تحميل رواية «بنات الغجرية» PDF

_بنات الغجرية _

( بقلم بسمة البياتي)

_البارت التاسع  والعشرون _

جنة...بديت اتأقلم ويا حياتي بدون أصال صح كولشي بالبيت يذكرني بيها وبسوالفها بس ارجع اصبر روحي واكول هي بعد ازوجت ومكانها الطبيعي بيت زوجها

اميرة يمي متعوفني ابات وحدي ابد.

كبرنا الصالون وسوينا ديكورات جديدة وجبنا بعد عاملات صار عدنا ست عاملات لان ما شاء الزبونات هواي ومدنلحك كرست وقتي كله للشغل

من اتصل على اصال واحجي وياها احسها مهمومة اشكد اسألها شبيج اتكولي مابية شي بس مشتاقتلج

گلبي ممرتاح اصال ربت على ايدي متأكدة ضامة عليه شي عفتها براحتها يجي يوم وتحجيلي

اميرة اتكولي انتي من كثر حبج الها وخوفج عليها  كمتي توهوسين

گلبي ابد ميقتنع بهالكلام واني متأكدة گلبي ميكذب عليه

أميرة... جنة مفكرتي بطلب ام سهاد

... ميحتاج افكر اني انطيت جوابي

.... هسه بس على الأقل شوفي واحجي ويا بلكي تقتنعين بي

... رحمه الأهلج شقتنع رجال مزوج وعنده اطفال كل عقلج تريدين اوافق عليه

....  ما دام جايج من الباب ومستعد ينفذ كل طلباتج ويصونج شكو بيها الى متى تبقين وحدج اصال وأزوجت انتي هم لأزم تشوفين حياتج

.... اني راضية بعيشتي وادري بنفسي ثقلت عليج انتي ممجبورة يومية تجين تباتين عندي

... لا لهنا وكافي هاي من صدوك تحجين والكعبة زعلت منج

الظاهر انتي فهمتي كلامي على مزاجج ترى من كتلج ميصير تبقين وحدج مجان قصدي اني ضايجة من بقيتي عندج بالعكس والله مرتاحة وتعودت عليج واكثر وحدة راح تضوج اذا ازوجتي هي اني

وبنفس الوقت اريدج تستقرين وتصير عندج عائلة وطفل يسندج من تكبرين

... لج والله ادري بكل هذا الكلام بس موبيدي مرات اخجل من نفسي لان هواي داثقل عليكم

.... ليش يمه شنو شايلج على رأسنا لو عايشة من خيرنا واحنا نصرف عليج اشش كلامج ابد ممقبول

.... هههههه اكلتيني حاصل فاصل عمي سكتت

وبخصوص العريس انتي شلون ترضيها اخرب بيتا

زين مرتة واطفالة شنو ذنبهم اهجم بيتهم

.... ام سهاد مو كالت مرتة موافقة واذا انتي وافقتي هي بنفسها تجي تخطبج اله وهي بيتها وحدها وانتي وحدج

.... بربج وين اكو مرة ترضى زوجها يزوج عليها اكيد ضاغط عليها ومهددها ويمكن هو شالع گلبها بس تريد تخلص منه وتشمرة على غيرها

واني عاد حظي شلونه يخبل ياهو السكط يجيبة عليه

... خرب يومج اشكد بومة تبجين بوجه العباس لعبتي نفسي بهذا تفكيرج السكط

... تفكيري هو الصح الزلم مينحزرون هاي كدامج يومية نسمع سوالف من النسوان تشيب الرأس كل هذا الأسمعة وتريديني ما اتشائم

.. براحتج ان شاء الله يجيج الأحسن منه

.... ام سهاد ظلت يومية تجي تفتح الموضوع وياي واني ارفض خالة ام وليد شجعتني على قراري كالت انتي شناقصج حتى تاخذين مزوج لو بي خير مجان مرتة تريد تخطبله

سديت الموضوع نهائياً ويا ام سهاد وطلبت منها بعد متفتحة وياي

اليوم باليل اميرة بالغرفة دتنوم ليث واني كاعدة بالهول بيدي الفون اتفرج على فيديو تسريحات شعر

اندكت الباب عبالي وحدة من البنات كمت لبست الشال وكفت يم الباب وكلت منو

اجاني صوت اشمئز منه

فتحت الباب  ونترت بغضب شجابج انتي مناوية تجوزين مني

.... خليني افوت ترى حيل مابيه ومناقصة مشاكل ولغوة زايدة

... رجعي منين مجيتي ما اريد تنكسين بيتي

كامت تبجي وتضرب على خدها صاحت وين اولي داكولج تعبانة والكائنات تعبانة

اميرة اجت يمنا كالت جنة خليها تفوت الناس راح يطلعون من صوتها

وخرت من كدام الباب وفاتت كعدت بالهول ونصبتها مناحة

اني واميرة صافنات عليها هاي شبيها اول مرة اشوف مرجانة هيجي منهارة وتعبانة

اميرة...منو ميتلج شبيج  تملخين بروحج

مرجانة...اني تصخمت وتعزيت ضاع تعب السنين صفيت على الحديدة

جنة... لو تحجين شبيج لو تكومين اطلعين اني مناقصة بلاويج بخيرهم مخيروني بس بالمصايب تجين تركضين عليه

....باكوني الكواو.. مبقوا عليه شي صفيت اني والماكو سوا

.... رجعت تلطم وتبجي

كتلها منو هما وشباكو منج؟

... وحدة كح.. اتفقت ويا صاحبها الكو... باكونا اني وساهرة وانهزموا ذهبي وفلوسي كلهن راحن

.... ابتسمت بشماتة اذكرت من باكت ذهبي وحركت گلبي مثل ما هسه گلبها محروك ويمكن هي متعذبة اكثر

كتلها الدنيا دوارة كما تدن تدان تذكرين من بگتيني والله اليعلم بعد من منو هم بايكة وحاركة گلوبهم شربي من نفس الكاس الشربتي الغيرج

.. بنت الكلب شمتانة بيه هاي بدال متواسيني وتوكفين وياي

.... وشلون اواسيج اجي افتحلج ايدي واخذج الحضني واطبطب عليج واكولج لاتنقهرين فدوة ألج

راحن هذن يجن غيرهن بعدح بحيلج تكدرين تعوضيهن

احسن شي رجعي يم ساهرة وتكابلن وكعدن لطمن سوا لان خسارتكم وحدة

.... اريد ابقة اهنا ارتاح جم يوم اذا ارجع اهناك اموت من القهر

.... للأسف اني مفاتحة فندق ابلاش وانتي بالذات وجودج ممرحب بي راح اسمحلج بس هاليلة تبقين لان تاخر الوقت وباجر من الصبح تطلعين وما اريد بعد تشوفيني وجهج

...  متصيرلج جارة تبقين خبيثة على ابوج لوميتة ولا مخلفة عار مثلج

..اي والله لو ميتة ولا باقية لهسه على الأقل جان ارتاحوا الناس منج ومن قذارتج

اميرة.. جنة كومي دخلي للغرفة اني اجيبلها فراش

جريتها من ايدها وبالكوة دخلتها للغرفة

لج شبيج مدتشوفيها صايرة نار تروح تخلي قهرها بيج

.. طبها طوب شجابها عليه لج بالقرآن معندي قطرة حنية عليها اختنك من اشوفها

... ميخالف اتحمليها بس هالليلة وباجر طرديها

.... والله فرحانة وشمتانة بيها

.... ههههههه مبين هاجمين بيتها الله اليعلم اشكد بايگين منها

.... كلهن فلوس حرام اكيد ميبقن وتتهنى بيهن

راحت اميرة فرشتلها ظليت للصبح كاعدة كل شوية اكوم امد راسي من باب الغرفة اشوفها شسوي اخاف منها وما ارتاح الوجودها

صار الصبح مرادت تروح تعارك وياها وطردتها

اصال... قربت العطلة تخلص وضعي ويا رضا نفسة اشكد حاولت الفت انتباها ماكو فايدة جنت البس اتمكيج اكشخ ادلع وهو عبالك حجارة

صرت احسد صاحبتة شنو من حب يحبها كمت اتمنى اشوفها واشوف شكلها

اني وام رضا نار وبانزين يومية كابة عركة بينا بالبداية جنت اسكتلها اكول مرة جببرة

بس طفح الكيل وخلصت طاقتي منا ابنها ومنا هي بعد مكدرت اتحمل

هي لوتية من يجي عمو فاضل تصير انعم من الكطن وياي ومن يطلع تكشر عن انيابها

بالبداية من شافتني اسكتلها حبت تستغل هالشي وكعدت تتأمر وتتشرط عليه

... بعد من ساعة سبعة تكعدين تنظفين وتساعدينا بالخبز والطبخ

     احد كايلج اني خدامة مالتكم لو ماخذيني فصلية

... غصباً عليج جاااا اذا متتحملين مسؤولية ليش ازوجتي

...عادي اشتغل حالي حال بناتج وجناينج مو اكعد من الصبح استلم الشغل وحدي عبالك اني البنكالية مالت الخلفوكم

... اشكد وكحة وادبسز ولو انتي تربية مرجانة وخالتج اكيد هيج اطلعين

..  اذا بعد جبتي طاري خالتي بخير او شر اهجم البيت عليكم وهسه اخابر ابوية وعمي خلي هما يجون يلكولي حل وياج

من سمعت راح اتصل عليهم جرت بوش وبناتها طلبن مني اسكت وما اسوي مشاكل

ومن هاليوم بدت المعارك بينا

رضا غنده اربع اخوان ثلاثة اكبر منه مزوجين اثنين منهم طالعين بيوت وحدهم بس طول النهار عدنا

وكت النومة يروحون لبيوتهم والثالث عايش ويا اهلة وماخذ بنت خالتة مرتة حية مثل خالتها

والولد الرابع اصغر من رضا

وعندة ثلاث خوات اثنين مزوجات  ووحدة بكدي طالبة

البيت العايشين بي بيت جدي الله يرحمه

بيبي وياهم مرة حيل جبيرة بالكوة تتحرك فقيرة ومن اهل الله

بنين تهتم بيها يومية تجي هي اداريها متقبل وحدة غيرها تهتم بأمها

باهر رغم عمره اربعين بعده ممزوج وعنده بيت وحدة

و اكثر وقتة لو بالمكتب والمحكمة لو يجي يم امه او يم منصف

ئ

اليوم المغرب كاعدة بغرفتي وهموم الدنيا على گلبي رضا مموجود

اندكت باب الغرفة دخل سيوفي

مشتاقتلة صارلي اهواي محاجة ويا كمت بوستة

هاي وينك مو جنت اتكول ما اعوفج واني بظهرج اشو صاير حتى سؤال متسأل عليه

... اطلع ويا ابوي للشغل وارجع المغرب اروح اشوف امي ومن ارجع نعسان انام

.... ممممم معذور حبيبي حسيتة مرتبك يريد يكول شي بس خايف

شبيك سيوفي رايد شي احجي لا تستحي

.. هاا انه اريد

.. اي شتريد

.. اريد. تحجين ويا ابوي يرد امي للبيت

... صفنت عليه شجاوبة يربي

زين انت ليش متحجي ويا وتطلب منه

... اشكد توسلت بي ومارضى يكول انساها

عفية اصال انتي احجي ويا  هو يحبج لان دوم يكول العمي باهر زهراء بعد ماتدخل الهذا البيت لان اذت بنتي وحجت عليها

انتي موتكولين احبك اذا تحبيني احجي ويا المدارس راح تبدي وانه ما اكدر اظل رايح جاي البيت خالتي لان رجل خالتي يضوج وحتى على اخواني يصيح ومايريدهم يبقون وامي كاعدة بس تبجي

... انقهرت عليه يحجي بصوت يرجف وعيونه متروسة دموع حقة يريد امه هو واخوانه شنو ذنبهم ينحرمون منها اذكرت من اخذوني من جنة شلون گلبي احترك على فراكها

لزمت وجها بكوف ايدي وبستة من خدودة الخاطرك اليوم اجي واحجي ويا

... الله عليج صدك تحجين

.. اي والله صدوك انت تدلل قابل كم سيوفي عندي

اجة حضني وانفجر بالبجي متت قهر عليه راح سيف ظليت انتظر الأفندي

من اجة ورا العشا كتلة اريد اروح البيت ابوية

عقد حواجبة بشك كال ليش رايحة شعندج

... قابل الا عندي شي يلا اروح ضايجة وأريد اروح اشوفة ابوي

زيارة عادية يصير لو ميصير

... اي شكو بيها روحي

.... غير توصلني لو تريد بهاليل اطلع وحدي

.. هسه تعبان باجر روحيلة

... حجيت بگلبي يعني متتعب من السهر للفجر بس تتعب اذا اخذتني

نترت ترى المسافة قصيرة من شنو تتعب

... احجي عدل لا افلش حلكج روحي العمي باهر قبل شوية سمعتة يريد يروح اهناك خلي ياخذج ويا

.... باوعت عليه بطرف عيني امده حظي وجمالة محسوب عليه رجال دزيت مسج الباهر جان بعده موجود كتلة انتظرني اجي وياك

لبست الصاية والشال ونزلت

طلعنا تمشينا اني ويا

.... شلونج بوية ورضا شلونة وياج

....تنهدت الحمد لله

.... بيج شي

.... لا قابل شبيه

.... خالتج شلونها؟

.. انداريت عليه باوعتلة بشك هههه شعجب يسال على خالتي

كتلة الحمدلله زينة بس والله شالعة گلبي

... ليش

.... جايها عريس ومدتوافق

.... ها ومنو هذا ومنين

... اخو وحدة من زبونات الصالون كاتلة روحها عليها ويومية تجي تقنعها وجنة قافلة اتكول ما اريد ازوج

.... اي عوفيها براحتها اهم شي هي تكون مقتنعة هذا زواج مو لعب

... ابتسمت حجيت بداخلي والله وراك سالفة ولأزم اعرفها كتلة اي هو هسه الموضوع انسد ولو هي كل يوم والثاني رايدها وهي ترفض

اكول بهوري

.... بهوري ابنج الصغير

.... ههههه ولايهمك عمو بهوري انت ليش لهسه ممزوج البعمرك جهالهم بطولهم

.... ها فكيتي ياخة من خالتج درتي عليه بوية شنو سالفتج احد شاكيلج وكايلج نريد نعرس خليج بحالج بنتي

... ياااا هاي شبيك ترى مكتلك عندي عروسة الك داكولك ليش ممزوج ركز على السؤال رجاءا

... وصلنا فوتي وكرميني بسكوتج

... دخلنا للبيت منصف من شافني الفرحة بينت عليه كام لحيلة حضني وباسني

.... هلا بوية توة البيت نور

... البيت منور باهلة

.... وانتي اهلة وناسة

باهر... والمزهرية الواكفة كدامك ماكو الها سلام

.. قبل ساعة جنت مكابلك لو هي غيرة

اصال.. كعدنا نسولف سالني شلونه وضعي وشلونهم وياي رضا شلونة وياج مرتاحة لو لا واني جوابي بس كلمة وحدة  الحمد لله

منصف... راح ادز باهر البغداد يمشي بمعاملة النقل لان ماظل شي للدوام

.... فرحت اي والله ياريت اني هم الموضوع على بالي وردت اكولك بس انت سبقتني

... لاتخافين انه ماناسي راح اخابر جنة حتى من يروح باهر ادلي على مدرستج

.... ماشي ان شاء الله

ابو سيوفي عندي سالفة وياك

باهر.... شلون. طلابة هاي يابة بالعباس هذا ابوج والحسين ابوج ابو سبوفي شنو

.... اهوووو هم حجة اني صوجي جبتك وياي

.... اي مو جاهل جارتني من ايدي وجايبتني وياج

منصف.. هسه انه راضي انت شكو ضايج

كملي بوية معليج بي شردتي تحجين

.... خررب حتى الكلام طيرة من راسي

اي اذكرت ليش مترجع زهراء

صفنوا عليه

... عوفج من هالسالفة زهراء بعد مالها عيشة بهالبيت

.... فدوة اسمعني مو الخاطرها الخاطر الجهال. شنو ذنبهم ينحرمون من امهم هي غلطت واخذت جزاءها وهذا جان درس الها لهنا وكافي رجعها ولدك بعدهم صغار ومحتاجين امهم

... بوية ترى السوتة زهراء مو شي سهل وعادي

اول شي طلعت اسرار بيتها ثاني شي وهو الاهم حجت عليج ورادت تشوه سمعتج لو غيري واحد يذبحها

... ميخالف المسامح كريم حتى لو متريد تحجي وياها عادي رجعها ولاتحجي وياها اهم شي اتكون يم ولدها ترعاهم وتهتم بيهم

باهر متحجي شبيك ساكت

... غير كاعد اسمعج طلعتي خوش تفكرين

خوية صح كلام بنتك ردها الخاطر ولدك

... اني ما اروح عليها اذا تريد هي ترجع وبعد اقل غلطة ما ارحمها

سيف. بفرح انه اخابرها واكللها تجي

اصال.. ظليت كاعدة شوية بعدين رجعت للبيت

الكل نايمين عبالك دجاج ينامون من وكت صعدت الغرفتي رضا مموجود تحسرت اووف ياربي الى متى ابقى متحملة هالوضعية الطايح حظها

اخذت ملابس رحت سبحت من طلعت جففت شعري ومشطة ودخلت لفراشي راسلت جنة والبنات وراها ظليت اتفرج فلم للساعة ثنتين

دخل رضا الوجه احمر والحواجب معكودات

بعدت نظري عنة رجعت اتفرج على الفلم

نتر كومي طلعيلي ملابس

عافاني وراح للحمام هزيت ايدي هذا شبي مبين يدور مشاكل

طلعتلة ملابس خليتهن على الجرباية ورجعت المكاني

طلع بس بالمنشفة درت راسي عنه مستحية من هذا شكلة

بدل واجة تمدد ظل. يتفرج وياي

ظلينا نتفرج واحنا ساكتين اني بالي اصلاً مو يم الفلم

يومية رضا يسهر للفجر اشعجب اجة من وكت وحتى الفون شامرة بعيد

خلص الفلم راح طفى البلازما ورجع للفراش انطيتة ظهري غمضت اريد انام حسيتة صار قريب مني صدره لزك بظهري وانفاسة الحارة تلفح على رگبتي توترت وتشنجت ما اعرف شسوي لو شلون اتصرف هذا شبي مو بأذني سمعتة وعد حبيبتة بعد ميجي يمي

رضا... انداري عليه

...نعسانة اريد انام

... نامي بس مو هسه

...دارني عليه وجها صار مقابيل وجهي مشى ايده على خدي بلعت ريك يااا شجا هذا

.... ليش عيونج هلكد حلوة مجنت مركز عليهن قبل

... حجيت بگلبي شتركز اذا انت حتى متباوع بوجهي ظليت ساكتة مستغربة من تصرفاتة بلكي الله هداه

اخذ شفايفي بين شفايفة يبوووو مدري شصار بيه احس دخت ما اعرف ليش قربة يأثر بيه

ظل يوزع بوساتة على وجهي وشايفي وركبتي واني استسلمت اله واللمساتة

اتقرب مني بلهفة ولا عبالك هو نفسة الجان مثل الحجارة

ابتعد مني انطاني ظهرة ونام

خرب ولاتصيرلة جارة اني هم غفيت

الفجر فزيت على صوت طكطة يمي فتحت تك عين لكيتة كاعد وبيده الفون اخذه وراح للحمام

كرهتة وكرهت نفسي

كمت وكفت يم باب الحمام سمعتة يحجي ويراضي بيها

هسه يلا عرفت شنو سبب تصرفاتة الغريبة طلع الافندي متعارك وياها واجة عليه عناد بيها

رجعت لفراشي خليت المخدة على راسي وطكيت بجي

كمل مكالمة ورجع يريد ينخمد

كمت كعدت والشرار يطلع مني لهنا وكافي

نترت شششنو اني لعبة بيدك اذا مرايدني شششكو ازوجتني

..... اششش نصي صوتج نايمين لايكعدون

.... اني اريدهم يكعدون ويشوفولي حل لهذا الزضع الكسيف

... هسه انتي شرايدة

.... ليش ازوجتني ودمرت حياتي

.....بدال هذا الصياح لازم تشكريني لان مخليتج علج بحلك الناس

... ينكص لسانة اليحجي اني اشرف من كل واحد يحجي عليه كلمة

.... لادوخيني بدال هذا الكلام جان انتي رفضتي وفكيتني منج

..... اني الرجال لو انت تدري بنفسك تحب غير وحدة ومتكدر تعوفها شكو ورطتني وياك

.... ابوية ضغط عليه مكدرت ارفض وانه البنية احبها من اول سنة الي بالكلية لاتتوقعين مني اعوفها

  .. لعد ما صخمت وجهك وتزوجتها اذا هلكد تحبها

.... طلبتها اكثر من مرة واهلها منطوها لان اني ابن شيوخ وعشاير وهما عائلة منفتحة وحياتهم تختلف عنه

.... وهسه اني شنو مصيري

.... كعدي وسكتي اتحمليني مثل ما اني متحملج ولاتفكرين تحجين شي الاحد او ادورين طلاك ثقي هالشي راح يضرج ميضرني

.... كمت ابجي الله لايوفقك مثل ما دمرتني اياك بعد تحاول تلمسني افضحك والله واخلي الميشتري يتفرج

.... اطمني انه اصلا راح ارجع الدوامي ونادرا انزل اجازة

.

.. خفتا وراحا

رجعت تمددت واني گلبي يبجي دم موبس عيوني

مر يومين اني ورضا واحد ميباوع بوجه الثاني

صعدت بنين يمي

سالتها زهراء رجعت لو بعدها؟

... اي رجعت ههههه صايرة فقيرة ومينسمعلها حس

.... الله يهديها زين منصف يحجي وياها لو لا؟

... لا ولايباوع بوجها وهي تحير شتسوي حتى تراضي

باجر باهر يروح البغداد

.... اي ادري كالي

صدوك سؤال باهر ليش لهسه ممزوج؟

.... خايبة سكتي وخليها سالفتة سالفة هالمسكين

... اي احجيلي شنو هي اني هم احس اكو شي

.... شوفي حبيبة انه ابوية الله يرحمه عقليتة قديمة وشيكول لازم انفذ واهم شرط مخليلنا ماكو زواج من خارج العشيرة لازم كلنا نأخذ گرايب وماتدخل غريبة بينا

واول واحد كسر  هالقاعدة هو أبوج بيوم الحب امج الله يرحمها

وابوي من درة بي انگلبت الدنيا وصارت مشاكل يابو مشاكل

بعدها باهر من دخل كلية حب وحدة هناك ورادها وابوي من عرف تعارك ويا وحتى طردة من البيت لان بنت عمي من هي صغيرة مسميا على اسمه والكل يعرف ميادة الباهر

وهو سودة علية يتخبل منها يكول هاي مثل اختي لو اموت ما اخذها

حاول يقنع ابوي وماكو فايدة حبيبتة اجت قسمتها وازوجت

وباهر وكف كدام ابوي وكال انت مارضيت اخذ البت الردتها بس لاتتوقع راح اخذ بنت اخوك لو اعرف اظل طول عمري بدون زواج ما اخذها

ميادة تحبة ماترضى بغيرة شكم مرة كاللها ازوجي ولاتنتظريني اني ما افيدج لاتضيعين عمرج علمودي وهي مجلبة بي والحد يومنا هذا باقية بلايا زواج وبسببها باهر الهسه مايكدر يزوج

.... ياااا شنو هاي عبالك فلم بس ابوج مات  ليش ميكدر ياخذ غيرها

..... العشيرة شمروا اللوم عليه يكولون البت عنست بسببك بعد منو ياخذها

وهسه اذا فكر بغيرها تصير مشاكل

... ايييييع شهالتخلف هذا بسبب هاي الافكار الهمجية ضاع مستقبلة ومستقبلها

جنة... اتصل عليه منصف. كال اخوية راح يجي عليج اريدج ادلي على مدرسة اصال حتى يكمل معاملة نقلها

من الليل اتصل عليه رقم غريب عرفتة اخو منصف لان هو كال راح انطي رقمج اله

جاوبتة سلم عليه وعرف عن نفسه كال اذا تكدرين باجر الصبح اجيج حتى تاخذيني المدرستها

كتلة ماشي ان شاء الله

الصبح كعدت بدلت اميرة يمي كتلها ليش متجين ويانة داشوفها صعبة اصعد ويا بوحدنا

... يااا وانتي من شنو مستحية ترى الرجال محترم لاتخافين مراح ياكلج

.... عابتلج هسه اتي قابل كلت مو محترم بس والله داشوفها صعبة

.... لاصعبة ولا شي اني وعدت امي اروح وياها نتسوك ماتكدر وحدها حتى من نرجع نروح للصالون

... اوووف ماشي دك عليه كال اني بالباب

اخذت جنطتي وطلعت

ظليت واكفة محتارة وين اصعد عزززا مستحيل اصعد ويا كدام فتحت باب الورا وصعدت

سلمت عليه هو رد السلام سالني وين المدرسة

بديت ادلي جنت مرتبكة حيل وخجلانة

باهر...اصال تسلم عليج ودزتلج اغراض كالت انطيهن الجنتي

... رفعت راسي عليه من كال جنتي رجعت دنكت وعيني دمعت مشتاقتلها

... خوية بيج شي

.... لا مبيه فدوة العمرها هي شلونها وضعها شلونه

.... الحمدلله بخير اصال سبعة لاتخافين عليها

.... امانة ديربالك عليها ما اعرف ليش احس بيها شي

..... انه دوم يمها ماتاركها اطمئني

وانتي لاتحسبين نفسج بوحدج شوكت تحتاجينا احنا اخوتج

.... ونعم منكم الشي الوحيد الاحتاجة اديرون بالكم على أصال

.... بعيونة لاتخافين

..... وصلنا للمدرسة كمل بعض الاجراءات ورجعني للبيت انطاني الاغراض واني هم جنت مشتريتلها ملابس ومكياج كتلة لحظة انتظرني اجيبهن الك واعذرني لان ما اكدر اكولك ادخل تدري بيه عايشة الوحدي

.... معذورة خوية ومن حقج

..... رحت جبتهن اله وجبتلة مي انطيتة وراها شغل سيارتة وراح......

