تحميل رواية «غرورك اللي علم الطاووس نفش ريشه» PDF

خرج من حمامه جاسر وناظرته متجاهلها ولا كأنها موجوده ولاقدرت تنطق بكلمه من سكوته ، ودها يتكلم هو وتفهم وضعها وحالها وتفهم اللي بيصير

لكنه ساكت ويتعامل معها كأنها جماد بالغرفه ما يحرك ساكن

مشى يرمي منشفته ويفتح اللحاف بيستعد للنوم ونطقت شادن:وأنا ؟

جاسر ناظر المخده يعدلها:نامي بحضني وين ينامون العرسان ؟

ناظرته يسخر وراسم على ثغره ضحكة سخريه ولف عليها:بجهنم ما يهمني

وقفت شادن بربكه ونطقت:بتعاملني كذا يعني ؟

جاسر:بتلوميني على معاملتي ؟

شادن:على الاقل قدّر اني ببيتك الحين

جاسر:ماهو بكيفي ببيتي ، جايبك لمصلحتي والا لا انا ولا انتي بيينا بيت وشراكه اصلاً

شادن سكتت وكمل جاسر:وحده سرّاقه بايعه ضميرها عشان تخرّج اخوها القاتل من السجن بوشو تهمني ؟

بلعت ريقها تخفي غصتها وكمل جاسر:وبنت عمك الشيطانه بفضحها لكن بعد ما تخلص حاجتي منك وأزيح عن راسي مشاكلي

شادن:وماراح تنسى منصور اكيد

جاسر:ترا أذيتيني انتي وابوك كل شوي منصور ومنصور تراه قاتل ويستاهل اللي يصير فيه وانا بكيفي بطلعه ماهو عشانك ولا عشان ابوك ، وبطلعه عشان يفضح بنت عمك عند اهلي بنفسه

سكتت شادن تناظره برعب وابتسم جاسر : أخوف صح ؟ اي وماشفتوا شي انتي وبنت عمك هذي

وانسدح يكمل:طفي النور جنبك

سكتت تناظره يغمض عيونه ولفت تطفي النور عشان تخفي دموعها اللي نزلت من خوفها وربكتها وتصرفها ومن وجودها هنا بينهم ومن طاري منصور اللي ناداه بالقاتل ومن ملاك ونظراتها لها ومن ابوها اللي ضحّى فيها عشان منصور ولا اهتم لمشاعرها

'

جلس بالطاوله مالقي ملاك عليها وسكت يناظر الاكل ونطقت نوره:وين ملاك مانزلت معك ؟

ثنيان:عند اخوها

عقاب:نهار شفته انت ؟

نهار:لا والله ارسلت له ولارد شكله نايم

لفت أصايل تناظر الحوش من مكانها ورجعت تاكل

عقاب:شفت موضوع ملاك طلع شخص مدمن طايش ماله علاقه بملاك

عقد حاجبينه ثنيان ورفع عيونه يناظر ابوه:كيف عرفت ؟

عقاب:مسكوا واحد نفس السياره اللي وصفتها ملاك بيضاء هونداي ومعاه سلاح وبنفس المنطقه اللي كانت فيها ملاك

نوره:اعوذ بالله

عقاب كمل:ومسكوه حمدلله

ثنيان سكت يناظر ابوه ونطقت جنى:حمدلله ولا الرعب اللي عشناه

لفت أصايل:اي رعب جنى امس انتي مع خواتك بالمول حياتي

جنى:اقصد رعب لملاك اكيد انا مالي شغل

نوره:لا حمدلله انحل الموضوع مسكينه خل تأمن

ثنيان:شسمه ولد الكلب ؟

عقاب ناظره:شتبي فيه ؟

ثنيان:ابي اعرفه

عقاب:ماني قايل لك

تنهد بغضب ثنيان ولف من نزل جاسر ومعه حمد شايله وشادن خلفه ماسكه كف سارا

ناظرهم يناظرونه ساكتين:سلام عليكم

جلس وسحبت كرسي شادن ونطقت نوره:مكان ساري ولدي راح يرد على جواله وراجع

ناظرتها شادن ومشت تسحب الكرسي الثاني ونطقت نوره:سارا متعوده تقعد هنا واقرب لها غيري مكانك

رفع عيونه جاسر لامه ولفت أصايل لنوره وهمست:امي !

ناظرتهم شادن تاخذ نفس:مو مشكله ما بقدر اكل على اي حال

كان قصدها لثمتها ووقف نهار:ارتاحي افطري انا طالع

نوره؛وان طلعت انت بتقدر تاكل ؟ ساري وثنيان موجودين ، روحي كلي بالمطبخ

سكتت شادن تناظرهم وبدأ يفطر جاسر ومشت شادن تجلس على الكنب وتناظرهم

دخلت ملاك عليهم ولف ثنيان من ابتسمت:صباح الخير ، تأخرت ؟

نوره ابتسمت:صباح النور والسرور اي تأخير انتي متى ما قمتي اشرقت شمسنا

ابتسمت ملاك ورفع حاجبينه ثنيان من تعبير نوره وضحك عقاب:هذا الترحيب ما سمعته من قبل

ضحكت ملاك تجلس بجانب ثنيان وناظر وجهها المنور وكأنها فعلاً اشرقت بوجه جديد عكس امس

جلست ملاك:انتي خير الصبح كله ياخالتي ، كلك ذوق

ابتسمت نوره:ياحلو اختيارنا وشور عقاب بس

سكتت ملاك ولفت تناظر شادن قاعده بعيد عنهم تناظرهم ولفت للأكل

وناظرها ثنيان وهمس:نمتي عند اخوك

هزت راسها وهي تاكل ولاردت عليه وكمل ثنيان:ماعطيتيني خبر

لفت عليه ملاك وهمست:المفروض اعطيك ؟ نفس ما انت المفروض تعطيني خبر عن اللي صار ؟

ثنيان سكت وناظرته ملاك وصدت عنه

أصايل:سمعتي الخبر اللي صار ؟

عقاب:زين بديتي قولي لها اجل

ملاك ناظرتهم وابتسمت أصايل:مسكوا اللي تعرض لك امس

عقدت حاجبينها ملاك ولفت لعقاب وكمل عقاب:طلع مدمن طايش ماهو متعمدك

سكتت ملاك بصدمه وضحكت نوره:يوه يوه يالموج احترق علينا بغى اسمه يبي ياخذ حقك منه

لفت ملاك لثنيان اللي ناظر امه ورجعت صدت:وين حبسوه ؟

عقاب:لا تقولين بتزورينه

ملاك:بعرف فعلاً مو قاصدني والا لا

عقاب:لا تسألين انقفل الموضوع وانتهى لا تجرين ورا شي يضرك

سكتت ملاك وناظرت الاكل ولفت من نطق جاسر:خذي غسلي فمها

ناظرت شادن اللي وقفت تاخذ سارا وتخرج من عندهم ونطقت نوره:ما تنلامين على القطاعه ياملاك

جاسر ناظر امه واخذ حمد وخرح ونطق عقاب:خلاص يانوره خلاص اللي تسوينه ، خلي البنت بحالها زين رضت تستر على بلوة ولدك

نوره:رضت بوشو ؟ الا قول تبي الملايين والحياه الهنيّه وجاسر ولد العميد حاصل لها ؟

لفت أصايل على ملاك اللي ساكته تناظر الاكل وسكتت نوره واخذت نفس ملاك ووقفت:كويس اقدر اروح لشغلي المتوقف

ثنيان:اي وبوصلك انا

ناظرته ملاك:اروح بسيارتي القديمه عادي

ثنيان:ماهو عشان السياره

وقف وناظرته تنتظر بقية جملته بـ عشان خايف عليك

لكنه ما نطق ومشى قبلها للغرفه وناظرتهم ملاك وابتسمت ومشت تلحق ثنيان

فتحت باب الغرفه تناظره فاتح شنطه ويحط ملابسه ووقفت تناظره وهمست:اشتاقت السمكه للبحر ؟

مالف عليها وقفل الشنطه وتقدمت ملاك:هذي لعبه بينك وبين اخوك ؟

اخذ نفس ثنيان ولف عليها:وبعدين ؟ ابي اعرف وبعدين مع كل هالكبرياء ؟ خلاص ملاك استوعبي انا واياك لوين وصلنا ، المصايب تحذفت علينا من كل جهه، مره وحده استوعبي انك إنسان ومو ضروري تركضين طول الوقت وتحذرين

ملاك ناظرته بهدوء:بنت عمي داخله البيت اللي انا فيه وباقي تتكلم عن الحذر وسوء الظن ؟

هزت راسها بالنفي ملاك بتعب:ولا اضمن أحد بحياتي ، ضمنتهم عمري كله يوم عشت معهم

سكت ثنيان يناظرها واخذت نفس تصدّ وتستجمع نفسها

واخذ مفتاحه وناظرها:تبين تروحين كذا والا بتغيرين ؟

ملاك سكتت تناظر هدوئه وهزت راسها بالنفي ومشى من جنبها:انتظرك تحت

خرج تاركها وناظرته يقفل الباب ومشت بهدوء تفصخ عبايتها وتغير ملابسها

نزلت له بعد ربع ساعه ومالقته عندهم ومشت لسيارته بالخارج ومشت

فتحت الباب وركبت وقفل بابه وحرك بدون صوت

لفت تناظره ساكت ويهوجس:انا اللي اطلقوا على سيارتي وش هالحال عليك اليوم ؟

لف عليها بصدمه هي منجدها تسأل بعد كل اللي سمعه منها ومن منيف تسأل ؟ بعد كل اللي عاشته بحضنه امس وحالها اليوم تسأل ؟

هزت راسها من نظراته ولفت لقدام:إبحار موفق عسى تكون لوحدك مامعك احد

ثنيان:يهمك من يكون معي ؟

ملاك:لا

ثنيان هز راسه ولف لقدام ولفت عليه من سكت؛لوحدك ؟

ثنيان؛ما انتي مهتمه ليه اجاوبك ؟

كتمت غيضها من بروده ولفت للطريق ووقف عند مكتبها وناظرته ولف عليها بهدوء يناظرها

طولت بالنظر ومدّ النظر بعيونه وكأنها تحاول تفهمه لكنه ما نطق بشي تفهمه ما اكتفى غير بنظراته لها

اخذت شنطتها:بتجيني ؟

ثنيان هز راسه بالنفي وهزت راسها تنزل من السياره ولفت قبل تقفل الباب:متى بترجع ؟

ثنيان؛ماهي زينه كثرة الاسئله يا ملاك ، كثرتها تخليك تغرقين اسأليني انا

سكتت تناظره ثواني وقفلت الباب ومشت لمكتبها

ناظرها ثنيان لين دخلت وحرك رايح لطريق مشواره الأحب ، الملجأ الأزرق

وعند وصوله اعتلى اليخت ورمى شنطته وسطه يدخل ويشغله

ناوي الغرق لانه يغرق وهو على اليابسه ، في شي داخله ما يفهمه في اسئله داخله مالها اجوبه

في طيوف تلاحقه وكلها لملاك

استغرب حاله وصار لازم يختلى بنفسه عشان يفهم كل شي يصير

توسط الموج وهو موج وفصخ تيشيرته يخرج من اليخت ويقفز للبحر

غاص بكل قوته وطاقته يندمج مع اللي يشبهه ويسمونه عليه ، بين الموج

ما خرج الا لحاجة رئته للاكسجين ورفع راسه ياخذ نفس ورفع شعره عن وجهه

سبح بيدينه لليخت وطلع يجلس على حافته

حط المنشفه على كتوفه يحس بحرارة شمس الصيف اللي يحبها وتريحه ويشوفها أدفى من اللهب اللي عايش معها وتشتعل كل ما اقترب منها

ياليتها شمس لكنها نار ونار تحرق تنثر جمر وتبكي لهب وموج عيونها ماهو الا رماد لحريق صدرها

كانت أغرب شي خاضه بحياته وجربه ، ثنيان غاص البحر وزار بلدان كثيره وعاش تجارب طويله ويشتغل بمكان مختلف لكن ماشاف شي غامض اقوى من البحر اللي هو وسطه الان الا ملاك

رجع ظهره لورا ينسدح وهو يتنفس وغمض عيونه يتذكر نظراتها كلامها وتعبيرها وحزنها المختلف ، ضحكها وابتسامتها المزيّفه

أول جذب يحسه ناحيتها ، أنيابها اللي ما تخفيها أبد وطول عنقها الصافي الشفاف اللي يتزيّن بحلي ربانيه اسمها عروق خضراء وشرايين للدم المشتعل اللي يركض بجسمها

استوعب بتفكيره انه ولا عمره سمعها تناديه بإسمه وصدّق فكرة ان اسمه سهل ينسي وصعب تتذكره

فتح عيونه يناظر البحر وصوت الموج اللي يريّح صدره

'

كان محبوس بمكانه ما يقدر يخرج من الديوانيه ولاهو مرتاح

تأفف ووقف يناظر الحوش وشاف العامله اللي ترتب في الجلسه الخارجيه وابتسم من شاف كوتي تمشي بالعشب

فتح الباب وخرج وتقدم وابتسم:كوتي

ناظرته كوتي وانحنى منيف يمسح على راسها ، ضحك من انسدحت على ظهرها تلعب معاه:تحبين الدلع

رفع عيونه من نطقت العامله:فينش مدام

لف من شاف العامله تتكلم وعينها خلفه وجمد وجهه من شاف أصايل ووقف بربكه:ماكنت أدري السموحه

أصايل بلعت ريقها بربكه:لا عادي خذ راحتك

حك جبينه يصد بنظراته ومشى بيروح وغمضت عيونها بقوه أصايل ولفت عليه:اذا عادي يعني

سكت من سمع صوتها ولف عليها يناظرها وعدلت حجابها تناظره:كوتي يخافون منها صديقاتي وبيجوني ومتـ

سكتت تتلعثم ولفت تناظر كوتي بربكه من نظراته:كوتي يعني ؟

فهم عليها وهز راسه وهو يناظر كفوفها اللي تشّها على بعضها

ورفعت عيونها أصايل تناظره هادي وواقف وتقدم منيف:عندي

جلس على الارض وأشر لكوتي ومشت له وناظرته أصايل وابتسم منيف من رفعت ذيلها تحط راسها تحت كفه:تحبني يعني ؟

ابتسمت أصايل تعض شفتها من ربكتها ومسحت كفوفها بعبايتها:يمكن

منيف ابتسم بهدوء وشال كوتي بحضنه ووقف ورجعت للخلف أصايل بتوتر من رفع عيونه لها:عندي ، لا بغيتيها هي عندي

هزت راسها أصايل ومشى منيف راجع للديوانيه ولفت تغمض عيونها بقوه وزفرت بإحراج تتذكره كيف خرج ومشى لكوتي يلعب معاها هادي ومبتسم وتذكر نظراته لها وعضت شفتها تمشي للبيت

قفل الباب منيف خلفه وضحك:يا نصابه

حط كوتي بالارض ولف من الشباك ولا لقاها ، ابتسم يلف لكوتي هو يدري انها تقدر تحط كوتي عند العاملات او حتى بغرفتها لكنها طلبته هو

جلس عند كوتي وطلع من جيبه جواله يصورها وابتسم:أبو كوتي وأم كوتي ، تراك بنتي صح انك ما انتي من فصيلتي وإهانه لي كإنسان اني اخليك بنتي لكنك بنتي

جلست كوتي بحضنه ومسح عليها منيف يرفع جواله يتصور معها

'

رجعت ظهرها للخلف تناظر مكتبها وتلعب بالقلم بين اصابعها وتتذكر كلام ثنيان وتوديعه الغريب لها ونظراته وسكوته

اخذت جوالها تراقب الواتس اب حقه لكن مالقت شي يدل ان احد معاه ، هو فعلاً راح البحر لوحده

المفروض تخاف وتقلق من عدم وجوده والا تخاف من سكوته والا تخاف لانها ممكن تطيح وهي تعودت يكون هو اللي يوقفها

رفعت راسها من دخل السواق حمدان وعقدت حاجبينها ونطق:مدام ملاك كلمني مستر ثنيان عشان ارجعك

سكتت ملاك ثواني ونطقت:متى ؟

حمدان:قبل ساعتين

ناظرت ساعتها وعرفت انه كلمه اول ما وصلّها ورفعت عيونها وهزت راسها وخرج حمدان

اخذت شنطتها واوراقها ولابتوبها وخرجت

ركبت مع حمدان وهي تناظر الطريق لين وصلت للبيت

دخلت وناظرت سيارة منيف اللي موجوده ونزلت

كانت بتمشي لمنيف وتشوفه لكن لفت من سمعت نوره تناديها

ابتسمت من شافتها تتمشى بين الزرع وتقدمت لها

نوره:رجعتي مع حمدان ؟

هزت راسها ملاك:ولدك بالبحر

ضحكت نوره:ما يطول عليه

ملاك اخذت نفس وناظرتها نوره:تعالي تمشي معي

مشت ملاك بشنطتها مع نوره بهدوء وهي تناظر الزرع

نوره:تدرين ثنيان قريب صار يحب البحر هالكثر ؟

ناظرتها ملاك وكملت نوره:كان ابوهم يوديهم معهد سباحه وخيول قبل ما يفتح النادي حقه ، وثنيان الوحيد اللي ماقدر يستمر بالسباحه

رفعت حاجبينها ملاك وضحكت نوره:غرق مره وصار يخاف من البحر

ابتسمت ملاك وكملت نوره:وقريب دخل البحر بنفسه وتعلم بنفسه وصار كل ما جاء بخاطره شي ولا عرف كيف يعيشه مشى للبحر ، ويحس ان البحر حلّال مشاكله

صدت ملاك وهي تمشي وابتسمت نوره:يحب يدخل البحر كل ما انشغل باله بشي

ملاك:ماتخافين عليه من البحر ؟

نوره هزت راسها بالنفي:ثنيان موج والموج يحب الموج

ملاك سكتت وكملت نوره:ما يعرف احد وش بخاطر ثنيان ماهو مثل نهار وجاسر وساري يتكلمون معي كثير عن خواطرهم ، ان دخل بخاطره شي ركض للبحر

ملاك هزت راسها:وممتلي حنيّه

ابتسمت نوره وناظرت طريقهم ملاك بهدوء:يمكن قابلت كثير ناس وآوادم بس ماشفت شخص حنون كثره

نوره حضنت كتفوها:الله يخليكم لبعضكم ولا يبعد هالحنيّه عنكم

ملاك صدت واخذت نفس ولفت نوره:قال لك متى بيرجع ؟

هزت راسها بالنفي ملاك وابتسمت نوره:ما يقول دايم ما يقول متى رجوعه ، بس لا تشيلين همه ما بيطول ويرجع الحين عنده ملاك احلى من مليون موج

ابتسمت ملاك لها:تسلمين ، تعطيني اكثر مما استحق

نوره ابتسمت ومسحت على ذراعها:انتي اغلى من دخل بيتي وصار بين عيالي ، احس بشعور غريب وانتي موجوده مدري ملاك سبحان الله بس كأني مع أصايل ، ما استحي ولا اخبي شي

تجمع بمحاجر عيون ملاك موج دموعها من كلام نوره وكملت نوره:وانا ودي تحسين معي نفس احساسي ، مابي تشوفيني خالتك وام ثنيان ابي تشوفين بمثابة امك الله يرحمها

ابتسمت ملاك تعض شفتها وتمنع دموعها وصدت واخذت نفس

نوره:ادري الموضوع يأثر عليك لكن ودي دايم تحسين ان ربي عوضك وعطاك عائله

لفت ملاك عليها وابتسمت:عطاني ربي ، ماعشت عند عمي حياه نفس ماعشتها عندكم وبينكم

ابتسمت نوره تمسح على ذراعها ورفعت عيونها ملاك تخفي دموعها وضحكت:بخليك تتمشين لوحدك وبشوف منيف

هزت راسها نوره لها وابتسمت ومشت ملاك عنها وتلاشت ابتسامة ملاك بضيق وتعب

فتحت باب الديوانيه وناظرت منيف اللي جالس وبحضنه كوتي وعقدت حاجبينها

رفع عيونه منيف وحك جبينه من شافها وتقدمت له تقفل الباب وناظرت كوتي:جاتك والا جيتها ؟

منيف صد لكوتي:افكر اجيب لي قطو يسليني

هزت راسها ملاك:جيب جيب لك ، لان اللي بحضنك هذي مستحيل تكون لك

رفع عيونه منيف وجلست ملاك واخذت نفس

منيف:وين ثنيان ؟

ملاك:بالمكان اللي يحبه

هز راسه منيف:تقابلتي مع شادن ؟

ضحكت بهدوء ملاك:شادن تعيش عقوبتها

منيف:وش المقابل اللي طلبته ؟

ملاك:يقولون مليونين

منيف:تهقين ؟

هزت راسها ملاك

منيف عقد حاجبينه:قالوا له عن منصور ؟

ملاك:يمكن لان جاسر متغير عليّ ويرمي عليّ كلام قدام اهله ولا همه

منيف:وليه ماعلّم ثنيان ؟ او اهله عنك ؟

ملاك:يطبخ على نار هاديه وهو وده يقول لكن مدري وش مانعه

منيف:ملاك ، روحي قبل تصعب عليك المسافه

ملاك:ما وصلت لهنا عشان اروح الحين وجاسر بتحداه نفس ماتحديت غيره وكسبت وبفتش وراه وأوجعه

منيف تنهد بتعب وهزت راسها ملاك:بس ابي هالهدوء يستمر شوي ابي احسني مرتاحه لو شوي بدون ما اشتعل من افكاري طول الوقت

منيف:وانا برجع البيت الليله ماودي ابطي اكثر هنا

هزت راسها ملاك ووقفت تخرج من الديوانيه ومشت للبيت

دخلت غرفتهم ولا لقت لثنيان وجود ، استغربت فكرة عدم وجوده بالغرفه

حطت شنطتها على السرير تناظر محله وفصخت عبايتها وجلست على السرير

ناظرت اغراضه بالغرفه عطوره وساعاته وملابسه ، وناظرت الاماكن اللي انهارت فيها وطاحت لَهب وجمعها الموج وطفّى اللهب

فتحت جوالها ما تلاقي منه رساله وإتصال وكأنها تنتظر ، قفلت جوالها واخذت نفس ووقفت تدخل الحمام

-

شال كوتي بحضنه وخرج من الديوانيه وفتح سيارته وجلس وهو فاتح الباب وحط كوتي بحضنه:تكفين ودي اشوفها من جديد قبل اروح سوي اللي تقدرين تسوينه وخليها تجيني

تنهد وناظر المرايه من دخلت سياره وصوت الاغاني عالي فيها ووقفت خلف سيارته وعقد حاجبينه يسمع صوت بنات

ووقفت السياره خلف سيارته تسد عليه ونزل من السياره وناظر الثلاث بنات اللي ينزلون

وتقدم لهم:بطلع

لفوا عليه وناظرته ميّ:اوه سوري ما انتبهت ان في احد بالسياره

منيف مارد يرجع لسيارته وركبت ميّ سيارتها وخرجت أصايل تناظرهم ومشت لهم

رزان وقفت جنبها:مين هذا ؟

أصايل ناظرت السياره وميّ اللي بسيارتها تبعد ونزلت من سيارتها تتجه لمنيف اللي فاتح بابه وابتسمت بإحراج:اسفه من جديد

هز راسه بالنفي وهو صاد وتقدمت أصايل لهم ولف منيف يناظرها وناظرتهم وضحكت ميّ:خليت كل مواقف بيتكم ووقفت ورا سيارته

لفت عليه:انت أخو ملاك صح ؟ اتوقع انت شفتك بالزواج

هز راسه منيف وهو يناظر أصايل ولفت أصايل على ميّ:اذا خلصتي من سواليفكم اطلعي الملحق

