تحميل رواية «غرورك اللي علم الطاووس نفش ريشه» PDF

نزلت من الطياره بدون شنطه نفس ما سافرت بدونها لمكه ومشت تاخذ لها قهوه بهدوء نفس هدوء داخلها

وشربت من القهوه تخرج من المطار وتركب تاكسي للخبر

ناظرت حوالينها الطريق والبحر واخذت نفس طويل تشوف الموج ، الموج اللي صار يشبهها وتشبهه

ونزلت عيونها بهدوء لين وصلت للخبر وعطته عنوان بيت منيف

ووقف التاكسي عند البيت وناظرت سيارة منيف ودفعت له ونزلت

مشت للبيت واخذت نفس طويل ودقت الباب ما فتحته

وقف منيف ومشى يفتح الباب وجمد وجهه يوم شاف ملاك

ابتسمت له تشوف تعابير وجهه وتقدمت له تحضنه وانصدم محله وهمس:ملاك

غمضت عيونها وهي حاضنته:اشتقت لك

عقد حاجبينه وابتعدت عنه تناظر وجهه:ما اشتقت لي ؟

منيف:ليه ؟

تنهدت ولفت وقفلت الباب ومشت للبيت وفصخت حجابها وجلست ورفعت عيونها له من دخل

منيف:ليه ملاك ليه ؟

ملاك:عشان هذا المفروض

منيف جلس وناظرها وابتسمت له:بس رجعت احسن لا تخاف عليّ

منيف:كل شي سيئ ظنيته خفت عليك ودورتك ولا نمت ، ليه ملاك ؟ ايه تعاقبيني معك ؟

ملاك:منيف تكفى افهمني

منيف هز راسه:على الاقل علميني لا تخوفيني عليك تعرفين وش يعني الاقي سيارتك واغراضك بالشاليه ولا احصلك انتي ؟ تفهمين وش يعني اللي عشته ؟

ملاك رفعت كتفها:ما فكرت بشي وقتها

تنهد منيف ورجعت ظهرها لورا:مين دورني معاك ؟

منيف:كلهم

سكتت ثواني وكمل منيف:ثنيان كان عندي هنا امس

رفعت عيونها ملاك واخذت طرحتها:بدخل اريّح

منيف:ماتبين تسألين عن شي ؟

هزت راسها بالنفي وتركته تدخل غرفتها

غمضت عيونها بتعب وانسدحت وناظرت صورها اللي بالغرفه وصور اهلها

وتقدمت تفتح درجها وطلعت من داخله ألبوم الصور وجلست بإعتدال تشوف صورهم وابتسمت تلمس وجيههم

ولفت باقي الصور تشوف صورتها مع شادن ومنصور ومنيف وعقدت حاجبينها بإنزعاج تناظر وجيههم

مستحيل هم اللي عاشت معهم واستأمنت روحها بينهم ، ماظنت بيوم انها بتتعور ومن هذولا اللي كانوا اقرب لها من اي احد

وقفت بالألبوم تفتح لابتوبها اللي على طاولتها وجلست تسحب كرسيها وفتحته تبحث عن رقم ديّة منصور ورجعت ظهرها لورا تنتظره يفتح

ولانت ملامحها مالقت للديّة أثر ، عقدت حاجبينها تكتبه من جديد ولا جاها شي

جمد وجهها من شكت بخروجه ومشت وخرجت برا وناظرت منيف:وش صار ؟

تنهد منيف يناظرها وهمس:منصور خرج

جمد وجهها بصدمه وعض شفته منيف يناظر تعابيرها

تمسكت بالكنبه تجلس وتناظر الفراغ ورمشت بهدوء ولفت على منيف بخوف:عرفوا ؟

هز راسه بالنفي:اذا قصدك عقاب وعياله لا ، ثنيان بس اللي يدري

رجف قلبها من اسمه وتنفست بسرعه بخوف

وتقدم منيف يجلس جنبها:كان عندي ثنيان

هزت راسها بالنفي:مابي اسمع شي منيف تكفى تعبت لين استجمعت نفسي مابي شي يهدني من جديد

منيف:ماتبين تشوفين عقاب ؟ تراه سهر بالقسم يحاول يعرف مكانك

هزت راسها بالنفي ولفت عليه:مو اليوم

سكت منيف واخذت نفس بتوتر ملاك ولفت لمنيف:شفت منصور ؟

هز راسه منيف:وعرفت وش قال عنك لثنيان

صدت وغمضت عيونها بتعب وتقدم منيف:وعطيته حقه واخذت حقك منه

لفت وعقدت حاجبينها:وش سويت ؟

منيف:رحت ضربته ببيت عمي وثنيان كان معي

ملاك:ثنيان وش يسوي معك؟

منيف:ياخذ حقك

سكتت ملاك وكمل منيف:وريته فيديو القضيه وعلمته ان منصور يلفق عليك كلام ويقذفك بشي مستحيل يمسّك ورحنا سوا نهدّ فيه

ابتسم ثواني منيف:وضربت عمي بعد

جمد وجهها بصدمه:منيف ؟

منيف:ليش تناظريني كذا ؟ هذا حقهم وحق اي واحد يتكلم عليك ، مستحيل اسمح لهم يجحدونك ويخربون سمعتك واقعد

سكتت ثواني وهمست:وش قال ؟

منيف:ماقال شي ثنيان بس ماهو مصدقهم انا متأكد

لفت ملاك بهدوء ورمشت تناظر الفراغ قدامها

منيف مسك كتوفها بقوه:ما بسمح لأحد يعورك اكثر يكفي اللي جربتيه منهم

تنهدت ملاك بتعب وهزت راسها ورفعت عيونها من دق الباب وعقدت حاجبينها

ووقف منيف ومشى للباب وفتحه

نهار:الفال الطيب صاحي ؟

ابتسم منيف:صاحي وعندي ضيف

نهار تقدم:من ؟

منيف:ماتقدر تدخل السموحه بس ملاك

انصدم نهار وناظر منيف:احلف ؟ ملاك رجعت ؟

هز راسه منيف وابتسم وتقدم نهار يرفع صوته:ملاك اينجل تكفين بشوفك

ابتسمت ملاك بحنيّه من سمعت نهار يناديها ومشت لغرفتها تاخذ عبايتها ومشت تخرج

ورفع عيونه نهار بصدمه من خرجت له:اقسم بالله انها مليون مرحبا

ابتسمت ملاك بإمتنان لنهار:شلونك نهار ؟

نهار:وينك انتي ليه تخوفينا عليك ؟

ملاك اخذت نفس:لا تسأل عن شي اهم شي اني بخير قدامكم

نهار:والله حمدلله على سلامتك خوفتينا عليك

ملاك:اشتقت لك ولأصايل وخالتي شلونكم ؟

نهار:تعالي معي ارجعي البيت وشوفيهم تكفين

ملاك:لا لا تكفى نهار

نهار:عشان ثنيان ؟

سكتت ملاك ولف منيف عليها ورفعت عيونها عليهم:لا نهار

نهار:وش صار معكم ؟

ملاك:ولاشي

نهار:ولاشي انتي وهو اتفقتم تقولونها ؟

ملاك انضغطت ورفعت يدها على عنقها بتعب ولف منيف:بلغ عمي عقاب وان شاء الله ترتاح ملاك وتشوفه

نهار هز راسه:ملاك ان احتجتي شي كلميني

هزت راسها ملاك وابتسمت له وابتسم نهار ورفع كفه يضرب لها تحيّه وضحكت بخفوت

وابتسم منيف ومشى نهار راجع وعض شفته يسوق

راجع للبيت ودخل يوقف سيارته ويدخل البيت:امي

لفت نوره من صوته ورفع راسه ثنيان

دخل نهار وابتسم:خبر بمليون ريال وسياره

عقاب:وشفيك ؟

نوره:بسم الله وش صاير ؟

نهار ابتسم وناظر ثنيان:ملاك

لانت ملامح ثنيان وكمل نهار:رجعت

شهقت أصايل بصدمه ولفت نوره:اسألك بالله ؟

نهار:والله عند منيف قبل شوي كنت عندهم

أصايل وقفت:تكفى خذني اشوفها نهار

عقاب سكت ولف لثنيان اللي صد بهدوء

ولفت نوره:عقاب قوم نروح نشوفها

عقاب:جاي جاي

وقفت نوره تخرج وخرجت أصايل ولف نهار من لخلت جنى:وشفيكم؟

نهار:ملاك رجعت

رفعت حاجبينها جنى:بالله ؟

لفت تشوف ثنيان ولف عقاب عليه:ما بتجي ؟

هز راسه بالنفي ثنيان ورجع ظهره للخلف يشد على يده

ووقف عقاب يخرج من عندهم وناظر الفراغ ثنيان وهز رجله بتوتر

جنى همست:كل شي غريب شادن فجأه تتطلق وملاك فجأه ترجع

لف ثنيان عليها ورجع صدّ بلع ريقه يمسك ياقة تيشيرته من تعرقه من طاريها

وقف بربكه ووقف عند شباك الصاله يناظرهم رايحين ومسح على شعره اللي محلقه

'

اكلت من صحنها بهدوء ورفع عيونه منيف:بتنامين ؟

هزت راسها ملاك بدون تناظره وسكت منيف

ولفت من دق الباب ولفت لمنيف:علمهم

هز راسه منيف ووقف وارتبكت ملاك توقف وخرج منيف يفتح الباب ودخل عقاب:شلونك منيف ؟

ابتسم منيف وهز راسه:حياكم

دخل عقاب ودخلت نوره وبجانبها أصايل وناظرته أصايل ومشت تدخل

دخل عقاب وعضت شفتها ملاك تناظر نظراته لها تفهم عتابه وبلعت غصتها وهمست:معذوره صح ؟

هز راسه عقاب وتقدم لها:زي دايم

ابتسمت ومشت تحضنه وحضنها عقاب:خوفتينا عليك

ناظرت نوره وأصايل خلفه وابتسمت بين دموعها تشوف خوفهم وجيّتهم لها

وابتعد عقاب وتقدمت نوره تحضنها:الف حمدلله على سلامتك ياملاك خوفتينا يا أمي خوفتينا

ابتسمت بإمتنان ملاك بين دموعها وابتعدت عنها نوره:انتي بخير يا أمي ؟

هزت راسها ملاك وتقدمت أصايل وحضنتها ملاك وتنهدت تغمض عيونها

أصايل:اشتقنا لك

ناظرهم منيف وهو واقف وابتعدت ملاك تلف عليهم:حياكم

جلسوا وجلست ملاك تشد على ركبتها بربكه

وناظرتها نوره:وش صاير معكم يا أمي ؟ لا انتي ولا ثنيان لقينا لكم مكان

رفعت كتفها ملاك:ولاشي

عقاب:في في ياملاك واذا مارضي يتكلم ثنيان انتي بتعلمينا

أصايل عقدت حاجبينها بضيق:تكفين ملاك

ابتسمت تناظر سؤالهم وتجمعت دموعها بمحاجر عيونها وهزت راسها بتعب

ووقفت نوره تجلس جنبها ومسكت كفها:وش صار معكم ؟ تهاوشتوا ؟ احد دخل بينكم ؟ علميني يا أمي

تنهدت ملاك بضيق ورفعت عيونها لعقاب ودها تقوله كل شي ، كل شي ويحلّ لها امورها زي ما يحل مشاكل عياله دائماً

عقاب:علميني

ملاك هزت راسها بالنفي:ما اتفقنا

عقدت حاجبينها نوره:وشلون ما اتفقتوا ؟ انتم دايم متفقين ما اختلفتم

هزت راسها بالنفي ولفت لنوره ولفت نوره على عقاب

عقاب:ومهما ، مايكون الحل تنفصلون

رفعت عيونها ملاك وهمست:يبي ينفصل ؟

عضت شفتها أصايل ولفت لعقاب اللي سكت

وبلعت ريقها ملاك ولفت لمنيف وناظرهم منيف وهو ساكت

واخذت نفس ملاك ورجفت كفوفها تستجمع نفسها:يصير

عقاب:لا ما يصير بتعلميني انتي مابي اسمع من ثنيان وان طلبتي انتي تنفصلون بكون معك

أصايل:ملاك تعالي البيت عندنا واجلسي مع ثنيان ومع ابوي وتكلموا يمكن تنـ

وقفت بتوتر ملاك تمسح كفوفها:لا لا خلاص

ناظرتها نوره:ملاك يا أمي

ملاك:تكفون لا تضغطون عليّ

هز راسه عقاب وسكتت نوره بتعب ووقف عقاب:جينا نطمن عليك وهذا المهم ، سلامتك ، وان بغيتي تتكلمين تلاقيني دايم

ابتسمت له بهدوء ملاك ووقفت أصايل بتعب ولفت تناظر منيف اللي جالس ورفع عيونه عليها

تنهدت من وضعهم ووضع ملاك وثنيان وخرجت ولف عقاب على منيف:ان احتجتم شي كلمني

هز راسه منيف ووقف:ماتقصر عمي

لفت نوره تمسح على ذراع ملاك وابتسمت لها ملاك:شكراً

تنهدت بحنيّه نوره وتقدمت ملاك لها:احضنيني من جديد

لف عقاب عليها وصد منيف وتقدمت نوره تحضنها وغمضت عيونها ملاك

شدت عليها تدور حضن دافي حضن أم حضن يستقبل تعبها ويزيحه

مسحت على ظهرها نوره:الله يجبر بقلبك يا أمي ويصلح ما بينكم

ابتعدت عنها ولفت نوره لعقاب وخرجت معه

لفت أصايل عليهم عند السياره:ابوي

لف عقاب وناظرتهم:ينفع اجلس عند ملاك؟

لفت نوره على عقاب وناظر البيت عقاب ثواني وهز راسه ومشت أصايل تدخل البيت

منيف لف لملاك اللي واقفه ومميله راسها بتعب تناظر محلهم وتقدم لها يحضنها من الخلف وتنهدت تمسك ذراعينه

ولف منيف من دخلت أصايل ولانت ملامحه وعقدت حاجبينها ملاك:أصايل ؟

بللت شفايفها أصايل بتوتر:ينفع اجلس عندك صح؟

بعد منيف عن ملاك وناظرتها ملاك ثواني وهزت راسها:ينفع

ابتسمت أصايل بهدوء ومشت ملاك لها:تعالي

مشت تدخل غرفة ملاك وابتسم منيف يناظرها وجلس بالصاله

دخلت أصايل وناظرت غرفة ملاك وابتسمت تشوف صورها وصور اهلها

لفت عليها ملاك:اشتقتي لي والا بتحققين معاي ؟

أصايل:الاثنين

ضحكت بخفوت ملاك وجلست على السرير ومشت لها أصايل:والله مكانك بالبيت خالي ملاك مو متعوده ولا راح اتعود

ملاك:تأقلمي

أصايل:انتي انصدمتي يوم ابوي قال ان ثنيان يبي ينفصل لان انتي مانويتي صح ؟

سكتت ملاك تناظر أصايل وكملت أصايل:تكفين ملاك بجمعكم وتكلموا سوا وماراح اتدخل بس بعد كل هالايام بدون بعض يمكن تلينون شوي تشتاقون لبعض ويرجع كل شي نفس قبل

هزت راسها ملاك بالنفي:ماراح يتصلح شي أصايل صدقيني مستحيل نرجع

أصايل:بترجعون واحسن من قبل بعد لان ادري ان هالفتره ما تأقلمتوا على فراق بعض هالفتره اشتقتوا لبعض

صدت ملاك بهدوء وكملت أصايل:ونفس ما اشوف نظراتك وتعبك اشوف نظرات ثنيان وتعبه ، يمكن اللي صار بينكم شي كبير وبظنكم ما يتصلح بس صدقيني الحب اكبر من كل المشاكل

ملاك لفت لأصايل:الحب مو كل شي أصايل

أصايل:كل شي ، الحب كل شي هو اللي يعطيك جمال ويعطيك راحه ويعطيك نجاح وصبر ويعطيك ذريه صالحه نظيفه صحيّه

سكتت ملاك تناظر أصايل وكملت أصايل:واذا انتي تحبينه وهو يحبك بترجعون لانكم عمركم ما خرجتوا من بعض ، هو ترك كل شي وهرب لساحل بحري ما اعرف وين وانتي هربتي لربي معناته كلكم تأذيتوا ليه تعاقبون بعضكم ببعض ؟

ملاك تنهدت بتعب وصدت عن أصايل ومسكت كفها أصايل:مابضغط عليك اكثر ، تجهزين لنا فيلم ؟

لفت ملاك لأصايل وابتسمت لها وابتسمت أصايل وهزت راسها ملاك ووقفت

مشت تفتح الباب تخرج ملاك وتركته مفتوح وتلفتت أصايل بالغرفه ولفت من سمعت صوت

وابتسمت من شافت يامور وشهقت من شكله الحلو وهمست:يامور

تقدمت له بهدوء:يصير المسك ؟ والا تسوي فيني زي ما سويت في منيف ؟

قربت كفها تمسح عليه وابتسمت من ارتاح لها وضحكت تناظره:اشتقت لكوتي ؟ اجيبها عندك ؟

تذكرت منيف وكيف كان يجي عشان كوتي وعشانها وابتسمت بهدوء ورفعت عيونها من وقف عند الباب يناظرها

ابتسم بخفوت بدون يبين اسنانه يناظرها جالسه عند يامور وهمس:ما يخلي احد يلمسه كذا كثير

هزت راسها أصايل تناظر يامور:يمكن يحبني

اتسع وسع ثغره منيف وهز راسه:يحبك أكيد مو يمكن

عضت شفتها بحيا بدون تناظره ودخلت ملاك وناظرتهم ولف منيف على ملاك وتلاشت ابتسامته

ملاك:منيف تجيب لنا اغراض من برا ؟

منيف هز راسه:اي

ملاك:طيب جيب لي قهوه وأصايل شتبغين ؟

رفعت عيونها أصايل وهز راسه منيف:ماتشا

ابتسمت له أصايل وهزت راسها ولفت عليه ملاك تناظره ورجعت تناظر أصايل

ولف منيف لملاك وخرج تاركهم ووقفت محلها ملاك ثواني تفكر

ولفت تدخل لأصايل:وشو بتاخذين قطوة منيف مع كوتي زياده ؟

ابتسمت أصايل تشيل يامور:متعود عليّ اصلاً ومتعود على كوتي

لفت ملاك عليها وكملت أصايل:يجيني دايم يامور

سكتت ملاك وابتسمت أصايل تلعب مع يامور وفصخت طرحتها وعبايتها

وتقدمت ملاك تشغل اللابتوب وانحنت أصايل تتصور مع يامور ولفت ملاك تناظرها

'

واقف عند الشباك الكبير يناظر الحوش بهدوء وناظر سيارة السواق من دخل البيت ونزل عقاب مع نوره وبلع ريقه وصد من دخلوا ولف عقاب عليه وناظرهم ثنيان

تقدمت نوره وناظرت ثنيان:حرام عليك ثنيان ليه ماجيت معنا ؟

ثنيان:مالي لزوم

عقاب تقدم وناظرهم ثنيان:قالت شي ؟

نوره هزت راسها بتعب وجلست:ماقالت ياليتها تكلمت من شافتنا بكت وطلبتني احضنها مرتين ، البنت تعبانه ثنيان

سكت ثنيان ولف عقاب عليه:بتنحل السالفه ثنيان بتنحل

بلع ريقه ثنيان ومشى يجلس عقاب وناظرهم ثنيان ومشى يطلع غرفته

فتح الباب وتنهد بتعب وجلس على السرير ما يقدر ولا يعرف وش يسوي

مستحيل يرجع كل شي نفس قبل مستحيل ، كيف يشيل من باله منصور والسبب في نار ملاك اللي ماحرقت الا هو

كيف يتخطى سرقتها لاهله عشان كلب جحدها ورمى عليها اتهامات يعقب تكون فيها

كيف يقدر يتقدم اكثر ؟ كيف بيقدر يواجه ؟

تأفف بتعب من التفكير ولف من دخل نهار:اخوي مهندسنا الكبير

ثنيان:مو رايق نهار تكفى

نهار تقدم له:اي ادري وعشان كذا جيتك عندي بطوله

ثنيان رفع عيونه لنهار:لا يكون بالعلا بعد ؟

نهار ضحك:لا لا بنادي ابوي

ثنيان هز راسه وكمل نهار:بتجي لازم ولا تعتذر لان مالك اعذار

ثنيان:والله نهار مدري لو كان لي خلق جيت

نهار:اقولك بطوله بطوله ومعي راشد ولد بندر ابي اكسر خشمه

رفع عيونه ثنيان من جاب طاري راشد وتذكر جواهر واكيد انها بتجي مع منصور للبطوله وعض شفته بقهر

ما بيقدر يطردهم ما بيقد يمنع دخولهم لان الحين امام الناس لبندر دين عليهم

نهار:هاه وش قلت ؟

هز راسه ثنيان وهو ساهي وخرج نهار تاركه وناظرته نوره:وش قال ؟

نهار:وافق

نوره:حمدلله الحين كلّم أصايل تقنع ملاك تجي بعد نبي يشوفون بعض ويقعدون مع بعض يجوز يتراضون

نهار اشر على خشمه وابتسمت له نوره

'

ضحكت أصايل تلف لملاك:بصراحه ملاك تحبين وجودي الحين والا لو ماجيت احسن ؟

لفت ملاك وعقدت حاجبينها:وش هالكلام؟

أصايل جلست ويامور بحضنها:يعني حلو وجودي هنا في هذا البيت ؟

سكتت ملاك تفهم أصايل ورفعت حاجبها:والله ما اعرف انتي عاجبك بيتنا هذا والا ماهو ذوقك ؟

أصايل:ذوقي وعاجبني

هزت راسها ملاك ودق الباب ووقفت ملاك وفتحت الباب واخذت الاغراض من منيف وحك جبينه منيف:اجيب شي ثاني ؟

ملاك:لا

منيف:طيب يامور عندكم ؟

ملاك:عندنا

منيف:تحتاجون شي ؟

ملاك:منيف ؟

ناظرها منيف وهز راسه:طيب

مشى وتركها وقفلت الباب ومدت الماتشا لأصايل وابتسمت أصايل من شافتها من محلها المفضل مع ان ملاك من كوفي غير لكنه اخذ لها اللي تحبها

ملاك شربت من قهوتها:اي أصايل

لفت أصايل ولفت عليها ملاك:قلت لي على ذوقك بيتنا ؟

هزت راسها أصايل وناظرتها ملاك:بالعكس انا ما اشوفك تشبهين هالمكان ابد

تنهدت أصايل:ملاك !

ملاك:وش صار بينك وبين منيف ؟

بلعت ريقها أصايل تناظر ملاك

ورمشت بهدوء ملاك:تكلمون بعض ؟

هزت راسها بالنفي أصايل:لا

ملاك:اجل وش بينكم ؟

أصايل نزلت عيونها ليامور:يمكن يامور وكوتي

ناظرت القطو ملاك ورفعت عيونها أصايل:انا جيت عشانك انتي

سكتت ملاك تهز راسها ماودها تبدأ بحوار مع أصايل بهذا الوقت بالذات

أصايل:وصح نهار كلمني عنده بطوله بالنادي ويبغاك تحضرين

ملاك هزت راسها بالنفي وعقدت حاجبينها بإنزعاج أصايل:ليش ملاك ؟ عادي تعالي

ملاك:لا أصايل اخر مره طاوعتك وجيت معاك لقيت النادي فاضي

ضحكت أصايل:هالمره والله بطوله تبغين ارسل لك كارد الدخول عشان تصدقين ؟

ملاك:مصدقه بس ما ابي اروح

أصايل:ماراح يجي ثنيان

لفت ملاك عليها:ما يهمني

أصايل:الا لو عرفتي ان ثنيان ما بيجي بتجين تكفين ملاك تعالي معانا اذا مو عشاني عشان نهار

ملاك تنهدت من طاري نهار:اشوف أصايل

ابتسمت أصايل:بفهمها اوكيه وبقول لنهار

اخذت جوالها أصايل وصدت ملاك بهدوء

-

دخل النادي مع ساري وجنى اللي وصل معهم وناظر الناس الموجودين والاحتفال الكبير بالنادي وتقدم يشوف ابوه وامه وأصايل وجاسر جالسين ومشى معهم

ابتسمت نوره:وصلتوا ؟

ساري:تأخرنا شوي جنى كانت بالصالون

ضحكت جنى:سوري بس حمدلله ما بدأ

عقاب:لا لا للحين

جلس ثنيان ولفت أصايل عليه وابتسمت له ورد لها الابتسامه ولفت تناظر الخيول اللي تتدرب

ولف ثنيان من دخل منيف وبلع ريقه بتوتر لكن كان منيف لوحده

ابتسم لهم من بعيد ولفت أصايل من رفع كفه عقاب وابتسمت تشوفه من بعيد

نزل من بينهم لين تحت وتقدم يدخل الاسطبل لنهار ولف نهار:الفال الطيّب

ابتسم منيف وحضنه:موّفق

نهار:لوحدك جاي ؟

منيف:جايه ملاك بس ماهو الحين

نهار:ان شاء الله ما تتأخر

منيف:لا تفكر انت جب البطوله

نهار ابتسم:بجيبي ولا يهمك

ضحك منيف وصد يناظر الخيول ورفع عيونه يحاول يناظر جلوسهم لكن كانوا ابعد من مدى بصره

وتقدم منيف يجلس قريب من الاسطبل

دخلت النادي تسمع ضجيج البطوله واخذت نفس تتقدم تدخل وتناظر الاسطبل والحضور

بلعت ريقها تذكر جيّاتها لهنا وتذكر اخر مره مع ثنيان

دخلت تناظر حوالينها ولفت أصايل وابتسمت:ملاك

لف ثنيان وناظرها من بعيد وطاحت عينها بعيونه من لف عليها وجمدت محلها

نبض قلبه من شافها بعد مدّه طويله والتقوا من جديد وعاد كل الشعور اللي تعب عشان يتخطاه ويخبيه

ياما حاول وياما جرّب لكنه ما قَوى ، ماعصاه قلبه الا على نزوعها من صدره

ملاك ، ملاك اللي عاش معها جنون العاقل ، ملاك اللي اشعلت داخله مع انه موج والموج قادر

بلعت ريقها تشوف نظراته من بعيد ، شعره اللي حلقه ولونه اللي تغير وتذكرت اخر كلامه وشعوره ونظراته ، تذكر القسوه اللي جربتها منه بعد حنيّه طافحه منه

ياليت تتخطى كل الحضور وترجع لحضنه من جديد ، تحبه وهي معاه وتحبه يوم يتفارقون وتحبه يوم يتواجهون

ماعمرها طاحت وتعورت الا بعد فراقها عن ثنيان اللي علمها وشلون الحنيّه وكيف المحب يمحي خطايا الحبيب

صدت بعيونها من طولوا بالنظر ومشت تنزل وناظرها لين جلست بجانب منيف اخر المدرجات

ولفت نوره تناظر ثنيان وتنهدت من جلوسه اللي مستمر

ظنت انه بيقوم لها لكنه ماقدر رجع ظهره للخلف وصد بعيونه

جلست بجانب منيف وهمست:كنت ادري انها تكذب

منيف:وليه جيتي ؟

ماردت عليه ملاك وناظرت الخيول من بدأ إعلان المتسابقين ولفت من دخل راشد بجانب فرسه ورفع كفه لأهله ورفعت عيونها تناظر بندر وزوجته

بلع ريقه بترقب منيف ولف لثنيان اللي بالاعلى ورجع صد

بدأت أشواط القفز على الحواجز واندمجت تنتظر فوز نهار فقط

لف ثنيان من دخل محمد وخلفه زوجته وشادن ونزلوا وثواني ودخل منصور مع جواهر

وشد على قبضة يده ثنيان بقهر ولفت نوره بصدمه:جواهر وش جابها معهم ؟

جاسر لف يناظرهم وانصدمت أصايل:جواهر مو برا السعوديه ؟

نوره:هذا منهو اللي معهم ؟

جاسر:ولدهم

عقدت حاجبينها نوره ولف ثنيان عليهم:تزوجت اخو شادن

جمد وجه نوره وغطت فمها بصدمه جنى وناظرهم جاسر من بعيد يناظرونهم وجلسوا

اخذت نفس ملاك ودها تلتفت وتشوف ثنيان وكيف وضعه لكنها ماتقدر

بللت شفايفها ولفت من نزلت شادن وعقدت حاجبينها ملاك من وجودها وتقدمت شادن لها:ملاك

ناظرتها ملاك وهي جالسه ووقف منيف:وش جابك انتي ؟

شادن:جيت اسلم على ملاك كانت مختفيه فتره طويله ما اعرف وش صار معها ، عسى خير ملاك ؟

وقفت ملاك قدامها واخذت نفس:افضل لك تتركيني لان ماراح يعجبك شي لو تكلمت

شادن ابتسمت:يالله مو مشكله بروح اجلس مع حمولة منصور احسن

عقدت حاجبينها ملاك ولفت من اشرت لها شادن وناظرت جواهر ومنصور اللي واقفين على المدرج وجمد وجهها من شافت منصور ماسك كف جواهر ويناظرها

عقدت حاجبينها بصدمه وانقطع كل صوت عن مسامعها تناظر منصور حرّ ، واقف قدامها الشخص اللي حرقت نفسها وحرقت ثنيان واهله وناس كثير عشانه ، اللي حرقها وسبب نارها

رمشت بصدمه وابتسم منصور يشوف نظراتها له وأول ملتقى لهم من جديد

لف ثنيان يناظر منصور من لفت ملاك ورجع يناظر ملاك وشد على قبضة يده يشتعل نار من نظراتهم

نشف الدم بعروق ملاك وعجزت ترمش وهي تناظر منصور وعقدت حاجبينها ثواني تستوعب وجود جواهر بجانبه وكل هذي الفوضى وابتسمت شادن:عروستنا جواهر

لفت ملاك بصدمه على شادن وضحكت شادن ومشت تاركتها تطلع ورجعت ملاك تناظر منصور بصدمه

تنهد منيف يناظرهم من بعيد ويناظر ردة فعل ملاك

نزل منصور يجلس معهم ومع جواهر وناظرتهم ملاك جالسين مع بندر ومختلطين معه

هي سددت من حياتها وعمرها وخيرها وضميرها ٢١ مليون عشان يكون منصور اليوم هنا وبأول خروجه ، جلس مع أعداء عقاب وعدوتها وكأنه ينتقم منها ينتقم من خيرها اللي قدمته له

ناظرها منصور من بعيد ولفت عليه جواهر:تشوف صدمتها ؟

مارد منصور يناظر ملاك ولف لجواهر:ثواني وجاي

محمد:خلك منها

مارد منصور ووقف وناظره ثنيان ينزل وتقدم بغضب يناظره متوجه لملاك

وقف قدام ملاك اللي تناظره بصدمه بجمود وناظرهم منيف وهو واقف بجانب ملاك

ناظرت عيونه ملاك بصدمه وذهول وتساؤل وحيد همست فيه:ليه ؟

منصور ناظر شكلها:تغيرتي صرتي تشبهينهم

هزت راسها بالنفي بتكرار ملاك:ليه ؟

منصور:سألت كثير وانا وحدي بين اربع جدران هالسؤال يوم عرفت انك بعتيني وتزوجتي وكملتي حياتك معه وجاتك منه سياره وشاليه وتركتي اللي دخل السجن بسببك

عقدت حاجبينها ملاك:بسببي ؟ يوم دافعت عن شرفي برجولتك وبنفسك صرت انا السبب ؟

منصور ضحك بسخريه:صح نسيت انك جحدتي اللي سويته لك لانك لقيتي الاغلى

لف يناظر ثنيان من بعيد اللي يناظرهم ورجع ناظرها:والكايد احلى

ملاك تقدمت له تناظر عيونه بقهر:انا اللي عشت بسجن مو انت انا اللي وسخت يديني بسببك مو انت ، انا اللي تعبت وانهد حيلي وبكيت وركضت عشان بس انت تكون هنا

ضربت صدره باصبعها تأشر عليه وتناظره بحرقه من دموعها اللي بعيونها:انا يامنصور انا

سكت منيف يناظرهم وهزت راسها ملاك:انا اللي قلت عنها رخيصه ومن حضن رجّال ورجّال ، انا اللي جحدت كل ايام عمرها اللي قضتها عشانك ، انا

تنفست بسرعه بتعب من حست انها بتبكي وهز راسه بالنفي منصور:ولا راح احزن ويأثر عليّ

سكتت تناظره وناظر عيونها منصور بحده وقهر

لفت أصايل وعقدت حاجبينها:وشفيهم ؟

جاسر سكت يناظر منصور من بعيد ووقف ثنيان ما تحمل حريقه ورفع عيونه عقاب:ثنيان

مشى ينزل ورفع عيونه منيف يناظره جاي وتقدم ثنيان وسحب منصور من ذراعه ولف منصور يناظره

بلعت ريقها ملاك تناظر ثنيان وتقدم ثنيان:عسى خير ؟

منصور:شدخلك ؟

منيف تنهد:خلاص ياخي ماهو وقته المكان مليان ناس

ناظره ثنيان بحده وابتسم منصور:تغار يعني ؟ لا اذا بتغار عليها مني فبتغار اكثر اذا عرفت انها مرّت على كل شيوخ هالمكان

عقدت حاجبينها ملاك من كلام منصور عنها وتقدم ثنيان لمنصور ودخلت بينهم جواهر:منصور

ناظره ثنيان بحده ولفت جواهر على ثنيان تناظره وناظرها ثنيان ورفعت عيونها ملاك عليهم وهزت راسها بالنفي بتعب

واخذت شنطتها ومرت من بينهم تطلع وتقدم ثنيان لمنصور وهمس:لعد تقرب منها

ابتسم منصور ولارد ومشى ثنيان خلفها وناظرهم عقاب ولف لجاسر اللي نطق:ثنيان

مارد عليه ثنيان وخرج خلف ملاك ، مشت بسرعه لسيارتها بتعب ورجفت اصابعها تفتح السياره

وتقدم لها وهمس:ملاك

غمضت عيونها بتعب من صوته ومناداته لاسمها ونزلت دموعها ماردت عليه

ووقف خلفها ثنيان ولفت عليه تناظره بموج عيونها وسكت يناظر حالها ودموعها وبلع ريقه ما يطفي حريقه الان ولا اي موج

عضت شفتها وهي تبكي بدون صوت ولفت تفتح بابها وتركب

ومسك الباب وشدته تبي تقفله ولاقدرت وغمضت عيونها تصرخ بقوه بغضب وقهر

وناظرها ثنيان يشتعل وجهها من قوة صراخها وتوقفت تتنفس بسرعه ولفت عليه تناظره وهمس:انزلي

هزت راسها بالنفي ونطقت ببحه بسبب صراخها:لا

ثنيان رفع صوته:انزلي قلت انزلي

لفت عليه تصرخ:ماراح انزل خلني لوحدي

مسك ذراعها بقوه وسحبها من السياره وعقدت حاجبينها بألم من شدته ولفت عليه بغضب:فكني اتركني

قفل باب سيارتها ومشى وهو شادها بقوه ولا يشوف احد من غضبه ونار صدره وفتح باب سيارته ودفها ولفت عليه تناظر تعامله معها وقسوة ذراعه وتجمعت دموعها تناظره

وقفل الباب ومشى يركب يسارها ومسكت ذراعها بألم وقفل بابه وشغل سيارته يطلع من النادي

عضت شفتها تمنع نفسها تبكي وتناظر الطريق ورمشت تطيح دموعها بحضنها

كل شي يعورها كل شي تعبت عشان تتخطاه وتكون قويه جاها اضعافه اليوم

كانت تظن انه بياخذها للبحر كعادة غضبهم اللي ينثرونه على الموج ورفعت عيونها تشوف بيتهم ولفت عليه:ودني للبحر

قفل سيارته بغضب:اذا كنا بنتمشى اخذتك بس جايين نصفي حسابات

ناظرته وفتح بابه ومشى لها وفتح بابها ومسك ذراعها وتأوهت بألم من كفه ومشت معه تدخل البيت

رفعت عيونها للبيت اللي تمنت تسكنه طول عمرها ولا تخرج منه ابد

دخل وطلعت معه للدرج وهمست:تعورني

فتح غرفتهم ودفعها وغمضت عيونها وقفل الباب بقوه وتقدم لها:نفس ماعورتيني ؟

رفعت عيونها عليه وهز راسه بحرقه ثنيان:نفس ما حرقتيني ؟

ملاك:قلت لك بحرقك قلت لك ثنيان ، وقفت بوجهك وصديتك وتركتك

ثنيان رفع صوته يصرخ بوجهها ويرمي مفتاحه:وقلتي لي أحبك

سكتت تناظره وتجمعت دموعها بعيونها وكمل ثنيان بقهر:قلتي أحبك وعيشتيني أيام طويله كلها كذب ، كنتي تلوميني على زواجي من جواهر وطلعتي كل لياليك جنبي تفكرين بغيري

غطت أذانيها بإنزعاج من صدمتها ورعبها ووجود منصور قدامها بعد سنين وجلست تحس ان رجلينها ما تشيلها

غمض عيونه ثنيان يتنفس من قهر:سمعتيه وش قال عنك ؟ سمعتيه هذا حبيبك ؟

صرخت توقف ملاك:لا تقول عنه حبيبي ولا صار بعمري سافرت من شوقي وضربت الموج وانا أخافه ، ما وصلت بحياتي كلها لهذا الضعف الا جنبك ، غلبتني وهزمتني واخذت سلاحي وذخيرتي ونزعت عن وجهي أقنعتي ، ما عاد فيها نار لمنصور ناري الي داخلي منك

هزت راسها تناظره من فتح عيونه ونزلت دموعها:ذقت الموج وذقت اللهب وانا جنبك

ثنيان تقدم لها:كيف قدرتي ؟ كيف جمعتيني معه بقلب واحد ؟

بكت بتعب تجلس على السرير:ماحبيته ما حبيته

ثنيان ناظرها بغضب ينحني لها:سرقتي الناس وهديتي بيوت وما تحبينه ؟ اذا هذا ماهو حب وشو ؟

رفعت عيونها عليه تبكي:عرفته وانا وحيده وبنت ١٥ سنه تمسكت فيه ظني انه حب لكن ظنيت ، وسرقت وركضت بين الشرّ عشان ضميري

ثنيان سكت يناظرها ولا قادر يطفي لهب صدره شي كل ما يذكر منصور ويذكرها وده يحرق كل شي

ناظرت عيونه اللي تشتعل لهب وميّلت راسها:انت صدقته

ابتعد عنها ثنيان يناظرها وكملت ملاك:قلت لي لو تهمك نظرة عيوني لك ما بصدق حتى الوشاه ، وصدقت

هزت راسها بخذلان:صدقته ما سمعتني

ثنيان:ماصدقته كسرت فمه اللي تكلم عليك

ملاك سكتت وناظرها ثنيان:تلوميني سمعت كلب تكلم عنك وطلع هو سبب نارك وناري ؟ كلب كان حاجز بيني وبين وصلك ؟ كلب بكّاك ليالي طويله وانتي المفروض تفرحين ؟

صرخ يتقدم لها:تكلمي

غمضت عيونها تبكي ولف بغضب وضرب الدولاب وبكت بعلو صوتها وتمسكت بالسرير بحرقه

نزلت راسها تبكي وحط راسه ثنيان على الدولاب ثواني ولف عليها يشوفها تبكي وهز راسه بتعب

رفعت عيونها عليه بين دموعها:يحرم نوم عيني لو كذبت بشعوري

وقفت ومشت له وهي تبكي:يحرم نوم عيني لو قدرت اعيش معك بدون ما ياكلني ضميري ، يحرم نوم عيني اذا قدرت اطيب منك

بكت وناظرها ثنيان وكملت ملاك:عشت عمري ثابته وماهزنّي في رحلة العمر غيرك ، حاولتك وحاولتنا وتمنيت لو اللي بيني وبينك عامر واللي بيني وبين العالمين خراب ، ماهمني شي غيرك

ناظرها ثنيان وهو يتنفس بحرقه وكملت ملاك:كنت أبيك وأرفضك ، أتجاهلك وكل مافيني يتشفق عليك ، ويوم جربت أودعك

رفعت كتوفها بقل حيله:حبيتك

صد ثنيان بتعب وغمض عيونه وعضت شفتها تناظره

هزت راسها بملامه وعتاب:ثنيان

لف عليها من نادته وعقد حاجبينه بتعب:وظيفتك تلوين ذراعي ؟

تقدمت ومسكت ذراعه بتعب:مابي أذوق قسوتك يكفي ، والله يكفي ، نسم صدري يطلع من داخلي من ضيق إبره ماعاد عندي قوه أتحمل قسوتك مع كل هذا الخذلان ، جيتك أسف وجيتك ألم وجيتك مليانه ندم جيتك جروح وجيتك وقلبي مالقيته بصدري

ناظرها ثنيان وبكت ملاك تتمسك بذراعه:تركته عندك ، أضيق من النسم بعدك وماعمري مشيت ورا ظهر أحد غيرك ، كل اللي عطاني ظهره ما ناديته

تقدمت له تناظر عيونه وهي تبكي:الا انت صوتي وروحي تناديك

ناظر عيونها ثنيان وبلعت ريقها ملاك تشد ذراعينه ولاقدرت تكابر اكثر وتقدمت تحضنه وتحاوط ظهره بذراعينها وتحط براسها على صدره

بكت على صدره تحترق مهزومه ، مخذوله موجوعه

غمض عيونه ثنيان من حضنته وشدت على ظهره ملاك:ماراح تلقى مثل حبي والقلوب وساع انا الصادق وانا الثابت بحبك رغم متاهاتي

تنهد بتعب ثنيان يسمعها وعقد حاجبينه وكملت ملاك:كنا نهر واحد متى صرنا ضفتين ؟

ثنيان هز راسه وهمس:حبك تملكني وذوقني الويل ناشدك بالله من لظى لهبك كافي

مسحت على ظهره بكفوفها ماودها تتركه ويتركها وتنهد ثنيان:لمستيني وحرقتيني ماعادني موج

رفعت عيونها عليه وهي ماسكه ظهره وناظرها ثنيان من قريب وهمست:انا موج

هز راسه بالنفي برفض لفكرتها:انتي لَهب

ملاك ناظرت عيونه من قريب:تعرفني وتعرف كبريائي وغروري ، وتعرف اني ما ركضت خلف احد غيرك ولا اعتذرت واهتميت بإعتذاري لأحد غيرك

سكتت ثواني وكملت:انا عندك رميت كل أوراقي وتمسكت فيك ، انت الوحيد اللي شفت بيض جنحاني ، رميت كل غروري اللي لبسته سنين

ناظرها ثنيان وهز راسه بنفي:رميتيه ويعزّ عليّ انك رميتيه ، غرورك اللي علّم الطاووس نفش ريشه ، غرورك اللي تلبستيه لباس عباتك وعرفتك فيه

ناظرت عيونه وكمل ثنيان:ارمي غرورك عني ماعاد فيني اتحمله زود ، غرورك ودانا الهلاك ياملاك

ملاك بلعت ريقها من نطق اسمها:ماعاد بيني وبينك غرور ومكابره ، ملاك اللي عند كل العالمين عندك غير معك مركب غرامي ما سأل عن مُنتهى ‏مرساي و أعاف المطيح إلا مطيحي على صدرك

كان يشوفها تتجرد من كل الكبرياء والغرور اللي تعوّد يشوفها عليه كان فعلاً يشوفها متمسكه فيها بحاجته تتوسل إليه وهذا المنظر أشد قسوه عليها وعلى روحها اللي علمتها الغرور

وفلتت يدينها من طوّل بالصدّه وناظرته وهز راسه بالنفي:ما طفت ناري

سكتت تناظره وتنهد ثنيان وبلع ريقه وخرج من الغرفه

تركها وجلست على الارض بتعب تحس ان كل بيبانها تقفلت بوجهها وكل دروبها ضاعت فيها ، وكل كفوف الحنيّه قست عليها

-

( لا تنسون النجمه ⭐️ )

جلس بالصاله وفتح ياقة ثوبه وناظر الفراغ يذكرها ويذكر دموعها وتمسكها فيه وحاجتها له

انهيارها وضياعها وخذلانها ويذكر بنفس الوقت منصور وكيف اختلف كل شي بلحظه واحترق

وكأنها لمسته فتره طويله ويوم احترق احترق حريق ما يرحم

مسك صدره وغمض عيونه ولف يناظر غرفتهم من بعيد يدري انها تتألم لوحدها وهو يتألم لوحده

كان وده يحضنها ووده بالحضن لكنه تمنّع من قهره وغيرته ونارها

بلع ريقه من شاف سيارات اهله وعض شفته ووقف

دخلوا البيت وتقدمت أصايل وناظرت ثنيان:ثنيان ؟

نوره:وش صار وين ملاك ؟

ثنيان:فاز نهار ؟

دخل عقاب وناظرهم وهزت راسها أصايل:فاز

هز راسه ثنيان وتقدمت نوره:تكلمت مع ملاك؟

ثنيان:هي فوق

ابتسمت أصايل وعضت شفتها نوره:حمدلله يعني تصالحتم ؟

رفع عيونه ثنيان لعقاب ورجع ناظرهم ولارد

أصايل:اوكيه باين باقي بس المهم انها موجوده هنا

نوره:تراضيها وتراضيك ماعليك يا أمي

مشت نوره تجلس ودخل جاسر وناظر ثنيان ورفع عيونه ثنيان على جاسر وعقد حاجبينه جاسر

أصايل:تعال جاسر ، ملاك بالبيت

لف جاسر بصدمه على ثنيان واخذ نفس ثنيان يصد عنه

ودخلت جنى مع ساري وابتسمت أصايل:ملاك بالبيت

ناظرتها جنى بصدمه:احلفي

أصايل ضحكت:والله

ساري:ماشاء الله البيت كله روّق برجعة ملاك

نوره:اي والله مكانها خالي

جلس ثنيان ولفت نوره:أصايل امي كلمي الخدم يجهزون لنا قعده برا وشاهي ومكسرات ومعجنات صح ان الجو حار لكنه يحبها كذا ثنيان

ابتسم ثنيان بهدوء لامه وضحكت أصايل:اوكيه

مشت عنهم ورفع عيونه عقاب لثنيان وهز راسه له وتنهد ثنيان يصد

ومشى جاسر عنهم وناظره ثنيان لين ابتعد ورجع يصد

نوره:بقوم اشوف ملاك

ثنيان:امي خليها

ناظرته نوره وبلل شفايفه بهدوء ثنيان:خليها ترتاح

نوره:بطمن عليها

مشت توقف تاركتهم وطلعت لغرفتهم ودقت الباب ولفت ملاك وفتحت الباب نوره وابتسمت ملاك من شافت وجودها

ودخلت نوره:حيّ بنتي حيّ ملاك

وقفت ملاك بتعب وتقدمت نوره تحضنها وتنهدت ملاك بتعب

وحسّت نوره بالوضع لان ملاك عليها آثار دموع وبكاء ومسحت على ظهرها:بداية الغيث قطره دامك ببيتنا ومع ثنيان شوي شوي ويلين كل شي

ملاك همست:ياليت

نوره ابتعدت عنها ومسكت كفوفها:ماعليك مهما قسى شوي ثنيان الا وما يرجع يحنّ وانتي تعرفينه

هزت راسها ملاك وابتسمت نوره:قومي غسلي وجهك وغيري هذا الوجه ما ابي اشوفه وانزلي معنا كلنا

ملاك:لا تكفين خليني ارتاح لوحدي

نوره:مافي وتحلمين تقعدين لوحدك واحنا مع بعض ، قومي ملاك قومي يا أمي والحقيني

سكتت ملاك وابتسمت لها نوره ومشت تتركها وتنهدت ملاك بتعب

جلست على السرير واخذت جوالها ترد على منيف:دقيت عليك منيف ليش ماترد ؟

منيف:كانوا يحتفلون ولا سمعت ، وينك وش صار معك؟

ملاك:انا ببيتهم

سكت منيف ثواني:وش صار ؟

ملاك رفعت كتفها بحيره:ما اعرف

منيف تنهد:طيب اجيك؟

ملاك:لا لا اذا احتجت شي بكلمك

هز راسه منيف:براحتك

قفلت منه واخذت نفس وقامت تشوف ملابسها اللي لا زالت موجوده واغراضها وعطورها وناظرت ملابس ثنيان

واخذت لها ملابس تغيّر وغسلت وجهها وناظرت وجهها بالمرايه تناظر صورة منصور من جديد ووجود جواهر معه وتناظر وجه ثنيان القاسي الغاضب

رجعت تغسل وجهها من جديد تفوق من كل شي يكسرها

ولبست وخرجت وفتحت شعرها تنثره وجلست قدام المرايه تناظر وجهها وحاولت تبتسم وترسم ابتسامه وفشلت ورجعت من جديد تحاول تبتسم ونجحت

بانت أنيابها من جديد وانشرح وجهها بعد حزنه وضيقه واخذت الماسكرا والبلشر واخذت عبايتها وحجابها ولبستهم

وهمست:قدّها ملاك

اخذت نفس طويل وخرجت من الغرفه نزلت ولا لقت احد وسمعت اصواتهم برا

ومشت تخرج لهم ورفع عيونه عقاب من شافها وابتسم ولفت نوره:هلا لين ما يبقى هلا بهالدنيا هلا باللي هروجه تسّلي

ابتسمت لهم ولف عليها ثنيان يناظرها مبتسمه نزل عيونه لأنيابها ويدري ان هذا الوجه ماهو حقيقي وهذا اللي تظهره للجميع ماعداه

وقفت أصايل تمشي لها:احضنك والا نصير دراما ؟

ملاك ابتسمت:امس نمتي عندي امداك تشتاقين لي ؟

أصايل:لا هذي فرحة وجودك ببيتنا

ابتسمت ملاك وحضنت أصايل وضحكت أصايل

وقفت جنى ومشت لها ملاك تسلم عليها ولا نطقت بشي

ومشت تجلس بجانب ثنيان واخذت نفس بربكه من جلوسها بجانبه

وسكتوا يناظرونهم وبلع ريقه ثنيان بوجه جامد وهو يناظر فنجان الشاهي

وابتسمت نوره:اي ووين الطايش نحتفل فيه ؟

أصايل:كلمته يقول النادي مسوين احتفال وبيجلس معهم

ساري ضحك:انتم شفتم فرحته ؟ ولا كأنه فاز من قبل

ضحكت أصايل:اعشقه صورته اوريك ملاك ؟

ثنيان:وريني انا

وقفت أصايل وجلست بينهم وفتحت فيديو نهار اللي يحتفل وابتسمت ملاك وضحك ثنيان من فرحته

وتلاشت ابتسامة ملاك من شافت منصور واهله وجواهر واهلها بزاوية المشهد

وجمد وجه ثنيان يناظرهم ورجعت ظهرها ملاك تصد عنهم وبلعت ريقها

وهز راسه ثنيان ورجعت محلها أصايل ولف ثنيان يناظر ملاك ولفت عليه تناظره

صد عنها ولفت نوره وابتسمت:دايم تهربون من هالقعدات سوا انا اسمح لكم تهربون الحين

هز راسه بالنفي ثنيان:لا ماله داعي

نوره ناظرته بحده وصدت ملاك عنهم وابتسمت نوره:اقول ملاك

لفت عليها ملاك وكملت نوره:كم قعدتي بمكه ؟

ملاك عقدت حاجبينها:ما اذكر من اخر مره شفتوني يمكن

عقاب:وطبتي ؟

ملاك ناظرت عقاب وهزت راسها:يوم احترت بدروبي اخترت الدرب الصح

لف ثنيان عليها وابتسمت نوره:اي والله الدرب الصح والله يكتب لنا عمره قريبه كلنا

ساري:اللهم امين

دخلوا سارا وحمد وابتسمت نوره:ياهلا بعيوني ياهلا

دخل جاسر خلفهم ولفت ملاك تناظره وناظرها جاسر واخذ نفس ثنيان نفس بتعب من نظرات جاسر وحدّتها

وجلس جاسر ولفت ملاك تشوف سارا اللي ترقص ونوره تغني لها وتصفق وابتسمت ، تتمنى لو كان حظها أجمل وولدت من طفولتها مع هذي العائله وعاشت معهم وكبرت

تقدمت أصايل تشيل حمد توقفه على الطاوله ورقص مع سارا وضحك عقاب يناظرهم

وابتسمت نوره:يالله الحين ترقصون بزواج عمتكم

سكتت أصايل بربكه وعقدت حاجبينها ملاك ولف عليهم ثنيان:زواج من ؟

عقاب لف لملاك:ماكلمك منيف ؟

لف ثنيان بصدمه وناظرتهم ملاك:شدخل منيف ؟

نوره:منيف اخوك طلب أصايل ووافقت عليه لكن كنا ننتظر رجعتكم

جمد وجه ملاك بصدمه ولفت لأصايل اللي تناظرهم بتوتر ولف ثنيان:وشو وانا ويني محد يقولي شي ؟

جاسر ناظرهم:حتى انا ماعندي علم ليه محد قالي ؟ شلون توافقون عليه وما تعلموني ؟

عقاب:نعلمك ليه ؟ اختك راعية الشان وهي تقرر

جاسر وقف:تخسي ويخسي هو ما ياخذها

لفت ملاك عليه وكمل جاسر:ما ياخذ اختي هالكلب لو يموت

وقفت ملاك تناظره بحده:امسك لسانك لا اقصه لك

وقف ثنيان والتفت ساري:اذكروا الله

تقدمت ملاك له ومسك ذراعها ثنيان:ملاك

ناظرته ملاك بحده:اقص لسانك ان قلت شي عن اخوي تفهم؟

جاسر:يالله بس يالله بتخرعيني انتي يعني ؟ تبطين ويبطي اخوك الورع ياخذ اختي

ملاك فلتت ذراعها من ثنيان ووقفت قدام جاسر وتأفف ثنيان:ياجاسر

ملاك ناظرت جاسر:الورع اجل ؟ على الاقل أرجل منك يوم انك رحت تسربت برا وجبت لك ورعين ورجعت تستر عيبك وتاخذ وحده من اهلها غصب عليها وتشتريها بفلوسك

جاسر ناظرها بحده:لكني ما سرقت ناس دخلوني بيتهم

وقف عقاب ورفع صوته:خلاص

ناظرته ملاك ولف ثنيان يتدارك كلام جاسر ويناظرهم

وهزت راسها ملاك:بتندم على صوتك اللي عليته هذا

عقاب:ملاك خلاص قلنا

ناظرته ملاك بحده وتقدم ثنيان يسحبها لناحيته بهدوء وناظرهم جاسر ولف لأبوه وهز راسه:دافع عنها لا تقصر

عقاب:اذلف

هز راسه جاسر وخرج من عندهم ولفت ملاك على عقاب اللي يناظرهم بعصبيه واخذت نفس ومشت تدخل البيت

عض شفته ثنيان ولحق جاسر اللي بيركب سيارته ولف عليه جاسر:اذلف ثنيان عيوني لا تشوفك

سحبه بقوه ثنيان وناظره:وشفيك جاسر وشفيك ؟

جاسر:انت صاحي ؟ رجعتها لبيتنا من جديد ؟ رغم انك عرفت حقارتها ترجعها ؟

ثنيان ناظره بحده:ما يخصك ولا تدخل بمشاكلي تفهم ؟ خلاص جاسر خلاص ريحنا من مشاكلك

جاسر:المشاكل كلها من اللي عندك هذي وشوفها تبي تدخل اخوها بيننا بعد وتخليه ياخذ اختي لكن يبطي

ثنيان:لا تدخل

جاسر:احمد ربك لين الحين مافضحتها لكن والله ياثنيان والله ان ما انحل هالموضوع قريب اني لاروح لابوي واقوله كل شي

ثنيان:روح الحين روح الحين اذا معك دليل روح ، تحسب ابوي بيصدقك ؟

جاسر هز راسه بقهر:مشكلتي الوحيده لكن والله ما اخليها

ثنيان تقدم وهمس:تعرف من تبرع لأبوك ؟

سكت جاسر يناظر ثنيان وكمل ثنيان:ملاك

جمد وجه جاسر وعقد حاجبينه وهز راسه ثنيان:كلنا مدينون لها

ناظره جاسر بصدمه ومشى ثنيان تاركه ودخل البيت

طلع للغرفه وفتح الباب ولفت عليه ملاك وناظرته:حاربني معه استاهل

سكت ثنيان وتقدمت ملاك:حاربني انت بعد حاربوني كلكم وقفوا قدامي واخذلوني وهددوني ، حاربني معهم

ثنيان:ملاك

صرخت ملاك بتعب:احترقت

ناظرها ثنيان ومسكت راسها بتعب:خلاص يكفي يكفي

جلست على السرير:كل شي يحاربني حتى منيف يحاربني حتى هو

عضت شفتها ووقف قدامها ثنيان ورفعت عيونها عليه:تشمت فيني قول هذي عدالة ربي واخذ حق الناس وحقي منك ، قولي ووقف مع اخوك ، تكلم واحكي بشماتتك توها تغفى جروحي اصلاً

ثنيان:طول عمرك لهب متى صرتي ضعيفه كذا ؟

وقفت ملاك وناظرته بحرقه:ضريبة اني سلمت قلبي لك

سكت ثنيان يناظر عيونها وكملت ملاك:وانت داري وعارف الحال بوضوح ان الموج قادر وطفّى اللهب

فتحت يدينها بقل حيله:وهذا انا بدون لهب ، يهددني شخص مجهول ويهددني اخوك ويخذلوني أهلي ويتعداني اخوي

هزت راسها تناظره:ويظن فيني أبشع ظنونه من عطيته قلبي

ثنيان ناظرها بحده:انتي خليتي فيها ظنون ؟ خليتيني اصدق بياضك عشان ما اشوف سوادك ؟ بليله عرفت ان كل الحواجز بيني وبينك هو واحد كلب كيف تبيني ما اصدق ابشع ظنوني ؟

ملاك صرخت بوجهه:وطعن بشرفي وضربته ، دافعت عني لانك تدري انه كلب

ثنيان تنهد من صراخها وصد عنها يتحمل غضبه وناظرته ملاك بحرقه:اول مره اوقف ضدي معك لكن كل شي قلته عورني

لف عليها ثنيان وهزت راسها:ويوم شفت جواهر ماسكه يمين منصور عرفت انه طعنّي

ثنيان سكت وكملت:عرفت وش يعني تكون معطي ظهرك بأمان لشخص وما يطعنك الا هو ، هذا اللي كدّيت عشان أطلعه هذا هو ، خرجته جواهر

هزت راسها بتعب واخذ نفس ثنيان بضيق وخرج من الغرفه يهرب اكثر من عيونها وعتابها

جلست بتعب على السرير لانه يقطع كلامهم ويخرج كل ما تمنت تتكلم اكثر ويسمعها تركها وخرج

'

دخلت أصايل الغرفه ومسكت قلبها ودخلت خلفها نوره:ليش تقومين ؟

لفت أصايل بخوف:وش يعني جاسر وملاك وثنيان ما يبون ؟ محد سألني انا وش ابي ؟

نوره:ابوك سألك وانتي جاوبتي بإيه وهذا المهم

أصايل جلست تحاول ما تبكي:أمي تهاوشوا قدام عيوني كيف يعني مو مهم ؟

نوره تنهدت وتقدمت لها:أمي أصايل جاسر من قبل علاقته ماهي زينه لملاك تسمعينه وش يقول عنها ؟ يقول تسرقين ، بالله هذا كلام ينقال ؟ ترا من تالي جاسر ماهو جاسر

أصايل:ما ابي احد يتهاوش بسببي

نوره:وانا ما بسمح لأحد يوقف بينك وبين قرارك

أصايل رفعت اصابعها تمسح مدمع عيونها ومسحت على كتوفها نوره:لا يتأثر قرارك باللي يصير

أصايل:افكر ارفض ولا تصير مشاكل اكثر

نوره:ياويلك أصايل ياويلك ، انتي تبينه وهو يبيك وابوك واقف مع شورك من هم يقررون عنك ؟

أصايل لفت بخوف:امي بتوصل بين ثنيان وجاسر

نوره:وتوصل ، انا موجوده احلّ وافك العقد وتعرفين امك صلحت كل شي بهالبيت سنين ما بقدر احلها الحين ؟ هذا قرارك وفرحتك واللي تودينه ويودك ، أمي أصايل لا تكسرين فرحتك

لفت أصايل تناظرها بضيق وابتسمت نوره:بتنحل وتصيرين عروس الموسم كله وبيكون زواجك افضل زواج بهالدنيا كلها وازهلي ام ساري

ابتسمت أصايل بين دموعها وضحكت نوره وباست راسها تحضنها:أمي انتي ولا ينكسر خاطرك

تنهدت أصايل بحضن امها وتنهدت بتعب نوره

'

وقفت عند البيت ونزلت ودخلت وخرج منيف وناظرها:ملاك ؟

تقدمت له وحطت مفتاحها وشنطتها على الكنبه:خطبت ؟

سكت منيف بصدمه وثواني لانت ملامحه وهزت راسها ملاك وجلست ورفعت عيونها عليه:ماقلت لي

منيف:انحديت وما كنتي موجوده

ملاك:انحديت ؟

منيف جلس قدامها:اي خطبوها قدام عيوني واحترقت ملاك ولاقدرت اصبر وتروح عليّ ورحت لعقاب وخطبتها من عنده

ملاك عقدت حاجبينها:ليش ماقلت لي منيف ؟ ليش ؟

منيف:ماراح توافقين وماكان ودي اخرج عن شورك

ملاك:وخرجت عن شوري

منيف:ملاك انتي شتبين اسوي بحياتي ؟ شتبين اسوي وترتاحين ؟ حبيتها ياخي حبيتها وماني قادر اتخطاها وادري انها درّ ثمين لكني أبيها لو هي الموت أبيها

ملاك رفعت صوتها:ماهو عشانها أعلى منك ولاهو عشانك أقل منها ، عشانك بيوم هددتها بسببي واختك هددت اهلها كلهم عشان كذا افهم

منيف سكت وكملت ملاك وضربت الطاوله قدامها:عشان ما يصير فيك نفس ماصار بأختك تحب ولا تقدر تطوله

لانت ملامح منيف ورفعت عيونها ملاك من رجفت يدينها وامتلت عيونها بالموج:عشان ما تحب شي ما تطوله

بلع ريقه منيف وكملت ملاك:لأني يوم حبيته وعرف كل شي عني !

