تحميل رواية «غرورك اللي علم الطاووس نفش ريشه» PDF

قام من نومه يفتح عيونه بتعب والتفت يشوفها نايمه بجانبه ورجع يغمض عيونه بإرهاق من هواجيسه وتخيلاته اللي كانت تلازمه دايم

لف على يامور اللي بجانبه يلعب وعقد حاجبينه من شاف كوتي ولانت ملامحه ورجع يلتفت يناظرها نايمه

جمد وجهه بصدمه وذهول ، هي حقيقه مو خيال

هي بجانبه نايمه ، على سريره وببيته ، كل اللي عاشه بلاوعي وحضنها وكلامها ووجودها ماكان حلم وخيال اعتيادي عليه كانت حقيقه

رجع بظهره ينسدح وهو يناظرها نايمه وارتخى جسده يتأملها بعدم تصديق ، بإطمئنان ، بشوق ولهفه

مستريحه على مخدته بجانبه ، تركت كل اللي بوجهها وجات معه عشان ما تخليه وحده ، ولأنه صار مرعوب من الوحده ومن كل الأحداث اللي مشت فيه

تنفس بتعب وهو يناظرها غافيه ورفع كفه على شعرها بخفه ونط يامور بينهم وعقدت حاجبينها بإنزعاج

وفتحت عيونها وناظرت يامور ورفعت عيونها لمنيف وبلعت ريقها وجلست بسرعه وناظرت الغرفه تستوعب وجودها وغفوتها اللي ما حست فيها

غمضت عيونها بربكه تشتت تفكيرها عن نظرات منيف لها وفتحت اللحاف ووقفت تمشي للحمام

ولف منيف وناظر يامور يفهم حركاته من جوعه ووقف منيف ومشى يامور خلفه ومشت كوتي خلفهم

ودخل منيف المطبخ وفتح الدولاب وجلس وناظر كوتي اللي تقدمت له ورفع اصابعه على راسها يمسح عليه

وفتح لهم الاكل وناظرهم ياكلون وهمس:أسف يامور

كان ياكل بشراهه يامور من إهماله بالفتره الاخيره ونسيانه

طلت عليه تناظره بالمطبخ جالس بين يامور وكوتي وهم ياكلون ويمسح على كوتي بكفه وهادي ، بملامح متعبه مرهقه وبال مسروق مغلوب بالهواجيس والتفكير المفرط

حطت براسها على الجدار تتأمل ضياعه وانهياره الصامت ، عاش شي كثير لوحده كان لوحده يلازمه يامور فقط

كيف قدر يعيش مع أفكار لوحده بدون صوت أحد بالبيت معه

عضت شفتها تمنع نفسها تبكي وهي تشوفه وتشوف ضعفه ورعبه ، كان وهو يمسح على كوتي ترجف اصابعه تجهل سبب رجفته لكنها تخاف عليه

دخلت ورفع عيونه منيف وناظرها وسكت وبلعت ريقها أصايل من سكوته ومشت تفتح الثلاجه وتطلع فطور وتحطه على الطاوله

ونزل عيونه منيف لكوتي ويامور وجلست أصايل وناظرته وهمست بتوتر:منيف

لف عليها وناظرت الاكل ورجعت ناظرته ووقف منيف وسحب كرسي وجلس وناظر الاكل وهو ساكت

وبلعت ريقها أصايل تناظره وتكلمت بهدوء:ما بتاكل ؟

مارد عليها منيف واخذت نفس أصايل:بنفطر ونروح نشوف ملاك

لف عليها منيف وهز راسه بالنفي وبدأ ياكل:مابي اشوفها

عقدت حاجبينها تناظره ياكل:كيف ماتبي تشوفها ؟

مارد عليها منيف ورفع عيونه عليها وارتبكت من نظراته وتقدمت بهدوء:ملاك كانت تعبانه منيف ، ما فكرت حتى بنفسها لا تعتب عليها

مارد منيف وهو ياكل وكملت أصايل:هي تحتاجك الحين وتبيك أكيد جنبها

رفع عيونه منيف للفراغ يذكر نظراتها له وهي ماسكه الموت بيدينها الثنتين متجاهله شعوره ووحدته ورعبه من الفقدان

وجمد وجهه يناظر الفراغ واستغربت حاله أصايل ومدت كفها لكفه وهمست:منيف تكلم معي ، قولي اللي تحسه

لف منيف عليها يناظرها وعضت شفتها بحزن من شكله وهزت راسها:قولي وبترتاح بتفهم كل شي تحسه من ضياع بس تكلم معاي

منيف سكت ثواني يناظرها ونطق:انتي تركتيني

سكتت بربكه أصايل تناظره وكمل منيف:خليتيني اجرب من جديد الظلام اللي سكنته بعد أمي وأبوي

نزلت راسها أصايل وبكت من طاري أهله اللي الواضح ما تخطاه

ونطق منيف:وحتى ملاك كانت بتخليني

رفعت عيونها عليه ومسحت دموعها بخوف من طاري ملاك

منيف:والله مشتاق لأبوي وأمي

بكت أصايل وقامت من مكانها وتقدمت له وحضنته وهو جالس وغمض عيونه منيف بجهد من كل اللي يحسه

ومسحت على راسه وهي تبكي بدون صوت من كل اللي عاشه منيف وقاعد يعيشه

'

قطع لها بيدينه الخبز والتفت لها:كلي ملاك

فتحت فمها تاكل ببطئ ولف ثنيان من انفتح الباب ودخل الدكتور:سلام عليكم

التفت عليه ثنيان ووقف:وعليكم السلام

الدكتور ناظر ملاك اللي تاكل وتناظر الاكل:كيفك ملاك ؟

لف ثنيان وناظر ملاك اللي ماردت والتفت الدكتور لثنيان:رفعت حالة زوجتك لدكتوره كويسه هنا عشان العلاج النفسي يسـ

قاطعه ثنيان برفض:لا زوجتي ما تحتاج دكتور نفسي ، زوجتي تطيب وهي جنبي ومعي ما يحتاج

رفعت عيونها ملاك على ثنيان واخذ نفس الدكتور:عارف صعوبة الموضوع بس زوجتك خرجت من تجربة إنتحار يعـ

تقدم ثنيان للدكتور:متفهم حرصك يادكتور وعملك المتقن بس أنا أدرى بزوجتي وأنا أتحمل المسؤوليه

سكت الدكتور وناظر ملاك ورجع ناظر ثنيان وخرج

وتقدم ثنيان وهو عاقد حجاجه ورجع يجلس واخذ الاكل ولف لملاك يلقمها بيده ونطقت:تعبت مني ؟

رفع عيونه لعيونها ثنيان من تكلمت ونزل يدينه:وش هالكلام ؟

ملاك سكتت وناظرها ثنيان:أي تعب ؟ أنا ما تعبت عليك أنا أساندك وأحبك ، وبتكونين معي وبتطيبين جنبي وبترجعين احسن من قبل

ملاك همست:وين توديني ؟

ابتسم من فهم مطلبها:البحر

سكتت ملاك وكمل ثنيان:بس ماهو قريب من اليابسه ابد ، انتظرك تطيبين وبنروح نبحر بالبحر سوا وبحجز رحله بحريه طويييله معك

ناظرته ملاك وابتسم ثنيان:تجربه ما عشتها من قبل بعيشها معك الحين

ناظرها ساكته ورجع ياخذ من اكلها:بس قومي على حيلك عشان نروح البحر

ملاك ناظرت اللقمه من اصابعه:ما اقوم على حيلي من غذاء

سكت ثنيان يناظرها وهمست ملاك:وجودك

ابتسم ثنيان وهز راسه لها واخذ نفس وشال الاكل والتفت لها:ودك تطلعين اليوم ؟

ملاك نطقت بسرعه بخوف:وين ؟

ثنيان:البحر قلت لك

سكتت من زرع الخوف داخلها اسئله ولف لها ثنيان:ما بخليك تشوفين احد تطمني

ناظرت عيونه ملاك وسكتت ولف ثنيان من دق جواله وطلعه من جيبه وابتعد عنها

رجعت راسها تسترجع الاصوات اللي تسمعه ونظراتهم ووجودهم وصراخهم ومنظر منيف أمامها وعقدت حاجبينها

ولف ثنيان من قفل جواله وناظرها وتقدم:تطلعين ؟

ناظرته ملاك:بشوف منيف

هز راسه ثنيان:نمرّ عليه

هزت راسها ملاك وخرج ثنيان يوقع على خروجها

ورجع لها ولمّ اغراضها وساعدها تجلس ونزلت رجولها على الارض تشعر ببرودة المستشفى برجلينها الحافيه ، تذكر هذا الملمس يوم تبرعت بكليتها وكانت لوحدها بدون احد

بس الحين في من ماسك ذراعها ، رفعت عيونها لثنيان اللي واقف يساعدها ووقفت على حيلها

وابتسم ثنيان وناظرها:حمدلله

اخذ الاغراض بيده وبيده الثانيه ماسك ملاك اللي سانده عليه وخرجوا

فتح الباب وركبت وتألمت من ذراعها وقفل الباب ثنيان وحط الشنطه بالخلف وركب محله والتفت ناظرها

قفل ازرار البيبان ولف للطريق واخذ جواله اللي يدق ورد:هلا نهار

نهار:امي جهزت الشنط مع الخدم وش اسوي اجيبها لك وين ؟

ثنيان:عند بيت منيف ، تعال

نهار:طيب

قفل نهار وناظرته نوره:وش قال ؟

نهار:ببيت منيف

عقدت حاجبينها نوره:خرجوا ؟

نهار:شكله

نوره تنهدت:طيب روح يا أمي وطمني على أصايل ومنيف بعد

هز راسه نهار وخرج وبيده شنط ثنيان وملاك ولف عقاب يناظرها وناظرته نوره وصدت عنه بحده ودخلت داخل تاركته وحده

'

وقف عند البيت ولف لملاك بخوف من انهيارها وتقدم لها ومسك كفها وباسه:ملاك

لفت تناظره وناظر عيونها:أنا جنبك طيب ؟

سكتت تناظره وتنهد ثنيان ونزل من سيارته ومشى وفتح لها الباب وساعدها تنزل ونزلت ومشت معاه

تقدم للباب ودقه ولفت أصايل من سمعت صوت الباب وناظرت منيف:يمكن نهار ، اشوف ؟

هز راسه منيف وهو جالس بالصاله ومشت أصايل وفتحت الباب وعقد حاجبينه ثنيان من شافها موجوده وهمس:أصايل ؟

بلعت ريقها وناظرت ملاك بخوف من حالها ولاردت عليه

ونطق ثنيان:ليه انتي هنا ؟

ناظرت ثنيان بربكه:عشان منيف

ثنيان لف لملاك وتقدم ومشت ملاك معاه ودخلت البيت

تقدمت تناظر ظهر منيف اللي جالس بالصاله ووقفت ملاك وهي تناظره ولفت أصايل على ملاك وعضت شفتها

ولف ثنيان لمنيف:منيف

لف من سمع صوت ثنيان وناظر ملاك ولانت ملامحه يناظرها ، بكت ملاك بعلو صوتها وهي تناظره وبلع ريقه ثنيان

ووقف منيف وناظرها وتقدمت ملاك وهي تمشي بألم وتناظر منيف

بكت ملاك ورفعت كفها تتمسك بكتفه وهي تبكي ومنيف واقف جامد محله وتقدمت تحط براسها على صدره وهي تبكي

وناظرهم ثنيان ورفع عيونه منيف على ثنيان وأصايل بدون ما يرفع ذراعينه لها

وابتعدت ملاك وناظرته وهي تبكي:محروقه

ناظرها منيف وكملت ملاك وهي تبكي بإندفاع:متعوره منيف

منيف نطق بهدوء:وأنا ؟

ناظرته ملاك وكمل منيف:ما فكرتي كيف بكون ؟

نزلت راسها تبكي وتقدم ثنيان:منيف ، ملاك تعبت شوي وتحتاج ترتاح وتحتاجك جنبها وانت تحتاجها

ناظره منيف وهو ساكت وناظرته ملاك ولف منيف عليها ونطقت ملاك:ما سمعت غير صوتك بينهم

بكت بتعب تنحني وتقدم ثنيان يحضنها وعضت شفتها أصايل تبكي بصمت وهي تناظرهم

وصد منيف يرفع كفه اللي يرجف على صدره بإختناق ورفعت صوتها ملاك وهي تبكي:كنت ابي ارتاح بس ما ارتحت منيف

رفعت عيونها تناظر ظهره وشد على كتوفها ثنيان بتوتر وهمس:ملاك

تقدمت أصايل ومسحت دموعها وناظرت منيف:منيف خلاص تكفى

لف منيف وناظرهم:خلاص انا خلاص انا ؟ مره وحده افهموا مكاني ، اختي كانت بتموت منتحره وتتركني لوحدي

بكت ملاك بعلو صوتها وصدت أصايل تبكي ولف منيف لملاك:كنتي دايم تروحين وتتركيني دايم تتركيني ، لو رحتي للابد ما كان سامحتك

بكت ملاك وهي تناظره وناظرها منيف بحرقه:كيف ما فكرتي بحالي ؟ كيف فكرتي تتركيني لوحدي بدنيا اوجعتك انتي ؟ انا قبل اجيك كنت ابكي بين قبر امي وابوي ، للحين ابكي عندهم بعد كل هذي السنين ، كيف فكرتي تخليني اطيح عند قبرك انتي بعد ؟

ناظره ثنيان بضيق من الطاري وجلس منيف وهو يأشر على صدره ويناظرها:للحين ابكي لوحدي كأني طفل ما كأن يكسيني شارب ، للحين أخاف أصير وحدي وانتي تعرفين

بكت ملاك بعلو صوتها وغمضت عيونها وهي تبكي وناظرها منيف:زرعتي داخلي خوف مستحيل ينمحي

لفت أصايل تناظره وهي تبكي واخذ نفس ثنيان:اللي عشتوه صعب وانا عشته معكم وما ألومكم دام للحين ملاك جنبي وقدامك ودام انت للحين عايش مع اختك فالأمور اللي مضت ما تهم

ناظره منيف وميّل راسه ثنيان بترجي:خلاص منيف

لف منيف يناظر ملاك اللي تبكي بوجع وحسّ ببكاه وخاف انه يبكي بينهم ووقف ومشى لملاك وجلس عندها وحضنها وهو بالارض ورفعت ذراعها تحضنه ملاك وهي تبكي

وصد ثنيان يبلل شفايفه بضيق وبلعت ريقها أصايل وهي تشوفهم

وقف ثنيان ومسح شاربه بتوتر وصد عنهم وابتعدت ملاك وناظرت منيف:أسفه لأني دايم أعورك

سكت منيف يناظرها وكملت ملاك:كنت أبي الكل يرتاح مني حتى أنا

غطت فمها أصايل تناظر ملاك وبكت ملاك ورفعت كفها لمنيف وهي تبكي:والله ما وقفني غيرك

نزل راسه منيف وحطت راسها على راسه ملاك وهي تبكي وهمس منيف:إنتي الباقي من أهلي

'

جلس منصور يسمع ابوه اللي يتكلم وساهي في الفراغ

ناظرته جواهر ساكت ولف محمد:منصور

رفع عيونه منصور وهو يدخن وناظر ابوه ونطق محمد:خلاص هالحال كأن مايت لك ميت ، اخذنا اللي بغيناه

منصور:انت اخذت اللي تبيه

سكت محمد ورفع ظهره منصور يكمل:انت بغيت فلوس وولدك وجاك ولدك والفلوس

ناظرته جواهر وهمست:وانت وش بغيت ؟

لف منصور يناظر جواهر وتنحنحت وفاء:منصور خلنا نقطع عالسيره دام ما دخلنا شرّ

لف منصور لامه:انا ماني مقفل الموضوع ، عقاب يوم جاني ما وعدني كذا

محمد:وعدني انا ووفى بوعده خلاص منصور فكنا من هالطاري

منصور:انا وعدني وعد غير ، قالي ملاك بترجع للمكان اللي خرجت منه

رفعت حاجبها جواهر من جاب طاري ملاك وكمل منصور:قالي ملاك بتترك ثنيان وبينفصلون بأول مشكله وملاك ما سوت كل هذا الا لانها تبيك وجيت وخرجت وسببت مشاكل بينها وبين زوجها بس وينها ملاك ؟

سكتوا يناظرونه وكمل منصور:بالمستشفى خارجه من انتحار

رفع حاجبينه يناظرهم وكمل:وحامل بحفيد عقاب

شادن:وانت كنت تنتظر ملاك ترجع لك بعد كل هذا ؟

منصور ناظر شادن بحده:اي لاني انحديت وباعتني وجيتها ودورتها المفروض انها هنا ، حتى لو خسرت ملاك المفروض تخسر هنا

جواهر:وانا ؟

لف منصور يناظرها وناظرته جواهر:وش كسبت ؟ اذا حتى انت ما كسبتك

منصور:انتي اخذتيني عشان تكسبين ثنيان مو عشان تكسبيني انا

جواهر هزت راسها:انا عرفت ان ثنيان ماهو لي من يوم دخلت ملاك حياته بشرّها بس اخذتك عشان ننتقم مو عشان ارجع له ، بس اثاريك تحفر كل هالحفر عشان ترجع ملاك لك

محمد:تخسى ملاك والله ما ترجع لو تموت ذلّ ما احنا بحاجتها

وقف منصور وناظرهم بحده:انت مو بحاجتها ، شادن يوم باعتها ماهي بحاجتها كلكم ما تحتاجونها ، بس انا اللي رميت نفسي سنين بالسجن عشانها بحاجتها

هز راسه يناظرهم:صارت أم لعيال شخص ثاني بسبب عقاب

محمد:ما بتسوي لنا مشاكل يامنصور بعد ما استرحنا

سكت منصور ووقف محمد بغضب:منصور

هز راسه منصور:تطمن

طفى سيقارته ومشى يتركهم ولفت جواهر تناظره ولفت عليهم واخذت نفس:وانا مالي مكان هنا بعد

وقفت ونطقت شادن:جواهر

لحقتها تدخل خلفها وضربت فخذها وفاء ولفت لمحمد:الله يستر لا يسوي شي

محمد:لا ما يسوي مستحيل يرجع لنفس الجحر اللي كان فيه

'

راكبه جنبه بالطياره وتناظر الغيوم ولفت عليه:قلت البحر ماقلت الجو

ابتسم ثنيان وشد على كفها:بس ماحددت اي بحر

ملاك:وش بنسوي ببرشلونه ؟

اخذ نفس ثنيان ولف لها بجسمه ومسك كفها بكفوفه الثنتين:والله يا هلاكي بحقق امنيتي اللي انتظرت احققها وما حصلت فرصه

ناظرته ملاك وهي ساكته وكمل ثنيان وابتسم:رحله بالبحر الأبيض من ميناء برشلونه عبر كُروز يبحر فينا ثمان أيام من برشلونه ، بابيزا، نابولي ، ليفورنو، جنوة ومرسيليا

عقدت حاجبينها بذهول ملاك وضحك ثنيان من ردة فعلها:بنمر عليها بالبحر بس انا واياك بناكل وننام ونسهر سوا واحنا بالبحر بس بالبحر ، تاركين كل شي على اليابسه

ملاك سكتت تتأمله ، ياخذ من وقته وطاقته قدره عشان يعالج أوجاعها ، تتخيله يمسح على خدوشها وجروحها بكل هذي الحنيّه والقدره الكبيره بالتمسك فيها مع انها نار ولَهب

ابتسم وهو يناظر نظراتها له ونطق:نظراتك الصامته لي تجيب حَتفي ، تهلكني ياهلاكي

ابتسمت ملاك لأنه قاعد يغمر اكتئابها بالحب ، لأن الحب علاج نفسي مفعوله سحري ما يشبه اي رقائق وأقراص مصنّعه ، قادر يعالج الشخص من جروحه ويخفي همومه ويزرع داخل صدره طمأنينه وأمان وينثر على وجه بني آدم راحه وسعاده وتقاسيم إبتسامه

أعلنوا الهبوط بعد مده قضوها بالطياره ووقف ثنيان ومشى معها ونزل للمطار ووقف ولف عليها:تبين قهوه تبين عصير تشربين شي ؟

ملاك:اكلنا بالطياره

ثنيان ابتسم:قهوه لان تخيلي الى الان ما شربنا قهوه سوا ؟

ابتسمت ملاك:بتحقق أمنياتك اليوم ؟

ضحك ثنيان وهو ماسك كفها وهز راسه ومشى وطلب قهوتين ومشى معها واخذوا شنطهم وخرجوا سوا من المطار ولفت ملاك تناظر اللي رافع لوحه بإسم ثنيان وهمست:ثنيان

لف عليها بإهتمام بكامل جسده يناظرها وناظرته كان يلتفت لها يبي يشوفها ينتبه لها ويسمعها حتى وسط موجة الازدحام اللي بالمطار وسكت يناظرها ينتظرها تتكلم لانه يبيها بس تتكلم وتفك عقدة لسانها

وشدت على كفه وهي تناظر نظراته لها واهتمامه بكامل جوارحه ، عين تنظر لها وإذن تسمع لها وقلب يتلهف على كلامها وبال كامل لها منتبه همست:أحبك

لانت ملامح ثنيان بهدوء لين ابتسم وبانت أسنانه وابتسمت من ابتسامته ورفع ذراعه على كتوفها وباس جبينها:وثنيان يحبك

مشى معها وناظر اسمه وتقدم وركبت السياره وركب معها وحرك السواق لميناء برشلونه

لفت تناظر اسبانيا وشوارعها وجوّها الصيفي ، شعبها وسيّاحها

فتحت الشباك تشم ملوحة البحر وناظرت الميناء من وصلوا له ونزل ثنيان وتكلم بالانقليزي مع السواق اللي ينزل شنطهم ورفعت عيونها بذهول على حجم السفينه الكبيره اللي بتبحر فيهم ولف ثنيان وابتسم يناظر الكروز ولف لملاك وضحك:حلم حياتي بيتحقق معك

ابتسمت له ملاك من فرحته اللي مو قادر يخفيها ومشوا يدخلون الكروز ويدخلونه وكل مالهم ينذهلون من مساحته الكبيره ، مطاعم وغُرف وصالات ألعاب وصالات مائيه ومسارح غناء وطرب وجلسات هاديه

ودخلت الغرفه المخصصه لهم ومشت توقف عند الزجاجه تشوف البحر أمامها

وتقدم ثنيان وحضنها من الخلف وهو يناظر البحر:أول ما نبحر بكون جمعت الموج مع لَهب

رفعت كفوفها ملاك تمسك ذراعينه اللي حاضنتها واخذت نفس تتأمل البحر

لفت عليه بعد ثناني:بغير ملابسي واجيك

هز راسه بها ومشت تدخل وفتحت شنطتها وانتظرها ثنيان عند باب الغرفه وخرجت له وابتسم من فستانها وتقدمت له ومدت كفها

ومسك كفها وتقدم لآخر الكروز يوقف ويشوف البحر والغروب وابتسم وتكّى بيده

اخذت نفس ملاك تتأمل الموج وصوت البحر وهدوء المكان والهواء اللي يداعب طرف فستانها الملون المستريح براحه على جسدها

لفت لثنيان:ودي أتكلم

لف ثنيان عليها واعتدل بوقوفه يعطي البحر ظهره ويناظرها وهو ماسك كفها:وأنا ودي أسمعك

ناظرت كفه ملاك ولمست كفه الثاني وناظرته:اذا تعرف شي اكثر من اللي عرفته قوله لي مابي يتخبى عليّ شي من جديد

تنهد ثنيان وهز راسه:بقولك بس اذا تعشينا

ملاك ناظرت عيونه:ماراح تخبي علي شي ؟

هز راسه بالنفي ثنيان ومشت ملاك معاه ولف وابتسم لها:أمي من وين طلعت لك هالملابس الحلوه ؟

ابتسمت ملاك تناظر فستانها وناظرته:قلت لأمك ؟

ثنيان:مابي أصدمك بس هي حجزت لنا ، قالت لي روح سو اللي بخاطرك تسويه من زمان بس مع ملاك وجهزت لي شنطه ولك شنطه وارسلتها مع نهار

ابتسمت ملاك من طاري نوره ولفت تشوف البحر ورفع ذراعه ثنيان على كتوفها وناظر البحر

'

رفعت عيونها من خرج منيف من غرفته ووقف يناظرها جالسه بالصاله ويامور وكوتي عند رجلها

وبلعت ريقها:عادي أظل هنا أكثر ؟

تقدم منيف وجلس بجانبها والتفتت أصايل بجسمها تناظره ونطق منيف:عادي

أصايل:ما ودي أواجه ابوي ابد ولا أبي أسمعه

سكت منيف من طاري عقاب واخذت نفس:يدق عليّ بس ما أبي ارد عليه ابد

منيف:تعرفين ان هذا البيت كان بيكون بليله بيتنا سوا

سكتت أصايل وهمست:كان !

منيف:قبل ما تحطين دبلتك هذي على هذي الطاوله

رفع دبلتها وناظرتها أصايل وبلعت ريقها ورفعت عيونها لمنيف وناظرها منيف:مابي تجلسين معي شفقه ودين من أبوك أو مشاعر عادي تزول بعد فتره ولا ابي أحبك اكثر وتتركيني

ارتبكت من جديّته وكلامه وكمل منيف:مابي تمرّ أيام طويله وتصحين وتقولين غلطت وتسرعت

رفع كفوفه منيف:هذا منيف قدامك شخص حزين وحيد عاش بفتره طويله من حياته بظلام ، هددك وأرعبك وكذّب عليك وبلحظه صدمت شخص بسيارتي ودخلت السجن بسببه

رجفت كفوفها تناظره وناظرها منيف:تبين تكملين معه ؟

ناظرت عيونه المُتعبه وبلعت غصتها ونزلت عيونها لدبلتها ورجعت ناظرته:لا

سكت منيف يناظرها بدون ردة فعل وكملت:ما أبي منيف هذا ، أبي منيف اللي اخذني من حضن أبوي لحضنه وحفظ كل تفاصيلي عن ظهر غيب ورسم أحلامي اللي يعرفها عني ، أبي منيف اللي دخل بين أخواني وطلبني بتكرار وتشجع واعترف لي بنفسه عن كل اغلاطه

رفعت عيونها لعيونه وتقدمت له ورفعت كفها على صدره ولمست قلبه:أبي منيف اللي يحبني وأسكنه ، أبي منيف اللي ما يخجل يبكي ويبرر تصرفاته ويعترف بأغلاطه ، أبي منيف اللي يعطف على حيوان سكن معه ببيته ورعاه ، أبي منيف اللي صار يشرب شي ما يحبه عشان أنا أحبه

سكتت ثواني تشوف نظراته وكملت:أبي اللي حبيته

عقدت حاجبينها من حست انها بتبكي وناظر عيونها وموج دموعها منيف:‏أنا عايش على سلك الأمل حزه ورى حزات انك تصيرين حلالي ببيتي أم عيالي ، أنا رسمت قعداتك هذي حواليني أيام طويله ، عشت لوحدي بس مع طيوفك

رفعت عيونها تتأمل عيونه وهدوء صوته وهو يتكلم معها من قريب

وهز راسه بتعب منيف:اللي تحبينه قدامك بس متعوّر

مسحت على صدره بكفها:أنا دواه

ناظر عيونها منيف وكملت أصايل:أنا واثقه باللي أبيه ، وإنت اللي أبيه

سكت منيف ونزل عيونه لثغرها ورجع ناظر عيونه كان يشعر بإنه لو أقدم ما بيمنعه شي بعدها يوخّر عنها ولا وده يخطي ويتسرع معها لكنه يحس فيها تبيه وتبي قربه وهي حلاله عَلم ليه يمتنع ؟

اقترب منها بهدوء وارتبكت من قربه ونزلت عيونها لثغره تشعر بصوت انفاسه ونبضاته واقترب لين لمس ثغرها برقه وغمضت عيونها تتناثر مشاعرها داخل بطنها

رفع كفه لفكّها وهو يقبّلها على كنبة بيته بصالته بين أياديه ، حلم بعيد طال وهدف أبَى لين تحقق

شدت على كفها اللي متمسكه بتيشيرته ورجعت للخلف تستريح وقبّلها أكثر ، يخيّط كل جرح فَتقه الزمن ويعالج اللي تورم داخله من قربها

وتكون داخل صدره الخايف دايم الدوم سُكون من قربها ، وسمع تهشيم الوحده المرعبه اللي داخله من قربها بين اياديه ، تبالغ في داخله وكأنها أكثر من توقعاته ،قُبله منها عدلت كل خطاويه السريعه والمتودده وزرعت داخله ثبات وطمأنينه

رفع راسه من دق الجرس وناظرته أصايل وهي تتنفس والتفت منيف يناظر الباب وابتعد عنها ووقف وغادر الصاله

وجلست أصايل ومسكت عنقها بربكه ورفعت شعرها خلفه أذنها بتوتر ولفت ووقفت ومشت خلف منيف ووقفت من شافت عقاب عند الباب

ورفع عيونه عقاب على أصايل بضيق من شاف نظراتها له ولف لمنيف ماله وجه يطلبه يدخل بيته

وناظره منيف ثواني طويله وترك الباب ومشى يدخل تاركه على الباب

اخذ نفس عقاب وتقدمت أصايل وناظرته:ليش جيت ؟

عقاب تقدم وناظرها:أفا يا أصايل أفا وأنا أبوك ؟

أصايل:خذلتك ؟ ماهو قد خذلاني منك ماهو قد صدمتي منك

عقاب لف يناظر منيف اللي جالس ومعطيهم ظهره وتقدم لأصايل:بس ما تطلعين من بيت أبوك

ناظرته أصايل بذهول:أي أبو ؟ اللي حرقنا كلنا مره وحده عشان شغله ؟

سكت عقاب وناظرته أصايل:كنت مستحيل أشك انك تأذي كوتي قطوتي ، كيف قدرت تحرق ملاك ؟

عقدت حاجبينها أصايل:انا تأذيت منها بس ما بعت عشرتها ، بيننا عيش وملح ، ملاك صارت أختي شلون سويت فيها كذا وفي ثنيان وفيني وفي نهار ومنيف ، ليش وصلتها لمرحله تبي تنهي حياتها بيدينها ؟

نزل راسه منيف وهو يسمعهم وكملت أصايل تناظره بصدمه:كيف زوجتني بالأول لمنيف وانت تدري عن كل شي ؟

عقاب نطق بهدوء:مشكلتي ماهي مع منيف ، مشكلتي داخلي

عقدت حاجبينها أصايل بضيق ولف عقاب وناظر منيف ورجع ناظرها:ملاك ما اخذت منك فلوس

أصايل:ما اخذت لأن منيف رفض

ناظرها عقاب وبلعت ريقها أصايل ولفت لمنيف اللي يناظرهم ورجعت تلف على أبوها:وصار وأنا تخطيت وجروح ملاك عليّ فدا ، مستحيل أبيع وحده عاشت معي عشان ماضي شين لها

عقاب سكت يناظر أصايل يستوعب انه حرق كل الدنيا بسبب حريق بالماضي

وكملت أصايل:وماراح أرجع بيتك ، هنا بيتي وبلغ كل الناس ان أصايل ببيت زوجها ولاتبي عرس

لف منيف من سمع كلامها ولانت ملامحه ورفعت حاجبينها أصايل تناظر عقاب اللي ساكت

ولف عقاب على منيف ورجع ناظر أصايل:بس تأكدي لو بغيتيني بتلقيني

سكتت أصايل بدون رد عليه ومشى عقاب تاركها وناظرته من اختفى وقفلت الباب وغمضت عيونها من كل المشاكل اللي سببها عقاب لها ولملاك ولمنيف وحتى لثنيان ونهار

اخذت نفس ولفت من تذكرت منيف اللي يناظرها من بعيد وبلعت ريقها تناظره ولفت من دق الباب وغمضت عيونها بتعب من محاولة ابوها وفتحت الباب ولانت ملامحها تناظرهم

وابتسم نهار:الصراحه ما اشتقت لك ، اشتقت للفال الطيب

وقف منيف من سمع صوت نهار ومشى وناظر نهار وخلفه جاسر واستغرب تواجده وتقدم نهار ومعه عصيرات وبيتزا:قولوا ما تعشيتم

ابتسمت أصايل ودخل جاسر وناظر منيف:سلام عليكم

منيف هز راسه ومشى يدخل ولف جاسر لأصايل وناظرته أصايل وهمست:مو جاي تحاسبني صح ؟

جاسر اخذ نفس وهز راسه بالنفي وابتسمت له أصايل:تعال

تمسكت بذراعه ودخلت ولف منيف على نهار اللي وزع المشروبات وفتح البيتزا ورفع عيونه لمنيف:تحب الخضار صح ؟

سكت منيف يناظر نهار وضحك نهار:هكرت مخك هالمره

ابتسم منيف بهدوء ولف نهار لأصايل:واحلى بيتزا رانش لأصولي

ضحكت أصايل وجلست:كويس جيتم

جلس جاسر وناظر أصايل:لمحنا سيارة ابوي جاك ؟

هزت راسها أصايل بضيق ولف جاسر لمنيف:كلمك ؟

هز راسه بالنفي منيف:جاي عشان بنته

نهار:تصدق الفال الطيب والله حسيت بجوعك لاني ادري محد عندك يطبخ لك

جاسر لف لنهار:نهار وش هالدم الثقيل ؟ اصبر خلنا نتكلم جدّ

نهار شرب من عصيره:الجدّ توفى طال عمرك

ضحكت أصايل:سامج

ضحك نهار وبدأ ياكل ورفع عيونه جاسر لمنيف اللي يناظره وتنهد يسكت

-

تقدم ثنيان للمطعم وجلس وجلست ملاك ولفت تناظر مشهد البحر مع إبحار الكروز الهادي

طلب أكل لهم سوا وبدوا ياكلون بهدوء وبين وهله ووهله ينطق لها بموقف يخليها تضحك كان متحدي وماخذ يمين انه بيضحك معها عن كل يوم بكت فيه

رجعت ظهرها للخلف بعد ما انتهت من اكلها:ثنيان

رفع عيونه ثنيان ورجع ظهره للخلف واخذ نفس:أبوك مساعد الله يرحمه

سكتت ملاك من طاري ابوها وكمل ثنيان:كان جار لأبوي من قبل ما يتزوج ابوك ويتزوج أبوي

عقدت حاجبينها ملاك وتقدمت تسمعه وكمل ثنيان:وكانت تسكن بحيّهم بنت كان ابوي ناوي يتزوجها ويتكلم لأبوك عنها أيام طويله ودخل العسكريه أبوي تارك أبوك وراه ودرس ثلاث سنين

هزت راسها ملاك تسمع سيرة ابوها وعقاب اللي ما سمعت فيها من قبل

ثنيان:ورجع لقي ابوك تزوج البنت اللي كان يبيها

سكت ثواني ثنيان وكمل:أمك ، زَهره

جمد وجه ملاك تسمعه واخذ نفس ثنيان وضم يدينه ببعضها وناظرها:وأبوي احترق عمره كله وقبل ما تنطفي ناره أبوك توفى ، وعرف بجيّتك وجيّة منيف وراقب حياتكم كلها ، وأول ما طاح نهار بمشكله جاك ورسم لك الدرب كله اللي خططتي عليه

هزت راسها بالنفي ملاك:أبوي مستحيل يطعن أحد بظهره

ثنيان:صدقيني انا ماني مع أبوي حتى لو فعلاً حصل ، أبوك توفى وأمك توفت معه المفروض كل هالنار تندفن ، ليه انتي ومنيف تدفعون الثمن عن شي ما عشتوه ولا كنتم سبب فيه ؟

عقدت حاجبينها ملاك تناظره وكمل ثنيان:ماني معه ولا بصفه وألومه وأعتب عليه

سكتت ملاك وهي عاقده حجاجها وكمل ثنيان:يعني شي بالماضي دفعنا كلنا ثمنه ، نار قديمه ما انطفت ولعت نار جديده بكل واحد

ملاك ناظرته بذهول:أبوي عنده صوره لأبوك

عقد حاجبينه ثنيان وتقدم يناظرها وكملت ملاك وهي تتذكر:أشك انه أبوك صوره قديمه ثنيان قديمه وجودتها ماهي واضحه بس وراها كلام مافهمته ، قريناه انا ومنيف سنين بس مافهمناه

ثنيان:وش مكتوب خلفها ؟

ملاك امتلت عيونها بموج دموعها من تذكرت الصوره السوداء والبيضاء اللي احتضنتها سنين تتأملها:‏نبني بيوت أحلامنا وأثرها ثلج ، وإليا أشرقت شمس الضحى ذوبتها

عقد حاجبينه ثنيان ومسكت راسها بتعب ملاك:يمكن اللي بالصوره هم سوا ؟

ثنيان هز راسه:لا رجعنا شفتها

ملاك:بس أبوي ما أخذ أمي يعرفها

ثنيان:شلون يعني ؟

ملاك:أبوي كان يقول انها كلام شيّاب جلسوا وخططوا وعطوهم لبعض

ثنيان عقد حجاجه:غصب ؟

ملاك:ماعمره قال غصب

ثنيان:يمكن مايقدر يقولها ؟

ملاك رفعت عيونها ونزلت دموعها:أصعب شي توقف الحقيقه عند فم ميّت ، بنهلك لو أبوي مظلوم بهالقصه ومات قبل يقولها

تنهد ثنيان ومسك كفها:أبوك توفى الله يرحمه ويغفر له ، وهذي زلّات وقصص ماضي المفروض ما تحكم علينا حالياً

مسحت دموعها ملاك ولفت تناظر البحر بضيق ورجع ظهره للخلف ثنيان يفكر باللي قالته

ولفت ملاك عليه وناظرته:وليش ما وقفت مع أبوك ؟

ناظرها ثنيان وسكت وهزت راسها ملاك تناظره:تنتصر مره وحده عليّ

ثنيان:انا انتصرت عليك من زمان أخذت منك أغلى شي تملكينه

ناظرت عيونه من فهمت مقصده وتقدم ثنيان وناظرها:في أغلى من قلبك ؟

تقدمت ملاك له:ما أشعر بدفى الا معك ، وأحس ان بصدري شمس ما تغرب ابد

سكت ثنيان وكملت ملاك:بس شلون حبيتني ؟

ابتسم ثنيان يناظرها:‏تقاسمنا الظما بالتساوي ، وانتي وانا قلوبنا على الماء

ابتسمت له ملاك تناظر عيونه وتسمع دفى صوته:ماكان قدرت اعيش بدون موج

ثنيان:الموج قادر

ملاك:لو تطلب عمري الباقي عطيتك

ثنيان:لا عاد تعطين ، كل ما عطيتي تعورتي

ملاك:بس انت عطيتني كل شي انا ماعطيتك شي

سكت ثواني ثنيان:انا مابي تعطيني غير موج ولَهب

سكتت ملاك ولانت ملامحها وناظر تغير حالها ثنيان وكمل:وهذا الوقت المناسب اللي بتجينا فيه موج وتملي حياتنا فرحه

بلعت ريقها وضمت كفوفها ببعض:مو مناسب ابد أحمل

ثنيان سكت وناظرته ملاك:حامله همومي مابي أحمل شي أكثر

ثنيان:كنتي مستعده تعطيني عمرك وهو اغلى شي ، ما تعطيني روح من روحك ؟

ملاك تنهدت بتعب:ثنيان مابي أظلم أطفال

ثنيان:ماهم أطفال هم بناتي وبناتك وبيكونون فخورين بأمهم وحنونين على أبوهم وبيمسحون كل جرح داخلنا انكوى

ملاك هزت راسها بالنفي بتكرار وبخوف وكمل ثنيان:تردين مطلبي الوحيد ؟

رفعت عيونها ملاك:ثنيان افهمني تكفى انا ابي اطيب عشان اقدر اجيب طفل بالدنيا هذي

ثنيان:انتي طيبه وبخير وانا جنبك وأبيك وهذا الوقت المناسب لان ربي لو كتب ، كتبه خيره ويعرف وش الأحسن

ملاك:وماهو الأحسن الحين

ثنيان:بس صار

سكتت ملاك تناظره وناظرها بهدوء ثنيان:داخلك روح

جمد وجهها تناظره ومسك كفوفها ثنيان وتقدم يناظرها من قريب:مطلبي صار بين يديك وبيتحقق قريب

رجفت كفوفها وهي تناظره برعب ونطق ثنيان بنبره هاديه يطمن خوفها:ومن بدايتها موج جات قويه

ابتسم ثنيان:جات وانتي حزينه ورغم كل شي للحين ثابته ، تبيني وتبيك رغم كل الظروف

نزلت دموع ملاك بصدمه ونزلت راسها تبكي ووقف ثنيان ومشى وجلس بالارض عندها ومسك كفوفها:ملاك