مشت بتروح ونزل منيف:أخت النّهار

وقفت أصايل ولفت عليه تناظره ونطق منيف:بغيتك

ناظرتهم ميّ ومشت تاركتهم وبلعت ريقها أصايل من ناداها بالنداء اللي مستحيل تنساه وتقدم منيف يوقف قدامها:كوتي بسيارتي بعطيك اياها

ناظرته أصايل وهزت راسها ومشى يفتح بابه يأشر لكوتي اللي طلعت على صدره ومسكها ومشى لأصايل ومدت كفوفها لكوتي بربكه تاخذها من حضن منيف لحضنها

ونطق منيف:انا مابيني وبين احد سالفه

كان يقصد صديقتها وبلعت ريقها أصايل من الحوار الغريب بينهم وهدوئه ونطقت:وانا ما احب احد يناديني بغير اسمي

سكت منيف يناظرها وناظرته ثواني أصايل ومشت مع كوتي للبيت

ناظرها لين دخلت وركب سيارته وغمض عيونه بتعب وشغل سيارته يخرج من البيت

-

دخلت البيت مع كوتي ولفت تناظر كوتي:قالك شي عني ؟

مشت للملحق بتعب من تفكيرها ودخلت للبنات وجلست وكوتي بحضنها

ميّ:وين ملاك بنشوفها

رزان:لا تكفون مو مره كاشخه

أصايل:ولاهي كاشخه اتوقع نايمه حتى

غدير:تكفين بشوفها على الطبيعه شفتها بس بالزواج

أصايل:برسل لها واشوف اذا صاحيه تجي

اخذت جوالها ترسل لملاك واخذت جوالها ملاك من وصلتها رساله وقرتها:صديقاتي عندي اذا ودك تعالي تسلي معانا

قفلت جوالها ملاك وناظرت الفراغ هي لو تقعد لوحدها اكثر بس بتفكر وتاخذها افكارها وتتعب وتبي شي يشغلها

تقدمت تغير ملابسها وتاخذ جوالها وتطلع للملحق

دخلت وابتسمت:مرحبا

ناظرتها أصايل اللي تلعب بحضنها كوتي ولفت ملاك تناظر كوتي ورجعت ناظرت أصايل:رجعت لك أمانتك؟

ابتسمت بربكه أصايل من كانت تقصد منيف ومشت ملاك تسلم على البنات وجلست

ميّ:توقعت ما بنلاقيك بالسعوديه

ملاك:وين بكون ؟

رزان:هوني مون قصدها

أصايل:لا ماراحوا ولا مخططين حتى

ميّ:ليش ؟

ملاك:عندي شغل أقرب فرصه بنروح اكيد

أصايل:وخمنوا ثنيان وين بيختار الوجهه ؟

ضحكوا يجاوبون سوا:ساحليه اكيد

سكتت تناظرهم يعرفون ثنيان وعقدت حاجبينها وضحكت أصايل:والحين احلى اوقات المناطق الساحليه عند ثنيان والدليل اخذ اغراضه وراح البحر اليوم

ملاك:جاك خبر ؟

أصايل ضحكت:وجاتني صوره ، كلمته ورد عليّ مصور نفسه بالبحر وارسلها عليّ

ملاك حكت جبينها تهز راسها وفتحت جوالها أصايل تمد الجوال:شوفيه اكيد مشتاقه له

اخذت الجوال ملاك تناظر سُمرة جسمه ووجهه وصدره العاري وهمست:امداه ينحرق

أصايل:دايم ياخذ لون بسرعه ثنيان ولو تشوفينه بعد شهر بالبحر اللون خياال

ضحكت ميّ:اخوك اصلاً كل ما شفناه مسوي تان خطير صار بخاطري يعلمني الطريقه

لفت ملاك تناظرها وتبدلت ملامحها ولفت ميّ وتوترت من نظرات ملاك وهمست ملاك:تعرفينه

ميّ:لا شدعوه بس دايم اذا جينا لأصايل يكون موجود وأحياناً يجي ياخذ أصايل من عندي

ملاك هزت راسها وصدت تحك جبينها

وضحكت ميّ:صح شفنا اخوك برا

هزت راسها ملاك تصد بإنزعاج منها وكملت غدير:كأنه نهار من بعيد سبحان الله

سكتت أصايل وهزت راسها ملاك تبدل نظراتها لأصايل:بأعمار بعض

ابتسمت تلف للبنات؛وادور له على عروسه اذا وحده فيكم عاجبها نتوكل على الله

ضحكوا وناظرتها أصايل بجمود وابتسمت ملاك:منيف اخوي مستحيل يتزوج بنفسه ويبيني انا اختار له وانا مابقصر بدور له وحده من اهلنا نعرفها ويعرفها

نزلت عيونها أصايل لكوتي تبلع ريقها وكملت ملاك:وان شاء الله اقرب فرصه واذا تيسرت اموره بعزمكم كلكم

ابتسمت رزان:اكيد لنا الشرف

هزت راسها ملاك تناظر أصايل اللي اختلف حالها وسكتت

'

صباح يوم جديد

نزل نهار للفطور وابتسم:نهار الخير

ابتسمت نوره:هلا أمي

نهار:اليوم رايق مو مداوم

عقاب:ليه ؟

نهار:اجازه جات من الله

أصايل ضحكت:شافوا مامنك فايده قالوا لا تجي

ساري:معد يبونه

نهار ناظرهم:خير ؟

ضحكت جنى:الصراحه عمي عقاب دايم يحط كل شي بمحله الا انت ما عرف يحطك بالمحل اللي يناسبك ، اجل العسكريه ؟

نهار:انا ضابط واضبط امور الدنيا كلها لا تستهينون فيني

لف عليهم:وين ملاك ؟

نوره:للحين مانزلت

أصايل:ياحياتي اول مره اشوف ملاك بدون ثنيان ، احسها مستاحشه البيت امس سهرت عندي لين غلبها النعاس وراحت تنام

نوره ابتسمت:يازينها هالملاك ، الله يسامح الموج اخوك اللي تركها وراح

عقاب ناظرهم:ما قال لاحد متى بيرجع ؟

نوره:ماكلمني

سكت عقاب ونزل جاسر وشادن خلفه ماسكه ايادي عياله وكشرت نوره تشرب قهوتها

تقدم جاسر:سلام عليكم

ناظره عقاب وجلس جاسر وجلست بجانبه شادن وناظرتها جنى:ما تعرفنا على بعض شادن

ناظرتها شادن وهزت راسها:اعرفك انتي زوجة ساري

هزت راسها جنى:اي وشكلكم بتصيرون انتي وبنت عمك فريق وانا بصير وحدي ، نهار شرايك اعطيك بنت عمي ؟

ناظرها نهار:وريني شكلها أقيّمها

عقاب ناظره ولفت نوره تعض شفتها:عيب !

ناظرتهم شادن بربكه ولفت لسارا اللي تأشر على الاكل واخذت لها توست تسوي لها

ونزلت ملاك وناظرت شادن اللي تأكل عيال جاسر ورفعت عيونها شادن من تقدمت ملاك

صدت ملاك وتقدمت:صباح الخير

نوره:هلا بالولهان الحزين

ناظرتها ملاك وابتسمت تجلس:مامداني اصير ولهانه

نوره:والله ان مكانه جنبك خالي

لفت ملاك تشوف كرسيه ونطق عقاب:كلمك ؟

ناظرته ملاك تاخذ قهوتها:لا ، هو رايح يرتاح مني اصلاً

ضحكت أصايل وضحكت نوره:يازينك ياملاك

ابتسمت ملاك وهي ماسكه كوبها وكمل عقاب:ولا قال متى راجع ؟

ملاك:والله ياعميد عقاب على اللي سمعته عن ولدك ان ما يعطي مواعيد

نهار:هو يبطي بالبحر بس هالمره ما بيبطي في من يرجعّه لنا

ابتسمت ملاك:لا ماراح اتدخل خله بموجه وبحره ومجدافه

أصايل:كان رحتي معاه ملاك

ملاك:عندي شغل

جاسر لف يناظرها تفطر وصد يكمل فطوره ووقفت تاخذ شنطتها ونطق نهار:اي صح كلمني ثنيان قبل يروح وقالي ان سيارتك بتخرج من الصيانه اليوم العصر

ملاك سكتت وهزت راسها بهدوء ونطق نهار:تبين اوصلك ؟

ملاك:سيارتي القديمه موجوده ماقصرت يالمتحرش

ضحك نهار:طيب استري عليّ

ضحكت ملاك تخرج ومشت تركب سيارتها حركت لمكتبها وهي ساهيه

ثنيان عطى نهار كلمه قبل يروح وارسل صوره لأصايل وهي ماجاها منه غير سكوت واختفاء

وش قاعد يعيش ثنيان ومبعدّها عنه وليه اختار يروح البحر ويغيب هالفتره ؟

وقفت عند المكتب تاخذ شنطتها ورفعت راسها وجمد وجهها بصدمه تشوف قزاز مكتبها مكسور

فتحت بابها ونزلت بصدمه تناظر المكتب وتقدمت تشوف دمار مكتبها

مشت على القزاز بكعبها وتلفتت بصدمه بالمكتب اللي قالبينه لدمار ، كاسرين ابوابه ورامين كراسيه وأثاثه

تقدمت بذهول تشوف كل شي معدوم ورفعت راسها للكاميرا ولقتها مكسوره وواصله للارض من اسلاكها

نزلت عيونها من شافت الصوره اللي بالارض وانحنت تاخذها ولقتها صورة امها وابوها اللي كانت معلقتها على كمبيوترها

تجمع الموج بعيونها بصدمه تشوفهم ولفت تشوف كرسي مكتبها الشي الوحيد الثابت ونزلت عيونها للرصاصه اللي محطوطه على الكرسي

بلعت ريقها تمشي وتاخذ الرصاصه وتناظرها وكأنها تستوعب انها تحت التهديد الان وتجهل من يكون

وتعرف ان اللي تعرّض لها بالشارع برصاص ماهو مدمن مثل ما قالوا لعقاب

هم لا زالوا وراها ويبون يدمرونها ، جلست على الارض بين الزجاج والخشب المكسور وبكت وهي تناظر الصوره

تعبت من الضغط اللي تحسه ، من الخوف اللي تعيشه ، من مشاعر غريبه وريبه وسوء ظن ، من جاسر وشادن اللي دخلوا البيت ناوين يهزّون ثباتها ومن الشخص المجهول الخفّي اللي ناوي موتها ، ومن الاهتمام اللي تشوفه من عقاب وعياله ولاودها تخسره ، ومن ثنيان اللي اعتادت وجوده وضعفها أمامه والان هي لوحدها تبكي برعب بالمكتب بدون أحد

تذكر خذلان عمها وتخلي وجحود منصور لها تعرف انها على هاويه طول الوقت وما تستأمن تعيش اكثر

غمضت عيونها تمسح موج دموعها باصابعها وبيدها صورة اهلها وهمست:يا الله

رفعت عيونها تناظر السقف واخذت نفس بعد مده تقوم وتستجمع نفسها وتنفض عبايتها من الخراب اللي سكن المكان

'

خرج جاسر من الغرفه ومشى لغرفة عياله وناظر شادن اللي ماسكه سروال حمد وتطلبه يجي عشان تلّبسه وهو يلعب وتقدم:حَمد

لف عليه حمد بخوف واشر له يلبس ومشى لشادن ولبسته وهي ساكته

تقدم ووقف عندها ونطق:روشتيه زين ؟

رفعت عيونها له تناظره ورفع حاجبه جاسر:عسى خير هالنظره ؟

شادن صدت واخذت نفس تلّبس حمد وتقدم جاسر لسارا اللي تلعب وجلس جنبها:زين لاحظتي ان بنت عمك ساحره اهلي ويعاملونها احسن من زوجة ساري اللي من قبلها

ماردت شادن عليه وكمل جاسر:وانتي محد يشوفك شي هنا

رفعت عيونها شادن وكمل جاسر:طيحيها معي وافضحيها معي

سكتت شادن تناظره وعقدت حاجبينها:هذا طلب جديد غير الزواج ؟ لانك صرت تطلب كذا شي وللحين ما نفذت طلبي

جاسر:والله انا عند كلمتي شهر ويطلع اخوك لاني ما اضمنك الحين ، عادي تنحاشين

شادن:اجل كمل امورك لوحدك هالشهر ولا تدخلني بأمور زياده

جاسر:ما تكرهينها ؟ ما تستفزك ؟ ما تنقهرين انها باعتكم ودارت حوالينا واخذت واحد من اخواني وتزوجت احسن زواج والكل مقدرها وحاسب لها الف حساب وثنيان للحين متمسك فيها وهو يدري بسواتها وشاري لها سياره وشاليه وربحت اكثر مما انتي ربحتي

ناظرته شادن وكمل جاسر:اذا خسرتي انتي على الاقل لا تخلينها تفوز بشي

نزلت نظراتها شادن وبلعت ريقها تخفي ربكتها بالتفكير بالموضوع وكمل جاسر:نفضحها ونمسك عليها ممسك زود ، وثنيان محد بيعلمه عن اخوك الا اخوك بذات نفسه لاطلع

رفعت عيونها شادن عليه ورفع حاجبه جاسر ينتظر اجابتها وهزت راسها شادن وابتسم جاسر بهدوء

'

وقفت عند البيت وهي تتلبس الخوف وتتجاهل تناظر رجفة يدينها وسيل موج عيونها ، قفلت سيارتها ولفت تشوف الصوره اللي بحضنها والرصاصه معها

واخذتها تبكي من جديد وتناظر وجيه اهلها ولفت تحط الصوره بشنطتها مع الرصاصه وبلعت ريقها تنزل من سيارتها وتدخل البيت وهي تفتحه بمفتاحها ودخلت تدور على منيف لكن مالقته وبكت من فتحت غرفته ولا حصلته

ميلت راسها بتعب وحاجه لوجود احد معها ، مشت للصاله وغطت وجهها تبكي

واخذت جوالها وهي تبلل شفايفها وتبكي ودقت على رقمه تستنجد فيه ، لأول مره تستنجد بأحد وتطلب النجاه من أحد ، غمضت عيونها تسمع اللا رد

كانت ولأول مره بتناديه بصوتها وتنادي على اسمه ، كانت بتناديه بثنيان لأول مره لكنه مارد عليها

وحطت جوالها بحضنها تشوف اسم ثنيان اللي رفض الرد

كانت بحاجته ولأول مره تعترف وتبادر لكنه رفض الدرب والمسافه ، مع انها تنازلت عن كبريائها وجربت تلاقي اللي وقف على بابها وفتّح جروحها وكشف سترها والحين ماهو موجود

رمت جواله تلم رجلينها وتبكي على الكنبه ورفعت راسها تمسح كحل عيونها واخذت نفس تكتم غصتها ورعبها ووحدتها

لطالما كان ينتهي فيها اليوم وهي ضعيفه وهزيله ، كان ينتهي بفراغ ما يقدر احد يملأه

كانت تركض لفراشها مسرعه قبل ما تقتحم ذاكرتها ذكريات تتعبها وتظل مستيقظه الليل كله

انسدحت على الكنب ولمت جسمها بتعب تناظر الفراغ وهي تبكي

'

دخل وشايل معه بوكس ومبتسم وفتح باب بيته ودخل:وهذا بيتك

التفت من عرف ان سيارة ملاك موجوده:ملاك

تقدم وعقد حاجبينه من شافها نايمه على الكنبه وحط البوكس بالارض وتقدم لها يشوف كحلها السايح على خدينها وانحنى يجلس ويرفع شعرها عن وجهها

تنهد بتعب من حالها وسحب الوشاح من على الكنبه وغطاها ومشى ياخذ البوكس ويدخل الغرفه

حط البوكس وفتحه وخرج منه قطو ذكر وابتسم:ارحب

تجول القطو بالغرفه بخوف ووقف منيف:وش فيك ؟ هذي غرفتك وبيتك من الحين تعوّد عليها

لف القطو يناظره بحذر ورفع حاجبه منيف:عسى خير ؟ شكلي ماجزت لك ؟

طلع أنيابه القطو ورفع كفه منيف:حدك بس بتخرعني ؟ ترا مسميك يامور ماهو مسفر ريّحنا

تقدم بيشيلها وهرب يامور وناظره منيف:علامك ؟

مشى له وهرب يامور تحت السرير وابتلش منيف:عبالي كل القطاوه كوتي لكن ماتجي ربعها

انسدح منيف:لا جعت بتطلع اعرف

ناظر جواله يفتحه ويقرأ رسالة نهار:شريت عريس لكوتي ؟

ضحك يرد عليه وانحنى يصوره تحت السرير:بس تراه مبتلش فيني وانا مبتلش فيه

ضحك نهار من وصلته الصوره ولف لأصايل وهو متكي على سريرها:شوفي منيف وش شاري ؟

ناظرته أصايل ومد جواله وعقدت حاجبينه من شافت صورة القطو:قطوه ؟

هز راسه نهار وضحك يرد على منيف وناظرته أصايل بهدوء:ليش ؟

نهار:عريس لكوتي

سكتت وضحك نهار:ماتبينها تشوف نصيبها ؟ خافي الله

أصايل لفت تشوف كوتي اللي نايمه ورجعت ناظرت نهار اللي على جواله ويضحك:ذكر يعني ؟

هز راسه نهار:يقول

أصايل مسكت جوالها بربكه:وش سماه؟

نهار:بسأله اصبري

بلعت ريقها وناظرها نهار:يامور

ابتسمت من لطافة الاسم أصايل ولفت لكوتي:لقينا لها صاحب لانه مستحيل يصير زوجها

نهار:ليه مستحيل ؟

أصايل لفت لنهار:لانهم ما يشبهون بعض ومستحيل يصيرون لبعض وقدامهم مليون حاجز

نهار رفع حاجبه وابتسمت بخفوت أصايل:يمكن ما تعجبه كوتي حرام تتعلق فيه كوتي

لفت لكوتي تمسح عليها بهدوء وهمست:كوتي ما تستاهل تزعل

نهار:لا منجد الحين وضعك صاير يخرع تراها قطوه أصوله

أصايل تنهدت:وش يفهمك نهار بالله ؟

سكت نهار ينسدح وهو ماسك جواله وناظرت كوتي أصايل وسلسالها اللي برقبتها

'

رفع راسه يرجع يستنشق الاكسجين من الجوّ وفتّح عيونه يسمع الموج وحرك يدينه ورجلينه يسبح لليخت

طلع واخذ المنشفه وجلس وحطها على كتوفه وهو يناظر البحر وبخاطره أمنيه ياليت ان هالموج المرتاح الدافي هو صدر اللهب ملاك

اهخ وياليتها موج وهو البحر ماكان عاشوا كل هذا التعب ، لكنه معها يمشي على الجمر والنار من فوقه ومن تحته ولا تبي تطفي نارها ولا تبي برد الموج

مليانه كبرياء وغرور وشرّ وسواد وحتى وهي وسط حضنه بعد سقوطها وضعفها كانت تضرب صدره من قهرها على البياض اللي ظهر له

كان يبتعد عنها عشان يرتاح من كل اسئلته تجاهها والحقيقه انه بوسط الموج غرق فيها اكثر

وكأنها حالفه تزوره ولا تهجر باله وهو يرفض يفكّ شراعه في بحرها لانه يدري انه بدون مرسى

لكنه يغرق في الاسئله ومن زود الغرق صار يخاف الأجوبه يخاف من كل شي

ما خاف من زواجه بالسرّ والخَفى قد خوفه على سرّ ملاك ، خايف بيوم ينكشف كل شي وتتغير الأمور ويتحول كل حب اهله لها لكُره ويتحول وجود ملاك بحياته لسراب

وده يظل على علامة الاستفهام ويعيش عليها ولا يلاقي جواب ويطيح منها

لكنه الحين راجع للميناء بعد ما غاب أسبوع وكان وده يغيب اكثر لكنه راجع عشان شي بخاطره شي ماوده يمرّ ولا يسويه

'

واقفه تناظر العمال اللي بالمكتب واخذت جوالها ترد من دق:هلا منيف

منيف:بقعد الاحقك ملاك اسبوع ؟

ملاحة:مافضيت منيف ومو مهم اللي حصل كنت متضايقه بس

منيف:كنتي تبكين ماكنتي متضايقه وش صار معاك ؟

ملاك:ولاشي منيف ولو صار فعلاً فتخطيته الحين

منيف:طيب تعالي لي الحين بالبيت نتكلم سوا

ملاك:مشغوله اتركها وقت ثاني

منيف تنهد:طيب بس تعرفين اني موجود دايم لو صار شي

هزت راسها ملاك وابتسمت:اعرف

قفلت منه وغمضت عيونها تهدي نفسها ولفت للعمال وهزت راسها من تقدم:خلاص بكره كملوا

خرجوا ومشت لسيارتها تركب

قفلت بابها وناظرت حوالينها بترقب هي تدري انها مراقبه ولاهي مرتاحه ابد بهالشعور ومن اسبوع وهي تترقب طريقها من كل جوانبه وجهاته

ولا قدرت تنام اكثر من كفايتها تنام بعد ما تتعب وتصحى قبل تشبع من كوابيسها

مشت بطريقها راجعه للبيت هي هربت طول هالفتره من تجمعاتهم ومن انها تلتقي بجاسر او شادن ، كانت تدخل غرفتها ولا تخرج منها الا لشغلها

دخلت مع البوابه ووقفت من شافت سيارة ثنيان بالمواقف ورجف قلبها ، ارتبكت ولا تدري ليه اختلف وضعها لكنها تغيرت من شافت رجوعه ووجوده

التفت ثنيان اللي بالصاله من نطقت أصايل:ملاك

رفع عيونه لسيارتها اللي عند البوابه واقفه وضحكت نوره:ماهي مصدقه اطلع لها ثنيان خل تصدق عيونها

أصايل:اي ياولهان

ابتسم نهار:على هاللون ما ظنتي تعرفك

لف عقاب يناظر سيارة ملاك اللي لا زالت واقفه وعقد حاجبينه ثنيان من طولت وهمس عقاب:شوفـ

كان بيكمل كلمته لكنها دخلت للمواقف

وقفت سيارتها بجانب سيارته ونزلت راسها تهدي كل مشاعرها من خوفها والضغط اللي عاشت فيه ومن الرصاصه اللي بشنطتها للحين ومن اختفاء ثنيان ومن اكتشافها لحاجتها له

غمضت عيونها من حست بتجمع الموج ورفعت كفوفها تهف على وجهها وتخرج زفيرها:اهدي ملاك اهدي

اخذت نفس واخذت شنطتها ونزلت من السياره مشت ترفع راسها مثل ما تعود راسها ، تتلبس الشموخ والغرور لبس عبايتها وتمشي بكعبها للبيت وهي تدري انهم يشوفونها من صالة بيتهم

لف ثنيان يناظرها تمشي جايتهم وصدّ بعيونه ورفع كفه لياقته من اختناقه وارتفاع حرارة جسمه ولا يدري كيف بيكون اللقاء بعد هالفتره القصيره لكنه ما ظن بيعيش هالشعور بعد ما اختلى بنفسه ما توقع انه بيرجع وتتفجر مشاعره اكثر من قبل

دخلت البيت وناظرتهم متجمعين كلهم ولا احد ناقص الا هي ورسمت ابتسامتها المعتاده تكشف عن أنيابها وتقدمت:سلام عليكم

