تحميل رواية «غرورك اللي علم الطاووس نفش ريشه» PDF

نوره:شدعوه عقاب والله كل اللي يجون يجون يتقهوون وبس محد يجي يتمرن غير نهار ياحبيبي هو وهالفرس

ملاك:وانا والله من رايي اقول ما بيضر النادي لو يوم ياخذونه بنات ينبسطون ويتجمعون

عقاب:المكان فيه اسلحه ياملاك وش ينبسطون

ملاك:ما بيجي ضرر ان شاء الله ، قفله العصر وافتحه العشاء يكفيكم صح ؟

هزت راسها أصايل وابتسمت ولفت ملاك تكمل:وعادي انا اكون موجوده اذا ودك تطمن

ثنيان ناظرها:واذا انتي موجوده عادي ؟

ملاك ناظرته وابتسمت:اعرف للاسلحه

عقد حجاجه وناظره عقاب:دخلت ملاك العسكريه كم شهر

لفت نوره بصدمه:منجدك ؟

أصايل:يمه ليش ماعندنا خبر ؟

ابتسمت ملاك:ما كملت ولاهي فتره طويله اصلاً

ثنيان سكت يناظرها ولف لعقاب:لكنك تعرفين وتعرفين تقنصين الهدف مثل الشاهين

ابتسمت له ملاك واخذ نفس عقاب:طيب موافق بس من العصر للعشاء وبعدها بفتح عليكم البوابات

أصايل ضحكت وتقدمت له تبوس خده وحضنته وابتسم عقاب يحضنها وناظرتهم ملاك وابتسمت

أصايل لفت لملاك:ثانكيو ملاك بستغلك دايم عند ابوي

عقاب:لا هالمره بس عشان اول طلب لملاك

ملاك ابتسمت من تكلمت أصايل:نروح سوا اجل بكره

ملاك:ان شاء الله

لفت لنوره:استأذن انا

نوره:وين ؟ اقعدي تعشي معانا ونسولف انا وانتي بالزواج

ملاك:مره ثانيه ان شاء الله مشغوله والله اليوم

وقفت واخذت شنطتها ووقفت نوره:على راحتك ومتى ما بغيتي تجين تعالي لا تقولين فشله وحمولتي ، حتى لو ثنيان مو موجود نبي نشوفك

ملاك ابتسمت ولفت تاخذ عبايتها من الخدامه:اكيد

لبست عبايتها ووقف عقاب وناظرته:لا تتعبون نفسكم انا ادل

عقاب:بجي معك

تحجبت ووقف ثنيان من مشت وعقاب معها ومشى خلفهم يسمع صوت كعبها من خطواتها ونزل عيونه لكعبها ورجع يناظرها ويمشي خلفها

حط عقاب ذراعه على ظهر ملاك يمشي معها:ان احتجتي اي شي كلميني لا تستحين

لفت عليه ملاك ووقفت عند الباب:من بعد كتب الكتاب ياعميد نسيت من اكون شكلك

عقاب ضحك:اعرفك وما تستحين من شي بخاطرك فيه لكن قلت عشان اذكرك

وقف ثنيان بينهم يناظرهم وهزت راسها ملاك:ماتقصر ياعميد

عقاب:بحفظ الله

مشت ملاك ولف عقاب على ثنيان وهمس:استرجل وقل انا بوديك انا باخذك تعالي معي

هز راسه بأسف ودخل ومشى ثنيان خلف ملاك ولفت ملاك تناظره وفتحت باب سيارتها تركب

فتحت شباكها وناظرها ثنيان:كيف عرفتي عن جاسر ؟

ابتسمت ولفت عليه:ماخبت عليك امك غريبه

ثنيان:انتي من وين تعرفين كل شي ؟

ملاك:بعلمك بخطواتي ؟

ثنيان ناظرها بإستغراب ولفت ملاك:الحين غضبك اشتد من بعد المليونين

ثنيان:ولا عمره غضبي قل من يوم عرفتك كل يوم احس اني بتحدي معك

ملاك هزت راسها:خلك عند جواهر ولا يكثر بس

ضحكت تحرك سيارتها وناظرها ثنيان بحده لين خرجت من البيت ومشت متوجهه لمكتبها وصلت ونزلت تدخل وفتحته وثواني دخل عليها رجالل ومعه ملف قضيته وجلس معها يتكلمون بالقضيه وبعزّ انشغالها

رفعت راسها تشوف جواهر تدخل وصدت عنها تكمل مع الرجال حوارها

جواهر:بتكلم معاك

ملاك:انتظري دورك

رفعت حاجبها جواهر واخذت الاوراق ملاك:تمام بدخل على النظام الحين ارفع الاوراق وارسل لك رقم ملف القضيه

هز راسه:الله يعافيك ماقصرتي

ملاك:ياهلا وسهلا

وقف يخرج ومشت جواهر تجلس ولفت ملاك لجهازها تكتب وناظرتها جواهر:بتكلم معاك

ملاك:جايه بدون موعد زين دخلتك ، انتظري جواهر هانم مو دايم مرحب فيك

اخذت شنطتها جواهر وطلعت من داخلها ورقه صغيره وحطتها على مكتب ملاك:اعرف اخذ اهتمامك

لفت ملاك من عرفت انه شيك ورفعت عيونها على جواهر

ابتسمت جواهر:مبلغ يعيشك ملكه بدال السرقه اللي عايشه فيها

رجعت ظهرها لورا ملاك ونزلت نظارتها الطبيه تناظر جواهر

جواهر:وانتي تعرفين مقابل ايش

رفعت اصابعها ملاك:مقابل اعطيك دبلتي

جواهر:ابي ثنيان

ابتسمت ملاك:تحبينه ؟

جواهر:لا تسألين اسئله معروفه اجاباتها

ملاك:الحين الفلوس ما طلعت منك شخصيه زينه ! ، تحبين واحد ماخذك بالدسّ عن اهله واهلك ومو معترف فيك ولا معطيك الحياه اللي المفروض تعيشينها وفوق هذا تزوج غيرك وجايه تساومين عليه بملايين ؟

عقدت حاجبينها ملاك تكمل:وش هالرخص ؟

جواهر:احترمي نفسك وتكلمي زين معي ولا تتدخلين بعلاقتي مع ثنيان

ابتسمت ملاك وتقدمت لها وغمزت:بالله بالحلال ؟

جواهر:اذا ما قبلتي الشيك بيرجع بشنطتي

ملاك اخذت الشيك وفتحته ورفعت حاجبينها تضحك من العدد ولفت لجواهر:والله سخيّه وبنفس الوقت غبيه

جواهر:اطلعي من حياتنا

ملاك ابتسمت ولاردت وكملت جواهر:وعيشي بعيد عني وعن ثنيان

ملاك هزت راسها:على أمرك يالشيخه جواهر

ناظرتها جواهر بحده ووقفت تخرج من مكتب ملاك وضحكت ملاك تاخذ جوالها:سَبك

دورت رقم ثنيان ودقت عليه وهي تناظر الشيك

'

كان يسوق ومشغول بأفكاره اللي صوتها اعلى من صوت الاغاني بسيارته ولف من دق جواله وعقد حاجبينه من شافه رقم ملاك

جنّب على اليمين ولا مره اتصلت عليه من يوم عرفها ومن كتب كتابهم ولليوم هذا هي اول مره تتصل عليه وينوّر جواله برقمها

رد:هلا

ملاك:ولد العميد

ثنيان:وش سويتي من مصيبه جديده خلتك تتصلين علي

ملاك ضحكت:لا هالمره مو انا هالمره جوجو

عقد حاجبينه ثنيان:من ؟

ملاك:جواهر ياحبيب جواهر

ثنيان نطق بإستغراب:وش صاير ؟

ملاك:مرّني مكتبي ودي ينور بوجودك زوجي العزيز

ثنيان:انتي ماتتعبين ؟ ما تنهدين ؟ وش قاعده تسوين يرحم لي ابوك وامك خلاص يكفي طغيان وش صاير بينم وبين جواهر ؟

ملاك ضحكت بصدمه:أعصابك !

ثنيان تأفف بتعب وشغل سيارته:جايك

ملاك:بإنتظارك

قفلت منه وضحكت من عصبيته وناظرت الشيك وإسم جواهر ولفت لطابعتها

نسخت من الشيك نسخه وطبعتها وحطت الورقه بمكتبها على دخول ثنيان ولفت بذهول:جاي طاير ؟

ثنيان:وش عندك؟

ملاك:كل ذي لهفه يا ولد العميد

ثنيان تقدم:انطقي اخلصي

ملاك ابتسمت ومدت له الشيك واخذه وجمد وجهه من قرأ اسم جواهر والرقم اللي حاطته ولف لملاك اللي مرجعه ظهرها لورا ومبتسمه

رفع الشيك:هذا وش ؟

ملاك:شدعوه ماعمرك شفت شيكات ؟

ثنيان:جواهر ليه معطيتك اياه ؟ والا مزورته ؟

ملاك:شوف انا شيطان وياكلني الشرّ بس مو لدرجة أزوّر شيكات هذي يبي لها احترافيه

ثنيان ضرب مكتبها:انطقي قلت

ملاك:ثاني مره اقولك لا تضرب مكتبي نعرف انك قوي

ثنيان صد ياخذ نفس طويل وهمس:صبرك يارب

ملاك:استريح نتكلم مثل الناس العاقله

ثنيان لف لها:خليتي فيها عقل انتي خليتي فيها عقل !

ضحكت ملاك تأشر له يجلس وجلس ثنيان

وابتسمت ملاك:نضيفك شي زوجي العزيز ؟

ثنيان:ملاك ! لا تختبرين صبري

ابتسمت بوسع مبسمها من نطق اسمها ولأول مره تسمع اسمها منه:بطلت اكون بنت مساعد ؟

ثنيان:جواهر ليه اعطتك الشيك ؟

ملاك:زارتني مرتين هذي المره الثانيه واتوقع ان ماعندك خبر بس جواهر طفشتني وانا ما احب اللي يشغلني عن شغلي بأسباب تافهه ابعده عن طريقي وخلاص

ثنيان:ليه جاتك؟

ملاك:تساوم عليك تحسب كل شي ينشرى بفلوس حتى انت

ناظرها ثنيان بحده وابتسمت ملاك:اخذت لك وحده برخص التراب بيتها شاليه وشهر العسل يخت

عقدت حاجبينها بضحكه:ماخذها من الشارع ؟

ثنيان:تكلمي زين عشان لا يوحشك فكك

ملاك ضحكت:لا والله بتوحشك جواهر

ثنيان:هالشيك ماراح تصرفينه ولا تاخذين ريال من جواهر تفهمين ؟

ملاك اخذت الشيك من يده وناظرت الشيك:ليش ؟ احلى من المؤخر اللي تعبت عشان يجيني

ثنيان:كلمه وقلتها ولا تجربين عواقبها ، الشيك لا تصرفينه

لفت ملاك عليه تناظر جنونه وشقت الشيك وناظرها ثنيان بذهول ما يعرف كيف يفسر تصرفاتها

وابتسمت تجمع يدينها ببعض:ابي الخمس ملايين منك ، احلى

ثنيان:الحرب بيني وبينك لا تدخلين بيننا احد من اهلي

ملاك:اي زين يعني جواهر مسموح ادعس عليها لان طوّلتها

ثنيان:قلت اهلي

ملاك:وجواهر من اهلك ؟ عجيب !

ثنيان وقف وناظرته ملاك لين مشى لها وابتسمت من انحنى لها على كرسيها وناظرها بحده:مالقيت زلّه عليك للحين بس والله ان لقيت ما أرحمك

ملاك رفعت يدينها على كتوفه تعدل تيشيرته وابتسمت:بعد الزواج والا قبله ؟

ثنيان ناظر ابتسامتها ونزل عيونه لثغرها يشوف أنيابها ورجع ناظر عيونها:انتي اسوأ شي عرفته بحياتي كلها

ملاك:ليش عشاني أسرق ؟

ثنيان:لانك شرّ يمشي بهالدنيا

ملاك:لا تلّمع نفسك ياولد العميد مافي أوسخ من عائلتك واخوانك

اشتدت ملامحه بالغضب ومسك فكّها بقوه ورجع بالكرسي للخلف وغمضت عيونها ملاك بألم

ثنيان:اهلي انظف من نيّتك تفهمين

ناظرته ملاك وهمست:تبي تجرب كفّ يدي من جديد

دفعها بقوه وابتعد وناظرته ملاك تمسك فكّها:لا تعيدها ياولد العميد عشان لا اعلقها فوق رقبتك

ثنيان:ان قدرتي

ناظرته يمشي يخرج من المكتب وشدت على اسنانها من ألم فكّها وقوة ذراعه واخذت جوالها وهي تتنفس بغضب

دورت رقم عقاب واتصلت وابتسمت اول ماسمعت صوته:العميد عقاب

ابتسم عقاب:الشاهين

ملاك:اذا فاضي بغيت اشوفك

عقاب ناظر النادي اللي هو فيه وخرج لسيارته:فضيت الحين ليه وش صاير

ملاك:ابد جالسه مع ثنيان بالشاليه حقه وانشغل عني شوي قلت بكلمك تجي واتكلم معك بموضوع

عقاب هز راسه:طيب اجيك

ابتسمت ملاك:ارسل لك الموقع والا تعرفه ؟

عقاب:لا والله ما اعرف درب لشاليه ثنيان ابد

رفعت حاجبينها ملاك بتوقع:الحين ارسله

قفلت وهمست:ونعم ، لو تعرف تركض ورا عيالك كان ما دشروا

ارسلت له وابتسمت تخرج من مكتبها وتركب سيارتها

-

ثنيان تقدم لها بعصبيه:انتي ليه تتصرفين من راسك ؟ وش انا عندك ؟ وش انا ؟

جواهر:ناديتني الشاليه عشان تهاوشني ليش اروح لملاك ؟

ثنيان ضرب الطاوله:جبتك عشان افهم انا وش انا عندك ؟ جدار ؟ طاوله ؟ تهمشيني وتسوين اللي براسك ولا كأن اللي طايح بالمصيبه انا وانتي ؟

جواهر:لاني ما اشوفك سويت شي مازالت تلعب فينا لعب الشطرنج ، ماتخاف لا مني ولا منك ما خافت من احد للحين ، قبل فتره راحت معك للعلا مع اهلك وانت للحين ما سويت شي ثنيان ولا شي سويته وزواجك قرب وانا ما اعرف وش وضعي

ثنيان:قومي روحي اصرفي لها شيك ، حماره انتي ؟ ماخذه منك مليونين انتي وامك وتزيدينها ؟

جواهر سكتت بتوتر وكمل ثنيان بعصبيه يأشر على عقله:انا بفهم ليه تتصرفين بدون ما تسأليني تشاوريني تقولين بعلم ثنيان وهو يحلّها ماني رجال ؟

جواهر:كل يوم اتفزز من صوت اهلي اي تصرف اللي تتكلم عنه ؟ انا مرعوبه مو قادره انام بسبب طيش وتصرف عاطفي مافكرت في هاللحظه من قبل

ثنيان عقد حاجبينه :طيش ؟ الحين سنتين مع بعض واليوم عرفتي انه طيش ؟

جواهر:علمني وش اقول لاهلي لو وصلهم خبر

ثنيان:مدري تذكري من قبل وش كنتي تقولين لي وتعرفين ، ثنيان انت مو غلطه ولا بندم اني وافقت وتزوجت بالسرّ وخبيت على اهلي ولو صار ماصار بوقف بوجههم

ناظرها بحده:اذكرك جواهر ؟

جواهر مسكت راسها بتعب:ثنيان اقسم بالله احسني خسرت كل شي

تقدمت تجلس على الكنب وناظرها ثنيان:انتي بديتي تغلطين وغلطك ذا بيحرقك وملاك ما بترحمك من الحين اقولك

جواهر لفت عليه:بتخليني لوحدي بالمصيبه يعني ؟

ثنيان:انتي خليتيني قبل شوي وطلعتيني وتصرفتي لوحدك

جواهر وقفت تناظره بحده:انا ما وقـ

سكتت من أشر لها تسكت والتفت بصدمه يسمع الأصوات اللي برا وتقدم يفتح شوي من الستاره وجمد وجهه

لف لجواهر يأشر لها ونشف دمها تمشي وتدخل الغرفه وتقفل عليها وعض شفته ثنيان

وفتح الباب يناظر ملاك اللي تمشي مع عقاب بطرف البحر ولف عقاب عليه من شافه:وينك انت ؟

ابتسمت ملاك من شافت سواد وجهه وجمود ملامحه ولفت لعقاب:مصدوم انك موجود

مشى عقاب لين عنده وملاك جنبه وناظرهم ثنيان:وش جابـ

قاطعته ملاك تدخل:خلصت شغلك ؟

دخل عقاب خلفها ونشف الدم بعروق ثنيان يقفل الباب خلفهم ويناظرهم يجلسون

جلست ملاك ورفعت شعرها عن عنقها تربطه

عقاب:حلو الشاليه والله ومرتب

ملاك:ادخل تجوّل بالغرف بيعجبك اكثر من داخل

ثنيان وقف:ارتاح ابوي تبي تشرب شي ؟

عقاب:لا لا اقعد بس

لفت ملاك عليه تناظر توتره وحك جبينه:جاي الحين بدخل الحمام وانت بكرامه

مشى يدخل ولفت ملاك من سألها عقاب:من متى وانتي هنا ؟

ملاك:من ٩ الصباح مرّني ثنيان واخذني اشوف الشاليه

عقاب ابتسم بهدوء وابتسمت ملاك تناظر لبسها اللي قدرت بسرعه تلبسه ، فستانها الابيض الواسع وسلبرها الفوشي اللي برجلها

'

دخل على جواهر اللي وجهها أسود ومغطيه فمها بخوف وهمس:انحرقنا انحرقنا

جواهر همست بخوف:وين اروح ؟

ثنيان:اطلعي مع الباب الثاني بطلعهم برا

جواهر:ليش جات ملاك ؟ كيف تعرف الشاليه ؟

ثنيان:وقته وقته ؟ اطلعي جواهر لا تحرقيني

قفل عليها ومشى برا:خلونا نطلع برا الجو حلو

عقاب:وش جوّه الحلو ياثنيان انت تمون على الشمس والشمس تمون عليك بس انا ما احب الشموس

ملاك ابتسمت:نتمشى شوي نسايم البحر حلوه

عقاب اخذ نفس ووقف ووقفت ملاك تمشي وتخرج وخرج ثنيان يقفل الباب خلفه ومشوا لين شط البحر وغمضت عيونها تاخذ نفس طويل ملاك وتسمع صوت الموج والبحر على يمينها

ومشى عقاب يناظر المكان:ما يزعجك احد ؟

ثنيان بلل شفايفه وهو يمشي معه:من حواليني يعني ؟ لا

عقاب:زين وخاص وكبير

ملاك هزت راسها:يبي لنا نتجمع هنا يوم كلنا ونسهر

ابتسم عقاب ولف ثنيان يناظر ملاك بحده

ونزلت سلبرها ملاك:بخلي المويه تلمس رجلي

مشت عنهم للبحر ترفع فستانها وتمشي على طرف الموج ولف عقاب على ثنيان:زين انك اخذتها وطلعتها معك هذي زوجتك ولك حق عليها

سكت ثنيان يناظر ملاك اللي تمشي وكمل عقاب:ملاك كنز والله كنز ياثنيان ومن يوم شفتها قلت ابيها لواحد من عيالي ابيها تدخل بيتي

ثنيان لف يناظر ابوه اللي ما يدري عن شي وكمل عقاب:ورغم ان وصلها خبر عن بنت بندر قبل كتب الكتاب وتنكدت وادري ان حزّ بخاطرها بس رغم هذا شوفها تمشي معك على البحر هِنا

ثنيان لف لها يناظرها تمشي وكمل عقاب:تكبر عقلها وتوزن كلمتها وتعرف حدودها وتفهم كل شي

ثنيان دخل يدينه بجيوبه ولف عن ابوه يناظر ملاك

وابتسم عقاب يرفع ذراعه على كتوف ثنيان:وزواجك قرّب وان شاء الله من تدخل بيتنا ملاك بتزين أمورك ، بتعدل إعوجاجك وبتكون أوفى من مسك قلبك وتبرد على نيرانك هذي اللي داخلك

تنهد ثنيان بدون رد ومشى عقاب يبتعد عنه لملاك ولف ثنيان يراقب الشاليه

عقاب:لا تشيلين هم انا اشوف وش تقول نوره وابلغك يمكن يروحون معك سوا وتشترون من هناك اللي ودكم

ملاك:لا تضغط عليهم اقدر اروح وحدي دبي ليلتين اخلص اموري وارجع

عقاب هز راسه:انا برجع ينتظروني على الغدا

لف لثنيان يأشر له ومشى عقاب عنهم ولفت ملاك لثنيان اللي يناظرها وابتسمت تنزل عيونها لرجلينها ولخلخالها وللموج اللي يسري من تحتها

تقدم ثنيان لها ووقف قدامها:وش تسوين ؟

ملاك ابتسمت:أخوفها

ثنيان عقد حاجبينها ورفعت راسها ملاك:عشان تعرف من اللي تشتريها بفلوس

ثنيان:لو ابوي وصله خبر ما بيصير لك طيب

ملاك:وش بتسوي بتطلقني ؟

ولفت للشاليه تبتسم:قدرت تنحاش والا بلقاها داخل ؟

مشت من جنبه ومسك ذراعها ولفت له وهي تضحك:بالله وش هالذوق عليك ؟

ثنيان:ارجعي من مكان ما جيتي

ملاك:برجع بس ترا مكانك صار معروف انتبه تتقابلون من جديد هنا

تقدمت تهمس لثنيان:كل مكان بكشفه

ثنيان مارد عليها وكملت:باقي اليخت لازم توديني له والا بجيك انا

ضحكت من تغير وجه ثنيان للغضب وابتسمت:أعصابك

لفت للبحر تنحني لموجه وتلم بين كفوفها ماء البحر وتغسل فيه وجهها

ناظرها ثنيان تغمض عيونها وتستريح بالمويه بفستانها وكأنها تبرّد نيران داخلها وتطفي لهبها

كان مشهد جلوسها وسط الموج لوحه رسمها من قبل ثنيان ووصفها يوم قال انها لَهب والموج يطفي اللهب

وهذي هي تلمس بكفوفها الثنتين الموج ويتسرب من بين فراغات اصابعها ، يغرّق فستانها ويروي ضَمى ملامح وجهها ومع ذلك هي لا زالت لَهب ما خفّ توهج نيرانها وجمرها

فتحت عيونها ملاك تناظر البحر ورفعت عيونها لثنيان:ما ألومك تحبه

وقفت تلم فستانها بيدها من البلل ورفعت عيونها عليه:ماتحب جواهر كثر ما تحب البحر

ثنيان:تدرين كثر ما تصدميني وتدخلين لي من بيبان ما اتوقعها اقعد اهوجس كيف انك خربتي حياتك لسنين لا تعد والسبب اجهله

ظلت تناظر عيونه ملاك وموية البحر على ملامح وجهها ورموشها ونطق وهو يناطر عيونها:من اللي اشعل النيران يا لهب ؟

ابتسمت من تساؤله بدون تبان اسنانها:تدري ياولد العميد ! انت الوحيد اللي نظراته لي اسئله

سكت ثنيان وهو يناظرها وكملت ملاك بهدوء:وكل مره تسألني وتدري اني ما اعطيك جواب ما تملّ

ثنيان:أنا مبلي ياملاك ، مبلي فيك لحد الشرايين وباللي جمع فيك من كل شي ضد وضد اني ماتوقعت بلاقي انسان يشبه البحر مثل ما تشبهينه انتي

هز راسه يراقب عيونها:تمليني بالاسئله ، بكل مره توقفين قدامي تتصنعين الصلابه يجي شي يهدّك ويسقي نيرانك حطب ، من يزيد نارك ياملاك ؟

لانت ملامح ملاك تناظره يحللها ويسألها يوصفها ويشرح غموضها

ثنيان:انتي تقوّمين العالمين على رجل وحده وانتي تبتسمين وهاديه بحيث انه محد من هالعالمين يشمّ ريحة رمادك ، بكل هالبرود الخارجي

رفع سبابته على صدرها:انتي تحترقين هنا

كان حاط اصبعه على اجابات اسئلته ، قلبها

لكنه يجهل الاجابه رغم انه يكشف ستر غموضها رويداً رويداً

ملاك هزت راسها:استغرق مني هذا اللهب عشان ينبت داخل صدري طفولتي ومراهقتي وشبابي وما بيكفيه ، بياخذ شيخوختي وكبر سني وعجزي وضعفي ووهني

سكتت ثواني تكمل:تتوقع بيقدر موج يطفيها ؟ يطفي نتيجة سنين وعُمر ؟ انت تركض بالدرب الغلط ياولد العميد لا تحاولني وتفهمني ، انا كذا لين ياكل من لحمي الدود

ثنيان هز راسه بالنفي:انتي مستحيل كنتي لَهب بحضن امك ولا كنتي لَهب بحضن ابوك

بلعت ريقها من طاري اهلها وكمل ثنيان:هذا من صنع الدنيا عليك ما يولد بني آدم من طين يشتعل لَهب ياملاك نولد من طين وتعرفين ان الطين معجون بماء

رفعت يدها تأشر على البحر ملاك وهي تناظره:لو اسبح درب البحر كله واغوص فيه ما طفى لَهب خاطري

ثنيان تقدم لها:انا الموج اللي يقدر يطفي لهيبك ياملاك ، انا وبوسط حضني شفت رجفة صقيع بردك ، ماقدرتي ورغم احتراقك تخفين رجفة زمهرير البرد

ملاك صدت من عاد الطاري:لا تجيني من هذا الطريق

ثنيان:انتي تتصنعين كل هاللهب ، لان لو انتي فعلاً لهب ما كانت اللي شالتك ببطنها وجابتك بالدنيا سمتك ملاك

لفت عليه تناظره وكمل ثنيان:كانت تدري انك تستحقين الاسم وياليتك استحقيتيه

اخذت نفس ملاك وتقدمت له ونطق ثنيان:بتدركين بوقت متأخر من حياتك ان معظم المعارك اللي خضتيها ماهي الا هوامش اشغلتك عن حقيقة حياتك

ارتبكت لانه يزيد عليها الضغط النفسي بكلامه وابتسمت:تقدر تصير دكتور نفسي ياولد العميد

سكت يناظرها تهرب من الكلام واخذت نفس تلف للبحر:ألاحظ محاولاتك ياولد العميد لكن لا تتوقع مني الأجوبه انت بس بتغرق فيني بدون فايده

ثنيان:غرقت بالبحر عاري بدون طوق نجاه تتوقعين بخاف اغرق داخلك ؟

سكتت تناظره وهز راسه ثنيان:لكن لكل شي جواب ياملاك

ماردت عليه تناظره عيونه وصدت تترك المكان وتغادر

'

لبست أصايل واخذت عبايتها واغراضها وطلعت من البيت ركبت مع السواق واخذت جوالها تكتب لملاك:قربت

ناظرت الطريق ووقف السواق عند البيت وفتحت جوالها جربت تتصل على ملاك وماردت

تأففت وناظرت حمدان:دقيقه حمدان

فتحت الباب ونزلت ومشت للبيت ودقت الباب وهي تنتظر واخذت نفس تنتظر ملاك

فتح الباب ووقف من شافها لفت عليه

ناظرته أصايل وارتبكت ترجع خطوه لورا:ملاك !

منيف سكت ثواني يناظرها وكمل:داخل

أصايل:طيب انتظرها برا انا

منيف فتح الباب:حيّاك

أصايل:لا مو مشكله بنتظرها بالسياره عادي

منيف:حيّاك

ناظرته مصرّ يكرر كلمته ويناظرها وبللت شفايفها تدخل البيت ومشت بهدوء وتقدم يدلها للصاله ولف يرفع صوته:ملاك

مشى تاركها وفتح الغرفه ولفت ملاك:وصلت ؟

هز راسه منيف واخذت عبايتها ملاك تناظر شكلها وتستجمع طاقتها:طيب طالعه

خرج منيف ومسح يدينه ببعض يناظرها جالسه على كنبهم:السموحه مافي ماتشا نضيفك فيها

ناظرته بصدمه:هاه !

سكت منيف من طلعت ملاك وناظرت أصايل:كنت بالحمام ماسمعت جوالي ، نطلع

وقفت أصايل وناظرت منيف اللي واقف ومشوا يخرجون

ابتسم منيف يناظر دهشتها ومشت من جنبه تخرج وقفل الباب بعدهم وفتح شباك الصاله يناظرهم يركبون سوا بالسياره

لفت أصايل على ملاك اللي تكلمت:عازمه كثير ؟

أصايل:لا شدعوه بس بنتين

ماردت ملاك ودخلوا للنادي وتقفلت بعدهم بوابة النادي ونزلت أصايل ومعها ملاك ودخلوا

ناظرت البنات اللي بالنادي ولفت لأصايل:بنتين ؟

ضحكت أصايل تفصخ عبايتها ولبست كابها ودخلت مع ملاك اللي تناظر البنات

وأصايل تمشي وتسلم وملاك متورطه بكمية البنات اللي بالمكان

أصايل:زوجة ثنيان

ابتسمت لهم من رحبوا فيها ولفت تمشي مع أصايل دخلوا الإسطبل وتقدمت ملاك للخيل:ماقصرتي أصايل

ضحكت أصايل تطلع فرس نهار:فرس حبيبي

اعتلت الفرس ملاك تشدّه ومشت مع أصايل بالإسطبل

أصايل:ملاك شوفيني

لفت ملاك وشافتها تصورها وابتسمت ملاك وهي على الفرس

شافت أصايل اللي انطلقت بالميدان وابتسمت ولفت تناظر البنات الموجودين والمتوزعين بالنادي وصوت الاغاني بالمكان

مرت أصايل من عند ملاك ولفت ملاك بالفرس:انزلي لي بادل

ضحكت أصايل:لا تحاولين لعبتي واسألي عني ثنيان

ملاك:اسبقيني اجل

ركضت أصايل بالفرس وملاك وراها لين وصلوا للاسطبل نزلت تحط الخيول وخرجت تدخل البادل مع البنات ولفت أصايل:ملاك انا تيم وانتي تيم

ملاك هزت راسها واخذت المضرب واخذت مركزها مع البنات وبدوا يلعبون

ضحكت أصايل تضرب بالمضرب وتسمع تشجيع البنات

فازت أصايل والتيم وصرخوا يضحكون وابتسمت ملاك وتقدمت أصايل تحضن ملاك وهي تضحك

ناظرتها ملاك وابتسمت وعضت شفتها وهي تشوف أصايل وكيف تعرف كل البنات وتضحك معهم وتلاشت ابتسامتها من تذكرت انها بيوم كانت بتطيح أصايل بأيام سوداء وتهديد وتقلب حياتها لجحيم

كيف كانت بتقدر تفرط بكل هذي الروح الحلوه والنظيفه

ابتسمت من لفت عليها أصايل تمشي معها بالنادي

أصايل ناظرتها:ابوي قال بتروحين دبي عشان فستان زواجك

هزت راسها ملاك:ان شاء الله بس ما بطول

أصايل:بجي معاك مع ان بدلتي خلصتها مع امي بالكويت

ملاك ابتسمت:مختاره ومخلصه

أصايل:امانه !

ناظرتها أصايل بحنيّه:احس مو مصدقه بتتزوجون

ابتسمت ملاك تصد وكملت أصايل:بس برضو ما تمانعين اجي معاك صح ؟

ملاك:تعالي ما اقول لا

ابتسمت أصايل لها:وريني مهارات الشاهين اللي يتكلم عنها ابوي دايم

تقدمت ملاك للاسلحه ولفوا يناظرونها البنات اللي بالمكان ويترقبون لملاك

رفعت السلاح ملاك ورفعت جوالها تصورها أصايل ضربت الهدف ملاك وابتسمت تلف لأصايل اللي صورتها فيديو:شوف يامحظوظ شوف الشاهين المغرور وياويلك تزلّ

ضحكت ملاك من فهمت انها تصور لثنيان وحطت السلاح ملاك ولفت عليها وحده:متى زواجك ؟

أصايل:قريب ان شاء الله وكلكم بتجيكم كروت دعوه لا تخافون

لفت لملاك:ماخذين بعض عن حب ؟

لفت أصايل لملاك اللي ابتسمت بدون رد ولفت عليهم:ومو أي حب طيّحت ثنيان على وجهه

تقدمت ملاك تدقها:بنت !

ضحكت أصايل ولفت ملاك تناظر البنات الموجودين

'

قام من نومه واخذ جواله وهو عاقد حجاجه يناظر رسايله وفتح على سنابة أصايل وناظر ملاك اللي على الفرس ومتصوره مع أصايل وفتح الفيديو اللي بعده وملاك تضرب بالمسدس وتناديها بالشاهين المغرور وتأمل ابتسامة ملاك وأنيابها وكيف ان ابتسامتها قادره تسرق قلبك وتطمنك بحسن نيّتها بينما هي قدرت تكشف أسرار أبطت ما انكشفت

قفل جواله وناظر الساعه وتنهد بتعب ووقف يغسل وجهه وغير ملابسه ونزل تحت

تنحنح يدخل من سمع اصوات ونادته نوره:تعال يامخرب نومك

دخل ولفت ملاك تبتسم تناظر ذهوله وتذكر انه شافها الصبح قدام البحر والحين هي بوسط بيته

زاد اتساع مبسمها ونطقت:صباح الخير

ناظرها بصدمه هي تطلع له بكل مكان وبكل وقت وكأنها حالفه تكون شيطانه ، ناظر لبسها والفنجان اللي بيدها وابتسامتها

نوره:قولي مساء الخير شوفي الساعه كم

ثنيان ناظر جنى اللي جالسه جنب أصايل ونادته نوره يجلس جنبها وتقدم يجلس جنبها ومسحت على ظهره:امي تبي اكلمهم يجيبون لك فطور ؟

هز راسه بالنفي وهو ياخذ تمره من قدامه وناظر ملاك وأصايل:خلصتوا ؟

أصايل:انبسطت صراحه الفايبز مع البنات خيال

نوره ضحكت:تحبين سُلطة البنات انتي

أصايل:اكيد حياه ورديه والكل حلو وكاشخ وانا احب دهرة البنات احب اكحل عيوني

ابتسمت ملاك وهي تشرب قهوه وناظرتها جنى:كان ودي اجي بس انشغلت

ملاك ناظرتها من عرفت انها تكلمها:نعيدها ان شاء الله

نوره:ما بيوافق عقاب غصب اقتنع

ابتسمت ملاك:انا اقنعه

أصايل:شوفي ملاك الصوره هذي

مدت جوالها ووقفت ملاك وبان جسمها من لبسها الضيق وانرسمت ملامح جسمها وارتبك ثنيان يرفع كفه على جبينه يحكه وينزل عيونه من انتبه لنظرات جنى اللي ضحكت

اخذت الجوال ملاك وهزت راسها وجلست تناظر الصور:حلوين بس الاضاءه مو مبينه

سكتت من جات رساله لأصايل محتواها:يا أخت النهار

ناظرت الرقم اللي مو مسجل ومدت الجوال من تقدمت أصايل واخذته وارتبكت من انتبهت للرساله وصدت ملاك بهدوء عنها

لف ثنيان من سمع صوت مفاتيح والتفت لملاك واشر لها ورفعت صوتها نوره:عندنا ضيوف ياللي جاي

نهار وقف وهو يحرك مفتاحه:مالمحت شي استريحوا

وقف ثنيان ورمى عبايتها على رجولها ورفعت عيونها تناظره يخرج ولفت نوره عليها وضحكت:تاكله النيران ثنيان من غيرته

لبست عبايتها ملاك بدون رد وكملت جنى:على هالجسم انا بعد بغار على ملاك

تقدم نهار وناظر ثنيان :اها الاهل ؟

ثنيان مارد ودخل نهار وابتسم من شاف ملاك:ادق تحيه ؟ وببدلتي بعد

أصايل ناظرت بدلته:كل ما لبستها بقولك مو لايق مو لايق وبس

ثنيان:ما يستحقها

نوره:اسم الله على ولدي احلى ضابط

أصايل:اي ضابط بس شغلته يقولك سويتي اتمنى تتخطى السجن

ضربها نهار وضحكت أصايل ولفت ملاك:طولت انا برجع عندي شغل بدري

نوره:امي ثنيان وصل زوجتك ماجات بسيارتها

ثنيان ناظرها ووقفت ملاك تاخذ شنطتها:تصبحون على خير

دق تحيه نهار وضحكت ملاك تخرج ولف ثنيان يناظر نهار وصد عنهم يمشي خلفها

ركبت سيارة ثنيان وركب جنبها يشغلها وهمس:لا تتقربين من أصايل واجد

ملاك ابتسمت:مستحيل أضرّ أصايل ونهار بالذات

لف عليها:وليه نهار ؟

ملاك لفت عليه:نظاف مهما حسسوك انهم طايشين انظف منك ومن باقي اخوانك

ثنيان حرك سيارته:جاسر متزوج بالحلال تراه

ملاك:عندي خبر وساري مخبص وانت مخبص واهووه

لفت عليه تضحك:تسبح بالعسل

ثنيان مارد عليها ولفت ملاك للطريق ولف ثنيان:بتستعدين للزواج ؟ توقعتك بتطلبين الطلاق قبله

ملاك:لا ، ودي اخذ اتنشن من حضور زواجنا عشان استفيد بعد طلاقك

لف ثنيان وهمس:شيطان

ملاك ناظرته:بس عطني مده قصيره معك وما تلاقي الا دبلتي على سريرك

ثنيان:انتي من يوم تدخلين بيتنا بيتغير كل شي ياملاك

ملاك ابتسمت:طيب يعجبني كيف صرت تناديني ملاك تحسسني اني ملاك فعلاً

ثنيان:وانتي ولا مره ناديتيني الا بولد العميد ولا كأن عندي اسم

ملاك:كيف اصارحك اني انساه ؟

لف ثنيان يضحك بسخريه وناظرته بجديّه:سهل تنساه وصعب تتذكره

ثنيان:ثنيان ، وش الصعب ؟

ملاك:اسمع وتعرف

مارد ثنيان يلف للطريق ومن تذكر لف يقفل ازارير سيارته وضحكت من انقفل بابها ولفت له:تخاف افتح الباب ؟

ثنيان:ما اعرف خطواتك الجايه

ملاك:لا هذيك المره كنت تعبانه بس الحين ذيبه ما ادور الموت اذا ما دورني

ثنيان لف عليها:وليه كنتي تعبانه ؟

ملاك:لا تفتش كثير ما بتفهم شي اصلاً

مارد ثنيان وصد للطريق ووقف عند بيتها وفكت حزامها ولفت له وابتسمت:شكراً زوجي العزيز اتوقع بنتقابل المره الجايه انت ببشت وانا بفستان ابيض نفس بياض قلبي وأجنحتي

ثنيان:اختاريه أسود دام فيها قلبك وأجنحتك

ضحكت ملاك واخذت شنطتها ونزلت من السياره وناظرها ثنيان لين دخلت وحرك سيارته

دخلت البيت ورمت شنطتها تنزع عن وجهها قناعها المزيّف وابتسامتها وضحكها وقوتها وغرورها وخلتها عند باب غرفتها

فتحت باب غرفتها ودخلت وجلست على السرير تفصخ شوزها وتشيل مجوهراتها وحطت كفوفها بحضنها وهي تناظر الفراغ واخذها الماضي تتذكره

( نجمه ⭐️ )

ابتسمت تفتح له الباب وناظرها ورفعت حاجبها:ان شاء الله جايب لي شي يستاهل انتظرك بغيابك هذا

منصور:رحت اخذ عمره وبتزعلين على غيابي ؟

ملاك:خليتني لحالي

منصور:اموت ما اخليك لحالك

ناظرته ملاك وابتسمت وطلع من خلفه ورد وتقدم لها واخذت الورد:والحين اذا امك وابوك سألوني من وين الورد !

منصور:قولي الله يجيب الصالح

رفعت عيونها له وابتسم منصور:خبيت داخلها شي لك دريت ان سيارتك تعطلت فيك امس وانتي راجعه من الجامعه

ملاك:اي وماكنت موجود تنقذني

ناظرت الفلوس اللي بالظرف ورفعت عيونها بصدمه له وخباها منصور وتقدم يهمس:كل مالي فداك

ابتسمت له ودخل البيت منصور وناظرت الفلوس ملاك هي من يوم سكنت مع عمها كان منصور يقسم لها من مصروفه لين توظف وصار يصرف عليها ويسدّ احتياجها هي ومنيف

..

ابتسمت من حست ببلل خدودها من دموعها وفكت أخراصها من إذنها ووقفت تمشي للتسريحه وحطتها وناظرت شكلها بالمرايه وكيف الكحل ساح على خدينها ورسم حزنها

ياليتها كامت تدري ان كل هذي بتصير ذكريات من منصور كان عاشت معه اكثر

محد بيقدر يعوضها عن حنانه وسؤاله عنها بوقت حزنها واهتمامه ومحد بيقدر يملي مكانه

عاشت مع منصور أفضل عوض عن ابوها وبالوقت اللي كانت تحس بالوحده كان منصو بطبيعته يملي عليها حياتها

'

نوره ناظرت عقاب اللي ياخذ دواه وبينام وابتسمت:وش رايك نسهر شوي ونسولف سوا

ابتسم عقاب ولف عليها:شكل عندك علوم والا ماقلتي نسهر

ضحكت نوره:اي والله بغيتك بسالفه

عقاب:هاه وش عندك من جديد

نوره:هذي وحده اعرفها تقول ولدها كُبر جاسر راح بريطانيا يدرس ووالله لقي له وحده حلوه وشقراء وتزوجها بالحلال

لف عقاب يناظرها وكملت نوره:ونيّته زينه يعني يبي يستر على نفسه ويعيش الحلال وجاب منها ولد وبنت والحين متورط يبي يرجع لاهله لكنه خايف منهم

عقاب:راح عشان يجيب لهم شهاده رجع بولد وبنت ؟ هذا ولد هذا ؟

نوره بلعت ريقها:ماغلط ياعقاب رجع بالشهاده وبعيال بالحلال

عقاب:نوره ! تسمعين وش تقولين ؟ يتزوج بدون شور اهله ووحده اجنبيه مالها عرق وأصل قشّها من الشارع وتزوجها وتقولين ما سوى غلط ؟

نوره:حب ياعقاب وتعرف الحب ما يدق باب

عقاب:اللي يغلط ويقول حب ماهو رجال ، الرجال يعرف من يحب ويعرف من يتزوج

نوره:هذا هو ساري زوّجته غصب لجنى عشانها بنت سفير ولها صيت ولها سمعه وللحين ما يحبها ولا خلّف منها

لف بحده عقاب:يحبها لا اسمعك تقولين هالكلام

نوره بللت شفايفها بتوتر:طيب عقاب لو اطلب منك طلب تطيعني ؟

عقاب:تعرفين اني ما اردك

نوره:هو طلب صعب

عقاب ناظرها وسكت وكملت نوره:طالبتك عقاب واذا انا زوجتك وام عيالك انك تسمع منه

جلس بإعتدال عقاب من فهم وتقدمت نوره له:جاسر ويـ

وقف عقاب بعصبيه:هذا جاسر ؟

نوره:ياعقاب الولد هنا بالسعوديه لكنه ماقدر يجيك مستحي منك

عقاب صرخ بغضب:يستحي ولا يجي بعمره كله ولا يدخل علي ، كيف يتزوج ويخلّف وانا ماعندي علم ؟ هذا صاحي هذا رجال ؟ هذا احد يأمن عليه ويسفرّه يدرس ؟

نوره:درس يا عقاب درس الولد ورجع بشهاده زينه وبترفع راسك

عقاب خبط السرير:وطّى راسي ما رفعه وسفّل بإسمي وسمعتنا ، استقبله ببيتي وش اقول للناس ؟ والله ولدي وديناه يسافر بس رجع مع ١٧ ورع ؟

نوره:ياعقاب مشتاق لنا ومشتاق لاخوانه لا تصعّب الأمور

عقاب:ولا تشوفه عيني تفهمين

تنهدت نوره وناظرها بغضب عقاب وخرج من الغرفه تاركها

تأفتت نوره تاخذ جوالها:صعب صعب ياعقاب صعب

دقت على جاسر ووقفت تمشي بالغرفه

جاسر:هلا أمي

نوره:أمي جاسر قبل شوي علمت ابوك

ارتبك جاسر ووقف:وش قال ؟

نوره:وش بيقول يعني اكيد عصب ولا يبي يشوفك

تنهد جاسر يشد شعر راسه

نوره:بس اسمع مني ولا تهتم اعرف له ابوك هذا

جاسر:وش اسوي الحين ؟

نوره:ابوك بكره بيجيه ناس من القبيله يبون صُلح وأمور تعرفها تخص القبيله وبيمتلي مجلسه ، اقلط معهم

جمد وجه جاسر:امي منجدك ؟ والله يشرشحني قدام القبيله كلهم

نوره:منهو ؟ عقاب ؟ ما يسويها اعرفه

جاسر:امي تكفين مابي يصير شي وننفضح عند الناس

نوره:اقولك البس اذا عندك بشت واذا ماعندك اجيب لك من بشوت ساري والا ثنيان

جاسر تنهد:والعيال ؟

نوره:عيالك ؟

جاسر:اي

نوره ابتسمت:جيبهم لي حبايبي الله يجعل عمري قبلهم يقعدون عندي ماعليك

جاسر:طيب ان شاء الله

نوره:اي وبرسل لك ثوب جديد وعقال وشماغ مع حمدان يعطيك اياه الظهر بكره

جاسر:طيب

نوره:يالله يا أمي تصبح على خير

جاسر قفل جواله وتنهد يمسك راسه بوهقه ولف يناظر عياله نايمين بسريره وصد يفرك عيونه بتعب

'

دخل نهار وهو مستعجل ولابس طاقيته ولف ثنيان:دق الباب يالطيب قالط على بقاله

نهار ابتسم:اسمع غتره والا شماغ ؟

ثنيان ناظره ونطق:غتره

نهار:اها عشان تلبس انت شماغ وتطلع احلى مني ؟ حركاتك يالغيور

ثنيان:اذلف

ضحك نهار ووقف جنبه عند المرايه ياخذ من عطوره:عطور جديده

اخذها يشمها ويبخ وعدل شماغه ثنيان واخذ بشته اللي معلق ولبسه ولف نهار:اليوم ابوك بيعزم كل القبيله لزواجك اسرع من انه يدق يعزم ويرسل دعوات

ثنيان:ابوي الود وده يزوجني اليوم

نهار:ياشيخ فله وش تبي احلى من الزواج دلع

ثنيان:اي خل ينقي لك ابوي على ذوقه وتعرف الدلع

ضحك نهار:لا انا زواجي على ذوقي اذا انتم سبك وافقتم على اختيار ابوي انا غير

ثنيان شال العود يحطه خلف اذانيه وهز راسه:لا يسمعك عقاب بس

نهار عدل غترته ومشى ثنيان يخرج من الغرفه ونزل وناظر نوره اللي تبخر وابتسمت:عريس قلبي وعيوني

ابتسم ثنيان:لا بدري على عريس قلبك

نوره:وش بقى ؟ ما بقى شي

ثنيان:ابوي وصله احد ؟

نوره:لا للحين لوحده بالمجلس

ثنيان مشى بيروح ولفت نوره:أمي ثنيان

لف عليها وهمست:اليوم جاسر اخوك بيجي

عقد حاجبينه بصدمه:وش اليوم رديه لا يجي محنا ناقصين فضايح

نوره:انا قلت له يجي ماعليك انت ادري ابوك لو شافه وسط ناس كثير ما بيقدر يقول شي

ثنيان:وهذا حل ؟ بيروحون ونبتلش

نوره:عاد يصير اللي يصير ولدي وابيه يرجع بيته

ثنيان تنهد وهز راسه:طيب طيب الله يهدي النفوس

مشى يدخل المجلس ووقف عقاب:وين باقي اخوانك؟

ثنيان:وراي

لف ثنيان من دخلوا الرجال وبلحظه المجلس صار ما ياسعهم والقهوجي بدأ يصب القهوه ويضيفهم وجلس عقاب ببشته وبجانبه عياله واقفين

لف ساري على ثنيان:ما بتقعد ؟

همس ثنيان:جاسر جاي

ساري ناظره بصدمه ولف نهار من سمعه:احلف ؟

ثنيان:بس ماهو لوحده

نهار:تكفى لا تقول مَره

ساري لف بعصبيه:انكتم صوتك عالي

ثنيان:مع الأسف معه ولد وبنت

رفع يده على راسه نهار ونزلها ساري غصب وعدل بشته ساري:ابوي بيذبحه

ثنيان:منجدك ؟ زين ما يذكيه بصحون العشاء

ساري تنهد بتوتر ولف يناظر حوالينه ودق جوال ثنيان واخذه يرد:جايك

مشى ثنيان وخرج وناظر جاسر اللي نزل من سيارته وابتسم ثنيان:ارحب

جاسر بربكه:اي رحابه ياشيخ

ثنيان ناظر عياله بالسياره:امش ندخل لأمي

جاسر:البس بشتي والا ابوي يخنقني فيه ؟

ثنيان:معودين الناس نلبس بشوت دايم تدخل بدونه ليه ؟

جاسر:مدري بيقولي ابوي مسوي شيخ على راسي

ثنيان:لا تطمن بيقولك اكثر بس امش

فتح باب سيارته جاسر ونزلوا الصغار ومشى يدخل البيت وابتسم من شاف أصايل ونوره بإستقباله

وغطت فمها أصايل:جاسر

ابتسم وفتح يدينه لها وركضت تحضنه وابتسمت نوره براحه تناظرهم

أصايل:اهخ وحشتني وحشتني

جاسر:وانتي أكثر

ابتسم يبتعد عنها ولفت تناظر الصغار:ياحياتي

انحنت تبوسهم وتتكلم معاهم ولفت نوره:ادخل مع اخوك

جاسر ناظر ثنيان واخذ ثنيان البشت اللي على ذراع جاسر ولبسه ولفت أصايل تناظرهم:الله يستر عليك بس

جاسر ارتبك ومشى ثنيان يدخل المجلس وناظر ابوه اللي يتكلم:ابوي بدون ما اقاطعك معي ضيف

رفع عيونه عقاب وابتسم ثنيان من دخل جاسر ووقف نهار يعلي صوته بالمجلس الكبير:ارحب

ابتسم جاسر من شاف اخوانه ووقف ساري يمشي له وحضنه

ورحبوا فيه الجالسين ولف ثنيان يناظر وجه عقاب اللي تلوّن بالغضب وكأنه يمسك أعصابه

وابتسم ساري يشد على كتوف جاسر ويعدل له بشته ولف جاسر ونطق بهدوء:السموحه استأذنكم اسلم على ابوي قبل الكل

جاه صوتهم:خذ راحتك ، حق ، معذور

وتقدم جاسر يمشي بربكه لين اخر المجلس ووقف قدام عقاب وتقدم يبوس راسه واخذ كفه يبوسها وناظر عيون عقاب اللي تناظره

وتقدم ساري:يالله حيّه حمدلله على السلامه

لف جاسر وجلس ساري جنب ابوه وجاسر جنبه وناظرهم ثنيان وشاف عقاب من حك جبينه يكتم غيضه ولف من كملوا صُلحهم وكلامهم

بدأ الضيوف يقومون ويدخلون لصالة العشاء وعقاب لا زال جالس وثنيان ونهار يرحبون فيهم

ولف عقاب على جاسر اللي ناظره بربكه ونطق:ماقلت مابي اشوفك ؟

ساري:ابوي يـ

عقاب:انكتم انت

جاسر بلع ريقه:ابوي أنا جاي لأهلي لبيتي لديرتي وجاي رافع راسك والله ما وطيته

عقاب عقد حاجبينه:ما وطيته؟ وين ورعانك اللي جبتهم بالغربه ماقلت عندي ام وأب من حقهم يشوفون ولدهم متزوج بنات أصول وجايب خلفه من صُلب رجّال ؟

بلع ريقه جاسر ودخل ثنيان يناظرهم ووقف عقاب:دام النفس طيبه اطلع لا اشوفك

جاسر وقف:ابوي تكفى

مشى بيروح عقاب وتقدم ساري:ابوي تكفى خل نتفاهم جميع عائله نسد مشاكل بعض

عقاب لف:مشاكل ؟ قل مصيبه وفضيحه

ثنيان:ابوي تراه ماغلط

عقاب:لحد يدافع عنه !

جاسر ناظرهم بضيق ودخل عقاب مع الضيوف ولف ثنيان:لا تطلع اصبر امي تفكك الأمور

جاسر:طردني تستهبل وشو اقعد ؟

ساري:اي اقعد ان طلعت ما انحل شي

تنهد جاسر وفصخ بشته يرميه على الكنب وجلس

'

نوره ابتسمت تلعب جون ولفت من دخل عقاب:خذهم واطلع

وقفت أصايل تناظرهم يدخلون خلف عقاب وناظرته نوره:وين يطلع ؟

عقاب:لحد يتكلم ولا يفتح فمه

لف لجاسر اللي واقف:خذهم واطلع ما سمعت ؟

جاسر:ابوي اقسم بالله كنت ناوي اقولك لكن كل شي صار بسرعه

عقاب جلس وناظره بحده:بسرعه ؟ انا كل شهر احول لك مبلغ تمشي امورك فوق مصروفك عشان تدلع نفسك وتجيب لي ورعين ؟

نوره:عقاب شوف بالله طالعهم مالهم ذنب

عقاب مارد عليها يناظر جاسر بحده

جلسوا العيال يناظرون جاسر اللي واقف ولفت نوره تأشر له ومشى يجلس عشان يبوس كف عقاب وشال كفه عقاب

جاسر:ابوي تكفى والله العظيم انا من يوم جيت للسعوديه ضايع مدري وين اروح

عقاب:طبعاً تبي البيت والسيارات والفلوس ولا كأنك غلطت !

