تحميل رواية «بنات الغجرية» PDF
بقلم بسمة البياتي
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
اختر مجموعة الفصول للتحميل (كل ملف حتى 10 فصول)
عن الرواية
_ _ ( ) فتاة حسناء تغري النظر ملاك طاهرا اغلى من الدر طفلة ساذجة اطهر من الزهر تحمل قلباً انقى من الجوهر تجهل الشر والغدر اساء الزمان اليها كثير واقتاد لها وحشا خطير اصبحت تتعامل مع قلوباً كالحجر فقدوا احساسهم ووعيهم كشاربي الخمر تحملت الكذب والخداع والمرار ونظرا الناس اليها بأحتقار وماكان لها ذنب غير أن من ولدتها من الغجر __________ كاعدة كدام المرآيا عيوني متروسة دموع ماأكدر انزلهن الخاطر اصال ادري بيها اذا شافتني ابجي هم هم راح تبجي دخلن امي وصديقتها الضحكة تارسة وجهن مرجانة... بعدج ممبدلة دي...
رواية بنات الغجرية الفصل الحادي عشر 11 - بقلم بسمة البياتي
._ بنات الغجرية _
( بقلم بسمة البياتي)
_ البارت التاسع _
تحرك جسمها ويا الايقاع وتهز بشعرها ورگبتها
عيوني تشخصت عليها بالقرآن شفت الكدامي مرجانة مو اصال نفس الركص ونفس الحركات
صرررررخت عليها بعلوا صووووتي اصاااااال
فزت وجمدت بمكانها تباوع عليه
اشرتلها تجي يمي اجت وكفت كدامي لزمتها من عكس ايدها حجيت واني صاكة على اسناني منووو علمج هيجي تركصين
.. ماما مرجانة علمتني
... مكدرت اسيطر على غضبي لزمتها بثنين ايدي من كتفها كمت اهز بيها واصرخ
هاي من شششششوكت واني وين عنج الف مرة كايلتلج معلييييييج بماما صخامة شتكولج لاتسمعين منها
صال خافت كامت تبجي
كالت والله بعد ما اسمع كلامها
هديت ايدها وكمت الطم ملخت نفسي لج ليششش هذا تالي تعبي اصال تريدين تصيرين مثلها لو مييييتة ولاشايفتج تقلديها بشي
..اصال كامت تناشغ لزمت ايدي تتوسل بيه والله بعد ما اركص عفية جنونة لاضربين نفسج
.. من شفت خوفها ودموعها جريت نفس عميق ومسحت دموعي حجيت وياها بهدوء
ماما مرجانة شوكت علمتج تركصين احجي لاتخافين ما اسوي شي
... من يجي هذا عمو اليخوف واني وماما نروح للغرفة هي تشغل اغاني وتكوم تركص وتلزم ايدي اتكولي تعالي ركصي وياي وتعلمني
.... يا نار گلبي اني السبب شلون أامن اخليها وياها بنفس الغرفة الله ياخذني على هالسواية
حجيت ويا اصال بتهديد بعد ممنوع تسمعين كلامها شتكولج تجين تكوليلي مفهوم
... هزت راسها بالموافقة
اصال تعشت ونامت اني ظليت كاعدة انتظر امي
نص الليل يلا اجتي شافتني كاعدة
كالت خير اليوم سهرانة يمكن ميجيج نوم لان مو بحضن كرومي ههههههه
كمت وكفت كدامها ولزمتها من ملابسها
اني مو الف مرة كتلج معليج باصال
لزمت ايدي دفعتها
... بنت الكلب بس باقي تجين تضربيني شششبيها المكموعة ومنو جاي يمها
.... تريدييييين تعلمييييينها سوالفج الطايح حظها تريدها تصير عار مثلج
ضربتني راشدي بكل قوتها عاطت اليوم انعل اهل اهلج منوو العار بنت القندرة نسبتي اني امج لج انتي لازم ليل ونهار تبوسين رجلي لان متخليت عنكم من ابوج عافكم
جنت اكدر اذبكم بالشارع واشوف حياتي بس مسويتها
... على اساس شلون عيشة عيشتينا اصلاً لو ما مصلحتج عدنا مجان بقيتنا انتي عفتينا حتى تستفادين منا عبالج من نكبر انصير سكط مثلج
رادت ترجع تضربني لزمت ايدها.
... واني هسه شحصلت منكم اشو وحدة جوا التراب والثانية مستهترة
... شششوفي اذا اشوفج بعد تتقربين من اصالج وربج اشمرج بالشارع لحظة وحدة ما ابقيج اهنا
... لج لو ما اني منين يجيج هالبيت شششنو نسيتي شلون جنتي تخدمين بالبيوت والمعامل اني السويتج ادمية وخليت براسج خير
وتعالي فهميني شبيها اصال خبصتي الدنيا علمودها
.. متعرفين ششششبيها تستغلين غفلتي عنها وتعلميها على الركص وسوالف الكاولية
... ههههههههههه على هاي محروك دمج اصلاً اصال الوحيدة طالعة عليه ههههههههه
... والكعبة اموتها وادفنها بيدي ولا اخليها تصير مثلج الأخر مرة احذرج معليييييج بيها
... اوووي اكلتي راسي طبج طوب انتي وياها وخرررري من كبالي اولي انطمر احسنلي
... عافتني ودخلت نامت جسمي بعده لهسه يرجف من العصبيه دخلت للغرفة تمددت بصف اصال اخذتها الحضني ربي مرايده شي من الدنيا
غير الستر الي والها
من اليوم بعدت اصال عن امي حتى نوم ما اخليها تنام وياها من يجي اكرم اقفل باب الغرفة وافرش الامي بالأستقبال
علمت اصال على الصلاة كلما اصلي اوكفها وياي وهي شوية شوية بدت تتعلم
وقت الفراغ احجيلها قصص دينية عن الجنة والنار وعن الحرام والحلال هي ذكية تفهم بسرعة
بس شغلة وحدة مكدر اخليها تبطلها هي الركص
اتغافلني من تشوفني ماكو تكعد تركص
مرات احاسبها ومرات اعوفها اكول اكثر البنات يحبن الركص ميصير اكتم على انفاسها اذا ابقة اضغط عليها تتعقد
اليوم يجي اكرم يبات اهنا امي جانت مالها خلك مطلعت بقت بالبيت
اكرم كالعادة من اجة نصب البطل والكعدة واني محكوم علية لازم اكعد يمه
كاعدين اجت امي كعدت يمنا واندمجت بالسوالف والضحك ويا كلامهم مشترك كله على ساهرة وجماعتها
ظل يسألها عن فلانة وعلانة وهي تجاوبه
الظاهر كل صديقات ساهرة جانن ويا اشكد قذر
اكرم.. خوش اغنية كومي ركصي هاي بنتج كديشة كلشي ميطلع منها
مرجانة... ههههههههه اي ثولة مطالعة عليه
اليوم مريضة شيكومني يمعود
اكرم طلع فلوس كال ركصي وهذن الج
... اي هذا الحجي المضبوط هسه صارلي واهس وحتى المرض راح هههههههه
اخذت الفلوس خلتهن بصدرها شدت الربطة على خصرها وكامت تركص وتهز
وهو يطك اصبعتين ومكيف عينه تريد تطلع على حركاتها
ما اعرف شلون اوصف حساسي كمية الشمئزاز العندي فوك الحد
امي تركص الزوجي اكو اكثر من هالقرف والنحراف
متحملت عفتهم وكمت دخلت للحمام ذبيت من راسي كلما يجي منظرهم كدامي نفسي تلعب اكثر
رحت للغرفة تلفلفت بالبطانية ارجف من البرد وبنفس الوقت جسمي نار
كمل سهرتة اجة مثل الثور اخذ اليردة ونام زاد المرض ظليت للصبح اتقيئ
الصبح من كعد وشافني متلفلفة واون من الوجع
تخبل كال هاي شبيج من شوكت انتي هيجي وليش مكعدتيني
ولاجاوبتة يقتل القتيل ويمشي بجنازتة
اكو تلفون ارضي بالبيت راح خابر ساعة واجة ولد حمايتة جايب اكل وعلاج
يريدني اكل مقبلت عاط بيه خفت منه اكلت لفة صغيرة واخذت العلاج
بالي يم اصال هسه اكيد كعدت بالكوة كمت فتحتلها الباب جانت كاعدة تنتظرني
اصال.. قافلة الباب اريد اروح للحمام
.. مستندة على الباب وبالكوة واكفة الدوخة لازمتني حجيت وياها بصوت تعبان حبيبتي جنت نايمة يلا اخذج للحمام
طلعت ومشيت وراها عيني على الحمام وعين على باب غرفتي ما اريده يطلع ويشوفها
كملت وغسلت كتلها يلا بسرعة دخلي للغرفة
.. تخوصرت هاي شنو هم حترجعين تحبسيني يعني شلون ما اتريك دشوفي حتى عصافير بطني ديبجن من الجوع
... لج نصي صوتج وامشي دخلي للغرفة هسه اني اجيبلج
اصال مسحت على بطنها وكالت تعالن حبيباتي ندخل للغرفة وهسه جنونة اجيبلنا اكل
كتلها رعنة شبيج تخبلتي ويامن دتحجين
.... ويا عصافير بطني مو كتلنا الجوع وانتي بعدج واكفة تحجين
... خرب غيرتج ولي وهسه اني اجيبلج
رغم المرض بعظامي دخلت للمطبخ سويتلها ريوك اكرم جايب بورك وكاهي خليتلها بالماعون اخذتة الها
.. الله اليوم بورك وكاهي
... اي حتى يشبعن عصافيرج
... جنونة ليش وجهج احمر انتي مريضة
... لا مابية شي لان جنت نايمة المخدة طبعت على وجهي
كافي حجي كملي اكل واني فد شوية اجيج
... اكولج دامبي شوكت يروح اريد اطلع
... دامبي؟
... اي هو يشبة دامبي بكارتون گلندايزر بس دامبي قصير وهذا طنطل
... بالكوة كتمت ضحكتي تشبيها قاتل ههههههه
من يروج اني اكولج عفتها ورجعت للغرفة اكرم مبدل وكاعدة
... شلون صرتي؟
... شوية احسن
... اني رايح باليل اجي اطمئن عليج
... لا ميحتاج اني راح اكضيها نوم لان تعبانه اذا تريد عود خابر
اكرم عگد حاجبة كال يعني متريدني اجي؟
... ماكو داعي لان مراح تستفاد مني شي مثل متشوف مريضة وتعبانة
... هااا يعني قصدج اني اجي بس علمود رغبتي
.... ما اعرف وعفية لاتسال لان راسي حيطك اريد انام
... ماشي براحتج
... عافني وطلع
فتحت باب الغرفة الاصال كتلها ديربالج تكعدين ويا امي اني حنام اذا كعدت ولكيتج كاعدة وياها املخج
... معليه بيها حكعد اتفرج على التلفزيون
... مرتاحيت اخذت بطانية ومخدة تمددت بالهول يمها من التعب والمرض نمت للعصر يلا كعدت
شفت اصال هم نايمة سودة عليه اكيد ممتغدية
كمت غسلت دورت امي مموجودة فتت للمطبخ گليت بتيتة وطماطة وسويت جاي اخذتهن ورحت للهول كعدت اصال وتغدينا
اكرم بعد مشفتة هالأسبوع ابد ما اجة ارتاحيت منه جان بين يوم ويوم يتصل يسال شمحتاجة ادزلج
اكرم وضعة تغير وكام ميجي هواي واني جنت مرتاحة على هالشي
حتى من يريد يجي بالنهار يبقة ساعة ويروح
كاعدة امشط الأصال
... اكولج جنونة منو عطر؟
... انصدمت بسؤالها جسمي رجف لا والله مو بس جسمي حتى گلبي فز من جابت طاريها
درتها عليه كتلها منين سمعتي هذا الأسم؟ .
... اخاف اكولج وتضربيني
... مكارة هو اني شوكت ضاربتج
... ح كولج بس الله عليج لاتتعصبين
... اهووو هي غير تحجي عاد احجي ما اتعصب
... لا ما احجي انتي من هسه شكلج تعصب
... يبوووو عليه شحيفضها اليوم لج بنتي احجي والله ما اصخم
... البارحة جنت كاعدة اتفرج على التلفزيون ماما مرجانة كاعدة هناك واشرت على القنفة
... اي وبعدين
... كالتلي تعالي كعدي يمي خلي احجي وياج
.. هزيتلها جتفي كتلها مااه ما اجي جنونة متقبل
مرجانة... انعل ابوج لابو جنونة مكموعة شكو هلكد خايفة منها ترى هي مو أمج حتى هلكد تخافين
... اي ادري هي مو امي اختي بس اني أحبها
... حبتكم حية ام سبع رؤوس يالغمة جنة مو اختج
... ،انتي امي وهي بنتج يعني اختي ترى اني صرت جبيرة واعرف
... لا واضح تعرفين لج بومة لا اني امج ولا هي اختج انتي بنت عطر
... منو عطر
... عود سالي جنة عليها اني رايحة طكت روحي من الكعدة كبالج وكبالج هذيج البومة الثانية
جنة.. اووف منج مرجانة متعوفين احد بحالة
... جنونة يعني انتي مو اختي وهي مو ماما وانتوا لكيتوني بالزبالة
... فتحت عيني صرت نار هاي بس لا امي هيجي كايلتلها اصال تحجي وعيونها متروسة دموع
لج شنو بالزبالة خلي تجي امي اني اعلمها
... لا لا هي مكالت بالزبالة اني اكول
اني سامعة من صديقتي اخوها من يتعارك وياها يكولها لكيناج بالزبالة
... وانتي شعليج بيهم شوفي اصولة اني راح احجيلج كولشي لان ادري بيج ذكية وتفتهمين
عطر تصير اختي
... اختج ؟
.. اي اختي وانتي بنتها
.. لعد وينها ليش معايشة ويانة
حبيبتي عطر ميصير تعيش ويانة
لان روحها راحت للسما
... يعني مثل ابو ناظم
... ابتسمت اي مثله
اني اصير خالنج ومرجانة بيبيتج
انتي احلى هدية تركتها عطر الي لو ما وجودج وياي ما اعرف شلون جان عشت
جريت اصال كعدتها بحضني وحضنتها
... جنونة اني احبج بكد الدنيا
... واني اموووت عليج
تعبت ومليت هلكد ما اتعارك ويا امي اعيد واسقل اكلها معليج باصال وهي يومية لاكيتلها سالفة
وهاي اخير شي كالتلها على عطر اني من البداية جنت ناوية اكوللها بس مو هسه خلي تكبر شوية بس امي مستحيل تلزم لسانها
والله خايفة لا فديوم اتكوللها امج انتحرت وابوح عافج ومعترف بوجودج
كولشي اتوقع من امي
اكرم صارلة اسبوعين ماكو حتى اتصال ميتصل واني مرتاحة الهذا الوضع
اليوم الصبح وديت اصال للمدرسة لان دوامها صباحي من رجعت سويتلي ريوك
شغلت فيروز وكعدت اتريك واسمعها
راجعين يا هوى راجعين
يا زهرة المساكين
راجعين يا هوى على نار الهوى
راجعين يا هوى راجعين
منودع زمان منروح لزمان
ينسانا على ارض النسيان
منقول رايحين منكون راجعين
على دار الحب ومش عارفين
آه راجعين يا هوى على نار الهوى
مندمجة ويا الاغنية وسارحة بخيالي رن التلفون عبست وجهي هذا اكيد اكرم نزلت اللكمة من ايدي حتى نفسي انسدت رحت للهول رفعت السماعة واجاني صوتة الخشن كال الوو
حاوبتة هلا
... هلابيج مشتاگلج شلونج
... الحمدلله وانت؟
... صرت زين من سمعت هذا الصوت الحلو اليوم باليل اجي اريد اسهر وياج للصبح حظريلي نفسج
... تحسرت وجاوبتة بقلة حيلة ماشي
سديت الخط واحس اهموم الدنيا نامت على گلبي
امي كالت مادام اكرم يجي اني ابات بيت ساهرة صارلي هواي مبايتة عدها
مجاوبتها عفتها تحجي وحدها
المغرب عشيت اصال وقريتها كملت واجباتها خليتلها التلفزيون بالغرفة تتفرج
اكرم اتاخرت للساعة عشرة هو ماكو شوية ارتاحيت كلت اكيد بعد ميجي
اصال نامت ربع ساعة وسمعت سيارة
خابت امالي
من دخل ملهوف اخذني الحضنة
اكرم... لوتدرين اشكد مشتاگلج
... بعدت عنه وغيرت الموضوع تتعشا لو بعد
... بين ما ابدل ملابسي صبي
... استغربت شعجب حيتعشى ومكال حظريلي الكعدة ولو هو مبين شارب بس مو هواي
صبيت العشى تعشينا
بدون مقدمات اخذني للغرفة لمساتة الي بالهفة وحب يتعامل وياي بلطف
للفجر هو كاعد تعبت اريد انام انداريت وغمضت عيني سحبني عليه وحضني
اكرم... تدرين جنة اني عندي بنية بعمرج
.. رفعت راسي باوعت عليه اول مرة يجيب طاري بنتة كدامي هو ابد ميحجي عن عائلتة ردت احجي بس اخاف منه
... اعرف بشنو تفكرين
.. رفعت حاجبي وبشنو افكر
... هسه اتكولين اني اذا بعمر بنتك شلون الك نفس بيه
... اي وشنو جوابك على هذا كلامك؟
... اني نقطة ضعفي الحلوات ما اكدر امنع نفسي عنهن حتى لو جانن صغار الي تدخل عقلي لازم احصل عليها
... اهااا خوش جواب
... هاي اخير ليلة الي وياج
... مستوعبت كلامه بدون وعي كتلة كول والله
... ههههه هلكد ضايجة مني وتريدين تخلصين
.... هااا لا موقصدي بس استغربت
... لاتستغربين اني انقلت غير مكان وبعيد منا وبنفس الوقت صارتلي مشاكل ويا عائلتي
.. ليش؟
... جنة اني عندي ولد كبار وبنات وبعضهم مزوجين
. ابني الجبير وزوج بنتي عرفوا بعلاقتي بيج واني مزوجج
بالكوة قنعتهم ميحجون الاحد مقابل اطلكج
زوجتي اهلها معروفين واصحاب مناصب ما اكدر اخسرهم وزوج بنتي يصير ابن اختها اخاف يروح يبلغها لو يبلغ امه
... هههههههه حجيت بگلبي كل هالطول والعرض والشخصية يخاف من مرتة
كتلة اي حقها تزعل اذا عرفت
... كل البنات العرفتهن علاقتي وياهن فراش بدون زواج انتي الوحبدة اتزوجتج
جنة انتي نقية ديربالج على نفسج حرامات انتي بنت مرجانة
... هاي قسمتي بعد
الصبح جاب شهود اثنين وطلگلني وأخيراً خلصت منه رغم الفرحة الفرحتها بس اكو خوف بداخلي ياترى امي اذا عرفت اطلگلت شنو من مصيبة اجيبلي هالمرة..........