لفت عليه وهي تبكي:ما أبي ثنيان ما أبي أخسر نفسي أم بعد

رفع كفه يرفع شعرها ويمسح دموعها:والله أقوى أم وأحلى أم وأحسن أم

ناظرته ملاك وكمل ثنيان:أبعد أحلام عمري وأقرب أهدافي ، الشي الوحيد اللي أطلبه منك

ناظرت عيونه ملاك وهي تبكي وشد على كفوفها ثنيان:وأنا أدري وواثق ان شاء الله بجيّتها بتكون الحياه ضحكت لي ولك

رفعت كفها تاخذ نفس وتتماسك من خوفها وتقدم ثنيان وباس عنقها وغمضت عيونها تنزل راسها وابتعد عنها وابتسم:أم موج

ناظرت عيونه ملاك وابتسامته وطمأنينته وحنيّته وشدت على كفوفه بقوه تستقوي فيه

وقف ثنيان وشد كفها:تعالي نرجع ونرتاح بغرفتنا ونشوف البحر سوا أنا وإياك وموج

وقفت تترك الطاوله وتمشي معاه وتخرج من المطعم وتدخل معه غرفتهم وتقدمت لين خرجت وناظرت البحر وصوت الموج وهدوء السفينه ووقف خلفها ثنيان وحاوطها يحط راسه على كتفها:البسيني حضن لو تعورتي

شدت على ذراعينه ملاك والتفتت عليه تناظره من قرّب وحطت بظهرها على سور السفينه وناظرها ثنيان من قريب ونطقت ملاك:كل شي مرّ عليّ هيّن

ناظر عيونها وموج دموعها المتامسك وكملت ملاك:دامني لين الحين ما خسرتك

ثنيان:أحيان الشدّه تولّد حب قوي ما يغلبه شي ، يوم جيتك بشدّه ورديتي عليّ بأشد حتى حبنا جانا شديد

ملاك تمسكت فيه:أنا قويه فيك وأحس إني بخير وأنا معك ، يمكن خسرت كل شي أهلي وصحتي ونفسي بس كسبت شي واحد أغلى من كل شي فقدته ، يساوي أمي وأبوي

ناظرها ثنيان وكملت ملاك تتأمل عيونه:موج

ابتسم ثنيان:أي واحد تقصدين ؟ في ثلاثه الحين

ضحكت ملاك بوسط دموعها بمحاجر عيونها تفهم انه يقصد نفسه والموج خلفها وموج داخلها ، اضحك لأن فجأه تغيرت حياتها وابحر وسط موج وبداخلها موج ويسكن قلبها موج

وتقدم ثنيان من شاف ضحكتها وأنيابها وقبّلها وضحكت وسط تقبيله ، كانت قُبلتها شهيّه لانها تضحك وهي تقبّله

ورفعت ذراعينها لشعره وعنقه وتمسكت بظهره تقبّله وحط بيدينه على ظهرها وابتعد عنها يحط جبينه على جبينها:بعور ذراعك لو أقترب أكثر ؟

ناظرت عيونه ملاك:إنت ماتعورني أبد

ابتسم ثنيان وانحنى يقبّل عنقها وغمضت عيونها ملاك رجع فيها للغرفه وأنهمر حبه عليها إنهمار المطر ، يداويها ويخيط جروحها يعالجها ويطيّب خاطرها ، يمارسون الإختلاف بمعنى آخر إنسجام الضعف مع القوه والجفاف مع الارتواء ، يعيشون مجاز وحشو ، عاطفه ومنطقيه

كان الوصل بينهم بكل مرّه يشوش الحواس لدرجة ان صدورهم تشع بريق حُب وشغف وما يسمعون غير أجراس وموسيقى وينتشر من بينهم رائحة عطر مُسكر ، كان الوصل أوجز من كلمات وأعمق حديث المشاعر

'

جاسر ناظر منيف:أنا جيت عشانك مو عشان أصايل

لفت أصايل على جاسر وناظره منيف وكمل جاسر:عشان لك حق عندي وأنا من بداية حياتي ما تركت الحق ، بأول الموضوع كنت أبي أخذ حق أهلي من إختك وماهو غلط اللي يبي حق أهله

سكت منيف يناظره وكمل جاسر:والحين الحق إن أبوي غلطان وعيشكم شي ما يشبه طبعه ولا اللي نعرفه من أبوي

تنهدت أصايل وناظرها منيف ورجع ناظر جاسر اللي نطق:والمشاكل كثرت بحياتنا ووصلت بليله ان ممكن احد ينهي حياته بيننا ووسطنا

نزل راسه منيف من جاب طاري ملاك وكمل جاسر:وأنا مستحيل أرضى توصل لهنا ، لأن إحنا آوادم وأنا حق

وكمل نهار:وغير انك صرت أخوي

رفع عيونه منيف لنهار ولف جاسر وكمل نهار:وملاك عندي مثل أصايل ووجودكم بيننا فَرق بحياتنا وبيكون خالي لو تفارقنا

سكت منيف يناظره ونطق جاسر:وأدري ان ولد عمك جحود وأبوه ما يستأمن فيه وشفت أطباعهم الشينه وفطرتهم

كشر جاسر:ياخي تنباع عشرتهم برخص التراب ليه سويتوا كل هذا عشانهم ؟

منيف:مالقينا غيرهم أهل

لفت أصايل بضيق تناظر منيف وسكتوا وكمل منيف بهدوء:لو تخلينا عن عمي من بدري ما كنت بلاقي أب وأنا أحتاج أب

بلع ريقه جاسر من كلام منيف ونزل عيونه نهار بضيق وكمل منيف:بس ماعطانا أبوّه

ناظرته أصايل وعقدت حجاجها بضيق تناظره

واخذ نفس منيف وناظر جاسر:وتدري ماتعورت من أبوك واجد ؟

رفع عيونه نهار وعقد حاجبينه جاسر

منيف ميّل فمه يفكر:لأن أبوك وراني كيف الأب معك ومع أخوانك ومع بنته

نزل عيونه وبلع ريقه يناظر كفوفه:حتى لو إنه جاملني وعدّني ولده بينكم بكذا موقف بس ما نسيته

رفع عيونه على جاسر:ياخي جلست بينكم عند رجّال وقال عني ولده الخامس

ابتسم منيف بهدوء من تذكر:والله رجعت البيت مانمت

ضحك من اعترافه وناظروه بضيق وهم ساكتين

وبلع ريقه منيف وبلل شفايفه وناظر نهار وجاسر:لو مكانكم وأبوي غلط والله ما بعتب عليه حتى

هز راسه يكمل:يعني لو أبوي مساعد حيّ ! سـ

سكت لانه تغير صوته وشدت على كفها بقوه أصايل من حست بغصته وتنحنح نهار:أبوي إنسان يعني مثل ما غلطنا كلنا هو غلط بعد وبتتصلح الأمور أدري تدرون متى ؟

لفوا عليه وكمل نهار:اذا تزوجت التايقر

ضحك منيف وابتسم جاسر:ياشين دمك

ضحك نهار ورجع ظهره للخلف واخذ الريموت:عندك أغاني بتلفزيونك نقدر نحطها بدال سواليفكم هذي ؟

التفت جاسر يناظر منيف ورفع عيونه منيف وناظر أصايل اللي تناظره وابتسمت له بهدوء تطمنه وابتسم بدون يبين أسنانه

والتفت من شغل نهار أغنيه وضحك جاسر لان نهار صفق بطرب يهز راسه

رجع ظهره للخلف جاسر يناظره وهو مبتسم

والتفت نهار لأصايل يميَل راسه بطرب:أجاذبك الهوى وأطرب وأغني وأبادلك الغرام بكل فَني

ابتسمت له أصايل وكمل نهار:وأشاهد صَنعة الله في جمالك

ابتسم منيف وبدأ يغني جاسر مع نهار بطرب وضحكت أصايل من صفق نهار بتكرار وسط كوبليه الموسيقى الفنيّه بصوت طلال مداح

والتفتت لمنيف من سمعت الشَطر اللي غناه طلال:وأشوف الودّ في عيونك ولكن يردّ الودّ خوفٍ فيك منّي

ابتسم منيف وهز راسه من كمل طلال:ولا ادري وش يخيفك يا حبيبي وأنا بك مغرمٍ جاك متعنّي

ابتسمت أصايل من كلمات الأغنيه اللي تشبههم وصدت من نظرات عيونه بربكه لان نهار وجاسر يغنون

نزلت عيونها من نشوة كلمات الأغنيه وغمضت عيونها تذكر قربهم قبل وقت من الآن وانقبض قلبها بربكه تذكر الى الآن نعومة ثغره بثغرها وصوت نبضاته وأنفاسه

وفتحت عيونها ورفعت عيونها لمنيف اللي مبتسم ويناظر حالها ونطق طلال:تعال أسقيك من جدول غرامي شراب فيه للعاشق تهنّي

صد بعيونه منيف يبتسم ويناظر نهار وجاسر يغنون قدامه وصبّ له فنجان شاهي وهو مبتسم

لأن ضجيج الأصوات والاغاني غريب على مسامعه ببيته اللي قضاه وهو هادي وحيد لوحده ينسى صوته أحياناً من صمته المستديم

ولكن الآن البيت يعجّ بالدفَى بالودّ

بنهار وحُب وحق - بنهار وأصايل وجاسر

'

جالس عقاب ويناظر ساري وجنى قدامه يفطرون والطاوله خاليه وناظر كراسي عياله ولف يناظر كرسي ملاك اللي كان قريب منه ، واسترجع ذاكرته بصوت المسدس ونظرات عيونها له من على كرسي مكتبه

مسك راسه ولف ساري يناظر ابوه ولفت جنى على ساري ورجعت ناظرت عقاب

ودخلت نوره:ساري

رفع عيونه عقاب وناظر نوره اللي لابسه عبايتها ووراها خدامه معها أكياس وشنطه

ولف ساري:هلا

نوره:بروح اشوف عيالي منيف وأصايل وانت لا فضيت شوف اختك يمكن تحتاج شي ببيت زوجها والا شي

سكت ساري يناظر امه ولف لعقاب يناظره ورفعت حاجبها نوره:عسى خير ياساري ماني ماليه عينك تلف تطالع في ابوك ؟

ساري لف عليها:امي وش لزوم قعدتها أصايل عنده قبل الزواج ؟

نوره:زوجته ووقعوا عقد كبر راسك وبتقعد عنده لين يرجع ثنيان مع ملاك ونسوي لهم عرس ، انت تطمن بس واقعد مع زوجتك وخلك من ذي السوالف

لفت نوره للخدامه:وديها عند حمدان

مشت الخدامه وناظرتها جنى:خالتي

لفت نوره وناظرت جنى

جنى:أصايل ماهي راجعه يعني ؟

نوره:ترجع لمن ؟

سكتت جنى ونزل راسه عقاب ورفعت حاجبينها نوره:ماعندك جواب اجل بطلع انا ، سلام

مشت تاركتهم وركبت مع حمدان ودقت بجوالها تناظر الطريق:هلا جاسر

جاسر:هلا أمي

نوره:وينك ؟ اخذت عيالك من بدري ولا شفتك ؟

جاسر:أصايل تبي تشوفهم وجبتهم بدري قاعدين نفطر

ابتسمت أصايل اللي تفطر ولفت تناظر نهار ومنيف اللي يفطرون

نوره:انت جيت الصبح اخذتهم ورجعتهم لمنيف ؟

جاسر:اي من امس بالليل قاعدين عند منيف

رفع عيونه منيف اللي يفطر وابتسم له جاسر

نوره:وش هالخساسه ياجاسر ؟ خل الرجال يقعد مع زوجته ناشبين عنده انت ونهار ؟

ضحك جاسر يفهم كلام امه:والله ماني قاصد بس اخذتنا السوالف

نوره:اي زين اجل افتح لي الباب

جاسر:وانتي جايه اشوف

نوره:اسكت اسكت وافتح الباب

ضحك جاسر وهز راسه:ابشري

قفل جواله وناظر منيف:امي برا

منيف رفع راسه بسرعه:والله ؟

هز راسه جاسر ووقف نهار ومشى وفتح الباب وناظرها داخله وابتسمت:منيف

ابتسم منيف لها وتقدمت له وناظرته:لا ماشاء الله القرب من أصايل يغير الحال للاحسن

ضحك منيف وابتعد عن الباب:حيّاك

نوره:اقرب اسلم عليك

وقف منيف بربكه وتقدمت نوره تسلم عليه وناظرته ومسكت كتفه:شلونك صرت بخير ؟

منيف:حمدلله

نوره لفت لحمدان:جبت معي شنطه لأصايل ومؤونه تاكلونها

ابتسم منيف يناظر الاغراض:ماقصرتي

لفت تدخل:اي وينهم هذولا اللي استحلوا البيت

ضحك نهار من دخلت:حياك الله ام نهار قبل شوي طاح الفطور اقلطي

نوره ابتسمت تناظره يستهبل لان الصحون فاضيه:اي كنتم بإنتظاري اصلاً

وقفت أصايل وحضنتها نوره:هلا أمي

ابتعدت أصايل وناظرت نوره:غريبه جيتي ما كلمتيني قبلها

نوره:ادري ان جاسر ونهار امسوا عندكم ما طلعوا

ضحكت أصايل:اخذتنا السوالف والله

جلست نوره ودخل منيف وناظرهم جالسين بالصاله ولفت نوره:تعال اقعد منيف خل اشوفك

مشى وجلس بجانب أصايل وحطت نوره رجل على رجل وهي تناظرهم جنب بعض وتوترت أصايل من نظراتها لهم

وحك جبينه منيف وناظرهم نهار وناظر امه:عسى عجبوك ؟

لفت نوره عليه وضحكت أصايل

نوره:انت وش بتسوي مع التايقر ؟ ترا عطونا موافقتهم وبعدها معد سمعوا منا خبر

نهار:وشو اتكلم معهم انا ؟

نوره:لا خلها عليّ انا

جاسر:امي وش هالكلام ؟ ابوي اللي لازم يتكلم ويحدد كتب الكتاب

نوره رفعت كفها:لا ياروح امك ماهو لازم ابوك اللي يحدد ، انا ام ساري احدد كل شي واتكلم مع ام التايقر

أصايل:تكلمتي مع ابوي ؟

نوره:لا

جاسر:غريبه ماجاك تكلم معك

نوره:جاني بس صاكه عليّ غرفتي

ضحك نهار بصدمه:ومتى تفتحين له غرفتك ؟

نوره:والله متى ما عرف غلطته وصلح الأمور اللي خربطها بيدينه

ناظرها منيف وابتسم من قعدتها وشخصيتها وهي تتكلم مع عيال طوال وكبار بكل شموخ ولا تشوف جاسر ونهار وعقاب شي

نهار:اجل امي لا كلمتي ام التايقر تكفين اطلبي رقمها ابي اكلمها واتكلم معها عشان تعجب بشخصيتي اكثر

جاسر:نخاف تنحاش خلها مستوره لين تملكون

ضحكت أصايل:الصراحه نهار يصيد أي بنت بس التايقر ما اتوقع بترضخ له

نوره:وانتي

سكتت أصايل من لفت لها نوره وناظرتهم نوره:جيتي بيت منيف اي بس ترا في زواج لازم يصير وصيت يطلع ، والصراحه شفت فنانه رايقه وصار بخاطري اجيبها

ضحك منيف وابتسمت أصايل:انتي بتسوين الزواج عشان الطرب بس

نوره اشرت على مخها:في راسي طرب ابي افضيه

جاسر:وهذا بعد الموضوع لازم ابوي يتكلم فيه

نوره:ترا أذيتنا جاسر ابوي وابوي ، شوفه وش سوا وعفس الدنيا

جاسر اخذ نفس ووقف:ياخي أصايل شوفي العيال لا يكون افطروا على قطاوتكم

ضحك منيف:لا ماعليك يلعبون

وقفت أصايل ونطق جاسر:وناديهم خل ارجع البيت انام

منيف:وين رايح اقعد ؟

ضحك نهار:أدمنت ؟ نسيّر بالليل ماعليك

ابتسم منيف:حياكم الله

خرجت أصايل وشايله حمد بيدها ومشت سارا لجاسر:أبي كات بابا

جاسر:الحين اجيب لك

ضحك نهار وضحك منيف ونطقت نوره:وش فيكم تضحكون ؟ اي جيب لها كات دام تبي

جاسر:امي اجيب لها الحين كات الساعه ثمان الصبح ؟

نوره:اذا تبي جيب لها وغصب عليك بعد

جاسر ناظر سارا:صلي شكر كل ليله دام جدتك نوره

ضحكت نوره ومشى جاسر ومشت معاه أصايل لين الباب ولف عليها ونزلت حمد ومسكه جاسر وناظر أصايل:اي شي تبينه كلميني

هزت راسها وابتسمت وتقدم جاسر باس راسها ومشى خارج ورجعت أصايل وناظرت نهار اللي واقف

منيف:خالتي انتي اقعدي ما طولتي

نوره:لا يا أمي عندي موعد بالعياده بشد هاللغلوغ قبل كتب كتاب نهار

ضحك نهار ومشى وحط ذراعه خلف كتوف امه:هذا كله الزين وتقولين عياده ؟ يا ام نهار !

ابتسم منيف يناظرهم وطنشته نوره وضحك نهار

لفت نوره لأصايل:أصايل متى ما صحيتي كلميني

هزت راسها أصايل ومشت نوره:منيف يا أمي ان احتجت شي دق علي لا تدق على العيال مامنهم فايده

ابتسم منيف ووقف وضحك نهار:امش سيده على الراس الكبير وامورك بخير

ضحك منيف:ماتقصرين

مشت نوره ومعها نهار وخرجوا ولفت أصايل تناظر ابتسامة منيف اللي يراقب المكان وضحكت بهدوء:بيجونك كل شوي

منيف لف عليها وابتسم:من قال ما أبي ؟

ابتسمت بربكه أصايل من صاروا لوحدهم وجلست وناظرها منيف:ما بتنامين ؟

أصايل رفعت عيونها عليه:الا

منيف:اذا ودك ترتاحين غرفة ملاك نظيفه

نزلت عيونها تخفي ابتسامتها لانه يحس بخوفها من النوم معه وبجانبه وهزت راسها بدون تناظره

وابتسم منيف واخذ جواله:تمسين على خير

مشى يدخل وناظرته أصايل لين غاب عن عيونها وابتسمت تبيّن أسنانها

-

( لا تنسون النجمه ⭐️ وكل التشبيهات بحسابي بالاستقرام r_55shog )

لبس نظارته الشمسيه ورفع عيونه عليها جالسه:ما بتسبحين ؟

لفت تشوفه من المسبح وهزت راسها بالنفي:ماودي

ثنيان ابتسم:طيب من بعيد لبعيد ؟

عقدت حاجبينها تناظره وطش عليها من المسبح وفزت ملاك:ثنيان

ضحك ثنيان ولفت عليه تشوف فستانها المبلول ورفعته:لازم يلمسني موج يعني ؟

ثنيان:هالمره خربت علينا موج والا كان علمتك السباحه

ملاك رجعت تجلس:لا هالمره اقتنعت ان جيّتها بالوقت المناسب

ضحك ثنيان من تقبلها للموضوع وناظرته ملاك:واذا مو بنت ؟

ثنيان:برضو موج

ملاك ابتسمت وكمل ثنيان:بس أبي بنت

سكتت تتأمله ورجع يسبح ثنيان واخذت نفس ولفت تناظر البحر خلفها والموج الى مدّ بصرها

لفت من خرج ثنيان وتنشف وتقدم لها:بنوقف بنابولي محطه ودك نشوفها ؟

ملاك:ودي

ثنيان ابتسم:ونقطع رحلتنا هنا ونرجع جوّ ؟

هزت راسها ملاك وتقدم ثنيان وناظرها:انتي تعرفين اني ما أرفض لك طلب ؟

ضحكت ملاك وانحنى ثنيان يبوس خدها ومشت معاه ودخلت وتكلم مع الموظفين ثنيان ودخل وقفلوا شنطهم ووقفت محطه ونزلوا

رفع كابه ثنيان على شعره وهو لابس نظارته الشمسيه ووقف تاكسي وركبت بجانبه ملاك وفتحت الشباك وطلعت راسها تناظر المدينه الايطاليه وتسمع صخب ايطاليا ولغتهم

ولفت لثنيان اللي على جواله يحجز فندق ووقف السواق ونزلوا ووقف ثنيان:بدخل احط شنطنا في الغرفه واجيك ودي نفرّ المدينه

هزت راسها ودخل ثنيان الفندق وتمشت ملاك تناظر المباني الملونه والبحر اللي يعجّ بقوارب وابتسمت تشوف المحلات وخرج ثنيان ومشى بسرعه لها ووقف بجانبها وابتسمت:المطعم الصغير هذا يشوّق نجربه ؟

لف ثنيان لها:سي ميو كارو

ضحكت بذهول من لغته الايطاليه وابتسم ثنيان من سمع ضحكتها وهز راسه:زرت إيطاليا كثير بس هذي المره الوحيده اللي جازت لي

ابتسمت ملاك تمشي معاه ومسك كفها ثنيان ودخلوا المطعم وطلبوا بيتزا وابتسم ثنيان من ضحك ملاك المستمر وسط سوالفهم وراحتها النفسيه وسعادتها

كانوا يحتاجون يسافرون ويبتعدون ويغامرون ويمشون بدوله غريبه عليهم بين ناس يجهلونهم

دخلوا وسط أحياء صغيره وناظرت الفرقه اللي يغنون ويعزفون وابتسم ثنيان وتقدم يرقص معها وابتسمت ملاك بضحكه تدور وهي ماسكه كفه وفستانها يدور معها ، تحس انها اصغر معاه وصدرها اخف من همومها ، تحس ان السعاده تكسيها كسوة فستانها

وضحكت من حطها تحت جناحه يتمايل معها ويمشون سوا ، ركبوا قارب سوا وجدّف ثنيان بين البحيره وصورته ملاك مع المشهد الساحر

وابتسم ثنيان وطلع جواله يصورها بجواله وضحكت ملاك تجلس بإعتدال وتبتسم لجواله

جربوا كل شي حوالينهم من أكل وتمشوا مشي اقدام بالمكان يسمعون لغه ما يفهمونها واغاني يجهلونها تذوق من ايسكريم ثنيان مره وهو يذوق خدها مره

'

جلس نهار عند نوره اللي تتصل وناظرته وهمست:اثقل

ضحك نهار وانتظرت نوره وابتسمت:سلام عليكم

ام راكان:ياهلا وعليكم السلام

نوره:معك أم ساري

ابتسمت ام راكان وناظرت غلا اللي قدامها:ياهلا بأم ساري ياهلا

رفعت عيونها غلا ولف ابو راكان عليها

نوره:ياهلا فيك يابعدي ، شلونك وشلون غلا وراكان ؟ عساكم بخير ؟

ام راكان:الحمدلله نسأل عليكم يا ام ساري انتي شلونك ؟

نوره ناظرت نهار:إحنا بخير يارب لك الحمد ومبسوطين عساه دوم

ضحك نهار من نوره اللي تكذب من وضعهم

ام راكان:دايم يارب

نوره:بغيت اسألك يا ام راكان عن موعد يناسبكم ونحدد كتب الكتاب

لفت ام راكان على فهد:والله ماعندي علم انا توقعت ابو ساري يتواصل مع فهد بهالموضوع

نوره:اي اي بس قلت اخذ منك العلم واشوف بين حريم وش يناسبنا

ضحكت ام راكان:والله ودنا نتفق سوا وأسهل لنا بعد

ضحكت نوره:والله

ام راكان:على خير انا بتكلم مع فهد ونحجز تحليل زواج لغلا ونتواصل ان شاء الله

نوره:تحليل زواج ؟

ناظرت نهار واشر لها وهزت راسها:اي وبلغيني بأي مستشفى يصير نقابلكم

ام راكان:على خير ان شاء الله

نوره:سلام عليكم

قفلت جوالها وناظرت نهار:الله يسامح ابوك نقدتني لاني متصله انا

نهار:انا اتكلم مع ابوي اليوم

نوره كشرت:ابوك يهوجس ماهو فاضي لك

نهار:بس لازم نكلمه ابوي ما بنقعد بذا الوضع بالبيت ، ابوي غلط وملاك غلطت وكلنا غلطنا بس عَدت

نوره اخذت نفس:اي روح لابوك اجل

دخل جاسر وجلس واخذ الشاهي:وين ابوي ؟

نهار لف لجاسر:مدري

دخل ساري وتقدم وسلم على راس نوره:شلونك امي اليوم ؟

نوره:بخير

جلس ساري ودخل عقاب ولف نهار وصدت نوره عنه ووقف نهار وناظر ابوه وبلع ريقه:أبوي

ناظرهم عقاب جالسين وساكتين ونطق:مالي فرصه للعتاب يعني ؟

عقد حاجبينه نهار بضيق ونزل راسه جاسر

وكمل عقاب:تعاتبوني

ناظرته نوره وناظر نهار عقاب:صكيتوا بابكم يوم غلطت أنا ، وكان بابي مفتوح دايم يوم إنكم تغلطون

نزل عيونه نهار بضيق وبلع ريقه ساري يسمع ابوه وكمل عقاب:أخطيت وجات قويه وخساره وندم أعترف

ناظر نوره وعياله:بس النتيجه ذوقتني أصابع ندم

نوره:يوم تركت بيتك أصايل ووقف ثنيان بصف ملاك واختليت لوحدك بالصاله هذي أيام عرفت انك ندمان ؟

جلس عقاب بهدوء:نار حرقتني ولا حكّمتها زين

رفع عيونه عقاب وناظر نهار وجاسر وساري:احذروا من نار تكويكم

صدت نوره عنده وتقدم نهار:اللي صار صار يا ابوي ومالنا حق نزعل عليك اكثر

جاسر:ابوي ما يرضينا اللي صاير والله ووجودك فارق بيننا

سكت عقاب يناظرهم ونطق ساري:وأنا ابوي ما وقفت ضدك أبد وزلاتك مسموحه انت على راسي ومن فوق وجمايلك لي كثيره

عقاب ناظر ساري والتفت لنوره:دخلت ملاك حياتنا وعرفت من دخولها كل زلّاتكم

ناظرته نوره ونطق عقاب:من ساري لين نهار

لفوا على ساري وبلع ريقه ساري ونطق عقاب:كل واحد فيكم زلّ وسامحته ، وراجعوا كل اللي سويتوه

نزل راسه ساري وكمل عقاب:وموضوع ساري ما فتحته أبد وأبي حياته تستمر لانها زلّه

ناظروه العيال وكمل عقاب:بس انا مالي حق أزلّ

نوره:اي مالك حق لانك أبوهم وعكاز هالبيت والوجهه والملجأ ، شلون سويت كذا ياعقاب شلون ؟

عقاب:قلت لك نار وعمت عيني

نوره:اذا تبي تصحح من جهه صح ، صحح من جهة عيال مساعد

ناظرها عقاب من نطقت بإسم مساعد ونزل عيونه

واخذ نفس نهار:امي صادقه ابوي احنا نحترمك ونعدي زلّاتك ولا نوقف بوجهك لكن الغلط لمس منيف وملاك

هز راسه عقاب وناظرهم:وأصايل ؟

سكتوا ولف عقاب لنوره اللي تكلمت:تبي تراضي بنتك روح لها وراض زوجها

سكت عقاب يناظر نوره ونطق بعد ثواني:ومتى يرجع ثنيان ؟

نوره:ماعندي علم تبي تعرف كلم ولدك

عرف عقاب ان نوره تبيه هو يعتذر ويتعنّى ويراضي بدون ما يتدخل احد واخذ نفس وهز راسه

خرج عقاب والتفت من خرج بعده جاسر:ابوي

وقف وتقدم له جاسر:وين طالع ؟

عقاب:كلمني منصور يبي يشوفني

جاسر:ابوي انت باقي بتقابل ذولا الناس ؟ ما تخاف منهم ؟

عقاب:طلعته من سجنه وش بيسوي لي ؟

جاسر:انا ماني مطمن له بجي وراك

عقاب سكت يهز راسه ومشى يركب مع حمدان وركب جاسر سيارته وحرك خلف ابوه

ووقف عقاب عند منطقه خاليه وناظر منصور اللي واقف وينتظره ونزل عقاب ومشى له

ناظره منصور واياديه بجيبه ووقف قدامه عقاب:ما انتهينا ؟

منصور ناظره وسكت ثواني طويله ونطق عقاب:كلاً احترق وصار رماد

منصور:الا انا مازلت احترق

عقاب:كل اللي سويته بسبب نار حرقتني وشوف كيف ضيعت كل شي بسبب ناري ، انتبه تضيعك نارك

منصور هز راسه بالنفي:ناري سببها انت ، حطيتني قدام ملاك بوجه المدفع بدال ما أكسبها خسرتها ، قلت لي ما بتستمر مع ولدك واشوف انها تنتظر ولدها منه

عقاب:لان فعلاً ما ظنيت يكملون

منصور:والحين انا ضعت بسبب ظنك وخسرتها

عقاب:لو تحبها ما كان سمعت مني

ضحك منصور من تهكم عقاب:حطيت قدام عيني حريّتي

عقاب:كان اخترت حبك ، كانت تسرق لك الديّه كان انتظرتها

منصور:مابي ملاك تنحرق وهي تسرق ما ابيها تسرق

عقاب:ولا انا ابي بنت مساعد تسرق ولا خليتها تسرق ريال كل شي سرقته رجع على كل واحد بخفيَه بدون ما يلاحظ احد ، تحسب حربي مع ملاك حرب وخساره وفوز ؟ انا ما خليت ملاك تخسر ولا بغيت تجيها أذيه لكن ابوها أعماني

منصور:صرت تحبها ؟ صرت تشوفها بنتك يعني ؟ والا صارت زوجة ولدك المفضله ؟

عقاب:ملاك من عائلتي واللي سويته لها دفعت ثمنه غالي وكنت بخسر عيالي وبخسرها هي بعد وعرفت ان اللي يركض خلف دخان نارَه هو خسران

منصور:وانا خسرت بسبب نارك

عقاب:وجاي تاخذ حقك ؟

هز راسه منصور:ماعندي شي اخسره اكثر

طلع يده من جيبه ولواها جاسر من خلفه وناظر السكين اللي شايلها ووقف بجمود عقاب يراقب منصور اللي التفت يضرب جاسر

ودفعه جاسر وطاحت السكين من يدينه وناظره منصور وهو يتنفس بغضبه وصرخ جاسر:تبي تقتل ابوي ياولد الكلب ؟ تبي تذبح اللي طلعك للدنيا ؟

منصور التفت لعقاب ومسك عنقه يخنقه وتقدم جاسر وسحب منصور وضربه ومسك عنقه عقاب يناظر منصور

ومشى بسرعه لسيارة حمدان وركب واخذ جواله ولف يناظر جاسر ومنصور اللي يتضاربون

ونطق:ابي دوريه لموقعي في شخص كان بيذبحني بسكين

نزل عقاب وناظر جاسر اللي جالس على بطن منصور يخنقه وناظر يد منصور اللي تحاول تلمس السكين ووقف عقاب عنده ودعس على كف منصور ورفع عيونه منصور لعقاب يناظره بحقد ونار تشتب من عيونه

وناظره جاسر بحده ودقايق وصلت دوريه لموقعهم ووقف جاسر وانحنى العسكري وكلبش يدين منصور ونطق جاسر:ارجع خيس بنفس المكان اللي طلعت منه ، ما انت وجه يد عون

ناظرهم منصور:والله ما اخليك حيّ ياعقاب

نطق العسكري:انطم

انحنى برقبته منصور يركب الدوريه ولف العسكري لجاسر وعقاب ياخذ اقوالهم وركبوا سياراتهم خلف الدوريه للقسم

'

ناظرته أصايل يخلط الماتشا ويتكلم بهدوء:يقولون لازم لونها يصير زي هاللون

ابتسمت وهزت راسها:يعني تقول اعرف اسوي لك ماتشا ما يحتاج تشترينها من برا

لف منيف عليها وهز راسه:اكيد اعرف ، كل شي تحبينه اعرفه

ابتسمت وعضت شفتها تشوفه يحط الماتشا مع الحليب بأكواب ولف عليها:ذوقي وحكّمي

اخذت أصايل الكوب تذوق الماتشا وناظرها منيف ونط يامور على دولاب المطبخ ولحس كوب منيف اللي يناظر أصايل ومبتسم

ورفعت حاجبينها وهي تناظر عيونه ونزلت الكوب ونطق:كيف ؟

أصايل:يعني الصراحه يمكن يعجب كوتي

سكت منيف يناظرها وضحكت:حلوه

منيف ابتسم:لا تجاملين

أصايل ضمت الكوب بيدينها:والله حلوه بس الحق اشرب كوبك لان يامور بيخلصه

لف وناظر يامور:انت ماتوفر ؟ كل شي تاكله ؟

اخذ الكوب وهوش له يامور وضحكت أصايل:انا اعطيك يامور

اخذت صحن وصبت له وتقدم يامور يشرب وابتسمت تناظر يامور ونطق منيف:ارسلت لي ملاك

لفت عليه أصايل تناظره وكمل منيف:مبسوطه

أصايل ابتسمت:وثنيان بعد يصور لي مبسوطين ، كانوا يحتاجون يبتعدون فتره عن كل شي بس ما اتوقع بيطولون لهم عشر أيام للحين غايبين

منيف ناظرها وتكى بذراعه على الدولاب:وإحنا متى نبتعد فتره عن كل شي ؟

ابتسمت بربكه وصدت بعيونها وكمل منيف:نهار وامك مرابطين عندنا

ضحكت أصايل وناظرته:انت قلت لي مو متضايق من وجودهم !

منيف ابتسم من ضحكتها:مو متضايق والله بس يعني أتشوق اني ابتعد عن كل شي حتى عن يامور المزعج

ابتسمت أصايل:اصلاً غريبه لين الحين أمي ما داهمتنا

منيف:اليوم جدولهم تلخبط العاده نهار الليل وامك الصبح وجاسر ما يقصر يجي كل عصريه

ضحكت أصايل بعلو صوتها وابتسم منيف يناظرها ولفت عليه أصايل:تحبهم

وقف بإعتدال منيف قدامها وتقدم لها وارتبكت تناظره ورفع ذراعينه يبعد شعرها عن عنقها:وأحبك انتي

ناظرت عيونه ورجفت كفوفها وتكلم بهدوء منيف:تعرفين ان داخلي يبي بس ما اعرف انتي وش تبين ؟

بلعت ريقها أصايل ونزلت عيونها وناظرها منيف:ننتظر زواجنا ؟

رفعت عيونها أصايل بربكه من الطاري وتوترت:ما ابي زواج

منيف همس:وش تبين ؟

أصايل:ابي يتعدل الوضع مع ابوي وبس

منيف:ابوك ماراح يجيك عندي والا كان جاك

أصايل:وانا جيت عندك ابيه يجيك انت مابي نصير كذا منيف ، مابي ارتبط فيك وانت وابوي مبتعدين عن بعض مابي تصير انت بكف وابوي بكف

منيف:انا مو بكفك انا بقلبك

سكتت أصايل تناظره وكمل منيف:وابوك روحي له شوفيه لا تخلين ابوك بعد كل هذا العمر والوقار يترجاك ترضين عليه

بلعت ريقها أصايل وكمل منيف:والله لو أبوي يغلط مليون غلطه ما كان خليته يتعنّا ويعتذر

رفعت عيونها أصايل على منيف:بس ما توقعت ابوي كذا ماني قادره منيف اصدق انه سوا كل هذا في ملاك وفينا كلنا

منيف:ولو كان هذا أبوك

صدت بعيونها أصايل وناظرها منيف:ما قلتي لي وش ودك يصير ؟

لفت عليها بتوتر من إصراره وغمض عيونه وضحك من سمع صوت الباب ولف يشرب من الماتشا وابتسمت أصايل ومشت تخرج من المطبخ

اخذ نفس منيف وخرج وناظر نوره اللي دخلت وابتسم وتلاشت ابتسامته من دخل خلفها عقاب

ورفع عيونه عقاب على منيف ولفت نوره تناظر أصايل وعقاب ومنيف وسكتت

ووقفت أصايل قدام أبوها تناظره يناظر منيف

ومشى منيف بيبتعد عنهم ونطق عقاب:منيف

لف عليه وهز راسه عقاب:بتكلم معك

لفت أصايل على منيف ومشى عقاب يجلس وجلس منيف قدامه

اخذ نفس طويل عقاب وسكت لوقت طويل بتردد ورفع عيونه لمنيف:مستحي منك

سكت منيف وكمل عقاب:طريقتي كانت غلط اعترف ولا تمنيت توصل ملاك لهالطريق ابد

منيف ناظر عقاب وكمل عقاب:وانا والله ويشهد عليّ ربي ما كذبت بودّي لكم ، ولا جاملتكم وكنت ابيكم بس تجون لي وتندمون وتوقفون اللي تسوونه وسـ

قاطعه منيف:معذور

لفت أصايل على منيف وسكت عقاب يناظر منيف وكمل منيف:وأنا اعتذر عني وعن اختي لاننا بيوم اذيناك في أهلك وعيالك وصحتك

ناظره عقاب وتشكل بعيونه صورة مساعد وعقد حاجبينه بتعب يناظر منيف اللي يشبه أبوه بسكوته وهدوء صوته وقلة كلامه

منيف:وأبي تطمن ان أصايل أغلى شي أملكه بحياتي وما بفرط فيها ابد

عقاب هز راسه بتعب:مالي وجه اتكلم اكثر

منيف:تكفى

رفع راسه عقاب وعقد حاجبينه منيف:تكفى عرفتك شامخ وما تنحني لأجل احد ما ابيك تحس بهالشعور عندي

ناظره عقاب وكمل منيف:ويكفيني من كل ذا انك صادق بنيّتك لنا

عقاب:تظن ملاك تسامح ؟

سكت منيف ولف على أصايل اللي تناظرهم

'

رفعت يدينها من سرعة ثنيان اللي يسوق سياره مكشوف سقفها ومبتسم يناظر البحر يمينهم وماشي طريق سفر لمدينة كابري

ولف لملاك اللي مبتسمه ووقفت تتمسك وترفع يدينها تعيش حريّة اللا هموم ، ولفت تشوف البحر ولفت تمسك كف ثنيان اللي رافعه يلمس الهواء وجلست بجانبه وحضنت ذراعه

وحضنها ثنيان وهو يسوق ووقف عند شاطئ البحر ولف عليها وابتسم:مشينا

فتحت الباب تنزل وتناظر البحر ونزلت بالرمل تمشي ونزل ثنيان يشوفها تمشي بفستان مريح صيفي ورافعه طرفه بيدها عشان تدخل الموج

وتقدم لها وغمضت عيونها ملاك من حست بالموج وسمعت صوته ولفت ومدت كفها لثنيان اللي جاي لها وابتسم وقدم كفه ومسك كفها وشدت ذراعه واستندت تحضنه وهي تناظر البحر

ملاك:المكان هنا معك يشبه الجنه

ثنيان لف يناظر راسها على ذراعه وباس راسها ورجع يناظر الموج ونطقت ملاك:ثنيان

سكت ثنيان يسمعها ورفعت راسها عليه تناظره من قريب وناظرت عيونه:إنت حبيبي

اتسع مبسمه من أجمل كلمه سمعها منها ولا توقع يسمعها وكان يشعر دايم انها سهله تنقال وعادي تنسمع ، بس من قالتها له حسّ انه بأقصى روضات الغرام وأعلى درجات السعاده

وكملت ملاك وهي تناظر ابتسامته:ما سمعتها مني ولا قلتها لك ابد بس انت حبيبي ثنيان

سكت ثنيان يتأملها بمبسم سعيد وشدت على كفه ملاك:أخاف أسرف بالسكوت وأحرمك الكلام ، إنت أدفى شي لمسته برغم إني لَهب وإنت أحنّ شي عشته رغم إن حياتي قسوه وجَبر ، إنت حبيبي

تقدم ثنيان وباس جبينها وأسند براسه على راسها:وإنتي ملاكي حتى لو كنتي شيطان لكل العالمين

ابتسمت ملاك وهي حاضنته ونطق بعد دقايق من التفكير:بترجعين شيطان ؟

سكتت ملاك تناظر البحر ولف ثنيان وناظرها:وتلبسين الغرور اللي يعلّم الطاووس نفش ريشه ؟

رفعت عيونها عليه ملاك:يسكني خوف ما أظن بقدر أرجع

تنهد ثنيان والتفت عليها بجسمه ووقف قدامها:ما أبيك شيطان بس ما أبيك خايفه وإنتي معي ، بنرجع إحنا وبتقابلين كل اللي عادوك أو إنهم عوروك ولا ودي تكتمين بصدرك شعور وتنفجرين متأخر نفس ماصار لك ، عيشي بقوتك وضعفك اذا صار بخاطرك تبكين ابكي واذا بخاطرك تخافين خافي ، بس لا تلبسين شي مايشبهك ، ازعلي وعاتبي عشان تطيبين من هنا