جاسر:ابي اهلي مابي شي زود

عقاب؛خذهم وانقلع عيني لا تشوفك

نوره:عقاب دام وصل والقبيله كلها شافته وش نقولهم اذا سألوا عنه ؟

عقاب؛قولي مات

نوره ضربت صدرها:اسم الله عليه

أصايل:ابوي تكفى والله مايهون علي اخلي جاسر يطلع برا البيت بعد كل هذي السنين وهو برا

عقاب:ما امداك تشتاقين له كنتي عنده قبل شهرين ، كنتي تدرين عن عياله؟

أصايل هزت راسها بالنفي:لا والله

جاسر:محد كان يدري

لف عقاب يناظره بحده

أصايل؛ابوي تكفى ابي حسّ اخوي بالبيت وابي وجوده

لف نهار يأشر لأصايل تكمل وتقدمت أصايل تجلس جنبه ومسكت كفه:ابوي عشان خاطري انا أصايل بنتك ، خله يجلس بالبيت وعاقبه باللي تبي احرمه من الفلوس احرمه خروج من البيت اللي تبي بس يكون بالبيت

جاسر ناظر ابوه اللي يناظره ولف عقاب عليها:عشان يزلّون غيره ؟ ماهم اصلاً على حدود الزلّه بس ربي ساتر عليهم

صدوا بعيونهم نهار وساري وثنيان لانه يقصدهم

نوره:ولو زلّ احد نغطي عليه ونستره احنا اهله وسنده وعزوته

عقاب:لا انا ما استر احد يزلّ افضحه واتبرأ منه

نوره؛وجاسر ما زلّ

عقاب ناظرها بحده وصدت نوره للصغار ورفع عيونه عقاب للعيال وناظر جاسر:اذلف غرفتك عيني لا تشوفك

ابتسم جاسر وتقدم يبوس راسه ومشى يطلع

مشت خلفه نوره وابتسمت أصايل تبوس راس عقاب:الله يخليك لنا

لف عقاب يناظر العيال:اقسم بالله لو أحد يجرب بس ينزل راسي بالارض لأدفنه ولا أبكي عليه تفهمون

بلع ريقه ساري ونزل عيونه ثنيان بسرعه يخفي ربكته

ووقف عقاب يطلع من عندهم وهو لابس بشته

تقدمت الخدامه:مدام أصايل ملاك برا يبغاك

رفع راسه ثنيان ولفت أصايل على ثنيان:كلمتك ؟

هز راسه بالنفي ووقف قبلها يخرج ومشت أصايل بربكه تمشي خلفه

كانت تناظر خطواتها وتمشي بالحوش ولفت من خرج ثنيان لابس بشته وضحكت من شافته:شدعوه مو اليوم العرس كل هذا حماس ؟

تقدم لها ولفت له وتقدم لها ثنيان:شتبين بأصايل ؟

ملاك:بنات وبيننا سالفه

ثنيان مسك ذراعها:ملاك ! ادفنك الحين ترا

ملاك ناظرت الحوش:هنا ؟ لا يصيدون جثتي بسرعه

غمض عيونه يكتم غضبه وخرجت أصايل:هلا ملاك

ملاك:اذا فاضيه البسي عبايتك بوريك فستاني وصل

أصايل ناظرت ثنيان وهزت راسها:دقايق واجيك

لفت ملاك تناظر ثنيان:اعذرنا ياولد العميد ما اقدر اوريك شكلي من الحين نخرب عنصر المفاجأه

ثنيان:اضحكي ماتعرفين وش جايك ؟

ملاك:صار عندي فضول صراحه شوقتني

ثنيان ابتعد عنها بيدخل ونطقت:حمدلله على سلامة اخوك

لف وعقد حجاجه وكملت ملاك:صراحه ! ماتوقعت العميد رحيم لهالدرجه

تقدم لها وفصخ بشته يحطه على ذراعه:شدراك ؟

ملاك ابتسمت:عندي نيتين على قولتك نيّه ملاك ونيّه شيطان والشيطان هذا داخل بيتك

ثنيان:انتي كم واحد يشتغل معك ؟

ملاك:لا عيب ! انا ادير اموري بنفسي

ثنيان:اقسم بالله لأكشفهم واحد واحد

ملاك ابتسمت من خرجت أصايل ومشوا لسيارة ملاك وحركت ملاك تخرج من البيت

ولفت وهي تسوق:نورتي سيارتي

ابتسمت أصايل:وصل بسرعه فستانك ماشاء الله

ملاك:ماوصل بس بغيتك تطلعين معاي

لفت أصايل عليها ولفت ملاك عليها وهي تسوق:مين اللي يناديك اخت النهار ؟

أصايل صدت بربكه وكملت ملاك:ادري مو شغلي وتقدرين تقولين مالك شغل وتقفلين الموضوع بس لان الرقم غريب وبدون إسم

أصايل بلعت ريقها ثواني:ما اعرف انا احياناً تجيني رسايل مزعجه كذا واطنشها

ناظرتها ملاك ولفت للطريق:منيف اخوي يقدر يحل لك موضوع الارقام هذي الغريبه

لفت أصايل بسرعه:لا تكفين ملاك فشله خلاص اطنش الارقام او ابلكها وانتهينا

ملاك:شدعوه فشله ، فاضي منيف يحلها لك الحين

أصايل:ملاك ماله داعي صدقيني

ملاك وقفت عند بيتهم وابتسمت:تعالي انزلي

ناظرتها أصايل بوهقه ونزلت معاها ومشت ملاك تفتح البيت وتدخل ورفعت صوتها:منيف

ارتبكت تشد على شنطتها وتناظر البيت ورفعت صوتها ملاك:منيف

خرج ووقف من شاف أصايل وتغير وجهه بربكه

ولفت ملاك تناظر أصايل ونزلت عيونها ليدينها اللي تشد على شنطتها:أصايل عندها مشكله ودي تحلها لها

منيف ناظرها بصدمه وبتوتر:مشكلة وش

أصايل لفت لملاك:ملاك ماله داعي

ملاك:ادخلي تعالي اجلسي

مشت أصايل تجلس وفصخت عبايتها ملاك ولفت لمنيف:مدري خذ جوالها شوف في رسايل تزعجها وكل ما تبلك الرقم يرجع يزعجها رقم جديد

منيف لف لملاك وهمس:تغير رقمها

أصايل هزت راسها وناظرته ملاك:خذ الجوال منيف

ناظرها منيف وتقدم ومدت جوالها أصايل بربكه وبلع ريقه منيف يناظر المحادثه

ونطقت أصايل:مو مشكله

ملاك:يناديك اخت النهار هذا ساطي خذ رقمه منيف وشوف لنا مين

منيف جلس على الكنبه وهو يناظر المحادثه بدون يرد وحطت رجل على رجل ملاك:والا دق عليه نشوف مين

أصايل لفت بخوف:لا ملاك تكفين

ملاك:وليه ؟ خايفه من وشو ؟

بلعت ريقها أصايل وناظرت ملاك لثواني:كان يهددني بصور لي

جمد وجه منيف ولا قدر يرفع عيونه على ملاك

وهزت راسها ملاك:وحولتي له فلوس ؟

هزت راسها بالنفي:قالي الله يستر عليك بعدها صار يضايقني ما اعرف احسه يراقبني ، ارسل لي مره على البيت ورد وماتشا من المحل اللي دايم اصوره وبعدها كتب لي بالمطار ايام سفرتنا مع ان المكان ماكان في احد غيرنا

هزت راسها ملاك ولفت لمنيف:شرايك يامنيف ؟ مو كلب بالله ؟

مارد منيف واخذت نفس ملاك:الصراحه لازم ينفضح نفضحه عشان يتربى وارفع عليه قضيه وتاخذين تعويض وياسلام

رفع عيونه منيف على ملاك ولفت أصايل:لا ملاك ماودي ابوي يدري وازعجه هو خلقه مبتلش الحين بسالفة جاسر

ملاك:مو لازم يدري

أصايل:اشتكي عليه ؟

لف منيف عليها:لا

ناظرته أصايل ولفت ملاك عليه تناظره ونطق منيف:انا اجيبه واخوفه ومعد بيأذيك

ملاك:نبيه يختفي معد يتجرأ يكتب لها شي يامنيف

هز راسه منيف وهو يناظر ملاك واخذت نفس أصايل:تعبت والله ملاك صرت اخاف اروح مكان لحالي احسني مراقبه وسنابي كل مافتحت جديد حسيت في احد داخله مو ماخذه راحتي

ملاك:اكيد شي مو هيّن بس بيحلها أخوك منيف ماعليك

وقف منيف وحذف المحادثه من عند أصايل ومد الجوال:احلها

اخذت الجوال وناظرته ومشى منيف يدخل الغرفه وناظرته ملاك لين دخل الغرفه ولفت لأصايل:تشربين شي ؟

هزت راسها أصايل:قهوه

وقفت ملاك ودخلت المطبخ تسوي بكوبين وخرجت تمد كوب لأصايل:ثواني واجيك

هزت راسها أصايل ومشت ملاك لغرفة منيف ودخلت على منيف الغرفه وقفلت الباب وهي ماسكه كوبها ولف منيف وبلع ريقه:ما كنـ

ملاك:لا تبرر وش تبرر وش تقول ؟

منيف رفع عيونه على ملاك:ماقدرت اهددها واخذ منها ريال واحد

ملاك:مو هذا اللي بنتكلم فيه ، بنتكلم عن الورد والماتشا والرسايل واخت النهار

صد منيف بربكه وكملت منيف:لو فضحتك عندها وخليتها تكرهك مو احسن ؟

منيف لف عليها:على اساس انا اللي نشبت الا اهددها ؟ مو انتي اللي غصبتيني ؟

ملاك ابتسمت:صح انا اغصبك واغصب شادن على اشياء ماتحبونها انتم ، صح انا ام الشرّ

منيف:انتي دخلتيها في جهازي وهي دخلت في بالي

حطت كوبها وتقدمت له بحده:ولا تدخل قلبك تفهم ؟ اصحك تدخل قلبك الا هالبنت ، ومستحيل بتحبك ولا بتشوفك لان انا وانت قاعدين نأذيها ونأذي أهلها

منيف سكت يناظر ملاك وكملت ملاك:لا تتعب نفسك وتدخل بمكان مستحيل يصير اللي ببالك ، من الحين انسحب واترك البنت بحالها لا تأذيها ولا انا بأذيها

منيف مارد وناظرته ملاك ثواني:اقتل مشاعرك ترا ماعليها شهود

صد منيف ولفت ملاك تاخذ كوبها وتخرج من غرفته

'

خرج من دوامه ثنيان وفصخ الستره الملونه اللي يزينها شعار أرامكو وحطها بسيارته وركب يشغل مكيف سيارته ولف لجواله ياخذه وفتحه وهو يتثاوب بنعاس ورفع راسه يعدل شعره ونزل عيونه من جاته رساله من رقم غريب وعقد حاجبينه وفتح الصور اللي جاته

كانت صور له مع جواهر لكن مو باين وجهها كان هو اللي باين ، باليخت وبالشاليه وهو نايم عاري الاكتاف وصور كثيره له مع جواهر وناظر الصور بصدمه بدون ما يقرأ الكلام اللي تحته ونطق:هذي ما تتوب ؟ يارب هذي ما تموت ما تعقل ؟ ما تنهد ؟

شغل سيارته بعصبيه:هالمره داعسك اقسم بالله لادعسك ياملاك

وقف عند بيتها وسحب فرامل بصوت عالي ولفت ملاك من سمعت الصوت وعقدت حاجبينها ولفت أصايل:عند بيتكم ؟

ملاك:مـ

سكتت من دق الباب بقوه ولفت أصايل بخوف:بسم الله مين ؟

وقفت ملاك بإستغراب وتقدمت تفتح الباب وناظرت ثنيان اللي معصب ورفع صوته:انتي تتحديني ؟

وقفت أصايل من سمعت صوته ووقفت خلف ملاك:ثنيان !

ثنيان ناظر أصايل:وش جابك عندها ؟

لف ملاك:شتبين بإختي ؟

ملاك تنهدت ولفت لأصايل:ادخلي ارتاحي احلها مع اخوك واجيك

أصايل ناظرتهم وابتسمت ملاك بهدوء ومشت تدخل الصاله ولفت ملاك تحول ابتسامتها لحده وقفلت الباب توقف معه عند باب الشارع:وش فيك هذي المره حضرة المهندس ؟ عسى ماشر ؟ جاتك ضربة شمس ؟

مسكها من ذراعها بقوه:البسي عبايتك واطلعي لي

ابتسمت تناظره من قريب معصب:تغار علي من الجيران ؟ محد يشوفنا لا تخاف

ثنيان:ادخلي ملاك والا اقسم بالله دفنتك هنا

تنهدت ودخلت البيت ولفت أصايل:شفيه ؟

لبست عبايتها ملاك:دقايق واجيك بناخذ فرّه وراجعه

أصايل وقفت:خلاص بكلم حمدان يجي ياخذني

هزت راسها ملاك:براحتك

طلعت ملاك وجوالها بيدها وركبت يمين ثنيان اللي حرك بسرعه وتمسكت تناظره:اي وش من جديد هالمره ؟

ثنيان لف لها يرفع صوته:تسأليني انا ؟ تحسبين بتمشي علي تهديداتك ؟ تبين مليون زياده ؟

عقدت حاجبينها ملاك تفكر:اصبر ما اذكر هالفتره في مليون بتجيني

ثنيان لف لها لانها تستفزه ولف للطريق وناظرت البحر:بترمي جثتي بالبحر ؟ يلقوني بسرعه

ثنيان دخل الشاليهات ووقف عند الشاليه حقه ونزل وناظرته يمشي لها ويسحبها من ذراعها ونزلت تمشي معاه:لا تعاملني كذا عشان لا يتلوّن خدك من جديد

ثنيان سحبها بقوه:انا اللي بلوّن جسمك الحين بالدم

دفعته ملاك تحاول تفك نفسها ودخلها الشاليه ودفها على الكنب وناظرته بحده:لا تسحبني كأني بقره عندك ، اعتدل

ثنيان فتح جواله:تبين مليون قبل الزواج يعني ؟

ناظرت جواله من مده ورفعت حاجبينها بصدمه وثواني وابتسمت:اح انكشفتوا ؟

تقدم ثنيان ومسكها من شعرها يكشف حجابها ودفعته بقوه تصرخ عليه:وخر قلت

طاح على الكنبه وتقدم لها ووقفت:اكسر يدك اذا مديتها مره ثانيه تفهم !

ثنيان:انتي بقيتي فيها عقل وتفاهم ؟ انتي خليتيني بحالي ؟ انتي مجنونه صاحيه ؟ انتي من راسلك عليّ ؟ من ؟

ملاك:مو انا اللي مرسله صورك ذي روح فتش على اللي كشفكم

ثنيان:تضحكين علي ؟ تحسبين بقفل على السالفه كذا ؟ لو توصل فيها اني انفضح اليوم بس ما اخليك تعيشين ليله زياده

اخذت الجوال منه بقوه وناظرت الصور ونزلت نظرها للرساله تحت تقرأ:تتوقع يتمّ زواجك لو انتشرت صورك هذي ؟

رجعت تناظر الصور اللي باين فيها ثنيان بس بدون جواهر وضحكت ترمي عليه جواله:سَبك ، لعبت عليك اللي معك وحاطها فيني انا

ثنيان:بتحطينها بغيرك ؟

ملاك جلست على الكنب:طالع الصور ياحمار ياغبي طالع مافيها الا انت بدون السلقه اللي معك ، ومكتوب تحت بكل وضوح يتمّ زواجك بعد هالصور ؟ انت حمار اقسم بالله

ناظر الرساله يقراها وهز راسه:هذي حركاتك انتي

ملاك ابتسمت:يحق لك ما تثق فيني بس مستعده الحين اثبت لك انها حركات جواهر ماهو انا

ثنيان:انتي صاحيه ؟ تهددني انا ؟ تبي تفضح نفسها ؟

ملاك:تفضح نفسها بوشو ياغبي ؟ مو باين الا رجولها

نزل انظاره يناظر الجوال وكملت ملاك:واعرفها غبيه تلاقي الرقم جديد وبإسمها ماخذته ، هذي سَبك ما تعرف تهدد حتى

ثنيان:تبيني ابتعد عن جواهر بذي الطريقه يعني ؟

ملاك:اي لاني ميته من الغيره ولا ابيها تشاركني فيك

وقفت وناظرته:صحصح ياحمار الصور هذي بجوال من ؟ مو بجوالها هي ؟ مو هي اللي مصورتها ؟ انا وش بيجيبها عندي من جوالها ؟ اوكيه لي أمور تقنيه بس ماتوصل !

ثنيان:لو تحلفين على المصحف ماصدقتك

ملاك لفت تاخذ جوالها:تخسى احلف لك ، صدق والا لا تصدق بكيفك

مشت بتروح ومسكها من ذراعها يلفها ولفت له تناظره ونطق ثنيان:تبين تنتشر الفصيحه وزواجنا مابقي عليه شي عشان تطلبين الطلاق وتاخذين المؤخر ؟ انتي تلعبين على بزر بذي الحركات ؟

ضحكت ملاك بتعب من غبائه ولفت عليه:تحس السناريو تسويه ملاك ؟ وش هالسهوله ؟ انا قبل ما اخذ منك خمس ملايين بقلب حياتك جحيم

ثنيان:انا اللي بعيشك الجحيم وجربي تنشرين لي فضيحه تبطين ما طلقتك تبين الفكه مني ؟ اخلعيني

ملاك هزت راسها:ان انفضحت بتعرف انها مو أنا واقعد بعدها انبح بالصاله

ثنيان سحبها من ذراعها وناظرت الغضب من عيونه وصوت أنفاسه وناظرها ثنيان بحده:ماني راحمك

ملاك:الله الرحيم ياولد العميد ما ارتجي رحمه من بني آدم

فكت يدها منه ومشت طالعه:تعال رجعني بس

خرجت تاركته ولف ثنيان يناظر الجوال مستحيل ماتكون ملاك هي وحركاتها وتهديدها واكيد تبي الفضيحه قبل تتزوجه عشان تبي الطلاق ويكون لها الحق بالطلاق وبتلصقها بجواهر

خرج وهو معصب ولفت عليه:الشاليه تَبع أرامكو ؟

عقد حاجبينه بذهول من سؤالها ولفت تناظر الشاليه:يعني خاص بس لموظفين أرامكو ؟ كنت أفكر اشتري لي حلو مكانه وبرايفت

نزلت تلمس تراب الشاطئ:ونظيف

اخذت نفس ولفت تناظر نظراته:بنطول كذا ؟

ثنيان:متى بصير أفهمك ؟

ابتسمت له ملاك من عرفت انه وصل للجنون منها ورفعت حاجبينها بعدم علم ومشت قبله للسياره

ركب ثنيان وقفل الباب وبلل شفايفه يهدي نفسه ولف لها:اقنعيني ليش ماتكون لعبه منك ؟

ملاك فتحت المرايه تناظر شكلها:لاني ما أهدد الا بفلوس

ناظرها وقفلت المرايه ولفت له وابتسمت:اقنعتك اكيد ، الحين رجعني بيتي وروح دور على اللي يهددك

رفعت كتفها تكمل:مع انه معروف

شغل سيارته وهو يناظر جواله وحرك وحط جواله على اذنه وهو يسوق:هلا طلال

نزلت نظراتها لجوالها تنشغل فيه وكمل ثنيان:برسل لك رقم طلعه لي لو انه جني تطلعه وتكفى بس قولي انها ملاك بنت مساعد

ضحكت ملاك ولفت له تناظره وقفل جواله ثنيان يحطه بحضنه وناظرت شكله:حلق وتعدل بس للزواج

لف يناظرها وصدت عنه تناظر الطريق

وقف عند البيت ولف لها يناظرها والتفتت وابتسمت

:اتوقع المره الجايه بتشوفني عروستك اكيد خلاص

ثنيان مارد عليها وفتحت الباب ملاك ونزلت من سيارته ومشت تدخل البيت

ظل واقف يناظر البيت ولا هو عارف كيف فعلاً بيرتبط بإنسانه مليانه شرّ وغامضه وتخوفه ، يخاف من أفعالها واللامبالاه اللي تعيشها وكأن ماعندها شي تخسره ، يذكر انها تناظر بنظرات كلها تحدي ويحسّ بالنيران اللي تشتعل داخلها وكأنها ولا بليله من عمرها حست بالبرد ودَفت

حرك سيارته وعقد حاجبينه يقرأ رسالة طلال:جواهر بنت بندر

جمد وجهه من طلع كلام ملاك فعلاً صحيح وناظر الطريق وهو يسوق وتأفف يضرب سيارته

'

دخل غرفته منيف من سمع صوت باب ملاك وقفل عليه الغرفه بالمفتاح لانه يعرف انها بتجيه وفعلاً تقدمت ملاك وحاولت تدخل وناظرت مقفل وهزت راسها تتركه وتروح لغرفتها

مسك كرسيه بيدينه منيف وهو يناظر صورة أصايل قدام عيونه بكمبيوتره ويذكر اخر شي صار بينه وبين أصايل

خرج الصاله من طلعت ملاك وناظرته بربكه أصايل ومد لها جوالها:ما بيضايقك

أصايل ناظرته:شسويت ؟

منيف:وخرته عنك

سكتت وهي تراقبه وناظرها منيف نفس نظراته اللي شافتها منه بالسياره مع نهار ولا فهمت شي

اخذت جوالها منه ونطقت بفضول:ليش قلت ماعندنا ماتشا لك ؟

منيف:مو تحبينها ؟

هزت راسها أصايل وفهم استغرابها منيف:طلبتيها بالعُلا وفهمت انك تحبينها

سكتت أصايل ودق جوالها وردت على السواق ومنيف واقف يناظرها ووقفت تقفل جوالها:يعطيك العافيه

منيف مارد عليها ومشت أصايل طالعه من البيت

غمض عيونه بهدوء منيف من غادرت البيت وخرجت وتنهد يستجمع نفسه ويعود لرشده لانه طاح بمكان بيغرق فيه وبس وكويس صحصح من بدري

'

ثنيان حاول يتصل عليها ويرسل لها ولاردت

ناظر رقمها وهز راسه:ما انتي تبيني ليه ماتردين علي اجل ؟

تأفف ثنيان ولف من دق الباب ودخلت مريم الخدامه تبلغه انهم جالسين برا بالحوش ويبغونه

وقف ومشى ينزل لهم وطلع يمشي لخلف البيت وسمع أصواتهم من قبل يتوجه لهم وتقدم يشوفهم جالسين كلهم

نوره:يقعد معانا مثله مثل اخوانه

عقاب:انتي ليه تكسرين بكلمتي ؟

نوره:لانه ولدك ياعقاب ان ما سترت عيبه واحتويته لمن يروح ؟ احنا عائله ومو أي عائله احنا تحت اسم عقاب بن جرّاح والمفروض نستر على بعض ونحتوي بعض وكل من مسك يد اخوه صار أقوى ولحد قدر يطيحنا

سكت عقاب ولف يناظر جاسر اللي جالس وجلس جنبه ثنيان

عقاب:وش مسميه؟

كان يقصد ولده اللي بحضنه واشرت له نوره يكذب ولاقدر ونطق:جون

ضحك نهار من ردة فعل ابوه اللي ناظره بحده ينقده

جاسر:بس بغيره ان شاء الله واسميه عقاب اذا ودك

عقاب:لا مابيه على اسمي

نوره:ياحبيبي هو سَمه حمد على اسم ابوي الله يرحمه

جاسر ابتسم:سمّي

ابتسمت نوره ولف جاسر يناظر سارا اللي تتكلم مع أصايل بالانقليزي

وناظر ثنيان عقاب:وين واصل انت ؟

لف ثنيان من عرف انه يكلمه واعتدل بجلسته:معكم

عقاب:زواجك هذا الأسبوع

ثنيان هز راسه:معي علم

نوره:الله يعديه على خير والله شايله هم الحجوزات

أصايل ضحكت:انتي شايله همّ أحلام بتجي تغني بالعرس والا بتبطل

ضحكت جنى:خالتي عسل دام اخترتي احلام

عقاب:عشان يقولون نوره جابت أحلام

نوره:اي والله دفعت دمّ قلبي عشان تجي وابي يقولون نوره سوت العجب بزواج ولدها وابيه لا صار ولا استوى مثله بالدنيا

صد ثنيان وناظره عقاب ودخل يده بجيبه وطلع مفتاح ورماه على ثنيان ومسكه ثنيان وناظره بإستغراب

لفوا يناظرون عقاب اللي نطق:هدية زواجك مني

بقق عيونه نهار:سياره ؟

عقاب:اسكت انت لا تتدخل

ابتسم ثنيان يناظر المفتاح بصدمه وناظر ابوه اللي رفع عيونه على الحوش ووقف ثنيان بإبتسامه وخرج يشوف السياره اللي موقفه

ووقفوا اخوانه خلفه وشهق ساري:العب أبو جرّاح

ابتسم ثنيان ونطق جاسر:احه والله مطلب

نهار:انت لخمس سنوات تحلم فيها يابطل

تقدم ثنيان يفتحها وركب نهار يمينه:نبي فرّه

ركب ساري بالخلف:والله لعيب ابوي وش هالذوق

نهار:لو مو شاري جديده قبل شوي كان حسدتك

جاسر ركب:عليكم بالعافيه

ناظره ثنيان من المرايه:انا ومن ؟

جاسر:المدام يالطيب

نهار ضحك:نسي الزواج وابوه ياعمي

تقدمت أصايل وهي تمشي مع سارا وناظرتهم:احنا كمان بنجي

جاسر شال سارا بحضنه وركبت أصايل بينهم وابتسم ثنيان يشغل السياره وفتح القزاز نهار يأشر لابوه اللي ابتسم وخرج ثنيان وهم معاه

أصايل ابتسمت:امانه ثنيان ابغى ماتشا

ثنيان ابتسم وهو يسوق ولف نهار:لا تعلمين سارا عليها تدمن معك ونبتلش

جاسر:لا هذي تخصص موكا

ضحك ساري:ليتها تقعد على الماتشا أستر

شغل اغاني نهار بالسياره وهو يكتشفها وفتحت جوالها تصور أصايل وتصور اخوانها وابتسم جاسر يحضنها من الجنب من لفت تتصور معاه

وقف واخذ لهم ماتشا وقهوه ومشى يرجع للبيت

شرب من قهوته نهار وهو يتصور بالسياره ودخل البيت مع البوابه ثنيان ووقف السياره

نزلوا وتقدم ساري:والله ودي بالثانيه دام فيها سيارات

ناظرته جنى بحده وضحكت نوره:يبي يغثك بس

عقاب:انت عطيتك مثلها واحسن بزواجك

نوره:اي والله ماقصرت ياعقاب

عقاب:شلت الدنيا شيل عشان زواجك اول عيالي عاد انت

ابتسم ثنيان وتقدم له يبوس راسه:ماقصرت أبوي ورايتك بيضا

عقاب:مابي الا انك تصون البنت وتقدرها وتعيشها عيشه زينه

هز راسه ثنيان:ان شاء الله

أصايل:غش طيب أنا غرت

عقاب:الحين بنقعد ندلعها لين ترضى عاد

ضحك نهار:حتى ابوي مبتلش

أصايل:افا أبوي مبتلش فيني ؟

عقاب:انتي أحسن شي سويته بحياتي والله والله لا مال ولا منصب ولا عيال يجون ربع ظفرك ، ولو خرجت من الدنيا هذي بك بس فإني ربحان

ناظرته بحنيه أصايل من كلامه:اووه ابوي !

تقدمت تحضنه وابتسمت نوره:وش يفكنا الحين نفخت ريشها

ساري:بسوي نفسي ما انتبهت انه جحدنا الاربعه

نهار:اربع رجال عطتهم أصايل عشره صفر مره وحده

'

واقفه قدام فستانها تناظره يمكن اخذت ساعه كامله وهي على حالها من صدمتها من اللي سوته ومن الدرب اللي مشته ومن علامات الاستفهام اللي تشكلت فوق مستقبلها

تناطر الفستان اللي دفعت عليه حرّ مالها عشان تكون افضل عروس واحلى عروس والطله اللي مستحيل تنسي ولا يجي مثلها بس عروس لعريس ماتبيه ولا يبيها

وش مشاعر منصور الحين وهو وحده بالسجن ! بعد ما اهله رموا عليه حكايات مزيفه عشان يمنعون قلبه عنها وينتقمون منها بولدهم

جلست على السرير واخذت نفس ولفت من جاتها رساله واخذتها تقراها وعقدت حاجبينها تقراها:زواجك بكره بيكون فضيحه وبخربه ومستحيل تتم فرحتك صدقيني

رفعت حاجبها ملاك وهمست:طالت أجنحتك يا ست جواهر

وقفت ولبست عبايتها واخذت شنطتها وخرجت وركبت سيارتها وحركت وهي تمشي:انا تهدديني يا جواهر ؟ انا ؟

-

لا تنسون النجمه ⭐️ وجميع تشبيهات الروايه بحسابي بالاستقرام

دخل الحي يناظر بيت جواهر وجرب يدق عليها من جديد لانها ما زالت ترسل عليه صور وتهدده بفضيحه لزواجه ويدري انها من غيرتها تبي تحرقه وتحرق نفسها ووده لو تكلمه ويحلها لكنها مطنشته

تنهد يرجع يتصل وعقد حاجبينه من شاف سيارة ملاك توقف عند بوابة بيت بندر وجمد وجهه وفتح الباب ينزل

ودخلت بالسياره البيت ملاك ونزلت من سيارتها وتقدمت تدخل ودخل ثنيان بصدمه ونطق:ملاك

لفت عليه ملاك وناظرته وتقدمت له:ماشاء الله معزوم ياولد العميد ؟

خرجت جواهر بصدمه من البيت تناظر ملاك وثنيان ومشت بسرعه ونطقت:ثنيان ؟

ثنيان:ملاك اطلعي

ملاك لفت تناظر جواهر:بتخربين زواج مين انتي ؟ تهددين مين ؟

جواهر لفت بخوف تناظر بيتهم ولفت عليها:انتي صاحيه ليش تجين بيتنا ؟

ملاك:عشان افضحك عند اهلك ويالله بالمره موجود حبيب القلب نفضحكم سوا ونفتك ، لاني لاحظت انك تحبين الفضايح

جواهر:اطلعي برا الحين

ملاك تقدمت لها بحده ودفتها من كتفها:تحطين راسك براسي ؟ تعرفين مين انا يوم انك تهدديني ؟

جواهر ناظرت ثنيان بخوف ورجعت ناظرت ملاك:اطلعي وانا بجيك بس اطلعي

ملاك:اشتغل عندك انا ؟ وخري بس وخري

مشت بتدخل البيت وسحبتها جواهر برعب:تكفين خلاص

ملاك لفت لها بحده وهمست:انا ملاك محد يهددني ولا يتجرأ من يهددني وزواجي بتحضرينه وبنت ابوك تقدرين تخربين شي ، وبتزوجه هذا اللي انتي ميته عليه وبنتحارب انا واياه وبسرقه وبرجع اسرقك انتي واهلك واذا في راسك شي هدديني بشي

كان واقف ويناظرهم مصدوم ويناظر ملاك اللي بنص الحوش بسيارتها وكأنها داخله سوبر ماركت مو داخله بيت وله أهله

جواهر:تكفين تكفين اطلعي من البيت وانا بجيك بس اطلعي

ملاك:الحين تكفين ياجواهر الحين تكفين ؟

جواهر:اطلعي

ملاك:بطلع بس ما بستناك تجين تترجيني ، بطلع وبنت ابوك ترجع عيوني تشوفك ولا تطلعين بدربي لاني بحرقك اقسم بالله لاحرقك وأبكي أهلك عليه وأدمرك وأدمر اسم اهلك لسابع جد

رفعت كفها تهددها:والله ياجواهر والله لأفضحك فضيحه اخلي كل السعوديه تتكلم فيها

ناظرتها جواهر برعب من نظرات ملاك وثقتها وتقدمت ملاك لها ونطقت بهمس:وجربي خليني اعرف انك تقابلين ولد العميد

لفت لثنيان تناظره واقف:ودعها ياولد العميد لاني طفشت من وضعكم ولا ودي يستمر

جواهر ناظرتها بصدمه:انتي صاحيه ؟

ملاك:كنت بتجاهلك والله وبخليك تتهنين فيه واريح راسي لكن طناخه وابن ابوه اعرف انه رجع لك والا قابلك

لفت جواهر بصدمه على ثنيان:ثنيان !

ملاك لفت تناظر ثنيان اللي ساكت مصدوم من وجوده بحوش بندر اللي لو خرج بيقلب الدنيا عليهم ومن ملاك اللي متحديه الكل ولا شايفه احد قدامها ومن جواهر اللي تستنجد فيه

ناظرته ساكت ملاك ولفت لجواهر:اخذتي جوابك ، ولاشي لانك ولاشي بحياته والحين توكلي لاهلك خليهم يمسون بدون فضايح

فتحت باب سيارتها ملاك تركب وتخرج من البيت ولفت جواهر تناظر ثنيان بصدمه وخرج ثنيان من البيت ومشى لين سيارته وركب وحرك خلف ملاك

تسوق بهدوء وتشوف سيارة ثنيان خلفها لين وقفت عند بيتها واخذت شنطتها ولفت تفتح الباب وشافته ينزل وتقدم لها

ملاك:ابي امسي ياولد العميد

ثنيان:انتي من ؟

ملاك ناظرته ثواني وكمل ثنيان:انتي من وراك ؟ مدعومه من من ؟ من مقويك لهالدرجه ؟ تدخلين بيت الناس وتهددين ؟

ملاك:انا زوجتك

ناظرها ثنيان وابتسمت ملاك:ونعم النسب صح ياولد العميد ؟

ثنيان:كنتي بتفضحينها بين اهلها صدق ؟

هزت راسها ملاك:اي وافضحك معها من بيوقفني ؟

ثنيان ناظرها وهو ساكت وكملت ملاك:شفت ان اختيارك ركيك وما جاب لك الا وجع الراس ؟ اجل ذي تاخذها من ورا اهلك وتعاند ابوك عشانها ؟ اقسم بالله ما تستاهل

ثنيان:متى تنطفي نارك هذي ؟ قاعده تنحرقين ياملاك

ملاك ابتسمت له:خلها تحرقني أبي الدفى

سكت ثنيان يناظرها:وش سبب ذي النيران ؟ من ولعها فيك ؟

ملاك ابتسمت تناظره والجواب الوحيد اللي بيكون على كل هذي الاسئله هو منصور

وهزت راسها تتقدم له:انتبه بس ياولد العميد ، انا أحرق اي شي المسه

ثنيان ناظرها ومارد عليها ومشت تاركته تدخل للبيت ولف يركب سيارته ويحرك

دخلت غرفتها ورمت مفتاحها وفصخت عبايتها ولفت تناظر الفستان:انت باقي ما انحرقت ؟

وقفت قدام الفستان تناظره وجلست على السرير طول ليلها تتأمله مع صوت أفكارها

'

دخل غرفته وطلع جواله اللي يدق واخذه ورد:الحين رديتي ؟

جواهر:هذي مجنونه ؟ كيف تدخل بيت اهلي كذا ؟

ثنيان:ليه ارسلتي علي هذي الصور ؟ ترديني ما اتزوج بهالطريقه ؟

جواهر بلعت ريقها:مو انا

ثنيان:رقمك بإسمك وصورك بجوالك ، تهددين ياجواهر ؟ طلعتي نفسها بكل شي ، تهدديني انا ؟ متى صرنا كذا ؟

جواهر:لا تتزوج ثنيان

ثنيان:متأخره حيل

جواهر جلست واخذت نفس تهدي نفسها:ثنيان !

ثنيان:انتي اخترتي تنهين كل شي كذا ، بهالطريقه البشعه وتحاولين تلوين ذراعي وانا كل عمري معك اقولك لا تخربك غيرتك وتخلينها تكون سبب للفراق بيني وبينك

جواهر:بتتزوجك وتسكن معاك ببيت اهلك وتبغاني ارتاح ؟ ثنيان لو انا اللي ارتبطت بشخص ثاني عادي عندك ؟

ثنيان:انا مو أناني انا حتى مو ناوي اتركك وابي اعلن زواجي منك بأول فرصه لكن انتي اخترتي تخربين كل شي ، بتحطك براسها ملاك والله تفضحك ولا ترحمك ليه قاعده تلعبين معها

جواهر هزت راسها ووقفت:اجل طلق

ثنيان سكت ثواني يشوف حياته تتدمر قدام عيونه ونطقت جواهر تخفي رجفة صوتها:طلقني خلني اروح لواحد غيرك

ثنيان:ماهو وقته

جواهر:صح لانك عريس ولازم تنام بدري

ثنيان غمض عيونه بتعب ونطقت جواهر:كل شي انتهى ثنيان كل شي

قفلت وناظر جواله ثنيان وتنهد بتعب ورمى جواله يمينه يناظر الفراغ

حياته كلها تغيرت من يوم دخلتها ملاك كل شي تشابك وكل شي صار ماله رغبه فيه ، جات وقلبت كل حياته فوق تحت وغيّرت كل شي بحياته

دخلت بين اهله وصار اسمها تحت اسمه وخلت نفسها زوجته غصب قدام الكل وطلعت على ظهره عشان توصل لمجتمعه والشيوخ والتجار وهو ماقدر يمسك عليها ربع ثغره للحين

-

قصر الأفراح -الساعه ١٠ مساءاً

ليلة زواج إبن العميد ' ثنيان بن عقاب بن جرّاح

على المحاميه ' ملاك بنت مساعد

كانت اساميهم على جميع زوايا القصر وأمام ترحيب الناس وبالإستقبال وكأنهم يعلنون للكون معجزه ما تصير ولا راح تصير

موج البحر بغموضه بمدّه وجزره يتلاقى مع لَهب تاكل الحطب والجمر وتاطى عليه ولا تقول اهخ

السيارات تعدّت مواقف القصر والكل ودّه يحضر ويكون معزوم والكل يوجّب عقاب ونوره وثنيان والكل يلبي العزيمه

سمعوا عن الزواج وحاولوا يلقون دعوات لزواج ولد عقاب ، سمعوا انه بيكون زواج ينافش زواج ساري بفخامته وبحضوره وبالفنانين اللي بيحييون الزواج

-

وقفت السياره عند باب القصر وفتحوا له الباب ونزل وهو يعدل بشته وابتسم يتقدم على صوت الطبل والعرضه النجديه عند باب القصر

رقص السيوف وعطر الدخون وعود البخور

ابتسم يتقدم يسلم على الحضور واخوانه معه

دخل القصر يختلط مع اصحاب البشوت واصوات الترحيب والتباريك تغمر المكان

يشوف ابوه اللي يرحب ويهلي ويلف يشوف اخوانه اللي معاه

التفت يشوف التصوير بالقصر ووقف يبتسم بثبوت

تقدم عقاب يوقف يمينه ويلف يسلم على الحضور اللي دخلوا القصر

عقاب ابتسم:يامرحبا أعزّ من حضر

لف يناظر عياله بحذر ويشوفهم واقفين والتفت يبتسم

تقدمت لهم القهوه والحلويات والتمر وتلوّن المجلس الكبير بالبشوت السوداء والبنيّه دليل ان عقاب الكل يعرفه والكل يوجّبه

رفعوا السيوف يرقصون بجانب ابوهم وتوسط المكان نهار يرقص بسيفه امام ثنيان وتقزم جاسر معه يرقص ومسك ذراع ابوه ساري يرقص معه

تقدم نهار يرقص امام منيف اللي ماهو متعود على كل هالحشد من الناس وابتسم منيف يهزّ سيفه بجانبهم

ابتسم ثنيان من نهار اللي يرقص امامهم مع جاسر

بدون ما يخفي مشاعره ثنيان كان منظر ابوه واخوانه افضل مشهد يشوفه وفرحتهم فيه وتراحيب الناس خلت بداخله فرحه بغض النظر عن من عروسته ولمن ينزف

تقدم عقاب لثنيان:ما شفت عمهم ؟

هز راسه بالنفي ولف على منيف:عمك ماهو جاي ؟

منيف:قال بيجي بس يمكن بيتأخر

سكت ثنيان هز راسه عقاب وصد منيف بربكه يصرف عمه ويخارج نفسه ويناظر الحضور والرجال

لف ثنيان يشوف الشخص اللي تقدم لأبوه ومد له الظرف الطويل وخرج برا القصر ومدّ عقاب لثنيان الظرف عشان يقدر يسلم على ضيوفه

وفتح الظرف ثنيان بفضول وجمد وجهه من شاف صوره مع جواهر وكانت واضحه فيها جواهر وهو واضح بالصور

قفل الظرف جامد وجهه مسوّد وخرج من القصر بسرعه يحاول يدور الشخص لكنه مالقي له أثر

مشى وركب سيارته وجمد وجهه اكثر يشوف الصور هذي صوره مع جواهر خمن انها لعبه من ملاك وتبي تفضحه لكنه طلع من ورا الصور صك عقد النكاح اللي يثبت ان جواهر زوجة ثنيان بالسرّ

تغيرت ملامحه لان محد عنده نسخه الا جواهر

مستحيل جواهر تتجرأ تفضح نفسها مستحيل تقدر

معد عنده عقل يفكر مسك راسه بقوه بخوف يتذكر ان ابوه استلم الظرف لكن ربي ستر عليه

-

عند العروس ' مَلاك '

شربت من قهوتها تشوف اللي تسوي شعرها وتعدله ومتجاهله صوت دقات قلبها وافكارها ومخاوفها وجهل مستقبلها والجاي ، تسمع صوت أحلام يتغنى بالقصر ' ناويلك على نيّه '

ضحكت بهدوء تشوف اظافرها اللي تسويها وحده ورفعت راسها تشوف الميك اب اللي يزيّن وجهها ويبرز جمالها وشدت على الكوب من ثبتوا لها طرحتها على شعرها

كانت لوحدها بالغرفه بدون أي احد بدون خوات بدون أم بدون صديقات بدون أحد

هي تزف نفسها بنفسها بدون دعوات من احد وابتسامات فرح وتصفيق ورقص لها

تسمع الصخب بالقصر وتعرف ان الزواج هذا من أكثر الزواجات إزدحام والكل متشوق يحضره

وقفت وهي لابسه روبها وتناظر شكلها بالمرايه وتقدمت تاخذ فستانها وساعدوها الوصيفات اللي حجزتهم بنفسها عشان يساعدونها

شغلوا المباخر بالغرفه وامتلى الجوّ بريحة العود والعنبر والهيل وعطروا فستانها بالباتشولي وخشب الصندل والعود والمسك ، كانت ريحة المكان تبيّن حجم فخامة فستانها وشكلها وزواجها وكأنها تقول:

أنا الدايم وأنا الحاكم وأنا الدستور ، نمايم القوم ماداست طرف ثوبي ، وأنا ماني الدرب الخضر اللي كل من جاني تمشّاني ، لاني ما أرضى بالقليل وان وطيت الجمر عادي ولا اوطى في وحل

لبست أبيض فستانها وضحكت من تجمعت دموعها من مشاعرها وناظرت شكلها تتأمل اللي سوته بحياتها

هزت راسها بالنفي هي لوين بتروح وش سوت بحياتها ووش قاعده تسوي !

جلست على الكرسي تستجمع نفسها واخذت جوالها اللي يدق وناظرت الرقم اللي اتصل عليها

جمد وجهها من الرقم لانها تعرف رقم الثابت للسجن ولفت تناظر اللي بالغرفه:اتركوني لحالي

خرجوا يتركونها ناظرت الرقم بتردد ماتدري ترد عليه وتكلمه وتنّهدّ قبل تطلع للناس والا تقفل بابه الوحيد اللي فتحه لها وتمشي بدون ما تلتفت

رفعت يدها برجفه وردت بدون صوت ورجفت يدينها بخوف من نطق:صرتي له ؟

بكت تغطي فمها من سمعت صوته وأول اسئلته

وكمل منصور:قلت لك من قبل ان ما يخليني اعيش وأصبر الا انك تنتظريني

نزلت راسها تبكي بدون ماترد عليه وشدت على فستانها بكفها

منصور:ما صدقتهم والله ماصدقتهم لين شادن بنفسها قالت لي

عقد حاجبينه بصدمه:تتزوجين غيري ياملاك؟

ملاك:عشانك اقسم بالله عشانك كل شي سويته بدونك عشانك

منصور:عشان تسرقينهم ؟ عشان تطلعيني بفلوس واحد ولد تاجر ؟ تحسبين ابي الدنيا هذي ؟ انتي وش قاعده تسوين في نفسك ؟ تحسبين انا ابي ملاك هذي ؟

ملاك تكلمت وهي تبكي:وش انتظر ؟ انتظر تمرّ سنين اطول وانت بالسجن ؟ جاوبني ؟ تبيني أنذل عند رجول الشيوخ عشان يسددونها ؟

منصور صرخ بقهر:ولا تروحين لواحد غيري ولا تعيشين مع احد غيري ، حرقتيني اقسم بالله أحس كلبشاتي جمر ، كرهتك

ملاك بكت بتعب:اقسم بالله عشانك انا اللي انحرقت

منصور:لا تكملين تسددين لي ريال مابي منك شي

ملاك صدت تبكي وعضت شفتها تمنع صوت بكاها

منصور:مابي منك شي من لحظة ما بتنزفين لواحد غيري انسيني وطلعيني من حياتك ، مابي منك ريال واحد ، اقسم بالله ولأول مره احسني بسجن ، كرهتك ملاك كرهتك ماهو انتي اللي اعرفها ولا اللي ابيها

بكت تنزل راسها:منصور

منصور:الله يستر عليك

قفل السماعه وبكت من انقطع الخط ورفعت صوتها تشهق بتعب هي كانت تحاول تتماسك تحاول تقوي نفسها لكن هدّها ، هدّها صوته واتصاله والخذلان بنبرة صوته وكلامه

رفعت راسها تناظر شكلها اللي تغير من دموعها ومسحت دموعها ترفع صوتها تناديهم

دخلت الميك اب ارتست وانصدمت من شكلها ونطقت ملاك وهي ترجف:عيدي علي مكاجي

ناظرتها بصدمه ولفت ملاك بحده:تسمعين ؟

هزت راسها وتقدمت لها وشدت على كفوفها بقوه

'

مشى فيهم الوقت وهم يرحبون لين انتصف الليل وخرجوا يدخلون لصالة الحريم عقاب وكل عياله وانتظرهم منيف عند الباب ودخلوا تاركين منيف

اشتغلت زفة الرجال ودخلوا فرقه يرقصون معهم بالطبل والسيوف وترددت:عريسنا يابدر بادي

وصوت الغطاريف واضاءة النجف والفلاشات ودخلوا سوا وابتسم ثنيان يشوف امه اللي بإستقبالهم

والبخور يعج بالقصر وتقدم عقاب يسلم على نوره:مبروك ام ساري

ابتسمت نوره ولفت تسلم على ثنيان وعيالها وتقدم نهار:وش هالزين ام نهار ؟ وش هالزين غطيتي على الحضور ؟

ضحكت نوره وضربت كتفه بخفه ووقفوا على الكوشه

وطلعت أصايل ماسكه فستانها الوردي الطويل وابتسمت ترقص بخفه بذراعها وتبتسم لاهلها لعزوتها ولاخوانها وابوها وسندها

وتقدم نهار يمسك ذراعها يرقصها وهي تدلع عليه ورفع جاسر كفوفه يصفق لهم

لفت أصايل تمسك كف عقاب وتسحبه يرقص معها وابتسم عقاب لها يشوفها ترقص معهم

وتقدمت تحضن عقاب اللي سلم عليها:عقبال افرح فيك

أصايل:بعد ما اشبع من دلعك

لفت لثنيان وحضنته:مبروك ياعيون أصايل

ثنيان ابتسم:الله يبارك فيك

عدل بشته يشوف الحضور من الحريم والتجمع بالقصر والكثره وارتبك

التفت عقاب لساري:اطلعوا ونادوا اخوها يدخل

هز راسه ساري وغادر القصر مع نهار وجاسر ولف منيف من خرجوا وابتسم لنهار اللي نطق:هاه اخو العروس تدخل ؟

منيف ابتسم بربكه:اي

دخل منيف القصر وتقدم يوقف يمين ثنيان وانطفت الأنوار وتسلطت على بوابة ملاك واشتغلت زفتها

ويحلف يمين ثنيان ان من ربكته وخوفه من خطوته ومن مستقبله ومن نصيبه ، صوت نبضاته يسمعه كل اهل الخبر الليله

ناظر الباب منيف بخوف وهمس:استودعتك الله

كان يشعر بخوفها خلف الباب وانها لوّنت وجهها من جديد بالثقه والشموخ وتنتظر الباب ينفتح عشان ينرسم عليها ابتسامه مزيّفه اصطناعيه

شدت على مسكتها تكتم كل مشاعرها وترسم ابتسامه تظهر أنيابها

وفعلاً من انفتح الباب طلت تبتسم ولا كأنها عاشت عاصفه قبل خروجها للناس

ابتسم منيف من شكلها وطلتها وهز راسه عقاب من دخولها وشكلها وهمس:ماشاء الله

ناظرتهم امامها وابتسمت تمشي بخطوات هاديه وراسها مرفوع من غرورها وثقتها وتمشي على صوت زفتها وتوزع نظراتها على الحضور والابتسامه تغمر وجهها

شد على بشته وهو يشوفها تنزف له وارتبك يبي تعدي الليله على خير بدون مشاكل وفضايح

لف من سمع عقاب يهمس:ماشاء الله ماشاء الله

ناظر ملاك اللي تتقدم لهم كانت احلى عروس واحلى طلّه كلها دلع وانوثه وغرور وثقه وابتسامه ساحره لكنه يعرفها يعرف اللي داخلها عكس كل اللي خارجها

البياض اللي تلبسه ويزيّن جسمها يكسي داخلها السواد

لكنها تفتن الأعمى قبل البصير بقوامها وطولها وطول عنقها المكشوف ، ابتسامتها بأنيابها اللي ما تخفيها ابد عن عيونه

ماقدر ما يركز على كل تفصيله من شكلها ومن فستانها اللي صُنع لأجلها يكشف كتوفها وعنقها ويزين عنقها الطويل عقد فخم يليق بملاك بالشاهين المغرور

رفع عيونه لعيونها اللي تناظره من بعيد ، لو كل مافي الدنيا جايز واحتمال مستحيل تشك في ان الملاك هذي تخبي داخلها قوه وعزّه ما تشيلها جبال

كان يشوف ابتسامتها وأنيابها وينزل نظراته لعنقها الطويل لأول مره يشوفها مكشوفه عن كل هذا العنق الغزالي الطويل ، صافي لدرجة ان عروق عنقها الخضراء بارزه من جلدها الصافي الشفاف وكأنها ' عناقيد ربلٍ ما سفى فوقها السافي '

الشي الوحيد اللي لاحظه ولا يعرف السبب لكن ما بعد أنيابها شي فاتن غير خضار عروقها اللي بعنقها الطويل ، عنق الغزال عنق الشاهين المغرور

كان أطول مشوار يشوفه بعيونه لملاك ولا يدري كم استغرقت وقت تنزف له لكن كل افكاره مشت فيه لين اقتربت لهم

تقدم من وصلت وتبدلت الاغنيه لاغنية فرحه وحظ ونصيب فايز ، مد كفه لها ومسكت كفه الدافي بجمر اصابعها

باس جبينها واشتعل من قبلته لجبينها ولَهبها وابتسمت تكتم مافي جوفها ونطق ثنيان:مبروك

هزت راسها له وبلعت ريقها تمسك كفه وتشدها بقوه وتطلع معه للكوشه وتقدم عقاب يسلم عليها ومسك كفها:مبروك والله يوفقكم يارب

ابتسمت له بدون رد ولفت من شافت منيف وحست انها بتبكي لا محاله وتقدم يحضنها وفلتت كفها من ثنيان تحضنه وتنزع الابتسامه عن وجهها

ابتسم منيف:لا تبكين لا تبكين ياملاك

ملاك شدت على ظهره بقوه وابتعدت عنه تبتسم تخفي دموعها وباس خدينها ووقف جنبها ولفت بفستانها توقف جنب ثنيان وتبتسم للكاميرا اللي تصورهم

غادر المكان عقاب ومنيف بعد دقايق واعتلت الكوشه نوره بفستانها العودي وتفصيل فستانها اللي يعطيها فعلاً فخامة زوجة العميد ، أم ساري