يتبع

_بنات الغجرية _

( بقلم بسمة البياتي)

_البارت الثلاثون  _

اصال..انقلت النفس المدرسة الداوم بيها ربى اخت رضا

رحت ويا بنين اخذت ملابس مدرسة وقرطاسية والاشياء الاحتاجها

رضا بدا يجهز نفسه حتى يروح البغداد

اشبع قهر من اشوف لهفة للروحة عبالك مسجون وانطوا افراج

يحير شيسوي اخذ احلى الملابس وراح للحلاق عبالك عريس

جنت احمس بروحي واضم بداخلي

باجر يسافر المغرب رجع من السوك بيده كومة غراض عافهن ودخل للحمام

صار عندي فضول كمت فتحتهن

تخبلت من شفتهن ملابس نسائية عطور اكسسورات وكلها مبينا اشياء غالية

كل قطعة احلى من الثانية

فتحت العلاكة الثانية بيها بوكس هدايا ملفوف بطريقة تجنن مكدرت افتحة واعرف شكو بداخلة

الدموع اتجمعن بعيني احترك گلبي عفتهن ورجعت المكاني

طلع من الحمام ينشف شعرة كال حظريلي جنطتي وطلعيلي ملابس ويا ملابسي الجديدة

نترت واني شعليه عندك ايد روح حظرها النفسك

خزرني كال شكو گالبة خلقتج مثل البومة اجفي الشر وامشي حظري ملابسي

.. اني معليه وانت متأمرني

بس لا مصدك اني زوجتك ولازم اخدمك

... لعد انتي شنو؟

... والله ضحكتني وبكل عين صلفة يسأل

... راح اسكت لان ما اريد اعكر مزاجي ولاخلفت عليج ما آريد شي منج

... اي احسن وقبل لاتروح وصي امك معليها بيه ولاتظل تجاوز عليه وعلى خالتي اذا قبل جنت اسكت هسه بعد ما اسكت

..... انتي اشكد وكحة بنت ابوج وطولي لسانج على امي والخلقج اجي من بغداد اجفص ابطنج

... وبصفتك منو وتمد ايدك عليه عزيزي انت مالك سلطة عليه الي بينا ورقة وبس لاتقدم ولاتاخر ويجي يوم تنتهي هاي المهزلة

... والحد ميجي هذاك اليوم تكعدين بأدب وتحترمين نفسج انه مستخطيج وعايفج على راحتج لاتخليني اشوفج شي مايعجبج

... ليش بعد عندك شي ممشوفنيا

.. اي هواي احذري مني

... اعصابي تفور سكتت مجاوبتة اعرف بنفسي اذا ابقة احجي مراح يعدي اليوم على خير

رضا حظر ملابسة وطلع  خابر  حبيبتة المكموعة وراها رجع انخمد

واني طول الليل ابجي الديصير بيه گلبي مديتحملة شنو الذنب السويتة واوكع بهيجي واحد

اخير شي غفيت ومن كعدت لكيتة ماكو رايح

غسلت ونزلت جواه روحي طافرة والدنيا طالعة من عيني

عمتي اول مشافتني استلمتني

...هلا بالمسعدة بعد وكت جان ظليتي نايمة ووكت الغدا نزلتي

الله يرضاها رجلها عنده سفر لكمة متكعد تسويلة ولاتشوفة شمحتاج ممحتاج

سودة عليه وليدي الله بلاك بقسمة مصخمة لو ظال عزابي ولا هالوكعة الوكعت بيها

... اني الله بلاني بناس مثلكم وبهاي القسمة المصخمة  عيني ام الأمير محد ضربكم على ايدكم وكاللكم تعالوا خطبوني اليسمعها يكول اني راكضة ورا ابنها

..... سمعتوها شلون تترادد وياي اشك هدومي شحجي وشكول العتب مو عليج العتب على تربيتج السكط

.... على اساس انتي عرفتي تربين

اني مليت وطكت روحي منج صعده الم ملابسي واروح البيت ابوي على شنو ابقة متحملتج

صعدت اجتي امال وجنتهم الجبيرة سعاد

يقنعن بيه ويتوسلن

سعاد. لاتكبرين السالفة عمتي مرة جبيرة وبحسبة امج لازم تتحمليها وميصير تجاوزين عليها الخاطر رجلج سمعي وسكتي

امال... امي ويا الكل هيج موبس وياج انتي طيعيها وشوفي شلون راح تحبج

.... ما اريد تحبي كل الاريده تعوفني بحالي على اي اساس تغلط على تربيتي ليش شبيها تربيتي

سعاد.. ونعم منج ومن تربيتج حبيبة الخاطرنا عوفي سالفة الروحة البيت ابوج ترى انتي مصارلج هواي من مزوجة اذا زعلتي الناس راح تحجي عليج

.... شخبصتوني بالناس يعني انداس ولازم اسكت الخاطر الناس

.امال... الناس ميعوفون احد بحاله خصوصا اذا بسمعون عروس تزعل الف عيب يطلعون بيها

.... ظلن يقنعن بيه واني متاكدة ميريدن ازعل علمود عمو فاضل لايعرف ويتعارك ويا عمتي

ظليت بغرفتي بس انزل من اجوع اكل واصعد وعمتي لو بيدها تشرب من دمي

بداه الدوام كمت اروح واجي ويا ربى هي ادبي واني علمي علاقتي بيها مو قوية بسبب امها لان ادري بيها تقرأ براسها عليه اني هم تركتها براحتها

عدنا خط بودينا ويرجعنا

اهتميت بدراستي وابتعدت عن الكل انزل وكت الشغل والأكل ومن اكمل اصعد ادرس

ومرات اذا يصعب عليه موضوع باهر يدرسني

بيت ابوية من يوم الرجعت زهراء بعد مدخلتة

منصف هو يجي عليه يشوفني

اما رضا من يوم الراح ما اعرف شي عنه لايتصل عليه ولا اتصل عليه

من يجي الليل واخلي راسي على المخدة اشبع بجي اتخايلة طول النهار وياها ويتغزل بيها واني وجودي وعدمه سوة

جنة من تتصل دوم تسألني شبيج انتي مو نفسها اصال القديمة اكو شي كاسرج ليش ماتحجيلي

اطمنها واني داخلي ينزف ما اريدها تشيل همي وتنقهر لان تحملت هواي قهر بسببي

يمر شهر ورا شهر و رضا ماكو سمعت من بنين

عمو فاضل متصل عليه ومتعارك ويا يكوله ليش متجي جم يوم تشوف مرتك اكو واحد يسوي سوايتك رحت وكلت عدولي

رضا متحجج بالدراسة والامتحانات يكوله دراستي صعبة مو مال اهملها وثاني شي الطريق طويل ما اكدر ابقة رايح جاي

عمو متعصب وسادة بوجها

بعدها بيومين جان يوم خميس من رجعت من الدوام الظهر قبل لا اصعد الغرفتي

مرة حسين اخو رضا كالت رجلج اجة

استغربت كتلها شوكت اجه ؟

هالة.... قبل ساعة تغدا وصعد يرتاح

... اها اوك

صعدت الدرج واني احجي ويا نفسي هه اكيد علمود ابو اجه مو علمودي

وصلت يم باب الغرفة سمعتة ديحجي ظليت متصنمة بمكاني اسمعة شلون يراضي ويقنع بيها الظاهر زعلانة لأن اجه

فتحت الباب بغضب وطبكتة بكل قوتي كمز من الصوت

باوعت عليه بغضب

... لج شبيج انتي مخبلة متكدرين اطبكي مثل الاوادم

.... كيفي غرفتي واني حره بيها معاجبك اطلع منها

واياك بعد تصيح عليه وانت فاتح الخط ويا العار مالتك

كام عليه بكل غضب ظلت واكفة بمكاني اجة لزمني من ايدي قوي شوية وتنخلع

.... هاي على منو تغلطين شنو ناوية على موتج اليوم

.؛ اغلط وبكيفي وحدة ساقطة بالنهار دايحة وياك وباليل مكالمات للصبح لاتجي تسويها شريفة براسي

.... اصااااال وعلي كلمة زايدة اشك حلكج

.... عوووف ايدي واطلع منا انت شجابك اني ماصدكت خلصت من شكولتك

كفخني على راسي حسيت دماغي اهتز

كمت اصرخ واملخ بي لك يا كلب يا حقير تضربني علمودها اليوم  افضحك ياساقط

من شافني تخبلت خلى ايده على حلكي يريدني اسكت

قيدني بايدة الثانية واتي ارافس واخمش بي

.... انعل يومج بطلي خبال انتي جبرتيني امد ايدي عليج

.... تعبت واختنكت اريده يهدني

.. لاتصيحين وانه اهدج خلينا نكعد نتفاهم

... هزيت راسي بالموافقة بس اريده يعوفني كمت ما اكدر اتنفس

عافني رجعت هجمت عليه اضرب بي نار شابة بيه شلون يمد ايده عليه

... خرب اهلج هم رجعت تخبلت

.... رجع قيدني كتلة وخر لاتمد ايدك عليه

... صيري عاقلة واعوفج انعل شرفج يبتلي على عمره اليندك بيج تعالي كعدي خلي نحجي بهدوء

اندكت باب الغرفة صوت امه كالت يمه رضا ليش صوتكم عالي

... يمه ماكو شي مرتي مشتاقتلي وحبت ترحب بيه

.... ششنو هذا يا... قبل لا اكمل رجع سد حلكي

امه نزلت

دفرت ايده لحظة بعد ما ابقة اهنا وخياساتك كلها راح احجيها اني على شنو متحملتك ومتحملة فذارتك

... وتالي ويا هالسان الزفر سكتي الخاطر العباس وخليني احجي

.... ليش انت هم الك عين وتحجي وياي

كلمة وحدة ما اسمع منك اني كايمة الم ملابسي رجال بس بالضرب كرة عين امك بيك

.... الصبر ياربي وتكولي ليش تضربني لج بابا انتي مرايده روحج استغفر الله اللهم طولج يا روح

... راحت روحك وانكسرت ايدك

... ههههه ما ادري اضحك لو انعل الساعة السودة الجيت بيها

بداعت خالتج سكتي شوية وخليني احجي وراها عود مسلتي بكيفج

.... شكو شتريد اتكول

..اتحمليني بس هاليومين وراها ارجع البغداد متشوفيني بطلي سالفة الزعل لاتكبرين الموضوع

... لا بربك كل هذا الدتسوي بيه واتكولي لاتكبرين الموضوع اكولك انت شارب شي الظاهر مو صاحي

...لا اله الا الله غير تبطل مو راح انشل من هالسان بس فهميني اذا زعلتي شراح تستفادين ترى محد راح يخليج تطلكين كعدي وسكتي وانه بعد معليه بيج تحمليني بس هالسنة وراها يحلها الحلال

.... تنفست بعمق اني هم ما اريد اروح يم زهراء اخاف تجيبلي مصيبة جديدة

... الووو وين صفنتي ها شكلتي

....ماشي راح اسكت هالمرة ومن هسه اكولك من تجي اهنا غصباً عليك تحترم وجودي مو كاعد بغرفتي وتحجي ويا صاحبتك العار

... ماشي

... و هااا شي مهم انت ما الك اي سلطة عليه اطلع اطب بكيفي مفهوم

... انجبي شنو طرطور كدامج اذا ويا اهلي واهلج عادي طلعي غير هالشي اكسر رجلج

... ايباه صارت عنده غيره وكام يكسر اني مو ذايحة مثل صاحبتك واطلع وحدي اكيد والبنات للسوك لو البيت ابوية

... اليوم شادة گرتج ويا صاحبتي ههههه اخاف تغارين

.... ششنو يمه من منو اغار هاي من كل عقلك ليش شناقصني واغار منها تروحولي فدوة انت وياها

.... الله لايوكع بشر بالسانج امي اتكولي وكحة وماصدكتها

....هو انت وامك نفس الصنف عبالك تطلبوني بثار شوف رضا اذا بعد فكرت تمد ايدك عليه وداعت جنة الي ماعندي اغلى منها اگلب عاليها واطيها واندمك على الساعة الفكرت تضربني بيها 

.... مو على اساس هسه انتي قصرتي دشوفي ايدي سويتها خريطة

... باوعتلة بطرف عيني كمت اخذت ملابس بدلت ونزلت تغديت

رضا بقى يومين وبهاليومين جان يجنبني يخاف لا اسويلة مشكلة

خلصت اجازتة ورجع

واني رجعت للدراسة والضيم عمتي

اليوم الشيخ مسوي عزيمة البيت من الصبح انخبص

نسوان العشيرة كلهن جايات

اني ظلبت بغرفتي اعرف اذا انزل عمتي مراح تفك ياخة مني ولأزم تغثني كدام الموجودين

قبل الغدا اجتني بنين نزلتني جواه

  زهراء ومرة رحيم هم موجودات مسلمت عليهن ولا باوعت بوجهن

كعدت وياالبنات صبوا للزلم وراها صبوا للنسوان

بنين كالت امشي نتغدا

دخلنا للربعة بالكوة لكينا مكان كعدنا بي

اباوع للأكل صواني متروسات خبز وتمن ولحم يسموا هبيط

بصراحة اول مرة اشوف هيجي شي اني ممتعودة على هيجي اكل اباوع على النسوان ياكلن بخمس اصابيعهن معدتي انگلبت

لزمت الخاشوكة وبالكوة ابلع اللكمة

بنين... شبيج حبيبة صافنة على الاكل شنو معجبج؟

... عمتي قريبة منا الظاهر سمعت كلام بنين

كالت حقها تصفن جااا هي وين شايفة هيج اكل

هي وخالتها ابغداد عايشات بالفگر

النسوان كلهن رفعن ىاسهن عليها

مرة رحيم رادتها من الله جاوبتها هههه لا عاب حلكج

بنين...شنو هذا هالحجي  ترى محد ميت من الجوع اصال وخالتها نازكات ممتعلمات على هيجي اكل

.... باوعت العمتي كتلها صح كلامج قابل وين اشوف هيجي اكل اني وخالتي اذا ناكل زيتونة نشبع بيها لان مثل مكالت عمه بنين احنا نازكات مو افات ناكل الاخضر واليابس

كمت من السفرة

بنين والنسوان كالن كعدي كملي اكلج لاتزعلين  عمتج تشاقة وياج مو قصدها

كتلهن لا علويش ازعل معدتي متتحمل هيجي اكل خلي عمتي تاكل حصتي اخاف حصتها متكفيها

عمتي اشتعلت بنار من سمعتني

عفتها وصعدت من دخلت للغرفة كمت ابجي

كلامها زرف گلبي

العصر باهر دز عليه جيت كعدت يمه كال بنين حجتلي الصار

وانه كلت الفاضل وهو مقصر بيها

بنيتي اي وكت تضوجج تعالي كليلي وانه اتصرف شحده اليغثج 

.. برطمت ما اعرف ليش هلكد تكرهني اني شمسويتلها بس فهمني

....بنت ابوها وبعد تحجي وياج كلمة

... فدوة العمرك

... بعد يومين رايح البغداد محتاجة شي اجيبه الج مناك

... گلبي فز من كال بغداد جاوبتة بالهفة شعجب تروح

.... انه قبل جنت اشتغل بمكتب محامي اهناك وهو دوم يدز عليه من تصير عنده قضاية هواي اروح اساعده

.... اهااا وكم يوم تبقة

.... خمس ايام او اسبوع 

..... حك راسة وحجة برتباك تريدين ادزين شي اخذة وياي الخالتج

... جاوبتة بصوت مخنوك اي اخذني اني

.... ودوامج شلون؟

... عادي اخذ اجازة فدوة اخذني وياك والله گلبي طاك عليها

... زين رجلج يرضى اخذج وياي

... اني احجي ويا واكوله فدوة حتاخذني لو لا

.... لاتبجين بوية اذا رضا قبل اكيد اخذج

.... من فرحتي شمرت نفسي بحضنة وابوس بخدة فدوة اشكد احبك 

..... هههههه اشكد حيالة

.... رحت الغرفتي اتصلت على رضا جاوبني متفاجئ

... شعجب متصلة

..... هاي بدال متكولي شلونج

.... هههه استغربت اول مرة تسويها

..... اريد اجي البغداد ويا باهر

... ليش شعندج؟

... شنو شعندي مشتاقة الخالتي  اريد اشوفها من يوم عرسنا الاكشر مشايفتها راح اموت عليها

..... ماشي روحي 

..... اوك يلا باي

.... محتاجة شي

.... قابل شحتاج منك

.... مو وجه نعمة يلا ولي

..... سديتة واني اغم بي

....باليل عمي ورحيم ومنصف وباهر واولادهم كاعدين بتعللون

نزلت جواه سلمت عليهم رحت يم منصف باسني من راسي وسوالي مكان كعدت بمه حاوط جتفي بيده وقربني عليه. الحد هذا اليوم اتمنى اكوله بابا بس ما اعرف شنو اليمنعني

كتلة من رخصتك ورخصة عمو اريد اروح ويا عمو باهر البغداد

باهر.... شنو هذا الاحترام هاي من شوكت صرت عمو

.... غير اخوانك كاعدين كلت عيب اصيحك باسمك

رحيم نتر وشعندج رايحة

..... اشوف خالتي مشتاقتلها

...انتي ليش ماتنسين بغداد

منصف... خوية ابو علي واذا راحت شكو بيها جنة امها الربتها وحتى رجلها اهناك

الشيخ... روحي بنتي ميحتاج تسالينة

.... تسلم عمو ربي يحفظك

منصف... رجلج عنده علم بروحتج

.... اي طبعاً استاذنت منه وكال عادي

.... هذا هو بوية روحي بس لاطولين لان بيوم الما اشوفج  تظل روحي تلوب عليج

.....لزمت ايده بستها وحضنته الله لايحرمني من حنيتك بابا

حسيتة رجف من كلتها رفعت راسي باوعت عليه عيونه تلمع ومختنك كال بروح امج عيدها

.... هههه غير انت بابا لو اني غلطانة

... اكيد ابوج ياروحة انتي

.... الكل صافنين ميعرفون شنو السالفة لان محد يدري اني لهسه مصايحتة بابا

باهر....بروح ابوية صرت اخاف اخذج وياي

لاتروح تنگلب بينا السيارة ونموت

منصف... اسم الله شبيك يمعود لاتخوفني ترى بالعباس ما اخليها تروح

الشيخ.. شنو هالفال شبيك تسودنت بهاليل

باهر....غير من سوالفها وحنانها النزل عليها فجأة اليكول راح تموت

منصف... باهرررر شبيك يمعود بوية لاترحين ويا متشوفي مثل البومة نغط

... يااا لا فدوة اريد اروح والله ازعل منك

الشيخ... الآعمار بيد الله وكلمن يموت بيومه عوفها تروح خليها تشوف خالتها

.. باوعت الباهر وسويتلة بسيطة بيدي وهو خربان ضحك

ثاني يوم الشيخ وبابا انطوني فلوس نزلت ويا بنين للسوك اشتربت هدايا الجنونة والخالة والبنات

وثاني يوم من ساعة ستة الصبح طلعنا بابا ظل يوصي باهر ديربالك عليها وسوق على كيف ههههه خبصة خبيصة باهر بكوله انه شورطني وحجيت

بالطريق كل شوية يتصل ويطمن

اني من دوخة السيارة كضيتها نوم هههههه

للظهر يلا صلنا

دخلنا بغداد طلعت راسي من الشباك واتنفس قووي افيش ياهوى بغداد يرد الروح لوبيدي انزل من السيارة وابوس ترابها.....

