ وشكدما يكلفن اني ادفع"

-تالة: اييع كزبرت

-تَـمني: اخر شي كتبتلي "بس احچي وياه بلكي يلتهي ويعوفني ويعوف ابنه"

-تالة: لا بله؟ شنو احجي وياه خو هي تعوفه وتخلص من هالمتوحش

-حتى اني فكرت بهالسالفة ليش مو هي تعوفه وتخلص

-باعي لو شيصير لا تجاوبين واني اكول لو تبلغين الامـير علي احسن انتِ متزوجة توتة ولازم زوجچ يعرف

-كلش محتاجة ابلغه بس مادري تالة احسه مَل من مشاكلي

-تَـمني هالشي ما مرتبط بس بيج مرتبط بي هم! محسن مو صاحي وعقله ضارب لا يجي يسببلج مشاكل او يسببله اله مشاكل ويسويلكم فضيحة

-بالقران مليت شمعنى بس اني ديصير ويايه هيج راح اموت اختنگت! حتى هو هسة شيگول عليَّ شنو هالعلة الجبتها على گلبي

-شنسوي تَـمني الحمدلله والامير خوش رجال ميحچي شي بالعكس هو بكل مرة يساعدج بدون لا يفتح الموضوع وياچ بعد تتذكرين سيف؟

-اتذكر.. گعدني بالاستقبال وسألني مرة وحدة سوالچ شي لو لا ومن گتله لا وحلفت بروح اهلي سد الموضوع كلياً ويايه وگال بعد شغلي يصير وياه

-يصدگچ ويهتم بيج ويغار عليج ويخاف عليج من الهوا لو لمسچ وين اكو منه هالرجال والله هالامير فريد من نوعه

سكتت تهز براسها ساكتة وسرحت تفكر وصراحة ما اللومها من تتخيل الامير مل من المصايب وانزعج لان أي بشر طبيعي راح يبزع ويضوج وتطگ روحه.. بس عمي هذا مو أي بشر هذا الامـير علي على سن ورمح!... ما حميت ويستاهل امدح بي لانه خوش رجال..

رمش عليَّ علي الكـرار بمعنى وصل بس تَـمني ما راح ترجع لان عدها محاضرة اضافية وحسيتها تريد تبقى حتى الامير يجي يرجعها وتفتح وياه موضوع الرسائل..

-تالة: لعد اني راح اروح توتة ما انتظر وياچ خاف تروح عليَّ المسلسة اليوم الحلقة مهممة

-خبصتيني بيها روحي يمعودة

فلتت اهرول لبوابة الجامعة، اليوم احنه وحدنا حبيبة ممداومة فـ فكرت اشتري گهوة من النادي واخذ وحدة لـ كرار منتبهة عليه يعشق الچاي والگهوة وعايش عليهن.. رجعت للنادي واشتريت الي واله وكملت طريقي لسيارته سلمت ودخلت گعدت بالكراسي الوره..

-تفضل كرار

باوعلي من المراية يشوف شنو وانتبهلي مادتله الگهوة، اشر بيده بطريقة شكراً وكال..

-رحم الله والديج ما مشتهي

-بس جبتها الك

-شربيها انتِ بالعافية

-هاي مالتي وهاي مالتك

باوعلي من المراية وحسيته محتار ياخذها لو لا بس بالاخير اخذها مني وتشكر، سكت يتنهد ويمكن عباله تَـمني راح تجي ويانه وهذا السبب ما حرك السيارة واني هم مگتله مراح تجي وعجبتني اجواء السيارة الهادئة..

عطر السيارة الرجالي ويه ريحة القهوة والجو بارد وهدوء ماكو احلى من هالشي، شربت من الكهوة مالتي اباوع لجانبه الايمن وانتبهت عنده عقفه بعظمة اذنه الفوگ مطبوگة.. ابتسمت بدون لا احس على روحي وبنفس اللحظة هو باوعلي بيها من المراية..

صفن بالمراية واني بقيت مبتسمة ودرت وجهي عنه، باوعتله بطرف عيني وانتبهت لحاجبه معگود مستغرب وشو هذا طلع من السيارة يوگف بره!

نزلت الكهوة من ايدي فاكة حلگي شبي هسة شسويت اني شو هذا فد مرة ميتحچى كرار افندي؟ ظل بره خمس دقايق بالبرد واگف والكهوة ما شربها عافها بالسيارة ضجت من تصرفه وفتحت الجامة وحجيت من مكاني..

-مناوي ترجعنا عزيزي؟

-چا غير الباقيات يجن

-تَـمني متجي ويانه وحبيبة ممداومة اصلاً

-ويامن ترجع تَـمني؟

-مادري

-چا شون اتصلي بيها افتهمي ويامن

-شعلينا بيها هي چبيرة وگد نفسها يمكن زوجها ياخذها

-اتصلي بيها خوية

طلعت تلفوني من الجنطة ودگيت عليها يرن ومتجاوب اكيد بالمحاضرة وتلفونها صامت هي ليش بقت لعد..

-تالة: متجاوب

-علي الكرار: چا شون

-تالة: چا مادري شون

سند ايده على السيارة حاير ومستحير ويذب حسرات عبالك راح يعوفها بملهى ليلي استغفر الله.. طلع تلفونه وتوقعته اتصل بالامير والثاني هم مدا يجاوب وهذا المسكين انشتل هنا لا يقبل يعوفها ولا ديجاوبه احد..

-تالة: كرار گتلك تَـمني عدها محاضرة واكيد الامير ما راح يعوفها وهو يرجعها خلينا نروح

-لا خوية لا شني هالحجي

-ليش شنو المشكلة؟

-انتن امانة ماكدر اعوفچن واروح راح ننتظرها تكمل محاضرتها ونرجع

-مو شوف تعال احاچيك

بعيد عني انشلع گلبي اعيط ياله يسمع، تقرب شوية مني بس ابدد ما حط عينه بعيني يباوع للشارع ويسولف..

-اتوقع هي وامير متعاركين وتريده يرجعها حتى تصالحه

-مو مشكلتي هاي انا العليّ اجيبچن وارجعچن ماريد انحط بموقف محرج ويه اخوي

شفته كلش معاند فـ طلعت تلفوني مرة ثاني اتصل بيها انشلع گلبي دگيت اربع مرات ومتجاوب وهو هم بقى يتصل بأخوه هواي وحتى على ابو كربله دگ وگله همه مو سوه وميعرف بالامير وين.. نفخت هوا متنرفزة هسة غير يقتنع يعوفها هنا ويجيها الامير بلكي يتصالحون!

-تالة: باوع صارلك نص ساعة تنتظر وانتَ من توصلنا متفضل علينا لا انتَ خط ولا انتَ الدتاخذ فلوس ومجبور تنتظر مجرد بطريقك دتاخذنا وتودينا شنو ذنبك توگف كل هالوقت وانتَ تعبان من الدوام

باوعلي مضيگ عيونه بطريقة "مو عليَّ سوالفچ" ضميت شفايفي بحلگي ابلع ضحكتي من گال بخباثة..

-انتِ مو بحالي بالچ ويه مسلسلچ الحلقة اليوم مهمة

-هاي شمعرفك

-يمكن لان من الصبح خبصتينا بي؟

-والقران الحلقة مهمة ماريد افوتها

-چا شنسوي مجبورين انا هم راح افوتها

-متابعها؟؟؟

-شني؟.. لا لا ما متابعها

-ياا ياا ياا متابع مسلسلة تركية رومانسية علي الكـرار؟

-لااا خايبة شني تركية مو جوي

-لعد شنو جوك عزيزي؟

-احب الاجنبي

-شمتابع اجنبي؟

-ها؟

-اجنبي شنو متابع؟

-ذا روك

-ذا روك مصارع علي الكـرار

-اي هو نفس الشي

-شلون نفس الشي قصدك تتابع افلام ذا روك؟

-اي هو افلامه اتابعهم

-بله شنو احلى فلم متابعه

-مال هذا.. هذا اليصارع بي

-ياهو منهن؟

-اهووو تالة سكتي هسة ليش تحرجينه

-ههههههههههه تحب التركي علي

ضحك ودار وجهه عني واني الرعنة ماكدر اشوف واحد خجلان وما اداهره ما اتحمل..

-واني اگول شبي متلهف على الزواج وخابص امه عباله راح ياخذ تركية وتگضيها عليه حياتم وئشكم

-اي چا ليش

-ومنين تجيب التركية من شط العرب؟

وخر من يم جامتي يسوي روحه ما سمعني.. ساعة مرت على گعدتي ومو بس روحي طگت راح انفجر وملييييت، گمت اجيب شعري منا واحطه هنا اشيله وافتحه اللعب بالتلفون واشمره ارزل تَـمني بالرسائل ومتوصل لان ماعندي نت تعبت تعبت من الانتظار..

-كرار

دار وجهه عليَّ يشوف شريد ومديت راسي من الجامة اصيحله استخطيته يربي واكف على رجله ميقبل يكعد، ابتسمت وگلت بأحراج..

-تعال اگعد بالسيارة ليش واگف بره ما بردت؟

-لا مو باردة، اخذي راحتج انتِ

-مرتاحة اني تعال اگعد يمعود اني معليه وتعبت بدالك

هز راسه مبتسم ودخل يگعد بكرسي الصدر، شغل السيارة وطلع تلفونه يتصل اخر مرة على الامير ومن ما جاوبه دگ على امه..

-ها يوم شونچ.. اگلچ الامير وين؟... صار ساعة واكفين بباب الجامعة منتظرين مريته... لا البت عدها محاضرة ماتدري بموبايلها... بس تالة وياي والفرخة تعبت شني السالفة؟.... خوش خوش هذا هو حبيبتي صار

سد التلفون وحرك السكان يطلع السيارة من الگراج، بقينا على هالهدوء بالسيارة وفوگ التأخير التأخرناه بباب الجامعة انوب عصينا بأزدحام طلع روحنا، عصبت كللش من مرت من يمنا سيارة و كاعد واحد بالصدر شفته غمزلي وسوالي حركات بيده.. باوعت لـ كرار شفته ممنتبه وحاير بالمسجل عصبت كللش ونترت مزعوجة...

-تالة: اهوووووووو

-علي الكـرار: على كيفچ يمعودة طيرتينا

-جزعت من الطريق شنو هاي

-چا شنسوي

-انتَ لو ممنتظر تَـمني چان ما صار هيج

-انوب هالفرخة عليَّ شني اشمن گفه ايدي انا؟؟

-اني مو فرخة هاي اولاً ثانياً كلنا نعرف ازدحام هيج وقت يصير بس هو هم صوچي بقيت وياك لو راجعة بتكسي مو احسن

-تاخذين تكسي شني؟؟ چا انا المن صار ساعة واگف انتظر؟!

-گتلك يا عززيزي تَـمني متجي ويانه بس شيعاندك انتَ

-لا تگولين عزيزي! انا مو عزيزچ

-هاااا!!

-ايييي!!

سكتنا ثنينا مطنگرين وظلينا منفوخين لحدما طبينا لشارع بيتنا، وگف على بُعد من البيت لان الي بصفنا عدهم بناء وجايبين عمال ديشتغلون..

-ماكو داعي تدخل شكراً كرار المو عزيزي

-اوگفي

-ها تريدني اصيحلك عزيزي؟

باوعلي من المراية گالب وجهه، هز راسه بطريقة لا وحچه وعيونه على العمال..

-امچ بالبيت؟

-لا بالدوام بدت صارلها اسبوعين

-يعني وحدج تبقين بالبيت؟

-اي عادي

-لا شون يصير هيج

-هاا هم راح نبقى ساعة واكفين هنا نتناقش على دخلتي للبيت وحدي استاذ كرار؟

-انتِ شبيچ روحج طافرة؟؟ مو جاي نسولف مثل الاوادم!

انلصمت بس من صدگ ضايجة، لميت ايدي لصدري انتظره يحجي مالي خلگ اسوي مشكلة من لا شيء واول تالي راحت عليَّ المسلسلة..

-تجين لبيتنا؟

-لا

-چا شون تبقين وحدج وذولة العمال تارسين باب بيتكم

-قابل راح يطبون ويايه للبيت؟

-حتى لو مو امان تظلين وحدج والدنيا ظهر

-انتَ مبين خلگك طويل وعنادك ماله حدود بس اني اعاند اكثر وخلگي اطول فـ لا تتعب نفسك ويايه.. شكراً عزيزي المو عزيزي كرار وبااي

طلعت من السيارة بسرعة وهرولت للبيت، اللتفتت اشوفه راح لو لا بس لا والله شفته طالع من سيارته ويباوعلي من بعيد وبقى واگف هناك لحدما دخلت للبيت وسديت باب الحوش ورايه..

غمضت عيوني اضحك وغطيت حلگي بيدي، دخلت للمطبخ والضحكة ما فارگتني ياربي شگد محبوب شگدددد لطيف وحتى من يعصب شكله كيوت ولا ازعل منه هالرجال..

**

"تَـمني"

طلعت من المحاضرة شفت تلفوني محترگ بالاتصالات هم تالة وهم كرار داگين عليَّ كومة واخر تسع اتصالات چانت من الامـير علي وما صارله هوايه من دگ عليَّ، عفت الكل ودگيت عليه رنة رنتين وجاوب بصوت ثگيل مال واحد چان نايم..

-ها بوية وينج؟؟

-هلوو

-هلا بيج وينج تَـمني كرار يكول ما رجعتي ويه تالة؟

-اي چان عدنا ميدان وطولنا شوية

-يعني خلصتي مو؟

-اي خلصت وماعرف اخذ تكسي وارجع لو...؟

-انا واگفلچ بره

-يااا يعني مو نايم انتَ صوتك بي نوم

-من الفراش وگبل اجيتچ يلا طلعيلي

-تمام دقايق واجي

سديته منه ورحت للحمامات ارتب نفسي، شفت شعري مبين من الشال ضميته وعدلت مكياجي ورشيت عطر خفيف.. طلعت من الحمام بسرعة اهرول لبوابة الجامعة واگفلي على الشارع لان سيارته متفوت للكراج ماعنده باج..

سويتله من بعيد بيدي "هلوو" وضحكت فرحانة وهاي اوول مرة من شهر يرجعلي ابتسامة واسعة ويسويلي بيده هلو.. فرحت بهذا التطور وركضت ركض اعبر الشارع بعدها طاقة الميدان بيه وركبت سيارته اللهث..

-علي وياچ

-ههههههه هلو اميير

-هلو تَـمني

-شلونك شنو اخبارك

-على الله.. شلون چان دوامچ؟

-كلش زين صح تعبنا والدكتور لعب بينا لعب بس حلو واحب هاي الاجواء

عيونه على شفايفي ما شالهن ابد بسبب حمرتي، گوة لزمت روحي ما اطگها بضحكة رنانة هنا وافضحنا بنص الشارع اليوم الا احچيك يا اميرر واطلع السوالف منك غصب..

-اگلك امير اني جوعانة

-خوشن

-خلينا نروح نتغده سوه

-اني ما اشتهي بس انتِ شنو تردين تاكلين هسة اجيبلج

-لا حباب سوه ننزل ناكل بمطعم اريده على النهر

-مالي واهس

-حباب حباب

-غير مرة اخذج

-حباب حبااب

-تَـمني راسي مصدع وما مبدل جاي بتراك البيت

-واني لابسة تراك عادي خلينا نبين ثنائي متناسقين

-تـ...

-حباب حبااب

ابتسم يهز براسه مأيس مني، ايي تَـمني عفية وهذا تطور رقم واحد نخلي يطلع من البيت ويشوف بشر طبيعيين.. اخذنا على مطعم صاير على النهر وشفته مطعم مال سمچ واني مو كلش ويه السمچ بس ميخالف يمكن هو مشتهي..

-اوگفي

قبل لا اطلع من السيارة قفل البوب ومد نفسه على الكراسي الوره جر علاگة ثخينة، فتحها وطلع منها عباية اسلامية وحطها بيدي..

-لبسي هاي ابوي

-تراكي مستور والله طويل

-لبسيها تَـمني

-شلون اكل سمچ بيها راح ازفرها

-عود انا اغسلها بيدي لبسيها

-اويلي منك اويييلي

اخذتها منه ولبستها بالسيارة وهم قبل لا اطلع جرني من زندي يرجعني للسيارة وعدل شالي يضم شعري الي ماعرف شلون طلع مرة ثانية..

-ضمي الشعفة ضميهاا

-ضمها انتَ وخلصني منها

-اضمها واضم ابوها

-شكراً شيخي

-جسر للطيبين

-وهسة ننزل مو؟

-لا

-لعد؟

-انا اجيب الغده هنا انتِ ابقي

-لاااا عااااد امير

ضحك على ردة فعلي ومسح على لحيته كم مرة، بوزت عليه وانطيته گفاية ضايجة ندسني بزندي على كيفه وصفرلي حتى ادور وجهي عليه، جر كلينسة انطانياهة واشر على شفايفي..

-مسحي الكرز

-مااا

-مسحي ولج

-ما امسح

-مسحيهم لا وعلي ما ننزل

-لا ننزل ذليتني بالغدة حتى الجوعة راحت

-انا مو كتلج عندي حساسية من الاحمر؟ انتِ ليش ما تحسين؟

-كذاب ماعندك حساسية من الاحمر اصلاً حبيبة گلتلي لونك المفضل الاحمر

-اي وشتردين هسة؟

-احب الحمرة الحمرا

-حبيها ببيتج وغرفتج ما كاضچ بس بره ما تصرف وياي تمشين بالشارع هيج عرضة للوادم تخلين الما يشتهي يشوف

-اففففف

-لو تظلين تأفأفين لباجر ما يهمني مسحي خالوو مسحي

تأفأفت بالچذب مرة ثانية عود ضايجة بس بالحقيقة مزعلانة ولا ضايجة بالعكس سعيدة لان فتحنا نقاش صار اسابيع احاول اسولف وياه وهو اصلاً موضح وجهة نظره بخصوص الحمرة من قبل وهسة اني تحارشت بي..

مسحت الحمرة ونزلت من السيارة كل مرة من ننزل يلزم ايدي بس هالمرة ما سواها وخلاني امشي گدامه بخطوة وهو ورايه لحدما دخلنا للمطعم فارغ بس احنه بي ورغم هذا اختاريت الطاولة التعجبني واختاريتها معزولة شوية وصايرة ختلة..

طلبنا اكل وبقينا ساكتين ثنينا، انتظرته يحجي أي شي بس مرت دقايق وما فتح حلگه، يأست منه وقررت اني اسولف..

-صدگ امير نسيت اسأل شعجب حاط بسيارتك عباية إسلامية؟

-ما حاط

-لعد مالتمن هاي؟

-مال رفل

-اميييييير

-شبيچ رفل نستها بسيارتي امس

-وشعدها رفل بسيارتك امسسس؟؟

-وصلتهم للبيت

-كذاااب

-والعباس

-يعني رفل وليلة چانو ببيتكم البارحة وانتَ مگتلي؟؟

-بس رفل وامها ليلة ما اجت

-ليش مگتلي لعد چان اجيت!

-انتِ مو تردين خالتج ابقي هناك وشبعي منها

-اميييير

-ها تَـمني

-شبيك انتَ شبييك

-شبيه خالوو

-ليش مدا ترجعني للبيت؟ من يمته وجاي تقبل ابات ببيت خالتي شبيك متغير

-انا ما متغير انا جاي اطبق التطلبي والترتاحين عليه، ما اضغط عليج بولا شي واخليچ هيج طير طايوري لا زلمة عندج ولا مسؤوليات مو هذا التردينه؟

-لا!

-چا شتردين؟

-اريدك ترجع طبيعي اريدك تضحك اريدك تبتسم اريد اشوف الامـير علي القديم الچان يضحك ويايه ويداهرني! ادري امير الصار بحيدر اذاكم كلكم بس كلكم دتغرگون سوه بيتكم من بعد الحريق عبارة عن حزن وقهر وكآبة وحقكم والله العظيم حقكم بكلشي تحسوا وتعيشوا بس هالشي ديأثر على حيدر وعلى علي الدر وابرار

سكت يستمعلي بس شنو احس روحه طالعة وماله خلگ نقاشات ورغم هذا ما استسلمت، جريت ايده الحاطها على الطاولة ولزمتها بين ايدي وكملت..

-اشتاقيت ترجع لامير القديم القوي اليگعد للشيوخ ركبة ونص يغرد عليهم وميطلع من گعدة الا وفاضها

بقى على الصامت والحزن بعيونه فطر گلبي.. صح حيدر ما مات بس وجعهم وحالتهم ووضع بيتهم كأنه مات واكثر بعد..

-تَـمني

-نعم

-راح اسافر انا

-شنو؟؟

-راح اروحن ويه حيدر علاج بالخارج بلچن نلگاله حل ويرجع يوگف على رجليناته

-شوكت راح تسافر؟

-عگب باچر حجزنا

-ها

-اريدج تنتبهين على نفسج نوومه وعلى حبيبة كلش تعبانة وحالتها النفسية متدمرة دائماً ابقي وياهة هي تحبج هواي وراح تتحسن من تشوفكم حواليها

-بدون متوصيني حبيبة بعيوني

-لا تاكلين ولا تشربين من ايد بشر كله انتِ سوي بنفسج و...

-فهمني ليش؟

-شنو

-فهمني شنو هالسالفة مال لا تاكلين ولا تشربين من البيت؟ شنو الموضوع امير تره مو زعطوطة اني وتريدني ابقى بس اطبق اوامر بدون لا افهم

-وانتِ شبيچ عصبتي

-لان هاي المرة الثالثة تعيد موضوع الاكل والشرب عليَّ ومتقبل تفهمني السبب

-لان ادري اذا حچيتلج ما راح تتفهمين وراح تبقين بقلق

-حتى لو اريد اعرف احچيلي كلشي

سكت يزفر انفاس متثاقلة، فرك بين عيونه لثواني قبل لا يگول..

-كلشي جاي يمشي غلط تَـمني

-شنو قصدك؟

-الامور بدت تطلع من ايدي ما جاي اسيطر عليها

-فهمني امير سولف ولا تعوفها بگلبك

-عمتي غزوة شكيت بيها تنطيج حبوب هلوسة شفت الحبوب بجنطتها و.....

كمل يسولفلي القصة من بدايتها لنهايتها، يحجي واني جاحظة عيوني مصدومة! مصدومة من الدا اسمعه ومصدومة من المجتمع المخيف العايشة بي ومصدومة اكثر مو لان غزوة دتنطيني حبوب هلوسة مصدومة لان طلعت مو غزوة الدتنطيني!!

-تَـمني: يعني طلعت مو عمتك غزوة التنطيني الحبوب؟؟

-رحتلها خاطر افتهم منها شنو السبب وليش كارهتج وما تريدلج الراحة تدرين رحت اتعارك وياهة گلبت بيتها گلااب وهي حچاية ما حچت!!

-اي؟؟

-من ظليت اللح وياهة واتصايح سكتت وراحت تگعد ولا چن صار شي وگبل لا اطلع من بيتها گالتلي بالضبط..

"كل السويته ما يهمني وما يهز مني شعره انتَ تهمتني وفضحتني وسحلتني من بيتكم بهذا الشكل وما حچيت ولا بررت ودافعت لنفسي لان حگك انعميت على عيونك والجرالك صعب!! بس يا الامـير علي انتَ غلطان! غلطان لاني احب تَـمني ولوما احبها ما اشجع على زواجها منك! غلطان لان مو انا الاريد اخبل مريتك ولو ردت اسويها ما اخاف من اكبر واحد واخشن بنص عينك واگلك انا كارهتها واريدن اخبلها وما اخاف لا منك ولا من ابوك!"

-تَـمني: عزاا بعيني

-ظليت حاير ودايخ مادري شسوي ودوختني بالزايد من گالت "روح شوف ياهي التبلت عليَّ وذبت الحبوب بجنطتي خاطر تطيحني من عينك"

-امير انتَ شاك بأحد؟؟

-تَـمني انا صاير اشك حتى بنفسي شتحچين انتِ!

فرك وجهه يستغفر وذب جسمه على الكرسي، صفنت استوعب كلامه وانتبهت فعلاً عمة غزوة صارلها هووايه ما جاية لبيت عمو وحتى بقرايتهم ما اجت..

-عمة غزوة ما اجتكم بعد لان طردتها؟

-گالت ما تدوس بيتنا الا اكشف الجاي يتلاعب بينا

-اووف يا الله

-على العموم تمني عوفي هالسالفة عليَّ ولا تفكرين بيها انا وصيت امي وخالتچ عليچ وراح ينتبهن

-تمام احاول

-ومن ارجع من السفر عندي موضوع مهم وياچ لازم نصفي، ووراهة..

-وراهة شنو؟

-الله كريم لوكتها

سكت وسكوته مريب هالمرة، تذكرت موضوع الانفصال وگلبي خمشني ضجت من حديثنا وتمنيت ما طالعة نتغده ومن ضوجتي ما مديت ايدي واكلت لگمة گامت معدتي تگلب وخفت لا اتخربط..

رجعني للبيت ومشت اليومين مملة كئيبة حابسة روحي بالغرفة وهو بغرفة حيدر جوه.. اجه اليوم الي سافروا بي وحسيت بي من ودعني الفجر، بوس راسي وشم شعري وخدودي واني نايمة بس چنت مختنگة ومقهورة لدرجة ماردت اشوفه وهو يطلع اكره الوداع بس ثاني يوم تندمت.. كللش تندمت لان بهاي سفرتهم طولوا اكثر من شهرين علاج ويه حيدر..

راحوا ابرار والامير علي وعلي السور ومنتصر وياهم، خطية علي الدر ما گدر يبقى وياهم بس اسبوعين وما قبلوا يجددوله الاجازة وبقى متگلي تگلي هنا وحده والقهر ياكل بي..

وبيوم اني گاعدة ويه رفل نسولف اتصل بيه الامـير علي وفاجأني من گال اروح اني وخالتي لـ بغداد ضروري باچر وراح يوصلنا علي التـقي، شگد سألته واستفسرت منه شنو الموضوع بس ميجاوبني جواب يشفي الگلب وثاني يوم رحت لبغداد واني ممفتهمة شكو!

**

"عـــبق"

كملت كنس البيت كله ورحت للمطبخ انظفه انكسر ظهري، من يوم سافرت ابرار ومرض حبيبة البيت ما جاي يفرغ من الخطار والوصخ موتنا يجون همه وجهالهم وميهتمون اذا ابنهم لو بتهم وصخوا وهاي اني عايفة دراستي وكل يوم اظل اجلف بالبيت..

صعدت للمخزن هلكانة اريد انام محتاجة ارتاح بس تذكرت علي الحـق صار يومين مدازتله شي، تسحبت لغرفة حبيبة شفتها على نومتها سودة عليَّ من يوم سالفة حيدر ما صحت هالبنية من مرضة لمرضة وماعدها قوة ترفع ايدها.. ابوها واخوتها ميتين قهر عليها ويومية جاي دكتور شكل وكلهم اكدوا البيها مرتبط بحالتها النفسية وراح تتحسن بمرور الايام..

غطيتها زين واخذت تلفونها وگعدت بالگاع يم ميزها، كتبت لـ حق رسالة تفاصيل عن يومي بس بكل مرة اچذب عليه وما اذكر موضوع دراستي.. ما اگله ما لحگت ادرس ولا اگله الشغل هلك رجليه وايدي وظهري وانطي بس الاخبار الزينة، ختمت رسالتي بـ جملة..

"اني بخير لا تخاف، حبيبة دتنتظر نزولك كلش راح تفرح بشوفتك"

قرا الرسالة وگلبي دگ بعنف من طلعلي يم اسمه "جاري الكتابة" يممة گلبي راح يوگف هاي اول مرة يجاوبني من ثلاث اشهر احنه متفقين اني اكتب وهو يقرا بدون جواب..

"انتِ وين؟"

عگدت حاجبي على رسالته توقعته راح يداهرني على جملتي من كتبتله حبيبة راح تفرح بشوفتك لان واضحة ذيج وينها استخدمت اسم حبيبة حتى ابينله اني الراح افرح بشوفته..

"بغرفة حبيبة ليش؟"

قراها وطلع من محادثتنا، بقيت على اسمه ما طلعت منتظرته يجاوب مرت عشر دقايق بس بعد ما رجع ولا كتبلي شي.. مليت وحذفت المحادثة ورجعت تلفون حبيبة لمكانه وطلعت من غرفتها ارجع للمخزن..

شفت ابا الحسن هستوه ديدخل لغرفته عبرته ومشيت على اطراف اصابعي خاف باقي الولد يحسون بيه وفتحت باب المخزن على كيفي، تنهدت تعبانة وبدون لا اشوف كدامي شمرت روحي على فراشي ونزعت الصاية والربطة شمرتهن بعيد..

غمضت عيوني اروح لعالم الاحلام وحسيت شفت شي اول ما دخلت للغرفة بصف فراشي بس ما ركزت بي، فتحت عيوني ودرت وجهي للجهة الثانية وشفتها اي والله هاي مچانت موجودة قبل شوية؟!

علاگة رصاصية چبيرة كلش شلون الكارتونة وبصفها علاكة سودة هم كارتونة وعلاكة اخيرة لونها احمر، فزيت من مكاني افرك بعيوني اتأكد من الدا اشوفه حقيقي لو دا اتخيل من التعب؟ بس لا والله ذني حقيقيات!

واني بمكاني جريتهن اشوف شنو بيهن، اول علاكة فتحتها هي الرصاصية الجبيرة وتوسعت عيوني من شفته قماش تول لونه سمائي.. ايدي كامت ترجف وكوة طلعت القماش من العلاكة اشوفه وانصدمت من شفته مو قماش هاي بدلة سمائية!!

توترت كلش من جريت العلاكة الثانية وطلعت منه حذاء كعب عالي لونه ابيض والعلاكة الاخيرة لا ارادي شهگت من شفت محتواها!.. هذا ذهب! هذا تخم ذهب! تخم ذهب كامل كلادة وتراجي ومحبس وسوار!

ريگي نشف وصرت ابلع بي واگلب بالاغراض، وگعت ورقة من وحدة من العلاليگ جريتها بسرعة وقريت المكتوب بيها وعيوني مدمعة..

"تأخرت عليج هواي وقصرت وياچ و اكيد تعرفين السبب شنو بس بعد ماكدر اصبر اكثر، ما بقى شي وانزل واول ما ارجع راح اطلبچ من ابوي ونعقد حتى لو بدون حفلة احتراماً لمشاعر اخوي وابن اخوي"

مسحت دموعي بأصابعي وتوقعت مكتوب شي بظهر الورقة هم لان خايلي ظِل كلمات، گلبت الورقة وشفت مكتوب بيها..

"اعشگچ ودايخ بالكودري المغطي الجمار.. شوكت تحنين عليّ وتبهريني بالاخبار!"

ضحكت ضحكك مثل المخبلات من قريتها، ضحكتت من كل گلبي وحضنت الرسالة على گلبي فحطانة.. يبسمرني الخبيث يريد بهارات ومغازل ابو النسوان.. بس هم حقه اني اكتبله الرسايل عبالك دا اكتبله دروسي بدون أي مشاعر واحاسيس بس فلان اجانه وفلان راح..

من حماسي وفرحتي گمت لبست البدلة والحذاء اجن فيت عليَّ، ياا الله شگد حلو الفستان ومختاره سمائي نفس لون الفستان اللبسته بعقد تَـمني والامير وشافني بوكتها، عباله تمشي عليَّ سوالفه وما اربط؟..

شلت مرايتي وحاولت اشوف روحي بيها بس ميبين جسمي بيها صغيرة كلش، ايست ونزعتهن وضميتهن جوه المنادر المركونات بالزاوية دحستهن زين خاف يبينين وظليت اضمضم بيهن اخاف احد يلگاهن..

رجعت لفراشي ونمت ليلتي هنية، نسيت الوجع ونسيت التعب وكرست كل تركيزي واحلامي ويه رجعة علي الحـق اخيراً راح ننجمع سوه.. ننجمع بس وعد يا امي راح احاول بكل جهدي اكمل دراستي واكون امرأة ناجحة وسعيدة واستند على رجال يحبني وهو بنفسه يجيبچ تعيشين ويانه..

فزيت الصبح على راشدي صلخ خدي، گمت مخترعة واحس بگلبي وگع ببطني خايفة لا سلوى لگت الفستان والذهب بس طلعت الصلختني راشدي مو سلوى طلعت..

-ليلة!!!

-ليلة: اخيراً گعدتي شبيچ شبيچ ما شايفة نوم

-وجععع مخبلة انتِ؟؟ فهميني مخبلة؟؟

-اي مخبلة چا توچ دريتي

-امداج هبطتيني روحي راحت

-گومي خية وعوفي روحج وتعاي اسولفلج شي صار گبل شوي صدمني

-شصار؟؟

-تلاگينا انا وابا الحسن علي على الدرج وحزري شسوالي!!

-باسچ؟؟

-نعععل شيبوس ولج مبين مفسدچ ابو النسوان

-لعد شسوه گولي؟

-ولاشي

-شنو

-ولاشي ما سوه شي ولج كلللشي ما سوه عبرني ونزل چن ما شافني

-لاا مستحيل

-والعباس ابو فاضل فكيتلج حلگي اعاين لظهره وگلت هسة يدور وجهه هسة يلتفت عليَّ هسة وهسة وهسة وهسة وتالي ما هسهست غير روحي

-ما اللتفت مو

-مو خايبة مو.. اقريلنا نشرة اخبار بـ عم دهده عم دهده ونقلي الاخبار لـ تَـمني وحبيبة

-خليني اصحصح واروحلهن

-چا گومي خلينا نتريگ سوه

گمت وياهة هي نزلت واني رحت للحمام غسلت ورتبت نفسي ونزلت، طرت فرح من شفت حبيبة گاعدة على الكرسي گدام الميز وشعرها مبلل هستوها سابحة.. ماتحملت ما اروح ابوسها واحضنها واجعصها جعصص..

-حبيبة: هههههه خبلة

-عبق: مشتاااقتلج مشتااقة لكعدتج بيناتنا مشتااقتلج شيخة الشيخاتت

-بعد روحي عبيقة وانا مشتاقتلج

-ليلة: واخوج الخايس ما اشتاقلي ولا حاچاني

-حبيبة: انتِ جبتيها لروحج خايبة چا شني تردينه العمر كله يركض وراج

-ليلة: چا انا ضلعته گبل لا يعترفلي بحبه احنه اصدقاء صارلنا عمررر

-عبق: الصداقة تغيرت لشي ثاني حبي تقبلي الامر الواقع

-حبيبة: ما تشوفين ليش ما تصلح الصداقة بين الرجال والمرة

-عبق: لازم واحد منهم يوگع چفي على وجهه

-ليلة: استلمني عاد شيسكتهن بعد

-حبيبة: چا انتِ سكتي ولا تظلين تحجين على اخوي

-عبق: ضيعتي هذا اثير الخطبچ ليلة بعد منو يتزوجچ متگوليلي

-ليلة: هممم وانزاح من گلبي من ابوي اقتنع نبطل على اسيا الحموضة

-حبيبة: چا شتردين ولچ!

-عبق: حبيبة عوفچ منها هسة بشريني اكو اخبار جديدة على حيدر؟

-حبيبة: اي الحمدلله الامير اتصل بأمي رسمية وگالها عملية حيدر باجر والدكتور مأملهم خير بيها

-عبق: يا الله

-ليلة: الحمدلله والشكر دخيل علي واهل بيته يرجع هالوليد على رجليناته ما يستاهل الا كل خير حويدر

گعدنا نتريگ واجت شمس من الغرفة ووراهة اجت خالة سلوى وخالة رسمية واللتمينا كلنا.. خالة سلوى ورسمية متغيرات كللش ويايه مادري اني صايرة اغلس على تصرفات سلوى واتچفى الشر..

العصر حبيبة راحت لبيت عمها صمد ويه ليلة وراح يباتن هناك، لحن عليّ اروح وياهن بس ماكدر عندي امتحان وبعدني كلشي ما دارسة فـ بقيت..

صعدت فوگ ونمت على الكتاب ما طلعت من المخزن ولا نزلت جوه الا ثاني يوم رحت للمدرسة ورجعت الظهر مشي الجو بارد ويخبل، اتمشى واتذكر الفستان ورسالة علي الحـق واتبوسم للرايح والجاي..

واني امشي الدنيا گامت تنث مطر خفيف، استعجلت بخطواتي ورجعت للبيت اهرول قبل لا تزخ الدنيا، فتحت باب الحوش ودخلت جوه ركض صعدت فوگ للمخزن اخذت منشفة وطبيت للحمام سبحت وبدلت ونزلت شفت سلوى واگفة بالمطبخ دتسوي چاي..

-عبق: حبيبة مارجعت؟

-سلوى: لا اليوم عقد زهراء

-زهراء بت عمو صمد؟؟

-اي چا شني وين عايشة انتِ

-ولا ادري والله مگلتلي حبيبة

-چا هي المن راحت امس وباتت يمهم توسلن بيها البنيات تحضر العقد

-اي همزين خليها تغير جو بلكي تتحسن

-اي

-وانتِ هم ترحين؟

-مالي خلگ انا

-شعجب؟

-مالي واهس بس ام علي جاي تلح عليّ وشمس هم طلعت للصالون راحت تتمكيج وتسوي تسريحة الشيخة!

-خليها تتونس خطية هم نفسيتها تعبت

-وانتِ ما ترحين لو عندج امتحان؟

-يعني عادي اجي؟

باوعتلي بطرف عينها ما عاجبها وگالت من وره خشمها..

-امشي روحي بدلي يلا بس بساع

ضحكت فرحانة وركضتت اصعد ابدل خاف يعوفوني ويطلعون، لبست الفستان الاشتراه الي علي الحـق بيوم الي تلفت فستاني الجديد سلوى بالدهن يخببل وفد مرتب وانيق كلش مناسب للحفلة..

رحت لغرفة حبيبة شسورت شعري عدها بسرعة وحطيت بس حمرة ومسكارا ورجعت للمخزن لبست صايتي وشال فوك راسي ونزلت اركض لخالة سلوى شفتها هم متحضرة وخالة رسمية هم كاشخة..

-عبق: اني جهزت

-سلوى: خوش چا لملمي الديوان بينما اللبس الربطة

هزيت راسي اي ورحت انظف رغم نظيف ويلمع بس ما عاندت وظليت اشيل بالكوشات وارجعهن لمكانهن بس حتى ما اترزل منها وتحرمني من الروحة..

-عبق وينج

-هناا خالة

اجتني سلوى لابسة شالها وعبايتها وبيدها موبايل، طبگت باب الديوان علينا وقفلتها وتقربت مني تراويني شي بالموبايل..

-شوفي

مديت راسي اشوف وگلبي لعب من شفتها صورة امي، رفعت عيوني عليها ابلع بريگي خايفة وسألتها بتردد..

-شبيها امي

-امچ راح تموت عبق..

حطيت ايدي على گلبي گوة اتنفس، اردفت سلوى بنبرة حقيرة كلها سم وخبث..

-امچ راح تموت اذا ما سويتي الراح اگلچ عليه

-شـ.. شـ.. شنو تردين.. مني

-راح تتزوجين! وهسة!

-لا لااا لا فدوة لاا

ركضت اشرد من الديوان وجرتني من ياخة فستاني تسحلني ترجعني لمكاني، صرخت اهز براسي لا ودموعي صارت تنزل مطرر من عيوني احس عزرائيل واكف فوگ راسي مو سلوى..

-عبق وراس ابوي الشردت منه بذيج الظهرية ورااس شيخ علي اذا ماا گعدتي راحة وتزوجتي الزلمة الجايچ امچ ادفنها بيدي!! والعباس ابو فااضل ادفنها بيدي واذب عليج تهمة ما تطلعين منهاا لو موو علي الحـق يوگفلچ ويساعدچ!!

-هددينيي مااريد وخررري عنيييي

-عببق تلفووون واحدد والزهرررة بأتصال واحد وامچ تروح بيها! هي واگفة على طرريف صار اياام گاطعين عنها العلاج واذا ما انطوها اليوم تموت!! وبعد انتِ بكيفج

-حررام عليج والقران حررام عليج حرااااام

-مو حرام انا اريدلج الزينة وجاي ازوجچ من زلمة تحلمين تاخذين مثله

-زواج الاكراه باااطل

-ماكو شي باطل يمنا والقرار يمچ بعد

-ما اوافق!!!

-خوش

رفعت تلفونها ودگت على رقم مسميته "دكتور يونس" شهگت جافلة من فتحت مكبرة صوت وحچت وياه..

-شلونكم دكتور بشر شلونها اختي؟

-دكتور يونس: تعبانة والله

-هاا يا ستار ليش

-گتلج وقفوا عنها العلاج واذا ما رجعناه الها واجيتوا دفعتوا التكاليف شذى مستحيل تعيش

اسمعه وگلبي يتگططع اختنگت وبعد النفس مينجر عندي، وگعت بالگاع وموتت روحي من البچي، ابچي واضرب بالگاع بكل حيلي منهارة..

-سلوى: مع السلامة دكتور ان شاء الله ندفع بس خلي يصير عدنا...

سدت الاتصال منه وگنبصت گدامي، عصرت فچي بين ايدها ورفعت وجهي عليها رافعة حاجبها وتحچي بتعالي..

-امچ حياتها بيدي جاي اعالجها بفلوسي وبتعبي انطيچ مهلة منا لخمس دقايق عبق تطلعين تجهزين نفسج وتكعدين بالصالة تنتظرين يجي السيد يعقدلج غير هالحجي ترحمي على امچ وودعي شرفچ...

طلعت وعافتني بضيمي عافتني احارب افكاري التعصف عقلي وسببتلي دوخة قوية، الخنگة موتتني حطيت ايدي على صدري احاول اهدأ نفسي واتنفس راح تطلع روحي.. احس بروحي جاي تطلع والدنيا بدت تفتر بيه..

بچيت عاجزة اباوع بالحياطان واضرب على رجلي شبيددي شسوي شنو يطلع بيدي واگدر اوگف هالشي.. اشرد واعوف امي تموت؟؟ لو اتنازل وادفن روحي ويه رجال ما اريده لخاطر تعيش..

مسحت دموعي متناسية الدا اعيشه متناسية كلشي ومتناسية وجع روحي، گمت من مكاني بسرعة من انرسمت صورة امي گبالي صورة المرة الوعدتها اسوي المستحيل حتى تعيش وارجع لحضنها وسلوى صارلها سنين تسوي النون وما يعلمون حتى تكتلها وتحرگ گلبي بيها..

ضربت على راسي ابعد شكو فكرة سلبية اجتني وطز بگلبي طزز بمشاعري طز بالعيشة المقززة الدا اعيشها بس مو طز بـ علي الحـق! علي الحـق شنو راح يصير بي؟؟ راح يتفهم موقفي لو يكرهني ويـ....

-خلصت الخمس دقايق

فزيت ارفع راسي اباوعلها گلبي يرجف، بيدها الموبايل وعارضة الشاشة گبالي داگة رقم دكتور يونس..

-انتِ اختاريتي مصيرچ وبعد تحملي نتيجة اختياراتچ

-حرااام عليج ورووحه لابووية

-ابوج ال**** الستر على امج ال****؟

-انتِ اكبررر ساقطة ومنحططة ومنحررفة حراام شيخ علي مگعدج ببيته والله حررامات علييه

-ارضى اكون منحرفة ومنحطة ومدري شني المهم انا ام هالبيت وزلمتي ينحلف براسه وبنيتي شيخة كاعدة على چتاف النساوين وانتِ وامثالج ينظفون فضلتها!

-مستعدة ابقى انظف فضلتها طوول عمري حبيبة اختي مو بنتچ هي اختيي واميي وصديقتي موو بنتچ وسففه عليها عدها ام نفسچ وسسفة

-وسفه عليج مگعدتج ببيتي صار سنييين! سنيين وانا حاطتج هنا متفضلة عليج! ياهو وگفلج غيري من طردچ ابوي من بيته وتبره من شكو واحد يلفيچ ياهوو؟؟

-والله ابقى بالشاارع ولا ابقى يمج ياا سلوى!!

-خوش يلا ولي للشارع تيهي ويه البايعات شرفهن وامج الله يرحمها همزين خلصتيني من همها ومصاريفها

-لاااااااااا

-چا مو هذا التردي؟

-الله يااااخذج حسبيي الله ونعم الوكييل بيييج

-دوليي اكعد اتوسل بيج؟ علي الحق ما يريدچ ولعبت روحه منچ امشي ولي طلعي من بيتي ماريد اشوف چهرتچ بعد يلاااااا

-انتِ هذا دگچ ومدگوگچ علي الحـق!!

-علي الحـق لو غيره انتِ ما تستاهلين زلمة وانا متفضلة عليج من جبتلچ رجل هسة! وحتى هذا ضيعتي بغبائج ويلا ولي طلعي مناا

-وامي؟؟؟

-امج الله لا يرحمها تصعد لربها چا طلابة

حچتها ببرود شعلني شعل وطلعت من الاستقبال ممهتمة لوضعي، صرخت من مكاني ملچومة ومعدتي تتگلب من الحرگة..

-لاااا لاااا اوگفي اوووگفي

رجعت بس مدت راسها من الباب ما مهتمة، مسحت دموعي وترجع تنزل امسح وترجع تنزل، بلعت ريگي زردومي يموتني متجرح من الصياح والبچي..

-اني موافقة

-على شنو؟

-ارضى.. ا.. ارضى اتزوج

-تفتهمين، هسة اتصل بالطبيب يرجع علاج امج

-موافقة اتزوج هالرجال بس يا سلوى ورووحه لابوية وداعة امي وضيمها وحق كلل لوعة عشتها وكل دمعة نمت وهي بعيني وراس حبيبة بنتچ اندمچ نددم عمرچ وطردتچ وفضيحتچ تصير على ايددي من هالبيت!!

-يلا يلا انچبي وغسلي وجهچ المرعبل

عافتني وطلعت واني ظليت اكل بروحي الووب بمكاني واعض بأصابعي اريدد انسى وجع گلبي واللتهي بوجع ثاني.. طلعت من الديوان مفرفحة روحي طلعت اركض على موبايل ادور بالختلة ومثل المخبلات على تلفون اريد اتصل بعلي الحق يلحگني يجي يوگف هالمهزلة وحتى لو ما لحگ يوگفها على الاقل ابررله اني مجبورة بس ما لگيت تلفون.. الكل طالع من البيت وماخذ اجهزته وياه وتلفون رسمية ما هو مدا اللگاه..

-عببببببق وينج ماما حبيبتي

صييخ نار وصار بگلبي من صاحتلي "ماما حبيبتي" صيخ وفرفح گلبي.. گعدت على الدرج ما اكدر ادخل ماكدر اروح مهدود حيلي ورجليه متحملني.. اسمع اصوات ناس جايه من الاستقبال وصوت ضحكة سلوى الرنانة تطرب بالبيت.. دعيت بگلب محروگ عسى بدال هالضحكة يصير بچي.. عساچ يا سلوى متشوفيلچ درب ولا تتسهلچ حياة عسى ربي ياخذ حقي منچ بدون لا يفجعني بـ حبيبة لو واحد من احبابي عسى كل ضيم عيشتيني بي يرجعلچ اضعاااف مضاعفة بجاه زينب وستر زينب...

طلعت الكلبة من الاستقبال تخزر بيه وتحچي بحنية مصطنعة..

-يلا يا ماما الرجال وراه سفر هم ياله تلحگون تعقدون وياخذج وياه

انخمشت روحي بالزايد انوب سفر!! حتى سفر راح تسفريني حتى ماعندي مهرب بعد وماگدر حتى اتواصل ويه احد موجود هنا! لا اني الحافظة ارقامهم ولا اني العندي موبايل اتواصل وياهم.. جرتني جر من زندي وگرصتني بقوة ونزلت تنتر بأذني..

-مسحي دموعچ ولا تفضحينا بين الناس والله يا عبق لو شلعتي گلبي اشلع گلبچ بأمچ واصعد روحها لربهاا

-هديني

-اهدچ وتمشين عددل السيد راح يعقدلج بساع تجاوبين لا تظلين تمطمطين فهمتي؟؟؟

مردت زندي مرد وما قبلت اجاوبها، قبل لا ندخل للاستقبال دارتني عليها وصفگتني رااشدي شعل وجهي وطبعن اصابعها بي..

-جاووبيي

-بالقران ارجعلج هالراجدي ومو بس بأيدي! بأيد شيخ علي وولده!!

خنگتني من رگبتي بيدها تضغط حييل وراصة على سنونها ترجف، طلعت رسمية من الاستقبال تهرول ومبحلقة عيونها على سلوى دفعتها عني ونترت بيها تهمس..

-شبيچ انتِ شبييج تخبلتييي

-سلوى: تعااند بت الچلب!

-رسمية: تعاند چا هي مو موافقة؟؟ مو گلتيلي عبق رضت بالناس لو شني؟؟

-سلوى: موافقة اي بس تتقنعرر

-عبق: لاا ما موافقة ماا موافقة

-سلوى: انچبييي بت الغبررة لسانج هذا اليوم اگصه بس اصطبريلي

-رسمية: سلوى شون تجبريها؟؟ انتِ مو گلتي البت مقتنعة ورايده؟؟ شني تضحكين عليّ ولج!؟؟

-سلوى: موافقة بالعبااس ابو فاضل شبيچ ام علي

-عبق: شالچ ابو فااضل شلچ ابو فااضل وخصيمچ ابو فاضل يا سلوى!

صرخت وانگطعت صرختي من مدت ايدها لحلگي وجرت لساني من مكانه حييل حسيت راح اتقيء.. دفعتها رسمية ما قابلة وبدون لا تنطيها مجال سلوى صدتها بأيدها ونترت..

-سلوى: ام علي من رخصتج!! البت بت اختي وانا ادرى بمصلحتها لا تدخلين فدوة لطولج

دفعتني گدامها تطببني للاستقبال والدمعة بعيني كوة مسيطرة ما انزلها، گامن النسوان الكاعدات سلمن عليّ وبوسني بس روووحي ما طايقتها تمنيت املخهن تملخخ بيدي واطردهن منا..

-سلوى: هههههه هي تستحي شوي گوة طلعتها ترجف رجف من الصبح

-هههههه يا بعدي ليش الرجيف والله عمي خوش زلمة راح ترتاحين وياه

فكيت عيوني وحلگي من گالت "عمي" صرت اباوع بالوجوه واخذتني الرجفة راح اوگع من طولي يربي رراح اموت..

-رسمية: من رخصتچن.. عبق تعالي يمة اريدج

-سلوى: هاا ام علي صدگ نسيت اگلچ ابو علي رايدج گال اصيحلچ وانا نسيت والله

-رسمية: خوش اروحله بس عبق تعالي هسة

-سلوى: لا ام علي فشلة روحي لابو علي اهم بعدين عبق تجيچ خلي النسوان يشبعون منها ويشوفون جمالها

-هههههه ام علي چنها ما رايده تنطينا بنيتكم

ما جاوبت رسمية ولا جاملت وطلعت من الاستقال تروح لشيخ علي تشوفه.. روحي تعلگت بيها من انتبهتلها ما راضية على هالخطبة وحسيتها ما قابلة انجبر على شي ماريده تأملت خير وبقيت اباوع للباب عيوني معلگة عليها.. بس الامل ويه سلوى ميرهم ماله وجود اصلاً بقاموسها گومتني بسرعة وگعدتني يم باب التفصل بين الاستقبال والديوان ونترت بأذني..

-وراس حبيبة يا عبق امچ اذبحها مو بس اكطع عنها العلاج اموتهاا بيدي وابچيچ دم عليها واللزگ بيج تهمة بس الله يخلصج منها! من ترجع رسمية تگليلها انتِ موافقة ومقتنعة وهسة راح نبدي العقد فهمتي!!

ما تجاوبت وياهة ونزلت دمعتي، غطتني بجسمها ونترت بحرگة تهمس..

-ولج لاا تبچين كدامهن لاا تبچين!!

-ها شبيها الحلوة؟

-سلوى: تگول ماريد اعوف حبيبة ههههه متعلقات ببعض

-ميخالف امي انتِ نجيبج تزوريها قابل وين ماخذيج يا عيوني

مسحت دمعتي بأيد ترجف ولبسوني شال ابيض چبير على راسي، حطت بيدي سلوى قران وگامت بت اخو الرجال مادري بنته وگعدت بصفي وشعلت شمعة فرحانة..

-رمشت لـ للحجي خاطر يبدون بالعقد

ويه كلامها رجعت خالة رسمية تباوعلي من بعيد، تقربت علينا توگف بصفي ونزلت على اذني تهمس بحنية..

-عبق يمه شيخ علي گاعد بالديوان ويه الزلم وسألني انتِ راضية؟

باوعت لعيونها ودموعي تلمع بيهن، اشرتلي براسها حتى اتشجع واحچي وهمست بصوت گوة ينسمع..

-خالة ماريد اتزوج فدوة

هزت راسها اي ووخرت عني تبتعد بس فات الاوان لان بده الشيخ يسألني عن قبولي وسلوى مردت زندي مرد بالگرص..

-رسمية: شيخ علي يريد يحاچي البت دقايق من رخصتكم

بهتت سلوى والمرة هم صفنت وگلبت خلقتها من موقف رسمية بس اني شنوو گلبي تعلگ بيها وكمشت بيدها بكل حيلي، بهالثواني حسيت امي رجعتلي وراح تنقذني من الاني بي..

گمت ويه خالة رسمية وما ردت اباوع لسلوى اخاف تهددني بشي بس هم ما خلتني اطلع بدون لا تصيحلي..

-عبق!

اللتفتت اعض بشفتي ودموعي على خدودي، رفعتلي موبايلها واشرتلي عليه وعرفت قصدها بهالحركة شنو.. قصدها اذا شكيتي لشيخ علي من هالزواج امچ نهايتها على ايدي الله لا يوفقج يا سلوى وعسى حوبتي متتعداچ!

طلعت ويه رسمية للمدخل ننتظر يجي شيخ علي واحس بروحي راح تغيب، كمشت بيدها ورجليه خيوط صارن انتبهت عليَّ وطبطبت على ايدي على كيفها ودارت وجهها تحاچيني وفجأة صفنت.. صفنت واني هم صفنت على صوت رجال عالي اجه من الصالة يصيح..

-يممة!! يوووم وينكم شنيي طالعين؟

-رسمية: علي الحـق!

غصيت بدموعي وبدون لا اشعر صرت ابجي بصوت عالي وسدت حلگي بيدها رسمية، غمضت عيوني احرر دموعي ويه صوته اليصيح بأمه وسلوى وحبيبة حتى وحدة منهن تروحله، همست رسمية بحس ناصي متوترة..

-رسمية: اششش لا تبجين سكتي عبق سكتيي والعبااس يحرگ البيت لو يفتهم بالجاي يصير سكتيي

بس ما كدرت اسكت ما كدرت وظليت ابجي واشهگ مهضومة، صوتي عالي ومتأكدة وصل للكاعدين بالاستقبال لان اجتنه سلوى تنتفض من فوك ليجوه وتأشر بيدها..

-هذا ابنج اجه!! علي الحـق هذاا علي الحـققق شجااابه.. امشيي ولج امشيي بسااع

سحلتني من ايدي ترجعني للاستقبال وگعدتني على الكرسي، دگت الباب التفصل بيننا وبين الديوان بأيد ترجف وحچت بصوت خشن مستعجلة..

-احنه جاهزين شيخ

بس محد جاوبنا بقت تدگ بالباب مرة ومرتين وبالثالثة انشلت ايدها ويه صوت علي الحـق الاجه من الاستقبال فات علينا وعلى النسوان ميدري بينا هنا!!

-علي الحـق: العفو خيتي العفوو

طلع من الاستقبال وطلعت روحي وياه ماا انتبهلي ما شافني ما ركز اني گاعدة هنا وسلوى گدامي..

-علي الحـق: يووووم

نزت خالة رسمية وطلعتله تركض وبعد اختفى حسه من البيت، وگفت گبالي سلوى تمسح دموعي وتحجي بنتر..

-لا تبجين يمممة لا تبجين الزلمة نشمي وكال ما امنعج من اهللج

-ام صادق: ام حبيبة مو چنها السالفة طالت؟

-بووووووية... بووووووية شييييخ علييييي

جحظنا كلنا عيوننا على صوت علي الحـق زلزل من الحديقة وطب للديوان.. طب وعياطه ما هدأ وصوت شيخ علي فوگاه يحچي وياه..

-ها بوية هلا بيك وليدي

-بوووية اللحگ طلاابة!! طلاابة واشتعلت الدنياااا

-شيخ علي: ياا علي دخيلك وين الطلابة؟؟

-شيخ زهير: يا ستار ان شاء الله خير صاير شي؟

-علي الحـق: اييي صاير صاااير وراااح تحترگ الدنيااا وتصير فضيحة يحچي بيها السلف كللله لو ما اجه ابوووي هسة وفض هالطلاابة!!!

-شيخ علي: عذرونا يا جماعة العفو منكم شيخ زهير والله مادري شني السالفة بس چنها الطلابة چبيرة وما تتأجل امسحها بلحيتي

-شيخ زهير: لا ابو علي شني السالفة تصير هاي الشغلات بعد الطلايب شيحلها لوما الشيخ يتدخل ويوگف على روسهم

-علي الحـق: من رخصتكم خوية.. من رخصتكمم ابوي يلا بسااع النار شااعلة لا تحرگنااا

-ام صادق: شصاير ام حبيبة هسة وكت طلابة؟

حچيت من مكاني ومن بين دموعي..

-عبق: الطلايب متتأجل عيب بحق الشيخ يرد مساعدة احد!

-سلوى: سكتييي انتِ

فركت زندي فرك بيدها احسه انشل وبعد ما احس بي، النسوان ضاجن من الموقف وگالن صارت بيها عرضة وطلابة نجي غير يوم نعقد بس شنوو سلوى رادت تموت وحق الله شوية وتنجلط، طلعن واني گمت من مكاني اضحك وابچي ما مصدگة لو بيدي ارگص بمكاني من الفرحة بس سكتت من رجعتلي سلوى عيونها خابطة من العصبية وصفگتني راشدي فوگ راشدي قبل شوية وهالمرة خدي انشل وشفتي طگت دم..

-سلوى: بت العاار لوما ربيتتج يا عببق

-عبق: اني شعليه شسووويت

-سلوى: بسيططة اني الج عبق بسييطة

رجعتلنا رسمية تهف وتفرك بصدرها وتسوي صلاوات وتقرا المعوذات، بقت هيجي فترة خمس دقايق وقاطع قرانها صوت الباب التفصل بين الاستقبال والديوان من اندگت دگة مال واحد عصبي..

-علي الحـق: خلي البت تتحضر رااح نعقد

شهگت فاكة عيوني وسلوى بعد ماكدرت توكف على رجليها وكعت على القنفة ترجف وخالة رسمية وجهها صار ددم بس ما حچت شي..

-علي الحـق: تفضل سيدنا ابدي بالعقد

-شيخ علي: بوية عبق تسمعيني؟

-علي الحـق: عوفها بوية تستحي.. يلا سيدنا بلا امر عليك مستعجل

-السيد: بسم الله الرحمن الرحيم اللهم صل على محمد واله محمد الحمدلله الذي جعلنا من الموالين والمحبين لامير المؤمنين.. ابنتي عبق هذا الزواج خوما مغصوبة عليه؟... عبق؟ عبق اذا تسمعيني گولي نعم!

من الخوف والرهبة صرت اطگ سن بسن ارجف، باوعت لـ سلوى ضامة وجهها بيدها وتضرب على رجليها ورسمية ساكتة وصوت السيد بعده يصيحلي..

-السيد: عبق تسمعيني بنتي؟

-عبق: نعم

-هذا الزواج انتِ موافقة عليه؟

غمضت عيوني وبلعت ريگي متغاضية عن الكل وركزت بس ويه صوت السيد، زفرت نفس اخفف من رجفتي وتخيلت امي وابوية ويايه.. شلت القران الكريم بين ايدي وفتحته على سورة الفتح وگلت بصوت يرجف..

-نعم

-السيد: انا السيد حسين عبد الرضا هل تقبلين ان اكون وكيلچ؟

-عبق: نعم

-بارك الله بيچ بنيتي... بسم الله الرحمن الرحيم الحمدلله الذي فتح بالحمد كتابه وجعله اول محلٍ لنعمته وصلى الله على محمد والهِ الطاهرين ائمة الرحمة ومعادن الحكمة وسُبل الايمان.. قال تعالى بسم الله الرحمن يا ايها الناس انا خلقناكم من ذكر وانثى وجعلناكم شعوباً وقبائل لتعارفوا ان اكرمكم عند الله اتقاكم.. ابنتي اترضين ان تقبلين يا محروسة بعين الله يا عبق فاضل حسام بأن اكون وكيلك لأزوجكِ وامتعكِ وانكحكِ من المحروس بعين الله واهل البيت علي الحـق علي علي السجاد على سُنة الله ورسوله وعلى مهرٍ معجله خمسة وعشرين مليون دينار عراقي ومؤخره ثلاثون مليون دينار عراقي فأن قبلتي فـ قولي نعم انتَ وكيلي!

يحچي وگلبي ينبض بجنون ودموعي تنزل، رفرفرت من الداخل من عاد العقد خمس مرات متتالية بدون انقطاع ويكرر جملة "فأن قبلتي فـ قولي نعم انتَ وكيلي" تنهدت براحة وعضيت على شفتي ابتسم من بين دموعي.. مسحت دموعي بأيدي وگلت بصوت مبحوح من البچي..

-نعم انتَ وكيلي........

يتبع 👑....

━━━━━━ ♛ ━━━━━━

السعااادة 🤍🤍🤍🤍🤍🤍🤍🤍🤍🤍

المشهد المنتظر من بداية الرواية لليوم هو خطوبة علي الحـق وعبق عگاريگناا الحلووين 😭👌🏻🤍🔥🔥

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

ينجمة ليلي وضواها.. وين الگه بعد نجمة مثلچ واهواها؟ ⭐️♥️

━━━━━━ ♛ ━━━━━━

"عـــبق"

نطقت القبول ودموعي تهل، سديت القران وحضنته لصدري وهمست من كل وگلبي "الحمدلله رب العالمين".. توسعت ابتسامتي من سمعت صوت علي الحـق يقبل التزويج وهيچ صرنا لبعض اخيراً..

فزيت من مكاني ويه ما انفتحت باب الاستقبال علينا وظهر منها جسم علي الحـق، وگفت خالة رسمية عدل وسلوى هم ظلت تباوعله من بعيد.. ما شاف بعيونه غيري ما شاف امه ومرة ابوه واگفات وغلس على الكل وهرول بأتجاهي فاتحلي ايده وبلمحة بصر شالني من الگاع بحضن قوي كسر ضلوعي..

ضحكت من بيت دموعي من صار يفرني ويبوس بوجهي ورگبتي وشعري.. ضحكت بخجل وفرحة غمرتني واستسلمت بحضنه ارخي كل جزء من جسمي واغمض عيوني استشعر الامان..

-رسمية: احم

-سلوى: احم شنيي ليش همه شايلينا من گاعنا!!

بقى مغلس عليهن تغليسة مرتبة ولا دار وجهه ولا نزلني من حضنه، رجليه تلولح بالهوا وماردني مرد نفسي انگطع واستحي اگله گدامهن ماكدر اتنفس..

-رسمية: چا احنه نطلع بعد شعدنا هنا

-سلوى: لا انا باقية هنا اخافن عليها

-رسمية: ولج شراح يسويلها!

-سلوى: كلشي يصير همه بعدهم بس عقد ما يصلح نعوفهم وحيدهم

نزلني علي الحـق من ايده وباس خدي بلهفة ولوعة لاخر مرة، مد ايده بجيب بدلته العسكرية وطلع منها علبة صغيرة فتحها وظهرت منها حلقة ذهب خلت سلوى تشهگ..

-سلوى: لطاااام اللطمني مخليها بجيببك

ما تجاوب وياهة وكأنها نكرة، تلمس ايدي الخشنة على كيفه استحيت من منظرها المجرح من المنظفات والقاصر وعضيت على شفتي منحرجة، لبسني الحلقة بأصبعي وابتسمت بعيون مدمعة من رفع ايدي يبوس بطنها وظهرها وحطها على وجهه..

-سلوى: يمممماااا

-علي الحـق: من رخصتكم

سحبني من نفس الايد الچانت على خده وياه بهدوء يطلعني من الاستقبال واخذني للدرج يريد يصعد بيه، تخبلت سلوى گامت تدگ وتلطم وامه كلمة وحدة ما حچت..

-سلوى: وووين ماخذهااا وييننن بعددكمم كلشيي ما صاار

انطاهة الاذن الطرشة ممهتم بس اني استحيت وغديت دم، جريته من ردن بدلته العسكرية وهمست..

-علي لا نصعد فوگ

-لا تحجين

-علي الحـق!

-سكتي معليج انتِ

-سلوى: يتبسبسوون خاايبة يتبسبسووون بيناتهممم تطشر عررضناا راح شرررفناا

-علي الحـق: حچاية بكبر بيتنا نايمة بزردومي لا تخليني اسولفها واطشر العرض من صدگ!

-سلوى: تفشرر عليَّ؟؟؟

-علي الحـق: وعلى عشيرتچ هم!

جاوبها بكل صلافة وخلاها مصخمة وملطمة واخذني فوگ ولغرفته بالتحديد.. توترت ورجليه گامت ترجف عبالك اخذني للموت ظليت واگفة واطگطگ بأصابعي وشفايفي خلصن من گدما عضيتهن..

باوعتله يسد الباب علينا ولزم المفتاح يريد يقفلها وبطل عافه بدون قفل، اللتفت عليَّ عاگد حاجبه ومضيگ عيونه بعصبية، سويت روحي طبيعية ولا كأن متأثرة وخايفة من ردة فعله ورفعت راسي اگول بثقة..

-عبق: اني راح اطلع بينما تسبح وتبدل ملابسك

-چا ما تنزعيني البدلة؟

بحلقت بوجهه ممفتهمة هو يقصد بدلته العسكرية؟ لانه لابس عسكري لو بدلة عرس ومادري ليش حسيته يقصد بدلة عرس..

-عبق: لا شساعدك بيها

-بس بالدكم ساعديني وامانة تغمضين عيونج ما تفتحيهم

-علييي الحقق

رص على اسنانه حيل وهجم عليَّ لزمني من زنودي وعضنيي عضة انتقاام بچتفي روحي شاغت بيها ودفعته عني اعيط..

-ليييش تعضضضض

-هاي خاطر اذكرچ علي الحـق ياهوو وما تلعبين بذيلچ بعد!

-شوكت لعبت بذيلي؟؟ اوووووف چتفي ماات اللحمة انشلعت اااخ

-گاعدة وبيدها القرااان ولابسة چفنن ابيض على راسها تريد يعقدوولها وولج ااااااخ لو اكضچ بالعباااس رووحچ اطلعهااا

-شبيك شبييك تره انجبرت

-تنجبرررين تشردين من البيت وليي طلعيي دوريلج أي نعاال خابريني منننه

-ما اكدر اخابر بالنعال

-دوريييلج قندددرة

-هم ماكدر

-عبببببق

-لا تصيح لاا تصييح اذني راحت شبيك

-وووولج تعالييييي

-يمااااااا

لزمني ملخني بالعض خلاني ارافس ما خلى مكان يعتب عليه زرفني تزرف، دفعته عني فحطانة وعطت بكل صوتي..

-والعباااس جبرونيييي

-ياااهيي الجبرتتچ گليييييلييييي

يحجي من بين اسنانه وعيونه ناطة ويرجف رجيف، حطيت ايدي على گلبي اتنفس على كيفي وگعدت على الشازلونة مالته..

-احجيييييييي

-طلگني ماريدك بعد

هجم عليَّ مرة ثانية يريد يبدي بنوبة جديدة من العض والتملخ ودفعته عني اشرد لنهاية الغرفة واعيط من مكاني..

-ووولك جبروني جبرووني افهممم افتح عقلك وافهممم

-اليوم افتتتح صدددر الخلفچ گليييلي ياهوو جبرچ امي؟؟؟

-مرة ابوووووك

-سلوووى العاره؟؟

-اي اي بس بداعة امك متروح بد....

گطم جملتي على النص وفتح الباب ونزل يركض جوه يروحلها، رحت وراه مثل المخبلة اجرجر بيده وهو يعتها اجر بچتفه ويدفعني ماعرف شلون طررت طرررت وطفرت على ظهره وكمشت براسه وضميت عيونه بيدي..

-وووولج عبببق

-اذا رحتت يا علي الحـق لاا اعرفك ولا تعرفنيي

-هدينيييي

مشى لمحجر الدرج ويفلت بيه يريد يشمرني من على ظهره واني كمشت حييل ولفيت رجليه عليه خاف يلطشني بالگاع، جر ايدي يريد يعضها حتى افلتها من رگبته وقبل لا يلحگ يعضني عضيته من علباته..

-وووولج اااااااااااخخخخ

-ااااخ انتَ زرفتني تزررف تستاهل

-هدديني ولج لا تكضيني من علباااتي اظل ارررعشش

-تستااهل ظل ارعش هيج مثل المنتوول تستاهل

-ولج عبببق بالعباااس ارگعج بالحاايط

-لاا تصيح وتفضحنا اسكتت يلااا اسكت

-الصللفة الرعنة العگرووگ انا اعلمج بت فااضل اليوم اطلعع عيونج وحگ ابو فااضل

-شيخ علي: شبيكم علي الحـق!!

انتفضت من شفت شيخ علي وخالة رسمية واگفين جوه ورافعين راسهم لمحجر الدرج يباوعولنا واني فوگ ظهره، فلتت ايدي من رگبته اريد اشمر روحي والخبيث كمش بيه بالزايد يعصر ايدي ميخليني انزل..

-شيخ علي: شبيكم بوية شني هالصياح؟

-علي الحـق: بوية عگروگة هاي انا معليه

غمضت عيوني من الفشلة وهمست بصوت كلش ناصي..

-علي لا تسوي هيج لا تفشلني گدام اهلك نزلني بسرعة وعدل حچايتك فدوة

استغربت من استجاب بسرعة ونزلني من ظهره وجرني يحضنني نص حضنه لجسمه، بلعت ريگ منزلة عيوني استحي من ابوه ومفتشلة من الموقف الشافنا بي..

-شيخ علي: شسالفتكم انتم بوية؟ حسبالنا صار بالبت شي

-علي الحـق: جاي نتشاقه بوية ونلعب ماكو شي لا تخاف

-رسمية: نزلي عبق يمة لا تظلين فوگ

تفشلت اكثر من اشرتلي بيدها اجي وشيخ علي هز راسه موافق، فلتت نفسي من ايد حق وشردت اريد انزل ورجع جرني من ايدي يسحبني عليه..

-علي الحـق: يمة انا الجابرها تبقى هي تستحي وما تريد بس مشتاگلها واريد اشوفها واشبع منها

-رسمية: اي يمة نزلوا جوه لا تظلون فوگ

-عبق: حاضر خالة

شلعت ايدي من ايده ونزلت اركض من الدرج وهو يصيح ممهتم لابوه وامه..

-علي الحـق: اناا اعلمچ قببق حسابج بعدين بس انزع البددلة

-شيخ علي: امشي ولك عوف البت

-علي الحـق: مااعوفهاا وجايك بووية اليوم اشعل الدنياا بس اسبح

-رسمية: تسبح ليش ولك؟؟

-علي الحـق: چا خست من الطريق بس جايكم جااايكم

راح واني نزلت جوه يمهم، گعدت على القنفة بدون صوت وابو بقى يفر بيده ويدردم عليه..

-شيخ علي: ابن الچلب ياهو يگدرله هالارعن

-رسمية: چا شنسوي ما تعودت عليه

-انتِ كل ولدچ سوادين اريدلي واحد عاقل بيهم ماكو

-رسمية: لا تحچي عليهم علي شبيهم شحلاتهم عين الله تحرسهم

ضحك يهز براسه ودار وجهه عليَّ، نزلت عيوني خجلانة من موقفنا قبل شوية شگد عيب من شيخ علي هسة شيگول عليَّ..

-شيخ علي: ان شاء الله مهناية ومسعدة بنيتي عبق

-عبق: الله يحفظك عمو

-شيخ علي: علي الحـق صح متهور بس خوش زلمة واخو خيته نشمي وصاحب غيرة يمكن انتِ مستغربة من الصار گبل شوي وانا هم ما صارتلي فرصة احاچيچ بس يا بوية وليدي رايدچ وهاويچ من كل خاطره ورادچ على سُنة الله ورسوله بدون لعب وسوالف مكسرة

هزيت راسي ساكتة واحس بالبوخة تطلع من وجهي خجلاانة كلش ومدا اعرف شلون ارد عليه..

-شيخ علي: ام علي بلغتني انتِ ما موافقة على اخو شيخ زهير ووالله العظيم ما ادري بيچ ما رايده سلوى وصلتلي غير حچي وسودت وجهي وياچ ووياهم

-عبق: محشوم عمو والله يطوللنا بعمرك

هز راسه مبتسم وعافني ودخل لغرفته هو وخالة رسمية الي ما نطقت حرف من صار العقد لسه، توترت ابقى وحدي خفت تجيني سلوى وتسويلي مشكلة جديدة فـ رجعت اگعد بالاستقبال وحدي اتصفن..

عشر دقايق ونزيت على صوت صياح اجه من الصالة، ركضت اشوف شكو ولگيت علي الحـق شاايط ويتعارك بيده ويه سلوى وابوه واگف بيناتهم وخالة رسمية واگفة على جهة..

-علي الحـق: يااااهووو سمحلللچ تجيبيلهااا خ** يخطبهاااا ووولج هااااي مررريتييي اليييي مااالتي عبببق الييييي

-شيخ علي: وووولك هيييد

-ورااسك يا بووية انععل والددديه اليجبرهااا على غيررري شنييي انتِ ماااا رايدة روووووحچ؟؟؟؟

-شيخ علي: علي الحـق!! لااا تتجاوز على مرة ابووك

-علي الحـق: دخييييلة ابوي خليها تحشممم نفسهاا وتحط رجليها بالگاااع خليها تعررف مكاانهاا عددل ولا تظل تنطط مثل السلنگحيية والبريعصييية

دفعه ابوه ما راضي وسلوى تسوي روحها تبچي، جر شيخ علي ابنه جر ودخله لغرفة امه بس حق متخبل ويفلت نفسه من ايد ابوه ميريد يروح وياه للغرفة..

-شيخ علي: علي الحـققققق ورووح ابوووي اغضب عليييك هدديت حيليي ابن المسموووط طب للغررررفة

دخلوه للغرفة وصوته يرعد رعد بالبيت يهدد ويتوعد ويحرگ بروحه حرگ اني واگفة بعيد وصدري گام يوجعني من العياط وحسيت بناره.. ظلت سلوى واگفة بباب الغرفة تسمع وخازرتني هستوها دتجيني تطلع حرگتها بيه وصاحلها شيخ علي من الغرفة واضطرت تدخل وطلعت بدالها رسمية..

-رسمية: عبق گعدي بالاستقبال

رحت للاستقبال بدون نقاش عرفت دخلوني حتى ما اسمع كلامهم ويمكن ميريدون يصغرون سلوى اكثر واسمع لاهانات حق الها..

مي بااارد ونزل على گلبي من سمعت صوت بچيها العالي وصلني هنا بالاستقبال تبچي وتصرخ "اني اريد مصلحتها" عود تريد مصلحتي الي الحية!

اكثر من نص ساعة استمرت العركة وهاي اول مرة بحياتي احس بروحي مسمومة لاني فرحانة! والله العظيم فد فرحاانة ومتونسة على بچيها وعياطها والاهاين الدتبلعهن عساچ بالزايد يا سلوى واخلص منچ..

اخيراً هدأت الاصوات وانفتحت باب الاستقبال عليَّ ودخل علي الحـق، گمت اوگف اباوعله من بعيد اعصابه تلفانة گمت اللاحظ واعرف متتلف اعصابه وينهار بس من يتعلق الموضوع بيه.. اشكال يعصب قبل واصلاً هو العصبية من صفاته بس ميصير بي شي عادي يعيط ويرزل ويخبص ويكمل حياته بس من يكون شي خاص بيه يتأذه كلش..

بدون لا يحجي كلمة ذب حسرة وگعد على القنفة الي بصفي، اجيت دا اگعد بصفه وشهگت من جرني وگعدني على رجله..

-علي الحـ...

-اذا گمتي اطگچ وعلي!

خزرته وگرصت زنده بيدي ما اهتم ولا عبرني وبقى منفس ضايج، انزعجت لانه ضايج وانقهرت هم يعني هو جاي تعبان ويتلگاه خبر يموت قهر وانوب تعارك ويه مرة ابوه..

-علي الحـق شبيك

مجاوب واستمر على وضعه سارح وعاگد حاجبه ويتنفس سريع، لميت ايدي لحضني مرتبكة شنو المفروض اسوي هسة حتى يصير زين؟

-علي جاوبني

دار عيونه عليَّ وصفن بوجهي ابتسمتله وبدال لا يبادلني ابتسامة فكت عگدة حاجبه وگال بغصة سارح بوجهي..

-شلون بيه لو صارت صدگ

-شنو هي؟

-شلون لو ما لحگت عليج وعقدتي على غيري!

-علي الحـق لا تفكر هيجي حباب

-عبق انا نزلت صدفة! صددفة انا نزولي باچر واليوم استأذنت من الآمر ونزلتلكم على وكت شلوون لو ما نازل واجي واللگاچ متزوجة غيري!!!

