تحميل رواية «الامارة» PDF

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

شمدريني، اليشوفك يوم يخلص عُمره يتصفن ♥️..

━━━━━━ ♛ ━━━━━━

"ســـبأ"

فركت ايد بأيد متوترة من دگ على امه بساع، ظل الموبايل على اذنه هواي يرن وما تشيله انوب تخبلنا ثنينا..

-سبأ: تقي لو نرجع للبيت خاطر نتطمن

-هاا؟

-والله

-چا انتِ شنو ذنبج طلعتج على الخالي بلاش لا ونستج ولا وكلتج

-لاا لا شون على الخالي بلاش تونست والله انا ماطولني وياك متونسة

هز راسه اي وركب السيارة وانا وياه ركبت بكرسي الصدر، ربط موبايله على السيارة ودگ على عمتي للمرة الثالثة وهم ما شالته..

-دگ على حبيبة بله

-اي

كض موبايله يتصل بـ حبيبة وهو بيده رجعت دگت عليه عمتي، فتح الخط مستعجل وملهوف ووصللنا صوتها..

-رسمية: ها تقي وينك

-هاا يمة شبيكم؟؟ شصاير؟؟

-وينك اتصل بيك ما تجاوب

-صاير شي يوم؟؟؟

-اي صاير بس ما تستاهل احچيلك

-يممة شسالفة!!

-اي چا ليش ما تجاوب؟

-والعباس الموبايل بالسيارة نسيته ما متقصد ما اجاوبچ

-استغفرالله وكت طلعة هسة بهالليل واحنه بهالحال!

-يمة سولفيي بعلي گلبي وگعع شصاير!!

-شمس مرية بدر جابت

-شنيييي

-اگلك شمس شمس جابت تسمعني؟؟

-اي اسمعچ الحمدلله على سلامتها بس هو هذا الموضوع الدگيتيلي 17 مرة علموده؟

-اي چا غير اگلك خاطر تجي

-شني اجي خاف منتظريني انا اجيبها ومادري!

-انچب لا تتسرسر عيب مرة اخوك هاي

-چا زوعتينا العافية والعباس گلبي طاح ببطني حسبالي شو شنو صار

-اي والله يمة سودة بوجهي ولادتها تعسرت وفروخها خذوهم للخدج خاطر يفحصوهم

-استغفررر الله يمة انا وين وانتِ وين.. ااخ شنحچي شنكول بعد الحمدلله على سلامتهم ويتربون بعزنا ودلالنا ان شاء الله

-ان شاء الله يا روح امك يلا ارجع

ضحك خفيف يفرك بوجهه وذب حسرة مهدود حيله، ابتسمت فرحانة لـ شمس ودرت وجهي اعاين عليه وكبرت ابتسامتي من غمزلي واشر على التلفون بحركة "شوفي" وگال..

-علي التقي: لا يمة ما ارجع انا طالع

-رسمية: ياااا چا وشمس؟؟؟

-شمس مرة اخوي مو مرتي لا تيهين

-اي چا اخوك غير توكف وياه وما تعوفه وحده

-يمة تره مرته جابت ما ماتت!

-اي يمة غير تفرحله يا وليدي

-فرحان والله هسة ادزله بصمة وانا اهلهل

-راح تفوت عليك شوفة الفروخ

-من ارجع اشوفهم ان شاء الله

-تره جابت توم ولد

-ما شاء الله يتربون بعزهم ودلالهم

-اي سماهم اخوك محمد ومصطفى فدوة لطوله

-يحفظهم النبي بجاه علي

-اي يلا هسة ارجع انتَ خاطر تجي للمستشفى تحبهم

-من ارجع احبهم

-ارجع يمة شمالك تره الجو بارد مو مال طلعة

-لا والله الجو حلو كلش وينه وين البرد

-اخاف عليك وليدي ماريدك تستبرد

كتم ضحكته بيده ويأشرلي على الموبايل ويهمسلي "سمعي حججها" ضحكت على سوالفه وبالغلط طلع صوت ضحكتي واستلمتني عمتي..

-رسمية: هاا سبيئة تضحكين عليّ مو؟؟ هاي وانتِ ماخذه وليدي وطالعة بي مادري وين؟

-سبأ: لا عمة العفو والله مو عليج

-رسمية: لا انا ادري بيجن اخذتنهم بعد وعافوني وحدي

-علي التـقي: محد عافچ يمة احنه بس طالعين نتعشا ونرجع ما راح نهاجر

-رسمية: يعني ببالك السالفة موو؟؟ ببالك تهاجر وتعوف امك ولك تقي؟؟!

-علي التـقي: لاا يمة والله ماعوفج نايم على خوانيگچ انا

-رسمية: ما تطلع من البيت افتهمت لو لا!!

-علي التـقي: شني؟

-رسمية: ادري بيك كله چم يوم وتجيني تگلي يمة راح اعزل ببيت وحدي خاطر تصيرلنا خصوصية بس والعباس اغضب عليك يا تقي لو سويتها!

-علي التـقي: انتِ منين تجيبين هالحجي حبيبتي

-رسمية: ادري بيكم انا ادررري تزوجتوا ونسيتوا امكم اذا هو العشا اخذتها وشردت بيها تاكلون بره خاطر ما تكعد ويانه على سفرة وحدة

-علي التـقي: يمة هسة انتِ دگيتيلي علمود ولادة شمس لو عبني طلعت اتعشا ويه مريتي؟

-رسمية: لا يمة لا شني لخاطر شمس انا دكيت.. يلا ارجع

مسح على شواربه يضحك وهي مستمرة ارجع ما ارجع، كتم الصوت من يمنا واندارلي وكال..

-نرجع ونأجل الطلعة لباجر؟

-اي براحتك

-اكيد؟

-اي والله اصلاً هذاك المطعم ما عجبني

هز راسه ورجع فتح الصوت وكال لامه احنه بالطريق راجعين، ما استحملت ما اضحك على ردة فعلها من صاحت..

-رسمية: كفوووو بوليدي السبع عفيية عليك يمة رفعت راسي

-علي التـقي: يلا راجعين احنه يوم انتم بالمستشفى لو بالبيت رجعتوا؟

-بالمستشفى بعدنا

-چا جايكم لهناك

-لا شعندك يمة بردهة النسائية ارجع للبيت انتظرنا هناك

-چا شكو راجع اذا ما ترديني اجي للمستشفى

-هاا؟ لا لا چا تعال اي هم لازم تجي لخاطر اخوك

-يلا جاي

سد التلفون وياهة وبقى مبتسم طريق الرجعة كله، ذبيت نفس مرتاحة عبن ما راح نرجع للمطعم وانلغت الطلعة انا شكول هيج كعدات وهيج طلعات طلعة البستان زايدة عليّ..

-علي التـقي: سبأ

-هاا عيوني

-امي شلونها وياچ بالبيت؟

-زينة

-جاوبي بصراحة

-اي هو زينة

-نفس ما تعامل ليلة وتَـمني تتعامل وياچ؟

-هااا؟

-كتلج جاوبي بصراحة

سكتت ماعرف شنو اجاوبه، اخاف اگله يوم عمتي زينة وياي ويوم تگلب وحسباله اريد اخرب بينه وبين امه واسبب مشكلة..

-علي التقي: هاا ما راح تجاوبين؟

-اجاوب بس ما تضوج؟

-لا ما اضوج

-عمتي يوم زينة ويوم لا

-امممم

-بس مو معناها مو زينة لا والله بس هي هيج تركيبتها يوم تحبني ويوم ما تطيق تعاين لوجهي

-مزاجيات

-شنو يعني

-امي مزاجية حتى ويه ابوي هي هيج

-وعمي عنده عادي؟

-لا هم صارت مشاكل بيناتهم بداية عمرهم حسب ما گال ابوي بس تعود عليها وتقبل شخصيتها

-عبنه يعشگها

-وهي هم تعشگه بس مزاجها متحكم بيها، وغير عن مزاجها امي عدها غيرة مفرطة بس مو على ابوي غيرتها على ولدها

-اي لاحظت

-هههههههههه يا حلاتچ يا سبأ

-على شنو

-عبنچ واعية ومؤدبة ما ضجتي من تصرفها هسة مع العلم عرفتي ليش رادتنا نرجع

-لا تقي انا ما اهتم لهالسوالف عمتي انا احبنها من گبل ووالله مو لان كدامك اسولفها بس احسبها چن امي وصدگني عمتي ارحم من امي بمية مرة

-الحمدلله

ابتسمت مرتاحة عبن ما ضاج ولا فهمني غلط وبقيت الوقت كله افكر بمزاجية عمتي، اريد طريقة اكسبها بيها واخليها تحبني، صح ويه باقي الچناين هم هيج تتعامل بس انا اكثرهن من صدگ احسها تضوج مني وتكره وجودي بس ما جاي اخلي هالفكرة تسيطر على عقلي خاطر اكدر اعيش..

وصلنا للمستشفى ونزلنا سوه ايد بأيد، رحنا لردهة النسائية وشفنا علي البـدر وابا الحسن وعلي الدر موجودين هنا واكفين بره.. سلمت عليهم وباركنا لـ بدر الطاير من الفرح وضحكته ما فارگت وجهه..

-علي البـدر: الله يبارك بيكم يوم الالكم ونفرح بيكم.. تقي خلي مرتك تطب للغرفة النساوين جوه ويه شمس

اشرلي تقي ادخل للغرفة وسويت مثلما گال، تحمست اشوف الفروخ فـ بساع طبيت وشفتهن هنا متجمعات، جاية ام شمس وعمتي رسمية وليلة وابرار وشمس نايمة بس وجهها تعبان كلش..

-سبأ: السلام عليكم

جاوبوني كلهم ورحت لشمس الي هستوها فتحت عيونها مبتسمة، بوستها وباركتلها هوااي ودرت وجهي ادور على الجهال..

-ليلة: بالخدج مو هنا

-سبأ: ليش؟ خوما بيهم شي

-ام شمس: لا لا اسم الله مابيهم بس اخذوهم خاطر يفحصوهم

-سبأ: الحمدلله

وكفت وياهم شوي ورجعوا الجهال وما شاء الله صلوات على محمد يخبلون صح كلش ضعيفين بس بعدهم حلوين و گالو صحتهم زينة وما يشكون من شي.. شلت واحد بيدي فرحانة بي وشالت الثاني ليلة مكيفة..

-ليلة: يا عمة يمته اشوفن فرخي واكضه بيدي هيج

-رسمية: ان شاء الله يمة ما ظل شي غمضي غين فتحي عين تلگينه بحضنج

-ليلة: ان شاء الله، ولج شمسه عايني خشمه هذا جبير على اختج

-شمس: هههههه ليلة كعدي راحة

-نهى: ههههه شلون بيج انتِ خايبة

-ليلة: بعلي يشبه بنيتج خالة هي كوة

-رسمية: لا عيني وليداتنا يشبهونا احنه عايني يشبهون ابوهم

-ليلة: ولا يم ابوهم شني تضحكين على روحج انتِ عمة

-رسمية: يشبهون ابوهم وعلي عايني عيونهم چن بدر

-ليلة: ابد ولا يمه

-رسمية: ولج ابرار مو يشبهون بدر عايني لنصبتهم

-ليلة: شسالفة عمة منيله نصبه وهو ابن نفاس

-ابرار: اووووف سكتيي.. اي عمة صدك ينطون لبدر حتى شعرهم سرح عليه

-ليلة: شمس هم شعرها سرح

متت ضحك من داست على رجلها عمتي رسمية حييل مردت اصابيعها، صاحت ليلة متوجعة وتضحك بنفس الوقت عاد ليلة تموت على المداهر وتتغذى على ضوجة الحواليها..

-سبأ: يتربون بعزكم ودلالكم ربي يحفظهم الكم يا رويحتي شموسة تستاهلين كل خير

-شمس: يا بعد عيني يوم الالج سبأ وافرح بيج واگمط وليدج بيدي

ويه حچايتها طبن عبق وامها وتَـمني الضحكة من الاذن للاذن، ضحكت على حركة عبق شون اجتني تركض وفاتحة ايديناتها ثنينهن وتگول..

-انطيني الطفل سبأ انطينيي اريد اشوفه

اخذته من ايدي ووكفت تغنيله وتسولف وياه فرحانة وتَـمني شايلة الجاهل الثاني وتوزع ابتسامات وتسأل عن حال شمس وحال الاطفال..

-تَـمني: شمس هذا شسمه البيدي تيهت شو

-شمس: مصطفى

-تَـمني: زين شلون راح نفرق بيناتهم يشبهون بعض كلش

-شمس: والله خية مادري انا هم محتارة

-عبق: يجننون ما شاء الله لازم اجيب توم اني لازم!

-ليلة: ها عبيقة چن صارلج واهس تخلفين

-عبق: صراحة بديت احوص

-تَـمني: كعدي ولج مو كلتي من تتخرجين

-عبق: اي بس باعيهم شلون حلوين

-ابرار: هسة حلوين بس من يكعدوج نص الليل ويسلبون النوم من عينج من بچيهم تكرهين حتى روحج

-رسمية: لا يمة لا تكولين هيج لا الله يگلبها بينا هذول رزق الوادم تتمنى ظفر الظنى وانتِ متعاجزة منهم

-ابرار: اي والله هم مادري شمالني انا الله يرزق كل محروم

بدت شمس تتعب ومبين تريد ترتاح فـ عمتي كالت احنه نرجع للبيت وامها تبقى يمها، طلعنا من المستشفى وصعدت عمتي وياي انا وتقي واجت ليلة ويانه ورجعوا الباقين كلمن بسيارته..

-رسمية: اجيت وياكم انا تقي عبن ارتاح يمك اكثر شي

-علي التـقي: بعيني اخليج يمة

-رسمية: بعد طولي طولك، اي سبأ تعشيتي لا؟

-سبأ: لا عمة ما لحگنا

-رسمية: هااا چا شبيك ما تعشي الفرخة ما تستحي انتَ

-علي التـقي: يمة غير انتِ فطستينا من الخوف داگتلي 17 مرة چن مادري شصاير

-رسمية: اي چا غير ظل بالي

-علي التـقي: خوش حبيبتي، ناخذ منا لفات سبأ؟ شنو حابة تاكلين

-سبأ: لا انا مو جوعانة

-رسمية: لا شون ما يصير عاد مو لخاطرج لخاطر البطنج اكليلج لكمة.. امشي يمة جيبلها لفة فلافل منا

-ليلة: عمة!!

-رسمية: ليش شبيها الفلافل؟ شو صايرين تتبطرون انتم؟!

-ليلة: مو تبطر عمة بس هي حامل وما يصير تاكل شي ثگيل تالي الليل لا تنفخ بطنها وتتوجع

-رسمية: هم مادري شمالچن بزرة هالوكت شو احنه چنه ناكل فول وحمص وفاصوليا نص الليل ولا يصير بينا شي

-علي التـقي: بعد جسم عن جسم يفرق.. ها سبأ اجيبلج گص بيتزا أي شي شنو حابه؟

-سبأ: بكيفك

هز راسه وسفط كدام مطعم ونزل يجيبلنا عشا، اللتزمت الصمت طول ما هو نازل وعمتي اخذت تسولف ويه ليلة وتقنعها..

-رسمية: يمته ناوية تتصالحين ويه زلمتج انتِ ولج لويلو

-ليلة: خوب هو يصالحني ليش انا اروحله

-رسمية: خيبة انتِ المزعلته غير

-ليلة: اي بس هو اليحبني

-وانتِ شني ما تحبينه

-اگلج عمة

-ها

-شو احسج ضايجة هالفترة ومتفرغتلنا هاي هيج سلوى جانت ماخذة كل وكتج

-اي الله لا ينطيها چان ما عندي وكت احك شعر راسي

-سبأ: حبيبة شعجب ما اجت وياكم ليلة؟

-ليلة: ما تدري جانت نايمة من طلعنا

-رسمية: طلوگ شمسه صار بساع شون ابرار ما تنطينا فنتگ نامت كعدت لكت روحها جاي تطلگ

-ليلة: يارب انا هم هيج وما اتبهذل

هزت راسها عمتي ساكتة لفترة والسيارة صارت عبارة عن هدوء، تنهدت انتظر تقي واراقبه من الجامة وشتت تركيزي صوت عمتي وهي تكول..

-انا احبنچ ليلة ويشهد الله متمنيتچ لوليدي من زمان بس ما يستاهل ابا الحسن هالمعاملة منج

-ليلة: عمة انا...

-رسمية: حسون سجلچ بالجامعة ليلة

-ليلة: شنو؟؟

-رسمية: صارله اسبوعين من گالي خاطر ابلغچ وتبدين دوام بس گلبي محمل عليج وزعلانة منج

-حسن سجلني بالجامعة؟؟ يعني سجلني خلاص هذا هو صرت طالبة؟؟

-اي

-صدگ تحجين عمة؟؟

-اي والله وكال من تتخرجين تصيرين محامية

-عليج العبااس؟؟؟؟

-اي

-وما گتيلي ولج عمة!

-خايبة سكتي انا مزاعلتج ليش تقهرين وليدي حيل بيج لو راح عليج الدوام

-عمةةة راح اجيب من الصدمة

-هاا ولج على كيفج شني شبيچ تسودنتي

-چا ابا الحسن سجلني بالجامعة وساكتة!

-سكتي رجع تقي لا يطلع حسچ العايق گدامه

-عمة بس نرجع تفهميني كلشيي اليوم ما اهدچ للصبح

-ماكو شي يتسولف هو اجاني وكال بلغي ليلة تداوم وخلي يوصلها واحد من الولد لجامعتها...

**

"عـــبق"

بعدما طلعنا من المستشفى بوجهنا اخذنا علي الحق للبيت والطريق كله هو يسولفلي عن فرحته لعلي البدر وحماسه لـ علي التقي وانتظاره ولادة سبأ على نار.. يمكن اكثر شخص الكل فرحله هيج فرحة من عرفوا راح يصير اب هو علي التـقي والسبب كل البيت يموت على تقي ويرتاح ويحب وجوده ووجود زوجته العبارة عن نسمة هادئة بالبيت..

ابتسمت من شفته شلون مكيف ويحجي من كل گلبه ويريدنا نشاركه بالفرحة وكل شوية يباوع لامي من المراية الامامية ويسولفلها عن تعلقه بـ تقي وشلون هو توأمه بس مو بالشكل والعمر وانما بالعقل والتفكير..

-علي الحـق: عمة انتِ اظن ما تفتهمين من اسولفلج على تقي عبنچ ما مسولفه وياه هواي سألي قبق عليه

-عبق: اي والله علي التـقي كلش انسان خلوق

-علي الحـق: اي چا ابو تقوى هذا مو ياهو الچان

-عبق: ماما هو الي زوجته حامل

-علي الحـق: اي هي هاي السمرة شفتيها عمة؟ هاي تصير بت عمي مسعود العار بس هي مو عاره خوش بت بس ابوها نگس وما يتعاشر

-شذى: الله يگومها بالسلامة مبينة حبابة

-علي الحـق: ان شاء الله يستاهل تقي كل خير

ابتسمت اهز براسي ودرت وجهي اله، رجعلي الابتسامة ودغ چف ايدي بأصبعه يتحارش بدون لا يلزمها يستحي كدام امي، ضحكت على سوالفه وگلت بدون لا افكر بحچايتي..

-عبق: يوم الالنا حبيبي

-علي الحق: ان شاء الله ياااااااارب

-عبق: هاي شنو شنو شدعوة عليك

-ولج گلبي مفرفح على فرخ يلعب ببيتنا ويترس علينا الدنيا

-ليش وجودي ووجود ماما مو كافي؟

-علي الحـق: سمعي يا ماما سمعي انتِ راضية بحچي عبق؟

ضحكت امي الكاعدة بالكراسي الوره وسكتت متجاوب، غمزلي علي الحـق فرحان لان ضحكها واني هم كيفت عليها الحمدلله وضعها كل يوم ديصير احسن واحسن واليوم اول مرة تقبل تطلع ويانه وتجي للمستشفى..

وصلنا للبيت وحق ما سكت عن سالفة الجهال كل شوية ذابلي بسمار كونكريت واني اضحك واغلس.. اعرفه يتشاقه خصوصاً وبده دوامي يعرف ما اللحگ بين بيت ودوام وطفل وهو مقدر هالشي ومن تزوجنا لليوم هاي اول مرة يجيب طاري الطفل واعرفه حچى بالموضوع بس لان غار من بدر وتقي..

ثاني يوم ما داومت ولولا علي الحـق واللحاحه عليَّ اصلاً اغلس واضرب الجامعة لان حضرة جنابي ما داومت ويه بدء دوام المرحلة الاولى وانطيتني عطلة شخصية.. ماعرف ليش مدا اقتنع اداوم واعوف امي بالبيت وحدها اخاف عليها..

بس علي الحـق اله رأي اخر وجبرني باليوم الثالث اروح وهو وصلني لجامعتي الصبح بيده والطريق كله يوصيني بتوصياته الي مستحييل تخلص..

-انتبهي على نفسج قبق وانتبهي على حجابج زين كل شوي طلعي مرايتج وتأكدي خاف طالعة شعره منا مناك

-صار

-انتبهي لا تدنجين كدام احد ولا تسولفين ويه ولد ابدد ابدد عنق انا عندي ثقة بيج واعرفج ما تنزلين راسي بيوم

-اكيد لا توصي حريصة

-لا تختلين ويه دكتور وحدكم بمكتبه لو تنگلب الدنيا! اذا احتاجيتي شي منه اخذي صديقاتج وياچ وروحن حاچنه سوه

-بعيني

-ولا تثقين بكل بت تماشيها شفق تره مو كلهن يحبنج اكو حقيرات ومريضات نفسياً

-صح كلامك

-باالچ واياچ تجيبين طاري اسمي لو شغلي كدام وحدة بيهن انتبهي

-واذا سألني شجاوبهن؟

-شسم زلمتج؟ اسمه علي.. شنو يشتغل؟ يشتغل عسكري وهذا هو

-اوكي

-لا تسولفين بعلاقتنا ولا تراويهن صورنا خلي حياتج خاصة ولا تخلين ياهو الچان يحط روحه بيناتنا

-تم

-شو راويني حلقتچ اشوفها

-هاي لابستها

-اگص اصبعج اذا نزعتيها وعلي!!

-ما انزعها يمعود شبيك

-وهاا نسيت انتبهي لا....

-علي الحـق شسالفة! تره كل يوم دتعيدلي نفس الاسطوانة والله حفظتها

-اي غير اخاف عليج عگروگ شمالج وياي انتِ

-حبيبي والله اعرف تخاف عليه بس ليلة راح تكون ويايه لا تخاف وانتَ تعرف ليلة شنو من لسان شايلة

-ادري بيها.. هي وابا الحسن ما تصالحوا بعدهم مو؟

-لا والله بس هو سجلها بالجامعة بدون لا تطلب منه واحس هاي خوش اشارة

-ما يصالحها لو تطلع نخلة براسها منتظرها هي تتقرب منه

-احسها ناوية تصالحه هالفترة خصوصاً من عرفته مسجلها جامعة انصدمت عبالها من عرفها حامل ما راح يخليها تكمل دراستها ويخلف بوعده

-لا شعليه الحمل بالدراسة ماله غرض

-صدگ؟

-اي چا شكو واذا حملت وخلفت ودرست ما دامها مسيطرة على وضع بيتها وفروخها مابيها شي اذا كملت

-امممم

-يلا حبي انتبهي على نفسج ومثلما وصيتج

ابتسمت اهز براسي وودعته ونزلت للجامعة، سجلت بجامعة اهلية قسم تحليلات مرضية واحسني لليوم ممصدگة كلما اصفن واباوع للملازم البيدي واللاب كوت احس روحي بحلم وراح تجي سلوى وتگعدني منه..

ذبيت نفس اهدأ نفسي، بعدني كلما اخطي خطوة لداخل الجامعة بطني تمغصني وابقى هيج بس اليوم تغير وضعي من شفت ليلة تجي من بعيد وبطنها كدامها سجلها ابا الحسن بكلية قانون..

-ليلة: هلااا بطة

-عبق: ههههه والله انتِ البطة ويه هالبطن

-ليلة: سكتي كوة جاي امشي فرد نوب ثگلت

-عبق: بالمناسبة فستانج كلشش حلو هذا منيلج؟

-ليلة: سودة عليّ رفل امس اشترته الي من الفرحة رايحة للسوگ وجايبتلي كومة نفانيف مال حوامل خاطر اللبسهم بالدوام وما احتار

-خطية يا عيني والله ماكو منها رفولة

-اي بعلي.. يلا امشي راح تبدي محاضرتي عود اللاگيچ من يدگ الجرص

-ولج يا جرص سكتي فضحتينا

-اگلچ يمته يسلمونا كتب خاطر نجلدهن

-سكتي ياا فشلة لا يسمعونا ليلة ويسوونا ميز

-خوش چا تندلين ام الحانوت وينها اريد اشتري؟

ضحكت ضامة حلگي وهي مستمرة تحشش لحدما عفتها ورحت للقاعة حضرت المحاضرة واللتقيت بيها بالاستراحة شوية وكملت باقي محاضراتي واتصلت بعلي الحق يجيني.. خطية ربع ساعة ولگيته واكفلي ركضتله مثل الطفلة الراجعة من المدرسة وفرحانة تسولف شسوت بيومها وهو استقبلني بنفس حماس الاب المنتظر يسمع كل التفاصيل..

-علي الحـق: حي الله المحللة

-الله يحييك سيدي

-يروحلج فدوة سيدچ

لزمت ايده بين ايدي فرحانة وبديت اسولفله على يومي بعدما سألت عن امي وحالها كال من طلع جانت نايمة وذابة روحها..

-علي الحـق: والله خوش مبدعة مريتي اليوم

-اي لعد شعبالك گتلك اني شاطرة

-بله عيديلي شنو گال الدكتور؟

-گال احسنتِ بابا شنو اسمج؟ كتله عبق كال احسنتِ عبق ممتاز

-خيولي لوگي هذا

-ههههههه يا غيور

-عوفي يولي.. خطية الامير اليوم من الصبح اجه خاطر يسويلنا واجهة البيت

-خطية الله ينطي العافية

-اي والله من ستة الصبح الشمس تصگع فوگ راسه لحد گبل شوي ياله ارتاح بالست ساعات هو معلگ فوگ وما رضى ياخذ فلس مني

-خطية علي الحـق لح عليه هذا حقه

-ماكو قفل كال اعتبره هدية مني

-الله يرزقه ويوفقه

-امين

رجعت للبيت وبوجهي لغرفة امي شفتها هستوها كاعدة وصافنة بالحايط مثل عادتها، بوستها وحاچيتها شوية وعفتها رحت اصب الغده الطبخته البارحة وزاد منه كلت اليوم هم نتغده بي نعمة الله شبي قابل..

-عبق: علي الحـق صيح امي جهز الغدا

-علي الحـق: انا نعسان راح انام ماريد غده

-اني هم نعسانة خلينا نتغده سوه وننام يلا حباب يلا تمساحي

دخل للمطبخ يتثاوب وضايج بس خليته يشيل صينية الاكل وطلعنا سوه، حطها بالگاع وصاح من مكانه..

-عمة عوفي النوم تعالي تغدي لا تصيرين تنبل

ضحكت بس كتمتها بسرعة حتى مانطي عين زايدة يتداهر ويه امي لان الديسوي بيها هسة كافي! يمكن باجر عگبة توصل وياه من يتشاقه وياهة يصفگها راشدي..

-علي الحـق: هااا ما تجين مووو

-شذى: ماريد اكل

-علي الحق: تعالي اكلي ما يصير عندج علاج

-شذى: ماريد

-تعاي ولا تعاندين مثل بتچ العگروگ

-شذى: انتَ عگروگ عوف بتي

-عبق: اي والله انتَ عگروگ عوف امي

-علي الحـق: هااا تگابلن عليّ رية وسكينة تعالن تعالن خلناكل

-شذى: انتَ شبيك ضايج

گالتها وكعدت متربعة كبال الصينية، شله حق ردانه وكال ووجهه مگلوب..

-من وراجن ووره فواينچن

-عبق: احنه شمسويات

-علي الحـق: ولا شي اكلن اكلن

-شذى: شبيك امي خاف گعدتي وياكم مضايقتك؟

-علي الحـق: لاا شني السالفة عمة بعلي انتِ الطابة وعبق الطالعة تحجين صدگ

-عبق: اني شكووو تطرد بيه

-علي الحـق: يا حبيبتي غير امج هاي ولازم نتلوگلها

ضحكت امي بصوت عالي ضحكة خلتها ترجع جسمها ليوره، ضحك حق وياهة يهز براسه مستحي واني كضيتها اوزع ابتسامات.. للغرابة الشديدة علي الحـق وامي كلش متوالمين امي تنطلق وياه عكس الباقين متستغرب منه ولا تتقيد وهالشي بسببه هو يعاملها مثلما يعامل خالة رسمية شالع گلبها ويداهر بيها..

-علي الحـق: عاشت ايدج حبيبتي

-عبق: بالعافية حبي

-علي الحـق: عمة باجر انتِ تطبخيلنا قبق تكول طبخج حلو نريد نجربه

-شذى: بعيني

-علي الحـق: اي مو بس اكل ونوم سويلج شغلة بهالبيت

ضحكت امي مرة ثانية وهو يضحك، والله لوما اعرفه شنو جان كلت ديسمعها حجي بس تعودت عليه هي امه الحقيقية مخلصانة منه قابل راح يستثني امي..

-شذى: اذا مضايقتكم اروح اني حبيبي وليدي

-علي الحـق: والززهرة ما تطلعين شني هاي عمة خلي روحج رياضية وتحملي لا تتماوعين عليّ بتچ مكفية وموفية تره

-شذى: يعني اگول خاف دا اضوجكم

-عبق: صدگ جذب تحجين انتِ ماما والله وجودچ ببيتي وشوفتچ كل يوم تريحني وتخليني طايرة من الفرح

-علي الحـق: وانا ما اريحچ واطيرچ من الفرح مو؟؟

-عبق: اهوووو هم حط روحه

-علي الحـق: خايبين انا اروح انامن احسلي من الكعدة هنا

-شذى: لا يمة اكل ما اكلت شي

-علي الحـق: لا شبعت الحمدلله اكلن انتن اكلن والله التضعف كيلو اطردها من البيت

عافنا وكام للغرفة، ابتسمت امي ساكتة بس خفت لا تزعل من حچايته فـ فوراً حطيت ايدي على رجلها وكلت..

-والله يتشاقى بس علي الحـق شقاه ثگيل شوية راح تتعودين عليه ماما

-تعودت حبيبتي انتِ بالعكس رجلچ والنعم منه خفيف دم وحلوة گعدته متنمل الله يسعدكم ويحفظكم ويعمر داركم ويرزقكم بالذرية الصالحة ان شاء الله

-حبيبتي امي

-عبوقة ماكو شي منا منا

-قصدج على الحمل؟ لا ماكو لان متفقين لحدما اتخرج ياله نفكر بالاطفال

-ليش حبيبتي؟

-ما ادبرها ماما بيت ومسؤولية ودوام واطفال ماكدرلهن كلهن سوه خصوصاً وانتِ تعرفين حق عسكري ودتشوفي كل يوم رايح لبغداد وعايفنا

-واني وين رحت؟ لو متأمنين على بيتچ واطفالج عندي؟

-لااا بالعكس والله يا بختي اذا انتِ ربيتي جهالي بس ماريد اثگل عليج اني

-لا ابد لا تفكرين هيج عبق ازعل عليج اني موجودة وكل يوم من ترجعون من دواماتكم راح تلكون الغده جاهز واذا فكرتي تسوين طفل فـ عوفي يمي الصبح احطه بعيوني

ابتسمت اهز براسي ممتنة وكملنا غدانا، گمت اريد اشيل الصينية وماقبلت الا هي تاخذها وكالت..

-رجلچ ميقبل تشيليها انتِ وخري حبيبتي

ابتسمت فرحانة لانها منتبهة على هالشي فعلاً علي الحـق ميقبل اشيل لا صينية ولا شي ثكيل كله هو يشيلها غده وعشا يكول البنية ميصير تشيل شي ثكيل مو زين عليها وامي خلتها ببالها واخذتها من ايدي..

سبقتها للمطبخ خاف هي تغسل المواعين وبسرعة بسرعة انطيتها علاجها وخليتها تنام واني استلمت المطبخ، غسلت المواعين ولملمته على اكمل وجه ماريد اقصر بولاشي بالبيت حتى علي الحق ميلاحظ دوامي خلاني اتغير ويربط تقصيري بي..

غسلت ايدي من كملت ورحت لغرفتي، تمددت بصفه على الجرباية لكيته رايح بسابع نومة، غطيته زين ونمت بصفه ومثل كل يوم اول ميحس بيه اهبط بصفه يمد ايده ويجرني لصدره يحضنني ياله ينام..

**

-تالة وينج انتِ والله گلبي راد يوكف من الخوف!

تنرفزت من شفت وديان واكفة بصفها ولابسة البوشية، بدون لا ترفعها عرفتها من عيونها الخضر بس حاولت ما ابيّن انزعاجي منها ووجهت كلامي بس لـ تالة..

-تالة: تأخرت اخذونا محاضرة اضافية

-تَـمني: لو مبلغتنا عاد الامير شوية وينجلط

-تالة: يا عيني والله مادري اسفة توتة اعتذريلي منه

-تَـمني: انتِ تعالي وفهمي امشي واكف منتظرنا وحبيبة وياه

هزت راسها وكمشت بأيدها اجرها من وديان الواكفة وما نطقت حرف ورحنا لسيارة الامـير علي، لگيته واكف بباب السيارة ويلوب.. استعجلت بخطواتي حتى يشوفنا وركضناله اني وتالة اول ما شافنا ياله ذب نفس وحط ايده على گلبه..

-تَـمني: طلعت بالمحاضرة امير مابيها شي

-الامـير علي: يا خوية غير تنطين خبر لبت خالتج ظل بالنا عليج

-تالة: اسفة اعتذر منكم بس الجنطة احطها باللوكر من ادخل للمحاضرة وبيها تلفوني

-الامـير علي: حصل خير، يلا بوية

صعدنا السيارة ومثل كل يوم اكعد اني بالصدر وحبيبة وتالة بالكراسي الخلفية، درت وجهي على امير وابتسمت قلقة من شفت وجهه صاير احمر من الضغط واعصابه ترجف، كللش ظل بالنا على تالة وهو وجهه انگلب گلاب من مرت فوگ الساعة وهي ماكو نبشنا عليها الجامعة نبش محد گاللنا عدهم محاضرة اضافية وطابگيهم ويه المسائي، وگعت كلوبنا والامير راد ينجلط الا شوية لان يعتبرها امانة برگبته ويخاف عليها كلش..

-تَـمني: امير كملت شغلك اليوم؟

-لا والله بعد

-مكثف شغلك امير دتتعب انتَ

-ميخالف چا اذا بشبابنا ما نشتغل يمته

-اي صح بس مو هيج مدا نشوفك

ابتسم يهز براسه ساكت واني هم سكتت لحدما رجع تالة لبيت خالتي واحنه لبيتنا وبوجهنا لغرفة شمس اخذنا منها الاطفال واكلناهم اكل بالبوس وهمه ينوصون ضايجين.. طلعت بمحمد للصالة وحبيبة شايلة مصطفى وشفنا علي الدر كاعد وبحضنه بنته..

-علي الدر: باعوچ بابا؟ اي اي باعنچ البنيات وصرتي عتيگة بعد محد تريدج

-حبيبة: يمة بنيتي شلون ما نريدها اروحلها فدوة

-علي الدر: لا لا مانريدج بعد احنه خلي بنيتي الي وانتِ اخذي جهال بدر الج

-حبيبة: لا والله جيبها فدوة لوجهج يا روحي

-علي الدر: ما نحبج احنه عمة خلينا بحضن بابا

ضحكت على أسلوبه شلون يداهر بـ حبيبة وبنته تضحك يحرك بيها منا ومنا وهي ميتة من الضحك تكهكه وهو متخبل عليها.. اخذها الامير من ايده يبوس بيها ويعضعض بيدها المتفتفة ويگزگز على ضحكتها وجمالها..

-الامير علي: ولك در ماكو هيج جماااال دررر

-علي الدر: هههههه عاين لوجهها يضوي اللهم صل على محمد وال محمد

-الامـير علي: ما شاء الله، شصار على سفرة حيدر؟ بعدها اسبوع الجاي

-علي الدر: اي ان شاء الله رتبت كلشي

-يلا ان شاء الله خير متفائل بهالسفرة انا

-علي الدر: انا هم والله الطبيب كال بلچن ان شاء الله يكدر يخطي چم خطوة وره عمليته

هز راسه امير ورجعنا الجهال لاهلهم ورحنا نفرش سفرة الغده قبل لا نبدل لان بس ابدل ملابسي انحل ومابيه حيل ارجع اتغده فـ اكل قبل كلشي.. گعدنا كلنا نتغده سوه بهدوء مريح بعيداً عن هوسة سلوى وبساميرها..

ما انكر الها وحشة بالبيت ومكانها كلش فارغ وغرفتها لليوم عمو علي ميدخللها بس هدأنا وارتاحينا من مشاكلها الحمدلله، ضحكت على سوالف سور ونور ونكاتهم تتشامر من كل حدب وصوب وكل شوية محصليلهم خزرة من ابوهم بس ميهتمون..

-علي السور: عود شني بوية حسبالك راح اخاف من خزرتك؟

-شيخ علي: هاا؟!

-علي السور: والله مو بس اخاف حتى اسويها على روحي اذا تريد

-علي البدر: طاح حظك

-علي النور: لا بدوري لا ما رجيناها منك تغلط على ضلعي الضلوع

-علي البدر: ادوس عليك وعلى ضلعك

-علي السور: بوية اسمع بدر شلون يغلط علينا

-شيخ علي: كافي يا ولد شمالكم انتم ما تستحون واحدكم شطوله وبعدكم چن مزعطة

-ابا الحسن علي: اي والله.. علاچي موجود عندك موبايل ايفون الاصدار الحديث بالمحل؟

-علي السور: كلشي موجود

-ابا الحسن علي: چا اريدنه بيش يطلع؟

فزيت من ضربتني ليلة بعكسها وهمستلي..

-سألي شيسوي بي

-تَـمني بهمس: اني شعليه

-ليلة: خرب!!... شتسوي بالموبايل الجديد انتَ مو عندك موبايل؟

-ابا الحسن علي: مو الي اريده لشخص

-ليلة: يا شخص؟

-علي النور بغمزة: شخص لو شخصه

-حيدر: هااا عمي هااا طلعت مو هين

-ابا الحسن علي: ههههههه انچبو يلا

فكت حلگها ليلة مصدوومة وصراحة كلنا مصدومات نفسها وظلينا نوزع نظرات بين بعض، تفاجأنا من ضحك وما برئ نفسه من هيج فكرة حتى امه وابوه ظلوا يباوعون عليه بس محد بيهم حچى شي..

انگلب وجه ليلة بس ما حچت كملت اكلها وترخصت وصعدت فوك لان تعبانة واني هم مابيه ابقى هوايه بسرعة كملنا اكلنا وكمت اغسل مواعين ويه سبأ وصعدت فوك نمت والعصر كلت للامير ياخذني لبيت خالتي..

كعدت انتظره جوه بينما يبدل ملابسه واثناء انتظاري شفت علي الكـرار يطلع من غرفة خالة رسمية وتبسمر بمكانه من شافني كاعدة..

-علي الكـرار: السلام

-تَـمني: عليكم، شنو شبيك عبالك شايف جني

ضحك وحك شعره خجلان، عافني واندار يريد يفوت لغرفة امه ورجع طلع وانوب هم راح يريد يدخل وهم طلع وهيج بقى يراوح يروح ويجي لحدما ختم حركته ووكف بمكانه ضبط، حمحم وكال متوتر..

-تَـمني يصير اطلب منج شي؟

-اكيد كول

-تكدرين تفتهمين اذا.. اذا تالة مقتنعة بيه لو لا؟

-حتى ترجع تخطبها

-اي.. اريد ارجع اخطبها بلچن تتغير شروطها

-هاي مو شروطها كرار شروط خالتي

-اي اي اعرف كالت امي، اريد بس اعرف بيها مجال يوافقون بدون لا تعيش ببغداد لو لا

-تمام، راح احجي وياهة تدلل

-حاچي خالتج تَـمني فدوة اروحلج والله اعيشها ملكة لا تخاف عليها اطلعها بيت وحدها والتريده يجرالها بس بغداد صعبة ماكدر اطلع منا

هزيت راسي متفهمة وهو ذب حسرة ضايج ومحتار كللش محتار، كمت وكفت على حيلي وتقربت منه اريد اطمنه ان راح احاول احجي ويه خالتي بس سبقني هو من كال بـ لوعة..

-تَـمني انا هاوي هالبيت ورايدها بالحلال، ما فد يوم تجاوزت وياهة او راسلتها عبني اعرف هالشي غلط وما اريدن شي يوكف بوجه جمعتي وياهة بس وعلي ابن ابي طالب يا مرة اخوي انا احبنها وگلبي متلوع عليها ومستعد اسوي اليطلبونه ومن عيني بس بغداد صعبة والله صعبة

-الله يجمعكم بالحلال كرار واني متمنية هالشي والله العظيم راح احجي ويه خالتي بلكت تقتنع

-غالية واصيلة يحفظج الله

دنگ راسه وطلع بره يهرول من شاف الامير ينزل من فوك عاكد حاجبه مستغرب من وگفتنا، ضحكت على وجهه شلون مغندب مال واحد يريد تفسير ضروري وما خليتها بنفسه.. لزمت ايده وطلعت بي بره وسولفتله شنو گلي كرار..

-الامـير علي: الله يسهل

-شبيك حبيبي شو احسك تعبان

-اي والله ما شبعان نوم

-تحب نرجع حتى ترتاح؟

-لا لا عندي شغل

-بكيفك

وصلني لبيت خالتي وهو راح بشغل مهم، كعدت ويه خالتي وتالة الي رجعت علاقتهن طبيعية بس بعدها تالة احسها مقهورة من رفض امها لـ كرار بس متحجي..

-حنين: رجلچ هواي ديشتغل هالفترة خو ماكو شي توتة؟

-تَـمني: لا والله ماكو بس هو ديلم نفسه علمود نشتري بيت

-تالة: معقولة ماعنده بيت لسه؟

-تَـمني: لا عنده قطعتين ارض بس يريد يبيعهن ويضيف عليهن ويشتري بيت يم اهله

-حنين: صح مكان اهله غالي ينرادله مبلغ محترم

-تَـمني: اي وشكد لحيت عليه حتى اني ابيع حصتي الي ببيت عمو ونشتري بيهن بيت ماقبل واصلاً ضاج وكال هالموضوع مينفتح مرة ثانية

-تالة: اني اكول لو تقنعي تَـمني وتطلعين ساعة قبل حتى ترتاحون

-تَـمني: اشوف اليوم هم راح احجي وياه والله كريم

-تالة: تشربين كابتشينو؟

-اي يلا جاية وياچ

كمت وياهة للمطبخ نحضر الكابتشينو ونويت احجي وياهة بخصوص كرار بس مو بشكل مباشر حتى متحس بشي اذا خالتي بقت معاندة..

-تَـمني: شلونچ ويه الدوام تلاوي

-زينة

-بعدج مصادقة هاي وديان؟

-لا مو صداقة بس لان ثنينا بنفس اللوكر فـ نتحاچى اوقات

-تالة ابتعدي منها ماحبها اني

-ههههه كلش واضح عليج تره

-اي والله اكرهها ما ارتاحلها ابد

-حقچ ما اللومچ

-ليش هم حجت وياچ بشي؟

-اي

-شكالت؟؟

-سألتني على زوجچ

-سألتج على امير!

-اي گلتلي ليش هيج شكله تعبان

-الله ياخذهاا هي شعليها؟؟؟

-حتى اني كلتلها شكد مركزة بي وانتبهتي عليه تعبان هو اني يومية يوصلني ما انتبهت

-وشكالت؟؟

-كالت لا عيونه ذبلانة مبينة

-ولجججج ماااا كفختيهاااا على عينهااااااا

-آآآييي ايدي شبيچ تعضين ولج

-اعض راسج المرة الجاية اذا ما لطمتيها على حلگها اوول متجيب طارب امير ماشيي؟؟؟

-ماشي ماشي افتهمت

-گبرر شلون بنية قليلة ذوق

-هاي عليَّ لو عليها؟

-على ثنينجن!!

-اني شكو ولج

-كافي كافي غيري الموضوع نرفزتيني

-بشنو تردينه نسولف كولي

-شلونچ بالدوام ما تعرفتي على وحدة واحد؟

-واحد؟ لا طبعاً

-امممم عليناا

-والله لا شبيچ اصلاً ممفكرة بهيج موضوع ومستحيل افكر

-ليش؟

-لان طلاب دفعتي چنهم سلابيح يخزون

-ههههه اتفق بهاي

-اي والله شنو هاي عيني اني اريد رجال

-ديلا يلا كملي الكبتشينو ولحكيني رايحة يم خالتي اكعد

تملصت منها بسرعة حتى اروح استفسر من خالتي اذا خطب كرار مرة ثانية تقبل لو لا وجوابها جان متوقع، جنت متأكدة مليون بالمية راح تكول..

-تَـمني هالموضوع ينسد نهائي وما اسمح ينفتح بعد، تالة ما ازوجها هنا نقطة راس سطر

-بس خالة..

-لا بس ولا هم يحزنون هذا العندي

سكتت فوراً اول ما رجعت تالة وبيدها المشروب، غيرت الموضوع حتى متضوج واخذتنا السوالف سوه.. گمنا صلينا ورحت ويه خالتي اسوي العشا وياهة وهم وكفت شكد احجي وياهة واقنعها بـ كرار بس قافلة قفل ما صاير من قبل..

-حنين: هذا موبايلج يدك؟

-اي امير هذا

-گليله خلي ينزل يتعشى ويانه

هزيت راسي اي ورحت احجي وياه، ماقبل ينزل واخذتلي خمس دقايق اتوسل واقنع بي ياله اجه اعرفه يستحي يطب ويطلع هواي على بيت خالتي وكلش يتقيّد من يجي هنا..

تعشينا بسرعة وما قبل حتى نشرب چاي كال تعبان كلش ويريد بس يرجع ينام واني هم ما ضغطت عليه مبين عليه مهدود حيله وبعكوسه بعده البورگ ما غاسله زين..

رجعني للبيت وبوجهه هو راح يسبح، طلعتله تراكسود وملابسه الداخلية وحطيتهن على الفراش ونزلت ركض سويتله چاي وصعدت احضر مكان كعدتنا.. طلعت حلويات وفواكه وصبيت الجاي وكعدت انتظره اعرفه يتأخر علما يطلعه من ايده ويتأكد ماكو نقطة بورگ على جسمه..

مليت وگمت اتطمن على حبيبة بينما يكمل ورحت لغرفتها لكيت ليلة يمها كاعدة وثنينهن ديدرسن، ابتسمت على منظرهن ومنظر ليلة شلون ذابة روحها على الملزمة تحفظ وتحضر اول بأول متحمسة وتريد تثبت نفسها خصوصاً هي داومت متأخر مو من بداية العام الدراسي فـ عدها تراكمات..

عفتهن براحتهن ماريد ازعجهن ورجعت لغرفتي لكيت الامير هستوه مكمل تبديل وديمشط بشعره..

-تَـمني: هلو يا حلو

ضحك وجرني من خصري يوكفني كدامه كبال المراية خلى ظهري يضرب بطنه، ابتسمت من نزل حنچه يثبته على چتفي وباسني بوسات متفرقة على خدودي واماكن اخرى..

-اميييير

-عيونه

-صاير وكح

-بس وياچ

-شحدك تصير وكح ويه غيري

-هاا هااا

-شنو هاا؟ على شنو اصلاً ها؟ لازم مفكر بالسالفة وضجت؟!

-اهوووو بدينا بهرموناتج

-لا ما بدينا دنسولف شبيك

فلتت نفسي من ايده وبسته بخده، ابتسم ورجعلياهة اقوى وسحبني على الجرباية وجريت ايدي منه ما اقبل..

-تعال نشرب چاي سويتلك

-ما مشتهي والله بس اريد انام

-حبيبي شو فد مرة صاير كسول انتَ

-يا رويحتي غير لخاطرج اريد نأمن على مستقبلنا واشتريلج بيت واكعدج بمچان يليق بيج

-اني كل مكان انتَ موجود بي يليق بيه لا تجهد نفسك على حسابي فدوة والله حتى بالايجار اقبل

-مرتاح انا لا تخافين

-امير اني اضوج من تتعب وديظل بالي عليك

-اروح فدوة لبالچ يا بالي ومالي

ضحكت على غزله وجريته نكعد على الكراسي، رجعت الجاي بالقوري وصبيتله جديد وهو وكلني من البقلاوة بيده، يوكلني ويداهرني بنفس الوقت واخذتنا السوالف ما حاسين على نفسنا ولا على الوقت..

-امير

-ها

-اريد اگلك على شغلة بس لا تضوج فدوة

-اذا تضوجني لا تحجيها

-امير حباب خليني ابيع حصتي من هالبيت ونشتري بفلوسها بيت النا

-چؤؤ تَـمني!!

-حباب حباب

-اشتريلج بيهن بيت الج تأجري وتستفادين منه بس ما نكعد بي حلم

-حبيبي شبيك عادي رجعلي فلوسه بس على شكل دفعات

-هيج متضايقة من كعدتج هنا امنية؟

-لا والله لا بالعكس خصوصاً من سلوى راحت بيتنا صاير كلش هادئ بس اني علمودك اريدك ترتاح ولا تضغط على نفسك بالشغل، اشتغل على راحتك وكلما يصير عندك انطيني وهيج احنه هم طالعين ببيت وحدنا وهم انتَ مرتاح ومتهلك نفسك

-لا

-امير لخاطري

-لا حبيبتي خليني هيج انا مرتاح لا يظل بالج

-اخاف عليك تتعب

-ما دامج وياي ما اتعب

-اني وياك اليوم وكل يوم حبيبي

جر ايدي مبتسم وطبع قبلة خفيفة عليها، تنهد يحطها على خده وغمض عيونه يرتاح شوية واني بقيت اتأمل ملامحه التعلمت عليها ومستحيل راح اكدر اعيش بدونهن يوم..

-اميري

-احبچ

-هههههه واني احبك حبيبي

-گولي يا عيون امير

-عدنا سفرة بالجامعة اسبوع الجاي عاجبني اروح

-هاي شني هاي

-امير حباب تالة هم راح تروح وصديقاتي التعرفت عليهن يروحن كللش راح نتونس

-لا نوومه عوفيها تولي عود انا اخذج

-حباب حباااب

-لا

-ابوسك وتقبل؟

-شو بله

گمت بسرعة بسته ورجعت لمكاني انتظر جوابه، ضحك ورفع حواجبه بحركة وكال..

-لا

-امييييييييييييير

-شنهاي شو هالمرة كلش طويلة

-لاني معصبة منك

-لا تعصبين خليني امخمخها واشوف شيطلع وياي

-زين شنو رأيك حبيبة تجي ويانه وسور ونور هم حتى نتونس كلنا وهم تأمن انتَ؟

-يصير؟

-اكيد يصير

-خوشن باجر احاچيهم بلچن يقبلون

-اووووووي

گمزت من مكاني وطفرت على حضنه اضحك فرحانة وهو يضحك، كام من مكانه وشالني على وضعي وتمدد على الفراش واني بصفه وغمض عيونه بسرعة يريد ينام.. ابتسمت وبست طرف خشمه وهمست بيني وبينه..

-امير

-همم

-تحبني؟

-هممم

-امير

-هممم

-منو تحب اكثر اني لو امك

-استغفرالله

-لا لا لا تجاوب بطلت.. امير

-همم

-لا تعوفني ابد

فتح عيونه على كيفه وابتسم ساكت، ضربت بيدي على صدره خفيف وهمست..

-ادري متحب هالكلمة بس احتاج اسمعك تجاوبني

-للموت ماعوفج امنية

-هنيالي بيك

رقت نظراتي اله ومديت ايدي اسد جفونه على كيفي حتى ينام ويرتاح، نمت عدل واني بين ايده انداريت انطي ظهري لان متعودة وغمضت عيوني اريد انام وحسيت بي يمسح على ذراعي بيده ويهمس بصوت كله نوم..

-يا كبر بختي وانتِ مرتي

غفيت وره ما سمعت جملته بگلب كله ورود، نمت نومة عميقة وكالعادة حلمت حلم غريب بس ماتذكر شنو جان مضمونه وحتى لو ردت اتذكر فـ الفزة الفزيتها الصبح نستني كلشي..

-شنهاااي

انتفضت مخترعة على شخص يدفع جسمي بقوة ردت اوكع من الجرباية، فتحت عيوني مستغربة من شفته الامير فاتح عيونه على وسعها ويباوعلي بنظرات غريبة..

-شبيك حبيبي

-انتِ ياهوو؟؟

-شنو؟ شبيك امير

دفع ايدي المديتها على جسمه وفز يكوم من الجرباية وصار يدور حول نفسه، كعدت على حيلي اباوعله محتارة ومدا افهم شبي وشديكول..

-شنهاي انا وين؟؟ انا وين؟؟

-امير شسالفة

-انتِ منو؟ ما تجاوبين؟!!!!

-باوع اذا هاي هم خطة من خططك فـ مو حلوة والله

ما جاوبني ولا اهتم وطلع من الغرفة يركض، اخترعت من ركضته وكمت بسرعة لبست بس شال على راسي وهرولت وراه شفته ينزل الدرج يدبچ تدبچ ويصيح بكل صوته..

-يمممماااا ولجج يمممةةةةة

طلعو خالة رسمية وعمو من غرفتهم والباقين هم كلمن طلع من غرفته بعيونهم النوم بس الامير صاحي، صاحي ووجهه مكلوب كلاااب احمر على ازرگ ماعرف شنو لونه بالضبط و عروگ وجهه وايده بارزات يخرعن..

-رسمية: شني يمة شبيكم

-الامـير علي: يوم هاي البت كعدت لكيتها بغرفتيي وداعتج ووداعتك يا بوية انا مالي غررض لا كضيتها ولا الي وياهة شي!!

يحجي ويأشرلهم عليَّ وامه وابوه ثنينهم فتحوا حلگهم متفاجئين بس مو اكثر مني.. مو اكثر مني واني اشوف زوجي يمثل هو ميعرفني ولا اكثر مني واني اشوف امه وابا الحسن ركضوله ولزموه يحجون وياه..

-رسمية: اموري شبيك يوم شبيك حبيبي

-الامـير علي: كعدت لكيتها حدي يمممة هااي يردون يبلوونا بيها بوية ويننك شوفلنا چاارة گبل لا ننفضح!!

-ابا الحسن علي: امير هاي مرتك! شبيك انتَ تسودنت خوية؟!

-الامـير علي: ولكك مرتي شنييي مخبل انتَ؟؟؟ منين اجت مرتي!!

-رسمية: ولك يمة تَـمني هاي مرتك شمالك كمت تشبچ خيط بخيط

-الامـير علي: شنو تضحكون عليَّ انتم؟؟؟ من شوووكت متزوج اناا وللك اباا الحسننن ما تسولفف شبيك!!!

يتبع 👑....

━━━━━━ ♛ ━━━━━━

مصيبة... 😣

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

ما طبگن سره طبن علي كلهن

وكتلني وبعد ما اكدر اكتلهن

واذا شدن اجدامي وشدن الچفين

وكعدن اعلى الصدر چا بعد شيحلهن

ويلتمن عليك مشتتات البال

يا عريان گلي شلون تنفضهن.. ✋🏻

━━━━━━ ♛ ━━━━━━

"تَـمني"

انگلب البيت على روسنا كل اخوته وگفوا بوجه الامـير علي يردون يفتهمون شبي وابوه لزمه من متونه يريد يوگفه بمكانه بس مدا ينطي لاحد مجال، مستمر يأشر عليَّ كأني مجرمة وفاتح عيونه ويعيد نفس الحجي "هاي البت لگيتها بفراشي وانا مالي غرض بيها"..

وگعت رجليه ماكدرت اوكف على حيلي اكثر وكعدت على الدرج منهارة، ركضن يمي سبأ وليلة وحبيبة ركضت على خالة رسمية الي لزمت گلبها وتبسمرت بمكانها من الخوف..

-الامـير علي: وخرر من وجهيي تقيي لا تكضنييي

-شيخ علي: ولك هييييد شبيييك بوية شبيك تسودنتتت

فلت نفسه من ايد ابوه ودفع الولد عنه يلهث، رفع عيونه عليَّ يباوعلي من فوگ ليجوه مخنزر يريد ياكلني.. فرك وجهه بأيده الترجف من العصبية وخلى وطلع من الصالة يريد يروح..

-ابا الحسن علي: وين رايح؟؟

-الامـير علي: رايح لضرغام

شهگت خالة رسمية وحبيبة وياهة وعمو علي وجهه كام ينطي اللوان، حطيت ايدي على گلبي اهدأ نفسي واتنفس على كيفي اخاف لا ينغمى عليه والولد بقوا واحد يباوع لوجه الثاني بعدما طلع امير من البيت..

-شيخ علي: دخيلك يا علي

-علي الدر: هذا حلمان لو شني؟

ويه جملته رجع الامير دخل للبيت يدبچ دبچ برجله مخلف صوت عالي، وكف بباب الصالة معصبب كلش وروحه طافرة..

-الامـير علي: بوية وين دراجتي؟؟

-رسمية: يمة امير

-يمة خلي يرجعلي الدرااجة مو حالة هاااي

-شيخ علي: اموري بوية يا دراجة شبيك وليدي تعال اكعد هنا خلينا نسولف على كيف

ما جاوب ابوه ولا اهتمله وضرب الباب بأيده بقوة وعافنا ورجع طلع من البيت مرة ثانية عايف الكل بحيرته، محد ديكدر ينطق شي من الصدمة احس بروحي ماعت ولولا سبأ وليلة اللازماتني جان وكعت على وجهي..

-شيخ علي: ابا الحسن، تقي لحگوا اخوكم لا تخلوا وحده

ركضوا يطلعون وراه وراح وياهم كرار بينما الباقين بقوا يضربون اخماس بأسداس ويتناقشون بين بعض عن حالته وشنو سبب تصرفاته..

-علي البدر: خلينا ناخذه للطبيب بوية لا نعوفه هيج

-علي الدر: علساس راح يرضى يجي ويانه؟؟ شفته شون يتصارع بين ايدنا مادري منين اجته كل هالقوة خمس زلم ما كدروا يكضونه

-علي البدر: چا ندگ على منتصر خلي يجي بلچن يفتهم السالفة

-شيخ علي: لا، لا تدكون على احد خلي اخوتك يجيبوه ونفتهم منه شبي

اعترضوا در وبدر ثنينهم بس عمو ظل مُصر ميجيب منتصر، كوة سندت نفسي على رجليه ونزلت جوه يمهم كعدت بالصالة اتصفن وعقلي يعيد ويزيد ينظرات عيونه وعصبيته وادعائه ان هو ميعرفني..

-شيخ علي: ان شاء الله خير بوية ان شاء الله ماكو شي صلوا على محمد

صلوا كلهم على النبي محمد وكعدت خالة رسمية تفرك بصدرها وتدعي، الرجفة بعدها بعظامي ولساني مربوط ما نطقت حرف وبقيت انتظر رجوعهم بس طولوا..

-رسمية: علي وين صارو ولدك؟؟

-شيخ علي: جيبي موبايلي حبيبة

ركضت حبيبة تجيب موبايل ابوها واتصل بـ علي التـقي، حطه على اذنه ينتظره يجاوب وصاحت ليلة من مكانها حتى يفتح مكبرة صوت فـ سواها..

-شيخ علي: ها تقي شصار وياكم؟

**

"علي التـقي"

اعاين لاخوي وعيوني صايرة بگصتي هايت بالشوارع ويمشي سريع ويطحر غضب.. درت وجهي على علي الكـرار لكيته متفاجئ اكثر مني وابا الحسن باقي يركض وره الامير ويسولف وياه..

-ابا الحسن علي: امير شسالفة صدك جذب تحجي انتَ وين مولي ولك

-هدني حسن انا مالي كعدة بذاك البيت بعد

-ابا الحسن علي: وين تولي خايب ويين فهمني طالع من الغبشة شعندك

-الامـير علي: وينه موبايلي؟؟ ولك اااخ نسيته خررررب

-شتصخم بي امير بعلي راح ارفسك

-دگلي على ضرغام ليث أي واحد دگلي

-ابا الحسن علي: شو تمسلت انتَ!

-ابا الححسسننن

-وسمممم لا تصيح لعنة الله على ابليسك سودنتنا الله يسودنك

-الامـير علي: شكوو طالعين وياي انتم شكوووو ذول شجابهم وراي!!؟

-علي الكرار: لو بس افهم ليش يصيح ارتاح!

-الامـير علي: رجعووا ما اجي وياكم لذاك البيت بعد ماااا ارجع

-علي التـقي: ليش؟ ياهو وياك ولك

اللتفتلي مخنزر عيونه ما جاي ترجع طبيعية بس يوزع خزرات على الكل ياهو حچى وياه ولزگة بخزره..

-الامـير علي: موو كلنا عدناا مثل حوصلتك تقييي ويتحمل اللعباان الروح الجاي نعيشه!!

-علي التـقي: خوي ليش لعبان روح حرام عليك هاي وانتَ مرتاح عندك شغل ومتزوج و...

-الامـير علي: همممم كال متزووووج هم كااااااال

هجم عليَّ يريد يتكاتل وياي وكضوه ابا الحسن وكرار يقيدون حركته.. لا لا هذا مو الامـير هذا مو اخوي مستحيل الجاي يصير بي طبيعي تصرفاته وحركاته تخوف..

طلعت موبايلي ادگ على ابوي مرة ثانية وانخبصت مهبوط گلبي من شفته يذبل بيد ابا الحسن وراد يطيح، ركضت عليه اسنده حيل وصار يصيح بين ايدي حط ايده على عيونه ويعصرهن بكل قوته راح يفگسهن..

-ابا الحسن علي: امير!! امير شبيك ولك امير

دفعنا عنه ما يخلينا نكضه وظل حاط ايده على عيونه ويمشي ويتطوطح لحدما وصل لرصيف كعد عليه ولزم راسه بين ايده ثنينهن يعصره ويصيح..

-رااسي اااخ.. راااسي راح يطگ

-علي الكـرار: كوم امير خلينا ناخذك للمستشفى كوم

-ابا الحسن: اموري؟؟ ولك امير شبيك حاچينيي ولك خوية شبيك

على صوت صياحنا صار ياهو يمشي بالشارع يجينا يركض يريد يساعدنا، تگابلنه عليه من كل جهة نريده يكوم من الرصيف ما يرضى ولا احنه جاي نكدر نشيله ثگيييل چن حاط بجيوبه حديد تخبلنا فوگ خبالنا هد حيلي وابا الحسن جسمه ينخض خض راح يطيح علينا من الخوف ودموعه عشرة عشرة يبجي على توأمه..

-علي التقي: حسن وخر عنه حسنن مو وكتهااا

-ابا الحسن: تقي اخووي تقي عاين لوجهه

-علي الكـرار: ابا الحسن لا تزيد ضيمنا ضييم ساعدنا نشيله

-الامـير علي: ماريد.. راسي.. مـ.. را...

الچلمة ما تطلع من حلگه وعيونه صارن عبارة عن فصوص دم انخبط البياض ويه السواد، ما اهتميتله واللتموا علينا الوادم يساعدونا نشيله وبألف محمد يا علي گدرنا نسيطر عليه وعلى الثگل الجاي نحس بي وصعدناه بسيارة واحد من الجيران..

صعدنا وياه وطلعنا بي للمستشفى وامير يلوب بين ايدنا ما يرضى يريد يطلع منا ويصييح بكل صوته والزلمة الجاي ياخذنا بسيارته انخبص راد يطب بسيارة ويسوي بينه حادث..

طلعت روحي ياله وصلنا للمستشفى وبعدنه ما سافطين السيارة غافلنا وفتح الباب وعبر علي الكرار وطلع يركض..

-علي التـقي: ياا علي ولك هذا شبيي

وكف السايق بينا بنص الشارع وركضنا وراه وگبل لا نحلگ نوصله ما شفناه غير طاح من طوله وانلطم وجهه بالكاع، گلبي طاح وياه وركضت بكل سرعتي عليه وكرار ركض يصيح للمرضين يجيبون سدية..

-ابا الحسن: ولك امييير گوم شسويت بينا يا خوية گووم

-علي التـقي: لا ترجع راسه حسن انتببه

گومت ابا الحسن منه من شفت الممرضين يركضون بأتجاهنا ويجرون بسدية، تگابلوا عليه يشيلوه واحنه وياهم ونيموه على السدية واخذوه جوه..

حيل ما ظل بينا الصدمة الجاي اشهدها ومنظر اخوي الغريب استنزف طاقتي، كضيت كرار من ايد وابا الحسن بالايد الثانية وطبينا للمستشفى، هرولنا للطوارئ وين نقلوا الامير والحمدلله والشكر من كرار شاف واحد من جماعته هنا وشرحناله الوضع..

-علي الكـرار: گعد من النوم ما يتذكر مرته وطلع من البيت يريد يروح لصاحبه الميت

-شنو السالفة!

-علي التـقي: اي والله خوية والمشكلة يصيح ويستريح من وجع راسه

-خوية چا لازم يتحول على الجملة العصبية مو هنا مكانه، روحوا لدكتور رعد خوش طبيب ويفتهم لا تسكتون عن وضعه

تشكرنا منه وطلعونا من الطوارئ وبقى بس ابا الحسن وياه جوه، دكيت على ابوي وفهمته السالفة وكال نحجزله عند الطبيب بينما يبدل ويجي هو..

-علي التـقي: امشي نحجزله يجوز نلگه الطبيب اليوم موجود

-علي الكـرار: حتى لو ما لگيناه نروحله للعيادة

-هسة امشي نشوف والله كريم

صعدنا لطابق الموجود بي جماعة الجملة العصبية ولگينا الطبيب موجود بس السره شگد وشكبره منا لثلاث ساعات ما يجي سرانا..

-علي الكـرار: أيس يا عبيس وين ينكض امير ثلاث ساعات خاطر الطبيب يشوفه

-علي التـقي: حاكم صاحبه يشتغل هنا بلچن يساعدنا بشي

ايد فكرتي ودگيت لحاكم والزلمة والنعم منه اول ما افتهم كال ظلوا بمچانكم انا جايكم، خمس دقايق واجه مستعجل سألنا شكو وشصاير سولفتله مختصر مفيد وكال هالحالة ما ينسكت عنها ولازم يشوف الطبيب بساع..

-علي الكـرار: عاين السره

-حاكم: معليكم اني ادخلكم

-علي التـقي: لا خوية شني ذنب الوادم الكاعدين ينتظرون

-حاكم: حبيبي اكو حالات صعبة متتأجل وندخلهم بالبداية يجوز اخوك من وكع على راسه صار عنده نزيف داخلي او ارتجاج الناس راح يتفهمون هالشي مالك علاقة

استحيت من الوادم الجاي ينتظرون بس الوضع ما يسمح للمستحى ودكتور حاكم راح حاچى السكرتير الكاعد واستجاب للوضع بسرعة وكال بس يجي يدخلوه.. دكيت لـ ابا الحسن اسئله عن وضع الامير وگالي كعد ووضعه زين هادئ ومابي شي..

-جيبه حسون حجزناله عند الطبيب

-ياله جايين

سديته منه وانتظرته علما جابه واجه امير وياه بدون عناد، اعاينله يمشي كلشي مابي ابد بس گصته شوي صاير بيها اثر مال الطيحة..

-حاكم: ها امير سلامات شصاير وياك؟

-الامـير علي: مابيه شي

-حاكم: گالو كعدت الصبح دايخ شوية صدگ هالحجي؟

-الامـير علي: لا مابيه شي

-ابا الحسن علي: تعرفه هذا منو؟

اشر على دكتور حاكم وامير هز راسه بـ "اي" فرك وجهه وعصر عيونه بأصابعه حيل وكال..

-الامـير علي: راسي حاكم راسي جاي يوجعني

-حاكم: تمام ميخالف يلا نفوت للدكتور وگله من شنو تشكي

هز راسه اي ودخل وانا وحاكم طبينا وياه، سلمنا على الطبيب وكام لحاكم يتصافحون وبده حاكم يسولف للطبيب عن وضع امير..

-دكتور رعد: راسك يوجعك امير؟

-الامـير علي: اي

-دكتور رعد: حددلي نسبة الالم من واحد للعشرة شكد يوجعك؟

-الامـير علي: گبل لا اجي چان كلش بس هسة هدأت انطي خمسة من عشرة

-دكتور رعد: يعني هسة صداع عادي؟

-اي

-تمام..

گام من كرسيه واجه لامير مد ايده لجفونه وفتحهم ووجه عليهم ضوه يفحصه، سوه هالشي للعينين وكال بهدوء..

-راح نحولك على المفراس حتى نتطمن

-علي التـقي: دكتور اخوي بي شي؟

-ما اكدر احكم الا اشوف الاشعة، دكتور حاكم دخلوه فوراً للاشعة ورجعولي

استجابينا لحچايته وطلعنا بي للمفراس وتلاكينا ويه ابوي وباقي اخوتي كلهم جايين وامير بس يوزع نظرات مستغرب من الهوسة وكلما يصير صوت عالي يعصر عيونه ويرص على سنونه..

**

"ســـبأ"

كاعدين على جمر ننتظر اتصالهم دقيقة دقيقة بس كلما ندگلهم يكولون بعده بالمفراس ولازم ننتظر النتيجة.. فركت ايدي متوترة وطارت عيني على تَـمني صافنة وعقلها شارد مو ويانه ولا ويه حچينه وعمتي رسمية تلوب وتقنع بروحها..

-رسمية: مابي شي يمة مابي اموري سبع هاي اظنه حلمان واخترع مابي شي لا تخافن

-حبيبة: ان شاء الله يمة انا هم شوي ارتاحيت عبن ابا الحسن يكول عنه زين وما شكى من راسه بعد

-رسمية: اي اي حلمان وليدي لا يظل بالجن.. وينج تَـمني حلمان زلمتج لا تخافين يمة كلشي ماكو

دعيت من كل گلبي يطلع صدك مابي شي وكمت اسوي غده ويه ابرار ان شاء الله من يرجعون ويجيبون امير وياهم اكيد راح يجون جواعة ويردون يتغدون..

اشتغلنا انا وابرار واجت ويانه ليلة تساعدنا، سوينا مرگة فاصوليه وتمن وليلة اشتهت دجاج فـ سلگنه دجاجة الها ولشمس تاكلها خاطر ما تنفخ، اذن صلاة الظهر ورحنا نصلي ورجعنا للغده.. كمل الغده وهدرنا التمن وكمل التمن وسوينا زلاطة وكملنا كلشي وهمه بعدهم ما راجعين..

-ليلة: اووووف شوكت يجون والله تعبت

-سبأ: الله يساعد تَـمني

-ابرار: اي والله ان شاء الله ماكو شي لا تخافن

هزيت راسي متفائلة ورجعنا نكعد بالصالة ويه الباقيات، بطني كامت تمغصني من الجوع ونفسي تلعب بنفس الوقت بس ما حجيت وكعدنا ننتظر.. للثلاثة ونص الظهر سمعنا صوتهم جاي من الساحة يسولفون ركضن تَـمني وحبيبة گبلنا كلنا يستقبلوهم وصاحت بيهن عمتي ما ترضى..

-تعالن لا يشوفچن ابو علي طالعات للساحة ويعصب اكو عمال مسلطين علينا

رجعن للصالة ووگفن ينتظرن دخلتهم ويانه، طبوا عمي والولد وراه يمشون من دون الامير طاح گلبي مخترعة من ما شفته والف فكرة وفكرة اجت ببالي، ركضت عمتي ملهوفة على عمي خايفة وصاحت..

-وينه الامير؟؟؟

-شيخ علي: لا تخافين مابي شي طلع

-تَـمني: وين؟؟

-علي التـقي: مادري طلع ويه ابو كربله

-تَـمني: شنو يعني؟ مافهمت هو مو مريض؟؟ شلون طلع!

-شيخ علي: گعدوا خلينا نسولف على كيف

استجابينا بساع وكعدنا البنات على القنفات والولد ظلوا واگفين ويذبون حسرات، فرك وجهه تقي تعبان واول واحد بيهم حچى..

-علي التقي: الطبيب يكول الامير مابي شي، سويناله مفراس وطلع نظيف مابي مشاكل

-رسمية: الحمدلله والشكر چا شبي اليوم الصبح؟

-علي الكـرار: احنه همات احتارينا والطبيب أكد وگال ما يعاني من سبب عضوي وماعنده مشاكل بالاعصاب والصار اليوم يجوز ضغط او تعب بس...

-تَـمني: بس شنو؟

-علي السور: امير ما يعرفنا! ما يتذكرنا لا انا ولا علي النور من شافنا صاحلنا يا ولد!

-رسمية: يممممة!!

-علي النور: والله العظيم!! من گتله شبيك امير استغرب ولج يمة استغغرب شلون عرفت اسمه ظل صافن عليَّ ويسويلي بيده حركة "شبيك"

-حبيبة: وتالي؟؟؟

-علي السور: كرار حاچاه وگله ما تعرف هذول منو گال لا شمعرفني گتله انا سور وهذا نور اخوتك الصغار گالي وخر ولا تظل تمسلت

-رسمية: صخام بوجهي!!

-شيخ علي: مادري شنو جاي يصير بهالولد مادري

-تَـمني: شنو السبب؟؟ ليش هيج ميتذكر معقولة هالشي طبيعي؟

-علي الدر: لا دكتور حاكم ودكتور رعد ثنينهم گالو عرضوه على الطب النفسي يجوز المشكلة مرتبطة بنفسيته

-تَـمني: بس هو زين! والله زين البارحة كلشي مابي شلون يصير بي هيج بين ليلة ويوم!

هزوا روسهم بيأس مايعرفون شيحچون، استحيت اجيب طاري الغده لان همه بيا حال فـ سكتت وهمه ظلوا يتناقشون بيناتهم شيسوون ووين ياخذونه لحدما دكت الساعة خمسة العصر عمتي كالت صبوا الغده..

صبينا الغده وگعدنا سوه واعاين للمواعين محد ياكل طبيعي بالهم سارح وحايرين بأخوهم الي لا اخذ وياه موبايل من طلع ولا جاي يرضى يرجع للبيت من يتصلون بـ ابو كربله..

كملنا وگمنا نشيل المواعين وغسلناهم بساع وصعدت فوك وره تقي لغرفتنا، طبيت لگيته كاعد على الجرباية وصافن يفكر عرفته باله ويه الامير فـ ما دوخته زايد وبس كعدت بصفه، شوي ولطم على رجله وكال بحسرة عالية..

-علي التـقي: اووووف اوووف

-سلامتك

-والله حيرة يا سبأ ماعرف شلون راح تفض

-ان شاء الله تلكون حل بس ليش اليوم ما اخذتوا للطبيب النفسي؟

-دكتور رعد كال انتظروا فد چم يوم بلچن وضعه يتحسن خاطر تاخذونه برضاته لا احد يضغط عليه بشي

-ليش؟

-يخاف لا تتفاقم حالته فـ حتى من راد يروح ويه ابو كربله ابوي ما اعترض وگاله روح براحتك

-وتَـمني؟

-شبيها

-راح يبقى ما يتذكرها

-ان شاء الله يتذكرها من يرجع بجاه علي

-ان شاء الله يارب

بس للاسف ما تذكرها من رجع تالي الليل، طب للبيت تعبان وعيونه تغفي وبوجهه راح لغرفة امه واظنها سولفتله على تَـمني لانه طلع من غرفتها گالب هذا على ذاك حرگ البيت على روسهم..

-تَـمني: امير اهدأ حبيبي بس اهدأ

تقربت منه تلمس ايده على كيفها ونترها منها بقوة، دفعها عنه وعاط بوجهها صوت خلاها تنهار من البچي..

-وخري شبييج انتِ مخبلة!!

-تَـمني: امير حرام عليك والله

-رسمية: يمة لا تسوي هيج بمريتك لا تكسر افادها عاين لحالها

-الامـير علي: هم كالت مريتتك هم كالتتت انتم بيكم شيي والله اكو سالفة مو طبيعية جاي تصير

-علي الحـق: اي السالفة المو طبيعية جاي تصير بيك تره!

نفخ هوا ضايج كللش حتى اخلاقه متغيرة، جاي انصدم بي چن غير واحد واكف گبالنا بعيد كل البعد عن شخصيته النعرفها وانصدمت بالزايد من ماعرف حبيبة منو! وگفت كدامه ضبط وظل يعاين عليها چن بت جاية من الشارع..

-رسمية: يمة شلون ما تعرفها شلون هاي اختك حبيبة

خفنا عليه من صارت عنده ردة فعل غريبة، غمض عيونه وفوراً كض راسه وعصره بيده..

-شيخ علي: كاافي عوفي رسمية لا تضغطين عليه

سكتت عمتي بس دموعها تصب وتَـمني حالها بالضيم زلمتها لا رضى ينام يمها بنفس الغرفة ولا حاچاها بشي.. تأملنا ثاني يوم يكعد متذكر بس نفس الحالة بل اتعس كعد متخبل على الاخير وما يتحمل حچاية من احد..

-علي الحـق: لا احد يحاچي يا يمة شبيكم انتم مو الطبيب كال عوفوه!

-رسمية: والله تحز بخاطري وليدي السبع هيج يصير بي

-علي الحـق: راح يتحسن ان شاء الله الطبيب گال عوفوه بحاله اذا بقى هيج اسبوع وما رجعت ذاكرته لزوم تقنعوه يروح للطبيب

مسحت تَـمني دموعها التصب من عيونها وكامت وكفت كبال علي الحـق وكالت بقهر..

-خو هسة اخذوه فدوة ليش ننتظر اسبوع

-علي الحـق: ما جاي يرضى يروح ودكتور حاكم ورعد ثنينهم گالو لا تضغطون عليه بأي شي خلوه على راحته على القليلة اسبوع

-تَـمني: والله راح اموت من القهر مدا اتحمل

تحسر علي الحـق محتار وضايج ما يعرف شيسوي وشلون يواسيها، راحتلها عبق تسولف وياهة وتهدأها وعمتي رسمية هم حاچتها وگلتلها تصبر وتوگف ويه زلمتها بهالمحنة وما تعوفه وتروح لبيت خالتها زعلانة..

-تَـمني: اروح زعلانة؟ لا خالة مستحيل شتحجين انتِ شلون اعوفه وهو مريض قابل هو متقصد ميعرفني لو ديمثل

-رسمية: اي والعباس هاي حتى حبيبة ما جاي يعرفها

-تَـمني: خليني احجي وياه يمكن ترجعله ذاكرته بسببي

-حبيبة: لا توتة انتِ ما جاي يرضى تكعدين حده مو انوب تسولفين وياه

-تَـمني: لعد شلون!

-ليلة: الله يصبرج حبي بس تحملي هالسبوع على الاقل يارب يتذكر

هزت راسها ساكتة ورجعت تبجي بدموع چبيرة تقهر، وحدنا الدعاء وعمتي نذرت اذا امير منا لاسبوع يتحسن وترجع ذاكرته تذبح ذبيحة وتهديها للفقراء بس للاسف ما صار هالشي.. مر هالسبوع الصعب كللش وامير على حاله والمشكلة ما جاي يرضى يروح للدكتور معاند، طلع عمي علي من غرفته وكال بعصبية..

-شيخ علي: راح ناخذه للطبيب شنسوي بعد

-رسمية: لو بس ترضى ناخذه للشيخ بلچن يقرا عليه شي ويبطل هالسحر

-علي البـدر: يمة مو سحررر والله مو سحر ابوي راح لشيخ وسأله گاله مو اعراض سحر هاي

-رسمية: والله سحر

-شيخ علي: لا تفتحين هالسالفة بعد ام علي! راح اخذه للطبيب ونشوف شيكول

-رسمية: ما جاي يرضى علي شلون تاخذه!

-شيخ علي: بعلي لو اعرف اخدره تخدير واخذه للطبيب بعد فلا اسكت واتحمل شوفته بهالحال!

طلع من الصالة وعافنا نتصفن وحدة بوجه الثانية وراح للاستقبال، امير جاي ينام هناك ويكعد هناك ويجيله ابو كربله وحاكم وكل اخوته يتجمعون يمه بالاستقبال..

ماعرف شلون قنعوه ياخذوه لطبيب نفسي بس اظن ما اعترض مثل الايام الفاتت عبن ما سمعنا صوت صياحه، گعدنا ننتظر رجعتهم على ناار والافكار تجيبنا وتودينا..

-رسمية: الباب جاي يندگ بس لا اجونا خطار

-ليلة: كلللش مو وكتها

-رسمية: كومن كومن وحدة منجن تفتح قفل باب المطبخ

ركضت ابرار تفتح الباب ورجعت وياهة عمة غزوة وعمة ابتسام، وگفن بالباب ودگن ولطمن على وجوههن مادري ياهو موصللهن الخبر وعرفن بالامير هيج صاير بي خوب عمة ابتسام ملخت روحها وتبجيي مصدومة..

-ابتسام: سودة بوجهيي عمت عيني عليكمم ما صدكت بعلي ما صدكت من گالي الزلمة انهد حيلي

-رسمية: اوووف الحمدلله والشكر شنسوي خية

-غزوة: خاف سحر رسمية؟؟

-رسمية: شيخ علي ما يرضى اجيب هالطاري يكول مو سحر

-غزوة: وهسة وينهم؟؟ وينه اخوي اريد اشوفه

-رسمية: اخذ اموري وراح ويه ولده للطبيب

-غزوة: ان شاء الله خير يارب ان شاء الله ماكو شي

رحت للمطبخ ويه ليلة وتَـمني نحضر ضيافة الهن بس تَـمني دموعها ما جاي تسكت ممرود گلبها وكلما تصفن ترجع تبجي وايدها ترجف تلفانة اعصابها..

-ليلة: خية شعندج هنا انتِ صعدي ارتاحي بغرفتج هلكتي

-تَـمني: لا لا اريد اكون موجودة من يرجعون

-ليلة: انا اصيحلج والله شبيچ

-لا ليلة خليني

بقت ويانه تلهي روحها منا ومناك وانوب راحت تكعد ويه العمات وكلنا وياهة كعدنا ننتظر، عيوننا ما طاحت من الساعة الدقيقة تمشي سنة منتظرين رجعتهم خاطر يطمنونا عبن موبايلاتهم ما يجاوبون عليها..

فزيت من مچاني ويه صوت باب الحوش تنركع ووگفنا ننتظر مثل وكفة ذاك اليوم، طبوا كلهم سوه وهالمرة الامير وياهم بس وجهه يخوف! وجهه صاير ازرررگ وعروگه ناطات وشعره متخربط چن طالع من حرب..

-غزوة: اموري شلونك يبعد عمتك

هز راسه عدة مرات بحركة "زين" وهي راحتله تبوس بي وتسلم عليه وراحتله عمة ابتسام نفس الشي سلمت عليه وتقبلهن چا شبي ويه تَـمني كلما كضته انتفض چن تچوي!

-شيخ علي: سوولنا چاي بوية

اشرتلي براسها عمتي رسمية خاطر اروح اسوي وركضت للمطبخ، ترست القوري ماي وحطيته على النار وطلعت صينية خاطر ارتب بيها الاستكانات..

-سبأ

رفعت راسي فازة على صوت علي التـقي، طب للمطبخ مهموم ومن الباب ذب حسرة تعبان وتقدم يجي يوكف بصفي..

-شبيك يا حيلي

-مابيه شي اجيت اساعدج

-بشنو؟

-بالچاي، هاي الصينية احط بيها الاستكانات؟

-تقي لا روح انتَ انا ارتبهم

-لا ماعندي شي

-يااء علي التـقي شمالك شني انتَ تسوي روح

-ليش عيب؟

-اي عيب طبعاً

-هاي شني ليش عود عيب؟

-عبنك زلمة وما يصير

-ههههههه ضحكتيني يا سبأ وانا مالي خلگ

-على شنو تضحك

-ولاشي سلامتج، ما دليتيني وين الاستكانات؟

-انا اجـ...

-وينهن؟!!