هزت راسها بتعب:افترقت طرقنا

نزل عيونه منيف واخذت نفس ملاك تستجمع نفسها:عشاني الحين ابيه وكل داخلي يبيه لكن في ألف شخص يبعدني عنه ، اتهدد كل يوم واشوف عذالي كل يوم وكل يوم اغرق فيه اكثر ، ما ابيك تصير نفسي

منيف:محد يقدر يهددني بشي وأصايل مستحيل تصدق عني شي

ملاك ضحكت ثواني وصدت:تصدق تصدق

لفت على منيف:لان عمك وعياله شياطين

تنهد منيف بتعب وهمس:أبيها ملاك لو ماصارت لي بموت بحسره

سكتت ملاك تناظره وكمل منيف:اقسم بالله صرت ابي اعيش عشانها ، ابي اعيش معها

عضت شفتها تناظر منيف وهز راسه منيف:أحبها

تنهدت ملاك وغضمت عيونها

منيف:ولقيت لي وظيفه وبشتغل وقبلوني بالمقابله الشخصيه وانا واثق بنفسي وبشغلي

ملاك سكتت تناظره وكمل منيف:وابيك جنبي بقراري وتساعديني بحياتي وتوقفين جنبي بزواجي

عقدت حاجبينها تبكي من نقطة ضعفها منيف وحاجته للعائله بنفس حاجتها

ووقفت وحضنته وهو جالس ووقف لها وحضنها:تكفين ملاك

ملاك بكت وهي حاضنته:اسفه ان كل شي صار بسببي

منيف:ولا تتأسفين ماعندي اغلى منك وخطاك بعيوني صواب بس لا تتركيني بعد

ملاك تنهدت وابتعدت عنه ومسحت دموعها باصابعها:باقي اخطبها انا لك ؟

ابتسم منيف وهز راسه:مع انها ردت بإيه بس اخطبي لي

ابتسمت له ملاك وهزت راسها واخذ يدينها منيف وباس كفوفها وتقدمت تبوس خده ملاك ورجعت حضنته:انت نقطة ضعفي منيف مابي يعوروني فيك

منيف:ماهو صاير شي لا تخافين

تنهدت وهي بحضنه وغمضت عيونها وابتعدت عنه بعد ثواني:برجع انا جيت اشوفك

منيف:بتتكلمين معهم ؟

هزت راسها ملاك:وجاسر هذا بملي فمه تراب لا تشيل هم شي

منيف تنهد بتعب ومشت ملاك واخذت شنطتها ومفتاحها وخرجت

رجعت للبيت ودخلت توقف سيارتها وقفلتها ولفت من وقف بجانبها ثنيان بسيارته وناظرته

ناظرها ثنيان وتنهد بتعب ، كل مره يشوفها وده يقطع كل شي بينهم ويتخطاه ولا تفترق دروبهم عن بعض

يناظر وجودها بجانب سيارته متشفق على وصلها وقربها وخيرها وبياضها ويبيها وكل مافيه يركض لها

يحلف بالله انه يحس روحه خرجت من سيارته لسيارتها ، ملهوف ملهوف ولا يقدر يخبي لهفته اكثر

رمشت تشوف نظراته وتنهدت بتعب تنتظر سماحه وحنيّته ترجع عليها من جديد ، تتمنى وتحلم كل شي يتصلح برمش عينها لكن كل مالها حياتهم تصير أصعب

نزل من سيارته وفتحت بابها تنزل ووقف ومشت له:منيف كلمني

سكت ثنيان وكملت ملاك وهي واقفه امامه ماسكه شنطتها بيدينها الثنتين:خطب أصايل من ابوك وأصايل ردت عليه بإيه

ثنيان:وانتي ماودك ؟

ناظرته ملاك وهمست:ماودي عشان ما يذوق اللي اذوقه

ثنيان:ولا ابي أصايل تعيش اللي عشته وتنصدم زود

ملاك:منيف ما لمس الشرّ بحياته الا بأسبابي اذا بتحاكم منيف قبل يتقدم لأصايل فحط ببالك اني انا سبب بكل شي سواه منيف ، منيف أنظف وأطهر من بيض جنحاني

ابتسم بخفوت ثنيان:جنحانك ؟

ملاك:ماعاد فيها جنحان ؟

ثنيان سكت وكملت ملاك:كسّرتها الدنيا

ثنيان:كسّرها اللهب الدنيا ما سوت شي انتي سويتي بالدنيا

تقدمت له ملاك ورفعت اصبعها لصدره ورفعت عيونها لعيونه تناظره من قريب:وسويت لي مكان هنا

ناظر عيونها من قربها وصوتها ونظراتها وكملت ملاك:نجمه من هالسماء طاحت على راحة يدينك

ثنيان نزل عيونه لثغرها ورجع ناظر عيونها وهمس:تغرقين موج وترجعين من جديد لَهب وشاهين مغرور

ملاك اخذت نفس:مالقيتك ترجعني من جديد شاهين مغرور ، رجعت لوحدي

ثنيان:يعني هواي ماله لزوم ؟

ملاك ناظرته يقيس غلاه ويبيها تكشف مكانه عشان ينكسر زعله وكبريائه وهمست وهي تناطر عيونه:ولا تكفيني الدنيا لو أشرب من هواك بحور ، ضاميه وقلبي على الماء وقلب الماء على شطك

ابتسم بدون يبين اسنانه من اعترافه اللي كررته على لسانها ونزل عيونه لثغرها وتكرر عليه كل التردد اللي سكن داخله بالبدايات ورجع ناظر عيونها من همست:اللي بخاطرك تقدر تسويه ماعاد فيه حاجز بيني وبينك الا اذا انت بنيت حاجز بيننا

ثنيان:تلوين ذراعي

ملاك سكتت وتنهد ثنيان ومشت ملاك تاركته تدخل البيت ومشى خلفها ثنيان

طلعت للغرفه وفصخت عبايتها ودخل ثنيان وناظر وجودها بالغرفه وارتبك

علقت عبايتها وجلست على الكرسي وناظرته واقف يناظر الفراغ ونزلت عيونها لدبلتها:تقدر تنام

لف عليها ورفعت عيونها عليه:وتكمل زعلك وعتابك وملاماتك بكره

ثنيان ناظرها ولارد ومشى للدولاب واخذت نفس ملاك تناظره يتجاهلها واخذ ملابسه ودخل الحمام

غمضت عيونها من دخل الحمام ومسكت راسها ثواني ورفعت عيونها لشكلها بالمرايه ، ينقصها وجوده معها عشان تقدر تستقوي وترجع من جديد لهب وتحارب ، تحتاج تحارب خصوصاً بعد اخر معاركها اللي ما حلتها للحين واخذت ثارها

خرج ثنيان ومشى ينسدح وناظرته بضيق ملاك ومشت وانسدحت بجانبه وعطاها ظهره

ناظرته وجلست واخذت نفس:تعرف ؟

سكت يناظر الفراغ قدام عيونه ولفت عليه ملاك:المطر بعد طول جفاف الحصاد بعد طول السنين العجاف ، رويّ العطشان ويقين المحتار وجواب الفضولي ومعطف البردان وشمس الصيفي الغرقان

تنهدت تناظر ظهره:عطيتني كل هالمشاعر انت

غمض عيونه بتعب ثنيان من محاولاتها وصدت ملاك للأمام تسمع اللارد وهمست:تصبح على خير

انسدحت وطفت الأنوار وعطته ظهرها تناظر الظلام

ابتسم من محاولاتها وعاجبه كيف تحاوله مثل ما تعب وجاهدها ، ومبسوط لانها من خوفها على زعله قاعده تعترف وتبتعد عن المكابره والصمت

'

نزلت تشوف ثنيان جالس على الطاوله يفطر وتقدمت وابتسمت:صباح الخير

ابتسمت نوره:أسعد الأيام ‏شوفك ولقياك و أقشر الأيام غيبتك عنّا

ضحك نهار:امي اعترفي انك تجهزين قبل تنامن ترحيبة ملاك

التفت عقاب:وانا مارديتي على سلامي

مشت ملاك لنوره ولفت أصايل:انا ما شافتني للحين اصلاً

ضحكت نوره وحضنتها ملاك من الخلف ونوره جالسه

ناظرهم ثنيان وابتسم بهدوء وناظرهم جاسر بجمود

وهز راسه عقاب:لو هالكلام لغير ملاك ماقبلت

جنى:يعني عمي لو لي هالكلام مع انه مستحيل يصير بتزعل ؟

ابتسمت ملاك من دق الكلام وباست خد نوره ومشت تجلس بجانب ثنيان

نوره:دايم ارحب فيك ياجنى بس شكلك تغارين كثير

جنى:اغار اغار وساري يدري

مارد عليها ساري وهو ياكل واخذت نفس ملاك تبدأ تاكل:مبروك يالطايش

ابتسم نهار:الله يبارك فيك

قاموا بعد ما خلصوا فطورهم يجلسون ولفت على ثنيان اللي يناظر فنجانه وساهي وهمست:بتداوم ؟

لف عليها ثنيان يناظرها وهز راسه يصد

وبلعت ريقها ملاك:توصلني معاك ؟

ثنيان:وين سيارتك ؟

ملاك:موجوده

ثنيان ناظرها ثواني تحاوله وهز راسه بالنفي ووقف:طريقي غير طريقك

سكتت تناظره يصدّها وبللت شفايفها بضيق من مشى يجلس مع اهله

لفت على جاسر اللي يناظرها وصدت تاخذ فنجان قهوتها وتقوم تجلس جنب ثنيان حطت شنطتها يمينها

وحطت رجل على رجل لابسه كعبها ولفت لعقاب:دريت عن اللي حصل بغيابي

سكتوا ولف ثنيان عليها يشوفها تكلم عقاب

وهز راسه عقاب بهدوء وكملت ملاك:كلمت منيف

لفت أصايل بتوتر وبلعت ريقها

ملاك:وعرفت انه تقدم لأصايل لوحده قدامك بدون أحد معاه ، مع اني وراه وسنده وعن قبيله كامله واعرف ان وجودي معه قدامك بيفرق

سكت عقاب يسمعها ووقف جاسر يتقدم لهم ويجلس

ملاك:لكن منيف ما خطى هالخطوه بدوني الا انه سمع باللي يبون أصايل وخاف تضيع من يده

شدت على كفوفها أصايل بربكه

ملاك ناظرت نوره ورجعت ناظرت عقاب:وعشان منيف قطعه من روحي وأوفى علاقاتي وكل أهلي ، دام إختياره أصايل

لفت ملاك تناظر أصايل المرتبكه:فأنا أبي أطلب أصايل منك ومن خالتي ومن باقي أخوانها

عضت شفتها بتوتر أصايل ولف عقاب على العيال اللي يناظرونه ولا تكلم احد بوجوده

ولف يناظر أصايل اللي تناظره بخوف وتوتر ورجع ناظر ملاك:منيف طلبها ووافقت أصايل عليه والحين انتي طلبتيها وهذي هي أصايل ترد عليك

لفت أصايل من نطق جاسر:واخوانها ؟

عقاب:انت اللي بتتزوج منيف ؟

ضحكت جنى وتلاشت ضحكتها من لف عليها جاسر

ورجع ناظره جاسر:مابي أختي تطيح بإختيار غلط

لفت ملاك ترفع صوتها:كل الإختيارات غلط الا منيف الصواب الوحيد

جاسر:عشان ايش عشانه اخوك ؟

نوره:يوووه جاسر خلاص يكفي ما بنخلص من هالكلام ؟ ولحد يتدخل بقرار يخص أصايل ، ابوكم موجود وحيّ الله يطول بعمره وأصايل كبيره وتعرف تختار وحتى لو أصايل بعد مده تكتشف ان اختيارها غلط وانا ماظنتي ، بنوقف معها كلنا

ملاك لفت لجاسر:واذا بنتكلم عن الاغلاط يا أخو زوجي موج ، فلا تنسى اغلاطك

لفت ملاك على سارا وحمد اللي جالسين يلعبون

ولف ثنيان على أصايل:أصايل انا ما تكلمت للحين ولا قلت رايي انا ابي اسمعك انتي ابي اعرف ان قرارك هذا طلع من اقتناع ويقين

ارتبكت أصايل من نظراتهم والضغط اللي تحسه ولف ساري:ضغطتوها ياخي يكفي ماصارت خطبه

نهار:انا اعرف أصايل تحب اعطيها رايي دايم ، ورايي يقول ان الفال الطيب مناسب لها ومثل ماكان فال طيب لي بيكون فال طيب لها

لفت أصايل على نهار وابتسمت له وضحكت نوره:اي هذا نصف الجواب اجل

ابتسم عقاب ولفت أصايل تناظر عقاب اللي يناظرها ومبتسم

ولفت نوره لملاك:بعد العصر نطلع انا واياك سوا هالمره ام ساري وملاك يرتبون لعرس ماصار احسن منه

ابتسمت ملاك وضحكت أصايل بربكه وتقدم نهار:وانا مني اقوى دعم مادي ومعنوي اللي تبونه يصير

عقاب:أصايل للحين تبين شاعر يكتب لك زفه ومغني يغنيها لك لوحدك ؟

ضحكت لانه يعيد احلام مراهقتها اللي تكررها وابتسم ثنيان:هذا عندي من الشاعر للمغني للزفه

نهار:وش هالغش سبقتني يعني ؟

نوره:باقي ياحبيبي العرس ماهو زفه وبس ، نبي فستان زواج انرسم لأصايل

ابتسمت أصايل بإمتنان تناظرهم وامتلت الدموع بعيونها

نهار:المصممه عندي انا

عقاب لف لملاك:بكلم منيف واحدد معه كتب الكتاب

ثنيان:ابوي انا اشوفه واكلمه لا تشيل هم

ساري:وانا بتكفل بتغطية سعودي ويدنق لأحلى عروس بالدنيا

ضحكت أصايل وكمل ساري:بخلي كل العالم تشوف زواجك وتتكلم فيه

ابتسمت بإمتنان لساري ولفت جنى:وانا يكفي حضوري

ضحكت أصايل وهزت راسها لجنى ولفت تناظر جاسر اللي يناظرهم وتلاشت ابتسامته بضيق

وعض شفته جاسر يناظر فرحة أصايل ونظراتها له وتنهد وتقدم:الله يوفقك

سكتوا يناظرون جاسر وهز راسه:وان بغيتي شي اخوك جنبك وما بيقصر

ابتسمت له بين دموعها ووقفت:بحضنك

وقف جاسر ومشت تحضنه ولف نهار عليهم:لي ساعه اداريها وبالنهايه الحضن من نصيب جاسر

ضحكت نوره وابتسم عقاب يناظرهم وتنهدت ملاك تناظر فرحتهم ياليت كان منيف يعيش فرحه عائليه نفس ما تعيشها أصايل

وقف ثنيان:انا ماشي

رفعت عيونها ملاك بضيق ونزل عيونه عليها:استناك بالسياره

جمدت ملامحها وخرج تاركها وابتسمت لانه ناداها ولفت عليهم وابتسمت لهم ومشت خلفه بشنطتها

فتحت باب سيارته وركبت يمينه وحرك ثنيان

اخذت نفس بربكه ولفت عليه:بتروح لمنيف ؟

هز راسه بالنفي وهو يناظر الطريق

ملاك:بتروح لشغلك ؟

لف عليها ثنيان يشوفها تسأله:وين تبين انتي ؟

ملاك:معاك لان طريقي نفس طريقك

سكت ثنيان يناظرها ورجع لف للطريق

ملاك:ما بنتكلم ؟

ثنيان:وش نقول ؟

ملاك:أحبك

لف عليها ثنيان وميلت راسها ملاك تناظره وتنهد يسمعها من ثغرها أغنيه ، وكأن لحنها منها غير وحروفها منها غير ، قراها وكتبتها له لكن سمعها مختلف

كان يتمنى تكررها من جديد عشان يستوعبها

نثرت على لهب جمر صدره موج وطفت كل نار تحرقه وهي بس نطقت بكلمه

ناظرته ساهي يناظر الطريق وكملت:وأبيك وأعذارك سمينه وخطاياك مسموحه وأتشوقك جداً حد الثماله ، وأتخيلك حولي وودي ألوذ بصدرك الدافي مدى حياتي وحتى أفنى ، هذا كلامنا

ثنيان لف عليها:كل مره بادرت لك وصديتيني بسبب حاجز بيني وبينك هالمره صدودي من نفس الحاجز

تأففت بتعب ولفت عليه:يحترق هو مو إحنا ، تعبت ثنيان تعبت من وجوده بحياتي وبحياتنا انا وإياك ، خلاص يكفي اللي سواه فيني وهو مسجون وش بيسوي اكثر وهو حرّ ، أبيك ثنيان أبيك

تعب ووقف على جنب ولف عليها:يعني تشوفينه هيّن ؟

ملاك:انت تبيني بعد انت جبتني ببيتك وبين اهلك من جديد انت ودك فيني ثنيان نفس ما انا ودي فيك

ثنيان ناظرها وبللت شفايفها ملاك بهدوء:ماعمري ترجيت احد ثنيان ولا عمري تمسكت بأحد بس انت الوحيد اللي لو اقضي عمري كله انادي على اسمه ماتعبت

ثنيان لف يناظر الفراغ وتقدمت له ملاك:أحبك ثنيان

غمض عيونه ومسكت كفه وفتح عيونه يناظرها وناظرت عيونه:والله أحبك وقلبي على الماء وقلب الماء على شطك

بلع ريقه ونزل عيونه لثغرها ورجع يناظر عيونها ولمعتها ونظراتها له

سمع اعترافها اللي اعترفه لها من قبل وتعب ، تعب بين كل مشاعره وهز راسه ورجع ظهره للخلف:نتكلم بالبيت

سكتت تناظره ولف عليها ثنيان وهزت راسها بضيق ورجعت محلها وصدت للطريق:بشوف مكتبي

مارد عليها وحرك لمكتبها ووقف عنده ورفعت عيونها لباب مكتبها وعقدت حاجبينها

ورفع عيونه ثنيان وتغيرت ملامحه يناظر باب المكتب الزجاجي الشفاف اللي مكتوب عليه بخط كبير ببخاخ احمر ' شيطان '

رجفت وهي تناظر الباب بصدمه وهمس ثنيان:من ؟

بلعت ريقها ما تشيلها رجولها من خوفها ورعبها وفتحت الباب ومسك ذراعها ثنيان ولفت عليه

ثنيان:لا تنزلين

فتح بابه ونزل ومشى للمكتب يناظر الكلمه وتلفت حوالينه ونزلت ملاك ومشت بهدوء وخوف ووجهها جامد ووقفت عند الباب:ماتركني

ثنيان تنفس:الله ياخذه الله ياخذه ، اقسم بالله لو ادري انه الكلب منصور والله ما يبقى فيه شي صاحي

ملاك رجفت وتقدم لها ثنيان:بنحلها تعالي ارجعك البيت

ملاك لفت عليه بتعب:وش يبي مني ؟ من هذا اللي يبي يرعبني ؟

ثنيان:يخسى يرعبك والله لأجيب راسه لا تخافين

ملاك:ماني خايفه ابي اعرفه ابي اعرف من هذا اللي يبي يأذيني

ثنيان عض شفته بتعب ولف يناظر الشارع ورجع ناظرها:طيب اركبي اركبي برجعك البيت

مشت وفتحت باب سيارته ولفت تناظر الكلمه وهي عاقده حجاجها وركب ثنيان وناظرها:ملاك

لفت عليه وركبت وحرك وناظرت الطريق وهي ساهيه وثنيان عاقد حجاجه يفكر

وقف عند البيت واخذت شنطتها ولف عليها:لا تسوين شي بدون علمي

ماردت عليه ملاك ورفع صوته ثنيان:ملاك

هزت راسها ونزلت وتنهد ثنيان وناظرها تدخل البيت وحرك

'

وقفت بالغرفه تمنع صرختها وضحكت وناظرت شكلها بالمرايه وابتسمت ماهي مصدقه ابداً ان كل احلامها بتصير بتاخذ اللي شافها احلى بنت بالعالم وحافظ كل تفاصيلها يحب كوتي ويحبها

عضت شفتها تلف على كوتي:بنعيش معاه

ضحكت ماهي مصدقه وعضت شفتها ماتبي تبكي من مشاعرها واخذت كوتي بحضنها تناطر سلسالها:بنعيش سوا ، بعيش معاه

غمضت عيونها ما تتخيل كيف بتكون حياتها معاه واخذت نفس تهدي صوت نبضها

ورفعت عيونها من دق الباب:مين ؟

دخلت نوره وابتسمت لها أصايل وغمزت لها نوره:اناديك عروس ؟

أصايل ارتبكت:امي ؟

ضحكت نوره:امشي حبيبتي امشي ورانا تماشي ماراح تخلص

أصايل تنهدت بتعب من امها:امي

نوره:قومي بس قومي لا تتدلعين بندور لك فستان لكتب الكتاب على بال ما يتحدد موعده ونحجز كل شي

وقفت أصايل وابتسمت:يعني صدق خلاص ؟

تكتفت نوره تناظر بنتها:وش رايك ؟

ضحكت أصايل:اوكيه بجيك

هزت راسها نوره وخرجت وابتسمت أصايل ومشت تاخذ عبايتها وخرجت

ناظر ملاك اللي طالعه:ملاك

لفت ملاك عليها وتقدمت أصايل:تكفين تعالي معاي بنروح نشوف لي فستان

ملاك:تعبانه أصايل والله

أصايل عقدت حاجبينها:ليش فيك شي ؟

هزت راسها بالنفي ملاك:لا لا روحي انتي

مشت تاركه أصايل ودخلت الغرفه وقفلت الباب واسندت ظهرها على الباب تناظر الفراغ

الكلمه اللي بالخط الاحمر للحين ببالها التهديد اللي كان يوصلها بكثره كل شي غريب وغامض يرعبها

هزت راسها بالنفي تبعد شكوكها لمنصور واهله ، مع انها انخذلت منهم وانصدمت من جحودهم بس ما تظن انهم ممكن يهددونها ويرعبونها

جلست وعضت شفتها تفكر وعاقده حجاجها طال الموضوع واخذ وقت طويل واللي يلعب معها جهل انها ملاك بنت مساعد ، تطيح وطاحت واجد لكن ترجع توقف من جديد وما تنكسر

اخذت جوالها وهي تتذكر كلام ثنيان:لا تسوين شي بدون علمي

تأففت بإنزعاج واخذت مفتاح سيارتها وخرجت من البيت

ركبت سيارتها وحركت تناظر طريقها من قدام ومن خلفها ووقفت عند بيت عمها ، محتاره تنزل والا ما تنزل

اخذت نفس تخفي ربكتها وفتحت الباب ونزلت ، مشت لباب البيت وبلعت ريقها ورفعت كفها تدق الباب

رجعت خطوه للخلف تنتظر الباب ينفتح وثواني فتحت شادن ورفعت عيونها ملاك:وخري

شادن:ماراح تدخلين

دفعتها ملاك عن طريقها ودخلت البيت ومشت خلفها

دخلت الصاله وناظرت منصور وجواهر ومحمد ووفاء ورفعوا عيونهم بصدمه من وجودها

وناظرت منصور ملاك وجمد وجه منصور من وقوفها اللي استبعده

ورفعت حاجبها جواهر:تعودتي تدخلين البيوت كذا ؟

تقدمت ملاك وناظرت جواهر:اخر شخص اتكلم معه انتي ، كل ما قلت لك بتعرفين قيمة اسمك تصدميني انك ارخص منه

محمد:احنا ما بنخلص ياملاك ؟ ما بتتركينا لوحدنا ؟

حطت شنطتها على الكنبه بغضب ولفت له:انا ما تركتكم ؟ انا ؟

منصور:ليه جيتي ؟

لفت عليه ملاك وناظرته بحرقه وهزت راسها بالنفي بعدم تصديق

ورفع حاجبه منصور:اشتقتي تشوفيني ؟

لفت جواهر على منصور وابتسم منصور وتقدمت له ملاك:اطالع في سبب همّي وظلامي وشرّي وهو جالس يشرب قهوه مع شخص يشوفني عدوته

رفعت عيونها جواهر على ملاك وكملت ملاك تناظر منصور:اطالع في الجحود كيف يكون

وقف منصور:جحود ؟ كالعاده بتوقفين قدامنا تحسابينا على جحودنا ؟ انتي ما تشوفين نفسك ؟ من اللي تزوجت ولد عميد وشيخ وانا بالسجن بسببها

تقدمت بغضب ترفع صوتها وضربت صدره:بسببي ؟ بسببي قتلت ؟ انت اللي قتلته وما كنت تسمع صوتي اناديك ورغم هذا انا طحت عند رجلين الشيوخ عشان اطلعك ، سرقتهم ونهبتهم عشان اطلعك

منصور:قلت لك اسرقي وطلعيني ؟ طلب واحد طلبته وقلت لا تنسيني

هزت راسها تناظره بصدمه:وتجازيني كذا ؟

منصور:اجازيك واحرق قلبك وانتقم منك ومن اللي اخذك ، لاني خست بالسجن بسببك وبسبب واحد ما اعرف كيف تعرفينه ، بعتيني عشان لقيتي الاحسن مني انتي كذا يا ملاك ما منك أمان

ملاك:تركت أماني عندك لاخر لحظه قلت فدا منصور وبخلصه وبيطلع تحملت كلام اهلك وصوت ضميري وظلمي لنفسي وشوف كيف تجازيني ، تتكلم عني بأبشع الظنون وترمي علي تهم ماصارت فيني

منصور ابتسم وتقدم لها:تستاهلين

ناظرته ملاك ورفعت ذراعه وضربته كف ووقف محمد:زودتيها انتي

ناظرته ملاك من التفت عليها يشتعل من غضبه وتقدمت ترفع اصبعها:اقسم بالله لأرمي عشرتك رمي الزباله ولا اشوفك شي ، إصحّك تلعب معي يامنصور أصحَك تطلع اسوأ مافيني ووخر عن طريقي

سكت منصور يناظرها وناظرت جواهر:دام هي سددت الباقي وصارت الافضل ابعد عن الاسوأ

منصور:تحسبين بتمشي ببساطه ؟ تتهنين مع ولد الشيوخ وتسكنين بينهم ؟ بخليك ؟

ملاك:شتبي مني شتبي ؟ ما يكفي التهديد اللي تهدده لي بالخفاء وادري انه انت ؟

منصور:انا ماهددت بالخفاء انا اهدد بالعلن وقدامك الحين واقولك عيال عقاب هذولا بيرمونك رمية كلاب

ملاك هزت راسها:ابيك بس تطلع بوجهي والا بوجه عيال عقاب يمين بالله ما يكون فيها ولد عمي يامنصور

منصور:صاروا اهلك ؟ تخافين عليهم ؟

ملاك سكتت تناظره بعدم تصديق وهز راسه منصور:تحسبين بمشي اللي سووه بأختي ؟

صرخت ملاك:هي اللي انباعت له من اهلك محد جاء لاختك

منصور صرخ:تدافعين عنهم ؟

ملاك:ادافع وابيع عمري كله اللي عشته معكم عشان يكونون بخير هم اقسم بالله لأضحي بنفسي عشان ما يجيهم شرّ منك ومن اهلك

منصور:بيعي انا ودي اشوفك تبيعين وتخسرين عشانهم

ملاك سكتت وهز راسه منصور:بيعي مثل ما بعتيني انا

ملاك ناظرتهم وناظرت جواهر اللي جالسه وهزت راسها ومشت تاخذ شنطتها ولفت عليهم:كثرتكم ما تعني الانتصار ، اوقف قدامكم وحدي واكسر خشومكم وما اكون بنت مساعد

مشت تتركهم ولف منصور من خرجت وتنفس من غضبه وناظرتهم شادن:ترا زودتها محد بيوقفها عند حدها ؟

محمد:اسألي اخوك اللي يطبخ على نار هاديه

رفعت عيونها جواهر:منصور

منصور:لحد يتدخل

مشى يتركهم ولفت جواهر عليهم وجلست وفاء:ما بتريحنا هالحيّه

'

( لا تنسون النجمه ⭐️ )

مشت وهي بالسياره عاقده حاجبينها بغضب وتتآكل من شعورها واخذت نفس من شافت سيارة ثنيان عند بيت منيف ووقفت خلفه ونزلت

دخلت البيت ولف ثنيان من سمع المفاتيح وناظرها:تلحقيني ؟

ملاك هزت راسها:اراقبك

وقف منيف وابتسمت لمنيف تحضنه وناظرها ثنيان بهدوء وجلست تفتح حجابها:بوشو تسولفون ؟

منيف:ما بدينا قبل شوي جاني ثنيان

هزت راسها ملاك وناظرت ثنيان ولف ثنيان على منيف:جيت عن ابوي بنتكلم عن الايام اللي تناسبك وتناسبنا

منيف عقد حجاجه:ايام ايش ؟

لفت ملاك:الو منيف ركز حبيبي مافي سالفه الحين غير زواجك

جمد وجه منيف بصدمه وناظرهم بتوتر:مدري عنك اقصد مدري عنكم يعني اللي يناسبكم

ملاك:واللي يناسبك انت بعد لانك عريس والحين صرت متوظف وجدولك مو دايم متوفر ، قول منيف

منيف اخذ نفس وبلع ريقه وناظر ثنيان ورجع ناظر ملاك:يعني انا مدري عن اختك اذا تبي كتب الكتاب بالبيت عندكم والا برا

ثنيان:لا ماهو بالبيت بنسويه برا

منيف ناظر ملاك ورجع ناظر ثنيان:الجمعه يمديكم ؟

ثنيان سكت ثواني ولف لملاك وهزت راسها:أصايل راحت اليوم تدور فستان بيمدي

هز راسه ثنيان ولف لمنيف:بإذن الله ببلغ ابوي وأكد لك مره ثانيه

ابتسم منيف بهدوء يهز راسه ووقف ثنيان

منيف:لا وين اقعد نتغدا سوا

ثنيان:ما تقصر برجع البيت اريّح مخلص دوامي وتعبان

ناظر ملاك اللي وقفت:ما بتجلسين ؟

ملاك لبست حجابها:ودك اجلس ؟

ثنيان ناظرها ولف لمنيف:كيف عشت مع غرابتها عمرك كله ؟

ضحك منيف وابتسمت ملاك:يحبني منيف رغم غرابتي

سكت ثنيان واخذت شنطتها تمشي له:وانت تحبني

صد ثنيان وابتسم منيف يناظرهم وخرج ولفت ملاك لمنيف وابتسمت له تبوسه من بعيد وخرجت

فتحت سيارتها تناظره يركب وركبت سيارتها تشغلها ومشت طريقهم خلفه بسيارتها

ناظر كاميرا ربط الحزام وناظرها خلفه وشغل لها الفلشر يهدي وابتسمت تفهمه وربطت حزامها تهدي وضحكت تهمس:منتبه لي ياثنيان

دخلوا الحي ودخلوا البيت يوقف سيارته ثنيان وملاك بجانبه وسيارة حمدان

وابتسمت نوره تنزل:ياحلوكم

نزل ثنيان وناظر أصايل وامه:خلصتوا ؟

ابتسمت نوره تترقب ملاك ومشت ملاك لهم وضمت كفوفها ببعضها نوره:ياحلوكم كنتم سوا ؟

ثنيان ناظر نوره:امي اسألك انا

نوره:وش يهمك خلصنا والا ما خلصنا ؟ قولي وين كنتم ؟ رحتم اليخت ؟

ملاك ابتسمت:لا ثنيان كان مداوم تقابلنا بالطريق

أصايل:احد ينقذني من امي من الصبح برا

ثنيان ابتسم وتقدم لهم ومشت نوره تدخل البيت:وباقي بنتعب

ثنيان مشى يدخل البيت وملاك خلفه مع أصايل:تحدد كتب الكتاب

جمد وجه أصايل ولفت نوره:اسألك بالله ؟

هز راسه ثنيان:كلمت منيف وقال الجمعه بس بشوف يناسب ابوي والا لا

نوره:اي ياحليله يقصد اخر جمعه من هالشهر صح ؟

ضحكت ملاك وهز راسه بالنفي ثنيان:الجمعه هذي امي

أصايل:اوف ثنيان

نوره ناظرته بعصبيه:صاحي انت من وين الاقي لي مطربه زينه بأسبوع ؟

ثنيان:هذا همك امي ؟

ضحك يدخل وابتسمت ملاك:انا ادبرها لك خالتي ولا يهمك

تنهدت نوره بتعب ومشت أصايل تدخل:ما ينفع بعد جمعتين ؟

لفت عليها ملاك ورفعت حاجبها:ودك تتأخرون اكثر ؟

ارتبكت أصايل من نظرات ملاك وسكتت ودخلوا الصاله وناظرت امها أصايل بتوتر:امي

نوره مسكت راسها:أميمه طالب نلاقي لها حجز؟

ضحكت ملاك ولفت أصايل من دخل ابوها:سلام عليكم

ردوا السلام وناظر أصايل اللي واقفه جنبه:وشفيك يانور عيوني ؟

أصايل بلعت ريقها:ثنيان يقول انه تحدد

عقاب لف لثنيان:تحدد ؟

ثنيان:الجمعه يناسبك ؟

عقاب:وش يهم اذا يناسبني او لا ؟ المهم يناسب الشيخه أصايل

ابتسمت أصايل وعضت شفتها من لف ابوها ورفعت كتوفها:ما اعرف

نوره:لا لا ما يناسب نخليه نهاية الشهر ما بلاقي حجوزات

عقاب ابتسم يناظر أصايل ومسك وجهها:قولي يا ابوي قولي اللي ودك يصير

ابتسمت ملاك تناظرهم واخذت نفس أصايل ولفت لثنيان وملاك اللي يناظرونها ولفت لابوها تعض شفاها بحيا:تفهمني ؟

ضحك عقاب وحضنته أصايل وهز راسه عقاب:الجمعه ياثنيان

هز راسه ثنيان ولفت نوره عليهم:اقولكم ما بلاقي حجوزات

عقاب ابتعد عن اصايل يحطها تحت جناحه:نلاقي انتي قولي بنت عقاب بن جرّاح وكلهم بيخضعون

ملاك:خالتي انا موجوده معاك اذا احتجتي شي

نوره:الوحيده اللي حاسه فيني ، امي ملاك الله لا يحرمني منك

ابتسمت ملاك ولفت لثنيان اللي وقف وخرج يطلع للغرفه ومشت خلفه تدخل

لف من دخلت ولبس تيشيرته ومشى للسرير وفصخت عبايتها وجلست على التسريحه تناظر انعكاسه

سرح ثواني بالفراغ يهوجس وهو جالس على السرير تجهل بوشو يفكر لكنه يهوجس وهي تمسح الميك اب

ملاك:ياهوه لا تسرح بعيد وتتركني وحيد أدور عليك ما ألقاك

التفت بإنتباه ثنيان وناظرها صاده عنه تمسح مكياجها

وابتسم ثنيان وصد عنها يجلس يكمل الاغنيه اللي بدتها:أنا هنا ، هنا ياحبي الوحيد

ابتسمت ملاك:يحلّها اللي جمعنا بعد طول غياب ، يحلّها اللي فتح بيني وبينك باب

صد يبتسم بخفوت ثنيان من الاغنيه وتلميحها ووقفت تاخذ لها ملابس وتدخل الحمام

تنهد ثنيان بتعب من حالهم ووضعهم ومحاولات ملاك له وهواجيسه اللي ما تتركه ابد

خرجت ملاك ولا لقته واخذت نفس تاخذ عبايتها وتنزل وهي تلف حجابها

دخلت الصاله تشوفهم يستعدون للغداء ولف نهار وابتسم:اينجل

ابتسمت له ملاك ودق لها تحيّه:الطايش

نهار:حلوه هذي احلى من المتحرش

ضحكت وجلس على سؤال جنى:طيب جهزتي شي أصايل ؟

أصايل:للحين بس الفستان لقيت شي حلو وناسبني يوصلني بكره

نهار:امي مو قلت فستان أصايل عليّ

نوره ناظرته تفهمه:لا بكره بروح انا ادور لي فستان على ذوقك

ابتسم وغمز لها وابتسمت تجلس على الكرسي

عقاب:جاسر وينه ؟

ساري:قال عنده شغل

نوره:وعياله غدوهم الخدم وهم يلعبون بغرفتهم ، الله يعين والاقي له بنت الحلال

هز راسه عقاب بهدوء وبدوا ياكلون ولف ثنيان يناظر ملاك تاكل بهدوء

ودخلت خدامه:مدام ملاك

لفت عليه ملاك وكملت الخدامه:لديك ضيف

عقدت حاجبينها ولف ثنيان وهمس:من ؟

رفعت كتفها ووقفت تحت نظراتهم ولف ثنيان يناظرها تخرج من البيت

وقفت من شافت منصور اللي واقف بالحوش وعقدت حاجبينها بصدمه وتقدمت له:شجابك ؟

لف منصور عليها وناظر البيت وهز راسه يتأمله

تقدمت ملاك:شجابك اخلص ؟

منصور:جيت لانه ما انتهى كلامنا

ملاك:انتهى كلامي انا وما يهمني كلامك ابد

منصور:يهمك يهمك لان ما بيوقف كل شي لهنا

ملاك:شتبي منصور شتبي ؟ مو خرجت من السجن واخذت جواهر اللي تحسبها انتقام مني ومن ثنيان ، شتبي زياده شتبي بعد ؟

منصور:باخذ حقي منك ومن عايلة عقاب وما بترك حقي وحق اختي يضيع

رفعت حاجبها ملاك:حقك وحق اختك ؟ اي حق اللي تبيه منهم ؟ حقك خذه مني انا اذا تبي هالعايله طلعهم من راسك ، واختك محد جبرها هي بغبائها دخلت بينهم وما استفادت غير خسارتها

منصور تقدم لها بحده:ماتعرفين ان ولد عقاب زوجك جاني وتهاوشنا سوا ؟ ببيتي بين ابوي وامي وزوجتي

ملاك:زوجتي ؟

منصور رفع حاجبه:وشو لا يكون بتغارين عليّ مع زوجك بعد

ملاك:لا والله مستغربه المصخره اللي سويتها

منصور:انا ما بموت لين اشوف هالعايله طاردتك من عندهم

سكتت ملاك تناظره وهز راسه منصور:وباقي اللي بيني وبينك ما انتهى بتتعبين وبتترجيني اوقف عن اللي اسويه فيك

ملاك:بتكمل تحط لي رصاصه على مكتبي ؟

ابتسم منصور ورفع عيونه من خرج ثنيان ووقف من شاف منصور ولفت ملاك تناظر ثنيان وبلعت ريقها

عقد حاجبينه ثنيان بصدمه وتقدم:شتبي انتي ؟

منصور ابتسم ووقف قدامه ثنيان ورفع صوته:شتبي جاي ؟

منصور:ابد جيت اسلم على بنت عمي

غمضت عيونها بتعب ملاك وتقدم لمنصور ثنيان:تكلم زين

مسكت ذراعه ملاك وهمست:ثنيان

منصور ضحك:افا هذا مو طبعنا زارتنا اليوم الصبح بنت عمي وما اجي ارد لها الزياره

عقد حاجبينه ثنيان ولف لملاك وبلعت ريقها ملاك تناظر نظراته

ولف ثنيان لمنصور:اذلف

منصور:ابوك يعرف كيف ترحب بالضيوف ؟

ثنيان:اذا صرت ضيف بالاول

منصور ابتسم:افا اعتبرني نسيبك وماخذ وحده من ريحتك

مسك ياقته ثنيان وسحبته ملاك:ثنيان اتركه

مسك يدينه منصور يناظره بغضب وتنفس ثنيان بعصبيه:اقسم بالله ان ما خرجت من بيتي لاحرق وجهك هذا

منصور دفعه وعدل نفسه:انا ماني ورع امد يدي ، انا اعرف كيف ارد عليك وعلى بنت عمي اللي جنبك

ثنيان:توكل وانقلع

لف منصور من نزل جاسر من سيارته وعقد حجاجه يناظرهم وابتسم منصور يناظر جاسر

تقدم جاسر وناظرهم ووقف قدام منصور

وهز راسه منصور وابتسم:جاسر

جاسر:وشو نقولك حمدلله على السلامه ؟

منصور:ماهي زينه لكم سلامتي

جاسر:توكل بس سمعنا نفس كلامك كثير

منصور:سمعت بس باقي ماشفت

جاسر ابتسم وربت على كتف منصور:توكل توكل

مشى جاسر ولف من نطق منصور:باقي عايشين مع اللي سرقتكم ؟

رفع عيونه جاسر لملاك واحتدت ملامحه يناظر ثنيان ولف لمنصور ومشى له:بتتوكل والا تبيني اعدم وجهك ؟

منصور ناظر ثنيان وضحك:ساقتها عليك

ثنيان مشى له ومسكته ملاك:خلاص خلاص

تنفست بتعب تناظرهم ومشى منصور يخرج ولف جاسر على ثنيان:هذا اللي تبيه يصير هذا ؟ شوف وش دخلت بحياتنا بسببها

ملاك ناظرت جاسر ومشى جاسر يدخل وهو معصب

وبلعت ريقها تشوف قبضة يد ثنيان وعصبيته وهمست:ثنيان بشرح لك

لف عليها بحده:انا ماقلت لا تتصرفين بشي بدون علمي ؟

ملاك:كنت بقولك اقسم بالله كنت بعطيك خبر بس ماقدرت اتحمل ورحت هديت فيهم

ثنيان رفع صوته:قلت لك علميني قلت لك لا تسوين شي بدون علمي لا تسوين شي من راسك ، انتي بتعيدين نفس حركات جواهر يعني ؟

عقدت حاجبينها وهسمت:شدخل جواهر ؟

ثنيان:لانها كانت مثلك

ملاك:ما سمعت اسمها منك من زمان وشو حنيت يوم جاب طاريها ؟

ثنيان هز راسه بتعب من ملاك ومشى يدخل وغمضت عيونها ملاك تتحمل غليل صدرها ومشت خلفه

عقاب رفع عيونه:من ؟

ملاك بلعت ريقها ولف ثنيان عليها يناظرها وتنهدت ملاك:ولد عمي

عقاب عقد حاجبينه:وش يبي ؟ ليه ما دخل ؟

ثنيان شد على الكرسي وهو واقف وعض شفته

ملاك:مستعجل

جلست ملاك ورفع عيونه عقاب على ثنيان يناظره ولف لجاسر اللي عينه على ملاك وثنيان ورجع ياكل

اخذ نفس ثنيان بعصبيه ومشى يطلع للغرفه ولفت تناظره ملاك يخرج وبلعت ريقها ومشت تتركهم وتمشي خلف ثنيان وناظروهم ولفت نوره وهمست:اللهم اجعله خير

'

فتحت الباب ولف ثنيان:اطلعي

كان يتشعل من غضبه ولا يبي يزيد ناره اكثر لكنها دخلت وقفلت الباب خلفها وتقدمت له:ماراح اطلع

ثنيان لف عليها بعصبيه:جيتي تكملين اللي صار تحت ؟ تبين نتحارب ؟

ملاك هزت راسها ترفع صوتها:ابي نتحارب نتحارب واحد فينا ينتصر ، انا تعبت من هالحال واحنا بنفس النقطه انا تعبت

لف عليها يرفع صوته:انا اللي وصلتنا لهنا ؟ انا ؟

ملاك:انا او انت ، تعبت ثنيان خلاص مافيني حيل اتحمل اكثر

تقدم يصرخ بعصبيه:من يوم طلع منصور وسبب نارّك ما يتعدل هالوضع ما بيتعدل

رفعت صوتها:قلت لك أبيك قلت أحبك حاولتك وجيتك وقلت اسف وش بقى اسوي عشان يتعدل وضعنا ؟ وش بقى خلاص تعبت

كملت تصرخ بوجهه:متى بستريح متى بعيش ؟

ثنيان:اذا مات هالكلب اذا خرج من حياتنا

ملاك:وما خرج من حياتنا وظل يهددني ويعدم عليّ كل حياتي متى بعيش قولي متى ؟

ثنيان:يهددك لوحدك ؟ هذا الكلب بكل بجاحه جاي بيتنا يهددني ويهدد جاسر ويهددك ، هذا ما يبي ينتقم منك لوحدك هذا يبينا كلنا

ملاك صرخت:خلاص جحدني وباعني برخيص وكل سبايبي منه ماراح اخليه يوقف بيني وبينك ابد ، انا تعبت لين لقيتك تعبت

سكت ثنيان يناظرها بقهر ونزلت دموع ملاك تصرخ:أبيك وباللعنه بأبو هالدنيا لو موتي بكره أبيك ثنيان

ثنيان تقدم يضرب التسريحه اللي خلفها:وأنا محترق قدامك من وش ؟ من وش علميني ؟ ماهو من قلبي ؟ ماهو من اني أبيك ؟

ملاك:هذا اللي يكفيني ومابي زود والباقي ما يهمني

ثنيان:ماراح يخلينا بحالنا وانتي ماراح تستوعبين وجودي جنبك وتصيرين تكلميني قبل تسوين شي

ملاك صرخت ترفع صوتها:رحت انهي كل شي مارحت اتحمد له بالسلامه

ثنيان:نهيتيه ؟ جاوبيني نهيتيه ؟ جايك الكلب لين عندنا هنا

ملاك سكتت تناظر عصبيته وكمل ثنيان:سرق حياتي معك ماهو بس حياتك

نزلت دموع ملاك بتعب من علاقتهم وحياتهم اللي كل مالها تصير اسوأ واخذ نفس ثنيان من شاف دموعها

ومشى بقهر يجلس على السرير يتنفس ويغمض عيونه يحاول يهدأ

وفتحت عيونها من بين دموعها تناظره ومشت تجلس جنبه وهمست:تعبت ثنيان تعبت

تنهدت بتعب من كل شي تخوضه ولفت عليه تناظره صاد عنها معصب:لا يغلبونا

لف عليها وعقد حاجبينه من جملتها وهزت راسها:مابي ينتصرون عليّ ويفرقونا

سكت من استوعب جملتها وطلبها وتقدمت له تحط راسها على كتفه وتحضن ذراعه:مابي أخسرك ، انت الوحيد بحياتي اللي باقي لي

تنهد يغمض عيونه ورفع ذراعه يحضنها من الجنب وبكت ترفع يدينها تلف وتحضنه

غمض عيونه ثنيان من حضنها وهمس:انتي هلاكي

بكت وهي حاضنته وتنهد ثنيان:انتي هلاكي

ميلت راسها على كتفه وهي حاضنته:أبيك ثنيان ما أبي شي من حياتي غيرك

سكت يسمعها وابتعدت عنه تناظر وجهه:مامعي غير انت واقف بصفي ، ذخيرتي ودنيتي واللي معيشني ، انا لو بدونك رفعت كفوفي واستسلمت لكل شي لكني احارب واجاهد عشان ما يجيك شي ، عشان ما يجينا شي

ناظرها ثنيان وهزت راسها بتعب تلمس خده:منقاد لك قلبي وعقلي لك منقاد

تنهد ثنيان يناظرها متمسكه فيه:وشلون اكون الراكد الهادي ياملاك ؟ كل حياتي من قربك حرايق ، اقسم بالله حرايق وان غبتي عني انا في حرايق ، تشتعل نيران شوقي وانتهي مثل الحريق ومن غيرتي احترق وكلي احترق ، إنتي لهب

بكت وهي تناظره وناظر عيونها ثنيان:انتي بلوتي

نزلت راسها وتنهد ثنيان:بلوتي وهلاكي

رفعت عيونها عليه وكمل ثنيان:أبي أفوزك وأبيك لو انك موتي وحتفي وهلاكي ياملاكي

غمضت عيونها من كلامه وتقدم يمسك وجهها:تعبت مشوارك

فتحت عيونها تناظره ونزلت عيونها لثغره ورفعت عيونها لعينه وماقدر يصبر أكثر ، كانت قريبه منه تحاوله وتبيه وتحبه وحرام يصدّ ، حرام ما يروي ضماه

ميّل راسه لها وقبّل ثغرها ياخذ انفاسها لانفاسه ، ولأول مره بادلته تعني كلامها في قولها بإنها تبيه

رفعت كفها على عنقه وشعره من الخلف ونزل ذراعه لخصرها يقربها منه

وقف وهو يقبّلها وانحنى لها وهي جالسه على السرير وابتعد يرفع راسه وناظرها

ورفع ذراعينه ينزع تيشيرته ورجع ينحني لها يقبّلها ، استراحت على ظهرها وميّل راسه يقبّل عنقها

قضى وقت طويل يقبّلها وتقبّله لين ما ابتعدت عنه وناظرت عيونه ، حط جبينه على جبينها وناظر عيونها:ماعاد فيها رجعه ، ما أبالي لو طريقك هلاك

غمضت عيونها ملاك ورجع يقبّلها

-

رفع عيونه نهار يناظر اهله اللي ساكتين ويناظرون بعض

ولفت جنى:سكتوا لا يكون ذبحوا بعض

لف ساري عليها ولفت نوره تناظرها:بقوم اشوف

عقاب:خليهم

نوره:ماسمعتهم يصارخون ؟ ما فهمنا شي غير صراخ وبس صراخ ، خلني اشوف وش صاير

نوره وقفت تتركهم وطلعت للغرفه واخذت نفس ودقت الباب

رفع راسه ثنيان وهمس:مو وقتك

بلعت ريقها ملاك تناظر وضعهم وعض شفته ثنيان ووقف ونطق:من ؟

نوره:انا ثنيان

لف ثنيان لملاك اللي قامت بسرعه واخذ تيشيرته يلبسه ودخلت ملاك الحمام ووقفت عند الباب

فتح الباب ثنيان وبلع ريقه ودخلت نوره وناظرته بحده:وش صاير ؟

ثنيان:وش صاير ؟

نوره:انا اللي اسألك وش هالصوت وصلنا لين الصاله مافهمنا شي ما نسمع غير صراخ

ثنيان عقد حاجبينه:اي صوت ؟

نوره:ثنيان لا تستهبل معي ليش تهاوش البنت ؟

سكت ثنيان يناظر امه يحاول يتذكر وتقدمت نوره له بحده:لا تفهي جاوبني

رفعت عيونها نوره من خرجت ملاك ولف ثنيان ناظرها وابتسمت بربكه ملاك

نوره تنهدت:ملاك وش صاير يا امي ؟

ملاك رفعت كتفها:ولاشي ، اختلفنا شوي وتصالحنا

هزت راسها نوره ولفت لثنيان:تعال معي بكلمك

مشى ثنيان وخرج ومسكت راسها ملاك بتوتر وجلست على الكرسي تتسجمع نفسها

لف ثنيان لنوره اللي وقفت عند الدرج:ليش تعامل البنت كذا ثنيان ؟ من تالي صاير تغثني وش هالمعامله

ثنيان تنهد وحك جبينه:امي والله العظيم كنت اراضيها بس انتي خربتي كل شي

كشرت نوره:الله ومراضاتك نفس وجهك ، روح جيب لها هذيك الشنطه اللي تترس العين والا طقم يواجه لزواج اختك

صد ثنيان وكملت نوره:ترا ملاك تبي الشي الزين الغالي لا تخليها تطفش منك ومن هواشك

ثنيان:اقسم بالله امي كانت امورنا بتتغير ١٨٠ درجه قبل تجين

نوره:تضحك عليها بكلمتين مسكينه ، على العموم لا عاد تكررها مو لوحدك بالبيت تقعد تصارخ فيه

هز راسه ثنيان ومشت نوره ورجع ثنيان ودخل الغرفه وما لقاها وسمع صوت المويه بالحمام وجلس على السرير

عض شفته يتأفف لانها فرصه جاته لكن ما تمت

'

جلست نوره بتعب:الله يهدي النفوس

ساري:من تالي امورهم ماهي زينه

جنى:الصراحه اي

أصايل:عادي تصير وبيرجعون يتصالحون حتى يمكن تصالحوا الحين

نهار تنهد:اثاري الزواج صعب

جاسر:عبالك سهالات ؟

نهار:شدراني شفت امي وابوي مبسوطين قلت الدنيا كلها مثلهم

نوره:اللهم لا حسد

ضحك نهار ونطق عقاب:وش ظنك يعني انا وامك ما مرت علينا أيام صعبه عشناها ؟ لكن الزواج الحقيقي اللي يستمر بس يستمر وهو يصلّح كل شي ، يفهم ويسمع ويحب ويبادر

دق جوال نهار واخذه ولف لأصايل يدقها وناظرت الاسم وابتسمت

ورد نهار:الفال الطيب

لفت أصايل تناظر اهلها بربكه ووقف نهار يخرج:ارحب النسيب

ضحك منيف:شالاخبار ؟

نهار:ابد ننتظر فرحتكم

ابتسم منيف:فاضي ؟

نهار:افضى لك

منيف:ماتقصر بغيت اروح اشتري لي بشت وابي احد معي

نهار:تعال البيت وانادي خياط ابوي يضبطك

منيف:لا لا بالله نهار نروح خياط كويس

نهار:اجل اعرف خياط زين نروح له

منيف:استناك

نهار طلع مفتاحه من جيبه:جايك

ركب سيارته نهار وحرك ماشي للطريق ومشغل اغاني ووقف من شاف سيارة منيف وقفل سيارته ونزل:حيّ النسيب

ابتسم منيف:تسوق طاير انت ؟

نهار تقدم:اجيك طاير تبشر

منيف ضحك ودخل عند الخياط ومعه نهار واخذ نفس منيف

ووقف الخياط:اهلاً اهلاً نهار

نهار ابتسم:جايك اليوم لين عندك ما بنتعبك للبيت

الخياط:تبشر انت والوالد تحت أمرك

نهار رفع ذراعه على كتف منيف:جايب لك نسيبنا

ابتسم منيف ولف الخياط:ماشاء الله الف مبروك

منيف هز راسه وهو مبتسم ولف نهار:خذ مقاساته وخلص لنا بشته قبل الجمعه

هز راسه الخياط ياخذ المتر:تبشر تبشر

ابتسم منيف وبدأ ياخذ قياساته الخياط ويحس منيف بالفرحه تغمر داخله

ماهو مصدق كل شي يصير ولا توقع كل شي يتيسر بهالسهوله له ويقدر يربح أغلى البنات ، أصايل

نهار:امي من بدايتها ماجزت لها

رفع عيونه بسرعه منيف؛ليش ؟

نهار:ما عجبها الموعد تقول ما يمديها تجيب اميمه طالب

حك حاجبه منيف:نأجل طيب

ضحك نهار:خفت منها ؟ ابوي وافق ما يمديك تتراجع انت بعد

منيف:لا تكفى نهار اذا ما ناسبكم نأجله

نهار:ماعليك امي تجيب اللي ما ينجاب ليوم الجمعه

منيف سكت ووقف نهار:وانا بجيب مصورين لكتب الكتاب ابوي وصاني بس مدري القاه الحين مفتوح والا لا

منيف:ماعليك انا اشوفهم

نهار:المشكله بكره مستلم انا بقول لساري

منيف:لا والله انا اخلص هالامور ماعليك

ابتسم نهار:اي تبي تكبر بعين ابوي

ضحك منيف ولف للخياط:اسود ؟

لف منيف لنهار:وش رايك ؟

نهار:اسود اسود الله لا يسود عيشتك

ضحك منيف وهز راسه للخياط

الخياط:اوصله لك اذا خلصته

منيف هز راسه:تمام يعطيك العافيه

خرج مع نهار وتقدم نهار يفتح باب سيارته:اذا تحس انك مرتبك ارتبك اكثر تراك ماخذ أصايل اختي

ضحك منيف يفتح باب سيارته وركب نهار وضحك

حرك من جنب منيف وابتسم منيف وناظر طريقه يرجع للبيت

'