-تطلگني منه وتاخذني

-شني

-تروح للرجال تطيح حظه و تطلگني منه غصباً عليه وتتزوجني واعرفك مخبل وتسويها

صفن يفكر بكلامي واستغليت صمته واردفت اكمل..

-هاي اول مرة تنزل قبل وقتك وسبحان الله على الصدفة اجيت بالوقت المناسب وگلبت الدنيا على الكل وعقدت عليَّ بدال الرجال الجابته سلوى.. علي الحق الله يريدنا لبعض وهو الي كفلني ووگف ويايه وجابك من محافظة تبعد اكثر من سبع ساعات حتى تنقذني وتكمل حبنا بعقد قران..

غمض عيونه يستمعلي ابتسمت على حركته وتأثره بالكلام وكملت احچي كل الي بگلبي..

-بكل ليلة اني ادعيلك ترجع بالسلامة كل يوم اني احصنك بدعائي حتى وره ما تأجلت خطوبتنا اكثر من 3 اشهر بسبب الصار ويه حيدر بقيت اگول ميخالف وكله خيرة الله سبحانه وتعالى يعرف الوقت المناسب وهو الراح يسهل امورنا وشوف بعينك شلون تسهلت وبدال ما ضحكوا عليَّ وبدلت علساس اروح لعقد زهراء بنت عمو صمد اني تجهزت النا ولعقد قراننا..

قطعت كلامي وشهگت بدون صوت من دفن وجهه بشعري يتنفسه، كزبر جسمي واطرافي بدت ترجف من صار يوزع قبلات خفيفة على وجهي وخدودي ويهمس بصوت تعبان..

-اعشگچ وميت بيچ يا السحرتي گلبي وهديتي حيلي

بلعت ريگي وگلبي تتراقص نبضاته ذايب بجمال كلماته، خلل اصابعه بين شعري واستمر يغازلني وكأن كلماتي قبل شوية وياه طفت عصبيته وامتصتها..

-اشتعل اصلچ هطولچ وكل البلا بيچ

-ليش ولك

-چا انا روحي طافرة بحچايتين ضحكتي عليّ بت فاضل وفشيتيني

-هههههه امداك

-ولج ولج لا ترحين زايد

-شبيك امداك هي مختصر كلمة ام داك يعني ام هذاك بس همه شالوه الهاء والذال گلوبها دال لان الگالها تركي

ضحك بكل صوته ضحكة اتوقع وصلت الهم، ضميت حلگه بيدي اريد اخفي صوته فضحنا هذا المفضوح ولا يهتم لاحد ولا يحترم..

-يمعوود شبيك يمعوووود

-وووولج عننننق امووووت عليج وعلييييي

عصرني بحضن حسسني بحبه وخلاني غصب اضحك من السعادة، استحيت من قربنا لازگين ببعض واحس كلش مبالغ بيها بعدنا بسم الله شسالفة فـ وخرت عنه على كيفي وردت اگوم من على رجله وما قبل وجبرني ارجع اگعد..

طلع جگارة من جيبه واستمر الهدوء بيناتنا وبس حسراته وتنهيداته العالية تنسمع وريحة الدخان تعتلي ترسم قلوب حب فوگانه.. لمحته بطرف عيني صافن بوجهي يدخن وما بعد عيونه عني كللش استحيت ووجهي اشتعل..

من شافني ما اباوعله لزمني من فچي ودار وجهي عليه يثبته حتى يگدر يباوعلي زين وعن قرب، اضطربت انفاسي وريگي نشف من ركزت عيوني بعيونه وتهت بيهن.. چانت نظرة وبيها سولفنا شكثر...

-لو بس تدرين شگد هايم بعيونچ وعلي انام واگعد اتحلم بيهن

ابتسمت وخدودي متأكدة صارن طماطات لان تلمسهن بأصابعه وباسني عليهن وهمس بأذني..

-وعيونچ؟ ما ناوية تتنازل وتحبني بزونات؟

-حق

همهم يحط اصابعه بين اصابعي ويعصر چفي بين چفه، مستحوذ على كلشي والخجل مدا يخليني حتى احجي احس تعبت وروحي راحت واني گاعدة وممسوية شي..

-سولفي اشتعل يوم برودچ

-شگول ماعرف

-سولفي بأي شي.. بأمي بأبوي بسلوى العار بالنگس الراد ياخذچ مني، بأي شي بس لا تسكتين

-خوش.. تدري الراد يخطبني طلع اسمه فليّح؟

-خ** على فليح وعلى الخلف فليح وعلى الديوان الگعد بي فليح ولج انتِ تردين تسووودنينييي

-اي

-چا ابشرررچ تسودنتتت

-ههههههههههههه

-ضحكي ضحكيي انا اعلمج شفق هذا حلگچ اليضحك الا ا.....

-الا شنو؟؟؟

-انسي

-لا لا الا تكول شنو!

-بعدين ولج مو وكتها خليج ساكتة ماريد اسمع حسچ بعد

-لا بله؟؟ اشو الا احجي بـ فليّح واحرگ گلبك!

-وانا احرگ المطيي الجاي يسمعلچ بس انطيني مجال

-عادي احرگ روحك ما اهتم

-لسانچ گصي يا مهجومة!!

-مو جنت تتغزل بيه شو هسة صرت مهجومة

-ولج سكتييييييي

-ما اسكتتتتت

-تعالي ووولج

طفرت اشرد بعيد عنه عزا بعينيي هذا تخبل عليَّ شلون راح يفضحنا هنا، ضحك بخباثة وحصرني بزاوية الاستقبال يفرك ايد بأيد بمكر ويگول..

-خوش وجبة دسمة عندي اليوم

-قصدك اني سمينة مووو؟؟

-اطررررب على السمينة

-مووو سمينة اني

-چا الخسفت رجليه هسة ياهي امي؟

-مو سميينة اني حرام عليك!!

-تدرين شايل هم شلون اشيلچ باجر عگبة

-علي الحـقق!!!

ضحك بصوت عالي مرة ثانية واني مبوزة والله مو سمينة مجرد جسمي مربرب بأماكن معينة وهالشي مخبلني حتى لبس مثل العالم ماكدر اللبس لان يبين جسمي مو مناسب..

-اموت على كلشيي بيچ عگروگ عاجبتني من الجدم للراس ومتسودن بيج

-لا تحاول ما اصالحك

-تصالحيني وغصباً عليج

-لو تموت روح روح للرشيقات الكاتل نفسك عليهن

-ولج ماريد رشيقة انا اريد عدها ثرب

-عليييي منيليييي ثررررب

-نسويلچ واحد يا بعد علي وننفخه بطفل هم

-احترم نفسك

-صار شهوور كاض نفسي ومحترم روحي بعد ماكوو راح ننزع المستحى تعااي ولج

نظراته مو بريئة وتفكيره افسد من كفار قريش، صرخت اضم وجهي من جرني من زندي وحسيته يريد يتسوفل وويه صرختي وضحكته فتحت الباب ودخلت امه..

-رسمية: علي الحـق تعال اريدك

انسحبت من ايده بسرعة قبل لا تشوفنا ووگفت على جهة، زفر نفس هو مغثوث من مقاطعتها بس ما حچى شي وراح وراهة واني هم فلتت اصعد للمخزن وقفلت الباب عليَّ خايفة من سوالفه مو راحة هالرجال اتعب واني اگول مو راحة..

**

-تتوقعون ليش اجينا لبغداد؟

-حنين: مادري والله

-تَـمني: احس خايفة

-تالة: من شنو؟

-تَـمني: يمكن اجينا علمود قضية تخص بسام واخاف لا راح يطلع من السجن

سكتت تالة ودارت وجهها عني، اعرفها مشتاقة لابوها واعرفها شگد تحبه ومدا تگدر تكرهه حتى وره السواه بيه صح تحجي عليه ومتقبل على تصرفاته بس دائماً من نذكره اشوف الكسرة بعيونها..

نمنا بشقتهم الي ببغداد وثاني يوم دگ باب الغرفة علينا من الصبح تقي، گامت خالتي تشوف شيريد وسمعته وهو يحجي وياهة ويگول..

-ام تالة خلي تَـمني تحضر نفسها خاطر نطلع

-حنين: وين تطلع؟

-نروح للمحكمة عدنا معاملة

-معاملة شنو وليدي؟ هي مجايبه مستمسكاتها الكاملة

-علي التـقي: لا ما تحتاجهم

ما لحت وياه خالة لان حسيناه ميريد يحجي فـ اختصرنا الوضع وبدلنا اني وياهة وتالة وطلعنا، بالطريق اخذنا لمطعم حتى نتريگ وهو ما اكل شي ظل بس يدخن ويحچي بالتلفون..

-تالة: اني حاسة جابوچ لبغداد حتى تعقدون محكمة انتِ والامير علي

-تَـمني: بس الامير مو هنا مسافر

-تالة: يمكن عدهم واسطة وميحتاجون حضور الامير

-حنين: تعقد محكمة همه غير يسألوها؟؟ غير يحچون بله متريد تكمل بهالزواج!!

-تَـمني: هسة خالة انتِ ليش معصبة خلينا نفتهم شنو الموضوع والله كريم

-تالة: ماما مو تتعاركين ويه الرجال عيب علي التـقي معليه هو بس جابنه حتى يسهللنا امر

-حنين: اي غير نفتهم يا امر يسهله؟ سكتن انتن معليچن ولا وحدة تفتح حلگها من احجي وياه!

طلعنا وياهة وهي معصبة متتحچى عفتها علما تهدأ وصعدنا بالسيارة ويه تقي وخالة كعدت بالصدر..

-وليدي مگلتولنه شعدنا بالمحكمة؟

-علي التـقي: انا مادري عن شي خالة ابا الحسن راح تلاگوه هناك وكلشي يشرحلكم

سكتت خالة ما لحت ووصلنا للمحكمة، نزلنا ثلاثتنا وتقي يمشي ورانه وما ظل واحد ما سلم عليه گضاها حبيبي وحياتي ومشتاقلك وعلى راسي ونتشاوف باچر ووالله مشغول..

-تالة: ولج هاي شكد عنده معارف واصدقاء

-تَـمني: محبوب، لطيف، يضحك ومريح ليش ميصادقوه

-اي والله هو اني ويعجبني اصادقه شگد احبه

-اني هم احبه يجنن تقي

استحيت من دار وجهه عليَّ حسيته سمعني رغم اني وتالة دنهمس همس يبووو شگد فشلة اذا سمع..

-علي التـقي: يلا تَـمني ابا الحسن جاي ينتظرچ

اشرلي على باب ادخل بيها، هزيت راسي وعدلت جنطتي على كتفي ولزمت ايدي خالتي متقبل اروح وحدي، ضحك تقي خفيف على تصرفاتها وبقت تالة واگفة وياه بره..

دخلنا للغرفة تشبه المكتب گاعد ابا الحسن علي ووياه رجال شايب، سلمنا اني وخالة وهمه ردوا السلام والرجال اشرلنا نتفضل، باوعت لابا الحسن وشوية ارتاحيت مادري يمكن لانه توأم الامير حسيت امير ويايه وممسافر..

بالبداية كملوا حديثهم الي ما فهمت شي منه دقايق ووجهوا حديثهم الي..

-ابا الحسن علي: تَـمني انا زحمت عمي معروف وحاولت بكل ما اگدر نسهل امرچ بدون لا نكثر بالجلسات وتتبهذلين بالطريق

-معروف: شلونچ بابا؟ اني المحامي معروف أياد النصراوي وكلوني بقضيتچ ويه استاذ ابا الحسن علي حتى نستعجل بالامر وثنينا نتعاون على قضيتچ ونرجعلچ بيتچ اسرع

بهتت ودرت وجهي على خالتي وهي هم باوعتلي مصدومة، ضحك ابا الحسن على ردة فعلنا وگال بنبرة كأنه ديبرر تصرفنا گدام المحامي..

-ابا الحسن علي: گتلك راح تنصدم اخوي الله يسلمه ماراد نحچيلها الا اذا تم الامر ونرجع البيت خاطر ما تنكسر اذا ما ربحنا القضية

-معروف: يفتهم اخوك ابا الحسن وگتلك اني هالقضية مدروسة وصعبة دخلنا كذا طرف ويانه والقاضي صديق نسيبي ومن خلاله گدرنا نعجل بالقضية شوية

-تَـمني: ابا الحسن البيت راح يرجعلي؟

-ابا الحسن علي: ان شاء الله راح يصير قريب الخمسة اشهر احنه نشتغل بالقضية الامـير علي راسي گرعه يروح ويرد على هالسالفة خاطر نرجعلچ البيت وعمي معروف ما قصر هم

-معروف: امانة الله القضية مو سهلة واني محامي صار اكثر من ثلاثين سنة واعترف الي لعبوا هاللعبة عليج دارسيها عدل ولاعبيها ويه مية واحد او وحدة غيرج ذولة عصابة منظمة واذكياء يعني مو شغل مرعبل ومخربط وهذا السبب مدا ينلگفون لان حتى من يشتكون عليهم القضاة ميصدگون لان ماكو دليل حقيقي يثبت البيعة تمت غصب كل الادلة توحي ان البيت انباع بموافقة جميع الاطراف

-تَـمني: والله العظيم غصبوني وحتى خلوني احط مكياج واعدل شعري يعني تخيل ليا مرحلة واصلين

-معروف: نعم بنتي حچالي ابا الحسن فـ هسة احنه اليوم الجلسة الاخيرة ويه القاضي وجبناچ حتى ويه الادلة العدنا تحچيله الصار بالتفصيل الممل وتذكرين موضوع اختطاف بنت خالتج وياچ واذا احتاجيناها هم نجيبها

-تَـمني: هي جاية ويانه

-ابا الحسن علي: ممتاز كلش زين هيج چا يلا نتوكل على الله

گمت وياه ورجليه ترجف متوترة، كمشت بيدي خالتي مبتسمة وتهمس "الحمدلله".. دخلوني لقاعة الجلسات وخالة وتالة وتقي والمحامين ويانه ماكو غيرنا واكو بعد مرة مغشاية ورجال گاعدين بالاخير..

اجه القاضي وسبحان الله شلون تسهلت قرا ملفي وسألني عن الصار بدون مماطلة وشرحتله كلشي بالتفصيل وابا الحسن علي چان المحامي الخاص بيه واليدافع عن القضية بكل اصرار والمحامي معروف گاعد ويعلق بأمور بسيطة..

دامت الجلسة قريب الساعة ويه ظهور الادلة الي ماعرف منين جابهن ابا الحسن محادثات وبصمات بصوت زلم يتفقون على السعر وشلون يشتروه بسعر رخيص وبصمة واحد يگول..

"هو البيت مبيوگ قابل جبتوا بتعب! غير ثلاثين مليون ما ننطي احنه خوووش؟؟"

اسمع وگلبي ينبض بجنون واباوع بالوجوه متوترة، ابا الحسن كاعد طبيعي ومسيطر وعلي التقي كاعد عبالك متعود على المحكمة وهالامور وصايرة عنده روتين..

دمعت عيوني وضحكت اضم وجهي بين ايدي من نطق القاضي بصوت واضح الحكم النهائي وقرار المحكمة.. البيعة باطلة وتعتبر سرقة وراح يتم اللقاء القبض على المدعو سمير صبيح عدنان لكونه المتورط الاول بالقضية ومن خلال كلام ابا الحسن عرفت سمير يصير صديق صلاح المقرب وتجمعه صداقة ويه ابن مسعود غفار!! غفار نفسه الي يعشق حبيبة عشق جنوني!

باركولي تقي وابا الحسن والمحامي معروف وخالتي وتالة حضنوني وبوسوني بسعادة، عفت الكل وطلعت من القاعة دورت على مكان ختلة وفوراً طلعت تلفوني وبدون تفكير دست على اسمه اتصل بي كامرا..

دموع السعادة بعدها على خدودي وايدي ترجف، جاوبني بتك عين مبين نايم بس من شافني ابچي فز من مكانه وسأل بخوف..

-تَـمني شبييچ

-شكراً امير.. شكراً شكراً شكراً الف مرة اني ماعرف شلون اطلع من افضالك وماعرف شلون راح اردهن

تغيرت ملامحه من الخوف لابتسامة حلوة صغرت عيونه وخلتهن يطمسن، مسحت دموعي بأيد ترتعش واردفت..

-صارلك كل هالفترة موكل ابا الحسن ومحامي وياه وذبيت كل هالفلوس والجلسات والكراوي والتعب علمودي ومتگول امير

-البيت حگچ تَـمني وتستاهلين التعب يا عيوني

-فدوة لعيونك الچقل

-هههههه خرب راسج امنية

-والله انتَ خوش زلمة الا اسويلك تمثال

-عمي ماريد تمثال بس خلي يرجع حگچ وارتاح

-والقران خوش زلمة انتَ واخو خيتك

-وعندي شوارب

ضحكت وهو يضحك ويايه يا الله ولا ينسى شي اگوله.. اتذكر من اول لقاء النا گتله انتَ خوش زلمة وعندك شوارب وبوكتها هو رزلني على هالتمسلت..

-مبارك الج ابوي والله يمهلچ بي ونخلص من فواينچ

-اني اسفة امير

-على شنو

-لاني دائماً اتعبك

-لا تحچين هيج ما ارضى انا مسؤول عنج وهذا واجبي

-حنين: تَـمني وينج بنتي

سمعت صوت خالة تصيحلي اكيد دتدور عليَّ، ابتسمت وسألته مستعجلة..

-شوكت ترجعون؟

-بس لا اشتاقيتيلي؟

-لا اوي ولا اشتاقيت

-امداني وامده بختي

-ههههههه شلونه حيدر بشرني شصار على عمليته؟

-تأجلت عبن عنده كحة وما يكدرون يبنجوه

-يااا خطية بس طبيعي تصير عنده كحة الجو بارد احنه يمنا مطر

-اي گالت امي.. شلونها حبيبة شلون صارت؟

تغير مسار المحادثة على حبيبة واهله دقيقتين وسديت منه الاتصال ورحتلهم، حضنتني خالة نص حضنة وباست خدي تباركلي مرة ثانية واني تشكرت من الولد لان لولا الامير ولولا خوتهم ومروتهم چان ما رجعلي البيت..

بتنا ليلتين ببغداد لان تقي مگدر يرجعنا بنفس اليوم عنده شغل ورجعنا لمحافظتهم.. الواضح كل اهل البيت افتهموا بالصار ومطروني مباركات وفرحة وشيخ علي بنفسه اجه يباركلي وچان كلش سعيد لان رجع حقي..

گعدت وياهم شوية وعيني على عبق ما شلتها شفت بيدها حلقة وگاعدة ويانه تضحك وتسولف ويه حبيبة منسجمات، من يمته وجاي عبوقة تگعد هالگعدة وسلوى موجودة؟

ما تحملت انتظر اكثر وصعدت لغرفتي ارتب اغراضي وسحلتها ويايه هي وحبيبة وصدمتني من گالت..

-خطبنا اني وعلي الحق صار ثلاث ايام

-تَـمني: انچبييييييييي

-عبق: والله العظيم شوفي

رفعت ايدها اليمنى تراويني حلقتها الذهب بس هم مصدگت جريت ايدها اشوفها وفاتحة حلكي وعيوني..

-تَـمني: ولج قببق انخطبتي صدگ لو تضحكين عليَّ؟؟

-حبيبة: صدگ خية صدگ وگضت هالثلاث ايام تشرد منه وين ما تشوفه عود تستحي

-عبق: ههههه حبيبة والله استحي احس ممتعودة

-حبيبة: ولللج صرتي مرة اخووووي ولج بطةةة

هجمت عليها حبيبة تبوس وتحضن وتعضعض بيها واني بعدني فاكة حلگي، شنو هالتغيرات السريعة عبق انخطبت وحبيبة وضعها النفسي هواي متحسن كل هذا صار واني ببغداد؟

-تَـمني: هسة تگعدن تسولفلي كلشييي كل تفصيلة اريد اعرفها يلا يلاا عبيقان

-حبيبة: اي اي يلا عبيقة

-عبق: ولج انتِ مو سولفتلج كلشي صار طلابة

-حبيبة: حلو حلوو اريد اسمع بعد

ضحكت وطفرت على چربايتي وگعدت عبق تسولفلنا الصار بالتفصيل، بنص حديثها صعدت شمس وشاركتنا الگعدة وويه كل حچاية تطلع من عبق احنه نگزگز وحبيبة تگوم تعض الطفلة..

-عبق: زورگتوووني انتِ واخوچ راح اموت

-حبيبة: احبكم احبكمممم

الليل كله احنه نسولف وباتن يمي بالغرفة وثاني يوم هم باتن، باليوم الثالث داومنا من وره خشمنا بس علمود الامتحان وهم رجعنا لغرفتي وتالة وليلة ورفل وزهراء وهالة بنات عمهم اجن كلهن وعرضنا فلم وگعدنا نتابع..

-رفل: فهاوي موبايلج يدگ

-تَـمني: خيولي خيولي

-ليلة: ولج كومي شوفي منو

-تَـمني: عوفي بعدين عود

بقيت اكل بالچبس وعيني على التلفزيون ورفل مدت ايدها تجر تلفوني وحطته بوجهي شفت المتصل "الامـير علي"، شهگت واخذته من ايدها وطفرت من الفراش اگوم اطلع من الغرفة اجاوبه والبنات كلهن صاحن..

-هاااا ولج ام البعدددين

عفتهن اضحك ودخلت لمخزن عبق اسولف وياه هنا.. اوكي حتى اكون صريحة اصلاً منحجي بشي غير شلونچ وشلونك وهيج مگضيها، نفسيته تحت الصفر وماله خلگ شي وما اللومه حتى ميلحگ ينسى الصار لانه اربعة وعشرين ساعة ويه حيدر المسكين بس اني احاول اغيرله جو بخبالي..

-تَـمني: تتذكر من گتلي تَـمني لا تداومين بالسوت الرياضي بعد ولبسي شي طويل؟

-اممم

-تخيل بس تخيييل لبست تنورة والدكتور گلي شلون راح تلعبين رياضة بيها لو تردين توصليها لزرورچ من تركضين!

-صددددگ هيج گال؟؟؟؟

انتبهت على چفصتي وحسيت لاا تَـمني لااا رحتي زايد كلش زايد وصار وقت ترگعين سالفتج ومتخلي يحجز تذكرة ويجي طيارة للعراق ويسويله سالفة بنص الجامعة..

-لا هو مگال هيج بالضبط بس گال شلون راح تركضين بيها

-لا گال!!

-لا لا مگال

-وانا اگلچ گال! يا خ** دكتور هذا؟؟؟

-مگال امير هاي اني كذبت عليك

-لييش تچذبين؟؟؟

-مو.. مو...

-مو شنيييي

-مشتاقة لغيرتك عليَّ

خنس صوته وبس اسمع انفاسه العالية، ارتاحيت من حسيت كلامي جاب نتيجة وحميت زايد وكملت..

-مشتاقة تلبسني عباية اسلامية

وهنا بعد ما كدر يسكت وفططس ضحك واني الغبية اضحك وياه مادري شكو..

-مشتاقة اللبسج عباة ولج تَـمني؟

-اي وتضملي شعري ونظل نتعارك على مكياجي

-اشتعلو عشيرتج

-هاي ليييش

-خوب فوخي گلبي وگولي مشتاقتلك الك لييش تعلين گلبي تَـمني لييش

-ممشتاقتلك اوي

-روحي روحي تصعدين ضغطي

-يلا باي

-تعاالي ولج شو كيفتي

-مو انتَ متريدني

-وووولج اااخ اااااخ اااااااخ اااااااااااااخ

-شبي اللباخ؟

-واطب من شباچ بيتكم واطلعلچ من الطباخ

-هههههه الله الله حبيت

-ايي يا الله صايرة تحب چلامي چن اكو تطورات مو؟

-لا ماكو تطور اموري الفرفوري

-العِلة الزرعتيها بگلبي هااااكبرها

-باي بااي البنات يمي خطار اليوم

سديته منه ورجعت للغرفة ابتسامتي من الاذن للاذن، گعدت بنص البنات ارجع للفلم وانتبهتلهن كلهن يباوعلي بنظرات من جوه الجوه..

-تَـمني: شكو

-رفل: ماكو حبي بس چنه نفك الحصار على ضلعي؟

-تَـمني: يااا يا حصار هذا

-حبيبة: سكتن كافي لا تخجلنها خلونا نتابع

نقذتني حبيبة وعافني واني هم غلست، مرت الايام روتينية بدون أي تغيرات بحياتنا كلمن بغرفته وكلمن عايش حياته علي الحـق المسكين رجع اللتحق وره خطبته بأربعة ايام صح ما شاف شي من عبق بس اشترالها تلفون احدث مديل وجابلها خط حتى يبقون على تواصل بس لاحظت ميتصل بيها هوايه علمود تدرس واكثر شي بالليل يحچون واني وحبيبة نوگف بباب مخزنها نتجسس بس احسها تدري ومغلسة علينا على گولة حبيبة تغور بينا..

-تَـمني: اهووو اريد اعرف شديحچون

-حبيبة: شني گاللها وهيج جاي تضحك؟

-تَـمني: احس گللها احبچ لان جاوبته اني هم

-حبيبة: احلامج وردية فهاوي هاي الچلمة الحلوة ما تطلع منها معيشة اخوي بحصار سودة عليّ

- تَـمني: اوووف اريد احب

-حبيبة: لطام بعيني چا اخوي شبي معيشته بجفاف عاطفي راح يصير بي توحد

سكتت ملصومة على حلگي وبقينا نتسمع على عبق اوووي عود تحجي بصوت ناصي وعلى كيفها وهي ويانه تطلع جبار الي بداخلها..

-عبق: ههههه بطل سوالفك علي تره ازعل

مدت راسها حبيبة من الباب تداهرها، تباوعلها من جوه الجوه وتهمسلها..

-حبيبة: اوووي عيني تووزعل

وعبق مغلسة عليها وتكمل وياه..

-عبق: امممم.. وبعدين شسويت

-تَـمني: بيض وطماطة

وعبق مستمرة تتجاوب وياه مغلسة علينا..

-عبق: افف صدگ والله؟

-حبيبة: وداعة عبد الله

-عبق: شجاك حق خو مو هيج

-حبيبة: چا شسوي غير زلمة خشنة انا

-عبق: هههههه ادري بيك ادري

مديت راسي ويه حبيبة وطبگت على الخط اداهرها..

-تَـمني: يمن فدوة لهلضحكة عگروگتي

-عبق: اممم مادري هسة اريد اقرا شوية وانام

-حبيبة: افاا وانا اخو الامير انا اخلي مريتي تقرا وتتعب؟ لا لا جيبي اقرا بدالج

-عبق: لا عادي متعبانة

-حبيبة: لا چبيدي لا اكيد تعبانة بس انتِ مطي وماعندج احساس

رصت عبق على اسنانها وگامت لحبيبة گرصتها من ايدها وسوتلها اني اعلمج بدون لا تحجي..

-عبق: راح اروح بعد كافي طلابة اليوم حچينا هواي

-حبيبة: هواي شني ولج كله صارلكم نص ساعة تسولفون

-عبق: لا حق كافي شبيك مو حتى تشتاقلي

-تَـمني: اشتاگلچ؟ حبي انا رايح اخونچ

متنا ضحك وظلينا ننطط اني وحبيبة على راسها وهي حارت شتسوي وقضتها بس تسويلنا اني اعلمچن بيدها..

-عبق: وين راح تروح انتَ هسة؟

-حبيبة: والله هذا اكو فد مطعم بي حاتات رايح انا وجماعتي

-عبق: هاا اكيد راح تنام؟

-تَـمني: لا جاي اچذب عليج والله

-عبق: شعجب تنام هيج وقت؟

-حبيبة: لان انا ولد مؤدب

-عبق: يعني منعسان وتريد تنام حق؟؟

-تَـمني: اي حبي چا وين انطي وجهي

-عبق: يعني تريد تطلع وتچذب عليَّ تگلي راح تنام؟!

-تَـمني: شبيچ عگروگ خلي روحچ رياضية غير منريد نزعلچ

-عبق: لا لا خلص روح الله وياك

-حبيبة: بداعتي لا ترحين زعلانة

-عبق: راح ادرس اني وانتَ گابل نرگيلتك

-تَـمني: ولج حتى النرگيلة تردين تحرمي منها

-عبق: لا والله مزعلانة شبيك بس تأخرت وباجر عندي امتحان

-حبيبة: چا يلا ولي دوختيني

-عبق: ههههههه افتهمت

-تَـمني: شنو افتهمت؟ حبيبة شنو فهمت بالضبط؟؟

-حبيبة: شو چنهم مو راحة ذولة خايفة لا يورطونا

-عبق: اممم.. الله وياك

سدت منه الاتصال وعاطت بينا صوت فززتنا وخلتنا نتراكض من المخزن..

-عبق: حقيرااااات نصص الحچييي خربطت بي من وراچنن اني اعلمچنننن الا اردهااا عليچن من تنخطبننن

-تَـمني: همزين اني متزوجة

-عبق: اردهاا بطريقة ثاانية الج اني اعلمجج الفااهية

ضحكت حبيبة ولزمتها تصنيف وعبق لبستنا ودخلت للمخزن تكمل قراية.. نمت من وكت لان باجر يرجعون الامير والباقين الحمدلله سووا العملية لـ حيدر ويحتاج بعد سلسلة من العمليات بس هسة بشرنا الامير وگال حيدر گدر شوية يحرك اصابع رجله اليسره وطرنا من الفرح..

ثاني يوم من الصبح گعدنا تعاوننا على الغدة والتنظيف وسووا عزيمة عزموا كل العمام والعمات عدى غزوة ما قبلت تجي، اشتغل وكلما عيني تصير على عبق وسلوى اموت من الضحك سلوى راح تنتحر من وره عبق وكل شوية تباوع للحلقة البيدها وتعض بأصبعها وتگول..

-اااااخ يا القهرر بت شذى تااخذ هيج زلمة اااااخ

-تَـمني: تستاهل بت شذى وهنيال حق عليها

-سلوى: ياهو يفزع للبريعصي غير اهله انتِ هم بت فگر وما شايفة وخذاچ الامير وتشيختي

-تَـمني: اوييلي شگد يلوگلي اتشيخ واتسلطن هم

-سلوى: عووووع عووووووع على الفاهية التوگع من حلگها الچلمة ياله تحچيها

-تَـمني: هالفاهية مدوخة شيخكم حبيبتي

گلتها وضحكت ضحكة رنانة وعبرتها عفتها تدردم وتصفگ بيدها وترعش من الغيرة، من شفتها هيج تمنيت اصيح بنص النسوان موووتي يا سلوى واحترگي بنارچ..

وره الصلاة سمعنا صوت هورنات السيارة، ركض علي الدر قبلنا ملهوف وطلع للحديقة يتلگاهم وكلنا طلعنا وراه.. دمعت من شفت در عاف الكل ونزل على حيدر الگاعد بكرسي متحرك وحضن ابنه لگلبه وصار يبچيييي بصوت عالي ممهتم لاحد وابرار تبچي وياه بالسكتة..

تسالموا البقية ويانه وبوسوا واحد واحد وسور وامير وگعوا بـ حبيبة بوس واحضان ترسوها ترس بوس وجعصوها بيدهم..

-عمة زهرة: ههههههه خلصتوا البت خلصتوها

كمل الامير سلام منها وراح لامه وابوه بوسهم وعماته ونسوان عمه تورعشنه ما انطوا مجال يتحرك، يتسالم وياهم واشوف عيونه طايرة تدور بين الموجودين ابتسمت على نظراته المفضوحة وختلت روحي وره رفل اشوف راح يبقى يدور لو يمل ويبطل..

بس والله ولا بطل وظل يتفحص بالوجوه يكملهم ويرجع يدور بيناتهم، شفته يباوع لـ تالة وسوه روحه يعدل بقميصه وبقت عينه هناك، بلعت ضحكتي وظهرت نفسي من تقدم للباب يريد يفوت وصارن بنات عمه بوجهه سلم عليهن من بعيد سلام جماعي واني وگفت وياهن اتجاوب وياه بالسلام ولا انتبهلي واگفة وياهن وسلم شلون مچان وعبر..

-رفل: اياا ملعونة ما تسولفين وياه شلعتي گلبي

-تَـمني: هههههه سكتي متونسة

سلمت على ابرار والولد ودخلنا وياهم من باب المطبخ، اللتفت الامير يحاچي امه ورصدتني عينه وما اسولف شلون توسعت عيونه ثنينهن ورفع حواجبه وهمس همس شفايف منفعل..

-لچ هلااااااا

ابتسمت وتقربت منه اسلم عليه حالي حال الكل، مديت ايدي اصافحه وجرني منها بنفاذ صبر وبوسني على خدودي بوسة ام الشمة خلت گلبي يدگ بقوة..

-تَـمني: الحمدلله على سلامتك شيخ

-الامـير علي: هلا ابوي

ابتعدت عنه بسرعة وجهي مولع ودرت وجهي للبنات حتى مينتبهلي، ضحكت ليلة ومدت نفسها الي وهمست..

-عيونه رادت تطلع عيوونه

-تَـمني: اششش انتِ

-زهراء: الخفيفة چا شبيچ ويه ابا الحسن الزلمة يبس دمه وما انطيتي نظرة

-ليلة: هم جابوا هالسيرة خايبات سكتننن

دخلنا للصالة سوه وتوزعنا على التخم وقسم وگفوا وقسم گعدوا بالگاع وقسم گعدوا على بايات الدرج لان منكفي..

-ناصر: شلونكم بوية شني اخباركم ان شاء الله كلشي تم على خير؟

-الامـير علي: ان شاء الله عمي بقت عنده عمليات بالايام الجاية وان شاء الله وليدي السبع يگوم على حيله

-العم صمد: سمعت العمليات مكلفة بعد عمك أي شي تحتاجون لا تترددون تشلعون عيوننا وتدللون

-شيخ علي: رحم الله والديك خوية ما تقصر بس الويلاد تسعتهم تحاططوا والفصل مال حيدر شوي جاي يساعد وكلشي يدبر المهم أسدنا يگوم ما نريد شي بعد

تبادلوا اطراف الحديث شوية بالصالة وانتقلوا للاستقبال يكملون واحنه البنات اللتهينا نحضر بالغدة، فرشنا سفرة على طول الصالة وفرشنا وحدة ثانية للبنات بالمطبخ لان ولد عمهم راح يجون هم واخوان حبيبة ميتقبلون ولد عمهم يندمجون ويه اختهم عدى منتصر..

نقلنا الاكل مسوين باچة وكسور ومفطح كل الاكل ما اكله بس گعدت انقش وياهم واعلس خضورات مثل الصخول..

كملنا غدة وشفنا المواعين جباال وتلاال المطبخ متروس من السنك لبوابة الصلاة ومطلعين للحديقة هم مواعين بس شوفتهن تسوي كآبة..

-ليلة: ظهري ينشل هيج ما اغسل لو تنگلب الدنيا

-حبيبة: عاينن عندي فكرة خلونا نقسم المواعين احنه نغسل النواعم ونطلع الصواني والجدورة وهالسوالف نشمرهن على الولد هاا شتگولن؟

-رفل: الولد؟؟ خاطر يجرونا بزيج

-حبيبة: ولچن انا احاچيهم شبيچن

-هالة: ها يعني يعفطون بس الچ؟

-حبيبة: اوووع شبيجن عود اسوي روحي متخربطة وانا احاچيهم معليچن يمي عوفن السالفة

تأملنا خير وتفائلنا بـ حبيبة ووگفنا ننتظرها ترجع، بقن ليلة وهالة وزهراء وحدة تصد والثاني ترد وعبق صافنة على حلقتها وتگول..

-عبق: بنات اني سامعة ميصير المخطوبة تغسل مواعين مو زين

-ليلة: ليش يمة تنگطع خلفتها؟؟

-عبق: لا ولج بس الحلقة تچلح واخاف لا علي الحـق يكتلني

-زهراء: راح ا... لا لا اخلاقي ما تسمحلي اگول كلمة اعفط

متنا ضحك والنسوان كل شوية وحدة جاية تگول غسلن المواعين وفضوها واحنه واكفات مثل شمعات الفگر ننتظر حبيبة.. ثواني ورجعت حبيبة مشلهة ردانهة ولافة ربطتها على شكل عصابة..

-حبيبة: امشن نغسل المواعين وننچب فشلوني اخوتي

-رفل: مو گلناهة احنه

-حبيبة: ولچن اول مرة يردوني انصدمت

-زهراء: كلهم متغيرين من حادثة حيدر وحگهم نفسيتهم تعبانة ومالهم خلگ شي

ايدناها ووگفنا انكربنا كراب قسم وگفن على السنك وقسم وگفن بالمطبخ الحار وقسم گعدنا بالحديقة نغسل بالبوري مال الطرمة واني من هالقسم شمرني بره اني ورفل وحبيبة..

-حبيبة: اااه يا زمن تاليتنا نگعد هالگعدة ونغسل مواعين هنا

-تَـمني: حبيبة اني ماكدر اكعد بالگاع اريد كرسي فستاني يتدمر

-رفل: بيه حچاية تزلزل بيت عمي علي وتگعد سور بحضن نور وعلي!!

-تَـمني: رررفل

-رفل: ولچ ااخ شون بيج اذا حبلتي وثگلتي الفرخ تشيلي من بطنچ تحطي ببطني

مديتلها لساني وحطيت تلفوني بحضني وگعدت بالگاع مثلهن اگنبص واغسل بالمواعين وافكر بصوت عالي..

-تَـمني: حبيبة ليش متجيبون مساعدة تره المساعدة بين بعض حلوة والله

-حبيبة: ولج مرة گلت لامي خلينا نجيب وحدة تساعدنا كتلتني وطردتني من غرفتها

ضحكت رفل ضحكة فضيحة ورج تلفوني بحضني، نفضت ايدي وسحبته اشوف منو لگيتها رسالة من الامـير علي كاتبلي..

"وينج نوومه؟"

نشفت ايدي زين وجاوبته..

"بالطرمة دا نغسل مواعين"

"بالطرمة؟؟"

"اي"

غاب دقايق وتوقعته راح فـ ذبيت تلفوني ورجعت اغسل، شوية واهتز موبايلي برسالة كاتبلي..

"گومن وعوفن المواعين بساع"

"يااا ليش"

"گومي وبدون حچي زايد"

-تَـمني: بنات امير كتبلي كومن وعوفن المواعين

-رفل: الففف رحمة على والديك اموري

-حبيبة: گلتيله ليش؟

-تَـمني: اي بس مجاوب

فزينا ثلاثتنا من مكاننا من طلعوا سور ونور يعضعضون بأصابعهم وتگابلوا يلطمون على چتافهم مثل النسوان ويقرون بصوت ناصي كلش..

-علي السور: تطشرر عرضك علاووي تطشررر عرضك علااووي

-علي النور: اريد الططم لطم نسوان واوصل الزفر لچتاافيي

-علي السور: بنات الـ... الـ... الحباابات گاعددات منطيات ظهورچن للاستقبال والديوان شنيي سينمااا خومااا سينمااا

-علي النور: ترزلنا من الامير وانمسحت بشواربنا قنادر ولد عمنا الخيااس من وراچن

-حبيبة: يااا سودة بوجهي كلشي ولا يعصب الامير امشن امشن بنيات لا نزعل اخوي

-تَـمني: لعد والمواعـ...

-رفل: يبووووو كلشي ولا يزعل شيخ العشيرة يبوووو

سحلني كل وحدة من ايد ورجعني للبيت لعد والمواعين شلوون!

-تَـمني: والمواعين بنات

-رفل: ولج سكتيي خليهم همه يحيرون بيهن

وفعلاً گعدوا سور ونور شلهوا ردانهم وطلع كرار وياهم هم انسحل وعباس ورضا اخوان رفل وعلي ابن عمو صمد خلوهم يغسلون المواعين الموجودات بالحديقة ويغسلون الطرمة من الزفر هم..

-ليلة: بنات استغلوا العرض وخلونا نطلعلهم بعد المواعين الي هنا بسااع

گامن يعبن المواعين الوصخة بالصواني ويطلعلهن بالختلة بره ويرجعن يركضن وذولة يجلفووون ومملحگين الى ان انتبه عباس وصاح بخواته..

-عباس: بنااات الصمااااخ انا اعلمچننن

-رفل بهمس: اغسل اغسل يا خايس صماخك شكبره

كملنا تنظيف ورجعنا اللتمينا بالصالة مادري بالامير صعد فوگ يرتاح الا من دزلي رسالة كاتب بيها..

"تعالي فوگ"

-زهرة: تَـمني بعد روحي ما تصبيلي فد استكان چاي راسي راح ينفجر

-تَـمني: اي تدللين عمة

عفت تلفوني يم تالة بس بيّن فتحت الرسالة وگمت اصبلها چاي وهي اجت ورايه للمطبخ تسولف، شفت القوري مابي چاي مخلص فـ وگفت اسويلها جديد بسرعة بسرعة اشتغل..

-زهرة: ما شلتي ببطنچ توتة؟

-تَـمني: لا عمة مو امير مسافر

-زهرة: ههههههه اي والله صدگ يلا ان شاء الله يوم الينترس حضنچ بفريخ

-ان شاء الله عمة

-احنه الامير محلفنا ما نضوجچ ونسألچ بس گلبنا نار ومنتظرين ليوثي يترس علينا البيت

-ليوثي منو؟

-وليد اموري من چان شاب صغير يگول لو صار عندي وليد اسمي ليث

-مبين يحب الاطفال

-كلللش يحبهم حيدر ابن علي الدر هو رباه وبالعطل الصيفية مال المدارس اموري ما يگعد ياخذ حويدر ويفتر بي كل مكان ويعلمه صنعته

-شگد حلو يعني حيدر هم يعرف للديكور نفس امير؟

-ايييي چا شلون يحب صنعة عمه ومتعلقين ببعض ما تشوفين شون تأثر بوگعته سودة عليَّ

هزيت راسي متفهمة وبدون لا تحچيلي مبين الامـير علي شكد يحب حيدر وقريب عليه، اخذتنا السوالف وكملت الچاي وطلعت استكان اصبلها وترخصت منها ارجع يم البنات.. اخذت تلفوني من تالة وشفت امير هم دازلي رسالة قبل خمس دقايق كاتب..

"خالوو بس انطيچ صوغتچ ما راح اكلچ!"

مجاوبته بالتلفون وفضلت اصعد واگله اللتهيت اسوي چاي لعمة زهرة، ركضت اصعد فوگ وفتت للغرفة شفته مظلمها ومتمدد على الچرباية نازع قميصه ومنطي ظهره للباب..

-امير

مجاوبني اووووف شلحگ يغفى يربي! دخلت وسديت الباب ورايه شفته حاط اغراض على ميز التواليت تفرجت عليهن من بعيد بدون لا اللمسهن جايبلي جنطة و تراكات ثنين واحد مبين برمودة والثاني بجامة كاملة وجايبلي سوت رياضي وحذاء رياضة هم وابتسمت من شفت مدالية صغيرونة مال كرة السلة اووووي فدوة..

والله اليوم ولا اخلي ينام ويفهمني غلط، گعدت على الچرباية بصفه وندسته بأصبعي وهمست..

-امير

فز فزة واحد مخروع، اللتفت يباوعلي وگال بقلق..

-شبيچ؟؟ صاير شي؟

-اسم الله لا شبيك مخترع

صفن بوجهي ثواني ونفخ هوا وهمس يستغفر، فرك وجهه وانگلب بجسمه لجهتي بدون لا يگعد..

-عبالك صاير شي؟

-اي

-صايرة نومتك قلقة امير

هز راسه اي وغمض عيونه يريحهن، تربعت بمكاني ونزعت الشال من راسي..

-گوم امير لتنام ضوجة

-اممم

-دگووم خليني احچي وياك

-نعسان

-اي اي خلينا نسولف وبعدين نام

-سولفي اسمعج

-باوع شو افتحلي عيونك الچقل اشوفهن

ضحك وفتح عيونه يباوع لوجهي، گلب عيونه من شافني مكشرة اضحك عليه وگال متنرفز..

-ام خد المزروف

-يااا شگد عيب مو انتَ الشيخ

-خ** على الشيخ

-باوع باوع مو تظل شايل عليَّ وضايج تره من راسلتني عمة زهرة گلتلي سويلي چاي ووگفت تسولف ويايه وسألتني اذا حملت لو لا

-وشگلتيلها

-گلتلها لاا مو الامير مسافر

فز من المخدة يباوعلي، ربعت ايدي لصدري وبوزت بوجهه اني قصدي بهالكلام ان انتَ صارلك هواي مسافر وتاركنا بس چنه هو افتهم غير شكل..

-ولج فهاووي

-خيييير

-بحلگي حچاية تزلـ....

-انتَ چنت تتجسس علينا؟؟؟

-شني؟!

-هههههههااااي وانوب يقلد كلامها بكل جرأة گداامي حلووو امير حلوووة صايرة سوالفك كلللللش حلوة

-هاي شمالها

-ماريد خلص ماريد نحجي انسى

-غير افتهم المن اقلد

-عود يسوي روحه ميعرف بس مبين انتَ متغير من سافرت الظاهر شفتلك خوش شوفة هناك!

-تَـمني تعاي لبدي بحضني وانچبي

-لووو تموت

مد ايده يريد يكفخني وطفرت من مكاني خايفة بس ما خلاني لزمني من زندي بقوة وجرني ينومني على ايده وقيّد حركتي..

-شبيچ انتِ شبيچ

سكتت مبلوع صوتي بعده گلبي يدگ مهبوطة، بلعت ريگي ورجفت من صار يمشي ظهر اصابعه على خدودي على كيفه، همس بخفوت بيني وبينه..

-ليش كلما اتقرب منچ تنزين؟

-هاا؟

-عبالچ راح اطگچ؟

-مادري

-من كل عقلچ انا اطگچ تَـمني؟

زفرت نفس وذبلت عيوني ويه حركة اصابعه على خدودي، اتابع حركته بكل هدوء ولطف وغمضت عيوني لا ارادي من طبع بوسة خفيفة على جبيني وگال بصوت ناصي بصعوبة فهمته اذاني..

-انشلع گلبي يا علي

-هاي ليش

رفعت راسي احط عيني بعينه وهو نزل وجهه عليَّ، ابتسمت ولزمت اصابعه بين ايدي ناوية افهمه ليش انتفضت بالبداية بدون لف ودوران..

-اي اعترف عبالي چنت راح تضربني وصدگني ردة فعلي ماكدر اسيطر عليها تصير لا ارادي

-اممم

-اي وحاولت اعالج الموضوع بس صعب

-مو مشكلة راح نبدي نعالجه سوه

-شلون

-اول شي لازم تعرفين مستحيل راح يجي يوم وامد ايدي عليچ لو اهينچ

-واذا فد يوم ضوجتك كلش ودست ببطنك وعصبت وعيونك انعمت هم راح تضربني؟

-عود نشوف لوكتها

-امييييير

-هههههه تَـمني بعيداً عنچ عيبة بحگي اطگ حرمه.. مو سباعية الزلمة يطلع همجيته على مرة لا حول الها ولا قوة

-ابوس شيخ علي على هالتربية

-وووولج

-ايي شبيك غير عمي هو

-چا بوسي ابنه هو شكو!

-هم ابوسك تدلل

مديت نفسي وبسته بخده، ضحك خفيف ولمني بحضنه اكثر ودفن ايده بشعري من وره، تنهدت مرتاحة من حركته ومسترخية كُلش وغمضت عيوني.. حسيت بشاربه صار على خدي ينغزني وصارت تفتر النغزات على وجهي نزولاً...

ارتبكت وشديت على اعصابي متوترة من طبع قبلات متفرقة على وجهي، صدري گام يوجعني من دگات گلبي القوية وبطني خبطت خفت كللش خفت وماعرف ليش خايفة لهدرجة والرعب استوطن راسي وكل حواسي، محسيت واني شادة على نفسي لدرجة مفضوحة خلت الامير من ذاته يبتعد مني..

-تَـمني..

-اني.. مادري اسفة.. بس..

-لا تتأسفين وصلي على محمد ما ردت اسوي شي لا تفكرين زايد انا مشتاگ ومتلهف عليج وهذا هو لا اطلب شي ولا ردت اسوي شي والحسين

حچاهة طبيعي وحسيته مضايج ولا منزعج بالعكس چان هادئ جداً وحتى گام من الفراش يلبس قميصه المشمور على جهة..

-امير

-بوية نزلي ويه البنات تونسي

هزيت راسي اي ونزلت ويه البنات جوه بس شنوو وجهي صاير هطوله من الفشلة مااعرف شوكت تروح مني هالخوفة والرعشة التزورني اختنگ وريتي تفرغ من الهوا..

بقيت الكعدة كلها ضايجة ومزعوجة وزادتها عليَّ خالة رسمية من سوت نفس الحركة تراوي مرة عمهم صمد بالتلفون شي وتضحك وياهة!! حلفت وقسمت قَسَم والقران الا اعرف هالبنية المن تريد تخطبها ولو اني لو انتِ يا خالة رسمية!

**

"حَــبيبة"

گعدت الصبح على صوت رسائل حور تدزلي وحدة وره الثانية بطريقة كلمات متفرقة..

"وينج؟"

"گعدي"

"ح"

"ب"

"ي"

"ب"

"ة"

"گعدي"

"شيخة"

"شيخة لو علوية ههييههييههي"

"گعدي مصختيها"

"اييييع متگعدين"

"اني بباب بيتكم واگفة گبررر"

شمرت تلفوني وگمت بسرعة غسلت ولبست عباية راس ونزلت اركض الفايخة جايتني بالسبعة الصبح شعدها مادري، طلعت لباب الحوش فتحتها الها وشفتها گاعدة بسيارة اخوها وصاحت من مكانها..

-هلوووووو حبيبببببة

-حبيبة: ووولج صوتج

ضربت على حلگي خاطر تسكت واخوها هم كضها من ايدها يدورها عليه معترض على تصرفها..

-حور: ها شبيكم

-حبيبة: تعالي

اشرتلها بيدي تنزل بس ما رضت وخلت اخوها ينزل بدالها، غميتها خفيف بدون لا يشوفني حاكم ووگفت عدل ويه ما وصل لبابنا..

-حاكم: صباح الخير

-صباح النور

-شلون صرتي؟

-شني

-چنتي مريضة شلون صرتي؟

-ها.. زينة شكراً

-حور تگول ملازمها بقوا يمج واجينا ناخذهن

ما عجبتني نبرة صوته شو يحاچيني معلگ ولابس مناظر شمسية ومتهندم بقاط ورباط وعطره يهفهف من صباحيات الله..

-حبيبة: اي نستهم بالجامعة وانا رجعتهم وياي

-جيبيهن يابة

-تمام

عفته بالباب مصلوب وركضت فوگ جبت ملازمها ونزلت گبل لا يگعدون اخواني واترزل لان فتحت الباب وما صحت لواحد منهم.. بعدني ما وصلت لبوابة الحوش وسمعت صوت مألوف فزله گلبي هرولت استعجل بخطواتي وفتحت الباب مبتسمة..

-منتصر: بعد روحي مشتاگلك... ها عنون شو انتِ فتحتي الباب وينهم الولد؟

-حبيبة: هلو منتصر

-منتصر: هلا بيج

جاوبني بأبتسامة حنوونة تخبل خلاني افهي وماعرف اجاوب سؤاله الجاي..

-منتصر: راح نبقى واگفين هنا؟

-حاكم: احنه نريد الملازم ونروح

-منتصر: تفضل خوية تريگ ويانه شني السالفة

-حاكم: بالعافية

مد ايده يريدني انطي الملازم حطيتهن بيده بسرعة وسويت باي لـ حور وفتت جوه، ثواني ودخل منتصر ورايه وتمشينا سوه لداخل البيت..

-منتصر: هسة عمة رسمية تگلي شعندك جاي من صباحيات الله

-حبيبة: هههههه لا بالعكس هلا بيك بأي وكت

-منتصر: شصار على سفرتكم؟

-يا سفرة؟

-چا ما تدرين راح ترحون للشمال؟

-صدددگ؟؟ هاي شوكت؟

-عمي علي گال ترحون هم تغيرون جو وهم حيدر تتغير نفسيته من يشوفكم كلكم حوالينه

-حبيبة: حيدر ما صارله شي من رجع من السفر معقولة بي حيل؟

-اي وكيّف هم من افتهم بالسالفة

هزيت راسي متحمسة وركض دخلت جوه شفت عبق گاعدة تحضر بالريوگ وبيدها كتاب، وگفت وياهة نحضر الريوگ واخذتلهم الصينية وگعدنا نتريگ سوه انا واهلي ومنتصر، طلب منتصر چاي صبيتله ومديتله الاستكان وبالغلط اطراف اصابعه تلامست ويه ايدي..

انتفضت مستحية وجريت ايدي منه اضمها بحضني ماخذتني الرجفة مادري شمالني، رفعت عيني عليه شفته ملتهي يشرب بالچاي ولا چن صار شي، نزل الاستكان من ايده يرجعه بالگاع وبهاي اللحظة رفع عينه الي وابتسم والحظ الفگر ابووي چان يعاين عليه وشهد الموقف كله!!!

من الخرعة عفت الريوگ وصعدت لغرفتي، لليل نزلت ارتب البيت بدال عبق بس بالختلات انظف خاف امي تشوفني وتعرس على راسي.. عبق عدها امتحان باجر ولازم تدرس والفقيرة صارلها شكد هاملة دراستها خاطر ما تقصر بالبيت من چنت مريضة صح بعدني مالي خلگ وگوة عليّ بس كافي لازم اگوم على حيلي وما اقهر اهلي زايد..

مسحت الدرج ونزلت امسح المطبخ واكنسه وطلع ابوي من الغرفة يصفگلي ويغنيلي بحنية..

-وشلون بشه عدنا بنص الحوش تتمشى.. وشلون بشه عندي بنص گليبي تمشي

ضحكت وذبيت المكناسة من ايدي ورحتله بوسني وحضنني واستمر يغنيلي شلون بشه عدنا بنص الحوش تتمشى..

-حبيبة: هههههه بوية كبرت بعد انا

-تبقين صغيرونتي ونظر عين ابوچ

-يا بعد طولي الله لا يحرمني منك

مشاني وگعدنا على القنفات وبقاني بحضنه ما فلتني، سندت راسي على چتفه اشبع من حنيته وامانه واسمعله يغنيلي..

-بنيتي بنت ابوها وعشرة يتخاطبوها.. واحد يگل للثاني انا عبد لابوها.. وبنيتي بت الدلال شابعة لعب وشابعة خبال..

-بوووية

-ههههههههه يا بعد ابوچ والخلفه

-تره ازعالك وما احجي وياك بعد

-لا بوية كلشي ولا زعلچ شيحمله

-هههههه وين اكدر ازعل منك شيخ علي

باس راسي ووخرني من چتفه ودارني خلاني اواجهه، لزم ايدي بين ايدع مبتسم وگال وعيونه تلمع من الفرحة بدون أي مقدمات..

-حبيبة تتذكرين شيخ فهد صاحبي؟

-هذا الچان يلاعبني وانا صغيرة مو؟

-اي هو

-اتذكره چا شون

-اجاني امس وطلبچ لوليده زين العابدين

جفلت وچن الدنيا كفختني راشدي، بحلگت عيوني على وجه ابوي خاطر ما اتسودن گدامه وهو بقى عاصر ايدي بين ايده ويكمل..

-حاچاني وزين العابدين ما يحتاج سؤال زلمة نشمي وهو خليفة ابوه والشيخ من بعد عينه.. صايم مصلي يخاف ربه، دارس ومحترم وزلمة صلوات من كلها وانا اشوفنه مناسب كلش الچ يا بوية

-بوية انا...

-لا ترديلي جواب هسة فكري زين وقرري بس حبيبة الزلمة ما ينرفض وانا ابوچ واعرف بمصلحتج ما راح تندمين عليه بنيتي

-بوية انا ماريد اتزوج فدوة

-لا يا گليبي هالسالفة لا تخليها براسچ ليش ما تردين تتزوجين؟ اكو سبب؟

-لا

-چا ليش يا بوية ليش ترفضين قسمة زينة مثل هالزلمة وباجر تعضين اصابيع الندم

-مو...

-حبيبة ما ظل واحد بالسلف ما خطبج مني وانا احترم قرارچ وارفض بس يا بوية ما يصلح هيج الوادم هم تحچي وتدريني انا ما اهتم لحجي الناس وانعل ابو الناس المهم سعادتج عندي بس ليش الرفض وعمرج مناسب وما بقتلج غير سنة وتتخرجين واذا تكولين ما ادبرها نطول الخطوبة هم نتعرف على الزلمة اكثر وهم انتِ ترتاحين علما تكملين وبيج خير وادللي

سكتت ابلع بريگي والرجفة كَلت جسمي صرت اطگ سن بسن، ابوي يحجي وچنه مصمم راح اوافق وما ارفضه يحجي بنبرة واحد يگلي ارضي بالطيب ولا تخليني اجبرچ لان الزلمة ما يتفوت..

-بوية انتَ ما فد يوم جبرتني على شي و...

-لمصلحتچ؟ اي اجبرنچ وما اخليج تتخذين قرارات تندمين عليها باچر

-ليش مُصر على هالزلمة

-عبن الوادم خطبوچ من صفر وصارلهم اكثر من ثلاث اشهر ينتظرونا لا تظلمين بختج يا بوية وترفضين

حچاهة ومسح على خدي بأيده وگام لغرفته وعافني بضيمي، گلبي يگلي نظرات منتصر اليوم السبب الرئيسي بقرار ابوي المفاجئ واصراره على الزلمة..

گعدت وحدي نص الليل اضرب اخماس بأسداس وافكاري توديني يمين ويسار.. هاي اول مرة ابوي يكون هيج مُصر على خاطب يجيني وهاي اول مرة يگلي عبارة "لا تظلمين بختچ وترفضين"..

كضيت گلبي يوجعنيي من تخيلت اتزوج واصير لزلمة غير منتصر، الزلمة الگضيت حياتي كلها عاشگته وبانية احلامي واوهامي كلها عليه.. اختنگت وركضت لغرفتي عفت التنظيف وكعدت هنا وحدي اللوبن شسوي ووين أنطي وجهي حتى لو رفضت وابوي رضى امي ومرة ابوي شيقنعهن!

عبرت الساعة بـ 12 بالليل ونويت انزل عاد بس امسح لان محد توكع بيها وتاكل الرزالة غير عبق المسكينة، نزلت وعبرت الصالة وصلت لباب المطبخ ووگفت رجليناتي من سمعت صوت علي التـقي وچنه صوت عبق وياه تسولف؟

-عبق: مسوين سبزي على الغدة ابرار طبخته

-علي التـقي: ها چا تكدرين تصبيلي؟ شو اجتني الجوعة

-عبق: اي صار

صار صوت طگطگة جدور مبين جاي تصبله، ضجت من روحي شكو واگفة هنا عبالك جاي اتجسس عليهم! كفيت بجامتي وبعدني ما خطيت خطوة للداخل وتبسمرت بمكاني ويه حِس علي التـقي من گال..

-شفت امچ اول امس عبق

صوت شمرة عبق لغطا الجدر وصلني، حطيت ايدي على گلبي وركزت سمعي وياهم ظل بالي عليها وتوترت على توترها..

-علي التـقي: سألتها عنچ وما عرفتچ

-عبق: امـ.. امي مو هنا.. مسافرة

-صار فترة اريد احجي وياچ بهذا الموضوع ويجوز راح تكرهيني وتحقدين عليَّ عبن دخلت نفسي بشي ما يخصني بس...

-عبق: فدوة لا.. ماريد اسمع مااريد

-عبق امچ ليش بالشماعية؟؟ امچ ليش فاقدة عقلها؟

-مااريد اسمع ماااريد مااريد

صارت تصرخ وتبچي بصوت مبحوح، ركضت ادخل للمطبخ اشوفها سادة اذانها بأيدها ومغمضة عيونها تمنع حتى تشوف وجهه وهو يحاچيها..

-ضعيفة هزيلة چنها هيكل عظمي! شكلها ميت ايدها عبارة عن عظم وجلد شگد حاولت احاچيها وافتهم منها ما تجاوب

-اسكتت فدوووة اسكتتت

حطت ايدها على گلبها مال وحدة جاي تموت من الوجع، گعدت بالگاع على ركباتها تبچي بالخنسة ودموعها عشرة عشرة تنزل..

-حبيبة: عبق حبيبتي شبيچ يمممة عببق شبييچ

-عبق: خلي يسكت خليي يسكت امي عاييشة مو ميتة.. والله عايشة والله راح تاخذني راح تصير زينة وتاخذني هي كالت هيي وعدتني تعييش ويايه وعدتنيي

تبچي مهضومة ولازمة ايدي چنها تريد تقنعني امها طبيعبة ومابيها شي، هزيت راسي اي بس اريدها تسكت گلبي انزرف عليها بس تقي ما قبل يسكت ما قبل لانه چان معصب ومبين الشافه هناك حرگ دمه......

يتبع 👑....

━━━━━━ ♛ ━━━━━━

امير انتَ جنتل زلمة 👍🏻👍🏻👍🏻

علي الحـق وقبق يخبلووووون احب شوية خبالات بالعلاقة تنطيها متعة 😂💕💕💕💕

وحبيبة؟ يعينچ الله يعينچ الله يا عيوني ✋🏻

القفلة 🤏🏻👀🩷🩷🩷🩷🩷🩷🩷🩷؟؟

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

هلا يالطولك غِصن يتمايل بگلبي.. 🥀♥️

━━━━━━ ♛ ━━━━━━

"حـــبيبة"

ردة فعل عبق صدمتني قبل لا تصدم علي التـقي، گووة سكته بس خليها تهدأ وتبطل بچي بس ماكو البت صابها انهيار وگعدت بنص المطبخ بالگاع تبچي وتضرب على رجليها حييل بقضبة ايدها..

-حبيبة: يا عيوني انتِ اميي حبيبتي عبوقتي كافي دخيلج كافي

حركت راسها نافية ما تقبل تهيد وتقي راح يوگف بباب المطبخ بعيد عنها ويعاين بدون لا يحچي شي، حضنتها بين ايدي ورفعت عيوني عليه نظرتله نظرة صامتة استفهم ليش فتح وياهة هيج موضوع!

-عبق: حبيبة امي عايشة والله العظيم عايشة ومابيها شي هي.. هي.. هي دتتعالج امچ گالت دتعاالجها

-حبيبة: اي حبيبتي اي صح جاي تتعالج والله حتى انا گالتلي

مسحت دموعها تنشر من اثار البچي، رفعت راسها تعاين لـ تقي وحچت بكسرة..

-ليش تچذب عليَّ تقي ليش تكسر گلبي

استمر على سكوته ما يجاوب، دفعتني عنها وصرخت بحس مبحوح ما يعبر للصالة..

-حاچينيي تقيي

-حبيبة: خية كافي لا تأذين روحج

-عبق: لييش يچذذب ليييش!! انتَ چذبت عليَّ انتَ تكررهني اكييد وتكره وجودي هناا ممتقبل خطوبتي من اخوك وتريد تأذيني بأمي اني متأكدددة

تحچي بلا وعي وتلطم على رجليها بكل قوتها انا معليه وحيلي طاح، تقدم علي التـقي عليها ووگف گبالها ضبط، سكت ثواني گبل لا يگول..

-علي التـقي: انا صار فترة طويلة اعرف بوضع امچ وكل يوم انتظر اخوي يحچي بسالفتها لو على الاقل يجاوب من اگله وين ام عبق! ليش ضميتي هيج موضوع على الكل عبق؟ لييش دمرتي امچ ودمرتي نفسج؟!

-عبق: مااا دمرررت ماااا سويت شييي مااا دمرتها اني دا اعاالجها والقرااان دا اعالجهاا رضيت بالذذل والقهرر والضيم والفگر لخاطررهاا بس اريدهاا تعييش

-حبيبة: علي التـقي كـ...

-علي التـقي: چلممة ما اسمع منج حبيبة! النايمة بالشماعية تصير خالتج اخت امج وما تحچين؟؟ لييش ولج ليييش ما گلتي بلچن نلحگ عليها!

كفخني بكلماته لصمني ظليت ماعرف شحچي، استحي اگولن انصدمت من عرفت بخالتي شذى بالشماعية امي فهمتنا وفهمت عبق هي بأحسن مستشفيات بغداد وجاي تعالجها عند احسن الاطباء..

-عبق: اسكتتت اسكتتتتت امي مابيها شيي انتَ معلييك علي الحـق راح يرجعها اليي هو يرجعها بس خليها تتحسن معليك انتَ...

گامت من الگاع وتكرر "معليك انتَ" چن تحجي ويه روحها، عقلها فاصل وايدها ترعش ما ثبتت راحت للمغسلة تغسل بس وجهها ونگعت روحها والگاع كلها الماي ما يثبت بأيدها ويطيح منها گبل لا يوصل وجهها..

-حبيبة: عبق

ما جاوبتني وعافتنا وصعدت فوگ، تبادلنا النظرات انا وتقي واشرلي اروح وراهة خاف يصير بيها شي.. گمت بسرعة نشفت الكاع من الماي وصعدت وراهة وگفت بباب المخزن واسمع صوت نحيييب وبواچي تهد الحيل وصوت موبايلها يدگ.. تخلص الدگة ويرجع يدگ اعرفه علي الحق جاي يتصل بيها محد غيره يدگ عليها من الاساس..

طبيت للمخزن وگعدت بصفها على فراشها وجريتها لحضني، نزعتها الربطة وحطيت راسها على رجلي امسد على شعرها واقرا على راسها ايات..

-حبيبة: سودة بوجهي حبيبتي.. گليبي عبوقتي لا تبچين تقي اكيد مخربط بين امچ ووحدة ثانية

عصرت بيدها بجامة التراك مالتي وغمضت عيونها تحرر دموع اكثر، عفتها على راحتها ما سولفت بعد وكضيت موبايلها شفت ١٦ مكالمة من علي الحـق وكومة رسائل دازلها يسأل ليش ما اتصلت بي اليوم.. فتحت الرسائل وكتبتله بنفس اسلوبها..

"موبايلي صامت واخذني الوقت واني ادرس"

بساع شاف الرسالة وطلعلي جاري الكتابة..

"انا بالطريق راجع لا تنامين اريد اشوفچ بزونات"

"لا راح انام شوية تعبانة"

"ولج صبري تره اجيچ للمخزن وعلي"

"علي الحـق حباب"

"تمام، نوم العوافي چبد"

رفعت راسها عبق تشوفني اراسل بموبايلها وبدون لا تسأل عرفت جاي ارد على حق، رجعت تضم وجهها بحضني وبچت اكثر من گبل شوية.. تبچي بچي گطع گلبي تگطع، فترة طويلة استمرت على هالوضع گبل لا تسأل بصوت گوة ينسمع..

-عبق: وينه اخوچ

-علي التـقي؟ اظنه بغرفته

-اريد احجي وياه

-لا عبق عوفي گلبي انتِ تعبانة هسة

-اريد اعرف امي شبيها

-گتلج اظنه مخربط ويه غير وحدة لا تشيلين هم امج بأحسن مستشفيات بغداد

-وديني لتقي حبيبة

استسلمت لمطلبها بلچن تبطل بچي، گعدت على حيلها ولبستها الربطة روحها رايحة ووجهها مصلوخ ماعرف من القهر مدري الحرگة بس خدودها مطعونات يخوفن..

گومتها مكمشة بيدها وگعدتها بصالة الطابق الثاني، ما رضت واشرت تريدنا نطب لغرفته وعرفتها ما تريد احد يسمع.. دگيت باب غرفته ووصلني صوته يسمحلي اطب..

-تقي تريد تنام؟

-لا

-چا نگدر نحاچيك شوي؟

اشرلنا بيده تعالو طبينا لغرفته وعفت الباب شوي مفتوح، گعدت على الكرسي الموجود وعبق بقت واگفة ومنزلة عيونها ودموعها تجري..

-علي التـقي: عبق خوية الصار...

-عبق: گلت لـ علي الحـق؟

-لا

هزت راسها اي ومسحت دموعها، گعدت بصف الميز مالته بالگاع گمت اريد اگعدها بمكاني بس ما رضت ورادت تبقى هناك..

-علي التـقي: بحلگچ حچي

-عبق: اريد اعرف شبيها امي

-صارلج چم سنة ما شايفتها؟

-اكثر من ٣ سنوات

-ما فكرتي بيها شسوت وحدها بهاي الثلاث سنوات؟

-فكرت

-اي؟

-چانت تتعالج

-من شنو بالضبط؟

-امي بعد وفاة ابوية الله يرحمه انهارت ودخلت بـ اكتئاب حاد صارت ما تهتم لشي والجكارة متوگع من ايدها.. ليل نهار الجكارة بيدها تدخن وصورة بابا گدامها تباوعلها وتبچي..

مسحت دموعها النزلت مرة ثانية وشهگت تغطي وجهها چن تذكرت شي، چتافاتها تهتز وبچيها موتني..

-عبق: صارت متهتم لشي وتفكر بس بالموت وعافت الدنيا.. ابوية چان عنده محل يبيع شالات وجنط وحتى هالمحل باگوه بعد وفاته وعافونا بالضيم وحدنا..

-شلون عشتوا من بعد عينه؟

-رغم عمري صغير بس ليل نهار افكر بالعيشة شلون ناكل وشلون نمشي وضعنا، كل يوم اروح لامي اتوسل بيها يمة رجعي لوعيچ حاچيني وفهميني شنو نسوي؟ اطلع ادور شغل اني؟ اروح لبيت جدي اهل ابوية؟ اروح لبيت جدي اهلچ؟ وماكو امي بغير عالم..

-علي التـقي: اهل ابوچ وينهم؟

-عبق: متبرين من ابنهم ميردوا لانه غضبهم من تزوج امي واتذكر چان دائماً يسولفلي على اهله شگد يحبهم ومتعلق بيهم بس ابوه وامه قسموا قسم وگالوله يا فاضل لو اخذت هالبنية تنسى عندك اهل لا نريدك ولا تريدنا بعد

-حبيبة: ليش ما رضوا بأمج؟

-رادوه يخطب بنت عمه

-علي التـقي: وما حنوا عليكم بعد ما مات؟ ما رادوكم؟

-عبق: ابد ولا وصلوا وفاتحته مكسورة محد اجاه ورغم هذا تواصلت وياهم تلفون ابوية چان عندي وارقامهم موجودة تواصلت ويه عمامي وطبگوا الخط بوجهي خو عمي الچبير گلي اذا شفتچ متصلة بعد اذبحچ تفل عليَّ بالتلفون وطبگ الخط بوجهي

-حبيبة: الله اكبر!!

-عبق: عشنا الضيم وحاولت بكل مابيه اقتصد وما اصرف، وره كم شهر من وفاة ابوية اجانه صديقه گال چنت متداين من فاضل چم فلس واجيت ارجعهم وذني السترن علينا شوية ومشن وضعنا الى ان...

-حبيبة: رجعت امچ لاهلها

-عافت بغداد امي ورجعت لاهلها وجدي طردها من الباب.. ما انسى شلون دفعها بقوة لدرجة وگعت وانطخ راسها بالصبة مال الشارع سودة عليَّ.. شطتت متت بدمي هجمت عليه اريد اخذ حق امي وعتني من شعري وشمرني بالشارع اني وياهة ميريدنا

-علي التـقي: ليش؟!

-عبق: زواج امي وابوية صار غصباً على اهلهم لا جدي ابو امي يريد ابوية ولا اهل ابوية يردون امي وثنينهم باعونا من صاروا لبعض وحلفوا ميساعدونا ولا الهم علاقة بينا

-حبيبة: تقي جدي حاقد حقد على خالتي شذى يشوف دم سنونه ولا يشوفها وحتى من يجيب طاريها يگول عنها "المرحومة" چن ميتة

-عبق: من امي شافت جفاء والكل عافنا ساء وضعها اكثر صرنا ملطلطات من مكان لمكان ووضعها من سيء لاسوء كرهت حياتها كرهت كلشي وچنت خايفة لا تكرهني..

بچت هووواي وره هالجملة وضامة وجهها بين ايدها، ركضت اگعد بصفها اواسيها وگلتلتها ما تكمل اذا الموضوع هيج يأذيها بس ما رضت..

-عبق: يومية ابوس ايدها ورجلها واذكرها بيه حسيت بدت تنساني لدرجة اوقات تكعد من النوم تباوع لوجهي عبالك غريبة گدامها.. خفت عليها وعجزت ماعرف شسوي ظليت اللوب وحدي اسبوعين بقينا هنا بس هالأسبوعين كبرتني سنتين، لزمت تلفون ابوية فصخته تفصخ ادور على أي شخص ممكن يساعدنا وكل اهله لو يحضروني لو ميجاوبون واهل امي نفس الشي لحدما بيوم من الايام امي صاحتلي وگالت دگيلي على "سلوى"..

-علي التـقي: سلوى مرة ابوي

-عبق: اي، چنت اعرفها خالتي سلوى وسامعة عنها بس الاعرفه هي وامي مو كلش علاقتهن قوية وانگطعت من سنين بس ليش وشلون انگطعت ماعرف.. المهم اتصلت بيها وعرفتها عن نفسي بالبداية سبتني وسبت ابوية وامي وحتى فشار فشرت علينا وطبگت التلفون بوجهي

-حبيبة: اتذكر هالموقف

-علي التـقي: صدك؟؟

-حبيبة: چانت امي تخبز ودگ موبايلها برقم غريب خذيته الها وفتحت مكبرة صوت وسمعت صوت عبق تبچي وتحاچيها تگللها انا بنت اختج شذى والدنيا ضاگت بينا وره وفاة ابوي

-عبق: وبسببچ يا حبيبة امج رجعت تواصلت ويانه وره چم يوم واستقبلتنا ببيتكم

-حبيبة: توسلت بيها ووصلت السالفة لابوي بدون علمها وابوي الي ما رضى عليكم وجابكم لبيته

-عبق: انطيتونا الهول نبقى بيها وخالة سلوى گالت حسكم ما اسمعه ما رادت تزعج الولد واهل البيت وفعلاً يومين عشناها بالختلات بس چانت احلى يومين شفت الدلال والحب والعطف والراحة من حبيبة ومن خالة رسمية استقبلونا احر استقبال وامي بدت توصيني على نفسي ودراستي بس بعد هاليومين كلشي تغير..

امي تخربطت ونقلناها مستشفى وهاي چانت اخر مرة اشوفها بيها، الاطباء گالو وضعها واصل مرحلة ورئاتها منتهيات من الجكاير هاي من غير حالتها النفسية المزرية فـ خالتي سلوى گالت هي تتكفل بعلاجها وتنقلها لاحسن مستشفى ببغداد وتعالجها..

كيفت وحضرت اغراضي حتى ارجع وياهة بس عارضت سلوى اروح وگالت اني بنية وميصير ابقى افتر بين المستشفيات لا يصيرلي شي وهي تبتلي بحساب امانة امي عافتني يمها ومن هذا اليوم بدت رحلتي.. انطتني المخزن وبديت اتختل عن عيونكم وانظف واطبخ واسوي كلشي بالسكتة، اوقات چنت ابقى ساعات محبوسة بالمطبخ الحار لان انتو منجمعين هناك وممنوع اطلع گدامكم و...

-علي التـقي: ليش ممنوع؟!

-عبق: خالة متقبل تگول اقلق راحتكم من تكتشفون بنية غريبة عايشة وياكم

ضحك تقي مستهزأ وفر بيده على تفكير امي وما اللومه، امي سوت النوون وما يعلمون بـ عبق دمرتها وسرقت شبابها وهجولتها بعز احتياجها للحب والحنان..

اغلب هالحجي انا اعرفه بس ما جاي اعرف ليش چانت ما ترضى اسولف لابوي عن وضعها وليش جانت تموت خوف وقهر اذا اعاندها واروح اريد احچيله عن وضعها وقررت ما اسئلها هنا خاطر ما احرجها..

-علي التـقي: انا دورت وراچ عبن شفتچ وحيدة لا اهل ولا سند وچنت استغرب من وجودچ هنا، مو قصدي اتدخل بأشياء ما تخصني بس انتِ كاعدة ببيتنا ومن ما روت فضولي امي عنچ قررت انا اكتشف

-عبق: حقك

-بس عندي سؤال.. اسم امچ ما موجود بالدولة هي مغيرة اسمها؟

-عبق: لا!

-بس ماكو بالدولة اسمها

-شلون

-ماعرف، دورت هواي وبحوشت ياله لگيتها و هسة امچ بالشماعية عبق واحترگ دمي من شفتها بهالحال وكلما اعاينلچ اگول شلون راضية امها تبقى بهالوضع وما تحاول تساعدها؟ كل ظني بيناتكم مشاكل

-عبق: لا والله.. امي چانت احن ام

حچتها بغصة وبدت بنوبة بكاء طوييلة، لمت رجليها لصدرها وحطت راسها عليهن وحچت بغصة ونص الحجي ينبلع عدها..

-اوقات سلوى من تعصب مني چانت تگول اوديچ للشماعية واللحگچ بأمچ وچنت اخاف من كلامها وابچي.. اروحلها اتوسل اسئلها عن وضع امي تگول هي زينة بس علاجها مستمر لان بدت تاخذ حبوب وادمنت عليهن ويحتاجلها وقت حتى يتخلص جسمها من الادمان

-علي التـقي: امچ فعلاً مدمنة وواضح عليها عقلها خاينها وذاكرتها شبه ممسوحة

رفعت راسها على تقي شفايفها ترجف ودموعها غاسلة وجهها، اردف يكمل بنبرة حزينة..

