تحميل رواية «بنات الغجرية» PDF

._  بنات الغجرية _

( بقلم بسمة البياتي)

فتاة حسناء تغري النظر

ملاك طاهرا اغلى من الدر

طفلة ساذجة اطهر من الزهر

تحمل قلباً انقى من الجوهر

تجهل الشر والغدر

اساء الزمان اليها كثير

واقتاد لها وحشا خطير

اصبحت تتعامل مع قلوباً كالحجر

فقدوا احساسهم ووعيهم كشاربي الخمر

تحملت الكذب والخداع والمرار

ونظرا الناس اليها بأحتقار

وماكان لها ذنب غير أن من ولدتها من الغجر

__________

كاعدة كدام المرآيا عيوني متروسة دموع ماأكدر انزلهن الخاطر اصال ادري بيها اذا شافتني ابجي هم هم راح تبجي

دخلن امي وصديقتها الضحكة تارسة وجهن

مرجانة... بعدج ممبدلة ديلا فضينا الرجال على جية

.. الهدرجة مستعجلة على طيحان حظي وكسران ركبتي

.. اهوووو راح تبدي بسطوانتها المشروخة لج هاي القسمة المعاجبتج غيرج يتمننها بس رتبتة تسواج وتسواني 

لج بدلي ترى مالي خلكج

عيوني سهورة مكيجيها لايروح اارجال يشوفها ويغير رأيه ههههههه

ساهرة... هههههه يمعودة شيغير لوتلبسبها كونية يأخذها وهو الممنون

... صرت مثل اللعابة بيدهن وحدة تمكيجني والثانية ترتبلي شعري

امي كالت كومي اجه خطيبج

اخذتني من ايدي امشي وياها بدون وعي داخلي يصرخ ويستنجد اريد تصير معجزة وتخلصني من الأني بي

دخلوني للأستقبال الشيخ كاعد واثنين شهود

وجلادي هم موجود اي هذا جلادي الي راح يقتل كلشي بية ومايبقى من جنة غير اسمها

تم العقد من كلت موافقة تمنيت اكص لساني النطقها وأشمره للبزون

اكرم شال شدة فلوس خلاها بيد امي

كال يلا مرجانة اخذني الجماعة وطلعوا خلال خمس دقايق اريد الشقة فارغة

.. ركضت للغلافة البيها اصال حضنتها

مرجانة.. مكموعة شسوين اهنا روحي الرجلج وانطيني اصال

.. احتضنت اصال بقوة

وعطت كتلها كل عقلج اخليج تأخذيها اذا بقت يمج يوم واحد موبعيد بهذا عمرها تبيعها مثل مبعتيني

اني من البداية شرطت اصال تبقة يمييييي

ساهرة... اوووووف شراح يفهم هالغبية

لج دادة انتي عروس ميصير تبقة يمج

مرجانة... لاتخافين ما أسويلها شي باجر اجيبها ألج

.. استسلمت بوست اصال همست بأذنها لاتخافين جنة للموت متعوفج انطيتها الهم

قبل لاتطلع امي كتلها

ترى اني مو جنة القديمة اذا سويتلها شي اقتلج بدون ميرفلي جفن

... والله وطالعلج حس

امشي دادة سهورة امشي حرامات تعبي بيهن بناتي مطالعات عليه

.. راحن وعافني بقيت بالغرفة ما اريد اطلع واشوفة مشمئزة منه

صاح عليه

لج هاي وينج تعالي لا اجي ادوس راسج بنت *****

رحتلة واني رجلي تضرب وحدة بالثانية من الخوف

شافني تقدم عليه رجعت ليوا استغفر الله حتى شكلة مدري شلونة كرشة أعلى من خشمة طويل وجسمة ضخم شواربة كثيفة شعرة متروس شيب يمكن اني بعمر احفادة

وصل يمي بي ريحة مشروب قوية دنك يريد يبوسني وخرت راسي ودفعتة

انجن صاح بنت الكلب ادفعين منو اليوم انعل والديج

بقبضة ايدة ضربني على وجهي من القوة وكعت بالكاع زحفت أريد اكوم نزل المستواية وهجم عليه  .....

__________

المشهد الثاني

عيوني مورمة من البجي ودموعي متقبل توكف

عاطت بية أميرة وتالي وياج لج مرمرتيني كل شوية مخربة المكياج

جنة فدوة احجي وياها

جنة.. حالتي مو احسن من حالها دموعي تنزل ويا دموعها وكفت يمها من شافتني حضنتني تشهك وتبجي

اصال.. جنة فدوة ما اريده وما اريد ابقة اهنا خلصيني منهم حموت

... اسم الله عليج ياروح جنة وعمرها ولج شبيدي عليج الله لاينطي الجان السبب

الله ينتقم منج مرجانة

حبيبتي الخاطري بطلي بجي الولد شفتة وحجيت ويا دره ما الله

.. استلمت مسحت دموعي اميرة عدلت مكياجي

اجت عمة بنين كالت يلا نزلوها وخلوا شي على راسها حتى الشيخ يعقدلهم

لبسوني جادر فوك البدلة ونزلوني جوا وكفوني يم باب الاستقبال

بدا الشيخ بالعقد وسالني مجاوبتة

جنة همست جاوبي حبيبتي

النسوان يكولن ولج جاوبي واني صافنة بوجهن مااريد اكولها

جنة...خفت لا تروح تعاند وترفض وهذولة عشاير وشيوخ اذا كالت لا يأذوها

همست بغلات جنة عندج جاوبي

اصال... وكعن دموعي جاوبت بشهكة نعم انت وكيلي

تم العقد اخذوني للديوانية مسويلي كوشة رحت كعدت بدت مراسيم الحفلة جنة واميرة كاعدات قريب مني وادري بيهن مقهورات عليه

.. النسوان كامن يهوسن بالكولات والهوسات الجنوبية والبصراوية بعدها شغلن الديجي وكامن يركص

ام العريس كالت لبسن راح يدخل بشار

من سمعت اسمة بطني مغصتني

همست الاميرة هذا شجابة ليش يدخل ما اريد اشوفة

... ولج عوبة الولد صار رجلج غير تشوفي وتتعرفين عليه صارلج سبوع معاندة متريدين تطلعيلة هسه ماكو مهرب ارضي بالامر الواقع

.. درت راسي قحط ما اريد اشوفة خوما كوة

النسوان كامن يهلهلن مبين دخل اني مرفعت راسي بعدين كلت بگلبي دخلي اشوفة هو انحسب علية رجال بعد

رفعت راسي ظليت باهتة عززززا شنو هذا شهالطول شهالأناقة شهالشكل

هو مدنك مبين خجلان اجة كعد بصفي بدون ميحجي

لكزت اميرة وهمست اكولج هو هذا بشار

.. اي هو

... هو هذا الصارلي اسبوعين ابجي لان ما أريدة وكاطعة الأكل والشرب

... اي نعم هو بشحمة ولحمة

...غميني الله عليج غميني

... يااا البنية تخبلت

... طيح الله حظي اكو واحد يبجي من نعمة الله دباعي شلون شخصية

... عزززا بعينج لج ثكلي والله اذا جنة تسمعج تنجلط

... خايبة شثكل وجينات مرجانة يمشن ويا دمي

... لا عاد بهاي حجيتي الحق

... امه وخواتة كالن يلا لبسها الذهب اخذ الحلقة واندار عليه عينة اجت بعيني يفدوة شلون عيون دنك بسرعة لبسني الحلقة

واني اخذت حلقتة لبستهيا

انطوا السوار كالولة لبسها همس بصوت رجلي هاي سوالف نسوان  انتن كملن اني طالع

بنين.. خايب بوسها صارت مرتك من شنو مستحي

... باسني براسي وطلع واني لهسه مسطورة من بوستة وعطرة

رجعن البنات يركصن

لكزت اميرة اكولج اريد اركص صارت عندي طاقة للركص

.. وتالي يربي شحيفضها اليوم عليج العباس اتحملي وكعدي عاقل الحد متخلص الحفلة

.. يااا شبيج هي مو خطوبتي غير اكوم اركص

... هو انتي لو تركصين مثل البنات العاديات جان بيها مجال الله وكيلج اذا دخلتي بنصهن هسه عبالهن جايبين راقصة من غنوة حتى تحيي الحفلة واني وجنة انظل كل شوية نسحلج تكعدين وانتي تغافلينة وتكومين تهزين تصيرين مثل عبود خطبولة مرة ههههههه

... منو هذا عبود؟

واحد يحب الركص مثلج ههههه

بداعت مرجانة العلمتج هالسالفة الطايح حظها كعدي عاقل اني ادري اليوم جنة تنشمر مستشفى بسببج

... لا يمه اسم الله عليها هياتني كعدت عاقل

ورا شوية اجتي اخت العريس كومتني اركص كمت واني خربانة ضحك

حركت حواجبي الاميرة هي وجنة وجهن صوفر ههههههههه

________

مسائوو عسولاتي

كتبتلكم مشهدين من القصة واختاريت مشاهد توصف الخطوبة بحياة بطلاتي

اصال قلبها مثل قلب متابعاتي رهيف وبسرعة يوكع بحب الحلوين هههههههه

حبايبي القصة طويلة واحداثها هواي هالمرة مراح اتخصر شي لان كولشي بيها يستحق ينذكر والقصة بيها اكثر من بطل وبطلة

اني محبيت اكتبلكم مشاهدة قوية لان اي مشهد اكتبة راح يحرك هواي من احداث الرواية لهذا اختاريت هاي المشاهد ويارب تعجبكم

والنشر راح يكون بين يوم ويوم

اكرر بين يوم ويوم

اشدد وبقوة بين يووووووم ويوووووم

خايبات والنبي بين يووووووووووووم ويووووووووم

ما اريد من ابدي انشر تضوجون وتعاتبوني وان شاء الله ما انساكم بالبارتات الاضافية

الغلاف من تصميم المبدعة عبورة AbeerAL_Hussnawy

واسم اصال أيضاً من اختيارها على عنادج نور n_oor_14 ههههههههههه

انتظروني من اتفرغ وارتب وضعي ابدي بالنشر وان شاء الله خلال هالأيام

تحياتي للجميع بسمة البياتي

جبتلكم عبود خطبولة مرة يلا حيو حيو هههههههههه الفيديو تحفة

مساء العسل حبايبي

ترى والنبي مشتاقتلكم كوووومات

اعرف تأخرت عليكم بنشر القصة لكن للضرورة احكام هالأيام جدا مشغولة

وهسه ياعسولات أريد رأيكم تريدون ابدي بالنشر لو انتظر بعد

لان متابعاتي الحلوات نص يريدون انشر ونص لا واني ظليت محتارة على كولت هيثم يوسف حرت والحيرتني انت

واني بالبداية نوهت وشددت وكررت كتلكم من انزل القصة النشر بين يوم ويوم وتعرفون بيه اني كلمتي متنزل الأرض ابدأ بس راح تنزل هالمرة ههههههه

السبت والأثنين والأربعاء استراحة وباقي الأسبوع نشر

شفتوا اني اشكد طيوبة انطيتكم يومين زيادة لاحلى متابعات ومتابعين

وربي لوما هاي الثلاث ايام مشغولة جان هم نشرت بيهم

غيرت صورة غلاف القصة انطوني رايكم بيها ياهو احلى هاي لو القبلها

وأيضاً الصورة من ابداعات عبورة الحلوة AbeerAL_Hussnawy

تحياتي للجميع احبكم

بسمة البياتي

الأغنية تنطبق على حياة وحدة من بطلات قصتي هاي تغشيشة الكم ههههه

._  بنات الغجرية _

( بقلم بسمة البياتي)

_ البارت الأول _

وسلاماً علي أعين ذاقت العناء وما زالت تضحك وفي قلوبها فوق البكاء بكاء

__________

اصال.. دخلت للمطبخ واني معبسة وادردم  شلون بله واحد حتى بعطلتة ميرتاح ويشبع نوم شهالبلوة ياربي

جنة.. الناس اتكول صباح الخير شبيج مبوزة وعاقجة الوجه

... يعني شششبيه نعسسسانة هي مال دولمة من صباحيات الله

... لج عوبة غير نكملها من وكت حتى نوزعها بدون لغوا زايدة امشي تريكي

حتى تجين تساعديني  بنين هسه هم على جية

... غسلت وجهي وجيت انحشكت يم الصوبة كعدت اتريك

اباوع الجنة مخبوصة كومة مسواك كدامها تروح منا وتجي منا

كمت وكفت يم السنك باوعت من شباك المطبخ الجو مغيم وقطرات مطر قليلة دتنزل

جنة مشغلة قرآن صوت القرآن ويا هيجي جو ينطي طاقة ايجابية

... لج على شنو صافنة تعالي سساعديني مو شلعتي گلبي

... اووي شبيج ولاتخلين الواحد يستمتع بالمنظر

.. والله حرت وياج هسه تريدين تستمتعين بالمنظر لو ترجعين تنامين

   هي بقت نومة اشو انتي طيرتي ابو ابوها

هياتها عمة بنين اجت رحت فتحتلها الباب بسرعة دخلت نزعت العباية وكعدت يم الصوبة

... خايبات شني هالبرد عظامي طكطن

... يمعودة وينه البرد الجو حلو تعالي ساعديني من تتحركين حتدفين ترى اصال مرمرتني اصيح عليها اطبب من اذن اطلع من الثانية

... يامسكينة يا اني دوم مظلومة فوك مساحلتني من عز نومتي انوب تحجي عليه

جيت كابلتهن لزمت السجينة فرمت بالحشوة كتلهن مدام انجمعنا انسوي دولمة اليوم منبقي احد بدون منجيب طارية

جنة... ياااا اليسمعج يكول اربعة وعشرين ساعة كاعدات يكصن بالناس

... هههههه اني سامعة النسوان اذا انجمعن يلفن دولمة ميبقن احد اذا ميأخذن غيبتة حتى يذكرن اجدادهن السابع عشر

بنين.. ههههههه لا عاب حلكج عاد بهاي حجيتي الحق انه وخواتي من نلتم ونسويها مانسكت نحجي اخبار العشيرة كلها

جنة.. ابتسمت سوالفج انتي واصال مثل سوالف عجايز ايام زمان

... خلص القرآن جنة شغلت فيروز متعودة بعد القرآن تسمع فيروز واني هم تعلمت اسمعها مثلها

بنين... خايبة شنهاي من القرآن فد طفرة للغنى

... هههههه شنو مسامعة المثل اليكول ساعة الربك وساعة القلبك هذا المثل ينطبق على جنة

... هههههه والله آول مرة اسمعة شلون سوالف عجيبة عليجن   بالبغداديات

جنة... اني بس اوزع ابتسامات اويلي شحيسكتهن اليوم

...اني وعمة استلمنا العشيرة واحد واحد مبقينا احد مجبنا طارية  ههههههه

جنة... كافييييي ترستوا الدولمة غيبة ولكم هاي ثواب  حتى الله بعد ميتقبلها منه

... اني وعمة صرنا عاقلات سكتنا ههههههه

طلعت اغنية فيروز سألوني الناس عنك ياحبيبي

كمت اغني وياها كل كلمة اتأثر بيها أشكد على حروفها واتحسر

سألوني الناس عنك يا حبيبي

كتبوا المكاتيب و أخدها الهوا

بيعز عليي غني يا حبيبي

و لأول مرة ما منكون سوا

سألوني الناس عنك سألوني

قلتلن راجع أوعى تلوموني

غمضت عيوني خوفي للناس

يشوفوك مخبى بعيوني

و هب الهوى و ما كان الهوى

لأول مرة ما منكون سوا

رفعت راسي عيني أجت بعين جنة صافنة عليه

ابتسمتلها بيأس ردتلي نفس الأبتسامة

جنة... اووووف ياربي كووون الله يشيل الهم من گلبها ويخلي بگلبي ما اتمنى شي من هالدنيا غير سعادتها

غمضت عيني و اذكرت حياتي القديمة

يمكن الله لو ما بالينا بأم مثل مرجانة مجان تعذبنا بحياتنا

راح احجيلكم عن مرجانة

اني مرجانة الغجرية اي غجرية من وعيت على الدنيا هذا لقبي الغجرية ( الكاولية)

امي من الغجر وابوية ما اعرفة ولاشايفتة كل معلوماتي عنه هو سوري الأصل مو عراقي

جان دائماً يجي الكعدات الطرب والحفلات التسويها عشيرتنا

جدي وبيبتي مسؤولين عن شؤون العشيرة محد يكدر يتصرف بدون علمهم وشورهم

عدهم بنات اثنين وولد واحد

امي اسمها دلال بعمر ال 13 سنة بدت تحيي الحفلات ويا البنات وتركص للزبائن اليجون يدورون ونسة وطرب

من صار عمرها 16 سنة كام يتردد على السهرات شاب سوري يجي ويا اصدقائة

البنات اليركصن من يجي كل وحدة تحاول تلفت انتباهة بركصها لان هو احلى واحد بجماعتة عيونة لونهم مثل لون الزمرد سبحان الخلقة

دلال من شافتة انعجبت بي ودخل مزاجها وبدت تتوددلة وتحاول تغري وخلال ايام كدرت توكعة بشباكها  صارت علاقة بينهم

دلال تعرف بأبوها وامها اذا رادها مراح يوافقون عليه لان ممنوع اي بنية من بنات العشيرة تزوج واحد من خارجها لهذا خلت علاقتها ويا امجد سرية محد يعرف بيها

اطورت العلاقة بينهم وسلمتة نفسها بدون زواج

جانت لقاءاتهم اتم بعيد عن عيون اهلها

استمرت علاقتهم شهرين

بهالفترة دلال وضعها تخربط دائماً مريضة ونايمة مكامت تطلع ويا البنات تركص

امها جانت شاكة بيها بس مغلسة

وضع دلال بدء يسوء اكثر امها ضغطت عليها  حتى تعترف

بدور.. هاي اعراض حمل احجي منو لعب عليج

دلال اعترفت الأمها بعلاقتها ويا امجد

بدور جابت الداية كشفت على دلال طلعت فعلاً حامل من اجة أمجد للسهرة لزموا شباب العشيرة شبعوا كتل