اخذ نفس يكابر بشعور الشوق ولف عليها وناظرته جالس بينهم وتلاشت ابتسامتها بهدوء تناظره ، ماظنت بيوم انها بتشتاق لشخص غير أهلها ، ماظنت بتحس بالغربه والوحده من جديد ، تحلف يمين انه لو يقدر يقرأ عيونها اللي تناظره الحين بيعرف انها كلها شوق وحنين ، كانت رؤيته بينهم بمثابة لوحه كُتب عليها ' منطقه آمنه '

بلعت ريقها تتدارك وجودهم وشكله عقب الغيبه ورجعت ترسم ابتسامه:حمدلله على السلامه

ناظرتهم أصايل بترقب وعضت شفتها تشوف نظراتهم بحماس وشد قبضة يده ثنيان ووقف يمشي لها:الله يسلمك

رفعت عيونها شادن على ملاك ونظراتها ولفت تناظر هدوء الجميع

ومشى ثنيان لين عندها ووقف قدامها ونزل عيونه لابتسامتها وأنيابها ورجع يناظر كفوفها اللي ماسكه فيها شنطتها بأصابع راجفه مخفيه عن عيون الجميع الا عيونه ورجع ناظرها ومد كفه لها وبللت شفايفها بربكه ورفعت كفها تصافحه ، لمس جمر كفوفها بدفى كفه وارتبكت من دفى كفه اللي حسته وتقدم يسلم عليها وغمضت عيونها من قربه وابتعدت عنه تحك حاجبها وتلف لهم:بغير ملابسي وارجع لكم

ابتسمت نوره:خذي راحتك ياحبيبتي

مشت تاركتهم وطلعت للغرفه ورجع ثنيان يجلس وناظره عقاب ورفع عيونه ثنيان يشوف نظرات ابوه ولف يناظر نظرات اهله وهمس:بغيب دايم دامني باخذ كل الاهتمام بجيّتي

أصايل:مو مهتمين لجيّتك ثنيان مهتمين لشوفة نظرات الشوق

دقتها نوره وضحكت أصايل وابتسم نهار يعض شفته لأصايل ويأشر على ابوه ووجوده

وناظرتهم شادن ولفت على جاسر اللي لف عليها وصدت

-

( لا تنسون النجمه ⭐️ )

دخلت ورمت طرحتها ومسكت عنقها بضيقه وفصخت عبايتها ورفعت شعرها مسحت على عنقها من ارتفاع حرارة جسمها وجلست بعصبيه لانها ماهي متعوده على نفسها كذا ، ماهي متعوده تنحط تحت كل هذا الضغط دفعه واحده هي من التهديد اللي تعيشه صارت ما تستأمن حتى مشاعرها ولا تدري عن اللي يحصل

دايماً كانت ترسم خطواتها بحذر ودقه وماتمشي بدون ماتعرف الوجهه لكنها الحين تعيش ايام عند عقاب ولا تعرف وش النهايه ومتى الفرار والنجاه ، قاعده تنام وتقوم ولا عندها علم عن اللي بيصير ، مشتته وضايعه ووحيده ومكركبه وشايله داخلها مشاعر كثيره نصفها ماتفهمه

جلست قدام المرايه تناظر ملامحها المسوّده والرعب اللي على وجهها واخذت مكياجها تزيد على سواد عيونها بالماسكرا والكحل وتزيد لمعة وجهها وروجها وترسم الملامح اللي تبي تبان للجميع

ووقفت وفتحت الدولاب تاخذ لها ملابس تلبسها وطلعت عبايه ولبستها وخرجت من الغرفه ومشت تنزل لهم

على صوت نوره تتكلم:ماشفنا ملاك بغيبتك والله الحين شفناها

ابتسمت ملاك ومشت وجلست بجانبه تتجاهله:كنت مشغوله

أصايل:تنشغل عشان ما تفكر

ضحكت نوره وابتسمت ملاك بدون ترد ولفت تناظر جاسر وشادن اللي جالسين بصدر القعده وعينهم عليها ورجعت صدت من نطق عقاب:مريت مكتبك ولقيت عمال

هزت راسها ملاك:بجدد الديكور بالمكتب

عقاب:مالقيتك فيه

ملاك:كنت بالمحكمه أمشّي أمور

عقاب هز راسه ونطق نهار:بالله ماتغير ثنيان بعد البحر ؟ طالعي لونه

ملاك لفت على ثنيان اللي ساكت وناظرته وناظرها ثنيان وابتسمت بهدوء ورجعت تصدّ:الشمس تحبه

ثنيان نطق بهدوء:اللي يحب ما يحرق

لفت عليه ملاك وسكتت وكمل ثنيان:الشمس ماتحبني

صدت عنه ونطق ساري:مخططين العشاء برا البيت ؟

ثنيان تقدم:لا لا ودنا هنا وبرا بالحوش دام الجو حلو

نهار:ثنيان اذا قال الجو حلو اعرفوا ان درجة الحراره اربعين

ضحكت أصايل:لا جد حلو الجو

عقاب:تبون تشوون يعني ؟

جنى:يممي باربكيو ؟

تقدمت أصايل بحماس:سمك مشوي ؟

ابتسم عقاب واشر على عيونه وابتسمت أصايل:اعشقك

نوره:دام كذا بقولهم يجهزون القعده وبعد المغرب نخرج نقعد

هز راسه عقاب ووقفت نوره ورجعت ظهرها لورا ملاك ولف ثنيان على جاسر:ماسمعت حسّك

جاسر ابتسم:شفتك راجع مشتاق قلت وش يبي فيني

سكت ثنيان يناظر جاسر وكمل جاسر:هاه ملاك الحين بنشوفك كثير بأرجاء المنزل والا بتهربين ؟

لفت عليه ملاك تناظره وناظرت شادن اللي بجانبه وصدت عنه بدون رد وضحك جاسر:افا !

ناظروهم بإستغراب ونطق عقاب:صاير شي ؟

ملاك ناظرت عقاب اللي يسألها وهزت راسها بالنفي وناظرها ثنيان ورجع يناظر جاسر وشادن ولف لأبوه:مو صاير شي

سكت عقاب ووقف ثنيان:نهار ابيك

وقف نهار وخرجوا ورفع عيونه عقاب على جاسر اللي يناظر ملاك ووقف:ملاك

ناظرته واشر لها ومشى واخذت نفس ملاك من الضغط ومشت خلفه وفتح مكتبه ودخل ودخلت خلفه:اذا بتسأل عن الارض ياعميد عقاب فللحين ماشفتها واعذرني طولت بالموضوع ادري بس اسـ

لف عليها يأشر لها تجلس وجلست ورجع ظهره عقاب:وش صاير ؟

سكتت وكأنه بسؤاله نثر الملح على جروحها وصدت ملاك تخفي رجفتها

عقاب:انتي حالك مختلف وادري واحسّ ولا تنكرين ولا ظنتي فراق ثنيان اللي مسوي بك كذا

ملاك بللت شفايفها ولفت عليه وابتسمت:ضغط شغل بس

ناظر دموعها اللي حابستها ووقف عقاب وفركت يدينها ملاك ببعضها وجلس قدامها عقاب وسحب الكرسي بإتجاهها ورفعت عيونها ملاك عليه ونطق عقاب:وش الموضوع ياملاك ؟

نزلت وجهها من بكت بدون صوت وناظرت يدينها ورفعت كتفها بتعب ورجعت ناظرته:ملاك بكبرها ماتدري

عقاب:وجود بنت عمك مضايقك ادري وادري ان بنت عمك أذّتك والدليل اختلاف جاسر وضغطه عليك

ملاك اخذت نفس بتعب وكمل عقاب:وادري ان عيشتك مع عمك وعياله ما عطتك غير اليُتم ولو ظليتي بعيد عن عمك ما ظنتي حسيتي بيُتمك حتى

ملاك صدت تبكي وهي تهز رجلينها وتفرك كفوفها وتقدم عقاب ومسك كفوفها ولفت عليه:لا تسوي فيني كذا ، خلني دامني ساكته

عقاب:انتي مو ساكته انتي قنبله مؤقته ولا ودي تنفجرين بمكان تتأذين فيه

ملاك هزت راسها بالنفي بتعب وهي تبكي:اعرف وين ابكي واعرف كيف اقوم

عقاب:وعرفتي ان البكاء عندي احسن من البكاء عند احد غريب

ملاك ابتسمت بين دموعها:ماحسبت حساب دموعي

عقاب ابتسم من ابتسمت:مردها بتزين وانا ابوك

عضت شفتها تناظره وكمل عقاب يربت على كفوفها:واللي تبينه تبشرين به واللي يضايقك ولو انه واحد من عيالي ما بسمح له صدقيني

ملاك هزت راسها ومسحت دموعها تشيل كفوفها من بين الكفوف الحنونه

وكمل عقاب وابتسم:ارجعي نفس ما عرفتك يابنت مساعد

ابتسمت تهز راسها ووقفت:تبي شي ؟

هز راسه بالنفي ومشت تخرج من مكتبه وطلعت للغرفه بتستسلم لدموعها لكنها شافته بالغرفه

قفلت الباب بهدوء ومشت تفصخ عبايتها وناظرها ثنيان:لقيت لك مكالمه

هزت راسها وهي صاده عنه وكمل ثنيان:وش بغيتي ؟

ملاك:راح وقته

ثنيان سكت ومشت ملاك للحمام ووقف ثنيان ولحقها ومسك ذراعها ولفت عليه وغمضت عيونها بتعب

وناظرها ثنيان:وش صار معك؟

ملاك ناظرته:بتعرف احوالي ؟

ثنيان:صار شي وادري والا ماكان اتصلتي عليّ

ملاك:صار وانتهى وكنت بدق عليك ويوم مارديت عرفت اني غلطت يوم دقيت اصلاً ، شكراً لعدم ردك يازوجي موج

مشت بتدخل الحمام وشدها من ذراعها يرجعها وناظرته بتعب:لا تتعبني

ثنيان:انتي تدرين اني عشت هالفتره بين الموج لكن انا ما ادري وش عشتي وابي اعرف

ابتسمت ملاك بهدوء:عشت بلَهب

سكت وصدت ملاك بعيونها:هذي اسئله مع اسئلتك اللي ما بتلاقي لها اجوبه يازوجي موج

ثنيان:ملاك

اخذت اطول نفس وغمضت عيونها من ناداها ولفت عليه تناظره وناظر موج عيونها وعرف انها تنضغط وهمس:وش صار ؟

ملاك رفعت كتفها:طحت ورجعت اقوم لوحدي

سكت ثنيان وكملت ملاك بهدوء:هذا الجواب اللي بتعرفه

ثنيان:كنتي تبيني موجود وقت طيحتك ؟

ضحكت بهدوء تصد عنه وهزت راسها بالنفي وناظرها ثنيان:كنتي تبيني

لفت عليه ملاك تناظره:انا لَهب واحرقك مثل ما تحرقك شمس بَحرك ، واي شي يحرقك ما يحبك ياموج

ثنيان:ماتحبيني لكنك تبيني

ملاك رفعت كفها على صدره بتعب ورفعت عيونها لعيونه من جديد:يكفي ، تكفى

سكت من ترجته وسط نظراته الغارقه بالموج وصوتها المهموس اللي يوصف تعبها وفلت ذراعها وهو يناظرها وناظرته ملاك ثواني ودخلت الحمام

وقف عند الباب من قفلته بينه وبينها وغمض عيونه ومسك الباب ورفع عيونه من سمع صوت المويه ومشى يخرج من الغرفه ونزل وناظر نهار اللي يكلم وابتسم يأشر له وابتسم له ثنيان وخرج لأهله

ناظرهم جالسين وتقدمت أصايل:وين ملاك؟

ثنيان:بتجي وراي

نوره:يازين هالجمعه اي والله ان الجو زين وحلو

عقاب هز راسه:صدقتي

اخذ جواله من جاته رساله وناظر رسالتها:تعذّر من اهلك بنام

عقد حاجبينه ولف لأصايل:أصايل

لفت عليه واخذ نفس ثنيان:يبدو ان ملاك ماتبي تجي وانا ابيها تجي اطلعي انشبي لها نفس ما تنشبين في ابوي دايم

ضحكت وناظرته نوره:ليه ؟ انا حسيت ماهي بخير فيها شي تعبانه ؟

ثنيان رفع كتفه ووقفت أصايل:انا اجيبها لكم ازهلوني

ابتسم عقاب وركضت أصايل تدخل على خروج جاسر وخلفه شادن وصدت نوره:ان غاب القط العب يافار

جلس جاسر وجات بتجلس شادن ونطق:بيلعبون بالكوره الصغار

شادن ناظرته بعدم فهم:طيب ؟

جاسر:لا يطيحون بالمسبح

سكتت تناظره ورفعت عيونها عليهم يناظرونها واخذت نفس ومشت مع حمد وسارا

جنى ناظرت جاسر بصدمه:اوميقاد جاسر انت رسمي تزوجت خدامه !

ساري لف عليها:جنى ؟

جنى قفلت فمها ونطقت نوره:ما قفلنا المسبح صادق ليتنا نغطيه ياعقاب

عقاب هز راسه:نغطيه نغطيه ان شاء الله

'

تنهدت بتعب من دق الباب وغمضت عيونها من دخل ونطقت:قلت لك تعذّر منهم

أصايل:مو مقبول عذرك

لفت ملاك من سمعت صوت أصايل وابتسمت أصايل ومشت لها وجلست على السرير

واخذت نفس ملاك:تعبانه والله أصايل

أصايل:عارفه وباين عليك وعشانك تعبانه انزلي معانا

ملاك:مافيني افهميني

أصايل:عشان خاطري اذا عندي لك خاطر

ملاك سكتت تناظر أصايل وناظرتها أصايل بترجي:عشاني تكفين ملاك

غمضت عيونها بتعب ملاك ومسكت كفوفها أصايل:هيّا ملاك لا ترديني

ملاك هزت راسها وجلست وابتسمت أصايل:اسبقك اكيد ؟

هزت راسها ملاك وخرجت أصايل وتنهدت ملاك وهمست:ليه تسوي فيني كذا ياولد العميد ؟

وقفت تغير ملابسها وتلبس عبايتها بتعب ونزلت لهم

طلعت لهم برا وناظرتهم وابتسم عقاب:محد يرد أصايل

ضحكت أصايل وابتسمت بخفوت ملاك وجلست ولف عليها ثنيان

نوره:شفيك ملاك شكلك تعبانه اليوم

ملاك رفعت كتفها بهدوء:ولاشي انضغطت بالشغل بس

نوره ابتسمت وناظرت ثنيان ورجعت ناظرت ملاك:او يمكن في احد بيلعب مع حمد وسارا

سكتوا وجمد وجه ثنيان بصدمه من فهم وضحكت أصايل بصدمه ولفت عليهم وعقدت حاجبينها ملاك من استوعبت وهزت راسها بالنفي:لا

لف عليها ثنيان وناظرته ملاك وهي تهز راسها بتكرار:لا

عقاب:الله يرزقكم

سكتت ملاك تصد وبللت شفايفها بهدوء

ولفت جنى على ساري ورجعت صدت عنهم

نهار خرج مسرع ونطق:تم ثنيان اسـ

سكت من شاف ملاك وابتسم:اينجل

ابتسمت له ملاك وحك جبينه نهار يأشر لثنيان وهز راسه ثنيان وجلس نهار:اي ومتى العميد بيتفضل يشوي لنا العشاء

وقف عقاب:الان ياحضرة الضابط

ضحك نهار ومشى عقاب وقاموا معه العيال يساعدونه وشغّل النار ساري واخذ السمك عقاب يحطه بالأطباق الحديديه المفرغه عشان يشويه

وتقدمت أصايل:ابوي ابي تشوي بصل وطماطم مع خلطتك اللي احبها

ابتسم عقاب:هذي كلها الكلافه عشان اللي تحبه أصايل

ابتسمت أصايل ونطق نهار:هو محد ممشينا على رجل وحده بالبيت غير أصايل

ساري لف عليهم:دخلت العسكريه ببيتنا وصارت هي العميد

ضحكت أصايل ومسكت راسها بتعب ملاك بإنزعاج ولفت تناظر شادن من بعيد واقفه عند المسبح وحمد وسارا يلعبون عندها

ولفت على سؤال جنى:غريبه ما تجلسين مع بنت عمك ؟

رفع عيونه ثنيان يناظر ملاك اللي لفت على جنى:اجلسي معها انتي اذا ودك

ناظرها عقاب وابتسمت جنى:اسفه لو ازعجتك قالي ساري ان بينكم مشاكل

هزت راسها ملاك:دام تدرين ليه تقولين غريبه ؟ تفتحين موضوع ؟

سكتت جنى بإحراج وابتسمت نوره:اعصاب ملاك تالفه اليوم

صدت ملاك بدون رد وهي تحس انها مضغوطه من كل شي ومن نظراتهم لها ومن غصتها اللي ما رحمتها

حط السمك على النار عقاب وهو يقلّبه وتقدمت أصايل تقطع مع نهار السلطه ورفع عيونه عقاب:ملاك

لفت عليه وهز راسه يناديها ووقفت ومشت لهم ونطق عقاب:عاونيهم

ثنيان ناظرها ورجع ناظر ابوه:تعبـ

قاطعه عقاب:ادري

ناظرتهم ملاك ومشت تجلس بجانب أصايل وبلعت ريقها من ضحك نهار وأصايل وسوالفهم

ودق جوال نهار واخذه ورد:هلا ، وصلت ؟ ، طيب ثواني بس تطلع لك الخدامه

قفل ولف لأصايل:وصلت طلبيتك

ناظرهم ثنيان ونطق عقاب:جيبوها

تركوا ملاك اللي تقطع وهاديه ودخلت أصايل تسحب السماعه الكبيره وشغلتها وابتسمت تنتظر نهار

وابتسم عقاب من وقفت نوره تمشي لهم ولف ثنيان يناظر ملاك اللي ساهيه تقطع بهدوء وكأنها ما تحس بكل هذا الازدحام والحركه حوالينها

رفعت عيونها من اشتغلت اغنية الميلاد السعيد وناظرتهم واقفين قدامها ونهار ماشي من بعيد شايل كيكه وورد وبوالين وجمد وجهها تناظرهم بصدمه

صفقت أصايل تغني وتناظر ملاك وتقدمت شادن من شافتهم من بعيد وعقدت حاجبينها بصدمه تناظرهم

ماقدرت توقف ملاك وهي تناظرهم مصدومه تشوف الابتسامات المرسومه على ثغرهم والفرحه اللي تغمرهم

والكيكه اللي انحطت قدامها ومد لها الورد نهار والبوالين واخذتها بيد راجفه

وهي تسمع صدى اصواتهم وتناظر الكيكه اللي مكتوب عليها اسمها وجنحان بيضاء

وبلعت غصتها اللي حرقت حبالها الصوتيه ورمشت من طاحت دموعها واول موج عيونها

ورفعت عيونها بدون ماترسم ابتسامه بملامح جامده بارده توصف صدمتها وشعورها

هي اخر شموع طفتها كانت مع امها وابوها قبل ما تصير لَهب ويتلون داخلها سواد وتكون شخص ماتبي تكونه وتعيش مع ناس ما يودّونها

ورغم الخذلان اللي عاشته من العائله اللي كبرت معها الا انها لقت افضل عائله تحتوي بياضها

اكثر العلاقات متانه ، اللي من شدة ترابطهم تشوفهم متشابهين ما ينقص شخص بينهم الا وكان مكانه خالي ولا يسدّ مكانه احد

أب له أكثر من كفّين وصدر ، أب يحتوي جميع أولاده ويهتم بكل شخص موجود حوالينه ولا يغفل عن حال شخص موجود بجانبه

أم تشيل الحنيّه ولا تبخل على احد فيها ، تعطي الجميع اللي يحتاجه وتشوف ان الذريه نِعمه

أخوان مترابطين كتوفهم بكتوف بعض ما يقدر يدخل بينهم شيطان ويبعثرهم حتى لو كانت ملاك

ماكانت تحس على مجرى دموعها اللي خسرت انها تتحكم فيها كل اللي تشوفه وجيههم امامها وصوت الفرحه بالمكان

ناظرتها نوره بحنيّه وهي تشوف حزنها ومشت لها تجلس بجانبها وشدت على كفها بقوه تغني مع أصايل

وناظرها عقاب وهو مبتسم ونزلت عيونها على الكيكه

تحسّ انها أسوأ شخص بالدنيا وحريق صدرها من صوت ضميرها يشويها ، وان كل هذي الفرحه دين عليها ولازم ما تحرم هذي العايله منها

ناظرها ثنيان بأضعف حالاتها اللي محد تعوّده ويعرفه وأيقن ان ملاك مافي شخص أقوى منها يقدر يكسر شموخها ، كل اللي يطفي لهبها إحتواء عائله ووجود أب وأم بالصوره وفرحه وشموع

طفت الاغاني أصايل ونزلت عيونها للكيكه ملاك ونطقت نوره:اعذرينا ملاك على القصور كان ودنا نحتفل فيك احتفال يسوى واكبر واحلى لكن ثنيان ما عطانا خبر غير بأول جيّته العصر وأصرّ اننا نحتفل بشي بسيط اليوم

رفعت عيونها ملاك على ثنيان اللي واقف وهادي يناظرها ، هو اللي قدر يدخل في ماضيها ويلمس جروحها اللي ماقدرت تنبرأ

ميلت راسها تناظره وكأنها تعاتبه وتلومه ليه يطيّحها بأسوأ وقت ، ليه يرجعّها لمواقف تضعفها ما تقويها ؟

لفت من نطق عقاب:كل سنه وانتي بخير وهداياك بتجيك مني ومن باقي اهلك

نزلت راسها من اخر جملته وعضت شفتها بضحكه تتألم من كل هذا الكلام المحفوف الحنون

أصايل:وانا بعد ترقبي هديتي بتعجبك

ماردت عليهم ولاقدرت ترد حتى من اختناقها وتقدموا حمد وسارا للكيكه ونطق نهار:ورع لا تمد يدك تعدم الكيكه ماهي لك

لحس اصبعه حمد ينتظرهم يقطعونها ولفت سارا وابتسمت لملاك تسألها:ميلادك ؟

ناظرتها ملاك وابتسمت وهزت راسها ولفت للشموع سارا:تمني أمنيه

لفت تناظر الشموع وكانت تدري انها خزعبلات وأوهام أطفال وان الاماني ما تحقق من شموع الميلاد لكنها تمنت وغمضت عيونها ورفعت كفها على صدرها من نيران صدرها تشك انها فاحت ريحة احتراقها مع احتراق الشموع ونفخت الشموع وما سكن بالها غير امنيه واحده

امنيه مستحيل تتحقق بظنها وانها تخرج من هذي العايله بدون ما تتغير كل هذي النظرات لها لنظرات ما تبي تشوفها وتبتعد عنهم بدون ما يتعور احد بينهم وتكون سبب في ذلك

اخذت السكين من يد نوره تقطع الكيكه وضمت الورد تشد عليه من اختناقها وودها تهرب من بينهم او يقبض روحها ملك الموت بهذي اللحظه ولا تعيش اكثر وسطهم

ضجيج الفرحه والعائله يدمّرها ويزيد نيرانها ولفت بعيونها على شادن اللي واقفه بجانب آخر عنهم وناظرت نظراتها

كان ودها تعيش كل هذي الألفه مع أهل تمنتهم أهل مع بنت عم تمنتها أخت ، تعبت عشان تحاول تعيش مع عائلة عمها وتتمسك فيهم وترسم لها مكان بصورهم الخاليه منها لكنهم كانوا دائماً بدونها

تقدمت أصايل تمد جوالها لسارا:التقطي صوره سارا

جلست جنب ملاك وتقدم عقاب يوقف خلفهم ومشى نهار يجلس عند رجلين أصايل ومشى ثنيان لخلف ملاك ورفع كفوفه على كتوفها يشد عليها بقوه وكأنه يلمس جمرها من شدة احتراقها واشتعالها وسطهم

وابتسمت جنى توقف مع ساري ومشى جاسر يوقف بجانبهم من ناداه عقاب بعيونه

حست بيدين ثنيان اللي على كتوفها وكأنه يلمس جروحها وتألمت من مشهد الصوره اللي توسطتها هي بنفسها ورفعت كفها على كف ثنيان اللي على كتفها وابتسم ثنيان للكاميرا وكأنه ينتشي فرحة المنتصر

المنتصر اللي ركض عشان يبيّن البياض بالصوره ويبعد السواد بكل ألوان الفرح بصدر ملاك

ويرسم على كيكتها جنحانها البيضاء اللي كسّرتها السنين والظروف

وابتسمت ملاك وسط دموعها للكاميرا ولفت لشادن البعيده عنهم ومسحت دموعها بأصابعها ولفت من تقدمت الخدامه:مدام ملاك

نوره:وصلتك هدايا ؟

الخدامه:منيف برا

ارتاحت وكأنها لقت المهرب من بينهم وأخيراً رغم ان رجلينها تجمدت ولا قدرت تقوم الا انها قامت بالورد والبوالين ومشت بخطوات سريعه تبكي بدون صوت

ولفت لخلف البيت تشوف منيف واقف عند باب البيت ولف عليها من شافها جايّه وهي تبكي

وعقد حاجبينها وركضت له تفلت البوالين من يدينها وتحضنه وحضنها منيف وهمس:ملاك !