مساء العافيه حبايبي
اعتذر لان منشرت البارحة الاشتراك جان خلصان
اعرف طريقة النشر دتزعجكم ودتسببلكم ملل من القصة
. لهذا اني راح انشر يومية بس حبايبي من هسه خلي نتفق
اني اكتب بحدود 2000 كلمة مو تجون بعدين تعترضون وتكولون البارت قصير لان من اشوف اعتراض والنبي واهسي يخرب بالكتابة
اتحملوني فدوة
تحياتي للجميع بسمة
رواية بنات الغجرية الفصل الثاني عشر 12 - بقلم بسمة البياتي
._ بنات الغجرية _
( بقلم بسمة البياتي)
_ البارت العاشر _
مكلت الأمي بسالفة طلاكي من اكرم ظليت ساكتة خايفة اذا تعرف اطلكت اجيبلي مصيبة جديدة
هي يومية تسالني ليش اكرم رجع اختفى وحتى اتصال ميتصل احجي خوما متعاركة ويا وهججتي بسوالفج الطايح حظها
اجاوبها مصار شي وما ادري وينه لاظلين تساليني اذا ظال بالج عليه روحيلة
جوابي ميعجبها تخزرني وتروح
مر اسبوع على طلاكي اليوم المغرب دخلت امي عيونها تجدح نار من باب الهول كامت تصيح عليه
... لج كلبة هججتيييي الرجال هسسسه ارتاحيتي احجيييي شسويتلة وطلكج
... جاوبتها برود هه خلصت مصلحتة ومل مني وانتهى كولشي شنو عبالج يظل يمي طول العمر
مرجانة خاتون اني وانتي ندري كولش زين هاي الزواجة فترة وتنتهي هههههه معقولة واحد مثلة يظل متمسك ابنت مرجانة الغجرية ويعيش وياها بقية حياتة ههههههه
... بنت النعال لاتضحكين اكرم جان ميت عليج اكيد بسوالفج العوجة هججتي مليون مرة كتلج اكسبي ادلعي صخمي وانتي مثل البومة وجهج يكطع النعمة
... لادوخيني اكرم راح عوفيني بحالي ترى مالي خولكج
بس سؤال انتي منين عرفتي اكرم طلكني
مو كلتي اكرم مختفي حتى بيت الشريفة ساهرة هم ميروح
.... اي مديروح اليوم قصي حمايتة اجة اهناك وكلي
... ههههههه جنت شاكة عندج علاقة بقصي وهسه تاكدت
... وانتي شعليج ششنو تريدين تحاسبيني بعدني حلوة وصغيرة من حقي اتمتع بحياتي
.... اي حقج بعدج بنت 14 سنة ولازم تتمتعين
والله يا الله مصدكة روحها صغيرة
... انجبي بنت الفگر وهسه كوليلي شراح تسوين ومنين تصرفين
... معليج بيه عسى ما اگدي انتي مالج دخل
.. طبج طوب صوجي حايرة بيج
.. عافتني ورجعت طلعت تنهدت رفعت راسي للسگف ربي دخيلك اكفيني شرها وبعدها عني وعن اصال
كمت دخلت للغرفة وقفلت الباب طلعت ذهبي والفلوس
اكرم جان هواي يشتريلي ذهب وينطني فلوس جنت اجمعهن حرت وين اضمهن اكيد امي هسه اتحوم عليهن وادورهن
شلت دوشك الجرباية خشب الجرباية من هذا الصاج القوي بالكوة كدرت ارفع وحدة من الخشبات وضميتهن جواه رجعت الخشبة مثل مجانت ورتبت الدوشك
بقيت فلوس قليلة اصرف منهن وكم قطعة ذهب الي لابستهن
ثاني يوم امي سالتني على الذهب كالت جيبيهن اضمهن الج اخاف ينباگن
... منيلي بس هذن الي لابستهن
... هالكلاوات عبريهن على غيري مو كدامي اكرم كلما يجي يجيبلج قطعة
... اي صح ومن طلگني اخذهن
... ههههههه لج بنتي اني مرجانة تريدين تضحكين عليه
اكرم مثل اسمه كريم اذا ينطي شي مياخذه
... العندي كلتة واذا متصدكين بكيفج
امي كامت تفتش بالبيت من اخذ اصال للمدرسة ارجع الكيها مفتشة البيت كله
اليوم العصر اجتي صديقتها ساهرة كابلني وكعدن
ساهرة... اووي شو الكعدة يابسة دكومي مرمر شغليلنة اغاني خلي نتونس
... هههههه من عيوني سهورتي
جنة .. كاعدة على اعصابي لو بيدي اثنينهن اكوم اطردهن بس اخاف من شرهن
امب اجت جرت اصال تريدها تركص عطت بيها وخري ايدج عنها لا اكسرها
هي وساهرة وحدة ظلت تباوع بوجه الثانية ويتهامسن
اصال.. شاورت جنونة منو هاي السعلوة التشبه عبسي
... ههههههه معليج بيها خلي تولي عبسي اشرف منها
ساهرة.... شجاي تتشاورون
اصال.. جاي نحجي على عبسي مو عليج
جنة... هههههههه
ساهرة رفعت حاجبها كالت خير جنة اشو اضحكين
... لعد ابجي والله حلوة هاي كاعدة بيتي اسوي اليعجبني انتوا شعليكم
اصال... هذا سنج شبي ليش بي حديدة صفرة
.... هذا سن ذهب ميلبسنة غير الخاتونات
جنة... ورا شوية اصال كامت شالت دولكة المي اجتي يمي كالت اريد مي غيره هذا ام سن الوصخ شربت منه
ساهرة... مرجانة ترى بنتج وحفيدتج زودنها صارلهن ساعة يتهامسن ويحجن عليه واني ساكتة
مرجانة داده سهورة مسحيها بوجهي هذن ادبسزيات وممربايات
جنة.... اي احنا ممربايات انتي وصديقتج المربايات وتنكطن شرف
امي وساهرة استلمني غلط وفشار لسانهن زفر والفاظهن وصخة
محبيت اصال تسمعهن اخذتها ودخلت للغرفة
ساهرة كل يومين تجينا اختنكت منها ما اكدر اطردها لان ادري بيها وحدة قوية اخاف من غدرها
اليوم اجتنا من الصبح هي وامي مخبوصات يجيبن ويودن رتبن الأيتقبال وجابن حلويات وفواكه
كمت الطم عزززا بس لا راح يسون بيتي
بيت مشبوه
متحملت طلعت الأمي نترت بعصبيه انتي شجاي تسسسوين شنو مفكرة تستقبلين زبائنج اهنا والقرآن احرك البيت عليج وعلى صديقتج
ساهرة.... على كيفج لايطكلج عرك اصلا هالكعدة علمودج نريد انفعج
... ششششششنو اشدتخربطين انتي امشششي طلعي برا صوجي اني صارلي كم يوم متحملتج ومبقيتج اهنا
مرجانة.... لج حيوانة فهمييييي بالأول بعدين احجي حيجي رجال يريدج
شوفي اذا معجبج لاتوافقين
... ما اشوف احد كافييييييي رحميني وعوفيني بحالي غضببببب انتي غضب مو ام
... تششششوفي وغصبا عليج الظاهر انتي متجين الا بالعين الحمرة
جنة ترى روحج بيدي والله اذا مطلعتيلة اندمج
.... عرفت رجعت تهددني باصال اخرسيت ما اكدر احجي
ساهرة... لاتضوجين عيوني مرجانة ترى جنونة عاقلة وتعرف مصلحتها اكيد مراح تعترض وراح تدخل تبدل وتتحظر مثل البنات الشاطرات
.... متت بدمي خوف على قهر على خنكة احس گلبي على دقيقة يوكف
وهذن وحدة تكبس ووحدة ترفع
عفتهن دخلت للغرفة كعدت بالكاع كرفصت لميت رجلي الصدري وكمت انوح وابجي شسوي ياربي وين انطي وجهي
اصال.. جنونة ليش تبجين منو ضربج
... مابية شي كعدي اقري معليج بيه
اصال. عفت جنونة طلعت من الغرفة ادري ماما مرجانة وعبسي ضربوها
رحت للهول شفت عبسي متمددة على القنفة ومغمضة عينها شعرها مفتوح ونازل اجتني فكرة رحت للمطبخ طلعت المكص مشيت على كيفي كعدت يم راس عبسي لزمت شعرها على كيف وكصيتة
هي نايمة ولا حست بيه ذبيت شعرها بالكاع واني اضحك على شكلها هههه
دورت ماما مرجانة جانت بالغرفة كاعدة وبيدها جكارة
اجيت كعدت يمها حضنتها
مرجانة... هاي شعجب انتي مو تخافين من جنة ومتجين يمي
... بعد ما احب جنة احبج انتي
... هههههه ولج مكموعة اخاف رايده فلوس وجاي تتمسكنين
...بعدني حاضنتها ايدي ملتفة على ظهرها المكص جنت مخليتة على طرف لزمتة بحجة العب بشعرها طيرت نصه
ماما حيت بيه دفعتني وكعت بالكاع
...بنت الكلب بنت القندرة اليوم احرك عشششيرتج هاي شششششسويتي
.. اريد انهزم لزمتني شبعتني كتل كمت اصرخ
اجتي عبسي هم تعيط ولازمة شعرها بيدها
لزمني اثنينهن كتلني
ساهرة...بنت الكلب اليوم ازينج صفر وييين المكص
.... ماما شافت المكص بالكاع شالتة اجت عليه كمت ارفس
جنة.... بعدني على نفس كعدتي ودموعي تجري فجأة سمعت صراخ اصال وصوت امي وساهرة يغلطن عليها
طلعت اركض الصوت يجي من الغرفة
دخلت لكيتهن متكابلات عليها وامي بيدها المكص تريد اتكص شعرها
عقل مظل براسي
ركضت دفعت امي بكل قوتي من القوة تمددت بالكاع
لزمت ساهرة نمت عليها طلعت قهر گلبي كله بيها ملختها
امي بالكوة اجتي سحبتني منها
عطت انتوا منووووو وتمدوون ايدكم عليها
الأيد التنمد اكصها
مرجانة... هاي مو طفلة شششششيطانة بنت السكط ششششوفي شششسوت بشعري
ساهرة... مو بسس ششششعرج دششششوفي شعري
جنة...انصدمت من انتبهت على شعرهن كل وحدة بيهن شعرها جان الخصرها هسه صاير ويا جتفها
وامي صفحة طويلة وصفحة قصيرة
كتلهن مسسستحيل اصال تكدر اتكص شعرجن وحدتجن بكد الهايشة وين تكدرلكم
ساهرة... اني جنت منطمرة سسسسساعة السودة الغفيت بيها
... واني اجتي تتلوكلي وتحضن بيه مجنت ادري بيها خبيثة مثل ابوها وناويتلي على نية مصخمة
... طفلة وحبت تشاقة وياكم كافي لاتكبرون الموضوع
.... خربت شششششعري وتكولين حبت تششششاقة لج هذا هم شششقة
... شسويلج منو كايلج عوفي بيتج وتعالي اهنا
اخذت اصال من ايدها وطلعت اسمع صوت ملاطمهن جوا ههههه
دخلنا للغرفة سديت الباب
. حجيت ويا اصال بعصبية ليش هيجي سويتي
... ليش صيحوا عليج وخلوج تبجين
... ولان بجيت رحتي كصيتي شعرهن
... هزيت رآسي بمعنى اي
... ششششعليج انتي حتى لو تشوفيهم يضربوني لاتدخلين لج انتي فقيرة منين متعلمة هالوكاحة
كامت تبجي صح گلبي وجعني عليها بس مومثل كل مرة مرحت اخذتها الحضني عفتها وتمددت
ماأربدها تدخل بيني وبينهن هذن حياية كرصتهن والگبر
اخاف يحقد عليها ويأذنها وهنا بدون شي يهددني بيها
باليل اجه الشيطان المنتظراتة
اجت امي وهي معبسة ضايجة علمود شعرها كالت لبسي شي بخير وتعالي طلعي للرجال
مكدرت اعترض خصوصا الوضع متوتر اخاف ارفض اطلع وياذن اصال لان يباعون عليها بحقد
لبست شلون مجان لفيت حجابي عدل وطلعت
دخلت للأستقبال شفت رجال هالمرة يمكن اكبر من اكرم سمين ومدعبل كرشة اعلى من خشمة
مرجانة. تعالي جنونة لاتستحين ابو فيصل يريد يشوفج زين ويحجي وياج
... كعدت بعيد عنهم ابو فيصل مدري منو عيونة عليه ويحجي
... هو هذا الحجي المضبوط مو مثل القبلها شكلها يسد النفس هههههه
... يحجي ويضحك طلعن سنونة صفر يلعبن النفس يمكن بحياتة ممفرشهن عوووع
كمت وكفت اريد اطلع
صاح وين تعالي كعدي اني اشفت منج
ولا انداريت كملت طريقي رجعت للغرفة
اجت امي ورايه
.. وين وليتي امشششي رجعي الرجال كولشي مشاف منج
... طبه طوب عسى ما شاف شسويلة روحي من كبالي قبل لا اتخبل عليكم بهالليل واطلع اطردة
... هه بسيطة الجايات هواي غصب عنج تشوفي
راح ابو صخام واخذ ساهرة ويا
... مرجانة تعالي نكعد بالهول اريد احجي وياج
... طلعت وياها كعدت وهي كعدت كبالي
... ابو فيصل ميتفوت رجال طاك للستار صاحب اراضي واملاك ومشاريعة بكل مكان اذا اخذتي تصيرين اميرة حتى خدامة يجيبلج
.. اذا هلكد عاجبج انتي اخذي وعيشي اميرة
...ياريت لو يقبل بس شنسوي روحه خضرة يدور كتكوتات صغار
.. واذا رفضت ؟
... متكدرين لان روحج بيدي
وبدون كلام زايد واعتراض حظري نفسج باجر يجي يبات يمج
... ششنو يبات يمي بهالسهولة
... اي وشنو الصعب بالموضوع
.... الافهمة من كلامج ياخذني بدون زواج
.... حاولت اخلي يعقد عليج بس مقبل وكال شتريد اني حاضر بس زواج ماكو......
يتبع
رواية بنات الغجرية الفصل الثالث عشر 13 - بقلم بسمة البياتي
._ بنات الغجرية _
( بقلم بسمة البياتي)
_ البارت الحادي عشر _
حاولت اخلي يعقد عليج بس مقبل وكال شتريد اني حاضر بس زواج ماكو
... ابد ممستغربة من كلامها لان متوقعة منها هالشي من زمان
شترجى من وحدة كاولية الشرف اخر همهة تعبد الفلوس عبادة
ما اعرف شلون اجتي هالفكرة براسي
حجيت بهدوء تدرين يامرجانة انتي نهايتج قربت
... هههههه اي شلون بله راح تكتليني ههههه
...لا طبعآ اني مستحيل اوصخ ايدي بدمج القذر
ترى اني من الصبح لهسه ساكتة واتفرج عليج اريد اشوف لوين حتوصل وياج
اني لو اريد حتى الهذا ابو فيصل ما اطلع بس عجبني اشوف شحايبتلي هالمرة
... اي خوش وهسه شفتي وراح تقبلين بي غصب عنج وعن الخلفج
... مو داكولج نهايتج قربت بصراحة اني مليت منج واريد اخلص من شوفة وجهج
لهذا سمعيني زين تهدديني باصال مووو مممم اوكي هذيج اصال نايمة روحي اخذيها
... هاااا مبين مليتي منها لعد شكو خابصتني معليج بيها وديربالج تمدين ايدج عليها واذبح واصلخ اذا صار بيها شي
... ابتسمتلها لان متاكذة مرجع اصال الي ومحد راح يتأذى غيرج
... ههههههه اي وشسوين تشتكين عليه ههههه يمه جسمي كزبر كمت ارجف ههههه
... هههههه لا ميحتاج اتعب نفسي واروح اشتكي بتلفون واحد مني الأكرم تختفين وراه الشمس بس اني مراح اطلب منه يلبسج تهمة ويسجنج
لا هذا مو خوش طلب اني طلبي حبكون راسج وانتي تدرين كولش زين اكرم وجماعتة القتل عدهم مثل شرب المي هههه
امي وجها صوفر بس مثلت القوة وجاوبتني اي عيني وانتي وين راح تلكين اكرم
هاي ايام زمان جنتي تطلبين وتشرطين هسه بح اكرم راح وبعد ميعبرج بنعال مكطع هههههه
.... اي صح راح بس وعدني اي طلب اطلبة منه ينفذه الي لان يدري بسوالفج الوصخة لهذا انطاني رقمه الخاص حتى من اتعرض الاي مضايقة من اي بشر هو يتصرف
... جذاااااااابة ششششنو عبالج تعبر عليه لج اني مرجانة مو انتي التضحكين عليه
.. اوكي اني جذابة لاتصدكين وكتلج بهذيج الغرفة نايمة اصال روحي اخذيها اني هياتني كاعدة اهنا مراح اتحرك من مكاني
..... انجبي لج هو اني شششوكت هددتج بأصال لو كتلج اخذها لاتحجين حجي من كيفج
اني من ردتج الأبو فيصل لج علمودج غير رايدتلج الخير والعز
... عفت الخير والعز الج
... طبج طوب مو وجه نعمة مووتي من الجوع ورجعي اشتغلي بالمعامل والبيوت انتي هذا مستواج
.... هه اني عاجبني مستواية و عيشتي انتي شكو حاركة دمج والله يا الله
امي كامت بعصبية وهي ادردم طبكت الباب بغضب
تنفست براحة كمت توضيت وصليت ركعتين حمد وشكر لله
مدري شلون الله الهمني هذا لكلام
لان اكرم اصلاً مكالي هيجي ولا اعرف شي عنه
امي ظلت يومية تتوسل بيه حتى اوافق على ابو فيصل تحاول تخليني اقتنع برضاتي بدون تهديد
اخير شي عطت بيها وكمت لزمت سماعة التلفون اجتي تركض سحبتها من ايدة وسدتة
كالت هاهية بعد معليه بيج طبج مرض انتي متعرفين مصلحتج اني شكو مقهورة عليج
... والله ياريت تجفبني شرج ومتدخلين بحياتي من اجي اشتكيلج هذاك الوكت عود حيري بيه
صح امي عافتني بحالي بس ظليت خايفة منها ليل ونهار عايشة بخوف
رحت المدرسة اصال وصيت المديرة كتلها اي احد يجي على اصال ما اقبل تطلع ويا حتى لو جانت امي وهذا رقم البيت اي شي يصير خابروني
المديرة حبابة كالت تدللين وصيت اصال كتلها اخاف ماما مرجانة تجيج للمدرسة وتقشمرج حتى تروحين وياها اتكولج جنة تريدج لو جنة مريضة ابد لاتصدكيها ظلي اصرخي وابجي لان هي تريد تاخذج مني وبعد ما اشوفج
صح كلامي يخوف مومال اكولة كدام طفلة بس شسوي من ضيمي
يشهد الله حتى باليل من انام اخاف اقفل باب الغرفة وكلما تصير حركة افز واظل مرعوبة مختصر الكلام حياتي صارت جحيم خوف قلق رعب اتخيلوا عايشة بيتي ومحاسة بالأمان والمصيبة الاكبر امي هي سبب رعبي
الأم لأزم اتكون الامان والحماية ونبع الحب والحنان البنتها اذا اخاف من شي اروح الحضنها حتى احس بالطمئنينة لكن اني بكل هذا محاسة حتى ما أذكر امي فديوم اخذتني الحضنها وحسستني بأمومتها
بدت امتحانات اصال جنت اروح وياها ابقة انتظرها الحد متخلص وارجعها
اصال صايرة لسان هي وامي كل دقيقة يتعاركن
مرجانة اتكول هاي طالعة عليه بس للاسف انتي ربيتها لو اني مربيتها جان فادتني
كلامها يزرف گلبي ارزل اصال اكوللها معليج بامي ما اريدج تطلعين عليها
تجاوبني براءة لا لا اني اصير مثلج مو مثلها هي ما احبها بس احبج انتي
خلصت الأمتحانات
بنوتي نجحت راحت للثاني ابتدائي
بدت العطلة الفلوس العندي خلصن بس بقة الذهب
صار الظهر تغدينا اني واصال
امي بعدها لهسه نايمة
كلت الأصال راح انام شوية من تكعد امي ما اريد مشاكل وياها معليج بيها
... اني شمسويتلها هي تتحارش بيه اليكول ماكلة عشاها
.. بس لو اعرف منين اجيبين هالسوالف الأكبر من عمرج جان ارتاحيت
... هنا يجن وحدهن كدامي
... اي وانتي تلكفيهن على السريع
... هسه مو كلتي نعسانة روحي نامي اني حكعد اتفرج على التلفزيون
.رحت تمددت شوية واخذتني النومة نص ساعة وكبت العيطة بين أمي واصال كمت مفزوعة من الفراش ادري اذا ما الحك عليهن يتكافشن
دخلت للهول امي كاعدة تسب وتغلط واصال واكفة متخوصرة وتترادد وياها
صحت كافيييييي فضحتونا اكفر اعوفكم شوية لازم اجي الكي مصيبة
مرجانة... هاي وحدة ادبسز بكد النعال لسانها اطول منها بس باقي تجي تضربني احجي وياها كلمة تردلي عشرة تاكلني اكل بالسانها
اصال.. ليش احد كايلج اني اكل لحوم الحيوان
... امي نزعت البرجلها وشمرتة عليها بنت السكط منو حيوان
جنة هي هاي تربيتج الفرحانة بيها
... بالكوة كتمت ضحكتي سويت نفسي متعصبة ما اريدها تتعلم على طولة اللسان نترت ببها لج اصال مو عيب تجاوزين كم مرة منبهتج ما اريد مشاكل ومرادد بالكلام
... اني شعليه هي البدت مو اني
... شششوفي الجذابة مو اني مجلوبة واتعدى عليج وادور مشاكل
... هم زين تعرفين نفسج واعترفتي بالسانج
... بنت القندرة شششششنو قصدج
جنة.. كافييييييي طلعتوا روحي راح اهج من وراكم فهموني ششبيكم وعلى شنو هالصياح والغلط
... جنونة اني احجيلج وانتي تدرين بيه اني ما اكذب مو مثل بعض ناس
... امي كامت تريد تضربها وكفت كدامها
.. لج عوفيني انتف شششعر هالمكموعة
... يوووم كافي خلي افتهم واذا غلطانة اني احاسبها
..اشششك هدومي كل هذا الغلط الكدامج واتكوليلي اذا غلطانة
.. على هالتجاوز هم احاسبها بس هسه اريد افهم شبيكم
اصال.. شوفي جنونة اني جنت كاعدة بأمان الله اتفرج على الفلم حلوو
.. اي حلو كملي
... اجتي ماما مرجانة كعدت على القنفة حلووو
..بالعباس حلوو فضيني
... كالت نصي الزفت راسي يوجعني حلووو
... اي صخام دكملي عاد مو عليتي الگلبي
.... كتلها الراسة يوجعة ياخذ حباية ويرجع ينام حلووو
..... شحيفضها مو فتيتي مرارتي احجي
... هي تعصبت وكامت تغلط عليه واني مسكينة كولشي ممسويتلها حلووو
مرجانة... من اكولج نصي تنصي بدون لغوا زايدة بس انتي ادبسز ومتسمعين الكلام
جنة... حقة راسج يوجعج من سهر الليالي ونوم الظهر ومن تجين اهنا ادورين هدوء
... يعني دتشجعيها على تجاوزها هو محد طلع عينها غيرج اروح اولي احسن ما انجلط واني مكابلتكم
.... اخذت اصال للغرفة ورزلتها من كامت تبجي نمرد گلبي حضنتها كتلها لاتبجين اني اخاف عليج ما اريدج تختلطين بامي
مسحي دموعج باجر اخذج البيت خالة ام سرمد من الصبح للعصر حتى تشوفين خالة ومنى
.. كمزت حضنت جنونة واني اضحك هيي هييي راح نروحلهم والله مشتاقتلهم
كعدت ساعة تسعة سويت ريوك كملتة رحت كعذت اصال
بالبداية مقبلت تكعد من كتلها مو ابطل وما اخذج البيت خالة ام سرمد فتحت عينها وطفرت من فراشها
..لا لا هياتني كعدت كمت اركض رحت للحمام غسلت نشفت وجهي وجيت كعدت كبال جنة
هاي شنو البيضة
... شنو شبيها
... اشو بيضة وصفرة
... لعد شتريدها حمرة وزركة
... اهوووو مجاي اشاقة موتدرين بيه احبها كلها صفرة
... نسيت ومطركتها ( خفقتها) اكليها وانتي ساكتة
.. ماااه ما اريدها
.. لج بنتي لاتتعززين على نعمة الله غيرج يتمنوها
... عبست ماشي حا اكل
...كملنا اصال راحت بدلت امي من طلعت البارحة مرجعت للبيت
بدلنا وكملنا قفلت البوب وطلعنا اخذنا تكسي من راس الشارع
وصلنا للمجمع شقتهم طابق ارضي اصال ادك ابابهم بثنين ايدهاولج عيب جيرانهم حيطلعون من الصوت
. اوووي شسويلهم خلي يطلعون
فتحت منى الباب من شافتنا فتحت حلكها ابتسمتها وصلت الأذنها كالت ماما جنة واصال اجوي
بوسناها وفتنا طلعت خالة فرحانة سلمنا عليها
كعدنا بالهول
ام سرمد.. واج بذاتة صارلج اشكذ مجاية
... خالة والله ملتهية تعرفين اصال امتحانات من كملت يلا كدرت ارتاح
... حقج حبيبة اني هم نفس حالتج
... سمعت صوت عمو ابو سرمد كتلها شعجب عمو مو بالمحل
.. اووف جنة شحجيلج
.. خير خالة شصاير قلقتيني
... ابو سرمد صارلة شهر بالفراش لا ايد ولا رجل
.. عززا شبي