نترها مخنزر خفت اتجادل وياه فـ اشرتله على الكاونتر ادلي مچانهن، راح للكاونتر فتحه وطلع الاستكانات شال چم واحد بأيده وحطهم بالصينية ورجع يجيب الباقيات.. اعاينله ومستغربة كلش شعنده وليش ما يرضى انا اسويهم؟ شني سالفته بس لا ما يستنظف؟

-سبأ: تره انا طبخت الغده اليوم

-اي عاشت ايدج چان كلش طيب

-انا غسلت اللحم بيدي يعني

-اي فدوة اروحلهن

-چا شبيك هسة؟

-شني

-ليش ما ترضى انا اصب الچاي شبيهم اديناتي؟

دار وجهه عليَّ عاگد حاجبه، بلعت ريگي وضوجتي وياه ووخرت منه رحت للقوري انصي النار من جواه..

-شبيهم ايدچ؟

-مابيهم شي مغسلتهم تره

-ههههههه ادري

-چا ليش انتَ تريد تصب الچاي؟!

-خايبة بعلي مو شكول نعمة انتِ

-يعني شني

-اجيت اساعدج ولج

-ليش؟

-غير مرتي وحامل ماريدج تتعبين

-صدگ

-لا چذب

-لا لا عليك الله صدگ يعني؟

-ولج اي شفت امي اشرتلج ترحين ومحد من البنيات اجت وياچ واحنه عددنا جبير كلت انا اجي اساعدج وابوسچ.. (تلفت منا ومنا واجه باسني على شفتي سريع ووخر) واشبع منج

-ههههههه صدگ يعني؟

-خرب روح ابوچ خوش؟؟

-لا مادري هاي شبيك انا بس متعجبة شون زلمة اجه يصب چاي واكو نسوان

-اخوتچ القنادر ما مسويها من گبل؟

-لا والله اخوتي ما يندلون المطبخ اصلاً

-لانهم عارات

-امي من گبل تكول شغل البيت والمطبخ الزلمة عيب يتدخل بي وما يصلح هاي تقلل من قيمة الحرمة

-مع احترامي لامج حبيبتي وماريدج تزعلين بس هواي تمسلت

-هااا!

ضحك ما مهتم وشال قوري الچاي يصب بالستكانات وانا هم عفته وجبت قندول الشكر حطيته وفرغت كعك وكليچة بماعون التقديم..

-صدگ تقي شصار وياكم علمود امير؟

-سكتي مادري منين ابدي

-ليش؟؟

-خلني اخذ الچاي وصيحيلي تَـمني وحبيبة لغرفة امي

-صار

اخذ الصينية هو شالها وطفر علي النور ياخذها من ايده وعلي السور اخذ ماعون التقديم، اشرت لـ تَـمني تجي وياي وصحت لـ حبيبة وطبينا لغرفة عمتي.. گعدنا ثلاثتنا ننتظر جية علي التـقي خاطر يفهمنا وما طول دقايق وفتح الباب وطبوا هو وعلي الحق..

-تَـمني: فهمونا فدوة والله گلبي راح يوگف

-علي الحـق: تَـمني نريدج سباعية وتتحملين لا تزيدين تعبه تعب

-تَـمني: فهموني الموضوع شكال الدكتور؟؟

-علي التـقي: الطبيب اول ما شافه گال عنه مو طبيعي من اول جملة سولفها وياه گال الزلمة مو خالي

-حبيبة: يعني مسحور؟؟؟

-علي الحق: لااا خايبة

-حبيبة: چا ماعرف السبب شنو؟؟

-علي التـقي: لا يكول السبب ما ينعرف بسهولة بس سألنا هواي اسئلة واغلبهن ما عرفنا نجاوبه عبن يجوز احنه ما منتبهين

-علي الحـق: فـ اجينا الج تَـمني بلچن تعرفين تجاوبينا

-تَـمني: اي شنو كولوا؟

-علي الحـق: انتِ لاحظتي تغير بحالته هالچم يوم؟ يعني هم گلتيله على حاجة ونساها؟

-تَـمني: هالايام لا بس قبل اي

-علي التـقي: شلون يعني سولفيلنا

-تَـمني: مرة گلي يريد يروح ويه جماعته لـ لبنان ومن سألته وره فترة شوكت سفرتكم تفاجئ وگلي شعندي بـ لبنان ومن گتله انتَ گتلي ظل صافن ميعرف يجاوب وراهة گال ها اي بطلنا بعد ما نروح

-علي الحـق: اممم

-تَـمني: ومرة من زمان رحنا لبغداد نساني بالشقة وطلع ويه صديقه وزار ورجع للبيت متأخر وانصدم من شافني عبالك غريبة واكفة كدامه لحدما سولفت وياه شوية ياله تذكرني

-علي التـقي: يعني السالفة قديمة!

-تَـمني: اي والله وكلت لخالة رسمية كالت عادي وطبيعي من الخبصة والمشاكل ديروح من باله

-علي الحـق: شني ياهو ينسى مرته من المشاكل وين اكو هيج كلاوات

-حبيبة: وينسى اخته!!

-علي التـقي: الطبيب يكول يجوز متعرض لصدمة نفسية قوية واثرت على ذاكرته، صاير عنده فقدان ذاكرة وقتي خصوصاً من گلناله كلشي صار بالجديد ما يتذكره چن راجع بي الزمن من گبل 15 سنة

-تَـمني: منين اجته الصدمة النفسية؟؟

-علي التـقي: انا صراحة ربطت صدمته بيوم اجتنا وديان لبيتنا وطاح تتذكرون؟

-تَـمني: اي اي يمكن صح!

-حبيبة: بس هو زين والله زين وكل يوم يجيني ويسلم عليه ويتشاقه وياي ولا تكول بي شي!

-علي الحـق: حبيبة الدكتور گال الموضوع يا اما ضغط نفسي قوي او صدمة وثنينهن يجن بالتدريج مو شرط من اول مرة ويجوز هاي الفترة هم من ضغط على نفسه بالشغل اثر عليه بشكل سلبي وعقله تعب

-تَـمني: وراح يبقى هيج؟؟

-علي التـقي: لا لا الطبيب يكول يجوز ما يطول بالزايد شهر ويرجع نفس گبل كتبله علاج وضروري نخلي يلتزم بي

-تَـمني: يبقى شهر على هالوضع؟! شهر هو ميتذكرني ولا يتذكر حبيبة واخوانه الصغار!!

-علي الحـق: شهر او....

-حبيبة: او شني!

-علي الحـق: عاينوا اريدچن تستوعبن الجاي احچي، الطبيب مو ساحر بس يكول هاي الحالات تصير وهواي يجوه عدهم فقدان ذاكرة وقتي ويطيبون بالعلاج بس بعد كلمن وحالته اكو بيهم بيومين يرجعون يتذكرون واكو بأسبوع واكو بشهر واكو... اكو حتى سنين يطولون

شهكت تَـمني تضرب على صدرها حييل، هز راسه علي الحـق معترض على دموعها البدت تتجمع بعيونها وكال بهدوء كلش..

-تَـمني خوية لا نفكر بسلبية الي يطولون اكثر من شهر حالات نادرة

-حبيبة: واذا امير جان من هالحالات النادرة!!

-علي الحـق: بعد كله بيد الله! حبيبة احنه لازم نراعي ونهتم بي وما نضغط عليه بأي شكل من الاشكال الطبيب يكول عاملوه مثل الطفل شايفة الطفل؟! بالضبطط لازم مثله اذا يگللكم هذا الحايط لونه اسود تگلوله اي اسود بدون لا تتناقشون وياه زايد

-علي التـقي: عبن اعصابه تلفانة وما يسمح لأي ضغط زايد يصير عليه لان أي ضغط اضافي يجوز يخلي وضعه يسوء ويتعب بالزايد

-تَـمني: خلوني اني احجي وياه بس على كيفي والله ما راح اضغط يجوز يتذكرني ويتحسن وضعه

-حبيبة: اي اي خوش فكرة

-علي التـقي: لا تَـمني عذريني ادري بيچ محترگ گلبچ بس ما نكدر نجازف هيج الطبيب حرص ما نخلي ينفعل وهو من يحاچيچ يخبص الدنيا

-تَـمني: فدوة بس خليني احاول الله يخليكم

-سبأ: تقي

اللتفتوا عليَّ كلهم ومن ضمنهم تقي، بلعت ريگي مرتبكة من نظرتهم بس تشجعت من شفت دموع تَـمني على خدودها وحرگة كلبها وكملت الردت اگوله..

-خليها تحاچي مرة وحدة يجوز بهالمرة راح يستجيب لا تكسرون خاطرها اكثر

-تَـمني: اي حبابين ايييي

-علي الحـق: استغفرالله والله مادري شكول

-علي التـقي: تمام.. بس تَـمني عايني اول ما تشوفي بده يعصب ويضوج عوفي وكومي خلينا نتحمل بس هالچم يوم ويلتزم بعلاجه اكيد ان شاء الله ترجعله ذاكرته

هزت راسها اي ومسحت دموعها بالشال مالتها وكامت من مچانها، ركضت طلعت من الغرفة وعافتنا احنه كاعدين ونعاين بوجوه بعض محتارين...

**

"تَـمني"

صعدت بسرعة للغرفة مالتي اركض طلعت ملابس من كنتوري وركضت للحمام اسبح وارتب نفسي مثل المخبلة.. صار كم يوم هاملة نفسي وكلشي مدا اسوي ودا اتأمل من اروحله راح يتذكرني وياخذني بحضنه ونرجع نفس قبل..

رشيت عطر وحطيت شوية تنت لوجهي الصاير اصفر نقطة دم ما ظلت بيه من الهبطة والضياع العشته السبوع الفات واني اشوف امير بهالحال.. رشيت عطر مرة ثانية ولبست شال نظيف طلعته من الكنتور ونزلت اركض ما لكيت أي واحد من الولد كاعدين بالصالة..

-رسمية: شني تَـمني طالعة؟

-تَـمني: لا خالة بس امير وين؟

-رسمية: كاعد بالاستقبال يعني وين يروح

كالتها مقهورة وفتحت ايدها بيأس، هزيت راسي اي وتمشيت للاستقبال دكيت الباب على كيفي ومديت بس عيوني شفته وحده ومتمدد على القنفة..

سميت بأسم الله وفتحت الباب بدون لا اطلع صوت ومديت رجلي اليمين ادخل جوه.. سديت الباب ورايه وكملت طريقي امشي على اطراف اصابعي گلبي ينبض بقوة ومعدتي تگلب من الخوف، اخاف لا يصدني مثل الايام الفاتت وارجع افقد الامل، اخذت نفس عميق وهمست اسمه بخفوت مترددة..

-امير

انتظرته يجاوبني او على الاقل يكعد على حيله ويباوع بأتجاهي بس ما سواها، توقعته نايم فـ ما ظليت واكفة بمكاني ودخلت اوكف گباله ضبط وجفلت من شفته مفتح عيونه وصافن بنقشة الزولية الي بالكاع..

-تَـمني: امير.. تسمعني؟

رفع بؤبؤ عينه يباوعلي بس وجهه جامد بدون ملامح، ابتسمت وتقربت اكثر وگنبصت گباله ضبط خليت وجهي يوازي وجهه..

-تَـمني: هلوو

عگد حاجبه مستنكر وگعد على حيله بسرعة وتدنى يسوي مسافة بيني وبينه، كبرت ابتسامتي وكمت اكعد بنهاية القنفة ودرت بس وجهي اله..

-امير ليش متحجي؟

-شتردين؟

-اريدك

خزرني ضايج ومعصب وقبل لا يحجي شي سبقته وكلت بهدوء..

-امير شبيك ضايج سولفلي على كيفك ولا تعصب

-شتردين مني انتِ؟؟ تره سودنتيتي شبيچ بوية شبيچ ماعندج اهل يكضوچ؟؟

-لا

-هواي صلفة انتِ!!

-اني يتيمة وماعندي اهل منين اجيب؟؟ منين فهمني؟؟

سكت ودار وجهه مني ينطيني گفاه بس ايده ترجف اعصاب ما باقية عنده، گلبي صارت بي رجفة قوية ودموعي ينرادلهن حچاية بعد ويوگعن، ضغطت على چف ايدي واصابعي حيل وهمست بغصة..

-امير انتَ اهلي اني ماعندي غيرك لا تعاملني بهالطريقة فدوة

-استغفررررر الله

-شلون نسيتني اني تَـمني حبيبتك! اني زوجتك!

-طلعي بره

-امير

-خرررب بأمييير طلعييييييييي

عاطها بوجهي بكل قوته وعيونه تتجادح من العصبية، على اثر صوته دخلت امه تركض واجن عماته وحبيبة يهدأوه بس هيهات.. ما استجاب لاي وحدة بيهن ودفع عمة غزوة عنه بضجر وصاح..

-خبلتونيييي هالبت خبلتنيييي خليهااا تروح من وجهييي

-رسمية: اي اي تروح حبيبي بس لا تضوج والله راح تروح

لزمتني من ايدي حبيبة بقوة وطلعتني من الاستقبال تبجي، عيوني مدا اكدر اشوف بيهن من الدموع والشهگة ذبحت صدري حيلي انهد وگلبي معصور عصر تعبت..

-حبيبة: تَـمني تنفسي يا رويحتي تنفسي

-مـ.. مـ.. ميتذ.. ميتذكرني.. ميتذكر.. حـ.. حبيبـ.. حبيبة

-تنفسي حبيبتي تَـمني ولج تنفسي راح تموتين....

**

"حبيبــة"

هدت حيلي البت گلبها راح يوكف ترجف بين ايدي والهوا ضاع من ريتها، تگابلن وياي عبق وليلة وسبأ نهديها وابرار ركضت تجيبلها ماي وشمس واكفة فوك روسنا تهفيلها وتقرا سورة الانشراح..

-شمس: بسم الله الرحمن الرحيم* أَلَمۡ نَشۡرَحۡ لَكَ صَدۡرَكَ (1) وَوَضَعۡنَا عَنكَ وِزۡرَكَ (2) ٱلَّذِيٓ أَنقَضَ ظَهۡرَكَ (3) وَرَفَعۡنَا لَكَ ذِكۡرَكَ (4) فَإِنَّ مَعَ ٱلۡعُسۡرِ يُسۡرًا (5) إِنَّ مَعَ ٱلۡعُسۡرِ يُسۡرٗا (6) فَإِذَا فَرَغۡتَ فَٱنصَبۡ (7) وَإِلَىٰ رَبِّكَ فَٱرۡغَب (8)

-ابرار: صلي على محمد يمة تَـمني صلي على محمد وشربي هذا الماي

-ليلة: ولجن شبيهاا فهمونا!!

-شمس: اظنه صاح بوجهه واخترعت البت

-عبق: بنات وخروا عنها البنية فحطت تحتاج هواا

وخرن كلهن عنها وشمس باقية تهفيلها ونيمت البت على رجلي، ضمت وجهها بشالها وبچت بچي بعمري وحياتي ما شايفتها تبجي هالشكل تبجي بونين مهضومة ومكسور افادها..

بچيت وياهة ماعرف شسوي شنو يجي بيدي واكدر اخفف من وجعچ يا تَـمني، انا اخيته وما عرفني كلما شافني وكال ياهي هاي البت وليش ما لابسة حجاب من عدنا ومن ابوي يگله هاي اختك حبيبة ما يصدگ ويكول حبيبة صغيرة هاي البت جبيرة..

گوة هدأتها وقنعتها تصعد لغرفتها ترتاح، اجن عبق وليلة ويانه وبقن يمها بالغرفة لحدما غفت ياله طفينا الاضوية وطلعنا من غرفتها نعوفها تستريح شوي..

-ليلة: اظن راح اجيب من وره هالمصايب

-حبيبة: امشي انتِ هم ارتاحي بغرفتج ولا تتحركين زايد مو زين عليج

-ليلة: لا وين اكدر ارتاح وانتم بهالوضع

-حبيبة: بنات تقي يكول لازم ما نحسسه اكو شي غريب ونتعامل وياه چن طفل.. خلونا نمشي حياتنا بشكل طبيعي خاطر ما يعوفنا ويطلع من البيت من يشوف ضغط صار عليه

-عبق: صح كلامج لازم وتَـمني اذا متتحمل الوضع خليها تجي لبيتي ترتاح كم يوم ببينما زوجها يتحسن

-حبيبة: الله كريم هسة لا نستعجل وخلي نشوف امي شتكول

هزن روسهن وطبت ليلة لغرفتها وانا وعبق نزلنا جوه، لليل الامـير علي كاعد بالاستقبال وحده وبس ابا الحسن يروحله يسولف وياه بمواضيع بعيدة كل البعد عن الاحداث الجديدة..

ثاني يوم امير دگ رجل الا يطلع يشوف ضرغام وليث وابا الحسن كضه يقنع بي من جهة وعلي التقي يقنع وابوي يقنع واخوي قافل ما يرضى الا يشوفهم يگول مشتاگلهم صار اسبوع ما شايفهم.. ما هاد ولا سكت الا من اجه ابو كربله وگاله الولد مسافرين وما يكدرون يرحولهم..

هدأ واستچن بس ظل معصب وضايج منهم يسب بيهم ويغلط عبن راحوا بدون لا يودعوه وهيج مشى اليوم واحنه بس نسمع لصوته العالي الجاي من الاستقبال ونتصفن..

اليوم الوراه عدنا دوام وامتحانات مد لازم نروح ورغم وضعي الصعب وسجن امي الاخذ كل حيلي وما راحت من بالي ولا دقيقة واتحارب ويه عقلي محارب خاطر ما افكر ببها، جاي اضغط على نفسي خاطر بس اتخرج واخلص من الجامعة بس هسة انضاف هَم جديد لهمومي وهو هَم اخوي الامير..

ضغطت على تَـمني خاطر تجي وياي للجامعة عاد بس تمتحن والحمدلله كدرت اقنعها واجت وياي بس شنو الفائدة؟ الطريق كله گضته تبجي وتمسح بدموعها من وصلنا علي السور تعلمت على الامير كل يوم يوصلنا الفترة الفاتت وهسة من شافت غيره ياخذنا ماتت بجي..

كل يوم الصبح اكعد اتأمل الامير متحسن وضعه بس للاسف، للاسف ما جاي يتحسن بالعكس احس بديت افقد الامل! صارت عصبيته مضاعفة وابا الحسن يكول يفز من نومه كاره الدينا ويريد بس يتعارك، يروح لغرفة امي رسمية وينام على رجليها ويصيحلها "حبوبة"! وصلت بي يتيه بين امه وبيبيته المتوفية صارلها سنينن!!

كلما نسأل الطبيب عن وضعه يكول تحملوا وميخالف الموضوع محتاج صبر.. يوم وره يوم بدينا نروض عقلنا اخوي راح يتحسن يحتاج بس وقت وتَـمني ما زالت تحط كرسي يم باب الاستقبال وتسمع لصوته وسوالفه ويه ابا الحسن وباقي اخوتي وتبجي بگلب دامي عليه وعلى ايامها وياه..

-حبيبة: مو كافي يا تَـمني كافي لا تأذين نفسج اكثر

-تَـمني: عوفيني حبيبة فدوة

-حبيبة: ليش تكعدين هنا يا حبيبتي والله اموت قهر من اشوفج بهالحال

سكتت تمسح عيونها ونزلتهن لاصابعها تلعب بأطراف الشال، بلعت ريگها ويه غصتها وكالت بحس مبحوح..

-تَـمني: اكول بلكت الله اسمعه يجيب طاريي بشي ويتذكرني

-حبيبة: الولد يمه كاعدين اذا جاب طاريچ بأي شي ما راح يقصرون بعلي يجون يركضون عليج خاطر يبشروچ، گومي حبي مو زين تكعدين بعتبة الباب

-تَـمني: اريد اكعد هنا حبابة ماريد اكوم

-توتة

-بس شوية بعد واجي وياچ والله

-مو..

-حبيبة والله مشتاقتله خليني

الكسرة والحسرة الي بصوتها دمرتني، ما كدرت اسوي شي غير اعوفها براحتها واروح اكعد بغرفة شمس يم جهالها الجاي يبهذلوها..

-شمس: شلون صار امير حبيبة؟

-بعده خية

-شمس: اووووف اووووف

-الحمدلله والشكر

-والله يا حبيبة مادري شكول

-شني حبي صاير شي وياچ؟

-حبيبة انا گلبي ممرود وما جاي اتهنى بشي

-ليش؟

-وجه ولدي مو خير عليكم يا خيتي

فكيت حلكي مصدومة من حچيها، هزيت راسي معترضه ورجعت حمودي بفراشه وكلت محترگ دمي ومقهورة عبن تفكر هيج..

-لا شمس!! لا ما ارضى تكولين هيج تره هذول الاطفال مالهم ذنب! ذولة ملائكة مالهم ربط بوضع البيت بالعكس اجونه نعمة ورزق من الله سبحانه

-ادري بس والله مستحية منكم وامي تكول هضيمة عليهم اخاف تفكرون الجهال گصتهم فگر عليكم وفگروا البيت

-يااا خية صدگ تحجين! لا عفية لا احنه ما نفكر هيج شمس بداعتي لا تحجين هالشكل والله ازعل عليج

-مادري انا بس مقهورة من الجاي يصير بينا

-الحمدلله والشكر حبي حالنا احسن من هواي ناس

هزت راسها مأيدتني وشالت ابنها ترضعه، بقيت كاعدة يمها واعاين للجهال واخذ طاقتي الراح احتاجها بالايام الجاية منهم..

-شمس: حبيبة هاي عمتي تصيحلج

-اي كايمة

كمت اركض اطلع على صوت حسها جاي من الصالة، نشفت ايدها المبللة بدشداشتها واشرتلي على المطبخ وكالت..

-رسمية: تعالي يمة حبيبة هاي صاحبتج اجت

-حبيبة: منو؟

-رسمية: مادري هاي اخت الدكتور

-هاا حور

فرت ايدها بحركة "ماعرف" وعافتني وراحت، رتبت شعري بيدي وطبيت للمطبخ شفت حور واكفة هنا تستحي تطب..

-هلا حبي حورية

-هلو حبيبة شلونچ

سلمت عليها وبوستها وكلتلها تفضلي بس ما رضت تطب وظلت واكفة بمچانها..

-يا خية ليش ما تطبين؟

-اخوية ميقبل هو كوة جابني كال بالباب توكفين حتى بس اصيحلج تطلعيلي

-صدگ جذب خوب يتصل بيج

-لا ميقبل حبيبة خليني هيج احسن

-دكتور حاكم هم صاير حاكم وياچ

-هههههه لا ولج مو حاكم هذا اخوية حسام حاكم ميحجي شي

-هاا ثنينهم جايين لو شني؟

-اي اجوا يزورون اخوج امير

-هلا بيهم خية چا كعدي انتِ على الكراسي هنا خلني اجيبلج شي تبلين بي ريگچ

كعدتها على كرسي ميز الطعام بس البت متوترة، كاعدة على اعصابها وكل ساع عيونها تطير على باب المطبخ من تسمع صوت اهل البيت جاي من جوه..

-حور تشربين عصير لو چاي؟

-أي شي حبي

صبيتلها استكان چاي عبنه حار وهستونه مسوي وحطيته كدامها على الميز، ابتسمت وكعدت گبالها على الكرسي ارحب بيها..

-حور: وجهچ هواي متحسن عن قبل حبيبة راجع الدم بي

-وين يمعودة هو بقى بينا دم وره الصار بينا

-لا الحمدلله وضعج افضل صح اخوج مرض بس على الاقل اللتهيتي ونسيتي امچ

همست كلمة "امچ" بصوت ناصي كلش مستحية، سكتت ماعرف شكول بس صحيح الجاي تكوله لولا وضع الامير ما انزل ولا ارجع اكعد وياهم واللتم ويه اهلي چنت گبل ثلاث اشهر گوة يسحلوني على غده وعشا وبس اكمل ارجع اصعد فوك لمخبأي..

-حور: والله متت قهر من كال حاكم اخوج مريض كللش ضجت عليه يشهد ربي

-شنسوي بعد خية الحمدلله

-لا تخافين والله حاكم يكول ان شاء الله ترجعله ذاكرته ويتحسن على العلاج بس ضروري يلتزم بي ويرتاح لازم يرتاح وينام هواي حبيبة ولحد يضغط عليه حاكم گالي انبهج الج بالذات لانج عاقلة

ابتسمت اهز براسي مفتهمة وصدگ هذا الجاي نسوي، جاي نريحه واصلاً علاجه يخلي ينام هواي فـ بدون لا نضغط عليه نلگاه غافي..

-حبيبة: حور محد افتهم بوضع الامير ابوي اكد علينا كلنا ما نطلع سالفته بره لخاطر سمعته تعرفين الوادم ما يرحمون

-ادري اي اي حتى اخوية نبهني ماجيب طاري كدام احد

-فدوة لگلبج

-محتاجة شي انتِ حبي؟ شلونها صحتج؟ وحالتج النفسية؟

-الحمدلله على كل حال

-حبيبة اعرف الدتمرين بي صعب بس انتِ قوية وگدها والله گدها اني منج اتعلم الصبر وتجيني القوة

كبرت ابتسامتي من كضت ايدي تحطهم بين ايدها وعصرتهن حيل وفاجأتني من همست بصوت ناصي چن ماتريد احد يسمعها..

-طليقچ هم دتتواصلين وياه؟ اكو نية ترجعون سوه؟

-لا اكيد

-هاا

-ليش تسألين؟

-لا هيج ماكو سبب بس كلت يجوز يغتنمها فرصة ويريد يرجعچ بعد الاحداث الصارت وياكم

-لا ما فتح هيج موضوع ويانه

-احسن

-ليش

-ماحبه

ضحكت على ملامحها تكشول بيهن ما عاجبها، والله ولا انسى من كلتلها انا تطلكت چنه بوكتها نسولف على الموبايل هي ببغداد وانا هنا وشلون عاطت بكل صوتها فرحانة ومن انتبهت على روحها استقرت واعتذرت مني.. ههههههه دائماً تغير مزاجي هالبت احب اسولف وياهة..

-حور: تعالي خليني اغير مزاجچ البارحة رجعنا من بغداد اني وامي والحمدلله تحاليلها كلهن سليمات وراح نكمل تجهيزات عرس اخوية

-بالسلامة يا روحي الحمدلله والشكر والله چنت شايلة همها

-اي انوب اخوية خبصنا خبص يريد يتزوج مل وتعب من التأجيل فـ الحمدلله را...

گطعت جملتها من انزاحت عينها على جهة الباب، اللتفتت اشوف شبيها وانتبهت لـ سور ونور واكفين بالباب وصافنين علينا..

-علي السور: ما چنت اعرف جايينا خطار، السلام عليكم

-حور: عليكم السلام

-علي السور: چا ليش كاعدين بالمطبخ حبيبة فشلة من البت

-حبيبة: اي جاي اگللها بس...

-علي النور: انا طالع سور اللحگني

عكدت حاجبي من نبرة صوته واسلوبه الناشف لا سلم ولا حچى شي عبرنا وطلع من المطبخ وعلي السور ركض يطلع وراه ورجعت وحدي ويه حور..

-حبيبة: هذا شبي اخوي ما سلم

-حور: عادي عادي هههه عادي شباب هالوكت كلهم هيج

-اي صح..

سكتت من شفت خدودها مگلوبات طماطات وگصتها عرگت هاي من غير ضحكها الماله مبرر، شالت استكان الچاي كله صكته دفعة وحدة وانهلط حلگها ولسانها كامت تصيح بصوت ناصي تخاف لا يسمعوها..

-حبيبة: چا اكو وحدة تشرب الچاي هيج ولج حور

ركضت اجيبلها ماي بارد وحطيته بيدها، ما لحكت تشربه واجه صوت اخوها حسام من بره يصيحلها خاطر تطلع..

-رايحة اني حبيبة يلا باي باي اشوفج باجر

-ولج ما شربتي الماي

-ماريد ماريد صرت زينة باي

-شبيچ تركضين خايبة

كضيت ايدها اوگفها وفلتت نفسها مني مخبوصة، هزت راسها معترضة وكالت مستعجلة..

-ولج اني كوة خلاني اجي لبيتكم ماريد اتأخر على حسام بااااي

-الله وياچ

ودعتها للباب وطلعت، رحت على الشباچ اعاينلها منا اشوفها تركض وذيل حصانها يركض وياهة لحدما وصلت يم اخوانها، حاكم وگف يسولف ويه اخوتي وحسام وكف على جهة يحجي وياهة بس مبين معصب او ضايج منها مادري..

ظلت براسي ملامحها الخايفة وبقيت افكر بيها لحد ثاني يوم رحت للدوام وتلاگينا مثل العادة وكالت جابها اخوها حسام وهو راح يرجعها بس جانت كلش ضايجة ومزعوجة..

-شبيچ حور مبين ضايجة؟

-اووووف كله من وراه

-ياهو

-حسام! ولج موتني موتني موتنيييي

-شبي وياچ

-شاد ويايه مو شلون مچان ومتخبل ماكل راس حاكم الا نرجع لبغداد ميقبل يعيش هنا بعد

-ليش؟؟

-هيج ضايج من شغلة

-وحاكم شيكول؟

-ميقبل يگله شغلي هنا ماكدر اعوفه وامي والبنات تقبلن عيشتهن هنا وانتَ لازم تتأقلم

-اي؟

-وگبت بيناتهم البارحة وصارتلج عركة الها اول مالها تالي حسام يكول لحاكم اخذ امي والبنات وارجع بيهن لبغداد وانتَ ابقى هنا

-وحاكم شكال؟!

-مقبل طبعاً! حسام دگه ومدگوگه ميريدنا اني واختي نبقى هنا متخبببل!!

-من شني؟

تنهدت تهز براسها ضايجة وحسيتها مترددة ما تريد تسولف وتريد بنفس الوقت، ما ضغطت عليها وعفتها براحتها بس هي ما تحملت تسكت اكثر وكالت..

-اسولفلچ ومتكولين لاحد!

-اكيد

-باعي.. اختي انخطبت لواحد وياهة بالدوام والرجال يجنن حبيبة مو شكل لا لا يعني شكله كلش عادي بس اخلاقه واسلوبه وفد محترم وتصرفاته رجولية ومواقفه ووگفاته كلللش حلوة وياهة

-حلوو وشصار؟

-اجوا اهله يخطبوها وحسام تخبل گوم الدنيا ما گعدها تعارك ويه امي وسوالنا هوسة بالبيت ما قابل بهالزواج

-هاي ليش!

-اكول ومتزعلين؟

-كولي ولج

-والله مو قصدي شي هذا هو هيج تفكيره تره

-شنو تفكيره؟

-يكول هاي تاليتنا نزوج بناتنا لشروگ

-امممم وحاكم شگال؟

-حاكم من افتهم بالموضوع ما قبل وگله هذا مو سبب حتى نرفض رجال محترم شاري اختنا بس حسام حط روحه وگال حتى لو صارت قسمة اخربها وما اخليها تتم اختي تستاهل واحد احسن من هذا

-وحاكم شنو رأيه!

-ما قبل وگللها مالج علاقة اذا انتِ مقتنعة بالرجال من باجر ابدي اسئل عنه واستفسر عن وضعه واخلاقه بس اختي خافت وبطلت كالت ما اخسر اخوية علمود رجال

-يا عيني

-اي بعد هي هاي شخصية حسام ممتقبل العيشة هنا حبيبة واحنه ملينا من تصرفاته حتى امي نص مرضها منه ومن وره عناده

-وحاكم؟

-اكلج شسالفة كل كلمة والثانية سألتي عن حاكم هههههه

-هاا؟ لا ولج مو انا ادري بي الجبير وچلمته التمشي

-ماكو هواي فرق بينه وبين حسام

-هاا.. الله يهدي ان شاء الله

-اني ما اگلج اخوية حسام مو زين لا والله كللش يحبنا ويخاف علينا وهو بسبب حبه وحرصه المبالغ بي دنختنگ وصايرين هو وحاكم من الروس

ضحكت بآخر جملتها وضحكت وياهة شنسوي شنو اكو اسهل من الضحك بهيج مواقف، نضحك والدنيا تضحك علينا وتلطمنا من كل جهة..

رجعت للبيت ومثل كل يوم ماكو شي جديد، نكعد نتصفن وننتظر الله سبحانه وتعالى يزيد من رحمته علينا ويشافي اخوي ويرجع لذاكرته ويمسح على گلب مريته التعبت من هالحال..

باليوم الوراه سويت ريوك ويه البنات واخذت السفرة للاستقبال وحطيتها گدامه مبتسمة، توترت من نظراته ظل يعاين عليّ من فوگ ليجوه وانتبهت لـ علي الدر يأشرلي اطلع بدون لا احجي شي وياه.. سويت مثل ما يكول بس گبل لا اخطي خطوة بره الاستقبال جمدت رجليه من سمعت الامير يكول..

-حبيبة

اللتفتت عليه بگلب ينبض حيل وابتسامة تردد مرسومة على وجهي، مسح على لحيته الصايرة طويلة وكال بعد هدوء دام لثواني..

-كبرانة هواي

نزلت دموعي تغطي على ابتسامتي وهزيت راسي بـ اي ما مصدكة هو تذكرني.. او خليني اكول اقتنع انا اخته حبيبة الجانت طفلة صغيرة..

-ابا الحسن علي: اقتنعت اموري؟؟ اقتنعت هالبت هي حبيبة نفسها!

-الامـير علي: اي.. تشبهها

ضحكوا كلهم وهو ضحك وياهم بس چنه بغير عالم وما مفتهم على شنو يضحكون، من فرحتي كعدت وياهم اتريك وابوي وامي ابتسامتهم وضحكتهم ما غابت فرحانين بهالتطور ودعينا من ربي كون تَـمني هم يتذكرها بس حريمة ما تذكرها..

حال تَـمني جاي يسوء واليأس بده يتخلل بين شرايينها خصوصاً من طلب الامير يطلع من البيت ويروح لـ رفل! راد يشوف رفل بس ما حچاها گدام ابوي گال بس لابا الحسن وصدمنا من حسن كال الاامير استقتل خاطر يشوفها ويحاچيها عبنه مشتاقلها!

-تَـمني: رفل؟؟؟ يشتاق لرفل وميشتاقليي؟؟؟

-رسمية: ولج يمة ما يتذكرج نااسي الزلمة ناسي يا بنيتي

ما جاوبت امي وصعدت لغرفتها تبجي، تنهدت امي محتارة ماتعرف شتكول وشتتصرف ويه تَـمني وشلون تهون عليها بس اخر ما توصلتله امي هو تدزها چم يوم لبيت خالتها تزورهم بلچن اذا ابتعدت منه شوي ترتاح والامير هم بلكت يفگدها..

**

-اجيتتت وجعععععع

-وجعع اليوجع گلبج بت العار شكو تصيحين؟؟!!

-رهف: وخر مني سامرر لا انعل ابوك وخر

-سامر: انا اعلمج الا اكول لابوي خاطر يطيح حظج

-رهف: گله خاطر افرك حلگك بقندرتي!!

-سامر: تهيي بهيي عود شني تخوفيني؟؟ والله ولا اخاف منج واليوم الا اكول لابوي يكتلج كتلة يطلعلج جلد جديد!

ما استحملت اسمع هالطلي واسكتله وجريته من زيجه وبطحته بالكاع واخذت ارفس ببطنه حييل رفسات اريد اطلع روح ابن اخوي العار هذا..

-رهف: مووت وخلصني منك موووت

-سامر: ولججج انا تطگينيي اناااا

گمز من الكاع وهجم عليَّ وسحلني يعتني من شعري للكاع، شال راسي ورگعه بالكاشي حسيت دماغي تطشر والهوا ضاگ بصدري.. دفعته عني بضعف اريد ادافع عن نفسي وما كدرت كضاني من وجهي ويصفگني راشديات حتى ضوه الله طفاه من عيوني وصرت اشوفن بس اسود..

-وووولك كوم عنهااا

شهكت من غمج روحي من سمعت صوت امي اجتني تركض ووخرت سامر عني، وخرت حفيدها العاق! بقيت بالكاع ممطولة واسمعها تعاركه وترزل بي وهو يجاوبها اضعاف رزايلها حتى سب وفشار يفشر عليها..

-صابرين: امشيي اطلع من البيت ياا **** امشييي

-سامر: طالع وحسابجن بعدين انا اعلمجن ******

طلع من البيت وامي اجتني تكومني من الكاع، كوة وكفت على حيلي دايخة وزادت دوختي من صفگتني راشدي شعلت بي وجهي..

-صابرين: انا چم مرة كتلج لا تتلاسنين ويه هالنعال؟؟ هااا چم مرة؟؟

-وانتِ شني هسة صفگتيني خايفة عليّ لو ضايجة

-انچبي وولي شري الهدوم گبل لا يرجع ابوج ويخبصنا

دبچت رجلي بالكاع ميتة قهر وحرگة منها وعفتها وطلعت من المطبخ بس اكييد لازم بكل مرة گبل لا اروح تغمني وتكول بشوطة..

-صابرين: الغبرة بت الغبرة شلون چان شعرچ وشلون صار!

ما اهتميتلها وطلعت من المطبخ مليت من نفس الاسطوانة تتكرر كل يوم! كل يوم يمر امي تستحيف على شعري الطويل الگصيته بين ليلة ويوم بس لاني مكتئبة بس ياهو يعترف بشي اسمه اكتئاب ويهتم لرهف ومشاعرها؟ محد!

طلعت الهدوم من الغسالة وطلعت بيهن للساحة اشرهم مالي خلك اصعد للسطح، ادري راح اترزل من كل الموجودين بالبيت بسبب هالتصرف بس طزز انعل ابوهم لابو الخلفهم..

انفض بالهدوم واشرهم وافكر بـ سبأ اويلي شكد متلهفة على شوفتها ومتمنية اشبگها وارتاح بحضنها.. من بعد موت زيد البيت صار ما ينحمل امي اربعة وعشرين ساعة معصبة لو تبجي ومرة سلطان عافت البيت وراحت لاهلها زعلانة وابوي يمشي ويتعارك ويه ذبان وجهه وانا الطايحة بيناتهم اركض بين جهال اخوي واخوتي الشياطين.. انا اللازم اتحمل كلشي واسكت وينج با سبأ تجين وتعينيني..

-رهف: بعلي هسة لو يجيني چلب يخطبني هم ارضى بي ولا اكعد ويه وجوههم التجيب القهر

كلتها بصوت ناصي عبني اختنكت وانا اسولف بگلبي حتى صوتي نسيت شلونها نبرته.. تشتت تركيزي ويه افكاري السلبية صوت دگ باب الحوش، ذبيت من ايدي ورحت افتح الباب عبن ماكو واحد من اخوتي بالبيت..

-رهف: منو؟؟

-انا

-منو انتِ؟

-انا حبيبة فتحي الباب رهف.....

يتبع 👑....

━━━━━━ ♛ ━━━━━━

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

انه وگلبي النحبك طولت عنه

گلي شغيرك وصرت مو منه؟...

━━━━━━ ♛ ━━━━━━

"حــبيبة"

اجه عليَّ علي السور خاطر يرجعني من الدوام وگضينا الطريق كله سوالف بس اكيد ماعدنا سالفة غير موضوع الامـير علي وحالته الي بده يتخللنا الملل واليأس من گدما طولت والمشكلة ما جاي يطيب!

-علي السور: ما يرجع نفس گبل حبيبة ما يرجع

-حبيبة: سور ليش تتشائم شبيك انتَ والله لو يسمعك ابوي يطيح حظك!

-المشكلة بي لازم ابوي يستوعب الامير ما راح يرجع نفس گبل حتى لو رجعت ذاكرته ما راح يرجع طبيعي!!

-اهوووو اسكت سور ضوجتني بسلبيتك

-خايبة بزعت روحي حسبالج انا مكيف على وضعه؟ شني كلما اجي يمه وگالي شوكت كبرت وليش هيج متغير وشلون طلعتلك لحية وشارب

-اي ما يتذكرنا بهالعمر بس راح يقتنع احنه كبرنا وراح يصدگ هو الي متيه مو احنه وراح ترجع حياتنا نفس گبل الدكتور كال هيج والله وكال الموضوع يحتاجله وكت انتو بس تفائلوا بالخير

-ان شاء الله يارب

سكتت اهز براسي وافكر بكلام علي السور وبسرعة نفضته من عقلي، ماريد اتشائم ماريد، امير راح يتحسن اني حاسة بهالشي الصار مجرد ينرادله وقت وصبر حتى تَـمني دائماً اذكرها راح يتحسن ولا تخاف وتتشائم..

-اگلچ حبيبو

-ها

-شخبار بيت عمي مسعود؟

-شمدريني

-سمعت شغلة بس ما متأكد من صحتها

-شنو هي؟

ذب نفس متردد وظلت عيونه على الطريق وايده على الستيرن، حك لحيته وگال شي بحس ناصي بس ما سمعته..

-شگلت؟

-جاي اگول جاي خاطب على بنيتهم هاي مدري شسمها نسيتها

-يا بت؟

-ولج بت عمنا مسعود

-هو منيلهم بت ما متزوجة غير رهف

-اي هي رهف

-چا ما تكول اسمها شبيك

-اي هو قصدتها بس شسمه.. نسيته اي

-تنسى اسم بت عمك؟؟

-اهووووووو عاد حبيبة لو لحت على شيي

-المهم شبيها جايها خاطب؟

-اظن اي

-نعرفه احنه مو؟

-اي

-ادري

-شني تدرين يعني تعرفين بالسالفة؟؟

-اي

-صدگ؟؟

-اي چنت شاكة خليهم الله يوفقهم ويسعدها ان شاء الله

-شسالفة حبيبة! شلون تنسعد ويه زلمة بكبر ابوها!!

-شنو؟

-خال غسان اصغر من مسعود بسنتين تره

-خال غسان؟ ياهو هذا

-خرب حظييي ولج غسان غسان ابن عمنا الاغبر اخو صلاح! الموجود بحياتنا وما محصلين منه شي بس اللعبان الروح وضيجة الخلگ!

-هو خاطب رهف؟؟

-حبيبة فتحي عقلچ وافتهميي جاي اگلج خالهم الخاطبها خال غسان وصلاح!!

-خالهم؟؟ ولك هو بس خال واحد عدهم وبكبر جدي

-اي هو هذا الخاطبها ومسعود يريد ينطيهم

-لااا صدگ!

-والعباس! حبيبة لازم تساعديها وتبلغيها ترفض خليها تصخم روحها تلطم روحها تزلغ خدودها تنتحرر المهم ترفض!!

-ليش هي رهف تكدر لابوها ياهو يگدرله مسعود

-تكدر لسان رهف محد يكدر يتحكم بيها بس لازم نبلغها گبل بوقت خاطر تسويلها خطة وما تنحط امام الامر الواقع ويطيح حظها

-ياربي شلون سالفة هاي خاف ابوها يجبرها سور؟؟

-اخذج لبيتهم هسة؟ اخذج خاطر تسولفين وياهة وتفهميها؟

-مادري سور خاف ابوي ما يرضى ومن يفتهم بينا رايحين يرزلنا ويكول احنه بيا حال

-من تفهمي بالسالفة صدگي راح يقتنع ويعذرنا

تنهدت اهز براسي مستسلمة صار لازم اخصمها واحچي وياهة بموضوع منتصر وافهمها عفته انا ومستحيل ارجعله لاني متأكدة اذا يفتهم بيها تنخطب لزلمة ثاني راح يروح يخطبها وهي ترفضه لان رهف بت عمي واعرفها عدل ما راح تقبل بي اذا ما فهمتها انا مطلعته من گلبي وما رايدته..

-حبيبة: سور

-ها

-انتَ ليش هيج مهتم لرهف؟

-شني؟

-ليش مهتم لرهف لهاي الدرجة؟

-ماكو سبب

-چا؟

-شني حبيبة بت عمي طبعاً راح اخاف عليها

-ليش معترف ببيت عمك انتَ وتخاف عليهم

-سكتي حبيبة واگفتلي على الچلمة

ضحكت على وجهه من كل عقله ضاج وكعد ينافخ ويستغفر، حسيت بي شي مو طبيعي بس ما طوخت وياه مبين نفسيته مو تمام هالفترة واظن الكل نفسه..

-علي السور: سيارات الولد ماكو معناها الكل طالع بس مع ذلك لا تطبين لبيتهم وحاچيها بباب الحوش

-خوش

-أي شي يصير بسااع تتصلين بعلي يا حبيبة اذا غلستي وكعدتي تتسبعين فوگ روسهم اموتج

-لا شبيك والله ما اطب جوه من الباب احاچيها واطلع

-چا يلا نزلي وخلي الموبايل بيدج

-اي

طلعت الموبايل من جنطتي وطلعت من السيارة، دگيت باب الحوش وكل ساع اتلفت على سور كاعد ويسويلي حركات "دگي الباب اقوى" هزيت راسي وهستوني جاي اريد ادگها بعد وانفتحت الباب وطلعت بوجهي رهف..

-حبيبة: شلونچ رهف

-رهف: صاير شي حبيبة؟؟ سبأ اختي بيها شي؟؟؟

-لا حبي لا تخافين

-چا شصاير؟

-شني يعني ما راح تكليلي تفضلي؟

-اي اي اكيد هلا بيج

فتحت الباب كلها وطبيت جوه بس بقيت واكفة بباب الحوش وما خليتها تطبگ الباب، ابتسمت من شفت ملامحها المتفاجئة يا الله شگد مشتاقتلها، بوستها وجريتها لحضني وشبگتها حيل..

-شلونچ رهوفة

-زينة

همستها بتردد وخفوت وخرتها من حضني وكبرت بسمتي على شكلها چن جنية واگفة گبالها عرفتها خايفة على اختها وحسبالها اجيت خاطر امهدلها موضوع يخصها خاطر ما تخترع..

-حبيبة اذا سبأ بيها شي احجي بساع!!

-هههههه شبيچ ولج مابيها شي والله اختچ وفرخها زينين

-فرخها؟

-حبيبة: اي چا مو سبأ حامل

-عليج علي؟؟؟

-هههههه اي والله

-صدگ تحجين!! اللهم صل على محمد وال محمد الحمدلله والشكر يا رويحتي فدوة اروحلها يمة خيتي حامل

-حامل وتسلم عليج هواااي ومشتاگتلج هم

-رهف: يا بعد حيلي فدوة اروحلها، شلونها هي؟؟ زينة؟ مرتاحة؟ وضعها مستقر هي وعلي التقي؟

-ليش ماعندج تواصل وياهة؟

-لا والله

-ليش؟ وموبايل امج شبي

-اخذه ابوي گبل فترة من تعاركوا وبعد ما رجعه الها

-سودة عليَّ لا تخافين عمري سبأ كلش زينة وهي وتقي كلش مرتاحين الحمدلله

-رحم الله والديج حبيبة الله يريح گلبج مثلما ريحتي گلبي بأخبارها

-يا رويحتي انتِ

-چان طببتج جوه بس اخافن لا يشوفوج جهال اخوي سلطان واسببلج مشاكل

-لا لا انا اجيت خاطر اطمنچ على سبأ واسولف وياچ بموضوع

-خير ان شاء الله خو ماكو شي حبيبة؟

-صراحة اكو..

مديت ايدي لشعرها اتلمسه على كيفي وذبيت حسرة، هاي وين شعرها الچان راح يوصل لركباتها شوصله لجوه اذنها؟؟ رهف الشعرها ينضرب بي المثل بالعشيرة بالطول والثخن هيج تبتره؟..

-حبيبة: عايني رهف اليوم سمعت عن شغلة وصراحة كلش ضجت وانزعجت

-شنو هي؟

-جايچ خاطب عن طريق غسان ابن عمنا

-هااا

-اي وصراحة الرجال چبير كللش چبير بگد ابوج او يجوز اكبر مادري هو يصير خال غسان

-صخام!

-وانتِ تعرفين ابـ..

-ابوي! ابوي اكيد راح يرضى ينطيهم!

-اي فـ انا اجيت ابلغچ خاطر تلگين لروحج حل اعرفج شاطرة وتكدرين تسويلج سالفة تتملصين من هالخطبة

-الف رحمة على والديج والعباس ماعرف شون اجازيچ يا حبيبة

-لا تجازيني بشي حبي.. ورهف عندي موضوع ثاني وياچ

-اي كولي؟

-انتِ اكيد عرفتي انا تطلگت من منتصر...

سكتت اعاين لوجهها اريد ادرس ملامحها بس رهف مو هينة وتكدر تتحكم بوجهها وتصرفاتها وما تبيّن بشنو جاي تحس..

-حبيبة: وماكو أي شي يجمعني بي بعد لا انا اريدنه ولا هو

-الله يعوضج بالاحسن حبيبتي

-امين.. بس رهف انا اكتشفت شي گبل لا انفصل

هنا تغيرت علومها، وخرت شعرها عن عيونها وبلعت ريگها مرتبكة، هزت راسها بـ معنى كملي بدون لا تنطق..

-عرفت انتِ ومنتصر تحبون بعض

-حبيبة والله انا..

-لا تحجين شي ولا تبررين رهف مو ذنبج كل الصار وصراحة الغلط من عندي هم چان لازم انتبه لـ منتصر وبروده وياي واربط ان اكو وحدة ثانية براسه

-جاية خاطر تگليلي خطب وراح يتزوج مو؟

-اي

ضحكت مستهزأة وظلت تهز براسها مرات متكررة، مسحت اسنانها بلسانها تخفف من توترها وكالت..

-الله يهني سعيد بسعيده

-رهف منتصر يريد يخطبچ الچ

-شنو!

-اجيت اگلچ يا بت عمي الزلمة طالع من گلبي ولا انا الرايدته ولا هو، كلشي ما يجمعنا بعد وزواجي منه چان غلطة وصححتها من تطلگت.. من الاول انتِ ومنتصر مكتوبين لبعض والله رايدكم لبعض واذا تكولين ابوج ما راح يرضى بي فـ ابوي يگدر يتدخل واذا ابوي ما يريد يـ...

-اوگفي اوگفي حبيبة

-هاا

-تدرين من شوي چنت جاي اشر الهدوم عايني ذنيچ

مدت اصبعها تأشرلي على الحبل بي چم قطعة ملابس مشرورة، هزيت راسي ورجعت اعاين لوجهها الجامد ومابي تعابير فرح ولا زعل..

-گلت هسة لو يخطبني چلب هم ارضى بي بس حتى اخلص من حياتي

-واجاچ دكتور

-لا اجاني انگس من الچلب

-ها!!

-حشى الچلب واقارنه ويه منتصر العار شني ذنبه تتشوه سمعته

-صدگ تحجين!!

-وعلي

-رهف منتصر يحبـ...

-والزهرة اذا كلتيلي منتصر يحبج وجهي ما تشوفينه بعد حبيبة!

-هو متندم

-على روحه

-يعني اذا يخطب ما تقبلين معقولة؟؟

-انا صارلي شهور ابچي واتعذب واموت الف موتة بسببه، چنت كل يوم اتحلم بي واكعد من النوم گلبي ممرود من القهر بس هسة بهاي اللحظة كل هذا راح وطبت

-ليش؟

-عبني عرفت الزلمة الچنت ابجي عليه وانوح مو زلمة! حرامات بي الشوارب واللحية

-رهف..

-داز طليقته خاطر تخطبله البت الچان يعشگها؟؟ اوووووع عليه وعلى رجولته وانعل ابوي لو رضيت بي

-هههههههه

مادري شمالني وضحكت.. والله ضحكت يمكن على حچيها لو على ردة فعلها لو على ملامحها المكشولة چن جاي نسولف بجريدي كاتله الوصخ..

-رهف: اسفة والله ماعرف ليش جاي اضحك

-رهف: ضحكي خية ضحكي ما يلوگلج الزعل تستاهلين زلمة ارجل من منتصر

-الله يعوضچ خير يا رهف ويريح گلبج

-عوضني حبي، چا مو خال غسان خطبني راح اتزوج باركيلي

-رهف گعدي راحة

-ما اگعد وراح اقبل بي عاد هذا شوي احسن من الچلب

-ولج زلمة بگد ابوچ!

-چا ابقى خايسة هنا ببيت اهلي الهمج؟؟ ولج تلعب روحي اعاين لوجه ابوي واخوتي خليني اتزوج واخلص منهم بلچن ارتاح

-چا ارضي بمنتصر هو...

-نعااالي على منتصر سكتي سكتي لا تجيبيلي طاري اسمه

-رهيفة لا تتهورين وترضين بذاك الزلمة!

-اشوف شيصير وياي حبي الله كريم

-حبابة حاولي ترجعين موبايل امچ وتتصلين بيه تطمنيني

-بعيني

-يلا انا اروح، بس اوكفي امج بالبيت؟

-اي موجودة

-چا شعجب ما عدها فضول تشوف منو من اندكت الباب؟

-باع هاي حسبالها امي مثل عمة رسمية تهتم

-هم صدگ.. يلا مع السلامة

-الله وياچ حبي وامانة سلميلي على سبأ وشبگيها بكل حيلچ

-تدللين من عيني

فتحت الباب وطلعت لـ سور شفته واكف يم سيارته وبس شافني اشرلي استعجل، هرولت عليه ودرت وجهي شفت رهف مادة عيونها تودعني بنظراتها..

-علي السور: بشري؟؟؟

-خليني اركب السيارة يمعود

فتحلي الاقفال ودخلت اكعد بكرسي الصدر بس ما خلاني اجر نفس ورجع سأل..

-سولفي حبيبة راح تقبل؟؟

-عاين انا گلتلها وبالبداية البت ماتت قهر وانصدمت بس بعدين رضت بي وكالت اوافق

-صدگ تحجين؟؟؟؟؟

-اي والله

-عليج العباس حبيبة افتهمتي على البت عدل لو بس جاية تشوطيني!

-ولك اي ايي افتهمت عليها عدل شبيك

-خرب خرب خرب خرب خررررب

-شكل شريطك لو شني

ما جاوبني وحرك السيارة يطلع بينا للبيت، وصلني ونزلت حسبالي هو هم ينزل بس داس بانزين وطلع من فرعنا والله هذا اخوي هم صاير ما ينفهم..

طبيت للبيت وبوجهي للاستقبال شفت امي وعلي النور كاعدين ويه الامير على الصامت، شكلهم يضحك كاعدين وصافنين بالكاع كلهم چن كاعدين بعزا..

-حبيبة: سلام

-رسمية: هلا هلا يمة عليكم السلام زين من اجيتي

-حبيبة: ليش يمة خير صاير شي؟

-رسمية: اي تعاي گعدي يم اموري شوي مشتاگلچ هو

رفع عيونه يباوع لامه بنظرات تنفي تماماً هو مشتاقلي بس على الاقل ما علق ولا گالها بلسانه وظل ساكت..

-حبيبة: والله حتى انا گلبي مشتاگ

گعدت گباله على القنفة وبقى هو يباوعلي خانس لا طلع حسه ولا صوته طول ما احنه كاعدين وحتى من تداهرنا انا وعلي النور بالعادة گبل جان ما يرضى ويفاككنا ويرزل نور عبنه يضوجني بس هسة كلشي ما سوه وظل صافن علينا..

**

-وجع وجع مو طبيعي الوجع

-عبق: خاف راح تجيبين ولج

-ليلة: لا خايبة الدكتورة كالت البچر يتأخر

-عبق: والله مادري بس احس وضعج ميطمن مو مال تكعدين على روحج وتغلسين

-ليلة: هو من ارجع للبيت اگول لعمتي واشوف شتكول

هزت راسها عبق وانطتني ظهرها تكمل تگطيع البيذنجان، اليوم اجيت لبيتها اغير جو شوي بيتنا صاير يخنگ ابا الحسن ما يسولف وياي من جهة ووضعه بالنازل على اخوه وعمي ما يتحچى وعمتي رسمية كاعدة ويه العمات ويومية يسولفن بنفس المواضيع..

-ليلة: تدرين عبق انا كلش مختنگة من الجاي يصير

-عبق: حتى اني صراحة ومو بس اني وياچ مختنگات حتى امي رغم هي متعرف الامير كلش زين بس متأذية عليه

-الله ياخذ سلوى حرمتچ من هيج مرة كل هالسنين

-يوووه لا تجيبين طاريها بس اسمع اسمها جسمي يكزبر

-اي والله

-اگلچ ليلة شصار وياچ انتِ وابا الحسن؟

-ما صار شي

-لا بشرفچ!!

-والله

-ولج مو كلتيلي وضعكم ديتحسن وراح تتصالحون؟؟

-اي بس طلعت غلطانة لان بعد هو ما حاچاني

-ومنتظرته هو يحجي وياچ

-اي

-صراحة ليلة صح انتِ صديقتي واحبج بس هالمرة اني مو وياچ گلتها قبل وارجع اعيدها الغلط بده منچ فـ انتِ لازم تنطي ريگ حلو حتى تتحسن علاقتكم ومتبقون هيج

-ادري عبق بس..

-بس شنو؟

-كرامتي ما تسمحلي

-علي الحق: طاح حظج وحظ كرامتج خووووش؟

فزيت من سمعت صوت زلمة جاي من وراي، اللتفتت وچان اشوفنه علي الحـق هستوه كاعد وبعيونه النوم ويعاين عليّ بضوجة..

-ليلة: احترم نفسك ولااااك

-علي الحـق: اشش اشش لعبتو ارواحنا ما تصالحين الزلمة وتخلصينا

-ليلة: وليش مو الزلمة هو اليصالحني؟؟

-علي الحـق: ليلة طفت ليلتج يا ليلة وخلص ابا الحسن منج

-ليلة: عبيقة كضي زلمتج لا اتعارك وياه انا وفرخي

-علي الحـق: استچني وصيري ادمية عيب كبرتي راح تصيرين ام

-ليلة: يمته ما تصير انتَ اب انا اكبر

-عبق: منو گال هو مو اب هسة؟

-علي الحـق: لا لا اصبري قبق ولج ليلـ..... اوكفي شني؟

بحلگ عيونه الجانت عوصة من النوم ودار بكل جسمه عليها، ضحكت هي خجلانة ونزلت عيونها للگاع چنها بطة مستحية..

-ليلة: عاينو ولكم انا روحي طالعة مو مال هالسوالف

-علي الحـق: عنق انتِ حامل؟؟

-ليلة: ولك لاا جذابة هاي حچت هيج عبن حسبالها جاي نتعارك

-علي الحـق: عليج الله؟

-ليلة: والله

-علي الحـق: چا لا ولج شفق ما جاي نتعارك هاي ليلة اخوي العاشر

-ليلة: رحمة الله على والديك عزيز وغالي

-علي الحـق: فرخچ بعد روحي، صالحي اخوي عيب ما يصلح تظلون متزاعلين

-ليلة: راح أفكر بالموضوع خوش

-علي الحـق: يعشگچ وداعة عيونه العسلية اخذيها مني

-ليلة: هاا؟

-علي الحـق: وعلي

-ليلة: مو اروح اصالحه ويفشلني حويق انا على مسؤوليتك راح اتصرف

-علي الحـق: روحي وبهالرگبة بس رجعي لبيتكم لعبتي روحي

-ليلة: لا راح ابات اليوم كلت لعمتي

-علي الحـق: عين غطا وعين نعال

-ليلة: هههههههه يا بعد روح عبق ضحكتني فدوة تروحلك سوزان الخايسة

-عبق: هَييييييييي!!!

-ليلة، علي الحق: شكو

-عبق: شو عفتوني وكعدتوا تدگون فچ!

-علي الحـق: بس لا تغارين؟ ولج ليلة اخوي العاشـ...

-عبق: يبووو لا قصدي على موضوع الحمل

-علي الحـق: يعني شني؟

عكدت حاجبي اعاين لوجهها الابيض خدودها صايرات طماطات وعيونها مدمعة مادري شمالها، فلت عكدة حاجبي من رفعت ايدها تمسح عيونها وضحكت بدون لا تحجي وعلي الحق تسووودن..

-علي الحـق: عبق انتِ حامل؟؟؟؟؟

-عبق: هههههههه اي.. اي

-علي الحـق: لااا بشرف امج؟؟؟

-عبق: هههههه والله اي حامل

-ليلة: دخيلك يا علي ولج من يمته؟؟

ما لحكت تجاوبني بسبب ركضة علي الحـق عليها، حضنها وشالها على وگفتها بين ايده ويضحككك بكل صوته ويصيح..

-انتِ حااامل ولج حاااامل اكييد حامل؟؟؟

-اي هههههه وداعتك اي

دمعت عيوني الصلفة وانا اعاين لفرحتهم، مسحتهن بساع گبل لا تطيح الدمعة وبقيت اتأمل اشكالهم.. علي الحـق ما نزلها الگاع بقى شايلها ويبوس بخدودها ويعصرها بين ايده وضحكته تزلزل البيت من السعادة وعبق چنها طير يرفرف..

-ليلة: خرب ولكم بچيتوني

طاحت دمعتي ومسحتها بگفه ايدي وابتسمت سعيدة، اول مرة من شهور احس بسعادة حقيقية سعادة خلتني اقرا على صاحبتي وزلمتها الفلق والناس اخاف عليهم من عيوني لا تحسدهم..

-علي الحـق: ما مصدك والزهررة ما مصدك ولج قبببق

نزلها من ايده وعاينت لوجهه يزخ عرگان ودموعه بعيونه ما يرضى يطيحهن، مسحت عبق دموعها النزلن شلال من عيونها وكالت بحس مبحوح..

-عبق: خفت متفرح والله حتى ماردت اگلك

-علي الحـق: اناا ما افرح؟؟ ولجج شلون تظنين بيه هيج شلوون

-عبق: دا اشوفك شلون مقهور ومخبوص على اخوك ودا اشوف الوضع كلش ميسمح احمل هسة بس بعد صار ماعرف شلون خصوصاً واحنه متفقين بس بعد الله راده

-علي الحـق: الحمدلله والشكر الحمدلله نعمة هذا عبق لا تحجين هيج الحمدلله يارب

-ليلة: شمالچن انچلبتن على الحمل خايبات ياهي تكضها تگلك حامل دخليني اجيب اول شبيچن

-علي الحـق: هاي بدال چلمة مبروك؟

-ليلة: چا مو باركتلكم بگلبي هو طلابه

-علي الحـق: هم صدگ انعم الله عليج مرة اخوي ما تقصرين

-ليلة: هلا بيك حماي وابن عمي.. هسة شفق ما تسولفيلنا شلون عرفتي بروحج حامل؟

-علي الحـق: اي شلون؟؟

-عبق: امي انتبهت عليَّ گلتلي عبق انتِ كلش ذبلانة ووجهچ متغير لونه شبيچ بس اني ابد ما خطر على بالي اني حامل فـ كلتلها من وره الديصير ببيت عيالي تعبانة على تعبهم

-علي الحـق: يا بعد حيلي حيلچ

-عبق: عمرري انتَ

-علي الحـق: اموت عليج وعگال ابوي افديچ بكلشي عندي

-عبق: اوووي علي

-علي الحـق: يروحلج سحل علي ورمشاته

-ليلة: انتم صدگ ما تستحون

اللتفتوا ثنينهم عليَّ متسائلين، چتفت ايدي لصدري وگلت ووجهي مگلوب..

-ما تگولون هالبت گابه هرموناتها وجفافها العاطفي واصل لابو موزة؟

-عبق: من ايدج حبي تستاهلين

-علي الحـق: اي بعلي

-ليلة: طبعا انتَ تفزع لاخوك... اااه

-علي الحـق: شنو شبيچ؟؟

-عبق: ليلة شبيچ ليلة!!

-ليلة: ااه رفسة الفرخ رفسني صلف على امه

-علي الحـق: خرعتينا يمعودة

-ليلة: ااخ خرب هسة الفرخ گالي شي ويريدني اوصله الكم

-عبق: شنوه

-ليلة: يكول احترموا رواحتكم وبطلوا سخافة گدام الوادم عدكم غرفة روحوا خربطوا بيها

ضحكت عبق خجلانة وعلي الحـق وياهة يضحك بكل صوته، هز راسه وگال عود مستحي..

-حگچ والله بس هاي من الفرحة نسيت العيب والاحترام

-ليلة: لا بوية اتشاقه صدگ جذب غير انا ردت اجيب من الفرحة

ضحكوا ثنينهم وانا وياهم، ودعها علي الحـق وكال لازم يروح يشوف الامير گبل لا يلتحق باله يمه عبنه اليوم كله ما شافه وعبق شجعته خاطر يروح..

-علي الحـق: لا تتعبين نفسج عنق كعدي ارتاحي عوفي المواعين

-عبق: هاا هاي من عرفت بيه حامل تريدني ارتاح بباقي الايام تكرب عليه جنت

ضحك بدون صوت وعض على اصبعه متحلفلها، ودعنا وگبل لا يطلع كفخها خفيف على راسها وهي رجعتله الكفخة على زنده، سوالها بيده حركة انا اعلمج وسلم علينا مرة ثانية وطلع..

-ليلة: كلش فرحتلج عبيقة تستاهلون كل خير

-عبق: حياتي يوم تجيبين بالسلامة ونخلص من نگچ

-ليلة: امين اميين

-عبق: اگلج رايحة اشوف امي صارلها هوايه نايمة مو زين هالكد

-ليلة: خوش انا هم راح ارجع للبيت

-لااا ليلة شنو هاي لعد مو كلتي تبقين على العشا؟؟

-خية كعدي يا عشه رجلچ ما يرضى تتعبين كعدي

-ولج والله ما راح اتعب قابل شمسوية هو تبسي احطه بالفرن واكعد

-على الجايات ان شاء الله، يلا خية گعدي ويه امج شوي واقري عندج دروس لا تلتهين

-ماشي حبي بس والله مو خوش طلعة هاي ليلة

-راجعتلج لا تخافين انام على افادچ بالايام الجاية

ودعتني للباب وطلعت لكيت علي الحـق هستوه جاي يحرك سيارته اشرتله ينتظرني وهرولت اصعد وياه خاطر يوصلني فرد نوب..

-علي الحـق: شبيچ ليلة؟

-ليلة: مابيه شي بس شوي وجع

-اخذج للمستشفى؟ شكلج كلش ما يبشر بخير

-لا خوية مابيه شي هسة ارجع للبيت انام وارتاح

سكت بعد ما علق على شي ووصلني بدربه للبيت ومثلما توقعت ترزلت من عمتي عبن علي الحـق وصلني وحده وما اجت عبق ويانه ما ترضى ابد واحد من الولد ياخذني وحدي تكول ما يصلح لازم اكو نفر ثالث بين كل ذكر وأنثى اذا ما جانت تربطهم خوة..

-رسمية: امشي روحي نامي ارتاحي بطنها واصلة لخشمها وبعدها تهمرع وتطلع ما تعرف تستقر

-ليلة: عمة ضايجة ضااايجة

-امشي امشي

تقبلت رزالتها بروح رياضية وصعدت لغرفتي، سبحت وبدلت هدومي وكعدت اقرا شوي بينما انعس وانام بس عقلي چان اله رأي اخر..

ذبيت الملزمة من ايدي وحطيت شال على راسي وطلعت من غرفتي لغرفة سبأ، دگيت عليها الباب وسمحتلي اطب لكيتها متمددة وفاتحة مسلسل جاي تتابع..

-ليلة: اول تالي سبأ تتابع مسلسل وزلمتها ماكو

-سبأ: لا شني ما اتابع بس الحلقة الگبل هاي خلصت على شي مشوق وفتحت الثانية اشوف التكملة خاطر اسولفها لـ تقي

-ليش تقي وينه؟

-نزل واجب من الفجر

-هااا هاي عبيقة هم زلمتها راح يروح واجب خطية

-اي بعد شنسوي

-امم.. اگلج سبيئة

-هاا

-ردت اسألج شي بس لا تترعنين وياي خوش؟

-خوش كولي شكو

-تعرفين وين ابو لسانين لو لا؟

-قصدج ابا الحسن؟

-ليش ياهو عنده لسانين غيره بهالبيت

-حرام عليج والله ابا الحسن وردة مـ...

-اي اي ادري هسة تعرفين وينه؟

-اظنه بالسطح

-شيسوي هناك!

-مادري بعد

-انا اعلمه شعنده كاعد هناك وحده خليني اروح اتعارك

-هههههههه

-على شني تضحكين

-تردين ترحين خاطر تتعاركين لو لان مشتاگة

-لاا شني انا اشتاگ لهذا؟؟ مستحيل لو اموووت

-چذابة

عفتها فاكة حلگها وتضحك وصعدت درج السطح بس كوة، لامة دشداشتي اخاف لا اعثر بيها واللهث چن صارلي ساعات اركض.. فحطت علما وصلت السطح ووكفت بالباب اجر نفس وارتاح..

استقر نفسي شوي وجذب انتباهي صوت طگطگة جايه من غرفة مرسم الامير چن بيها احد وصوت واحد يسولف، الفضول اشتغل عندي والشيطان بده يلعب فلك براسي بس لا الامير جاي يخون تَـمني؟ صخام لو صدگ يخونها..

مديت اذني للباب وعصرت عقلي خاطر افرزن الصوت والحديث بس ما احتاجيت اتعب هواي عبن الصوت اعتلى وكدرت اميز هذا علي السور يمه فوگ!

-علي السور: المشكلة اخاف اسولفلك وتگلي بطل تمسلت وانزل

-الامـير علي: لا كول

-علي السور: بس بطل تعاين لشواربي قلقتني تره

-ما اعاين كول

-امير انتَ اخوي وانا من گبل متعود من اطيح بمصيبة اجيك لو اروح لـ تقي

-خوشن

-امير

-ها

-متوتر خرب

-راسي بده يوجعني سور

-لا لا راح اسولف اصبر

-اي؟

-خوية انا عاشگ ومنعول خير خيري

شهكت بدون صوت والفضول اشتغل عندي اضعااف گبل شوي، عدلت وكفتي ومديت نفسي اكثر خاطر اسمع شيجاوبه بس ما فهمت شكال امير الحظ صوته ناصي وما لگفته بس سمعت من سور جاوبه وكال..

-علي السور: البت براسي صارلها فترة طويلة وما جاي اكدر افكر بغيرها وهسة اخافن تنخطب وتروح من ايدي وانجلط من القهر

-چا ما تخطبها انتَ وتخلص؟

-ياريت بس وين ابوي يرضى

-ليش ما يرضى؟

-يكول عني صغير ومو مال زواج

-وصدگ انتَ هيج؟

-يجوز چنت اي بس من عرفت البت الاحبها راح تضيع من ايدي مستعد اسوي كلشي خاطر انجمع وياهة

-حلو

-فـ انا اجيتك الك خاطر تقنع ابوي يروح يخطبها

-انا؟

-اي انتَ

-وياهو يكول راح يقتنع مني

-افااا وانا اخوك شون ما يقتنع منك انتَ الامـير علي على سن ورمح چلمتك ما تتثنى

-لا صدگ؟

-والحسين

-مادري سور انا...

-انتَ الامير مو ياهو الچان گدها والله ماكو واحد نخاك ورديته خايب

تحمست اعرف جوابه بس گمزت مخترعة من صار صوت مشي خفت لا واحد بيهم راح يطلع فـ بساع ركضت ابتعد من المرسم وفتحت باب السطح على كيفي كللش خاطر ما ينتبهلي ابا الحسن..

مديت بس راسي اتطقس وادرس موقع العدو وضيگت عيوني من شفته گاعد.. گاعد على الفراش المفروش ومنطي ظهره للباب وعالگ مباراة قديمة وجاي نرگل اييي انتَ تنرگل هنا وانا مسموط ابو ابوي..

-ليلة: احمم احممم

جذبت انظاره بالحمحمة مالتي ومن شافني واكفة رجل بالسطح ورجل بره اللتفت بكل جسمه يعاين عليَّ..

-ابا الحسن: شنو شبيچ؟

-مابيه شي

-چا ليش واكفة هنا؟

-عبن اريدك بسالفة

-شنو

-اريدك تجيبلي بند ورق خلصت مالتي

رخت ملامحه وذب حسرة وياهن، هز راسه اي وجر نفس من النركيلة ورجع انطاني ظهره يتابع المباراة.. تشجعت وقررت ما اظل واكفة بمچاني فـ كملت طريقي بأتجاهه وكلت..

-ليلة: هاي شني مباراة ريال مدريد

-قديمة

-هاا هاي من خسر فريقك

-امم

-وانتَ شني جاي تتابعها خاطر تحرگ بگلبك

-امم

-ليش تريد تحرگ گلبك؟

-حرگة المباراة ولا حرگة گلبي على اخوي

تنهدت ماعرف شكول صعدت شايشة عليه وشاكة بي جاي يسوي مكسورة وهسة تغير كلشي من شفت حاله، كعدت بصفه على المندر وذبيت حسرة محتارة.. اكثر شخص تأذه بالصار ويه الامير من بعد تَـمني هو ابا الحسن لا ليله ليل ولا نهاره نهار وگاضيها بس يتصفن ويدعي يرجع توأمه بخير وترجع ايامهم الحلوة..

-ليلة: هو بخير واظنه جاي يتذكر لان هسة سمعت صوت علي السور عنده بالمرسم

-يمثل

-ياهو؟

-اموري

-ليش تكول هيج؟

-عبنه بزع من امي وهي تعيدله نفس الأسطوانة يومية وتحاول تذكره بكلشي، صار يمثل هو زين خاطر يخلص من هالسالفة

-هاا

سكتنا شوي نتابع المباراة وهو يجر نفس وره نفس من النركيلة انا من يمي اختنكت هاي عود احنه كاعدين بالسطح..

-ليلة: چنتو كل يوم تسهرون هنا سوه تنرگلون ويه بعض وتسولفون

-اي

-ليش ما تجيبه هنا بلچن يتحسن ويغير جو؟

-ما يرضى

-يعني انتَ عرضت عليه؟

-اي

-وشكال؟

-كال ما تدوس رجله السطح الا يرجعون ضرغام وليث ونكعد وياهم نتابع المباريات

-اوووف

-الحمدلله والشكر شنكول غيرها خلي بالمرسم ترتاح نفسيته هناك

-بلچن يتذكر شي من يطبله كون بي صورة او شي يذكره

-شاف ليلة كلشي شاف

-مافهمت؟

-شاف صور راسمهم هو بنفسه بس نكرهن يكول هذا مو انا راسمهم وكلهم شالهم وشمرهم بره

-ما شگشگهم اهم شي؟

-لا ما شگهم

-اي همزين

-ليش عود

-معناها اكو شي بداخله جاي يگله الرسمات تابعات اله

-صدگ؟

-اي اي لو مو اله ليش ما شگهم؟ ليش ما حركهم؟ هو جاي يعاند نفسه وعقله بس الامير راح يرجع يتذكر صدگني بس محتاج وكت انطوه صبر وكلشي ينحل والله

-الله يسمع منج ان شاء الله

رفع ايده بشكل دعاء ونزلهم على فخذه يحطهم، دام صمت مريب بيناتنا وبديت احوص متوترة من الفكرة الگمزت براسي، گلبي صار يدگ يدگ چن دنبگ حاولت انساها بس ما كدرت، نبتت اظافري بيدي وذبيت نفس قوي وتجرأت ومديت ايدي الترجف وحاوطت زنده..

-ليلة: لا تخاف، گلبي جاي يگلي توأمك راح يرجع وترجع ايامكم الحلوة

خنس حسه حتى صوت انفاسه انگطع وانا بطني كامت تخبط شبي ليش ما جاي يتنفس صخام الصخمني شكو اكضه هيج شهالرعونية؟ يا علي شلون بيه ايدي ما جاي اكدر اشيلها چن تصمغت على جسمه..

-ليلة: احم..

-ابا الحسن علي: ان شاء الله من يجي امير الصغير للدنيا امير الچبير يكون متحسن

-اي اي ان شاء الله اي

هز راسه بدون لا يبتسم وجر نفس من النركيلة وزفره بهدوء كلش، تذكرت مياعة عبق وتَـمني على زلامهن وكلت شيصير لو انا نفسهن هم اتميوع يجوز نتصالح ونخلص من هالسالفة؟ فـ خلص نويتها اليوم لو لا انا لو هو..

-حسووووون

دارلي وجهه مخترع، اشرلي براسه "شبيچ" وكال بسرعة..

-شبيچ؟؟ متوجعة؟؟

-هههههههه لا اووي شبيك انتَ

-شني

-تدري شنو اتمنى

-يا ستار

-اتمنى يجي فرخنا.. اءء اقصد طفلنا عيونه نفس عيونك عسولي

-عسولي؟!

-اي وبعد شني.. يجي شعره ثخين وسرح و.. اممم و.. ههههه اووي نسيت

-اوي؟

-اوووي شبيك انتَ ههههههه

-دخيلج يا ام الحسن لا تفجعينا

-شبيك حسونيييييي ههههههه

-ليلة اذا ضحكتي هيج بعد مرة وحدة افر وجهچ براشدي اللزگچ ويه الكاع

-لااااا بله خوووووية؟؟؟؟؟

-اييي رجعي ليلة الاعرفها ولج ايييي

-خاااب بعلي مو شكول نعمة انتَ تدري لو لااع!!

-لاع؟ فدوة لحلگچ اروح

-هاي شني شمالك حسيون

-ليلة انا روحي تلعب من التماوع اكزبرر شعر جسمي يوگف من تتماوع بت عليّ لو بيدي اللطها على حلگها اكسر سنونها واخلص من حسها المايع

-چا شكد محمل على تَـمني انتَ

-هههههههههههههههههههه

ضحك من كل گلبه ضحكة طويلة وعالية وضحكت على ضحكته، حرك راسه بـ "لا" وكال بعدما هدأ من نوبته..

-لا والله اصلاً ما مركز بالبت حرام عليج

-حسن لا تقنعني ما منتبه عليها مستحييل اصدگ

-صراحة؟

-اي

-عيب احچي بمرة اخوي بس منتبه اي

-هههههههه احب من تكول امييييييير

-هههههه وامير يسترسح عليها ويغدي تراب

-تدري حسيون انا ما احب المايعات بس هالفاهية تَـمني احبنها واحب اسولف وياهة

-خوش بت اهم شي امير مرتاح وياهة

-يارب يرجعون نفس گبل ما يستاهلون

-اي بعلي

-شلون ينساها حسن؟ فهمني شلون ولك شلون ينسى هيج بت حليوة وحبابة ومتفائلة وتحب الحياة؟ شلووون؟

-قابل هو بكيفه نساها غير مريض الزلمة

-خطية فقيرة هاي.. تدري بيها ابد ما تزعل؟ ابد ابد وحتى من تزاعل زلمتها تكول اظل اللوب اريد نتصالح وما تطول بالمناگر تكره المشاكل

-اي مو مثل بعض الناس

-يا ناس؟؟

-خالتچ الشگرة

-ها خالتي افراح؟

-لا احزان

-ههههههههههههه حلوة حلوة بس لا تعيدها بعد

-اهمداچ

-لا تغمني الفرخ ما يرضى

-الله يساعد هالفرخ عليج خبلتي گبل لا يجي للدنيا

-روح امه هو مالك غرض بي خلي متونس على خبالي

-هم صدگ

-يلا حسن

-شنو

-يلا شبيك

-شنو شكو

-صالحني يلا

-شني؟

-اعتذر مني وصير حباب يلا ابو امير يلا

-اعتذر منج انا؟

-چا جدي

-شكو معتذر شمسويلج ولج

ماكدرت اجاوبه بسبب الكرفة القووية الاجتني حتى صوتي ما طلع بيها، كضيت بطني شايغة روحي احسها تريد تطلع وگلبي عصرني انمردت روحي مرد..

-مو عليّ سوالفج هاي گليلي على شنو اعتذر؟

-بطني

-بطليهن ليلة شبعنا

-ااه.. ا.. ااه

-ليلة

-بطني.. بطنيييييييي ااااااااااااه

-ولج ليييلة شبيچ!!

-راح اجيبببببب يبوووووووووو

-عمت عينيي ولج عمت عينييي شسوووي

-ااااه حسن راح اموووتت

-اسم الله اسممم الله لا تكولين هيج حبيبتي يومي گبل يومج تعاي.. تعاي سندي روحج عليّ تعاالي ولج اشتعل بختچ

مديت ايدي عليه خاطر يگومني بس فجأة راح الوجع واختفى كلشي، جمدت بمچاني ماعرف شسوي والمشكلة الفشلة سيطرت عليّ واستحي اگله صرت زينة وراح الوجع فـ رجعت امثل..

-اءء هاك هاك كضني

-تعاي بوية تعاي سندي روحج عليّ بسم الله

-ااه حسن

-ها هاا كولي

-انا ا.. اسفـ.. ااااه

-سكتي بعدين سكتيي

-لا لا.. عاين انا شسمه

-شني؟؟

-خايب ما تفهم شبيك هاي عود محامي

-ليلة بعدين نسولف بهالموضوع امشي اخذج للطبيب

-لا ماروح لمچان الا تجاوبني

-على شنو؟؟

-انا اسـ... ااخ توجع وعلي توجع الچلمة

-ليلة مو وكتهااا!!

-چا سامحني على الفات وارضى اروح وياك للمستشفى

-سامحتج يلا امشي

-عليك الله؟

-اي ولج انتِ مو متوجعة شني هالسوالف!!

-اگلك وما تعصب

-شكو

-راح الوجع فجأة

هدني من ايده مخنزر يبوو هسة هذا شيقنعه جنت صدگ متوجعة مو اجذب عليه، نفخ هوا ضاييج كلش وفرك وجهه يهز براسه مأيس.. دار وجهه عليَّ متحلف وبعده ما فاتح حلگه خاطر يغسلني بالرزايل جريته من زيج دشداشته ولزگته ببوسه اسكته بيها..

گلبي، عقلي، اعصابي، اطرافي الاربعة كلهن احسهن وگفن عن الحركة وماتن، نفسي ضاع وعيوني انسدت من وحدها من كضني من خصري بأيد والايد الثانية حطها وره ظهري يسنده..

سحبت نفسي عن ببطئ بسبب الدوخة الزارت راسي بس بقيت بين ايده خفت اطيح گدامه واتفشل ويعرفني تأثرت بي، ظليت مغمضة عيوني اتدارك الموقف وهمست بصوت ناصي بيني وبينه..

-حسن انا اسفة

انتظرت اسمع منه جواب بس ما اجاني حسه، جاي احس بأنفاسه بس صوته ماكو، فتحت عيوني على كيف وجفلت من شفته يعاين لوجهي يدور بؤبؤ عينه على كل جزء بيه..

-ابا الحسن

-ها

-سمعتني؟

-لا

-كول والله

-واللط

ضحكت ودفعته من صدره اوخره ورجع جرني من ايديناتي ثنينهم يعصرهم بيده..

-ويين رايحة ولج وييين

-هدني لاا

-بالعباس ما اهدچ اليوم

-اوكف اوكف هاي شني الاسود على راسك؟؟؟

-شنو؟؟ شنو اكو شنوو

صار ينفض بشعره ويمسح على راسه ويحركه حيل يريد يطيح الشي الوهمي الي واكف على راسه..

-ابا الحسن: طاح؟؟ وينج ولج طاح لو لا!

-ليلة: لا لا بعده بين شعرك صار نفضه زين

رجع ينفض بشعره وانا انسحبت انسحاب تكتيكي، مشيت على اطراف اصابعي اعوفنه وحده لحدما وصلت لباب السطح ياله انتبهلي جاي اشرد، صاح بيه يستوقفني وعفته وركضت اطلع من السطح وقفلت الباب وراي وحبسته هو بره..

-ابا الحسن: ولللج ليييييلة

-ليلة: هاي خاطر تتأدب

-ابا الحسن: مشعوولة الصفحة ياهوو باس منوو ولج ليييلة فتحي البااب

-ليلة: اصبر خوية شسالفة انطي صبررر

-خوه الخواچ يا ليلة يا الشالعة گلبي

-حسيون تره ارجع ازاعلك هااا انا كتلك بعد

-فتحي الباااااب

ضرب الباب برجله حيل وهي حديد طلعت صوت كلش قوي وسمعت صوت من مرسم الامير مال واحد جاي يمشي يريد يطلع، نزلت عيوني اعاين لدشداشتي مخازي لاطشة عليَّ تلطيش مو مال احد يشوفني بيها..

-ليلة: راح افتحح اي اي اجيت

مديت اذني لباب المرسم اتسمع وهمزين محد بيهم طلع بقوا جوه من سمعوا صوتي قريب، الف غمة غميت روحي على تصرفي السخيف وظليت اكل بروحي الغبرة.. وكفت اراواح بمچاني محتارة وگمزت من ضرب باب السطح برجله بقوة مضاعفة وصاح..