يتبع

صباح العافية حبايبي

شلونكم ان شاء الله الجميع بخير

اعرف من شفتوا الأشعار عبالكم بارت وراح تسبوني بقلبكم ههههههه

واعرف هواي داقصر وياكم لكن يشهد الله هاي القصة جداً تعبتني من بديت بيها ولهسه يومية طالعتلي سالفة الله عليكم تحملوني

كثير منكم طلبوا صور للأبطال  وصارلي اشكد ادور ومد الكي

راح انزللكم صورة الشبه بينهم كملامح مو اكثر لان صعب الكي نسخة طبق الاصل عنهم

جنة

اصال

باهر

رضا

مثل مكتلكم كملامح مو نسخة منهم

واشكركم جميعاً على التصويت والتفاعل الحلو

احبكم

تحياتي بسمه البياتي

_بنات الغجرية _

( بقلم بسمة البياتي)

_البارت الواحد والثلاثون  _

من وصلنا بغداد طلبت من باهر يأخذني للصالون لان جنة اكيد اهناك

هي الحد هسه متدري بجيتي حبيت افاجئها

باهر.. هذا الصالون التشغل بي جنة؟

.. اي هو ساعدني خلي انزل غراضي

.. لا عوفيهن  وين تاخذيهن  عود من ترجعين للبيت انه اجيبهن ألج

.. ضحكت بداخلي اويلي عليك عمي مبين واكع ومحد مسمي عليك ههههه ادري بي بس يريد يشوف جنه

ماشي يلا باي

نزلت من السيارة احس روحي ركضت قبل رجلي

باهر... على كيفج بوية راح توكعين امشي عدل منا الوادم

....اشرتلة روح معليك بيه

ظل يهز بيده ويضحك

دخلت للصالون انصدمت  ما شاء الله صاير اشكد حلو مكبري وديكورات جديدة وهواي عاملات يشتغلن بي

ومتروس نسوان الان اليوم خميس وهواي عروسات عدهم

واكفة بالباب وعيني ادور على جنة

اكو بنية شافتني كالت انتي من المرافقات لو عندج حجز؟

... لا هاي ولا هاي

...اعذرينا حبيبتي الحجز مقبط واليوم شغلنا بس للعرايس تعالي غير يوم

.. يااا هاي شبيها مخليها مثل الشرطي عبالك داخلة مركز شرطة مو صالون

اريد اجاوبها وجان المح جنة من بعيد واكفة ويا اميرة وفدمرة عفت البنية تحجي وركضت عليها

جنة... اليوم خميس الصالون ازدحام من الصبح نشتغل ومكسور ظهرنا كومة عروسات ومخطوبات ويا مرافقاتهن

جوه ايدي عروس دامكيجها امها لعبت بيه طوبة واكفة فوك راسي خلي من هذا طوخي هذا عدلي هذا اني طبعي ما اتعصب بسرعة واتحمل هواي بس هاي طلعتني من طوري

كلما امكيج بنتها تريد اطوخ اكثر

مكدرت اسكت انفجرت

اكولج عيني اذا انتي هلكد شاطرة بالمكياج وتعرفين كولشي ليش ممكيجتها انتي بدال هاي الفلوس الدفعتيها

ترى ميصير هيجي مجاي اكدر أركز بسببج

.. يااا شبيج ضجتي غير بنتي واريدها تطلع حلوة

... ومنو يكولج كثرة المكياج اطلع العروس حلوة ياعيني ترى المهرج بالسيرك هم يطوخ بالمكياج

  احنا نعرف شغلنا ونعرف شنو الي يلائم العروس كل وحدة حسب بشرتها وتدويرة وجها

اذا اجيب واحط راح تطلع شراح تطلع متكوليلي  ممكن تكعدين وتعوفيني اكمل شغلي

راحت كعدت

عدلت المكياج  بنتها من جديد ورا شوية وهم رجعت وكفت فوك راسي

متحملت عفت بنتها كلت هاهية ما اكمل بعد ميعجبج مكياجي اخذي بنتج وروحي اجت اميرة يمي هم حجت ويا المره

ام البنية كالت رجعي كملي اني راح اكعد معليه

كتلها ابد خلي وحدة غيري تكملها

اصال... تقربت من جنة وحضنت ظهرها فزت مفزوعة اندارت وشهكت حضنتها بقوة كتلها شبيها جنتي ضايجة

....ممصدكة الواكفة كدامي اصال لزمت وجها وابوس بي من كل مكان

لج هاي انتي صدوك كبالي لو من التعب كمت اتخيل

.... فدوة اروحلج لوتدرين اشكد مشتاقتلج وگلبي طاك عليج

.... ولج مو بكدي والله

اميرة.. كافي عوفيها خلي اسلم عليها

... حضنت اميرة وبوستها

اباوع الجنة ينزلن دموعها وبسرعة تمسحهن سألتني ويامن جبتي كتلها ويا باهر

جنة. كلت للمرة على هاي الفرحة البگلبي  راح اكمل بنتج واطلعها الج ملكة 

رجعت امكيج البنية عين يمها وعين على اصال

كل دقيقة اروح احضنها وارجع اكمل اريد بس الصالون يفرغ واكعد وياها

اميرة.... لج كعدي ارتاحي شكو جاي تفترين لوما جاية من طريق شطولة

... وداعتج كضيتة نوم ولج اصلاً من دخلت بغداد وشميت هواها صارت عندي طاقة ونشاط

.... اذا هيج لعد ايدج ويانه حتى انكمل بسرعة

..... ههههه ماشي اكو بنية اليوم خطوبتها مكيجتها وسويتلها تسريحة

وراها كمت استلم وحدة ورا الثانية اشتاقيت الهاي حياتي اهناك محبوسة حدي للمدرسة وبس

للخمسة يلا كملنا

رجعنا للبيت  جنة بالطريق وكفت السايق دزتة جاب اكل جاهز

من نزلت من السيارة ركضت البيت خالة  سلمت عليها وعلى البنات

خالة من سامعة اني اهنا مسوية عشا كالت اليوم اهنا تتعشون

اتصل عليه باهر

... شنو ملابسج متريديهن

.... من شفت جنة حتى اسمي نسيتة مو بس ملابسي

.... اني قريب منكم راح اجيبهن

...كلت الجنة باهر راح يجي يجيب ملابسي

ام وليد... من يجي دخلوا جوه حتى يتعشى من نروحلهم يشيلونة بالصلوات مايصير نعوفة برا

من اجة طلع كامل وخالة دخلوا وكعدوا ويا بالاستقبال

ام وليد.. بالكوة قبل يبقة مبين يستحي لو ما كامل موجود مجان دخل

.. جنونة امشي وياي حتى تسلمين عليه

اخذتها ودخلنا من شافنة كام وكف سلم عليها

اباوع عليهم بتركيز هو عيونه تلمع خرب عيونه فضحاتة

بس جنة عادي الظاهر الموضوع مو على بالها

باهر... ام وليد بروح اهلج لاتكلفين نفسج انه ماجاي اجربكم ادري بيكم متقصرون

... يااا قابل شمسوية ومكلفة روحي والله لو ادري بجيتك جان سويت اكثر

..هذا ملكاكم واستقبالكم الي كلش كافي بيت العامر ان شاء الله انطبلكم بالافراح خوية 

اصال... صبينا اله والكامل خالة مسوية برياني تدري بيه احبه ودجاج مشوي وجنة جايبة مشاوي ومقبلات خير من الله

كعدوا يتعشون واحنا هم تعشينا

اليوم نفسي مفتوحة اكل براحة فرحانة بكعدني بينهم حسيت نفسي رجعت اصال القديمة ونسيت كل همومي

باهر من كمل العشى وشرب جاي ترخص وراح

اني وجنة والبنات رحنا للبيت

من دخلتة اتمنيت ابقة بي وبعد ما ارجع اشتاقيت الكل ركن بي

جنة.. اصال صافنة وعيونها متروسة دموع ادري بيها مشتاقة الحياتنة  القديمة مثل ما اني مشتاقتلها

وكفت كدامها وحضنتها هسه يلا ردت الروحج البيتنا

.... حضنت جنة قوي وانفجرت بالبجي شهكاتي تطلع من كل گلبي

جنة...منو المأذيج وكاسر گلبج اصال ماتبجي هيجي اذا ما صاير بيها شي قوي احجي ليش اضمين عليه

... وخرت من حضنها ومسحت دموعي مابية شي هاي دموعي لان مشتاقتلج

.... ما اكدر اصدكج لسانج يكول شي وعيونج اتكول شي ثاني

ثناء... يمعودات خلونة نتونس شو نصبتوها مناحة

اميرة... دتكولج مابيه شي لاتلحين عوفيها براحتها خرب غيرتج اشكد تحبين الدراما

جنة... سكتت واني متاكدة اصال موطبيعية بس مثل مكالت اميرة عفتها براحتها يجي يوم واعرف شبيها اذا مو اليوم غير يوم

اصال... اتهرب من عيون جنة ادري بيها حاسة بيه اني كدامها مثل الكتاب المفتوح تقرأني بدون ما احجي

دعاء... شجبتيلنا وياج اذا حاية وايدج فارغة هسه اخابر عمج اخلي يجي ياخذج

..... عابت هالشكولات اشكد مصلحجية يعني اذا مجايبة شي متريديني

.... أريدج بس اذا ويا الهدايا  اريدح اكثر

..... طلعت الهدايا انطيتهم

للصبح كاعدة وياهن ما اريد انام اخاف اذا نمت وكعدت يطلع كل هذا حلم واني يعدني اهناك واصبح بوجه عمتي البومة

جنة.. رضا شلونه وياج

.. الحمدلله

.... هم يجيج بالأجازة

.... اي مرات يجي مو دائما لان دراستة صعبة وطريق طويل ميكدر يبقة رايح جاي

.... اي صح اذا يريد خلي يجي ما دامج اهنا

... هاا وين يجي لا عوفي يمعودة اني جاية عليج مو عليه اريد اشبع شوف منج هو مطاير

.... يعني معقولة ممشتاقتلة وهو ممشتاقلج وتريدون تتشافون

اشو حتى باالتلفون مشفتج تخابري ولا هو يتصل

.. عزززا هاي مركزة وياي حرت شجاوبها

كتلها هو كال اشبعي من خالتج ما اريد ازعجج

واعرف بي يستحي يجي يبقة اهنا

... ومن شنو يستحي اني مو غريبة واذا تريدون اعوفكم وحدكم واروح البيت خالة

... يااا جنونة هاي شبيج شبسرعة مليتي مني وتريدين تعوفيني ترى اني جيت علمودج مو علموده

.. امل من روحي وما امل منج وانتي تدرين بهالشي من حجيت هيجي علمودكم لان اكيد صارلج هواي مشايفتة ومشتاقتلة

.... اوووف شجاوبها غيرت الموضوع سالتها على مرجانة

... ما اعرف عنها شي من يوم النباك ذهبها وفلوسها واجت اهنا بعد ما شفتها

.. بلكي من القهر طكت وماتت ولو العار ميموت

.... ههههه هاي انتي كلتيها عار شيموتها

.. الفجر يلا نمنا ماكعدنا غير الظهر جنة مراحت للصالون

سألتها لعد اميرة والبنات وينهن شو ماكو

... اميرة راحت للصالون والبنات رجعن للبيت يم خالة

.. صارلي خمس أيام  يم جنة تونست وكدرت اغير جو اروح وياها للصالون ومرات نطلع للسوك

باهر يومية يتصل بحجة خوما محتاجة شي ههههههه

اليوم بالصالون انفتحت الباب ودخلت مرجانة

جنة من شافتها عقدت حواجبها وبخطوات سريعة راحت يمها

جنة... شسوين جاية وتالي وياج ترى تعبت واني اعيد بنفس الكلام مليون مرة كتلج ما اريد اشوفج

مرجانة.. واني مميتة على شوفة وجهج شو وخري من كدامي اني زبونة وجاي انفعكم فوك زينيتي هيجي تستقبليني

.... لا تنفعينا ولا انفعج ماكو اكثر من الصالونات شكو جاية اهنا

... بكيفي وبفلوسي

.... مبين خلال هاي الفترة كدرتي تعوضين خسارتج

.... مرجانة تربح متخسر واذا يروح مني قاط احصل قاطات

هاي منو هنا اصال هههههه شعجب خلوج تجين ولج اخاف مهزومة

اصال...لا هلا ولا مرحبا اكول شبيه كعدت اليوم متكأبة الظاهر گلبي حس راح اشوف هالشكولات

... ادبسز معليج عتب  شترجى منج وانتي تربية هاي واشرت على جنة 

... تروحيلها فدوة تحجي على التربية بنت الغجر

جنة... اصال كافي النسوان حينتبهون

مرجانة.... ما اوصخ لساني بيجن لان اني غاسلة ايدي منجن من زمان

جنة... ياريت لو تغسلينا من راسج هم وتنسينا

.... اكولها ثور اتكول احلبي هو انتي منو جاي عليج اني عروس وجيت ارتب نفسي

... اني واصال وحده باوعت للخ بصدمة

شنو منو العروس انتي

.... اي وشبيج ممصدكة بعدني حلوة وصغيرة والف من يتمناني

اصال... هههههه منو الصغيرة ههههه لا وفوكاها عروس زين العريس وينه بكدج صغير لو بغل هههههه

....اي ضحكي ادري بيجن ميتات من غيرتجن

اميرة... ههههه تعالي وياي اليوم اني بيدي ارتبج واطلعج الاميرة ديانا

.... فدوة للتفتهم مو مثل هذن البرابيك

اصال... اميرة اخذت مرجانة واستلمتها صبغ تاتو تنظيف بشرة مبقت شي مسوتة واني وجنة واكفات انباوع عليها

كلت الجنة كبرت وبعدها كل البله بيها

... ههههه تلكيها مسويتة طلي من السحورة واكيد هو عار مثلها الطيور على اشكالها تقع

للمغرب يلا خلصت راحت دفعت فلوس

كالت زياد بالباب ذبتلنا بوسة وطلعت

اصال واميرة وكفن يم الباب يريدن يشوفن العينتين

اصال. عاااا شوفي سيارتة

اميرة... عززززا بعينها هذا وين لكتة

... جنونة تعالي شوفي والنبي حلو وشخصية هههههه

جنة.. وكفت بصفهن جان نازل من السيارة واكف  يحجي وياها راح فتحلها الباب

رجال خمسيني انيق وفعلاً مبين شخصية هذا شجابة عليها

اصال... كمت اردح عرس مرجانة هيل وطش بالولاية كللوشششش 

اميرة... ياااا شجاج كمتي تهوسين هههههه

.... لج غير فرحانة بعرس بيبيتي خوش صايدتلها صيدة صدوك لو كالوا حظ كح....

جنة..  شو صايرة ادبسز والفاظج زفت

.... يااا وشبيهن الفاظي هسه قابل اني مجذبة هي صدوك كح...

... اصاااااال

.  اهووووو ترى كبرت وأزوجت لاتظلين عايطة بيه  وواكفتلي على الكلمة

.... ليش هي التتزوج تستهتر

اميرة... اكول عيني اصولة بما انو انتي مزوجة لعد زوجج وينه اشو ما اجة شافج شنو فلمه

.... خرب هاي شحجاها غمزتلها اريدها تسكت جنة اذا تسمعتها ترجع تستلمي وشيسكتها بعد

جنة..... والله ياعيني نفس السؤال يومية اسألها و ما احصل عليه جواب

....  من جيت ولهسه اكوللكم اني جاية عليكم مو عليه هو يجي اهناك واشوفة انتوا الله اليعلم بعد شوكت يلا اكدر اشوفكم

اميرة....ممممم كلام مقنع

جنة.... بس اني ممقتنعة  واحس اكو شي ما اعرفة

..... عفية جنونة صدكي ماكو شي لاتظلين توهوسين

... صفنت عليها سكتت بس داخلي يفور وضعها مو طبيعي من اجت لهسه حتى بالتلفون متحجي ويا شنو الديصير ما ادري

اصال... من رجعنا باليل باهر اتصل عليه حجة وياي شوية وبعدين سالني رضا هم شفتي

حجيت بداخلي اووف يربي هاي شبيهم اليوم اخلص من تحقيق جنة انوب يطلعلي باهر

كتلة لا مشفتة

... وشنو السبب ليش ما اجه يشوفج هو صارلة هواي مجاي للبصره

.... هاا مو عنده دراسة وامتحانات وهو يستحي يجي البيت جنة

... اهااا خوش

... سديت الخط ظليت سهرانه ويا البنات ورا ساعة انصل رضا

ممممم اكيد باهر مرزلة

فتحت خط وجاوبتة

يحجي وياي بنزعاج عبالك احد غاصبة يتصل

... باجر العصر حظري نفسج نطلع نتعشى سوة

.... لوبيدي ارفض لكن اضطريت اوافق حتى اشيل الشك من گلب جنة

كتلة ماشي عود مر عليه للصالون وانطيتة اسم الصالون والعنوان

الصبح كلت الجنة اليوم العصر رضا يجي عليه نطلع نتعشة برى

... وأخيراً صار عنده احساس

.. هههههه هاا اشو هم راح تحجين

... اصولة ترى اني من احجي وادقق علمودج لان شفت وضعج مو طبيعي اني ميهمني شي غير راحتج وسعادتج

   فدوة العمرج ادري بيج بدون متكولين

اخذت ملابس حلوة حتى اهناك ابدل اريد اكشخ واحرك گلبه

قبل لايجي لبست فستان بينصل اسود الحد الركبة وفوكاه سترة لونها جكليتي قصيرة وبوت اسود طويل ويا ستريح حجابي بلون السترة مكياج تدرجات البرونز

كلت الجنة شنو رايج حلوة لو لا؟

... هو انتي بدون شي حلوة وانوب تأنتقي طلعتي تخبلين

اميرة.. رضا اليوم مراح يرجعج للبيت يأخذج الأقرب قندق يطلع كدامة

..... هههههه شدعوة وداعتكم على گلبكم اتعشى واجيكم اني باجر اسافر اريد اشبع من حضن جنتي

جنة.... بالكوة حبست دموعي من هسه مختنكة شلون راح اكدر ارجع افاركها

كتلها يلا روحي رجلج ديتصل اكيد وصل

بوستني وطلعت

.... طلعت اطكطك بكعب البوت جان كاعد بالسيارة من شافني من بعيد نزع النظارات من عينه باوع عليه من فوك ليجوا

فتحت الباب وصعدت كعدت يمه

سلمت عليه ابرود هلو شلونك

رضا... هاي شلابسة؟

.... ملابس يعني شلابسة

....لاتغشمين روحج شنو هالبس هذا الفستان يريد يطك ومن تكعدين شوفي لوين يرفع

.... هو موديله هيجي وثاني شي ترى لابسة ستريج ثخين ممبين مني شي

... وانه مكرن اخذج وياي هيج فرضاً واحد من جماعتي شافج شكللهم  طالع ويا مرتي بهذا لبسها

.... ههههه عبالي صارت عندك غيرة على عرضك طلعت خايف من جماعتك

.... اصااااال راح افلش وجهج احجي عدل لج

.... احد كايلك اني داحجي اعوج وهالطلعة هم ما اريدها ردت افتح الباب وانزل بسرعة قفلة من يمه

شخط السيارة سريع

... بسسيطة انه الج احسابج مو هنا من ترجعين للبصره مو ابن ابوي اذا ماحرمت عليج الجية البغداد

.... كول هيج من البداية هذا الفلم كله حتى لا اجي اهنا وانت تنجبر تجبي تشوفني مو اكول منين اجاك هالحرص عليه وعلى لبسي

... لج كافي لا تخلي اكفر بيج

.... ما اريد اطلع وياك الأي مكان رجعني للبيت

... انتي تنجبين وكلمة وحدة ما أسمع منج

.... صفنت عليه ياااا هذا شبي وجها احمر ومبين صدوك متعصب يعني معقولة لبسي الهدرجة غثة

سكتت بعد محجيت هو اتصل مدري على منو سالة انتوا وين ولاترجعون الا اني اتصل بيكم

هذا شبي بس لا ناوي يذبحني  عزززا شنو هالتفكير هذا قابل شمسوية اني وحتى لبسي مستور بس هو يتحجج

ظليت عين على الطريق وعن عليه اخاف اسألة وين راح تأخذني

وكفنا كدام عمارة ركن السيارة على جهة

كال يلا نزلي حضنت جنطتي احجي بخوف عفيه هاي وين جايبني ترى لبسي والله مبي شي

... وين راح لسانج مو قبل شوية جان يلعلع

... الله وكيلك اني بس لسان لاتشوفني نافشة ريشي ترى اني بوخة

... هههههه استغفر الله وعلي شايف اشكال الناس بس مثلج ماشفت لج انه رجلج مو صاحبج  يلا نزلي

.. نزلت واني رجلي وحدة تنضرب باللخ ساعة السودة الطلعت بيها ويا

صعدنا الشقة طابق ثاني  من الهوسة مبينا شقة شباب 

اني سامعة من بنين رضا واصدقائة ماجرين شقة عايشين بيها

دخلت كعدت بالهول كتلة انت ليش جبتني اهنا مو كلت نروح نتعشى ونرجع

.... اي كلت وغيرت كلامي من شفت هذا منظرج

... هم كال منظرج ترى والله مبي شي هياتني مستورة حجاب ولبس مقبط شتريد البس جادر واطلع وياك

.... بدت رحمة الله هم رجعت للوكاحة وللسان الطويل

.... حقي ارجع من تصرفاتك شكو جايبني اهنا ولاتسوي نفسك غيران عليه

.... لج لاتكفرينييييي احد كايلج اني ناقص ومعندي غيرة على عرضي انتي بنت عمي قبل ماتكونين زوجتي واليمسج يمسني

.... ايباه مجاي اعرفك هسه صرت عرضك واليمسني يمسك وانت من يوم الزوجتني دست عليه وعلى كرامتي اكولك ترى ميلوكلك هالدور ارجع الوجهك القديم احسن

صاح بنت الكلب اليوم اقضي عليج اجة يريد يضربني خليت ايدي على راسي وعطت لا فدوة لاتضرب والله حسكت وبعد ما احجي

من شافني خفت عافني وظل يفتر ويفرك بوجها يتنفس سريع عززا اول مرة اعرف بي هلكد عصبي

موبايلة رن اكثر من مرة  والرسائل تركع

رضا راح للحمام

كمت رحت يم الفون شفت الاتصال من عشقي الأبدي

هزيت ايدي ورجعت المكاني

رجع مبلل راسة وبنشف بوجها كتلة عشقك الأبدي دتتصل خطية جاوبها شنو مستحي مني مو جنت اذا ملكيت مكان تروح تحجي وياها بالحمام

شال التلفون وضربة بالحايط والنبي راد يغمى عليه من الخوف عززا العزاني هسه اني شحجاني

اجة جرني من ايدي ومشى بيه بتجاه الغرفة

كمت ابجي واشهك شبيك والله موقصدي مو كتلك اني بس لسان وبعد ما البس هيجي عفيه عوفني

دخلنا للغرفة قفل الباب

.... يلا طلعي سباعيتج اهنا وغردي بكيفج

.... يا سباعية والكعبة جبانة وبس لسان

... هاي ملابسج المنو لبستيها الي لو للناس؟

... غير طالعة وياك اكيد الك ولان جنة شاكة بيه وتحس علاقتي بيك متوترة ردت اثبلها العكس. واهتم بنفسي

... اهااا خوش خلي من هاللحظة انصلح علاقتنا

.... شنصلح شبيك رضا انت مو متريدني وتحب غير وحدة عوفني شرايد مني

..... انتي مرتي حلالي واريدج برضاتج او غصب عنج

.... رجعت ليورا انهزمت منه مو كتلي بعد معليه بيج وما اجي يمج شنو التغير هسه

.... حجي الليل يمحي النهار واطلع صدك غبي واعمى نظر اذا اتبطر على النعمة الي الله منطيها الي

... وصاحبتك؟

.... معليج بيها ولاتفتحين موضوعها

.... اجة عليه راد يسحب الشال من راسي، مكدر بي دنابيس نتر هذا شلون ينزع

برطمت خايفة منه وبنفس الوقت ما اريده يتقرب مني اني مو لعبه بيده بس للأسف خوفي منه جان طاغي عليه

رحع نتر بعصبية مو جاي احجي وياج شيلي الشال من راسج

وخرت الشال واني اناشغ من البجي

.... شكو تعوين وناصبة مناحة

شو تعالي

.. جرني من ايدي وكعدني على الجرباية

ظل يمسح بدموعي كال لو تبجين منا الباجر ما اعوفج انتي مرتي وهذا حقي

.... اريد ارجع يم جنة ما اريد ابقة اهنا

.... اذا تبقين معاندة ورافضتني اخليج تباتين اهنا

.... يااااا عزززا لا الله عليك اريد اروح هو اني بس اليوم يمها

.... لعد سكتي وبطلي بجي

.. استسلمت اله  بس اريده يعوفني ارجع

غرس اصابعة بين شعري وقرب وجهي عليه باسني من شفايفي بهدوء تعمق بالبوسة وايده اخذت راحتها على جسمي

يتعامل وياي برومانسية زايده

اخذ اليريده

ابتعدت منه اريد اكوم سحبني عليه وحضني

هذا شبي اليوم ولا جاي اعرفة عبالك مو رضا مبدلي

كتلة التريده اخذتة يلا رجعني

دفن راسة بركبتي وهمس يعدني مشبعت ولاتخافين ارجعج بس مو هسه

عبرت المغرب وهو بعده مطوقني بيده ورجلة وميقبل اتحرك اختنكت منه گلبي. حاقد عليه لو مدري شيسوي ما اكدر اصدكة لان اعرف اني بالنسبة اله لا شئ مجرد حليت بعينه وحب ياخذ حاجتة مني

جنت منطيتة ظهري وهو مطوق خصري بيده وراسة بركبتي

... ليش هلكد حامدة عبالك البصفي جثه مو بشر من لحم ودم لج لو حجر هم جان تاثر

... ههههه يمكن نسيت ثلاث اشهر يمك طخة مطخيتني عبالك مموجودة وهسه اني صرت حجر

... ههههههه شايلة بگلبج عليه

.... لا على شنو اشيل بگلبي ماكو شي مستاهل

يلا كافي رجعتي صارت ظلمة واصدقائك  اكيد يريدون يرجعون الشقتهم

.... ماشي يلا كومي

... رضا راح يسبح كمت بسرعة لبست ملابسي بس اريد اطلع من هالمكان

طلع من الحمام بدل ملابسة كال يلا امشي

راح شال تلفونة من الهول الشاشة صايرة طحين رجع للغرفة جاب موبايل ثاني اتصل على اصدقائة

هزيت ايدي وطلعت قبلة

بالطريق كال تعالي نتعشى

ما اريد مو جوعانة

وكف. يم مطعم جاب اكل واجة دليتة البيت

... اريد انزل اسلم على خالتج عيب اوصل للباب وما اسلم عليها

... ماشي نزلت دخلت للبيت جنة واميرة صارن كبالي يباوعن عليه بنظرات غريبة

شكو ليش هيجي تباوعن

اميرة... مو كتلكم هسه ياخذها الاقرب فندق مصدكتوني دشوفي شكلها عبالك جانت بمعركة

.... جنة رضا بالباب يريد يسلم عليج

.... ياااا ولج ليش مخليتي يدخل مو عيب مبقيتا برا

.... واني شعليه هو مدخل

جنة لبست الشال وراحتلة

دخلت للغرفة شمرت روحي على الجرباية

اميرة. . مبين الحلوة تعبانة ههههه

.... اهوووو شحيفضها اليوم وياج

.... هههههههه وشكو متعصبة ترى هو رجلج عادي مابيها شي

.. سمعت صوتة بالهول

امبرة طلعت تسلم عليه اني بقيت بمكاني

رجعت  تبتسم وتغمزلي كتلها شكو سالمين

اميرة... ههههههههه من العصر لهسه شجنتوا تسوون وانتوا حتى عشى ممتعشين

..... اشكد سخيفة

... كومي لج على اساس مستحية رجلج حيتعشى ويانه

... تنهدت كمت اخذت ملابس اريد اروح للحمام طلعت من الغرفة

شفتة كاعد ويا جنة ومنطلق  بالسوالف عبالك يعرفها من سنين

رحت للحمام سبحت. بسرعة من طلعت بس هو بالهول باوعلي وغمز

لا مستحيل رضا يكون طبيعي

فتت للغرفة جففت شعري

جنة... احم يلا تعالي نتعشى رجلج يكول نكعد كلنا سوة مقبل اصبلكم وحدكم

...  كعدت وياهم اني ساكتة وهما مبقوا سالفة محجوها اول مرة اعرف برضا اجتماعي مو معقد وبسرعة يذب مبانة ويا الشخص المقابيلة

لعد شبي قبل وياي  وجها ميكصة السيف 

رضا... خيتي جنة اي شي تحتاجي انه هنا موجود مايردج غير لسانج بتلفون واحد تلكيني يمج

جنة... ونعم منك متقصر الشي الوحيد الاريدة منك اديربالك على اصال من اشوفها مرتاحة اني هم ارتاح

.... لاتخافين عليها بعيوني

اصال.. باوعت عليه ورفعتلة حاجبي

هو ابتسم ودنك على الأكل

كمل العشى وشرب جاي كال تاخرت لازم اروح 

جنة... ابقى اهنا اليوم لاتطلع الوقت متاخر والوضع موزين

... ماعليه شي لاتخافين خليها غير مرة ان شاء الله

... سلم على جنة واميرة. وطلع

طلعت وراه همسلي من ترجعين للبصره اياج تطلعين اي مكان بدون علمي ولبس ضيك وقصير ممنوع

... ياحسرة هو اني وين موليه اشو هناك محبوسة من المدرسة للبيت

... اي بعد احسن شسوين بالطلعة

.... عوجت حلكي باسني بخدي  وراح

جنة....اليوم من شفت رضا وحجيت ويا وشفت عيونه شلون متفارك اصال ارتاحيت لان جنت خايفة لا ليلي ليل ولا نهاري نهار ايدي على گلبي حسيت علاقتهم مو طبيعية واكو شي بس اليوم ارتاحيت

... ثاني يوم الصبح اجة باهر حتى ياخذني ودعت بيت خالة

وجيت حضنت جنة واني مفرفحة من البجي وهي نفس حالتي

باهر... بطلن بجي انه كلما تصيرلي جيه لهنا اجيبها وياي

جنة.. اي عفية بروح ابوك كلما تجي جيبها والله مجاي اشبع منها

... وعد اجيبها وانتي هم زوريها احنا اهل لاتستحين

... ان شاء الله

.... رجعت للبصره ورجعت النفس معاناتي ويا عمتي وهالمرة شدت وياي اكثر من قبل

رضا كل فترة يجي يبقة يومين ويرجع

ومن يروح حتى اتصال ميتصل ابو طبع ميغير طبعة

كملت هاي السنة نجحت للسادس اجت العطلة واجة رضا

بس وضعة كولش. متغير ما اعرف شبي......