-ما اچذب عليچ سألت الاطباء وگالو امچ بحاجة لرحلة علاج طوويلة حتى تتخلص من وضعها الحالي وترجع شذى القديمة

انهد حيلها للبت وحتى دموعها خلصت، حسيت بيها وگع راسها على چتفي حضنتها اواسيها وانتبهت لملامح تقي تتغير ويگول بقلق..

-ولج حبيبة هاي غابت عن الوعي!

-حبيبة: شنييي

وخرتها مني اشوفها مغمضة عيونها ومايعة تروح منا وتجي مناك، تخبلت عليها نيمتها على رجلي وصحت بـ تقي يجيب عطر خاطر نشممها، بعده تقي ما شايل الشيشة من الميز وانفتحت باب غرفته على وسعها وظهر منها علي الحـق وجهه صاير احمر واعصابه ترجف..

فكيت حلگي من شفته هذا شوكت وصل؟؟ عافني بصدمتي وطب يركض عليها وخذاها من ايدي حطها بحضنه يمسح على راسها ويحاول يصحيها..

-علي الحـق: عبق.. عبق چبيدي عببق

-حبيبة: خلونا ناخذها للمستشفى علي الحـق

هز راسه وشالها يرفعها من الگاع لحضنه، سند راسها على چتفه وطلع يهرول واحنه وراه، نزل الدرج يركض وعلى صوت دبچاته طلعت مرة ابوي من الغرفة وعلي البدر وشمس..

-علي البدر: شصاير؟؟

بنفس اللحظة طلعت امي من غرفتها تفرك بعيونها من شافت حق شايل عبق ركضت تصير بوجهه ودگت على وجهها..

-صخاام بوجهي شبيها البت

-علي الحـق: تولييين عن وجهييي لا انعل والددديج

وخرت بسرعة مبحلگة عيونها وتعاينلي، عفتها بصدمتها هسة مو وكتها وركضت لغرفة امي رسمية جريت شال منها وعباه وطلعت وراهم واجت امي رسمية ويانه..

علي التـقي ساق بينا للمستشفى ومرة ابوي بالصدر وانا وحق وعبق وره نحاول نصحيها، وصلنا ونزلناها ركض للطوارئ فحصوا ضغطها گالو كلش هابط بساع شكلولها مغذي وعلي الحق طلب يحولوها لغرفة..

نقلناها وبقت عبق نايمة مدري غايبة عن الوعي ماعرف بس ما جاي تفتح عيونها وكلما تحاول تفتحهم يرجعون ينسدون وحدهم والدكتور گال بسبب الهبوط ما جاي تگدر.. بقى تقي بره وبس انا وحق ومرة ابوي طبينا وياهة للغرفة..

گعد حق يمها على السرير وكاض ايدها حيل منتظرها تصحى، تعاينله مرة ابوي وتفر بيدها وتهمسلي..

-بعده بالبدلة العسكرية الاغبر ما بدل

-حبيبة: يمة چا غير خايف عليها

غمت نفسها بالسكتة ما تخلي يشوفها لان تعرف حق لو نكضه هسة ينفجر، دقايق وبدت عبق تصحصح شوي شوي وفتحت عيونها على كيفها بس سرعان ما فكت عيونها على وسعها جافلة من شافت علي الحـق بوجهها..

-عبق: علي

ذبلت عيونها تهمس اسمه بحس خافت وبرمشة عيين بلمحة بصرر شهگنا انا ومرة ابوي من حق جر وجهها وباسها گدامنا!!

تحمس زايد اخوي وما گدر يكض روحه صخام الصخمني! درت وجهي بساع ارجف واطگطگ بأصابعي ومرة ابوي دگت على صدرها وصرخت..

-صواااااب

ما جاوبها لا علي الحـق ولا عببق وانوب وجهي دايرته مادري شجاي يسوون بس أشوفن مرة ابوي تصفگ بيدها وتسوي حركات عجايز..

-رسمية: ايييي عاشت ايدج على هالتربية ياا رسميية عااشت ايدج يا فاايخة شوون وليد عندج سرسري يسد عين الشمسس

-حبيبة بهمس: خلصوا؟

-رسمية: انچبيييي انتِ الثانية

-حبيبة: انا شكوو

-علي الحـق: طلعي يمة بره وخلينا براحتنا

درت وجهي فاكة حلگي واشوفن عبق دايرة وجهها عنه وعاصرة عيونها بكل حيلها متفشلة وحق بعده مگابلها، شالت امي رسمية عباتها تهوس بيها وتگول بلحن..

-تسررسر يمة تسرسر ولا تهتم الناا تسرسر يمة تسرسر

تنهد علي الحـق ما يجاوبها شكله تعبااان ومهدود حيله، عصبت امي بالزايد من شافته مغلس وظلت تدردم عليه..

-تهيييي بهيييي ذولة ولدج رسمية؟؟ هاي بزرتچ الطايح حظهاا بسس اااخ من ابوك كاضني من ايدي التوجعني وما يخليني ادوس بثربكم اطلع روااحتكم

-علي الحـق: يمة يا حبيبتي انتِ اصلاً ليش زحمتي نفسج بنص الليل واجيتي ويانه شعندج هنا

-رسمية: ايييي يمة اييي اطردني يلاا ايي اطردني خاطر تـ..... استغفر الله مننك يا لسانيي

-حبيبة: يمة خلينا نطلع ونخليهم براحتهم

-رسمية: يااااااع يا يمممة ياااا خية ياااا بوية شني براحتهم ولج وين عايشين احنه بتركيااا

-علي الحـق: يمة البت تعبانة وكت صياح فوگ راسها هسة

-رسمية: هو مو صوچك صوچ البت الما رگعتك راشددي من حبيتها وولج عبيققة شون ترضين يتگرب منج وانتم ما معرسين بعدكم؟؟؟

-علي الحـق: خطيية عاين منو تحجي رسمية الجانت تتختل بالبسانين خاطر تشوف معشوگها علي!

-رسمية: اسممم الله شوكت هاي ولك

-علي الحـق: فراقد فاضحتج يوم وحاچيتلنا كل سوالفكم انتِ وابوي

-رسمية: ياا يااا يااا يااا ياااا

غشت نفسها بالعباه وتعض بأصبعها، گوة كضيت ضحكتي خاطر ما اترزل منها بس صدگ ماكو واحد بالعشيرة ما يعرف ابوي كتل روحه كتتل على امي رسمية وانتظرها سنيين خاطر ابوها يرضى ينطيها ومن عقدوا ظلوا يلتقون بالبستان بالختلات والخنسات بدون لا يفهمون احد بس فراقد فضيحة وما يعبر عليها شي وكشفتهم..

-علي الحـق: شلون صرتي يرويحتي

سكتت عبيقة ما تجاوبه واعرفها خجلانة من امي الفتحت عيونها وحلگها عليهم تنتظر منهم الزلة..

-علي الحـق: بعدج تعبانة عنق؟ لو ارگعچ ببوسة ثانية تصحيچ؟

-رسمية: خايبيين هالوليد لييش ما يستحيي ولك انتَ شني ربتك كافرة وهيج طلعت؟؟

-حبيبة: حق لا تخبلها علينا شبيك

-رسمية: اصغر زعاطيطچ وتگولين لا تخبلها علينا؟؟ ولكم صدك انتم ما تستحون وكل تربية ماعدكم!

-حبيبة: حگچ يمة وانا اسفة صدگ ما استحي

-رسمية: ايي عفية هيج صيري

-علي الحـق: انا مو اسف

-رسمية: تففففف عليك انتَ

تفلت عليه وگامت تلبس عباتها، اشرت لـ عبق تگوم ويانه والبت بساع استجابت وگعدت على حيلها..

-علي الحـق: هاي وين!!

-رسمية: اخذها وياي اخافن عليها لا تسويلها شي هاي فقيرة ما تگدر لفواينك ابن علي

-علي الحـق: تره مريتي!!

-رسمية: انچببب يله انچب مريته ابو بوسة

جرتني من ايد وكضت ايد عبق وانتبهت للمغذي مشكل بيها، اشرت لـ حق يصيحلنا دكتورة وما رضى يگوم بوز علينا..

-رسمية: تگوم لا بنعالي!

-علي الحـق: يممة ليش تچفصين باللحظات السعيدة ليييش

-رسمية: گممم العار يدورلي لحظات سعيدة والبت متخربطة

-علي الحـق: اداريها انا انتِ ماعليج

-رسمية: ما نريدك عبيقة تنام يمي اليوم

-علي الحـق: لااااا بله

-رسمية: انچب انچبب يله ولي صيحلنا دكتورة

طلع من الغرفة شايط وانا ميتة ضحك مييتة، اعاين لـ عبق ورغم وضعها الصعب بس ما كدرت ما تبتسم وتغير جو على لهفته عليها وخوفه..

-رسمية: سمعي ولج عبيقة لاا ترضين يتگرب منج الا تعرسون سمعتي؟؟

-عبق: لا خالة ابد ميتقرب مني حتى ايدي ميلزمها

كشولت امي بوجهها وفرت بيدها رافعة حاجبها وتدردم..

-رسمية: هو شوية ويحطها بحضنه وتگول ما يكض ايدي الحمدلله والشكر ربي انا مو عمية واشوفن بعيوني

-حبيبة: لا لا يوم تره هاي اول مرة

-رسمية: وانتِ شمعرفج؟! كاعدة وياهم؟

-حبيبة: لا مو عبيقة تسولفلي

-رسمية: انلصمن كافي اذا هيج مفلفلين على بعض اگول لابو علي يزفكم ونخلص من فواينكم

وجه عبق صار طماطاية وما حچت كلمة ودافعت عن نفسها احس بعدها حزينة ومالها واهس شي، اجت الدكتورة شالت المغذي منها وطلعتها امي وياهة وعلي الحق ورانه يمشي ونسمعه يبسمر بأمي..

-علي الحـق: تقي تتذكر من سولفلنا ابوي على فد وحدة چانت تبچيي بچي وتزلغ روحها عبن ابوها ما يرضى تشوف معشوگها؟

-علي التـقي: ايباااه شذكرك بيها ولك

-علي الحـق: بعد تذكرتها واجت ببالي.. وتتذكر من راحت للدگاگة خلتها تدگ اسمه على جسمها؟

-علي التـقي: ايباااااه تاتو اهل گبل

-علي الحـق: ايي خايب وتتذكر من چانت...

-رسمية: سممم وزحير وزقنبووت بگلب عدوينك كاافي ذليتنا ابن الغبرة!!

-علي الحـق: چا لا تحطين راسچ براسي يووم تره كل سوالفكم عندي

-رسمية: ماحط راسي براسك انا احط نعالي براسك وليي غاد يلااا

-خوش يمة خووش خياساتكم كلها يمي وبالدليل اطلعها

-هييچ من تربيتك الخايسة انا اعلمك حويق تحلمم تشوف هالجماره بعد خلي خياساتنا تفيدك

سحلت عبق وياهة تهف بعباتها وهاي الطفلة تعبانة وگوة تمشي وياهة، صعدنا السيارة واجه يريد يكعد وره وامي ما رضت ودعبلته بالصدر..

-علي الحـق: ااااااخ يا القهر

-رسمية: تحسر زين انا اريدك تتحسر خاطر تتربى وتثگل چن جماعتك الزبايل غسلوا عقلك ونسوك عاداتنا

سكت حق ما جاوبها وچنه تچفى الشر خاطر امي تنسى السواه ويكدر يختلي بـ عبق وحده بس والله ولا نست ونزلنا للبيت واخذت عبق وياهة لغرفتها..

-علي الحـق: يمممة خلي البت ترتاحح بفراشها!!

-رسمية: امشي لك مالك غرض انتَ خليها عندي ترتاح اكثر

-علي الحـق: بالعباس اگـ...

-رسمية: چلمة زايدة وتحلمم تشوفها بعد عليوي وليي بدل وانخمد

واكفين انا وتقي بصف بعض نشوف الحرب الطاحنة وميتين ضحك، ندسني تقي بعكسه وگال..

-بشرفچ نامي يمهن اليوم وگليلي شيسوي حق من تنام امي

-حبيبة: هههههههه ما يكعد راحة علاوي

بتت يمهن الليلة وفرشنا بالگاع انا وعبق، حطت راسها هي على المخدة خانسة ما طلعت منها حچاية.. انكسر گلبي عليها وحضنتها من وره امسح على شعرها واسولف وياهة على كيفي..

-شلون صرتي عبق

-احسن

-علي التـقي ما راح يعوف خالتي يرويحتي لا تخافين احنه وياچ وما راح نرتاح الا تنجمعين بأمچ

-حبيبة

-عيونها

-تتوقعين علي الحـق سمعني من چنت احجيلكم؟

-اظن اي

-برأيج راح يكرهني؟

-ليش يكرهچ؟؟

-لان ضميت عليه ورضيت بالذل

-لا عبق مستحيل حق يزاعلج لو يضوج منج

-علي الحـق يكره الذليلة، اخاف تتغير نظرته الي

-مستحيل! لا تخلين ببالج هيجي شي

هزت راسها ساكتة وغمضت عيونها، لعبت بشعرها على كيفي وببالي فكرة بس ماعرف شلون اسئلها بدون لا اأثر عليها بس بالاخير قررت اسئلها..

-عبق ليش تخافين من امي؟ وليش ما ترضين تشكين لاحد منها؟

همست كلامي همس مترددة، سكتت لفترة طويلة وظنيت ما راح تجاوب بس فاجأتني من گالت بصوت ناصي كلش..

-تهددني بيها

-بأمج؟

-اي

-شلون

-بكل مرة اعارض كلامها تهددني تگطع عنها العلاج وتخليها تموت

-وانتِ تصدگيها؟

-اممم

-ما اظن تسويها

-سوتها من قبل

-شوكت؟

-تتذكرين بيوم عرس علي البدر وشمس واجيتچ كتلج صرنا وجه بوجه اني وعلي التقي؟

-اي؟

-افتهمت سلوى وعبالها متعمدة وحلفت تكطع العلاج عن امي، بالبداية ما صدگتها وكلت بس تهديد وغلست على السالفة بس وره يومين اجتني وراوتني صورة امي وجهها وجه اموات، شعرها مخربط ووجهها مزلغ والنفس گوة ينجر عدها وتهمش بيدها على هوا تخبلت بيومها.....

اهتز جسمها تبجي بحسرة، حضنتها اكثر وطبطبت على ايدها بينما اردفت..

-بست ايدها يا حبيبة.. بست ايد امچ ورجليها بست نعالها والله بسته وذلتني ذل ياله رجعتلها العلاج حاربتني لدرجة تمنيت انشليت بيوم عرس بدر وشمس ولا شايفني تقي

تحسرت محترگة حرگ من سوالف امي والله سودتي وجهي يا يمة گدام بت خالتي وخالتي، يجوز انتِ جاي تسوين هيج حسبالج تاخذين حگچ من اختچ الي تگولين فضحتج بس بتها شنو ذنبها؟ كلش تعبت على تعب عبق وتألمت لان الجاي تعذبها امي.. امي انا!

-عبق: امانة الله ورسوله حبيبة متحجين لبشر ولا تحاولين تعدلين وضعي الا اتأكد مية بالمية من وضع امي واعرف شنو العلاج الدتنطيها سلوى او شنو هالحبوب الوصلتها لهذا الحال.. لا تحچين الا اشافي امي من فلوس مهري وارجعها توگف على رجليها

-وعلي الحق شتگليله؟

-اذا سمعنا فـ هو عرف شجابني يمكم بس ميعرف اني متعذبة ببيتكم وخلي لا يعرف هسة حتى منخرب الاول والتالي وبدگة تلفون من سلوى تكتل امي وانحرم منها للابد

هزيت راسي متفهمة بس الغصة ذبحتني ما جاي تروح مني، غمضت عيوني اريحهن وما حسيت من غفيت وحسيت مرة ثانية على صوت همسات عبق چن جاي تحاچي احد.. فتحت عيوني وچان اشوفن حق بالغرفة وعبق تلطم وتعاين لامي رسمية النايمة على الچرباية..

-حبيبة بهمس: علي الحـق!

-علي الحـق: نامي نامي

-عبق: حق اطلع حباب لا تسويلنا مصيبة

-طلعي وياي

-اجي اي اجي بس روح لا تحس خالة رسمية

رغم الغرفة مظلمة بس كدرت اشوفه من مد ايده لوجهها وعصر خدودها ثنينهن طبگهن بأصابعه وگام يطلع من الغرفة، هفت وجهها عبق بأيدها وهمستلي..

-گومي ويايه حبيبة

-خاطر اشوفكم بوضع يخزي مرة ثانية؟؟ لو اموت!

-ولج لا بس راح نحجي حبابة تعالي ويايه اخاف تكعد خالة رسمية وتشوفنا وحدنا وتكول عني خفيفة

ظلت تلح عليَّ شلعت گلبي وكومتني وياهة غصب، عرفناه كاعد بالمطبخ دخان جكارته جاي مناك ورحناله انا وعبق، بس شافني وياهة لطم على رجله حييل ونتر..

-شنييي جايبتها حمماية وياچ!

-عبق: اي!

-وجعييي

-هاا راح نتعارك؟؟ خوش لعد ارجع انام اني مالي خلك

-تعاالي ولج

هرول بأتجاهها وجرها من ايدي ودفعها على الحايط، بعده ما خاطي خطوة الها غمضت عيوني ونترت بيهم..

-بالعبااس اذا تسوفلتوا اروح اگعد امي!

-علي الحـق: نعالي على امج!

-عبق: تقصد امك تره

-علي الحـق: ها چا نعال امي على امچ!

-حبيبة: حقق لا تحجي على امي!

-علي الحـق: سكتي لا اروح ابتلي بيها سكتييي

-حبيبة: اهوووو فضوها وسولفوا يله

-علي الحـق: شني هالحجي السمعته عبق؟!

بأختصار شديد وبدون مماطلة علي الحـق سمع كل كلمة حچتها عبق وشهد على كل بچي وقهر عاشته وهاي سبب عصبيته وروحه الطافرة، وگفت عبق فوگ الساعة بس حتى تقنعه هي سعيدة بعيشتها هنا ومرتاحة خاطر ما يروح يفرغ سلاحه براس امي هسة وهي نايمة..

-عبق: علي اني لو ما اجيت لبيتكم چان ماتعرفت عليك ولا خطبنا! هالبيت هو الجمعنا ويه بعض وراح نعيش احلى حياة بي سوه

لزم ايدها ثنينهن بوسهم وحطهن على وجهه بس العصبية تقرا عنده ملياار متحلف لامي ويريد يهد عليها ويسوي مشكلة جبيرة..

-عبق: اهده.. اهده ولا تتعصب كلشي اله حل هسة عوف مرة ابوك واريدك تاخذني لامي اشوفها

-علي الحـق: واذا شفتيها وچلبتي بيها مثل الجهال ما ترضين ترجعين وياي؟؟

-عبق: الصراحة؟ اني اتمنى ارجع اعيش وياهة

عصر ايدها الحاطهم على خدوده وخنزر بدون لا يفتح حلگه، ضحكت بتعب وگالت جزعانة..

-شبيك بس لا صدگت انتَ؟

-اي!

-هههه لا تتنحس حق واخذني اشوفها حباب

-بس ترجعين وياي!

-ارجع

-حلفي بروح ابوچ!

-وروح ابوية ارجع

-عبق انا راح اخذچ بس بعلي انجلط لو ما رجعتي والعباس اسحلچ سحلل من شعرچ وارجعچ وياي غصبااً ما على الخلفج!

-اهوووو بده بددده

-اعشگچ انا **** بروحج

-هسة انتَ تتغزل بيه لو تغلط عليَّ؟ حتى اعرف شنو اجاوبك!

-اتغزل بيج واتحارش والعب وياچ وعليچ واطيح حظج وابوسج واحضنج وانعل والدين اليزعلچ و...

-حبيبة: اوووع كاافي لعبت نفسي شهالتلوث السمعي والبصري هذا!

-عبق: حبيببة شبيچ

-حبيبة: ووويع ويييع سكتي هاي كل المخطوبين هيج يسولفون؟ يمة الله يساعدكم على رواحتكم

-عبق: هسة انتِ من تنخطبين هم هيج تسولفين واكثر بعد

-حبيبة: اذا سولفت وياه هيج دگوني بالنعال انتِ والمغازلچي مالتچ

عفتهم ورجعت لغرفة امي رسمية وهي اجت تركض ورايه چنها بطة وهذا اخوي الارعن ولا عافها شبعها تگرص وگبل لا تطب للغرفة شنطها من رگبتها وتعال واشفطها شفطة مرتبة على خدودها وشمها بكل قوتك اظنه گعد حتى الجيران وما غلطت لان نزلت تَـمني من فوگ وظلت تتصفن بالوجوه..

-تَـمني: اووه اسفة قاطعت عليكم خلوتكم

-حبيبة: خايبة همه بقوا بيها خلوة

-تَـمني: اجيت اشرب مي وارجع كملوا كملوا

عبرتنا وراحت للمطبخ، فكيت حلگي عليها من انتبهت هاي نازلة بدون شال وعلي الحق هنا! خرب عرضج تَـمني شوكت تتذكرين تلبسين الحجاب..

-عبق: فضحتنا حق كافي

-علي الحـق: امووت عليج وعلي

ضحكت وجرتني وياهة ورجعنا لغرفة امي رسمية وهالمرة نامت شوية مرتاحة، صح سرحت بأفكارها بس احسن من گبل شوي..

ثاني يوم اتفقوا عبق وحق يرحون لبغداد بس تقي طلب يأجلون روحتهم چم يوم بينما يتطقس ويفتهم من مصادره الخاصة عن حالة امها ويهتمون بيها شوي على الاقل بس تگوم على حيلها خاطر من يرحون لبغداد بساع يطلعوها من الشماعية..

ثالث يوم صار وقت نحضر جنطنا راح نطلع للشمال وطبعاً كل هالايام تمر وعيون امي تطاير وراي علمود موضوع الخاطب يردون مني جواب وانا تعب لساني من گدما رفضت وبكل مرة تفاتحني بالموضوع تگب هوسة وتطلع من غرفتي ترزل بيه..

داومت اليوم مالي واهس رحت بس علمود الامتحان، كملت وطلعت شفت حور واگفة تتعارك ويه واحد وترزل بي.. خفت عليها وركضت افتهم شني السالفة وسمعتها تنتر..

-ادبسززز چان استحيت على دمك يا قليل التربية!!

-شدعوة عيني شدعوة شسوينا احنه

-حبيبة: شني حور شصاير؟

-حور: هالارعن يصچمني وبااعي شسوه

مدت جنطتها البيضة وشفت مكتوب عليها بالجاف يوزر مبين مال انستا ايا چلب! كاتب يوزره على جنطتها ماكو هيج صلافة!

-الولد: مو صوچچ صوچي اني المعجب واجيت اصارحج

-حور: امشي لك اجه يصارحني والقران الا اكول لاخوية يجي يأدبك!!

-**** بيج وبأخوج

شهگنا كلنا على حچايته الگالها وانطانه ظهره يعوفنا، حور طفرت عدها ما تحملت تسكتله شالت جنطتها ورگعتها بظهره..

-الولد: بتتت الزمااال

-حور: مااكو ابن زمال غيررك اني اعلممك يا خايس الا اربييك

-ما عاوزنا غير الساقطات يربونا.. اخذيها عموو اخذيها فشلتن نفسچن ما متربايات

يأشر عليَّ ويحچي، خزرته معصبة وانا منا طلعت من الامتحان ما مجاوبة زين اللتمت عليَّ وحلفت بالعباس ما اسكتله..

-حبيبة: ووولك سلنگح ياهي هاي الما مترباية؟؟ هااا ياهي؟؟؟

-الولد: انتِ! عندج مانع؟

-حبيبة: عندي وعند ابوي هم! اليوم اسحلك سحل ذهاباً واياباً بالعمادة بسييطة

-يلا يلااا شايفة روحها شووفة علينا المغروورة

يصيح بكل صوته لم الدنيا علينا سودني، الحظ سواها وخلى واحد من الدكاترة يعبر ويشوفنا، شاف حور تترادد وياه وهو يجاوبها وانا هم وسحلونا ثلاثتنا للعمادة..

-حور: حبيبة انلاصت علينا

-حبيبة: سكتي ولج

-عزا بعيني كله بسببي خاف يفصلونا؟

-ما يفصلون بس سكتي

-راح اتصل بحاكم يجيني

-وولج لاا

-والله الا اتصل

فلتت توگف على جهة وطلعت موبايلها دگتله ما جاوب تالي شفتها تدزله رسالة خرب حظ عدوينچ حبيبة انفضحتي!

-العميد: تفضلوا شباب

تقدمنا انا وحور والحقير التجاوز، غميت روحي من جابونا للعميد مو لرئيس القسم شسالفة شمسوين احنه قابل هي كلها عركة زعاطيط..

حچى ويانه العميد وافتهم السالفة كلها وحور راوته جنطتها الحمدلله احنه ما تعاقبنا بشي بس الولد ترزل وكتب تعهد ما يتقرب من عدنا بعد وماله غرض بينا.. طلعنا من مكتب العميد منتصرات بس طار هالانتصار من شفت بوجهي حاكم!

-حاكم: بنات شصاير وياكم؟؟

-حور: حاكممم

راحتله تبچي وحضنته حيل يااا مو هستوها مابيها شي منين جابت هالدموع خرب حظي..

-حاكم: حورية لا تبجين حبيبتي وفهميني شنو الموضوع بالضبط؟

-حور: شوف جنطتي

-حاكم: شنو هاي؟ شبيها جنطتچ؟

-شوفها زين شوفها

كضها يتفحصها ما مفتهم السالفة، هاي هسة شون تريد تسويلنا فضيحة بنص الجامعة وننفصل فصلة مرتبة من العميد..

-حبيبة: ماكو شي دكتور هاي صديقتها جاي تشاقة وياهة وكتبت على جنطتها وحور زعلت

-حاكم: زعلت لدرجة جابوكم للعميد؟

-حبيبة: اي ما تعرف بسوالف البنات انتَ على كلشي نتعارك

ميل زاوية فمه ما مصدگ وعاين لـ حور الواكفة تمسح بدموعها، تنهد وحضنها نص حضنة يمشيها واستغربت من اللتفت الي ومدلي ايده الثانية شنو يريدني اكض ايده لو فهمت غلط؟

ثانيتين ما بقت ايده ممدودة وبساع سحبها وغير الموقف من اشرلي بيده خاطر امشي وياهم وگال..

-يلا حبيبة

مشوا همه كدامي وانا وراهم، طلعنا من العمادة واسمعه يحاچي حور ويلح عليها يريد يفهم السالفة شنو..

-حور: گلتلك حبيبة تعاركنا ويه بنات

-حاكم: حور مو زعطوط گدامج فهميني السالفة كلها خليني اعرف شلون اتصرف!

ظل يلح عليها وشكله عصبي بس عصبيته معقولة مو مبالغ بيها مثل اخوتي، استمرت حور تفهمه ماكو شي وانا وگفت على جهة اشاركها بالچذبة بس طبعاً ماكو چذبة تدوم وعبروا من يمنا جماعة ذاك السلنگح الحارش حور من البداية.. صفر واحد بيهم بصوت جذب انظارنا وصاح..

-فديييييت هالطووول

وطبعاً "فديت هالطول" ما ينرادلها روحة للقاضي وواضح منو يقصد بيها لان حور قزمة وانا النخلة الوحيدة الواكفة هنا وحاكم طبعاً بس قابل راح يكولون فديت هالطول لزلمة؟

-حاكم: عليمن هاي وولك؟؟؟

ضحكوا الشباب ما مهتمين وعبرونا وهذا شاااط اذاناته گامت تطلع دخان، ركض راد يروح وراهم وحور كضته من ايده خايفة..

-عوفهم حاكم فدوة ذولة هووايه

-حاكم: رجعن للقسمم

-حور: منرجعع حاكم والله ذولة شياطيين حتى سچاچين يشيلون بيدهم

-گلتتت رجعن للقسمممم

عاطها بوجهي مو بوجه حور هالمرة، عصرت عيوني بلا ما احس من علو صوته وحور بعدها مچلبة بيده وتتوسل..

-حور: حاكممممم عوفهمممم

-حبيبة: اصلاً راحوا

-حاكم: كلللله من وراااچنننن

-حبيبة: لا تصيح بوجهي خووية

-حاكم: امشننن رجعن للقسم يلااا

-حبيبة: شبيك شايط لا تصيح

-حور: معصب معصب عوفي

سحلتني حور وياهة وره ما تطمنت الولد اختفوا مادري وين راحوا تبخروا مادري اندفنوا المهم ضيعناهم، مشيت وياهة طبيعي وهي المسكينة تنتفض من الخوف..

-حبيبة: على كيفج يا حبيبتي عليش هالخوف هسة هو شصار

-خفت والله تصير مشكلة

-ما تصير خية لا تخافين ما شفتيني ما اتصلت بأهلي ولو انا لو صارتلي هيج سالفة ما ادگن على اخوتي اخابر منتصر عاد هو شوي متفهم فدوة لعينه

-حور: اي اني اخاف من يعصب حاكم وشفتي شلون عصب

-حبيبة: والله يا الله تشوفين هاي عصبية؟ خايبة انا شابعة تكسر اغراض وهجم بيوت وحتى البوب يشلعوها من يعصبون وانتِ لان عله نبرة صوته خفتي

-حاكم: امشنن ولا تظلن تسولفن

-حبيبة: هاي ويانه؟

-حاكم: لاا ويه امي!

-حبيبة: ها خوش

-حاكم: انتِ غييير صلفة!

جحظت عيوني مصدومة من عبارته واللتفتت عليه وهذا وضعي، قابلني ببرود مميت ولا چن تجاوز عليّ وگال عني صلفة ابدد ولا يمه ولا اهتم طلع موبايله مادري شيسوي بي..

-حور: حبيبة تعالي ويايه تعالي

-حبيبة: لا والعباس فلا اجي انتَ ياهو حاسب نفسك؟؟ يممك حواليك وتجاوز؟؟

-حاكم: ديري وجهج ماريد احجي وياچ

-حبيبة: لا حباب حاچيني لاا ابوس ايدك بس جاوبني! انتَ اشايف روحك شوفة هاا؟؟؟

-حاكم: حبيبة سكتيي اني واااصلة ويااايه لهناااا (ويأشر على خشمه) كلمة زايدة وماا اظمنن الراح اسوووي تچفي الشررر وروحي هناك

-حبيبة: انتَ بجامعتنا يعني انتَ رووح هناك وراوينا عرض چتافك! واحترم نفسك مرة ثانية دكتور عييب عيببب بحگك تتجاوز وتهين بت ما موجهتلك حديث!

هديت ايد حور وعفته ورجعت للقسم واسمعه يصيح من بعيد خلاني افوور..

-التربية بيين تسع ولد هوووايه مأثرة عليج ستت ينرادلج جررعة انوثة!

-حور: حاكم شبييك

-حبيبة: انتَ صددگ واحد ما تستحي وگوة تجيب الحچي لروحك!! انا بالعة موس وساكتة لخاطر اختك بس كافي مصخت! چلمة الدكتور شكبرهاا ببداية اسمك عيب تطلع منك هاي السوالف!!

كملت طريقي واعصابي ترجف مادري شبي هذا عليّ اليوم خاف انا عايزة عركة هذا كملها.. ضربت باقي المحاضرات وخابرت سور يجيني وطلعت گبل لا اللتقي بـ حور واودعها ما راح اشوفها منا لحدما نرجع من الشمال..

ثاني يوم قرر ابوي نطلع من الفجر وره الصلاة هيج فجأة هو احنه متفقين نطلع الجمعة بس ابوي غير رأيه ودائماً الطلعات الي ما متحضريلهن وتصير بساع تكون حلوة ونتونس بيها كللش..

بيني وبين روحي تذكرت سبأ ورهف صار شگددد ما شايفتهن وگلبي طاگ عليهن بس شلون اجيبهن ويانه وابوي يشوف دم سنونه ولا يشوف واحد من اولاد مسعود.. استسلمت واتصلت بس بـ رفل وليلة حتى يجون وانتظرناهن علما تجهزن ورجنا عليهن..

ضربنا دواماتنا بعرض الحايط وتَـمني حتى امتحانها اجلته تكول استاذهم حباب وقبل يأجل، الامير عزم منتصر وبناته خاطر تتغير نفسيته وابو كربله هم حط روحه واجه هو وامه بسيارته متنا ضحك من الامير اتصل بي وگاله من وره خشمه..

-اسمع لك انا اهلي وياي لا تكعد ويانه ولا تاكل ويانه ولا تشوفنا ولا نشوفك تظل مثل الچلب وحدك... اي من هسة اگلك

-ابو كربله: عادي عادي

-الامـير علي: حتى الفندق ما تكعد ويانه واذا اجرنا ڤله تنام بالساحة ياكل الذبان وجهك

-ابو كربله: عادي عادي

-الامـير علي: خالتي ام حسن (امه) على راسي احطنها بس انتَ ما مرحب بيك

-ابو كربله: بعد روحي روحك معروف انتَ جسر للطيبين

-اي چا هذا هو بعد انتَ جبتها لروحك تستاهل الراح يجرالك

-ابو كربله: عادي عادي

-علي الحـق: وقهررر خبصنا عادي وعادي شني ماعندك احساس ولك جاي نگلك جايبين اهلنا

-ابو كربله: شني السالفة اخوكم انا مو غريب ولك

-علي السور: رجاءً ما ناقصين گمت ازوووع اخوان

-ابو كربله: ما يهم بحسبة ابوكم انا

-الامـير علي: ابو كربله جايب البيت وياي لا تجي

-تَـمني بهمس: منو البيت؟

-حبيبة بهمس: اظن انتِ

-تَـمني: امييييييييير

همستها همسس بصوتها المايع بس وصل لمسامعه وسد المكبرة ملتفت عليها يضحك، كضت ضحكتها گوة وانطته گفاهة مبوزة عود ما راضية وهو گضى الطريق كله يصيحلها البيت والبيت يداهرها..

-الامـير علي: بوية اظن البيت تعبانة شوي لو ننزل ناكل هنا

ضحكت خالة حنين وسمعتها تگللها حلوة سوالفه، نزلنا بمطعم يخبل يطل على حديقة ونهر صغير بين الصخور.. طلبنا سمچ لان المكان يتميزون بالسمچ الطيب وما شاء الله صلوات على محمد خمس طاولات طبگولنا ياله كفينا..

-تالة: الله وناسة كلش احب العوائل الچبيرة

-حبيبة: يمعودة توزعنا على ثلاث سيارات كبار وهم ناس كاعدين بحضن ناس

-الامـير علي: البيت تاكلين سمچ لو دجاج؟

-تَـمني: اوووووف اميير شنو بيت اكو واحد يجيب بيته وياه!

ضحك ومد نفسه الها ولاني گاعدة بصفهم گدرت اسمعه من يگول..

-الامـير علي: چا انتِ البيت وام البيت وشمعته

ضحكت وضربته خفيف على چتفه وانتبهت لنظرات الامير ما نزلت منها، الاهتمام ينبع من عيونه والغده كله گضاه اكلي وهاچ طرشي وهاچ هذا طيب وهاي صفحة السمچة اطيب.. ولا تاكلين من الذيل وهاچ صفحة البطن وبالنهاية صار يسويلها لفات وينطيها..

-تَـمني: والله شبعت امير هسة اريد لبن

حچتها بهمس وابتسمتله، اشرلها على عيونه بمعنى "من عيني" وگام يجيبلنا گلنا لبن وانا رحت وياه اتمشى..

**

"تَـمني"

المكان يجنن، الاجواء تجنن، الناس الگاعدين يخبلون والحب المتوزع بين الكل شي يتسولف بي لنهاية العمر من جماله، جابلي امير لبن شربته و گمنا اني وتالة وعبق ورفل نغسل، كملن قبلي ورجعن واني دخلت للحمام اعدل بنطروني وطلعت شفت حبيبة واگفة بحديقة المطعم ووجهها كللش ضايج..

-تَـمني: حبيبة شبيچ

-حبيبة: لا.. لا ولشي

-شبيچ يمعودة شنو مضوجچ؟

-تَـمني مابيه خلينا نروح تعبت

ما لحيت عليها ودخلنا للسيارة نروح لغير مكان، السايق گللنا اكو ڤلل حلوة وچبيرة تفيد العوائل اجرنا وحدة ونزلنا كلنا سوه وابو كربله ضحكنا كلنا من گال..

-امي امانة يمكم وانا ابقى انام بالسيارة احرسكم اخاف على فليسات علي الحـق جيبه ثگيل هالمرة مستلم راتب

-علي الحـق: عينك الله لا ينطيك عيننك

-ابو كربله: خوية تضمهن عندي تره انا جماعتي يسموني القاصة من گدما امين

اشرلنا الامير ندخل جوه البنات كلنا ميقبلون نبقى وياهم بره بسبب ابو كربله.. صح غريب بس مبين كلش يثقون بي وقريب عليهم لان فرحانين بوجوده ومحد متضايق او ضايج لان اجه وكلامهم اليوم بالسيارة چان كله مداهر..

استقرينا البنات كلنا بغرفة والشباب هم بغرفة والكبار گعدوهم بغرفة وعمو علي وحيدر وحدهم بغرفة وعلى هالتريب تبقى غرفة فارغة.. خالة رسمية اصرت وحرجتني كدام الكل من كالت اني والامير نبقى بيها لان بعدنا عرسان..

-تَـمني: لا خالة عادي ويه البنات ابقى

-رسمية: لا لا روحي ويه زلمتچ

حچتها وغمزت للامير وعضتله شفة، استغربت كلش من حركتها بس ما علقت ورحت للغرفة، حسيت غمزتها الها علاقة بالصورة بالتلفون وماعرف ليش ربطتها بي مادري اني موضوع التلفون ياكل ويشرب ويايه وصايرة بكلشي احطه بالنص..

وره المغرب قررنا نطلع نتعشا وعشنا احلى اللحظات سوه، علي الحـق وعبق عصافير الحب ملتهين ويه بعض وخالة رسمية كل شوية تروحلهم وتحط عوچيتها بنصهم وتصيح..

-وخرر ولك وخرر ارعن رووح غاد هناك يلاا

-علي الحـق: يمممة لا تمصخيهاااا

-شيخ علي: و تففگ ما تستحي تگول لامك تمصخيها؟؟

-علي الحـق: بوية شوفها بس عاين لحركاتها

-علي الكرار: تستاهلون چا راعوا مشاعرنا التصير خبز يابس من تشوفكم

-علي السور: اااه شوكت نتزوج نوير ونكض ايد معشوگتنا ونفتر وياهة يم النهر ومن نبزع ونضوج نشمرها هناك خاطر تغرگ وتموت ونخلص منها؟

-ابا الحسن علي: چا شكو تتزوج من الاول؟

-رفل: چا يظل طول عمره بلا زواج؟ وعادي هم الانسان تجيله فترات يبزع وتطگ روحه ويريد بس يخلص من شريك حياته

-علي النور: تفتهمين وعلي

-ليلة: هسة انا لو زلمتي ضوجني شسوي ا...

-ابا الحسن علي: انا لو مرتي ضوجتني راح اشمرها من ذاك الجبل جاي تشوفوا؟؟

-رفل: علييييي والله جبل عالي

-ليلة: انا لو زلمتي ضوجتي راح...

-ابا الحسن علي: انا لو مرتي ضوجتني اربط شعرها بذيل ذيچ الصخلة واخليها تعتها وياهة وتمسح بيها الدنيا

-ليلة: انااا لو زلمتي ضـ....

-ابا الحسن علي: انا لو مرتي ضوجتني اللبسها احمر واوگفها گبال ذنيچ الثيران اخليهم ينطحون براسها لحدما تموت

-ليلة: ا....

-ابا الحسن علي: انا لو مرتي....

-الامـير علي: قزززززرقططط

-علي البدر: لا عاب حلگك يا خوي

-علي التـقي: لعبتوا ارواحنا ما تتصالحون وتخلصونا

-ليلة: انا اصلاااً ما مهتمة حتى اصالحه وانا ماا اريده ماا اريد صداقته المبنية على مصلحة

-ابا الحسن علي: لااا بداعة امج صاحبيني ولا تفشليني گدامهم

-ليلة: ما اصاحبك ولا احاچيك انتَ زلمة ما تحترم

-ابا الحسن علي: لا صدگ؟

-ليلة: وعلي

-ابا الحسن علي: انا ما احترم ولج؟؟

-ليلة: اي!!

-ابا الحسن علي: چا خوش گوومي لا اجرچ بزيج اطفي شمعة شبابچ

-رفل: لللللك عاااااااش

-ليلة: رفل انا اختج الله لاا ينطيج

-رفل: اختي بس تستاهلين

نسمعلهم ونضحك على مداهراتهم، شيخ علي وخالة رسمية وسلوى كاعدين على جهة ميسمعون واحنه الشباب ملتمين بجهة وحدنا وحق وعبق گعدو ويانه بس متفرقين عن بعض لان خالة رسمية خبصتهم متقبل يگعدون وحدهم..

-علي الحـق: ماكو هيج حالة يعني خذيتها بالحلال وبعدهن ما راضيات شسووي ويفكن ياخة عني!

-علي البدر: ومن تتزوجون راح يخبصوكم شوكت تخلفون وليش تأخرتوا و ما صار عدكم يعني بالحالتين همه وراكم وراكم

نصى الامير عليَّ لانه گاعد على كرسي بصف حيدر واحنه على المفرش بالكاع وانطاني لالنگية مگشرة اخذتها منه مبتسمة وقسمتها بيني وبين عبق وتالة..

-الامـير علي: نروح نتمشى يم ذاك النهر شوي؟

هزيت راسي اوافقه ورحنا سوه، لزم ايدي بين ايده وتمشينا بهدوء نستمتع بالطبيعة الحلوة بدون لا يحجي واحد بينا لفترة من الزمن..

-تَـمني: صارلك هواي ما راسم امير

-اممم

-ممشتاق؟

-كلش اي

-شنو رأيك ترسم من هاي الطبيعة شوية؟

-ما جايب وياي شي والاجواء مو مال رسم

-بالبيت تالة جايبة دفتر واقلام عود اجيبلك يمكن يجيك اللهام

ابتسم ابتسامة حلوة وهز راسه موافق، مشيت گدامه بشوية وهو وراية الجو باارد كلش بس حلو وممأثر علينا..

-علي الحـق امس حاچاني يريد يروح لبغداد وياخذ عبق وياه يعجبچ ترحين وياهم؟

-الله صدگ؟؟

-اي خاطر اذا تحبين جهزي وضعچ وشوفي يا يوم يناسبج يكون ماعندج امتحان بي

-اي اي اروح... بس اوكف خاف عيب وهمه يردون يرحون وحدهم؟

-لا بالعكس هو گالي لان لو يوذن امي ما ترضى يرحون وحيدهم

-تمام نروح عادي بس ماتوقع تالة وخالة يكدرون يجون علمود دواماتهم

-تدبريها وحدج؟

-وحدي؟

-اي چا خالتج وتالة ما يجون

-انتَ موجود عادي

-لا.. انا ما اروح

-ليش

-عندي مراجعة طبيب ويه حيدر

-ها

-اي انتِ روحي وياهم وحبيبة اذا كدرت هم تروح وياجن خاطر تتونسن

سكتت بدون لا اعلق ونويت ما اروح احس انكسر واهسي بس مبلغته بهالشي، تعشينا سوه ورجعنا للڤلة نمنا بسرعة من التعب محد كابل الثاني..

غفيت وحسيت على صوت حبيبة جاي من بره الغرفة تتعارك بصياح وحتى فشار تفشر فاقدة.. خفت كلش بس نعسانة ماگدرت اگوم ودرت على جهتي اليمين وفزيت مخترعة من شفت وجه عاصف گاعد على كرسي بصفي..

جمدت وصوتي اختفى صرت اراوح بمكاني اريد اتحرك اريد اتنفس اريدد اعيط ماكو.. انبلع لساني ويبس جسمي ويه ابتسامته وهو يگول..

-شلونچ

ظليت مبحلقة عيوني عليه ارجف واتلفت بالغرفة ادور على شخص يساعدني بس ماكو.. ماكو بشر غيري نايم هنا وهذا گدامي گاعد وبيده جداحة يشعل ويطفي بيها ويضحك..

-شگد حاولت اوصلچ بس ما تنطين مجال

شمر الجداحة على الفراش ولزم طرف لحافي يجره عني، رجعتلي القوة وصار جسمي كله يتحرك بخبال وارفس برجلي اريد اللوحه، عطت بكل صوتي منهاارة من جر رجلي من جوه وطگها يلويها بيده..

-لااااااااااااااا لاااااااااااااااااااا

-تَـمني تَـمنيي اصحيي تَـمني

-رجلييي رجلييي

-الامـير علي: تَـمني جاي تحلمين گعددي ابووي گعدي

فزيت فاتحة عيوني على وسعهن اشوف الامير بوجهي گاعد ولازمني من وجهي يحركه، دفعته عني مخترعة وصرت ادور على عاصف وين راح ويينه!

-وينه؟؟ وين راح

-ياهو

-عاصف وين راح

عگد حاجبه مستغرب وحرك راسي نافي، مسح وجهي على كيفه وحچى بصوت ناصي يهدأني..

-حلم هذا تَـمني مو حقيقة

-رجلي توجعني

-رجلچ؟

-اي توجع هواي

بچيت متألمة ومهبوطة حسيته عبالك حقيقة مو حلم لسه ريحة عطر عاصف معلگة بخشمي وضغطة ايده على رجلي توجعني، رجعت لوعيي من مد ايده امير يدوسلي رجلي ثنينهن على كيفه يضغط ويحچي ويايه يمكن چان يسألني عن الحلم بس ممتأكدة شنو گال بالضبط ما مركزة..

-تَـمني: حبيبة وين

-نايمة حبيبة ترديها؟

-چانت تتعارك

-حلم هذا امنية نامي يرويحتي

حطيت راسي على المخدة تعبانة كلش وگلبي صاير بي خفقان، استحيت من بقى يدوسلي رجلي وجريت ايده حتى يرجع ينام ويرتاح هم فززته من نومه.. بقيت اتلفت على جهتي اليمين خايفة والامير حس بيه وسحبني يلمني بحضنه شوية ارتاحيت..

-نامي ابوي

-امير

-گولي

-لا تعوفني ابد

-اعوف روحي ولا اعوفچ تَـمني

غمضت عيوني وبسرعة اخذني النوم من جديد وبعد لا تحلمت ولا فزيت بالليل، ما گعدت ثاني يوم الا على صوت ضحك الولد جاي من بره والامير مو بصفي.. گمت غسلت وفرشت اسناني وطلعت للصالة وگفت بباب الغرفة اتفرج على سور ونور يغنون ويلحنون..

-علي السور: وااااگف على النهر وابچي اعله فراگك... طلعتلي السمچة تگول اسكت غرگناا

-علي النور: طراراراراران

-علي السور: گتله ياا حيدر.. گتله گتله يا حيدر انچب كافي وناام تالي گضاهة يحجيلي كله بالاحلام

-علي النور: طرارارارارا

-علي السور: خرط كلشي بغيابك حتى الحزام.. اياابة خرط كلشي بغيابك حتى الحزااام.. ترضاهاا الشماته تشووف رجيلاتي

-شيخ علي: انچبب

-علي السور: شني بوية شبيك ما تدعم مواهبنا هاي لو غيرك يدزنا على ذا ڤويس

-شيخ علي: ادزك للفتحة السادسة الارعن يريد الشماته يشوفون رجيلاته

-علي الكرار: چنهن رجيلنات فختاية

-علي البدر: والله واهس عليكم من الصباحيات تضحكون وتشعرون هيدو شوي صدعتونا

-علي النور: يگول ابو شادي الزبنطوطي مو كل مبتسم تحكم عليه مرتاح.. البلابل بالقفص من ضيمها تغرد

-حيدر: وووولك الله الله الله الله مبدددع نور مبدددع

-شيخ علي: هاا حتى انتَ طبگت وياهم! حگك بوية تطربون على الهيلگة والرعونية

-حيدر: جدي هاي الك.. يگول ابو شادي الزبنطوطي اجت فكرة بدماغي وگلت انساك.. صعد افادي لدماغي وتفل على الفكرة!

-شيخ علي: يگول ابو شادي الزبنطوطي في بعض الاحيان تتأكد النعال مو بس للمشي.. النعال يفيد للكتل والبچي!

-كل الولد: عااااااااش الشييييخ

ضحكنا ضحك عليهم وسور ونور وحيدر ظلوا واحد يباوع للثاني وعلي الحق استغل الكل مشغول وراح وره عبق بالمطبخ وقبل لا تخطي رجله جوه نصت خالة رسمية ونزعت نعالها اللاستيك وشمرته عليه اجه سنتررر على ظهره صلخه..

-علي الحـق: ااااااااااخ

-رسمية: انچب واكعد هنا

رجع يكعد على القنفات طاگة روحه، طلعت عبق من المطبخ وظل يباوعلها ويتحسر وهي تضحك مكيفة على الوضعية، سوالها من بعيد حركة "اني اعلمچ" وهمس همس شفايف..

-كله اطلعه من عينج هذا بس انطيني صبر

طلعوا الولد بره للحديقة ورفل استغلت الفرصة وگعدت قريب من علي الحـق واكييد حبت تخبث وياه مثل عادتها..

-رفل: ااااح والله الاجواء حلوة تعاي عبوقة ابوسچ شو اشتاگيت لوجهج الترف الحلو

-علي الحـق: بت الـ....

راحت لـ عبق وباستها حيييل من خدها وصاحت بكل صوتها مگزگزة..

-رفل: افيييييييش مو خد صموون فرنسيي

-حبيبة: ترفه ترفه حبيبة روحي

-سلوى: منيلهاااا

-علي الحـق: انتِ سكتي!

-سلوى: اي چا خليهن يبطلن چذب

-رسمية: وين الجذب خايبة صدگ البت تجدح جدح

-علي الحـق: شفتي ذوقي يوم يرعد لو ما يرعد؟

-رسمية: انچب انتَ

ضرب الطاولة بقوة وگام من مكانه منزعج، طلع للولد بالحديقة وخالة رسمية فطست من الضحك ياا ربي هاي اول مرة اشوف ام هالگد تداهر ولدها..

اذن الظهر وراحوا الكل يصلي، انتبهت لتلفون خالة رسمية محطوط على الطاولة وعافته ودخلت للغرفة والف لوبة صارت بيه من شفته هناك، تقربت من الطاولة على كيفي كللش وبالبوگة وبالسكتة اخذت التلفون وركضت للحمام، قسمت قسم الا افتش تلفونها اليوم واگلبه گلاب.. رحت بسرعة للاستوديو فتحت صورة البنية بعدها موجودة لاا وانوب دازيلها بعد صور گعدت اگلب بيهن ومشتعلة من الحرگة البنية تخببل مابيها عيبة هااي العيبة ماا بيها!!

ماعرف ليش اجه ببالي اروح لمحادثة الامير اشوفها، دخلت عليها بأصابع ترجف لگيت بيناتهم بصمات وكتابة امه بصمات وهو يكتبلها، صعدت بمحادثتهم شوية لحدما رحت لمحادثة تاريخها قبل شهر وشهگت من نصصص گلبي من شفتها دازتله صورة البنية بالحجاب ودازتله وراهة بصمة، لزمت راسي من الدوخة وگوة گووة فتحت البصمة ونصيتها اسمعلها تگله..

"شوفها اموري اللهم صل على محمد وال محمد ماكو هيج جمال وحشمة الوادم كاتلين ارواحهم عليها بس ما ينطون يردولها شيخ وواحد مقتدر خاطر يعيشها عيشة كريمة"

ما مجاوبها امير وره بصمتها ورجعت دزتله بصمة ثانية تگول..

"بالعباس مثل هالبت ما تلگه بعد اول ما ترجع من السفر اروح اخطبها انا وفراقد وسلوى فهمت اموري؟"

هم ما جاوبها، رجعت دزتله وراهة بصمة..

"فهمتتت امير؟؟ جاوب خلصنييي!"

جاوبها كتابة..

"فهمت يمة"

وهي ترجعله بصمة..

"ومريتك شلون؟ خاف تحس؟"

"ما تحس"

"شلون ما تحس شنو راح تسوي؟"

"ادزها لبغداد"

"اي وانتَ جر عدل وياهة هالچم يوم خاطر ما تحس بشي وتخرب السالفة زين؟؟"

"خوشن"

اسمع البصمات واقرا كلامه وياهة وگلبي يتگطع، عصرت عيوني گووة سيطرت على نفسي ما ابچي وطلعت من محادثته، سديت التلفون وگعدت بالگاع اسند ظهري على باب الحمام ممهتمة الگاع شنو بيها ما بيها.. گعدت وسرحت بعقلي شلون وشوكت وليش؟

اسرح وارجع اجاوب روحي "شلون" عادي هو شيخ ومعروف عدهم الشيخ يتزوج اكثر من مرة.. "شوكت" واضح من قبل صفر مقررين.. "ليش" ميحتاجلها تفكير امير كبر ويريد يكون عائلة ويرتاح بحياته ويجيب ولد يسمي ليث!

گعدت فوگ النص ساعة وحدي صافنة، ويه كل زفرة نفس ينزل شلال دموع من عيوني وويه كل رمشة عين تتگطع وصلة من داخلي.. ابچي واواسي روحي واصبرها ليش تَـمني متألمة؟ ليش مزعوجة؟؟ ليش گلبچ راح يطلع من صدرچ من القهر!! مو انتِ گلتيله تزوج؟؟ مو بكل مرة تكررين عليه تزوج والا ازوجك! يله!! يله هسة راح يتزوج راااح يتزوج هااي اللعابة ويجيبها لبيته وينيمها بغرفته وبعد ميشوف بعيونه غيرها!!

ماعرف بشنو احس بالضبط واعجز اشرح شعوري ماعرف اني المتقبلة لو المنهارة بس المتأكدة منه اللمعة التصير بعيوني من اشوف الامير انطفت والنغزات الاحسها بگلبي من يتقرب مني راح تختفي والمشاعر الچنت خايفة منها صرت ما اخاف بعد لأنها انتهت لا احقد عليه ولا اضوج منه حقه هذا تَـمني حقققه!! والله يوفقه بحياته الجديدة وياهة او ويه غيرها..

رجعت التلفون لمكانه واخذت منشفتي ورجعت للحمام بچيت لحدما عيوني گامت توجعني، سبحت وصليت وبدلت ملابسي ومكيجت وطلعتلهم مرة ثانية ولا كأن فحطت قبل شوية وگلبي مفرفح..

صلينا وطلعنا نتغدا بس اني لو تطخوني اتعارك، لزمت ايد تالة اسيطر على رجيفي وما اجاوب أي بشر يحجي ويايه لا يحسون عليَّ..

-تَـمني

انداريت على صوت حبيبة واشرتلي بيدها اجي وياهة، گمت وتمشيت سوه للمراجيح الموجودة بالحديقة العامة گعدنا عليهن وصرنا نمرجح، اخذنا الهدوء دقايق قبل لا تگول..

-انا انخطبت

رفعت عيوني عليها ساكتة، ذبت حسرة عالية واردفت بخفوت..

-رفضت الزلمة بس ابوي جاي يلح عليّ افكر اكثر وانا اعرف لو رفضته مرة ثانية تصيرلي سالفة

-ليش تصيرلج سالفة

-ابوي شافني اعاين لمنتصر وهو يعاينلي وبيومها جابلي الزلمة وگال انخطبتي ومستعد يجبرني لاني ماعرف مصلحتي عدل

-اووف

رجع الصمت سيد الموقف وبقينا على هالحال فترة مو قليلة، تنهدت مغمضة عيوني استشعر برودة الجو بلكي يبرد گلبي بس مُحال يصير هالشي وره جملة حبيبة الجاية..

-توتة

-همم

-تَـمني انتِ صديقتي واعتبرج اخت الله شاهد ويصعب عليَّ اكسر گلبج وخاطرج وابلغج بهيج شي...

ركزت عيوني عليها وكأني افتهمت شنو تريد تگول، حسيتها ضايجة مو بس بالخاطب الاجاهة ضايجة من شي ثاني ويمكن بلغوها بالسالفة وجايه تحرگني بالخبر الاكيد..

-الامـير علي راح يتزوج تَـمني

شيش نار وحطته بگلبي، انگطع نفسي وجمدت عن الحركة، بلعت ريگي وبصعوووبة لزمت دموعي ويه ما كملت..

-حبيبة: امي مصممة ومقررة تخطبله زينب بت شيخ محمد

-ها

-اي وانا ماكدرت اعرف وما اجي اگلچ واعرف رأيج شني

-ماعندي رأي

-صدگ!

-اي.. الله يوفقه حبيبة

-تَـمني من كل عقلج!!

-حبي مبين اخوچ هم رايد والله يوفقه من حقه يتزوج خوما يبقى عزابي طول عمره

-عزابي شني چا وانتِ وين رحتي؟؟

-اني راح انفصل عنه خلصت المهلة الطلبها مني وقررت ابلغه بهالشي من نرجع حتى ما اضوج احد

-تَـمني!!!!

-شنو حبيبة انتِ ليش معصبة؟

-ما معصبة خية.. براحتج بعد

گامت من المرجوحة وعافتني وحدي شگدما حبيبة مقهورة وزعلانة اني ميتة! قسماً بالله احس بگلبي ينززف من الوجع وزردومي مجرح من الغصة ذبحتني بس والله ولا اطلعها ولا انزل دموعي عليه وابين قهرتي..

كلشي ما فهمت من الطلعة ناس تضحك وناس تشاقه وناس تذب حچي واني باقية على هدوئي وعلى توازني اخاف افتح حلگي بكلمة وانفجر من البچي كدام الكل.. طلعنا للسوگ وصرت اشتري بخبال شنو اشوف بوجهي اخذه اشتريت اشياء بعمري وحياتي يمكن ما احتاجهن بس ماعرف ليش اخذتهن..

رجعنا للبيت بوقت متأخر ونفس ما سويت الظهر اخذت منشفتي وخلصت دموعي بالحمام، سبحت وطلعت ابدل شفت الامير بالغرفة وبكل مرة ما ابدل گدامه استحي بس هالمرة طزززز وانعل ابو المستحى ماهتميت ولفيت المنشفة عليَّ وبدلت بسرعة بسرعة بدون لا توگع مني..

لبست دشداشة اشتريتها منا خفيفة وقصيرة لونها احمر رغم الجو بااارد كلش بس محترگة من جوه واريد شي يبردني، گعدت كبال الميز امشط شعري اغني واتمايل واحط مرطباتي وعطوري ومسلطنة بالچذب طبعاً!

اخذت حمرة حمرا رسمت بيها شفايفي وكحلت عيوني وتنهدت امثل الراحة والامير كاعد ورايه كلمة ما نطق حررركة ما تحرك هييج كاعد جماد بدون لا يتلحلح..

-تَـمني: اليوم كلش تونسنا

مجاوبني، اللتفتت مبتسمة وكملت بحماس مصطنع..

-علي التـقي موتني ضحك من ركض وره سور ونور يريد يكتلهم ههههههههههه خطية وين ميرحون متعاقبين ههههههههههههههه

اضحك وضحكتي ترررن رررن يمكن حتى وصلت للنايمين بالغرف البره، گمت من الكرسي انفض بشعري واللعب بالخصلات وگعدت على الفراش امد رجليه..

-اوووي رجلي توجعني من الحذاء

-انتِ ما تحسين؟

رفعت راسي اباوعله وجهه ماكلته العصبية صاير احمر وعروگ جبينه بارزة، خشمه مجنح وحاجبه مرفوع..

-مفهمت؟

-انتِ شنييي ماااكو احساس؟؟؟ لهدرررجة ما تهتمين؟؟؟

گمت من الفراش وصبيتله گلاص مي من الدولكة، تقدمت عليه ومديتله الگلاص وگلت بهدوء..

-اشرب المي وعلى كيفك، انتَ ليش معصب شيخي؟

شمر الكلاص من ايدي ووكع المي على الزولية هو والكلاص بدون لا ينكسر، خزرني بحدة ونتر من بين اسنانه وجسمه ينتفض عصبية..

-وگفتت بووجه شيوووخ خاطر تصيريليي ليييل نهااار اغضبب امي واجاااهد جهاااد خاطر تشيل سالفة زوواجي الثاني من راسهاا تااالي هاااي ردة فعلج على الموضوع؟؟ هاااي!! تضحكين وتتدلعين وتتماوعييين چن منتظرة يزفون اخووچ!!

-امير

-گلت لحبيبة تبلغچ ارريد اعررف اكوو ذرررة مشاعر بگلبچ!! اكووو ذرررة احساااس بسسس انتِ ماكووو ولااا يمممچ!!!

-مـ...

-لااا تحجين سكتييي كلمممة ما اسمععع انا **** هووو انا **** وعقلييي مضروووب ولللج گلبييي اشتعععل گلبييي

يسب روحه ويضرب على صدره حييل يخلف صوت يرهب قوي، بلعت ريگي اباوعله يرعش وعقلي قفل على الرسائل والبصمات ذني اكبر دليل وما راح اچذب عيوني وأذاني واصدگ بس كلام عابر، عافني وگعد على الچرباية يحرك رجله ويتنفس سريع..

-انتَ مو تريد تتزوج بت شيخ محمد

رفع راسه الي خازرني يريد ياكلني، بعده ممجاوبني وتشتت تركيزنا ويه صوت طرق الباب علينا، اجانه صوت امه تگول..

-اموري.. شبيكم يمة ليش كل هالصياح؟

-تَـمني: روحلها اموري ولا تغضب امك

لطم رجله وفز من مكانه واني نزيت خايفة من ردة فعله، ركضت بعيد عنه وحصرت روحي بالحايط ضامة وجهي ومغمضة عيوني خايفة لا يفقد عليَّ.. مرت ثواني وما سمعتله حس ولا خطى خطوة بأتجاهي..

فتحت شوية من عيوني شفته واگف بمكانه وملامحه لانت شوية مو ذيچ العصبية، وخرت ايدي عن وجهي وبحلقت عيوني عليه منتظرته يسوي شي..

-الامـير علي: انتِ شلون وياچ

-شسويت

-شوكت تفض هالسالفة؟ شووووكت

-لا تعيط.. باوع اذا تريد نسولف طبيعي لا تعيط، تريد تزوج؟ اني اروح اخطبلك بس لا تعيط

صفگ ايد بأيد طرش اذاني، ظل يصفگ بيده ويأشر عليَّ عبالك ديسولف ويه احد ويگول..

-استلممم الفهااوة استلم

-اني موو فاهية وهاي الحقيقةةة مو رحت تخطب بت شيخ محمدددد

-هسسسة شلون تخليني اسببب شيخ محمد ولللج مااا اتزوووووووج

-لا تصيييييح

-اشششش لا تحجين اشششش

-لا تأشأشني!!

-ولج انتِ مسودنة؟؟ تَـمني اذا مسودنة گولي يااا بوية احجيي گووولي خلينا نلگاالچ حححل!!

-اني صاحية واصحى من الفف وحدة!! شفت رسائلك ويه خالة رسمية شفتتت شلون تريد تاخذني لبغداد حتتتى تتزوج ذييج المعفنننة

-چذذذب ولللج چذذذب چذذذذذذب بس اريد اسكتهااا

-لاااا تكذب لااااا تكذذب

-خاايبة وعلي والسمااني علي وحگ هوو علي چذببت على امي بسس خاطر تفك ياخة عنيي انا مااا اريد اتزوج ولااا راح اتزووج ولااا الي نية اتزوووج علييييچ

كتفت ايدي لصدري ازفر ناار متمنية هسة اروح لخالة رسمية واتعارك وياهة عركة يطردني شيخ علي من وراهة بس ميخالف المهم اتعارك وافوخ گلبي..

هدأنا ثنينا وسكتنا لحظات نفكر، ذب حسرة عالية يفرك بوجهه وگال بنبرة واحد جزعان..

-الامـير علي: ولج بوية انتِ ليش متعبتني؟ ليش معذبتني؟ لييش ما جاي تستوعبين انا احبچ وولج اناا عاشگچ وانعل ابو النسوان اليجن بدالچ

كزبر جسمي وره كلامه وحضنت روحي بأيدي، انطيته ظهري حتى ميبين التوتر عليَّ وانفضح وگلت بصوت ناصي..

-ماشي امير اصلاً بكيفك اذا تزوجـ.....

ما سمحلي اكمل الجملة، ما انطاني مجال استوعب وجرني من زندي بقووة عليه وباسني يلصمني، فتحت عيوني كلها وجسمي انتفض بخوف ورهبة انتفض بمشاعر مخيفة ضربت عقلي وگلبي.. مشاعر بحياتي كلها ما حاستها ويه بشر.. مشاعر عشقتها وتعلقت بيها وتمنيتها تدوم..

وخرني عنه يبعدني مسافة بسيطة وجر وجهي غصب يحط عيني بعينه ونتر بعصبية يرجف بسببها..

-گلبي غِده دم والحُسين الشهيد!! لا تهتمين ولا تحبيني بس لاا تدوريلي ظهرچ وتوجعين گلبي!

تلاحمت عيوني بعيونه ثواني قبل لا يهدني على كيفه واخذ كلينس من الميز ودار وجهه وطلع من الغرفة، عافني وحدي واگفة بنص الغرفة بعقل ملحوس، عقل تايه وميعرف شيسوي.. بقيت على وگفتي ودرت وجهي على المراية اشوف روحي منها وفجأة ضحكت.. ضحكت من كل گلبي لدرجة لزمت گلبي من الضحك..

اباوع لروحي بالمراية حمرتي الحمرا شبه ممسوحة، شعري مكفوش من قوة لزمته ووجهي صاير خريطة، جريت كلينسة من الميز ومسحت وجهي وفاطسة من الضحك مدا اگدر اسيطر على نفسي.. اتذكر كلامه واضحك واطفر بمكاني مثل المخبلة واغطي وجهي مستحيية..

ركضت قفلت باب الغرفة عليَّ ورحت للحمام غسلت وجهي من مكياجي المتلوص ورجعت اعيده من جديد بسرعة بسرعة، كملت ومشطت شعري وانداريت على الاغراض الي اشتريتهم اليوم من السوگ وطلعت منهن الشموع المعطرة.. فتحتهن بأيدين ترجف ووزعتهن على الميوزة الي يم تاج الچرباية..

دورت على جداحة شگد وهمزين لكيت بجيبه جداحة، شعلتهن وبطني تلويني يمممة شلون بيه ولج تَـمني شنو هالصلافة شنو هالرعونية شنوو هالاستهتار!

نفضت عقلي من افكاري ورشيت عطر لنفسي وللغرفة سبحتها سبح بالعطر وعدلت الفرشة، شفت فازة ورد اصطناعي وقررت اگطع بتلات الوردة واشمرهن على الچرباية وعود اشتري بديل عنهن من اطلع بس هسة اريد شي حلو..

خففت الاضوية عفت بس الاصفر وباوعت للغرفة صارت اجواء رومانسية تجنن، دورت عيوني بيها اللوب واطگطگ بأصابعي من الخوف والخجل شنو راح تكون ردة فعله من يرجع؟ راح يفهم شنو قصدي من هالحركة لو يغلس عليَّ؟.. لا لا اكيد ميغلس شلون يغلس وهو يحبچ! خلص تَـمني اخذي نفس عميق وگعدي انتظري أميرچ يرجع........

يتبع 👑.....

━━━━━━ ♛ ━━━━━━

القفلة 🫣🤝🏻

عبق وعلي الحق 🥹🫂♥️

بس رسمية خوش صاگرتهم ومطلعة عيونهم بتدخلاتها 😂😂😂😂

حبيبة وحاكم شبيكم طگوكم عين لو شسالفة 🫣

واخيرراً نوووومه واميرها 🙈🦋🦋🦋🦋🦋

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

بوگني من الدنيا كلها وضمني بين چفوف ايديك.. 🥀♥️

━━━━━━ ♛ ━━━━━━

"تَـمني"

گعدت انتظره وگضيتها هسة يجي وهسه يرجع هسة يوصل ويجوز راح يحچي ويه امه بس الامير علي ماكو! اخذت الغرفة روحة رجعة وما شرف حضرة جنابه بس مو صوچه صوچي اني الخفيفة بسرعة طخيت راسي وتلهفت عليه!..

شتت افكاري صوت خبصة اجت من الصالة، ركضت جريت الكوت الچنت لابسته لبسته فوگ الدشداشة وجريت شال حطيته على راسي وطلعت اشوف شصاير..

-ااااخ يا يمة اااخ ردنا نمووت خايبين ردنا نموت

فكيت حلگي من شفت فراقد گاعدة وفاتحة ايديها ورجليها ومطلعة لسانها فاحطة والولد والبنات والدنيا مخبوصة فوگاهة وحتى عمة زهرة وابتسام جايات وياهة ويه بناتهن..

-رسمية: سودة بوجهي شصار شجاچن صدگ چذب

-زهرة: خايبة ظلمة دنيا هندس والسايق الاغبر طب بجبل يبس دمنا ولفظنا الشهادتين بعلي

-ابتسام: اااخ يمة راسي ااخ ضغي صعد اااخ

-علي السور: شجابچن انتن لو بكلشي نابصات

-رسمية: ووولك سوووير

-فراقد: هاي خلفتج رسمية؟ عاشت ايد الربتك يمة

-علي السور: ايدج العايشة خالة

لطمت رسمية وعضت اصبعها تخزر بي وسلوى گوة لازمة ضحكتها.. دورت بعيوني على الامير ماهو لا هو ولا ابوه وعلي التقي ثلاثتهم ماكو..

-فراقد: اااخ رجيلاتي يونن عليَّ تعاي عبيقة فدوة لطولج دوسيلي شوي

بعد جملتها ساد صمت عجيب بالمكان وكل الانظار توجهت على علي الحـق الگاعد وعاگد حاجبه مبين بعينه النومة وفز على صياحهن وانوب فراقد زادتها بهالسالفة لاا اليوم كلش حلو مبين..

بعده ما فتح حلگه يجاوبها فزت ليلة من مكانها وصاحت بنبرة وحدة مخبوصة بس تريد تتچفى الشر..

-انا ادوسلچ خالة انا

-علي الحـق: محد يدوس لاحد رجعي لمكانج

-فراقد: ياااا ليش ولك چا البنيات المن ينرادن

-علي الحـق: عذرينا بنياتنا نعسانات ولازم ينامن يلا كلچن للغرفة انخمدن

-فراقد: حوويق شبيك ولك

-علي الحـق: يلااااا

عاط بينا كلنا ومن الخوف انهزمنا كلنا للغرفة حتى سور ونور اجو ويانه يسحلون بكرسي حيدر وطبگوا الباب وراهم..

-رفل: انتم شكو اجيتوا

-علي النور: سكتي ولج لا ننكتل بهالليل

-علي السور: نور ذكرني اعصب على فراقد المرة التجي اذا صخرت مريتي

-حبيبة: سور نور طلعووا عيب شني هاي طابين غرفتنا

-علي السور: شني طابين وياجن للحمام هسة واذا

-حيدر: فرشولي هنا انامن ويه البنات انا نعست

-حبيبة: ياااااا طلعوا لا اصيح ابوي

-علي النور: يگول ابو شادي الزبنطوطي...

-ليلة + حبيبة: يگووول طلعوووووا

-تَـمني: بنات هسة عوفكم من زوج المشاكل گلولي فراقد والعمات راح يبقون ويانه؟

-علي السور: رحم الله والديج تَـمني واي اظن السحارة فراقد تبقى هنا

-علي النور: اگصن ايدي لو ما ابوي منطيها عنوان ڤلتنا

-تالة: شكد عيب كدام ام ابو كربله لو تعرفون شلون فزت من النوم

-حيدر: چا الله يسلمها فراقد شايلة بيدها بوق تفزز الميت من گبره

-رفل: زوج المشاكل روحوا شوفو حق رد نام لو لا خاطر نطلع نريد نفهم شصاير

ما قبلوا بالبداية وشمرولنا شعر عن الغدرة بس راحوا بالنهاية يشوفون، دقايق ورجعولنا يطگون اصبعتين ويزفولنا البشارة علي الحـق راح ينام وضرب الدنيا بعرض الحايط..

طلعنا نركض من الغرفة واني اللملم الكوت على جسمي مابي دگم بس حزام ينربط واخاف يفلت، طلعنا للصالة وشفنا رسمية وام حسن (ام ابو كربله) مفرشات وگاعدات يم فراقد يسمعن القصة الكاملة وصدمتنيييي من گالت..

-فراقد: الله يحفظه ابن مسعود المسعور ستر علينا وركبنا وياه

-رسمية: ابن مسعود ياهو

-زهرة: شبيچ خية ابن اخوي مسعود زيد وغفار جايين للشمال واللتقينا بيهم

فكينا حلوگنا كلنا ولا ارادي درت وجهي لـ رفل وهي سوت نفس الحركة دارت وجهها عليَّ مصدومة، بسرعة تذكرت الحلم الحلمته بعاصف وتوترت كلش خفت لا يكون هم جاي.. انتبهت عليَّ رفل وبدون لا احچي لزمت ايدي بين ايدها وابتسمت تهمسلي..

-رفل: لا تخافين مالنا غرض بيهم ذول الزبايل

هزيت راسي على الصامت واستمرينا نسمع لفراقد الفتحت شيلتها وطلعت شعرها وحواجبها الحمر تحجي عن بطولاتها وشسوت للسايق وشلون انطته مي ومسحتله وجهه من عرگ من التوتر..

-فراقد: علي واهل بيته وگفوا ويانه ووگفنا بمنطقة چانو بيها زيد وغفار وسبحان الله شون صدفة واللتقينا بيهم

-رفل: سبحاااان الله والله صدفة

-ليلة: صدفة المسلسلات الهندية

-زهرة: شنو قصدچن؟

-رفل: ابد عمة بس چنها خالة فراقد تحمست وحسبالها صدفة شافت زيد وغفار

-فراقد: شني ولج تچذبيني؟؟

-رفل: حشه بس مو چنها صدفة قوية زيادة عن اللزوم؟

-فراقد: وانا شكوو لو حتى بقدر رب العالمين تردن تدخلن وتغيرنا.. والله يا الله زين ما الله يگلبها بينا

سكت الكل مغلس عليها بعد فراقد ومدت لسانها منو يگدرلها، تعبت من الوگفة القنفات كلها گاعدين عليها ونعست هم شوكت يرجع الامير ووين راح يربي!

-زهرة: شيخ علي وتقي لحگونا عمت عيني واموري اجه وراهم سودة عليَّ فززناهم من نومهم

-فراقد: اوگفي.. شني هالريحة؟

-رسمية: اي والله چن ريحة.. ريحة...

-ام حسن: ريحة شي مايع

انتفضت بمكاني فاتحة عيوني جافلة عزاا بعيني الشموع!! ركضت قبلهم للغرفة وركضوا ورايه البقية يجون يشوفون شكو.. وگفت بالباب قبل لا اطب ومديت ايدي حطيتها بوجه خالة رسمية وضربت خشمها بالغلط..

-رسمية: وللج ااااخخخ

-حنين: تَـمني شبيچ ماما انتبهي

-تَـمني: بالغلط والله.. بالغلط

-فراقد: وخري من الباب احترگت الغرفة

دفرتني سلوى وفتحت الباب وطبت امة محمد كلهاا للغرفة حتى الولد طبوا خايفين لا يكون صار حريق، ضربت خدي بأيدي من شفت نظراتهم المتفاجئة وشلون صارو يدورون عيونهم بالغرفة ويبلعمون..

-علي الدر: احم.. امشوا نطلع يا ولد

سحلهم كلهم وياه منزلين راسهم وعبروني والنسوان بقن يتفرجن على الغرفة ويبسبسن.. عزا العزاچ تَـمني الدنيا كلها شافت الغرفة والترتيبات وصاحب الانا ما شافها!!

-فراقد: هاي شني هاي ولجن غرفة من هاي

-رسمية: غرفة تَـمني والامير

-فراقد: والله خوش مدلل هذا اموري الله هاي شني.. شموع هاي؟ الله وهاي شني ورد؟ الله وهاي شني هاي ماعرف شني هاي؟

-رفل: جداحة

-فراقد: اي شمدريني.. والله خوش مدللة وليدنا ولج تَـمني

غمزتلي وعضت شفتها ظليت واكفة مثل الطرنة والبنات فاطسات ضحك عليَّ حتى تالة الحقيرة تأشرلي بحواجبها وتلم شفايفها عود دتبوس..

-رسمية: چا منين جاية هاي الريحة

-شمس: من الشمعات عمة هاي نوعهن اذا انفتحن هواي تطلع ريحة مو حلوة مثل النايلون المايع

-سلوى: اي بعد انتِ خبرة بسوالف الساقطات

-تَـمني: سوالف شنو؟؟؟

-سلوى: انتِ شكو يمج حواليج وانهديتي

-حنين: ام حبيبة عيب هاي التصرفات والبسامير مرة هي ورجلها وبغرفتهم شنو العيب بتصرفها؟

-سلوى: چا وكتها حبكت الا اليوم وهنا

تعوج بحلگها وتحچي يااابة شكد غثتني، رحت للشموع نفخت عليهن ووگفت يم تاج الچرباية موجهة سؤالي لخالة رسمية..