ابوها طلب من امجد يزوجها ويعيش وياهم اهنا ويصير واحد منهم

امجد من خوفة وافق بس جان اذكى منهم خلاهم يأمنون بي وقبل الزواج انهزم منهم

امجد فص ملح وذاب محد بعد عرف عنه شي

آهل دلال ميهمهم الشرف وهالسوالف عادي عدهم سواية بنتهم

قبل ولادتها  زوجوها الواحد من ولد العشيرة

اجة يوم الولادة

دلال صار عدها بنية الي هي مرجانة

الطفلة اية من الجمال فلعة گمر عيون وبياض ابوها وملامح وشعر اسود على أمها

ام دلال ودلال كيفوا عليها وعتبروها كنز الهم هي هاي الراح تنفعهم وتربحهم

مرجانة من عمري ست سنوات كامن بيبي وامي يعلمني على الركص

ومن صار عمري عشر سنوات صرت محترفة بي محد يكدر ينافسني رغم صغر سني

جنت مستغربة من حياتنا وعيشتنا كل جم شهر ننتقل من منطقة المنطقة ثانية لو الغير محافظة

  سالت امي احنا ليش منبقة بمكان واحد

اتكولي المكان من يقل رزقة نغيرة احنا هاي حياتنا رحالة

جنت اشوف هواي بنات يجن يمنا ما اعرفهن ومو من عدنا

ارجع اسأل امي عليهن تضحك بقهقهة وتجاوب

.. هذن هم رزق ويجن برجليهن النة

مجنت افهم واطلب منها توضحلي وهي ممعتبرتني طفلة عادي عدها تحجيلي عنهن

... شوفي هذن البنات من ينهزمن من اهلهن يجن علينا محد غيرنا يلفيهن

... وهنا ليش ينهزمن

... هههههههه غير مصخمات وجهن اهلهن اذا يبقن ينكتلن

بيهن التغلط ويا صاحبها وبيهن التنهزم من الفقر والضرب وحبسة البيت وبيهن التبوك اهلها

من تكبرين راح تفهمين كلشي هذن البنات كل وحدة بيهن الها سالفة طويلة عريضة

زاد عندي الفضول رحت سالتهن ومثل مكالت امي كل وحدة مسويتلها بلوة وجاي منهزمة يمنا

مرات اشوف بنات صغار من عمر خمس سنوات العمر العشرة

مفرفحات من البجي اجي اسالهن ليش تبجن

... نريد ماما وبابا

.. ليش هما و ينهم

.. ما ادري خالة اخذتني كالت اوديج عليهم وجابتني اهنا

... من كبرت عرفت هذن البنات مبيوكات من اهلهن

اكثر نسوانة يروحن للسوك لو يطلعن بالظهرية اذا شافن طفلة حلوة وحدها يقشمرنها بحجة نشتريلج لو ناخذج الاهلج يخطفنها ويجيبنها يمنا يربنها ومن تكبر يشغلنها بالركص وسوالف الكاولية

عشيرتنا شتريدون تلكون بيها

نسوانها سحارات وعرافات يطشن بالخرز وياخذ خيرة

حرامية كاولية حتى مجرمين موجودين ويانة

هاي جانت حياة الغجر الي اني تربيت عليها وصرت محترفة بكلشي ركص سحر شعوذة حتى بوك كمت ابوك فلوس من امي وبيبي

صار عمري 12سنة برزت ملامح جسمي

بيبي بدور كالت من باجر تنزل تركصين ويا البنات

باول يوم نزلت للركص صرت محط انظار الكل وصارت العيون كلها عليه

اصحاب الكيف والونسة يجون يومية بس علمود مرجانة

والكل يتمنون نظرا مني

هواي شباب من عشيرتنا رادوني وطلبوني من جدي

وهو يرفض يكول مرجانة ما ازوجها هاي وجه الخير علينا ومصدر رزقنا عليها

استمريت بالركص والحفلات  وبين كل فترة وفترة ننتقل غير مكان

بعمر 18 سنة انتقالنة الشمال العراق

وبدينا نسوي حفلات اهناك

اني صح  امية وجاهلة وحياتي محصورة بين العشيرة والركص بس طموحاتي جبيرة وذكية

جنت اتمنى اعيش قصة حب خيالية

ومن امي حجتلي قصة حبها  ويا ابوي الحقيقي تمنيت اني هم اعيش نفس قصتها

ويمكن القدر حب يعيد نفسة وتكررت نفس سالفة امي وياي بس اني مو دلال اني مرجانة ومراح اكون مثل امي الي احبة مراح اخلي يعوفني وينهزم

بسهرة من السهرات اجوي شباب ومن بينهم شاب حلو وصاحب شخصية تسحر الگلب

من اول نظرة بينا وكعت بحبه

تراهنت عليه ويا نفسي وصممت لازم اوكعة بحبي

  من اركص اروح يمه واسويلة حركات اقل من يومين الحلو وكع ههههه وصار مثل الخاتم بيدي

حبيت العب عليه جنت يوم انطي وجه ويوم لا وهو يتخبل يحير شيسوي غركني بالفلوس والهداية يتمنى بس ارضى عليه

اعترفلي بحبه

وبهالحظة اجة دوري لازم احقق الأريده

.. اذا تحبني لازم تزوجني

رافت انصدم من طلبي ظل صافن عليه لا يآخذ ولاينطي

طكيت اصبعي بوجه كتلة وين صفنت سمعت الحجيتة لو لا

رافت.. سمعت بس طلبج صعب اني ابن ناس معروفين مستحيل يرضون ازوج راقصة من الكاولية

... ههههه وشبيها الراقصة مو  كاتل روحك عليها

على العموم مو بس اهلك مراح يوافقون اهلي هم مستحيل يقبلون واني متأكدة من هالشي

... اذا تعرفين اهلج مينطوج لعد شلون تريدين نزوج

... تقربت منه ولفيت ايدي على ركبتة همست اني حبيتك مستعدة اعوف اهلي وعشيرتي وانهزم وياك وهسه القرار قرارك فكر وانطيني جواب

رافت زادت حيرتة وميعرف شيسوي كاللها الموضوع موبهالسهولة  لازم افكر بي انطيني مهلة كم يوم واردلج جواب

.. اختفى رافت اني جنت مطمئنة متاكدة راح يرجع وهو بنفسه يطلب مني ننهزم

خمس ايام اجة شكلة تعبان كالي اني موافق

بدينا نخطط اني ويا بسالفة هروبي حددنا يوم

ومن اجة الموعد

وقت الفجر غطيت وجهي وجمعت فلوسي وذهبي طلعت امشي على كيفي واتلفت وراية خايفة احد يشوفني

من بعيد لمحت سيارة رافت ينتظرني

صعدت يمه هو شغل السيارة وساقها بسرعة جان مبين خايف ومتوتر اكثر مني

عنده بيت اخذني اله بقينا بي جم يوم بين ما يهدء الوضع

لان اصدقاء رافت كايليلة مرجانة منهزمة واهلها متخبلين وجاي يدوروها بكل مكان

واحد من اصدقائه يعرف بعلاقتي بي كايل الاهلي مرجانة انهزمت ويا رافت

ومنطيهم عنوان اهله

جدي وزوج امي وشباب العشيرة رايحين البيت اهل رافت كالبين البيت عليهم ومهدديهم

اهله من خوافهم كايلين احنا من كاللنة يريد يزوج غجرية تبرينة منه ومنعرف عنه شي

جد مرجانة... ابنكم دمه مهدور بس انشوفة باي مكان راح نكتلة

اخو رافت اجه علينا للبيت كال لو ترجعها الأهلها لو تطلعون منا جدها هدر دمك

رافت باك طن هوا من الخوف اخذني وطلعنا البغداد اجرنا شقة كعدنا بيها واستقرينا

اهله حالتهم المادية زينة كل شهر يدزولنة مصروف ورافت هم جان عنده فلوس

عقد عليه وتم زواجنا

وباول شهر صار عندي حمل

رافت مدللني حبيت عيشتي ويا حياة مختلفة عن الحياة الجنت عايشتها قبل

صار موعد ولادتي صارت عدنا بنية سميناها عطر

حلوة ماخذه جمالي وجمال ابوها

بعد ولادتي بشهر اهل اخو رافت احة علينا

كال انهزموا بسرعة اجانة  واحد من اصدقائك القدامى كال عندي علاقة ويا وحدة من بنات عشيرتهم وكالتلي اهل مرجانة عارفين هما ابغداد وجايين يدورون عليهم

.. اني ويا انرعبنا جنت متاكدة أهلي مراح ينسوني ويبقون يدورون عليه

بنصاص الليل اخذنا بنتنا وكم غرض وطلعنا الأبعد محافظة الي هي اليصرة استقرينا بيها.......

يتبع

مساء العافية حبايبي

مشتاقتلكم جداً هواي كومة كثير

رجعت وياكم بقصة بنات الغجرية ان شاء الله تحبوها  تعجبكم

هواي بنات ميعرفون منو الغجر هذا البارت راح يوضحلكم منو الغجر وشيسوون وشلون عايشين

اني بديتها وياكم من حياة الأم لان الأحداث كلها مرتبطة بعضها ما اكدر اختصر شي

ومن هسه اكولكم الي يكول ماكو هيجي والقصة بيها مبالغة راح اكولكم اسألوا اهلكم عن الغجر او الكاولية وهما راح يجاوبوكم

البارحة كتبت البارت وأريد انشرة الكم داسوي نسخ سويت قص وراح البارت وراحت روحي ويا والنبي لوما عيب من اهلي جان كعدت ابجي

حطيت رأسي على المخدة ورحت بنوم عميق من قهري

ومثل مكتلكم ياحلوات النشر يومية ماعدا سبت اثنين أربعاء 😁

تحياتيييييي الكم اختكم وصديقتكم بسمة البياتي

._  بنات الغجرية _

( بقلم بسمة البياتي)

_ البارت الثاني_

انتقلنا القضاء تابع المحافظة البصره

اهل المنطقة ناس عشائر واكثرهم گرايب ناس تعرف ناس

المنطقة حلوة وبيوتها مرتبة بس محبيتها تعودت على بغداد وأجواء بغداد

رافت جانت صعبة عليه العيشة اهنا ما كدر يتأقلم بسرعة

ابن الشمال مو بسهولة يكدر يعيش بالجنوب ويتحمل الجو الحار

أجرنا بيت صغير على كدنا وعشنا بي

اهل رافت بعدهم يدزولنة المصروف وعايشين منه

بديت اضوج واحن العيشتي القديمة مو هاي الحياة الجنت اتمناها بدت تصير مشاكل بيني وبين رافت جنت اتعارك ويا واظل اندب حظي هو يبقة يتوسل بيه ويراضيني

سوا وكالة الأخو وباعلة بيتا الموجود بالشمال وبفلوسة اثثلي هذا البيت واشترالي ذهب

كدر يقنعني ورجعت حياتنا طبيعية

صار عمر عطر اربع سنوات واكتشفت اني حامل للمرة الثانية تخبلت مردت هذا الطفل احس الحمل يكبرني ويخرب جمالي حاولت انزلة ماكو فايدة بقة مجلب ابطني

بعد تسع اشهر صارت عندي بنية ثانية ابوها سماها جنة

عطر وجنة  وحدة احلى من الثانية الجيران يحسدوني عليهن

اهل المنطقة الحد هاي اللحظة ميعرفون اني غجرية ومنهزمة من اهلي

كل معلوماتهم عنا احنا يتامى مالنة احد واجينا سكنا اهنا

صار عندي علاقة قوية ويا وحدة من جاراتي يسموها ام حسن مرة خمسينية عدها جناين وبنات كبار

من تجي تكعد يمي  تحجيلي على نسوان المنطقة شعدهن وماعدهن

جانت تحجيلي على بيت الشيخ على ولدهم ونسوانهم

من اسمعها اغم روحي اني لو ماخذتلي واحد من هيجي عائلة مو جان عيشني ملكة بدال عيشي هاي

رجعت مشاكلي ويا رافت

هو هم بدا يضوج مني و يمل

من اشوفة شوية مبتعد عني اسويلة سحر وارجعة مثل الطلي يفتر وراي

صار عمر عطر عشر سنوات وجنة ست سنوات اثنينهن بالمدرسة

اكو شاب من منطقتنا من اطلع دوم عينة عليه من اشوفة يباوع امشي بدلع كدامة وابتسملة

عجبني ارجع مثل قبل اشوف نظرة اهتمام الزلم بيه واعجابهم بجمالي

اليوم وكت المغرب متمددة حتى طبخ مالي خلك اكوم اطبخ رافت طالع ويا اصدقائه

اشو هذا دخل مثل العاصفة ركع الباب وراها اجة عليه واني متمددة سحلني من شعري لزمني دك راشديات ودفرات  بالكوة كمت وكفت ودفعتة مني

ششششششبيك اكيد تخبلت لك عار هاي على منو تمد ايدك  اليوم انعل والديك

... فوكها لسانج طويل لج انتييييييي وحدة زبالة وتبقين زبالة ما ادري انيييييي ششششلون صارلي سنين عايش وياج وعيني معمية عنج

... ماكووووو زبالة غيرك احمد ربك اني باقية وياك ولا انت من  تكلبك اشو معيشني بتلفات الدنيا بهذا البيت عبالك گن مال دجاج لك اني مرجانة الزلم جانوا يركعون جوة رجلي موزين قبلت بيك

... بنت الكلب اني ماادري شلون اخذتج اكيد عميتني بسحورتج

لج من وراج صديقي يكولي ابن ابو محمد عينة على مرتك وين مجاي يكعد يكول هي تتحارش بيه تسويلي حركات

.. هذا واحد جذاااااب اني وين اعرفة وشايفتة اشو ليل ونهار محبوسة بهالبيت

... ماكوو احد جذاب غيرج انتي الظاهر حنبتي الأصلج وللدم الخايس اليجري بيج

من هالحظة بعد ما اريدج انتي طالك سسسسمعتي شكلت انتي طالك وبحياتح بعد متشوفيني

... تخبلت من طلكني هجمت عليه ضربة الي وضربة اله مبقيت غلط مغلطتة عليه

من راد يطلع كتلة درب الصد لا رد اخذ بناتك اني ممسؤولة عنهن

اندار عليه وكال منو يكول هذن بناتي مثل ما انتي بنت حرام هنا هم اكيد بنات حرام حتى بناتج ما اريدهن

عافنة وطلعت فرفحت من العصبيه مبقيت شي مكسرتة عطر وجنة واكفات يم باب الغرفة يبجن لزمتهن كطعتهن من الكتل خليت قهري بيهن

بالكوة هديت روحي كعدت واني الهث

هينة رافت اذا مخليتك ترجع تتوسل وتبوس القنادر فلا اتسمى مرجانة

الليل كله اني اشتغل بالأعمال  واحرك بالجو باسم رافت وامه

جنت متاكدة يرجع قابل وين يروح

أدري بي يموت عليه

مر اسبوع ورافت ماكو القلق بدا يدخل الگلبي ليل ونهار عصبية مخلية قهري ابناتي

الأسبوع صار أسبوعين وثلاثة وهو ماكو تخبلت

مبقة عندي غير حل واحد لأزم اسافر المحافظتة  القديمة واسأل عليه يم اهله اهناك

اروح اعتذر منه وارضي أرجعة وياي بس اوف هالبلوتين وين اخليهن ما اكدر اخذهن وياي

صحت العطر وجنة اجني كعدن كدامي

سمعن بنات انتن مشتاقات الأبوجن لو لا

جنة.. اي ماما اني مشتاقتلة وينه اريده

. وانتي عطر هم تريدي يرجع

.. اي ماما

.. خوش اني راح اروح ارجعة الكم بس انتن لازم تصيرن عاقلات وتسمعن الكلام

اني راح اروح وحدي اجيبة وأجي وانتن تبقن بالبيت اقفل عليجن الباب

اي احد اذا يجي يدك الباب لاطلعن صوت

عطر وجنة خافن كامن يبجن مايكدرن يبقن وحدهن مرجانة عاطت بيهن وسكتتهن

خلتلهن أكل وثاني يوم من الصبح سافرت وعافتهن

بنات بعمر الورد مفكر ممكن يصير بيهن شي من الخوف لو ممكن حرامي يطفر على البيت ويصخمهن

لو يصير بيهن قدر يحتركن يتمرضن كل هذا مايهم مرجانة بس المهم عدها ترجع رافت

اني جنة البنت الصغيرة المرجانة ورافت

امي عافتني اني و اختي وحدنا بالبيت وراحت

عشنا برعب باليل كلما نسمع صوت لوتصير طكة لو صوت حيوان انظل نرجف ونبجي نتحاضن اني واختي ونختل جوا البطانية اربع ايام وامي ماكو الأكل خلص

عطر متعرف تطبخ ماكو غير الخبز نأكل خبزة وانام

خامس يوم رجعت امي بدال متأخذنا لاحضانها وتطمئن علينا دخلت موجرة نار تسب وتغلط

... ولجن ابوجن الكو..... عافنة حتى اهله شايلين مبقيت احد مسألتة يكولون سافروا

راح ابن القندرة وعافجن على گلبي

.. يومين امي صايرة نار اطب وتطلع تغلط علينا وعلى بابا

رجعنا انداوم اني وعطر

امي ليل ونهار ويا جارتنا تكعد تسويلها سحورة الجناينها

وهذيج مكيفة مرت سنة كاملة على غياب ابوية  تبهذلنة

كمنا نتعشى منتغدا نتغدا منتريك الناس يحنون علينا ويدزولنة هالقاسمة الله

امي كومة ذهب عدها متصخي تبيع منه قطعة  وتجيب احتياجاتنة

عطر صار عمرها 11  سنة بطلت من المدرسة تخجل اداوم لان معدها ملابس

اني صرت ثاني ابتدائي احب المدرسة رغم الضروف ما افكر اتركها

كاعده بيدي كتابي اجتي ام حسن على امي كعدن يتبشبشن

ام حسن.  اكلج ام عطر ليش ماترحين البيت الشيخ تشتغلين عدهم هما اهل كرم ميقصرون وياج