سلمت عليهم نوره:الله يحفظكم ويحرسكم من العين قمر واخذ قمر ، ملاك واخذ ملاك

ابتسمت ملاك ولفت لها نوره:زين ما اخترنا

ملاك ماردت وابتسمت وطلعت أصايل ترقص قدامهم وتصفق لها نوره وكانت ملاك بعالم اخر غير عالمهم غير اصوات فرحتهم وغير شعورهم

كفها بكف ثنيان تبتسم وتناظره بإبتسامه لكن داخلها نار داخلها جمر وفحيح لهب

لف يناظرها ثنيان ويحس بيدينها اللي تشتعل من نارها وابتسم لها بدون ما يتكلم والتفت على امه وأصايل

شدت على كفه تتصنع الفرحه بيمينه وهو كذلك يضحك ويلف لها كل شوي يبتسم لها ويصد لاهله وفرحتهم

تقدمت أحلام تغني لهم وابتسم ملاك واشتغلت لهم أغنيه تتكلم عن الملاك اللي بجانب ثنيان : معذوره لو تكبرت مغروره يابخت الغرور

تقدمت نوره تمسك كف ملاك وترقصها مع ثنيان

وابتسم ثنيان من نطقت نوره:طلبت الاغنيه مخصوص لملاك

لف ثنيان يناظر ملاك على كلمات الاغنيه:يعني تسميها ملاك ؟ لا هي احلى من كذا

اخذت نفس ملاك من ربكتها من الفنانين اللي يغنون لها وتقدم ثنيان يمسك كفوف امه اللي ترقص له

وابتسم وهي ترقص:اي والله فزّي له يا أرض

تعب ثنيان من الابتسامات المزيفه ومن توتره ومن الوقت اللي مشى فيه

قضوا ساعات يمثلون قدام ملأ ويمثلون على بعضهم لين خرجت معاه لغرفتها وتلاشت ابتسامتها وناظرها ثنيان:قبل شوي تضحكين

لفت عليه تناظره بدون رد تشوف اللي صنعته بنفسها والطريق اللي مشته ووين طاحت بنهاية عمرها

ابتسم ثنيان يهز راسه وتقدم لها يشوف طرحتها وفستانها:جاتك لحظة إدراك ؟ عرفتي وين طحتي برجلينك ؟

ملاك ناظرته وتقدم لها ثنيان ووقف قدامها يناظر وجهها ونظراتها:ادري انك جمر وادري انك حريق وباطى الجمر ولا اقول اهخ ، الا وما تنطفي نارك هذي يابنت مساعد الا وما بيوم تبردين وترجفين من البرد وساعتها بكون انا لفيح وزمهرير البرد

ماردت ملاك تناظره وهز راسه ثنيان:ادري انك كاتمه سخط الدنيا كلها بحلقك لكنك تبلعينه خلف ابتسامه عاديه ، كل شي تحاولين تخيطينه ببراعه من خلفك انا بفتقه بيديني الثنتين ، انتي ظلام وشرّ وشيطان تعرفين ؟ كل الناس اللي مصدقين اسمك انا الوحيد اللي ادري انك عكسه

هزت راسها ملاك ونطقت بهدوء:ما انتظر منك تقدم لي كفك وألفت انتباهك وتهديني عيون وآذان ، خلك في مسعاك ياولد العميد وانا مثلك برسم خطاوي ، انت بخير وانا بخير والله على ذلك كريم ومستعان

ثنيان عقد حاجبينه بإستغراب من الشخص اللي امامه:انتي كل هذا ؟ غامضة و واضحة و حاضرة و غايبه ؟ شي من الحقيقه وشي من الخيال ؟ صفوة التالين وآخر بقايا من الاولين ؟

ملاك سكتت ثواني تسمع دفى صوته:انا شي مستحيل تفهمه وشي تجهله ولا بتعرف حدوده ، ماني جنب الاعتدال

ثنيان:ادري انك متطرفه ولا تعرفين الاعتدال والمنتصف لكن حتى لو تطغين وتسلبين حقوق البشر ، بمشي خطاويك واكشف نيّتك ، بوقف وبسد طريقك

ملاك ناظرت عيونه:فقدت أكثر من اللازم ، دموع وآلام وعافيه وأحلام وشعور وناس وزهرة شبابي ، بخافك انت ؟ انا ماصرت اخاف يا ولد العميد

ثنيان هز راسه:لا تحاولين تتلبسين القوه تحت ستار من الضعف لان هذا الضعف الا وما ينكشف

ملاك:ممكن ينكشف لكن ينكشف لربي انت مستحيل تكشفه

كان بيكمل حواره معاها لولا دخول امه بالغرفه:استودعتكم الله ياحبايبي والله يهنيكم

ابتسم ثنيان ولفت ملاك تلبس عبايتها البيضاء وتسمع دعوات نوره لهم

-

خرجت معه تركب سيارته الجديده وهو مشغل الفلشر وابتسم ثنيان لاخوانه:خلوكم مع ابوي

جاسر:لا بغيت شي دق عليّ

ثنيان لف لطلال اللي واقف:طلال وراي ماعليك

طلال ابتسم:في أمانتي المعرس

ابتسم جاسر وركب ثنيان سيارته تحت نظرات منيف لملاك اللي تناظره ، قفلت بابها تناظر اخوها اللي ساكت

تدري انه يفكر كيف وطت رجلينها على درب هالعائله ؟ ووين صارت بسبب شرّ يكسيها ؟ بدون خوف وتردد دخلت برجلها لبيت وعائله وحياه تخوف بتاكل منها وبياكلون منها والاقوى بيفوز

ويتمنى من كل قلبه ان اخته ماتكون الخاسر بحرب الليله

حرك سيارته ثنيان يناظر طريقه وفرحة الناس اللي تعنّوا له وحضروا وقدروا وباركوا

ونزل عيونه للرساله اللي وصلته واخذ جواله يقراها

:إنتهينا أمس ، لعد تنادي علي ما يوصلني صوتك

قفل جواله وابتسم ابتسامه تحسّر على حاله وحياته وناظر طريقه للفندق ووقف وفتح بابه وفصخ بشته يحطه على ذراعه وتقدم لبابها وفتحه لها ونزلت تمشي معه

فتح الغرفه بالكرت ودخلت قبله وناظرت المكان اللي زرع داخلها ضيقه وسكاكين وجلست بفستانها على السرير وحط بشته جنبها وفتح ازارير ثوبه من همّه ورمى شماغه وعقاله وجلس جنبها يناظر فراغ الغرفه

يتذكر الظرف اللي وصل ليد عقاب وكان بيخرب زواجه بين الاف من الناس ، يتذكر ان اللي رمى بآمانه وكان بيفضحه هو جواهر بنفسها ووصلت من غيرتها انها تبي الفضيحه بس تكون زوجة ثنيان علن ، وعرف انها بدت تخاطر بنفسها ويسمعته وبعلاقته مع ابوه ، وبعد ما شاف زواجه الليله وفرحة ابوه وضيوفه حسّ انه بيخسر كل شي بزواجه من جواهر

كانت يساره تناظر مكان ما يناظر ، الفراغ

ودها تبكي بس من كبريائها ماقدرت وهو جنبها لكنها شعرت بجمر يسيل على خدها وعقدت حاجبينها تتحسس خدها وتناظر اصبعها اللي تبلل من دموعها

واستنكرت نفسها كيف تبكي بدون ماتحس وبدون صوت وعرفت انها تدمرت وانهدّت وتفجّرت

ناظرت دموعها اللي على اصابعها ولف عليها ورفع عيونه يشوف سيل عيونها وثبات ملامحها وشكلها وكأن دموعها تنزل بدون شورها

صد يدري انها تنهدّ يساره يمكن نفس همّه وأكثر ويجهل حجمه لكنه يعرف انها نار تشتعل يساره

وقف يتركها بالغرفه ويخرج ومن سمعت صوت الباب تغيرت ملامحها وتبدلت ترتخي وتبكي

تمسكت بفستانها تحلف انها كانت تلبسه شوك ما تلبس أنعم أنواع الأقمشه ، تحلف انها تشم ريحة رماد صدرها ماتشم عطورها

ماتدري كيف بتكون حياتها لو كان أبوها حيّ وأمها تشم الهواء بهالدنيا بس كانت تدري انهم بيكون دليلها وما بتعيش شي تخطط له ويدمرها

كيف تلوّنت بالسواد عشان تطلع بياض حياتها من سجن وزنزانه وحديد !

طاحت بفستانها بالارض تبكي بصوت وتشد على فستانها بكفوفها ، ياليت ان الدنيا كانت الطف معها

رفعت عيونها من شافت طيوف امها وابوها وعرفت ان النقص اللي ولّد حزنها ونارها هو خسارتها لأهلها

'

واقف عند باب الفندق يفكر وساهي وحاله ما يقول عريس وليلة زواجه

نزل انظاره لجواله وحط قدامه أبوه وعائلته وزواجه وسمعته والحياه اللي مشت فيه لين خطوته هذي وعرف ان قراره اللي بياخذه أفضل قرار وأحسن إختيار مايبي شي يلوي ذراعه حتى لو كان قلبه ، ما يبي ملاك تمسك نقطة ضعفه وتهدمه متى ما بغت

ارسل لطلال:ابي تصدر صك طلاق لجواهر وترسله عليها

قفل جواله وحطه بجيبه ورجع يدخل الفندق ويمشي لغرفته

فتحها وعقد حجاجه من الظلام بالغرفه ونور الابجوره الصغيره تنوّر محل نومه

تقدم يشوفها نايمه على السرير وفستانها طايح على الكنبه ما يعرف كيف لمّت نفسها واستجمعت اللي طاح منها وتناثر ونامت

كيف قدرت وهو كان متأكد انها تشتعل نيران ، كيف طفت نارها وقدرت تنام ؟

جلس على السرير يناظر ظهرها اللي معطيته وانسدح محله ورفع يده على راسه يناظر السقف

فتحت عيونها من حسته ينسدح جنبها وبلعت ريقها تشد على مخدتها وتمنع صوت شهقاتها لكنها بللت مخدتها بدون قصد منها

سمعته يتنهد ويطفي نور الغرفه ويعمّ السواد بالمكان وبقلبها وقلبه

'

تمشي بالمبخره:حطي الصحون هذي طلعيها قبل يجون العرسان

دخل عقاب يعدل شماغه:ماكلمك ثنيان ؟

نوره ابتسمت:الا كلمني يقول جايين بالطريق

هز راسه يجلس وخرجت أصايل تجلس بالصاله

وطلع ساري مع جنى ودخلوا يشوفون ضيافة نوره وريحة المكان والعود والبخور والهدايا اللي بالاستقبال

لف عقاب يناظر بوابة بيته من زجاج الصاله وشاف سيارة ثنيان تدخل البيت

طلت أصايل وابتسمت:وصلوا

وقف سيارته بالبيت وفك حزامه:مانبي مشاكل عند اهلي

فكت حزامها تاخذ شنطتها:اذا سكت انت ما بتكلم انا

ناظرها وفتحت بابها ونزلت ونزل معها وعدل شماغه واخذ نفس ولفت تشوفه يتقدم لها ومشت معه بكعبها وعبايتها وشنطتها تدخل للبيت

ماتعرف كم بتعيش بهالبيت وكيف بتتحمله ولا تعرف الجاي من عمرها لكنها ابتسمت من دخلت البيت ترسم ابتسامة الكِنه اللي ما بيندم على إختيارها أحد

تقدم ثنيان من طلعت له امه:يامرحبا بالعرسان ياهلا ياهلا

ابتسم يسلم على امه وحضنته:أمي وعيوني الثنتين

ثنيان رفع راسه يبوس راسها وابتسمت نوره تلف لملاك:ياهلا بزوجة ولدي وكِنتي وان شاء الله بنتي ، عساني أكون لك خير وتكونين لي خير

ابتسمت ملاك تناظرها وتقدمت نوره تسلم عليها:مرحبا فيك في بيت أهلك الثانين وحياك الله

ملاك:الله يحييك

دخلت الصاله ووقف عقاب:الله يحيي العرسان

ثنيان تقدم وباس راس عقاب وصافحه عقاب:الله يحيي الشيخ ثنيان ولد الشيخ عقاب

ابتسم ثنيان لأبوه:الله يبقيك ويعلي اسمك دايم

تقدمت ملاك ووقفت قدام عقاب وابتسمت له وناظرها عقاب بإبتسامه:ملاك بنت مساعد

هزت راسها ملاك تناظره:ملاك بنت مساعد

عقاب:الشاهين

ناظرها ثنيان وناظر ابوه يكتم غيضه وابتسم عقاب:مرحبا بك في بيتي وفي عائلتي وتحت إسمي وتحت عيني ، انتي صرتي بنتي وسمعتي واللي يمسّ ملاك يمسّني ويمسّ أهلي

ماردت ملاك تناظره وكمل عقاب:اللي يبي جموح خيول بيعرف ملاك واللي يبي عِزّه ماتثنى للذل يعرف ملاك

لف ثنيان يسمع ابوه وترحيبه ولفوا يشوفون وقوف عقاب قدام ملاك

عقاب:انتي ماتكونين بالصف الختامي ولا بآخر صفحات الكتاب ، توقفين مقام يناسب مقامك وسيرتك ماهي حيّ الله سيره ، ‏من نالك نال سبعَ مُعجزات

لف ثنيان على ابوه من نطق:وعشان انتي ملاك ما خذيتي الا نجل العقاب ، يملكك من ياطى الجمر ويصبر على الكيّ ، يوم يضيع الدرب يكون لك دليل ، مثل ثنيان

شدت على شنطتها من كلامه ووقوفه قدامها ومن هول المشهد ومن وجود ثنيان بينهم يناظرهم الاثنين

ابتسم بعد ثواني عقاب:مرحبا بك من جديد ياملاك

مد كفه يصافحها وظلت تناظر عيون العقاب اللي قدامها ورسمت ابتسامه ومدت كفها تصافحه بدون تنطق وترد عليه

أصايل ناظرتهم ونطقت:واو ، اتمنى انا بعد اسمع ترحيب نفس كذا ببيت زوجي

ابتسمت نوره:عقاب غير دايم غير

فلتت يدها ملاك وجلست وجلس ثنيان جنبها

ودخل نهار ببدلته:افا سبقوني العرسان ؟

ضحكت نوره من طاقة نهار بالمكان:اسم الله عليك بس

نهار تقدم:الله يحيي العرسان

ابتسم له ثنيان ورفعت عيونها ملاك عليه من رفع كفه يدق لها تحيه ونزلت عيونها لبدلته وابتسمت تلمح سلاحه بخصره

وجلس :عقبال عروستي ابي ترحبون فيها مثل ملاك وأزود

جنى:لا أبشرك كل ما تأخرت بيزيد الترحيب قبل ثلاث سنين ما شفت هالترحيب

ضحكت ولف ساري يناظرها ورفع عيونه عقاب وسكتوا يناظرونها ولفت عليهم من شافت نظراتهم وابتسمت:امزح معاكم

نوره:ماقصرنا معك ياجنى

جنى:شدعوه خالتي اكيد كنت امزح

لفت نوره من دخلت سارا وابتسمت:هذي اللي تسوى بنات الدنيا كلها

رفع عيونه عقاب من دخل جاسر وبحضنه ولده:سلام عليكم

مارد عقاب يصد عنه وتقدم يجلس جاسر ولف عقاب يناظره:ما خلصنا لكن أخرنا زواج اخوك والا باقي ما حلينا اللي ودنا نحله

اخذ نفس جاسر وهز راسه عقاب:تعال مكتبي بعد غدانا

هز راسه جاسر وهمس:سمّ

ناظرته ملاك وعياله وصدت عنهم

تقدمت لهم القهوه والحلويات وكانوا يسولفون بجو عائلي محفوف بالطمأنينه والحب

جو ما عاشته ولا شافته ملاك من قبل وتحس بالغربه فيه

لفت من دخلت مريم:مدام ملاك !

لفوا يناظرون الخدامه وعقدت حاجبينها ملاك من الفازه اللي بحضن الخدامه بحجمها الكبير ولونها الأحمر وابتسمت:فور يو

لف ثنيان يناظرها ولفوا عليها من سكوتها هي دارت براسها اسماء كثيره وترددت توقف تشوف الكرت من خوفها

ناظرها ثنيان من طالت بسكوتها:مِن مَن ؟

بللت شفايفها توقف وتتوجه للفازه وتاخذ الكرت وتقراه بدون صوت:الف مبروك واعذرينا على القصور عمك محمد

انصدمت لكن تماسكت لوهله ولفت لهم تشوف نظراتهم وابتسمت:عمي محمد يتعذر عن غيابه على الزواج

هز راسه عقاب:معذور ولو كان ودنا نتعرف عليه

رجعت محلها ولف ثنيان يناظر الكرت اللي بيدها وناظرته وحطت الكرت بحضنه تحط رجل على رجل

ناظر الكرت بحضنه يقراه وصد يرجع الكرت بحضنها

أصايل:عنده بنات عمك ؟

ملاك:بنت

أصايل:يالله كان ودنا نتعرف عليها

عقاب هز راسه:وولد على خبري صح ؟

لفت ملاك بربكه من لف عليها عقاب تناظره

وهز راسه ثنيان:منصور

رجف قلبها وتغيرت ملامحها ولفت على ثنيان اللي يناظر ابوه:سألت عليه بغيت اشوفه لكن ماكان ببيته

جمد وجهها تشوف ثنيان وبدل نظراته ثنيان لعيونها وابتسم:لاحقين نشوفهم مره ثانيه

عقاب:على خير

حست انها تخوض بحرب لوحدها وانها لوهله ماتقدر تتكلم وكل شي يجيها ماهي مستعده له ولا خططت له ووقفت:عن اذنكم

اخذت شنطتها تخرج ولف نهار على ابوه:شكل علاقتهم ماهي كويسه

أصايل:كيف مو كويسه مرسل لبنت اخوه ورد

عقاب:مانعرف عن الناس ووضعهم

نوره:يالله المهم انه قدرها وجاب لها ورد على بيت حمولتها وهذا يدل انه يقدرها

عقاب لف لثنيان:متى رحت لبيته انت ؟

ثنيان:قبل الزواج بأسبوع بغيت اعزمه بس طلعت لي بنت تقول انه باع البيت وخارج السعوديه يتعالج مدري يعالج زوجته

نوره:يالله ياحرام الله يشفيهم يارب

عقاب سكت يناظر ثنيان ورفع كتفه ثنيان:الله العالم

صد عقاب يناظر عياله بدون يتكلم

-

" لا تنسون النجمه وباقي التشبهيات موجوده بالتيك توك على هشتاق الروايه "

مسكت المغسله بيدينها اللي ترجف ورفعت عيونها لشكلها بالمرايه وهمست:صحصحي ملاك صحصحي

نزلت نظراتها لصدرها اللي من سرعة نفسها أربكها

كيف انهدت بلحظة ما جابوا سيرة منصور وعمها

عقدت حاجبينها تاخذ جوالها من شنطتها بيدين راجفه مين راسل الورد ؟ مستحيل يكون عمها مستحيل يبي يحسن وضعهم قدام اهل زوجها

ناظرت رسالة شادن اللي كتبت:ان شاء الله وصلت بالوقت الصح

عرفت انها شادن وغمضت عيونها تهدي ربكتها وحطت جوالها بشنطتها ولفت تناظر شكلها بالمرايه وخرجت تمشي بكل ثقه

ابتسمت تدخل الصاله وترجع تجلس بمكانها

جنى:عاد انا اكثر وحده مبسوطه من أول احسني دخيله بالعائله لوحدي الحين في مين دخيل معي

ابتسمت ملاك لجنى ولف عقاب:انتم بناتي ما انتم دخائل ببيتي هذا بيتكم وانتم بين اهلكم

جنى:جعلك تسلم ياعمي

نوره:وتوفقنا في الثنتين عز الله

ضحكت جنى ورجع ظهره لورا ثنيان يناظرهم يسولفون

نوره:الطيبون للطيبات ما ياخذ الطيب الا طيبه مثله

ضحكت ملاك تلف على ثنيان وناظر ضحكتها ثنيان وصدت تبتسم وتكمل:والخبيثون للخبيثات بعد

نوره:لا اعوذ بالله من الخبث جعله ما يدخل بيتي خبث

نزلت انظارها لفنجانها ملاك وناظر امه ثنيان يهز راسه:اللهم امين

عقاب:روحي شوفي غرفتك وان شاء الله انها تناسبك ام ساري ما قصرت رتبتها لكم

ابتسمت نوره:ان شاء الله يعجبك ذوقي

ملاك:إنتي راعية الذوق كله

نوره:الله يسلمك

وقفت ملاك تاخذ شنطتها ولف ثنيان يناظر ابوه اللي يناظره ووقف ومشى قبل ملاك

طلعت مع الدرج تمسك الدربزان وتتأمل البيت وفتح الباب ثنيان يدخل الغرفه ودخلت خلفه

ناظرت الغرفه ودارت بعيونها عليها وقفل الباب ثنيان ووقف جنبها:عزاي لأمي ماتدري ان الخبث دخل بيتها من هاللحظه

ابتسمت ملاك ولفت عليه:تزكي نفسك من الخبث ؟ عزاي للعميد ما يدري ولده وش مسوي من وراه

سكت ثنيان يناظرها بحده وحطت شنطتها على السرير وفصخت عبايتها:لحد يستشرف عليّ ويطلعني راعية الخبث والشرّ

لفت تناظر ثنيان:عايلتك ياولد العميد ربي ساترها والا كلاً يقول الخبث عندي

ثنيان:انا اتحمل كل تصرفاتك الا انك ترمين كلام على اهلي

ملاك:والله اذا اهلك يهمونك واجد ليه ماخذ بنت عدوهم ؟

ثنيان تقدم بيتكلم وابتسمت ملاك:والا ما انت ماخذها ؟ علمني حلال ؟

ثنيان:ماودي يعلا صوتي

ملاك:لا انا ودي يعلا ابي اسمع هواشك وضرب المكاتب اللي تعودته ، ابي اشوف كيف بتحدني بسيارتك كذا مره بالشارع ، ورني ياولد العميد والا ماتقدر لصق اسمي في اسمك واي شي يصيبني بيصيبك

ثنيان تقدم لها ومسك ذراعها وناظرته ملاك ونطق ثنيان:انتي هنا مِلكي ، تحت يدي وشوري ومن يوم دخلتي هالمكان ما بتلعبين نفس ماكنتي ، أقودك وأوجهك وأمشّي حياتك بنفسي ، مِلكي

ملاك بعدت يده من ذراعها:اسمع ، انا أقود ما أنقاد وماني مِلك احد انا حُرّه لين أموت محد يملكني ، انا الشارب اللي كان يملكني مات

ناظرها ثنيان يشوف الموج بعيونها وهمست تكمل:انتبه لا تنحرق

عرف انها تقصد غضبه ونيرانه اللي تشتعل داخل صدره ومشت تدخل الحمام تاركته بالغرفه

غمض عيونه يكتم غضبه ونزل نظراته لشنطتها ولف يشوف الحمام وفتح شنطتها يطلع جوالها

عقد حاجبه من انفتح له ودخل يشوف سجل المكالمات واستغرب الرقم الغريب اللي داق عليها شاف التاريخ والوقت وعرف انه وقت زواجهم

لف يشوف الحمام وطلع جواله وصور سجل مكالماتها وشاف اسم شادن ومنيف فقط ولا تتواصل مع احد غيرهم

دخل على الرسايل وشاف اخر رساله من شادن وعقد حاجبينه وهمس:من شادن ؟

قفل جوالها وحطه بشنطتها يفكر معقوله مو عمها اللي مرسل الورد ولعبه منها ؟

طلع من الغرفه وارسل الصوره على طلال وكتب:اعرف لي الرقم اللي مو مسجل رقم من

قفل جواله ونزل تحت ولا لقي ابوه ولا اخوانه

ورفعت عيونها نوره:اخذ جاسر لمكتبه

مشى ثنيان ودخل مكتب ابوه يسمعه يكلم جاسر اللي واقف:هو كذا اللي ما يحسب حساب لبعدين يخطي ويزلّ ويعيش يومه ولا يدري كيف بيكون وضعه بعدين

سكت جاسر يناظر ابوه وكمل عقاب:تطلع للناس الحين تقول اخذت لي وحده اجنبيه لا أصل ولا فصل ولا دين ولا عادات وجبت منها اثنين ، يسألونك وينها ؟ بتقول انحاشت لاني ماعرفت اختار

لف ساري يناظر جاسر اللي واقف ورجع يصد يشوف ابوه

عقاب:كيف بتحلها الحين ياولد عقاب

جاسر تنحنح:ابوي يعني هي ماهي جريمـ

عقاب:وشهو ؟ وش تقول انت ؟ تبينا نقول للناس اللي سويته ؟ وش بيقولون ؟ عقاب وعيال عقاب ؟

جاسر:يعني بالنهايه ابوي تراني تزوجت ماغلطت

عقاب:تزوجت من ورا ابوك وهذي فضيحه تلصق بظهرك لين تموت

بلع ريقه ثنيان وصد ساري عن ابوه ولف نهار:ابوي زوّجه طيب

لف جاسر بصدمه على نهار وناظر جاسر:اما ماتبي ؟ انا قلت بتنحل لو تزوجت

عقاب:ليه ما يبي ؟

جاسر:لا ابوي تكفى تعقد الأمور فوق ماهي معقده

عقاب:نزوجك بالسكوت ونقول انها زوجتك وجبتها معك من بعثتك واحنا عندنا علم

جاسر مسك راسه:ابوي تكفى

ثنيان:وليه مخلين الزواج حل دايم ؟

عقاب:لانه حل ، عشان ساري ما يعرف يختار انا اخترت له وعشان ثنيان وده يلعب النار انا اخترت له وبختار لجاسر دام عندي رجال بشوارب وما يعرفون يمشون امور حياتهم

لف ساري يناظر اخوانه ولف عقاب:ندور لك وحده ماهي راعية صيت لا هي ولا اهلها

جاسر ناظر ابوه وهز راسه عقاب يفكر:اطلعوا

وقف ساري ومشى يخرج وخلفه اخوانه ولف جاسر عليهم:وش هالحاله يارب ؟

ساري:اسكت ومش امورك دامه رضي يدخلك البيت اصلاً

جاسر:كله منك ياملقوف لو انك ساكت !

نهار:شدخلني رايي وعطيته

ثنيان:كيف الحين ما بتطلع السالفه بالله ؟

ساري:سهله يروح يخطب ويملك ويجيبها بدون زواج بدون شي من وين بيطلع الموضوع؟

ضحك ثنيان يعض شفته من تذكر ملاك وهز راسه بالنفي:والله ماتصير

جاسر:ياخي خلاص فضايح وش هالحاله ؟ كل شي نسويه مراقب ومحسوب

نهار:لانك ولد عقاب وتعرف من يكون عقاب

ثنيان:زواج بدون علم الناس تبطون تسوونه ، والله ليطلع الخبر قبل تنطبخ الطبخه

ساري:يا ابن الحلال انت ليه تحلف اقولك نكتم على الموضوع بيننا

ثنيان:اي على خير سوها ياساري خل نشوف كيف تكتم على مواضيعك

سكت ساري وتأفف جاسر:اصلاً من اللي بيزوجني اياها وينشبني فيها الحين

نزل انظاره ثنيان لجواله واخذه يقرأ الرساله وبعد عن اخوانه

طلال:رقم تلفون السجن المركزي

عقد حاجبينه ثنيان وقفل جواله وهمس:من ذا ؟

حك جبينه ونزل راسه من جاته رساله ثانيه من طلال

طلال:صك الطلاق عندي تعال نحلها

تنهد يرد:جايك

قفل جواله وخرج من البيت وركب سيارته يخرج

ناظرت سيارته من غرفتها وقفلت الستاير ومشت لجوالها

قفلت باب الغرفه وهي تتصل وجلست من ردت عليها:مافهمت حركتك

شادن:أغطي عليك

ملاك:غريب ! مو طلعتي يدك من الموضوع ؟ وصرتي مطهره من السرقات والشرّ ؟

شادن:بقابلك ونتكلم

ملاك:ما بيننا كلام

شادن:ملاك !

ملاك:عيوني لا تشوفك

شادن:زوجك جاني قبل زواجكم بأسبوع

ملاك سكتت وكملت شادن:دق باب بيتنا وكويس ماكان احد موجود غيري ، عرفت انه ولد العميد وسأل عن ابوي يبي يشوفه ويقابله

ملاك همست:وش قلتي ؟

شادن:قلت انه برا السعوديه وباع بيته هذا ويتعالج مع زوجته بالخارج

ملاك غمضت عيونها بتعب وكملت شادن:لو يصيدون ابوي بتنفضحين

ملاك:ما بيصير شي

شادن:انتي دخلتي نفسك بين المصايب وصعبتيها كنتي دايم تقدرين تخرجين منها بسهوله والحين تزوجتي وصرتي بينهم كيف ما تنفضحين ؟

ملاك:ما يهمك الموضوع انتي اصلاً لذلك ريحينا ياشادن

شادن هزت راسها:صح ما يهمني لو ما علمتك وغطيت على ابوي اللي ما حضر زواجك كان الحين تبررين بألف تبرير

ملاك:مو وقته بقفل انا

سكتت شادن وقفلت جوالها ملاك ورمته على السرير وناظرت الورد اللي قدام عيونها

ثنيان كان بيوصل لعمها وبيسأل عليه وبيسأل عن عياله ولو عرف ان ولده مسجون بيفهم كل شي كل شي بيفهمه

تأففت تمسك راسها وتفكر وبللت شفايفها توقف تمشي بالغرفه

هي لازم تضغط عليه وتدخل له من مدخل جواهر وتشغله بمشاكله هذي لدرجة ما يقدر يتفرغ يبحث وراها

'

دخل ثنيان عند طلال وابتسم:والله جمايلك واجد

طلال ابتسم:اقعد بس اخدمك بعيوني

ثنيان:ما أنحرم

طلال مد له صك الطلاق واخذه ثنيان كان الصك بتوقيع من الطرفين لان جواهر كان لها بنود قبل زواجها منها مؤخر

هز راسه ثنيان ولف لطلال:وموضوع السجن ماعرفت توصل لشي ؟

طلال:لا التلفون لكل السجناء

ثنيان:سجين ويتصل عليها ليلة زواجها ليه ؟

طلال:يمكن فعلاً قضايا وماسكتها وأستجد شي

ثنيان:ياطلال بالله ريحنا ، هذي كل شي يطلع من تحتها مصيبه وكارثه اي قضايا

طلال:هذا اللي خمنته

ثنيان سكت ولف للورقه:بحل أموري وأكلمك

طلال هز راسه وخرج ثنيان ودق على جواهر لكن ماردت عليه

ركب سيارته وتنهد يصور الصك ويرسله لها

يعرف كيف يخليها ترد ويحل موضوعه وخلاص

شافت الرساله وانتظر ردها لكن ماردت

عقدت حاجبينها بصدمه جواهر تشوف الصك وجلست على السرير تفكر في حجم المصيبه اللي طاحت فيها ، بتصير مطلقه وبدون علم من اهلها ؟ وش بتسوي ؟ هي يوم تزوجت ثنيان كانت واثقه انها بتجلس سنه سنتين وبيعلن زواجهم ويرضون بالأمر الواقع العايلتين

بس ثنيان الحين تزوج وبيتركها بمفرق الطريق

رجفت ووقفت تتصل عليه ورد بهدوء ثنيان:رديتي الحين ؟

جواهر:انت كذا بتخسرني

ثنيان:وش المفروض يصير ياجواهر ؟ المفروض يوصل الظرف لأبوي بليلة زواجي ؟ كذا ننتهي ياجواهر ؟

جواهر مسكت راسها بصدمه:وتطلق ؟

ثنيان:انتي هددتيني ووصلت فيك ترسلين لي صور تمسكيني من اليد اللي تعورني وكنتي بتقضحيني عند ابوي وتخربين علاقتي فيه

جواهر:مستحيل اسمح لك تدمر حياتي وتخرج منها بدون شي مستحيل

ثنيان:بتقضحينا الاثنين يعني ؟

جواهر:توصل

ثنيان تنهد وبلل شفايفه:بنتقابل ونتكلم ما ينفع كذا

جواهر:تحلم ياولد عقاب تحلم ، والله من اليوم لأصير كابوسك والله ياثنيان

ثنيان:بس بتخربين حياتك بس بتفضحينا

جواهر:وأفضحك ولا اخليك تخرج من حياتي بسهوله كذا ، عشان تعرف انت مع مين كنت

ثنيان غمض عيونه من قفلت الخط وتأفف يرمي جواله ولف يناظر الملف اللي بسيارته

وصل البيت وهو يفكر ونزل ومعه صك الطلاق ودخل البيت

طلع للغرفه ودخل وناظرها عند الدولاب ولفت تناظره:لو امك معطيتني فلوس الهدايا أفيد

قفل الباب وتقدم:انتي بس كذا ؟ طاري فلوس وفلوس والفلوس خلتك تصيرين إنسان محد يطيقه

ملاك ناظرت ملابسها:ماولدت عشان يحبوني الناس

ثنيان:اذا تبين تدخلين بالشرّ وتكونين هالقد ظالمه لا تدخلين بحياتك ناس وتدمرينهم

ملاك لفت عليه وقفلت الدولاب:ترا ذبحتني وانت ماخذ دور الضحيه واني دعست عليك وانت مظلوم ، انت طلعت بطريقي وحذرتك وقلت لا تتدخل وش فيها لو طنشتني ؟ كان اخذت من ابوك مليون ومعد شفت وجهي

ثنيان تقدم يناظر بجاحتها وعقد حاجبينه:انتي صاحيه ؟ مريضه تسمعين اللي تقولينه ؟

ملاك:تحب ابوك واجد لدرجة تاخذ جواهر بنت بندر اليخت طول سنتين تصيدون سمك سوا

ضحكت بسخريه ومسك ذراعها بقوه ثنيان ورفع صوته:قسماً بالله الواحد يخرج عن صبره معك ، أهد فيك الحين وأفلق راسك بالعطر ذا عشان تعقلين وتفكيني من شرك ؟

دفعته ملاك:قلت لك تمد يدك اكسرها وانا عند كلمتي للحين

ثنيان:انتي لو تسكتين بس

ملاك:انت اللي تجيني كل شوي مسوي صوت ضميري مليانه شرّ ومليانه شرّ ذبحتنا تستشرف على راسي

ثنيان:أنظف منك وماخذ جواهر حلال ما ألعب فيها بالحرام

ضحكت ملاك من اعترف بزواجه:على أساس يفرق الحين جواهر وش مصيرها يا راعي الحلال ؟ بتعلن زواجك منها ؟ اتحدى

سكت ثنيان وكملت ملاك تناظره بحده:بتخليها تدفن نفسها بدون زواج عشان الفضايح وعشان محد يدري انها متزوجتك هذا اذا ما طلقتها وتخلصت منها عشاني مهددتك وممكن تنفضح بأي لحظه ، راعي حلال وكلك خير أجل

تقدمت تناظره:بس هي الغبيه يوم استأمنت نفسها وارتبطت فيك بدون شور أهلها وأرخصت نفسها وهي جواهر ويكفي تنطق اسمها وتعرف قيمتها ، لكن وش نقول عاد الغبي غبي

ثنيان:ليه ترخص نفسها ؟ من تزوجت هي ؟ تزوجتني انا وقدرتها وحبيتها ولا لعبت عليها

ملاك ضحكت:ياشيخ ريحنا قدرتها وين وانت تاخذها من بيت اهلها بنص الليول وتطلع معها يخت بنص البحر ساعتين وترجعها ، اي تقدير يا ابو تقدير

ثنيان تقدم بحده وشدها من ذراعها:ماني قليل واسويها واعلن زواجي منها تحسبين بسمح لك تهدديني وتمسكين علي شي ؟

ملاك ابتسمت:تخسى ماتسويها انت ولد ابوك ما تبعد عن ريحة فلوس ابوك ومنت رجال تاخذ البنت من يد ابوها وتعلن زواجك منها لكنك ذكر ولقيت لك من يشبع رغباتك بيخت بنص البحر

صفعها كف وجمد وجهها بصدمه ولفت عليه تناظره بحده وناظر عيونها ويحلف يمين انه يشوف نيران من عيونها

تنفس بغضب وهمس:الصبر تلف يابنت مساعد اعرفي حدك واعرفي من أنا

ملاك لفت عليه بغضب ورفعت صوتها:ابيك تعرف انت بالأول مين أنا

لفت تاخذ العطر من خلفها وصرخت:تمد يدك عليّ ؟

رمت العطر وانحنى عشان لا يجيه شي وكسرت الشباك اللي خلفه وطاح وتناثر القزاز ولف بصدمه يناظر الشباك اللي بالارض وتقدمت ملاك له ودفعته من صدره:احمد ربك ماكسرت راسك جرب تمد يدك من جديد

ناظرها ثنيان بصدمه وصرخ عليها:انتي مجنونه ؟

لف من انفتح الباب ولفت ملاك تناظر عقاب اللي دخل مستغرب الصوت ونوره خلفه يناظرون بصدمه

وضحكت ملاك:اوف حادث من أول يوم لي بالبيت

ناظروهم بصدمه عقاب ونوره وابتسم ثنيان ولف للشباك يناظره بالارض:حادث غير مقصود

عقاب تقدم وهمس:وش صاير ؟

ملاك لفت لثنيان اللي ابتسم وابتسمت له وناظرهم ثنيان وحك جبينه:جيت اجرب افتح الشباك وقوي ما انفتح لي وحاولت الا وطاح وانكسر شكل الزجاج دنيئ

نوره ناظرت الارض بصدمه وكملت ملاك:وانا من خوفي صرخت ورميت العطر اللي بيدي

ضحك ثنيان يناظر ابوه اللي يناظرهم:حادث غير مقصود ، بس ماعليك ابوي انا بتحمل اللي صار

عقاب ناظرهم وهمس:انتم صاحين؟

ملاك ابتسمت تناظرهم بدون تتكلم ونطق ثنيان:انكسر الشرّ مثل ما يقولون

نوره:اعوذ بالله شكلها عين والله من بعد زواجكم ما بقي احد ما تكلم اعوذ بالله من عيون الناس ، بنادي مريم تلم القزاز لا تمشون عليه ياعيوني بس

ملاك:ابشري ، انتبه لا تمشي عليه يعورك

لف ثنيان يناظرها وابتسمت ملاك له وخرج عقاب وهز راسه بعدم تصديق للوضع

وقفلت الباب نوره ولف ثنيان على ملاك وتلاشت ابتساماتهم يناظرون بعض

دخلت مريم تنظف ونطق ثنيان:امسكي جنونك ولا تدخلينا بسوالف مع اهلي

ناظرت مريم ولفت عليه:اسكت الحين مو لوحدنا

ثنيان:بتسكتيني ؟ بعد كل ذا تقولين اسكت

ناظرته بحده:خلاص قلت مو لحالنا استوعب

لفت مريم عليهم ولف ثنيان على مريم ورجع ناظر ملاك:واثق فيها ما تطلع كلام

ضحكت ملاك وجلست على السرير:انت تكفى فكنا من ثقتك هذي لانك كل ما وثقت بشي طلع خرطي

ثنيان جلس جنبها واخذ نفس من الجنون اللي يحس فيه وهمس:دوري لنا حل يابنت الحلال الوضع لو زاد معك ما بيكون خير

خرجت مريم ولفت ملاك عليه:طلقني اذا مو متحمل

ضحك ثنيان وهز راسه:تبين والله الخمس ملايين لكن والله ما تشمينها

ملاك:اجل تحملني

صد ثنيان عنها ولفت ملاك تشوف الاوراق اللي دخل فيها جنبها ولف ثنيان يشوفها تناظر بالاوراق واخذها من عندها وضحكت من لمحها

ثنيان:انتي بكل وقت ؟ ما توفرين شي ؟

ملاك:قلت يمكن الاقي شي جديد يجيب لي مليون

ثنيان ناظرها بحده وابتسمت ملاك وخرج ثنيان من الغرفه

لفت ملاك تناظر الشباك المكسور ورجعت تلف تناظر الفراغ

-

كان يسوق سيارته وعاقد حجاجه ولف من دق جواله وناظره اسمها ووقف على جنب:هلا

جواهر:امي تبي تشوفك

ثنيان:ليه ؟

جواهر:بنتفاوض ياولد العميد

ضحك بسخريه ثنيان:وانتي صرتي تناديني كذا ؟

جواهر:عبالك الحياه تنشرى بفلوسك دايم ؟

ثنيان:انتي دمرتي كل شي بيدك

جواهر:صح كل اللي حوالينك غلطانين انت الشخص الوحيد الصح ياثنيان

ثنيان:وش تبي امك ؟

جواهر:ابوي مسافر وراشد معاه تعال لنا البيت نتكلم

ثنيان سكت وتنهد

مشى لين وصل لبيتهم ودخل بسيارته ونزل

دخل ووقفت ام راشد من دخل ثنيان واخذ نفس يتقدم:سلام عليكم

ام راشد:اي سلام ؟

تنهد ثنيان وجلست جواهر وهي تناظرهم ولف ثنيان:انا ما لعبت ببنتك تزوجتها وماهو غلط والحين بننفصل وبيجيها حقها وأكثر لو تبي

ام راشد:أرخصتها عن اي تقدير تتكلم ياولد عقاب ؟

ثنيان:انا طلبتها وهي وافقت وسنتين استمرينا سوا الحين صرت مرخصها ؟

ام راشد:بنتي وش مصيرها اذا تطلقت ياولد عقاب ؟ بتقدر تتزوج بعدك ؟

ثنيان مارد ولف يناظر جواهر:تتزوجين ؟

جواهر:بقعد انتظرك وانت متزوج ومستقر ؟

ثنيان لف لأم جواهر:وش يرضيكم طيب ؟

ام راشد:تعلن زواجكم وبعدها تطلق بالعلن

ثنيان ناظرها بصدمه:صاحيه انتي ؟

ام راشد:بنتي ما تتطلق بالسكات نفس ماتزوجت

ثنيان:بنتك ابوها بيذبحها لو عرف

ام راشد:لا اطلع من الموضوع انت اعرف احل مشاكل بيتي

ثنيان لف لجواهر:وش قاعده تسوين انتي ؟

جواهر:حقي

ثنيان لف لام راشد:مستحيل

ام راشد:طيب انا يصير ابلغ ابوك ماهي صعبه

ثنيان مسح وجهه بتوتر وتقدم يجلس وناظرهم:اطلبوا اللي تبون غير ان الزواج يصير علن

جواهر:بتشتريني بالفلوس ؟ ليش تحسبني زوجتك ملاك ؟

ام راشد:ومو بس هذا بيوصل لابوك بنقول لابوك ان زوجتك المصون هددتنا واخذت منا مليونين

ثنيان لف لجواهر يناظرها وكملت ام راشد:وتصير فضيحتك انت وزوجتك على لسان كل الناس

ثنيان:بس بتعقدون الأمور

ام راشد:ماعليك أنا أفك أموري بنفسي انت لملم حياتك

ثنيان هز رجله بتوتر يناظرهم وتكتفت جواهر:اذا زوجتك تحب الفضايح بنلعب معها بنفس اللعبه

ام راشد:هذي ضريبة انك تحب جواهر بنت بندر ياولد عقاب

ناظرهم ثنيان وهو يتنفس من غضبه وتوتره ووقف يخرج من البيت

ركب سيارته بعصبيه من تغير جواهر ووضعها ومن الضغط اللي يحسه وحرك للبيت ووصل يوقف وينزل

دخل وطلع وناظر امه اللي نازله:امي ثنيان شفيك ؟

ثنيان:ولاشي

نوره:زين شفتك ناد ملاك وانزلوا تعشوا

ثنيان هز راسه ومشى للغرفه ودخل وقف عند الباب يشوف الشباك المكسور

ولفت ملاك تشوفه واقف وباله مو معه وعاقد حجاجه يناظر الشباك

لفت تشوف الشباك ورجعت ناظرته وهمست:اللهم دايم ، لانك كل مافتحت هالباب تدخل بحال غير

لف عليها ثنيان وقفل الباب وتقدم لها:بننزل نتعشى

ملاك هزت راسها:عندي خبر

ثنيان سكت يناظرها ولفت عليه ملاك من وضعه:المفروض اشيل هم من سكوتك هذا ؟ لان متعوده نكسّر سوا

ثنيان جلس على السرير وناظرها:بننفضح

عقدت حاجبينها:مين بينفضح ؟

ثنيان:انا وانتي

ملاك رفعت حاجبينها بذهول:وش فضيحته ؟ انت واعرف فضايحك بس انا وش فضيحتي ؟

ثنيان تنهد:ام جواهر بتفضحنا

ملاك جلست قدامه:مافهمت

ثنيان:تبيني اعلن زواجي من جواهر والا بتبلغ ابوي بالزواج وبتبلغه انك اخذتي مليونين منهم بسبب تهديدك لهم

ملاك ضحكت:والله حاله ، شوف من يتكلم ويهدد ؟ صاحيه ذي ؟

ثنيان:تضحكين ؟ اقولك بتفضحنا تضحكين ؟

ملاك:اقص يدي من مكانها لو تقدر جواهر تقول شي وتفضح نفسها ابوها يذبحها ويذبح امها معها ، صاحي انت ؟

ثنيان:انتي ماشفتيهم ترا بايعينها

ملاك:وانا بايعتها

لفت ترتب المكياج قدامها وكملت:خل اشوف وش بيسوون

ثنيان:نخاطر ؟

ملاك لفت عليه:نخاطر ؟ صرنا انا وانت الحين ؟صايرين فريق سوا يعني ؟

ثنيان تنرفز من برودها:انا ماعلي فيك باللعنه والمفروض ما اعلمك واخليهم يفضحونك بعد

ملاك ابتسمت:المفروض بس شوفك قدامي تعلمني السالفه كأنك تستنجد فيني ، ودك أخلصك ياولد العميد ؟

ثنيان وقف وناظرها بحده:تخسين ما استنجد فيك اعرف احلّ اموري لوحدي

ملاك:اي طيب حلها اجل انت حلّال الأمور وتفك العقد مثل فكّ ازرار ثوبك

ثنيان:هذا اللي بيصير

وقفت ملاك تلبس عبايتها وتتحجب قدام عيون ثنيان ولفت عليه:تفضل

مشى قبلها ومشت خلفه تنزل لهم تحت وابتسمت تجلس على الطاوله وثنيان جنبها

عقاب:ملاك

لفت عليه ونطق عقاب:بعد العشاء بنتكلم بمكتبي

لف ثنيان عليها ورجع يناظر عقاب:عشان ايش ؟

عقاب:موضوع جاسر

جاسر التفت وعقد حاجبينه ثنيان:وملاك شدخلها ؟

عقاب رجع ظهره لورا يناظر ولده ورفع حاجبه

وابتسمت ملاك اللي بدت تاكل:يخاف عليّ

ضحكت نوره:يبي المشوره ابوك بس مافي شي يخوف

ثنيان ناظر ملاك اللي تاكل ومبتسمه ولف يكمل اكله

جاسر:بس ابوي ترا في احد يعرف اني رجعت بدون زوجتي غيرنا

رفع عيونه عقاب وعقد حجاجه:من ؟

جاسر:مدري في شخص هددني وهدد امي بصور

رجع ظهره لورا ثنيان يشد على كاسته وسكتت ملاك تاكل بهدوء

عقاب عقد حاجبينه بصدمه:متى هذا الكلام ؟

نوره بلعت ريقها:وقتك ياجاسر ؟

لفت نوره تناظر جنى اللي تناظرهم بصدمه ولفت لعقاب:بنتكلم بعد العشاء بس الحين خلنا ناكل

عقاب ناظرها بحده:المليونين اخذتيها عشان احد هددك ؟

لفت أصايل على امها اللي توترت:عقاب خلنا ناكل

عقاب ناظرهم بحده:انا ليه ما يجيني خبر ؟ ليه محد يقولي ؟ واحد كلب ابن ست وستين كلب يهددكم وتدفعون له مليونين ؟ مليونين يانوره ؟

ناظرتهم ملاك وهي تاكل بهدوء ولف ثنيان عليها يناظرها وهمس:عزّ الله كلب

لفت ملاك وابتسمت وهي تاكل

سكتت نوره تناظر الاكل ووقف عقاب يرمي ملعقته:انا ليه للحين عندكم ؟ المفروض أهج واخليكم مالي لزوم بالبيت الكل يتصرف من كيفه بدون ما يعطيني خبر

أصايل:ابوي !

مشى تاركهم وتنهد جاسر من لفت عليه امه تناظره بحده

ووقفوا الاكل من توتر الوضع الا ملاك اللي لازالت تاكل بهدوء

مسحت فمها بهدوء تشرب من عصيرها وتحس بنظرات ثنيان

وقفت نوره تلحق عقاب وتنفس بغضب ثنيان من الوضع ونطق نهار:كان أجلتها انت بعد

جاسر:شدراني قلت امي اكيد عطته خبر من قبل

ساري:خلاص هدوها

ناظروه وفهموا انه يقصد زوجته وابتسم ثنيان:والله ياساري الهدوء كله يميني

لفوا يناظرون ملاك وابتسمت ملاك ولفت عليه:المفروض اعصب مع ابوك يعني ؟ انا شدخلني بمشاكلكم ؟

ثنيان هز راسه:صح مالك دخل

رفعت كتفها ملاك تشرب من عصيرها وناظرته أصايل:شدعوه ثنيان منجد مالها شغل خلها تاكل

ثنيان وقف وخرج من عندهم ووقفوا العيال يتركون الطاوله

ووقفت أصايل تلحقهم وابتسمت جنى تناظر ملاك:هذا اللي اعيشه انا لحالي من أول

ملاك:ليه تتحسسين ؟ انتي مو بنتهم ولا بتصيرين

جنى:عادي عندك ؟ يعاملونك كأنك دخيله عليهم وتتجسسين على مشاكلهم ؟

ملاك رجعت تاكل:هذا الصدق انا واياك دخلاء ونتجسس على مشاكلهم

ناظرتها جنى بصدمه وكملت اكلها ملاك بهدوء

'

جلس على مكتبه عقاب:وش يعني احد يجي يهددنا بمشاكلنا ونقوم نقوله سمعاً وطاعه ونعطيه مليونين ؟

ناظرهم ثنيان وسكتت نوره تصد

وكمل عقاب يضرب المكتب:انا أتهدد ببيتي ويطلع مني مليونين لناس تهددني ؟

نوره ناظرته:وش كنت تبغاني اسوي ياعقاب ؟ بسكتهم باللي يبونه وهذا هم سكتوا

عقاب ناظرها بحده:يتجرأ احد يهدد احد من عايلتي ؟ تحولين له فلوس ولا كأن عقاب زوجك ؟

جاسر ناظر امه اللي صدت

وكمل عقاب:اي احد يطيح بمشكله بمصيبه بأي كارثه يجي يعلمني ونحلها لا يتصرف من راسه

لف ساري على ثنيان وبلعت ريقها أصايل تشد على جوالها

هز رجله جاسر بتوتر واخذ نفس عقاب وناظر ثنيان:ناد ملاك

ثنيان ناظره بصدمه:شدخل ملاك ؟

عقاب:انت شفيك ؟ تعال اقعد محلي احسن !

ثنيان:ابوي ملاك مالها شغل بمشاكلنا طلعها منها

عقاب:ما بتناديها ؟

سكت ثنيان يناظره ولفت نوره على ثنيان تأشر له وتأفف وخرج

مشى وناظرها تحلي من صحن الكنافه وجالسه مع جنى ولفت عليه من تقدم

ثنيان:ابوي يبيك

ملاك ابتسمت:طيب ليش معصب ؟

ثنيان ناظرها بحده وحطت صحن الحلا ولفت لجنى:عن اذنك

وقفت ومشت مع ثنيان ودخلت المكتب تناظرهم متجمعين وابتسمت:على خير ان شاء الله

عقاب:تعالي ملاك

تقدمت وجلست وناظرت عقاب اللي اخذ نفس:في احد هدد نوره وجاسر قبل فتره وحولوا له فلوس وابيك تطلعينه من تحت الارض

لف ثنيان يمسك راسه من اللي قاعد يصير وابتسمت ملاك لعقاب:اكيد اطلعه لك من تحت الارض

لف يناظرها بصدمه ثنيان ورجعت ظهرها لورا:واللي صار المفروض ما يصير مره ثانيه وش يعني يجي احد غريب يهددكم وتعطونه فلوس ؟

لفت نوره:ملاك لا تصيرين انتي وعقاب واحد ؟ خلاص صارت ودفعة بلاء

ملاك:واذا رجعوا يهددون مره ثانيه

ثنيان:يخسون

ابتسمت ملاك له وكمل ثنيان يناظرها:محد يقدر يهددنا من جديد وياخذ منا ريال واحد

ملاك:والله يمكن ماتدري

ثنيان:أدفنه حيّ

ملاك:قدع بس هدّها

ناظرها ثنيان وابتسمت له ملاك ولف عقاب على عياله:كلكم والكلام للجميع لا تنعاد هالحركه ولا تتصرفون من كيفكم تسمعون ؟

لف على نهار:تسمع ؟

نهار:اسمع والله

عقاب:خذي التحويل ملاك وشوفي لنا من يكون وبنرفع عليه قضيه اول ما نجيبه

هزت راسها ملاك:سمّ

وقفت ملاك ودق تحيّه نهار:ثاني قضيه تمسكينها تخصنا

ملاك ضحكت:صرت منكم خلاص

ضحك نهار ومشت ملاك تخرج ولف نهار على ثنيان اللي عاقد حجاجه بحده ومعصب:هدها

لف ثنيان عليه بغضب وخرج ولحق ملاك وطلع مع الدرج ولفت عليه ووقفت ووقف ثنيان قدامها:تستهبلين انتي ؟

ملاك:اقولك خطر ببالي فكره دام جواهر ماودها تخليك وتفكك من شرّها ، افكر أدبسها بقضية التهديد واحطها براسها ونفتك منها مره وحده

ثنيان ناظرها بصدمه:انتي ما تخافين من شي ؟ تسوين كل شي غلط وبدون تفكير ؟

ملاك:ادري بتندمر حياة جواهر بس ياشيخ نفتك منها شتبي فيها

ثنيان مسك ذراعها:امشي

مشت معاه ودخل الغرفه ودخلت خلفه ولف عليها:كيف تقولين لابوي انا بحلها ؟ وش بتسوين ؟ ناويه مصيبه جديده ؟

ملاك:خواف تراك !