... يومية مرض شكل اخير شي ديشكي من كلياتة واني حايرة بي يم الاطباء الظاهر تعب المعمل هسه كام يبين بي
.. سودة عليه والله عمو ميستاهل الله يشفي وينطي الصحة
... اميين الله يسمع منج
... لعد منو يكعد بمكانة بالمحل
.. سرمد و سامي وكفوا بمكانه والحمدلله طلعوا كدها وسدوا مكان ابوهم
. فدوة ربي يحفظهم الكم اريد اسلم على عمو اذا كاعد
.. تعالي وياي
..كمت سلمت عليه خطية شكلة ذبلان وتعبان هذا الرجال درة مالله ميستاهل هالنومة
اصال التهت ويا منى واني رحت ويا خالة للمطبخ نحظر الغدا
سالتني على امي
كتلها الحمدلله جايزة مني عايفتني بحالي بس مرات من تلكي زبون جديد تجي ادكلي ناعم من اهددها تسكت وتعوفني
... الله يبعدها عنج ويكفيج شرها
.. اميين والله خالة عيشتي وياها رعب ممامنة على نفسي وعلى اصال بالبيت
اتصوري اقفل باب الغرفة واخلي غراض وراه الباب وابقة خايفة
... من شنو تخافين؟
... اخاف تروح تجيب جماعتها للبيت ويصخموني اني وهالطفلة ادري بيها كولشي يطلع منها
.. الله يساعدج على هالعيشة العايشتها من صغرج لهسه جبتيها خوف بخوف وتعب
... الله كريم شسوي هاي قسمتي
.. بمناسبة القسمة ليش متزوجين معقولة كالهجمال وماكو واحد يجي يتقدملج
.. ههههه الله يخليج خالة منو يفكر ياخذه وحدة امها كاوليه حتى اليريدوني من يعرفون اني بنت منو ينهزمون
... بعدج صغيرة حبيبتي المثلج بعدهن يتفرجن افلام كارتون هو كله عمرج 18سنه
... احس روحي كبرت عشرين سنة ليكدم على الضيم الشفتة
... الله يساعدج كوليلي اصولة شلونها وياج
... هاي الشي الوحيد الحلو بحياتي رغم صايرة وكحة وكاضيتها معارك ويا امي
... ههههههه فدوة العينها خليها تصير وكحة زلا فقيرة الفقير بالهزمن ميعيش وينوكل حقة
... اي والله صح
كملنا الغدا كعدنا نتغدا اصال مكيفة مسكتت مدري منين اجيب سوالف وخالة مكيفة عليها وخربانة ضحك
اصال... سرمد وسامي شوكت يجون
... الوراه المغرب يلا يعزلون
... اهوووو يعني مراح اشوفهم
.... ابقوا يمنا اليوم حتى تشوفيهم
جنة. لا والله خالة منكدر ما امن اعوف البيت وحده
... امج وين؟
.. من البارحة مبايتة بالبيت
.... اصولة مره الثانية من تجون ادز عليهم حتى تشوفيهم سامي دوم يسال عنج
.... اي حتى يضربني ويجرني من شعري
اني احب سرمود
... ههههههه وهو هم يحبج
.. اي اني من اكبر ازوجة لان حلو
جنة... غصيت باللكمة اريد ابلعها ما اكدر
عطت لج رعنة شنو هالحجي
ام سرمد ههههههه الله عليج عوفيها شفايتلي من تكبر تصير جنتي
.... عزززا مدري منين دتتعلم هالسوالف
.... عادي ترى اكثر البنات هيجي يحجن وهنا اصلاً ميعرفن شنو زواج
.. سكتت وخزرت اصال هي هم خافت وسكتت
العصر رجعنا وصلنا للبيت
اريد افتح باب البرا لكيتة مفتوح
جمدت بمكاني متت بدمي اني متاكدة قافلتة والمفتاح بس اني عندي ماكو نسخة ثانية
اريد افوت بس اخاف بقيت بالحوش خفت لا احد جوا شجعت نفسي شلت الماسحة بيدي كلت الاصال انتظريني بالحوش
جيرانة اكثرهم برا كلت ما اعتقد احد جوا واذا صار شي بعيطة وحدة المنطقة تلتم
تقدمت اريذ افتح باب المطبخ هم لكيتة مفتوح
دفعت الباب بيدي انصدمت من المنظر غراض الكاونتر كلها مطشرة بالكاع
نسيت الخوف فتت مثل المخبلة جوا دخلت للغرفة لكيتها متبين من الملابس والغراض حتى دوشك الجرباية مشيول ومشمور بالكاع ركضت على مكان الذهب دورت ماكو
كعدت الطم وابجي سسسوتها بيه مرجانة ربي دخيلك وين انطي وجهي شلون راح اكدر ادبر عيشتي وعيشة هالطفلة اليتيمة عسسساج بنار مثل نار گلبي مرجانة الله لايوفقج
ربي سسسامحني ادري هي امي بس الدتسوي بيه ظلم وانت مترضى بالظلم
اصال.. سمعت جنة تصرخ وتبجي دخلت للبيت الغراض مطشرة وكفت يم باب الغرفة سمعت جنة تبجي وتدعي على ماما مرجانة عرفت ماما بايكة فلوسها كمت ابجي بعد ابد ما اطلب من جنونة شي خطية ماعدها
دخلت للغرفة حضنتها ومسحت دموعها لاتبجين جنونة اني بعد ما اريد فلوس
... احتركت بالزايد من كلام اصال يربي هاي شنو ذنبها تتحمل العوزة والفقر
فوضت امري الربي مسحت دموعي وبوست اصال
كتلها لاتخافين مصار شي كومي نرتب البيت
غراض البيت كلها مگلوبة ممبقين شي ممفتشينة هه اكيد البارحة سمعتني من كلت الأصال نروح البيت ام سرمد لكتها فرصة ونفذت جريمتها من هاي ما رجعت البارحة
حتى اطلع نفسها بريئة وعود هي مموجود خافت لا اتهمها واتصل بأكرام
حبت تبعد الشبهات عنها
واني هسه مجبورة اسكت وما اوجه اي اتهام الها اذا اتهمتها وكتلها متاكدة انتي اخذتيهن راح تستغرب ليش متصلت على اكرم حتى يدورلي على الحرامي وراح تكشف لعبتي وتعرف اني معندي اتصال بي وترجع تهددني وتبيعني
ذهب مبقة عندي غير تراجي وكلادة بركبتي وتراجي اصال بأذنها
رتبت البيت واني بالكوة حابسة دموعي ما اريد اصال تنقهر
امي رجعت باليل سبحان الله عملتها المصخمة مبينه بوجها
جانت بس تريدني احجي
كتلها اليوم حرامي فايت على البيت وبايك ذهبي
... ياااا عززززا هاي شوكت وانتي وين جنتي
..اني واصال مموجودات
... بلغتي الشرطة لو لا؟
... لا شيوديني للمراكز لو اريد جنت اخابر اكرم بس بعد راحن وين نلكي الحرامي
... سودة عليه انقهرت هاي وين جانتلج هسه شحتسوين منين تصرفين
... الله موجود واكيد مراح ينساني
... يا حبيبتي انتي لو تسمعين كلامي تحصلين اضعاف هذاك الذهب الراح وتغركين بالفلوس
.. اهووووو هم رجعتي النفس الكلام ترررى مليت اذا بعد حجيتي وياي بهذا الموضوع اهجم البيت على راسج
... اوووي واني ششسحجيت وهيجي كبيتي تريدين تخلين قهرج بيه اكوم من كبالج احسن
.. اي يكوووون افضل لان شوفتج تسد نفسي
مر اسبوع قطرة مسواك مبقة بالبيت
اخذت تراجي وتراجي اصال والگلادة رحنا اني وخالة ام سرمد بعناهن وتسوكت وضميت باقي الفلوس
كمت اقتصد بالاكل والمصروف وحبيبتي اصال شنطيها تاكل متعترض ولاتطلب مني شي فدوة العينها اشكد حساسة هالبنية
خلصت العطلة وبدا الدوام لازم اشتريلها صدرية وقميص وجنطة لان ملابس العام صغرن عليها
اخذتها للسوك اشتريتلها ومظل من الفلوس غير القليل
اريد اشتغل بس ما اعرف ششتغل هسه وضعي تغير كبرت والف عين عليه يوم بعد يوم الحال تضيق بينا
ورجعنا الأيام الجوع والعازة اصال طفلة تشوف صديقاتها يشترن ويودن اشكال وياهن وهي تباوع وتتحسر
رغم هذا ما تجي وتكولي اريد فلان شي
اليوم متمددة وحايرة بهمي دك التلفون
كمت من مكاني رحت للهول رفعت السماعة
اجاني صوتة الخشن رجفت واختنكت اشكد جنت اكره هذا الصوت واريد اخلص منه بس والله من راح يلت عرفت قيمتة وتبهذلت بدونة
كمت ابجي بدون صوت بالكوة كلت الوو
اكرم... شلونج جنة
... بعدني عايشة
. ششبيج وشبي صوتج ليش مخنوك وتعبان
... تعبانة من الدنيا بس انت شذكرك بيه
هو اني شوكت ناسيج حتى اذكرج انتي دوم على بالي ودائماً اسال عنج وعن اخبارج واعرف بسوالف امج الناقصة وياج واليفرحني من اعرف بعدج جنة نقية وطاهره
... مكتلي شعجب اتصلت؟
.. عندج امانة يمي واجة الوكت الأزم انطيجباها
.. أمانة ؟! .........
يتبع
رواية بنات الغجرية الفصل الرابع عشر 14 - بقلم بسمة البياتي
._ بنات الغجرية _
( بقلم بسمة البياتي)
_ البارت الثاني عشر _
... مكتلي شعجب اتصلت؟
.. عندج امانة يمي واجة الوكت الأزم انطيجياها
.. أمانة ؟!
.. اي
.. بستغراب وشنو هي؟
... البيت
... رجفت واختل توازني ارتجيت على الميز شلت التلفون ورحت كعدت بعد مابية حيل ابقة واكفة عزا بعيني بس لا البيت مو باسمي
... الووووو جنة وين صرتي ليش سكتي
... حجيت بصوت مخنوك شبي البيت عفية الله عليك لاتكول البيت مو بأسمي ترى مظل عندي شي غيره
... اهدئي وسمعيني
جنة اني بيوم الجيت اشوفج وعدت امج اذا تعجبيني الكم بيت واني بحياتي متراجعت عن كلامي وجنت ناوي اسجل البيت بأسم امج
... كمت اشهك خليت ايدي على حلكي همست يعني البيت باسم امي
.. لاتبجين وخليني اكمل كلامي بدون متفاطعيني
.. من اجيت شفتج طار عقلي بيج ومن وكفتي كدام امج وكلتي البيت يتسجل باسمج
عرفتج قوية رغم صغر سنج
ومن نظرت عيونج عرفت انتي مجبورة على هالزواجة
وافقت اكتبة باسمج واني اعرف البيت ميتحول بدون وصي لان انتي قاصر
بوقتها كايلج مرجانة راح تكون وصية عليج متاكد راح ترفضين
واني جنت مستعجل بس اريد اخذج
لهذا زورت عقد وجبتة الج
... بجيت بصوووووت قووووي ليششش هيجي سسسويت حرام عليك هسه وين نروح اني واصال
.. كتلج اهدئي البيت الج ومحد يطلعج منه
... ششششلون مو هسستوك كلت العقد مزور
.. اي صح واني كتلج عندج امانة يمي واريد ارجعها الج
ادري هسه صار عمرج 18 واكدر احول البيت الج
... كمت ابجي واضحك فرح على خوف ما اعرف شلون اوصف مشاعري
كتلة وانت شنو اليخليك ترجعة الي جنت تكدر تاخذه وتشمرني بالشارع
.. لا جنة اني مو هيج وخصوصاً وياج انتي بالذات
الفترة العاشرتج بيها عرفت شنو معدنج انتي ذهب صافي رغم صغرج شايلة حمل جبير على جتفج تربين طفلة يتيمة صايرتلها ام وأب جنة المثلج قليلات
العقد يمي كامل بس ينقصة توقيعج راح ادزه ويا واحد من الحماية يجيبة الج
اتمنى اجي اني بنفسي واشوفج بس صعب وضعي حساس وما اريدج تتآذين
... ما اعرف شكولك كل الأكدر اكوله اششكرك من كل گلبي
.. لاتشكريني هذا حقج كوليلي محتاجة شي
... عزت عليه نفسي مكدرت اطلب منه شي كتلة تسلم متقصر
.. الولد جايج بالطريق ديربالج على نفسج ولو انتي سبعة ممحتاجة توصية
... سلم عليه وسده ارتاحيت الحمد لله ياربي حتى أكرم النسونجي طلع اشرف من امي
ظليت كاعدة على نار انتظر الولد شوكت يجي
اندكت الباب طلعت اركض فتحتها جانت سيارة واكفة بالباب
الولد كال انتي جنة؟
... اكرم دائماً من يريد يدز شي يدزه بيد قصي بس هالمرة داز غير واحد
كتلة اي اني وين العقد؟
.. ممكن ادخل
.. لا طبعاً مو ممكن انطيني العقد وروح
طلع العقد وانطاني قلم كال وقعي اهنا
اخذتة وقريت المكتوب خفت لا هاي لعبة واوقع على تنازل والحمدلله جان عقد تحويل ملكية وقعت ورجعتلة القلم اريد اسد الياب كال لحظة اختي
طلع ظرف انطانيا كتلة هذا شنو؟
... سيدي كال اوصلة الج
.. اخذتة منه وما اعرف شنو بداخلة
... اختي اكو اغراض بالسيارة راح انزلهم ولاتخافين اخليهم بالحوش ما ادخل جوا
... عگدت حواجبي كتلة اغراض شنو؟
... بدون ميجاوب راح نزل علاليك وخرت من كدام الباب دخلهم للحوش وراح نزل بعد
الحوش انترس علاليك مسواك
كملهم استاذن وراح
دموعي جرت الله ابد ميكطع جنت حايرة منين اجيب فلوس اسوك للبيت وبالحظة الله فرجها عليه
دخلت المسواك للمطبخ
الكاع انترست ممبقي شي مجايبة مخضر فواكه بقوليات لحم دجاج بيض اجبان حتى قواطي المعجون
احنا بوقت حصار وغلاء الناس تتحسر على هيجي مسواك
فتحت الظرف لكيت بي فلوس وبوكتها جان مبلغ جبير ظليت اردد الحمدلله الحمدلله
رتبت المسواك اصال وياي ومكيفة
اكثرهن ضميتهن من كدام امي ما اريدها على الحاضر تجي تاكل وهذا مو بخل مني بس للضرورة احكام
ثاني يوم الظاهر امي شايفة المسواك بثلاجة سالتني. منين جبتي فلوس وتسوكتي؟
... رفعتلها حاجبي كتلها اكرم دزهن تقصدت اكول اسمه حتى تعرف بعده يتواصل وياي واني مو بوحدي
... ههههههه لازم جان سهران يمج لعد شكو ليل ونهار تبعين شرف براسي يعني الأكرم حلال والغيره حرام
... انجنيت صرخت اني اششششرف منج ليش اني مرجانة وابيع نفسي اذا عدتي هذا الكلام مرة ثانية اطلع روووحج بيدي
... على كيفج عيوني هسه اني شحجيت ياكلمة ردي المكانج اوووي ولا تتحملين شقه
.اني حذرتج اياج اسمعج تحجين وياي بهالطريقة
... بعد ما اصخم سدي حلكج دوختيني
... روحي يم صديقتج اهناك تتونسين
مو مثل الكعدة اهنا ادوخ وتقصر العمر
... اول مرة تحجين شي بي خير اني رايحة عابت هالشكولات
.... كضيت باقي ايام على نفس الموال بين مشاكلي ويا امي وبين اصال ودراستها من غير عركات امي واصال
الفلوس الدزهن اكرم هواي فادني اشهر واني اصرف منهن وعيشتنا ماشية الحمد لله
الفلوس راح تخلص الصبح سمعت صوت ابو العتيك برا طلعت صحتة
وعرضت عليه غراض البيت غرف النوم والقنفات المبردة الكونتر مبقيت غير الغراض الضرورية
وهو للاسف استغل صغري ولان ما اعرف شي كسر سعرهن اخذهن برخص التراب
اني واصال واكفات على طرف وانشوف شلون دياخذوهن عيونة غركانة دموع بس شسوي منين اجيب وادبر العيشة
باليل امي رجعت من دخلت للبيت كبت العيطة
هاي وين الغراض دخلت الغرفتها لكتها ماكو وهدومها بسلة گلبت الدنيا
كتلها بيتي وغراضي احركهن ابيعهن انتي معليج واذا متعجبج العيشة اهنا روحي يم صديقتج شكو باقية يمنا
... بنت القندرة تطرديني لج لاتخليني حتى البيت اخذة منج غصبا عنج
.. هه اعلى مبخيلج اركبي شسوين سوي
اخذت اصال دخلت للغرفة وقفلت الباب
اسمعها تسب مهتميت ثاني يوم اجتي ساهرة كاعدات يتبسبسن ويخزرن بيه
امي من شكلها مبينا ادور عركة
ساهرة...لج جنة شنو العاجبج بهالعيشة دشوفي حالج ولبسج اليشوفج يكول عجوز عمرها سبعين سنه لا عندج لبس براسة خير واكلج بيتنجان وطماطة وهاج شوفي حتى غراض مبقة عندج صفيتوا على الحصيرة
... انتي شعليج اني شاكيتلج؟
... ميحتاج تشكيلي اني داشوف بعيني يا داده سمعي كلامي وكلام امج متخسرين
ولج عندي واحد الج متاكدة راح يعجبج بعده شاب وحلو والاهم من هذا متروس وينكط فلوس اذا كسبتي ووكعتي بحبج حتى زواج يزوجج وتصيرين الكل بالكل
مرجانة... لج بنتي مرة وحدة بحياتج سمعي كلامنا ومراح تخسرين
... كولولي اني على شنو متحملتكم الحد هسه ليش بعدني لهسه مطاردتكم يلا انتي وياها طلعن برا وما اريد اشوف وجه وحده بيكم
كملت كلامي محسيت غير امي هجمت عليه جرتني من شعري وكفختني بقبضة ايدها حسيت نار تطلع من اذني ووجهي لزمت ايدها بطحتها بالكاع للصبر حدود واني خلص صبري
.. تتلازمين وياي بنت الكلب اليوم اطلع اجنازتج من هالبيت
.. كامت ساهرة واجتي تضربني اتكابلن عليه اثنينهن وحدتهن بكبر الهايشة الضربات كامت تجيني من كل مكان
اصال.. كاعدة بالغرفة سمعت صوت عركة طلعت اركض شفت جنونة بالكاع وامي وعبسي يضربنها ركضت صعدت على ظهر عبسي وجريت شعرها
هي وخرت من جنة تريد تنزلني من ظهرها مكدرت كطعت شعرها ولزمت اذاناتها نبتت اصابعي بيهن وهي تعيط
جنة... من عافتني ساهرة كدرت ادفع امي وكعتها بالكاع شفت اصال على ظهر ساهره مجلبة برجلها تريد تسحبها ركضت جريت اصال منها
لزمتها من ايدها مشيت للمطبخ على السريع طلعت سجينة اجني وراي من شافن بيدي سجينة جرن بوش وانهزمن
عطت هسسه اطلعن من البيت ما اريد اشوف وحده بيجن اهنا منا العشر ذقايق اذا مطلعتوا اخابر اكرم
باوعت الأمي كتلها اياج بعد تعتبين باب البيت
ساهرة اخذت امي وطلعت
دخلت للغرفة كعدت ابجي مقهورة على روحي اجت اصال يمي ظلت تبجي وياي
... جنونة وجهج احمر
... مابي شي حبيبتي لاتخافين
.. هاي ماما ضربتج سمعتها اتكول راح اموتج لاتخافين جنونة هسه اني اموتها
... ابتسمت لا عمري محد يموتني ومعليج بامي خلي تولي بعد ما اخليها ترجع اهنا
ثاني يوم العصر دخلت للمطبخ دورت مواد كيكة لكيت عندي كلت اسوي كيكة الاصال خطية تحبها وصارلي هواي ممسويتلها
التهيت بالكيكة عندي راديو شغلت بي قرآن
داخلط بالكيكة الراديو تحول من القرآن للاغاني صحت على اصال بدون ما اندار
لج رعنة رجعي على القرآن لا اجي انتف شعرج
ماكو جواب فاجئ سمعت صرخت اصال شمرت البيدي انداريت ماكو احد
وصوت الصراخ يجي من الغرفة ركضت فتحت الباب لكيت اصال واكفة وظهرها ملزوك بالحايط بيدها شمعة والضوا طافي الغرفة شبه ظلمة شغلت الگلوب
جيت يمها حضنتها اشو هاي ترجف مثل السعفة وتبجي طلعتها من الغرفة انطيتها مي وكعدتها بحضني اريدها بس تسكت حتى افهم شبيها
اصولة كافي بجي فهميني شبيج ومن شنو خايفة ودترجفين
.. حضنت جنة كتلها اكولج بس لاتتعصبين
... لا مراح اتعصب كوليلي شبيج
... هذاك اليوم سمعت عبسي كالت الماما سويتي السحر الأم ثامر
ماما كالت فدشوية اسوي الها
.. اي استعجلي كون جنتها تموت
.... لاتخافين الا اطيح حظها
... صافنة على اصال هاي شجاي تحجي كتلها اي وبعدين
... من راحت عبسي وماما دخلت للغرفة اني باوعتلها من زرف الباب شفتها طفت الضوا وشعلت شمعة وشكت اصبعها طلعت دم وكتبت بالورقة وبعد ما ادري شنو جانت تحرك بالشمعة ورشت بالكاع شي ابيض مثل الملح
.. كمت ارجف اريدها بس تكمل
... البارحة ماما من ضربتج ردت اموتها واسويلها مثل السوتة للمرة
... عززززا بعيني صخام بووووجهي احجي شسويتي
اصال رجعت تبجي وخلت ايدها على وجها باوعت اصبعها مجروح
وخرت ايدها من وجها لج احجييي شسويتي
... جبت شمعة شعلتها وطفيت الضوا وجكيت اصبعي بالابرة طلع دم مسحتة بالورقة ورشيت ملح بالكاع وجان الشمعة تنطفي من كيفها والغرفة صارت ظلمة تخوف
... كمت ارجف سسسسسودة بوجهي لج هاي تاليتج تتعلمين تسوين سحر
من حركت كلبي شكيت دشداشتي
وهي تبجي وتتوسل بيه اني قفدت
الليل اصال مكابلتني بس تريدني احجي وياها واني كلمة منطقت سوالفها صايرة اكبر من عمرها
فرشت ونمت اجت تمددت بصفي رادت احضنها تطيتها ظهري
باليل فزيت البيت اظلم طافية الكهرباء حتى معرفت ساعة بيش تلمست مكان اصال ماكو بي
كعدت باوعت بالغرفة ماكو ثواني ودخلت اجت لفراشها ونامت
تعجبت هاي وين جانت واني ادري بيها جبانة متطلع بالظلمة
كتلها اصال وين جنتي؟
جاوبت وهي مطفية من النعاس يم الأسود
هي كالت اسود لو اني متت نقطة دم مبقة بيه
هزيتها لج اصال منو الاسود
خرب غيرتها هاي رجعت نامت
كمت اتلفت بالغرفة رجعت هزيتها اصال كومي وياي اجيب اللالة
.. اي اي كمت
.. تحجي وترجع تنام اصال فدوة لج كومي وياي
... والله بس شوية انام وبعدين اكوم
... شحيخلص هاليلة يربي سحلتها سحل من الفراش اخذتها جبت اللالة والراديو
شعلتها دورت اذاعة تبث قرآن لكيت نصيت الصوت وخليتة يمنا
وظليت للصبح كاعدة ختمت القران بگلبي من الخوف
اول مصبح الصبح كعدت اصال كتلها منو الاسود الجنتي يمه باليل.
.. يا اسود
... لج هذا الكلتي جنت يمه
...لا والله مرايحة يم اسود
... عرفت مجانت تدري بروحها بدلتلها اخذتها ورحت البيت خالة ام سرمد
حجيتلها انصدمت مثلي ظلت تحجي ويا اصال بهدوء وفهمتها هذا السوتة غلط وحرام
قرت قرآن على راسها وانطتني مي مقري عليه كالت رشي بالبيت وليل ونهار فتحي قرآن
رجعت للبيت المغرب بس اويلي بقيت خايفة تندمت لان طردت امي ولو طيحان حظ اصال كله بسبب سوالفها
مر اسبوع والحمدلله ماكو شي وكدرت انسى امي رجعت للبيت لا اني احجي وياها ولا هي تحجي وياي
من رجعت أبد مطلعت من البيت وضعها متغير مبين عليها قلقة هواي تخابر بالتلفون وتحجي بصوت ناصي
اليوم الظهر دك التلفون ركضت اصال رفعت السماعة
امي طلعت بسرعة من الغرفة اجت بنترة جرت السماعة من ايد اصال
اشرت الأصال تجي تكعد يمي
امي بالبداية جانت تحجي بهدوء ثواني وكبت العيطة الغلط والفشار بفلس
مرجانة.. اني ششششعلية ششكو يورطوني وياهم
ماشششي تعال بسرعة راح اطلعلك على الشارع
... امي طبكت سماعة التلفون وطبت الغرفتها تركض
الفضول كتلني رحت وراها فتحت الباب شفتها دتلم ملابسها
سالتها بستغراب اشدتسوين وشبيج هلكد خايفة
تشيل بالهدوم وتحجي برتباك
.. ولد الكح... يريدون يورطوني وياهم
.. شلون يورطوج احجي شصاير
... كفرت رحت ويا ساهرة خطبت الواحد من الولد اشو سووني شريكة بالجريمة الكوا....