لبست فستانها وخرجت توقف قدام نوره وأصايل وجنى

ابتسمت نوره تبدي اعجابها

وهزت راسها أصايل:مايشبهك

لفت لجنى اللي هزت راسها بالنفي ودخلت تغير الفستان

لبست غيره وخرجت لهم ووقفت أصايل:هذا هو هذا اللي صنع لأجل اينجل

ابتسمت ملاك ورفعت حاجبينها نوره:ملاك

ضحكت ملاك تناظر فستانها بالمرايه ونطقت جنى:بتولعين بالناس ؟

ملاك عضت شفتها تناظر فستانها:لَهب ، هذا هو

هزت راسها نوره:خلينا نستعجل عشان نشوف باقي اغراضنا

دخلت تغير وتلبس عبايتها وخرجت لهم

ركبت ملاك سيارتها وأصايل بجانبها ونوره وجنى مع السواق

ووقفت عند دار غلا فهد وابتسمت أصايل:بنشوف ذوق نهار واخيراً

ابتسمت ملاك ونزلت ودخلت نوره قبلهم ودخلوا خلفها

وناظروا المكان وتقدمت لهم وابتسمت:اهلاً وسهلاً

لفت نوره وناظرتها جنى من فوق لتحت وهي تشرب من قهوتها

ومسكت شنطتها ملاك بيدينها الثنتين تتأملها

وابتسمت أصايل وهي تاكل علك وتناظر غلا

وناظرتها نوره بترقب وناظرتهم غلا ولا فهمت شي من نظراتهم وهمست:اخدمكم بشي ؟

نوره هزت راسها:زبونتك ام ساري

ابتسمت غلا:اهلاً وسهلاً شرفتيني تفضلي

مشت نوره تجلس وتناظر الفساتين من حوالينها وجلسوا البنات معها

ووقفت غلا تمد لها الايباد:حابه شي معين ؟

نوره هزت راسها:اي اجلسي

ابتسمت غلا وجلست ولفت تناظر جنى وأصايل وملاك اللي يناظرونها ولفت لنوره

قفلت الايباد نوره:متزوجه ؟

ابتسمت غلا بإستغراب:مو جايه تختارين لك فستان ؟

نوره:الا بس قلت اسولف معاك شوي انا وبناتي

ابتسمت غلا لهم ورجعت ناظرت نوره:لا

نوره هزت راسها:عايشه لوحدك بالخبر ؟

غلا عقدت حاجبينها من اسئلتها:لا مع اهلي

هزت راسها ملاك من جوابها

نوره:كم عمرك ياغلا ؟

غلا:خالتي انا مو فاهمه صراحه اسئلتك للحين كيف اقدر اخدمك ؟

نوره:ابد سولفي معي احب اتعرف على مصمماتي

غلا ابتسمت:لي الشرف اكيد ، حابه اعرض لك الفساتين هنا تشوفين شي مناسب لك وللبنات ؟

رفعت عيونها نوره وهزت راسها جنى

نوره:اي بشوف

مشت غلا ونادت عامله وتقدمت العامله تعلق قدامهم الفساتين وهزت راسها أصايل

وابتسمت نوره تناظر غلا وابتسمت لهم:عن اذنكم اشوف الزبونه اللي داخل وارجع لكم ، خدوا راحتكم

مشت تاركتهم ولفت نوره تناظر البنات

ملاك:بنت ناس عايشه مع اهلها

جنى:قوية شخصيه وتعرف تتجاهل اسئلة نقالين العلوم اللي عندنا

أصايل:وفاهمه منصبها ما عرضت بنفسها الفساتين استعانت بعامله

نوره:ونادتني خالتي

ملاك:تحسب لها ؟

ابتسمت نوره ووقفت:غلا

لفت عليها غلا وابتسمت لها نوره:ابي هذا بقيسه

هزت راسها غلا ومشت العامله مع نوره للداخل

وشربت من قهوتها جنى تناظر الفساتين

أصايل:تايب نهار ما يتغير ابد

جنى:عجبتني تناسب عايلتنا

ملاك:يمكن تصيرون صديقات

جنى:يمكن

ابتسمت ملاك وضحكت جنى ولفت أصايل اللي تاكل علك وتناظر غلا من بعيد:طولها حلو بعد مو قصيره ، نهار ما يحب القصار

ملاك:ولا أنا

جنى عقدت حاجبينها:شعرها طويل ؟

أصايل:ما قدرت اعرف مع حجابها مو مبين

ملاك هزت راسها:تناسبه تقدر تكسر راس نهار وتترس عينه اللي ما تنترس

تقدمت لهم قهوه وشربوا وهم يناظرون غلا من بعيد

خرجت نوره وتقدمت لغلا وابتسمت غلا:ناسبك ؟

نوره:اي عجبني اللي داخل اخذت قياساتي بالضبط اذا خلص تجيبونه بيتي ؟

غلا:ان شاء الله بس حطي رقمك وعنوانك

نوره:اي سجليه عندك

اخذت قلم تسجله على الفاتوره ورفعت عيونها نوره تناظرها ولفت غلا:شرفتي

ابتسمت نوره تهز راسه واشرت للبنات وخرجوا

توجهوا لمحل المجوهرات ودخلوا يختارون أطقم

ورفعت طقم أصايل:هذا ؟

نوره:وش صغره هذا لا ما يترس العين

جنى:خالتي هذا ؟

نوره:مبين رخيص

رفعت طقم ملاك وابتسمت نوره:ما تطيح عيونك الا على الغالي

ابتسمت ملاك ولفت نوره للي واقف عندها:هذي كلها وجايه احاسب عليها

وقفت نوره معاه وتقدم حمدان ياخذ الاكياس وخرجوا ولفت عليهم أصايل:للبيت ؟

نوره:لا ، عشاء حلو للسيدات

ابتسمت جنى وضحكت ملاك ومشت نوره تركب وحركوا لمطعم ونزلوا سوا

وجلسوا وناظرتهم نوره:اي ما قلتوا لي تناسب نهار ؟

ملاك:انا قلت رايي تناسبه وبقوه

جنى:وانا عجبتني

أصايل:بس مين اهلها وكيف اهلها للحين ماعرفنا

نوره:هيّنه هذي على ابوك

جنى:وجاسر ما بتدورون له عروس ؟

تنهدت نوره تناظر المنيو:جاسر اهخ ياجاسر

رفعت عيونها ملاك من طاري جاسر وصدت للمنيو

جنى:خالتي شصار حجزتي مطربه ؟

ابتسمت نوره ورفعت حاجبها بشموخ وضحكت أصايل:أميمه طالب

ضحكت ملاك وهزت راسها نوره:قلت تجيني يعني تجيني حتى لو حجزي متأخر

جنى:وناسه تحمست

نوره:للحين خلصنا حمدلله مابقي الا شي بسيط

ملاك ابتسمت وطلبوا اكل ياكلون سوا

سولفوا سوا وضحكوا وقضوا وقت كامل سيدات فقط

رجعوا البيت ودخلت ملاك بسيارتها ونزلوا ودخلت الصاله نوره ورفع راسه عقاب:الشيخه ام ساري

ابتسمت نوره تجلس بتعب:تعبت

ضحك ثنيان وابتسم ساري:خلصتي طقوسك ؟

نوره:اي حمدلله وكل البنات لقوا لهم فساتين

رفع عيونه ثنيان لملاك اللي واقف وجلست جنى:وخلصنا امور سيدات

ناظرها نهار وابتسم ولف لامه:امي ؟

غمضت عيونها تطمنه ولف نهار لأصايل وغمز لها واشرت له عشره على عشره وعض شفته يضحك

عقاب:وش عندكم تتغامزون ؟

نوره:بعدين بعدين

ملاك:انا تعبت وبدخل ارتاح تصبحون على خير

مشت تخرج ورفع عيونه ثنيان لنوره اللي ناظرته وتنهد من فهم نظراتها ووقف وناظر أصايل:كلمت شاعر وجهزها تبين تقرينها والا تسمعينها ملحنه ؟

ابتسمت بصدمه أصايل:منجدك ثنيان ؟

ابتسم ثنيان وهز راسه وعضت شفتها:بقراها

ثنيان:طيب برسلها عليك

هزت راسها ومشى ثنيان يطلع وفتح الباب ودخل

لفت عليه ملاك اللي تمسح مكياجها وجلس يفتح جواله

وناظرته ملاك:شسويت ؟

ثنيان ارسل القصيده لأصايل:بوشو ؟

ملاك:بغيابي

قفل جواله ولف عليها:خمنت لون فستانك

ابتسمت وهي تمسح مكياجها:وش طلع معاك ؟

انسدح ثنيان ورفع ذراعينه خلف راسه:لَهب

ضحكت وابتسم ثنيان من ضحكتها:بتولعين بالناس

هزت راسها ورفعت عيونها بالمرايه عليه:اشتقت احرق

ابتسم بهدوء ثنيان ومشت ملاك وجلست على السرير:وعشان اعرف ان عمي بيعزم نفسه غصب عني وعن منيف بجهز لهم لهب

ثنيان:اها تبين تتكلمين معهم بهدوء زي دايم ؟

ابتسمت ملاك ورفعت كتفها ببراءه:ولا ازيد على كلامي ابد

ثنيان:ابد ولا تكسرين وتضربين وتصرخين

ملاك عقدت حاجبينها:مين ؟ زوجتك ملاك ؟ اكيد وحده غيرها

ابتسم وتقدم يحط راسه على ذراعه يناظرها:زوجتي ملاك

ابتسمت تشوف نظراته وهز راسه ثنيان:ملاكي هلاكي

ناظرت عيونه اللي تتأملها:تحبها

ثنيان:رغم انها صعبه ولَهب وقروشتني بحياتي وحرقتني وطلعتني من طوري وورتني أيام عصيبه

ضحكت ملاك تصد وابتسم ثنيان:تورطت

لفت عليه ملاك وهزت راسها:اللي عديته معاي كثير وباقي آخر شي بيحرقني ويحرقك

ثنيان هز راسه:اهلي

هزت راسها ملاك بتعب وتنهدت:وش بتكون ردة فعلهم لو وصلهم خبر عني ؟

ثنيان مد ذراعه ومسك كفها:انا معك بنحلها

ملاك:لا تقولي مستحيل يعرفون

ثنيان:بيعرفون وادري هذي ذخيرة عمك وولده اصلاً لكن انا موجود وبتنحل

تنهدت ملاك تصد تناظر الغرفه وناظرها ثنيان:بتنامين ؟

هزت راسها تفتح اللحاف وناظرها ثنيان ولفت عليه تشوف نظراته:لا يكون بتنام على صدري ؟

ابتسم ثنيان:انا لا انتي ودك ؟

ابتسمت له وهزت راسها وفتح ذراعه وتقدمت له وغمضت عيونها من حضنها وحطت راسها بحضنه

وابتسم ثنيان يناظرها بحضنه لأول مره ورفع يده على شعرها:تذكرين اول مره شفتيني ؟

ابتسمت ملاك وهزت راسها وهي مغمضه عيونها:اول مره هددتني قصدك

ثنيان:رفعت عليك سلاح

تنهدت ملاك تذكره وكمل ثنيان:ماكنت اعرف وقتها انك بتدخلين حياتي بهالقوه وتغيرين كل شي ظنيته صحيح ، اختياراتي اهتماماتي وأولوياتي

ابتسمت ملاك تفتح عيونها تسمعه وكمل ثنيان وهو يلعب بشعرها:ما كنت احب احد اكثر من حبي للموج

رفعت راسها ملاك وناظرت عيونه وناظرها ثنيان:وحبيت

ابتسمت له وكمل ثنيان:وحبيت ضده وعكسه ، لَهب

ملاك رفعت كفها على دقنه تلمسه بأصابعها وهي تناظره

ثنيان:ماحبيت غير الصعب الكايد والمثابره ، لَهثت عشان أدخل قلبك وتعبت عشان أذوق ثغرك وأبي أتعب اكثر اذا بتجيني دايم بلذة الانتصار ، الصابر ، المجاهد ، اصعبي عليّ دايم ولا تتساهلي وتتهاوني معي

ملاك ناظرت عيونه:وعشانك صعب وتحب الصعب انا ما اعرف للسباحه ، تعلمني اسبح ؟

ابتسم ثنيان يفهم تلميحها:اعرف اخليك تغرقين بس

ضحكت ملاك وهز راسه ثنيان:بخطفك

ملاك:لليخت ؟

ثنيان:لا ، بس خلينا نخلص من أصايل ومنيف وبنهرب

ملاك ابتسمت:انا وانت ؟

ثنيان:متى صرنا بدون بعض ؟

ملاك ناظرت عيونه ورجعت تحضنه وغمضت عيونها براحه من وجود هذا الحضن والحنيّه اللي تحوفها حوف

غمض عيونه ثنيان يحضنها بذراعينه لصدره

-

( لا تنسون النجمه ⭐️)

ليلة الجمعه - كتب كتاب منيف بن مساعد على بنت العميد والشيخ عقاب بن جرّاح ' أصايل وأخت النهار '

-

وقفت خلفه بالمبخره:تركت الميك اب ارتست تنتظر عشان ما أفوّت هاللحظه

ابتسم منيف وهز راسه بالنفي يناظر المرايه:مو مصدق

ابتسمت له ملاك وحطت المبخره ومشت تاخذ البشت ووقفت خلفه:أحلى يوم بحياتي

حست انها بتبكي وضحكت:حمدلله مو حاطه ميك اب

ضحك منيف ورفعت البشت تحطه على كتوفه وتنهد منيف يناظر شكله بالمرايه

مسكت كفوفها ببعض تناظره وبكت ولف عليها منيف واشرت له:مابي اعفط غترتك

منيف مسح دموعها:بتزفيني الليله

بكت وهي تناظره وهزت راسها:بزفك

ابتسم منيف وبلعت ريقها تاخذ العطور تعطره:اقرأ أذكارك منيف

منيف:تحصنت وتعطرت سبعين مرّه

ملاك ضحكت تعطره:بتروح مع نهار ؟

هز راسه واخذت جوالها ومفتاح سيارتها ملاك:تأخرنا تعال

خرجت معاه ولف نهار:النسيب

ابتسمت ملاك ومشت لسيارتها:منيف بأمانتك يالطايش

نهار:ماعليك بالحفظ والصون انتي روحي طلّي عليهم اينجل

ابتسمت له وركبت سيارته تحرك للقصر ، دخلت للغرفه وناظرتها نوره:تأخرتي ملاك وينك ؟

ملاك:جيت جيت

نوره:بستقبل بدونك يعني ؟

ملاك فصخت عبايتها:دقايق اسبقيني

نوره هزت راسها وابتسمت ملاك للميك اب ارتست:معليش

جلست تستعد وتتجهز وتسمع الاغاني اللي بدت تطرب المكان والحضور

وجهزت تلبس فستانها ووقفت قدام المرايه بالمبخره وتبخرت بالعود

لابسه الأحمر نفس ما تعرف نفسها ' لَهب '

تعطرت بالعنبر والكشمير وتطيّبت بالعود وناظرت شكلها وكأنها تثبت للعيون ؛ لو تقوم بلاد ما تشبه بلادي ولو يجون أشباه ما أشبه أحد

انحنت تلبس كعبها واخذت جوالها بيدها وخرجت تمشي بكل ثقه وفرحه وتقدمت لنوره اللي واقفه تستقبل ووقفت بجانبها

ابتسمت للي يباركون ويسلمون عليها ووقفت قدامها وحده تجهلها ومدت لها كيس:هديه بسيطه

ابتسمت ملاك:للعروس؟

هزت راسها بالنفي:لاخت العريس

عقدت حاجبينها ملاك ودخلت المَره تجلس بين الحضور ونزلت عيونها للكيس ملاك ورجعت تلف تسلم

'

-قسم الرجال -

بلع ريقه يناظر الحضور والبشوت وطوال اللحى ، واخذ نفس يجلس بجانب الشيخ

ورفع عيونه عقاب لمنيف وابتسم منيف بهدوء يسمع مقدمة الشيخ

ورفع عيونه من دخل محمد ومعه منصور وتلاشت ابتسامته ولف للشيخ من طلبه يردد خلفه

وقف منصور يناظر منيف من بعيد بجانب عيال عقاب

والمصوريين أمامهم يصورونهم

وكل من عيال عقاب لابس بشته وكأنهم جميعاً أخوان وعزوه لمنيف ولأصايل

ما أخذ منيف غير الكايد والأغلى ، ما أخذ غير بنت الشيوخ وحيدة عقاب ودلوعة أخوانها ، الدرّ الثمين

وقف من ابتسم عقاب وصافحه:مبروك

سلم عليه منيف ولف للي بجانبه أخوانها وسلم عليهم

يشوف الحضور ومكانه بين عقاب وعياله وكله شعور بالراحه يغمر صدره ، تواجد بالمكان اللي يستحقه وأخذ الأغلى والأفضل

ابتسم عقاب يمسك كتف منيف اللي يسلم على الل تقدموا له يباركون

ولف عقاب يناظر محمد ومنصور وهمس:عمك

لف منيف يناظرهم من بعيد وتقدم محمد:ماشاء الله لو ما جيت بدون عزيمه ما دريت

سكت منيف وناظره عقاب:ما تحتاج عزيمه يا ابو منصور الله يحييك

محمد ناظر عقاب اللي ابتعد ولف لمنيف وصافحه محمد:مبروك مبروك

منيف ناظر تسليكه وبرودة كلامه وهز راسه بضيق

تقدم منصور وصافح منيف:استحليتوا لكم مكان بينهم ؟

منيف اخذ نفس:اذا جاي لغير المباركه مابي اسمعه

منصور سكت والتفت منيف من ناداه نهار وتقدموا يرقصون سوا بالسيوف

ابتسم منيف وذراعه جنب بجنب لثنيان ونهار يرقصون بالسيوف وأمامهم فرقه تقرع لهم

وتقدم عقاب يرقص بسيفه وسطهم فرحه ببنته وأغلى أمنياته

وتقدموا ساري وجاسر معه ما يتركونه لوحده وابتسم ثنيان يناظر فرحتهم

انحنى جاسر يشيل ولده حمد ويرقص بسيفه مع ابوه وساري

والمصورين منتشرين بالمكان يصورونهم

'

اخذت نفس أصايل توقف ودخلت ملاك:مادخل منيف ؟

هزت راسها المصوره:كلميه عشان لا نتأخر بالتصوير ونعطل الزفه

ملاك اخذت جوالها:لا ما بيتعطل شي ان شاء الله

دقت عليه وفتحت الباب وناظرته:منيف ؟

قفلت جوالها وتقدم منيف:جيت

ابتسمت ملاك:انتظر فرست لوك

ابتسم منيف ولفت ملاك وغادرت الجناح أصايل توقف بالصاله الصغيره ودخل منيف

المصوره:طيب منيف راح توقف هنا تعطينا ظهرك نصور الفرست لوك

هز راسه منيف ووقف يعدل بشته وعطاهم ظهره وابتسمت ملاك توقف بجانب المصوره

ونطق منيف:ملاك

ملاك:موجوده ما بروح لين تشوفها

ابتسم منيف بربكه يناظر الفراغ قدامه وشغلوا اغاني بالجناح المصورات ودخلت أصايل وهي ماسكه مسكتها

وابتسمت من شافت ظهر منيف وناظرتها المصوره:وقفي خلفه شوي أصايل

وقفت أصايل وشدت على مسكتها بتوتر وابتسمت ملاك تناظرهم

تقدمت المصوره تصورهم ورفعت كفها أصايل على كتفه ونطقت المصوره:لف ياعريس

التفت منيف وابتسم من شافها قدام عيونه ولمعت عيونه بصدمه من فرحته وحلمه اللي قدام عيونه ورفع كفوفه يغطي وجهه بصدمه ورجع يناظرها

وضحكت أصايل تناظره مو مصدقه ابداً مشاعرها

ومسك قلبه منيف يهز راسه بعدم تصديق وتقدم لها:حلالي ؟

ارتبكت لانه يطلب حضنها وابتسمت ورفع ذراعينه يحضنها وابتسمت ملاك تناظرهم ولفت للمصوره وابتسمت وخرجت

غمض عيونه من حضنها ومن صارت نصيبه وحلاله ويعيش معها كل عمره الباقي

حست ان دمها حار من شعورها وتناثر داخل بطنها مشاعر من حضنه وابتعد عنها وابتسم:انزعيني من يدين الحسايف والظنون أنتي بعد ليالييّ المظلمه طلعة فجر ، إخت النهار وشمس حياتي

ابتسمت تناظر عيونه وارتبكت تنزل عيونها وابتسم من حياها ووجودها قدامه ، ما يبي أكثر اخذ اغلى مكاسب الدنيا وأغلى الأمنيات

لف للمصوره من طلبت منهم يتصورون سوا

المصوره:حاوط خصرها ياعريس

منيف:عمري كله ولا أفلته

ضحكت أصايل بحيا وتقدم منيف لها وارتبكت ترفع عيونها عليه وتحط بكفوفها على صدره

ناظرها وما غابت عن ثغره الابتسامه ولا رمش هدب عينه ابد

لفت أصايل للمصوره:بس بنصور مع كوتي ويامور

لف منيف وناظر المصوره:فيها يامور ؟

تقدمت المصوره بكوتي واخذتها أصايل وجات بتاخذ يامور وهوّش لها وضحكت أصايل

منيف:خليه الحيوان ذا بحرمه التونه

أصايل:حرام

انحنت تناديه ومشى لها وابتسم منيف ووقف واخذ كوتي من حضنها وهمس:صور حديقة الحيوان

ضحكت أصايل وابتسم منيف وتصوروا مع كوتي ويامور

انتهوا التصوير وابتسم منيف وجلس ومسك كفوف أصايل:فرحتي الـ

وفزّ من انفتح الباب وبلع ريقه من دخل عقاب وخلفه العيال وناظرهم منيف ناشف ريقه وهمس:اعوذ بالله من الشيطان

ابتسمت أصايل:ابوي

مشى لها عقاب:نور عيوني

مسك ياقته منيف ووقف يعدل بشته وناظر أصايل اللي تحضن اخوانها وناظر عقاب اللي يناظرها وابتسم له بهدوء

وصد عقاب عنه وتلاشت ابتسامة منيف وناظر نظرات اخوانها ولف من نطق نهار:ياويلك ياولد مساعد

ضحكت أصايل وهي بحضن نهار وبلع ريقه منيف

ناظر جاسر وساري وثنيان اللي يناظرونه وحك جبينه بربكه

دخلت نوره وناظرتهم:عقاب ؟

لف عقاب وابتسم:ام ساري

ابتسمت وتقدمت لهم ولف نهار:ملكة العرس والشرقيه والعالم كله الشيخه ام النهار

نوره تقدمت لهم تضحك وتقدم جاسر اقرب واحد وسلم عليها:افراحك دايمه ام جاسر

ابتسمت نوره وناظرته:عقبالك

هز راسه جاسر وسلم عليها ساري وتقدم ثنيان يسلم عليها وتقدم نهار يبوس كفها:ما بخرب الطلّه

لفت نوره لمنيف اللي واقف وبلع ريقه منيف:شلونك خالتي ؟

نوره هزت راسها وتقدمت له:مبروك منيف مبروك عليك بنتي واغلى شي بحياتي

ابتسم منيف وسلم عليها ووقفت نوره بجانب منيف:الحين صاروا عيالي خمس

عقاب:يعني ما يهم وجودك ياعقاب

ضحكت نوره:انت راس مالي ياعقاب

ابتسم عقاب وناظرتهم:يالله عشان تدخلون ، أمي أصايل

مشت لها أصايل وعدلت شعرها نوره:تجهزي وخل يعطرونك ، تحصنتي ؟

هزت راسها أصايل وابتسمت نوره:تسمعين الطرب ؟

ضحكت أصايل وهزت راسها وخرجت نوره

ووقفوا عند الباب وحك جبينه منيف وهو بجانب عقاب

ومد كفوفه جاسر يعدل بشت منيف ولف عليه منيف يناظرهم خلفه وصد لقدام وغمض عيونه بتوتر

وقفت نوره تشوف المباخر اللي توزعت بالقصر واشتغلت الاغنيه وانفتح الباب

ووقفت ملاك على الكوشه تناظر منيف من بعيد وهي لابسه عبايتها وابتسمت بفرحه من تقدم مع عقاب

دخل مع عقاب وابتسم براحه من شاف ملاك واقف قدامهم

رفعت جوالها تصوره معهم وطلع على الكوشه وفتحت يدينها له وحضنته وابتسم يحضنها:أموت عليك ملاك

ضحكت تشوف فرحته وابتسم عقاب يناظرهم وحك جبينه ثنيان يوقف جنب أخوانه وابتعد منيف وابتسمت له:احلى عريس بالشرقيه كلها

منيف تقدم لها:خليتيني بينهم

ملاك:مو لوحدك انا معاك

ابتسم منيف وتقدم يوقف بجانب عقاب ورفعت عيونها ملاك تناظر عقاب اللي ابتسم لها وردت له الابتسامه وناظرت ثنيان اللي واقف ببشته وابتسم من شافها وابتسمت تصد بعيونها

وطلعت نوره ترقص بذراعينها وتتباهى بعيالها وكثرتهم ، وتقدم نهار يرقصها وابتسمت ترقص مع نهار

ورفع عقاب يصفق بهدوء ويناظرهم واخذت نفس ملاك ولفت للحضور وتلاشت ابتسامتها من شافت اللي من بعيد داخلين متأخر وعرفتهم ومستحيل ما تعرفهم ، شادن وجواهر ووفاء

ظلت تناظرهم ولفت شادن على وفاء وجواهر اللي دخلوا بين الطاولات وشادن مشت لباب العروس

وابتعدت ملاك من بينهم ومشت تلحق شادن اللي دخلت

رفع عيونه منيف ينتبه لملاك وناظر اللي تدخل لابسه عبايتها وبلع ريقه بتوتر

وعقد حاجبينها ثنيان يشوف ملاك تدخل خلف وحده

'

دخلت ملاك ورفعت صوتها:شادن

لفت شادن وناظرتها وتقدمت ملاك:عسى خير هالجيّه ؟

اخذت نفس شادن:جيت اسلم على عروسة ولد عمي

ملاك تكتفت:بدون عزيمه ؟

شادن:احنا اهل

ملاك تقدمت ووقفت قدام شادن وهمست:اتركي اللي جايه تسوينه واطلعي الحين قدام عيوني من المكان

شادن ابتسمت:بعد ماتعرف عروسة منيف من كان يهددها بصورها

رفعت كفها ملاك تشد شادن من ذراعها:لا تخليني اخلي هالليله فوق راسك ، لا تطلعين أقصاي ياشادن

خرجت أصايل مع العاملات وهمست:ملاك ؟

لفت شادن وابتسمت من اطلالة أصايل:واو

رفعت عيونها أصايل وعقدت حاجبينها:شادن ؟

شادن هزت راسها:عرفتيني وانا منقبه ؟

ملاك عضت شفتها ومشت وسحبت شادن معها ووقفوا عند باب العروس

ورفعت عيونها ملاك:قدام هالناس ولا اسأل عن احد ولا يهموني اخلي فضيحتك على كل لسان اقسم بالله يا شادن لأطلع شرّي كله عليك وعلى اهلك

شادن لفت تناظر الناس اللي يناظرونهم والرجال اللي صافين على الكوشه

وشدتها ملاك وهمست:احرقك

لفت شادن تناظر عيون ملاك:عبالك اذا خلصتي مني الحين ما بقدر اوصل لها ؟

ملاك ابتسمت:تعديني قبلها

سكتت شادن وبلعت ريقها من عيون الناس ولفت تشوف جواهر وامها من بعيد واتسع مبسم ملاك:توكلي على الله

لفت شادن تتركها ولفت ملاك على الانظار اللي من الكوشه عليها وابتسمت لهم وقفلت الباب خلفها وتقدمت توقف يمين الباب تترك الزفه تشتغل لأصايل

لفت تناظر شادن اللي جلست مع جواهر ووفاء ورجعت تصد

اشتغلت الزفه بالقصر واخذ نفس منيف يناظر الباب ينتظر خروج أصايل لهم

تقدمت نوره لعقاب توقف بجانبه وتمسك كفه بقوه من نظرات عيونه للباب وابتسمت

ارتبك جوف منيف من صوت الزفه والمقدمه وبلع ريقه من عظمة توزيع الزفه والكلمات ولحنها

وشدت على مسكتها أصايل تخفي ربكتها وانفتح الباب وابتسمت بوسع مبسمها من اهلها اللي قدام عيونها

ابتسم منيف بعدم تصديق ورفع كفه على صدره اللي بيخرج من مكانه

وابتسموا اخوانها يناظرونها وتقدمت تمشي بهدوء

ورفع جواله يصور نهار وابتسم

وابتسمت ملاك اللي بجانبها ولفت تناظر حوالينها بحذر ورجعت تناظر أصايل

نزلت دموع نوره ومسحتها بسرعه تغطرف بعلو صوتها وابتسمت أصايل من نظرات اهلها لها

وحست انها بتبكي من اشكالهم ورجفت كفوفها وعض شفته نهار من شافها ترتبك وصفّر بأصابعه وضحكت أصايل تناظره

وتقدمت ملاك لها ترفع صوتها:اضحكي اضحكي

ابتسمت أصايل بربكه وناظرت منيف اللي بإنتظارها وتقدمت ملاك تطلع على الكوشه وناظرت طاولة جواهر وشادن ورجعت ناظرت أصايل

هزت راسها بتعب من وجودهم وتغيرت الاغنيه من وصول أصايل وتعالت اصوات صديقاتها بالصراخ ولف منيف لعقاب يناظره وابتسم عقاب يأشر له يروح

وابتسم منيف ومشى لأصايل ومسك كفها وباس جبينها وضحكت أصايل من فرحتها وابتسمت ملاك تناظرهم

كانت تشوف أطهر قلوب وأنقى حب ، كان ودها تحارب هذا الحب لأجل مصالحهم لكنها ماقدرت تغلب حبهم ابد ، تمنت لو ما كانت موجوده بحياة منيف ودمرت حتى مستقبله واختياره

حست انها بتبكي وهي تناظر منيف وأصايل وصدت تاخذ نفس وبلعت ريقها ورجعت ناظرتهم

حضنت عقاب أصايل وتجمعت دموعها بعيونها:أحبك أبوي

عقاب ابتسم وابتعد عنها ومسك وجهها:وللحين أنا أبوك وما خرجتي من تحت جناحي

عضت شفتها ماتبغى تبكي وباس جبينها عقاب:لا تبكين

مشت نوره وحضنتها:أمي ودنيتي وأحلى عطايا ربي لي

ابتسمت أصايل تحضن نوره:الله لا يحرمني يا أمي

ابتعدت وضحكت من تقدم لها نهار:صديقتي تزوجت

حضنته تضرب ذراعه وابتسم نهار:احلى عروس لا تحسبين بخليك بعيش معكم بعد

ضحكت أصايل وابتعدت عن نهار وتقدم لها ثنيان وضحكت تحضنه:شكراً على الزفه

ثنيان ابتسم:لو تبين عيوني لا تشاورين

ابتعد عنها وتقدم ساري لها وحضنته تضحك:أخوي الكبير

ساري:الله يوفقك ياحبيبة اخوك

ابتسمت وتقدم جاسر وحضنها:تكفين لا يردك لسانك أصايل

اصايل ابتسمت وهي بحضنه:أعشقك

ابتسم جاسر وابتعد عنها يبوس كفها وابتسمت لهم ووقفت بجانب منيف

وتصوروا سوا وملاك واقفه بعيد تناظرهم يدينها ترجف من مشاعرها ، نزلت عيونها تفكر بحالها وحياتها وحياة منيف معها

رجعت تناظرهم من بعيد وابتسمت بين دموع عيونها تشوف فرحتهم

لفت أصايل وابتسمت لمنيف تناظره وهز راسه بعدم تصديق يناظرها ، تبتسم له وما يصدق عيونه من جمالها وابتسامتها ونظراته لها

وضحكت من تقدمت نوره ترقصّها قدام عيون اهلها وابتسم منيف يتأمل كل هذي الرقه والدلال قدام عيونه

وتلاشت ابتسامته من مسكت كفه نوره تقدمه يرقص مع أصايل وبلع ريقه ولف يناظر عقاب والعيال اللي يناظرونه

وابتسمت أصايل تمسك كفه وهي ترقص بكفه ولف عليها واتسع مبسمه من شكلها ولا رمشت عيونه وهو يناظرها

مسك كفوفها الثنتين وهي ترقص أمامه ، ورفع حاجبه جاسر يناظرهم وناظرهم نهار قدام عيونه

وحك جبينه ثنيان وصد ساري بعيونه ودارت أصايل بفستانها قدامهم وكفها بكف منيف وهو مبتسم

اخذها من بينهم وحده وصارت له وحده ، صارت حلاله ونصيبه

لف ثنيان يناظر ملاك اللي واقفه بعيد تناظرهم وحك شاربه يحاول يلفت انتباهها وابتعد عنهم شوي ورفعت عيونها ملاك عليه ومن ناظرته اشر لها وابتسمت تبلع غصتها ومشت له

وقفت بجانبه ولف عليها:اشوفك ترا

ابتسمت تناظر عيونه:منتبه لي ؟

ثنيان:اي موج عيونك من بعيد اشوفه

ملاك نزلت عيونها بهدوء ورفعت راسها تناظرهم وتنهدت

ثنيان:من اللي دخلت ولحقتيها ؟

رفعت عيونها ملاك:شادن

سكت ثنيان يلف عليهم والتفت عقاب عليهم عشان يطلعون

والتفت ثنيان عليها وابتسم:احرقيهم لَهب

ابتسمت له ملاك وشدت على كفه والتفت ثنيان يعطي الناس ظهره وناظر جمالها اللي كَوى صدره ، وناظر أنيابها من ابتسامتها ورجع ناظر عيونها وتقدم يبوس جبينها

واتسع ثغرها وشدت على كفه وابتعد عنها وناظرت عيونه:أحبك

ايتسم والتفت لاهله ومشى يخرج مع اخوانه

لفت تناظر الطاوله ولا لقت جواهر ودورت بعيونها ولفت من نادتها نوره وهزت راسها من مد كفه منيف يناديها

مشت تترك عبايتها وتمشي لهم وابتسمت من مسك كفها منيف ورقصت له بفرحه

وابتسم منيف من مسكت كفوفه الثنتين تغني وترقص معاه والفرحه تغمرها

وابتسمت أصايل اللي واقفه وتناظرهم

رقصت قدام منيف بتباهي وفرحه بأخوها وفرحته

وحضنته وحضنها منيف بقوه:انتي أهلي

ابتسمت وابتعدت عنه:خلك مع عروستك

ابتسمت ملاك تناظر أصايل ومشت تاركتهم ورفعت فستانها تدخل مع الباب ماهي مطمنه من عدم وجود جواهر

-

خرج اخر واحد مع اخوانه ولف من مسكت ذراعه كف وجمد وجهه يناظر جواهر والتفت يشوف اخوانه اللي خرجوا والتفت عليها يناظرها بصدمه

وقفلت الباب وتقدمت له:ولا فكرت تسألني ليش ؟

ثنيان:وهنا بسألك ؟

جواهر:ما شفتك تعنيت واهتميت وجيتني

ثنيان:اسبابك معروفه ياجواهر تحسبين انك كذا انتصرتي لكن مع الاسف ما فزتي بشي

ابتسمت جواهر:المشكله انك متمسك بالشخص الغلط ، دمرتك ودمرت حياتك وحياة اهلك والى الان مصرّ تشوفها صح

ثنيان:اطلعي منها جواهر وفكيني من شرّك انتي واللي اخذتيه

جواهر:فرحان بزوج اختك ؟ تعرف سواته ؟

ثنيان تقدم بغضب:اذلفي جواهر

جواهر:هو اللي هدد اختك بصورها اذا ماتدري

جمد وجه ثنيان وهزت راسها جواهر:كل مره تنصدم من سوء الشيطان اللي معك ، صحصح ثنيان

لفت ولف ثنيان من دخلت ملاك وناظرتهم

بلعت ريقها جواهر تناظر ملاك بحده ورفعت حاجبها ملاك وتقدمت تمشي بكعبها وفستانها:تحومين حوالين رجال غير زوجك ؟

جواهر:كان زوجي

ملاك تقدمت ووقفت قدامها:كان ، فعل ماضي عليه حسوفه وملامه وسوء اختيار

جواهر ابتسمت:ماجيت اتغزل فيه جيت عشان العشره اللي بيننا

ملاك لفت تناظر ثنيان ورجعت ناظرت جواهر:تنصحينه ؟

جواهر:أفوّقه

ملاك سكتت وكملت جواهر:ان اللي هكر جوال اخته وسنابها وصورها وهددها فوق هذا كله هو عريسها ياحرام

لانت ملامح ملاك وهي تناظر جواهر وضحكت جواهر:كل مالها تبان فضايحك يا الشيطان ، وش بيكون ردة فعل عقاب بن جرّاح ياترى

بلعت ريقها ملاك وابتسمت جواهر ومشت تخرج من عندهم

رفعت عيونها ملاك لثنيان اللي يناظرها وهمست:ثنيان

ثنيان:ثنيان ايش ثنيان ايش ؟ وش باقي ما علمتيني ؟

ملاك:منيف ماله شغل اقسم بالله ماله شغل انا اللي سويت كل شي

ثنيان عقد حاجبينه بصدمه:كذا بتهونينها ؟

ملاك اخذت نفس:انت كان عندك خبر من قبل

ثنيان:عندي خبر انك انتي هددتي مادريت ان اللي كان يهدد واحد كلب قاعد يرقص مع اختي الحين

ملاك:ثنيان قلت لك ماله شغل

صد ثنيان وشد على اسنانه ولف عليها:متى بنخلص ملاك ؟ متى اقسم بالله تعبت منك ومن مصايبك

سكتت ملاك تناظره وناظرها بغضب ثنيان وفتح الباب وخرج يقفله بقوه

وغمضت عيونها ملاك ولفت تاخذ نفس وتخرج

ناظرت مكانهم وهزت راسها بوعيد

وقفت جواهر مع شادن ووفاء خارجين وتقدمت لهم ملاك وحطت يدها على الطاوله وناظرت جواهر:جربتي من قبل وش ممكن اسوي لو انداس لي طرف

جواهر:هالمره جربيني انا

ابتسمت ملاك وتاظرت شادن ووفاء ورجعت ناظرت جواهر:لا تتعزوين فيهم مالهم امان اسأليني انا

شادن:متى تبطلين القوه المصطنعه هذي ياملاك ؟

ملاك:لا يابنت عمي ماهو تمثيل وزيف ، انا احرق وناري لظى وانتي تعرفيني

وفاء:ريحينا من المشاكل ملاك

ملاك:كان قعدتي ببيتك لو ماتبين المشاكل ، اذلفي وخذيهم معك

ناظرتها وفاء بصدمه ولفت ملاك لجواهر ومشوا تاركينها واحتدت ملامحها تشوفهم يطلعون ولفت للناس اللي قاعدين وطلعت للكوشه وتقدمت لمنيف ونطق:بطلع

هزت راسها ولف منيف لأصايل وابتسم وشد على كفها وابتسمت له

خرج مع ملاك ووقف عند الباب الخارجي ولف لها:شادن اللي دخلت وقت الزفه ؟

هزت راسها ملاك وكمل منيف:وش بغت ؟

ملاك تنهدت:بنت عمك يعني وش تبي بس وقفتها عند حدها

منيف:وليش متضايقه انتي ؟

ابتسمت:مو متضايقه ماعليك

ناظرها منيف وهز راسه وخرج وقفلت الباب ملاك وجلست بالغرفه

غمضت عيونها واخذت نفس وخرجت تناطر أصايل اللي ترقص مع صديقاتها والكوشه تعج بالبنات

ورجعت تدخل وتلم اغراضها وتلبس عبايتها وخرجت فتحت سيارتها وركبت واخذت نفس وحركت

مرت من عند قسم الرجال تشوفهم يتعشون وتعدتهم ترجع للبيت

وساقت بهدوء لين دخلت البيت ونزلت من سيارتها ولفت من ناداها من عند البوابه:ملاك

ناظرت منصور وعقدت حاجبينها وتقدم لها وابتسم

ملاك:خير ؟

منصور ناظر طرف فستانها الاحمر الباين:خير ان شاء الله

دفعت كتفه بسبابتها ورفع عيونه لها وناظرته:شتبي جاي ؟

منصور:متلهف اشوف طلة اخت العريس

ملاك:ارسلت اختك وزوجتك والحين جاي تكمل السهره يعني ؟ ما تعبت ؟

منصور سكت يناظرها:تعبت ؟ سنيني كلها اللي بالسجن تعبت فيها وانتي ماتدرين

ملاك ناظرته بحده:ما ادري ؟ انا اللي ما ادري منصور ؟ انا اذا كنت اليوم هنا فكنت عشانك انت ، انا سرقتهم هذولا اللي ينادوني بنتهم وعطوا بنتهم لاخوي ، سرقتهم عشانك انت

منصوو:طلبتك ؟ جاوبيني طلبتك تسرقين ؟ تتزوجين ؟ والا بتحمليني كل شي انتي سويتيه حتى الحيوان اللي لقيته في مكتبك

ملاك:كمل كمل واطعن بشرفي ياولد عمي ، قول عني مستعمله وعند رجلين الشيوخ

سكت منصور وتقدمت له ملاك:٢١ مليون

بلع ريقه منصور وهزت راسها ملاك:ريال ريال عشان اطلعك من جريمه انت سويتها بنفسك وحطيتوا غلطتك انت واهلك عليّ والحين يوم طلعت بتجي تنتقم من السبب اللي خلاك تعيش ؟ الجحود وراثه ؟

منصور ناظرها بعصبيه:انتظرتك تجين وتنكرين وتدوريني ولا جيتي، تزوجتي وانترست عيونك فيهم

ملاك عقدت حاجبينها:انتظرت ؟ انا اللي انتظرت ووقفت قدام زنزاتك وجاني منع اني ازورك ، انا يامنصور

منصور هز راسه بالنفي:مامنعتك

بللت شفايفها تبتسم ملاك:ابوك ، وهو اللي خلاك تخرج بكل هذا الغضب تبي تحرق وتذبح

منصور تقدم يناظرها:وش النهايه ؟ تعيشين معه طول عمرك ؟

سكتت ملاك تناظره وكمل منصور:تبيعيني ؟

صرخت بوجهه بقهر:ما بعتك متى تفهم اني ما بعتك

منصور:لو ما بعتيني كان الحين انتي ببيتنا مو ببيتهم

رفعت عيونها من السيارات اللي دخلت البيت وبلعت ريقها تشوف سيارة ثنيان

ولف منصور يناظر سياراتهم اللي دخلت ووقف بإعتدال يناظرهم

فتح الباب عقاب ينزل ووقف يناظرهم ونزل ثنيان وعقد حاجبينه

ولفت ملاك لمنصور وهمست:روح

ناظرها منصوره وهز راسه وخرج

واخذت نفس ملاك ولفت تناظرهم ينزلون ومشت تدخل البيت

قفل باب سيارته ثنيان بقوه وهمس:صبرك يارب

دخل بعدها البيت وطلع الغرفه ودخلت ملاك ودخل خلفها وقفل الباب:وش يبي ؟

فصخت عبايتها وناظرته:منصور ماتعرفه ؟

ثنيان تقدم لها:ناديه كلب لا تنادينه بإسمه

سكتت ملاك تناظر عصبيته ولفت ومسك ذراعها ولفت عليه

وهز راسه:ماجاوبتي وش يبي جاي ؟

ملاك:يكمل مع اخته وزوجته فضايحهم

ثنيان:لحقك يدري انك لوحدك ؟

ملاك تنهدت تصد وهز راسه ثنيان:هاه ملاك ، ليه ترجعينا دايم لنفس المكان ؟

لفت ملاك عليه:انا ناديته ؟ شفتني انا عزمتهم وفتحت بيباني لهم ؟

ثنيان:لو لقي ردة فعل منك ما كان تجرأ يجيك لوحدك

ملاك رفعت حاجبينها:بتتكلم عني انت بعد ؟ حلو لان اي ذكر عليه شارب يوقف قدامي ويتكلم عني

رفعت صوتها تناظر ثنيان بحده:خلاص عاد كل من وقف قدامي وتكلم علي

ثنيان:ملاك ! انا عاقل لين تشتب نيراني

ملاك:لا تشتب يازوجي موج لا تشتب انا اللي بشب نيراني من اليوم

ناظرت ثنيان ورمت شنطتها والكيس على السرير وطاح الكيس على الارض وتأففت

وفصخ شماغه ثنيان يرميه وانحنت تاخذ الكيس وناظرت البوكس الصغير وعقدت حاجبينها تذكر الهديه

فتحتها واخذت الكرت اللي عليها تقراه:قربت

عقدت حاجبينها وتقدم ثنيان وهمس:وش هذا؟

فتحت البوكس وجمد وجهها ولانت ملامح ثنيان وبلع ريقه

نشف الدم بعروقها تناظر الكلبشات اللي بالبوكس

ولف ثنيان بصدمه ياخذها من يدينها:من عطاك اياه ؟

رجفت تجلس على السرير بصدمه وقرأ الكرت ثنيان وعقد حاجبينه وناظرها:ملاك انطقي من عطاك اياه ؟

عقدت حاجبنيها ورفعت عيونها عليه:ما اعرف

ثنيان ناظرها بجنون:كيف ما تعرفين ؟ من وين وصلت الكلبشات ذي لهنا ؟

ملاك:في وحده عطتني بالزواج ما اعرفها ولا اذكر شكلها ولا سألتها

ثنيان:كيف يعني ما تعرفينها ؟كيف يعني تعطيك كلبشات بنص الزواج ولا تدرين ملاك ؟ كيف ؟

صرخت برعب توقف قدامه:شدراني انها كلبشات

ناظرها ثنيان وهو يتنفس بسرعه:من بنت الكلب ؟

بلعت ريقها ملاك:ماهي هي

ثنيان:وشو ماهي هي ؟

ملاك:هي وصلتها لي بس نفس ما وصل لي الاوراق وصورك منيف واحد ما اعرفه

سكت ثنيان يناظرها وعقدت حاجبينها ملاك وهي ترجف:كيف دخلت بالكيس الزواج ؟

رفعت عيونها لثنيان:ثنيان ابوك حط تفتيش عند القصر كيف دخلت ؟

ثنيان:قالت هديه ودخلوها صعبه يعني ؟

جلست بتوتر وهزت راسها بالنفي:هذا مو تهديد هذي لعبه ثنيان

ناظرها ثنيان وعض شفته يغمض عيونه بتعب

وهزت راسها بتكرار:في احد يلعب معي

ثنيان:من غيره ولد عمك الكلب

هزت راسها بالنفي:لا ماهو هو

ثنيان:شدراك ؟ عشانه قابلك اليوم عند البوابه ؟

مسكت راسها بتعب ملاك وغمضت عيونها تسترجع كل شي

وناظر الكلبشات ثنيان:ان طلع ولد عمك بالسالفه برجعه مكان ما كان

وقفت ملاك:انا اللي بلاقيه هالمره انا اللي بوقف قدام اللي يلعب فيني ، ماراح انتظر رحمه من تحت يدينه

ثنيان:قامت لهب اللي تجازف بكل شي صح ؟ اعقلي ماراح تسوين شي بدون علمي

ملاك:هذا انت عندك علم ابن الكلب اللي يلعب معي بجيب راسه

تأفف ثنيان وهزت راسها ملاك:اقسم بالله ما اخليه

جلس ثنيان ومشت ملاك توقف قدام التسريحه ودق الباب ولف ثنيان وقفل البوكس:ادخل

دخلت أصايل وابتسمت:العروس عازمتكم تحت بالحوش نسهر شوي

ابتسمت لها ملاك وهزت راسها:جايين

ابتسمت أصايل وقفلت الباب وتلاشت ابتسامة ملاك ولفت تناظر ثنيان ودخلت الحمام

نزل عيونه ثنيان يقرا الكرت وغمض عيونه بتعب:اهخ ملاك

سندت جسمها على الباب تناظر شكلها بالمرايه

تلبس اللهب وتشتعل لهب لكن في نار تصلاها اكبر منها وتجاهلتها واستهانت فيها

هزت راسها بخوف تتذكر الكلبشات وغمضت عيونها تسمع صوت نبضها

تعبت ، تعبت وأنهد حيلها وما استراحت ابد ، حق كل الناس اللي سرقتهم قاعده تعيشه الحين

التهديد بالصور وبالكلام قاعده تعيشه ثقله الحين

فتحت عيونها تتنفس وتهدي نفسها

'

نزل ثنيان وابتسم يناظرهم جالسين وتقدم:ما نمتوا ؟

نوره:انا من فرحتي ما بنام

ضحكت أصايل وجلس ثنيان:وين نهار ؟

ضحك ساري:مع النسيب

تلاشت ابتسامة ثنيان وناظر أصايل اللي مبتسمه ورجع ظهره لورا

نوره:لقيت وحده وحده اهخ ياناس من شفتها قلت بس هذي عاشت للحين تنتظر جاسر ولدي

تنهد جاسر بتعب وضحك عقاب ولفت نوره:لا تطالعني كذا ما بخليك تقعد بدون زواج

جاسر:خليني انا اختار

نوره كشرت:لا تكفى الا انت لا تختار نهار يعرف ينقي احسن منك

أصايل لفت:صح ابوي سألت عن اهل البنت ؟

عقاب هز راسه:اي ابوها راعي عقار معروف بالشرقيه

نوره:اسم الله على نهار ما يطيح الا على الشي الزين

عقاب لف عليها:كيف البنت عاد ؟

جنى:انا عجبتني وبتعجبك عمي

عقاب سكت ولفت نوره:بتعجبنا وبتعجب نهار هذا اللي يبي له وحده تكسر راسه

ساري:من بالله بعقله ياخذ وحده قويه ؟

رفعت حاجبها نوره:عسى خير ياساري

جنى:مستهين فيني خالتي تشوفين ؟

ساري:انتي قويه ؟

جنى رفعت حاجبها ولف ساري لثنيان:والله اللي سحبت ثنيان اخوي وراها وشرى لها شاليه وسياره ويخت هي اللي قويه وما تناسب الرجال

رفع عيونه ثنيان:حلو ساري من كثر قعدتك مع امي والحريم صارت سواليفك نفسهم

ضحك جاسر ولف عقاب:بس عاد سولفوا زين

رجع ظهره لورا ساري وضحك ولف ثنيان من دخلت ملاك واخذت نفس وجلست

عقاب:اخت العريس

ابتسمت بهدوء ملاك:اخت العريس اليوم تعبت

نوره:اي ياحياتي انتي كان ارتحتي طيب

ملاك صدت بعيونها وهزت راسها بالنفي

وناظرها ثنيان ونزلت عيونها لكفوفها ملاك تتخيل شكل الكلبشات حوالينها

ورفعت اصابعها بتوتر تمسح جبينها بيد راجفه وشدت على عبايتها ما تعرف كيف توقف رجفتها

واخذ نفس ثنيان وهو يناظرها بقهر وغضب على الوضع اللي هم فيه سوا

وتقدم ومد كفه ومسك كفها ولفت عليه واخذ كفها لحضنه يشد عليه

وناظرته ملاك تهدأ رجفتها ونبضها يستريح من كفه فقط ، فهمت انها كل ماكانت بعيده عنه كل ما كانت اضعف مو اقوى

هز راسه بهدوء ثنيان يطمنها واخذت نفس تقترب منه وتحط ذراعها جنب ذراعه بطمأنينه لوجوده

دخل نهار وابتسم:سلام عليك يا أفضل عائله

ضحكت نوره تناظر بشته اللي على ذراعه وغترته على كتفه وعقاله فوق راسه

عقاب:ابطيت

نهار:كنت احتفل مع سارق اختي

ابتسمت أصايل ونطق عقاب:تكلم زين

جلس نهار:سمّ

ناظرهم وابتسم:نبي عرس ثاني ادمنت

نوره ضحكت:والله تبي نفتح طاري التايقر

ضحك نهار:مهما حاولت الف وادور انتي الوحيده اللي تفهميني

رمى لها بوسه وابتسمت نوره تضحك

لف جاسر يناظر نهار وناظره نهار:عسى خير اخوي تبي تتزوج تزوج قبلي بس لا تطالع فيني كذا

جاسر:لا والله اطالع وافكر كم بتصمل على هذي قبل تعجبك غيرها

نهار:لا لا هذي نثبت عليها خلاص مافي لعب زياده كبرت وانا اخوك ابي لي عيال ينادوني نهوري

ضحكوا وتقدم جاسر يضربه وضحك نهار:ابوي وش طلع الموضوع عندك ؟

عقاب:والله الموضوع عندي زين وخير لكن اللي بيناديك نهوري ماهو عيالك

ضحك نهار وابتسم عقاب له واخذت نفس ملاك بتعب ولفت لثنيان وهمست:بطلع أنام

ثنيان:ما بتنامين

هزت راسها وبلعت ريقها ووقفت:تصبحون على خير

مشت تتركهم ودخلت الغرفه وغمضت عيونها ومشت انسدحت بالسرير وهي تناظر الفراغ وضمت نفسها

متى بترتاح وتسدد كل ديونها ، تضحك لها الدنيا ، وتهجرها مخاوفها وتلاقي حصاد تضحياتها

متى بتنام مرتاحه وتغمض عيونها وما تشعر الا بدفى ، متى بتعيش يوم طبيعي بدون مشاكل وخوف وحذر

غمضت عيونها تسيح دموعها على مخدتها وفتحتهم من حست بذراعينه تحضنها

انسدح خلفها يلاحظ سرحانها وحاوطها بذراعينه يحضنها

رفعت كفوفها لذراعينه تشده لها وغمضت عيونها

همس ثنيان:تبكين على وسادتك وكتفي موجود ؟

بكت بتعب وتقدم لها ثنيان ودفن وجهه برقبتها يبوسها ويحضنها وبلعت ريقها بتعب

ونطق ثنيان:بجيبه

ملاك هزت راسها:يكفي تكون جنبي

ثنيان:تلوين ذراعي واغلاطك كثيره وحياتك شقى بس يمين بالله أحبك

مسحت دموعها ولفت عليه وناظرها ثنيان:حمار

ضحكت بين دموعها وحضنته ورفع راسه ثنيان وتنهد يشدها لصدره

غمضت عيونها من استراحت على صدره وعاشت امنيتها واخيراً ، تشعر بالأمان بالدفى

دق منيف على أصايل ولفت تناظر اهلها اللي سكتوا ولعت ريقها وقفلته

وابتسمت نوره تشرب من فنجانها ولف جاسر بحده يناظرها ووصلتها رساله ولف عقاب عليها يناظرها تناظر الفراغ وتهز رجلها بتوتر

وضحك نهار من وجيه اهله:ماراح تتقبلون يعني ؟ زوجها ياجماعه ، هدوها

لف جاسر على نهار:اشوفك متقبل انت

نهار:اي والله صاحبي وفالي الطيب ودلوعتي الوحيده

ابتسمت اصايل لنهار ونطق عقاب:تأخر الوقت اصلاً كل واحد يروح ينام

وقفت اصايل ولفت لنهار اللي غمز لها وابتسمت ومشت تطلع لغرفتها واخذت جوالها وقرت رسالته:ما ظنتي بتنامين

ابتسمت وجلست على السرير وردت عليه:لا

لف منيف من ردت وابتسم وحط ذراعه خلف راسه واتصل

عضت شفتها بربكه تناظر رقمه واخذت نفس وردت بدون تتكلم

وابتسم منيف يسمع الهدوء:تمنيت لو ما خلصت الملكه

نزلت عيونها أصايل تسمعه وكمل منيف:صورتك براسي مو قادر انسى شكل الفرحه بعيونك

عضت شفتها أصايل وناظر دبلته منيف:بسولف لوحدي يعني ؟ حتى يامور ما يسكت اذا سولفت معه

ضحكت اصايل وتنهد منيف من سمع ضحكتها

اصايل:وش اقول ؟

منيف:اي شي يكفي اسمع هالحسّ

أصايل ابتسمت:نهار قالي انه كان معاك

منيف:لا تكفين ما بنسولف عن نهار بهاليوم

ضحكت اصايل:حرام عليك ترا اللي طلعني من بين اهلي ارد عليك هو نهار

منيف:اي زين يعني حتى انتي تحسين اهلك يخوفون

اصايل ضحكت:لا بس مو متعودين يعني اصير لاحد ثاني

اتسع مبسم منيف من كلامها وعض شفته:وصل الواحد الثاني واخذك

ابتسمت اصايل وهزت راسها واخذ نفس منيف:طيب عشان لا تحسيني بثر بخليك تنامين

ضحكت اصايل:جنتل

ضحك منيف وابتسمت اصايل وهمست:تصبح على خير

غمض عيونه منيف:من الليله حياتي كلها خير

غمضت عيونها اصايل من مشاعرها وبلعت ريقها ونطقت:باي

قفلت واخذت نفس تمسك قلبها وتناظر دبلتها وانسدحت على ظهرها وهي تضحك وقتحت جوالها تشوف الصوره اللي صورتها

كانت اياديهم سوا بدبلهم وكان هذا افضل مشهد صورته اصايل بحياتها

'

جالسه قدام المرايه تحط ماسكرا وساهيه

لف وفتح عيونه وناظرها وتثاوب:ليه ما صحيتيني؟

ماردت عليه وهي تناظر مكياجها ولف ثنيان ونطق:ملاك

لفت عليه وناظرته:ماسمعتك

هز راسه ثنيان ووقف:ما سمعتيني يعني وراك مصيبه

ملاك لفت للمرايه ولاردت ومشى لها:وين بتروحين ؟

تحجبت وناظرته:عند اللي حط صورة منيف على مكتبي

عقد حاجبينه ثنيان:انتي متى خططتي وفكرتي ؟ ماكنتي نايمه جنبي ؟

ملاك وقفت تاخذ شنطتها:الذيب ما يغمض عيونه وهو نايم

ثنيان تنهد بتعب:انتظريني اجي معك

ملاك:اصلاً كنت بطلبك تجي ماراح يخلوني اشوفه

ثنيان:وانا بدخلك يعني ؟

ملاك:صاحبك طلال موجود

سكت ثنيان ورفعت حاجبها ملاك:الجندي المجهول

ثنيان:ما يفوتك شي

ابتسمت ومشى ثنيان للحمام وخرجت من الغرفه ونزلت وابتسمت تشوفهم ياكلون:صباح الخير

رفع عيونه عقاب وابتسم:ياهلا

لف لنوره:انتظر ترحيبك

ضحكت نوره وابتسمت ملاك وتقدمت تصب لها قهوه ورفعت عيونها لكرسي نهار الفارغ ولفت عليهم:وين نهار ؟