ثنيان مسك راسه:ياخي بنجن انا هنا بنجن جاوبي لا تستفزيني

ملاك:عادي قلت لك نرميها على ظهر احد ولو تشاورني نخليها جواهر

ثنيان ناظرها بذهول تتكلم بهدوء وجلست ملاك وفصخت حجابها:بتأذيك ترا ما بتخليك البنت

ثنيان:مالك شغل فيني تفهمين؟

ملاك رفعت عيونها له:حذرتك من قبل وقلت لك انتبه منها بس شنسوي كنت طايح بالغرام

ثنيان:مشاكلي انا بحلها لوحدي ومشكلة اهلي طلعي نفسك منها وقفلي على الموضوع تفهمين ؟ لا تاخذين دور بنتكم اللي تساعدكم ومعكم وشايله مصايبكم وانتي اساس المصايب اصلاً

ملاك:لو ما اخذت القضيه بيعطيها غيري وغيري يمكن يكشفني ، ترضى انكشف ياولد العميد ؟

ثنيان ناظرها تنتظر اجابه وضحكت:بيطق فيك عرق بجبينك تدري ؟

ثنيان صد واخذ نفس واخذت جوالها ملاك ولف ثنيان:لا تتصرفين من راسك تسمعين ؟

ملاك:توكل بس

خرج ثنيان وناظرت الرساله ملاك وعقدت حاجبينها تقرأ محتواها : بترجعين المليونين وفوقهم ثنيان وبتتركين كل شي والا بيوصل كل شي للعميد وانتي تعرفين العميد عاد

رفعت حاجبينها ملاك وضحكت من استوعبت انها جواهر وقفلت جوالها:والله حاله ، انا بعد ما كانوا يهددوني شيوخ بتجي تهددني وحده غبيه نفس جواهر

رجعت تضحك ولفت للمرايه واخذت نفس وهمست:انا الحين مشغوله ياجواهر وشغلي اهم منك ومن حبيبك

ظلت تفكر وهي هاديه ومشغوله بأفكارها

-

ضحكت أصايل تأشر له ودخل نهار وهو شايل كيكه وشغلت أغنيه أصايل وتقدمت ترقص عند جون اللي غيروا إسمه لحمد وضحك نهار يرقص مع أصايل بالكيكه وناظرهم حمد وابتسم من الكيكه والشموع ونطت سارا تصفق بحماس

خرج جاسر ومن ناظرهم و ضحك:حفله عشان اسمه الجديد ؟

أصايل تقدمت وشالت حمد وهي ترقصه على الأغنيه

نهار:العب ياوحش العب ياحمداني

ضحك جاسر واخذ حمد وحطه على طاولة البلياردو ورقص حمد بحماس مع الاغنيه

أصايل:بنادي امي وابوي

جاسر:لا تكفين

طنشته وركضت لفوق ولف نهار لحمد:اجحدها بعدين قل عمي نهار ما احتفل فيني

جاسر ابتسم:ماقصرت نهار

نهار ابتسم:هذا الشيخ حمد

دخل عقاب على كلمة نهار وناظر حمد اللي يرقص على طاولة البلياردو وسارا جنبه

ولف جاسر يناظر ابوه ولانت ملامحه بربكه

ودخلت نوره وابتسمت:وه يابعد عيني وعين سميك ياحبيبي

تقدمت تبوس حمد وابتسمت أصايل تحضن ذراع عقاب:نسوي له حفله بمناسبة الاسم الجديد

نهار:خلاص الحين حفيد العميد عقاب رسمي

جاسر ناظر ابوه اللي يناظر الصغار ودخلت جنى مع ساري:سمعنا اصوات احتفال مو معزومين ؟

أصايل:تعالوا تعالوا

تقدم ساري وابتسم وهو يقرأ اللي على الكيكه:حمداني

ضحك نهار:مدري سميناه على جدي والا على حمدان السواق

ضحكت أصايل ولفت نوره بحده على نهار اللي عض شفته يكتم ضحكته

ساري:حمد

مارد عليه وهو يرقص وضحك جاسر:رد عليه ما انت جون الحين

عقاب:ما يعرف عربي كيف يرد

نوره:يوه ياعقاب اكيد ما يعرف طيب بس شوي شوي بيتعلم منا ومن عمامه

ابتسم جاسر يمسح على راس حمد وتقدمت أصايل لسارا:وسارا هديتها قريب نجيبها ان شاء الله

عقاب تقدم لحمد وابتسم له حمد يرقص قدامه وماقدر ما يضحك عقاب من حركاته وابتسم براحه جاسر

ولف ساري على نهار وضحك

أصايل:شيله ابوي بصوركم مع بعض

دخل ثنيان وعقد حاجبينه من شافهم متجمعين عند طاولة البلياردو وتقدم من شاف عقاب يشيل حمد بحضنه وابتسمت نوره تمسك ذراع عقاب

ووقفت أصايل تصورهم على صوت الأغاني وابتسم ثنيان يحط كفه بجيبه وهو يناظرهم ولف من انتبه للي واقفه بعيد تناظرهم

ورفعت عيونها ملاك عليه من انتبه لها ورجعت تناظر المشهد اللي قدام عيونها وصوت الفرح اللي ماتعودته ولا عاشته

ورجعت للغرفه وقفلت الباب وجلست على السرير تناظر الفراغ ، قادرين يتجمعون سوا ويضحكون رغم مشاكل كل شخص بينهم ، يساندون بعضهم ويرفعون اللي يطيح منهم ويسامحون ويعفون ، لأول مره تفهم مفهوم العائله وتشوفه قدام عيونها

دخل ثنيان ومالفت عليه وابتسم من شاف وضعها وقفل الباب:كل مادخلت عليك وانتي بحال غير اللي تركتك عليه ، بس تصدقين هذا أحلى حال اشوفك فيه

لفت عليه ملاك تناظره وابتسم ثنيان يتقدم لها:افهم هذا الحال

رفعت عيونها تناظره وهي جالسه وكمل ثنيان:كذا يكون شكل اللي فاقد عائله ، منبوذ يحس كل شي مثالي كذبه وتمثيليه

لانت ملامح ملاك وكمل ثنيان بهدوء وهو يناظرها:العائله السبب الاول اللي يخلي الإنسان صالح ونظيف وكله خير

هز راسه ثنيان:وانا متأكد لو ابوك وامك عايشين ما كنتي بتكونين الا ملاك

شدت على كفوفها اللي ماسكه مفرش السرير وكمل ثنيان:لكن ضريبة اللي يعيش بدون مرشد وبدون دليل وبدون وجهه ، يضيع

ابتسمت ملاك له بهدوء وكمل ثنيان:لو أبوك عايش ما كان خلاك تطيحين هالطيحه ، طيحة وحلّ

نزلت راسها ملاك وهي مبتسمه وناظر وضعها ثنيان وهز راسه:بديت أفهمك ياملاك

رفعت عيونها له يناظر موج دموعها وابتسامتها وكمل بهدوء:ماعندك شي تخسرينه حتى نفسك ماهي غاليه عليك اذا الاغلى ماهو موجود وش بيصير ؟

ملاك هزت راسها بدموع عينها وهي مبتسمه:تدري لحقت على أبوي ؟ وعشت بحضن أمي ؟

سكت ثنيان يناظرها وكملت ملاك:١٥ سنه كان عمري يوم خسرتهم ، كبيره وأستوعب وش يعني فقد واعرف وصايا ابوي لي واني اصير احسن وحده واعرف وصايا امي واني اصير أفضل زوجه وأم

مارد عليها ثنيان ووقفت ملاك قدامه وابتسمت:وانك توقف قدامي تتفاخر انك تعيش معنى العائله وترمي اغلاطي على يُتمي ماهو خير يا ابو خير

ثنيان:يمكن يتحرك شي بضميرك

ملاك:ضميري حيّ ياولد العميد ودايم حيّ وانا ما عشت لليوم الا من ضميري

ثنيان عقد حاجبينه:عشان ايش ؟ عشان ايش كل هذا ياملاك ؟ انتي مستوعبه حجم الحرام اللي داخله فيه ؟ بيدينك ورجلينك وكل حيلك ؟ من اللي يستاهل كل هذا ؟ ولمن ؟

ملاك رفعت حاجبينها:عندك اسئله كثيره مالها جواب عندي

سكت ثنيان يناظر دموعها اللي حابستها وهمس:اتركيها

سكتت تناظر عيونه وكمل بنفس نبرة صوته:اتركي دموعك ابي اشوفك إنسان مره وحده

ملاك ابتسمت:انا شيطان ياولد العميد

تنهد من مقاومتها وقوتها وكبريائها وظل يناظر عيونها ولا هو فاهم شي من موج عيونها الا انها تشتعل أمامه والنيران تزيد وتحرقه من قربه منها

تركته محله ودخلت الحمام وظل يناظر محلها ثنيان وجلس بتعب هو دافن نفسه بين مشاكل وصوت عقله وافكاره ما يسكت

بين جواهر ومشاكلها وام جواهر ومن ملاك اللي تعصف بحياته عصف الرياح ، وبين اهله ومشاكلهم

تعب تعب من تفكيره ومن الدنيا اللي خذته وده يترك كل شي ويروح للبحر لكنه ما يقدر يترك شي وهذا الحال

-

" لا تنسون النجمه ⭐️ "

خرج من دوامه نهار بعد يوم متعب وركب سيارته واخذ جواله اللي يدق:هلا الفال الطيب

ابتسم منيف:ظهر الخير

نهار:والله الحين صار خير بعد ماخرجت من دوامي

منيف:بترجع تنام ؟

نهار:واضح ودك نخرج سوا

منيف ضحك:بجيك البيت اذا فاضي تكفى اذا بتنام قولي وأبطل

نهار:هاه طفشت بعد زواج ملاك ؟

منيف:والله خالي البيت

نهار:تعال اجل نلعب قيم فيفا ونشرب شاهي ونسولف

منيف:طيب مسافة الطريق

قفل من نهار وبلل شفايفه يطلع من جيبه علبة السلسال الجديد الأخضر وابتسم يحرك سيارته

وصل للبيت ودخل يوقف سيارته ويشوف نهار اللي وقف جنبه ونزل

ابتسم منيف:ببدلتك باقي ؟

نهار؛يوم كلمتني انا خارج من دوامي

منيف تقدم له ونطق نهار:ادخل الديوانيه وجايك

منيف:اذا ملاك في نادها لي

هز راسه نهار ودخل البيت ومشى منيف للديوانيه ودخل يناظر المكان الشرح والزجاج اللي يبين السيارات اللي بالمواقف والتلفزون الكبير والفرش الثقيل الغالي وجلس وهو يناظر المكان

دخل نهار بعد ماغير ملابسه:برا ملاك

منيف:مو مشكله

جلس نهار يشغل البلاستيشن وحك شاربه منيف:بأذيك بس بشوف كوتي

ضحك نهار يلف بصدمه:اسألك بالله هذي علومك ؟

ضحك منيف:والله مشتاق لها

نهار ابتسم:مدري صاحيه أصايل والا لا اصبر بقول للخدامه

طلع جواله يدق على مريم وهو يلعب بلاستيشن واخذ نفس منيف ينتظر ولف من دخلت الخدامه ومعها كوتي

ابتسم يمد كفوفه واخذها:تتذكريني ؟

نهار ناطر مريم:أصايل سليب ؟

هزت راسها مريم وخرجت تاركتهم وابتسم منيف يلعب مع كوتي ولف نهار يلعب بلاستيشن

ودخل يده بجيبه منيف وطلع السلسال الجديد ولبسه كوتي وابتسم

جلس يلعب معها وتلعب وهي بحضنه ولف من سمع صوت بحوش البيت

ووقف نهار وخرج وناظر أصايل اللي تمشي بين الزرع:كوتي

ضحك:صاحيه من نومك تدورينها ؟

أصايل ناظرته من بعيد:شفت كوتي ؟

نهار:عندي ضيف بالديوانيه

ترددت أصايل بربكه واشرت له ودخلت البيت

منيف:خذها خلاص

نهار:لا خلها عادي

منيف فك كوتي:خذها ياشيخ خلاص ودها

نهار اشر لكوتي ومشى لين البيت ودخل ولفت أصايل ونزلت عيونها:كوتي

اخذتها بحضنها وناظرها نهار:كانت عند منيف

رفعت عيونها أصايل بإستغراب:ليش ؟

نهار:طلب يشوفها يقول مشتاق لها عاد صارت صديقته الحين

ضحك نهار يمسح على راس كوتي ولف لأصايل اللي ساكته:بلعب معه انا بالديوانيه اذا جات ملاك وشفتيها قولي لها

هزت راسها وخرج نهار من البيت ونزلت عيونها أصايل وعقدت حاجبينها من لمست السلسال وناظرت السلسال اللي على كوتي بصدمه

ومشت تجلس بالصاله وفكت السلسال من كوتي وناظرته كان أخضر لونه وابتسمت بهدوء ولفت لكوتي تناظرها:عجبك ؟

مشت كوتي على الكنبه وابتسمت أصايل والسلسال بيدها:هو يعني مو السلسال

لفت تشوف كوتي اللي تتمشى بالصاله ونزلت عيونها للسلسال وبللت شفايفها تخفي ابتسامتها

وقفت توقف بالشباك تشوف سيارة ملاك تدخل البيت

دخلت بسيارتها ووقفت وهي تناظر سيارة منيف وطفت سيارتها ونزلت وخرج من الديوانيه وابتسمت ملاك وتقدمت ترفع يدينها وابتسم منيف يخرج لها وحضنها

غمضت عيونها ملاك وهي بحضنه:اهخ ردت روحي

منيف ابتسم وابتعد عنها:طولتي

ملاك:كان عندي شغل بالمحكمه ، مع مين جالس ؟

منيف:نهار

دخلت ملاك وهي ماسكه ذراع منيف ولف نهار وهو يلعب:اسمحي لي ارفض ادق تحيّه

ملاك:وين زوجي موج على قولته ؟

نهار لف:والله مدري مو بالبيت

هزت راسها ملاك ولفت لمنيف:بدخل اغير واجيك

منيف:لا لا رايح انا طولت اصلاً

نهار وقف:لا والله ماتروح نتغدا سوا

منيف:لا ياشيخ برجع والله

ملاك:طيب وكلمني اذا بغيت شي

هز راسه منيف وابتسم ومشى لسيارته ومشت ملاك لين ركب وناظرته:جالس لحالك ؟

ابتسم منيف:اي لانك خليتيني

ملاك ناظرته بضيق ومسك ذراعها منيف:تعالي

تقدمت له وهو بسيارته فاتح الباب وحضنته

منيف:بجيك كل يوم ماعليك

ابتسمت ملاك وهي تشد عليه:الله لا يحرمني منك

منيف ابتعد عنها وشغل سيارته وابتعدت وقفل الباب وخرج من البيت وتنهدت ملاك ومشت تدخل البيت

لفت من شافت أصايل واقفه بالشباك وكوتي بحضنها ولفت أصايل:اهلين

ابتسمت ملاك:تعرفين وين اخوك موج ؟

ضحكت أصايل:صار اسمه موج ؟ حلو

ملاك:هو يقول كذا

أصايل:مو بالبيت

هزت راسها ملاك ومشت لفوق دخلت الغرفه وفصخت عبايتها ومشت للحمام وجات بتقفل الباب شافته يدخل الغرفه

قفل الباب خلفه وهو يناظرها وحط شنطته بالارض

خرجت وناظرت الشنطه:وين كنت ؟

ثنيان فتح شنطته:مالك شغل

ابتسمت ملاك تناظر شعره المبلول:انت سمكه ؟ ما تبطي عن البحر ؟

رفع عيونه لها يناظرها بحده وفصخ تيشيرته ووقفت محلها تناظره ولفت بتدخل الحمام وتقدم:بدخل

ملاك صدت عنه:بعد ما اخلص

ثنيان تقدم ومسك الباب ولفت عليه ملاك بحده تناظره ولف يناظرها ثنيان من قريب وهو ماسك الباب عنها

وحست بالإختناق من قربه ومن عُرّي صدره وصدت عنه تتركه ولف يناظرها تمشي للغرفه ودخل الحمام

وقفت بالغرفه ولفت تناظر شنطته وفتشتها تناظر ملابسه ومنشفته وجلست على السرير

خرج من الحمام ومشت تدخل وتقدم ثنيان يلبس ورفع شعره عن جبينه وبخ عطر واخذ جواله ونزل تحت

ناظرته نوره:رجعت ؟

هز راسه وسحب الكرسي يجلس ولف عقاب:وين كنت ؟

ثنيان:بالبحر

نوره:يا ذا البحر يا أمي انت ما تقعد عنه ؟

ثنيان هز راسه بالنفي وناظره عقاب:وملاك معك ؟

هز راسه بالنفي ثنيان ورفع عيونه من نزلت ملاك تناظر عقاب ونوره:جينا بدري ؟

نوره:حياك اجلسي الحين يجون الباقين

جلست ملاك وحطت جوالها على الطاوله ونزل ساري وخلفه جنى وابتسمت جنى:ماشاء الله العرسان موجودين

ثنيان:وين بنروح ؟

جنى جلست وناظرتهم:هوني مون والا مو مخططين ؟

ابتسمت ملاك تشرب من عصيرها وتحس بحدة صوت ثنيان:لا

عقاب:ليه ؟

ثنيان لف عليه:عندي شغل ما اقدر اخذ اجازه

عقاب:اليوم انت بالبحر وين شغلك؟

ملاك حطت كاستها:والله حتى انا عندي قضايا ما تتأجل ما اقدر اتركها

نوره:يالله مو مشكله تعوضونها وقت ثاني وين بتروحون عن بعض

نزل نهار ومعه أصايل اللي شايله حمد تلعب معاه وسارا مع نهار وجاسر خلفهم

وجلسوا سوا على الطاوله وبدوا ياكلون بهدوء

نوره ناظرت جاسر اللي يحط أكل لسارا وتنهدت:الله يرزقك ياحبيبي ببنت الحلال

رفع عيونه جاسر وناظره عقاب:وش سويت بموضوعك ؟

جاسر:بحله ان شاء الله

عقاب:انتظر حلك

سكت جاسر ولف ياكل واخذت جوالها ملاك من وصلتها رساله واخذته تقرا وهي تاكل وعقدت حاجبينها:ما تخافين من التهديد يعني يابنت مساعد ؟ لا تخافين اصلاً فتره ويتفركش كل هذا الزواج المزيف

ابتسمت من عرفت انها جواهر ونفس الرقم ولفت لثنيان تمد له:شوف نكتة اليوم

لف ثنيان عليها واخذ الجوال وضحكت ملاك وعقد حاجبينه ثنيان يقرأ الرساله ولف على ملاك اللي ابتسمت ترجع تاكل

قفل الجوال وحطه على الطاوله واخذ نفس ورجع ظهره لورا:حمدلله

وقف ومشى للصاله وطلع جواله وفتحه ودخلت ملاك:وبعدين مع ذي ؟ ترا أذتني والمشكله ماعندها ماعند جدتي مسويه تهدد وقويه وتبي تفركش الزواج ، انت مو قلت بتحل مشاكلك بنفسك ؟ ما اشوفك حليت شي ياولد العميد

ثنيان:لا تتدخلين تفهمين ؟

ملتك تكتفت:والله انا ودي بس جواهر مصرّه تلعب معي وانا مالي خلق حركات حريم

ثنيان تنهد بغضب يصد عنها وناظرته ملاك:استنجد فيني صدقني راح ارمي عليها تهمه شكبرها نفتك منها وتفتك منها

لف ثنيان عليها بحده:انتي مجنونه ؟ ياخي اعقلي يرحم والديك مره وحده اعقلي وحلّي امورك بدون مصايب وظلم وافتراء

ملاك:اجل حلّها انت خل نشوف الصدق والخير وش بيسوي مع جواهر ، البنت لاصقه في ظهرك ماتبي توخر لين تفضحك وتخليك برا البيت ذا

صد ثنيان وهو عاقد حجاجه بغضب وناظرته ملاك:طيعني خلني احلها ونفتك

ثنيان لف:لا اطلعي منها

ملاك:انا ما بقعد اتحمل رسايلها وهي مسويه نفسها قويه انا اكسر خشمها هذا ، انا محد يتجرأ يهددني

ثنيان:بروح لها ولامها واتفاهم معهم بس لا تتدخلين انتي

ملاك:اي طيب بجي معاك

ثنيان:شتبين تجين ؟ شتبين ؟ فكيني ياخي خليني احلها انا

ملاك:بجي اشوف جواهر شعندها وش تبي تقول وامها بعد هذي اللي ما تعرف تتصرف بشوفهم

ثنيان:لا

ملاك هزت راسها:لا ؟

ثنيان مشى تاركها ومشت خلفه ملاك ودخل ثنيان يناظرهم:انا طالع

ملاك ابتسمت وتقدمت تمسك ذراعه:لا تحسبونا بالعشاء

ابتسمت نوره تناظرهم ولف ثنيان يناظرها بصدمه وبللت شفايفها ملاك تمثل الحياء:بنطلع اليخت سوا

جنى ضحكت ولفت نوره على عقاب:شفت شلون ؟ راح بدونها والحين معها

هز راسه عقاب ولف ثنيان ياخذ نفس يكتم غيضه وابتسمت أصايل:اخيراً بتشوفين يخت ثنيان يالله انبسطوا

ملاك:ان شاء الله

مشى ثنيان ومشت ملاك وهي ماسكه ذراعه:انتظرني بجيب شنطتي

وقف ومشت ملاك لفوق ووقف والتفت يغمض عيونه وهمس:صبرك يارب

اخذت شنطتها ملاك وناظرت شكلها بالمرايه ومشت تنزل خرجت وشافته يركب سيارته وفتحت الباب وركبت

شغل سيارته ولف عليها:ما ابي مشاكل تسمعين ؟

ملاك:مو مسويه مشاكل بس بتكلم بهدوء مع جواهر

ثنيان هز راسه وحرك سيارته وخرج من البيت:بنتفاهم معها ومع امها اذا ودهم بفلوس بنعطيهم

ابتسمت ملاك تصد وتناظر الطريق:لعد تشركني بفعل معك ياولد العميد ، انا لوحدي بتفاهم ما بنتفاهم

كمل ثنيان بهدوء:بنحلها بدون مشاكل

لفت وابتسمت وناظرها ثنيان:انا وانتي سوا

هزت راسها ملاك وكمل ثنيان:والكل بيرضى ونقفل على الموضوع هذا اللي مو راضي ينقفل

ملاك:محد قالك تزوج من ورا اهلك

ثنيان:بدينا ؟

ملاك لفت عليه وقفلت فمها باصابعها ولفت للطريق واخذ نفس ثنيان ودخل بيت بندر وهمس:بندر وولده راشد مو موجودين

ملاك اخذت شنطتها:شدراك ؟ تتواصل معها ؟

ناظرها ثنيان ورفعت حاجبها ملاك ونزل من السياره واستغفر

نزلت ملاك وهي تمشي معاه:لا ادري انك تتواصل معها ياولد العميد أهدّ فيك

وقف عند الباب ودق الجرس وناظرت ساعة يدها ملاك وهي تنتظر

فتحت الباب الخدامه وتقدمت ملاك:وين مدام جواهر

ناظرها ثنيان بصدمه ودخل خلفها ومشت ملاك وهي ترفع صوتها:ست جواهر اطلعي لي

ثنيان ناظرها:ملاك !

ملاك تقدمت تدخل البيت وابتسمت من دخلت الصاله وشافتهم يشربون شاهي ورفعت عيونها بصدمه جواهر وعقدت حاجبينها ام راشد

ملاك:مساء الخير على الجميع ، تعال مافي احد غريب

دخل ثنيان ووقفت ام راشد تناظرهم بذهول

وابتسمت ملاك:متكين وشاهي وسوالف وخطط وتهديد وش هالروقان ياجواهر ؟

جواهر:انتي مين سمح لك تدخلين البيت ؟

ملاك حطت شنطتها على الكنب ولفت للخدامه اللي واقفه:جيبي كاس مويه ابل فيها ريقي

ثنيان اخذ نفس:ملاك !

ملاك ناظرته واقف:تعال استريح بنتكلم بهدوء ونتفاهم

رفعت عيونها جواهر على ثنيان وتكتفت:ما بيننا كلام وتفاهم

ملاك:بيننا تهديد صح ؟

ابتسمت تكمل:احلى ونلعب في ملعبك ، من متى تعرفين تهددين انتي ؟

ام راشد:احترمي نفسك تراك في بيتي ودخلتي بدون استئذان ولا هو مرحب فيك انتي وزوجك

ملاك حطت رجل على رجل:انا ادخل المكان اللي ابيه ومحد يردني ، من بيردني انتي ؟

ام راشد:قومي اطلعي برا بيتي وبشتكيك وبرجع اللي اخذتيه مني ومن بنتي تسمعين ؟

ملاك اخذت كاس المويه من الخدامه وشربت وثنيان يناظرها مستصيب وندمان انها جات معه ولف لام راشد:انا جاي اتفاهم معكم بدون مشاكل ونحلها

ملاك رفعت كفها تأشر له يسكت ووقفت وحطت الكاس وناظرت ام راشد بحده:من انتي يوم تهدديني ؟

ناظرتها ام راشد وتقدمت لها ملاك:من انتي توقفين قدامي وتهدديني ، من بتشتكين ؟ هاه سمعيني

رفعت سبابتها ملاك:انا ملاك بنت مساعد تهدديني انتي وبنتك الرخيصه هذي ؟

جواهر:ابلعي لسانك وتكلمي زين عني

ملاك:انتي اسكتي بالله خليني اتكلم مع امك

لفت لام راشد:اناديك جده والا خاله والا وشو ؟ والله عيب حرمه بهالعمر المفروض تدورين حل لفضحية بنتك بدال ما تتورطين مع ملاك

مسك راسه ثنيان وهمس:ملاك

ملاك رفعت صوتها تصرخ بالبيت:انا ما اتهدد منك ولا من عشر من امثالك ولا اطول شارب بالدنيا يهددني ، لمي نفسك ولمي بنتك وخلي الموضوع هذا ينقفل وكلاً يروح بطريقه عشان والله ان طلع حسّ من عندكم لأهد هذا البيت فوق راسك انتي وبنتك

ملاك:حطي في بالك يا ام جواهر انا مافضحت احد ، وبنتك اللي ارخصت نفسها وتزوجت سنتين بدون رضاكم ،اذا بتلومين احد لومي بنتك تربيتك وين حطت راسكم

لفت لجواهر:حطيتي نتيجة حبك الفاشل الركيك وزواجكم الرخيص على ظهري ؟ والله هذي نتيجة اختيارك وتحمليها هذا حول قدامك تزوج ويبي ينهي الموضوع ، كان فكرتي قبل تختارين تكوني سرّ وخلسه

جواهر:لو مادخلتي بحياتنا ماكان صار كل هذا

ملاك:لو حبكم صادق ماكان فرقتكم

ام راشد:وبتنفضحين على اللي سويتيه فينا انتي وزوجك

ملاك:زوجي العزيز عايف يا ام جواهر والرجال ان عاف عاف ، واسمعي مني زين وافهمي وش اقوله من فمي انا ما اتهدد ولا احد يقدر يمسح خطاويي

تقدمت وكملت بهدوء:والله لأدخل ولدك بجريمه ما سواها واخليه يخيس ٣٠ سنه من حياته بالسجن وأخلي بنتك تنتحر بسبب الجنون اللي بياكل مخها وأزوج العميد بندر وحده اصغر منك تخليك خدامه هنا بهذا البيت ، والله لأعيشك تفكك أسري محد عاشه بهالدنيا

حطت سبابتها على راس ام راشد:انك تسمعين في ملاك خير من انك تشوفينها

ولفت لجواهر:وانتي اسمعيني زين

تقدمت لجواهر وناظرهم ثنيان بصدمه من اشكالهم وكيف سكتوا يسمعونها ولا سمحت لهم يتكلمون

ملاك:تكلمت معك كثير وانا ما احب الكلام الكثير وهذي اعتبريها الكلمتين الاخيره اللي بتسمعينها مني ، المره الجايه بسوي بدون كلام

جواهر:جيتي وقلبتي حياتي فوق تحت وما تبيني اخذ حقي ؟ دخلتي بيني وبين ثنيان واحنا سنتين نحب بعض ماقدر احد يفرقنا

ملاك:اعتبرين الموت اللي بيفرقكم وان كنتي تقولين له ما يفرقك عني الا الموت ! فأنا الموت

لف ثنيان عليها ونطق بهدوء:جواهر لا تحطين اللوم عليّ ، انا يوم جيت وقلت لك ان ابوي رفض قلتي خذني معك لآخر الدنيا لكن لا تخليني

لفت ملاك تناظره وكمل ثنيان:وقبل اقبل اننا نتزوج بالسرّ قلت لك جواهر بننحرق قلتي لي بتحمل كل شي واعيش السرّ معك احلى من العلن ، الحين يوم تغير كل شي صرتي تبين الفضايح؟

جواهر:هذا قبل ما تدخل بيننا وحده

ثنيان:انتي ما شبّ نيرانك الا غيرتك هذي هي اللي بتودينا للجحيم

ملاك:خلصنا عتاب الحبايب وامك حرمه كبيره تبي تاخذ دواها وتنام حزة عشاء

تكتفت جواهر تناظرها ونطقت ملاك:خلي الطلاق يتمّ وروحي استري على نفسك بنفسك ، دامك سويتي كل شي بدون شور احد خارجي نفسك بدون شور احد وفكينا من غيرتك التافهه وكأنك مراهقه ودوري نصيبك ، الطلاق الحين بيتمّ وزواجي انا ماراح يخرب بيستمر

جواهر:وانا المفروض مني سمعاً وطاعه ؟

ملاك:غصباً عليك بعد

جواهر ناظرت ملاك بحده تتحداها ولفت ملاك لثنيان:طلق

ثنيان رفع عيونه لجواهر اللي لفت عليه ومشت ملاك تجلس على الكنبه:طلق طلق لا تخاف

تقدم ثنيان:ما بغينا نحلها كذا ولا كان ودي نوصل لهنا ياجواهر لكنك لعبتي وانا ما احب اللعب

جواهر ناظرت ثنيان اللي يتكلم وكمل ثنيان:الله يستر عليك ولهنا وانتهينا

جواهر:من زمان انتهينا ياولد العميد لكن ما انتهت قصتنا

ثنيان:تنتهي والليله

ناظرتهم ملاك وهم واقفين قدامها وتقدم ثنيان يناظر جواهر:حقوقك بتجيك

ناظرتهم ام راشد:داخلين بيتي وبـ

ملاك:انتي انكتمي ولا تسمعيني حسّك الواحد وده يحترمك عشان عمرك لكن مافيك ذرة احترام ، اجل تهدديني انا ؟ انا ؟

ام راشد:اطلعي من بيتي الحين الحين تطلعين

ملاك:اذا خلصنا من موضوع جواهر

ثنيان اخذ نفس وناظر جواهر اللي تتحداه وتبدلت عيونها من حب وإعجاب لكُره وتحدي وبغض وكأنها تناظر عدوها الوحيد

ثنيان ناظرها ونطق:انتي طالق

ابتسمت ملاك ووقفت واخذت شنطتها:شفتوا كيف الامور سهله ؟ الله يهديكم صعبتوها وخليتونا نزوركم والا كان ضبطنا الامور من المحكمه

ام راشد:والله ما اخليك تفهمين ؟

ملاك تقدمت لام راشد تناظرها بحده ومسك ذراعها ثنيان:ملاك !

ملاك:اصبر شكل خالتنا مافهمت علي

مدت شنطتها لثنيان واخذت الكاس اللي على الطاوله وتقدمت لام راشد:افهمي اللي تشوفينه شيطان بيخنقك بحياتك ويدمّر هذي الهللتين اللي عندك وينثر في طريقك جمر مثل نثر الزجاج

رمت الكاس على الارض وشهقت بصدمه ام راشد ولفت عليها وصرخت جواهر:خير ؟

ملاك:انا وحده مجنونه والا نسيتي ياجواهر من بغى يدخلني مستشفى الامراض العقليه ؟

تقدمت ملاك ومسكها ثنيان:خلاص قلنا

ملاك ناظرت الصور اللي بالصاله:هذا راشد ولدك ؟

ابتسمت ولفت لام راشد اللي تناظرها بصدمه ونطقت ملاك:عمره كبير ويفهم ، يفهم لدرجة عادي يسوي جريمة قتل يقتل فيها اخته

ام راشد:اطلعي برا حياتنا

ملاك ابتسمت:دام قلتي كذا يعني فهمتي الدرس

ناظرت جواهر اللي واقف وتناظرها بتحدي وغضب ومشت ملاك تاخذ شنطتها من ثنيان وخرجت من البيت

مشى خلفها بهدوء ثنيان وركب السياره وهو هادي وبللت شفايفها بهدوء ملاك:بنمرّ منيف نتعشا عنده

لف يناظرها مذهول منها كيف دخلت البيت قلبت حالهم وخرجت ولا كأنها سوت شي

لفت تناظر نظراته ونطقت:بلعت لسانك بعد الطلاق ؟

ثنيان:انتي طينتك من وشو مخلوقه ؟

ابتسمت ملاك:من لَهب

سكت ثنيان يناظر ابتسامتها ولف بصدمه وقفل بابه وحرك سيارته

مشوا لين انتصفوا الطريق وهم هادين ولف ثنيان عليها:قلت لك بنتفاهم بهدوء ليه تسوين كل ذا ؟ ما تخافين من مشاكلهم ؟

ملاك:طيب وانا كيف تكلمت معهم ؟ بهدوء والله

ناظرها ثنيان ورفع حاجبينه وكملت ملاك:وما اتوقع يكملون مشاكلهم بيعقلون

ثنيان لف للطريق:ما ظنتي اعرف جواهر انا

ملاك:وما تعرفني انا

ثنيان لف عليها وسكتت ملاك تناظر الطريق:انتي معتوهه اقسم بالله ولاني فاهمك

ملاك:ما ابيك تفهمني اصلاً ابيك تطلقني

ناظرها ولفت ملاك عليه وضحكت ولف يضحك بسخريه من وضعهم وابتسمت من ضحك وصدت للطريق:يالله زين صرنا نسمع ضحكتك

ثنيان هز راسه بأسف:انا وش خلاني اطلع بحياتك كان مشيت اموري لوحدي

ملاك:ما يفيد الندم ياموج طحت بين اللهب ما ينفع تقوم

ثنيان:قصدك طاح اللهب على الموج وانطفى ضي اللهب

ملاك:ما يطفي ناري شي

سكت ثنيان يناظرها وصدت ملاك للطريق

وقف عند بيتها ونزلت ونزل معها مشت تفتح الباب بمفتاحها ودخلت

دخل ثنيان ومشت من سمعت صوت الاغاني بالمطبخ وتقدمت وثنيان خلفها

دخلت تشوف منيف يطبخ وابتسمت:حبيبي

لف منيف بصدمه وهمس:بسم الله

تقدمت ملاك وحطت شنطتها وتقدمت له تحضنه وناظر ثنيان اللي واقف:وش جابكم ؟

ملاك حضنته بدون ترد وتقدم ثنيان:نتعشا هنا

منيف:ليه ؟ مطرودين ؟

ملاك:اي سوينا مشاغبه

منيف ابتعد عنها وناظرها وضحكت ملاك:وحشتني وجيتك بس

منيف:كويس مبتلش بالفرن ماعرفت اشغله

ابتسمت ملاك وفصخت حجابها وعبايتها:انا اسوي العشاء

تقدم منيف وصافح ثنيان:شلونك؟

ثنيان هز راسه:حمدلله

جلس على الطاوله منيف وجلس ثنيان ورفعت شعرها ملاك:كويس جيت عشان تشوف ان زوجتك طباخه وتطبخ

ثنيان سكت يناظرها كيف تبتسم وتطبخ وتمزح مع منيف وما كأنها تسرق وتنهب فلوس الناس ولا كأنها تكسر وتضرب وتصرخ ، كائن غريب ما عرف له ثنيان ولا شافه من قبل ، كائن تخاف منه مره وتأمنه مره

منيف:ماتعودت اسمع هدوء بالبيت

ملاك:ياشيخ ! على اساس انا كنت امشي واغني بالبيت ؟ كل وقتي اشتغل وانا ساكته

منيف:هدوئك لوحده حسّ

ابتسمت ملاك تلف عليه وناظرت ثنيان اللي ساكت:اذا بتهوجس وضايقناك اطلع بالحوش هوجس على راحتك في اللي ودك

سكت ثنيان من فهم ان قصدها جواهر وكملت ملاك:مع ان الهواجيس مو زينه تهلك الانسان

ثنيان طلع جواله اللي دق وقفل المكالمه ولفت تناظر جواله ملاك وهي تطبخ ورجع دق من جديد وقفله

والتفت منيف يناظره وفتح جواله ثنيان يرسل لطلال:هلا طلال

طلال ارسل له:ثنيان بغيتك

ثنيان:وش صاير ؟

طلال:عمّ زوجتك موجود بالسعوديه ولاهو مسافر والبيت بيته

عقد حاجبينه ثنيان وارسل طلال:متأكد وعايش مع بنته وزوجته

سكت ثنيان ورفع عيونه على منيف وملاك يناظرهم بحذر وقفل جواله يحطه بجيبه ونطق بهدوء:عمك وينه ؟

لف منيف من وجّه له السؤال ولفت ملاك تناظره:سألت وقالوا لك انه مسافر برا السعوديه تعيد السؤال ليه ؟

ثنيان:وين برا السعوديه ؟

منيف نطق:سويسرا

ناظره ثنيان بهدوء وهز راسه:وعياله كلهم معاه؟

اخذت نفس ملاك ولفت عليه:ليش تسأل ؟

ثنيان:اسولف مع اخوك

ملاك:سولف بدون تسأل اسئله ما بتفيدك

منيف:ملاك !

ناظرته ملاك وصدت تكمل تطبخ وابتسم ثنيان:والله تعودت على هواش اختك زين جات على كذا

منيف ابتسم بهدوء وناظر ملاك اللي صاده وعرف انها تأثرت من طاري عمها ومنصور وشادن ولف لثنيان:تعال نستريح برا احسن

وقف ثنيان وناظر ملاك اللي تطبخ وخرج مع منيف

'

جواهر:هي عبالها الدنيا سهله تدخل وتعفس البيت وتخرج ؟ من تحسب نفسها ؟

ام راشد:اسكتي عني البنت مو صاحيه وتسويها وتطلع لنا بلوه

جواهر:بالله ؟ واسكت انا بعد ما طلقني الاخ ثنيان ؟ خلاص كذا ينتهي كل شي ؟ وحقي ؟

ام راشد ناظرتها بحده:اي حق ؟ تراك اخذتيه بعقلك ولا غصبك وهذي نتيجة تمردك على اهلك

جواهر:امي انتي يوم عليّ ويوم معاي ؟

ام راشد مسكت راسها:اسكتي جبتي لي مصايب ما يتحملها احد اسكتي عني خلاص فكينا من المشاكل ، ابوك لو وصله خبر والا راشد بيذبحنا انا واياك

جواهر جلست:انا مستحيل اسكت مستحيل

دق الجرس ولفت ونطقت ام راشد:من جاي بعد ؟

جواهر:بشوف انا

وقفت تمشي لين الباب وهمست:ان شاء الله تكون ثنيان وجاي ندمان ومليان أعذار وأسف

فتحت الباب وجمد وجهه وتغيرت ملامحها ونشف الدمّ بعروقها من شافت اللي واقف عند الباب

'

شافت منيف يدخل المطبخ وتقدمت له وهمست:بغيت برنامج تنصت على واتس اب حق جواله

منيف تنهد ولف يناظر الصاله ورجع همس:لازم نفتح جواله

ملاك:طيب عادي انا بلهيه وانت خذ جواله وروح الغرفه اذا خلصت تعال هنا

منيف هز راسه وخرجت ملاك تناظر ثنيان اللي بالصاله ومالت على الباب وابتسمت تطهر أنيابها:زوجي العزيز موج

رفع عيونه لها واشرت له بسبابتها:تعال بغيتك بكلمتين

ناظره منيف وجلس بالصاله ووقف ثنيان يناظر جسمها المايل على الباب وابتسامتها وتقدم لها تارك جواله ومفتاحه ومشى المطبخ

دخلت وقفلت الباب ولف لها بإستغراب:وش صاير ؟

ملاك:اجلس بتكلم معك

جلس ثنيان وجلست ملاك قدامه:بحلّ موضوع ابوك اللي وصاني عليه

هز راسه ثنيان:يعني بتكشفين لعبتك ؟

ملاك:لا طبعاً ، قلت بحطها براس واحد يعادي ابوك وناديتك ابيك تشور علي شخص يكرهه ابوك ومعاديكم عشان بالمره نتخلص منه

عقد حاجبينه ثنيان وتقدم:انتي صاحيه ؟

ملاك:وليه ؟ لا تقولي ظلمتيه شخص ما يحب العميد عقاب نزيحه من طريقه

ثنيان:اسمعيني زين ياملاك اقسم بالله لو لعبتي بشي من وراي لتندمين تفهمين ؟ خلاص عاد اعقلي

ملاك رفعت كتفها:بكيفك ياولد العميد انا قلت اشور عليك يمكن انت افهم

ثنيان:استوى عشاك والا اتوكل اكل من برا ؟

ملاك:جاهز

دق الباب منيف ودخل المطبخ وناظرته ملاك:تعال ساعدني منيف نحط الاكل

منيف تقدم يساعد ملاك ولفت تناظره واشر لها وابتسمت

خرج ثنيان واخذ جواله وجلس يقرأ رسالة طلال:تبيني اجي معاك ؟

كتب له ثنيان يجاوبه:لا انا بروح له بكره بعد دوامي واقابله لوحدي

طلال:طيب وشوف وش يطلع معك

قفل ثنيان جواله وحطه بجيبه من طلعت ملاك ونطق:بغيت الحمام

ملاك اشرت بيدها وهي تحط الاكل ووقف يمشي يدخل

فتح باب الحمام ولف يشوف غرفة منيف مفتوحه وبجانبها غرفه مقفوله

والتفت يساره ما لقي احد ومشى للغرفه المقفوله تخمين انها تكون غرفة ملاك

فتح الباب وطلعت فعلاً غرفتها دخل وناظر السرير المرتب والدولاب وكتبها بالرفوف ومكتبها واغراضها

تقدم يناظر حوالينه وفتح ادراج المكتب ما لقي غير اوراق عاديه

تلفت وتقدم يشوف الصوره اللي عند راسها وعرف انهم اهلها ، ابوها وأمها ومنيف ، كانت تطفي شمعة ميلادها وبسن الـ ١٥ من رقم الشكوع اللي على الكثكه وعرف انه اخر ميلاد لها مع اهلها

ظل يناظر اهلها وهمس:ليتكم موجودين

لف يشوف الكتب اللي عند راسها واخذها يقراها كانت كلها تتكلم عن القانون

اخذ نفس وحط الكتب يتلفت وطاح الكتاب على الارض ولف بتأفف عشان محد يسمعه

واخذ الكتاب بسرعه وطارت منه صوره وعقد حاجبينه وجلس وهو ياخذ الصوره

وزادت عقدة حجاجه من صورة الرجل اللي كانت حاطتها بالكتاب

شخص ما يعرفه ولا قد شافه ولاهو ابوها لان الصوره حديثه ولرجل بعمره

لف الصوره يقرأ اللي خلفها " لا تنسيني "

زاد استغرابه من الكلام ولف الصوره يرجع يتأمل الرجل اللي بالصوره

ووقف وحط الصوره بجيبه وخرج من الغرفه يقفلها وراه ومشى لهم

تقدم يجلس وابتسمت ملاك:سمّ بالله

بدأ ياكل وغمض عيونه منيف:الله اخيراً بشبع

ابتسمت له ملاك تناظره ياكل ونزلت عيونها للاكل تاكل

وناظرهم ثنيان وهو ياكل ولفت ملاك:جواهر كانت تطبخ لك ؟

رفع عيونه منيف وناظرها ثنيان وضحكت:اسفين نسينا انك تحاول تتخطاها

ثنيان:تعشي

ملاك:والله استغربت انك اكلت من اكلي ماخفت اطلع مسممتك ؟

ناظرها ثنيان وكح منيف وضحكت ملاك:ما وصلت لمرحلة السمّ لا تخاف ، كل وآمن

منيف:ملاك صبي لي مويه

لفت ملاك على منيف اللي بقق عيونه لها ومدت له كاس المويه ورجعت تاكل بهدوء

شالت الاكل بعد ما خلصوا ودخلت المطبخ حطتهم واخذت جوالها

شافت التطبيق اللي حطه بجوالها منيف ودخلت على كل رسايل ثنيان وابتسمت

دخلت اول محادثه وكانت محادثة طلال وقرت المحادثه وعرفت انه يلاحق موضوع عمها وما بيخلص منه

تنهدت بإنزعاج وقفلت جوالها وغمضت عيونها تهدي نفسها وتفكر بدون ما تتوتر

دخل ثنيان:نمشي ؟

هزت راسها تحط الصحون بغسالة الصحون ومشت تخرج

لبست عبايتها:منيف اذا احتجت شي كلمني

منيف:انتبهي على نفسك

ابتسمت وتقدمت تسلم عليه تحت نظرات ثنيان لهم ومشت تخرج ومشى ثنيان يركب السياره

ركبت جنبه وربطت الحزام وحرك ثنيان وهو ساكت يهوجس في الصوره اللي في جيبه وفي الكلام المكتوب وفي موضوع عمها اللي يجهل وش ممكن يطلع من وراه ، من علاقتها مع منيف وحياتهم البسيطه ومن الشرّ اللي داخلها مره تطلعه ومره تخفيه وهذا يوترّه ويرعبه

لفت تناظر ثنيان اللي يسوق وظلت تتأمله تحت صوت افكارها ، وش بتسوي لو انكشف موضوع منصور لثنيان وكيف بتكون ردة فعله ؟ بيقدر يفضحها ويكشف اوراقها وتخرج بدون انتصار لمنصور ؟

حسّ بنظراتها لكنه ما التفت عليها يسوق بهدوء وصدت ملاك للطريق بهدوء

'

( لا تنسون النجمه ⭐️ )

عقاب قاعد على مكتبه ومجمع كفوفه ببعض ورفع راسه من دق الباب ودخلت ملاك:تبيني ؟

هز راسه ومشت ملاك وقفلت الباب وتقدمت تجلس وناظرته

رفع عيونه عقاب عليها وابتسم:عسى انبسطتوا ؟

ابتسمت ملاك:حمدلله الجو كان خيال

هز راسه عقاب:يالله زين

ملاك:بغيت شي ؟

عقاب:اي ، لي أرض بنيت فيها وباقي أشطبها وجاني من البلديه ازاله يقولون اني ماخذ من الشارع مترين وبغيت تشوفين الموضوع

ملاك اخذت نفس:اوكيه اشوفه واراجعهم

عقاب مد لها ورقه:هذي هي نسخة الصك

اخذت الورقه تناظر الصك ومساحة الارض وسعرها بأسفل الورقه ٨ مليون

رفعت عيونها على عقاب ورجعت تقرأ الرقم من جديد

عقاب:واذا بتلقين عليها مشاكل بيعيها سوم ٩ ملايين ماعليها حسوفه اصلاً

ابتسمت ملاك تناظر الارقام اللي يقولها عقاب وكيف ان ارقام الملايين ما تأثر فيه وهو تحتاجها:صح

عقاب:وش صار مع موضوع اللي هددوا نوره وجاسر؟

ملاك سكتت ثواني تناظره واخذت نفس:ما طلع شي من ورا الموضوع كل شي مجهول واتوقع شغل دولي

عقاب:الله ياخذهم ياشيخه عيال حرام هذولا ولا وراهم حسيب ولا نقيب ، شلون يطاوعه قلبه يهدد ويبتز وياخذ فلوس ماهي فلوسه ، فلوس حرام

سكتت ملاك تناظره ودق الباب ودخل ثنيان وناظرهم:قالوا تبي ملاك !