... ياااا من كل عقلج اني اشتغل خدامة

... خايبة شبيج هسه خدامة وبعدين صيري ام البيت ما شاء الله الشيخ بعده بحيلة اذا كدرتي توكعي تنفتحلج ابواب السعاده واذا مكدرتي على الشيخ حاولي ويا ولده

خايبة انه لو عندي جمالج جان عشت ملكة

... ههههههههه والله طلعتي بلوه واني ما ادري اي هذا الكلام الحلو من باجر اروحلهم

ثاني يوم من الصبح راحت مرجانة البيت الشيخ

مرة الشيخ مموجودة بس جناينها وبناتها

من شايفات مرجانة وجمالها كل وحده خايفة على زوجها

كايلتلها ممحتاجين خدامات

رجعت مرجانة شايطة

ام حسن.. انتي ليش ما انتظرتي مرة الشيخ

المرة فقيرة ومن اهل الله وگلبها طيب لو تدري بيج معندج احد وتريدين تعيشين بناتج

مراح تردج وتساعدج

مرجانة... هنا الحياية وين انطني فرصة حتى انتظرها من الباب حجن وياي وكالن ممحتاجين خدامة

ام حسن... انتظري جم يوم وروحيلهم وهالمرة لاطلعين بدون ماتحجين ويا مرة الشيخ

... ماشي

ورا يومين اجتي ام حسن والأبتسامة شاكة حلكها

كالت عندي الج بشارة

... شنو هي؟

.. اليوم الصبح شفت مرة الشيخ بالسوك وحجيتلها عنج كتلها اجتي عليكم وجناينج ما استقبلوها وهي خطية محتاجة وعدها بنات صغار

كالت من باجر خلي تجي تساعد البنات واني كل يوم انطيها القاسمة الله

.. صدك تحجين فدوة العينج ما اعرف شلون اشكرج

.. ههههه ما اريد شكر اريد تسوين عمل مضبوط لعيال بنتي سودة عليه شالعين گلبها

... ههههه من عيوني تدللين انتي وبنتج

ثاني يوم راحت مرجانة البيت الشيخ مرة الشيخ مستقبلتها ومعاملتها معاملة حلوة بس جناينها جانن يغارن من مرجانة

مرة الشيخ منبها عليهن محد عليه بمرجانة

ومن اليوم بدت مرجانة ترمي شباكها على الشيخ

بس الرجال جان متدين ويخاف الله عينة ميرفعها عليها

وحتى سحرها ميمشي بي

حولت خطتها على أولاده وهم فشلت طبعهم نفس طبع آبوهم

سنة كاملة تحاول وماكو فايدة

الشيخ عنده ولد طالب كلية يداوم ابغداد بس بالعطلة يجي الولد مو مثل اخوتة سبورت وشخصيتة منفتحة يحب الشقة والمجاملات

مرجانة صممت متطلع من بيت الشيخ بدون متكون ربحانة

وقررت تستخدم بنتها عطر حتى توكع ابن الشيخ........

يتبع

اعرف البارت قصير بس التصويت ابد ميسوي واهس للنشر😏

._  بنات الغجرية _

( بقلم بسمة البياتي)

_ البارت الثالث_

مرجانة من رجعت من بيت الشيخ مريت على السوك اشتريت ملابس العطر اخذتهن ورحت للبيت

باليل صحتلهت طلعت النفانيف خليتهن كدامها

عطر بصدمة الله هذن اشكد حلوات مالات منو

.. عجبنج ؟

... اي يخبلن وعلى كدي شوفي كمت وكفت وكدرت الثواب على طولي بدون ما البسه

... اذا تسمعين كلامي وتسوين الاكولج  عليه انطيجياهن ومو بس هذن بعد اشتريلج

... كرفصت كدام امي وعيوني تلمع من الفرحة اي والله راح اسمع كلامج بس انطينياهم

... شوفي من باجر راح اخذج وياي البيت الشيخ حتى تساعديني

.. اي عادي اجي بس خطية جنة منو يبقه يمها خلي ناخذها ويانة هسه عطلة معدها دوام

... نترت بغضب هسسسسه انتي شعليج بصخامة تبقة اهنا شكو عليها اسمعي الكلام ولدوخيني

عطر فقيرة بسرعة خافت من امها ودنكت راسها

سمعيني زين اريدج تكشخين وتترتبين

الشيخ عنده ولد اسمه منصف اريدج من تشوفي تدلعين كدامة وتبتسميلة

بس من بعيد البعيد

... عطر فتحت عينها مفهمت على امها مرجانة كعدت تشرحلها شسوي

وللأسف عطر شخصيتها ضعيفة شتكوللها مرجانة توافق بدون متناقش وهي اصلاً طفلة كل عمرها 12 سنة بس جسمها يبين اكبر من عمرها

جنة... اجيت كعدت يمهن اتفرج على النفانيف كلت الأمي لعد واني مجبتيلي

... عاطت عليه بغضب اليسمعج يكول كاعدة على بنك الخلفوكم موزين مني متحملة مصروفكم واجيبلكم زقنبوت تطفحوا

جنة انهضمت بالكوة كتمت دمعتها عافت امها وكامت

اجت عطر يمها كالت لاتنقهرين ماما جايبة  ثلاثة  اخذي واحد الج  اني اكصفة حتى يصير على كدج

جنة فرحت باختها حضنتها

عطر احن من مرجانة على جنة

ثاني يوم مرجانة اخذت عطر وياها

  مرة الشيخ من شايفتها باقية تصلي على النبي

كايلة بعدها صغيرة مو مال شغل ليش جبتيها

مرجانة... اني اريدها تتعلم وتصير ام بيت وهي تحب تشتغل وتساعدني

النسوان والبنات الموجودات ابيت الشيخ رادن ينفجرن من الغيرة

هنا جانن خايفات من مرجانة انوب اجتي الاضرب منها

عطر خجولة ما تكدر تسوي الكالتة امها

ظلت مرجانة كل شوية تخزر بيها وترزلها

واستمرت مرجانة أيام تاخذها وياها

  عطر رغم خجلها كدرت تلفت انتباه منصف وكام يطب ويطلع عينه على عليها

منصف كل دقيقة يتحجج بشي حتى يدخل للمطبخ

شهرين بينهم بس نظرات وابتسامات

زوحة الشيخ والبنات لاحظن هالشي

ومعجبهن الوضع

ام منصف طلبت من مرجانة بعد متجيب عطر وياها كالت انه عندي ولد شباب وخطارنا هواي مايجوز بنتج تنكشف عليهم وهي ما شاء الله حلوة وصغيرة تخلى الاعمى ينتبه عليها

مرجانة ضاجت من طلب ام منصف بس مكدرت تعترض

عطر من رجعت للبيت ظلت تبجي تريد تروح البيت الشيخ

هي مراهقة بسرعة تعلقت بي خصوصاً امها جانت اتكوللها انتي اذا اخذتي راح تعيشين ملكة  يدللج شتريدين يجيبلج تلبسين احسن لبس وتأكلين اطيب آكل وتخلصين من عيشة الفكر

مرجانة من شافت عطر تبجي كالتلها لاتخافين وداعتج احيبة الج وهو يزحف بس اصبري

مرجانة كامت تروح  وحدها منصف من نزل اجازة عينة ادور على عطر يريد يسال بس يستحي

  دخل للمطبخ يشرب مي حجت مرجانة ويا مرة هم تشتغل ابيت الشيخ

كالت اليوم اريد اطلع من وكت لان ورا المغرب خطار راح يجونا يخطبون عطر

منصف نزل الكلاص من ايده بقة صافن على مرجانة

وهي استمرت تحجي بمكر وتبتسم

هو ظل يروح ويجي من شاف المطبخ فارغ اجة المرجانة وحجة بثقة خالة اني رايد عطر لاتنطيها

الفرحة مساعتها

جاوبتة واحنا منلكي احسن منك بس الأصول اتكول اليريد يخطب يجيب اهله ويطلبها

صح اني اشتغل عدكم بس بناتي عزيزات واليريديهن لازم يجي يطلبهن حسب الأصول

منصف طايش كل همه ياخذ عطر فتح الموضوع ويا اهله ابو رجال طيب ومتواضع ميهمه سوالف فرق الطبقات مجان عنده اعتراض

بس اخوتة وعمامة مقبلوا

وصارت مشاكل هواي  ام منصف طلبت من مرجانة بعد متشتغل عدهم وهي كل شهر ادز شهرية الهم

واحد من اخوان منصف عنده معارف هواي مكلفهم  يسالون على مرجانة واهلها وعلى زوجها واهله

وانصدموا من عرفوا مرجانة غجرية كاولية ومنهزمة

عمام منصف اجوا على مرجانة انطوها مهلة  شهر تاخذ بناتها وتطلع من المنطقة

منصف اجة البيت مرجانة باليل

استقبلتة وحجتلة على سواية اهله بيها

منصف... خالة انه رايد بنتج ومراح اتخلى عنها  اريدج تاخذين البنات وترحين البغداد اهناك عندي شقة سكنوا بيها

ومن اجي اعقد على عطر وازوجها انه زلمة مو طفل من حقي اخذ الاريدها

مرجانة... اني خايفة اهلك اذا عرفوا يحاربونة وياذوني وياذون بناتي

... لانخافين انتي وبناتج بهالركبة راح تصيرون مسؤولين مني وتحت حمايتي شحده اليوصل يمكم

ثاني يوم مرجانة اجرت سيارة لمت غراضها اخذت البنات وراحت البغداد

منصف مدليها على الشقة ومنطيها المفتاح

بعد عناء السفر والطريق الطويل وصلوا بغداد راحوا للمنطقة البيها شقة منصف  بسرعة كدروا يندلوها

رتبوا غراضهم بالشقة ورتاحوا

اكثر وحدة جانت فرحانة هي عطر وأخيراً راح تنجمع ويا التحبة

جنة  مفرفحة من البجي على مدرستها

عطر... جنونة لاتبجين والله بس ازوج

اخلي منصف ينقلج وداومين اهنا و هذا وعد

جنة... اي عفية الله عليج كوليلة  خلي ينقلي قبل نصف السنة

... ماشي حبيبتي من يجي اكولة

ورا اسبوع اجة وقرر يعقد على عليها

مرجانة معجبها الوضع متريد عقد سيد

منصف.. خالة بس صبري هالفترة الحد ما ارتب وضعي واعقد محكمة

ولاتنسين هي بعدها صغيرة منو يكول القاضي يقبل يعقدلنا

.. عمرها صار 13 سنة مو صغيرة دبرلك واسطة منا منا

اني مشامرة بنتي حتى انطيها بهالطريقة ترى عطر الف واحد يتمناها

... صار تدللين اشوف ابو صديقي بلكي يكدر يدبرها

بس هسه خلي اعقد مهر سيد حتى طبتي وطلعتي عليكم تصير حلال

... وافقت مرجانة العصر  اخذها هي وعطر راحوا  عقدوا ورجعوا

مرجانة شرطت عليه ميلمسها قبل عقد المحكمة وهو انجبر يوافق

جنة... عمري صار تسع سنوات رابع ابتدائي راحت عليه هالسنة بسبب انتقالنة البغداد

عطر حجت ويا منصف حتى يساعدني انقل بمدرسة اهنا

كال ماشي بقيت انتظر وماكو

الظاهر نسة لان هالفترة مشغول بسالفة العقد

ابو صديقة كدر يدبرها اله راحوا هو وعطر وامي للمحكمة عقدوا

وتم زواجهم

اول مرة بحياتي اشوف عطر هلكد فرحانة من تضحك الضحكة تطلع من گلبها

فرحت الفرحها منصف مجان ممقصر ويانة بشي ومدلل عطر

هو سنة اخيرة كلية ادارة واقتصاد همل دراستة دوام كام ميداوم ليل ونهار بالغرفة وياها

اثنينهم مثل عصافير الحب غزلهم وشقاهم كدامي وين متروح يفتر وراها يحضن ويبوس بيها

اما امي  من اجت البغداد صارت متكعد بالبيت تطلع من الصبح مترجع غير المغرب

وشحده اليسألها وين جنتي رجعت تهتم بلبسها وكشختها المكياج ميوكع من وجها

منصف يضوج من تصرفاتها بس ميكدر يحجي شي

منصف.. جنونة اريدج تعذريني ادري وعدتج وخلفت بوعدي

جنة... لا عادي ادري بيك مشغول ان شاء الله على السنة التجي اداوم

..  قبل لا تبدي السنة انقلج وميكون خاطرج الا طيب

عطر.. شوكت تروح الأهلك

... الخميس اروح

... اووف والله راح اشتاقلك

.. حبيبتي اني هم مختنك لوبيدي ما اعوفج ولا لحظة بس شسوي ما اريد اهلي يشكون بيه

اصبري بس اكمل هالسنة ابلغهم بزواجنا واخليهم امام الأمر الواقع

... خايفة يرفضوني ويجبروك اطلكني

... لاتخافين ميفرقني عنج غير الموت  اهلي گلبهم طيب صح راح يزعلون بس متاكد بمرور الأيام يتقبلون الوضع ونروح نعيش يمهم وتصيرين وحدنا منا

... ان شاء الله حبيبي الله يسمع منك

منصف رسب

وأهله من عرفوا تخبلوا يكولوله انت وضعك مو طبيعي

اخوانة شكو بي وكم مرة اجوي البغداد هو ذكي جان منطيهم عنوان شقة صديقة من يجون يروح اهناك بستقبلهم  حتى لايكشفوا

بدت سنة جديدة انقلت البغداد وعدت السنة

امي طلعاتها كثرت ومن تجي للبيت اظل تبسمر منصف وتحجي عليه تريده يعلن زواجة كدام اهله وهو كل مره يطلع عذر

مرجانة.. اذا خايف من اهلك ومتريد تعلن الزواج طلك بنتي واني ازوجها اغاتك

اصلا هاي غلطة مني من انطيتها الك

... خالة ماكو داعي الهلكلام كتلج خلي اكمل كلية واكللهم هسه اذا حجيت اخاف يكطعون المصروف ويشيلون ايدهم مني

واني بعدني ممتخرج حتى شغل ما اكدر اشتغل

.. هاي اخر فرصة الك راح اصبر عليك الحد متتخرج وراها اذا معلنت الزواج لحظة وحدة ما ابقي عطر على ذمتك اطلكها منك وغصبا عليك

... امي فاتت للغرفة وركعت الباب وراها  تحجي بصوت عالي

ساعة السودة النطيتها الك اشو حافي كلشي محصلنا منك مدري وين جان عقلي من خليتها تاخذك

منصف كاعد يهز برجلة من التوتر عطر واكفة على صفحة مخلية ايدها على حلكها وتبجي

اجت كرفصت كدامه حجت وهي تشهك

فدوة معليك بأمي لاتسمع منها اني لو اموت ما اعوفك

منصف لزم عطر من كتفها كعدها بصفة وحضنها

لاتبجين حبيبتي امج حقها خايفة عليج وعد بس اكمل هالسنة اعلن زواجنا انه  عاشكج مستحيل اتخلى عنج

.. الله لايحرمني منك حبيبي

.. ولايحرمني منج ياروح منصف و اهله وعشيرتة

مرت الأيام وضع منصف بدا يدهور ليل ونهار يشكي من راسه وجه ذبل وهواي يرد من معدتة

وخطية عنده دراسة وامتحانات

بالكوة دبرها وكدر يمتحن والحمدلله نجح

اني هم نجحت صرت صف خامس ابتدائي

  كال لأزم اسافر الأهلي ابقة فترة اهناك وافاتحهم بموضوع زواجي واحاول اقنعهم حتى يتقبلون الوضع

قبل لايسافر عطر فرفحت عيونها مورمة من البجي

وبيوم الراد يروح حضنته وتشهك وهو عيونه مدمعة

... بعد بيتي لاتبجين مو اخذتي عافيتي بهالدموع فدوة اروحلج اتحملي هو بس جم يوم وارجع اخذج ونروح نعيش بالبصره وبعد منفترك

... ماااه ما اريدك تروح گلبي ممرتاح اخاف يجبروك اطلكني وبعد ما اشوفك

فدوة ابقة اهنا  لاتكوللهم  ومعليك بكلام امي

... مايصير عمري لأزم يعرفون انه مصيري ارجعلهم خوما اظل طول عمري عايش اهنا

بالكوة كدر يسحب نفسة منها راح  وهي حبست نفسها بغرفتها اكل بالكوة تأكل

وكلما تسمع صوت لو يندك الباب تفز وتطلع تركض عبالها هو

اكثر من شهر وماكو اي خبر عنه

تمرضت نايمة بالفراش اني مكابلتها وابجي ويا بجيها

امي ممهتمة اهم شي عدها طلعاتها

ومن  تجي تبقة تبسمرها و تسممها بالكلام

اتكولها

بعد بعد موتي روحج علموده  لج اصحي هذا جبان مثل ابوج

أكيد راح وبعد ميرجع

عطر من سمعت كلام امي كامت تلطم ملخت نفسها

بالكوة لزمت ايدها وحضنتها

اليوم  ساعة عشرة باليل اندكت باب الشقة راحت امي تفتحها

اول مفتحت الباب دخلن نسوان اثنين وثلاث زلم د علينا دفعوا امي وفاتوا

امي تريد تحجي النسوان هجمن عليها  وحدة سدت حلكها والثانية لزمتها دك كتل

النسوان ضخمات مبينات بصراويات والزلم لابسين دشاديش

اني وعطر واكفات على طرف وايدنا على حلكنة نخاف يجون علينا

وفعلاً المرة عافت امي وهجمت على عطر

اني تخبلت كمت اجرجر بيها بس هي مثل الثور شيزحزها

من شفت عطر تخربطت  انجنيت عضيت المرة بكل قوتي من ايدها ردت اشلع اللحمه

هي من حلات روحها كفختني على راسي

واحد من الزلم كال كافي عوفوهن خلي يكعدن اريد احجي وياهن واذا وحدة بيهن صرخت لو طلعت صوت افرغ هذا المسدس براسها.