-خالة اميري وين؟

-سلوى: عمتتت عين البانية اميرها

-حبيبة: يمممة كافي

-سلوى: چا شوفيها لا حيا ولا مستحه

-تَـمني: حبي تره دا اسأل على رجلي مو صاحبي

-حنين: امشي تَـمني

-رسمية: وين وين ام تالة

-حنين: لا تخافين ام علي بس اخذها وياي لغرفتنا قبل لا تگب مشكلة مالها داعي

-رسمية: لا ام تالة هاي غرفتها خليها هسة يرجع زلمتها راح بس يشوف سالفة سايق عماته

-سلوى: مالها غرفة بعد هنا يبقن زهرة وابتسام وفراقد وتَـمني تنام ويه البنيات وامير ويه اخوته

انتبهت رسمية ان صدگ العمات مالهن مكان وهسة الحظ الفگر حتى الغرفة اخذوها! لملمت الغرفة وطفيت الشموع ورجعتهن بالعلاليك ورحت لغرفة البنات وذني الخبيثات استلمني هاي التصوفر وذيچ الي تسوي حركات سخيفة وذني اليذبن ارواحهن وحدة على الثانية..

-ليلة: اويليييي مو اجواء ضييييم

-تَـمني: يووه ليلة

-رفل: وانا اگولن الاحمر المن اشتريتي

تحجي وتغمز وتأشر على الكوت مالتي، انتبهت للدشاشة مبين الكيبور مالتها من الياخة وضميته بسرعة گالبة وجهي عليهن..

-تالة: بشرفج بشرفج شكال الامير من شافج؟

-حبيبة بغمزة: او شسوه الامير من شافچ

-تَـمني: انچبن كافي

-عبق: يمة فدووة دا اتخيلكم

-رفل: شتتخيلين ولج شو صايرة مستهترة انتِ

-ليلة: شبيچ خلي الفرخة تتخيل چا مو انخطبت بعد عادي

-تالة: يعني التنخطب عادي تصير ادبسز؟ الله لعد خليني انخطب تَـمني حبابة

-تَـمني: اوووف سكتن كافي تنرفزت بما فيه الكفاية اليوم

-رفل: متنرفزة والحمرة نصها طايرة چا لو ما متنرفزة شتسوين

-تَـمني: رفللللل

-رفل: خية انتِ مفضوحة هي گووة

-تَـمني: ولا انام يمجن اليوم اروح للصالة انام على القنفات اشرفلي

-حبيبة: لاا تَـمني بداعتي ابقي

-تَـمني: لعد احترمن نفسچن

-رفل: صار يا عيوني وهسة نزعي وطلعيلنا الاحمر

-تَـمني: ررررفل

-رفل: خايبة نريد نشوف شني ربنا ووحد

-عبق: رفل كافي عوفيها خطية تستحي

-حبيبة: اي رفيلة كافي سكتي.. توتة حبي نامي ارتاحي بس نزعي الكوت وشوفينا الاحمر اول

طگن ضحك وماتحملت ما اضحك وياهن يمممة شلون بنات يموتن على الرعونية، كتفت ايدي الهن وانطيتهن گفاية معاندة لا انام ولا انزع..

-تالة: ولج نامي يااا

-ما

-ليلة: لا تنزعين شبيچ بس نامي بسرعة گبل لا يرجعن العجايز

-رفل: لا شني ما تنزع چا تنامين بالقبوط

-تَـمني: باعن راح انزعه بس والله ثم والله اذا فكيتن حلگچن احير شسوي بيچن!

-عبق: صار هذا هو

هزيت راسي ونزعت الشال وذبيت الكوت من جسمي وما سمعت غير صوت التصفيق والصفير والهوسات گبت..

-ليلة: لللللك لللك لللكك لللك للك للك للللك شنيييي هاي

-عبق: لاا تگول محمرة چنها طمااطة لا تگول محمرة

-حبيبة: الله يساعد گلبك يا خوية

-رفل: واحنه نگول شماله الزلمة يفز گلبه على طاري اسمها طلعت خوش مدللته

-تَـمني: بعد شيسكتهن

سونلي مجال ونمت بين رفل وتالة والنسوان الكبار بعدهن ما رجعن بعد احسن خاف هم تجيني سلوى تسممني بحچاية..

-ليلة: اگلچ عبق

-عبق. هممم

-ليلة: شگال ذاك الواحد گبل شوي؟

-عبق: ياهو؟ الگال وعلي والسماني علي وحگ هو علي ما اريد اتزوج ولا الي نية اتزوووج عليج؟

فزيت من مكاني فاكة حلگي وعيوني عليهن ما لحگت استوعب صدمة عبق سمعتنا وكملتها حبيبة من گالت..

-لا خايبة اظن تقصد الگال "شلون راح تخليني اسببب شيخ محمد ولج ما اتزوووووووج"

-تالة: اي بالضبط والگال اششش ولج اششش وهي تجاوبه لا تأشأشني

-تَـمني: بنااااات اذنچن ويااانه ولچن

-رفل: لاا وداعة فراقد ما سمعناه من گالچ "بوية انتِ ليش معلعلتني ليش معذبتني؟ ليش ما جاي تستوعبين انا احبچ وعاشگچ وانـ...

لصمت حلگها بيدي قبل لا تكمل جملتها والبنات استلمني ضحك ومداهر ورفل ترفس وتعضعض بيدي حتى اوخرها..

-تَـمني: عابتلچن اي والله تتسمعن علينا موو عيب

-تالة: باع هاي ولج البيت كله سمعكم وكرار گاعد بالصالة يعض بأصبعه ويتحسر

-ليلة: ما شفتن ابا الحسن يعاينلي ويغمغم بيه ههههههههه

-عبق: سلوى رادت تمووت والله ظلت تضرب على رجلها وتسوي حظوووظ حظوووووظ

-تَـمني: اوووف خرب اكيد هي الضربتنا عين اسفة حبيبة بس ماكو هيج حظ

سكتت حبيبة ما شاركت من جبنا طاري امها وحقها من تنقهر فـ قررنا نسد الموضوع وننام، گامت عبق تطفي الضوة ورن جهازها بأشعار وبدون تخطيط من عدنا طلعت صدفة وكلنا صحنا بصوت واحد..

-ابو عيون تمساحية

ضحكنا كلنا على الصدفة وعبق فطست وگعت بالگاع فاحطة يااا شبيها هاي خو ضحكنا اي بس مو لهدرجة مو چنها تحمست زايد؟..

-حبيبة: راح تغصين خايبة شبيچ

-عبق: هههههههههه هههههههههه لو تعرفن شكاتبلي ههههههه

-ليلة: شكاتب؟

-عبق: كاتبلي "ما اشتاقيتي لابو عيون تمساحية"

-حبيبة: شوووف الصدفة

هزت راسها اي ومسحت دموع الضحك من عيونها ونامت بمكانها تتراسل وياه، تحسرت وحطيت راسي على المخدة والف لوبة بيه هسة غير انام؟ غير انطمر واغلس على فضيحتي گدام الكل اليوم؟ ابد ولا كدرت.. انداريت على رفل وهمست..

-تَـمني: رفل

-مم

-نمتي؟

-مم

-گومي رفل گوومي

-شكووو

-اشش باعي.. تلفونج يمچ؟

-اي ليش

-راسلي امير

-شكو ولج ليش

-حبابة باعي جيبي موبايلج واني اگولج شنو تكتبيله

-فهاوي مو وكتها خايبة تلگي رجع ونام

-لا ولج ما رجع مسمعت صوته يلا رفل يلا

-خوب راسلي من موبايلج

-مخلص شحن يلا رفوول الا تذلني

نفخت هوا وجرت تلفونها من الميز، راحت على اسمه وعيوني لا ارادي راحت على اخر مراسلة بيناتهم من قبل فترة طويلة وبس سلام عابر..

-تَـمني بهمس: كتبيله "ليش مزعل تَـمني؟"

-شنيييي

-لا لا خلص غيرت رأيي كتبيله هلااو

-خاطر يحضرني هلاو شني ولج

-يبووو شتكتبين لعد وياه انتِ؟

مجاوبتني وبسرعة كتبتله "ها ضلعي" فكيت عيوني وضربتها على كتفها..

-شنو ضلعي ررفل شنووو

-ولج متعودين احنه.. هاا هاا هذا جاي يكتب

ركزت وياهة بالتلفون وعضيت شفتي متوترة من كتبلها.. "صاير شي؟" ورفل جاوبته..

"ليش سلبي امير يعني لازم اكو شي ياله اراسلك"

"احجي رفل تَـمني بيها شي؟؟"

"خايب لاا هيج راسلتك وحدي عبن مشتاگة"

"ولي"

توقعتها راح تزعل من كتبلها هيج بس شو هاي تضحك ولا مهتمة بعدين تذكرت همه علاقتهم ميانة لدرجة غريبة شوية...

**

-علي السور: عمي روحنا راحت شني هالذلة ما نريد فراقد ويانه هي گوة

-علي الكـرار: شباب شوكت امي تخطبلي وتفرح گلبي؟

-علي التـقي: ذولة ولد مسعود العار شجابهم اليوم ما تگلي شجابهم

-علي الحـق: ولكم ليش ماكو اشارة بهالمكان الخايس ساعتين ياله تندز الرسالة شنيي هااي

-علي الدر: بدر انا اگول لو حويدر نجيبه هنا ينام خاطر يتونس ويه زوج المطيرچية

-علي البدر: لا هذا هو خاطر ما ننام اليوم

-علي النور: ليش شبينا احنه؟؟ بالعباس اوقات افكر انا مو ابنكم وابوي لگاني بباب جامع وجابني خاطر تطلعون عقدكم النفسية بيه

-علي السور: انتَ لگوك بجامع زين چا انا اكيد لگوني جوه مرافق فراقد

-علي الدر: هاي شمعرفك ولك؟

-علي البدر: ياهو مسربلك هالسر المضموم صارله قرن؟

-علي السور: لااا بشرفكم

-علي الدر: تقي ما تگوم تطلع ضوجتك بذول وتطردهم بره

-علي التـقي: انا ايدي تعبت گول لـ حق

-علي الحـق: انا مشغول گول للتوأم الحزين

-علي السور: التوأم الحزين مادين البوز سبع اشبار شمالهم

-علي الكـرار: واحد ضاربته بوري ليلة والذئب والثاني شلعت گلبه امنيته المو راضية تتحقق

-ابا الحسن علي: انچب كرار ما تضحك

-الامـير علي: شباب سؤال

-الولد كلهم: جواب

-الامـير علي: اذا امي طلبت منكم شي بس انتم ما تردون تسووا ومستحيل تخطون هيج خطوة وبنفس الوقت مترددين من ردة فعلها لا تسويلكم سالفة چبيرة اذا ما لبيتوا هذا الشي شتسوون؟ وشلون تقنعوها تعرض عن هالشي؟

-علي الكـرار: اگللها بطتنا بطت بطن بطتكم تگدر بطتكم تبط بطن بطتنا مثلما بطتنا بطت بطن بطتكم

-الامـير علي: تفاهتك بطلها كرار

-علي التـقي: امي تريدك تتزوج بت شيخ محمد

-الامـير علي: هاي شمعرفكم!

-ابا الحسن علي: امير بيت شيخ محمد بنفسهم سمعوا صوت جعيرك من شوي

-الامـير علي: هسة جاوبو در انتَ شتسوي؟

-علي الدر: ماتزوج هو انا وحدة وما مدبرها

-وانتَ بدر؟

-علي البـدر: هم ما اسويها وشتسوي امي خليها تسوي يوم يومين وتبرد وتسكت

-علي الحـق: انا لو توذن هم ما اتزوج على قبق

-علي السور، علي النور: حتى انا

-علي البـدر: وانتو شني ولكم

-علي النور: يعني ما نتزوج مرة ثانية اذا چنه متزوجين

-علي الكـرار: خاب نچبب خلينا نحصل الاولى وبعدين نفكر بالثانية وننطي رأينا

-منتصر: امير اذا انتَ ومرتك متفاهمين ومتحابين وماكو خطة انفصال بيناتكم حاچي عمتي وفهمها هالشي.. ادري زواجك صار صدمة الها عبن چانت متحمسة لعرسك اكثر واحد بس بعد انتَ هسة تزوجت ومرتاح خلاص خليها تتقبل الامر الواقع وتنتهي هالسالفة

-علي الحـق: اتفق وشرف فراقد

-علي السور: حِلف بشرف العزيزة بعد

-الامـير علي: راح احل هالموضوع لازم اللگاله حل

-ابا الحسن علي: خوش وهسة اللگالي حل ويله ليلة فكر بدالي تعبت انا

-الامـير علي: طبعاً انا وياك حظنا فد خ**

-ابا الحسن علي: خوية من الاخير لو انا عاديك بحظي الفگر لو انتَ ماكو غير هالاحتمالين...

**

"تــــالة"

ثاني يوم طلعنا الصبح نتريگ بره واول وحدة طلعت فراقد والطريق من الڤلة للمطعم گضته تطگ اصبع وتهلهل وتغمز للامير وتَـمني وتسوي..

-فراقد: امووري رايد رادته وعايف بنات ولايته

امي وخالة رسمية يضحكن والامير ما مفتهم شكو باقي بس يتصفن بالوجوه مستغرب وتَـمني وجهها صاير احمر وتطگطگ بأصابعها..

-تالة: روحي احچي وياه امشي

-تَـمني: ماكدر ماكدر بطلت ماريده بعد

-ولج شنو متردي لعبة هو

-لا لا ماريد تالة بطلت خلي يتزوج عادي ما اهتم.. واحنه خلينا هيج احسن

-تالة: غبية انتِ بنفسج دتكولين البنية تخبل ولج تره هاي تكوش عليه بعدين وتصيرين انتِ الكخة

-دختوووليييي

-بعد اني گتلج وبكيفج

-باعي.. اني شنو اگول لو من نرجع احجي وياه احسن مو؟ يعني نتفاهم اكثر وهم هدوء ومحد يگدر يتسمع علينا احس احسن مو؟

-بكيفج بس مو تأجلين بعد تَـمني تره الرجال طگت روحه

-لا ما اأجل امه مبين شادة حزامها على زواجه

هزيت راسي اوافقها الرأي ونزلنا للمطعم صار هو ريوگ هو غده وگعدنا نستمتع بالمكان يجنن صاير على شلال لطيف..

-رفل: بنات امشن للنهر وخلونا نفتر بالمنطقة

همستها بسكوت خاف الولد يعترضون ورحنا وياهة بس اني وليلة باقي البنات ما رادن يجن وفضلن يشربن چاي ويلعبن ويه بنات منتصر.. افترينا ويه رفل وا شترتلنا عصاير واخذتنا السوالف ومشينا بعيد عنهم..

-ليلة: يعني الجامعة حلوة تالة ما متندمة لان كملتي؟

-تالة: مو بيكفي اتندم والله واني اصلاً اكره الدراسة بس امي جابرتني اكمل

-ليلة: ولج ليييش شحلاتها الدراسة والثقافة وعلي ماكو احلى منها

-تالة: لا داده اني اريد رجل ماريد دراسة اريد اتزوج ورجلي يگعدني بالبيت ويگلي اكسر رجليچ اذا داومتي

-رفل: شلون تعرفون عدها امتحانات

-تالة: ههههههه عابتلج

-رفل: عوفن الدراسة وخلونا نمشي فوگ الصخور نعبر النهر

-تالة: اني ماريد اخاف

-رفل: تعاي ليلة

-ليلة: ماريد مالي واهس

غمتنا وشالت صايتها تعبر النهر وتمشي على الصخرات، عبرت الصخرة الاولى تضحك عبالك مسوية انجاز واني وليلة نصنف عليها..

-ليلة: مثل الفقمة بالضبط تموت على الماي

-رفل: ولجن تعاالن وناسة

عبرت الصرخة الثانية والثالثة بالرابعة دتحط رجليها عليها وزلگت وبممممم تكربحت ووگعت بالنهر وبرمشة عين مي النهر جرها وياه ياخذها..

-ليلة: يممممماااااا رفففففلللل

-رفل: ووووولجنننن الماااي غميييج

-تالة: لااا مو عميق رررفل مو كللش عمييق

-رفل: انچبييي غمييييج راح امووووت

-تالة: عززا بعينييي ساعدووناااا ساعدووناا رااح تموووت

اللتموا الناس علينا يباعون بس محد يساعد، شفت ابو كربله هو وامه واگفين بعيد لازم ايدها ويمشيها ويسولفون، صحت من مكاني وليلة تلطم على خدودها تباوع لاختها المچلبة بالصخرة بكل قوتها وتبچي خايفة ياخذها المي وتغرگ..

-تالة: سااعدناااا ابو كررربله

ما سمعني بالبداية الا من كررت اسمه مرتين بصوت عالي كلش، انتبه علينا وفتح عيونه مصدوم عاف امه واجه يركض كاف دشداشته البيجية لحد الشورت وطالعة سيقانه..

-ابو كربله: شنييي خياااتي شصاااير شكوووو

-ليلة: اختييي اختيييي

-ابو كربله: ياااابوو فااااضل

عگد دشداشته على خصره وعبر الصخرات على النهر ونزل يجر رفل من ايدها فوگ الصاية وهاي تخبلت..

-رفل: ووولككككك

-ابو كربله: ووولج كضيييني

-هددددني وللللك ما تستحيييي

-ليلة: انچبييي رفففل وكضي ايده

-رفل: لوووو امووووت

-ابو كربله: ووولج لا تظلين تتجعمصييين كضينيي لا ادفررج كضيييي

-مااا اكضك

-تالة: ليلة هاي اختج مال واحد يكتلها كتتلة

-رفل: انچبننن ما اكضه مااا اكض مستعدة اموووتن ولا اكض ايد ززلمة غريب

-ابو كربله: چا موتيي بينما يجيچ الگريب

ما اهتمتله وظلت مكمشة بكل قوتها بالصخرة الصغيرة بأيدها ثنينهن والمي قوي كلش ويضرب جسمها بقوة مستحيل راح تكدر تسيطر وتنهض نفسها.. فلتت ايد وحدة من ايديها وصرخت خايفة..

-رفل: رااااح امووووتن

-ابو كربله: انچبيييي وكضينيييي

تنازلت ولزمته من ايده وسحبها يطلعها من المي بقوة مضاعفة المي كثافته اعلى ويسحب جسمها وياه، شالها شيول من خصرها وگعدها على وحدة من الصخرات ضربت ايده وعاطت بي..

-لااا تكضنيي

-وجعع خبصتنا بحالچ انا

-رفل: الله لا ينطيچن شسويتن بيه

-ليلة: عمت عينج انتِ الرعنة شكو تعبرين النهر متوازية

-ام حسن: يمة لا تظلين كاعدة على الصخرة لا تجرچ مرة ثانية طلعي بنيتي

هزت راسها رفل تلهث، سندت ايدها على الصخرة ورادت تگوم وهم زلگت رجلها والله ستر ما وگعت مرة ثانية.. گامت تبچي بصوت عالي خايفة وتصيح..

-مااا اگوم هسة هم اطيح

-ليلة: چا نباات هنا گومي

-رفل: بالعباس مااا اگوم صيحيلي فراقد تشيلني

اللتفتت ليلة تدور أي وجه عرف ويمكن لمحنا وجه عبق من بعيد، صحتلها تجي بس الناس خبصونا قسم اكو عرب وقسم أكراد وكلها تدردم شلون بيها وشيطلعها..

-ابو كربله: شوووووووو

شهگت من نصى عليها وشالها من مكانها، صرخت رفل تدك وتلطم وهو مغلس ويمشي على الصخور على كيفه يخاف لا تفلت رجله ورفل مستمرة بالعياط، ما خنست الا من شافته عبر صخرة بنجاح وبقتله صخرتين ويطلعون..

-رفل: طلعني بسااع

خزرها عيونه راح تطلع وهو شكله من ذولة الزلم الخشنة اهل الشوارب الثخان يخوف يخووف بس هاي الصلفة رفل شيخوفها كشولت بوجهه ودارت وجهها عنه متريد تشوفه..

اللتفتنا على صوت عبق والولد ورانه يركضون وانداريت على ابو كربله ورفل المركزين لا يوگعون من الصخرة مرة ثانية، انخبصت ليلة خبص تلطم على وجهها وتصيح..

-اجووو ولج اجوووو يبووووو عليج رفيلة يبووووو

رفع راسه ابو كربله فاز ومادري شلون عبر الصخرات مثل المخبل يريد بس يشمر رفل عنه بس ما لحگ! عااااا ما لحگ وشافو ولد شيخ علي وصار اللطم على راسهم جماعي..

-علي النور: تططططشر عرررضك عمي نااااااصر

-الامـير علي: وووولك اليوووم اشرررب من دمممك وعلييي

-علي السور: عرررضنااا شرفناااا وووولك حوووويق اللحگ عليناااا

الدنيا انگلبت واجه علي الحـق يركض من بعيد ميدري شكو وابو كربله وجهه صار ددددم ورفل هم توترت بس مو مثل الرجال فد مرة صار، كمل عبرة النهر ونزل رفل على جهة وركض يفلت منهم ويصيح..

-ورااااس الحجية طااحت البت طاااحت ولك طا....

ما كمل جملته وهجموا عليه امير وعلي الحق گوة فلت نفسه منهم وبعد ميعرف وين ينطي وجهه اجه وچيت بالنهر يذب روحه بي والمي اخذه وياه، كمش بصخرة وصاح..

-سوادددين طاحت البت وكضيتهاا چا تردوون عرضكم وشرفكم يروووح ويه الماااي

-الامـير علي: تصييييحلنااا تصيح لووواحد من ولد عمهاااا

-ام حسن: ياااع بينما يصيحلكم البت ماكلتها الحيتان

-علي السور: حجية رحمة لاهلج وين اكو حيتان بالنهر

-ام حسن: اكو يمة انا شفت چا حسن ليش ركض على البت غير خايف عليها

-علي الحـق: حجية شساالفة

-ام حسن: شبيكم يما چا شون ترضوها ياكل الحوت بت عمكم؟ ليش يوم ليش مو هاي امانة

-علي النور: بالعباس شعرة واصدگ صدگ اكو حوت هنا

-الامـير علي: حجية چا هسة ما تخافين على وليدج ياكله الحوت؟؟

-ام حسن: لا يمة الحوت ما يدور چلحان

-ابو كربله: رحم الله والديج يوم

نفخوا الولد ضايجين واللتفت الامير علينا مخنزر، يباوع لرفل من فوگ ليجوه وهي تباوعله من جوه الجوه خايفة من ردة فعله..

-شجابچن هنا وحدچن؟؟؟

-رفل: اجينا نسبح

-علي النور: تسبحن بنهررر بي حووووت

-الامـير علي: نووور

-علي النور: شنييي امير شنييي

-ام حسن: يمة شني السالفة كل هذا عبن انكض عرضكم؟ بس حگك اي بعلي حگك حبيبي وليدي اموري صدگ ما ينكست عن هالسالفة خلاص انا احلن الموضوع بطريقتي

-علي الحـق: تدور حلول الحجية

-ام حسن: چا شون.. يمة انا اگولن من الاخير اخطب هالحليوة لحسوني ونفضها

شهگت رفل فاكة حلگها وما اللومها لان الكل شهگ وياهة مصدوم حتى ابو كربله بنفسه!

-ابو كربله: يووووووم

-الامـير علي: الخااايس ما يعجبه! نعععل مگطعة ننطيك موو مررة

-ابو كربله: خاادم وممنون

-ام حسن: صدگ چذب اموري هيج تردون الطالبين گربكم

-ابو كربله: ربيييي ما ياكلني الحوووت وتخلصنييي

طلع من النهر ممهتم راح ينكتل لو لا بس من شاف امير متحلفله طگها ركضة يروح بعيد يضحك ويهوس لروحه..

-ابو كربله: شااايف خير ومستااهلهاا

-الامـير علي: ووولك تعااال

ركض وراه وذاك يركض وصاروا يلعبون ركيضان وعلي الحق يفر بيده يعوفهم وسور ونور يكرزون حب ويشمرون بالنهر وام حسن بعدها تقنع بـ رفل..

-ام حسن: والله يا يمة خوش وليد ابني هذا وحيدي وماعندي غيره اعاين لالله ثم عليه واموري يعرف اخلاقه عدل

-رفل: احم.. الله يحفظه خالة

-ام حسن: ودعوته بالمچان وعلي انتِ بس جربي گليله ادعيلي وشوفي شون تنگضي حاجتچ بسع

-رفل: ان شاء الله خالة ان شاء الله

-ام حسن: يعني نهلهل؟؟

-رفل: لا انا ماتزوج خالة خطبي اختي هي خوش بت

-ليلة: رررفل

-ام حسن: لا هاي بلگه ما عجبتني

-ليلة: فديت صراحتچ خالة

ضحكنا اني وعبق وعفناهن ورجعنا ويه حق والولد واخييراً گدروا ينفردون حق وعبق وحدهم بس ما دامت خلوتهم دقايق واجه لعلي الحق اتصال مهم من لواء حسين خلاه يفشر..

عفنا رفل ويه ام حسن يسولفن بسرعة صارن صديقات والمرة مصممة تريد تخطبها لابنها واجتها سالفة النهر حجة مبين هي من البداية عاجبتها رفل بس هاي الصلفة بعد شيسكتها؟ گعدت تسولف ويه المرة على المواصفات التريدها..

-رفل: خالة انا اريده ابيض من الجمارة ما اتزوج اسمر

-يااعع فاهي ولج الابيضاني

-انا عاجبني خالة واريدن عيونه زرگ

-ياااع ولج اعمى ابو عيون الزرك يصير

-انا عاجبني واريدنه رجل اعمال ويلبس قوط وهيج كشخة كششخة

-خايبة ابو القاط ما يتحصل اخذي ابو الدشداشة البيجي هذا اخو خيته يصير

عفتهن يسولفن والعصر ياله قررنا نرجع، شبعنا من المكان وتعبنا هم، ركبنا السيارة وسور استغل ابوه مموجود بسيارتنا وعلگ اغاني وگعدوا هو ونور وحيدر يردحون..

-الامـير علي: طفوه ولكم ما تخافون الله انتم

-علي السور: امير بشرفك بس هالمرة حباب

غلس عليهم وسند ظهره على الكرسي مچتف ايده منفس ويباوع لـ تَـمني الكاعدة بين ليلة ورفل ويغنن منسجمات..

كرسيي صار بصف حبيبة وره الامير وابا الحسن ضبط واكدر اسمع كلامهم وهمه يتناقشون على بهجة البنات وحركاتهن المو طبيعية خصوصاً من بدن يغنن سوه منفعلات ويه اغنية رومانسية..

-ابا الحسن علي: اگلك ضلعي

-الامـير علي: بدون لا تگول وصلت

-مو بله؟؟

-كلللش

-لا تره الموضوع بده يقلقني

-اسكت ابا الحسن اسكت

منفوخين نففخ وضوجتهم وصلتني خصوصاً من اجه مقطع يحچي عن عيون الحبيب والبنات ساحن وياه ووحدة نامت على چتف الثانية وانوب حتى حبيبة تدندن وياهن مبتسمة..

-ابا الحسن علي: لا امير لا السالفة تخوف

-الامـير علي: هو احنه عيوننا چقل! عيون من جاي يغنن الها؟؟

ضحكت اضم حلگي بيدي واسمع لحرگانهم، ابا الحسن يرفع وامير يكبس وعيونهم ما نزلت من تَـمني وليلة الرايحات بغير عالم وذايبات بالعشق..

-ابا الحسن علي: نعله عله غيرتكم غيرو الاغنية نفسيتي تعبت

-حيدر: لا عمي حبيناها

-الامـير علي: عمي هم حرگان دم وهم حرام مو حالة هاي وعلي

ابتسمت على تذمرهم ودرت عيني للشباك اباوع منه ومرت من عدنا السيارة البيها عبق والبقية وبالصدفة صرنا اني وعلي الكرار عين بعين هو هم ديباوع من الجامة..

ابتسمتله ورجعلي ابتسامة ودار وجهه بسرعة، بقيت اباوعله منا ولسبب ما فهمته ماكدرت اشيل عيوني عنه وبقيت اتأمله من مكاني الطريق كله.. تمنيت يدير عيونه الي مرة ثانية يباوعلي بس بعد ما كررها وبقى وجهه مستقيم لحدما وصلنا للڤلة..

رجعنا تعبانين وفراقد صوتها شعلاته زعجنا، رحت للمطبخ اجيبلي مي واللتقيت بي مرة ثانية بالمطبخ واگف يغسل وحلگه مصوبنه، ابتسمت لا ارادي وطلعت من حلگي كلمة..

-تعبنا

اللتفتلي ساكت توقعته ما سمعني شگلت لهيج عدتها..

-تعبنا اليوم كلش

-علي الكـرار: اي صح

-هم نطلع للعشا لو لا؟

-مادري

-زين اذا طلعتوا برأيك عمو ابوك يقبل ابقى وحدي هنا لو لا؟

-لا اكيد

-ليش؟

-ولد مسعود موجودين وما نعرف همه جايين عبنهم عرفوا بينا هنا لو جيتهم صدفة

ما لحگت اجاوبه وعافني وطلع من المطبخ، باوعتله وهو يبتعد عني وبسرعة درت عيوني من دخلت خالة رسمية تدردم على ولدها..

-شيبوني هالولد شيببونييي

رجعت للصالة وهمزين ما طلعنا للعشا بقينا بالڤلة اكلنا نميات وگعدنا نسولف ونضحك الليل كله عمو علي يداهر ولده وولده يرجعوها اله بس بأحترام تجنن علاقتهم عبالك اصدقاء..

**

-علي ماكدر اجيك والله اذا شافتني خالة رسمية تذبحني

-علي الحق: طلعيلي عبق وما عليج بأحد

سديت منه الموبايل واباوع للساعة عبرت الثلاثة الفجر شلون بيه شلون اتسحب واطلع من الغرفة، باوعت للاجسام المسطرة النايمين وارجع اباوع لمكاني شلون لو دست على رجل وحدة منهن واني اطلع؟ شلون لو شافتني خالة رسمية شيخلصني من لسانها!

رخيت چتافاتي وذبيت نفس خفيف وسميت بالله وگمت، جريت شالي حطيته على راسي وطلعت بالتراك الجديد الي اشتراه الي حق منا شكد فرحانة بي يخبل لونه سمائي وعليه رسمة بطة..

گمت من مكاني اعبر بين الرجلين اليذبح الغرفة ضيقة وصايرة طولة وفراقد وعمة زهرة اجن ينامن يمنا اليوم وبقت بس ابتسام بذيج الغرفة وحدها.. عبرت اول خمسة فرحانة واحس بأنجاز يلا عبق ما بقى الا القليل..

عبرت من فوگ وحدة مغطية راسها وبالغلط دست رجلها فزت مخترعة واني بعد ماعرف وين انطي وجهي ظليت اراوح بمكاني مثل المخبلة..

-زهرة: اااخ رجليناتي اااخ

-عبق: ها عمة.. اءء هاا توجعج؟ حسيت توجعج حسيت گلت اجي ادوسها الج

-زهرة: ها؟

-عبق: سمعتج تونين وانتِ نايمة وتكولين رجليي ااه رجلي توجعني ماتحملت اشوفج هيج وما اكوم ادوسها

-زهرة: يمة يا بعد طولي عبيقة تعاي احبنچ

نزلت عليها وباستني بخدي تدعيلي وتتشكر مني خرب حظي المعگرگ شلون ورطة ورطت روحي بيها!!

-زهرة. ااخ دوسيلي الركبة شوي ااخ اي اي الله يرزقج الجنة يا بعد عيني

كعدت ادوسلها واحرگ بروحي علي الحـق انشتل بره بهالبرد اكيد دينتظرني، طلعت تلفوني من رداني من وصلني اشعار منه كاتبلي..

"جمد التمساح وينننج"

شفت الرسالة ومجاوبت بقيت ادوس لعمة زهرة لحدما حسيت نفسها ثگل ورجعت غفت، شوية شوية ملصت روحي منها بدون لا تحس وطگيتها ركضة اطلع من الغرفة وطبگت الباب ورايه على كيف..

ركضت للحديقة الخلفية وضحكت من كل گلبي من شفته گاعد على دچة بصف المسبح الفارغ، نويت اخرعه ومو رأساً ابين نفسي فـ كمت امشي على اطراف اصابعي لحدما وصلت وره ظهره وطفرت عليه وصحت بأذنه..

-تمسااااحي

نز مخترع يضحك وبحركة مفاجأة سحبني من ايدي وجرني بسرعة وقوة وگعدني على رجله..

-بدده بددده بسوالفه بدده

-بت الاوادم مشتااااگ انا

شفط خدي شفط ببوسة والله حتى بوسته توجع، دفعته من صدره وركضت اوخر منه وهم جرني من ايدي يريد يرجعني بس كدرت افلت وركضت بعيد اضحك..

-هسة اصيح لخالة رسمية والله

-انا اعلمج عگروگ شايفة هذا شلعان گلبي كله اطلعه من عيوونج اخليج تلطمين بالهندي بس صبري

-اگلك انتَ شسالفتك ليش بكلشي عنيف تره اني ماتحمل هسة ابطل والله

-بطلي

-هااااا

-والعباس اروح اتزوج وحدة تتحمل شسوي بيج بزر نستلة

-خوش لعد حق طلگني!!

-تدللين بس نرجع

-علي الحـق!!!

-چا مو انتِ تردين يا عنق

-چلب بيه توسل مثل باقي الزلم شبيك

-وانتِ شمعرفج بباقي الزلم ولج

-تره جنت عايشة ويه تسعتكم سنييين وعرفت شلون تفكرون وتتصرفون

گام من الدچة مضيگ عيونه ويتقدم عليَّ..

-وانتِ واگفة وره البيبان تتصنطين علينا ولج

-ها؟ لا.. لا شلون.. لا تره لا

-ابد بس تعرفين تقي شيحب ياكل وانا شلون احب اشرب الچاي وسور ونور شوكت ينكتلون وعلي الدررررررر ااااااااخ يا علي الدرررر

-هم رجع على در

-درر شني صيحيله ابو حيدر

-تره بيني وبين علي الدر علاقة...

-ايييي علاقة شنو دكتورة عبق؟!!

-علاقة اخوية علاقة ابوية علاقة نظيفة تماماً

-گطعي كل علاقاتج وكوني علاقات بس وياي لو انا ما اعجب

ضحكت امسح على وجهي جزعانة والله للصبح مستعد يبقى هيج ولا يتنازل ويسد الموضوع الا اذا ضحكت عليه بشي يفر عقله..

-علي احنه علاقتنا احسن واحلى من كل هاي العلاقات احنه بيناتنا علاقة حب وغرام وشغلات لطيفة محترمة

-خربتيها بمحترمة!

-ليش ولك

-لان اليوم راح اچفص بنص الاحترام!

شهگت فاتحة عيوني من شالني على ظهره وافتر بيه بالحديقة، تخبلتت ظليت اضرب على ظهره اخاف احد يشوفنا ياا فضيحتنا اذا طلع واحد من الزلم لو من النسوان والله يظلون يحچون بينا شهر..

-علي نززلني نزززلني

-صار وتدللين

نزلني على الكراسي الكبار الخاصات مال مسابح يتمدد عليهن الشخص، نهضت نفسي بسرعة ما اقبل اتمدد عليهن وقيد ايدي ورجلي ميخليني اتحرك..

-علي لا تسوي هيج حقها امك تخاف منك حقهااا ولك عيبب عـ....

لصمني ببوسة خلاني ارافس اخاف احد يطلع والله حتى الاجواء الرومانسية ما استمتعت بيها عقلي وگلبي كله ويه الباب خايفة لا يجي احد وننفضح.. وخر عني شوية يتنفس وهمست بصوت ناصي بيني وبينه..

-يلا فخت؟ كافي يلا خلينا نرجع

-لا ما فخت محتاج جرعة اضافية

-ابووك.. ابوووك هذا ابوك اجه

-انچبي سوالفج مو عليّ

-حق اهلك راح يگعدون شبييك

-شفق اذا تبقين هيج نتزاعل وعلي

-خلينا نتزاعل

-ها؟؟

-والله نتزاعل وبيوم العرس نرجع نتصاحب

-لا والله؟

-والعباس احلى من هيج خطوبة ماكو نتزاعل وكل واحد بمكان وبيوم العرس نتصاحب ونصير حـ....

سد حلگي ببوسة ثانية وهالمرة الخجل سيطر عليَّ اكثر من الخوف، توترت وكل عضلة بجسمي صارت ترجف بطلت اتصارع وياه وعشت اللحظة وحسيت بدفو الحب يحاوطني بهالجو البارد..

-عبق..

همسها من طبع قبلة خفيفة على جبيني، فتحت عيوني على كيف وجهي مشتعل.. هد ايدي ورجلي ونهضني يخليني اگعد عدل وبقى يفرك ايدي بين ايده..

-شو سحتي فرد نوب انتِ

-اي

-هههههههههههههه تگول اي

-لا لا دا اكول لا وطلعت اي

-احبچ قبق

-علي الحـق

-چبدي

-اريد اگولك شي بس مترددة

-گولي ولا تترددين وياي

-علي اني خايفة من علاقتنا

عگد حاجبه وحرك راسه مستفهم..

-ليش؟

-اخاف منك وعليك

-فهميني شلون يعني؟

-اخاف يجي يوم و.. و.. اوف يربي

-احجي عبق!

-اخاف يجي يوم وتتغير عليَّ...

سكت يباوع لعيوني وبسكوته الغصة تكونت ببلعومي، بلعت ريگي بصعوبة وكملت بنبرة ناصية..

-اخاف يجي يوم وتكسر گلبي علي الحـق

-عبق...

-اخاف يجي يوم متصيحلي بي غير "عبق"

ضحك منتبه على نفسه اخيراً.. انتبه ان يصيحلي عبق بس من يكون جَدي او عصبي وباقي الاوقات الي يكون بيها سعيد ومرتاح او يداهر بيه يصيحلي "عنق" "شفق" "عطر" "قبق" "بزونات"... الى اخره..

من شفته ما جاوب خاب املي ونويت اغير الموضوع لشي ثاني قبل لا اطگها بچية هنا واخزي روحي بس كلشي تغير من ضغط على ايدي الي بين ايده وگال..

-عنق، شفق، قبق، غسق، عطر، عگروگ، بزونات، بطة كلها مجرد مسميات تافهة ومالها معنى.. انتِ حبيبتي وحياتي انتِ الوردة النزرعت بأفادي ورويتچ من دم گلبي انتِ عَبقي اليفوح من كل خلية من جسمي

حررت الغصة الاعتلت بلعومي ونزلت دموعي بس هالمرة چانت دموع فرح، تقرب مني اكثر ومسح على خدودي وباسهن  بوسات ناعمة ويسولف..

-لو الف نعال احصل من امي ولو تمسح بشواربي الگاع ما اعوفنچ يا قبق لو اعرف الدنيا كلها توگف ضدي ما اضيعچ من ايدي

-هههههههههه

-ونذر عليَّ ارجع حگچ وانعل الخلف سلوى وارجعچ لامچ واجيبها تعيش وياچ ببيت واحد وهي تساعدچ بتربية فروخنا

-اوگف اوگف

-ها؟

-اني نسيت اگلك شي..

عدلت گعدتي والشال ربطته زين على راسي، رجفت شوية من البرد واردفت اكمل..

-نسيت اگلك اني ماريد يصير عدنا جهال هسة الا من اتخرج

-لا عليج علي

-والله حق تره ما اسيطر وگلت ابلغلك عن الحلال والحرام

-عوفيهم امي تربيهم

-لا والحمل شلون لا لا ماكدر

-انچبي حبيبتي

-لا صدگ احجي حق شبيك

-انچبي چبيدي

-اهووو تره اني الراح احمل مو انتَ واني بعدني صغيرة ما ادبرها

-زين انا عندي حل

-وهو؟

-اتزوج غيرج ونعوفها للحمل والولادة وانتِ اهتمي بدراستج وراحتج

-اگعد عينيي ابو النسواان

-چا غير ادور راحتج

-ماريد هالراحة! وراح نأجل موضوع الاطفال!

-ولج اريدن درزن انا شنلحگ نخلف بينما تتخرجين!

-معليك اجيبهم توم توم

-ما يصيرون درزن

-يصيرون معليك هسة بس عوفني اهتم بدراستي

-ولج چا انا المن متزوج!

-منو گلك تتزوج طالبة؟ لا اني الضربتك على ايدك ولا اني الجبرتك تتزوجني ومثلما اني متفهمة دوامك وسوالفك المااادري عنها من تروح لبغداد انتَ همم تفهم موضوع دراستي!

-خوش أتفهم موضوع دراستج بس بالعباس ما تطلعين من فراشي!

-اسكتت اسكتتت وين راح باله هذا

-اي هذا العندي لا تكولين عندي امتحان ولا تكولين اريد اروح يم حبيبة ماكو ما دامني موجود ما تطلعين من غرفتي

-ونأجل موضوع الاطفال!

-عود افكر

-علي الحـق دا اگولك ماريد اطفال هسة والله اقصر وياهم واني ماريد هالشي

-انا اربيهم انتِ بس حبلي وجيبي وانا اگابلهم واكعد

-لا لا اني امهم ولازم اهتم بـ عيسى و ودق

-عيسى ومني!!

-ودق

-ودق شني ولج

-يعني المطر الخفيف

-انوب علينا مطر خفيف خوب نسميها خرير

-خرررير شنوو

-شبيچ معناه صوت الماي

-باوع ما اسمحلك تحجي على اسم بنتي ماا اسمح!

-من الاخير انا غير علي وفاطمة ما اسمي

-شلون اسمي علي وانتَ اسمك علي الحق!

-وشلون تسميها ودق وانتِ اسمج عبق!

-اي عادي شبيك حتى تطلع تشبهني

-يعني اذا سميناها خرير ما تطلع تشبهج؟

-هم رجع على خررررير

-تؤ تؤ لا تطولين الراء عبق هسة العالم حسبالهم جاي نصيحلها غير شي

-عوف الاسماء هسة عود بعدين نتفق خلي يجون والله كريم.. يلا امشي نرجع ننام الشمس راح تطلع

-ما شبعت منج بس ميخالف كله اطلعه من عيونج هذا

-بعد شيخلصني من التمساح الزاحف اني

وخر مني يضحك ويگرص بيه ويدغدغني كل شوية مطفرني لحدما عفته وشردت للغرفة، بلعت الضحكة وفتحت الباب على كيفي وفزيت مخترعة من شفت خالة رسمية گاعدة وفاتحة لايت الموبايل وحاطته على وجهها..

-عبق: بسم الله الرحمن الرحيم

-رسمية: هسة عرفتي ربچ مووو

-خالة والعباس هو جبرني

-تعاي تعاي ام ودق تعاي

-لا خالة لاا ودق شنو اني مو ام ودق

-چا ام شني؟؟؟

-ام رسمية! راح نسميها رسمية هسة اتفقت ويه علي الحـق قبل لا ادخل للغرفة

-ولج تضحكين عليييّ

تحچي بصوت عالي متأكدة كل البنات گعدوا بس محد تسترجي وترفع راسها، بلعت ريگي وهفيت على وجهي متوترة ماعرف شحچي..

-عبق: خالة بنتي راح نسميها رسمية و..

-رسمية: ليش انتِ حاااامل ولج!!!

-سلوى: يممممااااا

فزت سلوى من مكانها تلطم على صدرها وگعدت فراقد هم هي وشعرها الاحمر المكفوش..

-سلوى: حااامل يا بت الچلببب

-عبق: شبييج منين احمل صدگ تحجين خالة!

-فراقد: من ابو رسمية يعني منين

-عبق: خالة صدگ چذب شلون احمل واني بس خاطبة عيب عيب ميصير هالحجي اني حق ما اخلي يلزم ايدي عيب رجاءً خلونا نسد الموضوع عيب والله عيب شكد عيب وفشلة يمممة عيب شنو هالسوالف العيب...

مشيتها عليهن عيب وعيب وتسرسحت للفراش وغطيت وجهي اسوي روحي نايمة وعفتهن يدردمن عليَّ، غمضت عيوني زافرة نفس مرتاحة من سكتن وكلمن حطت راسها ونامت..

توقعت ثاني يوم راح اترزل من وحدة بيهن بس الحمدلله من نسن ومحد جابت الصار البارحة بالطاري، طلعنا لمصيف وتونسنا كلللش بي الكل چان مستمتع بس متنا من البرد وظليت اطگ سن بسن ولازكة بـ ليلة..

-ليلة: ماكو زلمة بيهم نزع قمصلته وسترنا

همست جملتها بيني وبينها محد سمع بس ما مرت ثانيتين واجاني علي الحـق نزع قمصلته وحطها فوگاية، باوع منا ومنا ومن شاف ماكو احد لزمني من فچي شنط رگبتي وسرق مني بوسة شفطني بيها وراح..

-ليلة: صح شگ زردومچ شگ بس وعلي زلمة

-عبق: تمساحي العاشق هذا

-ليلة: وييع انچبي ماحب هالحجي

-امداج اي والله شكد نفسية

-عبيقة انا روحي طاگة شوكت نرجع

-ليش روحچ طاگة؟

-هيج من لا سبب

-چذابة اكو

-ماكو سبب لا تلحين

ضحكت لان اتوقع عرفت السبب شنو، قبل شوية مرن من يمنا بنات كرديات يموتن من الجمال ووحدة منهن طلبت من ابا الحسن علي يساعدها يشيل وياهة الاغراض لسيارتها وهو ما قصر طگ غيرته الجنوبية وشله رداناته وشاللهن كل الشغلات..

-عبق: والله يا ليلة انتِ مينعرفلچ

-حيري بتمساحچ عبيقة وفكري بـ ببنيتچ رسمية الورطتي روحچ بأسمها

-عبق: لج راح اموت قههر خالة رسمية مقتنعة راح نسيمها رسمية تخيلي گالت لعمو علي وفرحانة على الفكرة والله حسيت علي الحق شوية ويجي يذبحني

-تستاهليين ام غزل تالي الليل

بدت بمداهراتها المعتادة وعفتها وركضت لمكان رفل وحبيبة گاعدات على مصطبة وتقي گاعد على مصطبة مقابيلهن بمسافة مو قليلة ينرگل بهالبرد، دحست روحي بـ حبيبة ادفيها وهمست بأذنها..

-عبق: بعدج ضايجة؟

هزت راسها ساكتة المسكينة مو سفرة صارت عليها سم، منتصر موجود بس ولا يتقرب من مكان هي موجودة بي ابد وظلت تباوعله من بعيد وتتحسر وتفكر بالخاطب الجايها عمو علي كللش متحمس للموضوع وفاتح اخوانها بالفكرة عبالك حبيبة موافقة..

-عبق: لا تزعلين حبيبتي ربچ يسهلها

-رفل: مو كلها مثلچ وكدرت تاخذ حبيبها عبق

-عبق: رفل شيلي عينج عني وعوفيني بضيم بنتي رسمية

-رفل: ههههه صراحة؟ الله يساعدج شلون تقنعين عمة رسمية تنسى هالسالفة

-حبيبة بهمس: بنات عوفن بت عبق العجييّز.. انا اعرف شون اقنع ابوي يرفض الزلمة

-عبق: لعد ليش ضايجة؟

-حبيبة: ضايجة لان اعرف راح ينقهر ويضوج

-رفل: لا خية انتِ ضايجة على منتصر عبنه ما مهتملج

-حبيبة: اووووووف

-رفل: لا تنفخين عوفيها يمي

-حبيبة: شني يمچ؟

-رفل: انتِ مو عاشگة ابو البنات؟

-اي

-چا خليها وراي

-شلون ولج فهميني

-لا ترفضين الزلمة الخطبچ وخلي اهله يجون ويشوفهم منتصر بعيونه

-واخجل ابوي؟؟

-شعليج انا احلها انتِ اهدي وارتاحي بعلي ما اتسمى رفل الا ازوجچ منتصر

-عبق: ولج شلووون

-رفل: خايبات اكو مرة تدخلت بموضوع وما دبرته؟؟ جاوبن عليجن الزهرة

-حبيبة: صراحة لا ماكو

-رفل: چا هالمرة هم عوفيها عليّ ازوجچ هالزلمة والا اردح بعرسچ

سكتت حبيبة مستغربة وحسيتها خايفة بس قررت تتنازل عن الموضوع وتخلي رفل تتصرف، فعلاً ماتذكر اكو مرة رفل تدخلت بشي ما كدرت تحله او لگتله حل على الاقل ذكية وشاطرة ومن النوع تعرف تقنع الطرف المقابل وتلعب براسه مثل ما قررت تسوي هسة ويه الامير وتَـمني من شافتهم كل واحد بمكان..

شفت عيون تَـمني تركض وره رفل من شافتها راحت تگعد بصف الامير على الگاع وجرت برتقالة تگشرله وكأنها دتسولف وياه، انتبهت لـ تَـمني صارت تلوب بمكانها وتاكل بشفتها متوترة بس من شافت امير رفع عينه يباوعلها عكست عينها وسوت روحها تسولف ويه خالتها وتالة..

-حبيبة: راح تموت وتكول ما مهتمة لزواجه ااخ منج تَـمني ااخ

-عبق: حبيبة عليج الله خالة رسمية صدگ تريد تزوجه زينب بت شيخ محمد؟

-اي وعلي مصممة على الفكرة بس اموري معترض

-اخاف يمل ويسويها شلون بينا

-لا ما يسويها

رجعت عيوني على تَـمني وضحكت من شفت اصبعها يفتر، حاطه ايدها على فخذها وتحرك بأصبعها عليهم وتأشرلي بعيونها..

-حبيبة: ههههههه ولج تريدج ترحين يمهم

-ادري افتهمت بس استحي شعندي رايحة

-روحي خطية خليها ترتاح

قررت اروحلهم واسوي روحي اريد اكل فواكه، تمشيتلهم وگعدت بصف رفل وجريت تفاحة اگصگصها واسمع لحديثهم افتهمت ديحچون بـ تَـمني..

-رفل: والزهرة تحبك

-الامـير علي: سدي الموضوع رفل

-رفل: اموري لا تظل مهموم ومغموم تَـمني تحبك بس البت ما تعرف تعبر ما تعرف شلون تفهمك

سكت ميتجاوب وياهة وبقى يدخن من الفيب مالته، ظل يباوع على تَـمني الحارت شلون تگعد من القهر وبنص هالبرد جرت كارتونة صغيرة تهفي لروحها..

-رفل: عيبها الوحيد ما تعرف تعبر ومن تستحي لو تتوتر تظل تچفص وعن نفسي ما اشوفه عيب بالعكس احب عفويتها وهاي معناها گلبها نظيف وما تعرف تچذب وتتلون

-الامـير علي: رفل شني جاي تعلميني بيها؟

-لا انا ما اعلمك بيها انا اريدك تفهمها! يعني تعرف نواياها بس انتَ ما جاي تفهمها

-افهمها

-يعني تعرف هي تحبك وتريدك؟

-تَـمني ما تحبني رفل هي تحب الامان الجاي انطي الها تحب دفاعي عنها وتحب الطمأنينة الازرعها بگلبها من تعاكسها الدنيا بس مال عشگ؟ لا رفل لا البت ما تعشگني

-امير چا الحب شني؟ الحب مو امان؟ مو راحة واطمأنان؟ قابل هاي المشاعر اجتها من الهوا الطاير غير لانها متعلقة بيك و...

-انتِ گلتيها متعلقة! والتعلق يختلف عن الحب التعلق يجي من التعويد شي روتيني ومشى وياي وتعلقت بي مو ضروري احبه واعشگه وماگدر اعيش بدونه

-ليش قابل انتَ ما تگدر تعيش بدونها؟

-اي! ماگدر اعيش بدونها

نتر كلماته بقوة خله رفل تسكت واني التفاحة تلزگ بحلگي ما انبلعت، كزبر جسمي من اردف بنبرة حادة مال واحد محترگ گلبه..

-انا جاي ادوس على نفسي واشبح بيدي ورجلي وطاقتي بس حتى احافظ عليها واحسسها بالامان خاطر تبقى وياي وما تعوفني! تعرفين بشنو جاي احس؟ احسني مخبل لان تَـمني مثل النار التچوي افادي وانا راضي واگلها هل من مزيد!

-رفل: امير لا تصعب الموضوع عليك

فتح حلگه يريد يگول شي وتراجع حسيته منحرج من وجودي وحتى جملته الاخيرة توقعته تندم عليها لان تحسر يستغفر، قررت اگوم وشفت تَـمني تأشرلي بأصبعها بمعنى ابقي وتتوسلي بعيونها..

-رفل: عندي سؤال وجاوبني بصراحة ولا تگلي رجولتي ما تسمحلي ولا غيرتي ما تخليني انطق.. انتَ وتَـمني اذا تطلگتوا تتوقعها تتخطاك بساع وتتزوج وراك لو لا؟

وهالمرة ما جاوبها بكلمات هالمرة جاوب بضحكة استهزاء وااااضحة، ضحك يكمل يدخن من الفيب ويفر بيده مستهزأ من وضعه وهالشي زعلني الي قبل رفل.. لعد ليا مرحلة واصلين لدرجة متيقن ومتأكد اذا انفصل هو وتَـمني تكدر تتخطاه بسهولة وتتزوج غيره بدون لا تهتم؟..

گلبي انكرب وضجت ما اهتميت لحركات تَـمني ولا لتوسلات عيونها وگمت اعوفهم وحدهم وقررت اسولفها عن شعور زوجها يمكن تگدر تحسن الوضع بيناتهم وتتلاحگ لعلاقتهم...

**

"رفـــل"

شفت الامير مكتأب وحزين وماكو شي جاي يونسه وعرفت السبب مرتبط بمرته، مليت من شوفته بهالحال احنه ما صدگنا على الله يرجعلنا بخير ويتخطى موت عزيز گلبه تالي ترجع تنتكس حالته هيج ويفقد عزيز ثاني؟

جريت الفيب من ايده وبساع جريت منها نفس، خزرني ولگفها من ايدي ورجعت خذيتها وركضت بعيد عنه اريده يتحرك بلكي تتجدد طاقته..

-جيبيهاااا رفل

-گوم انتَ اخذها

-ما اگوم رجعيها

-گووووم

-جيبيها وووولج

-ما اجيبها والكعبة هسة اذبها منااا

-جيبيها بداعة شواربج

-حفيتهن هههههههااااييي

فك عيونه مصدوم وبلع ضحكته وگام من مكانه يصيح بيه..

-يا ادبسزززز

-يلااا يلااااا

-ماعدها لا خجل ولا مستحى هالبت وينها صوندة عمي ناصر ترجع تربيچ من اول وجديد

-تسكت لا اشمر الڤيب منا

-ولج انااا تهددني نثية

-اهددك واهدد ابـ.... لا لا تراجعت ولك لااااا

جر عودة من الگاع وركض وراي يريد يكتلني وانا فلتت ميتة ضحك، عثرت وردت اطيح على وجهي حذائي عالي ويمروجني وبدال لا انا الاصيح اجه صوت عياط من جهة النسوان.. اللتفت امير مفجوع وشاف تَـمني بالگاع طايحة تصيح ودموعها عشرة عشرة على وجهها..

ذب العودة من ايده وعافلي الڤيب وركض يشوفها وانا رحت وراه، النسوان محاوطيها وعمو علي مستند على عوچيته يسألها شبيچ وهي ماكو فاحطة وبس الدموع تكت.. گنبص الامير گبالها كاض وجهها بين ايده ويسأل بخوف..

-شبيچ ابوي؟؟ شبيچ تَـمني!!؟

لزمت ايده حيل بين ايدها واشرت على رجليها وتشهگ بالبچي..

-رجلي.. رجلي انلوت

-الامـير علي: شلون؟؟

-فراقد: خايبة شون انلوت وانتِ ما گمتي من مچانچ

-تَـمني: انلووووت قابل دا اكذذب

-الامـير علي: لاا محشومة شني تچذبين تعاي اشوفها هناك امشي

رفعت عيونها المدمعة اله وگالت بدلعها المعروف..

-ماكدر اكوم

-تعاي سندي روحج عليّ

-هم ماكدر

-ابتسام: شيلها يمة شيلها شجاك البت فحطت ما تشوفها

هز راسه اي ونصى حط ايد جوه سيقانها والايد الثانية جوه ظهرها ورفعها، مسحت دموعها بسرعة وچلبت ايدها برگبته مبتسمة.. ما گدررت ما اضحك على منظرها والله هالبت ملعوونة وعليها سوالف حلوة..

درت وجهي على حبيبة وعبق وشفتهن مبتسمات ويعاينن چنهن افتهمن النگرة شني.. بچي تَـمني مو لان رجلها انلوت البت جاي تبچي عبنها مفتقدة اهتمام الامير ورادت تموت وتطگ من الغيرة من شافته يضحك وياي ويركض بحماس..

عفتهم يگعدون على جهة واستغليت فترة انشغال الكل بسالفتها ورحت لـ منتصر، نويت اخصمها اليوم ويه الكل وانعل ابو اليأجل سالفة حبيبة بعد كافي البت طگت روحها وهذا مثل الصنم لا تنحنح ولا تلحلح..

شلت بنيته رقية من الگاع اللاعبها ومدتلي ايدها سكينة تريدني اشيلها ويه اختها، رفعتها ووگفتنهن ثنينهن على المصطبة اللاعبهن..

-رقية: عمة انتِ كلش حلوة

-رفل: انا؟

-سكينة: اي

ضحكت على لسانهن هطولهن وكل البلا بيهن، تقدم علينا منتصر مبتسم وگال بضحكة..

-بس لا وكحن وجاي تعاقبيهن هنا؟

-رفل: لا وردات عندك وينهن وين الوكاحة

تخصرت رقية وباوعت لابوها وگالت بثقة تهز براسها..

-هاااا شفت مو نگلك احنه حبابات

-سكينة: هوفي هوفي (عوفي) ما يصدگ

-منتصر: صدگت بس سكتن

-رقية: عمة شوفي ابوي شلون يحاچينا

-منتصر: ولجن كافي سكتن عيب

-رفل: ههههههه والله يونسن رگية وسكينة

ضحكن البنات ببراءة ويباوعن وحدة للثانية، مسحت على راسهن وبدون مقدمات دخلت بصلب الموضوع..

-ما ناوي تتزوج منتصر وتجيبلهن ام حلوة؟

-منتصر: الله كريم

-اذا اكو وحدة ببالك انتَ بس گول انا اروح اخطبها بنفسي

سكت مبتسم ونزل عيونه على بناته، تحسرت على حالهم وانقهرت هالصغيرونات انولدن يتامى وما عرفن معنى الام شني..

-رفل: صح مخبوصين احنه هالچم يوم بس ميخالف اخطبلك تدلل

-مخبوصين؟ خير ان شاء الله؟

-چا ما تدري بـ حبيبة راح تنخطب

-حبيبة راح تنخطب؟؟؟؟

-اي من ابن شيخ فهد

-صدگ!!

-اي بعلي بس البت ما راضية وميتة قهر ما تريده

-يعني راح ترفضه مو؟؟

-لا وين عمي علي يريدها توافق بس المسكينة راح تموت گلبها راح يوگف

-صدگ چذب! ليش يجبروها؟؟؟

-بعد شنسوي شيقنع عمي علي لو قفل، هسة لو اكو واحد يساعدها هالفترة خاطر ابوها يبطل بس بعد منين نجيبه

-شون يساعدها؟

-يعني.. انا لو چنت زلمة چان ما خليت حبيبة تحير وتتعذب ما تستاهل هالغزالة معقولة انا ابن عمها واخليها تروح لغريب؟؟ افااا

سكت ما علق وبقى يلاعب بناته، انتبهت لتفاحة ادم تصعد وتنزل عنده وتنفسه اعتلى بس ما جاي اعرف هو معصب لو غار لو شني بالضبط؟

-منتصر: انا احاچي عمي علي واخلي يبطل

-وين يرضى عمي؟ وتره حگه ليش يرفض نصيب زين ويعوف بنيته هيچ

-چا يغصبها!!

-بعد شنسوي هذا هم حظها واخوتها زعلانين على زعلها

-لا لا لا ماا ارضى بهالحجي شنييي يا يوم انغصبت حبيبة على شي حتى تنغصب على زواج!!

-يعني تريد تساعدها انتَ؟

-اكيد وحتى لو ما اقتنع عمي علي اللگالي فد حل

-حل مثل شني؟

-مادري افكر

-اذا تريد نصيحتي فـ انا عندي حل مؤقت ومناسب بنفس الوقت

-شنو حلچ؟

-انهي عليها منتصر! اوگف بنص ديوان ابوها وانهي على بت عمك حبيبة!!

يتبع 👑.....

━━━━━━ ♛ ━━━━━━

ان شاء الله نأجل السوالف للانستا او التلي هسة تعبانين امشوا ننام

لاااا چذب كتبولي توقعاتكم 😂👀🩷🩷🩷🩷🩷

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

انا العايش على عيونك.. انا المايدري وين يروح من دونك ♥️!

━━━━━━ ♛ ━━━━━━

-انتِ تخبلتي رفل تخبلتييي!!

-رفل: لا تخبلت ولا شي انتِ المخبلة الكاتلة روحج على ارمل وعنده بنات ثنين

-حبيبة: عمي ماريد مااريده بعد بهالطريقة ماريده!

-ليلة: بس فهميني شلون اقتنع؟ منتصر دكتور يعني دارس وفاهم ومثقف مو زعطوط تجيبه وتودي حچاية

-رفل: بعدني ما قنعته بس گال راح يفكر بالموضوع

-حبيبة: صخااام ولطاام بوجهج يا حبيبة راح تعادين اخوتج ويه ابن عمهم ياا حبيبةةة

-رفل: لا يتعادون ولا شي ومنتصر مو اكيد يسويها هو صح انا گتله النهوة شي وقتي ويگدر يفكها وره يومين من الخطبة وتنتهي هالسالفة وما يتأثر ولا انتِ تتأثرين بشي حالچ حال الااف البنات النهوا عليهن ولد عمهن من اجه غريب يخطبهن

-حبيبة: احنه مو هيج رفل!! ابوي ما يرضى لا بالنهوة ولا الفصلية لان ثنينهن حرااام وتقلل من قيمة البت واهلها!

-ليلة: چا مو ابا الحسن نهى عليَّ

-حبيبة: ليلة ابا الحسن نهى عليج منا فكها مناك ما طول ساعة لان يدري بأبوي ما يرضى وراح يجيبله وجع راس اله اول ماله تالي وبالاخير ينجبر يفكها

-ليلة: هم صح

-رفل: حبيبة انتِ ليش ضايجة؟ خلي هسة راح تبين اذا هو هاويچ لو ما مهتملچ خليج مرتاحة وحطي ايدج ورجلچ بماي باردة

تحچي ببرود ولا خايفة ولا چن راح تصير طرگاعة لو نهى عليّ منتصر اووف منج يا رفل شگد گوية عين.. عفتها ورحت اگعد وحدي اتصفن وافكر شني تاليتها؟ منتصر صدگ ينهي عليَّ ويعادي ابوي واخوتي لو ما يجازف بعلاقته بيهم؟

تعبت من الفكرة وجسمي كله صار يرجف، جريت بطل ماي اشرب ونصه تبده عليَّ من الرعشة، سديته وحطيته على جهة والافكار تروح وتجي بعقلي.. گوة كاضة روحي ماروح اسولف وياه واگله ما عليك من رفل هاي ما تعرف عواقب فعلته شني بس من اتخيل يجوز بسبب عملته نهايتي اصير مرته وببيته ابرد واسكت..

نفضت عقلي بلكي انسى وطلعت موبايلي اگلب بالاشعارات مال صديقاتي، امي ما خلتني اكول لاحد اجيت للشمال تخاف من العين بس حور گلتلها وفتحت رسايلها..

"حور: ها الگاطعة شو ماكو"

"ملتهية والله.. شلونچ خية"

"ضايجة بدونج"

"يله كله يومين ونرجع ان شاء الله.. بشريني بس لا العصبي هم تعارك وياچ من رجعتوا للبيت؟"

"ههههههههههههههه"

"شو تضحكين"

"ما تعارك هههههههه بالعكس"

"چا شسوه؟"

"گالي حور هاي حبيبة شگد وكحة عبالك امير ودا اسولف وياه الفرق بس هاي بنية وصوتها ناعم وجميلة كلش"

فكيت حلگي اتخيل الجملة بصوته خرب عرضج حور ولا عدها بريك وكلشي تسولف ما تهتم..

"اخوچ السلنگح ما يستحي شون يعاين على اخت صاحبه"

كتبتها مبتسمة شافتها وما جاوبت حسيت چفصت وخاف تضوج عبن گلت عليه سلنكح بس صدمتني من كتبت..

"ههههههههه يگول لعد اغمض عيوني"

"ولج كلتيله؟؟؟؟"

"كاعد بصفي والله هو شافها اني معليه"

"خايبة شبيچ لا تخلين اخوج يقرا محادثتنا"

ما جاوبتني كتابة دزتلي بصمة فتحتها وضحكت من سمعتها..

"حبيبة اني شعليه هذا حاكم فضولي ومو اگوله لا تباوع بتلفوني يگول اخاف عليج من صديقات السوء"

"وانا صديقة سوء؟"

رجعت جاوبتني بصمة بس هاي شوي طولت بيها، فتحتها وشهگت من اجاني صوت حاكم يگول..

-صديقة سوء لانچ تعليمها تخبي على اخوها ليش ام بجامة المطي ليش هيجي؟ مو اني اعرف اخوج حباب وخوش رجال ويحبني انتِ شبيچ شايلة سيف عليَّ وتتعاركين كلما مريت من يمچ

-حور: حاكمم عوفها كافي

-دزي البصمة حور

-ما ادزها عيبب

-دزيها دزيها

-ماا ادز

-جيبي اني ادزها

وخلصت البصمة واندزت الي، كتبتلي حور وراهة بسرعة..

"اسفة ما سيطرت عليه مو هو عصبي"

ضحكت على سوالفها وضميت موبايلي بجيبي ورفعت عيوني على صوت رقية وسكينة بنات منتصر جاياتني يركضن وبيدهن تفاحات معضعضات، ابتسمتلهن وفتحت ايدي هالسفرة صايرات يحبني فديتهن..

-حبيبة حبيبة حبيبة

-ها يا روح حبيبة

-رقية: ابوي يگول.. يگول.. يگول اءء يگول.. نسيت

-حبيبة: هههههه يلا چا ختولي

-سكينة: لا لا ابوي يدول من نرجع للبيت سبحينا ميخالف؟

-حبيبة: من عيني هاي گبل هاي غير تدللن عليّ

-رقية: اي صاح هيچ گال.. لان عمة ماكو انتِ صيري بدالها عادي؟

-حبيبة: طبعاً عادي

-سكينة: بس شلون

-حبيبة: شنو شلون؟

تقربت مني وهمست بأذني وطبعاً ترستني تفال بس ما اهتميت للتفال بگدما اهتميت من كالت..

-سكينة: عمة هدية تدول حبيبة مو حبابة وما تحبتم (تحبكم) وانتم لا تحبوها ديربالتم (ديربالكم)

-حبيبة: هدية هيج تعلمچن؟؟

-سكينة: اي تدول عنچ مبتوته

-حبيبة: شنو مبتوتة؟؟

-رقية: يعني مبخوتة

فكيت حلگي مصدومة وهنه وحدة تباوع للثانية ويهزن بروسهن، شگد ردتهن يحجن بعد ويسولفن عماتهن شني يعبن براسهن بس قفلن ما قبلن يحچن شي اكثر وبقن يعضعضن بالتفاحة..

شگد ضجت وحزت بنفسي ليش يعبن براس جهال صغار وهسة عبنهن ما موجودات بساع حچن ونسن توصيات عماتهن.. ماعرف ليش بنات عمي مرتضى الوحيدات من بنات عمي ما يحبوني ودومهن يبسمرن بيه خصوصاً هدية وصفا يكرهني كره العمه واكثر من مرة سمعتهن بأذني يحاچن عماتي عن دلال اهلي الي ويگولن لا تنطوها عين زايد لا تكسر وجوهكم بعدين..

**

-رجلي ااه رجلي

-وين توجعج وين؟

-تَـمني: هنا شوف هنا اووي ورمت باوعلها

كف شوية من البنطرون ومغطيني بكل جسمه مع العلم احنه بختلة ضامتنا شجرات صغار ومصطبة، تلمس رجلي بأيد ومركز بكل حواسه يقارن بين رجلي اليمين واليسار..

-تَـمني: اكو ورم مو؟

-لا

-لا اكو!!

-ماكو نوومه الحمدلله يعني ان شاء الله مو شي خطر

-خطر واتوقعها كسر

-لاا خالوو كسر شني

-امير متوجعة

-يا بعده شبيدي عليج

عصرت عيوني اريدهن يدمعن بس يربي ماكو مدا تنزل الدموع بعد بردت، ماعرف شجاني وشلون اجه على بالي اكول رجلي انلوت بس من انتبهت عليَّ سلوى عيوني وره الامير ورفل وبدون لا احس الدموع تنزل ميتة من القهر اخترعت وسألتني شبيچ گدام الكل وما اجه ببالي غير جملة "رجلي انلوت" وطگيت من البچي وراهة مفرفح گلبي..

گام جاب بطل مي بارد كلش وحطه على رجلي يعني فوگ برودة الجو ورطت روحي برجل ملتوية ولازم اتحمل برودة مضاعفة عليها حتى ما افضح روحي!

-تَـمني: يووجع ماريد ماريد

-لازم تَـمني خاطر ما يصير تمزق

-لا ميصير نحطلها شي بارد مو زين امير وخرها

-لا عليج علي؟ هاي وانتِ اختصاص رياضة ما تگليلي شتسوين من ترحين للجامعة

-احط حمرة حمرا واصور

-خرب راسج وراس حمرتج

-عادي المهم صوري تطلع حلوة

ذب حسرة يدردم معترض على تفكيري وثواني ورفع راسه خازرني، هزيتله راسي بمعنى شبيك وفاجأني من گال..

-انتِ تطلعين من البيت بلا حمرا! ترحين هناك تحطيها؟؟؟

-هاا

-وجعاا

-لا تعصب حباب، اصبر وافتهمني امير

-امير لو صبر عليج بعد شوي يزين شاربه ويگعد يم امه!

-احس دتهينني بطريقة مبطنة فـ اذا زعلت لا تكول شبييچ

-واذا نتفت شاربي اليوم لا تكولين ليش ملطت روحك

-تملط روحك علمود حمرة حمرا؟ مع الاسف عليك شيخ المستقبل شلون تكعد بالديوان بشوارب محفوفة

عطت من لزم راسي يخضه ويودي منا ويجيبه منا وصار يضربني كلات خفيفة ويرص على اسنانه متحلف..

-وولج انتِ وووولج

-راسي راح ينگطممم

-ما ينگطم وارتاح منج

-الله وماكو بعد تَـمني بحياتك

-سكتي اشش

-لا تأشأشني

-سكتي ولج

-ليش تسكتني

-هسة غير تنلصممم

-عيب تلصمني

لزم شفايفي بين اصابعه يطبگهن وحدة على الثانية وخزرني عود سكتي، حركت چتافي بمعنى ميهمني ووخرت ايده من حلگي وسندت ظهري على المصطبة..

-بعد ما اخاف منك

-لا صدگ

-والله اصلاً متسويلي شي حتى من اضوجك

سكت يتنهد وسند ظهره يگعد بصفي، طبگ رجل ومد الثانية واخذنا الصمت محد بينا حچى شي لا هو ولا اني.. كل دقيقة تمر اگول هسة يگول شي بس ماكو مرت اكثر من عشر دقايق وهو على وضعه ما تحرك ولا فتح حلگه..

-احم

حمحمت اجذب انتباهه واشرتله على رجلي وگلت بتردد..

-رجلي توجعني

حرك راسه متفهم وگام من مكانه، رفعت راسي اشوف شديسوي ولزمت بيده بقوة من لاحظته راح يروح ويعوفني..

-وين رايح

-اجيبلچ شي اللف بي رجلچ

هديت ايده وراح مبتعد عني، اوووف تَـمني لازم تلگين حل تكسرين البرود المحاوطكم مو برودة الجو لاا برود مشاعركم بس شلون؟؟

گعدت اعصر بعقلي افكر شسوي وشنو ممكن يجذبه؟ كلام حلو؟ لا لا اني فاشلة كلش بهالشي وبس احط عيوني بعيونه اظل اچفص واخربط تخربط فـ نستبعد هالفكرة.. زين اسولفله شي يونس؟ مثلاً شلون زوج نرمين صديقتي اخذها سفرة للعمرة ومن راحوا هناك بلغته هي حامل؟ لا لا هسة يگول هاي تسمعني تريد تسافر وبس تريد تستغلني.. زين اگله...

-هاي جاروبة مال امي طولها سبعين مترة بلچن تفيد

لصمت افكاري ويه رجعته، نزل يگعد گبالي وبيده جاروبة سودة ثخينة وطويلة كلش متنعرف جاروبة لو كالون هاي.. اخذ رجلي بين ايده ولف الجاروبة عليها الله شعور يجنن ورجلي بدت تدفى..

اللتهى يلفها ويرتبها شلون الباندج وانتبهت لاصابع ايده صايرات زرگ من البرد ومن بطل المي البارد شگدما ظل لازمة وحاطة على رجلي، گلبي وجعني وكفختني مشاعر حنونة وماتحملت ما ابوسه على خده دليل الامتنان وهم بلكت نتصالح..

تقربت منه منصية اريد اسويها مفاجئة اله وبنفس اللحظة هو ديرفع راسه الي وانضرب راسه بخشمي شاااطت روحي من الوجع وعطت بصوت معزايات..

-خشمييييييييي

-خرررب ولج مادرري بالعبااس مادري شكووو حاطة وجهج يم راسيي

-ااااااه راح امووت دا انزززف داااا انزززززززف

-صووتج ولج صووتچ

-نزززززيف ددددم كل مكااااااان

-انفضحناا يالكاظم انفضحناا يااا عليييي

ما اعرف شديسوي وكلشي ماشوف ضربة خشمي اثرت على نظري وعيوني تزخ دموع وبس اشوف دم ينزل من خشمي، حسيت بي يحط شي على وجهي ويخنگني حيييل النفس گطعه تخبلت وظليت ارافس دفعته عني اعيط..

-راااااح اموووووووووت

-تَـمني بسس صوووتج

-خوية شصاير هنا ان شاء الله خير؟

فتحت عيوني ملصومة ويه صوت زلم ثنين اجه من ورايه يحاچون الامير، اشوف وجه امير انگلب ازررگ وگوة يجاوبهم شاد على اعصابه ويمسح على گصته عرگان..

-الرجال: هذا دم دينزل من وجهها؟ خوية محتاجة مساعدة؟

-الامـير علي: خالوو ماكو شي جاي اگلك خشمها طگ دم مابيها شي

-الرجال: اعذرني خوية شفت رجلها ملفوفة وملابسها ووجهها كله دم وسمعتها تحجي عراقي واخذتني الغيرة عليها

-معذور ورحم الله والديك

عافونا وراحوا وامير لو اطخه ينفجر عليَّ ويطيح حظي هنا فـ قررت ابلعها واسكت لا انفضح بالزايد.. طلع كلينس من جيبه وحطه بحضني اخذتهن ومسحت خشمي المدا يوگف نزيفه انخبصت وانترست دم ماعرف شسوي..

-رفعي راسج

خفت ارفعه سامعة هالشي مو زين فـ بقيت منصية وامسح بي، ماتحمل ينتظرني اكثر ولزمني من فچي ورفع راسي غصب وضغط على خشمي بالكلينسة ويستغفر طالعة روحه..

-شجاچ ما تگليلي شجاچ

همهمت متوجعة ومقهورة ليش مدا تضبط ويانه وتخرب بكل مرة؟ مو حالة هاي تره ومادري ليش عقلي راح لغير مكان وتذكرت يوم العقد مالتنا..

-امير

-نعم

-سحر المحبة دينگلب ضدنا

-ااخ يا تَـمني

-احنه بعدنا متزاعلين؟

نزل عيونه عليَّ ورفعت عيوني اله ابتسمت بين دموعي تحرگني وما بطلت تدمع، لزمت ايده الفوگ خدي وهمست بخفوت..

-خلينا نرجع اصدقاء

-خ** على الاصدقاء

-لعد نرجع اخوان

-تَـمني سكتي لا تجلطيني سكتي

-يااا لعد شتريدنا

-انا زلمة ما تمشي وياه اصدقاء ونعولة غير الحبايب ما اريد

سكتت وكالعادة مثل الغبرة لساني لو ينبلع لو يظل يچفص مثل الغبية..

-بردت

-وبردتتهمم

-امييييير

وخر مني جزعان ونزع جاكيته وحطها فوگاية، گعد بصفي منفس ورغم الاجواء يمنا متوترة بس ماعرف ليش ضحكت على وضعنا.. اني كاعدة ملوية رجلي بالچذب وخشمي يبس الدم عليه ولابسة قمصلة رجالية شكبرها وهو گاعد بطرگ البلوز ابو رگبة الجوزي وراح ينفجر من الضوجة..

-تَـمني: هههههههههههههههههه هههههههههههههه

-تضحك الفاهية

-ههههههههه امير انتَ ملاحظ شي

-ماريد اللاحظ أي شي

-اووووي امير هاي شبيك منفس

-فشيني بطريقتج

-اوكي

تقربت منه وبحركة سريعة بسته بخده ورجعت لمكاني اضيع عيوني عنه مستحية، عضيت شفتي اللعب بأظافري وافرك بيدي متوترة من ردة فعله ومنتظرته شنو راح يگول بس ما گال لان بنفس السرعة البست خده بيها لزمني من وجهي وباسني بنفس الطريقة وطول بيها لدرجة جسمي كزبر من شمني ونزل يوزع قبلات خفيفة على باقي وجهي..