عقاب هز راسه:اي ابيها وش عندك انت ؟

ثنيان ناظر الورق اللي بيد ملاك:بوشو ؟

وقفت ملاك وتقدم ثنيان لهم ورفع عيونه عقاب:وش تبي ثنيان ؟ وش عندك ؟

ثنيان:ابي اعرف وش الشغل اللي تبيها فيه ؟

اخذ الورقه ثنيان وتنهدت ملاك بتعب وناظره عقاب:الله يصلحك قول امين

ثنيان هز راسه:امين ، وش دخلها ملاك بالأرض ذي ؟

ملاك:عسى ماشر ؟

ثنيان ناظر ابوه بدون يلف عليه:كان يخلصها لك ناصر

عقاب:وابي يخلصها لي الحين ملاك وش عندك ؟

ثنيان بلل شفايفه بهدوء:ملاك عندها قضايا ولا ودي تنضغط

ملاك ابتسمت وهي تناظره ونطق عقاب:هذا شغل ومحد يرده ياثنيان وملاك بنتي تخدمني وتساعدني بدال ما اتعنى عند احد غريب والله ما يخليني اتوه حمدلله رزقني بملاك تخلص اموري

تقدمت ملاك تاخذ الورقه من يدين ثنيان وكمل عقاب وهو يوقف:الله يجيب الصالح

رجفت وجمد وجهها ولفت بسرعه على عقاب تناظره

لف ثنيان يناظرها ماده كفها ما اخذت الورقه وتناظر عقاب

وابتسم عقاب يناظر ملاك:وجاب لي ملاك

ماردت وهي تراقبه وهي جامده محلها تراقب ابتسامته ونظراته وعقدت حاجبينها تتأمله بحذر وشك وخوف ورعب اكل من صدرها لحظة ما نطق جملة منصور

وهمس ثنيان:ملاك

لفت على ثنيان ووجهها جامد وبلعت ريقها واخذت الورقه وخرجت

ولف ثنيان يناظرها تخرج ومشى خلفها

دخلت الغرفه وحطت شنطتها وفصخت عبايتها وهي ساهيه وتتنفس بسرعه وسط مخاوفها

دخل ثنيان يراقبها:وش جاك ؟

ملاك حطت يدها على خصرها وهي تفكر ولفت على ثنيان تناظره:ولاشي

عقد حاجبينه ثنيان وعضت شفتها وتقدم ثنيان:ليه اختلف حالك ؟

سكتت ملاك ثواني ورفعت كتفها:ما اختلف

رفعت عيونها ملاك عليه وناظرت نظرات ثنيان ومشت تهرب عنه تدخل الحمام

اخذت نفس تهدي خوفها وتتمسك بالبانيو تجلس عليه بتعب ومسكت قلبها اللي بيخرج من مكانه

صوت الذكريات واشخاص دافنتهم يخرجون لها بكل مره ويختلف حالها ، مره عمها والحين منصور

غمضت عيونها برعب تهدي نفسها

'

نهار اشر لحمد:حمود قول اعقب

لف حمد يناظر جاسر وضحك وهو يحاول ينطق

وضحك عقاب:لا تعلمه على ذا الكلام

نوره:افكر اجيب لسارا معلمه تعلمها عربي شرايك جاسر ؟

جاسر:ماعندي مشكله

عقاب:للحين ما تعرف وش تجاوب الناس عن عيالك ؟

نوره:وانت ياعقاب كل ماشفت الولد مبسوط نكدت عليه ؟

عقاب:الدنيا ما تمشي كذا يانوره ، بيقعد يضحك مع اخوانه وان طلع مع عياله وش بيقول

جاسر صد ودخل ثنيان:سلام

نوره:هلا أمي ، تعشيتم ؟

هز راسه ثنيان وجلس ودخلت ملاك وناظرت عقاب اللي جالس ومشت تجلس جنب ثنيان

نوره ابتسمت وهي تناظرهم:ماشاء الله تبارك الله الوجيه تنور

لفت ملاك على ثنيان تناظره وابتسمت:اي يشعّ نور

ابتسم ثنيان لامه ولفت ملاك من تقدمت سارا تسألها بالانقليزي:انتي اخت والدي ؟

هزت راسها بالنفي ملاك:زوجة عمك

سارا ناظرت ثنيان اللي جالس ورجعت ناظرت ملاك:ما اسمك ؟

ملاك ابتسمت تناظر سارا:ملاك

سارا:ما معناه ؟

ملاك:آنجل

ضحك ثنيان ولفت ملاك من عرفت ان ضحكته على اسمها وابتسمت:ماعندي مشكله تناديني آينجل الصراحه

سارا ابتسمت:اين جنحانك ؟

ملاك رفعت يدينها وضحكت سارا وابتسمت ملاك

سارا:ما لون أجنحتك ؟

ثنيان تقدم لسارا:أسود

لفت ملاك تشوفه من تقدم يجاوب ولفت تناظر سارا اللي ابتسمت تلف تتكلم مع أصايل

عقاب:البنت فطينه لكن لو تعرف تتكلم عربي زانت امورها

نهار:حطوهم عند امي والله شهر وهم يتكلمون احسن منا ، شوفوا الخدم ما يبطون الا وصاروا يتكلمون عربي

نوره ابتسمت:اي انا عندي اعتزاز بالعربي

عقاب:قولي ما اعرف انقليزي اسهل

ضحكوا وضحك عقاب من لفت عليه نوره بحده

ابتسم ثنيان ولف من لمست كفه ملاك وناظرها وهمست:عطني منديل من قدامك

نزل انظاره لكفها اللي شالته وتقدم يمد لها منديل

اخذته وناظر كفوفها اللي لمت المنديل ورجع يناظر يدينها ودبلتها ، نعومتها من أطرافها لراسها تعكس كل شي داخلها من خشونه ووحشيّه وقوه وشرّ

ما يصدق ان اللي يمينه الحين تبتسم أفضل ابتسامه شافها بعيونه بأنياب ساحره ، انها هي اللي سرقت حلال اهله وزعزعت امان صدره وحياته

ابتسمت ملاك:القعده معاكم حلوه بس انا تعبانه وبطلع انام

ثنيان هز راسه:دوخها البحر

لفت تناظر ثنيان وابتسمت له ووقفت:تصبحون على خير

عقاب ابتسم:وانتي من اهله

ناظرت ابتسامته ومشت تطلع الغرفه ، ابتساماته لها كلها حنيّه وصدق وكلامه معها يشعرها بالأمان ووجوده مع عياله افضل مسمى للعائله

تصيبها الضيقه كل ماجلست معهم بمجلس عائلي وشافت الاهتمام والدلال والضحك

دخلت وفصخت عبايتها تعلقها ومشت تغير ملابسها وتلبس قميص النوم الحريري واخذت الروب الحرير تلبسه وجلست وهي تحط لها كريم

دخل ثنيان ولفت تناظره وهي تمسح رجلينها ورجعت تصد

ارتبكت من وجوده والهدوء اللي سكن الغرفه بعد يومهم العاصف

تقدم ثنيان يفتح الدولاب ياخذ ملابسه وفصخ التيشيرت تحت نظراتها لظهره اللي صاد عنها

تشوف طوله وعرضه امامها وكيف عايشه مع شخص ما تعرفه ولا تمنته

دخل الحمام ومسحت يدينها تمشي للسرير وفصخت الروب على خروج ثنيان يناظرها على السرير

بلع ريقه يصد عنها وانسدحت تلبس باللحاف وتعطيه مقفاها

وحك جبينه ثنيان وهو واقف ولف يمشي للسرير وينسدح

ظل يراقب السقف وهو هادي ولفت ملاك تشوفه ساهي:ما بتقفل النور ؟

ثنيان لف عليها:طفيه انتي اذا ما تبينه

انسدحت على ظهرها تتسائل:ليه تخاف ان ابوك يعرف عن زواجك ؟

لف عليها:كيف ما اخاف ؟

ملاك ناظرته:ابوك مستحيل يعيش بعيد عنكم ويكابد عشان تكونون دايم حوالينه تتوقع بيفرط فيك عشان زلّه وسوء اختيار ؟

ثنيان:اي يسويها عقاب يطردني ويتبرأ مني

ملاك؛ابوك وقف مع نهار بالمحكمه مع ان نهار كان متحرش قدام الناس ودافع عنه وبيّض اوراقه ، ولو عرف عن ساري بيغضب عليه يومين ويرضى ، ابوك رفض فكرة ان جاسر طلع عن شوره وتزوج وبنى عايله وهو ما يدري لكنه الحين تحت قاعد يضحك مع عياا جاسر

ابتسمت تناظر ثنيان:ابوك شقى عشان يلمّ هالعايله مستحيل يزعزها بنفسه

ثنيان ناظرها:وتفقدين هالشي ؟

ملاك ابتسمت؛مو مأثر فيني زي مو ملاحظ

ثنيان:تشبهين ابوك

سكتت ملاك تناظره وكمل ثنيان:كنتي تشبهينه وانتي بجنبه

عقدت حاجبينها وكمل ثنيان:شفت صورته بغرفتك

لانت ملامح وجهها وكمل ثنيان وهو يناظرها:ليه تسوين فيه كذا ؟ تشوهين تربيته ورعايته لك اللي ما طولت ؟

صدت ملاك عنه وتقدم ثنيان يرفع راسه تحت يده وهو يناظرها:ملاك وشهي ظروفك اللي تاكل من كبدك ؟

ملاك لفت عليه:ظروفي اللي تعشّى من طرف كبدي

‏اموت منها ولا يدري بها إلا الله

ثنيان ناظرها وكملت ملاك؛بكشف لك ظروفي يعني وانت تدور زلّاتي وتفتش وراي ؟

ثنيان هز راسه بالنفي وابتسمت ملاك:ميت حسره على الملايين اللي اخذتها

ثنيان:ماعاد تهمني الفلوس اللي اخذتيها ابي اعرف من وين كل هالنيران ؟

ملاك:كل ما فتشت انحرقت لذلك لا تدور اكثر

ثنيان:ما عمري انشغلت بشي قد ما شغلتيني فيك

ابتسمت ملاك تناظره:اعتبره غزل ؟

ثنيان:اعتبريه تصريح انك أغرب شخص عايش بالدنيا

ملاك:لا تستهين بنفسك ياولد العميد انت بعد ياكل من طرف كبدك الغموض

ثنيان؛أنا موج ما ينفهم

ابتسمت من نطق وكملت:وأنا لهب

ناظر ابتسامتها اللي ترسمها وتخفي وراها مشاعر يشعر بها

لفت عنه تطفي النور وانسدحت وصد ثنيان يناظر السقف

'

جاسر لف من خرج من البيت ثنيان وناظره:صباح الخير

ابتسم ثنيان ولف له:وش تسوي ؟

جاسر لف يناظر سارا وحمد اللي يلعبون قدامه

ثنيان تقدم وابتسم ولف جاسر:انت وش عندك ؟

ثنيان:رايح دوامي

جاسر:طيب اذا خلصت دوامك بجيك

ثنيان:ليه ؟

جاسر:ياخي ابوي نشبني والله ماني عارف احلها يبي اتزوج وألفق قصه وسالفه

ثنيان:طيب اخلص دوامي وأمرك

جاسر:كلمتي

هز راسه ثنيان ومشى لسيارته وركب وحرك خارج من البيت

دخل جاسر وناظر ملاك اللي تقدمت للفطور تجلس

عقاب:ثنيان امداه يطلع ؟

جاسر:اي مستعجل على دوامه

نوره:الله يوفقه حبيبي ما مداني اشوفه

بدت تاكل ملاك ولف ساري:واحنا طالعين

نوره:جنى معك ؟

هزت راسها جنى توقف:عندي موعد وبروح مع ساري

هزت راسها نوره:اي الله يسهل عليكم

مشوا يخرجون وشربت قهوتها أصايل على سؤال عقاب:تعرف تحل لي اللابتوب ذا يانهار ؟

نهار:وش فيه ؟

عقاب:مدري طفى ولا عاد يشتغل واحتاجه ضروري فيه اوراق مهمه ابيها

نهار:اخذه اصلحه ولا يهمك

عقاب:بس شخص ثقه مابي اوراقي تتسرب

نهار ناظر ملاك:منيف موجود والا ؟

ناظرتهم أصايل يتكلمون عنه ورفعت عيونها ملاك ولفت لعقاب:موجود

عقاب:اي والله شلون راح عن بالي ، زين بنتعبه شوي

ملاك:لا ابد يحب اصلاً

ابتسم عقاب:يالله زين

نهار:انا باخذ اللابتوب واوديه الحين قبل اروح دوامي

ملاك:اذا مستعجل انا اخذه

نهار:لا لا انا اخذه

أصايل لفت لنهار:ما بتوديني ؟

نهار:هاه وشو بعد استلمتوني اليوم !

جاسر:وين تبين أصايل انا اوديك ؟

نوره:وليه دام حمدان برا ؟

أصايل:حمدان مشغول مع ابوي وبغيت اروح بيت وحده من صديقاتي

لفت على نهار:نهار تكفى بيتها قريب من دوامك اصلاً

نوره:هاو ! جاسر يطلبك وتردينه ؟

جاسر:خليها والله معد افزع

ضحكت أصايل:سوري جاسر بس ما ابغى اتعبك انت مو طالع الا عشاني فخلاص ليش التعب اروح مع نهار

نهار:وماتشا من الطريق وفطور من الطريق لين اوصل دوامي الظهر

عقاب:نهار خلاص بتترجاك لين متى ؟

نهار:سمّ

ابتسمت أصايل:بطلع اجهز واجي

وقفت تمشي وشربت قهوتها ملاك ووقفت:عن اذنكم

ابتسمت لها نوره:الله يوفقك

مشت ملاك وخرجت من البيت وناظرت رسالة شادن:صاحيه

اخذت نفس ملاك واتصلت عليها وردت شادن:هلا

ملاك:لك الحق ترفضين ماني ضاغطه عليك

شادن:طحتي بمصيبه ؟

ملاك:اذا ودك منصور يطلع قريب حليها انتي

شادن:وليه انا ؟ من قبل ما كان ودك اتدخل بشي ؟

ملاك:لان الموضوع وصل عندك ، ولد العميد فتش عن عنوان ابوك وبيجيه اليوم البيت

عقدت حاجبينها شادن:مو جانا وصرّفته شيبي راجع؟

ملاك:ما ارتاح للموضوع بيمرّ عليكم بعد دوامه اذا تقدرين يعني !

شادن:امي وابوي بيروحون لمنصور اصلاً

ملاك سكتت من جابت طاري منصور ونزلت عيونها وهمست:وشلونه ؟

شادن:لا تسألين نصيحه

سكتت ملاك وصدت تكتم غصتها من طاريه وكملت شادن:خلاص انا بحلها كلميني أول بأول وبصرّفه من جديد عسى يقتنع

ملاك:طيب

قفلت من شادن وحركت سيارتها تمشي لمكتبها

'

طلع من دوامه ثنيان وحرك للبيت ووقف عند البيت ينتظر جاسر وخرج جاسر وركب جنبه وابتسم ثنيان:حيّ الله ابو حمد

ابتسم جاسر وحرك ثنيان وناظره جاسر:انت عندك شي والا اشغلتك ؟

ثنيان:عندي والله بس مشوار قصير بقضيه وبعدها نقعد بمكان ونتكلم

جاسر:وين بتروح ؟

ناظر العنوان ثنيان في جواله:بزور عمّ زوجتي

جاسر:هو مو برا السعوديه ؟

ثنيان وقف عند البيت:والله ودي

لف جاسر يناظر البيت ولف ثنيان:ماني مطول

نزل من السياره ومشى يدق الباب وتقدمت شادن تتلثم وتفتح الباب:هلا

ثنيان:السلام عليكم

شادن:وعليكم السلام

ثنيان:بغيت محمد

شادن:اخوي محمد راعي البيت باعه من زمان وجيت سألت عنه وقلنا لك ليه مو مصدق

ثنيان:السموحه بس قالوا لي انه ببيته ماهو مسافر وجيت اتأكد

شادن:لا مسافر وباع البيت واتمنى ما تزعجنا من جديد

ثنيان ناظرها ونزل من السياره جاسر وتقدم يوقف جنب ثنيان

ورفعت عيونها شادن وتغيرت ملامحها من شافت نظراته وبلعت ريقها:درب السلامه

قفلت الباب وعقد حاجبينه جاسر ولف لثنيان:من ذي ؟

ثنيان رفع كتفه ومشى لسيارته ولف جاسر يناظر الباب وعقد حاجبينه يتذكر العيون ومن قوة ذاكرته ميّزها

مستحيل ما تكون هي بس وش جابها هنا ؟ وكيف الصدف خلتها تطلع من جديد له ؟

لف يمشي وركب جنب ثنيان:غريبه

ثنيان ناظره:وشو ؟

جاسر:البنت عيونها عيون وحده اعرفها

ثنيان:وشو انت بعد تسربت نفس ساري ؟

جاسر:لا ياشيخ البنت اللي صورتني مع عيالي وهددتني

عقد حاجبينه ثنيان وناظره جاسر:والله نفس العيون مستحيل انساها

ثنيان سكت يلف يناظر البيت ورجع ظهره لورا:انا اقول خلنا نتكي هنا

جاسر لف يناظر البيت واخذ نفس ثنيان يترقب البيت

'

وقف نهار عند البيت ولابتوب ابوه بحضنه ودق على منيف ولفت أصايل تناظر البيت

ورد منيف:هلا

نهار:صاحي ؟

منيف:حيّاك

نهار:والله انا برا افتح لي

منيف:ارحب

ابتسم نهار وقفل ولف لأصايل:دقايق وجايك

هزت راسها ومشى وفتح الباب منيف وابتسمت من خرج تناظره

وسلم عليه نهار:جايب لك غرض ماهو من عندي من عند العميد عقاب

عقد حاجبينه منيف:وشو

نهار:لابتوبه مدري شفيه عطلان وفي اشياء مهمه ما يبي تتسرب بمكان ، عاد قلت قدها الفال الطيب

ابتسم منيف واخذ اللابتوب:مو مشكله اشوفه

نهار:لا تفشلني مع الوالد

ضحك منيف:برجعه عطلان اكثر اجل

ضحك نهار وتقدم منيف:ادخل

نهار:لا والله بروح دوامي ومعي دلوعتنا نبي نوصلها

لف منيف ولانت ملامحه يناظر سيارة نهار وناظرها راكبه معه وتناظره من السياره

نهار:تبي شي ؟

لف منيف عليه:سلامتك

نهار:اذا خلصته كلمتي

منيف:ماعليك اوديه انا

نهار:على راحتك

مشى نهار يركب ولف منيف يناظرها بالسياره وحرك نهار واخذ نفس منيف

ودخل البيت وحط اللابتوب ودقت عليه ملاك واخذه ورد:هلا

ملاك:وصلك لابتوب العميد ؟

منيف:اي عندي

ملاك:طيب شوف لنا وش فيه وعلمني كنت بمرّ عليك انا بس عندي جلسه بالمحكمه ما اقدر اخليها

منيف:وش تبين ملاك تكفين

ملاك:ماقلت شي قلت شوف بس

منيف:طيب

قفلت ملاك وفتح اللابتوب منيف واخذه معه لغرفته

-

لف نهار عليها يمد لها الفطور والماتشا:وين بيت صديقتك ذي ؟

أصايل:لا خلاص بطلت رجعني البيت

لف عليها بصدمه:تستهبلين أصايل ؟

أصايل:تذكرت اني متهاوشه معاها بطلت خلاص

نهار:وش اسوي فيك انا ؟ اوقفك بالشارع الحين ؟

أصايل:ماتقدر اصلاً

نهار:طبعاً حاميك العميد ومكبر راسك يالدلوعه

ابتسمت أصايل تشرب من الماتشا:بترجع تاخذ اللابتوب من منيف ؟

نهار:لا بيجيبه هو يقول

أصايل:متى ؟

نهار:شدراني متى ما خلصه

أصايل صدت تناظر الطريق وهي تشرب الماتشا

ووقف عند البيت نهار:اذلفي اخرتني عن دوامي

تقدمت تبوس خده:اعشقك طيب

نهار ابتسم يضرب راسها ونزلت من السياره تدخل البيت

رفعت عيونها نوره من دخلت:انتي مو قلتي بتروحي لصـ

قاطعتها تطلع لغرفتها بسرعه:بطلت

دخلت غرفتها وابتسمت تحط الماتشا والفطور على السرير:كوتي كوتي

نطت كوتي على السرير تلمس الاكياس وابتسمت أصايل:تعرفين مين شفت اليوم ؟

مدت الاكل لكوتي وكملت:منيف

ضحكت بعد مانطقت اسمه بربكه:اسمه يربكني كوتي ما اعرف احسه غير مع ان ما دار بيننا كلام ومواقف كثيره بس ما اعرف عيونه اذا طالعني احسها تلمع وانا احب كذا

مسحت على راس كوتي:احب اصير حلوه بعيون احد

ناظرت السلسال اللي برقبة كوتي وابتسمت

تنهدت من تضارب مشاعرها ولفت تشرب الماتشا

'

اخذ نفس ثنيان وملّ انتظاره ولف لجاسر:وشو ارجعك وارجع انا ؟

جاسر:لا لا خلنا نشوف وش السالفه ماني مرتاح ياخي

ثنيان:انت متأكد انها نفس البنت ؟

جاسر:مستحيل انساها هي اللي صورتني ياخي

ثنيان صد يفكر ووقفت سياره عند البيت ونطق جاسر:شوف

ناظر رجال ينزل ومعه مَره كبيره وهمس:انتظرني

فتح الباب ونزل ومشى لين عندهم:محمد ؟

لف محمد ولفت وفاء تناظرهم ولف يأشر لها تدخل ودخلت وهز راسه محمد:وصلت

ثنيان ابتسم:كيف الحال ؟

محمد:من انت ؟

ثنيان:معك ثنيان بن عقاب بن جرّاح ، سامع فيني ؟

سكت محمد يناظره ولف يناظر سيارته الجديده السوداء وضحك يهز راسه:اللي ماخذ بنت اخوي

ثنيان:وصلت

محمد:وش تبي ؟

تقدم ثنيان له:كيف وش ابي ؟ انت عم زوجتي وما نعرفك ولا شفناك قلنا نبي نتعرف عليك ونعرفك ونعرف عيالك

محمد:مابي احد يعرفني ولا اعرف احد ، توكل

ثنيان رفع حاجبه وتقدم له يرفع صوته بجديّه:ابوي يوصل لك سلامه ويقول حيّاك عنده

محمد لف عليه:وش يبي ؟

ثنيان:كلمتين وقهوه وناخذ علوم بعض

محمد سكت يناظره ويناظر السياره ونطق ثنيان:اعتبرنا صرنا أهل

محمد ناظر ثنيان:اشوف اشوف

ثنيان:هذا رقم جوالي وكلمني والله يحييك في بيت العميد عقاب بأي وقت

محمد اخذ رقم ثنيان وهز راسه ودخل البيت ومشى ثنيان يركب ولف جاسر:هو ؟

هز راسه ثنيان وقفل الباب وشغل السياره:وتقولي مسافر برا السعوديه

جاسر:ومن اللي داخل البيت ؟

ثنيان لف على جاسر:بنت عمها ، من تكون ؟

جاسر:بنت عمها وش تبي مني تهددني ؟

ابتسم ثنيان بسخريه وسكت ما يرد وحرك سيارته

'

وقفت سيارتها بالمواقف تشوف ثنيان اللي ينزل من سيارته ومعه جاسر ونزلت:زوجي موج !

لف جاسر على ثنيان ومشى يدخل البيت وتقدم ثنيان لها:راجعه بدري

هزت راسها:ودك اتأخر

وقف قدامها:وش وراك ؟

ملاك ضحكت:معد صرت تثق في هدوئي ؟ افا

ثنيان:ماتكونين هالقد هاديه الا ووراك بلوه

ملاك:صرت تعرفني ؟

سكت ثنيان يناظرها وابتسمت ملاك ومشت تاركته ومشى خلفها ثنيان يدخل البيت

دخلت وحطت شنطتها وتقدمت تجلس على الطاوله

أصايل:وين ابوي ؟ جعت

نوره جلست:جاي اقعدوا

جلس ثنيان ودخل عقاب وناظر ملاك:ملاك ؟ وش سوا منيف ؟

لف ثنيان بإستغراب وناظرت عقاب ملاك:ماعندي خبر على اساس نهار اللي وداه

عقاب:اي نهار وداه بس ماهو موجود قلت يمكن ارسله معك

ثنيان:وشهو ؟

عقاب:لابتوبي تعطل ووديته لمنيف ما قصر بيصلحه ، فيه اوراق مهمه ماودي تتسرب بمكان

جمد وجه ثنيان وابتسمت ملاك من ردة فعله ونطق ثنيان:وليه منيف ؟

عقاب:وليه ما يكون ؟

اخذ نفس ثنيان وصد وبدت تاكل ملاك والتفت ثنيان عليها يناظرها بحذر

اكل وباله ماهو معاه واخذ دقايق بسيطه ووقف:ملاك تعالي معي

رفعت عيونها والملعقه بيدها ولفت نوره عليه:خل البنت تاكل ياثنيان

ثنيان مسك الملعقه:شبعت

عقاب عقد حاجبينه:انت صاحي ؟

ابتسمت ملاك:اكيد وده يعشيني برا اليوم وما يبغاني اكثّر

وقفت ملاك من مسك ذراعها ثنيان يوقفها وضحكت:خايف على وزني اكثر من الكوتش

لفت أصايل تناظر اهلها من وضع ثنيان وملاك ومشى ثنيان ومشت ملاك معه

دخلت الغرفه ولفت عليه واخذت نفس:وش اكتشفت شي جديد ؟

ثنيان:ماراح تمسين ابوي بشي

ملاك:من قال بمسّه ؟

ثنيان اخذ نفس يهدي غضبه:شوفي ملاك بتكلم معك بعقل وهدوء بدون مشاكل وصراخ وتكسير

ملاك ماردت وهي تناظره وكمل ثنيان:ما بيخرج شي من لابتوب ابوي

ملاك صدت عنه تبلل شفايفها وابتسمت وتقدم من شافها تبتسم وشدّها من ذراعها:ملاك

ملاك لفت عليه:قصدك لَهب ؟ زي ما تسميني

ثنيان:لا تكملين هاللعبه إصّحك

ملاك ناظرت عيونه:واذا كملتها وش بتسوي ؟ بتطلقني ؟

ثنيان:انا وقفت عند اخر سطر وقفتي عنده وقلت تبتي وما بترجعين تلعبين من جديد بس الظاهر اني انخدعت

ملاك:فعلاً انخدعت كل ما توقعت انك عرفتني ياولد العميد تكتشف اني اخذل توقعاتك ، انا ما اتخمن

ثنيان ناظر عيونها اللي تتأمله:منيف باللعبه ؟

ملاك ماردت عليه وضحك ثنيان يصد من استوعب:اكيد والا مين يمشي امورك التكنولوجيه ؟

لف على ملاك وهز راسه بصدمه:انتوا من وين طالعين ؟

ملاك:منيف ما يلعب مع احد ، انا العب لوحدي

ثنيان:بتطلعين اخوك من السالفه يعني ؟ مستحيل اقتنع انه ما يعرف شي مستحيل

ملاك:هذا كلامي ياولد العميد وهذي انا ملاك ماراح أتوب ماتبي لك مشاكل ؟ طلقني

ثنيان عقد حاجبينه من انقلاب حالها وتقدمت ملاك له:لا يطوّل مقعدي بينكم ياولد العميد ، انا لهب واحرق اللي حواليني انتبه لأهلك

ثنيان هز راسه بالنفي:لا تنغرّين بنارك يا ملاك ، أنا موج وبحر

ابتسمت من تعبيره عنهم بكل مره وهز راسه ثنيان يتحداها ونزل عيونه من دق جواله واخذ يرد:هلا

ناظرته ملاك واخذت نفس تفتح جوالها وترسل لمنيف:وش طلع معاك ؟

ثنيان عقد حاجبينه:من معي ؟

تغيرت ملامح وجهه من سمع الاسم ولف لملاك اللي على جوالها وابتسم:الله يحييك انا والوالد بإنتظارك بعد صلاة العشاء

لفت ملاك تناظره وقفل جواله ثنيان وخرج من الغرفه تاركها

دخل على اهله اللي ياكلون ورفع عيونه عقاب وتقدم ثنيان:اليوم بيجيني ضيف بعد صلاة العشاء

عقاب:منهو ؟

ثنيان:عم ملاك ، محمد

سكت عقاب يناظر ثنيان وعقدت حاجبينها نوره:هو مو برا السعوديه ؟

ثنيان:الظاهر رجع وما قصرت معه وعزمته ومبدئياً كذا بسويها مفاجأه لملاك لا يجيها خبر

ابتسمت أصايل تهز راسها

ورجع ظهره عقاب يناظر ثنيان:كيف وصلت له ؟

ثنيان:ماهو صعب المهم نتعرف عليه

سكت عقاب ولف ثنيان عليهم ونطق جاسر:انا ما بكون موجود اعذروني عندي شغله

ثنيان:معذور

وقف جاسر وخرج ومشى ثنيان للغرفه ولف عقاب على نوره يناظرها ورجع صد

-

بعد صلاة العشاء - ٨:٠٠

ملاك جلست على السرير تناظر الملفات اللي يصورها منيف ورفعت راسها من دخل ثنيان ورجعت تناظر جوالها

ناظرها تكتب ومندمجه ومشى للدولاب وطلع ثوبه وشماغه ودخل يلبسه ولبس شماغه يناظر المرايه واخذ عطره يتعطر وسحب الدرج يطلع ساعه من ساعاته وسحب سبحته الزرقاء

ومن وصلتها ريحة عطره رفعت عيونها تشوفه يولع العود والبخور وعقدت حاجبينها تراقبه وهي ماسكه جوالها

رفعت حاجبها:رايح تتزوج ؟

ثنيان مارد وهو يبخر شماغه وقفلت جوالها ملاك بعد اخر رساله كتبها منيف:جاي

وقفت وتكتفت تمشي له:والا هذي طقوس ولد الشيخ عقاب ؟

ثنيان ابتسم يلف عليها:زايرنا ضيف عزيز

رفعت حاجبينها:ومين هذا الضيف ؟

ثنيان مارد واخذ جواله وخرج من الغرفه

نزل وناظر ابوه اللي واقف وساهي والتفت له وتقدم ثنيان:من بيستقبله معنا ؟

عقاب:محد

ثنيان عقد حاجبينه:ليه ؟ كلمت ساري وقال بيكون موجود

عقاب تقدم:مشغول

مشى يدخل المجلس ويجلس داخله وجلس ثنيان وهو ينتظر

ووقف ثنيان من دخل محمد وناظرهم بالمجلس الوسيع الكبير:سلام عليكم

ناظره عقاب من دخل وابتسم ثنيان:حياك الله

وقف عقاب وتقدم محمد يوقف قدامه:العميد عقاب

عقاب هز راسه بدون يتكلم ولف ثنيان:حياك الله استريح تو ماتبارك المكان

محمد جلس وهو يناظر عقاب اللي ما سأل عن حاله

والتفت ثنيان من دخل العامل يصب قهوه واخذ الفنجان محمد ولف لثنيان:ابوك ماهو معنا

ثنيان لف لعقاب اللي ابتسم ثواني ونطق:معك

ثنيان:اخبارك وكيف الاحوال ؟

محمد:الحمدلله مستورين

هز راسه ثنيان ولف لعقاب اللي يناظر محمد

محمد ناظره وحط فنجانه عقاب قدامه ولف لمحمد:ليه ما حضرت زواج بنت اختك ؟

محمد ناظر ثنيان وابتسم:ابوك يبي يرجّع ذكريات شغله بالتحقيق ؟

ثنيان تلاشت ابتسامته من سوء اخلاق محمد وهز راسه بالنفي عقاب:سؤال عادي يشغلنا ، اخذنا بنتكم وما شفنا احد معها الا اخوها

محمد ناظرهم وابتسم:سألتوهم هم ؟

ثنيان:ليه تمتنع تجاوب ؟

محمد شرب قهوته:بنت اخوي موجوده ؟

لف ثنيان على عقاب اللي هزّ راسه:موجوده

محمد:نادوها تجاوبكم بعد ما تشوفني

عقاب لف لثنيان ووقف ثنيان

'

خرجت ملاك وهي لابسه عبايتها وشافت منيف اللي تقدم لها

ومسكت كفوفه تاخذ الفلاش من يده:نسختها؟

هز راسه منيف يمد اللابتوب:سلميه انتي مابي اشوفه

ملاك:لا تخاف منه خاف من اي احد الا عقاب

منيف:لا تاخذين راحتك وانتبهي يضيع منك مالقيت اشياء مهمه كثير بس انتي أصريتي

هزت راسها ملاك ورفع عيونه منيف من شاف ثنيان متقدم:عسى خير ؟

لفت ملاك وناظر اللابتوب ثنيان ورجع ناظر ملاك:وصلت الامانه ؟

ملاك لفت لمنيف:اوكيه منيف تقدر تروح انا بعطيه

ثنيان:لا اصبر

لف منيف وناظرته ملاك وتقدم ثنيان لمنيف؛في داخل ضيف تعرفه ودّه يشوفك

عقدت حاجبينها ملاك وارتبك منيف:ضيف ؟ منهو ؟

ملاك؛مين اللي يبي يشوف منيف ؟

ثنيان ناظرها:ماهو بس منيف يبي يشوفك انتي بالأصل

سكتت ملاك تناظر ثنيان ومشى ثنيان للمجلس ولف منيف على ملاك يناظرها بنظرات استسفسار ورفعت كتفها ملاك ومشت ورا ثنيان

مشى منيف مع ملاك وتنهد بربكه يمسح كفوفه بثوبه وتقدمت ملاك من دخل ثنيان المجلس:عيال مساعد

وقفت بالمجلس وناظرت اللي جالس بالمجلس وجمد وجهها ووقف منيف يناظر محمد مبتسم يناظرهم وتغيرت ملامحه وانصدم

وقف ثنيان يناظر وجيههم ولف عقاب يناظرهم وابتسم محمد؛عيال اخوي

ظلت تناظر محمد اللي جالس بالمجلس مصدومه من وجوده وليه هو قاعد ووش قال ووش بيصير ، انفضح موضوعها وانتقم محمد منها واخيراً ؟ والا ثنيان وعقاب ركضوا خلف محمد لين صادوه ؟ والا محمد قرر يفضحها ويخرب كل خططها ؟ والا هو جالس الحين يشرب قهوه عشان يشتتها ويربكها ؟ فكرت في مليون فكره خلال الدقايق اللي وقفوا فيها قدام محمد

عقاب لف يناظر محمد اللي مبتسم يهز راسه ورجع لف لمنيف وملاك اللي جامده وجيههم ونطق:عسى خير ياعيال مساعد ؟

لفت ملاك عليه تناظره وبلع ريقه منيف من لف عقاب عليهم

ملاك؛خير ان شاء الله

لفت لمحمد:حمدلله على السلامه

محمد ضحك وهز راسه؛اي اي مسافر ، كنت مسافر

ثنيان لف على محمد وبلعت ريقها ملاك تمشي له ومدت كفها:شلونك ؟

ناظرها محمد وابتسم يصافحها وهو جالس:انتي ادرى

شدت على كفه تناظره بنيران وغضب بحريق يشتعل داخلها من خوفها والرعب اللي سكن صدرها

عقاب؛غريبه سلمتي عليه وهو جالس ياملاك

ملاك فلتت كفها وهي تناظر محمد ولاردت

محمد ابتسم يهز راسه ورفع سبابته يأشر على راسه وعقد حاجبينه ثنيان من حركته

وناظرت راسه ملاك وتماسكت تبلع ريقها وتنحني تبوس راسه وابتسم محمد يرفع عيونه لملاك ولف يناظر منيف؛تعال تعال اسلم عليك

ضحك محمد يأشر على منيف ولف لعقاب:هذا كان شيطان شيطان وهو صغير

تقدم منيف وانحنى يسلم على راس محمد وابتسم محمد:دايم كنتم تسلمون على راسي ، جعل من جابكم بالجنه

جلست بجانبه ملاك بالضبط تاركه كل فسيح المجلس وتجلس يمينه

وجلس منيف بعيد عنهم والتفت محمد عليها:زوجك وصل لين بيتي وعزمني ومارديته

لفت ملاك على ثنيان اللي ماسك سبحته ويناظرها ورفعت حاجينها؛والله ؟

رجعت تلف لمحمد اللي كمل:بس شكلك بلغتيهم اني رجعت من السفر عشان كذا جاني

ضحك يمسك كفها وناظرته ملاك بدون تبتسم حتى ولف محمد لعقاب؛كان ودي اجيب عيالي معي بس الله المستعان

لفت ملاك على منيف اللي جامد وجهه مو قادر يتدارك الموقف ولفت ملاك:انا ازورهم اكيد

محمد لف عليها:ممنوعه من الزياره انتي

ناظرته ملاك بصدمه وابتسم محمد:نسيتي ؟

ناظرها ثنيان ولف عقاب يناظر منيف اللي جالس ورجع يناظر ملاك

اخذت نفس متقطع ملاك وشدت على كفه وابتسمت:لا ماعليك انا براضي شادن وبترضى ومابزعلها مني مره ثانيه

محمد ضحك من ملاك وخوفها وربكتها وحالها بعد ماشافته:كم اخذتي مهر منهم ؟

تنحنح منيف يمسك ياقة ثوبه بإختناق وناظرته ملاك بحده وابتسم محمد ولف لعقاب:طلبت مليون ؟

عقاب ناظر ملاك اللي ناظرته ورجع ناظر محمد:لا

محمد لف بصدمه يضحك:طلبتي اكثر ؟

ملاك رفعت يدها تحك جبينها برجفه من الوضع وناظرها ثنيان كيف تتنافض اطرافها ومتوتره

ونطق عقاب:اقل اقل

محمد هز راسه ورفع عيونه على منيف اللي ميل راسه من طالع فيه وكأنه يقوله خلاص ، اترك اللي قاعد تسويه

ملاك لفت لمحمد:اكيد انك تعبان وماقصرت على زيارتك اكيد بأول وقت افضى فيه بزورك

وقفت عشان يوقف ويخرج من المكان ويترك اللي قاعد يسويه

ووقف محمد وابتسم:دام هذا رايك

ملاك ظلت واقفه تناظره ولف محمد من وقف عقاب وابتسم له:يقولون ان يدك سخيّه ياعميد ومجالسك مشرّعه لقبيلتك ولغير قبيلتك وما تقصر ببياض الوجيه ومجلسك مدهوك من زحمة طوال الاعمار

لفت ملاك تستنجد بمنيف من فهمت مقدمته ووقف منيف:الله يسلمك ياعمي ويطول بعمرك والله ابرك الساعات

محمد:اصبر اصبر انت

تلفتوا عقاب وثنيان من الوضع الغريب ومن اسلوب محمد معهم

لف محمد لعقاب:بغيتك بموضوع تساعدني فيه وما بتقصر

لفت ملاك بخوف وهي تتنفس برعب وهز راسه عقاب:نعين ونعاون لا تردد

محمد:منصور ولدي مـ

دفت برجلها الطاوله ملاك وتناثر قزاز الطاوله على الارض يقطع كلام محمد وعقد حاجبينه عقاب من الصوت العالي وتقدم بسرعه ثنيان ورفعت عيونها من تقدم ثنيان وناظر عيونها اللي تشتعل من دموعها ومن صوت انفاسها ورجفتها وعقد حاجبينه

تقدم عقاب وهمس:انكسر الشرّ

لف محمد بصدمه ولفت عليه ملاك بغضب وقل صبر:توكل

رفع عيونه ثنيان من سمعها وسكت بهدوء عقاب يناظرها وناظر محمد اللي احتدت ملامحه وهز راسه وكأنه يهددها ومشى يخرج من المجلس

وجلست ملاك على الكنبه تناظر القزاز بالارض ومسكت صدرها تتنفس

وتقدم عقاب:عسى ماصار لك شي ؟

منيف تقدم:ما انتبهت لها واخترعت ماجاها شي حمدلله

جلس عندها منيف ومسك كفوفها بقوه وناظر عيونها اللي حابسه دموعها ووجهها اللي يشتعل من احمراره:ماجاها شي

ناظرها ثنيان ورفعت عيونها عليه تحرقه بسهم اهدابها وعرف انه مسك نقطة ضعفها واسباب نيرانها ووصل للي يهدّ حيلها بكل لحظه

ناظرته من اكتشفت انه يجري ورا عمها وعرفت انه قد تهديده ووصل لقوله وفَعل وجلّس محمد بمجلسهم ودخلها عليه وكأنه يقولها تلعبين وتقدرين بكل مره تلعبين ، تشبين نيران ولَهب وبكل مره ما تنطفين ، انا موج وإنتي دايم لَهب والموج يطفي اللهب

هز راسه عقاب بهدوء:حصل خير المهم الكل سالم

دخل عقاب ينادي الخدم وبلع ريقه منيف يشد على كفوف ملاك اللي عيونها متعلقه بعيون ثنيان ونطق:ملاك

نزلت عيونها لمنيف وشد عليها:انقضت

هزت راسها بالنفي ومشى ثنيان يخرج من عندهم واخذ نفس منيف وجلس جنبها وهمس:وش جابه؟ هذا ليش جاي ؟

ملاك هزت راسها بالنفي بتكرار وهي ترجف واخذ نفس منيف:مايبي يتركنا ما يبي يفكنا حتى واحنا قاعدين نحفر عشان نطلع منصور

لفت ملاك تناظر منيف:قال منصور

لف من نزلت دموعها ومسك كفوفها اللي ترجف وتنفست برجفه تهمس:قال اسمه قدامي

منيف:حتى لو قاله محد بينتبه صدقيني وانا بصك باب عمي بيديني ولا بيقدر يرجع يلعب من جديد ، ما بيخرج موضوع منصور من سرّنا تفهمين ملاك ؟ انا معك ما بسمح لأحد يفضحك ويسدّ طريقك ولو من يكون

ملاك هزت راسها بالنفي:ما بيتركني ما بيتركني منيف

منيف رفع ذراعه على كتوفها لحضنه ومسح على ظهرها:تمادى ويبي يلوي ذراعنا لكن ما بيقدر ، ما بيقدر ملاك انتي تطمني ولا يلمس روعاتك احد ، انتي بأمان دامني معك

ملاك رفعت عيونها بخوف من فكرة انها تنكشف وهي بالبرّ وبعزّ ماهي مطمنه وواثقه

منيف:وسدي الباب على ثنيان

ناظرته ملاك وكمل منيف:قاعد ينبش وراك ملاك ، لا تتركين له باقي الطريق سهل او اتركي كل شي

بلعت ريقها ملاك وصدت عن منيف تناظر القزاز المنثور وكمل منيف:ماني تارك عمي بحاله بس انتي قدها ملاك واعرفك واعرف داخلك حتى لو انك غلط والله ما عمري بيوم بقولك غلط

لفت عليه ملاك تبكي وكمل منيف:وحتى لو اني ماني راضي لكني معاك لا تنسين

هزت راسها ملاك ومسحت دموعها تاخذ نفس ووقف منيف:لا تخوفيني عليك

هزت راسها له ومشى منيف يخرج

-

( جميع التشبيهات بحسابي بالاستقرام r_55shog , لا تنسون النجمه⭐️ )

تقدم عقاب يدخل الصاله وثنيان وراه وناظرتهم نوره:راح ؟

عقاب:راح

ناظره ثنيان وجلس عقاب ورفع عيونه لثنيان

ولفت أصايل من سألت نوره:اخو ملاك موجود بعد؟

هز راسه عقاب وخرج ثنيان ماشي لغرفته ولفت أصايل تقوم وتمشي لغرفتها

وقفت عند الشباك تحاول تشوف سيارته بالمواقف وشافتها

ابتسمت ولفت لكوتي تاخذها بحضنها:تعالي

خرجت ومشت تطلع من الباب وتمشي لين المواقف وحطت كوتي بالارض وهمست:خليه يشوفك

مشت تدخل الديوانيه وهي تراقب المواقف

خرج منيف من عند ملاك عاقد حجاجه معصب ويشتعل من غضبه ومسرع بخطواته وسحب باب سيارته يفتحه ونزل عيونه من سمع صوت قطوه

عقد حاجبينه يشوف كوتي عند سيارته ولانت ملامحه وتلفت بالمكان حوالينه

ونزل لكوتي ومسح عليها:ما تطلعك برا ابد ، كيف طلعتي ؟

ظل يناظر كوتي واخذها بحضنه ووقف وناظر السلسال برقبتها واخذ نفس ينطق:إخت النهار أفضل من يرعاك كيف خرجتي ؟

عقدت حاجبينها ولفت من نطق بأخت النهار وظلت تناظره لين مشى للبيت وابتعد

وحط كوتي عند الباب ودقه ومشى لسيارته

ركب سيارته وشغل الفلشر وانعكس ظل أصايل بالديوانيه وعقد حاجبينه يشوف ظلها وعرف انها هي اللي حطت كوتي وهي اللي متخبيه

ترك السياره مفتوحه ومشى لين الديوانيه ورجعت على ورا بخوف من لمحته يقترب للديوانيه

رفع كفه يبي يفتح الباب وظل يناظر ظلها وخطر بباله صعوبة الموقف اللي عاشه قبل شوي وكيف انه كان بلحظه قصيره بيكون خلف هذا الباب مطرود

رجع كفه وغمض عيونه يردّ خطوته ومشى يرجع للسياره يركب ويسوق يخرج من البيت

عقدت حاجبينها من خرج ومافهمت ليش تردد بالدخول وليه كان بيدخل معقوله انتبه لها او حسّ بوجودها

مشت تخرج من الديوانيه ومشت للبيت

اخذت كوتي اللي لقتها بالمدخل وطلعت لغرفتها فوق

'

وقف عند البيت بسيارته وظل يناظر البيت هو متأكد ان اللي شاف عيونها هي نفس العيون اللي قلبت حياته واخذت مليونين منه ومن امه

رفع ظهره من خرجت وحده منقبه من البيت وركبت مع سواق وحرك خلفهم

وقفت عند المستوصف ونزلت ووقف سيارته جاسر يطفيها وينزل

مشت للرسبشن:ابغى كشف عند دكتور عام

عطست بتعب ورجعت تتكلم ووقف خلفها جاسر ونطقت:اسمي شادن محمد

دفعت فلوس ولفت بتمشي وجمد وجهها من شافت اللي وراها

ناظرها جاسر وبلعت ريقها بربكه تمشي لداخل ومشى خلفها جاسر واخذت نفس بربكه وجلست بالإنتظار تنتظر دورها

وتقدم جاسر يجلس جنبها ورجفت من حسّت انها مكشوفه وجاسر عرف يوصل لها وعرفها ، وصبّت عظامها من رجفتها

رجع ظهره للخلف جاسر ونطق:سلامتك ما تشوفين شرّ ، عسى الايسكريم اللي عدم عبايتك راح ؟

ماردت عليه وهي صاده لقدام ولف لها جاسر يناظرها بحده:ما بعيد كلامي لك واسمعيه مني الحين احسن مما تسمعينه وانتي ورا زنزانه بالسجن

بلعت ريقها شادن بدون ما تلف عليه ونطق جاسر:خذي لك دواك اللي تبينه واطلعي لي انا برجعك لبيت اهلك وبتفاهم معك ومع اهلك وكل شي بفهمه ياشادن بنت محمد

لفت عليه شادن تناظره برعب وارتبكت بخوف وهي تناظره وهز راسه جاسر:مامن مهرب

شادن عقدت حاجبينها بصدمه ولفت من نادوا اسمها

لفت تناظره ووقف جاسر يخرج ورجفت بخوف وغمضت عيونها بصدمه ووقفت تدخل للدكتور

'

فتحت باب الغرفه ولف ثنيان يناظرها تدخل وصد يفصخ شماغه ويحطه على السرير

قفلت الباب وعينها عليه وتقدمت له توقف قدامه

لف عليها ينتظرها تتكلم لكنها كانت ساكته

انتظر دقايق من سكوتها ونطق:انبلع لسانك ؟

ملاك:انا ردودي مو بلساني

ثنيان هز راسه:اي بتسببين مشاكل اكثر لان ماعجبك موضوع عمك وكيف دخل حياتك من جديد

عقد حاجبينه ثنيان:تظنين ان في سرّ بهالدنيا مستحيل ينكشف ؟

سكتت ملاك تناظره وكمل ثنيان:ادري بيخرج شي من ورا عمك ذا وما بتركه وبجري وراه وادري ان علاقته ماهي زينه فيكم انا فهمت وابوي فهم

ملاك هزت راسها وناظرها ثنيان مستغرب سكوتها وهدوئها ونظراتها:ليه هاديه ؟

ملاك ناظرت عيونه واستغرابه بعيونه ونطقت بهدوء نفس هدوء الموج اللي أمامها:المفروض اكسر الشباك من جديد ؟

ثنيان هز راسه:اي لان اللي يخوف ماهو جنونك

ملاك سكتت تناظره ومشت بتتركه ومسك ذراعها ثنيان وغمضت عيونها ملاك بتعب وتقدم ثنيان منها يشوفها مغمضه عيونها وهمس:ليه ما خليتيه يكمل كلامه

فتحت عيونها ورفعت نظراتها لإتجاهه وعقد حاجبينه يشوف موج عيونها من دموعها

كانت تسمع صدى اسم منصور وهي تناظر ثنيان ولاقدرت تجاوبه ورفع عيونه ثنيان لعيونها بعد ما لاحظ ارتجافة يدينها ونطق بهدوء:ما حسيتك بارده الا مرتين هذي المره وبحضني بالعلا

رمشت وهي تناظره وكمل ثنيان:عمك اللي يقدر يطفي نيرانك ويخليك ترجفين ولا كأنك لهب ؟

ملاك رفعت كفها على صدر ثنيان اللي واقف أمامها من قريب وناظرت صدره ونطقت بغصه:كل ما ظنيت انك لقيت الأجوبه بتتغير الاسئله

سكت ثنيان ورفعت عيونها ملاك عليه وهمست:تسمع في ملاك خير من انك تشوفها

ثنيان:بتزيحيني عن طريقك ؟

ملاك نزلت كفها عن صدره ورفعت عيونها تتحداه وتحولت نظراتها لنفس القوه اللي يعرفها ثنيان وكأنه داس على طرف لها واشتعلت

ملاك:سلاحي ممتلي بالذخيرة

سكت ثنيان ولا فهم منها شي ولا توقع منها شي لانها انهدّت وشافها قدام عيونه تعصف بعواصف ومسك اللي يوجعها

مشت تاركته تدخل للحمام وخرج هو من الغرفه

مشى ولف من ناداه عقاب والتفت:هلا

تقدم عقاب له:تعال معي مكتبي

ثنيان مشى خلف عقاب ودخل عقاب المكتب وقفل الباب ثنيان

جلس عقاب ورفع راسه لثنيان:ليه ناديته ؟

ثنيان عقد حاجبينه:المفروض ما اناديه ؟

عقاب:من وين دورت عليه وناديته ؟ وليه تجري وراه؟

ثنيان:مافهمت ابوي انت ليه مو عاجبك موضوع اني وصلت لعم ملاك وابي اتعرف عليه ؟

عقاب:لانها ماتبي وواضح لك انها ماتبي ليه مصرّ تضغط عليها ؟

ثنيان:لان ابي افهمها ، ملاك باقي اسئله وابي اعرفها

عقاب:لا تجري ورا موضوع عمها

ثنيان:اذا عشان ملاك بس ! انا اسف واعرف كيف احل مشاكلي مع زوجتي واذا في اسباب ثانيه قولها لي

عقاب:انا قلت اترك الموضوع وبدون اسباب اقولك اتركه

رفع سبابته عقاب:شفتني كم مره عدتها ؟

سكت ثنيان يناظر ابوه ونطق عقاب:عمهم ماهو زين لهم ولا يبونه ولا عجبني ودام ملاك بكيفها طلعته من حياتها محد له الحق يرجعه

غمض عيونه بهدوء ثنيان وهز راسه:سمّ

خرج تاركه وتنفس من غضبه ليه ابوه مصرّ يدافع عن ملاك ويبعد عنها اي شي يأذيها ؟ ليه يعاملها احسن مما يعامله ؟

طلع الغرفه وعقد حاجبينه من شافها نايمه ، يرعبه هدوئها ويبي يسمع صوت افكارها وردة فعلها لكنها ملتزمه الصمت والهدوء وهذا يربكه

غير ملابسه وانسدح بجانبها يناظرها نايمه وظل يتأملها مرتاحه بنومتها ولا كأنها عصفت بمشاعرها قدام عيونه وشاف رجفتها وربكتها وتظاهر القوه اللي لبسته ومحاربتها بالمحاوله عشان يطلع عمها من المكان

نزل انظاره لعنقها الطويل وكتوفها العاريه من روب نومها ورجع يناظر وجهها وكأنه لأول مره يطيل بالنظر فيها ، ولأول مره يعترف انها تاخذ من اسمها نصيب بنومها الهادي وملامحها الهاديه من نومها

نزل عيونه لثغرها اللي لطالما كان مبتسم دايم يظهر أنيابها

رفع عيونه يتمعن فيها ولا يدري ليه الغرق فيها ماله نجاه ؟ ليه الى الان كل ما زاد عمقها داخله تزيد الاسئله حوالينها ؟ كل ما غلب سؤال ولقى له جواب زادت اسئلته اكثر

غلبت كل الحدود اللي كان راسمها ثنيان ، غلبت كل سرّ كان أقوى من انه ينتشر بالإفصاح ، غلبت الخارج الهادي بالداخل المحترق ، مره نار ولَهب ومره أقوى من زمهرير الصقيع ، كان يظن ان السرّ اللي قضاه مع جواهر هو أشد ذكرياته لكنه الحين يعيش حاضره مع ملاك اللي فاق شدائد حياته

دخلت في حياته عرض من أضيق أبوابه وتمردت وقالت وطالت وفعلت ، وده ما ترفض الاسئله وتفتح له محطة عبور لكل الاسئله اللي تسكنه ، وده تفك شراعها في بَحره وموجه وتنثر كل لَهبها وتخلي الماء يغسل داخلها ، ولو بقى للهيل صبر على فوح الدِلال ! مابقى داخله صبر على فضوله لها ، وده ينزع من داخلها كل أسباب هالنيران ويفهمها ويعرفها ويكشف سِترها

يراقبها نايمه على المخده بجانبه عباره عن دوامة اسئله ومدارات وأقواس هدّت حيله وذبحته وهو حيّ أشغلت هوجاسه وهو ما يهوجس كثير

يتكرر عليه كل شي حاربت بكل قوه انه يصير وصار ، يذكر كل انتصاراتها وشرّها اللي أقوى من إسمها ويذكر بكاها بحضنه بليله بارده مستحيل ينسى فيها دفى حضنها من نارها

اخذ نفس من طالت هواجيسه وطال تفكيره وتأمله فيها ولف يطفي الاضاءه وينسدح

'

قام من نومه وهي لا زالت نايمه لف يناظرها ودخل ياخذ شاور ويلبس ويخرج من الغرفه

نزل وابتسم من سمع اصواتهم بالخارج

خرج يشوفهم متجميعن بالحوش يفطرون وناظرته نوره:هلا أمي هلا

ثنيان:وش خلاكم تفطرون اليوم هنا ؟

نوره:مزاج ابوك

ابتسم يجلس يفطر ولفت أصايل على سارا اللي تلعب مع كوتي:لا ينقطع سلسالها سارا

نهار:خليها تقطعه فداها وانا عمها مليون سلسال

لفت أصايل:اذا كان لك طبعاً بس السلسال يخصني

جاسر تكلم وهو يفطر:نجيب لها أم قريب وبتنشغل عنك وعن قطوتك

لفوا عليه وناظره عقاب:وش سويت ؟

جاسر هز راسه:قريب بخليك تخطب لي وحده

ناظرته أصايل بصدمه:احلف !

جنى:اوميقاد !