أصايل:نايم

سكتت ثواني:ماعنده دوام ؟

نوره:ليش تسألين بغيتيه ؟

ملاك:اي بغيته يشوف سيارتي اذا يقدر يوديها يغير زيتها بس خلاص بشوف وقتي

جاسر:متزوجه ثنيان مو نهار

لفت ملاك على جاسر:ماله شغل ، ثنيان مشغول

دخل ثنيان وناظرهم:وشفيه ثنيان ؟

نوره:مافيه شي تعال اقعد

تقدم ياخذ زيتون:مستعجل

نوره:وانتي ملاك اجلسي

ملاك:بيوصلني ثنيان

عقاب:وين رايحين ؟

ثنيان شرب من فنجان الشاهي:المحكمه عندها جلسه

ابتسمت ملاك تناظره ولف ثنيان:مشينا

هزت راسها ولفت:دقيقه نسيت جوالي ، اسبقني

هز راسه ثنيان وخرج ومشت تطلع وقفت عند الغرفه ولفت تناظر الممر فارغ

ومشت بهدوء عشان صوت كعبها ومسكت باب غرفة نهار وناظرت حوالينها ودخلت

ناظرته نايم عاري على سريره والتلفزيون مفتوح ومشت وهي تناظره وفتحت الادراج

وعقدت حاجبينها وناظرت بدلته معلقه ومشت وناظرت حزامه والفرد

ولفت لنهار اللي نايم وسحبت الفرد وفتحته تشوفه ممتلي رصاص وفتحت شنطتها تحطه وخرجت

اخذت نفس ومشت تنزل وناظرت ثنيان اللي بالسياره وركبت جنبه ولف عليها:بتتعاملين معه بالهدوء اللي اعرفه ؟

ابتسمت له ملاك:انا دايم هاديه

ضحك ولبس نظارته الشمسيه وقفل باب سيارته وحرك ولفت عليه:كلمت طلال ؟

ثنيان:اي بنشوفه بمكتبه

ملاك:طلع عندك واسطات زوجي موج

ابتسم ثنيان وناظرها ورفعت حاجبها:هذا اللي كنت تلجأ له عشان يفضحني ؟

ثنيان لف للطريق:ذراعي اليمين

لفت ملاك للطريق ووقف ثنيان وناظرت المكان ملاك ولف عليها:انزلي

نزلت ونزل معها ثنيان ومسكت شنطتها ومد كفه ثنيان ومسكت كفه ودخلوا سوا

وقف عند مكتب طلال ودق الباب ولفت ملاك تناظر العسكر ودخلت خلف ثنيان

ابتسم طلال:ارحب

ثنيان ضحك وسلم عليه وناظرتهم ملاك ومسكت شنطتها بيدينها الثنتين وهي واقفه

ثنيان:تعبناك

طلال جلس:لا ماعليك

ثنيان:تجيبه نشوفه

طلال ناظر ملاك:حققت معه كذا مره وما اعترف بشي

ملاك:انت حققت معه

لف ثنيان عليها ورفعت حاجبها ملاك ولف ثنيان:بس جيبه نشوف وضعه

هز راسه طلال ووقف يخرج واخذت نفس ملاك

ناظرها ثنيان:اجلسي

هزت راسها بالنفي وهي واقفه وتقدم ثنيان:مهما صار لا تمدين يدك عليه ترا بنتورط بسالفه وش كبرها ابوي ما يقدر يطلعنا منها

ملاك لفت عليه:ما امد يدي انا

ثنيان:اعرفك

هز راسه وصد ولفت من دخل طلال ومعه الرجال مكلبش وناظرته ملاك بحده

ناظرها الرجال وابتسم ووقف ثنيان يناظره

ناظرته ملاك وتقدمت تناظر ابتسامته:عرفتني يعني

طلال جلسه على الكرسي ووقف ثنيان قدامه:جايين نبي نحلها وتعاون معنا عشان مصلحتك ، اللي قدامك هذي محاميه وتطلع القاتل من حبل المشنقه اذا ماتعرف

ابتسم له وهز راسه:اعرف

تقدمت ملاك:يعرف يعرف ، جاني مكتبي

لف عليها يناظرها واقفه وابتسم يهز راسه

ثنيان:عشان كذا حلها وعلمنا من اللي وراك

ناظرهم وضحك ورفع حاجبه ثنيان وناظرته ملاك بحده

وتقدم ثنيان وانحنى على كرسيه:كثرة الضحك مو زينه

هز راسه:الا يقولون تطيل في العمر

رفعت عيونها ملاك لطلال اللي جالس على المكتب يناظرهم

وابتعد ثنيان وجلس قدامه:تعرف كم بتقعد وتخيس بالسجن ؟

اخذت نفس ملاك اسمعه يضحك وناظرت شنطتها ولف الرجال على ملاك وهو مبتسم وابتسمت له:تعرف اني ماعندي اخسره ؟

ناظرها ثنيان وضحكت وضحك الرجال وعقد حاجبينه ثنيان وحطت شنطتها على المكتب ملاك ودخلت يدها وهي تناظره ومبتسمه وطلعت المسدس

وجمد وجه ثنيان ووقف طلال يطلع فرده:نزلي المسدس

ثبتت المسدس على جبينه وتلاشت ابتسامته بخوف وناظرته ملاك:سمعني ضحكتك وين راحت ؟

طلال رفع صوته:نزلي المسدس

ثنيان:ملاك يرحم والديك نزلي المسدس

ملاك:اعترف من اللي وراك ؟

بلع ريقه يناظرها وتقدم ثنيان بحذر:ملاك

طلال:نزلي المسدس من يدك

ناظرته ملاك وصرخت:من ؟

تنفس بخوف يناظر المسدس على جبينه وناظر ثنيان اللي خلفها ورجع ناظرها وتقدم طلال:نزليه

بلعت ريقها تنتظره ينطق لكن ما قال شي وشدت على اسنانها بقوه ورفعت المسدس تفرغ رصاصه وناظرها طلال اللي ماسك فرده

وحطت المسدس على المكتب بقوه ولفت له وصفعته كف

ومسكها ثنيان:ملاك

ناظرته ملاك:اقسم بالله لأدمر حياتك

طلال:ياعسكري

اخذ مسدس ملاك وخرج طلال وسحبه من كلبشاته معه يخرجه ولف ثنيان بجنون على ملاك:وش سويتي ؟

ماردت عليه ملاك ومسك ذراعها ثنيان:انتي مجنونه ؟

ملاك لفت عليه وهزت راسها:للحين ما اكتشفت

دخل طلال وناظرهم:تعرف ان الموضوع مايعدي ياثنيان

اخذ نفس ثنيان:طلال

طلال ناظرها:من وين المسدس ؟

لف ثنيان عليها وناظرتهم:مسدس نهار

مسك راسه ثنيان وهز راسه طلال:بغيتي تورطين نفسك ونهار معك

ملاك:انا ما اطلق النار

طلال:وليش محشي ؟

ملاك سكتت ومسك راسه بصدمه ثنيان وناظرها طلال:احمدي ربك مافي كاميرات بالمكتب

ملاك:حتى لو في ما يهمني

ثنيان لف بغضب:ملاك انكتمي خلاص

ناظرته ملاك ولف ثنيان لطلال:طلال

طلال:كانت بتصير مصيبه اقسم بالله

اخذ نفس ثنيان:خل المسدس عندك انا برسل نهار عليك

طلال:لا تخلي المسدس قريب من احد مره ثانيه

رفع عيونه طلال لملاك وناظرته ملاك ووقف ثنيان وهز راسه برعب ومشى ومسك ذراع ملاك بقوه وخرجت معاه

ركبت يمينه وركب ولف عليها:وش كنتي بتسوين ؟

ملاك:افجر راسه

ثنيان:انتي صاحيه ؟ كذا بتحلينها يعني ؟

ملاك لفت عليه:اي انسجن قصاص وافتك من كل شي

ثنيان تأفف وصد عنها ولفت ملاك بهدوء:خله يبلغ اللي وراه اني رفعت سلاح عليه

ثنيان:تحسبين تقدرين تطلعين منها ؟

ملاك ناظرته:ماعاد فيها طلوع جاب لي كلبشات

سكت ثنيان وبلع ريقه وصدت ملاك عنه بهدوء

شغل سيارته وحركها ومسك راسه وهو يسوق

ناظرت الطريق وهي هاديه ووقف ثنيان عند الشاليه وناظرت الشاليه وعقدت حاجبينها

تذكر اخر مره كانت فيه تذكر كلام ثنيان وصورة منصور ، اتهاماته وخذلانها وحدتها وضياعها

لف عليها ثنيان يناظرها وهمس:ما بتنزلين ؟

بلعت ريقها تناظر البحر:اذكر اخر مره كنت فيه

سكت ثنيان يناظرها وكملت ملاك:من اللي عشته وحجم الألم فزيت اتصدق خوف من ان يكون ربي ساخط علي

عقد حاجبينه ثنيان من كلامها ولفت ملاك عليه وهمست:ماراح اتحمل يصير شي اكثر ، ماراح اتحمل تغيب عني لأي سبب

ثنيان:انا مستحيل اخليك بس انتي لا تخليني بتصرفاتك هذي ، وش بعني ترفعين سلاح على واحد ؟ تبين تنتهي حياتنا وانتي بزنزانه ؟

تنهدت وصدت عنه وفتحت الباب تنزل

نزل معها ومشت وهي تناظر البحر ووقفت وغمضت عيونها تسمع صوته وتشم ملوحته

وقف بجانبها ثنيان يناظر البحر:مهما صار لا تضيعين نفسك

لفت عليه ملاك تناظره:انا ضايعه من زمان

ثنيان ناظرها وكملت ملاك:ضايعه

ثنيان:على الأقل قبل تفكرين بنفسك فكري فيني

سكتت ملاك تناظره وكمل ثنيان بهدوء:اذا خسرتي بخسر انا

ميلت راسها بتعب تناظره وكمل ثنيان:مامشيت دربك كله وتعبت وشقيت عشان بالنهايه تكون النهايه لصالحك ماهو لصالحنا سوا

ملاك عضت شفتها تناظره:انت الوجهه اللي اعرفها وحافظتها وكل ماضعت الاقيها

ثنيان هز راسه وتقدم لها:اتجهي لي وماراح تضيعين

ملاك:احس كل شي حواليني ثقيل ، احس صوت الدنيا يزعجني ابي استريح

ثنيان رفع كفوفه على كتوفها وغمضت عيونها ملاك:احضني

ناظرها وتنهد وتقدم يحضنها وفلتت يدينها تستريح بحضنه وقربه لها وهمست:إنت حياتي انا قبلك بدون حياه

تنهد ثنيان وشدّ عليها ورفعت يدينها ملاك تحاوط رقبته وتحضنه وميلت راسها لعنقه:أحبك ثنيان

غمض عيونه ونزل يدينه لخصرها يشدها له ودفنت وجهها بعنقه وقبّلت عنقه وابتعد عنها وناظرها وهز راسه بالنفي:كل شي يقول ماهو الوقت المناسب بس كل شي داخلي يبيك

ملاك ناظرت عيونه ومسكت كفوفه وتقدمت له وناظرت ثغره ورجعت ناظرت عيونه:كل شي يكذب عليك بس داخلك صادق

تنفس ثنيان بتعب ورفعت كفوفها لوجهه وتقدم لها يقبّل ثغرها

ابتعد عنها بعد دقايق وناظرت عيونه وشد على كفها ومشى للشاليه ، مشت خلفه يفتح الباب ويدخل

طلع مع الدرج وكفه بكفها وفتح باب الغرفه وناظرت الغرفه ملاك ، الغرفه الأحب لقلبها مستحيل تنسى هالمكان والمشاعر اللي جاتها بهذا المكان

الى الان تذكر ملمس الحرير اللي نامت عليه ولفت من ناظرها ثنيان:اطلقي شمس سجنتيها بصدرك ، غير قربك مالنا شمس استحاله

ملاك ناظرت نظراته لها وهمست:اخاف تنحرق

ثنيان رفع عيونه لعيونها:فات الأوان

نزل عيونه لثغرها وهمس:احترقت

غمضت عيونها من تقدم يقبّلها وفتح عبايتها عن جسدها وحجابها ورجع فيها للخلف

جلست على السرير ورفعت راسها عليه ونزع تيشيرته عن صدره ومسك وجهها بيدينه:احرقيني

انحنى يقبّلها من جديد ويقبّل عنقها ، نحرها ، عظام ترقوتها ، المكان اللي عاش عشان يقبّله ويتهنى فيه

بأول الصبح ، بأول شروقه ، بأول انشقاق نوره

كانت بين يدينه فَن وغِنوه ، كانت حلم وحقيقه ، موج ولَهب

قربها اليوم على بعده الطويل على قدّ صبره كان الأعذب حدّ الارتواء

وكأنه عطش سنين عمره كلها عشان وصلها ، عشان روي السنين بوصلها الغالي

غالي بحدود الأثمن ، بعيد ببعد السحاب ، وعذب بعذوبة الموج

ما كان يصدق انها وأخيراً بين يدينه حقيقه ، حطمت عنه كل الحواجز وصارت له

حاوطها بيده اللي تتفجر من عروقه اللي اشتعلت وتفجرت من قربها ، كان ينبثق من عيونه بريق الحب وكانت تناظره وكأنه معجزه ، أو نقطة النور الوحيده بدفترها الأسود وكأنه العالم

شعرت ان قلبها توقف لوهله من كل المشاعر اللي تشعر فيها

كانوا من فرط مشاعرهم يشعرون بإن هذا أول عناق لهم ، ومرّ دهر عليهم من أخر قُبله

كان يبلع ريقه من كمية المشاعر اللي يحسّ فيها ، كان يشمّ الخزامى من جديد بقربها

تلمسه بأصابعها وتخيط جروحه وجروحها ، عاشت اللاوعي والوعي بقربه

حريق ولَهب وجمر ونار ، لكنها تبي تحترق

كان ثغرها يلمس شاربه ودقنه ، القرب اللي حلم فيه

٣٠ عام من عمُره عاش الصيف وقيظه اليوم فقط ذاق روعة الربيع ، ٢٥ سنه من عمرها ضاعت في زحام وشدايد وصبر ، اليوم طيّر من ضلعينها حَمام واستبشرت كل السنين الجايه عُشب وغمام

-

لأن الدفاتر لو تمتلي بالسواد والظلام بيقع وسطها ظل أبيض لا محاله ، مهما امتلأ صدر بني آدم ظلام بيسود عليه مره بالعمر نقطة بياض ، نقطة بياض تخرج الخير اللي داخله دفعه واحده ، ونقطة البياض الأقوى هي الحُب ، كل ما طلعت شمس وكل ماغربت ! الحُب المستطيع الأول والقادر الوحيد اللي يجعل بني آدم في أغرب نُسخه من نفسه ولأن الحُب غريب ما يجمع تشابه ابد ، الحُب موج مجبور تخوض عمقه وجزره ومدّه اختلافه وغموضه وجهادك للنجاه ، الحب يجعل كل الهموم مجرد وهم والخوف فكره زائله والمسافه كذبه ملعونه والمحاوله حدث حَتمي ، الحُب يجعلك حتماً تصدق اي فكره مُنكره ، بلحظه واحده بتؤمن بوجود قمرين وشمسين وفصل خامس ما اروعه ، لأن الحُب قوي باس وما ينغلب ولأن الحب قادر مثل ما الموج قادر وغلب اللهب ، لأن الحُب بالنهايه موج ولَهب

'

هز راسه نهار يسمع مكالمة ابوه

وابتسم عقاب:دام تعرفني فأمورنا طيبه يا أبو راكان

ابتسم فهد:من طيب أصلك يا ابو ساري

عقاب:شرواك ، بغينا نزوركم وناخذ من علومكم متى ما كنتم متفرغين

ابتسم نهار وشربت من الشاهي نوره تسمعهم

ضحك عقاب:ماقصرت يا ابو راكان بإذن الله بيننا تواصل

قفل وناظره نهار:وافقوا ؟

عقاب:بتثقل انت والا شلون ؟

نهار:ابوي ابي اعرف طيب في نصيب والا استغل الوقت ادور غيرها

نوره:اسمع المشاكس

ضحك نهار وهز راسه عقاب:طلع يعرفني وشكلي اعرفه بس ما تذكرته يمكن لاشفته تذكرته

نهار:اي العقاب مستحيل ما يعرف الفهد

ابتسم عقاب ولف لنوره:نروح لهم ؟

نوره:نروح نروح بس بالاول ما يفشلنا ولدك

نهار:ابد خلاص هذا اختياري الاخير صدقوني

عقاب:يالله زين بعد ثلاثين اختيار ثبت

نوره:وجاسر عقاب ؟ ماهو عاجبني حاله

عقاب:اقعدي معه شوفي وش وده هو وبمن وده ونخطب له ويتزوج يشوف حياته

نوره كشرت:لا مانبي من ذوقه

نهار ابتسم:اذا تبون ادور لكم على ذوقي بتعجبه

ضحكت نوره ولف عقاب:قم اذلف

ابتسم نهار ووقف يضرب تحيه:سمّ

خرج من عندهم ولف عقاب:وثنيان وينه من الصبح ماشفته

نوره:والله مدري خبري فيه خرج مع ملاك

سكت عقاب وهز راسه ودخلت أصايل وابتسم عقاب:نور عيوني

ابتسمت أصايل:جالسين لحالكم ؟

نوره:كلاً مشغول

أصايل:طيب ابوي في حفله قريب نحضرها ؟

عقاب:أصايل يابنتي انتي ما تتركين هالحفلات ؟

أصايل:ابوي ننبسط كلنا سوا تكفى

عقاب:من الفنان ؟

أصايل:عبدالمجيد عبدالله

ابتسم عقاب وضحكت نوره:احجزي احجزي

أصايل:احجز ؟

هز راسه عقاب وابتسمت أصايل:بحجز لنا كلنا

هز راسه عقاب ووقفت ونطقت نوره:اسمعي

لفت عليها وكملت نوره:احجزي للي سرقك مني

ضحكت لان قصدها منيف وهزت راسها وخرجت

دخلت الغرفه تناظر اتصاله وجلست وابتسمت ترد:الو

ابتسم منيف:الوين اثنين

ضحكت أصايل وبللت شفايفها بربكه:غريبه اتصلت

منيف:ليه غريبه ؟ اطمن على زوجتي والا دبلتك مو باصبعك ؟

ابتسمت تناظر دبلتها:في اصبعي

هز راسه منيف ورفع كفه يناطر دبلته:نسيت شكل دبلتك صار بخاطري ارجع اشوفها

رفعت حاجبها أصايل:والله ؟ هذا عذر عشان تشوفني ؟

منيف:يعني تقدرين تقولين

أصايل:مرفوض المفروض ما تنسى شي يخصني

منيف ابتسم:من قال انسى شي يخصك ؟

أصايل:اعذارك ماعجبتني وما احب اللف والدوران

منيف هز راسه:بنت العميد

ضحكت أصايل وابتسم منيف:اي طيب بكل وضوح نتكلم بجي اخذك من بيت العميد عقاب يا بنت العميد لان مشتاق اشوفك

عضت شفتها:يمكن ما يوافق

منيف:اذا العميد ما يوافق فلا أمره عندي المهم بنت العميد وش ودها

أصايل ابتسمت:على حسب وين تاخذني ؟

منيف ابتسم:سينما

رفعت حاجبينها وكمل منيف:اذا بخاطرك تتابعين فيلم

أصايل:اوكيه اتابع بس لازم تاخذ الموافقه من اهلي

منيف:اهلك كلهم ؟ وانا جاي اخطفك ؟ تراك زوجتي

أصايل:اوكيه بس انا ما اجي بالساهل كذا قدامك رجال

هز راسه مينف:والله رجال ، طيب اجي اخذك من رجال

ابتسمت وهزت راسها وكمل:تجهزي

أصايل:لا بنتظرك يمكن ما يوافقون

جلس منيف ولانت ملامحه:أصايل !

ضحكت تسمع ارتباكه وعض شفته:بيوافقون

أصايل:اوكيه تعال جرب

منيف:ملاك تساعدني

أصايل:ملاك مو موجوده مع الاسف بتوقف لوحدك بدونها

منيف:وينها ؟

أصايل:خارج التغطيه مع موج

منيف سكت وهز راسه:جايك

ابتسمت أصايل:استناك

قفلت منه وضحكت وعضت شفتها تقوم بسرعه تناظر ملابسها:وش البس ؟ اوف أصايل اوف

طلعت الميك اب توزعه قدام عيونها واخذت شعرها تسشوره وتلفه بالمَكر وتبدأ تحط ميك اب

'

دخل جاسر البيت وناظرهم يدخلون قبله:لا تطيح وتنكسر اللعبه

دخلت سارا مع الالعاب وحمد خلفها وابتسمت نوره:هلا عيوني هلا بدنيتي

سارا:بابا لي هديه اشترى

نهار ضحك:علموك عربي بس ماعلموك ترتيب الجمل

عقاب رفع عيونه لجاسر اللي دخل:سلام عليكم

ناظره ساري:وعليكم السلام ، اليوم يوم الأب ؟

ابتسم جاسر وجلس يناظر عياله واخذت نفس نوره:ماندري متى يوم الأم

رفع عيونه جاسر لنوره وابتسمت جنى:خلوه يتنفس تزوج مرتين وماعاد صار عنده ثقه

لف ساري على جنى:جنى !

ابتسمت تناظره ونطق ساري:مو بس سارا ماتعرف ترتب الجمل

ضحك نهار وتلاشت ابتسامة جنى ولف ساري لجاسر:تلاقي تلاقي بس لا تقعد كذا

جاسر:طلعوني من موضوعكم الحين واقلبوا على نهار جدولوا عليه

نهار:ياحبيبي انتم بتجدولون عليّ شهر لقدام مع خطبتي وانا احب كذا اصلاً

ابتسم لنوره يغمز لها:اتنشن من الوالد والوالده

ضحكت نوره:لا تستعجل يمكن ترفضك

عقاب:صح ولدك هذا مشاكس بس تخسى ترفضه

نهار ضحك:عاش العميد عقاب

جاسر:كبر راسه ابوي لا تقصر

نهار:الغيره ماهي زينه

ساري:وين ثنيان من الصبح ما شفناه ؟

ابتسم نهار:خارج التغطيه يا اخو ثنيان

نوره ابتسمت:تلقاهم راحوا البحر محد يرد

سكت جاسر ولفوا من دخلت أصايل بعبايتها وابتسمت لهم

عقدت حاجبينها نوره:وين رايحه اي عرس ؟

ضحكت أصايل:مو عرس بس اسـ

سكتت من دق الجرس ولف عقاب من دخلت الخدامه:منيف

لفوا على أصايل ورفعت كتفها ووقف جاسر:على خير أصايل خليه يجي

ساري لف لجنى اللي عدلت حجابها ودخل منيف وناظرهم جالسين وبلع ريقه:السلام عليكم

ابتسمت أصايل وناظره عقاب:وعليكم السلام

منيف:مساء الخير

ضحكت نوره تهز راسه ووقف جاسر قدامه:المقدمه طويله مافي خلاصه ؟

ناظره منيف ولف عقاب:تعال يا منيف تعال

ناظر جاسر ومشى وجلس وابتسم لعقاب:شلونك عمي ؟

عقاب هز راسه ونطق ساري:امس تعرف اخبارنا

ناظره منيف وهز راسه ولف لنوره وابتسم:خالتي شلونك ؟

ابتسمت نوره:بخير يا أمي حمدلله

منيف هز راسه وسكت

وناظروه ينتظرونه يتكلم وضحك نهار:عسى خير الفال الطيب

منيف رفع عيونه لنهار:جاي اخذك

ناظرته أصايل بصدمه وابتسم نهار:انا ؟

منيف اخذ نفس:اي قلت اذا فاضي نطلع سوا

ابتسم جاسر من ضحك عقاب ولف منيف لعقاب وابتسم:دايمه يارب

عقاب:غريبه جاي لنهار بس أصايل لابسه عبايتها

رفع عيونه منيف لأصايل:اوه انتي طالعه ؟

رفعت حاجبها أصايل ولف منيف لعقاب:مع صديقاتها ؟

عقاب لف لأصايل:والله مدري مع من رايحه ؟

أصايل ناظرت منيف وتكتفت:مو مع احد بطلت

بلع ريقه منيف وابتسم عقاب:وين بتاخذ بنتي يامنيف ؟

منيف لف عليه:انا ؟ من قال باخذها ؟ لا لا انا جاي لنهار

عقاب رفع كفه على كتف منيف:قول قول

منيف بلع ريقه ورفع عيونه على جاسر وساري ونهار ورجع ناظر عقاب:السينما

ضحكت نوره وعضت شفتها أصايل وهز راسه عقاب:اي تروحون بس نهار معكم ماهو اصلاً انت جاي لنهار

لف منيف لنهار اللي نطق:اكيد هو جاي عشاني

رفع عيونه منيف لأصايل ولف لعقاب وابتسم:اذا ودك انت بعد وخالتي ابشروا اذا ما شالتكم السينما افتح سينما غيرها لكم

جاسر:لا لا ارتاح ماودنا نتعبك

هز راسه منيف واخذ نفس عقاب:اي توكلوا على الله

وقف نهار وناظره منيف ومشت أصايل تخرج وخرج منيف ولف لنهار من وصلوا للباب وهمس:نهار !

ضحك نهار:بجي بجي ماني مخلي اختي معك

منيف:نهار تكفى يكفي شافتني وسطكم بذا المنظر

نهار ناظر أصايل اللي واقفه بعيد وضحك:توكل على الله

ابتسم منيف ومشى وناظر أصايل ووقف قدامه:شفتيني كيف اخذتك من بين الرجال ؟

هزت راسها أصايل:شفت شفت

منيف ابتسم وفتح لها باب سيارته ومشت تركب وركب جنبها واخذ نفس ، لأول مره تركب معاه بسيارته وبيروح معها مشوار

وابتسم يحرك سيارته ولف عليها:تبين تشغلين اغاني ؟

أصايل ناظرته:كنت بتاخذ نهار بدالي ؟

تلاشت ابتسامة منيف من لمس نبرة الزعل:لا والله يخسى نهار وليل بعد

أصايل:اي وليش تقول لابوي واخواني كذا ؟

منيف:انتي شفتي اهلك بالله عليك انا مادخلت بيتكم انا دخلت ساحة اعدام

أصايل صدت للطريق وكمل منيف:جاسر اخوك وده اغلط عشان يدفني عند فنجان شاهي امك

أصايل:بس مو غلط تقول ابغى زوجتي

ابتسم منيف وناظرها:من ؟

لفت عليه تشوف ابتسامته وصدت وهمست:زوجتي

ابتسم ومدّ كفه لكفها وناظرت كفه بربكه وشد على كفها:اي خلينا كذا حلوين

ابتسمت تناظر الطريق وبلل شفايفه منيف يناظر طريقه

'

لفت تفتح عيونها وتناظر البلكونه مفتوحه وتسمع صوت الموج وتشم ريحته

لفت بجانبها ولا لقته واخذت نفس وناظرت السقف تعيد كل شي عاشته ورفعت يدها لعنقها تحس بآثاره وكأنه لا زال يقبّلها

وقفت وسحبت تيشيرته تلبسه ومشت لين البلكونه وناظرته جالس تحت ويقطع بطيخ وابتسمت

مشت ونزلت تحت وخرجت له تناظره يقطعها ومشغل اغاني في جواله وتقدمت له ولف عليها وابتسم

ابتسمت له ورجع ظهره لورا:حلو لبسك

وقفت عنده وناظرته وهو جالس:بطيخ ميلاد مين هذي المره ؟

مد كفه لكفها يسحبها تجلس على رجلينه وناظرها:ميلادي

ابتسمت تناظره ولفت للبطيخ واخذت قطعه تاكلها ونزل عيونه لعنقها يشوف وروده وابتسم:تبين ندخل الموج ؟

لفت عليه:ما دخلت ؟

هز راسه بالنفي:كنت انتظرك تصحين عشان اعلمك الغرق

ضحكت وهي تاكل بطيخه وصدت بعيونها:تعلمته اصلاً

ابتسم ووقف توقف معه:تعالي

سحبت كفها:ما اعرف ثنيان

ثنيان رجع يمسك كفها:بعلمك تعالي

مشت معاه:ثنيان البحر بارد الحين والدنيا ليل

ثنيان هز راسه:انتي شمسي

ابتسمت له ووقفت من لمس رجلينها الموج وهز راسه ثنيان:تعالي شوفيني لابس شورتي مستعد استناك

ملاك:ثنيان بغرق

ضحك يهز راسه:تعرفين للغرق طيب

ابتسمت من ضحكته وسحبها معه للبحر وشدت على كفه بتوتر:ثنيان

لف عليها وهو يرجع للخلف وانحنى يسبح ودخلت معه وتمسكت فيه من ارتفعت رجلينها عن القاع وابتسم ثنيان وناظرته:بنغرق محد بينقذنا

ثنيان ناظرها متمسكه فيه:تذكرين اخر مره غرقتي وش صار بعدها ؟

ابتسمت تناظره:لا نسيت

ثنيان:اذكرك عادي

صدت عنه تضحك واخذ نفس ثنيان:الغرق فيك أجمل غرق

لفت عليه ملاك تناظره وناظر عيونها ثنيان:لا عاد تبعديني عنك مابي النجاه

ملاك:ماعاد في نجاه ثنيان ، يا أنت معاي او بلاها الدنيا

ثنيان ابتسم وتمسكت فيه ملاك:انت موجي وأنا ماصرت اخاف الموج

ابتسم ثنيان:انتي موجي وانتي بحري وانتي نيلي العذب وانتي دجلاي وفراتي

ملاك ناظرت عيونه:تعبت مني

ثنيان هز راسه:اي وراضي بالتعب

تنهدت ملاك وحاوطت كتوفه تقرب منه وناظرته:عادي اطلبك طلب ؟

ثنيان:ماعاد فيها عادي ياملاك ، فيها تامرين

ملاك ابتسمت بهدوء:ما أبي بيوم اوقف لوحدي وتكون ضدي

ثنيان عقد حاجبينه وكملت ملاك:ما أبي أطيح بدونك من جديد

ثنيان:انتي ليه تجيبين هالمواضيع واحنا وسط الموج ؟

ملاك:ثنيان انا صرت اخاف

ثنيان:لا تخافين وانا معك ، ولا بعيد اللي انقضى ولا بيتكرر ولا بيصير شي جديد

رمشت بهدوء ملاك وهمست:تنقذني من الموج ؟

ابتسم وهز راسه وتمسكت فيه يسبح للشاطئ وخرجت معه وشالها بين يدينه وضحكت:ما اعرف اسبح بس اعرف امشي

ابتسم ثنيان من ضحكتها ومشى يدخل الشاليه وتمسكت فيه لين دخل الغرفه:اذا حطيتني وانا مبلوله على السرير وهو حرير راح نـ

ضحكت من نزلها على السرير وهز راسه:راح ايش ؟

رفعت عيونها عليه وابتسمت:شعرك مبلول

هز راسه يناظرها جالسه على السرير:ينشف

عضت شفتها وتقدم لها وميّل راسه يبوس عنقها ورفعت كفوفها على شعره

'

وقفت عند الأفلام وناظرت الفيلم وابتسمت:احب هذا الممثل

لف منيف يناظر البوستر ولف عليها من طلبته:خل نشوفه

منيف:للمره الثانيه تشوفينه ؟

ضحكت وعقدت حاجبينها:كيف عرفت اني تابعته ؟

منيف ابتسم وتقدم يطلب لهم أكل وتقدمت له:منيف !

لف عليها منيف:اي طيب علميني اي فشار تحبين ؟

ابتسمت وهزت راسها:اي شي

لف منيف وحاسب ومشى معها يدخلون الفيلم ومشت معاه لين مقاعدهم وجلس وجلست يمينه

ولفت عليه:كيف عرفت منيف ؟

ابتسم منيف:حركات سحريه يسويها اي واحد يخطب وحده عاجبته

ضحكت أصايل:يتحول ساحر ؟

ضحك منيف وابتسمت أصايل ولفت تناظر الشاشه وانطفت الأنوار وبدأ الفيلم ولف يناظرها وابتسم

ترك لكل الموجودين متعتهم والتفت هو لمتعته ، ترك لهم أفضل مشاهدهم والتفت لمشهده المفضل

ضحكت وهي تاكل فشار واتسع ثغره من ضحكتها وتلاشت ابتسامته من نطق شخص بالخلف:الفيلم قدام طال عمرك

لف منيف ولفت أصايل وجمد وجه منيف من شاف منصور خلفه ياكل فشار ويمينه جواهر مبتسمه

ابتسم منصور وهمس:ارحب ولد عمي

عقدت حاجبينها أصايل وناظرت منيف اللي جامد وجهه ولف منيف لقدام وشد على قبضة يده وبلع ريقه

ولفت أصايل تناظر جواهر وعقدت حاجبينها ولفت لمنيف:منيف ؟

وقف منيف ومسك كفها وقوّمها وقامت تاركه كل شي وخرجوا وناظرته:منيف شسالفه ؟

لف من خرج منصور ومعه جواهر وهمس:انتظريني هنا

سحبته من ذراعه أصايل:علمني اول

لف عليها منيف:انتظريني قلت

بلعت ريقها بربكه من وجهه وملامحه وهزت راسها ومشى منيف ووقف قدام منصور وابتسم منصور:شفت محاسن الصدف التقي فيك مع زوجتك مع زوجتي بنفس الفيلم ، صدق الدنيا صغيره

تقدم منيف لمنصور:شتبي منصور ؟

ابتسم منصور:اتابع فيلم

منيف همس:انطق منصور انطق

منصور:زوجتي جواهر ؟

لفت جواهر على منصور:عيوني

منصور ناظر منيف:تتوقعين بنت العميد لو تعرف من هكر سنابها توتـ

مسكه منيف من ياقته ومشت أصايل بخوف:منيف

ناظره منيف بحده وابتسم منصور وشال يدين منيف وبلع ريقه منيف يناظر منصور

ومسكت ذراعه أصايل بخوف:منيف تكفى خلاص

منصور:اسمع كلام زوجتك

هز راسه منيف يناظر منصور بوعيد ومشى ومشت معاه أصايل وخرجوا

فتح سيارته وركب وركبت جنبه أصايل وناظرته:ما بتعلمني منيف ؟ شصاير داخل ؟ كنت بتتهاوش معاه ؟

منيف غمض عيونه بتعب وخوف ولف لأصايل يناظرها تناظره بقلق وبلع ريقه:ولاشي

أصايل:كيف ولاشي انا مافهمت شي داخل وبتعلمني

منيف اخذ نفس:ولد عمي ومشاكله ما نخلص

أصايل:ليش ترد عليه وتكلمه ؟ دامه يحب المشاكل اتركه منيف لا تتورط معاه

بلع ريقه منيف وصد يناظر الطريق وكملت أصايل:تكفى منيف شكله مو مريح ودخل السجن من قبل واخو شادن كل شي يخليني اخاف عليك منه ، لا تتورط معاه

منيف هز راسه ولف عليها وابتسم بهدوء:لا تخافين

تنهدت بضيق ومسك كفها بقوه منيف وحرك يناظر الطريق

وقف عند البيت ولفت عليه أصايل:منيف !

لف منيف وابتسم وحضن كفوفها الثنتين:اسف ، ماكانت اول طلعه لنا مع بعض حلوه نفس ما تمنيت بس اوعدك بغيرها

أصايل تأففت:اوف منيف انا وين وانت وين

منيف:لا تكفين ما ابيك بمكان وانا بمكان انتي معي وانا معك

تنهدت وشدت على كفوفها:اوعدني ما يصير شي يخوفني عليك

ابتسم منيف وهو يناظرها وسكت وبلعت ريقها أصايل:منيف

منيف:اوعدك

هزت راسها واخذت شنطتها ولفت عليه:كلمني اذا وصلت البيت

منيف:أصايل

سكتت تناظره وناظرها منيف ومسك كفوفها من جديد ولفت عليه بجسمها وتقدم لها وناظر يدينها ورفع عيونه عليها:إنتي أغلى شي دخل حياتي

ابتسمت له تناظره وكمل منيف:أموت لو أخسرك

أصايل عقدت حاجبينها:لا تتكلم كذا

منيف هز راسه:اتكلم اتكلم ، أبي تعرفين إحساسي كله ولا تظنين فيني ظن

أصايل سكتت وناظر عيونها منيف:أقسم بالله دخلتي حياتي وغيرتيها للأفضل ، كنت في ضلال أصايل كنت في ظلام

ارتبكت من كلامه وناظرت عيونه بربكه وكمل منيف:لا تتركيني

أصايل:ما راح أخليك

منيف ابتسم بهدوء ولف يناظر سيارات اخوانها وابوها بالمواقف ورجع ناظرها:صح إنه المكان اللي ممكن يدخلني بمتاهه بس مابي أتردد

مافهمت عليه ورفع يدينه لوجهها وتقدم لها يقبّلها ، يقبّل ثغرها بخفه وغمضت عيونها وفلتت يدينها بذهول ورجف قلبها وتسارع نبضه

حسّ بملمس ثغرها وقبّلها لأنها يمينه الحين وما يضمن الجاي

ابتعد عنها وفتحت عيونها تناظره بتوتر ومسك وجهها منيف وهمس:أحبك والله

بلعت ريقها بتنفجر من مشاعرها ومن انفداعه ومن كل اللي جاها دفعه وحده وابتسمت بربكه وشد على وجهها منيف:والله

عضت شفتها وابتعدت عنه وفتحت الباب تنزل تاركته ونزل وجهه بتعب منيف ورفع عيونه يناظرها داخله البيت

دخلت بربكه وقفلت الباب ومسكت قلبها وبلعت ريقها من مشاعرها ونفثت زفيرها ورفعت عيونها تتذكره وعضت شفتها ومشت لغرفتها

دخلت وابتسمت بحيا وفصخت عبايتها وانسدحت على السرير ومسكت قلبها

'

دخل البيت منيف وجلس وناظر الفراغ وهو ساهي ولف ياخذ جواله واتصل على ملاك ماردت عليه

غمض عيونه بتعب وبضياع كل ما يتذكر منصور وتواجده وكلامه يخاف

ما يبي يخسر كل شي ما يبي تسمع من غيره ما يبي تتركه

مسك راسه بقوه ووقف بالبيت يمشي فيه واخذ جواله يرسل لملاك فويس:ملاك تكفين كلميني ضروري

ارسل لها ولاردت عليه ورمى جواله على الكنبه ومشى يدور بالبيت

جلس واخذ نفس وارسل لأصايل:وصلت البيت

ناظرها قرتها ولاردت عليه وتنهد بتعب يقفل جواله

وابتسمت أصايل بخجل وقفلت جوالها وناظرت السقف وعضت شفتها تتذكره

رفعت سبابتها على ثغرها ورفعت عيونها من دخل نهار:زين لقيتك كنت بداهم منيف عبالي لين الحين برا معك

ابتسمت أصايل:لا رجعت من قبل

وتقدم نهار وجلس على السرير:اي وش سويتوا ؟

ارتبكت وناظرته:وش سوينا ؟

نهار:وين رحتوا ؟

أصايل:اها السينما

نهار حك جبينه:اي فيلم؟

أصايل بلعت ريقها:اوف نهار ليش تحقق معاي كذا ؟ يكفي شفت ابوي قبل شوي وكنت بدوخ

نهار ضحك:تدوخين ليه وش مسويه ؟

أصايل:ما سويت شي والله

ضحك بعلو صوته نهار وجلس بإعتدال:كل ذا خجل طيب دلوعتي بخليك

بلعت ريقها أصايل ومشى يخرج نهار وتأففت أصايل وانسدحت من جديد

'

ساهيه تناظر الفراغ وتسمع صوت الموج وتحس بالدفى من حضن ثنيان لها ومن اصابعه اللي على شعرها

نزل اصابعه لخصرها ولمس جرحها واخذت نفس ونطق:ماعاد يعورك ؟

هزت راسها بالنفي:صار أثر بس

انحنى ثنيان براسه يناظرها ورفعت راسها وناظرته

ثنيان:ما ندمتي ؟

ملاك:لا

ثنيان:وما بتقولين له ؟

ملاك:لا

ثنيان:ليش ؟

ملاك صدت عنه تحضنه:مو لازم

ثنيان تنهد من وضعها وناظر البحر:وما بتتعلمين تسبحين بدوني ؟

ضحكت وهي بحضنه:لا

ابتسم ثنيان:بس حلو صار لونك يبي لك صبح ثاني وتصيرين على لوني

رفعت عيونها وابتسمت وكمل:شمسي

ضحكت له وجلست ورفعت شعرها وهي تناظره:بنطول ؟

ثنيان:اللي ودك انتي

ملاك:انا اللي ودي اعيش هنا خلاص

ثنيان؛جحدتي اهلي مره وحده

ضحكت وهزت راسها بالنفي:أبيهم وأبيك بس أبي أكون قريبه من الموج دايم

ثنيان:وانتي قريبه منه حتى هناك

ابتسمت لانه يقصد ذاته وتقدمت له تناظره:دايم قريبه مابي اصير بعيده

ثنيان رفع اصابعه لشعرها وهز راسه:ما تبعدين

غمضت عيونها ورجعت تحضنه من جديد وحضنها ثنيان وهو يناظر الموج أمامهم

سمعت رنين جوالها ولف ثنيان:لا تردين لو رديتي بنرجع

اخذت نفس:اخاف صار شي

ثنيان:يصير وينتظرنا

سكتت ملاك تسمع رنين جوالها

نزل جواله منيف:ردي ياخي ردي

تأفف ومشى واخذ نفس:لا تسوي غلطة ملاك لا تسمح لمنصور يلوي ذراعك

مسح وجهه واخذ جواله ودق عليها ينتظر ردها

لفت من دق جوالها وناظروها اهلها وضحكت جنى:يعني مو معقول كل مادق جوال أصايل بتسكتون كلكم فجأه

وقفت بربكه واخذت جوالها ومشت تبتعد وردت بتوتر:الو

منيف غمض عيونه بتعب:أصايل

ابتسمت وعضت شفتها ولفت تناظر اهلها من بعيد وصدت:أصايل

منيف بتوتر جلس:يمديني اجيك البيت اشوفك ؟

جمد وجهها بربكه:ببيتنا ؟

منيف:اي

أصايل:ليش مو برا ؟

منيف بلع ريقه:لا يعني

سكت بتوتر وحك دقنه:يعني ودي اشوفك بدون عبايه

عضت شفتها بصدمه وغمض عيونه بقوه منيف:يعني مو قصدي قصدي اريح لك ، اريح لنا كلنا

ابتسمت وهزت راسها:اوكيه بس عادي لان ابوي واخواني موجودين

منيف هز راسه:اي اي عادي

أصايل:بتجي الحين ؟

منيف:يعني عطيني نص ساعه

هزت راسها وبلعت ريقها:اوكيه

قفلت منه وغمضت عيونها بقوه واخذت نفس ومشت لأهلها ورفعوا عيونهم عليها وابتسمت بهدوء:هالمره قدام عيونكم

نهار:وشو بيجي ياخذك ؟

أصايل:لا بيجي هنا

عقاب:وين هنا ؟

أصايل:البيت

جاسر عقد حاجبينه:ماعنده خبر اننا هنا ؟

نوره:هاو جاسر وشو جاي يخطف اختك هو تراه زوجها ويبي يقعد معها

عقاب:يجي عادي

ابتسمت أصايل:اوكيه نجلس برا اصلاً بالحوش اريح

نوره:روحي انتي غيري لبسك وانا بقول للخدم يجهزون القعده

ساري:وش تجهزين القعده ؟

نوره:اسكت انت مو ناقصنا غير غيرة الاخوان بعد ، روحي أصايل امي روحي حطي لك روج وتعطري والبسي لك شي حلو

نهار:رسمياً امي تشوي قلوب الاخوان الان

نوره لفت عليه:اي اشويك لين تبطلون توترون اختكم

مشت أصايل الغرفه وفتحت دولابها تدور لها ملابس وهمست:قال بيشوفك بدون عبايه

جلست بربكه تناظر ملابسها:يعني اكيد ما ينفع تلبسين شي يشبه العبايه

كشرت:بس اكيد ما بتلبسين مفصخ ويفهمك غلط

دق الباب ودخلت نوره وتقدمت للدولاب وناظرتها أصايل وطلعت منه نوره فستان:هذا

ناظرته أصايل ومشت نوره تخرج وضحكت أصايل من حركات امها ووقفت تناظر الفستان

كان بسيط هادي قصير لتحت الركبه وعاري الذراعين ولونه أبيض

تنهدت ولفت تحط ميك اب وتسوي شعرها

'

قاعد وساهي ويدخن لوحده بالحوش

طلعت جواهر وناظرته لوحده ومشت له:ليش لوحدك ؟

رفع عيونه منصور عليها ورجع صد يدخن:أروق

رفعت حاجبها جواهر وجلست وناظرته:طيب منصور اخذت حقك من بنت عمك واخذت حقي من ثنيان ، ليش للحين تركض وراهم ؟

لف منصور عليها:اي حق اللي اخذتيه من ثنيان ؟ هو ما شافك اصلاً

سكتت جواهر وطفى سيقارته منصور يعتدل:انتي ظنيتي انك لا تزوجتي غيره بيحترق صح ؟ بس ما احترق ، الرجّال كسر فمي عشاني نطقت اسم ملاك

بلعت ريقها جواهر تناظر منصور وكمل منصور:تأخرتي لين نساك ، نسّته اللي نسّتني ضميري

جواهر:انت ظنك كذا ، بس ثنيان ما بيترك الموضوع

منصور ناظرها:وحتى لو ما تركه بيتركه لانك زوجتي الحين وش تنتظرين اكثر ؟

جواهر:انت علمني وش تنتظر ؟

منصور:انا انتظر يعرفون ان ملاك سرقتهم واخوها هددهم

جواهر:واذا صار كذا ؟ بتوقف تركض ورا ملاك ؟

سكت منصور يناظرها وتقدمت له جواهر:أشمّ ريحة رمادك منصور انت نار ما تنطفي

بلع ريقه منصور يناظر جواهر وكملت جواهر:انت علتك ودواك ملاك بس ماراح يخليها لك ثنيان

مارد عليها منصور يناظرها بحده ورفعت كفها على خده تناظره بتأمل:تقبل منصور وانت بعد تأخرت على ملاك

رفع كفه يبعد كفها ورجع ظهره للخلف يطلع بكت دخانه واخذت نفس جواهر تناظره ووقفت تتركه

اخذ سيقاره منصور يولعها واحتدت ملامحه يناظر الفراغ

دخلت جواهر وناظرتها شادن:وين منصور ؟

جواهر:برا

مشت جواهر تدخل وطلعت شادن وناظرت منصور جالس وتكتفت:كم سيقاره خلصت ؟

لف منصور يناظرها:ماني ناقصك انتي بعد شادن ريحوني

تقدمت شادن:بريحك بريحك بس اسمع اللي صاير

منصور ناظرها ورفعت حاجبينها شادن:خدامة بيت عقاب تقول ثنيان وملاك لهم أربع أيام برا البيت ويقال بإنهم بالشاليه او اليخت او مسافـ

وقف منصور وتقدم لها:وش تقولين انتي ؟

شادن:اقول خيبتك ، انت قاعد هنا تحرق كبدك بالدخان عشان ملاك اللي تسبح بالموج مع الموج ؟

منصور:شادن لا تستفزيني تكلمي زين

شادن:والله هذا الصدق يامنصور ، تزوجت وزوجتك عندك وانت قاعد هنا عشان ملاك اللي ما التفتت لك ، شتبي خلاص وخر عنهم حرقناهم واحترقوا وش تبي اكثر

منصور بلع ريقه يناظر شادن وتقدمت له شادن وهمست:صحصح منصور ملاك عمرها ما تلتفت لنا ولا لك

سكت منصور وكلمت شادن:ادخل لزوجتك ادخل عشان لا تخسرها هي بعد

ناظرته شادن ثواني ومشت تدخل البيت وناظر محلها منصور وشد على سيقارته اللي بين اصابعه لين انطفت بين اصابعه وتفتت على كفه

'

دق الباب واخذ نفس وانفتح الباب وناظر جاسر وبلع ريقه ونزل الورد وهمس:سلام عليكم

جاسر:برا

عقد حاجبينه منيف والتفت من تقدم نهار:منيف هنا تعال

لف لنهار اللي جاي من داخل الحوش ورجع ناظر جاسر واخذ نفس كان مقصده انهم جالسين برا

تقدم له نهار وابتسم:حيّ الفال الطيب

ابتسم بخفوت منيف يسلم عليه وناظر الورد نهار:اي دلع ياعمي دلع تراها ماهي هينه توقفك على رجل وحده

ضحك منيف وخرج عقاب:منيف

لف منيف وتقدم له:شلونك عمي ؟

سلم على راسه وناظره عقاب:بخير الحمدلله

منيف اخذ نفس وحك جبينه:جيت أشوف أصايل

عقاب:عندي خبر

منيف هز راسه وخرجت نوره وابتسمت:منيف

ابتسم منيف وتقدمت له تسلم عليه نوره:كيفك أمي ؟

منيف:الحمدلله انتي شلونك خالتي ؟

نوره:بخير يا أمي بخير ، وش هالورد الزين وش هالذوق الزين ؟

ابتسم منيف بربكه وخرجت أصايل تناظرهم واقفين عند البيت ولانت ملامح منيف يناظرها بفستانها بينهم

ولف عقاب عليها وابتسم:نستناك

ضحكت أصايل ورفع ذراعه يدخلها تحت جناحه عقاب ولف لمنيف:عطها الورد دلعها هالدلوعه

ارتبك منيف يناظرهم حوالينه وتقدم لأصايل بالورد

وضحكت نوره:بس كذا بالسكّاتي يامنيف ؟

نهار:انتم تخلون الواحد يقول شي طالعين كلكم له

جاسر ناظر منيف وابتسم عقاب:روحي يانور عيوني

ابتسمت أصايل واخذت الورد ومشت تطلع للحوش والتفت منيف عليهم بتوتر ومشى خلفها

ضحكت نوره ولفت لعقاب:عقاب امسك عيالك تكفى هبلتوا بالولد

جاسر:احسن خل يخاف ويعرف اننا معها دايم

نهار:ترا منيف ولد حلال ريحنا جاسر

جاسر هز راسه ودخل ودخلوا للبيت

جلست أصايل بالجلسه وبيدها الورد وجلس منيف بجانبها وابتسمت تناظر الورد

رفع عيونه منيف عليها يشوفها ولا هو هيّن كل شعوره اللي يحسه ماهو هيّن ، النار تصلاه من كل جهه يبيها ومندفع لها ووصل لين عندها لكنه مَكوي مشتعل

رفعت عيونها أصايل تناظره ساكت وارتبكت ترفع شعرها عن وجهها

واخذ نفس منيف:شلونك أصايل ؟

هزت راسها بدون تناظره وتقدم لها منيف ومسك كفوفها ورفعت عيونها عليه وناظرها:طالعيني مابي تمنعيني النظر

ابتسمت بربكه تعض شفتها وهي تناظره وابتسم منيف من ابتسامتها وحياها:من يوم عرفتك الحزن ولّت دروبه

ابتسمت تناظره وكمل منيف:لو يوقف بوجهي جيش مسلح وثوره وشعب حلفت إني ما أتركك

نزلت عيونها لكفوفه أصايل وتنهد منيف:لو عرفتي عن ماضيي شي ماهو زين بيزعلك مني ؟

رفعت عيونها بإستغراب:شي زي ايش ؟

منيف:يعني اشتغلت شغله ماهي زينه بس اني تغيرت بيفرق عندك ؟

أصايل ابتسمت:ما اصدق انك تسوي شي مو زين

ناظرها منيف وسكت وضحكت أصايل:هكرت حسابات ناس مشهوره ؟

منيف هز راسه بالنفي وارتبكت تبتسم:وش سويت ؟

منيف سكت ثواني ونطق بهدوء:هكرت سنابك

تلاشت ابتسامتها تناظره وكمل منيف يشد على كفوفها:انا اللي كنت أناديك أخت النهار

سكتت تناظره بدون ردة فعل وكمل منيف:وغلطت وغلطتي كبيره ادري بس انا ما سـ

رجعت لورا وعقدت حاجبينها تسمع تبريره وسكت منيف وهزت راسها:لحظه وش قاعد تقول ؟

منيف بلع ريقه:أصايل اسمعيني وبفهمك كل شي

ناظرته بذهول وشالت كفوفها من كفوفه وتقدم لها منيف:بفهمك افهميني

أصايل فزت بخوف:وش بتفهمني ؟

منيف:غلطت أصايل غلطت وادري اني غلطان لكني عرفت غلطتي وبصلحها يمين بالله بصلحها وهذا انا قدامك شاريك وابيك حلالي ونصيبي وعائلتي وسـ

سكت من وقفت بصدمه تناظره:انت تسمع اللي تقوله ؟

منيف وقف قدامها:أصايل اقسم بالله ماكان ودي وما هكرته عشان أضرك

أصايل تقدمت له بحده:انت طلبت فلوس انت هددتني بصوري

منيف:بس ماكنت ابي فلوس يعني هي بسـ

سكت بربكه يناظر نظراتها وكمل:أصايل اقسم بالله مابغيت أضرك

أصايل ابتعدت عنه بصدمه:تستهبل ؟

منيف تقدم:اسمعيني طيب اجلسي ونتكلم واشرح لك كل شي والله كل شي

دفعته عنها تناظره بصدمه وهزت راسها بتكرار

وميّل راسه منيف بتعب ومشت من عنده تدخل البيت ومسك راسه منيف يجلس

لف يناظرها دخلت البيت وعض شفته يهز رجله وشد شعره بقهر ووقف يخرج من البيت

دخلت غرفتها وقفلت الباب ونزلت دموعها بصدمه ودارت في الغرفه بصدمه

وتقدمت للشباك توقف عنده وتناظر سيارته تغادر وأيقنت انه صادق ، صادق بكل شي

هو اللي أرعبها وهددها وطلب فلوس وخوّفها ، هو

استرجعت كل شي صار بينها وبينه

من اول نظره التفت لها بسيارة نهار لسفرة العلا ، لكل التفاصيل الصغيره اللي حافظها لين وصلت لمناداته لها بـ ' أخت النهار '

جلست وبكت بصدمه تغطي فمها ماتبي احد يسمع

ماكانت تدري تتكلم لمين وتشرح لمين ، مصدومه محلها يدينها ترجف وكل داخلها يشتعل وياكلها الزمهرير بنفس الوقت

'

( لا تنسون النجمه ⭐️ )

دخل البيت ورمى مفتاحه وجلس على الكنبه يناظر وحدته اللي رجع لها من جديد وهز راسه بتعب من حاله ومن نظراتها له ومن ماضيه الملعون اللي حرق مستقبله كله

لف من دق جواله واخذه يقرأ اسم ملاك ورد بدون صوت

ابتسمت ملاك من مسك كفها ثنيان:الو منيف

رمش بهدوء منيف:ملاك

عقدت حاجبينها من صوته وقامت من حضن ثنيان تغادر السرير ووقفت بالبلكونه:شفيه صوتك ؟

منيف هز راسه بتعب:ربي كاتب أعيش بدون أحد

عقدت حاجبينها ملاك:شصاير منيف ؟

منيف:قلت لأصايل كل شي

جمد وجه ملاك وكمل منيف:قلت لها اني هددتها بصورها وهكرت سنابها وطلبتها فلوس

مسكت راسها ملاك بصدمه وضحك منيف بصدمه:قلت لها لان منصور يهددني

ملاك غمضت عيونها:منيف ليه ليه ليه

منيف:لو سمعت من احد غيري كان لفق كلام نفس ما لفقوا عليك

ملاك مسكت راسها:ليش ما انتظرتني؟

منيف:ماقدرت

عقدت حاجبينها بتعب ملاك تحس بإحتراق منيف وتعرف شعوره وناظرت البحر وهمست:جايتك

قفل منيف واخذت نفس ملاك ودخلت لثنيان:برجع ثنيان

جلس وناظرها:وش صار ؟

ملاك تقدمت تلم اغراضها:منيف تكلم مع أصايل عن الهكر

عقد حاجبينه ثنيان ووقف:ليه يقولها ؟

ملاك رفعت عيونها:لان في كلب يهدده

جمد وجه ثنيان:أصايل عرفت يعني ؟

ملاك:اقولك قالها اعترف لها بكل شي

مسك راسه ثنيان:اهخ أصايل

ملاك قفلت شنطتها:بتروح لأصايل اذا تبي تصلح شي بيننا صلح اللي بين أصايل ومنيف ، اذا وصل خبر لأهلك ثنيان !