جان لابس حزام فوك الدشداشة طلع المسدس من الحزام

امي من شافت المسدس انخلست وجها صار مثل النومية

كامت تحجي على كيف وتبجي

.. على بختكم لاتكتلونة احنا شمسويلكم اني صاحبة ايتام حرام عليكم

... لج  عيارة ما أريد احجي شسويتوا المنصف

... عطر فزت من كال منصف عينها عليه

امي انخطف لونها كالت ياا  شمسويلة احنا نسوان شنكدر نسوي

... عاط بامي كافي جذب شششششنو معرفتيني انه اخو رعد

منصف بين الحياة والموت احجيييييي شمنطيتة لج منصف راح يموت مبقينا مكان ما اخذنا اله وماكو فايده يكولون مسكي وعليه عمل

... اني شششعليه كلشي ممسويتلة لاتبلوني

... وحق العباس ابو فاضل اذا ماتحجين اليوم ابيتج بالكبر

... امي خافت كالت اني افك العمل بس عوفوني بحالي

رجعن النسوان هجمن عليها

... احنا راح نراقبج لو اطيرين السابع سما هم نجيبج فمن هسه اكلج ديربالج تحاولين تنهزمين

ومنا الباجر اذا مقكيتي العمل ورجع منصف الوضعة الطبيعي انتي وبناتج اقرن على نفسجن الفاتحة

عافونة وطلعوا امي تفتر بالبيت مثل الخبلة

طلعت شغلاتها القذرة مال سحر وكعدت مدري شسوي

عطر فاصلة بعالم ثاني هدوها خوفني

ثاني يوم رجع الرجال امي كالتلة السحر انفك

هو خلال أيام يرجع الوضعة الطبيعي

الزلم  كالوا راح تبقة عينا عليج الحد مايطيب منصف

ورا ايام عطر تخربطت امي خافت لايصير بيها شي اخذتها للمستشفى والمفاجئة طلعت حامل

رجعت للبيت وهي فرحانة وبدت تاكل

كالت منصف من يعرف بيه حامل اكيذ راح يرجعلي

بس يافرحة متمت ورا ايام اجانة تبليغ ان منصف مطلك عطر..........

يتبع

._  بنات الغجرية _

( بقلم بسمة البياتي)

_ البارت الرابع _

عطر من عرفت منصف طلكها تخربطت لا أيد ولا رجل اني حرت بيها

امي كاعدة ولانهزت شعره منها

صرخت عليها بقهر على شششششنو كاعد تتفرجين كووووومي شوفي بنتج مو راح تمووووووت

مرجانة... بنت الكلب شكو تصيحين

لاتخافين مايصير بيها شي يوم يومين وتنسى

... صفنت عليها شنو من بشر قطرة رحمه ماكو بگلبها

عطر صحصحت كامت تون وتبجي جسمها يرجف مثل السعفة جبت بطانية غطيتها

دفرت البطانية وبالكوة كامت وكفت راحت على أمي

كالت هسه ارتاحيتي من هججتي ليششششش هيجي سويتي ليششش مفكرتي بيه شلون گلبج نطاج تأذينة وتدرين بيه احبه

... بنات القندرة شبيجن اليوم كل دقيقة وحده هادة عليه

السويتة المصلحتج ردتة يعلن زواجة وتعيشين معززة مكرمة بدل التختل

... ومنووووو شكالج وكالج اني اريده يعلن اني مرتاحة ما أريد شي من الدنيا غير وجوده يمي

... لو حتى ممسوية السحر هم جان عافج اصحي على نفسج هذا مصيره يرجع الأهله ويتركج

... هسسسسسه جاية اتكوليلي هالكلام هو منو الوداني عليه مو انتي انتي الزرعتي حبه بگلبي وهسه جاي اتكولين مصيره يعوفج

لعد قبل ليش مفكرتي بهالشي

... اني غلطت ومحسبتها صح على العموم مصار شي بعدج صغيرة وحلوة والله لزوجج واحد احسن منه

... كمت الطم انتي شششبيج هاي من كل عقلج اني منصف اذا مرجعلي امووووت وخطيتي بركبتج هو جان يحبني بس بسحرج بعدتي عني

روحيلة كوليلة عطر حامل اكيد من يعرف راح يرجعلي

... وين اروووح شششنو مرايده روحي واروحلهم برجلي تريديهم يموتوني

... البطني شنو مصيره لازم ابو يعرف

... انتي ليش مجاي تقتنعين منصف عافج ورااااااح انسي وطلعي من حياتج

وهذا الحمل اشوفلج وحده تنزلة

... عطر خلت ايدها على بطنها جاوبت امي بفزع لو اموووت ما انزلة هذا ثمرة حبنا اني ومنصف

اتخلى عن روحي وما انخلى عنه

... طبج عرج اني العندي حجيتة بعد لاتجين وتتبجبجين كدامي اني معليه تريدين منصف روحيلة عسى مايكتلوج ولا عليه بيج

... امي عافتنا وطلعت  عطر رجعت للفراش غطت راسها واسمع بس صوت شهكاتها

گلبي يوجعني على اختي ومابيدي شي اسوي

مرت الأيام عطر وضعها ميطمئن وحالتها دتسوء

هواي تتخربط جسمها يصير مثل الخشبة

وتصك على اسنانها وتگلب عينها اتظل ترعش واذا اجي الزمها تبقة ترافس

اتوسل بأمي تاخذها للطبيب

اطبب من اذن لطلع من الثانية

من شافت وضعها ساء اكثر اخذتها للمستشفى وكولشي مسوولها ولا انطوها علاج لان حامل

دخلت بعمر 11 سنة شلت مسؤولية اكبر مني

تعبت بين الدوام وعطر من اروح للمدرسة يبقة بالي يمها

امي وأخيراً طلع منها شي زين جانت تبقة الصبح يمها ومن ارجع من الدوام تطلع

عدنا جيرانة شقتها مقابيل شقتنا مرة اربعينية عدها اربع اطفال وكلهم صغار  علاقتي بيها  زينه

بالبداية جانت تجنبني بسبب امي بس بمرور الأيام صار سلام بينا وسوالف

تدري بعطر حامل ودوم تسألني عليها حجيتلها على حالتها صفنت عليه

كالت هاي شغلتها مال شيخ مو طبيب خلي امح تاخذها السيد يقرأ عليها ترى البنية خلصانة ظالة جلد وعظم وانوب حامل موزين تبقة هيجي

باليل من رجعت امي كتلها خلي ناخذها السيد يقرأ عليها

... ههههههه منو علمج هالسوالف ماكو غير رابعة العدوية جارتنا

عطر مبيها شي من اتجيب تصير زينة كافي لادوخيني خليني انام

... حاولت اقنعها ماكو فايده

ثاني يوم ام سرمد شافتني كالت بشري وديتوها للشيخ لو لا

هزيت راسي بالنفي كتلها امي متقبل اتكول مبيها شي من اتولد تصير وينة

... لا حول ولا قوة الا بالله اسمعي جنونة حبيبتي اختج من تلزمها الحالة اقري ايات قرآنية على راسها الحد متهدء

انتي حافظة آيات لو لا

.. اي حافظة جم وحده الينطونياهن بالمدرسة

... زين انتي هم تغرفين تصلين

   لا ما اعرف محد علمني حتى برمضان من اشوف البنات يصومن اكول الأمي احنا ليش منصوم اتكولي معليج بيهن

   اوووف الله يهديها

... كمت اطبق الكالتة الي خالة ام سرمد من عطر تتخربط اجيب كتابي مال قرآن واقرأ يمها

اشوفها تضوج وتسد اذنها وبالكوة ترجع تهدء

دخلت بشهرها امي جابت ملابس طفل مستعملات مدري منين ماخذتهن وكاروك قديم

مكلفت نفسها تشتري لو قطعة وحده جديدة

يلا مو مهم المهم تكوم بسلامة

اليوم من  الظهر عطر عدها وجع ابطنها

امي مطلعت مثل عوايدها بقت بالبيت خافت لايصير عدها الم قوي وهي مموجودة

للعصر الألم زاد راحت  جابت قابلة حتى تولدها

المرة من شافت وضع عطر وعرفت عمرها 15 سنة خافت مقبلت اجيبها كالت البنية صغيرة وتعبانة تحتاج مستشفى

امي اعترضت وحاولت تقنعها القابلة مقبلت عافتنا وطلعت

عطر اتلوب من إلوجع وامي كاعدة

نترت شبيج كاعدة كومي جيبي سيارة خلي ناخذها للمستشفى دشوفيها شلون دتتوجع

... ادري هاي وين جانتلي هسه بالمستشفى يخبصوني يكولون ليش زوجتيها وهي صغيرة

... يعني انتي خايفة من كلامهم ومخايفة على بنتج والقرآن اذا مكمتي اخذتيها اني اخذها راح تمووووت وانتي بعدج تحجين

امي ظلت تسب وتغلط كالت كوميها حظرت ملابس الطفل واغراضها اخذناها وطلعنا

من وصلنا للمستشفى منتهية بسرعة اخذوها منه دخلوها صالة الولادة ومثل مكالت امي الدكتورة والممرضات لعبن بامي طوبة بالرزايل

تعسرت الولادة  تالي الليل يلا جابت

صار عدها بنوتة

عطر والبنية اثنينهن تعبانات ولأزم يبقن بالمستشفى

امي جانت جايبة وياها عقد زواج عطر حتى تسوي بيان للطفل

الممرضة سالت شحتسموها

اني وامي صفنة حتى ممفكرين شنسميها

السستر الجيبت عطر جانت واكفة

حبابة گلبها انكسر على عطر واهتمت بيها

باوعت عليها سألتها شنو اسمج كالت اصال

ابتسمتلها كلت هاهية حنسميها اصال

ضحكت وكالت عمي شفايتلي اني لو بجمال اصال الصغيرة تتربى بعزكم شاء الله

ثاني يوم وضع عطر واصال صار احسن المغرب طلعناهن من المستشفى

روحي تعلكت بالبنوتة حبيتها

هواي تشبه عطر وهادئة ولاتبجي

زاد الثقل عليه وصرت لازم اهتم بعطر واصال

امي شايلة ايدها فدمرة ولاتسوي شي واني اركض منا واجي منا البيت كله على راسي

الطفلة تريد ترضع عطر متكدر ترضعها بعدها تعبانة والحالة تجيها

همستلي كالت اكو جوا دوشك الجرباية فلوس روحي طلعيهن ضميهن يمج ومنهن اشتري حليب وممه الأصال

ديربالج امي تشوفهن ترى تاخذهن هي حتى ذهبي اخذتة

رحت طلعت الفلوس نزلت اشتريت حليب وممه ورجعت

امي من شافت الحليب عگدت حواجبها كالت هاي منين جبتوهم

عطر بصوت واهن جان عندي جم فلس انطيتهن الأصال جابت بيهن حليب

... واشكد انطيتها

... هنا مو هواي بس فلوس الحليب

... امي سكتت وادري بيها مصدكت دخلت للغرفة اتفتش اني جنت حاسبة حسابي من طلعت اجيب حليب ضميت الباقي يم خالة ام سرمد

صار عمر اصال شهر اني مسؤولة عنها حتى الدوام تركتة كلت على السنة التجي اداوم بين ما عطر تصير زينة

عطر...ماما  شوكت تبلغين منصف الله عليج روحيلة من يعرف صارت عنده بنية اكيد يجي يشوفها ويرجعلي

.. عطر ظلت تلح على امي الى ان وافقت تسافر للبصرة تبلغة.

سافرت امي وعطر كاعدة على نار، ومتاملة منصف راح يجي ويا امي

يومين رجعت امي معبسة الوجه اول مفاتت للشقة

عطر رغم تعبها كامت وكفت راحت على امي بالهفة وعينها على باب الشقة

.. وين منصف اشو ما اجة وياج

... كتلج هذا مثل ابووووووج مصدكتيني منصف العار نكر بنتة

كال الله اليدري منين جايبيها وتريدون تلزكوها بيه لو عطر صدك حامل جان بلغتوني من اول يوم مو جاييني هسه

وازيدج من الشعر بيت منصف مزوج سسسسسسمعتي شكلت منصف ازوج ونسسسساج وانتي هم انسسسسي

عطر متحملت كلام امي تمددت بالكاع وكامت ترفس

انريد نلزمها منكدر الحالة اجتها اقوى من كل مرة

كمت اصرخ كلت هاهية اختي راحت مني

بيت ام سرمد من سمعوا الصراخ اجوي علينا

المرة وزوجها كعدوا يقرون قرآن عليها الحد ما هدئت

امي تباوعلهم من ورا خشمها

الرجال وزوجتة ترخصوا وراحوا

صار عمر اصال ثلاث اشهر وعطر حالتها من سيئ للأسواء

اني تعبت احس كبرت وتحملت مسؤولية اكبر من عمري

فلوس عطر بقة منهن قليل حرت اذا خلصن منين انجيب حليب الأصلل

أمي فلس متنطي

باليل كاعدة واصال بحضني

عطر بفراشها وعينها على السكف.

فاصلة ولاتحس باحد

ساعات هواي احسها بغير عالم كلامها قليل اكل بالكوة تقبل تشرب شوية شوربة

باوعت عليه شافتني داباعلها ابتسمت

ياالله هاي اول مرة تبتسم من يوم الراح منصف

همست بتعب جيبيلي اصال اخذتها الها عدلتها المخدة ارتجت عليها

ايدها ترجف بالكوة كدرت تشيل اصال

. ضمتها الصدرها وتشم بيها

دموعها وكعن على وجه بنتها

رفعت راسها كالت

... جنونة تدرين انتي مو بس اختي انتي امي وابوية وكل اهلي

.. اختنكت بالكوة حبست دموعي كتلها واني ماعندي غيرج بهالدنيا الله عوضني بيح عن امي وابوية الي مايهمهم شي غير نفسهم

... جنونة وعديني متصيرين مثلي ولاتخلين امي تلعب بعقلج مثل مالعبت بعقلي وكسرتني

... لاتخافين عليه مستحيل اخليها تستغلني

... جنة ديربالج على اصال ولاتخلين امي تآذيها اريدها تكبر وتصير، مثلج بطيبتج وعقلج الجبير

... انخمط گلبي اختنك شبيها عطر ليش هيجي دتحجي دموعي كامن ينزلن مثل المطر

كتلها اصال نربيها اني وياج وانخليها تطلع احسن وحده

شدي حيلح وقوي نفسج حتى ترجعين بصحتج وتنورين البيت بطولج ومشيتج وتاخذين بنتج الحضنج

ابتسمت وهزت راسها رجعت تبوس اصال وتشمها

بهاليلة منمت للصبح كاعدة كل دقيقة اجي يم عطر اراقب انفاسها

يومين واني بقلق مو طبيعي عليها

ثالث يوم كعدت الصبح غيرت الأصال وانطيتها الممه

عطر بعدها نايمة حظرت الريوك وأجيت اكعدها

مغطية راسها كعدت يمها كتلها يلا عطورة كومي نتريك  مجاوبتني

شلت البطانية من شفت شكلها جسمي انتفض وانقبض صدري..

وجها شاحب عيونها مفتوحات على وسعهن  وحلكها مفتوح

اريد اتحرك ما اكدر احس انشليت

لساني انعگد

مدري شلون تقربت منها وهزيتها اريدها تكعد جسمها بارد مثل الثلج

سحبت البطانية منها وياريتني مرافعتها  قشعر بدني من المنظر ايدها اليسار مكصوص الوريد سابحة بالدم وموس حلاقة بصفها

عرفت اختي راحت مني صرخت باعلى صوتي عطرررررررررررر

حضنتها واني اصرخ من كل گلبي لج عطررررررر   لا ليشششششش عفتينا اني وبنتج منو النه غيررررررج لا ياربي معندي غيرها لاتفجعني بيها...............