حط سبابته على قلبها وكمل:عشان قلبك لا تكتمين

ملاك ناظرته:أخاف أشوف أبوك

هزت راسها بتعب:ما هدني عمي ولا أحد معه ، هدني عقابي اللي تعاقبته

تنهد ثنيان وصد من طاري ابوه ونطقت ملاك:ولا بقدر أبتعد عنه ، أبوك وجدّ موج اللي تنتظره يجي

لف ثنيان عليها:ما بجبرك تقابلين احد بس اذا تبين اللي بخاطري ؟ ماودي اعيش بين نارك ونار ابوي ، وانا واثق ومتأكد ان ابوي بيعتذر وبيكون اعتذاره بحجم غلاتك عنده

سكتت ملاك تناظره وتقدم لها ثنيان:ولا ابيك تحسين اني اتكلم عنه كذا عشانه ابوي ، ابوي غلط وماوقفت معه بس نفس ماعرفت بياضك اعرف بياضه ومعدنه

صدت بعيونها ملاك وكمل ثنيان:واذا رجعنا بنفتح صور ابوك وندور لابوي ونفهم اللي صار عشان هالنار تنتهي

شد على كفوفها ولفت عليه وناظرها بتعب ثنيان:ابي تجي موج وأنا مرتاح ، بين أهلي وبينك

ناظرت عيونها تكتم خوفها وقلقها وسكتت وصدت للموج وناظرها ثنيان وسكت مايبي يضغط عليها

'

وقف عند البيت والتفت عليها وناظرها تناظره

ورجعت راسها للخلف وهي تناظره وابتسم منيف:كل ما صرتي قريبه منك أخذوك مني

ابتسمت أصايل ولفت تناظر بيت أهلها ورجعت ناظرته:بس انا مابطول ، أبي عشان أبوي بس

منيف هز راسه لها ولف من خرج عقاب من البيت وتقدم لهم ونزلت أصايل

وأشر بكفه عقاب لمنيف اللي بسيارته ونزل منيف

عقاب:لا ترجع بخطاك قبل تدخل

منيف:ماتقصر وراي شغل

عقاب سكت يناظر منيف ولفت أصايل على منيف:تعال منيف وعشان أمي بخاطرها تشوفك بعد

ناظرها منيف وناظر عقاب ومشى

رجفت كفوفه يشوف البيت ويتذكر ملاك والرعب اللي عاشه وبلع ريقه

ولفت عليه أصايل وتقدمت له ومسكت كفه وناظرهم عقاب ودخل البيت

وشد منيف على كفها بإختناق ودخل وناظر نوره اللي استقبلته وابتسمت:هلا أمي هلا منيف

تقدمت تسلم عليه وحضنت كتوفه بحنيّه وناظرته:تعال حيّاك العيال كلهم هنا

تقدم ودخل وابتسم نهار:حيّ الفال الطيب

سكت منيف ولف من ناظر مكتب عقاب من بعيد وسكتوا يناظرونه

ولفت نوره تناظر المكتب وبلعت ريقها ولفت تناظر عقاب

وشدت كفها أصايل تناظر نظرات منيف ولف عليهم يناظرهم بجمود وكأنه يعيش بمكان آخر

نطق جاسر اللي وقف:حيّاك تعال منيف

رفع كفه منيف ومسك ياقته:لا بروح

سكت جاسر وتقدمت نوره:ما بنجلس هنا بنجلس بالحوش جهزت القعده لنا كلنا تعال

منيف ناظر نوره:تكفين بروح

سكتت نوره تناظره ولفت على عقاب وتقدم عقاب:منيف

ناظره منيف وفلت كف أصايل:بنتك حوالينك ، انا استأذن

عقدت حاجبينها أصايل بخوف تناظره ومشى منيف يخرج ولفت نوره لأصايل:لا تطالعيني روحي له

مشت أصايل خلفه ولف نهار على اهله:وش بيصير الحين؟ اذا منيف ما قدر يقعد ببيتنا شلون ملاك بتقدر تدخله ؟

لف عقاب يناظر نهار وجلست نوره بتعب من حالهم ووضعهم

ونطق ساري:ما ينلامون انا للحين ركبي تتصافق ان شفت المكتب

صد عقاب من كلامهم وناظر المكتب يذكر المعاناه الكبيره اللي عاشوها واشتعل صدره ندم

'

مشت أصايل بسرعه خلفه:منيف

لف عليها منيف وفتح بابه:روحي لأهلك

تقدمت له ووقفت قدامه:ماراح أخليك بجي معاك

منيف صد بضيق:تكفين اتركيني بحالي وروحي لاهلك

أصايل مسكت ذراعه وناظرته:قلت ماراح أخليك

ناظرها منيف وكملت أصايل:خليتك أيام ، مابي أخليك أكثر

سكت منيف ومشت أصايل وركبت بجانبه وغمض عيونه منيف بتعب وركب وقفل بابه ولف عليها:مابي تتركين اهلك اللي ينتظرونك عشاني ، انزلي لهم

أصايل ناظرته بإصرار:قلت ماراح أخليك ، خلاص منيف رجعنا بيتنا

ناظرها منيف من نطقت ' ببيتنا ' ولفت أصايل عليه:أهلي عندي كل يوم

سكت ولف وشغل سيارته وحرك

وقف عند البيت ونزل وناظرته أصايل متوتر ودخل بسرعه قبلها ومشت خلفه ودخلت خلفه من دخل الغرفه وجلس ومسك راسه بيده وهز رجلينه بتوتر

ووقفت عند الباب تناظره وحك جبينه منيف بتوتر يحاول يهدي أنفاسه ومسك ياقته وطلع جواله من جيبه ودور اسم ملاك يبي يكلمها

ورجفت كفوفه يحط الجوال على اذنه ويناظر الفراغ

ورد ثنيان:هلا

سكت منيف من سمع صوت ثنيان ولف ثنيان لملاك اللي خرجت من الحمام تنشف شعرها وتقدمت له

ونطق ثنيان:الو منيف

بلع ريقه منيف:ابي ملاك

عقد حاجبينه ثنيان:صاير شي ؟

تقدمت بخوف ملاك وهز راسه بتكرار منيف بتوتر:لا ابي ملاك

سكت ثنيان بإستغراب ولف لملاك:منيف بيكلمك

اخذت جوالها ومشت بخوف وهي ساكته تسمع سكوت منيف ثواني:منيف

غمض عيونه منيف وهدت رجلينه ورجفة يدينه:انتي بخير ؟

ملاك:زيك

سكت منيف واخذت نفس ملاك:انت كيف حالك ؟

منيف هز راسه:متى بترجعين ؟

ملاك لفت تناظر ثنيان:قريب

منيف حك جبينه ووقف:طيب

قفل منها ووقف يناظر الجدار ثواني ولف من تذكر أصايل وناظرها واقفه تناظره

ارتبك من شافها تتأمل وضعه وخوفه وتقدمت له أصايل وابتسمت بهدوء ماتبي توتره:متى راجعين ؟

سكت منيف من فصخت عبايتها وجلست على السرير تناظره وبلع ريقه وجلس بجانبها:قريب

ابتسمت ومسكت كفه بعفويه:وحشوني ان شاء الله انبسطوا

ناظرها منيف وتنهدت أصايل من نظراته:ليش تطالعني كذا ؟

منيف:خفت

أصايل هزت راسها:اشتقت لملاك قصدك

منيف هز راسه بالنفي:خفت تروح وتخليني

أصايل:وليش تقولها كذا ؟ تخاف على أختك ومحد بيلومك على خوفك

منيف سكت وتقدمت له أصايل:وأنا أخاف على أخواني

رفع كفه الثانيه منيف على ياقته بإختناق يتنفس وتقدمت له أصايل وفتحت أزرار ياقته:والجو حار عشان كذا متضايق من ياقتك

سكت منيف لانها ترفض فكرة انه خايف ومرتبك ويتعرق من وسواسه

وابتسمت له وحطت يدينها على كتوفه:وأنا جيت معاك عشان أبي أكون معاك

منيف همس وهو يناظرها من قريب:خفتي أسوي شي بنفسي

أصايل عقدت حاجبينها:لا ، أعرفك بس صرت أشتاق لبيتنا سوا

ضحكت بخفوت:وأحس بالغربه ببيت أهلي وضيعت القِبله هناك

ابتسم من سخريتها وضحكتها عشان تطمن قلبه وتمسكت بكفوفه أصايل:أبي أكون هِنا ، جنبك ومعاك ، غربتي كل دار بدونك

اعتدل بجلسته منيف يقرب منها ورفع كفوفه لوجهها وناظر عيونها:أنا عندي خوف مفرط وتعلق شديد وأقلق لو فقدت حسّ يامور وأركض أدوره ، أنا بعيش مفزوع أخاف عليك

ابتسمت أصايل تطمنه ورفعت كفوفها لكفوفه:مابخليك تِفزَع أبد ، أنا بطمنك وخوفك المفرط بدمره بوجودي وحياتك الوحيده بمليها فوضى وضجيج

سكت منيف وهزت راسها أصايل له:ماراح تخاف

تقدم أكثر منها منيف بحاجه وإطمئنان وتمسك:‏قبلك هالجسد صوره ويحيا في ضريح أموات

ابتسمت أصايل له وتقدم منيف يقبّلها من فوضى طوفان المشاعر داخله كان يرغب يستريح

وراحته وسط حضنها بدون حدود وتمنّع ووقوف عند لحظه ما تحلو بالوقوف

كان ينتظر زواجهم عشان يمشي طريق لوصلها لكنها تغمره بسكون طوفان خوف وقلق وهو يبي هذا السكون ، هو تعب لين لقي لصدره الخايف طمأنينه ومندفع لها يبي يتمكن من هذا السكون والمشاركه والصوت المسموع والاذن الصاغيه

ولأجل هذا الشعور هو نزع عنها ما يكسي جسمها وما كانت ترده أبد لأنها حلاله وببيته وبشرع الله زوجته

لكن كان يوقفه دايم إعلان الزواج وصيت زواج بس ما قدر يصبر وقطع كل حبل يربطه عن وصلها

وغنّى الليله براحه وإنسيابيه - ياوصلها الغالي هلا - ، لأنها جات غاليه عليه من أول مره شافها بجهازه وعرف حياتها وعرف قيمة غلطته ، وعرف انها غاليه من وجودها بعائله تمليها الشوارب تدلل عليهم ، عرف انها غاليه يوم تقدم لها لوحده بشجاعه رغم وحدته وعرف انها غاليه يوم تركت له دبلتها عشانها تخاف منه وتجهله ، وعرف انها غاليه أصيله دُرّه ثمينه وهي بين أياديه الآن ، تشمّس بنور صبحها وتدفى بفيّة ظلالها وحنانها ، وأشرق شعاع قبلاته على جسدها لحد الغسق وهو يهيم في كل تفاصيلها ، لقى وأخيراً نجاته ونور طريقه وشمس حياته وأشرقت

'

دخل نهار المستشفى ببدلته العسكريه بعد دوامه وابتسم يعدل شكله وتقدم واتسع مبسمه من شافها جالسه وتقدم لها:أنا مدرب احتمي الضرب بالنار مادربوني في مواجه عيونك

رفعت عيونها عليه غلا وناظرت ابتسامته ونطقت:من متى حافظها عشان تقولها ؟

ابتسم نهار:من يوم شفتك صرت شاعر

بلل شفايفه بثقه:وان شاء الله اليوم يبشرونا بالتحاليل السليمه ونسـ

سكت من شاف راكان جاي من بعيد وتلاشت ابتسامته وهمس:سلامُ قول من ربٍ رحيم

بلع ريقه وتقدم راكان ومعه ورقه وناظر نهار:عسى خير

ابتسم نهار:عاد تصدق قبل شوي بسأل عليك

راكان:بالله ؟ اي زين

نهار:جيت اطمن لو تخاف من الدم والا تدوخ لا سمح الله اجيب لها عصير تشـ

رفع كفه راكان:لا لا روح شوف أمورك إنت

نهار ضحك:يبي لي مصنع عسل

سكت راكان يناظر نهار ولف يناظر غلا اللي تناظره وتلاشت ضحكته من سكوتهم وبلع ريقه:موفقين

مشى تاركهم وابتسمت غلا من لف راكان:يبي له مصنع نفط على هالدم

ضحكت غلا وجلس راكان جنبها:يمديك تتراجعين

غلا لفت على راكان:اقول شي وما تنصدم ؟

راكان:اذا بتبطلين ما بنصدم

غلا ابتسمت:عسول

ضحكت من ردة فعل راكان وحدة نظراته

راكان:يعني يبي له مصنع عسل ؟

غلا ضحكت وحضنت ذراع راكان:لا تغار مو أخف من دمك

راكان:ما أشوفك تضحكين يوم تشوفينه دامه عسول

غلا ناظرت راكان:بثقل عليه

ضحك راكان:هبلي فيه غلا تكفين

لفت غلا وهي تضحك ونادوا اسمها ومشت تدخل وجلست وسحبوا منها دم

ووقف راكان ينتظرها ولف من تقدم نهار ومعه قهوتين وعصير وصد راكان يهز راسه بأسف

ووقف نهار عنده:ما سحبت دم

لف راكان وعقد حاجبينه:ليه ؟

نهار:قالوا يتعذر سحب العسل عندنا

راكان:انت مصرّ على ذبتك ؟ تراها ميته

ابتسم نهار:عطنا ذبه نعرف مستواك عاد احسك خفيف دم

راكان:لا تشك ، أخف من دمك

نهار:طيب ياخفيف الدم هاك قهوه على حساب نسيبك

راكان اخذ القهوه:عسى لا تذلنا بس

نهار:اذا تزوجت إختك بذلك

راكان شرب من القهوه:عساها ما توافق

ضحك نهار وابتسم راكان ووقفوا بجانب بعض وخرجت غلا:راكان شـ

سكتت من شافت نهار ولف راكان:توكل

نهار:بس عصير للمدام

عقدت حاجبينها غلا وهمست:مدام !

نهار:نحشم أخوك بس

راكان:ياخي توكل ياعسل

ضحك نهار وحط العصير وناظر راكان:حتى انت اعترفت اني عسل

راكان:تبرع بدمك بس عساه يخفّ

ضحكت غلا وابتسم نهار وهز راسه ومشى يتركهم ومسكت ذراعها غلا واخذت العصير وخرجت مع راكان

ناظروا نهار اللي ركب سيارته وابتسم نهار وحرك

ودق على امه ينتظرها ترد وردت نوره:شعندك

نهار:أمي بغيت اسألك

نوره:وش مهبب ؟

نهار:قبل شوي رحت ابي أحلل دم عشان الزواج وقالوا لي عطنا بيانات امك ضروري

عقدت حاجبينها نوره وجلست بإعتدال:ليه ؟ ما اذكر طلبوا من اخوانك

ابتسم نهار:اي لاني انا غير

نوره:وش قالوا طيب وش يبون ؟

ناظرها عقاب وكمل نهار:قالوا بنتأكد انها ملكة النحل لانها جابت عسل

نوره سكتت ثواني وقفلت الجوال بوجهه وناظرها عقاب:وش فيه ؟

نوره:يستهبل نهار ما تعرفه

اخذ جواله عقاب اللي يدق وناطر اسم محمد وتجاهله ودخل جاسر:ابوي محمد برا

عقاب:صرفه ماني طالع له

جاسر:كنت بتصرف انا بس قلت اسألك

عقاب رفع كفه ومشى جاسر يخرج وناظرته نوره:وش يبي ؟

عقاب:سجنت ولده

ناظرته بصدمه نوره:ليه ؟

عقاب:ما حشم نفسه ورديته مكان ما كان

سكتت نوره ولف عقاب:متى راجع ثنيان ؟ ابطى

نوره:خلهم يطولون يعوضون شهر العسل

عقاب:أبي اعرف متى يرجعون

نوره:وانا ابي اعرف الصراحه وش بتسوي وتعتذر من ملاك ؟

بلع ريقه عقاب وكملت نوره:وشلون بتعدل الوضع لان ما بسمح لثنيان وملاك يعيشون بعيد عني وخصوصاً ملاك حامل وتبي من يعتني فيها

عقاب هز راسه بحيره:ما ادري

نوره:غريب يوم تصرفت وفكرت بكل هذا ما فكرت وشلون تصلحه ؟

ناظرها عقاب ورفعت حاجبها نوره:صلح اللي خربته ياعقاب ، صلحه قبل يكتب كتابه نهار على بنت فهد

هز راسه عقاب بحيره وتردد وخوف من المواجهه

'

نزلت من السياره ومشت تتجول بالأسواق وكفها بكف ثنيان اللي لابس نظارته الشمسيه ولفت تناظر المحلات:ليش جينا ؟ هدايا لأهلك ؟

ثنيان هز راسه بحيره وهو يناظر المحلات:يمكن

دخل محل مجوهرات ايطالي وتقدم يناظر المحل وابتسم من شاف عقد اللولو واشر عليه وطلعه العامل وناظرته ملاك ولف عليها:جربيه

ناظرته بذهول وهي مبتسمه واخذه ثنيان ورفعه يبي يلبسها وضحكت بخفه ورفعت شعرها ولبسها العقد ثنيان ولفت تناظر اللولو اللي على عنقها

وابتسم ثنيان:ضاع عقل الرزين بين لولو قلادتها ولولو ثغرها

ملاك ميلت راسها تشوفه بالمرايه ولمست العقد:لولو عشانك موج ؟

هز راسه ثنيان:عشان الموج يحب اللي يسكنه وما يسكن الموج غير الدرّ الثمين وانتي ثمينه داخلي مثل لولو ومرجان البحر

لفت عليه ملاك وابتسمت له ولف ثنيان يطلع بطاقته ونزلت العقد وحطه بعلبته المخمليه وحاسب ثنيان عليه وشال الكيس بيده وخرجت معاه

تمشي بسليبر مريح وتنوره زرقاء مثل لون الموج وحدود سُمرة الصيف على كتوفها تبين فرق لونها عن لون الصيف

ورفع شعره ثنيان وفتح سيارته يركب وركبت بجانبه وحط الكيس بالخلف ولف لها:ملاكي

التفت له بإنتباه واخذ كفها:شفت هنا دكتوره بنروح عشان نشوف وضعك ووضع موج

سكتت وصدت ثواني تفكر بقلق وابتسم ثنيان يحط راسه على مرتبة السياره:أبي أشوف موج ومتى بتجينا ؟عشان أعد الأيام لجيّتها

هزت راسها بتوتر ملاك:ليش الحين ؟

ثنيان:لأننا طولنا هنا بنكمل شهر وأنا قلقان أبي أعرف وضعك

بلعت ريقها ملاك وحرك السياره ثنيان ولفت ملاك تناظر طريقهم ولبست نظارتها الشمسيه عن الهواء اللي يطاير شعرها من كشف سيارتهم

وناظر العنوان ثنيان ولف يشوف الطُرق ووقف عند العنوان وناظرت العياده ملاك بقلق والتفت ثنيان يوقف السياره ويقفلها:تعالي نشوف موج

نزلت من السياره بخوف وتقدم ثنيان ورفع ذراعه على كتوفها ودخل ونزل نظارته الشمسيه من تقدم ياخذ موعد

وجلست ملاك وهي تناظر العياده ولف ثنيان وجلس بجانبها ومعه ورقه وناظر المكان والناس ولف وابتسم لملاك:موج بتجي بتحب إيطاليا دام بنشوفها هنا بميلانو

ابتسمت بهدوء ملاك تخفي ربكتها عن ثنيان لكنه كان يحس بشعورها من قبضة يدها اللي على تنورتها ورفع كفه على كفها يشد عليه

ولف من تقدمت الممرضه تناديهم ودخلوا وتقدم ثنيان يتكلم مع الدكتوره انقليزي ولفت ملاك تناظر صورة الطفل اللي بغرفة الدكتوره وقفت تتأملها بمشاعر فوضويه ما تفهمها ولفت من نطق ثنيان:ملاك

لفت عليه واشرت لها الدكتوره تستريح على السرير ووقف ثنيان وابتسم ومد كفه لكفها وناظرت السقف ملاك وغمضت عيونها بتوتر

وجلست الدكتوره وكشفت عن بطنها وحطت جهاز السونار ولف ثنيان يناظر الشاشه وهو ماسك كف ملاك ولفت الدكتوره على ثنيان:تريد سماع صوت نبض الجنين ؟

ابتسم ثنيان ولف لملاك اللي مغمضه عيونها:تبين نسمع نبض موج ؟

فتحت عيونها ملاك ولفت للسونار تناظره ورجفت من سمعت صوت نبض الجنين وضحك ثنيان واخذ جواله يصور الشاشه

وبلعت ريقها ملاك ونطقت الدكتوره:عمر الحمل سَبعه أسابيع

لف ثنيان على الدكتوره بإنتباه:وماهو وضع الجنين ؟

هزت راسها الدكتوره:ممتاز

ابتسم ثنيان ولف لملاك:شفتي كيف موج قويه نفس أمها ؟ يارب قريب يبشرونا بإنها بنت

ناظرته ملاك بربكه وناظرت شاشة السونار تتأملها وتجمعت بمحاجر عيونها موج دموعها

وشدت على كف ثنيان وبلعت ريقها من ابتعدت الدكتوره ترجع لمكتبها وتقدم ثنيان لملاك وانحنى لها ومسك جبينها:اذا رجعنا بنطمن مره ثانيه بس سمعتي صوت موج ؟

هزت راسها وابتسم ثنيان يناظر عيونها وتقدم يبوس جبينها وابتعد عنها يبيها تبتسم ويرتاح وهمس:ليه تبين تبكين وما تقدرين ؟

رفعت راسها ملاك تبكي وضحك ثنيان من مشاعرها وحضنها وحضنته ملاك واخذت نفس بتوتر:تظن بتحبني ؟

ثنيان:أنا موج وأحبك ما بتحبك موج بنتي ؟

مسحت دموعها وغمضت عيونها بمشاعر تجتاحها وابتعد عنها ثنيان وجلست ونزلت من السرير وتقدمت الدكتوره بصور السونار وابتسم ثنيان واخذها وخرجوا

ناظر الصور والتفتت ملاك تناظرها

ثنيان لف لملاك وطلع جواله:وقفي هنا

ناظرته ملاك وابتسمت من فرحته ومد لها الصور وابتعد عنها عشان يصورها مع موج

وضحكت من صورها مع صور السونار وخلفها شوارع إيطاليا

وتقدم لها وباس خدها وحضنها:اهخ ياهلاك ثنيان

حضنته ملاك وشدت على تيشيرته وابتعد عنها ومشوا للسياره

دق جوال ثنيان سناب وضحك يرد وناظر الكاميرا وابتسم:أم ثنيان

لفت ملاك وابتسمت ونطقت نوره:وش هاللي ارسلته تبي تلهفني يعني ؟

ثنيان ضحك:انا متلهف وميت لهفه

نوره:وشلون ملاك ؟

ثنيان لف الكاميرا وابتسمت ملاك وابتسمت نوره:شلونك ملاك يا أمي ؟

ملاك:حمدلله ، وحشتيني

نوره:وانتوا اكثر والله انتوا اكثر وكلنا ننتظركم ابطيتوا علينا

ثنيان لف الكاميرا عليه:ان شاء الله لان نهار كل يوم يرسل لي عشان ملكته

نوره:مطفوق نهار ومستعجل

ثنيان:راجعين ان شاء الله ولو اننا ما شبعنا

نوره ضحكت:انت ما تشبع من الموج والحين ما بتشبع من الموج مع ملاك

ابتسم ثنيان ولف لملاك اللي تضحك ولف يناظر نوره:ان شاء الله راجعين قريب

تقدم عقاب يناظر نوره اللي تكلم وناظر ثنيان بجوالها ولمحه ثنيان ولف لملاك اللي تناظر الطريق ورجع ناظر الجوال من تقدم عقاب:شلونك ابوي ؟

لفت ملاك ولانت ملامحها بربكه تشوف ثنيان لاف الجوال على نفسه وبلعت ريقها

لفت نوره على عقاب وهز راسه عقاب:بخير انتم شلونكم ؟

هز راسه ثنيان بهدوء:الحمدلله

نوره:يالله امي ثنيان بقفل انا وانت انتبه لسواقتك

ثنيان:توصين شي من إيطاليا ؟

نوره:اي برسل لك لسته

ضحك ثنيان واشر على خشمه وقفلت نوره ولف ثنيان يناظر ملاك اللي ساكته وحط جواله بحضنه بهدوء شايل هم الرجعه والمواجهه وان ملاك ترجع تتعب من جديد

مع انه قعد معها كفايه بالسفر وارتاحت وتغيرت نفسيتها لكنه خايف وقلقان

'

نزل عيونه ليامور اللي عند رجله ومسح عليه ولف من خرجت من الحمام وناظرها

وصدت بعيونها أصايل بربكه وجلست عند المرايه وصد منيف ليامور وابتسم بهدوء

وجلست كوتي على فخذه ومسح عليها منيف ولف لأصايل:تبين تخرجين ؟

هزت راسها بسرعه وكأنها تبي النجاه من تواجدها بالبيت معاه خصوصاً بعد اللي صار بينهم

ووقف منيف:تجهزي طيب

مشى للحمام ولفت أصايل لين دخل وناظرت شكلها بالمرايه وغطت فمها تناظر نفسها

نزلت عيونها لعنقها وغمضت عيونها بقوه وبلعت ريقها بتوتر لو اخوانها او امها شافوها كيف بيكون شكلها

عضت شفتها ولبست عبايتها ولفت من خرج منيف وتقدم لكوتي ويامور:اقعدوا عاقلين

انحنى ياخذ مفتاحه من جنب سريره ومشى يخرج ومشت خلفه أصايل

تحجبت وخرجت وركبت بجانبه وحرك سيارته منيف وسكتوا يناظرون الطريق

ولف منيف وناظرها ساكته ونطق بهدوء:تتعشين ؟

ناظرته أصايل بتوتر ولفت للطريق:عادي

منيف ابتسم وسكت يناظر الطريق ووقف عند مطعم ونزلت معاه

وتقدم منيف لها وبلعت ريقها من تلامست كفوفهم ولف منيف عليها وهو يمشي ومسك كفها وناظرته وشدت على كفه ودخلوا المطعم

جلسوا بطاوله ورفع عيونه منيف عليها تصد بنظراتها:اللي تعيشينه خجل والا خوف ؟

ناظرته أصايل بهدوء وكمل منيف:تخجلين مني والا تخافين مني ؟

أصايل:بطلت أخاف

ابتسم بدون يبين أسنانه ومد كفه لها وطلعت كفوفها من تحت الطاوله ومدت كفها وناظرها منيف:لا تخجلين الخجل يحرمني منك

أصايل سكتت ثواني ورفعت عيونها عليه:نسوي زواج ؟

اتسع مبسم ثغره منيف:وش تغير ؟ كنتي ما تبين زواج

أصايل رفعت كتفها:ماتغير شي

منيف رجع ظهره للخلف يشوف خجلها وربكتها:نسوي حفل زواج نفس ما تودين وتعزمين اللي تحبين

أصايل سكتت وكمل منيف:بس بأول وصول ثنيان وملاك

أصايل:بلغتك متى يرجعون ؟

منيف هز راسه:بكره بالليل

أصايل ناظرته بضيق:بيتصلح كل شي والا يرجع يخرب كل شي من جديد ؟

منيف تنهد ورفع عيونه للسقف ثواني يفكر

وشدت على كفه أصايل:ابوي بيعتذر وواثقه بس ما اعرف كيف بتكون ردة فعل ملاك

منيف ناظرها:ملاك تطيب جنب ثنيان بس لا تتأثر حياتنا بأي شكل كان

أصايل عقدت حاجبينها:مستحيل

منيف ناظر كفها:لا ترجع كفوفنا خاليه

أصايل:بطل تخاف

منيف ناظرها:وبطلي تخجلين

ابتسمت بتوتر وصدت بعيونها وابتسم منيف يناظرها ودق جوالها واخذته وردت:هلا

نوره ناظرت الطريق:وينك مختفيه انتي ؟ ما كلمتيني

أصايل بللت شفايفها بتوتر:ولاشي موجوده

نوره ناظرت المكان من وقف حمدان:طيب عندك خبر ثنيان جاي بكره ؟

أصايل:قالي منيف قبل شوي

نوره:افكر اخذ خدم وانظف الشاليه لان اكيد بيقعدون فيه قبل تزين الامور

أصايل:انا بعد اشوف كذا أنسب

نوره:زين بقفل الحين مشغوله اتصل عليك بعد شوي

أصايل:اوكيه

قفلت نوره ونزلت من السياره ومشت تدخل وناظرت العسكري ومدت هويتها له:بشوف منصور محمد

هز راسه:تفضلي

دخلت السجن وجلست وحطت رجل على رجل وانتظرته يجي ودخل منصور وناظرته نوره بحده

وتقدم لها وابتسم:زين جيتي ما رديتي طلبي

نوره:خلصني خل اشوف وش عندك

منصور جلس قدامها:ابي اطلع من هنا

ضحكت نوره وابتسم منصور ورفعت حاجبها نوره:تطلع ؟ وليش تطلع ؟

منصور:لاني بقولك حقيقة زوجك عقاب وليه سوى كل ذا

نوره:اي قلت لي عقاب ؟ دام فيها عقاب فما يهمني لو ادري ان جيتي عشان عقاب ما جيت

منصور:هذا زوجك وابو عيالك وبتزعلين لو انتشر اللي بقوله

نوره:انا حياتي مستقله

منصور:عقاب كان يعرف مساعد ابو ملاك

نوره:من وين يعرفه ؟

منصور:كانوا جيران وجارتهم وحده اسمها زهره سمعتي فيها ؟

سكتت نوره تناظر منصور بهدوء وكمل منصور:عقاب كان يبيها لكن مساعد سبقه واخذها والحين عقاب انتقم من عيال مساعد لان حربه مع مساعد وناره مع مساعد

سكت يناظر نوره الهاديه ورفع حاجبه:ليه ساكته ؟

نوره:بس هذا موضوعك ؟

منصور:تمثلين انه ما يهمك ؟

نوره:ما يهمني ، زهره اللي تتكلم عنها ماتت الله يرحمها وش ينفعني فيه كلامك ؟ بزعل على وحده ميته ؟ ميته ميته رحمة الله عليها

منصور سكت وناظرته نوره:تحسبني بخرب بيتي واشتت عيالي عشان سالفه لها سنين ؟ صدق انك تجهلني

تقدمت وناظرته بحده:انا نوره أم ساري زوجة الشيخ عقاب وينادوني يالشيخه ام ساري ، لا انت ولا عشره من امثالك تقدرون تهدمون حصوني على عيالي وبيتي ومملكتي ، انا ملكة هالعائله ومستحيل اسمح انها تضيع بسبب خرابيط لها سنين

منصور:لكن زوجك ضيعكم بسبب هالخرابيط

نوره:زوجي فقد عقله نفس مافقد كليته ما الله عطاه الفطانه نفس ما عطاني ، الشي الوحيد اللي سواه من فطانه هو انه رجعك مكان ما كنت

رفع عيونه منصور من وقفت نوره ومسكت كفوفها ببعض تناظره:شوف لك شي تنشغل فيه بدال ما تنشغل بعيالي

مشت تاركته وخرجت ومشت تركب السياره:امش حمدان امش خسارة هالبنزين اللي انقضى

'

مشت وكفها بكف ثنيان بعد وصولهم لأرض السعوديه بعد غياب شهر كامل

وابتسمت وضحك ثنيان من شاف لوحه كبيره مرفوعه مكتوب عليها ' كل أبو الشرقيه مشتاقه لكم '

وضحكت من شافت نهار رافعها وبجانبه نوره ومنيف وأصايل وجاسر وابتسمت نوره:ياهلا ياهلا

تقدم منيف وتقدمت له وحضنته ملاك وغمضت عيونها بقوه:وحشتني

ابتسم منيف وهو حاضنها وتقدم ثنيان وحضن امه وابتسمت نوره:هلا امي هلا بنور عيوني اشتقنا لكم والله

ضحك نهار:وش هاللون القوي ابو موج ؟

ابتسم ثنيان وابتعد عن امه وحضن نهار بقوه وضحك نهار:اقسم بالله اشتقنا لك

ابتسم ثنيان ولف لجاسر وحضنه وابتعدت ملاك عن منيف وتقدمت لأصايل وحضنتها بقوه:وحشتيني

أصايل ضحكت:وانتي اكثر

ابتعدت ولفت لنوره اللي فتحت ذراعينها:هلا أمي هلا

حضنتها ملاك وابتسمت نوره:حمدلله على سلامتكم

لف ثنيان وسلم على منيف ووقف بجانبه وناظر امه اللي ماسكه كف ملاك:عساكم انبسطتوا ؟

ثنيان:الحمدلله

أصايل:هالمره لونكم احترق

ضحكت ملاك ولفت لثنيان اللي يضحك وناظرتهم نوره:امشوا امشوا بدال هالزحمه

مشوا خارجين من المطار ولف نهار:معي بسيارتي

مشت نوره مع جاسر وركب ثنيان بجانب نهار ومنيف وأصايل بالخلف وركبت بجانب منيف ملاك ومسكت كفه من شوقها له

حرك نهار خلف جاسر ولف لثنيان:كنتم بتبطون اكثر ؟

ثنيان:الصراحه ماكان لي نيّه ارجع بس في واحد نشب فيني عشان كتب كتابه

ضحكت أصايل:ابشرك ناشب فينا كلنا

لفت ملاك لمنيف وابتسمت من تغير حاله وشكله للاحسن:شلونك منيف ؟

منيف هز راسه وشد على كفها ولف نهار لملاك:الحين يبي لنا نسأل عن شخص ثالث

ابتسم ثنيان ولف يناظر ملاك وابتسمت ملاك بهدوء:كلنا بخير

ناظرتها أصايل:تطمنتي هناك على وضعك ؟

هزت راسها ملاك ولف ثنيان للطريق:وبنراجع هنا بس بنرتاح اليوم

نهار:ياحبيبي ما بترتاح امي سابقتكم للشاليه ومجهزه قعده تبي تسولف معكم

ثنيان:وانا والله مشتاق لامي بعد ، وش اخر الاخبار ؟

نهار:لاحق لاحق بتجيك

سكت ثنيان وناظر الطريق ووقفوا عند الشاليه ونزلوا ودخلت ملاك واخذت نفس براحه تناظر المكان الاحب لها ولفت تشوف ثنيان ونهار وجاسر ومنيف واقفين برا يتكلمون

وابتسمت من تقدمت لها أصايل تفصخ عبايتها:احلويتي ملاك

ابتسمت لها ملاك:تعالي علميني كيف وضعكم؟

أصايل جلست على طرف الكنبه:كويس انا بالبيت مع منيف من اخر مره

هزت راسها ملاك بهدوء ودها تسأل عن كل شي بس متردده من قلقها

ودخلت نوره اللي لابسه فستان وبيدها مبخره:ملاك الحقينا برا بنقعد

ابتسمت ملاك وهزت راسها وخرجت نوره وناظرت العيال:ابي لي اثنين يسحبون لي هالطاوله

تقدم منيف مع نهار وابتسم ثنيان:امي وش مسويه انتي بالشاليه ؟

نوره:ولاشي ، اثثت داخل وغيرت بالمطبخ هذاك الدولاب وسويت غيره والقعده هذي صممتها اريح واوسع ومع مظلات لاني ما احب الشمس مثل ولدي

ضحك ثنيان ونطق نهار:تقول ما سوت شي ركز

ضحك منيف من ضربت نهار نوره:اسكت انت

جلست نوره:تعال ثنيان أمي اجلس جنبي والله اني مشتاقه لهالزول الله لا يحرمني منه

ابتسم ثنيان وجلس بجانبها وابتسمت له:شلونك وشلون ملاك ؟

ثنيان هز راسه:بخير غيرنا جو وارتحنا بعد المشاكل

نوره:اي زين سويتم وملاك شلونها مع الحمل ؟ ما اشتكت من شي ؟

ثنيان لف من خرجت ملاك مع أصايل:اخر اسبوع ماصار يعجبها الاكل

ابتسمت ملاك وجلست وناظرتها نوره:توحمتي ملاك ؟

ملاك هزت كتوفها بهدوء:ما اعرف بس اخر مطاعم ذقتها ما عجبتني

نهار:الله ستر على ثنيان لا تتوحمين عليه وانتم هناك ويبتلش

ضحكوا وابتسمت أصايل:انا احس الحمل خلاك احلى الصراحه

نوره ابتسمت:يقولون حمل الولد يزين وحمل البنت يشين

عقد حاجبينه ثنيان وهو يناظر ملاك:نبيك تشينين

ضحكت ملاك وابتسمت نوره:جنى علموها بجنس اللي ببطنها

لف ثنيان:والله ؟

جاسر:خمن

ابتسم ثنيان:ولد

ضحكت نوره وهزت راسها:اي

أصايل:كنا بنسوي حفلة تحديد جنس البيبي بس ساري رفض

نهار:ساري شيّب معد يبي حفلات اخر مره شفته كان يقفل في اللمبات يقول ليه المصاريف

ضحك منيف وهز راسه:ساري اخوك كبير تبيه نفس حركاتك يالورع ؟

نهار:اشوفك تقول عني ورع لوحدي تراني بعمرك ؟

نوره:لا اللي يتزوج ماهو ورع

نهار:زوجيني اجل ترضينها علي ؟

جاسر:اوهوه فتحنا هالباب الحين ما ينقفل

نوره لفت لثنيان:على هالطاري امي ثنيان جهزنا لكتب كتاب نهار شوف انت وملاك اللي ناقصكم قبل الجمعه

لفت ملاك لأصايل:لقيتي لك فستان ؟

هزت راسها أصايل:امي ماقصرت

نوره:ملاك انا طلعت لك كذا فستان عند المصممه ايمان عجبتني وحسيتها تلوق عليك لافضيتي كلميني نروح نقيسها عليك

ابتسمت ملاك وهزت راسها

نوره:وقلت الشهر الجاي نسوي زواج لمنيف وأصايل ما عجبتني هالروحه بدون طرب

ابتسم ثنيان وضحكت أصايل:عشانك بس والا ما بخاطري اسوي زواج

جاسر ناظر أصايل:ليه ؟

أصايل رفعت كتفها:ماله داعي خلاص انا ببيتي من شهر

منيف لف عليها:نسوي نسوي

نوره:اي يا أمي منيف اقنعها هالبساطه والسهوله ما احبها ابي اسوي زواج احضر له شهر

ثنيان لف عليهم:وابوي شلونه ؟

سكتت نوره تناظر العيال ورفع عيونه منيف لملاك اللي لانت ملامحها بهدوء

ونطقت أصايل:مشغول

ثنيان هز راسه بهدوء ولفت أصايل لملاك:تعالي ملاك ندخل داخل نسولف

وقفت ملاك وناظرت منيف:شوي وتعال لي

هز راسه منيف لها ومشت ملاك مع أصايل داخل

ولف ثنيان لامه:ما كان خليتم ابوي لوحده

جاسر:هو قالنا نروح وقعد ساري عنده

ثنيان:بروح اسلم عليه

نوره:بيجيك بكره ماعليك

ثنيان:صار شي جديد ؟

وقف منيف وتركهم ودخل ولفت نوره لثنيان:ولد هالخسيس محمد راح لابوك ومعاه سكين وتهاوش معه بس جاسر كان معهم

عقد حاجبينه ثنيان وناظر جاسر وتقدم جاسر:حاقد على ابوي بس ماصار شي ابوي قدم شكوى وهو الحين خايس بالسجن

ثنيان:فتره ويطلع

نوره:شعلينا منه ما يقدر يسوي شي زود خلاص

ثنيان تنهد:انا ودي الوضع يتصلح مع ابوي ما اقدر افتح الموضوع مع ملاك وتنضغط ولا ودي اترك الموضوع كذا

نوره:انا بجي مع عقاب وما بيصير شي ملاك تخطت الموضوع ان شاء الله

ثنيان:وماودي اخلي ابوي بهالموقف

نهار:بس لازم يعتذر ابوي مهما كان الموضوع صعب ابوي ضغط على ملاك ودمرها وارعبها

نوره:خلاص لا تفتحون هالطاري ماهو وقته علمنا وش جايب لنا من اسبانيا وايطاليا

-

( لا تنسون النجمه ⭐️ )

ابتسمت ملاك من دخل منيف وناظرها:ملاك تغيرتي !