هزت راسها ماتقدر تكمل وعض شفته ثنيان يناظرها

وبلعت ريقها ملاك:ماعاد فيها إحنا لو يدرون

ثنيان هز راسه:بحلها بحلها

مشى ياخذ اغراضه ولبست عبايتها ملاك وخرجوا سوا

ركبت يمينه بالسياره ولف عليها ثنيان:قالها عنك ؟

ملاك هزت راسها بالنفي:لا ما اعتقد

حرك سيارته ثنيان ولف:متى الحيوان منصور كلمه ؟ قال شي لأصايل قابل أصايل ؟

ملاك:ما ادري ثنيان ما ادري ابي ادفنهم خلاص

رفعت صوتها بقهر:ابي احرق اللي حرق منيف

ثنيان ناظر الطريق وعض شفته ما يتخيل وضعهم كيف بيكون لو ابوه عرف او احد من اخوانه عرف

مسك جبينه بقوه وهو يسوق وناطرت الطريق ملاك وهي تشتعل نار

ووقف ثنيان عند بيت منيف ولف عليها:ماراح يخليكم الكلب ذا

ملاك هزت راسها:ماعاد فيها صبر ثنيان ابي احرق اي واحد يوقف بطريقنا

ثنيان:لا تتصرفين من راسك خلينا نحلها سوا ملاك

بلعت ريقها ملاك ومسك ذراعها بقوه ثنيان:ملاك

لفت عليه تناظر حدة نظراته وهزت راسها ورفع صوته تستوعبه:ماراح تسوين شي

هزت راسها:طيب فهمت

اخذ نفس واخذت شنطتها ونزلت تمشي لبيت منيف وحرك ثنيان لبيتهم وهمس:لا تسوين مصيبه أصايل تكفين يا أخوي تكفين

وقف بالمواقف بترقب ونزل بسرعه ودخل البيت يسمع هدوئه

وتقدم يناظر الصاله فارغه وناظر الاضاءه الخافته وهمس:ان شاء الله نايمين

مشى لفوق وفتح غرفة أصايل ولانت ملامحه من شافها

تقدم وقفل الباب وناظرته أصايل وهي تبكي وحاضنه نفسها بالسرير

وقفل الباب بالمفتاح ومشى لها:اهدي أصايل انا موجود

بكت وتقدم لها ثنيان وجلس:انا موجود

تقدمت له تحضنه وتنهد ثنيان بتعب وغمض عيونه:اهخ أصايل اهخ

تعلقت فيه وهي ترجف وتبكي وتوّن بخوف ومسح على ظهرها ثنيان:انا موجود خلاص لا تبكين

شدت عليه أصايل وهي تبكي:ثنيان خايفه

عض شفته يذكر ملاك ومنيف وتنهد ما بيده شي كلهم في كفين وابتعد عن أصايل وناظرها:طيب اسمعيني انا جاي الحين بعد ما كلمني منيف

ناظرته بصدمه وهز راسه ثنيان:اعرف كل شي ، كل شي

بكت بصدمه:ليش ما علمتني ؟

ثنيان تنهد بضيق:لأنه ما ظنيت بيعلمك منيف

أصايل:كيف خليتني ارتبط فيه وانت تعرف اللي سواه ثنيان ؟

ثنيان:لانه ما سواه قاصد أصايل سواه غصب عنه في أحد غصبه

بلعت ريقها وهي ترجف:مين ؟

ثنيان حك جبينه وناظرها:شفتي اللي هددوا امي وجاسر ؟

هزت راسها وكمل ثنيان:هم نفسهم اللي هددوا منيف يسوي كذا

أصايل عقدت حاجبينها:ليش ؟

ثنيان هز راسه بربكه:ما اعرف بس بندور عليهم وينلاقيهم اكيد ومرده كل شي يتصلح

أصايل:كيف وصلوا لمنيف ؟

ثنيان غمض عيونه يلوم نفسه لانه يكذب يكذب على أصايل اخته عشان تنجو ملاك من الكلبشات اللي بتنحط على كفوفها

لف لأصايل واخذ نفس:ما اعرف أصايل ولا تسأليني كثير بس منيف ماهو قاصد اعرفه وما اعترف لك الا لانه ندمان وما سكت أنا الا لأني أعرف من هدده

سكتت أصايل تناظر ثنيان ومسك كفوفها ثنيان:منيف ماله شغل والله ماله شغل

أصايل:اصلاً يوم هددني ما اخذ فلوس مني

ثنيان عض شفته:شفتي شلون واضح ما بغى اصلاً

رجفت وناظرت الفراغ وبكت:خايفه منه

ثنيان تنهد ورجع يحضنها بقهر من الوضع وابتعد:اسمعيني بروح اشوف منيف طيب ؟ بس تكفين أصايل اوعديني محد يدري ، انا بوقف معك وان ما بغيتي منيف والله ما أجبرك وانا بنفسي اقول لاهلي انك تبين تنفصلين عنه

أصايل:ابي اقول لابوي

جمد وجه ثنيان:لا أصايل الا ابوي تكفين ان قلتي له بيدمر منيف وملاك بعد والله بتصير مصيبه

أصايل:ما اقدر ثنيان احط عيني بعيونه

ثنيان:شوفي كيف بنحلها باخذك الشاليه واقعدي فيه على اساس بتسافرين مع صديقاتك البحرين

أصايل ناظرت ثنيان وهز راسه ثنيان:اي اي اصايل بتسوينها وبنتفاهم وبنحلها

أصايل:تكفى ثنيان

شد على كفوفها بقوه:انا معك والله معك بس اسمعي مني زين ؟ وبنحلها سوا مع بعض هناك ، اللي تختارينه انا معك فيه وما ببدي منيف عليك بقرارك

هزت راسها أصايل ووقف ثنيان يناظرها ومشى يخرج

'

دخلت الصاله وحطت شنطتها وتقدمت تناظره ماسك راسه بيدينه:ليه منيف ليه ؟

مارد عليها وناظرته بغضب:ليه تحرق نفسك عشان منصور ليه ؟

رفع عيونه عليها وعقد حاجبينه:انتظر يحرقني ؟

ملاك:يخسى يحرقك تسمعني ؟ يخسى منصور وغير منصور يحرقك

وقف منيف وناظرها بحده:سواها جلس وراي بالسينما وهددني ملاك ، سواها وعينه بعيني

ملاك تأففت بقهر وناظرها منيف:انتظره يروح هو ويلفق زي ما لفق عليك ؟ انتظره يهدمني نفس ماهدمك ؟

ملاك لفت وضربت الطاوله:متى نخلص ؟

رفعت راسها تناظر منيف:متى ننتهي من هذا كله خلاص منيف ؟ انا بحرق الدنيا باللي فيها وطز ، تعبت لاوي ذراعي وانا ما احب ينلوي ذراعي

منيف:اي روحي انتي بعد واقعدي عند رجلين عقاب وخليه يسلمك هو بنفسه للشرطه وقولي له انك سرقتيه وسرقتي غيره ، قولي ملاك قولي

ملاك تقدمت لمنيف:بخاف الحين ؟ علمني بقى شي ماصار فيني ؟ يهددوني منيف يهددوني

منيف:لو وصل خبر لعقاب لا انا ولا انتي بنشم ريحة الدنيا ، ماعاد فيها ثنيان وأصايل ملاك

ناظرته ملاك وهي تتنفس بسرعه وكمل منيف يضرب كفوفه ببعض:انتهينا

صدت ملاك تناظر الفراغ وكمل منيف يرفع صوته:الحلقه الاخيره من الخير والشرّ ياملاك ، ينتصر الخير دايم ويخسر الشرّ هذا احنا خسرنا ماعاد فيها فوز اكثر

لفت عليه ملاك تمنع دموعها من الخوف اللي داهمها وكمل منيف:انتهينا مانقدر نستر ماضينا اكثر

ملاك تقدمت لمنيف:لو بينتهي كل شي وبنخسر ما بنخسر لوحدنا

منيف ناظرها وكملت ملاك تتقدم لمنيف:ينتهي منصور واهله معنا

سكت منيف وهزت راسها ملاك وجلست على الكنب ودق جوالها واخذته ترد:شصار ثنيان ؟

ثنيان فتح سيارته وحرك:اهخ ياملاك اهخ

غمضت عيونها من سمعت صوته وقهره وبلعت ريقها وناظر الطريق بعصبيه:كذبت على أصايل كذبت على اختي

ملاك عقدت حاجبينها:كذبت شقلت ؟

ثنيان عض شفته بقهر:جايك جايك انتي ومنيف جايكم

قفل الجواله وناظرته ملاك وعقدت حاجبينها ووقفت

منيف:شصار ؟

ملاك:مافهمت عليه بس ثنيان صبره بيخلص معنا

منيف ناظرها وتنهدت ملاك:حبه ما بيكفي ، صرت بكفه واهله بكفه وكفة اهله اقوى من كفتي

منيف مسك راسه بقوه وناظرت الشباك ملاك توقف امامه

ودقايق ووقفت سيارة ثنيان عند البيت وناظرته ملاك ينزل ولفت لمنيف:افتح له

ناظرها منيف وهزت راسها:خايف منه ؟ انا افتح اجل

مشت وفتحت الباب وتقدم ثنيان يناظرها بقهر يشتعل نار وصوت انفاسه توصلها

وناظرته بهدوء ملاك ووقف قدامها وهز راسه بتعب منها ورفعت كتفها:ما فهمتني يوم قلت احرق اي شي المسه

مشى من جنبها ودخل وناظر منيف اللي واقف وعض شفته يناظره وبلع ريقه منيف

تقدمت ملاك ووقفت بينهم:اي وش الوضع الحين ؟

ثنيان ناظر منيف ولف لملاك:كذبت على أصايل

ناظرت عيونه ملاك:عشان تخرجني ؟

ثنيان مسك راسه ومشى بالصاله ولف عليها:كذبت عليها

ملاك:كان ما كذبت اذا بتجي تحط اللوم عليّ وتطالعني كذا

رفع صوته ثنيان:ما ألومك ألوم دنيتك اللي حرقتني معك وحرقتنا كلنا ، ألوم ابن الكلب اللي ولّع هالنار فينا كلنا

غمض عيونه منيف وتقدم ثنيان:ملاك قاعدين يخنقونا واحنا هنا ، بالبدايه كنا انا وانتي والحين فيها أصايل واخوك بتزيد الدائره ملاك

ملاك تكتفت:اجل ما نتعبهم ونختصر طريقهم

سكت ثنيان يناظرها وجلست بهدوء ملاك وناظرتهم واقفين:أسلّم نفسي

لف منيف بصدمه وجمد وجه ثنيان ونطقت بهدوء:وينتهي كل شي

ثنيان:وش ينتهي يعني وش اللي تقصدينه ينتهي ؟ وش ينتهي ملاك انتي تنتهين

ملاك:وأنتهي مافي حال يدوم

سكت ثنيان يناظرها بصدمه وتقدم منيف:ملاك مو منجدك تكفين لا تتكلمين كذا ، لا ماراح ينتهي الوضع كذا ماراح ينبسط عمي انه دخلك مكان ما دخل منصور

ملاك وقفت وناظرت منيف:حرقتك منيف حرقتك وحرقت أصايل وحرقت اللي قدامك واقف ضحيتي

ناظرها ثنيان وامتلت عيونها ملاك بموجها ورفعت صوتها بحرقه:احترقت صرت رماد في احد قاعد يهددني منيف ، في احد حط على مكتبي رصاصه وعطاني كلبشات هي في درج سريري

ناظرها منيف بصدمه ولفت ملاك تبلع غصتها ولفت تناظر ثنيان:ماراح تنحل بالكذب أصايل لازم تدري

ثنيان تعب وجلس على الكنبه وهزّ رجله

ولف منيف على ملاك:من هددك ؟ منصور ؟

ملاك هزت راسها بالنفي:لا ما أظن

منيف:كيف ما تظنين كيف يعني ما تظنين ؟ علميني من ملاك

لفت عليه ملاك:يعني لو ادري بوقف قدامك الحين ؟

ناظرهم ثنيان وهمس:ابوي يمكن يساعدنا

ناظرته ملاك يربط نفسه معهم بـ يساعدنا وكأنه كان بينهم ومعهم بكل خطواتهم

وهزت راسها بالنفي:يساعدني انا ما يساعدك انت ولا يساعد منيف ، انا اللي سويت كل شي

وقف ثنيان:ملاك يرحم اهلك خلاص تكلمي بعقل ماعاد فيني حيل

ملاك:بتروح لابوك وش تقوله ؟ ملاك اللي ناديتها بنتي وعاملتها مثل أصايل سرقتك وسرقت اهلي وتبيك تساعدها الحين

غمض عيونه بتعب ثنيان ورفعت صوتها ملاك:ابوك بيوقف معي يعني ؟

تأفف منيف ولف لثنيان:وش قلت لأصايل ؟

ثنيان ناظره:قلت لها ان في احد هددك تسوي كذا وهدد امي وجاسر

لفت ملاك ورفعت حاجبها:ماقلت مين اللي هددهم ؟

ثنيان همس؛ملاك

ملاك اخذت جوالها وتقدم ثنيان ياخذه:ماراح تكلمينها

ملاك:ماراح تكذب على أصايل اكثر بتقولها كل شي

ثنيان رفع صوته:خلاص ملاك خلاص خلينا نحلها دام نقدر نحلها مابي أصايل تدخل بالموضوع

جلس منيف بتعب ونزل راسه وناظرته ملاك ولفت لثنيان تناظره وصدت توقف بالشباك

لأول مره تتمنى إنها شخص معدوم بحياة منيف وثنيان والجميع ، لأول مره تتمنى إنها تموت ويتخلصون من كل هذا اللي سوته ، لأول مره تتشوف إنها شخص سيئ ما يحمل صفات إسمه ، خطر ببالها أمها وأبوها وبكت بدون صوت وهي تعطيهم ظهرها

ما كان ودها تكون بهذا الشرّ ما كان ودها تعيش معنى - دارت الدنيا وياما دارت الدنيا عَجب - ، خذلها الشخص اللي حطت نفسها بهذا المكان عشانه وقاعده تسدد كل اللي سوته بالناس

ناظرها ثنيان صاده عنهم ومشى لها ومسك ذراعها وهمس:ملاك

صدت بوجهها وهي تبكي ماتبي يشوفها وناظرها منيف وعقد حاجبينه بضيق

وتقدم لها أكثر ثنيان:أنا أعرفك ويكفي إني أعرفك وبوقف معك وبكون معك

هزت راسها بالنفي ووقف قدامها ثنيان وغمضت عيونها بقوه تصد عنه ومسك وجهها ثنيان:أقسم بالله ما يربحون عمك وعياله وتخسرين انتي وأنا حيّ ، بسوي كل شي وينقفل هذا الموضوع

رفعت عيونها عليه وهي تبكي:اذا عرفوا اهلك بنتهي ثنيان

ثنيان:اهلي مستحيل يوقفون ضدك بعد كل ذي العشره

ملاك هزت راسها بالتعب:مو شايله هم وقوفهم وين ، شايله هم شكلي كيف بيكون ؟ نظراتهم لي وعتابهم

سكت ثنيان ومسكت كفوفه ملاك:مابي أخسر عقاب ونوره

تأفف منيف بضيق يصد عنهم وتقدم ثنيان يحضنها وبكت بحضنه ملاك

وتنهد ثنيان:بتنحل إن شاء الله

وقف منيف ودخل غرفته تاركهم ورفعت عيونها ملاك:منيف

ابتعد ثنيان ولف يناظر محله ولفت ملاك على ثنيان وناظرته وناظر عيونها ثنيان:امشي نرجع

ملاك:مابي أخلي منيف

ثنيان؛وانا مابي أخليك ولا أبي اخلي أصايل ، بنروح نحل الموضوع عند أصايل قلت لها تكلم اهلي انها بتسافر البحرين مع صديقاتها وباخذها الشاليه عندنا

عقدت حاجبينها ملاك:ليه ؟

ثنيان؛عشان نحلها بدون ما يدرون اهلي بشي

سكتت ملاك وهز راسه ثنيان:امشي

لفت تناظر غرفة منيف ملاك بضيق ومشت تاخذ عبايتها وشنطتها وتخرج من البيت مع ثنيان

'

اخذت نفس تناظر شنطتها واغراضها ويدينها اللي ترجف وبلعت ريقها من دق الباب ورفعت عيونها ودخلت نوره:أصايل ويـ

سكتت وعقدت حاجبينها:وين رايحه ؟

أصايل:صحباتي قرروا يحتفلون فيني بالبحرين

نوره:متى بتروحين ؟

أصايل رفعت كتفها:بكلم ابوي واشوف وش يقول

نوره سكتت تناظرها وصدت أصايل:باخذ كوتي معاي

نوره:شفيك طيب وش هالوجه عليك ؟

لفت أصايل:مافيني شي بس سهرت امس ما نمت

نوره:اي طيب ابوك تحت روحي كلميه شوفي وش يقول

مشت وغمضت عيونها تتماسك ودخلت الصاله وابتسم عقاب:نور عيني

بلعت ريقها وابتسمت بوجه بارد ودخلت نوره:نور عينك تبي تسافر

عقاب:وين ؟

أصايل:صديقاتي عازميني البحرين بيحتفلون فيني

عقاب:كم بتقعدون ؟

أصايل:ما اعرف بنروح درب مو طيران

عقاب هز راسه:طيب روحي يا ابوي وان احتجتي شي كلميني

هزت راسها أصايل وتقدمت له تحضنه وابتسم عقاب:دايم تسافرين بس هالمره مسافره وانتي عروس

سكتت تحاول ما تبكي وابتعدت عنه تبتسم بدون رد

ومشت للغرفه وقفلت الباب واخذت نفس واخذت جوالها ترسل لثنيان:بطلع الحين مع حمدان تعال خذني من بيت غدير

رد عليها ثنيان:جايك

قفلت ولفت لكوتي واخذتها تلبس عبايتها ولفت للخدامه اللي دخلت تاخذ شنطتها

وخرجت وناظرها نهار:اوله شنطة سفر ؟ وين خاطفك منيف ؟

رجفت من طاريه وصدت عن نهار وتقدم نهار:أصايل

بلعت ريقها أصايل:لا مع صديقاتي

ابتسم نهار:افا ما تعزميني

أصايل:فجأه ما عطوني خبر من بدري

نهار:اي طيب انبسطي هاه وصوري لي

هزت راسها ومشت وناظرها نهار:أصايل

لفت عليه تناظره وسكت ثواني نهار:فيك شي ؟

هزت راسها بالنفي:ما نمت من امس عشان كذا

نهار:طيب تريحين بالسياره ماعليك

ابتسمت له وتقدم لها يحضنها نهار وتنهدت بضيق وهي حاضنته

وابتعدت عنه وشالت كوتي من الارض ونزلت وناظرت حمدان يحط شنطتها بالخلف وركبت بالسياره

'

لف ثنيان لملاك:بروح اجيب أصايل

رفعت عيونها ملاك عليه وهزت راسها

ثنيان:ملاك بجيبها عشان تستريح وانتي تستريحين

ملاك عضت شفتها تصد بعيونها وتقدم ثنيان:ما بتقولين لأصايل شي عنك

هزت راسها ومشى يخرج ثنيان واخذت نفس تغمض عيونها

مشت تنزل وتطلع من الشاليه وجلست بالجلسه عند البحر

ضمت رجلينها تشوف الشمس وتسمع صوت الموج ، غمضت عيونها تبي ينثر الموج على روحها نسايم بارده تطفي لهبها ، تطفي نارها

ظلت دقايق وسمعت صوت سيارة ثنيان ولفت تناظرهم جايين

وقف ثنيان ونزلت أصايل وناظرت ملاك اللي جالسه ووقفت ملاك ومشت لأصايل وميّلت راسها أصايل بتعب وهي تمشي لها وحضنتها

وتنهدت ملاك تحضنها وناظرهم ثنيان ومشى لهم

بكت أصايل ما تعرف وش تقول ومن تلوم

لف ثنيان يناظر البحر بضيق وابتعدت أصايل عن ملاك وناظرتها ملاك:تعرفين انك اذا تعورتي اتعور انا ؟

أصايل هزت راسها:ما صدقته

ملاك ناظرت ثنيان اللي واقف ورجعت ناظرت أصايل:غصباً عنه وهو قالك انه غصباً عنه

صدت أصايل بتعب ونطق ثنيان:ماعلينا انا ما جبتك للموج عشان تبكين جبتك ترتاحين

لفت أصايل وابتسمت:انت الوحيد اللي ترتاح بالموج بس

ضحك ثنيان:لا ترا ملاك كانت لَهب وصارت الحين تدور للموج وبتجربين الحين وش يقدر يسوي الموج

ابتسمت أصايل ومشت تدخل الشاليه ولف ثنيان لملاك اللي تناظره ورفع ذراعه على كتوفها يدخل معها ورا أصايل

جلست أصايل وتقدم ثنيان:سجلوا عندكم ، بنروح باليخت بتسبحون وبتلعبون جت سكي

ضحكت أصايل:ثنيان !

لفت ملاك تناظر ثنيان اللي يحاول في أصايل وناظرته بتأمل وإمتنان لوجوده

ولف يناظر نظراتها وابتسم:وبتسبحين انتي بعد

ابتسمت له بدون رد ومشى ثنيان:بدخل اغير واجيكم وانتم غيروا لين اطلع لكم الجت من قراج الشاليه

مشى تاركهم واخذت نفس ملاك ولفت أصايل عليها

ملاك:ماراح اقول شي تطمني

صدت أصايل ومشت ملاك ودخلت الغرفه تناظر ثنيان اللي لابس شورت وقميص واسع فاتح اول ازاريره وكاب وياخذ منشفته ولف لها:البسي وتعالي معي

ملاك:ما بتتكلم معها عن منيف ؟

ثنيان:مو الحين ، هيا استناك

مشى يتركها واخذت نفس ملاك ومشت تطلع لها ملابسها

سمعت صوت ضحكة أصايل وابتسمت ومشت وبيدها نظارتها الشمسيه ونزلت تشوف ثنيان شايل أصايل على كتفه وهي تصرخ وتضحك

وابتسم ثنيان:قلت بتسبحين حتى لو مالك خلق

ضحكت تتمسك في قميصه وابتسمت ملاك ولبست نظارتها الشمسيه وخرجت معهم

نزل أصايل ثنيان وابتسم ولف لملاك اللي لابسه فستان قصير فوشي قصير ومفتوح الصدر والأذرع مريح يشبه اللباس الصيفي المعروف ، كانت تميل لسمرة شمس البحر ومع لون شعرها كانت فعلاً زوجة موج

ورفع كفوفه ثنيان بإعجاب:زوجة موج

ضحكت ملاك وابتسمت أصايل من شكل ملاك ولونها ولف ثنيان:تعالي أصايل

مشت أصايل معاه ودخلت الموج مع ثنيان للجت سكي ووقف ثنيان وركبت أصايل

علمها عليه وناظرتهم ملاك وابتسمت ماتعرف وش كانت بتكون حياتها بدون ثنيان وماتعرف حجم مأساة أصايل بدون أخوها

هز راسه لها:اصبري بعلم ملاك لا تحركينه

مشى لملاك ومد ذراعه:تعالي هلاكي

ابتسمت له ومسكت كفه ودخلت برجلينها بالموج وركبت وناظرها ثنيان وابتسم:ما تخافين الموج صح ؟

ناظرته ملاك وابتسمت:اذا انت معاي ما بخاف

ثنيان:بركب وحدي بس معاك وحوالينك

هزت راسها ومشى ثنيان وحركت أصايل وصرخت بحماس من شعورها وابتسم ثنيان ودخلت بالموج ملاك معهم وهي تسمع صوت ضحك أصايل

وتشوف ثنيان اللي يسبقهم بمسافه ، لفت ملاك تشوف أصايل اللي تحاول تسبقها وصرخت ملاك من لفت أصايل تعكس الاتجاه تنثر الموج على ملاك وتبللها

وضحكت أصايل ومشت لثنيان اللي يسبقهم ومبتسم ووقفت ملاك ترفع شعرها المبلول ورجع لها ثنيان وضحكت:لا ترشني نفس أختك اعدمكم

ضحك ووقف بجانبها ومد ذراعه:تعالي وراي

ملاك:ثنيان ! اعرف ضحكتك هذي

ثنيان:تعالي تعالي

وقفت ومسكها من خصرها وركبت خلفه وتمسكت فيه وحرك ثنيان بسرعه وضحكت وهي تتمسك ببطنه ورفع الجت سكي على الموج وانقلبوا قاصد ثنيان يقلبها

وغطس يناظرها تحاول تطلع ومسكها يطلعون وضحك

رجفت تتمسك فيه وكحت وضحكت أصايل تتقدم لهم:قاصد ثنيان والله قاصد غمز لي ملاك

فتحت عيونها ملاك وناظرته:اعرفه

ضحك وتقدمت أصايل لهم وطلعت ملاك تركب مع أصايل ونطقت ملاك:خليه لوحده احسن لا تنقذينه

ضحك ثنيان:اعرف اسبح

رجعت أصايل للشاطئ ونزلت ملاك ولفت أصايل تناظر ثنيان اللي يسبح وابتسمت

نزلت مع ملاك اللي اخذت المنشفه وتقدمت لها:الشمس قويه

ملاك لفت عليها:هذي شمس ثنيان اللي يحبها

ابتسمت أصايل تلف تشوفه يسبح وجلست أصايل تناظر البحر بهدوء ودخلت ملاك تاركتها

ونزلت عيونها أصايل يخطر ببالها منيف وعقدت حاجبينها بضيق من طاريه ورفعت عيونها من مدت لها ملاك ايسكريم وابتسمت لها واخذته

جلست ملاك وهي تفتح الايسكريم حقها:تحسين بعتاب ؟

بلعت ريقها أصايل وهي تناظر الايسكريم اللي بيدها:شعور غريب ما اعرف اوصفه بس احس بنار تاكلني

لفت ملاك تناظر أصايل هي فعلاً تحترق ومنيف يحترق وسبب كل هالنار هي ملاك

لفت ملاك تاكل من الايسكريم:بنادي منيف

لفت أصايل بسرعه عليها وناظرتها ملاك:وتكلموا لان هذا الحل

أصايل:ما ابغى اشوفه

ملاك:لازم تشوفينه لان سوء التفاهم بيني وبين ثنيان كان اننا ما نجلس ونتهاوش سوا ونتكلم ، ماتبينه وقفي قدامه وقولي له واذا يبيك بيوقف قدامك وبيقولك بس لا تقعدون كذا

صدت أصايل بضيق تناظر البحر واخذت نفس ملاك:ما بوقف معه عشانه أخوي ولا بتدخل ، بس لازم تقعدون سوا حلوها

ناظرتها أصايل وهزت راسها ملاك ورجعت تناظر ثنيان اللي يسبح بالبحر

'

جلست على السرير بتعب من طول المشوار اللي قضته تنتظر بس نتيجه إيجابيه تبشرها بإنها أم بإن ساري بيكون أب

تعالجوا سوا ومشوا سنين طويله بالإنتظار وكانت تخوض ضغط وخوف من انها ما تحمل أو ملاك تسبقها بالحمل وتشوف نظرات من الناس حوالينها

ناظرت جوالها تنتظر إتصال بس إتصال ولفت تناظر ساري اللي مشغول يكتب بلابتوبه على السرير ورجعت صدت بتوتر تشد على جوالها

رفع عيونه ساري عليها مستغرب هدوئها ونطق:هاه طحتي على موضوع جديد تغارين منه ؟

ماردت عليه جنى ورجع ناظر اللابتوب ساري:والا راميه كلمه كبيره على احد وتورطتي ؟

لف لانها ماترد عليه:جنى ؟ من اكلم انا ؟

فزت من دق جوالها ووقفت وردت:الو

ناظرها ساري وبلعت ريقها جنى وهزت راسها:ايوا جنى

انتظرت ثواني ولفت تناظر ساري اللي يناظرها وجمد وجهها ورجفت يدينها وعقد حاجبينه من تغيرها ساري وشال اللابتوب وجلس:وشفيك ؟

غطت فمها بصدمه:أكيد ؟

ساري وقف ومشى لها:وش صاير ؟

هزت راسها جنى:تمام اكيد بجي اشوف الدكتوره

قفلت جوالها ورفعت عيونها لساري تناظره بصدمه وهز راسه ساري:وش السالفه ؟

جنى همست:حامل

جمد وجه ساري وعقد حاجبينه:من ؟

جنى ضحكت بين دموعها بصدمه:أنا

ناظرها ساري بجمود وبكت جنى وحضنته:حامل ساري

ابتسم يشد عليها:اسألك بالله ؟

ابتعدت عنه وهي ترجف:والله اتصلوا المستشفى حامل ساري حامل

عض شفته بصدمه ساري يناظرها وهو مبتسم واخذت نفس جنى بتوتر:ماراح تقول لأهلك ولا بقول لأهلي

ساري ضحك:صاحيه انتي ؟ بعلم الدنيا كلها هالمره انا اللي ما بمسك لساني

سحبته من ذراعه:ساري

مشى يتركها وطلع من الغرفه وهو يضحك وعض شفته ودخل الصاله وناظر نهار ونوره وعقاب وجاسر وابتسم

وناظروه ونطقت نوره:شفيك ساري ؟

ساري ضحك ومسك راسه بصدمه:بصير أب

جمد وجه نوره وفزّ نهار:اسألك بالله

ضحك جاسر وهز راسه بعدم تصديق ساري وابتسم عقاب ووقف:ماشاء الله ماشاء الله

تقدم ساري يحضن عقاب وابتسم عقاب يضرب ظهره بفرحه:الله يتمم على خير يارب ويقرّ عيونكم

غطت فمها بصدمه نوره وضحك نهار وقام حضن ساري بقوه:أبوي انت من قبل تجيب لك ولد

ضحك ساري وابتسم جاسر وبعد نهار وحضن ساري ولفت نوره بصدمه على عقاب

ومشى ساري وجلس عند رجلين نوره:امي بيجيك حفيد

ضحكت بصدمه وحضنته وحضنها ساري حضن الطفل لأمه وهو جالس عند رجلينه وبكت نوره:حمدلله يارب قرّة عيوني وعيونك يا أمي

ابتسم عقاب:الله يتمم على خير والله لتقام تمايم ياساري ماصارت ولا بتصير مثلها من قبل

ابتسم جاسر يناظر عقاب اللي التفت له وفهم ابوه:يستاهل ساري والله يستاهل

ابتسم ساري ولف عليهم وابتسمت نوره:مبروك يا أمي مبروك

ساري:الله يبارك فيك

-

جالس ثنيان وياكل وملاك وأصايل قدامه ياكلون

اخذت نفس أصايل تشرب من عصيرها ولفت للبحر من ظلمته ورفع عيونه ثنيان لملاك اللي ناظرته ورجع ياكل

لفت عليهم:بدخل أنام

ثنيان هز راسه بالنفي:اجلسي بتكلم معك شوي

ناظرتهم ملاك وصدت تشرب من عصيرها ورفع عيونه ثنيان من دخلت سيارة منيف ولفت أصايل ولانت ملامحها تشوفه بالسياره

وناظرته ملاك وتنهدت بضيق ووقف ثنيان:تعالي ملاك

وقفت ملاك وصدت أصايل تعطيه ظهرها وتناظرهم ودخل ثنيان الشاليه وبجانبه ملاك

وبلعت ريقها أصايل ونزل منيف ومشى لين عندها واخذ نفس بتعب ووقف عندها وناظرها جالسه

مارفعت عيونها وظلت تناظر محل ثنيان

بلع ريقه منيف ونطق بهدوء:أخذتيني مني معاك

ماردت عليه ومشى منيف وجلس وصدت بعيونها للبحر

اخذ نفس منيف:والله مالي مكان غير لك انتي

ناظر صدودها وتقدم:أصايل

لفت عليه تناظره بعتب ولوم:بطلت أكون أخت النهار ؟

منيف:صرتي جوف منيف

سكتت تناظره وهز راسه بتعب منيف:أقسم بالله أموت لو أخسرك ، أسف ودبلتي بإصبعي عشان أصحح اللي سويته

أصايل:مع الأسف ماتقدر تصحح شي بالماضي

منيف:أصايل أقسم بالله كنت أجاهدك جهاد ، أقسم بالله غلبتي النيّه ، ماقدرت أمسّك بشرّ

أصايل عقدت حاجبينها تناظره وكمل منيف:والله واللي أخذ مني أغلى اثنين بحياتي إني أحبك وأبيك وكان وصلك مستحيل ونلته ولا خبيت عنك لأني أبيك تعرفيني وتسمعيني وتحبيني

ناظرته أصايل بضيق وتقدم لها منيف بيمسك كفوفها وشالتها عنه وناظرت عيونه بعتب

منيف:إنتي العوض عن أيامي السود وإنتي غايتي وأصدق مرادي ومهما خسرت من المخاليق عادي يكفيني إني كسبتك

تجمعت دموعها بعيونها تناظره وكمل منيف:أقسم بالله ما وصلتك الا بعد جهد السنين أبي ارتاح من حزني أبي أرمي حمولي في حضنك ، أبي اغفى ولو ساعه جنبك وأرتاح ، أبي الفرحه تجيني ويضحك سنّي ، أبيك والله أبيك أكثر من كل شي بهالدنيا

صدت عن عيونه ترفض تبكي وتنهد منيف يناظرها:أسف بو عيشتك شي سيئ بالماضي بس أمن لك الجاي وعد ياجوف منيف والله وعد ودين عليّ ، بس عطيني فرصه

ناظرته ثواني أمامه ووقفت تتركه وتدخل الشاليه رفع عيونه ثنيان ولفت ملاك من دخلت للغرفه

ووقفت ملاك وخرجت لمنيف وناظرته ماسك راسه وتقدمت له:منيف

رفع عيونه منيف عليها وخرج ثنيان وناظر منيف:منيف

لف منيف واشر له ثنيان يدخل واخذ نفس منيف ووقف ودخل ولف عليه ثنيان وتقدم له منيف ودخلت ملاك

ناظره ثنيان:تعرف اني ما بوقف معك واترك اختي

منيف هز راسه وناظرتهم ملاك وكمل ثنيان:وتعرف ان لو الموضوع مافيه ملاك ماكان مشى كذا

منيف:اعرف

ثنيان:انا سويت اللي عليّ وسديت خلفك الباقي عند أصايل اذا نوت تنفصلون ما بمنعها صدقني

تنهدت ملاك بتعب وصدت عنهم وبلع ريقه منيف وهز راسه

ثنيان:في غرفه اذا ودك تنام هنا وبكره تكلموا وحلوها

منيف لف لملاك وهزت راسها ملاك له ولف لثنيان ومشى للغرفه ودخل

لف ثنيان على ملاك ومشى لها وتقدمت له وحطت راسها على صدره تحضنه وحضنها ثنيان:بنطلع يخت الصبح

رفعت راسها تحط بدقنها على صدره وتناظره:عشان منيف وأصايل ؟

ثنيان هز راسه بالنفي:عشان موج ولهب

ابتسمت له بهدوء ونزل عيونه ثنيان لثغرها:ما ودك نرتاح شوي ؟

هزت راسها ومشت معه وهي حاضنته من الجنب ودخلت الغرفه معاه

'

جلس على السرير منيف وناظر البحر قدامه من شباك غرفته واخذ نفس

لف ياخذ جواله وفتح على محادثتها وكتب لها:بيني وبينك جدار وهيّن بس مابي يصير بيني وبينك درب ، تكفين

لفت أصايل من وصلتها رساله ومشت للسرير واخذت جوالها وقرت رسالته وعقدت حاجبينها ، معقوله هو بالشاليه ما رجع ؟

مشت للشباك وناظرت سيارته ورجعت ناظرت رسالته ولاردت عليه

بلعت ريقها تذكر كلامه واعترافه وأسفه ، ما تعرف وش بتقرر ماتعرف كيف بتعديها

لفت من انفتح الباب وتغيرت ملامحها من شافته ، جمد وجهها ودخل منيف وعينه عليها وقفل الباب خلفه وهمس:ماقدرت ما أجيك

نزلت عيونها من تقدم لها ووقف قدامها منيف:أدري غلطتي كبيره وأنا معك بكل اللي تسوينه لكن والله أنا غيرك ما أشوف وحبي لك ما يتغير

رفعت عيونها عليه أصايل وهز راسه بتعب منيف يناظر عيونه:خسارتك بتكون كبيره بحياتي ، ما كسبت شي أثمن منك

بلعت ريقها أصايل:قلت كلام كثير وسمعته

منيف قاطعها يتقدم لها:وبفعل لك أفعال والله لأعطيك زود على اللي عطيتيه لي من إحساس ومشاعر ، أبيع دنيتي وأشتري رضاك بس قولي إن لي فرصه ثانيه معك

ناظرت عيونه أصايل وكمل منيف:دامك ما قلتي لأبوك معناته تبيني أصايل

أصايل:ومابي أندم اني ما قلت لأبوي

هز راسه منيف بتوتر وتقدم يمسك ذراعينها:والله ما أذوقك ندم زود والله ما تشوفين فيني غير العشم ، إنتي توبتي

بلعت ريقها تناظره من قريب وهزت راسها:أبي أشوف فرصتك الثانيه

ابتسم منيف:واللي زرع فيني هالقلب وخصّه لك إني لأكابد عشانك يابنت العميد ، يا أخت النهار ويا جوف منيف

نزلت عيونها تصد عن عيونه واخذ نفس منيف براحه ومشى يتركها وخرج من الغرفه

غمضت عيونها بتعب من خرج ولفت تناظر البحر

'

بعدت شعرها عن وجهها من اتجاه الريح عليهم من سرعة اليخت وابتسمت تلف تناظر أصايل اللي بطرف اليخت تصور

رفع صوته ثنيان مع منيف:هنا هنا شوف من هنا

لف منيف ومسك قيادة اليخت وهز راسه من ثنيان اللي يوجهه

ورفعت عيونها ملاك للسماء تسمع صوت الاغاني اللي مشغلتها أصايل بصوت عالي باليخت ، صوت عمرو دياب وطرب أغانيه الصيفيه ،وتشعر بوجود منيف وثنيان بجانبها

هي في أحلى مكان ودها تتواجد فيه ومع أفضل أشخاص بحياتها

ابتسمت ولفت للموج تناظره وتحس بأشعة الشمس على جلدها الأسمر من سُمرة الصيف

تعيش لحظه تسوى حياتها الجايه كامله ، مدت ذراعها تلمس الموج بيدها وضحكت

ولفت أصايل عليها تصورها ورفعت صوتها تناديها:ملاك

لفت ملاك وابتسمت من شافتها تصورها وخرج ثنيان وابتسم ورفع صوته:بغرقك بغرقك

لفت ملاك وضحكت:ماراح تقدر منيف هنا ياخذ روحك

ضحك ثنيان ولف لمنيف اللي داخل اليخت ورجع ناظرها:ماراح يحس

أصايل:وانا بغطي على أخوي موج

رفعت حاجبها ملاك تناظرهم وتقدم ثنيان ورفعت كفها تهدده ملاك:ياويلك ثنيان

ثنيان ضحك وشالها وصرخت ولف منيف يناظرها

وقف ثنيان على طرف اليخت وتمسكت في تيشيرته ملاك وهي تصرخ وتضحك

وضحكت أصايل ولف ثنيان عليها:تعالي دفينا عشان منيف ما يدفني واحطها فيك

خرج منيف وصرخت ملاك تناديه وتمد كفها وصرخت أصايل تضحك وتجري لهم وتقدم منيف بسرعه ودفعتهم أصايل وتقدم منيف وناظرهم داخل الموج

ضحكت أصايل ولفت على منيف:عشان اخوي طلبني

ابتسم منيف وتقدم لها ورفع شعرها عن وجهها:وانا باخذ بثار اختي

تلاشت ابتسامتها من فهمته ودفعها منيف وصرخت ولحقها داخل الموج

خرجت ملاك من الموج مع ثنيان وضحك يناظرها:شوفي للحين ما تعلمتي تسبحين طلع صعب تعليمك

ملاك:مو كذا يتعلمون الناس

لف ثنيان يناظر أصايل اللي تسبح ولفت ملاك بذهول وضحكت من خرج منيف وناظرهم ثنيان:هذولا عيال مساعد مين يقدر عليهم

ضحكت ملاك تناظر منيف اللي يسبح:أعشقك منيف اقسم بالله انك حبيبي

فلتها ثنيان تغطس وتقدم منيف لها يسحبها وضحك:نذل

ثنيان:نادتك حبيبي

طلعت أصايل على طرف اليخت:ماراح اسامحك منيف اعتبرها فرصتك

لف منيف عليها بصدمه:لا عاد ما تنحسب

هزت راسها أصايل بوعيد له ولف منيف لملاك اللي متمسكه بذراعه:فدا ملاك صح ؟

منيف:كذا يعني ؟ صرت بين بنتين ؟

ابتسمت ملاك وتقدمت تطلع على اليخت وطلع منيف وخلفه ثنيان

فصخ تيشيرته ثنيان ولف لأصايل:لا يغلبونا

أصايل:يغلبونا وهي ماتعرف تسبح ؟

ضحك ثنيان ولفت ملاك لأصايل وابتسمت:اها أصايل صرت مصخره الحين ؟

ابتسمت أصايل وناظرت منيف اللي يجفف شعره:بسبب اخوك

ناظرها منيف بصدمه:كل شي صار براس منيف الحين ؟

ضحك ثنيان واخذت جوالها أصايل:تعال نتصور ثنيان سوا انتصار عيال العميد عقاب

ناظرتهم ملاك وابتسمت ووقف ثنيان بجانب أصايل وتقدمت ملاك تفرقهم:عيال مساعد في مجرى دمكم

ضحك ثنيان ورفع ذراعه على كتوف ملاك وابتسم منيف:يعني اذا تسمحين لي اكون صوره بجوالك ولي الشرف والله

ناظرته أصايل وصدت لجوالها وابتسمت وتصوروا سوا

جلس ثنيان وناظر أصايل:ابوي كلمني يبينا نرجع

أصايل ناظرته:ارسلت لي أمي تسأل عن رجعتي

ثنيان:نرجع بتقولين انك كنتي عندي ؟

تنهدت أصايل ولف منيف يناظرها وهزت راسها بالنفي:مو لازم احد يدري

جلست ملاك وحطت المنشفه على كتوفها:وانا اشوف كذا مو لازم احد يدري بيسأل ابوك على كل التفاصيل

لف منيف على أصايل اللي ناظرته وهزت راسها

منيف لف لثنيان:اشغل على الرجعه ياكابتن ؟

هز راسه ثنيان وابتسم ومشى منيف يدخل اليخت

رجعوا خطهم كله للساحل ورجعوا للشاليه

دخلت ملاك الغرفه ورفعت شعرها كله وحست بذراعينه على خصرها وابتسمت وغمضت عيونها واخذ نفس ثنيان وقبّل عنقها وهو حاضنها من الخلف:زوجتي موج

ابتسمت ومسكت كفوفه:بطلت لَهب ؟

لفت على ثنيان ورفعت ذراعينها على رقبته وناظرته:ما صرت تحس بناري ؟

هز راسه بالنفي:صرتي موج وانا دايم

ابتسمت تشوفه يهز راسه بتعب وكمل:دايم ضامي الماء

ملاك ابتسمت وكمل ثنيان:ما تملين وأنا أطلب ترويني دايم ولا أشبع ضمى ؟

ملاك رفعت كفوفها على وجهه:‏فداك ، فداك السنين اللي مضت قبل لا اعرفك ‏وفداك اللي مرّوا في حياتي

‏على الفاضي

ثنيان اخذ نفس:يبقى لي عندك أمنيه متشفق عليها

عقدت حاجبينها تناظره ونزل عيونه لثغرها وعقد حجاجه:موج ولَهب

سكتت تناظره ورفع عيونه ثنيان على عيونها:بنات

لانت ملامحها وابتسم ثنيان:أبي أكون أب من أحلى بنات من أحلى أم

بلعت ريقها من الطاري وكمل ثنيان:أبي بناتي موج ولَهب ، أبي أشوفك أم

ملاك:انا ما ينفع أصير أم ، الأم شخص كويس وأنا مانـ

تقدم لها يقبّلها ويقطع كلامه ويسكّت ثغرها عن الكلام وكأنه يمنعها عن كلامها وينفي صحته وكأنه غير مهتم لنظرتها لنفسها اللي يكفي نظرته هو

'

لف نهار لابوه:لازم ننتظر ثنيان وأصايل ؟

نوره:نروح نخطب بدونهم علامك نهار وش هالخفه ؟

جاسر ضحك:كما الريشه

نهار:اي اي تغار عشاني بتزوج قبلك هاه

جاسر:الصراحه اي شلون كذا ياخي

نهار ضحك:لو تبي ادور لك على ذوقي ابشر ترا ذوقي سوقه حلو

جاسر:لا فكنا من سوقك

عقاب جلس:بيجي ثنيان وأصايل راجعه ونروح سوا بكره ان شاء الله

ساري:ابوي ببشوت ؟

عقاب:متى رحنا من غير بشوت ؟ عيال الشيخ عقاب ؟ افا

ابتسم ساري وكمل عقاب:والحين انت ابو عقاب ييي لك بشت

ضحك ساري بفرحه وابتسمت نوره:جنى مبسوطه الله يتمم لها على خير ويقرّ عيوننا بولدك ياحبيب أمك

ابتسم ساري:اللهم امين

اخذ جواله نهار يقرأ رسالة منيف:أخذت أصايل من جسر البحرين وأنا بجيبها

نزل جواله منيف من ناظر رد نهار:حلالك ياوحش

ابتسم ولف لأصايل اللي تناظر الطريق وهاديه ورجع يناظر طريقهم:اي يا أخت النهار

لفت عليه أصايل تناظره:باقي ناوي تناديني كذا ؟

منيف:ما لقيت أحلى من هالنداء

أصايل:لا نادني بنت العميد احلى عشان تتذكر دايم اني بنت عميد

منيف:اي وبناديك اخت ساري وجاسر اللي بيذبحني وثنيان ونهار والعايله الكريمه

ابتسمت أصايل تصد عنه وتناظر الطريق

ابتسم يناظر ابتسامتها واخذ كفها وسحبتها:شيل

منيف رفع حاجبه وضحك:وشو شيل ؟ هاتي كفك بس

أصايل:مو غصب مابي أمسك كفك

منيف ناظر الطريق ورجع ناظرها وابتسم:اي زين

شغل جواله يشبك على بلوتوث السياره ويختار اغاني وابتسم من اشتغلت اغنيه ولف للطريق

بدأت الأغنيه وابتسمت أصايل تسمعها:وضحكت لي بشفة مثل الشفق ، حسّها قلبي وحنّ لها وخفق

لفت عليه من غنّى ولف عليها منيف:وسبلت لي طرف ذوبني غشيت في شديد البرد نضحني عرق

ابتسمت له وكمل منيف:مادريت وين قلبي مادريت مادريت ان قلبي انسرق

صدت عنه وتقدم ياخذ كفها وابتسمت تناظر كفوفهم وشدّ على كفها وهو يغني ويناظر طريقهم

ووقف عند البيت ولف عليها وشد على كفها ولفت عليه ونطق منيف:مابيك تزعلين مني

اخذت نفس أصايل تناظره وكمل منيف:وبجاهدك لين تختفي نظرة عيونك هذي اللي اشوفها منك ، كلك عتاب وخوف ومو قادره تثقين في قرارك

نزلت عيونها أصايل لكفوفهم وتقدم منيف:ما بخليك تضيعين فرص اكثر عليّ صدقيني

رفعت عيونها عليه وهزت راسها وهمست:أتمنى

تقدم لها منيف وباس جبينها وغمضت عيونها وابتعد عنها واخذت نفس ونزلت

ونزل معها ولف من دخلت سيارة ثنيان ووقف ينتظرهم

وابتسمت أصايل تناظر ملاك وثنيان:وينكم ؟ وش هالغيبه ؟

ضحكت ملاك:مبطي عنا ؟

ضحكت أصايل وابتسمت ملاك ومشت معها ومشى ثنيان مع منيف يدخلون البيت

لف عقاب من اصواتهم ورفع عيونه نهار ودخلوا

وابتسم ثنيان:سلام عليكم

نوره ابتسمت:ياهلا ياهلا

تقدموا يسلمون وناظرهم نهار:انتم مسوين تان عن بعد ؟

ضحك ثنيان وابتسمت أصايل تبيّن ذراعينها:كيف اللون ؟

نهار ناظرها بذهول ورفع عيونه لملاك:هذي احترقت

ضحكت ملاك وابتسمت نوره:اي والله ملاك صايره نفس لون ثنيان

ابتسمت ملاك:وحلو والا لا ؟

ثنيان:حلو محد يقدر يتكلم

عقاب ناظر منيف:وشو انتم جايين مع بعض ؟

منيف هز راسه:لا عمي تقابلنا هنا بالبيت

ناظرهم عقاب ولف لثنيان اللي جالس ونطق جاسر:ريحتكم بحر

جلست أصايل وابتسمت:انا كنت بالبحرين وهم بالشاليه اكيد ريحتنا بحر

نهار ناظر منيف:انت شكلك ما امداك تنحرق لونك أسمر

ابتسم منيف:لا انا ما شفت بحر هذي شمس ربي

نوره:تعال منيف اقعد عندنا خبر بمليون

نهار ابتسم:بنروح نخطب بالليل

نوره:لا مو هذا الخبر اسكت

ضحكت أصايل وجلست ملاك بجانب ثنيان وجلس منيف

وابتسمت نوره ولفت لعقاب اللي ابتسم:قولي

نوره:ساري بيجيه ولد ان شاء الله

جمد وجه ثنيان وشهقت أصايل ووقف ثنيان:اسألكم بالله !

نوره ابتسمت من ردة فعل عيالها:والله

أصايل:ياحياتي حمدلله يارب

ثنيان:وينه ؟

نوره:اقعد اقعد راح مع جنى لأهلها شوي ويرجعون

ثنيان ابتسم وجلس:ياربي لك الحمد كان وده والله وصبر واجد

جاسر:الحمدلله ماشفت فرحته انت

ثنيان لف لجاسر وتنهدت أصايل براحه:اوف كان مخوفني هالموضوع حمدلله يارب ياحياتي جنى الله يتمم لها على خير حتى هي كان بخاطرها

نوره:اصلاً كل مشاكل جنى وساري عشان العيال زين حمدلله الحين يشغلهم هالولد

ملاك:ماشاء الله مبروك والله يتمم لها على خير

منيف لف لعقاب اللي هز راسه:الحمدلله

نوره:يالله هذا الخبر الاول وباقي الاخبار الحلوه بتجي من بعده انا ادري

نهار ابتسم:اي خطبتي ثاني خبر

نوره:انت شفيك على هالخطبه مستانس فيه ما كأننا عشرين مره خطبنا لك

نهار:امي هالمره ثابته صدقيني

عقاب:اتمنى والله يالطايش لاني معد بخطب لك

أصايل:ياخوفي ما توافق التايقر عليك

نهار:ما توافق على من ؟ عليّ انا ؟

ضحك:ياحياتي انتي ماشفتي عيونها من شافتني عاجبها عاجبها انا

منيف ضحك:والله ياشماتتي فيك لو ترفضك

نهار:انتم علامكم تهزون ثقتي بنفسي

نوره:وهو صادق نهار حاصل لها يالله بس يالله ، ولدي ينشرى بذهب

جاسر:على وشو ؟ صايع وبس

ضحك نهار:اوريك

ضحك جاسر ولف منيف عليهم:انا استأذن

وقف وناظرته أصايل وهز راسه عقاب:خلك فاضي بعد العشاء منيف نروح كلنا سوا

نهار:اي بالله تعال معي انت فال طيب

منيف ابتسم لانهم نادوه وهز راسه:ان شاء الله تبشرون

ابتسم عقاب ومشى منيف ولفت نوره بحده على أصايل اللي جالسه وناظرتها أصايل وبلعت ريقها ووقفت

ابتسمت نوره من قامت أصايل خلفه وخرجت ووقفت عند الباب ولف عليها منيف وابتسم:تبيني اجي معكم ؟

أصايل:نهار وده

منيف:ادري نهار وش وده ، بس ابي انتي وش ودك ؟

اخذت نفس أصايل تناظره ومسك كفوفها منيف:بجي لان ودي اشوفك

نزلت عيونها أصايل تناظر كفوفهم وتقدم منيف وميّل راسه يبوس خدها وابتعد عنها ومشى لسيارته

ناظرته أصايل ورجعت داخل

-

( التشبيهات بحسابي بالاستقرام r_55shog ) لا تنسون النجمه⭐️

لفت من انفتح الباب وابتسمت:تعال

دخل راكان:غلا فهد سمعت في خطاب جايين لك !

ابتسمت غلا وهي تحط ميك اب:شفت شلون اختك بتروح منك خلاص

راكان:من قال يعقب ياخذك اذا ماعجبني

غلا:اي كويس قيمه اجل اذا وصل

راكان:تعرفينهم ؟

غلا:لا ابوي يقول يعرفهم

راكان:بشوف ابوي وانتي اجهزي تراهم على وصول

هزت راسها وخرج راكان ومشى لابوه اللي ناده:وصلوا تعال

خرج راكان وناظر السيارات وهمس:ياساتر

دخلت السيارات بالمواقف وناظرهم ابو راكان وابتسم

مشت غلا للشباك وناظرت السيارات بربكه وعقدت حاجبينها من كثرتهم

ولفت من دخلت امها وابتسمت:وصلوا وصلوا

غلا لفت للشباك وتقدمت ام راكان ووقفت جنبها:كل هذولا جايين ؟

غلا سكتت وعقدت حاجبينها تشوف عقاب ينزل ومعه اربع من عياله ماكانت تشوف وجيههم من اشمغتهم وكثرتهم ولفت من نطقت ام راكان:بستقبل الحريم تعالي

هزت راسها غلا ومشت تتعطر وطلعت من سمعتهم يجلسون بالصاله وتقدمت ولانت ملامحها من شافت نوره وجنى وملاك وأصايل

ابتسمت نوره تناظر فستانها وهزت راسها بإعجاب ولفوا البنات يناظرونها وابتسمت ام راكان:تعالي غلا

تقدمت غلا وسلمت عليهم وجلست بجانب امها وناظرتها نوره:شلونك غلا ؟

غلا:حمدلله انتي شلون صحتك ؟

نوره ابتسمت:ياربي لك الحمد

ام راكان:ابو راكان قالي انه يعرف زوجك

نوره:اي عقاب قالي يعرفكم ونعم فيكم واحنا جيتنا اليوم كلها عشان صيتكم الطيب

ام راكان:تسلمين الله يرفع قدرك ، بناتك ؟

اشرت عليهم وابتسمت نوره:بناتي ، أصايل بنتي وملاك وجنى حريم عيالي ساري وثنيان

ام راكان ابتسمت:ماشاء الله تبارك الله

نوره:وحريم عيالي بحسبة بناتي وما أفرق بينهم وبين أصايل ابد

ملاك ابتسمت:خالتي نوره ذهبه وانا وجنى محظوظين فيها

لفت نوره لملاك وابتسمت لها ونطقت أصايل:غلا فستانك من تصميمك ؟

غلا هزت راسها وعقدت حاجبينها أصايل:ماشفته بالبوتيك

غلا:اي لانه قطعه وحده فصلته لي انا

أصايل ابتسمت:ماشاء الله خيال يزهى عليك

غلا:تسلمين

نوره:عقبال تفرحين فيها يا ام راكان ان شاء الله

ابتسمت ام راكان:بحضورك ان شاء الله

نوره:لا تسأليني عن فرحة البنات ، بكتب كتاب بنتي أصايل حسيت روحي بتطلع من مكانها

ابتسمت أصايل وضحكت ام راكان

نوره:ما استانس انا الا بزواج عيال لو تشوفيني بزواج ساري وثنيان كيف راحتي وفرحتي

ام راكان:الله يبلغك فيهم جميع

نوره ابتسمت:عقبال ولدي نهار ان شاء الله

ناظرت غلا وناظرتهم غلا ونزلت عيونها بهدوء

'

جلس عقاب وجلسوا عياله ومنيف

ووقف راكان يقهويهم وابتسم نهار:تسلم

هز راسه راكان وصب لمنيف وجلس بجانب ابوه

عقاب:هذا ولدك راكان ؟

ابو راكان؛الله الله

عقاب ابتسم:ماشاء الله وش تشتغل ياراكان

ابتسم راكان:نمشي خطاك ياعمي ، عسكري

ضحك عقاب ولف نهار؛صديق العمل

لف ساري لنهار وتلاشت ابتسامة نهار من نظرته ولف عليهم

عقاب:موفق موفق ، ماظنتي بقطاع نهار والا كان عرفك

لف راكان على نهار:بالامن العام انا

عقاب:ماشاء الله ان احتجت شي بلغني اعرف مدير المركز

راكان:ماتقصر

ابو راكان:اعرف عيالك اربع ياعقاب والا خمس ؟

عقاب:صاروا خمس الحين

ابتسم منيف ولف عقاب على منيف:هذا زوج بنتي

ابو راكان ضحك:ماشاء الله

عقاب:وانا اشتري رجّال بنتي وادور أغلى البنات لعيالي

سكت ابو راكان وكمل عقاب:والسمعه الطيبه تسبقك ياراعي الأنساب يا ابو راكان ، بنتك والنعم فيها وتربيتك خير التربيه ولي الشرف تصير وحده من بناتي

ابتسم ابو راكان:والنعم يا ابو ساري والنعم

رفع عيونه راكان على نهار يناظره وابتسم نهار بهدوء

ابو راكان:لنا الشرف يا ابو ساري وعطنا وقت نسأل البنت وتستخير والله يكتب اللي فيه الخير

عقاب؛حقها وحقكم ابد خذوا راحتكم والولد هذا هو اسألوا عنه واعرفوا اخلاقه

ابو راكان؛ولد عقاب ونعم يكفي صيت ابوه

ابتسم عقاب:ماعليك زود يا ابو راكان

تقهووا وسولفوا لين انقضى وقت كافي يرتاحون لبعضهم وغادروا المجلس

تقدم منيف لعقاب:عمي

لف عليه عقاب وناظره منيف بتوتر:باخذ أصايل اذا تسمح

عقاب سكت ثواني ولفوا العيال على منيف وبلع ريقه

ابتسم عقاب:حلالك يامنيف لا تسأل

ابتسم منيف براحه:تسلم ياعمي

ناظر العيال بإنتصار ومشى لسيارته واتصل عليها

تحجبت قدام المدخل واخذت جوالها اللي يدق وقرت اسمه ولاردت عليه

خرجوا ومشت أصايل وناظرها عقاب:أصايل

لفت عليه واشر لها على سيارة منيف وناظرتهم ملاك ومشت تركب مع ثنيان

واخذت نفس أصايل ومشت لسيارة منيف وفتحت الباب وركبت وناظرها منيف:توقعت ماتردين عشان كذا خليت السلطه العليا تتدخل

أصايل ناظرته وربطت حزامها وصدت لقدام وابتسم منيف يحرك

ناظرته يوقف بعد دقايق عند المحل اللي تحبه واخفت ابتسامتها عنه ونزل وناظرته راجع ومعه كوبين ماتشا وركب وحطها بينهم وحرك

لفت تاخذ الماتشا تشربها وابتسم وهو يناظر طريقه ووقف عند مطعم والتفت عليها:أعشّيك

ناظرته أصايل وفتحت الباب تنزل ومشى منيف يدخل المطعم معها

وجلسوا على طاوله وابتسم:خطبتي لنهار ؟

هزت راسها تشوفه يبدأ سوالف معها:خطبت له

منيف:اي وكيف العروس ؟

رفعت عيونها بحده تناظره:شدخلك فيها ؟

جمد وجه منيف وتقدم:مالي دخل اقسم بالله افتح سالفه بس

أصايل ابتسمت من توتره ومداراته لها:اي ياليت تفتح سواليف كويسه

منيف هز راسه ولف من تقدم نادل ومعه بوكيه ورد وابتسم

ولفت أصايل وناظرت الورد وابتسمت تاخذه وناظرت منيف وابتسم منيف:حطيه جنبك اشوف

حطته جنبها ورفع كفوفه منيف:مافي فرق

ابتسمت أصايل ورفعت حاجبينها تسمعه يحاولها واخذت نفس وتقدم منيف ياخذ كفوفها وناظرت عيونه أصايل ونطق منيف:إنتي وحدك اللي اشوفك بينهم كامله ، انتي وحدك اللي سلمت لك روحي تحركينها على كيفك ، انتي وحدك اللي وقظتي أشواقي انتي وحدك

نزلت عيونها أصايل لكفوفهم ورفعت عيونها لمنيف:اللي خلاني أصفح وأعديها هو ثنيان ، ولأن عنده خبر وقالي انك تستحق الفرصه

منيف سكت وكملت أصايل:لو محد كان عنده خبر ماكان هذا مكاننا اليوم

منيف هز راسه وتنهد:وانا بكون قد الفرصه

رفعت عيونها أصايل لعيونه اللي تتأملها ورجعت ظهرها للخلف:حجزت حفله لي ولأهلي بكره

عقد حاجبينه منيف وكملت أصايل:عبدالمجيد عبدالله

هز راسه منيف لانه ماجابت طاري ورجع ظهره لورا

ناظرته أصايل:مابتقول شي ؟

منيف:وش اقول ؟ يالله انبسطوا

أصايل:ماودك تجي ؟

منيف:محد عزمني اجي ليه ؟

أصايل:حفله لفنان كبير ونازله تذاكر مين بيعزمك ؟

رفع حاجبه منيف ورفعت كتفها أصايل:ودك تحضر تحجز بنفسك

هز راسه منيف:اها يا أخت النهار

دخل يده بجيبه يطلع جواله ودور تذاكر ولا لقي وعرف انها تبي تشوفه يجرب ويجيها ويحضر معها ورفع عيونه من سألته:مالقيت تذاكر ؟