يتبع

._  بنات الغجرية _

( بقلم بسمة البياتي)

_ البارت الخامس _

اهز بيها واحركها  وهي جثة هامدة بدون روح

اجتي امي تركض جانت هستوها كاعدة من النوم من شافت منظر عطر واني نايمة عليها

دفعتني وجرت عطر الحضنها كامت تصرخ بصوت عالي اول مرة امي هيجي تنهار

مرجانة... ليششششش عطر ليشششش هيجي سويتي صخام بوجهج مرجانة راحت بنتيييييييي عززا العزاني

خلال دقايق بيتنا انترس ناس سحبونا اني وامي من يم عطر اخذوها للمستشفى

وهناك انفتح تحقيق يريدون يعرفون شنو سبب الأنتحار ويتاكدون عطر انتحرت لو احد قتلها

بين سين وجيم وتحقيقات امي كالتلهم جانت حامل واطلكت

وبسبب الطلاك ادهورت حالتها ونفسيتها تعبت

التحقيق اثبت ان عطر فعلاً انتحرت

انسدت القضية

دفنة عطر الي مشافت راحة بحياتها

بهذا اليوم اني هم اندفنت وياها عطر اخذت روحي وراحت وتركتلي مسؤولية جبيرة ما اعرف شلون راح اكون كدها واكدر احافظ عليها

امي اعصاب متتحاجة اني بعالم ثاني الغرفة الماتت بيها ما اكدر ادخلها

كولشي بالشقة يذكرني بيها

ليل ونهار حاضنة اصال وابجي

خالة ام سرمد معافتني من تطلع امي تجي يمي تواسيني وتحاول تخفف عني

أم سرمد.. يا بنتي اذكري الله كلنا على هالطريق شدي حيلج وقوي نفسج حتى تكدرين تربين بنتها وديرين بالج عليها

... والله موبيدي گلبي دينعصر من القهر عليها

الحد هسه ممصدكة عطر ماتت

شلون كدرت تعوفني بهالدنيا الظالمة  الوحدي بنتها اشافت منها حتى ملحكت اتكوللها ماما

... اوووف ما اعرف شكولج بكل صلاة ادعي الله يصبر گلبج وينطيج القوة حتى تحافظين على هالطفلة المسكينة

... رفعت راسي واني عيوني تجري باوعت الخالة ام سرمد كتلها خالة صدوك عطر ماتت والله غاضب عليها وتروح للنار

... منو كالج هالكلام محد يعرف بالغيب حبيبتي

... ام تقى من اجتي للفاتحة كالت الأمي بنتج انتحرت وغضبت ربها ماتت كافرة

... ماما جنونة شوفي لا كلشي تسمعي تصدكي الله وحده يعرف بوضع عطر والحالة المرت بيها

عطر مجانت واعية على نفسها البنية جانت ممسوسة

... شنو يعني ممسومة؟

.... جان متلبس بيها جن والعياذ بالله اني وابو سرمد من اجينا قرينة عليها جانت ترافس جوا ايدنا وصوتها يتغير عبالك مو هي التحجي

حتى كلت الأمج بس للأسف مسمعت منا ومودتها الشيخ

... ليش مكلتيلي اني

... مردت اخوفج وانتي شنو بيدج وشتكدرين تسوين

... اوووف ربي هم امي السبب ليش بس احنا الله بلانا بهيجي ام

... جنونة اريدج تصلين وتحصنين نفسج

امج تشتغل بالأعمال والسحر وشقتكم صايرة مسكن للجن والشياطين اذا تلتزمين بصلاتج ماكو شي يكدر يمسج

... دنكت راسي خجلانة همست خالة والله ما اعرف اصلي محد علمني

.. اني اعلمج ومن اليوم نبدي كومي وياي

.. اخذتني خالة  اول شي علمتني عليه هو الوضوء من كملنا لبستني جادر صلاة وفرشت السجادات وكفت بصفي

من توجهت للقبلة وكالت الله اكبر سرت رعشة بجسمي

جانت تقرأ بصوت عالي واني اسوي مثل ماهي تسوي من بداية الصلاة النهايتها اني ابجي دموعي موكفن

من كملنا وباوعت عليه وأبتسمت كالت يتقبل الله حبيبتي ليش هالدموع

شهكت بصوت عالي اخذتني الحضنها

كالت كلما اتضيق بيج الدنيا وينترس گلبج بالهموم فرشي سجادتج وصلي ابجي واشكي الربج  أهمومج واحجيلة شنو متعبج

محد يسمعج  ويخفف عنج ويقضي حاجتج غير رب العالمين

صلي وأدعي الآختج ربج ارحم الراحمين يدري بيها طفلة شافت ضيم اكبر من عمرها لاتصدكين بحجي الناس لان الناس ميعوفون احد بحالة هاي شغلتهم ناس تاكل بلحم ناس

... كلام خالة ام سرمد مثل البلسم ينزل عالجرح

رجعت للشقة واني مرتاحة وأخيراً كدرت اغفى وانام

من اجت امي طلبت منها فلوس اجيب حليب الاصال

كالت معندي منين اجيبلج

... ماما شششبيج الطفلة جوعانة خطية

... طبها طوب عسى ماتموت من الجوع هالفكر هاي من يوم الصارت الفكر والنحس اجانة لوميتة هي ولا عطر

... اسم الله عليها انتي شبيج حتى الطفلة مخلصت من كلامج

هاي حفيدتج الذكرى الوحيدة من بنتج لازم اداريها الخاطر امها

... كتلج معليه بيها انعل ابوج لابو ابوها

.. عافتني ودخلت للغرفة ظليت حايرة شسوي ياربي

سويت مثل مكالتلي خالة ام سرمد فرشت السجادة صليت ودعيت الله يفرجها عليه

شكيت الربي من ظلم امي

ماما طلعت من الغرفة شافتني اصلي هزت ايدها ودخلت للحمام

ثاني يوم اجتني خالة ام سرمد تسأل عني وعن اصال استحيت اكوللها معدها حليب

من راحت ورا شوية اجت جايبة قوطية حليب صدقاً من شفتها كمت ابجي

.. لاتبجين حبيبتي ادري الفلوس خلصن وامج متنطيج

وداعت جهالي لو عندي اجيبلها اكثر بس مثل متشوفين العين بصيرة والأيد قصيرة

ابو سرمد من الصبح للمغرب بالمعمل يادوب يكدر يدبر اجار البيت ولكمة الجهال ومصاريفهم

... ميحتاج تكوليلي ادري بيج متقصرين ربي يحفظلج زوجج واطفالج ويرزقكم من واسع ابوابه

... فدوة العينج احلى دعوة من احلى جنة

هالسنة ترجعين للمدرسة لو لا؟

.. لا بعد وين اكدر اصال منو الها لازم ابقة يمها

.  ياربي اشكد حنينة وگلبج طيب

راحت ام سرمد سويت الاصال ممه خطية من الجوع ترضع سريع اووف حتى انتي تعذبتي ويانة

امي من شافت الحليب كالت منين جبتي كتلها من اهل الرحم

الغربة احن منج عليها

... لج احجي عدل وهسه سمعيني حظري اصال راح انطيها

... من كالت انطيها عبالك صاعدة على عمارة ووكعت من اخر طابق حضنت اصال بكل قوتي

صرخت شششششششنو انتي اشدتحجين

... مثل مسمعتي باجر اخذها انطيها الناس يهتمون بيها  احنا هم انحصل جم فلس

.. شششششنو من بشر انتي الهدرجة الرحمه معدومة من گلبج

هاي حفييييييدتج بنت بنتج الي ماتت بسبب ظلمج وعمايلج السسسسسودة

امي نزعت البرجلها ضربتني بي كالت خلصتي خطبة الجمعة

لج سسسسمعي اخذها يعني اخذها واريد اشششوف شلون تمنعيني

عافتني وراحت كمت الطم عزززززا هاي بس لاتسويها ربي رحمتك معندي غيرك

والله اذا اخذتها الله اليعلم المنو حتنطيها وشيسوون بيها

كمت الوب اختنكت صليت وبجيت توسلت بربي يساعدني

الليل كلة اني كاعدة ابجي حاضنة اصال اخاف اغمض وتجي تاخذها مني بدون ما ادري

ثاني يوم  الظهر امي كعدت من النوم سبحت وبدلت ترست وجها مكياج

مرجانة.. اشو ممسوية زقنبوت

.. مجاوبتها ظلبت حاضنة اصال

... طبج طوب لاتحجين شو جيبي هالمكموعة

.... تكدرين تاخذيها مني بحالة وحدة من تاخذين روحي وتشوفيني جنازة

... اهوووو رجعنا النفس اللغوة راسي مصدع مالي خلكج جيبيها خلي اولي

... وحق الحق ما انطيها واذا اخذتيها افضحج اروح ابلغ الشرطة عنج اكلهم تخطفين اطفال وتبيعهم

امي فتحت عينها بصدمة عاطت بنت النعال تهددينيييييي هجمت عليه سحلتني من شعري خليت اصال على صفحة خفت لاتتآذى

كمت وكفت لزمتها من ايدها وتقاويت وياها مدري منين اجتني هالجرئ وهالكلام

باوعت بعينها

كتلها مو بس هيج اعرف كل نسوان المنطقة الأجن سويتلهن سحر

اروح افتر على بيوتهن وابلغ ازواجهن وعيالهن عليهن وعليج

واخلي موتج يصير بالجملة

رجعت هدت عليه ملختني تملخ كطعت شعري

من تعبت يلا هدتني

كالت بسيطة بقيها يمج بس يكون بعلمج بعد دينار واحد ما اصرف لا عليج ولا عليها

اريد اشوف شلون راح تعيشين وتعيشيها حدي ادفع اجار هالشقة وبس وهذا الشي علمودي مو علمودج

وحتى مسواك بعد ما اجيب واني اكل برا

اذا مخليتج انتي بنفسج تجين تتوسلين بيه وتنطينياها فلا اتسمى مرجانة

... لا خلفت عليج ما اريد شي عسى ما اموت من الجوع ارحم مما اشوفج تبيعيها

... بسيطة اشوف لوين راح تكدرين تصبرين تبقين صامدة

عافتني وطلعت كعدت بالكاع خليت ايدي على حلكي عزا بعيني شراح اسوي

لج عطرررررررر ليش عفتيني ششششوفي امي شششسوت بيه وبنتج

اسبوع واني عايشة على تمن الحصة والخبز اصال احاول انطيها خبز ممرود بالجاي واقتصد بحليبها

شفت خالة ام سرمد كتلها خالة اريد اشتغل عسى ما خدامة بس المهم ادبر فلوس حليب اصال

... ولج وين تشتغلين انتي حلوة وصغيرة الناس تطمع بيج

... شسسسوي فهميني الطفلة راح تموت من الجوع من البارحة مصخنة معندي فلوس علاج الها  خالة اني جاي اموت فدوة ساعديني

... عندي خافض حرارة هسه اجيبة الج وراح اشوفلج شغل

... اي عفية وكون شغلة اكدر اخذ اصال وياية من اروحلها

... الله كريم من يجي ابو سرمد اوصي واشوف الجيران بلكي يدبرولج

ورا يومين ام سرمد كالت اكو ناس يريدون وحدة تنظف شقتهم  حجيتلهم عليج كالوا خلي تجي

انتي عليج بس تنظيف وغسل ملابس مواعين طبخ هي المرة قبل لاتروح للدوام تطبخ

.. انترست فرح الحمد لله ياربي  وين بيتهم وشوكت اروحلهم

بعد عمارتين عن عمارتنا المرة والرجال مواظفين

وعدهم اطفال اثنين الصبح تروحين ومن يرجعون للبيت ترجعين هما ميقبلون باي وحدة  واني لان كتلهم على ضمانتي قبلوا

لازم اديرين بالج على اطفالهم الولد عمرة خمس سنوات والبنية سنتين

كتلهم عمرج 13 سنة لان اذا عرفوا بعدج مداخلة 12  ميقبلوج

... ماشي خالة الله يبشرج بالخير

ثاني يوم من الصبح كعدت اخذت اصال طلعت من الشقة دكيت باب شقة ام سرمد

خطيه جانت متحظره اخذتني ورحنا الشقة ست مروة

المرة من شافتني عگدت حواجبها كالت على بختج ام سرمد هاي شجايبتلي

البنية بعدها صغيرة وشنو هالطفلة الوياها

.... حبيبة جنة شاطرة وام بيت اكيد حتعجبج

وهاي الطفلة يتيمة متكدر تعوفها لاتخافين البنية هادئة مراح تسبب ازعاج

.. والله الخاطرج حوافق وراح اخليها تحت التجربة من هسه اكولج بدون زعل اذا معجبتني ما اخليها تكمل

... اني متاكدة حتحبيها وتعجبج

... اريدها تخلي حجاب على راسها من تجي اهنا

... خالة باوعت عليه هزيتلها راسي بمعنى موافقة

طلعن خالة وست مروة خليت اصال على طرف واستلمت الشقة تعزيل وتنظيف ظهري انكسر

جهالها وكحين شلعوا گلبي خو البنية دمرتني كل شوية تجي يم اصال تخلي اصبعها بعينها وبخشمها لو تعصر راسها

واني باخر لحظة اتلحكها

للظهر كملت كولشي اجتي ست مروة انصدمت من شافت الشقة عبالها كولشي ما اعرف

متدري اني وعطر الله يرحمها من احنا صغار معتمدات على روحنا بكولشي

... عفيه عليج ولاتوقعتج هيجي شاطرة

يوميتج انطيجياها كل اسبوع

... فركت ايدي وحجيت بخجل كتلها تكدرين تنطينيها  من هسه اريد اشتري حليب الاصال

يمكن المرة انقهرت عليه كالت هاج فلوس الحليب هاي مني للطفلة ويومتج تبقة نفسها تاخذيها نهاية الأسبوع

فرحت اتشكرت منها اخذت اصال مريت للأسواق اشتريتلها حليب ورجعت للشقة ميتة من التعب وجوعانة اكل ماكو  سويتلي عجينة كليتها بالدهن  سويت جاي وكعدت اكل

كملت ونمت باليل من اجت امي وعرفت بيه اشتغل خدامة

كابلتني وكعدت تضحك بقهقهة اول مرة اشوف ام تشمت بنتها

.... ههههههههه عود ما اوصيج اذا شفتيلج صيده حلوة وكعي هههههه

... مجاوبتها  استمريت بشغلي زوجها الحد الان مشايفتة

من اروح الصبح هو طالع للدوام والظهر ست مروة ترجع قبلة واني اخذ اصال وارجع للبيت

سبوعيتي الحمدلله زينة اهم شي اكدر اجيب بيها حليب ومسواك شي قليل مرة طماطة مرة بيتنجان هالقاسمة الله

بالبداية من جنت انظف الشقة الكي فلوس بغرفة النوم لو على طقم القنفات ابقي بمكانة ادري بيها دتجربني تشوفني اخذهن لولا

من ترجع وتشوفهن بمكانهن تفرح

صارلي ثلاث اشهر اشتغل عدهم  صار عمري 12 سنة

بهاي الثلاث اشهر زوج ست مروة مرتين شفتة

اليوم كالعادة اخذت اصال ورحتلهم دكيت الباب فتحة الي زوجها

صفنت مدري ادخل لو لا

... شبيج واكفة فوتي

... دنكت راسي وفتت عيني ادور على ست مروة

همست بخجل وين ست مروة

.... مموجودة

... بهت لوني كتله هااا لعد اني اروح من تجي اجي

... ههههههه شبيج مراح اكلج انتي مو هذا شغلج ابدي بي قابل يومية مروة تبقة يمج

.... الجهال وينهم

.. هم مموجودين راحوا البيت جدهم ويا مروة

... لعد بقيتي مالها لازم اني رايحة انداريت اريد اطلع

حجة بصوت عالي كال اوكفي

انداريت عليه كتلة نعم محتاج شي

... اي محتاج واريد تسمعين الكلام

... رفعت حاجبي شنو ياكلام

... لاتباعين هيجي عيونج يدوخن

... ترى ما اسمحلك تحجي وياي بهالطريقة

... ههههههههه معقولة بنت مرجانة متحب هيجي كلام

بس والله طلعتي قنبلة جنت سامع بنات مرجانة حلوات بس ممتوقع هيجي

هي امجن داهية اكيد اطلعن عليها

... اختنكت من كلامة مشيت سريع اريد اطلع سبقني وصار كدام الباب

كتلة توخرررر من كدامي لو اصرخ والم عليك الناس

... سمعيني وبعدين روحي

... ششششسسمع عوفني اولي الخاطر ربك

... انتي حرامات تشتغلين خدامة وهاي ايدج الحلوة تتلفيها بالشغل

المثلج لازم تعيش ملكة

.. اني عاجبتني حياتي وراضية بيها معليييك اشتغل خدامة او لا هذا شي يخصني

.... هههههههه تريدين تقنعيني انتي شريفة ههههه والله حلوة هاي مرجانة الكاولية تربي بنية وتطلع محترمة هههههه

... عيوني انترست دموع ما اعرف شحجي

... اني من اول يوم شفتج بي وانتي عشعشتي بدماغي ليل ونهار افكر بيج لون عيونج سطرني صرت احلم المسج واضوك شفايفج واعرف شنو طعمهن

... اخرررر مرة اكولك افتتتتح الباب

... واذا مفتحت شسوين لج بابا اني رايدج راح ادللج شتريدين انطيج واريحج من الخدمة بالبيوت خليني يومية اجيج الشقتكم اكضي وقت وياج

وداعتج راح ادللج واريدج انتي هم ادلليني

... تفلت عليه

  حاولت ادفعة من كدام الباب اريد اطلع

مسح وجها وضربني راشدي ردت اوكع جرني عليه اصال صارت بيني وبينه.......