.. الخاطر ربج فهميني يا جريمة
اجت وكفت يمي كالت خابري اكرم خلي يساعدني
جماعتنا كلهم تبروا منا ةمحد يقبل يتوسطلنا كوليلة امي معليها ساهرة هي السوت كولشي
... اول مرة خلي افهم هذاك الوكت اساعدج
... واحد من الولد اليشتغلون يم ساهرة متعرف على بنية وراد يوكعها حتى تنهزم ويا وتجي البيت ساهرة
وهما هو يحبها ويريدها
بس هي الرعنة ممنطيتة مجال ادور زواج لان اهلها فگر
ساهرة كالتلة اني ومرجانة نروح نخطبها الك ومن تزوجها غصب عنها تشتغل ويانة
رحنا اني وياها البيت البنية كاعدين بخرابة بيتهم مابي غير الفراش ساهرة كالت اني امه وهاي خالتة
ومن طمعتهم بالمهر والذهب انطوها بسرعة بدون ميسالون عنه
وخلال اسبوع كملنا كولشي واخذها عقد عليها وجابها البيت ساهرة
وراه مدة ساهرة حجت وياها على المكشوف وكالتلها تنزلين تشتغلين حالج حال البنات
بنت الفگر كامت تبيع شرفيات وادك وتلطم وتهدد اتكول الأهلها كلمة منها وكلمة من ساهرة اضاربن
ساهرة دفعتها اشو هاي راسها اجة بحافة الباب وتمددت لا حس ولا نفس ودمها غرك الغرفة
... همست بخوف فدوة لاتكولين البنية ماتت
.. اي انگبرت ساهرة كدرت تلم السالفة وكالت وكعت وماتت
بس ما ادري يا كح... من اليشتغلن بيت ساهرة رايحة الأهل البنية وحاجيتلهم وهذولة الفگر، كلبوا الدنيا
وهسه خابروني كالوا الشرطة لازمين ساهرة وجاي يدورون عليه لان اهلها منطيهم مواصفاتي
.... لطمت على خدودي الله لايوفقكم الهدرجة واصل الانحطاط والاجرام بيكم تكسرون ركبة بنية بريئة وتالي تموتوها
انتي شششششنو طلعتي مجرمة مو بس ساقطة
فوكاها تريدين اساعدج اني لوبيدي اشرب من دمج
... انتي عاررررر لو مربية جلبة ولا مربيتج
... كعدت بالكاع من الخوف امي لمت ملابسها وانهزمت
خفت ابقة وحدي اخذت كم قطعة ملابس قفلت الباب
طلعنا اني واصال من البيت اكيد هسه الشرطة تجي ويمكن اذا ملكوا امي ياخذوني اني بدالها
معندي غير بيت خالة ام سرمد اروحلهم ولو مستحية منهم
وصلت البيتهم استقبلوني.
خالة حست بيه مو طبيعيه. كالت جنة شبيج هم متعاركة ويا امج؟
كمت ابجي خرطتلها الموضوع من البداية للنهاية
هي وعمو صافنين عليه كالوا ارتاحي وابقي اهنا الحد ميهدء الوضع
كتلهم خايفة اورطكم وياي
ابو سرمد... قابل انتي شمسوية حتى تورطينا اشو حالج من حالنة لاتخافين ماكو شي هذا بيتج واحنا اهلج
... خجلت من كرمهم لو ما اعرف شسوي ما اجازي هذولة الناس
بقيت يمهم رغم الخوف الاني بي بس تونست وياهم حياتهم بسيطة وحلوة
اصال فرحانة تكمز منا وتجي منا هم زين بدت عطلتها ومعدها دوام
عمو ابو سرمد دز ولد من معارفة المنطقتنا يشوف الوضع
من رجع كال الشرطة جايين كاسرين الباب ومدورين على مرجانة
وراه يومين اجة عمو كعد كبالي كال
... جنة ابن جيرانة بالشرطة وكلفتة يسال عن الموضوع صح القضية مو بمركزهم بس من خلال اصدقائة عارف امج لازميها وهسه هي بالسجن.........
يتبع
رواية بنات الغجرية الفصل الخامس عشر 15 - بقلم بسمة البياتي
._ بنات الغجرية _
( بقلم بسمة البياتي)
_ البارت الثالث عشر _
... جنة ابن جيرانة بالشرطة وكلفتة يسال عن الموضوع صح القضية مو بمركزهم بس من خلال اصدقائة عارف امج لازميها وهسه هي بالسجن
... ششنو شوكت لزموها؟
.. البارحة
... تحسرت خلي تاخذ جزاءها شنو ذنب البنية ماتت بسببها
... بنتي لاتعتبرين نفسج بوحدج احنا أهلج ومراح نتخلى عنج وعن اصال
... فدوة العينك عمو والله لو ما انتوا موجودين مدري شجان صار بيه ووين صفى بيه الدهر
اكولك اني واصال خوما اكو شي علينا اخاف يجي اسمنة بسبب سالفة امي بصراحة كولش صرت اتوقع
... لا بنتي انتوا شعليكم هي غلطت وراح تدفع ثمن غلطها
... يعني اكدر ارجع البيتي؟
... ابقوا مونسينا واذا مشالتكم الكاع نشيلكم بعيونة
... سالمات عيونكم ربي يجعل هالبيت عامر بوجودكم ادري بيكم متقصرون بس لازم ارجع
خايفة على البيت خصوصاً البوب مفتوحة لان الشرطة كاسرين القفل اخاف الاغراض تنباك وهو مباقي عندي غير كم غرض
... باجر اخذي ام سرمد وياج وروحي واي وكت تحسين بالخوف او يصير شي اتصلي علينا خلال ساعة تلكينا يمج
... دمعت عيني من حنيتة الله يحفظة شلون انسان
باليل فرشنا دنام
اني واصال وخالة ومنى سوى بالغرفة تمددنا
ام سرمد.. جنونة داشوفج هادئة كولش ومنطيتي اي ردة فعل بموضوع حبس امج احجيلي الصراحة هم ضجتي علمودها
... تصدكين خالة مهتزة شعرة مني من كالي عمو عبالك ديبلغي خبر وحدة ما اعرفها حتى رحمة مبقت بگلبي عليها الي شفتة منها قسى گلبي صار مثل الحجر اتجاها
... حقج حبيبة الي سوتة بيج مو قليل ما الومج اذا كرهتيها
... غمضت عيني وغرگت بهمي حايرة شلون ح دبر عيشتي لأزم الكيلي شغل
ثاني يوم وراه الريوك خالة كالت بدلي الاصال بين ما اكمل طبخ الغدا لان ابو سرمد وسرمد بيضة ميعرفون يطكون
وسامي راح يجي ويانة
كملنا تبديل وخالة كملت الغدا اخذنا الجهال وطلعنا
الطريق كله ايدي على گلبي ابد ممرتاحة ما ادري شنو ضامتلي الأيام الجاية
زصلنا للمنطقة وفتنا للبيت اقفال الباب كولهن مسكورات والبوب بس مردودات
فتت اباوع خوما ناقص شي والحمد لله ماكو شي ناقص ولو هو الحرامي اذا اجة بس يدخل للبيت ينقهر عليه هههههه واحنا منطقتنا شوية راقية وناسها محترمين
نظفنا البيت اني وخالة
هاي اول مرة خالة ام سرمد تجي البيتي قبل متكدر تجي
بسبب امي حتى اليدخل بيتنا ينشبه
دخلت للمطبخ حرت شسوي غدا لكيت عندي طماطة بيتنجان بصل وبتيتة كلت اسوي بيهن مقلوبة
خالة ساعدتني كملناها صح بسيطة بس طلعت طيبة كعدنا نتغدا
ام سرمد... جنونة انتي مو تريدين تشتغلين
.. اي والله بس ما اعرف وين
.. اني عندي اقتراح الج
.. مممم شنو هو؟
... ما شاء الله بيتج حلو وجبير ومنطقتكم راقية وهادئة الناس تحب تسكن بيها
.. اي صح
... اني اكول لو تقسمين البيت واطلعين منه مشتمل وباجارة تعيشين احسن من الشغل والتعب وهاي اذا لكيتي شغلة توالمج
.. صفنت فكرتها عجبتني
كتلها هي فكرة حلوة بس اذا اريد اقسم البيت احتاج فلوس منين اجيب كومة يحتاج للبناء
... راح احجي ويا ابو سرمد يشوفلج احد يداينج وعود انتي من فلوس الاجار سددي الدين والبناء اني اجيب ولد اختي وسرمد يبنولج
... ياريت والله اذا صدوك صار راح تنقذيني
.. عوفيها عليه ان شاء الله ادبرها الج
العصر خالة كالت اني لازم اروح وانتي اي شي يصير انصلي علينا
قبل لايروحون اندكت الباب راح سامي يفتحها
اجة كال جنة اكو رياجيل بالباب يريدوج
متت من الخوف عزززا بس لا اجوي الشرطة يريدون ياخذوني جلبت بيد خالة اخاف اطلع
... لاتخافين سامي يكول مو شرطة لبسهم عادي طلعي سامي وياج واني حواكف قريب من الباب
... طلعت اقدم رجل واسحب الثانية الحد ما وصلت للباب اني ميتة مديت راسي باوعت ثلاث رياجيل شكولهم مو غريبة يمكن جيرانة اي شايفتهم من اطلع اودي اصال للمدرسة
همست نعم تفضلوا
ابو مجيد... مراح اطول عليج السالفة
هنا كلمتين ورد غطاهن انريدج تطلعين من البيت والمنطقة
... نعم شنو اطلع من البيت هذا بيتي
.. واذا بيتج وجودج ممرحب بي بينا احنا اصحاب عوائل وبنات منريد تجينا سمعة بسببكم
... لوميتة ولا سامعة هالحجي اريد اجاوب ما اكدر الغصة والحركة جرحن بلاعيمي
بالزور حبست دموعي همست واني شمسوية وشنو البدر مني حتى هيجي اتكولولي
.... ههههه لا يابوي احنا نتبلى عليكم قابل انتوا شمسوين
اخير مره اكولج طلعي منا بالتي هي احسن لاتخلينا نستخدم وياج غير اسلوب لا عبالج كلشي منعرف ترى من زمان ندري بسوالف امي المكسرة وندري هسه هي بالسجن
... اذا تدرون من زمان ليش محجيتوا هالحجي من هي موجودة هسه اجيتوا تستقون عليه
... باعي ترى اني مو قليل بكتاب واحد للحزب اخليج تلحكين امج
ابو علي.. على كيفك وياها ابو مجيد مو هيجي الحجي كلمة الحق تنكال البنية من يوم السكنت اهنا واحنا مشايفين عليها شي ونعم منها
ابو مجيد... البنت بنت امها واكيد تطلع عليها رحمه الوالديك ابو حسين لا اطلعنا من الموضوع الأساسي اني مجاي اقيم اخلاقها الاريده منها تطلع منا وتجفينا شرها وخيرها
... اني مدنكة وساكتة اااااخ يا دنيا لعبتي بيا لعب خليتي اليسوى والميسوى يبيع ويشتري بيه
اجة رجال رابع وكف يمهم
رجع حجة هذا اليصيحوا ابو مجيد كال كدامج اسبوع اتركين البيت وهذا اخر كلام
... الحقير وجه ينكط سم وخباثة كتلة وين اروح بهالاسبوع شنو هالظلم هذا
ابو هيثم... كلام البنية صح وين تكدر تلكي مؤجر لو شراي باسبوع ابو مجيد على كيفك احنا مشايفين عليها شي ميصير نطعن باعراض الناس احنا هم عدنا بنات
... هاي من صدك تحجي امها اسقط خلق الله كاولية صيطها واصل للعجم والروم وانتوا واكفين ادافعون البنتها
ماشي الخاطركم انطيها مهلة شهر وراها اذا معافت المنطقة لاتلوموني على الراح اسوي
.. راحوا الزلم بس بقة ابو هيثم باوع عليه بقهر كال بنتي نصيحة طلعي منا ابو مجيد اذا خلاج بعقلة ياذيج اني ويا بالحزب واعرف سوالفة ودروبة التعبانة ولاتزعلين مني صدكيني ما بيدي شي
... عادي عمو لاتهتم واشكرك على الكلام الطيب الحجيتة بحقي
... لاتشكريني اني حجيت الحق الله يوفقج ويسهل امرج
.. فتت وسديت الباب انداريت خالة واكفة ودموعها تجري شمرت نفسي بحضنها وطلعت كل قهري بجيت بصوت عالي
شششفتي حظي وين اروح وانطي وجهي لعنة مرجانة راح تبقة اطاردني حتى وهي مموجودة
فبل شوية صار عندي امل اقسم البيت وادبر عيشتي بالحظة انگلب كولشي ضدي حتى بيتي مجبورة اعوفة
.. كافي حبيبتي الله ينتقم منه ان شاء الله حوبتج اسكطة
امشي ماما لمي ملابسج وتعالي وياي ما امن اعوفج اهنا وحدج
.. مسحت دموعي لا عادي خالة لاتهتمين الله موجود روحي البيتج تاخرتي على عمو وسرمد
... لج وين اعوفج لاتعاندين امشي وياي حتى نحجي ويا ابو سرمد بلكي يشوفلج شراي للبيت
... خالة مقبلت تروح اذا مو اني وياها وافقت لميت ملابسي وطلعنا جنت خجلانة من نفسي ادري ثقلت عليهم بس شسوي لا عندي اب ولا اخ ولا كرايب ضايعة بهالدنيا الوحدي
خالة حجت العمو عيونة صعدت الراسة من العصبية كال باجر اروح اطيح حظ هذا ابو مجيد
اني وخالة بقينا نتوسل بي لان مبين هذا واحد مسنود كرصتة والگبر
ظليت يمهم واني كارهة روحي ومستحية مهمها يكونون طيبين وياي بس هم لازم يكون عندي احساس
خطية سرمد مراهق احس متقيد بحركتة حتى عمو نفس الحالة
باليل حجيت ويا عمو يشوفلي شراي كال اكو واحد صارلة فترة يدور بيت باجر اخذة اشوفة البيت
عمو اصدقائة هواي وعنده زبائن يجون يتسوكون منه ومرات يحجولة اذا محتاجين شي
اخذ الشراي وراحوا يشوفون البيت
وهذاك مبين يدور بيت رخيص مدفع بي هواي وعمو رفض كال لاتستعجلين حرامات يروح البيت بهيجي سعر
كاعدة بالغرفة ويا اصال اجتي خالة كالت تعالي ابو سرمد يريد يحجي وياج
لبست حجابي وطلعت
كعدت مقابيلة اول مرة سالني شلونج ومن هااسوالف وشمحتاجة انتي واصال اذا تحتاجون شي طلبي ولاتستحين اعتبريني مثل ابوج لو اخوج الجبير
تشكرت منه وكتلة انتوا ممقصرين
.. جنة كم شراي لكيتلج وكلهم ديكسرون بسعر البيت شنو رايج تاجري
وبفلوس الاجار اجري بيت صغير على كدج انتي واصال وبلكي يبقة من فلوس الاجار جم فلس ادبرين نفسج بيهم
... عجبتني الفكرة تقريباً نفس فكرة خالة من اقترحتها عليه بخصوص هذاك البيت
بدون تردد وافقت
... هذا هو اني راح اعرضة للأجار وان شاء الله ااجرة بمبلغ زين واشوفلج بيت او شقة بمكانة
ام سرمد.. ام وليد عدها مشتمل فارغ قبل فترة كالت تريد تاجرة بلكي بعده باقي
... سالتها منو ام وليد؟
.. ام وليد خالتي اذا رحتي يمها راح اامن عليج
... ما دامها خالتج اكيد وردة مثلج
... ياعمري والله ماكو وردة غيرج
... بس خالة لازم تعرف كولشي عني ما اريد من اسكن وتعرف اني بنت منو وتزعل منج
... حبيبة انتي شعليج بامج انسيها
واذا هذا الشبي يريحج اطمئني راح احجيلها. ترى خالتي فقيرة ونفس حالتج مسؤولة عن ايتام هي تصرف عليهم
زوجها قبل سنوات انطاج عمره
عدها ولد اثنين واربع بنات الجبير مزوج وصاير طلي المرتة عايف امه ولا يسأل عليها
وبناتها اثنين مزوجات واثنين بعدهن طالبات والولد الصغير بعمر اصال خطية جان ابطن امه من مات ابو
. اووف خطية الله يرحمه ويصبرهم
الله فرجها عليه قبل لايخلص الشهر لكينا مؤجر وام وليد قبلت اسكن بالمشتمل
رحنا اني وخالة لمينا الغراض ونقلناهن للبيت الجديد الي هو عبارة عن غرفة وهول ومطبخ وصحيات البيت على كدنا والحمدلله مرتب والمره مبينه حبابة
فبل لايبدي الدوام نقلت اصال للمدرسة الجديدة واكيد خالة وعمو ساعدوني
وراه اشهر عمو كالي امج انحكمت سبع سنوات وساهرة 15 سنة
لان هواي قضاية عليهن وبالواسطات والمحامين وغرامه كدروا يحصلون هذا الحكم..........