-اشتعلت روحچ الحارمتني منچ

گلبي ينبض بجنون والنفس بده يضيع مني خفقان قوي تعبني وقربه الي اخذني لغير عالم.. لوما هو منتبه لمكاننا ويخاف لا احد يجي ويشوفنا ومبتعد چان اصلاً نسيت اني وين..

وخر مني يمسح على لحيته وشواربه وغمض عيونه يهز براسه محترگ، تحسر يزفر نفس قوي ودور على الڤيب بجيبه بس القديمة عند رفل فـ طلع وحدة جديدة من الباكيت وقبل لا يحطها بحلگه لگفتها من ايده واخذت منها نفس..

فتح عيونه مصدوم من حركتي واني مصدومة من نفسي بعدها ما مشتغلة ومابيها دخان ما اختنگت بس تصرفي چان متهور وما فكرت بي بس ظلت بنفسي اسوي هالحركة وسويتها اخيراً..

-ايا بت الـ... الحلو!

-بنفسي اجربها شيخي

ضحك وبعده فاتح عيونه متفاجئ، استحيت من نظراته واحترمت نفسي ورجعتها لحلگه جر منها نفس وهي بعدها بيدي، انتظرته يزفر الدخان بس بلعه وطلعه من خشمه..

-لك اوووف

فكيت عيوني مصدووومة من كلمتي وهو هم طگها بضحكة عالية كللش عزا العزااني على هالجرأة! لا لا اني ماكدر ابقى كاعدة هنا اكثر راح انفضح.. گمت من مكاني اركض بعيد عنه وهو يصيح عليَّ..

-ولج چاا ورجلچ!

-هاا هاا تذكرت آآآآيييي رجلي

-ايا ملعوونة

-رجلي امير اوووي ماكدر امشي ماكدر

-رجلها ام الكلاوات ما تكدر تمشي سوودة عباة امي

بقيت امثل دا اعرج وفلتت منه بالعة ضحكتي اختنگت، رجعت يمهم والكل انخبص بيه شلون صرتي وشلون صارت رجلچ والامير يباوعلي ومضيگ عيونه..

-تَـمني: اي متت وجع بس بعد قدر وصار الحمدلله

-حنين: شجاچ ماما الحمدلله والشكر من عدت على خير

-زهرة: عوينة خيتي اجتكم ووگعت بالفرخة سودة عليّ

-حنين: اي والله يجوز

-الامـير علي: من نرجع ذكريني ابخرچ امنية

-تَـمني: عن الحسد؟

عض على شفته ونصى عليَّ يسوي روحه يريد ياخذ بطل المي الي بصفي وگال بصوت ناصي..

-خاطر ما تنحسد صلافتچ

-اميرررررر

-خايبة انا همستها همس وانتِ فضحتينا

-ابتسام: ههههه شعدكم ولكم هاا تضمون علينا موو

-علي الكـرار: اگلچ يوم..

-رسمية: بالعبااس يا كرير لو كلت زوجيني هسة ادچك بهالسچين

-فراقد: اسم الله على الوليد رسمية شمالج

-رسمية: اي والله مادري شصابني اسم الله عليك يبعد امك تعال حبوبي بحضني

حضنته وبوسته وقرت على راسه وشالت السچينة وضربتها بالگاع ثلاث مرات وشمرتها بعيد، فروا بيدهم باقي الولد وعلي التقي گال..

-يمة لا تخافين على حبوبچ العار عرج ما يصيبه

-زهرة: اسم الله عليكم يمة لا تحچون هيج

ظلوا الولد يداهرون بعماتهم و گعد امير بصفي، مد رجله وعگد حاجبه يسوي روحه متوجع..

-اااخ اااخ رجلي ااخ

-تَـمني: لا تقلدني يا مقلد

ضحك خفيف وگال بغمزة..

-هاي بعد نحب نقلد الحلوين

-على طاري التقليد انتَ منتبه لملابسنا

نزل عيونه مستغرب باوع للبلوز مالته وباوع لملابسي، هو لابس بلوز رگبة عالية لونه جوزي واني هم وفوگاه لابس هو قمصلة جلد سودة واني لابسة جاكيت طويل اسود..

-يا مقلدة

-هاي بعد احب اقلد العيونهم چقل

ضحك يرجع راسه ليوره وضحكت على ضحكته اضم وجهي بقمصلته، ما انتبهت بالكل مركز ويانه الا من صوفروا سور ونور وحيدر الي حچى بيناتهم..

-حيدر: عمي امير مرتاح يم بعض الناس وبس يمي عاگد نونته

سكت امير عن الضحك يمسح على وجهه ويعدل حواجبه مغلس على نظرات الكل، رجع گال حيدر بأبتسامة لواگة..

-عمي چا ما تضحكنا وياك

-علي الدر: انتَ شني ولك شكو مدخل روحك بيناتهم

-حيدر: بوية مو روحي طگت انتَ سفرتني علاج وعمي امير اجه وياي وگضاهة بس معصب ويتعارك ويه الممرضات

-علي التـقي: يتعارك ويه الممرضات ليش؟

-حيدر: يردن يساعدني ابدل ملابسي وهو ما يرضى هسة يا عمي انتَ لا ترحم ولا تخلي رحمة الله تنزل علينا

-علي الكرار: لا امير لااااا ما حبيناها منك

-علي النور: ليييش تگطع سبيل المعروف اموري صدددگ چذب انتَ التعلمنا على المساعدة

-حيدر: اي بعلي وشون چانن مؤدبات عمت عليهن يشگن الراس شگ

-علي الكـرار: مؤدبات ويشگن الراس شگد ما يتناسبن بجملة وحدة حويدر

-حيدر: يتناسبن والله شني السالفة لو شتكولين يوم؟

-ابرار: بكيفك يمة

-حيدر: اي هذا هو يتناسبن

-علي النور: اشرحلنا عنهن اكثر حيدر يعني شني گالن شون يحچن

-علي السور: انا اسولفلكم.. طبعاً هنه شني شگر حمر والعيون زرگ والوجه چركاية والخد گيمر عرب والايد...

-علي التـقي: انتَ جاي توصفلنا لو تجوعنا؟

-علي السور: اي والله يا خوية هناك معمل كيك وكله يحچن وياك هلوو مستر وهلوو سير

-علي الحـق: اكيد چان قصدها سير نعال مو؟

-حيدر: بالضبط نعم صحيح

-ابرار: ههههههه

كلناا اللتفتنا على صوت ضحكة ابرار ولا ارادي انرسمت الابتسامة على وجوهنا، صار اياام مفتقدين صوتها وضحكتها ابرار موجودة بس مموجودة بس هسة فعلاً حسيناها ويانه ومنتبهة لابنها شديكول..

دمعت عيوني على علي الدر شلون يباوعلها وفرحاان ومكيف على ضحكتها صار يوزع ابتسامات للهوا والله تمنيت انبهه واراويها شلون سعيد لانها ضحكت وتبطل تشكك بحبه الها..

-علي النور: وعلى شرف ضحكة ابرار يگول ابو شادي الزبنطوطي الضحكة الحلوة ما تجي الا من حلگ ........ لا لا بطلت ما اكمل لا يكتلني علي الدر

-علي الدر: لا كمل

-لا ما اكمل

نزع حذائه علي الدر وگام متحلف..

-علي الدر: بعلي الا تكمل!

-علي النور: وعلي ما اكمل وقندرة فوگ ابو شادي الزبنطوطي الصايع

-علي الدر: اليوم قندرتي اگطعها علييك وعلى ابو شاددي البر****

فلت نور يركض وعلي الدر شال حذائه وشمره وراه بس ما لاحه، ضحك علي النور فرحاان وصار يدبچ ويرگص بمكانه يضحك ويهوس لروحه على هالانتصار..

-علي النور: كلللووووششش مااا لاحني وكللوووش ماا لاحنييي

گامله شيخ علي يصيح عليه فضحنا بين الناس صارت الدنيا كلها تباوعله ويضحكون وعلي السور يسويلهم حركة "اهدوأ" بأيده ويگول..

-ميخالف ميخالف عذرونا عنده مرض اسمه طيف التوحد الالنگي عمت عيني عليه هواي تعبه

وتجاوبه وحدة من العجايز الگاعدة على بُعد عننا..

-ياا يمة شون شاب خطية ما تشوفوله چارا

-حيدر: والله خالة عمي امير حاول يگشرها بس ما رهمت بلچن ياخذه لشريفة بت الحسن دخيل اسمها عسى يثگل شوي ويرجع ادمي

-فدوة لاسمها اي يمة لا تخلونه هيج

انهارينا من الضحك البنات صارت وحدة توگع على الثانية انوب العجايز مصدگات ويگولنله شلون يگشرون عقله وعلي السور گعدلهن ركبة ونص يفهمهن هذا مرض العصر الجديد..

-علي الحـق: ههههه شگد ادبسزية ذولة

-تالة: هههههه اني بس شغلة وحدة لاحظتها ان من تعاقبوهم لو تتعاركون وياهم ميزعلون بالعكس يضحكون ويلزگون بيكم اكثر

ضحكوا الولد يهزون براسهم وجاوبها علي البدر..

-ماكو زعل بين الخوان واحنه نداهرهم عبنهم بزر گعدتنا ونتونس على سوالفهم

-علي التـقي: سور ونور ولدنا ربوا على ايدنا لحد هسة اتذكر من امي گالت حامل بسور علي الحق شسوه هههههه

-علي الحـق: اسبوع انا هاج من البيت استحي أعاين لوجهها

-علي الكـرار: وختمتها من حبلت بـ علي النور گعدتنا من النوم تلطم و تزلغ بخدودها وتگول گعدو ولكم گعدوو امكم الغبرة حاامل گعدوو

-علي البـدر: الله لا يعوده ذاك اليوم ابا الحسن شوي وينجلط والزهرة

ضحكنا كلنا وعبالي ديتشاقون بس طلع صدگ ابا الحسن تخربط من الخبر ونقلوه للمستشفى يركضون بي يگولون ارتفع ضغطه وبوكتها زاعل امه ميحچي وياهة..

-رسمية: ويلادي شبعوني رزايل بوكتها طايحين الحظ

-ابا الحسن علي: يوم چا سور مشكل بصدرچ وواحدنا زلمة خاطة شواربه وتجينا تگليلنه حامل مرة ثانية شني منتظرتنا نهلهلچ؟

-فراقد: چا فايخة شني على گلبها امكم گاعدة ومترندحة وتزق بهالويلاد واحد وره الثاني

-ابتسام: شلون ويلاد جابتلنا فدوة لطولهم وشهامتهم عاشت ايد الربتكم يا يمة والكبرتكم.. طلبكم ابوكم من علي ورادكم تمشون على نهجه سلام الله عليه

-علي التـقي: بعد روحي عمة

-شيخ علي: اااااخ ظهرري ااااخ يا بوية ظهرري.. درر بدددر

فزينا على صوته وگاموله الولد كلهم يركضون يشوفون شبي، رفل عوجت حلگها وهمست بيناتنا..

-ما عدت دقيقتين وطگو ابو الويلاد عين شلت ظهره

-عبق: فاطمة بت عمة زهرة فد دقتنييي

-تَـمني: شسوت؟

-عبق: موتتني من البارحة لليوم تبسمر بيه وتگول گليلنه عد منو سويتي السحر واخذتي علي الحـق هي تحجيها بالضحك بس هاي خامس مرة تعيدها عليَّ

-ليلة: ختولي هاي خية عينها ضيجة عكس امها

لملمنا المكان ورجعنا للسيارات وره ما ارتاح عمو علي شوية خطية صار عنده تشنج بظهره وتأذه بسببه، رجعنا للڤلة وطبينا ويه صلاة المغرب بسرعة الكل راح يتوضى ووگف عمو علي يصلي بينا جماعة.. وگف ليگدام وولده تسعتهم وعاشرهم حيدر على الكرسي وراه وباقي النسوان خلفهم..

ابتسمت من كملنا صلاة المغرب والولد صاروا واحد يصافح الثاني بدوا من شيخ علي وعلي الدر ونهوها بين حيدر وعلي النور وكلهم بدوا يسبحون بيدهم ويه ابوهم حبيبة گالت اسمه تسبيح الزهراء..

تنهدت مرتاحة وبدون لا احس حطيت راسي على كتف حبيبة وجريت ايدها لحضني، نزلت راسها الي وهمست..

-ها معتي؟

-هممم

-خية موعي على اخوي مو عليّ لا تتيهين

-عابت

وخرت منها وگمت اكمل صلاتي نسيت الجماعة وبعد ماكدرت اگطعها ظليت واگفة هيج بيناتهم چني شمعة فگر والكل يتفرج عليَّ واسمع حيدر يسأل كرار..

-حيدر: اگلك اخواننا ما يتعبون من يچتفون بالصلاة؟

-علي الكرار: والله مادري ما مجرب اسأل تالة

-حيدر: تالة لو عمة ههههههههههه

-تالة: متضحك تره.. ولا منتعب

-علي الكرار: عذرينا تالة هذا هم لاحه طيف التوحد اللالنگي

ضحكت تالة واني بقيت اصلي حتى ماعرف شدا اكول من الخجل يمكن حتى شيخ علي ديباوعلي هسة ويحسبلي ركع..

كملت شلون مچان وركضت للغرفة بينما همه كملوا صلاة العشاء جماعة، اخذت منشفة ودخلت اسبح كملت بسرعة خاف يخلص مي الحار وغيري يريد يسبح وطلعت ابدل..

لبست فستان اسود بينصل وسترة صوف فضفاضة توصل لنص الفخذ فوگاه سودة ومقفلة بأبيض، نزلت اللبس جواريبي الصوف الحمر ولفيت شال جرجيت اسود على شعري ولاا اسيطر عليه يظل يتمزلگ والكب مادري وين يروح.. مادري شوكت اضبط الحجاب مو بزعت روحي من روحي..

رجعوا البنات وهم اللتهن يبدلن راح نطلع نتعشا بمطعم راقي على ذوق سور ونور يردون مكان بي صاكات وطبعاً هم گاملهم شيخ علي يهددهم بعصاته وتخبوا بظهر الامير..

-عبق: تَـمني اريد مسكارا منج

-حبيبة: خاطر حق يملص عيونج كعدي

-عبق: هم صدگ واني مالي خلگ نتعارك اليوم وافرح فاطمة بت عمة زهرة

-تَـمني: بنات احد شاف وين حمرتي الحمرا؟ نفشت الجنطة نفش وماكو

-حبيبة: احاا انوب الثانية تريد تگببها اليوم وتجلط اخوي

-تَـمني: لا احطها خفيف اسويها طبيعية بس لان جواريبي حمر تطلع حلوة

-رفل: انا بحياتي ما شايفه حمرة حمرا تصير خفيفة هاي بس عد تَـمني

نفخت بوجهها وگمت ادور بالجنطة الجبيرة بس ماكوو مالها اثر، دورت بجنطة تالة خاف متخربطة وصايرة عدها بس هم ماكو طلعت من الغرفة ورحت للامير اطلب جنطته هاي اكيد حطيتها هناك اني من رتبت اغراضنا اليوم الظهر.. شفته گاعد بالصالة يشرب چاي ويسولف ويه ابا الحسن..

-امير تعال شوية حباب

صحتله على كيفي واشرتله يجيني، نزل الاستكان من ايده وگام يرجع موبايله بجيبه واخذته ويايه للمطبخ نحجي..

-ها تَـمني

-احم.. باوع بس مو تعصب تره سؤال عادي جداً جداً

-الله يستر من سؤالچ

-شفت فد شي لونه اسود وطويل واگع بجنطتك؟

رفعلي حاجبه مستفهم يربي شلون راح اگله حمرتي الحمرا يمك لو لا يمكن يشمرني من الشباك لو گتله..

-شوف هيج يصير قلم اسود ومكتوب عليه بالاحمر كتابة انكليزي

-ما شفت

-ها؟

-ما شفت، شني قلم اسود ومكتوب بالاحمر قلم جاف هو

-يوووه امير حمرتي الحمرا هاي

-ما شفتها

-احسك كذاب

-ما شفت خالوو ليش اجذب

-اوووف خربت كل الستايل امير كله من وراك ومن وره عرضتك

-انتِ لو تالة تعورت صحتي كله من وراك

-عوف تالة وگلي شنو اسوي هسة؟

-تَـمني

-ها

-انتِ ليش تافهة بوية؟

-حراااام عليك

صم حلگي بأيده ونتر بصوت ناصي..

-خررب صوتها ينوص وشعلوه

وخرت ايده مني وعفته اطلع من المطبخ ورجع جرني، باوعتله منتظرته يسولف شفته كأنه يريد يكول شي ومدا يعرف يكون الجملة..

-شنو شبيك

-هم راح تحطين هاي الخرابيط على وجهج؟

-يا خرابيط؟

-اقلام الجاف

-اكيد قصدك حمرة و اي راح احط بيجي شسوي

-لا بيجي شني چن مطلعيج من الگبر بكفالة

-لاا امير والله كلش يلوگلي اصلاً احلى لونين عليَّ البيجي النود والاحمر كل صديقاتي يگولن

-لا مو حلو وحرامات تخربين شكلج

-زين احط وردي

-لا وردي شني چن ماكلة علچ بوبي

-يااااا

-والعباس مو حلو

-لعد اخلي جوزي من هذا الـ...

-جوزي شني؟ ماكلة ككو وناسية تغسلين؟

-كافي امير خربت واهسي

-امنية ابوي انتِ ما تحتاجين لا وردي ولا احمر انتِ من الله حلوة وتجيبين التايه ليش تخربين وجهچ

-لعد التايه غير ادلي امير هم خطية؟

بعده ممجاوبني وفلتت نفسي منه وشردت اضحك، عفته يعيط ويهدد بصوت عالي بالمطبخ وحدة..

-بالعبااااس امسسحه لو شنيي يصير لونه احمررر اصفررر ينمسح يعني ينمسححح وبطريقتييي خووب ما يحتاج اعلمچ بيهااا

عفته ودخلت للغرفة على ضحكتي وسكتت بسرعة من شفت النسوان كلهن يباوعن عليَّ وسلوى تعوج بحلگها وتفر بيدها معاجبها العجب مادري شوكت يجي يوم وتنعجب بشي غير بنتها هاي.. قررت فعلاً ما اخلي حمرة هالمرة على گولة حبيبة خفت لا ينجلط وما ردت اضوجه زايد فـ تنازلت هالتنازل العظييييم!....

**

-طاااااح حظكم طااااح حظكم من خلفة انااا الله بلاني بيكم بلوووا الله لااا ينطيكم يا بيت عليي يا كفاار يا زنادديق ياا راعين الملاهي والحاتات الله لا يوفقكم لعبتوا بحالنا وكسرتوا ظهروناا

-سلطان: يمة تعبنا كافي رحمي بحالنا بسچ ما مليتي صارلهم اسبوعين من ردوا من الشمال وبعدج تنوحين

-صابرين: املن؟؟ لا بالكاظم ما امل واظل گومة گعدة ادعي على بيت شيخ علي وعلى ولدي المرعبلين!

-زيد: يوم جاي نگلج ما گدرنا نسوي شي الولد اربعة وعشرين ساعة محاوطين بنياتهم ما عافوهن ولا دقيقة ما گدرنا حتى نتگرب

-صابرين: انتَ انلصم وينه غفاار وينه العاار وينك ولك طلعلي وجهك اعاين عليه خاطر اتفل بنصه

-غفار: سمعي من الاخير ولا تدووخيني انا گلبي موجر منهاا ومطيحة حظي متشيخة على راسي عبنها تشوفني عاشگها بس انا اعلمها لووما كسرت جناحهاا وگعدتها يمج تخدمج ما يطلع اسمي غفار

-صابرين: ههههههههههههاايي سمعتها من سنتين يروح امك سمعتهاا وما شفت غيرها الكسرت جناحك وخشمك

-غفار: الا انهي عليها وانعل والديها بسيطة

-عاصف: اگعد ولا تفشلنا وتفشل روحك اگعد

-صابرين: لاا ليش يكعد چا حگه ابن عمها ورايدها رووح انهي عليها يمة

-عاصف: يروحلج كامل يرجعلچ وصل وصل وبكيفج بعد

-صابرين: ولك انتَ هم الك عين وتسولف ولك عويصف؟؟ العار ابن العاار فوت شوون رمانة وحطهاا بحلگ الامير! يا اغبر بيت شيخ كوشووا على كلشيي خذوا مرت نعمة العار وخذوا فلوسه وبيته وكل املاكه وانتَ كاعد هنا مگابلنيي!

اسمعهم وروحي طگت من طاري بيت شيخ علي وحسد اهلي عليهم، هاي يومية احنه على هالرنة تعبنا ولعبت رواحنا.. صار اسبوعين من رجعوا زيد وغفار من الشمال علساس مسوين خطة مدري شني خاطر يحاچون حبيبة مادري يخطفوها والله مادري شني الخريط الرادوا يسووا بس فشلوا واصلاً گبل لا يرحون چنت اعرف راح يرجعون وايدهم فارغة..

طلعت من الصالة وصعدت لرهف سودة عليّ رجعت تلوب من وجع بطنها هاي تاخذلها چم يوم تصير زينة وترد توجعها، المسكينة بطنها انترست علاجات وحبوب ومرة وحدة ابوي جابلها طبيبة وحلف ما يكررها..

نزلت لابوي بلچن يلين هالمرة ويقتنع ناخذها للمستشفى، طبيتله للغرفة شفته كاعد يگلب بموبايله وبصفه حاط تعلاگة خفت اتگرب منه لا يهفني بيها فـ وگفت بعيد عنه ونزلت راسي وصحتله..

-بوية

رفعت عيوني على كيفي اشوفنه يعاين عليّ لو لا وشفته ما اهتملي، رجعت اصيحله وهم ما عاين لوجهي اخير مرة من صحت بي عاط..

-وجعععععع ما تحجييين

-ها.. بوية اعذرني حسبالي ما سمعتني

-ليش اصمخ وما اسمع؟؟؟ اللغي كولي شكو

-بوية رهف كلش تعبانة بلچن ناخذها لطبيب لو تخلي....

ما كملت جملتي وشال التعلاگة وشمرها عليَّ الچنكال مال التعلاكة طب بعيني واحسه شخط البؤبؤ رووحي فرفحت وعيني صارت تهمل كضيتها ارفرف و ابچي بسكات..

-بت النعاال انا مو كااايل مااكو طبيببب شنييي ماعدناا شرف والزلام تكضكض بأختج

جريت نفس اسيطر على روحي لا تطلع شهگتي كدامه وانكتل اكثر وجاوبته بساع..

-محشوم بوية.. بس والله متفرگعة من القهر عليها لو تشوف حالها انتَ ما ترضاها وعلي وانتَ معروف بگلبك شگد حنين ومدللنه وتخاف علينا وما تتحمل تشوفنا مريضات وتعبانات وتجيبلنا احسن العلاجات...

تعمدت اسولف هيج خاطر ارضي غروره، سكت يسمعلي وصفن يفكر بچلامي بينما كملت..

-انا اگولن لو نجيب طبيبة هنا احسن خاطر تسويلها فحوصات ومدري شني واذا تطور الوضع حتى لو ناخذها لهذا المستوصف اليم بيتنا مال منتصر

-خووووش

-يا بعد عيني يا بوية فدوة رحتلك

ركضت على ايده بستها ومدلي الايد الثانية، بست ايده وعيني المضروبة تذب دمع، طبت امي للغرفة وشافتني فرحانة راحت لابوي كعدت على الجرباية وكالت..

-شني شكو

-مسعود: راح اجيب منتصر يشوف رهيفة شمالها

شهگت امي داگة صدرها ومبحلگة عيونها، وگفت على طولها وصاحت..

-صابرين: تحچي صددددگ مسعوووود تجيب هالچلبب يكشف على بنيتتتك

-مسعود: هو طبيب وخلي اخوتها يكونون موجودين

-صابرين: لاا انتَ تعرف ولدك بس يتلاگون ويه منتصر يتناطحون انتَ تريد تعزينا وتصخمنا؟؟

-سبأ: يمة چا شون تبقى هيج

-ختوليي عرج ما بيها دلع بنات هذا هسة اسويلها نومي بصرة تصير زينة

عاينت لابوي اتوسل بعيوني ومادري شلون ما اهتم لچلام امي وگام اتصل بمنتصر يجينا وخلاها واكفة تدك وتلطم..

-صابرين: بالعباااس لا انا اشوفنه ولا ولددي عود انتَ گابله واگعدد

-مسعود: امشي ولي امشيي بت الزمال تهدد الرعنة

عافته وطلعت من الغرفة وانا رحت اريد اللحگها ووگفني ابوي، نزع دشداشته ولبس غيرها وگال..

-اوگفي فوگ راسه ولا تخلي وحده ويه اختج

-انتَ ما تجي؟

-لا عندي شغل

انصدمت منه شلون يعوفنا ويه منتصر وحدنا واخوتي اكيد امي ما راح تبلغهم هو جاي خاطر ما تصير الحرب العالمية الثالثة هنا، قررت اغلس على الوضع وما اهتم واروح اللبس رهيفة شال وانزلها للاستقبال..

-رهف.. رهف گومي خية راح يجي الطبيب يشوف شبيچ

ما جاوبتني وبقت تلوب متت قهر عليها وجريت شال لبستها وسحلتها جوه للاستقبال، نامت بساع على الگعدة بالكاع وغطيتها بچرچف، لبست ربطتي وعباتي وكعدت انتظر منتصر..

الحمدلله بيته مو بعيد منا ما طول خمس دقايق ووصل، تغشيت بالشال والعباه ضميت عيني ودخلته من باب الاستقبال ولا اخوتي ولا امي بينوا، سلم وطب جايب وياه جنطة سودة..

-هلا بيك خوية

-خير شبيها رهف؟

طب متوجه عليها ونصى يعاين على وجهها من شاف وجهها اصفر حط الجنطة بالكاع وگعد على ركباته يحاچيها..

-رهف.. رهف تسمعيني؟ رهف؟؟

فتحت عيونها على كيفها واستغربت من شافته گبالها، فزت من مكانها مخترعة ولملمت الچرچف على جسمها مخنزرة..

-سبأ: مو كتلج راح يجي الطبيب

-منتصر: مو وكت خزراتچ هسة گولي شبيچ شصاير وياچ؟

-رهف: بطني توجعني

-بعدها؟

-اي

-وما رحتي طبيب مو؟

-لا

-ولا سويتي فحوصات

-لا

-ولا..

-خايب گتلك لا شني السالفة

ضحك مأيس من لسانها الطويل وفتح جنطته يطلع سماعاته مال طبيب، لبسهن على اذاناته وحطهن على بطنها وصدرها انتبهت على حركته البطيئة ومركز يتسمع على كيفه ويتنهد من ثانية لثانية..

گعدت على جهة منتبهة لتحركاته ونظراته بنفس الوقت، عيونه ما وگعت من وجهها وعيون رهف تدور بالاستقبال ما تخليهن عليه الا من همس بأسمها واللتقت نظراتهم.. صفنوا واحد بوجه الثاني لحظات وعكس عينه منتصر منها بساع مرتبك وضم السماعة بالجنطة..

-منتصر: احم.. بلا زحمة تكدرين تجيبيلي ماي سبأ؟

-اي صار

كمت بساع حضرت الدولكة والكلاص وحطيتهم بصينية وخذيتها الهم، وگفت بالباب ما طبيت من سمعتهم يبسبسون يحچون بشي ويه بعض، ركزت وياهم بكل حيلي وگدرت افتهم شجاي يسولفون..

-تتمرضين من عنادج

وهي تجاوبه بضوجة..

-معليك انتَ

-صيري ادمية وجاوبي زين لمرة وحدة بحياتج

-شتريد منتصر؟ شبيك اجيت خاطر نتعارك لو تعالجني؟!

-مو شكول نعمة وحگ هو علي

طبيت للاستقبال انطيته الماي خذاه وشرب ثلاث كلاصات واحد وره الثاني فحطان، اعاين على اختي متوترة وتلعب بطرف الچرچف وتبلع بريگها حسيت بيهم مو طبيعيين واكو حركة غريبة بيناتهم..

-منتصر: تحتاج تحليل بس على الاغلب عدها رمل بكلاتها هذا سبب وجعها، راح ادز رسالة العلاج لعمي مسعود يجيبه و خليها تكثر من شرب الماي والسوائل كشكل عام

سد جنطته وشالها بدون لا يعاين لوجهي وگام يريد يطلع وعيون رهف وراه تركض، بعده ما خاطي خطوة برة الاستقبال وصاحتله..

-منتصر

وگف بمچانه يسمعلها بدون لا يلتفت عليها، نزلت عيونها على الچرچف البيدها وگالت بصوت ناصي..

-بوسلي رقية وسكينة

رجعت عيوني عليه شفت ملامحه العصبية تتغير وابتسم بس خفاها بساع وطلع من البيت، فكيت حلگي مصدومة ذول شبيهم ما جاي افهم سالفتهم؟

-سبأ: ولج رهيفة

-رهف: نعسانة راح انخمد

-ولج گووومي حاچيني

-نعسانة نعساانة

لفت راسها ونامت خرب حظج رهيفة راح تخليني افكر بيج واألف قصص بكيفي، عفتها نايمة ورحت اسويلها عصير برتقال وحطيته بالثلاجة.. عاينت للساعة عبرت الاربعة العصر واليوم ثنين معقولة اشوفه على النهر منتظرني لو مثل كل ثنين اروحن وارجع خايبة ما اللگاله اثر..

حطيت امل واحد بالمية يجوز يجيني وقررت اروحن ما دام امي واخوتي ملتهين يشنون حرب على بيت عمي علي، لبست عباتي على راسي وطلعت من البيت متوجهة للنهر، امشي وادعي بجاهج يالزهرة كون اشوفنه ولو من بعيد..

وصلت للنهر وشفته فارغ مثل عادته بهيج وكت، گلبي وجعني والحسرة ترست گلبي.. من يوم حادث حيدر لهذا اليوم انا ما شايفته لا يجي ولا يتگرب من النهر وانا مثل المطية مثل الغبية كل ثنين انتظره! انتظره مثلما انتظرته عمرري كللله!

افتريت بالمچان عسى اللمح طيفه وافكر بي.. من يوم دافعلي وانا بت السبع سنين من عيبوا على وجهي المچلح ولد عمي ناصر وطگهم لخاطري وانا گلبي اتسودن وتعلگ بي.. ما انسى شون وگف بصفي بيومها ومسح على گصايبي وگال..

"لا تهتميلهم ذول الحيوانات واحدهم وجهه وجه القندرة حشى خلقة الله ويعيب"

اتذكر من ضحكت خجلانة وشون غطيت سنوني المتكسرة مستحية منه، اتذكر من ضحكلي وطلع من جيبه چكليته ومدلياهة ينطيني وگال اكليها بسكات ولا يشوفج احد لا يحسدوچ..

خذيتها من ايده بگلب جاهلة فرحانة وشخص اهتملها، بوكتها ما كليت الچكليته وضميتها بين اغراضي فوگ الست سنين صارت الچكليته حجارة وما كليتها، اطلعها اعاين عليها اضحك وياهة مثل المسودنة واضمها بين اغراضي وچان بقيت محتفظة بيها لهذا يومي لوما رهيفة چانت طفلة شافتها وچلبت بيها تريدها وامي كتلتني خاطر انطياهة..

بچيت وانا اتذكر كل هالذكريات الحلوة وگلبي يتگطع، مهضومة عبن تخيلت اخيراً راح نرجع نتلاگه سوه وتتكرر بس ما اجه علي التـقي.. ما اجه وما راح يجي وحگه شيسوي جاي لوحدة وجهها محترگ ماكلته الشمس وايدها كاتلها الضيم من الحرث والحش..

گعدت بالكاع لميت عباتي على جسمي وخذيت راحتي بالبواچي افوخ گلبي واخلص من الغصة والحسرة الكاتلتني، عيني تون عليّ توجع وزيدتها بدموعي المالحة بس طزز عساني بالعمى عسااني ميتة ولا هالعيشة الكافرة..

-ليش تبچين؟

فزيت من مچاني مخترعة وگمت على حيلي، تعثرت بعباتي ردت اوگع وگوة سندت روحي ووازنت نفسي.. گلبي صار يدگ حييل وتخربطت احوالي مادري شسوي ماعرف وين اضم وجهي المكروب صرت اتغشى بالعباه وامسح بدموعي وخشمي وانطيته ظهري ارعش واتنفس سريع..

-علي التـقي: هاج

حسيت بحرورة جسمه يتقرب مني ويمدلي كلينسه من فوگ چتفي، خذيتها بساع وركضت بعيد عنه ولو بيدي اطبن للنهر واتغطى بي..

-تره ما راح آكلچ والله

-اءء.. انتَ.. انتَ هنا

-لا خيالي اجه

طلعت عين من عيوني ودرت وجهي اعاينله وبساع انطيته ظهري مرة ثانية مبتسمة، غمضت عيوني اتنهد وامسح على گلبي اليرجف التعبان..

-اجيت اسألج سؤال واروحن

بلعت ريگي متوجعة يا ظالم شلحگت اشوفك وتريد تروح بس هم رضيت الحمدلله والشكر شفته من بعد غياب مابي شي ويمشي على طوله الحلو كلشي ما رايده الحمدلله والشكر..

-اسأل لو ما ترديني احاچيچ؟

اللتفتتله بساع واعرف ليش سألني هيج عبن منطيته ظهري، وخرت العباه عن وجهي وگبل لا افتح حلكي واجاوبه جفلت من گال..

-هاي شبيها عينج؟؟؟

-مابيها شي.. فگستها انا بالغلط

ضميتها بأيدي ووترني من تقدم بخطوات سريعة يمد وجهه يريد يعاين عليها، ابتعدت منه خطوتين خايفة وبساع رجع هو لنفس مكانه من شاف ردة فعلي..

-شوفيلها قطرة ملتهبة عينج

-ان شاء الله

-المهم على سؤالي.. راح اسألچ مرة وحدة وجاوبيني بدون لف ودوران سبأ انتِ تعرفين العداوة البيناتنه وماريد الوضع يسوء اكثر

بلعت ريگي وهزيت راسي انتظر سؤاله بس صدمني من گال بنبرة واحد ما طايق شي..

-غفار اجه للشمال راد يسوي شي لاختي حبيبة مو؟!

-لا

-لا تجذبين!

-لا لا.. لا شني شيسويلها يعني

-شفته مرة من رحنا لمصيف چان يحوم! ومن راحت للحمامات شفته مرة ثانية يمشي وراهة ولوما انا ملحگ عليها چان حاچاهة لو الله يعلم شسوه! احجي شنوو براسه؟؟؟

خفت من نبرة صوته يعيط بيه ويحجي بنتر مو نفس تقي الاولاني چن واحد ثاني بس ما اللومه ولا اشيل بگلبي عليه المروا بي مو هين والسواه سيف اخوي دمر شكو شي زين بيناتنا..

-سبأ: ماكو شي براسه غفار يحب حبيبة

-ااااشششششش هااااي السالفة ماااا تعيديهااا خاطر مـ......

-صخااام الصخمنيي

لطمت على وجهي واللتفت على المكان الجاي اعاين منه وانصدم! انصدم من شاف ابن اخوي سلطان واكف بعيد ويعاين علينا.. انهاريت بعد ماعرف شلون اكف عباتي مااعرف شلون اضمن وجهي واركض بعيييد.. صرت اركض مثل التايهة ما اندل دربي عفت تقي واگف يحاچيني وماريد اسمعه ماكدر اوكف وافهمه بالمصيبة الطاحت على راسي.. اركض واطيح وارجع اوگف وهم اطيح ماعرف وين اروح وين انطي وجهي شسووي بروحي وشراح يصير بيه شسوي!!!

**

-وين رايحة ليلة؟

-هااا

-وين رايحة وشبيج طلعتي تسحبين من الغرفة؟!

جفلت مخطوف لونها واعرف ما ينخطف لون اختي الا من تكون مسوية مصيبة، مصيبة راح تطيح حظنا وتدمرنا ثنيناتنا..

-احچيي شكو!!

-رفل راح اگولن بس عليج العباس لا تعاركيني

-فضيني كولي شكو

-راح يجي.. يريد يجي ويحاچيني

-يممممممة

لطمت صدري بكل حيلي متخبلة، ركضت عليّ تتوسل وتگول..

-من الحايط تعاي وياي انتِ من الحايط يحاچيني تعاي وشوفي بنفسج

لبستني شال وجرتني جر وياهة وانا صافنة شني جاي يصير! شني السالفة ياهو هذا واول مرة ينضرب على عقلي وطلعت وياهة بدون لا اسألها شنو الموضوع بس يمكن صدمة اختي تريد تحاچي زلمة غريب من الحايط اثرت عليّ..

طلعت وياهة للمنور وره البيت وشهگت من شفت زلمة ماد راسه من الحايط يطلع اكبر من ليلة بثلاث سنين واگف وبيده وردة حمرة، لطمت على وجهي متسودنة وبدون حچي جريتها من ايدها ارجعها للبيت والحظ خلانا نصير وجه بوجه ويه ابوي..

-ناصر: شعدچن هناك

حچاهة بحس ناصي وبنفس اللحظة صاح الزلمة البره بأسمنا ويااا بوية وياااا يابة مااعرف شلون انگلبت الدنيا فوگ راسنا بلحظة.. طلع ابوي للمنور وشاف الزلمة واگف وكضه يريد يكتله وهرب من ايده واندار علينا.. كضنا وحطنا وحدة فوگ الثانية وكتلنا كتتل مووت شفت نجوم الليل بعز الظهر!..

جر موبايل ليلة من ايدها وجبرها تفتحه، ظلت تبجي وتلطم على وجهها ورجع يكتل بيها بخبال موتها، خلاني انا بنفسي افتحله الموبايل ومادري شني شاف ماادري بس الشافه سودنه علينا وراح جاب سچينة من المطبخ..

-رفل: بوووية والعبااس والزهررة والحسين الشهييد و.....

-ناصر: بتتتت العااااار شااالج العباااس شااالچن ابوو فاضل نزلتننن رااااسيييي

كضنا يجلد بينا بكل حيله بحزامه گطعه على ظهري وظهر ليلة، راح اموتن روحي طلعت احس الهوا ضاع مني صرت اشبح بيدي بس اريد احد يساعدني ويطلعني من جوه ايده اريد اساعد ليلة الراح تغيب عن الوعي من الكتل اريد اچلب بأمي الطاحت من طولها من شال ابوي السچينة وحطها على رگبتي..

-ناصر: اذبببحج من الوريددد للوريددد وروحه لابووي اذبحچننن واسويچن عبررة لمن اعتبررر

-رفل: تذذبح بنااتك هااي تاليتهاا هيييج بوووية تذذذبح بناتك الشريفاات بـ...

ضربني على حلگي بكل حيله احس الدنيا دارت بيه وطحت بالكاع، تعب جسمي من الكتل وتعبت واني اعاركه واحاول احمي روحي واحمي ليلة الورطتنا وجابت الزلمة لحايط بيتنا تحاچي مناك..

-ناصر: ولللجن اذبحچننن واغسل عااارچن گووووومنن گوووومن اغسل عاااري وارجع ماااي وجهههي گووومنننن

جرني من شعري وليلة من شعرها ويسحل بينا مثل الحواوين، شمرنا بالساحة على الصبة ما مخلي بينا روح ندافع على نفسنا.. جاب حبل وصار يربط ايدي واندار على ليلة يربط بأيدها وجرنا من شعورنا مرة ثانية يطلعنا من البيت..

-ام رفل: وووين ماااخذهن يا الماا تخاااف ربببك حسبييي الله ونعم الوكييل بييك يا ناااصر عسسسى حوبة هالبنااات ما تعددديلك عسااااك حطب لجهنممم

-ناصر: ررراجعلج انتِ ررراجعلج تفوووو عليج وعلى بناتج ال*****

جرنا يطلعنا بدون حجاب بدون شي يسترنا، عتنا بنص الشارع والله ستر علينا والشارع چان فارغ، طببنا للسيارة وتفل علينا وركب بكرسي السايق وطلع بينا لمادري وين.. مادري وين ماخذنا ماشوف بعيوني دم راسي جاي يطيح عليها وتحجب عني الرؤيا..

مسحت عيني بيدي بس اريد اللمح ويين ماخذنا بس لا البالي صدگ بس لا راح ياخذنا يغسل عاره! ظليت اطگن سن بسن من الخوف وحضنت ليلة حطيتها على گلبي.. شابگتها بكل حيلي وجسمي يهتز برد وخووف ورهبة وكل شعور يخوف جاي اعيشه..

لمحت بيت عمي علي وروحي تعلگت بي صرت اصيح وابچي بكل صوتي واضرب على چتاف ابوي اريده يوكف ارريدن اضم روحي بحضن عمي علي اريده هو يسندني ويوگفلنا ويساعدنا..

كض ابوي ايدي ولواها يصيح ويفشر عليَّ وعبر بيتهم، تسودنت وظليت اتعارك وياه بأيدي معارك.. وگف السيارة يخاف لا نسوي حادث واللتفت يريد يرجع يطگني وگبل لا يلوحني فتحت باب السيارة وشمرت روحي منها وليلة وراي..

ركضنا مثل المخبلات نشرد منه وچن رادها من الله ابوي جيتنا لبيت عمي علي، شهگت واحس بروحي تريد تطلع من كضني من شعري تگطع بيده وليلة سحلها من ايدها وخذانا لبيتهم.. تخبلت عقل ما ظل براسي من دفر باب الحوش برجله وتلگتنا عبق بالساحة واكفة ويه سلوى يتعاركن وسكتن من شافننا..

-عبق: عزااا ليييلة رررفللل

-ناصر: ووووخري انتِ

دفعها وگعها بالكاع من اجت تريد تحامينا وجرنا جر لديوان عمي علي، رجلي ظلت تطگ وحدة بالثانية والدنيا دارت بيه طحت بالكاع وگومني يجرني من ياخة دشداشتي وطببنا غصب لديوان عمي بهالحال! بالدشاديش وبدون حجاب، ايدنا مربطة ومدامايات من فوك ليجوه والسچين بيد ابوي يريد يذبحنا..

طحنا بنص ديوان عمي واحس بروحي تريد تنسحب والعباس ابو فاضل ملك الموت احسنه واگف فوك راسي مو ابوي الرباني.. وگف عمي علي على حيله وچان عنده زلام ثنين گاعدين وابا الحسن وعلي السور موجودين.. وگفوا كلهم مصدومين ومبحلگين عيونهم عاجزين يكولون چلمة..

-ناصر: اجيييتك يا خوووي اغسل عااري جداامك اجيت اگللك بناااتي رخييصات وبااعن شرفهنن طيحن ماي وجهيي وسودنه وموو ناصرر اليسكتت على بناااته الكسررن وجهه!!

-شيخ علي: نااااااصر صلييي على محمد واستهددي برحماانك

-ناصر: ابدددد بعلييي اليوووم لو انااا لو هالبنيات المااا عرفت اربيهننن وطينن وجهيي بيننن الناس!!!

يتبع 👑.....

━━━━━━ ♛ ━━━━━━

توقعاتكم.... 👀🩷🩷🩷🩷🩷🩷؟؟

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

بعيونك شفت العُمر،

وبعيونك حبيت الحياة.. 🤍

━━━━━━ ♛ ━━━━━━

"عـــبق"

طلعت من المطبخ الحار على هوسة توقعت مثل العادة يكونون منجمعين ويضحكون ويسولفون طبيعي بس من عله صوت عمو علي وصاح شبيك ابا الحسن ركضت اطلع وجمدت بمكاني من شفت ليلة ملفلفة بيده ببطانية وركض يطلع بيها يروح للمستشفى..

بعد ماعرفت شلون اعدل شالي على راسي وشلون اجيب تلفوني من الصالة ابلغ علي الحـق راح اروح وياهم، ركضت للصالة وبطريقي سمعت بمنتصر متصل على عمو علي ما اهتميت ووگفت بمكاني انتظر خالة رسمية گالت لابا الحسن ينتظرها علما تلبس عبايتها وتجي..

اخذت حبيبة الموبايل لابوها وشفتها تفتح مكبرة صوت لان سمع عمو مو كلش زين هالفترة، شهگت وحطيت ايدي على گلبي خايفة من اجانه صوت هدية اخت منتصر تكول..

-عميي انا هدية ودكيت من موبايل منتصر ناسي هنا اللحگلنا عمييي اللحگ علينا

-شيخ علي: شصااير هدية؟ ولج احجييي

-هدية: رقية بنية منتصر ماكلة گزاز وبالعته وحلگها مشگگ والبت گضتها تزوع دم عمي راح انجلط منتصر ما اخذ موبايله واحنه ظالات هنا ما نعرف شنسوي

-شيخ علي: جاايكم جايكم

سد الاتصال منا وطلع البيت كله للمستشفى مناك، كلها تتراكض اني ورفل وخالة رسمية وتقي رحنا ويه ليلة وابا الحسن وحبيبة والباقين راحوا لبنت منتصر ويه عمو علي..

بنص الطريق گعدت ليلة بس ظلت تلوب منعرف شبيها خالة تسألها شبيچ وشنو يوجعچ متجاوب بس لازمة ايدي وعاصرتها بين ايدها، وصلنا للمستشفى وما قبلت تكعد على كرسي متحرك نزلت تمشي على رجليها وحاطين البطانية فوكاهة..

دخلناها للطوارئ سألونا عن حالها وهمزين جانت اكو دكتورة خالة رسمية حچت وياهة وگلتلها عندها نزيف فوراً دخلتها لغرفة الفحص وراد يروح وياهم ابا الحسن وخالة دفعته متقبل يدخل للغرفة..

-رسمية: اسم الله يالزهرة سترينا شني جاي يصير ويه بيناتنا

-ابا الحسن علي: يوم شبيچ مو كتلج اطب وياهم جوه شمالج

-يمة عيب عييب شبيك انتَ ما تعرف للادب والاحترام خلي الطبيبة تشوف دربها

سكت يتحلطم معاجبه، تذكرت علي الحـق مبلغته اجيت فـ ابتعدت منهم ووكفت على جهة اتصل بي مرتين ياله جاوبني يلهث..

-علي الحـق: ها چبد

-هلو حق اگلك اني بالمستشفى

-بالمستشفى؟؟ ليش شبيچ؟؟؟

-مابيه شي بس ليلة تخربطت واجيت ويه خالة وابا الحسن وتقي ورفل وگلت اتصل بيك ابلغك

-خوش حبي انتبهي على نفسج ورجلچ على رجل امي وين ما تروح وياهة

-ماشي، اگلك شو تلهث انتَ وين؟!

-بالجم

-اهاااا

-اي يله روحي حبيبي شوي واتصل بيج

-افتحلي كام حق اريد اشوفك

-بعدين قبق حيري بـ ليلة مو صديقتج هي

-افتحلي كام علوشي مشتاقتلك

-يروحلج فدوة علوشچ صار

فتحلي كامرا وحطها على وجهه عرگان وصاير احمر وشعره نازل على عيونه، لابس كيمونة رياضية سودة بارزة عضلات رگبته وعروگه مبينه... خرب مو وكتي هسة اصفن ليلة بالطوارئ!

-صورلي الجم عاجبني اشوفه

-ليش تردين تسجلين؟

-لا احب جسمي

-چا شتسوين تشوفي

-احب اشوف الجم التروحله

بلل شفايفه بلسانه وگلبلي الكامرا على الاجهزة يصورلي، تنهدت متنرفزة اريد اشوف الموجودين بالجم بحال الاجهزة اني!.. سكتت مغلسة ما بينت نيتي شنو وخليته يراويني المكان وفجأة....

-اووه اسفة انطخيت بيك هههه

-علي الحق: عادي مو مشكلة

-عبق: هاي منو؟؟؟

سد كامرته بسرعة وجاوبني..

-وحدة

-وحدة شتسوي وياك بالجم؟؟

-شتسوي وياي عنق غير جاية البت تسوي رياضة

-علي الحـق الجم الانت بي مختلط؟؟؟

-لا يعني مو كلش مختلط بس...

ويه صوته تداخل صوت بنية تگول.. 

-علي تگدر تساعدني شوية ثگيل هذا

-عبق: هلااااااا

-علي الحـق: عبق بس ثواني انطيني

-عبق: اي علي اييي روحلها لا تخليها تنتظر خووووطيااا

-علي الحق: ما رايحلها راح اطلع خرب روحج

-اني هم راح اطلع من المكالمة

-عبـ..

-باي!

سديت الخط وحطيت تلفوني بجيبي ورجعتلهم روحي طافرة واحس گلبي صاير جمرة مشتعلة.. وگفت بين تقي وخالة رسمية صافنين على رفل و ابا الحسن الحاير يضرب اخماس بأسداس، نويت اللتهي وياهم واعوف حق هسة وما اظل افكر زايد الوقت مو مناسب..

-عبق: علي التـقي ممكن سؤال؟

اللتفت يباوعلي ورجع باوع گدامه وجاوب..

-تفضلي

-عبق: انتو من ترحون لبغداد هم تسجلون جم؟

-رسمية: ياااع وكتها ولج عبيقة

-عبق: مو مادري خالة اجه على بالي هالسؤال هسة

-علي التـقي: اي نروح

-عبق: والجم مالتكم هم بي مسبح وهالسوالف؟

-اي

-والجم مالتكم هم..

-رسمية: خايبة ماعندج احساس انتِ؟

-عبق: خالة علي الحـق يروح لجم مختلط!

-رسمية: يممممةةة

دگت صدرها جاحظة عيونها واندارت بكل جسمها على تقي..

-ووولك صدگ تقييي

-ابا الحسن علي: يمة هسة وكتها؟؟

-رسمية: وكتها ونصص! صددگ ترحون للملاهي انتَ واخووك من تطلعون لبغداد؟؟

-علي التـقي: يمة يا ملاهي جم جم ما تعرفين شني جم؟

-رسمية: انچبب وصممخ چا شني الفرق مختلط لو مو مختلط؟؟ مو اغاني وزلم ونسوان مصلخة كدام بعض لو لاا؟!

-علي التـقي: يوم شسالفة ليش نتصلخ يعني

-عبق: اني شفت حق بالكيمونة

-رسمية: يبووووي يبووووي يبووووي اسمع يا شيخ عليي اسمع ولدك الصايعين شمسوين

-علي التـقي: يمة كيمونة يعني ضام جسمه بس زنوده طالعة واذا هسة

-رسمية: انچبب الزنود ما يطلعهن بس لمريته شكوو يورج النساوين عليهن؟؟

-عبق: اي خالة صحيح كلامج

-علي التـقي: عبق شسالفة

-رسمية: انلصم لا تسكتها لوو طلعت عينكم من وره جماعتكم الضباط الادبسزية

-علي التـقي: يمة هسة انتِ اعتراضج على الزنود الطالعة لو على الجم المختلط؟

-رسمية: على كلشي علي التـقي! احنه ما ربيناكم خاطر تصيعون وتنجرفون ويه الولد الطايح حظهم احنه ربيناكم على مخافة الله وتحطون الحلال والحرام بين عيونكم يا يمة

-علي التـقي: يمة احنه ما كاتلين رواحنا على المختلط وهذا الجم اقرب شي لشقتنا وتعرفين احنه نرجع من الدوام تعابة مو مال نتحمل طريق وازدحامات بغداد خاطر نروح لجم ثاني، هو نروح لهذا نسوي رياضة ونرجع للبيت لا النا علاقة بالنسوان الموجودات ولا نباوع عليهن

-رسمية: لا يمة لا غيروا ما ارضى بهالوضع ما يصلح

-علي التـقي: صار وتدللين

-رسمية: عفية وليداتي

فر ايده ابا الحسن عليهم واني ظليت اكل بروحي اكيد راح يفتهم حق گلت لامه وخاف يسويلي هوسة، طلعت الدكتورة من ليلة وطلبت تحجي ويه زوجها وحده بس خالة رسمية حطت روحها وياهم..

ما فهمت شنو حچت وياهم الدكتورة ودخلنا اني ورفل على ليلة بالغرفة فاتحة عيونها وصافنة بالسگف، گعدت رفل بصفها ومسحت على شعرها مبتسمة..

-رفل: شلون صرتي يروحي

هزت راسها ساكتة وجهها اصفر والتعب مبين عليها، دورت على مي انطيها بس مشفت فـ قررت اطلع اشتريلها من الكافتيريا بعدني ما تحركت ولزمت ايدي ليلة متخليني اروح..

-لا تروحين عبق اريدج

-رفل: انا اروح اجيب الماي عبق انتِ ابقي يمها

طلعت رفل واني كعدت بمكانها، حطيت ايدها بين ايدي ترجف وواضح عليها متوترة وقلقة كلش، استحي اسئلها شنو صار وياچ وشبيج لان واضح الموضوع مال متزوجين وخاص بس احنه قريبات لدرجة بدون لا اسأل هي حچتلي..

-ليلة: الطبيبة كالت لازم ارتاح چم يوم

-عبق: ها

فهمت قصدها ممضطرة توضح اكثر وفهمت اكثر من همست بتعب..

-انام يمج بالايام الجاية ما اثق بذاك

-ليلة ابا الحسن اكيد راح يتفهم وضعج

-لا

-حبي هونيها على نفسج وعليه

-ما اكدر عبق گلبي يوجعني من اتذكر السواه بيه، انصدمت بي والله انصدمت

-والله ماعرف شكول

نزلت دموعها من العينين وبلعت ريگها تكمل..

-توسلت بي يعوفني بس ما رضى علبو يذبحوچ زين ليش الامير ما تصرف هيج ويه رفل؟ ليش ابا الحين تعده عليَّ وهاني بهالطريقة؟

-يا حبيبتي يا ليلة يجوز اندهش وما اجه بباله شي غير ينقذج ويطلعج من هالورطة لا تلومي تره ابا الحسن انصدم صدمة جبيرة من شافچ بهيج وضع

-لا انا اعرفه هو چذاب ورادها من الله خاطر يتزوجني وينتقم مني عبني ارفضه بكل مرة راد يكسر خشمي

-مستحيل ابا الحسن يريد ينتقم منج انتِ مو تكولين هو صديقج وضلعچ؟

-تغير ابا الحسن عبق هواي تغير

-ماتغير انتِ تغيرتي وسمحتي للخوف يسيطر عليج ويخلق فجوة بيناتكم

-ناظم ما جاي يعوفني عبق ما راح يعوفني

-الله ياخذه! شيريد منج هذا الحقير بس فهمينيي

-ولج دزلي زلمة غريب بيوم الابوي شافني يريد يورطني جاي وجايب وردة بيده ويعرف اسمي واسم رفل تخيلي!

-عمت عيينه

-هو راسلني وگالي طلعي احاچيچ وامسح كلشي خفت اروح وحدي وصحت لـ رفل حتى لو تكتلني عادي بعدين افهمها ونتصافى.. بس من رحت لكيت زلمة غيره واكفلي واذا رفل ما جانت وياي الله يعلم شچان سوه بيه

-اوكفي اوكفي فهميني على كيفج.. ناظم راسلج گلج طلعيلي اني واكفلج وره بيتكم وانتِ طلعتي على اساس تشوفي ولكيتي غيره هناك؟

-اي

-لييلة شلون تطلعين لـ ناظم الخبيث بله سوالج شي!

-ما يسوي ولج حلفلي اذا انطيته الفلوس يحذف كلشي

-ليلة دتدمرين نفسج كولي لابا الحسن عن كلشي وخلي هو يتصرف احسن مما يظل يفكر بيج بطريقة مو زينة وعباله انتِ وحدة ملعبة

-ما يصدگني ما راح يصدگ وحسباله انا الدازه الصور والفيديوهات لناظم هاي اذا ما فكر بيه مصاحبته وبيناتنا شي

-والله راح اتخببل

-عبيقة اخاف لا يفتهم تزوجت ويجي يفضحني بديوان عمي شسووي عبق ساعديني

سكتنا ثنينا من دخلت رفل بيدها بطلين مي واجت وياهة خالة رسمية، وگف ابا الحسن بباب الغرفة يباوع لـ ليلة من بعيد وهي دارت وجهها عنه متخلي يشوف وجهها..

-رسمية: سلامات سلامات يمة ماعندج الا العافية

-ليلة: الله يعافيج عمة

-رسمية: شنسوي اذا انتِ هلگداتچ ههههه

ظلينا نبلعم ساكتات وليلة وجهها احمر دم صاير، كعدنا شوية علما خلص المغذي اخذنا علاجها ورجعنا للبيت.. اجت ليلة ويايه لغرفتي تريد تنام وخالة رسمية ما قبلت وحلفت عليها تنام بغرفة ابا الحسن وهو الي يداريها ويهتم بيها..

-ليلة: عمة ارتاح ويه عبق اكثر

-رسمية: لا يمة شون تطلعين من غرفة زلمتج ما يصير خلي حسون هو يهتم بيج والتردي بس اشري عليه وهو يجيبه

-رفل: الدكتورة كالت ما يصير تتحرك هواي مو زين عليها فـ ابقي فوك ليلة اذا تردين شي بس دگيلي

-رسمية: لا شعليج انتِ چا زلمتها المن موجود اخذها يمة حسن للغرفة اخذها واهتم بمريتك يبعد امك

هز راسه ابا الحسن ساكت ما نطق حرف، لزمها من ايدها وجرت ايدها منه وصعدت وحدها فوك وهو مشى وراهة، باوعت لوجهه توقعته راح يضوج من حركتها بس ما تغيرت ملامحه المتأثرة بحزن على الصارلها..

بقينا احنه جوه ننتظر الباقين يرجعون، اتصل بيهم تقي وگالو دخلوا بنت منتصر لغرفة العمليات وراح يسوولها عملية صغرى ينظفون لسانها من الگزاز..

-رسمية: سودة بوجهي شجاب الگزيز على الطفلة

-علي التـقي: يمة يكول سور البت طالعة تلعب ويه بنات الجيران ومسويات تحدي لعبة مدري شني ومخلياتها تاكل الگزيز

-رسمية: ااااخ من بزرة هالوكت شياطين مو فروخ

-علي التـقي: الحمدلله ما بالعته الله ستر

-رسمية: الحمدلله والشكر يمة باجر ذبحولنا دجاجة شي وانطوها لفقير خلي الله يسترنا من هالمصايب

-علي التـقي: ان شاء الله

-رسمية: عبيقة جيبيلي ماي يمة فحطت

رحت للمطبخ اجيبلها مي وبالي ويه علي الحـق من المستشفى لحد هسة اتصل بيه فوك العشر مرات ورگعني ررگع رزايل بالرسائل لان سديت الخط بوجهه..

-علي التـقي: خوش خوش جاي

شتت افكاري علي التـقي ديحجي بالتلفون وعبرني يريد يطلع من باب المطبخ، انداريتله بسرعة وصحت بأسمه حتى يوگف..

-عبق: ممكن دقيقة احجي وياك

هزلي راسه اي وسد التلفون ونصى يلبس حذائه، تلفتت بالمطبخ اشوف خاف تجي خالة رسمية وتفهمنا غلط فـ فوراً دخلت بالموضوع بدون مماطلة..

-عادي متگول لـ علي الحـق ان اني الي كلت لخالة عن الجم المختلط؟

ضحك يرفع راسه وبقى مستمر يربط حذائه، كمل ووگف عدل وطلع جكارة من جيبه بس استمر يضحك ماعرف على شنو..

-عبق: كلت شي يضحك؟

-لا

-لعد ليش تضحك

-لان كيدچن عظييم

گالها بضحك وطلع من المطبخ بدون لا يجاوبني على سالفة الجم هسة ما افتهمت راح يگله لو لا شنو هاي! اجتني خالة رسمية تدردم لان تأخرت بالمي وما قبلت انطيها هي شربت هنا وگلتلي اصعد فوك وما انزل بعد لان تريد تنام وخاف يرجع واحد من الولد ميصير نبقى وحدنا..

صعدت لغرفتي الجديدة وكعدت على الجرباية بعدني ما مكملتها بس الجرباية مرتبة الباقي مخربط بعده لان مدا اللحگ، طلعت كتابي ادرس هاي كم امتحان دا اصخم بي بسبب الوقت ما اللحگ لو الخطار طابين طالعين علينا لو المصايب تتراگع..

بنص دراستي دگ تلفوني بأتصال من علي الحـق للمرة الـ 16 حمحمت بحنجرتي واخذت نفس عميق قبل لا اجاوبه..

-الو

-وينج انتِ؟؟؟

-كاعدة بالغرفة

-ما تستحين تسدين الموبايل بوجهي؟؟ هاي اخلاقج عبق؟؟!

-ما سديته گتلك باي

-والباي شصخم بيها؟؟ زعطووط كدامج!!

-علي الحـق لا تاخذني بعصبيتك اني من اتصلت بيك جنت بالمستشفى والدنيا محتركة

-واذا الدنيا محتركة لييش ردتي افتح كامرا وتشوفين چهرتي!؟

-ردت اشوف المكان الفاسد الداخل بي!

-فاسد؟؟؟

-اي نعم فاسد! البنية الواكفة بصفك هي وستريجها برمودة ولزك على جسمها والتشيرت طافر وصرتها طالعة شنو وين كاعدين احنه علي؟ مو عيب بله مو عيب؟؟ يعني انتَ تقبل اروح لهيج جم؟؟

-خاطر اگص رجليج

-هاا يعني عادي تكص رجليه لان رحتله بس مو عادي اذا انتَ مسجل بي صارلك شهور مادري سنين؟

-عبق انا شعليه بيهن شبيچ انتِ!

-شعليك بيهن شنو؟ لعد يله اني هم اروح وشعليه بالزلم

-عببببق لا تستفززززيني

-لعد انتَ بطل تستفز بيه تمام؟ كل ساق سيسقى بما سقى علي الحـق واني ما اتقبل تروح لهيج اماكن تلعب نفسي

-تلعب نفسج من شني ولج وين مولي انا!!

-صح صح رايح لجامع عيوني هو انتَ رايح لجامع واني معاجبني

-استتتتغفر الله شووون تريد تحچينا گوووه

رصيت على سنوني مفوورة ومثلت صوت ذيج المايعة وهي تكول..

-عليي تعال ساعدني هاي ثگيييله علييي اوووي علاوي صاير ذا هولك مالتهن

-عبق لا تستهزأين لا...

-لا تكمل علي الحـق لان كلمة وحدة بعد وانهي كلشي!

-تنهين شني ولج؟؟؟

-باوع حق من الاخير اگولها اني هالجم ما طقته ولعبت نفسي منه اذا انتَ صدگ تحبني وتحترمني تعوفه وتدور غيره

-تنهين شني جاوبي؟؟؟

-لا تلزگ على هالكلمة عوفها هسة

-جاوبي عبق!!

-انهييي هالخطببببة التلفت اعصااابي

-خطبتنا تلفت اعصابج عبق؟؟!

-اي تلفت اعصابي وشغلك ديأذيني وغيابك يوجع گلبي! من تروح الف فكرة وفكرة تجي ببالي والليل ما انامه اظل افكر شديسوي وحده ومنو وياه ووين طلع وويامن تعبت واعصابي متتحمل اكثر مادري احير بيك لو بأمي لو بدراستي لو بوجهك الـ....

-وجهي الشني؟

-هيج انسى

-ولج حتى وجهي شايله همه شبيها چهرتيي

-وجهك حلوو ولا تنغر عليّ بس وجهك حلوو ويجذب واني هالشي تعبني

-لا عليج العباس

-اي ولا تشوف نفسك تره اني ابالغ

-واضح كلش تبالغين

-اي

-هسة عوفينا من وجهي هاي خلقة ربچ وخلينا نجي لباقي مشاكلچ ونصفيها

-تمام

-الجم بقالي اسبوعين اشتراك وخيولي اعوفه بس اخلص هالچم يوم لان ماكدر ابتعد عن نقطتي وتعرفيني ماكدر اعيش بدون رياضة

-اسبوعين علي الحـق بس أسبوعين!

-اي مو مشكلة، نجي للمشكلة الثانية وهو دوامي عبق انا هذا شغلي صارله سنين وصعب كلش انقل لنفس محافظتي واذا ردت انقل لازم اغير واحول شغلي مكتبي وانا هالشي ما ناسبني حاولت بس ما كدرت عبني رجال احب الحركة ماحب اركد بمچان واحد.. بس هم لخاطرچ راح احاول

-لا علي

-شني لا؟

-لا تضغط على نفسك لخاطري اني من گتلك حجيتها بس كـ فضفضة مو اكثر انتَ شغلك زين ومرتاح ومقتنع بي لا تغير مسار حياتك وتقلق راحتك

-لا مالج غرض احاول اللگالي حل

-شكراً علي الحـق

-تدلل بزونات ولو بعدني ما راضي على طبگة الموبايل

-مقصدت اقلل من احترامك بس مادري شصار بيه اني.. اني بس..

-غرتي

-شنو؟؟ لا لا شنو اغار يمعود ويني وين الغيرة

-اي صح

-ما اغار اني علي الحـق لا تفكر بالموضوع اصلاً.. بس يعني ضجت لا اكثر

-خو

-اي يعني مو عبالك غرت؟ اصلاً الغيرة كلش مو حلوة ومتعجبني

-اي خلي الوادم تعيش سفردحي لا غيرة ولا صخام وواحد يطب على الثاني

-لا مو لهدرجة بس الغيرة القوية تخنگني

-عبق سالفة الغيرة القوية تخنگچن بطلنها، انتن ما تردن اليراقب ويهتم تردنه گاعد مالط شاربه ولابسلچن فافونات براسه ويعاين للاستهتار بعينه ويسكت!

-شوف مبينه هاي بداية عركة فـ خليني اسد التلفون واكمل دراستي احسن

-انچبي وعوفي الاتصال مفتوح

-اريد اقرا

-اقري وعوفي مفتوح

-شتسوي بيه دا اقره

-قبق لا تعاندين وفتحي كام واتصال بساع

-داا اقرره

-هسة انتِ شعليج انا عاجبني اعاينلج وانتِ تدرسين

-لا حق مو اتوتر

-توتري شحلاتهن خدود العگروگ لو صارن طماطات

-راح اسد التلفون بوجهك!

-سدي خاطر اسد ابواب الدنيا كلها بوجهچ

نفخت هوا وفتحت كامرا وهو فتح مالته، شفته واگف گبال الطباخ ديحمي جمر للنرگيلة ومصلخ يفتر بالبجامة..

-عبق: طفي كامرتك لو اللبس تشيرت

-ما اللبس

-علي لا تبقى مصلخ هيج

مد ايده للكاونتر يطلع منه شي ورجع للتلفون لزمه بيده وگال بغمزة لعوبة..

-ليش تخافين تلتهين بجسمي وتعوفين الكتاب

-شلون بالطاووس المغرور احنه

ضحك وطفى كامرته واني ثبتت التلفون گبالي وگعدت اقرا مغلسة عليه بس المشكلة اني من ادرس اظل اضرب چقلمبات وافتر واگمز وارگص واغني وافتر ياله استوعب هسة شلون بهالحالة؟

اضطريت احترم نفسي هالمرة وابقى كاعدة بمكاني وجريتها للفجر اقرا واسمع صوت نرگيلته يدخن بيها، تناسيت وجوده وكعدت احل بالمسائل وفتحت الايباد اباوع فيديوهات وماحسيت على روحي من غفيت بمكاني..

گعدت الصبح على صوت المنبه مال الايباد، طفرت من فراشي مخترعة من شفت الكامرا بعدها مفتوحة وتلفوني داز اشعار تنبيه راح يطفى، ارتبكت من تخيلته بعده موجود وديشوفني وشلت الموبايل اريد اطفي واجاني صوته..

-صباح الخير تنبل

-انتَ بعدك موجود؟؟

-طالع للدوام

-وعايف الاتصال مفتوح علي الحـق ليش ما طفيته من نمت

-خاطر اشوفچ وانتِ تسعبلين

-عليييي

-ههههههه لا زين ما تسعبلين من تنامين بس تونين

-اون شنو؟

-يعني تجرين اهات ومواويل

-تره من التعب هاي يمعوود

-اي هسة شگلنا احنه

-عاد طمني انتَ نمت لو لا؟

-لا

-صدگ تحچي؟

-ما ينطيني گلبي انام واعوفج

طفيت كامرتي خافية ضحكتي واسمعه يكمل..

-چن بطة ونايمة هادئة وخدودج ترفة مال عض وعلى مرتين ضحكتي اظنچ تحلمتي بيه

-شوف الثقة

-والله ابتسمتي

-لا ثقة ان ممكن تحلمت بيك وضحكت

-ليش ما استاهل تضحكيلي بزونتي؟

ضميت حلگي بيدي مستحية اريد اگله تستاهل وماكدر متطلع من حلگي الخجل مسيطر عليَّ وعبالك هو حس عليَّ لان ضحك وگال..

-يلا راح اضطر اسد الاتصال وصلت.. انتبهي على نفسج وجاوبي زين بالامتحان هواي تعبتي امس

-عبق: ان شاء الله وانتَ هم انتبه على نفسك

-احبك يالترف

-امم.. الله وياك

-اشتعل بختچ

سديت الاتصال منه اضحك مثل المخابيل، لبست شالي وطلعت للحمام اغسل وافرش اسناني واتخيل شنو ممكن سويت من چنت نايمة وحق شهد عليه؟ والله اذا سويت شي يفشل يلزمها عليَّ العمر كله..

**

"تـــالة"

ابتسامتي ما غابت طول ما تَـمني تسولفنا الصار وشسوه الامير وشگال گدام اهله وحتى امي دا اشوف طيف ابتسامة مرسوم على وجهها وخافيته بيدها..

-تالة: تَـمني اني احب زوجچ احبه احبببه فد رجال وحباب

-حنين: فعلاً زوجچ خوش رجال توتة حبيبتي الله يسعده وين ميكون

-تَـمني: لعد خالة ليش چنتي تگوليلي ميناسبچ وحياتهم متناسبج؟

-حنين: وما زلت اگولها حياتهم متناسبچ، شايفة الموقف المريتي بي چنت متأكدة ومتيقنة راح تعيشي شي يوم وگايلتها الج وحچيتها بوجهچ بكل صراحة قبل وارجع اكررها ممكن هالموقف ينعاد وتنعاد هالمعاناة والاذية كلها ويمكن المرة الجاية تتم.. تَـمني اني اعرف انتِ تفكرين بعاطفتج تعلقتي بي وحبيتي حياتج وياه بس بحكم اني امچ ومسؤولة عنج ضروري افكر بعقلي

-تالة: ونعمة ليش مفكرتي بعقلچ من زوجتيها؟

-حنين: راح نرجع لهالموضوع تالة؟ بس حقچ انتِ متعرفين بت خالتج بشنو مرت وشنو العاشته ويه ابوج النذل

-تَـمني: تالة اني عشت المُر ببيتكم بس مچنت احسسچ ابوج كم مرة بمرة حاول يعتدي عليَّ والله سبحانه وتعالى ينقذني منه بآخر لحظة

-حنين: زوجتها لنعمة متأملة تخلص من الضيم، غزوة اجت گلتلنا هو عاجز وبس يريد ونس وياه بالبيت، سألنا عنه والكل يمدح بأخلاقه وكرمه ونزاهته اشم گفه ايدي طلع واحد... استغفر الله ميجوز على الميت غير الرحمة

-تالة: وهسة من مات وورثت فلوسه صار الامير كخة؟ الي ثبت نفسه گدامها الف مرة وثبت هو يحبها ورايدها وتقبلها مثلما هي ويدافعلها بخبال كدام اهله وميقبل عليها؟؟

-تَـمني: مو كخة تالة! وبعمري كله ما احصل رجال يوصل لربع من شهامة وغيرة الامـير علي واصلاً اني اجيت اليوم حتى اگوللكم على شي

-حنين: خير ان شاء الله؟

-تَـمني: قررت ابقى واكمل زواجي واعيش وياه على الحلوة والمُرة وما اعوفه بيوم لان مدا اكدر اتخيل حياتي بدونه

-تالة: الله!!! الف الف اللف مبروك الفف مبروك حبيبتي توتة اييي هاي الاخبار الحلوة يا عمرري

كمت اسلم عليها وابوسها وهي تضحك كلش فرحانة بس بنفس الوقت حسيتها متوترة من ردة فعل امي وظلت تباوعلها بتردد، ابتسمت امي على نظراتها البريئة كأنها طفلة وخايفة من امها لا تعاقبها على تصرف غلط بس مخلتها تبقى بهالخوف وفتحت ايدها وگالت بلطف..

-الف مبروك يا روح امچ ان شاء الله متشوفين غير السعادة والراحة

فاجأتني من بچت وركضت لحضن امي تبوسها وجسمها يهتز من البچي خلتنا كلنا ندمع وياهة، وخرتها ماما عنها ومسحت دموعها بأبهامها وگالت بنبرة صادقة..

-يوم الاشوف الطفل بحضنچ امي تَـمني وافرح بيج وبيدي اگمطه واللبسه واحفظه تستاهلين كل خير يا نقية

وخرت تَـمني من حضن امي وگالت وهي مبرطمة مهضومة..

-مادري خالة على موضوع الاطفال ماريد اتأمل

-لا ماما ان شاء الله يصير عدكم وتگر عيننا بشوفة ابنكم او بنتكم

-تَـمني: خالة تدرين اني بشنو فكرت اول ما بديت اميل للامير؟ فكرت بالاطفال اذا ما صار عندي شلون؟

-تالة: اذا يحبچ صدگ راح يصبر وياچ

-تَـمني: هو يصبر واهله؟ مستحيل يصبرون اصلاً همه منتظرين خبر حملي على نار وخالة رسمية كل كم يوم تسألني

-حنين: ماما ربچ كريم لا تستعجلين على رزقچ ان شاء الله يصير حمل انتِ بس خلي ثقتج بالله عالية

-تَـمني: ونعم بالله

قضينا باقي الوقت وياهة ضحك وسوالف وراوتنا خاتمها الجديد فرحانة بي.. عيون تَـمني فرحانة وسعيدة وصار زماان كلش مشايفتها بهالحال صدگ لو گالو الرجال الزين يوّرد مرته ويرجعها طفلة من دلاله وحبه والرجال الشين يكبر مرته عشر سنين من ضيمه وعذابه..

ما حسينا على الوقت تأخر الا من امي تثاوبت منعسة، رفعت عيني على الساعة شفتها بالوحدة بالليل..

-حنين: تَـمني تباتين يمنا مو؟

-تَـمني: لا وعدت امير ارجع بس شعجب ما اتصل معقولة نساني؟

-تالة: خاف صار عنده شغل

حركت اكتافها بطريقة ماعرف وطلعت تلفونها تتصل عليه، اخذت تلفونها وكلت متوسلة..

-حبابة ماطوله ناسي خليج بعد شوية

-لا تالة خطية خاف نعس ويريد ينام

-وشنو انتِ تلوليله

-ههههه عابتلج بس اراسله عاد اشوفه وين

-لا لا هسة بس تراسلي يكول اجي عليج انطي صبر فد نص ساعة ودگي عليه شبيچ خلينا متونسات

هزت راسها موافقة وامي راحت تنام متتحمل تسهر، كملنا سهرتنا ورحنا اني وتَـمني للمطبخ نسوي كابتشينو وكعدنا ناكل نساتل ونميات ونسولف..

-تالة: يعني ليلة بعدها متحجي ويه ابا الحسن؟

-تَـمني: اي كلش قافلة متقبل تحجي وياه

-تالة: حقها المرت بي صعب كللش صعب، زين توتة هم صدگو هنه بريئات لو صاروا يعاملوهن بحقارة وكذبوهن؟

-تَـمني: لاا صدگوهن خصوصاً افتهمت من حبيبة رفل حاچية ويه عمو علي وحتى ابا الحسن حچت وياه وفهمته كلشي صار گالت تفاجئن بالرجال الشافنه وماعدهن أي شي وياه ولا يعرفنه اصلاً

-يلا همزين وصدگوها بسرعة مو؟

-اي همه يصدگون بيها اصلاً عدهم رفل مميزة عن كل بنات عمهم والكل يثق بيها

اخذتنا السوالف وما خلينا شي ما اكلناه وچان بقينا على گعدتنا لوما تَـمني طافرة من مكانها من شافت الساعة عبرت 1:45 بالليل..

-عززا تالة راح عليَّ الوقت بس ولج امير وينه؟؟ شعجب ما اتصل

اخذت تلفونها وراحت للغرفة دكت عليه وفتحت مكبرة صوت وراحت كدام المراية تلبس شالها، بأول رنة جاوبها عبالك التلفون بيده..

-تَـمني؟

-هلو امير انتَ وين؟

-گدام بيت خالتج

-هاا اجيتني؟

-ترجعين؟

-اي يله طالعتلك

سدته منه وبوستني وطلعت تركض بيدها تلفونها وجنطتها، طلعت وراهة اودعها للباب ومديت راسي من باب الحوش ادوره وين واگفلها شفته واگف گبال سيارته على بُعد مسافة من بيتنا ومن شافها طلعت من الباب تركضله صار شي ما توقعته ابد!

شهگت جوه انفاسي بفرحة من فتح ايده ومشى بخطوات سريعة وحضنها يشيلها من الگاع ويفتر بيها، المشهد يجننن وخلاني اكزبر.. المنظر اخذني لفلم رومانسي من التسعينات، باردة ودنيا ليل وشارع فارغ وطيور الحب وحدهم عايشين بعالمهم الخاص واحد حاضن الثاني وصوت انثى الطير يغرد بضحكة تنعش الدنيا بأكملها..