ضحكت ملاك ولفت أصايل:قبل شوي اقولها لونها ووجهها وشعرها

تقدم منيف وجلس ورفعت شعرها خلف اذنها ملاك:انتوا شسويتوا ؟

لف منيف لأصايل اللي تناظره وابتسم وناظر ملاك:نحوس في البيت أصايل كل يوم تشتري ابجوره

ضحكت أصايل ولفت لملاك:يعني حاولت اغير بالاثاث شوي على ذوقي واحط روحي بالمكان

ابتسمت ملاك تناظرهم مع بعض منسجمين ولف منيف لملاك:شفتي وضعك مع الحمل ؟

هزت راسها ملاك ورفعت كفها على بطنها وابتسمت بشعور غريب:بس مو مصدقه للحين

عضت شفتها أصايل بفرحه وتقدم منيف ولمس بطنها:ولا انا

ضحكت ملاك من شافت منيف يلمس بطنها الصغير ونطقت ملاك:مع اني سمعت نبضه بس مو مصدقه للحين

أصايل:وقالت لك بأي أسبوع ؟

هزت راسها ملاك:هالأسبوع دخلت الأسبوع التاسع

منيف رفع عيونه لملاك:يعني كم ؟

أصايل:بداية الثالث

هزت راسها ملاك وابتسم منيف:وشو يعني بتكبر عايلتنا ؟

هزت راسها ملاك:بتصير خال

ضحك منيف ولف لأصايل:تتوقعين بنت ؟

أصايل:بخاطري بنت ميته صراحه

ملاك:وثنيان يبي

منيف لف لملاك:وانا ابي

ابتسمت ملاك ورفعت راسها من دخلت نوره وناظرت منيف اللي عند بطن ملاك وابتسمت

ودخل خلفها ثنيان وضحك:مافي بطن تقعد عنده

ابتسم منيف وعدل قعدته وتقدمت نوره:امي ملاك انا برجع البيت تحتاجين شي ؟

ملاك:ماقصرتي

نوره:حطيت لكم بالثلاجه اكل ان بغيتم تاكلون وتغذي زين ملاك واشربي من هالعصيرات

ثنيان:انا معها امي لا تشيلين هم

نوره:زين اجل انا برجع

مشت تاركتهم ولف منيف لأصايل:نمشي احنا بعد؟

هزت راسها أصايل ووقفت ولف منيف:اذا بغيتي شي كلميني

هزت راسها ملاك:دقيقه منيف

وقف منيف ومشت تخرج أصايل وتقدم ثنيان للبلكونه

رفعت عيونها ملاك لمنيف:تقدر تجيب لي البوم صور اهلي معاك بكره ؟

عقد حاجبينه منيف:ليه ؟

ملاك:بغيته

هز راسه بهدوء منيف ومشى يخرج ولفت ملاك تناظر ثنيان واقف بالبلكونه يشوف مغادرة اهله وابتسم من حس بكفوفها على بطنه وحظت راسها على ظهره ملاك:هنا بيتي

ثنيان مسك كفوفها وهو يناظر البحر:انتي بيتي وضحكتك بيتي

ابتسمت ملاك وابتعدت عنه وناظرته:ودك تشوف ابوك ؟

ثنيان:بيجيني بكره

سكتت ملاك تناظره وناظرها ثنيان:يشوفني ويشوفك

ملاك؛ماودي اشوفه

ثنيان:ليه ؟ بصدرك عتاب عاتبيه ، بقلبك زعل ازعلي اشكي وعاتبي بس لا يطول الموضوه والصدّه ، واجهيه واللي بقببك قوليه وتفاهموا سوا

ملاك:كيف ارجع احط عيني بعينه من قريب كيف بشوف المكان الوسيع والحضن الدافي بعد ماذقت ابشع قسوه منه

ثنيان تنهد ومسك كفوفها:هذا الكلام تقولينه له وتواجهينه فيه بس ما ابيك تنضغطين وتتعبين محد بيجبرك على شي وانا معك

سكتت ملاك تناظره وميل راسه بتعب ثنيان:يس خلي الموضوع ينتهي

كان واضح عليه القلق وحَمل الهموم وثقل المتون من وضعه بعيد عن ابوه بسببها ولا ودها يعيش ثنيان فتره ثقيله بسببها

نزلت عيونها وهزت راسها ومشى يدخل ثنيان وتركها بالبلكونه لفت تناظر البحر وغمضت عيونها بضيق

'

وقفت ملاك وهي تناظر القهوه اللي تغلي على الفرن قدام عيونها ولفت من دخل ثنيان:اهلي وصلوا

مشى يتركها وناظرت الفراغ ملاك واخذت عبايتها ولبستها وبداخلها هدوء وسكون

وصبت القهوه تسمع حسهم بالشاليه وخرجت تشوف ثنيان يسلم على عقاب ولفوا عليها من حطت القهوه وسطهم وناظرت جنى وساري وجاسر ونهار ومنيف وأصايل ونوره وعقاب وابتسمت بهدوء:حياكم الله

سكتوا يناظرون بعض ولف ثنيان يناظر ملاك ورجع ناظر عقاب اللي يناظر ملاك

جلست ولفت لجنى:حياك اقعدي ارتاحي

جلسوا ولفت نوره لعقاب وثنيان وجلسوا واستراحوا

لفت ملاك لمنيف:جبت اللي وصيتك عليه منيف ؟

هز راسه منيف:حطيته داخل

ملاك هزت راسها ولفت تناظرهم ساكتين واخذ نفس عقاب بهدوء:شلونك ملاك ؟

لفوا عليها من هزت راسها:الحمدلله

سكتوا يناظرون بعضهم البعض بغرابه من الموقف والحوار والهدوء اللي حاصل

وبلع ريقه ثنيان يراقب ملاك وجلوسها المريح وجمع كفوفه ببعضها عقاب وهو يناظر ملاك:تكلمت مع اخوك منيف واعتذرت وان شاء الله انه قبل اعتذاري ، يمكن طريقتي كانت خاطئه بس أسبابي تـ

قاطعته ملاك:نار ولهب

سكت عقاب وناظرته ملاك:أسبابك نار ولهب حرقتك سنين طويله لدرجة عَمت عينك عن طريقتك صح ؟ خل أقوب أسبابك يمكن بعض عيالك يجهلون

نزل راسه ثنيان بتعب ولفت ملاك على العيال:أبوي الله يرحمه كان جار لأبوكم من سنين الله ، وكان أبوكم بخاطره وحده يتزوجها

لفت نوره لعقاب وناظروا بعضهم العيال وكملت ملاك:لكن أبوي سبقه لها وأخذها وتزوجها ، اللي هي أمي ، واشتعلت النيران داخل العميد عقاب نار لظَى حرقتني وحرقت اخوي بسبب ماضي مع شخص مرحوم

لفوا على عقاب يناظرونه ساكت وكملت ملاك:تخيلوا ان السبب ماهو انا ولا السرقه ولا شغل ابوكم ، السبب ثار قديم من سنين

لفت ملاك على عقاب تناظره:انت عاشرت ابوي قبل ما انا اعرف ابوي معقول ما عرفت انه مستحيل يسوي فيك كذا ؟

عقاب:سواها

ملاك رجعت ظهرها لورا:وليه ابوي احتفظ بصورتك سنين بين صورنا معه ؟

عقد حاجبينه عقاب ووقفت ملاك ودخلت تاركتهم ولفوا يناظرون بعضهم واخذت نفس نوره تصد عنهم

ودخلت ملاك وتقدمت لعقاب ومدت الصوره ورفع عيونه ثنيان للصوره ولف لعقاب اللي اخذها وعقد حاجبينه يناظرها

ملاك:هذا مو انت معه ؟

سكت عقاب يناظرها ولفّها يقرأ اللي خلفها:‏نبني بيوت أحلامنا وأثرها ثلج ، وإليا أشرقت شمس الضحى ذوبتها

رفع عيونه لملاك وهو عاقد حجاجه:وش قال عني ؟

ملاك ناظرت عقاب مطوّلاً بالنظر وهزت راسها بالنفي بتعب وهمست:ما قال

رجعت تجلس محلها وناظر الصوره عقاب ونطقت ملاك:ابوي اخذ امي بكلام شيبان بعد صلاة الجمعه ، ويمكن ابوي كان مغصوب لكن ما قال لنا بيوم هالكلمه

هزت راسها ملاك تكمل:ومات قبل يقولها لك

عقد حاجبينه منيف يناظرهم بصدمه ونطق عقاب:دورت عليه لو بغى يقولي شي كان وصلني

ملاك:ولا يمكن ابوي يطعن احد بظهره حتى وهو رايح راح مِحرم من مكه

سكت عقاب ولف يناظر عياله اللي ساكتين يناظرونه وهزت راسها ملاك:لو كان اللي بيني وبينك أنا وناري فكان هيّن ، بس اللي بيني وبينك أبوي وأمي

لف ثنيان على عقاب ونزل عيونه عقاب يناظر الصوره ووقف بتعب وثقل وخرج من بينهم

ولف ثنيان لملاك وناظرته ملاك وبلعت ريقها ولفت على الجميع:اصب قهوه ؟

ناظرتها نوره وهزت راسها:قهويني يا أمي قهويني

لفت أصايل بذهول من ردة فعل امها وهمست:أمي !

نوره:عندي خبر ما قصر ولد عم ملاك ومنيف

رفعت عيونها ملاك ولف منيف لنوره:منصور ؟

نوره هزت راسها:اي عطاني هالسالفه زين سوى شي زين

جاسر:متى كلمتيه ؟

نوره اخذت الفنجان ورجعت ظهرها للخلف:ما كلمته رحت له

ثنيان ناظرها بصدمه:امي منجدك رايحه السجن ؟

نوره:اي وشفيها ؟

نهار:وما تكلمتي مع ابوي ؟

نوره:ما يهمني ماضي أحد المهم ما يأثر على الحاضر

رفعت عيونها نوره لملاك اللي تناظرها وسكتت ولفوا يناظرون بعضهم

ولفت ملاك تناظر عقاب اللي واقف برا ولفت تناظر ثنيان اللي عيونه عليها ووقفت ومشت تخرج وعض شفته ثنيان ومشى خلفها

وقفت خلف عقاب اللي ماسك الصوره ورفعت عيونها للبحر:انا ما اشبه مساعد

لف عقاب عليها وتقدم ثنيان لهم وناظرت عقاب وكملت:مساعد مات بدون يأذي نمله لكن أنا عشت أرعب بشر ، لو ظنيت بيوم ان هذي تربية مساعد وجيت تنتقم من اللي زرعه مساعد فيني فأنت غلطان ، اللي عشته ماهو من تربيه اللي عشته من إحتياج

عقاب رفع الصوره:كان اللي بين سرّي ونفسي أبوك ، بس باعني بغيابي

ملاك:أبوي ما يبيع احد عاش معه

عقاب نزل عيونه يقرأ الصوره ونطقت ملاك:أنا تكلمت اليوم معك عشان موضوع أبوي والا كل شي عشته بالماضي دفنته ، والبيت اللي دخلته اليوم هو بيت ولدك ولا بمنعكم عن بعض

ناظرهم ثنيان ونطق عقاب:بس أنا جيت عشان أصلح اللي صار حتى لو انه غلط

ملاك:اللي بيتصلح بصلحه أنا ، مابي تلمس جروحي من جديد ، ذوقتني أقسى شي عشته ولا يمكن ارجع اقترب لصدرك من جديد

سكت عقاب ولفت ملاك لثنيان ورجعت ناظرت عقاب:إنت أبو ثنيان ، بس

مشت تتركهم وتدخل الشاليه ورفع عيونه عقاب لثنيان ونزل عيونه ثنيان للصوره وناظر ابوه:تعرف احد يعرفكم؟

هز راسه بحيره عقاب ونطق ثنيان:افهم وش صار عشان تنطفي هالنار

عقاب:امك واخوانك داخل

ثنيان هز راسه:امي ما تأثرت

نزل راسه عقاب من نوره اللي دنت بسقف توقعاتها لعقاب وصارت تهتم لعيالها فقط ورفع راسه يناظر الشاليه

ونطق ثنيان:ادخل ما بخليك تروح الحين

عقاب هز راسه بالنفي:برجع اقعدوا انتم

ثنيان رفع ذراعه على كتف ابوه:مابخليك تروح

ناظره عقاب ثواني ودخل مع ثنيان وهو يسمع الهدوء ويشوف نظراتهم وجلس

ورفعت عيونها ملاك على عقاب اللي يعيش تفكك أسري شديد من نظرات وسكوت

صدت نوره تناظر عيالها وناظرهم ثنيان ساكتين يناظرون بعضهم

لين نطقت نوره:اللي ما جهز للجمعه يجهز مابقي شي على كتب كتاب نهار

سكتوا يناظرونها وهزت راسها:شفيكم كأنكم بعزاء ؟

ثنيان تنهد:أمي

لفت نوره على ثنيان:لا تقولي ماهو وقته ، اكيد ما تبيني اندب حظي عشان غلطات ابوك اللي تعب وجاهد عشان يغطي على اغلاطكم

نزل راسه ثنيان وكملت نوره:غلطتم انتم وحاسبكم والحين غلط وبنحاسبه

ساري لف لامه:أمي

عقاب:انا قلت مابقعد بس ثنيان أصرّ

ثنيان:وما بتطلع لين نحل هالمواضيع كلها ، انا ماني راضي عن اللي صاير

رفعت عيونها أصايل تناظر ثنيان وعقد حاجبينه ثنيان:ادري تغيرت النفوس لكن الوضع طال ، ابي نرجع نفس قبل جمعتنا طيبه ونفوسنا صافيه

صدت ملاك تناظر منيف اللي صاد وساكت وكمل ثنيان:احنا أهل وأي أهل يصير بينهم مشاكل وحرابه بس يرجعون ، متى نحنا نرجع ؟

سكتوا يناظرون ثنيان وناظرهم بتعب ثنيان ولف يناظر ملاك اللي تناظره

عقاب بلع ريقه:أعذروني لو حصل مني كل هالخدوش وكنت سبب وفرقت ايادي عايلتنا عن بعض

نزلوا عيونهم من كلام عقاب ورفع عيونه عقاب لملاك:قلتي ان اللي فسد داخلك هو نارك وانا ناري اللي فسدت داخلي ، ماقدرت اطفيها حتى بعد سنين ولا سويت هالشي لان قلبي معلق بوحده غير زوجتي وام عيالي

صدت نوره عنه وكمل عقاب:انا اللي يخليني اعيش للحين هو انتم ، عائلتي

رفعت عيونه ملاك من كمل:عيالي وعيال مساعد اللي كَوى صدري

ناظرته ملاك من جاب طاري ابوها وكمل عقاب:وعسى الله لا يزيدني عمر لو بعيشكم اكثـ

قاطعته أصايل:بعيد الشر ابوي ، خلاص اللي حصل حصل ومحد عتبان عليك منا

ناظرتها نوره وهز راسه عقاب:استريحوا وانبسطوا مع بعضكم انا استأذن

وقف وخرج يتركهم ولف يناظره ثنيان يخرج ولف على اهله وتنهد جاسر ومسك راسه بتعب

'

تناظرهم جالسين برا كلهم سوا ولفت لمنيف اللي قدامها جالس:كل شي تبدل

ناظرها منيف ولف يناظرهم برا يتكلمون سوا ولف عليها من جديد:اقولك شي بس ما تنصدمين مني ؟

ناظرته ملاك ونطق بهدوء منيف:رغم كل المشاكل اللي صارت انا ما أحس بالخوف ، أحسهم أهلي وكل العتاب اللي يطلع مني هو عشانهم أهلي

سكتت ملاك تناظر منيف وكمل منيف:وأدري وواثق ان بعد فتره قصيره بيرجع كل شي نفس قبل

ملاك:ظنك بنسى ؟

منيف هز راسه:العائله تشفي

سكتت ملاك تناظره ونطق منيف:وثنيان يبي أبوه وأهله وانتي ما بتبعدينه مستحيل

بلعت ريقها ملاك ولفت تناظر ثنيان جالس مع اهله بعيد وكمل منيف:عشان كذا ادري ان كل شي بيرجع نفس قبل

تنهدت ملاك ودخلت نوره وابتسمت بهدوء:ماجلسنا كثير ملاك بس نعوضها ان شاء الله

وقفت ملاك:بتروحين ؟

نوره:اي ماجازت لي سواليفهم برا

تقدمت نوره بتسلم على ملاك وهمست ملاك:في صدرك شي ؟

ابتسمت نوره:لا عليك ولا على احد انا صدري فسيح

ابتسمت لثواني ملاك وتقدمت نوره لها:ماعليك تزين

سلمت عليها ولفت نوره لمنيف وسلمت عليه:شوف نهار ان بغى شي روح معه لا تخليه يخربط لوحده

هز راسه منيف:ابشري

مشت وتركتهم ووقف منيف وخرج ورفعت عيونها أصايل عليه:نمشي ؟

ناظرها ودها تترك المكان وهز راسه ووقفت أصايل وتقدمت قبله بالسياره

وركب وناظرها هاديه تناظر الطريق وحرك سيارته ولف عليها بعد ثواني:ليه ساكته ؟

أصايل:ما عجبني الوضع بيننا أول مره أحس بالغربه وسط أهلي

منيف:اللي صار بسيط دام كلاً حيّ

لفت عليه أصايل تناظره ونطق منيف يطمنها:دام هالنفوس حيّه ما بيطول الزعل بيتصلح كل شي

لفت أصايل تناظر الطريق بضيق

'

خرجت ملاك وتقدمت تجلس وناظرت ثنيان اللي صاد للبحر وساكت ولفت لجنى:سمعت من خالتي عن جنس البيبي ، الله يسهل عليك ويبلغك فيه

ابتسمت جنى:امين عقبالك الله يبشرنا فيك

هزت راسها ملاك بهدوء ولفت تناظر ثنيان اللي ساكت وناظرت نهار اللي على جواله وجاسر يناظرهم

وحست فعلاً بوحشة المكان والقلوب ووقف ساري:ثنيان احنا ماشين

لف ثنيان عليه:بحفظ الرحمن

وقفت جنى ومشت تغادر الشاليه مع ساري ونزل عيونه جاسر يفكر لثواني

ولف نهار عليهم وقفل جواله:وش هالقعده طيب ؟ ما بنتكلم ؟

لف ثنيان عليه وعدل جلسته:بوشو نتكلم ؟

نهار:ما علمتوني وش اخذ معي بكتب الكتاب ؟

صد جاسر بملل من سوالف نهار اللي كان كل مره يحاول يفتح هالسواليف رغبه في تغيير جوهم لكنهم يستخفون بسوالفه لانها بوقت غير مناسب

طلع جواله اللي يدق ثنيان وناظر الاسم ورد:هلا أمي

صدت تناظر البحر ملاك واستغربت السكوت ولفت تناظر ثنيان اللي جامد وجهه وتقدم جاسر:وشفيك ؟

سكت ثنيان ونزل الجوال وناظره وعقد حاجبينه نهار:ولد وش فيك ؟

رفع عيونه ثنيان عليهم:ابوي

جمد وجه ملاك بخوف تناظره ومسكت بطنها من حست ان كل داخلها ارتبك

وهمس ثنيان:طاح بالبيت

وقف جاسر وفزّ نهار:وينه طيب ؟ وش تقول امي ؟

وقف ثنيان بخوف:تقول بالاسعاف معه وساري لحق عليهم

جاسر:طيب ليه واقف امش نشوفه

خرج نهار بسرعه ومشى نهار خلفه ولف ثنيان لملاك اللي تناظره بجمود ورمش بخوف يناظرها وقلق

ووقفت ما تتردد وتمشي معه لسيارته

'

ماسكه كفه تبكي وتناظره نايم وشد على كتفها ساري:مافيه شي بس ضغطه ارتفع

ماردت عليه أصايل واخذ نفس ثنيان يناظر ابوه

جاسر:خلاص ياخي خلاص ابوي تعب وانضغط وضغطناه كلنا لين متى يستمر هالوضع لين نفقده يعني ؟

نهار:بعيد الشر لا تقول كذا

نوره تنهدت وناظرت جاسر:هذا احنا عند راسه ، اي غلط بس محنا مخلينه

تكتفت ملاك تناظر عقاب من بعيد حابسه دموع عينها بمجاجرها

تكررت عليها ايام تعبه وعطائها له بكليتها وصحتها

رفع عيونه منيف يناظر ملاك اللي تتماسك وهي تراقب عقاب وطيحته على السرير الابيض

وقفت بإعتدال وخرجت من عندهم ومسكت عنقها من اختناقها بغصه حابستها

ورفع عيونه ثنيان يناظرها تخرج ولف لمنيف اللي ناظره ووقف وخرج خلفها

تقدم وناظرها جالسه ومنزله راسها وجلس بجانبها وسمعها تشهق وتبكي

ورفع ذراعه عليها ولفت تحضنه وهي تبكي بتعب ومسح على ظهرها ثنيان:مافقدناه باقي موجود

كانت تبكي خوف فعلاً عليه رغم انه أذّاها لكن تحسه مساعد تحس ان كل الحنيّه اللي جاتها منه كانت حقيقه ، ومشهده يحاول في جمع عايلته من جديد يعور داخلها

هي فتحت كل أبواب الخير من لمست كفها كف عقاب بيوم شافته ، تذكره بكثره بذاكرتها وكأنه بطيحته هذي رجّع داخلها من جديد مواجع خيره اللي تكاثرت عليها

احتواها وحطها بصوره وبرواز مع عايلته رغم ناره وحريقه من مساعد وصورة ماضي وصُحبه ، بكت لأن الشخص الوحيد اللي كان يلزم مساعد هو نفس الشخص اللي بيوم شافته مساعد

كانت تجهل سبب كل هالوّد اللي تحسه لعقاب بس الحقيقه ان عقاب فيه من روح مساعد ، صُحبة سنين وجيرة زمن

بكت لان ماتبي تخسر اخر ما تبقى من ماضي ابوها ، رغم انه قسى عليها بعد فرط الحنيّه اللي كساها فيه لكنها الى الان ما تقدر تكرهه ماتقدر تشوفه غير اللي فتح لها احضانه وبيته واهله

كان منتبه لها وسطهم جميع ويعرف بحزنها لانه يعرف وش مساعد بحياة اللي يعرفه وشلون لو كانت بنته

غمضت عيونها وهي بحضن ثنيان واخذ نفس ثنيان بتعب وجهد يحسه وجروح داخل صدره عيّت تشفى

ابتعدت عن ثنيان ومسحت دموعها وناظرته وهزت راسها تتأمل وضعه:مابي أشوفك تخسره بسببي

ثنيان:اللي حصل ماهو بسببك ، اللي حصل صار واليوم ابوي بخير مستريح وانتي قدامي بخير

ملاك ميلت راسها تناظر ثنيان بذهول من حال داخلها:خفت أفقده

بكت وهزت راسها:زعلانه عليه بس مابي أفقده

تنهد ثنيان والتفت يصد عنها ويناظر الفراغ ومسحت دموعها ملاك

والتفت من خرج منيف:ثنيان ابوك قام

وقف ثنيان ودخل ولفت ملاك تناظر منيف اللي واقف ومسحت وجهها ووقفت تتماسك ودخلت مع منيف

ناظرت العيال اللي عند راس عقاب وأصايل اللي متمسكه بكف عقاب ونظراته لهم ووقفت بعيد تتأملهم

هز راسه عقاب:الحمدلله

أصايل:يعورك شي ؟

هز راسه بالنفي وتنهدت نوره:الحمدلله مافيك شي كايد

جاسر:بسيطه يا ابو جاسر العقاب ما يطيح الا واقف

مارد عقاب ولف ساري:بتطلع ابوي ؟ والا ودك تستريح هنا ؟

عقاب:لا بطلع للبيت

ثنيان:ارتاح ابوي لين تحس انك احسن

عقاب:انا احسن وطيب

لف ثنيان لساري وهز راسه ساري وخرج

جلس عقاب على كرسي متحرك ومشوا يخرجون من المستشفى وركبت ملاك سيارة ثنيان تناظره يساعد اخوانه عشان يركب عقاب ومشى يركب سيارته وحرك وتكلم وهو يناظر سيارة اخوانه:اوديك للشاليه وارجع لاهلي ؟

هزت راسها بالنفي ملاك:لا روح ورا اهلك

لف يناظرها ثنيان والتفتت عليه:تطمن عليه ، لا تخليه

مارد ثنيان يناظر الطريق ووقف ورا اخوانه ونزلوا وتقدمت تدخل البيت معهم

ناظرت البيت تتذكر اخر مره كانت فيه ولفت تشوف مكان المكتب من بعيد

والتفت منيف يناظر ملاك وجلس عقاب بالصاله وجلسوا العيال

رفع عيونه عقاب وناظر ملاك ومنيف اللي واقفين يناظرون المكتب والتفتت نوره وناظرتهم

ونطق جاسر:ابوي تبي تاكل شي ؟

مارد عقاب وهو يناظر عيال مساعد والتفت ثنيان وناظر ملاك ومنيف

ولف منيف عليهم من انتبه لسكوتهم وبلع ريقه وهمس:حمدلله على سلامتك

لفت ملاك وناظرت عقاب وهز راسه عقاب:الله يسلمك

رفعت عيونها أصايل لمنيف اللي نطق:الله يطول بعمرك لعيالك ويخليك ذخر

قالها بعفويه تخرج من اعماقه رغبه في ان اي أب يعيش لعياله ولا يجرب اي شخص اللي جربه منيف

نزلت عيونها نوره ولف ثنيان على ابوه اللي يناظرهم

ومشت تتركهم ملاك وتطلع ووقف ثنيان بقلق ومشى خلفها ووقفت بنص المسافه ولفت عليه:لا تترك اهلك

ثنيان:بجي معك

ملاك ناظرت قلق عيونه وهزت راسها:بستريح بالغرفه

ثنيان هز راسه بالنفي:ما بتركك طيب

ملاك رفعت كفها على صدره وناظرت عيونه:ما بخليك

سكت ثنيان ونطقت ملاك:والله بس بستريح

بلع ريقه وهز راسه ومشت ملاك تتركه وتطلع للغرفه

ناظرت الغرفه وجلست على السرير ولفت تناظر شكلها بالمرايه وتتذكر كل الايام اللي عاشتها ونزلت عيونها لبطنها ولمسته بكفها وهمست:إنتي مصدر قوتي الحين ، بأول مطيح لي بتذكر انك تنتظريني وتبين حضني وعايشه في جوفي

اخذت نفس ملاك وهي تمسح على بطنها:عشانك ، كل شي بيصير عشانك

رفعت راسها تستقوي من داخل روحها ووقفت وغسلت وجهها ونزلت لهم

ولف ثنيان من دخلت عليهم ورفعت عيونها لعقاب:حمدلله على سلامتك

سكت عقاب وجلست ملاك بجانب ثنيان براحه:اخر الاوجاع ان شاء الله

هز راسه بدون يرد عليها ولفت نوره:نهار شوف أدوية ابوك

نهار:معي بس ابوي لازم تاكل وتاخذها

نوره:اي اي لازم الحين بناكل جميع بس بإنتظار الاكل يجهز

لفت لمنيف اللي جالس بجانب أصايل:جميع

هز راسه بهدوء منيف ولفت نوره عليهم

لف عقاب على أصايل اللي ماسكه كفه وابتسمت بهدوء له أصايل:عشاني بعدت عنك ؟

هز راسه عقاب وضحكت بخفوت أصايل تخفي خوفها عليه وشدت على كفه:انا بنتك وجنبك دايم ومستحيل ابعد عنك بس لا تفكر في شي يتعبك مابي اخسرك

تغيرت نبرة صوتها من اخر جملتها ولف ساري:الحين نبتلش بالدلوعه من يسكتها

تقدم منيف يناظر ساري وناظره ساري وصد منيف:تحب ابوها ماهي دلوعه

لفت أصايل على منيف اللي يغير المصلطحات نفس ماتغيرها له بإستمرار وابتسمت له

وقفت نوره:يالله خل نقعد على الطاوله سوا

لف ثنيان لملاك وعقد حاجبينه:وش سويتي فوق ؟

ملاك:تفقدت مكاننا اذا نظيف عشان بننام هنا

ثنيان:ليه ؟

ملاك:لان هذا بيتك وانا اقعد معك ببيتك

سكت ثنيان ومسكت كفه ملاك:تعال ناكل

وقفت ومشت معهم وجلست على الطاوله وجلس بجانبها ثنيان

رفعت عيونها ملاك تناظر عقاب اللي جلس ولفت تشوف العائله كامله جالسه

نوره:سمّوا بالله

بدوا ياكلون وبدت تاكل ملاك بهدوء وعقدت حاجبينها من انزعاج معدتها وشالت الدجاج من صحنها وشربت عصير تبعد انقلاب حالها من الأكل

وظلت تناظر الأكل ولف عليها ثنيان وناظر صحنها:ما بتاكلين ؟

هزت راسها بالنفي وحطت عصيرها ورفعت عيونها نوره:وشفيك ملاك ؟

ملاك:ولاشي بس مالي نفس ، بالعافيه

وقفت تتركهم ونطقت جنى:يمكن انزعجت من ريحة الدجاج حسيت فيها

نوره:اي من تالي ماصارت تحب الاكل

رجع ياكل ثنيان ونطق جاسر:بتقعد هنا ثنيان ؟

رفع عيونه عقاب وهز راسه ثنيان:ان شاء الله مابخلي ابوي

عقاب:انا طيب اذا تبي روح مكان ما قعدت

ثنيان:انا هنا قعدت وانا هنا بيتي

سكت عقاب ورجع ياكل ثنيان ولفت نوره لعقاب:نأجل كتب كتاب نهار لين تصير طيب ؟

عقاب:لا لا بنروح ان شاء الله

نهار:ابوي كل شي يتأجل المهم سلامتك

عقاب:انا طيب لا نعطل الناس

منيف لف لنهار وهو ياكل:متى بتمشي ؟

نهار:مدري عن ابوي

عقاب:انا واخوانك نسبقك

نهار:طيب انا ومنيف يصير نجي بعدكم

عقاب:اهم شي لا تبطي على الشيخ

هز راسه نهار:ابشر

وقف ثنيان:بالعافيه

طلع ودخل الغرفه وناظر ملاك اللي منسدحه:ليش ما اكلتي ؟

لفت عليه ملاك وهي مكشره:ما ادري ريحة الدجاج قلبت معدتي كلها

ابتسم ثنيان وناظرت ابتسامته ملاك:ليش تضحك ؟

تقدم وضحك وجلس عندها:تتوحمين تخيلي !

ملاك:انتبه اتوحم عليك

ثنيان:لا ما تتوحمين علي مستحيل ماتقدرين

ملاك:انا ما اقدر بس موج تقدر

رفع سبابته ثنيان:لا تدوخيني بموج الحين

ابتسمت ملاك وتقدم ثنيان وانسدح بجانبها وحط كفه تحت راسه وناظرها:بس نبي نشوف موج مره ثانيه

هزت راسها ملاك:بروح بعد العشاء مع خالتي بشوف لي فستان

ثنيان:اجل انا بوديكم عشان نمر العياده

ملاك:بس انت شفت موج وسمعت النبض ليش تبي تجي مره ثانيه؟

ثنيان:اشتقت لها

ابتسمت ملاك ورجع ظهره للخلف ثنيان:واشتقت للغرفه هذي

ضحكت ملاك:انا ما اشتقت لها

لف ثنيان وابتسم:والله ياجات مكابره وهواش

ضحكت ملاك وجلس ثنيان وناظرها:‏رضيت اعيشك بظلمه قبل حتى اعيشك نور رضيت احمل على أكتافي أمر حزنك و آلامك

ملاك رجعت راسها للخلف وكمل ثنيان:زين اني صبرت

ابتسمت ملاك:عشان ما تدفع مؤخر مو عشاني أنا

ضحك ثنيان وتقدمت ملاك وحضنت راسه من صوت ضحكته وحطت راسها على راسه:إنتَ عمري

ابتعدت عنه تناظره وابتسم ثنيان ورفع راسه يبوس عنقها وانسدح على ظهره يناظرها براحه

رغم كل اللي يصير بين اهله من تشتت وحساسيه الا إنها ملازمته ومعه وتنازلت عشانه وهو مقدر تنازلها ووجودها هنا بالبيت اللي له ذكرى سيئه بحياتها

-

الجمعه - كتب كتاب نهار بن عقاب على غلا بنت فهد

بصالة الرجال تقدموا يسلمون على عقاب اللي واقف وبجانبه نهار وعياله وابتسم يرحب فيهم عقاب

المباخر في كل ارجاء القصر والعود يصدح بين الحضور ، والبشوت السوداء تمتلي بين الحضور

وريحة البن واصوات فناجين الدلال المهيّله

لف منيف على عقاب من نطق اللي يصافحه:الله يخلي لك عيالك يا ابو ساري

عقاب ابتسم:ويخلي لك أحبابك

هز راسه:هذا مَن مِن عيالك ؟

لف عقاب من قصد بكلامه منيف وسكت منيف يناظر عقاب ولف عقاب:هذا زوج بنتي

بلع ريقه منيف من رد عقاب وكمل عقاب:خامس عيالي

رفع عيونه منيف على عقاب من كمل وابتسم بهدوء من كمل كلامه عقاب وصد بعيونه للحضور وباله مسرور من كلام عقاب عنه

وجلس عقاب من جلس الشيخ وابتسم نهار يعدل بشته بجانب الشيخ ورفع عيونه لراكان اللي جالس بجانب ابوه

رفع كفه يصافح فهد وابتسم من نطق الشيخ يختم عقد القِران بجملة:‏بارك الله لك وبارك عليك وجمع بينكما في خير

وقف نهار وسلم عليه فهد:مبروك الله يوفقكم يارب

ابتسم نهار وتقدم راكان يسلم عليه وشد على كفه راكان:احذر واسلم

ابتسم نهار وابتعد عن نهار:ما بتسمع الا اللي يسرك عنها

لف فهد يسلم على عقاب وتقدم نهار لاخوانه يسلم عليهم وحضن منيف اللي ضحك:ما انت ورع الليله ، الليله عريس

نهار ضحك:بوجودك يالفال الطيب

لف من ناداه فهد وتقدم والتفت فهد:حيّاك يا ابو ساري

مشى عقاب مع نهار وابتسم نهار يمشي مع فهد وراكان ودخل قاعة النساء واتسع بؤبؤ عينه من شافها واقفه أمامه ، انقطعت أنفاسه لهفه عليها وعلى نظراتها له

رفع كفه عقاب على ذراع نهار اللي تقدم لها ولف نهار لابوه اللي يقطع عجلته ونطق عقاب:ماشاء الله تبارك الله الف مبروك يابنتي الف مبروك والله يجعل قادم أيامك خير وانا ماني أبوك دم لكن عساني أكون لك أب روح ووجود

ابتسمت غلا لعقاب وتقدم عقاب وسلم عليها وابتعد عقاب عنها وتقدمت غلا لابوها وحضنته ونهار مبتسم يناظرها

ولف عقاب عليه وهمس:اثقل

لف نهار على ابوه وهو مبتسم ورجع ناظرها تحضن راكان وابتسم راكان:غلاي أنا لوحدي

ضحكت غلا وابتعدت عن راكان وتقدم نهار:بس دوري

تلاشت ابتسامة راكان ولف فهد على نهار وضحك نهار:أسلم على زوجتي

عض شفته عقاب وتقدم نهار وسلم على غلا وناظرها:ألف مبروك وشـ

عقاب:هاه ندخل يا ابو راكان ؟ امش نهار توكلنا على الله

لف نهار على ابوه وتلاشت ابتسامته وناظره بحده عقاب ولف نهار على غلا وابتسم:بسبقك

مشى نهار وابتسمت غلا وخرجوا ينزفون لداخل صالة النساء

وابتسم نهار يناظر الحضور ودقه عقاب:عينك قدام عينك قدام

طلع على الكوشه نهار والتفت وهو مبتسم ويعدل بشته ويبتسم للتصوير ويسمع الاغاني ويناظر الحضور ولف لعقاب:ابوي تسمح لي ارقص ؟

لف عقاب عليه:جرب عشان تطلع من المكان بدون رجلين

ضحك نهار ورفع عيونه من انفتح الباب وطلّت غلا بفستان بتصميمها ما شافته عين من قبل ولفت أصايل تناظرها ورفعت حجابها ملاك تراقب دخولها وابتسمت نوره تغطرف بصوتها

ابتسمت غلا تناظر أهلها ونهار وشدت على ورد مسكتها ولف نهار على عقاب:قلبي يرقص

عقاب ناظره بحده:اثقل قلت اثقل

لف نهار على غلا وهو مبتسم يراقب مشيتها وطولها وشعرها ونعومتها ، عينه شافت كثير ومثير بس الوحيده اللي ملت عينه زين كانت غلا

تقدم من قربت منهم واخذ كفها يبوسه وهو يناظر عيونها وتنحنح راكان يصد بعيونه

وابتسمت غلا وتقدم يبوس جبينها ولفت أصايل على ملاك:الله يستر لا ياخذ راحته

ضحكت ملاك وهي تراقب نهار اللي ابتعد وناظر غلا:حظه اللي ربي كاتب له العمر كله معاك

ابتسمت غلا من نظراته وجرئته وصدت عنه تتقدم وطلعت وهي ماسكه كف نهار

وتركوا المكان عقاب وفهد وراكان وجلست غلا بجانب نهار وهو ماسك كفها

وطلعت نوره ووقف نهار وفتح ذراعينه:ام نهار

ضحكت نوره وحضنته وحضنها نهار وغمضت عيونها نوره:حبيبي والله

نهار ابتسم وناظرها:الف مبروك زواج احلى عيالك يا ام نهار

ابتسمت نوره:الف مبروك لك ياحبيب أمك

لفت نوره لغلا وسلمت عليها ولف نهار من شاف اللي تقدمت لهم:انا مو ساحر بس انتي عمتي الغاليه

ابتسمت ام راكان وسلم عليها نهار:جاهل من وين مصدر جمال زوجتي بس المصدر هذا هو قدامي

ضحكت ام راكان من غزله وكلامه وهزت راسها:يعني بتترس غلا غزل هذا باين

نهار:بنتك بتعيش ملكة زمانها

ام راكان:الله يوفقكم

لف نهار على أصايل اللي تقدمت له وضحكت تحضنه بقوه:مبروك اخوي وصاحبي وحياتي كلها

نهار:ما بتغارين علي بالله ؟

ضحكت أصايل وابتعدت عنه:لا هذي حركاتكم

نهار مسك كف أصايل ولف لغلا اللي جلست وجلس بجانبها

وتقدمت نوره بالدبل وابتسمت غلا من مسك كفها نهار وناظرها:ربي بيجمل حياتي من بعد ما تلبسين دبله

رفعت عيونها عليه ولبسها دبلتها وباس كفها وضحكت أصايل واخذت دبلته غلا ومدت كفها تلبسه وابتسم:بعد بوسه ثانيه

رجع يبوس كفها الثاني ولفت غلا على الحضور ولف نهار على امه:اطلع ؟

نوره:اقعد اقعد لا تستعجل

نهار:ابي اسمع صوتها ما اسمعه زين بالاغاني

غطت فمها أصايل تضحك وهزت راسها بأسف نوره

لف نهار على غلا:اذا ودك ترقصين لا تستحين

عقدت حاجبينها:ارقص ليه ؟

نهار:عروس

غلا:لا

صدت بعيونها للحضور ولف نهار من تقدمت امه عند اذنه:اخرج خل البنت ترتاح

نهار:اما اخرج لا عاجبني هنا المكان لا تودوني عند الرجال

نوره:اخرج نهار احسن لا اشيلك من بشتك انا

وقف نهار وخرج من المكان وابتسمت غلا من تقدموا صديقاتها يرقصون لها

ولفت ملاك على جنى:تقومين تسلمين ؟

جنى:اي

وقفت ملاك تعدل فستانها الماسك على جسمها وردي اللون وطلعت جنى معها اللي لابسه فستان واسع عشان بطنها اسود اللون

تقدموا لغلا اللي وقفت وابتسمت أصايل:سلايفك

ابتسمت ملاك وصافحت غلا:الف مبروك انا ملاك زوجة ثنيان اخو نهار

هزت راسها غلا:الله يبارك فيك

تقدمت جنى وسلمت عليها:وانا جنى زوجة ساري

غلا:تشرفت فيكم

مشت ملاك ووقفت جنب نوره وأصايل ووقفت معهم جنى

لفت نوره عليهم:ما بنطول دامه ماهو زواج بس جازت لي المطربه

ابتسمت ملاك اللي تناظر الحضور:كل شي رايق وحلو ماقصرتي

جنى:والله انا ودي ارقص بعد

نوره ابتسمت:اي ياحبيبتي هذا الطرب الاصيل وباقي بعرس أصايل بسوي اللي ماقد صار

ضحكت أصايل:الله يستر

خرجوا من المكان وطلعت أصايل من دق عليها عقاب ودخلت الجناح وناظرت اخوانها ومنيف وابوها وابتسمت:اهل العريس ؟