يتبع
اعرف البارت قصير بس مكدرت اخلف بوعدي وياكم وما انزل اعذروني ❤️
رواية بنات الغجرية الفصل السادس عشر 16 - بقلم بسمة البياتي
._ بنات الغجرية _
( بقلم بسمة البياتي)
_ البارت الرابع عشر _
... قررت ابدي حياتي من جديد وانسى امي نهائياً
عشت بالبيت الجديد مرتاحة فلوس أجار هذاك البيت نصها انطيها الأجار هذا البيت والباقي ادبر بي عيشتنا والحمدلله
الله مبارك بيهن
اصال مو من النوع المتطلبة تقدر ظرفي وشخلي كدامها تاكلة بدون اعتراض
معندي علاقة ويا اي جار من هالمنطقة حتى بهذيج منطقتي معندي اختلاط بأحد قافلة بابي وكاعدة
المكان الوحيد الأطلعلة هو المدرسة اصال اوديها وارجعها بعدني الهالحظة معندي ثقة اعوفها تروح وتجي وحدها
ام وليد كرايب ام سرمد مرتين شفتها وماكو بينا غير السلام
العصر كاعدة اقري اصال اندكت الباب القردة مالتي كمزت من مكانها ركضت تفتحة
دخلت ام سرمد وخالتها وبنية
ابتسمت كمت سلمت عليهم ولميت الكتب من الكاع
ام سرمد... تعالي كعدي وين رايحة
.. هسه اجي بس أسوي جاي
ام وليد.. تعالي حبيبة عفنا الاستكاين بالكاع من انريد احنا انكولج كومي سوي
... على الأقل خلي اجيبلكم مي رحت جبت مي قدمتلهم وكعدت يم خالة
ام سرمد.. خالة ام وليد اتكول جنة ولا تطلع الحد الان ممتعرفة عليها
.. والله يا خالة ملتهية باصال ودراستها والبيت
ام وليد... يومية اشوفج مشلوع گلبج ماخذتها ومرجعتها لاتخافين عليها خلي تروح وحدها المدرسها هياتها قريبة بالفرع الثاني
... تحسرت موبيدي اخاف عليها ما امن اخليها تروح وحدها
خالة ام سرمد فهمت عليه وعرفت شنو سبب خوفي كالت عوفيها خالة جنونة من نوع الحريصة على اصال تخاف عليها من الهوا
اميرة شبيج صافنة وفاتحة حلكج
هههههه جنونة خلي اعرفج على اميرة بنت خالتي تقريباً نفس عمرج اعتقد اكبر منج بسنة
.. ابتسمتلها هلا بيها تشرفت بمعرفتها
اميرة.. اكولج عيني جنة يصير الزم ايدج واكرصها
... فتحت عيني عززا هاي شبيها
... خرب انوب فتحت عينها لا لا هيج هواي عليه مو راح كره روحي وبعد ما اباوع بالمرآيا
ام وليد... يااا شبيج ولج شجاج
... دشوفيها شلون حلوة عبالك من كوكب ثاني كوليلي امج شمتنسية بيج اكيد حلويات مو مثل حظي متنسية بيه باجة
... هههههههه سوالفها تخبل خجلت ما اعرف شجاوبها
امها كالت صلي على النبي
... عليه صلاة والسلام يراد اكابلها لمدة شهر
ام سرمد... هههههههه وليش بله
.. بلكي الفصعون مدري الفصعونة يطلعون عليها
... اميرة رفعت ايدها وحجت بصوت عالي ياربييييييي هاي دعوة وحدة يومية شابعة طن كتل من رجلها كوووووون عيون ابني مدري بنتي نفس عيونها واذا شوية افتح من هاللون عادي راضية والله لو حتى بس بس الرموش والحواجب قابلة واني الممنونة
ام وليد... متصيرلج جارة ولاتعقلين ازوجتي وراح تصيرين ام وبعدج نفس خبالج
... هههههههه اني ميتة ضحك اصال جانت بالغرفة تلعب ويا منى اجتي وكفت كدام اميرة وتخوصرت هاي حركتها المفضلة
كالت وشبيهن عيوني ليش متدعين يطلعن مثلي
ام سرمد... ههههههه استلمي اجتي الثانية شحيخلصج من لسانها
اميرة... لا لا ياربي شهالعائلة هاي طلعت كلها بقلاوات عليج الله تعالي ابوسج
... اصال راحت باستها وكعدت يمها اميرة كالتلها انتن عليمن طالعات هيجي حلوات
اصال جاوبتها على مرجانة قابل على عبسي
اميرة... منو مرجانة
... مرجانة اذا رنت بحجلها توكع اكبر رجال جوة رجلها
جنة... صكيت على اسناني راح تبدي اصال اتغرد نترت بيها لج اصال
اميرة...فدوة عوفيها سوالفها تجنن
اصال... اني شعليه غير هي عبسي جانت هيجي اتكول هذن طالعات حلوات عليج
وماما اتكولها ادري حلوة اني مرجانة رنت حجلي توكع اكبر رجال جوة رجلي
... بسس كافي روحي يم منى
... اوووي ولاتخلين الواحد يحجي
... خرب غيرتها عافتني وهي ادردم
خجلت من كلامها ولا اريد ينجاب طاري ام كدام اي بشر لان امي مو شي فخر وينذكر
ام سرمد... شبيج جنونة عوفبها بعدها طفلة وشتسمع اكيد يظل بالها
... همست واني خجلانة وافرك بيدي ما اريد تتعلم منها شي
ام وليد... وليش مدنجة وتحجين يشهد الله اني جيت بس اتعرف عليج
ومن طريقة كلامج عرفت بيج خجلانة مني
يابنتي على شنو تخجلين قابل انتي شمسوية انسي الفات وخلي وراه ظهرج
... حجيت بصوت مخنوك للاسف خالة الفات مينسي وراح يظل مثل الكابوس يطاردني والله خايفة اهنا الجيران يعرفون اني بنت منو وهم يطردوني ويسودون عيشتي
ام سرمد.. ومنين يعرفون امج راحت وخلصتي منها انسيها وعيشي حياتج لاتظلين تفكرين بيها
.. شنسى مصيرها تطلع وترجع ادمر حياتي وموبعيد تلكيلها واسطة وحتى السبع سنوات متكملهن
.. لو عدها واسطة مجان انحكمت سبع سنوات ومن تطلع بعد وين تلكاج ابو سرمد وصى المؤجر اي احد يروح الهذاك البيت ويسأل عليج يكولة ما اعرفها وهذا البيت اشتريتة منها
... اي احسن
ام وليد...بنتي لاتخلين كلام الناس ياثر بيج ويحسسج بالنقص هما الناس بيها وبلايها يحجون حتى لو الكدامهم شيخ هم لازم يطلعون بي عيوب
كومي ام لسان سويلنة جاي اريد احجي الجنة سالفة ومبين الكعدة راح اطول
... لا خطية متشوفيها حامل وين بيها حيل اتكوم اني اروح اسوي
... لا خليها هي تكوم بلكي تتحرك ويصير عدها ولادة راح يخلص شهرها وماكو شي
اميرة... من طريقة كلام امي مبين اليوم وراية رزالة غسل ولبس هههههه
بس اني شندل بالمطبخ راح اخذ وياي العسل اصال هم تونسني وهم ادليني
ام سرمد...ههههههه مبين انتي واصال راح تتوالمن نفس العقل ولو هي طفلة معذورة بس انتي شنو عذرج
.. اوووي على كولة اصال ولاتخلون الواحد يحجي شي
... جنة سمعيني راح احجيلج سالفتي اني اتزوجت ابو وليد واني صغيرة
مراح احجيلج على الشفتة ويا عيالي لان بس هاي يرادلها كعدة ثانية
المهم بداية زواجي حملت وصار عندي وليد ابني الجبير وأول فرحتي
وبعد وليد اجتي سمارا بنتي الثانية
من صار عندي جهال اثنين مات عمي وتقسم الورث والحمد لله طلعلنا خوش مبلغ ابو وليد فتح بي مشروع واجرنا بيت على كدنا
مشت الأيام صار عندي بنبة ثانية الي هي اميرة
شغل ابو وليد تحسن وكدرنا نجمع واخذنا هالبيت
اميرة... ششفتي يوم معناها اني كصتي خير
.. ليش متنلصمين وتخليني اكمل
... انلصمت كملي ست الحبايب
... هالرعنة نستني وين وصلت بالحجي
اي اذكرت من اشرينة هالبيت وليد جان المدلل بين خواتة لان هو الجبير والولد الوحيد شيطلب منبخل عليه وابو دائماً يكول هذا سندي وعكازتي من اكبر وحزام ظهر خواتة
حملت مرة رابعة وتمنيت هالمرة يجيني اخ الوليد
بس الله مكتب هالشي وبدال البنية الله رزقنا بثنين بنات تؤام دعاء وثناء
اكتفينا بوليد والبنات وقررنا بعد منخلف
وليد من كثر الدلال وضعة اتغير صار فاشل بدراستة ودوم ياذي خواتة اخير شي ترك المدرسة
ابو قررت ياخذة ويا يعلمة على الشغل
نسيت اكولج ابو وليد عنده محل عطارة بالشورجة وهو يفهم بالاعشاب والخلطات ويسوي وصفات الناس يجون من كل مكان يشترون منه
كام ياخذ وليد ويا يومية صح بالبداية تعبنا ميقبل يروح بس من كطعنا عنه المصروف جر عدل ومن كيفة صار يطلع ويا ابو
الشغل اطور ووسعوا المحل والحمدلله الله فتحها علينا
بهالفترة سمارا اجت قسمتها وانطيناها
ولان الولد محترم والناس طيبين مكدرنا نرفض رغم حياخذوها الغير محافظة
من ازوجت سمارا ابو وليد كال اريد ازوح وليد
اني فرحت هذا وحيدي يم المنى اشوفة عريس
منى.. لا عيب خالة اني بعدني صغيرة ما ازوج هسه
ام وليد... هههههههههه انعل ابليسج والله ضحكتيني
ام سرمد...ولج شكو مخلية اذانج يمنا
منى.. غير كاعدين نلعب وانتوا تحجون بصوت عالي سمعتكم
جنة... هههههه خالة كملي اريد اعرف شصار
... اي كلت الوليد راح ادورلك ابنية اخطبها الك كال لا ميحتاج ادورين اني اريد رانيا بنت عمتي
مكدرت اعترض على اختياره رغم اني ماحابة اناسبهم لان الشفتة من أهل ابو وليد وخواتة بالذات مو قليل سكتت ما اريد اكسر خاطره
بعدين عرفت وليد عنده علاقة بيها لان عمتة الله يسلمها دوم تاخذ المحروسة وتروحلهم للمحل تتسوك منهم
تم الزواج
بالبداية البنية زينة والوضع طبيعي
ورا شهرين وليد ومرتة انكلبوا طناطل علينا ليل ونهار مشاكل مرتة شغل متشتغل واذا واحد يصخرها على شي تقوم القيامة
كامت تحرض وليد على خواتة حتى ضرب صار يضربهن
ابو مل من مشاكلهم اخذ جزء من البيت وبنى هذا المشتمل اله حتى نرتاح وهما هم يرتاحون
اني صحتي تعبت ووضعي موطبيعي من راجعت طلعت حامل جانت صدمة بالنسبة الي وين انطي وجهي وفشلة من جهالي والناس شراح اكوللهم اتسابق ويا بنتي وابني واخلف وياهم
ابو وليد من عرف طار، من الفرح كل رجال بهيجي موقف يفرح يحس نفسه بعده شاب ههههه
البنات من عرفن عادي عدهن الا وليد گلب البيت حار شيسوي غلط وصياح ذرة احترام معنده
ابو تعارك ويا وطردة ومن يومها وكع بالفراش صحتة ادهورت واني رغم الحمل والتعب اركض بي على الاطباء وخطية ابو سرمد واخوني وياي متركوني
وليد اجة اعتذر من ابو ومشت الامور عادي
المحل هو استلمة ومن يجي يجيب اليومية ينطينا جم دينار حتى ميكفن علاج ابو
سآلتة معقولة طالع من الصبح لليل هلكد الوارد قبل ابوك يطلع خير من الله
يجاوب بصلافة لعد قابل امجذب شغل ماكو والسوك واكف
واستمر يومية على نفس الموال
صحة ابو وليد ادهورت اكثر وبيوم كاعدة يمه كال اني ايامي بهالدنيا معدودات واريد اامن عليج وعلى البنات عبالي وليد ينشد بي الظهر بس للاسف الغريب احسن منه
كتلة لاتحجي هيج الله يطول عمرك وتكوم بسلامة
هزلي راسة بياس ثاني يوم كعد بالكوة بدل وكالي تعالي وياي اخذني حول طابو البيت بأسمي
بيومها شبعت بجي خايفة عليه وضعة مو طبيعي ايام وانطاكم عمره وعاف برگبتي ثلاث بنات والبطني حتى ملحك يشوفة
ولدت وهالمرة صار عندي ولد ثاني سميتة على أسم ابو كامل
وليد فلس مكام ينطينة وكلما اكولة وين الوارد يكولي ماكو ممشتغل
اخير شي هددتة اذا متنطينا اطلعك من المحل واخلي ابن اخوي يلزمة بدالك
ضحك ويكولي متكدرين المحل ملكي
ابني العود مستغل مرض ابو وبحجة يستلم بضاعة مخلي ابو يوقع على تنازل
ومكفى المحل كعد رجل على رجل يكولي ابوية مات اريد حصتي من البيت
دكيت ولطمت حتى الثوب العليه شكيتة كتلة مكفاك اكلت حق اخواتك واخوك بمحل ابوهم هسه جاي تريد تبيع البيت وتهججنة
يكول المحل حقي وتعبي والبيت من نبيعة انطيكم حصصكم واخذولكم بيت اصغر منه على كدكم
ضحكت وكتلة الحمدلله مراح متكدر تاخذة منه لان البيت باسمي عود من اني اموت تعال دور ورث
الي ربيتة وكبرتة وسويتة رجال وكف كدامي يكولي انتي جذابة البيت باسم ابوي
ولكم ابني تهجم عليه يريد يضربني وخواتة وكفن بوجه وهو خلة قهره بيهن ضربهن ضرب رادن يموتن جوا ايده اجوي الجيران خلصوهن منه
ومن يومها تبريت منه حتى من المشتمل ردت اطلعة وهو عناد بيه مقبل يطلع
يجيب وينكل بهالعلاليك البيتة واحنا حسرة علينا الفلس لميت ذهبي وذهب البنات اريد ابيعة
يم الصايغ شفت وحدة اعرفها عدها صالون بيتها نفس المنطقة بس على الشارع
ظلينا انسوالف كالت شعندج جاية كتلها اريد ابيع هذن محتاجة فلوس كالت ليش ماتجين تشتغلين وياي واذا عندج جم فلس نتشارك بالصالون وافقت لان هاي فرصة بالنسبة الي
اشتغلت وياها وهي بدت تعلمني والحمدلله كدرت اتعلم بسرعة
وداعتج جنة الناس معافوني بحالي اشكال والوان الكلام طلعوا عليه
على ان هاي مصدكت زوجها مات وكامت تطلع وطب براحتها وفتحت صالون حتى تمشي بكيفها وتسوي اليعجبها وكلام مينلبس عليه ثوب ابني العار شعرة منهزت منه
. طنشت كلام الناس واستمريت اشتغل المهم عندي بناتي وابني ميعتازون الأحد واكدر اعيشهم واصرف عليهم
شوية شوية رجعت ثقة الناس بيه وشكو واحد حجة وطعني بشرفي بلع لسانة وسكت كدرت بمرور الوقت اشتري الصالون والحمدلله مستورة
وابني اخذ بيت ملك وطلع منا وبعدني الهاليوم ما احجي ويا وغاضبة عليه
... خالة تحجي وتبجي الله يساعدها حالها مو احسن من حالي اليشوف مصايب الناس تهون عليه مصيبتة
كلامها انطاني طاقة ايجابية وعزز ثقتي بنفسي اني هم لازم ما اخلي كلام الناس ياثر عليه
حبيت خالة ام وليد طيبة وحنينة مثل خالة ام سرمد سبحان الله نفس الحنية والاطباع
اميرة... جنة بعد متخلصين مني يومية راح اجيج الحد ما تملين مني وطرديني
... هههههخذ هلا بيج عمري البيت بيتكم بس انتي مو مزوجة لازم بيت زوجج قريب منا
.. لا مو قريب محسوبتج زعلانة ومطرودة
ام سرمد.. ههههههه مو جديدة عليج هو انتي بين كل اسبوع واسبوع تجين زعلانة
ششسسوي غير هذا حظي
... تونست الكعدة وياهن ولاتنمل قبل المغرب ترخصن وراحن
باليل فرشت دانام طفيت الضوا وجيت تمددت اصال بصفي كالت.
أكولج جنونة مرجانة بعد ماتجي اهنا لو هم تجي
.. لا متجي شنو لازم اشتاقيتي العركاتج وياها واشو صارت مرجانة مو ماما مرجانة
... لا ما اريدها تجي ما احبها وبعد ما اكوللها ماما لان هي مو ماما
اهااا اي زين ديلا نامي
.. جنونة
.. هااا
. احنا ليش انام باليل ونكعد بالنهار
... لان الليل الناس ترتاح بي وتنام والنهار يكعدون حتى يشتغلون ويدرسون كافي عاد نامي باجر وراج دوام
... سكتت شوية وكتلها جنونة جنونة
... يا طلابة جنونة لج شكوو
ليش السمج مايختنك بالمي واحنا من نخلي راسنا بالمي نختنك
... شنو هالأسئلة العجيبة
لان البشر عدهم رئة ويتفسون الهواء السمج عنده خياشيم الله خلقة للمي
انامييييي راح ابتلي بيج
... سكتت شوية واذكرت كتلها جنونة اخير سؤال
جنوووووونه
... كون ماتت جنونة بس كوليلي هذا لسانج شوكت يسكت ليل ونهار يشتغل
.. هو الله خلقة للحجي خوما تريديني اسكتة
... ههههههه العوبة سكتتني
... اكولج بعالم الحيوان عدهم غابات احنا ليش ماعدنا
... للاسف بالعراق ماكو غابة لو اكو جان ذبيتج بيها وخليتج تعيشسن ويا الحيوانات هواي احسن
... اي واخذج وياي ونعيش سوا
... ينت الاوادم ولا اكدرلها
... جنونة
... هالمرة شراح تسأليني
... احبج
... ابتسمت وحضنتها واني امووت عليج بس الله عليج كافي خلي انام
الصبح العوبة بالكوة كعدت تسهر باليل وبطلاع الروح تكعد الصبح بدلتلها وريكتها اخذتها وطلعت
من دافتح باب الحوش عيني اجت بعين ولد واكف كدام البيت المقابيلنا بسرعة نزلت راسي سديت الباب ومشيت بسرعة
وصلت اصال ورجعت من وصلت قريب من البيت الولد بعده واكف يم بابهم وعينة عليه يبو كمت امشي واتعثر
احس الطريق صار شطولة الحد ما وصلت تبهذلت بسرعة فتت جوا وسديت الباب
اني مو مثل غيري صرت اخاف من نظرة الرياجيل الي احسهم كلهم نفس الصنف ويريدون ينهشون بيه تعقدة بسبب امي ومعارفها
الظهر رجعت اصال من المدرسة تغدينا ونمنا
فزيت صوت الباب يندك بعيني النوم لبست شالي وطلعت فتحتة جانت اميرة واختها
اميرة... هاي شنو بس لا كعدناكم من النوم
... ههههه عادي فوتي
صار العصر بيها وبلايها لازم اكعد
اميرة... اصولة وين؟
.. نايمة هسه تشبع نوم وباليل اتسهرني واتجيبلي اسئلة غريبة وعجيبة واني الازم اجاوبها
.. سوالفها عسل لوبيدي اكابلها واكعد
... شما اشوف انتي وباها جدر ولكة قبغة ههه
سوينا عصرية جاي وكليت بتيتة كعدنا ناكل ونسوالف
اجت اصال تفرك بعينها
اصال.. خوما خلصتوا البتيتة ومبقيتولي
دعاء. هستونة مدينا ايدنا وانتي جيتي يمكن شميتي الريحة وانتي نايمة
جنة...امشي غسلي وتعالي اكلي
سوالف اميرة تونس كل شوية تتناكر هي واصال
اميرة... اصال تاليتي اطلك واجي اكعد يمج وانظل ليل ونهار نتكافش
جنة.. لا اسم الله بيش طالبة روحج ان شاء الله ترجعين البيتج وزوجج راح يصير عدكم طفل يا طلاك
... ههههههه هذا يا ببت هي غرفة ابيت عيالي وحسرة عليه اسد بابها عمتي اذا شافت الباب مسدود تجي تدفرة اتكولي شعندج قافلتة
ومن يجي التحفة واشكيلة يلزمني ويكتلني
... عززا شنو هذولة
.... لج مشوفيني الويل وياريت بس على هاي زوجي سكير ومخلص فلوسة على الشرب والنسوان
ومن اكولة ليش تخوني يكولي اني كيفي واذا ميعجبج الباب يوسع جمل مبقة عليه غير بنت ام الصالونات تحاسبني
... وششششبيها ام الصالون
... شمدريني
... يمعودة لاتضوجين بنت ام الصالون ولا بنت الغجرية
دعاء... شو كلبتوها درامة اجيبلكم جفية حتى تبجون
اميرة... ولايهمج هسه انكوم نركص حتى تتونسين
اصال الله اي عفيه كومي واتي اركص وياج
جنة...خووو انتي مصدكتيييي سمعتي كلمة ركص كيفتي
اميرة... ششششبيج وياها عوفيها اصولة معليج بجنة كومي ركصي
... لا ما اريد انوب تزعل ومتقبل تحجي وياي
... لا شحدها تزعل جنة الله عليج خليها اتكوم
.. كتلها كومي جنت بوحدة صرت بثنين مدري منين طلعتلي هالاميرة
دعاء.. ههههههه هذا حظج
... اميرة شغلت المسجل اصال نثرت كفشتها وكامت تهز
وهذن فاتحات حلكهن وصافنات عليها
كتلهن سدو حلوكم لاتدخل بيهن ذبانة
... امدايه واني مكيفة عبالي اعرف اركص
... اصال جرت اميرة وياها واثنينهن يتمركصن اميرة من تهز بطنها تنهز وياها
اميرة.. اصال عليميني وشتريدين انطيج
... خوش شسوي سوي مثلي
.... منظرهن تحفة
اصال كل شوية تعيط باميرة اتكولها لا موهيج سوي هيج اوووي انتي ولاتتعلمين
كتلها ولح اميره كعدي مو راح اجيبين
.... ما اريد اكعد لج كومي ويانة تتونسين ههههههه
... لا ما اريد ابقة اتفرج احسن دعاء كامت وياهن ونصبنها حفلة
المغرب كامل اجة عليهن يلا راحن
من طلعن كلت الاصال اي مرجانة الصغيرة اليوم تونستي
... اني اصال مو مرجانة انتي كتيلي اركصي لاتشمريها براسي
... اي صح صوجي اني وانتي الفقيرة ماكو منج
بالوحدة باليل اندكت الباب خفت اكوم افتحها من سمعت صوت خالة ام وليد يلا فتحت الباب
كالت خلي دعاء وكامل يمج اني راح اخذ اميرة للمستشفى بطنها توجع راح اتجيب
بقوا يمي دعاء وكامل
دعاء . هههههههههه من الركص اجتها الطلوگة
... هههههههه ولاتكعد راحة ان شاء الله تكوم بسلامة
للصبح يلا رجعوا من المستشفى
واميرة صاير عدها ولد
مكدرت اروح الصبح اطمئن عليها لان اصال وصتني كالت ديربالج تروحين واني مو وياج من ارجع انروح حتى اشوف النونو
من وصلت اصال ورجعت الولد نفسه هم واكف وعينه عليه انزعجت منه هذا شبي وليش هلكد مركز بيه......
مساء العافية حبايبي
هواي بنات يسالوني على تاريخ القصة وأكو يطلبون اذكر التواريخ
شوفوا حبايبي اني بدايتها بديتها من حياة ام مرجانة لهذا اكيد ما اعرف السنة
اما زواج مرجانة ورافت سنة 1977
مواليد جنة سنة 81
اصال 92
زواج جنة من اكرم 1996
دخول مرجانة للسجن 1999
هسة عندي ملاحظة صغيرة
انتوا تدرون بيه اني من يوم البديت اكتب الحد هاليوم ممنعتكم من الانتقاد
اشكد تنتقدون وتحجون مفديوم ادخلت وحجيت لان اعتبر هالشي من حقكم واني من اكتب قصة اول شي اطلية من ابطالها ميعترضون على الانتقاد
بس مال تجي وحدة تدخل على تعليق غيرها وتغلط وتجاوز لا هاي ما اقبلها اذا اني راضية انتوا ليش تجاوزون
شوفوا حبايبي كلكم احبكم وعلى راسي تدخلون التعليقات غيركم وتتناقشون باسلوب حلو عادي هذا من حقكم
بس من يوصل الموضوع للتجاوز لا هذا الشي مرفوض
اني عندي متابعات وياي من بداية قصصي وهذن الهن مكانة خاصة بقلبي ما ارضى احد يجاوز عليهن ويمسهن بحجاية
وحتى البقية كلكم احبكم ومعتبرتكم صديقات وخوات مو بس متابعات لهذا اتمنى متصير مشاكل بينكم وكل شخص مسؤول عن تعليقة
لاتزعلون مني ارجع واكول احبكم كلكم تحياتي بسمة...