منيف:لا

أصايل لفت تصد عنه:معوض خير

هز راسه منيف ونزل عيونه للموقع يناظره ورجع يدخل جواله بجيبه

واخذت جوالها أصايل ودخلت قروب عائلتها وارسلت التذاكر تكتب تحتها:بكره ومحد بيعتذر لان أصايل بنت عقاب تقول كذا

ابتسمت من شافت عقاب يكتب وضحكت من كتب:تحت أمرك يالعميد أصايل

وناظرها منيف تكتب بالواتس وحك جبينه يناظر الموقع من جديد

تعشوا بهدوء وابتسمت اصايل تشوفه ساهي وياكل ومسحت فمها:خلصت

رفع راسه وهز راسه وطلب الحساب ووقفت أصايل تمشي لدورة المياه واخذ الورد منيف ووقف ينتظرها وهو يناظر جواله

وخرجت واخذت الورد من يدينه وناظرها من قريب وابتسم وابتسمت له ومشت معاه للسياره وركبت

وحرك لبيتهم ووقف عنده ولف عليها وناظرته ساكت وعقدت حاجبينها:ما بتودعني ؟

منيف:بشوفك بكره ان شاء الله

أصايل:بكره بروح مع اهلي الحفله

هز راسه منيف:اجل بحفظ الله

ابتسم وابتسمت تفهمه ونزلت من السياره وضحك منيف يحرك

وقف عند بيته ونزل وفصخ شماغه ومشى يفتح الكمبيوتر وهو بثوبه:بفجر موقعكم بفجره

دخل الموقع وضحك:الهكر ولد مساعد والله لتصير بين يدينه تذكره غصب

'

لبست كعبها تشوف ثنيان يرتب شماغه ولف عليها:جهزتي ؟

هزت راسها تاخذ شنطتها ومشت وراه ، تقدمت تمسك ذراعه وابتسمت من شافتهم عند الباب ينتظرون بعضهم

ابتسمت نوره:ما قصرت أصايل عز الله نبي هالطلعه من زمن

أصايل:بنبسط ان شاء الله

عقاب:من بقي ؟

أصايل:نهار

عقاب:بنسبقه بيطول اعرفه

خرج ساري مع جنى لسيارته ومشى جاسر يركب سيارته ومشى عقاب مع نوره لسيارة السواق

وخرج نهار وناظر أصايل:لو عرفت انك رحتي مع جاسر كان قطعتك

ضحكت أصايل:لا بجي معاك

توجهوا للحفب وناظرت جوالها أصايل تنتظر منه رساله ولا ارسل شي

قفلت جوالها تسمع نهار يسارها يغني وابتسمت

لف يناظر سيارة ثنيان اللي يساره بالاشاره وضحك يرقص لهم

وضحكت ملاك تناظره ولفت من دق جوالها وردت:هلا منيف

حرك ثنيان بعد ما انفتحت الاشاره وابتسمت ملاك:طيب

قفلت ولف ثنيان:وش يبي ؟

ملاك:بيقابلنا هناك

عقد حاجبينه ثنيان:بيحضر معنا ؟

هزت راسها ملاك ووقف ثنيان سيارته مع اهله ونزلوا وارسلت موقعهم ملاك ولفت أصايل من تقدمت سياره ودقت بوري وضحك نهار:يالشيطانه عزمتيه ؟

انصدمت أصايل تشوفه يوقف سيارته وينزل وابتسم:سلام عليكم

نوره:قلنا ما بتزين اصلاً من غير منيف

نهار:من قبل امي ترحب بملاك والحين منيف طاح كرتك يالعميد عقاب

ضحك عقاب:تشوف ؟

منيف تقدم وسلم على نوره ولف لعقاب يسلم عليه

ابتسمت ملاك ورفعت ذراعينها تحضنه:وحشتني

لف منيف على أصايل ورجع ناظرهم:ندخل ؟

عقاب:دامنا اكتملنا ، ندخل

مشوا وانتظر منيف لين تقدمت أصايل له ووقفت:جاي بدون تذكره ؟

منيف ابتسم:افا ؟ انا جيت بعزيمة عبدالمجيد نفسه

ضحكت أصايل ورفع حاجبه منيف:اذا ما لقيت تذكره منك بجيبها المهم اكون معك

ابتسمت أصايل وعضت شفتها ومشت ومشى جنبها منيف ودخلوا

جلست ملاك بجانب ثنيان ويمينها عقاب ونوره

ولف عقاب لملاك وابتسم:غششيني بالاغاني ماهو فناني المفضل بس محكوم عليّ

ضحكت ملاك وهزت راسها ولفت لثنيان اللي يعدل شماغه وينتظر حضور عبدالمجيد عبدالله

تغيرت اضاءة المسرح وبدت الموسيقى وصرخوا الجمهور واتسعت ضحكاتهم من صوت الطرب العالي

ودخل عبدالمجيد وتوسط المسرح يبدأ اول اغانيه:روحي تحبك غصب عني تحبك

ابتسمت ملاك ولفت لثنيان اللي هز راسه:والمشكله حبك بروحي جرحني ، واذا شكيت تقول اش كان ذنبك ؟ ذنبي هويتك يوم حبك ذبحني

ابتسمت له ولفت من صفقوا الجمهور وصرخوا ومسكت كفها بكفه تكمل تسمع باقي الأغاني ولفت تشوف نهار اللي يغني وجالس بجانب أصايل ومنيف

ابتسم منيف يغني:هلا بك يانسم روحي ويالبيه

لف لأصايل يغني:في قلب ما اعترف بالحب من قبلك

ضحكت أصايل من نظراته وجيّته اللي تمنتها واعتبرتها فرصه يمشيها منيف ويوصلها

كان يناظر الجمهور ولف من لفت له ملاك وابتسمت تغني له؛تفاصيلك اهي ضعفي لا تسأل ليه ، حنانك ضحكتك هيبتك وطيب أصلك ، وصوتك كوكبي الوهاج وحسك فيه اذا سولفت ياخذني واسافر لك

ضحك ثنيان يكمل:وأنا يا سيد إحساسي ويا غاليه ، فؤادي خيل ما ساسه سوى وصلك ،

ضرب صدره يكمل يغني لها:يحبك حب يشب الحاسد ويطفيه إلين يرمد وجعله فدا ظلك

ابتسمت ملاك تشوفه يوصف حريق صدره من لهبها وشدت على كفها ولفت للمسرح وتلاشت ابتسامتها من الاغنيه اللي أرعبتها من مشاعرها وهي تسمعها

:أنا من قبل أعرفك كان لي خلان ، أوفاهم غدر بي فوق غدري خان

نزلت عيونها وبلعت ريقها من ذكرياتها اللي داهمتها ولفت تناظر ثنيان اللي سكت يناظر حالها وهزت راسها بتعب

لان عبدالمجيد عبدالله يكمل:عشت سنين ظلما ما وصلها نور ، اجمع جراح وخاطري مكسور ، اتحمل خطاهم كني فيني قصور

ابتسم ثنيان من موج عيونها وناظر عيونها اللي تتأمله وغنّى مع عبدالمجيد لها:بالأول ظلمتك ما قريتك زين ، سئت الظن بك غالطت شوف العين ، عكر طيبتي ريبه أبو وجهين شككني بنفسي وكل مخلق كان فاجأني حنانك ما فهمتك خفت أجزع يا صدوق الود منك إنت أندم كيف صديتك للحظة وإنت أول شخص ألمس داخله إنسان

شد على كفها وناظرته ملاك بإمتنان لأن لولا وجوده كان كل الدنيا حسايف

ابتسمت أصايل تناظر نهار ومنيف اللي يتصورون بجوال نهار ويغنون:أبغى اقول اني احبك وانت لسى اللي عشقته

لف منيف لأصايل يهز راسه:إني أحبك والله

ابتسمت أصايل ولفت من لفوا على ملاك على المقطع وناظرتهم ملاك من لفوا وضحكت تسمعهم يغنون:مستعجل حبيبي يمضي عمري مو معاك ، خل هاللحظه وانت لسى في عيوني ملاك

ضحكت لان منيف يأشر على عيونه وابتسم ثنيان يناظر نهار اللي يصورهم كلهم سوا

وابتسم عقاب يناظرهم ويستمع للحفل

ووقف نهار من صفق عبدالمجيد وصفقوا الجمهور ورقص بذراعينه وابتسمت نوره بوسع ثغرها تناظره ورفعت جوالها تصوره

ولفت جنى تصور الحفل وجلوسهم سوا وناظرهم جاسر بهدوء وهو مستمع

صرخت أصايل تصفق من جوّ الحفل والاغاني اللي تحبها ورفع ذراعه منيف يرقص وضحك نهار وهو واقف يرقص معهم

وابتسمت ملاك تهز راسها بطرب مع الاغنيه:ياما حاولت الفراق وما قويت

ولفت لثنيان تهز راسها:كنت ابي انساه لكن ما نسيت ، ما عصاني قلبي بعمره ولكن الأكيد اني انا اللي ما اشتهيت

ثنيان ضحك يكمل معها وهو يميّل راسه بطرب:مر طعم البعد واحساس الغياب الدقيقه طول شهر من العذاب طالبك مابي نكررها حبيبي ليه نفتح للحزن والهم باب

هزت راسها بالنفي ملاك ورفعت صوتها:مستحيل

ابتسم ثنيان ولفت ملاك للمسرح تسمع باقي أغانيه ، لمحته ويا إبن الأوادم ويا غايبه ، غزال ما ينصادي ، اخذت القلب ،‏ انتخل شخصيتك ،‏ قنوع ، اطيح واقف ، حن الغريب ، مليون عام

وقف نهار من عرف الأغنيه ولف لنوره اللي خلفه وابتسم يغني لها:مو بس أحبك أنا تتنفسك دنياي

ضحكت نوره ولف عقاب:بعد ملكته ما بيغني لك

ابتسمت نوره لنهار ورفعت جوالها أصايل تصور منيف يغني معها وغنت معاه:الله لو تدري قلبي وش كثر مملا

ابتسمت أصايل من رفع ذراعه على كتوفها يتصور معها وكمل:شوق لعينك وشوق لوجهك المملوح ، وش قد أرتب كلامي لك قبل ملقاي وش قد يضيع الكلام بشوفتك والبوح

ورفعت ذراعها ملاك تغني ولف ثنيان عليها:غلاك عوقي وهو نفسه لعوقي دواي ، كن بعدك اليم ووصلك هو سفينة نوح ، ما تبتهج نفسي إلا وإنت في يمناي وما يلوي ذراعي إلا ضيقتك والنوح

ابتسمت من الكلمات اللي تشبه حالهم فعلاً وحطت براسها على كتفه وهي ماسكه كفه وتغني معاه

وضحك جاسر من لف نهار لجاسر يغني له:وغيابك ابسط تعاريفه شقى وجروح ، رديت روحي برجوعك يابعدي ومناي ويالضحكه اللي اصير لها فدا واروح

جلس نهار وناظر الشاشه اللي تبين الجمهور وابتسموا يناظرون الشاشه ولانت ملامحه يناظرها ، غلا ، التايقر اللي قرر انها الثابته بقلبه متعدد التجارب

وشهقت أصايل بصدمه من شافتها ولفت لاهلها تبي تعرف من لاحظها وضحكت ملاك من ردة فعل نهار

تلفت نهار بصدمه وهو يضحك ودق ذراعه منيف يغني:كنت الحبيب وغديت اليوم كل دنياي

ضحك نهار يرفع صوته:دورها منيف تكفى

تقدمت أصايل:نهار اتوقع بالمدرج اللي مقابلنا ماراح تشوفها

نهار لف وضحكت نوره ولفت لعقاب:غلا فهد

هز راسه عقاب:ما شفتها

نطق ساري:على فزة نهار ذي بتشوفها في بيتنا يا ابوي

ضحكت جنى ولف ثنيان لملاك من أغنيته المفضله اللي غناها عبدالمجيد:انت ما انت انسان أكثر قلبي مو من قلبك أصغر ، ومثل ما تشعر تأكد اني أشعر

ابتسمت ملاك وكمل ثنيان يغني لها وغنت معاه:فيني منك فيك مني ، غصب عنك غصب عني ، التقينا واللقى قسمه مقدر

لأنهم فعلاً متشابهين رغم اختلافهم ، هو مره موج ومره يصير مثلها لَهب وهي دايم الدوم لَهب لكنها معاه تحب الموج وتشبهه

وهز راسه ثنيان:مالي غيرك ومالك إلا أنا حبايب يكرهك نصفي ونصفي فيك ذايب الهوى غلاب وأمر الله غالب ألزمك طول العمر لاأجي ولا أروح

وهو فعلاً يكرهه شرّها ودنيتها اللي حكمت عليها بهالطريق وذايب ، ذايب بكل شي فيها من أول شي لمحه وحَبه ، أنيابها ، لكل شي شافه وانتبه له

ابتسم نهار وضحكوا من الاغنيه اللي تشبه حال نهار حالياً:لمحته وارتعش قلبي وضاعت مني أنفاسي ؟ عيوني ماهي عيوني عمتها قوة احساسي

ضحكت أصايل ولف منيف لنهار يغني له:من اللي وقف الصوره ؟

ضحك نهار:ليته وقف الصوره يالفال الطيب

ضحكت أصايل ولفت للمسرح تغني وابتسمت من جات الكاميرا عليهم وبانت صورتهم بالشاشه وابتسم منيف يغني معها:هو اللي وحده بعيني أشوفه بينهم كامل ، هو اللي ما أبي غيره ولاني مجبر أجامل

لفت أصايل على منيف تغني وتناظره:هو اللي يلمس أعماقي

ابتسم منيف ولف يناظر المسرح وتنهدت بوسع رئتها ملاك براحه وإمتنان ورضا وشدت على كف ثنيان من وجودها مع هذي العائله اللي عطتها أكثر ما تتمنى وتحلم ، من وجود ثنيان بحياتها اللي وأخيراً عطتها شي تستحقه وتستاهله وفوق أمنياتها

وقفت وهي ماسكه كفّ ثنيان وخرجوا من المسرح وخلفهم عقاب ونوره وساري وجنى ، نهار وجاسر وأصايل ومنيف

أصايل:ابوي غلا فهد واخوها حاضرين ما انتبهت ؟

هز راسه بالنفي عقاب وهو يمشي:لا والله

نهار:ابوي تكفى خل ندور عليهم

نوره ضحكت:نهار وش هالطبع الخايس ، اثقل

ضحكت أصايل ونزلت عيونها من حست بكف منيف ورفعت عيونها لعيونه وابتسم منيف يلمس كفها وشدت على كفه وناظرتهم

وقف ثنيان وهو ماسك كف ملاك وناظرهم وابتسمت أصايل:بنتصور هنا عند صورة عبدالمجيد

نهار:من بيصورنا ؟

جاسر:اي احد قدامك

وقف عقاب بجانب نوره ولف لملاك وابتسم يرفع ذراعه على ظهرها وقربت منه وقرب ثنيان من ملاك وهو ماسك كفها ومدّ جواله نهار لشخص ومشى ووقف بجانب نوره

ووقف جاسر معهم وابتسم ساري اللي ماسكه ذراعه جنى ، وميّلت راسها أصايل بهدوء على كتف منيف تناظر الجوال

اتسعت ابتسامة ملاك لأنها بالصوره ، بالبرواز العائلي ومو لوحدها ، منيف معها يعيش نفس اللي تعيشه

حُب وعائله ودفى ورضا وعطاء وخير وحنيّه وحنان ، أب محاوط ظهرها ومبتسم للصوره وأم تدور بعيونها عشان تتأكد ان الجميع بالصوره

وزوج شاد على كفها يبيّن لها إنه يفهم فرحتها وشعورها بالصوره والمشهد البسيط اللي حظت فيه ومستحيل تنساه

اخذ جواله نهار وابتسم:برسلها عليكم بالقروب

عقاب:هاه وش عشانا الليله ؟

ساري:ابوي اذا تسمح لي انا بعزمكم بمطعم بمناسبة حمل جنى

ابتسمت جنى بفرحه وهز راسه عقاب:تستاهل جنى

مشوا لسيارتهم واخذت جوالها ملاك تناظر الصوره وثنيان يسوق وساهيه تتأمل شكلها ووجود منيف وأصايل اللي حاطه راسها على كتفه تعطيه كل الحب اللي يستحقه

تناظر ثنيان السبب الأول في وجودها هنا بالصوره ولف ثنيان يناظرها ساكته وناظر جوالها والصوره ولف للطريق ورجع ناظرها ومد كفه لكفها ولفت عليه وابتسم:انتي دايم بالصوره

ابتسمت ملاك وقفلت جوالها تشد على يده:اول صوره اتصورها وانا مبسوطه من بعد ميلادي الـ ١٥

ابتسم ثنيان ورفع كفها يبوسه وناظر الطريق ولفت ملاك للطريق

-

ضحكت نوره:زين ما قابلنا عيال التايقر بالحفل

نهار:مقبوله يا ام النهار مقبوله منك

نوره:بغيت تطيح على وجهك يوم شفت صورتها شلون لو شفتها قدامك

ثنيان ناظره وهو ياكل:ماردوا عليكم ؟

عقاب نطق:لا

ساري:غريب ليه يطول الموضوع دامه يعرفك

رفع راسه عقاب وهو ياكل:لانه يعرفني بس ما يعرف اخوك

جاسر:يمكن اكتشفت انك تحرشت بثلاثين وحده قبلها

ضحكوا وناظره نهار:ما اتحرش انا حشّم كلامك ، انا بس الاحق البنات

ضحكت ملاك وهي تاكل وابتسم منيف:الله يستر لا تطلع متحرش فيها من قبل بس نسيت من كثرتهم

ضحكت أصايل ولفت تاكل

ناظرهم عقاب وهو ياكل:ما حددتوا الزواج ؟

رفع عيونه ثنيان على منيف وأصايل وناظره منيف من فهم انه يقصدهم ولف لأصايل اللي هزت راسها بالنفي

نوره:حددوا خلونا نجهز من بدري

منيف ناظر أصايل:وش رايك ؟

أصايل ناظرت ثنيان ثواني وناظرتها ملاك وفهمت انها الى الان تعيش خوف من منيف واخذت نفس ملاك:عندكم وقت تتكلمون وتتناقشون لا تستعجلون

ناظرها منيف ورجعت تاكل ملاك

عقاب:جنى شلون اهلك ؟

ابتسمت جنى:حمدلله بخير ومبسوطين

عقاب ابتسم:حمدلله ، رحتم شفتم وضع الجنين ؟

ساري:اي ابوي الدكتوره اللي كنا نزورها زينه ومستمرين معها

نوره:مو مصدقه لين الحين بقعد أعد هالشهور لين اشوف حفيدي وولد ساري بحضني ان شاء الله

ابتسمت جنى براحه وضحك ساري:يارب الله يبلغنا

عقاب:جاسر

لف جاسر عليه ونطق عقاب:لقيت بنت زينه واهلها معروفين وتناسبك وتناسبنا

لفت نوره:من هي ؟

عقاب:ما تعرفينهم واحد يشتغل بالمحكمه اسمه ناصر

رفعت عيونها ملاك وناظرت عقاب ولف لملاك:تعرفينه ملاك ؟

لف ثنيان على ملاك وسكتت ملاك ثواني تناظر عقاب وتتذكر ناصر ، اللي كان يروّج عملها بين الشيوخ وتعطيه فلوس مقابل مدحه لها

بلعت ريقها وعقد حاجبينه ثنيان من سكوتها وهزت راسها ملاك:اعرفه

عقاب رجع ياكل:اي عنده أخت عمرها ٢٤ تناسبك

نزلت عيونها ملاك للاكل بوجه جامد وناظرها ثنيان ورجع ياكل

نوره:اي دام تعرفهم نروح نشوفها

جاسر اخذ نفس:اللي تشوفه ابوي

حكت جبينها ملاك ورجعت ظهرها لورا ، لو رجع ينفتح الباب من جديد وطلع بوجهها ناصر وكل اللي تعرفهم ويعرفون شرّها بتنكشف كل اوراقها

لفت ملاك لعقاب بهدوء:كيف خطرت ببالك ؟

سكتوا وناظرها عقاب:شفت ناصر قريب وكانت معه ، شفته بالمستشفى كان عندي موعد وأخته دكتوره هناك

سكتت ملاك تناظره وكمل عقاب:ودامها دكتوره واخوها ناصر اعرفه قلت خيار أنسب لجاسر

جاسر:بأي مستشفى ؟

ضحكت نوره:تبي شوفه شرعيه ؟

جاسر:بعرف وضعها

عقاب:نفس المستشفى اللي سويت فيه عملية كليتي

رفعوا عيونهم نوره ونهار ومنيف وأصايل على ملاك من طاري الكليه

واخذ نفس عقاب:وجربت اسأل الدكتور عن المتبرع وما عطاني ويوم عرفت ان ناصر اخته دكتوره قلت يشوف لي

بلع ريقه ثنيان ورجعت تاكل ملاك بهدوء

ولفت نوره:وما عرفت ؟

عقاب:لا

لفت نوره تناظر ملاك وناظرت ثنيان اللي عض شفته

دق جوال نهار وطلعه ورد:هلا

عقد حاجبينه:من معي ؟ ماعرفتك ؟

رفعوا عيونهم عليه وهم ياكلون وسكت نهار ورفع عيونه لملاك وثنيان وهز راسه ووقف:ياهلا

ابتعد عنهم ولفت أصايل تناظره مبتعد عن طاولتهم ووقف عند باب المطعم

ونطق نهار:أخدمك بشي ؟

منصور ابتسم:ما تقصر بس انا اللي بخدمك بشي

عقد حاجبينه نهار:مافهمت للحين وش تبي ؟ ولد عم ملاك ومنيف وعلاقتكم ماهي زينه اصلاً ، تدق عليّ تخدمني بشي وش بيكون مثلاً ؟

منصور:أنقذ أختك من واحد نصاب

نهار:تكلم زين وحشّم عمرك

منصور:ماجبت كلام من راسي ، اخوك ثنيان معه علم وملاك تدري ، منيف هكر جوال اختك قبل يتزوجها وهددها بصورها وطلب فلوس منها

نهار:انت راعي مشاكل ونيتك خايسه مثلك ، انا اقول احشم عمرك عشان لا أردك انا مكان ما كنت

منصور ضحك:انا اقول انت بطل وولد العميد وتقدر ، بس لا تستعجل وابحث ورا الموضوع هذا

لف من ناظر أصايل جايه له وصد:لا عاد اشوف رقم جوالك

قفل جواله ووقفت أصايل عنده:مين ؟

نهار لف يناظر منيف من بعيد ولف عليها:محد مهم

أصايل:احسك انزعجت صار شي نهار ؟

نهار رفع كفه لكتفها:لا لا ارجعي

ناظرته أصايل ومشت ترجع معاه للطاوله وجلس نهار

ولف ثنيان من وصلته رساله واخذ جواله يشوف اسم طلال:ثنيان لا فضيت كلمني في تطور بموضوع اللي هدد زوجتك

عقد حاجبينه ثنيان وقفل جواله وناظرته ملاك:صار شي ؟

هز راسه بالنفي واخذ كاسته يشرب مويه وناظر ابوه اللي يدفع الحساب ووقفوا يخرجون من المطعم يتوجهون للبيت

لفت ملاك على ثنيان وهو يسوق وساهي:ليش ساكت ؟

لف ثنيان عليها وناظرها ما يدري يقولها والا ينتظر لين يعرف من طلال

وعقدت حاجبينها ملاك من سكوته ونظراته ولف لقدام يسوق:ولاشي

سكتت تناظره ولفت للطريق متأكده انه يخفي عليها شي

وقف عند البيت ونزلت معاه ملاك ولفت لمنيف اللي نزلت أصايل من سيارته

ومشت له ووقفت دخلت أصايل ولفت ملاك لمنيف:بغيت اسألك منيف

ناظرها منيف وكملت ملاك:لو ابي ارجع اراقب جوال ثنيان بيشتغل البرنامج معي ؟

منيف عقد حاجبينه:ليه ؟

ملاك:في شي يخبيه علي ابي اعرفه

منيف لف يناظر البيت ورجع ناظرها:لا تسوين هالحركات ملاك

ملاك:منيف انا لمحت اسم طلال وطلال ماسك اللي هددني بمكتبي يمكن اعترف بشي وثنيان ما بيقولي ، ابي اعرف

منيف:اكيد ثنيان بيقولك بس ينتظر وقت مناسب

ملاك:انا ماعندي وقت مناسب ، انا احسني مراقبه من كل مكان وبأي لحظه بلاقي الكلبشات بيدي

تأفف منيف بتوتر ولف يناظر البيت ورجع ناظرها:برسلك اذا وصلت البيت

هزت راسها ملاك ومشت للبيت وركب سيارته منيف وحرك

دخلت الغرفه ولف ثنيان اللي يكلم وتنحنح:طيب اكلمك بعدين

سكتت تناظره ومشت للتسريحه تفصخ عبايتها وتناظره على جواله

جلست وبدت تمسح الميك اب وحك جبينه بتوتر ثنيان وقفل جواله وعقد حاجبينه يناظر الفراغ

ناظرت انعكاسه من المرايه ونزلت عيونها لجوالها من ارسل لها منيف

دخلت وناظرت واتس اب ثنيان واسم طلال ودخلت المحادثه تقرأ رسالته الوحيده والاخيره:ثنيان لا فضيت كلمني في تطور بموضوع اللي هدد زوجتك

رفعت عيونها على ثنيان وقفلت جوالها:ثنيان

لف عليها وناظرته ملاك بهدوء:بوشو تهوجس ؟

ثنيان:ولاشي شغل

ملاك:دوامك يعني ؟

ثنيان هز راسه ووقف يفصخ ثوبه:لا تهتمين

سكتت ملاك وتقدم ثنيان لها وابتسم وانحنى يبوس خدها وناظرته ملاك وابتعد ثنيان وابتسم ومشى للحمام

ناظرته لين دخل وهزت راسها وهمست:لا تسوين شي بدون علمي وانتي بتسوي شي بدون علمي

'

وقف نهار قدام البوتيك وفتح شباكه يناظره مفتوح وابتسم ورفع عيونه لصورة التايقر على محلها

ولف يمينه يناظر العمال اللي بالمحل يشتغلون ووقف سيارته ونزل

تقدم للبوتيك ودخل ولفت غلا وناظرته وابتسم نهار ونزل نظارته الشمسيه:سلام عليكم

تقدمت غلا له تناظره:نعم ؟

نهار ناظر البوتيك ورجع ناظرها:جاي أبشرك إن المكان اللي مقابلك إنباع

عقدت حاجبينها غلا ولفت تناظر المحل اللي قدامها ورجعت ناظرته:بوشو يهمني ؟

نهار ابتسم:أنا أشتريته

رفعت حاجبها وكمل نهار:بفتح كوفي يعني عشان كل يوم قبل تبدين نهارك تاخذين كوفي من نهار

سكتت غلا تناظره وابتسم نهار من نظراتها وهمست:اطلع برا

ضحك نهار وعض شفته وكملت غلا:ما يهمني اي شي تسويه

نهار:افا هذا وانا داق باب بيتك

غلا:ليش خطبتني ؟

نهار تقدم لها:لأنك حلوه وذكيه وثقيله وتتجاهليني ، تايبي المفضل

غلا سكتت ثواني تناظره:اطلع برا

ابتسم نهار:بيرفكت

صدت عنه غلا وخرج من المحل ورجع يلبس نظارته الشمسيه وابتسم

ناظر محله قدام عيونه يشتغلون فيه ولف من وقفت سياره خلف سيارته وتقدم بيركب سيارته ولف من ناداه:نهار

عقد حاجبينه من شاف منصور وابتسم منصور وتقدم له

قفل بابه بحده نهار وتقدم لمنصور:شتبي ؟

منصور:والله اني ابي انفعك وانفع اختك ليه تظلمني ؟

ناظره بحده نهار:اذلف احسن لك تفهم ؟

منصور هز راسه:افهم وافهم انت بعد ، منيف لعب عليكم كلكم هكر سناب اختك بفتره وهي بلغتك على اساس انه سناب صديقتها

عقد حاجيينه نهار وكمل منصور:كانت هي اللي متهكر سنابها واللي هكره منيف وهددها وطلبها فلوس ، وروح اسأل ثنيان وملاك

نهار تقدم ومسك منصور من ياقته بقوه:ادفنك هنا

منصور بعد يد نهار:بدري على موتي روح فتش ورا منيف ، فالك الطيب

ناظره بحده نهار ومشى منصور يركب وعقد حاجبينه نهار وطلع جواله ومشى يركب السياره

ناظرته غلا من محلها لين اختفى وابتسمت وهمست:قَدع

-

تثاوب منيف بنعاس ولف لجواله اللي يدق واخذه:هلا نهار

نهار:وينك ؟

منيف:بالبيت

نهار:انا عند الباب

منيف عقد حاجبينه:وشفيك ؟

نهار:ولاشي جيت اشوفك

هز راسه منيف ووقف:جايك

قفل جواله ومشى وفتح الباب وابتسم:ارحب

ابتسم نهار وتقدم:صحيتك ؟

منيف:اي

نهار:طيب جامل قول لا

منيف ضحك وجلس بالصاله:وش عندك ؟ مو مداوم ؟

نهار:لا جيت اسولف معك

منيف:طيب ارتاح بجيب جوالي واجيك

وقف منيف ودخل غرفته واخذ جواله ولف ووقف من شاف نهار يدخل الغرفه

ناظر الغرفه نهار:ما بتغير غرفتك ؟

منيف:الا اكيد وبغير اثاث كل البيت

لف نهار وناظر الكمبيوتر وتقدم له ونطق منيف:امش نجلس برا

نهار لف عليه:يشتغل ؟

اشر على الكمبيوتر وسكت منيف بإستغراب يناظر نهار

وفتحه نهار وتقدم منيف وقفله:يشتغل اي

نهار ناظره:شفيك قفلته طيب ؟

منيف:شتبي فيه ؟

سكت نهار يناظر منيف بشك وفهم منيف ان نهار يشك فيه او وصله علم وهمس:كلمك منصور ؟

ضحك نهار وابتعد وعض شفته ولف لمنيف:قولي انه يكذب

غمض عيونه يتنهد منيف وتقدم له نهار:انطق

ناظره منيف:ليش ما سألت اختك ؟

عقد حاجبينه نهار بذهول:لأني ماصدقته

بلع ريقه منيف وتقدم له نهار وناظره بحده:كلامه صحيح ؟

اخذ نفس منيف وناظر نهار:اي بس انا كلـ

طاح على الارض منيف من صفعه نهار ولف على نهار بصدمه وتقدم نهار ومسكه يصرخ بوجهه:كيف تسوي كذا بأختي ياولد الكلب ؟ كيف تهددها بصورها وانت تضحك بوجهي ؟ كيف قدرت ؟

ناظره منيف يمسك يدينه بقوه:نهار خلنا نتكلم

شده من ياقته نهار وهو باطحه بالارض:كنت اناديك الفال الطيب وانت اسوأ من دخل حياتنا ، انت لعبت في أصايل اختي وماراح اخليك تلعب فيها اكثر

ناظره منيف بدون رد وتفل بوجهه نهار وغمض عيونه منيف ووقف نهار وناظره بحده:عزاي اني ماصدقته ووثقت فيك ، تهد اختي وتوجعها ؟

جلس منيف يناظر نهار بتعب وكمل نهار يهز راسه بعتاب:اعتبرتك اخوي ياخي

تنفس بسرعه نهار من غضبه وخرج من عنده

ومسك راسه منيف بتعب وشتم ووقف واخذ جواله

عض شفته بتوتر وبلع ريقه

'

لفت من فتحت عيونها وناظرت ثنيان يلبس وجلست ورفعت شعرها وابتسم ثنيان:صباح الخير

ملاك:طالع ؟

ثنيان هز راسه ولف عليها:اي عندي شغله بخلصها وراجع ماني مطول

ملاك قامت من السرير وتقدمت له:انتظرني بجي معاك

ثنيان:وين تجين ؟

ملاك:المكان اللي بتروحه

ابتسم ثنيان:اذا رجعت نطلع سرا

مسك وجهها بيدينه وباس خدينها وناظرها وابتسم:تبين شي ؟

هزت راسها بالنفي ومشى ثنيان يخرج

مشت للحمام وغيرت ملابسها ولبست عبايتها واخذت شنطتها:نشوف ياثنيان وش السالفه

خرجت من الغرفه ونزلت مالقت احد بالصاله وطلعت

ركبت سيارتها وحركت خلف ثنيان

دق جوالها وردت عليه وهي تناظر سيارة ثنيان:هلا منيف

منيف:الاخبار سيئه ملاك

عقدت حاجبينها ملاك بخوف:وش صاير ؟

منيف؛منصور قال لنهار اني هكرت جوال أصايل وهددتها

عضت شفتها ملاك وكمل منيف:بيروح لابوه لا محاله

ملاك:بروح له بروح واحلها ومنصور بشرب دمه

منيف:روحي لنهار اتركي منصور ، منصور عندي

قفلت ملاك وغيرت طريقها ترجع وصرخت بقهر:والله لأدمرك يامنصور والله لأدمرك

وقفت بالبيت وناظرت سيارة نهار ونزلت من سيارتها ودخلت البيت

تقدمت ولا لقت احد وطلعت من سمعت صوت نهار

دخلت غرفة أصايل على صوته يصرخ:ليه ما قلتي لي ؟

بلعت ريقها أصايل وناظرت ملاك وتقدمت ملاك لنهار:نهار

لف نهار بغضب:انتي بعد ماقلتي لي ؟ ولا ثنيان قالي ؟

أصايل:نهار ما كنت ابي ابوي يدري

نهار لف عليها بحده:ليه ما يدري ليه ؟ هددك بصورك وابوي ماعنده خبر وكيف منصور الكلب يدري انك كلمتيني بوقتها وقلتي انها صديقتك مو انتي ؟

عقدت حاجبينها ملاك:منصور شدراه

لف نهار بحده:منصور هذا بحرقه مع منيف

أصايل جلست بتوتر:غصب عنه هددني هددوه نهار اجبروه

نهار:ضحك عليك

أصايل:حتى ثنيان يدري وملاك تدري ونفس اللي هدد منيف هدد جاسر وامي

صرخ بغضب نهار:ومن ابن الكلب اللي هددهم؟

غمضت عيونها ملاك ونطقت:أنا

لفت أصايل وعقد حاجبينه نهار وبلعت ريقها ملاك وناظرتهم:أنا اللي هددتهم

جمد وجه أصايل وتقدم نهار لها:كيف يعني ؟

اخذت نفس ملاك وناظرت نهار:تجلس تسمعني ؟

أصايل:ملاك شقاعده تقولين انتي ؟

لفت ملاك عليها:اقول الحقيقه

ناظرها نهار بذهول وجلست ملاك بهدوء وناظرتهم:سرقت من أمك وجاسر مليونين ومن غيرهم ١٩ مليون عشان يطلع منصور من السجن

جمد وجه أصايل وعقد حاجبينه نهار بصدمه

وكملت ملاك:وزواجي من ثنيان كان عشان أسرقه وثنيان كان عنده خبر وكنا نتحارب بالوقت اللي كنتوا تشوفونا مبسوطين

جلس نهار وهو يناظرها واخذت نفس ملاك:وتغير كل شي يوم دخلت بيتكم ، بطلت أسرق وبطلت أشوفكم اي عائله ، وجحدني منصور وجحدوني أهله وصار في أشخاص يهددوني بين فتره وفتره

مسكت راسها أصايل بصدمه وكملت ملاك وناظرت نهار:وبالنهايه بتتكلبش يديني وادفع الثمن

سكت نهار يناظرها بصدمه ونطقت أصايل:ملاك !

ملاك:معكم الحق تكرهوني وتحاربوني ، واللي سويته لا يمكن ينغفر بس ترا منيف مجبور مني أنا

أصايل:ليش تسوين كذا ؟

ملاك تنهدت:لأن ما عندي أحد يوجهني ويدافع عن اغلاطي ويوقف ورا ظهري ، لاني رميت نفسي بالنار عشان ناس ما يستاهلون وعطيت وغلط اني عطيت ، حاربت وجاهدت عشان منصور وعشان عمي وبالنهايه باعوني

لفت عليهم وكملت:لأني كت أحلم يكون عندي عقاب واغلط ويسد عن اغلاطي نفس ما تغلطون ويسد عنكم ولاني احلم يكون عندي نوره تحن علي وتقول خطاك بعيوني صواب واحلم يكون عندي نهار وأصايل وثنيان يحبني رغم سواد حياتي ، لاني أحلم إني الاقي عائله ولا لقيت ومشيت درب لوحدي وقاعده ادفع جزاته

صد نهار وناظرته ملاك:وأدري مافي شي بيغير اللي سويته وما تجرأت وقلت لكم الا لاني ابيكم تشوفون حقيقة ملاك

هزت راسها:انا بفتره من حياتي كنت شيطان مو ملاك

لف نهار عليها:جاسر يدري ؟

هزت راسها ملاك:وثنيان

أصايل عقدت حاجبينها تناظر ملاك وناظرتهم ملاك:وقريب عقاب ونوره والجميع

وقفت واخذت نفس:قريب بتاخذ حقها ملاك لان وصلت النهايه

ناظرت أصايل ونهار وميلت راسها:بس لو حصل يوم وافترقت طرقنا او مرّ اسمي بينكم تذكروا اني كنت أعزكم ونهار عندي مثل منيف

لف نهار يناظرها وناظرته بضيق ملاك:أسفه نهار

صد عنها وعقدت حاجبينها بصدمه أصايل وناظرتها ملاك:عطيتيني شي ماقدرت تعطيني اياه اللي نامت معي بغرفه وحده ، اشوفك اختي أصايل

ناظرتها أصايل بذهول ورفع عيونه نهار عليها واخذت نفس ملاك:ودام الموضوع وصل عندكم اليوم ، اليوم بيوصل لعقاب ونوره

مشت ملاك وخرجت من عندهم

-

( لا تنسون النجمه ⭐️ )

دخل ثنيان ومشى لمكتب طلال ودخل:سلام عليكم

طلال وقف:هلا ثنيان

ثنيان:وش السالفه ؟

طلال:والله مدري وش العلم بس اللي عندنا هدد زوجتك طلبني اشوفه

هز راسه ثنيان وكمل طلال:وقال يبي يشوفك انت لوحدك

عقد حاجبينه ثنيان:ليه ؟

طلال:ما ادري يمكن ييي يكركب الوضع اكثر

صد ثنيان يفكر وكمل طلال:بجيبه ونشوف وش عنده

هز راسه ثنيان وجلس وخرج طلال

عقد حاجبينه ثنيان ودقايق ودخل طلال ومعه المتهم بتهديد ملاك

ناظره ثنيان وجلس امامه مكلبش وجلس على مكتبه طلال:هذا هو عندك ثنيان قول وش عندك

لف ثنيان عليه:وش تبي ؟

ناظر ثنيان ونطق:طول موضوعي وانا هنا ولا وفى بوعده اللي حطني هنا

عقد حاجبينه ثنيان وكمل:بقولك من اللي طلب مني اهدد زوجتك

لانت ملامح ثنيان ونطق طلال:وليش ما اعترفت لي ؟ ليش تقول لثنيان ؟

لف على طلال ورجع ناظر ثنيان:لانه يعرفه

سكت ثنيان يناظره وهز راسه يناظر ثنيان أمامه:العميد عقاب بن جرّاح

جمد وجه ثنيان بصدمه وعقد حاجبينه طلال:تستهبل انت ؟

لف على طلال:لا ، العميد عقاب ماسك ملف لزوجته المحاميه يقول إنها تسرق من فتره طويله ويبي يلعب معها

لف ثنيان بصدمه على طلال ورجع ناظره:وش تقول انت ؟ وش قاعد تقول وش تخربط ؟

ناظر ثنيان:هذا الصدق واذا تبي تتأكد اعرف واحد اسمه ناصر يشتغل مع ابوك بسالفة زوجتك وهو اللي جاب زوجتك لابوك

رمش بصدمه ثنيان بوجه جامد يناظره وكمل:اسأل عن ناصر بالمحكمه وبيدلونك عليه

طلال ناظر ثنيان بذهول ونزل راسه ثنيان بصدمه يفكر ولف لطلال:خله عندك لين اشوف هذا ناصر واكلمك

هز راسه طلال:بلغني ثنيان

هز راسه ثنيان وخرج من عندهم وركب سيارته

رجفت يدينه وهو يسوق ومصدوم ويتمنى ان كل هذا كذب ، يتمنى ان الامور ما توصل لهنا ما تتعقد كذا

مسك راسه بقوه وهو يسوق وناظر رقم نهار اللي يتصل عليه ولارد

وقف عند المحكمه ونزل ومشى يدخل وتقدم للمكتب:أبي ناصر

رفع عيونه الموظف:الدور الثالث مكتبه على اليسار

مشى ثنيان وطلع مع الدرج ووقف من شاف عقاب بالممر

عقد حاجبينه بصدمه وميّل راسه يناظر عقاب يتكلم مع ناصر وهز راسه بتعب وهمس:تكفى

رفع كفه عقاب على كتف ناصر وهز راسه يتكلم معه

ونزل ثنيان بخطوات ترجف ووقف بالممر بالدور الثاني وعطاهم ظهره

ونزل عقاب مع ناصر وهز راسه ناصر:كلمني ابو راشد وقال ان منصور يركض وراهم للحين

عقاب هز راسه وهو ينزل مع الدرج:كلم منصور خلني اشوفه

جمد وجه ثنيان وتمسك بالدربزان من اختفوا عنه

ورجفت كفوفه بصدمه وحس ان الدنيا تدور فيه ولف من طلع ناصر لوحده وناظره ثنيان بحده وتقدم ومسكه من ياقته:من انت ياكلب ؟ من انت ؟

ناظره ناصر بصدمه وصرخ ثنيان:علمني من انت ؟

ناصر:وخر يدك عني

ثنيان تنفس بسرعه وشد عليه:وش يبي ابوي منك ؟

ناظره ناصر بصدمه وصرخ ثنيان:وش بينك وبين عقاب انطق

بلع ريقه ناصر ورجفت كفوف ثنيان من خوفه وهز راسه ناصر:اتركني وبعلمك كل شي بس اتركني ، الناس تمر من عندنا

ثنيان:ما يهمني احد انطق اخلص وش بينك وبين ابوي

ناصر:تعال مكتبي طيب

سكت ثنيان يناظر ناصر وفلته ومشى ناصر بتوتر ومشى خلفه ثنيان ودخلوا المكتب

ولف ثنيان على ناصر وجلس ناصر:استريح

ضرب المكتب ثنيان بغضب:ماني جاي استريح انهق علمني

ناصر:طيب ابشر

سكت ثنيان واخذ نفس ناصر:الموضوع يخص ملاك بنت مساعد

جمد وجه ثنيان وكمل ناصر:العميد عقاب يمشي ورا موضوعها وموضوع السرقه اللي يصير

رجف فك ثنيان ونطق:وش يعني ، وش يصير ، وش وش يعني

ناصر:العميد عقاب هو اللي طلب مني اجيب له ملاك بنت مساعد مو ملاك اللي جابته

سكت ثنيان يناظره وكمل ناصر:وهو اللي سدد ديّة منصور بن محمد وطلعه من السجن وهو اللي ارسل بندر وجواهر لمنصور وتعاونوا سوا

مسك راسه ثنيان وابتعد يستوعب الكلام ولف لناصر:كيف يعني ؟

ناصر:ابوك عنده خبر عن زواجك بالسرّ من جواهر من سنين وتكلم مع بندر وبندر كان عنده خبر ، كتّم على الموضوع لين ملاك هددت جواهر لانه يبيها تهدد وتسرق ويمسك عليها ممسك ، بعدها تواصل مع جواهر بعد طلاقها واخذ منها معلومات التحويل ورسموا خطه مع منصور

جلس ثنيان لانه رجوله ما تشيله وكمل ناصر:وطلب منك تتزوجها لانه يبيها تكون قريبه وقدام عيونه ، وهددها واطلق على سيارتها وقاعد يركض عشان يرعبها وتعترف له

مسك راسه ثنيان وكمل ناصر:يعني ملاك بنت مساعد ما دارت ورا ابوك ، ابوك اللي كان يدور عليها

رفع عيونه ثنيان بصدمه يناظر ناصر وهز راسه بعدم استيعاب وذهول

'

وقفت ملاك بالصاله وتاظرت نوره وساري وجنى وجاسر اللي جالسين وناظرتها نوره:ملاك ؟

بلعت ريقها ملاك ولفت من دخل عقاب وناظرها ، وقف قدامها وناظرته ملاك

وخرج نهار مع أصايل وناظروهم وناظر عيونها عقاب ، عيون الخساره التعب الهزيمه الإنكسار

عقاب همس:ملاك بنتي

عقدت حاجبينها بتعب تناظره ودخل ثنيان وتقدم بغضب ونطق:ابوي

لف عقاب عليه ولفت ملاك تناظره وتنفس ثنيان بغضب وقهر يناظرهم قدام بعض

وعقدت حاجبينها ملاك من حال ثنيان وشكله ونظراته وناظره عقاب يعتدل بوقفته

تقدم ثنيان ووقف بين ملاك وعقاب وناظر ابوه بقهر بتعب بصدمه بذهول

ووقف جاسر:وش السالفه ؟

نوره:عقاب !

لفت ملاك تناظر ثنيان وهمست:ثنيان

نزلت عيونها أصايل من دق جوال عقاب ولف عقاب عليه ورد وهو يناظر ثنيان وملاك:هلا

عقدت حاجبينها ملاك من نطق:منيف ؟

جمد وجه عقاب يسمع صوت منيف:صدمت منصور بسيارتي

تقدم ثنيان من شاف وجهه:شصاير ؟

بلع ريقه وقفلت الجوال وجلست على الكنب ووقف ساري:وش صاير احد ينطق وش فيكم اليوم انتم ؟

عقاب اخذ نفس:منيف بالقسم

ناظرته ملاك وعقدت حاجبينها وكمل عقاب:منيف صدم منصور

جمد وجه ثنيان وعقدت حاجبينها ملاك وشهقت أصايل

لف نهار بغضب وشد شعر راسه وعض شفته

رفعت عيونها ملاك لعقاب وناظر عيونها عقاب من امتلت بموج حزنها وخوفها وهمست:الا منيف

لف ثنيان لعقاب من شاف نظرات ملاك له وعقد حاجبينه بتعب لانها تستنجد فيه

هز راسه عقاب:بيطلع ، تعالي معي

قامت ملاك ومسك ذراعها ثنيان:تعالي معي أنا أخذك

ناظره عقاب وهزت راسها بتعب ملاك ومشت تخرج

لفت أصايل لنهار وبكت بخوف وتقدم لها نهار:لا تبكين

جلس جاسر وتأفف من الوضع ومسكت راسها نوره

خرج ثنيان مع ملاك وركبت يمينه وظل ثنيان ساكت يناظر سيارة عقاب خلفه وشد على كفوفه من حرقة داخله

ناظرت الطريق بجمود ملاك لين وقف ثنيان ونزلت تجرّ خطواتها

ودخلت وناظرت منيف جالس ويدينه مكلبشه ومنزل راسه ووقفت قدامه ووقف بجانبها ثنيان وهمس:منيف

رفع راسه منيف وناظر ملاك وطاحت دموع ملاك على خدينها بوجه جامد

ودخل عقاب وناظر منيف:منيف وش اللي حصل ؟

لف منيف عليه ورفع راسه:لقيته قدام عيوني وصدمته

عقاب:وينه الحين ؟ وش صار عليه ؟

منيف:بالمستشفى

تقدمت ملاك لمنيف:ما مات ؟

لف ثنيان عليها يناظرها وهز راسه بالنفي منيف وضحكت ملاك ولف عقاب عليها

وجلست قدام منيف وضحكت:حسافه ياليتك قتلته

ناظرها منيف من شكلها وضحكها وتقدم ثنيان لملاك:ملاك

رفعت عيونها ملاك على ثنيان وابتسمت:أخو ملاك وولد مساعد ، سواها

بلع ريقه منيف وضحكت ملاك ولفت لمنيف:بطل

ناظرهم عقاب ورفع عيونه ثنيان على عقاب وناظره عقاب وخرج تاركهم

جلس ثنيان واخذ نفس:ليش منيف ؟

ملاك:يستاهل

ناظرها ثنيان بتعب وهز راسه وكملت ملاك:يستاهل أي أحد يتعب عيال مساعد

ثنيان:منيف بيتورط ملاك لو مات بيتورط

ملاك ضحكت وطاحت دموعها ولفت لمنيف:أنا أختك أنا أطلعك من حبل المشنقه

ناظرها منيف وابتسمت ملاك:والله محد ياخذك مني

تنهد ثنيان ومسك راسه بتعب ونزل راسه ووقف وخرج

تلفت وناظر عقاب واقف مع العسكر وطلع جواله من جيبه يرد ولف وناظر ثنيان من بعيد وعرف ثنيان ان ابوه وصله خبر

هز راسه عقاب وهو يناظر ثنيان وصد وقفل جواله

لف ثنيان وناظر ملاك اللي جلست عند منيف

وناظرها منيف من لمست كفوفه الثنتين وجلست عند رجلينه بالارض:قولي وش صار

اخذ نفس منيف:كنت بروح أتضارب معه بس

ناظره ثنيان وكمل منيف:وشفته نازل من سيارته عند بيته وشافني وضحك ، ضحك ملاك يستفزني ضحك يحس نفسه منتصر ومنصور

ناظرته ملاك وكمل منيف:وماقدرت ، حرقني ملاك حرقني وحرقك وحرقنا كلنا ، خلاني أتعادى مع الشخص الوحيد اللي سميته صاحب وأخو

عقد حاجبينه ثنيان وكمل منيف:خلاني أصير عدو نهار وخسّرني نهار وأصايل ويبي ياخذك مني

ملاك شدت على كفوفه:محد بياخذك مني ولا بياخذني منك ، أدفع عمري كله ولا يصير لك شي منيف تسمعني ؟

هز راسه منيف ونطق ثنيان:وش صار على منصور ؟ تعرف وضعه ؟

لفت ملاك تناظر ثنيان وهز راسه بالنفي منيف:لا ما أعرف بس ما أتوقع صار له شي قوي

تنهد ثنيان بتعب وصد ووقفت ملاك ومشت له:إنت وش صاير معك ؟

ناظرها ثنيان وسكت وتقدم لهم عقاب:ملاك

لفت ملاك على عقاب وناظرهم عقاب:بروح أشوف ولد عمك بالمستشفى ونشوف وضعه بتجين ؟

ملاك هزت راسها:بجي

ثنيان:اسبقنا ، انا اخذها معي

ناظره عقاب ولف ثنيان لمنيف:بنرجع منيف

هز راسه منيف وناظرته ملاك ومشت مع ثنيان

'

تنهدت جواهر وهي تناظر منصور اللي بالسرير

محمد:والله ما أخليه أقسم بالله لياخذ جزاه

جواهر:اكيد بياخذ جزاه كيف يتجرأ يدعس منصور بالشارع ؟ وين قاعدين ؟

بندر:بياخذ جزاه مستحيل يقدر يخرج منها ، اهم شي منصور لا تتنازل

منصور عقد حاجبينه بألم ولفت عليه شادن:يوجعك شي ؟

جواهر:حمدلله جات خفيفه حمدلله بس كسر باليد مو شي أقوى

لفوا من دخلت ملاك مع عقاب وثنيان ووقف محمد وناظرهم منصور

وابتسمت ملاك من شافت منصور متجبّر ووجهه كله خدوش وجروح ووقف محمد:وش جابك هاه ؟

ضحكت ملاك بعلو صوتها ولف ثنيان يناظرها وناظرهم عقاب

وعقدت حاجبينها جواهر تناظر حال ملاك

واخذت نفس من ضحكها الهستيري ملاك وناظرت منصور وتلاشت ضحكتها ونطقت:تستاهل

محمد:انتي مجنونه ؟ انتم واخوك مجانين مستحيل تكونون طبيعيين

لفت ملاك وناظرته وابتسمت:هذا ما صنعته يديك

عقد حاجبينه محمد وضحكت ملاك وناظرت بندر وأم راشد وراشد:هطوف

وقف راشد ومسكه بندر ورفع عيونه عقاب على بندر

لفت ملاك من نطق منصور:لو يخيس اخوك سنينه كلها ما تنازلت

ملاك:تخسى ، ما جيت أطلبك تتنازل أنا أطلع أخوي بنفسي مابي منكم شي ، جيت أتشمت بس

شادن:ملاك !