بكت بعلو صوتها بحضنه تشد عليه بتعب ومسح على ظهرها منيف بخوف:وش صاير ؟

ملاك:خذني تكفى منيف تكفى خذني

عقد حاجبينه وابتعد عنها وناظرها ومسك وجهها:علميني وش صاير ؟

ملاك ناظرته وهي تبكي:اليوم ميلادي

سكت منيف يناظرها وناظر الورد والبوالين اللي طارت بالسماء وفهم ورجع يناظرها ومسح دموعها ورجع حضنها وبكت بحضنه:ولعّوا لي شموع ميلادي منيف ، ولعّوا نار داخلي زياده

تنهد بتعب ومسح على ظهرها يهديها وبكت ملاك:١٠ سنين من عمري ما شاركني احد ميلادي ، ١٠ سنين ما طفيت شمعه الا اليوم منيف

غمض عيونه بتعب منيف وبعدت عنه ملاك وناظرته:تعرف اني دخلت بينهم عشان مضرّه وهذا جزاتي ؟ كل هذي الحفاوه والحنيّه والاحتواء ، ينادوني بنتي منيف ينادوني بنتي

بكت تتمسك بذراعينه بقوه وكملت:مع ان كل الشرّ اللي اخترت امشي فيه كان سبب عائله قفلوا الباب في وجهي فجأه وانا أهمّ بالدخول بعد ما قالوا لي ان هذا بيتي ، طردونا من بينهم

منيف:اهدي ملاك تكفين

ملاك هزت راسها بالنفي بتعب:انا أحترق منيف حسّ فيني داخلي نيران تحرقني

مسح دموعها منيف باصابعه ورجع حضنها وحضنته ملاك تبكي في حضنه

'

رفع عيونه للسماء من اشر حمد على البوالين اللي طارت بالسماء

وناظرت السماء أصايل:خساره شكلها طارت من يدين ملاك

نوره ناظرت عقاب بحزن:البنت ما ابتسمت لو شوي ، لا يكون زعلناها بدال ما نفرحها ؟

عقاب:لا ما زعلت ، هي يمكن تذكرت اهلها وامها وابوها

سكت ثنيان يناظر البوالين اللي ابتعدت ووقف يمشي

حط يدينه بجيوبه لين شافهم من بعيد ووقف

ناظرها بحضن منيف ومنيف يمسح على ظهرها وراسها وسكن محله يتأمل حالهم

ومشى بخطوات هاديه لين اقترب منهم ورفع عيونه منيف من شافه وابتعد عن ملاك ولفت ملاك وناظرته

ناظر وجهها اللي يتشعل إحمرار ودموع عيونها وصدّ لمنيف وابتسم:زين جيت تشاركنا الإحتفال

ناظرته ملاك وعقدت حاجبينها بذهول من ابتسامته وهدوئه وتجاهله لمنظرها

كان واقف يتكلم مع منيف مبتسم رغم انه نفض البنزين على الجمر اللي داخلها وزاد احتراقها

منيف بلع ريقه بهدوء:جيت اشوف ملاك وراجع

ثنيان:لا تروح فاضي خل نقص لك كيكة ميلاد اختك

سكت منيف يناظر ثنيان ولف لملاك:ملاك

لفت ملاك وابتسمت لمنيف ومسكت ذراعه بيد راجفه:ارجع انا كويسه

ظل يناظرها منيف ونطق ثنيان:لا تقلق لو بغت مثل هالحضن اللي عندك بتلقاه

لفت ملاك عليه تناظره واخذ نفس منيف من الوضع الفوضوي وهز راسه وناظر ملاك:ان احتجتي شي تعالي لي لا تتصلين

هزت راسها ملاك ومشى منيف يرجع يركب سيارته وناظر الورد اللي بالارض ثنيان وشاله ولف لملاك يمدّ لها الورد

رفعت عيونها عليه ملاك تشوف هدوئه ودفى نظراته وعيونه اللي تتصل بعيونها بدون ما ترمش

ملاك اللي كانت دايماً منتبهه على كل شي ، هالمره ما انتبهت على ثنيان

ناظرته وكأنها أول مره تناظره وتعرفه وتذكر اسمه اللي أبت انها تحفظه وتردده وتناديه فيه

هزت راسها وهمست:ليش ؟

ثنيان ناظر عيونها بهدوء:عشان الكل يعرفك بالحاضر الا انا اعرفك بالماضي ، وعشان اللي عاشوا ماضيك كنتي ما تتردين تحضنينهم وتدورينهم نفس ما دورتي شادن وسطنا ونفس ما ركضتي تاركه كل شي بيدك وحضنتي منيف

سكتت ملاك تناظره وكمل ثنيان:عشان ثنيان اللي اسمه سهل تنسينه وصعب تذكرينه شاف صورة الملاك بحقيقته قبل ما يلبس شي ماهو ثوبه ، ويحط قناع مزيف يخفي هويته ، عشان ادري ان العائله هي علاجك يا لَهب

هزت راسها بالنفي ملاك وعضت شفتها:انت ظنك بتطفي ناري لكنك زدتها

هز راسه ثنيان:ابي ازيدها لين تحرق غصونها وجذورها مابي جذر لَهب يبقى داخلك

سكتت ملاك تناظره وكمل ثنيان:كنتي دايم تقولين انك تحرقين كل شي تلمسينه انا الوحيد اللي لمستيه ماحرقتي داخله

ملاك:عشر سنين أطفّي من رجاي المشاهيب وإنت نفخت في حطبها وشبت

ناظرت عيونه وهمس ثنيان:البسي اذا ودك تهربين منهم

مشى تاركها وبكت ملاك بعد روحته واخذت نفس تناظر لون الورد اللي بحضنها ، البيوني الأبيض

اللي يشبه ماضيها واجنحتها واسمها

ناظرت ظهر ثنيان اللي مبتعد وهي تبكي ودخلت البيت

-

تقدم ثنيان وابتسم من ناظروه:والله مدري اذا بتزعلون والا لا

كمل بإبتسامه:بنطلع

ضحكت أصايل ونطق نهار:اطلع ياعمي اطلع

ابتسمت نوره:اي احسن خل ملاك تاخذ راحتها

عقاب:وين بتروحون ؟

ثنيان رفع كتفه وناظر جاسر وشادن اللي جالسين:وين ماودها ملاك

جنى ضحكت:الله يستر لا يكون المطار دام فيها راي ملاك

أصايل:لا ما ظنتي يمكن اليخت ؟

نوره:بتقعدون تخمنون انتم ، روح يا أمي الله يوجّه لكم كل خير

ابتسم ثنيان بهدوء ومشى تاركهم وركب يشغل سيارته ولف من شاف ملاك طالعه من البيت وبيدها شنطتها وشنطه صغيره وركبت يمينه بدون تناظره وبدون تتكلم وقفلت بابها

ناظرها بهدوء وقفل بابه وحرك سيارته خارج من البيت

ناظرت الطريق وهي شاده على شنطتها بحضنها ونزلت عيونها من حست بتعب غصتها يخدش حلقها وعقدت حاجبينها بتعب تبكي بدون صوت

هزت رجلها ورجعت تناظر الطريق وهي تبكي وتتذكر اصواتهم حوالينها ونظراتهم وابتساماتهم لها

لف ثنيان يناظرها وهو يسوق ورجع يلف لقدام لين وقف عند الشاليه وفتحت الباب قبل يقفل السياره ونزلت تمشي

فكت حجابها من اختناقها وهي تمشي وفلتت شنطتها بالتراب ومشت وهي تنزل عبايتها وتدخل موج البحر

نزل من سيارته يناظرها ومشى ياخذ شنطتها وعبايتها وحجابها من الارض

غمضت عيونها من لمست رجلينها برودة الموج وكأن داخلها تطلب الموج وتترجاه ' ياموج هوّن على قلبي '

وجلست على ركبها بالموج ورفعت راسها تتنفس وسط بكاها

تتذكر ميلادها الـ ١٥ وكأنها مانامت بعده ابد تذكر ريحة عطر امها وصوت ابوها وتحس حتى بلمسات كفوفهم على كفها وهي تقطع كيكتها السعيده

وتذكر ميلاد الليله وكيف رجعت تعيش الميلاد من جديد

كانت تتعلم من بعد ميلادها الـ ١٥ القسوه وتلّبستها ثوب ما نزعته عنها غير الليله ، الليله حست انها ماقست الا على نفسها

خسرت بياض جنحانها وصفاء اسمها واحلى شخصياتها ، خسرت ضميرها وافضل عائله عرفتها

هي ما دمرتهم كثر ما تدمرت هي بينهم ووسطهم

حطت يدينها على الموج وتحسه يغسل روحها ويطهرها من كل زيف وأذى ، وقادر الموج انه يطفي لهيب صدرها اللي اشتعل بسبب الموج

الموج اللي لفت من تذكرته ولا لقته على الشاطئ

شافت انوار الشاليه وعرفت انه دخل وقفت تلم ملابسها من بللها ومشت حافيه للشاليه ودخلت وناظرته واقف وماسك بطيخ ولف عليها:تعالي تبرّد عليك

بلعت ريقها من هدوئه ونظراته ومشت لين عنده وهي ترفع شعرها كله واخذ السكين ثنيان وهمس بدفى صوته:كيكة ميلادك لكنها على ما يحب الموج ، ولد البحر والصيف

ناظرته تستغرب هدوئه ومد لها السكين ونزلت عيونها للسكين واخذتها بيد راجفه وشد على كفها يوقف وراها ، قرب منها على وشك يلمس ظهرها بصدره

ناظرت البطيخ اللي قدام عيونها على الطاوله وناظرت كفه اللي ماسك كفها قبل ما يمسك السكين

وارتبكت من قربه ودفى كفّه وكيف وقف خلفها وعقدت حجاجها من حست بأنفاسه على عنقها وشعرها

ورجفت يدها ورفع عيونه ثنيان يناظرها من قريب نزل عيونه لعنقها المكشوف ولأول مره يشوفه من قريب ، لأول مره تبان له عروقها الخضراء من عنقها الشفاف واللي تتوزع عليها وكأنها جذوع نخل وشجر وبساتين ما كان ينقص هذي الجذوع الا توريد الورد بألوانه الحمراء ، لكنه اكتفى بالنظر مع ان داخله يرغب

ولف للبطيخ يشد على كفها يقطعه معها واخذت نفس من انقسمت نصين وشالت كفها من تحت كفه وابتعدت عنه

رفعت عيونها عليه من قطع لها شويه ومدها لها اخذتها من يده بهدوء وقطع له يذوقها ولف عليها:في مناشف داخل

ناظرته يصد يرجع يقطعها كامله ومشت وبيدها البطيخه ودخلت الغرفه وجلست بملابسها على السرير وناظرت البطيخه واكلتها بهدوء ولفت للمنشفه اللي على السرير واخذتها ودخلت الحمام

'

خرج برا وهو ياكل من البطيخ وابتسم ثواني من تذكر شكلها وسط اهله ودموعها ، ابتسم لانه قال وطال وتمنى ان ملاك بيوم تنكشف بيض اجنحتها على يدين ثنيان

كان يدري ان ما خلف هذي النيران غير فردوس وجنه وملاك تخبي كل هذا النعيم اللي يحظى فيه اي شخص حوالينها ، بياضها ونيّتها الصادقه وحبها وحنانها وضعفها وحاجتها

وهو يبي يشوفها كذا يبي يحس انها جنبه ضعيفه هاديه رقيقه ماتقدر جمره وحده تشتعل داخلها

ولف من خرجت مغيره ملابسها تلبس الفستان اللنن الأبيض ومشت تجلس ولف للبحر ثنيان وهو ياكل من البطيخ

ناظرته ملاك واخذت نفس:الان انت سعيد اكيد

ابتسم ثنيان بدون ما يناظرها وناظرته ملاك:خليت اهلك يكشفون اني شخص ضعيف

ثنيان:اللي يبكي مو ضعيف اللي يبكي إنسان

لف عليها وسكتت ملاك وكمل ثنيان:وانتي ماتبين تكونين إنسان

ملاك لفت للبحر ولاردت عليه وصد ثنيان يناظر البحر

لفت عليه تشوفه ياكل من البطيخ ومتكي بظهره يناظر البحر كان يناظر شبيهه ، الموج الهادي

كان جنبها جالس يشبه البحر الهادي بطمأنينته وهدوئه ودفاه وغموضه ، كان مره واضح مثل نور فَلق الصبح ومره مثل البحر ما ينعرف قاعه

لف عليها ثنيان من انتبه لنظراتها ونطق:بيكون هذا افضل ميلاد لك بعد ميلادك مع اهلك

ابتسمت بهدوء وصدت عنه:لا

ضحك ثنيان:والله الافضل ، ميلاد ماكنتي تتوقعين انه يحصل

لفت عليه ملاك تناظر ضحكته وهمست:كيف عرفت يوم ميلادي ؟

ثنيان:زوجتي

سكتت وكمل ثنيان:ولا بغيت اقطع روحتي للبحر بسبب شي لكن رجعت وقطعتها عشانك ، عشان ميلادك

ملاك:خططت برجوعك قبل تروح للبحر ؟

هز راسه بالنفي:وسط البحر خططت الرجوع اليوم ليلة ميلادك

ملاك ناظرته وكمل ثنيان:واذا بتسأليني يستاهل رجوعي من وسط الموج عشانك ؟

سكتت ملاك تناظر اجابته وابتسم ثنيان:بقولك لا ما يستاهل

ابتسمت تصد عنه وضحك ثنيان وبللت شفايفها ملاك بهدوء وهي تناظر البحر:من زمان ما بكيت هالقد من بعد مـ

ثنيان قاطعها يكمل:من بعد حضني

لفت عليه وهز راسه ثنيان

ملاك:وليه تقولها وكأنك مبسوط ؟

ثنيان:اي والله مبسوط ما بكذب عليك ، اعرف ان نَبع دموعك بيطفي نيرانك لان لا الموج بيساعد ولا الأقدر بتساعد

ملاك:هذا انتقامك ؟

ثنيان:ما انتقمت انا منك ولا فكرت انتقم

ملاك سكتت تناظره وناظر عيونها ثنيان:الشي مغلوب عليّ ، انتي السبب

سكت ثواني وكمل ثنيان:غرقت بالاسئله

ملاك رفعت عيونها لعيونه وناظرها ثنيان وهو ساكت ورمشت بهدوء ونطقت:انا يوم كنت اخفي عنك دموعي مع الاسئله كنت اخاف تقول عني وقفت يوم من الايام قدامي ودمعتها على خدها وانا ماني بحيّ الله بشر يكشف المستور انا اموت ، اموت ولا درت الامواج عن سَدّه ، لكنك الوحيد اللي توقف عنده كل مبادئي ويعجز كبريائي قدامك

ثنيان سكت وكملت ملاك:خرجت من بيت عمي مطروده

عقد حاجبينه ثنيان بصدمه وكملت ملاك:والحين هذا هو قاعد يحاول يفضحني بعيونك وبعيون اهلك ، قول عمي يمكن ما زرع ربي في قلبه حنيّه لو شوي

صدت بقهر عنه:بنته كانت قرينة فراشي وغرفتي ، شاركتني سرّي وجهري تعرف عني كل شي ما يعرفه منيف اخوي من لحمي ودمي

لفت على ثنيان:للحين ما قدرت اروح واوقف قدامها بعد زواجها من اخوك واعاتبها ، للحين احسني مصدومه من نظراتها وتعامل اخوك اللي اختلف

رفعت كتفها بصدمه:ليه تبي تأذيني ؟

تقدم ثنيان يحاول يفهم وناظرها:وش تعرف عشان تهددك ؟ تعرف وين تودين الفلوس ؟

ناظرته ملاك يسأل ولاردت عليه واخذ نفس ثنيان:جاوبيني دام تتكلمين ، ليه عند اسئلتي تسكتين ؟

ملاك هزت راسها بالنفي بتكرار وتجمعت بعيونها موج دموعها وعقد حاجبينه ثنيان:علميني ملاك فُكّي عني استفاهاماتي

ملاك:ماراح تقدر تطالع فيني كذا من بعدها

زاد استغرابه وعضت شفتها ملاك من دموعها وناظر دموعها ثنيان وسكت يصد عنها

شد على قبضة يده بإنزعاج من الطاري وناظرته ملاك وبكت بدون صوت

سكت ثواني طويله ونزل عيونه بتردد ونطق:اذا بين كل القلق اللي تعيشينه تهمك نظرة عيوني !

لف عليها يناظرها وكمل:ما بتتغير لو كل الوشاة تكلموا عنك

نزلت دموعها تناظره هي تتعبها كل هذي الثقه والمحاوله منه والقرب وبعد المسافه

كمل ثنيان يناظر عيونها:بس ابي اعرف منك كل شي

هزت راسها بالنفي ترفض الكلام وصد ثنيان عنها وهمست ملاك:ما أقدر

ثنيان لف عليها بغضب وناظرها:لين متى ؟ علميني وجاوبيني وش النهايه ؟

سكتت تناظره وناظر عيونها ثنيان بحده:علميني وش نهاية هالحرب اللي داخلي ؟ بين موج ولَهب يتحاربون ؟ علميني اذا ماودك تجاوبين ، قولي وش نهايتك بحياتي ؟

عقد حجاجه:بتهربين ليله بغفلتي وتخلين وراك دبله ؟

ماردت ملاك وناظرها ثنيان بقهر:هذا اللي تبين تخلفينه بعدك ؟ وتتركين لي كل الاسئله ؟

ملاك رفعت كتفها:ما ظنتي بخرج من حياتك بهالسهوله ، صارت حياتي اصعب

ناظرها ثنيان ومسحت دموعها ملاك:صار صعب عليّ اتركك واترك اهلك ورا ظهري وامشي

ثنيان همس:وش بتسوين ملاك ؟ بتتركين عمك يعيّشك هالضغط ؟ وش تنتظرين ؟

ملاك رفعت صوتها من اسئلته بتعب وإنزعاج:ليش مصرّ ؟ ليش تبي تساعدني ؟ ليش تبي تطلعني ملاك ؟ ليش ؟

سكت ثنيان وسكتت ثواني ملاك وكملت:انا أذيتك ، دمرت حياتك وعيّشتك تحت تهديد وقلق وما اكتفيت وفضحتك ، ليه تبي تطفي نيراني وهي ماهي سبايبك؟

ماكان عنده رد يقدر يجاوبه لها ولا كان عنده فَهم لوضعه ولمحاولاته معها واكتفى بالسكوت من غموض مشاعره واختفاء اجابته

وعقدت حاجبينها ملاك وناظر عيونها ثنيان كان وده يجاوب جواب واحد جواب غامض يشبهه ويقول لها

: قلبي على الماء وقلب الماء على شطك

لكن ملاك فطينه وبتفهم غرقه واعترافه ولا نطق شي غير السكوت اللي خرج من ثغره بلا شي

صد عنها ومسكت ذراعه ملاك بقوه:انا حريق ياولد العميد ، انا لَهب احرق كل شي ألمسه لا تصرّ عليّ

قربت منه تهزه من ذراعه:أنا ما أستحق المحاوله وظروفي أبشع من ضميري اللي تحاول تصحيه

بكت من تذكرت صورة منصور اللي معه بكت بخوف من الحقيقه وشهقت بتعب ولف عليها ثنيان من شهقت وناظرته من قريب وهي ماسكه ذراعه:انا احس بحريق في قلبي كل ما تنفست زاد اشتعاله ، اترك محاولاتك معي خل الاسئله بدون أجوبه

ثنيان ناظرها من قريب ونزل عيونه لدموعها وناظر ثغرها اللي يخفي أنيابها ورجع ناظر عيونها وهمس:فات الأوان

بكت تناظره بتعب وعضت شفتها بتردد

شدت على ذراعه الضلع الأطول اللي حضنها وجربت منه أدفى المعاطف وجَمر المدافي

كانت تتمنى تكسر كبريائها من جديد وتطلبه حضنه او تحضنه بلا طلب ولكن ماقدرت

وكان هو وده يحضنها لكنه ينقهر منها ومن صدّها والبيبان اللي قافلتها عنه وقام تاركها وفلتت يدها عن ذراعه ومسحت دموعها من جديد تلّم نفسها

وتقدم ثواني يناظر البحر ولف عليها:لو غرقت لا تنقذيني

رفعت كتفها:ماراح انقذك

كان قصدها انها ماتعرف تسبح ولكن فهمه بمقصد جوابها المختصر ومشى تاركها وفصخ تيشيرته وتركه على التراب ودخل بين الموج ومد يدينه يسبح

ضمت رجلينها تشوفه يسبح بالبحر رغم ظلمة الليل وتأخر الوقت

لأول مره تدرك ملاك ان في تضحيات أكثر من تضحيات منصور يستطيع احد انه يعطيها

لأول مره تعرف ان كل تضحيات منصور ماهي الا انسانيه وفطره ، والحقيقه اللي تمثل التضحيه هي محاولات ثنيان

تغاضيه عن سوادها واخطائها ومحاولاته لها

كان المتأذي الاكثر بقصة حياتها رغم هذا هو نفخ لها شموع الليله عشان تطفيها ولا يفوتها ميلاد بدون فرحه ولمّة عائله ، ماتدري اذا سامحها او لا بس تدري انه تخطى اخطائها وتغاضى عنها وفهمها رغم انه يجهل للحين أجوبة اسئلته عنها

نزلت عيونها ثواني تذكر منصور اللي تركها بأول غلطه منها رغم انها غلطت عشانه ورفعت عيونها للموج

اللي من سعة صدره تقبل كل شي سوته وصدّق انها ظروف وماضي أليم وقَدر حدّها على الأذى ، وصبر مع ان النار تصلاه من فوقه ومن تحت قدمه

مع انها نار وحقيقتها نار ونهايتها نار الا انه رمى نفسه معها ، مع انه ممكن يخسر اهله فعلاً من حقيقتها ويخسر حياته وحسن سمعته

وقفت تمشي على الرمل حافيه لين تيشيرته واخذته بيدينها ورفعت عيونها له يسبح قدام عيونها

شدت على تيشيرته تحس بالتعب فوق جفونها وفوق صدرها ولا شعرت بيوم من أيام حياتها بكل هذا القلق والضغط من قبل