يتبع

الي يسأل البارت ليش قصير شوفوا التفاعل وانتوا تعرفون 🌹

._  بنات الغجرية _

( بقلم بسمة البياتي)

_ البارت السادس _

حاولت ادفعة من كدام الباب اريد اطلع

مسح وجها وضربني راشدي ردت اوكع جرني عليه اصال صارت بيني وبينه

راد يتقرب يبوسني جسمي رجف اختنكت درت راسي عطت بصووووت عالي وخررررررررر حيووووان

هو فز من صوتي وصحة على روحة ارتبك وكال اششش لاتصيحين ما اسويلج شي

راح اعوفج تروحين بس قبلها سمعيني

اذا حجيتي شي المروة وكتيلها على الصار والخلقج اندمج

وأفر السالفة عليج اكول هي اجت وشمرت نفسها عليه وموبس هيج ألبسج تهمة واكول باكت فلوس مني

مروة والناس كلها راح يصدكوني اني وجذبوج لان يعرفون انتي منو وبنت منو

واني منو

لهذا ياحلوة أستري على نفسج لان انتي مو كدي

... غرغرت عيوني بالدمع اعرف كلامة صح محد حيصدكني

هزيت راسي بالموافقة كتلة افتح الباب ما احجي شي وحتى شغل بعد ما اشتغل عدكم

فتحلي الباب طلعت امشي سريع دموعي تنزل وامسحهن بيدي

رجعت للشقة دخلت للغرفة شبعت بجي هسه شراح اسوي وين انطي وجهي شلون حعيش واعيش هالطفلة

للظهر اندكت باب الشقة عرفتها ام سرمد لان متعودة من تشوف امي تنزل تجي

فتحتلها الباب صفنت بوجهي

... شبيها عيونج ليش حمر ومورمات

... متحملت حضنتها وغصيت بالبجي كمت اناشغ اريد احجي ما أكدر

... لج شبيج خوما امج سوتلج شي تعالي انفوت ميصير نبقة بالباب

دخلنا جوا كعدتني جابتلي مي شربت وهدءت

... هسه احجي شبيج ومنو وياج

... حجيتلها على السوا زوج ست مروة ظلت مصدومة وفاتحة حلكها

كالت اليوم العب بيهم طوبة شنو انتي تايهتلة هالعار

كدام الناس يبيع شرف ومثاليات وهو زبالة

...لا خالة فدوة اروحلج سكتي والله العظيم اذا حجيتي محد يتاذى غيري

مثل مكلتي كدام الناس انسان محترم واذا حجة الكل يصدكونة ويطلعوني اني المتهمة لان للاسف اني بنت مرجانة

... والله احترك دمي لوبيدي اروح اكطعة

... سلمتة بيد الله هو ياخذلي حقي

هسه كوليلي اني شحسوي وششتغل

خايفة تخلص الفلوس العندي وأرجع اتبهذل

... جنة شفتي الصار بيج لو ما الله سترج جان هذا النجس دمرج

يابنتي انتي حلوة مومال تشتغلين بالبيوت

... لعد ششششسوي هذا حظي اني من دون البنات الله بلاني بام سكط

... اصبري بلكي الله يفرجها عليج راح احجي ويا ابو سرمد يشوفلج شغل ثاني

... مرت الايام واني كاعدة بدون شغل هم زين جنت جامعة كم فلس اصرف منهن

اصال صار عمرها سنة جنت اكثر شي انطيها اكل داحاول افطمها من الحليب

ست مروة من عرفت بطلت اجت عليه كالت ليش بطلتي تعودت عليج

اعتذرت منها كتلها تعبت من الشغل اريد ارتاح

امي تطلع الظهر ترجع نص الليل ما اعرف عنها اي شي حتى كلام ماكو بينا

الجوع والعازة دمرني  احس معدتي يبست من اكل الخبز والتمن الناشف بدون مرك

اللحم بس اسمع بأسمة فواكه ميطبن بيتنا

خالة ام سرمد الله يحفظها رغم حالتهم الضعيفة جانت من تطبخ ادزلي ماعون لوما هالمرة اني واصال انموت من الجوع

جنت اكل شي قليل والحصة الأكبر اخليها الأصال خطية طفلة ومحتاجة تتقوى وتتغذى

اليوم امي رجعت من المغرب استغربت مو من عوايدها

شايلة علاليك  خلتهن بالهول كعدت تفتح بيهن وعينها عليه

اصال بدت تخطي راحت وكفت يم امي تلعب بالجياس

امي طلعت كعكة انطتها

عگدت حواجبي هاي شصاير بالدنيا معقولة هاي مرجانة اخاف مبدليها لو يمكن تريد تموت وهاي صحوة موت

... شبيح تباعيلي هالشكل امشي فرغي المسواك وهاج هالدشداشة قيسيها شوفيها على كدج

... شنو هالكرم هذا معرفتج ومصدومة بيج

... انجبي لج طول عمري كريمة بس انتي رعنة ولسانج طويل دوم شالعة گلبي

.. مرتاحيتلها كمت رتبت المسواك بالمطبخ

الدشداشة عفتها بعلاكتها حتى مفتحتها

امي لليل وهي تحوص تروح وتجي عينها عليه

كعدت مقابيلي كالت اصال شوكت نامت

... هستوها

..اهااا اي خوش اكولج باجر صديقتي راح تجي العصر علينا أريدج تستقبليها وياي

.. صديقاتج كامن يجن اهنا كملت السبحة

... اي وشكو بيها

.. هي جاية عليج اني شعليه حتى استقبلها

... غير بنتي وتريد تشوفج

... اكولج ليش متحجين بصراحة شنو السالفة

...ههههه طالعة ذكية على امج

شوفي بنتي الحلوة باجر صديقتي وابنها يجون يشوفوج حتى يخطبوج

... اهااا طلع الموضوع بي عريس

من هسه اكولج لايجون ولايتعبون نفسهم زواج اني ما ازوج

... لج مكموعة قسمة زينة الناس حالتهم زينة يدللوج بدل الفكر العايشة بي واذا رافضة علمود اصال معليج بيها اني اربيها هاي بنت الغالية

... هههههههه هسه صارت بنت الغالية لعد قبل مو ردتي تبيعيها

...غير جان دمي محترك على بنتي الراحت بعز شبابها اني بحالة عصبية حجيت خوما من صدك ابيعها

... اي صح على العموم اني حجيت العندي زواج ما ازوج

... لج لاتمرمريني اول مرة شوفي الولد واحجي ويا وبعدين قرري

... امي ظلت تزن براسي اضطريت أوافق حتى اخلص من زنها

... ثاني يوم العصر حظرنا عصير وكعك

بالكوة خلتني البس الدشداشة الجابتها الي

صح داسوي التريدة بس مخلية ابالي الرفض لو اموت ما ازوج واعوفلها اصال ادري هاي الزواجة وراها سالفة

اجتي المرة وابنها اني جنت بالمطبخ

مرجانة... وينج يلا تعالي جيبي العصير ودخلي كعدي يمنا

شلت الصينية ومشيت وياها سلمت وقدمت للمرة العصير

باوعت عليها استغفر الله من شكلها مبينه مو راحة الشعر اصفر وكيلو مكياج بوجها  وعلج بحلكها رغم كبر سنها لاعبة لعب بشكلها

ام سامي... شهالكيكة  لج مرجانة بنتج تخبل

... ههههههه اي داده طالعة عليه

ام سامي... سمسوم حبيبي باوع العروستك اشكد حلوة

... انطيت العصير السمسوم واني لو بيدي اضرب الصينية براسة

خرب غيرتة ذرة رجولة مبي الشعر فاركة من النص وحركاتة حركات نسوان

يحجي ويحرك بيدي وحواجبة ويتماوع

كعدت واني صافنة عليه وعلى امه

... داده مرجانة شتريد الحلوة احنا حاظرين البنية تستاهل

سامي... اني مستعد الكل طلباتها

مرجانة... ادري بيكم متقصرون واني ما لكي احسن منكم

سامي... لعد خلي نقرأ الفاتحة وباجر نطلع نشتري الذهب

ام سامي... ههههههه انزول عليك سمسوم مبين مستعجل

مرجانة... هههههه عوفي فرحان

جنة... صافنة عليهم ولازمتني الضحكة احس مهرجين كدامي يفصلون ويخيطون بكيفهم

كمت وكفت كتلها خالة ام سمسوم احذي سمسوم وروحي شوفيلة غيري

اني زواج ما ازوج من رخصتج

دخلت للغرفة ورا شوية اجت امي هدت عليه

.  بنت النعال انعل ابوج لابو شرفج شلون تفشلين المرة وخليتها تطلع زعلانة

... طبها طوب زعلت الجلاب وحدة دايحة وابنها طنطا كل عقلج اخذه

ترى اني فاهمتج وادري بشنو تفكرين اعرف تريدين تزحلكيني حتى تاخذين اصال تبيعيها

بس والله على جنازتي يصير هالشي

.. لج رعنة ليش تظلميني مو كتلج اني اربيها  اني داريد مصلحتج اريدج تعيشين بالعز ميهون عليه اشوفج تشتغلين ببيوت العالم

.. ايباه اعيش بالعز ويا سمسوم زين اكولج اذا نزوج منو يلبس البدلة البيضة اني لو هو ههههههه

... ظلي ضحكي تبقين فگر وميصير براسج خير طالعة على ابوج السكط

... هههههههه غمتني وطلعت والله يا الله عبالها اني مثل عطر الله يرحمها تكدر تقشمرني

امي شدت وياي لان رفضت من ترجع للبيت اظل تتعارك الحد ما تنام

اني واصال كمنا نتحسر على اللكمة كولشي ماكو بالبيت

يومية من اشوف خالة ام سرمد اسألها اذا لكتلي شغل او لا

اتكولي ابو سرمد اشكد دورلح ماكو

يأست واحس الأبواب كلها انسدت بوجهي

مخايفة على نفسي كل خوفي على اصال خفت يصير بيها شي من الجوع والحرمان

يومية افرش سجادتي اصلي وابجي مامليت من الدعاء بكل فرض اصلي ادعي ربي يفرجها علينا

اليوم العصر اجتني خالة كالت عندي الج بشارة

فرحت بداخلي كلت يا الله بلكي لاكيتلي شغل وفعلاً توقعي صح

كالت اكو بنية تشتغل بالمعمل مبطلة وابو سرمد كايللهم اكو بنية يتيمة من معارفي اريدها تشتغل ويانة

المدير كايل جيبها.

.. اوووووف الف الحمدلله والشكر مقصرت ياربي

... جنونة من هسه لأزم تعرفين شغلهم متعب

تروحين من ستة الصبح ترجعين ستة المغرب

بنتي اذا صعب عليج ومتتحملين كوليلي

.. اكيد مو اصعب من الحياة العايشتها لاتخافين عليه خالة اني كدها

فدوة  يصير اخذ اصال وياي تدرين بية ما اكدر اعوفها

... لا والله ميصير وين تعوفيها اذا شافوها وياج يرفضوج

... دخيلك ربي لعد شلون

... عوفيها يمي اني اخليها بعيوني

... فدوة العمرج بس اخاف اتعبج

.. لا يمعودة حالها من حال جهالي وين التعب وهي دشوفيها اشكد فقيرة

... افضالكم كثرة  ما اعرف شلون اجازيكم

... ترى ازعل منج احنا شمسوين انتي بنتي بس الله يعرف اشكد احبج

.. فدوة العينج وانتي احن من امي عليه

خالة اني الصبح اجيب اصال يمج ومن أرجع اخذها راح اكول الأمي اخذ اصال وياي ما اريدها تعرف اصال يمج

... اي احسن اني هم ما اريد مشاكل وباها

جنونة ولو ميحتاج اوصيح ادري بيج مستورة بس اريدج تلفين الحجاب زين ولبسج عريض ما اريد احد يطمع بيج ولو اني هسه مطمئنة لان انتي بحماية ابو  سرمد

.. ان شاء الله خالة ميحتاج توصيني

ثاني يوم كعدت من الفجر نشيطة حظرت ملابس الاصال

حميت الجاي اكلت خبز وجاي ووكلت اصال لفيت الحجاب لبست ملابس عريضات من ملابس امي

شلت اصولة ورحت البيت ام سرمد

زوجها كاعد ينتظرني جنت محرجة منه لان معندي أختلاط بي

خالة اخذت اصال مني

الرجال كال يلا امشي بنتي

رحنا للمعمل

المعمل مال حلويات مصاص وحلقوم من السما سمسمية ومصقول

اخذني للمدير شافني الحمد لله جان رجال جبير ومبين محترم

انقهر عليه لان بعدني صغيرة ويتيمة

المعمل بي هواي بنات ونسوان شباب وزلم كبار والكل يحترمون ابو سرمد ويريدون خاطرة ومن عرفوا اني عايدة اله

محد كدر يباوع عليه بنظرة محلوة

بديت الشغل اشكد ما اوصفلكم التعب ما اكدر من الصبح للمغرب على وكفة وحدة من غير اللجعات الي انلجعها بيدي من الشيرة مالت المصاص والحلقوم

بس كولشي يهون المهم ادبر عيشتي وما احتاج الأحد

من رجعنا اشكد تعبانة بس ملهوفة على اصال وهي من شافتني كمزت الحضني

حضنتها واشمها روحي بيها وروحها بيه

سالت خالة خوما تعبتج

... بحياتي مشايفة مثلها  حتى من تجوع متبجي ربي يحفظها مثل النسمة

... ابتسمت اخذت اصال ورجعت للبيت تعشينا

رغم نعسانة بس ما اريد انام خطية مشافتني اليوم

اجتي امي من شافت التعب  مبين عليه كالت

طبج طوب هذا الميسمع كلامي هيجي يصير بي ظلي دكي شغل مثل الزمايل الحد ما ينكسر ظهرج

... اني راضية عود من اجي اشتكيلج كوليلي هالكلام

عافتني ودخلت للغرفة اخذت اصال الحضني وغمضت

همست ياروح خالتج يمكن تحسين بيه لهذا  صوتج مينسمع رغم جوعج وحتى من تتمرضين متبجين وتعبيني

بوستها ونمت

استمريت بالشغل والحمدلله كدرت ادبر عيشتنا وما احتاج احد

صح الشغل والتعب اخذ نص حيلي بس كولشي يهون المهم مناكل اكل حرام وانام واني راضية على نفسي

اصال تعودت على خالة ام سرمد الدرجة جانت من اتشوف جهالها يصيحوها ماما هي هم تكوللها ماما 

واني تسميني ننه لان تشوف خالة وامي يصيحولي جنة

صارلي سنة اشتغل بالمعمل والحمدلله الكل يحبوني ويحترموني

اجة شاب يشتغل ويانة شقتهم بنفس المجمع الي ساكنين بي

من يوم الشتغل وهو عيونة اطاردني  وقت استراحة الغدا اجة عليه كال جنة عندي موضوع وياج

.. تفضل اخي

كريم ؛. هههههه  اخوج

.. وشنو اليضحك بكلامي

...لا سلامتج  جنة بدون لف ودوران اني من زمان معجب بيج واريد اتعرف عليج

... جاوبتة بحده اني جاية اشتغل مو اتعرف اترجاك بعد لاتعيد هالكلام وياريت تبتعد عني

عفتة ومشيت كملت شغلي

كريم ظل يومية يحجي وياي بنفس الموضوع ابو سرمد انتبه عليه ونبها لايحجي وياي ويجي يمي بس ماكو فايدة ظل لاطش

بعدها بفترة وكفني وكال شوفي لج اني صبرت عليج هواي وجيتج باسلوب حلو بس الظاهر انتي متجين بالهدوء

باعي باجر تاخذين اجازة وتطلعين وياي واذا رفضتي افضحج

اكول الكل العمال انتي بنت منو وشنو امج

بنت الكح.... لاظلين تبيعين شرف براسي وامج وحدة كاولية وسكط

... ردت اموت من كلامة حتى النفس كطعتة ياربي شسوي ليش بس اني مكتوبلي انذل وانهان بسبب امي والناس تاخذني بذنبها

بهالاثناء اجة ابو سرمد كال كريم اني مو نبهتك بعد متحجي ويا جنة

... اي عمي اني بس سالتها اذا تكدر توكف على مكينة المصاص

جنة   مكدرت اسكت شرفي اغلى من كولشي

كتلة لا عمو  مسألني على المكينة ديهددني يفضحني ويكول اني بنت منو اذا باجر ماطلع ويا

ابو سرمد تعصب ولزمة من ياختة لك ياناقص اني موكتلك جنة تابعة الي واليمسها يمسني

التموا العمال فاككوهم

كريم مسكت نفذ تهديدة كال هاي وحدة جذابة هي تتحارش بيه

بس العتب مو عليها هي بنت مرجانة الغجرية كلشي يطلع منها

ظل يحجيلهم على امي واني ميتة من البجي

المدير اجة وكف بالنص كال الكريم من اليوم تطلع من المعمل مالك شغل اهنا

ظل يتوسل بالمدير والمدير قفل

اني دموعي تنزل تمنيت الكاع تنشك وتبلعني

المدير اجة يمي كال رفعي راسج ومسحي دموعج

انتي اشرف منه ومن امثالة بنتي انتي جوهرة لو جنتي موزينة مجان جيتي اشتغلتي اهنا وتحملتي التعب والبهذلة لادنجين راسح بقيها مرفوعة

زدت بالبجي كل الموجودين وكفوا وياي ومدحوني صدوك لو خليت قلبت

حسيت نفسي اني مو بنت مرجانة اني بنت نفسي اني ربيت روحي بروحي وخليت الناس تحترمني

من رجعنا خالة وابو سرمد حجوا وياي وطيبوا خاطري حتى لا اضوج

ثاني يوم من رحت للمعمل جنت مستحية ومحرجة بس الحمد لله محد بعد حجة بالموضوع وتصرفوا وياي عادي كانوا مصاير شي

صار ثلاث سنوات اشتغل عمري صار 15 سنة وعمر اصال اربع سنوات

امي متعرفتلها على وحدة اسمها ساهرة طبتها وطلعتها كلها وياها

اليوم جمعة معندي شغل اجتي ساهرة علينا من شافتني ظلت تتبشبش ويا امي ويباوعن عليه

مرتاحيتلها مبينة وحدة موراحة من امثال امي

اخذت اصال ودخلت للغرفة

ورا كم يوم امي كعدت ادكلي ناعم وتحاول تتقرب مني وتجيب وتنكل بالمسواك عرفت امي حطتني براسها واكيد جابتلي عريس گلبي ممرتاح ومقبوض احس هالمرة حيصير شي .....