-والعباس يا ليلة اذا ما فتحتي اليوم....

ما انطيته مجال يكمل جملته لان بسرعة فتحتها وشردت اركض انا وبطني چني بطريق بس روحي خرطت من حسيت بروحي انرفع من الكاع وصرت بين ايده شايلني..

-ابا الحسن علي: اليوم احرگ الدنيا حراگ

-عاين و...

-انا گوة كاض روحي چلمة زايدة واندمچ على الساعة الصعدتيلي بيها

انلصمت خانسة اعاين لعيونه المتحلفتلي وابلع بريگي، نزل من الدرج يركض مراكض وكل وضعي تخربط من شفته يمد راسه يتأكد اكو واحد هنا لو لا عرفته ناويلي على نية خايسة مثل نظراته بالضبط..

-حسيون انا حامل اي من هسة اگلك حامل واظن راح اجيب اذا تاخذني للمستشفى تسويلي فضل

ما جاوبني وكمل طريقه يهرول للغرفة، جسمي كله كام يتراعد وصرت ارعش بيده، فلتت نفسي منه أريد اطيح روحي وهو كاضني حييل شلون مسيطر عليّ مادري..

-صبري صبري لا تستعجلين على رزقج

-حسن حامل انا خايب وديني للمستشفى! ابا الحسن شبيك تسمعني؟؟ الوو؟؟ الووو ولك حسيووون حااااامل انااا......

**

-تاالة خلصيني تره ماكو وكت راح تعوفنا السيارة!!

-تالة: اجيت والله

-حنين: اوووف شالعة گلبي هالبنية

-تَـمني: ليش مستعجلة انتِ خالة؟

-حنين: ولج السايق اتفقت وياه على الاربعة ونص يجينا باعي ساعة بيش هسة

-تَـمني: ميخالف هسة مو اتصل وكلتيله انتظرنا فد ربع ساعة

هزت راسها اي بس معاجبها، معاجبها تأخير تالة ولا عاجبتها روحة بغداد كشكل عام.. راح تروح هي وتالة لبغداد علمود تالة تشوف ابوها صار كم يوم تحلم بي ومكتئبة عاد قنعت خالتي تاخذها تزوره حتى ترتاح شوية بشوفته..

-حنين: يلا توتة گومي ماما

-تَـمني: لا خالة كتلج الصبح وارجع اعيدها هسة ما اجي وياكم اني

-حنين: لعد ويامن تبقين؟

-تَـمني: شنو ويامن ابقى؟ ارجع لبيت عيالي شعندي باقية هنا وحدي

-حنين: المن راجعة تَـمني لا تخبليني! باعي حالج باعي السواد الجوه عيونج باعي وجهج مبلوع بلع من القهر المن راجعة حتى تحركين كلبج من تشوفين رجلج بهذا الحال؟

-تَـمني: ميخالف خالة اريد اتطمن عليه

على اثر صوتها العالي طلعت تالة من الغرفة حاطة نظاراتها الشمسية على راسها ولابسة جنطة على الخصر..

-تالة: شنو شبيكم

-حنين: تعالي سمعي بت خالتج تعالي

-تَـمني: خالة اني قبلت ابقى هنا كم يوم بس حتى اكدر ارتب افكاري واعرف شنو اتصرف من ارجع ما رجعت حتى اعيش هنا واعوفه!

-تالة: منو گلج تعوفي؟؟ ماما رجعتي على هالسوالف!

-حنين: ولجن ما كلت تعوفه شبيجن اكلتني! دا اكول رجعتچ هسة بس راح تتعبچ ما راح تستفادين شي ولا هو يستفاد

-تَـمني: لعد شلون؟؟ خالة لا تخبلينيي اذا ما اوكف وياه بهذا الوضع شوكت اوكف وياه!!

-حنين: شتوگفين وهو ميتذكرچ!

-تالة: صراحة تَـمني هالمرة اتفق ويه امي، راح ترجعين بس تتأذين وتنقهرين لا زوجچ يقبلون تحجين وياه لان متكدرون تضغطون عليه ولا راح تستفادين شي غير شلعان الگلب

تنهدت تعبانة ماعندي حيل اجاوب، ماعرف شسوي شنو بيدي واكدر اخلي يتذكرني، جزعت وخلصت طاقتي بكل خطوة اخطيها بعيد عنه هو ويايه بكل حركة بكل جرة نفس الامير ميفارق خيالي ولا يفارق عقلي.. ادعيله بكل لحظة وكل ساعة اسرح بيها كون يرجعلي ويرجع لذاكرته بحق علي الي يحلف بي..

-حنين: ها حبيبتي تجين ويانه؟

-تَـمني: لا، راح اخابر علي السور يجيني حتى ارجع لبيتي

سكتن ثنينهن ما حچن واني اتصلت بـ سور، خمس دقايق واجاني ودعت خالتي بالباب وهي طلعت ويه السايق الاجرته يوصلها لبغداد واني صعدت ويه سور السيارة..

-علي السور: سبحان الله اليوم چنه بطاريچ على الغده

-تَـمني: الامير سأل عني؟؟

-علي السور: لا والله امي وابوي حچوا بيج اليوم

خابت امالي المعلگتهن بخيط انهكته الايام ودرت وجهي للجامة اباوع منها، ما صار عندي فضول اسأل شحچوا وبقيت ساكتة الطريق كله لحدما وصلني للبيت..

نزلت وهو نزل جنطتي الحاطة بيها اغراضي ودخلت جوه، سلمت على اهل البيت وخالة رسمية سلامها چان يختلف هالمرة.. حضنتني لجسمها حييل وظلت تمسح على ظهري من وره وتكول..

-هلا يمة هلا بيج هلا

-تَـمني: شلونچ خالة وشلونه امير

-رسمية: والله على الله

-تَـمني: الله كريم

-حبيبة: تحبين تشوفينه؟

-تَـمني: ياريت بس خاف هم ينفر مني

-علي السور: انا اكول لا نجازف عبن جاي يتحسن على العلاج وعصبيته هدأت شوي لا نأزم حالته من جديد

-تَـمني: بكيفكم

اخذت جنطتي وصعدت فوگ لغرفتي، رتبت كلشي لمكانه ورجعت الاغراض واللتهيت انظف بيها وامسح بالاثاث واكنس الكاع.. غيرت الفرشة ولبست كوشات الكراسي وجوه جديدة وعدلت كلشي على اخر حبة..

كملت واخذت البرنص ودخلت للحمام سبحت وكعدت جوه الدوش مباشرة، غمضت عيوني وصفيت عقلي من كل فكرة سلبية راودتني ونويت اعيش هنا مثل قبل اشوفه بس ما اخلي يشوفني لحدما تحن علينا ذاكرته وتخلي هو يسأل عني..

كملت حمامي وطلعت بدلت ملابسي ونزلت جوه سألت خالة على الامير وكالت بالمرسم كاعد ميطلع منه الا لليل، تنهدت وكملت طريقي للمطبخ شفت البنات كلهن هنا ومن ضمنهن عبق ورفل هم جايه وضحكتها ترن رن بالبيت ماعرف على شنو تضحك بالضبط، سلمت عليهن وحدة وحدة واخذت المكشارة من ايد سبأ ووكفت اگشر بالبتيتة بدلاً عنها..

-سبأ: يا خية خليني ماعندي شي انا والله

-تَـمني: كعدي ام فلان لا يجي ابو فلان ويطشرنا

ضحكن كلهن عدايه بس ابتسمت، وكفت اكشر واگصص بالبتيتة واسمعهن ناصبات على ليلة الوجهها صاير احمر وتعض بشفتها..

-رفل: هههههههه تالي طخيتي راسج ولج وراضيتي

-ليلة: انچبي انچبي هو راضاني مو انا

-عبق: صح صح من البوسة الخليتي يغص بيها

-ليلة: اهووووو انا صوچي رعنة وهيلگ وسولفتلچن ما تستاهلن وعلي

-رفل: عليج الله شنو سوالچ بعدين امانة سولفيلي مو انا اختج

-حبيبة: خايبات يبوووو لعبت روحي سكتن ماريد اسمع

-ابرار: هههههههه نسينا يصير اخوچ

-ليلة: اي والله صدگ؟ چا خليني اسولف بالتفصيل الممل اخذني للغرفة و..

ضربتها حبيبة على زندها تسكتها وشو هاي لزمت بطنها وعاطت بكل صوتها..

-ااااااه

-حبيبة: ضربتج على زندج خية كاضة المكان الغلط

-ليلة: ااااه يمة اااخخ ولجنن ااااخ

-تَـمني: عزا شبيها بنات

-ليلة: راح امووت يمممة يمممةةة ولج يوووووووم

-عبق: راح تجيب اكيد راح تجيب ولجن صارلها اسبوع متوجعة ومتقبل تروح للدكتورة تفحص

-ابرار: رايحة اصيح عمتي كعدنها هنا كومي رفل عيني اختج

انخبصت رفل ويه اختها وكوة جريناها تكعد على الكرسي متقبل تكعد تكول تتأذه، وخرنا عنها كلنا من اجت خالة رسمية تركض وابا الحسن نزل من فوك طاير ركضوا ثنينهم عليها وكنبص ابا الحسن كبالها ولزم ايدها..

-ابا الحسن: ليلة شبيچ حاچيني

-ليلة: يعني شبيييه راح اجيييييييب

-رسمية: يلا يا الله دخيلك يا علي، حبيبة ركضي جيبي عباتي وانتِ رفيلة جيبي لاختج عباتها بسااع

-ابرار: رايحة انا اجيب جنطة الطفل

ركضن كل وحدة بجهة وصوت ليلة يرهب كل صرخة تصرخها ترج البيت، البنية وجهها صاير ازرگ ويكت عرگ لازمة ايد ابا الحسن وروحها ترفرف من الوجع اول مرة اشوفها بهالوضع ومتت خوف عليها..

-شمس: شني ليلة راح تجيب؟؟

طبت شمس للمطبخ وبيدها واحد من جهالها وويه طبتها شفت الامير ينزل من فوگ على كيفه.. گلبي صار ينبض بجنوون وعيوني ما رمشت بعيد عنه بقيت اراقبه بكل حواسي لحدما دخل للمطبخ عاكد حاجبه مستغرب من الهوسة..

-الامـير علي: شصاير

اللتفتت امه عليه واشرتله على ليلة التعبانة، هز راسه متفهم بس شكله ما مقتنع ابد ايد ممقتنع مادري ليش نظراته غريبة وطلع من المطبخ وراح يكعد بالصالة وحده.. انقهرت من تصرفه مو لان ما قدم المساعدة لان اعرف لو أي واحد من اخوان ابا الحسن جان سوه نفس الشي ميبقى بمكان واحد ويه مرة اخوهم التطلگ لان اكيد تكون بوضع صعب بس حزت بنفسي لانه صرنا عين بعين وصد وجهه عني!

اجن البنات ولبسوا ليلة العباية وطلعوا بيها للمستشفى ورفل وحبيبة وام عبق وياهم، عفنه العشا وكعدنا بالمطبخ ندعي الله يسهل عليها ونقرالها سورة الانشقاق..

واكفة والوب عين بموبايلي دا اقرا على برنامج القران الكريم وعين على الصالة اباوع للامير الكاعد بهدوء وصافن بالكاع.. روحي تريد تروحله وتسولف وياه وعقلي يحارب يريدني ابقى هنا وانتظر خبر ولادة ليلة..

-تَـمني: بنات الولد راحوا للمستشفى لو لا؟

-شمس: اي بدر راسلني كال هو ودر راحولهم

-تَـمني: احم.. وامير؟ شنو رأيكم اگله حتى يروح؟

-ابرار: انا اگله مو احسن؟

-تَـمني: بكيفج

ابتسمت ومسحت على چتفي وراحت تحجي وياه، ما سمعتهم شكالو بس شفته يهز براسه وكام بسرعة وطلع من باب الاستقبال بس وين رايح وهو ناسي موقع المستشفى؟ ركضت على ابرار اسئلها وريحتني من كالت..

-هو صارله ساعة كاعد هنا منتظر واحد من الولد خاطر يروح وياهم عاد گتله علي الكرار كاعد بمحل صاحبه الصاير براس الفرع خلي يروحله

-اي زين

-ابرار: تعاي خلينا نكعد شوي تعبتي من الوكفة

ويه حچايتها دگ موبايلها الي بيدها باوعت للشاشة شفته "علي الدر"، جاوبت وقبل لا تكول الو شفت وجهها ينرسم عليه ابتسامة واسعة..

-ابرار: الحمدلله والشكر الحمدلله على سلامتهم ويتربى بعزكم ودلالكم ابو حيدر

-تَـمني: ليلة جابت؟؟

-ابرار: اي هههههه جابت.. بناات ليلة جابت وينچن

-شمس: يا بعد روحيي اللهم صل على محمد وال محمد

ضج البيت بالفرح بولادة ليلة وانترس بالسعادة من بعد ايام طويلة چانت عبارة عن كآبة.. تمنينا نروح للمستشفى نشوفها بس خالة رسمية ما قبلت كالت لان جابت بالمستشفى العام مو بالخاص فـ ممنوع الزيارات..

اللتهينا نرتب البيت وعدلنا غرفة علي الكـرار حتى هي وابا الحسن يكعدون بيها مو زين عليها تصعد وتنزل هواي واكيد خالة رسمية ما راح تخليها تروح لبيت اهلها عدها قانون الچنة تنفس ببيت العيال متروح لبيت اهلها..

-عبق: بنات واغراض كرار وين يروحن؟

-ابرار: هسة دگيتله يرجع خاطر ياخذ اليحتاجه ويفرغلهم الغرفة

وفعلاً اجه قبلهم ولملم اغراضه وظل يدردم على اهله لان دومهم مبهذلي من دون اخوته بس طبعاً كله بالضحك يحجي..

-علي الكـرار: مثل ام البزازين كل يوم شامريني بمچان

-شمس: على كيفك عيني على كيفك وين شامريك هاي وانتَ عندك اكبر غرفة بالبيت

-علي الكـرار: غرفة؟ غرفة؟ لا ام محمد ما مقبولة منج خايبة انا منطيني الهول لو واحد عطس بالاستقبال يوصلني صوته

ضحكنه على دردمته وكملنا ترتيب كلشي وكعدنا ننتظر رجعت ليلة والطفل على نار.. بليلتها محد بينا تعشت من الحماس كل همومنا انست وتفكيرنا بس بـ اموري الصغيرون نريد نشوف شلون شكله راح يطلع اتخيله يخببل على امه..

ثاني يوم بالـ 11 الصبح رجعوها واجت تمشي على رجليها ما شاء الله ولا كأنها البارحة جانت راح تموت من الوجع، بالباب ذبحوا جوه رجليها ذبيحة وذبيحة ثانية لسلامة الطفل ذبحوها گالو ذني هدية من علي الدر..

نباوعلهم من شباك المطبخ ونگمز نريدها بس تجينا متحمسات، متنا ضحك من سمعنا صوتها العايق جاي من بعيد تصيح..

-فرخي وينه جيبوا فرخي اريده

-ابا الحسن علي: هذا بيدي لا تخافين عليه

-ليلة: جيبه اريد اشيله

-ام ليلة: ولج يمة بعدين هسة انتِ بيا حال

-ليلة: كلشي مابيه جيبوا وينج رفيلة انطيني امير العنون

غلست رفل عليها محد قبل ينطيها الطفل لحدما دخلوها جوه، تحمدنالها على السلامة بسرعة بسرعة وعفناها وكلنا ركضنا على الطفل نشوفه ومثلما توقعت ما شاء الله عليه ينكرط..

استقرت ليلة بالهول اءء اقصد بغرفة علي الكـرار وابا الحسن وياهة جوه ويهتم بيها، قدملها اجازة من الجامعة وقبلوا ينطوها اسبوعين رغم هي ماقبلت وكالت وضعها كلش زين وخالة رسمية هم كالت ما شاء الله ليلة جانت كلش قوية ومو من ذني المايعات..

بقت ام ليلة عدنا ثلاثة ايام واجه عمهم ناصر ياخذها بقت بس رفل يمنا تهتم بأختها وبالطفل وهيج صار عدنا اربع عنونيين بالبيت ولد شمس وابن ليلة وبنت ابرار ومنتظرين بعد ثنين ينورون الدنيا جهال عبق وسبأ..

ابتسمت اتنهد واني اشوف الكل فرحان وبده يرجع لحياته الطبيعية حتى الامير صار يطلع وبه ابو كربله ويشتغلون بس بعده ميتذكر شي.. او بالاحرى ميتذكرني بس على الاقل ديلهي نفسه وابو كربله ما عايفه يومية يجي ياخذه بيده للشغل ويرجع وياه بالليل..

الايام تمشي والكل ديتطور وديعيش يومه وحياته ومنتظر ثمرة حبهم يكبر گدام عيونهم الا اني بده اليأس يسيطر عليَّ والكآبة تاكل وجهي الابتسامة صارت صعبة عليَّ ابتسمها واحس بروحي انطفت..

الامير قافل ترجعله الذاكرة مو شلون مچان وادري والله ادري مو بأيده هالشي بس شوفته بهالحال دتموتني قهر! ودا اموت اكثر من اشوفه كاعد بالطرمة البره كل يوم يسهر لوقت متأخر ويه ابا الحسن ورفل تطلع يمهم ويكعدون يسولفون..

بديت اتنرفز واضووج من تقربه من رفل بس حبيبة وعبق اكدولي همه من قبل هيجي علاقتهم ومستحيل يصير حب بيناتهم واعرف بهالشي لان اتذكر قبل لا أتزوجه شلون چانو قريبين بس من تزوجنا شوية ابتعدوا مو هوايه بس شوية..

نزلت مثل كل يوم بنص الليل على اطراف اصابيعي ورحت للمطبخ كعدت يم الشباك اسمع لسوالفهم واحرگ بروحي بس الديهونها عليَّ هي رفل دتحاول ترجعله الذاكرة بشكل مو مباشر وعلى كيفها وياه كللش..

وخرت التول حتى اشوفهم ولكيتهم وحدهم هالمرة كاعدين على الكروتية اليصير ظهرها على شباك المطبخ، حطيت كرسي وكعدت اراقبهم واسمع لكلامهم وضحكاتهم سوه..

-رفل: خوش خوش اوكف يعني تريد تقنعني ماكو بت عجبتك؟ ابد ابد؟ هاي السنين كلها ماكو وحدة باگت هالگلب

-الامـير علي: لا والله

-رفل: ما اصدك

-خاب ولي منتظرج تصدكيني

-لا يمعود شبيك عصبي بس جاي اكول مو معقولة تره انتَ جبير واشكال بيوت طبيت وكعدات حضرت ما صدتلك فد طيرة تطيّر عقلك

-لا

-شسالفة امير

-والله شبيچ يعـ...

سكت فجأة ورفع ايده يعصر راسه، هدأت رفل وما لحت عليه زايد وخلته يرتاح دقايق ياله كررت سؤالها..

-رفل: يعني ابد ماكو؟

-ماكو انا من اول ما اعاين للبنات مو دربي هذا

-انا حاسة اكو بت تحبك

-ياهي هاي

-علساس ما تعرفها يعني

-شمدريني بيها

-چا خليك لا تعرفها ما تستاهل حبها

-احسن

فرت بيدها ما عاجبها وسويت نفس الشي بس مو ايدي الفريتها راسي، حركت راسي مأيسة يتذكر او يقتنع چان متزوج وعايش احلى قصة حب ويايه..

-رفل: ما تشتاق لـ ليث وضرغام؟

استغربت من سؤالها المفاجئ واستغربت اضعاف من جاوبها الامير بصوت ناصي گوة لقطته اذاني..

-الله يرحمهم

لحظة شنو؟؟ الامير يعرف همه ميتين؟ يعني تذكر موتهم لو شنو! بس اي اي اكيد عرفهم ميتين چان ما گال الله يرحمهم بس ليش محد بلغني بهالشي!

-رفل: تذكرت الصار اموري؟

-چؤ

-شبيك

-مابيه

-امير شبيك وجهك تغير؟

-اختنگ رفل لا تجيبين طاريهم

گالها وگام عرفته راح للاستقبال بسبب صوت الباب سمعتها تنطبگ حيل، ركضت اطلع للحديقة اشوف رفل حتى اسئلها وخابت كل امالي من كالت..

-رفل: مو هو تذكر ابو كربله حاچيله گبل چم يوم من چانو بالشغل

-وانتِ شلون عرفتي؟

-هاا؟

-شلون عرفتي ابو كربله حاچيله؟

-شني شلون عرفت.. غير هو.. هو سولفلي امير حچالي

-امم

-يلا انا رايحة انام نعست تصبحين على خير

عافتني وطبت للبيت تركض حسيت بيها شي مو طبيعي بس ما لحيت، مزاجي ضارب واريد اكعد بمكان وابجي للصبح وما خليتها بنفسي صعدت لغرفتي وكعدت وحدي ابجي لدرجة كعدت الصبح عيوني منفخات وحمر حتى للدوام ما رحت..

مشى كم يوم جديد من حياتنا الكل ملتهي لو بأمتحانات نص السنة لو بالاولاد الصغار وبحياتهم واني مثل العادة كاعدة وحدي انتظر شي شبه مستحيل ينحل.. وهاي اول مرة راح اكولها اني تعبت! اعترف واكولها بلساني تعبت واحتاج ارتاح مدا اكدر اتحمل اكثر دا اختنگ وگلبي مقمووت اتأذه وانجرح مية مرة من اوكف كدامه وميعرفني..

انظف وامسح واكنس بالبيت الهي روحي بس ماكو فائدة، كلما يجي الليل ارجع لعزلتي ووحدتي ولدموعي ومخدتي.. تفاجأت ثاني يوم من اجتني خالة رسمية وعادت عليّ كلام ذيج المرة كالت مو ذنبي اتحمل كل هالضغط وتريدني ارتاح من كل هالاذية واروح كم يوم لبيت خالتي..

-تَـمني: ماريد اروح

-رسمية: يمة تَـمني حگج من تخافين تعوفي وحيده وترحين بس انا ماريدج تبقين بهالحال كافي يوم مو زين عليج عايني لوجهج شلون ذبلانة وخالتج هم مقهورة على حالج وتعبانة على تعبچ

-خالتي؟

-حگها خالتج مقهورة عليج تريدج ترتاحين جاي تشوف بت اختها تذبل مثل الوردة العطشانة، روحي يوم ارتاحي وطلعي وغيري جو وانا اوعدچ وعد واحلفلچ براس ولدي الامير اول ما يتحسن اول وحدة تخابرج تبشرچ هي انا

جنت شاكة بخالتي متصلة بخالة رسمية ورادتها تحجي ويايه حتى اعوف بيتهم وارجع يمها، بجيت مقهورة من حاچاني عمو علي وكال نفس الحجي وجان كلش متأذي وهو يحجي ويايه، كال يعز عليه يشوفني بهالوضع وصار لازم ارتاح كم يوم واخلص من هالتعب بعيد عنه وعن نظراته الباردة تجاهي..

هزيت راسي مستسلمة وصعدت لغرفتي رتبت جنطتي وحطيت بيها كل احتياجاتي بدموع تجري وحلگ متقوس بكسرة، وينك يا الامير عفتني انتَ مو وعدتني متعوفني للموت؟ شلون هسة واحنه دنصير عين بعين وتصد عينك عني وتكمل طريقك عايفني بروح مجروحة..

ودعتهم العصر حتى اروح لبيت خالتي بس خالة رسمية جانت مو طبيعية ابدد مو طبيعية متغيرة عن اليوم الصبح وهالشي قلقني، بقت بس تتصفن وتفرك بيدها وتذب حسرات ومن حبيبة او البنات يسألوها شبيچ تصيح بوجههن وتطب لغرفتها..

طلعت واني افكر شبيها وليش هيجي ضايجة وظليت يومين خايفة لا يكون الموضوع متعلق بيه وحاطة ايدي على گلبي اخاف اكو خطة يردون يزوجون الامير بس طلعت غلطانة! لان بعد هاليومين الكل انصدم من عرف سبب توترها شنو..

**

-يلا ولي نظفي غرف اخوتج

-رهف: نعاااال عليهم ما انظف لاحد خليهم يهزون طولهم ويلمون الزبل وراهمم

-صابرين: يلا يا رهف لا تعلين گلبي امشي يمة امشي لا يرجعون ويكتلوچ

دبچت رجلي بالكاع طاگة روحي وصعدت فوك انظف بغرف اخوتي الجرب، انظف زبالتهم من وره خشمي ما اتعب روحي عبنهم ما يستاهلون واصلاً ما يميزون نظفت لو لا هوش الله بأرض الله وجودهم..

نظفت غرفة غفار ركض ركض وتفلت على صورته المعلگها خفه لهالوجه الخايس امس كاتلني واليوم اجي انظفله غرفته ما يستحق اخت مثلي..

فزيت مهبوط گلبي من انفتحت الباب وطب عليّ الشيطان، حاجبه معكود ووجهه مطرود منه الرحمة سبحانك ربي مو زلام جنانوه وتمشي على الكاع..

-غفار: شعندج هنا ولج

-رهف: جاي امسح صورتك

بالوصلة البيدي مسحت التفلة بساع گبل لا يشوفها ووكفت عدل، ابتسمت بوجهه وكشر بوجهي لعبانة روحه..

-غفار: ولي بره

-رهف: اگلك غفار عندي سؤال

-انچبي وطلعي

فريت ايدي بدون لا يشوفني وطلعت من غرفته اكمل شغلي وصار بوجهي سامر واكف وساند ظهره على المحجر ويباوعلي من فوك ليجوه ويضحك بشماته..

-رهف: شبيك ولك

-سامر: ههههههه هذا گدرچ وهذا مچانچ مكناسة بيد اليمين ووصلة باليسار وتكربين ليل نهار

-رهف: طير عني لا اطير وجهك بالوصلة

-سامر: لو تعرفين منو كاعد بديوان ابوي

-شعليه انا روح سامر

عفته وعبرت ممر الدرج عبن اعرف ياهو جاي ماكو غير هذا العجيز اليريد يخطبني خال غسان بس الماعرفته والجمد رجليه وما خلاني اعبر خطوة ثانية هو من كال سامر..

-عمي علي جايب واجهة وجاي ويه ولده كلهم

-رهف: ليش؟؟ سبأ بيها شي؟؟

-سامر: عرج مابيها جايين لغرض ثاني

-يا ستار شصاير وياهم؟

-جايين يطلبون من ابوي شي وابوي رفض ينطيهم

-تعلمني ببخل ابوي

-ما سألتيني شطلبوا منه

-يذبحون غفار؟

-لا

-فلوس؟

-هم لا

-چا شني

-اجو يطلبوچ الچ

-يطلبوني؟

-اجه شيخ علي وجاب مشية وياه وخطبچ لوليده علي السور

-شني!!!

-لا تكيفين ابوي رفض

-اوكف اوكف اريد افتهم ياهو خطبني؟؟؟

-هيوووو طرررش شبيچ

-ولك على كيفك وياي سولف على كيف شبيك سامر

-وجع شيخ علي خطبچ لـ علي السور

-يمة

-وصمه

-ولك اظن هاي دعوات صلاة الليل

-وينج وين صلاة الليل

عفته وركضت انزل الدرج مثل المسودنة، طبيت للمطبخ شفت امي مشلهة ردانها وتتصايح ويه ابوي وعاصف وتكول..

-صابرين: الهممم عين جايين يخطبون من عدناا هالچلااب بعليي ما ننطيهم والزهرررة ما ننطييهمم

-مسعود: ايي ايي لا تخبصينا افتهمنا

-صابرين: چااا شكو كلتلهم نفكر؟؟ شكووو ما رفضت!!

-عاصف: يمة اكيد ما نرفض بساع چا جاب واجهة شيوخ ترس بيهم الديوان حطنا بموقف محرج

-صابرين: چا احنه مو حزانة؟؟ مو عييب جايين يخطبون شني الميت ماله حرمة؟؟

-سلطان: واذا حزانة شني تردين الوادم تموت؟

-صابرين: ايي عيب عيبب ما يعرفون للاصول هاي والميت يعودلهم!

-رزاق: يمة جاي نكلج راح نرفض شبيچ ضايجة وخبصتي الدنيا

بقيت واكفة بباب المطبخ اتسمع عليهم بدون لا ابيّن روحي وافتهمت ابوي راح يرفض باجر ويكول كدامهم سألني وانا ما راضية.. عفتهم وصعدت لغرفتي وكعدت أفكر واستوعب الصار! معقولة حبيبة خلت اخوها يخطبني وهي تعرف چنت عاشگة منتصر؟ معقولة ما نبهت اخوها!

طلعني من صوت افكاري صياح امي من جوه تريدني، نزلت اشوف شتريد وكالتلي اجي اساعدها بالخبز رحت وياهة بس شني وجهها ما يگصه السيف ما تتحچى ولا تعاين لوجهي..

-رهف: يمة شبيچ

-مااااابيه شي

-جيبي انا اخبز بدالج

-لا وخري انتِ بس شنگيلي

هزيت راسي وبديت اشنگلها العجين وارتبهن بالصينية وهي شعلت التنور، لفت راسها بربطه بالعكس وبدت تاخذ من العجين وتفرشهن على المخدة..

-يمة

-خيير

-سامر گالي على شي وانصدمت

-شكو

-علساس عمي علي جاي لابوي خاطر يخطبني لابنه

ذبت المخدة من ايدها وخزرتني حييل، خزرتني لدرجة عيونها راح تطلع من وجهها هزت راسها بـ لا ونترت بيه..

-چذاب!! چذاب محد اجه خيولي هالزعطوط لا تصدكين بي

-لا مو چذاب

-رهفففف

-يمة ليش عصبية شبيچ؟

-اموووتج رهيفة والعباااس ادفنج بيددي اذا....

-گبل لا تكملين غير تاخذون رأيي گبل لا ترفضون؟

-رأيج بشنوو؟؟؟ ماكوو رأي انچبييي

-لا اشو الي رأي وانا اريد افكر بالموضوع لا تستعجلون وترفضونه

-ولج تسودنتييي انتِ؟؟ من كل عقلچ انطيچ لرسميية الخايسة!!!

-جاي اگلج راح افكر ما كلت موافقة

-اذبححج ذبح خلااص لو فكرتي! رهف لا تجربينيي تعرفيني من اعصب اميي ما اعرفها ستري على رويحتج وكملي الخبز لا ابتلي بيج

-يعني هاي نهايتي؟؟ هاي بس انظف واطبخ واركض مراكض بين اخوتي؟؟ دراستي بألف يا علي ياله رضيتوا اكملها وبالبوكات والختلات اروح للدوام هسة حتى بزواجي تردون تحكموني؟؟

-لااا ما نحكمج لاا بس هذول ما ننطيهم لو تموتين فـ انجبي وكملي شغل

-ما اكمل!!

-شنووو ولج؟؟؟

-ما اكمل يمة! خاف من شوي كتلج اريد افكر ويجوز ارفضه هسة اگلج انا موافقة اتزوج علي السور واذا وكفتي بوجهي بالعباس ابو فاضل اذب روحي بهذا التنور واخلص وأخلصكم مني!

-چا يلا ذبي روحج وخلصينا ماكو زواج

-والله اسويها!!

-عود تهددين؟

-ما اهددج بس كافي بزعت روحي من هالعيشة كاافي

-ادفنچ محترگة بهذا التنور ولا ازوجچ لابن رسمية!

-يمة لا تتحديني والله اذب روحي!

-لو تردين تذبين روحج ما تحچيها فـ كلاواتج بطليهن رهف

استفزتني بأسلوبها تحجي ببرود وتگلب بعيونها چن تريد تثورني بالزايد، اخذت عجين من الصينية وفردتها على المخدة وگبل لا تمد ايدها لغطا التنور وترفعه انا كضيته ووكفت على اصابع رجلي اريد اشمر روحي بنص التنور..

-صابرين: رهفففففففففف

لگفتني بكل قوتها ودفعتني طيحتني بالكاع، صاحت بصوت يرهب وهي تلطم على وجهها حيل وتزلغ بخدودها..

-يمممة بتي يمممة ولج لييش رهف لييش محد بقالي غيرج لييش تسوين بأمج هييجج

-احرگ روحي والله اذا تحكمتي بيه بعد والله اشعل روحي واخلص من هالعيشة!

-سكتي اشش سكتييي لا تسودنيني

-راح تقنعين ابوي يوافق يمااا

-ولج لييش لييش لييش ليييش ليييش

تلطم بكل قوتها على وجهها زورگته وتصيح "ليش" حزت بخاطري اشوفها بهالحال بس جنت متأكدة راح تطلعني من التنور وما تخليني احترگ.. امي ما تهتم الا نضغط عليها هالشكل سبأ جانت ما تتأثر بيها ولا يرفلها جفن لو سوت بروحها شي بس انا لا تگلب الدنيا..

-صابرين: كومي طبي جوه كوومي

-ما اروح الا تقنعين ابوي!

-ويييين اقنعه ابوج ما يرضى والله يا يمة ما يرضى لا تأذيني رهف كومي

-تعرفين شلون تقنعينه ما تصعب عليج يمة

-ولج اوووووووف منج لو اللزمج الا اكطعج بيددي

ما جاوبتها وكمت من الكاع خاطر اطب جوه خلص بعد سلمت الموضوع يمها ان شاء الله يارب كون تكدر تقنع ابوي بطريقتها الخاصة..

-صابرين: رهف اوكفي!!

انداريتلها اعاين لوجهها مگلوب واثر اصابعها مطبوعة بي من الطگ، هزت راسها متحلفتلي وكالت..

-لازم عندج علاقة ويه سور وهيج كاتلة روحج عليه!

-تعرفين كلش زين ماعندي علاقة ويه بشر بس سور اهون بمية مرة من الزلمة التردوني اتزوجه

-هذا ياهو؟؟

-يوم هالسوالف مو على رهف ادري بخال غسان خطبني من ابوي وتردون توافقون عليه بس اذا سويتوها ورضيتوا يا يمة والچفل زينب مو بس احرگ روحي احرگ البيت عليكم واشعل ولدچ وياي!

عفتها فاكة حلگها وصعدت لغرفتي انتظرها تجيني تگلي قنعت ابوچ وراح يتم هالزواج.. والله لو اعرف انزف بعباتي السودة المهم اتزوج انسان بي خير واخلص من هالحياة الكافرة!

كل يوم يمر وانا ارسم احلام واوهام لحياتي الجاية وامي تمشي وترزل بيه وحتى كتل تكتلني بس عايفتها ما يهمني حاسني گلبي وضعي وحياتي راح يتغيرون للاحسن وابوي راح يوافق..

وصدگ ما طول موضوعي ثلاث ايام! وصعدتلي امي تغمني وتگول ابوي رضى وراح ينطيني، شلون رضى وشعجب وشسوت وياه ما يهمني! تنهدت مرتاحة امسح على گلبي ونويت من اليوم ابدي بداية جديدة واحاول احسن من وضعي.. سور خوش زلمة وعمتي رسمية احبنها وانا وسبأ راح ننجمع ببيت واحد شريد اكثر من هيج؟

باليوم الرابع اجه عمي لابوي خاطر يسولف بالمهر وتفاجأت من شفت حبيبة جاية وياهم ومن الباب كضتني من ايدي وجرتني تصعد بينا لغرفتي..

-رهف: حبيبة

-حبيبة: طبگي الباب خاطر محد يسمعنا

-عايني حبيبة انا اعرف انتِ ليش جاية بس...

-شلون تتزوجين اخوي وگلبج ويه منتصر رهف؟؟ شلووون!

-لا والله بس فهميني ولا تستعجلين انا منتصر صفحة سودة وطويتها من حياتي وداعة امي

-رهف سور ما يستحق ينلعب بمشاعره والله الزلمة شاريج!

-ادري گلبج محترگ على اخوچ بس ما راح اللعب بمشاعره والله.. ماريد عشگ منتصر يبقى طمغة بيه العمر كله انا هم استاهل اتزوج واعيش!

-ما مرتاحة رهف اخاف على سور والله اخاف لا تلوميني اخاف تردين بس تقهرين منتصر بي!

-ادري وحگچ بس شوفي شلون راح اسعده تره سور ابن عمي وهم اخاف عليه لا عبالج استغله لو متزوجته خاطر اقهر بي منتصر لا والله شالني الو راس وسطرني لو فكرت هيج تفكير!

انتفضنا ثنينا شاهگات من انفتح باب غرفتي علينا وطل منها غفار! غفار واكف بالباب كدامنا وعيونه يتطاير منهن شرار....

يتبع 👑....

━━━━━━ ♛ ━━━━━━

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

المشكلة عيونك هنّه هنّه

چا وين وديت المَحنّة ؟ ♥️

━━━━━━ ♛ ━━━━━━

"حــبيبة"

طاح گلبي من شفت غفار بوجهي ومن الخوف رهف كضت ايدي لدرجة نبتت اظافرها بيه، صديت عيوني عنه ودعيت بگلبي كون ما سمع الحچيناه..

-غفار: يا هلاا ما صدكت من كالت امي حبيبة دايسة دارنا الا من سمعت صوتج جاي من غرفة اختي

-رهف: غفار..

-غفار: سكتي انتِ!!

جريت رهف اضمها وره ظهري البت يابسة من الخوف وعيونها متروسة دموع، اشرتله بيدي بحركة وخر وكلت بهدوء..

-شوي من رخصتك اريد اطلع

-غفار: وين تطلعين

-انزل جوه لابوي واخوتي

-اوكفي رايدج بچلمة

-غفار وخر عن طريقي اريد اطلع!

-انتِ شبيچ؟؟ شنو هالغرور والتكبر يمته تبطلين هالتصرفات!

-اذا ماريد احجي وياك صرت مغرورة؟

-مغرورة ونص! شايفة روحج على العالم على شنوو؟ هاي وانتِ مطلگة ومحترگة هم!

حچيه قاسي بس والله ولا اثر بيه لان اعرف نفسيته شكد دنيئة وحقيرة، ما اهتميتله وعدلت جنطتي الي على چتفي وجريت ايد رهف وياي اريد اجتازه واطلع بس ما رضى وكف بالباب يسدها علينا..

-غفار: ما قصدت الگلته حبيبة

-وخر

-انتِ تعصبيني!! انتِ بهذا برودج تستفزيني شمسويلج وكل هالحقد بكلبج عليَّ؟!

-خوية وخر عن طريقي! مو حالة هااي ماريد احجي وياك مارريد زيح هيج خلينا نطلع من الغرفة!

-انتِ مو مال احترااام

كضني من ايدي ولواها حييل، صرخت متوجعة وصم حلگي بيده ودفعني لزكني ويه الحايط متت بدمي عصبية وخوف بنفس الوقت.. رجف گلبي ويه صوت صياح رهف وشلون النذل رفسها برجله من اجت تفزعلي..

-رهف: حراام عليك وخرر يا الما تخاف الله وخررر

-غفار: وخري لا تنطگين انتِ!!

رفسها برجله مرة ثانية وطيحها بالكاع خلاني اشووط من القهر، كامت بسرعة وبقت تتعارك وياه بيدها وتجره مني وهو قافل لازمني بكل قوته ويضغط على وجهي بالحايط احس خشمي راح يطگ..

-رهف: توخرر لا اذبحك بيددي غفاار

-غفار: ههههه تهدديني بقلم كحل؟

-رهف: احطه بعينك والله!!!

رخت ايده مني شوي چنه يريد يكتلها واستغليت هالفرصة وفلتت نفسي منه ودست على رجله بكعب حذائي شاغت روحه..

-حبيبة: حقيير نذذل ماعندك شررف! انا اعلمك اخلي ابوي واخوتي يتصرفون وياك يا زبااااالة

كضيت رهف وركضت اهرول اطلع من غرفتها وحسيت بي يجرني من شالي من وره راد ينزعه من راسي، اللتفتت بكل جسمي عليه ارجف غضب تمنيت اذبحه بيدي واشرب من دمه..

-حبيبة: هدددني ووولك

-غفار: اوكفي اووكفي لا ترحين ما عندي شي وياچ انا بس اريد احاچيچ!

-حبيبة: وانا ماااريد

-غفار: لا تصيحين حبيبة صوتج يوصل!

-هذا الاريده انا شيل ايدك من حجابي لا افضحكم واشهركم وعلي

-وما تخافين على سمعتج وانتِ مطلگة؟؟؟

-مطلگة واشرفك واشرف عشرة من امثالك لا عبالك تستفزني هالچلمة

-عايني حالج عاينيي الله گلبها بيج امج مسجونة ووجهج محترگ ومطلگة دگ بلاوي على راسج وبعدها رجليج ما لايحة الكاع

-حبيبة: مطلكة، محتركة، امي مسجونة وبعدك تركض وراي! احترم نفسك وعوفني غفار لا والعباس ابو فاضل اشهرك شهيرة واخلي سيرتك على كل لسان!

-غفار: ياهو يصدكج وانتِ حرمة؟ تحجين عليّ چلمة تنردلج اضعاف وسمعتج تصير بين الرجلين

-رهف: حبيبة عوفي مالج غرض لا تجاوبي

-حبيبة: عود حسبالك اخاف من تحجي هيج؟؟ لا والله بالعكس عبن اعرف شنو نيتك انتَ متعمد تأذيني وتسويلك سالفة خاطر تورطني وياك هالدروب مو عليَّ حفظت سوالفكم!

-غفار: ولج ماكو هيج صلافة! ترباية شيخ علي وسلوى ما اعتب عليج

ما تعبت نفسي وجاوبته بعد عفته وطلعت من غرفة رهف اركض وامشي رهف كدامي خاف يسويلها شي.. وصلنا لممر درجهم جاي نريد نعبره وشهگت من انشنطت ايدي وانجريت بحركة عنيفة قوية من غفار..

-حبيبة: عوفـ...

-غفار: احبج اناا احبج ليش ما جاي تفهمينن ولج سودنتيني يمته تحنين عليَّ وتصيرين الي حبيبة!!

-حبيبة: بأحلاامك هد ايدي

عتيت ايدي منه وركضت ويه رهف ننزل الدرج واسمعه يصيح بصوت مو كلش عالي..

-غفار: ما قصدت اضوجچ وينج حبيبة لا ترحين خليني افهمجج لاا ترحييييين

طلعت مثل المخبلة من بيتهم اخاف على روحي منهم اساساً اني اجيت هنا وابوي ما راضي گوة قبل وكال ما اتأخر دقايق وارجع للسيارة علي الكرار كاعد ينتظرني هناك..

طبگت رهف باب المطبخ ورانه وطلعت وياي للساحة، ودعتها بباب الحوش وگبل لا اطلع كضت ايدي وعيونها مدمعة، نزلت دمعتها مقهورة وكالت بحسرة..

-انا اسفة حبيبة، اسفة لان بكل مرة تجين لبيتنا تطلعين وانتِ خايفة

-مو ذنبج رهيفة لا تهتمين، يلا مع السلامة

-حبيبة اوكفي

وكفت بس عيني على الباب گلبي مقموت خايفة لا يطلع غفار من جديد ونتلاگه وتصير مشكلة جديدة..

-رهف: انا راح ارفض علي السور واعتبري الموضوع ما صار من اساسه

-حبيبة: ليش

-ماريد اخليج بموقف مو حلو ويه اخوج وحگچ خايفة عليه مني انا راح احل السالفة لا تهتمين وانسي الصار امانة

-رهف..

-حبيبة امانة الله ورسوله احلفج اذا اجاني نصيب بالايام الجاية لا تذكريني بعلاقتي القديمة ويه منتصر ولا تعيريني بيها بيوم اريد اعيش بعيد عنه وعن طاري اسمه انا كارهته والله ماريده ولا مفكرة بي بعد..

صفنت ماعرف شجاوبها، البت تبجي وتتلفت للباب تخاف لا اخوها يرجع مسحت دموعها من خدودها وهمست بصوت ناصي بيني وبينها..

-يشهد الله وراس سبأ الماعندي اعز منها منتصر لمسة لايدي ما لامسني والصار بس رسايل مو اكثر وهو التقربلي ووهمني وخلاني اتعلق بي واطيح والله العظيم متندمة ندم عمري واكبر غلطة بحياتي جانت من فكرت بي

-رهف غفار يجوز سمعنا من چنه نحجي؟؟

-لا ما اظن.. لو سمعنا چان طگني گدامج وما اللتهى بيج اتطمني

-واذا طلع سامع ومنتظرني اطلع ويستفرد بيج؟؟

-حبيبة لا يظل بالج عليّ كتلج ما سمع اخوي وانا اعرفه شنو ما ينتظر او يتردد اذا راد يسويلي شي

دگيت رجلي بالكاع محتارة ووجع خشمي ينخر بگلبي، ظليت اراواح بمچاني اعاين لباب الحوش وارجع عيوني على رهف المبتسمة بين دموعها وتحرك بيدها حتى اروح..

-رهف: يلا روحي حبي لا يظل بالهم

-حبيبة: اووووف رهف الله ياخذ عدووچ

-شني ولج شسويت

-ليش احبچ هالكثر لييش

جريتها لصدري حضنتها وچن البت چانت منتظرة هالحضن لانها انفجرت تبچي على چتفي، گلبي تگطع عليها وعلى اخوي العاشگها.. احسني واكفة بين نارين نار خوفي على اخوي لا يتورط ببت ما تحبه ونار خايفة لا اظلمها واخش بخطيتها..

تنهدت افكر بحياتي وشلون انگلبت من تزوجت منتصر لليوم، غلطت من تزوجته وغلطة الشاطر بألف بس لو نجي للواقع فـ كلنا نغلط وكلنا عدنا ماضي بس الله ساترنا ومحد يدري بالمصايب النسويها لولا ستر رب العالمين چان ناس اكلت ناس.. ذبيت حسرة عالية خاتمة طواحين افكاري، اذا هو رب العالمين يسامح ويغفر ويستر الوادم احنه البشر شنو كاعدين نحاسب؟!

-حبيبة: رهف لا تظلمين اخوي وياچ احلفج بداعة امج

وخرت من حضني تباوعلي وجهها صاير خريطة من الدموع، تنهدت مبتسمة ومسحت خدودها بيدي..

-حبيبة: علي السور ذهب مصفى وراح تشوفين بعينج شلون زلمة كفو هو، صح يحب يضحك ويحشش ويگمز منا ومنا بس رجال ونعم منه لا تغرچ شخصيته ويانه

-شنو قصدج

-قصدي يستاهل ينعشگ ويعيش احلى ايامه ويه البت الهاويها لا تحرمي من هالشي

-يعني...

-ما راح اگله على منتصر ولا على أي شي صار بالماضي وان شاء الله يكون منتهي بس الاريده منج ما تفشليني وياه وتخليني اعض اصبع الندم

-لاا وداعة امي مستحيل افشلج والله احطه بعيوني لا توصين حريصة

-اعرفج سباعية ووكحة چا ما هواچ اخوي المسودن سور يخرب على الصلفات

ضحكت وغطت وجهها وفجأة صارت چتافها تهتز تبچي بنفس الوقت، مسحت على راسها وزندها وكلت بنبرة مستعجلة..

-ابجي هناك خايبة خليني اروح لا يرجعلنا اخوج الخبل

-الله وياچ حبيبتي

ودعتني للباب بدموعها وكل شوي تضحك وترجع تبجي ما تنعرف مشاعرها شنو، سويتلها بيدي باي وطلعت اركض لـ علي الكـرار وركبت السيارة..

-علي الكرار: تأخرتي حبيبة! الف سالفة وسالفة اجت براسي

-مابيه شي جنت احاچي رهيفة

-اتفقوا على المهر؟

-مادري والله كلشي ما ينسمع من ديوانهم بعيد

-چا يلا اوصلج للبيت وارجعلهم

-لا ترجعني للبيت فدوة مخنوگة

-چا وين تردين اخذج

-لأي مكان بس مو للبيت امي رسمية راح تموتنيي من يوم خطب علي السور لليوم هي شايلة سيف وتفتر علينا وترزل

-علي الكـرار: حگها خايبة انا هم انصدمت ولا ادري بـ سويّر عينه على رهف

-امم.. اخذني لبيت خالة تَـمني اروح اشوف البنيات مشتاقتلهن

-احم.. هاا رايحة تشوفين تالة

-لا

-چا؟؟

-رايحة اشوف تَـمني والساحلتك

طنگر ضايج وكفخني على راسي، ضحكت على حرگته وخليته ياخذني وهو الممنون لا والحلو من وصلني لبابهم ما رضى يروح وكال..

-حبيبة انا اظل واكفلج هنا خاف تحتاجين شي

-تره اطول جوه انا

-اي ادري ميخالف

-وشني واكف هنا ناطور

-حبيبة نززلي لا تنكفخين مرة ثانية

-اهوووووو

نزلت من السيارة وطبگت الباب حيل، ضحكت من صاح عليَّ يرزل شلون ركعت باب سيارته هيج بس عفته يصيح ورحت ادگ جرس بيتهم، شوي وفتح الجامة مال السيارة وگال..

-ها تأخرو؟

-هستوني دكيتها ما لحگن يطلعن بعدهن

-هاا

-يلا سد الجامة

-لا خليها حارة

ما جاي اكدر اكض روحي صايرة سفيهة وعلى كلشي اضحك، اباوعله شلون منتظرهم يفتحون اكثر مني كاعد على نار وعيونه ملزوكة بالباب.. ثواني وانفتحت باب الحوش بس الفتحتها بقت جوه ما مدت راسها فـ انا گبل طبيت للبيت وعفت هالمسكين خايب امله بره..

-حبيبة: السلام عليكم

-تالة: عليكم السلام هلوو حبيبة شلونچ

-بخير الحمد انتِ شلونچ يروحي مشتاقين

-وينج يا الكاطعة لا تجين لا تمرين لا تسألين

-حبيبة: وانتِ شبيچ ما تجينا هاي كل يوم العصر من نلتم اكول هسة تجينه تالة وتكمل السبحة

-وين يمعودة علساس متعرفين امي

-يمعودة شني السالفة

-تعاي تعاي تفضلي جاية وحدج مو؟

-اي خطية كرار جابني

-هااااا

-اييييي

-امم.. يلا لعد امشي ندخل جوه

ابتسمت على توترها بس ما حسستها انتبهت لعيونها الطايرة على باب الحوش.. طبيت وياهة للبيت وسلمت على تَـمني وخالتها ومثل گبل خالتها تلگتني ذاك الملگه..

كعدت وياهن شوي وسولفت ويه تالة امها بس تَـمني جانت هادئة ما تشارك هواي الا من گمنا سوه للمطبخ نسوي كابتشينو..

-حبيبة: يلا عاد تَـمني سولفي ما متعودة عليج هيج انا

-تَـمني: ماعرف بشنو تردين اسولف

-حبيبة: أي شي يعني مثلاً شنو راح تلبسين بالعقد؟

-تالة: كرار راح يتزوج؟؟؟

-حبيبة: ههههههههه لا ولج شبيج فززتيني

-تَـمني: اووووف تالة خزيتينا

-حبيبة: لا يمعودة عادي، چا ما افتهمني بـ علي السور خطب وراح يتزوج

-تَـمني: سور؟! شعجب هو مو كرار اكبر منه وبعده ممتزوج

-حبيبة: اي صارت فجأة وانجلطت امي

-تَـمني: خالة رسمية انجلطت؟؟

-حبيبة: ولج لاا اسم الله عليها بس هذا تعبير مجازي

-تَـمني: ليش المن خطب؟

-حبيبة: ما راح تصدكون

-تالة: هسة غير تكول منو

-حبيبة: رهف

-تالة + تَـمني: رهف بت عمكم مسعود؟!!!!!

-حبيبة: اي

-تَـمني: شنو هالصدمة!! معقولة؟؟

-حبيبة: اي والعباس صدمة من صدمة ولو تشوفن شصاير ببيتنا صار يومين امي مهلهلة على الكل حتى ابوي ما يتدنه عليها لان بقت حباية وتطلب الطلاگ

-تالة: ما قابلة برهف مو

-حبيبة: ابددد وكضت سور هزأته تهزأ بالرزايل تگله انتَ لا عندك ذوق ولا فلوس خاطر تتزوج

-تَـمني: ولج هو أحنه مصدومات الله يساعد خالة خصوصاً وهي متطيق بيت مسعود خطية هي سبأ يمها والبنية راح تموت من كدما تضغط عليها

-حبيبة: لا لا بنات رهف امي رسمية ما تطيقها سودة عليّ عاد سبأ اشوى الا رهف يبوو شكد تضوج منها عبنها وكحة

-تالة: ليلة هم وكحة بس خالة رسمية تحبها شمعنى تضوج من رهف؟

-حبيبة: لا ليلة عزيزتها من گبل لا يتزوجها ابا الحسن تموت عليها بس رهف تكرهها كره ما صاير ولا داير وهيج صايرين هي وابوي وسور كل ساع وگبتلج هوسة

-تَـمني: يعني من طلعت من البيت خالة رسمية جانت ضايجة من خطبة علي السور واحنه مندري؟

-حبيبة: اي وبيومها چانو رايحين طالبيها الامير مسولف ويه ابوي وگايله سور هاوي رهف ورايحين خاطبيله بس جانت شبه متأكدة مسعود وولده راح يرفضون والصدمة جانت من رضوا وانطوا

-تالة: الله والله اكشن صاير ببيتكم

-حبيبة: لا هو انا شردت من المشاكل اريد راسي يستقر

-تَـمني: يا الله هسة شلون حبيبة شلون صفت؟

-حبيبة: امي راكبة راسها رهف ما تطب بيتها واذا سور يريد يتزوجها يطلعها بيت وحدها المهم ما يتلاگن كل يوم الصبح

-تَـمني: خدمتها بهالشرط هي هههههه

-حبيبة: لا والله ما اظن عبن رهف مكيفة تريد تكعد ويانه لخاطر سبأ

-تالة: ياا اي هنه خوات صح

اخذنا سوالفنا ويه صينية الكابتشينو للصالة خالة تَـمني عافتنا براحتنا نسولف وهي راحت لغرفتها، دكيت على كرار اتأكد بعده واكف لو لا وهمزين كال ابوي متصل بي ورايحله معناها اكدر اطول براحتي هنا..

-تالة: شوكت العقد ما حددتوا؟

-حبيبة: اظن الجمعة

-تالة: ياا تَـمني ما راح نكدر نحضر حرامات

-حبيبة: ليش عود

-تَـمني: خالتي عدها معاملة ببغداد يوم الخميس وراح نروح وياهة نبقى كم يوم نقضي العطلة بيها

-حبيبة: صح تمنيت تحضرين العقد بس زين تسوين طلعي وغيري جو شعندج كاعدة بين اربع حيطان

-تَـمني: والله ميعجبني اروح ولا ببالي بس خالتي متقبل ابقى هنا وحدي

-حبيبة: اخذيها نصيحة من اخت لا تحبسين روحج تَـمني وطلعي وعيشي حياتج طبيعي مثلما هو عايشها ماريد امرد افادچ بس الامير ما معلوم يمته ترجعله الذاكرة لا تعذبين نفسج طول ما هو هيج اصلاً هو ما يرضى بهالشي ومتأكدة لو هو بذاكرته القديمة مستحييل يرضى على وضعج

-تَـمني: الله كريم

-حبيبة: يلا انا اروح بعد الوكت تأخر

چلبن بيه خاطر ابقى وانا هم يعجبني ابقى بعد بس غير امي رسمية تگطعني هو انا اجيت من دون علمها واكيد راح تستلمني بالرزايل اول ما ارجع وتطلع حرگتها بيه..

طلعتني تالة تودعني للباب وحسيتها طلعت خاطر تشوف كرار وما غلطت والله، جمدت رجليها وعيونها تعلكت بسيارته وهو هم اول ما شافها نزل بساع ووكف بمچانه..

-علي الكـرار: السلـ.. السلام عليكم

-تالة: عليكم السلام

-علي الكـرار: شلونكم

-تالة: بخير، انتو شلونكم

-علي الكرار: والله مو بخير

-حبيبة: احمممم احمممم

-علي الكـرار: شمالج مريض لو حرام اذا مرضت

-تالة: سلامتك متشوف شر

هز راسه متحسر بدون لا يجاوبها ورجع طب للسيارة، ودعتها وداع اخير وطبيت للسيارة كعدت بكرسي الصدر والطريق كله اسمع صوت حسراته العالية وهمساته وهو يدندن..

-الشر لو منچ راضين بي

يا الغايب وجرحك ناسي بگلبي

ضجت على اخوي المو راضية تضحكله الدنيا وظليت ساكتة وادعيله بگلبي كون ربي يصيح براس ام تالة وترضى تجمعهم ولا تخليهم يسوون شي وره ظهورنا..

وصلت للبيت ورجعت اسمع مواويل الرزايل والدعاوي ا بيت مسعود يمممة گلبي انفخ والله وتعبت، مكابلة امي وكاعدة اواسيها على الجاي تعيشه وبقينا على هالحال ثلاث ايام.. ثلاث ايام احنه نعيد ونزيد ونسمع لنفس الاسطوانة تتكرر لدرجة بزعناا..

حسيت الصبح على صوت موبايلي يدگ، فتحت تك عين اشوف منو اليتصل هيج وكت وفزيت مخلوسة من شفت المتصل "حاكم"! طفرت من الجرباية اوكف على رجليه واعاين للموبايل والتردد يقرا عندي الف ماعرف اجاوبه لو اغلس..

-حبيبة: راح اجاوب.. الله يستر ان شاء الله ماكو شي اي اجاوب.. الو؟

-حاكم: صباح الخير ست حبيبة

-حبيبة: صباح النور اهلاً دكتور

-اعتذر اذا متصل بوقت غير مناسب بس محتاجج بخدمة بلا امر عليج

-تفضل؟

-حور شوية تعبانة وصارلها ساعة تبجي وتنوح تريدج وامي كلش خايفة عليها اكدر اجي عليج اجيبچ لبيتنا تشوفيها او اذا تكدرين أي احد من اهلج يجيبج؟

-شبيها حور؟؟

-هي تحچيلج افضل

-حاكم خوفتني شبيها اختك؟؟

-تعالي حبيبة وتعرفين

-تمام تمام هسة اكول لابوي

سديته منه وركضت انزل اشوف ابوي، صح مستغربة من تصرف حاكم هاي اول مرة يسويها ويتصل بيه من حور تبجي لان اصلاً حور حساسة كلش ودائماً تبجي بس مبين الوضع هسة ما ينسكت عنه..

دكيت باب غرفته وسمحلي ادخل، سولفتله مختصر مفيد بس ما كتله حاكم اتصل كتله هي حور دكتلي ووضعها صعب وتريدني ولازم اروح اواسيها وانا صديقتها المفضلة وماعدها غيري وخطية يتيمة وغريبة عن المحافظة وماعدها احد ودگتلي بالذات خاطر اروحلها ووووو... دگيتله اليتيمة ورووح روحي طلعت ياله اقتنع وشرط الا هو ياخذني..

-حبيبة: يا بعد روحيي بوية انتظرني بس خمس دقايق ابدل وانزل

صعدت فوك اركض غسلت وجهي وفرشت اسناني ولبست صاية وشال لفيته شلون مچان ونزلت لابوي لگيته واكف ويفرك بعيونه..

-حبيبة: خلصت انا

-شيخ علي: اليوم رهف تطلع تشتري الذهب ترحين وياهم؟

-حبيبة: لا امي رسمية حلفت اذا اروح تتبرى مني

فر بيده ما عاجبه وطلعنا سوه لبيت دكتور حاكم، الطريق كله گلبي يدگ ومتوتررة كلش اخاف لا بيها شي وحاكم ما يحجي بس لا اكيد هو راح يكون حريص اكثر عليها..

-شيخ علي: يلا بوية

نزلت ونزل وياي، صعدت درجات بيتهم ودكيت باب الحوش وما طول ثواني وفتحها حاكم بس چنه ما شاف ابوي الواگف وراي لان الابتسامة المرسومة على وجهه الف علامة استفهام بيها شاگة وجهها من الاذن للاذن..

-حاكم: يا اهلاً وسهلاً

-شيخ علي: هلا بيك عمي

وكعت ابتسامته بساع وعض على شفته، بلع ريگه وطلع من باب الحوش يروح لابوي خاطر يسلم عليه وانا اختصرت الوقت وطبيت جوه، استقبلتني ام حور وجهها صاير احمر مبين زالغته ووضعها يخوف..

-حبيبة: اسم الله خالة شصاير؟؟

-حور حابسة روحها بالغرفة متقبل تطلع ماما حبيبة فدوة لعينج قنعيها

هزيت راسي وصعدت وياهة لغرفة حور، دكيت الباب عليها وما جاوبت دكيتها مرة اللخ وكلتلها انا حبيبة ياله جاوبت وبساع فتحت الباب وطببتني جوه..

-حبيبة: حووور شنو هالحال؟؟؟؟

ذبت روحها بحضني تبجي بصوت عاالي بچي مرد گلبي، بعدني مصدومة من منظرها وشعرها المكفش ووجهها المجروح شكلها مكتولة بس مو كتلة طبيعية لاا كتلة زورگتها لان حتى زندها بي زراگ مال حزام..

-حور: حبيبة تعبت تعبتتت

-حبيبة: بس فهميني خية على كيفج منو مسوي بيج هيج؟؟

-حسام اخووية حسام ضربني

-صخاام الصخمني ليش ولج؟؟

بجت مرة اللخ ما ترضى تحجي شكد حاولت وضغطت عليها بس ابدد قافلة مو شلون ما چان حيرتني بالزايد..

-فهميني حاكم وين چان عنج؟؟

-بالدوام خفارة ميدري هو وامي هم ما حچتله

-يعني ميدري بحسام كاتلچ لحد هسة؟

-اي

-ليش ما تحچيله؟ شمنتظرة!

-حبيبة امي تموت والله حسام متغير علينا كللش حتى ورث ابوي الله يرحمه يريد يقسمه ويهجولنا بالشارع

-استغفرالله يا ربي

-اول مرة يمد ايده عليَّ بحياته كلها ممسويها والله جان ماكو اطيب من گلبه بس منعرف شبيي صارله سنة متخبل علينا

-والله مادري شكول

رجعت تبجي وتضم بوجهها، سحبتها لحضني امسح على وظهرها واسمعها تشهگ بروح ملچومة.. سودة عليَّ وينها وين الكتل هاي چنها نستلة شمالهم الاخوان متخبلين على خواتهم شو انا اخوتي يفدوني بروحهم..

ما كدرت اعوفها واطلع وبقيت وياهة لحدما حسيتها غفت، كمت عدلت نومتها وغطيتها وطلعت موبايلي من جيبي اشوف چم مرة ابوي متصل بيه بس الغريبة ولا مرة داگلي..

رجعت الموبايل لجيبي ورحت اطفي اضوية الغرفة خاطر ما تزعجها، وانا امشي حسيتني دست على شي نزلت عيوني اشوف وانتبهت طايح گلاص گزاز بالكاع وبصفه موبايل حور مشمور..

شلتهن ثنينهن احطهم على ميزها وبلمستي ضوه موبايلها بيدي، ما اهتميت ونزلته على الميز بس جذبني اشعار جايها من واحد كاتبة اسمه بالانكليزي بس طويل وحاطة وياه قلوب حمر..

الفضول اشتغل عندي والف تساؤل اجه براسي بس ما تجرأت وقريت الاشعارات الا من شفت اخر الاسم مكتوب "Noor".. كضيت الموبايل بيدي اقرا الاسم وشهكت من شفته اسم اخوي! اسم اخوي علي النور وكاتبلها رسالة محتواها هو!

"والله گلبي جاي يتگطع بس كلشي بيناتنا انتهى حور ماريد اسببلچ مشاكل اكثر، انا مستعد انتظرج العمر كله بس لا تأذين نفسج وتورطين روحج ويه اخوچ خلي تواصلنا ينگطع هالفترة خاطر ما تجيچ مصيبة واياچ تتصرفين تصرف غبي لو ترجعين تفتحين الموضوع وياه وهو عصبي انتظري چم يوم وسولفي لا تتهورين.. احبچ"

**

"ســـبأ"

بكبر صدمتي بالجاي يصير انا فرحانة، فرحانة واحسني طايررة من السعادة كل شوي اتصل بـ علي التـقي واگمز على راسه والزلمة متعجب من الشخصية الخفيفة الطلعت فجأة والمشكلة هو بالواجب وشغل الدنيا كله فوك راسه وانا البطرانة اخابره على سوالف تافهة..

-علي التـقي: لو ادري بزواج رهف وسور هيج يفرحج جان من زمان خليته يخطبها حتى لو ما يريدها اغصبه

-سبأ: ههههههه تقي ما مصدكة والله ماعرف وين انطي وجهي من الفرح

-علي التـقي: وين ترحين يمعودة محتاج وجهج انا

-هههههههههههههههههه

-عساها دوم

-احم.. تقي عندي طلب بس اذا ما ترضى عادي والله مو اله اصلاً مو لازم صدگني

-كولي شعندج

-عادي اطلع ويه رهف من تشتري الذهب؟

-اممممم

-ها ما ترضى؟ خلص ماروح عادي

-ولج هو انا لحكت اجاوب

-چا مو كلت امم؟

-ليش اممم جواب؟

-اي غير

-وشنو تفسريها؟

-مادري يعني حسب الموقف

-هههههههه يا حلاتج يا سبأ روحي بوية طلعي واشتريلج شي وياهة

-صدگ والله؟؟

-اي حبي اخذي فلوس من القاصة تعرفين الرمز مو؟

-اي اعرفه بس ابد ما فاتحتها والله

-ادري بيج، اخذي فلوس منها واشتري الي يعجبج من الصايغ واخذيلج هم نفنوف وهالسوالف مال بنات اذا تحبين

-بعد حيلي الله لا يحرمني منك

-ولا منج حبيبتي

-احبك تقي والله هواي احبك

-جايك جاي.. احبج اكثر يلا انا لازم اروح حبيبتي

-الله وياك عيني

سديته منه وبقيت باقي اليوم بغرفتي لان عمتي رسمية ما طايقة تشوف وجهي واخاف لا تسمعني شي يضوج..

كلشي ما لحگنا نسوي والوضع متكهرب بين عمي علي وعمتي رسمية وحتى للسوك ما رضت تطلع ويه رهف خاطر تشتريلها الذهب ونفنوف العقد، طلعت انا وابرار وياهة واشترينالها كل احتياجاتها وعيوني ما فارگت وجهها المشتاگتله، الفرحة البيه ما انطيها لبشر وين چنت محسبتلها هاي رهف اخيتي وقطعة من روحي تصير مرة حماي واكدر اشوفها كل يوم وما اظل أتحسر عليها؟ يا بختي!

-ابرار: بنات الذهب بقى رهف اشتري اكثر شي ذهب بفلوس مهرج ما اوصيچ لا تحيرين بالخرگ والجرود كلهن يروحن وزلمتج بعدين ما يقصر وياچ بس الذهب زينة وخزينة وكله الج يظل

-رهف: خوش

طبينا للصايغ الاول بس كلشي ما عجبها فـ طلعنا لغيره وهم كلشي ما جذبها مع العلم الذهب يخبل وانا حرت شنو اخذ بس رهف من گبل تشلع گلب امي من تشتري حاجة انا كلشي الجان يعجبني وارضى بي..

اخيراً دخلنا لصايغ وعجبها شي اخذت تخم كامل وابرار اخذت مدالية وياهة عجبتها وانا ظليت محتارة شنو اخذ شو كلشي حلو بس المشكلة خاف انا اشوفنه حلو وعلي التقي ما يعجبه ويحجي على ذوقي؟

-رهف: سبأ شنو منتظرة؟

-سبأ: ماعرف شأختار اخذيلي على ذوقج

-رهف: لا انتِ اختاري

-سبأ: خية ذوقي مو حلو خاف ما يعجب تقي

-رهف: ما دامه يحبج لازم يحب ذوقج هم انتِ اختاري يلا

-سبأ: مو...

-رهف: اششش يلا اشري على قطعة خلي الصايغ ينزلها

شفت ابرار تضحك وتضم حلگها بعباتها حگها والله تشوفني لا هده ولا سده واختي الصغيرة ترزل بيه..

-سبأ: اشوفن هذا؟

-رهف: نزله بلا زحمة

نزله الصايغ وحطه كدامي، عبارة عن كلادة وسوار كال يسمونه نص تخم، ظليت اگلبه بيدي واعاين لرهف مترددة ابتسمت ابرار وكالت..

-اذا ما عجبج مو لازم تاخذينه سبأ

-سبأ: اي اي ما عجبني اريدن ذاك

-الصايغ: صار

جابلي الثاني هم كلادة وسوار بس شكله يخبل متت عليه صايرة الكلادة زنجيل ومشكل بي كله ورود صغار والسوار نفس الشكل.. احتاريت اكثر وخفت اخذه ويعيبون عليَّ ويكولون عني مرعبلة وماعرف اشتري يا ربي شون بيه..

-رهف: ها خية

-سبأ: اكلج هذا حلو يعني؟

-رهف: مالي غرض عجبج اخذي ما عجبج نشوف غيره

-سبأ: شبيچ نحيسة دجاوبي، ابرار هذا حلو لو لا؟

-ابرار: حـ...

-رهف: لا ابرار لا تجاوبيها! خليها هي تقرر

-ابرار: لا رهف عادي واذا شجعناها تاخذه ما دامه حلو

ما جاوبتها رهف وكضتني من ايدي وهمست بصوت ما يسمعه غيرنا..

-رهف: تعلمي شلون تختارين وابني شخصيتج خيتي تره تظلين هيج طول العمر اذا ما تجرأتي واخذتي قرار وحيدج هسة!

-سبأ: مو..

-رهف: ماكو مو شوفي اذا عجبج اخذي ما عجبج رجعي اذا تظلين تاخذين رأي الكل عمرج ما راح تشترين لان مستحيل الكل يتفق على ذوق واحد وراح تبقين بهالحيرة

هزيت راسي بس بقيت خايفة لچن خلص لازم اتخذ قرار..

-سبأ: اريده بلا زحمة

-ابرار: وزنه النا خوية نشوف چم مثقال

-الصايغ: بخدمتكم.. خيتي هذا 13 مثقال وحبايتين تقريباً

-سبأ: هاا خاف هواي؟

-رهف بهمس: شكد منطيج زلمتج؟

-ما انطاني كال اخذي من القاصة التحتاجي

-ابرار: يا خية چا شكو ما دامه ما حددلج سعر اخذي تره كلش حلو

-سبأ: مو خطية

-رهف: ااخ گلبي

-سبأ: لا لا خلص راح اخذه

ضحك الصايغ يهز راسه صخام هذا شلون سمعنه واحنه نتهامس بيناتنا، عاملته ابرار على ذهبنا ونززلنا من السعر وحطهن بعلب حلوة وانطاهم النا..

شلت الذهب مالتي وبگلبي طايرة من الفرح متحمسة يجي تقي ويشوفني لابسته هذا اول ذهب يشتري الي تقي من بعد الحلقة وللموت ما ابيعه ولا اتصرف بي راح اضمه لبنيتي بالمستقبل اذا صار عندي بت طبعاً..

-ابرار: بنيات منو تريد تروح وياي للتواليت؟

-رهف: انا ماريد متوضاية

-سبأ: انا هم

-ابرار: چا خوش انا رايحة وانتن افترن قريب منا لا تروحن بعيد خاطر اللگاچن بساع وما ينشلع گلبي

-رهف: صار

راحت ابرار وبقينا انا ورهف نفتر شوي هي اشترت بعد اغراض وشنو تاخذ لروحها تگلي اشتري بس حسيت صرفت هواي ومفتشلة لا ينحجي عليّ..

-رهف: سبأ جاي تحسسيني چنتي بت فگر تره من اول انتِ بت عز وخير وطبيعي تشترين الي يناسبج

-سبأ: بس من چنت ببيت ابوي ما يرضى اشتري الي يناسبني وحسرة علينا الطلعة

-رهف: بس هسة انتِ تزوجتي وزلمتج والنعم منه ادمي ويحبج ليش تظلين عايشة نفس عيشتج ببيت ابوي وما تطورين؟ حبي نفسچ وانسي حياتج الراحت انتِ هسة مرته لـ تقي مو بت مسعود!

سكتت افكر بچلامها وافترينا بعد بالسوگ، وكفت رهف تتعامل على تراك الي وبينما هي ملتهية واكفة تختار اللون المناسب شفت منتصر ابن عمي جاي بأتجاهنا..

-سبأ: هذا شيسوي هنا منـ...

-منتصر: رهف!!!

نزت رهف مخترعة وذبت التراك من ايدها، كضتني من ايدي حيل وجرتني ومشت بينا سريع..

-سبأ: رهف ايدي شبيچ تجرين هيج

-امشي بسرعة امشي

-منتصر: رهفف مو احاجيج!! رهف اوكفي رهففف!!

-سبأ: شيريد منتصر ولج اوكفي شوفي الزلمة شبي

-رهف: ماريد احجي ويااه امشيي

ما لحگنا نعبر للجهة الثانية لان منتصر هرول گبلنا ووگف بوجهنا وجهه مگلوب وحواجبه معگودة مبين ضايج من شي بسبب نبرة صوته التنتر بهمس..

-منتصر: انا مو احجي وياچ؟!! ليش تعبريني وتركضين؟!

-رهف: شتريد؟؟ ماريد اوكف وياك بالشارع الوادم شتكول علينا هسة؟

-منتصر: الوادم؟؟ لو خايفة واحد من بيت عمي علي يشوفج واكفة وياي!

-رهف: ههههههه واذا شافوني؟ ابن عمي واجه يسولف وياي بشارع شني قابل شجاي نسوي

-منتصر: چا ليش ما وكفتي من البداية ليش انهزمتي؟

-رهف: منتصر اختصر شتريد؟

-منتصر: صدك السمعته؟؟ صدك واحد من ولد عمي خاطبج؟!

-رهف: اي وهسة روح لا تسويلي مصيبة ابرار ويانه راح تفهم وگفتك غير شكل

-منتصر: خليها تفهم!! خليهااا شني رهف انتِ ناوية تنتقمين مني بهالطريقة؟؟ هم تتزوجين وتطلگين خاطر تحرگين كلبي!!

-سبأ: شنو جاي يصير رهف شبيكم؟؟

-رهف: اتزوج واتطلگ؟ يممة اسم الله الرحمن عليّ ليش خوية انا اذا ناوية اتطلگ ما اتزوج من البداية

-منتصر: وهيج تنسين كلشي؟؟ كلشي چان بيناتنا!!

-سبأ: رهفف انفضحنا رهفف شنو جاي يصير؟؟

-رهف: فضيحته على روحه! ليش انا شنو بيني وبينك؟؟ هاا فهمني شنو؟؟

-منتصر: عشگ

-رهف: اووع على هيج عشگ وينك وين العشگ انتَ ليش تعرف تحب غير نفسك ومصلحتك؟؟

-منتصر: انا ادري بيج ما تقصدين هالحجي وبعدج مجروحة من زواجي بس وداعتج چنت مجبـ...

-رهف: مجبور اي خوش افتهمت جنت مجبور وانا ما مجبورة هسة وراح اتزوج زلمة يحبني وشاريني بغالي

-منتصر: اشتريج بماي عيوني رهفف هسة اروح اخطبج من ابوج هسسة بس لا تلعبين بأعصابي!!

-رهف: ماي عيونك عوفه لبناتك محد يستاهله غيرهن وعوف سوالف الحب مو دربك هذا.. يلا سبأ

-منتصر: اوكفييي

شهكت من جرها من ايدها حيل يوكفها، عتت ايدها منه مخنزرة ونترت بي بصوت ناصي كللش..

-والعباس يا منتصر اذا اعترضت طريقي بعد ادمرك! كل يوم اندم اكثر واكثر عبني ضيعت وكتي ويه زلمة نفسك! ويوم بعد يوم جاي اكتشف كل الحسيته وياك چان وهم!

-منتصر: وهم؟؟ والله چذابة والزهرة چذابة!!

-وهم عبن لو چنت احبك ولو شووي چان ما فرحت بخطوبتي هالشكل! چان ما اشتريت الذهب والنفنوف وگلبي يرعد فرح وحماس يمته يجي يوم العقد واللبسهم لزلمة يستاهل!

نترت حچاياتها بوجهه نتر وعافته مبحلگ عيونه وجرتني نكمل طريقنا، فزيت عاصرة عيوني ميتة بدمي على صوته العالي اجه من ورانه يصيح بين الناس ما مهتم..

-منتصر: انااا اعرف شلون اخررب هالخطبة اناا اعلمج نهايتج ومرجوعچ الييي فهمتيييييي

-سبأ: رهف!!

-رهف: عوفي يهايط وحده امشي نرجع لابرار

-سبأ: فهميني سالفتكم رهيفة!

-وعد اسولفلج بس نرجع هسة ماكدر ذيج ابرار

سكتت من شفت ابرار جاية بأتجاهنا، كملنا فرة السوك بس بعد كلشي ما اشترينا محد بينا الها واهس وابرار كضت الوكت كله تسأل شبيجن وشصاير وياجن ونجاوبها بچلمة "تعبنا"..

رجعت ويه رهف لبيت اهلي همزين ابوي واخوتي طالعين اكدر ابقى شوي، سلمت على امي وجاوبتني من طرف خشمها ولا چن صارلي شكد ما شايفتها بس عادي تعودت عليها..

-صابرين: هاا تاليها سويتيها رهيفة مووو راح تعقدين على ابن رسمية!

-رهف: اعقد على ابن رسمية لو على منتصر بكيفج انتِ اختاري

-صابرين: شنو ولج؟؟؟

-رهف: هسة واحنه بالسوك اخت منتصر خطبتني لاخوها

-صابرين: تحجين صدك لو تضحكين عليّ؟؟

-رهف: لا صدگ فـ اختاري يوم بس اظنج راح تفضلين ابن رسمية

ظلت امي ساكتة وفاكة حلگها ماتعرف شتكول، عافتها رهف وصعدت فوك ورحت وراهة ومن الباب استلمتها.. بالبداية ما رضت تحجيلي وظلت تضيع الموضوع بس بالاخير جبرتها تسولف وصدمتني! انصدمت من عرفتها جانت تحب منتصر وبيناتهم تواصل بالرسايل من موبايل امي صارلهم فترة وبيناتهم عشگ وتخطيط للزواج هم!

-رهف: والله يا سبأ هو التقرب مني وهو التواصل وياي وهو التوسل خاطر اجاوبه وهو الوهمني راح يخطبني وهو كلشيي هو وانا مثل الغبية صدگته وعلگت امالي بي بس حتى اخلص من هالبيت

-سبأ: وهسة؟؟

-هسة مسحته وداعتج وداعة خوتنا مسحته من عقلي وگلبي ودست عليه هم ما اطيق اسمع حروف اسمه وما جاي افكر غير بخطوبتي هسة وفرحانة بيها اريد اعيشها بكل تفاصيلها واتونس

تنهدت مادري شكول خفت جاي تنسى منتصر بـ علي السور وحزت بگلبي، سور اعزه هواي ماريده يتبهذل وبنفس الوكت اخيتي مجروحة واخاف يجيها يوم تصحى على نفسها وتندم ليش تزوجت غير زلمة..

مشت الايام تركض ركض واجه يوم العقد، من الصبح رحت لبيت اهلي لان العقد هنا راح يصير والحمدلله ابوي ما طردني من شافني بس سلامه جان بارد وكوة عليه..

لبست رهف سيت مهر ابيض وهي مكيجت روحها عاد اختي ما شاء الله جمالها رباني ما تحتاج جهد حطت مكياج فضي بسيط وعافت شعرها القصير مفتوح.. دمعت عيوني من شفتها واكفة تتمايز روحها ع المراية وتبتسم فرحانة جاي احس بفرحتها حقيقية مو تمثيل عبن الضحكة ما غابت من وجهها..

دقايق وصعدتلنا حبيبة مبتسمة كالت راح يبدي السيد العقد ولازم رهف تنزل، هزت راسها اي وحطت الشال الابيض فوك راسها ونزلت وانا وحبيبة وياهة كلمن تمشي على جهة..

نزلت ورگعنها ابرار وعبق بهلهولة وانا وياهن اهلهل، امي واكفة على جهة ما عاجبها وعمتي رسمية كاعدة على القنفة ما كامت، ليلة وشمس ما جايات علمود جهالهن وتَـمني ببغداد فـ بس احنه هنا..

كعدت رهف على الكرسي خاطر يعقدلها الشيخ وظلت تفرك بأصابعها متوترة ضحكت على منظرها اول مرة اشوف اختي بهالشكل متوترة بس فرحانة بنفس الوقت..

-رسمية: فتحي ايدج لا تتصخم حياتج فتحيها

-صابرين: مبين جاي تدعين بگلبج خاطر تتصخم حياتها موو؟؟

-رسمية: يحوز

-صابرين: ولج رسمية انتِ فد وحدددة

-رسمية: هاي عليمن ولج؟؟ تره هسة اخرب كلشي ونبطل

-حبيبة: يمة!!

-رسمية: والله چا خليها تسكت وتحمد ربها

-صابرين: راح اسكت بس لخاطرج حبيبة محد يستاهل الحشيمة والاحترام غيرج هنا

-حبيبة: مسحيها بوجهي عمة

سكت الكل من بده السيد يعقد والحمدلله تم كلشي على خير، عقدت اختي رهف على زلمتها وصارت حليلة علي السور.. باركنالها كلنا حتى عمتي رسمية باركتلها صح گوة عليها بس المهم باركت وما لبستها..

بسرعة بسرعة صعدناها فوك خاطر تبدل وتلبس النفنوف حتى يطب سور يشوفها وهاي اختي انخبصت لزمتها الرجفة وظلت تروح وتجي بمچانها متوترة..

-رهف: احس متندمة اشتريت هذا الفستان ولج سبأ انا شكلت لروحي؟؟

-سبأ: يلا خية اشتريتي بعد شتسوين

-رهف: ما طگيتيني من خذيته شبييج

-حبيبة: ليش شبي بنات ما جاي افتهم

-رهف: باعي شلون گصيير

-حبيبة: لا عادي يمعودة يلا بساع سور خبصني بالاتصالات

استسلمت رهف لعنادها من دگت رجل بالسوگ الا تشتري هالنفنوف واضطرت تلبسه بس شنيي طلع ياكل ويشرب عليها، يخبل من صدگ يخببل لونه ازبري وقصير وردنه هم كصيرة انا بت وظليت فاكة حلكي عليها شكد لايگلها..

-رهف: يلا كملت انا

-حبيبة: هو يصعدلج لا تنزلين

-رهف: شنووو؟؟

-حبيبة: مادري والله انا هم مستغربة امي تكول خلي هو يصعدلها لا تنزل

-سبأ: اوكفي رايحة اتأكد

نزلت اسأل شنو السالفة وعمتي گلبت وجهها وانطتني گفاها، عدلت الشيلة الي على راسها وكالت من طرف خشمها..

-خلي هو يصعد لا تنزل ماريدن اشوفهم سوه

-سبأ: بس عمة..

-رسمية: سكتي وروحي بلغي اختج لا تترعن وياه بعدهم مخطوبين ما ندري شيصير بعدين

انهضمت من اسلوبها المتعالي همزين امي مو بالصالة سمعت حسها من المطبخ، درت وجهي لابرار وعبق وثنينهن شفت الزعل والفشلة بعيونهن..

-سبأ: تمام عمة

-رسمية: وانتِ لا تظلين تصعدين وتنزلين هواي حامل مو زين على الجاهل

هزيت راسي وصعدت لرهف بلغتها نفس حچي حبيبة گبل شوي بدون لا اذكر الگالته عمتي جوه بس رهف مستحيل تعبر عليها وحست اكو شي..

-رهف: ليش يصعدلي هنا؟ عيب بعده هاي اول شوفة نتشاوف وره العقد خلي كدامكم احسن

-سبأ: لا رهف خليكم هنا

-رهف: اي ليش؟؟

-سبأ: احسن

-رهف: وانا ما يعجبني يلا بنات خلونا ننزل

-سبأ: رهف شبيچ جاي اگلج ابقي هنا!

-رهف: راح تحجين البگلبج سبأ لو شلون؟؟

-سبأ: اوووووف عمتي ما ترضى ماا تقبل!