ملاك لفت لشادن:انتي انكتمي مابي أسمع منك كلمه وحده عشان لا أخليك تنسدحين جنب اخوك

محمد:لا طالت وشمخت ما تقول شي ياعميد عقاب

لف ثنيان على عقاب وناظره عقاب ولف عليهم ثنيان:وش يقول العميد عقاب ؟

ملاك لفت لثنيان اللي تقدم وناظرهم:والله منيف بطل على اللي سواه زين كسر يدك ليته كسر راسه بعد

منصور:ابلع لسانك اقول

ثنيان:يالله عقبال اليد الثانيه

محمد:ياعميد عقاب خل ولدك يمسك لسانه

ثنيان:لا اطمنك العميد عقاب ما يقدر على لساني

لف ثنيان على عقاب وناظره عقاب وهو ساكت وتقدم ثنيان لملاك:يالله ملاك

ناظرتهم ملاك ومشت تخرج مع ثنيان ، مشوا سوا جنب بجنب نفس خطوات بعض وكأنهم جسد واحد ، كل واحد منهم يفوح منه رماده من حريقه

ركبت بجانب ثنيان ولفت عليه وناظرها ثنيان وهزت راسها:رجعني لمنيف

هز راسه وحرك سيارته واخذ جواله ودق وهو يناظر طريقه

ناظر رقمه عقاب ورد:شعندك ؟

ثنيان:بشوفك ونتكلم

عقاب هز راسه:تعال النادي

هز راسه ثنيان وقفل جواله ووقف ولف على ملاك:بخلص من شغله وأجيك

ملاك ناظرته وتقدم ثنيان ومسك كفوفها:أنا معك

ملاك ناظرت عيونه وهزت راسها تشوفه بخوض شي لوحده ومتأكده وتشعر بناره لكنها هي بعد تفوح نارها ومنيف بحاجتها

لفت تنزل من السياره وحرك ثنيان وتوجه للنادي ووقف يناظره فارغ ونزل من سيارته ودخل النادي

ناظر عقاب اللي واقف ويناظر الخيول اللي تلعب لوحدها بالمضمار

ووقف بجانبه ثنيان يناظر الخيول وهمس:ناديتها بنتي

لف عليه عقاب وناظره ولف ثنيان وناظر ابوه:كيف أستهنت بالعميد عقاب وتوقعته ما يعرف شي

ابتسم عقاب وكمل ثنيان:كيف قدرت تحطني معك بلعبتك ؟

عقاب:كان لازم يصير

ثنيان عقد حاجبينه:ما بسألك عن ملاك ، ببدأ معك فيني أنا

سكت عقاب يناظره وكمل ثنيان:ليش خليتني أنا أتزوجها وأدخلها بيتنا وأحطها قدام عيونك ، كيف فرطت فيني وفي قلبي ؟ ليه تحطها يميني وهي نار تحرقني ؟

عقاب:كيف فرطت في سمعتي يوم تزوجت جواهر بنت بندر ؟

عقد حاجبينه ثنيان وكمل عقاب:عرفت انك تزوجتها من قبل ما تعرف ملاك وجبت ملاك حوالينا وخليتها هي بنفسها تجبرك تطلق جواهر

ناظره ثنيان بذهول وكمل عقاب:وانا رحت لجواهر بعد طلاقها ودقيت بابها وعطيتها عناوين منصور واهله ، وأنا دفعت ديّة منصور كامله

سكت ثنيان يناظره بصدمه وكمل عقاب:ملاك ما كانت تسددها كل مليون اخذته كان ينحط بحساب اعرفه

ثنيان رمش يستوعب وكمل عقاب:وكل شي مسجل ملاك بنت مساعد وكل ريال اخذته ، دخلتها بيتي وخليتها تأمن وتستقر وتحب وتعيش

سكت ثنيان يناظره وكمل عقاب:وبعدها عاقبتها

جمد وجه ثنيان يناظر ابوه بصدمه وكمل عقاب:والحين ملاك قاعده تخسر شوي شوي ، ملاك تخاف وبتلجأ لي

ثنيان هز راسه بعدم تصديق وكمل عقاب:سويت شغلي ليه مستنكر ؟

ثنيان ناظره بغضب وصدمه:لانك دخلتني معك خليتها تدخل حياتي أنا تستقر بغرفتي انا تنام يميني انا ، خليتها تصير زوجتي وتسكن قلبي

عقاب:ضريبة زواجك من جواهر بنت بندر

ناظره بصدمه ثنيان وكمل عقاب:لكل شي ضريبه ياثنيان

ثنيان رفع صوته بجنون:وأصايل ؟ خليت أصايل تعيش نفس اللي عشته أنا ؟

عقاب:أصايل ما بتكمل مع منيف

ثنيان:إنت متى صار شغلك أهم منا ؟ متى صرنا دون أولوياتك ؟ متى صرت كذا عشان شغلك ؟ متى صارت سمعتك ما تهمك ؟ وتخاف من كلام الناس عن عايلتك ؟ متى تغير

عقاب:مشكلتك سامحتها مع انها سرقت اهلك

ثنيان صرخ:حبيتها

سكت عقاب يناظره وامتلت عيون ثنيان غضب وناظر ابوه:حبيتها وسامحتها وساعدتها وشفتها بأضعف حالاتها ، شفت ذلها وحاجتها ، شفت خوفها من تهديدك والرعب اللي عشناه سوا ، شفت ذكرياتها ويُتمها ، شفت انهزامها حوالينا عشان ماتبي تخسرك ماتبي تخسر عايلتك

عقاب ناظر ثنيان وكمل ثنيان:ملاك أنظف من اللي تدور عليه

عقاب صرخ بوجهه:مشكلتك ماتفهم ، سرقتنا وسرقت غيرنا

صرخ ثنيان:عشان عمها وعياله الكلاب ، احتاجت وضاعت واختارت غلط

عقاب سكت وكمل ثنيان:لانها لقتنا وصارت بيننا بنتك وقفت عن كل شي غلط ، كانت تبي عائله عائله بس ، تبي أب مثلك تبي أم تبي أهل

صد عقاب وكمل ثنيان بحده:ماراح تكمل اللي تسويه

لف عقاب وعقد حاجبينه:من بيردني إنت ؟

ثنيان:ياخي انت وقفت قدامها ورحبت فيها ببيتك وقلت لها ان اي انثى بحياتي تدخل بيتي بتكون اميرة زمانها ، ليش تدخلها حياتنا اذا بالنهايه بتسجنها وتعاقبها ؟

عقاب:ماراح تنسجن

عقد حاجبينه ثنيان يناظر ابوه بدون فهم من كل كلامه ومن اسئلته اللي براسه

وكمل عقاب:اخذت رخصة محاماه عشان تكذب وتسرق

مسك راسه بجنون ثنيان:كل عمرك تشتغل ورا اخس من ملاك وجرايم ما يندرى عنها ليه الحين عفست كل حياتنا بسبب ملاك ؟ ليه هالمره دخل شغلك بحياتك ؟

لف عقاب عنه يصد:مو لازم تفهم

ثنيان:وخليت منصور يسوي كل هذا لها ويتكلم عنها وبعرضها ويحرق قلبها ؟ وخليت شادن تاخذ جاسر ويرعبون ملاك وهي ببيتها ؟ انت متى صرت كذا ؟

عقاب اخذ نفس بغضب:ثنيان لا تدخل بالموضوع هذا

ثنيان تقدم من عقاب وناظره:ماراح تقدر تتخلص من ملاك مستحيل تنتصر على ملاك

ضحك ثنيان وهز راسه:ملاك انتصرت عليك من قبل تنتصر عليها اصلاً

عقد حاجبينه عقاب وتقدم ثنيان وهمس:ناديتها بنتي وأعتبرتك أبوها ، ضحت لعمها وخذلها وضحت لولد عمها وباعها وضحت بصحتها وخسرت

سكت عقاب وهز راسه ثنيان:باعت صحتها عشانك

عقد حاجبينه عقاب واشر ثنيان على جسده:ملاك داخلك داخل جسمك مع روحك

جمد وجه عقاب وابتسم ثنيان:كليتها داخلك هذي اللي تجري ورا طيحتها

ضحك ثنيان من شاف ردة فعل عقاب وصد ومسك راسه بصدمه ولف لأبوه:كيف قدرت تسوي فيها كذا ؟ كيف قدرت ؟ شافتك أبوها خاف الله في نفسك

سكت عقاب بصدمه وكمل ثنيان:باعت صحتها عشانك طاحت عشان تقوم انت ، عشان تقوم وتهدّها انت

صرخ ثنيان يأشر عليه:عشان تهدني أنا وتهد أصايل وتهدنا كلنا

بلع ريقه عقاب بصدمه وكمل ثنيان بحرقه:لو تنتهي ملاك بتنتهي عائلتك كلها

ناظره عقاب وهز راسه ثنيان بتعب وخرج من عند ابوه

ركب سيارته ونزل راسه من حس إن وده يبكي ، وده يحلق شاربه اللي يمنعه ويبكي ، يبكي من خسارته وخسارة ملاك وصدمته في أبوه

ليته كان أي شخص الا أبوه ، الا عقاب

كل ما يذكره بجانب ملاك وكيف تعامل معها ودخلها بينهم من اول يوم وصافح كفها ورحب فيها ، وقف معها وطلبه يرجعها مرتين لحياته عشان يكمل لعبه مع ملاك ويرعبها

مات وده ينتصر على ملاك ويهزم شرّها بس الحقيقه خير ملاك انتصر عليه

خايف يتكلم معها ويفضح كل شي والناس تدري بعلته ، وخايف يسكت وينجرح والنار تاكل مهجته

'

مسكت راسها من قوة صداعها وهي تناظر لابتوبها ورفعت عيونها من دخل ثنيان وطاحت عيونه بعيونها وظل واقف محله

ناظرت عيونه وحاله وتقدم بعد ثواني طويله ومشى لها

جلس على السرير وشال لابتوبها وحط راسه على فخوذها وغمض عيونه وناظرته ملاك وهمست:مرتين نمت فيها بحضني ، مره وأبوك تعبان ومره الحين ، وش صاير ؟

تنهد ثنيان وفتح عيونه يناظرها:وش بتسوين مع منيف ؟

ملاك:بطلعه

ثنيان جلس وناظرها من قريب:كيف بتطلعينه ؟

ملاك اخذت نفس وصدت بتعب ومسك كفوفها ثنيان:يبون يطيحونك ما يدرون انك ما تطيحين

لفت ملاك عليه:أطيح ، وطيحتي سببها منيف بس الا منيف ثنيان الا منيف

بلع ريقه ثنيان يناظر حالها وصد ومسك راسه ولف عليها:بشوف ابوي واجيك

ناظرته ووقف ثنيان وخرج اخذت نفس ملاك ووقفت بتعب ومشت للشباك ونزلت عيونها تناظر نهار اللي قاعد على جواله لوحده

بلعت ريقها من تذكرت نظراته وذهوله منها وسكوته واخذت جوالها ونزلت

مامرت من عند الصاله وغادرتها تخرج برا ومشت لين عند نهار ورفع عيونه نهار وناظرها وعدل جلسته يصد

جلست وناظرته صاد:نهار

قفل جواله ولف عليها بجمود يناظرها

ملاك:تدري إني أعزك زي منيف ولا ودي تتغير علاقتنا ببعض حتى لو كنت انا السبب وظروفي السبب

مارد عليها نهار وضمت كفوفها ببعضها ملاك ونزلت عيونها:اللي بيوم خلاني اتراجع عن اللي اسويه وافوق واصحصح ، هو إنت

رفعت عيونها عليه وكملت:وأصايل وأبوك وأمك وثنيان ، وجودي بينكم كان أول سبايب الخير

اخذت نفس تمنع غصتها ونزلت عيونها:كان حلم من أحلام حياتي إني أعيش مع عائله ، أجرب شعور أم تحن عليّ وأب يسد ثغرات اخطائي ، أخت تكتم أسراري وأخوان يسندوني

سكت نهار يناظر رجفة يدينها ورفعت عيونها ملاك عليه وابتسمت:عيد ميلادي بينكم كان أفضل عيد ميلاد بحياتي بعد موت أهلي

هزت راسها بالنفي:ماعمري ببيت عمي احتفلت بميلادي او حتى احد تذكره ، وانا الوحيده اللي كنت احتفل بأعياد ميلادهم وأحاول أكون بينهم بس

رفعت كتفها بتعب:ما أعتبروني وحده منهم ، حتى يوم دخلت رجليني بالظلام والشرّ عشان منصور ماشافوه شي ، قاعدين يحاربوني عشاني حاربت نفسي اكون بنتهم

تنهدت ملاك ورفعت عيونها لنهار:وانا مو زعلانه على زعلك وأتفهمك بس ألوم نفسي وماضي حياتي لأني دخلت حياتكم بنيّه مو زينه

صد نهار عنها وكملت ملاك:ولو حصل بيوم وطلعت من بيتكم او انتهت علاقتي فيكم ! صدقني نهار مستحيل اقطعكم ولو بيوم احتجتني بشي بتلاقيني

نهار ناظرها وابتسمت له:جمايلكم عليّ كثيره وثنيان أخوك لو يطلب روحي ما بخلت عليه

سكت نهار واخذت نفس ملاك:مابي اضايقك وانت لوحدك بس جيت اقولك ان حتى منيف ضحيتي ومنيف انطف من اللي خليته يسويه ، ومنيف طول عمره بدون أصحاب وكان يلزم البيت وما يطلع كثير ، انت الشخص الوحيد اللي دخل حياة منيف وخلاه يشوف الدنيا بعيد عن الظلام اللي كنت فيه ، منيف يعزك نهار وصدقني ماهي نيّته كانت نيّتي انا

صد نهار بإنزعاج وبلعت ريقها ملاك تسمع اللارد ووقفت تتركه وتدخل البيت وصد للفراغ نهار

-

نزل و مشى ثنيان وفتح باب المكتب وناظره عقاب ودخل وقفل الباب وتقدم له:بيطلع منيف

عقاب:ليه ما عطيتني خبر عن تبرعها ؟

ابتسم ثنيان:حسيت بتأنيب ضمير ؟ والا نشبت ما تقدر الحين تسجنها لانك مديون لها

ضرب مكتبه عقاب بقوه ووقف:تكلم زين ثنيان ، تكلم واحشم نفسك

ناظره ثنيان وهو يتنفس بسرعه بقهر وناظره عقاب بحده:ليه ما عندي خبر عنها ؟

ثنيان:لانها ما عطت احد خبر سوت العمليه ورجعت البيت وتحملت كلام امي وكلام اخواني وسكتت ، انا اكتشفت انها تبرعت

سكت عقاب يناظره وكمل ثنيان:والحين دام عليك دين بتطلع منيف ، وبتروح لمنصور اللي سددت له الديّه وعفس حياتنا كلنا وبتخليه يتنازل

عقاب:ماراح اتدخل

ثنيان:بتخليه ينسجن يعني ؟

جلس عقاب على مكتبه وتقدم ثنيان بجنون يناظر ابوه:بتكمل تلعب مع ملاك ؟

لف عقاب بحده:سرقت اهلك وسرقت غيرنا

ثنيان ناظره بعدم تصديق وكمل عقاب:لا تضغط علي وتتكلم معي بالموضوع هذا تفهم ؟

لف ثنيان من دق الباب ودخلت ملاك وناظرتهم

جمد وجه ثنيان يناظرها وسكت عقاب ينتظرها تتكلم

وتقدمت ملاك بهدوء وناظرت عقاب وامتلت عيونها موج وبلع ريقه عقاب يناظرها وهمست:تساعدني ؟

بكت وهي تناظر عقاب ولف ثنيان لابوه وصد بقهر

وعضت شفتها ملاك:نفس ما تساعد عيالك وتطلعهم من مشاكلهم

تقدمت لعقاب اللي يناظرها ومسحت دموعها:منيف لا يصير له شي

لف ثنيان عليها ونطق:ملـ

قاطعه عقاب من رفع كفه:اطلع ثنيان

ناظره ثنيان بصدمه ووقف عقاب وناظره:اطلع

ثنيان:ماني طالع

ناظرتهم ملاك ولف عقاب لملاك ومشى لها ومسك كتوفها وهز راسه:بطلعه

ملاك:بتقدر ؟

هز راسه عقاب:بس لا تشيلين هم بحلها أنا

عقد حاجبينه ثنيان يناظره وبكت ملاك وحضنته ورفع عيونه عقاب على ثنيان وصد ثنيان وهو يرجف من غضبه وقهره

كانت لأول مره تلجأ لأحد ولأول مره تضعف وتحس بحاجه لعقاب ووجوده معهم نفس ماكان موجود بكل طيحات عياله

لف ثنيان بقهر ومسك ذراع ملاك يسحبها من حضن أبوه وحضنها وناظر عقاب اللي واقف

وشدت عليه ملاك وهي تبكي ومسح على ظهرها ثنيان:أنا موجود ، أنا معك

بعدت ملاك عنه ومسك وجهها ثنيان ومسح دموعها:ما انتي لوحدك

ناظرت عيونه ملاك تلمس حنيّته وهزت راسها ورفع عيونه ثنيان لابوه ومشى معها يخرج

جلس عقاب على المكتب ومسك راسه بتعب تغيرت كل خططه فجأه وتغير حال ملاك اللي عرفها بأول جيتها

نزل راسه لجواله ودور رقم محمد واتصل عليه ورد محمد:هلا عميد عقاب يالله حيّه

عقاب:تجيب ولدك وتجيني بكره بيتي

محمد:ابشر بس ملـ

قاطعه عقاب:بتجي ونتكلم

محمد:ابشر طال عمرك ابشر

قفل عقاب وتأفف بغضب

'

دقت باب الغرفه ولفت ملاك اللي تبكي ومسحت دموعها وناظرت ثنيان وقامت من حضنه

وقام ثنيان بتعب ومشى وفتح الباب وناظر أصايل وناظرته بخوف

واخذ نفس ونطق:ادخلي

دخلت أصايل وناظرت ملاك اللي جالسه بالسرير وباين عليها تبكي وبلعت ريقها وتقدمت:صار شي جديد ؟

ناظرتها ملاك وبكت بتعب لأنها ما توقعت تجي تسألها أبد وعضت شفتها أصايل بتعب ومشت وحضنت ملاك

بكت ملاك وهي حاضنه أصايل وتنهدت أصايل:لا تبكين أبوي أكيد بيحلها

ملاك:جيتيني بعد ما عرفتيني

ابتعدت أصايل وناظرتها ملاك وهزت راسها بلوم

أصايل:مو وقته هذا الكلام منيف راسه بمصيبه

ثنيان تقدم:بيطلع

لفت أصايل عليه:كلمت أبوي ؟ قال شي ؟

ثنيان اخذ نفس من طاريه:اي بيحلها

أصايل هزت راسها وناظرت ملاك:بتنحل

هزت راسها ملاك:ان شاء الله

وقفت أصايل ومشت لثنيان ومسكت كفه:اذا صار شي علمني

هز راسه ثنيان ومشت أصايل وخرجت واخذ نفس وقفل الباب ومشى لملاك

ناظرته ملاك بتعب:جاتني وانا كنت سبب بيوم في حزنها

ثنيان:خلاص ملاك صار اللي صار

ملاك ناظرته وجلس ثنيان قدامها وهزت راسها:انا شخص سيئ

ثنيان مسك راسها وحضنها وحضنته ونطق ثنيان:كنتي بالطريق الغلط بس ، انتي مو شخص سيئ انتي بس اخترتي غلط

ملاك:وقاعده أدفع الثمن غالي

ثنيان غمض عيونه بتعب وشدت عليه ملاك تحس بتعبه منها ومن حياتها ومن كل المشاكل اللي يعيشونها

'

دخل نهار المجلس وناظر محمد ومنصور وعقد حاجبينه بحده ونطق عقاب:ناد ثنيان وملاك اذا هم بالبيت يانهار

ناظره منصور اللي ماسك جبيرته ولف نهار على ابوه وهز راسه عقاب ومشى نهار داخل وهمس:كلب ابن كلب

مشى وناظر ثنيان اللي داخل البيت ومعه ملاك ولف عليه وتقدم له:ثنيان

ناظره ثنيان ووقفت ملاك وناظرها نهار وبلعت ريقها ملاك ولف لثنيان:ابوي يبيك

ثنيان عقد حاجبينه:من داخل ؟

نهار ناظر ملاك ولف لثنيان بغضب:منصور وابوه الكلب

عقدت حاجبينها ملاك ولف ثنيان بصدمه ولف لملاك:لا تجين انا بشوفهم

مشى ودخل المجلس وشدت على قبضة يدها ملاك ولف نهار عليها وناظرته ومشت تطلع فوق

غمض عيونه بقوه نهار بقهر ومشى خلفها وطلع لغرفته

دخلت ملاك وحطت شنطتها وهزت راسها بوعيد وفتحت الباب بتنزل لهم وناظرت نهار اللي عند الباب وعقدت حاجبينها من وقوفه

واخذ نفس نهار ومد كفه وجمد وجهها من ناظرت الفرد ورفعت عيونها عليه بصدمه

ونطق نهار:فاضي بس حطيه بين عيونه

لانت ملامح ملاك من وجود نهار وابتسم نهار لها وابتسمت له واخذت الفرد ومشت ومشى خلفها نهار

اخذت نفس وهي ماسكه الفرد بيدها ومشت بوجه جامد ودخلت المجلس ولفوا لها وناظرها ثنيان اللي واقف وكان يتكلم وسكت

وناظرها منصور وتقدمت تقطع كل المسافه وعقد حاجبينه ثنيان يشوفها تمشي لمنصور وجمد وجهه

من رفعت المسدس ونشف الدم بعروق منصور من حطته على جبينه ووقف محمد يصرخ:ملاك

وقف عقاب بصدمه وابتسم نهار اللي واقف من بعيد يناظرهم

ناظرته ملاك بجمود وبلع ريقه منصور يشوف الفرد على جبينه وهمس:ملاك

ماردت ملاك وتقدم ثنيان:ملاك ملاك شيليه ملاك

ماجاوبته ولف ثنيان وناظر نهار وعقد حاجبينه يشوف ابتسامته

وصرخ محمد:ياعميد عقاب سو شي تكفى تصرف مع المجنونه هذي

عقاب:ملاك شيلي المسدس من يدك

ماردت عليهم ملاك وبلع ريقه منصور برعب ووقف جاسر بصدمه يناظرهم

ميّلت راسها ملاك تناظر وجه منصور وابتسمت:تحط راسك براسي ؟

منصور:ملاك شيلي المسدس

ملاك ضغطت على جبينه بقوه وغمض عيونه برعب وصرخ محمد:نزلي المسدس

تقدم عقاب يحذرها وسكت ثنيان اللي يناظر نهار ووقوفه وراحته ولف لملاك:فجري راسه ملاك

لف عقاب بصدمه وناظره محمد:وش تقول انت ؟

ثنيان اخذ نفس وجلس وناظرهم:وش اقول ؟ اقول لها تفجر راسه وننتهي منه ومن حركاته وابشرك ما بيصير لها شي لان العميد عقاب يسدد اي ديه

لف عقاب يناظر ثنيان بذهول وجمد وجه محمد

فتح عيونه منصور يناظر ملاك ونطقت ملاك:منيف بيطلع

بلع ريقه منصور وهزت راسها ملاك:والحين

منصور هز راسه:طيب بس شيلي المسدس ملاك

ملاك:زي ما دعسك منيف انا اقدر افجر راسك ، عيال مساعد مجانين

ضحكت وناظرها محمد برعب ولفت على محمد وابتسمت وجمد وجه محمد:انتي صاحيه ؟

ملاك:ليه ؟ مو انا تربيتك ؟

محمد:شيلي المسدس ملاك شيليه

ملاك:بطلت اكون شيطان ؟

عقاب رفع صوته بحده:ملاك

بلعت ريقها من سمعت صوته ولفت لمنصور تناظره وهزت راسها له بتهديد ونزلت المسدس وتقدم عقاب يسحبه بقوه منها

وناظرتهم ملاك وتنفس منصور برعب وابتسم ثنيان

فتح المسدس عقاب وشافه فاضي ولف لنهار اللي حاط يدينه بجيوبه مبتسم وناظر ثنيان اللي يضحك وهو جالس

ونطقت ملاك؛منيف بيطلع

محمد:يطلع يطلع بس اتركينا بحالنا

لفت ملاك تناظر عقاب ومشت تتركهم وتخرج من المجلس

-

واقفه عند السياره وتنتظره يخرج ورفعت عيونها من شافته طالع مع ثنيان ومشى لها منيف وابتسمت له:قلت لك ماراح أخليك

تقدم منيف يحضنها ورفعت عيونها ملاك تناظر ثنيان اللي واقف وبكت وهي تتأمل وجوده ووقوفه معها وتعبه من حياتها

ابتعدت عن منيف ومسحت دموعها وضحكت:حمدلله على السلامه

هز راسه بضيق منيف وتقدم ثنيان:اركب منيف

فتح الباب وركب وركبت بالخلف ملاك وشغل سيارته ثنيان وحرك

لف منيف على ثنيان:كيف تنازل ؟

ابتسم ثنيان:طلع له شيطان رافع مسدس وهدده

ابتسمت ملاك ولف ثنيان لمنيف:ابوي تدخل

لف منيف لقدام وهو ساكت وناظر يدينه اللي كانت مكلبشه وعقد حاجبينه بخوف وناظرته ملاك تتأمل نظراته لكفوفه وتفهمه

عقدت حاجبينها من حال منيف واللي عاشه بسببها وصدت تناظر الطريق

وقف ثنيان عند البيت وناظر سيارة حمدان وعقد حاجبينه ونزلوا

تقدم ثنيان لحمدان:حمدان

لف حمدان عليه ووقف منيف وملاك ونطق ثنيان:مين داخل ؟

حمدان:أصايل

جمد وجه منيف ولفت ملاك عليه ولف ثنيان يناظرهم ومشى منيف يدخل ودخلوا معاه ثنيان وملاك

ارتبكت من سمعت بدخولهم ووقفت ولفت عليهم

وقف منيف قدامها وناظرته بعيون كلها ملامه وعتاب وعقد حاجبينه بضيق منيف

ودخلت ملاك:أصايل

لفت أصايل عليها وحطت المفتاح على الطاوله:اخذته من نهار كان عنده نسخه

دخل ثنيان وجلس بالصاله وسكت وناظرتهم ملاك

واخذت نفس أصايل وناظرت منيف:الحمدلله على السلامه

سكت منيف وتقدم لها ورمشت بهدوء أصايل ولفت تناظر ثنيان اللي جالس:انت قلت لي انك دايم بتوقف معاي وما بتبدي أحد عليّ

هز راسه ثنيان:وللحين

هزت راسها أصايل ولفت لمنيف ومسكت دبلتها بيدها وناظر دبلتها منيف يترقب اللي يحسّ فيه

واخذت نفس أصايل وناظرت دبلتها وفصختها وحطتها على الطاوله ولانت ملامح ملاك

وبلعت ريقها أصايل تخفي ربكة صوتها:ما ينفع نكمل سوا

ناظرها منيف بهدوء وتنهد ثنيان بتعب وناظرته أصايل بضيق:ضاعت فرصتك الأخيره

هز راسه منيف ونزل عيونه ولفت أصايل تناظر ملاك واخذت شنطتها وخرجت من عندهم

رفعت عيونها ملاك لمنيف وعضت شفتها ما تبي تبكي بس كان شكل منيف ووقوفه وهو هادي يوجعها

تقدم منيف واخذ المفتاح والدبله ومشى يدخل غرفته

ولف ثنيان لملاك وابتسمت له ملاك:بسببي أنا

تنهد ثنيان بتعب وصدت ملاك ورجفت كفوفها من مشاعرها اللي تشعر فيها وحريق صدرها وريحة رمادها وصوت احتراقها

'

ركبت السياره أصايل وبكت اول ماقفلت بابها وركب حمدان وحرك

وغطت وجهها أصايل تبكي خوف من منيف اللي كل مالها تشوف جانب أسود من حياته

غلطته الأولى وغلطته الثانيه ، كيف قدر يخاطر ويصدم منصور ويدخل سجن بسبب جريمه كان ممكن تصير

مسحت دموعها وهي ترجف واخذت جوالها وعضت شفتها من شافت خلفيتها كفوفهم بعقد قرانهم ودبلهم بأصابعهم

كيف كانت الحياه وقتها ورديه ونظرتها لمنيف غير

فتحت الصور تناظر صورتها معاه باليخت مع ثنيان وملاك وتشوف فيديوهات بحفلة عبدالمجيد يغنون سوا ويغني لها ويتباهى بحبها

قفلت جوالها تبكي وتتذكره وتتذكر اختلاف حالهم الان

وقفت سيارة حمدان وناظرت سيارة نهار اللي تشتغل وفاتح بابه يستعد للخروج

ونزلت من السياره:نهار

لف نهار اللي بيقفل باب سيارته وعقد حاجبينه واقدم له وهي تبكي:نهار

نزل من السياره بخوف:أصايل وشفيك ؟

حضنته وعقد حاجبينه:بنت لا تخوفيني وش فيك ؟

أصايل بكت بحضنه:ما عاد أبي أكمل معاه

سكت نهار وكملت أصايل:أبي أتركه

لانت ملامح نهار بضيق ومسح على ظهرها وبكت أصايل:خايفه منه نهار

نهار:أنا معك باللي تبينه لا تخافين

ابتعدت عنه أصايل وهي تبكي ومسح دموعها نهار:تعالي معي لا تدخلين البيت كذا

هزت راسها ومشت تركب معاه وركب نهار وتنهد وحرك سيارته

اخذ جواله من دق وناظر اسم ثنيان ورد:هلا

ثنيان:نهار وينك ؟

نهار:برا

ثنيان:اذا يمديك ارجع شوف أصايل

نهار ناظر أصايل وناظر الطريق:معي

سكت ثنيان ثواني وتنهد:طيب زين

قفل من نهار ولف يدخل البيت وناظر ملاك بالصاله جالسه وتناظر الفراغ

وجلس جنبها ولفت عليه:مابغيت يصير كذا بمنيف ابد

ثنيان مسح على ظهرها:خيره

هزت راسها بالنفي بتعب:ماراح يحب أحد قد ما حبها

سكت ثنيان وصدت ملاك ولفت لثنيان وحضنت ذراعه:اذا بترجع ارجع انا بنام عند منيف

ثنيان هز راسه ورفعت ذراعينها تحضنه ملاك وغمضت عيونها براحه من حضنه

وشد عليها ثنيان وغمض عيونه بخوف من فكرة عقاب اللي يعاقبها وطول الفتره كان كابوسها

ابتعدت عنه ورفعت اصابعها لدقنه:أسفه ثنيان

عقد حاجبينها يناظرها من قريب وكملت ملاك:أسفه

ثنيان رفع كفها لشعرها:هذي ماهي حياتك هذي حياتنا سوا لا تتأسفين وكأن الموضوع يعنيك لوحدك

ابتسمت بهدوء لان ثنيان ما زال يهوّن عليها ويكفّر خطاياها وابتعدت عنه ووقف وناظرها:اذا احتجتي شي كلميني

هزت راسها له وانحنى يبوس جبينها ومسكت كفه بقوه وابتعد عنها وناظرته وخرج

غمضت عيونها بتعب ولفت تناظت غرفة منيف ووقفت

مشت وفتحت باب غرفته وناظرته جالس على كرسي مكتبه وساهي وتقدمت له وناظرت دبلة أصايل بين كفوفها يناظرها وبلعت ريقها ورفعت كفها لكتفه تشد عليه

وناظر الدبله بهدوء منيف وحطها على مكتبه ووقف:بنام انا

ناظرته ملاك يتصدد بعيونه عنها ومشى للحمام ولفت تناظر دبلة أصايل وعضت شفتها تغمض عيونها وخرجت تاركه منيف

انسدحت على الكنبه حست بالضيق ياكل روحها ، وصوت الوحده يزعجها ويوترها

جلست وضمت رجلينها تناظر الصاله كل الأفكار السئيه داهمتها وأرعبتها ، عدم وحود ثنيان حوالينها زادها خوف ورعب

ولفت تناظر البيت وهمست:ثنيان

-

( لا تنسون النجمه ⭐️ )

بكت بخوف من مستقبلها اللي تخاف ويرعبها واخذت جوالها ولبست عبايتها وخرجت من البيت

مشت بالحيّ وهي تبكي بخوف وتناظر خطواتها ورجفتها لين طلعت للشارع العام

ووقفت تاكسي وركبت وصلها لين بيت عقاب ودفعت له فلوس ونزلت

دخلت البيت وعضت شفتها وبكت بخوف انها ممكن بيوم تغادر هذا البيت للأبد وما بتقدر يوم تركض وتفتح بابه وتدخل

مشت ودخلت البيت تسمع هدوء المكان من الوقت المتأخر

وطلعت لغرفتهم وفتحت الباب ولف ثنيان اللي جالس على السرير ويهوجس لوحده وعقد حاجبينه بصدمه من وجود ملاك وهمس:ملاك

بكت من شافته وتقدمت له ووقف وحضنته ملاك وجمد وجهها برعب:وش فيك ؟ صاير شي ؟

غمضت عيونها وهي بحضنه:لا تخليني تكفى

هز راسه ومسح على ظهرها:ماخليتك ولا بخليك

شدت عليه تحضنه وتنهد ثنيان:قالك شي منيف ؟

هزت راسها بالنفي وابتعد عنها ثنيان:كيف جيتي ؟

ناظرته ملاك ورفعت كفها لخده:ثنيان

ناظر خوفها ونظراتها ورجفة يدينها وتقدم له:اوششش اهدي ليه خايفه ؟

بلعت ريقها وتقدم لها ثنيان وباس جبينها ورجع يحضنها:صار لك شي ؟

هزت راسها بالنفي وجلس ثنيان وجلست معه ملاك وابتعد ثنيان عنها وفصخ حجابها:تعالي نامي جنبي

ملاك ناظرته:ثنيان

لف عليها يناظرها واخذت نفس ملاك:بقول لأبوك وأمك كل شي

سكت ثنيان وناظرته بتعب ملاك:خلاص تعبت

بلع ريقه ثنيان وكملت ملاك:توقف جنبي ؟

ثنيان:انا جنبك دايم بس اتركي هذا الموضوع لشوي

ملاك:ليش ؟

ثنيان:الحين سالفة أصايل ومنيف بتشغلهم

ملاك:تكلمت مع أصايل ؟

ثنيان:لا رحت لها بس لقيتها نايمه

ملاك هزت راسها:ما بترجع عن قراراها ؟

تنهد ثنيان وهز راسه:ما ادري

صدت ملاك بتعب ورجع ظهره للخلف ثنيان يناظر حالها وهو يفكر ولفت له ملاك وتقدمت تنسدح بحضنه ورفع كفه على شعرها

غمضت عيونها بطمأنينه لوجوده ولحضنه ورفعت راسها لعنقه تستريح

نزل عيونه ثنيان يناظرها في حضنه يرتخي جسمها براحه

'

قامت من نومها ولفت تلمس بيدها السرير وفتحت عيونها ما لقته بجانبها

عقدت حاجبينها وهمست:ثنيان

لفت لجوالها وناظرت الساعه وفزت جلست ورفعت شعرها ودقت على منيف ووقفت

فتحت الدولاب واخذت منشفتها وروبها ورد منيف:هلا

ملاك:انت بخير ؟

منيف:اي

ملاك سكتت ثواني:نمت منيف بس الحين بغير ملابسي واجيك

منيف عقد حاجبينه:ليه تجين ؟ مافيني شي

ملاك هزت راسها:عارفه بس بخاطري اشوفك

منيف:براحتك

قفلت جوالها ودخلت الحمام واخذت شاور وغيرت ملابسها وخرجت

جففت شعرها واخذت عبايتها وطلعت

نزلت تحت وناظرتهم جالسين وابتسمت نوره:هلا ملاك

ناظرتها ملاك وابتسمت بهدوء:شلونك خالتي؟

نوره:بخير من مده ماشفتك ، شلون منيف ؟

لفت ملاك تناظر أصايل اللي تناظرها ولفت لنوره:بخير

لفت لثنيان ومشت له وجلست بجانبه ولف ثنيان يناظر عقاب اللي يناظر ملاك

لفت ملاك وناظرت نهار وأصايل ورجعت صدت بهدوء

دق جوال عقاب وطلعه من جيبه يسمع الهدوء اللي بالصاله

ورد:ارحب ابو راكان

لف نهار وجمد وجهه وابتسم عقاب:الحمدلله نسأل عن علومكم ، كيف صحتك ؟ عساك بخير

نوره ابتسمت ولفت لنهار:حاسه انها رفضت

نهار:لا يا أمي تكفين

هز راسه عقاب وهو يناظر نهار:النصيب يا ابو راكان

لف ثنيان على نهار وعقد حاجبينه بخوف نهار

عقاب:الله يكتب اللي فيه الخير بيننا تواصل ان شاء الله

نوره ناظرت عقاب وقفل عقاب وناظر نهار بهدوء

نوره:تكفى عقاب لا توتر الولد وش قالوا ؟

عقاب:ما يبونه

جمد وجه نهار وناظرته بصدمه أصايل:منجدك ابوي ؟

ثنيان لف لعقاب ورجع ناظر نهار

وابتسم عقاب:متى تبي عقد قرانك ؟

ضحكت نوره وفزّ نهار:اقسم بالله دريت جمالي ما يخوني

ابتسمت ملاك وضحك بعلو صوته نهار ولف لامه:بتزوج امي

ابتسمت أصايل وقام نهار وحضن نوره وابتسمت نوره:يالله حمدلله يمكن تعقل مع التايقر

عقاب:اعقل اعقل لا تفشلني اكثر

نهار:على خشمي ابو نهار على خشمي

نوره ابتسمت:هذا لان الفال الطيب على قولتك كان معانا بالخطبه ، دق بشره

تلاشت ابتسامة نهار وصدت أصايل تبلع ريقها من طاريه

ولفت نوره لأصايل:ما بيجي منيف اليوم ؟

رفعت عيونها أصايل لملاك وتنحنح ثنيان:أصايل تبي تنفصل عن منيف

جمد وجه نوره ولف عقاب بصدمه وناظرهم ثنيان:ما اتفقوا

نوره لفت لأصايل بصدمه وناظرتهم بتوتر أصايل

ونزلت عيونها ملاك وناظرهم عقاب ولف لأصايل اللي تركت المكان وخرجت

نوره ناظرت ملاك بصدمه:ليه ؟ ومتى قالت لكم ؟

بلعت ريقها ملاك ونطق ثنيان:امس تكلمت مع منيف وطلبته ينفصلون

عقاب:هي طلبت ؟

ثنيان ناظر عقاب ولارد وهز راسه نهار:اي ابوي أصايل معد تبيه

نوره وقفت ومشت خلف أصايل ودخل جاسر:سلام عليكم

نهار ابتسم:أبشرك قبلوا فيني يالحاسد

ضحك جاسر:والله ؟ على البركه على البركه

ضحك نهار ولف عقاب يناظر ملاك وثنيان اللي يناظره وقام يتركهم وقام خلفه ثنيان

اخذت نفس ملاك ولفت تناظر عقاب اللي واقف بعيد ومعه ثنيان ويتكلمون ولفت لجوالها من جاتها رساله

ناظرت الرقم الغريب وعقدت حاجبينها وفتحت الرساله كانت تاريخ مستحيل تنساه ابد وتحته مكتوب:مثل هاليوم

رجفت كفوفها وجمد وجهها وفتحت الصوره اللي تحت التاريخ وبلعت ريقها من شافتها مقبرة أمها وأبوها اللي اندفنوا فيها

رمشت برعب ولفت تناظر ثنيان بعيد عنها وناظرت نهار اللي على جواله ولفت لجاسر اللي يناظرها

ورجف فكها برعب ورجعت تناظر جوالها بخوف وكتبت:من انت ؟

لف جاسر يناظر ثنيان ورجع يناظر ملاك

مارد عليها احد وقفلت جوالها من تقدم ثنيان:ملاك

رفعت عيونها عليه وعقد حاجبينه:فيك شي ؟

هزت راسها بالنفي وتقدم ثنيان:بتطلعين ؟

لفت تناظرهم حوالينها وبالها مو معها ولفت لعقاب اللي واقف يناظرهم وهزت راسها لثنيان

وقفت ومشت تخرج ولف ثنيان من ناداه جاسر ووقف

مشى جاسر وتقدم له:زوجتك جاتها رساله وارتبكت

عقد حاجبينه ثنيان ولف لعقاب اللي جلس وناظر جاسر وهز راسه:طيب بشوفها

جاسر:يوم انسجن اخوها ظنتي كانت بتقول شي لابوي

ثنيان:كانت بتعترف

سكت جاسر واخذ نفس ثنيان:اكلمك لارجعت

هز راسه جاسر وخرج ثنيان وناظر ملاك اللي واقفه ومسك ظهرها:ملاك

ناظرته بجمود وناظر عيونها:نمشي ؟

هزت راسها وركبت بالسياره وركب ثنيان

حرك سيارته ولف عليها ومسك كفها وناظرها تناظر الطريق ساكنه

ثنيان:فيك شي ؟

ملاك مسكت عنقها بإختناق وهزت راسها بالنفي

ثنيان:اعرفك ملاك

لفت عليه ملاك تناظره:بتوديني البحر؟

ثنيان ناظر الطريق:اوديك وين ماتبين

ناظرت الطريق واخذ نفس ثنيان ووقف عند الشاليه ونزلت

ومشت تجلس عند البحر وفصخت عبايتها ومسكت عنقها تناظره وتقدم لها ثنيان:تعالي بتكلم معك

ملاك صدت:شوي ثنيان بس شوي

مشت للبحر وناظرها ثنيان وجلس يناظرها

ضربت صدرها بخفه من ضيقه واختناقها وناظرت البحر تذكر اليوم اللي ما نسته ، رحيل أمها وأبوها عن حياتها

تذكر انها وقفت عند المقبره لوحدها تشوف الرجال داخلها يقبرون أمها وأبوها ومنيف واقف بينهم بعمر ١٦ سنه

بلعت ريقها ماتبي تبكي ولفت تناظر ثنيان اللي جالس بعيد ويناظرها ومشت له

جلست قدامه:بوشو نتكلم

ثنيان:اول قولي لي وش صاير ؟

ملاك:ولاشي تضايقت من طاري منيف بس

سكت ثنيان يناظرها وناظرته ملاك:في وش بنتكلم ؟

ثنيان اخذ نفس:في احد رجع يهددك من جديد ؟ يأذيك ؟ يرسل عليك شي ؟

سكتت ملاك وكمل ثنيان:قولي لي ملاك

ملاك:انت عرفت شي بخصوص اللي يهددني ؟

ثنيان هز راسه بالنفي ورفعت حاجبينها ملاك:غريب !

ثنيان:ليش غريب ؟

ملاك:لان طلال ارسل لك انه في مستجدات بخصوص الموضوع وما بلغتني للحين بالمستجدات

لانت ملامح ثنيان وتقدمت ملاك وناظرته:متى صرت تخبي علي ؟

بلع ريقه ثنيان ونزل راسه ورفعت صوتها ملاك:ليش ماتبي تعلمني ؟

ثنيان غمض عيونه وتقدمت له ملاك:ليش تخبي علي ؟

ثنيان رفع راسه:لاني ماعرفت شي

ملاك:كذاب

سكت ثنيان وناظرته ملاك:اعرفك ، من هذيك الليله انت صرت تجلس تفكر بالفراغ انت في شي شاغل بالك

حطت اصبعها على دماغه:في شي شاغلك هنا

ثنيان مسك كفها وناظرها:وانتي في شي مخليك تنفعلين كذا

شالت كفها ورجعت للخلف:لا تغير الموضوع

ثنيان:من ارسل لك ؟

سكتت ملاك وهز راسه ثنيان:انتي بعد تخبين ياملاك

ملاك ماردت عليه ووقف ثنيان:علميني من ارسل لك

ملاك:علمني انت بالاول من اللي يهددني ؟

سكت ثنيان ما يقدر ينطق بشي خوفاً عليها وطال سكوته وهو يناظرها وهزت راسها ملاك:وانا ماعندي لك جواب بعد

مشت تتركه وتدخل الشاليه وجلس ثنيان ومسك راسه بتعب ، وده يقولها ويبلغها بنفسه ويوقف معها ضد أبوه واللي يسويه بس ما يقدر

لف يناظرها واقفه بالصاله وماسكه جوالها وضغط على كفة يده

ورفعت عيونها ملاك تناظره جالس برا وصدت تناظر الرساله:عقابك

بلعت ريقها من جوابه وارسلت:شتبي مني ؟

انتظرت ثواني وناظرته يكتب وتوترت ترفع عيونها لثنيان اللي دخل

ونزلت عيونها من كتب:خسارتك

ارتبكت وقفلت جوالها من جلس ثنيان بجانبها:ملاك انا ماعرفت شي عشان اخبيه عليك

ملاك ماردت وهي صاده تفكر واخذ جوالها ثنيان ولفت تسحبه وتنهد ثنيان:علميني وش صاير ومن قاعد يرسل لك

ملاك:ماراح تعرف شي لين انا اعرف كل شي

ثنيان رفع صوته:ماعرفت شي علميني من يرسل لك ، لا يكون الكلب منصور

صدت عنه وتقدم ثنيان لها بغضب:ملاك

ملاك صرخت بقهر تقوم:ملاك بتموت خلاص

ناظرها ثنيان من وقفت قدامه وناظر رجفة كفوفها وبلعت ريقها ملاك:اتركني ثنيان اذا ماودك يصير بيننا زعل ، خلني بحالي

سكت ثنيان يناظرها ومشت تطلع للغرفه وقفلت الباب وفتحت جوالها:علمني من تكون ؟

جاها الرد مباشره:ما بتزورين اهلك ؟

تأففت بتوتر وجلست على السرير:صدقني بتخسر انت ، بلقاك وبتكون خسارتك كبيره

مارد عليها وخرج من المحادثه وقفلت جوالها وهي تفكر

'

ركب السياره عقاب ورد على جواله اللي يدق:هلا

ناصر:ارسلت لها

هز راسه عقاب:طيب

قفل الجوال وناظر حمدان:المقبره

حرك حمدان وناظر الطريق عقاب بهدوء وهو يفكر يذكر كل كلمه قالها ثنيان له ويذكر كل مواقف ملاك معه ووجودها بينهم

ولف من دق جواله وناظر اسم نوره ورد:هلا

نوره:عقاب وينك ؟

عقاب:عندي شغل

نوره؛اي شغل ؟ انت ما بتجي تتكلم مع أصايل وتفهم منها اللي صاير ؟ خرجت ولا كأنه يهمك ؟

عقاب؛يهمني وتهمني أصايل بس عندي شغل أهم ، اخلصه واجيكم

نوره تنهدت بتعب:طيب

قفلت من عقاب ولفت تدخل غرفة أصايل:بيجي ابوك وبتتكلمين معه غصب عنك عشان نفهم اللي صار

أصايل بلعت ريقها بربكه:قلت لك انفصلت عنه ما ناسبني ما اتفقنا

نوره:شلون ما اتفقتوا أصايل لا تجنيني كنتوا متفاهمين وش غيركم ؟ عشانه انسجن يعني ؟

هزت راسها بالنفي أصايل:مو مرتاحه ياجماعه مو مرتاحه خلاص اتركوني بحالي

نوره سكتت تناظر رجفتها وهزت راسها وخرجت تاركتها

ضمت رجلينها أصايل من خرجت نوره وبكت تحضن نفسها

ولفت تناظر جوالها الصامت هي بالها مقسوم جهتين ، تفكيرها في قرارها وفي خوفها على منيف ومن منيف

مشاعرها متناقضه مو فاهمه اللي يحصل لكنها تعبانه من فرط التفكير وسكوت منيف واختفائه عنها

اخذت جوالها تناظر صورهم وبكت بتعب وهمست:ليش تسوي فيني كذا ؟

مسحت دموعها تناظر صورته ، تنتظر رساله وحده منه اي شي تفهمه من كركبة مشاعرها

قفلت جوالها وانسدحت تبكي وتقدمت كوتي عندها وجلست عند راسها وناظرتها أصايل:كوتي عورني

بكت ومسحت على كوتي وهي تبكي:عورني من داخل ، ما أفهمه وما أأمنه بس أحبه

شهقت تغطي فمها وتبكي وهي حاضنه نفسها

'

واقفه بالبلكونه تسمع صوت أذان المغرب واخذت نفس من فتح الباب ثنيان ودخل

ناظرها واقفه تناظر البحر وتقدم لها ووقف بجانبها

لف يناظرها هاديه تناظر البحر:صدقيني ما عرفت من اللي هددك

هزت راسها ملاك وهي تناظر البحر:مصدقتك

ناظرها ثنيان ونطق بهدوء:لا تحطين بيننا مسافه ملاك

لفت تناظره ملاك:مستحيل يصير بيننا مسافه

سكت يناظر غرابتها ولفت عليه بكامل جسمها وتقدمت له توقف امامه

بلعت ريقها ورفعت كفها على ذراعه تلمسه ورفعت اصابعها على دقنه وشاربه ونزلت عيونها لثغره وتقدمت له تقبّله بخفه

حاوط خصرها ثنيان بذراعينه يشدها لناحيته ويبادلها القُبل وعقد حاجبينه من لمست تيشيرته وابتعد عنها وناظرته ملاك ولمست ظهره بكفوفها:أبي حضنك

فهمها من نظراتها وهمسها ورجع بقبّلها ورجعت معه للخلف لين دخلت الغرفه وفصخ تيشيرته ثنيان ورجعت ظهرها ملاك للخلف تناظره وانحنى ثنيان يقبّلها من جديد

كانت أفكارها بمكان ثاني حتى بوجود ثنيان معها ولفت من شافته غفى على بطنه بعد مده وهو عاري الصدر

ولفت تناظر الفراغ واخذت نفس وسحبت فستانها تلبسه وقامت للحمام

فتح عيونه ثنيان من حسّ فيها وعرف انها تخوض أفكار لوحدها حتى وهي بين ذراعينه لدرجة انها تركت جوالها محله

وتقدم يسحب جوالها وفتحه يسمع صوت المويه داخل الحمام ودخل المحادثه وعقد حاجبينه يقراها ويناظر صورة المقبره وقفل جوالها بذهول وحطه محله من فتحت باب الحمام

انقلب يعطيها ظهره يمثل النوم وناظرته ملاك واخذت عبايتها تلبسها وسحبت مفتاح سيارة ثنيان تناظره غافي واخذت جوالها وخرجت من الغرفه

فتح عيونه ثنيان والتفت ولا لقي مفتاح سيارته ووقف يرفع صوته:ملاك

سمع صوت السياره بالخارج ومشى يوقف بالبلكونه وناظرها خارجه من الشاليه

واخذ جواله يتصل على ابوه ومسك راسه ينتظر رده

ناظر جواله عقاب واسم ثنيان ولارد وهو يناظر المقبره وثواني وقفت سيارة ثنيان وناظرها من بعيد

ونزلت ملاك وقفلت باب السياره وناظرت المقبره بالأسوار المفرقه اللي تبيّن القبور وتقدمت بثقل خطاويها ووقفت عند الأسوار تشوف الموتى ونزلت دموعها تتأمل مكان قبر أمها وأبوها وهمست:أسفه لأني مشيت درب ماكنتم رضيتم عليه ، أسفه لأني تعبت منيف اللي قطعه منكم

بكت وتمسكت بالأسوار:أمنيتي أكون معكم كل يوم تزيد ، اشتقت لكم

طاحت دموعها وهي تتأمل قبورهم وبكت بعلو صوتها بتعب وخذلان وخساره وغمضت عيونها وهي تبكي وشدت على الأسوار بقوه تحس بثقل روحها داخل صدرها

وفتحت عيونها من شمت الريحه اللي تعودتها وعقدت حاجبينها لانها تعرف عتاقة هذا العود وتشمه داخل البيت اللي تأمنه وتسكنه

لفت بوجهها وناظرت اللي يوقف خلفها وجمد وجهها تناظره

ناظرها عقاب بهدوء وعقدت حاجبينها تحاول تستوعب وجوده ونطق عقاب:بنت مساعد

لانت ملامحها من ناداها بأول مسمى سمعته منه وطاحت دموعها بجمود تستوعب العميد عقاب اللي تجاهلت منصبه وذكائه وصيته ومعارفه واستاهنت في من يكون العميد عقاب

ميلت راسها تحاول تستوعب وهز راسه عقاب:انا اللي دورت خسارتك لين لقيتها الحين

عقدت حاجبينها بصدمه تحاول تستوعبها وبلعت ريقها تناظره وتقدم لها عقاب:أنا اللي دخلتك حياتي مو إنتي اللي دخلتيها ، وبندر كان رفيقي بكل شي سويته ماهو عدوي ، وأنا اللي سددت ديّة منصور ريال ريال كلها

ناظرته بصدمه ملاك وكمل عقاب:وانا اللي دقيت باب جواهر ودليتها على منصور وزرت منصور وشيشته عليك وزوجتك ثنيان عشان يحاربك ووصلت لعمك وشريته بفلوس ورميت رصاص على سيارتك وأرعبتك وناديتك شيطان

حست الدنيا تدور فيها وهي تناظره وطاحت دموعها بصدمه وكمل عقاب:وكل ريال سرقتيه هو محفوظ عندي ما سددتي شي لمنصور وكل سرقه سرقتيها أعرفها وأعرف ضحيتها

هز راسه عقاب:كيف ظنيتي اني بسمح تدخلين حياتي وبين عيالي وانا اجهلك ؟

هزت راسها بعدم تصديق تناظره وسط دموعها واخذ نفس عقاب:مسكتك من اليد اللي توجعك ووصلتك هنا عند أبوك مساعد وأمك ، بأضعف حالاتك

بكت ملاك وهي تناظره بصدمه وكمل عقاب:ومثل ما عورتك عورت اخوك معك

هزت راسها ملاك وكمل عقاب:هذي الضربه اللي بتموتك ، خذلانك من اللي ناداك بنتي

رجعت لورا تناظره وعاقده حاجبينها وكمل عقاب:خسرتي يابنت مساعد

جلست على الارض بتعب وناظرها عقاب:يمكن الليله امك وابوك يرتاحون بقبرهم اذا عرفوا بخسارة جبروتك وغرورك وقوتك

رفعت عيونها تناظر عقاب وناظرها عقاب بهدوء ومشى يتركها ويمشي لسيارته

وناظرته ملاك وهو رايح ويمشي معطيها ظهره وبكت بصدمه بوجه جامد تتأمل رحيله وتعيد كلامه

رفعت صوتها بخوف وهي ترجف وتمسكت بالارض بأظافرها:ثنيان

وقف السياره ثنيان وناظرها من بعيد جالسه بالارض وركض لها يرفع صوته:ملاك

رفعت راسها بخوف ورعب وناظرت ثنيان اللي جاس لها من بعيد يركض

ورفعت ذراعينها وانحنى لها يحضنها وبكت بعلو صوتها وهي ترجف ومسح على ظهرها ثنيان وناظر سيارة عقاب من بعيد ما زالت واقفه

وهمس:محد يقدر يسوي لك شي

بكت بخوف وخذلان ورعب واخذ نفس ثنيان يسمعها تبكي بحضنه

شدت على تيشيرته مفزوعه يسكنها الرعب ، مطعونه كل شي داخلها ينزف

ما كان بعرف كيف بتكون ملاك لو ما وصلها وجاها وحضنها ، كانت تناديه وهي خايفه تستنجد من فزعها ورعبها وطيحتها

'

قفل باب سيارته يعدل بدلته العسكريه وحرك سيارته وهو يغني بطرب ومرّ من عند بوتيك غلا فهد وابتسم

وقف سيارته عند محله اللي يترمم ونزل ومشى للعمال:سلام عليكم

لف العامل:وعليكم السلام

نهار:هاه كيف الشغل ؟ يالله يا ابو يمن نبي نفتحه نهاية الاسبوع

ضحك العامل:هذا بالحلم

ضحك نهار:افا

العامل:خلصنا حمدلله لكن في شغل يجيك أثاث وأدوات القهوه والديكور والموظفين

نهار:انت لا تشيل هم بس سو شغلك والباقي على ابو عقاب

ابتسم يناظر المحل وهو ماسك الفرد بخصره وخرج من محله وتقدم لبوتيك غلا

ودخل وهو مبتسم وتلاشت ابتسامته من شاف راكان لابس بدلته العسكريه وواقف مع غلا وبلع ريقه

لف راكان وعقد حاجبينه وكان بيطلع نهار لكنه تورط بوقوفه ونظرات راكان له

تقدم راكان يناظر بدلته:هلا

نهار ابتسم:النسيب

سكت راكان يناظره وصافحه نهار وسلم عليه راكان:عسى خير الجيّه ؟ ناقصك شي تبيه من عندنا ؟

ابتسمت غلا تناظرهم وابتسم نهار:لا ياحبيبي بس أمي موصيتني أشوف جديد التايـ ، اقصد جديد البوتيك

سكت راكان يناظره ونطقت غلا:اتواصل معاها على رقمها ما يحتاج تجيني

ناظرها نهار بحده توقف مع اخوها ضده ولف لراكان وابتسم:رايح دوامك ؟

راكان هز راسه وضحك نهار:وانا بعد

سكت راكان وتلاشت ضحكة نهار بتوتر ولف يناظر غلا ورجع ناظر راكان:طيب اجل استأذن انا

مشى وخرج نهار وكشر بتوتر من شكله قدام راكات وعض شفته وركب سيارته وناظر راكان اللي هرج وحرك نهار لدوامه

وناظر جواله اللي يدق واخذه يرد:هلا ثنيان

لف ثنيان يناظر ملاك اللي نايمه ولف للبحر:وينك ؟

نهار:رايح دوامي ليه ؟

غمض عيونه ثنيان بتعب:مرّ علي الشاليه لاخلصت ، بخليك تجيب سيارتي من مكان

نهار:صاير شي ؟

ثنيان:أبوك طلع يعرف عن ملاك كل شي

عقد حاجبينه نهار:كيف يعرف كل شي ؟

ثنيان:أبوك اللي رمى رصاص على سيارة ملاك يبي ينتقم منها ويرعبها ويعرف ان ملاك اخذت من امي وجاسر وساري فلوس

جمد وجه نهار:تستهبل ؟ كيف ابوي عنده خبر ؟

ثنيان:انت خلص دوامك وتعال ، عندي جاسر الحين

نهار مسك راسه:طيب

قفل جواله ثنيان ودخل من البلكونه وتقدم لملاك اللي نايمه وناظرها ثواني وخرج من الغرفه ونزل لجاسر

وناظره جاسر:كلمت نهار ؟

هز راسه ثنيان وجلس:تتوقع ابوي عطى امي خبر ؟

جاسر رجع ظهره للخلف:انا معد اعرف ابوك والله

ثنيان هز راسه بتعب:تعرف وش يعني؟ يعني ماعليه مني ولا من روحي ولا من حياتي اللي بتدمر

جاسر:وش فكرته طيب ؟ انتصر كذا يعني ؟ والا يبي يسجنها ؟

ثنيان:من يسجنها ؟ اموت ولا يسجنها ابوك ، ملاك سدتت دينها لابوي من زمان وعطته صحتها يكون جاحد لو باعها

جاسر تأفف ومسك راسه:قلت لك ثنيان حذرتك ياخي

ثنيان:زوجتي وبتصير أم عيالي وماني متخلي عنها لو مهما يصير يكفي عمها الكلب باعها وبعدين قالي ما بسجنها ابوي براسه موال ثاني

جاسر ناظره وصد يناظر البحر:بجرب اروح اشوف ابوي ووش يقول

ثنيان:واذا قابلت أصايل عطها خبر واذا تقدر تكلم ابوي خلها تكلمه

وقف جاسر وناظر ثنيان:والحين كلنا بنوقف مع ملاك ضد ابوي بعد ماكان ابوي ضدنا كلنا عشانها ؟

ضحك بسخريه من الوضع جاسر ولف لثنيان:عشان قلبك والله ياثنيان والا ملاك ما تخصني ابد

ثنيان وقف وناظر جاسر:ابوك حرقني ياجاسر اي قلب ، دخلني بحريق ما ينطفي دخلني بيدينه الثنتين وناظر وضعي وهو مستمتع وما كفاه ، دخل أصايل معي بعد

جاسر تأفف:مدري وش سوى ووش قاعد يسوي

ثنيان سكت ولف له جاسر وشد على كتفه:بشوف ابوي واكلمك

هز راسه ثنيان وخرج جاسر من الشاليه ومشى ثنيان يطلع وناظر ملاك اللي جالسه حاضنه ركبتها وتناظر الفراغ وهمس:ملاك !