لأول مره تتجمع عليها مشاعر وأحداث ما تعرف تحلها وواقفه عندها للحين بدون حل

خرج من البحر يمشي ورفع شعره يناظرها واقفه ومشى لين عندها ومدت تيشيرته وتجاوزها وغمضت عيونها بتعب ورجعت تشد على التيشيرت

لفت عليه تشوفه يدخل ورجعت تجلس وانسدحت بتعب والتيشيرت بيدها وغمضت عيونها تتذكر عتابه لها وكل الحرب والكلام اللي خاضته معها ، كل الاحداث الصعبه اللي عاشتها معه وكل اللي يعيشه حالياً بسببها

-

( ⭐️⭐️⭐️⭐️ )

خرج من الحمام يناظر الغرفه فارغه مع انه طوّل بالحمام ولبس وخرج

نزل يناظر حوالينه وخرج وناظر رجلينها وهي منسدحه وتقدم اكثر وشافها نايمه ونزل عيونه للتيشيرت اللي بكفها

كان بيكون كل شي أسهل لو فكت له بيبانها الليله وكان ممكن يخطي خطوه ما توقعها او حسب لها حساب لكنها صدّته ولا فتحت له باب من ابواب اسئلته

سحب المفرش اللي على يمين الكراسي وفتحه وغطاها وفزّت بخوف وناظرها وفتحت عيونها بخوف ورفعت عيونها عليه وجلست

وشال المفرش بيدينه:قومي داخل نامي

مسكت راسها بألم وتعب كان وجهها شاحب من بكاها الليله ومن تعبها ووقفت وهي تترنح ومسكت الكرسي توقف بإعتدال وناظرها ثنيان وهو واقف

وغمضت عيونها بألم من راسها ورفعت كفها وفتحت عيونها من مسك كفها وسمعت صوت تنهيدته ولفت عليه تناظره صاد يمشي ومشت معه

ورفع ذراعه خلف ظهرها يمشي معها ودخلت الغرفه وترك كفه ولفت عليه وناظرها واقفه بمنتصف الغرفه

لفت عليه بأمنيه مستحيله سكنت قلبها للحظه ، هي انها تهنى بنومه مريحه بعيد عن كوابيسها وسط حضنه

لكن ظلت تناظره واقف وهز راسه بهدوء:تصبحين على خير

رجع للخلف وخرج وقفل الباب خلفه وبلعت ريقها تناظر الباب اللي قفله بينهم ولفت للسرير وانسدحت وغمضت عيونها تحضن نفسها بنفسها

جلس بالصاله وحط كفوفه بحضنه بقل حيله من وضعهم ، من الاسئله حولها وحول وضعه معها ومن نهايته معها

ما يستأمنها ويخاف منها لكنه متمسك فيها بشكل يستغربه ويستغرب صدته اللي ما تستمر وكل ما صدّ قطع صدود دربه ورجع لها من جديد

'

كانت تاكل معاهم وتسمع نوره اللي تنطق لسارا:سمكه عيديها

سارا نطقت:سمكه

نوره:امي انتي اسم الله عليك اي لا عاد تقولين لها فيش

عقاب:بتتعلم شوي شوي ، وش بتسوي بمدارسهم ؟

رفع عيونه جاسر من توجه له السؤال:ان شاء الله قريب اشوف لهم

نوره:اي ومدرسين خصوصي بعد يجون البيت يعلمونهم وعقاب ما بيقصر بيدخلهم بالنادي يتعلمون السباحه والخيول

ابتسمت جنى:خالتي تبي كل العائله مواهب وهوايات

ابتسمت نوره:اي ابي يطلعون احفادي يفهمون بكل شي ولا يحتاجون لاحد

أصايل:ابوي

رفع عيونه عقاب وهو ياكل ونطقت أصايل:بغيت اشاوركم بموضوع

عقاب هز راسه واخذت نفس أصايل:زميلاتي بالجامعه كلموني وقالوا في تطوع يخدم تخصصنا في مستشفى حكومي

عقاب بلع لقمته:انتي وش ودك ؟

ابتسمت أصايل:انا بشاورك انت

عقاب:اذا تبينها فايده لك ولا تهمك وظيفه ودخل روحي وتطوعي وتعلمي مع زميلاتك

نوره:هاو أصايل تسألين بعد ؟ اشتركي معهم لا يغلبونك هالبنات ويصيرون احسن منك خذي امي شهادات وتطوع خذي

ضحك نهار:امي ترا بس بيكرفونها لانها بدون راتب

أصايل:لا ما احس كذا وانا بشوف بيئة المكان لو ما ناسبتني انسحب سهله

عقاب هز راسه:صح عليك اي مستشفى

نوره:خلي ابوك يشوف مدير المستشفى يمكن يعرفه

أصايل رفعت كتفها:ما اعرف للحين ماعطوني خبر

عقاب:روحي ابوي انتي روحي وانشغلي وتعلمي

ابتسمت أصايل وهزت راسها واخذت جوالها ترسل

'

لف من تغير الوضع بالكمبويتر وعقد حاجبينه وعرف ان أصايل تكتب لوحده دخل وناظر رسالتها

وفتح الرابط اللي مرسلته لها صديقتها وقرأ التطوع وخرج يقرأ اسئلة أصايل عن المستشفى وأوقات الدوام

وهمس:وش بتسوين ؟

كمل يقرا لين فهم مع التفاصيل ورجع ظهره لورا ولف :يامور الحق

ناظر يامور اللي جالس ومنفس:وانت بس من يوم جبتك وانت منفس عليّ ؟

وقف ومشى ليامور بيشيله وضربه يامور وتأفف منيف:يا ابن الحلال زينها معي لا تصير شين

ناظره يامور وهو حذر وجلس منيف:بوديك لوحده حلوه اجل يمكن تزيّن امورك

سكت ثواني وابتسم:اقصد كوتي اللي مع كوتي ما تخصك ولا تقرب لها والا تعشيتك

لف ياخذ جواله وارسل لنهار وابتسم من رد عليه

نهار:ارحب

منيف:اذا يمديك بكره تجيب لي كوتي استحي اخذها انا

نهار:عندك اللي يشغلك شتبي فيها ؟

منيف:ياخي اللي عندي شين وثقيل دم بغيت يتعلم من كوتي

نهار ضحك:كوتي كانت نفسيه ماتغيرت الا بعد ما قعدت مع راعيتها بس ابشر بجيبها

ابتسم منيف وارسل له:وانا ارجعها بنفس اليوم لا تشيل هم

نهار:انا ماني شايل هم بس لزوم اسأل الجهات المختصه

ضحك منيف وارسل:انتظرك

قفل جواله واخذ نفس ولف ليامور يناظره

'

صحت وجلست على السرير وناظرت الغرفه حوالينها بتعب ومسكت راسها ووقفت ومشت للشباك وناظرت البحر ونزلت نظرها للجلسه تحت وشافت منشفة ثنيان وتيشيرته وجواله ومفتاحه ورجعت تناظر البحر وعقدت حاجبينها ماهو باين لها يسبح ومستحيل راح مكان غير البحر ، لكنه ماهو موجود

مشت ونزلت وخرجت ووقفت وهي تناظر البحر تسمع صوت موجه

ناظرت اغراضه ورجعت تناظر حوالينها ومشت للبحر ، سكَنها الخوف من أول فكره جاتها ومن كلام نوره عن علاقة ثنيان بالبحر وانه غرق بأول مره يغوصه

مشت حافيه رجلينها لين لمست الموج ورفعت يدينها وكأنها تدوره ووقفت محلها من لفت يسارها تشوف اليدين اللي جايه من بعيد وتسبح

وتقدم ثنيان وهو يسبح لين رفع راسه وناظرها واخذت نفس بتوتر من شافته

خرج ومشى لها وناظرها:صحيتي تركضين للموج ؟

سكتت ما قدرت تقوله عن خوفها ورعبها اللي سكنها وعن محاولتها لدخول الموج رغم انها تجهل السباحه

رفع شعره وهو يتنفس ويناظرها بإستغراب وعقد حاجبينه:صحيتي بحال جديد ؟

ماردت ملاك ومشت راجعه للشاليه ومشى خلفها نشف شعره وحط منشفته على رقبته ودخل خلفها:امي ما كلمتك ؟

دخلت المطبخ وهو وراها وفتحت الثلاجه:لا

ثنيان:تقول تبي تجيب الخدم ينظفون الشاليه ويجهزونه تبي تعزم الحريم

لفت عليه ملاك:ما بطلت ؟

ثنيان:الظاهر لا

ملاك سكتت وقفلت الثلاجه لانها ما حصلت فيها شي ونطق ثنيان:عزيمة الحريم هذي ضروريه عند امي خصوصاً بعد كل حدث جديد لانها تسكت الناس عن اشاعاتهم وكلامهم ، الحين جاسر محد يدري عن جيّته بعيال وبنت عمك موجوده تستر على الموضوع وسالفة الفضيحه اللي انتشرت عني

لفت عليه ملاك:الفضيحه اللي نشرتها انا ، عنك

سكت ثنيان وناظرته بهدوء ملاك:صرت تطلعني حتى من مشاكلي اللي اسويها بعد ماكنت تحط كل شي براسي ؟

ثنيان هز راسه بتعب:وش يعجبك ؟

ملاك:تروح تلبس زين

سكت ثنيان وصدت عنه لانه لا زال واقف قدامها قطرات الموج اللي سبح فيه على صدره وشعره وكتوفه وشورته مبلول وامامها شبه عاري

وتقدم ثنيان لها ووقف بجانبها وصدت بعيونها عنه ونطق ثنيان:مثل ما انا صرت أجردّك من أفعالك ، انتي صرتي ترجفين من قربي لك

رفعت عيونها عليه واقترب منها ثنيان ونزل عيونه لثغرها ورجع ناظر عيونها:حالنا مثل الموج بمدّه وجزره

ملاك نزلت عيونها لصدره اللي أمامها ، الصدر اللي ذاقت منه أوسع مكان وأشد دفى وأعمق شعور

نزل كفه لكفها ثنيان ورفعت عيونها على عيونه وحط كفها على صدره

لمست برودة جسمه بكفها المشتعل من شعورها واختلاف حالها معاه وقدامه

وهمس ثنيان:دليل انك لمستيني بس ما احترقت ، انتي ماتحرقين

بلعت ريقها وسحبت كفها من كفه وصدت بعيونها عنه وشدت على كفها تخفي ربكتها منه

ناظرها ثنيان ثواني وخرج من عندها واخذت نفس تجلس وناظرت دبلتها بأصبعها

مسكت راسها بتعب من حالها ووضعها مع ثنيان اللي موجود دائماً مهما حاولت تزيحه وتبتعد عنه

بللت شفايفها تفتح جوالها وتقرأ رسالة أصايل:تحتاجين السوق نروح سوا والا اروح لوحدي ؟

تنهدت بتعب وارسلت:ما احتاج شي

قفلت جوالها وخرجت ومشت تاخذ عبايتها من الغرفه وخرج من الحمام ثنيان ولبست عبايتها وناظرته:برجع البيت بخلص أموري

مشى بدون ينطق بشي وركب سيارته وركبت بجانبه ملاك وحرك مبتعد عن الشاليه

وقف عند البيت واخذت نفس ونزلت معه ومشت تدخل لهم وابتسمت بهدوء من شافت ابتسامة نوره وناظرت عقاب اللي موجود وأصايل

نوره:ما اكلتي معنا الكيكه يرضيك ؟

ابتسمت ملاك وحطت شنطتها على الكنبه وناظرها ثنيان وهو واقف

وتقدمت ملاك وجلست جنب نوره ومسكت كفها:شكراً بس ماقدرت اكمل معاكم بس صدقيني فرحتوني وكثير

ابتسمت نوره لها ومسحت على ظهرها:ما سوينا شي

عقاب:وكل سنه بنحتفل فيك لا تنصدمين

ضحكت بهدوء ملاك ولفت أصايل:صح انك قضيتي كل يوم ميلادك مع ثنيان بس ما يمنع نقضي اليوم انا وانتي ؟

ملاك رفعت كتفها وابتسمت:ماعندي مشكله

نوره:حجزتي لك ميك اب ارتست والا اكلم اللي اعرفها ؟

ملاك:انا امشي اموري لا تحاتين

نوره:على راحتك

ابتسمت ملاك لهم بإمتنان ووقفت تمشي وعدت من جنب ثنيان وطلعت وظل واقف محله ثنيان

لين نطق عقاب:واحنا لنا دين لبندر

رفع عيونه ثنيان وكمل عقاب:صلح وعنوه وإعتذار

اخذ نفس ثنيان وهز راسه:اللي تشوفه

خرج من عندهم ومشى لغرفتهم وفتح الباب وناظرها عند ملابسها ووقف محله يناظرها

اخذت نفس بتعب ولفت عليه تشوفه واقف بدون يتكلم ورجعت تصد

ومشى يجلس على السرير قدامها:وش بتقولين للناس؟

ملاك ناظرت ملابسها:اعرف ادبر نفسي لا تشيل هم

ثنيان:ما بتسأليني اذا بدبر نفسي انا بعد والا لا ؟

لفت عليه ملاك تناظره محتاس في موضوعه للحين ولفت بكامل جسمها لان كل اللي قاعد يصير بسببها وللحين ثنيان ما اخذ حقه منها ولا فضحها ولا انحل موضوعه

لمت كفوفها ببعضها بهدوء وناظرته:ابوك اكيد بيحل الموضوع

ثنيان سكت يناظرها وكملت ملاك بهدوء:وما بيخليك تنهان بسبب غلطه لانه عقاب وما يرضى على عياله

ثنيان:واذا ترك الموضوع عندي ؟ انا أنزّه نفسي واعتذر

ملاك ناظرته بهدوء:بتحلها انت بعد نفس ما تحل كل شي

ثنيان:ماحليت كل شي للحين

سكتت ملاك وناظر عيونها ثنيان:للحين ماحليتك

ملاك بلعت ريقها تشوف نظراته ووقف ثنيان:كل شي سهل حله ما بيصعب عليّ شي

رفعت عيونها له وناظرته يناظر فساتينها اللي في دولابها وتقدم يلمس فساتينها وكتمت انفاسها من قربه ومسك فستان بيدينه وابتسم بهدوء:لَهب

ناظرت لون الفستان اللي بيده ، أحمر مشتعل

ورفعت عيونها عليه تشوفه يناظر الفستان:اختاريه يشبهك

لف عليها يشوفها واقفه قدامه وترك الفستان وخرج من عندها

اخذت نفس وجلست وغمضت عيونها بتعب ولفت تشوف الفستان ولونه ولمسته بيدينها تناظره

'

جلست قدامه شادن تشوفه على جواله:وش بيصير يعني وش بجاوب واقول ؟

جاسر:اللي اتفقنا عليه

شادن:انت لو تلاحظ ما اتفقنا الا على خسارة ملاك بس

رفع عيونه جاسر:انتي بتبدين هذا الحوار عشان منصور اخوك ؟ ماني مطلعه الحين لو تموتين بنخلص من ملاك ونفضحها بين اهلي سوا انا وانتي وبنخلي الناس تعرف بزواجي وعيالي شهر بعدها يطلع لك اخوك

شادن:للحين ما تكلمت معي ملاك ماهو فارق عندها وجودي

جاسر:وانتي ليه تنتظرينها تجيك ؟ هي تسرح وتمرح مع امي وأصايل وانتي محد يبيك هنا ، روحي نكدي عليها وهدديها وش شغلتك عندي ؟

شادن اخذت نفس:بتصعبها بيني وبين ملاك وانا ماودي

جاسر ابتسم:تخافين منها ؟

شادن:لا

جاسر ضحك:هي ماهي هينه الصراحه واحسن منك بكثير واذكى منك

شادن صدت تتنفس بغضب وابتسم جاسر:اذا والله انتي ذكيه نكدي عليها وصكي البيبان قدامها

شادن لفت عليه:وانت ؟

جاسر:انا شغلتي اهلي وثنيان اخوي مالي شغل بملاك

سكتت شادن ووقف جاسر:اجهزي لبكره وجهزي حمد وسارا معك يشوفونهم الناس

شادن:ما بتعزم امي ؟

لف جاسر وعقد حاجبينه:اعزمها ليش ؟ خليها تقعد محلها ما يشرفني وجودهم

سكتت شادن تكتم غصبها وناظر الصغار جاسر يناديهم وضحك:اعزم امك والله حاله

خرج من عندها مع عياله وتأففت شادن بغضب ووقفت تمشي بالغرفه

طلت مع الشباك وناظرت ملاك وأصايل اللي خارجين وركبت ملاك سيارتها الجديده هديّة ثنيان لها وجنبها أصايل ويضحكون سوا

وحركوا خارجين من البيت وهي هنا بين جدارن غرفه وبيت ومع شخص مستغلها ويذلها ويحاربها

'

ناظرت اظافرها ملاك اللي يسوونها ولفت لأصايل اللي جنبها:بتسوين شي غير اظافرك ؟

أصايل:شعري

ملاك:بفتح لون شعري شوي

أصايل ابتسمت:مع الصيف ادعمك وبقوه

ابتسمت ملاك وصدت من تقدموا لها بكيكه وضحكت من أصايل اللي ما اكتفت بحفلة امس

وحطوا الكيكه عندها وصورتها أصايل وهي تضحك ولفت لها ملاك ومدت كفها لأصايل وشدت عليها أصايل:احلى بنت ولدت بالصيف

ابتسمت لها ملاك بإمتنان تراقب فرحة أصايل لها اللي تمنت بيوم انها تلاقي فرحه مثل فرحة أصايل لها

رجعت تناظر أظافرها أصايل وسوت شعرها بالصالون ولفت لملاك اللي يغسلون شعرها بعد صبغتها

ورفعت شعرها أصايل بإعجاب من شكلها وابتسمت تتصور ومشت لملاك:كيف ؟

ابتسمت ملاك:خيال ماشاء الله

أصايل لفت للمرايه:خليتها تقص اطرافه شوي طالع حيوي

هزت راسها ملاك:عدلوا اظافرك ؟

مدت اصابعها أصايل:اي غيرت اللون طلع احلى ومناسب بدلتي

ملاك ناظرت شعرها المغسول:ترقبي

ضحكت أصايل:باخذ قهوه واستناك

هزت راسها ملاك ومشت أصايل مبتعده عنها وبدوا يسوون شعر ملاك لين بان لها لون شعرها وابتسمت بإعجاب ووقفت وهي تلمسه وتعدله باصابعها

'

دخل نهار البيت ولقي امه بالصاله والخدامه تحط لها مناكير وابتسم:ام النهار والزين كله

نوره ابتسمت:عيوني

نهار جلس:ماودك تعزميني معك ادور لي وحده حلوه تشبهك ؟

نوره رفعت حاجبها:على اساس ماكان ودك اختار لك !

نهار ضحك:للحين ماودي

نوره:اذلف اجل

نهار:يعني اعزميني وانا اختار وأنقي ، ادور لمار ادور لمى رنيم غزل ساره ومريم وجمان وأحلام واذا نلاقي ودّ وسلاف أحلى

نوره:كل ذولا تبيهم ؟

نهار:امي تعرفين وش احلى شي بهالدنيا كلها ؟

نوره:اي اعرف

ضحك نهار:البنات

نوره بعدت يدها من الخدامه:لو مو مناكيري قمت عليك ياقليل الادب

ضحك نهار ووقف:وانا صادق ابي كل البنات

نوره رفعت حاجبها وابتسمت وحط يدينه بجيوبه:ابوي قال وش بيسوي مع بندر ؟

نوره:ما شفته ابوك عنده شغل ومعزوم الليله

نهار:وثنيان ؟

نوره:وثنيان برا محد بالبيت الكل يتجهز لبكره

نهار رفع كفوفه:الا ولدك المزيون ما يحتاج الزين زين لو قام من النوم

نوره:تحتاج يالمزيون تخفف من شعرك هذا

نهار رفع شعره باصابعه:شعري هذا يجمع علي بنات حلوين

نوره:انا بس اتمنى ابوك يطل من وراك بس

نهار عض شفته وضحك:بهرب قبل يجيني

خرج من عندها ولف من دخلت أصايل تلعب بشعرها وخلفها ملاك وصفّر وابتسمت أصايل تتمايل:تقييمك ؟

تقدم نهار ومسك كف أصايل يدورها:والله أميره ودلوعه

ابتسمت ملاك تناظرههم وتقدمت أصايل تبوس نهار:أعشقك

نهار ناظر ملاك:اينجل ؟

ابتسمت له ملاك ودق لها تحيّه وضحكت

نهار ابتسم:اجل زوجك موج مو معك ؟

ملاك:لا كنت مع أصايل

نهار:وش هالبيت اللي مافيه احد

أصايل:ابوي مو موجود ؟

نهار:محد ولا ساري ولا جاسر ولا احد

سكتت ملاك ثواني:شادن موجوده ؟

نهار:مدري امي داخل لوحدها

هزت راسها ملاك ودخلت وفتحت حجابها تدخل لنوره ورفعت عيونها نوره وابتسمت بوسع ثغرها:اسم الله عليك

ابتسمت ملاك:عسى زان عليّ ؟

نوره:يهبل يهبل ملاك ماشاء الله الله يحفظك من عيون الناس

ملاك زادت ابتسامتها من نظرات نوره وكلامها ودخلت أصايل:وأنا طيب ؟

نوره:تهبلون تهبلون الله يحفظكم اي والله الواحد يغتر قدام الناس بهالبنات

ملاك رفعت شعرها تنثره على كتوفها وظهرها وابتسمت تشوف نوره تمسك شعر أصايل:حلو هالصالون وش اسمه خل اروح له معكم المره الجايه

أصايل:صديقاتي دلوني عليه كنت بس بسوي اظافري واحتفل بملاك بس شفت شغلهم بالشعر وما قاومت

لفت ملاك من شافت سيارة عقاب تدخل البيت وخلفها سيارة ثنيان وبلعت ريقها تصد تاخذ طرحتها

وناظرتها نوره:اقعدي خل يشوفك

ضحكت أصايل وضحكت نوره من ابتسمت ملاك وهمست:ما يلاحظ

دخل عقاب البيت وخلفه ثنيان وناظره ثنيان بضيق:سمّ

عقاب:بنحلها وما بنخرج من عنده الا برضاه تفهم ؟ هذا هو ابو عمر بيجي معنا وابو سامي وتركي معنا وبيصلح الموضوع معنا وان شاء الله الامور زينه

عقد حاجبينه ثنيان من الضغط اللي تولد داخله ودخل خلف ابوه للصاله ولف للي جالسه تعطيهم ظهرها وعقد حجاجه من لفت ملاك وابتسمت لهم

وابتسم عقاب:ماشاء الله

ضحك عقاب يشوف أصايل وملاك:هذي تجهيزات حرب ام ساري لنقالين العلوم ؟

ضحكت نوره ولفت ملاك تناظر ثنيان اللي واقف يناظرها وجامد وجهه وابتسمت تبين أنيابها له:مذهول باين بس للاسوأ والا للأحسن

أصايل:للأحسن وما يقدر ينكر

تقدم ثنيان ومسك ياقته ثواني يبلع ريقه وجلس وهز راسه بدون رد

نوره:هاو ثنيان بلعت لسانك ؟ قول كلمه حلوه لزوجتك

عقاب ابتسم يناظر ملاك:زاد زينك ياملاك

لفت ملاك عليه وكمل عقاب:بنتي ملاك

ابتسمت له ونطق ثنيان:حلو

سكتوا يناظرونه ولفت ملاك عليه وضحكت:بس ؟

ثنيان ناظرها تستفزه وتوتره عند اهله وسكتت تصد عنه وهي مبتسمه

أصايل:بطلع غرفتي انا

نوره:مرّي الخدامه شوفي اذا خلصت كوي فستاني والا لا

أصايل هزت راسها وخرجت ونطق عقاب:بيجيني الخياط وبقيس بشوتي بالمكتب

نوره:زين

ثنيان:اجي معك ؟

عقاب:محد بيلبس بشت لا انت ولا اخوانك

سكت ثنيان وناظرته بصدمه نوره:وليه ؟ دايم عيالك معك ببشوتهم

عقاب:اعتذار ما تفهمينه يفهمونه الرجال

سكت ثنيان يناظره ومشى عقاب عنهم وتنهد ثنيان وابتسمت نوره تناظر ملاك اللي تناظر الفراغ وساكته وثنيان ساهي وعاقد حجاجه