رواية بنات الغجرية الفصل السابع عشر 17 - بقلم بسمة البياتي
._ بنات الغجرية _
( بقلم بسمة البياتي)
_ البارت الخامس عشر _
صار العصر اخذت اصال ورحت البيت خالة ام وليد
اصال خبصتني لو بيدها اول مرجعت من المدرسة انروحلهم
دعاء فتحتلنا الباب سلمنا عليها
.اكولج دعاء خوما عدكم خطار
.. اي عشيرة امي وعشيرة ابوي الله يرحمة كلهم موجودين
. عااا لعد اني رايحة عود اجيكم غير وقت
.. ههههههه شوف الفطيرة صدكت الله وكيلج محد اجانة
البيت فارغ مابي غير دوخت ابن اميرة
... امداج صايرة دهرية مثل اختج
.. خيه اليعاشرها يبقة عقل براسه اكيد يتخبل ويا خبالها
اصال... اااف شلون بله نبقة واكفين اهنا
دعاء.. لا العفو ست اصال تفضلي دخلي واعذرينا لان اخرناج وخليناج تنشتلين بالحوش
... اووووي افوت وحدي احسن بالعة مسجل ولاتسكوت
.. اكولج جنونة هاي رزلتني لو اني متوهمة
...ههههههه اي
دخلنا جوا اميرة متمددة والنونو بصفها خالة وثناء يمها
اميرة.. بعد وكت جان اجتي من يطلع اسبوعة
هههههه حتى وانتي تعبانة لازم تغردين هو انتي الفجر جبتي يعني مصارلج يوم
.. اي لو حتى كلت جنة اكيد من الصبح تجيني
... شسوي هالعوبة مخلتني كالت ديربالج تروحين بدوني
بوستها وتحمدتلها بسلامة شلت ابنها خليتة بحضني كولش ناعم بالكوة ينشال
اصال.. جنونة انطينيا أشوفة
... وين تكدرين تشيلي اني بالكوة لزمتة شوفي وهو بحضني
.. ماااه انطينيا
ام وليد.. جنة خلي بحضنها خطية تريد تشوفه
...خليتها تتربع وحطيتة بحضنها
اصال صافنة علية
اميرة... الله عليكم مو يخبل
... فدوة العينة اكيد حلو على امه يتربى بعزكم ان شاء الله
اصال.. هذا يشبة جسومي ابو مخطة
جنة.. ييييع عززززا اصال انلصمي لج
اميرة... منو هذا جسومي لج عوبة اني ابني ابو مخطة
... جسومي بيتهم يم مدرستنا يوكف ابابهم ومخطتة نازلة الحلكة
.. كافييييي لعبتيها الروحي
اجة كامل دنج يباوع عليه كال اي صدوك يشبه جسومي
اميرة دمعتها بطارف عينها
... جيبوا ابني طايحين الحظ عيني عينك كاعدين تحجون عليه اصلاً احلى منكم
اصال... منيلة حلو شوفي خشمة اكبر من اذنة
.. يوووووم سكتيهم
ام وليد... ههههههههههه ام عقلين ديشاقون وياج
اصال... كامل شوفة مو عبالك خنفسانة صغيرة
كامل... لج لا مو خنفسانة يشبة العنكبوت ابو شعر المنتوف ويا نمول
جنة.. ههههههه خليت ايدي على حلكهم اريدهم يسكتون اميرة فرفحت وهما يكركرون عليها
خالة والبنات خربانات ضحك
ولج طلعتي بس لسان و هذولة الشياطين نصبوا عليج وانتي مصدكتهم
اميرة... والنبي راح ابجي كومي رعنة بعد ولا احجي وياج
اصال.. ترى بعد ما اعلمج تركصين
.. ما اريد لا خلفت عليج
دعاء.. هههههه يوم نسيت اكولج لو ما اصال جان اميرة بعدها لهسه مجايبة البارحة شادات الوصلة ويركصن
... ههههه وحق الحق هالبنية ولاتعقل انوب تزعل من يداهروها وهي عقلها من عقلهم
.. ثناء كاعدة على طرف ولاتحجي ابتسمتلها
ردتلي الأبتسامة ودنجت
كتلها ليش عازلة نفسج وكاعدة بعيد
دعاء.. هذا طبعها خجولة وكلامها قليل ولا عبالك تؤامي
... هههههه فدوة مبينا فقيرة بس انتي وياها ولاتشابهن
... اي احنا تؤام غير متماثل
.. كامت خالة تصلي تقربت من اميرة سالتها شبيج بس لا انغثيتي من اصال ترى تشاقة هي صايرة هواي دهرية
... لا والله ابد اصلا اتونس على سوالفها بس ضايجة من وضعي
... زوجج عرف جبتي؟
... اي الصبح دزينالهم خبر
لج بعده لهسه مكلف نفسه يجي يطمئن عليه ويشوف ابنة لا هو بين ولا واحد من اهلة
.. يجوز مشغول لاتحكمين بدون متسمعين تبريرة
.. متاكدة ممشغول
ادري ما اجة يخاف لا يصرف شي لو امي تاخذ منه تكاليف الولادة
فهميني اني جم دوب ابقة هيج عيشتي كلها على امي المسكينة فلس ميصرف عليه
وهسه زدت نفر ثاني امي شنو ذنبها تتحملني وتتحمل ابني
دخلت خالة وحجت بصوت عالي الظاهر سمعت كلام اميرة
كالت وربج اذا بعد سمعتج هيجي تحجين من صدك ازعل احد كايلج اني متعاجزة منج حتى لو تزوجتي تبقين مسؤولة مني والاخر يوم بعمري ما اقصر ويا وحدة بيجن
اميرة كامت تبجي خالة اجت حضنتها المنظر هزني وفتح جروح گلبي اللهم لاحسد بس المثلي تتحسر على هيجي كلام وعلى حضن دافي يلمها ويطيب خاطرها
عيوني دمعت درت راسي لكيت اصال تباوع عليه كامت من مكانها اجت كعدت بحضني وحاوطتني بثنين ايدها ضميتها الصدري
فدوة العينها دوم تحس بيه وتعرف شريد وشحتاج اصال صغيرة بعمرها جبيرة بافعالها
ظلينا كاعدين ردنا نرجع خالة حلفت نبقة على العشى
تعشينا وياهم كعدتهم تجنن كلها حب وحنان متختلف عن كعدة بيت خالة ام سرمد
سوالف وشقه واصال لكتها لعبة كل شوية تشمر سالفة الاميرة تخليها تكمز
ثناء كسرت حاجز الخجل وبدت تسوالف ويانة
لليل يلا رجعنا للبيت
ايامي مشت عادية علاقتي صارت قوية ويا بيت خالة ام وليد دعاء وثناء دوم يمي من تروح خالة للصالون يجون
اميرة اجة زوجها رجعها
اصال من دوامها صباحي واطلع اوصلها اشوف الولد نفسه واكف بالباب وعينة عليه
بالبداية جنت اخاف وبنفس الوقت اتعصب من نظراتة لكن بعدين طنشتة اوي شسويلة
خلصت السنة الدراسية واجت العطلة اليوم كاعدة بيت خالة ام وليد
خالة ام سرمد وسمارا بنت خالة ام وليد هم موجودة
شخصيتها تجنن نفس اطباع امها خطية متكدر تجي الاهلها هواي بس بالعطلة لان اطفالها مدارس
ام وليد.. جنونة احسن ما كاعدة بالبيت ليش متجين تشتغلين وياي بالصالون البنية التشتغل يمي بعد شهر عرسها وراح تترك الشغل
ما الكي احسن منج تلزمين الصالون بمكانها
.... يااا غير اخرب الأول والتالي اني شمعرفني بشغل الصالونات
ام وليد... اني وسارة نعلمج
ام وليد... جنة هاي خوش فرصة هذا الشغل يوالمج وهم تحصلين جم فلس ويا فلوس الأجار
... والله خايفة ما ادبرها وشغلة ثانية مخوفتني
... شنو هي؟
.. كلام الناس تدرون بية اني عايشة بوحدي اذا اطب واطلع اخاف يحجون عليه ويسوولي مشاكل
ام وليد.. وشعليج بيهم اني جارتهم صارلي سنين ومخلصت من حجيهم تالي غصب عنهم رجعوا يحترموني انتي تروحين وتجين وياي شحده اليحجي عليج
ام سرمد.. هسه لاتنطين جواب فكري واذا مقتنعتي براحتج
.. حجيت بداخلي اني محتاجة للشغل وما الكي احسن من هالفرصة كلت الخالة موافقة بس اخاف ما ادبرها
ام وليد.. هاي الفترة راح اخذج وياي حتى تباعين علينا وتتعلمين وبعدها من تضبطين الصنعة اخليج تلزمين الشغل
.. ان شاء الله
اميرة... واني من اليوم راح ابدي اعلمج
... تعرفين ؟
... وليش ما اعرف دوم جنت اروح وباها لاتستهينين بقدراتي راح اصدمج
... ما دام تصدميني الله يستر
ثاني يوم خالة اخذتني وياها وعرفتني على سارة
وبدن يعلمني ما شاء الله صالونهم مرتب وعليه رجل هواي نسوان يحبون شغل خالة
اني الشي من اباوع عليه مرة مرتين بسرعة اتعلمة
اصال اخذتها وياي اووويلي جانت مكيفة اكثر مني وتوكف تتفرج اتكولي اني هم اريد اتعلم
اكثر من شهر وضبطت الحفافة والمكياج والصبغ
بس قص الشعر وتسريحات لا بعدني داحاول اتعلم
خالة الظهر ترجع للبيت تتغدا اني ابقة وأكل اجيب وياي
خلصت العطلة بدا دوام اصال وقت رجعتها من المدرسة اروح عليها اجيبها للصالون
ملابسها واكلها كله اجيبة وياي حتى نوم اخليها تنام ومن تكعد اذب ميانة ويا البنات اليجن عدنا
ابد مهملت بدراسة اصال كلفت دعاء وثناء يدرسوها المواد الصعبة لان اني مو كولهن ادبرهن وهنا خطية ممقصرات رغم عدهن دراسة
اميرة المسكينة بين كل فترة تجي زعلانة تبقة شهر شهرين وترجع
دنتعشا اني وأصال سمعنا صوت صراخ قريب علينا
اصال طفرت من مكانها طلعت تركض
عطت لج ررررعنة وين طالعة تعالي
اصال.. صوت عركة اروح اتفرج
... اوصلي للباب وشوفي شلون اكسر رجلج
زاد الصوت لبست حجابي وكفت يم الباب عزززا الصوت من بيت خالة ام وليد
ظليت الوب لابية اطلع ولابيه ابقة
أصال.. حتبقين صافنة فتحيلي الباب اريد اطلع
... وين مولية مدتسمعين الصياح ابقي بمكانج وسدي حلكج
... ،شهالعيشة بس باقي تجيبين حبل وتربطيني بي
بيت خالة ديتعاركون اروح أساعدهم
.. بشنو تساعديهم لج؟
... اتعارك وياهم واضربلي جم واحد
... اني بيا حال وهاي بيا حال بالي باقي يمهم وهي تريد تتعارك بس اريد اعرف شصاير اهناك
... هو اليريد يعرف شصار يحبس نفسه بالبيت غير يطلع يسال ويشوف شصاير شنو تريدين الاخبار اطير وتجي يمج
.. تعالي اهنا شو صايرة متحترمين عبالك اني بكدج
.. اي اجة دوري تعاركي وياي وخليني اعيط مثل بيت خالة بلكي الناس تلتم وينفتح الباب واطلع اشوف شكو
.. اويلي ربي هالبنية لسانها يكبر وياها وصاير اطول منها
... الناس تتعارك وانتي باقية تحجين علبه
هسه ارتاحيتي سكتوا خلصت العركة واني ماشفت شي
... اشك هدومي من وراج كافييييييي كرميني بسكوتج الخاطر ربج
اندكت الباب اصال مثل الطلقة طلعت تركض واني الطم وراها اريدها توكف
صخام الصخمنييي اوكفي اني ميتة خوف وهاي ممهتمة
فتحت الباب دخلت ثناء بيدها ليث ابن اميرة وكامل وياها
ركضت عليها جانت تشهك وتبجي
اريدها بس تسكت دافهم منها
دخلتها جوا اخذت منها ليث
كعدي واحجيلي شبيج
كامل... رعد ضرب اميرة على راسها وطلع دم هسه امي ودعاء اخذوها بسيارة جيرانة للمستشفى
...ششششنو عززززا ولج ثناء احجي شششبيها اميرة
ثناء.. وهي تناشغ اليوم المغرب اجتنا اميرة تبجي رعد كاتلها وطاردها كالت هو وامه وخواتة لزموني شبعوني كتل
.. اي وبعدين
... قبل شوية اجة رعد سكران يطوطح ظل يسب ويغلط يكول انتي بايكة فلوس امي وجايبتهن الأمج ام الصالون
اميرة لك ياعار اني وامي اشششرف منك ومن امك السكط لوما كدامك طلعتوني اني وابني بالملابس العلية خلف الله على الجيران انطوني عباية انسترت بيها ووصلوني الأهلي
هو من سمعها غلطت اكو طابوكة يم الحديقة شالها وضربها براسها
.. الله يكسر ايده وهسه اميرة شلونها
.. كمت اشهك ما ادري وكعت لا ايد ولا رجل حتى نفس متتنفس
الجيران دخلوا اخذوها للمستشفى
.. وزوجها العار وينة؟
من شافها وكعت انهزم
.. متت خوف على بالكوة حبست دموعي ما اريد ابجي كدام ثناء وكامل خطية البيهم مكفيهم
لليل احنا كاعدين ننتظر وماكو اي خبر عنهم
ليث كل شوية يبجي ومعندي حليب انطي وهو متعود على صدر امه
عصرتلة برتقالة وبالخاشوكة اخلي بحلكة بالكوة يقبل يشربة
ما اعرف شلون مرت هالليلة لحظة وحدة منمنا بس كامل نام حتى اصال كاعدة
وليث سودة عليه فرفح
صار الصبح تقريباً ساعة سبعة اندكت الباب رحت فتحتها
دخلت دعاء مبين عليها التعب وجها ذبلان
بلهفة سألناها على اميرة
.. الحمدلله عدت على خير سوالها اشعة وفحوصات راسها مبي شي بس خيطوا وشكلولها مغذي وكالوا لازم للصبح تبقى بالمستشفى تحت الملاحظة
وقبل ساعة يلا كتبولها على خروج
.. اووف الحمد لله
اخذنا ابنها ورحنالها وجها كركم وبالكوة تحجي
سألت خالة زوجها راح تعوفوا بدون متحاسبوا الله ستر ومصار شي من سوايتة المصخمة
... شوف البطرانة اتكول تعوفوا
لج الارعن من الليل بات بالحجز اشتكيت عليه ونص الليل طلعت مفرزة البيتهم لزموا
هم زين ممهزوم وباقي بالبيت
.. عاشت ايدج خلي يصيرلة درس حتى بعد ميكررها
...واني انتظر الحد ميصيرلة درس بنتي مو زايدة عليه بعد يحلم يشوف اظفرها
اليوم اجمع اخواني واخليهم بطلكوها منه
... خالة هسه انتي متعصبة اهدي ولاتتسرعين لاتنسبن بينهم طفل
... والله لو عشر اطفال هم ما اخليها ترجعلة اني قبل بالكوة جنت متحملتة وهسه اجتي الفرصة اخلصها منه
... سكتت مكدرت اناقشها حقها گلبها محترك على بنتها وبنفس الوقت مقهورة على اميرة ادري بيها تحبه رغم ماهو سكط
باوعت عليها ساكتة ودموعها تنزل بهدوء
تقربت منها شبيج حبيبتي اذا تريدي من تهدء خالة احجي وياها
.. لا جنة بعد الصار مستحيل ارجعلة واني متاكدة هو هم بعد ميريدني
... اوووف لاتضوجين انتي جوهرة والله ميستاهلج
... الله كريم
.خلال ايام اطلكت اميرة صارت كعدة بين خوالها واهلة
ام وليد كالت ما اتنازل عن الدعوة اذا ميتنازل عن ليث ومنريد منه شي حتى النفقة متنازلين عنها
راحوا الرعد بالسجن ومبلغي بكلام خالة كال اني بعد ما اريدها هي لو محترمة مجان حبست زوجها وابني مني الها ما اريد شي يذكرني بيها
بيوم الطلاك خطية فرفحت اجت بقت يمي متريد تبجي كدام امها
اني واصال وخواتها كدرنا انطلعها من كأبتها بس اكيد يبقة الحزن بالگلب
اميرة كامت تجي ويانة للصالون
تعلمت منها ومن خالة والحمد لله صرت محترفة
اليوم طلعنا اني واميرة دنروح للصالون نص الطريق تلاكينا ويا نفس الولد سلم علينا اميرة ردتلة السلام ومشينا
اميرة... احم احم شفتي شلون يباوع
... وشسويلة خلي يولي
.. هههههه وشبيج متعصبة ترى كرار خوش ولد
.. هسه فابل اني كلت عليه مو خوش
..لعد شبيج تحجين بنفعال
.. تنهدت ما ارتاحلة كلما يشوفني يكصني كص بعيونه
.. حقة اي واحد بمكانة اذا شاف هالجمال يباوع
.. واني ما اريد احد يباوع
.. صار تدللين راح امشي وافكس بعيون الناس حتى ميباعون على حضرتج
... هي مال شقه
اكيد لا وراح ازيدج من الشعر بيت امه كلما تجي يم امي تسال عليج
.. عزززا شتسأل
.. خرب شبيج كمزتي اسئلة عادية البنية من وين وليش عايشة وحدها وين اهلها
.. وجعني گلبي همست وخالة شجاوبتها
.. كالت البنية يتيمة ماعدها احد عايشة ويا بنت اختها
... وهي شكو تسأل شتريد مني
... تريد اطلعلج جنسية يعني شتريد اكيد تريد تجي تخطبج
.. عززا لا ما اريد
.. ليش متريدين شنو عاجبتج عيشتج وحدج جنة انتي حلوة وصغيرة الف واحد يطمع بيج ميصير تبقبن بدون رجال
.. هه والرجال اذا عرف اني بنت منو نفس اللحظة ينهزم مني خليني هيجي مرتاحة وراسي صافي اهم شي عندي اربي اصال مستحيل ازوج واجيبلها رجال للبيت يمكن باي لحظة يطمع بيها ويخلي عينه عليها
... خرررب وين راح تفكيرج انتي اشكد متشائمة جنة لازعلين من كلامي بس مو كل الزلم مثل الجانت تعرفهم امج
.. بنظري كلهم نفس الشي لج اني صرت معقدة بسببها
زين من دتكوليلي ازوجي اليجيني واكولة اني مطلقة اكيد راح يطلب ورقة الطلاق حتى يتاكد هه واني ماكو شي يثبت جنت مزوجة حتى بجنسيتي مكتوب باكر
.. اوووف هاي امج شمسوية بيج
.بكل بساطة امي دمرتني
وصلنا للصالون وبدينا نشتغل اميرة صارت تجي بمكان خالة ومرات من عدنا اكثر من عروس خالة تجي تساعدنا
مرت الأيام وضعي المادي الحمدلله تحسن
اكو مرة دائماً تجي للصالون ويا بنتها جنت كلما انتبه عليها الكيها صافنة عليه
ام كريم.. جنة انتي من يا عمام؟
.. صفنت عليها هاي شجاوبها هو اني ما اعرف شي غير لقبي المكتوب بالجنسية
... خالة اني ***
.. اهاا ونعم منكم اهلج وين؟
... انزعجت منها لوما مرة جبيرة فلا اجاوبها
اميرة..ام كريم جنة يتيمة اهلها ماتوا بحادث
.. يااااا سودة عليه وهسه انتي ويامن عايشة
... ههههههه شجاج خالة اليوم نازلة تحقيق ويا البنية
...والله يا اميرة هالجنة حبيتها ودخلت گلبي وصارلي جم مرة اجي علمودها وما شاء الله عليها مبينا خلوقة وفقيرة
.. عگدت حاجبي شنو تجي علمودي كتلها تسلمين خالة هذا من طيب اصلج
... جنة اذا اخطبج الأبني توافقين؟
اميرة... ههههههه كولي هيجي من البداية طلع عندج الها عريس
جنة.. قاطعتهم خالة انتي مرة ذهب وابنج على عيني وراسي بس اعذريني اني ما افكر بالزواج
.. يااا ليش بنتي هو انتي شعرفتي عنه ورفضتي
.. ما اريد اعرف شي ولعلمج خالة اني منفصلة
صفنت بوجهي اني تقصدت هيجي اكول حتى تجوز مني اشو هاي كالت عادي شكو بيها اني هم ابني مطلك مرتة
اهوووو هاي لطشت
اميرة.. وهو ليش مطلك؟
.. خزرت اميرة المرة كالت يمه شلعت گلبة وصخة وماتهتم بي وبالجهال ودوم ادور مشاكل
اميرة ..ياا عنده جهال جم طفل؟
... اثنين وانتي جنة هم عندج اطفال بس لا هالحلوة بنتج
... اي بنتي فدوة العمرها
... اي شكو بيها كريم يربيها ويخليها بعيونة
.. خالة عذريني اني ما افكر بالزواج نهائياً عايشة البنتي وبس
... هسه يابنتي دشوفي وتعرفي عليه اكيد تغيرين رايج
... ظلت تلح صدعتني بنتها كالت ماما كريم اجة يلا امشي
اشو هاي اجت جرتني من ايدي وكفتني يم الجام مالت الباب ورفعت شوية من البردا كالت دشوفي شحلاتة شلون هيبة وشخصية
... تركت ايدها ورجعت المكاني كتلها الله يحفظة الج والاطفاله اعذريني ما اكدر اوافق
اصال.. وكفت وتخوصرت شبيج جلبتي اتكولج ما اريده خوما كوة
.. يااا شوفي اللسان
... اشو وينة ابنج الخبصتينا بي باوعتلة اكرع وضعيف عبالك سلبوح سيان
ييييع هو هذا الحلو خشمة جنا ماصولة
... لزمت اصال وسديت حلكها
اعتذرت من المرة لأن ضاجت كتلها خالة اعذريها بعدها طفلة وأكيد متحب امها تتزوج
المرة كالت يمه شهالوكاحة بعدها بكد الفصمة وملسونة من تكبر شراح تسوي
عافتنا وطلعت زعلانة
اميرة... هههههههههه لا عاب حلكج صدوك جنا سلبوح والقهرني اتكول شحلاتة هههههههه
... كافي ضحك لاتشجعيها اصال صايرة الله ميجرعها وما ادري شلون اتعامل وياها
بس هينا باصال منا وجاي بعد ما ارزل ايدي والضرب
... عادي ضربي المهم ما اخليج تزوجين ابو بريص
اميرة... ههههههه انوب ابو بريص
... اصااال طلعي كتابج وأكعدي اقري لا ابتلي بيج
ظلن هواي نسوان يطلبني اكو بيهن من يعرفن اني مطلقة ينسحبن واكو يلطشن واني جوابي مثل كل مرة الرفض
خالة ام وليد وام سرمد هواي يحجن عليه يكولن الي متي تبقين وحدج انتي محتاجة رجال يسندج ويحميج لان الدنيا متتامن
اعرف كلامهن صح بس ما اكدر اقتنع متاكدة اي واحد اوافق عليه بس يعرف ماضي امي يسوي حياتي جحيم والاكثر من هذا اني خايفة على اصال ما اريدها تعيش ويا رجال غريب حتى لو جان هذا الشخص زوجي
اليوم باليل اجني خالة ام سرمد واميرة
خالة من شكلها مبينا عدها سالفة
ام سرمد... جنة عندي الج خبر؟
.. خير ياربي شنو هو بس لا هم جايبيلي عريس ههههه
... امج طلعت من السجن......
يتبع
رواية بنات الغجرية الفصل الثامن عشر 18 - بقلم بسمة البياتي
._ بنات الغجرية _
( بقلم بسمة البياتي)
_ البارت السادس عشر _
ام سرمد... جنة عندي الج خبر؟
.. خير ياربي شنو هو بس لا هم جايبيلي عريس ههههه
... امج طلعت من السجن.