لف منيف وابتسم بهدوء يناظر شكلها وفستانها الذهبي وابتسم عقاب:هلا بنور عيني

تقدمت له أصايل وسلمت عليه ولفت لثنيان وجاسر وساري:نهار وين ؟

ساري:مسنتر بسيارته ينتظر العروس

ضحكت أصايل ولفت من دخلت نوره:ماشاء الله هالكثره الحلوه

ابتسم جاسر:كنت بصد بعيوني ظنيتك العروس

ضحكت نوره:بتاخذ مكان نهار ؟

جاسر:حركاته

نوره:خلونا نرجع دام الليله خلصت على خير

ثنيان:وين ملاك؟

نوره:ملاك وجنى خارجين سوا من باب النساء اطلعوا انتم

مشى منيف بيخرج ونطقت نوره:منيف

لف منيف وناظرته نوره من خرجوا:اقعد شوي مع أصايل لين اشوف اغراضي

ابتسمت أصايل من حركات امها وابتسم منيف وهز راسه ومشت تخرج تاركتهم

ولفت أصايل على منيف وابتسمت تلم كفوفها ببعض بربكه وتقدم لها منيف ونطق بهدوء:ماشفتك قبل تروحين

أصايل:امي ما تركتني من أمس

سكتت من شافت نظراته وتأمله لها وصدت بعيونها وتقدم لها منيف:أقسم بالله تجعلين الواحد يغرم فيك كل يوم اكثر ، كل يوم أحبك من جديد

رفعت عيونها عليه أصايل وابتسمت وكمل منيف:رغم اني وصلتك وصرتي لي اقرب من انفاسي وشرياني بس كل يوم اتلهف لك من جديد ، تصنعين بداخلي لهفه ما انقطعت عن صدري ابد

ناظرت عيونه أصايل وهي مبتسمه ورفعت ذراعينها تحضنه من ربكتها تبي تصد عن عيونه فقط وابتسم منيف وحط يدينها على ظهرها:حمدلله انك راجعه معي بيتي

ضحكت وهي حاضنته وابتعدت عنه:بلبس عبايتي

هز راسه لها ومشت عنه تاركته وابتسم منيف وحك شاربه ينتظرها

'

خرجت ملاك ولف ثنيان يناظرها تناظر خطواتها من كعبها وتقدمت له وابتسمت

تقدم وفتح بابها:ان شاء الله موج ماعكرت مزاجك

ملاك وقفت عند الباب وناظرته ببشته وثوبه وشماغه:عكرته عكرته بس تفاهمنا

ابتسم ثنيان:افا

ركبت ملاك ومشى ثنيان وفصخ بشته وركب وحطه بينه وبينها وحرك:اي وكيف تفاهمتوا علميني وانا ابو موج

ملاك:شاورتني قالت ياماما لو تطلبين الحين بنص الليل سهره باليخت ووافق عليها بابا انا بكون رايقه

ضحك ثنيان ولف لملاك ومسك كفها يبوسه ولفت تناظره وابتسمت:الموج تبي الموج

ثنيان:والله تبشر به الموج وام الموج

لفت ملاك تناظر الطريق وهي مبتسمه ووقف ثنيان عند البحر وفصخت كعبها ملاك ونزلت

فصخ شماغه وعقاله ثنيان وحطه على كتفه ولف لملاك اللي تمشي حافيه وتقدم لها:مابي الارض تصير حظيظه ، اقربي مني

وقفت وابتسمت وضحكت من انحنى يشيلها وناظرته:تضمن ان محد موجود بالمكان ؟

ثنيان:محد بيجي هذا الوقت يخت وبحر الا موج بنتك

ضحكت وطلع ثنيان اليخت ونزلت ملاك من حضنه ورفع ثوبه ثنيان ودخل داخل وحط شماغه وعقاله وتقدم يفتح انوار اليخت ويشغله

جلست ملاك واستراحت وناظرت أنوار المرسى كل ماله يبتعد من ممشاهم يبحرون داخل البحر

سحبت حجابها تحرر نفسها عنه وفصخت عبايتها وجلست تستريح على جنبها وهي تناظر البحر

ولفت من خرج ثنيان وابتسم يتقدم لها يشوف شعرها اللي جامعته يكشف عن عنقها وأذرعها وصدرها وتتزين بلولو عَقده اللي جابه لها وخط التان على كتوفها السمرا

وابتسمت تلمح نظراته للولو عنقها ورفع عيونه من كشفت على أنيابها تبتسم لها

ووقف عندها:لولو ثغرك يشغل الملهوف عن جيدك ولوله

جلس بجانبها وهي لافه بجسدها له وناظرها:ماعمري قلت لك بس أول ما حبيت فيك حبيت أنيابك

عقدت حاجبينها وهي مبتسمه له:ولامره توقعت

ثنيان هز راسه:ولمحتها من يوم اقبلتي عليّ تنزفين لي

ضحكت ملاك تناظره:يعني عجبتك من قبل تعرف بياض جنحاني

ثنيان:لين الحين كل ما شفتك تعجبيني

ابتسمت ورفعت كفها لدقنه تلمسه:وأنا أعترف لك إني كنت دايم أشتهي أبوس خدينك

ضحك ثنيان ولف لها بإهتمام:غير حضني ؟

ضحكت ملاك وهزت راسها:بس ما تجرأت للحين

ثنيان:تجردي عن الخجل وبوسيني

ابتسمت ملاك وتقدمت له ولمست خده اليسار بأصابعها وقبّلت خده اليمين وابتسم ثنيان لأنها فعلاً لأول مره تقبّل خده

ابتعدت عنه وناظرته من قريب وهي تلمس خده وابتسمت

رفع ذراعه ثنيان لخصرها يقربه لها:كل يوم بوسيني

ملاك نزلت عيونها لأزرار ثوبه ورجعت ناظرت عيونه:أنا أبي كل يوم جنبك

ثنيان ابتسم:وأنا جنبك كل يوم والحين موج جايه ما ببتعد أبد

ضحكت ملاك:لين الحين أذكر لمعة عيونك وقت شفت السونار

ثنيان:ما بفوتها كل شهر

ملاك سكتت ثواني:تظن بتتسهل ولادتي ؟

ثنيان:انتي سمعتي الدكتوره وطمنتنا ان مافي خطر عليك بعد عملية التبرع بس لازم تولدين قيصري عشان لا يجيك فَتق

ملاك تنهدت:بس بصير أولد كل مره قيصري

ابتسم ثنيان بسعة مبسمه:انتي تفكرين تحملين بغير موج ؟

ضحكت من ردة فعله وفرحته:أكيد أبي

تقدم ثنيان وانحنى براسه يقبّل عنقها وابتسمت ملاك ترفع كفها لشعره

-

( لا تنسون النجمه ⭐️ )

ركبت بجانبه بهدوء وابتسم نهار يحرك سيارته ورفع الصوت يشغل أغاني ويلف يناظرها هاديه تناظر الطريق ورجع يناظر الطريق وحك جبينه من ثقلها

ووقف عند مطعم ونزلت معاه ومشت تناظره واقف ينتظرها ومدّ ذراعه لها وتقدمت له وحاوطت ذراعه ودخلوا المطعم

جلست وجلس أمامها واخذت المنيو تطلب

ناظرت دبلتها وابتسم نهار وتقدم لها:والله إني نلت في دنيتي شي ما تخيلت إني أنوله

ابتسمت غلا تناظره وكمل نهار:يعني بين كل هالبنات حواليني أنا ما أشوف الا إنتي

تلاشت ابتسامتها ورفعت حاجبها:والمفروض تشوفهم يعني؟

نهار:اعوذ بالله انا اشوف بنات ؟ انا اصلاً عيني مستقيمه ونظري مؤدب ومحترم انتي اول من تشوفه عيوني يالتايقر

غلا:تايقر ؟

نهار ابتسم:اي نفس لوقو محلك

ابتسمت غلا وكمل نهار:بس عرفت أختار ودامنا بأول حوارنا متى تبين زواجنا ؟

غلا:مستعجل مره ليه نحدده من الحين ؟

نهار:وليه نطول ؟ الشهر الجاي نحدده شرايك ؟

غلا:لا طبعاً بدري مره ما يناسبني وبعدين انا الى الان ما اعرفك

نهار ابتسم:لا ماعليك ازهليني بعجبك

غلا تقدمت وناظرته:يعني تقول اطلبي وانا حاضر ؟

نهار رفع كفه على صدره وابتسمت غلا:اوكيه زواجنا بعد شهر بس بشرط

نهار ابتسم وتقدم لها:تربعي وسط صدري

غلا:أبي فَهد

نهار:ابوك ؟ ابشري الان اتصل عليه

غلا:لا

سكت نهار ولعبت بدبلتها غلا وهي تناظرها:تايقر نفس لوقو محلي واسم ابوي

نهار:من وين اجيبه ؟

غلا رفعت كتفها:ماراح اعلمك من وين تجيب لي تايقر بس ابي تايقر وتجيبه لبيتنا واتصور معاه

نهار:لا ياحلوة زماني انا اخاف عليك التايقر خطير وانا ودي فيك

ابتسمت ورفعت حاجبها من مراوغته بالكلام:لا تخاف التايقر يعرف اني بنت فَهد

نهار:وش هالطلب تكفين اطلبي مجوهرات شنطه سياره اللي تبين ، اطلبي نفس البنات

غلا:اي بنات ؟

نهار تنحنح:ابشري بالتايقر ولا يهمك

سكتت غلا وابتسمت ترجع ظهرها للخلف

وحك جبينه نهار وهو مبتلش ولف من نزل الاكل على طاولتهم وبدوا ياكلون بهدوء

وخلصوا ووقفت:نرجع ؟

نهار:ليه مستعجله، نحلي شرايك ؟

غلا:لا تأخرت على أهلي

وقف نهار:اي واذا تراك معي

غلا هزت راسها:انت متعود تسهر برا للوقت هذا ؟

نهار:لا ابد ولا عمري ابطيت عن ١١

غلا:اي زين

اخذ جواله ومفتاحه نهار ومشى معها وركب سيارته وركبت يمينه

ناظرت سيارته وناظرته:سيارتك جديده ؟ مو نفس اللي دايم

ابتسم نهار وغمز لها:مركزه معي ؟

غلا:اكيد مركزه اذا ماخذ كوفي قدام البوتيك وكل يوم تسيّر عليه

ضحك نهار:اي جديده ابوي شراها لي بمناسبة زواجنا

غلا هزت راسها:يعني تقول انا الولد المدلل لاهله ؟

نهار:لا ابد انا ان قعدت مع ابوي واخواني ما يستشيرون الا انا ومزحي قليل وكلمتي موزونه

غلا ناظرته وابتسم نهار:بس معك يطيح ثقلي

صدت غلا عنه تخفي ابتسامتها وناظر الطريق نهار ومد كفه لكفها يلمسه وناظرت كفوفهم غلا

وابتسم نهار يشد على كفها:صوري لا تستحين

غلا:ليش اصور ؟ ماله داعي احب الخصوصيه

نهار نزل جواله اللي كان بيصور فيه وبلع ريقه:وانا بعد احب الخصوصيه

ابتسمت غلا تسمع الاغاني اللي مشغلها وناظرت كفوفهم

'

لفت تلبس تيشيرت منيف وناظرت كوتي اللي طلعت على السرير ولمستها تمسح عليها وهمست:ليش احسك تعبانه ؟

لفت أصايل لمنيف:منيف ماتحس كوتي متغيره

مارد عليها وهو مغمض عيونه ونايم على بطنه وتقدمت له أصايل ورفعت كفها لشعره:منيف قوم شوف كوتي

نطق وهو مغمض عيونه:شفيها؟

أصايل ناظرت كوتي وناظرت يامور:شكل صار شي ما انتبهنا عليه

رفع راسه منيف وناظرها وناظرته أصايل:حامل

بقق عيونه منيف يناظر أصايل ولف لكوتي وجلس:أبو يامور ، حملتي منه ؟

عضت شفتها أصايل وابتسمت من ردة فعل منيف ورفع حاجبه منيف يناظر يامور:ورع متى صارت تعجبك عشان تحمل منك ؟

أصايل ناظرت منيف اللي عاري صدره:يمكن حبوا بعض بس ما انتبهنا

منيف ناظرها لابسه تيشيرته وابتسم:من ما يحب كوتي اسألك بالله ؟

ضحكت لأنه يقصدها نفس ما كان يعامل كوتي حبل وصل بينهم ولحبهم وتقدم لها وحاوط بذراعه خصرها وقبّل خدها ورفعت كفوفها لشعره وهي تضحك:سبقتني كوتي

ابتعد منيف وناطرها من قريب:لا لا ماراح تحملين قبل زواجك عشان ما انفضح عند اهلك

أصايل:اكيد مو جالسه معك طول هالفتره ناكل فصفص

ضحك منيف وابتسمت أصايل من ضحكته ولف منيف لكوتي:قومي نوديك عياده يا حَرم يامور

ضحكت أصايل وقام منيف ودخل الحمام وتقدمت أصايل لكوتي ومسحت عليها:عيوني اللي بتصير مامي ، كوتي منجد تحبين يامور ؟

ناظرت يامور:ياويلك تتركها

'

دخلت ملاك البيت وتقدمت تشوفهم يفطرون وابتسمت نوره:من اليخت ؟

ضحكت ملاك ودخل ثنيان وناظرهم:سلام عليكم

عقاب:وعليكم السلام

ملاك:بطلع انا

مشت وتقدم ثنيان وجلس والتفت نهار:ابوي ابيك تساعدني بشغله

عقاب:الله يستر

جاسر:مصيبه جديده ؟

نهار:لا بس التايقر تبي تايقر

ضحك ثنيان وهو ياكل ولف جاسر على ساري ينقد نهار

ولفت نوره:وش تبي ؟

نهار:تايقر تايقر

عقاب:تبي تايقر ؟

نهار:اي قالت اذا جبت لي تايقر بحوش بيتنا بنتزوج بعد شهر

ضحكت نوره:تبي تمشيك على البيض هالبنت

ثنيان لف لجاسر اللي يضحك بدون صوت وضحك بعلو صوته وشرق يكح

ولف نهار عليهم يضحكون وابتسم عقاب ورفع حاجبه نهار:وش يضحك الحين ؟

نوره:وتبي ابوك يساعدك بوشو ؟

عقاب:اجيب له تايقر

ضحكوا العيال وضحك عقاب يشرب شاهيه

ساري:ليه الكلافه ودها تزور حديقة حيوانات

جاسر لف لساري وضحك وهو ماسك ذراعه بقوه

ولف ثنيان عليهم:لا انا شفت زيّ تنكر تايقر يمشي الحال

ضحكوا وضحكت نوره من ضحك العيال ورجع ظهره للخلف نهار مبتسم يناظر اخوانه

ولفت جنى على نهار:ماعليك منهم نهار جيب لها لو تبي القمر

ساري:جيب جيب الله يقويك

نهار لف لعقاب:ابوي اذكر رحنا عند واحد تعرفه عنده حديقة حيوان وسيرك تكفى كلمه

عقاب:وش اكلمه صاحي انت ؟

جاسر:طيب لازم تايقر حقيقي ؟

ضحك ثنيان ولف نهار عليهم وصد بحده:ابوي باخذه بس ربع ساعه ويرجع والله ما افلته بشوارع الخبر

عقاب ناظر نوره:هذا صاحي ؟

نوره شربت من الشاهي:ترك عقله على الكوشه

ضحكوا بصوت عالي العيال وضحك نهار:مقبوله من ام نهار

نوره ناظرته:تبي تايقر التايقر ؟

نهار:ابوي تكفى

عقاب:زوجناك نرتاح منك وجاتنا تايقر معك

جنى ضحكت:عاد حبيتها الصراحه تبي تايقر مو اي شي

نهار:انا ناديتها تايقر وقالت جيب لي تايقر

جاسر:لا ياشيخ انتبه المره الجايه تقول ديناصور ونبتلش

ضحك ساري ولف ثنيان يكح من ضحكته

عقاب:اكلمه وش اقوله تبي تفضحنا انت ؟

نهار:قوله بنخوف فيه بزارين

عقاب:والله انك بلوه

نهار:تكفى ابوي اول مره تطلب مني شي لا اطلع رخمه

ساري:هو انت لو جبته بتطلع رخمه

ضحك جاسر وهز راسه عقاب:بكلمه واشوف

طلع جواله عقاب ونزلت ملاك وجلست وناظرتهم:شفيكم ؟

لفت من نطق عقاب:سلام عليكم ابو عمر كيف الحال

ابتسم نهار وضحك ثنيان يناظر نهار

عقاب:بغيت تدبر لي تايقر والا شبل صغير احتاجه منك ربع ساعه حفيدي عنده بالروضه حفله ويبي له تايقر

ضحك جاسر بدون صوت يغطي وجهه وكمل عقاب:وليتك تجوع التايقر وتسوي خير

ضحكوا بصوت عالي العيال ووقف ساري من ضحكه وابتسمت نوره تناظرهم

عقاب ابتسم:يمرك ولدي نهار وياخذه منك ويرجعه ماعليك بأمانتي

ابتسم نهار ووقف وقفل عقاب وتقدم له نهار وباس راسه:الله لا يحرمني يا ابوي جعلك سالم

عقاب:لا تفلته بس وتبلشنا

نهار ناظر اخوانه وضحك وخرج من البيت

ابتسمت ملاك تشوف ثنيان يضحك مع اخوانه ولفت تفطر بهدوء ورفعت عيونها وناظرت عقاب اللي يناظرها ساكت وصدت بعيونها عنه

'

غلا ابتسمت وهي تسوق تناظر رقمه وردت:الو

نهار عض شفته:صوتك حلو بجوالي

غلا ناظرت طريقها:والله ؟

نهار:بجيك

غلا عقدت حاجبينها:وين تجيني ؟

نهار:مكانك

غلا:انا بالسياره الحين راجعه من البوتيك

نهار:رايحه بيتكم ؟

غلا:اي صديقاتي بيجوني

نهار:طيب بجيك انا بعد عندي مفاجأه

غلا:نهار صديقاتي بيجوني أجلها وقت ثاني

نهار ابتسم:ياحلو اسمي منك قوليه مره ثانيه

غلا ابتسمت:بتجيني وقت ثاني أنسب

نهار لف على السياره اللي خلف سيارته مقفله بشبك حديد:لا يا غلاي انتي بجيك حتى اني وصلت واستناك

غلا ابتسمت من ناداها غلاي:اوكيه بتطول ؟

نهار:على حسب شوقي

ابتسمت ووقفت عند البيت:تمام وصلت انا استناك

نهار:وانا قريب

قفلت جوالها وناظرت سيارة صديقاتها ونزلت ودخلت الحوش ولفت من سمعت صوت بوري ورفعت عيونها لصديقاتها اللي بالشباك:بنت من اول نستناك تعالي

ابتسمت:دقيقه وجايه ادخلوا

رفعت عيونها صديقتها:بموت جاك بيشوفك الحين ؟

ماردت غلا وعضت شفتها من دخل نهار الحوش وابتسم وفصخ نظارته الشمسيه ومشى لها:‏لك أن تتخيلين بمنتصف القايله جاي عشان شوقي زاد عليّ

غلا:كان صبر شوقك شوي

نهار:اذا صبرت انا ما بيصير التايقر

غلا:بس التايقر ما امداه يشتاق

نهار:اي تايقر تقصدين لان معي تايقر بسيارتي

عقدت حاجبينها غلا من سخريته:معك تايقر ؟ عسى قهويته ؟

ضحك نهار ومشى ووقف عند الباب وتكتفت غلا تنتظره

ودخل عامل ماسك تايقر من سلسلة عنقه وجمد وجه غلا وصرخوا صديقاتها من الشباك

وابتسم نهار:ماهو مفترس تطمني

ناظرته بذهول غلا وتقدم لها نهار:تايقر قدام تايقر

ناظرت التايقر غلا بجمود ووقف بجانبها نهار:انتي تطلبين شي وما يجيك ؟

ابتسمت غلا بصدمه ولفت عليه وناظرت عيونه من جنونه وابتسم نهار من نظراتها:كل غالي تطلبينه في موازيني يهون

ضحكت غلا وتقدم نهار لها:يعني ردة الفعل المناسبه الان انك تحضنيني وتحللين عناي وشقاي عشان اجيبه لك

ضحكت ورفعت ذراعينها تحضنه وابتسم نهار من حضنها وابتعدت عنه وطلعت جوالها:صورني معاه

ابتسم نهار وعض شفته ومشت غلا وجلست جنب التايقر ورفع الجوال يصورها ووقفت تناظر التايقر الصغير وتقدم نهار للعامل:خلاص رجعه وانا اكلم ابو عمر

خرج العامل وابتسم نهار ولف لها:عند وعدك ؟

ناظرته غلا وابتسمت تناظر عيونه ونطق نهار:شهر ويصير حضني بيتك

بلعت ريقها بربكه وصدت تناظر الشباك وعضت شفتها ولفت لنهار:سويتها عشاني منجد ؟

نهار:محد طلعني بالقوايل ادور تايقر واجيبه الا انتي

ابتسمت غلا وهمست:تبيني أحبك ؟

ضحك نهار وتقدم لها وعض شفته وناظر ابتسامتها:والله مكسبي حبك

ناظرته بتوتر غلا لوحود صديقاتها اللي يصورون:تمام روح واكلمك

نهار:بس كذا ؟

غلا:صديقاتي موجودين اكلمك بعدين

نهار:بجيك البيت بعدين

غلا:تمام بس روح

مشت تدخل البيت ورفع عيونه نهار للشباك وهمس:سمعت حسّ بنات وينهم ؟

صد من انقفل الشباك وخرج وابتسم وركب سيارته

'

لفت تناظر أهلها ومحمد اللي يتكلم مع أبوها وصدت تناظر الفراغ ونطق بندر:بنتي طلبت الطلاق وهذا قرارها ومالها رجعه فيه

محمد ناظر جواهر اللي صاده ولف لبندر:منصور مسجون وماودي ينزعج من هالطاري

بندر:هذا اللي عندنا

محمد:يعني عقاب ينتصر علينا كلنا ؟

بندر:السالفه هذي مافيها عقاب فيها بنتي وقررت وانا معها

وقف محمد وهز راسه وخرج من البيت ولفت جواهر على ابوها وقامت ودخلت غرفتها

قفلت الباب وغمضت عيونها بتعب من الوضع اللي انحطت فيه ، من بداية طيشها وتسرعها مع ثنيان بدون رضى اهلها لليوم بقرارها اللي اخذته عناد بثنيان وملاك وارتبطت بشخص قاتل وخسرت بالمرتين

جلست على السرير واخذت جوالها ودخلت امها ورفعت عيونها جواهر ونطقت امها:بتسافرين

سكتت جواهر ونطقت امها:عن الصيت وعشان المشاكل

صدت جواهر عن امها وتقدمت لها امها:واخوك راشد بيحجز لك

ماردت عليها جواهر ومشت تتركها امها وغمضت عيونها جواهر وفتحتها من جاتها رساله واخذتها تقرأ رسالة شادن:منصور بيخرج قريب

ردت عليها جواهر:ما يهمني

عقدت حاجبينها شادن بإنزعاج من جواهر وقفلت جوالها شادن ووقفت ومشت للشباك تناظر الشارع

معقوله وصل الحال لهذا الطريق ؟ ملاك استقلت عنهم وعاشت مع عائله اكبر وأحن وأفضل ؟

وهي بقت شادن تحارب لوحدها بخساره ؟ وجاها خبر من الخدم ان الحال تحسن وملاك رجعت لبيت عقاب

اخذت عبايتها ولبستها وخرجت من البيت

ركبت السياره وهي تناظر الطريق ووقف السواق عند بيت عقاب ونزلت شادن وناظرت البيت اللي عاشت فيه فتره سيئه وتقدمت تدخله

وقفت من شافت سيارة جاسر اللي نزل منها وناظرها من بعيد وعقد حاجبينه

تقدم لها من عرفها وناظرها:انا ظنيت معد بشوفك ابد

شادن:اشتقت لك جيت أتفقد احوالك

ابتسم جاسر وهز راسه:طال لسانك كنت مربيك والله

شادن:تخسى ماجيت عشانك جيت اشوف بنت عمي

عقد حاجبينه جاسر:اي بنت عم لحظه ! اللي خليتوها تفكر تنتحر ؟ اي ظنتي معد تبيكم

شادن:لا تتدخل بين سوالفنا

جاسر:ملاك زوجة اخوي انتي لا تدخلين بسوالفنا

شادن:اشوف لين الحين ما تزوجت ، طبيعي على هالاخلاق محد بيرضى فيك

جاسر:لا تشيلين همي انتي وانشغلي مع اخوك القاتل اللي ما يثمر فيه شي

شادن ناظرته بحده:لا تتكلم عن منصور

جاسر:قاتل وحياته تدمرت وهو اللي محد بيرضى فيه وبنت بندر ما تبيه

شادن سكتت تناظر جاسر بحده ورفع ذراعه جاسر:والحين توكلي لا توريني وجهك مره ثانيه

شادن ناظرته وتقدم جاسر:اذلفي قلت

مشت وخرجت من البيت وناظرها جاسر لين طلعت ودخل البيت

'

ناظرت عقاب واقف لوحده عند المسبح بوقت متأخر ولفت تناظر ثنيان اللي نايم ورجعت تناظر عقاب اللي واضح انه يهوجس وحده

ترددت وطالت أنظارها ومشت تخرج من الغرفه ونزلت تحت ومشت بهدوء لين خرجت له

تقدمت له والتفت من حسّ فيها وناظرها ووقفت تاركه مسافه طويله بينهم ولفت تناظر المسبح

وناظرها عقاب والمسافه اللي بينهم وعرف ان ملاك قاصده تتركها عشان تبين له وتوضح اختلاف وضعهم

اخذ نفس عقاب ولف للمسبح:سألت عن مساعد

لفت ملاك تناظره ولف عقاب عليها:أبوه خطبها له هو ما بغى

هزت راسها ملاك من صدقت ظنونها ولفت للمسبح بضيق

وكمل عقاب:ليه يوم جيته ما قالي مجبور ؟ ليه باع صحبتنا وسكت ؟

ملاك:عشان أمي

لفت ملاك على عقاب وكملت:ولا عمره قال قدام امي انه اخذها غصب

سكت عقاب وناظرته ملاك:‏نبني بيوت أحلامنا وأثرها ثلج ، ‏وإليا أشرقت شمس الضحى ذوبتها‏ ، حلمك وحلمه قدرت عليها شمس أكبر منكم وذوبتها

عقاب صد عن ملاك:كان ودي أكسبه لين اخر يوم بعمره بس ما فتح لي باب

نزلت راسها ملاك وبلعت ريقها وكمل عقاب:اقسم بالله ما احترقت من غضب احترقت من كُبر صحبتي معه

رفعت عيونها ملاك للسماء تخفي دموعها ولف عقاب عليها:وكل شي شفته في مساعد شفته فيك وفي منيف

لفت ملاك تناظر عقاب وكمل عقاب:وكأنه عاش فيكم ما رباكم ، ولا بيوم حطيت عيني بعيونكم وما شفته

ملاك:ولا عمري حطيت عيني بعينك وما شفته فيك انت

سكت عقاب وهو يناظرها ورفعت كتفها:الحين صرت أشوفك العميد عقاب ابو زوجي

عقاب:تدرين اني ما بغيت توصل لهنا

صدت ملاك وكمل عقاب:واحترقتي انتي بنارك قبل أقدر أطفيها

ماردت عليه ملاك وكمل عقاب:الشاهين المغرور

لفت عليه تناظره:تصبح على خير ياعميد عقاب

مشت تاركته محله ودخلت داخل وغمضت عيونها بضيق من طاري ابوها ومن تغير حالها مع عقاب

'

دخلت أصايل وابتسمت غلا:اهلين

أصايل تقدمت لها:مو لحالي

لفت أصايل ودخلت خلفها نوره وملاك وجنى وضحكت غلا:هلا والله

تقدمت نوره وسلمت عليها غلا:شلونك خالتي ؟

نوره:حمدلله جينا نشوف لأصايل فستان عرس

غلا:حياكم

تقدموا ودخلوا وجلسوا وجلست غلا وابتسمت لأصايل:تبين تشوفين شي جاهز ؟

نوره:لا لا وشو جاهز ارسمي لها بهاليدين الناعمه الحلوه فستان ما يشبه فستان احد ابد

غلا ناظرت أصايل:بتعبك

أصايل:مو مشكله اسأليني واجاوبك

وقفت ملاك:بشوف الفساتين المعروضه انا

غلا لفت لملاك:الرف هذا كله كولكشن جديد

ابتسمت ملاك ووقفت جنى:بجي معاك ملاك لحظه

تقدمت غلا وجلست جنب أصايل ونوره وفتحت اوراقها ومسكت المرسمه:تبين ماسك على جسمك والا لا ؟

أصايل:اي ما ابي بجيبون ابي شي يرسم جسمي ويكون فيه شغل

نوره:يبرق ويرعد غلا يا أمي مابي اسمع كلمة بسيط

ضحكت غلا وهي ترسم:أكمام ؟

أصايل:لا

غلا ناظرت أصايل:شلون القماش تجين معاي تشوفين داخل ؟

نوره:ادخلوا وتعالوا شاوروني بقعد هنا

غلا:بجيب لك قهوه خالتي

نوره:لا القهوه بتجيني بس روحوا انتوا خلصوا

مشت غلا مع أصايل ولفت نوره من دخل نهار :اي مرابط عند البوتيك انت

ضحك نهار وتقدم لها:والله كنت بالكوفي وشفت حمدان وجيت

نوره:فاتح كوفي قدام البوتيك عشان تسيّر عليها

نهار:ابي اصير قريب من الحلال

نوره:اثقل اثقل تعلم منها

لف نهار لملاك وجنى:لو سمحتوا

لفوا ملاك وجنى وابتسمت جنى:شجابك انت ؟

نهار:مع الاسف زوجتي تصمم للنساء فقط البطات مو هنا

ضحكت ملاك وصدت تناظر الفساتين

جنى؛نهار بطلع حرة كرشتي عليك ترا

نهار:لا يرحم اهلك طلعيها على ساري

نوره:اسمع انت

لف نهار وتقدم لها واشرت له يجلس وجلس

نوره:كيف قهوتك بالكوفي ؟

نهار ابتسم:ابد تنتظر ذواقتك

نوره:مشينا خل يتبارك المكان

ضحك نهار ومسك ذراع نوره وخرجوا للكوفي

ومشت ملاك:أصايل

تقدمت ودخلت مكتب غلا وناظرتهم:تبون مشوره ؟

غلا:تعالي

دخلت وتقدمت لهم ورفعت القماش غلا:تحسينه يناسب مع هذا التطريز ؟

ملاك ناظرته:حلو بس يبي له تطريز يدوي عشان لا ينعدم

غلا لفت بملاك:وتطريز يدوي يعني وقت اطول

لفت غلا لأصايل وتنهدت أصايل:مافي وقت غلا

حكت جبينها غلا ودخلت جنى عليهم

ملاك:غيري القماش

أصايل:عجبني بسيط وحلو

جنى:بتجي خالتي تغيره لذلك غيريه

غلا طلعت من درجها كاتلوج صور الفساتين وتقدموا يختارون

ملاك:هذا الموديل يطلع حلو على أصايل

غلا:اي عجبني بس نغير طرحته أصايل شرايك ؟

سكتت أصايل تناظر ونطقت جنى:طويله احلى

غلا هزت راسها ولفت أصايل:طيب وبيخلص بوقت قصير ؟ مافي وقت غلا

غلا:لا ماعليك استعجله لك بس اهم شي ترضين فيه

أصايل:عدلي لي من هنا سـ

سكتت من دخل نهار وخلفه نوره وابتسمت غلا

ملاك ناظرت القهوه اللي بيدينه:تعلن للكوفي مو زايرينه ابشرك

نهار تقدم لغلا ومد لها القهوه:اللي تحبينها

سكتوا يناظرونهم وابتسمت غلا واخذتها:بن كولومبي ؟

نهار ابتسم يناظر عيونها:يسوى راسك الكايد

شربت منها غلا وهي تناظره ونطقت نوره:اي وش غير الكولومبي ؟ لان احنا جايين نعرف انواع البن ما بنخلص الفساتين

ضحكت غلا ولف نهار:خلينا نترزق الله بكلمتين حلوين

أصايل:نهار جيت وعطلتنا اطلع بالله

نهار لف وناظرها:انتي من يوم سكنتي مع منيف تغيرتي علي

ضحكت أصايل ولفت جنى:نهار تحب تندمج مع سوالف البنات

نهار ابتسم:خبره

تلاشت ابتسامته من لف لغلا وناظرها رافعه حاجبها

نهار:يمدحون الكولومبي

ضحكت ملاك وصدت لصور الفساتين

نوره تكتفت تناظر غلا ونهار وابتسم نهار لغلا:اذا راحوا اتصلي علي

ابتسمت أصايل تناظر غلا ونهار وصدت غلا:راكان بيجي ياخذني تبيني ادق عليك ؟

نهار:لا اعوذ بالله وش يفكني منه

جنى:خلاص توكل نهار

نهار:هذا وانا مقفل البوتيك بنفسي عشان ما يجون زباين يسرقون افكار فساتينكم

ضحكوا ولفت ملاك تناظر غلا اللي تناظرهم وخرج نهار ونطقت بهدوء ملاك وعينها على الاقمشه:نهار نفس اخوي ونعده اخونا انا وجنى

لفت غلا على ملاك ورفعت عيونها نوره وكملت ملاك:لو ضايقك قربنا منه يعني

غلا:لا بالعكس واضحه علاقتكم

نوره:انا حريم عيالي بناتي واحنا عايله وحده وكلنا اخوان مع بعضنا واذا دخلتي بيتي بتشوفين ثنيان وساري وجاسر اخوانك

ابتسمت غلا:يكفي انتي خالتي

نوره ابتسمت:ابشري بهذاك الزواج ان شاء الله

ضحكت غلا وابتسمت أصايل:بتجيب لك اغلى مطربه

ضحكت جنى ولفت لنوره اللي خزت أصايل

ملاك:انتي غلا شسويتي بالتجهيزات ؟

غلا:سويت اللي اقدر اسويه بهذا الوقت بس للحين ما شفت لي فستان يناسبني

جنى:المصممه تبي شي سبيشال

ضحكت غلا:اكيد

خلصوا وخرجوا من عند غلا ومشت غلا واخذت شنطتها وطلعت ناظرت كوفي نهار قدامها

ومشت ودخلت وناظرت نهار اللي واقف ومتكي بذراعه ومبتسم للبنت اللي قدامه تتكلم

ورفعت حاجبها غلا وتقدمت لهم ولف نهار وجمد وجهه واعتدل بوقوفه ولف للبنت:ماعندنا وظايف والله

سكتت البنت باستغراب ولفت غلا عليها:تسولفين واجد مع ناس ما تعرفينهم ؟

عقدت حاجبينها البنت:عفواً !

لفت غلا لنهار:ليش مفتوح الكوفي لين الحين ؟

نهار:بنقفل بنقفل ياعمري الان يتقفل

لف وصفق بيده للبارسيتا:خلاص عزلنا

غلا لفت من خرجت البنت وتكتفت وابتسم نهار وناظر غلا:اضيفك ياغلاي شي تشربينه ؟

غلا:نهار !