نوره:الله يحميكم

رفعوا عيونهم يشوفون ابتسامة نوره وكملت نوره:ولا واحد من عيالي توفق بزوجته غيرك

ابتسمت ملاك ولف ثنيان على ملاك وكملت نوره:الله يبشرني ويفرحني فيكم دايم واشوفكم سوا طول العمر

سكت ثنيان يرفع ذراعه على الكنبه بهدوء

نوره:ونجيب لحمد وسارا اخوان يلعبون معهم

رفعت كفها تحك جبينها ملاك بتوتر وابتسم ثنيان يهز راسه من كلام امه واحلامها عنهم اللي تقولها

نوره:وانا ادري بكره بإذن الله بتنحل هالسالفه اللي حوالينكم وتزين حياتكم سوا

ملاك هزت راسها:لا تشيلين هم

ثنيان ناظر ملاك وابتسمت ملاك:انا بطلع غرفتي

نوره هزت راسها ووقفت ملاك تمشي ولف يراقبها ثنيان ما غطت شعرها وعقد حاجبينه:طرحتك ؟

لفت عليه قبل تخرج وعقدت حاجبينها:محد موجود

ثنيان هز راسه:غطي شعرك

ناظرته ملاك ورفعت حاجبها وابتسمت وصد ثنيان ولفت لنوره اللي غمزت لها ورفعت طرحتها تتحجب وخرجت وحك شاربه ثنيان وهو يهز رجله بتوتر

وناظرته نوره وابتسمت:امي ثنيان

رفع عيونه ثنيان ونطقت نوره:تقدر تروح ورا زوجتك محد رادك

ثنيان:لا انا مرتاح هنا

نوره ابتسمت:اي طيب بس رح غرفتكم احسن

ثنيان:بقعد معك

احتدت ملامح نوره بغضب:ثنيان قوم اذلف عند زوجتك بس

حك جبينه ثنيان وبلل شفايفه ووقف وخرج من عندها

-

دخلت تحط عبايتها على السرير وتلف لشكلها بالمرايه وتناظر شعرها ولفت من فتح الباب ودخل ثنيان وصدت عنه تنشغل

وقفل الباب ومشى يصد عنها ينشغل بجواله وحك حاجبه بهدوء وهو صاد:ماهو حلو

لفت عليه ورفعت حاجبها:وليش تقول حلو ؟

ثنيان مارد عليها وابتسمت ملاك تهز راسها بهدوء:ماهو حلو يعني ؟

ثنيان لف عليها:لا

ناظرته ملاك وتقدمت له:قول اشوف مره ثانيه بوجهي

ثنيان ناظرها واقفه مبتسمه ونزل عيونه لثغرها وأنيابها ورجع ناظر شعرها وناظر عيونها:ماهو حلو

هزت راسها ملاك وهي مبتسمه:بفهمها عكس

مشت تتركه وانسدح ثنيان وهو على جواله ومشت تغير ملابسها وتخرج وهي لابسه بجامتها الحرير وحطت كريم بيدينها تمسح يدينها وتناظره متجاهلها وابتسمت لانها تفهمه وصارت تعرفه

هو مشغول فيها لكنه يمثل عكس شعوره وعكس كلامه وتعليقه

لان فعلاً شكلها صار احلى ومستحيل احد ينكر حلاوتها اللي زادت

مشت تفتح اللحاف وتنسدح ورفع عيونه للسقف ثنيان من حس فيها تناظره ولف عليها يناظرها وقفل جواله

ابتسمت ملاك ورفعت حاجبها:عسى خير يازوجي موج ؟ بتنام بملابسك هذي ؟

ثنيان:مهتمه يعني ؟

ملاك هزت راسها بالنفي:مو مهتمه ابد

ثنيان رفع حاجبه:بفهم العكس

ابتسمت ملاك تناظر نظراته لها:ماهو عاجبني حالنا كذا

سكتت ثواني وكملت:ولا تفهمها العكس

ضحك ثنيان ولف بجسمه عليها ورفع راسه بذراعه يناظرها وناظرت عيونه وقربه منها وبلعت ريقها ونزل عيونه لعنقها ثنيان يشوف عروقها المتناثره العشوائيه الخضراء اللي تمنى وكثير من أمنياته انها تتلون بورد يزينها

لكنه يتردد ويمنعه الف مانع ومانع ، رفع عيونه لعيونها اللي تناظره:وش تفهمين من وضعنا الحالي ؟ وسط مصايب وأعاصير يسكنا هدوء غريب !

ملاك نطقت:يمكن ان الموج يطفي اللهب ؟

ثنيان ميل شفايفه بتفكير:او يمكن ان الموج صار لَهب اصلاً

ملاك:ما تشتعل انت ومستحيل تحترق والشي الوحيد اللي لمسته وما احترق

ثنيان سكت يكرر حركته من جديد:جربي إلمسيني

رفع كفه يلمس كفها واخذه لصدره وحطه على صدره وهو ماسك كفها وناظرها

ارتبكت من حست بنبضات قلبه وناظرت عيونه اللي تتأملها وتكلم بهدوء ثنيان:ما لمستيني ولا احترقت ولا حرقتي زماني واشتعلت ، ما غيرتي داخلي ولاشي

سكت ثواني وكمل:ولا تفهمينها عكس

سحبت كفها من على صدره وناظرته:ما أنت المكان الدافي وإفهمها العكس

ابتسم ثنيان من اعترافها وصدت ملاك تعطيه ظهرها واتسع مبسمه وعض شفته يناظر شعرها ونطق:حلو

ابتسمت تسمعه وكمل ثنيان:شعرك

رفعت كفها تطفي النور اللي عندها وضحك ثنيان ووقف يمشي للحمام

اخذت نفس وغمضت عيونها تحط كفها على صدرها كانت هي اللي تشتعل بالحقيقه

'

علقت فستانها بالخلف ولفت لنوره اللي طلعت:اصبري ملاك بجي معك

ملاك:والسواق ؟

نوره:ماهو فاضي بيروح مع عقاب

ملاك فتحت الباب تدق بوري:وين أصايل

ركبت نوره مع ملاك:أصايل يومها بسنه خليها تعالي تجي مع اي احد مابتأخر على الميك اب ارتست

ركبت ملاك وخرجت أصايل تركض وفتحت الباب تركب:كنتم بتخلوني ؟

نوره:ابطيتي بنقعد نستناك ؟

حركت ملاك رايحه للشاليه وطلعت جوالها نوره تتصل:خل اشوف المطربه على موعدنا والا بتسحب علينا

ابتسمت ملاك وهي تشوف نوره تتصل وتطمن على كل شي لين وصلوا للشاليه

وقفت تشوف العمال اللي يصلحون المكان ونزلوا

نوره دخلت وابتسمت:تبارك الله يهبل يهبل

أصايل:جد خيال ومكانه حلو

ابتسمت ملاك من خطر ببالها ثنيان اللي اختار الشاليه لها ومشت تدخل داخل

دخلت غرفتهم تاركه نوره وأصايل مع الميك اب ارتست

وعلقت فستانها اللي مغطى ومفرود بقماش يستر لونه

ابتسمت تجلس من دخلت الميك اب ارتست وبدت تنثر الميك اب على وجه ملاك

سوت شعرها وناظرت ساعة جوالها وشمت ريحة البخور وعرفت ان نوره بدت طقوسها بالاستقبال اللي ما يشبه اي استقبال

ووقفت من اختلت بالغرفه وحدها بعد ما خلصت كل شي وفتحت فستانها وابتسمت بوسع مبسمها من شافت لونه ولبسته ووقفت قدام المرايه تشوف لونه

لون الموج لون البحر اللون اللي عكس اسمها ' لَهب '

لان ثنيان يوم مسك فستانها الاحمر المشتعل قال انه يشبهها ويليق عليها لكنها لبست لون الموج لانها يمكن بداخلها تبي تشبهه ويصدق ظنها بإن الموج يطفي اللهب

لبست مجوهراتها وعدلت دبلتها واخذت العود تتطيب منه وبخت من الباتشولي والعنبر وباقي عطور الأخشاب والتوباكو والهيل ، تمزج كل ريحه تحبها وتنثر أجمل روايح عطورها

وخرجت من غرفتها تسمع صوت الاغاني بالشاليه

نزلت تمشي ويبان ساقها المكشوف وطلعت تشوف أصايل اللي تصور الجلسه اللي زينوها للحضور بالورد والطاولات والتقديمات وابتسمت:لابسه اسود وانا باقي حيّه

ضحكت أصايل ولفت عليها ورفعت حاجبينها بذهول:موج ؟

ضحكت ملاك ومشت لها:وين خالتي ؟

أصايل:جايه

ملاك:وجنى ؟

أصايل:تجي مع اهلها حبيبتي

هزت راسها ملاك ومشت تجلس وخرجت نوره:على وصول ، ملاك

وقفت ملاك تمشي لها وتستقبل معها اللي وصلوا ورحبت فيهم نوره ولفت تأشر على ملاك:ملاك زوجة ثنيان

ابتسمت ملاك تسلم عليهم ودخلت جنى مع اهلها وخواتها وتناثروا الحضور بالمكان ولفت ملاك على أصايل:شدعوه امك ما بقت احد بالخبر

أصايل:حبيبتي حتى من الرياض متعنين هذي عزيمك الشيخه ام ساري

ضحكت ملاك ولفت تناظر شادن اللي دخلت المكان وبيدها سارا وحمد اللي لابس ثوب ودَقله

ولفت نوره وابتسمت:وهذي شادن زوجة ولدي جاسر

سكتوا بصدمه يناظرون شادن وناظرتها ملاك بهدوء

وابتسمت شادن من تقدمت نوره تسلم عليها:حمدلله على سلامتكم ياحبيبتي

هزت راسها شادن وانحنت نوره لسارا وحمد:سلموا ، هذولا احفادي وعيال جاسر ولدي

رفعت عيونها بصدمه أحد الحضور:ولدك تزوج يا أم ساري ؟

نوره:اي والله تزوج بأمريكا ورحنا هناك فرحنا معه فرحه صغيره وحمدلله هذا هو رجع ومعه احلى احفادي

نطقت أحد الحضور:ولا احد وصله خبر

ضحكت نوره:لابغينا نخبي امورنا خبيناها ما ينتشر الا اللي نبيه ينتشر

ابتسمت ملاك من رد نوره ومشت تجلس وجلست بجانبها أصايل

وتقهوت ملاك تسمع سوالف الحضور واسئلتهم عن جاسر وشادن

ورفعت عيونها لشادن اللي تناظرها وشربت من قهوتها ملاك تتجاهلها وتصد لعكس اتجاه شادن

لفت وحده تناظر شادن بتمعن:ومن بنته انتي ؟

سكتت نوره تناظر شادن اللي ابتسمت:انا بنت عم ملاك

لفت ملاك عليها وكملت شادن وضحكت:وعرفوا ملاك اصلاً بعد ما تزوجت جاسر هناك بأمريكا يعني انا الاولى قبل ملاك بالعائله

ضحكت وناظرتها ملاك بجمود وتنحنت نوره:وزين مالقينا ، ملاك

لفت ملاك لنوره وابتسمت لها بهدوء وكملت نوره:الدرّ الثمين اللي لو غاص البحر كله ثنيان ما بيلاقي اغلى منه

لفت ام جنى:لو لقي الاغلى ما اخذ الرخيص يا أم ساري

ملاك ابتسمت:ما ينعرف الغالي الا اذا انحط جنب الرخيص

ابتسمت نوره:وملاك غاليه وما رجعت الا برضاوه من ثنيان ، رضاوتها هالشاليه بإسمها ونصيب رضاها

ابتسمت ملاك وهي تراقب الحضور وكملت نوره:وسياره وفوقها ثنيان ولدي اللي ما ينقاس غلاه

لفت شادن وابتسمت:وتدخلات بنت عمها عشان ترضى المغروره

سكتت ملاك تناظرها وضحكت شادن تلف للحضور:يعني هدّيتها وطيّبت خاطرها وقلت ان هذولا الرجال ان ما لقي اللي تترس عيونه بيدور غيرها

تغيرت ملامح ملاك ولفت أصايل على نوره اللي تناظرها بحده

وضحكت شادن تغمز:عاد علمتها امور تفهمونها وزانت امورهم

ملاك ابتسمت تكتم غيضها:غلطة ثنيان قبل يعرفني وبوقتها جاملتك بنصايحك وكنت غلطانه اني جاملتك لان مامنها فايده واغتريتي فيها

رجعت ظهرها للخلف ملاك:اذا ودك طبقي نصايحك بحياتك وجيبي لنا أخ ثالث مع عيالك الشُقر

تلاشت ابتسامة شادن ورفعت حاجبها ملاك:شكلك توحمتي بأمريكا على وحده شقراء ماهم علينا

بلعت ريقها شادن تناظر ملاك ولفت نوره تضحك:زينهم بإختلافهم أحفاد عقاب

ناظرتها ملاك بحده وصدت عن شادن واخذت شادن القهوه تشرب منها وهي تناظر ملاك

-

( لا تنسون النجمه وجميع التشبيهات بحسابي بالاستقرام ⭐️)

نزل من سيارته مع ابوه اللي نزل وناظر اخوانه خلفه وما كان لابس بشت غير عقاب وهذي ماهي عادة عيال عقاب وهذا اللي كَوى صدر ثنيان منظرهم بالبياض بعد ماكانوا يمشون خلف ابوهم ببشوت

دخلوا مجلس بندر وناظر ثنيان الرجال اللي بالمجلس وتقدم مع ابوه اللي سلّم ومشى يتقدم يصافح الحاضرين من قبيلته ومن قبيلة بندر

وجلس وجلسوا حوالينه عياله وشد على سبحته ثنيان يسمع مقدمك عقاب:لنا الشرف بجيّتنا لين عندك يا أبو راشد وعسانا ما نقطع عادتنا بالجيّه بكل خير

بندر هز راسه:تقول ان اللي صار بيصلح بيني وبينك ؟

عقاب:ماني ضد الصلح بس انا جاي لرضاتك وحقك وحق شرفك واسمك

حك شاربه ثنيان يراقب الرجال ونطق أكبرهم سن بآيات ومنطوق يهدي مافي نفوسهم

عقاب هز راسه بهدوء ولف على ثنيان:ولدي ماخرج عن شوركم يا أبو راشد بيده صك زواج وصك طلاق

بندر:بتدافع عن ولدك يعني ياعقاب ؟

سكت عقاب لان بندر يناديه بإسمه حافّ ومحد تجرأ بيوم يناديه بإسمه

ورفع صوته ثنيان يتقدم بظهره بثبات:ان كان اللي صار غلط وبدون شورك وشور أبوي فأنا أطلب السموحه من أبوي بالأول ثم منك وقبيلتك واسمك ، لكن انا ما غصبت احد على شي ما يودّه ، هذا صار برضاي وبرضى بنتك وعلى ورق حلال

سكت بندر يناظر ثنيان بحده وبدل نظراته بين بندر وراشد وكمل:ويشرفني اني اعلن زواجي وطلاقي من بنتك وأعلنها قدام قبيلتي وقبيلتك وما جعلتها سرّ عشان رخصها بعيوني ، حَشى

لف عقاب يناظر ثنيان وكمل ثنيان:ماهو الا سرّ وصار عَلن الحين ، وعرفت خطاي وهذا انا عندكم استسمحكم

لف عقاب على بندر ونطقوا الحضور يتدخلون بالموضوع

وطال الموضوع طال لدرجة ان عقاب اشتد حجاجه ولا قدر يصبر على وضعه وكأنه ياخذ من بندر حق السنين الطويله وثار قديم بينهم

لين قطع الحوار عقاب يرفع صوته:طال الموضوع يابندر واخذ من وقتي واجد وصلك اعتذارك وهذا انا بعيالي خالين البشوت وقبيلتي معي ورايتي بيضاء قدام كل الحضور من شيبانكم وأبيض شواربكم لين أصغر رجّال بينكم ، واللي بينكر عطاي ووجودي الليله ماهو الا سفيل

بندر:ما اخذت رضاي للحين ياعقاب

رفع حاجبه ساري وناظروه عيال عقاب بحده كيف يقلل من شان عقاب بين الحضور

ونطق عقاب:انا ما اخذ رضا من احد يابندر انا اعطي وارقى سما وطلوعي مطلع الصقور ، وانا عقاب بن جرّاح ما اتعالى عن غلط عيالي وهذا انا عندك لكني ما أبطي وانا داني عند احد

ابتسم بندر:لكنك دنيت عندي

وقفوا عيال عقاب يقطعون الحديث وابتسم عقاب يناظر بندر:جينا بطيب الفعايل وهذا فعايلك قدام ربعك وربعي

وقف عقاب مع عياله وقاموا جماعة عقاب بيتركون المجلس ووقف بندر:دام تبي الصلح فالصلح ماهو بيني وبينك

لف ثنيان ولفوا اخوانه وعقاب ملقيه قفاه

ونطق بندر يضرب على كتف راشد:راشد يصير نسيبكم

جمد وجه ثنيان وعقد حاجبينه نهار ولف ساري على ابوه اللي التفت وناظر راشد اللي واقف بجانب ابوه

ونطق احد الحضور:عطَه يا أبو ساري عَطه ما بتعطي الا لرجّال وخل الصلح يتمّ وتصيرون أهل

مارد عقاب يناظر بندر ولف ثنيان على ابوه وهمس:لا ابوي

جاسر لف يناظر ابوه وبلل شفايفه ساري بتوتر وناظر الحضور عقاب ورجع ناظر بندر:لو تبي تدلّ مجلسي ما اعطي بنتي لأحد بغير مجلسي

لف نهار بصدمه على ابوه وخرج عقاب ومشى خلفه ثنيان:ابوي وش يعني ؟ بتعطيه أصايل اختي ؟ جيناه وانذلينا عنده خلاص يكفي

جاسر:يخسى ياخذ اختي اقسم بالله يخسى

ساري:ابوي لا تنتظر منه خير واضح نيته ومن وقت طويل ما يبي صلح معك

نهار:أصايل ما تاخذ ولده لو على جثتي

ثنيان:ابوي يبي يلوي ذراعك بأصايل اقسم بالله هذي نيته لا تعطيه حتى ان جاك لا تعطيه

لف عقاب عليهم بحده وناظره ثنيان وناظرهم عقاب كلهم وهمس:كله بسببكم وبسبب افعالكم اللي ما تفكرون فيها

ناظر ثنيان اللي اخذ نفس بضيق:لحد يعلمني وش اسوي

تركهم ومشى يركب سيارته مع السواق ولف ساري:ما عطاه ولا بيعطيه هدوها

جاسر:ابوي ما يفرط في أصايل لبندر اعرفه

نهار:يبطي اصلاً بندر وولده ولو وافق ابوي الموضوع بيوقف عندي

سكت ثنيان واخذ نفس ومشى يركب سيارته وركب كل واحد سيارته وخرجوا من مجالس بندر

'

تناظر الحضور اللي يتكلمون ويرقصون على صوت الاغاني والطرب وتناظر نوره اللي تصفق وتهلي وترحب بكل الموجودين

وملاك صوت افكارها وذكرياتها اعلى من كل شي

تناظر شادن اللي قدامها تتكلم مع اهل جنى وتضحك وياكل صدرها جمر من خذلانها بشادن ومن انتقامها لها

نزلت عيونها ملاك ثواني لفنجانها تناظره وهي هاديه وتفكر

ولفت من مسكت كفها أصايل:ارقصي معي

ملاك ابتسمت:ارقصي مع امك

أصايل:لا انا ودي معاك

ابتسمت ملاك تناظر أصايل ووقفت أصايل وحطت فنجانها ملاك ووقفت قدام أصايل ترقص بهدوء وتبتسم ابتسامه هاديه

ووقفت نوره من شافتهم يرقصون ورفعت كفوفها تصفق لهم وتعزز لهم

وابتسمت أصايل ترقص مع ملاك اللي تمشي بينهم وترقص بموج فستانها ترسم خطوط انتصارها على صفحات فضول الحضور وتجاوب بجواب واحد على جميع اسئلتهم ، انها زوجه لثنيان بن عقاب بن جرّاح

ناظرتهم شادن وتلاشت ابتسامتها ماتقدر تخفي غضبها وقهرها وغيرتها من ملاك

تشوف نظرات نوره لملاك وابتسامتها وتشوف أصايل اللي ترقص مع ملاك وكأنها وسط أهلها

كأنها ترقص مع اختها وأمها اللي واقفه تصفق لها

وهذا اللي كانت تشعر في ملاك من ابتسامة نوره وأصايل ونظراتهم لها وكأنها عاشت معهم عمرها كله ولا سكنت صدرها الغربه منهم

اخذت جوالها نوره تتباهى فيهم وتصورهم يرقصون سوا

وابتسمت ملاك تجلس وتناظر نظراتهم لها وسكوتهم واخذت نفس ترتاح وتجلس بإعتدال ظهرها ، بثقه ، بغرور

تكسر خشم شادن اللي أمامها خاسره ولا تقدر تطولها ناظرت شادن بنظرات عاديّه ولفت لجوالها اللي يدق ومن ناظرت اسمه وقفت تتركهم

وردت وهي تدخل للشاليه:وش صار ؟

ناظر الطريق ثنيان وهو ساكت بعد سؤالها ، ما يدري ليه اتصل من ضيقته عليها رغم انها سبب في ضيقته اصلاً

وقفت من سمعت هدوئه وفهمت افكاره ونطقت بهدوء:ياليتك ما دخلتي حياتي ياملاك

ابتسمت تكمل:صح ؟ تقول بداخلك هذي السبب بكل شي سئ بحياتي

مارد ثنيان وهو يسوق وفصخ شماغه يحطه بحضنه وكملت ملاك:سو اللي تبي تسويه ماعاد يفرق عندي شي ، كل شي اظنه خاب فيه ظني اصلاً

لفت ملاك تشوف شادن اللي قاعده وسطهم وعقدت حاجبينها تصد:وش صار فيك ؟ كل هذا قهر مني ؟

ثنيان نطق بهدوء:تطلعين اليخت الحين ؟

سكتت ملاك تسترجع طلبه وعقدت حاجبينها بعد ثواني:كيف يعني ؟

ثنيان اخذ نفس يشوف الشاليهات اللي على طريقه:يعني اطلعي لي انا برا

انصدمت ولفت تناظرهم وناظرت جوالها من قفل وظلت ترمش بهدوء تستوعبه ومشت تدخل الغرفه تاخذ عبايتها واغراضها وتلبس عبايتها وخرجت ولفوا عليها

وابتسمت لنوره:خالتي استسمحك ثنيان برا ينتظرني

هزت راسها نوره:مسموحه يا أمي انتي

ابتسمت ملاك بهدوء ومشت تخرج من عندهم وناظرت سيارة ثنيان اللي واقفه وضيقت عيونها تحاول تشوفه من نور السياره اللي على وجهها

وفتحت الباب تركب جنبه ولفت عليه تناظره صاد عنها يحرك ولفت للطريق:بتنتقم مني يعني وترميني بالبحر عشاني ما اعرف اسبح ؟