-ليش

-حبيبة: رهف لا تزعلين مني امي تحبج هواي بس انطيها مجال تستوعب خطوبتكم، هي بعدها مقهورة عبن سور ما تزوج على ذوقها جانت هي تريد تخطبله

-رهف: لا امج ضايجة عبنه خطبني الي انا بالتحديد

سكتت حبيبة مستحية وانا هم سكتت وتكترت على صفحة ماعرف شكول، هزت راسها رهف وكالت..

-وهسة هي ما تريدني انزل خاطر ما تشوفنا واحنه سوه خوش..

راحت للمراية ترتيب شعرها واخذت حمرتها تجددها، جرت شيشة العطر تتعطر من جديد واندارت علينا وكالت بأبتسامة..

-امشن ننزل يلا

-حبيبة: رهف..

-رهف: حبيبة انا اريد عمتي رسمية تحبني مثلما انا احبها واريدها تتقبل زواجي من ابنها وتفرحلنا هم فـ يلا نزلن وانا اجي وراجن

ضحكت حبيبة تهز براسها مأيسة ونزلت وانا لبست شالي وعباتي ونزلت وراهة، ويه نزلتنا من الدرج وصلن عماتي عمة غزوة وعمة ابتسام ووياهن جاية رفل، وكفن بالباب يردحن ويهوسن مكيفات..

-غزوة: اللهم صل على محمد وال محمد مهلة رسمية بوليدج ان شاء الله سبع سعادات

-ابتسام: اي والله مهنااية، عذرينا خية تأخرنا عبن الطريق ازدحام كلش

كعدن يسولفن شوي علما نزلت رهف، غصت عمتي من شافتها ورادت تنجلط بس ما ححت شي عبن العمات كاعدات وامي هم موجودة تعرف لو حجت شي تگب عركة..

-رفل: ولج الله شنووو هاي رهف

ابتسمت رهف وافترت تسلم على عماتي ورجعت تكعد على كرسيها، دقايق قليلة وگالو راح يطب سور وتلگيناه بالهلاهل وعمة ابتسام وابرار خبصن الدنيا بالگفلات والهوسات..

-صابرين: عليش الهلاهل احنه حزانة لو ماكو احترام!

-ابتسام: ياا خية نسيت والله يلا ميخالف هي فرحة مرة بالعمر

سكتت امي مطنگرة بس فكت من علي السور راح حب راس امه واجه حب راسها، انصدمت من حركته وحتى امي ظلت صافنة ما توقعته راح يحترمها او يعبرها بس الحمدلله ما فشلها كدام الباقين وهالشي خلى امي تنگلب مية وثمانين درجة..

-صابرين: ههههه هلا بيك يمة تحب الكعبة ان شاء الله

متت ضحك على ردة فعلها وجهها صار احمر وعرگت مستحية مسكينة تتحسر على الاحترام بهالبيت اخوتي وابوي ما معبريها چن وجودها بس تخدمهم وتكربلهم ما اذكر شي يوم ابوي سمعها حجاية حلوة لو رضاها بهدية..

-ابرار: عاين لعروستك سور شني السالفة ههههههه

ضحك يمسح على وجهه العرگان من الخجل، صدگ من اول ما طب لحد هسة ما رفع عينه على رهف وعاين لوجهها.. شجعناه كلنا بالگفلات والهوسات بس كله على كيفنا نخاف لا يسمعونا الزلم ويجي ابوي يعلسنا..

الكل چان فرحان وعلي السور طااير من السعادة وره ما تجرأ وعاين لرهف عيونه بعد ما شالهن ولا زاحهم حتى رمشة ما رمش وكل ساع وگايل..

-علي السور: حسبالك مو حقيقية وعلي

ورهف تضحك بصوت ناصي وتنزل عيونها، الاجواء زادت حماس من ابرار فتحت شاشة البلازما وعلكت عليها شي وعلته على اعلى شي.. امي زلغت خدها ما راضية بس عمتي ابتسام طبعها سبورتية وكالتلها اذا ابوي حچى علينا هي تبررله..

-رسمية: شني هالسخافة طفوه

-عبق: ليش خالة والله حلو

-رسمية: سكتي نستحرم احنه

-ابتسام: الذنوب عليّ رسمية مالج غرض تعاي رهوفة تعاي عماتي

گوموا رهف يرگصوها وعلي السور بس صافن، والله كل ساع اكول راح يرمش لو يتعب بس ماكوو فصل اختي تفضيل من فووك ليجوه دايخ ومتونس على تمايلها، عاد رهف شكدما وكحة وصلفة بس اذا تريد تتنعوص وتتغنج تعرف شلون والاهم تعرف شلون تجذب العيون عليها..

گومت عمة ابتسام سور ويه رهوفة وعمتي رسمية شاطت، كل ساعة ونافخة متضجورة وحتى غم شفتها تغم رهف بالخفيف وللاسف رهف شافتها من سوت هيج، بس اكيد رهف ما راح تمشيها اختي اعرفها عدل استاذة بالتحديات..

مادري شنو گاللها سور وهي ضحكت ضحكة رنانة وگلبت شعرها كله على جهة وحدة والمسكين وجهه مصبوغ احمر وواكف چن جماد ما تحرك بس عيونه تفتر على رهف التتمايل بين ايده وتضحك ووتميوع..

**

"رفــــل"

بالعباس هذا احلى عقد احضره بحياتي، رهيفة لعبت لعب بالدلع والتماوع سودنت علي السور وهذا خطية ما شايف هيج سوالف كاتله الضيم والجفاف العاطفي واصل لراسه تيه دربه وما يعرف وين ينطي وجهه بعد..

-غزوة: هههه متونس يا بعد گلبي

-علي السور بهمس: سكتي عمة راح اتصلخ من الفرحة

متت ضحك على حچايته وضحكت عمة غزوة وعضتله شفه خاطر يسكت، شجعناه يبوس رهوفة وما صدگ كضها وحجملها بخدها حجامة..

-رهف: ااخ

-علي السور: سكتي ولا تتنعوصين

-رهف: هاا!

-علي السور: اي جيبي الخد الثاني خطية نعوفه يتيم

كضها وباسها بعد من الخد الثاني نفس البوسة القوية، ابتسمت رهف ونزلت عيونها عود مستحية..

-رفل: هاا عصفورة ما تردين زلمتج يلبسج الذهب

-رهف: غير هو يلبسني بس اظنه ما مهتملي

-علي السور: افااا وانا ابن ابوي شون ما اهتملج يممةةة وين الذهب

-رسمية: وصممة التصمك هذا عد ابرار

-علي السور: يوم اجلي الرزايل بعدين لا تفشلينا

-رسمية: انا اعلمكم ثنينكم اطبگكم واغسلكم بالرزايل سوه يا الريّش يا الينفخون عليكم تطيروون

-رهف: تمونين حبيبتي عمة على العين وعلى الراس

-رسمية: ايي خوش

-رهف: علي السور شوف عمتي خاف محتاجة شي حبيبي

-علي السور: هاا

-ابرار بهمس: يمة صارت بيها حبيبي

-رفل بهمس: ملعبة هالفرخة تعجبني

-عبق بهمس: دسكتن خليهم متونسين

-حبيبة: يا ونس خايبة سور راح يطيح من طوله ما متعود على دلع نسوان گضى عمره يرزلون بي

-رفل: سودة عليَّ يلا بلچن رهف تعوضه

-عبق: تعوضه تعوضه باعوها شلون فرحانة وراح تطير

-حبيبة: الله يسمع منج ان شاء الله

كمل العقد على خير وكلمن رجع لبيته، طبيت لغرفة امي لگيتها هستوها راجعة من بيت عمي علي چانت عد ليلة..

-ام رفل: ها يمة رجعتي

-رفل: اي يوم، يلا انا رايحة اسبح وانام كلش تعبت اليوم

-وينج ما سولفتيلي شصار

-سكتي فاتچ العقد فاتج

گمزت على جربايتها وكعدت اسولفها وهي گضتها عليَّ يااا وشلوون وفدووة والله يحفظهم.. كملت سوالفي وياهة وصعدت لغرفتي فوك، البيت يصيح بوجوهنا من يوم رجعت ليلة لبيت عمي علي لسه چنت متونسة وياهة وهسة رجعت لوحدي..

سبحت وبدلت هدومي وتمددت على چربايتي، هستوها جاي تغفى عيني واجاني اشعار على الموبايل رفعته اشوف منو ولگيته من "ام العبي" مكتوب..

"السلام عليكم عباتچ جهزت اذا تردين تستلميها دگيلي"

ضحكت من قريت الجملة وعدلت كعدتي، وخرت شعري المبلل من وجهي وكتبت..

"لا ماريدها تعبانة"

"يخسى التعب وانا يمچ"

"نعم؟!"

"قصدت يخسى التعب واهلچ يمچ"

"اي مو اكول"

"اگلچ"

"امم"

"زينت شواربي اليوم"

ضميت وجهي فاطسة ضحك وضحكت اكثر من رجع كتب..

"هاا وينج جاي اكلج ام العبي حفت شواربها اليوم"

"بالعافية"

"لعنة الله على ابليسج مسويتني ام عبي!"

"شسويلك احسن ما أسجلك ابو كربله بموبايلي"

"چا شبي ابو كربله لازم ما يعجبچ وتردين ابو بغداد!"

"هاي شلون عرفت؟"

"هااا!!!!"

"يلا راح انام اني"

"اشتعلت روحك امير ليش شالعة گلبي انتِ؟؟"

"لا تشعل بروح ابن عمي ما ارضى عليه، يلا سولفلي على العباية شنو اخبارها؟"

"والله لو يدري امير مسوي انا عباه چان لبسني عباه ودزني لفراقد"

"هاا هاا تذكرت سمعت فراقد تريد ترجع صدگ هالحجي؟"

"اي جاية لشيخ علي ومتوسلة وطاردها ما راضي"

"احسن.. المهم راح تسولفلي على امير لو انام؟"

"مابي شي نعال نامي نامت عليج هايشة"

"تدعي عليَّ وتريدني احجي وياك زين مو؟"

"چا والشوارب الگصيتهم خايبة والعباس لخاطرج بترتهم"

"مع السلامة"

"رفل لا لا وينج عندي اخبار على امير"

"لا تصيحلي رفل احترم نفسك"

"چا شصيحلج ام عيون"

"استغفر الله!"

"فگست عيونج شكد حلوات"

عصبت منه ورأساً حضرته، شمرت موبايلي على الميز ونمت عدل ومثل كل يوم اتندم كللش لان جاي احچي وياه بس والله جاي أسويها خاطر اعرف اخبار الامير منه.. كل المستجدات يمي وانا الاطمن اهله عليه والكل حسباله جاي اجيب الاخبار من امير وهو يسولفلي ما يدرون ابو كربله كل يوم ينطيني تقرير عنه..

الندم جاي يسيطر عليَّ عبنه جاي يتعلق بيه وانا نفس الشي كل يوم لازم يحاچيني حتى لو ماكو شي جديد يخص الامير لازم يسولف وياي بأي شي ثاني وهالشي غلط!!

غلط لان گبل اسبوعين گال يريد يدز امه تخطبني گلبي بيومها ظل يرعد رعييد من الخوف والتوتر والفرحة ما فهمت ليش فرحت بوكتها خصوصاً وانا مستحيل ارتبط بزلمة نفسه كلشي بي ما يعجبني لا شكل ولا شخصية ولا نمط عيشة.. خفت ارضى بي واتندم وخفت اورط روحي فـ رفضته وگتله هالموضوع ما ينفتح بعد وصدگ ما فتحه بس ظل يذبلي حچي ويسولفلي شكد معجب بيه وانا باقية على قراري ومستحيل اغيره!..

**

"تَـمني"

رجعت من بغداد ورجع الدوام ورجعت حياتنا الروتينية لا جديد في حياتنا غير افتهمت بخالة رسمية صاير عدها فضول عجيب تجاه رهف، حبيبة وسبأ يكولن كل يوم لازم تسأل علي السور عنها وتكعد وياه بالساعة والثنين يسولفون بيها وتكعد تسمعله بكل حماس.. ضحكت من حبيبة كالت عبالك عدهم مسلسل يومية يكعدون سوه ويحجون بحبيبة گلبه ويضغطون علي النور وعلي الكرار لان ميقبل سور يسمعون شي يخص خطيبته..

فرحت بهالانجاز خطية رهف تستاهل كل الخير وعرفت ان هي كلش سعيدة ويه علي السور، صح ميطلعون ابد لان ابوها ميقبل الا يتزوجون بس باقين على تواصل بالتلفون هو مشتري الها هدية..

كعدت على المسطبة بالجامعة انتظر تالة تجيني وشفتها من بعيد تمشي وحدها، بعدها ما وصلتني وانتبهت لـ وديان تجي بأتجاهه وسولفت وياهة شوية.. يممممة شكد اندقيت مجرد اشوف طولها اتنرفز واكره حياتي!

مرت خمس دقايق وعافتها تالة واجتني، خزرتها ضايجة وقبل لا اللحگ ارزلها كالت وهي تبرر لروحها..

-سألتني على الجدول والله لان صارلها كم يوم ممداومة

-شعدها ممداومة؟؟؟

-راح تتزوج

-كذابة!!!

-والله كالت جايها خاطب واللتهت تجهز

-يمممة گلبي!!

-شبيچ تَـمني؟؟

-ولج خاف.. خاف امير ااخ احس راح انجلطط

-لا يمعودة صدگ چذب مستحيل

-لا لا لازم اشوفه اليوم لازم احجي وياه امشي

-وييين

-امشي نروحله

-وين نروح والسايق؟؟

-هو نروح ويه السايق اگله ياخذني لمحل امير

-امير عنده محل؟

-ولج ايييي مال قوالب وبورك ومادري شنو امشي

-ياا نسيت صح

طلعت وياهة من الجامعة اركض وگلبي يركض گدامي، صعدت لسيارة السايق الصاير يوصلنا من انتقلت لبيت خالتي لليوم وانطيته عنوان محل امير.. بالبداية الرجال استغرب بس ما حچى واخذنا..

-تَـمني: تالة شلونهن ملابسي

-يعني عادي مرتبات

-عندج مراية؟

-اي هاج

طلعتلي مراية واخذت جنطتها ابحوش بيها اشوف شنو مكياج جايبة، شفت عدها بس تنت لونه احمر طوخ وكحلة اخذتهن وكعدت املغط روحي بالسيارة.. لو الامير القديم يشوفني هيج والله ينجلط يكره المكياح بره البيت وكوة يقبل بس كحلة اخلي لان متعودة عليها ومتوكع من عيني غيرها مستحييل يقبل ومخبلني بهالشي..

-تَـمني: شلوني؟

-تالة: ولا غلطة

هزيت راسي راضية ورجعت الاغراض بجنطتها، ربع ساعة ووصلنا لمكان محله اخيراً، هاي اول مرة اجي لهنا واستغربت من شفته كله زلم.. شارع عبارة عن زلم وبي كم مرة ينعدن على الاصابع..

-تالة: تَـمني اتوقع احنه بالمكان الغلط

-تَـمني: لا، ابقي هنا تالة انتظريني

-لا عشتوو انزل وياچ

-لا تالة شوفي المكان مو مناسب

-انزل والله

تأفأفت بوجهها ونزلت وهي ويايه، كلت للسايق ينتظرنا بينما احجي ويه زوجي وارجع..

-تالة: شوفي شلون رجع الدم لوجهه من گلتيله رايحة لزوجي عبالك مادري وين منزلنا

-اششش امشي يلا

تمشينا لمحله صاير بالوسط، وگفنا بالباب ما دخلنا من شفنا ابو كربله واكف وعلي النور موجود هم وبعد زلم ثنين وامير كاعد على كرسي وكباله مكتب ومحطوط فوگاه دفتر چبير وملتهي يقرا بي..

-ابو كربله: خوي اظنه موجود بالمجر يمك

-الامـير علي: لا شلته اليوم بس نسيـ...

قطع كلامه ما كمل الكلمة وظل يدور على الشي النسى وين وداه، بوكفتي واني اراقبه من بعيد انتبهت لوجهه بده يعصب وعگد حواجبه، ظل يدور بحرگة كأن نسيانه وين وداه زعجه لان علي النور بسرعة تقدم عليه وكال..

-انا ادوره امير خلي

-الامير علي: لا لا انا حاطه هنا! انا متأكد

-ابو كربله: اي خوية يجوز شلته انا وما حاس اعذرني هسة ادوره الك

اللتهوا كلهم يدورون والزلم واكفين ينتظروهم، ضربتني تالة بعكسها وهمست..

-اتوقع اجينا بوقت غلط

-تَـمني: لا.. السلام عليكم

سلمت بصوت مسموع ودخلت للمحل كلهم اللتفتوا عليَّ عدى الامير بقى يدور بالجرارات وحاط كل تركيزه بيهن عبالك عنده امتحان ذاكرة مهم ولازم ينجح بي..

جاوب ابو كربله وطلع والزلم الوياه هم طلعوا من المحل يعوفونا وحدنا بينما علي النور ظل بس مبحلق عيونه علينا متفاجىء من وجودنا..

-الامـير علي: لگيته!! لگيت دفتر الحسابات لگيته

رفعه فرحان وشمره بقوة على الميز مخلف صوت قوي نتيجة ارتطام الدفتر بالميز وگال بحماس بدون لا ينتبهلي..

-گلتلكم ما نسيته گلتلكم شنيي هيته هي وانسى ما انسى انا

-علي النور: ههههه الحمدلله

ابتسمت على فرحته ودرت وجهي لتالة لگيتها هم مبتسمة، اخيراً انتبه لوجودنا وفوراً رفع حاجبه مستغرب..

-تَـمني: هلو

-الامـير علي: تفضلي؟

-تَـمني: اجيت اريد احجي وياك بموضوع

-خير ان شاء الله؟

-عندي مشكلة والكل گال روحي للامير هو يحلها

-انا؟

-علي النور: اي اي خوية انتَ اكيد

-الامـير علي: خوشن.. بس المچان مو مناسب الچ خيتي خليها بـ...

-تَـمني: خيتك؟!

-علي النور: دخيلك يا علي راح تعلگ

-تالة: تَـمني على كيفج داده

-تَـمني: تمام تمام.. اخييي امير اريد احجي وياك هسة اني بورطة واحتاج رجاااال مينسى يساعدني!

-الامـير علي: اسمعچ

-تَـمني: اريد نحجي على انفراد

-الامـير علي: نور اطلع بلا امر عليك

هز راسه علي النور مبتسم، مشى بأتجاهي وقبل لا يطلع من المحل همسلي بفرحة..

-كون يبقى ما يتذكر خاطر يظل محترمني هيج

-تَـمني: لا دقيقة شلون تطلع اخوك لعد وبت خالتي وين تروح؟ احتاجك بموضوع خاص ماريد احد يسمع

-علي النور: اموري عنده مخزن هنا بس شوي صغير

-تَـمني: ممتاز!

-الامـير علي: شني ممتاز المخزن چن گن دجاج

-تَـمني: منتأخر يلا منتظرتك

اشرلي نور على المخزن صاير طابق ثاني متصل بدرج حديد صغير، صعدت فوك وصدگ المخزن صغير كللش ومتروس مواد انشائية وقوالب قديمة مشمرات والتراب ماكلهن..

هزيت راسي راضية بهذا القليل وبقيت انتظره فترة، خفت ميصعد ويكعد يستشرف براسي لان المخزن هيج حجمه گوة يكفي نفرين وانوب سگفه ناصي شوية وينطبگ عليَّ..

عدلت جنطتي على چتفي ونويت انزل لان صارلي هواي واكفة وأيست يجي بس تراجعت بسرعة من شفت ظل جسم طويل صار على الدرج ديصعد.. نبض گلبي بقوة من شفت وجهه وتلاگت عيوننا من بعيد، بقى واكف على الدرج ما دخل المخزن وحاچاني مناك..

-تفضلي

-تعال شيخي شلون احجي هيج

-المچان صغير ماريد اضايقچ

-لا ما اتضايق عادي

نفخ هوا ومسح گصته البده يتجمع عليها العرق، شكله متوترر كلش وحتى من صعد ما حط عينه بعيني ابد بقى منزل راسه ويحجي ويايه..

-تَـمني: اول شي شكراً لانك فرغتلي من وقتك مبين چنت مشغول

-جسر للطيبين

ابتسمت على عبارته الاخذتني بعييد كللش بعيد اخذتني لبدايتنا ولبداية تعارفنا وزواجنا، اخذتني من جان الامير يحب تَـمني ويسوي المستحيل حتى يبقى وياهة ويستمر زواجهم..

-تَـمني: عندي مشكلة وماعرف شنو حلها رحت لخالة رسمية الي هي امك وكالت انخي الامـير علي ميرجعچ للبيت بدون لا يحل مشكلتج

-ان شاء الله بس شني مشكلتج

-اول شي مبروك تستاهل كل الخير

رفع عيونه يباوعلي متسائل، حرك راسه مستفسر وگال..

-على شنو؟

-سمعت راح تتزوج

-انا؟؟

-اي

-لا ماكو هيج حجي

-ها اسفة عبالي راح تتزوج سمعت هيج اشاعة

-لا لا

-هاا اوكي لعد نرجع لمشكلتي؟

-اي

رجع دنگ راسه وانطاني صفحته حتى يسمعني، حمحمت وتعمدت اتقرب منه حتى اكدر اباوعله زين واشبع عيوني من شوفة وجهه، خنگتني العبرة من شفت طالعله شيب بلحيته ووجهه مسمر بـ سمار التعب، غمضت عيوني امنع دموعي توكع وهمست بصوت ناصي..

-اني متزوجة من رجال يعشقني واعشقه وچنت عايشة وياه احلى حياة رغم الظروف التحطينا بس مرتاحة وسعيدة، چنه دنجهز حتى نطلع لبيت وحدنا ونستقر ونبني حياة جديدة النا ولاولادنا بالمستقبل بس.. بس بين ليلة ويوم گعد زوجي من النوم ميتذكرني

فز جسمه ورفع عيونه عليَّ متفاجئ، نزلت دمعتي التچوي خدي وهمست بصوت انصى..

-اجيتك اريدك انتَ ترجعلي زوجي، اريدك تساعدني ارجع زوجي الوعدني ميعوفني للموت يا الامـير علي.......

يتبع 👑....

━━━━━━ ♛ ━━━━━━

🥹♥️♥️♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

عيونچ تضيع سلفنا، احنه الچنه معدلين.. ♥️

━━━━━━ ♛ ━━━━━━

-اجيتك اريدك انتَ ترجعلي زوجي، اريدك تساعدني ارجع زوجي الوعدني ميعوفني للموت يا الامـير علي

صفن بوجهي صفنة مطولة وعيونه تصعد وتنزل تراقب دموعي الجبيرة الدتنزل بغزارة، حرك راسه محتار وذب حسرة عالية بدون لا يحجي شي..

-تَـمني: راح تساعدني لو لا؟

-استغفرالله ربي واتوب اليه

-لا تستغفر وجاوبني راح تساعدني لو لا!

-المشكلة ماعرف اساعدج! ما جاي اعرف شنو المطلوب مني؟ شلون اكدر اساعدج وشلون ارجعلج زلمتج وانا ماعرفه!

-تعرفه تره

-عايني يا بت الناس انا لا يعجبني اضوجچ ولا اضوج نفسي اريدج بس تفهمين انا ماعرفج! والعباس ماعرفج ماعرف منين طلعتيلي انتِ

-بس اني اعرفك

-وانا ماعرفج!

-عادي نتعرف من جديد

-شنهاي!

-اي شكو بيها لو اني ماعجب ذوقك الجديد؟

-اااااخ دخيلك يا علي

-جاوب

-خالو نزلي جوه

-جاوب!

-خايبة ماريد اجاوب

-جاوب!

-ولج!

-جاوب!

-تَـمني!!

-ما انزل الا تجاوب!

-شجاوب غير افهم على شني!

-اعجبك لو لا؟

-ولج بابا عيب والله عيب

-جاوب

-خ** بيه اييي تعجبيني ايي ارتاحيتي؟؟

-يلا لعد خلينا نتزوج مرة ثانية

-يا بوووووية

-عادي ما اطلب مهر جديد لا تخاف بس خلينا نتزوج

-انتِ صاحية بنيتي؟

-اي

-والله اشك بهالشي

-على كيفك داده تره انتَ المو صاحي وناسيني معناها العلة بيك!

-خوشن ناسي انا شتسوين بواحد ناسي؟

-اريده معليك انتَ

-شتسوين بي!!

-احبه

-وهو مايعرفج خاطر يحبج

-كذاب

-عايني تَـمني انتِ مبين عليج بت حبابة وفقيرة و..

-وحلوة واجنن ومخبلتك چنت كله اذكرك بي كله بس انطيني فرصة خلينا نتقرب من بعض صدگني راح تتذكرني ثق بيه اميييير

تقربت عليه اكثر واني اهمس اخر كلماتي همس، صرت لازكة بي لدرجة رجلي طخت برجله وهو ما ابتعد مني.. جازفت بروحي وبردة فعله اكثر ورفعت ايدي على كيف وحطيتها على خده اتلمس لحيته، توقعته راح ينفر مني بس ما سواها وظل يباوع لعيوني وهالشي شجعني اكمل..

-امير انتَ احسن انسان دخل لحياتي، علقتني بيك وخليتني احبك هواي.. احبك لدرجة من مرضت لليوم اني لا ليلي ليل ولا نهاري نهار كلما احط راسي على مخدتي دموعي تنزل من وحدها واني اتذكر ايامنا وشلون چنه عايشين سوه

تنهد وغمض عيونه يحرك راسه بـ "لا" المشكلة نافي ومدا يقتنع ردات فعله وملامحه كلها تأكد هو ممقتنع بالاگوله بس اهم شي مدا ينكر ويعصب عليّ مثل قبل..

-چنت تدلعني نوومه وامنية وتومه وتمنه وفهاوي.. چنت تحبني من اكول اسمك وتضحك من تحجي ويايه بشي وما افتهم عليك.. احب من تصغر عيونك من تبتسملي وتباوعلي بعيون كلها حب، امير انتَ تحبني لدرجة تحاربنا من كل الجهات وما عفتني بقيت ويايه وسندتني وعوضتني على كلشي تعيس عشته

-ما اذكر

-بس اني اتذكر، المهم اني اتذكر واني اعرفك منو هالشي كافي والله

-وليش ترضين على نفسج تعيشين ويه زلمة ما يعرفج ولا يتذكرج؟

-لان اعرف هذا الگلب ذايب بيه حتى لو عقلك نساني

دست على گلبه بأصبعي ونزل عيونه يباوعله، رجع نظراته عليَّ وگال بهدوء واضح جداً بصعوبة مسيطر عليه..

-انتِ تكولين تحبيني صح؟

-حسب

-يعني شني

-يعني من تكون حباب ويايه احبك ومن تزعلني اكرهك

ضحك خفيف مستغرب من حركاتي واني اكول جملتي الاخيرة وماهتميت اني متعودة احجي وياه بهالاسلوب وبنبرة الدلع هاي..

-والله مادري شگلچ

-لا تكول بس ارجع اميري الحباب

-ولج سودنتيني بعلي سودنتيني

-عادي امير القديم جان متعود ويحب هالسوادين

-شني امير قديم وامير جديد تره ماكو هيج سالفة خوية!

-اكو اكو معليك انتَ

-اشش ماكو

-لا تأشأشني تره والله ازاعلك

ضحك مرة ثانية بس هالمرة بنفاذ صبر وفرك وجهه، ظل يذب حسرة وره حسرة ويستغفر على كيفه وهم ما اهتميت لان مبين الافندي عاجبه الوضع ومتونس على وگفتي گدامه ونسى الحرام والحلال واستشرافه وظل ياخذ وينطي ويايه واحنه واكفين وجه بوجه..

-بس تصير زين راح نتزاعل على تصرفاتك هسة!

-شني؟؟

-ليش واكف ويه بنية غريبة متتذكرها مو عيب عليك؟

-هو انا؟؟ انتِ اللاطشة بيه وتنوحين فوك راسي

-اي غير رجلي

-خ** على رجلج منيين صرت ولج

-معليك معليك انتَ زوجي حبيبي وراح يجي يوم وتتذكر وتعض اصابع الندم على الديصير بيناتنا هسة

-ليش بوية اعض اصبع الندم؟!

-لان نوميتك واكفة گبالك وما تداهرت وياهة

-نوميتي ياهي هاي

-اني

-لا صدگ!

-متصدگ مو؟ هاك شوف صورنا هاك

طلعت موبايلي من الجنطة وفتحته دا اشوفه وما قبل، لزم ايدي اللازمة بيها التلفون حيل وعصرها..

-تَـمني

-خليني أراويك الصور

-تَـمني سمعيني

-بس خلينـ..

-تَـمني انتِ عاشگتني؟

-اي

-تحبيني وتدورين راحتي؟

-اكيد اي والله

-چا عوفيني

سهم وحطه بنص گلبي ويه ما نطق هالكلمتين، بهتت وعجزت اتحرك احس براسي خدر وضغطي صفر، اخذ كل حيلي من اردف بنبرة مو هادئة..

-ماريد اضوجچ ولا اجرحچ واعصب عليج بس والله العظيم گوة كاض روحي ومتحكم بأعصابي مبين عليج بت ناعمة وما تتحمل ينكسر خاطرها

-لـ.. لعد ليش تكسر خاطري

-تَـمني لا تبجين دخيل بخت الحسين لا تبجين

لزم راسه يعصره بين ايده متوجع وانطاني ظهره، حاولت اسيطر على دموعي وما ابجي بس فشلت والله فشلت ضميت وجهي بين ايدي ابجي بوجعع گلبي الوجع البي يذبح، صرت اشهگ بصوت وگنبصت بالكاع اكعد محتاجة اسند طولي لا اوكع من الدرج..

-الامـير علي: دخيلك يا علي

-حـ.. حرام.. عـ.. حرام عليك

-والحسين انتِ بت يتمناها كل زلمة العيبة مو بيج وعلي بس انا تعبان.. تعبان وما جاي اكدر اتذكر شي تبهذلت وياكم تبهذللت

**

"تـــالة"

سمعت صوت بچي تَـمني عالي جاي من فوگ، متت خوف عليها وركضت اصعد الدرج الحديد شفتها مگنبصة بالگاع والامير واكف كبالها بس وجهه مطعون طعنن وايده ترجف مال واحد تلفانة اعصابه..

وكفت على اخر باية القريبة منهم لان مستحيل اكدر اخطي خطوة داخل المخزن ما اكفي، وكفت احجي ويه تَـمني من بعيد حتى تكوم وتجيني والامير بقى يسولف وياهة بصوت عصبي وعالي..

-الامـير علي: ماا اتذكر حتى روحيي! هذاا وجهي من اعاينله بالمراية ماا اعرف نفسيي لا تلوميني عبن ما اتذكرج!! ما اتذكركم ما اتذكر اخوتيي الصغار يمته كبروا؟؟ ولج حبيبة! جانت حبيبة تلعب بالساحة وترجع مطينه وتركض تلبد بحضني تخاف من سلوى لا تكتلها! يمته صارت بهالعمر وتزوجت وتطلگت يمته؟؟

دمعت عيوني على حيرته وايده الترجف وهي تمسح بوجهه وشعره ولحيته ويفتر بنفس الدائرة الواكف بيها كل شوية ينطي تَـمني ظهره وانوب يرجع يباوعلها ويذب حسرات، بقى على هالحال الصعب حتى من گال بحرگة والغصة تارسة صوته..

-صارلي شگددد انتظر اتصال من ليث وضرغام تالي يجوني يگلون اصدقائك ماتوا؟؟؟ ماتووا!!! ماتووا وما حضرت فاتحتهم ماا ودعتهمم ماا چنت وياااهم!!!

بنفس اللحظة دموعه كامت تنزل وضم وجهه ينطينا ظهره، تگطع گلبي على منظره ومنظر تَـمني مو احسن منه، مجرد شوفتهم بهالحال خلتني اأيس من الدنيا ويأست اكثر من كال بتعب..

-محد يحس.. محد يحس بالوجع والتعب الهلكني وانا اشوف كلشي تغير، بين يوم وليلة كللشي تغير لا انا انا ولا اهلي هم اهلي! كلشيي مو نفسه وتردوني اصدگ واتقبل هالتغيير چن ما صار شي!

-تالة: امير اني اعرف الدتمر بي صعب بس تَـمني هم تعبت، انتَ اكيد متتذكرها بس هي شنو ذنبها؟

-مالها ذنببببببببب

فزيت من عاطها بوجهي بعصبية مخيفة، هسة عرفت العصبية الجانت تَـمني تحجي بيها وتكول عنه يتخبل طلع صدك يتخبل..

-مالهاا ذنببب واناا جاي اگلهاا لا تبقى تبني احلااام واوهاام ويه زلمةة ما يتذكر نفسه!!!

-تالة: تتذكـ....

-اگدر اللعب عليهااا اكدرر اگلها اتذكررج واتونس ويااهة البت حلووة وتجيب التاايه بس مالها ذنبب ينضحك عليهااا حراااام

-تالة: تمام.. تمام هذا هو اهدأ اني راح اخذها هسة انتَ بس اهدأ

مشيت خطوة اضافية اكمل طريقي للداخل وگوة دحست روحي يمها المشكلة المواد الانشائية الموجودة هنا سادات المكان سد ومدا يخلينا نتحرك بأريحية، نصيت يمها ولزمتها من ايدها اگومها بس متقبل تكوم ما سكنت ولا انكطع بچيها جسمها يرجف وتبجي على حظها..

-تالة: كومي تَـمني كومي يا عمري خلينا نطلع منا

-تَـمني: خـ.. خلـ.. خليني.. خليني

استغفر الامير يلطم على رجله عصبي بس حسيت عصبيته مو منها ومن بچيها حسيته مقهور عليها وعلى نفسه لانه ميتذكرها، جبرتها تكوم وگوة جريتها جر ونزلتها الدرج انهد حيلي متقبل تتحرك نابتة بمكانها علما نزلتها اني روحي فاحطة..

-تالة: تَـمني لا تبجين خلص خلي راح يجي يوم ويتذكرج والله صدگيني راح يعرفج وتذكري كلامي

طلعتها من المحل مالته وشفت علي النور واكف بالباب ويهز براسه مقهور من شافها شلون تبجي، ما حجيت وياه شي مجرد رفعت ايدي اودعه ومشيتها اعبرها الشارع حتى نروح للسايق، تمشي وتبجي بنحييب دمر كل امل جان بگلبي والزاد وضعنا سوء هو وگعتها! برمشة عين ماعرف شلون داست على قيطان حذائها الرياضي وعثرت..

-تالة: يمممةة

صحت ممرود گلبي من وگعت على ركباتها وسندت روحها بيدها الثنين بنص الشارع.. الشارع انخبص كلها تصيح الله واسم الله واجوا زلم يردون يساعدوها لانها وكعت وبعد حيل ماعدها حتى تكوم البچي اذاها واخذ كل قوتها شكد ردت اكومها بس ماكو مدا تشوف بعيونها وبقت منصية راسها وتهتز چتافاتها بالبچي..

-تالة: تَـمني كومي انفضحناا تَـمنييي

-تَـمني: عوفـ.. عوفي.. عوفيني تـ...

-ما اعوفچ هنا!! امشي تَـمني حرام عليج الدتسوي بنفسج حرااام

تقدمن نسوان ثنين ويايه تگابلن يساعدني عليها وانتبهت لـ علي النور اجه يركض من بعيد يشوف شنو صاير همزين من انتبه علينا وعيونه ظلت ورانه من طلعنا وكدر يشوفنا..

-علي النور: شصايرر سلامات سلامات.. شوي خوي وخر بلا زحمة.. شني السالفة خوية ليش تكض بيها وخررر

-الرجال: البت طاحت

-علي النور: وشني تريد تشيلها انتَ؟؟ وخر خوية رحم الله والديك

وخر الرجال بسرعة وباقي الزلم هم ابتعدوا والحمدلله من تَـمني استجابت لصوت علي النور وكدرت تسند روحها تكوم، سودة عليّ چف ايدها مزلغ وبنطرونها مدمور ومحكوك ووجهها هم صاير بي دم ماعرف منين اجه..

-علي النور: انتظروا دقايق لا ترحون هسة اجيب امير

-تالة: لا لا وين تجيبه يمعود اصلاً هو السبب بحالتها هاي احنه نروح السايق واگفلنا على الشارع الثاني

-علي النور: يا سايق وهي بهالحال لا ما يصير، اوگفي بس دقيقة هنا انتظريني

عافنا وراح يركض على جهة المحل، بينما رتبت حال تَـمني ومسحت دموعها واخذت جنطتها من ايدها اني شلتها شفت علي الكرار يطلع من المحل يركض..

-تالة: عزا هذا منين طلع!

اجه يهرول بأتجاهنا وبدون سلام ولا كلام اشرلي بيده وكال..

-يلا يلا امشن للسيارة يلا

-تالة: وعلي النور؟

-نور بقى ويه امير يلا تالة امشي

هزيت راسي ومشيت واخذت تَـمني ويايه مثل اللعابة اني احركها منا ومنا تعبتني، وصلنا لسيارته وركبتها بالكراسي الوره واني كعدت وياهة هم وهو بكرسي السايق..

حرك السيارة كرار واني جريت من كدامي كلينس امسح وجه تَـمني وايدها وانفض بنطرونها وارتب وضعها لا تشوفها امي هيج وتتخبل..

-علي الكرار: اووووف شنو هالحالة استغفر الله ربي واتوب اليه

-تالة: تعبت المسكينة

-علي الكـرار: مو گلنا لا تروح

-تالة: وهيج تظل لا متزوجة ولا مطلگة؟ انتو شنو على گلوبكم محد تأذه غيرها وانلعب بأحواله!

-علي الكـرار: تره انا...

-تالة: بس حاضرين تگولون لا تتقربين منه ولا تحجين وياه وعوفي ومعليج بي بس الى متى؟؟ الى متى تبقى هيج لشوكت! تره الامير صارله بهالحالة اشهرر!!

-شبيچ اكلتيني وشربتني ما جاي اگول هالحجي بس لخاطره هو عايني لحالها!! شوفي وضعها هذا عاجبچ؟ شنو استفادت من راحتله فهميني!

-استفادت لان گللها ماريدج وعوفيني وهذا الراح تسوي!

-تَـمني: تالة

-تالة: اششش سكتي انتِ!

-علي الكـرار: هو بكيفج تعوفه!!

-تالة: اي بكيفيي

-علي الكـرار: تره زلمتهاا شني هي هيته الرجال مريض وما يتذكرها قابل هو متعمد

-تالة: كلكم متعرفون هالمسكينة شنو دتعيش محدد بيكم يهتم حايرين بس بأبنكم!

-علي الكـرار: عبن ابننا المريض! اخوي المريض وفقد عقله بين ليلة وضحاها حسبالج هالشي هين؟؟

سكتت مجاوبته اصلاً ماعندي طاقة اتناقش واحس كلشي احجي واگوله مابي فائدة بس اتعب روحي، مقهورة ومحترگ گلبي على بت خالتي الي انمردت مرد بمرض زوجها ومنو يلزمها يگللها عيشي حياتج طبيعي مثل ما هو عايشها همه ميدرون ديدمروها بهالحجي وكل يوم للصبح تظل تبجي ومتغمضلها عين!

رجعنا للبيت كرار وبالباب راد يوكفني ويحجي ويايه بس مالي واهس، تشكرت منه وكتله يتصل بالسايق يگله حتى يرجع نسيته هالمسكين وعفناه مصلوب بسيارته ينتظرنا..

-علي الكـرار: تالة اوكفي!

-تالة: كرار خليني ارجع تَـمني جوه

-تَـمني: اني اروح مابيه شي

فلتت نفسها من ايدي ومشت للبيت تمشي بخطوات بطيئة مكسورة وراسها منزلته، گلبي يفووور من اشوفها بهالوضع ماتحمل اتأذه واتگطع عليها..

-علي الكـرار: كلشي راح يتحسن تالة لا تظلين متشائمة

-تالة: ان شاء الله

-شبيچ كوة تحاچيني چن انا السبب بوضعهم

-مو سبب احد الصار بس اني تعبانة شوية

-سلامتج من التعب

-شكراً

-تالة شسالفة!

-علي اعذرني بس وضعي النفسي ممستقر، اعرف انتَ مالك ذنب بكلشي ديصير بس الدنيا بهذلتنا وكفختنا من كل جهة

-كولي الحمدلله والشكر يمعودة وضعنا احسن من هواي بشر

هزيت راسي مؤيدة وهمست "الحمدلله" تنهدت اخفف من تعبي والحزن العشعش بگلبي ورفعت عيوني عليه من گال..

-انا وياچ.. اقصد يعني وياكم كلكم أي شي تحتاجوه لا تترددون وتطلبونه تالة

-شكراً متقصرون والله

-صيري سباعية وصبري بت خالتج على مصيبتها لا تصيرين انتِ والدنيا عليها وتشجعيها تعوف زلمتها

-كرار تره اني اعز الامير كلش وزواجه من تَـمني چان احلى شي اشهده بس لكل انسان طاقة وهم يجي يوم يبزع ويمل ويريد يكمل حياته

-وانا؟

-شنو انتَ

-هم راح يجي يوم تبزعين وتملين من وضعنا وتكملين حياتج؟

-كرار..

-لا خلص لا تجاوبين.. انسي سؤالي ولا تجاوبي

-لا كرار راح اجاوب، لا اني ما راح يجي يوم وامل بس بنفس الوقت ماريدك تتأمل

-گتلج لا تجاوبين!

-لا تضيع عمرك وتظل تنتظرني لاني اعرف امي شنو واعرفها لو قفلت مستحيل راح تغير رأيها

-يتغير يتغير لا تخافين راح يجي يوم ويتغير

-ميتغير واكدر احلفلك هسة! كرار لا تضيع عمرك تنتظر وهم كمل حياتك و.. كمل حياتك وتزوج بنية على ذوق امك وخليها تفرح بيك

-انتَ مخبلة؟؟ كتلج لا تتشائمين شبيچ هيج سلبية ماعرفتج هالشكل انا!

-الله وياك

-تاالة اووكفي مو احاچيييچ.. تااالة

عفته وهرولت للبيت وطبگت باب الحوش ورايه بقوة، نزلت دموعي مكسور گلبي بس بسرعة سكتت روحي ودخلت اكو وحدة حالها اتعس مني كاعدة جوه الليل مدا تنامه من حزنها...

**

-للوااه للواه يا فرخي للواه.. للواه للواه يا وليدي للواه

-ما نام هالصلف

-عيونه مفتحهن اكبر من عيونك العمص

-ابا الحسن علي: خايبة ماكو هيج جاهل صلف وعينه گوية

-ليلة: فديته ابن امه

-اريد اناااام تعبت تعبتت

-اسكت ياهو گلك سوي سوايتك وخلف اذا ما تتحمل

-سكتي ليلة لا اگوملج

-شتسويلي بله؟؟؟

-بس سكتي لخاطر الكعبة

-ما اسكت

-نعله علا روحج

كمزت اطفر من شال المخدة وشمرها عليَّ بعلي لو صارت على ظهري تفصخه مو مخدة طابوگة منطتنا عمتي رسمية..

-ليلة: امشي فرخي امشي نطلع ونعوف ابوك ما يحبنا هذا

-تعالي وين رايحين

-نروح يم سبأ وعلي التقي عاد ذولاك يحبونا

-الزلمة راجع من الواجب تعبان تعاي

-راجع من الواجب وراح يگابل اموري ويكعد بس يشوفه

-ليلة لا تتنحسين وتعالي حدي نامي

-مانريدك خوية هي كوة

-تجين وانطيج شي؟

-شني تنطيني

-اهديج هدية

-عليك علي؟

-اي تعاي

-والله يا حسيون اذا طلعت تقشمر عليَّ اتطلگ منك

-لا اقشمرج شني تعالي وشوفي بعينج

صفنت عليه افكر واقرر اروحله لو لا؟ خاف اروحله ويكول هاي ماعدها كرامة وتفضل الهدية على مبادئها؟ عمي والله حيرة..

-ما اجي كرامتي ما تسمحلي انتَ ردت تطگني

-انا؟؟

-اي چا مو ضربتني بهاي الطابوگة

-ههههههههه حگچ عليّ وهسة تعاي خاطر اراضيچ ام كرامة

تنازلت وحطيت اموري العنون بكاروكه ورحت اكعد بصف ابا الحسن على الجرباية، دگ چم مرة على گلبه بأيده بمعنى حطي راسج هنا بس ما رضيت وانطيته ظهري..

-شو انطيتيني گفاچ

-تأدب عيب

-شني عيب چا ياهي يومية تنام بـ...

صميت حلگه بيدي ما راضية يكمل عبن اعرف لسانه شطوله وراح يدلعه عليَّ، ضحك بصوت عالي ووخر ايدي من حلگه وكال..

-يلا ماحجي ماحجي

-ابو لسانين

-نتعلم منج خوية

-ههههههه اكرهك لا تحاجيني هيج

-ليش خيتي

-اسكت يلا مو اختك انا

-اختي ونص

-خوا الخواك وضيم اللفاك

ضحك بكل صوته وشبگني بين ايده وغصب نيمني بصفه، كزبر كل جسمي من شمني بشعري وباسني على كيفه.. كمشت بفانيلته الداخلية من وره وهمست..

-نام انتَ مو نعسان

-طارت النعسة

-اموري كاعد تره

-واذا

-اكعد راحة حسننن

ضربت ايده البدت تحارش وكمت اريد اوخر منه وما رضى رجع جرني وكال..

-خلص راح اصير عاقل بس لا تكومين

-شني هديتي يلا

-دقيقة

مد ايده للجرار اليم راسه وظل يبحوش بي بدون لا يشيل عيونه عني، توترت من نظراته التاكل وتشرب بيه، ابا الحسن بدون لا يحتاج يحجي شي اكدر اقرا عشگ ليلة المتداخل بعروگ عيونه..

-ليلة: احم شني شجايب وصارلك ساعة تدور

-كضيته

كالها وطلع من الجرار علبة مجلدة بجلاد هدايا لونه احمر، ابتسمت متحمسة ومادري شماله گلبي ينبض اريد اشوف شجايبلي وشنو المناسبة..

-هاچ

-شنو هاي؟

-فتحي

گعدت على حيلي بين ايده وصرت افتح بالجلاد بس على كيفي حرامات حلو لا يخرب يفيدني بعدين، ظليت اشيل اللزاگ منه شوي شوي وهذا كاعد ويتأفأف..

-شگي ليلة

-لا ولك يفيدنا

-شگي لا اشگ زيجي بشني يفيدنا ولج

-شكد نحس هالزلمة

شگيت الجلاد بضعف حماسي گبل شوي وشهگت من شفته علبة موبايل جديد!

-حسيوووووووون شنووو هذاااا

-والله زين ما يتسودن الفرخ على هالصوت

-عوف الفرخ عوفه هذا شني جايبلي موبايل جديد؟؟

-عجبچ حبيبتي

-ولك يشششگ

-الحمدلله من عجبچ

-ضلعي شنو هااي والله ولا ادري بيك رومانسي

-اعجبچ انا

-وانا حسبالي مشتري لصاحبتك الجاي تخوني وياهة

-لا شني اخونچ ليش منو توصل لاظفرچ واعاين عليها

-لا بله

-والله

-خوش زلمة عفية عليك

-اعجبچ

-زين واذا خنتني بعدين؟

-ما اخونچ ليلة شني متنسية على خيانة انتِ

-يعني مادري اگول محامي وحليو ولسانه طويل البنيات يحبن هالصفات

-البنيات يحبن يعني انتَ منهن صح؟

-لا مو شرط

-ولج بنات الدنيا كلهنن حبني وانتِ لا شسوي بروحي وتحبيني من خ** بروحيي

-لا لا ميخالف شبيك هو شني الحب ينوكل ينشرب خيولي المهم متونسين وعلاقتنا حلوة هذا كافي

-اهمداج

-بعد روحي

-هسة عجبج الموبايل لو اجيبلج غيره؟

-لا حلو شني غيره اريدن هذا بس شنو المناسبة؟

-هدية ولادتچ لاموري

-لا بله

-اي شبيچ

-چا فرخي ما تجيبله هدية شمعنى؟

-فرخچ جبتله ذبيحة شتردين اجيبله بعد

-لا تچذب علي الدر جاب مو انتَ

-والعباس حتى انا ذبحتله عقيقة بيوم طهوره

-هاا اي سودة عليَّ ردت اسويله حفلة بطهوره بس صار بسرعة بسرعة

-اعوضكم والله بس انتِ جاي تشوفين وضعنا شلونه

-اي صح جاي اشوف.. يلا ما يهم عادي

-ليلة

-ها

-انتِ ما زعلانة عبن ما سويتي عرس؟

-اي والله

-ما تجامل هالبت

-اي زعلانة چا شني اريدن حالي حال البنات اللبس بدلة وارگص واترعن قابل وحد

-زين شنو الحل شنو نسوي خاطر ما نخليها بنفسچ؟

-بعرس رهيفة راح اللبس بدلة بس مو بيضة فشلة منها واريد اروح صالون هم

-صار بعيني

-واريدك تحجزلنا فندق مثل العرسان

-خادم

-ونسافر؟ لو زودتها؟

-لا نسافر شكو بيها بس خلي اموري شوي يكبر خاطر تسيطرين عليه

-صدگ حساني تاخذنا لو بس تريد تسكتني

-لا وداعة امي اخذچ وبعيني حگچ هذا

-والله؟

-والله

-زين وين نروح

-انتِ وين تردينا نروح؟

-بنفسي اروح لايران بس عاجبتني تركيا هم فـ محتارة

-شنو رأيج نروح للرضا سلام الله عليه اول؟

-احسن يعني؟

-اي خاطر افرچ بيها فر ما اخلي مچان يعتب علينا

-اي اي اريد

-هذا هو چا حضري نفسج على العطلة

-بشرفك؟؟

-اي

-حسن العطلة ما بقالها شي صدگ تاخذنا؟؟

ضحك بزعانة روحه گدما حلف وشبگني مرة ثانية وحط راسه على صدري، ابتسمت فرحانة وكلني حماس ومن الفرحة مال الموبايل والسفرة غفيت واموري وابوه غفوا وياي..

حسيت من عز نومتي المريحة على صوت اموري ينوص بكاروكه، درت وجهي على جهة ابا الحسن ما لكيته بصفي والغرفة هم مظلمها هاي شكد نمت وما حاسة على روحي..

كمت من الفراش ورحت لابني شلته بين ايدي اهزهزه بس ما سكت مبين جوعان، رجعت على الفراش رضعته ونزعته الحفاظة وگمطته ونزلت بي جوه وره ما لبست حجابي وصايتي..

-ليلة: ذول وينهم شو البيت فارغ

ناص امير بأيدي ضايج ويتعارك بيده يريد يطلعهم من الگماط ولك هالگدوتك وما شاء الله هيج قوي چا لو كبرت شتسوي بينا..

-ليلة: كافي ولك.. هاا؟ اسكت لا اكفخك..

بچى بصوت عالي ويعصر بوجهه ما راضي ضحكت على حركاته الحلوة من فدوة لوجهه اروح، بسته بخدوده المعكمشات وحبيت عيونه العسلية على ابوه ونزلت اروح لغرفة عمتي رسمية ولگيتها هي وسبأ وعبق وحبيبة كلهن هنا..

-ليلة: ها ولچن شو هنا

-رسمية: هاي عليمن ولچن ولچ لويلوو

-على البنيات مالج غرض عمة لا تحطين روحج

-چا انا مو بت ولج؟؟

-ليلة: هاا هاا تردين نتعارك بهالمغربية؟

-رسمية: اصص سكتي لسانها شطوله ياهو يگدرلها بت نويصر

-ليلة: عمة هسة شتسون هنا ما افتهمت

-عبق: خالة جبرتنا نتعلم حياكة

-ليلة: شني؟؟

-رسمية: هدي هاذ من ايدج وتعاي تعلمي وياهن احسن من كعدتج بلا فايدة

-ليلة: سودة عليّ هاي منزلتهن من فوك وهاي جايبتها من بيتها خاطر تعلميهن حياكة عمة

-رسمية: اي وشكو احسن من النگ فوگ روس زلامهن

-حبيبة: بس انا ماعندي زلمة يمة

-رسمية: يصير عندج يصير

-ليلة: عمة خلينا نشرب چاي راسي دايخ انا، تعاي وخلينا نحش بالوادم

-رسمية: لا حرام كعدي

-ليلة: بس بهالسوالف تستحرمين من يومية كاضتنا وترزلين بينا ما تكولين حرام

عضت عمتي على اصبعها حييل واندارت عليهن تدردم عليَّ وتگلهن ياهو يگدر للسانها شطوله..

-رسمية: ما تصيرين مثل هالفقيرة سبأ حسها ما ينسمع بالبيت حبابة وسكينة مو مثلج صوتها يلعلع ومشكلة فرخها بخصرها ما تهده

-ليلة: اي سبأ احسن مني چا هستوچ دريتي

ضحكن البنات وحتى هي ضحكت وظلت تهز براسها وتهمس "اويلي منج" ضحكت عبن متعودة على هالمداهر يومية واتونس بي لا اضوج ولا اشيل بگلبي وهي نفس الشي، رحت يمها وحطيت اموري بيدها وكلت..

-عمة انا راح اطلع لبيت وحدي مو حالة هاي

-رسمية: شني ولج شني شني ما سمعت؟؟

-حبيبة: يمعودة ليلة سكتي لا يصير بيها شي

-ليلة: لا صدگ شني اريد استقر اريد نرتاح اريد انطي مساحة لفرخي يزحف ويركض براحته

-رسمية: شيركض ولج وهو بعده چنه گملة!

-ليلة: اقصد بالمستقبل عمة، ثانياً لا تكولين على امير گملة خطية يزعل

-رسمية: حفيدي وبكيفي!!

-خوش چا ابا الحسن زلمتي واريد اخذه واطلع من البيت وهم بكيفي

-اخذذذذي روووحوو اخذذذي ماريدكم كلكمم ماريدكمم

-ها؟

-روحو يمة شوفوا حياتكم رووحو چنها العيشة ويه رسمية صارت ما تعجب ومحد يريدها كلمن اخذله مرة ويريد يعوف امه وحيدها ويطلع من البيت

-ليلة: خوش راح نطلع احنه

-رسمية: وداعة الله يمة روحي ارتاحي بعيد، روحي حگچ هذا بعد محد يريد رسمية كلهم باعوها

حطت الطفل يمها على الفراش وكضت اطراف شيلتها ومسحت بيها عيونها من الدموع الچذبية، متت ضحك على سوالفها والبنات فاطسات خو عبق وجهها صار احمر من گدما حاصرة ضحكتها..

-ليلة: صدگ چذب عمة الخير والبركة انتِ ما راح اطلع منا چا بعد بوجه من اصبح وامسي واتعارك واتداهر كل يوم

-رسمية: لا يمة روحوا اذا تردون حتى انتِ سبيئة گولي لتقي طلعوا وعوفوا رسمية وحدها تاكل غداها وعشاها ويه البزازين

-ليلة: لا لا باقية انا اذا سبأ تطلع ما يهمني براحتها بس انا ابقى خاطر تكعدين ويه اموري الصبح من اروح للدوام

-رسمية: اي مو مربييية عندج!!

-ليلة: يا عمة يا بعد گلبي وين اكو منج انتِ بعلي احنه بدونج نضيع لو شتكولن بنات؟

-عبق: اي والله

-سبأ: واذا علينا انا وتقي فـ انا مرتاحة وين ما تقي يكون مرتاح

-حبيبة: ها يوم رضيتي هسة؟

-رسمية: اي يعني مادري مو انا ماريد اصير ثگيلة عليكم

-ليلة: عادي عادي تعودنا

گامت تريد تكتلني وشردت اطلع من الغرفة وكل البنات طلعن وراي وهي وياهن، ركضت للمطبخ اسوي چاي اسكتها بي وحطيت كعك وكيك بالماعون ورحتلهن، كعدنا كلنا سوه وطلعن ابرار وشمس من غرفهن واللتمينا ناكل ونسولف بأمور عشوائية..

-رسمية: هذا يا علي منهم بالمطبخ جاي يبحوش مثل البزازين؟

-حبيبة: اظن علي الدر

-رسمية: لا لا مو نصبته

-ابرار: يجوز حق؟

-عبق: لا حق ويه تقي وكرار طالعين

-رسمية: هذا جاي يتسحب مثل الحرامي ماكو غير علي السور! وووولك سووووووور... سوووور ليش ما تجاوب ولك سووويرر

-حبيبة: يجوز مو هو

-رسمية: لا هو ادري بي.. علي السور!!

-علي السور: مو انا هذا مو انا

-رسمية: تجي لا اگوملك

-علي السور: انا علي الكرار مو سور

-رسمية: جايتك

-علي السور: اهوووووو جاي جاي ما يخلون الواحد براحته بهالبيت الا اطلع منا واخلص منكم

طب للصالة مطنگر بس شني عطره يفحفح من وييين شميته والكشخة على اخر حباية طالع چنه تركي..

-رسمية: چنك طالع؟!

-علي السور: اي عندج مانع ام علي؟

-رسمية: وين مولي

-علي السور: والله حلوة هاي شو جديدة صايرة تسألينا وين طالعين

نصت تريد تشيل نعالها تكتله وصاح من مچانه ضايج..

-رااايح اشوف رهف

-رسمية: شعندك رايحلها هو كل يوم

-وين كل يوم حرام عليج خايبة خافي الله

-اي هواي تروحلها قابل جاي اچذب

-يمة!

-لا لا خلص روح شعليه بيك انا

رفع ايده بوداع وعافنا وراد يطلع بس شكله مقهور من تصرف امه وما اللومه عمتي رسمية لازم تستوعب سور ونور مو جهالها الصغار بعد وسور راح يتزوج ضروري تنطي مساحته الخاصة..

-حبيبة: علي السور

وگف بمچانه من صاحتله ورجع اللتفت علينا، ابتسمنا كلنا ومن ضمننا عمتي من كالت حبيبة..

-اليوم طالع كلش حلو

-علي السور: صدگ؟

-حبيبة: والله تخبل لو شتگولن بنات

-ابرار: فدشي

-شمس: العطر كلش حلو

-عبق: مرتب كللش

-سبأ: رهف راح تفرح هواي بجيتك

-ليلة: دللها ابن عمي تستاهل رهيفة

هز راسه يضحك بحماس وراح للمطبخ ورجع شايل بيده بوكيه ورد لونه احمر ووردي وعلاگة مال هدايا بس ما عرفنا شبيها، تقرب من عدنا وكال بفرحة..

-جبتلها ذني شوفن حلوات؟

-شمس: الله كللش حلوات والله ذواق

-رسمية: حلوات يمة بالعافية عليها

حنت نظراتنا لعمتي وسور كبرت ابتسامته وراح باس ايد امه وراسها فرحان عبنها علقت ويانه..

-علي السور: الله لا يحرمني منج يا الغالية

-رسمية: زينة رهيفة وياك

-علي السور: كلللش زينة

-ابرار: ما تسولفلنا چا شبيك هم يعجبنا نتونس على ونستكم

-علي السور: هههههه مادري شسولف

-حبيبة: خلوا بنات اخوي متسرسح على دلعها وياه

-علي السور: ولج حبيبة شني تتسنطين علينا من نسولف انتِ

-حبيبة: لا عيوني بس اعرف رهف شني

بقى يضحك وودعنا وراحلها واخذناه محتوى من طلع، گعدنا نسولف بي وبشخصيته شكد تغيرت من يوم خطب لليوم ومو بس احنه ملاحظين حتى عمو علي وكلش فرحان بهالشي بس عمتي رسمية احسها مقهورة عبنها تريده يبقى سور وليدها العنون بعيونها وتعامله مثل الطفل هو ونور..

اذن المغرب وتفرقنا ورجعنا مرة ثانية علمود العشا، ام الجهال كل شوية رايحة تشوف فرخها وترجع للطاوة والحوامل كاعدات يگصصن زلاطة وبتيتة وحبيبة واكفة على السنك تغسل بالمواعين التتوصخ..

-عبق: هاي الباب يجوز اجه علي الحق

حطت شال على راسها وركضت فتحت باب المطبخ وطلعت للساحة شوي ورجعت بس ما طب وياهة علي الحـق..

-حبيبة: ها وينه؟

-عبق: مو هو هذا علي السور رجع

-حبيبة: شعجب

-عبق: مادري بس وجهه چان كلش ضايج

-سبأ: الله يستر!...

**

"رهـــف"

كملت اخر لمسات مكياجي ونزلت ركض للمطبخ اشوف الاكل لا يحترك بالفرن، اليوم عزمت علي السور على العشا ومن الصبح لسه انا اركض وارتب واعدل واسوي بعشانا وعشا ابوي واخوتي..

بشلعان الروح ياله ابوي رضى يجينا للبيت خاطر يشوفني، كلما اگله يكول ذاك اليوم شافج بالباب كافي وعلي السور ما يقبل يريد يجي دائماً وهيج مشلوع گلبي..

اندگت باب الحوش ولبست عباه على راسي وطلعت اركض افتحها، ابتسمت من شفته بوجهي وشايل بيده بوكيه ورد يجنن..

-علي السور: السلام على وردة بيتي المستقبلية

-ههههه عليكم السلام تفضل سور تفضل

طب للساحة وحط البوكيه بيدي وبالايد الثانية انطاني علاكة هدية، ماكدرت ابقي واكف هنا هواي عبن اخوتي على غفلة يجون وخاف يسمعوه حجاية تغث فـ بساع طببته للاستقبال وقفلت الباب ورانه..

-علي السور: يا علي شو انقفلت الباب

ضحكت بدلع وكعدت بالقنفة الگباله وكلت بهدوء..

-امي كالت خاطر سامر ما يجي

-اممم.. تعاي كعدي يمي شني مشمورة هناك

-لا خليني مرتاحة

-تجين لو انا اجيچ؟

-اففف جاية جاية

ضحك ومدلي ايده، حطيت ايدي بين ايده بس كللش مستحية ماتوقعت لهاي الدرجة راح اخجل منه واستحي عبن من گبل اعرفه شخصيته فكاهية وما عنده رسميات بس تفاجأت من انخطبنا وتعرفت عليه اكثر شخصيته كللش حلوة وتنحب..

-علي السور: ماكو هيج گزازه تره

-هاا هاا بدينا

-ابدي ونص چا ترديني اشوفن هالچكليت وما ابوسه

باسني من خدي وشمني حييل، اقشعر جسمي وبساع وخرت منه من نزل يريدني يبوسني برگبتي..

-هم شردت

-لا سور ماتحمل

-شني ما تتحملين

-مادري بس.. بس مادري

-ههههه تموعين

-اسكت عاد

ضحكت وضربت چتفه على كيفي وكض چف ايدي يرجعه يخلي على چتفه، ابتسمت وعيوني نصيتهم مستحية من كمية الحب والاعجاب التارسة ملامحه..

-رفعي عيونج رهفتي

-علي السور

-عيونه

همسها وباس چف ايدي وجرني من خصري يلزگني بي غصب، ضحكت على كيفي واستقريت حده بدون لا اوخر وگلبت شعري كله على جهته، جاي احس بأنفاسه تضرب خدودي واصابعه تخلل بين خصلات شعري..

-علي السور: مثل خيوط الليل لمن يزاعله الگمر

-شعري؟

-ومثل ذنوب العاشگ الما راضي يتوب

-الله

-شدعوة هالكثر حلوة

-تحبني سور

-هذا هم سؤال ينسأل؟

-جاوبني

-شو مادري شمالني استحي اجاوب

-هههههههه شلون بيك انتَ

ضحك على ضحكتي وعدل گعدته يسند ظهره على التخم، دور عيونه بالاستقبال مالتنا وگال..

-شنو اسم الصبغ مالتكم؟

-شمدريني

-والكلوبات منين اشتريتوهم؟

-ماعرف والله

-والثريات؟

-ياا شجاك

-والقنفات؟

-يبووو كل هالاسئلة بس حتى ما تجاوب سؤالي

-لا لا اجاوب چا ليش

-اي؟

-احبچ اي اذا ما احبچ شكو خطبتج

-شكثر تحبني

-بكد حبي لفراقد

ما استحملنا وثنينا ضحكنا بكل صوتنا بس گطعناها بساع من اندگت باب الاستقبال..

-علي السور: بس لا رجع ابوج

-لا هاي امي دگتها خاطر تنبهنا صوتنا عالي

-وانتِ شني قريتي عقلها

-لا بس امي واعرف سوالفها

-يجوز

-اي هسة تحبني يعني؟

-اموت عليج

-يعني اذا طلبت منك شي تسوي؟

-عيوني الج

-والله؟

-اذا مكدور عليه ما ابخل عليج

-شو گبل شوي عيوني الج وهسة غيرت چلامك ليش

-مو حسب الطلب يا گلبي اكو ماكدرله وماريد يخيب ظنچ بيه

-تگدر لطلبي سور

-چا امريني

غمضت عيوني مقهورة ومكسور گلبي بس ما باليد حيلة، اخذت نفس عميق وهمست بخوف گووة كدرت اطلع الچلمة..

-اريدك تحجي ويه عمي علي خاطر يتنازل ويطلع اخوي سالم من السجن

-شنو

-سور هو اخوي وانا ماكدر اتزوج وافرح بدونه

-واذا ما طلعناه ما تتزوجين؟

-علي السور افهمني

-افهمج من تفهميني ليش تردين اخوج يطلع وانتِ بعمرج ما شايفة خيره

-يبقى اخوي

-لا تقنعيني

-يعني ما راح تحاچي ابوك

-جاوبيني واجاوبچ

-سور ليش صعب انتَ

-انا صعب؟؟ انا؟ رهف احجيلي بالخط العريض شني السالفة

-ابوي السالفة سور! ابوي رضى على زواجنا بشرط اقنعك تحاچي ابوك وتتنازلون على ثاركم ويه اخوتي

-شو صاروا "اخوتي"!

-تتنازلون عن سجن سالم و.. واحم.. و

-وشنو؟؟

-وتنسون ثاركم ويه سيف وترضون يرجع من السفر

-من كل عقلچ!!

-والله هذا ابوي مو انا صدگني

-يعني اذا ما سوينا اليريده يجبرنا نفسخ الخطوبة!!

-حباب افهمني

-ماريد افهم!! ماريد افهم وماكدر افهم رهف! انا مو الامـير علي وچلمتي التمشي ولا علي الدر وبدر خاطر ابوي ياخذ بحچيي ولا تقي وعلي الحق وعقلي يوزن بلد ولا كرار وابا الحسن واكل ابوي واشربه بلساني انا علي السور! علي السور وبس!

-لا تحجي على نفسك سور

-ما احجي بس هذا الواقع رهف! انتِ ذبيتي روحج على الزلمة الغلطط لو تردين زلمة تتزوجي على مصلحة خاطر يطلع اخوتج فـ انا مافيدج بشي!

-صدگني مو انا الاريد ابوي والعباس ابووي ليش مو راضي تقتنع

-ابوچ استغلالي يجازف بحياة بناته لخاطر مصلحته وانتن مطاوعاته!

-يعني شنو بيدي؟؟ جاوبني شنو بيدي شسوي؟ لا انا الاكدر اكسر چلامه وابقى عايشة وياه ولا انا الگادرة انهزم من وحشيته واتزوج بعيد عنه!

-مال اخوتچ يطلعون فـ هاي گطنة وشيليها من اذانچ رهف انا لو اطر روحي نصين ابوي ما يقتنع لا تعلگين امالچ بيه

-يعني ما تريدنا نتزوج!

-اتزوجچ بدون شروط تهز كرامتنا وكرامة ابوي ونسوان بيتي

-سور لا تفهمني غلط انا اريدك بس ابـ...

-ابوچ! افتهمت ابوچ من طرگاعة اللفته وخلصتنه منه

-وين رايح سوورر

-هديني خليني اولي

سمعت صوت غفار جاي من الصالة وخفت اتناقش ويه سور زايد ويتكامشون سوه هنا، خليته يروح زعلان وبدون عشا وانا رجعت للاستقبال قفلت على روحي وطگيت من البچي.. متت قهر من امي گالتلي امس شرط ابوي شنو والله لو اعرف شرطه هذا گبل لا انخطب لـ علي السور واتعرف عليه فلا ارضى بهالزواج بس همه لعبوها صح! خلوني انخطب خاطر اتعلق بي واتورط هالورطة!

**

"عـــبق"

شگد چنت متحمسة وفرحانة لليوم بس كل مزاجي انگلب بسبب البارحة بالليل، تفاجأت من عرفت بـ علي الحـق رايح لسلوى بالسجن ومحاچيها والحقيرة بعدها مُصرة وتكول ممتندمة على كلشي سويته وكل واحد بيكم يستاهل العاشه..

حرگت گلبي يكول حق وضعها بالضيم وكبرانة فوگ عمرها عشر سنين وبعدها صلفة، سألته ليش رحت وشحصلت من شفتها وجاوبني ما رحت لسواد عيونها ردتها تعترف ويامن چانت تتعاون ويساعدها غير ولد مسعود وعماته حتى نلگفهم ونطيح حظهم بس مجاوبته وظلت بس تضحك مثل المخابيل وتگله..

"مرتك وامها لعبوا بيهن طوبة بالشماعية"

شطت ومعدتي گامت تفوور من القهر خصوصاً من كملتها عليه وكالت الرسالة الي على اساس اني كتبتها بخط ايدي بيوم الي انحطفت بي فعلاً اني كاتبتها ومدا تقبل تعترف منو كتبها نيابة عني بس حق يكول مو صعبة تكدر توديها لأي خطاط وتاخذ دفتر من دفاتري وينسخ خطي نسخ بدون لا يبين اكو اختلاف..

تنرفزز هالمرة تنرفز! حسب كلام علي الحـق يكول ما تأثرت ولا انقهرت بأي شي سوته بس شاف عيونها شلون دمعت من گللها الثلاثاء الي هو اليوم يكون تخرج حبيبة من الجامعة، يكول بلعت غصتها ونزلت عيونها وكالت "الله يوفقها وين متكون وماكو يوم نستها من دعائها"..

نفضت عقلي من اخبار البارحة التعيسة ونويت ارجع انعش نفسي باليوم، اليوم تخرج حبيبتنا وبهجة البيت والكل الكل الكل بدون استثناء فرحان وطاير من السعادة علمودها وعمو علي كال يروح هو وخالة رسمية لجامعتها حتى تشوفهم وهي تشمر قبعة التخرج واخوانها كلهم گالو نروح احنه هم..

فرحت من علي الحـق كال اروح وياه علمود مناك ونطلع للدكتور نتطمن على الطفل، لفيت شالي عدل وشلت البلشر دا اريد احط وتذكرت الهوسة السواها الي حق قبل كم يوم سوالي عرس وطلع الطلعة كلها من عيني..

-علي الحـق: اللهم صل على محمد وال محمد قبق جاهزة گبلي؟؟

-عبق: اي عيني شعبالك لعد

-صلي على محمد

-اللهم صل على محمد وال محمد

-بعد مرة

-هههه شبيك اللهم صل على محمد وآل محمد

-اللهم صل على محمد وآل محمد بطنچ كبرانة شوي

-اوووي فدوة امي هم تكول بس شو اني مدا اشوف فرق

-لا اكو اكو

ابتسمت فرحانة ومسحت عليها بچف ايدي، كملت تبديل وشلت جنطتي دا اللبسها ونزيت من حسيت بعلي الحـق يشيلني ويبوسني من خدي حييل ويكول..

-بطة وشايلة بطة

-وراح تترس بيتنا كتاكيت

گلتها واني مبتسمة، من حملت لليوم لازم يغنيلي "بطة وشايلة بطة وراح تترس بيتنا كتاكيت" مادري هو اخترعها لو هي موجودة من زمان..

-والله زين حفظتيها

-چا شلون

-اروح فدوة للچا انا ام بطتيي

-اكلك علي انتَ ليش مُصر اني حامل ببنية؟

-عبن گلبي حاس

-واذا جان ولد

-ان شاء الله بت

-واذا ولد؟

-خاطر اذبه بالزبل

-علي شساااالفة

-لا والله اتشاقه بالعكس كلشي يجي من الله يا محلاه

نزلني من ايده ومشط شعره وطلعنا بعدما تطمنت على امي وشفتها نايمة، طلعنا بوجهنا للجامعة مال حبيبة وضحكت ممصدگة من شفت الكل هنا.. كل الولد وزوجاتهم وحتى تَـمني وتالة موجودات بس واكفات ويه سبأ وعلي التقي مو ويه الامير..

-عبق: الله همزين من الكل اجه شكد حلووو

-تَـمني: ماتوقع اكو احد يريد يفوت تخرج حبيبة

هزيت راسي مبتسمة ودرت وجهي اباوعلها من بعيد كلش واكفة على المدرج بين زملائها، لابسة روب التخرج ولازمة بيدها قبعتها وواكفة تنتظر المصور وهو يوجههم على وضعيات للصور..

-علي التـقي: ما اظنها شافتنا ما دارت وجهها لجهتنا

مشى بأتجاهها هو وسور ونور ويأشرولها بيدهم حتى تلتفت وماكو، خبصوا ارواحهم يهوسون ويطفرون وهي بغير عالم..

-علي الحـق: والله شريفة اخيتي ما دارت حتى وجهها

-عبق: شيخة الشيخات بعد

اخيراً ومن بعد عناء طويل وعلي النور ظل يصيح "هاا شيخ ولك شييخ عاين هنا" ياله حبيبة اللتفت لأتجاهنا وفوراً فتحت عيونها مصدومة ما متوقعتنا نجي..

نوّر وجهها بضحكة تجنن وضمته بين ايدها فرحانة، اللتفتت على صديقاتها وصارت تأشر علينا واقرا شفايفها دتگوللهن "اهلي"، "ذولة اهلي" ، "اجوا اهلي"..

-علي الحـق: بعد روحي روحج

همسها علي الحـق بينه وبين نفسه وهو يتأمل اخته من بعيد وسوالها بيده "هلو"، ظليت ادور بوجوه اخوانها وابوها وامها اشوفهم كلهم يضحكون فرحانين بيها وهي طايرة من السعادة بشوفتهم.. حاطة ايدها على گلبها وتحجي ويه صديقاتها كأنها تريد تصيح بعلو صوتها كدام الكل ذولة اهلي واجوني.. يا جمالج يا حبيبة ويا جمال گلبج اليوسع للكل..

شفت صديقتها حور واكفة من الجهة الثانية وبصفها اخوها حاكم هم واكف يباوعون للخريجين وثنينهم مبتسمين ويراقبوهم شوكت يتم رمي القبعات..

-تَـمني: شلون اجواء حلوة

-ليلة: وعيون ذاك الواحد احلى

-تَـمني: منو؟

-ليلة: امير يعني منو!

-تَـمني: شبي ما فهمت

ضحكت من ليلة غمت گصتها حيل تلطم وتَـمني بعدها ما مفتهمة شكو، عبالي بس اني انتبهت لعيون الامير وهي تركض وره تَـمني ويراقبها من بعيد بدون لا يتقرب.. يباوعلها بنظرات فضولية واحس احس احس ذني نظرات اعجاب هم لان اصلاً تَـمني طالعة تخبل اليوم بفستانها الماروني وشالها الاوف وايت..

-عبق: امير يباوعلج تَـمني

-تَـمني: كذابة!

-عبق: والله كل ساع يدورج بعيونه ويتلفت عليج

-سبأ: وبهالمناسبة الحلوة تَـمني وتالة تجون لبيت عمي على الغده اليوم مو؟

-تالة: عدكم عزيمة؟

-عبق: اي طبعاً عزيمة تخرج حبيبة عمو علي مسوي وعازم الكل بدون استثناء

-تَـمني: اي گلتلي خالة رسمية وعزمتنا بس احنه منروح

-تالة: ليييش تَـمني

-تَـمني: عدنا امتحانات تالة منلحك

-عبق: هسة شكد راح تطولون قابل يلا يمعودات سهلوها وتعالو

-تَـمني: لا والله عذرونا ان شاء الله على الجايات

هزيت راسي ساكتة وما لحيت زايد لان عرفت ليش متريد تجي كله حتى متتواجه ويه الامـير علي ويتأذون ثنينهم لان نظراته هسة ممفهومة شنو بالضبط وحقها من متريد تحازف بمشاعرها..

اللتهينا بتخرج حبيبة وشهدنا نجاحها لاخر دقيقة، شفناها وهي تشمر قبعتها بحماس وفرح وشفناها من نزلت للمدرج وحضنت ابوها واخوتها واحد واحد ودموعها شلال ينزلن من عيونها..

-شيخ علي: ليش تبجين بوية ياهو وياهة شيختي

-حبيبة: محد وياي يا روح شيختك، الله لا يحرمني منك يا هيبتي ولا منكم يا رفعة راسي

-علي الدر: بنيتنا واخيتنا وتاج راسنا انتِ

ابتسمت ومسحت دموعها الليلو ووكفت حتى تاخذ صورة وياهم كلهم، ما شاء الله اللهم صل على محمد وال محمد وكفوا كلهم عشرتهم صف واحد وحيدر على الكرسي وحبيبة وخالة رسمية حطوهن بنصهم واخذوا صور بعدسة وايد كال المصور حتى الكل يبين..

الانظار كلها عليهم واشوف منو يتعده منهم يأشرون عليهم ويبتسمون على منظرهم شكد حلو ويأسر العين، كملوا تصويرهم ووگف عمو علي يسولف ويه حبيبة على فدشي بصوت ناصي تخيلته ديحچيلها هو شكد فرحان وفخور بيها لانها جانت مبتسمة ولازمة ايده ورفعتها تبوسها بس بعدين كامت تبجي مهضومة واضح جاب طاري سلوى..

-تالة: يا روحي الله عوضها بأب حنون يسوه الف سلوى

-عبق: اي والله ماكو مثله عمو علي

نقلنا ونستنا وفرحنا للبيت وسوينالها عرس.. والله عرس هوسات وهلاهل وابا الحسن شايلها على چتافه ويهوس بيها وعلي السور لابس قبعتها ويدبچ وعمو علي قرالها هوسة تجنن، رفع بشته وايده وگال بصوت مسموع للكل..

-شيخ علي: هلا بالزين والغالي.. هلا ببهجة عيالي..

-الولد كلهم: اييييييه

-هلا ببت گلبي واخت رجالي..

-الولد كلهم: ايييييه

-بنجاحچ يا بوية اللتمينا.. بنجاحچ يا بوية اللتمينا..

وكلهم يرددون وياه ويدبچون بالكاع دبچة خفيفة وحبيبة بس تمسح بدموعها وتضحك، الاجواء تخبل صار هوااي بيتنا يفتقد هالفرحة واللمة والاحلى هو من علي الحـق راح جاب امي وانضمت النا وكعدنا كلنا نتغده سوه من ذبيحة تخرج حبيبة..

للعصر الولد طلعوا كلمن لشغله واني رحت للدكتورة، طمنتني على الطفل وكالت كلشي تمام بس جنس الطفل ماعرفته شنو ما مبين.. رجعنا لبيت عمو علي بعدما رجعت من الطبيبة واللتمينا على عشا هالمرة..

-حبيبة: والله مكان تَـمني وتالة خالي

-سبأ: ما رضوا يجون

-حبيبة: انطيني موبايلي رفل نتصل عليهن

دگت عليهن وفتحت سبيكر وصارن عبالك كاعدات ويانه، كعدنا كلنا البنات الشابات بغرفة حبيبة وتَـمني وتالة ويانة على اتصال وجانت كعدة من العمر كلها ضحك وفرفشة ووناسة..

تمنيت ابات يمهم اليوم بس گلبي ما هلي اعوف علي الحـق وحده خطية چنه يتيم واكفلي بباب الغرفة وبتوسل بعيونه حتى نرجع للبيت.. ضحكت على شكله واستسلمت وكمت وياه نرجع سوه حتى اتحضر لدوام باجر..

**

"حـــبيبة"

لو اشكر الله على نعمة وجود اهلي منا لباجر اكون مقصرة، انا ماعندي بس اهل انا عندي عزوة وسند وعكاز لايامي الصعبة.. شكد انهضمت اليوم على وحشة امي بس نويت اعوض مچانها بگلبي وبالبيت بأمي رسمية واخوتي والناس اليحبوني من صدگ..

تأخر الوكت ياله تفرقنا هذا الرجع لبيته وهذاك الراح لغرفته وذيج الرجعت لزلمتها وبقيت انا وحدي بغرفتي، تنهدت مبتسمة وتعبانة بنفس الوقت اريد بس انام بس ماكدر بدون لا ارتب الغرفة واللملم البيت ما دام الكل راح حتى باجر يخف الشغل علينا..

گمت اشيل بگلاصات العصير واحطهم بالصينية ولميت كواغد النساتل حطيتهم بچيس وبأثناء ما انا مشغولة اعزل بغرفتي اندگت الباب عليّ..

-تفضل

انفتح الباب على كيفه كلش وابتسمت من شفت وجه ابوي البشوش يضحكلي ويكول..

-شيخ علي: بس لا نايمة بنيتي

-حتى لو نايمة اكعدلك

ضحك خفيف وطب للغرفة، طبگ الباب وراه وتمشى وگف يم الميز مالتي وصار يوزع عيونه مستغرب وهو يشوف الهوسة مال الغرفة..

-حبيبة: لا تنصدم البنيات چانن يمي فوگ

-هاا مو اگول كل هذا اكلته حبيبة

-ههههه لا عاد بوية اشايفني

-غصن بان اشوفنچ يا بعد الكل

-تعال بابا لا تظل واكف تفضل هنا

-اي والله رجليناتي توجعني

-سلامتك افركهم الك؟

-لا بوية لا تعبين رويحتج

-افاا وانا بنيتك لا تكول هيج تمدد على فراشي تمدد حبيبي

ابتسم وسوه مثلما كلت بس ما تمدد بكل جسمه بس كعد ومد رجله على الجرباية وانا كعدت بصفه ادوسله بأيدي وامرغ اصابع رجله..

-شيخ علي: اااخ الله يرزقج الجنة يا بنيتي

-بوجودك ان شاء الله

-صعبة الجنة على امثالنا بوية

-لا تكول هيج شيخ علي، والعباس انتَ احسن رجال شافته عيوني

-الجنة تحب الفقراء، تحب الناس البسيطة مو الناس التحكم على حياة البشر وتفصل الوادم فصولة تكسر الظهر

-بس انتَ ما تظلم احد والكل يشهدلك

-حتى لو ما نكدر نحكم، محد يعرف المضموم والحكم الصح غير رب العالمين

-حتى لو ما رحت للجنة بوية انا اشفعلك

گلتها بثقة تضحك وغمزت اداهره، ضحك وگرص خدي بين اصابعه وكال..

-مو خاف تشفعين لزلمتج وجهالچ وتنسين ابوج

-شني بوية كل عقلك ابيعك لخاطر زلمة وجهال؟ يرحون فدوة لنعالك والله

-نشوف عود

-بوية اصلاً وينه الزلمة ووينهم الجهال انا باقية يمك هنا ما اروح لمچان

-لا ما ارضى بهالشي انا هم يعجبني اشوفن وليداتج وبنياتج كدام عيني ويترسون بيتي بوكاحتهم

-الله كريم بوية

-اكيد الله كريم بس الله هم يريدج تتقبلين الفكرة خاطر تخوضيها

-ان شاء الله خير

-واذا كتلج جايچ خاطب حبيبة

-لا بوية لا فدوة ابدد ما متحضرة

-يا بوية اسمعي مني وشوفي خاطر ما تتندمين

-مو..

-سمعي وانطيني جوابچ

-تفضل بوية

-الخاطبچ خوش زلمة ومشهودتله شهامته ومروته، ما شاء الله دكتور ومتعين صح ماعنده بيت بعده بس جاي يشتغل على روحه وان شاء الله يصير عنده

-اذا انوي اتزوج فـ من شروطي بوية يكون عنده بيت، ماريد اعيد نفس المشاكل العشتها ويه خوات منتصر

-حگج بهاي

-اي فـ يعني ما موافقة انا

-خوب نشرط عليه بيت

-واذا ما رضى؟

-لا انا اگلج دكتور حاكم راح يرضى

-دكتور حاكم!!!!

-اي

-دكتور حاكم صديق الامير؟؟

-اي شبيچ بوية انخبصتي

-بابا حاكم خاطب!

-شني؟؟

-خاطب الزلمة خاطب وراح يتزوج!