نهار:اقسم بالله ما ناديتها ولا تكلمت معها هي جاتني

غلا:واي وحده تجيك تعطيها وجه ؟ تاكي بيدك هذي اللي بكسرها لك وتضحك لها ؟

نهار:غلا والله ماهي عاجبتني اصلاً

ناظرته غلا بحده ورفعت صوتها:المفروض تعجبك ؟

لف نهار للباريستا اللي تركوا المكان وطلعوا من الكوفي وخرجوا وتقدم وقفل الباب ورجع لغلا:تعالي اقعدي

غلا:ماني قاعده كلمت راكان والحين بيجي ياخذني

نهار مسك يدينها:والله ما تروحين وانتي زعلانه اجلسي

ناظرته بحده وجلست وجلس قدامها نهار:والله عيني ماهي زايغه بس مشكلتي حبوب

رفعت حاجبها غلا وتقدم لها نهار وابتسم:وبعدين دبلتي بيدي ، ضعت من كل البنات وكسبتني غلا

غلا:انت كسبتني مو انا كسبتك

نهار:ولا يهمك انتي مكسبي بس ارضي عاد ترا العين شافت كثير بس ماترسها غيرك

غلا:لعاب ما اعرف كيف وافقت عليك

نهار ابتسم لها من عصبيتها:طيب اول مره اشوف احد حلو ومعصب

ماردت غلا وهي تناظره بحده وعض شفته نهار:لا تطالعيني كذا تدوخيني

صدت بعيونها عنه وقام من كرسيه نهار وانحنى على كرسيها بيدينه ولف الكرسي عليه وناظرها

رفعت عيونها عليه واقف وتاكي بيدينه ويناظرها من قريب

ابتسم نهار:يعني تقولين راضني يانهار

سكتت تناظره وهمس نهار:بس لا تبعديني

عقدت حاجبينها بخفوت واقترب نهار منها يقبّلها ورجعت بظهرها على الكرسي من اقترب

ورفع كفوفه نهار من الكرسي يمسك وجهها ويقبّل ثغرها

كانت مرتخيه على الكرسي من اندفاعه وجرئته والوقت اللي قضاه يقبّلها وهم لوحدهم وابتعد عنها

وناظرته ويدينها بحضنها وابتسم من هدوئها ونظراتها وابتسم نهار:كل مالي أغرم فيك أكثر

اقترب يرجع يقبّلها ودق جواله وحاولت تبتعد بوجهها عنه لكنه يقبّلها ورفعت كفوفها لكفوفه وابتعد وتأفف:ياليل

وقف وطلع جواله ورد:نعم يابثر

بلعت ريقها غلا تناظر نهار ولف نهار عليها وابتسم:اختك مشغوله

راكان:جيت البوتيك مقفل والكوفي مقفل وينكم ؟

نهار تقدم وفك الستاره اللي على قدام الكوفي وناظر نهار اللي بسيارته:بالكوفي خلاص روح وانا اجيب غلا

راكان لف للكوفي وقفل الجوال ولف نهار لغلا بسرعه وتقدم لها:اخوك جاي

غلا ناظرت نهار ووقفت وتقدم لها نهار ومسك وجهها بيرجع يقبّلها ودفعته غلا:خلاص

ضحك نهار وعض شفته من دق الباب راكان ومشت غلا واخذت شنطتها وفتحت الباب ودخل راكان:شفيك ؟

غلا اخذت نفس:ولاشي كنت انتظرك

تقزم نهار وابتسم لراكان:حياك

راكان:لا جيت عشان غلا ، امشي غلا

مشت غلا لسيارة راكان ومشى راكان وقفل الكوفي نهار وتقدم لشباك غلا ودقه

وركب راكان وناظره وفتحت الشباك غلا وابتسم نهار لها:تصبحين على خير زوجتي غلاي

قفل الشباك راكان من عنده وضحك نهار وصدت غلا بربكه وحرك راكان

'

ابتسمت أصايل وهي تكلمه:عشان تشتاق لي

منيف ناظر كوتي ويامور اللي على سريره:وتقعدين عند اهلك اسبوع عشان اشتاق لك ؟

أصايل:وعشان انا مشتاقه لغرفتي بعد

منيف هز راسه:طيب يكفي اللي قضيتيه عندهم بكره بترجعين بحضني

عضت شفتها أصايل وهي ترسم على اللحاف بأصابعها:ولا كأن زواجي بكره

منيف ضحك:احنا بنلبس فستان وبشت وبس ، سوينا كل شي

غمضت عيونها أصايل من ضحكته وكمل منيف:مو بس انتتي تتغلين عليّ حتى كوتي

ضحكت أصايل:ماتبي يامور ؟

منيف:لا كل ما قرب منها هوشت له

أصايل:بتولد قريب شايله همها

منيف:شيلي حبي في قلبك بس لا تشيلين هم احد

ابتسمت أصايل وكمل منيف:كنا نبي يامور وكوتي يتصورون معنا بس الظاهر كوتي بتعصب علينا

أصايل:يكفي صور ملكتنا

منيف لف لكوتي:يامور ابعد عنها

لفت أصايل من دق باب غرفتها ودخل نهار وابتسمت:نهار عندي

نهار دخل وناظرها:تكلمين منيف ؟ خافي الله في اشواق العاشق

ضحكت أصايل وابتسم منيف:يطنز صح ؟

جلس نهار على السرير:قولي له يقفل المشفوح

أصايل:ما ارضى نهار

نهار:اي اي اللي لقى احبابه هاه ياست أصايل

ضحكت بعلو صوتها أصايل واخذ الجوال نهار:هاه يالطيب خربت اختي عليّ

منيف:ياثقل دمك يانهار وياشين صوتك شتبي جاي ؟

نهار:بنشب لك

منيف:خل نترزق الله بكلمتين حلوين

ضحك نهار:انا اقول كبر المخده وراك عرس بكره ياعريس

منيف:رجع الجوال لزوجتي

نهار:زوجتك عندك من شهور الحين ابي اقعد معها

ابتسمت أصايل وضحك نهار وقفل الجوال وناظرته أصايل:زعلته ؟

نهار:لا يالخفيفه قفل وهو يضحك

أصايل اخذت جوالها ونطق نهار:تعلمي الثقل شوي من غلا تنشفني لين تقول كلمه زينه

ضحكت أصايل:هذي نتيجة البلاير

نهار:والله انها تحبني واعجبها لكنها ثقيله عليّ

أصايل:فستاني طلعته شي خيالي ياحياتي تعبتها معاي

نهار:يازين نهار بس حتى زوجته نفعتكم

ضحكت أصايل:اثقل انت بس

نهار:لا ماعليك معها ثقيل ترا ما تعرفوني

دق جوال نهار وناظرت الاسم أصايل ' غلاي ' وقلوب

وضحكت تتطنز عليه:غلاي

نهار دفعها ورد وابتسم:هلا ابوي هلا ياراحة المنهك هلا بزوجتي وحبيبتي

رفعت حاجبينها أصايل ووقف نهار وخرج من عند أصايل

'

جالسه بحضنه وتلعب بأصابع يده وهاديه

ناظرها ثنيان:سهرتينا للصبح ترضين احضر العرس دايخ ؟

ابتسمت ملاك:انت سهرتنا لا تكذب عليّ

ضحك ثنيان وباس خدها وابتعد:لاحقين على النوم سواليفك احلى

ملاك ناظرت ثنيان:نبي نسوي بعد الزواج حفله بالشاليه

ثنيان:لمن ؟

ملاك ابتسمت:موج

ابتسم بسعة ثغره ثنيان:بتعرفين اذا بنت والا ولد ؟

هزت راسها ملاك وكمل ثنيان:يارب بنت حلوه يارب

ضحكت ملاك:بس مين ناخذ معانا بالموعد عشان يعرف جنس البيبي ؟

ثنيان:اختاري اي احد الا نهار ترا نذل عادي ما يعلمنا

ضحكت ملاك:ودي اقول لمنيف بس ابي اشوف ردة فعله معانا

ثنيان:ساري عاقل وكبير

ملاك:تمام كلمه

لفت ملاك لجوالها اللي يدق وقامت من حضن ثنيان واخذته ترد:هلا خالتي

نوره:باقي ما قمتي ؟ يالله بنمشي ونتجهز

ملاك:صاحيه دقايق وانزل لكم

نوره:اي يالله

قفلت ملاك واخذت نفس:ثنيان حبيبي نزل لي الفستان بالسياره بلبس عبايتي

ابتسم ثنيان ووقف:يشيله حبيبك ولا يهمك

ضحكت ملاك ومشت تاخذ عبايتها وشال الفستان ثنيان ونطق من ثقله بـ:اهخ

ابتسمت ملاك ونزل ثنيان وهو شايل الفستان وناظر اهله يفطرون:سلام عليكم

ناظر أصايل وابتسم:عروستنا

ضحكت أصايل:العروسه مو مرتبكه ابد

نوره:اي ياحياتي تاكيه مع منيف من شهور

ضحك ثنيان وجلس وناظر ابوه:متى نروح ابوي ؟

عقاب:ما بنستعجل

نوره:وينها جنى ياساري

ساري:بتجي بتجي

نهار:بطه يبي لها تنزل الدرج بعشر ايام

ضحكت أصايل ونزلت ملاك وناظرتهم:بفطر هناك خالتي بس بلحق موعدي مع الميك اب ارتست

لف ثنيان وهو جالس:لا تروحين بدون فطور

حطت كفها على كتفه تطمنه:باخذ معاي ثنيان

نوره قامت:اجل خل نطلع

وقفت أصايل اللي على جوالها مبتسمه ومشت معهم

نزلت جنى ومشت خلفهم بهدوء وضحك نهار من شكلها ولف ساري وضحك يشوفها تمشي بخفوت

عقاب:متى ولادتها ؟

ساري:قريب تدخل الثامن ان شاء الله

عقاب لف لنهار:شوف جاسر وينه وخل نطلع نخلص امورنا

هز رسه نهار:بس انا بشوف منيف ابوي

ثنيان:انا بجي معك

عقاب:كلنا بنشوفه اطلع لجاسر ناده ونروح سوا

نهار وقف:ابشر

'

نزلت نوره تشوف تجهيزات المكان ورفعت عيونها من اشتغل النجف بالسقف والاضاءه لونت المكان

وهزت راسها للعمال اللي ينثرون فازات الورد على الطاولات ورجعت تدخل لأصايل اللي تشرب قهوه وتناظر شعرها

والمصوره تصورها وابتسمت نوره:أمي ونور عيوني

لفت المصوره:لا تبعدين عشان تتصورين معاها وتلبسينها الطرحه

نوره:بلبس فستاني واجيكم

لفت لأصايل:شوفي منيف اذا جهز عشان يمديكم تتصورون قبل الحضور

أصايل:كلمته جاهز بيجي مع ابوي واخواني سوا ونتصور

نوره:اي زين

تركتها نوره ودخلت لملاك اللي جهزت وتلبس كعبها وابتسمت:تبارك الله ملاك اي والله ملاك

وقفت ملاك ومسكت بطنها:بس الكروشه عندها راي ثاني

نوره:والله قمر اسم الله عليك تحصني امي تحصني

ملاك ابتسمت لها:الله لا يحرمني وجودك ياخالتي

نوره:بروح البس مابقي شي

هزت راسها ملاك وخرجت من عندها وتقدمت ملاك للبخور وحطت العود ووقفت تتبخر وتناظر فستانها ولونه المندمج بين - الاورنج والفوشي - مع لون التان وصبغة شعرها ومكياجها

انحنت تاخذ عطورها واخذت طيب من العود والمسك على نبض عروقها وبخت لها من عطور الباتشولي والعنبر والاخشاب والجلود اللي عطتها رونق الفخامه

اخذت جوالها ووقفت قدام المرايه وتصورت تبين جمال جسمها وساقها المكشوف من فتحة الفستان الطويل

ابتسمت تخرج من غرفتها وهي تسمع صوت الزفه وناظرت أصايل اللي خرجت تبي تنزف تصوير قبل الحضور

خرجت ملاك تشوف أصايل اللي تنزف ومنيف واقف معطيها ظهره

ابتسمت تصورهم مع التصوير المكثف في القصر من كاميرا الدرون وفلاشات التصوير من المصورات

ابتسمت أصايل تمشي لمنيف وتحس بنبضه وشعوره وتقدمت لين وقفت خلفه

ورفعت كفها لكتفه وابتسم منيف والتفت عليها وضحك وضحكت تناظره

ورفع كفوفه على فمه يناظرها بضحكه وضحكت أصايل

وتقدم يحضنها ورفعت مسكة الورد تحضنه

غمض عيونه وهو مبتسم وسعيد رغم انها كانت معه وببيته بس مشهدها بالبياض سرّ خاطره واستبشرت عيونه ، كانت مثل ما كان يحلم بها واجمل

حلم ووصل له ، مطلب وانكتب له ، نصيب وتحقق

ابتعد عنها ومسك يدينها وابتسمت تناظره أصايل

منيف:ياكبر حظ ولد مساعد ياكبر حظي اي والله

ضحكت أصايل من فرط سعادتها ومشت معه للكوشه ويدها بيده وتصوروا سوا وتقدمت ملاك لهم وفتح ذراعينه منيف وحضنته ملاك:اخوي واهلي كلهم

ابتسم منيف براحه من حضنته وللحظه تذكر كل وقت كان قاسي على ملاك وعليه

وشد عليها وامتلت عيون ملاك بالدموع من مشاعرها تجاه منيف ريحة اهلها وصاحب طريقها

ابتعدت عن منيف ولمست خدينه بيدينها:بدونك انا حياتي ما تفيد

منيف:انتي اهلي كلهم

ابتسمت ملاك ورفعت اصابعها لعيونها تخفي دموعها ولفت للمصوره ونطقت أصايل:ملاك خلي ثنيان يجي يتصور معانا

ملاك ناظرت جوالها:ما اعرف اذا فاضي او لا

منيف:فاضي ناديه

مشت ملاك وهي تتصل عليه وطلعت للغرف ورد ثنيان:آمري على قلبي

ابتسمت ملاك:تجيني ؟

ثنيان ابتعد عن اهله:اجيك

ملاك:نتصور معهم ؟

ابتسم ثنيان:ابشري جاي

ملاك:انتظرك

لف ثنيان لاهله ونطق:بدخل اشوف أصايل قبل يجون الضيوف وجاي

عقاب:لا تبطي

مشى ثنيان يعدل بشته وخرج يمشي بالاتجاه الآخر من القصر وركب سيارته وحرك للجهه الثانيه من القصر ووقف عند مدخل اهل العروس ونزل

دخل الجناح وابتسم من شاف ملاك بإنتظاره وابتسمت ملاك ومسك قلبه بكفوفه ثنيان يناظرها وضحكت ملاك وتقدم لها ثنيان:أم موج ! والله بيطفح قلبي حبك

ملاك ابتسمت من وقف قدامها بغترته وبشته وابتسم ثنيان:اقسم برب التين والزيتون والماء والموج والعباد إني نلت بدنياي شي محد ينوله

ملاك ابتسمت:تبي تتغزل فيني وارد عليك ؟

ثنيان:لا يكفي تناظريني

ملاك:والله انا كنت شخص في لهيب القيض مرمي واليوم انا في نعيم الموج وأعماقه

ثنيان مسك كفها:أعماقي وأعماقك فيها موج

ابتسمت لانه يقصد حملها بموج ومسك بطنها والتفتت تمشي بجانبه ورفع ذراعه ومسكتها تخرج معه

ابتسم من شاف أصايل ومنيف يتصورون ولفت أصايل عليهم من وجودهم بجانب بعض وتقدم ثنيان لها وحضنته أصايل

ثنيان:خاله وعمه لموج

ضحكت أصايل وابتعد عنها ثنيان ولف لمنيف وحضنه:مبروك الله يوفقكم

منيف ابتسم وابتعد عن ثنيان وناظره بإمتنان:مشكور ثنيان

ثنيان ابتسم من نظرات منيف ووقف بجانبه ورفع ذراعه لملاك ووقفوا ورفعت الكاميرا تصورهم المصوره

'

واقفه تصفق وطربانه وتناظر نوره اللي ترقص مع الفنانه داليا والمطربه خديجه معاذ

ابتسمت ملاك وهي تصفق ولفت عليها جنى:بطوننا حديث العرس اليوم

ضحكت ملاك:قولي انتي انتبهوا بملكة نهار انا هالمره واضحه

ضحكت جنى ومشت نوره ترقص وتمايلت ملاك وهي تناظرها

وطلعت غلا ترقص مع نوره وابتسمت نوره بفرحه بغلا رابع بناتها

ومشت تجلس ملاك بتعب وبعد وقت طويل من الطرب والاغاني ورقص الحضور

تحجبت بالطرحه عشان دخول الرجال وجلست جنبها غلا ووقفت نوره تتسقبلهم بحجابها

وانتشر ريح العود والبخور بالمكان ودخلوا فرقه رجاليه يزفون منيف وبجانبه عقاب وخلفه أخوان منيف و أخوان أصايل

ابتسم منيف يناظر نوره ومشوا بالممر لين وصلوا للكوشه وتوسطوها

وخرجوا الفرقه وتغنت لهم اغنيه حماسيه رقصت عليها نوره وابتسم نهار يعزز لامه

ورفع ذراعينه يرقص لها ومشت تسلم على منيف وحضنها منيف وابتسمت نوره:مبروك أمي منيف مبروك ياحبيبي

منيف:الله يبارك فيك

ابتعدت عنه ووقفت بعيد تنتظر زفة أصايل

وابتدت زفة أصايل بصوت عبدالمجيد عبدالله بأغنيه خاصه لها وزفه لاجلها ولفوا الحضور من طلت من الباب وابتسمت تناظر أهلها

وابتسم منيف يناظر خطواتها الهاديه اللي باتجاهه

وقفت عند اول عتبه من الكوشه وتقدم عقاب لها ورفعت عيونها من شافت عقاب ومسكت كفه بقوه وحضنته وتجمعت بمحاجر عيونها دموعها

بلع ريقه عقاب ومسح على ظهرها يصد بعيونه ولف لمنيف اللي تقدم لهم ومسك كفه وناظره:لو يوم نزع ربي من صدرك حبها لا تعورها ردها لحضني

رفعت سبابتها أصايل تمسح دموعها وابتسم منيف:أصايل بصدري لين اموت

مشى عقاب يرجع ومسح وجهه بغترته وتقدم منيف لأصايل وباس جبينها ومسك كفها وطلعت معه

ومشت لاخوانها ورفعت ذراعها تحضن نهار وابتعدت تحضن ثنيان اللي بجانبه وابتسم ثنيان:انا الكسبان الليله حضنتك مرتين

ضحكت أصايل وحضنت جاسر وسلم على راسها جاسر وابتسمت له:عقبالك

ضحك جاسر ومشت لساري وحضنته ووقفت بجانبهم واشتغلت اضواء المكان وبدأت الاغاني الطربيه تشتغل

وصفق نهار يعزز لهم وابتسمت أصايل ترقص وهي ماسكه كف منيف وضحك منيف من راحتها وعدم خجلها

وتقدم نهار يرقص معها وضحك ثنيان ورفع ذراعه يرقص معهم وصفق جاسر

وطلعت نوره ترقص معهم ورفعت جوالها ملاك تصور وابتسمت غلا تناظرهم

لفت جنى على ملاك:بتطلعين ؟

ملاك رفعت صوتها:ما اقدر فستاني مو ساتر

وقفت جنى بحجابها وعبايتها وطلعت وابتسمت أصايل وسلمت عليها ولف نهار من انتبه لاول كنبة جلوس جالسين عليها ملاك وغلا

ورفع كفه لغلا وضحكت ولفت ملاك عليها وضحكت

لأول مره ياخذون راحتهم بمكان عام وسط حضور ويرقصون بفرحه وراحه وكأنهم بين بعضهم فقط

لف منيف يرقص مع نهار ورفع جواله نهار يصور

وابتسمت ملاك من انتبه ثنيان لجلوسها وابتسم لها

'

ضحكت وهي ماسكه كفه وهو يسوق ووقف عند البيت ونزل من السياره واخذ الاكل من الخلف ومشى لها ونزلت بفستانها وشال ذيله بيده:حياك ياعروسه لا تضيعين الدرب الصاله يمين

ضحكت أصايل ودخلت البيت ومنيف خلفها شايل يشته على ذراعه والاكل وشايل بكفه ذيل فستانها

منيف:تمنيت هالليله وهالطله بس جات احلى وانتي مو مستحيه مني

ضحكت أصايل:طيب دام فيك سواليف جهز الجلسه بالصاله وانا بغير واجيك

منيف:من يفتح لك فستانك؟

مشت أصايل:يامور لا تجي انت

ضحك منيف ومشى وفصخ غترته وجلس بالصاله وفتح التلفزيون وفتح كيس الاكل ودقايق طلعت لابسه بجامه حرير وابتسم:شكل يامور صدق ساعدك

ضحكت وجلست بجانبه:فتحته انا

اخذت الاكل وابتسمت ولفت عليه:خفت تسبقني وتاكل

ابتسم منيف وهو يناظرها:ما يحلو الاكل الا معاك

لفت تاكل وهي تناظر التلفزيون وابتسم بهدوء منيف وهو يناظرها تاكل براحه بجانبه ببيته

ولف للاكل وهو مبتسم يفكر في حاله وفي اليوم اللي يعيشه وكان مستحيل ، يتذكر أول مره شافها مع نهار بالنادي وأول مره شافها بجهازه وعرف كل أحلى أيامها واسوأها

لفت أصايل تناظره يناظر الاكل وياكل وهو مبتسم:بوشو تفكر ؟

لف لها منيف وضحك:فيك

أصايل:تفكر فيني وانا جنبك ؟

منيف:واحلم فيك وانتي معاي

ابتسمت له أصايل ولفت عليه بجسمها وناظرته:ما اتخيل نصيبي مع احد غيرك ، حمدلله انك نصيبي واختياري الصحيح وحمدلله انك ما تركتني للغريب

ابتسم منيف ورجع ظهره للخلف:‏كيف افرّط فيك وانتي رزق من الله جاني ، وانا مفلس طاحت على يديني الثنتين ذهبه

أصايل رفعت كفها لشعره وهي تناظر عيونه:كنت خايفه اتزوج واصير بعيده عن اهلي بس صرت اقرب لاهلي وانا معاك

منيف:اهلك صاروا اهلي

ابتسمت أصايل وتقدم لها منيف وميّل راسه يقبّل ثغرها ورفعت كفوفها لوجهه وحاول ظهرها بذراعينه يرخي جسدها على الكنبه وابتعد عنها وابتسم وابتسمت تناظره بربكه من فتح ازارير ثوبه ورجع يقبّلها

-

رفع ذراعينه عشان ينتبهون له:ياجماعة الخير عطوا الاب الجديد فرصه

لفوا عليه وابتسم ثنيان:طبعاً بهذا المكان الجميل وعند موج البحر حاب اقول بالصريح يارب بنت

ضحكت ملاك اللي واقفه جنبه وخلفهم البوالين

نهار:انا اصوت لبنت بعد

جاسر:ترا ماتجي بالتصويت ياحبيبي

ضحكت غلا ولف نهار:على الاقل حشمني دام زوجتي زايرتنا اليوم

نوره:انا بعد ابي بنت

أصايل رفعت البالونه الورديه اللي بيدها:جيش البنات

منيف:وانا ابي بنت

جنى:عشان جاينا ولد نبي ننوع وتجينا بنت

ساري:بس هي مو اكله ننوع فيها ؟

ضحك نهار:العب اخوي الكبير صاير دمك خفيف

ضحك ثنيان وناظر ابوه اللي مبتسم:وانت ابوي وش ودك ؟

رفعت عيونها ملاك على عقاب اللي ناظرها ورجع ناظر ثنيان:اللي يجي من الله خير

ساري:انا عندي علم وانا اللي معبي لون البوالين

جاسر:ارشيك وتعلمني ؟

ثنيان:ياحبيبي انا مختار ساري لان ادري لو تموت عنده ما يقول

أصايل:طيب قولوا يالله تحمست

ابتسمت ملاك وهي ماسكه البالونه ولفت لثنيان اللي متشوق:يارب بنت

لف ساري لنهار وجاسر وغمز لهم ولفوا لثنيان

وعدوا لين ثلاثه وفقع البالون ثنيان وناظره فاضي وعقد حاجبينه ولفت ملاك من وقفوا ساري وجاسر ونهار وبيد كل واحد منهم مفرقعات وضحك ثنيان:ساري !

جاسر:والله طلع يجي بالرشوه ، هاه ابو موج ؟ نفقعها ؟

ضحك منيف اللي يصور ورفع صوته عقاب يعدّ

وفرقعوها وصرخوا كلهم من تلون المكان بالوردي لون الزهر

وضحكت ملاك تغطي فمها بصدمه وجلس على الارض ثنيان يصرخ ولف نهار يرفع ذراعينه ويصرخ

وضحكت نوره تناظر حال عيالها وفرحتهم وابتسم عقاب ووقف منيف وحضنته ملاك

ابتسمت أصايل ووقفت تغني مع الاغنيه اللي شغلتها:البنات البنات الطف الكائنات

رقص نهار يغني مع أصايل ومسك ظهر أصايل يسوي قطار:قولوا يابختنا يابختنا يابختنا ، اد ايه كلنا فرحانين اننا اتولدنا بنات

ضحكت نوره تصفق من صفوا خلف نهار يسوون قطار ويغنون

ضحكت ملاك تصورهم ورقصوا وهم يسوون قطار مع حمد وسارا

ولف ثنيان لملاك ووجهه سعيد وعيونه تلمع من سعادته وحضنها وضحكت ملاك بفرحه

وصفقت نوره تغني للعيال اللي يرقصون:البنت زي الولد ماهيش كمالة عدد

مسك راسه ساري وحضنت أصايل نوره ترقص معاها:البنات البنات ألطف الكائنات

ضحك عقاب يوقف يحضن أصايل ولف نهار لغلا:جحدوا اربع شيبان عليهم شوارب

غلا:البنات غيييير

ضحكت جنى وهزت راسها:اسأليني انا غير غير

ابتسمت ملاك اللي حاطه ذراعها خلف ظهر ثنيان وتناظرهم

وزعوا الاكل بالجلسه قدام البحر وهم يسولفون مع بعضهم ويضحكون

نوره:دامنا كل مالنا في ازدياد ببشركم لقيت وحده لجاسر

صد جاسر لسارا:اي يابابا وش تقولين

ضحك نهار وناظرته نوره بحده:والله لنصمل هالمره ونخطب لك

عقاب:من هي بنته ؟

نوره:بنت صديقتي ام جابر عندها بنت شفتها بزواج منيف وأصايل ، قلت سبحان الله هذي البنت ما تلوق الا على ولدي جاسر حبيبي ونور العين

جاسر:شسمها ؟

ابتسمت نوره:شهد ، حتى اسمها حلو مثلها

نهار:العب الاسم البطل

ضحك منيف ولف نهار من تذكر غلا ولف عليها وتلاشت ابتسامته وسكت

عقاب:كلميهم ونروح نشوفهم

جاسر:من الحين اقول اذا ما عجبتني ما باخذها عشانها بنت صديقتك

نوره:ورجلك فوق رقبتك تاخذها

جاسر:سمّي

ضحكوا وابتسمت نوره تشرب من قهوتها

غلا:طيب انا استأذن تأخرت على اهلي

نوره:وين توّ الناس اقعدي نسهر شوي ونشرب شاهي مع مكسرات

ابتسمت غلا:ماتقصرين شربت شاهي وانبسطت ومبروك ملاك وثنيان

ابتسمت ملاك:الله يبارك فيك

لفت لنهار وابتسم نهار لها وهزت راسها ووقف من استوعب:اي انا اوصلك اجل مشينا

وقفت غلا ونطق عقاب:وصلي سلامي لابوك

غلا ابتسمت:يوصل

مشت مع نهار وركبت السياره وحرك نهار والتفت عليها:شرايك في اهلي بالله ؟

غلا لفت عليه:انا شفت واحد ما وقف رقص طول القعده ويضحك ضحكه صوتها يسمعه كل اهل الخبر

عض شفته نهار يناطر الطريق ورفعت حاجبها غلا وابتسمت:انا عاقل وثقيل واهلي ياخذون برايي وشخص مسؤول

ضحكت وهمست:امك تفتح لك الفستق عشان تاكله مع الشاهي يادلوع الماما

ضحك نهار وناظرها:الصراحه دلوع امي ما ترضى علي

غلا ضحكت:نصاب

ضحك نهار ولف للطريق:ياليتك تتركين هالثقل بس وتريحين نهار مسكين

غلا ماردت عليه وهي مبتسمه ومسك كفها نهار وقرب منها:طيب بوسه وحده

ضحكت تبتعد عنه:الطريق يانهار

نهار ضحك وهو ماسك الدركسون:والله بسرعه بوسه وحده

صدت عنه تضحك وضحك نهار يرجع وناظر الطريق وشغل اغاني يغني معها ويناظرها ومبتسم

'

حاط كفه على بطنها ورفع عيونه بسرعه:تحركت

ضحكت ملاك:هذي تاسع مره تمسكه اليوم وتنصدم نفس الصدمه

ثنيان:تدري اني ابوها تصدقين ؟

هزت راسها ملاك تضحك من ثنيان ولف ثنيان يكمل يقطع لها البطيخ ومدّه لها تاكل قطعه ولف لامه:امي تبين ؟

نوره:لا مابي ادق على ساري ما يرد مدري وينه من صبح الله

عقاب:يمكن عند زوجته ماهي عند اهلها من شهر تبي تولد عندهم ؟

نوره:اي طيب تولد عند اهلها بس ساري وينه يختفي عني ؟

جاسر:يمكن ولدت

ناظرته نوره بصدمه:وما يعلمني ؟ ياويله مني

عقاب ناظر جاسر:انت وش سويت بتحاليل الزواج ؟

جاسر:حللت الصبح بيرسلون النتايج اذا طلعت

نوره ابتسمت:رحت مع جاسر ياملاك وقابلت شهد وه ياقلبي اللي ارتاح لها اسم الله عليها

ابتسمت ملاك اللي تاكل بطيخ:شفتها بالخطبه

كملت نوره:ذربه ذربه والله يا اني توفقت في حريم عيالي

عقاب:انا قلت محد بيقبل في نهار ويعقله بس التايقر هجدته

نوره ضحكت:من بعد الزواج قال يبي يروح تركيا يحضر دوري ابطال اوروبا بس ارسل لي قال تبي تايلند غلا واحنا رايحين

ضحك عقاب:بياخذها مباراه بشهر العسل الغبي هذا ؟

رفعت عيونها نوره من دخلت أصايل وخلفها منيف:سلام عليكم

عقاب:وعليكم السلام

دخل منيف وناظر ملاك اللي تاكل بطيخ وجلس جنبها:عطني انا بعد

ثنيان:تتوحم على بطيخ انت بعد ؟

ضحكت ملاك:حرام عليك ثنيان عطه ترا هو خالها بعد

منيف:اتوحم مع ملاك ما يخصك هات قطعه

ضحك ثنيان يقطع له ولفت أصايل:غريبه جالسين مارحتوا المستشفى

لفت نوره عليها:نروح ليه ؟

أصايل:جنى من امس بالليل بالمستشفى بتولد

بققت عيونها نوره:اسألك بالله ؟

ضحك جاسر:قايل والله

عقاب طلع جواله:ليه ما قال طيب ؟

أصايل:ما اعرف كلمني الصبح وقال دخلت تولد الحين

ملاك عقدت حاجبينها:من امس بالليل والحين دخلت تولد ؟

أصايل:والله يقول ساري

منيف:لا تخافين ما بتولدين زيها

ملاك ابتسمت:ولادتي قيصيريه هونوها عليّ

نوره:شوفوا الكلب ساري ما يبي يخرعني وما علمني وهو من امس لوحده

عقاب:الو ساري

سكتوا يناظرون عقاب اللي ابتسم:مابغيت تعلمني الا الحين ؟

منيف اكل من البطيخ:ولدت

هز راسه عقاب:يالله حمدلله على السلامه ومبروك

لفت نوره بسرعه وعطت جوالها أصايل:نزلي الفيديو بحالة الواتس اب وبسناب وانا بلبس عبايتي

ضحكت أصايل من ركضت نوره تدخل ولفت عليهم:بتنزل بشاره وهي ما شافتهم

لف جاسر على سارا اللي نطقت:بابا جانا البيبي ؟

جاسر:اي يابعدي جانا بس ماهو لنا لساري وانا ابوك

ضحك منيف:الحين تجيك بنت تشبه القمر تصير صديقتك ان شاء الله هذا اتركيه لحمد

ملاك لفت لثنيان:نروح احنا بعد ؟

ثنيان ناظر ابوه:مدري عن ابوي

عقاب هز راسه:نروح مع انه بنلاقي اهلها كلهم بس ما بنبطي وعشان ساري قدام حمولته

أصايل ناظرت منيف:نخرج قبلهم عشان نمر ناخذ لنا ورد ؟

منيف هز راسه ولف لملاك:تبون شي ؟

ثنيان:لا شارين هديتهم من مبطي

ضحك منيف:اجل بنطلع

مشت أصايل تخرج ووقف عقاب يدخل يلبس ووقفت ملاك ومشت تدخل الغرفه ودخل خلفها ثنيان وطلع ثوبه

وتأففت ملاك:عباياتي صارت ضيقه ومابي اشتري غيرهم وبالنهايه تنرمي بعد كم شهر

ثنيان:لا انتي من تالي معد تبين تلبسين شي

ضحكت ملاك ومسكت بطنها:ثنيان زدت مدري كم كيلو هذا وانا بالسادس

ثنيان:اي وباقي ثلاث شهور بتزيدين اكثر اشتري غيرهم

لفت ملاك للدولاب ولف ثنيان وهو يلبس ثوبه:تدرين ملاك

لفت عليه وابتسم:حاس بشعور ساري احس بولادتك ما بتنقفل عيني من اللهفه

ابتسمت ملاك:من حظك الحلو تعرف موعد العمليه والا كان سويت فيك مقالب

ثنيان:ياويلك تسوينها

ضحكت ولفت تلبس عبايتها واخذ الهديه ثنيان وخرج

'

وسط الاستقبال الكبير بالمستشفى وسط الورد ولوحات تشيل اسم عقاب

ابتسم عقاب من شاله:ماشاء الله تبارك الله الله يحفظه

ابتسم ساري:بحياتك يا ابوي

حط الظرف بسرير الطفل وتقدم ساري ورفع كفه عقاب:ماهي لك هذي للسمي

ساري:ماله داعي يا ابوي الله يكثر خيرك

جاسر؛خذها واذا ماتبيها ولدك يبيها

ضحك ساري ولفت نوره وابتسمت:وانا بقضي عمري كله اعيشه عشان اهدي ولد ساري حبيبي

ابتسم ساري:الله بكثر خيركم كلكم

ابتسموا اخوانه ولفت أصايل:صح نهار كلمني وقال ابارك لك واذا رجع من شهر العسل بتجيك هديته

ضحك جاسر ولف لثنيان:صور في ملعب اسطنبول تدري ؟ حاضر المباراه

لفت نوره بذهول :اخذ غلا المباراه ؟

ضحكت أصايل:اي مصورين مع بعض ولابسين تيشيرتات رياضيه انا من يوم شفتهم يرقصون سوا بزواجهم عرفت ان غلا تكابر بالثقل

ضحك عقاب:شوفوا بالله من يقدر عليه نهار هذا انا ظنيت التاقر بتعقله بس جننها معه

ضحكت جنى ولف عقاب:مانبي نتعبك بنروح الحين وعشان اهلك يجونك وترتاحين

جنى:مو اغراب انتوا ياعمي

حط عقاب الصغير بسريره ووقف:الله يخليه لكم ويربى في حنان وخير اهله

ابتسم ساري:اللهم امين

وقفت ملاك وابتسمت لجنى ومشت تخرج مع ثنيان

وخرجوا من عندها سوا وركبت أصايل مع منيف ولفت عليه:احس بتجيني عدوى من الحوامل

ضحك منيف:اول من يعديك كوتي اللي جابت سبعه

ضحكت أصايل:منيف كثيرين وعجزت احفظهم كل يوم اسميهم والخبط ولا ودي اوديهم بعيد عن كوتي

منيف:قلت لك نوديهم ونخلي واحد

أصايل:لا منيف حرام اولادها تحبهم

منيف:انا اعرف واحد منهم يشبه يامور

ضحكت أصايل:ماتشا

ضحك منيف:لا تضحكين والله سميته ماتشا يمشي ويشرب في الماتشا من كاساتنا ، ذاك اليوم لقيته ناثر علبة بودرة الماتشا

ابتسمت أصايل تناظر طريقهم ووقف منيف بجانب سيارات العيال ونزلوا سوا

مشت نوره واستراحت بالحوش ولفت تناظر ثنيان اللي بيدخل البيت:ثنيان

لف عليها:هلا

نوره:تعال اقعد معي

دخلوا ومشى ثنيان وجلس بجانب نوره وابتسمت نوره:سولف لي ابو موج

ابتسم ثنيان:والله متلهف على موج بس

نوره:بالله تذكر ثنيان اول ما تزوجت ملاك وقفت عندك وقلت لك انها بتكون لك فجر بعد ليل تسهره وشمس تدفيك بعد براد يتعبك وبتكون ستيرة جروحك ملاك اللي بتخلي حياتك جنه ، وقلت لي تبالغين

ضحك ثنيان بخفوت وصد يذكر حياته قبل مع ملاك وبدايتهم الصعبه

ابتسمت نوره:حامل ببنتك الحين ، احساس الام ما يخيب اشم ريحة الحب قبل نيته حتى

لف ثنيان عليها وابتسم:الله يطول بعمرك وتشوفين عيالنا كلنا

نوره:اي بس نبي يكثرون البنات

ضحك ثنيان:الحين الدور عند منيف واصايل

نوره ابتسمت:ياحبيبي يامنيف اقسم بالله هالولد احسه طلع من رحمي من حبي له ، ويداريني ويحبني وعيونه تلمع ان شافني

ثنيان هز راسه:منيف طيب وعانى كثير وحده

نوره:كله من عمهم الله لا يبارك فيه مدري وين هجوا هالفتره

سكت ثنيان من تذكر منصور ولفوا من تقدمت أصايل:ليش قاعدين هنا ؟

نوره:نسولف ، وين منيف

أصايل:داخل مع ابوي

وقف ثنيان ودخل البيت وطلع الغرفه ودخل وناظر ملاك اللي على جوالها ورفعت عيونها من شافته وقفلت الجوال بهدوء:ثنيان شفت طلبية سرير موج متى بيوصل ؟

ثنيان طلع جواله:الحين اشوف

جلس قدامها وناظرته بهدوء ملاك ولفت تاخذ جوالها تقرأ رسالة شادن:بشوفك

قفلت الجوال وهي ساهيه وحطت يدها على بطنها:ثنيان

لف عليها بإنتباه وسكت ينتظرها تتكلم

وناظرته كيف يناظرها منتبه لها:تجي معاي ؟

ثنيان:وين ماتبين انا معك

جلست واخذت نفس وناظرته:بروح عند عمي

سكت ثنيان وكملت ملاك:بابهم بحياتي باقي ما انقفل ابي اقفله خلاص ، كلي شي هدرته لهم ماعليه حسوف مابي يقدروني ابد ابي افصل حياتي عنهم

ثنيان:تقفلينه بهدوء زي ماعرفتك ؟

ابتسمت ملاك:بدون مشاكل

ابتسم ثنيان وهز راسه لها ووقفت ملاك واخذ نفس براحه ثنيان لانها علمته وبلغته وشاركته

'

طفى سيقارته واخذ بكت دخانه وناظرته وفاء:منصور خلاص اتركه حشرتنا وحشرت نفسك

مارد عليها وولع سيقارته وتأفف محمد بضيق ولفت شادن من دق الباب ووقفت وتلثمت

مشت وفتحت الباب شادن وعقدت حاجبينها من شافت ثنيان وملاك ونطقت ملاك:ابعدي ثنيان بيدخل معاي

بعدت شادن ودخلت ملاك ودخل خلفها ثنيان ورفع عيونه منصور من دخلوا وقامت وفاء تدخل وتجيب لها شي يسترها

ناظرتهم ملاك ووقف ثنيان يناظرهم ونطقت ملاك:جيت لان ما انقفل هالباب ولا ودي يجيني منه شي بوقت ثاني

محمد:ليه جيتي ؟

ملاك:لان بنتك ما كفاها تجي للبيت ويطردها طليقها كل ما لقت مجال ارسلت لي

ناظرتها شادن ولفت ملاك على شادن:هاه شادن عسى خير حنيتي لبنت عمك ؟ والا شفتيني استقريت قلتي انكد عليها

شادن:ترا عقاب هو اللي سوا كل هذا

ملاك عقدت حاجبينها بحده:يالله عاد اقول عقاب ذا ابو زوجي ومن عايلتي وبيصير جد لعيالي

لف ثنيان على ملاك وتقدمت شادن:لعب فينا كلنا ملاك

ملاك:اي وسامحته لانه اعتذر بس انا ما شفت منكم اي اعتذار الا تزيدون مشاكل ومتى ما ودكم قلتوا بنت عمنا ومتى ما ودكم تكلمتوا فيني

منصور وقف وناظرها:ملاك

ملاك لفت عليه:انكتم منصور انكتم ، خلاص اتركني بحالي انتهينا وطريقك مسدود

منصور ناظر ثنيان اللي ساكت:جاي تتفرج ؟

ثنيان:على الاقل اسكت دامني حاشمك وساكت

منصور:ساكت لان زوجتك تمشيك وراها

ملاك تقدمت لمنصور ورفعت صوتها:خلاص ياخي لين متى ؟

ثنيان تقدم:خليه هو وده يرجع يخيس من جديد ، بغيت تذبح ابوي اللي طلعك؟ ياعديم الخير ؟

منصور رفع صوته:واقتلك انت بعد

ملاك ناظرته بحده:احبسك بسبب هاللي قلته تدري ؟ واخلي اهلك شهود غصباً عليهم اقسم بالله ادمر حياتك يامنصور والله نفس ما حاربت عشان اطلعك بحارب عشان ادخلك

شادن:ملاك !