ضحكة تَـمني وصلتني وفرحتها بي خلتني اتنهد بحب، حب لا متناهي ولا يمكن ينتهي.. رغم عمري صغير ومن اسولف بالحب امي تحچي عليَّ وتكول اني عايشة بالاحلام بس دا اشوف الاحلام تحققت گدامي ويه ذولة الثنين.. امير وتَـمني يجمعهم حب انولد بأحلى بداية وما اتوقع راح يصيرله نهاية بيوم، لو ممكن تنقلب الامور ويجي هاليوم....؟

-تَـمني: هههه عبالي نسيتني ومتجيني

-الامـير علي: انساچ؟ ولج جمدت من البرد هنا واكف انتظرج ما تحركت من نزلتچ لبيت خالتج لسه

-كذاااب

-والحسين الشهيد

-وكفت تنتظرني اكثر من اربع ساعات امير؟ ليش؟

-ما كدرت اروح

-ليش

ضحك يحك شعره منحرج واشرلها على السيارة حتى يكعدون بيها ما قبلت تتحرك الا يجاوبها ليش ما راح، ضميت روحي وره الباب وركزت سمعي وياهم وحسيت گلبي انكسر من گال..

-ظنيت ما ترجعيلي بعد

-امير

-تَـمني كتلج الهواجس تأذيني من تغيبين عن عيني

-زين ليش ما اتصلت بيه حتى نرجع من وكت؟

-ردت انتِ تتصلين خاطر اعرف تردين ترجعين من صدگ لو مجاملة

-ارجع طبعاً

-ها؟

-والله ارجع علمود سلوى شلون تتوقعني اعوفها ترتاح وتنام ليلة هنيئة بدوني؟

-ههههههههه خرب راسج امنية

سديت الباب ورجعت لداخل البيت ضحكتي من الاذن للاذن، دخلت لغرفتي واتخيل نفسي اعيش هالشعور ويه شخص يحبني وينتظرني بلهفة ميهتم للبرد ولا لاي عوائق..

تمددت على فراشي وغمضت عيوني ماخذني النوم ومن گدما فرحانة وافكر بيهم حلمت بالامير وتَـمني صار عدهم ولد صغيروني عنده غمازة بس للاسف ما كمل الحلم لان امي كبت كلاص مي بوجهي وعاطت بيه..

-تاااالة گووومي علي الكـرار واكفلج برره

-تالة: اوي فدوة حبيبي

-حبيبچ شنو ولج؟؟؟

-شنو؟

-حبيبج منو تالة؟؟

-ماما شبيچ محد حبيبي محد طلعت من حلگي

فلتت منها قبل لا انكفخ وگمت اغسل وابدل مثل المخبلة اروح منا واجي منا وهورن علي الكـرار خبصني وتلفوني يددگ ما سكت من مكالمات حبيبة وتَـمني..

طلعت اركض من البيت واللفة بيدي لا حطيت مكياج ولا واقي طلعت هيج كما خلقني ربي بوجهي المصوفر.. دخلت للسيارة شفت البنات كاعدات كالبات وجههن عليَّ بس من شافوني بدون مكياج كالن..

-حبيبة: ما دام ماكو مكياج معناها الامور داچة يم تالة

-تَـمني: اول مرة بتاريخ البشرية تالة تطلع بدون ايلاينر

-حبيبة: وبدون بلاشر

-تَـمني: وبدون عدساتها التمساحية

-تالة: اوووي تره ما اللبس عدسات هي مرة وحدة لبست عدسات تمساحية وذليتني بيها

عضيت من لفتي وعفتهن يتنمرن عليَّ ممهتمة خليني مشغولة اصحصح واستوعب صار الصبح ورايحة للجامعة.. وصلنا ونزلنا كرار الي ما حچه حرف طول الطريق واصلاً هاي عادته ابد ابد ابددد ميحچي ويايه بس ويه حبيبة وتَـمني عادي يتشاقه ويضحك وياخذ وينطي ويداهر حبيبة كدامنا اما اني فـ نهائياً ميحجي ويايه..

كملت يومي الجامعي الممل ما كونت صديقات لان ماكو وحدة تشبه تفكيري، عدنا بس وحدة مبوشة كلش حبابة ولطيفة اوقات تكعد ويايه تسولف وعلى مرتين عزمتني على نادي الكلية واستحي اردها لان مرة گلتلي تحس روحها منبوذة هنا لان مبوشة ودتفكر تنزع البوشية بس بالدوام..

-بعدج راح تنزعين البوشية وديان؟

-وديان: لا بطلت اخوي ما يرضى

-يمعودة معليج باليعيب طز بالكل المهم انتِ مقتنعة بيها وحابتها ابقي لابستها اصلاً مطلعتج هيبة

ضحكت وهزت راسها ومشينا سوه للنادي، شكلنا نشاز ويه بعض واوقات استحي امشي وياهة هي من فوك ليجوه مسودة عباية وبوشية واللتزام فول واني سافرة بلا حجاب وملابسي متناقضة وياهة..

سولفنا شوية وگالت اجه اخوها عليها وراحت واني هم طلعت تلفوني اتصل بالبنات وشفت تسع مكالمات فائتة من حبيبة وتَـمني وكومة رسايل دازاتلي من چنت بالمحاضرة كاتباتلي امير اجه عليهن ورجعن بقيت بس اني وكرار راح يجيني على الموعد..

بدون لا احس انتبهت على روحي مبتسمة خفت من روحي وخفيتها بسرعة ورجعت تلفوني بجنطتي وتمشيت لبوابة الجامعة الخلفية، ابتسمت مرة ثانية من شفته واگف گبال سيارته بالكراج وواگفة بصفه بنية تضحك وتسولف وياه..

تقربت منهم مستغربة كللش من تصرفه هو نهائياً ميحجي ويه بنات شكد يلح على سالفة الحب والزواج بس ابد ميتقرب من بنية ولا يحجي وياهة او على الاقل ميسويها كدام احد..

-تالة: مرحبا

-علي الكـرار: هلا خوية

فتحلي السيارة وبقت البنية تسولف وياه منطيتني ظهرها ما دارته، لبت شوية بمكاني صار عندي فضول اشوف شلون شكلها، قدمت راسي اباوعلها وبدون لا اشعر صحت بصوت عالي متحمسة..

-زهراااااء بت عمو صمدد

باوعلي كرار مصدوم من صوتي العالي واللتفتت زهراء عليَّ تباوعلي وفوراً انرسمت على وجهها ابتسامة واسعة وحضنتني تسلم عليَّ..

-تالة: مادري بيج تداومين هنا

-زهراء: اي اني طالبة بكلية العلوم

-يعني ويايه؟ بس شو مشايفتج

-ولا انا شايفتج تدرين هسة من اجيتي عبالي وحدة غريبة، يا حبيبتي شكد فرحت بيج

-عمري زهورة، شوكت عرسچ لو ما حددتوا؟

-ان شاء الله على نهاية الشهر بس شوكت بالضبط ما حددنا

بين سوالفنا دگ تلفونها وگالت اجه خطيبها يرجعها بس كدام كرار كالت اخوها لان تستحي، صعدنا للسيارة وركبت بالصدر سيارته عريضة ومسافة بيناتنا جبيرة فـ ما اهتميت..

-تالة: تزحمت اجيتني وحدي لو اعرف بـ تَـمني وحبيبة راجعات چان اخذت تكسي

-علي الكـرار: لا تكسي ليش هو على طريقي انتِ

-تسلم هواي دنتعبك

-بالخدمة

ابتسمت ودرت وجهي للجامة اباوع منها الدنيا تنث مطر والجو رهيب والسيارة بيها عطر گهوة كلش الاجواء حلوة..

-تقبل افتح شي بالمسجل؟

-براحتج

-اكو شي ببالك حاب تسمعه؟

-اذا تردين تفتحين اغاني فـ اليوم وفاة (استشهاد امام)

-هاا لعد لا ما اعلگ

ابتسم يهز براسه وفتح على موبايله قصيدة من صوته عرفته باسم الكربلائي لاحظت شگد يسمعوله ويحبوه وحافظين حتى قصايده..

"روحي مشتـاگة وبعيـــد الـدرب... روحي...

واللي ينتظر ليله صعب... روحـــــي...

واحبـــابي بديار الغرب... روحـــــي..."

يقرا وياه ويدندن بالقصيدة منسجم على الاخر، ركزت بالقصيدة اسمعلها وافتهم على شنو دتحچي واخذنا الطريق كله هدوء ونسمع..

-علي الكـرار: روحي مفرفحة على كربله

حچاهة من العدم وفرحت لانه فتح ويايه حديث اخيراً..

-تالة: صارلكم هواي ما رايحين؟

-راح يصير سنة واحنه ما متعودين هيج لازم بالسنة مرتين ثلاثة نروح

-لعد شنو يمنعكم ترحون؟

-مشاغل الدنيا وابوي صحته ما تسمح يسافر مسافة طويلة ينرادله خلگ

-سمعت تَـمني تكول راح ترحون هالفترة ابوك گال؟

-اي صح

-حلوة كربلا؟

اللتفتلي مبتسم ولاول مرة بحياته يسويها، گلبي ظل يدگ بقوة من گال بحماس..

-تعالو ويانه وشوفوها

-صدگ؟

-اي تعالو تره كربلاء محظوظ اليزورها بعد هي جنة الله بأرضه

-ماشي راح اگول لماما اذا تكدر

-لا تكوليلها هسة خلينا نتفق على يوم خاطر ترتب امورها يجوز هسة من تگليلها ما تكدر ويخرب واهسها لبعدين

-تمام ما راح اگوللها بس كللش تحمست

-ان شاء الله نروح لطويريج اذا لحگنا خاطر ناكل سمچ سمچهم ينحجي بي شكد طيب

-شكد احب السمچ

ماعرف ليش كلت هيج مع العلم ما اكل السمچ وما احبه ابد وذاك اليوم من سووا وعزمونا كلت بصوت عالي ما احب السمج وهمه سمعوني، شگد فشللة اذا يتذكر من گلت وهسة غيرت كلامي..

وصلني للبيت وشفت امي هستوها واصلة دتنزل من سيارة التكسي، شلت جنطتي ودا اخذ تلفوني من المسافة التفصل كرسي الصدر عن كرسي السايق وتزحلگ من ايدي بالغلط ووگع جوه رجلين كرار ماعرف شلون طار لهناك بس المهم وگع يمه، نزل هو يجيبه الي ونزلت اني بنفس اللحظة امد ايدي وانرگعنا راس براس..

-تالة: ااااايييي

-علي الكـرار: ولج اااخ ههههههه

ضحك ولزم راسه متوجع واني هم لزمتني الضحكة وكعدنا مثل المخابيل نضحك على شي تافه مثل هذا، بطلنا من نوبة الضحك ونصى هو جاب تلفوني وانطانياه، تشكرت منه وسويتله باي ونزلت اهرول لامي افتح الباب قبلها بس ملحگت لانها لزمتني من زندي ودارتني عليها خازرتني ونترت بوجهي..

-حنين: شنو هالتصرفات تالة؟؟؟

-شنو ماما يا تصرفات

-ادبسززز ما مترباية منوو هذا الوصلج كرار موو؟؟؟

نترت ايدي حيل وهرولت بأتجاهه ترجف عصبية، اشرتله بيدها اوگف وانزل من سيارتك وسوه مثل متريد، ركضت عليها افهمها الصار حادث بس ما سمحتلي سوتلي اني اعلمج بيدها وراحت تحجي وياه بعصبية مكتومة..

-حنين: كرار بعد لا تجي على تالة شكراً زحمناك طول هالايام

-ها راح تسجل خط؟

-اي اشوفلها خط

-ليش خالة خوب ويه حبيبة وتَـمني فرد نوب اخذهن سوه

-لا شكراً!

-تالة: ماماا

-علي الكـرار: خالة صاير شي زاعجكم؟

-حنين: الصراحة اي ليش على كم مرة دتجيب تالة وحدها وين البنات؟

-علي الكـرار: اوقات البنات يخلصون على وكت ويرجعهم واحد من اخوتي

-وليش مياخذون تالة وياهم؟

-تالة: ماما اكون ممكملة محاضرات

-حنين: شمعنى؟؟

-تالة: مادري والله بس...

-حنين: على كلٍ ما اقبل ترجع تالة وحدها بعد شكراً وليدي دنتعبك احنه وبينما اللگالها خط اذا بيوم طلعن البنات قبلها لا تروحلها اني اجيبها

-علي الكـرار: هذا هو براحتكم

گالها بأبتسامة مجاملة وراح بس مبين عليه شكد انزعج من كلام امي واني متت من خجل هاي فوگما دياخذ فوگ دوامه ساعة علمود هو يرجعنا وميخلينا نتبهذل بالتكاسي والخطوط!، رجعنا للبيت وامي لزمتني ددگ رزايل طيحت حظ حظي..

-حنين: تمدينن نفسج يم جسمه بشارع فارغ ليييش تالة؟؟؟ ليييش هالحركات ما خفتي على سمعتچ؟؟ ما فكرتي؟؟ هو ما فكر بيج؟؟

-ماما والقران تلفوني وكع جوه كرسيه وملحگت افكر بكل الگلتي بسرعة نزلت اخذه لان شفتج وصلتي وردت اجيچ

-تااالة لا تخبلينيي شلوون متفكرين بهيجي شي شلون؟؟ زين عوفج من هالسالفة شتفسرين ضحككم؟؟ وجهچ گبال وجهه وتضحكون لبعض لييش؟؟ هم على التلفون؟؟

-انرگع راسي براسه من نزلنا و...

-سكتييي كااافي سكتي لا تحچيين انتِ بنتيي واعرفچ عددل ودا اشوف تصرفاتج وانتبه لنظراتج على هالرجال!! تالة من هسة اكلج الي ببالج حلمممم يتحقق حلمممم فهمتي لو لا؟؟

-ماما ا...

-عالمهم غييير عن عالمناا غييير ماما اصحيي المياخذ من ملته تكبر علته يعجبچ تبقين نفس تَـمني يومية مهبوطة ويومية خايفة لا يتزوج عليها!!

-ماما اني شعليه بـ تَـمني ثانياً انتِ ليش شايلة سيف على هالناس لييش متحبيهم؟؟

-تالة اني احبهم ويشهد الله عليَّ اودهم وممنونة على مساعدتهم النا بس بنتي محيطهم ما اتقبله اني بلعت موس وسكتت على تَـمني لان شفتها تحب زوجها ومرتاحة وياه بس مال اجازف بوحدة ثانية لاا مستحييل اقبل بهالشي ولا راح يجي يوم واتقبل!

-متحبين محيطهم لعد رجعينا لبغداد! اي يله رجعينا ليش عايفتنا يمهم وتستغلين بيهم هذا اليجيبلج المسواگ وذاك الياخذ بنتج خط للجامعة وشيخ علي الحلف يدفع اجار البيت ليييش عايشة بخيرهم وتحجين عليهم ليييش!!

سكتتني براشدي صفر اذني، لزمت خدي عيوني مدمعة ومهضومة من تصرفها دفعتني من چتفي بيدها وگالت بنتر..

-ما مستغلتهم والناس والنعم منهم ما احجي عليهم افتهمي كلامي عدل ولا تحوري بكيفج واذا على رجعة بغداد؟؟ اني باقية علمود بنت خالتج اخاف عليها بس اذا تطمنت تَـمني استقرت بعيشتها هنا ومرتاحة بيها ارجع لبغداد ونرجع لحياتنا القديمة ولا كأن شي تغير خوش؟!

عافتني مقهورة وراحت لغرفتها شكد احس روحي صغيرة وتافهة، ما ضايجة من الراشدي بگدما ضايجة من كلامها واسلوبها ويه علي الكرار هو شنو ذنبه تطلع حرگتها بي شذنبه؟؟

**

"حـــبيبة"

فزيت المغرب على صوت صياح عمي ناصر جاي من الصالة، گمزت من فراشي وركضت مثل المسودنة اشوف شصاير خفت لا مطلعله بسالفة جديدة ورجع على بناته وطلع توقعي صح..

-ناصر: طلگتوهاا ابو علي؟؟ كسرتوهاا وطلگتوها!!

-شيخ علي: ناصر بنيتك ما رايده الزلمة ولا هو رايدها الامير متزوج ومرتاح ويه مريته

-ناصر: واذا متزوج شنييي حاصله مرة مثل بنيتي؟؟ صدگ مو شكول نعمة زايد منيي رضيت انطيكم!

-علي الدر: عمي لو ما منطينه چان ذبحت بنيتك البريئة صدگ تحجي انتَ!

رده عمي ناصر ما راضي على كلامه وصار مشامر حجي من ابوي وعمي وعلي الدر وبدر وطب تقي على الخط وانا صايرة بين سور ونور وحيدر كدامنا واكفين ويحششون على عمي بالهمسة..

-ناصر: لا لاا چلامكم ما مسمووح ابو علي انا دايس بساطك هيج تهيني وترجعلي بنيتي الشريفة العفيفة مكسورة رگبة؟؟ بسس والله هي زايدة عليكم اييي بعلي زايدة وين حاصله ابنك بت بجمال وكمال رفل

-علي البدر: عمي شو انتَ ما ينعرفلك ساعة تحجي على بناتك وتنزلهن اسفل السافلين وساعة تسويهن زليخة من الجمال

-علي النور: اي بعلي يخوط بصف الاستكان

-حبيبة بهمس: حيرنا عمي والله حيرنا

-علي السور: يگول ابو شادي الزبنطوطي ماكو هيج زلمة ما ينعرف شيريد.. ولو نجحت وعرفت اليريده تستاهل صينية ثريد

-حيدر: لللللك الله

اللتفت الكل على صوت حيدر وابوي وعلي الدر لزگوه بخزره، هز حيدر راسه مال واحد متحسف وگال..

-الله عليك يا عمي ناصر الله ماكوو هيج درر تحجي فدوة يروح سور لحلگك

-ناصر: عاين عااين البزر الما طالع من البيضة يعرف الاصول ويفتهم بيها

-حيدر: عمي ليش ما طالع من البيضة چا الشارب لبوجهي شني هذا

-علي السور: انتَ هم مقتنع بشواربك؟

-علي النور: چنهن لمة عفطية

-علي السور: ينحفن بعلچ ابو السهم

وطبعاً كله بالهمسة يحجون وحيدر يلوب يريد يگوملهم وسودة عليَّ رجليه تخونه.. اختصاراً لعركة عمي ناصر الي بالعادة تكون بوخة بالبداية وبعدين ابوي يفر عقله بحچايتين يخلي يهدأ ويسكت بس هالمرة ما گدرله ابوي ساعة ضبط دام الجدال والكبر المشكلة الامير مو هنا، اگدر اشوف تَـمني معلگة بالدرج فوگ وتاكل بأظافرها خايفة لا ابوي يرجع رفل على ذمة امير بس الحمدلله ما صار هالشي وطلع عمي من بيتنا زعلان علينا وما رضى ياخذ رفل وياه عافها وگال مالي شغل بيها بعد هي چنتكم..

-شيخ علي: ااااخ يا ناصر

-سلوى: ابو علي خلي يومين ويهدأ ما تعودت على سوالف ابو عباس

-رسمية: علي لا تضوج روحك ورفل يمنا باقية هو هذا هم بيتها قابل غريبة

-شيخ علي: طبعاً بيتها وهي الطابة واحنه الطالعين بس انا بالي على اخوي لا يصيرله شي من القهر، حگه ما يرضى تنكسر بنيته وتطلگ هم يخاف على سمعتها ويريدلها مستقبل زين

-علي الدر: چا يا بوية ما فكر ببنيته گبل لا يسوي كل هالمسرحية؟

-علي البدر: والحمدلله الله سترنا من محد افتهم بالصار وانحفظ ماي وجهنا هو عمي ناصر هم يغني

استلموا عمي ناصر التوأم ثنينهم واحد يصد والثاني يرد، عصب ابوي منهم وگام يطلع ويدردم عليهم..

-شيخ علي: ياهوو يگدر للسانكم لو تگابلتوا ريه وسكينة فوگاهة نحجي على سور ونور الزعاطيط

-علي السور: لاء لاء بابي ما حبيته منك

-علي النور: اوگفو ما افتهمت ياهو الزعاطيط احنه لو در وبدر؟

فرت ايدها امي وانتهى النقاش وفضت السالفة بقرار رفل راح تبقى عدنا هالكم يوم بينما ابوها يهدأ وهي هم ترتاح من ضيم اهلها، كمل اليوم بشكل طبيعي وثاني يوم گعدنا العصر كلنا بالصالة نسولف على عمليات حيدر وبين السوالف تقي گال..

-عقلي افتر والعباس

-علي البدر: هاي بعدك محتار؟

-علي التـقي: ولكم معقولة سكتوا على السالفة؟؟

-الامـير علي: اسكت ولك لا تضربهم عين اسكت

-علي التـقي: لا مو طبيعي الموضوع ولك مسعود يسكت على سالفة تخصنا؟؟ مستحيل!!

-ابا الحسن علي: يجوز راد يستر على روحه وحسباله صارت وحدة بوحدة على مال سالفة سيف

-الامـير علي: لا وعلي ولا اسويها وحدة بوحدة سيف اللگاه يعني اللگاه الچان بالسما بالگاع اللگاه وانعل سلفه سلفاه!

-ابا الحسن علي: ياخوي جوز منه خيولي لا توصخ ايدك بي

-علي التـقي: عوفكم من سيف انا خايف لا يكون سوه بالبت شي!

-علي الدر: لو سوه چان افتهمنا هدي ياخوي ولا تظل تاكل بروحك

-علي السور: حبيبوو وينجج

دخل للبيت يدورني گمت اشوف شبي وصدمني من گال..

-اجت صديقتج وچم وحدة من حبايبها

-صديقتي؟

-اي

-ياهي منهن

-البغدادية

فكيت عيوني على وسعها من استوعبت البغدادية هي حور! حور اجت هي وامها لبيتنا واني صارلي يومين مطلعة الشريحة من موبايلي وارجعها بس من احتاجها وارجع افرغ موبايلي منها بس حتى ما اجاوب اتصالاتها!

-الامـير علي: شبيچ حبيبة وجهج انخطف لونه؟

-حبيبة: لا.. لا مابيه شي حبيبي

اخذت نفس عميق اسيطر على رجفتي وعلى وگفتي طلعت حور من باب الاستقبال مبتسمة، تفاجأت من شفتها اجتني لهنا خصوصاً اخوتي كاعدين ما گاموا وهمه هم چنهم انصدموا من شافوها..

-حور: مرحبا.. هلوو حبيبة شلونچ مشتاقتلج

شمرت روحها تحضنني وتبوس بيه وتسأل عن حالي، بادلتها الحضن وباوعت لاخوتي الصافنين وشمس وابرار الي صارن يبسبسن بين بعض ويعاينن عليها..

-حور: شكد سعيدة لان اجينا تدرين حاكم عاف شغله وجابنا

-حبيبة: هاا هلا بيكم خية نورتوا مشتاگتلج انا

ابتسمت واندارت على الباقين الي ولا واحد منهم زحم نفسه وگام شمالهم لطشوا صدگ چذب..

-حور حووور ماما حووور وينج حوريية

دقيقتين ما طولت وصاحولها من الاستقبال، رحنا انا وياهة وسلمت على امها بس استغربت من شفتها شايلة جنطتها وكالت مع السلامة وطلعت بسرعة وامي رسمية طلعت وراهن للباب..

-حبيبة: شسالفة يمة شو بساع راحن؟

-سلوى: جاية تخطبج المسعدة لابنها الدكتور

شهگت مبلوع صوتي وخبطت معدتي صواب سواهة صدگ هذا وجابهن يخطبن!..

-سلوى: بس احنه رفضنا گلنالهم باجر يطلبوج من ابوج رسمي شيخ فهد وابنه جايبيلچ مشية

-صوووواب

-اسم الله شني صواب ولج شمالج

-يمة صدگ باجر جايين يخطبوني؟؟ يعني هاي هي صارت؟؟

-اي صارت وابوج خابر عمامج وولد عمج راح يحضرون وان شاء الله ممهلة ومهناية يا عمر امچ انتِ

بوستني وطلعتني من الاستقبال بالهلاهل والگفلات، كل هلهولة ترگعها احسنها چيلة وبنص گلبي احس بروحي جاي تطلع وحالي كله انگلب.. لحد ثاني انا على هالحال روحي رايحة وبطني تلويني وگضيتها تقيء ومتخربطة.. كل ساع اريد انزل اگول لابوي بطلت وامي رسمية تكضني وتگول ما يصير افشل ابوي وراح يزعل عليَّ لانه فات الاوان وانا ادري فات وادري لو رفضت ابوي يمكن ما يحاچيني العمر كله على الموقف اليخزي الراح احطه بي..

البيت كلهم مخبوصين خبص يعزلون بالديوان ويحضرون الكهوة والضيافة واخوتي طابين طالعين وانا بغرفتي كاعدة اندب حظي واكل بأصابعي من الندم اااااخ شسويتي بروحج يا حبيبة شسوويتي!!

فزيت من فراشي على صوت الزلم جاي من ساحة بيتنا تسودنت واحس بنار صارت تچوي رجلي ما جاي اكدر اثبتها بالكاع، خمس دقايق مرت وصعدنلي البنات كلهن هاي التواسيني وتعرف حجم مصيبتي وذيج التباركلي حسبالها فرحانة..

-شمس: حبيبة ما تردين تنزلين تسمعيهم وهمه يطلبوج من ابوج؟

-حبيبة: ماريد لا

-ابرار: امشي خية حريمات هاي اللحظة تبقى تنذكر امشي

سحلني وياهن سحل وتَـمني وعبق ورفل يواسني بنظراتهن، نزلنا الدرج ارعش رجلي تروح منا ومناك صارن خيوط علما وصلنا لغرفة كرار نتسمع على الديوان منا انا متت الف موتة..

-سلوى: هششش صوتجن ولجن لا يطلع

-شمس: اي سكتنا

مدن اذاناتهن يلزگنها بالباب متحمسات للخطبة شون راح تصير وانا عفتهن وتمددت على چرباية كرار اريد اتقيء من الخوف، تحسرت وانا اسمع شون شيخ فهد يحمد بتربيتنا وشون فرحان بجيته ويتشرف بينا وبگربنا وابوي يجامله ويرده بحچي احلى..

-شيخ فهد: شيخ علي ما نشرب الگهوة الا تردلنا جواب، احنا طالبين الگرب منكم وشاريكم وحابيكم ونتشرف بيكم ووليدي وليدكم وبنيتكم ان شاء الله بنيتنا فـ اذا چنتو راضين خلونا نقرا الفاتحة ونتوكل على الله

سكت الكل من حچى واحد وره شيخ فهد يمدح بالولد گدام ابوي ويگله سمعته على مستوى المحافظة معروف وما يحتاج سؤال عنه عبنه مؤمن متقي يخاف ربه ويحترم المرة.. غمضت عيوني مستسلمة اتسمع لرد ابوي النهائي الي راح يردلهم بي الموافقة بس فجأة تغير كلشي... تغير كلشيي لان من بين كللل الاصوات صوت منتصر ظهر من بيناتهم وگال..

-عمي نسبكم على الراس ويشرف بس البت بنيتنا وانا ابن عمها واولى بيها و اذا عمي علي ينطيها الي على راسي واذا ما ينطيها فـ من بعد اذنك يا عمي ومع احترامي الك وللمصون بنيتك انا جاي نهاي.....!

يتبع 👑....

━━━━━━ ♛ ━━━━━━

گلب حبيبة وبنات الامارة حالياً 👈🏻💃🏼

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

هـلا بريحة هَــلي، هـلا بـ ابن علي! ♥️

━━━━━━ ♛ ━━━━━━

"علي التـقي"

نطت شياطين الكل من نهى منتصر على اختي حبيبة عداي انا! صح ما راضي اختي ينهي عليها بس ما معترض على زواجها من منتصر لسبب براسي عكس ابوي واخوتي الصارت وجووهم حمر وراح ينفجرون..

-شيخ فهد: ونعم منك دكتور منتصر بس لو انتَ رايد البت ما خطبتها گبل لا نجيب مشية ونجي

حچاهة شيخ فهد بالضحك بس مبين منزعج ومغثوث من الصار، ابتسم منتصر واللتفت على ابوي يگول..

-انا مادري انتم جايين الا اليوم الصبح بلغوني وانا اعرف البت صغيرة عمي علي ما يزوجها تفاجأت من گالو اليوم مشيتها

-شيخ علي: منتصر انا سالفة النهوة كلها ما اعترف بيها تريدني اعترف بنهوتك على بنيتي ووحيدتي؟؟

-منتصر: عمي ما اتجاوزك انا واخطبها منك على سنة الله ورسوله وگدام هالوجوه الطيبة والكل شاهد عليّ انا ابن عمها واولى بيها من الغريب

شمر ابوي سبحته بعصبية گدامه وصاح مغتاض..

-شيخ علي: ماا ننطيك!

-شيخ فهد: فكها وليدي منتصر فك النهوة عن بت عمك خلي يمشي نصيبها

-منتصر: ما افكها

-شيخ علي: تعاندني؟؟ ولك انتَ بحسبة اخووها ربت گدام عينك من شوكت شفتها مرة وحليلة؟!

-منتصر: من امس عمي ومن رخصتك النهوة ما افكها

-شيخ فهد: ما رجيناها منك دكتور احنه نعرف درب النهوة مو يمكم ليش معند!

-منتصر: عذروني

كض ايد ابوي الامير يهدأه بس والله هو ينرادله واحد يهدأه عيونه راح تطلع من وجهه وهو يگول..

-الامـير علي: بوية منتصر ابن عمنا والنعم منه مابي گصور

-شيخ فهد: چا اذا هيچ انتهت السالفة البت تروح لابن عمها الله يسعدهم

گامت الوادم تطلع وراح ابوي وراهم يتعذر منهم بس شني لو حچى واحد وياه حچاية زايدة ينفجر عليه ويحطه ويكتله.. فضت الدنيا بساع ورجعنا للديوان شفنا منتصر واگف وولد عمي ناصر وصمد وياه صافنين ما يعرفون شيسوون..

-الامـير علي: يااابن النعااال انااا ينهووون على اختيييي

هجم عليه امير وابا الحسن تولاه من جهة ودر وبدر من جهة يتعاركون ويهددون بي ويهايطون وهو يدافع عن نفسه ويصيح بيهم..

-منتصر: ماا تعديت عليكمم بت عميي ورايدهاا شني كفرررت

رفع ابوي عوچيته ووجهها على منتصر ونتر بي بحقد..

-ايي كفرت يبن مرتضى كفررت وكفرتك ماا نتغاضى عنها واطيح حظظك بيدي! ولك اناا الاحارب شيووخ مشوربة من ينهون على بنات عمهم تاليها ينهي على بنيتي بديوااني وللك اناا تهيني وتهين وحيدتي التشرفك وتشرف اهلك هالاهانة!!

-منتصر: خلااص عميي تريد افك النهوة؟؟ افكهاا بس لاا تهين ابنك الربيته والشاهد على اخلاقه! انتَ بعدك مغتاض من زواجي الاول وشون صار وحسبالك انا المو خوش والما اشرف بس ورااس بناتي الماعندي اعز منهن انا بريء والمرحومة ام البنات ما كضيتها بسووء ولا عاينتلها الاا وره ما تزوجت!

-علي الدر: منتتتصر احنه وين وانتَ وييين شعليناا بأم بنااتك احنه ماا راضين على النهووة مااا نرضى بيها وراح تفكها

-منتصر: لا در لااا چنه عمي لهذا يومنا ما مصدگني وحسباله انا العتديت على ام البنات ونزلت راسنا!

-شيخ علي: لااا تظل تچفصص ولللك منتصرر لااا تچفص انا لو شاك بيك ولوو ذرة اگص رجلييك وماا اخليك تدوس بيتي واگعدك على سفرة وحدة ويه بناتي ونسوااني! بس عبني اشووفك اخوهن انتَ اخوو حبيبة اخووها شوون تريد تزوجها!!

ما لحگ يفتح حلگه منتصر ويجاوب ورگعه بوكس الامير وگعه بالكاع، نيمه وصار فوكاه يطگ ويكتل بكل حيله ويصيح مفرفح..

-عاااار سنيييين احنه متخذيك اخووناا تاليها عينك على اختييي والله لانعل شرررفك يا منتصر زااايد مني احترمتك وما نعلت خيير خيرك كدام الشيووخ

-منتصر: امييير انتَ صااحبي امييير

-الامـير علي: انچببب انععل ابو صحبتك الخايسة

-شيخ علي: گوووم عنه امير گووم

-العم صمد: امير لا ننفضح الناس بعدهم ما عبروا شارعنا گووم يا وليدي

گوموه گوة عنه بس الحقد اليتطاير من عيون ابوي واخوتي مخيف، منتصر حاله تبهذل وترعبل شجاك ووين چانتلك هاي ما اندگيت الا بعزيزة ابوها واخوتها!

-شيخ علي: فك النهوة منتصر!!

-علي التـقي: لا بوية

اللتفت الكل عليَّ ومن ضمنهم منتصر فاك عيونه مصدوم، نتروا بيه علي الدر وبدر ما راضين بس مو وكت صدمات هسة احنه بورطة..

-علي التـقي: لا عبالك راضي على نهوتك على اختي وراح تتحاسب عليها بس اجت بوكتها.. بوية عمي مسعود جاي يحوك لشي وگلبي حاسني حبيبة المقصودة يردون يكسرون ظهورنا بيها وياخذوها لـ غفار بنهوة يجيب شيوخ ودنيا يگلبها ويفشلنا ويخلينا ننجبر ننطيها

-شيخ علي: والله لووو يجيبلي امممة الثقلين همم ماا اطلع بنيتي من بيتي بنهووة!!

-علي التـقي: يا بوية ما گلنالك طلعها بنهوة جاي اگلك مسعود ناوي على شر يخص حبيبة وانا متأكد! مثلما جاي اشوفك هسة گدامي متأكد براسه شي خلينا نحفظها يم واحد من عدنه وبينه وبرضاتها احسن ما تروح لغريب ويروحلهم مسعود وولده يسوولنا فضيحة الها اول مالها تالي وانتَ تعرفه يسويها

سكتوا كلهم يفكرون بچلامي ويعرفون بالضبط شني اقصده المشكلة ماكدر احجي زايد لا ننفضح كدام ولد عمي ناصر وعمي صمد والباقين، مسعود ما راح يسكت على سالفة سبأ وراح يطلعها بشي يهيننا ويصغرنا بين الناس واكثر بشر صارلهم سنين يدگون ويشگون عليه هي حبيبة كاتلين رواحهم عليها يردوها وابوي ما ينطيها..

-منتصر: عمي انا مستعد اجيبلك شيوخ وافك النهوة و....

-شيخ علي: اطلع ماريد اشوف وجهك

-منتصر: بس عمي انا..

-شيخ علي: اطلللعععع برررره

صاح بـ منتصر خلاه يسكت ويطلع من الديوان ولحگوه ولد عمي كلهم.. اللتفتلي ابوي مخنزر راح ياكلني بس ما اللومه صارله يومين يلوب وراسه دايخ على سالفة سبأ يخاف لا تصيرلنا فضيحة ثانية بالخصوص وهو يعرف مسعود ما يسكت ويسوي من الحبة كبة..

-صمد: ما جاي افتهم سالفتكم البت بنيتكم وانتم احرار تزوجوها لليعجبكم ليش متخوفين من مسعود شيخ علي هاي اول مرة اشوفك بهالحال؟

-شيخ علي: خوية ما يحتاج اعلمك بـ مسعود ونواياه السودة

-صمد: حگك تخاف على بنيتك بس وليداتك يسدون عين الشمس ما شاء الله ويكسرون راس اكبر واحد لا تفكر زايد وتضوج روحك ابو علي يرحون مسعود وخلفته كلهم فدوة لجدامك

-شيخ علي: الله يحفظك خوية

تباوسوا وودعنا عمي وطلع، زفر نفس ابوي ومسح على وجهه ايده ترجف وحسراته عالية تنسمع، دور عيونه بيناتنا وثبتهم بالاخير عليَّ ونتر..

-شيخ علي: ورطتنااا تقي ورطتنااا يا الاغم وويه ياهوو؟؟ ويه مسعوود اليشتري فضيحتنا بفلووووس

-علي التـقي: بوية والعباس ابو فاضل بس حاچيتها ومن بعيد هي بجهة وانا بجهة

-علي السور: ههههههه گلت من بعيد؟ هسة يجيك مسعود يسويها چانت بحضنك

-علي البدر: خوية عمك جاي يسوي المستحيل خاطر يمسنا ويلعب بسمعتنا وانتَ انطيته سبب يحجي بينا لنهاية عمره

-علي التـقي: عاينوو لا تظلون تذبون الصوچ بيه انا رحت خاطر افتهم غفار شعنده لاحگنا للشمال ولگفته يركض وره اختي حبيبة وين ما تروح!!

-شيخ علي: هاي شوكت ولك؟؟

-علي التـقي: من رحنا للشمال بوية مرتين شفت غفار يمشي وره حبيبة چن مترصدها

-الامـير علي: چا مااا حچييت

-علي التـقي: لو حاجي بوكتها واحد منكم يحطه ويذبحه وتصيرلنا سالفة جديدة!

-شيخ علي: وعفت اختك هييج؟؟؟

-علي التقي: لا بوية شون عفتها من رجعنا لليوم حاط بالي ويه حبيبة حتى للمستوصف ما اخليها تروح وكيفت من عرفت راح تنخطب عسى يتوب منها بس بعد صارت سالفة سبأ وچن الدنيا انگلبت فوگ راسي، الوسواس ذبحني گلبي وعقلي يگول راح يسويلها سالفة هالمسعود ويكسر ظهرنا حتى لو تزوجت حبيبة راح يفضحنا عد عيالها

-علي الدر: قصرت ياا خوية قصرت لو حاچيي

-علي التـقي: احچي شتسوون؟؟ نلفي مصيبة جديدة على روسنا وترحون تصخمون ويه ولد مسعود؟؟

-شيخ علي: وووولك اااااااخ اناا يكضووني من ايدي التوجعنيي اناا اليتصيدوون لبنيتي منن خ** بعگاالي ومچااني

نزع عگاله بكل عصبية وذبه بالگاع وعافنا وراح، ذبيت حسرة حاير ومستحير ماعرف شسوي اول مرة بحياتي اضيع هيج واجهل اتصرف..

رجعنا للبيت وره ابوي شفنا النسوان بالصالة وسلوى كاضة ابوي تبجي وتلمخ بوجهها..

-شيخ علييي ترضاها ينهون على بنيتك وحيددتك ترضااهاا

-شيخ علي: تعاي حبيبة

-سلوى: وينن ماخذها وييييين

-شيخ علي: سكتييييييي صوووتج ماريد اسمعه سكتييييي

سكتت ووكفت على جهة، صاح لـ حبيبة وطبوا للاستقبال وصاحلنا وراهة انا واخوتي، گعدها على القنفة وكلنا بقينا واكفين گبالها اشوف عيونها تفتر بيناتنا ووجهها صاير احمر..

-شيخ علي: بوية حبيبة اكيد افتهمتي بالصار؟ ابن عمج الاغبر الدكتووور المثقف منتصر نهى عليج

نزلت راسها تلعب بأصابعها وتبلع بريگها، زفر الامير ما طايق روحه ونتر..

-بوية شنهااي جايبها خاطر تحرگ بگلبها؟؟ حبيبة من الاخير لو ما رايدة الزلمة هسة اروح ادوس ببطنه واخلي يفك النهوة!

-شيخ علي: اسكت انتَ خليني اتفاهم ويه اختك

-الامـير علي: ماكوو ما نتفااهم بالنهوة احنه وين عااايشين بكهف!! بالعبااااس ما ارضى اناا سكتت كدام الوادم خاطر ما افضحه وامسح بكرامته الكاع كلت يبقى منا وبينا بسس مال افوتها اله؟؟ لاااا والحسيننن الشهيد!!

-شيخ علي: ووولك اسكت شبييك تسودنت گلت عقل وخف خباله وعصبيته وره ما تزوج شوو نفسك ما متغيير

-الامـير علي: جااا تدوسون ببطني وتردوني اتغيير من خ** بهيج عاادات زبااالة!!

-ابا الحسن علي: نعم يا سادة هذا العفطي شيخ المستقبل

-علي السور: خايبين سووا شيخ خاطر يقرض هالعادات الجايفة وينعل والدين اليفك حلگه

-شيخ علي: انلصمووا كافي خلوني اتفاهم ويه اختكمم ولو برره

-علي النور: لا لا سكتنا خلص

-شيخ علي: حبيبة ترضين بأبن عمج الطايح حظه؟؟

-حبيبة: بوية انا مـ...

-الامـير علي:‏ ما موافقة هااا اهاا ما موافقة بوية ليش تحرجها صدگ چذذب

-شيخ علي: امييير

-الامـير علي: هسة انتَ شني جايبنا هنا تحرگ بگلوبنا؟؟

-علي التقي: ماكول غير الحمدلله علي الحـق مو هنا واحد كافي علينا

-الامـير علي: شقصدك ابو البلاوي والمصايب؟؟

-علي التـقي: انچب يلا انچب ولا تتجاوز

-الامير علي: من صخمتنا ولطمتنا وطيحت حظنا ما فكرت بالتجاوز موو؟؟

-علي البدر: غير يستقر الصاح بنص الديوان انا عاقد على ارملة عمي

-الامـير علي: لا تشبچون شي بشيي

-شيخ علي: امير تسكت لا بعصاتي

-علي النور: بوية انا اگولن طگه ليش بس احنه ننطگ

-الامـير علي: تعاال ولك تعاال ياهو ينطگ

-علي النور: سوور ينطگ والله سور

-علي الدر: شبيكم انتم شبييكم كلشي ماخذي بخباال وعصبية سكتوا خلونا نعرف شلون نحل هالمصيبة!

-شيخ علي: چلمة ما اسمع بعد انچبووا وگصوا لساناتكم ولا تظلون تنططون چنكم بريعصية!

-علي البدر: من رخصتك بوية احنه نطلع يجوز حبيبة تستحي من عدنا.. يلا يا ولد

-شيخ علي: طلعوا وبس تقي ودر يبقون وياي

طلع الكل وبقينا انا ودر بالاستقبال ويه ابوي وحبيبة، گعد ابوي على القنفة مهدود حيله ونزع العرقچين من راسه جزعان، ما هان عليّ اشوفه بهالحيرة والتعب بس ما باليد حيلة..

-علي الدر: حبيبة احنه بحياتنا ما جبرناچ على شي ونهوة منتصر ما نشتريها بنعالچ وحگ علي ومالچ غرض بكل اليحچون فكري بنفسچ وبس! وبعد القرار الاول والاخير الج

-شيخ علي: اذا ردتي ترفضين بدون لا تفكرين انتِ حُرة وانا واخوتج كلنا بظهرج والله لو يشهرون بينا الدنيا ويكولون شيخ علي ضارب العادات والتقاليد بعرض الحايط هم ما انهز! كلشي ولا زعلچ يابوية ورضاچ بهالزواج مهم عندي

ابتسمت حبيبة وحبت راس وايدي ابوي وگعدت حده، نزلت راسها مستحية وتنهدت ساكتة واستغربت من سكوتها ليش ما اعترضت؟

-علي التـقي: حبيبة تردين تفكرين خوية؟

-حبيبة: تقي انا.. انا سمعتك بالديوان من گلت تخاف لا عمي مسعود يسوي مشكلة ويحاربكم بيه فـ.. انا شوري من شور ابوي اذا هو راضي على ابن عمي منتصر انا هم راضية

-شيخ علي: حبيبة عمري انتِ بنيتي وحيدتي منتصر والنعم منه ويشهد الله ورسوله انا مربي واعرف كل صغيرة وجبيرة عليه بس ماريد اكسر ظهرج بزلمة عنده بنيات ثنين وتربين بزرة مو بزرتج

سكتت منزلة راسها وجهها مطعون احمر من الخجل، عاينت لـ علي الدر اضحك وهو يضحك ويهز براسه معترض..

-علي الدر: حبيبة

-نعم

-شو عاينيلي

-ها

رفعت عيونها علينا مدمعة يا بوية ما تحمل انا هالوجه البريء، كضيتها امردها بحضني وابوس بخدودها اشبع منها عزيزتي هاي وبنيتي..

-علي التـقي: بنياتي لا تحملين نفسج فوگ طاقتج ما تردينه رفضي ومالج غرض لا تفكرين زايد

-شيخ علي: ها بوية شتكولين؟

-حبيبة: بكيفك بوية

-شيخ علي: بابا لا تستحين احجي الزلمة مقتنعة بي!

-حبيبة: بكيفك بوية

-علي الدر: هذا هو بوية لا نضغط عليها اكثر البت خلت شورها بيدك

غمض عيونه ابوي وذب حسرة عالية، گام على حيله وجرها من بين ايدي وحضنها لجسمه يمسح على شعرها..

-شيخ علي: على گص رگبتي تطلعين من بيتي بنهوة يا حبيبة ابوچ وأنيسته، باچر يجي منتصر يفكها ويطلبچ مني بشرط يجيب مشية يحچي بيها السلف كله!

هزت راسها المنزلته وبقت تفرك بيدها، ضحك علي الدر وكض ايدها بين ايده وگال..

-يلا بوية عوفها البت وجهها راح ينفجر من المستحى

-شيخ علي: خليني اشبع منها ولك

-علي الدر: هههه براحتك

-علي التـقي: بوية المشية والعقد تريده فد يوم؟

-شيخ علي: بكيف حبيبة ابوها

-علي الدر: ها حبيبة؟ شتكولين؟

-حبيبة: بكيفكم

-علي التقي: هاي راح تگضيها علينا بكيفكم وبكيفكم بوية سوي المشية والعقد فد يوم خاطر نرتاح من سالفة مسعود ونجلطه

-شيخ علي: خايب وين تلحگ بنيتي تشتري النفنوف وغريضاتها لباجر

-علي الدر: انا اگولن تسوي عقد مومن مختصر والعرس تسوي جبير بقاعة او بالمچان اليعجبها لو شتكولين حبيبتي؟

-حبيبة: بكـ...

-علي التـقي: بكيفنا اي اي افتهمت خلص هذا هو اتفقنا بيها الخير بنيتي عسى الفرح ما يفارگ گلبچ الابيض

-حبيبة: احم.. مـ.. من رخصتكم

فلتت روحها من بين ايد ابوي وركضت تشرد من الاستقبال، ضحك ابوي ومسح على لحيته متحسر..

-شيخ علي: والله فراگچ صعب يا بنيتي مادري شون اطبن للبيت وانتِ ماكو

-علي الدر: بوية چنك تحمست تره مو باجر راح تتزوج

-شيخ علي: ما نطول بين العقد والعرس خلي بنفس الشهر هذا مسعود مو راحة وگلبي لاچمني خايف عليها

هزيت راسي مأيد مو بس گلبك لاچمك يا بوية حتى گلبي.. طلعت من البيت افتر بسيارتي ماعرف وين اروح مختنگ والضيجة ذابحتني.. فتره واخذتني سيارتي للنهر نزلت اتمشى واعاين على المچان الچانت توگف بي وتحاچيني منگبة فد عين مطلعة والباقي ضامته، ضحكت اتذكرها والله هالبت تضحك حسبالها راح ابلعها لو عاينت لوجهها..

شلت حصوات بيدي من الكاع وصرت اشمرهم بالنهر اگضي وكت وادور بعيوني بلچن اللگه واحد من بيت مسعود هنا النهر قريب على بيتهم ودائماً يتواجدون بي وصدگ دقايق وشفت ابن سلطان الشافنا يتمشى وبيده جگارة يدخن منها ويتلفت خايف لان طبعاً الجاي يدخن بيها مو نفس جگارتنا العادية لا جگارة من نوع اخر..

فز مخترع من شافني وشمرها بساع يدوسها بنعاله، ضحكت مستهزأ خوش مرتبها حسباله ماكو احد هنا واجه يكبسل على راحته..

-سامر: علي التـقي.. شـ.. شلونك؟

-زين بشوفتك

-سامر: هههه والله مادري بيك تجي هنا لو ادري ماجي وايدي فارغة

-خيرك سابگ

-احم.. اجيت خاطر اشمن هوا نظيف شوي ضايج اليوم

رفعت حاجبي مستغرب اشوفنه متوتر وخايف وعينه كل ساع تصير على الجكارة الداسها والعجيب الولد جاي يحاچيني چن ما شاف عمته واكفه وياي على النهر گبل چم يوم؟

-علي التـقي: شونهم اهلك؟

-زينين زينين كلنا بخير

-سمعت بـ غفار وعمتك مرضى صاروا زينين؟

-عمي غفار مسافر ويه جدي لمصر

-اي صدگ نسيت

-وعمتي عرج مابيها

هزيت راسي اليفتر وعفته وركبت سيارتي، رجعت لبيتنا والف حسبة براسي شنو جاي يحوكون هذول وعلى شنو ناوين؟؟

**

"لــــيلة"

اتگلب بالفراش من الملل لعبت روحي من النوم كتلوني محد يخليني انزل كلما اتحرك صاحت بيه عمة رسمية ورجعتني للغرفة مليييت..

گمت من الچرباية افتر بالغرفة واعاين للساحة من شباچ غرفة ابو لسانين بالي ويه حبيبة منتظرتها تجي تطمني شصار وياهة او على الاقل تصعدلي عبق تسولفلي..

فزيت من سمعت صوت خطوات تقترب من باب الغرفة، ركضت ركضض وطفرت على الفراش غطيت جسمي وسويت روحي تعبانة..

-ها شون صرتي؟

طب عليّ ابا الحسن وسد الباب وراه، تنهدت ما طايقة شوفته وانطيته ظهري مغلسة عليه.. گعد بصفي على الچرباية وحسيت بأيده يحطها فوگ زندي اليسار ويسحبني منه على كيفه بدون لا يأذيني..

-ليلة: ااااااااخ

-شني شصار شبيچ

-ااااخ ايدي اااخ شبيك هو هيييج تجرنييي

-ولج برهاوة ايدي ما اذيتج والله

-وشمعرفك ما اذيتني؟ شنو عايش بجسمي؟؟

-ليلة تردين تقنعيني هاي اذتج؟

-اي!

-اسفين بوية اسفين

گالها رافع ايده مستسلم وگعدت على حيلي اگلب بعيوني، طگطگ رگبته وتحسر قبل لا يكول..

-عايني انا ادري بيج ضايجة مني على الصار بس اقسم بجاه الله ما نويت أذيج او اضغط عليج او اهينج مثلما جاي تكولين بأي طريقة چانت

-مو مهم

-مهم ليلة بالنسبة الي مهم! انا مو همجي ولا رجعي ومتخلف انا كل الردت اسوي انقذچ من الورطة الورطتي روحج بيها!

-ابا الحسن

-ها

-طگ گلبي من هالموضوع ماريد نحجي بعد بي

-هو بكيفج؟؟

-ابا الحسن عاين انتَ چنك ما مصدگني بريئة فـ انا اگول...

-بدون لا تگولين وتلغين لغوة زايدة انا لو ما مصدگچ ما اعاين لوجهج ولا اكعدج هالكعدة ببيتي وبغرفتي فـ سدي حلگج ولا تظلين تلوصين

-ابطل تلويص اذا انتَ بطلت تچفيص

-ولج ليلة اااااااخ يا ليلة

-خوية سويها وحدة بوحدة شالسالفة شطلبت منك انا

-خوا الخواچ يا ليلة وضيم اللفاچ

-اريد ماااااي

-سمحااي اجيبلج

-يلا يلا جيبلي ماي انتَ مو لازم تهتم بيه؟

-كومي جيبي لروحج

-خوش ابا الحسن الا اكول لعمتي اخليها تغرد عليك

عض على اصبعه حيييل وطلع صوت بحلگه چنه صوت محرك سيارة، درت وجهي عنه فاطسة ضحك بس ما بينت كدامه وهو كام يجيبلي ماي وحط الكلاص بوجهي انكب نصه على الفراش..

-حسنن هو هييج

-شربي وانچبي

-ما اشرب بطلت!

-ليلة تشربين لا اديره فوك راسج

-انتَ زلمة سويها!

وما چذب خبر شال الكلاص وداره فوك راسي خلاني اشله من البرد الماي ثلجج والغرفة باردة كمت من الجرباية اطفر مثل السوادين..

-انت مخبببببل مسوووودن؟؟؟ المحامي ابا الحسن ابو لساانين مسووودن يا ناااااس

-ابا الحسن علي: شو اشوفنچ گمتي مثل الحصان عرج مابيج

-اوووويلي يا حسن لو اكضك!!!

-هههههاااي بتك ايد اعقچچ

-ههههههااي اي نسيت انتَ وحشيي

-وحشي وزلمة خشنة وافتخر

-بيك ز.....

-بيه شني؟؟

-شني شني شكووو

-گلتي بيك "ز" هاي الزاء مال شني؟؟؟

-مو مال شي لا تلح

-تكولين مال شني لا اكضج واطلع روحج وعلي!

-تطلع روحي شلون ووولك

-بطريقتي الخاصة ليالي

-نععالي احسن احترم نفسك حسيون ولا تظل تهدد بيه

-گليلي الزاء لشني واحترم نفسي

-مال زوااج زوااااج ارتاحيت؟؟

-اوگفي اشوف الجملة ترهم لو لا "بيك زواج.."؟ لا ما ترهم لازم الها تكملة

-احووووووو على عمرري

-لطمي خية لطمي حيل

-اييي اللطم على حظي المطين

ضحك ضحكة مستفزة يمة شعل بيه نار كبرة بالعباس لو بيدي احطه واكتله، مد رجله على فراشه وريح ظهره على تاج الجرباية وگال بغمزة..

-عروستي المسودنة جيبيلي ماي

الحرگة صعدت لمعدتي طگت روحي واريد انتقم منه بس ماعرف شلون ماعرف شسوي، عاينتله يضحك ويغمزلي بتلاعب واجت ببالي فكرة.. رحت للدولكة شلتها خاطر اصبله ماي وطيحتها من ايدي خليتها تتفلش بالكاع وطحت وياهة بنفس الوقت..

زوغلت عيوني اسوي روحي دايخة وسمعته من طفر من الجرباية يصيح متخبل، ركضلي وكضني بين ايده حضني ويضرب على وجهي ويصيح خايف..

-لييلة لييلة شبيچ ليلة شصاار وياچ؟؟ دختي؟؟ شو حاولي تثبتين عيونج وعاينيلي

-دايخة.. دايخة

ما جاوبني وشالني يرفعني من الگاع، ضحكت بگلبي ضحكة حقيرة وگوة سيطرت على روحي لا ارسم ابتسامة انتصار على وجهي خصوصاً من نزلني على الجرباية بالمكان الناشف وركض جاب منشفة يمسح شعري من الماي..

-مادري بيج هيج دايخة والله مادري شسويت خررب

-ااه

-عمت عيني مادري والله صدگيني

-جاي تضغط عليّ حسن تعبت

-ما اضغط التوبة والله حتى ماي بعد مانريد نموت عطش عادي بس صيري زينة

-تعبانة

-بعدوينچ التعب يا بعد الكل

-خوب ليش مو بيك؟

-چا ياهو يداريج اذا انا تعبت

-اممم.. هم صدگ

-محتاجة شي؟ اجيبلج شي؟

غمضت عيوني اللوب براسي حتى ابين انا صدگ دايخة وشو مادري شمالني من سويت هالحركة صدگ دخت هبط ضغطي والغرفة دارت بيه..

-ليلة ليية وياي انتِ؟؟

-اي اي

-اجيبلج شي؟

-ماي.. خاطر اخذ.. علاجي

-اي صار

نزل يجيبلي بطل ماي من جوه لان الدولكة انكسرت ورجع يركض، صبلي بگلاص وانطاه بيدي وراح جابلي علاكة العلاجات..

-هاج، ياهو اول انطيج؟

-المكتوب عليه شخطتين

شربني العلاج كامل ومددني على الفراش، طلع من الغرفة مرة ثانية مادري وين راح بس بساع رجع وبيده لحاف جديد وچرچف ووجوه مخاد..

-تكدرين تكومين شوي علما افرش الجرباية؟

-اي

گمت على كيفي ورحت اكعد على الكرسي وهو اللتهى يفرش الفرشة الجديدة، اعاينله ومتشمتة بي حاير ما يعرف شلون يلبس وجوه المخاد وشلون يرتب الجرجف ايي حيل بيك حس بمعاناة عبق الفقيرة وهي تنظف غرفكم ولو گالتلي انتَ قليل توصخ ودائماً غرفتك مرتبة بس هم حيل بيك..

-يله تعاي ارتاحي كملت

-الجرجف مو عدل

-اوكفي

راح يعدله وصفه بشكل مرتب، كمل واشرلي اجي..

-ليلة: هذا اللون مو زين عليَّ

-يا لون؟

-لون الچرچف ما يصير تحطلي لون ماروني

-ليش؟

-معليك سوالف نسوان

-يعني لازم اغيره لو شني هسة

-اي غيره

-ليلة شسالفة

-شسوي غير تريدني اطيب بساع

نفخ هوا ضايج ونزل يجيب غيره، ضحكتتتت من كل گلبي الله احسني فرحانة اخيراً والضوجة راحت مني.. رجع بيده چرچف اسود ومطعم بأبيض وسوه نفس گبل شوي فرشه ورتبه واشرلي اجي..

-يله هاي غيرته

-ابا الحسن شون تجيبلي اسود صدگ تحجي انتَ؟

-ليش ولج

-شني تريدني اموت؟ فال مو زين الاسود للعروس

-ليلةةةة چا ما عرفتي تحجين گبل لا افرررشها!

-دايخة ما انتبهت

-خرب خررب خرررب خرررب خررررررب

-عادي لا تغيرها انام عليها چا شسوي

-والفال المو زين؟

-شنسويله انام عليه وانتظر موتي

-گبر لهالعقل فال الله ولا فالج نازل ابدله لا تنامين عليها

-لا مو خاف تتعب

-انجبي وكعدي

-لا عليك العباس ما ارضى بتعبك

-گعددددي

هزيت راسي اي وعفته ينزل ويجيبلي غير چرچف هالمرة جابه سمائي فرشه وكمل وصفنت افكرلي بسالفة جديدة بس گبل لا يخليني افتح حلكي واعترض خزرني ورفع اصبعه يم شفايفه وگال..

-وراس اخوتي حچاية وحدة بعد وانزع اخلاقي!

عبست بوجهه واجاني گومني من الكرسي ونيمني غصب وغطاني يلهث تعب من الصعدة والنزلة، كعد بصفي على الجرباية يستراح وگال..

-محتاجة بعد شي؟

-امم

-شني تردين؟؟؟؟

-هاي شمالك تصيح مانريد خوية مانريد

-لا تكولين خوية

-بكيفي اكول اليعجبني

-اويلي يا ليلة طفيتي ليلتي يا ليلة

-گبل جانت طفت ليلتج يا ليلة بس چن صارت عليها تحديثات

-تتحدث حسب الحالة

-ها مو اكول

-كولي شتردين

-رجلي توجعني تكدر تدوسلي؟

-اكدر اكسرها واخلصج منها؟

-لاااا مانريد عمي بطلنا

-لا عليج العباس لا تخليها بنفسي

دفعت ايده المدها على رجلي وخليت رجلي على جهة خاطر ما يتقرب منها، ضحك على حركتي وگام من الفراش نزع ملابسه الفويسد كدامي وطب للحمام يسبح بلچن يغرگ بالدوش واخلص منه!

**

"حـــبيبة"

گلبي يريد يوگف وحق الله ما جاي اصدگ منتصر سواها و نهى عليَّ ولا جاي اصدگ ثاني يوم طبق شرط ابوي و جاب مشية الديوان قبط بزلمها وفك النهوة گدامهم وطلبني من ابوي بشكل رسمي، صح ابوي واخوتي شلعوا گلبه وگلبي وما ردوله جواب الا وره يومين وانا بهاليومين اركض مراكض ماعرف احجز صالون لو اشتري فستان المهر لو اجهز وضعي..

هاليومبن مرت بفرحها وخوفها، من جهة خايفة لا ابوي يبطل ويرفض ومن جهة ثانية خايفة لا يجي عمي مسعود وتخرب بس العجبة ما اجه! وبعدين افتهمت من تقي مسعود مسافر لمصر بشغل هو وغفار وزيد وعاصف والحمدلله من چانو مسافرين لان لو موجودين بالعراق چان صارتلي طرگاعة..

باچر عقد المومن تمددت على چربايتي واحس بگلبي راح يطگ من الفرحة، ضحكتي من الاذن للاذن حتى استحي انزل كدام اهلي لا يشكون بيه خصوصاً امي حاطة دوبها من دوبي راح تموت من يوم النهوة لحد هسة، تروح وتجي عليَّ تگول "راح تندمين وتذكري چلامي" خفت من عرضتها بالبداية بس سلمت امري لرب العالمين ودعيت يسهل حياتي ويريحني ويه الزلمة العشگه گلبي..

ليلة المهر البنات كلهن عندي بالغرفة والفرح والرگص والردح للصبح، حطت بحضنها عبق كارتونة الكلينس الخشب وصارت تدگ عليها وتغنيلي..

-هاي الرادها وهاي التمناها بت الشيخ لابن الشيخ جبناها

-ليلة: يخالة منين جبتيها كلها تعجبت بيهاا ويا خالة منين جبتيها

-البنات كلهن: وكلها تعجبت بيها كللللوووششش

البنات شعلن الجو شعلل وتبرن من رجولتهن كلهن نامن عندي اليوم ومن الصبح گعدن قسم اجن وياي للصالون وقسم بقن بالبيت خاطر يرتبن ويهتمن بالمعازيم القليلين والكوشة..

فرحتي ما انطيها لاحد ولا راح انطيها لبشر انا سعيدة لدرجة احسني بحلم وما جاي اصدگ هالشي صار واليوم يعقدولي على منتصر يا فرحة گلبي وبهجته.. طلبت من ام الصالون تسويلي شي بسيط مكياج وردي ناعم لان فستاني لونه اوف وايت وردت شعري مفتوح..

تَـمني طلبت شي بسيط وعبق وتالة بس مكياج بدون تسريحة، اجواء الصالون ما تقل فرحة عن البيت رحت للي مكيجت تَـمني بعقدها تصير صديقتي من ايام المدرسة واخذت الصالون طول بعرض هلاهل وگفلات تهوسلي..

-نرجس: اييي تزوجي خية تزوجي عفية عليج

-حبيبة: اممم اظن اكو وحدة چانت تكلي شتسوين بالزواج والشلعان الگلب؟

-نرجس: هاي مو انا هذا جان خيالي يسولف وياچ گبل

ضحكنا على سوالفها وكملنا مكياجنا بوجود امي الما انرفعت شفتها بأبتسامة، گاعدة والزعل تارس وجهها..

-نرجس: خالة فرحي لبنيتج عروس اليوم

-سلوى: خففيلها مكياج خية لا تطوخين مو زفة هي

-نرجس: هي سمرا ويلوگلها المكياج البارز خالة

-سلوى: لا ما نريد شي بارز خففي ابوها ما يرضى

ضحكت على عبارتها "ابوها ما يرضى" چن اول مرة امكيج بصالون بس غلست وما حجيت، كملنا صالون ورجعنا للبيت استقبلنا علي الحـق من الباب يصيح..

-وينها قبببق وينهااا

-عبق: الله يستر.. ها هنا اني هنا

-علي الحـق: خلشوفچ مغطية وجهج عدل لو لا شوو اشوف

-عبق: مغطيته والله

تقرب منها يعاينلها ويتفحصها وبنفسه رفع البوشي من وجهها يشوفه خفيف ويبين بالشمس لو لا، كمل تفتيشه واخيراً ركز بوجهها وموتنا ضحك من شهگ وگال..

-اشتعلوو اهلج على هالجمال

-عبق: لا تشعل بأهلي علي الحـققق

-اااخ گلبي ولج ماكدر گلبي ما يتحمل كل هالحِسن

كاض گلبه ويلوب بمكانه، گلبت عيونها امي متنرفزة وعبرتهم وطلعت من المطبخ بينما عبق ضحكت وتخصرت گدامه رافعة حاجبها..

-شتريد علي الحـق اعترف

-شني شريد؟

-كول شتريد مني؟ احچي لا تظل تسويلي گلبي وگلبي

-هااا يعني اسولف؟؟

-سولف

-اريد نتزوج واليوم!

-لااا تحجي صدگ انتَ؟؟

-اي

-تَـمني: يمعودين صلوا على النبي اليوم خطوبة حبيبة

-علي الحـق: خايبة اللهم صل على محمد وآل محمد بس كافي بزعت روحي اريدن اتزوج اريدن اخلف اريدن....

-عبق: ستوووووب

انهاريت من وگفت على اطراف اصابعها وسدت حلگه بيدها، صارت تعرفه ماعنده ستوب حق ويحجي كلشي يعجبه بدون مستحى..

-حبيبة: شطرى عليك تزوج هسة حق؟

-علي الحـق: ابوي حاچاني گبل لا اروح لبغداد وگال ما يرضى بوضعنا هذا كاعدين ببيت واحد وبس عقد بيناتنا فـ حضري روحج عگروگ حددت يوم واحد بالشهر عرسنا

-عبق: عزااا شلحگ

-علي الحـق: تلحكين تلحكين

-عبق: حق عندي امتحانات ماكدر اتزوج شبيك نسيت

-اقريچ انا معليج

-لااا علي احنه اتفقنا وره امتحاناتي العرس

-وابوي ما يعجبه گال لو تفضوها لو تفصخوها غير هالشي ماعندي

-لعد خلينا نفصخ

-بت الاووادم ما صدگت!! امشي وياي امشي

-وين اروح راح يبدي العقد

-امشييي

كضها من ايدها ياخذها كدامنا وهي تعترض ما تقبل تستحي، رحنا وراهم للصالة ونشوفه يسحلها يصعد بيها الدرج ويأشرلها تستعجل ويكول..

-بساع بسااع گبل لا تجي الشرطة

-عبق: منو الشرطة؟

-امي يعني منو

عفناهم يصعدون فوك وانداريت على تَـمني وتالة وشمس يضحكن بالسكتة عليهم، صعدت تَـمني لغرفتها تتجهز وانا رحت لغرفتي گبل لا يوصلون الناس وتالة وليلة ورفل وشمس وياي يساعدون..

-رفل: حبيبة چن بيها كبر بدلتج شوي؟

-ليلة: يا النادرة ما سادة السحاب

-رفل: عاين الثول ولا انتبهت

-شمس: بنات جان لازم نشجع ابرار تشتري فستان ويانه

-حبيبة: عجزت وياهة والله بس ما ترضى شبيدي

-رفل: هم الله يساعدها اسبوع الجاي عملية ابنها وحاطة ايدها على گلبها خايفة

-ليلة: الله يرجعله حيله بجاه علي واهل بيته..

**

-علي الحـق هدني حباب استحي گدام البنات

-سكتي ولا نفسس طگ گلبي عليج صارلي يومين هنا والشرطية امي واكفة حراسة مشددة عليج ما تخليني اشوفج

-حباب تحمل بس هالفترة بينما اكمل سادس

طبگ باب غرفته ورانه وراد يقفلها وما قبلت، عافها بس مسدودة واندارلي يفرك ايد بأيد ويضحك بخبث متحمس..

-اخيييراً

-باوع حق لو سويت حركة سخـ....

ما سمحلي اكمل الجملة وجرني يبوسني ويحضني كسر ضلوعي يترجم اشتياقه، دخت من هدني وحسيت راح اوگع كمشت بقميصه وبقيت مغمضة عيوني استوعب..

-عنق

-همم

-بشري ما خلص مفعول المخدر؟

فتحت عيني بسرعة ودفعته عني مستحية، هفيت وجهي المشتعل وهو بقى يضحك على تصرفي وجرني من خصري يحضني ويبوس خدودي وراسي..

-مشتاگلچ وتعبان من الشوگ

-غير انتَ تجي يومين وتغيب شهر

-والله من وره شغلي لو بيدي فلا اعوفچ

-علي حباب خلينا نأجل العرس فدوة قنع عمو

-شفق اذا على الامتحانات لا تخافين ما ازعجچ ولا الي شغل بيج ابقي درسي للصبح واذا تردين حتى بنفس الغرفة ما ننام

-مو بس علمود الامتحانات انتَ مو كلت ترجعلي امي؟

-والعباس ارجعها وهاي انا اجيت خاطر اگلج اول امس گبل لا ارجع رحت للمستشفى وسألت عنها گالو وضعها جاي يتحسن على العلاج كله چم يوم ونگدر نطلعها

-خو هسة نطلعها ونكمل علاجها بره؟

-ما رضى ابن الچلب مچلب بيها شلع گلبي بس ما اخليها عبق وعيونج العاشگهن ما اخليها واجمعكم بأقرب فرصة

-الله لا يحرمني منك

-ولا منج يا رويحتي

حضني حضن قوي حسيت بضلوعي تنطبگ ويه ضلوعه بس ما حچيت بالعكس ضحكت وفرحت على لهفته.. شوية شوية بديت ارخي نفسي منه اريد اروح وما قبل لزمني وشبعني احضان وبوس ما خلى مكان بوجهي يعتب عليه..

-علي الحـق كافي مصختها شسالفة

-طاح حظج هي مطگة شمسوي انا

-اي كافي بزعت حتى مكياجي خربته

-ما تحتاجين مكياج بزونتي من الله تجدحين

-على طاري المكياج عاجبني اطلع ويه حبيبة من تجهز واكمل جهازي شنو رأيك؟

-اي ليش لا واشتري كل البالج مو بعدين تكولين حرمتني

-لا اشتري لا تخاف

-كثريلي سمائي قبقي

حچاهة بغمزة ومادري ليش تخيلت قصده فاسد لان الكدامي علي الحـق ومستحييل قصده شريف بأي شي يگوله..

-شنو قصتك ويه السمائي؟ والله لعبت نفسي منه ومليته

-لا تملينه لان جبتلج شي وياي من بغداد

فتحت عيوني متفاجأة وفرحانة لانه ذكرني بشي وفرحت اكثر من راح لجنطته وطلع منها فستان سمائي!

-هههههههههههه علي الحـق

-والحمزة افقد على هاللون عليج

-شمعنى

-لان باليوم الشفتج لابسته تأكدت من روحي عاشگچ وحسنچ ما فارگ خيالي

-يعني اني بس بالسمائي حلوة غير اللوان مو حلوة عليّ؟

-تشگين بس مو بحلاة السمائي

ابتسمت اگلب بالفستان حلو كلش وچان لبسته اليوم بس محضرة غير لبسه اشتريتها ويه حبيبة من اشترت فستان العقد مالتها..

-شكراً حق كلش حلو

-شو ناشفة الشكراً مالتج؟

-ماشي ذكرني من نتزوج ابوسك على خدك

ضحك بصوت مسموع وطفرني من مد ايده على بطني يقرقرني ويگول بغمزة..

-اليوم تنامين يمي قبق

-مستحيييل

-تنامين وغصباً عليج

-باوع من الاخير هالسالفة تطلعها من عقلك ما اسويها لو تموت فـ هسة خليني اطلع اجهز نفسي قبل لا يعقدون لاختك

ما انطيته مجال يجاوبني وطلعت من غرفته ودخلت لغرفتي وقفلتها، بدلت ملابسي بسرعة وسويت شعري ونزلت صح مجايين هواي ناس وينعدون على الاصابع بس صار العقد حلو وطبعاً فراقد شعلت الجو شععل..

-فراقد: خايبات شمالجن شنيي نايمات

-ليلة: انتِ تكفين وتوفين خالة

-فراقد: انتِ شمالج ذبلانة ورفيلة هم شبيجن ولجن وامچن وين؟

-رفل: مريضة امي واحنه مابينا شي

-فراقد: يلا چا گومن ردحن وياي

ما لحگن لان نزلت حبيبة من الدرج وخطفت كل الانظار، الف ما شاء الله عليها تضوي لابسة ابيض من فوك ليجوه تخبل عبالك غصن بان النزاكة والعطر والكشخة كلها يمها.. حبيبة من الشخصيات الي بس تباوعين لوجهها تعرفيها بت عز وخير ومدللة والسبب مو بملابسها الغالية ولا اختيارها لتنسيقاتها لان لو تلبس دشداشة كودري هم يبين عليها بس بعد هي عدها هالميزة من الله..

استقبلناها بالهلاهل والگفلات الحلوة ونزلت كعدت يم الباب التفصل بين الديوان والاستقبال حتى يتم عقد القران، ابتسمت فرحانة من شفت صديقاتها اجوا بس حور مو وياهم والسبب معروف..

-رسمية: هدوء يا نساوين بده السيد بالعقد

سكت الكل وفتحن ايدهن النسوان بشكل الدعاء من بده السيد يعقدلها، گلبي يدگ فرحانتلها وطول ما هي تعقد اني ادعي ربي يتمملها على خير ومتشوف غير السعادة..

-هدية: شسالفة شو كرر العقد خمس مرات

-سلوى: غير على اصحاب الكساء

-صفاء: شني هالسوالف هي مرة وخليها تفض

ردتهن سلوى ما راضية وتأشرلهن يسكتن لا تسمع حبيبة وتضوج، خوات منتصر واضح ما حابات هالزواج وما مقتنعات بي ومن بدايتها يردن يسون مشاكل..

اعتلت الهلاهل من انطت الموافقة حبيبة والصالة انترست فرح، مسحت دموعها خالة رسمية وحضنت حبيبة تكول..

-رسمية: اللهم صلللل على محمدددد وال محمددد الف الف مبروك بنيتي حبيبة ممهلة يا وردة البيت

-حبيبة: الله يبارك بيج يمة

گومناها من الكرسي نطش عليها بتلات ورد وچكليت ونهلهل وليلة لعبت لعب بالهوسات شايلة طرف فستانها الجابه الها ابا الحسن وگال لامه تنطيهيا بداله لان يعرف متتقبل شي منه ورافعته وتهوس..

-ليلة: صلييي على نبينا والعين لا تجيناا

-عمة ابتسام: حبيبتنا حديقة والورد بيها ماخذها شباب ومعتني بيها

-تَـمني: يله بنات خلونا نبدللها قبل لا يدخل منتصر

صعدناها فوك تبدل لفستانها الاوف وايت ووگفت كل وحدة من جهة ترتبها، دقايق وفتحت الباب علينا اخت منتصر هدية وكالت..

-يلا يا عروس اخوي منتظرج

-حبيبة: اجيت اجيت

سديتلها السحاب ورتبنا اخر اللمسات ونزلناها بهلاهل هزت البيت، گعدناها على الكوشة وحبيبتي طايرة مثل الفراشة ابتسامتها من الاذن للاذن ما غابت وكل شوية تهمسلي..

-عبق گرصيني فدوة

-ليش ولج

-اخافن جاي احلم

-ههههه لا مو حلم الديصير حقيقة

لبسنا احجبتنا وعبينا من كالو راح يدخل منتصر ووگفت على جهة اسويله مجال، استقبلوه عماته وخواته بهوسات وصفگات وفرحة تختلف عن قبل شوية هالمرة صدگ فرحاناتلهم.. مشى منتصر بأتجاه حبيبة مبتسم ابتسامة هادئة ووگف بصفها بدون لا يرفع عينه ويباوعلها..

گعدوا واحد بصف الثاني مبتسمين، حبيبة منزلة راسها وتلعب بمسكتها مستحية ومنتصر رافع راسه لخواته يتشكر منهن.. استغربت من ما دار فص عينه عليها طووول ما هو هنا، بقيت واگفة وعيني عليه واحس اكو شي مو طبيعي الرجال ما تلحلح من مكانه لا باس خدها من گالو حبها ولك حبها ولا تعب نفسه يباوعلها باقي بس يوزع ابتسامات..

دقايق ما طول بالگعدة مجرد لبسها الذهب والحلقة وطلع بسرعة، باوعت لـ تَـمني وليلة توقعتهن هنه هم انتبهن لشي مو طبيعي بس چانن فرحانات ويصفگن واستوعبت ماكو غيري الي انتبه ويجوز اني دابالغ مادري..

خلصت الحفلة وطلعوا الناس وصعدت حبيبة فوك لغرفتها تستحي تنزل كدام ابوها واخوتها شكد رادها عمو علي تنزل حتى يباركلها بس قفلت متروحلهم خجلانة كلش ورگبتها ووجها رغم المكياج مگلوب احمر..

-شيخ علي: ما تنزل احنه نصعدلها يلا يا ولد

ابتسمت سلوى ونفخت روحها فرحانة لان راح يصعدون لبنتها فوگ وما جبروها تنزل، ضحكت من غمزلي علي الحـق وبالختلة بدون لا احد يشوفه مد ايده يتحارش بيه ويگرص بزندي وبطني خلاني اللطم..

صعدنا وراهم اني وتَـمني وليلة نسوي روحنا نريد نروح لغرفنا بس جذب وگفنا مادات روسنا نتجسس شنو ديحجون ويه حبيبة ابوها وأخوانها..

-شيخ علي: گالو حبيبة ابوها ما تريد تشوف ابوها

-حبيبة: حشى وراسك الغالي..

ركضت على ابوها باست ايده وراسه وتضمضم بچتافها وصدرها بالشال تخاف لا يبينون، سلموا عليها اخوانها واحد واحد وسور ونور مچانو فرحانين مثل عادتهم وبوسوها من وره خشومهم..