ثنيان نطق بهدوء وهو يسوق:ما اصدق انك ماتعرفين تسبحين انتي تعرفين لكل شي

ابتسمت بهدوء ملاك تراقب الطريق ووقف ثنيان عند الساحل وناظرت اليخوت:ما اركب يخت كانت فيه وحده غيري

ثنيان قفل سيارته:وعشاني اعرفك ماهو نفس اليخت

ناظرته ملاك ونزل من السياره ثنيان ونزلت معاه ومشت خلفه تشوفه ماسك شماغه وعقاله وماشي لليخوت ووقف عند يخت وناظرته ، ماكان نفس يخته فعلاً

لف عليها ونزلت عيونها تفصخ كعبها وتمسكه بيدها وتمد كفها من مدّ كفه وتركب اليخت وتناظر البحر وتسمع صوت موجه

دخل ثنيان داخل يشغل اليخت ودخلت خلفه ملاك تراقب هدوئه وكيف انتصف باليخت وابتعد عن الساحل

لفت لداخل اليخت تشوف داخله وجلست وهي تحط عبايتها يمينها وتراقب البحر والموج

غمضت عيونها تشم ملوحته وتسمع صوت موجه وفتحت عيونها من قفل اليخت ثنيان وترك اليخت يطفو بنفس موجه وهدأ الجوّ وابتعدوا عن أنوار الخبر وما يشوفون غير نور القمر

وخرج ثنيان وهو ماسك شماغه يدور عليها وعقد حجاجه من شافها جالسه ترتدي لونه ، لون الموج والبحر

وتقدم لها:ليه هاللون ؟

رفعت عيونها ملاك من وقف قدامها:لان هذا اللون يشبهني

سكت ثنيان يناظر جسمها وجلوسها ورجلها اللي باينه له واللون اللي يزهى عليها مع لون شعرها ، كانت آيه من الجمال وكأنها فعلاً ملاك

جلس بجانبها وصدت ملاك تناظر ظلمة الليل ونور القمر المكتمل فوق البحر وتسمع صوت موجه

وناظرها ثنيان بهدوء:خرجت من عندهم أدور لك أعذار

لفت ملاك عليه وكمل ثنيان من حط عيونه بعيونها:خرجت وكل شي يأشر عليك ويقول هذي هي ، هذي سبايب كل شي

سكتت ملاك تناظره وكمل ثنيان:حاولت أكابر وأنسى ماضي لياليك لكن جتني طيوفك وزادت الطين بَلّه

ملاك بلعت ريقها تسمع هدوء صوته وكمل ثنيان:للحين أرسم ورا غلطاتك أعذار وأقول زلّه تحسبين اني اعرف ليه اسوي كذا ؟ والله ما اعرف ليه

ملاك ناظرت عيونه اللي تتأملها وكمل ثنيان

:استبحتك عن كل غلطاتك وسامحتك عن ألف الذنب الى ياء النهايه

نزل عيونه ثنيان يناظر كفوفه:اشرحي لي وش يصير انتي

رفع عيونه من جديد:علميني من إنتي ؟ وش تبين من حياتي ؟ وليه جيتي ؟ وليه ماتروحين مني ؟

صدت ملاك للبحر بهدوء بدون رد وكمل ثنيان:نصف منك أمان واستأمنه ونصف منك خوف وأخافه ، كل شي فيك نصف وانا ما كسبت ولا نصف فيك لا أمانك ولا خوفك ، دايم حَذر منك

بللت شفايفها بهدوء ملاك تسمعه ولفت عليه تناظره:انت فهمني وش تبي بملاك ؟ علمني ليه للحين مع ملاك ؟

ثنيان مارد عليها ولفت عليه بجسمها كله تناظره:ليه تبي تشوف أحسن مافي ملاك وكل الناس تشوف اسوأني ؟

ثنيان:صرت اسئله الحين ؟

ملاك بلعت غصتها بهدوء تكمل:ليه يوم كل الناس جوّ في شمالي جيت انت يميني ؟

ثنيان:انتي دخلتي معي بحرب وتحدي

ملاك ناظرته من تجمع موج عيونها:ومن الكاسب ؟

ثنيان سكت ثواني ونطق:انا المهزوم

ملاك ناظرت عيونه وسكتت ثواني لين نطقت:كل اللي بحياتي خيبّوا ظني حتى إنت ، يوم اني ظنيت انك المحارب الاول قدامي صرت بجنبي

ثنيان:بحارب معك

ملاك:من تحارب ؟

ثنيان:ماضيك اللي سبب نيرانك

صدت ملاك تعض شفتها ما تبكي وكمل ثنيان:عمك وبنت عمك وجاسر ، وأنا والدنيا

لفت عليه وكمل ثنيان:بحارب كل شي عشان ملاك تفوز ابي ادفن هالشيطان

ملاك ناظرت عيونه ماتفهمه ولا بتفهمه وكمل ثنيان:حربي ماهي معك حربي مع نارك

نزلت دموعها بقهر لان نارها منصور ومنصور حريق ثنيان

وتقدم ثنيان واخذ نفس بتردد لكن صوت نبضه يغلبه

مسك كفها ورفع عيونه لعيونها من قريب

رجفت كفها من لمس كفه الدافي وكأن كفه ملمس حنيّه ومعطف براد وجمر دافي وموج هادي

ناظرها كيف تتأمله ، يحسد الموج اللي ضفّها لأول مره معه والهواء اللي ضمّها والحرير من ثيابها ، يحسد كل جمره تشتعل في عنقها تثور

يناظر مفرق نحرها كيف قلايد ذهبها تذوب ، تذوب من شدة نارها ولَهبها

ولكنه تعب كل مره يكتفي بالنظر يبدل نطراته بين ثغرها وعروق نحرها وكل ما بداخله يرغب

ناظرت نظرات الغرق من عيونه ماتعرفه ، ماتعرف هو وش يكون ؟ هو غريب هو حبيب ؟

هو بين البين وشي يستدعي داخلها شعور غريب شعور بدايات تسكن صدرها تجعل اصغر ما بداخلها يرقص ويغلي من نظراته ووجوده وصوته ودفى كلامه

حنيته اللي غلبت كل قسوه ذاقتها وشكّلت داخلها حطب وجمر ، حنيّة موج اللي تطفي نارها

يناظرها ما رفّ له جفن وهي تغرق مثل ما يغرق الموج في بعضه قدامها وحوالينها

رجفت كفوفها من شعورها ومن خوفها ومن انقلاب داخلها ونزلت دموعها رغماً عنها تحس داخلها حرب تقيم بين بعضها وكأن ثنيان بيزيح كل شي في قلبها ويسكنه رغماً عنها

جالسه قدامه تناظره فاتر حيلها ، مهزومه ظنونها ومخذوله من أقرب الناس لها ، ومغلوبه قسوة زمانها بحنيّة موجها اللي أمامها

ناظرها ثنيان يشوف نظراتها له ويحس بكل هالنيران اللي حوالينهم: تحت القمر وفوق البحر نجلس ومستعد أقول الخوافي كلها ، وارمي يميني وشمالي كل زلاتك بس نذوق ينبوع الهوى عذب صافي

شد على كفها يقربها منه وغمضت عيونها من اقترب منها

ثنيان همس يناظر رجفتها:مستعد والله اني مستعد

ناظر ثغرها يسري داخله جمر من نارها

يحس بحرارة جسمه تزيد من قربها ومن رغبته اللي غلبت تردده بهاللحظه

فتحت عيونها ملاك تتأمله ودها تزيح النظر عنه لكنها تشوفه أقوى من كل شي عاشته بالدنيا

يغلب قوتها ولَهبها وقسوتها وكأن له قدره كبيره لها هي فقط

يكشف ستور جروحها ويفتق خيوطها خيط خيط ، ياخذها من كل شي بلحظه وكأن كل كونها يختفي

تعيش معه عالم ما جربته وضدها ، عالم موج وبحر ودفى رغم اللهب ، وحنيّه تمسح على كل قسوه وتطفيها

ناظرت نظراته لثغرها ولعنقها ولعيونها اللي يبدلها على كل جزء منها وناظرت ثغره من اقترب منها رغبه بتقبيلها

وشدت على كفه من زاد جمرها واشتعلت اكثر بقربه ماتقدر تعطيه ولا تقدر تقدم وتغرق

ماتقدر تعكس كل طريقها اللي تمشيه لأجل شي ودها فيه مثل ماهو وده فيه

تقدم منها اكثر ياخذ نَفسها ورفع كفوفه لوجهها وبلع ريقه يسمع صوت الموج حوالينه وكل مافيه يتجه لها

رفعت كفوفها تمسك كفوفه اللي على فكّها من لمس أنفه أنفها واشتعلت نار داخلها وماقدرت غير انها تنزل راسها وتتنفس بسرعه من صدته وفتح عيونه يناظرها ونزل عيونه من بللت ثوبه دموعها وبلع ريقه وبعد كفوفه عن وجهها

وعقدت حاجبينها تغمض عيونها بقوه تبكي واخذ نفس يستجمع نفسه وفتح ياقة ثوبه ووقف يتركها

بكت من تركها وفتحت عيونها تناظر البحر ، صورة منصور قدامها وصوت ثنيان بعقلها

تحارب جهتين ضدّ بعض داخلها لوحدها ، تحارب ودّها بما ودّها

ماتبي تصدق فكرة انها عمرها ما حبت منصور وكلها تعلقات من سوء مراهقتها ، ماتبي تكتشف بعد هذا كله ان ثنيان هو الحب الحقيقي

ولكن كل خوفها الأكبر ماهو نفسها هو ثنيان فقط لأنها تعرف حجم قسوة الحقيقه لو عرفها

بكت ترفع صوتها بقهر وغضب داخلها من حياتها ومن وجود ثنيان بحياتها بوقت ما ناسب دخوله

تبكي لانها تبي وجوده لكن بوقت أفضل بحياتها

وقفت تتمسك باليخت لين وقفت عند نهايته وهي تبكي ورفعت كفوفها على صدرها تحس بالنيران تشتعل داخلها وصرخت بعلو صوتها تغمض عيونها بقوه وتصرخ ما يرجع عليها حتى صدى صوتها

كل اللي تسمعه موج هادي ودها تغسل داخلها فيه

وقف ثنيان يراقبها بنهاية اليخت تبكي وتصرخ وشد على قبضة يده بقهر وغمض عيونه يسمع صراخها

في شي أكبر يحاربها وبينه وبينها ولا يقدر يعرفه لكن اللي يعرفه ان ملاك ما صدته ملاك أجبرت تصده

وصراخها وبكاها قدام عيونه الحين دليله اللي يؤمن فيه

ظلت تتنفس بسرعه بتعب من صراخها وبكاها وجلست وهي تتنفس وتناظر البحر ، تحط قدام عيونها ثنيان ومنصور

تحط قدام عيونها حياتها اللي ماتعرف نهايتها ، تشوف منصور اللي خلف الحديد بسببها

وتحط قدام عيونها ثنيان اللي باع حياته وسمعته وشرّها واشترى خيرها وماضيها وأجوبتها

غمضت عيونها بتعب هي واقفه بمحلها لانها تجهل وين تمشي

بين عيونها عقاب وأهله وبين عيونها هي ومنصور

وخوفها الوحيد اللي ماتبي تفكر فيه هو ثنيان اللي تشوفه الضحيه بالقصه واللي ممكن تأذيه أكثر رغم انها أذته

فتح لها بيبان الاعذار بنفسه ورسم لها خطوط خارج خطوطه وتغاضى عن زلّاتها ومسح اخطائها وحطها بين اهله يعيشها أفضل حياه تبي تعيشها

لفت بعيونها تدوره وناظرته واقف من بعيد يناظرها ورمشت بهدوء من طاحت دموعها وشدت على فستانها تشوفه يوقف قدامهم ألف حاجز ماتقدر تتخطاه

ناظر نظراتها له وهو واقف محله ينتظر منها القدوم بس لكنها ما تقدمت

ما يعرف وش اللي يوقف بينهم بهاللحظه لكنه يحلف يمين وده يمحيه ويرتاح

تناظره وكلها ملامه لانها تصدّه وتمنعه وتمنع نفسها وتعيشه حياتها اللي هي ما تحملتها ، تحلف يمين برب الموج انها ودها تركض لحضنه تبكي لكن رجولها ما تشيلها

تشوف قدامه حاجز كبير ما تقدر تكسره ماتقدر تتعداه

تركها ثنيان يدخل لليخت وغمضت عيونها بتعب من صوتها اللي راح بسبب صراخها ومن احتراق عيونها من موج دموعها

ناظرت البحر الهادي واخذت نفس طويل تغمض عيونها وشغّل اليخت ثنيان وعرفت انه صار وقت العوده

رَسى على المرسى وخرج يناظرها ماسكه كعبها وتنزل من اليخت على المرسى ومشى خلفها من مشت قبله

وقفت عند سيارته وفتحها وركبت وشغل سيارته

وهمست:بروح عند منيف

لف عليها يناظرها ثنيان ومالفت عليه ابد

وبلع ريقه يشد على الدركسون ويحرك سيارته ، مشى بهدوء يناظر الساعه قدام عيونه ٣:٠٠ ص

وقف عند البيت على أمل يتكلمون سوا وينفهم اللي ماهو مفهوم بينهم لكنها فتحت الباب تتركه

ورفع عيونه عليها يشوفها تدخل البيت ، قفلت الباب وغمضت عيونها تبكي ورمت عبايتها وكعبها واغراضها بتعب وجلست على الكنب تغطي وجهها وتبكي

مع إنه ما تكلم وما تبادلوا الاعترافات والشعور ، تتعب لانه يرجعّها لأول نقطه ولمكان تجهل تطلع منه

مكان يشبه غريق ما يعرف للسباحه يغوص بمكان ماله قاع ، يقلب توازنها وهي تخاف الاهتزاز يغيّر محطات وقوفها وطريقها كله

غيّر كل أمورها وهي تخاف التغيير ، تخاف بيوم تصحى ما تلاقي داخلها منصور ، تلاقيه

تخاف الحقيقه وتخاف قربه وتخاف من الخذلان والجحود ، تخاف تعيش شي اكبر من جريمة منصور وصوت ضميرها وجحوده لها وخذلان اهله لها

مسكت راسها وهي تبكي وتهز نفسها بخوف وهمست:لا تكفى يارب لا لا لا

قاعده تلمس داخلها شعور ماتبي تحسه ، صورة ثنيان وقربه وصوته وريحته وكلامه زالت من ذاكرتها أي احد وكأنها ماعاشت ماضي غير مع ثنيان

-

رجع دربه كله اللي مشاه مع ملاك بدونها ، البحر

لكنه وقف سيارته بدون ينزل يناظر الموج قدامه ، يهوجس وكأن الهوجاس ترك كل خلق الله الليله وسكن ثنيان

ودّه يكشف اللي داخلها يعرف من هو عندها ووش ترتجي منه ووش ودها معه ، ودّه ما تجاوب الا على سؤال واحد من بين كل الاسئله اللي غارق فيها

هي تشعر مثل ما يشعر ؟

تنعاد عليه طيوفها من أول جيّاتها له لقبل الدقايق الأخيره بينهم

كانت متمسكه بكفوفه بعد ما كانت تحط بينها وبينه مليون مسافه وحدود وخطوط حمراء

الليله لمست كفوفه ولا ابتعدت وكأنها تهدأ وهي قريبه منه لكنه سمع صوت نحيب بكاها وصدّتها اللي بدون أسباب

لكنه حاول لأجلها وبادر وكان هو السبب دايم بينهم ، كان ياطى على جمرها مع ان غيره ما قدر على نيرانها

نبش بيدينه الثنتين وسط اللهب ولا تألم لكنه بعد هذا كله حسّ انه غرق بمكان ما يشبهه ولا ينفع له

ملاك اللي كل شي حوالينها يقوله لا ، وكل شي ضد اللهب والموج

لكنه كان يؤمن انها ملاك وكل مره كانت تبكي أمامه ينتصر ، ويشعر ان هذا انتصاره الحقيقي ، شوفتها ملاك

بدون اقنعه مزيفه ومشاعر تتلبسها عكسها ، كان دائم ينظر لها بإنها خير ولها ضمير مع ان كل شي سوته عكس كل ايمانه

نزل عيونه بتعب وتساؤل ويهوجس بالبحر بدون أجوبه

'

جلست أصايل على الطاوله:وين الناس ؟

نوره:ثنيان وملاك الغايبين

عقاب:عن الجميع

عض شفته نهار:افا !

نوره ابتسمت:والله مدري وين غايبين بس الله يجعلهم سالمين

ضحكت جنى:ماقاوم اللون

سكتوا وناظرتهم جنى ولفت لساري وبلعت ريقها

لفت شادن تشوف مكان ثنيان وملاك وصدت تاكل

رفعت عيونها نوره من دخل ثنيان ومعه شماغه وناظروه ووقف عندهم:سلام

ناظر ثوبه وحالته عقاب:وش هالحال ؟

ثنيان ناظر نفسه ورفع ذراعينه:وش فيه حالي ؟

نوره:وين ملاك ؟

ناظرهم ثنيان ولف من دخلت ملاك خلفه:معاه

وقفت بجانبه وابتسمت بهدوء وناظروا كعبها اللي بيدها وسكتوا بإستغراب من حالهم

ولف ثنيان عليها ولفت عليه بهدوء:شوي واجي افطر

تركته محله ومشت للغرفه ولف عليهم يناظرهم ومشى خلف ملاك

عقدت حاجبينها نوره:وش هالحاله عليهم ؟

شادن:يمكن تهاوشوا

رفع عيونه عقاب على شادن اللي تاكل ولفت أصايل:ما اتوقع

عقاب:افطروا

،

قفل الباب ثنيان وناظرها:كيف رجعتي ؟

حطت مفتاح منيف على التسريحه وتقدم ثنيان لها

ورفعت عيونها عليه تشوف حاله نفس حال أمس ومشت تفصخ عبايتها وناظر فستانها اللي لا زالت لابسته وجلست على الكرسي تمسح بقية مكياجها

فصخ ثوبه ودخل الحمام ومسحت مكياجها ملاك واخذت لها ملابس وانتظرت خروجه من الحمام

تعداها من خرج وقفل الانوار وعقدت حاجبينها تشوفه ينسدح ولا تجرأت تسأله عن شي

دخلت الحمام واخذت شاور تحت مويه حارّه تشبه داخلها وغمضت عيونها ما يخطر في بالها غيره وقربه وكأن النهار ما كفّاه اللي اخذه الليل منها

فتحت عيونها تخرج من الشاور ولبست ملابسها تنشف شعرها وارجع من جديد تحط ميك اب وترسم على وجهها الوجه اللي تعودوه

خرجت تاخذ جوالها وتطلع لها عبايه في سكون الغرفه ونوم ثنيان

نزلت لهم وهي تناظر رسالة منيف:متى جيتي ومتى رحتي ؟

ارسلت له وهي تدخل عليهم:بنتكلم سيارتك معي

ابتسمت لهم:بالعافيه

نوره:وين ثنيان ؟

ملاك جلست وابتسمت:تعبان بينام

سكتوا يناظرونها ورفعت عيونها عليهم:سهرنا باليخت عشان كذا تعبان

ابتسمت نوره:اي يالله زين

اخذت نفس بهدوء ملاك تفطر وعيونها من شدة بكاها امس تألمها

نوره:ما علمتني عقاب وش صار معكم امس ؟

سكتوا العيال ورفع عيونه عقاب يراقب ساري وجاسر ونهار وهز راسه:ماصار شي

نوره:شلون يعني ؟ ما تصالحتوا ما قال شي ؟

عقاب رجع ظهره لورا:أصايل

لف نهار على ابوه ولفت أصايل:هلا

عقاب:من بيوديك دوامك ؟

أصايل ابتسمت:اللي يتطوع من اخواني حبايبي

جاسر هز راسه:انا فاضي

نهار:انا اوديك على طريق دوامي

ساري:اذا تبين ماتشا ؟

ضحكت أصايل:سجلي امي اللي صاير

نوره ضحكت:بيدلعونك اليوم

أصايل:بختار ابوي حبيبي يوديني

عقاب:كان ودي لكني مشغول ودربي مو على دربك

أصايل:حسافه

عقاب:روحي مع نهار

ابتسمت أصايل لنهار وهزت راسها:تشغل اغانيي اللي احبها

نهار اشر على عيونه وابتسمت أصايل

لف عقاب على ملاك اللي تاكل بهدوء وتناظر صحنها :ملاك

رفعت عيونها لعقاب وتكلم بهدوء:دام سيارتك ماهي معك انا بوديك

ملاك سكتت ثواني:كيف عرفت ان سيارتي مو موجوده ؟

عقاب ابتسم لها:اعرف كل شي ، قومي ان خلصتي

قامت تتركهم جالسين وناظرت نظرات شادن لها وصدت ملاك تتجاهلها ومشت خلف عقاب

رفع يده خلف كتوفها يمشي معها وركب مع السواق وركبت بجانبه

ابتسم ولف عليها:الشاهين المغرور ارحبي

ابتسمت واخذت نفس ولف عليها:مكتبك ؟

هزت راسها ملاك وصد عقاب للطريق:ما تكلمتي مع بنت عمك ؟

رفعت عيونها للطريق ملاك:لا

عقاب التفت عليها:لان مافي كلام بينكم والا لان الكلام ان طلع ماهو زين لك

لفت ملاك عليها:ماهو زين لها هي

عقاب:تدرين انها طلبت مقابل كل هذا الزواج فلوس ؟

سكتت ملاك بقهر تناظر الطريق وكمل عقاب:وتوقعت لاني شفت ابوها وعرفت ليه ما تبينه

ملاك ماردت عليه ولف عليها ملاك:اعرفي زين ملاك اني انا ما بسمح لحد يدخل بحياتك ويدمّر شي داخلك حتى لو كانوا أهلك

لفت عليه ملاك تناظره وكمل عقاب:أنا أبوك وأهلي أهلك وانتي عندي مثل أصايل وان كان اللي بيزعلك يوم ولدي ثنيان فمهو أغلى منك ، انا طول عمري أقدّر كل انثى تدخل بيتي بدايتها من ام ساري ونهايتها انتي

ابتسمت بهدوء ملاك من كلامه ومسك كفها عقاب وبلعت غصتها بتأثر وابتسم عقاب:آماليّي فيك كبيره يا ملاك وجمايلك واجد ووجودك مهم

عضت شفتها تكتم دموعها وناظرت عقاب اللي مبتسم يناظرها وهزت راسها:الله لا يخيب ظنونك فيني

ابتسم عقاب يطبطب على كفها ولف للطريق من وقف السواق

واخذت نفس ملاك ونزلت من السياره تدخل المكتب

-

( لا تنسون النجمه ⭐️ )

ارسل لملاك وردت عليه:سيارتك بالبيت كلّم نهار وروح خذها ما امداني منيف

تنهد واخذ جواله يتصل على نهار ورد نهار وهو يوطي صوت الاغاني:ارحب الفال الطيب

منيف:البقى ، شلونك نهار ؟

نهار:انا بخير شلون ابو يامور ؟

ابتسمت أصايل وهي تناظر الطريق وضحك منيف:بخير بس متورط

نهار:ابشر بسعدك

منيف:ان لاحظت ترا سيارتي عندكم

نهار ضحك:لاحظت وبعاقبك وبخليها عندنا

منيف:بجي اخذها

نهار:اصبر بوصّل الشيخه أصايل دوامها وأمرّ عليك ناخذ سيارتك

سكت منيف ثواني وهز راسه:اذا مافيها كلافه

نهار:ابد تحت أمرك

منيف:ما تقصر

قفل نهار ولفت أصايل:عادي اذا يبغى سيارته خذه على طريقنا

نهار:وين بيته ووين طريقنا ؟

لفت أصايل للطريق:طريقي وطريقه مو واحد ؟

نهار:لا وين دربك ووين دربه ، اوصلك واشوفه

اخذت نفس بضيق ودخل المستشفى نهار ولف لها:دلوعتي لا أوصيك انتي ما تحتاجينهم هم يحتاجونك