يتبع

_بنات الغجرية _

( بقلم بسمة البياتي)

_البارت الثاني والثلاثون  _

وضع رضا مو طبيعي كولش متغير كلامة قليل وهواي يتصفن

صارلة اسبوع من اجة من بغداد اكثر وقتة يكضي برا لو بالديوان ويا ابو لو يطلع ويا اخوانة واصدقائة ومن يرجع للبيت  يتفرج فلم او ينام التلفون ابد ميلزمة لايتراسل ولا يخابر

علاقتة بيه عادية كلامة وياي على كد طلباتة وحاجتة

مرات اصفن بيني وبين نفسي اني شنو جابرني على هالذل ليش ما ارجع البيت ابوية واعيش معززة مكرمة

ارجع واكول يا معززة ومكرمة وزهراء الحية اهناك مو بعيد عليها خلال يومين تلبسني تهمة جديدة يتفقن عليه هي ومرت رحيم ويلبسني مصيبة

اليوم العصر رضا كال شنو رأيج نطلع نفتر ادري بيج ضايجة من حبسة البيت

فتحت عيني كتلة صدوك دتحجي لو تشاقى!

.... هي مال شقى يلا احجي تردين لو ابدل واطلع ويا اصدقائي

.. طبعاً اريد اكوم ابدل بسرعة قبل لاتغير رأيك

.... لبس مستور وما اريد مكياج

... صار تدلل المهم اطلع ركضت طلعتلي بنطرون كابوي اسود وقميص طويل يوصل الركبتي وبي عرض لون بنفسجي لبستهن ويا شال وترانشوز  مكياج بس خليت كحلة خفيفة وحمرة بنفسجي فاتح

... موكتلج بدون مكباج

.... هي حمرة خفيفة اصلا متبين

... ماشي امشي يلا

.... نزلنا الكل كاعدات بيبي وامه ونسوان اخوانة بنين هم موجودة

عمتي عقجت وجها كالت وين طالعين

رضا... نفترشوية ونتعشى برا

...  معجبها الكلام عوجت حلكها واندارت

طلعنا صعدنا بالسيارة

... وين تحبين ترحين

.. ياحظي هو اني شندل اهنا بس طريق المدرسة والسوك

مرة باهر طلعني حتى نسيت وين اخذني

...ماشي راح اشوفج البصرة

.... اخذني هواي اماكن وراها دخلنا للمول كالي شيعجبج اخذي

صاير حباب ههههه

اخذت ملابس بيت ومكياج  وبعد مردت شي

.... امشي نتعشى

..اوك

ورحنا مطعم قريب من كورنيش البصره

.. شحابة تطلبين؟

... گص وكولا

... هههههه حسبالي راح تطلبين سمجة مسكوفة

... اكو واحد يتعشى سمج؟

.... اي اكو احنا نحب السمج بكل وكت هو ليش اكو اطيب منه

... عفست وجهي ادري بيكم ولاتملون منه واني من الريحة اظل محبوسة بالغرفة

.... ليش متحبي؟

.... بحياتي ممخليتة بحلكي اني صح ما اتبطر على النعمة واي شي يتخلى كدامي عادي اكل بس السمج الوحيد ما اطيقة

.... مجنت اعرف ماتحبي

... هو انت اشتعرف عني صارلنا سنة مزوجين والحد هسه احسك غريب عني واني غريبة عنك

..... شتحجين حقج ادري بنفسي هواي مقصر وياج

... عادي تعودت جابوا الأكل هو طلب مشكل كباب وتكة واني كص

ظلينا ناكل بهدوء بدون منحجي خلصت كمت غسلت من رجعت هو كاعد يشرب جاي

كمل وطلعنا كال تعالي نوكف يم الكورنيش المنظر حلو

فعلاً المنظر يجنن ويريح النفسية رضا كل شوية يتحسر حسيتة مهموم اشجعت وسألتة

شبيك ليش احسك متغير؟

.... مابيه شي لاتشغلين بالج

... ممممم براحتك درت راسي منه

كال شتريدين تعرفين؟

كتلة اذا ميعجبك تحجي عادي اني تعودت على برودك

.... اعرف على شنو تلمحين وشنو التردين تعرفي

... اذا تعرف لعد ليش تسألني احجيلي وارضي فضولي

.... البنية الجنت اعرفها انتهى كلشي بينا وراحت الحال سبيلها

... گلبي نبض بفرحة اي ليش الجذب فرحت وعيوني لمعت حجيت بسرعة شنو ليش عفتها

... هي رادت هالشي واني ما اكدر اجبرها

... يعني هي عافتك مو انت عفتها

.... انه وياها علاقتنا شبه مستحيلة واذا جان الي امل واحد بالمية اخذها من ازوجتج راح هالأمل

... زين قبل لاتتزوجني ليش علاقتكم مستحيلة؟ اذا انت رايدها وهي رايدتك ليش متزوجتوا

... اهلها مينطوها مرتين رحنا خطبتها ومقبلوا

.... شنو سبب رفضهم؟

... طبعهم وعيشتهم تختلف عن عيشتنا عائلتها من العوائل الراقية والمنفتحة حياتهم سفر وونسة وبناتهم منطيهن مطلق الحرية باللبس والطلعة والطبة

.. يااا وانت شحابك عليها وهي اذا تعرف بنفسها متتحمل عيشتك واهلها مينطوها شكو سوت علاقة وياك

.... حبتني من كل گلبها وهواي تغيرت علمودي وانه هم حبيتها بالكوة قنعت ابوي ورحنالهم  ومثل متوقعت اهلها رفضوا كالوا بنتنا وين تتحمل تعيش عيشتكم وبالبصرة

رجعوا اهلي وعمامي متفشلين وابوي كال انساها البنية متفيدك 

اني وياها تمسكنا ابعض اكثر وقوى حبنا رجعت توسلت بابوي ماخليت شي ماسويتة  حتى يرضى يرجع يخطبها الي من شافني متلوع عليها وافق واخذ شيوخ وناس كبارية وراحلهم

واهلها للمرة الثانية ماقدروا اهلي ورفضوا

ومن يومها ابوي حلف بعد ميروحلهم

....  اذا هلكد تحبك ليش محجت ويا اهلها وحاولت تاثر عليهم وتخليهم يوافقون

.... حجت وتوسلت بقوا على نفس رايهم

....زين واني شنو ذنبي من هالمعمعة كولها اذا هلكد تحبها ومتكدر تشوف غيرها ليش اخذتني ودمرت حياتي

... اصال انه مو نذل الصار انجبرت عليه ابوي طلبج بالديوان كدام الزلم وبدون علمي

بهذا تصرفة حب يخليني كدام الامر الواقع بيومها شطت من القهر زعلت وعفت البيت وبالكوة اخواني رجعوني وانجبرت اوافق ما اكدر اكسر كلمتة واصغرة كدام الزلم

... اهااا يعني الخاطر كلمة ابوك حطمتني محد بيكم فكر بيه منكسر گلبكم عليه مكلتوا هاي يتيمة شلون نلعب بيها وبمشاعرها

... كل كلمة تحجيها صح ومن حقج بس الصار يشهذ الله غصب عني

انه بيوم الحبيت مريم وعدتها ما اتخلى عنها

سنين وياها شلون ترديني ادير ظهري واعوفها هي هم مالها ذنب بالصار

من كتلها خطبت وراح ازوج تمرضت ودخلت مستشفى ظليت بين نارين نار گلبي ونارج انتي واهلي

...  من ازوجتني ليش بقيت وياها وانت تعرف زواجك منها مستحيل

... ماكدرت اعوفها ولا هي تكدر، تعوفني لاتلوميني لومي گلبي لان هو اليتحكم بيه

....ليش من جنت ابغداد اخذتني للشقة واتقربت مني وبعدها كمت تجي ملهوف عليه وين راح حبك الها

...  ما اعرف ليش هيجي سويت كمت من اشوفج احترك بنار وما اكدر امنع نفسي عنج ومن انه بغداد افكر بيج واشتاقلج

....  عجيب ميت عليها وتحبها وتفكر بيه وتشتاقلي شنو من گلب عندك

  .. هههه هذا حظي

اوكفي وياي وخلي نفتح صفحة جديدة انه اريد اكمل حياتي وياج وماعندي استعداد اخسرج واتخلى عنج

.... واذا رجعتلها؟

... لا هاهي بعد ماكو رجعة

.... مكتلي ليش تعاوفتوا

.... اهلها جاي يضغطون عليها ورادوها تسافر  حتى بلكي تنساني وهي عجبتها السالفة اجت كالت لو اطلك مرتك لو كل واحد يروح الحالة

كتلها ما اكدر اطلك

كالت لعد هاهية كلشي انتهى بينا

.... ههههههه كل هذا الحب والهيام وتتعاوفون بهالطريقة زين سؤال هما اذا سافرو  يرجعون لو لا؟

.... من تحلص العطلة ترجع ابوها وامها اهنا لان اطباء مايكدرون. يعوفون وظائفهم 

...ممممم لعد هي ويامن سافرت

.. ويا اخوها واختها

... اي ومن تخلص العطلة ترجعون اداومون وترجع حليمة العادتها القديمة واني انركن على الرف

... لا ماكو رجعة اطمئني

... والله هسه لو تحلفلي على القرآن هم مراح اصدكك

... انجبي ليش شوكت  مجذب عليج

... ممجذب بس شسوي موبيدي ما اكدر اصدكك

اكولك اكيد عندك صورتها اريد اشوفها

.... هههههههه شنو سالفتجن انتي تردين تشوفيها وهي رادت تشوفج

..... وليش تريد تشوفني

.... ما ادري اكيد عدها نفس فضولج

.. اي وشوفتها صورتي لو لا؟

... لا يابة غير تنجلط وتأكل راسي هي بدون شي متخبلة منج ادور تشوفج

... رفعتلة حاجبي يلا شوفني صورتها ولاتخاف اني مراح انجلط ولا اتخبل

.

.. شلج بهالسالفة امشي خلي نرجع تاخرنا

.... ماااه ما اتحرك منا اذا متشوفنيها

.

.. شبيج جنج جاهلة امشي بنتي انتي احلى منها لاتخافين

.. وليش اخاف اني الحمد لله واثقة بنفس بس هم اريد اشوفها اريد اشوف هاي المطيرة عقلك ومخليتك متندل دربك

فتح الفون ظل يگلب بي دارة عليه هاج شوفيها حتى ترتاحين

اخذتة من ايده.عيوني نطن من مكانهن عززا والله حلوة وراقية ملابسها اخر موديل شعرها اشقر يجنن هواي مهتمة بنفسها حقة يتخبل عليها

.... شبيج راح تبجين ههههه  الحق ينگال وعلي انتي احلى

.... اي اعرف انطيتة الفون وكمت وكفت داخلي يغلي من الغيرة مشيت كدامة صعدت للسيارة وطول الطريق ساكتة

وصلنا للبيت الولد كاعدين يتعللون وعمتي وياهم يومية هيجي وكت نايمة شو هسه سهرانة من شافتنة عقجت وجها

كال هاي وين صرتوا الدنيا ظلمت الوضع موزين اذا صار بيك شي وين انطي وجهي

رضا... شمالج يمه استلمتيني من الباب ترى بعد وكت والشارع متروس ناس ماكو شي لاتخافين

... عمتي تخزر بيه عششتو عبالك اني الجبرت ابنها يطلعني عفتهم وصعدت للغرفة رضا بقة كاعد وياهم

اخذت ملابس دخلت سبحت لان جسمي دبك الجو برا حار

كملت طلعت رضا بعده مصاعد كعدت كدام المرآيا باوعت النفسي قررت لأزم اكسب رضا واخلي يتعلق بيه اني احق منها بي

شسورت شعري خليت مكياج رحت للكنتور طلعت سيت نوم لونه جويتي طويل  لبستة هواي مشلح بس عادي اريد اليوم اخبلة

لبست الروب فوكاه رحت كعدت على الجرباية ظليت اتراسل ويا جنة بين مايجي الافندي

ربع ساعة فتح باب الغرفة دخل  سد الباب ظل واكف بمكانة عينه تريد تأكلي

معبرتة ظليت العب بالفون

.... الله يرحمك رضا جنت خوش ولد

...باوعت عليه ياااا شبيك؟

.... هذا كله الي

... لا طبعاً اني لابسة النفسي شنو ميصير اهتم بروحي

.... خلي اروح اسبح واجيج اريد اشوف شلون مو الي اليوم سهرتنا صباحية انتي جنيتي على نفسج راح اكلج

... ترى وترتني لاتظل هيجي تباوع يلا روح 

.....هههه بعدج مشايفة شي

... عابت

رحت انطيتة ملابس طلع من الحمام لابس شورت وفانيلة  وكف يمشط ويتعطر

اجة اتمدد كمت بسرعة رحت يم المرآيا

.... هوووب هوووب هاي وين رايحة اصال رجعي شنو تريد نخلص الليل ناس تركض وراه ناس مثل توم وجيري

.... هزيتلة كتفي بمعنى مااه ما اجي انطيتة ظهري

عندي  سماعة تشتغل على رام الفون جنت محظرتلة اغنية الساريه  شغلتها 

من سمع كلمات الأغنية كام يكركر

ﻳﺎﻟﻲ ﻣﻔﻜﺮ ﺣﺎﻟﻚ ﺯﻳﺮ ﻭﺍﻟﻨﺴﻮﺍﻥ ﻟﻌﺒﺔ ﺑﻴﺪﻙ

ﻣﺎ ﺗﻌﺮﻑ ﻛﻴﺪ ﺍﻟﻨﺴﻮﺍﻥ ﻭﺍﻟﻠﻪ ﻻ ﺷيب ﻘﻠﺒﻚ

ﻭﺍﻟﻠﻪ ﻟﺨﻠﻴﻚ ﺗﻤﺸﻲ ﺗﺤﻜﻲ ﻣﻊ ﺣﺎﻟﻚ

ﻣﺎ ﺍﺧﻠﻲ ﻏﻴﺮﻱ ﻳﺴﺴﻜﻦ ﻓﺒﺂﻟﻚ

ﺳﺴﺘﻨﻰ ﻋﻠﻴﺔ ﻳﺎ ﺍﺑﻮ ﺣﻨﻴﻰ

ﻭﺍﻟﻠﻪ ﻻﺷﻴﺒﻚ ﻉ اﺩياا

كمت اتمايل وياها وشوية شوية كمت اتعمق بالركص هو فاتح عينة وحلكة

اني من اركص انسى الحياء والخجل

كمت اغني وياها واركص وكل مقطع بيها يوصف حالي ويا

بعدك ما شفت مني غير الطيبة و الجنان

وانا يلي مجنني كنت مفكرتك انسان

الرجال ما يخون وانت خنتني

المحبة ما تهون وانتي هنتني

استنى عليا يا بو حنية

والله لشيبك ع ايديا

تعبت كمت اتنفس سريع جيت كعدت كبالة هو متصنم مدري شجاه ههههههه

.... اكلج انتي هم بيج عظام مثلنا

... ياااا عززززا لعد ليش مبية شنو اختلف عن البشر

... طلع عندح مواهب وانه مطفي

... انت من زمان مطفي وطابك على صفحة

... تعالي اشوفج المطفي شيسوي بيج اليوم

... اخذني الحضنة

كولشي حلو بهاي الليلة اعتبرتها يوم عرسي مو هذاك اليوم المشؤوم 

تقرب مني بكل حب ضعت من لمساتة ورومانسيتة

ظلينا سهرانين للصبح واني بين احضانه

من بعد هالليلة رضا اتغير روحه صارت بيه لو بيده ميطلع من الغرفة

وكل الموجودبن بالبيت لاحظوا هالشي

من يطلع ميطول هواي ويرجع يكولي اشتاقيتلج

اكتشفت  هواي جوانب حلوة بشخصيتة صح يغار بس ميخنكني اي وقت يشوفني ضايجة يكولي كومي نطلع

كولشي بحياتي صار حلو ماعدا شغلة وحدة الي هي عمتي منغصة عليه عيشتي

    العصر طلع رضا ويا اصدقائة

اني التهيت ويا البنات نسوي عصرية جاي وكعك لان خوات ام رضا موجودات واكيد حية الكوبرا مرت رحيم هم موجودة

ودينا الجاي بنين اشرتلي اكعد يمها ظلت تسوالف وياي

اخت ام رضا اكبر من عمتي سالتني خالتج شلونها

مزوجة لو لا؟

كتلها الحمدلله بخير

لا ممزوجة

اختها الثانية كالت جااا اذا ماعدها رجال منو يصرف عليها وانه سمعت امها ماعايشة وياها

ام رضا... تشتغل بصالون متعلمة على الطلعة والطبة شسوي بالزواج

. نترت بغضب شنو قصدج وشبيها ام الصالون واذا طلعت وطبت جنة بالف رجال ينكص لسانه اليحجي عليها ليش هي الطب وتطلع مو زينة ترى هواي نسوان كاعدات ببيوتهن ويسوون بلاوي

.... يااا يااا سمعتنها هي كدامجن وهيج تحجي  اكفر احجي حجاية تظل ترعد عليه اليكول انه بعمرها ماعدها احترام لا لصغير ولا الجبير

ام رافد.. صلو على النبي انتي حجبتي بدون قصد وهي فهمت غلط سدو السالفة

.... سكتت بس لوبيدي اشرب من دمها

حجت الكوبرا  اكلج اصال انتي ورضا صارلكم هواي من مزوجين شو لهسه ماكو شي

... على شنو مستعجلين اني ويا طلاب خلي نكمل وعود الله كريم

.... ياا والزلمة يظل ينتظرج الحد متكملين ام خالد انتي شلون راضية يبقى وليدج لهسه بدون خلفة

... انه اذا احجي اطلع مو خوش وعمة ظالمة احجي وياها كلمة تردلي عشرة خليني ساكتة احسن

بنين... هي وزوجها متفقين الموضوع يخصهم مو من حق اي احد يدخل بينهم

وهما بعدهم صغار لاحكين على دوخة الجهال

...عفتهم وكمت هذن اذا ميموتني ميرتاحن

قبل لا اصعد سمعت ام رافد وبيبي يرزلن بعمتي وبمرت رحيم

صعدت للغرفة تمددت متعجبة على نفسي شعجب بعدني لهسة مساحلتهن

بنين... اكدر افوت

.... هو انتي فتي

.. امداج يالعوبة خايبة شمالج بسرعة تزعلين وتركضين تصعدين يعني بعدج لهسه متعودتي على سوالفهن

.... گلبي خلص سوالفهن تحرك الدم وهواي صبرت عليهن وللصبر حدود

اكدر كولشي اتحمل الا شغلة وحدة هي جنة اليمسها بكلمة عندي استعداد افعصة برجلي

... نسوان كبار اخذيهن على كد عقلهن سشوين حظج بلاج بهيجي عمة تحملي الخاطر رجلج

.. لا والله ممجبورة اتحمل

.... ارجع البيتي واحظر عشا الرجلي ادري لو احجي منا الباجر مراح تسمعين مني

.... راحت بنين ظليت بفراشي وراه المغرب اجة رضا باوعلي بستغراب اجة كعد يمي

...خوما بيج شي ليش نايمة

.. كمت ابجي الكيلي حل ويا امك ترى روحي طكت منها ومن مرت عمك رحيم ماكو كعدة او مناسبة اذا ميهنني بيها

.... شبيهن شمسويات

.. كول شنو الممسوياتة دوم يحسسني اني بدون اخلاق لان مرجانة بيبتي وهالأيام طالعات بسالفة جديدة والله خالتها تشتغل بصالون والله اليعلم شسوي متسوي

رضا كولشي ولا خالتي بعد ما اكدر اسكت  راح احجي البابا واخلي يكول  العمو حتى يلكولي حل وياهن

.. وشنو انه موبعينج تردين تحجين الأبوج معليج انتي انه اتصرف كافي لاتبجين

... حضني يريدني اسكت حجيتلة على سالفة الحمل كال عوفيهن انه اعرف شحجي وياهن

نزل وعافني طلعت وكفت يم الباب سمعت صوتة يحجي بعصبية ويا امه ويكولها اذا تبقين شادة وياها احجي كلشي الابوي وبعدها اخذ مرتي واطلع

اتكولة انه شعليه  هي وكحة ولسان بدال ما واكف كدام امك ومتعصب روح علمها شلون تحترمني وبعد من اليوم معليه بيها حتى لو تضربني بالنعال ما احجي لان انه مو مهمة عندك تالي وكت علمود مرة توكف بوجهي وترزلني

عفتهم ورجعت للغرفة خرب اشكد حيالة

رجع رضا للغرفة كال امي بعد ماعليها بيج وانتي الخاطري حاولي تتقربين منها وتكسبيها  هي گلبها طيب وماكو بحنانها اذا حبتج تنطيج عيونها

... تعلكت بركبتة ماشي حبيبي الخاطرك ححاول

لف ايده على خصري وخمط شفايفي ابوسة

رضا... انعل ابليسج ماجاي اكدر افاركج اطلع شوية روحي تفرفح عليج شلون راح اداوم واعوفج ما ادري

... اوووف لاتذكرني من هسه شايلة هم الدوامك

..... ههههه ادري بشنو تفكرين لاتشيلين هم حبيبي انتي كاعدة اهنا واشر على گلبة

.... قربت وجهي من وجها وهمست اريد اكعد بعيونك مو بس بگلبك حتى متشوف غيري

.... عيوني وروحي وگلبي كلهن الج

...فديتهن

     انه الافديج ياعمري

خرب نسيت اكلج ابوج اليوم الصبح رجلة ملتوية ومورمة ماخذي للطبيب صاير عنده تمزق بالاربطة

... فزيت وضربت على خدي عزززا هاي شوكت اشو محد كلي

... على كيفج مابي شي انه هم ماجنت ادري العصر من طلعت يلا دريت رحنالة انه و ابوي وعمامي كلشي مابي لاتخافين

.. سودة عليه واكول ليش مبين اليوم

ردت اخابرة والتهيت بسالفة امك

..... كولي عمتي

... نرى مو وكتها فدوة اخذني اله اريد اشوفة

... مو هسه وراه العشا لان خطار اهناك رايحين جاين من تخف الهوسة اخذج

... اهووو هسه وكت غيره

... سمعي الكلام

.. ماشي

وراه العشا ظلبت احوص اريده بس ياخذني

وأخيراً كال يلا تحظري نروح

بسرعة لبست الجبة والشال وطلعت

بيت ابوية صارلي اشهر مداخلتة لان ما احب اتواجد ويا زهراء بنفس المكان

وهي هم  متحب تشوفني لان حتى البيت عمي متجي

وصلنا البيت ابوي ومثل متوقعت من شافتني عبالك انضربت طلقة بگلبها......