-معقولة؟ بس هو ما گال خاطب

-والله اخته گالتلي خاطب وراح يتزوج بس يجوز هسة فصخ مادري والله

-حتى لو فاصخ چا غير يكول لو هي هيتة

-مو يجوز ما حچى عبني مطلگة

-واذا مطلگة؟ هالشي يمنعه يصارحنا من البداية ويكول جنت خاطب وفصخت؟

-مادري بعد

-لا خلص عوفي يولي

-براحتك

سكتنا ثنينا واحتل الصمت الغرفة، انصدمت بالبداية من گال حاكم الخاطبني وحتى جرأة ما صارت عندي واسئلة شوكت طلبني فـ غلست على الموضوع بكبره ما دامه راح يرفض..

ثاني يوم انتظرته يحاچيني ويگلي رفضه بس ما سواها، اليوم الوراه هم انتظرت وهم ما حچى واليوم الوراه هم نفس الشي..

وره چم يوم صارت گعدة بين ابوي ومسعود وكل الولد حضروها، محد رضى يسولفلنا شنو الموضوع الا من رجعوا وانصدمنا من عرفنا صار بيناتهم اتفاق خاطر تكمل خطبة علي السور ورهف!

ابوها شارط الا ابوي يتنازل عن سالم وتنسد سالفة سيف ويرجعونه للعراق وابوي بثنينهن ما رضى بس من بعد حديث طوييل دار بيناتهم ابوي گاله يتنازل عن واحد منهم وشرط ابوي يختار منو منهم ووگع الاختيار على سيف.. گاللهم يرجع بس بشرط بعيد عن محافظتنا ومسعود قبل بهالشي..

امي بالبداية عصبت كلش بس كالت يجوز راد يرجعه خاطر اذا يموت لانه مريض سرطان فـ يندفن بالعراق يمهم، يبقى ابنهم ومحترگة گلوبهم عليه وابوي وافقها الرأي وكال هذا السبب هو رضى يرجع..

علي السور متفاجئ وما مصدك ابوي سمعله وسوه گعدة كاملة لخاطره وطبعاً چانت بوجود شيوخ من عشاير ثانية شهود، گضى اليوم كله يتصفن ويحس روحه بحلم معقولة ابوي اخذه على محمل الجد وسوه هيج شي جبير علموده!

-حبيبة: چا مو ابنه شبيك انتَ

-علي السور: ولج ما مصدك وعلي بعدني منثول

-علي النور: اي وعلي حتى ابو شادي الزبنطوطي ما مصدك

-علي السور: عاين شلون ابوي يحترمني هاي عبن خطبت انتَ هم اخطب خاطر تصير زلمة

-علي النور: ما اخطب ماريد

-علي السور: ليش ولك مو كافي صياعة

-علي النور: عود اخطب من يحن علينا اخوها

-علي السور:هاا عود عاشگ؟ هسة هم يطلع زلمة ولاعب عليك

-علي النور: انچبببب

-علي السور: عايني بعده مقهور على القط القطيته بي

-علي النور: كل هاي سوالفك اطلعهن كدام رهف اخليها تزوع بوجهك

-علي السور: ولك لاااا وينك تعاااال

ضحكت على خبالهم وعفتهم ورجعت للمطبخ اكمل العشا ويه البنات، مشى چم يوم من حياتنا ماكو شي جديد، ليلة شايلة فرخها وتفتر بي وتلعبه وسبأ كاضة معدتها وتلعب نفسها من كلشي وحامها كللش زاد من عبرت شهر الرابع لليوم وعبق تجينا كل چم يوم وشمس وابرار كلمن حايرة بحياتها..

نزلت من فوگ وبيدي اموري العنون وبالايد الثانية فطومة بت علي الدر چنت اللاعبهم واغير جو وياهم ملل وماكو شي اسوي..

-رسمية: وينج حبيبة تعاي، الشعبانية بعدلها چم يوم وابو علي يريدنا نسوي مولد بس محتارة شوكت نسوي وحويدر يريد يسافر؟

-حبيبة: يمة سويها عگب باجر واليوم وباجر نحضر خاطر نلحك

-هاا؟

-والله

-شمس: عمة المن تردين تعزمين

-رسمية: هو كلهن حبايبنا

-ابرار: حتى الزلم؟

-رسمية: لا الزلم شكو عود ابو علي يسوي بغير يوم

اتفقنا على يوم الحفلة وبدينا بالتجهيزات، اول يوم جان مخصص النا احنه طلعنا نشتري بي النحتاجه من ملابس وسوالف ثانية واليوم الوراه جان للبيت، وكعنا بي دك جلف وغسل هلكنا بي..

-ابرار: تَـمني وتالة راح يجون مو؟

-حبيبة: اي يجن گالن

كملنا كلشي ركض ركض ولحد ثاني يوم احنه ملتهيات بتجهيز البيت والاكل تعبناا تعب حتى الحفلة ما حسينا بيها من بدت الناس تجي، طبن هواي نسوان ماعرفهن بس ما تدخلت اكيد من جماعة امي رسمية اذا هي ياهي تشوفها تصاحبها وتطببها بيتها، ركضنا البنات كلمن لغرفتها تتجهز وتبدل ونزلنا نگابل الناس..

رغم التعب والهوسة مال اليومين الفاتوا بس الحفلة چانت كللش حلوة، ذكر اهل البيت والمواليد القرتهن الملا والحماس الي بصوتها يخبل حييّت المكان وخلت الكل يتونس ويعيش الاجواء..

-حبيبة: بنات گومن نتساعد ونوزع الضيافة

-تَـمني: اجي وياچ اني

اجت وياي والباقيات اللتهن كلمن بشي، وزعنا الضيافة ووراهة العشا وشوي شوي بدت النسوان تخف وتطلع لبيوتها فـ قررت نكعد انا والبنات بالمطبخ نجر نفس وناكللنا لگمة لان من الصبح ما ماكلين شي..

-حبيبة: رهف وين اختج؟

-رهف: فوك كالت تريد تغير نفنوفها جاي يحز ببطنها

هزيت راسي وعفت الباقيات كاعدات بالمطبخ ورحت للصالة، شفتها مكلوبة كلاب الفراش الچانن كاعدات عليه النسوان بعده بالكاع وينرادله تعزيل وكنس بس ماهتميت خليني اكل والله كريم وراهة..

-تَـمني: يلا حبيبة وينج

-حبيبة: يلا اجيـ...

گطعت حچايتي فازة ويه صوت الردمة القووووية الطاحت من فوگ ليجوه! اللتفتت اشوف شنو هذا وشهگت من غمج روحي من شفتها سبأ!! سبأ طاحت من فوگ محجر الدرج ليجوه ومباشررة لنص الصالة!!

-رهف: يممممة اختيييي!!!

صاحت رهف بكل صوتي وركضت عليها تشوفها اما انا.. فـ انا ماحجي على حالي رجلي جمدت بمچانها ماكدر احركها وبس اباوع بعيوني شلون مرة اخوي طايحة لا حس ولا نفس يطلع منها واختها تدگ وتلطم على راسها وتصيح..

-رهف: يممة اختييي ما جاي تتحرك اختييي ولج يممااااا.......

يتبع 👑....

━━━━━━ ♛ ━━━━━━

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

لو افقد الذاكرة الف مرة، راح ارجع احبچ بالمرة الالف ♥️!...

━━━━━━ ♛ ━━━━━━

-رهف: يممة اختييي ما جاي تتحرك اختييي ولج يمماااا

صوتها العالي خلى الكل يجي يتراكض، مرة عمي مسعود طاحت يم بنيتها تصيح وتلطم على وجهها وامي تتعارك ما تخلي احد يكضها الا يجي علي التـقي والنسوان كلها تتصايح خايفات يكولن البت ماتت عبن ما جاي تتنفس!

-رهف: سكتييي فال الله ولا فاالج سكتييييي

-تالة: لاا تحركيها رهفف لا احد يحركها يمعوددين

-حبيبة: يمماااا وين صار علي التـقي!!!

ويه صوتي العالي طب علي التـقي مخبوص اكثر من خبصتنا، ما صاح يا الله ولا اهتم للنسوان المفرعة وركض على سبأ الطايحة ومغمي عليها.. طاح على رجليه يم جسمها وحضنها عليه وصار يدغ خدها بأصبعه على كيفه ويحجي بحس يرجف..

-سبأ سبأ كومي سبأ شبيچ گعددي سبأ لا تطيحين گلبي سببببأ

-تَـمني: تقي مو وكتها لازم ننقلها للمستشفى!

هز راسه ورفع عيونه المدمعات علينا وصار يتلفت يمه وحواليه يتلفت چنه ما مستوعب وما يعرف حتى يكوم..

-رسمية: ولك يمممة كوووم

-عمة ابتسام: دكيت للاسعاف هسه جايين بالطريق

-صابرين: يااا اسعااف بتي راااح تمووووت

-حبيبة: عمة ما يصير يشيلها سبأ حاامل وطيحتها تخووف

حچاية مني حچاية من صابرين حچاية من امي وعمة غزوة وباقي النسوان البيت انگلب فوگ روسنا، ناس صارت تتعارك ويه ناس وعلي التقي بغير عالم ما منطي اذنه لبشر بس صافن على سبأ ويسولف وياهة بشي بس شنوو مادري لان كلشي ما جاي اسمع من الهوسة..

كعدت يم راسها انا ورهف ورفل ونرش على وجهها ماي ونشممها عطر نريدها بس تصحى بس البت لا حس ولا نفس، انهاريت وبلعت العافية من رفل همستلي..

-رفل: وضعها يخوف حبيبة

-حبيبة: اششش رفل اشش

-شمس: صوت سيارة اسعاف جاي من بره!!

-ابرار: اي اي هسة در دگلي راح يطبون

لبسنا سبأ حجاب بسرعة وانا ركضت لغرفة امي رسمية اللبس شي على راسي وطلعت اهرول للصالة شفت اهل الاسعاف جاي يطبون للبيت وبيدهم شايلين سدية، نصوا ثنين على سبأ يردون يشيلوها وتقي ما رضى گاللهم هو راح يشيلها بس خليهم يعلموه شلون ما يخليها تتأذه..

-شمس: استغفر الله كللش مو وكت غيرة!

علموه المسعفين وشالها تقي ويه رهف وصابرين ونقولها بالسدية وطلعوا يركضون بيها ويصيحون خاطر يسوولهم مجال ومحد يعترض طريقهم، رجعت لغرفة امي ولبست عباه فوك الشال وطلعت وراهم للساحة شفت كل اخواني هنا ووجوههم ما تتفسر وعيونهم تركض وره سيارة الاسعاف..

-حبيبة: علي الدر اخذني بدربك للمستشفى

-علي الحـق: شعندج جاية حبيبة!

-حبيبة: ماعوفنها وحدها اخذونييي

-علي البدر: تعاي وياي امشي طلعي وياي

طلعت وياه وركبت سيارته بس ما تحرك وظل واكف ينتظر شي، سألته شبيك كال امي خابرته هم تريد تجي ويانه..

-علي البدر: حبيبة سولفيلي شصار تره كلشي ما مفتهمين احنه

-حبيبة: طاحت البت من الدرج بدر طااحت

-تزحلكت؟؟

-لاا طاحت من فوك ليجوه

-من فوگ محجر الدرج!!!

-اي ايي انا جاي.. جاي.. اطب للمطبخ و...

-على كيفج بس على كيفج

-وشفت.. وشفتها طاحت من فوك ليجوه بنص الصالة

-يا علي دخيلك!!

-وين صارت امييييي

-لا تصيحين انفضحنا هسة تجي

ما استحملت انتظرها اكثر ونزلت من سيارة بدر وركضت على سيارة سور من شفته حركها يريد ياخذ رهف وامها للمستشفى، شلكت وياهم بكراسي الوره وطلع بينا سور الما كدر يسوق طبيعي من وره رهف البت ما سكتت من البجي.. كل ساع يلتفت عليها يعاين عليها ويضرب على الستيرن مقهور وامها كاعدة بكرسي الصدر وتبجي بالخنسة..

-علي السور: يا الله.. كولن يا الله يمعودات خلي الله يستر علينا

-رهف: ما شفتها انتَ ماا شفتهاا

لطمت على وجهها بيدها الثنين وكضيتها بيدي امنعها، گضى الطريقة كله يهدأ بيها وبينا ويسولف ويانه يكول سهلة وان شاء الله ما بيها شي، ما اللومه على تفائله عبنه ما شافها من طاحت والعباس احسده الما شاف الصار ولحگ على اخر شي..

-علي السور: وصلنا للمستشفى يا نساوين لا تتخبلن وعلى كيفجن لا تسوونا فرجة لامة محمـ...

ما كمل جملته وفتحت باب السيارة رهف وطلعت تركض وعباتها تركض وراهة وتبجي، ضرب سور على الستيرن وصاح..

-عووود حجينا احنه

خفت اطلع لا اترزل فـ انتظرته علما سفط سيارته عدل ياله نزلت ويه صابرين وهو ركض يهرول وره رهف ويصيح..

-ام عبد العزييز اوكفيي ام عزييزز

شكد خايفة وشكد مصدومة من الصار بس ضحكت على شكل صابرين من اللتفتت عليَّ وكالت وخشمها احمر من البجي..

-عبد العزيز ياهو هذا؟؟

-حبيبة: مو وكتها عمة امشي سبأ جوه

-ولج اوكفيي.. رهييييفةة ترجعين لا امرعدج عبد العزززيز ياهووو

طبينا للمستشفى كلنا تقريباً سوه وصلنا وركضنا على الطوارئ، اول ما شافوا سبأ حامل ووجهها صاير ازرگ كالوا فوراً تتحول على صالة الولادة..

-علي التـقي: وهي شلونها؟؟ هي فهموناا

-الدكتور: خوية ما معلوم بس لازم تتحول لصالة الولادة مكانها مو هنا وجه زوجتك ازرگ ممكن بسبب نقص الأوكسجين!

استجابينا لكلامه وخر من طريقهم تقي وهمه سحبوها يركضون بيها لجناح الولادة.. ما نعرف نفكر بشنو بطيحتها والكسور الي يجوز فصخت جسمها لو بولادتها لابنها الما مكتمل بعده..

تخبلنا بالزايد من شفنه مرة واكفة بالباب تتعارك ويه السكرتيرة وتگلها ليش جيبت بنتي ممرضة مو دكتورة انوب متنا خوف من كامت تصيح..

-چذابييين چذااببين الدكتورة ما تجيّب حاطيها بس ديكووور السستر الي تجيّب وطلعتت روحها لبنيتي هذوول جذاابينن

-السكرتيرة: حجية انطينا مجال ما يصير هيج

-علي التـقي: يعني شني؟؟ ماكو طبيبة؟؟

-المرة: لاا والله لااا حتى لو يكولون اكو فـ جذابين مو هي تجيّب والعبااس ابو فاضل

-علي التقي: هسة شلوون؟؟ وووولكم مرتييي راح تموووووت

-السكرتيرة: استاذ صوتك رجاءاً اكو مرضى جوه

-علي الحـق: وهاي؟؟ هاي مو مريضة ما تشوفين انتِ؟؟

-السكرتيرة: راح ندخلها هسة بعيني بس انطونا مجال

-علي التـقي: اريد اشوف الطبيبة وينها خليها تطلع اريد احاچيها

-السكرتيرة: الطبية مشغولة ويه نساء ثانية ما تكدر تطلع استاذ

-علي الدر: نريد نحاچيها بنيتنا وضعها خاص!!

-السكرتيرة: انطوني فحوصاتها انا ادخلهم الها

-علي الحـق: ليش ما ترضون نحاچي الطبيبة؟؟

-المرة: عبنهم چذابييييين والله بتي رادت تمووت وما اهتمووا بيها

-السكرتيرة: حجيية ما يصير هالحجي ما يصير

-رسمية: شووو وخروا اطبن عليها اچفص بأفادها

-السكرتيرة. حجية ما يصير تطبون هيج المكان كله معقم جوه وبطبتكم هاي تلوثون المكان

-رسمية: ولج انتِ الطبيبة ما ترضين تطلعيها خاطر نشوفها هاي اذا اكو طبيبة هسة خايفة لا نلوث المچان!

صارت ملاطمم هنا ناس تهد على ناس والسكرتيرة حقرت مو شلون مچان ويانه، اضطرينا ننقل سبأ لغرفة علمود الفحص بس بعدهم اخوتي متسودنين حتى اجوا حماية المستشفى واجه رجال يحچي ويه علي التـقي ويحلفله اكو طبيبات ثنين جوه بس تقي گلبه غادي نار وما جاي يكدر يأمن..

-علي التـقي: بفلوووسي جااايبهااا بفلوووسي اريد اشوف الطبيبة بعيونني واحاچيهاا شني حراااام؟؟؟

-ابا الحسن علي: خايبين امشووا نوديها لغير مچان شنيي لطشتوا هناا

-السكرتيرة: تطلعوها منا على مسؤوليتكم اخي

-علي التـقي: اي اي على مسؤوليتي

-الامـير علي: تقي بداعة الحسين لا تستعجل البت وضعها حرج يجوز مكسور حوضها لو شي ويطيح حظنا زايد

-رهف: وشنسوي نظل نتصفن بوجه هاي الغمة؟؟؟

-علي السور: سكتيي رهف

-رهف: ما اسكت وعليي

-الامـير علي: مو وكت مناگر! خلوني اتصل على حاكم بلچن عنده عرف يجينا

-علي البدر: حاكم اصلاً مو بهاي المستشفى امير!

-علي الدر: ماله غرض بجناح النسائية خوية

-الامـير علي: هسة نخاابره شنيي راح نموت لو خابرناااه؟؟؟

-علي الحـق: لا هذا هو خوية خابره اذا تريد خابر

وگفنا على جهة وامير اتصل بحاكم، من الخبصة والدوخة والخوف الاكل گلوبنا على سبأ الي لحد هاللحظة ما رجعت لوعيها محد اجه بباله نتصل بالطبيبة الي هي تراجع يمها.. بكل سهولة تكدر هي تجي تجيبها ومحد فطننا على هالسالفة غير حاكم!

-الامـير علي: يكول حاكم عدكم رقم الطبيبة لو هو يتصرف على معرفته؟؟

-علي التـقي: لا لا عندي هذا هنا

دگه بموبايله وما طولت ثواني وجاوبت سكرتيرتها، بلغهم تقي على وضع سبأ والله ينطيها العافية الدكتورة كالت عشر دقايق وهي يمنا عافت مراجعيها والدنيا واجتنا عبنها تعرف علي التـقي زين..

-علي التـقي: دخيلك يا علي استرها ويانه

-علي النور: هذا ابوي جاي يتصل عليَّ شنو اگله؟

-ابا الحسن: لا تبلغه بشي هسة اصبر هو بطريق لا يصير قدر

-رسمية: ااخ يا يمة حيل ما ظل عندي وين صارت هاي الطبيبة

ما انتظرنا اكثر من خمس دقايق واجت دكتورتها مستعجلة من وجهها مبينة خوش مرة، طمنتنا وكالت هي تحاچي المستشفى لانها تشتغل هنا الصبح وصدگ مجرد حاچتهم دخلوها واخذوا سبأ لغرفة العمليات..

-علي التـقي: دكتورة ما كعدت لحد هاللحظة ما فتحت عيونها

-الدكتور: بسيطة ما دام بيها نبض بسيطة

-صابرين: خية انتبهي عليها فدوة اندارلج

اشرت الدكتورة على عيونها بمعنى "بعيني" وطبت لغرفة العمليات، وگفنا ننتظر على نار وارواحنا تلوب عليها ما خلينا ختمة ما خلينا دعاء ما خلينا قران يعتب علينا ما قريناه..

-علي الحـق: يا الله هاي ممرضة ها خوية بشري

طلعت ممرضة من غرفة العمليات مستعجلة وگفوها اخوتي يستفهمون منها بس كالت هي كلشي ما تعرف والدكتورة راح تطلع تفهمنا كلشي وفعلاً كلامها دقايق وطلعت الدكتورة من الغرفة وتوجهت لـ علي التـقي..

-الدكتورة: زوجتك رجعت لوعيها خوية بس عدها الم حاد بضلوعها احتمال جبير عدها كسر

-علي التـقي: چا شلون تردين تجيبيها؟؟

-الدكتورة: على كيفك وياي بس على كيفك خليني افهمك

-تفضلي

-الطفل وضعه حرج والجارة مكسورة لازم نجيبها لاازم وضعها ما يتحمل تأجيل

-رسمية: معناها الفرخ يموت!!

-الدكتورة: سبأ عدها ولادة مبكرة معناها نسبة نجاة الجنين مو جداً قوية وهذا السبب اجيت ابلغ زوجها حياة الام اهم مستحيل افضل حياة الجنين على حياتها!

تحجي بسرعة بسرعة مستعجلة قلقتنا وظلينا نتطاطگ وواحد يعاين بوجه الثاني بس تقي بقى صامد وجاوبها بدون مماطلة..

-علي التـقي: اكيد اي اي اكيد طبعاً

-الدكتورة: فاطمة خلي يكمل الاجراءات

كالتها ورجعت تركض لغرفة العمليات وتقي راح وره المتسمية فاطمة، تعبت من الوكفة حيل ما ظل بيه ابتعدت عنهم شوي وسندت ظهري على الحايط وگنبصت اگعد بدون لا اخلي جسمي يطخ الگاع..

افكر بـ سبأ الفقيرة وشلون نجت من هيج وگعة، دخيلك ربي معجزة هاي طاحت من الطابق الثاني للاول واظن الي سندها وستر عليها هو الفراش المفروش.. سبحان الله ما ردت افرش المنادر بالصالة وكلت لامي تجيب كراسي بس ما رضت وكالت ما يكفون معازيمنا هواي..

-رسمية: عمت عيني عليك يا وليدي ما تهنيت ببزرتك

-ابا الحسن علي: الله يعوض يمة المهم مرته مابيها شي كله سهل

-رسمية: اي والله رب العالمين ستر عليها ولج حبيبة هاي لوما الفراش جان ماتت الفرخة شفتي شلون الله صاح براسي وما خلينا كراسي

-حبيبة: اي والله كله بيها حكمة سبحان الله

-رهف: همه ليش ما سوولها اشعة گبل لا يجيبوها؟

-صابرين: انا هم كلت والله هاي مو خوش مستشفى شكو جبتونا عليهاا

-رسمية: ارقى مستشفى هاي بس انتِ شمفهمج

-صابرين: انا ما افهم؟؟ ولج ابني اليراقب هالمستشفيات الخايسة وهو الينزل بيهم عقوبات!

-رسمية: اي قنعي روحج

-صابرين: ما تصدكين مو؟؟ سألي حبيبة وينج حبيبة مو غفار هو المسؤول عن هيئة الرقابة لو لا؟؟

-رسمية: حبيبة لا تجاوبين خليها وحدها

-رهف: انتن صدگ تحچين؟؟ وكتهاا هسة؟؟!

-رسمية: حاچي امج

-صابرين: هاا؟؟ يعني ما تحاچيچ الچ!

-رسمية: لا طبعاً انا ام ولي نعمتها

-رهف: خير؟؟

-علي السور: يمعودات مو وكتها والعباس گلوبنا ميتة على هالفقيرة وانتن واكفات تتعاركن

-رسمية: چا حاچي عمتك بس تريد تعاركني

-صابرين: ولج انا ويني وينج بس انتِ هيج من يوم يومج شايفة روحج على العالم وخشمج معلگ بالعلالي

-رسمية: ولچ انا...

-رهف: بس!! سكتن ثنينچن كاافي!

-صابرين: تسكتيني وانا امج ولج؟؟

-رسمية: الا اطلگچ من ابني انا اعلمج

-رهف: اووووع لعبت روحي وينك تعال انتَ طلگني وخلصني من هاللعبان نفس!!

-علي السور: بعلي الاسمعها تحجي بعد احير شسوي بيها! كافي احترمن الموجودين واحترموا تقي! الزلمة روحه تلوب على مريته ووليده وانتن واكفات وحدة تصد والثانية ترد!!

نتر بيهن بصوت مو كلش عالي بس سكتنهن ثلاثتهن، انطت ظهرها امي رسمية لصابرين وذيج سوت نفس الشي ورهف عافتهن وراحت توكف يم باب غرفة العمليات وتجر حسرات..

نص ساعة مرت وماكو خبر من غرفة العمليات، رجع علي التـقي وجهه اصففر كركم وعرگان كلش الخوف مبين عليه وواكف ويدعي وينخى الامام علي..

-رسمية: يمة انخى الحسين الشهيد وحلفه بالطفل الرضيع كون مريتك ووليدك يطلعون بالسلامة ثنينهم

هز راسه اي وظل يتمتم شي بينه وبين نفسه، نزلت عيوني على اصابعي اكمل تسبيح بيهن ونويت ما احجي كلمة الا اشوف الدكتورة تطلع من هالباب وتبشرنا..

نص ساعة جديدة مرت وما طلع احد، بدينا نيأس ونتعب والولد كلهم اللتموا يسوون نادي علياً مظهر العجائب سوه.. كل واحد لزم موبايله يحسب بي مية مرة يگولها وامي رسمية ورهف ثنينهن نذرن اذا كامت سبأ وطفلها (ولد او بت) لان ما نعرف جنسه شنو بالسلامة يتبرعن بالاربعينية بأسم الطفل الرضيع..

-علي الدر: هاي شني ياهو جابچن؟

گمت بسرعة من شفت تَـمني وعبق وابرار جايات يركضن بأتجاهنا ووراهن يمشي ابوي، كاض عكازته وكوة يمشي عليها ووجهه اصفر مخطوف..

-علي البدر: بوية شجابك انتَ للمستشفى

-شيخ علي: وين تقي.. وينك بوية تقي

-علي التـقي: ها بوية هنا

-شيخ علي: عمت عيني شصار بمريتك بوية

حضنه ابوي يصبره ويسولف وياه ويضرب على ظهر علي التـقي بحركة تقوي، متت بچي مادري المنظر مؤثر مادري انا صايرة كلش حساسة..

-رسمية: سودة بوجهي شجابك من النجف لهنا ابو علي

-شيخ علي: شلون ما تبلغوني رسمية!! انا مو اتصل بيكم يا ولد ليش محد يشيل؟؟

-ابرار: اعذرهم عمي همه هم خايفين عليك

هستوه علي الحـق جاي يفتح حلگه يسولف وسكت مهبوط من طلعت الطبيبة من غرفة العمليات واجت بأتجاهنا..

-علي التـقي: بشري دكتورة شلونها سبأ؟؟؟

-الدكتورة: الف مبروك ابني الحمدلله سبأ بخير وجابتلك احلى ولد

-علي التـقي: جابت؟؟؟ عليج العباس صدگ جابت وهي زينة؟؟

-الدكتورة: زين وضعها بعدها ما فك منها البنج والطفل راح ننقله للخدج

-رسمية: دخيلك يا علي اللهم صل على محمد وال محمد

ضج الممر بالفرح وكلنا باركنا لاخوي الدموعه ما وكفت، سودة عليَّ ما مصدگ سبأ زينة وجابت وحتى احنه متفاجئين بس ماكو شي بعيد على الله، سلم علينا واحد واحد وباقي وجهه مذهول يضحك ويمسح بدموعه بنفس الوقت،راح لامي وابوي حضنهم ثنينهم ويبوس براسهم ويتشكر منهم ماعرف على شنو بس ظل هوااي يتشكر منهم..

-شيخ علي: تستاهل وليدي العاقل تستاهل

-علي الحـق: مبروك ابو تقوى مبروك يا بعد روحي

تحاضن ويه علي الحـق وباقي اخوتي واندار للطبيبة يسأل عن وضع سبأ كل ساعة تعيدله نفس الحجي بس خطية ما جاي يستوعب المسكين، ضحكت الدكتورة وعادت للمرة الاخيرة..

-زينة سبأ زينة بس هم لازم تتحول للاشعة علمود ضلوعها يتأكدون منها

-ابرار: الحمدلله والشكر دكتورة الله ينطيج العافية ان شاء الله

-حبيبة: بس دكتورة سبأ بالسونار گالولها حامل بالشهر السادس؟ هالشي ما يأثر على حياة الطفل؟

-الدكتورة: لا الطفل مبين من حجمه وليد شهر السابع بس هم ما متأكدين راح ياخذوه للخدج ويفحصوه فحص شامل

-علي التـقي: يعني هم اكو خطورة؟؟

-الدكتورة: ان شاء الله بالعناية وبالخدج كلشي يكون بخير لا تخافون الطفل خديج لكن بصحة جيدة حالياً بس يحتاج فترة حتى يكتمل نموه بشكل يخلي يكمل حياته طبيعي

-علي التـقي: الله يبشرج بالخير بجاه الحسين

ارتاحينا شوي وجرينا نفس بس هم بقينا قلقين نريد نشوف سبأ ونتطمن عليها والحمدلله ما تأخروا عشر دقايق وطلعوها من غرفة العمليات يسحبوها بسدية.. سودة عليَّ مبينة البت تعبانة كلش تون وتهذي اثر البنج بعده بيها..

-سبأ: تقي.. تقي.. و.. وينه.. تقي

مشى وياهة تقي بالسدية كاض ايدها بين ايده ويسولف وياهة بس ما تسمع او يجوز بسبب عقلها بعده متخدر..

-علي التـقي: هنا انا سبأ تسمعيني

-سبأ: رهف.. تقي.. احبه

ضحكنا كلنا ومن ضمننا تقي وجهه صار احمر مستحي عبنها ظلت الطريق كله تعيدها "احبك تقي" و "اريدك تقي" "ليش تقي" "انتَ حلو تقي"..

-شيخ علي: ههههه خايب تقي شمسوي بالبت

غمزله ابوي يداهره واخوتي كلهم استملوه وهو بس يضحك ويمسح بوجهه المحمر من الخجل، دخلوها لغرفة ترتاح شوي وما رضوا احد يدخل وياهة بس امها واختها وعلي التقي فـ احنه بقينا بره..

-رسمية: چا وانا شني وگفتي هنا ما اطب اشوف چنتي؟؟

-شيخ علي: ما يصير بوية ما يرضون

-رسمية: روح حاچيهم هسة يرضون

-ابا الحسن: يمة حبيبتي ما يصير والله شوفي البت شلون تعبانة

-رسمية: لا كلشي ما بيها اسم الله صحتها احسن مني روح نور حاچي الممرضة خاطر اطب

-علي الكـرار: يا بوية تعبت نفسيتي

-رسمية: شني ولك؟؟

-علي الكـرار: سلامتج يمة جاي اكول ارتاحي هنا شوي ويطببوچ انا اروح احاچيهم

-رسمية: چا خلي صابرين هم تطلع

-علي الكـرار: تره صابربن امها!

-رسمية: وهسة تذكرتها؟؟

-شيخ علي: رسمية!!

حچاية وخزرة وحدة من ابوي سكتت امي ووكفت على جهة خانسة، ضمت وجهها عبق تسوي روحها جاي تكح بس اعرفها تضحك هاي من حملت لليوم صايرة سفيهة وعلى كلشي تضحك..

-تَـمني بهمس: سكتي ولج فشلتينا

-عبق: لا لا سكتت اسفة والله

هدأت نفسها گبل لا يشوفها احد بس اكييد علي الحـق شافها من بعيد وهي تتمضحك واجه يهرول يهف بأتجاهنا مخنزر..

-علي الحـق: شكوو شكوو شبيچنن

-عبق: مابينا شي

-علي الحـق: چا فاكة حلگچ تضحكين على شني؟؟ ثانياً شني هالمكياج جاية لحفلة انتِ؟؟

-عبق: لا بس..

-علي الحـق: بس شنوو وانتِ هم شني هذا مكياجچ ما تستحن انتن؟؟؟

-حبيبة: علي شسالفتك طلعنا من البيت نركض ما لحگنا كلشي نسوي وما مسحنا المكياج

ظل يهز براسه متحلف وطلع من جيبه كلينس وانطاهة لعبق خاطر تمسح حمرتها، مسحتها جوه انظاره وما لحگنا نهضم رزالة علي الحـق لان اجه علي الدر يركض علينا يبوووو عاد تفرغوا وانتبهوا على الوجوه شيخلصنا بعد..

تقدم على ابرار وجرها من ايدها ياخذها على جهة خاطر محد يسمعهم بس عبني واكفة قريبة كدرت اللقط عصبيته ونترته..

-علي الدر: ابرار!! انتِ شعندج هنا؟؟

-ابرار: شني چا هسة شفتني

-علي الدر: لا شفتج من اول بس ما كدرت احاچيچ كدامهم شعندج هنا وعايفة جهالج وحدهم؟؟

-ابرار: اي ظل بالي بالبيت محد بيكم يشيل موبايله عاد انا گلت لعمي وجابنا

-علي الدر: جايه وهاي الاصباغ بوجهج چن عرس عدنا! روحي غسلي وجهج بالحمام رووحي

-ابرار: ما يروح الا بمزيل مكياج

-علي الدر: تمسحينه لا امسحه بطريقتيي

-ابرار: علي الدر شبيك متخبل عليَّ!

-علي الدر: انا مخبل؟؟ بسيطة ابرار انا اعلمج بسيطة!

-ابرار: لازم شفتها اليوم بالحفلة واجيت تطلع حرگتك بيه!

-علي الدر: ياااهي هاي

-ابرار: معشوگتك خنساء!

-علي الدر: ابررارر

نتر اسمها يهمس وكضها من ايدها حيل، ضحكت ابرار ملچوم گلبها وگالت بنرفزة..

-بت عمك صمد عيونها ما طاحت من باب غرفتي! مادري متخيلتك تطلع منها مادري حسبالها نايم جوه

-اشش اششش سكتييي ابرار مو وكت شكچ

-چا لا تتقرب مني خووش واليوم ما ترجع للبيت!

-خو ماكو شي؟؟

-اي

نترتها بوجهه وعافته وراحت توكف بصف تَـمني، درت عيوني على علي الدر اشوف وجهه مغيم وضاييج كلش يجوز هو ما مفتهم ليش تريده يبات بره البيت اليوم بس انا اعرف.. خنساء راح تبات ببيتنا اليوم عبن بيت عمي صمد مسافرين لايران وهي جاية زيارة الهم، علساس وما لاگيتهم بالبيت وهنا خلت ابرار تحط علامة استفهام شكبرها عليها منو ما تعرف اهلها مسافرين وشلون ما متواصلة وياهم؟ وليش الا ببيتنا راح تبقى بينما يرجع زلمتها ياخذها؟..

ذبيت حسرة مهمومة شلون بينا وليش ما جاي نرتاح.. درت وجهي على الامير بلچن اشوفه بخير بس لكيت وجهه ما يگصه السيف مخنزر على الرايح والجاي اليوم من كعد الصبح لحد هاللحظة ما ينجرع من العصبية.. رجع نفس گبل هيج يتعارك ويه الهوا اليطخ وجهه وامي حذرتنا محد يتقرب منه خاطر ما يتعب زايد..

ركنت كلشي على صفحة من شفتهم يطلعون سبأ بالسدية من الغرفة راح ينقلوها للاشعة، دعيتلها بگلبي كون يارب بجاه الحسين النخيته يكون ما بيها شي وتكوم لخاطر وليدها ويتحسن وضعها وتستقر...

**

"ســـبأ"

حسيت من نومي على وجع مو طبيعي بظهري وبطني، وجع ينسور بگلبي خلاني اون بروح تلوع حتى النفس كوة ينجر عندي..

-اااخ يمة

-علي التـقي: سلامتج حبيبتي لا تتحركين سبأ

-سبأ: ااخ.. وجع.. وجع

-صابرين: يمة سبأ لا تتحركين زايد عندج ضلع مكسور وضلعين بيهن رض

-سبأ: ا.. ابني.. ابنـ..

-رهف: لا تخافين يرويحتي ابنچ بخير وعافية

فكيت عيوني ثكيلة وراسي دايخ كللش، جاي اشوفن تقي واكف يم راسي ورهف كاعدة على السرير حدي وامي من الجهة الثانية كاضة ايدي.. عفت الكل ونزلت نظراتي على بطني وتنهدت مرتاحة من شفت بعدني حامل..

-سبأ: طحت.. انا

-علي التـقي: اي بوية ارتاحي هسة وضعج ما يسمح تجهدين روحج

-سبأ: احلفك بداعة امك.. الطفل مابي شي؟

-رهف: لا ولج مابي شي جبتي وليد چنه فارة هاگدوته

-سبأ: شنووو

-علي التـقي: الحمدلله سبأ جبتي بالسلامة

-سبأ: لـ.. لا.. چا وبطني

احسني بحلم والحجاية ما جاي تطلع من حلكي متت تعب، كضني تقي من ايدي على كيفه ونصى يحاچيني..

-سبأ انتِ طحتي من الدرج وجارة الطفل انكسرت الطبيبة انجبرت تجيبچ وهاي بطنج كالت طبيعي تبقى منفوخة شوي

-صابرين: ليش يمة انتِ من چنتي حامل منيلج بطن مادري وين ضامة الفرخ چنتي

-رهف: هههههه عبنها رشيقة

-صابرين: والله انا ما صدكت بيها حامل كلت هاي جاي تضحك علينا البطن مسفوطة على الظهر

-علي التـقي: امي هيج جانت حبلها ما يبين بس بالتوم كالت شوي تبرز بطنها

اسمعهم بس ماكدر اشارك عقلي كله ويه الطفل شلون جبت وانا بشهر السادس گلبي راح يوكف من الخوف انوب ضلوعي تون عليَّ وحوضي يوجعني وتفكيري كله بالجاهل اريد اشوفه اريد بس اتطمن..

شكد حاولت ما انام خاطر ابقى صاحية بس ما كدرت اقاوم غفيت وفزيت مرة اللخ على الغرفة فارغة امي ورهف ماكو يمي وبس علي التـقي كاعد على السرير بصفي وساند جسمه على عكسه حاطه ع الميز الي بالجانب..

-تقي

-ها ها حبيبتي كعدتي

عدل گعدته وكام من السرير، راح للكرسي جره وحطه گبالي وكعد عليه..

-سبأ: شنو صار

-سولفتلج من شوي طحتي من الدرج و...

عادلي الصار من البداية للنهاية قسم منه اتذكره وقسم لا بس الحمدلله جاي استوعب والوجع هواي خف عليَّ..

-سبأ اريد اعرف بس شغلة وحاولي تتذكرين انتِ طحتي من وحدچ لو واحد دفعچ؟

-لا.. لا مو من كيفي حسيت بوحدة دفعتني جانت قوية كلش

-تكدرين تسولفيلي الصار بالتفصيل؟

-اي اكدر

-اول ما تتعبين سكتي ماشي؟

-اي.. صعدت فوك خاطر اغير نفنوفي بسرعة ما طولت ورجعت طلعت من الغرفة وبطلعتي شفت خيال خطف من يم غرفة تَـمني القديمة

-لا يا علي!

-والله.. شفت بس ما اهتميت وكملت طريقي للدرج اريد انزل وفجأة حسيت بأيد قوية چن ايد رجال بس لابس عباه جرتني من شعري وبرمشة عين حسيت بيها كضتني ودفعتني على المحجر وطحت من فوك الدرج

-ما شفتي وجهه؟؟

-لا بس ما اظنه زلمة تقي جان لابس عباه

سكت يهز براسه متحلف وظل على هالوضع فترة، ما طلع من شروده الا من سألته..

-جبت ولد

تغيرت كل ملامحه من جبت طاري الطفل وابتسم يهز راسه بـ اي، قرب كرسيه عليَّ اكثر وكض ايدي بين ايده وكال بصوت ناصي..

-اي اجانه وليد على كولة رهف چنه فارة

-چا شبي ما يبين بالسونار

-ههههه شلع گلوبنا كلما نروح كاعد على مقعده وكح من هسة

-فديته

-افديكم ثنينكم

-وينه ابني اريد اشوفه

-بالخدج حبيبتي، فحصوه فحص شامل والحمدلله وضعه زين وما ينخاف عليه سبع طالع على ابوه

-اريد اشوفه تقي

-بس يتحسن وضعج اخذج تشوفينه وعد

-تقي خاف ابني بي شي

-لا لا والله

-عليك الله

-لا والله حتى عايني هاي صورته

گام من الكرسي واجه يكعد بصفي ضبط، حضني نص حضنه لجسمه ومدلي موبايله يراويني صورته، مصوره من وره الجام حاطين ابني بحاضنة وفوگاه شمعة..

-يمة وليدي

-هههههه عايني شگدوته

-يمة يا بعد امه

-چنه جريدي

-لا تقي

-ههههههه اتشاقه شبيچ

-لا تحجي عليه ما ارضى

-من هسة فضلتي عليَّ ولج سبأ

-انتَ الاصل حبيبي

-يا بعد روحي، عايني هذا فيديو

-يمة عاين ايده

-ولج صغير كللش صغير خاف يجينا ناعم ويتنمرون عليه من يكبر

-ناعم، خشن المهم بصحة وعافية

-اي والله الحمدلله

-عاين عليه اجه اسمر مو اجنبي

-ههههههه حلو بكل حالاته

-مثلك

-اليوم فضحتينا فضيحة بالبنج

-شسويت؟

-احبك تقي اموت عليك تقي شبيك تقي تعال تقي كضني تقي...

-صخااام

-والعباس

-كدام منو احجي؟؟

-امة محمد كلها

-لا لاا اااخ يمة ضلوعي

-هههههههه شبيچ نفخت روحي على اخوتي گتلهم ياهو مرته تحبه وتهذي بأسمه وهي متوجعة هيج

-اوووف علي التـقي والله فشلة

-ليش فشلة يعني عيب تكولين كدام الكل انتِ تحبيني؟

-لا

-چا شكو بعد شو بله سمعيني فد جرعة احبك

-ههههههه

-يلا يلا اذاني تحكني تريد تسمع

-هههه احبك تقي.. احبك يا عوض ربي

ضحك وياي وباس راسي وهمسلي "احبچ ام حسين" ابتسمت ووخرت من بين ايده ورفعت عيوني عليه..

-علي التـقي: سميت وليدنا حسين.. اذا حابه طبعاً

-ماكو احلى من اسم حسين

-طلبته من الامام الحسين عليه السلام ودعيت الله بجاهه وجاه طفل الرضيع تگومون بالسلامة ثنينكم

-فدوة لاسمه.. يعني صار عدنا حسين يا ابو حسين

-بعد ماكو ابو فلان هههههه

-همزين خلصنا

-هاا! بس لا ما عاجبج فلان؟ تره الولد الثاني نسمي فلان لا عبالج

-تقي وين اكو واحد يسمي فلان

-انا

-اااخ لا.. اسكت

-متوجعة يروحي

-اي كلش

-هاي راح تأثير ابرة المخدر خليني اصيح الممرضة

-صيحلي رهف بدربك

-صار...

**

"تَـمني"

واگفة على اعصابي الوب اريد بس انفرد ويه علي الحـق او أي واحد من الولد وحدنا واسولفله الشفته والتوقعته قبل لا اطلع من بيتهم، اووف لو جان اميري القديم موجود چان اول واحد ركضتله بس للاسف..

رغم وضعنا الصعب بس انتبهت لشي غريب، انتبهت ولاول مرة امير هواي ديباوعلي! صح عصبي ويباوع للكل من طرف عينه بس دا احس بي هوايه يلتفت عليَّ ويباوعلي من جوه الجوه..

-تَـمني: عبق

-عبق: همم

-ادري مو وكتها بس هم حسيتي على الامير يبـ..

-يباوعلج؟ اي حسيت

-صدگ؟

-اي دا اگلچ اني كلما دتلتقون يبقى يباوعلج من بعيد لبعيد نفس ما صار بتخرج حبيبة

-برأيج ليش

-يجوز معجب

-اهووو دگعدي عبق مو وكت تحشيش

-والله شبيچ مو تحشيش صدگ احسه معجب

-يااا

-والله يعني هو يعرفج تحبي وتردي اكيد راح يبقى يفكر بيج ويتأملج من بعيد لبعيد.. تلگي يباوعلج ويكول بگلبه اويليييي هاي الحتيت عاشگتني

-استغفر الله سكتي ديباوعون

-علي الحـق ديباوع وراح يبلعني ادري عوفي

-شبي شايش عليج

-لان اليوم مسحت البيت والدرج

-مال بيتج؟

-اي

-واذا

-حسرة بگلبي امسح! لان هاي مرة مسحت وگلت بطني كامت توجعني خلاها عليَّ طمغة يكول السبب من المسح وحلفني ما امسح بعد واليوم امي فلتتها كدامه وكلتله عبق مسحت غير حرگ البيت فوك راسي

-خطية يخاف عليج

-تَـمني اني متعودة على كراب يم سلوى جنت من الصبح لليل امسح واكنس قزرقط ما صار بيه

-بس هسة الوضع مختلف انتِ تزوجتي وهسة حامل من حقه يخاف عليج وينتبه

هزت راسها اي وكملت تمسح مكياج عيونها، درت بس عيوني على الامير مرة ثانية وجفلت من شفته هم يباوعلي بس بسرعة وخر عيونه من صرنا عين بعين..

-تَـمني: عزا قلقني هذا

-عبق: لا تخلين ببالج توتة

-تَـمني: مادري احس بشعور غريب من نصير عين بعين

-شعور شنو يعني

-احسه يعرفني

-لا مستحيل

-ادري مستحيل بس.. بس نظراته ما تغيرت عبق نفس العيون مادري اني بائسة لدرجة كمت اتخيل

-كلشي وارد حبي انتِ بس هونيها على نفسج

-رايحة اغسل اريد ارتب شالي

-اي شعرج كله طالع

عفتها ورحت للحمامات، رتبت نفسي وشالي وخففت من مكياجي كلش طوخ ما منتبهة عليه، كملت وطلعت من الحمام وتبسمرت بمكاني من شفت الامير هم ديطلع من حمامات الرجال ودينشف ايده بكلينس..

-تَـمني: امير

اللتفت عليَّ مستغرب وفوراً ذبيت نفس متنهدة من انتبهت هذا ابا الحسن..

-عبالي امير

-ابا الحسن: لا انا حسن

-واضح

ابتسم يهز براسه واشرلي حتى نروح سوه، يربي عبالك امير بالضبط وانوب اليوم صدفت ثنينهم لابسين دشاديش زبدة..

-تَـمني: ابو امير اريد احجي وياك بشي اذا عندك وقت

-ابا الحسن علي: تفضلي خيتي

-وگعة سبأ من الدرج تتوقعها فعل فاعل لو هي وكعت من وحدها

-فعل فاعل اكيد

-ليش؟

-عبن حديد محجر الدرج مال بيتنا عالي وشبه مستحيل تطيح من فوگاه بدون لا احد يدفعها

-اممم

-ان شاء الله نعرف الموضوع كامل من سبأ

-واذا گتلك اني شاكة بوحدة

-ياهي؟

-شوف ابا الحسن اول ما شفت سبأ واكعة بنص الصالة وبهالطريقه حسيت الموضوع فعل فاعل فـ من اجوا الاسعاف لحد ما طلعوا اني عيني على الطابق الثاني منتظرة احد ينزل بس كلت يجوز نزلوا من الدرج المتصل بدرج غرفتي القديمة وما راح نعرف منو الجان ويه سبأ فوك

-مستحيل كلنا چنه واكفين بالساحة اذا نزلت مناك راح نشوفها

-صحيح اني هم هيجي كلت بعدين فـ بقيت اراقب هواي بس للاسف عمة غزوة صاحتلي وظلت تلح عليَّ حتى اروحلها فـ اضطريت اعوف الدرج فارغ بس هم ما كعدت وسكتت

-شسويتي؟

-جبت لعمة غزوة غيار من غرفة خالة رسمية لان وكع على صايتها عصير وتلوخت ورجعت بسرعة للاستقبال وين ما النسوان البقن كاعدات، چانن تسع نسوان اكو منهن شايفتهن واعرفهن صديقات خالة رسمية واكو منهن وجوه جديدة..

كعدت وياهن اجاملهن بالكذب عن الفشلة بس عيني ظلت على وحدة بيهن جانت ضخمة، كللش ضخمة وطويلة جسمها ذكرني بجسم فراقد فـ لا ارادي ظلت عيني عليها واراقبها الى ان كامن النسوان يردن يطلعن وكلهن لزمن عمة غزوة وعمة ابتسام يبوسنها ويسولفن وياهة على الصار بـ سبأ الا هاي المرة..

بس بوستهن كلمة ما حجت ورأساً غشت وجهها بعبايتها وطلعت من باب الاستقبال، گلبي لعب منها ولحگتها للباب شفتها راحت مشي بس مستعجلة شلون عبالك اكو واحد يركض وراهة..

-ابا الحسن علي: ليش شكيتي بس بهاي الحرمة؟

-لان من شفتها وشفت هيكل جسمها الرجالي تذكرت شي قديم صار ويايه اول ما اجيت لبيتكم

صفن يفكر بكلامي وماعرف اذا افتهم قصدي لو لا، اول ما شفت المرة ماعرف ليش تذكرت المرة الهددتني اول ما اجيت لبيتهم صعدتلي من الدرج المتصل بغرفتي القديمة بنص الليل وهددتني بتالة وخالتي ما انسى كلامها من كالت شيخ علي وولده كلهم ما كدرولنا..

-تَـمني: ابا الحسن اني سويت شي بس مادري راح تقبلون لو لا

-شسويتي؟

-صورتها

-صورتي المرة؟؟؟

-لا صورت النسوان كلهن البقن وصدگني سويت هالشي علمود سبأ

-وين التصوير موجود بمويايلج؟

-اي هذا

طلعت تلفوني من الجنطة وطلعت التصوير، جازفت كللش من صورتهن بس تذكرت تصرف الامير من نصب كامرات بالصالة الفوك وشفت شلون فادنا بفضح سلوى، بلكي ذني هم يفيدنا التصوير ويعرفوهن..

-ابا الحسن علي: بس لا شافوچ تَـمني؟

-لا اكيد! ما بينت جنت دا اسوي روحي اكلب بالموبايل

-كفوو

-الامـير علي: على شني

اللتفتنا ثنينا على صوته يجي من ورانه وشايل بيده كلاص مي بلاستك ديشرب، وكف بصف ابا الحسن مباشرة وكال..

-صاير شي؟

-ابا الحسن: لا بس تَـمني سولفتلي على الصار بـ سبأ

-الامـير علي: يعني شني

-تَـمني: ولاشي سلامتك

عفته ورجعت يم البنات ماريد اطوخ بوگفتي وياه لان اصلاً شكله ما مرتاح وخاف هم يكسر خاطري، طلعت خالة رسمية من غرفة سبأ وكالت خلينا نرجع ما دام امها وعلي التقي يمها..

-رهف: انا هم اظل

-علي السور: لا رجعي للبيت ارتاحي وباجر اجيبچ

-رهف: بس ارجع للبيت ابوي ما يخليني اجي بعد خليني هنا مرتاحة انا

-رسمية: وهو ابوج ما افتهم ببنيته هذا حالها؟؟

-رهف: افتهم عمة

-رسمية: چا وينه ما شفنا طوله لا هو ولا ولده

سكتت رهف ما جاوبت ومن كدما مقهورة المسكينة رجعت لبيتهم ما بقت.. توزعنا بالسيارات ورجعونا للبيت كلتلهم اخذوني لبيت خالتي بس حبيبة چلبت بيه وكالت بس هالليلة ابقى يمهم وباجر ارجع..

-حبيبة: نامي بغرفتي صار زمان على سهراتنا

-تَـمني: اي والله كلش مشتاقة لهالبيت ولمتنا

-ليش ما ترجعين تَـمني؟ والله مكانچ فارغ وغرفتج لليوم الامير ما ينام بيها عايفها

-ليش مينام بيها؟

-يگول لامي هاي مو غرفتي القديمة انتم بكيفكم تلعبون وتغيرون على مرامكم

-هسة ميكيّف الغرفة حلوة ومرتبة

-سكتي خية بس يتحجج مخبل امي خبال ساعة شحلاته زين ويسولف وساعة يتعارك ويه ذبان وجهه

-شفته بالمستشفى يخزر بالرايح والجاي

-انا ما استغرب من حالته عبنه من گبل هيج عصبي وما ينجرع، اذكر امي تسولف من ماتوا ضرغام وليث يممة الامير دمرهم دمار هم مكتئب وهم عصبي

اخذتنا السوالف عليه وجان عندي فضول اسمع كل حرف عنه وحبيبة مقصرت، سولفت لحدما تعبت وغفت بمكانها خطية واني بقيت اتگلب بالفراش ماكدر انام لان لا مبدلة ملابسي ولا ماسحة مكياجي..

گمت من الفراش وكلت ابدل أي شي من ملابسي القديمة، رحت لغرفتي واول ما فتحت الباب وكفخني عطر الغرفة اختنگت.. طلعت بسرعة منها مقهورة ودمعتي بعيني صايرة اكره هالغرفة وما اطيق ادخللها وحدي حتى تبديل ما ابدل خليني هيج..

طبكت باب الغرفة ورجعت لغرفة حبيبة اخذت شال حطيته على راسي ونزلت جوه، تمشيت بين الصالة والمطبخ اروح وارجع ملل واحسني جوعانة بنفس الوقت..

رحت للثلاجة فتحتها وشفت بيها خيار وبلحظة سخيفة اجتني نوبة ضحك، اباوع للخيارات واضحك وسادة حلگي لا يطلع صوتي.. ولد شيخ علي روحهم بالخيار يموتون عليه على كولة علي الكـرار نكرز بي بدال الحب تالي الليل..

اخذتلي وحدة ورحت غسلتها وطلعت للحديقة اكلها، كعدت على الكرويتة الموجودة يم شباك المطبخ وكعدت اكل بالخيارة واباوع للنخل والاشجار وهنه يتحركن ويه الهوا العالي..

الليلة گمرية والسما مضواية بلاية نجوم، الهوا يلعب بين الاشجار ويطير الورگ المشكل بغصن الشجرة حيلة، الحديقة فارغة وبس اني كاعدة مينسمع شي غير صوت دگات گلبي الحزينة والليل رغم سكونه بس سمعته وهو يسولف ويايه ويطبطب على وجع روحي..

اخذت نفس عميق وغمضت عيوني ارتب افكاري وخطواتي القادمة، شنو راح اسوي بالايام الجاية وهل راح يجي يوم وارجع لهالبيت زوجة للامير علي لو نبقى على هالحال؟..

قطع حبل افكاري صوت خطوات تقربت من يمي، فتحت عيوني واللتفتت اشوف منو وتفاجأت من شفته الامير، شهگت بدون صوت ووخرت عيوني منه فوراً ورجعتهن اباوع على النخلة.. بلعت ريگي شادة على اعصابي متوترة من حسيت بي يهبط يكعد بمسافة نفر بعيد عني على الكرويتة..

-الامـير علي: ليش سهرانة؟

-انتَ ليش سهران

-حسبالي رفل اجت وطلعت اشوفها

-اسفين خيبنا امالك مو رفل اني تَـمني

-جاي اشوف

ابتسمت مستهزأة ورخيت چتافاتي المشدودة، بقيت كاعدة هنا اتأمل الهدوء والهوا متناسية وجود الامير بصفي وهو هم ما طلع صوت الا بعدما مرت فترة مو قليلة من هدوئنا..

-انتِ محجبة؟

درتله بس وجهي اضحك على سؤاله المفاجىء بس ما استغربته لاني اعرفه شنو واعرف اللتزامه وعرفته انتبه لشعري الطالع من الشال وصدري المفتوح ومكياجي، حبيت استفزه بجوابي فـ كلت بلا مبالاة..

-شتشوف انتَ

-ما اشوفن حجاب

-لعد؟

-مادري يعني انتِ سافرة؟

-لا

-چا محجبة؟

-نص ونص

-شني!

-اللبس حجاب كدام الزلم الغربة بس الاعرفهم ما اللبس كدامهم

-يعني شني

-يعني انتَ اعرفك فـ ممهتمة لحجابي

ويه حچايتي نزلت الشال ووكعته على چتافي اخلي شعري المفتوح يبين كله، دار عيونه مني بسرعة عود يستحرم..

-انتِ كلش عنودية

-مو اعند منك حبيبي

شفت خده يرتفع بأبتسامة خفيفة بس بسرعة خفاها وحمحم يعدل گعدته..

-قافلة عليَّ چنچ

-لا

-چا شتفسرين چلامچ

-حچي عادي لو الحچي عليه فلوس؟

-لا خالوو بلاش

-هذا هو لعد

ابتسم مرة ثانية ودار وجهه يباوع للاشجار، مزاجه متغير عن قبل شوية بالمستشفى جان مينجرع بس هسة هواايه اهدأ واعقل..

-انتِ تدرسين؟

-واضح تريد تتعرف؟

-لا هو سؤال عادي

-اممم

-ما جاوبتيني

-راح اتخرج خوية

-صدگ؟

-اي راح اروح للمرحلة الرابعة

-حلو، شني تدرسين

-احزر

-تحليلات

-لا

-طب اسنان

-لا

-صيدلة؟

-شبيك قافل على المجموعة الطبية

-شكلج يبين هيج

-لا اني فاهية مو مال طبية

ضحك خفيف وحسيته يدير جزء من جسه عليَّ يگابلني، ابتسمت على تصرفه ورجعت اديرله بس عيوني بينما جسمي ثابت نفس وضعه..

-شكد عمرج؟

-مو كتلك مبين تريد تتعرف

-لا بوية خلص لا تجاوبين

هزيت راسي ساكتة ودار صمت جديد بيناتنا، صمت لطيف خالي من المشوشات الفكرية والصوتية.. تثاوبت نعسانة بس ميهلي اعوفه واكوم فـ ظليت كاعدة مقاومة بلكي يتذكر شي او يحجي ويايه شي وما غلطت لان فعلاً فتح ويايه موضوع جديد..

-افتهمت جايتكم العطلة الصيفية شنو راح تسوين بيها؟

-مادري

-ما تسافرين؟

-يجوز ويه زوجي اسافر مادري

هز راسه اي ولا كأن هو زوجي ودا اقصده، اوقات استغرب من احجي وياه احسه يرجع ينساني وينسى هو شافني بفراشه اول ما گعد وهالشي لاحظته عليه اكثر من مرة صار لازم اروح للدكتور مالته واستفسر منه على هالشي..

مطيت ايدي تعبانة وتعمدت اتقرب منه شوية صارت المسافة التفصلنا صغيرة، شفته ينزل عيونه يباوع عليها وما انطيته مجال لان بسرعة رفعت رجلي وتربعت بمكاني صار ميفصلنا شي نهائياً..

-تَـمني: تدري يمكن عندي مخططات اي، راح اروح لبغداد وابقى هناك فترة

-شعجب

-احب اروح لبغداد نفسيتي ترتاح هناك

-چا شجابچ هنا

-انتَ جبتني

-انا؟

-لا لا شوف خلينا نحجي واقع مو انتَ جبتني بس صارت ظروف واجيت هنا

-ها، عندج مچان ببغداد لو تأجرين فندق؟

-عندي مكانات مو بس مكان

-ها زين

-املاك عمك نعمة كلهن بأسمي

-عمي نعمة؟

-اي اني ارملة عمك نعمة

-ارملة عمي؟؟!

-اي وانتَ حبيتني وتزوجتني

-تحجين صدگ لو ناصبة عليَّ؟؟

-يوووه هواي فايتتك احداث عشنا اكشن يابو اكشن اني وياك بس جانت الاجواء تجنن وكلها حماس

-مبين عليج نعستي لو ترحين تنامين احسن

-قصدك بديت اهلوس؟ هو صح اني احجي بنومي وانتَ جنت تسمع لكل اسراري وفضايحي بس لا هسة اني منايمة

بقى صافن بوجهي ميعرف شنو يكول، شكله شكد ما مستغرب يضحك عبالك كائن فضائي ديسولف وياه مو بنية.. ضحكت بصوت ومديت عكسي اسند جسمي على ظهر الكروتية صرت اقرب واقرب عليه، گلبت شعري كله على جهتي وكلت واني اخلل اصابعي يخصلات شعري الفوگ..

-تدري صايرة ابد ما اتحمل قراصة

-شني

-انتَ راح تگضيها ويايه شني وشني

-لا بس..

-اوف صداع

-سلامتج

-شكراً بيبي

-هههههه استغفر الله

-راح تتذكرني امير اوعدك راح يجي هاليوم وتتذكرني

-يا علي قافلة هالبت

-احمد ربك بنية مثلي قافلة عليك

حچيتها بنبرة اداهره بيها وغمزتله، ابتسم ودار وجهه عني بسرعة يريد يضم ابتسامته ويشرد بيها بدون لا يحسسني بس مثلما هو ميعرفني حالياً اني اعرفه واعرف اطباعه واعرف شنو يحب واعرف كلشي يخصه كل صغيرة وجبيرة..

-يلا بيباي

-راح ترحين؟؟

-اي

-ترجعين لبيتكم

-اممم اي اريد ارجع لبيت خالتي بس الوقت تأخر وماكدر اروح وحدي

-ها

-توصلني؟

-انا؟

-اي يلا يلا

كمت بسرعة كدامه وركضت على اطراف اصابعي الحافية لجهة باب المطبخ حتى اللبس حذائي، نصيت اللبس حذائي ورفعت عيوني عليه لكيته هم يباوعلي بس رجع شرد بعيونه وسوه نفسه يگح..

-تَـمني: جهزت اني

-الوكت متأخر لو ترحين باجر

-لا اريد اروح خطية خالة وتالة

-شكو عليهن هي الدنيا ليل

-امممم مبين تريدني ابقى

-انا؟؟ لا ابد شعليه بيج

-يعني مادري اكول يمكن يمكن يمكن يمكن....

صغرت عيونه بأبتسامة من ظليت اكرر كلمة "يمكن" واني اتقرب منه لحدما وكفت گباله مباشرة، نصيت جسمي امده عليه وخليت وجهي بوجهه ضبط وكملت كلامي بنبرة هامسة..

-يمكن ضايج وتريد واحد يكعد وياك يسولف

ما جاوبني واستمر يباوع لعيوني، ابتسمت لنظراته الفضولية ينظرلي بنظرة شخص ضايع بس ديحاول يلملم نفسه ويسيطر على عيونه..

-راح تاخذني شيخي لو لا

-انا مو شيخ احد

-چؤؤ

-لا تعاندين وياي

-يلا ما اعاند اخذني للبيت ابو البورگ

فز جاحظ عيونه وانرد بردة فعل قوية ليوره، ابتعدت منه فوراً وره حركته لان تصرفه عبالك انتل بكهرباء، قلقني شلون لزم گصته يعصر بيها بقوة وطلع صوت مال واحد متألم كلش..

-شبيك امير

-ولاشي.. ولاشي يلا اوصلج

-راسك يوجعك؟؟

-اي بس عادي تعودت

-مو لازم ترجعني خاف يصير عليك شي

-لا يلا

كام من الكرويتة وطلع يهرول من باب الحوش، خفت عليه بس ما لحيت زايد رجعت بسرعة لبيتهم اركض من تذكرت موبايلي والجنطة جوه صعدت لغرفة حبيبة جبتهن ونزلت اطلع لسيارته..

ركبت بكرسي الصدر وبعدني ما لحكت اطبك الباب وشخط السيارة يحركها، توترت من سرعته وكمشت باليدة خايفة يسوق عبالك عدنا سباق، يبست بدمي مرعوبة وحمدت ربي وشكرته لان بيت خالتي مو بعيد منا چان سوه بينا حادث..

-اوكف هنا وصلنا

سفط بباب بيت خالتي ضبط لزك السيارة لزك بالرصيف حتى التاير انحك، درت وجهي عليه وكلت بضحك متفاجئة..

-مو دراجة هاي يمعود

ضحك ومسح على شعره، عصر المنطقة البين عيونه وگز على اسنانه مبين راسه كللش ديوجعه لان حتى وجهه تغير لونه صار باهت..

-يمكن عندك مشكلة بضغطك انتبه على نفسك

-ان شاء الله

-يلا باي اميري

تجرأت ومديت جسمي عليه وبسته على خده بوسة سريعة ونزلت قبل لا اخلي يستوعب وينطي ردة فعل، هرولت لباب بيت خالتي افتحها واستوقفني صوته وهو يصيح من الجامة..

-تحبين كرة السلة؟؟

اللتفتت عليه بدون لا اجاوبه، نزل من السيارة مستعجل واردف..

-لاعبين كرة سلة سوه من گبل؟؟

-يجوز

نزل عيونه يباوع لايده المثبتها على باب السيارة وعكد حاجبه تايه، جملة بسيطة حچاهة بس ترست گلبي فراشات احس الفرحة ما واسعتني من تذكر هالشي البسيط..

-تَـمني: اي احب كرة السلة ولعبنا مرة سوه، سويتلي مفاجأة بيوم عيد ميلادي..

-صدگ؟

-انتبه على نفسك امير، اتمنالك حياة مرتاحة وسعيدة

-ليش چنچ جاي تودعيني

-مع السلامة

عفته واكف وفتحت باب الحوش بالمفتاح ودخلت، نزلت دموعي ويه تنهيدتي العالية ومسحت على گلبي كم مرة اريحه واطمنه.. اكو امل تَـمني اكو امل يرجع يتذكرچ امير خلي ثقتچ بالله عالية..

عشت ايامي الجاية بهدوء غير عن الايام المضت، كلما اكتئب او اضوج اذكر نفسي اكو امل ولازم ابقى انتظر ميخالف هي الدنيا اختبار غيري عايشة اتعس وهم متحملة وصابرة اني هم اكدر اصبر..

افتهمت من ليلة ابا الحسن مسولف لابوه واخوته عن المرة الي صورتها وراوه صور النسوان كلهن لامه وكلهن عرفتهن حتى الجنت شاكة بيها كالت هاي مرة حمى فراقد!

-ليلة: ماطولها تابعة لفراقد يعني هم مسمومة بس امانة الله ما نعرفها زين احنه

-تَـمني: يعني مو هي السوت هيج بـ سبأ؟

-ليلة: لا سمعي عمي يكول زلمتها شراني ولوگي لمسعود وعمي ابو صلاح مزلغ روحه عليهم

-تَـمني: ممرتاحتلها ليلة ابد ممرتاحة تذكرني بالمرة الهددتني والله

اخذتنا السوالف ونسيت خالتي وتالة دينتظروني حتى نطلع لبغداد، اجتني تالة معصبة وضايجة وتأشرلي بيدها على الساعة عود تأخرنا..

-تَـمني: تمام تمام جاية، يلا ليلة بعدين اسولف وياچ احنه طالعين لبغداد هسة

-ليلة: وداعة الله، عمتي تكول خليها تنتبه على نفسها والكل هنا يسلم عليج

-تَـمني: وصليلهم سلامي حبي

-ما ترديني اگول للامير تَـمني تحبك؟

-لا

-حبابة بداعتي خليني اگله

-لا ولج

-عاد خليني اگول لابا الحسن بداله بس لا تخليها بنفسي

-يااا ولج ليلة

-تَـمني حبابة

-هاي اول مرة اشوف وحدة هيج تدلل برجلها، باي باي

سديته منها اضحك وكمت لفيت شالي وطلعت ويه خالتي وتالة للسايق، الطريق كله اخذناه سوالف وتخطيط منعرف نقضي شهر رمضان ببغداد لو نرجع وهيج خلص الطريق بين السوالف والنوم..

بعد ساعات طويلة اخيراً وصلنا بغداد ويا هلا ببغداد وهوا بغداد، انطيت للسايق عنوان شقة نعمة المسجلها بأسمي صار فترة من طالع المستأجر منها وما قبلت اأجرها لغيرهم ردتها النا حتى من نجي منظل حايرات خصوصاً وخالتي متقبل تدوس بيتها القديم ولا تتقرب منه..

نزلنا ونزلت الجنط ويايه وصعدنا بالمصعد للشقة، استقرينا بيها وارتاحينا شوية لحد ثاني يوم طلعنا اشترينا لفات سفري تغدينا وراهة رحنا للدلال ينطيني فلوس اجار المحلات..

-حنين: مثلما وصيتج تَـمني ضمي فلوسج ونامي عليهن لا تفلفسيهن على سوالف تافهة

-تَـمني: حفظت الاسطوانة خالة حااضر

ودعت قسم من الفلوس بحسابي بالبنك وقسم ضميته يمي حتى نصرف منه بس مثل العادة خالة متقبل اشارك بأي شي كله هي تتسوگ وتدفع تكسيات وتشتريلنا نمنميات تالي الليل من تالة تجبرنا نسهر على فلم..

لزمت موبايلي اشوف كروب العائلة دازين صورة ابن علي التـقي "حسين" فرحت بشوفته فدوة لوجهه بعده عنوني كلش وبالخدج بس افتهمت سبأ وضعها هواي احسن وكالوا راح يخرجوها من المستشفى..

-تالة: تَـمني ذبي الموبايل وانتبهي على الفلم

-تَـمني: اي اي

-تالة: الله شكد احب حياتنا قبل ياريت لو ترجع

-تَـمني: اييع الله لا يعودها اتعس ايام حياتي جانت ويه نعمة وابوج

-حنين: المضروب بسام مرمرنا

سكتت تالة بدون لا تعلق واعرفها تتألم من نحجي على ابوها فـ ما اخلي خالتي تلح بسالفته، كملنا الفلم ورحنا ننام بس قبلها اتصلت بـ حبيبة والبنات وتطمنت على اخبارهم..

-تالة: بشري اكو شي جديد؟

-تَـمني: تكول حبيبة لا بس الشكوك كلها تدور حول مرة حمى فراقد

-تالة: ان شاء الله يكشفوها ونخلص من هالنماذج

-امين

نمت ليلتي بدون كوابيس هالمرة وكعدت مرتاحة وطاقتي حلوة وكلت لخالتي نطلع نتغده سوه عازمتهم على مطعم احس روحي خفيفة وسعيدة عكس العادة معقولة كل هالشعور لان ما حلمت البارحة حلم يخرب مزاجي؟

طلعنا سوه لمطعم صاير على نهر دجلة، الاجواء تجنن صح حارة بس حلوة وتونس، طلعت تلفوني اصور وصورت صور الي وعجبني انشرهم ستوري صار هواية مناشرة.. نشرت جزء من وجهي وخليت النهر ورايه يبين وكتبت عبارة حلوة عليها..

-تَـمني: شلونه الستوري مالتي تالة حلو؟

-يخببل

ابتسمت ورجعت فتحت الستوري اشوفه واتأمل صورتي، صار عندي فضول اشوف منو اول شخص شافه وتفاجأت من شفته الامير!

-تَـمني: الامير شاف الستوري!

-تالة: كذابة

ضحكت فرحانة ومديت الموبايل اراويها، لزكت على الستوري اروح وارجع اعيده وتالة ويايه متحمسة وخالتي تتفرج علينا وتبتسم..

-تالة: ولج هاي شاف الستوري مالتج وهيج فرحنا لعد لو يتذكرج شنسوي

-والله اطلع اهلهل بالشارع

-هههههههههه متسويها

-والقران اسويها والله

-حنين: ههههه تخبلت بنتي

-تَـمني: خالة والله ثم والله اذا الامير رجع تذكرني اهلهل بالشارع واتبرع للفقراء واسوي عزيمة اعزم بيها الدنيا كلهاا منو يخطر على بالج اعزمه وشرط اني اطبخ بيدي!

-تالة: لك هلااا

-تَـمني: وما اللح على موضوع الحمل بعد وارضى ابقى عايشة ببيت اهله وما ازاعله ولا اضوجه مني ابدد واصيرله زوجة وحبيبة وسند ومكان يرتاح بي ويذب همومه وكلشيي كلشيي اسوي والله بس خلي يرجعلي

محسيت على روحي واني ابجي من احجي الا من مدت ايدها تالة على خدودي ومسحتهم على كيفها مبتسمة..

-تالة: راح يتذكرج حبي، حرامات يضيع هيج حب من ايده راح يرجع يتذكر

-تَـمني: ان شاء الله يارب ان شاء الله

مسحت عيوني بالكلينسة لان الناس بدت تباوع علينا وغيرنا الموضوع، وصل الاكل وانسدت نفسي ماكدرت اكل الا كم لگمة وكمت من الطاولة، رحت اتمشى بعيد عن خالتي وتالة ووكفت اتأمل النهر وبيدي الببسي اشرب بي وافكر وابني بأحلام وردية شنو راح اسوي اذا يتذكرني وشنو راح اقدمله من حب وعشق وحنان ودفو و...

-ماكو هيج صدفة تره!

صوت مألوف قطع حبل افكاري وخلاني اللتفت بجسمي اتأكد منو وياريتني ما اللتفتت لان شفت اتعس انسان من بعد بسام وصلاح اعرفه بحياتي!

-تَـمني: محسن

-محسن: شلونچ تَـمني والله ممصدگ انتِ كدامي شوكت اجيتي لبغداد؟؟

-صار كم يوم

-كم يوم هنا وما فكرتي تنطيني خبر

-ليش انطيك خبر

-يعني نقدم مساعدة شي خصوصاً وانتِ محتاجتها هالفترة

-نعم؟!

-شلونه هذاك الجنوبي بعده ناسيچ؟

-وانتَ شمعرفك بهالشي؟؟

-ما يخفى علينا شي تَـمني واريدج تعرفين انتِ مو وحدج واني وياچ أي شي تحتاجي لا تترددين وتجيني

-شكراً

انطيته جانبي الايمن بمعنى تكدر تروح بس ما راح وظل واكف يمي واحس بعيونه عليَّ لطشن، اوووف شكد اكره هالانسان من قبل اضوج منه وما اطيق تصرفاته الله يساعد مرته عليه..

-احب وجهچ

كزبر جسمي على صوت همسته حتى لوجهه ما باوعت وهرولت ارجع للطاولة، كعدت وياهن وخليتهن يستعجلن بالاكل وكمنا بسرعة..

-حنين: غير افتهم شبيچ وجهك اصفر

-تَـمني: شفت محسن المقرف

-تالة: عزاا شجابه هنا؟؟

-تَـمني: مادري امشن امشن..

**

"تـــالة"

رجعنا للشقة وتَـمني هذا حالها مخطوف لونها وبس تفكر، تعجبت شلون محسن يعرف اخبارها وظل الموضوع ببالي وهيج تزاحمت الافكار عندي وحرت بشنو افكر فـ قررت احط راسي وانام وهي تصفى بعدين..

ثاني يوم جان مابي شي جديد والايام البعدها نفس الشي، يجون بين فترة والثانية علي التـقي وعلي الحق يطمنون علينا ويسألون علينا من الباب ميقبلون يدخلون للشقة يكولون ميردون تجينا حچاية مو حلوة وماما تأيدهم تكول فعلاً كلام الناس ميرحم..

نفس الروتين دينعاد ونفس الفكرة مترسخة ببال امي قافلة تريدنا ننقل لبغداد للابد ودتشتغل على نقل دوامها بس ما گالت لـ تَـمني وحلفتني اني هم ما احجيلها حتى متعترض..

اني حفظت السر وما شاركت تَـمني لان متأملة الامير ترجعله ذاكرته وترجع لحياتها الطبيعية بس للاسف!! للاسف الشديد الايام دتمشي والرجال ماكو بغير عالم لا يمها ولا حواليها وهاي المسكينة من يوم شاف الستوري مالتها لليوم تخطط وتفكر شنو تسوي من يرجعون سوه..

ذبيت الريموت من ايدي على صوت باب الشقة يندگ وعطت من مكاني لامي وتَـمني اني راح افتح ماكو داعي يجن..

-تالة: منووو؟

-اني

استغربت من اجاني صوت بنية معقولة وحدة من بنات الامارة هنا؟ تحمست وما فكرت زايد وفتحت الباب بسرعة..

-السلام عليكم

-تالة: عليكم السلام

-شلونچ تالة شنو اخبارج

-تالة: بخير الله يسلمج حبيبتي بس ما عرفتج منو؟

-اكيد متذكريني اني زوجة محسن تَـمني تعرفني

-اهااا

-اكدر ادخل؟

-اكيد تفضلي بس عذرينا تَـمني دتسبح هسة وامي نايمة دقيقة اروح اكعدها

دخلتها للصالة وعفتها حتى اصيح لامي بس ما قبلت، لزمت ايدي بقوة وكالت بنبرة مستعجلة..

-ماريد تكعديها خليها مرتاحة

-لا فشلة منج خليني اروح

-لا تالة كعدي اريد احجي وياچ اني

عكدت حاجبي متسائلة وكعدت على القنفة المقابيلها بفضول، نزلت عيونها البنية تفرك بيدها مرتبكة وانتبهت لايدها مخرمشة هواي متشوهة تقريباً..

-تالة: تفضلي عيني

-اسفة اذا اجيت بوقت غلط ادري الدنيا رمضان وصيام مو مال زيارات بالنهار

-لا تفضلي عادي

-الموضوع ضروري وكلش دا احس بتأنيب الضمير

-ظل بالي!

-يمكن انتِ تعرفين زوجي محسن شلونه؟ ميخفى عنكم تعرفون اطباعه وتصرفاته وتعلقه المميت بـ تَـمني

-اي؟

-صارت مشكلة بيناتنا البارحة وكلت مستحيل اسكت بعد.. محسن مؤذي تالة وچان يسوي المستحيل حتى ينجمع وياهة والله لو اسولفلج شنو جان يسوي بيه وبجهاله متصدكين دمرنا دمار لدرجة اني بنفسي ردتها تنطي مجال وينجمعون سوه بس حتى اخلص من شره

-تره تَـمني متزوجة!

-اعرف اعرف بس هالحجي قبل لا تتزوج امير جانت بوكتها متزوجة نعمة ومحسن مستمر بمحاولاته واني بزعت روحي منه ومن تصرفاته واللعبان النفس الدا اعيشه وياه

-مدا افهم وين تردين توصلين؟

-جايتچ بالحجي.. محسن من افتهم بـ تَـمني تزوجت مرة ثانية تخبل عليَّ وعلى جهاله ضعف قبل لدرجة صار يتبعها خطوة بخطوة والله العظيم يا تالة لو اگلچ حتى بالجامعة يعرف شنو تاكل وشنو لون الجنطة الشايلتها تگولين دا ابالغ!

-عزا!!

-والله مخبل وخبلنا وياه مو طبيعي جان يتعامل ويه ناس يكرهون زوج تَـمني وگام يشوه بسمعتها يدفع فلوس وذولاك يشتغلوله على البطيء بدون لا احد يجيب طاري اسمه بشي

-وانتِ ليش هسة دتحجيلي؟؟

-لان تندمت شلون ما بلغتها بهالشي من قبل وجنت اريدها بس تتقرب منه حتى تخلصني، بس هسة من عرفت زوجها مريض متت قهر عليها وخفت لا محسن يستغل هالشي ويلعب بعقلها ويخليها تحبه

-انتِ مو ترديهم ينجمعون ليش هسة خايفة يتقربون من بعض؟

-لان احبه

-صدگ تحجبن؟؟

-ادري راح تكولين عليَّ مخبلة بس احبه.. من حسيت الموضوع راح يصير صدگ واكو امل ينجمعون خفت وكلت محسن بس يحصلها راح ينساني وينسى جهاله ونبقى بالضيم

-فهميني هو شسوالها بالضبط؟؟

-كتلج جان يتعامل ويه ناس يكرهون زوجها

-منو ذولة؟؟ تعرفيهم يعني؟

-لا والله بس الاعرفه اكو مرة جانت تتعامل وياه بكلشي

-بعده على تواصل وياهة؟؟

-لا وماعرف ليش انقطع تواصلهم صار شهور

-لان انسجنت حبيبتي

-صدگ!

-ماكو غير سلوى الجان يتواصل وياهة حبي لان ماكو غيرها الهجمت بيت تَـمني وبيت شكو وحدة مرتاحة

-والله بعد ماعرف بس اني متأكدة جان يتواصل ويه مرة لان اسلوبه بالكلام كأنه ديحجي ويه انثى وفد مرة سمعته يگللها شوهي سمعتها ببيت عيالها شكد متكدرين

-عزا العزااه!!

سولفتلي بعد على كم شغلة محسن جان يعلم بيها سلوى واني متأكدة سلوى الجان يتعامل وياهة لان لو نجي للواقع ماكو غيرها لو هي لو زهرة لو فراقد هجامات البيوت وثلاثتهن انقطع تواصلهن وياه بعدما انفضحن..

-مرة من المرات جان يحجي بالتلفون وياهة وطلب منها تلگف رمز تلفون تَـمني وتاخذ صورها الخاصة

-شيسوي بيهن؟؟؟

-مو اله گاللها تطبعهن وتذبهن بغرفة اخو الامير حتى تصير مشكلة بين الاخوان ويطردون تَـمني

-بس ما صار هيجي شي!

-ماعرف يجوز ما طبقوا الخطة

-او يجوز فشلت!

-معقولة؟

-طبعاً معقولة! تره الامير واخوته علاقتهم قوية لدرجة مستحييل واحد يشك بالثاني مستحييييل

ويه صوتي الي اعتلى اجت تَـمني للصالة، وجهها احمر ولافة منشفة على شعرها، تفاجأت من شافت زوجة محسن هنا وبدون لا تسلم كالت..

-شصاير؟؟

-خلي تالة تحجيلج حبيبتي تَـمني وفرصة سعيدة لان شفتج هسة اني راح اروح تأخرت

شالت جنطتها بسرعة وكامت تريد تطلع، فتحتلها الباب وقبل لا تخطي خطوة خارج الشقة كالت بنبرة مال وحدة تعبانة من المشاكل..

-اوقات الانسان يسوي شغلات متناسبه او يخوض معارك وهو ماعنده السلاح المناسب وهذا الديصير بيناتنا، دنخوض زواج صعب بس وضعي يختلف عن وضعج، على الاقل انتِ زوجچ مريض ونساچ اما اني زوجي يعرفني ويعرف كلشي يخصني وهاملني بس دائماً اذكر نفسي راح يجي يوم ويلين گلب محسن عليَّ وينصفني.. مثل ميكولون ما ضاقت الا لتفرج..

ابتسمت بآخر كلامها وعافتنا وطلعت خلتنا وحدة صافنة بوجه الثانية، طبكت باب الشقة وراهة ونويت اسولف لـ تَـمني كلشي بدون لا ازيد او انقص شي والفاهية گضتها عليَّ "يااا" و "عزاا" و"شلوون"..

-تالة: مادري شلون امشي نسوي الفطور ونكمل سوالفنا امي چنها ناوية متفطرنا اليوم

-تَـمني: امشي

دخلنا للمطبخ نكمل موضوعنا وتعاوننا على الفطور او خليني اكول بس تَـمني تطبخ لان اني افهى من الفهاوة وكلشي ماعرف اسوي بالمطبخ اعرف بس اكل..

تَـمني نوت متفتح هالموضوع ويه احد غير حبيبة حتى يصير ميصير هي تدافعلها وتشهدلها هي بريئة بس المفاجأة جانت من حبيبة طلعت تعرف! تعرف وكالت هالشي صار من زمان كللش لگوا صور تمني بغرفة تقي وعلي التقي حلفها متحجي لاحد حتى متصير مشكلة..

-تالة: شكد رجال!

-حبيبة: لگه الصور بكنتوره هو جان متأكد مو انتِ الحاطتهم تَـمني تطمني

-تَـمني: ما شَك بأحد؟

-شَك بوحدة من بنات عمي بالبداية بس ما حچى شي لاحد خاطر ما يكبر الموضوع ويتضخم

اخذتنا السوالف وياهة لحدما اذن ياله سدينا الموبايل، فطرنا سوه وسولفنا لامي الصار وهيج انطيناها سبب جديد تهم وتغم عليه وتحير شلون راح تحل هالمصيبة ونخلص من محسن..

-حنين: غير حظ عليها المگرودة منين ما تلتفت عوجة

همستها امي بصوت ناصي من كامت تَـمني حتى متسمع وتنقهر وصدگ والله هالبنية مكتوبلها الشلعان الگلب والتبهذل..

-تالة: ماما شنو راح تسوين ويه محسن؟

-حنين: ابلغ شيخ علي اخلي هو يتصرف

-تالة: هاا!!!