-علي السور: عود مبروك

-علي النور: عود شايفة كل الخير

-علي السور: ولو ما حصلنا كيكة بس ما يهم

-علي النور: شنسوي بالكيك اصلاً مو طيب

-علي السور: حشى النعمة ياهو بقى ياكل كيك هالوكت

-علي النور: انا سامع بس الفگريات يجيبون كيك ويوزعوه بالحفلات

-علي السور: صح حبيبة كلش اخطأتي بأختيار منتصر مو ستايلچ

-علي النور: راح يخرب برستيجچ حبيبة

-علي السور: تره جبير عليج وبعد بكيفج

-علي النور: ومتزوج گبلج يعني مو جديد

-شيخ علي: و تففففگ ادبسززية

-علي النور: بوية چا حبيبة تستاهل گلب جديد ما مدشن شني هاي

-ابا الحسن علي: شكد تلغون لغوة زايدة البت عقدت وخلص

-الامـير علي: اي والله شيفيد الندم بعد

-شيخ علي: امير!!

-علي الدر: انتَ ما كتلتنا هاي ومنتصر اقرب اصدقائك

-الامـير علي: صديقي وابن عمي موش نسيبي!

-شيخ علي: اسكت واطلع بره لا تخرب على اختك

-الامـير علي: بوية شون تطرد شيخ المستقبل؟

-شيخ علي: خ** على الشيخ

ضحكوا كلهم وحتى امير ضحك وبلعها يسوي روحه معصب، فر بيده شيخ علي وطلع من غرفة حبيبة والبنات تطشرنا كلمن لغرفتها نتراكض، بعدني ما طبيت لغرفتي وانشنطت من ياخة الصاية مسحولة..

-عبق: هذا يا فاسق يا فاجر يا فاسد يا...

-علي الحق: ياهو الراح يلعب جولة اليوم

-شتريد حق شتريد شكد فشلة من اخوتك

-وينهم اخوتي؟ ما جاي اشوف احد؟

-هسة يجون والله باوع هسة يطلع تقي من غرفته

-شعلتينيي بـ تقي امشي كدامي امشيي

جرني لغرفته غصب بس دكيت رجل ما افوت شنو مخبلة وانام يمه اليوم والله اذا عرفت خالة رسمية تطردني من البيت وتطلعني اني الملطلطة والمو زينة..

-ما ادخل علي الحـق!

-هااا

-اي!

-هيج صارت عبق!

-اي!

-خوش روحي لغرفتج ماريدج بعد

-تمام

عفته وركضت لغرفتي بس ما لحكت اطبك الباب ودفعها وطب وراي وقفلها علينا وحط المفتاح بجيبه..

-علييييي

-يموت عليح علي

-علي شدتسوي انتَ تريد تفضحنا

-اي

-حباب اطلع والله ميصير هيج احنه بعدنا مخطوبين عيب هالسوالف

ابتسم وذبل عيونه يباوعلي من جوه الجوه، رفعلي حاجبه على هالوضع وكال..

-ها ولج سرسرية وين راح بالج

-وين راح ما راح لمكان

-چا ما دامه ما راح لمكان اليوم تنامين هناا

ضرب على صدره بيده وجرني للچرباية تمدد عليها هو ودشداشته النيلي ونزع ساعته يحطها على جنب، ابتسمت متنهدة ماعرف شسوي ويه هالرجال العنودي المستعجل تعبت واني افهمه العيب والفشلة بس ماكو من يقفل هذا هو بعد..

-تعاي

-ما اجي

-عنق رحميني وتعاي بالعباس گلبي تعب

-ليش تعب عيني؟

-اريدج

-ريدني بعدين هسة مالك شي يمي

-تجين لا اجيچ!

-لا تجيني ولا اجيك وباوع خلينا تتفق اتفاق يرضي الطرفين

-ماحب الاتفاقات

-لازم تحبها علي الحـق

-بله سمعينا شني اتفاقج؟؟

-ننام راس بچعب

-تجيييين لا احط چعبچ يم راسچ!

عطت بكتمة من عتني من ايدي وشمرني على الفراش وحضني بكل جسمه يقيد حركتي، ظليت ارافس واتعارك وياه بس يا جبل ميهزك ريح ولا تزحزح!

-انتَ ليش متحترم رغبتي لييش

-خلي اليوم استثناء عگروگ

-استشناء شنوو المناسبة؟ عرس امي؟؟

-هاا تردين تزوجين امج؟ بيج خير وادللي بس تصير زينة ازوجها لابوي

-علييييي

-ولج سكتييييي

عصرني وضم حلگي بيده يسده، غمضت عيوني مستسلمة لان لو ابقى لباجر اتعارك وياه هم ميفيد بي.. وخر ايده عن حلكي وره ما هدأت ولا ارادي ابتسمت من باس خدي وهمس بأذني..

-احبچ

-امم

-عاشگچ من الجدم للراس

-علي

-عيونه ورموشه

-احبهن

-شني هنه؟

-عيونك ورموشك

-وهنه يحبنچ يا بعدهن....

**

-ما تنامين ابوي؟

-تَـمني: لا ما جايني نوم

-چا شراح تسوين؟

-اگلب بتلفوني

هز راسه ساكت وتمدد بمكانه، بقيت بصفه متمددة واگلب بتلفوني واجاوب الرسائل الجايتني، انمغصت اليوم من رجعت زوجة محسن راسلتني تطلب تشوفني بس مجاوبتها لحد هسة اريد اسولف لامير عنها واخذ رأيه باجر لان اليوم مبين على مزاجه ضارب..

ظليت اكلب بتلفوني ورحت على اسم حبيبة حبيت اتحارش بيها شوية واداهرها، كتبتلها..

"ها دتراسلين الحب ولج (ودزيت ايموجي يغمز)"

شافت رسالتي بسرعة وجاوبتني بـ كلمة..

"لا"

"امممم علينا"

"والله لا"

"ليش لعد انتو اليوم انفك الحصار عنكم ومتتراسلون؟"

"ولج هو ما راسلني راح انجلط"

"ليش تنجلطين يمكن الرجال مشغول او نايم تره الوقت متأخر"

"مادري تَـمني"

"لا تظلين تفكرين باجر وراكم دوام ثنينكم واكيد هو غفى بدون لا يحس على نفسه"

"ياريت يطلع كلامج صح"

"صح صح لا تظلين توهوسين اخذيها مني"

"شكراً فهاوي احبج هواي"

"احبج اكثر"

طلعت من محادثتها وبقيت اطب من تطبيق اطلع لتطبيق ضوجة وما جايني نوم، ابتسمت على اشعار احاني من نرمين مصورتلي بطنها اووووي كبرانة شوية ومبين الحمل عليها..

-المن تضحكين؟

اخترعت فازة على صوته مادري بي بعده كاعد لاا وانوب حاط ايده جوه خده ويباوعلي..

-خرعتني امير

-ليش شسويت

-مادري عبالي نايم

-هدي الموبايل نوومه ونامي

-نوومه ونامي حبيتها هاي

-يلا حبيبي هدي

-دا اسولف ويه نرمين اوكف

انطيته ظهري اراسل بيها واخذني الوقت وياهة عاد نرمين من اراسلها انسى روحي وهي تنسى روحها، ضحكت بالخنسة من كتبتلي ام رجلها تروح وتجي تعبي بيها اكل حتى عود الطفل يطلع سمين مو ضعيف مثل الابو بريص وبنص محادثتنا وضحكتي حسيت بشي صار يمشي على خصري..

-يمممممةةةةةةة

طفر امير من مكانه مخترع وركض يفتح الضوه يشوف شكو، اشرت على الفراش وعطت..

-ابوو بريص امييير ابوو بررريص على فرااشنااا

-ابو بريص؟؟ منين اجه منين

-ماادري انفض الفررراش مااادري

-ولج من وين اجه ثانياً وين اكو بريعصية بالشتا

شال اللحاف ينفضه وطررت اركض للحمام وطبكت الباب عليه ارجف واتلمس خصري يممة لعبت نفسي وجسمي كله كزبر ماتحملت ابقى لابسة التشيرت نزعته بالحمام وشمرته بالكاع، فتحت الباب ومديت راسي منها احجي وياه..

-هاا لكيته؟؟

-ماكو امنية كلشي ماكو

-والله حسيت بي امير مشى على خصري والله

-على خصرج؟؟

-اي

-هاي يمته؟

-هسة ما صار دقيقة

-خرب راسج تَـمني!

-ليييش

-ولج هاي ايدي!!!

-شنو

-ايدي انا كضيتج من خصرج

-كذاب

-والله العظيم انا كضيتج اتحارش بيج بس طبعاً فهااوي سوت ايدي بريعصي!

-احسك كذاب

-تَـمني!!!

-هاي شبيك اميير هسة اني شمعرفني انتَ دتتحارش بيه عبالي ابو بريص بالي يمه

-طلعي من الحمام طلعي شردتينا بهالليل

-اوكف

مديت نفسي اخذت قميصي لبسته وطلعت بس بعدني لعبانة نفسي وعقلي ديگولي ابو بريص چان يمشي على خصرج..

-چفصتي بأم الرومانسية

-امير شبيك خفت

-تعاي نامي تعاي

رجعت على الفراش مكزبر جسمي واتلفت وادور جوه البطانية، رفعت راسي عليه شفته خازرني بلعت خوفتي ونمت بسرعة وغطيت روحي وطلعت بس عيوني اباوعله..

-اميـ...

-نامي بلا صوت

-ما

-نامي ولج

-ما انام منعسانة

-چا سكتي

-ما اسكت

-ما تسكوووت الفاهية اششش يلا

-لا تأشأشني

-اشأشأچ ونص!

-ازاعلك

-زاعلي

-اكرهك

-كرهي

-اطلگك

بهت فاتح عيونه ثواني وفجأة طگها بضحكة عالية كلش، ضحكت على ضحكته بس ضميتها بالبطانية خصوصاً من شمر جسمه على الجرباية بصفي واندارلي بكل جسمه يحط وجهه بوجهي ويگول بأستهزاء..

-ياهي هاي تطلگني؟

-يووه امير كافي عوفني راح ازعل صدگ

-هو بس هذا المحصله منج تزعلين عليّ

-يمته هاي؟ ثانياً لا تظلمني اني منطيتك كومة اشياء

-وين كومة؟ هاي وانا اجدي منج الحنان جداوة وهاي اليوم حرمتينا وامس حرمتينا واول امس حـ..

-يلا يلا خلينا ننام نعسانة اني كلللش نعسانة باي

انطيته ظهري وغطيت وجهي وجسمي بالبطانية كلها خنگت روحي خنگ، توقعته راح يجر مني البطانية ويكمل مداهرته وبقيت منتظرته لحدما غفيت وما حسيت على روحي..

كعدت الصبح على صوت طگطگة خفيفة، وخرت البطانية من وجهي شفته ديلبس ساعته ولزم شيشة العطر يتعطر ويدندن..

-عنك اذا سألوني.. تفضحني بيك عيوني

-صباح الخير

اللتفت يباوعلي وابتسم يهز براسه وجاوب بهدوء..

-صباح النور

-شو بس صباح النور؟

-چا شگول

-ليش مو صباح الحب؟ صباح العسل؟ صباح الغرام؟ صباح الهيام؟ صباح الجمال؟ صبـ....

-بووووية شيسكتها بعد

-اي ما اسكت

-خالو انتِ بالعة مسجل؟

-لا خالو ما بالعة

بوزت وكمت من الفراش سفطته ورحت للحمام اغسل واسوي روتيني الصباحي، بالعادة منلتقي الصبح لو هو طالع لو اني نايمة لو هو نايم ونصبح على بعض بالتلفون ويكتبلي صباحيات حلوة..

-عصتتتت بالحمام عصتتتتت

ضحكت على صياحه واكف بباب الحمام ويعيط وطبعاً هو ميعرف اني اطول الصبح بالحمام من وره الروتين واوقات اتمكيج هنا واليوم عجبني اتمكيج فـ طولت.. فتحتله الباب لگيته واگف وساند ايده على اطارها الفوگ، همهم ورفع حاجبه ونزل عيونه يباوع لفرشة البلشر البيدي..

-ما تطلعين خايبة

-شوية بعد

-شني هذا بخدج

-بلشر

-والمن هذا الطباشير

-يسوي الخدود حمرة

-يعني انتِ غاشتني وخدودج چذبيات!

-لا مو هيج بس...

-يا كذااااابة

ضحكت ضامة وجهي بيدي من گال "كذابة" بدال "چذابة" عود يقلدني، جر الفرشة من ايدي وسحبني يطلعني من الغرفة خلاني خد وخد واحد احمر وواحد بعده ابيض..

-المن تحمرين بخدودچ خوب نسويلج حمرة ربانية

-شلون؟

ابتسم بمكر ولزمني من زنودي يثبتني وجرني يبوسني حيييل ويعض خدي خفيف كلش عضة وره عضة يدغدني بعضاته وينغزني بشاربه خلاني اموت من الضحك بس طبعاً ما گعد راحة وواضح هاي جانت تمهيدات لغير شي...

-اوگفففففف

-اهووووو بدينا

-اوكف دقيقة خلينا نتفاهم ونتفق على شي مهم جداً

-وهو؟؟

-على.. على هاي.. على شسمها.. على البرد! البرد امير لازم نتناقش بموضوع البرد تره غرفتنا كلش باردة انتَ جايبني يمك تريدني اتجمد لحدما اموت؟؟

-علگي الصوبة وهاي حليناهة يلا

-اوكف اوكف متكفي بعدها باردة

-نجيبلج غيرهاا

-لا امير مو تصير خنگة

-نجيبلج صوبة زيتية!

-لا تصير كُلش حـ...

بلعت باقي جملتي من نصى وشالني على ظهره، ضحكت وگلبي صار يدگ بقوة راسي مدندل جوه وباقي جسمي فوك..

-ههههه لاا امير لااا وين ماخذني وييين

-انتِ مو مال عيني واغاتي اليوم لو انا لو انتِ

-عندي دواااااااام....

بس ما هدني وما داومت بيومها وظليت محبوسة بالغرفة وياه وعود ضجت لو مليت؟ لا والله ابد بالعكس كلشش تونسنا وبالليل متأخر كلش طلعني ناكل ايسكريم بالسيارة وثاني يوم بيده اخذني للجامعة وهو رجعني واخذني للسوگ.. حسيته ديمهدلي بخصوص شي بس سويت روحي ممفتهمة ومغلسة عليه وعشت يومي متونسة..

مشت ثلاث ايام من حياتنا احلى من العسل والريحني هو حبيبة رجعت ابتسامتها وفرحتها بخطوبتها من تواصل وياهة منتصر وفهمها مدا يحجي وياهة هواي بسبب شغله المتراكم وهي تفهمت هالشي بكل حب وانطته مساحته الخاصة.....

**

-رهف: خايبة نريد معجون ما يكوم هذا التنبل يجيبلنا

-سبأ: عوفي خيولي

-رهف: شني خيولي چا والمركة شني ياكلوها صفرة!

-سبأ: رهف روحي طالعة فدوة عوفيني

-انتِ هم صايرة ما تنجرعين مادري شمالج الوجه مگلوب صار چم يوم

عافتني وراحت تتعارك ويه سامر خاطر يجيب مسواگ، كعدت على الكاع بالمطبخ مهدود حيلي الهم والخوف ياكل بجسمي على البطيء لحدما استنزف كل طاقتي والوگفة صارت صعبة عليّ.. سامر لهذا اليوم ما جاب طاري الصار وروحي تلوب عيني عليه وكلما يفتح حلكه يحاچي ابوي بشي احط ايدي على گلبي وانتظر موتي..

-شبيچ ولج

طبت امي للمطبخ لافة عصابة على راسها وبيدها طاسة العجين، گمت بسرعة من مچاني كبل لا تتعارك وياي وشلت الچمچة اخوط بالمركة..

-صابرين: مو احاچيچ؟؟

-ها يمة

-شبيچ وجهج اصفر صارله چم يوم وشغلج ذابته على رهف؟

-مريضة

-انتن لو بسس تبطلن من هالچلمة ارتااح ياهي الاكضها صاحت مريضة من موت الكرفچن وخلصنيي منجن

سكتت عنها وهي طلعت تخبز بالساحة البرة، رجعت رهف تلهث وشعرها مكفوش وگع كلبي من شفتها بهالحال وركضت عليها..

-ولج شصاار

-رهف: كفشني ابن الچلب العاار

-شعجب سكتيله

-انااا سكتتله؟؟ لاا بعلي شلت نعالي گطعته على ظهره الخايس ابن الخيااس

-يمعودة عوفي يولي

-امشي طلعي بالختلة جيبلينا معجون خايبة ابوج اليوم يرجع من السفر لا يسويلنا سالفة من ما يلگه مركة على الغدة

-ما اطلع رهيفة شوفي الولد

-مو هنا ببغداد الولد يلا سبأ حبابة لا تخليني اظل اتوسل بيج

ذبيت حسرة زهگانة بس صدگ لو ما لگه ابوي مركة بالغدة والعشا يسويها عزا على روسنا، صعدت جبت شالي وعباتي وجواريبي ونزلت اللبسهن بالمنور وطلعت من باب الخلفي سكتاوي لا يشوفني احد وتصيرلي مصيبة جديدة..

هرولت للمحل اشتري واتلفت كلشي ولا يشوفني احد، ما مسموحلنا نطلع من البيت وحدنا الا واحد من اخوتي ويانه.. المكان الوحيد الاروحله بدون علم اهلي ووحدي هو النهر والنهر هم انحرمت منه وره الصار..

-باقيلج الف دقيقة اصرفلج من المحل البصفي

-لا لا عوفه الك ماريده

-لا ما ارضى

-خوية ماريده

اخذت قوطية المعجون وركضت للبيت رادت تسحگني سيارة من سرعتي بس ما اهتميت وكملت طريقي.. وصلت لراس فرعنا وگلبي وگفت دگاته من شفت تكسي يسفط بباب حوشنا وينزل منه ابوي واخوتي والسايق ينزل بجنطهم..

-صخام الصخمني صخااام

دگيت على وجهي زايعة العافية مادري وين انطي وجهي وشلون راح اطب للبيت بدون لا يشوفوني، قريت فاتحة لام البنين تسهيل امر وتغشيت انتظرتهم يدخلون جوه وركضت ادخل من الباب الوراني وشفت رهف واكفتلي هناك ووجهها اصفففر..

-سبأ: شبيچ رهيفة؟ ابوي عرف؟؟

-سامر: اجتت جدي اجتت الصايعة ام الزلممم

روحي خرطت ذبلانة ما انطوني فرصة اتنفس وبرمشة عين شفت ابوي واخوتي گبالي تورشعوني، جرني ابوي من عباتي وسحلني لنص الصالة وداس ببطني يصيح محترگ..

-ووووولج ترحييين تواعدددين زللم يم النهههرر!! اليوم اذبببحج واشرب من ددمممج ووولج سبببببأ

**

"رهـــف"

معدتي صارت تگلب من الخرعة ووجع بطني رجعلي، اعاين لابوي يرفس ببطن اختي الوحيدة ويدوس على وجهها بنعاله والدم صار يتطافر من خشمها! البت خنستت وراح صوتها رااح حس اختي عمت عيني!!

-رهف: يممة ابوس ايدج تدخلي يوووم

-صابرين: ولج شسووي شنو بيددي اختج طيحت حظنا كلنا

بچيت ضامة وجهي بيدي مفرفحة ماعرف شسوي تهت ماعرف منين جاي يجيها الضرب من كل مكان وكل زاوية اخوتي تولوها وابوي متحلف ويحلف ما يخليها عدلة، كضها من شعرها يعت بي ويركع براسها الكاع ويصيح..

-ياااهووو الواكف وياااچ ياااهووو المواعددچ انطيني اسمممه

يضرب بيها بكل حيله بحقد وغضب، لطمت على وجهي اصيح يعوفوها واتعارك ويه سلطان الطلع جداحة من جيبه يريد يحرگها، كضيت الجداحة من ايده وشمرتها جوه القنفة تخببل لزمني وكتلني فوكاهة وبقيت ادافع عن نفسي لحدما جرتني امي من ايده..

صرخت رايح صوتي من شفت سبأ تشهگ وتسحل بروحها تريد تخلص روحها منهم تريد تجر نفس بس ماكو محد خلاها شالها غفار وشمرها بالگاع تكسرت ضلوعها راح تموووت..

-غفار: وووولج ياااهو المواعدته احجيييييي

-سبأ: محدد صدگوووني محدددد

-عاصف: احجججيي لا تنذبحييين ويضيع حگچ احجججيي

-سلطان: نذبحج ونذبحه فوووكاج ولك سااامر ما شفته يااهو؟؟؟

-سامر: لا بوية والعباس مادري ما شفت بس گفاه

رجعوا يطگون بيها وعيوني تمطر على حالها ماكدر ابقى اتفرج هيج واسكت مااكدر، ظليت اتلفت ادور على شي يساعدني ويحميها بس شنو ممكن يگدر يحمي بت ضعيفة من وحوش؟!

تعبت وانا اتفرج عليهم يموتون اختي من الطگ گدام عيوني، عاينت لامي المحتارة وركضت لغرفتها جريت عباتها وطلعت من الباب الوراني بدون لا يلمحني احد وركضت للمكان الوحيد الاحس بي بأمان بيت عمي علي! ركضتت بكل حيلي وكل سرعتي والعباة تتلفلف جوه رجليه..

وصلت لشارعهم شفت باب حوشهم مفتوح وكاعد حيدر بكرسيه المتحرك ويه جماعته هناك، عبرته وطبيت للبيت واسمعله يصيح بيه شصاير وليش ابجي بس مو وكتها اجاوبه لازم اللگه عمي علي!!

طبيت ساحتهم معمية على عيوني ماشوف وانطخيت بجسم زلمة ضخم، وخرت منه بساع اشوف ياهو وشهكت فحطانة من شفته منتصر..

-منتصر: رهففف شبيچ؟؟ شصاير رهف!!

-منتصر اريد عمي علي اررريد عمي منتصررر

-امشي امشي نصيحله امشيي

ركضت كدامه وهو وراي، طبيت لبيتهم من المطبخ فارغ ماكو احد ركضت للصالة هم ماكو احد طگت روحي وضاجت بيه الدنيا وكمت اصيح من مچاني بكل صوتي..

-عمييي علييي شييييخ علييي اللحگلنااا شييييخ

طلعت عمة رسمية من غرفتها وسلوى وكل البنات بس عمي علي ماكو مااهو! متت انتيهت طاح گلبي راد يغمى عليّ بس استجمعت قوتي وصرت ادوره بالغرف مثل المسودنة واصيحله..

-عميييي وينك عميييي

-رسمية: وولج شصصصاير

فزيت رافعة راسي من سمعت صوت رجلين تنزل من الدرج روحي رفرفت وتعلگت بيهم من شفتهم ولد عمي.. ركضت عليهم وتعثرت بالعباه وطحت جوه رجلين الامير علي ابجي واصيح فاقدة..

-اللحگ يا الامير اللحگ سبأ بت عمك راح يذبحووها.......

يتبع 👑....

━━━━━━ ♛ ━━━━━━

سبأ!!! 💔💔💔

حبيبة ومنتصر... همممممم 🤔؟؟

تَـمني والامير للابد احبكم ابقوا حبابين عفية 🥹♥️♥️

علي الحـق وقبق احبهم يا ناااس صح حق مستفزز بس ياخي مينزعل منه 😂😂😂😂

خو ابا الحسن وليلة كارثة اعشقق مشاهدهم واتونس واني اكتبهاا 😂😂😂♥️♥️♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

إنهجَم گلبي وعساهَا أبيتكُم كون

نَفس هِجمّان گلبي البَيت مَهجُوم!

━━━━━━ ♛ ━━━━━━

"تَـمني"

طفر الامير من مكانه مخبوص خبص بعد ميعرف شلون يلبس دشداشته ونزل بشعر يقطر مي، لبست بسرعة صايتي وحطيت شال على راسي وركضت وراه اريد اعرف شصاير ومنو هالبنية الدتصيح لعمو علي بعياط وصللنا..

هرولت اطلع من غرفتي وطلعن عبق وحبيبة والولد الي غرفهم بالطابق الثاني كلهم يتركاضون يشوفون شسالفة.. علما وصلنا لمحجر الدرج اني روحي مخموشة وگلبي يوجعني خاايفة كللش خايفة لا اكو مصيبة جديدة والامير ينجبر يسوي شي يمرد گلبي مرة ثانية..

يبس دمي من شفت رهف واكفة ووجهها مصبوغ احمر ومتت بدمي من شفتها وگعت على رجلين الامير وگالت فحطانة..

-اللحگ يا الامير اللحگ سبأ بت عمك راح يذبحووها

لطمت حبيبة على صدرها وليلة ظلت تتلفت خايفة وخالة رسمية انخبصت خبص لزمت رهف تكومها من مكانها تريد تفتهم شصار بس البنية مذهولة وترجف وتلطم على وجهها وتصيح..

-لحگوووو لااا تظلون صاافنيين اختي راح تمووووت

-الامـير علي: ابا الحسنن خابر ابوي بسااع.. تقييي وينننك تقييي علي التـقييييي

ركض تقي يطلع من غرفته بدون قميص مبين چان نايم ورايح بسابع حلم، عبرنا يهرول وجحظ عيونه من شاف رهف واكفة بهالحال..

-الامـير علي: اللبس واللحگنا بسااااااع

ركض يرجع لغرفته وعلي الحق صعد مرة ثانية يلبس قميص فوك فانيلته الداخلية وابا الحسن نفس الوضع، الدنيا ظهر وعطلة الكل متأخر بالنوم، ركض الامير ويه علي الكرار لباب المطبخ ينتظرون البقية علما يرجعون ورهف واكفة وجسمها ينتفض وبس تبجي..

نزلنا البنات نواسيها وبنزلتنا نزلوا الولد من فوك، شهكت من شفت سلاح بيد تقي وحق وابا الحسن كلمن شايل بيده سلاح وركضوا بره البيت، قبل لا يطلع الامير اللتفت على سور ونور وعاط بيهم..

-ابقوا هنا انتم لا تجون

-علي السور: نجي والعباس

-الامير علي: ابقوووا هنااا حاموا النساوييين

-ابا الحسن علي: در وبدر موو هنا وينهم؟؟ يمة وين الولد؟؟

-رسمية: طالعين بشغل رووحوا انتم همه يلحگونكم

طلعوا الولد كلهم ورهف ومنتصر راحوا وياهم، بعدهم ما عابرين باب الحوش ودخلوا در وبدر ووياهم عمو علي عيونهم تدور ميعرفون شصاير وبدون لا يسألون بس شافوا رهف واگفة افتهموا السالفة تخص بيت مسعود، صاح بيهم شيخ علي ينتظرون ثواني بينما ينزع عگاله وبشته بس الامير ما قبل وراد يطلع ورجع عاط بي ابوه..

-لاااا ترحون وحدكمممم انتظروووني

وگفوا يلوبون وبيدهم الاسلحة ودخلوا در وبدر جابوا رشاشات ظليت ارجف بايگة هوا من شفتهن وشفت شيخ علي يطلع وياخذ ولده وياه..

-رسمية: اسم الله الرحمن دخيلك يا علي دخيلك يا ابو الحسن استرها ويانه واحفظ وليداتنا

-حبيبة: شنو هالصوت جاي تسمعون؟؟

-عبق: صوت عركة بالشارع!

ويه حچاية عبق حسينا بصووت قوي كللش اجه من فوك السطح شلون صوت ردمه قوية ووراهة صار صوت اطلاق نار صلي مخابيل طلقة وره طلقة وصوت زلم تتصايح فوگ سطحنا، عطنا مفجوعات وسلوى صارت تلم بحبيبة لجسمها وتصيح..

-ولجنننن شصااار شنو جاااي يصييييير

-علي السور: فوتنن جووه فوتننن

-علي النور: حييييدر حوووويدر ارجععع حوووويدرررر

ركض لحيدر يسحله بالكرسي وطببنا سور لغرفة ابرار جوه وعاط بينا..

-لحدد تطلع منااا هدوا عليناا الچلااب

-حبيبة: يمة اخوتي اخوووتي بقوا برره ما لحگوا يوصلوون

طلعت خالة مغلسة على توصيات سور وهذا ما قبل تخبل علينا يدفع بيها جوه ميخليها تطلع ولا يخلي وحدة تعبر باب الغرفة، ما اهتمت خالة رسمية ولزمته من ايده تتعارك وياه وعيونها ناطة اول مرة اشوفها بهالشكل والقوة، صوتها انبح وهي تصيح..

-اخووووتك ولللك اخوووتك هدددني

فلتت نفسها من بين ايده وطلعت تركض وتلطم على وجهها من شافت بدر يدخل للبيت و چتفه متصاوب، ركضت شمس تعبر سور وتعيط بأسم بدر وتبچي بچي خمش گلوبنا..

-علي البدر: مابيه شييي طبن جوه يممة

-شمس: خليني اشوفك اوگفف لا تدفعع

-علي البدر: ووولج يمة اخذيييهاا

مدا افتهم شنو الموضوع ولا احد ديعرف شنو صار! علي البـدر اجه وچتفه متصاوب برصاصة وميعرف منو الي ضربه من بعيد! دخلنا بحالة هلع بالبيت والاجواء كلما جايها تسوء.. حرب قامت اصوات قوية تصدر من بره وصوت كأنما ماطور دراجة نارية يگوم بالحديقة مالتنا.. حبسونا بالغرفة كلنا وگعدنا وحدة حاضنة الثانية وسور واكف بالباب يمنع أي وحدة تطلع..

-شجااااابچ انتِ وكتهااا

سمعنا صوته يعيط من يم الباب وصوت مرة خشن يتداخل ويه صوته فوراً عرفناها فراقد جايه وبهيجي اجواء!.. دخلها سور علينا ومن الباب استلمتنا تلطم وفتحت شيلتها مصدومة ووجهها اصفر صاير..

-خايباات شني جاي يصيير شني مجززرة خوما مجزرة

وگفن خالة رسمية وحبيبة يفتهمن منها وانصدمنا كلنا من عرفنا عمو علي والولد ما لحگوا يوصلون لبيت مسعود لان بيت مسعود واصدقاء ولده هجموا علينا بدراجات نارية واسلحة..

-فراقد: الساقطة الخايسة سبأ گايلة لاهلها تقي متحارش ومكضكض بيها

-رسمية: شنييي ولج شلوون يمته هاي؟؟؟

-فراقد: بالعباس مادري سمعت وليدهم سامر يسولف ويهدد وسليطين هجم على تقي وافتهمت شوي من السالفة

دفعتها خالة رسمية عنها وركضت لـ علي السور تبلغه يفتح الباب بس تفاجأنا من ما لگيناه واكف هنا لا هو ولا نور موجودين بالبيت وصوت عيااط مجانين جاي من بوابة المطبخ وزلم يتصايحون..

-زيد: المخانيييييث ولد الزناااا الااا ننعل شرررفكم اليووم ونشوف ياهو يوگفناا

وصوت مألوف يتصايح وياه ميزته حبيبة وكالت هذا منتصر يجاوبه ومبين مال واحد ديتعارك..

-منتصر: وووولك هيييييييد انععل ابوووك لابووو امك لووو داست رجلك هالبيتت زيييييد

رجفة خوف وقلق ووحدة تتلفت على الثانية بضياع، بالنا ويه الولد ميتين خوف عليهم محد منهم بين وصوت الزلم الديجي من بره ومن الديوان منعرف تابع المن..

ثواني وصرخت مشلولة بمكاني ويه صوت طلقات وحدة وره الثانية اجت من المطبخ وصوت منتصر اختفى يمممة غير روحنا راحت وحبيبة انهارت ركضت تطلع بدون حجاب مثل المخبلة وامها تلزم بيها وتتعارك وياهة تريد ترجعها وهي متقبل..

-هدددديني يمممممماا

-سلوى: ووولج مخبلللة وين رايحة وووين

-حبيبة: منتصررر مااكوو اختفى صوته ويييين منتصرر يووم هدينيي بس اشوفه

چتفتها امها وشمس ودفعنها لحمام الغرفة وقفلوا الباب عليها، ظلت حبيبة تصرخ من جوه وتكسر وتضرب بباب الحمام وامها تبجي وتدور بعيونها متعرف شتسوي..

-عبق: وين راحوا الولد خالة ويين حبابة خلي احد يطلع يطمننا

-فراقد: ياهي تطلع ولج الدنياا مكلوبة شنيي ما رايدات شرفناا

گلبي ينبض بجنون واطرافي بعد ما احس بيها، ظليت اروح واجي بالغرفة وادعي يارب تعدي على خير يارب ميصير شي مو زين يارب إحفظ الولد..

ضميت وجهي بيدي مختنگة ضايق نفسي من كرر زيد كلامه يعيط من المطبخ ويگول بنبرة حاقدة حقيرة..

-هيييهييييي تلعبووون ويه ولد مسعود مااا يطلع اسمي زيدد لوما دنستت شرفكم وكشفت على نسوانكم يا ولدد الچلبب

-رسمية: هذاا ياااهو يريد يدوس بيتنااا ياااهو يريد يكشف على بنياتيي

عاطت من جوه ولفت شيلتها وطلعت من الغرفة، ركضن وراهة فراقد وابرار يوكفنها وما قبلت دفعتهن وعاطت بينا..

-رسمية: صعدن للطابق الثانيي بساااع

جفلنا من سمعنا صوت منتصر يجاوب زيد صرنا وحدة تباوع للثانية مرتاحات معناها هو بخير ومبي شي، ركضت ليلة تبشر حبيبة وامها مقبلت واشرتلها تطلع.. طلعنا نركض كلنا وفراقد ويانه سلوى ما قبلت تصعد وبقت ويه حبيبة وشمس بغرفة ابرار، صعدنا وقفلن الباب ورانه وتوزعنا قسم بغرفتي وقسم بغرفة عبق وقفلنا البيبان علينا..

اجت فراقد لغرفتي وعكدت شيلتها تدعي الله يعديها على خير، ركضت على تلفوني واتصلت على الامير البطرانة مادري شحس بس احتاجيت اتطمن عليه وللاسف ماكو منه جواب تلفونه يدك وميشيله..

-تَـمني: خالة امير ميجاوب

-فراقد: لااا عوزه يجاوب؟؟ تردي كاض عاصف من زيجه ويگله اعذرني ثواني اجاوب مريتي وارجع اكتلك؟؟

-لا مو هيج بس..

-بس شنيي؟؟ گووي گلبج ولج لاا تظلين فاهية سندي زلمتج رجلج شيييخ يحتاج مرة حووك مرة عينها صللفة وگلبها جلد عييب تتفهين عيييب!!

انصدمت من عاطت بوجهي ترزلني بس سكتت مجاوبتها هسة اني بيا حال وتكول صيري مرة حوك مو والله گلبي راح يوكف من الخوف..

ربع ساعة مرت من الرعب الحقيقي، گلبي وراسي وعقلي ميتحمل الديصير هووسة وفوضى وحديقة البيت انترست زلم غربة واصوات الولد جوه توصل لهنا لغرفتي وفراقد واكفة وتلوب وتلطم على رجليها..

-فراقد: ابقي هنا لا تطلعين انزل اشوف بلچن الوضع هده

-يا هده خالة دتسمعين العياط انتِ؟؟

-گعدي ما عليج انتِ

طلعت وعافتني وحدي بالغرفة وتأخرت بعد ما رجعت، الف فكرة وفكرة اجت براسي والوسواس نخر گلبي خايفة لا يكون صار شي جوه وبقت وياهم..

فتحت باب غرفتي على كيفي وعبرت صالة الطابق الثاني ناوية بس امد راسي من المحجر اشوف منا ووكع كلبي من شفت شايلين علي الحـق مغمي عليه والامير سابح بدمه دشداشته البيضة صايرة حمرة وشعره مخربط ووجهه عرگاان..

انتهييت وبعد ما اشوف بعيوني، ركضت مثل المخبلة انزل اريد اتطمن عليه ماطول ماكو زلم غربة هنا وبعدني على نص الدرج وانتبهلي دا اجيله.. اجاني يهرول وصاح بيه صوت نززني..

-رجعييييي فووووووووووگ

-امير.. مو...

-صعدددددددي فوووووگ صعدددددي

دفعني على الدرج وقبل لا اوگع على ظهري لزمني من متوني حييل ورفعني يصعدني فوگ ورجليه لو تدوس الباية لو تلولح بالهوا، اخذتني الرجفة مخترعة من عصبيته وروحه الطافرة وخفت اكثر من دخلني لغرفتنا وشال المفتاح من الباب يقفلها عليه من بره..

-لااا امير لاا تقفلها ما انزل والله

-تَـمنيييي ما جاي نلعب ممنوع تطلعيييين لو الدنياا تحترك

-مو.. اخاف اخاف عليك والله اخاف

-لووو شفتيني مطبررر ومگصب مااا تطلعين مناااا

يعيط بوجهي واني من الرهبة بس اهز براسي اي وگلبي يدگ بهمجية راح انجلط، طبگ الباب وتخبلت من نسى وقفلها عليَّ ظليت اعيط بي يفتحها بس اختفى حتى صوت خطوته مينسمع بعد..

كعدت بالغرفة اللوب وافرك بيدي ماعرف شنو تاليتها وشنو راح يصير شلون راح تصفى، وكفت يم الشباك اشوف منا بس شنو ينشاف وشنو ينعاف الحديقة محتركة وناس لازمة خوانيگ ناس وتتعارك..

دقيقة تجر دقيقة وساعة تجر ساعة واني واكفة هنا اللوب واحمس بروحي غيير احد يجيني يطمني! غير اعرف انحلت لو لا لان الحديقة شبه فرغت وبقوا كم رجال.. كتبت رسالة لـ عبق اسئلها شصار واكو تطورات لو لا ودزتلي متعرف شي حابسيهن بالغرفة وميقبلون وحدة تنزل، خفت اگوللها شفت علي الحـق غايب عن الوعي من نزلت لا تخترع البنية وتظل تلوب عليه ومتگدر تنزل تشوفه..

**

"سبــأ"

گلبي يدگ بطيء واصارع خاطر اجرن نفس وابقى عايشة، جسمي ورم من الطگ الخله جلدي يتگصگص وعيني اليمنى انطفت ما جاي اكدر اعاين بيها.. ادور عيوني بحيطان الترك الاظلم بين براميل النفط والعتيگ ودموعي تصب، مادري صارلي چم ساعة هنا محبوسة امي ختلتني هنا عن اخوتي وابوي لا يذبحوني وهاي اول مرة اشوف امي مهتمة بيه وخايفة لا يصيرلي شي..

اسمع لصوت بچي رهف جاي من بره وتدگ الباب عليَّ على كيفها وتسألني عن حالي، مسحت على وجهي اوخر الدم عنه وجاوبتها بحس مبحوح..

-عايشة انا

-رهف: اجه شيخ عصام وتدخل يحل السالفة لا تخافين يا عوينتي راح تنحل وعلي تنحل

-فضحوني رهف

-لا لا والله محد يدري ابوي ما فهم احد واصلاً محد من الغرب يدري السالفة بيها بت حسبالهم عركة عادية مثل العادة

-رهف

-هاا

-امي وين

-بالصالة واكفة تتسمع على الزلم بلچن تفض

-روحي تسمعي لا تبقين وياي وسولفيلي كلشي يصير

-اي خوش.. انتبهي على نفسج حبابة

تحسرت وسندت ظهري على الحايط ونزيت متوجعة ضلوعي تون عليَّ وجع مو طبيعي ياكل بجسمي.. شكد مكتولة من اهلي وشكثر ماكلة طگ واهانات منهم بس مثل هالمرة ما عشت ظليت ويه كل راشدي ورفسة ادعي ربي ياخذ روحي ويخلصني من الوجع والعذاب..

بعد مرور فترة مو قليلة من الوقت رجعتلي رهف دگت الباب عليّ وهمست تحط حلگها بالباب..

-سبأ كاعدة؟

-اي اي بشري انحلت؟؟

-يردوها دم سبأ

-يممممة

-وعلي ابوي حلف ما يهيد الا يوصل الدم للرچاب

-سووودة بوجهي

-صوتج ولج لا تصيحين تردين تنذبحين انتِ!!

-سولفيلي شني حلتها شون بينا لو كتلولنا واحد

-ما يكتلون بس احنه ناخذ واحد منهم وهسة راح سلطان كتب على حايط بيتهم مطلوب ثار بالاحمر

-صخام الصخم الحالي شسوويت انا شسوييت

-علي الحـق تصاوب ونقلوه مستشفى وبدر هماتين سمعت متصاوب والدنيا محترگة ببيت عمي علي زيد وعاصف متحلفين ما يعدوها الهم ومادري شني ناصبيلهم

-دخيلك علي شون راح تفض!!!

-مادري خية انتِ هسة ارتاحي وخليني اجيبلج شي تاكلينه الوكت تأخر

-ماريد سم عساني بالمووت ان شاء الله

-انچبي ولا تحجين حجي زايد هسة راجعتلج

راحت رهف وعافتني اللوبن خايفة وگلبي غادي نار اعرف ابوي ما يمشيها ولا يعديها هو يتمناها بالروح يتطالب ويه عمي علي وانا جبتله الطلابة على ماعون ذهب..

غمضت عيني اريحهن ورجعتلي رهف فتحت الباب على كيفها وانطتني لفة وطلعت، عفت الاكل ما جسته ما الي نفس عقلي وگلبي كله وياه بشنو جاي يفكر هسة؟ راح يعذرني من يعرف انجبرت اگول اسمه لابوي واخوتي لو يبقى حاقد عليَّ؟

مسحت دموعي واتلمس اثر چويات ايدي واتذكر شون جبروني احجي وعلي شفت الموت يا تقي وما ذكرت اسمك الا من حسيت بروحي تريد تطلع من چووني بأيديناتي ووصلت بيهم يردون يحرگون صدري ماعرف شلون طلع اسمك من حلگي وجبتك بالطاري..

شرحتلهم وگلتلهم لاگيته صدفة جاي عنده شغل وشافني هناك وسلم عليّ من بعيد ولگفنا سامر، حلفتلهم چذب وگلتلهم لا سولفت وياه ولا سولف وياي ولا عاينلي بس سامر النذل بقى يذب على النار حطب وگال شفتهم يسولفون..

تنهدت اذبن راسي على البرميل اسنده وغمضت عيوني، مادري شون خذاني النوم وفزيت الفجر على صوت الچيلات صليي، نزيت مخترعة اعاين للسما لونها تغير اثر البارود والنار وريحة الدخان تخنگ.. صوت اخوتي يهددون ويتعاركون من جوه البيت وصوتهم من بره يرعد ويرهب..

تحسرت افكر ببيت عمي علي شني حالهم هسة وشني الخوف الجاي تعيشه نسوانهم.. گعدت انتظر اخوتي يوصلولي ويذبحوني بمچاني وظليت على هالحال دقيقة دقيقة انتظر موتي البطيء.. طلع الصبح وانا على كعدتي، سمعت اذان الظهر ومحد اجاني غير رهف وهيج مضى اليوم وانا على هالكعدة حالي بالضيم محتاجة تواليت محتاجة اغسل واخافن اطلع..

ثاني يوم اجتني رهف تلهث، فزيت مخترعة من شفتها بس ريحتني من كالت ابوي واخوتي بالديوان اكدر اطلع للحمام وارجع هنا.. كمت بساع رحت للحمام سبحت شون ما جان وطلعت ملفلفة روحي وكعدت بين براميل النفط..

-رهف: راح اجيبلج بطانية اوكفي

-ماريد تعاي فهميني ابوي واخوتي معقولة ما سألو عني؟؟ شون اقتنعوا يخلوني عايشة؟

-ولج سكتي لو تعرفين على شني ناوين

-شني كولي

-مو كتلج شيخ عصام تدخل فـ ظل يضغط على ابوي يگله فهمني على شني كل هالمشاكل اكو سبب مقنع؟ وابوي ظل يمطمط يجيبها منا ويوديها منا لحدما طلع الشيخ من البيت

-اي؟؟

-بس الشيخ ما هاد ولا سكت كاض سامر وبالحجي جار لسانه وافتهم السالفة سالفة بت ورجع على ابوي

-عمتت عينييي انفضحتت

-ولج لااا ابوي من شاف شيخ عصام ما يسكت وفضولي فضها وياه وگاله واحد من ولد علي تورج بالغلط على نساويني وانا ما ارضاها

-زين؟؟

-شيخ عصام ما رضى بهالوضع وگاله انا احلك السالفة ونرجع حگك وكرامتك وعلى اساس باچر راح تصير الكعدة

-وانا؟؟

-انتِ شني

-ليش ابوي واخوتي ما اجوني غريب رهف ما اظنهم يفوتوها هيج

-مادري سبأ امي هم حاطة ايدها على گلبها وطاريچ ما تجيبه كدام ابوي وهو همات ما سأل عنج بعد

سكتت مادري شگول ماعندي تعليق، كلما جاي يمر الوكت كلما وجع جسمي يزيد وحرگ ايدي يبطبط، رجعتلي رهف جابتلي بطانيتين ثخينات ومرهم للحروق وطلعت تركض تخاف لا يتفطن واحد من اخوتي ويجون يخلصون عليّ..

الوكت ما يمر بألف حسرة والف دخيل ضلعچ يا الزهرة طلعت شمس صبح يوم الگعدة، كعدت وايدي على گلبي وجسمي يرجفف اطگن سن بسن واحس بنار مشتعلة بيه وبردانة بنفس الوكت.. النفس صار يخرخش بصدري وگحة قوية صارت عندي وگوة كاتمتها لا يسمعوني..

فزيت على صوت فتح الباب ورجعتلي رهف ترجف وجسمها يختض، كمت ع حيلي اكح وعاينت لعيونها المدمعات، گبل لا اسئلها شكو حضنتني وكالت بضحكة فرح..

-يردوون يسووها وحدة بوحدة سبأ ينطوچ وياخذون حبيبة لـ غفار بمچانچ!

شهگت من نص گلبي فاكة عيوني دفعتها عني ودكيت على وجهي ورجلي فاحطة..

-شنيي ولج المن ينطووني

-يزوجوچ لواحد من ولد عمو علي بس بشرط ينطون مرة وياخذون مرة وماكو غير حبيبة تجي بدالج هذا چان حل شيخ عصام

-يمة گلبي

-اي ولج الحمدالله بس كون ابوج يرضى ما جاي يقتنع وقافل

-ولج رهفف ياهو ياخذني لو صارت صدگ؟؟

-شمدريني يجوز لـ بدر مادري

-بس بدرر متزوج!!

-اي بس سمعت امي تكول مريته ما تخلف وسلوى مفلفلة تريد تزوجه وحدة ثانية

-لا لاا رهف لاا بجاه علي لاا ما اريدن بدر ما اتزوج والعباس ما اتزوجه

-خاب انچبي صحلها زلمة كالت اعور سكتي خليني اروح افتهم شلون نهوها

-رهفف اوكفي عايني گليلها لامي سبأ تكول ذبحوني ولا تزوجوني

-سببببأ

-خايبة استاهل استااهل ذبحوني دخيلج رهيفة عساچ الجنة قنعي امي دخيللج

-سكتييي سبأ لا تضوجيني منج

-رهف روحي تأكديلي فدوة اندارلج

-خووش خوش

عافتني وركضت تطلع من الترك عايفتني بضيمي، روحي انخمشت ودموعي تصب شسوي بروحي لو صدگ فضت هشكل ونهايتي لـ علي البـدر يا سواد وجهي ويه شمس ويا كسرة گلبي بـ علي التـقي..

مرت فترة انا كاعدة وافرك بيدي والافكار تروح وتجي براسي، كمزت من مكاني من انفتحت الباب عليّ ورجعتلي رهف وجهها ما يضحك مثل گبل شوي شو هسة مكلوب وصاير اصفر..

-شبيچ

-ولاشي گومي منا امي تريدج

-رهف شصاير؟؟

-كومي سبأ

-عليج العباس تسولفيلي ولا تضمين عليّ

كضيت ايدها اتوسل بيها واشوفن عيونها تطاير، گلبي وجعني وخفت لا يكون صاير شي چبير..

-ولج احجيييي

-سبأ ابوي رفض يزوجچ لـ بدر عبنه متزوج و.. و..

-اي؟؟؟

-صارت هوسة وضجة بالديوان وابوي معند ما ينطيج الا لعزابي وعلي التقي الوحيد اليناسب عمرج و...

-ولج احجيي دمي يبسسس

-تقي رفض يتزوجچ

شهگت بوجع چن صخرة وضربتها بنص صدري، اختنگت وضاگ بيه النفس صفنت بعيونها المكسورة وصفنت بعيوني المهضومة.. صديت وجهي عنها لا تطيح دمعتي گدامها واتفشل ضعف فشلتي وكضيت ايدها اسند روحي اطلع وياهة من الترك..

اخذتني لامي بغرفتها وبدون لا اعاين بعيونها شمرت روحي بحضنها وهاي اول مرة اسويها، حضنتها وبجيت بجي عمررر عصرت متونها بيدي ادفن وجهي بصدرها اريد اختفي هنا وما يلوگلي اثر اريد اخلص من هالدنيا بلچن ارتاح..

-صابرين: لا تبجين سبأ كومي مو بت صابرين اليدللون بيها

-رهف: يمة بس..

-صابرين: اششش سكتي انتِ، اخذي اختج وخليها تبدل وتاكللها لگمة بينما احجي ويه ابوج

جرتني رهف عن امي غصب عني وصعدتني لغرفتنا، بدلتلي هدومي وأخذتني للحمام تغسل وجهي ونزلت تجيبلي لگمة اكلها وانا باقية هنا اتصفن بالحيطان وگلبي ينزف دم..

دقايق مشت وفزيت مخترعة على صوت صياح رج البيت رررج عاينت للباب متحضرة على أي دقيقة يطبون ابوي واخوتي ويذبحوني ويخلصون من عارهم بس محد اجه.. محد اجه غير رهف طبت للغرفة تركض وتحجي مستعجلة..

-كومي سبأ لبسي عباتج بساع

-ليش

-كوومي راح يعقدولج على تقي كومي

-ما اعقد

-كومي ولج الدنيا محتركة جوه

-ما يهمني

-سبببببأ

عتتني من ايدي تلبسني شال وعباه ونزلتني تركض على الدرج وانا وراهة، مالي نفس شي ولا الي واهس كعدت بالصالة واشوفن اخوتي يروشون كل ساع واحد بيهم يتعده مني يخزرني ويضرب على رجله متحسف..

-عاصف: هااي تاليتهااا ننطي لبيت علييي العاارات

-زيد: كللله من وره ابوي لو ما حاچييي وگايل تورجوا على بنيته جان ما انجبرنا ننطي!!

-غفار: يلا اجت من صالحي صارت وحدة بوحدة

-سلطان: على كيفك وليدي تره شيخ علي ما انطاك بنيته ولا جاوبنا وابوك هم ما ضغط عليه بالسالفة يعني اذا ينطي لو ما ينطي براحته بعد!

-غفار: غصباً عليه ينطي! راح يتفشل ويه شيخ عصام اذا ما رضى ينطيني لان الما ينطي بس الخايف لا بنيته تكون معيوبة وشيخ علي ما يخلي لزمة على روحه وراح يزوجني حبيبة انا متأكد

حچاهة بضحكة شاكة وجهه فرحان واجه كعد على القنفة نافخ نفسه، فرت ايدها رهف عليه وگالت من وره خشمها تهمسلي..

-عفية وادم ما يحلون مشاكلهم بس بالزواجات همج يسدون حلوگهم بالنسوان

-زيد: شتبسبسين بت القندرة؟؟

-رهف: اسولف بجمالك

-زيد: تستهزأين ولج؟؟؟

-رهف: ليش لهدرجة تشوف روحك تلعب الروح؟

-زيد: انچبي غير اجيب التايهات من بعيد

-غفار: انچب چنك چعب استكان

بقوا يتداهرون وواحد يحجي على الثاني لحدما اجه ابوي وصاح اسمي، وكفت بمچاني منزلة راسي وتقدم هو عليّ ما كدرت اعاين بعيونه خايفة منه لا يسويلي شي وبقيت منصية..

-مسعود: انتِ عار عليّ و ما تستاهلين تعيشين! زايد مني مطول خلگ وگاومت بيت علي لخاطرچ

-صابرين: گاومهم بدددم ولا تنطي بنيتك!!

-مسعود: بحالها انا؟؟ بس طلبت بيها مهر خسف ظهورهم! رووحي تزوجي خليني اخلص منج انطيتچ لچلب عبنچ زايدة على گلبي رووحي من عابت هالوجه الاچلح

نزلت دموعي مكسورة اكثر من چلامه ونبرته وشهكت جافلة من كضني من زندي يعصره بين ايده يجبرني ارفع راسي واعاين بعيونه..

-بس خليها ببالچ انا ما زوجتچ لسواد عيونج! انا رايد استرچ واطم عارچ ويه زلمة يتحمل نتيجة افعاله غصبباً عليه!

-عاصف: ليش لحيت على علي التـقي؟؟ ليش الا هو ردته ياخذها؟!

دگ گلبي بقوة من جابوا طاري اسمه ودرت عيني على عاصف اليحجي بأستهزاء..

-مسعود: مالك غرض انتَ لا تدخل!

-صابرين: انا اگلك ليش راد تقي بالتحديد عبنه ضابط خاطر يتستر على خياسكم ويطمطمها من تحتاجوه!!

غلس عليها ابوي ما يجاوب وهيج عرفت وتأكدت چلام امي صح وصدك هاي نية ابوي، سحلني ابوي من ايدي وگفني بباب الديوان وخزرني ينتر..

-راح تعقدون لا تظلين تتعيقلين وتطوليها!

-سلطان: تره الزلمة واكف على طريف هسه يبطل عليج

-صابرين: ما ابريلك الذمة ولاا راضية يا مسعود على هالزواج!!

-مسعود: عساج لا رضيتي

-صابرين: انتَ تعرف بنيتك ما سوت الغلط! لاا تظلم بختنا وتزوجها لأبن عدونا!!

-سلطان: ولا احنه مقتنعين بالفكرة يمما سكتيي واوكفي غاد ولا تحطين روحج بسوالف الزلم!

دفعوا امي على جهة وطبوا ابوي واخوتي للديوان خاطر العقد وامي واكفة تسب وتقسم على اخوتي، تصفك ايد بأيد وتعض بأصابعها وتغمغم بيه..

-صابرين: راح تنذلين ذذذذلة وكولي ما كلت!!

-رهف: اليسمعج يگول سبأ عايشة هنا متريشة

-صابرين: انچبي يبقى بيت ابوها! مو بيت عدوان يدورون الزلة والغلطة عليها!

-مسعود: ياا نساوين راح يبدي السيد بالعقد!

صاح ابوي من جوه الديوان وانا گلبي طاح بين رجلي، اريد اثبت بمچاني واكعد عدل ماكدر اللوب وروحي تلوب وكلبي وعقلي كله طاير احس بروحي نايمة و اتحلم والجاي يصير كله مو حقيقي..

ريگ وره ريگ ابلع يبس حلگي ويه السيد وهو يعقدلي على علي التـقي الما طلع حسه من جوه، تحسرت طالعة الدنيا من عيني مابيه حتى اجاوب وانطي الوكالة بس كوة حچيتها جرت على روحي وگلت..

-نعم انتَ وكيلي

صفگت امي على رجليها وصدرها ونزعت شالها وشمرته بالكاع مقهورة ورهف ظلت ساكتة وتعاين عليَّ، غمضت عيونها تذب نفس وهزت راسها تواسيني بطريقتها، نزلت عيوني مهضومة على روحي يعني مكتوبلتج الذلة يا سبأ طول عمرج مكتوبلج تنسمح بكرامتج الكيعان وتبقين عالة على كل بشر يتگرب منج..

تنهدت ادور بعيوني بين امي ورهف ماعرف شني الخطوة الجاية وما لحكت افكر هواي عبن گبت بالديوان واعتلت الاصوات..

-صابرين: هاي شكو؟؟

-رهف: مادري

مدينا اذاننا نتسمع واجانه صوت غفار يصيح ويضرب على الطاولة بيده حيل..

-انتممممم تضحكووووون علينااااااا

-شيخ علي: نضحك عليك شني؟؟ جاي اگلك البت متزوجة شنيي تريدد اطلگها من زلمتها وانطيك!

-غفار: چذااااب انتَ واااحد چذاااااب استحي على شيبااتك ولا تجذذذب علي!!!

-الامـير علي: وعِلّي بگلبببك ولك طايح الحظ!! اعرف ويامن تسوولف انلصممم يلا وولي هنااك ماريد اعاين لچهرتك

-غفار: بالعبااس اليووم لو ااانا لو انتمم

ركضت رهف تعاين من باب المطبخ تشوف غفار طلع يركض وركضوا وراه باقي اخوتي والامير وتقي وشيخ علي وشيخ عصام كلها وراه تركض خايفين من خبال غفار لا يسوي شي بـ حبيبة والله يستر شني راح يصير..

**

-يعني تصاوبت وشفت الموت بعيونك وبعدك تسوي سوالف مينلبس عليها ثوب؟ والله ماعرف شنو من بشر انتَ

-علي الحـق: ااااااااخ بت العگروگ على كيفج هو هيج تدوسين بجرحي

-عبق: اسكت ماريد احجي وياك

-تحجين وغصباً عليج

-عبق: عود شنوو تجبرني؟؟؟

-اي!

عصبني بالزايد واني منا متفحم گلبي ضغطت على جرحه بالشاش عود دا اللفه وخليته يرافس ويفشر متوجع اييي حيل بيك حييل حتى تتأدب ومتظل تلعب بذيلك..

-وووووولج ااااااااااخ شنييي من بشر انتِ خايبة لا ذمة ولا ضمير وعليي

-اني الماعندي ذمة وضمير مو؟؟ اني؟؟ ليش منو جايب صاحبته وكعدت تتماوع وتذب بدموع التماسيح وتتنعوص بصوتها وتفتح بقميصها؟؟ منووووو

-اذني اريدها اولاً ثانياً سوزان مو صاحبتي

-لااا تكول اسمها اسكت اييع ايييع تلعب نفسي اسكتت

-قبق

-اسمي عببق لا تصيحلي قبق!!

-عنق

-كتلك عبق!!

-شفق

-اهوووووو

شمرت المعقم وعفته وكمت اريد اطلع ونهض نفسه وجرني من ايدي بقوة خلاني اوكع على صدره غصب يلزك وجهي بوجهه، غمض عيونه متوجع من ثگلي عليه لان الجرح صاير بخاصرته بس ما قبل يوخرني ولا اني وخرت گلبي نار..

-هدني علي الحـق!

-ما اهدچ.. صبر ثواني بس استوعب الوجع

سكتت شوية لان شكله متألم ونهضت روحي اوخر منه بس ماقبل وظل مشدد على ايدي، انحرجت من قربنا هو متمدد ومغمض عيونه مركز ويه الوجع واني ساندة عكس على چربايته والايد الثانية حاطتها على بطنه..

-علي

-ثواني عبق

-متوجع كلش علي؟

بلع ريگه عاكد حاجبه قلقت عليه وعلى كعدتي مديت راسي اشوف الشاش المغطي الجرح شوية صاير بي دم..

-علي جرحك دينزف

-فدوة الج

-هو شنو فدوة الي شحصل اذا توجعت

-هسة انچبي مو جاي نتغزل

-عود هو ديصير رومانسي

-احبج قبقي لا تطلعين من غرفتي زعلانة

-صعب

-شبيچ ولج چنچ مشتهية عركة وانا بهالوضع؟

-ممشتهية عركة اني ولا اريد اتعارك وياك اريدك بس تفهمني سوزان ليش اجت هنا؟ شجابها من بغداد لبيتك لا وانوب اجت تسأل عنك بالاسم!

-عگروگ

-لا تظل تسويلي عگروگ وبطة وتتمسكن ومدري شنو جاوب سؤالي!

-عبق اجيبها الج من الاخير؟

-ايي

-سوزان تريد رجل

-اللهم صللللل على محمددددد وال محمدددددد

-اي والعباس تريد رجل وموبايلي صرعته صرع وروحي شوفي بعينج ولا اتصال جاوبت الا امس من دكت وبالغلط فتحته

-بالغلط فتحته؟؟؟

-وداعة امي بالغلط ومن سمعت صوتي تعبان سألتني شبيك گلتلها مريض وهااا اها لا سولفت وياهة ولا انطيتها تفاصيل ولا صخام بوجهج كلشي ماكو

-طبعااً تجي وطبعاً عبالها بيك مجال علي الحـق! انتَ تلبس حلقتك من تروح لبغداد لو لا؟؟

-هااا؟

-تلبس حلقتك لو لااا

-لا تصيحين ولج انطيني مجال اجاوب انا رجال متضرر هسة لا تستغلين هالشي لصالحج

-والقران الا استغله واروح لفندقها واتعارك وياهة!!

-روحي

-كول والله؟؟

-والعباس روحي تعاركي ياهو مالتي

-حق لا تخبلنييي

-هو انتِ مسودنة من گاعج انا شكو

-عفية بشر شكد مستفز

تعاركت وياه بأيدي بس اريد اوخر منه وهو معند لازمني بكل قوته ويضحك ويداهر بيه ويجر وجهي يبوس بيه ويگول متحمس..

-هذا المستفز بچاچ دم من گالولج هو بالمستشفى متصاوب

-لا ما بجيت دم

-صح بس بچيتي بچي معزايات ولا تجذبين عليّ امي گالتلي گابلتي غرفة العمليات وكعدتي تبجين بالكاع ما ترضين تكومين

انعصر گلبي من ذكرني العشناه اليومين الفاتوا گلبي مات من شفته سابح بدمه حسيت بروحي تريد تطلع من صدري ويه صوت اخوانه الحايرين بي وابوه يصيح بأسمه وامه تلطم فوك راسه، علي البـدر هم تصاوب بس انضرب بچتفه وما فقد الوعي بس حق چانت اصابته اقوى صارت قريب خاصرته وكسرتله ضلع..

-هاا شو سكتي

-لا نحجي بالصار المهم انتَ هسة زين وبصحة وعافية الحمدلله

-وما احصل منج شي لسلامتي؟

-شتريد يعني

-مادري انتِ وكرمج

-علي اكعد راحة

-ماكدر اكعد اكدر انام؟

-علي الحـقققق

-هههههه وللج امووت عليج قبببق

عصر خدودي وجرني عليه يبوسني ويتحارش بيه بسخافة يممة وجهي اشتعل من لمساته وحركاته اريد بس افلت ورغم وضعه الصعب بس ماكدرله..

-لا لا حباب شبيك حقق شبيك تره عيييب

-العيب الوحيد هو دشداشتج هنا قبق

-هاا هم رجعنا على الدشداشة؟؟

-قبق خلي ملابسج كلهن كودري اخرب واتكهرب عليه

ضحكت صافنة على تفكيره اول مرة اشوف بشر هيج يعشق الكودري وانوب صفنني بالزايد من گرصني بخصري وغمز يگول..

-خلي حتى الشسمه كودري

-نعم؟؟؟

-شبيچ قصدي على التراكات شسالفة

-عليي توب من سوالفك عليي

-اموت على رب علي

-يلا اني رايـ....

گطعت جملتي جافلة وهو هم فتح عيونه وفز من مكانه على صوت رجال يصيح بخباااال اجه من جهة الحديقة، طفرت من يمه اركض للشباك وظل يعيط عليّ ميخليني افتح البردة اشوف..

-بس اشوف منو

-لااا تفتحيننننن گلتتت

گام كوة يستند على تاج الجرباية والميز مديتله ايدي اساعده ما قبل وكام وحده ايده على خاصرته ويمشي كوة، راح للشباك يفتحه يشوف بس الصوت صار قريب كلش وكأنه جاي من الصالة الجوه..

-خاف واحد من اخوتك؟؟

-لا تنزلين

هرول بخطوات شبه سريعة وطلع من الغرفة بس ماكدرت ابقى فوك خفت عليه يصيرله شي مثل قبل كم يوم، انتظرته علما نزل وركضت لمحجر الدرج شفت تَـمني واكفة وياهة تالة وليلة وجههن اصفر وجاحظات عيونهن يباوعن لشي..

وجهت نظراتي للاتجاه اليباوعن عليه ولطمت صدري مصدومة من شفت غفار يصيح مثل المجنون وعاصف مقيد ايده والامير علي يتعارك ويدفع بي وتقي من جهة وخالة رسمية وسلوى متخبلات وشيخ علي يصيح بي ومسعود واكف بباب البيت بس يتفرج..

-غفار: الله لاااا يوفقكمممم وووولكممم انااااا تزوووجون الاحبهاااا اناااا ياخذوون الرايدهاااا منيييي

-شيخ علي: غفاااار البت تزوووجت ماا تستحي انتَ!!

-غفار: جيبوووهااااا وووولكم چذابييييييين جيبوووهااااا

-الامـير علي: ااطلعععع لا ابتلييي بيييك اطلعععع لك سرررسريي

-غفار: تففففف على غيرررتكم وشرفكممم تففف على شرررفك وعرضك ووولك شيخ عليي اشتتتعلت رووحك مثلما شعلتتت روووحي

-علي الحـق: كضوووا ونعلوا والديه هالسربووتت

فلت روحه منهم محد ديگدرله وهو طويل وجثل وركض لغرفة سلوى وكأنه يعرف حبيبة كاعدة هناك، لزمه الامير من خوانيگه يسحبه وركض غفار على باب الغرفة وانتفضنا كلنا على صوت طلقة اجت من مسدس علي التـقي ضرب الحايط البصفهم يهدد بيها..

-علي التقي: حركة وحددة وانيم چييلة بگلبك!

-غفار: انتَ زلمة سويها!

ما اهتم لـ تقي وچفت على الغرفة يفتح الباب وقبل لا يلحگ يخطي خطوة وجه تقي المسدس عليه وضرب طلقتين رن صوتهن المخيف بالبيت خلتنا نزوع العافية..

-مسعود: ابنيييييييي وللللك غففااااار

-علي التـقي: انااا حذرت بس اببنك عاار ونااقص غيررة وناقص الغييرة حرامات عليه يعيش!

ركضوا على غفار ابوه واخوته وولد عمو علي واكفين من بعيد يباوعوله، تخبل مسعود ورج البيت بصياحه وتهديداته ووعيده بس عمو علي ما انهز ولا اهتمله بقى واكف ساند جسمه على عوچيته ورافع حاجبه بتحدي..

ركضوا بي اخوته ياخذوه للمستشفى بس مدا اعرف شصار بي مات لو عاش مادري! كل الاعرفه البيت قامت قيامته ومسعود تهجم على عمو علي يريد يتعارك وياه ويتطاول والامير وكف بوجه ابوه ودفع مسعود عنه بقسوة انسان كاره..

-الامـير علي: اخذ چلاابك واطلع مناا!

-مسعود: ثاااري وياكم صار ثاارين ووولد عليي مووتكم على ايددي!!

-الامـير علي: وعلي والسماني علي لوو عتبت رجلييك باب هالبيت احشهاا حشش واطلعك مناا مگرم!!

صياح وهرجة ووعيد ومشامر حچي يكسر الظهر صار قبل لا يطلع مسعود من البيت يلحگ ولده الآخذوا غفار للمستشفى، اول ما طلع مسعود من البيت ركضوا اخوان حبيبة لغرفة سلوى يتطمنون عليها ونزلنا احنه هم نركض نشوفها، لگينه البنية صاكة بمكانها وجهها اصفر ومبين عليها مخلوسة بس متبين وبقت تطمن ابوها واخوانها هي مابيها شي..

-حبيبة: مابيه شي بوية والعباس كلشي مابيه

-رسمية: الحمدلله اسم الله عليج بنيتي حبيبتي عزيزتي انتِ

-شيخ علي: وين باقي الولد؟؟

-الامـير علي: لا تخاف عليهم بوية هسة اطلع اشوفهم

-شيخ علي: اميير كض اخوتك ولمهم اليوم محد يطلع من البيت!

-علي التـقي: شني تريدنا نخاف ونتختل مثل النثاية من وره ولد مسعود العار؟؟؟

-رسمية: من ذبحت ابنه ما فكررت ولك ويين عقلك وووين تقي!!

-علي التـقي: ما ذبحته ضربته طلقة برجله عرج ما يصيبه!

-شيخ علي: زين تسوي

مسحت حبيبة على وجهها وزفرت نفس ترخي اكتافها، حضنها علي التـقي لجسمه وباس راسها يطمنها..

-لا تخافين حبيبتي مالهم شي يمنا

-حبيبة: اخاف يرجعون ينتقمون لاخوهم

-شيخ علي: ينتقمون لاخوهم شني؟؟ بووية داسوا بيتنا وتهجموا على بنيتنا!! زين ما كتلناه بمچانه! شنيي ماعدنه غيرة ماعدنه شرف؟؟؟

-علي الحق: دوسة بيت تعتبر لا تخافون محد يسترجي يرجع علينا واذا رجعوا بعلي اذبحه بيدي وارجعه لابوه وصل وصل!!!

رجفت خالة رسمية وجرته من ياخة قميصه المفتوح ونترت بوجهه فاحطة..

-علي الحـق هيييد ولا تتسودن! سمعوني ياا ولد هالسالفة تنطمم هنا وتنسي!! لا تجيبولنا مشاكل!!

-علي التـقي: يووم غفار تجاوز علينا ومسعود راضي بتصرفات ابنه وما حاول يوگفه!

-رسمية: تقي حگك واخذته كاافي عاد كااافي خلونا نرتاح صار ثلاث ايام لا ليلنا لييل ولا نهارنا نهار تعبنا

سكت الكل وشيخ علي هم ما علق زايد شكله تعبان ومهبوط من الصار وخله وطلع من الغرفة وولده لحگوه بقينا بس البنات ويه حبيبة كاعدات..

-حبيبة: بنات والله مابيه شي شمالچن

-رفل: روحي فرفحت عليج خايبة انا انحصرت بغرفة عمة رسمية جنت نايمة وفزيت على الصوت وما رضن اطلع

-حبيبة: حسيت راح يصير هيج شي من يفتهمون بس ما ظنيته يطب عليّ الغرفة

-تَـمني: الحمدلله من عدت على خير

-تالة: يلا بنات هاي امي دتتصل عليَّ تكول طلعيلي

-تَـمني: وين حبي خو ابقي يمي

-تالة: وين يمعودة هي ماما شادة حزامها عليَّ وكوة خلتني اجي اليوم

ودعتنا تالة وطلعت وحبيبة دگ عليها منتصر واصرت علينا وعلى امها وخالة رسمية محد تجيبله طاري عن الصار هسة الا اذا ابوها حب يسولفله..

ويه الليل طلعت من الغرفة مهدود حيلي تعبانة والرجفة بعدها بعظامي، رحت للمطبخ اسوي عشا ويه ابرار الي شايلة هم سفر ابنها وتخاف بسبب الاوضاع راح يضطرون يأجلون السفر ويتأخر علاجه مع العلم الدكتور اكد عليهم ميصير يتأخر علاج حيدر..

-عبق: لا تخافين ابرار اكيد راح تسافرون ان شاء الله ،الولد مستحيل يعوفوكم حتى لو علي الدر ما انطوه اجازة

-ابرار: خايبة هم استحي منهم شني ذنبهم متهجولين ويانه

-شنو متهجولين يمعودة غير ابن اخوهم حيدوري

هزت راسها ساكتة وبقت تشتغل على الصامت، انضمت ويانه تَـمني تساعدنا وشكد توسلنا بأبرار حتى ترتاح وتكعد بس ما قبلت تكول الشغل يلهيها..

-ابرار: چا ليلة وينهي؟

-تَـمني: متخربطة شوية ورفل وشمس يمها بالغرفة

-ابرار: شجاها؟

-عبق:‏ مادري هم صايرة متحجي ليلة عود سكوتية وكذا

ويه سوالفنا وتحشيشنا على ليلة اندكت باب المطبخ بقسوة كأنما احد ديضربها بمحبس او مفتاح، عرفته واحد من الولد فـ لبسنا شالاتنا وصاح علي التـقي من الباب..

-يا الله

-ابرار: تفضل خوية

فتح الباب شايل بيده جنطة ملونة برسمات ورد كبار اصفر واحمر وعبر باب المطبخ يمشي وحده، سلم علينا وردينا عليه السلام بالنا ويه غفار وهستونه دنريد نسأله وقاطعنا من صاح من مكانه..

-ووينج يمعوودة

دار وجهه على باب المطبخ وكلنا توجهت انظارنا لهناك، ثواني وانصدمنا من دخلت سبأ مغشاية بعبايتها ومبينة تك عين منها..

-تَـمني: سبأ!

دخلت البنية منصية راسها وملفلفة نفسها بالعباية تلفلف، هرولنا عليها نسلم ونسأل عن حالها بس ابد ما وخرت العباية من وجهها ولا زحزحتها..

-عبق: شلونچ سبأ مشتاقيلج

هزت راسها ساكتة وكأن لسانها مبلوع، زفر تقي نفس يباوعلها من بعيد وعاگد حاجبه كأن وجودها زاعجه كلش وواضح هالشي على ملامحه خصوصاً من اشر بيده على جهة الصالة وكال..

-غرفتي بالطابق الثاني تندليها اكيد

باوعنا وحدة للثانية مستغربات منتظرين أي شي يفسرلنا ليش تقي يريدها تصعد لغرفته وليش سبأ مدا تجاوبه وباقية على الصامت؟؟

-ابرار: خير ان شاء الله تقي خو ما صاير شي؟

هز براسه لا على كيفه ساكت واشر لـ سبأ تتقدم، هرولت بخطوات سريعة عليه واخذت جنطتها من ايده وركضت تكمل طريقها بينما هو بقى يباوعلها من بعيد وعاگد حواجبه..

-علي التـقي: انا وسبأ تزوجنا

بدون لا نحس شهگنا اني وابرار وتَـمني فتحت عيونها باهتة، ضحكت ابرار ضحكة وحدة ممصدگة وگالت..

-شسالفة تقي مو وكت شقه شبيها سبأ؟ خاف طلابة جديدة صارت ويه اهلها وجبتوها يمنا ويه رهف.. بس وينها رهف؟

-علي التـقي: سألتيني خوما صاير شي وجاوبتج! انا وسبأ تزوجنا

-تَـمني: شلون تتزوج بدون متاخذ رأينا!!

اللتفتنا كلنا عليها ومن ضمننا تقي، ظلت تدور عيونها بيناتنا مستحية واردفت تكمل بدون تفكير..

-اقصد يعني اني احبك... اقصد اقصد كلنا نحبك والقران قصدي كلنا نحبك والله

زلغت خدها ابرار واني ضميت ضحكتي جوه ايدي وتقي بقى ساكت ويباوعلها وهي تكمل..

-شوف اني قصدت احنه نحبك ونريدلك الخير يعني شلون اشرحها احنه نريد نشوفك فرحان وسعيد ونكون سعيدين الك وفرحانين وكلش متونسين ونفرح ونهلهل ونركص وهاي

گوة لازمة ضحكتي وتَـمني خطية وجهها گام ينطي اللوان من الخجل، هز راسه تقي متفهم وگال ببساطة وبدون مماطلة..

-شكراً تَـمني اعرف انتم تردولي الخير بس كلشي صار بسرعة، من رخصتكم

عافنا وطلع من المطبخ تاركنا بصدمتنا بهالخبر وعاف تَـمني تدبچ رجلها بالكاع مستحية وتلوم بروحها..

-تَـمني: يبوووو شكد فشلللة

-عبق: حصل خير حصل خير

-تَـمني: ماكول غير الف الحمدلله امير مو هنا جان شيخلصني

-ابرار: عوفن الامير ولجن صدگ تقي تزوج سبأ؟؟ زين شلون!!

**

"تَـمني"

هزيت راسي محتارة ماعرف شلون وشوكت وليش تزوجها والبنات هم بقن حايرات، بگعدتهم ويه بيت مسعود محد حچالنا شنو ممكن يصير وعلى شنو راح يتفقون وهذا سبب تفاجأنها و تفاجأت اكثر من عرفت خالة رسمية تعرف بالسالفة وعصبيتها واصلة للظالين اليحچي وياهة يترزل وتعيط عليه وتهججه منها..

حطينا العشا وشكد صحنا لـ سبأ تنزل بس مقبلت، اللتمينا كلنا على العشا عدى الامير وعمو وعلي الدر طالعين بس الباقين كلهم هنا ومحد سلم من عصبية خالة رسمية خصوصاً زوج المشاكل..

-علي السور: اويليييي شون كباب عروگ هذا يطگ طگتين

-علي النور: اي بعلي بس لو شوية مكسبيها اكثر

-رسمية: اكل واسكت

-علي النور: اي يمة بس جاي انطي رأيي

-رسمية: ياهو سألك عن رأيك؟؟

-علي النور: يعني مادري بس متعودين احنه ننطي ارائنا بالاكل

-رسمية: ما نريد رئيك بعد اكل وانچب

-علي السور: شبيكي امي مبين عليكي اليوم مش رايئى

-رسمية: انچب

-علي السور: شمالها الغالية الـ...

-رسمية: بطل لواگة واكل وانتَ ساكت

ظلت ترزل بيهم وهمه مستمرين عود غير يسكتون؟ ابددد انوب لطشوا حتى اشعار گاموا يشعرولها وحيدر دخل على الخط..