يتبع

_بنات الغجرية _

( بقلم بسمة البياتي)

_البارت الثالث والثلاثون  _

   وصلنا البيت ابوي ومثل متوقعت زهراء من شافتني عبالك انضربت طلقة بگلبها

جانت واكفة بالمطبخ ويا بنات اختها

بوست البنات وفتت من يمها اريد ادخل جوة 

رضا... عدكم خطار لو راحوا

زهراء... قبل شوية راحوا وسودة عليه  ابو سيف حيل تعب من الكعدة ويمكن نام لو جايين الصبح احسن

اصال... من سمعتها وكفت وانداريت عليها

رضا.. اصال امشي نرجع وباجر من الصبح اجيبج تشوفي 

.... انت ليش واكف تسأل شنو احنا غربة هذا بيت ابوية وهو عمك نجي بالوكت اليعجبنا حتى لو نص الليل

والله جلوة هاي البيت بيت ابونا واليسوة والميسوة يطردونا

هبة.... المثل غلط الغربة يطردونة

   اعرف حبي بس الغربة عندي احسن من هواي ناس شايفين روحهم وهما فلس ميسوون

زهراء... شكو شبيج داخلة حامية هو منو الطاردج جاية ادورين مشاكل وتتعاركين ويا ذبان وجهج ولسانج اطول منج

.... ابقي بعيد عني احسنلج ترى مثل ما رجعتج الهالبيت ارجع اهججج منه استري على نفسج ولاتلعبين وياي

رضا... اصال هاي شبيج امشي انفوت

..جرني من ايدي وفوتني جوة زهراء لوبيدها تاكلني

دخلنا للربعة باهر موجود واختها وبابا متمدد بس منايم

همست الرضا هاك شوف مو كالت تعبان ونايم

.. اششش كافي

...بابا من شافني كعد وحجة بفرح هلا بهالطول وعلي اليوم گلبي مثل النار لان مشايفج وتمنيت تجين

.. فدوة حبيبي ميحتاج تتمنى انت تامر وشوكت تريدني تلكاني كدامك رحت كعدت يمه وحضنتة

... يبعد ابوج وعافيتة

... اسم الله عليك ربي لايحرمني منك شلونك وشلون صرت ليش هيجي من الصبح رجلك متاذية واني اخر من يعلم

... مابية شي بنيتي اروح فدوة للخايفة على ابوها

....فدوة العمرك حبيبي اكيد اخاف قابل كم منصف عندي

باهر.... هنيالك خوية على هادلال

... اكيد هنيالي لان عندي هيج بنية

... زهراء كاعدة كبالنة تعصر بيدها من العصبية

راح تموت لان حاضني وكل دقيقة يبوس راسي

ظلت  تتهامس ويا اختها  صاحت ابنها الصغير حمودي شاورتة

كام من يمها اجة يريد يكعد بيني وبين بابا

منصف.... ها ولك بس لا تغار من اختك

...همست بگلبي ميدري مرتة التغار مو ابنه

بابا خلى حمودي بالجهة الثانية وبقى حاضن كتفي بيده

حمودي مل كام من مكانة

زهراء حارت شتسوي كل شوية تدفعة باتجاه بابا  وتأشرلة يكعد اهناك

من صدوك لعبت نفسي من غيرتها بابا تعصب خزرها ونتر بيها شجلبتي بي عوفي لا ابتلي بيكم  

تصرفاتها  مثل الزعاطيط باهر ورضا ضاجوا من حركاتها

وادري بابا متعصب بس اتجفة الشر ومحجة شي

زهراء وجها كام ينطي ألوان كالت هو يريد يجي يمك انه شسويلة

اصال... صارلي اشهر مشايفتج كلت هسه من اشوفها الكي بنتها بيدها

... يابنت؟

.. غير بنتج مو جنتي تريدين بنوتة لان بابا يحب البنات 

منصف...وشسوي بالبنات وعندي اميرتهن يكفي انتي بنت عطر ومن ريحتها 

....فدوة الگلبك حبيبي

زهراء.. بنترة وانه شسوي بالبنية اشو ماوراهن غير الهم والغم عندي ثلاث ولد يسوون الف بنية

منصف... لو ما الكاع محظورة جان عرفت شجاوبج

.... الجو تكهرب رضا خزرني حتى اسكت غير الموضوع

كال مو كافي بوس وغزل ترى اغار ميصير هيج

باهر... محد مظلوم غيري لا مرة ادللني ولا بنية ادلعني

منصف... لك طايح الحظ جاي تتغزل بابوها قابل بواحد غريب

.... هههههه يمكن ترزلت مشكور عمي

... وانت باهر افندي ماتزوج منو لازمك حتى تدلل وتدلع بدال مامكابلني ليل ونهار وين ما اروح الكي جهرتك كبالي

... هو منو اليخابرني ويدز عليه تخبصني خبص اذا اذا يوم ما اجيك

رضا... انتي ضحكي شكوو عليج حركتي الجو ومتونسة

.... هههههه ياااا واني شعلية

ظلينا كاعدين شوية بعدين ترخصنا حتى بابا يرتاح

باهر طلع ويانة

رضا...الله يستر بس لا عمي ومرتة راح بتعاركون ااشرلج اريدج تسكتين وانتي ولا يمج

... عششتو هي وحدة متستحي مخلية عقلها ويا عقلي تغار مني عبالك اني ضرتها

باهر...بوية  معليج بيها تحمليها الخاطر ابوج

... هو هذا حظي لازم اتحمل فلان وعلان الخاطر هذا وذاك

وحدتهن الله ميجرعها اني المسكينة لازم اتحملهن

باهر...ومنو غير ام سيف مأذيتج؟

... يوووو يا مكثرهن وكلهن مثل الحياية ينكطن سم

رضا جان لآزم ايدي عصرها قوي

سكتت لآن فعلاً بديت اجفص من رجعنا للبيت وصعدنا الغرفتنا ظل يرزل بيه زعلت منه

وراها بشوية اجه يراضيني ويتوسل

... فدوة الحبيبي الزعلان

.. وخر لاتحجي وياي صاير محامي الزهراء

... وانه شلي علاقة بيها حبيبي هو احنا نروح شوية من تشوفيها انطيها اذن الطرشة انه علمودج ما اريدج تنغثين علاج الجاهل التجاهل وانتي اتجاهليها

... هذا هو بعد ما احجي

... اذا رضيتي انطيني بوسة

.... انت الضوجتني لازم انت تبوسني

... هههههه وانه بالخدمة واذا تردين ازود على البوسة

... هههههه لا البوسة كافي

مبقى للدوام غير اسبوع خوف وقلق بداخلي مينوصف

خايفة من  يداوم  ويشوفها يرجع علاقتة بيها هو يعرف بشنو افكر  دائماً يحاول يطمني

يكول هي صارت ماضي وانتي حاضري ومستقبلي لاتخافين ماكو وحدة تكدر تاخذ مكانج بگلبي

رغم كلامة ما اكدر ارتاح نار، الغيرة تسعر بداخلي

العصر طلع ويا اصدقائة ومن رجع حسيتة مرتبك شلون الواحد من يسويلة مكسورة ويخاف ينكشف

اتصرفت عادي ومسألتة شي

باليل اخذت فونة ظليت افتش بي هاي صارت سولتي وهو عادي عنده ميمنعني يكول اذا الشي يريحج فتشي براحتج

دورت ونبشت ماكو شي

اخذة مني وظلينا نتفرج مقاطع فيديو على اليوتيوب

طلع اشعار على الشاشة وصل مسج اريد افتحة جر الفون من أيدي

... عوفي مو جاي نتفرج هذا اكيد واحد من جماعتي

... وشبيك وجهك صوفر انطيني الفون وخلي ليلتك تعدي على خير من رجعت ولهسه حاسة بيك مو طبيعي جنت اغالط نفسي واكول اكيد اني متوهمة بس هسه تاكدت اكو شي

.... وتالي ويا شكج ترى مصختيها اكلج ماكو شي لاتظلين تلحين هاي تصرفات الجهال بطليها

...وشكو تعصبت وكمت تصيح اذا ماكو شي ليش مدتنطيني الفون

خمطتة من ايده وبسرعة فتحت المسج جسمي ظل يرجف مريم دازتلة صورتها عيونها حمر كاتبة من سمعت صوتك ولهسه اني ابجي

اجة جره من ايدي ظليت ساكتة كلمة وحدة منطقت

...بالعباس ماعندي شي وياها خابرتني تبجي  مانطيتها مجال  كتلها يابنت الناس انسيني البينة انتهى وكل واحد راح بدرب وشاف حياتة وانه مرتاح ويا زوجتي وماناوي اعوفها

... اششش ولا كلمة هاي كلاوتك على منو دتعبرهن اذا صح كلامك ليش مكتلي من اتصلت بيك وليش  مردتني اشوف المسج لو صدوك مراجعلها ليش بعدك محاظرها

... وداعتج مراجعلها وهاي كدامج راح احظرها بس، لا تبجين

.... بعد ولا اصدكك وما اريدك تحجي وياي

.... يابة حتى الخط اكسرة اهم شي تطمئنين مايهون عليه اشوفج زعلانة

... انطيتة ظهري ونمت موبيدي ما اكدر اصدكة جمالة راح يرجع للدوام ويشوفها يشمعرفني شحيصير بينهم ياغافلين الكم الله

يومين اني زعلانة ما احجي ويا وهو يحير شيسوي حتى يراضيني جاب خط جديد وخطة القديم انطانيا كال بيدج انتي كسري حتى ترتاحين 

مكدرت ابقى زعلانة تراضينا

اجة يوم السفر شبعت بجي وهو حاضني ويتوسل بيه حتى اسكت

.... وعد كل اسبوع اجي هو انه الصرت ما اكدر بلياج وعلي مجرور من خشمي لوبيدي اكابلج واكعد تحملي هو بس هالسنة واتخرج وظل مكابل هالعيون الاعشقهن 

.... خايفة من تشوف حبيبتك تحنلها وترجعون سوة

.. طيح الله حظج وانه حسبالي تبجين لان راح تشتاقلي طلع كل هالبجي بسبب الغيرة

... هم ابجي عليك وبنفس الوقت غيرانه

... داكلج ما ارجعلها شلون طلابة هاي حبيبي

لاتشلعين گلبج وگلبي من اكلج كلمة صدكيها مريم طلعت من حياتي وانتي هسه ام بيتي وبنت گلبي هذن عيوني ميشوفن غيرج

...ماشي حبيبي مصدكتك ديربالك تتاخر عليه وياويلك اذا اتصل عليك باليل والكي مشغول

... هههههه شسوين

... اشرب من دمك

.. وانه اريد أشرب عسل هالشفايف

... اخذ شفايفي بين شفايفة طول بالبوسة لا اني اريد اعوفة ولا هو 

بالكوة وخرت منه خلى كصة على كصتي وهمس وتالي وياج من هسه بديت اشتاقلج

سحبني من ايدي للفراش

واني مثل العجينة بيده شلون ميعجبة يحركني

فونه يرن وهو ولايمه ابتعد مني 

وطكها بضحكة كال الشباب برا ينتظروني وانه غرگان بالعسل

.... انت متكعد راحة

.. شسويلج اذا أنتي تغرين بيه وانه المسكين ما اكدر اقاوم

و من نظرة وحدة اطيح على وجهي

... ديلا يالفقير كوم ترى تاخرت وصديقك خبص الدنيا بالأتصال

رجع سبح بدل وطلع

راح رضا

بديت بالدوام ومن ارجع الظهر التهي بالشغل والدراسة

الأتصالات مستمرة بيني وبينه

كل شوية اسوي كبسة وادك حتى اشوف خوما مشغول

وباليل اخلي ينطيني تقرير كامل عن يومة وسشوة مسوة

كل اسبوع يجي يبقة يوم او يومين ويرجع

عمتي استغلت غياب رضا ورجعت الحقارتها وانوب آستلمتني بسالفة الطفل شلون لهسه مصار عندج

كلت الرضا خلي نسوي طفل ما اريد يظلون يحجون عليه

رفض يكول مو هسه من اتخرج وانتي تكملين سادس نسوي على شنو مستعجلين  

راح حجة ويا امه ومن يومها بعد مفتحت الموضوع

هاي السنة ما اعرف شلون كدرت اخلصها ضغوطات عليه من كل الجوانب الدراسة والقلق وضيم عمتي والحياية الوياها

وغيرتي وشكي اتجاه رضا

هو ابد متغير عليه بالعكس حبه الي يزيد يوم بعد يوم

من يجيني ميطلع من الغرفة ليل ونهار ابقى بحضنة بس وقت الأكل ننزل

من يروح  واتصل عليه ابد ما الكي مشغول ويجاوبني بحب وهيام

تخرج رضا وسسو حفلة تخرج اخوانة وولد كرايبهم حظروا الحفلة اني مقبل اروح لان الحفة بيها هواي شباب

واني بهالفترة ملتهية بالدراسة

اتخرج ورجع لليصرة ارتاحيت وأخيراً خلصت من الكابوس الأسمها مريم

بدت امتحاناتي هلكت من التعب رضا وياي ويساعدني كملت واجاباتي الحمدلله زينة

من رجعت من اخير امتحان يوم كامل ظليت نايمة من التعب

ثاني يوم باليل حبيت ادللة.اعوضة عن الأيام الفاتت جهزت نفسي لبست احلى سيت نوم عندي ومكياج شسورت شعري

من دخل وشافني ظل يباعلي بنظرات اعجاب

.... اويلي صارلي هواي محروم من الدلال

... تعلكت بركبتة منا وجاي راح اشبعك دلال الحد متمل مني

... مخبل وامل من هالحسن هذا

اكلج ترى ميمشي يمي الدلال الشفوي اريد عملي شو تعالي

... نايمة على صدره وضعة غريب هواي يتحسر حسيت اكو شي صدري انقبض وما اريد اسال شبيك اخاف من جوابة

نمنا ثاني يوم كعدت على بوساتة فتحت عيني صار وجها بوجهي ابتسمتلة

.. صباح العسل عمري

... ممممم صباحو حبيبي ساعة اشكد

... عشرة ونص

... مابية حيل اكوم متكسرة

... واني هم ما اريدج اتكومين ابقي بحضني

.... حضنتة اوووف اشكد احبك

.... واني اموووت عليج

... رفعت راسي من حضنة باوعت بعينة شبيك حبيبي ليش تتحسر اكو شي

... هاااا لا ماكو شي يلا اني جعت راح اسبح حتى ننزل نتريك

... عافني وراح ظليت صافنة عليه هذا شبي ليش انكرص من سالتة

ورا الريوك صاحني كال تعالي نصعد اريد احجي وياج

صعدت واني لازمة گلبي

كعدت كدامة وهو يتهرب ميباوع بوجهي

كتلة شبيك مو كلت اريد احجي وياج ليش ساكت

    .. بروح امج اريدج تسمعيني بدون انفعال وتقدرين موقفي لان بس الله يعلم البيه

... رضا احجي ترى گلبي حيوكف من الخوف

... اعرف وعدتج بعد ما ارجع  المريم  واكون الج وحدج ويشهد الله حاولت اهواي ابتعد عنها بس ماكدرت

من رجعت للدوام اشهر وهي تتوسل وتبجي  وانه ارفضها واحاول اطلعها من گلبي

.... جسمي يرجف وانعگد لساتي ما اكدر احجي

... بيج شي ليش جاي ترجفين وشفايفج يبسن

.. حاولت اسيطر على. نفسي وما انهار همست كمل اريد اسمعك

... اصال وداعت ابوي حاولت اصدها وماكدرت البيني وبينها مو عشرة يوم ويومين حبنا عمره خمس سنين وهي اول حب بحياتي

... گلبي يريد ينفجر الطعنات كامت تجيني من كل جهة لو ذابحني ولا هيجي حاجي وياي

رجعت همست بخنكة وهسه المطلوب مني شنو

.. اريدج تفهميني وتقدرين الانه بي

  .. وشنو الانت بي هياتك كاعد بكل فخر تحجي عن علاقتك بيها

تريد اقدرك  لعد اشو انت مقدرتني وبكل صلافة دتحجيلي عن حبك العميق بحياتي مشايفة بنذالتك وحقارتك

... اهدي وسمعيني للأخير

.. عززززا بعيني لك شسمع بيدك جاي تذبحني وادوسني برجلك وتكولي سمعي

هو انت شبقيت هذا هو طلكني وروحلها الله ياخذك انت وياها

... ترى انه مكاعد احجيلج حتى اعوفج واطلكج

مثل ما احبها احبج ويمكن اكثر

.... الطم املخ نفسي لك ششششنو من بشر انت بس فهمني ششتريد ولوين تريد توصل بهاي سخافتك

... لاتعيطين وخليني افهمج بهدوء

مريم تمرضت وماكدرت اعوفها رجعتلها ما اتحمل اشوفها متاذية بسببي واهلها من شافوا صحت بنتهم ادهورت كالوا خلي يجي يخطبج واحنا موافقين

.....وهسه جاي تريد اباركلك لو شنو

...اريدج تفهمين شغلة وحدة طلاك ما اطلكج وراح تبقين حبيبتي وروحي من الدنيا

سالفة الطلاك شيلها من بالج انه الأول ولا اخر واحد يزوج اثنين 

راح اعيش ابغداد وورا زواجي  اخذج اهناك  ادري بيج تكيفين على العيشة قريبة من خالتج

.. اشكد شايفة تافهين ومنحطين بس بتفاهتك وانحطاطك مشفت

... لاتغلطين لوما ادري بيج مقهورة اتصرف وياج غير تصرف

... الله لايوفقك غصباً عليك تطلكني تحلم تزوج واني على ذمتك يا عار الزلم

... استغفر الله ضبي لسانج وبطلي غلط

بيها وبلايها توافقين احنا ماعدنا مرة تطلك

وكتلج حبي الج مراح يتغير تبقين بنت عمي وحبيبتي

راح افتح الموضوع ويا ابوية ومن يسالج كوليلة موافقة

.... اهلها يدرون بيك مزوج وراح تاخذ بنتهم على ضرة؟

... لا ميدرون مريم متقبل اكللهم

وراه الزواج  انبلغهم

... صارلك اشكد راجعلها

...ورا اربع اشهر من دوامي

   معقولة اني الهدرجة غبية ومحسبت بيك لو انت جنت ممثل بارع وكدرت اجيب الدور عدل بدون اغلاط

زين شلون جنت تحجي وياها واني مفديوم لكيت خطك مشغول

  . اخذت خط ثاني

.... والله والعبتها صح يا ابن الشيوخ يا ابن الحسب والنسب فعلاً اهنيك

... حبيبي وداعت امي احبج وبنفس الوكت مريم حلمي المستحيل وهسه راح يتحقق ما اكدر اعوفها

... تحبني وتحبها شنو من گلب عندك

اي وهسه اني لازم ارضى بالامر الواقع واسكت واذا اهلك سألوني اكلهم اي موافقة شكو بيها رجال ومن حقة ياخذ بدال الوحدة اربعة

وفوك هذا كله راح تنكر زواجك مني كدام اهلها

...بس اكطع مهر واخذها ابلغهم الموضوغ مينضم مصيرهم يعرفون

ومن اخذج البغداد اذا عجبج جيبي خالتج تعيش ويانه

... تدري انت شنو مشكلتك

. شنو

... هواي مستصغرني  لان اني بنت عطر الي ازوجت عمك بالسر وبيبيتي مرجانة الغجرية وبسبب هالأمور شتسوون بيه لازم اسكت واتحمل لان مثل مكالت امك هو انتي منو يگلبج احمدي ربج على هاي قسمتج اخذتي ابن شيخ وصارلج قدر وقيمة بين الناس

... شوكت امي هيج حجت وليش مكتيلي 

...هذا نقطة بحر من الاسمعة من امك

وهسه هذا مو موضوعنا

رضا تعتقد ابوية راح يرضى بنتة تنذل وتنزل عليها ضرة

... راح ادز عمامي يقنعوا معليج بهالسالفة المهم انتي ترضين

... صارلي ساعة ضاغطة على نفسي واحجي بهدوء عكس البركان البداخلي

انهاريت واتفجرت

لك ليش لعبت بيه وبمشاعري مو كد وعودك ليش توعد ليش تنطيني كلام انت متكدر تنفذة لك ليشش بس فهمني ليش الهدرجة مشاعري رخيصة عندك

رد يجي يحضني عطت بي اياك تفكر تقترب مني

.. لاتسوين هيج لا حسبالج انه مرتاح دايخ ومجاي اندل دربي احبج واحبها

اريدج واريدها حتى انه محتار بروحي

...  من طلبت مني نبدي صفحة جديده وكلت عفتها وبعد ما ارجعلها جنت خايفة منك وممصدكتك بس جان  لازم انطيك فرصة واكسبك حتى لا يجي يوم وتوكف كدام الكل اتكول اني ردتها وهي صدتني وتصير انت صاحب الحق وابو الراهي عليه

بسسس ااااخ من هذا گلبي التعلق بيك وحبك هلكد

لوعايفني قبل والله جان متاذيت هلكد ولا نجرحت جنت راح اكدر اكمل حياتي بعيد عنك واتعود على فراكك

بس هسه اني جاي اموت لان صدكت انت تحبني صدكت انت الي وحدي صدكت بكل كلامك ووعودك

وعدتني بالجنة وهسه اني بالنار وعدتني بالسعادة وهسه اني بالضيم بنيتلي قصور من الاحلام وهسه كلهن انهدن فوك راسي

سنه وانت تمثل عليه بكل براعة واني مصدكة وعايشة اللحظة سنة واني طايرة فوك السحاب

وهسه اجتني عاصفة نزلتني السابع ارض

....بداعت جنة كافي راح تموتين

.. ياريت اموووت ولا هالحركة البگلبي

اطلع برا ما اريد اشوفك

... ما اطلع شوفي حالج

.. يطبني مرض عساني بالموت حيل وابو زايد بيه اني هيجي سويت بنفسي اطلع الخاطر ربك قبل لا اصرخ والم عليك الناس

..بروح الاعزاز  خليني يمج ما احجي شي ابقى ساكت

... اني طالعة

...  وين رايحة  رجعي راح اطلع

... اياك توصل الباب الغرفة فهمت

هز راسة وطلع

كرفصت وثنيت رجلي الصدري دموعي تيزاب ويحركن خدي اكثر، من ساعة واني ابجي واون  كمية القهر والخذلان البداخلي مالهن وصف

رفعت راسي وحجيت بغصة ماما بحياتي مفكرت بيج لان مشايفتج

واسمج اذا مر على لساني اذكرة كانما اذكر شخص ما اعرفة

بس هسه اريد اعاتبج المنو جبتيني وليش عفتيني شفتي شسووا بيه كل ذنبي اني بنتج الرايح والجاي يدوسني لان انتي بنت مرجانة مالي اي قدر بين الناس حاسبيني لعبة يلعبون بيه وبمشاعري 

ماما مثل ما نهيتي حياتج ليش مانهيتي حياتي وياج ليششش عفتيني ليشش

جنة وينج اريدج جنة اريد حضنج ولكم جاي امووووووت والله جاي اموت.......