-والله

-صدگ عود؟ خاف هالشي يأثر على سمعة تَـمني

-لا بالعكس لو سكتت راح يأثر على سمعتها، اروح لشيخ علي افهمه السالفة من البداية للنهاية واخلي هو يحاچي شيخ العشيرة التابعلها محسن وياخذون منه عهد ميتقرب من تَـمني بعد

-علساس يعترف بعشيرة هو

-بعد مو مشكلتنا هاي ماما اذا تدخل شيخ العشيرة ينفضح بين الكل وانتِ تعرفي دكتور جامعي واله سمعته وهيبته بين الناس ما اتوقع يجازف بروحه هيج

-والله ماعرف بعد يجوز خوش فكرة ويجوز متنجح

-كايمة ادگ لشيخ علي بس لا تحسسين بت خالتج بشي الا اجيب الاوكي منه

-اوكي

كامت لغرفتها واني ظليت كاعدة واللوب منتظرتها شوكت تطلع وتبشرنا، رجعت تَـمني من المطبخ وكعدت بصفي تتصفن متدري شنو ديصير واني هم ما شاركتها لحدما رجعت امي وره نص ساعة وابتسامتها من الاذن للاذن..

-تَـمني: شبيچ خالة شو تضحكين

-حنين: ههههههه شنو حرام اضحك

-تَـمني: لا بالعكس بالعافية عليج

ضحكت امي اكثر وجرت تَـمني باستها بخدها وحضنتها، بادلتها تَـمني حضن وبعدها مثل الاطرش بالزفة ممفتهمة سبب فرحة امي..

-حنين: ايييي تَـمني

-تَـمني: يا ستار

-حنين: اتصلت بشيخ علي وبلغته على كلشي صار بخصوص محسن والگالته زوجة

-تَـمني: صدگ!!

-حنين: اي وكال الموضوع مينسكت عنه وهو راح يتصرف، راح يدز علي الحـق يتطقس على محسن ويسأل عنه ويبحوش وراه ويحلها بطريقة ودية بالبداية ويحذروه اذا تدنه علينا لو شفنا خياله بعد حوالينا الموضوع يتطور وتصير سالفة عشاير

-تَـمني: اويليي وهيج محسن راح يخاف من تحذير ويكوم يرجف

-تالة: تَـمني لا تصيرين غبية علي الحـق الراح يحذره! تتوقعين علي الحـق راح يكتفي يرفع اصبعه عليه ويگله صير حباب ولا توكح بعد؟؟

-تَـمني: هم صدگ

-حنين: يعني قصدج يضربه؟

-تالة: ويطيح حظ حظه وهيج محسن راح ينجر بوشه ويخاف او على الاقل يعقل لفترة من الوقت

-تَـمني: اووووف يوم منى محسن يختفي من حياتي يوم منننى

-تالة: يختفي والله اني حاسة هالخطة راح تنجح

-تَـمني: ان شاء الله يارب

-تالة: صدگ نسيت اكلج اجتچ اشعارات من صديقتج نرمين الظاهر تريد تزورج

انرسمت ابتسامة فرح على وجهها وكامت تركض تشوف موبايلها، اجتنا نرمين صديقتها ثاني يوم واليوم الوراه طلبت تطلع ويه تَـمني شوية يغيرن جو وره الفطور بالمنطقة وامي قبلت بشرط تَـمني متعوف تلفونها..

مشت ايامنا هادئة جدداً جداً لدرجة الملل، توقعنا بشهر رمضان راح تتغير حياتنا للاحسن بس ما صار هالشي بقينا على وضعنا، خلص الشهر وبده الشهر الوراه والوراه والوراه واحنه الثلاثة كاعدات وحدة تتصفن بوجه الثانية ولا جديد بحياتنا!

نفسيتي تعبت من الروتين ومن گدما كلبت بالانستا والفيس وماكو شي جديد حتى علي الكـرار مدا ينشر ستوريات ولا يفتح ستورياتي نهائياً بس مرة سواها وبعد تاب ولا فتحهن..

-تالة: خلينا نرجع ماما راح اطططگ

-تَـمني: ماريد ارجع

-تالة: ليش؟؟ ممشتاقة تشوفين امير والباقين؟

-تَـمني: خليهم يعيشون حياتهم مرتاحين من سلبيتي

-حنين: لا تحجين هيج على روحج تَـمني!

-تَـمني: بس هالحجي صحيح اني مدا أضيف لحياتهم غير الهم والغم! ابنهم وناسيني وفقدت الامل يرجع يتذكرني ديعيش حياته بالطول والعرض وحبيبة كالت على العيد سافر ويه اخوته وابو كربله ولا كأنه متزوج!

-تالة: وانتِ تبقين هيجي؟

-تَـمني: اي

-حنين: باعي ماما توتة بما ان طلعت منج فـ خليني اگلج على شي اني راح تخلص اجازتي و... وصارلي شهرين بدون راتب وحايرة شلون راح اصرف على البيت

-تَـمني: لا تهتمين خالة اني عندي فلوس

-حنين: ولج لاا مو هيج قصدي دا اگول ان الاجازة راح تخلص وگعدتنا هنا ما منها فايدة بدون دوام وانتن راح يبدي دوامچن هم فـ اني شنو دا اكول ليش منرجع نعيش هنا للابد؟

-تَـمني: بكيفج خالة

-تالة: شنووو؟؟

-تَـمني: اذا هالشي لراحتكم فـ اني اكيد وياكم ما افضل شي عليكم

-تالة: يعني تطلبين الطلاق من امير؟؟

-تَـمني: لااا تالة شنو اطلب الطلاق بس ابقى عايشة وياكم هنا بينما تحن علينا ذاكرته صار لازم صدگ اعيش حياتي واطبق توصيات خالة رسمية وحبيبة

-حنين: يعني شتسوين؟

-تَـمني: نرمين گلتلي خالها عنده مدرسة اهلية ويردون معلمة رياضة وكلتلي اروح اقدم على الوظيفة حتى لو ممتخرجة بعدني يجوز يقبلوني

-حنين: خوش فكرة! روحي ماما بلكي نفسيتج تتغير

-تَـمني: ان شاء الله كلت اشتغل حتى لو فترة قليلة اشوف الدوام يناسبني لو لا

-حنين: واني وياچ بنتي روحي وعيشي مثلما يعجبج والله كريم للجاي

هزت راسها اي وفعلاً تَـمني من ثاني يوم راحت قدمت على المدرسة وقبلوها، اتفقت وياهم وكلتلهم هي طالبة ولازم توافق بين دوامها هنا وبالجامعة وجانو كلش متعاونين وقبلوا يرتبون دوامها الها خصوصاً من سوولها اختبار وشافوا كفائتها ومعلوماتها عن الرياضة وشغفها وحبها بيها..

ومن هاليوم بدت نقلة جديدة بحياتنا نقلة ريحت امي هوااي، نقلنا جامعاتنا هنا وعلي التقي ساعدنا بهالشي خطية يروح ويجي علينا ويركض بمعاملاتنا ويساعدنا بالزايدة والناقصة واوقات يبقون هو وتَـمني يسولفون بالباب ويراويها صور ابنه الطاير بي شلون كبران شوية وصايرة بي لحمة على گولته..

-تَـمني: الله يحفظه الك تقي كللش يشبهلك

-علي التـقي: هههههه هاي كلها تكول هيج حتى امي وسبأ يكولون نسخة مني

-تَـمني: والله صح اول مرة اشوف طفل لهدرجة يشبه ابوه عبالك انتَ بس عنوني

ضحك بسعادة وودعنا وطلع كال راح يجينا بعد اسبوعين يتطمن علينا ويجيبلنا احتياجاتنا بس امي ماقبلت وكلتله لا تتعذب الطريق بين مكان شقتنا وشقتهم الي ببغداد بعيد والازدحامات تبهذل..

يوم بعد يوم يمشي وبدينا نتأقلم ونستقر خصوصاً من انشغلنا بالمحاضرات والدوام وبهذلة الخطوط والروحة والردة.. بيت شيخ علي هم سمعت اخبارهم مستقرين وديحضرون لولادة عبق الي ما بقالها شي ومخبوصين وياهة..

الكل دتمشي حياته عدل وبدون مشاكل او عرقلات الا تَـمني! لليوم هي متنام الا تگلب بصورهم وتنزل دموعها.. لليوم مدا تتخطى ان هي لازم تكمل حياتها بدونه وتعيش حياتها حالها حال كل البنات، لليوم حلقتها متنزعها من اصبعها ولليوم هي متعلقة بأمل اشبه بالوهم حتى من جبرتها امي تهتم لنفسها ولتخرجها وشعجتها تدخل دورة سياقة وتشتريلها سيارة حتى تكدر تروح وتجي بيها للدوام تَـمني جانت قافلة التغيرر وما حابته..

حتى وهسة احنه كاعدات بسيارتها الجديدة وبطريقنا للدوام دتاخذنا هي بالها بعيد وتفكر بمستقبلها المو راضية تقتنع صار فارغ من امير واهله.. دورت عيوني اتأمل سيارتها الي ما كلفت نفسها وطلعت تشتريها بنفسها وصت الدلال الي يجيبلها اجارات المحلات يشتريها على معرفته لانه يفتهم بالسيارات وهو همات خوش رجال وامين..

-تالة: ها شنو شو مراح تنزلين؟

-تَـمني: رايحة للمدرسة اليوم

-ماعندج محاضرات؟

-عندي بس استأذنت من الاساتذة

-توتة لا تتماهلين حبابة

-ان شاء الله

-انتبهي على نفسج حبي

-انتِ هم

ودعتها ونزلت للجامعة ومارست يومي الطبيعي الخالي من الصديقات، بعدني مدا اللگه صديقة تناسبني وتناسب افكاري فـ اروح واجي للدوام وحدي وشوي مرتاحة بهالشي..

خلص الدوام ورجعت تَـمني حتى توصلني للبيت وهي طلعت مرة ثانية حتى تجيبلنا غدة من المطعم، امي هالكم يوم مريضة كلش حتى دوامها مدا تروحله فـ تَـمني متكفلة بينا بالايام التكون فارغة تطبخ وبالايام المشغولة ومتلحك تجيب من بره..

-حنين: تالة ساعدي بت خالتج لا تصيرين كلش

-دا اساعدها ماما والله حتى هسة رايحة اسوي زلاطة

-زلاطة؟ عمت عيينج

-ماما شسالفة دا اكلج ماحب المطبخ

عفتها ورحت اسوي الزلاطة المستهينة بيها وهي بالحقيفة تكسر الظهر وتتعب، كملت ورحت ارتب البيت بينما تجي بت خالتي العبوسة الصايرة الضحكة حسرة نشوفها على وجهها..

طبت وشايله بيدها الغده حطته على الكاونتر وراحت تنام متقبل تاكل اهووو يعني راح اكل وحدي اليوم شنو هالكآبة مو سويت زلاطة ليش محد يهتم لهالشي ويقدره؟

حطيت الغده وحدي وعلكت مسلسلة اتابع وللعصر جريتها من حلقة لحلقة لحدما كعدت تَـمني من النوم عيونها حمر مال وحدة باجية، اوووف الله يعلم شنو شافت ناشرين هسة..

-تالة: شصاير امير شبي؟

-مابي شي

-لعد ليش تبجين

-شفته ناشر ستوريات

-شناشر؟

-الشغل مالته مسوي ديكور بيت يجنن

-لعد ليش تبجين؟

-اشتاقيتله

-تَـمني انتِ كل يوم تشتاقيله شنو الجديد

-لا.. اليوم كللش اشتاقيتله واستفقدته

تحجي ومبرطمة ودموعها تنزل سودة عليَّ ماتحمل دموع هالبنية تمرد گلبي، تنهدت ماعرف شسوي وشنو بيدي وكعدت وياهة اواسيها واسولف وياهة اغيرلها جو واحجيلها عن المسلسلة بس حسيتها ممهتمة وعقلها شارد وياه..

-توتة وينه موبايلج؟

-هذا

-انطيني

انطتني موبايلها ورحت على الكوكل دورت على شي اريده بس ما لكيت مناسب فـ بطلت..

-شدتسوين تالة

-كومي وياي

-وين

-امشي عندي خطة

-وين نروح

-اوگفي لحظة صبريلي.. مااماا وينج ماامااا

جريت تَـمني من ايدها ورحت لامي لكيتها دتبدل تريد تطلع تتسوگ وواكفة تحسب فلوسها..

-تالة: ماما لبسي سترتچ السودة الرسمية

-حنين: ليش

-تالة: سويها يا حبيبتي

-تالة اني روحي طالعة اريد اطلع اتسوگ وارجع بسرعة

-حبابة حبابه

جبتلها السترة وخليتها تلبسها وركضت لغرفتي جبت اظافر لونهن ماروني ورجعت لـ تَـمني، رفعت ردن قميصها وتعاركت وياهة حتى تقبل اللزگلها الاظافر وبقت هي وامي صافنات ميعرفن شنو ببالي..

-تَـمني: غير افتهم شكو

-تالة: ماما عندج حلقة؟

-حنين: مالتي القديمة موجودة ليش

-تالة: جيبيها اريدها

-تَـمني: تالة!

-تالة: بس انطيني صبر

جبت حلقة امي ونزعت تَـمني حلقتها القديمة ولبستها هاي بدالها، جريتهن ثنينهن من ايدهن امشيهن للصالة ووگفتهن وره الحايط عليه ورق جدران حلو..

-تالة: توتة حطي ايدج اللابسة الحلقة بيد امي

-تَـمني: شنو؟؟

-حنين: تالة شعندج احجي وفضينا

-تالة: تسونها لا نتزاعل!

تأفأفن گالبات وجههن وخلت تَـمني ايدها بأيد امي، خليتهن يوكفن هيج ورحت جبت موبايل تَـمني واخذتلهن صورة وخليت الحلقة وايد تَـمني تبيّن اكثر من ايد امي..

-تالة: خلصنا يلا نزعن

-تَـمني: شعندج

-تالة: انخطبتي مبروك

-تَـمني: نعم؟؟

-حنين: ايا ملعونة

حركت بحواجبي بشيطنة وعدلت على الصورة الاخذتها صارت تخبل عبالك حقيقية، حطيت يوزر تَـمني مال الانستا على ايدها حتى يبين صدگ وكتبت عبارة "الحمدلله الذي بنعمته تتم الصالحات" وجواها حرفين وبنصهن قلب احمر.. "T ❤️ M"

-تَـمني: هاي شنو؟؟؟

-تالة: راح تنشريها ستوري هسة يلا

-تَـمني: شنو تخبلتي انتِ تالة!!

-تالة: نشريها وسكتي

-مستحييل!!

-انتِ مو تردين الامير يرجعلج؟؟ يلا نشريها

-بس...

-ماكو بس نشري وسكتي الخطة راح تنجح سويها تَـمني وجازفي

-بس كل اهله متابعيني شيكولون عني هسة؟؟

-زيلي متابعتهم كلهم بس عوفي حبيبة وامير حتى اذا صار ما صار تفهميها السالفة وتكمل الخطة وياچ

-مادري تالة اخاف اني

-حنين: سويها تَـمني

-حتى انتِ خالة!

-حنين: اي سويها ماما عسى ولعل تصير عنده ردة فعل

هزت راسها بـ لا متقبل تنشرها واني وامي ظلينا هواي نقنع بيها، نزلت دموعها وغطت وجهها تبجي محترك گلبها عبالك صدگ راح تتزوج ردت ارزلها بس امي خزرتني بمعنى "اطيح حطچ اذا حجيتي"..

-تَـمني: اخاف يشوفها وميسوي شي

-تالة: جازفي علاقتكم صار واجب بيها المجازفة

هزت راسها اخيراً موافقة ولزمت تلفونها بأيد ترجف، بلعت ريكها وغمضت عيونها وداست على النشر وهيج تَـمني صارت مخطوبة الكترونياً لرجال اسمه يبدي بحرف الميم..

كعدنا ننتظر ردة فعل من امير او حبيبة وجرت كعدتنا لليل وماكو شي من ثنينهم حبيبة شافت الستوري وامير هم شافه وكلشي ما صدر منهم، أيسنا تنجح هالخطة وتَـمني انهارت تخبلت وظلت تعيط عليَّ وترزل بيه هاي اول مرة بحياتي اشوفها هيج معصبة لدرجة شالت موبايلها وشمرته بالحايط فلشته..

-تالة: تَـمني شبيييج

-تَـمني: عوفوونيي لحد يتقرب يمي عوفينييي

طبت لغرفتها وطبكت الباب عليها وظلت حابسة روحها لحد ثاني يوم لا قبلت تداوم بالجامعة ولا تروح للمدرسة وظلت بفراشها تاكل بروحها وتفكر بالجاي..

-حنين: انتبهي على بت خالتج تلاوي اني رايحة للدوام

-تالة: تمام ماما

طلعت وقفلت الباب وراهة ورحت اسوي كابتشينو حتى اخذه واروح لـ تَـمني اراضيها واخفف عنها، علكت العين بالجداحة بس ما جدحت ظليت اعيدها هواي وماكو اهووو مو وكتها القنينة خلصانة بس همزين بنفس اللحظة سمعت موسيقى ابو الغاز يفتر يم منطقتنا..

ركضت لغرفة امي جبت فلوس وفتحت باب البلكونة بلكي اشوف أي واحد من الجيران واگله يوگف ابو الغاز حتى نشتري قنينة جديدة، ظليت انتظر اشوف بلكي احد يطلع حتى لو رجال من الشارع اصيحله مو مشكلة.. وبينما اني واكفة ادور بعيوني لقطت عيني سيارة مو غريبة عليَّ تدخل لفرعنا..

سيارة باجيرو لونها لؤلؤي تسفط يم باب بيتنا ويطلع منها رجال اعرفه وحفظت ملامحه وشامات وجهه وحتى تجعيدات عيونه التصغر من يضحك من گدما شفت صوره طول هالشهور.. شفت الامـير علي يطلع من سيارته بخطوات مستعجلة ويتوجه لعمارتنا.... ولجججج يممممةةة.....

يتبع 🫢.....

━━━━━━ ♛ ━━━━━━

متحمسةةة رغم المرض 🥲😂♥️♥️♥️

احبهم احبهم احبهم احبب ابطال الامارة كلهم 🥹🫰🏻♥️♥️♥️♥️♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

احبه هـــواي

بگد عمري المضى والجاي

بگد ما تعـــشگ الوردات طعم المــاي

بگد المــا وفــــوا ويــاي

بگد الكــون والـ بالكون

وبگد النجــم بسمــاي

احبه هواي... ♥️

━━━━━━ ♛ ━━━━━━

"حـــبيبة"

بيدي وصلة المسح ومكروبة من صباحيات الله، امي رسمية استلمتني جلف وتنظيف عبن راح يجوني خطابة، بزعت وانا اگلها راح ارفض وماريدن بس ما تهتم تكول فشلة لازم نستقبلهم حتى لو نرفضهم..

اشتغل واستذكر الصار گبل چم يوم ومبوزة، ضاايجة ضاايجة ما جاي اكدر اتخطى وانسى، شمرت الوصلة بالسنك غسلتها ورجعت امسح الدرج من جديد واعيد الصار براسي، خرب حظي شبيه ظليت صافنة بوجهه مثل المطي؟ شبيه ما رديت حاكم من شفته بالمستشفى!

گبل چم يوم رحنا علمود ابن علي التـقي صارت عنده كحة وابوه وامه تخبلوا كلش خافوه عليه وركض تقي بي للمستشفى وامي كالت اروح بدال سبأ عبنها بعدها تعبانة وتشكي من ضلوعها..

طلعنا والطريق كله الطفل بيدي كحة ما كح بس اهله يوهوسون ويخافون من كلشي ومو بس تقي هيج حتى اخوتي الباقين لدرجة صايرين احزاب كلمن يفزع لفرخه ويدافعله، حسرة بگلب اموري ابن ابا الحسن لو طخ حسوني ابن علي التـقي وحسرة مصطفى ومحمد لو تناگروا ويه فطومة بت علي الدر يبوووو يومية عدنا عركة وطلابة بالبيت..

-علي التـقي: سودة عليَّ وليدي وجهك اصفر عمت عين عدوك بابا

-حبيبة: تقي والله مابي شي شحلاته الطفل ما شاء الله

-لا لا شاحب عايني نقطة دم ماكو بوجهه

-والعباس مابي شي بعده ازرگ

-ولججج

ضحكت من گرصني من ايدي على كيفه ضايج، يربي والله احب اداهره هو وسبأ واصيح ابنهم "الازرگ" لانه اسمر بس والله يخبل فد مملوح وينحب ورموشه صلوات على محمد مغطيات عيونه بحيث ما تبيّن من كثافتهن..

-حبيبة: زروگي مريض انتَ يا روح عمتك

-علي التـقي: لا تصيحيله زروگي حبيبة يزعل

-حبيبة: مالك غرض بيني وبين زروگي

ضحك مأيس مني وظل يسوق، بقيت اللاعب حسوني الكلساع يغفى ويفز لحدما وصلنا للمستشفى..

-علي التـقي: راح ادگ لحاكم

-حبيبة: شنسوي بي يمعوووود

-سكتي اتفائل بهالدكتور انا

-تقي بداعة الله عوف الزلمة

-ماعوفنه انام على خوانيگه شني يصير ويانه اركضله صدگيني مبخوت هذا

ما اهتملي ودگ لـ حاكم وعاد ذاك شلون ما يحب يساعد اهلي يركض مراكض علمودنا وطبعاً هي صفة كلش حلوة بي صاحب غيرة بس هم فشلة من الزلمة يومية مزحمي..

-علي التـقي: كال راح يجي عبن صاحبه دكتور الاطفال

-تقي والله فشلة جاي نزحمه

-سكتي بوية سكتي هي الدنيا اخذ وعطا

سكتت ما علقت بعد وكعدت ويه حسوني على الكراسي، انتظرنا شوي علما اجه حاكم مستعجل واكل تقي اكل بسلامه الحار بس ابد ما دار وجهه الي ولا حتى سلم..

-حاكم: هاا طبيت للطبيب لو بعدك

-علي التـقي: لا منتظرك

-حاكم: لعد يلا ندخل

-علي التقي: لا دكتور خلينا ننتظر سراه احسن خطية الوادم الگبلنا صارلهم هواي منتظرين

-براحتك مثلما تريد

گعدوا سوه على الكراسي يسولفون وانا شايلة حسوني بيدي، نص ساعة واجه سره حسوني واخذه ابوه من ايدي وطبوا للطبيب هو وحاكم هسة حاكم شني ماخده وياه مدالية؟ مادري والله اخوتي سوالفهم تضحك..

ما طولوا خمس دقايق وطلعو ثنينهم وبيد تقي الطفل، اجه حطه بحضني وكال يروح للصيدلية يجيب العلاج بس گبلها وگف يتشكر من حاكم عبنه عاف شغله تزحم واجه..

-حاكم: ماكو أي زحمة بالعكس عنده العافية ان شاء الله

-علي التـقي: بعد روحي، اروح انا اجيب العلاج بعد والعصر نتلاگه بالكوفي امير شايش علينا اليوم

-حاكم: ههههههه يتدلل ابو ليث

تمشوا سوه يكملون حچيهم لحدما افترقوا كلمن راح من جهة، عاف حسين بيدي والطفل يلوع يبجي ويلبط بيدي تعبني، كمت افتر بيه واهزهزه وماكو ولا سكت شلع گلبي..

-حبيبة: يلا حبيبي يلا هسة يجي بابا هسة

-دگدگيله ظهره يمه خاف يريد يتريع

ابتسمت للمرة العجوز الكاعدة وسويت مثلما تكول، طلعت بي اتمشى بالممر بدون لا ابتعد هواي وحطيته على چتفي ادگدگله لفترة مو قليلة والحمدلله هدأ شوي بس ظل ينوص ويتماوع..

-هذا ممتون

اللتفتت فازة من ميزت صوته جاي وراي ما توقعت اللگاه بعده هنا لاا وانوب واكف يراقبني! عگدت حاجبي عليه وهزيت راسي مستفسرة..

-حبيبة: شني

-حاكم: احتمال ممتون لان بچيته مو طبيعية

-وانتَ شمعرفك؟

-مادري والله يجوز لاني دكتور؟

-ما شاء الله دكتور كلشي انتَ ماكو شي ما تفهم بي

-طبيعي

ضحكت مستهزأة وهو ابتسم چنه ما افتهم شني قصدي حسباله امدحه، بس صدگ بكلشي يفهم وبكلشي يسوي روحه هو ابو العريف وبديت اضوج من هالسالفة مادري يجوز لان انا بعدني مغثوثة عبنه خطبني وهو خاطب مادري متزوج شمدريني..

-حاكم: واضح ما مقتنعة؟

-حبيبة: شتسوي هنا دكتور؟ انا شفتك رحت

-رجعت اريد احاچي دكتور مصطفى على شغلة

-ها براحتك خوية

-ههههههههههههههه

-خير؟

-اني شكد شايف بنات وشكد متعامل ويه بنات وشكد دارس ويه بنات بس ماكو بنية جذبتني ولحگتها عيني مثلما جذبتيني انتِ يا حبيبة

بهتت مبحلگة عيوني مصدومة ماتوقعته راح يحچي هيج بس صدمني اكثر من اردف بصوت هادئ بطيء خالي من العصبية..

-حاكم: صراحة اني ماعرف ليش انرفضت للمرة الثانية خصوصاً وما انطيتونا عذر منطقي.. بس مو مشكلة نعمة الله تستاهل نتعبلها

درت وجهي عليه مخروعة شني السالفة شجاي يصير هنا! هذا شبي انفتح هالشكل لا فوكاهة يكول ماعرف ليش انرفضت وعينه گوية..

-حاكم: الطفل راح يوكع من ايدج

-يمة اسم الله

كضيته عدل وابتعدت چم خطوة من حاكم اهزهز حسوني خاطر يسكت، يا علي تدوهنت وانلصمت عقلي فرغ من الحجي ماكو شي براسي ولا لساني..

-حاكم: حبيبة

-حبيبة: اشش اشش حبيبي اسكت عمة اشش

-حاكم: ادري بيج دتسمعيني، حضري نفسج اسبوع الجاي داز امي وحور عليكم وفكري مرتين قبل لا ترفضيني لان ‏راح ارجع اخطب مرة رابعة

حچاهة كلها دفعة وحدة وعافني وراح يمشي بخطوات سريعة، اللتفتت عليه اريد اجاوبه بس سكتت من سمعت صوت تقي يجي من الجهة الثانية يسأل عن ابنه..

-علي التـقي: شبي حسين حبيبة ليش بعده يبجي؟

-هاا؟ شنو؟

-ليش يبجي حسوني

-اظنه ممتون تقي لو نرجعه للطبيب يشوفه

-ممتون؟؟ ليش؟

-مادري رجعه وتأكد

اخذه من ايدي وطب للدكتور بسرعة بدون لا ينتظر وصدگ كال الطفل ممتون بس مو شي يخوف لچن لازم يتگمط وينشال بحذر عبن عظامه صغيرة بعده، رجعنا للبيت وتقي نقل هالتوصيات لـ سبأ وهي اخذت الوليد تهتم بي..

-رسمية: شماله وجهج اصفر حبيبة

-حبيبة: مابيه شي، وينه حيدر؟

-رسمية: بغرفة علي النور

هزيت راسي وطلعتلهم اشوف شبي حويدر معاند ويه امه وابوه وما يرضى يسافر هالسفرة مهمة كلش مو مال عناد، دكيت باب غرفة نور وطبيت لكيت الثلاثي كاعدين يكرزون حب ويلعبون بلي..

-حبيبة: زوج المشاكل وحويدر شبيكم قافلين على رواحكم صار يومين لا تتغدون ولا تتعشون ويانه؟؟

-علي السور: بكيفنا

-علي النور: براحتنا

-حيدر: سدي الباب وراج من تطلعين

-حبيبة: ولكمممم

-علي السور: هاي عليمن ولكم ولج؟؟

-علي النور: لا لا مو قصدها اكعد

-حيدر: شو انا احس قصدها

-علي السور: اگوم؟

-علي النور: رهف وما موجودة اكعد ولا تصير زلمة براس اختك

-علي السور: هم صدگ

فريت ايدي وكعدت على جرباية نور اتفرج عليهم وهمه يلعبون وحيدر كاعد يكرز حب ويتصفن..

-حبيبة: حيدر يمته سفرتكم؟

-حيدر: مادري

-حبيبة: شلون ما تدري معقولة ما متحمس تروح وتخلص من هالكرسي؟

-حيدر: مو اكيد ارجع امشي ولا ما متحمس

-علي النور: على طاري الحماس ابو شادي الزبنطوطي عنده خوش حكمة اسمعها تفيدك.. يگول الطيب ابن الطيب ابو شادي الزلمة السلبي طگو بنعال اصفر

-حيدر: شني؟؟

-علي السور: اعذرني نور انا هم ما فهمت حكمة ابو شادي هالمرة

-علي النور: هاي عبنك خاطب

-علي السور: يجوز والله

-علي النور: تفسير الحكمة هو المتشائم والسلبي والمعنفص يطگوا بنعال اصفر خاطر تروح منه الكآبه عبن النعال الاصفر يجلب السعادة والسرور وهالشي مو خرافة لا عبالكم تمسلت ومدري شني

-حبيبة: شكراً نور

-علي النور: جسر للطيبين بصوت شيخ امير

تنهد حيدر ينزل ماعون الحب من ايده بدون لا يعلق وذب حسرة ضايج، حيدر وره شهر رمضان سافر ويه امه وعلي البدر وعلي النور علمود فحوصات والطبيب حددله موعد العملية الاخيرة والي تصادف اسبوع الجاي وهاي العملية هي الراح تخلي يرجع يمشي ونجاحها 70%..

-حبيبة: حيدر لا تضيع تعبك وتعب اهلك ما مليت من هذا الكرسي؟ ما يعجبك ترجع تمشي على رجليك وتداوم وتطلع وتطب حالك حال الشباب

-حيدر: يعجبني

-حبيبة: چا شبيك ليش قافل؟

-علي السور: حبيبة لا تعبين روحج ملينا من گدما حچينا وياه

-حبيبة: مو بكيفه راح يجاوبني شبيك ما ترضى تسافر؟

-حيدر: ماريد حبيبة سدي الموضوع

-حبيبة: تره والله ازعل عليك وبعد ما احجي وياك!

-حيدر: ماريد احجي مااريد

-علي النور: زعل حبيبة ثجيل حويدر

-حبيبة: حاچيني يجوز اكدر اساعدك

-حيدر: حبيبة محد يكدر يساعدني خليني هيج انا مرتاح

-علي النور: خاف عاشگ ومضروب بوري ولك؟؟

-حيدر: باع هذا البطران

-حبيبة: چا شنو السالفة!!

ظلينا نلح عليه هواي انشلع گلبنا وكلنا گابلناه الا نعرف شبي وليش معاند يسافر خصوصاً وامل يرجع يمشي مرة ثانية جبير بس محد جان متوقع او اصلاً خاطر بباله السبب هو..

-حيدر: مااااريد اسااافر بعدد بدون عمي اميييير!! ارتاحيتووو؟؟ عرفتووا ليش ماريدد اروح؟؟؟

-حبيبة: بس..

-حيدر: ما جاي اتحمل هالوضع!! ملييت وانا اشوف عمي ما يعرفني ومن احاول اتقرب منه يتهرب!! صاير حتى ما يحجي وياي ولا يسأل عني!!

-علي السور: حيدر مو بس انتَ جاي يتهزم منك حتى احنه، هاي واحنه اخوته الصغار وهو متأكد من وجودنا شهد ولادة امي وشافها بعينه من تنفست بس ما جاي يستوعب احنه كبرنا

-حيدر: سور انتم مو مثلي!! علاقتكم بعمي امير مو مثل علاقتي انا بي! امير ابووي مو بس عمي!! شنو عندي شنو محتاج شنو اريده واشتهي اوول واحد اروحله اله اطلب منه گبل لا اطلب من ابوي! وسفه هسة اروحله اريد احاچي ويتحجج بالشغل ويتهزم مني!

-علي النور: حيدر ماكو شي بيدنا امير هذا وضعه وهذا شيته وانتَ هم هذا وضعك وهذا شيتك لا تدمر حياتك ومستقبلك بس لان عمك ناسيك وما يتذكرك!

-حبيبة: اي والله صح! امير من ترجعله ذاكرته انتَ اول واحد راح يعتب عليه من يعرفك تماهلت بعلاجك وسفراتك! راح يزاعلك ومن صدگ يلومك على تهاونك

-حيدر: ماريد شي منه والله.. اريده بس يسافر وياي

حچاهة مختنگ ونزل راسه يعصر عيونه بين اصابعه چن واحد يكابر ما يريد تفضحه دموعه، انمرد گلبي على منظره ومتت قهر ماعرف شنو بيدي وشنو اكدر اسوي.. امير قافل صاير حتى انا ما يكعد وياي ومثلما كال حيدر يتهزم من عدنا..

-حيدر: بس اشوفه كدامي ماريد منه شي انا ارتاح وگلبي يبرد من اشوف عمي امير وياي

-حبيبة: واذا ما اجه؟؟ تضيع شبابك ورجليك؟؟

-حيدر: اي!

حچاهة بأصرار معاند وراكب راسه، سكتنا انا وزوج المشاكل ما نعرف شلون نقنع ابو راس اليابس، تعبت من هالعناد ذبيت حسرة محتارة وطلعت من الغرفة وبوجهي لامي رسمية سولفتلها كلشي خاطر هي تتصرف وتقنع امير يروح..

-رسمية: انا اسولف وياه مالج غرض انتِ روحي هسة كولي لامه تجهز جنطته خاطر يرحون ساعة گبل

-حبيبة: صار

رحت لابرار بشرتها وخطية طارت من الفرح ركضت تجهز اغراضهم وانا كلتلها تعوف بنيتها ما تاخذها وياهة خاطر ما تتبهذل انا اهتم بيها ما دام ماعندي شي لا دوام ولا تعيين مكابلة امي رسمية ونسوان اخوتي وكاعدة..

ثاني يوم امي رجعتلنا خبر الامير قبل يسافر وياهم واستغربت شلون قنعته وقبل بس تكول ما تعبني وبساع رضى يروح لان افتهمت ابو كربله راح يجي وياه..

سافروا الامير وابو كربله وعلي الكرار كلهم سوه ويه ابرار وحيدر خاطر عملية حيدر الاخيرة وكلنا البقينا بالبيت گلوبنا سافرت وياهم، شكد تعب هالولد وشكد تمرمرط وشكد اهله تعبوا وياه ويركضون بي من دكتور لدكتور بس ان شاء الله هانت والعوض حلو..

وهسة انا خلوني ارجع للحاضر وافكر بأهل حاكم الراح يجون اليوم يخطبوني! سودة بوجهي من تفهيت وما جاوبته ظليت واكفة بوجهه چني طرنه لا اخذ ولا انطي..

-رسمية: حبيبة يلا يمة يلاا همي ايدج راح يجون الوادم

-حبيبة: كتلج ما اطلع كدامهم ولا ارضى بالزلمة شكو كلتي لامه تتفضل؟

-رسمية: يمة عيب عييب لا تنچلبين

نفخت ضايجة ورحت للمطبخ اكمل الطبخة، الشغل كله واكع فوك راسي هالفترة ليلة دوام وابنها نحس ما يرضى تنزله من ايدها من ترجع وسبأ وضعها بعده تعبان والفقيرة كوة تتحرك وشمس زعاطيطها مخبليها وابرار مو هنا..

-رسمية: ما طلع غده هذا حبيبة شو فاهية صايرة انتِ

-حبيبة: يمة تره والعباس ارضى بهالخاطب واخليكم تتلاطمون وحدكم

-رسمية: يوم منى هذا يا بنيتي اشوفج متزوجة ومرتاحة وراسج بارد

سكتت ما جاوبت انا ويامن احجي واهدد ويه امي رسمية الجاي تلوب عليَّ كلما تعاين لحالي تتحسر وتاكل بروحها حتى منتصر الجانت روحها معلكة بي كرهته وما ترضى تشوفه من وراي..

-شمس: حبيبة عوفي من ايدج اجيت انا روحي بدلي بساع ما ظل وكت

-حبيبة: لا كملت رجعي للتوأم انتِ

-شمس: لا ولج نايمين روحي روحي

عفت من ايدي وصعدت فوك سبحت وبدلت ونزلت مرة ثانية خطية مو مال اخليها وحدها، رجعت اساعدها بالطبخ وبوكفتنا طبوا علي الحـق ووياه ليلة وعبق البطنها راح تطگ..

-ليلة: اااااااخ يا علي تعبنا اااااخ يمة

-رسمية: لازم چنتي تكربين وهيج تعبانة

-ليلة: اي عمة هم چنت اكرب وانا اسحل بهاي البطة الما ترضى تمشي

-عبق: راح انفجر راح اموت

-رسمية: اسم الله شني ولج شهالحجي تموتين شني هو هذا البچر يشلع الگلب ياله يجي

-عبق: خالة صارلي يومين داخلة بشهر العاشر كااافي شوكت يجي هذا شوووكت

-علي الحـق: ابن الزمال بعده ما جاي للدنيا وشلع گلوبنا

-رسمية: انچبب واحمد ربك واشكره لا تظل تحجي على وليدك حراام

-علي الحـق: متبري منه من هسة من تجيبين عبق تنطي لامي وحملي مرة اللخ بلچن تجي بت

-حبيبة: استغفرالله علي الحـق حرام عليك اسكت لا الله يگلبها بيكم!

-عبق: اسم الله يمة وليدي اسكت حق حباب ما ارضى تحجي هيج

-علي الحـق: والله احبه انا بس تره الخلل من ابوي! الله يعلم هو شمسوي وخله خلفته كلها ولد وولده هم خلفتهم ولد

-رسمية: ما تردونه؟ جيبوا انا اربي والله يطيح حظكم فوكما هو مطيح حظكم!

-علي الحـق: لااا شني ما نريده جاي ننتظره على نار بس انا هيج احجي مال شقه وضحك

-رسمية: ما يصلح يمة هذا رزق من ربك لا تجحد النعمة شني ضحك شني شقه ما يصير

استغفر على كلامه وسكت بعد، من يوم عبق اخذت سونار لليوم علي الحـق مقهور عبنها حامل بولد مو بت وكلما يحجي امي ترزله وابوي هم وهو يسكت ويظل يستغفر متندم بس بساع ينسى ويرجع يحجي على ابنه ويرجع يتندم وهيج مگضيها..

صبينا الغده بدون علي الحـق وعبق عبنهم رجعوا لبيتهم امها وحدها هناك فـ بس احنه اللتمينا اكلنا والولد طلعوا من عرفوا راح يجونا خطار.. امي حرصت ما تكول لابوي منو جاي تخاف لا ما يقبل لانها قافلة على حاكم واهله تكول الزلمة ما يتفوت حلو وشخصية ودكتور والف من تتمناه واذا جان خاطب گبل وفاصخ مو عيب هذا..

للخمسة العصر اجت امه ووياهه خوات حاكم ثنينهن، ركضن شمس وليلة على الباب ومدن اذاناتهن يتسمعن وانا رحت وياهن بس يعني بعت ثگل شوي ما بينت نفسي فضولية..

-ليلة بهمس: امه تخبل شوفن شون صوتها ناصي من تسولف

-حبيبة: همه عائلة راقية كلش

-شمس: اشش خلونا نسمع

-رسمية: شرفتونا حبيبتي ام حاكم هلا بيكم

-ام حاكم: عيوني ام علي الشرف النا والله لو تعرفين شكد احب حبيبة وشكد حور تسولفلنا عنها مخبلة البيت بيها متعلقة بيها تعلق فضيع ومن تعرفت عليها عرفت السبب

-رسمية: هههههه يا رويحتي هي حبيبة اسم على مسمى الكل يحبها

-ام حاكم: الله يحفظها ان شاء الله ويرزقج برها، حبيبتي ام علي احنه حچينا على الموبايل عن سبب جيتي اني عندي هالولد حاكم بقى ما متزوج ودا ادورله على مرة حلوة وحبابة وبت اصول

-رسمية: هلا بيكم خية بس انا حسب ما افتهمت وليدج جان خاطب مو؟

-ام حاكم: حاكم؟ لا ابداً ما خطب

-رسمية: هاا؟

-ام حاكم: اي والله حاكم عزابي لا خاطب ولا متزوج من قبل

صفنت مستغربة على كلام امه انا اتذكر حور كالتلي اخوها خطب معقولة اخوها تقصد بي حسام مو حاكم؟ زين معقولة هالفترة كلها ما فطنت هي تحجي على حسام! بس لا لا انا اتذكر كالت حاكم معقولة انا سمعت غلط؟؟

-ليلة: عوبة هذا اخو الخاطب مو هو

-حبيبة: وانا اشمن گفه ايدي؟ هي حور ما تحجي بالاسماء من تريد تسولف بواحد منهم تكول "اخوي" بدون اسم وانا استحي اسئلها ياهو منهم

-شمس: امشي امشي جيبي الضيافة امشي

دفعتني خاطر اروح اجيب الضيافة واطب بس احس رجليه وكفت ما جاي اكدر اتحرك.. سحلتني سحل للمطبخ وهي حطت الصينية بيدي ياله رجعت لوعيي وكدرت اطب اسلم..

استقبلتني امه احلى استقبال وحور عيونها من بعيد تلمع فرحانة، ابتسمت وكعدت گبالهن على القنفة وره ما ضيفتهن وظليت الكعدة كلها ساكتة ومنزلة راسي مستحية كللش ومتوترة بنفس الوقت..

طولما همه هنا ما حجت امه بالخطبة ابد كدامي ورغم هذا انا كاعدة على اعصابي لا فتحت حلكي ولا حجيت كلمة مثل التمثال كعدت وامه وامي رسمية انطلقن يسولفن ويضحكن وذبن ميانة بساع ويه بعض..

طلعوا قريب المغرب ولليل امي كضت ابوي وسولفتله الصار بالبداية عصب وضاج منها بس تغير من عرف اخوه حسام الخاطب وتزوج مو حاكم وبالعكس لام روحه عبنه رفض بدون لا يستفسر منه وكال استعجل بتصرفه بس لانه شافني قافلة على الزلمة وما رايدته كال ما تعبت نفسي وما ردت اجبرها بس هسة اختلف الوضع! اختلف لان ابوي كلللش عاجبه حاكم واخوتي كلهم من افتهموا طارروا من الفرح وكالو هاي القسمة الزينة وحرامات نضيع هيج زلمة نشمي وكفو من ايدنا..

حيرتي تضاعفت والقلق ترس گلبي، ما مرتاحة وماريد اتزوج اخاف هم اتبهذل نفس زواجي الاول واخاف من حجي الناس خصوصاً حاكم عزابي وانا مطلگة شيخلصني من الوادم وحجيهم، ضليت بهالحيرة وجرت حيرتي شهر لا احنه رادين للعالم جواب ولا انا المرتاحة واكدر انطيهم موافقتي او رفضي بشكل طبيعي..

الايام كلما جايها تصعب اكثر وأكثر بس لطف رب العالمين دائماً محاوطنا وبيتنا الصارله شهور مطفي ومابي روح رجعتله الفرحة بولادة عبق الجابت احلى وليد صلوات على محمد جماله يتسولف بي لدرجة الطبيبة الجيبتها كالت عبالك ملاك الجاهل ابيض ومتروس وجبير وعيونه شهل على ابوه..

ولادة عبق ما كدرت اروح وياهة للمستشفى بساع عبن فطومة بت علي الدر يمي بس امي وامها راحن وكالت امي هوااي تعذبت عبق وتأذت بس علي الحـق جان وياهة لحظة بلحظة وما عافها ابد..

كاعدة وگلبي نار عليها ما استحملت ابقى انتظر فـ عفت فطومة يم ليلة ورحت ويه علي السور للمستشفى وشفت اخوتي هنا وحق واكف يتگله بمكانه يريد يفوت يمهم وام عبق ما ترضى تريد الا تبدل لـ عبق وترتبها ياله يجي زلمتها..

-علي الحـق: حبيبة گليلهن راح اكسر الباب عليهننن هسة وكت ترتيبب شني ما شايفها بجرودها اناا

ضحكت على عصبيته وطبيتلهن جوه وعرفت ليش ما رضوا يدخل، عبق روحها رايحة وصاير عدها نزيف قوي والطبيبة انخبصت وياهة، شكلولها مغذي وكتبولها ابرة ورادوا بس وضعها يستقر وترتاح شوي گبل لا يشوفها حق عبن امي وامها يعرفوه حامي ويفضحنا ويخزينا هنا اذا شافها هالشكل..

نص ساعة مرت والحمدلله بدت تسترد عافيتها خصوصاً من جابوا ابنها اليشلع الگلب من جماله وترافته وحطوه على صدرها، دموعها بعد ما كامت تسيطر عليهن نصبتها مناحة حضنته وتبجي وامها تبجي وياهة وامي فاكة حلكها صافنة ما تعرف على شنو يبچن بس انا اعرف بعبق شكد حساسة واعرفها طايرة من الفرح والسعادة وجاي تلمس عوض رب العالمين بيدها..

-عبق: وينه علي.. ماما صيحوا خلي يجي يشوف ابنه

رجعوا الطفل بالكاروك وانا طلعت اصيح لعلي الحـق، طب للغرفة يركض وبوجهه على عبق كعد يمها على السرير وكض ايدها بين ايده بحنية، ظل يمسح على ايدها وشعرها على كيفه ويگلب بوجهها يتفحصه بقلق..

-عبق: اني زينة حق الحمدلله

-علي الحق: وجهج اصفر قبق ليش؟

-رسمية: چا هستوها جايبة شني تريدها تطلعلك محمرة ومكحلة

-علي الحـق: لا يمة لا وجهها مال موته خاف صاير شي وما تحچن؟؟

-شذى: اسم الله يمة طبيعي وجهها يصير اصفر لا تخاف

-علي الحـق: چا ليش ما خليتوني اطب من البداية ليش هيج تأخرتو؟؟

-رسمية: غير نرتبها ونبدللها يا وليدي چا غير تجي وتشوف مريتك حلوة

-علي الحـق: يمة هالبت سحلت گلب وليدچ بالدشداشة الكودري حسبالج ما راح احبها وهي مبهذلة؟

-رسمية: عمت عين العدوو سحلت شوارب السبع هالدشداشة الكودري

-شذى: هههههه لعد فاتتنا ما جبنالها دشداشة تلبسها هسة

-علي الحـق: اي عمة قصرتوا

-حبيبة: يمعود عوف الكودري ما تريد تشوف وليدك؟

رفع عيونه عليَّ مبتسم وهز راسه متحمس، سمت بالله امي وشالته من فراشه الصغير وتمشت بي لعلي الحق وحطته بيده..

-رسمية: مبروك يمة يتربى بعزك ودلالك ان شاء الله

-علي الحـق: بعد عمري يوم بوجودج، اللهم صل على محمد وآل محمد ولج قبق هذا گمر

-عبق: ههههه حلو كلش اي

-علي الحـق: ما شاء الله عيني باردة بس ماكو هيج جمال ولج يمة عايني لوليدي شحلاته

-رسمية: اي يمة چا غير طالع عليك، اذكر انتَ من جبتك للدنيا حبوبتك تسودنت وما رضت اطلعك بره البيت واذا اريد اخذك للطبيب اضمك جوه عباتي

-علي الحـق: ادري بروحي حلو يمة ادري

گالها ونصى يشم رگبة ابنه وغمض عيونه مبتسم، منظره وشكله ولا عبالك چان مقهور من عرف راح يجيله ولد هسة الفرحة ما سايعته والضحكة تارسة وجهه وظل كل ساع وكايل..

-علي الحـق: يمة اخاف لا احسده شسوي

-رسمية: كافي ولك اقرا الفلق والناس على الوليد اسم الله عليه

-علي الحـق: احبه يمة

-رسمية: چا غير وليدك

-علي الحـق: لا لا احبه هواي كللش هواي

-شذى: الله يحفظه الكم ان شاء الله ويفرحكم بي

-علي الحـق: رحم الله والديج عمة، عطر شنو نسمي؟ اذا گلتيلي احمد هسة اطلكج

-عبق: علي اني احب اسم احمد شبيك والله حلو

-رسمية: اي والله حلو على اسم النبي

-علي الحـق: بعد روحي النبي بس ما يلوك اسم احمد الا على رسول الله شوفولنا اسم ثاني لهذا الصاك

-شذى: صارلكم عشر اشهر بعدكم ما لگيتوله اسم

-عبق: لا ماما احنه اتفقنا على احمد بس هسة هو خلف!

-علي الحـق: غسق لا تحچيني غسقق

-عبق: اهوووو

-رسمية: اذا هيج محتارين وواحدكم يجر طول والثاني عرض فتحوا القران وسموا على اليطلعلكم

-علي الحـق: يعني شلون

-رسمية: انا افتحه الكم اصبر

طلعت قران صغير من جنطتها تحطه بيها وابد ما تطلعه وكالت لـ عبق وعلي الحق اول ما تفتح القران يا اسم ذكر يطلع يثبتون عليه، خافوا شوي همه بس كالو ميخالف المجازفة حلوة واسماء القران كلها حلوة..

-رسمية: يلا بسم الله

مدت اصبعها تفصل القران وفتحته، كلنا مدينا روسنا نريد نشوف وامي رزلتنا ما ترضى تكول صغير ما يبيّن تريد هي تقرا براحتها..

-رسمية: يوسف!

-علي الحـق: لا صدگ!

-رسمية: والعباس هاي يوسف شوف الاية

اخذ حق القران يقراها ثواني وابتسم يهز براسه مقتنع، باس القران ورجعه لامي وكال بفرحة..

-نسمي يوسف وسبحان الله هو اجه بجمال النبي يوسف

-عبق: حلو يوسف بس احمد احلى

-علي الحـق: اطلكج ولا اسمي احمد

-عبق: يلا طلگني لعد!

-رسمية: يمة خلص سموه يوسف بعد ما يصلح تغيرون لا الوليد يصيرله شي اسم الله

-عبق: صدگ والله؟؟

-رسمية: اي هذا هو ثبتوا بعد

وهيج عبق وعلي الحق صار عدهم يوسف وشمحلاه هاليوسف ويا محلا جيته الغمرتنا بالخير.. وره ولادة عبق بأربعة ايام رجعوا الامير والباقين من السفر وجابوا البشاير، اجت ابرار وجهها مورد والضحكة تارسة حلگها الحمدلله العملية نجحت وحيدر تخطى چم خطوة على الجهاز هناك وبالعلاج الطبيعي وخلال چم شهر ان شاء الله يرجع يمشي طبيعي بدون عكازة وبدون لا يسند روحه على احد..

-شيخ علي: هلا بحيدرر هلا بزلمتنا السبعع

-حيدر: هههههه جدي هي خطوتين خطيتهن سويتني سبع

-شيخ علي: سبع وبطل هم لا تستهين بروحك وليدي الجرالك مو سهل

ارتاحينا كلش برجعتهم والهم الي جان بوجه ابرار وعلي الدر بده ينزاح وحتى علاقتهم تحسنت هواي، فرحت بهالتطور واخيراً كدرت اجر نفس وصار الوكت ارد خبر لبيت حاكم بس گبلها اريد افتح رسالته الدزها الي گبل اسبوع وما جاوبته عليها، محتواها جان..

"مرحبا حبيبة، يجوز امي نست تبلغكم ان اني مستعد لكل شروطكم مهما كانت لا تترددين وتستحين الخير هواي وكلشي مگدورله الحمدلله"

سميت بأسم الله وفتحتها من الاشعارات صارلها شكد هنا وانا مترددة اجاوب بس هسة خلص ما يصير اأجل اكثر، عدلت گعدتي وتجرأت وكتبتله..

"اهلاً دكتور حاكم، شكراً على كرمك بس اعتذر منك مو ببالي الزواج هالفترة.. الخِلة مو بيك ربي يشهد بس انا ما مستعدة اخوض التجربة مرة ثانية بهالسرعة.. ربي يعوضك بوحدة احسن مني"

دزيتها وبقيت على محادثته ما طلعت لانه بساع فتح الرسالة وقراها، بقيت انتظره كم دقيقة يجاوب بس ماكو رد منه فـ عرفت وصلتله الفكرة وانتهى كلشي بس مادري شبيه ليش ضجت.. هسة انا ما مقتنعة بالزواج ولليوم ما متخطية الصار ويه منتصر ووگعتي بالتنور والحروگ الي بوجهي بس شمالني انگلب حالي واكتئبت من دزيت الرسالة وما جاوبني عليها؟

نفضت شكو فكرة ندم اجت براسي وطلعت من البرنامج ورحت اكلب بالانستا شوي اغير جو، فتحت ستوريات صديقاتي وظليت اكلب بيهن وحدة وحدة لحدما وصلت لستوري تَـمني وشفتها ناشرة شي غريب؟! ناشرة ايدها بأيد زلمة وكاتبة الحمدلله الذي بنعمته تتم الصالحات!!

وكفت على حيلي مصدومة لثواني رفعت عيني اشوف شوكت ناشرته وانتبهت صارلها ساعتين هاي شني هاي! اكو شي غلط جاي يصير هنا!

گبل لا اجاوبها على الستوري طبيت على حسابها ادور بلكي اكو زلمة جديد متابعها بس انتبهت لمتابعيها بالعكس ناقصين وعدد مو قليل النقص فتت ادور على الامير شفته بعده متابعها بس اخوتي وبنات عمي كلهن ماكو شايلتهن..

-حبيبة: ايا بت اللذين

ضحكت من غمج گلبي من فطنت للي جاي تسوي، والله عقل عايفتني بس انا والأمير متابعيها خاطر نشوف الستوري وتحرك مشاعر امير وتخلي يتلحلح.. شيطاانة! بس اگص ايدي اذا هذا تفكير تَـمني مستحيل يجي على بالها هيج شي هاي اكيد اكو من وازها..

طلعت من حسابها بدون لا ارد على الستوري وشمرت موبايلي وكمت اشوف الامير وين، سألت امي عليه كالت كاعد بالمرسم فوك فـ خليته براحته وكعدت ويه البنات جوه بس عقلي كله ويه تَـمني سودة عليَّ تبهذلت هالبت الله يعلم ليا مرحلة واصلة ونشرت هيج منشور..

اعاين للمتنا هنا وللبنات كلمن كاعدة وابنها او بنيتها بحضنها وضحك وسوالف ويسولفن بعرس رهف وعلي السور ويخططن شنو يلبسن وشيسون وبكل جملة والثانية يجيبن طاري تَـمني يخافن تعاند وما ترضى تحضر لان الكل جاي يلاحظها شلون ابتعدت وانطفت هالبت..

-ليلة: والله انا گلبي نار عليها خابصة ابا الحسن اگله اخذني لبغداد خليني ازورها مشتاقتلها بس ما يرضى يكول اموري ينمرد بالطريق طويل

-حبيبة: ان شاء الله هالفترة اكول لابوي نروح نزورهم ما يصير هيج ذن بنيات ما يصلح يظلن وحدهن بله احتاجن زايدة ناقصة

-شمس: زين تسوون وبلچن امير هم يروح وياكم تقنعوه

-حبيبة: ان شاء الله نشوف شيصير ويانه

لليل هاي لمتنا حتى عشا ما سوينا ابوي كال يجيب كباب شوي عبن حيدوري مشتهي، تعشينا وكمت رتبت المطبخ ويه ابرار ورجعت اكعد وياهم اشرب چاي واسمع لسوالف ابوي وهو يحچيلنا عن المصايب الجاي تجي للديوان..

تأخر الوكت وكلمن راح لغرفته ينام وطبعاً اللمة جانت ناقصة امير، ما نزل ولا شفنا وجهه وابوي ما رضى لاحد يصيحله ويزعجه كللش ملتزم بتوصيات الطبيب من كل روحة اله يعيد ويكول "لا احد يضغط عليه شوكت ما يريد يتقرب منكم ويكعد وياكم خلي هو يبادر مو انتم"

لملمت الهوسة الجوة بعدما تفرقنا وصعدت فوك اروح لغرفتي وتفاجأت من شفت الامير كاعد بالصالة وحده وبيده موبايله يگلب بي..

-حبيبة: ها حبيبي محتاج شي گبل لا انام؟

رفع راسه من الموبايل وبدون لا يجاوب هز راسه بـ "لا" إبتسمت وعفته اطب بغرفتي رتبتها هم شوي وتمددت على الجرباية وكضيت وموبايلي اگلب بي.. عشر دقايق مرت وبديت انعس شمرت موبايلي وتغطيت زين وهستوها جاي تشكل عيني اغفى وفزيت على صوت باب غرفتي تنفتح بدون لا يدگوها وامير يطلع بوجهي..

-الامـير علي: اكلج حبيبة.. شنو نايمة؟؟

-حبيبة: لا كاعدة شبيك محتاج شي؟

-الامـير علي: لا بس هاي.. هاي شفت شسمها ناشرة صورة ومادري...

يعاين للموبايل الي بيده ويحجي جمل متقطعة، ابتسمت متحمسة وكعدت على حيلي اتجاوب وياه..

-مني هاي

-هاي البت.. تَـمني

-تَـمني؟

-اي شفتي الصورة مالتها؟

-لا شنو ناشرة

-ناشرة علساس انخطبت

-صدگ؟؟

-اي والله شوفي

اجه قدملي موبايله يراويني ماخذ سكرين للستوري مالتها، سويت روحي متفاجئة وفرحانة بنفس الوقت..

-حبيبة: ياا صلوات الله يهنيها ان شاء الله

-شني شلون؟

-شبيك

-شلون تنخطب ما جاي افتهم

-چا ليش ما تنخطب

-ولج هي مو متزوجة؟؟

-المن

صفن بوجهي محتار ما يعرف شيكول، نزل عيونه على الموبايل ورجع رفعهم الي وانوب هم رجعهم على الموبايل وبالاخير رفعهم يباوع للفضاء الگباله وظلت عيونه هناك چن اكو فد شي وواكف يتمايزه ويرمش عليه بفضول..

ابتسمت على منظره يا علي شكد شكله تايه وواضح عليه شكد متوجع من الافكار الجاي تآكل عقله وما يعرف شنو يتصرف وشنو يسوي، ادري بـ امير يعرف اكو خلل وخلل جبير كللش بس عقله ما جاي يقتنع بالفكرة والدكتور أكد علينا ذاكرته وخلايا عقله اشبه بصراع دائم والغلبة للاقوى والي يصمد اكثر..

-حبيبة: اموري تَـمني متزوجة منو؟

-حبيبة

-ها عيوني

-مادري

-شنو يعني

-مادري بس.. بس ما يصير تتزوج هي متزوجة

-اي المن؟

-مادري حبيبة مااادري

-چا ما دامك ما تدري خلي البت تتزوج وتشوف حياتها

-لا لا ما يصير لا شني هاي شبيچ حبيبة!!

-شني شبيه غير افتهم انتَ على شنو اعتراضك

-ماعندي اعتراض خلص بكيفكمم بوية بكيفكممم

حچاهة معصب وطلع وطبگ باب غرفتي حييل وراه ضايج، ضحكت على تصرفه وكمزت من الفراش اللحگه عندي فضول اعرف شنو راح يسوي.. طلعت من الغرفة ومشيت على أطراف اصابيعي اراقبه من بعيد نزل الدرج يركض ورجليه تدبچ على الباية حيل..

ركضت وراه لحدما شفته طلع من باب المطبخ، مديت راسي من الشباج اشوف شيسوي او وين يروح وانتبهتله ظل واكف كبال النخلة وصافن عليها.. بقى واكف هالوكفة يمكن بالعشر دقايق ما تلحلح من مچانه ولا تعب يممة والله قابلية صايرة عنده من فقد ذاكرته لليوم انا دقيقتين لو وكفت اتعب والدليل هسة كاعدة على الميز واراقبه..

نزيت من اندار على الحايط بسرعة واجه طاير على جهة باب المطبخ، كمزت من الميز وركضت للصالة حتى ما ابيّن روحي جنت اراقبه، كعدت على القنفة اسوي نفسي ملتهية ارتب بالكوشة ووكفت من شفته يطب للصالة ضايج وحاجبه معكود..

-الامـير علي: تندلين وين بيتها؟؟

-حبيبة: منو تَـمني؟

-اي!

-لا والله بس تقي يندل اظن

-تقيييييي ويننننك تقييييييييي

-صخاام يمعود نايمينن

-علي التـقييييي ولك تقيييييي

طلع الكل من غرفهم مخترعين ونزل تقي يركض بالشورت والفانيله، وكف على الدرج مهبوط الزلمة اجه فاك عيونه وايده مايدري شكو..

-شيخ علي: شبيك امير

-الامـير علي: تقي تعرف وين كاعدة هاي البت البغدادية؟؟

-علي التـقي: تقصدك تَـمني؟ اي اعرف عنوانها ليش؟

-دزلي العنوان على الموبايل انا طالع

-رسمية: ويييين رايحح

ما جاوبها وطلع من البيت يهرول، نزل وراه ابا الحسن وركضله للساحة والكل بقى يضرب صفنات محد يعرف السبب الحقيقي الخله امير يتعنى بهالليل منا لبغداد، حسيت امي وابوي حسبالهم ذاكرته رجعتله.. رجع ابا الحسن للبيت يركض وبدون مقدمات كال..

-حبيبة بدلي هدومج ونزلي بساع

-رسمية: وين تروح بهالليل ولكم؟؟

-ابا الحسن: ما جاي يرضى احد يروح وياه غير حبيبة يمة خليها تبدل وتروح يلا

هزيت راسي اي وركض صعدت بدلت شلون ما جان وحطيت اغراض احتياط بالجنطة وشلت موبايلي احطه همات وانتبهت لرسالة جايتني من "حاكم" ما لحكت اشوف محتواها لان حطيت الموبايل بالجنطة ونزلت مستعجلة لسيارة الامير..

صعدت وياه وانطلق بينا بس شني غير روحي راحت من وره سرعته والطريق كله هو عاكد حاجبه وما يتحجى حتى اذا ردت اسولف وياه ماعندي الجرأة افتح حلكي لا يتخبل عليه..

ساعتين احنه بالطريق على نفس الهدوء والسرعة ومن التعب غفيت بعد ما حسيت الا الدنيا صبح وامير يهز بيه ويكول..

-كومي حبيبة بيا فرع همه ما اندل

-حبيبة: شني

-كومي يمعودة يا فرع بيتهم؟؟

-مو كتلك ما اندل انا شبسرعة نسيت

ضرب على الستيرن عصبي عبن گتله "نسيت" يبوو نسيت ما يصير نذكره هو ينسى بس شنسوي اذا هو منا لهنا ينسى والمشكلة ما يقتنع ان هو ناسي!

طلع موبايله يدك لتقي باوعت للساعة بالسيارة بالـ 7:50 الصبح شني رايحين للوادم هيج وكت هسة شيكولون علينا بس هم ما علقت وكلت خليني سادة حلكي لا اترزل وينزلني من السيارة بحجة نسيتج وما اعرفج منو..

-الامـير علي: ين يعني تقي؟؟ شني؟؟ هااا خوش خووش.. اي اندليت هذا هو يلا روح

سد الموبايل منه وداس بانزين خلاني اعيط من السرعة، سكتت كاضة يدة الباب اتشاهد وهو طب لفرعهم وسفط كدام عمارتهم ضبط او يجوز بالعمارة البصفهم مادري لان ماعندي حيل حتى اسأل بعد من الهبطة..

-الامـير علي: نزلي

-حبيبة: اصبر خليني اجر نفس

-يلاااا حبيبة

انتفضت مخترعة وبساع فتحت الباب ونزلت وهو سوه نفس الشي، نزل وهرول بخطوات جبيرة وسريعة وطب لوحدة من البنايات وانا امشي وراه..

-حبيبة: امير

اللتفتلي مخنزر خرب هذا شلون راح احجي وياه، بللت شفايفي اليبست بلساني وتجرأت وكلت بهدوء..

-على كيفك من تشوفها لا تعصب ولا تصيح بوجهها تَـمني تره تخاف

-شني؟؟؟

-تخاف.. وصدگني مو لان هي نعووصه ودلوعة بس هي تخاف من الصوت العالي والعصبية المسكينة سودنها عمي نعمة من تعنيفه وهمجيته خلاها تفز من كلشي

سمعلي بدون لا يقاطعني بس ما انطى ردة فعل وصعد الدرج بنفس الخطوات السريعة، وكف بباب شقتهم راص على سنونه وانتظر ثواني بالباب گبل لا يلتفتلي ويكول..

-تذكرت شغلة امس

-حبيبة: اي يا الله!

-تذكرت خالتها تكرهني

ضحكت بالسكتة وضميت حلكي وهو هم ابتسم ودك الباب عليهم، تنهدت مرتاحة ما مصدكة امير راح يخطي خطوة تجاه تَـمني بعد كل هالوقت.. يارب تتم على خير..

**

-تَـمني ولجج تَـمني كوومي

-تَـمني: ولي عن وجهي تالة

-تالة: توتة امير واكف باالباب كووومي

-تَـمني: ولي هناااك

-ولج والله الامـير علي بالباب واكف هو وحبيبة تَـمني لا تصيرين فاهية وكوميي رجعي رجلچ!!

رفعت راسها مثولة ودايخة عيونها صايرات زروف چفچير من البچي ووجهها ملزگ وناشف عليه الدموع، سحلتها سحل من الفراش وجريتها اللم شعرها المكفش وامسح وجهها بالكلينس وطلعتها خليتها هي تروح تفتح الباب بينما اني ركضت اوكف بالممر اليفصل الصالة عن المطبخ حتى ما ابين..

وكفت اراقبها شلون مخبوصة وتمسح بوجهها وشعرها وتنفض ملابسها، اخذت نفس عميق وفتحت الباب حتى تستقبل زوجها الصارلها شهور تنوح عليه..

-الامـير علي: السلام عليكم

فهت بوجهه تَـمني ما جاوبت وهو هم ظل صافن عليها وعيونه تفتر على وجهها، انقذت الموقف حبيبة من تقدمت ووكفت گباله وكالت بقلق..

-شلونچ تَـمني؟ هاي شنو شبيهن عيونج؟ انتِ مريضة؟؟

بقت بت خالتي الفاهية تتصفن بوجوههم مثل الطرشة تمنيت اللطشها راشدي اصحيها بي بس مو وكتها لازم اتدخل واحل هالغرابة الدتصير حالياً..

-تالة: اهلاً وسهلاً يا هلا بحبيبة واخوها يا هلا بيكم

طلعت من الممر وتوجهت على حبيبة بوستها وحضنتها حضن طوويل مشتاقتلها هالبنية ومشتاقة لريحتها الفخمة، وخرت منها ودرت للامير اسلم عليه بحرارة وهو مثل عادته من نسانه يجاوب بأختصار ومنزل عيونه..

-تالة: تفضلوا لا تظلون واكفين بالباب تفضلوا يا اهلاً وسهلاً

نزعوا احذيتهم بالباب ثنينهم ودخلوا يكعدون على التخم وتَـمني هم راحت تكعد بس خانسة يبوو شجاها هاي اليوم بس هم حقها ما اللومها بعدها ممستوعبة امير اجه كل هالمسافة من شاف ستوري خطوبتها الوهمية..

-حبيبة: تالة حبابة انا راح اموت عطش اريد ماي

-تالة: اي دقيقة حبي

-حبيبة: جايه وياچ انا

گمنا سوه نروح للمطبخ وقبل لا ندخل لزمت ايدي وهمست..

-ماريد ماي ولج بس ردت اعوفهم وحيدهم خاطر يسولفون براحتهم

-تالة: اي اي زين بس امشي نتسمع لان راح اموت فضول وتَـمني تشلع الكلب ياله تحجي

-امشي يلا

مشينا على اطراف اصابعنا ووگفنا بالممر نتسمع على حديثهم الصامت! حرفياً صمت ماكو حتى هسس بيناتهم محد بيهم نطق وظلوا على هالهدوء بالدقيقتين قبل لا يقطع الهدوء امير وهو يكول..

-عيونج صغار

فطسناا اني وحبيبة من الضحك بس كوة سيطرنا على نفسنا وما طلعنا صوت، وضحكنا اكثر على ردة فعل تَـمني وهي تشهگ وتحط ايدها على صدرها مستنكرة ومزعوجة..

-الامـير علي: قصدت صغرانات مو صغار.. يعني متغيرات عن گبل

-تَـمني: والمطلوب؟!

-يعني مريضة لو شني

-اذا اگلك مريضة شنو راح تستفاد؟

-ولاشي

-لعد لا تسأل وتتعب نفسك

لطمت وجهها حبيبة على اسلوب تَـمني الناشف واني وياهة لطمت، هاي البنية حامية عليه وشايلتله سيف من هسة..

-الامـير علي: خطبتي وانتِ مريضة؟ شعجب ما انتظرتي تطيبين؟

-تَـمني: خطيبي ماحب نطولها

-الامـير علي: يعني مخطوبة صدگ؟!

-اي .. اوكف انتَ شعليك؟

-شني شعليه چا مو خبصتيني انا مرتك وانتَ زلمتي؟؟

-وانتَ تبريت مني وگتلي ماعرفج شلون اظل لازكة بيك وماكمل حياتي؟

-يعني انا ما مطلگچ وتزوجتي زلمة ثاني؟؟؟

-ليش اصلاً انتَ متزوجني؟

-لا!

-لعد بعد شكو تطلگني؟

-انتِ تكولين انا متزوجج!

-واذا؟

-اي چا غير اطلگچ

-يلا طلگني

-صدگ عود؟؟

-اي طلگني واخلص وخلصني هم

-چا شلون انخطبتي لواحد ثاني وبعدج على ذمتي!

-بكيفي

-شني هيته هيييي

-اييي

-ولج!!

-انتَ مو متعرفني؟؟

-اي ماعرفج!!

-لعد متطلگني وتفضهااا

-ما اطلگ!!

-ليش عيني؟؟

-عبن.. عبن.. ما اطلك وبسس!!

وگفت بمكانها شايطة وهو وگف وياهة معصب واني وحبيبة هنا واكفات وراح ننهار من الضحك على التمسلت الديصير..

-تَـمني: هو بكيفك!!

-بكيفي طبعاً چا انتِ مو تكولين متزوجتني!!

-اييي بس انتَ متتذكرني!!

-واذا؟؟؟

-يعني متتذكرني ومتريدني وتريد تحتكرنيي مو حالة هاااي

-ايي ماايصير شنييي اشايفتني گررن شايفتني گرررن؟؟؟

-تغااار على وحدة متتذكرها؟؟ وين اكو هيجي لعب امير!!

-ايي ما دامج مرتي اغار عليج چا شني!

-مرتك؟؟ يعني تعرفني مرتك!!

-لا!

-اوووووف يا گلبييي

-مكيفة راحت تنخطب وهي متزوجة شنيي ما تخافين الله انتِ!!

-خاااف انتَ من الله اول بعدين تعال حاسبني!!

-ليش انا شمسوي؟؟

-كاافي عليك ناسيي مرتك حيصيرلك سنننة!!

-هم كااالت مرتيييي

-لعد عوفنييييي

-مااا كاضج اناا بس ما يصيير تتزوجين!!

-وانتَ عاادي تروح لوديان وتزورها بييتها مووووو

-اناا؟؟

-لا تكذذب لااا تكذبب كلشيي ديوصلنيي علي الحـق بنفسه گلي امير ديزور بيت وديان!

-واذا رحتلهمم الوادم فقدوا اخوهم شلون اعوفنهم وحيدهم

-فقدوا اخوهم صارلهم دهررر مو البارحة مات ضرغام!! ثانيااً انتَ قببل مجنت تزورهم هسة من فقدت ذاكرتك كمت تروحلهم!!

-چا اعوفنهم وحيدهم وضرغام امنهم عندي!!

-هاااا امنهم عندك مو؟؟؟

-اي والعباس!!

-خوش امير خووش رووحلها روح لوديان گابلها واكعد اشبع منها شووف واذا تريد تتزوجها هم تزوجها حبيبيي

-وليش اتزوجهاا؟!

-مادري مو تكول مأمنهم يمك خو تزوجها وريح رااسك!!

-انتِ مسودنة؟؟؟

-ايييي مسوودنة اييي خبلتنيي انتَ خبلتنيييي كرهتنييي حياااتي كرهتتت كلشييي كلشيييي كرهتتت نفسيي كرهت كلللشيييي!!!!

تصيح بكل صوتها لدرجة انبح ودموعها صارت تنزل عشرة عشرة من عيونها عبالك جانت حابستهم، ركضنا نطلع اني وحبيبة من وكعت بالكاع تبجي وتنوح بصوت عالي.. ضامة وجهها وتكرر "كرهت كلشي"..

-حبيبة: تَـمني حبي تَـمني لا تسوين هيج بنفسج

-تَـمني: خلي يروح.. خلي يطلع حبيبة ماريده خليييي يروووووووح

بدون لا تحجي وياه حبيبة الامير طلع من الشقة بس شنو وجهه ميتفسر والعرك يصب منه، حضنت تَـمني لجسمي اهدأها واطبطب عليها وحبيبة راحت للمطبخ تجيبلها مي ورجعت تشربها..

-تالة: اششش اهدي حبيبتي اهدي ما صار شي

-حبيبة: يا رويحتي لا تأذين روحج تَـمني انا مو حاچيتچ وكتلج عيشي حياتج وانسي!

-تَـمني: شكد سهل الحجي.. شكد سهل

-تالة: ميخالف عمري اهدي هسة

گومتها من الكاع ورجعتها للغرفة، خليتها تمدد على الفراش وظلت على هالحال تبجي على مخدتها لحدما غفت.. غطيتها زين وطلعنا اني وحبيبة للصالة وبدون لا احتاج احجي شي سألتني حبيبة من ذاتها..

-من اجت لبغداد لليوم هذا حالها مو؟

-تالة: اي والله

-استغفرالله ياربي استغفرالله والله ماعرف شحجي وشكول يا تالة والعباس خجلانين منكم

-لا حبي لا تخجلون مو ذنبكم الديصير بعد هذا بلاء وكله امتحان من رب العالمين

-طالعة اشوفن امير انا وراجعتلج

-براحتج

طلعت من الشقة وشوية طولت ياله رجعت كالت امير كاعد بالسيارة ميقبل ينزل فـ عافته هناك ورجعت يمنا..

-حبيبة: غريب

-تالة: شنو شبيچ

-مادري اموري غريب گالي ابقي يمها فوك ولا تعوفيها يقصد على تَـمني

-تالة: حبيبة حبابة لا تكولين كدامها هو هيج حچى هسة هم تتأمل تذكرها وترجع لنقطة الصفر من يهملها مرة ثانية

-لا ماحجي لا تخافين عبن انا اخته وصايرة ما اثق بذاكرته مال السمچ

ضحكت على تعبيرها وهي ضحكت وكعدنا سوه نسولف على وضعهم بدون لا نحس بالوقت وما انتبهنا للساعة الا من انمردت بطوننا من الجوع، صلينا ووصيت على اكل من بره لان ماعدنا غاز ونكدر نسوي شي هنا ورجعنا لسوالفنا المتراكمة..

-تالة: يا عمررري ولج هذا شنو ابن عبق اللهم صل على محمد عبالك لعابة

-حبيبة: ايي ولج حليو كللش حليو امي تكول يشبه علي الحـق بس والله انا اشوفنه نسخة من عبق

-تالة: صراحة بيناتهم صاير ويمكن لانه صغير متبين ملامحه كلش، هسة عوفينا من هذا الحلو وسولفيلي ليش رفضتي حاكم؟

-حبيبة: على طاري حاكم هو دزلي رسالة امس ونسيت افتحها

طلعت موبايلها من الجنطة وفتحت رسالته، صار عندي فضول اعرف شنو كاتبلها من وره الابتسامة الي انرسمت على وجهها بس استحيت وما سألت..

-تالة: احممم احممم

-حبيبة: ههههههه شبيچ ولج

-يعني اريد اسألج شكاتب بس استحي

-لا تستحين لا هاج انتِ اقريها

اخذت التلفون منها بفضول وقريت الرسالة بصوت عالي ولا ارادي ابتسمت على الكلمات الحلوة المختارها..

"ماريد عوض غيرچ ولا تعيدين هالكلمة، اذا اليوم ما مستعدة انتظرچ باچر واذا باچر ما هويتي ننتظرچ عگب باچر واذا عگب ما رفلنا گلبچ ننتظر اليوم الوراه والوراه والوراه ومستعد انتظرج سنين يا حبيبة وابقى عزابي العمر كله ولا اتزوج غيرج.. بس من هسة اگلچ مو بعدين تضربيني بوري وتزوجين واحد ثاني صح ماعندي عرگ جنوبي واطلع خبالاتي عليج بس عرگي البغدادي كافي"

-تالة: هههههههههههههههههه يمة فديييييت

-حبيبة: ههههه سكتي تالة

-ولج حبيبة هذا يجننن شكد لطيف بس فهميني ليش متقبلين بي؟؟

ذبت حسرة تعبانة ورجعت تكعد بصفي، حركت راسها بيأس وكالت بدون مماطلة..

-تالة ماكدر اتزوج هسة، لا نفسيتي مرتاحة ولا اهلي مرتاحين وانا ادري اذا تزوجت هسة راح اتبهذل وابهذل الزلمة وياي فـ ليش اجازف بيه وبي واتعب نفسي اكثر؟

-يعني انتِ اعتراضج مو على حاكم اعتراضج على الزواج كشكل عام بهالفترة؟

-اي والله اريد بس اجر نفس واشوف دربي احتاج احط راسي على المخدة وانا مرتاحة واكعد الصبح وانا ما حاطة ايدي على گلبي وخايفة لا يصير شي اليوم خصوصاً وعلي التقي لليوم يلوب على الي وگع سبأ من الدرج ومخبل امي يروح ويجي يوصيها على مرته وابنه من يلتحق

-حقكم والله الله يلوم الي يلومكم

-الحمدلله والشكر

-بس حبيبة هونيها على نفسج وعليه وهو مبين من رسالته افتهم سبب رفضج للزواج متشوفي كاتب انتظرج معناها هو رجال ناضج ومتفهم فـ لا تضيعي من ايدج حرامات

-ان شاء الله خير

مشى الوقت وللثنتين رجعت امي وتفاجأت من شافت حبيبة هنا وكلش فرحت، اهلت وسهلت بيها واستغربت لانها كيفت من عرفت الامير جوه وحلفت الا يصعد ويتغده ويانه..

-تالة بهمس: منج من الشيطان

-حنين بهمس: انچبي واني اعلمج بعدين.. ههههه اي ماما اي صيحي خلي يصعد شكد عيب منه

صدگ نزلت حبيبة وحچت ويه الامير ومبين ظلت هوايه تقنع بي ياله قبل يصعد يمنا، عفتهم اني ورحت للمطبخ ارتب الاكل بالمواعين واجتني امي تهف وتهمس..

-امشي كعدي بت خالتج خلي تسبح وتترتب وتطلع كدام الرجال

-شبيچ ماما خاف مصخنة انتِ؟

-تاالة سكتي وولي كعديها هاي فرصة بلكت الله يرجعون سوه وترتاح هاليتيمة

هزيت راسي وهمست يارب ورحت لـ تَـمني بالغرفة، شگته لگلبي ياله قبلت تكوم وغصب طببتها للحمام وبللتها وبللت ملابسها ياله قبلت تسبح.. وكفتلها بباب الحمام مثل الناطور وطلعتها بيدي من كملت ورجعتها للغرفة..

-تالة: هاج لبسي هذا

-تَـمني: شعندي عرس؟؟ طلعيلي تراك

-تَـمني!!

-طلعيلي تراك لا اطلعله بالبرنص!

-تالة: هاا هاا ولج فاسقة

-اهووووو

عفتها تهوهو وطلعتلها تراك رياضي لونه ليموني من الكنتور احبه عليها يلوگ لبشرتها، شمرته عليها حتى تلبسه وطلعت المكياج من المجر ولزمتها طيحت حظها بي..

-تَـمني: كاافي لعبت نفسي شعندي رايحة لععرس!!

-تالة: اي اي لعرس معليج انتِ

حطيتلها مكياج بسيط بس يخببل، لبختلها تنت على خدودها وشفايفها حتى تبين طبيعية ومشطت شعرها وعفته على طولها ولزمت عطرها سبحتها بي وسحلتها اطلعها ويايه من الغرفة نروحلهم بالصالة..

-حنين: يا هلا بالجمال يا هلا بالكمال يا هلا بالدلع والمنع تعالي حبيبة خالتج تعالي تغدي يروحي

-تالة: راح يصيرلي بنتج عشرين سنة وماكو مرة استقبلتيني هيج استقبال

ضحكوا كلهم وحتى تَـمني شفت ابتسامة تنرسم على وجهها وراحت تكعد بصف امي بالكاع، انتبهت لعيون الامير وهي تتسلل وتسرق نظرات منها كل شوية وما اللومه والله بت خالتي كيكة..

-حبيبة: تَـمني شعرج طولان وصاير يخبل

-حنين: اي والله والثولة خابصتني تريد تگصه

-حبيبة: لااا شنو تگصه والله حرامات هالشعر ينگص

-تَـمني: محمد يحب الشعر القصير

كالتها ببرود تام ولا كأن فجرت قنبلة نووية هسة بيناتنا خلت الامير يخزرها ويرفع حاجبه معاجبه، حطت لگمة من التمن بحلكها واردفت..

-تَـمني: راح اگصه لچتفي احسه يطلع حلو

-حبيبة: ههه اي براحتج حبي ههه

-تَـمني: اكلي حبيبة ضعفانة انتِ اكلي يگلبي

-حبيبة: اي اي جاي اكل والله

اكلت والامير هم كمل ياكل بس شنو وجهه ميگصه الطبر من الطنكورة والانزعاج، والله يضحكني على شنو يضوج ويغار اذا هو ميتذكرها ولا عنده مشاعر تجاهها ولا يهتملها! لو هي شمرة هاي غيرتهم يخنگون بيها الرايحة والجاية..

كملنا غده وكمنا نشيل السفرة وكعدنا كلنا البنات بغرفة تَـمني بينما الامير امي فرشتله بالصالة مندر حتى يرتاح شوية لان راسه كلش كام يوجعه وحتى وجهه صار اصفر..

-حبيبة: على شنو ناوية ولج تَـمني

-تَـمني: ولاشي

-حبيبة: صدگ!

-تَـمني: والله ولاشي ما ناوية على شي ولا اريد اسوي شي مليت من المحاولات والانتظار خليني هيج احسن

ما علقت حبيبة وغيرت الموضوع حتى تَـمني مترجع تنتكس حالتها، ظلينا كاعدات سوه للمغرب الامير صاح لحبيبة حتى يرجعون واني چلبت بيهم يبقون اليوم يرتاحون يمنا من تعب الطريق لان شقتهم مابيها مسواگ ولا شي وكوة قنعته..

ثاني يوم ماكدرت اغيب بعد فـ طلعت للدوام اخذت فورتات لان تَـمني ما داومت وتوصلني، الدوام ملل وكئابة واكرهه دا انتظر يوم يوم شوكت اتخرج واخلص.. ندم عمري دخلت كلية علوم والله لو يرجع بيه الزمن اروح رياضة او فنية..

صارت بالثنتين الظهر واني بعدني طگت روحي وما تحملت اكمل المحاضرة طلعت وطزز بيها وبالعلوم.. ركبت فورتات ورجعت للبيت بس المشكلة ميوصل مباشرة لبيتنا ولازم اركب بعد كيات ثنين ياله اوصل لفرعنا..

نزلت من السيارة الاولى وركبت السيارة الثانية وطلعت موبايلي اللتهي بي بينما تقبط، حطيت سماعات بأذني وفتحت يوتيوب اتفرج مسلسلتي التركية وبعد ماحسيت بالدنيا..

طگة اصبعين انحطن گبال شاشة موبايلي هي الشتت تركيزي بالمسلسلة، وخرت السماعة من اذني ورفعت عيني اشوف منو هالغثيث وفزيت مهبوط گلبي من شفته عاصف!.. عاصف كاعد على الكرسي البصفي وساند عكسه على ظهر الكرسي ويباوعلي مبتسم..

-عاصف: يا مساء الخير على الاميرة

-تالة: عاصف؟ انتَ شتسوي هنا

-عاصف: جاي بشغل وصدفة لكيتج تصعدين هالسيارة

باوعتله بنظرة "مو عليَّ هالكلاوات" بس ما حجيتها بلساني، اخاف منه هذا احسه مو عاقل وعنده عرگ خبال من غفار نفس الاسلوب احسهم..

-عاصف: اي شكو ماكو

-ماكو

-متغيرة وكبرانة

-اممم

-شوكت نتزوج

-خاف مواعدتك بزواج واني مادري؟

-اي

-عاصف اني جنت صريحة وياك وفهمتك!

-گلتي ما تردين تزوجين بذاك الوكت بس هسة الوكت تغير وقرارچ هم لازم يتغير

-لا مو لازم دا اگلك ماريد اتزوج!