ساري:من بنته ؟

نوره:من وين عرفتها ؟

نهار:وش هالسرعه ؟ امداك تنقي ؟

ثنيان عقد حاجبينه:تدري بالسالفه ؟

جاسر ناظرهم:اي سؤال اجاوب عليه ؟

عقاب:كلها

جاسر:بجاوب بس عطوني وقت

سكت عقاب ولفت نوره تناظره:عساها بس تكون نفس ما نبي ونختار ، مثل ملاك وجنى

حك حاجبه ثنيان من طاريها ورفع عيونه عقاب:وينها ملاك ؟

ثنيان:نايمه

نوره:غريبه العاده معاك ما تخليك ابد

ثنيان مارد وهو يفطر

ولف ساري من ضرب الكوره حمد على اتجاه طاولته وشاتها ساري:ابعد بعيد حمداني

ابتسم ثنيان يضحك من حركات حمد مع الكوره ووقف نهار ببدلته يلعب مع حمد

ووقف ثنيان:ناولّي

ابتسم نهار يناوله وجلسوا يلعبون مع حمد ووقف جاسر يشيل سارا على كتوفه ويلعب معهم

وابتسمت نوره تناظرهم:اسم الله على عيالي

'

تناظرهم من شباكها جالسين سوا يفطرون ويلعبون مع حمد وسارا ، توصلها اصواتهم وضحكهم ومناداتهم لبعض

مسكت دبلتها تلعب فيها وتناظر عقاب اللي جالس ونوره توريه شي بجوالها وتشوف جنى اللي على جوالها وباقيهخ يلعبون مع الصغار

حست من بعد امس انها لازم تحط النقطه بنهاية وجودها بهذي العايله وبهذا المكان

بدت تخسر كل شي بوجودها بينهم وبدت تضعف وبدأ ثنيان ينبش خلفها وييكشفها وبيذلها

وهي عزيزة شان وكبيرة نفس ويكسيها الكبرياء ما تصغر نفسها وهي كبيره ، ولا تمسك الوقت وهي الخيارات وماتبي يكشف الجرح وهي ستيره ولا تقي تحجّم الدرب وهي المسافات

مستحيل تسمح باللي صار وباللي ممكن يصير

ومستحيل تخلي ثنيان يكمل تنبيشه خلفها ويفتح اوراق ماضيها وسواد صفحاته

مستحيل بعد ماقطعا لدوب منصور الطويل كل هذي المسافات تترك احد يكشفها

مشت وهي لابسه عبايتها وكعبها وتقدمت لسريرهم وناظرت اصابعها اللي يتوسطها دبله ورفعت عيونها تستجمع قوتها وفصخت دبلتها وحطتها وناظرتها تتذكر وعدها له بعد كتب كتابهم ووفت بوعدها وهذي هي تترك له الشي الوحيد ، دبله

خرجت من الغرفه ونزلت وهي تلمس الدربزان اللي لمسته بأول دخولها للبيت خلف ثنيان

والان تلمسه بعد خروجها نهائياً من حياتهم تاركه خلفها فضيحه كبيره تزيح فيها ثنيان عن طريقها

لفت من وقفت بالاستقبال وناظرت صورة عقاب الكبيره بالمدخل ومسكت شنطتها بيدينها الثنتين تناظره ، تعرف تتغلب على الظروف المايله وفي عز الليالي الجارحه تداوي وان رفض قلبها وعاف الدرب فهو عاف ، تحس انها تركت ريحة رمادها بالبيت

ياما احترقت وسطهم ومحد يسمع صوت جمرها والحين ماتركت خلفها غير لَهبها بالمكان وديله

طلعت من البيت ووقفت من بعيد تناظرهم ولف عليها ثنيان اللي يلعب مع اخوانه ووقف يناظرها تناظرهم

ابتسمت نوره:صباح الخير ملاك ، تعالي افطري

ناظرتهم بجمود تتأمل قعدتهم وتشوف نظرات عقاب لها وسكوتهم ينتظرون ردها

وعقد حاجبينه ثنيان من لفت تناظره بنظرات ما فهمها وظلت تناظره بهدوء بارد ما لاحظه من قبل عليها

مشت بدون رد تركب سيارتها وهمست نوره:بسم الله

جنى:وشفيها ؟

أصايل لفت لثنيان:مزعلها انت ؟

لف ثنيان يناظر عقاب اللي يناظره ولف من خرجت ملاك من البيت بسيارتها

مشى ياخذ جواله ومفتاحه:بروح دوامي

نوره:ما بتشوف ملاك وش فيها ؟

مارد عليها ومشى يتركهم ويركب سيارته

نوره:الله يهدي النفوس وش صاير بينهم ؟

نهار:تصير تصير

أصايل:اول مره اشوف ملاك كذا

جنى:حتى انا استغربت

عقاب:امس عمها كان موجود هنا

لف جاسر على ابوه وكمل عقاب:والظاهر ماكان زين لهم وباين عليه ما بقلبه حنيّه وشكلها ما تمنت يجي وتشوفه

جاسر لف يناظر مكان سيارة ملاك بهدوء

وتنهدت نوره:الله يعوضها زعلت والله ان عمها طلع بالسعوديه ولا حضر زواجها

أصايل:بعني كانت تخبي الموضوع ؟

عقاب رفع كتفه:الظاهر

'

دخلت مكتبها وجلست على الكرسي وطلعت كل الصور اللي بجهازها وطبعتها واخذت شيك جواهر الموجود بمكتبها وحطت كل الصور بعد ما طبعتها بظرف بني وناظرت الصور بجهازها تتأملها

ماتبي تاخذ وقت اكثر وتقكر بالموضوع هي قررت بسرعه هالقرار مافكرت بولا شي آخر غير نفسها وبس

ما توقعت انها بتصير وبتسويها وتعرف انها بتحرق الدنيا حرق وبتدمر كل شي لكن هذا حلّها الوحيد وردة فعلها على تنبيش ثنيان خلفها

تعبت معاه وخلاص صار لازم تتصرف وتسكت صوت ضميره اللي دايم يعذبها فيه

اخذت الظرف وخرجت من المكتب وركبت سيارتها وحركت وهي تمشي وساهيه

وقفت عند البيت وانفتحت البوابه لها ودخلت وسط البيت ونزلت بشنطتها والظرف

ودخلت من فتحت لها الخدامه ونطقت:قولي في ضيف يبغى يشوف ابو راشد

مشت الخدامه تدخل واخذت نفس ملاك تقوي نفسها ورفعت عيونها من نطقت الخدامه:تفضلي

مشت بكعبها وشنطتها والظرف بيدها وتقزمت تدخل لهم

ورفعت عيونها جواهر بصدمه وعقد حاجبينه ابو راشد

وجمد وجه ام راشد من شافتها

وابتسمت ملاك تناظرهم:صباح الخير

نشف الدم داخل جواهر وهي تناظر ملاك واقفه

وقف راشد بيغادر المكان ورفعت ذراعها:لو سمحت خلك موجود بغيت اتكلم معكم بموضوع مهم والكل لازم يكون موجود

ابو راشد عقد حاجبينه بإستغراب

ووقفت ام راشد بخوف:وش جابك انتي ؟

ملاك رمت الملف على الطاوله قدام ابو راشد:اذا ما تعرفني ياعميد بندر ، انا ملاك بنت مساعد زوجة ثنيان ولد العميد عقاب

عقد حاجبينه ابو راشد:وش تبين ؟

ملاك:المفروض تسأل جواهر هالسؤال

جواهر وقفت:اطلعي برا

تجاهلتها تماماً ملاك ولفت على ابو راشد:الظرف هذا فيه صور بنتك مع ولد العميد زوجي اللي متزوجها بالسرّ سنتين كامله

جلست ام راشد تمسك ركبها وجمد وجه جواهر برعب تناظر ملاك ولف راشد بصدمه يناظرهم

عقد حاجبينه ابو راشد وفتح الظرف يناظر صور بنته وثنيان وسوّد وجهه من صدمته

كملت ملاك بهدوء:وهذا شيك من بنتك عطتني اياه عشان اسكت عن الموضوع بعد ما كشفته

جواهر جلست تحس ان اقدامها بترت من خوفها ومن اللي تسمعه

وكملت ملاك:والله يقويك على اللي بتسويه

لفت لراشد تناظره ورجعت تناظر وجيههم:في أمان الله

مشت تخرج من البيت تاركه البركان ينفجر خلفها وركبت سيارتها تعلن انتصارها وحركت تخرج من بيتهم

مشت لين بيتها ووقفت من شافت سيارة منيف ونزلت تفتح البيت وتدخل فصخت عبايتها ودخلت تشوف منيف اللي بالصاله يفطر ورفع راسه بصدمه:ملاك ؟

ملاك:كويس لحقت فطورك

جلست جنبه وناظرها منيف مذهول:وش جابك؟

ملاك:رجولي

منيف:ثنيان معك ؟

هزت راسها بالنفي واخذت الخبز تاكل:معد في ثنيان

منيف عقد حاجبينه:ليه ؟ وش صار ؟

لفت ملاك وهي تاكل:مو قلت لي اشغليه ؟ شغلته بموضوع صغير لا تقلق

منيف:وش سويتي ؟

ملاك:قلت لك اشغلته بموضوع بسيط

منيف اخذ نفس بتعب وتكلمت ملاك وهي تاكل:افطر كويس باقي بنروح نزور عمنا الحنون ونرد زيارته

منيف:كنت بروح لهم

ملاك:ما كنت بتنتظرني ؟ افا منيف

منيف:ماقدرت انام امس اقسم بالله مو قادر اتقبل اللي قاعد يسويه لنا واحنا قاعدين نطلع ولده له

ملاك:تقبل تقبل كل شي من عمك هذا بيجحدنا ان طلع منصور اصلاً

منيف تنهد ورجع ظهره لورا وشربت شاهي ملاك بهدوء

'

رجع من دوامه ثنيان ووقف سيارته ولا لقي سيارة ملاك عقد حاجبينه ونزل ومشى يدخل البيت

سمع اهله يتغدون وتقدم:سلام عليكم

نوره:وعليكم السلام هلا أمي ، تعال وناد ملاك تجي تتغدا

ثنيان:هي بالبيت ؟ سيارتها مو في

عقاب:مارجعت ؟

رفع كتفه ثنيان بإستغراب وطلع جواله:بغير واجي

مشى يدخل الغرفه وهو يتصل عليها ولا ردت

حك جبينه يرجع يدق عليها مره ثانيه وجلس على السرير ونزل عيونه من طاح على الارض شي

وعقد حاجيينه يشوفه خاتم انحنى ياخذه وجمد وجهه من شافه دبلة ملاك

استرجع كل كلامها ووعودها بإنها اذا بتروح الشي الوحيد اللي بتتركه هو دبلتها

انصدم ولف من سمع صوت الصراخ برا وعقد حاجبينه ومشى للشباك ووقف

وجمد وجهه من شاف بندر ومعه راشد وبندر شايل مسدس بيده وينادي على عقاب

سوّدت الدنيا بعيونه وعرف ان ملاك سوتها ، ملاك رمت قنبله قدام طريقه لها ومو أي قنبله كارثه بتهدم كل حياته

شدّ على دبلتها وهو يشوف بندر يدخل البيت وراشد معه وجلس على السرير وبلع ريقه يجهز نفسه للمشهد اللي ما توقع انه بيصير ابد

رفع عيونه يناظر المرايه وهمس:بيكون الرد أقسى يابنت مساعد

فتحت الباب أصايل وهي تركض:ثنيان الحق بسرعه

لف ثنيان عليها ودخل نهار وعقد حاجبينه:بندر تحت يقول انك متزوج جواهر بالسرّ بيهد الدنيا ثنيان

مارد عليهم ونزل عيونه لدبلة ملاك وحطها بجيبه ووقف

نهار:قول انه غلطان تكفى

ثنيان هز راسه بالنفي وشهقت أصايل وغمض عيونه نهار وخرج ثنيان

نزل تحت وبلع ريقه وهو يمشي ويسمع صراخ بندر بالمجلس

عقاب ناظره بحده:حط المسدس وابعد الشيطان ، نتفاهم بالكلام

بندر:ناد ولدك لي الحين ، اخلص طلعه قدامي

جاسر مسك ذراع بندر:عمي استهد بالله واذكر الله وبنتفاهم الحين وبنفهم كل شي

راشد:الكلب اخوك له سنتين مع اختي وياخذها من بيت اهلها بالخش والدس اي تفاهم تتكلم عنه ؟

ساري:مستحيل وما يسويها ثنيان

بندر رمى الظرف عليهم:وهذا وش ؟ طالع بعينك ياعقاب شوف رباتك

اخذ الظرف عقاب من الارض وناظر الصور وجمد وجهه

ودخل ثنيان ولفوا عليه ورفع ذراعه بندر ودفعه جاسر واطلق بجدار المجلس وصرخ ساري يهديه:فك المسدسد فك الفرد

دخل نهار بصدمه يصرخ ويحاول يهدي الموضوع ولعتلت اصواتهم وسحب المسدس نهار من كف بندر اللي يصرخ بأعلى صوته:والله لأقتلك والله ياولد عقاب

لف عقاب يناظر ثنيان وبلع ريقه ثنيان يناظر نظرات ابوه

ساري:اقعد

جلس بندر وناظرهم راشد:مسّ شرفنا واخذ كلمة ابوي بالجدار ، من هو ياخذ اختي غصب عنا ويتزوجها بالسرّ ؟ منهو ؟

جاسر لف لثنيان يناظره ساكت ورفع يده بندر وهو يهدد:بعدم حياتك ياعقاب انت وعيالك ، والله لأخرب حياتك كلها

مارد عقاب وهو شاد على الظرف ولف ساري:يمكن مركبين الصور يمكن ماهو حقيقي

بندر لف يناظره:الصور هذي جاتني من زوجة اخوك ، جابتها وقالت ان زوجها مع بنتي من سنتين ، من سنتين ياعقاب ؟

غمض عيونه ثنيان ورفع عيونه عقاب وهمس:ملاك؟

عض شفته نهار من الوضع وهز راسه عقاب:مالك اللي يرضيك يابندر

بندر:اي اللي يرضيني هذا شرفي ياعقاب شرفي

لف عقاب على ثنيان:اذلف

ناظره ثنيان بتوتر ولفوا العيال عليه ورفع صوته عقاب:اذلف

تنفس بغضب ثنيان وخرج من المجلس وتقدمت نوره:وش السالفه ثنيان ؟

مارد عليها وخرج من البيت ومشى جاسر وراه وناظرتهم نوره:وش السالفه وش صوت النار ؟

جاسر:ماصار شي ماصار شي

لحق ثنيان يناديه وركب سيارته ثنيان ومشى جاسر وفتح الباب

رفع صوته ثنيان:وخر جاسر

جاسر:انت معصب وبتأذي نفسك وتتصرف بدون وعي الحين انزل لين تهدأ

ثنيان لف عليه:والله ما اخليها والله ما اخليها

جاسر:طيب ياخي انزل نتفاهم بالديوانيه

ثنيان:طردني ابوي طردني وين اقعد ؟

جاسر:اجل اصبر اركب معك

ثنيان:جاسر مو طايق نفسي انزل

مارد جاسر وركب جنبه وقفل الباب بقوه ثنيان وحرك يطلع من البيت

دق جاسر على ساري ورد ساري:هلا

جاسر:وش الوضع ؟

ساري:مدري ابوي طردنا وقعد مع بندر لوحدهم

تنهد جاسر ولف لثنيان اللي عاقد حاجبينه بغضب وهو يسوق وهز راسه:اسمع ان صار شي جديد كلمني انا مع ثنيان

ساري:طيب

جاسر:وطمن امي واللي داخل ترا ما امداني اقول شي

ساري:انا عندهم

هز راسه جاسر وقفل ولف لثنيان:وين رايح؟

ثنيان:للشيطان

جاسر:لا تروح وقف عند البحر خل نتفس وتهدأ

ثنيان لف عليه بعصبيه:اي هدوء ياجاسر فضحتني ودمرت حياتي مع اهلي وبشغلي وسمعتي

جاسر:طيب وقف بالله ثنيان وخلنا نتكلم ، خذني للشاليه حقك نتكلم هناك

مارد ثنيان ولف للطريق وهو يتنفس بسرعه من غضبه

'

راكبه جنب منيف ويسوق وهي هاديه تناظر الطريق

وقف عند بيت عمهم ونزلوا يمشون سوا ووقفت عند الباب ملاك:لا تدق

طلعت المفتاح من شنطتها وفتحت الباب ودخلت تفصخ حجابها وتمشي تدخل

دخلت الصاله ولفوا بصدمه عليها وناظرت شادن:منيف معاي يابنت عمي تغطي بشي اذا تبين الستر

ناظرتها بصدمه شادن ونطق محمد:وش جابكم؟

ملاك مشت وجلست على الكنب وقامت شادن تدخل ودخل منيف يجلس قدام ملاك

منيف:بنرد الزياره ياعمي

محمد ابتسم:بعد ما طردتني اختك ؟

ملاك:تستاهل الطرده ، كنت بتشحذهم فلوس لمنصور ؟

محمد:ما اشوفك سددتي منها شي من فتره ، قلت يمكن جاز لك وضعك مع ولد العميد ونسيتيه

ملاك:تعبت طول عمرك عشان تخليني انسى منصور والحين ما تبيني انساه وتبيني اكمل اسدد الديه ؟

محمد رجع ظهره لوراه:شادن علمتني

ملاك:ويوم عرفت طمعت اكثر ؟

محمد:بتذلينا انتي كل شوي انك سددتي الديه لوحدك ؟

ملاك:ابشرك ولد العميد اللي موترك بحياتك بيطلقني قريب

دخلت شادن على جملة ملاك وناظرتها بصدمه

وكملت ملاك:وبيجيني مؤخري وبتتقفل الديه ان شاء الله

لفت وفاء على محمد ورفع عيونه منيف لملاك بصدمه

شادن:كيف يعني بتتطلقين ؟

ملاك رفعت عيونها:انا أنتظر منصور يابنت عمي ومستحيل ارتبط بشخص غيره

محمد:منصور معد يبيك

ملاك:يبيني ومحد يغير هالشي

محمد:هو اللي منع الزياره ماهو أنا

سكتت ملاك ونطق منيف:بتكذب عندنا نفس ماكذبت عند منصور ؟

محمد:منصور معد يبيك وانصحك اطلعي من حياته قبل يطلع للحياه

وقفت ملاك:اطلع انت من حياتنا ، انا شقيت بالدنيا ودخلت بالظلام وانا أطهر من صفاء الماء وأذّيت نفسي قبل ادخل وأذي ناس مالهم ذنب عشان منصور ، ماهو بكيف احد يمنعني عن منصور حتى اذا كان منصور نفسه

تقدمت ملاك له؛انا دخلت ببيت رجّال يناديني بنتي وعشت معهم وأكلت معهم وانا اسرق من فلوسهم واهدم امانهم وازرع روعاتهم ، اخذت ٢١ مليون وكنت عايشه بخوف وتأنيب ضمير يكويني وزارع داخلي نيران مو عشان بعد هذا كله يجي منصور وينتهي كل شي هو يكسب حريته وانا اكسب عذابي

ناظرها منيف ولف لمحمد اللي ساكت عكس حالاته اللي دايم يشوفونه عليها واستغربه ، استغرب سكوته وهدوئه

محمد:لا تكملين دام تسمينه عذاب

ملاك عقدت حاجبينها:ماتبي ولدك يطلع لك ؟

محمد:بحل اموره بنفسي انا

ملاك:ماقدرت تحلها من بدايتها بتحلها الحين ؟

محمد:ولدي بيطلع بس مابي احد يمنّ عليّ وعليه

ملاك:أمنّ ؟

منيف وقف:ملاك ما استفدنا شي الظاهر من الجيّه

ملاك ناظرتهم وتقدم منيف ومسك ذراعها ولف لهم:ماربطنا فيكم الا منصور وان خرج منصور معد بيربطنا شي فيكم

مارد محمد وناظرتهم ملاك ومشوا يخرجون سوا

وركبت السياره ملاك بتعب وركب جنبها منيف وحرك

حطت راسها على الشباك بتعب هي كل ما حاست الدنيا وحرقتها ترجع أضعف وبعد كلام عمها لها صارت أشد ضعف وهَزل

غمضت عيونها تفكر في بيت عقاب ووش ممكن صار فيه بسبب اللي سوته ، ماتبي تفكر عشان ما تحس بتأنيب الضمير ماتبي تاخذ وقت اطول بخطواتها عشان ما تتردد فيها

نزلت عيونها لكفها وأصابعها الخاليه من الدبله ورجعت ناظرت الطريق

'

جاسر دخل الشاليه مع ثنيان وجلس وناظر ثنيان:ليه ما تكلمت معي ؟

ثنيان اخذ نفس:جاسر تكفى لا تبدأ تلومني انت بعد

جاسر:ما اتكلم عن جواهر اتكلم عن ملاك

رفع عيونه ثنيان ونطق جاسر:هي اللي هددتني انا وامي وانت تدري

عقد حاجبينه ثنيان:شلون عرفت ؟

جاسر:بنت عمها شادن قالت لي

سكت ثنيان بصدمه وكمل جاسر:ضغطت عليها وعلى ابوها وامها واعترفت وقالت انها هددتني لان ملاك تجري ورا الفلوس

انصدم ثنيان وهمس:عشان وش ؟

رفع كفه جاسر:ما ادري ولا قالوا شي ولا يعرفون

ثنيان:ابوها وش قال ؟ تكلم عن شي ؟

جاسر:اقولك دخلت بيتهم وهديت عليهم الدنيا وقلت بتصل على الشرطه لكن ما عطوني مكان للفلوس اللي تاخذها ملاك

ثنيان:يعني ملاك هي اللي تسرق ؟ هم مالهم شغل ؟

جاسر:هذا كلام بنت عمها

سكت ثنيان بإستغراب يصد ونطق جاسر:دخلت وحده بالبيت سرقت منا ملايين ومستغرب انها فضحتك ؟ اقولك عمها اللي رباها تبرأ منها وقالي انها سرّاقه تنهب الناس

ثنيان سكت بصدمه وكمل جاسر:وملاك ذي فضيحتها على يدي اذا انت ماقدرت عليها انا بقدر عليها

ثنيان رفع عيونه على جاسر:تحسب انا ماقدرت عليها ضعفه فيني ؟ البنت ذيب وسط ذيابه ما تفهم وش سوت ووش تقدر تسوي ولا عندي دليل يرميها ورا السجن ماتفهم ؟

جاسر:افهم افهم وانا بتزوج بنت عمها واعفس حياتهم

لف ثنيان بصدمه:تستهبل ؟ تستهبل جاسر ؟ بتجيب لنا وحده ثانيه نفس ملاك بالبيت ؟ ماتشوف حالي ووضعي من دخلت ملاك حياتي؟ انت بتحاربها كذا يعني ؟

جاسر:اي احاربها ببنت عمها وعمها ودامها سنين خبتهم عنا انا اجيبهم وسط بيتنا

ثنيان سكت يناظر جاسر اللي يتكلم بتحدي

جاسر:بتمثل التثميليه بنت عمها قدام الناس شهر ، بتكون زوجتي وهي ام عيالي وبعدها بطلقها مقابل اني اسامحهم على اللي اخذوه غصب

ثنيان ناظره بجنون:حمار انت جاسر ؟ انت تحسبهم بيخلونك كذا ؟ والله ليزرفون كل حلالك والله ليهددونك انت ويمسكون عليك اصغر شي ، انا ما فضحني غيرهم هم اللي سووا كل شي وخربوا حياتي

جاسر:انا اذكى منهم وما بسمح لها تسرق شي ولا تهددني بشي لاوي ذراعها بتسجيل صوتي وهي تعترف انها ساعدت ملاك بالسرقه

ثنيان جمد وجهه:سجلتها ؟

هز راسه جاسر وطلع جواله يشغل الصوت وحطه بينهم

شادن:انا مالي شغل كل اللي سويته ساعدت ملاك باللي تسويه كانت ترسلني اصور الناس ببيوتهم وبعدها هي تهددهم انا مالي شغل ما اعرف رقم حساب للبنك ولا ليش تسوي كذا ، خلاص تكفى امي وابوي انضغطوا من وجودك تبي تسوي شي سوه وفكنا

جاسر:وملاك ليه تسوي كذا ؟

شادن بلعت ريقها:ما اعرف اسألها هي

جاسر:ومقابل وشو تشتغلين معها ؟

شادن:بدون مقابل ما يجيني ريال اساعدها لانها عاشت معنا وأعزّها بس

جاسر:حمار انا عندك ؟ تعزينها وتسرقين معها ملايين وما تاخذين منها شي ؟

شادن:صدقني ما اخذت شي والله ماعندي ريال واحد من اللي سرقته ملاك

جاسر:ومن يدري بالموضوع ؟

شادن:زوجها ثنيان ، اخوك

جاسر:يدري انها تسرقنا ؟

هزت راسها شادن:من قبل ما يتزوجها ويخطبها ابوك لها

جاسر:الموضوع دام وصل لي ما بينتهي

محمد عقد حاجبينه بخوف:تكفى انا في وجهك لا يجينا شي من ورا ملاك ذي احنا مالنا شغل وشادن بنتي انجبرت وما اخذت شي والله ماجاها ربع ريال واحنا ماعندنا علم عن ملاك من زمن ولا كان عندي علم عن بنتي والظاهر انها انغصبت من ملاك وانا اصلاً تبريت من ملاك وطردتها بعد ما عرفت سواتها وسرقتها

جاسر هز راسه ونطقت وفاء:بنت يتيمه ما ربوها أم وأب كيف بتطلع ؟ اكيد بتطلق سرّاقه وتسرق الناس وتضحك عليهم

عقد حاجبينه ثنيان بذهول من كلامهم عنها ورفع عيونه لجاسر من قفل التسجيل يقطع حوارهم وعقد حاجبينه ثنيان وجلس مصدوم مذهول وتنهد جاسر يناظره

نزل عيونه ثنيان يسترجع كلام عمها وزوجة عمها عنها وهز راسه بالنفي:ما ادري في شي غريب ماصدقتهم ، كيف تساعد بنت عمها بدون مقابل وش مصلحتها ؟

جاسر حك حاجبه بتفكير:بيطلع شي اكبر من وراهم ادري

ثنيان ناظره:اذا عرفت ملاك انك بتتزوج شادن؟

هز راسه جاسر:اذا اكتشفت ان شادن خانتها بتطلع اسرار شادن هي بعد وبيفضحون وبيكشفون اوراقهم

رجع ظهره لورا ثنيان ونطق جاسر:لو علمتني كان حليناها مع بعض ياثنيان ولا صار كل ذا

سكت جاسر وصد ثنيان وهو يفكر

-

( لا تنسون النجمه ⭐️ )

دخل مكتبه عقاب بعد سؤال نوره:وش صار ؟ كيف هدّيت الموضوع ؟

عقاب لف بعصبيه:كيف يهدأ الموضوع ؟ كيف اصلاً يهدأ ؟ وش يعني يتزوج بدون شوري وبنت بندر ؟ وش يعني يحطني بهذا الموقف ؟ وينقال اني ماعرفت اربي ؟

نوره مسكت راسها بصدمه وجلست

وضرب المكتب عقاب:ماعرفت اربيهم ، ولا واحد عرفت اربيه

نوره تنهدت بضيق وبصدمه من الوضع ولفت عليه:والناس عرفت ؟

عقاب:اكيد عرفت اكيد كل الناس تعرف سواة ولدك ، حط راسي بالارض بيقولون ولده تزوج بدون شوره وبدون رضاه وبالسرّ وزوجة بندر عدوه ومنافسه الوحيد وسـ

نوره مسكت راسها: بس بس خلاص تكفى راسي بينفجر

عقاب جلس على المكتب ودق جواله ولفت نوره:من ؟

ناظر اسم ملاك على شاشة جواله ورد بهدوء بدون يتكلم ينتظرها

ومسكت كوبها ملاك ترجع ظهرها لورا على الكنبه:مساء الخير عميد عقاب اكيد وصلك الموضوع والوضع اللي حطني فيه ولدك ، وانا مابي الشي الكثير ابي اسلم من كلام الناس

سكت عقاب يسمعها وكملت ملاك:ورقة طلاقي

عقاب غمض عيونه بتعب:ماهو كذا تنحل الأمور ياملاك

نوره ناظرته:هذي ملاك؟

هز راسه ونطقت ملاك:انا أموري كذا حلها ، متى ما حسيت اني بديل وماني الأوله أغض الطرف وامشي واعتبره جرح سطحي ياعميد عقاب ، ولدك قلبه تملكه بنت غيري وانا ماهو طموحي اسرق شي ماهو لي

نزل عيونه عقاب من ختام جملتها وهز راسه:يعني تبين الطلاق ؟

غطت فمها نوره وابتسمت ملاك:اتمنى

عقاب هز راسه:الله يعين

قفلت جوالها ملاك وناظر المكالمه عقاب ومسكت راسها نوره:وش طلاقه ؟ بيخرب بيت ولدي وهو ما تهنى ، توّه عريس ياويلي ياثنيان ياويلي يا أمي

عقاب:اتركيني لوحدي نوره

نوره:وش بتسوي ؟ بتكلم ثنيان ؟ ما بتخليه يطلق صح؟

عقاب:نوره !

ناظرته نوره واخذت نفس وخرجت من المكتب واخذ جواله عقاب يتصل وانتظر الرد

اخذ جواله ساري ورد عليه:هلا ابوي

عقاب:خل ثنيان يجيني

ساري:ثنيان مع جاسر

عقاب:سألتك وينه ؟ قلت خله يجيني

ساري ناظر جنى اللي قدامه ونطق:سمّ

قفل وناظرته جنى:شصار ؟

ساري:الله يستر يبي ثنيان

جنى غطت فمه:اقبعت ياساري ياويلي اكيد بيتبرأ منه

ساري:اسكتي جنى عندك كلمه زينه قوليها ماعندك اسكتي

سكتت جنى تناظره ووقف ساري وقبل يطلع لف عليها:لا توصلين السالفه لاهلك بعد ما اطلع تفهمين ؟

جنى:اكيد وصلت السالفه ياساري اصلاً

ساري تنهد بتعب وخرج من الغرفه

'

ثنيان دخل البيت وهو مخنوق ويحس بالضيقه والخوف من بعد ما طلبه ابوه

شد على كتفه جاسر ومشوا يدخلون ووقف ثنيان بالصاله يناظر ابوه وامه وأصايل ونهار وساري

وعقدت حجاجها نوره بضيق:ليه يا أمي ليه ؟

مارد ثنيان وناظر ابوه اللي يراقبه

عقاب وقف بهدوء وتقدم لثنيان اللي بلع ريقع يناظر نظرات ابوه له

عقاب:انا يوم ربيت ربيتكم على ان اسم عقاب بن جرّاح عالي ولا ابي شي يطيحه بيوم بالأرض ، ويوم غلط جاسر حلفت يمين وقلت بتبرأ من اي احد يحاول يضيع تعبي وشقاي على اسمي واسم عايلتي

نوره غطت فمها تصد بقهر على حال ولدها

وحط نهار يدينه بجيوبه يشوف ثنيان واقف

عقاب:وهذا انت غلطت وغلطه كبيره مالها عذر عندي

ثنيان:ابوي انت صديتني عن شي ماهو حرام ولا غلط ، شي كنت ابيه وبالحلال وقفت بوجهي وقدام قلبي وقلت لا

عقاب هز راسه:وروح تزوجها من وراي ، وخل ابوها يجي يسمعني كلام مثل السمّ ببيتي ويطلق نار على جدار بيتي

تنهد ثنيان يصد ونطق عقاب:وش بتبرر ياثنيان ؟ وش بتقول ؟ بنقعد لسنين قدام ما يتكلمون الا عن فضيحتك وما بيقولون الا ان عقاب ما يعرف يربي وحمار ما يعرف وش يسوون عياله من وراه

نطقوا سوا العيال:محشوم

عقاب لف عليهم كلهم:محشوم حشمّوني وحشمّوا اسمي وتعبي ، كبّرتكم لين صار الواحد اطول مني ، اشنابكم تارسه وجيهكم وللحين ما ارتحت ولا قلت هذا ظفرك ياعقاب صبرت وظفرت بعيال يرفعون اسمك ويزيدونك شيخه فوق شيختك

بلع ريقه ثنيان ينزل راسه بضيق ما بيده يقول شي اكثر ولا يبرر ولا يعرف كيف يحل الموضوع

عقاب:والحين زوجتك تبي الطلاق

رفع عيونه بصدمه ثنيان وكمل عقاب:اكيد وش تبي فيك وانت خاينها ومو مقدرها ، فضحتك هي بنفسها وتبي الطلاق عشان تقعد بفضيحتك انت لوحدك

غمض عيونه بتعب ثنيان من جبروت ملاك وكيف استغلت الفضيحه لصالحها وطلبت المؤخر اللي كان حلم لها من بداية الزواج

عقاب:تبي تشتري رضاي ياثنيان ؟

رفع عيونه ثنيان بصدمه من سؤال ابوه:اكيد ابوي

عقاب:ملاك ترجع للبيت وما تخرج من ذمتك

تغيرت ملامح ثنيان بغرابه من طلب ابوه وتمسكه في ملاك برغم حجم المشكله وكلام الناس هو لا زال يتكلم عن ملاك

نوره ناظرت عقاب بإستغراب ولفوا العيال على ثنيان اللي يناظر ابوه:وليه ملاك وصل العفو بيني وبينك ؟

عقاب:هذا شرطي انت مستحيل تقعد ببيتي بدون ملاك

ثنيان:ملاك شدخلها الحين في الموضوع ، انت تبي تعاقبني عاقبني تبي تحرمني احرمني ملاك مالها علاقه بالموضوع

عقاب:بتطلقها يعني ؟

سكت ثنيان من تذكر المؤخر وكمل عقاب:معناته لا اشوفك بالبيت الا وملاك معك ، عشان تسكت الناس ياحمار لازم تمسك بيتك وما تزيد الفضيحه فضيحتين ، عشان يقولون بيته ما أنهدم وزوجته ببيته وراضاها وزلّه وتعداها وبندر بنروح له ونحل الموضوع لكن بعد ما يهدأ شوي

سكت ثنيان بغضب يشد على قبضة يده

وكمل عقاب:والحين اطلع من بيتي ما تدخله الا وملاك معك

نوره:يا عقاب الطرد ماهو حلّ خله ببيته بيننا

عقاب لف:نوره !

نوره سكتت ولفت تناظر ثنيان اللي هز راسه وشد على قبضة يده:اعتبره صار

رفع عيونه عقاب يناظره:قدرت توصل لعمها وتجلسه بمجلسنا رغم انها مسكره بيبانه عنّا ، تقدر ترجّعها لبيتك من جديد

هز راسه ثنيان ولف لجاسر وشد على ذراعه:خلك انا اروح لوحدي

ناظره جاسر ومشى ثنيان يخرج من البيت لوحده

اخذ نفس بتعب يوقف عند الباب وغمض عيونه من ملاك واسم ملاك ووجود ملاك بحياته واسئلته حوالين ملاك ، واللي كل يوم بحياته يكتشف شي جديد عنها وسواد اكبر واسئله اكثر يحس ان الغضب ياكل من روحه من شدته

'

فتحت اللابتوب تناظر ديّة منصور قدام عيونها واخذت نفس بتعب

هي صدقت عمها رغم انه ما يقول الا الكذب

صدقت ان منصور هو اللي قفل ابوابه عنها وصدقت ان منصور ما بيرضيه اللي صار

لكنها بتتجاهل كل شي لأجل حريّته وبتتعب عشان تكمل الديّه وتقفلها ويخرج منصور وتشوفه موجود بحياتها من جديد

خرجت من صفحة الديّه وناظرت الملف اللي بلابتوبها وفتحته تشوفه منسوخ من لابتوب عقاب

عباره عن صك أرض تقدّر بأربعه مليون ، تبيها تبي الأربع مليون عشان تقفل الديّه بآخر ٤ ملايين بعد المؤخر اللي تنتظره

قفلت اللابتوب ولفت من دق جوالها وشافت رقم ثنيان بشاشتها وظلت تراقبه بدون رد لين سكت

رجعت راسها لورا وناظرت السقف هي نست ان ثنيان يحفر وراها ولاهي لوحدها بالظلام

نست ان ثنيان وصل لأغلظ حبل يوصله لمنصور

جاها اتصال بعد اتصال ثنيان وشافته رقم نوره ولاردت عليهم

هي مصرّه تجيها ورقة طلاقها ومحد بيلومها ولو حاول ثنيان يرفض هي بتطلب حقها بالطلاق وبتاخذه بسهوله بعد فضيحته

رفعت عيونها من جلس منيف قدامها وناظرها ورفعت كتفها:شفيك ؟

منيف:وبعدين ملاك ؟

تنهدت تصد عنه وكمل منيف:وبعدين ؟ انتي يعني تبين النهايه كذا ؟ تبينها حرب ؟ تبين تتحدينه اكثر ؟

ملاك:اي حرب ؟ خلصنا منيف انا وولد العميد مالنا خط رجعه ومستحيل

منيف:تحسبينه بيترك كل شي يعني ؟ لا تثقين واجد ملاك

ملاك:لا واثقه بيكرهني وبيتمنى اخرج من حياته اليوم قبل بكره

منيف:ومنصور ؟ وعمي ؟ وشادن ؟ باعوك وجحدوك ملاك مع انك دخلتي بطريق ما يرضيني انا ولا يرضيك جحدوك

مسكت راسها ملاك بتعب وغمضت عيونها وكمل منيف بقهر:اعرف منصور واعرف انه يستاهل العنوه لكن بنفس الوقت اعرف عقاب واعرف ثنيان واخوانه واعرف انهم ما يستاهلون الفضيحه اللي سويتيها

ملاك رفعت عيونها على منيف ووقف منيف:ماني راضي ملاك اقسم بالله كذبت على نفسي ووقفت معك بس ماني راضي كل شي تسوينه غلط بغلط

ملاك:مشيت منيف مشيت ووصلت نهاية الطريق الحين تقولي غلط ؟ الحين تبيني اوقف ؟

منيف:اي وقفي ومنصور ولد عمي وجمايله كثيره عليّ بس ما يستاهل اخسرك عشانه ، منصور صح انه رعانا كأننا اخوانه بس ما عطانا زود ملاك ، منصور هذا هو شخصيته وانسانيته وحبه لنا اللي خلته كذا معنا لكنه ما عطى زود

ملاك وقفت وناظرت منيف ورفعت صوتها:طعن واحد بمكتبي كان بياخذ شرفي تقول ماعطانا زود ؟ اذا ماعطاك شي فهو عطاني وماني جاحدته

منيف سكت يناظر ملاك ثواني وكملت ملاك:وماني موقفه

منيف:انتبهي ان خرج يجحدك نفس اهله ، وقتها ماعندي كلام لك يهوّن عليك

ملاك سكتت وناظرها منيف ولف بيخرج ووقف والتفت عليها:فكرتي بثنيان طيب ؟

ناظرته ملاك وكمل منيف:فكرتي انه ما فضحك ولا فتش اوراقك عند ابوه وطالع معك للناس بصورة الزوج والزوجه وانتي وش سويتي ؟ فضحتيه

صدت ملاك تخفي عبرتها وكمل منيف:هذا اللي لا تجحدينه

لفت عليه ملاك:بس بنفس الوقت جاب عمي ودخله البيت وحطه قدامي وكأنه يهددني ، منيف انا ما سويت كذا الا من الخطر اللي بحياتي وحياتك

منيف صرخ بقهر:ما ابي تسوين كذا ما ابي هالحياه

سكتت ملاك بخوف من صراخه وناظرها منيف:ما ابي بيوم يجون يحطون بيدينك كلبش ويشيلونك قدام عيوني ، ما ابي منصور يطلع عشان انتي تدخلين

نزلت دموع ملاك بخوف واخذ نفس منيف يهدي نفسه من شافها تبكي وهز راسه ومسك جبينه وخرج تاركها

جلست على الكنبه تبكي بدون صوت كل شي موجَّه عليها كل شي ضدها وكل شي وقف عندها

وتحس ان الضمير ياكل من روحها ويشب بداخلها والخوف من النهايه ترعبها

'

رمى جواله بعد رفضها للمكالمه ووقف قدام البحر يناظره بعزّ ظلمة الليل يسمع صوت موجه

وتكتف يسهى ويفكر باسئلته ودخل يده بجيبه وطلع صورة الرجل اللي كان بكتاب ملاك وظل يناظره

وده يعرف اذا شكّه صحيح حوالين هذا الرجل او لا

اذا هذا فعلاً سبب نيران اللهب ملاك او لا

ماوده يخاطر اكثر لكنه خسر فعلاً وانفضح الان ولا عنده شي اكثر يخسره ، بيرجع يحاول يفوز وينتصر ويكشف أجوبتها ويعرف حقيقة ، ملاك من تكون ؟

وبعدها بياخذ حقه وحق اهله وتاخذ جزاتها ملاك بالسجن نفس جزاء اي شخص يسرق وينهب

ناظر رسالة طلال:يقولون انه سفّر جواهر بنته خارج السعوديه لوحدها

تنهد بضيق من الوضع اللي انحطت فيه جواهر بسبب حركاتها مع ملاك وكيف خسرت كل شي وانفضحت

هز راسه بالنفي كيف ما همها فضايح الناس ؟ كيف قدرت تسويها ؟ كل هذا عشان عمها ؟

عمها جحدها وتكلم عليها من وراها وماهو مصدق ان ملاك فعلاً سيئه مع عمها والناس اللي تربت معهم لانها كانت تبيض اوراقه عندهم وتبعد عنه الغلط وترمي عليه اعذار عكس عمها اللي سوّد أبيض صفحاتها ووقف عكس اتجاهها وشال يدينه عن اسمها

اتعبه التفكير ومشى يجلس قدام البحر لوحده يكمل اسئلته اللي مالها جواب ويناظر الصوره اللي بيده

'

نوره لفت من دق باب غرفتها ودخلت أصايل:مامتي

لفت نوره تمسح دموعها وتقدمت أصايل بضيق:مانزلتي تفطرين معانا لأول مره

نوره:ماني قادره ، ولدي ثنيان مو موجود وفوقها الناس ما سكتت عن سالفته وجوالي ما سكت يبون يعرفون العلم وزواجه بيندمر بعد ما فرحت فيه وقلت لقي وحده ملاك

أصايل مسكت كفها بضيق:مستحيل تتركه ملاك اذا تبين اكلمها واهديها وتسمع من ثنيان

نوره:ماردت علي عشان ترد عليك

أصايل:اروح لها بيتها واشوفها واكلم ثنيان اخليه يترضاها ويشتري لها رضاوتها

نوره:ماتوافق ملاك ما تبي واحد متزوج عليها

أصايل:ثنيان مطلق جواهر امي ومتزوجها من قبل ملاك وطلقها قبل يتزوج ملاك ، هو ودّه بملاك لكن انفضح وماني عارفه ليه صار كل هذا

نوره:اهخ يا أصايل لو يندمر بيت ولدي بموت من قهري

أصايل:اسم الله عليك ياحياتي

نوره:ابوك وينه؟

أصايل:فطر قبل شوي وخرج

نوره:ما انصدمتي منه ؟

أصايل:توقعت بيعصب اكثر بس ما اعرف ليش هادي ؟ معقوله زعلان مره ؟

نوره:مدري يا أصايل لكن ليت هالسالفه تنقفل مابيها تطول ، ابي ترجع ملاك وتسكّت كل احد يتكلم

أصايل:بطلع بعد شوي واشوفها انتي لا تشيلين هم

نوره:تبيني اجي معك يمكن تستحي مني

أصايل:لا انا بشوفها وابيها ترتاح وتتكلم بدون تستحي منك

نوره تنهدت:الله يهدي النفوس الله يهديها ، انا بروح لثنيان واشوفه

هزت راسها أصايل ومشت تخرج من الغرفه ودخلت غرفتها تلبس عبايتها ولفت لكوتي وهمست:بشوفه كوتي

ابتسمت رغم كل الخوف والتوتر من الوضع الا انها ترتبك لانها بتشوفه

اخذت شنطتها وخرجت من البيت تركب مع حمدان

نطقت:حمدان بروح بيت ملاك

هز راسه حمدان وحرك على صوت اذان الظهر

ودقايق وصلت لبيت ملاك وارتاحت من شافت سيارة ملاك موجوده ونزلت

بللت شفايفها تمشي للبيت ودقت الباب

كان خارج من المسجد راجع البيت مشي ووقف من شاف سيارة حمدان ونزول أصايل منها

كان بيوقف لين تغادر البيت ولا يلتقي فيها لكنه ماقدر والله ماهو عاجز عن الصدّه لكنه قلبه يبيها ويسوقه لها سوق

مشى بخطوات هاديه خلفها لين وقف عند الباب ومد ذراعه بمفتاحه وفزّت بخوف ولفت عليه

ووقف قدامها منيف يناظرها وليت المشاعر تقدر توصل بدون ما يتكلم بدون ما يتعب ويجتهد بالتعبير وصفصفة الكلام ، ليتها تشوف من وقوفه قدامها ونظراته لها انه مهتوي وعاشق كل تفاصيلها

لو بقى للهيل صبر على فوح الدلال ما بقي بقلبه صبر يقول أحبك

أنقى وأصفى وأنعم شي لمس ذاكرته وباله ، أحن وألطف شي سكن قلبه

هي حتى يوم سكنت حشاه ما تكلفت ولا حاولت ولا جاهدت ولمّحت ، هي سكنته بدون تكلّف

كذا بطبيعتها وتفاصيلها وحياتها ، نعومتها وذرابتها

ناظرته أصايل بربكه ماد ذراعه بمفتاحه لكنه مافتح الباب يناظرها وهو أمامها

ثاني مره يكون قريب منها لهالقرب وثاني مره تشوف منه هالنظرات ، ماتفهم وش داخل جوفه ولا تعرفه ولا تعرف عنه غير اسمه وحنيّته على ملاك

ودها تعرفه وتسمعه لكنه يربكها ولا تفهم الاسباب شي غريب يدفعها له وشي غريب يرقص داخل صدرها من تشوفه

من وقوفه وطوله ونظراته وهدوئه ، تغرق ولا تقدر تعرف ليه ومتى وكيف

هو لقاها لكنه لقاها متأخر بوقت ما تقدر تكون له ، كل أبوابها مقفوله أمامه وصوت ضميره يحرقه ويجبره على الصدّه

عاشت بربكه وخوف من شي هو سواه وزرعه فيها

عاش أيام سوداء طويله وجرّب يكون ساكت ومنطوي عمره كله ، لين شاف حياتها وعرف انها نافذه لحريّته وتغيره وتلوين حياته

بدون ماتبادر وتعطيه هو اخذ منها حلاوة الدنيا من حلاوتها

واقفه قدامه مرتبكه خجلانه ويبيّن عليها لكنه مهلوك من خجلها ووقوفها قدامه وده يوقف قدامها كذا العمر كله ، وحتى لو الشمس فوق راسه تنتصف سماهم الا انه يعيش زمهرير البرد بأعلى درجاته قدامها

هز راسه بالنفي من ارتبكت ترمش تمنعه عن عيونها وكأنها تقوله خلاص انا انتهيت من ربكتي

همس وهو يناظرها:سبحانك الحق المعين

رجفت من سمعت صوته وهمسه وهو يعنيها والتفتت بربكه تقطع كل حبل طال بينهم

ورفع كفه يفتح الباب بمفتاحه ودخلت بسرعه من فتح الباب

بلع ريقه يكتم مشاعره وقفل الباب ودخلت أصايل وناظرت ملاك اللي تشرب قهوه وعلى لابتوبها بالصاله ولابسه نظارتها الطبيه

رفعت عيونها ملاك بذهول وهمست:أصايل

أصايل لفت تشوف منيف يدخل وجلست واخذت نفس بتعب

ملاك قفلت اللابتوب وحطت نظارتها وناظرتها:صار شي جديد ؟

أصايل:انا جايه اسألك عن اخر شي حصل

سكتت ملاك وكملت أصايل:منجد بتنفصلين عن ثنيان ؟

ملاك رجعت ظهرها لورا:ومستحيل يتغير قراري

أصايل:تشوفينه صح ؟

ملاك:وش رايك يا أصايل بعيد على انه اخوك ؟ يصير اكمل مع شخص يخونني مع وحده غيري ؟

أصايل:ماخانك ملاك ، هو تزوج قبل يعرفك وطلّق قبل يتزوجك وانقطعت كل حبالهم عن بعض بعد ماتزوج

ملاك ماردت وكملت أصايل:تكفين ملاك اذا لي خاطر عندك بس اجلسي مع ثنيان وتكلموا

ملاك:ولاتشوفه عيوني

أصايل:بس مو كذا من اول عتبه بحياتكم تطلبين الطلاق ملاك ، جربي اجلسي معاه اسمعي منه

ملاك:أصايل ، لا تتعبين معانا وتحاولين

أصايل:ليش ما اتعب ؟ بتعب لان هذي حياتك وحياة اخوي ولا ارضى اشوف حياتكم تندمر ، كنتوا فاهمين بعض وتناسبون بعض مستحيل اشوف ثنيان مع احد غيرك ملاك

ملاك تعبت من ضغط أصايل وتنهدت وكملت أصايل:عشان خاطري

ملاك:أصايل ! لو سمحتي لا تضغطين عليّ

أصايل:اوكيه عارفه الحين بالك مشغول وتعبانه ومتضايقه بس خذي وقتك والوقت اللي يناسبك كلميني اجي معاك ونشوف ثنيان وتسمعين منه

ملاك:مستحيل أصايل مستحيل خلاص لا تحاولين معاي

أصايل:بحاول الا وما تشوفين ثنيان وتجلسين معاه واذا ما رضيتي بخلي امي وابوي يتدخلون بعد

ملاك:لو يتدخل ابوي من قبره ما تغير قراري

أصايل ناظرت جديّتها واخذت نفس ملاك:وصلي الكلام لاهلك

تنهدت أصايل بتعب ووقفت تخرج من البيت واخذت نفس ملاك تحس ان الموضوع بيطول وبيطول كثير وهي ماعندها صبر

'

دخل البيت بعد ما مرّ عليه أسبوع لوحده ماقدر فيها يلاقي لملاك أجوبه

لف عقاب من دخل وقطع عليهم فطورهم ولفوا يشوفونه

وهمست نوره:أمي

عقاب:عسى معك ملاك دامك دخلت

ثنيان اخذ نفس:لا والله بس جيت عشان ملاك

سكت عقاب ودخل يده بجيبه ثنيان وطلع مفتاح سياره:شريت لها رضاوتها

ابتسمت أصايل ولفت تناظر ابوها اللي هادي ويناظره

ثنيان:وفوقها اللي تبيه ويجيها بس ماهي فاتحه لي باب رحت لها البيت ولا طلعت لي ودقيت عليها ولاردت

عقاب:وهذا عذرك ؟

ثنيان:مو جاي اقول اعذار ابي أصايل تخدمني بخدمه وتنادي ملاك للنادي واشوفها هناك ونتكلم

لف جاسر على ابوه ورجع ناظر ثنيان

وهزت راسها أصايل:اكيد ثنيان من عيوني الثنتين

ابتسم لها ثنيان بهدوء وهز راسه عقاب:متى ؟

ثنيان:مدري والله متى ما تواعدت مع أصايل

أصايل:اكلمها اليوم واشوف

عقاب:وعلميني بقفل النادي وبجي انا معك

ثنيان عقد حاجبينه ولفت نوره:وانا بجي معك ونترضاها ونرجعها لبيتنا ، تستاهل العنوه ملاك

ثنيان:لا ما يحتاج تجون انا أحلها لوحدي

عقاب وقف:ما اشاورك طال عمرك

سكت ثنيان وتقدم عقاب:علمني بالوقت

هز راسه ثنيان وخرج عقاب من البيت وغمض عيونه بتعب ثنيان ومشى يجلس ويناظر الفطور

نهار:نحفت ثنيان اثاري فطور امي زين لنا كلنا

نوره:ياحبيبي ياثنيان بتنحل ان شاء الله ماعليك

ساري:اي تنحل لي اسبوع اسمع السالفه من الناس ورا ظهري اقسم بالله ما بقوا شي ما بهروه وقالوه

نوره:الناس فالحه بس تتكلم اجل يقولون ان ملاك تطلقت ! اسم الله عليهم ان شاء الله ترجع ملاك وتسكّتهم كلهم

أصايل:احس هذا الصح عشان يسكتون الناس ترجع ملاك ويبان للكل ان ثنيان صان ملاك وكان غلطان يوم اختار جواهر وتركها قبل زواجه اصلاً

ثنيان تنهد بضيق من الطاري:قفلوا الطاري

جنى:متوقعه ان ملاك ماترجع ما احس ملاك ممكن تسامح غلط نفس هالغلطه ، استحقاقها لنفسها عالي لدرجة ما تسمح تكون الثانيه

لف ساري عليها ولفت نوره:وش هالكلام جنى ؟ يرحم والديك عندك كلمه زينه قوليها ماعندك اسكتي

سكتت جنى تكمل فطورها ووقفت أصايل:بكلم ملاك واشوف

وقف ثنيان:جاي معك

خرجت أصايل وهي تدق على ملاك وتمشي بالحوش ومشى ثنيان معها

اخذت نفس أصايل:اخاف ماترد

ثنيان:حطي سبيكر

سكتت أصايل تسمع الرنين وبعد مافقدت الامل ترد ردت وفزت أصايل:ملاك

ملاك عقدت حاجبينها وهي منشغله بأوراقها:هلا

أصايل:عبالي مابتردين عليّ

ملاك:ليه ؟

أصايل:ما اعرف توقعت

ملاك؛لا عادي بس انا بالمحكمه الحين عندي جلسه في شي مهم تقولينه ؟

سكت ثنيان يسمع صوتها وبللت شفايفها أصايل:اي بغيت اشوفك بالنادي ملاك

ملاك:وليه ؟

أصايل ناظرت ثنيان اللي يأشر لها:ماله شغل الموضوع بثنيان بس ابغاك بموضوع يخصني بليز ملاك ماعندي احد اكلمه

ملاك عقدت حاجبينها:رجع يهددك اللي قبل ؟

جمد وجه أصايل وعقد حاجبينه ثنيان وبلعت ريقها أصايل تشيل السبيكر وتبتعد عن ثنيان:لا بس بشوفك

ملاك:طيب تمام

أصايل:متى ؟

ملاك:العشاء اجيك

أصايل:تمام اشوفك هناك

قفلت أصايل ولفت لثنيان:العشاء تقول

ثنيان؛وش سالفة التهديد ؟

أصايل رفعت كتفها بربكه:ولاشي

ثنيان تقدم:أصايل ! انطقي اخلصي

بلعت ريقها أصايل:سالفه لوحده من صديقاتي مو لي

ثنيان؛تستهبلين على راسي ؟ سامع كل شي علميني شالسالفه

أصايل تنهدت:سالفه قديمه ثنيان

ثنيان ناظرها بحده:من هددك ؟

أصايل:ما اعرف من زمان في احد هددني بصور لي وبعدها اختفى يعني

ثنيان سكت يناظرها وكملت أصايل:طلب مليون وميتين ألف وما حولت له جلس فتره يضايقني بس بعدها ارسل الله يستر عليك واختفى