يتبع

._  بنات الغجرية _

( بقلم بسمة البياتي)

_ البارت السابع _

باليل فرشت دانام اصال كاعدة يمي  تمددت أخذت أصال الحضني وألعب بشعرها

امي فتحت باب الغرفة ومدت راسها كالت نمتي لوبعدج

جاوبتها لا بعدني

شغلت الضوا واجت كعدت يمنا فتحت علاكة بيها ملابس بيت وطلعة الي والأصال

كالت شوفي شجبتلكم

رفعتلها حاجبي اي وهذن بمناسبة شنو

... يعني الأم اذا رادت تشتري شي البنتها وحفيدتها لازم بمناسبة

دكومي كعدي لاتظلين تحجين وياي وانتي نايمة

فتحت علاكة ثانية طلعت علية مكياج

وخرت اصال من حضني وكعدت لميت شعري على صفحة

كتلها من الأخير كولي العندج ترى هالسوالف صارن قديمات وحفظتهن

... مدامج فاهمة عليه راح احجيها طك بطك

اريد ازوجج ولكيتلج خوش قسمة

... هههههههه مثل سمسوم

... لاتضحكين هالمرة العريس يختلف هيبة ومنصب وفلوس راح يعيشج ملكة

... سبحان الله معندج غير هالكلام كل مرة نفسه تعيدي

... لا هالمرة صدك يختلف

لج بابا هذا العريس البنات يتمننه

... واني ما اتمناه واكولها الج من الاخير اني مموافقة وما اريد ازوج

... هسه انتي شعرفتي عنه ورفضتي لج بنتي لاظلين فگرية الى متى تبقين تشتغلين بالمعمل دشوفي شصاير بحالج من التعب

... اني راضية وممشتكية

عوفيني بحالي واني اكون بخير

... مو كيفج اني امج غصب عنج تسمعين كلامي  لج هذا عميد بالأمن منصب وجاه الناس تتراجف منه حمايتة يسدون الشارع

وهو مو كل وحدة تعجبة

احمدي ربج اذا عجبتي

ولاتخافين اني شرطت عليه يعقد عليج

.. هههههه مسوية فد انجاز شرطتي عليه يعقد يعني لو مموافق يعقد عادي تنطني اله بدون زواج

... هذا الكلام ماله داعي داكولج حيعقد عليج لج فگر بنت الفكر اذا اخذتي راح ينطينا بيت نعيش بي بدل هالشقة جنها گن دجاج

وراح يطمسج بالذهب ويغركج بالفلوس

... دفنتي وحدة وهسه جاية تريدين ادفنيني مصارلج درس بالسويتي بعطر

بله فد سؤال وهذا العميد مدري منو اشكد عمره

.... هاا ترى مو جبير بعدة بحيلة

... اي اي اشكد يطلع عمره

... شمعرفني

.... هههههه متاكدة تعرفين بس تغلسين اكيد فوك الخمسين والستين

انتي شيطانة مووو ام حتى الشيطان ينظلم من يتشبه بيج

... بنت الكلب اشو نسيتي نفسج وجاي تتجاوزين

... من ضييييييمي اتجاوز بس كوليلي انتي ليش هلكد ظالمة ومتخافين من  الله

ولو هو انتي حتى الله متعرفي

... هاي انتي كلتيها بالسانج ما اعرفة ومختصر الكلام توافقين ورجلج فوك راسج

... لا والله محزرتي مو اني التكدرين تجبريني واريد اششوف شراح تسوين

... بسسسسيطة جنة اني الج اذا مخليتج تجبن بنفسج تتوسلين وتكوليلي موافقة فلا اتسمى مرجانة

... ههههههه اي روحي سويلي سحر بلكي اتخبل واجي اكولج موافقة زوجيني هههههخ

... ظلي ضحكي انشوف منو اليربح بالأخير اني اعلمج

.... عافتني وكامت رجعت تمددت مدري ليش هالمرة خفت من تهديدها تحجي بثقة

الله يستر بالكوة كدرت انام

مر يومين على هالحجي والوضع هدوء اطمئنيت كلت اكيد متكدر تسوي شي

ثالث يوم داومت بالمعمل من رجعنا المغرب اني وعمو ابو سرمد

رحت الشقتهم اجيب اصال  دخلنا لكينا خالة كاعدة حاطة ايدها على خذها وتبجي

گلبي انقبض عيني ادور اصال متعودة من أجي اول ما ادخل تجبني تركض

اريد أسال بس اخاف  خالة اجتي يمي كالت

... ولج جنة امج اخذت اصال

... نشف ريگي كمت ارجف اريد انطق حرف ما اكدر

هم زين عمو سألها بدالي

. وين اخذتها ومن شوكت وهي شمعرفها اصال اهنا

... الظهر دكت الباب من فتحنة دخلت هي وصديقتها دفعني وفاتن اصال جانت نايمة شالتها وطلعت ردت امنعها استلمتني

فشار وغلط

اتكول انتي منو حتى تمنعيني هاي حفيدتي

لاتخليني البسج تهمة انتي ورجلج واذبكم ورا الشمس

جنة... حجيت بصوت يرجف هي شلون عرفت بيها اهنا

... والله ما ادري مرات ينفتح باب الشقة وتطلع ويا الجهال يمكن شايفتها

.... استجمعت قوتي طلعت اركض الشقتنا فتحت الباب دورتها مموجودة ربي دخيلك هاي وين راحت واخذت الطفلة

يئست كعدت ابجي خالة تبجي وياي وتلوم بنفسها

رفعت راسي وحجيت بقهر ربي اصال بأمانتك احفظها الي ورجعها سالمة

كلت الخالة لاتلومين نفسج الظاهر امي مخططة الهذا الشي  روحي يم زوجج واطفالج لاتخافين راح ترجعها متكدر تأذيها مصلحتها يمي

طمنت خالة وراحت

بقيت وحدي الوب افتر مثل الخبلة روحي شايغة امي لزمتني من الأيد التوجعني

اريد اصال امووووت اذا صار بيها شي

هاي بنت روحي وقطعة من گلبي اتحملت الضيم علمودها معندي استعداد هسه اخسرها

ساعة عشرة انفتحت باب الشقة دخلت امي رفعت راسي باوعتلها اصال مو وياها

باوعتلي ورفعت حاجبها بستهزاء

سدت الباب ومشت تريد تفوت كمت وكفت  بطريقها

حجيت واني صاكة على اسناني اصال وين؟

.. هه شعليج

.. لزمتها من هدومها وهزيتها عطت اصال وييييييين

... نترت ايدي بعصبية كالت بح اصال بعد ماكوووو انسيها

وشتريدين تسوين روحي سوي بلغي الشرطة ههههه الحكومة كلها هسه مخليتهم بجيبي

واذا تريدين تبلغين الناس السويتلهم سحر هم روحييييي وداعتج مخايفة

... الله ينتقم منج شششششنو من بشر انتي

ضربتني ولزمت شعري

كالت صوتج بعد ميعلى فاهمة الظاهر انطيتج  مجال وتفرعنتي

دفعتني وراحت كعدت طلعت باكيت جگاير ورثت الجگارة كامت تاخذ نفس وتنفخ الدخان بتجاهي

... دنگت راسي ورحت كرفصت كدامها حجيت بتوسل واني ابجي

رجعيها الي واني موافقة

... ههههههههههه على شنو موافقة وضحيلي

...شهكت بقهر كتلها موافقة ازوج بس رجعيها مو گلبي حيطك راح اموووت

.... مو كتلج الا اخليج انتي تجين تتوسلين وتكولين موافقة هههههههه عفيه هسه انتي صدك بنتي باجر اجيبلج اصال

... فزيت شششنو باجر هسسسسه اريدها اذا مجيبها هسه اكتل روحي كدامج

... لج لاتخبصيني شيطلعني بهاليل لاتخافين مبيها شي باجر ارجعها الج

... ابد والله هسه يعني هسسسه

... وتالي ويا العناد

... كامت وهي تتافاف طلعت من الشقة ردت اروح وياها كالت وين ابقي اهنا نازلة الشقة ابو احمد اخابر منهم

راحت اتصلت ورجعت جانت تغلط على بيت ابو احمد وضايجة

.. عشششششتو على شنو شايفين نفسهم عبالك بيه جرب بالكوة يحجون وياي

من ورا خشمهم دخلوني شقتهم

... مجاوبتها گلبي مثل النار انتظر اصال

نص ساعة واجتي ساهرة شايلة اصال بيدها

ركضت اخذتها منها ابوس بيها

ربي لايحرمني من شوفة هالوجه

كمت افتش بجسمها اخاف مسويلها شي

كتلها اصولة خوما ضربوج

... حجت ابراءه كالت لا مضربوني وشترولي هواي نساتل وجبس

ساهرة... ههههههههه والله عفيه عليج مرمر كدرتي تخليها توافق

.... هههههههه لعد شعبالج اني مرجانة ماكو شي يعصى عليه

... عفتهن وفتت جوا شيطانات الله لايوفقهن

بدلت وتمددت اصال بحضني حتى عشا مردت دموعي تنزل وامسحهن بسرعة ما اريد اصال تشوفهن

اصال رجعتلي بس الثمن جان غالي عطر صارت جثة وسكنت المگبرة بعمر ال 15 وهاي اني بنفس العمر راح انذبح وانكسر

امي فاتت كالت شغل بعد ماكو لاتروحين علمود  باجر تحظرين نفسج باليل أكرم يجي يشوفج

... مناقشتها وحتى مسالت ليش يجي باليل مو بالنهار

هه اكيد هذا واحد من امثالها

للصبح منايمة دموعي منشفن بالستة ونص اندكت باب الشقة عرفتها خالة اكيد تريد تطمن على اصال وهم تشوف ليش تأخرت على الشغل

كمت لميت شعري رحت فتحت الباب

خال

صفنت بوجهي حجت بقلق اصال خوما بيها شي ليش هيجي وجهج

.. لاتخافين مبيها شي موجودة نايمة جوا

... لعد شبيج وليش ممبدلة حتى تروحين للمعمل

... دمعت وحجيت بخنكة بطلت بعد ما اداوم

هسه ما أكدر احجيلج من تطلع امي اجيج

... راح يبقة بالي يمج لاطولين عليه

... هزيتلها راسي راحت خالة اني دخلت جوا رجعت لفراشي

اصال كعدت تريد تاكل سويتلها ريوك كالت اروح يم  ومنى

فتحتلها باب الشقة ظليت واكفة الحد مدخلت الشقة بيت ام سرمد

امي كعدت متاخر تريكت وهي فرحانة بدلت  قبل لاتطلع كالت

من ارجع اريدح مرتبة نفسج ديربالج تلعبين بذيلج والخلقج لو شمتسوين متكدريلي

... عافتني وراحت سديت الشقة ورحت البيت خالة حجيتلها كولشي جانت تبجي وياي گلبها محروك عليه

... كافي ماما مردتي گلبي لاتبجين فوضي امرج لله المهم راح بعقد عليج وياخذج  بالحلال

... وشنو الفايدة امي باعتني الله اليعلم شراح يصير بيه

...  مدري شكولج الله يكون بعونج ويستر عليج دنيا واخرة

... رجعت للبيت اصال بقت يم خالة اني لفيت راسي ونمت ردت انسى قهري ومصيبتي

للعصر اجتي امي وصديقتها من شافتني نايمة وممسوية شي ظلت تحجي

... هاي عود اني وصيتها لج كومي شنو تريدين تستقبلين الرجال بهالخلاكين

ساهرة.. لاتضوجين بعد وكت نلحك نرتبها هو ورا المغرب يلا يجي

... محبيت اناقشهن واوسخ لساني بيهن

كمت سبحت امي نطتني نفنوف لبستة

صديقتها رادت تمكيجني مقبلت

تعاركت وياها بالكوة هي وامي خلنلي كحل وحمره خفيفة

خالة دكت الباب جابت اصال اسمع امي اتكولها

بعد ما اريدج تختلطين ابنتي محد خربها عليه غيرج ولو احنا راح انشيل منا ونخلص من جيرتكم وبعد منشوف جهرتكم

طلعت اركض عطت بامي

اياج اسمعج تحجين ويا خالة هيجي

هاي المرة احسن منج ومن امثالج اشرف منكم كلكم

خالة كامت تبجي عافتنا وراحت

رجعت للغرفة اسمع امي وصديقتها يحجن مهتميت

ورا المغرب ساهرة راحت كالت اروح اجيبة واجي لان ميندل الشقة

اني كاعدة بالغرفة واصال يمي عدنا تلفزيون اسود وابيض قديم كاعدة كبالة تتفرج عالم الحيوان

نص ساعة اجتني امي كالت تعالي اجة اكرم كمت وياها امشي خطوة وارجع الثانية

دخلت للهول باوعت رجال ضخم ملامحة قاسية وتخوف ومثل متوقعت يمكن عمره فوك الخمسة وخمسين سنه صوته جهوري وبي بحة خشنة

من شافني كصني من فوك ليجوا خلى ايده على شواربة ويباوع عليه

ساهرة... هههههه شنو رايك بهالنستلة

اكرم... ههه عز الطلب وين جنتوا ضامينها عني

مرجانة... هههه جانت صغيرة وهسه حتصير الك

اكرم... اشكد عمرها

... 15 سنه

... تعالي كعدي ليش واكفة  معقولة بنت مرجانة  تستحي

.. ههههههه كتلك بعدها صغيرة وخام كولشي متعرف

جنة... كلامهم سجاجين وتكطع بگلبي اريد اصرخ اريد املخ نفسي بس ما اكدر

كعدت بعيد وهو عينه بعدها عليه

مرجانة... مثل متفقنا من يكمل تحويل البيت اعقد عليها واخذها

. ماشي تستاهل البيت

جنة.. رفعت راسي  والله ولا اخليج تحصلين بيت وتتهنين

حجبت بثقة البيت يتسجل بأسمي

امي عيونها نطت وخزرتني  هو ظل يضحك

كال وأخيراً سمعت صوتج هههههههههه هسه انتي صدك بنت مرجانة

.. اني الراح ازوج مو امي والبيت من حقي

مرجانة... يااااا وشنو الفرق بيني وبينج

اكرم... كلامها صح هي العروس تدلليين البيت اخلي باسمج بس اريد مستمسكاتج

.. كمت انطيتة جنستي امي تريد تاكلني

من راح استلمتني بالغلط

مو جنتي متريدي هسسسسه البيت صار عزيز لج انتي يا نعال وتفشليني كدامه

.. هه هذا الموجود انتي مو ردتي ازوج معناها البيت من حقي ونصيحة بعد لاتلعبين وياي مو كلتي الحكومة بجيبج وهسه حتصير بجيبي احذري مني

عفت امي باهتة محجت شي

تعمدت هيجي احجي بالكي تخاف وتلغي الزواج

بس للأسف ماكو شي انلغة البيت صار باسمي واليوم باليل العقد

اكرم كال من اعقد اريد اخذها ما اكدر انتظر الحد ما يكمل تاثيث البيت 

كاعدة كدام المرآيا عيوني متروسة دموع ماأكدر انزلهن الخاطر اصال ادري بيها اذا شافتني ابجي هم هم راح تبجي

دخلن امي وساهرة الضحكة تارسة وجهن

مرجانة... بعدج ممبدلة ديلا فضينا الرجال على جية

.. الهدرجة مستعجلة على طيحان حظي وكسران ركبتي

.. اهوووو راح تبدي بسطوانتها المشروخة لج هاي القسمة المعاجبتج غيرج يتمننها بس رتبتة تسواج وتسواني 

لج بدلي ترى مالي خلكج

عيوني سهورة مكيجيها لايروح الرجال يشوفها ويغير رأيه ههههههه

ساهرة... هههههه يمعودة شيغير لوتلبسبها كونية يأخذها وهو الممنون هو من يوم الشافها متخبل عليها

... صرت مثل اللعابة بيدهن وحدة تمكيجني والثانية ترتبلي شعري

امي كالت كومي اجه خطيبج

اخذتني من ايدي امشي وياها بدون وعي داخلي يصرخ ويستنجد اريد تصير معجزة وتخلصني من الأني بي

دخلوني للأستقبال الشيخ كاعد واثنين شهود

الكل كاعدين حتى يحكمون عليه بالموت هذا العقد شهادة وفاة بالنسبة الي مو عقد زواج  اليوم راح ينقتل كلشي بية ومايبقى من جنة غير اسمها

تم العقد من كلت موافقة تمنيت اكص لساني النطقها وأشمره للبزون

اكرم شال شدة فلوس خلاها بيد امي

كال يلا مرجانة اخذني الجماعة وطلعوا خلال خمس دقايق اريد الشقة فارغة

.. ركضت للغلافة البيها اصال حضنتها

مرجانة.. مكموعة شسوين اهنا روحي الرجلج وانطيني اصال

.. احتضنت اصال بقوة

وعطت كتلها كل عقلج اخليج تأخذيها اذا بقت يمج يوم واحد موبعيد بهذا عمرها تبيعها مثل مبعتيني

اني من البداية شرطت اصال تبقة يمييييي

ساهرة... اوووووف شراح يفهم هالغبية

لج دادة انتي عروس ميصير تبقة يمج

مرجانة... لاتخافين ما أسويلها شي باجر اجيبها ألج

.. استسلمت بوست اصال همست بأذنها لاتخافين جنة للموت متعوفج انطيتها الهم

قبل لاتطلع امي كتلها

ترى اني مو جنة القديمة اذا سويتلها شي اقتلج بدون ميرفلي جفن

... والله وطالعلج حس

امشي دادة سهورة امشي حرامات تعبي بيهن بناتي مطالعات عليه

.. راحن وعافني بقيت بالغرفة ما اريد اطلع واشوفة مشمئزة منه

صاح عليه

لج هاي وينج تعالي لا اجي ادوس راسج بنت *****

رحتلة واني رجلي تضرب وحدة بالثانية من الخوف

شافني تقدم عليه رجعت ليوا استغفر الله حتى شكلة مدري شلونة كرشة أعلى من خشمة طويل وجسمة ضخم شواربة كثيفة شعرة متروس شيب يمكن اني بعمر احفادة

وصل يمي بي ريحة مشروب قوية دنك يريد يبوسني وخرت راسي ودفعتة

انجن صاح بنت الكلب ادفعين منو اليوم انعل والديج

بقبضة ايدة ضربني على وجهي من القوة وكعت بالكاع فتح حزامة عبالي راح يضربني بي زحفت اريد اكوم انهزم   نزل المستواية وهجم عليه اخذني بطريقة بشعة مراعى صغر سني ولا هزتة توسلاتي ودموعي عافني واني جنازة

اريد اتحرك ما اكدر بالكوة سترت نفسي وكمت اريد اروح للغرفة عاط بية وين موليه تعالي كعدي يمي

جنت خايفة منه صرخ مرة ثانية رحت يمه جرني كعدني بصفة حضني يبوسني ويهمس من كالولي بنيه مصدكت متوقعت بنت مرجانة بعدها بنية

دموعي تنزل ونفسي تلعب منه اريده يعوفني ويرحمني

كام ولزم ايدي اخذني للغرفة ورجع تقرب مني مرة ثانية انتهيت تمنيت امووت واروح يم اختي   .....