-ليش؟

-راح نرجع على نفس الموضوع!

-ليييش؟؟

-لا تعلي صوتك كاعدين بسيارة احنه لا ننفضح!

-جاوبيني ليش؟!

-لان اني وياك منتناسب!

-شني ما يناسبج بيه بالضبط؟

-عمرك! انتَ اكبر مني بهواي ملاحظ هالشي لو لا؟؟

-عادي تَـمني متزوجة واحد اكبر منها بهواي بشني اثر عليها؟!

-بس اني مو تَـمني اني تالة وتالة متحب هالشي!

-العمر موش عذر

-ياخي منتناسب بكلشي منتناسب لا انتَ تفيدني ولا اني افيدك

-وانتِ شني منجمة وقريتي المستقبل؟

-لا الموضوع ميحتاج تنجيم اختلافنا من السما للگاع

-ماشوفن أي اختلاف انا

-شوف عاصف...

-لا تالة انتِ عايني انا زلمة قافل عليج شفتج وعجبتيني وما طلعتي من هالعقل..

يحجي ويضرب بچف ايده على مكان عقله خله المرة الي الكاعدة بمقدمة السيارة تلتفت علينا عزا بعيني انفضحت، ايست منه يهتم لسمعتي وگمت من السيارة اطلع وما خلاني سد الطريق برجله رفعها يعيق حركتي..

-تالة: وخر رجليك عاصف فضحتنيي

-عاصف: انتِ بس انطيني مجال وصيري حبابة انا متأكد راح اعجبچ وما تندمين على قرارج

-اخي افهم مااريدك اني! ماأريدك روح شوف غيري شبييك

-الخطة جانت ويه غيرج بس عيونج جبرتني اغير الخريطة

توترت كللش اريد بس اشرد منه، عيونه هادئة ونبرته ناصية مو مال تهديد بس اخاف منهم اخااف من بيت مسعود ميتأمنون ممكن برمشة عين يغدرون هاي اذا ما خطفني وسوالي شي..

-تالة: من رخصتك اريد اروح واضح السيارة راح تتأخر تقبيطتها

-امشي انا اوصلج

-لا شكراً

-شبيچ تالة ما راح آكلچ!

-عاصف خليني براحتي بطلت راح ابقى انتظر السيارة تقبط

-خوش انا هم انتظر وياچ

عفته ممهتمة، ما امن انزل وحدي خليني عاد هنا كدام الناس ميكدر يسويلي شي يضرني اذا جان يفكر بهيجي شي..

-عاصف: هههههههههههههههه

اللتفتت عليه مستغربة شبي يضحك هذا شنو مخبل! واليكتل ضحك اكثر من شافني مستغربة وخايفة وريّح ظهره على الكشن يعدل كعدته بطريقة مستفزة..

-عاصف: لو اذبحح هسة گطرة دم ما اللگه بيج شني السالفة هيج انا اخرع؟

-لا!

-همزين عبن ماريد اخوفج ولا نيتي سوء، انا ما اللومج ليش خايفة بس اريدج تعرفين انا صدگ هاويچ ورايدچ من غمج گلبي

رجعت وجهي مستقيم ما اخلي عيوني بعيونه بس ظلت اذني وياه اسمعه وهو يردف بهدووء شديد..

-النية ما جانت عشگ بس گلبي الغدرني، انا صار فترة طويلة اتصارع بين گلبي وعقلي واهلي.. اهلي كلهم ضدي وما راضين على هالزواج وما رايدي بس ما يهموني بشي عبني ما مستفيد منهم لا بسمعة ولا بفلوس ولا بحنية ولا احتواء، ما شفت من اهلي الا التعب والمشاكل وضيگة الخلگ وصار لازم اعوفهم واكمل حياتي

-شمعنى اني؟ ليش الا اني؟

-گتلج گلبي

-يعني هسة انتَ تريد تقنعني كل الچنت تسوي قبل من مصايب مجبور عليهن؟

-ليش انا شمسوي

-عاصف عندي سؤال واريدك تجاوبني بصراحة تامة ولو اني متأكدة ما راح تجاوبني بس مو غلط اذا حاولت

-جواب

-صلاح ابن عمك هذا المسجون شلونها علاقتك بي؟

-ابن عمي يعني شلون لازم تكون علاقتي بي

-طبة وطلعة جانت بيناتكم؟

-ليش تسألين

-فضول

-ما احب الفضوليين

-يعني جان اكو تواصل قوي بيناتكم

-ابن عمي تره!

-ادري بس ولد شيخ علي هم ولد عمك بس ماكو تواصل قوي بيناتكم

-عبن ما نتوالم

-بس تتوالم ويه صلاح وغسان؟

-وين تردين توصلين انتِ؟؟

-انتَ گتلي "الخطة جانت ويه غيرج بس عيونج جبرتني اغير الخريطة" يعني جنت ناوي على غيري!

-وين تردين توصلين؟؟؟

-ردت تتقرب من تَـمني ومن شفتني وعرفتني تغير رأيك مو؟

ضيگ عيونه يباوعلي بدون لا يجاوب، حاولت اسيطر على اعصابي وما انفجر بوجهه لان كلشي بي وحديثنا الحالي ديخلي الشك بگلبي يكبر.. الموضوع الصارلي اكثر من سنة افكر بي وشاكة بي بس ماعندي دليل واكدر اسولف بي ويه احد ديكبر..

-ما راح تجاوب؟

-اذا كتلج اي شنو راح تسوين؟

-ما اسوي شي لان بكيفك انتَ حُر بأختياراتك

-تردين الصراحة؟

-اكيد

-اي، الصراحة اي جانت الخطة اتقرب من تَـمني واتزوجها لخاطر املاك عمي نعمة ما تروح لولد علي العارات بس كتلج تغير كلشي من شفتج وعشگتچ

-وبهالسهولة غيرت الخطة؟

-اي طبعاً

-شوكت اول مرة شفت بيها تَـمني؟

-ما اذكر

-بفاتحة نعمة شفتها؟

-ما اذكر كتلج

سكتت بسرعة من ركبوا ثلاث زلم السيارة وگعدوا گدامنا، هدأت صوتي كللش وهمست بيني وبينه..

-عاصف محتاجتك تجاوبني حتى يرتاح گلبي گلي شوكت اللتقيت بـ تَـمني اول مرة

-شنو راح يتغير اذا عرفتي؟؟

-عاصف حباب

-تالة تَـمني ارملة عمي اخو ابوي ما اذكر يمته شفتها اول مرة بس اي اعترفلج جانت النية اتزوجها الها بس ما صارت

-تمام

-شبيچ ضجتي؟

-لا

-شبيچ حاچيني گلت شي غلط انا!

-ولاشي مگلت شي خلص سد الموضوع

-چا ليش سألتيني على صلاح؟؟

-صلاح وين هسة عاصف؟

-مسجون

-ليش؟

-شمدريني

-شنو تهمته على شنو انسجن

-مادري كتلج

-اممم ابن عمك ومتعرف على شنو مسجون

-شبيچ لحيتي على صلاح شسالفة!

-لا ما اللح بعد انسى السالفة

سد الموضوع فعلاً وبعد ما حچى بي، بهاي اللحظة شكد حقدت عليه وكرهته ضعف اضعاف كرهي القديم اله ولبيت مسعود كشكل عام.. ارتباكه، اصراره على عدم الجواب، نكرانه لمعرفته السبب الحقيقي وره سجن صلاح رغم انفضح بالعشيرة كلها والكل عرف هو مو خوش رجال وعنده علاقات محرمة واغتصابات ويه بنات بس سوه نفسه ميعرف!

من يوم تَـمني گلتلي هي تحلم بعاصف بأستمرار واني گلبي يلعب منه، گلبي يلعب لان كل احلامها كأنها واقع وتكول تالة عبالك عايشة الموقف من قبل وديرجعلي على شكل حلم.. كل مرة تفز من نومها اني تكبر شكوكي وتكبر مخاوفي ويكبر السبب الممكن يكون حقيقي وره احلامها شنو بگلبي..

-عاصف: اذكر شفت تَـمني مرة بباب بيت عمي ناصر چانت جاية تشتچيلة من نعمة وناصر كضلها شاربه وگاللها انا احاچي

يبست بدمي وكلمه ماكدرت احجي بعد جملته، اني متأكدة تَـمني كلتلي عاصف شافها بشقة شيخ علي الي ببغداد وجانت اول مرة يتلاگون وبوكتها تعارك ويه امير وتقي من شافها شابة وعلساس ميدري بيها هيج صغيرة.. زين هسة شلون ديگول اني شايفها اول مرة ببيت عمهم ناصر؟؟

ما عولت شوكت اوصل للبيت حتى اشرد منه، خاف جنت شاكة بي 50% صعدت شكوكي للـ 90%! اگص ايدي من الچتف لو عاصف او واحد من اخوانه مچانو ويه صلاح وابوية بذاك البيت وماله ايد بحمل تَـمني الاول! احلامها، قلقها، خوفها منه كله يفسر بين تَـمني وعاصف مواقف قديمة بس هي ناسيتها بسبب المخدرات الچانو يشربوها وهسة دتترجم الها وتتذكرها عن طريق احلام..

غافلت عاصف ورمشت على تَـمني وسديته بسرعة حتى هي ترجع تتصل وميبين اني الدكيت، ثواني ما تأخرت ودكتلي وبسرعة جاوبتها بدون لا ابين نفسي متوترة..

-هلو توتة هاا بعدج نايمة؟

-تَـمني: لا كاعدة، شنو وين صرتي شو تأخرتي اليوم؟

-اگلج تبهذلت بالفورتات اني تكدريني تجيلي يم ^^^^

-اي جايتج يلا

سديته منها ورجعت الموبايل بالجنطة امثل اني طبيعية ولا كأن راح اتقيء من الخوف، عاصف مسوالي شي يستدعي الخوف ولا هسة ضوجني بحجاية بس مجرد فكرة داخلية قالقتني تجاهه وشك ان ممكن هو مشارك بالجريمة السووها بـ تَـمني اني روحي جزت منه وقرفت..

**

"تَـمني"

صوت تالة ماعجبني واني منا بالي يمها لان راحت وحدها فـ كمت من الفراش بسرعة وطلعت صاية لبستها وحطيت شال على راسي وبلغت حبيبة اني شوية وراجعة..

-حبيبة: اي عيني صارت عندج سيارة وصرتي تسوقين شوكت ما يعجبج تطلعين

ابتسمت على عبارتها الواضح دتشاقه بيها وترخصت منها وطلعت، خالتي بعدها مارجعت من الدوام والامير مو بالبيت فـ طلعت بسرعة.. شغلت سيارتي وبعدني ما حركتها وشفت الامير يتمشى وعاكد حاجبه على الشارع هسة الشارع شمسويلك وهيج معصب عليه مادري!

-تَـمني: تجي وياي ابو البورك؟؟

صحت من الجامة المفتوحة اجذب عقله الشارد، باوعلي مستغرب بالبداية بس فوراً تغيرت نظراته من شاف هاي اني واجه يهرول بأتجاهي مستعجل..

-شعندج طالعة بهالظهرية؟

-رايحة اشوف محمد

-خ** على محمد نزلي

-ما انزل

-خالوو عيبب الجاي تسوي عييب

-عيب لاني اسوق سيارة؟

-شعليه بالنعالة عيب سوالفج هاي مال محمد ومحمود وهالتمخرط

-شنو گبت قيرتك يابو القيرة؟

خزرني معصب وسوالي بيده طلعي من السيارة، ضحكت على رجفته وسويت مثلما يريد نزلت من كرسي السايق وصعد هو بدالي..

-تَـمني: شنو انتَ راح تاخذني اشوف محمد؟

-الامـير علي: صعددي ولا تضوجيني صعدددي

صعدت بكرسي الصدر اضحك وكعدت بدون لا احجي شي، حرك السيارة ومثل العادة طار بينا طيور بس المشكلة هو ميعرف وين اريد اروح اني بس من شفته يمشي على طريق جامعة تالة سكتت..

-تَـمني: خفف السرعة شوية اريد اخلي حمرة

طلعت من الجكمجة گلوس وفتحت المراية الامامية احط لشفايفي، شهكت من جر الكلوس من ايدي بعصبية وفتح جامة السيارة وشمره بالشارع..

-تَـمني: اميييييير

-انا اشتريلج غيره

-تره هذا ماركة!!

-لبخي ببيتج ماركات الشارع اله حرمته واحترامه

-انتَ معليك

-هسة وين تردين ترحين خلصيني؟؟

-لبيت محمد

-تَـمنيييييي

-لا تعيط اخاف

-چا صيري خوش بت وجاوبي وين رايحة؟؟

-انتَ ليش تغار هاا؟؟ على شنو انتَ مو متعرفني؟

-وين تردين ترحين؟!

-اروح اجيب تالة!!!

هز راسه موافق وعكدة حاجبه العصبية انفلت، اخذني للمكان الاتفقت ويايه تالة اخذها منه ووكفنا ننتظرها علما توصل السيارة الصعدت بيها..

-الامـير علي: ليش ما ناخذها من جامعتها؟

-لا هي كلتلي منا اجيها

ما علق بعد وبقينا ننتظرها، ما طول انتظارنا دقيقتين ووكفت سيارة ونزلت منها تالة والغريب نزل وياهة عاصف!!

-تَـمني: امير انزل وياي بسرعة انزل

نزلت من السيارة وهو هم نزل بس شكله ما مفتهم السالفة، هرولت بخطوات سريعة بأتجاه تالة الوكفت تحجي ويه عاصف وجريتها من ايدها حيل خايفة عليها..

-تَـمني: شديصير هنا؟؟

-عاصف: لا تخافين ما راح اسويلها شي

-تَـمني: تالة شنو السالفة شعنده وياچ؟؟

-عاصف: انا اجاوبج، اجيت خاطر اخطبها

-تَـمني: نعم؟؟؟

-الامـير علي: خو ماكو شي خالووو ياهو يخطب بسيارة نفرات؟!!

-عاصف: انا

-الامـير علي: خوشن ما ننطيك يلا ادعبل منا

-عاصف: مبين رجع لسانك امير، بشري تَـمني تذكرج لا؟

-الامـير علي: لااا تحاچيهاا لك امشيي ولي مناا لا ابتلي بيك امشيييي

-عاصف: شوف انا ما راح اجاوبك خاطر ابيّن حسن نيتي وتعرفون صدگ رايد اناسبكم واخذ بنيتكم وماعندي غاية ثانية

-تَـمني: جاوبك امير وگلك احنه مننطيك! الله يسعدك ويه غيرها امشي تالة

سحلتها من ايدها واخذتها للسيارة وعفت امير واكف ويه عاصف، دخلنا السيارة واللتفتت على تالة اشوف وجهها مگلوب وشفايفها بيض مال وحدة مهبوطة..

-تَـمني: شبيچ تالة عاصف سوالج شي؟؟

-تالة: لا لا بس رجعوني للبيت

ما لحيت عليها لان شفت امير يتقدم علينا ويركب السيارة، انطلقنا للبيت بدون لا نحجي كلمة واني كل شوية ارفع عيني على تالة اشوفها سرحانة وصافنة على الشارع ما عولت شوكت ارجع حتى افتهم منها الصاير..

دخلنا البيت وشفنا خالتي هستوها راجعة من دوامها، طارت فرح من عرفت امير وصلني حتى نجيب تالة واني خليتها فرحانة وماجبت طاري عاصف الا افتهم من تالة السالفة..

دخلتها للغرفة وحدنا ولزمتها تحقيق وما تعبتني حجتلي الصار وياهم بالتفصيل الممل وروحي مردتها، گلبي گام يوجعني من حجتلي توقعاتها وتذكرت احلامي وكلشي عشته بذنيج الايام.. ايام حملي لطفلي الاول الي لليوم ما تخطيته ولا اتوقع راح يجي يوم وانسى الصدمة والخوف والتعب العشته..

-تالة: تَـمني ابصم بالعشرة هو اله ايد بالصار وياچ متأكدة!

-تَـمني: عوفي تالة ماريد نحجي بالموضوع خيولي كلشي ما راح نستفاد

-لازم نخلص منه حبابة حاچي الامير يتصرف وياه ماريده يرجع يحجي ويايه توتة اخاف منه!

-لا يظل بالج حبيبتي اني راح اتصرف انتِ بس ارتاحي

عفتها بالغرفة تنام شوية وطلعت للصالة وضجت من عرفت امير وحبيبة راحوا، ما حسيت عليهم وانقهرت لان ما شبعت منهم ثنينهم بس ارتاحيت شوية من خالة كالت ما راح يرجعون لمحافظتهم ويبقون ببغداد كم يوم بشقتهم..

بقيت على تواصل ويه حبيبة الفرحانة بسبب امير وقراره، وطار گلبي من كالت ميقبل يطلع من بغداد وديتحجج عنده شغل هنا بس الحقيقة لا.. ماعنده شغل وتكول يطلع بالنهار ويرجع العصر يكعد بالشقة ميطلع والفرحني اكثر هو من كالت هوااايه ديسألها عني وعن وضعنا وحالتنا..

جنت عبالي ستوري خطوبتي الوهمية راح يحل مشكلتنا بسرعة لكن طلعت غلطانة بس هم مزعلانة.. كلما تمر الايام دا احس بقرب الامير اكثر واكثر حتى من اضطروا يرجعون لبيتهم بسبب امه اكلت گلبه متقبل حبيبة تفارگها هواي بس هالشي ما اثر عليَّ بالعكس احسه صار اقرب وحتى يشوف ستورياتي اول بأول واوقات يجاوبني عليهن بكلمات بسيطة..

ضحكت على علاقتنا الغريبة رجعنا نتعرف من اول وجديد وصرت اتعمد اذا عندي مشكلة افضفضله واسولف وياه اتصال وهو يسمعني للاخير بدون لا يقاطعني حتى موضوع تالة وعاصف سولفته اله بدون لا اجيب طاري ممكن عاصف مشارك بالصار ويايه قبل لان اصلاً هو ميتذكر، سولفتله على موضوع زواجهم وگالي عاصف ما راح يتقرب منكم بعد وهو راح يتصرف من يمه..

-تَـمني: دنزحمك عيني

-الامـير علي: جسر للطيبين انا

-اممم، يلا اني اروح بعد باجر عندي يوم طويل

-خير ان شاء الله

-باجر حفلة تخرجي

-هاا بالسلامة

-تسلم، تكدر تجيب حبيبة حتى تجي؟

-لا والله باجر يرجع اخوي ابا الحسن من السفر ولازم اروح اجيبه من المطار

-ياا فدوة صح هو وليلة سافروا لايران

-اي

-يلا براحتك عود ادزلكم فيديوات شوفوا تخرجي حتى ليظل بنفسكم

حچيتها بالضحك ونجحت اخلي يضحك، ضحك ضحكة خفيفة وكال..

-ما تقصرين

-يلا باي

-الله وياچ

سديت منه وحطيت الموبايل على گلبي، اوووووف شكد مشتاقتله ومشتاقة لسوالفنا القديمة ومداهراته ويايه.. شكد مشتاقة وتعبانة من الشوق بس راضية، ما دام علاقتنا زينة ومدا ينفر مني مثل قبل اني راضية ومقتنعة وسعيدة هم..

ثاني يوم هو يوم السعد يوم تخرجي، اكدر اصنفه بأحلى واخفف يوم بحياتي كلها صح ما حضرت التخرج من بدايته حالي حال زملائي بس لحكت على رمي القبعات وشفت خالتي وتالة ونرمين واكفاتلي من بعيد وفرحانات الي..

عيوني دمعت بشوفتهن وتمنيت باقي الاحبهم ويايه بس الحمدلله على كل حال.. زوج نرمين عزمنا على غده بالمطعم لان المفروض زوجته ويايه تتخرج هالسنة بس اجلت سنة هي فـ بعدها مرحلة ثالثة، عشت احلى اللحظات وياهم وزوج نرمين هم كلش حباب وخفيف ظل وما قيدنا ابد حتى على الطاولة مالتنا ما كعد حجزلنا الطاولة وخلانا براحتنا ناكل..

كملنا غدانا واشترينا حلويات وكيك ونقلنا الفرحة للبيت بوجود نرمين، حضرت تالة كلشي وجابته للصالة واني رحت ابدل ملابسي واجتني نرمين تركض وبيدها موبايلي تكول ديدگ..

نبض گلبي بقوة من شفت المتصل حبيبة وداگة كامرا يجوز امير كاعد بصفها! ركض ركض فتحت شعري وجبت حمرة حطيت وفتحت الخط وهنا جانت المفاجأة.. او خليني اكول احلى مفاجأة!

ما وصلتني كلمة "الوو" من حبيبة وصلتني صوت هلاهل وگفلات وهوسات بنات الامارة كلهننن، كلهن ملتمات يم حبيبة يهوسنلي ويصفنگلي وليلة ورفل خبصن الدنيا خبص بالهلاهل وسبأ ورهف يهوسن وحبيبة وعبق يغنن بطور حلو..

-خريجة نوومه الليلة خريجة نوومه... ورد وشمع نهديلها وخريجة نوومه الليلة

اسمعهن ودموعي تنزل فرحانة.. فرحانة لاني رغم البُعد والفجوة الصارت بيناتنا بعد الفراق بس ما نسوني، ما نسوني حتى الولد اخوان امير ركض لبست شال على راسي من شفتهم طبگوا وياهن يهوسون وعلي السور وعلي النور وحيدر الي واكف على عكازة وشوفته بهالحال طيرتني من الفرح واكفين يصفكولي ويصوفرون..

-علي النور: هااا تَـمني شلووونج

-حبيبة: اذني زرفتها يمعود تره ما مسافرة البت

مسحت دموعي ميتة ضحك، لزموه الولد كلهم يصنفون عليه حتى علي السور وحيدر طبگوه على الخط..

-علي النور: اهووووو يا چلمة ردي مچانچ مو صوچكم صوچي انا الفطير واجيت اسلم

-تَـمني: ههههههه لا تهتملهم نور والله فرحت بشوفتك

-علي النور: وعلي بس انتِ التفهمين

-علي الحـق: اي يلا اسكت اسكت

-تَـمني: شلونكم شنو هالمفاجأة الحلوة والله فرحتوني

-ليلة: من امس حبيبة خابرتنا احنه بـ ايران وكالت اول ما ترجعون ندگ لـ تَـمني نباركلها

-علي التـقي: واخو خيته اليرفض ويكول لا

-تَـمني: ههههههه شيخة الشيخات هاي

-حبيبة: يا بعد عيني نومية وعلي مشتاقيلج مو شلون ما جان

-تَـمني: تمنيت تحضرون ويايه بس الحمدلله على كل حال

-علي السور: تَـمني وعلي ردت اجي انا بس امي رزلتني وكالت لا تستخف

ضحكنا كلنا وهو من ضمننا ورفعت راسها رهف عليه تخزره ضايجة، موتتني من الضحك عشتوو صايرة تغار عليه الحلوة..

-تَـمني: ولج رهف شوكت تتزوجون انتو مو طولتوا؟

-رهف: والله مادري خية يمته ما يحن ابوي علينا نتزوج

-حبيبة: هو اليوم وگوة جبناها بالبوگات طلعت من بيتهم لوما عمتي صابرين جان حلم رهف داست بيتنا

اخذتنا السوالف وحسيتني رجعت لبيتهم، نفس سوالفهم ونفس الروح الحلوة ونفس الوجوه المتروسة حنية ولطافة.. حطيت ايدي على كلبي بسعادة من مدت راسها خالة رسمية تسلم عليَّ ولزمت طرف شيلتها تهوسلي بيها وتباركلي على تخرجي..

-رسمية: ان شاء الله يوم التعيين يا يمة

-تَـمني: حبيبتي خالة فدوة لكلبج

-حبيبة: متعينة تَـمني يوم بمدرسة اهلية

-رسمية: لاا نريد حكومي احنه شنسوي بالاهلي

-علي النور: هو وينه الحكومي يمة چان ولدج تعينوا

-رسمية: ما يهم ان شاء الله كلكم تتعينون يا بعدي وترتاحون

هزيت راسي مبتسمة وعيوني تدور على امير بيناتهم، شكد تمنيت اشوفه بس واضح ما موجود وما ضجت ميخالف الغايب عذره وياه..

-تَـمني: اوووي هذا منو الاسمراني العنوني

-علي التـقي: هذا حسين وليدي شوفي شلون كبران

حط حسين بالشاشة حتى اشوفه ويا روووحي شلون كبران ومتغير صاير يشبه ابوه اكثر من قبل عبالك نسخة مصغرة منه، ضحكنا على ابا الحسن شلون شال ابنه وصاح من مكانه بضحك يتداهر ويه تقي..

-ابا الحسن علي: وخر ابنك خليها تشوف ابني شلون متغير

-تَـمني: هههههه يخبلوون والله

-علي الحـق: چا ما تشوفين يوسفي الصاك؟ وينه يوسف قبق جيبي

-عبق: خلي نايم يمعود

-علي الحـق: جيبي جيبي خلي مرة عمه تشوفه

ابتسمت على حماسه وشلون راح جاب ابنه الگمر ما شاء الله، كلهم لزموا اطفالهم يشوفوني وشموسة هم صورتلي جهالها وابرار صورت فطومة..

-حيدر: تَـمني شوفي ابن عمي تقي وابن عمي حق شون صايرين چن ككو وحليب

-علي التـقي: الككو يطغى على الحليب خااالي

-علي الحـق: چا الحليب شبي ولك

-علي التـقي: فاهي ما ينجرع وحده

-علي الحـق: ايا عار يا ناكر الخوة

ضحكوا سوه يتداهرون وكل شوية واحد ذابله بسمار على الثاني بس كله بالشقه يحجون محد ديزعل او يتحسس لان مبين عليهم شكد يحبون اولاد بعض وفرحانين بيهم، شكد كيفتلهم وفرحت على فرحتهم شلون كلهم واضح عليهم الراحة وحياتهم ماشية صح، كلهم اطفالهم بحضنهم وديكبرون بصحة وعافية وان شاء الله دوم هالفرحة..

-حبيبة: اخرناچ احنه خية اخذي راحتج

-تَـمني: مع السلامة وامانة سلمولي على عمو علي هواايه

سديته منها وابتسامتي مرسومة على وجهي وبقت مرسومة اليوم كله ما غابت، كلما اتذكر مكالمتنا ارجع ابتسم واضحك واستمريت على هالحال لحدما نمت وكعدت ثاني يوم رحت للدوام بالمدرسة..

بالدوام انسى نفسي وانطلق ويه الاولاد، دا اداوم بمدرسة ابتدائية للولد بس شنو من حماس وشنو من حب يحبوني يطيرون فرح من اجيهم واصعدهم للملعب ونظل الوقت كله نتنافس ونتسابق منو يفوز على منو وما شاء الله كفاءات عالية دا اشوف بيناتهم رغم عمرهم الصغير..

حياتي شبه استقرت بعد التخرج، اكعد الصبح اداوم بالمدرسة اتونس واغير جو ويه اولادي وارجع الظهر للبيت قبل خالتي، اطبخ وارتب البيت وانتظرها هي وتالة يرجعون حتى نتغده سوه.. اغسل المواعين واسولف ويه حبيبة والبنات العصرية واوقات قليلة اتصل بالامير احجي وياه دقايق واسده وهكذا... كل يوم تقريباً نفس الشي يتكرر وحياتي روتين بروتين بروتين بروتين..

اليوم كعدت الصبح متحمسة عدنا مسابقة كرة قدم ويه مدرسة ثانية ولازم اخذ طلابي للملعب، مسابقة لطيفة صارت بآخر ايام العام الدراسي الحالي للممتعة، جهزت كلشي قبل بيوم ورتبت وضعي ويه خالتي لان راح اتأخر بالرجعة وطلعت الصبح للمدرسة دربت الاولاد شوية واخذتهم وطلعنا ويه المدير..

-المدير: ست تَـمني امالنا بيكم عالية نريدكم ترفعون راسنا

-تَـمني: اكيد استاذ اولادي جاهزين

ابتسم يهز راسه وعفته ورحتلهم احمسهم واذكرهم بالكاس الي راح نحصله اذا فزنا.. ضحكت على وناستهم والحماس المتحمسيله شوية ويطيرون من النفخ يردون بس ينزلون للملعب حتى ياكلو اكل..

-مهند: ست والله نرفع راسج اليوم والله

-تَـمني: كفوو

گعدوا الحكم وصار دورنا نلعب، ما لحيت وذكرتهم يشدون حيلهم وهمه من وحدهم خبصوا الدنيا، طبوا للملعب يهوسون فرحانين ويسوولي "هلوو" بأيدهم من بعيد بسعادة..

وكفت اشهد المباراة كلها من بدايتها لنهايتها ما كعدت، عشت الفرحة والحماس والخوف والقلق وياهم وهمه من يشوفوني اشجعهم واطمنهم اذا سجلوا علينا الفريق المنافس هدف يزيدون بهمتهم ويحاولون اكثر.. بقينا هيج لنهاية المباراة وما رضينا نطلع من الملعب الا والكاس بيدنا!!

الفرحة والفخر بعيوني لاولادي نساني التعب العشنا شهور واحنه نتدرب، سعيدة لدرجة حضنتهم واحد واحد ووزعتلهم هدايا ناس جبتلهم دريسات مال برشلونه وناس جبتلهم احذية رياضية وكللش كيفوا عليهن..

ودعت طلابي بعد يوم طويل ورجعت للبيت مرتاحة بس قبلها جبت نمنيات وحبشكلات لـ تالة عطلت وخبصتنا بيتنا فارغ وبيتنا مال فگور ومحد يهتملي ومحد حاطني بالحسبان.. جبتلها چيس متروس وصعدت درج شقتنا وتفاجأت من شفت الباب مردود..

تقدمت للباب حاطة ايدي على گلبي اشوف ليش عايفته خالتي ما مقفول، مديت ايدي على كيف افتحها من بعيد وجفلت فازة فزة احس روحي طلعت من صدري ورجعت لمكانها من شفت الامـير علي بوجهي گصته يابس عليها الدم وقميصه مبهذل مال واحد جان داخل بحرب..

-تَـمني: امير!

دخلت للشقة واني اهمس اسمه همس خايفة من منظره وشهگت بگلب يرجف من شفته يهرول بأتجاهي ويسحبني من زندي بقوة وقسوة وشمرني على صدره وحضني بين ايده بحضن كسر بي ضلوعي..

گالو ما تجي وگالو عليك بعيد، والدرب كلش طويل البينك وبيني

شح مني الدمع گدما بچيت أعليك، وأعاتب بالگمر بلكت يواسيني

تعال لخاطر الله وخليني ارتاح، من زمان ما ارتوت وشافتك عيني..

-الامـير علي: تَـمني يا بعد حيلي.......

يتبع 🥹♥️.....

━━━━━━ ♛ ━━━━━━

فراشــــــات 🥹🦋✨♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

يا بدايات المحــبة

يا نهايات الولــه.. ♥️!

━━━━━━ ♛ ━━━━━━

-الامـير علي: تَـمني يا بعد حيلي

بشوغة تلفظ اسمي الغايب الهد حيلي، عيوني ذبلت وگلبي الزعلان هوّد.. رفعت ايدي الترجف وحضنته من رگبته حيييل بكل قوتي وشهگت النفس شهگ اريد اشبع من عطره الحرمني منه كل هالفترة..

-تَـمني وينج انتِ وييينج

ماكدرت اجاوبه من الغصة الذبحتني، حسيت بي يريد يوخرني عنه يباوع لوجهي وماكدرت اهده شددت اصابعي اضغط على ياخة قميصه اخاف افلته لا يرجع ينساني.. اخاف اصحى من هالحلم وارجع انلطم بالواقع وافز من نومتي..

-اميرر

-يا بعده

-اميير انتَ حقيقي

-لا افلام كارتون

ابتسمت من بين دموعي وشهگت ابجي بعياط دافنة وجهي بصدره، اصيح بكتمة مخنوگة اريد اخفف من تعب الايام والبُعد الكبرني فوك عمري عمرين..

-تَـمني ابوي..

-اششش اسكت اششش

-ليش ولج

-اميييييير

جبرني اوخر منه ولزمني من اكتافي، نصى يباوع لعيوني المدا اكدر افتحهن من الدموع وتقرب يطبع بوسة عليهن.. غمضتهن ابجي اكثر واكثر انهاريت تعبت وخانتني قوتي..

ماعت روحي بين ايده اريد ارفع نفسي من الكاع ماكدر صار هو يتحكم بحركتي لحدما دخلني جوه وسحبني لغرفتي.. كعد على الجرباية وكعدني على رجله وصار يحجي ويايه ويمسح على شعري وخدودي..

-تَـمني ليش تبجين شنو فهميني انا لـ...

-امير انتَ تعرفني

-شني

-تعرفني انتَ؟؟ تتذكرني امير؟؟

-چا ليش شنو جاي يصير حبيبتي انـ...

ما خليته يكمل الجملة وانفجرت.. انفجرت عليه اريد احس بي اريد احس بوجوده واترجم اشتياقي وخوفي ولهفتي وحبي ووحشتي ووحدتي وتعبي والايام والشهور القضيتها بدونه بطريقتي الخاصة اريد اللمسه اريد ابوسه اريد احضنه اريد انحضن بين ايده اريد اسولف وياه اريد اشم عطره اريد واريد واريد واريد........

طول ما احنه سوه لمست استغرابه ولمست الحيرة الديعيشها والقلق التارس گلبه بس ما خليت هالشي يأثر عليَّ، ماردته يضيع فرحتي ويرجع يصدمني بالواقع وانفجع بي.. گمت اقفل باب الغرفة علينا اخاف تجي خالتي او تالة ويتقيّد، وبگومتي للباب امير وگفني من لزم ايدي وكال بدون مماطلة..

-رجعيلي

-شنو

-رجعي وياي تَـمني ولا تخلين زعلنا يطول

-زعل؟ انتَ عبالك اني هنا لان زعلانة؟

-اي.. اظن

-يعني شلون تظن؟

-تَـمني ما اتذكر.. مادري ليش ما اتذكر شنو صار بالضبط بس انتِ هنا عبنج زعلانة وتردين تعوفيني

-هههههه امييير

ضحكت وفلتت نفسي من ايده ورحت على الباب اقفلها ورجعتله، تمددت بصفه على جربايتي وتنهدت مرتاحة وسعيدة مدا اصدك الصار مدا اصدك هو هنا يمي ودا اكدر احط ايدي على خده اتملسه..

-يعني هسة تصالحنا؟

-هههههههههههه

-شبيچ

-ههههههههه اي تصالحنا

-عليج علي؟

-تتوقعني اذا بعدني زعلانة منك اسوي كل السويته قبل شوية؟

-شمدريني انتِ هم صايرة مسودنة وما ينعرفلج

ضحكت من كل گلبي وحضنته بقوة، يا الله عباله احنه متزاعلين واني جاية هنا منين جاب هالحجي مادري.. اخذت نفس عمييق ومسحت على شعره من وره وهمست..

-خلينا هيج مرتاحين وانسى كلشي ثاني

-اي سهلة هاي

ابتسمت وغمضت عيوني اريد احس بالسلام والاستقرار وما اخرب اللحظة بشي ممكن يزعلني، غفيت على وضعي بدون لا احس وفزيت مرة ثانية مخترعة على شعر شارب ينغز بخدي وشفايفي..

-الامـير علي: هو هيج الينامون چن موتى وذابين رواحهم

ابتسمت مغمضة عيوني وكعدت على حيلي بينما هو بعده متمدد على الفراش بصفي، مغطت ايدي فوگ واستحيفت اكوم واعوفه فـ رجعت تمددت و حطيت راسي على صدره..

-ها خالوو

-هممم

-بس لا راح نرجع ننام

-عوفني مرتاحة

دغ خدي بأصبعه خفيف وكال..

-فشلة من خالتج نوومه من شوي اجت دگت الباب علينا

رفعت نفسي من على صدره مخترعة، عكدت حاجبي مستفسرة وسألت بفضول..

-خالتي؟؟

-اي

-سمعت صوتك يعني؟ تعرف انتَ هنا؟

-طبعاً تعرف هي الدخلتني الشقة

-صدگ تحجي؟؟

-اي

-شوكت هاي؟

-اليوم الظهر شبيچ

-يعني خالة تعرف انتَ تذكرتني وما گلتلي!!

-شني؟

-اففف انسى انسى.. خليني ارجع انام هسة

-شبيچ صايرة تنبل تَـمني خاف حامل حبيبتي؟

-منين احمل من زرف الحايط؟؟؟

-ليش ولج

-استغفرالله امير انسى هالسالفة هسة وفهمني شبيها گصتك مجروحة

-هيج هاي ختولي

-عليك الله احجيلي

-سويت حادث

-كذاب! لان قميصك هم مبهذل ومشگوگ منا شعندك وشصاير؟؟

-تَـمني

-اميييير

-لا تمطين اسمي ولج

-سولفلي لعد

-تكامشت ويه عاصف اليوم

-صدگ؟؟؟

-اي

-ليش؟؟

-على سالفة تالة

-يا سالفة

-انتِ مو كلتيلي عاصف قافل على تالة ويريد يخطبها وردتيني اتدخل؟

-يعني تتذكر هالشي!

-چا ليش فقدت الذاكرة!!

-هههههههههه يربي مدا اصدك

-شبيچ تَـمني شسالفتج حجاية والثانية ضحكتي

-لا لا هيج انسى يلا سولفلي شصار وياه؟

-بالبداية سولفنا بس بعدين تحولت عركة وصارت ملاطم

-ليش ملاطم؟

-هو **** وما رايد روحه

-ياااا

-وعلي

-امير فهمني الموضوع بالتفصيل شصار وتعاركتوا عليه؟؟

-احجيلج بس ما تنقهرين؟

-ما انقهر والله مستحيل انقهر اليوم

عدل گعدته ومسح على وجهه، شكله ضايج ومحترك دمه، ظل ساكت فترة قبل لا يگز على اسنانه بعصبية ويكول..

-عاصف العار يهدد ويهايط على الصار وياچ گبل يكول الا افضحكم واحجي كدام الكل تزوجت تَـمني عبنك حبلتها

صفنت بوجهه بدون لا انطي ردة فعل لاني مصدومة، مصدومة لان عاصف يعرف بموضوع حملي وممكن يعرف بسبب غفار شافنا بذاك اليوم بالمستشفى ونقل الشافه لاهله بس صدمتي الحقيقية هي من امير كال..

-يا تَـمني ما اسولفلج شصار بيه من حچاهة، يااااا علي ابن ابي طالب روحي صعدت للسما ورجعت لصدري وحسيت بقبق راسي راد ينشلع ويتطشر

-شصار بالضبط؟؟؟

-مادري شصار بيه مادري بس كضيت عاصف وقريت عليه اللم نشرح وكل وجع بيه حطيته بي

-يمةة

-لوما دورية الشرطة الاجت وشافونا واحنه نتكاتل چان لو انا ذبحته لو هو

-عزاااا اجتكم الشرطة؟؟

-اي وربچ تقي هنا ملتحق واجاني للمركز وحلها بطريقته

-يعني تقي يعرف؟؟

-اي

-اها.. تمام حبيبي هسة انسى عاصف خيولي لا تضوج نفسك بي

-شعوطني ابن الچلب

-خيولي امير انتَ هسة كوم للحمام اسبح واني اشوفلك شي تلبسه

هز راسه مأيدني وكام من الفراش بس قبل لا يطلع ما تحملت لزمته وشبعته بوس، ضحك متعجب من تصرفاتي ما خليت مكان يعتب عليَّ ما بسته حتى ايده من الحماس شلتها وبست بطنها وسحبها مني ما راضي..

-الامـير علي: ههههه تسودنت الفرخة

ضحكت وياه فرحانة وكمت طلعت من الغرفة قبله اسويله طريق وشفت خالتي وتالة ثنينهن كاعدات بالصالة ويوزعن ابتسامات وغمزات، عضيت على شفتي اتحكم بنفسي وصحت من مكاني حتى يطلع ماطولهن هنا..

-حنين بهمس: شايف خير ومستاهلها شايف خير ومستاهلها

-تَـمني: خااالة

-تالة: يوم الولد الصالح بت خالتي

-تَـمني: اني اعلمج تالة صبريلي

عفتهن يركصن ويغمزن ورجعت للغرفة، قفلتها وركض طلعت تلفوني من الجنطة ودكيت على تقي وحجالي بالحرف شنو صار وشلون اجه للامير بالمركز..

-تَـمني: رجعتله ذاكرته تقي!! شلون امير يتذكرني؟؟

-علي التـقي: مادري والله علمي علمج انا هم من اجيت وشفته تعجبت

-تَـمني: تواصلت ويه الطبيب مالته؟؟

-اي اتصلت بي وكال انا گلتلكم فقدانه لذاكرته وقتي وصار على اثر صدمة نفسية تعرضلها وراح يرجع يستذكر طبيعي يا اما بالتدريج تجيله ذكرياته على شكل ومضات لو تجي فجأة اذا تعرض لصدمة قوية ثانية بس انتم الچنتو ما تصبرون ومستعجلين

-تَـمني: تخيل عباله احنه متزاعلين واني رحت لبغداد

-هههههههه خرب عقله

-يا الله مادري شكول مادري احسني بحلم

-لا خوية مو بحلم انتِ بواقع الحمدلله

-الحمدلله يارب الحمدلله شكراً تقي والله ماعرف شلون اشكرك

-ليش انا شمسوي وتشكريني

-شلون شمسوي؟ والقران بدونك احنه نضيع الله لا يحرمنا منك

-خجلتيني والله خيتي شمسوي قابل كل الجاي اقدمه لاخوي وبيته انا ارتاح لراحتكم وگلبي يفرح بشوفتكم متونسين

-اخوية تقي انتَ الله يحفظلك سبأ وحسوني وكل عزيز على گلبك

-هههههه ادعي للي ببطن سبأ هم

-سبأ حامل؟!!

ضحك بقوة كأنه بعده ممصدگ واني من الفرحة عدلت گعدتي ورجعت اسئله..

-يعني حامل لو شاكة؟

-حامل اول امس عرفنا

-ياااااا على الخييير

-لو تشوفين وجهها لليوم ما مصدگة وكل ساعة تدگلي تكول التحليل غلط لو المختبر قروه غلط

-عمري فدوة لگلبها والله تستاهل كل خير سباوي صح ابنكم بعده عنوني بس ميخالف يكبرون سوه

-نفس حچاية امي تگلها لا تخافين كلنا وياچ ونربيهم سوه

-اي عفية

سمعت صوت خالتي تصيحلي من الصالة فـ ودعته بسرعة وطلعتلها شفتها واكفة وابتسامتها من الاذن للاذن..

-حنين : هاا بشري شلونه امير؟

-تَـمني: بعده ديسبح والله لوما فشلة اطبله للحمام

-تالة: هههههه ولجج

-تَـمني: والله مدا اتحمل انتظر

ضحكت خالتي وجرتني من وجهي وباستني على خدودي ثنينهن، لزمت ايدي بين ايدها وكالت وعيونها مدمعة..

-راح اشتاقلج يا روح خالتج

-تَـمني: ليش؟

-حنين: زوجچ ورجعت ذاكرته وراح يرجع ياخذج مني وتعوفيني وحدي اني وتالة

-تَـمني: لا خالة ماكو ترجعون ويايه

-حنين: لا توتة منكدر

-تَـمني: اذا على دوامج ودوام تالة اخلي عمو ينقلكم ثنينكم والله متصعب عليهم لعد اني تقي نقلني لغير جامعة واني بسنة التخرج عبالج صعبة ينقلوچن؟ همه عدهم معارف وواسطات بكد الدنيا!

-حنين: تَـمني روحي حمي الاكل لزوجچ هسة وبعدين نسولف

-تَـمني: خالة لا تقلقيني راح ترجعن ويايه!

-حنين: روحي ماما مسوية مركة بيذنجان على الغده بس حميها وصبيها اكيد كاتلكم الجوع هسة

أيست منها تجاوبني وعفتها بس گلبي ما متطمن احسها ما راح ترجع، اعرف خالتي من تقفل على شي بعد لو مادري شيصير متقتنع واني اعرفها ما ارتاحت من عاشت هناك.. صح بيت عمو علي دللوها دلال بس جانت دائماً قلقة على تالة وتخاف من الدنيا عليها رغم هناك امان اكثر من بغداد عليهن بس التغيير الجبير الصار بحياتها ما تقبلته..

نفضت كلشي من عقلي هسة ونويت اعيش اللحظة ويه اميري، يمة گلبي مدا يتحمل الديصير احسني بحلم والله العظيم ماعرف حتى شلون اعبر وشلون اشرح الي بداخلي..

حميت الاكل وصبيته وحطيت لبن وتمر وزلاطة وخضرة بالصينية، جبت وكومت بالخضرة اعرف حبيبي يفقد عليهن اذا مياكل باگة كرفس كل يوم ميرتاح.. سمعت صوت قفل باب الحمام ينفتح فـ بسرعة شلت الصينية وطببتها للغرفة وكعدت انتظره هنا..

-تَـمنيييي.. تَـمنييي

كمزت من سمعته يصيحلي ومبين بعده بالحمام، ركضت اشوف شبي وابتسمت من مدلي راسه اليقطر بالمي وهمس بصوت خجلان من خالتي وتالة..

-ابوي جيبيلي هدوم

-هااا اي صح دقيقة

رحت لغرفتي وكعدت ابحوش بيها اريد شي رجالي ماعندي ولا خالتي عدها، شفت الصاية مالتي معلگتها وره الباب هي شوية جبيرة عليَّ خلي يلبسها هسة ويمشي وضعه بيها بينما اغسل ملابسه وينشفن..

اخذتها وركضت للحمام دكيت الباب على كيفي فتحها ومدلي بس ايده، حطيت الصاية بيده اخذها وطبك الباب وراه يبدل.. عفته ورجعت للغرفة وكعدت انتظره علما يطلع، شوية وفززني صوته يصيح بكل حسه..

-تَـمنيييييييي

-تَـمني: هاا هااا

هرولت اطلع من الغرفة لكيته شامر الصاية مالتي بباب الحمام، دكيت الباب عليه حتى يفتحها بس ما فتحها دكيتها مرة ثانية وهم غلس عليَّ يااا هذا شبي..

-امير ليش شمرت الملابس بره

غلس عليَّ تغليسة مرتبة لا جاوبني ولا حتى طلع، ظل بالحمام بالعشر دقايق لزگ هناك.. مليت وعفته براحته وكعدت بالغرفة اعلس خضرة علما يطلع..

نزلت الكرفساية من ايدي من انفتحت باب الغرفة وظهر منها امير لابس نفس قميصه السمائي بس ناگع على جسمه، وكفت على حيلي مبتسمة وركضت عليه حضنته من خصرة وحطيت راسي على صدره الناكع..

-احببببببك

-مبين

-اموت عليييك

-من الجبة الجبتيها الي

-شبيها حبيبي

-ولج تَـمني اشايفتني فراقد؟؟

-يااا ليش

-چا شني نثية كدامج جايبتلي جبة شصخم بيها هاي؟؟

وخرت راسي عن صدره لان حسيته معصب والغريب عصبيته تشبه عصبيته المفرطة من جان فاقد ذاكرته، خفت لا هالشي يأثر سلباً عليه فـ ابتسمت ومسحت على لحيته بيدي على كيفي اهدأه..

-لا امير بس جبتها لان ماعندي شي رجالي يفيدك

-چا لاا تجيبيلي شييي

-هذا هو صار

-استغفررر الله

-خلص حبيبي اهده متسوه والله

وخر مني ضايج وكعد على الجرباية ينافخ، يربي شبي هسة حتى نكعت نفسي من شبكته وحطيت راسي على صدره عود رومانسية بعد عيني..

-تاكل امير؟

-تعاي

-شنو

-تعاي يمي

تقدمت عليه بخطوات بطيئة وتشنجت من جرني من ايدي بقسوة وكعدني على رجله غصب، رمشت رمشات سريعة اباوع لوجهه ماعرف شنو يريد او شنو راح يسوي بس فاجأني بالاخير من باسني على خدي بوسة خلت كل جسمي يكزبر وكال..

-لا تزعلين حبيبتي بس فهاوتچ طيحته لحظي

-هاا

-فهاوي

-هاا

-احبچ

-احسك كذاب

-ليش ولج

-كلتها بس حتى مازعل

-لا والله

-مادري احسك متغير

-لا وعلي بعدني امير الناعله عشيرته تَـمني

-هههههه هسة صدگتك

حضنته من رگبته ورجعلي الحضنه وچنه راد يروح زايد فـ تلاحكت للوضع وفلتت نفسي منه وكلت..

-خلينا ناكل يمعود

-اي ناكل ليش ما ناكل

-امييير وخر يااا

-تعاي امنية

-ما اجي فشلة من خالتي يلا ناكل يلا

شلت الصينية الحاطتها على الفراش ونزلتها بالكاع حتى ناكل وكعدنا سوه، ناكل ونسولف بس اكثر الحجي مني هو هادئ نوعاً ما بس ما لحيت عليه لان واضح من عيونه المنفخة راسه ديوجعه وتعبان..

-تَـمني: حبيبي شبيك

-مابيه..

گالها وعصر البين عيونه بوجع وگام من الكاع، تمدد على الجرباية وظل مغطي عيونه بچف ايده متت خوف عليه وكمت بسرعة اكعد بصفه ولزمت ايده..

-شبيك امير

مجاوبني وبقى على وضعه، كبر خوفي وحتى جسمي ظل يرجف مهبوطة، كمت بسرعة اريد اروح اتصل بـ علي التـقي ولزمني من ايدي معترض..

-امير لازم تروح للمستشفى

-لا مابيه شي.. بس طفي الضوه عمى عيوني

-اي صار

طفيت الضوه وجبت موبايلي فتحت الضوه مالته ورجعتله، بقيت كاعدة يمه لازمة ايده ما فارقته، ظليت كلما اشوفه متوجع ومتعذب من وجع راسه اكول اتصل بـ تقي وارجع اصبر نفسي واسكت لا يفتهم ويعصب عليَّ ووضعه يسوء..

للصبح بقينا على هالحال ما غمضت عيني اخاف اغفل عنه ثانية وانام لا يرجع ينساني وينعاد الصار من نساني اول مرة.. گوة على اعصابي طلعت سبحت وصليت ورجعت اركض اكعد على الفراش، عيوني على وجهه ولساني ما سكت من الدعاء يلهج ويتوسل برب العالمين منرجع نعيش ذيج الايام..

تبهذلت ونفسيتي تعبت من الخوف، روحي طلعت لحدما فتح عيونه الصايرات حمر ووجههن عليَّ.. متت خوف من شفته هيج وانكمشت بمكاني مرعوبة من ردة فعله المتنحزر..

-الامـير علي: ااخ.. صباح الخير حبيبتي

زفرت نفس وغمضت عيوني منهارة، ذبيت راسي على صدره ورخيت جسمي مهدود حيلي..

-شبيچ امنية

-اوكف..

-شنو شبيچ؟؟ تعبانة؟ مريضة؟؟

-اريد انام..

وخرني عنه غصب ولزم وجهي يگلب بي، عكد حاجبه مستغرب من وضعي وكال..

-وجهج شاحب؟

-مبيه شي.. انتَ شلونك شلون صار راسك؟

-لا احسن بس انتِ وضعج ما عاجبني

-لا والله اني زينة، كلش زينة هم

ابتسمت مرتاحة وتمددت بمكاني وغطيت نفسي، ابتسم من شافني رجعت نمت هو ميدري ما غفت عيني الليلة الفاتت..

-تعال ننام

-شني طلابة

-نعسانة تعااال

-صايرة هواي تنامين بس لا...

-مو حامل مووو حامل يبووووو

ضحك بصوت وتمدد بصفي، كمشت بي بأيدي ورجلي ماخلي يتحرك وهو بس يضحك مدا يفتهم الموضوع وليش اني هيجي صايرة بس شكله مكيف على الوضعية..

غفيت وللعصر ياله كعدت وطفرت من الجرباية من ما لگيته بصفي، طلعت من الغرفة اركض لخالتي وتالة اسألهن عنه..

-تالة: يمعودة صلي على محمد طلع الرجال بشغل

-تَـمني: شوكت؟؟؟

-حنين: من الظهر طلع كال صديقه ابو كربله منتظره عدهم شغل ببيت

-تَـمني: خالة شلون تخلي يروح بدون لا تگعديني شلووون

-حنين: على كيفج يمة شبيچ عايشة بقلق

ما تناقشت زايد ورجعت للغرفة وبوجهي لموبايلي، دكيت عليه واظافري بحلكي اعضعض بيهن متوترة.. دگتين دگ التلفون وتلفت اعصابي عقلي صدع على ما سمعت صوته يجي من السماعة ويكول..

-الو

-امير وينك انتَ؟؟

-بالطريق حبيبتي راجع حضري نفسج خاطر اخذج من الباب

-وين تاخذني؟

-نرجع لبيتنا

-للشقة الي ببغداد؟

-لا نرجع تَـمني شعدنا ببغداد بعد

-يعني هذا هو راح نرجع نعيش هناك للابد نفس قبل؟

-شسالفة چا وين نروح

-هههههههه ماشي ماشي دقايق واجهز ما اتأخر

سديته بوجهه قبل لا يكول مع السلامة وكمت طررت لخالتي وتالة بلغتهن يحضرن نفسهن وركضت للحمام توضيت ورجعت للغرفة صليت وبديت تجهيز، طلعت جنطة السفر النقلت بيها اغراضي من جوه جربايتي وكمت اجيب من كنتوري واترس بيها لحدما قبطت وطلعت الثانية..

ما كفت كل اغراضي فـ كلت اسويهن على شكل وجبات مو الا كلهن اخذهن ويايه هسة لان ما اللحگ اعزل كلشي بهالسرعة ينراد ارجع عليهن مرة لخ..

بدلت ملابسي ولبست شالي وطلعت للبنات اشوفهن كملن لو لا وتفاجأت من شفتهن كاعدات نفس ما عفتهن..

-تَـمني: هاي شن شو ممتجهزات امير راح يجي هو بالطريق

-حنين: هلا بي ماما

-تَـمني: يعني كملتوا اغراضكم مو؟

-تالة: لا تَـمني احنه ما راح نجي

-تَـمني: شنو؟؟ شنو متجون شلون تبقون هنا!

-حنين: حبيبتي احنه مرتاحات هنا وحياتنا مستقرة

-تَـمني: بس...

-حنين: لا نطولها ونحجي بالموضوع هوايه توتة، حبيبتي انتِ مكانج يم زوجچ واحنه مكاننا هنا وكلنا مرتاحين بأمكاننا الصح

-تَـمني: خالة كتلج اذا علمود دوامكم عمو يكدر ينقلكم!

-حنين: الموضوع ممتعلق بدوامنا

-لعد بشنو؟؟ معقولة لهدرجة كارهه ترجعين تعيشين بنفس محافظتهم خالة؟؟

-لا والله وربي يشهد كل ما بالموضوع جربت اعيش بره بغداد وما ارتاحيت ماكدرت اتأقلم وجنت كل يوم انام وخايفة من باجر عليچن

-تالة: تخافين علينا ومحاوطينا زلم من كل الجهات؟ شيخ علي وولده ما خلونا نحس بغربة وچانو ويانه بكل لحظة وكل صعوبة عشناها

-حنين: والنعم منهم بس المشاكل دتصير بسبب هالزلم، بيت شيخ علي ما عليهم غبار ناس اوادم ويخافون الله بس عدهم عداوات هوايه يا امي.. شكد همه اوادام بس عداواتهم دتأثر على الكل وتتحكم بيهم وبكلشي يعيشوا حتى براحتنا النفسية

-تَـمني: وتأمنين على روحج وتالة ببغداد بعيد عنهم؟؟ على الاقل همه هناك موجودين يكدرون يساعدونا لو صار ما صار

-حنين: صارلنا شكد كاعدين ببغداد اكو احد اعترض طريقنا او زعجنا بشي؟

-تَـمني: خالة ا..

-محد اعترض طريقنا او سببلنا مشاكل حبيبتي، من چنه عايشين قريب منهم تعذبنا وعشنا معاناتهم وياهم وحالتنا تبهذلت والسبب مو منهم لا والله يجوز انتن عبالجن اني ماحبهم بس وغلاوتچن عندي اعتبرهم اهل مو بس عيالج لكن يا يمة عادونا على عداوتهم وكرهونا على كرههم

-تَـمني: تره عاصف اجه واعترض طريق تالة قبل فترة ولولا امير جان الله اعلم شسوه!

-حنين: ميسوي بنتي

-تَـمني: شنو المخليج هيج متأكدة!!

-حنين: لان تالة حچتلي كلشي وكالت الرجال لمسة ما لمسني وما سوالي شي

-تَـمني: خالة من الاخير انتِ متردين ترجعين هناك! وبراحتج!!!

تركتها شايطة وگلبي مجمر، شكد جنت فرحانة ومكيفة بس انطفت فرحتي من شفتها معارضة تجي ويانه.. يمكن حقها متريد ترجع ومرتاحة هنا وحياتها ماشية مثلما تريد بس شلون راح اكدر افارقهن واعيش من غيرهن؟؟

وكفت عدل اجر نفس واهدأ نفسي حتى ما ابجي وكملت ترتيب غراضي، خليها براحتها شسويلها اظل اركض وراهة واتوسل بيها العمر كله؟ خليها وين متريد تعيش خليها تعيش!!

طلعني من افكاري وقهرتي صوت موبايلي امير يتصل، اخذت شهيق وزفير اضيع رجفة صوتي وجاوبته..

-ها امير

-نزليلي تَـمني واكف انا جوه

-لعد متنزل تودع خالتي؟

-ليش ما تجي وياچ؟!

-لا

گلتها وانفجرت بالبجي ما تحملت ابقى ساكتة، شكد حاولت اسيطر على نفسي حتى ما اقلقه بس فشلت، كعدت على الجرباية ابجي واسمعه يحجي ويايه بدون ميحتاج يعرف سبب بكائي..

-انا صاعد هسة جاي

سديته منه وكمت للحمام غسلت وجهي ورتبت نفسي ورحت للصالة من سمعت صوته جاي مناك، سلم عليَّ ووكف يحجي ويه خالة ويقنعها تجي ويانه بس خالتي جانت هادئة ومبتسمة ورفضت بأحترام..

-الامـير علي: ما بأذنج ماي عمة

-حنين: روحوا يمة وداعة الله ان شاء درب السلامة

-الامـير علي: الله يسلمج

-حنين: انتبهي على نفسج حبيبتي وابقي على تواصل ويايه مو تكطعين

هزيت راسي ساكتة الغصة ببلعومي ماكدر احجي، ودعتهن بحضن وداع اخير وطلعت ويه امير الطلع يسحل بجنطي..

-الامـير علي: شنهاي جايبة الدنيا كلها وياچ

-تَـمني: طبعاً اذا انتَ چنت عايش بغير عالم

-يعني شني

ابتسمت بدون لا اجاوبه ونزلت وياه لسيارته، شكدما زعلانة لان خالة وتالة ميرجعون ويايه بس مدا اكدر اتغاضى عن الفرحة التارسة گلبي واني بسيارة الامير.. امير القديم الي قضى الطريق كله يتلفت عليَّ ويوزعلي ابتسامات..

بعده يطير طيور من يسوق ولازم كل شوية واحد يتشاهد بس ميخالف بعدها ايده ماخذة على السرعة، وگفنا بالطريق مرتين ونزل يشتريلي اكل ونميات وصعد مرة ثانية وعكس كل المرات ابد ما نمت خفت لا هم يرجع راسه يوجعه ويغفل عن الطريق فـ بقيت ملهيته لحدما وصلنا البيت من بعد ساعات طويلة..

-الامـير علي: نورتي بيتج تَـمني

ضحكت فرحانة ونزلت من السيارة بسرعة، نزل ويايه هو ونزل جنطتي ووصاني منطلع صوت من ندخل لان يمكن اهله نايمين الوقت كلش متأخر، أيدته ودخلت قبله فتحت باب الحوش من السيم المشكل بره وهو اجه ورايه وجنطي بيده..

-الامـير علي: طابوگ محملتهن مو هدوم

-ههههههه امييييير

-يا بعده

ابتسمت ودخلت وياه ايدي بأيده اني اجر بجنطة وهو بجنطة، قبل لا ندخل للبيت باوعت على الكرويتة الموجودة بالحديقة ودرت وجهي للنخلة والمرجوحة وابتسمت..

-تَـمني: بيهن ذكريات هالمكانين

-الامـير علي: كلما اعاين للمرجوحة اتذكر سحر المحبة

-هههههه سحر المحبة الوهمي

ضحك يهز راسه واشرلي نطب بس لو بيدي ما ادخل اريد اكعد هنا شوية واشبع من حديقتهم الاحبها بس حتى لو ردت اكعد هنا ما راح اكدر بسبب باب المطبخ الي انفتحت وظهور عمو علي وخالة رسمية تهلهل وتهوس بشيلتها وتطفر بمكانها بفرح..

-رسمية: اوول ما نبدي وشنكووول لا اله الا الله الف الصلاة على الرسوول لا اله الا الله

ابتسم امير مستغرب من فرحة امه واستغرب اكثر من ركضت عليه وحضنته من رگبته ولزمته تبوس بيه وتشبگ بي وتبچي، تبجي بصوت عالي وجسمها يهتز..

-الامـير علي: يمة ليش تبجين صاير شي؟؟

-رسمية: يمة يا بعد امك اموري وليدي السبعع رجع وليدي

باسته بخدة حييل وشمته من قميصه ورجعت تحضن بي وتبوس بگلب ملهوف، عافها الامير ما حاچاها بعد بس نقل عيونه القلقة على ابوه المبتسم وما انطى ردة فعل تشبه امه..

-شيخ علي: نورت بيتك شيخ

-الامـير علي: اريدن اگول خ** على الشيخ ومستحي منك

وخرت منه امه تضحك وضربته على ظهره ما راضية وهو دخل يسلم على ابوه سلام عبالك البارحة چان شايفه وابوه هم ما لح وياه ودخلنا كلنا سوه جوه.. طرت فرح من شفت الكل كاعد هنا منتظرينا ولد بنات چناين وحتى اولادهم موجودين كلهم سهرانين منتظرين رجعتنا..

من بعد سلام حار ودموع الاشتياق اللتمينا كلنا بالصالة سوالف وضحك وما حسينا بالساعة ولا كأن الوقت نص الليل، حاطة حسوني ابن تقي بحضني وكاعدات اني وليلة ندگ فچ وباقي البنات محاوطاتنا ويعلقن بين السطور..

ثاني يوم جان احلى يوم بحياتي، فتحت عيوني واني بين ايدين الامير محاوطة بدفو جسمه وحنيته المشتاقتلها.. كمت من الفراش سبحت وبدلت ونزلت جوه اسمع اصوات الكل كاعدين ويمكن يمكنن واحد من زوج المشاكل مسويله طرگاعة لان علي الحـق من الصبح اجه وحزامه بيده..

عفتهم يتعاركون وعلي النور يطفر على القنفات وعمو علي كاعد يستمتع ويشرب بأستكان الچاي عبالك ديشاهد مسلسلة ورحت للمطبخ ويه البنات احضر الريوك..

-تَـمني: اوووي شكد مشتاقة لهاللمة

-حبيبة: بعد طولي والعباس مو بگدي كل يوم اتنغصلج وأفكر بيج

-ليلة: اي اي خوش هسة عوفن السوالف واللگنلي حل ويه مصيبتي

-شمس: خوب انتِ انجبي سوايتج ما تتسولف

-ليلة: ادري بيه ثولة بس ساعدني

-سبأ: الله يساعد ابا الحسن عليج شوطتي الزلمة

-تَـمني: تدرون اني كلشي ممفتهمة شمصخمة ليلة هالمرة

-ليلة: لا تره ما مسوية شي بس ذني چلبات ويبالغن

-ابرار: تَـمني انا خليني احجيلج شمسوية هاي الصلفة وانتِ احكمي.. گبل چم يوم رايحة لبيت خوالها هي ورفل وماخذة اموري الصغير وياهة وهناك موجودين ولد خوالها كلهم وطبعاً كلهم بعدهم عزابية فـ...

-ليلة: لااا لا تكملين سكتي سكتييي

-ابرار: والزهرة الا اكمل.. المهم فـ من راحت كاضها واحد من ولد خوالها اسمه سجاد وگايللها ليلة انتِ من تزوجتي لليوم انا اتحلم بيج واكعد من النوم مختنگ

-تَـمني: يااا ليش!!

-حبيبة: هيلگة! رعونة! زحف! خفة! طيحان حظ!!

-تَـمني: وتالي شصار؟؟

-ابرار: عود هي صايرة خوش مرة وگايليتله ليش تتحلم بيه وهذاك صلف وعينه گوية جاوبها "عبن من گبل لا تتزوجين انا هاويچ ورايدچ"

-تَـمني: وسكتيله؟؟؟

-ليلة: يبووووو ما سكتت والله ما سكتت وطيحت حظه بالرزايل خليته ما يندل دربه

-شمس: وشنو الفايدة حبي؟؟ شنو الفايدة؟ انتِ رحتي لزلمتج وخليتي يغدي نار كببررره

-تَـمني: عزا گلتيله؟؟

-ليلة: لاا ما گتله شمالجن شني ثولة انا

-حبيبة: لا بس مطية وگتيله گبل لا تتزوجني انتَ اكو من چان عاشگني ورايدني ولليوم يتحلم بيه

-تَـمني. عزا العزاااچ ليلة!!

-ليلة: چا هو ضوجني وگالي لوما انا متزوجچ ياهو ياخذج على هاللسان!

-حبيبة: حبي تعاركي وياه على هالحچاية بس لا تجيبيله طاري زلمة ثاني!

-ابرار: هاي وانتِ تعرفين كللش زين زلامنا ضاربهم رعاشي من الغيرة

-شمس: وعلي انا لليوم اذا جبت طاري ولد عمي كدام بدر يفكلي عيونه هاكبرها وتكضه رجفة

-تَـمني: فهموني وهسة ابا الحسن معصب عليج لو شنو؟

-ليلة: اي وگاعدلي ركبة ونص الا يعرف ياهو هذا الزلمة واذا كتله ابن خالي يروح يذبحه ويرجع

-حبيبة: لا ولج سكتي لا تكليله مالنا خلك مشكلة جديدة لعبت رواحنا

-تَـمني: ليلة شبيچ انتِ خو جان لعبتي بعقله وغيرتي الموضوع بسرعة شجااچ

-ليلة: ماعرف شلون ولجن انا عوبة من توصل يم حسيون اظل اچفص ببطنه

-تَـمني: اتوقع كلنا عوبات من يجي الموضوع لازواجنا واوضح مثال كدامج اني وسبأ

-سبأ: اي وعلي

-ليلة: لا بنات انا اچفص بمصارينه يعني مو اتفهى مادري شبيه انچلب وياه

-شمس: حبي هسة روحيله اخذيله استكان چاي وكعدي احجي وياه واذا فتح وياچ الموضوع مرة اللخ گليلة جذب انا حجيت هيج بس حتى اختبر غيرتك عبني اعشگها

-ليلة: عود صدگ اكو زلم يتقشمرون بهالتمسلت؟

-حبيبة: كلشي اكو خية هسة روحي گبل لا نتريگ يلا يلا روحيي

**

"لـــيلة"

دفعن بيه وقشمرني بحچايتين وهاي انا شايلة بيدي استكان چاي ورايحتله مثل الغبية اضحك عليه بچلمتين اغبى من تصرفي..

صعدتله فوك بعده بالغرفة ما نزل كاعد ويه امير يخاف عليه لا يفز فـ ابد ما نعوفه وحده، فتحت باب الغرفة شفته كاعد وبيده موبايله يكلب بي بس شافني شمره وفتح حاسبته يسوي روحه جاي يشتغل..

-ليلة: هااا هااا شعندك ذبيت الموبايل حسيون بس لا جاي تخوني

-ابا الحسن علي: روحي ما طايقها الصبح ترديني اطيق غيرج

-ليلة: اووووي يعني طايقني انتَ هسة؟

-هاي الاوي لو عدتيها ا....

-اي اي شبيك بس جنت متأثرة بـ تَـمني جوه

-شعندج جاية امير بعده نايم

-جبتلك چاي

-منچ من الشيطان

-مني مني هاك اشرب وصير مطيع

اخذ الاستكان من ايدي يفر بيده ما عاجبه عاد ابا الحسن لو طنگر شيحمله، كعدت بصفه على الجرباية ودرتله ظهري اسمعه بس يشفط بالاستكان يشرب ويمطگ چن اول مرة يضوگ الچاي..

-احم.. حسن

-خير

-شبيك منفس عليَّ

-تعرفين ليش

-چا اريد اكول شي بس اخاف تعصب اكثر

-الله يستر شعندج

-احلفلي ما تضوج وتعصب

-كولي شكو

-احلفلي اول

-ليلة!!

-خلص خلص راح احجي شبيك ما تتحمل

-شنو السالفة شمسوية بعد؟؟

-شني حسن لهدرجة تشوفني ام مشاكل

انقهرت من نظرته عليَّ وتوقعته راح يجاوبني بشي يقهرني زايد بس ما علق ولا جاوبني، درتله جسمي اواجهه وظليت اعاين لعيونه بدون لا احجي..

-شنو صاير ليلة؟

-تتذكر من كتلك اكو زلمة يتحلم بيه ويحبني غيرك؟

-ااااااخ انا كلت جاية خاطر تجلطيني اليوم

-شبيككك خليني اسولف

-سولفي سولفييي خلي القولون يطگ مو بس يهيج

-حسن انا چذابة!

-شني؟؟؟

-چذابة لا اكو واحد هيج كايل ولا ابد وانا حجيت هيج بس خاطر اختبر غيرتك عليَّ

-لا بله؟؟

-اي

-اشايفتني طفل؟؟ شايفتني طفففل ليلة؟؟؟

-لا بس..

-بس شني؟؟ احجييي وخلصيني ياا عااار حاچي وياچ هالشكل احجييي وريحيني!!

-ابو امير اوكف اصبر بس اصبر شبيك صاير ما تتحمل شي يا عيوني خليني افهمك على كيف

-يلاا فهميني!؟؟

-بس لا تصيح وتعلي صوتك الفرخ نايم

-احجي ليلة احجيي خلصيني

-حسيوون

-ليلة احجي!!

-حسن انتَ صاير ما تحبني!!

-شني؟؟

-صاير ما تهتملي وتغيرت! ما جاي احس بحبك ولهفتك عليَّ مثل گبل بردت ومشاعرك وعشگك لـ ليلة الچان ينضرب بي مثل بالعشيرة اختفى!!

-انتِ شتحجين شجاب هالسالفة هسة!

-عبن مقهورة ومحترگ گلبي وانا اجيك كل يوم بالليل اريد اگضي وكت وياك وانتَ تصد وجهك عني وتنام!

ظل ساكت ويعاين لوجهي، من صدگ مقهورة وحاز بگلبي بروده وياي صاير ما يهتم ودائماً باله شارد وصافن ودائماً تعبان ووضعه كللش ما جاي يعجبني..

-حسن انتَ ما منتبه على نفسك وتقصيرك بحگي وحگ ابنك

-تقصيري بشنو وانا ذاك اليوم سفرتكم!

-ما انكر سفرتنا وونستنا بس مو كافي

-شتردين اكثر؟؟

-ما يكفيني هالشي مو كاافيي

-اي شتردييين

-اريددددك ترجع مجنون ليلة!!!

فك عيونه وحلگه سوه مصدوم من حچايتي، اعترف انا هم مصدومة وما تخيلت بيوم راح اشتاق واريدن ابا الحسن الچان مسودن بـ ليلة يرجع بس صدگ اريده يرجع!

-ليلة: انتَ عودتني على عشگ مسودن ما يرضيني عشگ رزن!

-ابا الحسن: من كل عقلج انتِ؟؟

-اي وعلي!

-ولج ليلة خبلتينييي ليييلة

-تستاهل عبنك متغير!

-انا ما متغير انا گتلج جاي امر بضغط بشغلي وعندي قضايا ومشاكل اكثر من شعر راسج!

-اي وانا شكو چا العنده شغل يعوف مرته وابنه

-وين عايفكم انا ولج بالشارع؟؟

-اسكتت حسن اسكتت انا بعدني مقهورة منك وگلبي يوجعني

-لا تگلبيها عليَّ انا بعـ...

-وگلبي ضااايج كلللش ضايج اي وداعة اموري

-ليلة لا تضيعين السالفة خليني احجي انتِ مو...

-ومحترگ ومفلحم ويوجعنييي كللش حيل حييل يوجع

-ليلة!!!

-وحازة بي حچايتك من گتلي لوما انا ماخذج محد ياخذج على هاللسان

-چا حگي! يا وكحة تكول لرجلها اكو من يحبني ولليوم يتحلم بيه!!

-چذذذذب خوية چذذب ادرري غلط بس كلت هيج خاطر اشوفك تغار عليَّ

-وهسة شفتيني؟؟؟

-اي

-وشحصلتي؟؟؟

-ماحصلت شي بس فرحت

-چا شكد صلفة انتِ!

-هستوك دريت

صفگ ايد بأيد مأيس وطافرة روحه مني بس ماهتميت صدگ احسني فرحت وارتاحيت هسة، مفتقدة غيرته وحبه ولهفته عليَّ صرت حتى اشك بنفسي خاف المشكلة مني خاف مسوية شي ومضوجته وما حاسة بروحي ولو انا من يوم يومي اضوجه بس هم ما هملني..

-ابا الحسن علي: كعد امير كوميله

-ما اكوم

-ليلة

-ما اكوم هو مو ابنك ما تروحله انتَ

-ليش هالعناد ليلة ليش

ما جاوبته وكمت لـ امير من كام يبجي گلبي ما انطاني اعوفه، شلته من فراشه اهزهزه بيدي واسولف وياه بصوت ناصي..

-ليلة: جوعان ماما جوعان فرخي الحلو

-ابا الحسن: ليلة

-ليلة: هسة ننزل واوكلك بيضة طيبة

-ليلة

-ليلة: يلا ننزل يم حسوني وحمودي وصفاوي وفطومة ويمكن يجي يوسف وتلعبون

ما تجاوبت ويه ابا الحسن وتمشيت بـ امير للباب، كضيت اليدة جاي افتحها ووگفت ايدي على صوته وهو يكول..

-ليلة انا احبچ

ظليت واكفة بمچاني ما تحركت، منطيته ظهري واموري حاط راسه على چتفي واسمعه يتثاوب بعده نعسان..

-ما انطفت لهفتي عليج ولا قل حبي، يشهد الله لليوم ما مصدگ انتِ صرتيلي وعندي وليد منج بس يا ليلة الدنيا مو دائماً ويانه.. انا مستحي اگلچ عندي مشاكل لدرجة وصلت بي مرحلة ردت اشگ هوية النقابة واذبها

اللتفتت عليه مفجوعة شني يشگ هويته شني وضعه صعب مستحيل ابا الحسن يوصل لهالمرحلة ويترك شغله الا اذا جان كللش متأذي ومشلوع گلبه..

-ليلة: شنو جاي يصير وياك حسن؟؟

-انا ما گتلج خاطر تخافين انا بس ردت ابررلچ وافهمج مستحيل راح يجي يوم وامل منج لو تبرد نار عشگي كل ما بالموضوع انا مضغوط من الشغل وتعبان

-فهمني شنو السالفة بالضبط؟؟

-لا تخافين ليلة محلولة ان شاء الله

-ابا الحسن فدوة والله ظل بالي

-دخلت علي التـقي وسولفتله الموضوع كال خليها عليَّ هو راح يحلها بمعارفه

-ليش ما تسولفلي حساني

-عبن السالفة انحلت ومن شوي سديت الاتصال من تقي واتفقنا على الخطوة الجاية

-اكيد؟؟

-وعيونج

-ابا الحسن فدوة لطولك انتبه لنفسك انا ادري بيك مستلم قضايا صعبة وسمعت عمي علي ما راضي بس نعرفك شكد عنودي وتشتري المشاكل مشتره وانا ما رايده منك شي لا عبالك اگلك عوف شغلك ومستقبلك بس اريدك تفكر بيه وبأبنك گبل كل كلشي تسوي

-تخافين عليَّ ولج ليلة

-حسن مو وكتها هسة اوعدني

ضحك وكام من الجرباية يجي بأتجاهي، وگف گبالي ضبط وگال والضحكة ما فارگت وجهه..

-طلعتي تخافين عليَّ وتهتمين

-لا يعني مو هيج بس...

-وتكولين ماحبك وما اهتملك وانجبرت عليك

-اهوووو شيخلصني بعد امشي ننزل امشي

شهگت مخترعة من مد ايده لحلگي وجر لساني بأصابعه بدون لا يوجعني، ما لحكت ادفعه وانطي ردة فعل لان فكيت عيوني ويه ما گال من بين سنونه..

-اذا سمعتج تحجين بزلمة ثاني بعد لساانج هذاا اگصه

دفعت ايده ورجع كضني من ايدي يتلاوه ويضحك يتداهر وياي وامير بين ايدي يروح منا ويجي منا..

-هدنيي الفرخ راح يطيح

ما رضى يهدني وظل على سوالفه شكد حاولت انهزم منه بس وين اكدر والله ولا اكدر لهالزلمة ورعونيته وياي..

-حسنن انا مزاعلتك وخرر

-اي انا اعرف شلون اراضيج

-وخر وخر زعلانة انا

-جيبي امير جيبي

اخذ الطفل من ايدي ورجعه لفراشه سوده عليَّ رجع نام وهو جوعان، مغط ابا الحسن جسمه لفوگ وكال وهو يعاين للساعة..

-عندج نص ساعة تقنعيني بيها انتِ متندمة على حجايتج لا تصير مو حلوة

-لا بله؟؟؟

-والله يلا يلا الوكت جاي يمشي

درت وجهي اعاين للباب وافكر اذا اريد اشرد منا راح احتاج خمس ثواني بس راح اكدر انهزم بدون لا يكضني هالمخبل ويحبسني هنا؟ اي اي اللحگ چا ليش.. تحضرت وشلت ذيال صايتي للانهزام بس ما لحكت اطبق خطتي لان برمشة عين شفته راح للباب وقفلها ويااا عليييي دخيلك.......

ما گعد راحة حسيون الا من اندكت الباب علينا واجانه صوت رفل تصيح تريد اموري، ضحكت منتصرة ودفعته وركضت افتح الباب استقبلها..

-ابا الحسن: لا ادب لا اخلاق لا احترام لا حشيمة لا اصول

-رفل: ديلا يلا انطوني امير اريدنه

اخذت اموري ونزلت بي تركض وانا هم انتهزتها فرصة وركضت اطلع وراهة وانشنطت ايدي من جرني ابا الحسن ورجعني الغرفة..

-تعاي حبيبتي تعاي يروحي عندي سالفة وياچ.........

**

"ســـبأ"

ركضت للحمام من حسيت بمعدتي تگلب اووف دمرتني هالنساة، هذا حملي يختلف عن حملي الاول ونساتي هم غير.. كلشي جنت اكرهه من جنت حامل بـ حسين حبيته بهالحمل وكلشي جنت احبه گبل كرهته..

لحد هسة ما مصدكة انا حامل مرة ثانية وبهالسرعة، اول ما عرفت جنت خايفة وما رايدة بس من سولفت ويه علي التـقي وشفته شلون متقبل الموضوع وفرحان بي تغيرت وفرحت على فرحته وتحمست اجيب بالسلامة..

من يوم رجعت تَـمني لليوم حسوني يمها هي تنزع وهي تلبس وهي توكل وتشرب وتبدله وهو يموت عليها يبيع الدنيا كلها علمودها على كولة اخوان علي التـقي يسموه "لوگي تَـمني" اظنه يحبها اكثر مني عبنها تلعب وياه وتهتم بي هوااي..

گبل جنت استهضم من اشوفه يريدها اكثر مني بس تعودت وارتاحيت من شفتها شلون تهتم بي وتعامله چن ابنها واجت فترة حتى تنيمه يمها بالغرفة الظهر وتطور الوضع وصارت حتى بالليل، ليالي تاخذه يمها هي وامير يلعبون بي ويتونسون وياه ويغفى عدهم واليوم هم اخذوه ولحد هسة ما رجعوه..

-علي التـقي: عوفي بوية عوفي

-سبأ: تقي فشلة منهم الفرخ لازگ بيهم

-علي التـقي: غربة قابل همه خلي ارتاحي منه ومن وكاحته شوي انتِ حامل

-لا لا عيب انتَ لو تعرف شسوه اليوم ابنك

-شسوه ابن ابوه

-هو صدگ ابن ابوه اليوم هامش استكان الچاي من ايد علي السور وطيح الچاي عليه خله سور يطفر محترگ وهذاك يضحكك مكيف حسباله يلعب وياه

-هههههههههههه بعد گلبي گلبه

-تقي وليدك وكح كللش وكح

-هطوله وكل البلا بي

ضحكت وياه وتمددت على الجرباية بصفه اريح ظهري، سكتنا شوي وبديت اللوب ماتحمل ابقى نايمة هيج وتقي بصفي وما اشوفه، انداريت على صفحتي خاطر اعاين لوجهه واشبع منه شوف..

-علي التـقي: باجر لا تجهدين نفسج بالعزيمة مو تسويلي بيها عيب وفشلة وما يصير ما اساعدهن

-سبأ: ماكدر استحي تقي

-سبأ انتِ لوما حالتج صعبة والطبيبة كالت تحتاجين راحة وما تتعبين نفسج ما اوصيچ عبن اعرفج ما تكعدين بس هسة اريدج تتحملين وتبقين مرتاحة

-احاول عبن اصلاً تَـمني حالفة محد تساعدها تكول هي ناذرة اذا امير رجعتله ذاكرته تسوي عزيمة وهي تطبخ بيدها

هز راسه اي وغمض عيونه ومثل كل يوم ما يطول دقيقة اذا ما يغفى ويسلمها من التعب، تنهدت وانا اتأمله بهدوء وافتر بعيوني على وجهه الاعشگه واحمد الله.. زواجي من تقي مو بس چان مستحيل چنت حتى استحي اتحلم بي وافكر بيوم ممكن ننجمع بس رب العالمين اذا راد شي متصعب عليه..

ظليت الليل كله سهرانة بالي ويه الباب خاف تندك ويجيبون حسوني بس للصبح ما رجعوا وظل يمهم خطية.. الصبح نزلت من فوك من وكت على صوت عمتي تصيح بينا حتى نلحك ننظف وبطلعتي من الغرفة تَـمني طلعت وبيدها حسوني مبدلتله ومسبحته ومشربته ممية..

-سبأ: سودة عليَّ تعبج حسين

-تَـمني: لاا ياا صدگ تحجين بالعكس كلش تونسنا وياه امير كيّف عليه

-يا بعد حيلي الله لا يحرمكم من هالنعمة

-امين حبيبتي سبأ امين

نزلنا سوه وانا وليلة وشمس استلمنا البيت وابرار وحبيبة وعبق استلمن المطبخ والديوان وتَـمني على الطباخ واكفة ماا كعدت.. من السبعة الصبح وكفت على حيلها للـ 2 الظهر هي ما كعدت ولا استراحت وحلفت محد يساعد بس من تأخر الوكت وشافت روحها توازت طلبت بس نسوي الزلاطة والمقبلات الي الامير يحبهم..

-رسمية: يا مقبلات خايبة هبيط عدنا محد يعترف بيهن

-تَـمني: خالة والله امير يحبهن وطلبهن حبابة خلينا نسوي

-رسمية: بكيفج يمة بس انا كتلج ما ياكلون ويظلن

-تَـمني: حتى لو المهم يشوفهن بالسفرة ويعرفني ما نسيته

ابتسمت عمتي رسمية وهزت راسها ودارت وجهها على ليلة وغمتها، فكت حلكها ليلة مصدومة وصاحت..

-شنييي هاي شني شني شنيييي

-رسمية: عايني للنسوان الزينة التدور شيحب زلمتها عاايني وتعلمي

-ليلة: ليش يمةة لازم موته ابنج من الجوع وانا مادري

عضت عمتي على اصبعها متحلفتلها وراحتلها تكفخها على راسها وترزلها على لسانها بس عود ليلة اهتمت لو ضاجت؟ ابدد ولا اهتمت ظلت تحرك بچتافاتها ما مهتمة وكملت تثرم بالزلاطة..