يتبع

_بنات الغجرية _

( بقلم بسمة البياتي)

_البارت الرابع والثلاثون  _

ألم بداخلي يعجز الكلام عن وصفة محتركة بنار كبرة لوبيدي اصرخ واطلع كل قهري المحبوس بصدري

ظليت بفراشي متحركت عيوني شلالات تجري بدون توقف جسمي ساعة يبرد يصير مثل الثلج وساعة يشتعل مثل لهيب النار

اسمع باب الغرفة ينفتح وينسد اعرف بي هذا هو حاول اكثر من مرة يحجي عطت بي عافني وطلع

الوقت يمشي واني على نفس نومتي راسي يريد ينفجر من التفكير

المغرب اجتني بنين تطمئن عليه كالت انه وامي ظل بالنة عليج ليش مانزلتي بيج شي

كتلها بلاعبمي ملتهبة وعندي صداع ما اكدر انزل

.... كومي ناخذج للطبيب شوفي حالج بالكوة تحجبن

... لا نخافين اخذت علاج  بس اريد انام

اكولج بابا اذا اجة لاتكوليلة مريضة خطية يظل بالة 

... العصر اجة سأل عليج رضا كالة بعدها لهسه تعبانة من الامتحانات تريد تنام وتعوض

...اي زين

راحت بنين وراها مرتين صعدت تطمئن عليه واني سويت روحي نايمة

هي وبيبي الوحيدات ذكرني البقية او اموت محد يجي يشوف شبيه مبية

محتاحة جنة اتمنى اتصل عليها واشكيلها ضيمي والصار بيه بس ما اكدر ابلغها هي بعيدة عني واعرف بيها اذا عرفت راح تتاذى  ما اريدها تنقهر بسببي

اكل على ريوك الصبح حتى المي مداخل معدتي بمكن داعاقب نفسي على سذاجتي وغبائي

شلون كدر بهالسهولة يخدعني وبلعب عليه وعلى مشاعري لمدة سنة كاملة

واني الغبية مصدكتة وامشي وراه مثل العمية وضايعة بكلامة المعسول

باليل اجة جايب اكل من برا

كال كومي اكلي انتي من الصبح لهسه كلشي مماكلة

... كم مرة كتلك لاتشوفني وجهك بالقرآن اذا ماعفتني بحالي هسه انزل العمي واحجيلة عن كل خياساتك

... اريد انطمر وين اولي بهاليل

... وين متروح روح عسى ما للگبور المهم ما اريد اشوف خلقتك الزفرة

... راح الخمج على حلكج هواي تجاوزتي حدودج

انه طالع من يرجع عقلج الراسج وتبطلين اخبال ارجع

.... عافني وطلع للصبح اتگلب بفراشي مثل السمجة المزوهرة

الصبح دخل رضا سويت نفسي نايمة ظل يتحرك بالغرفة صوت خطواتة يفتر

عرفت راح للحمام

من طلع رجعت غمضت دقائق وصار هدوء فتحت عيني مموجود

كمت من فراشي الدوخة الزمتني لان مماكلة شي  دخلت للحمام غسلت وجهي باوعت عليه احمر وعيوني منفوخة

طلعت من الحمام عندي عصير  ونستلة جبرت روحي اكلت شوية وشربت العصير

اريد اتقوى مو وكتها اوكع واتمرض خليت الشال على  راسي ونزلت

دانزل الدرج تلكتني بنين

.... هسه سالت رضا عليج كال نايمة كلت من تكعد اصعدلها خايبة شبيهن عيونج لج خوما متعاركة

... لا يظل بالج مابية شي

... رايحة ابدل الامي ومن ارجع اريدج تسولفيلي شبيج

... الكل راح يعرف شبيه مو بس انتي كملت طريقي دخلت للمطبخ 

ام رضا وجناينها واختها كاعدات يسون طرشي

اكو صيدلية صغيرة بالمطبخ وكفت يمها ادور حب وجع راس

ام. نبيل.... خايبة شمالج  شنو حلكج يريد كروة كولي صباح الخير لو هاي هم ماتعرفيها

ام رضا.....لا وين تعرف بس انطيها تتختل بالغرفة واني وهالمكرودات نشتغل من الصبح لليل ونخدمها

عايني على وجها شوفي شلون منفوح من النوم

اصال... ابد مو وكتها ومالي مزاج اجاوبها

طلعت حباية وكفت يم البراد. اخذت مي وبلعتها

ام نبيل... يااااا حتى جواب متجاوب

ام رضا.. بعدج اشايفه انه گلبي خلصان منها هسه ادور راسها وترجع تصعد

هذا لو شغل بالصالون جان من السبعة كعدت لان بيها دياحة

.... شرايدات مني اسلم ما اسلم بكيفي انام اكعد اني حرة وانتي شكو مضغوطة من الصالون هي ليش التشتغل بالصالون دايحة

.... التروح وتجي بكيفها شيسموها اكيد دايحة وانتي وخالتج ما شاء الله شبعانات اتفتر

احمدي الله جبناج اهنا وسترنا عليج لو باقية اهناك جان صار مصيرج مثل مصير مرجانة وخالتج الزلم شبعانين ببهن

.....ياكلبة ياحقيرة منوووو الشبعانين بيها الزلم لج جنة نعالها يشرفج يا عار

.... يبووووووو سمعتوها شتكول اليوم انعل اهل اهلج انه بنت الشيوخ نعال وحدة كح يشرفني

... ردت اهجم علبها فقدت لزمتني مرت خالد بنين اجتي تركض

ربى وجنتهم الثانية اجني علية يريدن يضربني بنين صارت كامهن

يابنت الشيوخ جنة تاج راسج وراس عشيرتج كلها من الصغير للجبير

بنين اجرجر بيه تريد اطلعني من المطبخ

ام رضا نزعت شيلتها وكعدت تلطم

... اليوم لو انه لو انتي بهالبيت  خلي يجون عمامج وابوج يشوفولج صرفة انه من تالي عمري انسب وانهان بالعباس ما اخلي شيلتي على راسي اذا ما ياخذولي حقي منج

..... شالج العباس عجوز البين

سمعت عيطة قوية اصاااااااال

انداريت رضا. واخو اجوي من الديوانية مبين جانوا بالبيت امه من شافتة زادت باللطم

... تعالوا شوفوا شصار بامكم من تالي عمرها تنسب انه مرت الشيخ وام الشيوخ ينكال عليه عار ونعال خالتها يشرفني

... رضا بدون تفاهم فات من بين مرت خالد وبنين لكمني بوكس على خشمي من القوة اختل توازني ووكعت راد يرجع يضرب بنين جلبت بي

خشمي فاض دم اريده يوكف ماكو يدفق بغزارة

ايدي وملابسي انترسن دم

مرة خالد كومتني تريدني اصعد

رضا.... بنت الكاولية اليوم اخلص عليج تروحين فدوة الامي تاج راسج وراس اهلج السكط

... اخو بالمدافع اخذة طلعة

صعدت لازمة خشمي بيدي  بنين ومرت خالد بريدون يوكفون الدم ميكدرون

بنين... عزززا وصخام بس لا خشمها انكسر

راح اخابر عباس ناخذج انه ويا للمستشفى

.... حجيت بهدوء ما اروح اي مكان لاتخابرين

ورا شوية بالكوة وكف الدم  تمددت بالفراش

... كومي غسلي ونزعي ثوابج

.. مابيه حيل غمضت عيني حتى دموعي خلصن

بنين انطيني تلفوني

.. شسوين

... اخابر بابا

... اهدي هسه وارتاحي بعدين خابري

... سمعت منها لان مابية حيل اناقش

اقل من ساعة فاتت مرت خالد كالت اصال يردوج جوة

بنين... منو يريدها

   عمتي گلبت الدنيا مبقت احد مدزت عليه عمي وولدها ورحيم منصف باهر

وهسه كلهم كاعدي جوة ودخلت عليهم بدون حجاب تبجي وتلطم

.. كمت من مكاني لبست الشال بقيت بنفس دشداشتي مابية حيل انزعها  نزلت جوه

دخلت للديوانية الكل وجوهم متتفسر والحية كاعدة تبجي وتنوح

بابا من شافني كام وكف لحيلة باوعت بعينه شفت بيهن خوف وقلق مو عصبية وزعل

منصف.. منو سوة بيج هيج

... تقدم عليه لزم وجهي يفحصة بيده حضنته وانفجرت بالبجي

... منو ضربج احجي

رضا... انه ضربتها شنو تريدها تسب امي واسكت

.... بابا عافني راح يريد يضربة خالد وباهر لزمو

عوفوني اكسر ايده المدها عليها

ام رضا.. مو هذا عشمي بيك ابو سيف بدال متحاسب بنتك جيت على ابني

الشيخ... اكعد منصف وانتي اصال تعالي كعدي خلي نفهم السالفة وبعدين عود تعاركوا

... الشيخ ضايج مني هاي اول مرة يصيحتي باسمي دوم يكولي بنيتي

كعدت يم بابا

الشيخ... يلا احجوا شصاير وعلى شنو جمعتونا  ومن شوكت صارن النسوان اذا تعاركن بسوون كعدة هاي جديدة

ام رضا.  ابو خالد ترضاها ام ولدك تنسب وتنهان كدام بناتها وجناينها انه بهذا عمري  اتكلي عار ونعال خالتي يشرفج ووخالتي تاج راسج وراس عشيرتج ومن غير باقي الغلط المايتسولف

جاوبني ترضاها وانتوا ترضوها

الشيخ.. دوم اكول عليج العاقلة مامصدك تطلع منج هيجي سالفة

.... باوعت العمتي كتلها خلصتي لو بعد عندج كلام

دارت راسها مني ومحجت

الشيخ...احجي اصال اريد اعرف ليش غلطتي وشجاب طاري خالتج بالعركة

... ام رضا حجت بسرعة واحد يكفر يجيب طاري خالتها

من البارحة مانزلة جوة وعايفة الشغل علينا كتلها ليش مانزلتي حالج من حالج البنات هذا لو شغل الصالون وروحة ويا خالتج جان كيفتي

بعدني مامكملة كلامي استلمتني سب وغلط

... هسه عرفت رضا على من طالع طلعت امه اضرب_ منه بالتمثيل صدوك لو كالوا الخلف على الخلفوا

جاوبتها هسه اكدر احجي لو بعد عدها كلام

... ماعندي شي لان الكل شاهدين على سوايتج وياي

... ماشي مثل مسمعتوها اريد تسمعوني اي اني اعترف غلطت عليها ولو يرجع بيه الوكت هم ارجع اغلط

رحيم... خوش مرباية

ام رضا... هاي كدامكم اعترفت وانه اريد حل وتردولي اعتباري

الشيخ... اشكد تشكيلي منج ما اصدك واكول هاي سوالف العمة والجنة ماعلية بيهن وهسه صدك خاب ضني بيج

. . انت وعدتني تسمعني للاخير واشو جملة مدتخلوني احجي

... ولو ماكو شي ينحجي بس كملي

.... قبل لا احجي شي اريد تنطيني كلمة تحكم بالعدل بينا اني الاعرفة من تصير كعدة ويطلبون رايك دوم حكمك عادل لان تخاف الله

وحق خالتي اريده من عگالك واذا اني الغلطانة وعمتي الها حق يمي مستعدة اسوي التريدو

واذا منصفتني وحكمك جان باطل راح ارفع قضيتي القاضي العرش وحقي اريده منه

... بوية هذا كلام جبير احجي شصاير  واذا الج حقج تاخذي من هالركبة

... اني من يوم الدخلت بي الهذا البيت مامر عليه يوم بدون ما انغث واسمع كلام جارح عمتي بمناسبة وبدون مناسبة لإزم تجرحني وتعيرني بمرجانة  وبخالتي.

و كولشي مستعدة  اتحمل الا شغلة وحدة هي جنة

... شوف الجذابة وانه شوكت حاجية على خالتج

. . ام خالد سكتي ما اسمعلج حس

كملي بوية

... دوم تعيرني بشغلها عبالك مشتغلة بملهى مو بصالون

.... ولكم شوفوا الجذابة

... انه شحجيت مو كتلج سكتي

  . اليوم. اتكولي خالتج شبعانين بيها الزلم وكح... غصيت واختنك صوتي

.... ماكايلة هيج واذا تريد اسال البنات

.. تحلفين على كتاب الله انتي مكلتي هيجي

.... وانه تالي عمري زعطوطة تحلفني على القرآن

   اي شكو بيها مو تكولين ما حاجية بعد من شنو خايفة

بنين.. ولو ماحبيت ادخل بس بعد ما اكدر ابقى ساكتة انه وامي سمعنة ام خالد من غلطت على خالتها

   لج بنين خافي ربج انتي حتى ماجنتي موجودة ويانة

.... غرفت امي قريبة من المطبخ ومو بس انه سمعت امي هم سمعت ولوما اخاف من ربي ماجان حجيت

وداعت وليدي الماعندي غيرة هذا الجرا والصار

... ام رضا تهسترت تجيب وتحلف الشيخ عاط بيها وسكتها

وهسه قبل لاتحكم بينا راح احجيلك عن جنة ام الصالون الي مرتك دوم تحجي عليها

جنة عمرها 11 سنة صارت ام الطفلة مالها احد بالهدنيا غير رحمة الله

ام اندفنت جوة التراب واب مايعرف بوجودها

مرجانة رادت تبيعها وتستفاد منها هم تحصل فلوس وهم تخلص من دوختها ومصاريفها

ومنو وكف بوجه مرجانة هذيج الطفلة ام 11سنة منعتها صارت مثل اللبوة شرسة حتى تكدر تمنع امها تاخذ بنت اختها الي امنتها يمها

مرجانة مكدرت تسوي شي وقررت تعاقب جنة كالتلها من اليوم اني معليه بيج فلس ما اصرف عليج

تخيلوا الماسات العاشت بيها جنة طفلة تريد حليب معدها فلوس تشتريلها

رغم هذا مرضخت الأمها واعتمدت على نفسها الله دزلها ناس طيبين الله يذكرهم بالخير صارولها اهل وسند الرجال اخذها ويا تشتغل بمعمل تطلع من الصبج ماترجع غير المغرب وكل هذا التعب والضيم حتى تكدر تجيب حليب والكمة تأكلها

سكتت وكمت ابجي ( ماكدرت اكوللهم جنة اشتغلت خدامة ماحبيت ارخصها كدام ام رضا)  الكل صافنين عليه ويسمعوني بتركيز

كملت كلامي جنة لو صدوك مو شريفة جان مشت بدرب امها ترى درب الحرام فلوسة هواي وطريقة سهل فضلت تتعب وينكسر ظهرها وماتفرط بشرفها وسترها

الي بعمرها جانوا يلعبون باللعابات ويداومون مدرسة وهي جانت لعابتها من لحم ودم تريد ترضع تريد تلبس واذا تتمرض تريد تتعالج

ومن صار عمرها 15 سنة مرجانة اخذتني وضمتني وخيرت جنة لو توافق تزوج لو بعد متشوفني

وافقت واخذت رجال اكبر من ابوها يضرب ويسب ويهين وهي صابرة ومتحمله

راح زوجها

شافنة اني وياها الضيم فقر وخوف ومشاكل وكل هذا وهي صامدة ومتمسكة بشرفها

من اني طفلة علمتني الصوم والصلاة لبستني الحجاب دخلتني مدرسة وهاي اني كدامكم راح اتخرج من السادس بفضل الله وفضلها

فنت عمرها علمودي جانت تخاف تتزوج لا زوجها يطمع بيه ومن انخطبت بيوم الخيرها بيني وبينا اختارتني اني ورجعت ضحت بنفسها الخاطري

احلفك بتراب ابوك ياشيخ جنة تستاهل تنسب وتنطعن بشرفها

.... خالتج هيبة وشرف وعگال فوك الراس المثلها جوهرة نادرة الله يستر عليها مثل ماسترت على عرضنا وربتج احسن تربية 

... انت وعدتني تحكم بالعدل وهسه اني اريد حقها

... يجرالج بوية خالد اخذ امك بنت الشيوخ وديها البيت اهلها بعد مالها مكان بهالبيت

....باوعتلها بشماتة سوت هالكعدة حتى تهججتي من البيت تالي هي انطردت  رجعت تلطم اتكولة بعد هذا العمر وولدي وبناتي بطولي   تطردني من بيتي الخاطر هاي الجذابة

ولدها اعتراضوا كالوا عيب الناس شتكول علينا عوفها بالبيت ولاتحجي وياها

كال ابد اخذوها من كدامي واذا حجيتوا كلمة  زايدة ارمي عليها اليمين

خالد اخذها وطلع رحيم معجبة الكلام ترخص وراح

كتلهم هذاك جان حق جنة وهسه اريد حقي من رضا

الشيخ... اذا بعد مد أيده عليج اكسرها كوم بوس راس مرتك وعمك

... لحظة عمو اني حقي، ابنك يطلكني

رضا.... اصال سدي السالفة مو وكتها

..... بالعكس ماكو احسن من هالوقت حتى ينكشف بي المستور

... بنيتي شكاعد تحجين لاتكبرين السالفة ماكو مرة ورجال مايتعاركون اذا كل وحدة تنضرب وتريد تتطلك مايبقى احد مزوج

... ومنو كال اني اريد اطلك لان رضا ضربني هذا الموضوع اصلا مو بالي ابنك المحترم يريد بزوج

رضا....انه شحجيت امشي صعدي الغرفتج بلا لغوا زايدة

منصف..  اسكت لا ابتلي بيك  احجي بنتي. شنو يريد يزوج

.... اي راح يزوج حبيبتة الي صارلة خمس سنوات يحبها ترى رضا من ازوجني مجبور عليه

من اول ليلة عافني وراح يحجي وياها واني واكفة اسمعة بأذني سنة كاملة اني ويا عايشين مثل الغربة نايم بصفي ويراسلها لو يطلع كدامي يروح يحجي وياها

وبالسنة الثانية اجاني مكسور كال عفتها واريد افتح صفحة جديدة  وياج ونعيش حالنا حال باقي المزوجين

سنه وهو يضحك عليه ومعيشني بوهم ويمثل دور العاشق الولهان 

والبارحة اجة كالي راح ازوجها واعيش بغداد لان اهلها وافقوا اخذها

فوك هذا كله مراح يكوللهم هو مزوج بين قوسين راح يخفي زواجة مني

بابا كام لزم رضا من ياختة وضربة بوكس على  خشمة نفس البوكس الضربنيا

باهر لزمة

... عوفني اربي هذا الناقص حسبالي رجال وانطيتك بنية تسوة راسك يالنذل

الشيخ... خوية الخاطري اكعد وخلي نتفاهم

.... على شنو نتفاهم مامرجية منك خوية خطبت بنتي الابنك وانت تدري بي عار وحرام يتسمى رجال

... بابا فقد من العصبية خفت لايصير بي شي بالكوة لزموا وخلوا يكعد

.. بنتي تعوذي من الشيطان وانسي سالفة الطلاك ورضا شحدة يزوج انه اضمنلج هالشي

منصف... لا خوية لهنا وبس بنتي مو لعبة بيد ابنك حتى لو هي قبلت ترجعلة انه ما اقبل وطلاك غصباً عليه يطلگها

رضا... عمي كلامك على عيني وراسي وراح احجيها الك من الاخير طلاك ما اطلك لو مدري شيصير........

يتبع

_بنات الغجرية _

( بقلم بسمة البياتي)

_البارت الخامس والثلاثون  _

___

رمضان كريم كل عام والجميع بالف خير ينعاد علينا وعليكم بالصحة والعافية ويتقبل الله منا ومنكم صالح الأعمال

_____

منصف... لا خوية لهنا وبس بنتي مو لعبة بيد ابنك حتى لو هي قبلت ترجعلة انه ما اقبل وطلاك غصباً عليه يطلگها

رضا... عمي كلامك على عيني وراسي وراح احجيها الك من الاخير طلاك ما اطلك لو مدري شيصير

.... تخسى على شاربك اذا صدك زلمة واوكف بوجهي بعد تحلم اخليها تصيرلك مرة

كومي بنتي لمي ملابسج حتى نروح

رضا فرفح يحير شيحجي وشيسوي الشيخ كالة كلمة ما اسمع منك تنجب وتسكت لاتظل تهوبز فوك رؤوسنا خليها تروح ويا ابوها

كمت صعدت بنين اجت وياي لميت نص ملابسي واخذت ذهبي كله  عشتو والله ولا اعوفة الهم

بدلت ونزلت جوة رضا رفع راسة باوع علية بخزرة باهر شال الجنط اخذهن

لزمت ايد بابا وطلعت فدوة ايدة اشكد دافية وحنينة

رحنا البيت ابوية زهراء من شافت شكلي وشافت  الجنط رادت تموت ظلت تلوب بس تريد تعرف ليش جاية

... منصف شبيها اصال وشنو هاي الجنط

... ماكو شي بيت ابوها ورجعتلة

خلص الموضوع

باهر خوية روح جيبلها اكل ادري بيها ماتحب طبخ زهراء

... لا لاتجيبون شي مو جوعانة بس اريد ارتاح

باهر... وجهج اصفر لازم تاكلين وتشربين عصير بدال الدم الراح منج انه رايح اجيب وغصب عنج تاكلين

... ابتسمتلة اجة بابا حضني كال انه الذبيتج بالنار وماكدرت احافظ عليج كل الصار بسببي

... لا لاتلوم نفسك هاي قسمتي والكاتبة الله الي

باسني من راسي وكال روحي الغرفتج بدلي ورتاحي

هزيت راسي بالموافقة صعدت الغرفتي جنت اتمنى لو باقية بيها ومشايفة رضا ولا عرفتة

صعدولي الجنط اخذت ملابس رحت سبحت ورجعت تمددت

بنين.. شلونها الحلوة

... كمت كعدت اجت يمي حضنتها ما اعرف شلون اشكرج لو ما انتي يمكن مجان صدكوني

.... خايبة ليش ماتسكتين شنو تشكريني انتي  بنتي والله يعلم اشكد احبج وانه من زمان مرارتي مبطوطة من ام خالد ما ادري اخواني ليش هيجي حظهم والله انطاهم هيج نسوان

... هههه انتي كلتيها هذا حظهم

... خشمج خوما يوجعج.