غمض عيونه ثنيان من ملاك وتصرفات ملاك وناظر أصايل:ليه ماعلمتيني ؟

أصايل:خفت

ثنيان مسك ذراعينها؛تعلميني بكل شي وتعلمين اخوانك بكل شي ، لا تطيحين لوحدك تفهمين أصايل ؟ اقسم بالله احرق اي احد يمسّ شعره منك بضرّ

أصايل:ماودي بالمشاكل ثنيان تكفى قفل الموضوع دام انتهى

ثنيان؛ليه ملاك تدري اجل ؟

أصايل:شافت رساله منه بجوالي واخذتني لمنيف اخوها وحلّ الموضوع وقطع رسايله من جوالي

هز راسه ثنيان واخذ نفس ومسكت ذراعه أصايل:تكفى ثنيان لا تفتح الموضوع ماصدقت اتخطاه

ثنيان مسح على خدها:لا تعيدينها أصايل وتخبين شي عني وعن اخوانك

هزت راسها أصايل ومشت تاركته ولف ثنيان:اهخ منك ياملاك اهخ

شد على قبضة يده ومشى يركب سيارته يخرج من البيت

'

وقف بجانب ابوه يشوف السياره اللي اشتراها لملاك وموقفها عند النادي واخذ نفس يشوف النادي فارغ

وامه جالسه مع أصايل ينتظرون ملاك ولف عقاب على ثنيان:سو اي شي وخلها ترجع

ثنيان لف عليه:ليه ملاك العفو بيني وبينك ؟

عقاب:لانها بتحل كل شي متلخبط

هز راسه ثنيان يصد:لان ملاك اصلاً دايم اجوبه

لف عقاب من دخلت ملاك والتفت ثنيان من سمع صوت كعبها ولف يناظرها

مشت لهم تناظرهم وتشوف النادي فارغ مافيه الا ثنيان وعقاب

ووقفت قدامهم وناظرها ثنيان ياكم تعب من ملاك وطاري ملاك وكيف انها دخلت حياته بدون رحمه قلبتها وزلزلت ثبات امانه وعلّمته ان النار تغلب الموج بغالب الوقت ولا يقدر الماء يطفي جمر

رفعت عيونها ملاك تشوف نظرات ثنيان ولا فهمت منه شي ولأول مره ماتشوف الغضب من عيونه وتشوف العاديّه

وتقدمت لعقاب:توقعت الاقي أصايل بس

عقاب هز راسه:أصايل وأم ساري موجودين بعد

ملاك:وعشان ايش؟

عقاب لف لثنيان ومشى يتركهم ورفعت عيونها ملاك على ثنيان ونطق ثنيان:دايم تعرفين متى ترمين قنبله تدمّر كل شي وتكون لصالحك

ملاك:انت اللي قلت ان زواجنا حرب ياولد العميد

ثنيان لف لإسطبل الخيول اللي تحت:تعالي

مشت معاه ودخلت تشوف نوره وأصايل اللي جالسين وعقاب معهم ومشت خلف ثنيان لين نزلوا للإسطبل

ووقف ثنيان من ابتعدوا ولفت ملاك تشوفهم من بعيد يناظرونها ولفت عليه:طلّق ياولد العميد واعترف بالهزيمه

ثنيان:ماهي النهايه يا ملاك احنا باقي مابدينا

ملاك ناظرته تسمع هدوء صوته وطلع من جيبه ثنيان مفتاح السياره وابتسمت ملاك:تشتريني بسياره ؟

ثنيان:عشان اهلي يشوفوني احاولك

ملاك هزت راسها بالنفي:وخلهم يشوفوني وانا ارفض

نزل كفه ثنيان ودخل يده بجيبه يطلع ظرف صغير وابتسمت:قول شيك المؤخر ياولد العميد

هز راسه ثنيان ومد الظرف واخذت نفس ملاك وفتحت الظرف وجمد وجهها ورفعت عيونها بسرعه على ثنيان تشوف ملامح وجهه

كان على وشك يسألها من هذا ؟ لكن تغيرت ملامحها واشتبت نيرانها أمامه ونزلت عيونها بسرعه وكأنها حابستها سنين

تشوف صورة منصور بالظرف وطلبه ' لا تنسيني ' تجمعت بعيونها حريق دموعها وبراكينها ورجفت يدينها ورفعت عيونها وهمست بغصه تحرق نبرة صوتها:عرفت ؟

ثنيان ناظر اختلافها من صوره وفقط من صوره بدون ما يقول أكثر انهدّ حيلها وطاحت نفس ماكانت تطيح من اجابات ما يعرفها ونزل عيونه للصوره بفضول

هو راهن على الصوره وقال بيجرب يحطها قدام عيونها ويشوف ردة فعلها لكن انصدم من ردة فعلها

رجع ناظر ملاك اللي تقدمت له وهمست وعيونها تحترق من نيرانها ولَهبها:من قالك ؟

ثنيان تكلم بهدوء:ماهو سرّ مدفون ياملاك

ملاك بلعت ريقها وهمست:وش بتسوي الحين ؟ بتقضحني قدام اهلك وتسجني ؟ بتعلن فوزك وانتصارك ؟

سكت ثنيان يناظرها ونزلت دموع ملاك من عرفت انها خسرت وانكشف جواب لَهبها اللي عجز يسألها من ورا سبايب لَهبها

بكت تتأمل ثنيان الهادي قدامها بتنذل وبتخسر وكل شي تعبت عليه طار بلحظه وحده

ومسك ذراعها ثنيان بهدوء قدام عيون اهله اللي تراقبهم وحاوط ذراعينه يحضنها بهدوء وبكت وهي بحضنه ورفعت يدينها وشدت على صورة منصور وهي تحترق بحضنه تحترق بصدمه وخوف

ونطق ثنيان:هذا جوابك ؟

ماردت وهي تبكي وابتعد عنها ثنيان وناظرها تبكي متمسكه بالصوره:ارجعي بيتي ياملاك

رفعت عيونها بوسط بكاها تناظره بصدمه وكمل ثنيان:انا قلت اننا للحين ما بدينا

ملاك رفعت الظرف قدام عيونه:وهذا وشو ؟ مو نهاية كل شي ؟ عرفت جوابك وعرفت وش سبب النار اللي بجوفي وسبب نيراني وخوفي وسبب طيحاتي ، هذا هو

رفعت الصوره قدام عيونه وناظر الصوره ثنيان وهو هادي وهمس:من هو هذا ؟

سكتت تناظره بصدمه وعقدت حاجبينها وكمل ثنيان:من ؟

بلعت ريقها من عرفت انه يجهل منصور وكمل ثنيان:رجع يهدّك من جديد ، هذا سبايب نارك ؟

تعبت من الضغط اللي تحس فيه ومن صورة منصور اللي بكفها اللي يرجف ومن غموض ثنيان اللي مزعجها ومن كلام منيف لها ومن محاولات عقاب وعائلته لرجوعها وتمسكهم فيها

نطقت:وش تعرف ؟

ثنيان:ان هذا اللي اشعل النيران داخلك

ملاك:تعرفه ؟

هز راسه بالنفي وكمل:اعرف انك دخلتي بنت عمك بسرقاتك واخترتي السُلطه ، واعرف ان عمك أقسى رجل مرّ عليك بحياتك واعرف ان خسارتك لامك وابوك اكبر خساره لك واعرف ان مشهد اهلي يكوي صدرك ويرجع داخلك ذكرياتك مع اهلك واعرف انك بلحظه ماقدرتي تكملين تهددين أصايل لان داخلك خير وصوت ضمير ياكلك

واخذ الصوره من يدها:وهذا اللي ولّد داخلك الشرّ ، من هذا ياملاك ؟ علميني من ؟

بكت تسمعه وهزت راسها بالنفي تصد عنه بنظراتها ومسك ذراعها ثنيان:جاوبيني ياملاك ولا تخليني اكمل انبش وراك وأذّيك ، انا ورغم كل اللي صار لي من وراك للحين قدامك احاولك

ملاك لفت عليه وهي تبكي:انا تأذيت بما فيه الكفايه اصلاً ، واي ماكملت وهددت أصايل لان صوت ضميري كان اعلى من حرّ جمري واي مشهد اهلك يكوي صدري لاني خسرت اهلي بعد عيد ميلادي الـ ١٥ ومن بعدها ما نفخت شمعة ميلاد ، واي في داخلي خير اكبر من الشرّ لكني مجبوره امشي الجمر وما اقول اهخ لين صرت انا لَهب من جمر خطواتي ، ليه مستمر ؟ ليه ورغم اني شوّهت سمعتك واخذت منك حب حياتك مكمل تدمّر نفسك ؟ ليه وانا حذرتك وقلت اني احرق اي شي المسه ؟

ثنيان هز راسه بالنفي:لاننا بحرب وللحين ما فاز احد

عضت شفتها تمنع دموعها اللي تنزل بدون شور

ثنيان:بترجعين

ملاك هزت راسها بالنفي:طلعني من حياتك دامنا وصلنا لهنا

ثنيان اخذ الصوره من يدها ودخلها بجيبه وهز راسه بالنفي:مستحيل

ملاك بلعت ريقها من مسك كفها ومشى معها ومشت معاه ومسحت دموعها من طلعوا لاهله اللي يناظرونه

وعضت شفتها نوره تراقب حالهم وابتسمت أصايل تنتظر يتكلم ثنيان ويشرح كل شي

ورفع عيونه ثنيان لعقاب:صلّحت كل شي ، ملاك زوجتي وبتبقى زوجتي

لفت ملاك تناظر ثنيان وسط دموعها ولف ثنيان يناظرها كان أطول تواصل بصري بينهم من يوم عرفها ومن يوم عرفته

لأول مره تشوف عيونه وتقرأ داخلها وتحس بكفه اللي بكفها وتدري ان ما ورا نظرات الهدوء من عيونه غير خسارتها لأول مره تشوف شخص يناظر ملاك الضعيفه اللي سنين تعبت عشان تخبيها

حط قدامها صورة منصور وماقدرت تنكر كل شي خافت وانهارت رغم انها قدامه وعيون اهله عليهم

شد على الظرف بكفه من شاف دموعها وانهيارها ونظراتها له وتغاضى يصد عنها لاهله

ابتسمت نوره:ياربي لك الحمد الله يكفينا شرّ عيون الناس عنكم

أصايل:انا قلت ثنيان لملاك وملاك لثنيان

هز راسه عقاب وناظر ملاك:الشاهين المغرور

لفت ملاك تناظر عقاب ووجهها جامد من دموعها وشكلها المرتخي بتعب ووقف عقاب ومشى لين عندها وبلعت ريقها ملاك تشد على كفّ ثنيان

وابتسم عقاب يشد على كتوفها:روحتك عنّا كانت بتكون خساره لنا كلنا ماهو بس لثنيان ، مرحبا فيك من جديد بأهلك

نزلت راسها تبكي من كلام عقاب من بعد تأثرها بكلام ثنيان

وتنهدت نوره من شكلها وتقدم عقاب يحضنها ورفعت ذراعينها تحضنه بتعب من حبه وحنانه اللي ينثره عليها ويجرح ضميرها

بكت وهي حاضنته ورفع عيونه عقاب لثنيان يناظره

كان لأول مره يشوف حزن ملاك ويسمع بكاها ويحسّ بقوة حضنها له وكأنها تحتاج من يحضنها فعلاً

نزل عيونه ثنيان يسمع بكاها وناظر الظرف اللي بيده وشدّ عليه بقوه ودخله بجيبه

ابتعد عقاب عنها ومسح دموعها:كل شي أنحل برجوعك

ملاك ناظرت عقاب ووقفت نوره وابتسمت:بنتي ملاك

حضنت ملاك وعقدت حاجبينها ملاك وهي تحضن الشخص اللي سرقت منه امانه وحلاله وهددته بيوم

وابتسمت نوره تبتعد عنها:لا تبكين هذا هو ثنيان ندمان والله ندمان ويبيك وشاريك وانتي الخيار الصحيح له وأفضل قراراته وانتم سوا بتصلحون الغلطه قدام الناس

ماردت ملاك ولفت لأصايل اللي حضنتها:مبسوطه انك رجعتي

بعدت ملاك تناظرهم بضيق ورفع ذراعه عقاب على كتوفها:الكل لازم يدري برجعتك

ثنيان مارد ولفت نوره وابتسمت له:خذ زوجتك تشوف سيارتها

لفت ملاك على ثنيان ومد كفه ومسكت كفه ملاك تمشي معه تجرّ خطواتها جنبه ، صورة منصور بعقلها ودفى كف ثنيان بكفها

لفت عليه تناظره وسط دموعها وضعفها ، هادي يمشي معها وساكت يخفي كلام كثير وهذا اكثر شي ارعبها

خرجت تناظر السياره وبكت من عرفت بخسارتها قدام العائله اللي ماتركت داخلها شرّ وكل ما حاولت تبتعد رجع ثنيان عذبّها بوجودها بينهم

ناظرها ثنيان منهاره تبكي ولأول مره تبكي بهذا الضعف امام اهله اللي خلفهم

ومشى معها وفتح لها الباب وركبت وهي ترجف وحط المفتاح بحضنها ثنيان وقفل الباب ومشى يركب يمينها وهمس:حركي

ربط حزامه ورفعت كفوفها اللي ترجف تمسك الدركسون وناظرها ثنيان:شغليها وحركي

دعست على البنزين تسوق وتخرج من النادي ورفعت كفها تمسح دموعها وبللت شفايفها تناظر الطريق

رفع كفه يأشر لها تلف يمين ولفت بدون تتكلم وكمل يوصف لها لين قربت للبحر تشوف الشاليهات وعقدت حاجبينها واشر لها تهدي وهدّت وهمس:بس هنا

لفت تناظر الشاليه وعقدت حاجبينها ولفت من حط بحضنها مفتاح وناظرت المفتاح ولفت عليه

ونطق ثنيان:لك

سكتت تناظره وكمل ثنيان:عشان يقولون رضاوتها سياره وشاليه

-

( لا تنسون النجمه ⭐️ )

ظلت تناظره وهي مصدومه وكمل ثنيان:واي تقدرين تبيعينها وتنحاشين نفس ماودك بس ماتقدرين للنك قدام عيوني كل يوم تنكشفين ، إنسان وراه ماضي مكبل يدينه ، أضعف مما صورتيه لي ولغيري

سكتت ملاك تناظره ولف ثنيان يفتح الباب ينزل وناظرت المفتاح ملاك ورفعت عيونها عليه ونزلت من السياره:وليه تساعدني انحاش ؟

لف ثنيان عليها وتقدمت ملاك بمفتاح السياره ومفتاح الشاليه:وش تبي مني ياولد العميد ؟

ثنيان:ابي اطفي النيران

سكتت ملاك تناظره وكمل ثنيان:ابي تنتهي نارك ياملاك لانها مو بس تحرقني ، تحرقك انتي لدرجة صرتي رماد

صرخت ترفع صوتها:لا تقرب مني اذا انا نار اتركني

ثنيان:طريقك ماراح يبتعد عن طريقي الا اذا عرفت كل شي عنك

تجمعت بمحاجر عيونها دموعها تسمع دفى صوته وهدوئه وكمل ثنيان:لاني ادري انتي ما انتي كذا والسبب للحين اجهله لكني واثق انك مجبوره تكونين بهذي النيران وتاطين الجمر وادري انك تتألمين من حريق صدرك ، وادري ان عمك أبشع رجل مرّ عليك بحياتك وأدري ان ما سكن صدرك ثقه بأحد من زمن طويل وادري ان موت اهلك مأثر عليك للحين

طاحت دموعها وهي تناظره وكمل ثنيان:تبين تسمعين وش يقول عمك عنك ؟

سكتت وطلع جواله ثنيان وشغل لها تسجيل وتغيرت ملامحها تسمع كلام عمها عنها وكلام شادن عنها وبكت بقهر من خيانتهم لها وكيف رموا كل شي عليها وازاحوا السواد والشرّ عنهم وهي تجري جري عشان تطلع لهم منصور

رفعت عيونها وهي تسمع اصواتهم وناظرت ثنيان اللي يناظرها تبكي وتسمع صوت عمها

:انا من زمان احاول فيها ترجع لربها وتخاف الله في الناس اللي تسرقهم وطردتها لان مابي الشرّ يدخل بيتي منها هي واخوها ، هذولا ماهم ايتام هذولا شياطين الله يكفيكم شرّهم

صدت تبكي تسمع شادن تكمل:كانت تحاول فيني اسرق ناس اكثر لكن ابتعدت عن الشرّ وما قدرت اسوي نفس ماهي تسوي بالناس ، ملاك شرّ يكوي اللي يلمسها

وفاء:انا دعيت ربي يكفينا شرّ هالايتام لانهم فاسدين بالدنيا ولا لهم ولي ولا اب ولا ام مع اني احسنت لهم وحاولت اعدّل منهم لكن ماقدرت

محمد:هذي غلطه من اخوي المرحوم يوم سماها ملاك ، ربي رحيم فيه يوم خذاه عشان لا ينخذل بتربيته

رفعت راسها بوجع وخذلان وهي تبكي من كلامه عنها

ولفت على ثنيان تناظر عيونه وهي تبكي وقفل التسجيل من خلص وصدت عنه تبكي وتغطي وجهها

ثنيان:تخلوا عنك ؟ مع انك ربيتي معهم سنين ، شفتي انك صفيتي لوحدك ياملاك ، ليه تخلينهم يتكلمون عنك كذا ؟ ليه ؟ علميني من يستاهل ؟

لفت عليه ملاك وهي تبكي:تدري هذا عمي وش سوا لي بحياتي ؟

تقدمت لثنيان تتكلم بحرقه:دخلت عليه بعد العزاء الاخير لامي وابوي وسمعته يرفض ياخذني انا ومنيف ويبي اخوالي ياخذونا ، شفت عمي هذا اللي متبري مني ؟ اول مكافأه لي بالجامعه شريت له عطر عشان اكسب رضاه واحس انه ابوي تدري وش سوا بالعطر ؟ عطاه الخدامه

سكت ثنيان وكملت ملاك وهي تبكي:وشفت هذي بنت عمي اللي مغصوبه تشتغل معاي ؟ جلست سنه بالبيت ما انقبلت بالجامعه انا قسمت بيني وبينها مكافأتي

صرخت بقهر بوجه ثنيان:ماخذت حقي من ورث ابوي عشان عمي يقدر يكمل بيته اللي ساكن فيه الحين

بكت توصف له شعورها:هذولا هم اللي تسمع اصواتهم

وهزت راسها ترفع كفوفها اللي ترجف وتشرح له:خسرت امي وابوي وعمري ١٥ ، افهم واسمع واشوف واحس ، ما خسرتهم وانا صغيره ، اخر عيد ميلاد عشته كان اخر عيد ميلاد معهم من بعدها ما طفيت شمعه لميلادي ابد

ظل يناظرها تبكي وكملت ملاك:اي ياولد العميد انا اسوأ ماضي وحاضر ومستقبل ، اي ياولد العميد ما اقدر احط عيني بعين امك وابوك واشوف أصايل تعيش شي ما ظنيت ان في احد يعيشه بالدنيا ، اي ياولد العميد انصدم كيف تلمون مشاكل بعضكم وما تتفكك عايلتكم ابد ، اي ياولد العميد كل شي تعيشه انت ناقص عندي

هزت راسها تكمل:اي انا شخص كتوم ستر همه ورا ضحكة المسرور يموت الكلام بوسط صدره ولا قاله ، استاحش الدنيا هذي اللي ماخذتها تحدي واخافها وترعبني ولا اعرف نهايتي أجهل دربي واخاف الوحده ويرعبني الموج ، انا ما تعبت من السعي بين الاوادم والشيوخ انا تعبت عند بيبان الأمل لحظة وقوفي

ثنيان ناظرها تبكي وتشهق من شدة وجعها وتشرح له وعقد حاجبينه:وليه ؟ ليه تعيشين شي يتعبك كذا ؟ من السبب ياملاك ؟

كملت ملاك تتجاهل اسئلته:كنت دايم غيمه تروي العطشان بس انا والله اموت بظماي ، ماكسبت الا خساره وماربحت الا لَهب ياكل مني روحي ، كنت أحيك الصبر من رجفة يديني ؟ تدري ليه اخاف البرد واستاحش من الشتاء ؟ لاني اشتاق للدفى تعرف وش يعني افقد دفاي ؟

بكت تناظر ثنيان وحسّ بالقهر وتقدم يهزّها:من ؟ اشرحي لي ، علميني اقسم بالله لألمس بذرة الخير اللي فيك وانا بيدي اسقيها بس ساعديني ، علميني

بكت تهز راسها بالنفي وكمل ثنيان:مستعد اتجاهل كل شرّك كل شرّك ياملاك ، كل الفضيحه اللي تاكل من اسمي وسمعتي الحين بس تشرحين لي السبب ، من اللي بالصوره ؟ ليه يهدّك ؟ انقذي عقلي اللي اتعبني قهر منك ومن اللي تسوينه ، اقسم بالله اني ما ادري من انتي للحين ولا اعرف وش الصح واسويه

رفعت عيونها تناظر تمسكه في اسئلته وفيها وبكت : أنا الأتم إدراك والأغرب أطوار ، انا بموت وانا اسئله تسألها دايم ياولد العميد لا تحاول حَلّي

ثنيان هز راسه بالنفي:تصعبين كل شي وانتي تقدرين تردين عن كل هذي الاسئله بجواب واحد

صدت وهي تبكي بدون ترد وكمل ثنيان:تنهدي ، خرجي الان زفيرك دفعه واحده واستنشقي كل الأمل ، كل الأمل بس خلي هذي النار تنطفي ويخسر اللهب

بكت بصوت عالي تغمض عيونها وحسّ انها انفجرت وتناثر بالجو قَبس لهبها ونارها وكأنها خشب يحترق

ثنيان:لا تصيرين نار ولا تصيرين لَهب صيري شمس ما تحرقين لكنك دِفى ، لا تصيرين موج ولا بغصبك تكونين بَحر ، كوني شي يشبهك

هزت راسها بالنفي بين يدينه اللي ماسكه كتوفها وفتحت عيونها تناظره ونطقت:هدّني آخر حضن منك ماهدتني صوره ، هدّوني أهلك اللي دخلت عليهم بشرّ ما يستاهلونه ، هدّني ابوك اللي فتح لي ذراعينه اليوم يحضني نفس ما يحضن أصايل ، هدّني لان اخر حضن كان من ابوي ومن بعده صدري هجر الاحضان

ثنيان نطق:تبين حضني ؟ هذا اللي يريحك ؟

بكت وهي تناظره يسألها ويكرر اسئله وكل حواره معها اسئله لكنها ما تجاوبه بولاشي

ظلت تناظره وهي تبكي وظل يناظرها ينتظر اجابتها لكنها ما نطقت ونزل يدينه عنها يرجع خطوه لورا

وسكت يشوفها تبكي وتعبت تعبت من شافته يبعد للخلف ودها تشتري حضنه مو بس تحضنه لكنها تخاف الاجوبه ، تخاف قرب المسافات تخاف من كل شي ويرعبها الحضن ، لكن انهدّ حيلها وتعبت

اخاف حسن الطن عشان ما تشوف خذلانه ، تخاف تستأمن سرّها عنده

اخذ نفس يحس بوجع صدره منها ومن عالمها وغموضها ولَهبها ورفضها وسكوتها وبكاها ومن مشاعره الغريبه ومن بَحرها اللي ما يعرف وين مرساه

يسمع صوت موج البحر يساره ويناظرها تحترق قدامه

يحس ببرودة داخله وزمهرير جوفه لأول مره يشهد قسوة انهيارها بعد ما عاش وهو يشوف ثباتها ، لاول مره يشوف رجفة يدينها ويسمع خذلان الدنيا لها

ولأول مره يشوف الجانب الثاني من ملاك

نزل انظاره لكفوفها اللي شاده عليها تناظره

ورجع يرفع عيونه لعيونها يعرف انها تتمنع ، جمد وجهه يناظرها ترفض الجيّه واللي حسّه انها تبيه ، تبي حضنه

ماكان يظن انها فعلاً تبيه بسكوتها لكنها كانت مرعوبه تجاوب عليه بـ اي ابي حضنك وارتاح فيه

انتظر ثواني يشوفها امامه مهدود حيلها تناظره وفتح ذراعينه امامها يرخي جسده بتعب من وضعها ، يبادر مع انه الخاسر الوحيد ومع انه للحين ما انتصر لكنه بادر ، بادر لانه عرف انها ذاقت خيانة عمها وفراق اهلها وهدتها صوره قديمه بماضيها ، بادر لانه يشوف ان النيران هذي بدايتها شراره بالماضي

كان متوقع انها بترفض الجيّه له نفس مارفضت الجواب بـ اي

لكنها ثواني مرت وتقدمت له بتعب ترفع ذراعينها وتحضنه وعقد حاجبينه بصدمه من تمسكها ومن بكت بصوت عالي بحضنه

تمسكت بكتوفه تحضنه وهي تبكي وكأنها ماصدقت تشوف احد يؤمن بخيرها ويتغاضى عن شرّها شخص يفتح ذراعينه لها يوم كل الأذرع قست عليها ، شخص يشبه ثنيان بكل اسئلته ومحاولاته لها

وكأن بهاللحظه ولأول مره وبظاهره ماتصير من اختلافها ، يلتقي موج البحر مع لَهب الجمر ، يلتقي وينشر حوالينه مشاعر غريبه ما تنفهم ، يغيم الجو ويرتعد السحاب وتخاف الشمس ويزيد البحر بمدّه من حضن الموج واللهب

الحضن اللي غيّر بداخلهم كل شي ، غيّر داخل ثنيان مشاعره تجاهها من غضبه لسكونه من قهره لمحاولاته

ومثل ما غيّر داخل ثنيان غيّر داخل ملاك اللي بعد سنين طويله محد كشف حزنها انهارت بحضن ثنيان والتجأت لحضنه يوم فتح ذراعينه وماردته مع انها تعودت النفي دائماً وغصبت نفسها تختار القسوه عن الحنيّه

هي الان في حضنه في أشد حاجاتها للحضن ، للدفى اللي يهدي من لَهبها مثل ما صوت ثنيان الدافي دايم يهدّي غضبها

شد على ظهرها واخذ نفس من حضنته وكأنه ارتاح من همّ الكبرياء اللي كانت تتلون فيه ، يبي يشوف هذا الضعف فيها وحاجتها له يبي يعرف ان فعلاً تتخبى خلف كل هذا الشرّ والسواد ، ملاك

رفع كفه يمسح على شعرها بحضنه كانت دافيه بحضنه لثاني مرّه ، لثاني مره ما يشعر بلهبها ونارها

لثاني مره يسمع صوت قلبها وبكاها ونحيب حزنها ، لثاني مره يجتمع قلبه مع قلبها من قربهم وشدة تلاصقهم ، لثاني مره استطاع ثنيان انه يرسم خصرها من يدينه اللي تحضنها

تتحسس كتوفه بكفوفها الثنتين وتبكي بدون صوت بعد ما احترقت احبالها الصوتيه من بكاها ، استكنت وهدأت عواصفها من حضنه لكن قامت عليها عواصف ثانيه ما شعرت فيها من زمن طويل

صوت الحنيّه وريحة عذوبة الموج ولون الدفى ، ملمس الشي الحقيقي ملمس حضن ثنيان

قلبها اللي يلمس صدره حرقها من مبادرته رغم انها كانت تحاربه هو حاربها لكن بالشكل اللي ماجربه احد معها

حاربها من ماضيها ومن قلبها كان دايم يفتش عن نقاط ضعفها ويعطيها اللي يعورها ويخليها تضعف

هي تحس بالهزيمه رغم ان الكون كله يقول ان الخاسر ثنيان لكنه فاز ، وفوزه وانتصاره القناع الحقيقي لملاك اللي خبته عن الكل حتى عن مرايتها

ماتدري كم مشى فيهم الوقت وكيف قضت الغرق وهي على اليابسه لكنها ابتعدت عنه تناظر عيونه

وخافت خافت لانها فتحت كل بيبانها أمامه ولا تعرف ولا تحب تنكشف أحزانها لبني آدم وشلون لو كان ثنيان

عرف انها تندم على بكاها وصوت حزنها اللي سمعه من نظرات عيونها لعيونه ومن ذراعينها اللي خلف عنقه ومن قربها وصوت نبضها ويعرف انها بتهرب من المواجهه بعد كل هذي العاصفه فقرر انه يتركها ويحرر ذراعينه عن حضنها ويمشي مبتعد

ظلت تناظر محله ونزلت عيونها لمفتاح الشاليه والسياره بكفها ولفت للشاليه تناظره ورفعت شعرها عن عيونها ووجهها من قوة الرياح اللي فجأه عصفت بالمكان ولفت تناظر الموج اللي هاج بعد رحيل ثنيان وعاد الموج هائج من جديد وعاد اللهب يشتعل من جديد

مشت للشاليه وفتحت بابه ودخلت

ناظرت فخامته واتساعه وانعكاس الشمس بالمكان من زجاجه وستايره الخفيفه الشفافه

تقدمت تلمس اثاثه وتشوف غرفه وتطلع لفوق تشوف الغرفه الواسعه بسريرها الأسود والبلكونه اللي تطل على البحر

وانسدحت بتعب تناظر السقف وهمست:يارب يكون حلم يارب حلم

غمضت عيونها وهي تكرر امنيتها المستحيل لين ارتخت ونامت

-

وقف على الشاطئ مبتعد عن الشاليهات ، محتار بأمر حاله وشعوره ومحتار بملاك

مصدّق خيرها ومو مقتنع بشرّها مع انه اكثر شخص تأذى من نارها ، ما يعرف ليه تأكله بالاسئله والاحتمالات وورا كل شي بحياتها قصه وكل ما عاشرها وزادت يوم بحياته اكتشف شي جديد ما خطر بباله يكشفه

طلع الصوره من جيبه يتأمل ملامح الشخص اللي فيها وتذكر صورتها مع اهلها وهي تطفي اخر شموع طفتها ، شموع ١٥ عام من عمرها

دخل يده ببوكه يطلع بطايقه واخذ بطاقة كرت العائله يقرأ إسمها وتاريخ ميلادها

عقد حاجبينه من الصدفه اللي لاحظها ، يوم ميلادها ١٧ من هذا الشهر ، أحرّ أيام السنه ، يوليو ،منتصف الصيف وكأنها فعلاً تخرج من لَهب

هي يوم بكت ذكرت الشي الوحيد اللي تتذكره لانها تعرف ان ميلادها نهاية هذا الاسبوع ، هي لازالت تحسب الايام وتعرف ان ميلادها بيمرّ عليها حزين

رجّع بوكه بجيبه مع الصوره وناظر البحر من جديد

التفت يشوف الشالهيات من بعيد ، وده تكون لوحدها ووده يكون معها

ما يعرف وش هالضد اللي يعيشه وليه كل هذا التردد والتمسك بنفس الوقت ، يبي المسافه ومتشفق يقطعها ، يبي الإجابه وخايف من نتيجتها

مشى على الرمل راجع للشاليه وناظره من بعيد وعينه على بلكونته على أمل تكون واقفه فيها لكنها ماهي موجوده

مشى بهدوء والتردد ياكله بدليل خطواته اللي تتقدم وتتأخر ، فتح الباب اللي رادته وكأنها تناديه ودخل

شاف المكان خالي وتقدم للدرج يمشي بهدوء خطواته اللي تشابه هدوء صوته

دخل الغرفه وفتح الباب كله يشوفها نايمه على السرير بدون تتغطى بدون تتعدل ، بمنتصف السرير ضامه رجلينها ونايمه

ومشى يجلس على السرير وهو يناظرها نايمه وآثار مجرى دموعها على خدينها

يسرح ويتوه فيها وتاخذه حاجات لحاجات ووضعه صار يرعبه لان مايفهمه ، لكن كل ما غمض يروح لاسئلتها اللي بدون اجابات

تشبه الماضي مع انه يعيش معها الحاضر ، تشبه قسوة الماضي وأيامه الطويله اللي تنهش ذاكرة الآدمي دائماً

يتذكر صورتها تطفي الشمعه مع اهلها تغلبها السعاده بالصوره مع وجود اهلها ، اخر صوره كانت فيها ملاك

بعدها تغيرت وتغير كل شي بحياتها

تركها محلها وخرج من الغرفه يقفل بابها وينزل لتحت

يجلس على كنبته الجلد البنيّه يناظر البحر قدام عيونه

ناظر جواله وسؤال أمه:بتجون إنت وملاك ؟ عشان نراضيها معك يامزعلها

مارد عليها يقرأ رسالة أصايل:تكفى دللها ثنيان ، تعبت كثير

قفل جواله يسهى فيها من جديد وهو يناظر البحر

وكيف انه بالأول ما قراها زين وساء الظن بها ، وعكرت طيبته وحنيّته بالوجهين اللي شافها منها وشككها بنفسه ويكل مخلق يعرفه

لكنه تفاجأ من كل هذا الضعف اللي داخلها وكيف لمس داخلها مَلاك مع انها كانت تظهر له الشيطان

'

الساعه ١:٠٠ ص - بعد منتصف الليل

ضحكت تاخذ جواله من نهار:لا تغش الاجابه نهار !

ابتسم نهار:اسئلتك صعبه

أصايل:انا تحديتك وماجاوبت خلاص انسى الخمس الاف

نهار:انا اعطيك خمس الاف مو انتي تعطيني يالفصعونه

أصايل:الله وتشتري لي يومياً منها ماتشا

نهار:الحين ليه ماتسوينها بالبيت دامك مدمنه ؟

أصايل:ما اعرف حاولت ما تطلع حلوه

نهار طلع جواله من دق ورد:هلا الفال الطيب

سكتت من عرفت انه منيف ووقف نهار:جايك جايك

خرج من عندها ومشت خلف نهار ووقفت عند باب البيت تشوفه من الشباك واقف عند الباب

خرج نهار وسلم عليه:الله حيّه

منيف ابتسم:الله يبقيك بغيت اسأل ملاك جاتكم ؟ مارجعت البيت للحين

نهار عقد حاجبينه:لا والله ماهي بالبيت

منيف عقد حاجبينه:ماترد عليّ

نهار:يمكن راحت لأحد تعرفه او سـ

سكت من سمع صوت أصايل:مع ثنيان

لف نهار عليها ورا الباب:صادقه ؟

هزت راسها أصايل ونزل انظاره منيف يسمعها تكلم نهار:راضاها واتوقع راحت معاه

نهار ابتسم:يالله زين الله يهدي النفوس حنا هنا شايلين هم فضيحة ثنيان وهو مع ملاك

منيف اخذ نفس:زين على خير ، اسف جيت بهذا الوقت بس اضطريت وخفت عليها

نهار:والله ماترجع دامك وصلت

منيف:لا تكفى نهار برجع وانام والوقت متأخر

نهار مسك ذراعه:امش ادخل بس

مشت أصايل تبتعد عنهم وتقدم منيف يناظر البيت:يانهار ليه انت تنشب بالواحد ؟

نهار ضحك ودخل الصاله ودخل خلفه منيف وناظر الالعاب اللي على الطاوله والورق والماتشا اللي مشروب نصها والقهوه باخر الطاوله

ابتسم نهار:كنت العب مع أصايل ، حيّاك

جلس منيف وناظر كاسة الماتشا اللي يطبع على أثرها ثغرها من روجها ولف يناظر البلياردو بصالة بيتهم ورفع عيونه للسقف والنجف والثريا والدرج الطويل وهمس:ماشاء الله

نهار:تبي قهوه والا راعي ماتشا نفس الدلوعه ؟

ابتسم بهدوء منيف:تسلم ماودي بشي دخلت عشانك

نهار رفع عيونه من دخلت كوتي وضحك:كيف رسبنت هذي ؟

لف منيف وناظر كوتي وابتسم:هلا بسارقة بالي

اشر لها بكفه ومشت له ومسح عليها يرفعها بحضنه وابتسم يناظر سلسالها

نهار:جيب لك وحده تسليك بالبيت دامك لوحدك

منيف ابتسم:مالها شبيه والله ياهي يابلاها

نهار ضحك:ودي اقول حلالك ووالله لتصير لك بس أصايل بتذبحني

ابتسم منيف ولف لنهار:لو اطلبها بالله منك تعطيني ؟

نهار:ما أردك

سكت منيف ثواني يناظر ابتسامة نهار ونزل عيونه لكوتي:ابيها يومين تعطوني اياها ؟

نهار رفع يدينه:على حسب راعيتها وش تقول

منيف:ادخل شاورها وياليت توافق على طلبي

نهار وقف وخرج ونزل عيونه منيف لكوتي وهمس:ليتها تفطن

لف عيونه ينتظر دخول نهار يرفض خروج كوتي معه

لكن نهار دخل يشوفها واقفه وكأنها تسمعهم وناظرت نهار اللي ضحك:تسمعينا ؟

أصايل:انتظر كوتي دخلت عليكم

نهار:كوتي عليها طلب يا أم كوتي ، منيف يبيها ترجع معه البيت قلت له بترفض لكن بجرب حظه

شدت على دربزان الدرج بيدها بربكه وهزت راسها:عادي

رفع حاجبينه نهار بصدمه:بياخذها بيته

رفعت كتفها:اوكيه مو مشكله

نهار:أصايل !

أصايل:ليش مصدوم يعني عادي يعني ترا جلست عنده بسفرتنا وكان معتني فيها ويـ

تلعثمت ودفته بخفه:خلاص نهار خله ياخذها

نهار:والله مصدوم انا ما تخلينها تدخل غرفتي بتخلينها تروح مع منيف بيته ؟

أصايل:انت ماتعرف تتعامل معاها وما تحبك

نهار:وتحب منيف يعني هي ؟

ابتسمت أصايل ثواني وهمست:يمكن

نهار مشى يدخل ورفع عيونه منيف وضحك:وشو انضربت ؟

نهار:تقول خذها

جمد وجه منيف:بالله منجدك؟

نهار ضحك وجلس:والله ولا حاولت فيها وافقت على طول تقول انك اعتنيت فيها يوم جاتك ما بتخاف عليها وهي معك

ناظر كوتي بصدمه منيف وكمل نهار:تقول شكلها تحبك

رفع عيونه منيف وابتسم من جملة نهار:ياليت

نهار ناظر كوتي اللي بحضنه:وانا اقول اكيد انها تحبك شوفها بحضنك انا ماتقعد عندي

ابتسم منيف يناظر كوتي ولف لنهار:اجل بستأذن اخذت اللي ابيه

ضحك نهار ووقف منيف مع كوتي وخرج من البيت وركب سيارته وحط كوتي يمينه وناظرها وابتسم:ماودي أحلم وأفهم اللي سمعته بس الله لا يخيب لي رجاء

قفل باب سيارته وشغلها وهو مبتسم وحرك راجع للبيت مع كوتي

'

فتحت عيونها من فزّت وناظرت ظلمة الغرفه ولفت تشوف الشباك اللي يدخل على الغرفه ضي القمر

وعقدت حاجبينها تتحسس الحرير اللي نايمه عليه وجلست تناظر الظلام وتتذكر اللي حصل وغمضت عيونها من تذكرت كل شي وتنهدت بتعب

ومشت للشباك تناظر البحر وظلمة الليل وهدوء الموج وتتذكر انها عاشت هدوء الموج من حضنت ثنيان

غمضت عيونها تلوم نفسها هي ليه تكلمت ليه بكت وليه طلبت وحضنت

مشت تاخذ عبايتها من على السرير ومشت تنزل تحت وطلت مع الدرج تشوفه جالس وياكل لوحده بالصاله واخذت نفس تستجمع نفسها ومشت تنزل

لف من سمع صوت وناظرها تنزل وبعّد الاكل يناظرها بهدوء وترقب

مشت تحط عبايتها على الكنب وتجلس وتسحب الاكل من الكيس وتفهم انه لها لان اكله قدامه وبدت تاكل بدون تتكلم

وثنيان يناظرها وكمل اكله لين خلصت اكلها ورجعت ظهرها لورا:رجعني

ثنيان:وين ؟

لفت عليه تحط عينها بعيونه اللي تراقبها:وين المفروض اكون ؟

هز راسه ثنيان بهدوء:ببيتي

ملاك اخذت عبايتها تلبسها واخذ نفس ثنيان:ما يمدي الحين متأخر الوقت الصبح نروح

ملاك لفت عليه:بزورهم انا ؟ بدخل انام بالغرفه

ثنيان:ما ينفع امي موصيتني اعلمها بالوقت تبي تستقبلك

ملاك؛راعية ذوق بس ابي انام بالغرفه ماراح اجلس هنا اكثر

ثنيان:اهلي نايمين الحين وش يودينا ؟

ملاك:اي طيب ودني لبيتي اجل

ثنيان عقد حاجبينه يشوفها واقفه بعبايتها تنتظره:وش المفروض افهم الحين يعني ؟ ان اللي صار ما نتذكره ؟

ملاك:المفروض

ثنيان:لا مو المفروض ما ينفع تعيشين شي وتتناسينه

ملاك:انا اسهل شخص يتناسى وينسى مشكلتك انت اذا بتوقف عند كل شي ياولد العميد

زاد استغرابه من حالها وزاد غضبه من انفاصمها:صاحيه انتي ؟ تبين تفهميني ان كل شي انقال وان كل شي صار نرميه بالبحر ؟

ملاك هزت راسها:ومو بعيد البحر هذا هو قدامنا

ثنيان:انتي ما تنفهمين ولا ينعرف لك

ملاك:مو عاجبك طلّق

دف الطاوله اللي قدامه بغضب ووقف يمشي لها:ملاك لا تاخذين بعقلي لعب العيال ، انا ماني رامي شي خلف ظهري كل شي صار ماني ناسيه وبوقف عنده ، اذا كبريائك فجأه صحى بعد منامك وبتطلعين قدامي بعزّة بنت مساعد ودهاء المحاميه وقوة ملاك فماراح تمشي عليّ ، انتي بكيتي بحضني

رفع سبابته على صدره يأشر:هنا للحين موج عيونك على صدري

ناظرته بربكه تشد على كفها:يذوب ملح موجي لا تهتم ، انا دايمه دموعي وكل ما أنهدّ وأنهدم أنا ملاك ارجع اعيد كل شي وأصلح اللي اخترب وطاح وأشد بجمري على اللي ذبل

ثنيان:وهالمره محد شدّ وأصلح وعاد كل شي أنهدم غيري

ملاك صدت بعيونها وبلعت ريقها وكمل ثنيان؛اعترفي اني كشفت ضعفك لانه ماهو عيب

لفت عليه بحده ورفعت صوتها:الا عيب وانا اشوفه عيب ولا ابيك تفتح الموضوع وتذلني وتذكرني بلحظه طحت فيها قدامك

سكت يناظر غضبها وعقد حاجبينه ولفت:برجع

هز راسه وشد على فكّ اسنانه ومشى ياخذ جواله ويخرج من الشاليه

خرجت وركب يسوق وركبت جنبه وحرك السياره راجع للبيت

ناظرت الدرب الطويل وظلمة الليل وسَهت تسمع صوت بكاها وكلامها معه وحضنه لها وغمضت عيونها بقوه ، كيف بتتخطى اللي صار وتنساه كيف بتقدر تكمل بجبروت وتحدي وهي ماعاد حزنها مستور ، كشف جرحها وهو مستور وفتح اوراق قديمه لها وعرف حاجتها لحضنه

وقف بمواقف البيت ونزلت ولف يناظرها تمشي قبله وتنهد بتعب يقفل السياره وينزل

دخلت البيت اللي ظنت انها بتفرّ منه لكنها رجعت له من جديد ودخلته ، تذكر اول مره دخلته كيف كانت محمله بالشرّ والظلمه والنيّه السوداء وكيف الحين داخلها شايله معها الأسيّه والخوف والضعف

تقدمت تشوف صورة عقاب الكبيره اللي على جدار الاستقبال وظلت تناظره ودخل خلفها ثنيان يشوفها تناظر صورة ابوه وصدت تطلع لفوق

ومشى يلف يناظر صورة ابوه ولا فهم منها شي ولا عرف للحين هي وين وكيف تتشكل كل يوم بشكل ووش هي غايتها الجديده ؟

بعد مارمت على اسمه فضيحه كبيره وش ودها تسوي أكثر ؟

دخل الغرفه يناظرها تفصخ عبايتها وجلس على السرير بتعب يفصخ شوزه ومشى للحمام قبلها وغمضت عيونها تجلس على التسريحه فتحت عيونها تشوف شكلها وتعبت وأنهدّ حيلها من وجود ثنيان والضغط اللي يولّده لها كل يوم أكثر من قبل

خرج وفتح اللحاف ينسدح ويتجاهلها تماماً من تعبه اللي خلته يشعر فيه من انفاصمها اللي ما يفهمه

ناظرت انعكاسه بالمرايه وناظرت دبلتها اللي على التسريحه واخذتها بين كفوفها تناظرها

ماهي النهايه ولا نقطة آخر السطر ، هذي فاصله أعاقت عليها مشوار راسمته وبترجع تبدي من سطر جديد

لبست دبلتها تناظر اصبعها ومشت للسرير وانسدحت ولفت تناظر ثنيان اللي مغمض عيونه ومنسدح على بطنه وشدت على كفوفها تتأمله

هو فعلاً يشبه الموج بمدّه وجزره واختلافه ، مره هادي دافي ومره غضبان هايج

ماتعرف له حال واحد ماتعرف سوى انه يحاولها ولا شافت بحياتها شخص يفكك خيوطها ويفتقها خيط ورا خيط الا ثنيان

بكل مره تحسّ انها انتهت من وجودها بين اهله يرجعّها من جديد بينهم ، يخالطها بينهم ويتقصد يخليها تشوف عقاب ونوره وأصايل وأخوانها وهو ، تشوفه غصب وتشوف حياته اللي ماعاشت مثلها ابد ولا ظنت ان في احد يعيشها

انفضح فضيحه وكسر شور ابوه لكنه نايم مطمن الان لانه يدري ان وراه عائله بتشيل عيبه وترفع من اسمه من جديد لكن هي ما سمعت من العائله اللي عاشت معها سوى الجحود والنكران والكذب والإفتراء

نزلت دموعها تتذكر كلام عمها وشادن وغمضت عيونها بتعب ورفعت راسها للسقف تتأمله وتتذكر غضب منصور وكلامه وتتذكر هي وش تعيش عشانهم وكيف تبكي لأجل يضحكون ، ليه تعيش شي ما تبي تعيشه ، ليه صاروا هم الاهل اللي خلفها مع ان اهلها أموات ؟

اخذت جوالها من تذكرت منيف وفتحته تشوف رسايله واتصالاته هو الوحيد بجوالها وبحياتها اللي دوّر عليها من غيابها

بكت من تذكرت منيف اللي دايم ينتظرها خلف كل باب تفتحه ويمشي معها ولا يسأل عن الوجهه

ارسلت له وهي تبكي بدون صوت:أنا ببيت عقاب ، بجيك اذا حلّ الصبح ونتكلم ، تصبح على خير ، أحبك

ارسلتها وفتحت الصور تناظر صور دفنتها ولا قدرت تفتحها ، صور اهلها سوا ومراهقتها اللي عاشتها مع امها وابوها

قفلت جوالها تكتم حزنها وحاجته لهم وتحط جوالها جنبها وتقفل الانوار وتنام يمين ثنيان

'

نوره:اكتبي اكتبي تتشرف نوره لحضوركم جمـ ، والا اقول اكتبي أم ساري احسن وش رايك عقاب ؟

عقاب:الشيخه نوره حَرم العميد عقاب

ضحكت نوره:بيقولون تغتر بزوجها اعرفهم

أصايل:ام ساري احسن امي

نوره:اجل اكتبي ام ساري

أصايل:طيب وين بتعزمينهم ؟

نوره رفعت عيونها من دخلت ملاك مع ثنيان ترسم ابتسامه ووقفت:هلا بروح هالمكان هلا بفرحة خاطري ، هلا بعيالي الاثنين

ابتسم ثنيان وتقدمت ملاك تحضنها وغمضت عيونها نوره:ردت روحي وروح ثنيان والله

اخذ نفس ثنيان وناظر ابوه اللي ساكت ويناظرهم

ووقفت أصايل تحضن ملاك:مبسوطه مره برجعتك

ابتسمت لها ملاك بدون ترد ولفت لجنى اللي وقفت:ماتوقعت الصراحه بس هلا فيك من جديد

هزت راسها ملاك ومشت تجلس وجلس جنبها ثنيان

نوره:قبل شوي اسوي دعوه لكل اللي يتكلمون فيكم وبستقبلهم يشوفون بعيونهم ان ملاك للحين زوجة ثنيان بن عقاب ولا يمكن ينفصلون وان اغلاط ثنيان تمسحها ملاك

هزت راسها ملاك ولفت لعقاب اللي ساكت

ولفت أصايل:بالبيت بتنادينهم ؟

نوره:وش رايك عقاب ؟ هنا والا احجز مكان برا ؟

أصايل:ليش مو بشاليه ثنيان ؟ خيال وحلو

ثنيان نطق بهدوء:بعته

لفت ملاك عليه وعقدت حاجبينها وكمل ثنيان وهو يناظر أصايل:ماهو موجود

عقاب:ليه تبيعه ؟

ثنيان:ما يلزمني

ظلت تناظره ملاك ولف ثنيان عليها:اذا ودكم بشاليه ملاك اسألوها هي

ابتسمت أصايل:شريت لها شاليه ؟

جنى رفعت حاجبها وابتسمت نوره:ياحلوك ياثنيان

لفت ملاك عليهم وابتسمت:المكان مكانكم اذا تبون

عقاب:بإسم ملاك ؟

ثنيان هز راسه:مِلك ملاك

لفت عليه ملاك تناظره وناظر امه ثنيان اللي نطقت:والله يكون احلى واقولهم ان هذا الشاليه رضاوة ملاك من ثنيان

جنى ضحكت:بيحسدونها صراحه

رفعت عيونها ملاك عليها ولفوا عليها ودخل ساري على جملتها وناظر وجيههم وعرف ان كعادتها جنى ترمي كلام ما يعجب احد

جلس ساري وناظر ملاك اللي تناظر جنى

ملاك اخذت نفس بهدوء:ما احب رمي الكلام ياجنى ، اذا عندك شي بخاطرك قوليه لا تكتمينه مو زين عليك

جنى:الصراحه ما توقعتك تغفرين غلطه نفس كذا وترجعين ، من يوم دخلتي لهنا وانتي الاولى واللي ماتبين تكونين الثانيه وبالوضع الاخير

نوره:جنى ! ماله داعي هذا الكلام

ملاك:خليها خالتي بيني وبينها هالكلام

لفت لجنى وابتسمت:ولازلت أنا الأولى ولحد بيسدّ مكاني ومافي أغلى من ثراي الا سماي ومافي أكبر من رضاي الا زعلي

وزادت ابتسامتها ملاك:شموخي ما ينكسر ياجنى اذا هو يهمك لكن الغلطه ما كانت وانا بحياته فدامها قبلي فهي نزوه وسوء اختيار

لف ثنيان عليها وهزت راسها ملاك:واذا مره يزعلك الموضوع وتحسينه كبير ففتشي ورا زوجك يمكن تلاقين اللي يخليك ما ترجعين ابد

جمد وجه ساري وعض شفته ثنيان وعقدت حاجبينها جنى:ليش غصب تبغين تطلعين ساري نفس ثنيان ؟ اذا ثنيان يلعب بذيله مو شرط كل الرجال نفسه هذا نقص فيه وفي رجولته

لف ثنيان بحده يناظرها ولف ساري:جنى !