._  بنات الغجرية _

( بقلم بسمة البياتي)

_ البارت الثامن _

كام ولزم ايدي اخذني للغرفة ورجع تقرب مني مرة ثانية انتهيت تمنيت امووت واروح يم اختي

عافني ونام بعد ما كرهني روحي حتى وهو نايم شكلة يخوف صوت شخيره يوصل السابع جار

لميت نفسي رحت للحمام كمت اتقيئ

نفسي لعبانة منه تعبت هلكد مرديت من معدتي حسيتها حتطلع برا

ارتاحيت شوية فتحت الدوش عليه بقيت جوا كمت افرك بوجهي اريد اوخر لمساتة القذرة مني دموعي اختلطن ويا المي صوتي وشهكاتي ترسن الحمام

ابجي من كل گلبي وادعي على امي سبحت وطلعت رحت للغرفة الثانية تمددت جنت مكرفصة وحاضنة نفسي اخاف اغمض عيني وهم يجيني

ظليت للصبح كاعدة وعيني على باب الغرفة

تقريباً ساعة ثمانية سمعت صوتة يدورلي متت خوف فتح باب الغرفة شافني

نشف دمي كلت هسه يجي يضربني ويعيد السوا البارحة

باوع عليه كال ليش نايمة اهنا مو يمي

بلعت ريگي اريد اجاوبة ما اكدر موبيدي اخاف منه

كال شبيج ساكتة مو جاي احجي وياج

يحجي بهدوء وعينه بعيني جاوبتة برتباك

هااا مو شسمه انت جنت نايم محبيت أزعجك جيت نمت اهنا

تقرب مني ثنى رجلة وكرفص كدامي كال ليش هلكد خايفة مني

ثاني مرة لاتعوفين الغرفة اريد من افتح عيني اصبح بهالوجه الحلو

... هزيت راسي بالموافقة بس اريد اخلص منه كال كومي سويلي ريوك تعرفين لو لا؟

... اي اعرف

.. لعد يلا كومي

... كمت طلعت من الغرفة جنت امشي كدامة دخلت للمطبخ هو راح للحمام

خليت القوري على النار امي جانت متسوكة اكو بيض واجبان

طكيت بيض وطلعت الجبن حظرت الصينية طلع من الحمام بالفانيلة والشورت والمنشفة على راسة راح كعد بالهول وديتلة الريوك خليتة كدامة ردت ارجع للغرفة كال وين رايحة تعالي تريكي وياي

كتلة بس اني مو جوعانة

... ميخالف تعالي كعدي

... كعدت بعيد عنة اشرلي اروح بصفة

مختنكة منه ومطايقتة شلون راح اتحملة ما ادري

كعدت يمه ياكل بشراها لكمتة شكبرها

سوالي لكمة يريد يخليها بحلكي نفس تلعب منه مدري شلون كدرت ابلعها

... اني  هسه لازم اروح عندي موعد مهم اذا كدرت باليل اجيج واذا مصارلي مجال باجر نلتقي بالبيت الجديد لان اليوم يكمل تأثيثة

شتريدين اجيبلج من اجي

... هااا لا ما اريد شي تسلم

... هههههههه شبيج هلكد خايفة  ترى ما اكل بشر جنة اريدج تنسين الخوف والخجل اريد ادلل على ايدج واني عيوني الج

... ما اعرف شجاوبة جان شيكولي اكوله ماشي

كام غسل راح للغرفة صاحني رجلية ماتن ما اريد انجمع ويا بالغرفة

بالكوة رحتلة اول مدخلت اخذني الحضنه يبوس بيه وايده تتلمس جسمي

رجع تقرب مني بس هالمره مجان قاسي وياي

ورغم هاي جنت كارهة روحي وبالزور حابسة دموعي

ابتعد مني رجع سبح اني باقية بنفس مكاني حتى حيل مظل بيه

طلع من الحمام وكف يبدل كال امج شوكت تجي؟

... ما اعرف

بالي يم اصال اخذتها وياها اريدها تجيبها دموعي نزلن

.. منو اصال؟

... بنت اختي مو قبل العقد كتلك هاي اني مربيتها واريدها يمي

.. اي اذكرت اكيد فد شوية اجيبها الج

... كمت ابجي واحجي هي ممتعودة على امي اخاف يصير بيها شي لا سامح الله

صفن عليه كال لاتبجين من اطلع اتصل على بيت ساهرة اكيد امج يمها اخليها تجيبها الج

... فرحت كتلة اي عفية الله عليك مو تنسى

كمل تبديل عافني وراح انسان غريب باليل جان وحش وهسه يحجي بهدوء بس هم بعدني قرفانة منه

كمت سبحت وكعدت انتظر اصال عيني على الباب

خالة ام سرمد مبينت اليوم واني هم ما اريدها تجي مستحية من نفسي احس روحها مسوية ذنب

نص ساعة اتفتحت الباب دخلت امي كايدة اصال من ايدها

اصولة من شافتني تركت ايد امي واجت تركض حضنتني

اخذتها الحضني ابوس بيها لوبيدي ادخلها بگلبي

رفعت راسها كالت بعد ما اريد اروح ويا ماما مرجانة اريد ابقة يمج

باوعت عليها وعلى امي اكيد مسويتلها شي امي ارتبكت كالت يووو دعوفي اصال تعالي ابوسج واباركلج

كتلها على شنو تباركيلي على خيبتي وطيحان حظي ابقي بعيدة عني احسنلج لان من اشوفج اذكر مصيبتي ولوما خوفي من الله اشرب من دمج

... اشكد ادبسز ومتستحين قليلة تربية

... هه ومنين تجيني التربية اذا اني بنت مرجانة الغجرية

دنجت وحجيت ويا اصال شبيها ماما مرجانة خوما سوتلج شي؟

اصال تباوع عليه وعلى امي تريد تحجي بس تخاف من امي

كتلها احجي لاتخافين متكدر تسويلج شي اني بعد ما اعوفج

... البارحة جنت ابجي اريد اجي انام يمج ماما ضربتني وجرت شعري

... خزرت امي صحت عليها انييييي مو كتلج اذا تلمسين شعرة منها اموووتج ششششلون تمدين ايدج عليها

...اني بيبيتها اضربها احركها معليييييج هي وكحة متنجرع شلعت گلبي

.. وحق الحق بعد اذا مديتي ايدج عليها اكصها ألج

اصال افقر منها ماكو بس شكول عليج حتى رحمه ماكو بگلبج

امي معجبها كلامي عافتني ورجعت طلعت اخذت اصال سبحتها وسويتلها اكل وكلتها

كالت اروح يم منى ظلت تلح فتحتلها الباب وراحت

ورا شوية اجتي خالة ام سرمد اريد ارفع راسي كدامها ما اكدر

... رفعي راسج ماما ليش مستحية انتي ممسوية شي غلط هذا زواج على سنة الله ورسولة

... كمت ابجي خليت ايدي على وجهي اذكرت السوا بيه البارحة

خالة حضنتني بجيت  قوي محتاجة الحضنها محتاجة احس بالأمان وانسه همومي

خالة ظلت تنصحني كالت صيري قوية ولاتخلين هاي الظروف تكسرج

واهم شي لاتتركين صلاتج حبيبتي هذا الأنتي بي امتحان من الله يختبر بي صبرج وقوة ايمانج ويمكن هالزواجة بيها صالح ألج وعسى ان تكرهوا شئ وهو خير لكم

يمكن لو ممزوجة هذا امج تلكيلج واحد اتعس منه ويجوز تنطيج بدون زواج لو تبيعج الناس مشبوهين  اني كولشي اتوقع من امج

.. فعلاً كلامج صح امي مستعدة كولشي تسوي وخصوصاً هي تعرف نقطة ضعفي اصال ودتهددني بيها

... شوكت تنتقلون للبيت الجديد؟

... باجر

... والله يعز عليه فراكج انتي واصال ما اعرف شلون حتحمل بدونكم

... اني هم والله تغودت عليج بس اطمئني كلما يصير عندي مجال اجيكم

... فدوة العينج بيتي مفتوحلج بكل وقت

.. خالة راحت

جنت  نعسانة نمت بس نومتي جانت قلقة وكلها كوابيس كول شويه افز عبالي اجة

للمغرب كعدت رحت جبت اصال من بيت خالة سويت عشا تعشينا اني وياها

صار الليل دخلت انذار ميتة من الخوف ما اريده يجي والحمدلله ما اجه

ثاني يوم اجة واحد من طرف اكرم جاب المفتاح وكالت تعالوا وياي ادليكم على البيت

امي باعت غراض الشقة الأبو العتيك  الغراض قليلات وتعبانات مجابن هواي فلوس

لمينا ملابسنا

قبل لا اروح ودعت خالة

اخذنا الولد للبيت الجديد

منطقة مبينا هادئة وحلوة وكفنا كدام بيت بناءة مرتب

الولد فتحلنا الباب ودخلنا حديقة صغيرة ومبيها اي اشجار ولا زرع

البيت مساحتة 200 متر مطبخ واستقبال غرفتين وهول صغير صحيات ومخزن

البيت ماثث ومرتب

وحدة من الغرف بيها غرفة نوم مال عرسان هه

والثانية بيها جربايتين وكنتور الامي واصال

اصال مكيفة على البيت تركض منا وتجي منا

شغلتها التلفزيون جان ملون وجبير كيفت عليه كابلتة وكعدت تتفرج

مرجانة... شفتي العز لازم تجين تبوسين ايدي ورجلي لان لكيتلح  واحد متروس اخذلج هيجي بيت وسواج ادمية

... الشقة الصغيرة وشغلي بالمعمل عندي ارحم مليون مرة من هالبيت والعز التحجين عنه

... بووووومه وفگر

رتبنا الملابس الولد رجع مرة ثانية جان متسوك ممبقي شي مجايبة الثلاجة انترست

أصال تباوع على الفواكه حتى متعرف شنو هنا خليتلها بماعون غسلتهن وانطيتهن الها تاكل وتضحك كتلها طيبات هزت راسها اتكولي اي

الولد كال سيدي يجي باليل

بطني مغصتني من كال يجي

امي للعصر بدلت كالت اني ما ارجع ابات يم ساهرة

رادت تاخذ اصال وياها مقبلت

قبل لايجي عشيتها شلت التلفزيون خليتلهيا بالغرفة شغلتة حتى تكعد تتفرج

من سمعت صوت سيارة قفلت باب غرفة اصال اخاف يجي سكران ويشوفها يطمع بيها  هذا نكس موبعيد  يخلي عينه عليها

من دخل وشافني اجة حضني يبوس بيه بالهفة اريد اوخره مني ما أكدر

بدون كلام اخذني للغرفة واخذ اليريده

كام من يمي راح جاب عليه من جيبة فتحها كال هاي ألج

باوعت كلادة وتراجي وسوار

... عجبوج

... جاوبتة بدون نفس اي حلوات

... طيعيني واني اغركج بالذهب

... هزيتله راسي

... كومي حظريلي الكعدة

... عگدت حواجبي شنو يا كعدة قصدك العشا

... العشة مو هسة  اول شي اريد اعدل مزاجي

جايب كرزات خليهن بكاسة وسويلي خيار ولبن وشوفي بعد شنو موجود جيبي

... لبست ملابسي وكمت فتحت الجياس داطلع الكرزات  شفت بطل عرفت يريد يشرب

اووووف هذا من يسكر يتخبل على راسي

حظرتلة طلباتة اخذتهن اله كاعد بالهول مشغل اغاني ومسلطن

جر الطبلة خلاها كدامة خليت الكرزات والخيار وماعون فواكه

كال جيبي البطل وكلاص وكسريلي ثلج

رحت جبتلة الراده

دارجع للغرفة كال وين تعالي كعدي يمي

.. هااا مو أريد اسوي عشا

قبل لايحجي فلتت من كدامة دخلت يم اصال لكيتها نايمة غطيتها وطفيت التلفزيون

رجعت قفلت الباب وطلعت كعدت بالمطبخ

اريد الوقت يمشي هفف شوكت ينام واخلص منه

صاحنى ومبين من صوتة سكر

رختلة عيونة حمر معلي المسجل ويطك اصبعتين

كال تعالي كعدي يمي لج شنو اني ماخذج حتى تختلين

رحت كعدت يمه ريحتة تلعب ستين نفس لوبيدي اسد خشمي

جرني عليه كعدني بحضنه ايده تمشي على طول جسمي

كام يبوسني واني اريد ارد من معدتي عليه

حسبي الله عليج مرجانة شسويتي بيه

... شنو هالملابس هاي اكو مرة تلبس هيجي الرجلها اريد اشوف الحسن والبياض  امشي لبسي شي حلو

من خوفي منه كمت بسرعة هواي ملابس نوم امي جايبتلي لبست واحد وكفت كدام المرآيا خجلانة من روحي اريد اطلع ما اكدر كمت ابجي على نفسي

صاح بنت القندرررو وينج شنو نمتي

فزيت من صياحة طلعت بسرعة جنت اخاف اصال تكعد وتخاف

شافني ظل يلعب بشواربة واني بداخلي ادعي عليه وعلى امي بالموت

كال قتحي شعرج وشدي وصلة ركصيلي

... فتحت عيني عززا شنو اركص

همست بخوف والله ما اعرف.

... بنت الكح... على منو تضحكين اركصي لا اكوم اطيح حظج

.. عاط بيه بقة يسب ويغلط

جنت ارجف من الخوف فتحت شعري كمت اتمايل والله ما اعرف شلون بلوة هاي

... لج شششجاي تسوين هذا هم اسمه ركص اذا اكوم اركص احسن منج

... همست بداخلي طبعاً تركص احسن هلكد ممعاشر الدايحات امثالك

حجيت بخوف والله ما اعرف خوما كوة

... بنت مرجانة الكاولية متعرف لج امج اذا ركصت تصفن اكبر شارب

.. كلاص بيده ركعة بالكاع فزيت ولزكت جسمي يم الحايط كام عليه

خليت ايدي على وجهي كمت ابجي واتوسل بي عفييية لاتضربني راح اتعلم بس لاتضرب

جرني من شششعري واخذني للغرفة شبعني ضرب وراها تقرب مني من كمل  تمدد مثل الثور نام

لوينضرب صاروخ يم راسة ميحس

استمرت حياتي ويا اكرم بهذا الشكل من هو صاحي يحير شلون يدللني وشنو يجيبلي ومن يسكر ينگلب وحش

مرتين بالأسبوع يبات يمي وبهاي المرتين اتمنى الموت

بالأيام الباقي يجي وكت الظهر يبقة ساعتين ويروح

كم مرة اخذت اصال ورحنا البيت خالة ام سرمد

اصال هواي تاذت بفراكهم تكعد تبجي عليهم

عيشتنا تحسنت فلوس وذهب بس يشهد الله عيشتي القديمة ارحم مليون مرة من هاي حياتي

متركت صلاتي بالعكس التزمت بيها وبحجابي

امي مرة جابت نسوان تريذ تسويلهم سحر طردتهن

كتلها اذا وصختي هذا البيت ولوثتي بسحرج وشعوذتج اطردج من البيت

كامت تغلط وتدعي عليه من شافتني قافلة

استسلمت مكدرت اتسوي شي

طلبت من اكرم يطلع مستمسكات الأصال لان بعدها لهسه بدون جنسية بس على بيان المستشفى

بسهولة كدر يطلعلها واسجلت باسم ابوها الي هي اصلا مشايفتة ولاتعرفة

اصال عبالها مرجانة امها واني اختها

حبيت اساعد بيت خالة ام سرمد واردلهم جزء من افضالهم عليه

قبل سامعة من خالة  زوجها صارلة سنين مقدم على قطعة أرض بس للاسف لان معنده واسطة مطلعتلة

حجيت ويا اكرم وهو ميرفضلي طلب

بكم اتصال كمل الشغلة وطلعت الارض الأبو سرمد

بيومها خالة حضنتني وتبجي

كالت لو تدرين اشكد بانين امال على هالقطعة ابو سرمد بكل صلاة يدعي حتى تطلعلة  ويبيعها وبفلوسها ناخذ شقة صغيرة والباقي نفتح بي محل مخضر صغير لان ابو سرمد تعب من شغل المعمل

... الحمد لله هسه تكدرون تحققون التردوا انتوا ناس ذهب اكيد الله ميتخلى عنكم ويفتحها بوجهكم

عمو ابو سرمد تشكر مني وفعلاً باعوا القطعة واخذوا بمكانها شقة صغيرة بنفس المجمع  الساكنين بي وبالباقي فتحوا محل

صارلي سنتين ويا اكرم سنتين عشتهن بالضيم خصوصاً من يشرب ضرب واهانة ومسبة ومن يصحة يراضيني بهدية

دخلت بعمر ال 17 واصال ست سنوات حبيبتي هالسنة تسجل بالمدرسة

رحت سجلتها واخذتلها ملابس مدرسة وجنطة جانت لابستهن وتفتر بالبيت

مكيفة بيهن بنيتي كبرت من اباوع عليها انسى همومي كلها وخصوصاً هي نسخة من عطر

بدت اداوم جنت اوديها واجييها ما اخليها تروح وترجع وحدها لحد هسه اخاف عليها من امي

اليوم عدها قرأية كعدت اقريها حفظتها

اصال.. كافي جنونة تعبت خلي ارتاح

.. هو انتي شسويتي حتى تعبتي شنو جنتي تشيلين طابوك على جتفج

... اووووي ولاتخلين الواحد يرتاح

... ام الأووووي كملي كتابة متتحركين من مكانج اذا متخلصين صايرة وكحة وام السان المدرسة طلعت عينج

... وين وكحة اصلاً المعلمة اتكول للبنات صيرن عاقلات مثل اصال

... ديلا يالعاقلة كملي واجبج

ههههه كعدت تتافاف وتكتب كملت كامت فتحت التلفزيون كابلتة

ورا شوية طلعت اغنية باسم العلي خالة ويا خالة

اشو هاي كمزت اجتي يمي كالت

جنونة بسرعة فتحي شعري

اني على نيتي فتحتلها الظفيرة عبالي مأذية راسها

اشو هاي ركضت للغرفة جابت ربطة شدتها على خصرها وكامت تهز

تحرك جسمها ويا الايقاع وتهز بشعرها ورگبتها

عيوني تشخصت عليها بالقرآن شفت الكدامي مرجانة مو اصال نفس الركص ونفس الحركات

صرررررخت عليها بعلوا صووووتي اصاااااال .......

يتبع