... لا الحمد لله مابي شي

... شعرج مبلل ومامشط راح اجيب  المشط امشطلج

... اي والله ياريت لان مابية حيل ودايخة

... ولج يالمصخمة بس لا حامل

... فزيت لا شنو حامل هو ابن اخوج حتى طفل مجان يريد مني ويتحجج بالدراسة ويمكن هذا احسن شي سوة الي هاي الدوخة  لان مماكلة من البارحة

بنين كعدت تمشطلي

... خالتج درت بالصار لو بعدها

... لا متدري وما اريد اكوللها الحد ما اطلك خطية البيها مكفيها اذا عرفت راح تتخبل ويمكن تجي عليه والوضع مثل مدتشوفي متكهرب وهو بدون شي يامشكلة تصير لازم يدخلوها بيها

... كليلي اصالة انتي من صدك تردين تطلكين

... اي والله صدوك بعد مستحيل ارجعلة

... خايبة انه ادري بيج تحبي شلون راح تتحملين بلياه

... وداعتج اتحمل وعندي استعداد ادوس على گلبي اني جنة الي روحي بيها كدرت افاركها كل هاي الفترة مو عاد رضا الخاين

جابولي الاكل بنين كعدت تسويلي لفات وبالكوة تخليني اكل هاي الانسانة الله دزها الي بدال جنة

بنونة الله عليج يومية تعالي يمي ما اريد ابقى وحدي ويا زهيرة

.. هههههه بدون ماتكولين يومية تلكيني يمج رجلي المسكين راح يهج مني ههههه

... هههه والله صدوك خطية

راحت بنين واني نمت

ظليت بيت بابا

الشيخ اكثر من مرة اجة يريدني ارجع واني وبابا نرفض

زهراء ابد متندك بيه تخاف مني خصوصاً من سمعت مرت الشيخ انطردت علمودي

رضا كل شوية بتصل مرة يهدد ومرة يتوسل يردني ارجع كمت اقفل الفون بس من اريد اتصل على جنة افتحة

وهي حبيبتي حاسة بيه اتكولي مامرتاحة احس بيج شي

كتلها لاتخافين مابيه شي وتلفوني عاطل بالكوة اكدر اشغلة واتصل بيج

ومثل كل مرة متقتنع بكلامي بس تسكت

صارت هواي مشاكل  بابا يريد رضا يطلكني وهو معاند

اخير شي راح للشيخ كال اذا ميجي باجر يطلكها ارفع عليه دعوة واخليها تخلعة

رضا استسلم بسبب الضغوطات وثاني يوم رحنا اني وبابا وباهر للمحكمة

رضا واخو خالد اجوي ابد مباوعت بوجها ما اريد اضعف وكلما گلبي يحن عليه اذكر سوايتة بيه وغلطة وضربة بسرعة ارجع احقد عليه

الكل بالمحكمة يعرفون باهر

كتلة ما اريد اروح للباحثة رضا مقبل كال انه اريد انروح

باهر... بوية ترى مايحتاج لان البنية وابوها قافلين دخلوا للقاضي وفضوها

رضا.. ترى انت عمي انه هم ولأزم توكف وياي مو تصير ضدي

... والله لو ادمي اكيد اوكف وياك بس سوالفك ماينحجن واصال ماتريد ترجع لاتعب نفسك

... رضا ظل يلح واني بس اريد اخلص كتلهم عادي راح ادخل للباحثة دخلنا كعدنا حاولت تصلح بينا

رضا.. يابنت عمي انه الحد هاللحظة متمسك بيج وشاريج لاتضيعين حبنا بساعة عصبيه

... هههه والله كلامك يضحك شاريني وتحب غيري تحبني وتضربني وتطعن بشرفي

مختصر الكلام رجعة ما ارجع كمت وكفت كلت للباحثة بعد معندي شي اكولة اريد اطلع

كالت روحي دخلنا للقاضي وتم الطلاق

اكذب اذا اكول  ممقهورة بالعكس گلبي دينعصر من الوجع لان للاسف اني فعلا حبيتة

وادري بگلبي يستاهل ينضرب بالنعال لان حب حثالة مثلة

طلعنا من المحكمة قبل لانصعد بالسيارة اجة رضا علينا كال

ردتوني اطلگها وطلكتها بس بالعباس ابو فاضل تحلم تاخذ غيري

باهر... واكف بنصنا وتهددها ليش تخليني اربطك بالسيارة وامسح بيك شوارع اليصرة رجال واوصل يمها هالمرة اني اوكف بوجهك مو ابوها

منصف... خالد اخذ اخوك وروحوا منا وديربالة بيوم من الايام يشوفني وجها مو بنت منصف التتهدد اذا وصل يمها عندي استعداد اكتلة خلاص وادخل بي السجن

... خالد جر رضا وصعدة بالسيارة

باهر.. بوية لاتخافين هذا بوخة مايكدر يسوي شي

... ومنو يكول خفت اصلا مهز شعرة من راسي

منصف.... شوفلنا مطعم نتغدا بي

.... رحنا تغدينا حاولو يغيرولي جوا جنت اضحك كدامهم بس داخلي مكسور 

رجعنا للبيت سبحت ونمت مكعدت غير المغرب 

نزلت جوة

هبة... اذا جوعانة اكو اكل بالفرن عمتج دزتة الج

... راح اسوي جاي ولفة جبن ما اريد اكل ثكيل

سويت الجاي وصبيتلي

كعدت وياها

لعد امج وخالتج وين؟

.. كاعدات بالديوانية نسوان يمهن

.... اهااا اخاف جايج خطابة

.. ههههه لا منين يحسرة كفيلج العباس ظالة على گلب اهلي

... يااا ليش شبيج اشو حلوة وام بيت وبعدج صغيرة على شنو مستعجلة

هديل شلونها وزوجها شلونة وياها

   الحمدلله زينة ورجلها حباب وفقير

... الله يسعدهم

باليل ورا العشا رحت كعدت يم بابا وباهر

كتلة بابا اريد اطلب طلب منك وياريت توافق عليه

.. أأمري بوية عيوني الج

.... تسلملي عيونك

تنهدت بابا اريد ارجع الجنة

صفن عليه كال وتعوفين ابوج

.. شلون اعوفك ابقى دوم اجي عليك وانت هم تجيني ونتواصل بالتلفون

فدوة بابا وافق والله مجاي اكدر ابقى اهنا كولشي بيه مكسور محتاجة جنة اريد ارجعلها

... بنتي والله صعبة انتي من جنتي بيت اخوي ويومية اشوفج وهم اشتاقلج شلون اكدر اخليج تروحين

... قابل اني خوما حظل طول عمري اهناك مصيري ارجع اهنا خصوصا اذا جنة ازوجت

زين شنو رايك ابقى اهناك اداوم كلية ومن اخلص  وعد ارجع

باهر... خوية عوفها تروح من اجت اهنا مشافت خير لو عايغها يم خالتها هواي احسن

جنة تحبها  وتخاف علبها اكثر منك بنتك محتاجة امها الربتها لاتكسر بخاطرها

... فدوة العمرك يا احن عم بالدنيا

هااا بابا شكلت

...بعد شكدر اكول هذا هو بوية روحي بس لاتكطعين بابوج ومن تكملين دراسة ترجعين وخالتج اي وكت تنخطب ثاني يوم انتي اهنا

... ممصدكة وافق ظلت ابوس خدة مثل المخبلة فدوة اروحلك حبيبي الله لايحرمني منك

باهر... اشو انه مالي بوسة مو ساعدتج وحجيت ويا

.... ههههه اي صح كمت حضنتة وبستة

طرت من الفرح احس نفسي مثل العصفور وراح يطلع من القفص

زهراء يمكن فرحت اكثر مني هههههه

باهر كال جهزي نفسج بعد يومين اني اخذج البغداد

جهزت نفسي اريد الساعات تمشي واطير البغداد

بيبي وبنين اجني عليه ودعتهن

بابا كاسر ظهري ادري بي مقهور مايريدني اروح

جنة بعدها لهسه كولشي متدري وحتى بجيتي البغداد هم مكتلها

اجة يوم السبفر مكدرنا نروح من الصبح لان باهر عندة شغل الظهر قررنا نطلع

قبل لا اروح اجيت كعدت يم بابا لزمت ايدة

وحجيت بهدوء.

تدري بابا جنت دوم اكول ماما ليش هلكد حبتك وشنو الشي المميز بيك وخلاها شبه تفقد عقلها من فراكك وبالأخير متحملت وماتت

من اجيت اهنا وعشت وياك وتعرفت عليك لكيت جواب على سؤالي

حقها تحبك هلكد لان فعلاً ماكو بحنانك وطيبة گلبك والله ينتقم من مرجانة الدمرتكم وضيعت حبكم بابا اريدك تعرف شغلة وحدة اني فخورة انت ابوية

بمتحمل دموعة نزلن مسحتهن بيدي وحضنتة

... روح عطر بيج

صح نحرمت منها بس الله عوضني بيج يابعد ابوج وحيلة

... بست ايده وراسة باهر كال يلا تاخرنا

طلعت من المطبخ زهراء واكفة والابتسامة تارسة وجها لوبيدها تشمر حجرات وراي

كالت عود تعالي زورينا

... ميحتاج توصيني اكيد اجي البيت ابوي حبيبي

تقربت منها وهمست لاتفرحين هواي اكمل دراسة وارجع انور هذا البيت هه

خلقتها انگلبت وعوجت حلكها

طلعت من البصرة واني هموم الدنيا على گلبي من اجيتها أول مرة جنت مكسورة وگلبي محترك على فرك جنتي وهسه طلعت منها بنفس الكسرة والقهر

باهر.. جنة عدها علم بجيتج

... لا متدري

... هسه تتفاجئ 

... من ناحية تتفاجئ هي اكيد حتتفاجئ بهواي شغلات

... شنو متدري بطلاكج؟

... لا حبيت احجيلها واني كاعدة كدامها

... خوش

... ورا اذن المغرب يلا وصلنا خابرت جنة سالتها انتي وين كالت بعدني بالصالون هسه راح ارجع

... لعد من توصلين اخابرج

وصلت للبيت جنة بعدها مراجعة رحت البيت خالة

هي ودعاء من شافني تفاجئن سلمت عليهن

خالة طلبت من باهر يدخل مقبل كال تاخر الوقت لازم اروح غير مرة اجيكم 

جاب جنطي وراح

دخلت جوة

دعاء... ولج عوبة اشو مكتيلي راح تجين ولو اني زعلانة منج صايرة كاطعة حتى متتصلين

... جنت ملتهية والله وجيتي صارت مفاجئة

ام وليد...هلا بيج يوم والله مشتاقيلج وجنة تلوب عليج اسمج ميوكع من لساني

... بالكوة كدرت اسيطر وما ابجي

واني هم مشتاقتلكم ومشتاقة الجنة

ثناء شلونها ادري بيها زعلانة  لان مكدرت احظر عرسها

دعاء... غركانة بالعسل حتى احنا متذكرنا

لا مزعلانة تدري بيج ملتهية بالدراسة والامتحانات

صدوك شوكت النتائج؟

... ما ادري يكولون هالأيام تطلع

اكولكم شو جنة تاخرت

... هسه على جبة اكوم اضم الجنط حتى اصدمها بيج

ام وليد.. عبالك جاهلة ولا تكبرين

اي اصولة رضا وابوج شلونهم

.... بلعت ريك من ذكرت اسمه ردت اجاوب سمعت صوت اميرة وجنة يحجون ويا دعاء

جنة... ولج وين ماخذتني اريذ اروح ابدل وارتاح تعبانة

... دفوتي وشوفي شمحظرتلج مفاجئة

... الله يستر من مفاجئاتج لان ادري متطلع منج سالفة عدلة

... هااا هاي اني على هذا كلامج راح اخسرج هدية لان زعلت

اصال... اسمع صوتهم بالمطبخ كمت وكفت اريد اروحلها ما اكدر جسمي ظل يرجف ورجلي ثكلت  خالة انتبهت عليه كالت اصولة بيج شي

حتى جواب ماكدرت اجاوبها دخلت جنة من شافتني صاحت اصاااااااال شمرت الجنطة من ايدها وركضت عليه

حضنتها وكمت ابجي بصوت عالي

جنة تبوس بوجهي وتبجي وياي

جنة... صارلي فترة ممرتاحة بالي يم اصال  حتى من انام  احلم بيها وافز مرعوبة

ومن اخابرها واسالها عن احوالها اتكولي الحمد لله زينة گلبي ميقتنع بجوابها

اميرة وخالة يحجون عليه يكولون بطلي وسواس البنية مستقرة ومرتاحة زوجها يحبها وهي تحبة لاتظلين تفاولين عليهم

شيقنع گلبي بهالكلام  اخير شي كلت الاميرة اريد اروح ازورها اذا ما اشوفها بعيني واكعد وياها ما ارتاح

كالت خلي نرتب امورنا وناخذ كامل ونروح نبقى يوم ونرجع

من دخلت وشفتها كدامي مصدكت عيني بجيها شك گلبي بنتي بيها شي والله بيها شي

يانظر عين جنة منو الماذيج شبيج ياروح خالتج وعمرها

... اريد احجي ما اكدر الشهكة كطعت كلبي كعدنا على القنفعة حاطة راسي على صدرة وحاضنتها

حجيت بوجع جنة اذوني وكسروني موتوا گلبي والله جاي امووووت من القهر رجعت ابجي بصوت

... منو هما لج احجي دموعج ملخني شصاير بيج واني ما ادري

خالة واميرة اجني يمها كلنا نريد نفهم شبيها

... منين ابدي وشحجي من اول يوم عرسي انجرحت وانكسرت باذني والله بأذني سمعتة يحجي ويا حبيبتة يتوسل ويتغزل بيها

لحظة وحدة ميعوف التلفون كاعد يمي ويراسلها  دعاء وثناء جانن يعرفن بضيمي

شنو الخلاني اسكت واتحمل ما ادري جنت جبانة وخفت من كلام الناس ياريتني مخايفة ولا هالحركة البگلبي

وفوك هذا كله عمتي معايفتني بحالي  دوم يعيروني باصلي ويحسسوني اني بنت شارع 

اجاني كالي عفتها واحبج واريدج نسيت كولشي وانطيتة فرصة اتعلقت بي اي هذا گلبي الحقير تعلق بي

مثل عليه الحب وصدكتة تالي طلع راجعلها ويريد يزوجها عليه

جنة... لساني انشل من الصدمة كل هذا شايلتة  ومتحملتة واني ما ادري اتمنى لو رضا هسه كدامي متاكدة ما ابقي عايش

اميرة... كافي ولج گلبج حيوكف من البجي ترى هذا العار ميستاهل دمعة من دموعج

خلي يولي اصلا ميستاهلج اطلكي منه شنو قحط زلم

... وخرت راسي من حضن جنة كتلهم اني اطلكت

جنة.. واني اخر من يعلم شنو صرت غريبة عليج ومتحجيلي

... مردتج تنقهرين جنت انتظر اطلك وارجع يمج واحجيلج كولشي

...راح تبقين يمي؟

... اذا تريديني اي ابقة

... كمت ابجي حضنتها ولج شلون ما اريدج من عمري على عمرج

ام وليد... من اول مافتي حسيت بيج شي ماكدرت اسالج ردتج ترتاحين كومي غسلي وشمري الصار ورا ظهرج بعدج صغيرة والف من يتمناج رضا مو خيالج والحمد لله خلصتي منه

جنة.  راحت اصال تغسل وجها

ظليت اكل بروحي لوبيد اروحلهم اهناك واطيح حظهم

اميرة. جنة شبيج

... لج راح اموت من القهر شوفي شسوو بيها دمروها الميخافون الله 

...خليج قوية وساعديها تنسى الصار اصال مكسورة لازم توكفين وياها وتقويها العصبية والمشاكل متجيب نتيجة اذا سويتي شي اخاف. يرجعون ياخذوها منج

.... اوووف ياربي بس الله اليعلم شنو البداخلي والكعبة جاي احترك عليها.......

يتبع

_بنات الغجرية _

( بقلم بسمة البياتي)

_البارت السادس والثلاثون  _

جنة...نايمة واصال بحضني والعب بشعرها اباوع ملامحها الحلوة شلون ذبلانة هاي مو اصال القديمة الجانت ضحكتها وصوتها تارسات البيت

طفوها ضحكتها وكسروا فرحتها دموعي تنزل وگلبي محترك

اميرة اشرتلي نطلع للهول شلت ايدي بهدوء من جوة راسها وكمت طلعت

اميرة... جنة مو كافي بجي شبيج الخاطر الله هاي بدال متساعديها حتى تنسى وترجع مثل قبل انتي تزوديها عليها

.... هو ليش بيدي دشوفي حالها بربج هي هاي نفسها اصال الي كلها طاقة ايجابية و حيوية لج الوجع البيها احسه بيه

...لا هي اول ولا اخر وحدة تمر بعالتجربة الشاطر يتعلم من اخطائة الله يحبها خلصها منهم بعدها صغيرة وان شاء الله يجيها اليعرف قيمتها وقدرها

... والله ما اريد من الدنيا غير سعادتها واشوفها مرتاحة من تفرح وترتاح اني من يمي افرح وارتاح

... ميحتاج اتكولين لان ادري بيج

... رجعت للغرفة حضنتها ما اريد اعوفها عيني للصبح مشافت نوم

اصال... ما اعرف شبيه الله ذب عليه نوم كعدت الصبح فتحت عيني جنة كدامي فدوة اروح الهالوجه هذا احلى صباح بستها من خدها

جنة... ههههه شنو هالنشاط

... هو اليصبح بوجهج اكيد يصير عنده نشاط اوووف اشكد احبج

...ابد مو اكثر مني عمري يرخص الضحكة من ضحكاتج

.... الله يطول عمرج ياعمري انتي

شنو راح اظلين تحجين كومي سويلي ريوك جوعانة اريد بيض وجبن وزيتون

اميرة... گيمر وكاهي متريدين ادري شجاكم من الصبح كاعدات وتلغن يم راسي

... العغو عيني ام ليوثي مبين أزعجناج

ياحلوة انتي جبتيها النفسج وشهيتني كاهي امشي جيبيلي

... شوف هاي البطرانه رادتها من الله بنتي رجعي نامي وخليني انام

الكيها منج لو من خالتج امسهرتني وياها للصبح

.... خاينات سهرتوا بدوني وهذيج اختج العوبة اني اعلمها كتلها تعالي كالت ماشي واشو غلست

... لج رعنة لو ما انتي نمتي من وكت وعفتينا

دعاء اجت لكتج نايمة ورجعت

جنة... كافي مناكر  يلا كومن واني حخابر كامل يجيبلج گيمر وكاهي وصمون حار وراح اسويلج جاي ابو الهيل

... شمرت نفسي بحضنها يفدوة والله اشتاقيت الدلالج

... شعندي غيرج ادللي براحتج

... كمنا حظرنا ريوك رجعت اشاقة واضحك لان ادري بجنة مقهورة علمودي ما اريدها تضوج قررت اشمر الصار ورا ظهري وابدي حياتي من جديد

اجة كامل جايب الگيمر والكاهي ظل يدردم

... رجعت اصال ورجعت طلباتها شراح يفكنا منها

واني حايط انصيص روح كامل تعال كامل وياريت لو مستفاد شي

... مو راح اكعد تطفح ويانة كل هذا وممستفاد

... هم عايزة اطلعوني بدون ريوك لمشي لج جيبيلي مي تعبت ساعة واكف يم الفرن

...كام يتامر راح يطلع الريوك من خشمنا لان هو راح جابة

... اي نعم وانتي بالذات شكلج تنفذين

... اي مو اشتغل يمك

جنة... بالكعبة انسطرت كافي يمعودين

... اني شعليه هو هواي يحجي

جنة... دزينا على خالة ودعاء اجوي تريكو ويانة اليوم مرحت للصالون

شفت اصال ملتهية ويا دعاء شلت تلفوني وطلعت للطارمة

اتصلت على منصف اول مكال الووو انفجرت بي

هي هاي الأمانة الامنتكيها انطيتها الكم مثل الوردة ترجعوها الي بدون روح كولشي بيها ميت

ياخي اذا تدري بنفسك مو كدها ومتكدر تحافظ عليها ليش اخذتها مني عبالي صدوك راح تحافظ عليها وتعيشها ملكة وتعوضها السنوات الجنت بعيد بيهم عنها

سنة مكدرت تتحملها وشمرتها البيت اخوك وما شاء الله بيت اخوك مقصرو بيها داسوها وكسروها

ليششششش ساكت احجي شي انطيني جواب بلكي يثنعني ويطفي نار گلبي

.... شحجي وشكول وانه الغلط راكبني من ساسي الراسي شتحجين وشتكولين حقج مالومج

وعلي نارج مو ازيد من ناري كاعد اعض اصابيعي ندم وياريت يفيد

... تدري منصف من اخذتها مني شصار بيه وشلون عشت الله يشهد حتى الحياطين جانت تخنكني مرت عليه ايام الله لايراويها البشر، تمنيت اموت حتى ارتاح من وجع گلبي والخنكة الاني بيها

ورغم هذا جنت اكول ما لازم اصير انانية احسن شي صار الأصال روحتها يم ابوها وبين عمامها وگرايبها اكيد هناك راح تعيش معززة مكرمة محد يكدر يدوسلها على طرف

ويكوللها انتي امج هيج وبيبيتج هيج ولا يذكروها بمرجانة

واكيد راح تجيها قسمة ترفع الراس وتعيش مرتاحة

اذا تبقة يمي راح ينكسر بختها ويصير حالها مثل حالي

انخطبت الأبن اخوك رغم خوفي ورفضي تقبلت الموضوع كلت هذا ابن شيخ ومثقف وين تلكي احسن من هيجي قسمة

وشنو جانت النتيجة اول الناس الطعنوها وقللو من قيمتها بيت عمها ترباية الشيوخ واهل الحسب والنسب

الغربة سكتوا واهلك وناسك هما العيروها باصلها

شحجي وشكول حسبي الله على كل شخص كسر خاطرها ان شاء الله حوبت هاي اليتيمة متتعداهم

... بروح اختج كافي ترى البية مكفيني على ساعة اطخ برأسي اروح افرغ سلاحي براس رضا

... من سمعتة يحجي بنفعال وحركة گلب سكتت خفت لايروح بساعة عصبية صدوك يسويها

منصف اصال بعد ما ارجعها الك مستحيل افرط بيها واتخلى عنها انت تبقى ابوها وعلى عيني وراسي شوكت تريد تشوفها بيتي مفتوح الك واكيد هي هم تجيك وتبقى يمك بس مال اخليها ترجع تعيش اهناك لا مستحيل

... خوية مو وكت هالحجي هي راح تبقى الحد ماتكمل دراسة وبعدين عود الله كريم

... كملت المكالمة ورجعت كعدت يم اصال ودعاء

اصال...باهر اتصل حيجي

..خير شيريد

... يااا وشبيج متعصبة

.. على شنو اتعضب ماعدا ابوج وبنين ما اريد اشوف اي احد من طرف هاي العائلة

... صفنت عززززا مبين مطايقتة وهو المسكين غركان

جنونة باهر حباب وطيوب واني اموت عليه من رحت للبصرة هو بنين مشفت منهم غير كل خير لوما هما مدري شجان صار بحالي

ترى باهر معليه بالصار ومجان يعرف وهو القنع بابا يخليني اجي ابقة يمج

... رفعتلها حاجبي كمت اغار بس لا كمتي تحبي اكثر مني

.. حضنتها معقولة تتوقعين اكو بشر على وجه الكرة الارضية ممكن احبه اكثر منج

دعاء... لعد مو جنتي تحبين المصخم

.... انتي انجبي يعني لازم تعكرين مزاجي  صح حبيتة بس والله ميجي نقطة بحر حبي الجنة

جنة... اروح فدوة ونذر الهلعيون

دعاء... حتى المرة والرجال المزوجين عن حب ميتغزلون ابعض بكدكم

اشو اني خواتي العوبات ميكولنلي هيج  حتى كلمة احبج مسامعتها منهم

اصال.. خمسة وخميسة بعينج يالعوبة

دك فوني باهر كالت الجنة الله عليج استقبلي زين موتگلبين خلقتج بوجها

..صار تدللين اكو اوامر ثانية

.. هههههه لاسلامتج اروح افتحلة الباب اول مشافني

... اليوم الوجة مورد هوى بغداد طابلج

.... اي لعد شلون ههههه فوت ليش واكف

... لا بوية ميصير انتن نسوان وحدجن ماترهم ادخل

... اني بنت اخوك ترى عادي

... والناس شمعرفهم ما اريد تجي حجاية الخالتج

جنة... جنت ورا الباب من سمعت كلامة لمت نفسي لان حجيت عليه الرجال من يوم العرفنة مشفنا غير كل خير طلعت من ورا الباب وكفت يم اصال سلمت عليه شلونك اخي 

.... هلا بيج الحمدلله انتي شلونج

. نحمده على  كل حال تفضل فوت ليش واكف برا

.... مستعجل وراية طريق جيت انطي هذا الخط الاصال ابو سيف كال خلي تكسر خطها القديم

اصال... اي هم زين اني هم جنت مفكرة اغيره اخذتة

عمي المسكين يختلس نظرات من جنونة وهي ولا يمها

سلم علينا وراح

ايامي مرت عادية نفسيتي شوية ارتاحت

كمت اروح ويا جنة واميرة ودعاء للصالون

اليوم النتائج مرعوبة اتصل عليه باهر وبلغني بالنتيجة لان هو طلعها الي ناجحة بمعدل سبعين

تخبلت مجنت متوقعة راح اطلع هيجي معدل اني شاطرة شلون جبت هيجي معدل ما ادري شبعت بجي جنة تحاول تهديني وتهون عليه هاي السنة ابد مو سنة حظي الكفخات بيها دتجيني من جميع الجهات

جنة... اشو كعدي خلي احجي وياج على شنو كل هالدموع انتي تعبتي ومقصرتي والبكالوريا حظوج

.... شلون ما ابجي واني اشوف مستقبلي ديدمر فشلت بزواجي وهسه دراستي ليش هيجي حظي

... زواجج الله كاتبلج ميكمل واحمدي. ربج مصار عندج طفل منه جان انربطتي بي طول عمرج ومكدرتي تخلصين منه ومن امه

اما بخصوص دراستج انتي مو حلمج هندسة قدمي على اي كلية اهليه واذا قبلوج اني اتكفل بكولشي والله لو اعرف ابيع حصتي بالصالون ولا اخليج مقهورة ومغثوثة