... بدون وعي لطمت على خدي عززززا عزززا هاي شطلعها فدوة خالة كوليلي شلون عرفتي
... على كيفج شكو صفريتي اهدي خلي افهمج
قبل فترة انطوا عفوا شعجب متدرين
.. ومنين اعرف اشو اني من البيت للصالون حتى تلفزيون ما اتابع
.. امج قبل جم يوم رايحة البيتج القديم سألة عليج
كايليلها منعرف عنها شي احنا من زمان اشترينا منها البيت
رايحة للجوارين سألتهم هم كايليلها منعرف
المؤجر اجة كال الأبو سرمد
هم زين صارلنا فترة من شلنة من الشقة اكيد جان اجت دورتلنا حتى تسألنة عليج
.. وهسسه اني شششسوي وين اولي مكتوبلي ما اخلص منها
اميرة.. لج شبيج هلكد خايفة هي وين راح تلكاج
... ماكو شي يصعب على مرجانة
ام سرمد.. اني مردت اكولج عرفت راح تخافين بس ابو سرمد كال لازم تعرف هاي امها اخاف جنة تريدها ترجع يمها
... طبعآ ما اريد اني معولت خلصت منها ومن شرها
... لعد هذا هو لاتخافين امج من انسجنت انكسرت ومظل عدها لا واسطات ولايحزنون لاتخافين مراح تلكيج
... الله يسمع منج
حياتي صارت جحيم رجعلي الخوف والقلق حتى بنومتي ما ارتاح كلها كوابيس واحلام بامي
من اروح للصالون ايدي على گلبي كلما يندفع الباب وتدخل مرة عبالي هي
ظليت بهالخوف اكثر من شهر تالي شوي ارتاحيت كلت مادام مبيت كل هالمدة اكيد نستني وبعد مدورلي
اني واميرة بالصالون عدنا زبونات رادن صبغ وحفافة كملناهن وظلينا ننتظر
عروس موعدها ساعة ثلاثة الظهر
قبل الوقت اجني مرة وبنات اثنين
منظرهن ولا عبالك عدهم عرس
اميرة سألت ياهو من البنات العروس
المرة اشرت على بنية يطلع عمرها عشرين سنة وضعها ولايدل على انو هي عروس وفرحانة الوجة ذبلان والعيون حمر ومورمة مبين شابعة بجي
اميرة.. تعالي كعدي اهنا
كامت مثل الجثة اجت كعدت بدون متنطق حرف اني عليه المكياج وأميرة التسريحة
ردت ابلش امكيجها مكدرت عيونها تجري كلت الأميرة خلي تلبس البدلة وسويلها التسريحة اخير شي المكياج
امها واختها حالهن مو احسن من حالها يباوعن عليها بقهر كلت يمكن ضايجة لان حتفارك اهلها
اميرة كملت التسريحة بديت بالمكياج دموعها متوكف والكحل يسيل مكياج قبل بسرعة يسيل وهاي دموعها اليكول شلالات
اميرة.. ياعيني دكافي شوفي شسويتي بوجهج
امها... ماما وسن كافي مو عيونح راحن فدوة رحتلج بطلي بجي مو گلبي حيوكف من القهر
البنية بدال متسكت زادت منظرها يمرد الگلب
اندكت باب الصالون اميرة لبست حجابها وراحت تفتحه
سمعنا صوت ولد البنية اليمي شهكت وخلت ايدها على حلكها امها وجها صوفر طلعت تركض
دخلت اميرة عاگدة الحواجب
صوتهم عالي
المرة اتكولة شجابج بروح ابوك روح منا والله اذا محمد شافك يسوي مصيبة
... شيصير خلي يصير اريد اشوفها ما اروح منا قبل ما اشوفها
.. ششوف منها صخام الصخمني وليدي بداعت كل عزيز انساها كولشي قسمة ووسن موقسمتك
... خالة اني مجاي ادور مشاكل بس اشوفها واروح
.. وشراح تستفاد من شوفتها اخ منج وسن اكيد انتي كايلتلة اسم الصالون
... اني واميرة وحدة تباوع بوجه الثانية البنية كامت هي وبدلتها وكفت قريب من الباب ايدها على حلكها كاتمة شهكاتها
... خالة بالعباس ما اتحرك منه قبل ما أشوفها خليني اشوفها بالبدلة بلكي اكرها وتطلع من گلبي اريد اشوف الربيتها على حبي شلون جاي تتحظر حتى تروح الغيري
... يمه ليش جاي توجع گلبك وگلبها اذا شفتها راح تتاذئ وتاذيها وياك
.. ليش هسه اني گلبي مجاي يوجعني وممتاذي خالة اني جاي اشتعل وماكو اليطفيني گلبي جاي ينزف تعرفييييين شنو ينزف
جنة... كمت ابجي كلامة يمرد الگلب يحجي بصوت مخنوك
البنية فتحت الباب وصارت مقابيلة هي داخل الصالون وهو برا
وكف جامد من شافها عيونة تجري
اول مرة اشوف رجال يبجي بهالطريقة
شكلة تعبان ملابسة مخربطة حتى شعرة مبين ممشط
. كاللها هااا يروح مصطفى اليوم يزفوج الغيري اليوم يذبحونج ويذبحوني
رفع راسة وكال ربي ماريد شي بس اخذ روحي وريحني
عافها وراح وكل شوية يندار يباوعلها ويمسح دموعة
امها سدت الباب البنية متحملت وكعت كومناها وجبنالها مي
دمومي تجري اباوع حتى اميرة تبجي
البنية مثل الفاصلة كلمة منطقت
اميرة... ليشش منطيتوها اله عمري مشفت رجال يحب وحدة مثلة مو حرام عليكم تكسرون گلبهم
... يمه بالعباس موبيدي ابوها واخوها مانطوها واني ما اكدر اوكف بوجهم
اخت وسن كالت ترى هذا الشفتوا ابن خالتها مو غريب
انصدمنا كتلها معقولة تفضلون الغير على ابن اختج
واخيرا حجت وسن كالت سألوها المنو انطوني
الرجال اكبر من ابوية باعوني لان عنده فلوس
... انخمش گلبي اذكرت نفسي من امي نطتني الأكرم
وسن.. تدون هذا الرجال منو ابو جنتنا
واخوية لان ميرفض طلب المرتة قنع ابوية ونطوني اله حتى لاتجي غريبة تاخذة وتكوش على فلوسه
اميرة.. الله اكبر شنو من بشر انتوا هاي بنتكم ملاكينها بالشارع معقولة متعاجزين من لكمتها
... اني شششنو بيدي زوجي عصبي ومحد يكدر يكسرلة كلمة وابني العار، كدر يقنع ابو وباقي اخونها مكدروا يدخلون رغم هما هم مموافقين
وسن.. والله ولا اخلي رجلج وابنج يتهنون يدورون فلوس مو ماشي بعيني اليوم زفتي راح تصير للمكبرة
... امها حضنتها دفعت امها وظلت تردد زفتي اليوم للمگبرة انقهرت عليها وبنفس الوقت خفت لا تنفذ كلامها لان تحجي بثقة
جريت كرسي وكعدت كبالها رفعت راسها بيدي كتلها انتي ليش هلكد ايماتج ضعيف
.. لان الله ميحبني
.. وشلون عرفتي الله ميحبج؟
... لو يحبني مجان صار كل هذا
.. استغفري ربج الله احن علينا من امنا وابونا
كامت تشهك لعد ليش هيجي صار بيه اني جاي اموت والله اموت ومحد حاس بيه
... اني حاسة بيج واعرف شنو شعورج
.. لامتعرفين لان انتي مو بمكاني
. اني يوم من الأيام جنت بمكانج ومريت بنفس المريتي بي ويمكن وضعي اصعب من وضع
.. انتي اتكولين هيجي حتى تواسيني
.. لا والله هاي الحقيقة شوفي وسن اني ما احب احجي عن الماضي بس راح احجيلج وراح اكولج ليش انتي وضعج احسن مني
على الاقل انتي دتتزوجين وانتي ناضجة وفاهمة الحياة اني ازوجت وعمري 15 سنة الرجال حتى احفاد عندة
انتي صح ابوج جبرج بس عندج ام تحبج وروحها محتركة عليج واخت دموعها تنزل قبل دموعج واخوان رافضين ينطوج ماعدا اخوج الجبير كل هذولة سند الج ومتاكدة مراح يتخلون عنج بيوم واذا صارلج شي لا سامح الله راح يدافعولج
اني من ازوجت الي باعتني علمود الفلوس هي امي الي مفروض تكون منبع حنان وامان الي
انتي راح اطلعين من بيت اهلج معززة مكرمة بزفة وبدلة والناس كلها تشهد على زواجج
اني كل هذا انحرمت منه
جان يضربني ويهيني واني معندي احد اشكيلة جنت اختل منه بزواية البيت من اشوفة متعصب لان ادري راح يجي ياذيني
وكل هذا المريت بي مفديوم اعترضت على حكم الله بالعكس زاد ايماني وحبي الربي وكلما يضيم بيه الضيم والناس اتجور عليه افرش سجادتي واحجي ويا ربي واشكيلة لان ادري بي يسمعني ومناسيني
وهاي الزواجة الجنت مفكرتها عذاب ونقمة الي طلعت رحمه ونعمة من الله لو ما مزوجة جان الله اليعلم شصار بيه ووين صفى بيه الدهر
والحمدلله هسه عايشة ممعززة مكرمة وممحتاجة احد بفضل الله وحكمتة
وسن لاتياسين من رحمة الله وصدكي الي كاتبة الله هو يصير وابن خالتج اذا قسمتج تاخذي لو بعد خمسين سنة
طفرت حضنتني وتبجي كالت هاهيه مراح أاذي نفسي واصبر وابقة ادعي حتى الله يخلصني منه
كتلها عفيه عليج يلا كومي غسلي خلي ارجع امكيجج
امها اجت باستني كالت الله يرضى عنج ويجبر بخاطرج مثل ماجبرتي بخاطر بنتي
.. فدوة العينج خالة اني مسويت شي
اميرة... هو زوجها اشكد عمره؟
اخت وسن.. والله يمكن دخل السبعين
..ياااا سبعين وتخافين منه ولج هذا وين بي حيل هسه تلكي اذا راد يشد حيلة ويبيض وجها يبوسج هاي كل قوتة
... رغم القهر ضحكنا على سالفة اميرة
كملنا البنية سلمت علينا وراحت اميرة اجت حضنتني وتبجي سودة عليه جنة هاي شصاير بيج ليش مجنتي تحجيلي
.. لاتبجين امورة هاي قسمتي
اميرة.. هم زين اصال بالمدرسة ومشافت شي
.. عززززا لج نسيتها هسه اكيد طلعت
... خلي نقفل الصالون ونروحلها بعد مالي خلك اشتغل
... رحنا الاصال هم زين جانوا هستوهم طالعين اخذناها ورجعنا للبيت
ظليت ضايجة وگلبي ممرود على البنية صليت ودعيتلها
صبيت عشا الاصال اني نفسي مسدودة
... جنونة شبيج اليوم ليش ضايجة وعيونج حمر
... هههه وشلون عرفتي ضايجة
.. بلي اعرف
.. فدوة للتعرف مابية شي عمري بس راسي يوجع
باليل من تمددت اريد انام ما اكدر افكر شراح يصير بيها من يتقربلها
وحبيبها اوف حبيبها شنو وضعة هسه
اذكرت اكرم أول مرة من اتقرب مني خليت المخدة على رأسي اريد انسى
وهكذا استمرت حياتي
من خلال شغلي بالصالون شفت اشكال والوان السوالف وعودت نفسي عليهن كل وحدة تجي الها قصة وسالفة اكو التجي عيونها تلمع من الفرح لان ماخذة حبيبها
واكو التجي عادية وبس تتامر وميعجبها العجب
واكو التجي فقيرة مينسمعلها صوت وحمواتها من اول يوم يتنترن عليها
اكو التشكي من رجلها وخيانتة
واكو ام الأولادها عاقين وميسالون عنها
سوالف النسوان اليجن تشيب الراس وتفت الگلب
الاوضاع بدت تسوء والعراق داخل على حرب الناس خايفة وميعرفون شنو نهاية هالمعركة
اكثر الناس تركوا وبيوتهم بسبب القصف
اخوان خالة اجوي ياخذوها يمهم هي رفضت تروح كالت ما اترك بيتي
بايام القصف جنت اخذ اصال واروح يمهم مرت علينا ايام ميعلم بيها غير الله
سقطت الحكومة ودخلوا الامريكان
ودخلنا مرحلة جديدة
بيتي الماجرتة الناس الساكنين بي ما اعرف وين رايحين و اجار مينطون
وشغل الصالون وكف بسبب الاوضاع
اشتحيت من خالة ام وليد لان تاخرت عليها بالأجار رغم هي كالت لاتشيلين هم ولاتفكرين بالفلوس انتي حالج من حال بناتي
وراه مدة يلا رجع المؤجر والحمدلله انطاني الاجار ورجعنا نفتح الصالون بس الشغل مو مثل قبل بسبب الأوضاع
باليل قبل لا انام اجتي خالة واميرة عليه كالت عندي موضوع وياج
أم وليد.. جنة بدون مقدمات اليوم ام علي حجت وياي كالت اريد اجي اخطبها الكرار ومد اعرف اطلبها من منو
.. فتحت عيني وگلبي دك سريع ما اعرف شبية
... جنة كرار خوش كرار واهلة ناس محترمين والنعم منهم
اميرة... الولد مهندس زراعي وموظف متلكين احسن منه وبعده شاب وحلو
..تنهدت مو تدرون بيه رافضة الزواج فدوة خالة كوليلهم جنة متريد تزوج
.. ليش يابنتي جم دوب تظلين بدون زواج صدكيني متلكين احسن من هالقسمة اهلة مستعجلين يريدون يزوجوا لان راح يرجعون المحافظتم للديوانية
.. خالة فهميني والله مااكدر اني مو وحدي اصال وياي وين ترهم ازوج واعيشها يم عيال اني اخاف عليها من الهوا شلون اامن اخليها تعيش ويا ناس غربة وهي دتكبر
... اطمئني الولد ميروح ويا اهلة علمود دوامة راح يأجر بيت اهنا واكيد اصال يمج وكتلج الولد محترم لاتخافين عليها منه
.. هما يعرفون اني مطلقة
خالة سكتت ودنجت راسها
يعني ميعرفون
ام وليد.. هسه خلي يتقدمون ومن تصير الكعدة اني اكوللهم لان كتلها اذا يريدون يخطبوج يطلبوج مني انتي وحدة من بناتي وغلاتج من غلاتهن
.. دمعت عيني فدوة العينج الله يحفظج النا يا احن خالة بالدنيا
بس والله ما اكدر خايفة من الزواج
... اني كتلهم باجر تعالوا نتفاهم وانتي غصب عنج تكعدين وياهم ما اريد حجي زايد لاتشلعين گلبي
اميرة... عاشششو هذا الحجي المضبوط من البداية رزليها بدال هالدوخة
ثاني يوم خالة ام سرمد هم اجتي وصارت الكعدة امه مبينا ممتقبلتني وبالكوة جاية
ومن عرفت بيه مطلقة خلقتها انگلبت كالت هسه الحجي اختلف احنا مجنا ندري بيها مطلگة ليش داده ام وليد مكلتي من البداية
ام وليد...وشبيها المطلقة هاي بنتي اميرة مو هم اطلكت شنو يعني التتطلك فد شي عار وملأزم بعد ترتبط وتعيش حياتها
.. هههه ياااا شبيج خيتي اني موقصدي بس لان تفاجئت معبالي جانت مزوجة
وكرار لأزم يعرف بالموضوع
.. خية جنة الف واحد يتمناها اصلا يومية بالصالون وحده رايدتها وهي ترفض
اشو ما شاء الله عليها ادب و اخلاق وجمال كاملة والكمال لله
.. ونعم منها خية اني اترخص والي جية ثانية
.جنة .. اني جنت ساكتة بس اسمعهم حبيت دفاع خالة عني حسيت نفسي فعلآ وحدة من بناتها
ام سرمد... جنونة ليش ساكتة
.. لعد شحجي
.. لاتضوجين ترى كلامها عادي وكل ام اكيد تحجي مثلها
.. لا والله فلا ضجت حقها بس اني شما اشوف لو تلغون السالفة احسن وياريت هما بعد ميجون
.. ليش حبيبتي
.. شنو ليش هي بس عرفت مطلقة انعقجت لعد لو تعرف اصلي وفصلي ومنو امي شراح انسوي
.. كم مرة كتلج انسي امج واعتبريها صدوك ماتت بحادث
ام وليد.. جنة احنا نريدج تستقرين دتشوفين الوضع شلون طايح حظة ويومية يسوء اكثر لازم يصير عندج رجال وياكم بالبيت لان مندري باي لحظة شيصير
.. سكتت مدري شجاوبهم
بعدها بكم يم كرار بنفسه حاجي ويا خالة وكايللها حتى لو مطلقة شكو بيها اني رايدها ومتمسك بيها ومعندي اشكال واعتراض
من خالة بلغتني كلامة وظلت تلح عليه كتلها قبل لا انطي موافقتي اريد احجي ويا وبحظورج
كتلها الزواج الينبني على جذب مصيرة ينهدم ما اريد اخدعة واخدع نفسي من البداية لازم يعرف عني كولشي واذا رضى بيه بكل عيوبي وعيوب اهلي اني راح اوافق عليه
خالة كالت كلامج عين العقل واني راح ادز عليه أبيتي وتكعدين تحجين ويا
صار موعد اللقاء واجة كرار.......
يتبع
رواية بنات الغجرية الفصل التاسع عشر 19 - بقلم بسمة البياتي
._ بنات الغجرية _
( بقلم بسمة البياتي)
_ البارت السابع عشر _
قبل لايجي كرار اجتي ام سرمد كالت راح احظر الكعدة وياج اخاف يشكك بزواجج من اكرم لان معندج عقد اريد اكون اني الشاهدة واذا اطلب الأمر اجيب أبو سرمد هم يشهد
للعصر اجة كرار
اميرة.. كومي جنة يريدوج
.. منو اجة ويا؟
.. محد بس هو وامي وام سرمد كاعدين
.. عفيه مدري شبيه اشو خايفة ومرتبكة هاج شوفي ايدي شلون دترجف
..يمعودة على كيفج ويا نفسج راح يغمى عليج طبي بثقة واحجي العندج انتي ممسوية شي غلط حتى تخافين وترتبكين
.. لج اعرف بس هو الموقف بحد ذاتة يربك
.. هسه كافي لج امشي دينتظرج وعيني استاذ كرار جاي بكامل اناقتة عبالك اليوم عرسة ههههه
هسه وكت ضحك اني رايحة
سميت بسم الله ودخلت سلمت واني مدنجة مرفعت راسي
ام وليد... تعالي بنتي كعدي اهنا
.. رحت كعدت بين خالة ام وليد وام سرمد حسيتهن مثل الدرع الي
كرار.. احم شلونج جنة
.. من نطق اسمي رفعت راسي عيني أجت بعينة يمكن هاي اول اركز بملامحة صاحب بشرة حنطية ملامحة حلوة وجسمة مرتب انيق وعطرة تارس المكان
نزلت عيني الحمدلله
كرار... اي جنة احجي شنو شروطج وطلباتج؟
.. اني معندي اي شروط وطلبات
اكو موضوع مهم لازم تعرفة بس قبل احجي اريدك تنطيني كلمة ووعد رجال الموضوع الاكولة يظل بينا
عگد حاجبة بستغراب
كال احجي جنة وعد الكلام الراح ينحجي بهاي الغرفة ميطلع خارجها
... كمت افرك ايد بأيد من التوتر ياربي والله الموقف الأني بي صعب بس الله يعلم شنو احساسي بهالحظة
الكل ينتظرون ابدي بالكلام
جريت نفس وكلت الي انت تعرفة انو أهلي ميتين بحادث صح
... اي صح مو بس اني المنطقة كلها تعرف بهالشي
.. اني اهلي عايشين مميتين
.. ششنو لعد وينهم وليش انتي وحدج؟
... ابوية تركنا من عمري ست سنوات وما اعرف عنه شي
وامي.....
.. اي كملي وين امج
.. امي تختلف عن هواي امهات سكتت ودموعي لا إرادياً نزلن
هي سبب تعاستي وبسببها هسه اني كاعدة هاي الكعدة ومحطوطة بهذا الموقف الصعب
.... ليش شبيها امج؟
... تعرف الغجر؟
... رفع حاجبة سامع بيهم بس معندي معلومات عنهم
... امي من الغجر هذا اصلها ورغم ازوجت واستقرت بس ظل اصلها يجري بدمها ومكدرت تغير اطباعها
من ابوية تركنا اني واختي عشنة اسوء حياة
اختي راحت يم الخلقها وتركتلي بنتها الي هي اصال
اما امي بسبب حبها للفلوس والطمع جبرتني ازوج واني صغيرة وزواجي جان مجرد عقد سيد
.. يعني معندج ورقة طلاق او شي يثبت زواجج
.. هزيت راسي بالنفي
ام سرمد... كرار اني جارت جنة من زمان واعرفها من جان عمرها سبع سنوات وشاهدة على كلشي عاشتة هي صح معدها شي يثبت زواجها بس اني وابو سرمد مستعدين نشهد كدامك وكدام الله جنة جانت مزوجة وعندي استعداد احلف على كتاب الله
... كملت كلامي هذا الصار كرار واذا متصدك براحتك محد يلومك
امي انسجنت واني اخذت اصال وابتعدت عنها
واذا تريد تعرف شنو سبب سجنها جانت تعرف صديقة طايح حظها وبسبب سوالفهن المكسرة انسجنن
هاي اني وهاي حياتي وهذولة اهلي محبيت اخدعك واضم عليك لان انت من حقك تعرف وبعد القرار الك
اباوع عليه وجها احمر ويهز برجلة من التوتر مشى اصابعة بين خصلات شعرة ودنج راسة
ام وليد...ذمة برگبتك اذا حجيت الأحد السمعتة لان تدري بالناس ميعوفون احد بحالة
جنة.. اعرف الموضوع صعب ومجنت تتوقعة لهذا حتى لو متقبلتا هذا من حقك
كرار... امج هسه وين؟
.. ما اعرف ولا اريد اعرف
... تدرين جنة لو ما اخذج وبعد الزواج عرفت حقيقية اهلج وامج بالذات لحظة وحدة ما ابقة وياج بس هسه زاد تمسكي بيج قليل المثلج وبقوتج ماكو وحدة تكدر تكعد هالكعدة وتحجي هالكلام
وهسه كدام ام وليد وام سرمد راح اجدد طلبي واطلبج منهم والي الشرف تكونين زوجتي
... انصدمت ممتوقعة حيوافق بعذ السمعة وبهالسرعة جنت متوقعة اول ما اكمل كلامي يعوفني ويطلع
ام وليد... جنونة اعتقد بعد ماكو داعي للخوف والرفض
... استحيت بقيت منصية راسي
ام سرمد...السكوت علامة الرضا مو صح جنونة
... بس اني ماراح اتخلى عن اصال وهذا شرطي الوحيده تبقة وياي.
كرار.. اخليها بعيوني اطمئني وكدام اهلي راح يبقون اهلج ميتين بحادث
ماشي وهسه اريد نقرأ الفاتحة وانحدد يوم المهر
ام وليد... اريد اتجيب مشية وتطلبها من اخوني جنة بنتي الخامسة وما اقبل اي تقصير بحقها
... هذا حقها وان شاء الله اجيب عمامي واطلبها بشكل رسمي واريد بنفس اليوم اعقد عليها
... كاعدة اسمعهم وميتة خجل اول مرة احس بهالأحساس واحس بنفسي اني فعلاً عروس
راح كرار خالة والبنات بوسني وباركنلي شلت هم اصال شلون راح ابلغها قررت باليل افتح وياها الموضوع
باليل اصال كاعدة تدرس واني احوص يمها اروحي واجي اريد اكوللها بس مستحية منها ههههههه
اصال... بدربج شلعي الكاشي هم
.. يا كاشي؟
.. سألي روحج مبقيتي شي بالكاع مشلتي الف مرة رتبتي الغرفة
... انجبي غير موهوسة وداعدلها اشو انتي الله يسلمج تمشين وتشمرين بملابسج وغراضج
...اني احب اقرأ بالهوسة ما ارتاح اذا اكعد بمكان مرتب بدون ما اطشر الكتب والملابس
.. انتي بكولشي عكس الناس
جيت كعدت يمها كتلها اصولتي اريد احجي وياج بفدموضوع بس مداعرف شلون ابدي بي
.. ابدي ولاتستحين اني مثل امج
.... كفختها والله اذا تطلعين مثل امي اتبرى منج وبطلي سوالفج خليني احجي
... هسه متحجين احد لأزمج
... شوفي اصولة اني
... يمعودة على كيفج اصابعج راح تنجعص هلكد متفركين بيهن
راح اني احجي لان مبين سالفتج مطولة راح اظلين طول الليل بس اني واني وكولشي ما افهم منج
انتي راح تزوجين
... باوعتلها وشلون عرفتي
... شنو شلون ترى اني عايشة وياج بنفس البيت مو بغير كوكب ولاعبالج ما افهم اني صرت بالمتوسطة ترى كولشي اعرف
... اي وانتي شنو رايج توافقين لولا؟
... واذا موافقت شحتسوين
... ارفضة اني معندي شي بهالدنيا اهم منج
... لا جنونة لاترفضين اني افرح من اشوفج فرحانة
.. متحملت دموعي نزلت حضنتها لج اصال انتي فرحي وروحي بهالدنيا
... جنتي امانة من تزوجين واتجيبين جهال مو تكومين متحبيني وتعوفيني لان اني بدونج اموت
.. كافي اصال انعل ابو التزوج لج انتييييي بنتي تعرفين يعني شنو بنتي اني الاموت بدونج
.. بجيت بحضن جنة اريدها تزوج وبنفس الوقت خايفة اليزوجها ياخذها مني مسحت دموعي ودموعها
كتلها شوكت العرس اريد اركص
.. ههههههه عابتلج ما اريد بطلت
... اهووووو معليه اريد حفلة صارلي كومة مراكصة
... اصولة متاكدة مراح تضوجين
.. ليش اضوج انتي يمي وراح يجي يمنا كرار يطلعنا ويونسنا احسن ما محبوسين بالبيت
... ههههه من هسه شادة حيلج على الطلعة
... الطلعة والركص ما اتنازل عنهن
.... كملي قراية لا ابتلي بيج
بيوم المشية خالة كالت الكعدة تصير ابيتي وبلغت اخوانها وعمو ابو سرمد يجون
قبل لايجون اميرة والبنات جهزني لبست فستان وردي بسيط بس حلو ومكياج وردي وشعري سرحتة على طولة
ام سرمد... صلوات جنونة طالعة تخبلين والله اخاف عليج من العين
.. هههه فدوة عيونج الحلوة
والله ما اعرف شلون اجازيكم انتي وخالة فعلاً صرتولي اهل وسند
ام وليد.. على شنو اجازينا ليش احنا شمسوين بعد اذا عدتي هالكلام من صدك ازعل منج
... كولشي ولا زعلج بعد ما اعيده
اكولكم بنات اصال وين
.