وصلوا بيت عمي ناصر وبيت عمي صمد وبيت عمتي ابتسام وعمة غزوة كلهم اجوا، شكد تمنيت رهف تجي بس ادري بأبوي موجود اليوم بالبيت وراح يعاند ويسويلها مشكلة فـ هي اصلاً كالت ما تجي وحلت السالفة..

فرشنا السفرة واللتمينا كلنا النسوان بالصالة وفتحنا باب غرفة كرار خاطر نكفي وهم ما كفينا اكو بينا كعدنا بالمطبخ بس جانت العزيمة تخبل والاكل طيب كللش لدرجة محد من نسوان عمامي صدگ تَـمني الطابخته وهذا نفسها هي..

-عمة ابتسام: عمي ام بيت معدلة ما شاء الله

-رسمية: من امس تشتغل خطية، نظفت اللحم والدجاج ونكعت التمن وجابت كلشي تحتاجه من السوگ وطبخت

-غزوة: من گبل تَـمني ام بيت اذكر خالتها گالتلي يعتمد عليها

ابتسمت تَـمني على چلامهن عنها وجانت كلش فرحانة رغم التعب المبين عليها، للعصر كعدنا نشرب جاي وبدوا يرحون لبيوتهم بس رفل وزهراء بت عمي صمد بقن يمنا لليل..

ايامنا جاي تمشي بدون مشاكل الف الحمدلله، من بعدما رجعت عافيته للامير والبيت يضحك والكل مرتاح واعصابه راخية.. ظلوا اخوته على تواصل ويه الطبيب مالته خصوصاً من لاحظوا عليه يتذكر شغلات صارت من جان فاقد ذاكرته وهواي شغلات ما يتذكرها مثل ولادة ابن ليلة وابا الحسن فـ الطبيب طمنهم وكال هالشي وارد..

حسب ما افتهمت اخوته بدوا شوي شوي يفهموه ان جان فاقد ذاكرته لفترة طويلة بس حسب ما افتهمت من تقي امير ما يصدك ويظل يضحك عليهم ويكول هالشي مستحيل بس تَـمني تكول هو مصدگ هالشي لچن ما يحجي بصوت عالي عبن بعده مستغرب ومستحي بس شي على شي ما صار الچنه خايفين منه حسبالنه راح ينهار ويكلب الدنيا من نگله بالعكس جان هادئ نوعاً ما..

راحة نفسية من اشوف البيت هادئ ونظيف والوجوه مبتسمة بالخصوص وجه تَـمني.. البت فراشة وتفتر بالبيت يومية تبدل وتتمكيج وتسوي شعرها وتضحك وتلعب ويه الجهال وتنظف وتطبخ ويه ابرار وتشاقه وتتداهر ويه ليلة وشمس وعمتي رسمية مكيفة على الوضعية وفرحانة لدرجة اليوم كاعدة من وكت وسمعتها تكول لـ شمس وهي تشرب استكان چاي..

-خنشوف فهاوي تنزل شلابسه اليوم

-شمس: ههههههه عمة والله عليج سوالف

-رسمية: وعلي تونس

-سبأ: صدگ تونس وشعرها كللش حلو شلون تسوي

-شمس: الحمدلله والشكر من ارتاحوا واستقر وضعهم

-رسمية: اي والله لو بس تحبل ويرتاح گلبي چان انا بخير

-شمس: بعد كله رزق من ربج

ذبت حسرة عمتي وظلت ساكتة، جاي اللاحظ قلقها عليهم واعرف نيتها من جابت طاري موضوع حمل تَـمني هي صدگ خايفة عليهم ومنتظرة هالخبر على نار بس الحمدلله من صارت ما تفتح الموضوع وياهة بشكل مباشر وما تحسسها..

بدن البنيات يتحضرن للدوام وتَـمني خريجة بس كالت تريد تتعين بمدرسة اهلية قريبة علينا، فتحت الموضوع ويه الامير وتقبل السالفة بسرعة كال ماعنده مشكلة خصوصاً المدرسة ابتدائية بنات ومابيها أي رجال..

-ليلة: ويمته تبدين دوام؟

-تَـمني: من باجر ان شاء الله

-ليلة: وشصار على موضوع سيارتج شو بعد ما طلعتي بيها؟

-تَـمني: من جابها امير من بغداد لليوم ما طلعت بيها لان ببساطة اصلاً مدا اطلع من البيت

-ابرار: وانتِ ليش حابسة روحج هالحبسة شمالج ما تطلعين

-تَـمني: ماريد مرتاحة هنا احس.. احس ما اتمنى اطلع ابد

ضحكنا كلنا وهي ابتسمت چن بأبتسامتها تأكدلنا ما جاي تبالغ بحچيها، فرحتلها هواي فرحت للي جاي تعيشه والاستقرار النفسي الوصلتله هالبت.. تستاهل تَـمني اگولها من كل خاطري تستاهل..

-عبق: بنات شبيها حبيبة تلوب؟ شبيچ حبيبة والله قلقتيني

-حبيبة: چا بيت عمي مسعود راح يجونا اليوم والله يستر

-سبأ: اهلي؟؟

-حبيبة: ليش ما تدرين جايين اليوم؟

-سبأ: لا والله رهف ما كالتلي

-حبيبة: اظنها اصلاً ما تعرف عبن عمي مسعود امس بالليل متصل بأبوي وگايله اريدك بچلمة باجر جايك للديوان

-ابرار: استغفر الله عود كلنا ارتاحينا

ضميت وجهي بأيدي محتارة وخايفة من جيتهم، ادري بأبوي ما يعتب بيت عمي علي الا اذا عنده قنبلة ويريد يفجرها ببيتهم وصدگ! صدگ اجه العصر وصدم الكلل من گال ببرود فضيع..

-مسعود: خوية ابو علي انا جيتك اليوم وحدي بدون الولد عبني ماريد مشاكل وضيجة خلگ وانتَ تعرف ويلادي من يتلاگون ويه ولدك شيصير

-شيخ علي: شنو الموضوع مسعود؟

-مسعود: خوية بدون مشاكل وطلايب وهوسات اجيت اگلك ماكو قسمة بعد بين وليدك وبنيتي رهف خلي يطلگها

گبل لا يجاوب عمي فز سور من مچانه ونتر..

-شني؟؟ شني ماكو قسمة شكوو شصار هو؟؟

-مسعود: احترم نفسك واگعد بمچانك

-شيخ علي: مسعود! أخرت زواجهم وسكتنا! سويتلك سالفة وبلبة علبو تريد خطوبتهم تطول وسكتنا! بس مال تجي هسة تنهي كلشي وبدون تبرير بي خير لااا لهنا وحدك!!

-مسعود: لا شون ماكو تبرير انا اخافن على بنيتي عبن بيتكم مو امان وگلبي ما مرتاح! انا انطيتكم الجبيرة وبعد خلفت وجابت مو مال اطلگها بس ليش اجازف بالصغيرة؟

-علي السور: شنيي بيتنا مو امااان شني تجاازف عمي شهالحجي؟؟ شكوو وين راح نطببها حرب؟؟؟

-علي الحـق: علي السور! اكعد خلينا نفتهم!

-شيخ علي: مسعود من الاخير فهمنا سالفتك مالنا خلگ وجع راس

تفاجأت من أسلوب عمي ويه ابوي هاي اول مرة يحاجي بهيج نبرة چنه ما طايق الكعدة واظن ابوي هم لاحظ هالشي لان رأساً كال بأستهزاء..

-مسعود: چا شتفسر طيحة سبأ من الدرج؟! چنتك الحبلة اندفعت من فوك درج بيتك ليجوه لولا ستر الله جان ماتت هي وفرخها!!

-شيخ علي: والله ستر عليها وما ماتت

-مسعود: تريدني انطيك بنيتي الثانية خاطر تكتلوها فرد نوب!!

-شيخ علي: هذا سبب جيتك؟ تريد تفصخ الخطبة؟

-مسعود: اي!

-شيخ علي: يجرالك خوية هذا هو

-علي السور: بووووية شتحجي انتَ شنو يجراالك لعببب هو لعبببب

-شيخ علي: علي السور!!!

-علي السور: وعلييي ما اسكتتت مااا اسكتتت!! اذاا خايف على بنيتك من بيتنا فـ انا مستعد اطلعها بيت وحدهااا

-شيخ علي: سووور!!!

-الامـير علي: سور اكعد خلينا نتفاهم

-علي السور: ماا اتفاهم انتممم كلكم ضد هالزواج ومنتظررين هاي اللحظة!! صارلكم شهوور تشمرون بينا وما ترضون نتزوج لحدما وصلت لهناا وتردونا نفصخ!!

-شيخ علي: كرار اخذ اخوك بره

-علي السور: مااا اطلععع مو طفففل انااا مووو طفللل ما اطلگهاا لو تنطبگ السمااا على الگاااع

من الصوت العالي الصار وصياح علي السور مبين كرار ونور طلعوا بره الاستقبال، گلبي ناار عليهم الله يساعد كلبج يا رهف اكيد ما تدري بسوالف ابوي.. جنت حاسة ما راح تكمل هالخطبة على خير من كام يشمر بيهم ويأجل بموعد الزواج ويومية مطلعله سالفة شلع گلبهم..

-شيخ علي: ينتهي كلشي حسب الاصول ولا انتم تحجون عنه بسوء ولا احنه

-مسعود: يعني شني؟ اذا سألوني الوادم ليش طلكت البت غير اگلهم السبب

-شيخ علي: بس انتَ هيج راح تضرنا وتضر سمعتنا بين الناس

-مسعود: چا چذب؟ مو يومية واحد طاب لبيتكم ولاعب بنساوينكم

-شيخ علي: لهنااا واحترم نفسسك!!

ركضت للمدخل من سمعت الاصوات تعلى وكبت هوسة بالديوان، جازفت وفتحت شوي من باب المدخل خاطر اشوفهم وتوترت من لكيتهم واكفين على حيلهم وتقي واخوته كلهم يتصايحون ويه ابوي وعمي علي شاب نار..

-مسعود: كض ولددك عليي گبوا عليَّ مثل الچلاب المسعوورة ما يستحوون يتجاوزون على عمهم لو هاي عبن شفتوني وحيدد تورشعتونيي

-الامـير علي: المحترم نحطه على راسناا فووگ بس انتَ ماا تستاهل الاحتراام

-مسعود: تسودنتوا عبني حجيت الحقيقة؟؟ لا تخلوني اخذ بنيتي الثانية منكم واخليكم تتلاطمون ويه الحيطان!

-علي التـقي: انتَ اخذهاا خاطر افضحك واخزيك وعليي

-شيخ علي: انتَ مو تريد تطلگ رهف من سور؟؟ هذا هو نطلگ بس ما تجيب طارينا بسووء ولا تكبر المواضيع!!

-مسعود: لا احجي واسولف كلشي عندي چا اخلي طمغة على بنيتي!

شهگت لاطمة صدري حييل من رفع ايده عمي علي وانطه لابوي راشدي دوى صوته بالمچان، من الصدمة ابوي كض خده فاك عيونه ما مصدك وولد عمي هم كلهم جمدوا ما مصدكين الصار حقيقة..

-شيخ علي: اخذ مصايبك واطلع منا مسعود لا اسحلك بين العشيرة واخلي طاريك على كل لساان!

-مسعود: ولك تطگني!!!

-شيخ علي: واكسر رااسك وادوس علييه!! عااار حسبالك مادري بعمايلك ولك سوودت وجووهنا وطينت روسناا وسففة عليك محسوب على العشيرة ووسفة!!

دفعه من صدره حيل خله عكال ابوي يطيح والمصيبة ابوي رفع ايده راد يرجعها لعمي وكضوا الامير وابا الحسن يچتفوا من ايده خلوا صوته يزلزل بالاستقبال..

-مسعود: ولكم چلاااااب استفردتووا بيه عبنيي وحيييد بس صوووچي احترمتكم زاايد واجيتتت بدون زلامييي بس اناا اعلمكمم انااا الكمم ولدي دوااكم

-شيخ علي: حجاية بعد ولساانك اكصه من عرجه مسعوود! وعليي وراس ولدي التسعة علي اذا شفتتت ولدك عتبوا بااب بيتيي ارجعلهم الك مذبحيين واكبرر عگال ادوووسه وانعل والدديه

-مسعود: ولللك انتَ ويامننن اندكيييت ويه مسووودن اندكيت علييي

-شيخ علي: اطلععع خليني اشوف المسودن شيسوي وعلي شاربك انتفه!! اطلععع من تففف على غيرتك وغيرة ولدك يا عاار الزلممم

-مسعود: محد غيررك وغير ولدك العاارية..

-شيخ علي: والله الحمدلله محدد بينا دفع بنيته من على الدررج ولا واحد بينه طب على بيتك وتورج على نساوينك!!

-مسعود: شني؟؟ شتحجي انتَ؟؟ شني هالحجي شنيي

-شيخ علي: حسبالك الماي تجري من جوه رجلي ومادري بفواينك؟؟ والعبااس شارربك ازينه بنعاالي وافضحك بديوان كله شيوخ وانعل ابو الخووه لابو اليهتملهاا.. هدوووا خيولي هدووا خلي يطلععع

هدوا الولد وابوي ظل يصيح ويهدد ويتوعد وعمي علي مغلس عليه ما مهتم واشر للولد محد يجاوبه..

-مسعود: انطينيي شيي يثبت اناا سويت هالعمايل؟؟ اكو واحد يدفع بنيته من الدرج؟؟ انطيني دلييل

-شيخ علي: انطيك دليل بشرط احجي بگعدة عشاير! حضر روحك الجمعة امسح بشواربكم قنادر ولدي

-مسعود: شنيي؟؟ يعني شني؟؟ ياا دليل هسة طلععه شني كعدة شني هالحجي موو عيب احنه اخوان!!

-شيخ علي: **** على خوتناا مسعود انا كاض روحي بالكوة كلماا اريد اجيك واگلب بيتك على راسك وام علي تكضني وتكول اخووك هذا مهماا سوه ومهما غلطط يبقى اخووك بس مال اخوي يريد يطلگ بنيته من ابني بالحيلة بس خاطر يفضحنا؟؟ لا والله ادووس ببطن هالخوة

-مسعود: اذا على رهف هذا هو اخذوها بنيتكم هي وسور وليدي ماعندي شي انا بس.. بس خفت عليها ماعندي شي ويااكم

-شيخ علي: ناخذها وغصباً عليك حلگك ما تفكه! وسالفة مال تخاف عليها هاي سولفها لـ وليدك سلطان الي لليوم حاقد على اخته!! ولك اختته من امه وابووه لليوم حاقد عليها وشايل بگلبه ودزلها وحدة تدفعها من الدرج!! ولكم حيوااانات انتممم حيواااناتتت

-مسعود: ماكو هيج حجيي ماكوو

-شيخ علي: مسعود اطلعع منا والجممعة كعدتنا عود لا تتأخر

-مسعود: ماكو كعددة علي جاي اكلك البت بتكم اخذوها بعباتها ماكو لزوم لهاي الكعدة

-شيخ علي: اطلع منا

-مسعود: علي! علي مو انتَ شيخ الامارة شني هالتصرفات!

-شيخ علي: طلعوه منا يا ولد

-مسعود: علييي جاي اكلك اخذذ البت وللك عليييي

كضوا الولد يطلعوا وابوي مستمر يصيح ويتعارك وياهم، شكد حسيت بروحي صغيرة من شفتهم يتعاملون وياه هالشكل.. شكد انقهرت على روحي لان عندي هيج أب يسود الوجه!!

رجعوا الولد لعمي وگعدوله ركبة ونص يردون يفتهمون شنو السالفة وليش عمي فقد اعصابه ويه ابوي وهاي اول مرة يسويها.. بالبداية عمي ما رضى يحجي بس بعد الضغط والاصرار من علي الدر وتقي حجالهم وكال اهلي همه السبب بوگعتي من الدرج!!

-شيخ علي: لا عبالكم انا سكتت عن هالسالفة خاطر اطمطمله بس ردت يجي الوكت المناسب واحجي بي

-علي التـقي: يااا نذذل يا مسعود بوية ليش ما كتلي؟؟؟

-شيخ علي: عبن ردت دليل واشتريته مشتره! بنية نظال الي اتفقوا وياهة باعتهم واجت تعترف بلسانها!

-الامـير علي: منو نظال؟

-علي البدر: مرة حمه فراقد!

-ابا الحسن: يعني شَك تَـمني بيها چان بمحله؟؟

-الامـير علي: تَـمني شبيها؟

-ابا الحسن: قصة طويلة عود بعدين اسولفلك

-علي الدر: بوية فهمنا شلون بت نظال اجتك؟

-شيخ علي: شلون وليش اجت مادري بالضبط بس حسب ما افتهمت البت وامها عداوة وعلاقتهن مو شي چن وحدة تدور الزلة على الثانية واجت صبت سوالف امها كلهن يمي

-علي التـقي: اجت اعترفت هيج! بهالسهولة!!

-شيخ علي: لا طلبت مني فلوس وافتهمت هو هذا شغلهن ويسترزقن على هالسوالف التعبانة

-الامـير علي: وانتَ انطيتها؟

-شيخ علي: ما انطيتها الا جابتلي دليل وسمعت البصمات بأذني وهمه يتفقون على وكعة سبأ.. سلطان لليوم گلبه مجمر من سبأ وتقي وما جاي يرتاح وهو يشوفكم عايشين حياتكم ووضكم مستقر راد يخرب بيناتكم ويكسر فرحتكم بأبنكم

-علي الكـرار: شافوا رواحهم كلشي ما حصلوا من هالزواج ورادوا ينهوا هالشكل! چا شكد چلاب ونفسيتهم خايسة!

اسمع عمي والولد ودموعي تجري.. شسويت خاطر اهلي يحقدون عليّ كل هالحقد؟ شسويت واستحق هيج معاملة منهم؟ شمعنى من دون كل اخوتي انا هيج يكرهوني وما يطيقون حتى يشوفوني مرتاحة!

صميت حلگي بأيدي ابلع شهگاتي وانا اشوفن تقي متخبل وطلع من البيت يريد يروح لـ سلطان يربي، لولا عمي علي صايح بي واخوته كاضي وحاجين وياه جان راح هجم بيتهم على روسهم..

-ابا الحسن علي: اگص ايدي اذا مو نضال نفسها الي هددت تَـمني گبل!

-الامـير علي: شني سالفتك انتَ كل ساع وجايب تَـمني!!

-ابا الحسن: غبيي انتَ تتذكر هالسالفة شبيك من طبتلها حرمة صوتها خشن وضخمة من شباچ غرفتها

-الامـير علي: هاا اي صح تذكرت

-شيخ علي: مو وكت نگرة هسة، سمعوني يا ولد انا هالموضوع ما اسكت عنه وراح ادخل اهل نضال وزلمتها واكسر ظهورهم وانعل والديهم لو افتهمت بيهم يعرفون بعمايلها وساكتيلها!

-علي التـقي: ونسكت لـ مسعود وسلطان؟؟؟

-شيخ علي: تقي بوية مسعود الخوفة البگلبه هسة كافية ولا عبالك ربك يعوفه مرتاح راح تجيله ضربة بيوم تخلي ما يندل دربه منين

-علي التـقي: لاا بوية لااا ما اسكتلهمم اسمحليي هالمرة اناا ما اسكتلهم!!

-شيخ علي: تقي يبقى عمك وهو اخوي! انا هددته اسوي گعدة وافضحه بس خاطر اخوفه اكيد ما راح اسويها صدگ! سمعة مسعود من سمعتنا ولا تنسى اخوك ماخذ بنيته لا تخربها عليه وتطفي فرحة علي السور!

-علي التقي: لا تخاف بوية اعرف بيمن احاسبهم! لا راح اأثر على سمعتنا ولا اطفي فرحة اخوي ارتاح

-حبيبة: سبأ

همسة حبيبة لاسمي هي الطلعتني من الحزن الجاي اعيشه وانا اراقبهم، انداريت الها وطاحن دموعي من جديد خجلانة.. ضميت وجهي بين ايدي ابجي واشهك بالخنسة مالي وجه احط عيني بعينها..

-حبيبة: لا تبجين يا رويحتي لا تبجين محد يستاهل دموعج

-ااااخ يا حبيبة اهلي كسروا ظهري

-الله لا يعوزج الهم.. امشي يگلبي امشي نطلع منا

مشتني وياهة تطلعني من المدخل واخذتني للصالة وين ما كل البنات واكفات ويعاينن عليَّ بعيون مدمعة، استحيت ابقى هنا ما تحملت نظراتهن وصعدت فوك اركض لغرفتي طبكت الباب على روحي وطحت على فراشي ابجي بحس عالي وافرغ الجبل النايم على صدري..

يا خزي حالي ويا عاري واهلي رادوا يكتلوني ويكتلون ابني.. يا وسفة ايامي العشتها وياهم وانا اخدمهم بحلگ ساكت مثل الچلبة.. مثل الچلبة المنبوذة اشتغل ليل نهار ومالي لا حقوق ولا رأي بأي مچان اروحله او اگعد بي ولا احد يشوفني بعينه!

جريت المخدة اضم وجهي من سمعت باب الغرفة تنفتح، استحيت اكثر من تخيلت البنات صعدولي وراح يشوفوني هالشكل يربي وين انطي وجهي عنهن..

-سبأ

سكنت هادئة من سمعت حس علي التـقي واكف قريب عليَّ، توترت من حسيت بي وهو يمد ايده على المخدة يشيلها مني ويشمرها بعيد..

-سبأ گومي حبيبتي

-ماريد تقي خليني

-ليش

-ماكدر.. ماريد مستحية منكم عوفني

-مستحية من شنو؟؟

-سمعت كلشي انا سمعت كلشييي

انفجرت ابجي واضم وجهي بأيدي ماريده يشوفني بهالحال بس ما رضى، ما رضى لان كعد على الجرباية وحضن راسي بأيده وخلاه على رجله وصار يمسح على حجابي..

-علي التـقي: زين من سمعتي لان لو ما سامعة چنت ناوي انا اجيچ واسولفلج كلشي صار جوه

-سمعت

-لا تبچين سمرتي، دموعچ غالية لا تنزليها على رخيص

رفعت راسي من رجله اعاين لوجهه، مد ايده على خدودي يمسح دموعي وابتسم رغم الوجع التارس عيونه..

-لا تزعلين سبأ انا اهلچ وانا ناسچ، انا زلمتچ المستعد يثرد بگلب اخوچ لو هالشي يبرد گلبج

-لا تقي...

-ما اسكتلهم والله ورموشچ اليرفن بگلبي ما اسكت واحرگ گلب اخوج مثلما حرگ گلبي عليكم

-شنو راح تسوي!

-لا تهتمين لهاي السالفة خليها وراي ولا تفكرين زايد انتِ حامل لا تأذين روحج على ناس ما تستاهل

-اهلي ذول تقي.. اهلي

-اهلج نغولة شنسويلهم

-استغفرالله

-هههههههه والعباس ما ردت احجيها لخاطرج بس صدگ همه عارات شسويلهم

ضربته على رجله على كيف اسكته وهو كض ايدي يعصرها بين ايده يضحك، باس چفي وكض فچي مثل عادته يرفع وجهي يخلي عيوني بعيونه..

-وسفه هالعيون تعودلهم، مسحي دموعج ما ارضى تبجين على غيري

-اسم الله عليك عسى عيني ما تبچيك

-يا حلاتج يا سبأ

-احبك تقي.. احبك يا عوض ربي

-احبج اكثر من احبج

-يعني شني

-مادري عود جاي اترومص مشيها هسة

-هههه

-ضحكي حبيبتي ضحكي عسى محد غيرج يضحك....

**

-حبيبة شبيچ دعوفي يوسف يمج حباابة

-حبيبة: خرب بيجننن شصير ولجن شصيير المزعطة كلهم على كلبي عفتوهمم

نفخت هوا مقهورة وطلعت من مطبخ بيتها، انا اليوم ببيت عبق وعلي الحق عازميني على غده خاطر نتفق على عرس رهف وسور الي ما لحكنا حتى نستوعب موعده..

العرس يوم الجمعة بنفس الجمعة الي ابوي هدد مسعود يفضحه بيها مسعود شرط يكون بهاليوم العرس وهمات ماكو حفلة ومدري شني بس زفة من الباب ناخذها واحنه من افتهمنا لليوم ما نعرف وين ننطي وجوهنا ونركض مراكض ماندري نشتري لرواحنا هدوم او نطلع ويه رهف نساعدها بالبدلة البيضة واخشاب غرفة النوم والزولية والخخخ...

حسين وفاطمة اتفقن امهاتهم يعوفوهم يمي ومحمد ومصطفى يم امي رسمية وهسة اجتني عبق تريد تخلي يوسف يمي خاطر تطلع تشتري ملابس للزفة بس المشكلة ماكدر انتبه على كل هالجهال بنفس الوكت وهنه همات ما رتبن مواعيدهن طلعتهن كلها صدفت بوكت واحد عبن زلامهن فارغين بهالوكت ويكدرون ياخذوهن..

انقهرت على عبق بس شسوي مو بيدي لو اكدر اخلي يوسف بعيني والله ولا متعاجزة منه بس يوسف وجهال بدر مو كلش يتوالمون ويظلون بس يبجون يتسابقون ياهو بچيته اعلى..

طلعت من المطبخ خاطر اسئلها ليش ما تعوفه يم امها ووكفت بمچاني من سمعت صوت علي الحـق يتغزل بيها وصوت شفطاته اءء اقصد بوساته لهنا واصلة..

-عبق: علي اختك هنا عيب

-علي الحـق: واذا اختي هنا شني حرام؟ بعلي الا ابوسج كدامها

-عبق: لا كافي يلا روح لا تضوجنا

-هاا هسة صرت انا اضوجج ولج عنق؟؟

-لا هي حجاية وانكالت

-هاا؟

-والله

-چا بوسيني اذا صدك

-هههه ولك حبيبة هنا لا تفضحنا شبيك

-تبوسيني لو افضحج كدامها؟

-عليي

-حبيبببة وينج حبيبةةة

-لا لاا صدك تحجي انتَ تعال يمعود تعال

ضحكت صامة حلكي واحمد الله واشكره الف مرة ما جاي اشوفهم بس اسمع لصوت غزلهم اليكزبر الجلد.. اووع شو صايرة ماتحمل هالسوالف وروحي تلعب شلون بيه باجر لو فكرت اتزوج؟

-علي الحـق: مشتااگ انا وگلبي مجمر فرغيلي نفسج اليوم خاطر نسهر

-عبق: ماشي من عيوني

-يوسفي خلي حبيبة تاخذه اليوم يظل يمها

-لا خطية متكدر اولاد اخوتك الباقين يمها

-چا خلي يم عمتي

-مو ماما صايرة تاخذ هاي الحباية التخليها متحس على شي بعد

-چا شون عگروگ اريدج انا

-والله حتى اني مشتاقتلك بس شنسوي حبيبي عدنا طفل صار ولازم نهتم بي

-اي نهتم بي چا شون بس كلت هي ليلة

-لا لا عوفه ميسويلنا شي بالعكس خلي يسهر ويتونس ويانه فدوة لگلبه

عفتهم يسولفون ويتغزلون ببعض ورجعت للمطبخ مبتسمة، ماكدر اعاين لـ علي الحـق وعبق بدون لا ابتسم واحس بالحب وهو يتطاير بالهوا من حواليهم.. سبحان الله كلما افكر بعلاقتهم اتنهد براحة، شلون صار زواجهم واصرار حق وعشگه لـ عبق الي من تزوجها الكل راهن راح يقل ويختفي بس هو ثبتلهم العكس.. اكثر حب واضح اشوفه وجريء لدرجة ما يستحي من بشر من يغازلها ويعاين لعيونها ويفتخر بيها ويكيف ويفرح لنجاحها ويتونس على وناستها هو حب علي الحق لـ عبق..

للعصر رجعت لبيتنا وقررت اخذ يوسف، يستحقون يعيشون سهرة حلوة ويه بعض وما اخليها بنفسهم وابنهم اسرحه ويه باقي الجهال چا شسويله هو فرخ يضيع بيناتهم..

ثاني يوم چان يومي الخاص والخاص جداً! امي رسمية طلعتني وفرفرتني السوك كله وما خلت شي بنفسي ما اشترته الي شني اأشر عليه تاخذه ورجعت للبيت محملة..

اليوم الوراه هو يوم الجمعة "عرس علي السور ورهف" الي ما افتهمنا منه شي.. ومن اكول ما افتهمنا منه شي والله ما افتهمنا شي لان من رحنا لبيتهم من الباب تلگانه غفار يعربد ويكول..

-اخذوهاا بعبايتها اخذوهاا ماكو كعدة هنا بالبيت امشن

-ابتسام: شني ولك؟؟ ما تستحي انتَ تطرد بينا!

-غفار: ما طاردج انا عمة بس ماكو لزوم لهالكعدة والسوالف عدنا شغل

-رسمية: بعد احسن ما يشرفني اكعد ببيتكم

راحت على رهف الي دمعتها بعينها ولبستها حجابها وعبايتها فوك البدلة والتسريحة وطلعت بيها لسيارة الزفة، تفاجأ سور من شافهم حسباله راح نكعد شوي وهو يطب عليها يشوفها بالبدلة بس كلشي تغير بتصرف غفار وخلانا نختصر كلشي وتصير بس زفة صدگ بدون أي شي ثاني..

واليقهر اكثر الزفة ما حضرناها عبن ابوي خايف لا مسعود او واحد من ولده يتسودنون ويسوولهم فد سالفة يفضحونا بيها فـ حتى الزفة انحرمنا منها ورجعنا للبيت مثل الططوات..

-شمس: اووووع حرامات على المكياج

-ابرار: سكتي لا يسمع عمي

-حبيبة: والله انقهرت على رهف شني هاي ما يصير تره

-تَـمني: زين شمعنى بس خالة رسمية راحت وياهم بسيارة الزفة خو احنه هم كلمن تركب ويه زوجها بسيارته

-عبق: مو همه توزعوا على السيارات وجماعتهم وياهم مصعديهم

كعدنا نسولف بالعرس الما حضرناه وظلينا سهرانات ننتظر امي ترجع، صارت بالـ 11:00 ياله رجعت هي واخوتي وطبوا الضحكة شاكة وجوههم والونسة طالعة من عيونهم وخشومهم..

-حبيبة: هاا شلون جانت الزفة

-علي النور: والعباس هاي احلى زفة احضرها بكل حياتيي

-حبيبة: طبعاااً عبن احنه ما حضرنا

-علي الكرار: هههههه بس والله كللش تونسنا

-حيدر: صديق سور جاب فرقة وعلگوها الطريق كله نردح

-ابرار: اييي بالعافية عليكم

-الامـير علي: مچانكم خالي

-تَـمني: اذا مكاننا خالي ليش ما اخذتونا!

گالتها بعصبية وحاجب معگود خلت الكل يدير وجهه عليها، متت ضحك على منظرها خطية توترت ووجهها تغير لونه مستحية من الموقف فـ بسرعة عدلت على جملتها وكالت..

-تَـمني: كذب اصلاً احنه منريد نروح بس ضجنا لان ما عرضتوا علينا نجي

-الامـير علي: اي صح صح

-تَـمني: ونبي اصلاً منريد نروح احنه

-علي النور: لا حبابات تعالن

-تَـمني: لا منروح اصلاً مشغولات احنه

گوة مسيطرة على ضحكتي ما افطس هنا على شكلها وشلون تدور وجهها وتهز راسها وايدها عود ما مهتمة، والله ما اللوم الامير من يتسرسح عليها ويتأثر..

-الامـير علي: يا ولد امشوا نكمل السهرة بالسطح اليوم اكو لعبة

-تَـمني: اكرهك

غمزلها يضحك واخذ الولد وصعدوا كلهم فوك للسطح معناها اليوم محد ينزل يظلون للفجر.. ما اهتمينا وقررنا احنه هم نسوي سهرة بس گبلها كضينا امي نسوي وياهة تحقيق ونفتهم الصار بالزفة..

-رسمية: شمدريني

-حبيبة: زين رهف شلون جانت هم خايفة ومتوترة؟

-سبأ: سودة عليَّ اكيد متوترة ما لحكت تجر نفس واخذوها من الباب

-رسمية: مداراهاا وينها وين التوتر والخوف شو اول ما طبينا الفندق نزعت البركع والعباه والضحكة من الاذن للاذن وكضتلجن سور تتماوع وتتدلع وتتمايل عليه خلت الزلمة يتيه دربه

-تَـمني: اوووي حياتي الله يسعدهم

-رسمية: هه تكلي متوترة بعد عيني الله يساعد وليدي عليها اليوم البت شايشة عليه

ضحكنا كلنا على امي وسوالفها نزلت عليها دوسة ونص وكامت تحجي بالخط العريض، غيرت الموضوع بسرعة من شفت سبأ ضايجة حگها چا امي استلمت اختها حاصل فاصل..

باقي اليوم گضيناه بغرفتي وعفنه الولد محد كامت لزلمتها خلنهم ينامون وحدهم وهنه نامن بغرفتي الا تَـمني الليل ما نامته وكاعدة وتلوب وكل ساع تريد تروح وتكضها شمس ترزل بيها..

ثاني يوم اجونا علي السور ورهف الظهر وما كعدوا يمنا ربع ساعة وصعدوا لغرفتهم الجديدة، اخذوا غرفة علي الحـق القديمة وظلوا بيها لليل ما طلعوا وامي تمشي وتدردم عليهم..

-رسمية: ما شايفين ايي والله ما شايفين شني اول طيحته العرس

-حبيبة: يمة يا حبيبتي عوفيهم فرحانين ببعض لا تخربين فرحتهم فدوة اروحلج

-ليش انا شمسوية؟؟ مو زين من رضيت اجيبها لبيتي واعيشها يمي؟؟

-اي اي عاشت ايدج ما قصري حبيبتي وهسة امشي لغرفتج خليني ادهن رجليناتج بزيت زيتون وحبة سودة وافركهم الج

-هاا؟

-والله يلا امشي

سكتتها بهالسالفة واخذتها لغرفتها بس هم ما سكتت بالعكس ماتت قهر من نور وحيدر اجوا وكالوا علي السور حاجز لايران يريد ياخذ رهف شهر عسل وسوالها مفاجأة..

-علي النور: اااخ يمة تكي ضااع مني تكي

-حيدر: اي والله متغير سور حبوبة كله منج شكو خطبتيله

-رسمية: هو صوچي خطبتله ليش هذا مال زواج هذاا بعده بطول زري

-علي النور: يلا بعد شنسوي هي الدنيا دار بلاء ويكول ابو شادي الزبنطوطي منك الجرح اجاني وانا عطشان أحن.. سگيتني مر الغدر وانطيتني سم الفتن

-رسمية: يبوووووو عمت عينييي

-حيدر: يمة مشتاگله احس بگلبي مقموت وينه خلي ينزل

-رسمية: صيحوا ولكم صيحوله ما شبعت منه

-حبيبة: شدعوووووة!!!

-رسمية: شني ولج

-حبيبة: زودوتها كللش شبيكم تبجون وتنوحون على الزلمة چنه رايح للجهاد! شمالكم ما تگلولي شمالكمم

سكتوا ثلاثتهم وظلوا واحد يعاين بوجه الثاني، تندمت ما سويتها من گبل عبن من بعد هالرزالة الخفيفة ما ظلوا يدردموو وراه وينوحون او على الاقل ما يسووها كدامي..

يوم الاحد الصبح كعدنا على خبر قلقنا، افتهمت جايين الاحداث لبيت مسعود وماخذين ابن سلطان سامر! سبأ وجهها انخطف لونه ورأساً دارت وجهها لـ علي التـقي الساكت وما مهتم.. حسيت هو اله ايد بالموضوع خصوصاً من عرفت لزموا عنده مخدرات..

الايام جاي تركض ركض تمشي والكل حياته تمشي وياهة الا انا كاعدة بين اربع حيطان اتصفن، اجتني حور لبيتنا ولمحتلي على اخوها بس فوراً سديت الموضوع لاني ما جاهزة.. اعرف اذا تزوجت راح اللفيلي مشاكل وياه لان لليوم ما متقبلة الفكرة ومتحضرتلها..

انتبهت لعيون حور طايرة على باب الاستقبال اظنها متمنية يعبر علي النور لو تشوفه حتى لو لمحة تلمحه بس هالشي ما صار عبن نور مو بالبيت اصلاً.. علاقتهم ماعرف شي عنها ولا تجرأت وسألتها عبن البت متكتمة كلش وما تشارك احد بهيج مواضيع بس حسب الفهمته وتأكدت منه اخوها حسام مستحييل يقبل بـ نور وجمعتهم سوه اشبه بالحلم..

ودعتها للباب ورجعت جوه شفت تَـمني كاعدة وحسوني بحضنها كاعدة تشربه ممية، كعدت بصفها مبتسمة واعاين عليهم واتأملهم، شكد يلوكلها تصير ام وشكد حنونة وعطوفة وگلبها جبير ويتحمل..

-تَـمني: اگلج حبيبة

-ها كولي

-برأيج حسين حجمه طبيعي؟

-اي، ليش تسألين؟

-مادري بس دا اشوفه كلش ناعم بالنسبة ليوسف ابن عبق ويوسف اصغر منه

-اي الدكتور كال طبيعي هالشي عبن حسوني اجه للدنيا سبيعي بس بالمستقبل عادي يكبر وحجمه يصير طبيعي

-هاا الحمدلله طمنتيني

-ليش شايلة همه؟

-صراحة؟ اي شايلة هم خفت هالطفل يبقى هيج صغير ومن يكبر يتنمرون عليه وتتأذه نفسيته

-هههههه امه ما تفكر لمستقبله بگدج

-مو احبه

-بعد روحي ينحب هالوليد

-لو يجيني طفل يمكن ماحبه مثلما احب حسوني

-لا راح تحبين ابنج اكثر وتذكري كلامي

-صدگ؟

-والله

-يعني تتوقعين هم يجي يوم ويصير عندي اطفال؟

-اكيد ان شاء الله! تَـمني انتِ بعدج صغيرة والعمر كدامج

-بس الامير مو صغير ودا أشوفه شلون يتحسر على الجهال وگلبه مفرفح على طفل

-ميخالف حبي كله رزق من ربج بعد لا ذنبج لان ما حملتي لسه ولا ذنبه

-الحمدلله

-الحمدلله، اكلج تعرفين وين امي؟

-اي بالغرفة كرار عدها جوه

-كرار؟ شعنده؟

-مادري بس صارلهم هواي جوه

-الله يستر شعنده.....

**

"تــــالة"

رجعت من الدوام وبوجهي لغرفتي، شمرت روحي على الجرباية وبملابسي وجنطتي وملازمي غفيت من النعاس والتعب.. البارحة الليل كله ما نمته عندي امتحان صعب وسهرت للصبح علموده..

فزيت من نومتي على صوت ضحكة امي ترن رن بالبيت، نهضت راسي من الجرباية عاكدة حاجبي شكو شعدها امي وهيج تضحك؟ صار عندي فضول وماكدرت ابقى نايمة حتى النعسة طارت من وره صوتها عبالك دتحجي ويه احد وتضحك وياه.. طلعت من الغرفة اتبع الصوت وجمدت بمكاني من ميزت صوت تَـمني! يمممة تَـمني هنا!!

ركضت للصالة اروحلهن وجفلت متفاجئة من شفت تَـمني وخالة رسمية وحبيبة وعمة ابتسام كلهن هنا، من الصدمة ماعرفت شسوي وعليمن اسلم هنه تلگني واستقبلني..

-رسمية: ههههه بعينج النومة

-تالة: اي والله جنت نايمة ولا ادري بيكم هنا شنو هالمفاجأة الحلوة خالة

-تَـمني: حركت موبايلج بالاتصالات ومتجاوبين

-تالة: ولج صامت مسويته ولا حسيت عليه

كللش فرحانة بجيتهم واحس الكاع مسايعتني، كعدت وياهن وممفتهمة السالفة عبالي جايين زيارة عادية ولاا ادري ولا حتى اجه ببالي ولا شكيت ولا واحد بالمية جاية خالة رسمية كل هالمسافة حتى تخطبني لـ علي الكـرار للمرة الثانية!

وجهي انبلع من فتحت الموضوع خالة رسمية كدامي والوجوه كلها تضحك كلهاا حتى امي وجهها متغير هالمرة ومادري شنو السبب، ظليت صافنة ماعرف شنو احجي ومن الخجل ركضت اطلع من الصالة ووكفت بالممر اتسمع عليهم..

-رسمية: بعد حجة وماعندج ام تالة البت نريدها وشروطكم كلها انحلت عبن علي الكـرار اجاه نقل لبغداد وراح ينتقل يعيش هنا وحده سودة عليَّ

-حنين: خطية لا يضغط على نفسه زحمة يبقى هنا وحده بدونكم

-رسمية: بعد شنسوي شغله شمره هنا وراح يبدي دوام من الاسبوع الجاي

-تَـمني: خالة بعد ماكو اعذار تره متلگون رجال هاوي ومحترم ورايد تالة اكثر من علي الكـرار واني بنت اختج ودا اگلج بهالشي

حچت عمتهم ابتسام فوك تَـمني وحجت حبيبة ورجعت خالة رسمية هم تحجي وامي ساكتة، گلبي ينبض بجنوون احسه راح يوكف بأي لحظة واني اسمعهم يقنعوها ويحجون برغبتهم بيه وشكد خالة رسمية حابة اصير چنتها، بقيت واكفة على اعصابي الترجف واذني مادتها اتسمع عليهم وروحي تلوب وما هدأت الا من سمعت امي تكول..

-حتى لو فكرت ارفض واكول هالرجال مو مناسب لـ تالة فـ ماكدر اكولها بعد.. علي الكـرار رجال بكل ما تعنيه الكلمة وان شاء الله يسعد تالة ويهنيها وياه

خرطت روحي من الرجفة وماتحملت ابقى واكفة سنحت وكعدت بالكاع صافنة، اسمعهم شلون يباركون ويدعولنا بالسعادة وعقلي فاصل وبقيت على هالوضع حتى من اجن حبيبة وتَـمني الي يباوكولي ويضحكن على وجهي الجامد..

-حبيبة: ههههه ولج صدگ جذب شبيچ تويلة

-تَـمني: تالة كومي فضحتينا كوميي

-تالة: عود صدگ امي قبلت؟

-حبيبة: ايي ولج ايي

-تَـمني: كومي ولج لا يجي احد ويشوفج مسنحة وكاعدة هنا

گومتني گوة وطببتني الغرفة بس بعدني ممصدكة الديصير واحسه حلم.. حسيتني بحلم حتى من طلعوا واجتني امي تبلغني هي وافقت بدون لا تسألني لانها تعرف جوابي، وحسيتني بحلم حتى من كالت هالسبوع راح نعقد سيد لانهم مستعجلين، وحسيتني بحلم حتى من طلعت اشتري الذهب ويه امي وحبيبة وتَـمني، وحسيتني بحلم حتى من اجه علي الكـرار لبيتنا وجايب ابوه واخوته والسيد وياهم!

احسني بحلم ومدا اكدر اصحى منه، مدا اصدك اني هستوني تلفضت كلمة "قبلت" و تزوجت الرجال الي من اول مرة شفته بيها بطني مغصتني وگلبي نبض نبضة جديدة عرفت ما راح اكدر ارجع طبيعية وراهة.. مدا اصدك واني لابستله فستان اوف وايت مخصر وفاتحة شعري بتسريحة بسيطة ومكياج ابسط وكاعدة انتظره يدخلي للغرفة حتى يشوفني..

شقتنا صغيرة لدرجة ماكو مكان غير الغرفة يجيني بيها حتى نختلي وحدنا وطبعاً امي ماقبلت بهالشي لولا خالة رسمية كايلتلها هاي عادة عدهم لازم الزلم يكعدون ويه نسوانهم بغرفتها الخاصة..

كاعدة واطگطگ من التوتر، شبسرعة وشنو صار وشنو تفاصيل العشتها مادري اصلاً ماتذكر واحس هالشي غريب عود ليش ماتذكر الايام الفاتت معقولة جنت نايمة لو فاصلة عن الدنيا من الفرح؟

شتت افكاري صوت طرقات خفيفة على الباب عرفت هذا هو، وكفت على حيلي اقنع نفسي اني مسيطرة ماكو مجال للتوتر والخوف خلص الي جنت اريده صار واخيراً انجمعنا بس كل هالشي تلاشى وراح من شفته يطل عليَّ ويدخل لغرفتي وبيده بوكيه ورد وردي جبير..

دخل الاحبه وابتسامته مرسومة على وجهه وما طول هواي بسرعة طبگ الباب وراه ولزم المفتاح راد يقفلها وتوقف..

-علي الكـرار: لو قفلناها يشرونه على الحبل

ضحكت بصوت ناصي اغطي حلكي بيدي مستحية وهو تقدم عليَّ، توقعته راح ينطيني بوكيه الورد بس ما سواها لانه حط البوكيه على الميز وصدمني من جرني من خصري عليه ونصى يطبع قبلة جوه شفايفي مباشرة..

-علي الكـرار: احبچ

رمشت كم رمشة بگلب يرجف ماتوقعته راح يعترفلي بهالسرعة وهالسهولة خصوصاً واني ادري بشخصيته شكد خجولة بس هسة عبالك نزع ثوب الخجل ولبس ثوب جديد لان تجرأ وباسني بين عيوني واردف بهدوء..

-حلفت اول چلمة اگولها الج من تصيرين حلالي هي "احبچ"

-تالة: كرار..

-احبچ على كل لحظة شفتچ بيها وماكدرت اگول احبچ

گالها وطبع بوسة مطولة على خدي، غمضت عيوني يابسة بمكاني شكد استحيت من مياعتي بس مدا اكدر اسند طولي خصوصاً من اردف..

-واحبچ على كل يوم شفت طولچ الاعشگه يتمايل گبالي

طبع قبلة ثانية على خدي الثاني وطبع ثالثة على گصتي ورابعة على ايدي وخامسة على رگبتي وسادسة على خشمي وعلى حنچي وعلى كل شي بوجهي حرفياً ما خله شي يعتب عليه لدرجة ردت اوكع من الخجل..

-مو حرام ولج مو حرام حارميني من هالترافة

-احم.. اي يلا كافي

-عمت عين عدوچ تالة تردين تشعليني سنة ياله نتزوج!

-سنة؟؟ عزا ليش

-امج كالت ما نتزوج گبل السنة

-شنو سنة عدنا ميت قابل!

-شمدريني

-لا مالك علاقة اني احجي وياهة... او لا لا ما احجي وياهة خاف تبطل

-لا مانريد يمعودة خلينا هيج نرضي رواحنا بالچكليت ونسكت، يلا انطينياهة

-يا چكليت؟

-انطيني الجكليته تالة لا انا اخذها

-لا لا شبيك صدگ جذب شو انتَ طلعت مو فقير

ضحك بصوت ولزمني من ايدي ومشاني يكعدني على الجرباية واني البريئة رحت امشي وياه مادري بنواياه البعيدة كل ابعد عن الفقارية......

**

"تَـمني"

خطوبة تالة وعلي الكرار جانت احلى حدث يصير من بعد ذاكرة الامير، شكد فرحتلهم وكيفتلهم وفرحت اكثر من عرفت كرار وَهَم اهله وگللهم اجاله نقل بدوامه بس بالحقيقة ماكو هيجي وانما هو قدم على نقل حتى يصير قريب منها ويتزوجها، فرحت على حجم الحب الي يحب بي تالة وتنازل عن راحته وسعادته هنا بس حتى ينجمع وياهة..

نزلت من السطح اني وحسوني ودخلت لغرفتي، طلعتله حفوظة وملابس حتى ابدله واضيع وكت حلو وياه.. يممة حبيبي شحلاته صاير عيونه ورموشه يخبلن وسماره هم كللش حلو وصاافي..

-تَـمني: ككوي الحلو اذا الله رزقني وصار عندي طفل اريده نفسك بالضبطط

بسته من بطنه ادغدغه وهو يضحك ويلعب ويايه فدوة لوجهه صاير يفتهم ويعرف لكلشي ما شاء الله وامير هم لاحظ عليه وگال حسين كللش ذكي ونبه.. كملت تبديله ورحت اغسل وجهه بالحمام وحسيت على باب الغرفة تنفتح..

-تَـمني: عموو امير رجعتتت

-الامـير علي: اي رجعت... هلا بحسوني ولك هلاا بحنوني هلاا

اخذه من ايدي يلگفه بالهوا ويلعب وياه واني كعدت على الجرباية اتفرج عليهم شكد حلوين، امير يحب جهال اخوته حب ما شايفته من قبل يمووت عليهم كلهم وميفرق واحد عن الثاني كلهم نفس المعزة ونفس الملگه يتلگاهم..

-الامـير علي: نوومه وينه اموري اليوم كله ما شفته

-نايم يم امه شوية ماله خلگ

-لااه!!

-اي والله خطية اليوم اخذوا ليلة وابا الحسن يلقحوه ومن رجع لحد قبل شوية هو بس يبجي

-يا مسكين

-بعد هو هذا اللقاح خطية

-اي، اگلج حبي حضريلي هدوم بينما اسبح

-صار

حط حسين بالكاع وهذا اجاني يركض حبيبي، شلته ابوس بي وحطيته على الجرباية وانطيت بيده خرخاشته واللعاب حتى يلتهي بيهن، فتحت كنتور الامير حتى اطلعله ملابس و..

-تَـمني: يبووو شنو هالريحة

سديت الكنتور بسرعة من فاحت منه ريحة تلعب النفس، ريحة شي خايس! سديت خشمي لعبانة نفسي واللتفتت اباوع لـ حسوني اليضحك ومكيف عباله دا اللعب ويآه.. ضحكت على ضحكته ورحت اكعد يمه على الجرباية بس عقلي ظل ويه الكنتور والريحة الطلعت منه ما عولت شوكت امير طلع من الحمام وبلغته..

-الامـير علي: ها حبي وينهن هدومي

-ماكدرت اطلعلك امير اكو شي بكنتورك ريحته مطيبة

-شنهاي

-والله

راح لكنتوره فتحه ومد نفسه يشتم وعكد حاجبه، كمت اوكف بصفه وكفخت نفس الريحة المزعجة..

-تَـمني: يممة متنطااق

-شو ما جاي اشتم

-شلون متشتم امير؟ الريحة واضحة اشتم زين

-والله ماكو ريحة

گالها وطبب راسه يشتم وطلعه مرة ثانية مُصر ان ماكو ريحة، تعجبت شلون مدا يشتم والريحة تكتل حتى معدتي كامت تكلب راح اتقيء..

-امير اكو ريحة خاف سحر وانتَ متشتم!

-سحر؟؟ معقولة؟؟

-والله اي يمكن شو افتح كنتوري

فتح باب كنتوري وماكو ريحة عزا بعيني شنو هاي ليش هيج..

-خلينا نكول لخالة رسمية حباب

-اي امشي

طلع دشداشة لبسها بسرعة واني اخذت حسوني ونزلنا جوه لخالة رسمية، سولفتلها الشميته فوك وتخبلت طلعت من غرفتها تركض وخطية رغم رجليها توجعها كلش بس صعدت لغرفتنا حتى تشم بنفسها..

-تَـمني: بس بكنتور امير الريحة خالة تعالي شمي

-رسمية: دخيلك يا علي استرها يا علي

فتحتلها الكنتور وهي مدت راسها تشمشم بي، ظلت هواي تشم وتحرك براسها وحتى ملابس الامير شالتهم تشم بيهن..

-رسمية: بالعكس الريحة حلوة مال عطر امير

-الامـير علي: مو اگلها ماكوو

-تَـمني: عود صدگ تحجون؟؟ راح اتقيء من الريحة تلعب النفس شموا زيين

-رسمية: خايبة والعباس ماكو ريحة معقولة المشكلة بخشمي

-تَـمني: صيحوا حبيبة تجي!

وما كالو لا طلع امير يصيح لـ حبيبة ودخلت لغرفتنا سولفتلها الموضوع وفتحت الكنتور حتى تشم بس بعد ماكدرت اتحمل وركضت ابتعد عنه راح اتقيء..

-حبيبة: ماكو ريحة

-تَـمني: يااااا

-حبيبة: والله ماكو ريحة

-تَـمني: والله اكو والله

-الامـير علي: ماكو ريحة خالوو شني كوة هي

-تَـمني: معقولة؟

شكيت بروحي خاف اني دا اتخيل فـ رجعت اريد اشم وما كدرت اطيق الريحة بعد دخت وبطني خبطت وركضت للحمام تقيأت كلشي تغديته اليوم..

-رسمية: ياا ياا ياا ياا ياا

-الاميرعلي: تَـمني شبيچ تَـمني

دخل ويايه للحمام ودفعته ماريده يشوف بس ماقبل وظل واكف بصفي ويمسح على ظهري، ظليت اگح واتقيء والريحة احسها لزكت بخشمي راح اموت انهد حيلي.. فتحلي البوري امير يغسلي واسمعه يسولف ويايه على كيفه ويهديني..

-تنفسي حبيبتي على كيفج تنفسي

-حبيبة: سودة عليَّ شجاچ يا حبيبتي

-رسمية: ولج خاف حامل وجاي تتنسين تَـمني

-الامـير علي: لا يمة امس حللت

-رسمية: اي؟؟

-الامير علي: شني اي چا لو حامل تلكيني هيج واكف كدامج

-رسمية: هم صدگ

-حبيبة: بس انتو امس ما طلعتوا من البيت وين حللت

-الامـير علي: هذا المنزلي سوته

-حبيبة: بس هذا مو مضبوط

-الامـير علي: لا مضبوط ويانه دائماً تسوي هي

عفتهم يسولفون واني غسلت زين وشلت الخاولي انشف حلكي ووجهي، احسني تعبانة كللش تعبانة وكوة واكفة على رجليه اريد بس انام..

-تَـمني: دا ارجف امير حباب أخذني للفراش

لزمني من ايدي ومشاني للجرباية، تمددت عليها وغمضت عيوني بسرعة احس الدنيا تدور بيه شكدما جنت دنگت راسي على المغسلة واني اتقيء.. تحمدتلي خالة على السلامة هي وحبيبة وانتبهتلهن صاحن للامير حتى يطلع وياهن..

ماهتميت اريد بس اريح نفسي واخلص من هالدوخة واللعبان النفس الدمرني، ريحة الغرفة صارت متنطاق بسبب كنتور الامير والله بي شي والله مستحيل هالريحة طبيعية بس اكو فد شي غريب ليش محد ديشتمها غيري..

-ها ابوي شلون صرتي

فتحت عيوني على كيف من شفت الامير گبالي، محسيت عليه من دخل للغرفة ولا ركزت.. رفعت ايدي وسويتله حركة اوكي بأصبعي عود اني زينة ماريد يظل باله عليَّ ويتعب..

-نروح للطبيب تَـمني؟

-چؤ

-گومي حبيبتي خلينا نروح خاطر نتطمن

-لا.. ماريد

-كومي امنية كومي

گومني غصب عني وكعدني عدل، طلع صايتي من الكنتور لبسني واني اخذت الشال من ايده لبسته وحدي وكمت وياه مالي خلك حتى اتناقش بلكي الدكتور ينطيني شي يخفف اللعبان النفس هذا..

طلعنا سوه والطريق كله اني كوة مصبرة نفسي ما اتقيء بسيارته واتلفها وكلما يسألني شلون صرتي ارفعله اصبع الاوكي..

-يلا حبيبي نزلي

-وين جبتنا

-مختبر هذا خلينا نسويلج تحاليل اول

-شسوي بيهن

-حبيبة تكول يجوز عندج فقر دم تَـمني يلا

رفعتله اصبع الاوكي مرة ثانية ونزلت وياه، كعدت اني على الكراسي الصايرات على جهة من المختبر وهو راح يسولف ويه المحلل ويگله على التحاليل الي يريد يسويها الي..

-الامـير علي: ها حبي شلون صرتي

-اوكي

-چا يلا فوتي هنا خاطر يسحبون منج دم

گمت ودخلت لمكان مغلفي بالبردات عرفت هنا النساء يكعدوهن حتى محد يشوفهن وهنه يرفعن ردانهن، شوية واجتني بنية لطيفة هي سحبت مني دم وكالت اطلع انتظر النتيجة بره..

طلعت للامير ورجعت للكراسي كعدت وهو كعد بصفي، حطيت ايدي بين ايده اسند نفسي وريحت راسي على چتفه..

-تعبانة تَـمني

-اممم

-يلا بس ناخذ التحاليل ونروح للطبيب

هزيت راسي وغمضت عيوني وماحسيت على روحي من غفيت الا من فزيت على صوت اهل المختبر يصيحون بأسمي بصوت عالي..

-تَـمني: اسمي هذا

راح الامير يجيب التحليل منهم بس شوية طول مادري ليش، عدلت كعدتي قلقة شبي ليش هيج تأخر شنو صاير؟ كمت على حيلي اروح وراه ووكفت بمكاني من شفته يظهر من وره الحايط الصاير جانبي بس شنو وجهه مطعون طعن..

-امير

رفع راسه الي وشهكت من شفت عيونه صايرات حمر وخابطات بالدمع، متت خوف من شفت تحليلي بيده مفتوح وهو بهالحال.. هرولت عليه ووكفت گباله لزمت ايده وهمست بخوف..

-شبيك امير شبي التحليل؟؟

فتح حلگه يريد يحجي وماكدر من الغصة، بلع ريگه ودار وجهه مني يغطي عيونه وصدره يصعد وينزل يتنفس سريع..

-امير شبيهن التحاليل مالتي؟ احجيي شنو طلع بيه سرطان؟؟

-هههههههههههههههههه

وهو بهالحال مغطي عيونه وداير وجهه عني ويضحك، ليش ديضحك؟ ظليت صافنة كلشي ما مفتهمة خصوصاً من وخر ايده من عيونه وجرني من زندي وحضني لصدره! امير يحضني كدام الناس كلها وميهتم لشنو راح يعلقون او يحجون علينا!

-امير...

-تَـمني انتِ حامل

من الصدمة دفعته اوخر من حضنه فاتحة عيوني، حطيت ايدي على گلبي الراح ينفجر من دگاته المجنونة وبدون لا اسيطر على نفسي نزلت دموعي الحارة..

-شنو؟؟ كلت اني حامل؟؟ سمعت عدل لو دا اتخيل؟؟

مسح على وجهه وعيونه يهز براسه ويضيع نظراته مني، وجهه الاحمر وشاريين گصته الواضحة ورجفة ايده كلها تفسرلي السمعته صح بس ليش اذاناتي مدا تصدگ!

-امير اني حامل

-اي.. اي تَـمني ايي حامل ااي ااااي

شهگت اضم وجهي بيدي ما مصدكة وهو حضنني مرة ثانية وانفجر يبجي بصوت مكتوم ميريد احد ينتبه علينا، بس شلون محد ينتبه لهذا المنظر؟ شلون وهمه يشوفون ثنين راح يموتون من البجي متحاضنين بنص مختبر وبيدهم ورقة تحليل..

-تَـمني: اني حامل.. اني حامل اني حاامل امير اني حاامل

احس گلبي راح يوگف من البچي وحيلي باد راح اوكع، لزمني الامير بين ايده يسندني واسمعه يردد "الحمدلله" "الحمدلله" "ما قصر ابو الحسنين الحمدلله"..

ما انتبهت على وضعنا اليجذب الا من سمعت صوت مباركات وضحكات جاية من حوالينا، وخرني امير من حضنه ودار وجهه مني ميخليني اشوف دموعه واني ظليت امسح بدموعي واتشكر من النسوان الوكفن يمي يباركنلي.. ماعرفهن ولا يعرفني بس مادري ليش اجوا يباركولي وحتى اكو وحدة بيهن مرة عجوز بوستني ودعتلي اجيب بالسلامة..

-تَـمني: شكراً خالة

-لا تبجين يمة مو زين على الحامل البجي

-مدا اصدك والله ما مصدكة

-يا بعد عيني الله يكومج بالسلامة ان شاء الله ويگر عينج بشوفته

-امين.. يارب امين

درت وجهي للامير بعده منطيني ظهره خبلني مدا يقبل يديرلي وجهه حتى من طلعنا من المختبر ايد بأيد منطيني صفحته ميخليني اشوفه، عباله ما سمعت صوته اليرجف ولا شفت اذاناته الصايرات حمر ووجهه المصبوغ..

صعدنا السيارة وبوجهه اخذني لدكتورة نسائية كال حتى نتطمن وتسويلي سونار، أيدته بهزة راس ودموع غسلت وجهي مدا اكدر اسيطر عليهن حتى من وصلني للدكتورة طبيتلها ابجي واشهگ السكرتيرة اخترعت عبالها بيه شي ودخلتني قبل كل المراجعات..

بصعوبة سيطرت على نفسي وكلت للدكتورة اني حامل ظلت صافنة عليَّ ممفتهمة ليش دا ابجي وهيج منهارة بس من حجيتلها وضعي ابتسمت وتفهمت موقفي وباركتلي ودعتلي اكوم بالسلامة..

-تَـمني: دكتورة فدوة شوفي بالسونار صدگ حامل اني؟؟

-الدكتورة: اي ماما هذا التحليل يقرالي انتِ حامل بس يلا صعدي على السونار خلينا نشوف عمره

هزيت راسي اي وصعدت على السدية، تمددت وهي جابت الجهاز تسويلي سونار وعينها على الشاشة مركزة..

-بشري دكتورة

-هاا اهاا هذا كيس الحمل ما شاء الله مبين

-يعني صدگ اني حامل؟؟؟

-ههههههه اي يمة حامل

-يا الله

ضميت وجهي بيدي فحطانة من البچي شكد ردت اسكت واركز ويه كلامها بس ماكدرت، ماكدرت لان الفرحة الي بگلبي هسة تكفي اوزعها على كل العراق وهم تزود!!

-الدكتورة: اريدج تهتمين بنفسج كلش زين وتهتمين بصحتج واكلج نريد بس الحمل يثبت للاربعة اشهر لان انتِ وضعج مختلف

-صار دكتور صاار

-تَـمني انتِ وضعج مو مثل باقي النسوان انتِ عندج رحم طفولي لازم تهتمين بروحج ما اوصيج ماريد اخوفج بس ضروري افهمج ان انتِ معرضة للاجهاض اكثر من النساء العاديات بنسبة 60% فـ لازم تخلين هالشي ببالج

-ببالي راح اخلي والله

-بالسلامة ماما هاي علاجات اريدج تاخذيهن وهاي ابر تثبيت راح اكتبلج وبعد اسبوعين رجعيلي نشوف وضعه شلونه

-شكراً دكتورة

طلعت منها طايرة مثل الفراشة، ركضت على الامير الواكف بالباب ينتظرني على نار وبشرته بكل الكالته، ظل ميعرف شيسوي بعد من الفرح وعافني واكفة وراح بعيد عني يسوي روحه رايح للصيدلية..

ضحكت بنص دموعي على وضعه يربي اول مرة اشوفه بهالفرحة ربي يتتمها على خير ويديمها علينا.. جابلي العلاج امير وتوجهنا للبيت ومن الباب بلغنا الباقين وما اسولف بالهلالهل والهوسات والضحك والدموع والفرحة والهوسة الصارت بالبيت..

البيت انگلب گلااب وخالة رسمية لزمت امير حضنته وتبجييي وهو يبجي وياهة والبنات كلهن يگمزن من السعادة، مسحت دموع الفرح من اجتني سبأ تمشي وبطنها كدامها ظاهرة ما بقالها هواي وتجيب بالسلامة، حضنتني وباركتلي وكالت بأبتسامة..

-حسوني وجهه خير عليج تَـمني

-تَـمني: حبيب گلبي اييي

-رسمية بدموع: اي يمة هاي بطنج غارت من شافتج ملهوفة على فرخ ما يعودلها

هزيت راسي اي بس ماكدرت اعوف حسين، حتى من عرفت نفسي حامل وصار عندي امل اكون ام لطفل مني ومن امير بس ما قل حبي اله ولا كدرت ابعده عني.. ظل ويايه وظل مرافقني طول فترة حملي بالخصوص من قربت ولادة سبأ صار ينام يمي ويم امير كل يوم ومن يكعد بالليل يفز يكومله امير يسويله ممه لو ينزل بي يشربه مي ويصعد لو يظل يفتر بي لحدما ينام..

صرت ام قبل لا اصير ام وامير صار اب قبل لا يشوف طفله من صلبه، ايام حملي جانت طوويلة ومتعبة نساتي صعبة وهرموناتي گابة اربعة وعشرين ساعة لدرجة اتعارك ويه خيالي وامير شبه كرهته بس حاولت ما احسسه بهالشي..

فكرت ارجع اداوم بمدرستي حتى اغير من نفسيتي وحجيت ويه دكتورتي بهالشي وكالت مو مشكلة المهم ما اضغط على نفسي وما اتعب زايد فـ شاركت امير بالفكرة وقبل بشرط فعلاً انتبه على نفسي.. فرحت ورجعت للدوام اروح واجي وانتظر يوم يوم لولادتي لهالطفل الغير حياتي..

وبيوم دا ارجع اني من الدوام وشفت خالة رسمية وسبأ وحبيبة واكفات بباب الحوش ووجه سبأ ميتفسر، خفت عليها وسألتهن شصاير والمصيبة جانت من كالت خالة..

-شلون بينا جاي تطلگ

-تَـمني: شلون تطلگ هي مو عمليتها اسبوع الجاي!!

-حبيبة: اي اي بس مادري فجأة واكفة بالمطبخ وصاحت بطني وطگ ماي الراس

ظلينا محتارين منعرف شنسوي، سبأ متكدر تجيب طبيعي والسبب عمليتها مال ابنها بعدها خضرة وبالطلوگه ترجع تنفتح وتصير مصيبة والمشكلة تقي مو هنا ملتحق ومرتب نزوله على اسبوع الجاي على موعد عمليتها فـ اضطرن يروحن ويه علي النور هو ياخذهن ومناك لحگوهم الباقين..

دعيتلها ربي يسهل عليها وتتم عمليتها على خير والحمدلله والشكر ما طول انتظارنا اكثر من ساعة ودگت رهف تطمننا وتبشرنا سبأ جابت بخير وسلامة ونورت بنتها "مريم" للدنيا..

شكد فرحنااا من عرفنا جابت بنية خو تقي تخببل امير يكول ظل يطفر من الفرحة ما مصدك لان الكل عباله هي حامل بولد والسبب بالطفلة، جانت كلما سبأ تسوي سونار تكون البنوتة كاعدة على مقعدها نفس اخوها بالضبط فـ الدكتورة خمنت وكالت على الاغلب ولد والمفاجأة طلعت بنية..

نورت مريم الدنيا وشلون مريومة اجت، فدوة لالله على جمالها وملحها.. بشرتها حنطية بس شعرها فاتح كللش خالة رسمية كالت هاي تصير شگرة من تكبر خصوصاً وعيونها لونهن عسلي فاتح..

شكد فرحنا بيها وسبأ طارت ببنتها وضافت بهجة تخبل للبيت بس للاسف ما كملت فرحتنا لان ثالث يوم من ولادة سبأ اني حالي انگلب ووجع بطني گطعني.. متت من البجي والخوف والامير ركض بيه للمستشفى يرجف خايف لا الطفل صاير بي شي.. انهاريت من الدكتورة كالت مهددة بالاسقاط ولازم كللش انتبه على روحي وانام على ظهري وما اتحرك ابد..

كتبتلي ابر مثبتة وسويت بالحرف شنو كلتلي بحيث حتى الدوام تركته وما فارقت فراشي والامير قايم بكلشي حتى الدرج ميقبل انزل يشيلني شيول اذا ردت اروح للمستشفى والاكل يصعدلي ليفوگ..

ايام كلش صعبة مرت عليَّ بس الي هونها علينا وغير مزاجنا هو من رحت للدكتورة وسوتلي سونار وكالت اني حامل بولد! يابة غير خالة رسمية تخبلت غير كامت تهلهل وتصيح بنص البيت.. "على عناد العذال الخشوا بعيني وكالو ما يصير للامير ولد".. غير امير طاار من الفرح طاار ماتوقعته لهدرجة راح يفرح لان اني اعرف بي يحب البنات بس مجنت اعرفه متأذي كلش من الحجي الجان يسمعه ويسم گلبه وين ميروح يم عماته ويم اهل امه وحتى بديوان ابوه..

جهزت لابني كلشي من احسنه وجنت سعيدة بكلشي اسوي واجيبه بس رغم هذا بقى وضعي صعب، وبقيت على هالحال منتبهة على نفسي وما اكثر بالحركة لحدما دخلت شهر السابع وحملي ثگل والوجع صار مينحمل، كل يوم بالليل عندي طلوگة كل يوم والامير ينخبص ويايه وتصعدلي خالة رسمية وتجيني حبيبة والبنات كلهن يلتمن يمي يهونن عليَّ..

شفت الموت بحملي هاي من غير الخوف على الطفل والقلق والتعب النفسي والجسدي والهبطات من يجيني وجع والكل ينثبر ويايه، حتى الدكتورة خافت وكالت اول ما ادخل بشهر التاسع فوراً تجيبني لان وضعي ميتحمل تأخير..

-تَـمني: امير خاف اموت بالولادة فدوة انتبه على الطفل ولا تعوفه وحده

-تَـمني سكتيي چم مرة كتلج لا تحجين هييج

-فدوة مو تتزوج الله يخليك

-اذا انتِ ميتة شيضر اذا تزوجت؟

-هاااا يعني تريد تتزوج وديان موو؟؟؟

-تَـمني شجاب البت هسة!

-اي هو انتَ تلوب عليهاا افتهمت بيها فصخت من خطوبتها وكلت ليش اخليها تروح لغيررري

-اصلاً مادري بيها فصخت الا منج! ثانياً توبي من هالخبالات كافي تَـمني كااافي

-ليش تصيح عليَّ

-انا صيحت عليج؟؟

-اي هسة صيحت انتَ صاير متحبني لان سمنت

-تَـمنييي

-لا تعيط بوجهييي

-خلص خلص ما اعيط بس لا تبجين حبيبتي

-امير تحبني؟؟؟

-احبج وعلي احبج

-احسك كذاب

-والعباس اموت عليج حبيبتي انتِ وام بيتي وام وليدي وعرضي وشرفي وكلشي حلو بحياتي بس سكتي

-لعد ليش نسيتني ذيج الفترة

-بعد جنت مطي ونسيت عذريني

-احس بعدني زعلانة لان عفتني

-اسف حبيبتي اسف حگج عليَّ بس لا تبجين

-من سألتني تلعبين كرة سلة انتَ جنت متذكرني؟؟؟

-شوكت هاي؟

-طبعاااً متذكر لان نسيتنييي

-دخيل بختك يا حسين

مادري شبيه تخبلت وظليت ابجي الليل كله، كل ساعة اتذكر شي صار قبل واكعد ابجي عليه والامير نايم بصفي حاضني ويهدأ بيه وظلينا هيج لحدما غفيت اخيراً وسديت حلكي..

اخيراً حددنا موعد ولادتي والدكتورة ما نصحتني انتظر الولادة الطبيعية بسبب وضعي فـ حددنا يوم عمليتي الي راح اجيب بي العنون الي البيت كله منتظره على نار..

سعادة، قلق، بهجة، خوف، تردد، رهبة كلها عشتها من دخلوني صالة العمليات، جنت حاسة راح انام وما اكعد بعد وما اللحگ اشوف ابني وراح يربى ويه غيري وهالتفكير خبلني وخلاني اموت من القهر واموت امير ويايه لدرجة من دخلت لغرفة العمليات شفت الخوف بعيونه وبملامحه..

برودة بأطرافي وخدر بأسفل بطني، حسيت بتعب وخمول فضيع وره ابرة البنج، رمشت كم رمشة ثقيلة قبل لا اغمض عيوني وادخل بسبات عمييق ما حاسة بأي شي حواليه..

-تَـمني!! تَـمني حبيبتي توتة يروح خالتج كعدي حبيبتي تَـمني

صوت خالتي هو اول صوت اسمعه بعدما رجعت للحياة من جديد، فتحت عيوني على كيف بجفون ثكيلة واول اسم اتذكر اجه على بالي بهاللحظة وهذيت بي هو..

-امير

-الامـير علي: ها يروحي هنا انا تَـمني شلونچ حبيبتي بشنو جاي تحسين

حسيت بأيده تلمس ايدي والايد الثانية لازمتها خالتي، بلعت ريگ ناشف واللتفتت على الاتجاه الاجاني منه صوت امير..

-ابني

ابتسم الامير وشفته يروح على الجهة الثانية، تبعته بعيوني وين راح ولا ارادي شهكت من شفته يشيل ابني بأيده ويجيبه بأتجاهي.. مشاعري بهاللحظة ماعرف افسرها ماعرف شلون اشرح الحنية الترست گلبي من حطوا حلمي وتعبي بيدي..

نزلت دموعي واني اتأمل حبيب گلبي وروحي وفرحتي ووليدي وهو بيدي، وليدي الشلته ببطني تسع اشهر وتحملت كلشي صعب بس حتى اشوفه.. يا "ليث" يا نبضي وريحة ايامي، يا امل عمري وفرحة احزاني..

تمنيت ما افارق ابني ولا لحظة بس للنوم والوجع رأي اخر وانجبرت استسلم اله، ثاني يوم خرجوني للبيت وذبحوا جوه رجلي ذبيحتين وثنينهن هدية من علي الدر لسلامتنا..

خالتي وتالة اجوا يمي طول فترة نفاسي ولو علي الكـرار هنا جان يا فرحة تالة بس للاسف دوامه ببغداد وما استفادت من مبيتها ببيتهم شي..

يوم السابع هو يوم طهوره وعمو سوه عزيمة لكل العشيرة جابهم، اجوا الخوال والعمام ونسوان العمام ونسوان الخوال واولادهم والكل حضر هالوليمة الحلوة ومطرونا بالهدايا والنگوط لـ ليوثي الحلو..

روحي فرفحت عليه من شفته يبجي ومتوجع بعدما طهروه بس سكتت بسرعة من خالة رسمية رزلتني وكالت لا اظل ابجي وياه وازيد وجعي وجرحي يلتهب.. غصبتني اكوم ابدل وابدل لـ ليث حتى يشوفونا مرتبين وما نشمت العذال بينا.. شبيها ويه العذال مادري ومنو من الموجودين هنا يكرهونا هم مادري بس سويت التكول عليه بدون لا اسأل زايد..

فرحتهم بولادة ليث چانت غير وما خفى عني فرحتهم هاي للامير علي وبهجتهم لانه اخيراً صار أب.. اخيراً صار ابو گلب الحنين اب، صار الواكف للكل طول اب، صار الينحلف براسه وبشهامته أب!

لليل الفرحة قائمة ومحد من الكرايب راحوا بالعكس كل النسوان اللتمن على العشا بالصالة ومن خلصنا اجو الامير واخوته وعمو علي انظموا ويانه وخالة رسمية گالت لبنت اخوها تطلع دفترها وسماعتها وتقرا شي لـ ليوثي واضح هي ملا..

-اريد الكل وياي من نبدي مو تناموون وتخلونا نبطل

-ليلة: انتِ بس اقري ومالج غرض

-رهف: نشعلچ الجو خية لا تخافين

ضحكت تهز براسها وبدت تصلي على محمد وتقرا هوسات حلوة وتذكر بيهن النبي والامام علي وبعدين بدت تقرا لـ ليث..

-وليوثي يا چكليته حامض حلو بباكيته.. ليوثي يا بنبوونة....

والكل يقرا وياهة الكل بدون استثناء، وليث بيدي نايم ولابس دشداشة بيضة صغيرة ولافين على راسه مثل العصابة..

-مباارك جيتك ليوثي مبارك جيتك ليوثي

هي تقرا ووگفوا سور ونور وحيدر على عكازته يهوسون ويدبچون وكل البنات والنسوان الموجودات يصفگن بسعادة والجهال بالنص يگمزون ويرگصون واخوان الامير كل شوية مطلعين فلوس من جيوبهم ويحطوهن بحضن بت خالهم كـ هدية..

-ابا الحسن علي: فاضلة چا ما تقرين على وليدي امير

-فاضلة: منو كالك ما تعزمنا على طهوره جان قريتله للصبح

ضحكوا كلهم وهي هم روحها كلش رياضية وفرفوشة رغم جبيرة بالعمر تطلع اكبر من امير، بنص هوستتا وفرحتنا اجه للامير اتصال وطلع بره.. ظل بالي وعيوني ركضت وراه لا ارادي..

-حبيبة: شبيچ تَـمني؟

-تَـمني: امير اجاله اتصال وطلع حبيبة خاف صاير شي؟

-حبيبة: لا لا ماكو شي ارتاحي

-شمعرفج؟

ضحكت بخجل ونزلت راسها، استغربت من تصرفها وهزيتلها راسي بمعنى شبيچ، ابتسمت ونصت يم اذني وهمست بتردد يغلفه الخجل..

-هدا حاكم اجه

-كذااابة

-اشششش شبيچ اجه يبارك للامير على طهور ابنه

-امممممممم عليناااا

-ياا خية سكتي والله شبيچ

-اممممم

-تَـمني لا تلطشين

-امممممم

-هههههه ولج تَـمني

-امممممم واضح السلنگح جاي علمود نعمة الله

ضحكت تضرب على چتفي ودارت وجهها مني بس لگفتها، لگفت شلون صارت حمرة وعرگت متوترة.. والله يا حبيبة اشوف وره محرم وصفر راح نسمع احلى كلللوووششش...

ما طول امير دقايق ورجع افتهمت حاكم ما طول من الباب سلم عليه وانطاه عصارة علمود ليث وراح، رجع الامير والابتسامة ما غابت عنه وبوجهه على ليث النايم بحضني، نصى عليه باسه وشمه من رگبته ورفع عيونه عليَّ غمزلي وهمس..

-الامـير علي: جبن عرب وحليب هوايش

-تَـمني: هههه اميييييير

ضحك واجه يكعد بصفي واخذ ليث من ايدي، باسه مرة ثانية وهمس بصوت ميسمعه غيري..

-الامـير علي: عنده نفس رصعتچ

-اووي اي انتبهت

تنهد بأبتسامة راحة خلت عيونه تصغر، لعب بخد ليوثي بطرف اصبعه وهمس بصوت خافت كللش..

-چنت دائماً ادعي كون ربي يرزقني بطفل منچ ماخذ من شكلچ وصفاتچ

-وتحس ليث يشبهني؟

-صراحة لا اجه مصلبخ على ابوه

-اميييير

-يا بعد وبعد عشيرته كلهم

-خلي يسمعك عمو شيخي حتى يطردك من العشيرة

ضحك على الهزاز وسكت يتأمل ليث النايم بيده، حسيت بنفسي تعبانة ومتوجعة اريد امدد بس ميهلي اگوم واعوف هالكعدة الحلوة..

-نوومه

-ها حبيبي

-شبيچ تعبانة؟

-لا

-عليج علي

-لا والله زينة اتحمل

-ابوي لو تعبانة امشي اخذج ترتاحين

-لا حبيبي اريد ابقى يمك

-ابقى يمج بالغرفة

-صدگ؟

-اي والله يلا كومي

گومني على كيفه واترخص من الكل بصوت عالي گللهم لازم اروح ارتاح وليث هم، ابتسمت لانه اختصرلي التأسف والفشلة منهم ودخلني للغرفة ونيمني على الجرباية..

-تَـمني: لو علي الكـرار يعرف دننام بغرفته يتخبل

-الامـير علي: گضى عمره مثل ام البزازين من مچان لمچان

گالها بضحك وكعد بصفي على الجرباية ولمني يحضني لجسمه، سكتنا ثنينه نسمع للمواليد الحلوة التجي من الصالة ولا ارادي ابتسم كلما اسمعهم يجيبون طاري ليوثي ويغنوله..

-تَـمني

-هممم

-تحبيني

-هاي شنو شو انگلب الاية

-جاوبي

-ماا

-يعني ما تحبيني مو؟؟

-ههههههههههه

-انا ادري بيج ما تحبيني ومنتظرتني اموت خاطر تتزوجين وديان

-اييييع وديان بنية تره!

-چا اگول اسم زلمة؟ بعلي اشگ حلگي گبل لا انطقه

-اممم عود خوش

-ما جاوبتيني

-اي احبك شلون ماحبك ابو ليث

-ياهو تحبين اكثر انا لو ليث

-مو دا اگلك انگلبت الاية

ضحك بصوت عااالي وجعصني بحضنه، باس راسي بوسة قوية واخذ نفس عمييق يشمني من شعري بحب..

-امير

-عيونه

-اي احبك.. احبك لدرجة صرت احب البورك وريحة البورك

-هههههه

-واحمد الله واشكره لان وكع سطل البورك على راسي وراسك وتعرفنا على بعض

-تحية خاصة لسطل البورك خاااالي

-تحية خاصة لابو ليث الشالني بچيس زبالة خاليي

-هههههه قصة حب من اول چيس زبالة

-تره صدگ

-اي وعلي صدگ

حچاهة بحسرة خلاني ارفع عيوني بفضول اريد اعرف شبي، نزل نظراته الي مبتسم وضرب گصتي بگصته بكله خفيفة..

-شلون صرتي بعد راسي

-بوجودك زينة حبيبي

-محتاجة شي؟

-سلامتك

-اجيبلج شي بنيتي

-لا حبيبي

-متوجعة؟ اخذج للطبيب؟

-چؤ

-وجهج اصفر تَـمني ما جاي استحمل اشوفج هيج

-لا تخاف امير طبيعي هالشي

-مادري احسچ متوجعة وما تحجين

-تحبني امير؟

-انتِ اول عشگ عرفه گلبي

-الله حبيت عود ذكرني بيها باجر حتى اغور بيها الچناين خاف انساهة

ضحك وگرصني من زندي خفيف، خلل اصابعه بخصلات شعري وسرحت نظراته بوجهي لفترة قبل لا يهمس بخفوت..

-انتِ اول بشر رسمته عيوني وتهيت دربي بتفاصيله

-واني احبك شيخي

-اشتعل الشيخ

-تقبل الموضوع اغاتي نهايتك كاعد بديوان ابوك لابس بشتك وعگالك وتبوس بشوارب الزلم

-رحم الله والديج ست تَـمني

-تدلل حبيبي تدلل يا أمير الإمـــــارة...!

النهاية 👑♥️...

━━━━━━ ♛ ━━━━━━

وچان تنتهي الإمارة المبني أساسها على حُب علي 🥹✨♥️

الإمارة الي علمتني اني شخصياً دروس مستحيل انساها بحياتي 🥹♥️

صعببة اتخطى هيج عائلة ويعز عليَّ الفراق بس بعد هاي الدنيا لازم نعوفهم يكملون حياتهم بعيد عنه 😭

بس ابقى سعيدة جدداً لأني استلمت هيجي قصة جميلة وسعييدة اكثر لأنكم شاركتوني بيها 🫂

شكراً لأبطال الامارة لانهم شاركوني قصتهم ووثقوا بيه بأسرارهم، شكراً لانهم خلونا نضحك ونبچي ونتونس ونزعل وننتظر ونتحمس سوه وعشنا مشاعر مختلطة وياهم 🥹، حسينه بجزء من معاناتهم وشاركناهم تفاصيل حلووة تخصهم 💚♥️♥️..

واكييد الشكر الكم يا ارقى صديقات ومتابعين ممنونه منكم لان اخذتوا من وقتكم وقريتو هالقصه وشاركتوني بتصويتاتكم وتعليقاتكم الحلوة التريّح القلب، اتمنى نالت اعجابكم واعتذر من التقصير ♥️.

استودعكم الله واتمنى تبرولي الذمة على أي تقصير صدر مني او تعب نفسي سببته الكم بسبب القفلات 🫂 وحتى ببعض المشاهد ممكن أثرت بيكم اتمنى تتكرمون عليَّ وتهدوني براءة ذمة 🦋🩷

انتظرونا بقصة جديدة ان شاء الله الايام القادمة ينزل منها مقتطف بأذن الله، بيني وبينكم كُلششششش متحمستلها كُلش كُلش 🙈😂♥️

القصة مختلفةة ومغرومة وذايبة بيها وبتفاصيلها الرائعة 🔥

أي سؤال يراودكم او فضول لا تترددون وتسألوني على حساب الانستا او قناة التلي وان شاء الله راح اجاوب القدر المستطاع من الاسئلة بكل حُب ♥️

حسابي 👇🏻♥️♥️♥️♥️