-حيدر: حبوبتي يا حلوة اللبن.. حبوبتي يا عاشگة اللبن.. حبوبتي يا شوربة عدس تحب الفراولة والكرز

-رسمية: اشش يلا كافي خلونا نتزقنب

-علي السور: يمة ما ارضى على زعلچ انا احس بگلبي يوجعني

-رسمية: استغفرالله ياربي

-علي النور: يوم انتِ طالعة اليوم حلوة وحبابة وترفة تشبهين الكبابة

-رسمية: لعنة الله على ابليسك سويتني كبابة

-علي السور: يمة انتَ كبابة وخبزاية وطرشي وحمصاية و...

-علي الحـق: وراح تنكتلون بنعالها اليابس وره هاللواگة

-علي السور: لاااه وعلي ماكو لواكة هاي امنا هاي الحبيبة هاي السلطانة وهاي الاميرة وهاي الشيـ...

-رسمية: گوم كرار جيب النعال

-علي السور: لا لا لا بطلت والله بطلنا

-علي البدر: هو شماله كرار شو ضاربله ركن وما جاي ياكل

-علي الكـرار: مابيه شي

-علي الحـق: لا بشرفك شبيك ولك مو من عوايدك تبقى هادئ هيج

-ابرار: هسة يگللكم اريد اتزوج وامي ما ترضى

ضحكنا كلنا ويه جملة ابرار الا هو ابتسم ساكت وقسم من خبزته يطمسها بالطماطة ياكلها، مچنت اعرف صار موقف بينه وبين تالة اليوم وهي دتطلع من بيتنا الا من صعدت فوك وشفت خمس مكالمات فائتة منها.. دگيت عليها بسرعة ظل بالي وفوراً جاوبتني..

-شبيچ تالة صاير شي؟

-لا اگلج تَـمني كرار بالبيت؟؟

-اي ليش؟

-مو صار احم.. صار موقف قبل شوية ويه كرار و.. واني خجلت منه

-شصار ولج؟؟

-تَـمني والله لا ارادي صارت وطلعت مني بطريقة كلللش بشعة

-احجي ولج شصار!!

-من طلعت من بيتكم دا افتح باب الحوش وصار بوجهي علي الكـرار

-وشنو يعني؟

-ابد تَـمني بس حظي دائماً فگر وياه واليوم رغم المصايب الفايخ مسويله اجواء باريسية، باعي واني دا اطلع من بابهم چان هو ديطب وشايل بيده كوب گهوة سفري ديشرب منه وبالغلط انطخيت بي وانكبت الكهوة عليَّ وعلى صدري وملابسي اشتعلت شععل!!

-اووووي شجاچ تالة

-ظليت اگمز من الحرارة وشكدما حارة كام صدري يطلع دخان وقميصي هم وهو من شافني هيج ظل ويايه طلع كلينس من جيبه وصار يمسحلي واني شايطة روحي وبالغلط...

-بالغلط شنو؟؟

-احم.. شافني متوجعة واطفر انخبص وصار يمسحلي وينفخ على رگبتي وصدري واخذه الواهس وبالغلط دخل ايده بياخة قميصي يمسح الجوه

-كذابة!!!

-بالغلط اقسم بالله مو قصده شي واصلاً هو مو يمي ولا منتبه ديمسح الكهوة مني بخبال وسريع سريع بس يريد ينشفها بس اني بذاك الوقت اخذتني الغيرة على نفسي وضجت من تصرفه ودفعت ايده حيل مني دفرتها وعطت بوجهه..

-شبيييك

-اسف اعتذر والعباس مادري

عكست عيني عنه ونويت امشيها لان واضح الانسان اليتعمد يتحارش من الي مو قصده ونيته صافية تجاهك بس الحظ الفگر منو شفتها واكفة تباوع للصار؟؟ امي!!

من شفت امي واكفة وفاتحة عيونها بخزر تباوعلي وتباوع لظهر كرار من وره واني اعرفها شادة حيلها ويانه وتضوج من يتقرب مني كرار وانوب شافتنا بهيجي موقف متت من الخوف وعطت بوجهه..

-انتَ متستحيي ووااحد قلييل ادب وشررف!!

-تاالة جاي اگلج مادري ودااعة امي مادري لهدرجة تتوقعيني خسيس واتحارش بيچ؟؟

-اي!! يوووووه وخر عن وجهي وخررر

دفعته من صدره بقوة توجع وعبرته وهو بقى يعيط ويبرر لروحه، ولج هلك نفسه وهو يبرر ويتعذر واني لابسته وكملت طريقي ويه امي مشيت وگلبي ممرور مرد عليه اني اعرفه مو نيته سوء واعرفه شكد محترم ومؤدب ويايه بس شسوي لامي تَـمني شسوي!!

-اووف تالة واني اكول شبي خطية كاعد على العشا كلمة ميحجي بس يضرب صفنات

-مادري شكول بس اني هم موقفي چان صعب وجان لازم ابين اني رافضة حركته قابل اني كاعدة بگلبه واعرفه مو قصده

-ولج انتِ دتكولين تعرفي زين ووكعت الكهوة هناك والرجال توتر وخاف عليج وظل يمسحلج وايده صارت بمكان غلط وهو اعتذرلج وبينتي انتِ ما قابلة بعد هالحركات مال تدفعي وترزلي وتمدين لسانج عليه شكو؟؟

-الامـير علي: ها ولج على ياهو مديتي لسانج هالمرة

اللتفتت على صوت الامير اجه من ورايه هستوه ديدخل للغرفة، عدلت گعدتي اضحك لان چنت متمددة على بطني ورافعة رجلي اللعب بيهن..

-باي تالة باجر نكمل

سديته منها وربعت رجليه على الجرباية ورتبت شعري المتهوس..

-تَـمني: هاي شنو شوكت اجيت شو مسمعت صوت الباب ينتفح

بقى مبتسم بدون لا يجاوبني، شمر شماغه على الجرباية ونزع دشداشته على الصامت مبين عليه شكد تعبان وهلكان وما اللومه صارله ثلاث ايام لا نوم ولا اكل مثل البشر ويظل الليل كله سهران يخاف لا ولد مسعود يسوولهم فد مكسورة ويهدون على بيتنا..

-تسبح؟

-اي

-تمام راح احضرلك ملابسك

حچيتها وكمت للكنتور وعاق طريقي من جرني من ايدي عليه وحاوط خصري، بلعت ريگي خجلانة من باسني على راسي وخدودي وحنچي و... توترت كلش ودفعته على كيفي من صدره اضحك بخفة وفلتت نفسي من ايده اشرد يم الكنتور..

-روح روح اسبح حتى اسويلك عشا

باوعلي مضيگ عيونه باقي كله على الساكت ميحجي ولا فتح حلگه، درت وجهي مغلسة على نظراته وطلعتله منشفة وكل احتياجاته وهو فات للحمام، من تأكدت بي دخل وطبگ الباب وراه ياله ذبيت نفس مرتاحة اوووف شلون بيه وشلون بخجلي وياه لشوكت ابقى هيج..

لبست شالي ونزلت جوه حتى احطله العشا لكيت الصالة فارغة والكل مبين بغرفته، طبيت للمطبخ وطبكت الباب ورايه ورحت للفرن اشوف باقي اكل من العشا لو لا، شفت باقي بورگاية وحدة وشوية زلاطة اي كافي لامير هاي طلابة شيريد اكثر اصلاً مو زين واحد يثگل من ينام..

حميت الخبزة وحطيت بيها البورگاية ضاعت بيها هاي شگدتوتها؟ ظليت افتر على شي احطه وياهة شفت خضرة ترست اللفة خضرة وزلاطة ولفيتها وطلعت قوطية ببسي من الثلاجة وحطيتهن بصينية وكعدت انتظره ينزل..

كاعدة واباوع على الصينية واللوب احس قليل؟ بس لا مو قليل اني اليوم اكلت بورگايتين وشبعت وهو راح ياكل وحدة مو زين عليه تصعد عنده الدهون ثانياً حاطة زلاطة وخضرة هاي كله اكل صحي اله احسن خلي يضعف شو احسه سمنان هالايام..

-اي سمنان لازم يضعف لازم هذا كافي الحمدلله نعمة كريم شكد يريد بعد

كاعدة واقنع بروحي عقلي استوعبها وتقبلها بس گلبي مقهور ومدا يتقبل، ماتحملت ابقى كاعدة وقررت اكوم اسويله بعد خطية.. فتحت المجمدة ووكفت اقرر شنو اسويله بعد وبنفس اللحظة هو دخل للمطبخ شعره مبلل وقميصه مفتح..

-ها ابوي تعشينا اليوم لا؟

-اي اي اكيد

اللتفتت عليه ناوية اخيره شنو اسويله عشا بس شفته باوع للفة وابتسم، جر خدي بين اصابعه وگال..

-مرة معدلة وعلي

شال اللفة ديريد يعض منها وركضت عليه جريتها من ايده مخبوصة..

-لا امير لا تاكل منها

-ليش

-مو.. مو هاي اريد اسويلك غير شي

-چا هاي شبيها

-مو شسمها احس.. احس مطيبة

-طيبة طيبة ما دامها من ايدج شحلاتها

-لا امير حباب

-جيبي تَـمني انا اريد اكلها

-لا فدوة حباب هاي شبيك اريد اسويلك غير شي

-ولج ماريد لا تضيعين وقتنا خليني اكل لگمة واجيج مشتاگلج

-لا اني ما اقبل الا اسويلك عشا ثاني ا..

قبل لا اكمل الجملة عض من اللفة ياكل، ضميت حلكي بأيدي اباوعله ياكل مبتسم ويحركلي بحواجبه عبالك مسوي انجاز من عاندني واكلها واني بالي كله ويه اللفة شلون من يكتشفها فارغة وبيها بورگاية وحدة رفيعة وصغيرة كلش ضايعة بوسط الخبزاية..

عض لگمة ثانية ياكل وعكد حاجبه مستغرب، مد عينه للفة يباوع بيها واحس وجهي صار هطوله من الفشلة عزا بعيني لكمتين شكبرهن عضهن وما وصل للبورگ.. استمر يگلب بيها وبعده هستوه ديريد يفتح اللفة يشوف شنو محشيتها خفت اتفشل زايد وبدون تفكير چلبت بيده وجريت وجهه الي وگلت بصوت ناصي مايع مستعجل..

-مشتاقتلك حبيبي

-شني

-صار هوايه مدا نشوف بعض

-لا لا شني گلتي گبل شوي؟

-مشتاقتلك؟

-لا الوراهة

-صار هوايه مدا نشوف بعض؟

-ووولج گبلها

-مشتاقتلك گلت

عض على شفته متحلف ومخنزر حسيته يريد يرگعني راشدي بس كوة لازم روحه، غمض عيونه وتحسر يگول شاد على اعصابه..

-گلتي حبيبي نوومه

-اني؟؟

-لا امي

-اي خالة دائماً تگلك حبيبي شنو الجديد

-وووولج تَـمنييييي

-هاااااا

-وجعاا سكتي سكتي حتى الچلمة **** بيها

-باوع امير احسك فشرت عليَّ فـ احس لازم ازعل؟

-زعلي بوية اناا اريدج تزعلين

-يلا راح ازعل

-امشي صعدي فوك كدامي

-خليني اسويلك عشا

-ماريد استغففر الله صعدي اليوم انتقم منجج

-يمممة تضربني؟؟

-صعدي صعدي

-لا لا ماروح وياك راح انام بغرفة حبيبة

شردت اركض وهو عاف اللفة واجه ورايه، ما لحكت احط رجلي على باية الدرج وشالني بمكاني خلاني اعيط واضحك مثل المخبلات، فتح عيونه ينبهني وعض على شفته يضحك ويگول..

-صوتج ولج لا تفضحينا

-هههههه صير حباب لعد

-صارلي عمر حباب كافي بزعت رواحنا نريد نستهتر

ضحكت وصعد بيه بايتين ووگف بمكانه من همست..

-اميييير

-ولج يبوووووي لا تمطين اسمي شعلتي روحه لامير

-تحبني اموري

-لا

-اميييير

-ههههههه شلون سؤال غبي هذا

-اميير

-خليني افكر

-يعني متحبني صح

-عمت عينج ولج لا تگوليني حچي ما گلته

-لا لا مبين متحبني انتَ

ضحك خفيف يهز راسه مأيس وتنهد وهو يگول بتعب..

-انتِ اول عشگ عرفه گلبي يا الملوعة گلبي

-صدگ

-روحي تعلعلت وتعلگت بيج من يوم لفيتچ وشلتچ بچيس الزبالة

-هههههه كذاب

-والحسين الشهيد

-چنت متأذية كلش بوكتها

-بيه ولا بيج

-اسم الله عليك اميري

-احبچ فهاوي

-اكيد هاي اثار سحر المحبة

-خايبة موش سحر محبة هذا ضيم وظلايم

-اممم

-وانتِ؟

-رسمية: تحبك تحبك چا شون ما تحبك

انتفضنا ثنينا ونزلني امير بسرعة من ايده واللتفت يشوف امه واكفة بباب غرفتها ومتخصرة تباوعلنا ومبتسمة بمكر..

-الامـير علي: احم.. يمة انتِ هنا

-رسمية: اي يبعد امك هنا مو تعرف احنه حوشنا صار حوش كاولية كلمن يريد يغازل مريته ويتسوفل يسويها على هالدرج

-الامـير علي: يمة شسالفة

-رسمية: ولكم انتم ما تستحوون ما تخجلون ما تكولون الوادم نايمة عدكم غرفة روحوا بيها وشتسوون سووا شنيي شو كلش زايعين المستحه ولد علي ينرادلكم تربية من اول وجديد!

ما صارلنا مجال نجاوبها ونزل ابا الحسن علي من فوگ شايل ليلة! يمة اني شفتهم هيج وطگييييت من الضحك والامير هم ضم وجهه فاحط ضحك وابا الحسن بسرعة نزل ليلة من ايده مصدوم من شافنا..

-رسمية: هلاا هلااااا ولد علي لاا ادب لاا اخلاق لا خجل لا حياء

-ليلة: عمة بالعباس ابو فاضل انا معليه هذا ابنج ما يستحي گتله ماريد اطلع وهو معند الا تطلعين وياي وجابني سحل من الفراش

-رسمية: اي مو انا اعرفهم وليداتي ادبسزية سرسرية ما ينطون عين

-تَـمني: والله صح خالة

اندارلي امير رافع حاجبه ويتحلفلي بنظراته، سويت روحي ما منتبهه بس دا اللاحظه عينه ما شالها مني حتى من دخلوا سور ونور الي طلعوا من العدم مادري وين چانو طالعين بنصاص الليالي عاد همزين خالة رسمية اللتهت ترزل بيهم واحنه فلتنا فوگ وابا الحسن لزم ليلة يتعارك وياهة بنص صالة الطابق الثاني لان وجهها اصفر ومضربة عن الطعام..

-ليلة: امير اخذ اخوك مني ماريدنه خايب اخذووه انا اتبرعلكم بي

-ابا الحسن علي: اليسمعج كاتل روحي عليج عووعع چنچ عنبة معچفة

تركناهم يتعاركون بالصالة ورجعنا لغرفتنا، دخل امير يفر بيده على وضعهم ويدردم عليهم بصوت ناصي..

-سوادين والچفل زينب سوادين ذول الثنين

-هههههه مادري شلون راح يكملون باقي حياتهم سوه

-هواي تبهذل ابا الحسن ومشلوع گلبه

-اممم

-بس عود حسبالج هو ضايج من وضعه وناوي يعوفها؟ لا وعلي هذا مخبل عقل ماكو براسه لو ليلة تدوس بگلبه هم يصيح احبها وعاشگها وكلشي منها حلو

-ليش انتَ لو بمكانه تعوفني؟

ضحك بدون لا يجاوب ونزع قميصه يشمر روحه على الچرباية، تقربت منه ووگفت فوك راسه متخصرة وكررت..

-امير جاوب

-شني

-انتَ لو بمكانه راح تعوفني؟

بقى يضحك ويستغفر ويمسح على لحيته، خنگتني العبرة وصعدت الغصة ببلعومي گوة بلعت ريكي وكررت سؤالي..

-تعوفني؟

-تَـمني نامي بوية

-جاوبني امير

-شني هاي ولج جاي تبجين؟

-جاوب جاوب!

-ولج مسودنة انتِ

-جاوبنيي تعوفني لو لا جاوب

-هههههههههه والزهرة صدمتيني

قهرني بالزايد من ضحك لدرجة وجهه صار احمر وقررت اسكت واعوف السالفة، من خلال هالموقف خفت وماعرف ليش خفت هيج يمكن خايفة لا اسمع جواب ميرضيني ويكسر گلبي فـ الاحسن اللف راسي وانام وما اللح زايد..

نزعت الشال وعفته ورحت لمكاني بالفراش تمددت وسحبت البطانية اغطي روحي وانطيته ظهري، زفرت نفس خفيف وغمضت عيوني وبدون لا اسيطر على نفسي دموعي بدت تنزل من العينين واهتز جسمي ببكاء صامت..

دقيقة دقيقتين وحسيت بشي صار يمشي على ظهري، صكيت بمكاني اركز بالحركة الدتصير على ظهري ومن خلال مسار الحركة استوعبت هاي اصابع الامير دترسم على ظهري شي كأنه لوحة..

-نمتي نوومه؟

مسحت دموعي وغمضت عيوني امثل النوم، رفع نفسه فوگايه وهمس يم اذني..

-دامها نايمة خليني استغلها واسوي كل البنفسي

ما فتحت عيوني حتى من باسني وصار يتلمس ويضحك بخبث، شوية ومل ذب حسرة ولزم شعري يفرده على المخدة مالته ويرتبه على كيفه خصلة خصلة ويصفه على المخدة عدل ويكوي بيده..

-حلو شعرها المضروبة اشتعلت صفحتها

ضحك وره ما گالها وطنگرت عليه بگلبي، حصرتني ضحكة من لزمني من خصري يديرني عليه ويكول..

-بت الاوادم حتى من تنام حارمتني من وجهها دايرته عني

حط راسه على المخدة الموجود عليها شعري وجر نفس عميق منه وزفره بهدوء، همهم بهدوء مرتاح وهمس بخفوت بيناتنا..

-امنيتي نامت زعلانة مني چَي ضحكت

سكت شوية يلعب بگذلتي قبل لا يكمل ويگول..

-ما تدري انا اضحك على سؤالها الغبي بس يلا شنسوي نصبر ونتحمل المصيبة اللفت على روسنا

يمممة النرفزة وصلت حدها عندي بس مو مال ابين روحي گاعدة واتعارك وياه هم تطير الهيبة فـ سويت شي ثاني يفيدني، تحركت بمكاني ومديت رجلي ورفسته من جوه حيل بكل قوتي اريح گلبي بي..

-ههههههههههه ولج ااااخ

حركت راسي على المخدة مغمضة عيوني وگلبت نفسي للجهة الثانية بس ما خلاني رجع گلبني عليه وحضني يضحك بصوت عالي عبالك متونس!

-ولج فهاوي حتى وانتَ نايمة عالة گلبي

-اريد اتزوج

حچيتها بصوت خافت اسوي روحي عود دا احچي بنومي واسمعه يضحك بكل صوته وكل نشاطه.. مسح على وجهي بأيده وهمس يجاريني..

-ها ولج ام الزلم چا مو متزوجة انتِ

-اممممم

-اي شكو بعد

-هممممممم

-هاي شني هايشة منيمها بصفي

-ما احب الامير واريد اتزوج ايطالي

-خ** بالإيطالي خووش!؟؟؟

-ايطالي حلو

-انچبييي انجبي يلا انجبييي

-هممم ايطالي

-سم بگلبه سكتي ولج

-اكره امير

-خ** بخلفة امير گعدي ولج لا اطلع كل ضيمي بيج

-امير ايع

-والله صدگ امير ايع والعباس صدگتي!

-ايع ايع

-ايع بعينج هاي صدگ نايمة لو ناصبة عليّ؟؟؟

-اعيش ويه خالة بمكان حلو واعوف امير خيولي

-ووولج تَـمني!!! بالعباس مصيبة انوب ما ينعرفلها نايمة كاعدة شو بالحالتين تحجي!

راح اموت من الضحك وافضح روحي انهاريت من صار يضرب على خدودي حتى اكوم وانوب كام جاب شوية مي ورشه بوجهي هنا بعد ما كدرت اقاوم وفتحت عيوني اسوي روحي فازة..

-تَـمني: هاا هاا شصاير

-صدك جنتي نايمة؟؟

-شنو

-عايني لا تلعبين وياي تَـمني چنتي نايمة لو تمثلين؟؟

-نايمة امير شسالفة شبيك

-چذابة والحسين

-لا تحلف اشش يلا اريد انام

-كعدي ولج

-ماا باي راح انام

غمضت عيوني مرة ثانية ومادري شلون صدگ غفيت وحسيت على مكان الامير بصفي فارغ، فزيت مخترعة من مكاني ادوره بالظلمة وسمعت صوت بسبسه جاية من جانب الجرباية.. ابتسمت من لگيته ديصلي صلاة الفجر ومبين هستوه كمل لانه لزم تلفونه يطلع منه دعاء يقراه وره صلاة الفجر كل يوم..

شي بداخلي رادني اروح اكعد يمه واسمعله وما حرمت نفسي وكمت من مكاني، انتبهتله رفع راسه الي ومبينه ملامحه بسبب ضوه التلفون شفت ابتسامة تنرسم على شفته وگال شي بس ماسمعته..

كعدت بصفه على السجادة اباوعله ثواني وبدون مقدمات سحبني من ايدي وكعدني بحضنه ولفني بأيده، كبرت ابتسامتي من باس خدي حسيت بخدودي تولع خجلانة خصوصاً من حط ايده على بطني يمسح عليها وهمس بصوت ناصي..

-ربي لا تذرني فرداً وأنت خير الوارثين، واجعل لي من لدنك ولياً يرثني في حياتي ويستغفر لي بعد موتي، واجعله خلفاً سوياً، ولا تجعل للشيطان فيه نصيباً، اللهم إني أستغفرك وأتوب إليك إنك أنت الغفور الرحيم..

سكت شوية وره ما كمل يدعي وبده يقرا ادعيته الباقية واسمعله يدعيلي ويذكر اسمي بكل شي يگوله ويدعي حتى لاطفاله المستقبليين الي لسه ما موجودين وكرر اكثر من مرة جملة خلتني ادمع..

-اللهم لا تذرني فرداً وانتَ خيرُ الوارثين.. اللهم ارزقني ذرية صالحة طاهرة من رحم زوجتي تَـمني

-امير

-عيونه

-لا تعوفني ابد

-ليش دائماً تكرريها؟

-مادري.. بس لا تعوفني ابد

-للموت ما اعوفچ امنية روحي

-واذا مگدرت اجيبلك اطفال هم تعوفني؟

-اطفال شني؟ كله رزق من ربچ ما صار عدنا هذا هو ما صار شني اول ناس ما تصير عدهم خلفة كافي انتِ بحياتي وبحضني انتِ طفلتي وام بيتي ما رايد غيرج

-بس انتَ شيخ ولازم يكون عندك اطفال حتى تورثهم لقب الامارة

-اخوتي عدهم جهال تَـمني يكفون ويوفون

-وانتَ تبقى تباوع للاطفال وتتحسر

-ما اتحسر ان شاء الله وربچ كريم

-انتَ شكد رجال زين

-وانتَ خوش بت

-اني تلوثت هوايه و...

سد حلگي بيده بسرعة ونزل يطبع قبلة خفيفة على خدي، غمضت عيوني هادئة من همس بصوت ناصي قريب اذني..

-گبل شوي سألتيني سؤال وضجتي من ضحكت وما جاوبتچ، تدرين ليش ضحكت تَـمني؟

-ليش

-عبني ضگت العلگم وانتِ حداي وما فكرت بلحظة اعوفنچ.. يا بت انا عاشگچ وگلبي لهذا اليوم يرجف لو صحتي بحسچ "امير"

ابتسمت اتنهد براحة وحطيت ايدي فوك ايده الحاضنتني وسندت راسي على صدره اريحه، محسيت على روحي من غفيت على هالوضعية بس عرفت هو شالني للجرباية لان كعدت الصبح اني بمكاني ومغطيني زين..

نزلت جوه بنشاطي وطاقتي والابتسامة مرسومة على وجهي اثر كلام الامير البارحة، شفت سلوى كاعدة ويه فراقد تشرب چاي والعمات هم هنا كاعدات ويحچن على سبأ وشلون تزوجها تقي وشلون گدر يجيبها غصباً ما على ابوها..

-فراقد: سببع ابن علي ستر على هالفقيرة

-سلوى: امس چانت ساقطة شو هسة فقيرة؟

-فراقد: مالج غرض انتِ.. تعاي تَـمني اكليلچ لگمة ويانه

-تَـمني: بالعافية خالة

-زهرة: ليش حبوبة؟ تعاي اكلي هاللفة من ايدي لا ترديني

-تَـمني: لا خالة ما احب هذا الجبن الف عافية عليكم

-زهرة: الله يعافيج گليبي

-ابتسام: اگلچن همه نزلوا العرسان لو بعدهم؟

-سلوى: عرسان؟ هههههههههههههههههههه

-فراقد: وصمخ شبيچ تضحكين

-سلوى: خيات تقي ما نام بغرفتها ولا داس مچان هي موجودة بي

-زهرة: ليش؟؟ چا مو تزوجها ليش هيج هامل البت؟

عفتهن يتناقشن عن السبب ورحت للمطبخ اسوي شي اكله، طلعت بيضة من الثلاجة ووكفت على المغسلة اطگها بالطاسة واخبطها..

-اااااخ ااااخ

اللتفتت اشوف منين طالعة هالحسرات وچان اللكاهة خالة رسمية دخلت للمطبخ وكعدت بالكاع وبيدها طاسة ستيل وصينية ستيل تريد تنظف خضرة..

-خيرچ خالة مبين عليج ضايجة؟

-رسمية: وين ما اوديها عوجة يا يمة

-الله كريم خالة كلشي بي صالح بهاي الدنيا

هزت راسها ساكتة واني بديت اگلي البيضة وطلعت خبزة من الخاولي الي تلف بي ابرار الخبز..

-تَـمني

-نعم

-ماكو شي منا منا

عرفت قصدها على الحمل فـ فوراً هزيت راسي لا وابتسمت اگول..

-الله كريم خالة

-اي ندري بالله كريم بس يمة ربچ هم گال اسعوني وانا اعين

-شنو قصدج؟

-ما ناوية ترحين طبيبة شي تشوفيلج چارة؟

-امير ميقبل

-هو بكيف امير؟؟ يمة ما يصير البطن تتأخر وما تشيل تره تشلع الافاد بعدين

-خالة بعد وكت ليش نستعجل على الاطفال اني بعدني صغيرة و..

-انتِ صغيرة بس الامير مو صغير الي بعمره هسة وليده بطوله

-اي بس هو..

-لا تگليلي هو تَـمني الامير وليدي وانا اعرفه عدل هو من يگلج ماريد ترحين طبيبة عبنه ما يريدج تتبهذلين بالعلاجات ويخاف لا ينكسر گلبج من چلام الطبيبة وياچ

صفنت بوجهها جافلة، عيوني غرغرت بدموعها من استوعبت وتذكرت هي تعرف بالصار ويايه وتعرف حملي الاول وكلام الدكتورة وتحذيرها اذا نزلته شبه مستحيل يصير عندي حمل مرة ثانية..

-احترگ البيض بنيتي

فزيت وانداريت على البيضة احتركت اطرافها وطلعت ريحتها، شلت الطاوة من النار وويه شيلتي للطاوة وگعن دموعي الجاهدت مينزلن.. انطيت خالة ظهري وبقيت اسوي روحي دا احط البيضة بالماعون واسمعها تكول ببطئ..

-اذكر مرة گلتيلي ما راح توگفين بوجه الامير ووجودچ يمه بس خاطر يحميچ

گلبي خمشني ويه كلامها ونبرة صوتها الي تغيرت، حاولت اسكت واسمعها للاخير بس ماتحملت صيخ نار وحطته بگلبي من اردفت..

-وگلتيلي ما عندج مانع اذا تزوج الامـير علي عليج وانا صراحة اريد ازوجه

-تزوجي؟؟

-اي، يمة تَـمني انا احبج ويشهد الله حاسبتج چن حبيبة بس من حگه وليدي يشوف بزرته وما يظل محروم وعينه على الـ...

-عينه على منو بالضبط؟ وليش محروم تره ما صارلنا سنة متزوجين خالة

-ليش تغير چلامچ تَـمني؟ يما انتِ مو گلتيلي ما تهتمين اذا تزوج

-وهسة اگلج اهتم وما اقبل بهالشي

-بس حگه هذا!

-حقه اني اجيبله الطفل مو غيري واذا الموضوع لهدرجة هامكم من اليوم ابدي اراجع دكتورة واحاول بموضوع الحمل!

-ليش تأذين روحج بنيتي توتة؟ لا تزعلين وحسبالج ازوجه خاطر تجي وحدة بدالج ويهملج لا وعلي ازوجه بت بس خاطر تحبل وتربي فروخه وانتِ تبقين مريته وحبيبته وام بيته و..

-خالة هو مو لعبة شنو ذنب البنية التجيبيها؟ حتى بس تحمل وتجيب وتربي؟

-شمالج ترضى والله

-بس اني ما ارضى واريد اني احمل واجيب واربي واتعب وبنفس الوقت اكون مرته وحبيبته وام بيته وكلشي حلو بحياته

-واذا ما صار عندج حمل؟؟

-بعد كله بيد الله خالاتي حبيبتي واموري بنفسه وبلسانه گلي لا اشيل هم ولا افكر بهالموضوع

روحي احترگت واحس بالدم صار يغلي بعروگي، اباوعلها تحجي ويايه بهدوء كأنها دتسولف بشي عادي وحاولت ابقى على هدوئي واحترمها وما ادوس بالحجي.. بس الي حرگ دمي وخلاني اعلي صوتي منهارة وارجف من فوگ ليجوه وعلى اثر صوتي دخل عمو علي وبقية الولد هو من گالت..

-رسمية: اذا چنتي تحبينه صدگ لا تخربين حياته وتفكرين بأنانية فكري بمصلحته ومستقبله الامير لازم يصير عنده ولد تَـمني لازم!!

-اني احب ابنچ خالة فوووگ ما تتصورين احببه وما راح اسمح لبشرر يفرقني عنه ويجيبلي علة يحطها بيناتنا حتى تاخده مني!! رضيتوووا او لاا على جثتي تطب مرة للامير علي واني موجودة بهالبيت! وعلى گص رگبتيي مرة غيري تحط عينها بعينه والعبااس التحلفون بي املصهنن!!!....

يتبع 👑....

━━━━━━ ♛ ━━━━━━

صارت بيها العباس ما عرفناچ نوومه 💪🏻🥵♥️

سبأ اوويليي يا سبأ شكد انقهرت عليها 😩

جايتنا احداث ان شاء الله تحتاج شهيييق زفيير قبل لا تقروها... 🦦♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

على چتفي تنام وتحلم بغيري! ♥️

━━━━━━ ♛ ━━━━━━

"سبـــأ"

البيت مخبوص وكلها تتصايح وتهدد وانا كاعدة على الدرج مبحلگة عيوني مصدومة، ما جاي اصدگ تطلع من عبق وتنهزم من البيت عبق تحملت سنين اهانة وتعب ومعاناة تاليها من تنفتح بوجهها وتنخطب لـ علي الحـق تعوفه وتروح؟؟

طبن سلوى ورسمية لغرفة رسمية بعدما طلعوا عمي وعلي النور ونزلت انا يم حبيبة وليلة عقلهن طاير بغير عالم بيدهن الورقة يقرن بيها ويرجعن ليوره وكل ساع وحدة بيهن معلقة..

-حبيبة: بالعباس مو عبق هاي مووو عبق ما تسووويها وترووح

-ليلة: وينها ياربيي وين راحت البت ولج منيلها عبق واحد خاطر تسافر وياه؟؟

-سبأ: بنات ما تتصلن بزلمتها؟

-ليلة: لا لا عمي علي حذر گال هو راح يروح يدور عليها اول ومنا لليل اذا ما لگوها ذاك الوكت يتصلون بي

هزيت راسي محتارة اضرب اخماس بأسداس، راحن ثنينهن لغرفة عمتي رسمية حرت ماعرفت وين اروحن اخاف لا اطب وياهن وتطردني سلوى كدام الكل وانهان خليني كاعدة هنا احسن..

مرت الساعة والساعتين والثلاث ساعات ومحد بيهن طلعت من الغرفة والزلم ماكو واحد بيهم بين، اذن المغرب وكمت اصلي بغرفتي ورجعت نزلت حسبالي راح اللگه احد بس شو محد اكو بالبيت طلعن النسوان مادري وين..

كعدت مرة الثانية وحدي كلت هسة بأي دقيقة تكعد تمني وتنزل يمي بس حتى هي ما نزلت ضجت من الوحدة ومن التفكير بـ عبق گلبي يمها وحالي متبهذل لا الاكدر ارتاح ولا اكدر اغلس وانسى احبها عبق عزيزة على گلبي واخافن عليها بت حديثة وحليوة تجيب العين سودة بوجهي وين رحتي ولج وعفتي الوادم تتلاطم عليج..

تعبت والوكت تأخر صعدت مرة لخ لغرفتي سبحت وبدلت هدومي وتمددت على الجرباية اعاين للسگف وافكر، افكر بـ عبق لو افكر بـ علي التـقي الصارله چم يوم لا يجي ولا اشوفه بالبيت مادري وين جاي ينام ولا ادري شجاي يصير وياه..

غفت عيني مادري شكثر ونزيت على صوت طگة جداحة صارت يمي، حسيت چن طبيت بحلم وجاثوم نام على صدري لا البيه اتحرك ولا البيه افزن من مچاني تهسترت اتخيل راح يحرگوني سلطان اخوي جدح الجداحة وراح يحرگ صدري، صرت اون بوجع اريدن ارفع ايدي احطها على صدري احمي بس ماكدر ايدي ثكيلة انهد حيلي..

استسلمت لثواني وشهگت من نص گلبي اگح ويه ما انرشگ بوجهي ماي بارد، فزيت اعاين مخلوسة ادور عيوني بالغرفة كلشي ماشوفن ظلمة وبس فحمة الجكارة مبينة.. لزمتني الكحة اختنكت حسيت بأيد تنمد على ظهري تدگلي بقوة انخسفت خسف بس ما حجيت..

-علي التقي: اسم الله شجاچ

هدأت وسكنت مرتاحة ويه حِسه، عدلت كعدتي اتنفس سريع وصرت ادور على شالي وين ذبيته ظلمة يا علي وين انطي وجهي..

-شبيچ تحوسين

-شالي ماهو

-شتسوين بي

-اريدنه

-وهو ما يريدج عوفي

-لا لا

-خايبة خلي فكي ياخة عنه هريتي هري

لميت البطانية على جسمي وكعدت ساكتة، هسة ياله انتبهت عليه كاعد بصفي على الجرباية وهاي اول مرة يسويها دائماً لو واكف لو يكعد على الكرسي.. ركزت اعاينله بكل حيلي بس ما جاي اللمح غير جكارته تصعد وتنزل يدخن منها ويذب حسرات وحدة اعلى من الثانية..

فترة ظلينا على هالحال ساكتين ونشم بدخان جكايره، تخلص وحدة يشعل الثانية على كعدتنا هاي حسبتله دخن خمس جكاير ما انطى لروحه مفكه.. شوي ورن موبايله بأشعار رسالة واخيراً كدرت اشوف وجهه عبنه فتح التلفون يقرا الرسالة..

صفنت اتأمل ملامحه وگلبي يدگ بصدري راح ينفجر، كلشي بي يعجبني سبحانك ربي كامل والكامل الله، ابتسمت على عيونه التفتر على شاشة الموبايل حاير بي مادري شجاي يسوي صار عندي فضول امدن راسي اعاين وگوة كضيت رويحتي واحترمت نفسي..

درت وجهي بساع ويه ما سد الموبايل ينفخ نفس ضايج كلش، شمر الموبايل على الميز وگام من مكانه ظنيته راح يفتح الضوا بس ما علگه وظل يفتر بمچانه احس بحركته والهوا الجاي يصير وياه من يتحرك.. طول على هالحال تعبت وعيني صارت تغفي بس كل الحيل رجع بيه من لطم رجله بكل حيله وهمس بحرگة منفعل..

-اووووووووف اووووووووووووف

-شبيك

ما جاوبني اخذ موبايله ورجع يكلب بي بس جاي اكدر اشوف وجهه صاير احمر، ظل بالي واخاف اللحن عليه لا يعيط بيه بس من شفت ملامحه تتغير چن واحد راح ينفجر توترت وبدون لا احس طلعت من حلگي جملة..

-شصاير تقي والله گلبي خلص

رفع عيونه عليّ يعاين لوجهي هو ما يشوفني زين بس انا اشوف، انتبهتله يبلع ريگ ويفرك بوجهه يتحسر.. ذب الموبايل على الميز ورجع يكعد منطيني ظهره تجرأت اكثر ونويت خلاص اليوم الا اعرف شبي وشنو المتعبه تقربت منه صرت بظهره اخذت نفس عميق وهمست بهدوء..

-اذا ترتاح سولفلي

مديت ايدي اريدن اللمس ظهره بس ماكدر ماعندي هالصلافة، ضغطت على روحي كلش وتدنيت زايد، حرورة جسمه خربطت وضعي بس تجاهلته ورفعت ايدي اريد اكضه وفزيت مخترعة من صار جسمه يهتز! چتافاته صارت تهتز مال واحد جاي يبجي!!

-تقي

كضيت زنده اريد اشوف شبي ويبست بدمي من اندارلي وبدون مقدمات حط راسه بحضني وصار يبچي بكل حيله، حالي واحوالي كلها تخربطت صرت ماعرف شسوي امسح على راسه لو اسولف وياه لو اشرد لو وين اولي وشنو اسوي؟!

قررت اصم حلكي وابقى بسده، اتشجع وامسح على راسه واطبطب على ظهره خاطر يحس بوجودي خلي يرتاح.. عجبه يسولف عجبه ما عجبه اسكت وانسى الصار، انسى زلمة طول بعرض بضخامة حاط راسه بحضني يبجي بگلب محروگ وچن روحه ملچومه..

-مات.. ما لحكت.. ما لحكت

نزلت دمعتي على صوته المبحوح وظليت كاضه ايده بين ايدي، مسحت بأيدي الثانية على شعره وفتحت حلگي اريد اسولف وياه وجمد كلشي بيه من كال..

-ماتت ما لحكت عليها ماتت وما شفتها

جاي يگول "ماتت" لو مات؟؟ جاي يحجي على بت لو ولد؟؟ وياهي هاي؟ منو هاي الهلك نفسه بالبچي عليها منووو؟؟؟

-خابروني هي بالمستشفى بينما لبست كملت كالو ماتت ما لحگو عليها

-منو

همستها بصوت گوة طلع مني بديت ارجف واعصابي تتلف ماريد استعجل بالحكم ما يصير، سكت ثواني يهدأ من نفسه گبل لا يجاوب ويگول..

-يسُر

-منو يسر؟؟

خنس حِسه بعد لا حچى ولا بچى ظل ساكت وراسه على رجلي ما رفعه، بلعت ريگي هادئة اقنع بنفسي اسكت وما استعجل كلشي مافهمت بعدني شبيه راح اموت؟؟ وليش گلبي راح يشگ صدري ويطلع من الخوف؟

-سبأ: خليني اعلگ الضوه

ردت اكوم وما خلاني كض ايدي يثبتني ويثبت راسه على رجلي ما يرضى يوخر، جر البطانية من جسمي غطى روحه بيها وياي وتنهد..

-سبأ: ظلمة الغرفة

-مثل ظلام گلبي

-گلبك مو.....

-يسُر معشوگتي الهمت بيها سنيييين

سچينة خاصر چانت جملته، نزلت دمعة متوقعة من عيني تريدلها حجة خاطر تطيح، انخسف گلبي الغبي الچان كلما يعاين بعيونك يا تقي يحس اكو وحدة متربعة بصدرك وما جاي تكدر تعاين لغيرها.. اشكال بنات عبرن من يمك واشكال عرضوا عليك بنات يتعبن الگلب من الجمال وانتَ رافض وما تقتنع بيهن..

-سبأ: وينها

-بالگبر

-وين جانت عايشة، هنا؟

-ديالى

-ديالى!!

-هي بت بغداد بس عايشة بديالى

-شوداها هناك

-العار

-شني

-العار الخذاها مني

فكيت عيوني استوعب بس ما جاي اكدر شني خذاها مني شني بت بغداد وعاشت بديالى؟

-سبأ: هي متزوجة؟؟

-اي

-متزوجة وتعشگها تقي!!!

نهض نفسه مني فاز ما راضي، شدد على ايدي الكاضه ايده مردها ونتر محترگ..

-ما چنت ادري بيها متزوجة! وراس ابوي مادري بيها حسبالي بت بيت!

-شلون؟

-جنت اشوفها تطلع وتطب من بيت اهلها مادري بزلمتها عسكري ويطلع واجبات ويعوفها ايام وليالي ببيت اهلها، البت حتى حلقة ما تلبس بالعباس ابو فاضل مادري بيها متزوجة

-تقربت منها؟

-لا! لا شني اتقرب منها شني شبيچ انتِ!!!

-قصدت حاچيتها؟ رحت يمها سولفت؟

-اي

-خانت زلمتها وياك

-سبأ لا شمالج انتِ!

-چا شتفسرها من سولفت وياك؟

-ما سولفنا بشي تره! مرة طگت كهربائهم وطلعت من البيت شافتني بالشارع حسبالها من الجيران وصار بيناتنا حديث بسيط

-شسولفتوا؟

-عن الجو

-عن الجو؟!

-اي جانت حارة وشكتلي من الجو شفت وليد صغير يطلع من باب الحوش مايعة روحه اشرتلي عليه وكالت..

-باوع للطفل تبهذل من الحر سودة عليَّ

-علي التـقي: والله حگكم بس شعجب ماعدكم مولدة لو عاكسة؟

-يسُر: ماعدنا امكانية نشتري

-ها خير ان شاء الله، لا تخافين اتصلت بأهل الكهرباء راح يجوكم

-يسُر: اگلك عفية خوما يومين وترجع تنطفي علينا؟ فدوة رحتلك خوية شوفلنا چارة ابوية مريض ونايم بالفراش مو مال نطلع احنه النسوان نفرفر بين الزلم

-لا شني تفرفرون مالج غرض انا احلها

ابتسمت بوجهي وهزت براسها اي، اجه الوليد يلوب يم رجليها وجر العباه من راسها انفتحت گدامي وبساع لمت روحها ورجعت جوه واخذته وياهة وطبكت الباب.. ظليت ويه الكهربائي لحدما كمل ومن ثاني يوم طلعت اشتريتلهم عاكسة واخذتها لبيتهم، ما رضت بيها ولا قبلت تاخذها نفسها كلش عزيزة الله يرحمها وما ترضى احد يتصدق عليهم بس لحيت عليها هواي ياله تقبلتها..

-سبأ: الله يرحمها

حرورة بمعدتي گطعتني يحجي وحِسه مبحوح وروحه طالعة من القهر، اول مرة ما يصير عندي فضول بشي يخصه وتمنيته ما يحجيلي بعد ويسد السالفة بس سوه عكس هالشي وكمل يسولفلي عنها..

-محتشمة وتخاف ربها باره بأهلها وتخاف الله بالناس، حبيتها وتعلقت بيها من بعيد لبعيد ما ردت اتقرب منها بشي ما يرضي الله عبن اعرف البداية الما ترضي الله نهايتها ما ترضي البشر فـ ظليت كلما انزل واجب اروح يم بيتهم يوم اللگاها ويوم ما اللگالها اثر ابقى واكف انتظرها بالساعات بس ما تطلع من باب حوشهم

-وين تروح

-لديالى

-زلمتها عايش هناك مو

-ااااخ يا علي

-افتهمت

-من تأكدت من گلبي هاويها وامي جاي تلح عليّ اتزوج گمت اسأل عن اهلها الجيران، ردت اتأكد من معشرهم ونفسيتهم گبل لا اخطي هيج خطوة وياهو الاسئله عنهم يمدحلي بيهم وببناتهم.. ارتاحيت ونويت افاتح امي بالموضوع واجيبها لبغداد تخطبها

-وراحت؟

-اي راحت.. راحت وطلعولها اختها يقين شافتها امي مو نفس المواصفات الحچيتلها عنها واجت تگلي تفاجأت شون هيج چا يسُر وينهي!

-شون عرفت بيها متزوجة؟

-امي، امي خابرتهم وسألت عنهم وگالولها يسُر متزوجة وعدها وليد عمره ثلاث سنوات

-يا صدمتك

-ما احجيلج شصار بيه چن سچين ودچوه بگلبي بس من عرفتها متزوجة عود بطلت؟؟ بطلت اروح اعاينلها من بعيد واتحسر عليها؟ لا وعلي ولا كدرت ما كدرت تعبت وانا اللوم بروحي تعبت من الحرام شون ارضاها اتفرج على عرض زلمة ثاني بس جيبي اليقنع گلبي الجاي اسوي حرام وما يرضى بي بشر

غمضت عيوني تعبت من حچيه تعبت وانهد حيلي، تنهدت ادور وجهي عنه مابيه اسولف ولا اريدن اسمع ماريد ما جاي اتحمل بس ما سكت وبقى يسولفلي عنها ويزيد بحرگان گلبي..

-نفضت زلمتها نفض وعرفته ياهو، واحد اغبر كل خير مابي يعوف مريته ايام وليالي حتى من يكون بأجازة ما يرجعلها ويگضيها ويه الساقطات والادبسزيات وعايف اللعابة العنده.. ياما وياما تمنيت اروح افضحه واطيح حظه اراويها شنو هو بس بالنهاية اكض روحي واستچن

-يعني اذا تطلگ تتزوجها؟

-طبعاً! اي اكيد اتزوجها وما اتردد ولا دقيقة

-واهلك؟؟ راح يرضون؟؟

-اقنعهم واذا ما قنعوا أتزوجها واطلع من البيت

-ما تسويها

-اسويها وعلي!!

حچاها بتحدي ينتر، طاحن دموع جديدة من عيني بالسكتة وانلصمت ماكدر احجي راح ابين جاي ابجي وماريده يحس..

-كل يوم عندي امل تكشفه والحمدلله بآخر فترة اكتشفت يسُر خياناته ورفعت عليه قضية طلاگ

-اممم

-رادوا يتطلگون والدنيا ما وسعتني رتبت كلشي وجهزت وضعي اختاريت اخشاب غرفتنا والذهب والحلقات كلشي چان جاهز وما ناقص بس جيتها ودوسة رجلها لبيتي

-وانا

-انتِ شني

-راح ترضى تتزوج واحد متزوج؟

سكت سكتة مطولة وبهذا الصمت عرفت هو ليش كاره هالزواج وما رايده يخاف لا يسُر ما ترضى تتزوجه من تعرفه متزوج وبنفس الوقت ما يكدر يطلگني ويخلص مني بسبب ابوه وابوي، وهيج صار بين نارين لو يتزوجني ويسكت اهلي لو يعوفني وتصير دم..

-شون ماتت

-حادث سيارة

-بيوم نزولك عرفت بيها سوت حادث؟

-اي

-وردت ترجع لبغداد خاطر تشوفها؟

-اي

-وما لحكت

تحسر وگام مني بدون لا ينطيني جواب وراح للحمام، ذبيت روحي على الفراش مابيه احرك ايدي وجع وجع مو طبيعي بكل جزء من جسمي وگلبي صارت بي نغزات تذبح توجع حييل توجع..

طلع من الحمام وراح للضوه علگه اصفر خفيف، بقيت مغمضة عيوني اسوي روحي نايمة اريد اشرد من الوضع كله تمنيت لا متزوجته ولا متقربة منه ولا اللتقيت بي ذاك اليوم على النهر وعايشة وجع هالروح.. توترت من رجع بصفي على الجرباية وكفخ عطره بخشمي طاحت دمعتي الحاولت اسيطر عليها بس ماكدرت استحمل انا ضعيفة وعديمة شخصية ماكدر امثل القوة والله ماكدر..

-سبأ انتِ بت عمي ومالج ذنب بكل الصار.. انا يجوز طوختها وياچ بس يشهد الله الموقف الحطني بي ابوج جبير موقف ما انحسد عليه

سكت شوية يتنفس ورجف گلبي من كض ايدي بين ايده وباس چفي، فتحت عيوني اعاينله ما توقعت هالحركة منه ولا توقعت من ابتسملي وكمل..

-انا مو خسيس سبأ وسألي الكل عني ماكو يوم ضوجت بشر مني وگلبي دومه نظيف وابيض ويه الكل حتى لو اذوني.. وانا عاذرچ وما اللومچ عبنچ شكيتي لاهلج مني وگلتيلهم جبرتچ تصعدين سيارتي و...

-شنو؟؟!

-جبرتج تصعدين سيارتي واخذج لشقة خاطر اكسر خشم اخوتج بيج

-علي التـقي شجاي تكول انتَ!

-مو انا اگول انتِ هيج حچيتي لاهلج

-انا؟؟؟ لا والزهررة ام الحسن يا تقي ما كلت هيج

-بس هذا الوصلنا والسوالي مشكلة شگدها شكبرها ويه ابوي وانا عاندت وما رضيت اتزوج بهالطريقة ما ارضى على أي بشر كان من كان يشوه سمعتي ويشكك بتربيتي!

-لا لا بداعة امك لا تصدگهم جاي احلفلك ما حجيت هيج انا كلتلهم شفتك على النهر انتَ بجهة وانا بجهة وبس سلمت عليّ مو اكثر من هالحجي

-مادري سبأ انا بـ...

طفرت من مچاني اكضن بيده ارجف واتوسل..

-لا لا شني ما تدري شنيي لا بداعتي بداعة علي واهل بيته تتوقع اكو بت تطعن بشرفها وتحجي على روحها حجي باطل؟؟ تتوقع اكو هيج شي!!

-ماعرف انا ما معاشر بنات اعرف بس يسُر ويسُر جانت...

-الله يرحمهاااا لـ يسُر ماالي غرض بيهاا انا جاي احجيلك عن نفسي!! انا سبأ مستحييل بيوم من الايام احطك بموقف يفشلك ويشوه صورتك وداعة رهف وراس رهف امووتن ولا اسويها

-لا تبجين سبأ هذا هو انسي الموضوع

-لا لا انتَ ما مصدكنيي

-سبأ هذا هو مصدكج خلص انا فهمت غلط هذا هو انسي

-لا بداعة امك بداعة ابوك صدكتني؟ تقي صدكتني؟؟

-صدكتج شبيچ خايبة والله صدكت

-تقي ما اضرك انا والعباس ما اضرك بيوم

-وانا مصدكج ومتأكد من هالشي بس سكتي ولا تبجين

انفجرت بالبواجي ما كدرت اكض روحي اعاين لوجهه وابجي وارعش، كض وجهي بين ايده يضحك ويمسح بدموعي ويحاچيني بصوت ناصي..

-صدگ جذب سبأ هاي وانتِ الجبيرة

-صدگني

-مصدگج ورموشج المكناسات مصدكج

بجيت بالزايد وره جملته وهو كلما ابجي يضحك مصدوم ويضم بشفايفه يريد يسيطر على نفسه ما يكدر، انمردت واستحيت كللش حسيته جاي يضحك على وجهي والاثار البي تمنيت املخ روحي تملخ واختفي من الوجود.. وخرت منه ابتعد وجرني من ايدي يشمرني على صدره يجبرني اللبد بحضنه وحاوطني بأيده حيل، خلاني اتسودن ابجي وابتسم مصدومة بنفس الوقت..

-وين رايحة وين، الغلط مني ما سألتج من اول خصوصاً وانا اعرف بسوالف ابوج الخايس اشتعلوا ولده

-تقي انا والله...

-هشش سكتي بوية خلص لا تظلين تبررين افتهمت

وخرني عنه شوي خاطر يعاين لوجهي وضحك مرة ثانية، كض وجهي بأيد وحدة وصار يمسح بأبهامه على خدي حسيت بوجهي نمل والحسين حتى شعور ما ظل عندي..

-احد گايلج عيونج حلوة من تبجين؟

-لا

-خوش وهاي سمعتيها مني

-تحب ابجي كل يوم؟

-ههههه لا ولج مسودنة

ابتسمت وويه ابتسامتي طاحت اخر دمعة مشكلة على رموشي ومد اصبعه يمسحها على كيفه، ردلي الابتسامة وهمس بيناتنا صوت چن ما يريد واحد يسمعنا مع العلم احنه وحدنا بالغرفة..

-ما تغيرتي من صغرچ گلبچ گلب طير

-انتَ هم ما تغيرت

-شون؟

ويه سؤاله انتبهت لقربنا وانتبهت لايدي حاطتها على رجله، فزيت من مكاني مستحية ومن الخجل كمت من الجرباية كلها.. ضحك بروح تعبانة على تصرفي وتمدد بمكانه وحط ايده ثنينهن جوه راسه ومد جسمه على الجرباية يعاينلي من بعيد..

-اءء اگلك.. ا.. اسويلك عشا؟

-مو چنتي نايمة؟

-لا لا شبعت نوم اروح اسويلك لگمة تاكلها

-بكيفج

-خوش رايحة انا وانتَ هاي.. عاين هاي.. عاين اوگف اوگف

-مابيه حيل

-لا لا نام عادي بس اوكفلي

-مابيه

صفنت بوجهه مستغربة قصده ثواني وانتبهت شگلت، ضحكت اضم وجهي خجلانة وهو ابتسم وياي ابتسامة طلعن سنونه..

-علي التـقي: وينهم اهلي؟

-مادري اظنهم راحوا يدورون عبق

-شبيها عبق؟

-ليش ما دريت شصار؟!

**

"عـــبق"

حرارة قوية تلتهم جسمي واحس برماد داخل بعيوني يوجعني حاولت افتحهن وفشلت، جسمي خدران وراسي ثكيل يوجعني گلت بلساني الثگلان "يا ام البنين عينيني" وضغطت على روحي حتى افتح عيوني وتفاجأت!

تفاجأت من شفت روحي بمكان اظلم وصوبة نفطية محطوطة يم جسمي لزگ لدرجة راح اموت من الحر، فزيت من مكاني مخترعة ادور وجهي بالمكان فارغ كلشيي ماكو بس سرير الي هو اني نايمة عليه وشباك صغير كلش وبي قضبان حديدة شلون مال السجن..

كمزت من مكاني اتلفت واتنفس سريع اني شجابني هنا! وشنو هالمكان! شنو ديصير؟؟ شنو الموضوع اني وين!! اخر شي اتذكره هو من طلعت ويه سلوى للسوك وتعاركنا!

اي اتذكر تعاركنا على بجامة ستن ردت اشتريها لجهازي وما قبلت تاخذها الي، اشتريتها غصباً عليها وبدون رضاها ما اهتميت حتى من گرصت زندي بكل قوتها ونترت بين سنونها..

-اني اعلمج عبق انيي الج

-شبيچ خالة اني دا اشتري بفلوس مهري والله

-امشي امشي صدكت روحها امشييي

تنتر بين سنونها وتفرك بزندي حييل زرفته تزرف، خفت اتناقش وياهة زايد وتفضحني بالسوك فـ بلعتها وسكتت، اصلاً اني طالعة روحي وضايجة وحتى هالطلعة ما ردتها اليوم حق اتصل بيه وطيح حظي بعده يحجي بالرسالة وحلف باجر من يرجع يلعب بيه طوبة وفني لو فتحت حلگي لو شكيت..

-سلوى: شبيچ ويه علي الحـق ولج

-مابيه شي

-چا ليش يشكي منج؟

-ماكو شي

-ياهو هذا هاشم؟؟

-شنو

-هاشم ياهو ولج عبيقة؟؟؟

-منو هاشم ماعرفه والله ماعرفه

-ايي ما تعرفي مو حسبالج كاعدة ويه عميان وطرشان خوش عبق انا الج يا بت شذى ال*****

سكتت عنها مغلسة مالي خلكج خليني بضيمي هسة، طبينا لسوگ ثاني بس كلش ازدحام يخنگ ناس بنص ناس صايرين لزمت ايد سلوى حتى ما اضيع ومشيت وياهة بس سلوى بطبعها تكره اذا احد لزمها تكول اتقيد فـ جبرتني اهدها وامشي وراهة حتى ما اتيه..

عيوني ما وخرتهن منها اخاف تروح عني لابسة عباية راس واغلبهن هنا لابسات عبي، انوب اني ما جايبة تلفوني مادري شوكت ابطل هالطبع واشيله ويايه من اطلع بس مالي واهس اخذ جنطة واصلاً المن جايبته اذا علي الحق وكارهني منو يريد يحاچيني مثلاً..

فات ابو عربانة يمنا وسلوى طلعت قبلي ظلت عيني عليها لحدما كدرت اعبر ابو العربانة وركضت اللزم بعبايتها على كيفي من وره، بقيت مكمشة بيها لفترة لحدما اللتفتت تباوعلي وجفلت من شفتها مرة غير سلوى! عزا بعيني صارلي كل هالمدة مكمشة بعباية مرة غيرها!

-شبيچ ماما؟

-عبق: العفو عبالي خالتي

ابتسمت تهز براسها ميخالف وعفتها ورحت ادور بوجوه النسوان عليها، كل الاشوفها طويلة ولابسة عباية اللزمها واباوع لوجهها ويخيب املي من اشوفها مرة غيرها.. لثواني خفت كللش خفت خصوصاً من خلصت السوك وطلعت منه وكفت على جهة افرك بيدي وانخي ام البنين اللگاها وترجعلي..

وكفت بمكاني هواي تعب لساني من الدعاء وتعب عقلي من التفكير اريد اتذكر رقم تلفونها بس ماكو ما احفظ ارقام تلفونات ياربي دخيلك شلون بيه..

فكرت ارجع لنفس المكان التيهنا بعض بي اروح هناك اكيد راح ترجعلي فـ سويتها، طبيت للسوك مرة ثانية ووكفت اتأملها ترجع بس ما اجت.. مرت الساعة والساعة ونص وسلوى ماكو!

-محتاجة شي خوية؟

سألني رجال صاحب محل صغير مرطبات، يباوعلي مستغرب وحقه صارلي شكد واكفه بباب محله مثل المكدية..

-لا عمو تسلم

-اشوفج صار هواي هنا منتظرة احد؟

-اي خالتي

هز راسه متفهم ورجع لمحله، ابتعدت شوية عنه وقررت اوكف بعد نص ساعة اذا ما اجتني اني اخذ تكسي وارجع للبيت حتى لو علي الحـق ميقبل اركب تكسي وحدي عود اشرحله الصار ويايه وافهمه..

-عبق؟؟

اللتفتت رادة روحي من سمعت اسمي جاي من مرة مبوشة، ضحكت وكالت بمرح..

-انتِ مو عبق چنة ام علي؟

-عبق: اي خالة اني

-يا حبيبتي فدوة شنو هالجمال تعاي انطيني حبة

رحتلها مبتسمة مجاملة بوستني ولزمت ايدي تگول..

-شلونهم عيالج ان شاء الله زينين

-الحمدلله بخير

-ام علي صار شكد ما رايحتلها شكد فشلة منها سلميلي عليها هواي كليلها ام فاطمة تسلم عليج

-ان شاء الله يوصل

-شو اشوفنج وحدج هنا خير

-اي والله ضيعت خالة سلوى اجيت وياهة للسوك وتيهت

-ياا سودة عليّ چا صارلج شكد واكفة هنا؟

-مادري يمكن اكثر من ساعتين والمشكلة مجايبة تلفوني وما حافظة ارقام، عندج رقم خالة رسمية خالة؟

-لا والله ما عندي تواصل وياهة بس نتشاوف بالبيوت وبالقرايات

-والله حرت ماعرف شسوي

-عمت عيني عليج شغده بيج رجعي للبيت اكيد سلوى ردت وظل بالها عليج

-لا خليني انتظر بعد شوية

-اذا تخافين ترجعين بتكسي وحدج تعاي وياي نرجع سوه

-لا ماكو داعي خليني انتظرها

-يمة غلط بت حديثة تظل وحدها هنا ما يصلح امشي وياي بنيتي امشي

-مو..

-امشي يوم لا تعاندين

تنهدت محتارة بس بالاخير استسلمت ورحت وياهة لعد شسوي احسن ما ابقى واكفة هنا انتظرها، طلعنا من السوگ سوه وشفنا سيارة بيضة حديثة ناصية منتظرتنا اشرتلي المرة عليها وكالت..

-هذا السايق مالتي يلا

ركبت وياهة السيارة بس ممرتاحة ماحب اسوي شي بدون علم علي الحـق حتى لو متزاعلين بس ما اخطي خطوة بدون علمه لان كلشي يصير..

-المرة: اخذنا لشارع ^^^^^ يمة

هز راسه الرجال بدون لا يحجي مبين مو عربي، مشى بينا وعيني ظلت على الجامة اراقب الطريق بس كل شوية تحجي ويايه المرة وتجذب انتباهي الها، صارت تسولفلي عن حياتها وعن بنتها المتقبل تتزوج وتكول فد يوم اجيبها لبيتكم قنعيها انتِ وبنات بيتكم بلكي تسمع منجن، طول ما هي تحجي البوشية ما نزعتها اختنكت بدلاً عنها بس مبين عليها تستشكل لان حتى چفوف سود لابسة..

-عبق: من يا طريق اجينا؟

-طريق السريع

-ليش؟؟

-اقرب منا ماكو ازدحامات

-لا خالة فدوة لو رايحين على نفس طريقنا

-مو بيتي يصير بعيد عليَّ اذا مناك

-يعني انتِ تنزلين قبلي؟

-لا وراج لا تخافين

هزيت راسي اي بس گلبي خامشني ممرتاحة ابدد ممرتاحة احس السويته غلط ميصير اركب ويه مرة غريبة حتى لو عرفت خالة رسمية الناس مو امان..

-خالة ليش طلع منا الولد؟

-منين طلع مادري ما منتبهة انا

-باعي طلع على طريق المحافظات

-يا شمدريني ما اندل، اگلك يمة ليش خذيتنا مناك؟

ركزت انتبه شنو راح يجاوبها وما حسيت الا بشي يصير على خشمي يخنگني، انتفضت بمكاني خايفة وصرت ادفع بأيدها الغلفت وجهي شكبرهاا اختنكت راح اموت.. عيوني ثكلت والهوا ضاگ بريتي حسيت بروحي دتغيب وراح انهار شكد حاولت اقاوم وابقى مركزة بس عجزت، عجززت و ما شفت غير السواد يحاوطني ومن فزيت رجعت اشوف روحي محاوطة بغرفة ظلمة!..

ركضت على الشباك مال الغرفة اريد اكمش بالحدايد بس ماكدر اكو جامة سميكة فاصل بيني وبينهن، من الخوف كمت ماشوف بعيوني احس گلبي راح يوكف اني وينن وشجابني هنا شجاابني!! هرولت للباب حديد حاولت افتح بيها ماكدر مقفولة!!

-فتحوووووو الباااااب اني وووووييييين انيييي وووويييين فتحووو الباااااب

اضرب بالباب بكل قوتي بكل حيلي بكل خوفي وعصبيتي اضرب بيها لحدما ايدي تزلغت ومحد فتحلي الباب، تخبلت انجنيت صرت ابجي بصوت عالي كلش واعيط لحدما طكت حنجرتي وانبح صوتي..

الغرفة باردة كلش تصل وبس يم الصوبة اكو دفو ماعرف شلون صاير ترتيبها من اتقرب منها كلش احتر وانسمط ومن ابتعد ابرد، بچيت بعجز منتهية ذرة حيل ما بقت عندي كعدت بالكاع رجلي متشيلني تعبت ماكدر اوكف بعد، صرخت بمكاني اتوسل وابجي..

-فتحوووو البااااب الله يخليكممم رجعونيي وينن جايبيني رجعووني راح يوكف گلبي من الخووف رجعوونييي

اضرب أيدي بالكاع بجزع.. مادري شكد بقيت كاعدة بهالغرفة بس عرفت صار هواي من وره الصوبة انطفت وبقيت ويه ريحة النفط والبرد وحدنا، يبست دموعي وجسمي يرجف رجفف خوف وبرد وغربة كمت للجرباية لفيت روحي بالبطانية ورجعت اكعد يم الباب ابجي وانخي الامام علي دخيلك يا علي لا تعوفني وحدي دخيلك اني يتيمة وانتَ ابوية لا تخليني بهالغربة بجاه زينب وغربة زينب لا تعوفني..

بقيت اغفى وافز بمكاني اباوع بالحيطان وابجيي بجي سنين، صدري قبط من البرد والكحة لزمتني بلعومي راح يطلع من حلكي من كدما كحيت، صرت اجاهد النفس اريد هوا اريد ارتاح اريد المخزن الچنت اكعد بي ويه الصراصر والحشرات راضية والله راضية بس رجعوني.. اريد علي الحـق وينك يا علي وتجيني..

بين الونة والحسرة حسيت بروحي دتطلع ماعرف غبت عن الوعي لو غفيت بس حسيت مرة ثانية على صداع اكل راسي و مغذي مشكلي بيدي، انتفضت بمكاني شفتني على الجرباية نايمة وبالكاع حاطين صينية اكل، شوربة عدس وخبزة وخضرة شوية وبطل مي..

راسي ثكيل ويوكع على الفراش ماكدر انهض، لوما الكحة القوية جان بقيت بهالخمول بس هي التصحصحني وترجعني لوعيي، اكح وابجي وادور عيوني بالغرفة الفارغة صار شوية اكو ضوه يمكن طلع الصبح وهسة ياله انتبهت لباب موجودة بالجانب، كمت على كيفي وجريت المغذي ويايه وفتحت الباب شفته حمام بس شنو من حمام كاتله الوصخ يلعب النفس والريحة متنحمل يعني هاي ريحة الغرفة تلعب النفس من وراه......

**

"تَـمني"

يومين مرن وعبق ماكو محد ديلگالها اثر راح نتخبل، علي الحـق من افتهم بيها مختفية وقره رسالتها ما انتظر يرتاح وطلع بملابسه العسكريك يدور عليها مثل المخبل، راح وياه علي الكرار ورجع كرار يهز براسه مأيس ويكول..

-افترينا الدنيا كلها وما لگيناها

-حبيبة: شني ما لكيتوها كرااار شنييي ما لكيتوهااا

-علي الكـرار: شبيدي حبيبة؟؟ شبيدي البت مااكو مختفيية

-سلوى ببكاء: الله يسود وجهج يا عبق مثلما سودتي وجهي

-ليلة: سكتيييي اشششش ولا كلمة سكتييي محد سود وجوهناا غيرج يالمسموومة

-سلوى: هاي عليّ ولج؟؟؟

-علي الكـرار: ليلة شسالفة! شبيجن انتن وكت عراك!

-رفل: كلامه صحيح ليلة سكتي مو وكتها

-ليلة: چا اذا هسة مو وكتها يمته وكتها؟؟ يمته؟؟ عبق ماا انهززمت عبق صاير وياهة شيي افتهمووا حبيبة احجي!!

-حبيبة: اي والله ايي ما انهزمت احلفلكم ماا انهزمت البت يجوز مخطوفة يجووز صاير وياهة شي!

نزلت راسها خالة رسمية منتهية من الخوف على عبق هاي اول مرة اعرف لهدرجة تحبها ومتعلقة بيها، لطمت على رجلها وكالت بتعب..

-رسمية: شون مخطوفة وهي كاتبة هالورقة لا واليذبح طلعت ويه سلوى للسوك وتقصدت تتيه روحها

-شمس: چذب خالة چذب اكيد مو هي كاتبتها انا متأكدة كايديلها مكيدة لـ عبق وما تقصدت تتيه

-سلوى: ياهو يكيدلها؟

-شمس: اليكرهها!

-سلوى: وليش تكوليها وتعاينين عليّ ولج؟؟؟

ضحكت شمس مستهزأة ودارت وجهها عن سلوى وبهاي حركتها خلت الكل يباوع لـ سلوى بنظرات شك حتى كرار..

-سلوى: شنيي شبيكمم تتوقعون انا اكيد لـ عبق مكيدة؟؟ من كل عقلكم انتم

-ليلة: ليييش ياهو بهالبيت يكرهها بكدج؟؟

-رفل: سلوى اذا اكو شي احجي لا تخلينا حايرين زلمتها راح يوكف گلبه!

-سلوى: ولكم انااا ربيتها انااا عبق شكدمااا اضوج منها بس ما اكرهها بنيتيي عبق بتي كبرت وشبت على ايدي شتحچن انتنن لا تحرگن بگلبيي حراام عليجن حرررام

تحجي ودموعها تنزل ووجهها احمر دم، سكتنا عنها ودرنا وجهنا بس انتبهت لـ حبيبة تباوع لامها بنظرات غريبة وكأنها شاكة بأمها بس ماعدها دليل عليها..

-علي الكـرار: راح ارجع اطلع ادور والله كريم

طلع واحنه بقينا نضرب اخماس بأسداس، غياب عبق اثر على البيت كله واخذ طاقتنا وحماسنا وراحتنا محد دينام ولا احد ديقرا حتى امتحاناتنا منعرف شلون دنمتحن ونجاوب، امير يتصل بيه كوة اجاوبه بس حتى ما احسسه اكو شي عمو علي لح علينا محد يحسس المسافرين اكو خلل ميريد يأثر هالشي على علاج حيدر..

لليل رجع تقي ايد وره وايد كدام، تورشعناه نسأل اذا اكو تطور بس اذانا من هز راسه مأيس وگال بقهر..

-ماكو فص ملح وذاب

-حبيبة: المطارات تأكدتوا منهن كلهن؟؟

-كلهن كلهن

-شمس: عجيبب وين تروح يربيي

-رسمية: اااخ حيلي باد وعلي هلكت

-سلوى: حق وينه تقي؟

-علي التـقي: ببغداد راح يفتر بالمستشفيات يسأل عنها

-ليلة: هو شلونه؟

-علي التـقي: شلونه يعني لا اكل لا نوم لا راحة ما هاد ولا كعد لحظة من مكان لمكان يركض

شبه فقدنا الامل وصدگنا بـ عبق هربت ويه واحد خصوصاً من اجه ابا الحسن وگال لگه وحدة من المسافرين اسمها "عبق" بس اسم ابوها وجدها يختلف، ضرب عمو علي بعكازته الكاع ونتر..

-موو هي

-ابا الحسن علي: بوية انا مو قصدي اشكك بمرة اخوي بس..

-شيخ علي: بس شني؟!

-ابا الحسن علي: يجوز مسافرة بأسم وهمي خاطر ما نلگاهة

-شيخ علي: ابا الحسننن!!!

-ابا الحسن علي: بوية اقرا رسالتها جاي تگول لا تدورون لان ما راح تلكوني شنو قصدها بهالحجاية؟

سكتنا نفكر بكلامه بس محد مقتنع خصوصاً شيخ علي، للعصر احنه كاعدين واجن العمات وفراقد وياهن محد حسسهن بشي وكعدنا سوه نسولف ونجامل غصباً علينا..

-زهرة: چا وينهي عبيقة ما شفتها

-رسمية: فوگ تقرا ما ظل شي على امتحاناتها

-زهرة: الله يسهل عليها وعلى كل طالب

حسن بينا شي متغير خصوصاً من انجمعنا على العشا سألن على الولد وما قبلن يطلعن الا يشوفنهم ويسلمن عليهم ويكعدون سوه..

-علي النور: تعبان

-زهرة: الله يساعدك يمة

-علي النور: اي والله كلش تعبانين

-فراقد: چنك تطردنا؟

-علي النور: اي والله

-رسمية: وللك نور!!

-ابتسام: هههههه ماعدهم لحية مسرحة وليداتج رسمية

گامن يطلعن وخالة رسمية ما لحت وياهن خلتهن يطلعن براحتهن، رجعنا اللتمينا ننتظر خبر يفرح گلوبنا وكل شوية واحد منطي رأيه لحدما تعبنا وصعدنا ننام..

ثاني يوم امتحاني داومت وحرفياً ما فاتحة ملزمة، امتحنت شلون مجان على كد درجة النجاح وطلعت شفت تالة تتمشى بقسمي وبصفها تمشي بنية مبوشة ولابسة عباية.. شافتني من بعيد واجتني تهرول والبنية وياهة..

-تالة: ها تَـمني بشري شصار على عبق؟؟

-تَـمني: ماكو جديد

-تالة: اووووف هلكنا والله

-تَـمني: لعد علي الحـق شيكول من عرف لحد هاللحظة ما رجع للبيت

-تالة: شنو جانت ردة فعله؟

-بالبداية انصدم ومن صدمته ما نطق حرف، قرا الرسالة على الصامت وبدون لا يحجي حطها بجيبه وطلع من البيت

-يا عيني

تنهدت ماعرف شعلق او شحجي بعد وراحت عيني على البنية الواكفة بصفنا، هاي مو اول مرة اشوفها بس اول مرة اكون بهالقرب منها واكدر اشوف عيونها الخضر.. ما شاء الله من عيونها مبينة تخبل رموشها سود وكثيفات وطويلات كلش عبالك حاطة مسكارا بس هي ما مخلية شي..

ابتسمتلها مجاملة من شفت عيونها مركزة بيه وهي هم مبين رجعتلي الابتسامة لان عيونها صغرن، مشيت ويه تالة نروح لـ علي النور صاير هو يرجعنا بسيارة امير وطول ما احنه نمشي البنية ويانه تتمشى ما تركتنا، همست لـ تالة بصوت متسمعنا بي..

-تَـمني: مبينة قريبة عليج هالبنية؟

-تالة: اي ولج مو سولفتلج عنها

-ماتذكرها شو

-طبعاً اذا اني احجي وانتِ عقلج ويه اميرچ

-اي تالة شبيچ يعني عندي اهتمامات ثانية اني مرة متزوجة

قريب لا نوصل للباب ودعتنا البنية ولزمتني من متوني بقوة حتى تبوسني وسوت نفس الشي لـ تالة، تابعناها بعيونه لحدما راحت واللتفتت تالة عليّ تكول..

-خطية تَـمني هاي البنية يتيمة الام والاب عايشة ويه عمتها

-خطية

-عمتها فد مسموومة وحقيرة هوايه مأذيتها كلش هوايه ودتلح عليها تريدها تتزوج واحد من ولدها وهي رافضة..

كملت تالة تسولفلي عن حياة البنية المسكينة وصعدنا ويه نور السيارة، وصلنا للبيت واجت تالة ويايه لان خالة گلتلها راح تتأخر بالدوام اليوم.. كعدنا مثل كل يوم نعيد نفس الروتين نفكر بـ عبق ونخاف عليها لليل وخلال گعدتنا يمكن ليلة فوك الثلاث مرات تتقيء وتركض للحمام..

-حبيبة: شبيها ليلة؟

-رفل: من تخاف تظل تتقيء

-شمس: اي والله كلنا خايفين تدرن انا....

ويه جملة شمس الما كملتها فزينا كلنا على حيلنا ويه صوت باب المطبخ تنفتح بكل قوتها وطب منها علي الحـق يصييح بصوت يخلس رررج البيت رج...

-وووووولج سلووووووووووووى اليوووووم موووووتج على ايددددي سلوووووووى

عبرنا ما مهتم لبشر كدامه صارت بوجهه حبيبة تريد تفهم شبي بس ما انطاها مجال دفعها عنه شمرها شمر على المجمدة وعبرها يطلع من المطبخ، ركضنا كلنا وراه وحبيبة ماهتمت لروحها مع العلم تأذت بس مو وكتها اجت ورانه نشوفه شبي وليش دخل هيجي فاير..

طلعت سلوى من غرفتها وجهها مخطوف تباوع بالوجوه متدري شتسوي وعلي الحق واكف كدامها منگلب جمررة، شهگنا كلنا من طلع مسدسه من خصره ووجهه عليها ونتر بين سنونه راح ينفجر..

-بت الچلبببب ال***** وينننن عبق!!!!

-سلوى: شـ.. شـ.. شني.. شنـ.. شني شبيك.. مـ.. مادري و...

-احچيييييييي لاااااا انعل والديييييج احجيييييي

شهگت تبجي وشفايفها ترجف اول مرة اشوفها بهالوضع، سحب اقسام من سلاحه وهاي تخبلت وگعت بالكاع وسلتت حجابها من راسها وصارت تعيط بصوت بحوح..

-سلوى: شيخ علييي.. علي اللحگنييي علييي

-علي الحـق: تحجييين لااا اخذج لـ عليي جناااازة؟؟؟؟

-رسمية: علي الحـقققق ولك شبيييك تسودنتتتت

-علي الحـق: احچييييييي صبر ما ظل عندددي احجيييي وينننن عبببببق

-رسمية: ولك عببق تصير بت اختهاا شوون تأذيها شووون انتَ عقل ماكو براسك

-علي الحـق: رااح احسب من واحد للثلاثة اذاا ما حجيتي يا سلوى بالعباااس ابو فاضل انععل شررفج

-سلوى: شحجي شسوولف شكوول ماعرف اناا ماادري

-علي الحـق: وااااحد... ثنيييييين....

-سلوى: لحگوووليييي شيخ عليييي اللحگليييي

-علي الحـق: ثلاثة!

دفعته خالة رسمية توخره عنها وحبيبة ركضت على امها تبجي وتحضن بيها وتعيط حتى يبطل حق ويرجع لوعيه بس محد گدرله محدد! لانه وره ما نطق الرقم "ثلاثة" داس الزناد وطلعت طلقة طاييرة من مسدسه وصارت بـ سلوى......

يتبع 👑.....

━━━━━━ ♛ ━━━━━━

🫣