واني جامعة مبلغ زين وعندي ذهب كلهن فدوة الج المهم تفرحين

... لا عمري مو الهثخن تريدين تبيعين الأكو والماكو وترجعين على الحديدة هاي من كل عقلج

.... شسوي بيهن عود اتتي من تتخرجين وتتوظفين تعوضيني

.. هههههه اليسمعج يكول الوظائف مشمرة بالشارع انسي الموضوع جنونة اني لو اريد ابيع الذهب مالتي بس الحزام الجابة بابا بي كومة فلوس

خلص ما اريد راح اقدم اي كلية تطلعلي اداوم بيها عادي

جنة حاولت وياي رفضت وتصرف عادي رغم مقهورة بابا اتصل عليه باركلي على النجاح ويمكن باهر كايلة اصال ضاجت ونفس كلام جنة كال روحي اهلي ومعليج بالأقساط

رجعت رفضت ما اريد اكلفهم

متأكدة اقساط الهندسة هواي واصلاً منو يكول يقبلون معدلي

وهذا جان غباء مني لان رفضت ومحققت حلمي

اجة بابا زارني وجابلي هدية نجاحي وظل كل شهر يجي يشوفني ويجبلي مصروفي وممقصر بشي وياي

طلعت القبولات انقبلت علوم فيزياء صح قسم معقد ومحبيتة بس شسوي مجبورة اداوم

لزمت خط بابا هو يدفع الشهرية من غير باقي احتاجاتي

جنة هم ممقصرة وياي واني من ارجع من الدوام اروح اساعدهم بالصالون

حياتي مشت عادي

لكن  قلبي بعده يتوجع  وبعده مطايب من اثار الحب

  سمعت رضا خطب حبيبتة بيومها متت نار اشتعلت بصدري

جنت ادوس على نفسي واتصرف عادي ما اريد احد يحس بيه ويشفق عليه

بالكلية هواي حاولوا يتقربون مني جنت اصدهم وما انطيهم مجال

اما علاقتي ويا البنات عادية ما اتعمق بالصداقة لان اعرف اذا قوت علاقتي بيهن مراح اخلص من الآسئلة الشخصية

اليوم خلصت محاظرة وطلعت ويا البنات اخذنا لفات وكعدنا ناكل لمحت من بعيد شخص مو غريب من اقترب يبست بدمي عزززا بعينه هذا رضا  اللكمة عصت بلاعيمي مكدرت ابلعها وجهي صار ينطي الوان صخام هذا شجابة وشلون كدر يدخل

وكفت سلم وكال اصال تعالي احجي وياج

البنات يباوعن عليه وعليه بستغراب والف علامة سؤال بوجهن

وحتى الشباب الواكفين بعيد هم يباعون

حجيت برتباك بس اريد اطلع من الموقف الاني بي كتلهن بنات هذا رضا ابن عمي

سلمن عليه كمت مشيت ويا واني شايطة من العصبيه

رضا... اوكفي شبيج تركضين تعالي نكعد اهنا

... انت ششجابك وشرايد مني مستحيت على نفسك من خليتني بهذا الموقف الطلاب شراح يكولون عليه

... لاتصيحين مو كتيلهم ابن عمي بعد شكو وشدعوة هلكد متعصبة مبين متريدين احد يشوفج وياي

... اي طبعاً ما اريد ومختصر الكلام شرايد وليش جاي

...اشتاقيتلج وجيت اشوفج واطمئن عليج

... هه والله ياالله مشتاقلي  على العموم شكراً ويلا تفضل روح وياريت بعد ما اشوف خلقتك

.... سمعيني لج لاتشوفيني تاركج هاي المدة حسبالج هاهي نسيتج وطلعتج من حياتي لا غلطانة جنت انتظر الوضع يهدوء واجي ومنا وجاي راح تشوفيني هواي تحلمين اخليج براحتج لازم الكل اهنا يعرفون انتي ملكي حتى لايجرء اي واحد يفكر بيج

... اكولك انت مقتنع بنفسك وبكلامك اشو جاي تخوط بصف الاستكان بابا انت منو وتدخل بحياتي احب ما احب شي راجع الي نصيحة التهي بحياتك وخطيبتك ومعليك بيه

وبعد لاتشوفني شكولتك انت خلك ابن عمي وهاي الصفة لاتقدم ولا تاخر بالنسبة الي

.... صك على اسنانة وحجة بغضب لاتجربين تلعبين وياي انتي اتسجلتي بأسمي ومصيرج ترجعيلي اذا مو اليوم باجر افتهمتي بنت ابوج وفكري مجرد تفكير بغيري وعود شوفي رضا شراح يسوي

وهسه انه رايح  و الي جية ثانية يا بنت عمي العزيزة

عافني وراح ظليت كاعدة بمكاني اعصابي ترجف هذا شيريد مني مو خطب وعاش حياتة شعلي بيه

طلعت تلفوني واتصلت على بابا حجيتلة كولشي تخبل كال معليج انه انصرف واريد اشوف شلون بعد يوصل يمج

الظهر الخط وصلني للصالون جنة من شافت شكلي حست بيه شي استلمني هي واميرة حجيتلهن جنة تعصبت رادت تتصل على بابا كتلها اني حجيت ويا وهو حيتصرف

باليل اتصلت بيه بنين كالت اليوم منصف هد على ديوان الشيخ وكدام عمومتنا حجة كال ترضاها ابنك المحترم يروح البنتي للدوام وكدام الكل يوكف يحجي وياها

خوية ابعد رضا عن اصال لاتشوفني ساكت ورضيت بسوايتة قبل الله وكيلك انت واكف بعيني بس للصبر حدود اذا يظل على نفس وضعة طلقة برجلة اگرمة الك اخلي يعيش طول عمره مشلول

... اي وبعدين شصار

... الشيخ خجلان ماعرف شيكول كايلة عوف السالفة عليه بعد شحدة يوصل يمها

ومن راجع للبيت مخابر علية ومطيح حظه ومهددة اذا يظل يحوم وراج فلس بعد ماينطي وحتى خطوبتة من هاي البنية يخبرها

رضا منطي وعد الابو بعد ماعلية بيح

... اهاا اي زين حجيت بقلبي اشكد جبان وبوخة الصبح يثرم بصل براسي ومن حجة ويا ابو صار جريذي

كملت هاي السنة وصرت مرحلة ثانية

اني وجنة بالمطبخ دنسوي عشا سمعنا صوت سيارة وكفت بالباب ثواني واندكت الباب

طلعت اشوف منو فتحت الباب مرجانة واكفة

هففف هم انتي شجابج

مرجانة... عود من اجي البيتج كوليلي شجابج ادري شنو سالفتج كلما اجي الكيج اهنا

... هذا ببت خالتي يعني بيتي

... وخالتج بنتي واني امها وخري من كبالي اشكد ادبسز

جنة...مديت راسي من باب المطبخ اصال ومرجانة واكفات يتناكرن اوف وتالي ويا هالمرة اتغط وهم ترجع تلفي

فاتت للمطبخ اخذتني بالأحضان ياساتر ياربي

مرجانة....شلونج بنتي لوتدرين اشكد مشتاقتلج

اصال... منين نزل عليج هذا الحنان ولا عرفتج سبحان الله صايرة الماما الحنونة

.. اني دوم حنينة واحبجن بس انتن عايقات ورعنات وگلبجن اسود

جنة.... راحت كعدت بالهول ظليت اباوع عليها بستغراب شكلها متغير وحيل ضعفانة صح بعدها بكامل اناقتها ومكياجها بس الكبر مبين عليها

اصال. اشو خلصانة شنو زيودي ينومج بدون عشا

... هو وين اكو احن منه فدوة العينه لاتحجين عليه لج

... اي مو سبيت العنب الأسود

جنة... بدون لف ودوران كوليلي شنو سبب هالزيارة وبطلي سالفة مشتاقتلكم واحبكم لان ميوكلن خبز يمي

.... حسافر وجيت اشوفج قبل لا اروح

اصال...روحة بلا ردة دفعت مردي لاتباعين هيج قصدي تروحين بسلامة وبعد مترجعين

.... متصيرلج جارة ادبسز مو بيدج

... طالعة عليج العرك دساس ههه

جنة... الله وياج

... اشكد رعنات على الآقل سالوني ليش رايحة وشسوي

اصال... اي صح ليش رايحة وشسوين بس اعتقد الرزقج بالعراق قل متشوفين شلون ضعفانة فقررتي تسافرين وتجربين البضاعة المستوردة

جنة... لج اصاااال عزززا على هالسان

.... عوفيها هي صح ادبسز وطايحة حظ بس تشبهني والله لو مربيتها اني جان لعبنا اني وياها بالفلوس لعب

.... اذا اني مثلج احفرلي گبر واطم روحي بي

جنة... بديت افقد اعصابي موردتي تسلمين وصل سلامج يلا روحي

.... صارلج سنين تشتغلين بالصالون اكيد هسه كومة عندج فلوس نايمات على گلبج انطيني جم فلس محتاجتهم

.... ههه من البداية عرفت جيتج وراها سالفة ليش زوجج وين راح ليش متطلبين منه

.... زياد ممقصر وياي بس خطية خسر هواي بشغلة واني محتاجة مبلغ جبير للسفر

... شسوين بي؟

... اروح اتعالج هسه ارتاحيتي.......

يتبع

_بنات الغجرية _

( بقلم بسمة البياتي)

_البارت السابع والثلاثون  _

اروح اتعالج هسه ارتاحيتي

جنة... من شنو تتعالجين ليش شبيج؟

.... عندي تشمع بالكبد واريد اروح اشوفلي علاج اهنا الآطباء لعبوا بيه لعب بس روحي وتعالي وماكو اي نتيجة

.... صفنت بوجها المرض مبين عليها رغم محاولة تخفي شحوب وجها بالمكياج لكن التعب واضح على ملامحها

اصال.... حسب معلوماتي تشمع الكبد يصير بسبب كثرت المشروبات الكحولية والأدمان

كل السوالف العوجة بيج وهذا مرضج من افعالج السودة

... بنت الكلب جاي تتشمتين بيه

   لا علويش اشمت هاي مو اخلاقي ولاتربيتي

المرض مابي شماتة حتى لو جنتي يهودية هم مستحيل اشمت بيج

بس صدوك خلي انطيج معلومة ترى تشمع الكبد ماله علاج فلاتحاولين تعبين نفسج

... الطبيب كال اكو ادوية تقلصة ومتخلي يزيد اكثر واكو زراعة كبد العنده فلوس كولشي يكدر يسوي

... اسمعهم يحجون واني ساكتة منطيت اي ردت  فعل اي بنية اذا تسمع امها لا سامح الله مريضة تنهار وتركض يم رجلها ولو بيدها تنطي صحتها لامها اما اني مرفلي جفن عليها افعالها خلت گلبي مثل الحجر

كمت من مكاني توجهت للغرفة فتحت الكنتور  طلعت فلوس بحدود المليونين اني الحمد لله شغلي زين واكدر اجمع

اخذت الفلوس وخليتهن بيدها

... ههههه متوقعت حتنطيني طلعتي خوش بنية واني ظالمتج

.... اخذيهن وروحي ولاتتاملين بعد انطيج دينار واحد لان اني هم ماعندي

... لا بعد شريد منج وهم زين طلعن منج هل جم فلس

.... انتي شمنتظرة حتى تتغيرين شوفي لبسج وشعرج ومكياجج ترى هسه انتي بحلك الموت شوكت ترجعين الربج وتستغفري لو غيرح وحدة ماتترك السجادة وتظل سجادة ليل ونهار حتى الله يغفرلها ذنوبها

... اهووووو راح تستلمني العلوية وتسطرني بنصايحها دادة اني اجيت علمود فلوس مو علمود تدعيلي اكوم اروح. احسن

... سبحان الله بعز شدتها وبعدها على نفس وضعها مو بس كبدها متشمع حتى گلبها

شنو من ذنوب عدها ورب العالمين طاردها من رحمتة الك بيها حكمة ياربي

اصال صافنة عليه شبيج عبالك مضيعة بوجهي شي ودتدوري

.... ليش ساعدتيها وانطيتها فلوس شغلج وتعبج

نستي السوتة بينا وخصوصا بيج انتي حارت شسوت تفننت حتى تعذبج وتكسرج

... هي الله شايل الرحمة من گلبها تريديني اصير مثلها من ساعدتها مو حب بيها وانما خوف من الله وعقابة

ما اريد من اموت وبيوم الحساب انسال عليها. لان شما تسوي بيه للآسف تبقى امي وخوفي من ربي اكبر واعظم من حقدي عليها

.... تدرين جنونة شنو اتمنى

... شنو؟

... اكون نسخة منج بكولشي طبعي تصرفاتي اخلاقي شخصيتي حتى بتديني والتزامي اريد اصير  مثلج

.... فدوة العمرج ومنو بكولج انتي مو مثلي انتي بنتي والبنية اكيد تطلع على امها

... يا عمري احسن واحلى ام

..... يلا كافي كلام كومي انصب عشا ترى متت جوع

ورا العشا اجني البنات يمنا ثناء وياهن

ثناء.. جنونة اني اليوم جاية مخصوص عليج

جنة. بتعجب عليه؟

... اي شوفي حبي بدون ما اطول السالفة واعرضها خال قاسم زوجي يريد يجي يتقدملج

... لو محاجية احسن ما اريد لايتقدم ولا يتاخر اني كايلتلكم زواج ماازوج

اميرة.. هسه انتي شعرفتي عنه وبسرعة رفضتي دسمعيها بالأول وبعدين غردي

... الخاطر الله شسمع اني هيج مرتاحة شجابني على الزواج ودوخت الرأس

اصال.. ثنو احجي ومعليج بجنة 

خال قاسم وين شافها  وشسمة واشكد عمره وشيشتغل

دعاء... على كيفج داده ترى العريس الخالتج مو ألج

... عابت سكتي ومعليج يلا ثناء جاوبي

ثناء... شافها بعرسي وظل دوم يسأل قاسم عليها ومن عرف ممزوجة طلب من عندي احجي وباها

اسمه رعد اكبر منها بست سنوات عندة محل ملابس رجالية وبيت ملك حالتة المادية الحمدلله زينة بس اكو شغلة لأزم تعرفوها هو جان مزوج ومطلق صارلة سنتين وعنده بنية من طليقتة عايشة ويا امها

... وشنو سبب الطلاق

....قاسم وعمتي كالوا طليقتة كولش وصخة بس انطيها اكل ونوم اليطب بيتها كلاص مي ميكدر يشرب من القذارة

.... ومنو يكول هالكلام صح ولو حتى وصخة هذا مو سبب حتى يطلق وهو عنده بنبة منها ليش معلمها وصبر عليها

.... عمتي مرة تخاف الله ومتكذب الكلام صح

ويكولون سنوات هو يعاني منها حاول بكل الطرق يغيرها وهي ظلت على نفس وضعها اشهر تروح زعلانة ومن ترجع نفس الطاسة ونفس الحمام ماكو اي تغير بيتها جايف حتى بنظافتها الشخصية متهتم

... مممم لعد حقة اني من الحجي نفسي لعبت وراح يطلع العشا من خشمي جنونة ليش ساكتة شنو رايج

.... من البداية انطيتكم جوابي زواج ما ازوج وانسدت السالفة

اميرة...لا اشو متنسد وغصباً عليج تسمعينا الجم دوب تظلين هيج لا ام لا اب لا اخ على الآقل خلي يصير عندج رجال فوك راسج وتلحكين تخلفيلج طفل طفلبن يشيلوج ويسندوج من تكبرين يعني معقولة متتمنين تصيرين ام

واذا اتكولين اصال بنتي واني مكتفية بيها

احب اكولج ترى اصال مدايمتلج مصيرها تزوج صح فشلت مرة بس خوما تبقة طول عمرها مكابلتج

فكري بنفسج هسه انتي بحيلج اذا مشى بيج العمر وتوكعين منو الج ترى الكل راح يلتهي بيتة وحياتة ومحد حيفكر بيج

جنة.. سكتت معندي جواب الها كلامها اثر بيه وبنفس الوقت صارت عندي عقدة من الزواج والاكثر منها ما اريد اصال تعوفني

اصال.... اني حايرة مثل حيرت جنة اعرف باهر يحبها بس شغلتة صعبة واني اريدها ترتاح وتستقر

كتلهن بنات عوفوها تفكر براحتها اني عكب باجر اروح للبصرة ابقى عشر ايام ومن ارجع غصب عنها تشوف العريس بلكي يعجبها

... لج اصال شنو هالحجي

... لا اصال ولا بطيخ اروح وارجع ويصير خير

اجة يوم السفر وكالعادة بهوري هو مبتلي بيه يوديني ويجيبني صعدت ويا والطريق كله يحاول يلكي موضوع  من جوة الكاع في سبيل يجيب طاري جنة لو بيدي اطكها بوجها واكولة بس اخاف يگلب بينا السيارة هههههه انتظرت نوصل بسلامة

وصلت البيت ابوبة وبابا حبيبي ينتظرني بالباب اول مشافني فتح ايده ركضت الحضنة فدوة اشكد مشتاقتلة

... هسه ردتلي روحي يا روح ابوج

... ظل يبوس بيه اجة سيوفي بوسني وسلم عليه

بوست اخواني البقية ودخلت جوة زهورة المزهورة لاوية بوزها عبالك بسطال جيش ايام قبل

سلمت علية من طارف خشمها واني هم رديتلها السلام بنفس اسلوبها

ظليت حاضنة بابا كعدت اسولف ويا

ومن شافني تعبانة كالي روحي ارتاحي بغرفتج

صعدت سبحت ونمت محسبت غير على صوت بنين وهي تكعدني

... هلا بالكاطعة الي راحت وكالت عدولي

... هلا بنونة العسل لوتدرين اشكد مشتاقتلج

... اي خايبة ضحكي عليه بهذا كلامج لو صدك مشتاقتلي جان جبتي من رحتي بعد ماشفتج

... غير عندي دوام ومن صارت العطلة اجيت وبعدين اني مو يومية اتصل عليج

... الاتصال مو مثل الشوفة  يلا المهم هسه انتي اهنا

... اليوم ماكو روحة تباتين يمي واضربي عبوسي بوري

.... ههههه هو الرجال دوم مضروب بوري

... نزلت جوة بنين راحت كالت اعشي عباس واجيج

كعدت ويا بابا جان جايب عشا تعشبينا سوة

باليل اجتي بنين اخذتها وصعدت فوك ظلت تسوالفلي على اخبار العشيرة واحد واحد ماعدا رضا ابد مجابت طارية متحملت سالتها.

اكول بنونة رضا تزوج لوبعده

.... خايبة شلج بهالسالفة نعست خلي انام

... بنين احجي ولاتخافين مراح اضوج بس اريد اعرف فضول لا اكثرر

.... اي ازوج

... بداخلي حيل انقهرت ليش مجاي اكدر انسى ما ادري همست شوكت ازوج

.. قبل شهرين

... سوة عرس لو لا ولو اعرف اكيد سوة

... اي سوة عرسة بغداد انه وبيداء مرحنة وحتى الشيخ وأبوج وباهر هم مراحوا

.. واكيد عرس ضخم وبقاعة

... خايبة ليش تسالين وتغثين روحج

.. لا علويش اقهر روحي بس داسأل وانتي جاوبي اشو دتنكطين عليه بالكلام تنكط

... اي بقاعة اهلها مسوي عرس جبير ويكولج العروس وخواتها لابسات لبس يخزي مشلحات

اخوان رضا وكرايبنا ظلوا يحجون على رضا لان ما عجبهم الوضع

... هه اي هي هاي الكتل روحه عليها بالعافيه عليه

غمضت ردت انام مكدرت موبيدي وجع گلبي ملخني

ثاني يوم بابا طلب مني اروح ازور بيبي لان مريضة بالفراش ما احب اروح الهذاك البيت بس انجبرت الخاطر بيبي لان احبها

رحت ويا بابا مرت الشيخ ورا شهر من العركة ولدها رجعوها للبيت من شافتني لوبيدها تشرب من دمي

بس متكدر تحجي شي لأن بابا وياي لا سلمت عليها ولا سلمت عليه بسرعة دخلت الغرفة بيبي ظليت كاعدة يمها بعده اجة الشيخ سلمت عليه ورجعت للبيت

صارلي خمس ايام بالبصرة انصلت الظهر على باهر من صوتة مبين نايم

... شرايدة بهالظهرية ماتعرفين تتصلين العصر.

..لا ما اعرف. لان العصر اريدك اطلعني اشتاقيت للبصرة وشوارعها وللكورنيش واريدك تعشيني برا

... ترى انتي متصلة على الرقم الغلط انه باهر مو منصف روحي الابوج يطلعج شنو ابتليت بيج  منصف يخلف وباهر ودي وجيب

..... اكولك ترى ماكو داعي الكل هالكلام انت بيها وبلايها حطلعني يلا كولي ساعة اشكد تجيني حتى اتحظر

... مو انه سايق عندج كاعدة تحجين بثقة

... اي اكيد احجي بثقة عمي واعرفك طيوب ومترفضلي طلب

.... اي شكو عليج ضحكي عليه بهاي سوالفج امري لله فد ساعتين وامر عليج

.... فدييييييت عمو العسل

... ولي خلي ارجع انام ابتليت بيج وابوج

... سديتة واني اضحك تحظرت والعصر اجة اخذني فترينا شوية واخذني المطعم كلت ورا العشا افجرلة القنبلة خطية ما اريدة تنسد نفسه وميأكل شي ههههههه

كملنا العشا باهر ديشرب جاي ظليت احوص اريد افتح الموضوع

عمي الحلو الكعدة وياك ولاتنمل

.... لا حلو ولا بطيخ بعد ماكو طلعة لاتحاولين

..يااا هاي شبيك هسه اني شحجيت مو زين دامدح بيك وبالطلعة وياك

... مشكورة مقصرتي وما اريد لاتمدحين

... لأزم تتحملني اصلاً مبقة شي وارجع للبصرة اريد كل اسبوع نطلع

.. شتسوين ترجعين مو بعدلج ثلاث سنوات؟

... ابتسمت اي صح بس جنونة من تزوج اني لازم ارجع بابا ميقبل ابقى

... شنو منو تزوج؟

... شنو منو قابل كم جنة اكو اكيد جنة خالتي متقدملها عريس بي كل المواصفات وكاتل روحه عليها واني والبنات دنقنع بيها حتى توافق

... منو هذا ومنين وانتي شكو تدخلين اذا ماتريده عوفيها براحتها هذا زواج مو لعب

.... ياااا وشبيك تعصبت علية غير خالتي واريد مصلحتها وبصراحة متلكي احسن من هذا العريس وهو خال زوج ثناء بنت خالة ام وليد من شايفها بالعرس  متخبل عليها واني خليت عقلي لازم اخليها توافق

... اصااال معليج بهذا الموضوع فرضا طلع موخوش زلمة لا ادخلين نفسج

وشنو جنة بكدج وتقنعيها

... هاي عود  ردتك عون كلت عمي محامي وذكي بلكي برسملي خطة ويساعدني حتى اخليها توافق

... انتي مو خبصتني الدنيا علمود ترجعيلها شنو التغير هسه وعادي تردين تعوفيها

... غير اريد مصلحتها اتمنى اشوفها مزوجة ومستقرة وعدها اطفال ما لازم اصير انانية

... استغفر الله كومي خلي نرجع

...بالكوة كاتمة ضحكتي وجها صار دم هههههههه اكولك بهوري ليش مانحجي طك بطك

... طك بطك شنو كومي اصال مالي خلكج

... لا ما اكوم لا عبالك اني غبية ادري بيك تحبها ترى عيونك فاضحتك

.... بنت منصف لوين تريدين توصلين

.... اريدك تعترف وتكسر القيود وتاخذها ترى وربك اذا ظليت على نفس وضعك بروح امي اخليها توافق على المتقدملها........

بتبع

صباح الخير

حبيت اوضح شغلة وحق هذا الشهر وهسه اني صايمة البارحة داكتب وبالخطأ انحذف كل الكتبتة

ترى اني هم بشر تعرفون يعني شنو واحد صايم وتعبان ومن يصيرلة وقت يجي يكتب وبالحظة ينمسح كولشي

يمكن غلطت لان منزلت توضيح ب مو معناها تستلموني بهاي الطريقة

يسلمو على جميع التعليقات💔

وانتظروني باليل ان شاء الله اكمل البارت