دعاء.. اكيد ويا منى بالحديقة
اميرة. طلعت ادورها لكيتها كاعدة بالمطبخ وصافنة جيت كعدت يمها شبيج اصولة ليش كاعدة اهنا
... كاعدة اتفرج مباراة كاس العالم
... كفختها على كيف امداج يالعوبة فوك مجاي اسالج زين شبيج ضايجة وتحجين من طارف خشمج
... شبيه كولشي مبية
... مممم ضايجة لان جنة راح تتزوج ويمكن عبالج بعد متهتم بيج وتلتهي ويا كرار
... برطمت وهزيت راسي
. شلون تتوقعين جنة ام گلب الحنون الي تحبج اكثر من روحها راح تهملج اطمئني جنونة تموت عليج وانتي تبقين رقم واحد بحياتها
...نزلن دموعي حجيت بغصة اني معندي ام واب اخاف هي هم تعوفني مثلهم جنة اذا عافتني اموت بلياها
... انمرد گلبي من كلامها كمت ابجي ويا بجيها محد يعوفج جنة تعوف الدنيا ومتعوفج
وبعد لاتكولين معندج ام
اني وجنة وامي امهاتج ولج والكعبة بيوم الما اشوفج گلبي يصير مثل النار عليج غلاتج من غلات ليث ابني
حضنتها بستها من راسها ومسحت دموعها
كومي غسلي جنة اذا شافتج تبجين راح تنقهر
عابتلج حتى اني بجيتني
... ههههه شسويلج هو انتي ردتيها من الله كابلتيني وكعدتي تنوحين
... كوووومي رعنة ولايغزن بيج دموعي الصرفتهن بسببج
... لو صارفة فلوس شجان سويتي
.. الله لايكولها غير جان طكيت ومتت
دعاء... اصولة جنة تسأل عليج خبصتنا
... هياتني جيت
رحت الجنة يا الله شلون حلوة
كتلها هاا جنونة
.... تعالي شو يمي اجتي كعدت لزمت وجها بيدي وحركتة يمنى ويسرى
شبي وجهج ؟
... شبي كولشي ممخلية اني حلوة
... ام لسان لاتغيرين الموضوع احجي جنتي تبجين؟
... ياا اسم الله شنو اكو فاتحة وابجي مابية شي
.. ممممم شو ممصدكتج
... جنونة عيب لاتحجين هواي انتي عروس لازم تكعدين عاقل مثل البنات اليجن للصالون
... ولج شنو كعدي عاقل اشايفتني شادة الوصلة وداركص
... لا اني راح اركص ابدالج
... ديربالج تسويها والنبي ازعل منج بداعتي كعدي عاقل
.. اهوووو حتى بهيجي يوم متخليني اركص لعد هي ليش اسمها حفلة
... اعرف اصال ضايجة وجاي اداهرني حتى تغير الموضوع ظليت ساكتة بس گلبي جمر عليها
كالوا اجوي الناس دخلن هواي نسوان وبنات سلمن عليه بيهن الحبني وبيهن الي حتى ميباعن بوجهي
اميرة يمي كالت معليج بيهن غيرانات منج اكيد ممتواقعات انتي هلكد حلوة
الزلم كعدوا بالاستقبال ويا ابو سرمد واخوان خالة وراه شوية صاحوني علمود العقد
البنات لبسوني جادر صلاة واخذوني للغرفة موجودين بيها السيد وابو سرمد وكرار ورجال ما اعرفة
كمت ارجف ما ادري شبيه الحد ما كمل العقد اطرافي ثلجن
رجعت كعدت بمكاني والنسوان بدن يهلهلن ويهوسن هاي الاجواء معايشتهن قبل وضنيت نفسي ابد مراح اعيشهن
ام كرار كالت الذهب احنا اشترينا والحلقة اذا مصارت على قياسج بدليها
دخل كرار يلبسني الذهب كعد بصفي وهمس مبروك عليه انتي
معرفت شجاوب مستحية منه
انطوا الذهب لبسني جان عبارة عن حلقة وتراجي وكلادة وكلهن خفاف اني عادي عندي لان من البداية كتلهم اني معندي طلبات شجيبون جيبوا
كرار كمل تلبيس الذهب باسني من كصتي وطلع
ساعة وخلصت الحلفة واهل كرار واقاربة راحوا
ام وليد.. جنونة كرار برا استاذن منا يريد ياخذج تطلعون وقبل حظر التجوال يرجعج
... باوعت الاصال شلون اعوفها واطلع
كلت اخذ اصال وياي
اميرة.. جنونة عوفي اصال يمي ولاتخافين عليها
اصال. روحي جنونة اني ابقة يم منى اهنا
... بالكوة عفتها
طلعت جان واكف يم السيارة من شافني فتحلي الباب صعدت وهو هم اجة صعد
شغلها وطلعنا ثنينا ساكتين
.... شلونج حبيبتي
.. گلبي فز من الكلمة اول مرة اسمعها
الحمد لله زينة
... شبيج ترجفين وخايفة اني صرت زوجج ليش هالخوف
... هاا لا مخايفة بس بعدني ممتعودة عليك
... ممم راح اخليج تتعودين وبعد متكدرين تفاركيني
وين حابة نروح؟
... ما اعرف بكيفك اهم شي مو بعيد مظل شي الحظر التجوال
... تدرين جنة ممصدك انتي صرتي الي بداعتي باعي عليه لا دنجين
... رفعت راسي عيني اجت بعينه صفن وصاح اخ يابة محد وكعني غير هالعيون
.. حباب باوع للطريق مو حنندعم
ركن السيارة على طرف اخذ ايدي لزمها ردت اسحبها شدد عليها قوي
... تدرين جنة من شوكت حبيتج
.. هزيت راسي بالنفي
.. من اول يوم شفتج كمت اتعمد اتاخر على الدوام حتى اشوفج من تطلعين واكحل عيني بهالوجه الحلو والي خلى حبي يزيد من شفتج اشكد ثكيلة ومفديوم رفعتي راسج وباوعتيلي جنة اتمنى تحبيني مثل ما احبج
احجي لاتبقين ساكتة اووف لوما هسه اني بشارع جان خمطت هالشفايف ابوسة اروي بيها عطشي
... ياااا عزززا عفية كرار لاتحجي هيجي
... طلع اسمي يخبل واني ما ادري بس لو تكولين حبيبي تطلع بعد احلى
... والله دتخجلني
... اخجلي من الدنيا كلها بس مني لاتخجلين اني من اليوم صرت ابوج واخوج وزوجج وحبيبج وان شاء الله اعوضج عن الايام العشتيها قبل
... تنهدت ياريت
و اتمنى متخذلني والاهم من هذا كله اريدك تهتم باصال
اشرلي على عيونة وكال انتي واصال بعيوني
باس ايدي شغل السيارة راح يم مطعم نزل جاب اكل واجة كال هذا الج والاصال
.. ليش كلفت نفسك
.. اش ديربالج تعيدين هالكلمة من هاللحظة انتي صرتي من مسؤوليتي
رجعنا للبيت نزلت هو هم نزل كال اريد مي فتحت الباب دخلت اجيبلة اشو هذا دخل وسد الباب
.يااااا هاي اشدتسوي عفية روح
... من شنو خايفة اني زوجج محد يكدر يحجي
.. جان يتقدم واني ارجع ليواه انحصرت يم الحايط اتقدم عليه سحبني الحضنة ما اعرف شلون اوصف هذا الشعور اول مرة احس بهيجي احساس رفع راسة واخذ شفايفي برقة بين شفايفة وبدا يتعمق بالبوسة اريد ابعده عني ما اكدر فقدت السيطرة على نفسي ومبقة عندي حيل
بعد عني ورجع خلى راسة على كصتي همس شوكت نزوج اريدج جنة معندي صبر انتظر هواي
بالكوة نطقت بكيفك
.... لعد هاهي خلال شهر انتي بحضني........
يتبع
رواية بنات الغجرية الفصل العشرون 20 - بقلم بسمة البياتي
_بنات الغجرية _
( بقلم بسمة البياتي)
_البارت الثامن عشر _
اتفقنا اني وكرار موعد العرس خلال شهر جانت الدنيا مسايعتني من الفرحة وأخيراً الدنيا ضحكتلي
بهالأيام كرار مشى بمعاملة الزواج اخذني سوينا تحليل
ومناك رحنا تغدينا بمطعم بديت اكسر حاجز الخجل واتالف. ويا
ثاني يوم عقدنا وصرت مرتة شرعاً وقانوناً
من رجعنا من المحكمة اخذني البيت اهلة جانوا مسويلنا غدا
دخلت البيتهم كولشي بي راقي وحلو مبينين مرتاحين مادياً
كرار عندا اربع اخوان وثلاث خوات
ثلاثة من اخوانة مزوجين واختة الجببرة هم مزوجة
جناتهم حبابات بس خواتة وامه مدري شبيهن يباوعنلي صفح وكل شوية وحدة منهن ذابتلي سالفة
غلست عنهن لان اصلا بالي مو يمهن روحي تلوب على اصال باقية بيت خالة كتلها تعالي وياي مقبلت
ام كرار...شوكت تعوفين شغلج بالصالون؟
.. وليش اعوفة؟
.. شنو يمه بس لا ناوية تاخذين ابني وتبقين تشتغلين وتظلين طابة طالعة شوفي حبيبة احنا ناس عشاير متصرفلنا هالشغلات بناتنا مكانهن البيت وانتي دامج اخذتي ابني لازم تكعدين بالبيت وتسكتين
اختة الجبيرة... مدري كرار ليش هيجي حظة
.. رفعت راسي كتلها وشبي حظة؟
... نايم بالطين
... شنو فصدج وضحي
.. ههه سلامتج ماكو شي
... كلامهن سم مدري شلون جرعت الغدا
اجة كرار كتلة اريد اروح للبيت بالي يم اصال
... يلا امشي
طلعنا اني ويا ردت اروح البيت خالة اجيبها كال هسه فوتي للبيت واني اجيبها الج
.. فتحت الباب ودخلت كتلة يلا روح صيحها شمنتظر
دخل وسد الباب
... كرار هسه خلينا انفوت اريد احجي وياج مصدكت صرنا وحدنا
... كرار مو وكت سوالفك صير عاقل
... لج بابا العنده مثلج يظل عقل براسة
... ياااا ليش شبيه شنو خبلتك مو ادري
... موبس خبلتيني حركتي اهل اهلي
... دخل كعد بالهول وصاحلي اكعد يمه
خايفة منه مبين من شكلة نيتة مو صافية كتلة ماااه ما اجي عفية روح صيحلي اصال
... هسه شخبصتيني باصال قابل هي طفلة لو باقية بالشارع وخايفة عليها
... انغثيت من كلامة كتلة هاي بعدك بالبداية وضجت منها اني من اول لحظة فهمتك وكتلك اصال رقم واحد بحياتي اليمسها يمسني مستعدة اتخلى عن الدنيا كلها الخاطرها
... وتتخلين عني؟
... اذا انحطيت بهذا الموقف والازم اختار احد بيكم بدون تردد اختارها
كرار احنا بعدنا على البر اذا دتشوف نفسك ممستعد تتحملها من هسه كول حتى كل واحد يروح بدرب
... هيجي سهل عندج تعوفيني على العموم انتي فهمتيني غلط وحجيتي كلام اني مكايلة ردت اخذ راحتي وياج ونكعد نسوالف
انتي فهمتي كلامي على مزاجج ودخلتينا بمواضيع مالها اي لازم اني من اول لحظة تعهد اربي اصال وياج وانطيتج كلمة واني كد كلمتي وما اتراجع عنها
... هذا هو مصار شي سد الموضوع
... اني زعلت واريد تراضيني
... هههههه مو كتلك صير عاقل
... رب الحلو شكو واكفة هلكد بعيد عني
احد كايلج بيه جرب شو تعالي يمي
..حركت جتفي بمعنى لا ما اجي
... المثل يكول المايجيك انت روحلة وتعب رجلك ولاتعب لسانك
... اجة تقدم عليه ردت انهزم منه لزمني جنت قريبة من الغرفة سحبني من ايدي دخلني للغرفة
همست كرار اشدتسوي ردت افلت ايده واطلع حضني وقيد جسمي
دكات گلبي زادت ما اعرف من الخوف لو الخجل
اكو بالغرفة جرباية ام النفر كعد وجرني كعدني بحضنة
جر الحجاب من راسي وفتح شعري غرس اصابعة بين خصلات شعري
كرار همس شبيج متقيدة اني رجلج ما اريد تستحين مني
.. وراه العرس سوي اليعجبك هسه لا فدوة عوفني ردت اكوم باسني من شفايفي بقوة حتى النفس انكطع ايده تتلمس جسمي اختنكت واشمئزيت اذكرت اكرم من جان يجبرني وياذيني
دفعتة من صدرة قوي وهو ولا يزحزح راد ينومني على الجرباية كمت ابجي بهستريا وادفع بي صحى على نفسه وابتعد عني
قميصي الدكم اكثرهن مكطعة سديتة بيدي اريد استر نفسي
... اسف جنة وعلي مو قصدي ااذيج ما ادري ليش هيجي سويت فقدت السيطرة على روحي
..حجيت واني اشهك روووح منا ما اريد اشوفك
.. هاي شبيج جنة ترى اني زوجج ومصار شي ليش كل هالبجي
.. راد يجي يحضني كمت بسرعة
... اهدي يمعودة راح تموتين لاتخافين ما اجي يمج ورايح اجيبلج حبيبة گلبج
... معليك بيها اني عود اروح اجيبها
...براحتج لاتزعلين مني حبيبتي ما اكدر اطلع واعوفج زعلانة
... مسحت دموعي مزعلانة
... متاكدة
.. اي
.. لعد طيني بوسة
.. كرارررررر
... ههههههههه اشاقة وياج ياروح كرار
يلا اني رايح تعالي سدي الباب وراي
.. راح كرار رجعت بجيت مدري ليش گلبي ممرتاحلة مسحت دموعي كمت بدلت وغسلت ورحت على اصال خالة والبنات من شافوني باركولي بعدها اخذت اصال ورجعت
باليل اجتي اميرة يمي.
.. جنونة شبيج شو مو على بعضج من اجيتنا الظهر حسيتج مو طبيعية
... حجيتلها على امة وخواتة وشلون استقبلوني
... يااا هذن شبيهن يلا لاتضوجين هما حيشيلون وتخلصين منهم
... هم زين ما اعيش وياهم بنفس البيت جان اكلوني
... مممم معقولة بس هذا الغاثج اني الاعرفة انتي متهتمين الهيجي امور لان مريتي بمواقف اصعب. منهن وتحملتي
... تنهدت تصرفات كرار متعجبني وخايفة منه
.. ليش شبي شسوة؟
... حجيتلها على كلامة بخصوص اصال وختمتها بسوايتة السواها وياي
... لاتظلمي يجوز فهمتي غلط انتي من كثر حبج الها تتحسسين من موضوع يخصها
اما علمود السوا ترى شغلة عادية تصير بين المخطوبين وهو زوجج الصار لاعيب ولا حرام
.. ما ادري يمكن كلامج صح بس ما احب يلمسني قبل العرس اذا اتركة براحتة راح يتمادى اكثر
يجوز لان اني مطلقة عبالة عادي راح اقبل بهالشي
... انتي بهدوء فهمي وكوليلة ما احب هالشغلات لازم تصبر الحد ميصير العرس
... اكثر من مرة كرار حاول يعيد السوا واني امنعة اخير شي زعلت منه ومن يومها بعد مكررها
العرس تأجل لان اهله التهوا بالشيلة للديوانية مقبلوا ينتظرون الورا العرس
شغلي استمريت بي متركتة علاقة اصال وكرار متوترة ادري بيها متحبه وموطايقتة
من يحجي وياها اجاوبة على كد السؤال
من يريد ياخذني نطلع اتوسل بيها تجي ويانة ترفض
كرار حالياً باقي ابيت عمة بيتهم بنفس المنطقة
وكل اسبوعين يروح الأهلة
امة حججها كثرت يومية اطلعلها سالفة حتى العرس يتاجل وكرار ابد ميكوللها لا
صارلنا خمس اشهر مخطوبين واحنا على نفس الوضع
خالة ام وليد كم مرة كعدت حجت ويا كالتلة خطوبتكم طولت ميصير هيجي انت شمنتظر اشو متبهذل ابيت عمك وهي عايشة وحدها والوضع ابد موزين
تمم العرس والتموا ابيت واحد احسن من هالبهذلة
كرار... خالة والله موبيدي امي مريضة شلون ازوج وهي بهالحالة
... اليسمعك يكول انتوا راح تسوون عرس ضخم هي زفة بسيطة وهو انت بيها وبلايها مو يم امك قابل مكابلها وكاعد حتى ميصير تزوج
... اني بعد يومين اروح للديوانية وافتح الموضوع ويا اهلي وان شاء الله خير
... خالة مقتنعت بكلامه بس سكتت
سافر كرار ومن رجع كال بهالشهر نزوج
واتفق وياي يعيش ويانة بنفس البيت العايشة بي وهو اليدفع اجار
وقبل العرس بأسبوعين مات خالة وتأجل كولشي
من رجع كرار من الفاتحة جان عنده موبايل مشتري جديد
كالي احجي ويا امي واخذي من خاطرها اتصل عليها حجة وياها وانطانيا
سلمت عليها واخذت من خاطرها اشو هاي ذبتلي كلام مثل السم
اتكولي سودة عليه اخوي بعده بحيلة وراح منا مدري يابومة من لفتنا كرطت راسة
عرفتها تقصدني نهيت المكالمة واني ميتة قهر يمكن صدوك اني فكر وهيجي صار بيهم
كرار.. شبيج حبيبتي
.. لامابية شي انقهرت على امك
... اي والله لوتشوفين حالها شصاير بيها انكسر ظهرها عليه ضغطها من القهر ماينزل
.. الله يصبركم
رجع العرس تاجل وهالمرة لازم ننتظر سنة
منعت كرار يجي على بيتي اذا يريد يشوفني نطلع بمكان عام لان الناس اذا اتشوفة طاب طالع مراح يسكتون لو حتى هو خطيبي هم يبقون يحجون
.اصال.. اليوم خميس جنونة واميرة عدهن عروسة وهواي مرافقات وياها التهن بيهن
. اني كاعدة على صفحة شوية اتفرج عليهن وشوية اقرأ
اكو مرة عجوز اجت جابتلهن اكل وظلت كاعدة المرة كولش جبيرة بالعمر ووجها كولة دكات
صفنت عليه كالت تعالي يمي تقربت كعدت يمها
... شسوين اهنا انتي عروس
.. يااا شنو عروس اني اخت جنة واشرتلها على جنة
... وشمالج اخترعتي وشبيها العروس
... مابيها بس اني بعدني صغيرة ويني وين الزواج
... فلك طرجن يالمكارات ادري بيجن مفلفلات على الزواج ومن واحد يسالجن تتعايرن
.. عززززا اني مفلفلة عيب خالة شنو هالحجي ما ارد عليج لان مرة جبيرة
... لا خايبة ردي واخذيلج كفخة
... خرب هاي شبيها لا العفو خالة واعتذر اذا تجاوزت
... اي صيري ادمية انتي ليش مامزوجة
... يبوووو هاي جلبت اني طالبة وبعدني صغيرة شزوج
... انه من جنت بعمرج حميز يلبط ابطني
... شنو يلبط
... امداج يالثولة يعني يروح هيج ويجي هيج
... اهاا يعني يتحرك
... اي شوفي انه من جنت بعمرج اعرف اطبخ واعجن واخبز وشايلة البيت على راسي وبيوم اجانة كويظم يبووو الزلمة بس شافني تسودن كض ابوي من ايده وكالة رايدها واذا ماتنطوها اسوي عليها دموم
... عجبتني السالفة الابتسامة شكت حلكي اي اي وبعدين شصار
.... ابوي كال كبع واخذ وين الكي احسن منك
... انه من دريت كويظم خطبني گلبي رجف رجيف من الفرحة عبن هو حليو وهيبة
بيوم الزفة لبست البدلة مكركشة تخبل امي خيطتها الي عبن انه زغيرة ماكو على كدي وكلشي ماعندي لا **** ولا **** ممسوحات مسح
... ياااا عزززا اشكد عيب
جنة.... اكو بنية جوا ايدي دامكيجها جنت كل شوية ارفع راسي اشوف اصال دتقرأ لولا شفتها كاعدة ويا مرة عجوز سمعتها تسوالف وياها وترزل بيها جنت اضحك على سوالفها اشو هاي دخلت بالعميق
فتحت عيني وحلكي على حجايتها الظاهر اميرة هم منتبها باوعت عليه
واصال مكيفة وخربانة ضحك
كتلها اصال رجعي اقري
.... كملت عوفيني هسه اي خالة كملي وبعدين شصار
.... زفوني لكويظم كعدت بالغرفة انتظره وعودن انه شنو مستحية ومنزلة راسي وانه بگلبي اريده بس يجي
دخل كويظم يمممممه يخبل
ادنة مني وكعد كال رفعي راسج اريد اعاين بعيونج
رفعت راسي
... كال محد طيحني بيج غير هالعيون جنهن عيون الغزلان
.... اوكفي خالة خلي اشوف عيونج هنا هذن عيون الغزال ليش مو عيون البومة احسن
.... سودة بوجهج انه بومة يالهايشة
.. هههههه لا مو انتي بومة قصدت عيونج كبار مثل عيونها يلا كملي
جنة... اصاااال كومي عاد مو راح ابتلي بيج
... هسه اني شمسوية مو هياتني كاعدة كبالج وين انطي وجهي
... خايبة شمالج روحج بخشمج خلينا نسوالف
.. اي اي سوالفي معليج بيها سشوا كويظم من شاف عيون الغزال
.... جاااا كولي شني الماسوا الزلمة تسودن وعلي ظل يبلعم ويرجف رجيف عليه وانه عودن شنو اتنعوص وانوعم بصوتي واتمضحك ههههه وههههه لا كويظم لاتكضني استحي
كال خرب روح ابو كويظم تعالي ومطكني مطكة هيج ام الطكة حتى الحمرا الجنت فرحانة بيها انمسحت
جنة.. والكعبة اصال اذا مكمتي اجي امطكج براشدي افر راسج فر
.... خووو انتي جلبتي فديوم اهج واروح يم كويظم من وراج
....سودة بوجهي كويظم صارلة سنين بالگبر راح وماتهنيت بي
اميرة... حقة يروح هديتي حيلة ممنطيتة ممفكة بالمطك هههههه
.... ولاتستحن انه بكد امجن يالمكموعات
... وداعتج خالة انتي حتى اكبر من بيبتي الله يرحمها
... خمسة وخميسة قل اعوذ برب الفلق
... هههههههه الله يطول بعمرج لاتخافين ما احسدج
... تعالي يالمكموعة اكملج
جنة.. فدوة العينج حجية شتكمليلها
... خايبة خلي تتعلم بكد الهايشة وكلشي متعرف
... ميحتاج تبقة ثولة احسن
خزرت اصال ورجعت كملت شغلي
التهيت امكيج ابنية مدنجة عليها سمعت صوت رجفني من الخوف والصدمة شلت راسي شفت وجها بنعكاس المرآيا اي هاي هي. واني ممتوهمة ولا حلمانة
مرجانة... شلونج جنة.......