ارتخت ملامح الغضب من على وجه ثنيان من نزل عيونه لكف ملاك اللي لمست كفه وناظرها

ملاك:عفى الله عن ملذات الهوى وانا عفيت لأني أدرى اني ماني هوى نفس عند ولد العميد ، أنا وجودي في سطور دفتره تنوّر أوراقه وأنا زوجته علن وقدام كل الناس وما غلط بالسرّ الا لانها اسوء اختيار

لفت تناظر ثنيان اللي يناظرها تدافع عنه أمامهم وتلّمعه وكملت ملاك وشدت على كفه:يعرفني الموج ما يعرفني الساحل ، وهو موج وأنا لَهب والموج يطفي اللهب

شالت كفها من كفه من نطق عقاب يحسم الموضوع:الزلّات تغتفر لكنها ما تنسي ، وهذا ياجنى من طيب أصل ملاك وكبر عقلها وعرفت ان الموضوع ماهو الا قديم وماكانت موجوده بالأصل ما يعني ان ثنيان ما غلط لكن غلطه عندي كبير مقارنة بغلطه مع ملاك

ساري حك جبينه من هزت رجلها بتوتر جنى ونطقت:ماقلت الا الحقيقه ياعمي

عقاب هز راسه:وجاتك الحقيقه

ناظرتهم ملاك وارتبكت من الوضع نوره وضحكت:ما قلتم لي خلاص نحدد المكان شاليه ملاك ؟ والا نسميك لَهب مثل ما يسميك ثنيان ؟

ابتسمت ملاك بهدوء:اللي ودك

لفوا من دخل جاسر وناظر ابوه:ابيك ابوي

لفت نوره على عقاب اللي هز راسه وخرج مع جاسر وابتسمت أصايل لملاك:عندك فستان بتلبسينه بالعزيمه ؟

ملاك رجعت ظهرها لورا:ما اعرف بدور واشوف اكيد بلاقي شي مناسب

وقفت جنى تخرج من المكان وهزت راسها بأسف نوره:الله يصلحها بس

أصايل:لا تزعلين منها ملاك ترا هي كذا جنى يعني كل شي بقلبها على لسانها

ملاك:ما زعلت لا تهتمين

ساري:ماقصرت اصلاً

لفت ملاك تناظره ومشى يخرج ساري من عندهم واخذ نفس ثنيان ووقف:بشوف جاسر وابوي

رفعت عيونها ملاك من خرج وبللت شفايفها بهدوء وابتسمت نوره:بعزم لنا مطربه بالشاليه شرايكم ؟

أصايل:امي تموتين على الطرب

نوره:اي ازيّن من سوالفهم وعشان لا يسألون كثير

ابتسمت ملاك:لا تقصرين

-

جاسر جلس وناظر عقاب:لقيت لي بنت مالها صيت ولا لأهلها والموضوع وصل لها ولأبوها وتفاهمت معهم قبل اجيك واتكلم معك

عقد حاجبينه عقاب وكمل جاسر:مستعده تتزوجني وتجلس معي فتره على أساس انها راجعه معي من البعثه وهذولا عيالنا سوا وفتره وبيجيها حقّها وننفصل

عقاب:من هي ذي اللي تقبل على نفسها كذا ؟ و وشهو حقها اللي رضت فيه ؟

جاسر اخذ نفس وحك جبينه بربكه:مليونين

عقاب عقد حاجبينه:من بنته ؟

جاسر بلع ريقه:تعرفهم

عقاب تقدم بإستغراب ولف جاسر من دخل ثنيان يناظرهم وقفل الباب خلفه وتقدم لهم

ولف عقاب على جاسر:من بنته اللي وافقت عليك ؟

جاسر:بنت عمّ ملاك ، بنت محمد

جمد وجه ثنيان وانصدم عقاب يناظره وبلع ريقه جاسر من ردة فعلهم

جاسر:قبلت اني اتزوجها وابوها قبل ومابلاقي احد يقبل غيرهم

سكت عقاب يناظره بصدمه وتقدم بغضب ثنيان:تستهبل جاسر ؟ انت صاحي بعقلك ؟ بتجيب بنت عم ملاك عندنا بالبيت ؟

عقاب لف لثنيان:وليه ماتبيها ؟

ثنيان ناظره وهو مصدوم وارتبك يخارج نفسه بحروف مقطعه:لان عم ملاك هاجرها وبينهم مشاكل وادري وانت شفت يوم تقابلوا ببيتنا كيف كانت علاقتهم ، يعني ليه اجيب بالبيت وحده ما تبي زوجتي

رفع حاجبه عقاب:زوجتك ؟

لف على جاسر وناظره:وانت تبي بنت محمد ؟

وقف وناظرهم سوا:والله اني مذهول من تربيتي

لف جاسر على ثنيان اللي يناظره ومشى يجلس على مكتبه عقاب:اطلعوا ونتكلم بعدين ، لا يخرج الموضوع من فمّ احد

ارتبك جاسر ووقف وخرج وخرج خلفه ثنيان ومسكه ثنيان وهمس:بتسوي اللي براسك يعني ؟ ترا الوضع ماهو هيّن

جاسر ناظره بحده:جبت بنت عمها قدام عيونها وبكسر خشمها اذا انت ماقدرت تكسر خشمها

ثنيان:جاسر ، ترا عمها هو ساس البلاء ولا تستبعد يكونون مكذبين عليك بكل شي ، اقسم بالله أنجس من عرفت

جاسر:انا ماني غبي ياثنيان وانا كشفت كل شي يوم انت ماقدرت تكشف شي

ثنيان:كاشف كل شي انا

جاسر رفع حاجبه:وساكت ؟ عسى ما تكون طحت ياثنيان بوحده سرّاقه سرقت قلبك مع الحلال اللي اخذته منا ؟

سكت ثنيان يناظره وهز راسه جاسر:تعرف وش يعني بنت عمها تعيش معها قدام عيوننا ؟ تعرف وش يعني يلتقون ببيت عقاب بن جرّاح ؟ بتصير حرب

اخذ نفس ثنيان يمسك راسه وكمل جاسر:هذا اللي بسويه ومحد بيقدر يمنعني حتى ابوك اللي داخل

هز راسه بالنفي:بس بتلعب بالنار

جاسر هز راسه ومشى يتركه ومسك راسه ثنيان م مصيبته

خرج ثنيان يدخل الصاله ورفعت عينها نوره:وش قال جاسر لابوك ؟

ثنيان:ماهو مهم ، انا بدخل اغير ملابسي واطلع لدوامي لا تحسبوني بالعشاء

ملاك ناظرته من ناظرها ومشى يخرج واخذت نفس بهدوء ولفت من تقدمت الخدامه مريم:مدام ملاك

رفعت عيونها واشرت لها تجي وهمست أصايل:شفيها ؟

وقفت ملاك ومشت خلف مريم لين وصلت للمطبخ ولفت مريم تخرج من جيبها ورقه وتمدها:فور يو

عقدت حاجبينها ملاك واخذتها:من مين ؟

مريم:ما اعرف اقرأ عربي مدام سوري

رفعت عيونها ملاك ودخلت مريم المطبخ وفتحت الورقه ملاك تقراها

:انا شادن حاولت اكلمك بس لقيت انك بلكتيني وخرجتيني من حياتك بغيت اقولك ان المصيبه كبرت وانتي بتنفضحين بين عايلة عقاب هذولا اللي ترعين افراحهم واحزانهم ، قرب موعد فضيحتك والافضل وعشاني بنت عمك اهربي واتركي كل شي ورا ظهرك حتى منصور اتركيه

عقدت حاجبينها ملاك ترجع تقرأ من جديد ورفعت عيونها لمريم اللي تقطع خضار وتقدمت لها وهي تقفل الورقه:مريم

رفعت عيونها مريم وجلست على كرسي الطاوله ملاك:شكراً

ابتسمت مريم وكملت تقطع وناظرت باقي الخدم ورجعت ناظرت مريم:مين يطبخ مريم ؟

مريم:انا

ملاك:ماشاء الله لذيذ أكلك في طبخه ابغاك تسوينها على العشاء

مريم:اوكيه مدام مو مشكله

ملاك:بس ما اعرف اسمها بوريك لها صوره

مريم عقدت حاجبينها من مدت لها الجوال ملاك وتركت الخضار من يدها

قرت الطبخه مريم وهزت راسها:لازانيا لحم في مقادير مدام في لازانيا في جبنـ

سكتت تستوعب بصدمه ولفت لملاك اللي ابتسمت لها من عرفت انها تقرأ عربي ومعناته قرت الرساله وهذا خطر عند ملاك وضوء احمر وصوت إنذار ولازم تتخلص بسرعه من الخطر

هزت راسها ملاك وخرجت من المطبخ ملاك وهمست:جانا الوقت اللي تاخذين جزاتك يامريم وتتركين البيت اللي تفشين اسراره

طلعت ملاك بهدوء ومشت لغرفة نوره ناظرت حوالينها

تقدمت وفتحت الباب ودخلت تقفله خلفها

مشت تفتح الادراج وتاخذ كل المجوهرات اللي قدام عيونها وتحطها بعلبه وحده وخرجت بسرعه تطفي الانوار خلفها

ونزلت للبدروم ومشت تعدي من المطبخ وتمشي لغرفة الخدم وتقدمت تحط المجوهرات على السرير وتناظر حوالينها

تقدمت تفتح الدرج اللي بجانب السرير وطلعت منه كريمات وزيوت للجسم وعقدت حاجبينها من عرفت ان اللغه ماهي لغة مريم ومشت للسرير الثاني وفتحت درجه وشافت صور واخذتها وابتسمت من شافتها صور لمريم وحطت المجوهرات بدرجها وخرجت

مشت تطلع وتدخل الصاله لنوره اللي لا زالت تتناقش مع أصايل عن الحفل:خالتي

نوره لفت:هلا ملاك

ملاك:لقيت لي فستان مناسب بس مالقيت لي طقم يناسبه تعرفين وين الاقي محل حلو ؟

نوره:ما يحتاج ملاك انا اعطيك من عندي وأصايل عندها بعد

ملاك ابتسمت:لا ماودي اخذ شي يمكن تحتاجونها

أصايل:شدعوه ملاك هي ليله بس تلبسينه وترجعينه

نوره:خليك انتي انا بشوف بغرفتي واجيك واذا ما ناسبك شي شوفي أصايل

ابتسمت ملاك وجلست على دخول عقاب:سلام عليكم

ناظرته نوره:هلا وعليكم السلام

جلس عقاب وخرجت نوره وناظرهم عقاب:شعندكم؟

أصايل:عزيمة امي هو في شي غيرها ؟

عقاب ناظر ملاك:وين ثنيان ؟

ملاك؛بدوامه

عقاب هز راسه على دخول نوره وجهها مصفوق من الصدمه؛عقاب الحق مالقيت اغراضي

عقد حاجبينه عقاب ونزلت انظارها لدبلتها ملاك تلعب فيها

عقاب؛وش اغراضه ؟

نوره:اطقم ذهب والماس حاطتها بنقي منها ومالقيتها الحين

أصايل:امي يمكن رجعتيها بالخزنه او حطيتيها بمكان

نوره:انا متأكده حاطتها فوق تسريحتي بنقي منها ، عقاب من اخذها ؟

عقاب:وش دراني تسأليني دوري زين

ملاك نطقت بهدوء:او فتشّوا الخدم أسهل

عقاب:لا خدمنا محاشيم وحاشمين بيتنا من سنين ماهم جدد

ملاك:الحذر نصف الحل

لفت نوره:والله يمكن عقاب اقولك اختفى اختفى

عقاب:اصبري انا ادخل غرفتهم واشوف

نوره؛بجي معك

مشوا يتركون الصاله وناظرتها أصايل:مستحيل احس الخدم اكيد امي ناسيه

ملاك رفعت كتفها بهدوء وهي تتذكر كلام شادن ومشغوله فيه

ووقفت تاركه خلفها كل اللي تستحقه مريم ومشت تخرج من البيت

فتحت سيارتها بمفتاحها تركب السياره اللي اهداها لها ثنيان وتشغلها وتخرج من البيت

مشت ماتدري لوين كل اللي ببالها هو وش قصد شادن بالكلام هذا ولوشو تلمح ؟ بتزيدها وتخوفها ؟ والا فعلاً صار شي هي مالها علم فيه ملاك ؟

أكلت ذهنها الاسئله ووقفت قدام البحر تقفل سيارتها وتفتح شباكها وتناظره وهي تفكر وساهيه

رفعت عيونها من شافت السياره اللي توقف خلفها وعقدت حاجبينها من نزل واحد متلثم بشماغه واطلق على سيارتها وصرخت تنحني برعب وخوف وطلق طلقتين وسمعت صوت الفرامل من انطلق هارب

رجفت وهي منحنيه ولا قدرت ترفع راسها ، بكت بدون صوت ورفعت عيونها من تجمعوا الناس اللي كانوا قريب يناظرون السياره بصدمه ولفت تشوف كيف تدمرت السياره وكسر قزازها الخلفي

ظلت تناظر بصدمه وكيف كان ممكن يجي فيها شي يخسرها حياتها

لفت بخوف وهي ترجف وفتحت الباب ولا قدرت تحرك رجلينها من خوفها ماتعرف مين اللي تجرأ بنص شارع وقدام ناس يسوي كذا فيها ويهرب

جالس قدامها عقاب وعاقد حجاجه بغضب وخوف ويسمع اجوبة ملاك:ماشفته

العسكري:طيب شاكه في أحد ، في أحد ممكن يأذيك ؟

سكتت تفكر ولا لقت جواب وهزت راسها بالنفي

عقاب:مافي كاميرات بالمكان طيب ؟ احد شاف السياره او اللي كان راكب فيها ؟ كيف بتنقفل السالفه ؟

العسكري:انت أدرى ياعميد عقاب الموضوع يحتاج صبر لان مافي اي طرف خيط لصاحب الفعل بس انا اقول ما تروح مكان لحالها ولو هي بحكم عملها ماسكه قضايا ناس متهوره تتركها عشان سلامتها

عقاب ناظر نهار اللي نطق:لين متى ؟ ما بنصبر على هذا الوضع ، قدروا يأذونها بشارع عام كيف بتعيش ؟ تحبس نفسها ؟

العسكري:ما اقدر افيدكم اكثر الموضوع وهمي

تنهد عقاب ولف لملاك اللي ماسك كاسة المويه وترجف وهي ساكته ونطق:ملاك تعوذي من الشيطان ما بيصير شي اكثر صدقيني وانا معك

نهار:وانا موجود ملاك ما بخلي الموضوع ينقفل

ناظرهم ساري اللي متكتف ومصدوم من الحادثه اللي صارت ولف عقاب عليه:رد عليك ثنيان ؟

هز راسه بالنفي ساري ووقف عقاب:مشينا ملاك يابنتي

رفعت عيونها بخوف ملاك ومسك كفوفها عقاب:انا معك ما بيجيك خلاف

وقفت مع عقاب اللي ماسكها ومشت معاه

خرجت من غرفة العسكري وخلفها نهار وساري ورفع عيونه عقاب من شاف اللي يدخل المركز ببدلته مصدوم وتقدم:ملاك

رفعت عيونها ملاك على ثنيان اللي يناظرها بصدمه ومشى بسرعه وفلتت يدينها من يدين عقاب ورفعتها كأنها تنادي ثنيان لها

وتقدم لها وتمسكت ببدلته بخوف وناظرهم ثنيان:وش صار ؟ من اللي سوا كذا ؟

عقاب:خلنا نروح البيت خلنا نلم اللي صار ببيتنا

نزل عيونه ثنيان لشكل ملاك وتمسكها ببدلته ومسك كفوفها بقوه:علميني وش صار

ملاك هزت راسها بخوف:كنت بموت

عقاب:خلونا نرجع بيتنا مابي اوقف هنا قدام الكل يكفي الموضوع اللي صار

مشى ثنيان وهو ماسك كف ملاك وركبت سيارته وركب جنبها وناظرها:وش صاير ؟

ملاك غطت اذانيها بخوف:ما ادري ما ادري

ثنيان:امي قالت لي ، من اللي أذاك ؟ من اللي أطلق على سيارتك ؟

ملاك لفت عليه وهي ترجف:ما ادري ما ادري خلاص

سكت ثنيان ومسك راسه بصدمه وحرك سيارته يشوف نهار خلفه وسيارة ابوه قبله وكأنهم بموكب لين وصلوا للبيت ونزلت معاه ومشت تدخل

خرجت نوره مع أصايل وجنى وناظروهم:وش صار ؟

عقاب:خلوا البنت تدخل وترتاح

مشت ملاك تدخل وجلست بالصاله واخذت نفس تستوعب اللي حصل وجلسوا وناظرتها أصايل بخوف:وش صار ملاك طيب حكينا ؟

عقاب:ماتعرف ولا نحنا نعرف لكن ما ينسكت عن اللي صار ، من يتجرأ يسوي كذا ؟

ساري قفل جواله:نزلوا الخبر بكل مكان كويس مو ذاكرين اسامي بس الحادثه

لف ثنيان عليه ومشى لملاك وجلس جنبها وناظرها:شفتي احد ؟ احد ارسل لك شي ؟ لحقك احد قبلها ؟ هددك احد ؟

هزت راسها بالنفي ونطق عقاب:لو صار قبل اللي صار تهديد ماكان سكتت ملاك كان حلّت الموضوع لكنه فجأه هجموا عليها وعدموا سيارتها وش يعني ؟ وش هدفهم ؟

نوره:اعوذ بالله اعوذ بالله الله يكفينا الشرّ

أصايل:يخوف كيف بيصير الوضع الحين ؟

جنى:واضح ناس ماخذه قضيتهم ملاك وهدفهم ملاك بس احنا مالنا شغل

لف عقاب عليها:حنا كلنا هنا لنا شغل واللي يمسّ ملاك مسّنا كلنا

مسكت راسها ملاك:خلاص

سكتوا يناظرونها ورفعت عيونها ملاك وهمست:برتاح بغرفتي

وقفت ومشت تاركتهم وهمست أصايل:ليش كل هذا الثبات ؟ لو انا كان الحين بالمستشفى من فجعتي

نهار شد على كتفها وعقد حاجبينه:بسم الله عليك لا تفاولين مو هيّن اللي صار

وقف ثنيان ونطق عقاب:خلها

لف ثنيان:وش يعني خلها ؟ زوجتي يحدّها واحد ويعدم سيارتها وتخرج من مصيبه كل السعوديه تتكلم فيها وتقولي خلها ؟ ماني مخليها

عقاب:تبي تقعد بدون أحد

ثنيان نطق بإصرار:انا مو اي احد

سكت عقاب ومشى ثنيان يطلع فوق ودخل الغرفه وناظرته ملاك:تعرف لو خرج الموضوع من ورا جواهـ

قاطعها من تقدم:مستحيل ، اقسم بالله مستحيل ولا تتجرأ تسوي كذا لا هي ولا اهلها لانهم يبون الأذيه لي انا ماهو لك

ملاك ناظرته بصدمه:اجل من يسوي كذا ؟ من يسترجي ؟ علمني وش يعني اللي صار ؟

ثنيان:مدري يمكن احد فعلاً أذيتيه ؟

ملاك:اي أذيه تستهبل معي ؟ انا ما اخلي وراي شي محد يقدر يسوي فيني كذا الا شخص أقوى مني

ثنيان همس:يمكن يبي يرعبك بس

ملاك سكتت وكمل ثنيان يهز راسه بتعب:ملاك

ملاك جلست وهي تتذكر رسالة شادن وتحذيرها ووقفت بتخرج ومسك ذراعها:وين ؟

ملاك:بروح لشادن

عقد حاجبنيه:شادن شدخلها ؟

ملاك:لان الموضوع بيخرج منها هي وانا متأكده

ثنيان:مالها شغل اقولك هذا واحد اكبر من شادن واكبر من جواهر واهلها ، وين بتطلعين وانتي عادمين سيارتك بدون خوف ، ما بتروحين مكان بعيد عن عيني

ملاك ناظرته بغضب:اخلي الدنيا تحرقني يعني ؟

ثنيان رفع صوته:انتي محترقه اصلاً عن اي حريق تتكلمين ، هالمره ملاك الموضوع ما بينحل منك انتي وبس هالمره بنحله سوا انا واياك وما بتسوين شي بدون علمي وبتعلميني بكل شي ، كل شي

سكتت ملاك تناظره وحس برجفة ذراعها ثنيان ومن خوفها ورعبها اللي سكنها وموج عيونها وثباتها المزيّف ونطق:خفتي واعرف انك خفتي لكن ليه ما تبينينه ؟

ملاك بعدت ذراعه بتعب وجلست على السرير وهمست:تعرف وش يعني احد يبي يموتك ؟

رفعت عيونها اللي تنحرق من دموعها وهمس ثنيان:اعرف اني عادي اصير لَهب بس ما يصير لك شي

ناظرته ملاك وكمل ثنيان:واعرف اني بحرق الدنيا واعرف من ورا اللي صار

ملاك ناظرت عيونه وغضبه ونزلت عيونها من مد كفه لكفها يشد عليه بقوه وغمضت عيونها بتعب

ونطق ثنيان:وصلتي للمكان الآمن وانزاح الخطر عنك ليه للحين بكل هذا الثبات ؟ ماهو غلط ، انثري اللي داخلك من رعب ومن خوف لا تتصنعين

لفت عليه ملاك:ما اخاف من شي انا حتى من الموت اللي كان قريب مني ماني خايفه منه

مسك كفها بين كفه الثانيه وكمل:تخافين

صدت ترفع راسها وتاخذ نفس بإختناق من ضغط ثنيان وكمل ثنيان:وانا اخاف

لفت عليه تناظره وسكت ثنيان يناظرها ماقدر ينطق ببقية مشاعره ويقول ' عليك '

ملاك نزلت عيونها لكفها اللي متوسط كفه وسحبتها:ابي اكون لحالي

ثنيان:ماني مخليك

لفت عليه بتعب وضغط وبيدين راجفه مسكت صدرها:ابي اجلس لحالي مخنوقه اتركني

ثنيان مارد وهو يناظرها ووقفت ملاك وهي تتنفس بسرعه ورفعت صوتها:اتركني واطلع برا اطلع مابي احد عندي

ثنيان:عشان تنهدّين لوحدك نفس ماتعودتي ، الى متى وانا أحتري هالكبرياء اللي ما بتتنازلين عنه ؟ انا بكيتي في حضنه مرتين بتخبين الثالثه عني ؟

ملاك رجفت وهي تخفي غصة صوتها:بخبيها ، وبخبي كل شي عنك اتركني بحالي مابي احد عندي

ثنيان سكت يناظرها وارتبكت من هدوئه ونظراته وبكت ودفعته على صدره بقهر لانه ما زال واقف

ومسك كفوفها بقوه يسحبها لحضنه وضربت صدره بكفوفها اللي شادّها

ورفع ذراعه يحضن ظهرها لحضنه وبكت تحاول تتخلص من كل هذا الفائض من الحنيّه اللي ماتعودتها

ماتبي تعترف بإن الموج قادر وان نقطة ضعفها بعد انهيارات من الزمن هو حضن ، وان الملجأ اللي قادر يجمع شتاتها هو حضن

ماتبي تخوض الموج لانها دايم سليمه على الشاطئ ، ماتبي تذوق عذوبة الموج وهي حياتها مالحه وجرحها ما بَرى ، ماتبي توقف على مواني لانها بيوم بتدور على الموج من جديد وتعترف بإنها ماعادها تقدر

نفس ماصارت الحين ماتقدر وهي بحضنه تقاوم ، وكأن ضعفها غلب قوتها وثباتها وبكت بحضنه وهو شاد عليها

رفع ذراعه الثانيه على خصرها من ارتخت تبكي بعلو صوتها وعرف ان ملاك بكل مره طلعت له بوجه قوي وبارد كانت قبلها تنحرق من لَهبها

كل ما بكت على صدره ما بللت بدموعها شي هي كانت تشتعل ويحس بالدفى من حضنها وكأنها شمس ولَهب

ويدري انها تعيش أكبر خيبات الهزيمه لحضنه ومستريح ، مستريح لأنه وأخيراً لقي وجه المَلاك اللي تخبى ورا حزن وفراق وإحتياج

ما يعرف ان حياة اللَهب فعلاً تحرق اي شي تلمسه لين عاش الخوف اليوم وعلى خروجه من دوامه ومكالمته لامه وكيف ساق بدون ما يحذر من الشارع وركض لين لقي لها درب وما تطمن غير الحين يوم بلل لَهب جمر عيونها صدره

مايدري من متقصدها ومن يحاول يطيحها ويرعبها لكن يحس بالمسؤوليه اللي تخليه يركض ورا الموضوع وكأنه فعلاً حاميها

ابتعد عنها وناظر إحمرار وجهها وشعرها اللي على وجهها وبعده باصابعه وعينه عليها وهمس:الموج يقدر

رفعت عيونها اللي تشتعل إحمرار من لَهب صدرها وتعلقت عيونها بعيونه تحس ببرودته بدفاه اللي قدر فيه يطفي لَهبها

لف من دق الباب ورفعت اصابعها تمسح عيونها وتمشي للمرايه وكأنها تسترجع مَلاك اللي كانت

تقدم ثنيان وفتح الباب وناظره نهار:منيف تحت يبي يشوف ملاك

ثنيان:تعبـ

مشت من جنبه ونطقت:مافيني شي

نزلت تحت وهي تعدل حجابها وناظرتهم متجمعين ومنيف واقف ولف بخوف:ملاك

تقدم لها يحضنها وحضنته ملاك وهي تاخذ نفس تقوي نفسها ونطقت:ماصار شي

منيف:وش صار ؟ حكيني

ملاك مسكت ذراعينه وناظرته:ما اعرف بس ماصار شي حمدلله

منيف:كيف ماصار شي ؟ احد يطلق على سيارتك بنص الشارع وش يعني ماصار شي ؟

ملاك:اي طلق على سيارتي وهرب لكن بيرجع يجي وبنصيده

نهار ناظرهم:اكيد بإذن الله ينصاد

ملاك لفت تناظر عقاب وساري وجاسر ونهار وثنيان اللي خلفها ورجعت تناظر منيف:لا تخاف

منيف لف لعقاب:وش بيصير طيب ؟ كيف بتطلع لوحدها ؟

عقاب:ما بتطلع مكان

ملاك لفت تناظره:كيف ما اطلع مكان ؟ لا بطلع واللي يقدر يسوي شي بيسويه

اخذ نفس بتعب ثنيان ولف منيف:صاحيه ملاك ؟ طالق على سيارتك برصاص تبين تطلعين تخاطرين من جديد ؟

جاسر لف لابوه:من يعني ممكن يسوي كذا ؟

ساري:واحنا كيف بنمشي امورنا بعد اللي صار

عقاب:هذا ما يبينا يبي ملاك

سكتت ملاك تناظره وكمل عقاب:يبي يرعبها والا ماكان طلق على سيارتها وانحاش

ارتبك منيف ولف لملاك:تكفين ملاك مو مستعد اخسرك او يصير لك شي

ناظرته ملاك بدون ترد وتقدم ثنيان:مو صاير شي ان شاء الله ، اذا تبي تقعد مع اختك جب لك اغراض والبيت بيتك

منيف ناظر ملاك:لا ما يحتاج انا اجي كل يوم واطمن

عقاب:تعال تعال منيف جب لك اغراض وتعال حيّاك انت بين اهلك ما انت غريب واختك تبيك قريب

ثنيان رفع كفه على كتف منيف وشد عليه وناظره منيف وهز راسه:طيب

جاسر:يمكن ناس سويتي لهم أذى ويبون حقهم

لف ثنيان على جاسر اللي جلس وناظرته ملاك ولاردت

منيف:بروح انا وراجع

هزت راسها ملاك وهي تشد على ذراعه مرعوبه لكنها ماتبي تبيّن شي

خرج منيف ولفت ملاك على ثنيان اللي واقف ونطق عقاب:ملاك

لفت عليه ومشى عقاب لين عندها ومسك كتوفها:لا تخافين ولا يرعبك أحد انتي وراك عقاب بن جرّاح وعياله كلهم ، ما انتي لوحدك واللي صار لك بينأخذ حقه وبتعيشين مطمنه

كان ودها تبكي وتكشف عن مشاعرها وحاجتها لإحتواء نفس إحتواء عقاب وعائلته لكنها ابتسمت بهدوء

تقدم ثنيان:واللي قدر يسوي كذا كان جاهل انك زوجتي

نهار رفع حاجبه:من الساطي ذا ملاك بنتنا وش هالسطاوه فيه ؟

تنهدت تناظرهم كلهم متجمعين ووقفت وتركتهم ترجع للغرفه

جاسر ناظر عقاب:ابوي

لف عقاب ووقف جاسر:ما بنحلّ موضوعي الليله ؟

عقاب؛وقته خطايب ياجاسر وقته

لف نهار بصدمه:بتخطب ؟

جاسر:بتزوج خطبت وخلصت

ساري عقد حاجبينه:وليه ماعندنا علم ؟

تقدم ثنيان:انت مازلت صامل على اللي بتسويه ؟ جاسر فكنا من المشاكل يرحم والديك

عقاب:خلاص ثنيان خلاص ، خطبنا ومشى الحال بنقفل على الموضوع ما يقدر لين الحين يطلع عياله للناس

ثنيان:وتاخذ بنت عم ملاك ؟

نهار:اما عاد

ساري:وش هالفوضى ؟

نهار ناظر جاسر:شلون رضت فيك ؟

جاسر:حاصل لها ؟

عقاب:خلاص خلاص البنت طالعه من مصيبه وانتم تتكلمون عن بنت عمها ؟

ثنيان:ماتحب بنت عمها ولا تبيهم

عقاب ناظره:شدراك ؟

ثنيان:زوجتي واعرف وش جاها منهم ، وماني موافق على اختيار جاسر

جاسر وقف بحده:ماني منتظر موافقتك يا حضرة المهندس

ثنيان لف عليه بغضب:جاسر ! لا تدمر كل شي

جاسر:لا تشيل هم زوجتك ، ماعليها خوف هذي شيطان اكثر من انها ملاك

عض شفته نهار وعقد حاجبينه ساري:شفيك جاسر؟

عقاب:جاسر

رفع عيونه جاسر على عقاب وعقد حجاجه عقاب:وش هالكلام ؟ ليه تتكلم كذا عن زوجة اخوك ؟

ثنيان لف لجاسر وهز راسه ومشى تاركه

ونطق عقاب:احترم اخوك وزوجته واعرف عن من تتكلم ، ملاك هذي خرجت اخوك من سالفه تخص سمعته وللحين تسعى انها تطلعنا من مصايب

ابتسم بهدوء جاسر وهز راسه ومشى يخرج تاركهم ونطق نهار:يمكن تكلم مع بنت عم ملاك وهي تكلمت عن ملاك ؟ عشان كذا متأثر ؟

ساري:امداها تفضفض له عن ملاك ؟

سكت عقاب يناظر عياله ولف يناظر محل جاسر وثنيان وجلس وهو يفكر

واخذ نفس ساري وجلس:وش عيشة تلف الاعصاب هذي ؟

عقاب لف لنهار:بلغ اخوك جاسر نروح انا واياه بعد صلاة العشاء نخلص موضوعه

ساري ناظره بصدمه:بتخطب له ؟

عقاب:بزوّجه

نهار:منجدك ابوي ؟ بنت عم ملاك ؟ ثنيان يقول بينهم مشاكل

عقاب:ماعلينا من مشاكلهم

ساري ناظر نهار اللي يناظره مصدوم ووقف عقاب

دخل الغرفه ولفت نوره اللي تتكلم بالجوال:والله مدري ربي ستر ملاك شغلها حَذر وخطير يمكن احد أذّاها الله يكفينا شرهم ويصرف عنها كل شرّ

جلس عقاب وهو يناظر نوره وناظرته نوره وهزت راسها:اللهم امين اللهم امين ماقصرتي بسؤالك

قفلت وتنهدت:ما بيفكوني اتصالات هذولا

عقاب:بعد العشاء عندنا موعد مع ناس

عقدت حاجبينها نوره:اي ناس عقاب ؟ بوسط ذي الكارثه ؟

عقاب هز راسه:الناس مشغوله بموضوع واحنا لازم نخلص موضوع جاسر

تقدمت نوره:مافهمت وش فيه جاسر ؟

عقاب:خطبنا له وحده وبنروح اليوم نعقد

جمد وجه نوره بصدمه وكمل عقاب:بدون حسّ

نوره:منجد عقاب ؟ ليه ماعندي خبر ؟ ومنهي ؟ ومن متى ؟

عقاب:بنت عم ملاك ، شادن بنت محمد

انصدمت نوره تناظره وكمل عقاب:وافقت على جاسر وتكلموا بين بعضهم البعض وامورهم ماشيه ، وراضيه تلعب معه لعبه قدام الناس وتاخذ عياله

نوره:كيف وافقت ؟

عقاب:تبي جاسر بن عقاب بن جرّاح ، هذا اكبر شي يخليها توافق

سكتت نوره بصدمه وكمل عقاب:تجهزي بعد العشاء ولا تسوين شوشره وتعلمين الكل ، لا رجعنا ومعنا البنت بنتكلم

نوره:ملاك تدري ؟

هز راسه بالنفي عقاب وعضت شفتها نوره:مو بينهم مشاكل نفس ماتقول ؟

عقاب مارد ووقف ونطقت نوره:ماني رايحه عقاب

لف عقاب وعقد حاجيينه:وليش؟

نوره:ما اخطب لولدي بهالشكل ولاني راضيه وحده تعادي ملاك تدخل بيتي

عقاب:هذا اختيار ولدك وهذا قراره

نوره:مو راضيه

سكت عقاب ثواني وهز راسه:مو لازم تجين

مشى تاركها ومسكت راسها نوره من الفوضى اللي تعيشها

،

محمد ابتسم:ما بننتظر منّة ملاك واخوها

وفاء:مدري كيف بتقدر ترمي بنتك هالرميه

ناظرتهم شادن وبلعت ريقها ولف محمد عليها:بنتي ذيبه ماعليها خوف بتدخل عائلة عقاب وتخرّج لنا منصور بدون ما ننتظر ملاك وسرقتها

شادن اخذت نفس من الضغط اللي عاشته ولف محمد:اجهزي قبل يوصولون

وقفت شادن ودخلت غرفتها تناظر جوالها ولا لقت لملاك رساله ولا اتصال

ارتبكت تتذكر جاسر وكيف ضغطها وأجبرها تخوض شي ما توقعت تخوضه

هي ترتعب ولا هي قدّهم نفس ما سوت ملاك وقدرت بينهم ، هي اضعف وتخاف لكن جاسر عطاها أكبر ما تتمنى وقال ان حقها بعد كل هذا يطلع منصور ويدفع باقي ديّته وهذا مطلبها

وكان مطلب ابوها لجاسر ان محد يدري عن الاتفاق بينهم ويقول لاهله انها تبي مؤخر بعد الطلاق مليونين وكأنها طمعانه بفلوس فقط

لكن الاتفاق كان أكبر من مليونين وكلام

تجهزت تلبس فستانها الابيض القصير وتحط ميك اب بنفسها وتعيش زواج لولد العميد لكن شتّان بينه وبين زواج ملاك لولد العميد

هي تخرج من بيت اهلها سرّ وخلسه وملاك علن وإعلان

هي تلبس ابسط الفساتين وملاك لبست اغلى فستان والألماس

شدت على فكها من شدة غضبها وحطت روجها على صوت اذان العشاء وفتحت شعرها من المَكر تعدله ولفت تشوف شنطها اللي عند باب غرفتها

ووقفت من دخلت وفاء:هم بالمجلس

اخذت نفس شادن تناظر شكلها بالمرايه وهزت راسها لأمها

شدت على كتوفها وفاء:كله لأجل منصور

ابتسمت بهدوء شادن تطمن امها وخرجت معها يوقفون عند باب المجلس

عقاب ناظر محمد اللي يتكلم ومبسوط:عاد تعودنا على جيّة جاسر لنا صار ولدنا

مارد جاسر وهو يهز رجله ولف عقاب عليه يناظر حاله ورفع كتفه على فخذه يهدي توتره

وناظره جاسر وبلع ريقه وناظر محمد اللي مبتسم لهم

دخلوا اثنين من اصحاب جاسر شهود على العقد وبعد نص ساعه دخل الشيخ

لف عقاب على محمد الشخص الوحيد السعيد بالحدث ويترقب اعلان الزواج

وقف من رفع له الايباد الشيخ:خلها تبصم

اخذه محمد يخرج لشادن وناظرت ابوها اللي يضحك ويهز راسه لها:ابصمي ابصمي

ارتبكت ودها ترفض ودها تبتعد عن كل الخطر والتهديد اللي يضغطها فيه جاسر لكن ماتقدر

رفعت سبابتها تحطها وهي ترجف ومسكتها وفاء تشدها وابتسم محمد يدخل:مبروك مبروك يا ابو جاسر

ناظره عقاب وابتسم الشيخ ياخذ الايباد:الله يجمع بينكم على خير

عقاب رفع عيونه لمحمد اللي انحنى يسلم على جاسر ولا انتظر منه الوقوف حتى

وعقد حاجبينه بإنزعاج جاسر ووقف وشد على كفه محمد:الله يوفقكم يارب

لف محمد لعقاب اللي وقف وفتح ذراعينه محمد:العميد عقاب

حضنه وعقد حاجبينه عقاب من محمد وابتعد محمد:تبي انادي عروستكم تاخذونها ؟ والا تتعشون معنا ؟

جاسر لف لابوه اللي نطق :مستعجلين نادها لنا

محمد:اي الحين اناديها

خرج الشيخ بعد ما سلم عليهم وخرجوا اصحاب جاسر ولف عقاب لجاسر:متأكد طلبوا مليونين بس ؟ هذي فرحة ملايين

جاسر ارتبك يفتح ياقته:يقول عليه ديون يبي يسدد ويخرج من إيجار بيته هذا ، اكيد بيفرح

عقاب هز راسه بهدوء ولف من دخلت بنت عليهم

رفعت عيونها شادن تناظر عقاب وجاسر وشدت على فستانها

ناظرها جاسر ولأول مره بدون لثمه ونقاب وعبايه ونزل عيونه يتأملها ويحاول يكتشف من الشخص اللي قدر يهدده ويسرق منه مليونين مع ملاك طلع شخص أقل ما يقال عنه بريئ

تقدم بهدوء عقاب:الف مبروك ياشادن

ناظرته شادن ولا ردت ودخل محمد بعبايتها:البسي وتوكلي مع زوجك الله يوجه لكم

ناظرته شادن بإحراج وهو يلبسها عبايتها ونطق عقاب:لا تربك البنت

محمد ابتسم يناظر شادن اللي تلبس نقابها واشر عقاب لجاسر يخرج وخرج جاسر

لف عقاب عليه:خذها تعشوا في مطعم وبعدين تعالوا بفتح الموضوع عند اهلك

جاسر هز راسه ومشى عقاب يركب مع السواق ويحرك

ولف جاسر لمحمد اللي طلع بالشنط يسحبها وحطها بشنطة سيارة جاسر

وابتسم محمد لجاسر:متى وعدنا ؟

جاسر:لا تعيد كلامك كل شوي قلت لك شهر

محمد ابتسم:على هواك على راحتك

فتحت الباب شادن تركب ومشى جاسر يركب جنبها وقفل بابه وحرك سيارته

ناظرت بيتهم شادن من مراية السياره وبلعت ريقها من ابتعد عن البيت وشدت على كفوفها ببعض

-

ثنيان مشى للغرفه وقابلته نوره:امي ثنيان

لف عليها وتقدمت:كيف ملاك الحين ؟

ثنيان:مدري كنت عند منيف ونهار بالديوانيه ماشفتها بس ظنتي نامت

نوره:بشوفها واطمن عليها

هز راسه ثنيان ودخل الغرفه ودخلت خلفه نوره وناظرت ملاك اللي منسدحه تعطيهم ظهرها وهمست:ملاك

لفت ملاك من سمعت صوتها وناظرتها وجلست:هلا

نوره:لا تقعدين لوحدك يا أمي وتشغلين بالك تعالي تحت معنا

ملاك ابتسمت بهدوء:تعبانه بريّح بس

نوره جلست جنبها:اي ما يخالف ريّحي تحت معنا

ثنيان ناظر امه اللي تطيب خاطر ملاك وحط كفوفه بجيوبه من ناظرتها ملاك بنظرات يفهمها ثنيان

ناظرت نوره وكأنها تشوف امها وابتسمت ومدت كفها ملاك لكف نوره:انا بخير

نوره:ادري انك شامخه ما يهزّ ثوبك لا رياح ولا يدين

ابتسمت ملاك وكملت نوره:ادري انك اقوى من كل شي وما تخافين احد واللي يبي لك المضره انتي بنفسك بتوقفين قدامه وتحاكمينه

نزلت عيونها ملاك لكفوفهم اللي ببعضها وكملت نوره:عشان خاطر خالتك اللي بحسبة امك تجين معي

صدت ملاك من جملتها وابتسمت بتعب:تكفين

كانت تنضغط من طاري امها وابوها اللي يتكرر عليها من وجود عقاب ونوره حوالينها ، تنضغط من خوفهم عليها واهتمامهم وكأنها وسط اهلها

نوره لفت لثنيان:قول شي لزوجتك

لفت ملاك على ثنيان اللي واقف ونطق بهدوء:بتجي معك ما بتردك

نوره لفت لملاك وابتسمت ملاك بهدوء وهزت راسها وضحكت نوره:اي تبين تسمعين راي الموج

ابتسم ثنيان ومشت نوره توقف:انتظركم

خرجت من عندهم وقفل الباب ثنيان واخذت نفس بتعب ملاك وهمست:منيف وين ؟

ثنيان:بالديوانيه مع نهار

وقفت تلبس سلبرها بتعب وغمضت عيونها تستجمع نفسها ومشت تاخذ عبايتها وحجابها ومشت بتمرّ من جنب ثنيان ومد كفه يمسك ذراعها ولفت عليه

ونطق ثنيان يناظر عيونها:بتعدّي

ناظرت عيونه وهدوء صوته ودفاه وهزت راسها وخرجت

نزلت تحت وناظرت أصايل وسارا وحمد ونوره اللي جالسه:تعالي حتى جنى ماهي موجوده بنرتاح بالقعده سوا

ابتسمت ملاك وجلست وناظرتها أصايل:كيف صرتي ؟

نوره:ما خدشها شي ملاك ولا بيخدشها شي ، بنتي بخير وقويه

ابتسمت ملاك بإمتنان وكملت نوره:بنلقاه كان من يكون وبياخذ حقه

تقدم ثنيان يجلس:ساري وين ؟

نوره:مع زوجته عند اهلها بيتعشون هناك

ثنيان:وجاسر؟

نوره بلعت ريقها بربكه وفهم ثنيان وجمد وجهه وطلع جواله من جيبه

وناظرتهم أصايل:وشفيكم ؟

نوره:ولاشي

ملاك ناظرت ثنيان اللي يحاول يتصل على جاسر ولا يرد عليه جاسر

وقفل جواله ثنيان يسهى ثواني ويفكر ولف من دخل عقاب:سلام عليكم

نوره:وعليكم السلام

مشى وجلس عقاب وناظر ملاك:كيف صرتي ملاك؟

ملاك:بخير حمدلله

ثنيان:وين جاسر ؟

عقاب ناظره ولارد عليه ولف لنوره:كلمي مريم تجهز لنا قهوه وشاهي

نوره:مريم ماعادها في والا نسيت

عقاب عقد حاجبينه من تذكر:صح صح

أصايل:انصدمت من اللي سوته ليش سوت كذا ؟

ثنيان:وش السالفه ؟

نوره:مريم لقيناها سارقه مجوهراتي وحاطتها مع جوازها وشكلها كانت بتنحاش

ثنيان عقد حاجبينه بصدمه:منجدكم؟

عقاب:والله انها عاشرتنا سنين غريب اللي حصل

أصايل:كويس ملاك طلبت من امي طقم يوم راحت امي شيكت مالقتها ودورناها بنفس اللحظه قبل تنحاش مريم

لف ثنيان على ملاك وناظرت عيونه ملاك وكأنها تأكد شكّه وصدت عنه واخذ نفس ثنيان بتعب يتمالك اعصابه

عقاب:اجل كلمي غيرها يجهزون قهوه وشاهي جاسر جاي مع زوجته

لفت ملاك بصدمه ونطقت أصايل:مين ؟

نوره بلعت ريقها تناظرهم وعقدت حاجبينها أصايل:جاسر تزوج ؟

عقاب هز راسه:راجع من بيت اهل العروس

أصايل:كذا ؟ بدون محد يعرف ؟ ليش ؟

عقاب:لاننا نبي الموضوع كذا بدون محد يعرف

أصايل:مين طيب تزوج ؟

ثنيان شد على قبضة يده بتوتر وناظرتهم ملاك من سكتوا وعقدت حاجبينها ولفت أصايل من سمعت صوت باب البيت:وصلوا ؟

لف ثنيان على ملاك اللي لفت تناظر لحظة دخولهم وهي عاقده حاجبينها

دخل جاسر وبجانبه شادن المنقبه اللي واثق انه يسمع صوت نبض قلبها وارتباكها وخوفها من حجم البيت وهول الموقف

دخلت مع جاسر الصاله وطاحت عيونها بعيون ملاك اللي جالسه بينهم

عقدت حاجبينها ملاك هي تعرف هذي البنت تعرف الشخص اللي دخل لكنها رفضت التوقع هذا تماماً

ولفت تناظر ثنيان اللي ما لفّ وحاط عينه عليها يترقب ردة فعلها

ولفت على نوره اللي نطقت:والله مارضيت ياملاك

انصدمت من فهمت وناظرت عقاب اللي نطق:بنت عمك محمد ، شادن صارت زوجة جاسر

لفت بصدمه وجمد وجهها وتغير وناظرت شادن اللي واقفه بجانب جاسر ووقفت تناظرها

ارتخت عظامها من هول صدمتها وظلت تناظرها بذهول وناظرت جاسر اللي جنبها يناظرها

ونزل عيونه ثنيان يبلل شفايفه ولا يعلق

ملاك ناظرت شادن وتأتأت بصدمه:شلون ؟

عقاب:نصيب

لفت ملاك على عقاب تناظره مذهوله وكمل عقاب:شادن طلبت من جاسر مليونين عشان يتم هالزواج والزواج بيتم شهر لين الناس تعرف ان جاسر تزوج وحده مبتعثه سعوديه معه وجابها مع عيالها واحنا عندنا علم

لفت ملاك بصدمه على شادن ونطقت:انتي ؟

شادن ماردت وهي تناظرهم واخذت نفس نوره بإنزعاج:الله المستعان بس

تقدم جاسر:حلينا الموضوع

ملاك:اي موضوع ؟ انت تستهبل معي ؟ ردي انتي عليّ صاحيه ؟ وش اللي سويتيه ؟

جاسر عقد حاجبينه:وش اللي سوته ؟ تزوجت لأجل مصلحتها نفس ما تزوجتي انتي عشان مصالحك

وقف ثنيان ولف لجاسر:جاسر !

عقاب:وبعدين مع هالمشاكل وبعدين ؟ جاسر

لف جاسر على ابوه ونطق عقاب:اذا انترس مخك شي على ملاك فخله بمخك لا تطلعه علينا ، انا اللي دخلت ملاك هالبيت اذا ما تذكر

ملاك ابتسمت بصدمه من تغير جاسر وكلامه وناظرت شادن اللي واقفه وهزت راسها وابتسمت:ونعم

ضحكت ملاك بصدمه من وجود شادن قدامها ووسط بيت عقاب وكأنها تتحداها وصدت ثواني ملاك تستوعب

ورجعت تلف لشادن:ونعم يابنت عمي

عقاب:اطلع انت وزوجتك في غرفتكم دامكم تعشيتم

جاسر ناظر ملاك بحده ومشى ومشت معه شادن ولف ثنيان لملاك وناظرته ملاك:وانت تدري بعد ؟

ثنيان سكت وهزت راسها ملاك وضحكت:حلو

مشت تاركتهم وخرجت رايحه للديوانيه ودخلت وناظرت منيف اللي قاعد مع نهار ولفوا من دخلت ونطقت:منيف

ناظرهم نهار ووقف:دقايق وراجع

خرج ومشت ملاك لمنيف:تعرف عن اللي سواه عمك ؟

منيف عقد حاجبينه:هو اللي أذّاك ؟

هزت راسها بالنفي ملاك بتوتر وصدمه ومسكت راسها:أذاني بس ماهو بطلق نار

وقف منيف وعقد حاجبينه:وش السالفه ؟

ملاك:جاسر داخل الحين ومعاه زوجته تعرف من زوجته ؟ شادن بنت عمك

جمد وجه منيف وضحكت ملاك:اي عمك بكل بجاحه يهددني ويبي يفضحني لدرجة دخّل عليّ بنته عشان تحاربني بين عقاب وعياله

منيف:منجدك ملاك ؟

ملاك:ادخل بارك لها اذا مو مصدق

منيف:كيف وصلت لجاسر ؟

ملاك رفعت كفوفها وناظرها منيف بصدمه:وش يقاعد يسوي عمي ؟

ملاك:يبي ينتقم مني ، يبي يكسر شموخي يبي يحس اني فعلاً يتيمه وبحاجته وان موت امي وابوي المفروض يعيشني في ضعف وذل للناس ، مو عاجبه ان ملاك بكل هالقوه ويوم طردها من بيته عاشت بدونه

سكت منيف يناظرها ولفت ملاك تمسح مدمع عينها عشان لا تنزل دموعها ورجعت تناظره:هذولا اللي عشت معهم سنين عمري وتربيت بينهم قاعدين يحاربوني ، واللي داخل هذولا حاربتهم عشان اسرقهم وينادوني بنتي

غصت بآخر جملتها وبكت وكملت:ينادوني بنتي ، خايفين عليّ وقفوا وراي كلهم يسندوني ما يبوني ارتعب

هزت راسها لمنيف:شفت شلون الفرق ؟ الشخص الوحيد اللي تمنيت يعتبرني نفس بنته اكثر شخص حاربني ، والشخص اللي انا سبب بكل المشاكل بحياته وحياة عياله شايلني شيل ويناديني بنتي

منيف بلع ريقه من كلامها وتعبيرها وضعفها وخوفها وكل اللي قاعده تعيشه لوحدها وكملت ملاك

:اللي داخل هذي نمت معها بغرفه وحده ، تعرف وش يعني عشنا بنفس الغرفه سنين ؟ وشوف الحين وش تسوي فيني وفي حياتها

منيف:وش بيصير الحين ؟ بتتحاربين مع شادن بنص بيت الناس ؟

ملاك هزت راسها:توصل توصل اتحارب معها ، انا ما اخسر يامنيف انا ملاك بنت مساعد انا كدّيت لين وصلت لشخصيتي هذي وشغلي ومكاني ، عضيت مخدتي كل ليل عشان لا يطلع صوت دموعي ، تعفنت بالوحلّ وتلونت بالسواد وقبلت اصير شيطان ما اصير ملاك نفس ما تمنوا اهلي اصير

منيف تأفف بتعب؛اقسم بالله انهدّ حيلك ياملاك وانا تعبت معك ، اقسم بالله تعبان امثل واخالطهم ، تكفين خلينا نترك كل شي خلاص انتي تعبتي وانا تعبان ومضغوط ، تدرين وش يعني يكلمني نهار يعلمني ان في حيوان اطلق على سيارتك ؟ تعرفين وش يعني ركضت دربي خايف افقد اخر شي يخليني اعيش ؟

بكت ملاك تناظره وكمل منيف:انا اول فرحه لاهلي اي بس والله اني اشوفك فرحتي أنا

غطت فمها ملاك تناظر منيف وهي تبكي بتعب وكمل منيف:والله مستعد اختفي من كل شي واجي معك ولحد يلاقي لنا عنوان

كانت بتقوله وتسأله ومنصور لكن سمعت صوت عقاب ينادي:ثنيان

عقدت حاجبينها وطلعت من الديوانيه وناظرت ثنيان اللي واقف ، تغيرت ملامحها من وجوده وشافت بعيونه انه سمع كل شي

ناظر سيل دموعها وموج عيونها ولاقدر ينطق بكلمه اكثر من اللي سمعه غير انه التفت يمشي لعقاب مبتعد عنها

وبلعت ريقها وغمضت عيونها بتعب ودخلت تقفل الباب عليهم وهمست:لا ناخذ راحتنا هنا

اخذ نفس منيف وجلس:ماني ماخذ راحتي اصلاً ، كل ماشفت نهار مع اهله تجيني ضيقه ما يعلم فيها الا الله

مسحت دموها ملاك تستجمع نفسها وتمشي بالمكان وتهدي نفسها ونطقت:بجي انام عندك

ناظرها منيف اللي ماسك راسه:وثنيان ؟

ملاك:خله ينام لوحده ماني وساده لأحد

سكت منيف وجلست ملاك

'

دخل الغرفه يناظرها فارغه ولف من تقدمت خدامه:مدام ملاك تبغى وساده

سكت ثنيان ومشت الخدامه تاخذ مخده وكريم ملاك اللي على التسريحه وخرجت تاركه ثنيان

عرف انها عند منيف وبتنام مع نقطة ضعفها الوحيده

قفل الباب ومشى بهدوء يجلس على السرير

كان أهدا من الموج بساعة هدوء يناظر الفراغ يسترجع كل شي صار وكل شي سمعه

يفتش ورا ماضي ملاك ويعرف ان كل هذا اللي هي عليه الحين اساسه ماضي سيئ ، اساس كل هذا الثبات نقص عاطفي أسري

مصدوم ان منيف يعيش شي يشبه ملاك لكن ما يبيّن عليه مصدوم ان منيف مو طبعه هادي وكلمته قليله ، منيف يحس بمشاعر نقص بوجوده مع نهار اللي رديفه بالعمر لكن تربى نهار بأفضل بيئه وخرج منها بأفضل شخصيه

يتذكر صورة ملاك مع اهلها وصورهم اللي بغرفتها ويتذكر الصوره اللي ما نسي أمرها ، صورة المجهول اللي محتفظه فيه وكان سبب في انها ترجع للبيت وله

كل شي شافه منها من يوم دخلت حياته يعيده ويرجع يفهمه من جديد بشكل غير

كل دموعها وكلامها وتعبيرها كل نظراتها فهمها ، فهم ان ملاك بعمرها ما شافت عقاب بشكل غير انه يكون أب ولو حاولت وسعت عشان تتزوجه ماقدرت ولا حست انها بتقدر ، فهم ان نظراتها الهاديه لجمعاتهم ماهي الا صدمه لها وذهول من وضعهم وحالهم سوا

انسدح على السرير وتثاوب بنعاس وهو يفكر وغمض عيونه يستعد يبدأ في وسَن النوم ويغرق فيه

-

( لا تنسون النجمه ⭐️ )