ناظرته ملاك بهدوء وتقدم لها وجلس عندها وناظر سكوتها ونظراتها:ليه صحيتي ؟

ماردت عليه ملاك تناظره وتنهد ثنيان ومسك كفوفها اللي على ركبتها

ناظرته ملاك بملامح جامده وميّلت راسها تحطه على كفوفه وتناظره

وجلس قدامها يقلد جلوسها وحط راسه على ركبته يناظرها:ما بتتكلمين معي ؟

ملاك ناظرته ثواني وهمست:كنت تعرف

هز راسه ثنيان وكملت ملاك:وخفت تقولي

سكت ثنيان وكملت ملاك:بس ياليتني عرفت منك ولا شفته قدام عيوني

تنهد ثنيان وجلس بإعتدال وكملت ملاك:كان يقولي بنتي

نزل عيونه ثنيان يناظر الارض وكملت ملاك:ويمسكني من كتوفي عشان يطمني ، لو قضيت نفس عمري هذا مرتين ماكنت بشك في صدقه ابد ، نظراته لي وابتسامته لي وحضنه لي وكلامه كان أضعف نقاط ضعفي وسبايب خيري واستسلامي

لف ثنيان يناظرها وطاحت دموعها على كفوفها وهي تناظره:مين باقي ماعورني ثنيان ؟

ثنيان:أنا

بكت بخوف وهز راسه ثنيان:أنا ماعورتك ومستحيل أعورك

تقدم لها يناظرها تبكي وتتأمله وتنهد:وأبوي عورني معك مو بس انتي تعورتي

ملاك غمضت عيونها وهز راسه بذهول ثنيان:وعوّر أصايل معي

بلعت ريقها بخوف وفتحت عيونها وهمست:بيسجني ؟

ثنيان:يتعداني أول

رجعت ظهرها للخلف ملاك ورفعت راسها تتنفس بتعب وغمضت عيونها:كنت أشوفه مساعد ، كنت أشوفه أبوي لآخر لحظه كنت بجيه وأطلبه يساعدني لاني صرت بنته

ناظرها ثنيان وبكت ملاك وناظرت ثنيان:جربت موت أبوي مرتين

شهقت تبكي وتأفف ثنيان وتقدم لها يحضنها وحضنته ملاك بيدين ترجف وهي تبكي بعلو صوتها

وسمع جواله يدق لكنه ماقدر يبعد عن حضنها أبد وهو يسمع بكاها ورعبها وخذلانها وطيحتها الاخيره

'

تلثم بشماغه ودخل بخطوات هاديه وهمس:الله يرحم موتانا وموتى المسلمين ، الله يجعل مثواكم الجنه

كان يمشي لقبر أمه وأبوه ويدعي بهمس من رهبة القبور وكثرتها

ووقف عند قبر أبوه وأمه وناظرها دقايق طويله وهو ساكت وفصخ حذيانه وجلس عندهم وناظر الارض:جاكم منيف اللي عمره ١٦ سنه ماهو ابو ٢٦ سنه

ناظر قبرهم:أمي أنا وحيد

نزل عيونه يبكي بتعب ومسح خشمه بشماغه وكمل:حياتي مو قاعده تضحك لي ، اخذتم معكم سعادتي ، يوم رحتم ما خفتم أعيش وحيد ؟

بكى وغطى عيونه وعض شفته وناظر قبر ابوه:تكفى أبي أعيش شبابي كله معك ، والله اني محتاجك ، أنا ما كبرت من يوم دفنتك والله اني باقي بعمري اللي شفتني فيه

مسح خشمه بشماغه وتنهد وناظر السماء ورجع ناظر القبور:لو دنيتي هذي عشتها معكم كان بتكون هينه والله وكل شي اعيشه هين ، لكني بدونكم

ناظر التربه ولمسها بكفوفه:ملاك ضايعه وأنا ضايع وحياتنا سوداء ما دخلها نور ، بيتنا ضيق وروحنا ضيقه ونفسي تعبانه

لف يناظر قبر أمه:بس ملاك معها ثنيان ، أنا مامعاي أحد

لمس قبر أمه وهو يبكي:أمي الكل تركني ، والله وحيد أبيك وأبي ابوي

نزل راسه على الارض يبكي:والله اللي مهموم بحضن أمه وأبوه حيّ ، أنا ميّت أنا ميّت

شهق وهو يبكي مثل طفل حزين وحيد ورفع راسه من تقدم شيخ كبير بالسن:اذكر الله وادع لهم

ناظر الشيخ ومسح دموعه ومشى الشيخ ومسح على كتفه:ادع لهم والله يرحمهم يارب

صد منيف ومسح وجهه بشماغه ومشى الشيخ يبتعد ويوقف عند قبر بعيد وبلع ريقه منيف ولف لقبر أمه وأبوه ووقف

لبس حذيانه وخرج ، ركب سيارته يناظر القبور وفرك عيونه بتعب وشغل سيارته ومشى ووقف عند سوبر ماركت ونزل والشماغ على رقبته ودخل واخذ له عصير وأكل ليامور ولف وناظر اللي واقف عند الرف وبلع ريقه وصد بسرعه

ولمحه نهار وعقد حاجبينه وتقدم:منيف

وقف منيف ولف عليه وتقدم نهار وناظر عيونه وشكله ونطق:وش حالتك هذي ؟

منيف:وش حالتي ؟

نهار سكت ثواني وناظره منيف ساكت ومشى يتركه

تقدم نهار لابس بدلته بعد دوامه ومعه اغراض ووقف خلف نهار بالكاشير ونطق بهدوء:كأنك جاي من عزاء

ابتسم منيف وهو يمد اغراضه للكاشير ولف لنهار:اي راجع من عند أمي وأبوي ، مثل هاليوم راحوا ، دعواتك لهم

سكت نهار بصدمه وبلع ريقه من شكل منيف وحاسب منيف واخذ الكيس وخرج

وعقد حاجبينه نهار يناظره وحاسب وخرج ولا لقي سيارة منيف

وركب سيارته وتنهد بضيق وهز راسه بتعب من ملاك ومنيف واخذ جواله ودق وهو يحرك

ورد عليه ثنيان:هلا ثنيان

نهار:وينك ماترد ؟

ثنيان:وش بغيت ؟

نهار:كنت بالسوبر ماركت بغيت اسأل تبي شي قبل اجيك ؟

ثنيان:لا لا انت تعال نتكلم بس

نهار:منيف يدري عن ملاك وابوي ؟

ثنيان:لا ما اتصل على ملاك

نهار سكت وتنهد ثنيان:ولا ودي يعرف انا اكلمه بعدين

نهار:انا اكلمه بس جايك الحين ونتكلم

ثنيان:استناك

قفل نهار ولف ثنيان يناظر ملاك اللي جالسه وتناظر البحر وارسل على جاسر:وش صار معك ؟

رد جاسر اللي جالس بالصاله:ابوي برا انتظره يجي

قفل من دخل عقاب:سلام عليكم

ناظرته نوره:وعليكم السلام

لف عقاب على جاسر اللي وقف:ابوي بتكلم معك بالمكتب ماعليك أمر

ناظره جاسر وناظر ساري وجنى وأصايل ومشى ومشى خلفه جاسر

دخل عقاب ودخل جاسر خلفه وقفل الباب

جلس عقاب وناظره:تكلمت مع ثنيان ؟

هز راسه جاسر وجلس قدامه:بس مافهمت شي

عقاب:وانت جاي الحين عشان تفهم مني؟

جاسر:وش يعني ابوي تعرف عنها كل شي وتدخلها بيتنا وتوقف بوجهي كل مره اجيك واكلمك وتزوجها ثنيان وتلعب فينا لعب ؟

عقاب:هذا يعني شغلي وإنتقامي من الفلوس اللي اخذتها منك ومن امك ومن ساري اخوك ومن جواهر بنت بندر ومن غيركم

جاسر:انا معك بشغلك وكنت واقف ضدها اصلاً بس ليش تدخل ثنيان بالسالفه ؟ تربطه بوحده كذا وبالنهايه تقول انتقم

عقاب:وشو يعني حبها ؟

جاسر:البنت زوجته ابوي وشو حبها ؟ صارت زوجته الشغله ماهي نفس قبل وملاك مع ثنيان ماهي نفس ماجاتنا وتزوجته ولا ثنيان معها نفس قبل ، تراهم متزوجين ومكملين حياتهم ويبون بعض

عقاب اخذ نفس ورجع ظهره لورا وكمل جاسر:وش بتسوي فيهم يعني الحين ؟ تسجن زوجته عشان تنتقم من ثنيان ومنها ؟

عقاب:ما بسجن احد

جاسر تنهد بتعب:ابوي كل اللي سويته غلط حتى أصايل دخلتها بالدائره هذي ومنيف دخلته بيننا ويوم منعتك وقفت بوجهي وطردتني

عقاب:اي ياجاسر طردتك وسكتك ومنعتك لاني ابي كذا وهذي خطتي اصلاً وأصايل مافيها شي ، طلبت تنفصل عنه وجرح سطحي لها ما بيعورها

عقد حاجبينه جاسر يناظر ابوه وكمل عقاب:بس ليه خبيتم علي سالفه نفس تبرعها

جاسر هز راسه:وقفت عندها صح ؟ وانا اللي خلاني اسكت بعد هالفتره كلها اللي سوته لنا ولك انها عطتك من روحها

عقاب:ليه ما علمتني ؟

جاسر:عرفت متأخر

عقاب سكت وكمل جاسر:بالوقت اللي تعبت فيها قالت انها بتسافر وصارت هوشه بالبيت بيننا وحتى ثنيان صوته وصل لاخر البيت واخذت شنطتها وتركتنا بدون ما تبرر شي

ناظره عقاب وكمل جاسر:حتى اخوها ما كان معها ، تبرعت ورجعت بعد مدة علاجك لانها تعالجت معك اصلاً ، ابوي البنت كلها ذنوب وخطايا وانا للحين ماني واقف بصفها بس تراها ضحّت بصحتها عشانك وكلمة الحق حق ، يوم كلنا ماقدرنا نسوي شي هي اخذت نفسها وراحت بدون تتردد ولا علمتنا بعدها حتى ما كانت تبي احد يشكرها

عقاب صد بعيونه وكمل جاسر:انا يوم جيت اتكلم الحين جيت عشان ثنيان اخوي وما ابيه يتأذى من اي شي

عقاب ناظر جاسر ونطق جاسر بهدوء:اترك الموضوع ابوي ، اتركه دامك عرفتها زين

عقاب مارد عليه وتنهد جاسر ووقف ومشى يخرج وتركه

ناظر المكتب عقاب وهو ساكت ويفكر بكلام جاسر وبوضع ملاك

ودخلت نوره وناظرته:وش صاير عقاب ؟

سكت عقاب ومشت وجلست نوره:ادري في شي وضعكم غريب كلكم ، ماتبي تعلمني ؟

اخذ نفس عقاب بهدوء وناظر نوره:تذكرين اللي هددكم انتي وجاسر ؟

عقدت حاجبينها:اي وشفيه لقيتوه ؟

عقاب:ملاك اللي سوت كذا

جمدت ملامح نوره:ملاك من ؟

عقاب:ملاك اللي بيننا

نوره:لا مستحيل اكيد غلطان

عقاب:ماني غلطان وثنيان يدري وجاسر يدري وحتى نهار وأصايل يدررون

ناظرته بذهول نوره:وش قاعد تقول عقاب ؟

عقاب:بقولك كل شي من البدايه اسمعيني وارشديني

سكتت نوره تسمعه

-

وقفت بالبلكونه تناظر نهار اللي جالس مع ثنيان ويتكلمون وثنيان واضح عليه التعب من عقدة حجاجه

مشت ونزلت تحت وخرجت من الشاليه ومشت لهم

ولف عليها ثنيان من تقدمت لهم وناظرها نهار

ناظرتهم وجلست ونطق نهار:شلونك ملاك ؟

ملاك ناظرت نهار ولاردت عليه ولف نهار على ثنيان وتقدم ثنيان ومسك كف ملاك:ملاك

ملاك ناظرت ثنيان بهدوء:بخير

سكت ثنيان يتأمل حالها وتنهد ولف لنهار:طيب ثنيان انا راجع البيت

ثنيان حك جبينه:انا كلمت جاسر بس مايرد علي تشوفه والا اجي معك ؟

نهار وقف:تعال وتكلم مع ابوي بعد

لف ثنيان لملاك ومسك خدها:تنتظريني لين اجيك صح ؟

هزت راسها ملاك ووقف ثنيان:مفتاحي فوق بجي معك

نهار هز راسه ولف ثنيان وتقدم يبوس راس ملاك ومشى مع نهار

ناظرت البحر ملاك وضمت رجلينها تتأمله بهدوء فصخت حجابها وعبايتها ووقفت ومشت على الرمل حافيه

جلست على طرف الموج تناظر البحر بدون ردة فعل لتفكيرها اللي يغمر داخلها

ومن طول تفكيرها ما شعرت باللي حوالينها بأي حركه ولا بوقوف شخص خلفها تجهله

ناظرها جالسه شعرها منسدل على ظهرها وميّل راسه بتعب يتأمل حالها وسكوتها والطريق اللي وصلوا له

تقدم لها وهمس:ملاك

لفت بهدوء وناظرته واقف عندها وابتسمت تتأمل سبب نارها وجحيمها اللي تسكنه ، خذلانها الأول ، تعبها المزمن المستديم

رمشت وهي مبتسمه وطاحت دموعها حبيسة عيونها وانحنى منصور يجلس بجانبها يناظر وجهها وشعرها وناظرته ملاك بتعب

ونطق منصور:كنت مجبور لأن عقاب وراي

ماردت وهي تناظره وتنهد منصور:والله ما بغيت والله ما نويت ، لكني احترقت منه ومن ابوي ومنك ، كان يجيني يقولي انك زوجة ولده تلازمينه المجلاس والمنام وانا محبوس ، كنت محروق

ناظرته ملاك بدون ردة فعل وكمل منصور:واللي خلقني اني مستعد اجحد عقاب وافتح لك باب عمره ما تسكر لين الحين انتي ملاك بعيوني

غمضت عيونها وبلع ريقه منصور:لين الحين الله يجيب الصالح

ملاك فتحت عيونها وناظرته:من كثر ما قلتها الله جاب الصالح

سكت منصور وكملت ملاك:والله انه يسواك وعشره منك ومن اهلك

ناظرها منصور بذهول وهزت راسها ملاك:ولا يمكن اسامح

منصور ناظرها بقل حيله:أجبرني ملاك هو خطط لكل هذا وجاب لي جواهر وشهد على زواجنا بنفسه

وقفت ملاك وناظرته بحده:ما ابي اسمع شي اكثر لا منك ولا من اي احد ثاني كل يوم اسمع كلام يحرقني اكثر مابي احترق اكثر

وقف منصور وناظرها ورفعت كفوفها على راسها:خلاص اتركوني كلكم ، خلاص ابي اعيش يوم واحد بس وانا مرتاحه ابي اعيش بدون ما انصدم وانخذل

سكت منصور يناظرها وصرخت بقهر تدفعه:خلاص

منصور:ملاك اقسم بالله ناوي يسجنك سوا كل هذا عشان تنسجنين

ملاك صرخت بوجهه:وانت ساعدته

سكت منصور وصرخت ملاك:تبي تنهيني

منصور رفع صوته:ابي افرقك عن اللي اخذك مني

ملاك:اللي اخذني صانّي ، اللي اخذني ما باعني ، اللي اخذني ستر عيوبي وشاف نوري وببض جنحاني

نطق منصور بحرقه:والله ليوقف بصف ابوه لو صرتي بكفه وابوه بكفه ، والله ليبيعك عشان ابوه

ضربت صدره ملاك تدفعه ومسك كفوفها بقوه منصور:هو راح لابوه روحي واسمعي وش يقول له ، روحي اشهدي عليهم يبيعونك

ناظرته بجمود وهمس منصور:روحي اسمعي بنفسك

بلعت ريقها بخوف ورجفت كفوفها تدفعه عنها وتسحب كفوفها ومشت تدخل

اخذت مفتاح سيارة ثنيان واخذت عبايتها ومشت من جانب منصور تخرج

وركب سيارته منصور يحرك خلفها وحركت ملاك

كانت تحس بالدوار اللي ياكل من دماغها وصوت نبضاتها المتسارع ، رجفة كفوفها ورجلينها

كانت تشعر وكأنها تعيش سكرات الموت من تعبها وضغطها النفسي

بكت وهي تتمسك بالدركسون بشده وتناظر منصور خلفها ، خايفه تروح تلاقي ثنيان بطرف غير طرفها

خايفه يتركها اخر من بقى لها ، خايفه يبيعها

ناظر سيارة ملاك منصور واخذ جواله يتصل

ناظر اسم منصور بشاشة جواله وعقد حاجبينه ورد:شتبي ؟

منصور:اختك بتروح لعقاب

منيف جلس وعقد حاجبينه:مافهمت وش تبي مني ؟

منصور:منيف اللي كان يهدد اختك تراه عقاب وهو سبب كل شي حصل لكم

جمد وجه منيف بصدمه وعقد حجاجه:كيف يعني ؟

منصور:ماهو وقت اشرح لك اترك اللي عندك وتعال بيت عقاب لاختك لا تخليها وحدها

قفل وناظر جواله منيف بصدمه ثواني طويله ووقف

اخذ جواله وخرج لسيارته ، كان لابس ثوبه وشماغه على كتوفه نفس ما ترك مقبرة اهله

-

( لا تنسون النجمه⭐️ )

ثنيان ناظر ابوه:بتنقفل القصه هنا بيننا وتنتهي

صفق كفوفه ببعض:خلاص

ناظرته نوره ورفع عيونه عقاب:ومن يسدد اللي سرقته ؟ من يرجع حق الناس اللي سرقتهم ؟

ثنيان:أنا

عقاب وقف يناظره بحده:انت صاحي ثنيان ؟ تستهبل ؟ سارقه ٢١ مليون مليون ماهو ريال

عض شفته نهار يناظرهم وبلعت ريقها أصايل تراقب نقاشهم الحاد

وعقد حاجبينه جاسر:ابوي انت قلت كل اللي سرقته عندك محفوظ ليه يسددها احد غيرك ؟

نوره:ابوك الظاهر فقد عقله مع كليته

لف عقاب على نوره وناظرته نوره بحده :رجع كليتها دام ما تفرق عندك وتبي تسجنها

ثنيان ناظر امه:تبين تسجنين ملاك ؟

نوره:لا والله ما أفرط فيها حتى بغلطها حتى بصدمتي

ثنيان ناظرهم وهو يتنفس بسرعه:هذا العلم وجاكم ملاك زوجتي وماراح يصير لها شي ولا تنفضح عند اي انسان ولا ينقال عنها نص كلمه شينه

لف ساري على جنى يناظرها وناظرتهم جنى بصدمه

عقاب ناظر ثنيان وهز راسه ثنيان:يوم قلت بنتقم من ثنيان عشانه تزوج من وراي ما توقعت اني انا اللي بمنعك صح ؟ ما توقعت اني بحط روحي هنا بين يدينك ولا تأذي ملاك بشي ، ماتوقعت انك بتشوف مع خسارة ملاك فوزها بي انا

ناظرتهم بخوف أصايل من حجم الموضوع اللي يتكلمون فيه

وكمل ثنيان:وما فكرت ان أصايل بتغطي على سالفة ملاك وتستر عليها وتسامحها صح ؟

لف عقاب لأصايل اللي تناظر عقاب وكمل ثنيان:ولا توقعت انك بأول طيحه لك ما بيضحي بصحته احد غير ملاك عشان تقوم انت

عضت شفتها نوره تناظرهم وهز راسه ثنيان يناظر عقاب:جاهدت طول عمرك وربيتنا بإن سلاح بني آدم عائلته لكنك انت اللي فرّقت هالعائله ، بكيت بنتك وأرعبت البنت اللي دخلت بيتك وناديتها بنتي

عقد حاجبينها ثنيان يناظر عقاب:كيف مسكت نقطة ضعفها وذليتها فيها ، كيف وريتها وش يعني أب وخذلتها ؟ خليتها تفقد أبوها مرتين

نزلت عيونها نوره بحزن على حالهم وبكت أصايل تناظر ثنيان

ثنيان رفع كتوفه يناظر عقاب:كيف أخذتها يتيمه ضايعه وجهتها وما دليتها ؟ ضيعتها أكثر ؟ حطيت عمها وعيال عمها قدامها يحاربونها وانت تحتمي خلفهم ؟

تنهد نهار وناظر جاسر اللي يناظرهم

'

دخلت البيت ووقف منصور عند الباب يناظرها تدخل

كان مستعد يجحد عقاب بس ترجع له ملاك وارسلها لبيتهم عشان توقع ان ثنيان بيوقف بصف ابوه لا محاله

مشت تسمع صوت ثنيان المرتفع ووقفت عند مكانهم تسمعه يتكلم

عقاب:حق الناس ما يضيع

ثنيان:حق الناس يرجع لهم بدون ما تتضرر ملاك ، انا ادفعها ريال ريال

عقاب صرخ بعصبيه:لا تدخل انت لا تدخل وتسدد شي مالك علم فيه

ثنيان:والله ما يصير اللي تبي تسويه والله وأنا حيّ ما تطفي نورها

نوره:عقاب انت كل مشاكل عيالك حليتها بدون ما يتعثر واحد فيهم

عقاب لف عليها:عيالي

غمضت عيونها ملاك تسمعه ولف ثنيان بذهول على ابوه:عيالك ؟

نوره:عقاب وش صاير لك انت ؟ انت كنت تقول ملاك وحده منكم وكل مره تهاوشوا ثنيان وملاك وقفت مع ملاك وانت اكثر واحد تهتم للانثى ببيتك

عقاب جلس:خلاص خلاص مابي احد يتدخل بالموضوع هذا ابد ، انتيهنا ثنيان

ثنيان ناظر ابوه ونطق نهار:ابوي

عقاب لف عليه:قلنا لحد يتدخل

نهار:ماني متدخل بس كلمة حق ولازم اقولها

لف ثنيان على نهار ونطق نهار:ترانا عاشرناهم ، اكلوا بيننا عيش وملح ومنيف اخذ اختي وما ضرها من يوم صارت حلاله وانا شاهد وأصايل شاهده

سكت عقاب وكمل نهار:يمكن انهم ضرونا زمان ، اي

ناظر أصايل اللي تمسح دموعها وكمل:بس الولد تغير ابوي ، انا شفته اليوم حالته حالة واحد بليلة عزاء امه وابوه

عقدت حاجبينها بضيق نوره وكمل نهار:وعرفت ان أمس كان يصادف يوم وفاتهم يعني يمكنه قضى ليله كله بين قبرينهم

ثنيان:لا تطمن ابوك يعرف متى توفوا ووقف قدام ملاك وقبر امها وابوها خلفها

لفت نوره بصدمه على عقاب

نهار:انا ما اقول انهم غلطوا بس تغيروا ، ملاك بيوم واحد بدون تفكير عطتك روحها ولا فكرت ولا قالت لاحد ، قامت بنفسها وعلى حيلها ورجعت ما كأنها دخلت بين الحياه والموت الله العالم وش عاشت بدون احد

لف ثنيان يناظر عقاب واخذت نفس نوره:عقاب

رفع كفه عقاب يسكتهم وناظر ثنيان:الموضوع مـ

سكت عقاب وناظره ثنيان بتعب ورفع أنظاره عقاب يقطع كلامه والتفت ثنيان من نظرات ابوه وناظر ملاك ولانت ملامحه

تقدمت ملاك تناظر عقاب بجمود وبلعت ريقها نوره تناظرها

تقدم ثنيان وهمس:ملاك

ماردت عليه وهي تناظر عقاب اللي يناظرها ووقفت نوره بحذر من شكل ملاك وتغير حالها ونظراتها وجمود ملامحها

وسكتوا يناظرونها ومسك راسه نهار يناظرهم

ملاك ناظرت عقاب مستنكره صدمتها فيه وخذلانها منه وهمست:كنت بلجأ لك

جلس ثنيان بتعب وكملت ملاك:كنت أهرب منك لك

مسحت دموعها أصايل بحزن من حال ملاك وعضت شفتها تتأمل ضعفها وانكسارها اللي ما تعودوه

ملاك كملت وهي تناظر عقاب:كنت تمسح على جرحي وينفس الوقت تعرّيه وتحرقه ، كنت تعوضني عن أبوي وينفس الوقت كنت تحاربني بيُتمي

ناظرتها نوره بضيق وكملت ملاك ورفعت كفها على قلبها بهدوء:يوم عوروني كلهم بظهري انت عورتني هنا

ناظرها ثنيان وهو عاقد حجاجه من الضيق

وبلع ريقه جاسر ونزل راسه ولفت جنى على ساري تناظره ورجعت ناظرت ملاك

ملاك:جربت أصير يتيمه مرتين

غمضت عيونها نوره وجلست وناظرها عقاب بهدوء ووقفت ملاك وهي تناظر عقاب وتتأمله

ووقف ثنيان:ملاك

ماردت عليه ووقف عقاب وناظره ثنيان وتقدم يوقف قدام ملاك وناظرته ملاك بجمود وهز راسه

دخلت الخدامه:بابا في رجال اسمه محمد في مجلس

لفت ملاك من طاري عمها وتذكرت منصور اللي واقف على الباب ومشى ثنيان بعصبيه ورفع صوته عقاب:ثنيان

تأفف جاسر ومشى بسرعه خلف ثنيان ووقف ساري يخرج معهم

ولفت ملاك لعقاب اللي واقف ومشى عقاب تاركها وناظروها نهار وأصايل ونوره وجنى وناظرتهم ملاك بدون ردة فعل ، وجه جامد مخيف وكأنها ما تحس ولا تشعر بأي وجع

بلعت ريقها نوره تناظرها ولفت لنهار من سمعت صوت بالمجلس:نهار شوف اخوانك

وقف نهار ومشى من عند ملاك ولفت ملاك تمشي بهدوء بخطوات هاديه تسمع ضجيج صوت ثنيان مع عقاب ومحمد ومنصور

وناظرت مكتب عقاب من بعيد ومشت بهدوء وفتحته ودخلت

قفلت الباب خلفها بالمفتاح ولفت نوره لأصايل:وين راحت ملاك ؟

رفعت كتفها أصايل بضيق ومسكت راسها نوره:وش هالمصايب ياربي

'

ثنيان دفع منصور:والله لأخذ عمرك اقسم بالله

منصور:انا مالي شغل اذا بتحاسب احد حاسب ابوك

عقاب:انكتم منصور

محمد لف لمنصور بحده:بتسكت وتثمن كلامك ؟

منصور:مو هذا الصدق ؟ دخلنا بلعبه عشان يطلعني من السجن وسدد ديتي عشان احارب ملاك ؟

لف منصور لثنيان:انا عمري ما تمنيت اضر ملاك

ناظره ثنيان بحده:لا تنطق اسمها على لسانك

عقاب:اي انا سويت كل هذا من يتجرأ يحاسبني ؟ انطق انت واياه ، من يتجرأ يوقف بوجهي ؟

لف ثنيان على أبوه وناظره بغضب عقاب:سطيت ياثنيان سطيت وزودتها

شد على فكّ أسنانه بغضب ثنيان يناظر ابوه وهز راسه نهار بالنفي يناظر ابوه

ولف عقاب لمنصور:انا جبرتك ياولد محمد ؟

ناظره منصور ورفع صوته عقاب:انطق

محمد:لا ياعميد مسـ

عقاب:ما تكلمت معك اتكلم مع ولدك هذا اللي جاحدني

سكت محمد وناظره عقاب:جيتك وقلت لك هذا كلامي معك ، تبي تطلع تشم ريحة الدنيا وتبيع بنت عمك قلت اي

لف ثنيان بحده على منصور وعقد حجاجه منصور بضيق وكمل عقاب:لا تجي تلومني يوم صرت تشم ريحة الدنيا يامنصور تفهم ؟

صرخ بوجهه بآخر كلامه ولفوا من دخل منيف عليهم وناظرهم

صد ثنيان بعيونه وعض شفته وناظرهم منيف متجمعين على خسارة ملاك وتقدم وناظر عقاب

ناظره عقاب وهز راسه:عرفت من هي بنت العميد ؟

سكت منيف يناظره والتفت نهار على ابوه وهز راسه منيف ولف عليهم كلهم يناظرهم بهدوء

وناظره ثنيان بإستغراب من حاله وعقد حجاجه وهمس منيف:وين ملاك ؟

لف ثنيان على ابوه من تذكرها ومشى يخرج وناظر امه وأصايل اللي عند الباب:وين ملاك ؟

رفعت كتفها أصايل:ما اعرف

مشى ثنيان بسرعه يدخل ورفع صوته:ملاك

لف عقاب وناظروه ساري وجاسر ودخلوا البيت

وفتح غرفتهم ثنيان ولا لقاها ونزل وناظرهم ورفع صوته:ملاك وين؟

ناظرته نوره بربكه:ما انتبهت ثنيان بس ما طلعت من البيت

دخل عقاب وناظرهم وعقد حاجبينه وطلع نهار:وينها ؟

وقف منيف يسمعهم يدورونها وعرف ان ملاك وصلت نهاية أمرها ودخل ولفت أصايل وجمد وجهها من شافته بين عقاب ونهار واقف

وتنفست بربكه تناظر حاله وشماغه الهزيل اللي على اكتافه ولف منيف وناظرها واقفه بجانب نوره

وبلعت ريقها من نظراته لها وهدوئه رغم كل المصايب اللي يعيشونها

ولف عقاب من سمع صوت ثنيان:ملاك افتحي الباب

مشوا على صوت ثنيان وتقدم عقاب من شافه عند مكتبه:وش السالفه ؟

ثنيان دق الباب:ملاك افتحي لي الباب بتكلم معك

تقدم نهار برعب:ابوي ؟

لف عقاب يناظر ملامح نهار ولف عليهم ثنيان وجمد من تذكر أسلحة أبوه بالمكتب ولف يدفع الباب بقوه ويرفع صوته:ملاك افتحي لي

تقدم عقاب بخوف يدق الباب:ملاك اطلعي من المكتب

عض شفته جاسر ومسك راسه ولف لمنيف اللي واقف يناظرهم بدون ردة فعل

ودخل ساري يدور على المفاتيح ولفت نوره على أصايل بخوف

ودفع الباب بقوه ثنيان بربكه:تكفين ملاك تكفين افتحي الباب لا تسوين شي ، تكفين

لف عقاب بصدمه يناظر ثنيان ولده ورجاه وخوفه ورجفة يدينه وهو يحاول يكسر الباب

وبلع ريقه بخوف من إن ملاك فعلاً تنهي حياتها على كرسي مكتبه اللي خطط عليه كل هذي النهايه

تقدم نهار يدفع ثنيان ويصرخ:ابعد نكسره ابعد

ابتعد ثنيان ودفعه بقوه نهار ودفع معه ثنيان وتقدم ساري بالمفتاح:جربوه

ثنيان لف بتوتر:ماراح يفتح المفتاح داخل بالكيلون

'

كانت تسمع ضجيج أصواتهم وضرب الباب وفتحت أدراج عقاب تناظر العلبه الجلد السوداء وطلعتها تحطها على مكتبه وتفتحها وابتسمت من شافت المسدس

واخذته بين كفوفها تناظره وتلمسه وفتحته تشوفه فارغ وعقدت حاجبينها بإنزعاج وفتحت الدرج بهدوء تدور بين العُلب رصاص

لقتها واخذتها تحشي المسدس ولفت لكرسي عقاب وجلست عليه وناظرت الصوره اللي حاطها على مكتبه

كانت صورتهم بحفلة عبدالمجيد ، الصوره اللي كانت ملاك بالبرواز معهم ومنيف معهم

رفعت عيونها ما تنتبه لأي صوت غير صوت الهدوء اللي يسكن نارها ورجعت ظهرها للخلف بهدوء وناظرت المسدس بين يدينها ورفعت راسها تناظر السقف وثبتت المسدس على صدرها ، على قلبها ، على نار جوفها وحريقها ، على الرماد اللي تمكّن وطفّى لهبها

رمشت من مشاعرها وضياعها وشتاتها وطاحت دموعها بدون جهد من ملامحها

ولف ثنيان على منيف يصرخ بوجهه:تعال كلم اختك

ناظرهم منيف من لفوا عليه وناظر عقاب اللي يتنفس بسرعه مع محاولاته بالصراخ على ملاك

وتقدم ووقف عند الباب ونطق يشعر بنار ملاك:ملاك

بكت من سمعت صوته وفاقت على ضجيج المكان

وناظره ثنيان وهو مرعوب حاله هادي عكس اللي يشعر به ثنيان ولف ثنيان:تكفين ملاك لا تسوين شي ، تكفين ملاك أنا موجود أنا بساعدك انا معك

لفت نوره من سمعت صوت محمد يتنحنح وسحبت أصايل اللي تبكي ودخلوا

وتقدم محمد مع منصور ولف عقاب عليهم:وش تبون انتم ؟

منصور ناظرهم:وش صاير ؟ وش فيها ملاك ؟

تقدم نهار ومسك منصور بقوه:انت ماتفهم ؟ اذلف ياخي اذلف

جاسر مسك ثنيان:بندفعه سوا بكتوفنا

هز راسه ثنيان وابتعدوا خطوات وناظرهم منيف وتقدموا يدفعونه سوا

وصرخ عقاب:اكسروه

رجعوا يضربون الباب وانكسر المقبض وانفتح الباب ودخل ثنيان وجمد وجهه يناظرها

ولف منيف من محله يشوف ملاك ماسكه المسدس على صدرها وجالسه على الكرسي

بلع ريقه عقاب يراقبها وتقدم منصور بصدمه وفلته نهار من شاف ملاك

وتقدم ثنيان بحذر وخوف:ملاك

ناظرته وهي تمتلي بالدموع بملامح بارده وناظرها ثنيان بتعب:تكفين

بكت وهي تناظره وميّل راسه ثنيان:تكفين لا ننتهي كذا

دخل منيف يناظر ملاك وبكت تشوف نظراته وضعفه ، كان الوحيد بينهم اللي جعل يدينها ترجف من حزنها ، كان منيف نقطة وجعها

تقدم عقاب ورفع كفوفه بحذر من بعيد:ملاك لا تضرين نفسك نزليه من يدينك

نهار:ملاك تكفين بنحلها بس لا تسوين في نفسك كذا ، والله ما يصير لك شي بس نزليه

لفت تشوف محمد ومنصور اللي جامد وجهه ولفت من جديد لثنيان وهز راسه ثنيان بتكرار:ماراح أسامحك ، والله ما أسامحك لو تنهين حياتك قدام عيوني

شد منيف على شماغه يناظر ملاك ورجفت كفوفه بخوف ورعب سكن داخل جوفه

وتقدم منصور بصدمه:ملاك

ناظرتهم ملاك وعرفت إنها مشت مشوار طويل وجاهدت فيه وخسرته ، عرفت انها نار ولَهب تحرق اي شي تلمسه ، حرقت منيف وثنيان وكل هالعائله اللي قدامها ، حرقت نفسها عشان تضوي حياة غيرها ، تشوف قدام عيونها أبوها وأمها من اللاوعي اللي تخوضه وتسمع اصواتهم واسمها اللي تمنت تشبهه وتكون ملاك

نزلت عيونها للمسدس ورفع صوته ثنيان:ملاك

رجفت يدين عقاب يحاول يوقفها وتنفست ملاك من أقصى جوفها وحطت اصبعها على الفرد وصرخ منصور:ملاك

تقدم ثنيان بسرعه لها ودفع المسدس وأطلقت النار وناظرها ثنيان بصدمه

وشهقت أصايل من سمعت صوت طلق النار بالبيت ولفت لنوره اللي بققت عيونها بصدمه

سكتوا بذهول يراقبون ملاك اللي على الكرسي ورفعت عيونها ملاك تناظر ثنيان اللي يراقبها بخوف وماسك كفها ونزل عيونه من الدم اللي تلون على عبايتها

جلس منيف على الارض على ركبته يناظر ملاك وبكى بدون صوت

وتقدم عقاب بصدمه يراقبها تناظر ثنيان وهز راسه ثنيان وناظر المسدس اللي بين كفوفهم سوا

وصرخ منصور:ملاك

تقدم بخوف وناظرها:ملاك ملاك ، ملاك تكفين ملاك

نزل عيونه جاسر على ذراع ملاك وصرخ:شيلها المستشفى بسرعه

رجفت كفوف ثنيان ورفع ملاك بين ذراعينه وناظرها ساري:بذراعها ثنيان بذراعها

ركض ثنيان يخرج فيها وصرخت أصايل من شافتها وبكت نوره تمسك راسها بقوه وخرج عقاب بسرعه مع ثنيان ولف نهار لمنيف اللي على الارض جالس وتقدم له:ماجاها شي ماجاها شي منيف قوم معي ماجاها شي

شد بأصابعه على الارض بتوتر ودموعه على خده يناظر الكرسي الملون بالدم قدام عيونه

'

جالس على الكرسي يناظر الارض هادي يسمع اصوات صراخهم وبباله صورتها على كرسي عقاب

ما يدري كيف وصلت لهذي المرحله من التعب والجهد النفسي اللي انتهى ، ما يعرف متى ملاك أصبحت هشه وتآكلت من كثر المواقف اللي تقابلها

رفع عيونه يشوف عقاب ماسك راسه ويناظر الارض وناظر ساري وجاسر اللي واقفين ومنصور ومحمد ولف يشوف نهار جالس جنب منيف اللي ساكت بدون ردة فعل

ولف من تقدم له دكتور ووقف ورفع راسه عقاب من شافه

ناظره ثنيان:كيف وضعها الحين ؟

الدكتور:جرح سطحي الرصاصه ماهي موجوده بذراعها حمدلله بس ذراعها انجرح جرح عميق وحمدلله وضعها كويس بس تحتاج تراجع طبيب نفسي أفضل لصحتها النفسيه

هز راسه ثنيان وكمل الدكتور:ما اعرف اذا عندك خبر او لا بس في جنين

جمد وجه ثنيان ورفع راسه منيف يناظر الدكتور وعقد حاجبينه منصور يناظر ثنيان وانقبض صدره ونزل عيونه بخساره وتعب

مشى الدكتوره بعد ما نطق:ما تشوفون شر

لف جاسر على ثنيان اللي لا زال واقف مذهول وتقدم له وشد على كتفه

ولف ثنيان على جاسر:حامل

لف ساري على عقاب اللي يناظر ثنيان ولف ثنيان على ابوه:هديتوا بني آدم ونُطفه

صد بعيونه عقاب وغمض عيونه وتقدم ثنيان يناظرهم واقفين:كانت بتاخذ روحها وروح ولدي

صد محمد عنه ورفع صوته ثنيان:بسببكم

تقدم جاسر ومسك ذراع ثنيان:ثنيان اهدأ خلاص

لف ثنيان على جاسر:ياجاسر كنت بخسر روحين

تنهد جاسر يناظره ولف منيف يصد بجمود وناظره نهار والتفت من تقدمت أصايل مع نوره ووقف نهار وتمسكت فيه نوره:كيف ملاك ؟

التفتت أصايل تناظر منيف جالس وعينه عليها يراقبها بذبول بخفوت مخيف ما شهدته من قبل وعقدت حاجبينها بضيق على حاله

وتقدمت له وهمست:منيف

وقف وناظرها وهي واقفه ورفعت عيونها له من وقف قدامها ورمش بهدوء وتقدم يبتعد عنها ويغادر المكان ولفت تناظره من بعيد وعقدت حاجبينها تبكي وتناظره رايح لوحده

مشت نوره وتقدمت لثنيان وجلست جنبه وناظر الارض ثنيان بدون ردة فعل ولفت نوره تناظر عقاب اللي يناظرها وتنهدت بضيق

لف نهار من شاف منيف يخرج ومشى خلفه وجلس منيف على عتبة المستشفى وخرج نهار وناظره وجلس جنبه ومسك ركبته يشد عليها:بتقوم بالسلامه ، ملاك قويه

منيف مارد عليه وعيونه بالارض واخذ نفس نهار:وابوي غلطته كبيره صدقني ماني معه بشي سواه

ناظره ساكت ونطق:منيف

منيف همس وهو يناظر الارض:كانت دايم تروح بدون ما تاخذني معها ولا تعلمني لوين بتروح

سكت نهار يسمعه وكمل منيف:حتى اليوم كانت بتروح لأمي وأبوي بدوني

عقد حاجبينه نهار يسمعه ولف منيف يناظره:لو راحت لهم بدوني ما كنت بسامحها

نهار:اذكر الله منيف وش هالكلام ؟ انت رجّال مصلي وتعرف ربك وتعرف ان ملاك غلطت باللي سوته ، وما سوته الا من تعبها وان شاء الله الحين بتتحسن وبتقوم على حيلها واحنا كلنا جنبها

لف منيف من شاف أصايل تتقدم لهم وناظرها وعضت شفايفها تناظره ولف نهار ووقف واخذ نفس

مشى ومسك ذراع أصايل يشد عليها وناظرته أصايل وهز راسه نهار لها ومشى يدخل المستشفى ولفت أصايل على منيف وصد عنها منيف

تقدمت بخوف ورهبه وجلست جنبه بيدين راجفه ولاقدرت تنطق شي ، تذكر منظر ملاك وصوت طلق النار وتذكر صدمتها بأبوها والحرب اللي كانت بينهم وهي ماهي حاسه وتذكر منيف اللي تركته بعد فرص كثيره ضيّعها

ولفت تناظر حاله ونزلت دموعها وهمست:داخلي يحترق

مالف عليها ابد يسمعها وكملت أصايل:خايفه وأحترق

منيف:ما تشمين رمادي ؟

لف عليها وناظر دموعها وبكت أصايل وهي تناظره وناظر عيونها منيف وموج دموعها:العميد أخذ حقك يابنت العميد

بكت وهزت راسها بالنفي وكمل بهدوء منيف:وحقك غالي مثل قيمتك

مسحت دموعها وهي تناظره والتفت منيف ووقف وتركها يدخل ونزلت راسها أصايل تبكي

'

دخل وناظرها نايمه على فراش أبيض يشبه بياض جنحانها اللي تكسرت وتناثرت واحترقت

جلس عندها وحط راسه على ذراع السرير يناظرها ومسك كفها ونطق:لَهب

سكت يتأمل برودة ملامحها في منامها ، الوجه اللي لطالما اشتعل غضب وتحدي وقوه وشموخ وغرور

ناظر كفها البارد بباطن كفه ورجع ناظرها:لمستيني واحترقت ، ومن يوم قابلتك كنتي تحرقيني بس كل نار كوتني منك صارت سلام ، عرفت انك جمره حمرا يخالطها شعاع لكني قبل أعرف تأثيرك ضمّيتك

ميل راسه يتأملها:دايم الدوم ، دايم بكل الأحوال الموج قادر بس انتي قدرتي عليه

رفع كفها يقبّله وناظرها:يمكني انهزمت وخسرت قدامك كثير بس أشوفك مربحي بكل سنيني ، قلت لك ان الليالي تدور كفاك غرور لكني اليوم اقولك ‏تخيري بالسنين ‏و بالدروب و بالسما و الدَّار أنا كل حاجه ترضي غرورك قولي و أجيك بها ، بس لا يختفي غرورك

اخذ نفس ولف من انفتح الباب وناظر عقاب يدخل وتقدم عقاب وجلس بجانبه وصد ثنيان يناظر ملاك

بلع ريقه عقاب يناظر ملاك ويتأمل حالها وضعفها

ولف ثنيان من نطق عقاب:أعرف مساعد

سكت ثنيان يسمعه وكمل عقاب وهو يناظر ملاك:مساعد بسنين كان ظلي وذراعي

عقد حاجبينه ثنيان والتفت بذهول وكمل عقاب وناظر ثنيان:من قبل ما أتزوج ومن قبل ما يتزوج

ناظره ثنيان ينتظره يكمل ولف عقاب يناظر ملاك:كان كاتم سرّي وإعجابي ، كنت أحكي له عن زهرة شبابي

عقد حاجبينه ثنيان وهمس عقاب:زهره ، زوجته وأم عياله

جمد وجه ثنيان يسمع الحكايه وكمل عقاب:كانت حلمي في ترحالي كله ، عطيته يمين يحفظه عن كل العالمين بإني بعد العسكريه بخرج وأخطبها لي

عقد حاجبينه ثنيان وهمس:كيف تعرفه ؟

عقاب ناظره:جدار بيته بجدار بيتي وزهره مقابلتنا

اخذ نفس عقاب ورجع ظهره لورا:كان حافظ نَذري ودخلت العسكريه لوحدي ثلاث سنين بالرياض ، اكتب له رسايل ولا يجاوب عليها انقطعت اخباره ولا عرفت عنه شي ، تخرجت ورجعت عسكري متلهف

لف وناظر ثنيان ونطق بهدوء:لقيته تزوجها

لانت ملامح ثنيان يناظر عقاب وكمل عقاب:واخذها واختفوا من الحيّ ، حرقني ، زرع داخلي لَهب

سكت ثنيان من نطق بإسم لَهب وكمل عقاب:ومن يوم تزوجت وجيتم كنت أنتظر أسمع بخبر عياله بس ولو انه تبشّر متأخر بس تبشّر بولد وبعدها بسنه قصيره تبشّر ببنت

لف يناظر ملاك:لَهب

ثنيان عقد حاجبينه:وش دخلها ملاك بكل ذا ؟ حربك مع مساعد ليه ضحيته ملاك ؟

عقاب:راقبتهم من يوم توفى مساعد وعرفت عنهم كل شي حتى قضية منصور كنت احضر اسمع دفاعها عنه وعرفت انها تركض ورا درب غلط

ثنيان:وعاقبتها ؟ عشان ابوها مساعد ؟

عقاب اخذ نفس:أرعبتها عشانها غلطت

ثنيان عقد حاجبينه بصدمه وهز راسه:كل مالي انصدم فيك أكثر

عقاب ناظر ثنيان:كنت أبيها حولي وأبي منيف حولي حتى لو مساعد ماهو حيّ ، كنت أبي أحس اني انتصرت ، دخلت بيتي وسكنت معي وناديتها بنتي ولجأت لي

ثنيان:وجازيتها كذا ؟

عقاب هز راسه بالنفي:ما كنت ابي توصل لهنا كنت بس بأدبها

ثنيان ضحك وصد بصدمه وكمل عقاب وتنهد:ثنيان يمكني غلطت بطريقتي لكن نار الآدمي ما تنطفي وانت تدري وش يعني تشتعل لَهب

ثنيان لف عليه وناظر عقاب:أعرف وش يعني لَهب واعرف ان ما يضيّع الإنسان غير ناره وأعرف اني مستحيل ارجع اطالع فيك بنفس نظرتي القديمه

سكت عقاب يناظره ووقف ثنيان يخرج من عنده ولف عقاب يناظر ملاك اللي نايمه وهز راسه بتعب:أبوك أخذ راس مالي وإنتي عطيتيني عمر جديد

نزل راسه ومسك راسه ما يعرف لوين ودته هالنار وكيف ضيعت كل شي من يده بس يعرف وش يعني نار الإنسان ، يعرف إن اللي يضيع كل درب يمشيه بني آدم هو ناره ولَهب صدره وجمر جوفه

ما يضيع الدرب غير واحد محترق ، تنعمي بصيرته ويختفي بياضه ويحارب لأجل يشعل النار أكثر لكن بالنهايه النار ماتحرق الا رجل واطيها

'

مشى نهار وجلس جنب منيف وناظره:انت متى اخر مره نايم ؟

مارد عليه منيف وناظر حاله نهار بضيق:منيف قم ارجع بيتك وريّح ، ملاك هنا كلنا حوالينها لا تشيل هم

ناظرتهم أصايل من بعيد وهز راسه منيف وتقدم له نهار ورفع ذراعه على كتوف منيف:منيف انت ما انت طيب ومبين عليك ، روح ريّح الأمور طيبه حمدلله

تقدمت أصايل وجلست يسار منيف تناظره ونطق منيف:مابي اروح

نهار:اذا عشان ما تبي تقعد لوحدك انا اجي معك وادخل انت نام وريّح والله ما اطلع من عندك بس ارتاح

منيف هز راسه بالنفي وتقدمت نوره وناظرت منيف:منيف

رفع عيونه منيف وناظرها وتقدمت تمسح على كتفه:روح يا أمي روح ريّح ببيتك ومتى ما قمت تعال لملاك

ناظرها منيف ثواني طويله وهو ساكت ولفت نوره لأصايل وبلعت ريقها أصايل ولفت لمنيف:أنا أجي معاك

لف منيف وعقد حاجبينه يناظرها ورفع عيونه نهار على نوره ورجع ناظر أصايل

ارتبكت وترددت لكنها ماقدرت تشوفه بهذا الحال وكملت:اروح معاك

نوره:اي اي روحي معه قوم منيف ، قوم يا أمي قوم وارتاح وأصايل معك هي بعد تعبانه تبي تريّح

لف منيف يناظر نوره وغمضت عيونها تطمنه ووقف ووقفت أصايل معاه ولف منيف وناظر نهار ورفع عيونه لساري وجاسر وثنيان اللي جالسين بعيد عنهم ونطقت نوره:ماعليك

نهار وقف:أصايل روحوا مع حمدان منيف جا معي

هزت راسها أصايل ومشى منيف ومشت بجانبه أصايل بربكه وخرجوا

وتقدم منيف وركب السياره وركبت بجانبه أصايل وناظرته هادي يناظر الطريق وبلعت ريقها من حاله ووضعه

ولفت تناظر الطريق لين وقف حمدان ونزلوا ومشى بخطوات هاديه منيف وهو يناظر الارض

ووقف عند باب البيت ورفع ذراعه بيدخل كفه بجيبه ولف من دخلت كفها أصايل تطلع المفتاح وناظرته ، كان من سرحانه ما يدري وين جيبه ويجهل مكان كفه لكنها انتبهت له واخذت المفتاح من جيبه وتقدمت للباب تفتحه

وقف منيف يناظرها داخله بيته معه، حلم تكرر على هوجاسه كثير وما ظن انه بيوم بيصير

وقفت عند الباب تناظره وتنتظره يدخل وظل يراقبها ساكت وهمست:تعال

كان يتخيل هذا المطلب منها ويتخيل استقبالها له ، ببيتهم سوا والحين هي قدامه تطلبه يدخل ، يدخل معها

مشى بهدوء ودخل وقفلت الباب أصايل وتقدم منيف ووقف بالصاله وناظرته أصايل:بتنام

لف عليها ونطقت أصايل:ما بتجلس هنا ، بتدخل تنام

مشى منيف ودخل الغرفه وجلس على السرير ومسك راسه بتعب وغمض عيونه

لفت أصايل من خرج يامور وابتسمت من شافته:يامور

انحنت له تمسح عليه وعقدت حاجبينها بضيق:جيعان ؟

تأففت بحزن على حاله ومشت للمطبخ وفتحت الدواليب ولقت أكله واخذت صحن وتقدم يامور من سمع صوت أكله بالصحن وانحنت تحطه ومسحت عليه:تعبان زي صاحبك ؟

تنهدت من تذكرت منيف وعضت شفتها بقلق ووقفت ومشت بخوف ، تخاف لأن ملاك عيشتهم بموقف ما تخيلته بحياتها

طلت عليه من بابه المفتوح وشافته ماسك راسه وتقدمت له:منيف

رفع راسه وناظرها بعيون خامله ذبلانه تشتعل تعب وتقدمت له ووقفت عنده وناظرته جالس ورفعت كفها بتردد لشعره وناظر عيونها منيف بدون أدنى ردة فعل

بلعت ريقها وجلست بجانبه ورفعت ذراعها لكتوفه وانحنى براسه على صدرها وغمض عيونه ومسحت على شعره

تنهدت من حست بتعبه وضياعه وخذلانه وخوفه ووحدته واشتدت ضيقة صدرها لين تجمعت بعيونها دموعها

رفع ذراعينه الثنتين وحاوط خصرها يحضنها وراسه بحضنها ولفت تسحب المخده وميّلت جسمها تحط بظهرها على السرير وتقدم لها منيف يرجع يحضنها من جديد وانسدح يفرد رجلينه على السرير ويحضنها

رفعت كفها تمسح على شعره ورفعت اصابعها تمسح دموعها وهي عاضه شفتها

كانت تترد له كثير وتخاف منه وتستحي من اي موقف يصير لها معه لكنها اليوم أقدمت له عشر خطوات ماهي خطوه ، ما انتظرت موافقه أبوها وأخوانها ولا أستحت من وجودها الان في سريره وبيته

تعرف انه يحتاج ويضيع ويتوه ويخاف ووحيد ، ويحزّ بداخلها لانها عاشرته وتعرف معدنه حتى لو كان ماضيه ما يشبهه ، تعرف ملاك وعاشت معها جلست أيام طويله معها تاكل وتضحك وشاركتها كل مواقفها ، صورها وذكرياتها وحتى جلساتها مع اهلها

ملاك ومنيف صاروا من أهلها وماهي قادره تحاسبهم على شي عاشوه بسبب يُتم وقسوة زمان وأقارب جحودين

بلعت ريقها تشوفه بحضنها ومسحت على شعرها ما تخيلت بيوم ممكن يكون قريب منها لهالدرجه

تلمس شعرها وتشوف وجهه بحضنها وتشعر بأنفاسه وتسكن غرفته بين أشيائه

ناظرت يامور يدخل الغرفه وطلع على السرير وابتسمت بين دموعها من تقدم ينام بجانب ذراع منيف ويحضن نفسه ورفعت كفها الاخر على يامور تمسح عليه وتنهدت بضيق

'

خرج عقاب وناظر ثنيان جالس ورفع عيونه ثنيان يناظر ابوه وتقدم عقاب:قوم ابيك

ناظرتهم نوره ولفوا العيال عليه ووقف ثنيان ومشى وابتعدوا عنهم

تقدم عقاب ومسك ذراع ثنيان وشال ذراعه بهدوء ثنيان ولف لابوه

سكت عقاب يناظر حال ولده وهمس:مشكلتي ماطفت ناري من سنين

ثنيان:جاي بتملي عليّ اعذار ؟ من أقصى فعولك غلط

سكت عقاب وكمل ثنيان:غير ان الرجال اللي كان بينك وبينه ضغينه توفى ! والمفروض تترحم عليه وبس انت جالس تدمر في عياله ، وغير ان عياله مالهم ذنب انتقمت لنفسك منهم ، وغير ان امي حاشمتك وحاشمه بيتها وعيالها ولا عمرها قصرت انت الحين في سالفه من سنين طويله عشان وحده قديمه ؟

بلع ريقه عقاب يناظر ولده وكمل ثنيان:ابوي انا مستحيل أعقّك رغم كل شي سويته بس اقسم بالله مالقيت لك اعذار اقولها قدام امي واخواني وملاك ومنيف ، كل شي سويته ماله مبرر

نزل راسه عقاب بوجع من كلام ثنيان وتقدم له ثنيان:انا ماني ضدك انت ، انا ضد افعالك وعمري ما بوقف قدامك بيوم انا دايم سندك وخلفك ، بس ابوي انت دمرتنا كلنا

رفع عيونه عقاب على ثنيان وكمل ثنيان:دمرت بيتك وبيتي وقلبي وقلب غيري ، كيف بيتصلح كل هذا ؟ وش بتصلح ؟

عقاب:تتوقع ان ما كان يجيني تأنيب ضمير عليها وعلى اخوها ؟ كنت أشعر والله اني أشعر وكنت فعلاً أبيها حواليني وأبي اخوها حواليني وأبي احس ان مساعد ما انتصر ، كنت ابيهم عيالي هذول ابيه عيالي بس ملاك طاشت وتجبّرت بالدنيا وكنت ابي اوقفها وهي حولي وتجيني تطلبني انا اوقف كل شي ، لكني ماقدرت اوقف شي بالنص

ثنيان:حتى الحين ما قدرت توقفه صح

عقاب اخذ نفس وكمل ثنيان:اذا بتبدأ من مكان ابدأ من أصايل اختي ، انا وزوجتي ملاك نطيب مع بعض

سكت عقاب يناظره ومشى ثنيان ورجع لاهله وناظرته نوره:ثنيان

لف وتقدمت له نوره:وش قالك ابوك ؟ بوشو تكلمتوا ؟

ثنيان اخذ نفس بتعب:ولاشي ، بدخل اشوف ملاك

مشى وتركها ودخل الغرفه ووقف بذهول من شاف ملاك جالسه وتناظر الجدار وقفل الباب وتقدم لها وهمس:ملاكي

رفعت عيونها ملاك عليه وتقدم لها ثنيان وجلس أمامها بهدوء وابتسم يطمنها

رمشت بهدوء ملاك بدون ردة فعل وناظر جرحها بذراعها ولف عليها:يعورك شي ؟

ماردت عليه وهي تناظره ورفع كفه ومسك كفها وناظر عيونها اللي تمتلي كلام كثير يفهمه ويقراه:كنتي بتخلين ثنيان يعيش بدونك ؟

سكت من شاف موج عيونها بدون ردة فعل بوجهها وكمل ثنيان:بقي أيام حلوه ما عشناها ، وبقي أماكن كثير ما زرناها ، بقي أحلام أبيها معك ما حققناها ، تروحين وتخليني ؟

طاحت دموع ملاك بدون رد وتقدم منها ثنيان ورفع كفه لخدها:كلميني وأبكي بحضني وعاتبيني وفضفضي لي ، أنا ماني هنا عشان تسكتين

ماردت عليه ومسح دموعها اللي على مجرى خدودها:دام الهوى راسي وراسك يهبه والله لو الأرض جنه ملوها الناس عرض و طول ‏تركت الناس والجنه وراي ‏وعشت في نارك ، أنا دايم الدوم قلبي على الماء وقلب الماء على شطك إنتي

هز راسه ثنيان يطمنها:أنا اللي ذقت نارك وعشت باللهب وأنا اللي طفيت نارك وشاركتك أمل ، وأنا اللي بعوضك عن كل شي وأسندك لين تقومين على حيلك ، بس عمري ماراح أسمح لك تتركين الدنيا هذي قبل تضحكين معي ألف مرّه

ماردت عليه وهي تتأمله ودموعها تنهمر بوجه جامد

وهمس ثنيان وهو يحضن وجهها:‏ألا يا هلاكي ويا سلوة مُناي

تقدم يحضنها وبكت ملاك من حضنه ولمس شعرها يسمع ونينها المرتخي اللي تحاول تمنعه

وابتعد عنها من انفتح الباب ودخلت ممرضه وتقدمت لملاك وابتسمت:حمدلله على سلامتك

ماردت عليه ملاك ومسك كفها ثنيان وناظر الممرضه:ياليت تشوفين جرحها

الممرضه هزت راسها:هو مغطّى الان بس لو هي حاسه بألم أعطيها مسكن

لف ثنيان لملاك وهمس:تحسين بشي يوجعك ؟

ناظرته ملاك وهمست:وين ؟

سكت ثنيان يناظر ملاك وبلع ريقه من إجابتها الوحيده اللي نطقتها وعرف ان ألمها ماهو سطحي

ولف للممرضه وهز راسه لها واخذت كفها تشبك لها الإبره:استريحي على ظهرك عشان ترتاحين

وقف ثنيان وانحنى يساعدها تنسدح ورفع المفرش يغطيها ومسح على شعرها وهو يناظر المغذي اللي شبكته الممرضه ولف لملاك:أنا حوالينك ، بس نامي وارتاحي

ماردت ملاك عليه واخذ نفس ومشى يخرج وناظر نوره:ملاك صحت

وقفت نوره وتقدم نهار وناظرهم ثنيان:بس تعبانه ، امي اذا ودك ارجعي البيت وانا اطمنك عليها

نوره:لا والله ثنيان ما اروح بدون ما اشوفها البنت طلعت من الموت ولا ترمش لي عين

لف عقاب يناظرهم ونطق ثنيان:اخاف ماتبي تشوف احد ترا ما تكلمت معي ابد

جاسر:ثنيان زوجتك يبي لها دكتور نفسي لا تهملها

ساري هز راسه:وحامل الحين يعني ماهو زين والله

رفع عيونه ثنيان لعقاب اللي يناظره ولف لامه:لا تضغطين عليها

هزت راسها نوره ومشت ودخلت الغرفه وناظرت ملاك ورفعت عيونها ملاك من ناظرت نوره

وتقدمت نوره وابتسمت بهدوء بدون تبين اسنانها:شلونك ملاك يا أمي ؟

ناظرتها ملاك بدون رد وتقدمت نوره لها وجلست على طرف السرير وبلعت ريقها بربكه وهي تناظر حالها

ودخل ثنيان وتكتف يناظرهم وهو عند الباب

نوره:حمدلله على سلامتك وحمدلله على قوتك ، أنا أشوفك أقوى وحده بحياتي عرفتها وادري وش كثر عدّى عليك وعشتيه بس انتي الحين بخير وهذا المهم ، لأنك قويه وبتعدين كل شي وبتكملين حياتك بنفس القوه اللي عرفتك فيها أول مره

ماردت عليها ملاك وكملت نوره:وأنا بحياتي ما عمري شفتك غير بنتي ومستحيل اشوفك غير كذا

تنهد ثنيان يشوف نظرات ملاك لامه وكملت نوره:انتي بنتي بأغلاطك وبطيحاتك وبقوتك وقوة حيلك ، انتي بنتي بكل زلّاتك ومستحيل اكرر اللي عيشتك اياه بطيحة عقاب ، لاني اعرفك واعرف بنتي ملاك واللي مستعده تقدمه لي ولثنيان ولدي ولأخوانه ولأصايل

ماردت ملاك تتأملها وابتسمت نوره:أنتي ما بتكملين حياتك بدون أم ، والله لأصير لك نفس ما تودّين ، وتكفين لا تشوفيني غير أم

بكت ملاك وعضت شفتها نوره ونزلت دموع نوره وتقدمت تحضن ملاك ومسحت على شعرها بضيق:ما رضيت عن عقاب والله ما رضيت ولا عرفت

تعبت من الطاري من جديد ملاك وبكت بشده وتقدم ثنيان لهم وابتعدت نوره:اسم الله عليك يا أمي ، اسم الله عليك الرحمن الرحيم ، استودعتك الله واستودعت الله روحك وقلبك ، اعوذ بالله من كل ضيق يوجعك ويعورّك

ناظرتها ملاك وهي تبكي ومسحت دموعها نوره:إنتي قويه يا أمي قويه

صد ثنيان بتعب وهزت راسها نوره:ما بخليك بجيك بس ابيك الحين ترتاحين وتريحين جرحك وثنيان عندك وحوالينك ما انتي لوحدك

ماردت ملاك وهي ترجف من ونين داخلها ووقفت نوره وناظرت ثنيان وخرجت برا ، مسحت دموعها وناظرها نهار:كيفها امي ؟

نوره هزت راسها بضيق:عن وش تسأل يانهار عن وش تسأل ؟

لفت تناظر عقاب جالس ولفت عليه:رجعني البيت

وقف ساري واخذ نفس:وانا راجع بعد ، ابوي اوصلك ؟

عقاب:ارجع مع حمدان

نوره نطقت بدون تناظره:حمدان مع أصايل ومنيف ماهو موجود

رفع عيونه عقاب وعقد حاجبينه جاسر:وين أصايل ومنيف ؟

لفت نوره على جاسر:تآزر زوجها ببيتهم سوا

عقد حاجبينه عقاب ورفع عيونه جاسر بذهول على نهار ولفت نوره تسمع سكوتهم:عسى خير ، لا يكون في احد بيعترض بعد اللي صار لهم ؟

ساري:امي وش بيته بدون زواج ؟ وشفيك ؟

نوره:زوجته من قال ماهي زوجته ؟ ووصي عليها وخرجت من عندكم له ، وانا قلت لها تروح معه ومحد له كلمه فوق كلمتي

لف ساري على ابوه اللي ساكت ومشت نوره وناظرهم نهار ومشى خلف امه

-

( لا تنسون النجمه ⭐️ )