ملاك لفت عليها:ابعدوا عن الشر وصكوا الباب بيننا حياتي وزوجي واهلي وعيالي خط احمر ولا ابي اي شي يقربني منكم ولا ابي اعرف اخباركم

محمد:محد بيجيك

ملاك:ماهو من كيفك غصب عليكم كلكم

منصور:اعقلي لا ترمين دمنا في الارض

تقدم ثنيان ومسكه بقوه:اي دم ؟ انت مابينك وبينها شي تفهم ؟

ملاك ناظرت ثنيان ووقفت بهدوء تناظرهم ودفعه منصور:اخذت شي ماهو لك

ثنيان:والله لو تحفر برجلينك مع يدينك ملاك زوجتي وحلالي

منصور ناظر ملاك ومسكه ثنيان من ذراعه:عينك لا تطولها

منصور دفع ثنيان ورفع كفه ثنيان يصفقه كف ومسك راسه محمد بتعب وصرخت شادن:ابعد عنه

ابتعد ثنيان وناظره بحده:خلاص عاد انشغل بنفسك وامسك اهلك

لف ثنيان لشادن:لا اسمع لك حس انتي تفهمين ؟

ناظرته شادن وناظرهم ثنيان لملاك:مشينا

لفت ملاك تناظرهم الاشخاص اللي عاشت معهم سنين ودمروها وحاربوها ، ناظرت منصور طريقها الخاطئ واختيارها الغلط ولفت لشادن اللي ظنتها اخت وصاحب بس طلعت عدو وخادع

لفت لثنيان ومسكت كفه وخرجت معاه

'

دخلت الحمام وناظرت الفحص اللي بيدينها وهي تسمع صوت نبضات قلبها وخوفها وارتباكها

دق الباب منيف:أصايل لا نتأخر على اهلك امك وصتني نجي قبل زوجة ساري ما توصل

بلعت ريقها واخذت نفس ورمت التست وخرجت:جاهزه بس بلبس عبايتي

مشى منيف ولبست عبايتها وركبت معاه وحرك منيف للبيت

ووقف بجانب سيارات العيال ونزلوا ودخلت أصايل وناظرت تجهيزات امها لجنى اللي بترجع للبيت بعد فترة النفاس اللي قضاها كامله في بيت اهلها

ابتسم منيف:الله ياخالتي وش هالترتيب

لفت نوره:هلا أمي منيف تعال تعال

مشى منيف وناظرت الطاوله نوره:احسها مايله هالطاوله اسحبها يميني شوي

مشى منيف وسحب الطاوله وهزت راسها نوره:اي اي بس الله يعافيك ياحبيبي

لفت وناظرت أصايل:شفيك تهوجسين فصخي عبايتك وتعالي ساعديني

فصخت عبايتها أصايل وجلس منيف بالصاله ومشت أصايل مع نوره لداخل

ونزل نهار وخلفه غلا ورفع راسه منيف وابتسم نهار:حيّ الله منيف برحب فيك ولا كأنكم كنتم هنا قبل ساعتين

ضحك منيف:رجعنا عشان تلبس أصايل

غلا:أصايل داخل ؟

هز راسه منيف وصد عنها ومشت غلا تدخل وجلس نهار بجانب منيف

ودخل جاسر:وين ابوي ؟

نهار:تعال انت بحقق معك عن ملكتك

جاسر:وش هاللقافه ؟

ضحك منيف ووقف نهار يسحبه يجلس:بالله علمني جازت لك ؟

جاسر:ترا امس كتب الكتاب

نهار:ادري ياخي كنت معك بس يعني يوم كلمتها وقعدت معها جازت لك ؟

جاسر:واذا ماجازت لي ؟

نهار:اغيرها لك ولا يهمك عندي اللي يعجبك

ضحك منيف:ليتها تطلع عليك التايقر

نهار ضحك ولف لجاسر:امي كل مادخل احد عليها مدحت في هالشهد

جاسر هز راسه:اي بنت حلال

خرجت نوره مع أصايل وغلا ومدت الولاعه لجاسر:ولع الشموع اللي على الطاوله دامك قاعد

وقف جاسر ودخل ثنيان وبيده بطيخه وناظرهم:وصل ساري وعياله ؟

نوره:لا بعدهم

أصايل ضحكت:مواجيب لموج ؟

خبط البطيخه ثنيان:اشهدوا لا تجحدني اذا كبرت

نهار:موج متوحمه على بطيخ عسى ما تطلع مثلك

ثنيان:ليه ماني عاجبك ؟

نهار ناظر غلا وابتسم:لا عاجبني شخص ثاني

ضحك جاسر اللي يولع الشموع ولف منيف على نهار:اثقل اثقل على الاقل احشم خالتي

نوره:اتركه هالبزر

ضحك منيف وعض شفته نهار:افا

ناطر غلا:تسمعين الاهانات لزوجك ؟

غلا:ما اتكلم فوق كلام خالتي اذا قالت بزر فإنت بزر

ضحكوا العيال وحط البطيخه ثنيان ومشى فوق فتح الباب وناظر ملاك اللي جالسه تحط ميك اب وناظرته:قول مالقيت بطيخه عشان موج بتدمر نفسيتي

ضحك ثنيان:لقيت

ابتسمت ملاك وناظرت الميك اب:ساري وجنى وصلوا ؟

ثنيان:لا بس كل اخواني تحت

ملاك وقفت:يالله جهزت

لبست عبايتها وابتسم ثنيان يناظر بطنها البارز وتحجبت ومشت معاه لتحت

جلست بجانب منيف ودقايق دخل ساري شايل ولده وخلفه جنى

واشتغلت الاغاني يرحبون فيهم ووقف عقاب يستقبل ساري ونثرت الورد عليهم نوره بفرحه وهي تغطرف وابتسم ساري يمد ولده لعقاب

تقدمت جنى تسلم عليهم وجلست تناظر عقاب الصغير بحضن عقاب

ابتسمت بارتباك أصايل وهي تناظر البيبي ولفت تناظر منيف بجانب ملاك وحاط يده على بطنها يتكلم معها ويضحك

لفت وطاحت عينها بعين غلا اللي ابتسمت لها وهمست:فيك شي صح ؟

ضحكت أصايل وهزت راسها بـ ايه وسط زحمة سوالفهم جميعاً عنهم

ووقفت غلا وجلست بجانبها وناظرتها أصايل:عشانك اول وحده سألتي بقولك

غلا هزت راسها ونطقت أصايل:حللت تست منزلي وشكلي حامل

غطت فمها غلا وهي مبتسمه وضحكت أصايل:ماعلمت حتى أمي

غلا:وناسه أصايل يارب الله يتمم لك على خير

ابتسمت أصايل ولفت تناظرهم جالسين سوا كلهم

نوره:بعد شوي جايه بنتنا الجديده شهد

جاسر:ما فاتتك وسط كل هذي الزحمه تنادينها

نوره:اول وحده ناديتها شهد

جنى:عاد انا ما شفتها

غلا:حياويه مره

ملاك:اي تخجل اتوقع الحين بطلت تجي لانها تستحي

عقاب:يمكن تخجل من العيال

نوره:العيال هذولا اخوان زوجها وبحسبة اخوانها وانا ما بقعد افصل نفسي قسمين لعيالي ولحريمهم حلاتنا كذا كل واحد وعياله وزوجته قراب من بعض

دق جوالها نوره وناظرت جاسر:اطلع اطلع استقبلها

نهار ضحك:العب ابو حمد

ضحك جاسر ووقف ومشى تاركهم وابتسم ثنيان يناظره طالع

خرج وناظر سيارة السواق اللي واقفه ومشى وفتحت الباب ونزلت شهد وابتسم جاسر يمشي لها

وارتبكت وقفلت الباب ووقفت لين وقف قدامها جاسر:كيف الحال ؟

هزت راسها وصدت بعيونها بتوتر ونطق جاسر:ليه متوتره ؟

ما كان يدري انه زادها توتر بسؤاله وملاحظته لتوترها وناظرته ولا ردت

ورفع كفوفه على ذراعينها جاسر:لا تخافين كل اللي داخل اهلي وبيصيرون اهلك بعد

بلعت ريقها شهد وهزت راسها ومشى جاسر ومشت بجانبه ومد كفه لكفها جاسر يشد على كفها اللي يرجف ودخلت وناظرتهم

وابتسمت نوره توقف تستقبلها:ياهلا ببنتي ياهلا

تقدمت شهد وسلمت عليها بتوتر وصافحتها نوره:ياحياتي ليه كل هالخجل انتي بين اهلك

ابتسمت شهد وسلمت على أصايل وغلا وملاك وتقدمت لجنى ونطقت:الف مبروك البيبي

ابتسمت جنى:الله يبارك فيك ، مبروك لكم انتي وجاسر واعذريني ماكان عندي وقت احضر كتب الكتاب

ابتسمت شهد ولفت من وقف عقاب:هلا ببنتي ارحبي بين اهلك

سلمت عليه ومسك كفها عقاب بكفينه الاثنين:لا تخجلين ولا تتوترين انتي وسطنا بنتي وهذولا اخوانك كلهم وهذولا خواتك وان شاء الله قريب تتعودين علينا

شهد ابتسمت:ان شاء الله

مشت وجلست بجانب نوره وناظرتهم نوره:يالله خل نتقهوى دام الجميع موجود

بدوا ياكلون ورفعت راسها ملاك من مدت لها الخدامه صحن صغير فيه بطيخ وناظرتها ولفت لثنيان اللي غمز لها وضحكت واخذته

حطته بحضنها تاكل منه وتناظرهم يسولفون مع بعضهم

لف نهار لغلا:عطيني الحلا اللي قدامك

مدت يدها واخذته ولفت له ورفع الشوكه على خدها ولفت عليه وناظرته بذهول وابتسم نهار:لخبطت وين الحلا

ضحكت غلا:نهار نفسي اعرف من فين تجيب حركاتك هذي ؟

ضحك نهار:والله تعجبك بس تكابرين

هزت راسها غلا:اي بس مابي اكبر راسك

ضحك نهار وابتسمت غلا تصد تاكل

لف منيف على أصايل:وشفيك من يوم جينا هاديه ؟

أصايل ابتسمت وناظرته:في شي نفسي اقوله

منيف:وشو ؟

أصايل:الحين تسمعه

لفت عليهم ورفعت صوتها تقطع سوالفهم جميع:ممكن تنتبهون لي بخاطري اقول موضوع مهم

لفوا عليها وسكتوا وابتسمت أصايل:يعني دامكم اهلي موجودين كلكم وبخاطري اقولكم من بدري هذا الوقت المناسب اللي اتكلم فيه

نوره:وش عندك ؟

لفت أصايل على منيف وابتسمت:سويت تحليل حمل بالبيت

جمد وجه منيف وهو يناظرها ولفوا بصدمه عليها ولفت نوره بذهول تنتظر أصايل تكمل

وابتسمت أصايل تناظرهم:وطلع ايجابي

صرخوا ووقف نهار بسرعه وضحكت أصايل من قام جاسر خلفه وقام ثنيان

وابتسم عقاب يناظرهم ووقفت نوره:يمه بنتي يمه وخروا عني

تقدمت وحضنت أصايل وضحكت أصايل من وقوفهم حوالينها

وابتسم عقاب من لفت عليه أصايل تناظر هدوئه وسطهم ونظراته لهم بكل حب وسعاده

ثنيان:حمدلله موج عندها اصدقاء من بدري

لف نهار لمنيف:شفيك انت مصدوم صحصح يالطيب بيجيك ولد

ضحك منيف بصدمه ووقف من حضنه نهار ولف مو مستوعب وناظر أصايل:ليه ما علمتيني ؟

أصايل ناظرته بربكه:عرفت قبل شوي

ابتسم منيف يناظرها وتقدم ساري:تعالي اسلم عليك

ضحكت أصايل وحضنت ساري وتقدم منيف:وانا بعد لي نصيب

نهار:على الاقل اصبر شوي

ضحكت أصايل من حضنها منيف وابتسموا يناظرونهم

ووقفت ملاك وحضنت منيف وابتسمت:مبروك ياروحي

أصايل ابتسمت من نطق منيف:بنصير عائله

نوره:اقعدي اقعدي ارتاحي خل نروح نشوف وضعك ووضع الجنين ونحسب من هالشهر ٩ شهور عشان استقبالك وعشان نحجز مستشفى واستقبال ومطربه وسـ

قاطعه عقاب:ياساتر ياساتر

ضحكت أصايل وحضنت نوره وابتسمت نوره:يافرحتي انتي

ابتسمت أصايل وجلست ولفت لمنيف اللي مسك كفها يشده بقوه

جلسوا بالحديقه لوقت طويل من الليل سهرانين سوا ولفت ملاك لنوره اللي بجانبها تشرب شاهي وابتسمت تناطر نوره ونطقت:تدرين خالتي

لفت نوره عليها وسط ضجيج اللي حوالينها يسولفون سوا

ناظرتها بإمتنان ملاك:كان بخاطري من زمان اقولك هالشي بس مالقيت وقت مناسب ، بس انتي افضل أم عرفتها بحياتي وأقوى امرأه شافتها عيوني ولولا وجودك ماكانت هالعايله بهذا الثبات

ابتسمت لها نوره تسمعها وكملت ملاك بهدوء:قلبك كبير ويوسع لعيالك ولعيال غيرك ، مانقص عني وعن منيف اخوي اهتمام تعطين الجميع حب بدون ما تخلص طاقتك وتتعبين وتجاهدين على ثبات هذي العايله وتستثمرين بعيالك افضل استثمار

سكتت نوره تناظر ملاك اللي تتكلم معها وسط الضجيج:خسارتك بزواجك ما تعنيك قد ما يعنيك جهدك لعيالك ، يمكن أثر فيك موضوع امي بماضي زوجك وأشعر بهالشي بس ما خليتيه يأثر على عائلتك

نزلت عيونها نوره وابتسمت وكملت ملاك:أنا كبرت وماعندي قدوه بحياتي بس من يوم عرفتك انتي قدوتي

رفعت عيونها نوره تناظر ملاك بحنيّه ودفى من كلامها

ملاك ابتسمت:كل اللي عطيتيني اياه انا واخوي ماراح عبث ، انتي بحياتي شخص غالي ابديه على اي احد ومبسوطه ان اولادي بيكونون تحت عينك وتربيتك

رفعت كفها نوره على كف ملاك بحب وراحه:وانا مطمنه على ثنيان وعيال ثنيان وادري انك افضل زوجه وام لهم ، وادري انك تشوفينا اهلك ومستعده تسوين اي شي لاجلنا ونفس ما وقفتي مع عقاب بتوقفين مع اي احد من هالعايله

شدت على كفها ملاك وابتسمت

وقفت شهد مع جاسر اللي نطق:انا برجع شهد

نوره ناظرتهم:انبسطنا بشوفتك ياشهد

ابتسمت شهد:وانا اكثر

عقاب:سلمي على ابوك

شهد:يوصل

مشت مع جاسر اللي مشى لسيارته وناظرتهم نوره براحه ولفت تشوف عيالها حوالينها كل شخص وزوجته جنبه وأصايل بجانب منيف

لفت ملاك لثنيان اللي تاكي بجانبها وابتسم من لفت عليه:شرايك نهرب احنا بعد

ملاك:لليخت ؟

ثنيان:لا بخليك تمشين عند البحر عشان تولدين بسرعه

ضحكت ملاك:تبي تعيش خوف الولاده والصراخ مو عاجبك اني بولد قيصري

ثنيان:ميت واشوف موج طولت علينا

مسكت بطنها ملاك وناظرت بطنها:هانت

رفع يده ثنيان على يدها يحس بطنها وابتسمت تناظر كفوفهم ببعضها على بطنها

وقفت أصايل:يالله منيف ؟

نوره:اقعدوا شوي

منيف:مخلين ١٧ قطو بالبيت لوحدهم

ضحكت أصايل وهزت راسها نوره ومشت مع منيف وركبت بجانبه

وصلوا للبيت ودخلت وناظرت قطاوة كوتي يتهاوشون سوا:لا ليش تضاربون ؟

ابتسم منيف:أصايل

انحنت تبعدهم:دقيقه منيف

بعدتهم عن بعض وشالت واحد منهم بحضنها وناظرت منيف بهدوء تنتظره يتكلم

وابتسم منيف يناظرها ثواني طويله:أحبك

ابتسمت أصايل وتقدم منيف لها وحضنها واخذت نفس أصايل وهي بحضنه

منيف:مبسوط والله مبسوط لأني بصير أب وبيتنا بيصير كبير ، عندنا بيت كبير

أصايل رفعت كفها على ظهره:بس انا الى الان ما صدقت

منيف ابتعد عنها وناظرها:وعد يمين بكون أفضل أب وأتعب واجاهد عشان يكونون بخير ومبسوطين

أصايل ابتسمت تشوف لمعة عيونه:ما بشك ابد منيف

منيف:ومنيف محظوظ وعياله محظوظين لأنك أمهم

ابتسمت أصايل وحضنت منيف وغمضت عيونها وهي مبتسمه

-

( البارت الجاي بيكون النهايه بإذن الله لا تنسون النجمه ⭐️ )

جالسه بالصاله وتناظر منيف اللي يقدم الطاوله الصغيره منها عشان تلحق صحن الحلا وقهوتها وضحكت نوره:بتدلعها

منيف جلس أصايل:تدلع تدلع

ابتسمت أصايل لمنيف:بتدلعني الحين عشاني بالبدايه بس

ضحكت ملاك وهي ماسكه بطنها:لا ابشرك كل الشهور

ابتسم ثنيان اللي ياكل من صحنه

عقاب:المهم تقومين بالسلامه

ابتسمت له أصايل ولفت لجنى اللي شايله عقاب ترضعه

وهزته جنى:بس نامي واشبعي نوم لانك بتنحرمين منه

لف ساري لثنيان ومنيف:وانتم بعد ودعوا النوم

ثنيان:خلها تجي موج والله لاسهر عشانها ايام

نوره:لا البنات هادين ، بنشوف الحين أصايل وش تجيب لنا

ابتسمت أصايل ونطق منيف:بنت

نهار:كثروا بيننا البنات

غلا ضحكت:اول مره اشوف عايله كامله كلهم يبون بنات

أصايل:عشاننا محرومين من البنات

اخذت نفس ملاك وهي ماسكه بطنها وتحس بانقباضات بطنها الهاديه ولفت نوره:جاسر طالع مع شهد يتعشون واخذوا حمد وسارا بعد

عقاب:ليه اخذهم ؟

نوره:يقول شهد تبي تجلس معهم

غلا:حبوبه البنت مره

نهار:محظوظ جاسر طاح بوحده تستحي

لفت غلا وناظرته وكمل نهار وهو يشرب قهوه:ياحظه لو تطلع خفيفة دم وتضحك معه

غلا:تبي تضحك يانهار ؟

لف نهار وناظرها:انا ؟ لا ابد انا ما احب الضحك اصلاً

ضحكت نوره وضحكت غلا:لا لا شكلك تبي تضحك مع وحده خفيفة دم

نهار ابتسم:يالله بس محد محظوظ هنا بهالقعده غيري

منيف:بعد ما عطبها

تكت براسها ملاك بخمول ولف ثنيان عليها:اطلعي نامي

هزت راسها ووقفت بتعب ومشت ولفت نوره:ثنيان متى حددوا عملية ملاك ؟

ثنيان:نهاية هالاسبوع الدكتوره قالت انسب وقت

جنى:ماشاء الله ما بتتعب

منيف:بس تعبانه اليوم احسها

ثنيان هز راسه وهو ياكل:اي ما نامت زين

نهار:ثقلت البطه

ضحكوا ووقف ثنيان بعد وقت وطلع الغرفه

وناظرها جالسه على جوالها:ما نمتي ؟

ملاك:ماجاني نوم

تقدم ثنيان وانسدح بجانبها:نامي معي

ملاك لفت عليه وحطت كفها على شعره:شوي وانام بس احس بثقل بعد الاكل

غمض عيونه ثنيان ولفت ملاك للجوال وحطت يدها على بطنها تتحسس الانقباضات والمغص اللي تحسه وتحسب الدقايق بجوالها وعرفت انه طلق لانها من الصباح تحس بالالام تروح وتاخذها

غمضت عيونها تاخذ نفس ولفت لثنيان اللي نايم وظلت تنتظر الوقت يمشي شوي عشان يمدي ثنيان ينام ويرتاح

لكنها بدت تتعب وناظرت الساعه والوقت اللي ركض فيها وهي تعبانه

وقفت بالغرفه تتنفس بإنتظام ومشت بالغرفه بتكرار عشان يخف الألم

وغمضت عيونها ومشت لثنيان وحطت كفها على راسه:ثنيان

مارد عليها وهو نايم وهزته تناديه وفتح عيونه وناظرها ونطقت ملاك بتعب:بولد

فز وجلس وناظرها:هاه !

ملاك:بولد جاني طلق وارسلت للدكتوره قالت تعالي

ناظرها بصدمه ثنيان:بتولدين ؟

ملاك:اي بس جيب الشنط وخلنا نروح

ثنيان وقف بسرعه وجلست ملاك وغمضت عيونها تستغفر وقفت ومشت ومشى معها ثنيان

وناظر اهله نايمين والكل بغرفته وركبت وركب بجانبها وحرك

لف عليها:طيب قالوا اسبوع

ملاك:موج مستعجله

ابتسم ثنيان وناظرته ملاك بتعب وابتسمت له كانت قويه حتى عند ولادتها

نزلت المستشفى ودخلت مع ثنيان ودخلت غرفتها وثنيان واقف عندها كشفوا عليها يبلغونها ان الرحم ببداية توسعه وبيجهزونها للولاده من بدري

ثنيان تكتف يناظرهم متجمعين على ملاك ولفت الممرضه:تدخل معاها ؟

هز راسه ثنيان ومدت كفها ملاك له ومسك كفها ومشوا يدفون سريرها للخارج وثنيان ماسك كفها ودخلت غرفة العمليات وانسدحت على سرير العمليات وغطوا الجزء العلوي عنها وبنجوها بنج نصفي ومسكت كف ثنيان بقوه تشوف شاشة العمليه قدام راسهم بدون ما تحس بأي جزء من البنج

رفع عيونه ثنيان يناظر العمليه وعاقد حاجبينه بتركيز وخوف وتوتر

وغمضت عيونها ملاك تشد على كفه وتسترخي وتبعد التوتر عنها

ودقايق رفعت الدكتوره الجنين اللي بكى بعلو صوته وابتسم ثنيان وارتاحت ملامحه وشد بكفينه الاثنين على كف ملاك وابتسمت ملاك من حطوا الجنين بحضنها وقرب منها ثنيان يناظر موج اللي تبكي ولف من صوروهم الطاقم سوا

وخرج مع موج يستكمل البيانات واخذ جواله وبيده الاوراق ودق على عقاب اللي رد وهو راجع من المسجد لصلاة الفجر:هلا ثنيان

ثنيان ابتسم:ابشرك مع هالفجر وبوقت الشروق

وقف عقاب وابتسم بوسع ثغره:ولدت ملاك ؟

ضحك ثنيان ومسك راسه بعدم تصديق:اي حمدلله وجابت لنا موج تكفى ابوي تعال مو شايلتني رجولي من الفرحه

ضحك بخفوت عقاب وناظر خطواتها :ابشر جايك يا ابو موج جايك

'

ابتسمت تشوف الاستقبال السماوي البحري والورد الازرق والابيض واسم موج بالتوزيعات واللوحات وعلى مفرش سريرها

ولفت تشوف ثنيان شايل موج واخوانه بجانبه

نهار:جيناتك قويه ثنيان

ضحك ثنيان ونطق جاسر:من الخشم للدقن ثنيان اخوي

هز راسه ساري يناظر موج:ماشاء الله هاديه وساكته

نهار لف لساري:لا تحسدهم اذكر الله

ساري:ماشاء الله بس عقاب ما يقعد كذا ساكت لو سكت بنشك انه مات

ضحك نهار وابتسم ثنيان ورفع عيونه لنوره اللي نطقت:نزلوا البنت بسريرها ازعجتوها

أصايل:دقيقه بصوركم

وقفت تصورهم سوا ودخل منيف اللي شايل اكياس بيدينه:وين بنت اختي ؟

حط الاكياس وابتسم يتقدم لموج وناظر ثنيان:خلاص شايلها من الصبح مو عشانها بنتك !

ضحك ثنيان واخذها منيف وابتسم يناظر موج:نسل أمي وأبوي يا قطعه من أهلي

ابتسمت ملاك تسمع منيف وناظره عقاب بهدوء وكمل منيف:فيك من ريحة مساعد وزَهره

نطق عقاب:يكفي انها بنت الشاهين

لفت ملاك لعقاب وناظرته وابتسمت بهدوء تفهم الودّ اللي يكنه لموج وفرحته لوجودها

جلس منيف وهو شايلها وجلست على ذراع الكنبه أصايل وابتسمت تناظر موج

نوره:اقعدي زين لا تطيحين

دخلت غلا مع جنى وهي شايله ورد وكيس كبير وابتسمت:مبروك

ابتسمت ملاك بتعب:الله يبارك فيك

حطت الورد وتقدمت تسلم على ملاك وتقدمت جنى:مبروك ملاك حمدلله على سلامتك

ملاك:الله يسلمك

ساري ناظرها:وين عقاب ؟

جنى:مع الخدامه جايه وراي

دخلت الخدامه واخذ ولده ساري

وتنهدت بتعب ملاك من حست بالوجع من العمليه ولف لها منيف من سمع تنهيدتها:بترتاحين ؟ نخرج ؟

لف ثنيان يناظر ملاك وهزت راسها بالنفي تكابر ووقفت نوره:والله انك تعبانه خلينا نجيك وقت ثاني الحين نامي وارتاحي

وقف عقاب ودخل يده بجيبه وتقدم لسرير موج وحط الظرف وابتسم ثنيان:بنتي موج اغلى من عقاب الصغير

ضحك عقاب:السمي وحفيدة مساعد كلهم بنفس الغلاوه

رفعت عيونها ملاك من نطق باسم مساعد يشرح لملاك الحب اللي يكنه لمساعد والعلاقه اللي استمرت حتى برغم موت مساعد ورغم كل اللي صار وعاشه عقاب من مساعد

وقف منيف وناظر ملاك:ارتاحي لا تسهرين وجبت لك اكل تاكلينه اذا جعتي خلي الاكل اللي يجيبونه لك

ثنيان:انا موجود لا تشيلين هم

منيف:نص ساعه وراحع لك

ضحك نهار:امش يا بثر

ضحك منيف وخرج مع أصايل ومسك كفها يخرجون سوا من المستشفى

تاركين ثنيان جالس بالغرفه مع ملاك

ناظرته ملاك بتعب:ثنيان كلمهم يعطوني مسكن جسمي يعورني

وقف ثنيان وخرج ودقايق دخل مع الممرضه وتقدم لملاك وجلس على السرير ومسك كفها:نامي حاولي ترتاحين

فمضت عيونها وشدت على كفه بقوه ترتخي بجسمها تحاول تنام

وابتسم ثنيان يناظر موج بالسرير القزاز نايمه بجانب سرير ملاك

وطلع جواله من جيبه ورفعه يصورهم سوا وكفه بكف ملاك وموج قريبه منهم

'

دخلت غلا الغرفه وفصخت عبايتها وابتسمت:ياحياتي النونو الصغيره

سكت نهار يناظرها وجلست وهي تنزل شوزها:بس ملاك تعبانه مره وباين عليها كويس ما طولتوا عندها

تقدم نهار منها وناظرته غلا:وشفيك ؟

ضحك نهار وتقدم وباس خدها وابتسمت غلا:اشتقت لي عشان داومت البوتيك ساعتين ؟

نهار غمض عيونه يقبل عنقها ومسكت كفوفه غلا:نهار اهلك ينتظرونا تحت

نهار ابتعد عنها وناظرها:لا اهلي عندهم ثقافة المتزوجين اذا غبنا بيعذرونا

ضحكت غلا تعض شفتها وابتسم نهار:لا تسوين لي هذي الحركات ياويلك

ضحكت ترفع راسه وقبل عنقها نهار ولفت من دق جوالها ومدت يدها بتاخذه

ومسك يدها نهار وضحكت:نهار خلاص

وقف نهار وناظر الجوال:اخوك راكان صح ؟ انا بزوجه وارتاح منه

اخذت جوالها غلا وردت:هلا حبيب غلا

رفع حاجبه نهار يناظرها وابتسمت غلا:بخير ياروحي انت كيفك ؟ اشتقت لك

رفع اصابعه يعد مدحها له وغزلها وضحكت غلا:ونهار بخير

نهار:نهار ساده كذا ؟

غلا:كلمتني امي بجيها بكره اساعدها اذا جو الضيوف عندها ما بخليها لوحدها

نهار:ما استأذنتي !

صدت غلا تكمل:طيب تمام اشوفك بكره

تكتف نهار وابتسمت غلا:وانا احبك اكثر ، باي

قفلت وناظرت نهار وضحكت من وقوفه:خير ؟

نهار:تعرفين انك ما ناديتيه باسمه لين نهاية المكالمه ؟ وانا تقولين لي نهار حاف ؟

غلا:يغار دلوع امه

عض شفته يخفي ضحكته نهار وضحكت غلا ووقفت تمسك خدوده:اناديك نهوري يادلوع الماما

نهار ابتسم:دلوع بس اعرف اعض

ضحكت من شافت نيته بعيونه وابتسم من ضحكتها نهار وتقدم يقبّل ثغرها

'

ناظرته شايل موج ويتكلم معها ومبتسم وكأنه مو مصدق وجودها

ولف لملاك وناظرها:أحبها وأحبك

ضحكت ملاك:طيب انا وموج تعبنا بالمستشفى نرجع بيتنا ؟

ثنيان:لا ، بنروح الشاليه كل فترة النفاس بتكون بالشاليه وبدلعك هناك انتي وموج

ملاك:ثنيان بكون بعيده عن خالتي

ثنيان:تجيك بس موج تطلع من المستشفى للموج

ابتسمت ملاك وجلست بتعب ودخل منيف:يالله ملاك عطوني خروج

هزت راسها وساعدها توقف منيف ونزل عند رجولها يلبسها شوزها وابتسم ثنيان يناظره ووقف وحضنته ملاك وضحك ثنيان

وابتسمت ملاك:احبك منيف

ضحك منيف بذهول من حضنته وابتعد عنها:وانا بعد

لف لثنيان:مشينا

خرجوا وركبت ملاك بتعب بالسياره وحط موج بالخلف ثنيان ومشى يركب وناظرهم منيف:برجع لخالتي واصايل واجيكم هناك

ثنيان:طيب

حرك ثنيان سيارته وابتسم ومسك كف ملاك وباسه وشغل الاغنيه بسيارته:ياموج هوّن على قلبي داعيك من شطك

ابتسمت ملاك تهز راسها مع الاغنيه وكمل ثنيان يغني:اللي لها مبسم عذبي رعبوب وعيونها وساعي

ضحكت ملاك ولفت لموج بالخلف تشوف الملاك النايم ، ثمرة حبها بالموج اللي طفّى اللهب وقدر عليه

وقف عند الشاليه وناظرت البحر ملاك ونزل ثنيان وفتح الباب الخلفي واخذ موج وناظرته ملاك وتقدم وهو شايل موج ووقف عند البحر وناظر موج:عشان تكبرين ونقولك انك جيتي للموج بأول خروجك

ابتسمت ملاك وحطت راسها على ذراع ثنيان:وبتكبر وبتقولنا ابي اطلع باليخت

ابتسم ثنيان وناظر موج ورفعت راسها ملاك تناظر موج وكأن بهذي اللحظه كبرت سنين موج قدام عيونها فجأه

وشافتها تركض بعمر خمس سنوات مع ثنيان على البحر وصوت ضحكتها يوصلها وهي قاعده امامهم

رفعت شعرها ملاك تشوف ثنيان يركض خلف موج وشالها يدور فيها وضحكت

لفت ملاك لدانه صاحبة عمر السنه جالسه وتلعب بلعبتها

ضحك ثنيان من صوت ضحكة موج ولف لملاك ومشى لها وهو عاري الصدر وجلس وجلّس موج بحضنه

ونطقت موج:ماما ابي ايسكريم

ملاك:يعورك موج بحلقك ياماما

لفت موج لثنيان:بابا

ثنيان:خذي ابو الايسكريم كله واذا جاك شي انا باخذه عنك

ابتسمت موج تمد يدها للايسكريم وتاخذه

ثنيان:منيف جاي كلمني

ملاك:لحاله ؟

ثنيان:لا مع أصايل وريما

لفت موج لثنيان:ريمي بتجي مع خالو ؟

ملاك:اي خبي لها ايسكريم باقي ما اكلت تخلصينه عليها

موج ناظرت ملاك:بس نهار قال هذا كله حقي

ملاك:اسمه عمو نهار مو نهار

موج:لا نهار

ملاك:موج ماما !

موج هزت راسها بالنفي وهي تلحس الايسكريم وناظرتها ملاك:على مين هذا العناد كله ؟

لفت وناظرت ثنيان اللي رافع حاجبه وضحكت:اكيد مو عليّ

ثنيان:لا ابد لا العناد ولا الغرور اللي فيها

لف ثنيان لدانه اللي تناظره وابتسمت من شافته يناظرها وشالها بسرعه ثنيان:لا تسوين لي هذي الحركات التهمك ترا !

ضحكت دانه من حركات ثنيان بوجهه لها وابتسم:بابا

ناظرتهم موج وهي تاكل ايسكريم:ماتعرف تقول بابا

ثنيان:الا تعرف دانه قولي بابا ، بابا

ابتسمت دانه:بابا

ضحكت ملاك وحضنها ثنيان بقوه:ياعين بابا يادانه بعين بحّارك

ابتسمت ملاك وجلس ثنيان يرفع دامه ويلعبها طياره ومشت بالايسكريم موج لحضنه:بابا انا ابي طياره

ثنيان:عدمتي الشورت ياموج

ملاك:تعالي موج نسوي سباق ؟

هزت راسها موج بفرحه ووقفت ملاك ومسكت كف موج ووقف ثنيان شايل دانه:بنمسك ملاك وموج انا ودانتي

ضحكت ملاك من تكضت موج تصرخ ومشوا للبحر ورفعت فستانها ملاك ولفت تناظر ثنيان اللي يركض ودانه على رقبته تضحك

ودخلت موج بالبحر ترش عليهم مويه وضحك ثنيان يحط دانه بالارض وتقدم لموج شالها وصرخت ولف فيها وسط الموج وباسها ونزلها

وناظرته ملاك:ماراح تغرقني قدام بناتك

ثنيان:من يمنعني ؟

ضحكت ملاك تصرخ وتهرب منه ولحقها ثنيان وسحبها من يدها وشالها يدخل البحر وصرخت من غرقها وضحك ثنيان وحاوطت كتوفه ملاك ولفت لموج ودانه:موج لبسي دانه الجاكيت وتعالي

لف ثنيان من شاف موج متردده وابتعد عن ملاك ومد كفوفه لموج:تعالي بابا نفس ما علمتك لا تخافين حركي رجولك

موج:دانه بابا

ثنيان:انا اخذها تعالي عندي

مشت موج لين دخلت البحر وسبحت تغمض عيونها بقوه بخوف وضحكت ملاك اللي تسبح ومسكها ثنيان وابتسم:شطوره موج

تمسكت في ملاك وخرج ثنيان يشيل دانه اللي لابسه جاكيت سباحه ودخل البحر وصرخت دانه من شعور المويه وخبطت بيدينها بالمويه

ثنيان سبح على الخلف يأشر لموج تجيه وسبحت تغطس وتطلع لين مسكها ثنيان

ولفت ملاك لدانه اللي تلمس المويه ومبسوطه

ثنيان ناظر ملاك:نطلع عشان لا يبردون البنات

هزت راسها ملاك ومشى ثنيان يخرج وشايل موج بيده وخرجت ملاك وغطت دانه بالمنشفه ودخلت داخل

لبست روبها ملاك وجلست وهي تنشف دانه وتسمع ثنيان بالحمام مع موج وضحكت موج من نشفها ثنيان بقوه

مشت ملاك لموج:تعالي البسك

لبس ملابسه ثنيان وخرج لملاك ينشف شعره وناظر دانه اللي جالسه على السرير :بابا دانه

ابتسمت ملاك:المفروض تناديها لهب

لف ثنيان لملاك وابتسم:كنت اظن بس ماعاد نبي لهب بحياتنا

ملاك ابتسمت وهي تلبس موج ولفت تناظر ثنيان اللي يلعب مع دانه:يالله الحين تجي ريمي

ركضت موج تنزل تحت وشال دانه ثنيان ونزل وغيرت ملابسها ملاك تنزل لهم

رفعت عيونها من دخلوا منيف وأصايل وركضت ريما لموج وحضنوا بعض

ثنيان:هلا ريمي تعالي سلمي عليّ

موج عقدت حاجبينها بعصبيه من حضنت ريما ثنيان وضحك منيف:ابوك يالغيره

مشت موج لملاك تحضنها ووقفت ملاك وهي شايله دانه وسلمت على أصايل وضحكت أصايل:موج تحب ريما لين يصير فيها ثنيان

ثنيان حط ريما بحضنه وناظر موج:بابا موج ريما زي دانه

جلس منيف بجانب ملاك وبحضنه قطوه صغيره لابسه عَقد ومشت ريما للقطوه:موج شوفي

شالت القطوه ريما وابتسمت أصايل من تخبت موج بحضن ملاك:ماما ما احبها

شالتها ملاك ومشت ريما لمنيف:بابا موج ما تحب كيكي

أصايل:ما تنلام لان اسمها كيكي سميها اسم احلى

منيف:لا انا وريمي اتفقنا صح ؟

ابتسمت ريما لمنيف تهز راسها وجلست بحضن منيف وباسها منيف يحضنها بقوه بحب

ثنيان:مريتوا على بيت اهلي ؟

أصايل:لا كنا عند نهار ببيته

ثنيان:ليش ماجا معكم ؟

منيف:عنده موعد تطعيم لفهد يقول اذا ما تعب بعد التطعيمه جانا

ابتسمت أصايل تلعب دانه ولفت ملاك لثنيان:كلم خالتي مره ثانيه تجي شوف يمكن غيرت رايها

أصايل:معزومه عند اهل شهد رايحه مع جاسر تقول ما بخليه لوحده

ضحك منيف:كنا ظالمين نهار طلع دلوع الماما جاسر

أصايل:لان جاسر ما يتشكل براحه مع ناس ما يعرفهم

ثنيان:جاسر ثقيل وما يسولف واجد لو راح لهم وحده ابتلشوا فيه

ملاك:ما نشوف ولده كثير

أصايل:حتى انا نادر يجيني يقول جاسر عزام صار مشاغب مع حمد وسارا ويخاف على ريمي من شقاوتهم

ثنيان:جاسر ياخي عادي اطفال خل يلعبون ويتعورون شوي

منيف:بس ساري فاضي ترا اذا تبي كلمه يجي

ثنيان:بكلم ابوي اول واشوف

'

شايل فهد بيدينه ويناظر غلا اللي تتكلم مع الممرضه

ولف ناظر فهد:قدها يابطل لا تنفس علينا تكفى

غلا:حطه نهار

جلس فهد على السرير وبكى فهد بخوف ومسكت كفه غلا:خلاص ياماما خلاص

نهار:انا اقول طعموني بس لا يجيه شي

غلا:اوف نهار خلاص لا تتوتر قدامه يحس فيك

بكى فهد من تقدمت الممرضه تطعمه وغطت مكان التطعيمه وشالته غلا على طول تحضنه ولف نهار يناظر الممرضه بحده وخرجوا وفهد يبكي بحضن غلا

ركب نهار وناظر فهد:بس يابابا بس الله يكسر يدها

غلا:ليش تدعي عليها نهار ؟ ترا شغلها

نهار شال فهد بحضنه:عورت ولدي

غلا:انت بزر بعد

اخذت فهد من حضنه وشغل سيارته نهار وشغل اغاني لفهد يلعبه وهو يسوق وردت غلا على جوالها اللي يدق:هلا ملاك

لفت لنهار اللي يغني لفهد:خفض الصوت نهار شوي

صدت تناظر الطريق:معانا اطفال بالسياره ملاك ما اسمعك

ضحكت ملاك:جيبي اطفالك وتعالي عندي

غلا:ان شاء الله بغير لفهد بالبيت واذا امداني جيتكم

ملاك:يمديك يمديك تعالي نستناك

غلا:تمام

قفلت ووقف نهار عند البيت ونزلت غلا وهي شايله فهد ودخلت البيت وفصخت حجابها بتعب

جلس نهار وناظر فهد:تبي نروح عند ريمي وموج ؟ والا صديقة عمرك دانه ؟

غلا مشت تفتح الدولاب:اكيد يسبح مع ثنيان صح ؟

نهار:ثنيان يموت اذا ما حط الاطفال بالبحر

غلا:طيب خالتي وعمي بيجون ؟

نهار:مدري كان سألتي ملاك

غلا:نسيت

نهار:لبسيه زين اخاف يسخن هناك

غلا هزت راسها ونادت العامله تساعدها وخرجوا بعد وقت ومشوا للشاليه عند ثنيان وملاك

وقف نهار ونزلت غلا ودخلت وابتسمت من شافتهم جالسين برا عند البحر

وناظرت موج اللي ركضت لنهار تحضنه وشالها نهار:هلا بدلوعتي

غلا:وانا ما تبوسيني؟

ابتسمت موج وباست غلا اللي قربت منها

غلا:وش هاللون الحلو ياموج وش هالكيرلي الحلو ؟

لفت موج تناظر نهار اللي شايلها وابتسمت

مشت غلا ووقفت ملاك:غربت الشمس فاتكم الغروب

سلمت عليها غلا:المهم لحقنا

وقفت اصايل وسلمت عليها غلا:وين ريمي ؟

اصايل:دخلت مع منيف يختارون لون ايسكريم

ابتسمت غلا وجلست وناظرت ثنيان اللي قام واخذ فهد من العامله

غلا ناظرت ملاك:وين دندونه ؟

ملاك:داخل نايمه

غلا:ياحياتي اوف ياحلو البنات بس

خرجت ريما شايله قطو بيدها وركضت لنهار وصرخ نهار من شافها:هلا هلا

انحنى لها يحضنها مع موج وشالهم الثنتين بحضنه

وخرج منيف وناظره:ارحب ابو تايقر

ضحك نهار ومشى منيف لفهد اللي مع ثنيان:كيف الحال ابو نهار ؟

مارد عليه فهد يناظرهم بقلق

وخرجت العامله بدانه اللي قامت ولف منيف:جبنا لك عروستك

ضحكت غلا ولف ثنيان لدانه:ما ياخذك لين يكون كفو ابشري بي وانا ابوك

نهار:بيكون كفو لاني ابوه

ثنيان:هذا اللي ينخاف منه انك ابوه ، العرق دسّاس

ضحك منيف وابتسمت أصايل تصور نهار اللي شايل موج وريما

ولف ثنيان من دخل عقاب ولد ساري يركض ومعاه كيس هديه وضحك ثنيان:ارحب عقاب الصغير

نزلت موج من حضن نهار وحضنت عقاب وضحكت ملاك وناظرها ثنيان:ابو موج تحضنينه قدام اهلك ؟

نهار:ماتشوفكم شي

دخل ساري مع جنى اللي ماسكه ذراع بدر وابتسمت تناظر عقاب مع موج يفتح لها الهديه اللي جابها

ساري:ابلشنا يبي يشتري العاب الرمل لموج

لف منيف لريما:عزتي لك وانا ابوك

أصايل:واضح ريمي بتكون طرف ثالث

ضحكت جنى ومشت تجلس معهم وتقدم بدر لموج وعقاب يجلس معهم وجلس عقاب يلعب مع موج ومشت ريما تحاول تلعب معهم

ثنيان:بابا موج لعبي ريمي وبدر معكم

موج ناظرت ريما:لا عقاب جاب لي انا

غلا ضحكت:يكبر ويختار ريما

ضحكت جنى:اي العيال ما يصملون

نهار:شقصدك ؟

غلا:شفيك تحسست على طول ؟

نهار:اقول وش هالجو الحلو زانت الاجواء

ضحك ثنيان ولفت ملاك للبنات:خلونا ندخل داخل نسولف

وقفوا يدخلون وقعدوا العيال مع بعضهم عند بدر وعقاب وموج وريما

جلست ملاك تحط دانه بحضنها وناظرتها جنى:راجعتي الدكتوره ملاك ؟

هزت راسها ملاك:اي قالت الافضل اوقف حمل ولاده عشان العمليات

غلا:يوه

ملاك:بس عادي مو زعلانه بنفس الوقت قالت لي يمديك بعد ست سبع سنين تحاولين

أصايل:حياتي انا من بعد ريما ما تخطيت الولاده الى الان ماني قادره احمل

ضحكت جنى:وانا زيك قلت الله يخلي عقاب وبدر يكفوني انا وساري

غلا:احس انا وجنى حاسين ببعض العيال ابداً مو زي البنات، اشوف فهد ودانه بنفس السنه بس ياحلو دندون ماشاء الله

ضحكت ملاك تناظر دانه اللي بحضنها هاديه ولفت غلا من اخذت فهد من العامله وبكى على طول

أصايل:ملاك وين بتسوون ميلاد موج ؟

ملاك:هنا بالشاليه وبنخليها برا نفس ماتبي موج

جنى:خلونا ناخذ اليخت دام الجو زان

ملاك:نشوف موج وش تقرر لان ماشاء الله هي اللي تقرر كل شي بالعايله

ضحكت اصايل:اوف موج اسم الله عليها اموت عليها وعلى شخصيتها

غلا ضحكت:اي ماشاء الله فطينه تقولي ليش ما تجيبين بيبي لفهد يلعب معاه

جنى:شايله هم فهد

جلست دانه بالارض ولفت تناظر فهد اللي جالس يلعب ويعض الالعاب وضحكت له وعضت شفتها ملاك:يالخفيفه

غلا:فهد شخصيه من الصغر

اصايل:عيونها قلوب وهي تتأمله

غلا:الا صح كنت بنسى نهار عنده بطوله نهاية الاسبوع هذا بنادي عمي عقاب

أصايل:اي كلمني

ملاك:والله ؟ هو باقي يتمرن هناك صح ؟

هزت راسها غلا ونطقت جنى:والمفروض نروح نشجعه ولا كأننا نعرف انه الفايز

ضحكت غلا:المفروض

ملاك:تمام ان شاء الله نجي

أصايل:وانا اكيد ما اخلي نهار لوحده

لفت من دخلت شهد:ياهلا

ناظرت سارا اللي ركضت تحضن اصايل وابتسمت شهد:سلام عليكم

ملاك ابتسمت ووقفت تسلم عليها:ياهلا زين جيتي كان خالي مكانك

شهد:خالتي قالت بتروح قلت اجي معاها

ملاك:حياك الله

دخلت نوره:بناتي ياحلوكم

ابتسمت غلا ووقفت:ياهلا بالشيخه

ضحكت نوره وسلمت عليهم:سلمت على العيال برا والحين دور بناتي وه يازين الزين

ابتسمت جنى توقف تسلم على نوره ولفت نوره لدانه وفهد:وه ياعيون نوره وطوايف نوره

انحنت تبوسهم وناظرت دانه:جبت لك هديه هديه ياحلوها

ضحكت ملاك:ليش تكلفين على نفسك ؟

نوره:جبت للبنات هدايا معاي اختارتها سارا لهم

ابتسمت سارا:اخترت هدايا البنات انا وامي نوره والاولاد اختارهم حمد مع عزام

غلا:وه ياحلوك بس تعالي ابوسك

ابتسمت شهد:جاسر بعد جاب لهم هدايا مع خالتي

ابتسمت ملاك:بتدلعينهم

نوره:خل يتدلعون حبايبي ، ليه قاعدين انتم هنا ؟ امشوا برا نقعد بتفوتني السواليف

ضحكت ملاك:ابشري

خرجوا وناظرت نهار اللي وقف:اخواني حبايبي الكل معزوم على بطولتي بالنادي نهاية هالاسبوع والحضور مع هدايا بدون هديه مافي دخول

جاسر:هدايا وش يمكن ما تفوز

ضحك ساري:لا ضامن يفوز

نهار:هذي خالصين منها طبعاً بحضور الفال الطيب

ابتسم منيف ولف نهار لغلا:وغلاي اغلى شي بحياتي

ابتسمت له غلا ولف نهار لفهد:والتايقر حقي الصغير

نوره:انا اول الحضور وشوف يانهار ياولد بطني اذا جبت البطوله لك مني وعد

لف نهار بحماس يناظر نوره وابتسمت نوره:السياره اللي تبيها

صرخ نهار ولفوا العيال على نوره:خير ليه ياخذها ؟

نوره:ياشينكم شوفوا البنات محد فيهم حسد نهار مبسوطين له

ثنيان:وانا ماعندي بطوله طيب من يجيب لي سياره

جاسر:طيب انا اكثر عيالك خلفه المفروض لي جائزه

ضحكت شهد:خالتي نصيب جاسر نصيبي انا بعد راضين بسياره وحده

نوره ابتسمت تطالع عيالها:المشكله تطفروني واضطر اسرق من ابوكم

ضحكت اصايل:زين ابوي مو موجود يشهد على كلامك

نوره ناظرت موج اللي تلعب:موجي عيوني لها هديه كبيره عشان ميلادها

ابتسمت موج وناظرت نوره:امي نوره تعطيني هديه ؟

نوره:اعطيك روحي انتي قولي وش تبين ؟

اشر لها ثنيان تقول سياره وناظرته موج وناظرت نوره:سكوتر

ضحكوا بصوت عالي وعض شفته ثنيان وهو يضحك

ملاك:موج ماما عندك سكوتر

موج:بابا يقول

ثنيان:انا قلت سياره مو سكوتر

كشرت موج:ما ابي سياره

عقاب:عمي ثنيان انا ابي سياره

ساري:ابشر بها وانا ابوك شوف جدتك نوره قاعده توزع سيارات اطلبها

ضحكت نوره:يبشر عقاب اجيب له سياره اذا كبر

ساري:حسافه ما ضبطت

ضحك منيف من ناظرتهم ريما:امي نوره انا ابغى قطوه زي كيكي

نوره:اجيب لك حديقة حيوانات ياعيون امي نوره انتي

لفت وناظرت بدر اللي مستحي:وبدوري الخجول وش يبي ؟

بدر ابتسم وهز راسه بالنفي

جنى:ياحياتي وه

ضحك جاسر:خجول والله

حمد:ابوي عزام يمد لسانه شوفه

جاسر:خله يتحول ضب اللي يمد لسانه

صرخ عزام وضحك نهار:وش هالاب

نوره:شغلي لنا شي نسمعه مع هالشاهي وهالقعده الحلوه ياملاك

ابتسمت ملاك:ابشري

مدت دانه لثنيان اللي اخذها بحضنه ومشت ملاك وناظرت الاطفال نوره يلعبون:تكبروني بس احبكم

ابتسم منيف وناظر نوره:لك طولة العمر ياخالتي تكبرين وتشوفينهم كبار ويعيشون تحت جناحك

ابتسمت نوره من حنيّة منيف:والله انك حبيبي يامنيف

رفع كفوفه جاسر يصفق من اشتغلت اغنيه لطلال مداح

وانطربت نوره تهز فنجان الشاهي مع اوتار المقدمه

ومشوا البنات يدخلون ويجلسون معهم

جلست ملاك بجانب ثنيان اللي يلعب مع دانه اللي بحضنه

ابتسمت نوره تهز كفها:ياليل دانه دان دانه

ضحك ثنيان اللي يرقص دانه ولفت نوره لجاسر اللي يغني:تصدق والا احلف لك ؟

كمل ساري:عجزت بلساني اوصف لك

لف منيف يغني مع اصايل:نعيم الحب في وصلك وانت كريم من اصلك

صفق نهار وابتسم ثنيان ولف لملاك:وشوف قلبي على يدي وهو اغلى ما عندي

ملاك ابتسمت:وتبغى زياده في حبك أجيب لك قلب ثاني منين ؟

صفق نهار ولف من دخل عقاب عليهم وابتسمت نوره:يقولوا قلوبهم تابت من الآهات ، واحنا وعودنا طابت على الاوقات

ابتسم عقاب ومسك صدره يناظرهم وهو مبتسم

ووقف ساري يبعد لعقاب يجلس جنب نوره وقعد بجانبها ومدت له الفنجان نوره تغني مع طلال مداح

وابتسم عقاب يناظرهم جالسين مع بعضهم

'

شايله فهد اللي لابس كاب على راسه ونظاره وتأشر بكفها لنهار اللي يتدرب على الخيل

ابتسمت تصوره ولفت تجلس:الجو خيال

هز راسه عقاب يناظر الحضور والاحصنه بالنادي

لفت موج لثنيان:نهار يلعب على الحصان ؟

ريما ناظرت موج:اسمه هورس

منيف:بطله ريمي

ابتسمت ريما وناظرتهم موج:بس انا قلت صح ، ماما

ملاك:صح حياتي انتي بالعربي وريمي بالانقليزي

عقاب الصغير:بس موج صح لانه عربي

ساري:انت اثقل بس ونرتاح

ضحك جاسر ولف لشهد اللي جالسه وبحضنها عزام ياكل وتأففت:لا تعدمني بالجوكلت

جاسر:عزام لا تاكل بحضن امك تعدمنا كلنا

حمد:ابوي انا جالس اكل لوحدي

شهد ابتسمت لحمد:شاطر حبيبي انت

ابتسم حمد وناطر شهد:امي عزام ما يعرف لانه صغير

لف جاسر لشهد اللي مبتسمه لحمد وابتسم لان حمد يحس مع شهد بشعور الامومه

لف من نطقت نوره:وينهم يبدون ؟ زهقنا

منيف:الحين يبدون

ابتسمت أصايل من حطوا صورة نهار بالشاشه وصرخوا موج وريما

ضحك عقاب يناظرهم ولف ثنيان:حتى الاطفال مضبطهم

ضحك جاسر ولفت غلا تناظر البطوله تبدأ وتوترت تجلس

لفت ملاك لدانه اللي جالسه بحضنها وتناظر بهدوء وابتسمت

وخرج نهار بحصانه ووقفوا يصفقون وصفر باصابعه منيف

وصرخوا الاطفال وضحكت غلا تناظره بدأ يقفز بالحواجز بوقت قياسي وبمرونه وخفه

ابتسمت نوره:استودعته الله حبيبي

دخل داخل بحصانه يستكملون المسابقه ولفت موج تحضن ثنيان وجلسها بحضنه وهو يناظر باقي المتسابقين

وصلوا لتتويج الفائزين ولف نهار يناظرهم من بعيد

ووقفوا العيال عشان يسمعون زين

نوره:ولدي الاول

عقاب:اكيد محد يغلبه

ابتسمت غلا:يالله نهار نبي السياره من خالتي

ضحكت نوره:يبشر بها اي والله

أصايل:توتر متى يعلنون

صرخوا من قالوا اسم نهار اللي ركض بالملعب وضحك ثنيان اللي شايل موج وتضحك

ومشى منيف بسرعه ينزل من المدرج ويدخل لنهار وضحك نهار يحضنه بقوه

ابتسم عقاب ووقف يصفق وهو يناطر نهار ومنيف

ابتسمت غلا من اشر لها تجيه بفهد

ونزلت ومدت له فهد وحطه فوق كتوفه وصورتهم غلا ولف منيف:عطيني انا اصوركم

ابتسمت غلا وتقدم نهار يحط ذراعه فوق كتوف غلا وابتسموا من صورهم منيف

ريما لفت لهم تضحك:نهار فاز

لف عقاب وابتسم يناطرهم ولف لملاك:هاه الشاهين تبين تجربين السلاح والا نسيتيه ؟

لف ثنيان لملاك:لا لا ما تنسى وعدتني توريني ونتحدى بعض

جنى:انتبهي ملاك تكفين

ملاك:ماعليك

وقف عقاب ونزلوا من المدرجات ومشت موج بجانب ثنيان وملاك تمشي بجانب عقاب

تقدمت أصايل خلفهم ونزلوا سوا وابتسمت ملاك تناظر السلاح وتقدم عقاب:هاتي دانه

اخذ دانه من حضنها وابتسمت تناظر ثنيان:اذا فزت وش تعطيني ؟

عقاب:اكثر طلقات بالهدف انا اللي بعطيه

ابتسمت نوره:اي ياعميد عقاب نبي من العيار الثقيل

جاسر:طيب المشاركه بس لثنيان وملاك ؟

شهد:تكفى جاسر ادخل تحدي معهم ما فزنا بشي

ضحك جاسر:المشكله ما اعرف له

حك شاربه ثنيان يناظر ملاك ولفت ملاك لموج:ماما بعدي شوي

موج:مين يفوز ؟

ثنيان:من تشجعين ماما والا بابا ؟

ابتسمت موج وناظرتهم الاثنين:كلكم انتوا اقوياء

ضحكت اصايل ومسكت كف موج بجانب ريما وتقدم منيف مع نهار

منيف:وش السالفه ؟

اصايل:ابوي حاط تحدي لثنيان وملاك

نهار:على وش ؟

دخل يده بجيبه عقاب يطلع دفتر الشيكات وصرخوا يضحكون

وابتسمت ملاك تناظر ثنيان:ياويلك

جنى:فكروا بايجابيه حلالكم واحد

ابتسم ساري:خل نتقاسمه كلنا على هالتعزيز

عقاب:هيا استعدوا

لفت ملاك وملت الفرد ووقف ثنيان يرفع الفرد بكفينه

وابتسمت نوره تراقبهم ونطق عقاب:اطلق

طلقوا الرصاص متتالي وابتسم ثنيان من خلص الطلقات ولف لملاك:جبتيها ؟

لفت ملاك من تقدم الورق بالهدف لهم

وقدموا كلهم يشوفونها وابتسم عقاب:والله الشاهين ما نست

ابتسمت ملاك وناظرت ورقة ثنيان:في طلقه خارج الهدف ، تحسبها ؟

لفت لعقاب تنتظر جوابه وضحك ثنيان وعض شفته يناطر ملاك

منيف:الفوز لملاك بدون حيره

عقاب:الشيك من نصيب بنت مساعد

ضحكت ملاك وصفقوا لها وركضت موج تحضنها وابتسمت ملاك

رفع كفه نهار يدق تحيه لملاك وضحكت ملاك

وتقدم ثنيان لها وابتسم:منافس شرس

ابتسمت له ملاك واخذت دانه من حضن عقاب ومد الشيك لملاك وضحكت

وناظرت الشيك اصايل وشهقت:طيب غش انا بعد ابي من هالغنايم

منيف:عمي لو نسوي سباق انا واصايل على شيك ينفع ؟

ضحك نهار وابتسم عقاب:دام المكان فاضي هنا تسابقوا كلكم

ما امداه يخلص كلامه الا ركض جاسر ولحقه منيف بقوه وركض نهار مع ساري وثنيان ولحقوهم عقاب وبدر الصغار

وصفقت جنى تضحك:يالله عقاب جونيور وبدر

وضحكت غلا:نهار ما يوفر

اصايل ضحكت:حتى مع السياره يبي شيك

لفت لريما:اركضي ريمي ورا بابا روحي

لفت ريما لموج وركضوا خلفهم وضحكت ملاك تناظر دانه:وانتي يانونو تركضين معاهم ؟

غلا ناظرت فهد:اي والله متى يركضون

'

ماسك كفها وشايل فهد بيده ودخل الاسطبل وابتسمت غلا:هذا حصانك ؟

نهار:فرس

لفت عليه غلا وتلاشت ابتسامتها:حتى الحيوانات تاخذها إناث ؟

تهار:علاقتي مع الاناث حلوه شسوي ؟ اندمجت معها

رفعت حاجبها غلا وابتسم نهار:بس محد يغلب الفرس اللي عندي ، كنت اقولك تايقر بس الحين فرس طلعتي كل الحيوانات

ضربته غلا وضحك نهار ، ابتسمت غلا وتقدم نهار لها وباس خدها ومدت كفها تلمس الفرس

لف لفهد:شوف الفرس

لفت غلا:حبيبي خايف

نهار:لا التايقر ما يخاف اذا كبرت بتصير تركب حصان وتصير زي نهار

غلا ابتسمت:نهوري تكفى اركب مع فهودي اصوركم سوا

نهار لف عليها وعض شفته:لا تناديني نهوري هنا استفرد فيك

ضحكت غلا ومشى نهار وعطاها فهد وطلع الفرس من الاسطبل وركب ومدت له فهد واخذه

وابتعدت غلا وابتسمت تصورهم:فهودي شوف ماما هنا

ابتسم نهار :قولي لي انا بعد نهوري

ضحكت غلا وناظرت نهار:أحبك والله

عض شفته نهار وابتسمت غلا تصورهم

نزل نهار ومعاه فهد وخرج مع غلا ورفع ذراعه على رقبتها:مشينا السياره ناخذ فره مع الحب

ضحكت غلا ومشت معاه وخرجوا من النادي وركبت بجانبه وركب نهار وناظر فهد اللي بحضنه:متى تصير رجال وتخلينا ناخذ راحتنا ؟

غلا:حطه بالكرسي ورا نهار

لف نهار وحطه بالكرسي وبكى فهد والتفت نهار:تبي تقعد بحضن امك لكن تبطي دوري عاد

ضحكت غلا:مو صاحي

نهار حرك سيارته وهو يغني ويسوق وناظرته غلا:نهار

لف عليها يناظرها وابتسمت من التفت:تدري ليش حبيتك ؟

نهار:اي ادري من ما يحبني ؟

كشرت غلا:ياشينك

نهار ضحك ومسك كفها:قولي قولي

غلا ناظرته وابتسمت:تضحكني

نهار:الحين تاركه جمالي وطولي وسوالفي وكل شي وما حبيتي غير خفة دمي ؟

غلا:بس لو تبطل هالغرور

نهار باس كفها:مغتر فيك

وقف عند الدرايف ثرو للكوفي حقه وابتسم للباريستا:هات احلى ايس دريب لاحلى زوجه بالعالم

ضحكت غلا وابتسم الباريستا

نهار:اذا ماجانا مضبوط بفصلك

ضحك الباريستا:تبشر

ابتسم نهار ولف لغلا اللي تضحك

'

ابتسمت أصايل وهي لابسه فستان وتنتظر منيف ودخل منيف البيت وناظرها وابتسم يناظر الطاوله وشكلها وضحكت اصايل:اليوم سهرانه عشانك

ابتسم منيف وحط مفتاحه وتقدم لها:غريبه ريما ما ازعجتنا

اصايل:نومتها

منيف تقدم لاصايل وانحنى وميل راسه وباس خدها وابتعد وناظرها من قريب:وليه هالاستقبال من زوجتي الحبيبه ام ريما ؟

اصايل:خمّن

عقد حاجبينه منيف:لا هو يوم ميلادي ولا ميلادك

ابتسمت اصايل وكمل منيف:ولاهو ميلاد كوتي ويامور وعيالهم

اصايل:لا

منيف:لا تقولين مناسبه مهمه ونسيتها

اصايل هزت راسها بالنفي:ولا مره نسيت شي يخصني

ابتسم منيف ونطقت اصايل:اجلس طيب واقولك

جلس منيف وعضت شفتها اصايل وشغلت التصوير بجوالها وناظره منيف:في تصوير يعني

اصايل هزت راسها وغمض عيونه منيف من مدت له هديه وضحكت:افتح عيونك

منيف اخذ الهديه وفتح البوكس وتلاشت ابتسامته من شاف تحليل الحمل ورفع عيونه لاصايل اللي ضحكت تغطي فمها

وشهق يضحك ووقف وحضنها بقوه وضحكت وهي حاضنته

منيف:قولي والله ، قولي والله مساعد بيجي

هزت راسها :تخطيت ولادة ريما خلاص صار وقت يجيها اخ

ابتعد منيف عنها ومسك وجهها:اللي تطلبينه يجيك حتى لو نجوم السماء

ابتسمت اصايل تناظر فرحة منيف وضحك منيف:بنصير عايله كبيره

ضحكت اصايل ترجع تحضنه وابتسم منيف

'

جالسه على المكتب وتشتغل بلابتوبها ورفعت عيونها من دق الباب:تعالي

ابتسمت موج ودخلت:يصير ادخل ماما الحلوه ؟

رجعت ظهرها لورا ملاك وفصخت نظارتها:يصير

اخذت نفس موج:صحباتي بيسوون بارتي صغير ببيت غنى صاحبتي تسمحين لي اروح ؟

ملاك:موج انتي مو استأذنتي من ابوك تطلعون مع صحباتك اليخت حق ابوك ؟

موج:اوكيه قلت بالويكند بس بكره غنى قالت نسوي بارتي صغير

ملاك:طلباتك كثرت موج وما بقي شي على تخرجك من الثانوي وش هالطيش ؟

موج:ماما ننبسط مافيها شي

ملاك:تروحين مع دانه اوافق

موج كشرت وتقدمت للمكتب:امي ليش لازم دانه معاي ؟ ترا مو جوها

ملاك:اخر كلامي بدون دانه مافي

عقدت حاجبينها موج بانزعاج ولفت من دخل ثنيان وابتسم:احلى استقبال

موج:لو ما عكرت مزاجي ماما

فصخ شماغه ثنيان ولف لموج:وش صار ؟

ملاك:بنتك ما بتعقل

ثنيان جلس وناظر موج:علميني

موج:بروح مع صحباتي ببيت غنى نسوي بارتي صغير وامي قالت اروح مع دانه

ثنيان:وش المشكله لو راحت دانه ؟

موج:بابا دانه مو جو صحباتي وماراح تنبسط اصلاً

ثنيان:هذا الكلام تقوله دانه مو انتي تقولينه عنها

موج:بابا بليز

لف ثنيان لملاك اللي تناظرهم:وش قالت ملاكي ؟

ابتسمت ملاك واشرت له بحواجبها ولف ثنيان لموج:سمعاً وطاعه

تنهدت موج تناظرهم وخرجت من الغرفه ولف ثنيان لملاك ورجع ظهره للخلف ينسدح بتعب

ووقفت ملاك:خلصت شغلك ؟

لف ثنيان يشوفها تجلس على طرف السرير وهز راسه:مؤتمر خفيف

رفعت كفها لشعره وغمض عيونه ثنيان:لو اعيش وكفك على شعري سنين ما اشتكيت

ابتسمت ملاك:دانه ميلادها قريب

فتح عيونه ثنيان وناظرها:دندون ذوقها صعب وش يرضيها الحين ؟

ضحكت ملاك واخذت جوالها:اسألها

جلس ثنيان من دقت ملاك على دانه عشان تجي ودقايق دقت الباب ودخلت وابتسمت:والداي الاعزاء

ثنيان ابتسم:تعالي تعالي

ابتسمت وجلست بجانب ثنيان:تسالني عن ميلادي صح ؟

ضحكت ملاك وهز راسه ثنيان:دامك ذكيه وخمنتي اكيد فكرتي

دانه:فكرت

ثنيان:وش قررتي ؟

دانه:رحله بحريه باليخت مع الموج الكبير

ضحك ثنيان وحضنها من الجنب وابتسمت دانه:عشانك تحب رحلات البحر

ملاك:بس هذا ميلادك انتي علمينا انتي وش تحبين ؟

دانه:انا احب ماما وبابا

ابتسمت ملاك ولفت دانه لثنيان:امي نوره بتجي تاخذنا انا وموج المعهد

ثنيان:امي صامله تعلمكم بيانو ؟

دانه:حلو انا عجبني بس موج تعاني من مشاكل صغيره

ملاك:اهخ ياموج اهخ يالعناد

ثنيان:طيب اذا وصلت امي علميني

هزت راسها دانه وخرجت من الغرفه ولف ثنيان وفتح ذراعينه لملاك وحضنته ملاك وحطت راسها على راسه وهي واقفه وهو جالس على السرير

ثنيان:افضل مشروع عشته معك مشروع الأبوه والأمومه

ابتسمت ملاك:طيب يا أفضل أب بكمل شغلي والقضايا اللي عندي ممكن ؟

رفع راسه لها:مافي امل تنوميني ؟

عضت شفتها ملاك:لا يسمعونك بناتك

ضحك ثنيان ومشت ملاك تجلس على المكتب

وقف ثنيان وخرج من الغرفه ونزل وناظر موج ودانه جالسين:ما جات امي

موج:قالت بالطريق

دق جوال موج ووقفت:جات

رفع ذراعه ثنيان وفتح جنحانه يحاوط موج ودانه وخرج من البيت وناظر سيارة السواق وفتحت الشباك نوره:جاي تبي تتعلم بيانو ؟

ابتسم ثنيان:امي ليه هالتعب ؟ ارتاحي بالبيت

نوره:البيت يخليني اصدق اني عجوز خلني اروح مع هالبنات الحلوات يصغروني شوي

ركبوا السياره وابتسمت نوره من سلموا عليها وناظرهم ثنيان وابتسم:لا تتعبون امي

نوره:ما يتعبوني باقي بمر ريما

ثنيان:الله يعطيك الصحه والعافيه

ابتسمت نوره وقفلت الشباك ومشى السواق لفت على دانه وموج:وش قال ابوك على روحتك لصديقتك ؟

موج:وافق بس امي اشترطت تجي معي دانه

نوره:اي خذي اختك انبسطوا سوا

دانه:ما يعجبوني صديقاتها

نوره:ماعليه روحي لا تخلين اختك

وقف السواق ولفت موج:انا بناديها

نوره:ادق عليها وتجي خلك

ما كملت كلامها ونزلت موج تاركه الباب مفتوح ونطقت دانه:عقاب هنا

ضحكت نوره من دانه:قلتي عقاب جونيور موجود اجل

لفت تناظر موج اللي دخلت البيت ورفعت صوتها:ريما

لفت اصايل:موج !

ابتسمت موج من ناظرت عقاب وفهد وبدر قاعدين مع مساعد

لفت اصايل تناظر العيال ورجعت ناظرت موج:ما بتسلمين على عمتك ؟

لفت موج وابتسمت وسلمت عليها:كيفك عمه ؟

اصايل:حمدلله كل ما طولتي علينا تحلوين ياموج ؟

ابتسمت موج وابتسم عقاب يناظرهم من بعيد وخرجت ريما:امي انا بروح مع امي نوره

اصايل:اي قالت لي

باستها ريما ومشت تخرج مع موج ووقف عقاب:عمتي انا بعد بطلع

فهد وقف:برجع معك

اصايل:عقاب انتبه من سواقتك بالله

عقاب ابتسم:بدخل الجامعه عمتي تخافين علي من وش

مساعد:من طيشك

عقاب:انكتم انت

اصايل:تهاوشوا قدامي بعد

فهد:محشومه عمتي

اصايل:اجل روحوا عني وادرسوا لمدارسكم

خرج عقاب مع بدر ولحقهم فهد

ابتسم فهد من شاف سيارة نوره وفتحت الشباك:ما بتسلمون ؟

ابتسمت دانه تناظر فهد اللي واقف بعيد وتقدم عقاب لنوره وباس يدها وناظر موج:مشتاقين لك

نوره ضربت جبينه:طالعني انا

ضحكت موج وابتسم عقاب:والله مشتاقين لك

نوره:اي وشلون ابوك وامك ؟

عقاب:حمدلله كلنا بخير

ناظرت بدر وفهد:وانتم وش هالطيش روحوا دوروا لكم نادي اسبحوا والا اركبوا احصنه الفراغ مو زين

فهد:تكفين امي نوره الا الاحصنه ابوي خلقه يدورني عشان نروح النادي

نوره:احسن ولا تبطون على بيتنا جدكم يتشرّه

هز راسه عقاب:ابشري

نوره:الله يعين كلاً صار ببيت

ريما:امي نوره خل نمشي

نوره:اي زين توكلوا انتم

ابتعد عقاب وابتسمت موج تناظره يناظرها وحرك السواق

وقف عند المعهد ونزلت نوره مع البنات وناظرتهم:اقول بنات عسى شنطتي زينه ؟

ريما:تهبل امي نوره

دانه:بس مو مكان المعهد امي نوره احضري فيها عرس

ضحكت موج:تهبل ماعليك منها

نوره:وش يعرفكم انتوا اصلاً ، امشوا ابتلشت بهالمراهقات

دخلوا المعهد واستقبلتهم مدربة البيانو:اهلين طنط نوره شو اخبارك ؟ شو اخبار البنات الحلوات ؟

نوره:ياحلوك ياصوفيا زينه زينه اقعدي اسولف معك

ابتسمت صوفيا:بدنا نبلش تدريب مع البنات

قعدت نوره وحطت رجل على رجل:اي بس عطيني قهوه من يدك انطرب مع العزف الحلو

صوفيا:تكرمي

'

ابتسمت من دخلت نوره وخلفها عامله معها اكياس:خالتي !

نوره:رجولي ياملاك تعبت علي اصبري اريح

ضحكت ملاك وانحنت تسلم على نوره:ماقصرتي على الهدايا كان يكفي جيتك

نوره:مني ومن عقاب هو جاي وراي

لفت ملاك وناظرت عقاب اللي دخل بعكاز وابتسمت ومشت له:أعز من تعنى

ابتسم عقاب:وين البنات ؟ وين الخريجه ؟

ضحكت ملاك:جايين تعال استريح

مشى عقاب وجلس بتعب على الكنب

خرج ثنيان اللي شايل كيكة تخرج موج وابتسم:يالله حيّ ابو ثنيان وام ثنيان

لفت نوره:الله لا يحرمني هالحسّ

حط الكيكه ثنيان بالطاوله الكبيره اللي مزينه من الخلف بإطار يمتلي ورد

ومشى يسلم على راس عقاب ومشى لنوره:شلونكم ؟

عقاب هز راسه:وين اخوانك ؟

ثنيان:جايين مسافة الطريق

رفع صوته ثنيان:دانه تعالي

خرجت دانه وابتسمت:ابوي عقاب ؟

ابتسم ثنيان ومشت بسرعه دانه وحضنت عقاب وابتسم:ياهلا ياهلا

دلنه:اشتقنا لك

عقاب:لو اشتقتي كان سيرتي علي

دانه:والله ادرس ماعندي وقت وحتى وقت فراغي امي نوره ما تقصر تشغلني

نوره:تعالي سلمي علي

ضحكت دانه:قبل شوي كنا معاك انا وموج

ملاك عضت شفتها:سلمي

مشت دانه وحضنت نوره وابتسمت ملاك تناظرهم

لفت ملاك وابتسمت من دخول ريما مع منيف وأصايل ومساعد:ياهلا ياهلا

منيف ابتسم ووقفت ملاك وحضنته وابتعد عنها:شلونك ؟

ملاك:حمدلله بخير مشتاقين لكم

ابتسمت اصايل وسلمت عليها وتقدم منيف لثنيان وسلم عليه

ضحكت ملاك تحضن مساعد:ولدي ولدي

ضحك مساعد وسلم عليها:شلونك عمتي ؟

ملاك:بخير ياحبيبي

لفت لريما وسلمت عليها:وه ياحلو البنات وش هالريحه الحلوه

ابتسمت ريما:تسلمين

لفت دانه من دخل فهد مع نهار وغلا وابتسمت وصدت وناظرت نوره اللي تراقبها وبلعت ريقها بتوتر

تقدم فهد وابتسم:شلونك عمي ثنيان ؟

ثنيان ابتسم:كل يوم تكبر انت ماشاء الله ؟

ضحك نهار ولف نهار لملاك:ادق تحيّه ؟

ملاك:ما اتنازل

دق لها تحيه وضحكت ملاك وسلمت على غلا:كيفك ؟

غلا اشرت على بطنها:بوحام جديد

ملاك:الله يعينك

فهد:امي وابوي فجأه قرروا يطفشون مني ويجيبون لي ورع ثاني

نهار:ماهو لك الورع لي انا وبعدين ابي بنت معد ابي ورعان مثلك

هز راسه فهد:مقبوله منك يالغالي

ضحك ثنيان :شد حيلك وتخرج انت بعد

فهد:مطول دعواتك عمي

نوره:يالفصعون مطول اجل ؟ اقول تخرج خلنا نشوفك عريس

ابتسم فهد بإحراج وصد لثنيان اللي رفع حاجبه وضحك نهار:وين الباقين ؟

ثنيان:وراك جايين

لف نهار لدانه:دندون ما تسلمين يعني ؟

ابتسمت دانه وسلمت على نهار وباس كفها:وش هالزين والحلاوه انا صرت اغار على بنات اخواني

ريما:بس بنات اخوانك ؟

نهار رفع سبابته على منيف:تراه اخوي بعد

ابتسم منيف لنهار وضحكت ريما تناظر منيف

دخل ساري وتنحنح:يا اهل البيت

ثنيان:تعال تعال يالشايب

ضحك ساري ودخل:الشيبان سبقونا

نوره:ياشينك ياساري وش شيبانه يمكن ابوك بس

ضحك عقاب وتقدم ساري يسلم على ثنيان وابتسم يناظر عقاب الصغير وبدر:هلا بالابطال

عقاب سلم عليه:شلونك عمي ؟

نوره:يعدل العلاقه

ضحك فهد على عقاب اللي انحرج ومشى يجلس بجانب عقاب الكبير وابتسم له عقاب

تقدمت جنى بالهدايا:عسى ما تاخرنا !

ملاك:لا باقي وراكم شهد وجاسر

نوره:يومهم بسنه

غلا:الله يعينها عندها ثلاثه انا واحد وشيبنا ياخالتي

فهد عض شفته:طيب اسرارنا العائليه يالغاليه

دخل جاسر مع شهد وخلفهم حمد وسارا وعزام

وابتسمت ملاك تناظر سارا:ماشاء الله صايره عروسه سارا

ضحكت سارا وسلمت عليها ولفت ملاك لشهد:اخيراً جيتوا

شهد:لابد من التاخير اذا عندك اولاد

فهد:من يوم وصلنا وانتم تتنمرون على العيال

نوره:لان البنات احسن منكم

ضحك نهار:خذها من امي بصراحه احنا تعودنا

شهد جلست:اي وين عروسة الليله

نوره ناظرت عقاب الصغير:لا تقولين عروسه ينخفض الضغط عند بعض الناس

ضحكت جنى تناظر عقاب اللي ناظر ثنيان اللي التفت عليه ورفع حاجبه وهو يضحك

ملاك:دقايق اناديها

مشت ملاك ودخلت ودخلت غرفة موج:موج

موج لفت وهي تفتح شعرها:خلصت والله خلصت

ملاك:كل اعمامك وخالك منيف تحت طولتي

موج ابتسمت ولفت لملاك:كيف شكلي ؟

ملاك ابتسمت:قمر

موج:لبسيني كاب التخرج

تقدمت ملاك ولبست موج الكاب وعدلت شعرها وحضنتها

مسكت يد موج ومشت خرجت وابتسمت موج من ناظرتهم متجمعين عند الجلسه قدام البحر

وصفقوا لها وضحكت موج وتقدم ثنيان وحضنته موج بقوه

ابتسم ثنيان:مبروك ياموج روحي مبروك وانا ابوك

ابتسمت موج وباست خده ومشت تسلم على اعمامها ونوره وعقاب

وقفت ريما وحضنتها بقوه موج ولفت من ناداها ثنيان:تعالي شوفي كيكتك

وقفوا يجلسون على الطاوله وابتسمت موج لان ملاك تصورها ومدت كفها لثنيان ووقفت يصور معها

ركضت دانه وحضنت ثنيان مع موج وصورتهم ملاك

لفت موج وناظرت عقاب الصغير بتوتر وابتسمت له تناظر ابتسامته

ولفت نوره:اشم ريحة الحب قبل النيه

بدر:شمي لي حب حياتي انا يا امي نوره

ضحك فهد:انا وين نيتي يا امي نوره

نوره:انت ؟ اهخ بس يانهار الصغير

نهار:حوالينا ولا علينا يارب

غلا:اذا في فضايح ياخالتي سمعيني خل اطلع وحامي عليه

فهد:الا ام التايقر ما تزعل

وقف فهد وباس راس غلا:انتي بس خليك مرتاحه وراضيه علي وعلى ابوي

غلا:ولد ابوك

ضحك نهار وغمز لفهد وجلس فهد

ابتسمت موج اللي حاضنه ثنيان من الجنب:بهذي المناسبه حابه اقول كلمه صغيره

لف ثنيان يناطر موج وابتسمت ملاك تحضن كفوفها ببعضها

موج ابتسمت وناظرت ملاك:اشكر اعظم محاميه بالعالم كلها واحلى ام بالدنيا على تعبها معاي ووجودها بحياتي اللي فرق كثير ، ولولا وجود ملاكي وملاك عايلتنا ماكان كنا بخير

ابتسمت ملاك بعيون تمتلي موج وهي تناظر نظرات موج لها

وكملت موج:انتي احسن ام يتمناها اي شخص بالدنيا واحبك مره

ضحكت ملاك تمسح محاجر عيونها ومشت موج وحضنتها وابتسمت موج وابتعدت عنها ولفت لثنيان:تعرف ان تجيني غصه اذا تكلمت عنك ؟

ضحك ثنيان:اجل مابي تبكين

موج مسكت كفه:لا لازم

ابتسم ثنيان وهو شاد على كف موج وناظرته موج تحاول ما تبكي:شكراً يا احن بابا بالدنيا يا ادفى موج حضني وكان سندي بكل وقتي وساعدني وحاوطني دايم بحنيته

ابتسمت ملاك تناظر ثنيان ومفارق شعره اللي بدت تظهر عليها لون البياض

نزلت عيونها ملاك تخفي دموعها وابتسمت موج تكمل:وشكراً لانك عطيتني انا ودانه افضل هديه بحياتنا كلها ، وهي حبك لماما ماعمري شفت ماما زعلانه وحزينه وهي جنبك ووجودك حوالينا كلنا كان حنون ما يتجرأ شي يعورنا

عضت شفتها دانه عشان ما تبكي وابتسم ثنيان لموج يناظرها

ولف منيف لملاك ومد لها منديل وضحكت تمسح دموعها

تقدم ثنيان وباس راس موج وحضنها وابتسمت موج ولفت تناظر دانه:دندون

ضحكت دانه وكملت موج:اروع اخت تشاركني حياتي واسراري رغم انها ما تشبه شخصيتي بس كانت دايم معاي ولو ما تهاوشنا سوا بيوم وبابا اصلح بيننا ما احسها اختي

ضحكت دانه وابتسمت موج:وشكراً لامي نوره حبيبتي ونور بيتنا كلنا لانها الجندي الخفي والبطله الخارقه اللي تساعد كل بيوت اعمامي

ضحكوا وناظروا نوره اللي ابتسمت ولفت موج لعقاب:وشكراً لجدو الحنون والله يطول بعمره

ابتسمت بدلع:وشكراً لاعمامي وخالو منيف وعمه اصايل وكل خالاتي الحنونات

ضحكوا يصفقون لها وابتسمت موج ووقف منيف وحضنها وابتسمت له تحضنه:عقبال الجامعه ان شاء الله

موج:انا وريما سوا

ابتسم منيف ولف لريما اللي ضحكت

نوره:اي موج بتبكينا وانا ما احب ابكي ، شغلي لنا ياملاك شي نسمعه على هالطاوله الحلوه

شغلت الاغاني ملاك ومشت تجلس على الطاوله معهم واندمجوا ياكلون

لفت اصايل على منيف وابتسمت له:رد الزياره ؟

كانت تسأل عن المقدمه للموسيقى وهز راسه منيف:رد الزياره

رفعت فنجانها نوره:رد الزياره علينا

ابتسم عقاب يمسك كف نوره يرقص بكفها

ورفع ذراعينه نهار يغني:ماعدت اقوى فراقك

وغنوا معه اخوانه:اكثر من اسبوع

ابتسم ثنيان يهز راسه لدانه وموج:رد الزياره رد الزياره

لفت موج لعقاب الصغير وابتسمت تناظره ونزلت عيونها من شافته يناظرها

نوره:من يوم وادعت زولك والقلب ملتاع ، الحب سلطان امره مقضي ومسموع

ابتسموا يغنون سوا:ما في دروب المحبة حاجز وممنوع ، حاجز وممنوع

رفعت عيونها ملاك لمنيف اللي يناظرها وفهمت نظراته والامتنان لوجوده وسط الحضن الكبير بهذي العايله

وابتسمت ملاك من لمس كفها ثنيان ولفت عليه تناظره يشيل حنية الدنيا كلها بقلبه بدون يشكي وكأنها أنحكم عليها سنين تعيش في لهب يشتعل ما ينطفي يحرقها ولا يرحم عشان بيوم تحس بقوة الموج وكيف ان الموج قادر ، قادر يطفي اللهب

'

لأن الكاتب قلمه سلاح ويحمل عباءة الواعظ ومحبرة معلم ..

النصيحه الأبديه ؛ لا يغلبك اللهب ، لا تحرقك نار صنعتها بيديك لأن اللهب غير أنه يحرق ! يمنع كل أفراحك عن الشَوف وكأن عيناك تُحرم من البهجه ،

حارب رماد الماضي بربيع الحاضر ولهفة المستقبل ، إعشق الشمس وتلهف للشمس ولأول نور الفجر ،

بحجم ما تعيش استثمر بعائلتك لإنها الجذع الثابت الذي لا يبتر ، واصنع الضحكه وسطهم وكُن خفيف ظل وحنون ، لا يتحتم عليك ان تكون أفضل شخص في الحكايه لكن على الاقل لا تكن الاسوأ ، لا تُعطي بإسراف ولا تندم على عطائك ولا تنتظر جوابك ، سوف يلتهم اليأس بعض أملك لا تستلم له حاربه ، اسعَ بالدنيا سبط البنان ممتلئ بالحنان ، توّاق للعيش حتى ساعة معانقتك للتراب ،

تم بحمدلله ختام روايتي الثاني - غرورك اللي علّم الطاووس نفش ريشه -

قصة هذه الروايه من وحي الخيال فإذا وجدتم أي تشابه بين أشخاصها وأحداثها وبين أشخاص وأحداث من الواقع ، فهو مقصود .

النهايه

٢٠ - ٧ - ٢٠٢٣ م

شروق