ابتسمت أصايل وابتسم نهار:اي شخص يرفع عينه بس عليك ترا فَردي بخصري

ضحكت أصايل:لا تكفى مانبي طيش

نهار:انتبهي لنفسك

هزت راسها أصايل ونزلت من سيارته ودخلت المستشفى بتوتر وتقدمت من شافت صديقاتها:كيف الوضع ؟

ميّ:باقي ما وصل المشرف قاعدين ننتظر

ناظرت المتطوعين أصايل:كل هذولا معانا ؟

ميّ:شكلهم

سكتت أصايل تناظر المكان والناس ورفعت عيونها تصور لوحة التدريب وتنزلها بسنابها

'

جلست على مكتبها ومسكت راسها بتعب كل شي ينهمر عليها دفعه واحده كل شي فجأه صار اثقل من متونها

رجعت ظهرها لورا من دخل عليها رجّال وسلّم واخذت نفس ترد السلام:تفضل

جلس وبيده أوراقه:عندي قضيه اذا تقدرين تحلينها

هزت راسها بدون تناظره:حط اوراقك ورقمك واطلّع عليها واكلمك

حط الاوراق على طرف المكتب وخرج وفتحت لابتوبها تشغله وسحبت الاوراق تناظرها

عقدت حاجبها تشوفها فارغه وزاد استغرابها وهي تفتش بينهم وهمست:يستهبل

رفعت عيونها تدوره ورجعت تناظر الاوراق ووقفت تناظر الصوره اللي بين فراغ الاوراق وبياضها

واخذت الصوره تناظرها وجمد وجهها تشوف صورة منيف وتنفست بسرعه بخوف تفهم كل شي انه تهديد

وصرخت بخوف تخرج من مكتبها ولا لقت لها سياره ورجعت مكتبها تمسك راسها وتاخذ جوالها والصوره بيدها

مشت بخوف بالمكتب رجولها ما شالتها وجلست وهي تناظر رد منيف

غمضت عيونها بخوف وهي تتنفس وكأن من يركض خلفها:لا تكفى يارب

طلع جواله منيف وهو مع نهار يسمعه يتكلم وقفله يحطه بجيبه ولف لنهار:يعني اختلاط ؟

نهار هز راسه:اي تخصصها من قبل اختلاط اصلاً بس ماني شايل همّ ان احد يتعرض لها انا موجود واخواني وابوي موجودين

سكت منيف يناظر الطريق ودخل نهار البيت ونزل منيف وناظر جواله اللي يدق واخذه يرد:هلا ملاك

ملاك بكت بخوف:منيف

وقف محله بخوف يسمعها وعقد حاجبينها:وش فيك ؟

لف عليه نهار يناظره

وبكت ملاك برعب تتمسك بمكتبها:منيف تكفى تعال تكفى

منيف قفل الباب بخوف:وش صاير علميني طيب ؟ وينك انتي؟ من عندك ؟

ملاك بكت بخوف ترفع صوتها:محد محد بس تكفى تعال

منيف:طيب طيب بجيك اهدي

قفل وناظر نهار:جيب مفتاحي نهار من داخل

نهار:وش السالفه ؟

منيف:مدري والله ملاك دقت تبيني وتبكي ماني فاهم شي

نهار عقد حاجبينه:طيب طيب جايك

ركض نهار يدخل وطلع لفوق ودق غرفة ثنيان ودخل وفتح عيونه ثنيان بإنزعاج من فتح الأنوار

ناظر نهار اللي يدور حوالينه:وش فيك ؟

نهار:مفتاح منيف وين ؟

جلس ثنيان وهو عاقد حجاجه من نعاسه:وش صاير ؟

نهار:ياخي منيف يبي مفتاحه بيروح لملاك تبكي مدري شفيها اتصلت عليه تبيه

لانت ملامح ثنيان ووقف:تبكي ليه ؟

نهار اخذ المفتاح:مدري

ثنيان:انتظرني

نهار:اخلص

نزل نهار بسرعه ومد مفتاحه لمنيف وركب منيف يحرك يخرج من البيت وحرك بعده نهار

ونزل ثنيان مستعجل وركب سيارته وخرج بعدهم

وقف منيف عند مكتب ملاك ونزل تارك بابه مفتوح بخوف برعب من ان اللي صار مع منصور قبل يصير من جديد وكل رعبه يسكنه

دخل ورفعت عيونها ملاك اللي تبكي وبكت بإنهيار من شافته وتقدم لها يحضنها وهي جالسه وبكت تتعلق فيه

مسح عليها بخوف ونطق:وشفيك ؟ وش صار ؟

دخل نهار وناظرها بالارض تبكي ومنيف حاضنها

ودخل ثنيان وناظرها بصدمه وتقدم:ملاك !

رفعت عيونها عليه وناظرته وناظرت نهار اللي ببدلته ماسك فرده وكأنه يترقب شي

ورجعت ناظرت منيف وهدت وهي تتنفس بسرعه وجلس ثنيان يناظرها بصدمه:وشفيك علميني ؟

لفت ملاك على منيف ومدت له صورته واخذها وعقد حاجبينه ورجع ناظرها:وش فيها ؟

ملاك رجفت بخوف:جاني واحد حط اوراق على مكتبي وخرج

سكت ثنيان يسمعها وتقدم نهار يسمعها

وكملت ملاك بخوف:ولقيت الاوراق فاضيه مافيها شي ولا نقطة حبر ووسطها صورتك

بكت بخوف ورجعت ناظرت الصوره:بس صورتك

وقف ثنيان ياخذ الاوراق وتقدم نهار:وش يبي يعني ؟

منيف سكت ورفع عيونه لثنيان اللي يناظر الورق الفارغ

ملاك:يبي يخوفني هو اللي رمى سيارتي وهو اللي كسّر مكتبي وحط رصاصه على كرسي مكتبي انا ادري والله ادري في احد يلعب معي

لف ثنيان وعقد حاجبينه:متى كسّر مكتبك ؟ اي رصاصه ؟

منيف:ليه ما علمتيني ؟

صدت عنهم بتعب ومسكت راسها ولف نهار يدور بمكتبها:كان عندك كاميرا وينها ؟

عضت شفتها بقهر ملاك لانها غيرت مكتبها ولا ركبت بدالها وحده

ثنيان ناظرها بغضب:كيف يعني يجي احد يكسر مكتبك ولا تعلميني ؟ كيف يحط لك رصاصه ولا يجيني خبر ؟

منيف ناظر ملاك بهدوء:وليه انا ماعندي خبر بعد ؟

ضرب المكتب ثنيان بعصبيه:وش يعني تسكتين ؟ يجيك احد يرمي عليك نار بسيارتك ويكسّر مكتبك وباقي عايش ؟ باقي ما اخذت روحه ؟

ناظر ملاك يقرب منها بعصبيه:ليه ما تعلميني ؟

سحبه نهار يبعده:اهدأ ياخي ماهو وقته

منيف لف لملاك:اهدي ملاك هذا انا عندك ما بيصير شي

ملاك ناظرت منيف برعب:ماراح يتركني ولا يبي يقتلني يبي يخوفني بس

نهار:ما تذكرين شكله ؟ ما شفتي سيارته ؟

هزت راسها بالنفي ومسك راسه ثنيان يتنفس من غضبه

ورفع عيونه منيف على نهار اللي يراقبه ورجع ناظر ملاك وتنهد

اخذ نفس ثنيان وخرج من المكتب ونزل للشارع يناظر حوالينه ورجع دخل وناطر ملاك:ينقفل ذا المكتب

رفعت عيونها عليه ملاك واخذ شنطتها واغراضها ووقفت:هذا اللي بسويه ؟

ثنيان لف عليها بحده:اي هذا واحد ابن ست وستين كلب قاعد يلعب معك يحسب ما وراك احد ، بتقفلينه وانا بقعد هنا اشوف وش بيسوي

ملاك وقفت:بيوقف يعني وبيخاف منك ؟ هذا ما يبي احد افهم هذا يبيني انا

لف ثنيان عليها:يخسي لا تستفزيني بكلامك وتكلمي زين

وقف منيف يناظرهم وتقدمت ملاك لثنيان:هذي الحقيقه ياولد العميد هذا يبي راسي ويبي يخوفني لا انت ولا اهلك وقبيلتك كلها بتمنعونه

ثنيان تقدم لها ورفع صوته:قلت يخسي ، امنعينا

منيف:ملاك امشي البيت ونحل السالفه

ملاك لفت على منيف:ماراح اتخبى بالبيت عشان كلب يبي يخوفني

ثنيان:خوّفك لا تسوين قويه ، جيناك تبكين خايفه ياخي اعترفي قولي ابي من يساعدني

ملاك:بكيت خفت على منيف وهذا هو منيف قدام عيوني

ثنيان:وحطوا صورة ثنيان بكره بمكتبك بتبكين من جديد ؟

سكت منيف يصد ويتنفس بهدوء وناظرهم نهار من اشتدت نظراتهم

وارتبكت ملاك تناظر عيونه وعصبيته وكيف ماسك اغراضها بيده

ونزل عيونه ثنيان:امشي

هزت رجلها تكابر ولف منيف:ملاك خلاص تكفين !

نهار:انا بخوفك ولو ان المفروض ما تخافين بس لا تقعدين تنتظرين يسوي شي زياده ، خافي عشان المفروض تخافين

ناظرتهم ملاك ورفعت عيونها لثنيان ووقفت ومشت تخرج

وخرجت بتركب بسيارة منيف ولف منيف:ملاك !

لفت ملاك وهمست:ماراح اروح معاه

خرج ثنيان وعقد حاجبينه يشوفها عن سيارة منيف:تبين اغراضك ؟ بتجين معي

مشى لسيارته وهو معصب ولفت ملاك لمنيف اللي رمش بهدوء يطمنها

ومشت لسيارة ثنيان وركبت بجانبه وحرك ثنيان وهو معصب

حطت شنطتها بحضنها تراقب الطريق وبنص طريقهم هدأ السرعه ثنيان وتكلم بهدوء:ليه ما علمتيني ؟

ماردت عليه ملاك وهي تناظر الطريق ولف ثنيان:ومتى صار وانا ما حسيت ؟

همست ملاك:حسيت

عقد حاجبينه ثنيان:متى ؟

ملاك اخذت نفس ولفت عليه:اكيد ما بيأثر عليك الموضوع ليه ما علمتك

ثنيان:بيأثر ملاك بيأثر لان انا ماودي يصير شي وما تفكرين فيني اول واحد ، بيأثر لان انا ودي اصير اول رقم تتصلين عليه ماهو منيف ، بيأثر لان انا ودي اخذ حقك مره وحده بعد ما اخذتي حقك بنفسك عمرك كله

سكتت ملاك تناظره وناظرها ثنيان:ابي احس اني موجود بحياتك حتى لو انتي ما سمحتي لي

شدت على شنطتها تناظره وهز راسه بالنفي ثنيان:إصحِّك تبعديني

ملاك همست:أسلم لك وانت بعيد

لف ثنيان للطريق من جديد:مابي السلامه

سكتت ملاك تناظره يسوق ولفت للطريق

غمضت عيونها بتعب تحس بإن صدرها خالي من فجعتها وخوفها اللي سكنها ، تكذب على نفسها وإحتياجها لحضنه

ما تبي يزيد داخلها حاجه لحضنه ووجوده ابد ، حتى لو ان امنيتها الوحيده انها ليله واحده تنام بحضنه وهي كلها يقين انها بتنام أفضل وأريح نومه لها

ماتبي وودها تفتح باب السياره وتتخلص من كل هذي المشاعر

ناظرت سيارة منيف بالخلف وخلفها نهار اللي ترك دوامه عشانها ولفت لثنيان اللي ترك منامه وجاها

ولا مره طاحت بمشكله وشافت حوالينها احد وبهذي الكثره

عقاب يوصلها وثلاثه رجال يرجعونها ، لاول مره تحس ان حوالينها دروع تحميها من اي شي

دخل البيت ثنيان ووقف ونزلت ملاك ونزل منيف لها ومشى لها ورفع كفوفه على وجهها:كلمت نهار وبنحلها ماعليك لا تخافين

ملاك هزت راسها بهدوء:مو خايفه عليّ

وقف ثنيان يناظرهم وكمل منيف:ولا تخافين عليّ ماني مخليك

مسكت كفه تبعده من حست انها بتبكي من جديد وهزت راسها وناظرها منيف:بكلمك

شدت على كفه ورفع عيونه منيف لثنيان وهز راسه ثنيان:لا تقلق

هز راسه منيف ومشت ملاك مع ثنيان للداخل وتقدم نهار:كلمت دوريه بنروح نشوف كاميرات الشارع هناك والمحلات اللي جنب المكتب

منيف:تكفى نهار جب الكلب ذا

هز راسه نهار:لا تشيل همّ ملاك اختي مثل أصايل والله ما تمرّ

شد على كتف نهار ومشى لسيارته منيف وحرك خارج من البيت

'

جلست على السرير وهي هاديه ومشى ثنيان وهو يدور بالغرفه وثواني لف عليها:من بيسوي كذا ؟

ماردت عليه وهي ساكته وعقد حاجبينه ثنيان:معقوله عمك ؟

مشى بالغرفه ولف عليها:والا بنت عمك ؟

رجع يمشي بالغرفه وهو يفكر وهمس:مستحيل جاسر ماهي حركاته ، يعني ليه يرسل احد يأذيك ؟

مسك راسه يفكر والتفت عليها وتقدم لين عندها:هذي طقوسك عشان ترجعين أقوى ؟

رفعت عيونها ملاك:ليه يهمك ؟

ثنيان صد بعصبيه:إنّا لله وإنّا اليه راجعون ، ملاك انتي تستوعبين اللي صار مثلي ؟ والا تبلدتي ؟

ملاك رفعت صوتها:لا ما تبلدت بس ابي افهم ليه مهتم ؟ يهددني ويذبحني انت شعليك ؟

ثنيان:عليّ ومهتم وبتدخل ياملاك لو توقفين قدامي وتمنعيني

تقدم لها ينحني:وان لقيت الكلب هذا او لقيته بمكتبك والله لأذبحه بيديني هذي

جمد وجهها وسوّد من كلامه ويدينه اللي رفعها قدام عيونها ورمشت برعب وناظرها ثنيان وسكت من تبدل حالها

نزلت عيونها للارض وبكت بخوف وهي تتنفس وكأنها مختنقه تذكر صراخها على منصور وكيف كان يقتل شخص بمكتبها ، تذكر دخول منصور للمكتب يركض وكيف كان الضحيه ماسك ملاك ومغطي فمها يلمسها بطريقه مخيفه

من تذكرت الموقف تغير حالها قدام ثنيان اللي يناظرها وعقد حاجبينها من نزلت من على السرير تجلس على الارض وتبكي بخوف

وتقدم لها وهمس:ملاك

رفعت كفها تمسكه بخوف وصرخت ماتبي تعيد كل شي ماتبي ينعاد كل شي ، تبي تصرخ عشان ما تسمع صوت الحادثه وصراخها بإسم منصور تبي تبكي ما تبي تشوف منظر منصور من جديد

مسكها بخوف ثنيان من انهارت وهزّها:ملاك

تمسكت فيه وهي تصرخ وحضنها بصدره بخوف:سمّي بالله ملاك اذكري الله

صرخت وهي تبكي:لا تقتله تكفى

سكت يسمعها وهو مصدوم وهز راسه يهديها:طيب اهدي ماني قاتل احد بس اهدي

رجعت تتمسك فيه وجلس بإعتدال بجانبها وهو حاضنها وعقد حاجبينها يسمعها تبكي ولاهو فاهم شي

ابتعد عنها ومسك وجهها يناظرها:بتنحل لا تخافين بحلها انا وبعرف من هذا اللي يأذيك ووعد اني اتخلص منه

ناظرته وهزت راسها بتعب:تكفى لا تقتله

ثنيان:ماني قاتله ياملاك اذكري الله ، انا ماني موسخ يدي بدمّ كلب لكني بحلها وأمنع الردى عنك

ملاك ناظرت وجهه بخوف تتأمله برعب:مابي أنادي اسمك ولا تسمعني

عقد حاجبينه ثنيان بدون فهم من كلامها ورفعت راسها ملاك تتنفس وتغمض عيونها بخوف

ترجف بين كفوفه ونزل عيونه ثنيان لعنقها اللي بان له وزادت عروقها بروز من تنفسها وتوترها

ورفع عيونه ثنيان يناظرها مغمضه عيونها بخوف وتقدم لها ما يتردد ما يقدر وما يقاوم ورفع كفوفه يمسك وجهها ودفن وجهه بعنقها

وعقدت حاجبينها تنزل راسها من حست فيه يقبّل عنقها ورجفت كفوفها

وفتحت عيونها بذهول من حسّت ان كل ما بداخلها يتطاير من وجود وجه ثنيان بعنقها وملمس ثغره على عنقها ونحرها

رفعت كفها من استوعبت ومسكت شعره من الخلف بعجز انها ترده لانه يقبّل عنقها بغرق بإندفاع برغبه ورفع راسه ثنيان يناظرها من قريب وكأنه خرج من الغرق

منظره ونظراته وكيف بلل شفايفه يناظرها

بلعت ريقها بصدمه ترمش بعيونها وأهدابها المبلله تراقبه

نزل عيونه لعنقها اللي توّرم بالورد من ناحيه واحده وكأنه انتصر واخيراً على جفاف عروقها الخضراء ووردها

ورجع ناظر عيونها من جديد مصدوم من حاله قبل ما تكون هي مصدومه من حاله

وكأنه ماصار يقدر يتحكم برغباته ولا بنظراته ولا بشعوره

نزل كفوفه لكفوفها وشدّ عليها من شاف نظراتها له واخذ نفس وهمس:ماقدرت

سكتت بذهول تناظره وشال يدينه عن يدينها ووقف تاركها وبلع ريقه من رفعت عيونها له وخرج من الغرفه ظلت تناظره بصدمه وكأنها خرجت من اللي هي فيه ودخلت عالم ثاني

نزلت عيونها تلمس بطنها اللي تحس ان كل داخله يطير من شعورها وغمضت عيونها تمسك رجفتها من تذكرت شعورها وكيف لمس ثغره عنقها

فتحت عيونها تبلع ريقها ووقفت تستجمع نفسها تهدي حالها اللي تغير بعد قربه ، تحاول تمسح تعرقها اللي تحس فيه واحتراقها اللي زاد اشتعاله

لفت للمرايه ووقفت لوهله تشوف أثر ثنيان على عنقها

جلست بصدمه ولمست بأصابعها الورد اللي شكّله بين عروقها الخضرا بعنقها الشفاف

بلعت ريقها تتحسس عنقها وغطت بكفها ورده وغمضت عيونها من مشاعرها لكنها في ظلمة عيونها كانت تشوف نظراته من جديد وفتحت عيونها بتعب وهي تتنفس بسرعه

كل ماله يصير أقرب كل مالها تحس معه بإحساس غريب وماتبي تغرق ماتبي تحس بيوم انه قريب منها لدرجة ما تقدر تترك كل شي وتهرب

لكنها بلحظه معه نست الهروب وحسّت انها باقيه معه لا محاله

'

خرج من عندها يحك جبينه وناظر نهار اللي دخل:ثنيان

رفع عيونه وعقد حاجبينه من شاف نهار:وشفيك ؟

نهار:بحل موضوع الكاميرات

عقد حاجبينه ثنيان:اي كاميرات

نهار:تستهبل ثنيان؟ كاميرات المحلات اللي جنب المكتب

ثنيان سكت ثواني وضحك نهار:انت وش فيك دايخ ؟

ثنيان حك حاجبه:اي اي فهمت طيب وينها

نهار:وش اللي وينها ؟

ثنيان:الكاميرات

نهار:انت دايخ واجد لا صحصحت كلمني

مشى تاركه واخذ نفس ثنيان ومشى يدخل الصاله وناظر امه اللي تكلم

وجلس وصبّ له شاهي واخذ الفنجان يناظره وهو ساهي ، يهوجس

بلع ريقه من شعوره ومن فعله ومن نظرات ملاك له صار بخاطره يرجع من جديد يشوف ورد عروقها الشفافه ماهو مصدق اندفاعه

ابتسم بخفوت وهو يناظر الفنجان ولف من نطقت نوره:تهوجس في من ؟

اخذ نفس يبلل شفايفه:ولاشي ، ابوي ما رجع ؟

نوره:لا يقول بينتظر أصايل لين تخلص وياخذها هو

ثنيان:بلغك باللي صار مع بندر ؟

نوره:قالي ماصار شي بندر نفسه نفسه راعي المشاكل

سكت ثنيان وهز راسه:سوينا اللي علينا

نوره فتحت جوالها:صح بغيت اوريك تعال اقرب

وقف ثنيان وبيده فنجانه وجلس جنب نوره اللي شغلت له مقطع ملاك وأصايل

وابتسم بخفوت يناظرها ترقص مع أصايل بفستانها اللي اختارت لونه بنفسها وعشانه

دخل جاسر وناظرهم:وش فيكم ؟

نوره:لا تقرب قاعده اوريه احسن اختياره ترقص

رفع عيونه ثنيان وناظر جاسر ورفع حاجبينه جاسر:احسن اختيار فعلاً

ثنيان سكت وهز راسه جاسر:بغيتك

ثنيان:اخلص فنجاني واجيك

سكت جاسر يناظر ثنيان اللي يشرب من فنجانه وخرج تاركه وشرب فنجانه ثنيان ووقف يخرج مع جاسر

ناظره واقف بالحوش ويناظر السيارات ووقف جنبه ثنيان:عسى خير

لف جاسر عليه:الخير عندك

اخذ نفس ثنيان وناظره:باقي بتحوم حوالين ملاك ؟ والا شادن ترست مخك بأشياء جديده ؟

هز راسه بأسف جاسر:كنت انتظر انت اللي تحلّ الموضوع لكني ما اشوف منك شي

ثنيان:لاني ما بحله نفس ما انت بتحله ، ونسبب مشاكل ونخلي سيرتنا على لسان كل الناس غير ان وجود ملاك بيننا أمان عشان بندر وطاريه

جاسر ناظر ثنيان بحده:تضحك على من ثنيان ؟ تضحك على نفسك ؟ انت ما تدور نهايه لملاك انت للحين تطول مشوارها معك ماودك تخرجها من بيننا وتكشفها قدام ابوي وقدام امي اللي يعاملونها مثل أصايل

سكت ثنيان يناظر جاسر وشد على فكّه يسمع جاسر

جاسر:هذي شرّ وانت الحين قاعد تحارب في شي هي سببه ، لا تغرق ثنيان مثل ما تغرق بالبحر ، لاتغرق لان القاع اللي بتوصل له بينهيك

مارد ثنيان يراقب جاسر وهز راسه جاسر:ومابي أكشف اوراقها قدامك الحين لكن حقيقتها بتعورك

ثنيان:حقيقة ملاك محد يعرفها غيري

هز راسه بأسف جاسر وكمل ثنيان:خلص نفسك من شادن وتأثيرها عليك وخلني انا اسلم بمشاكلي لوحدي

جاسر:مشاكلك مستمتع فيها ياثنيان ، تكفى لا تطيح اكثر

ثنيان:ماطحت ولا بطيح انا اعرف احل اموري لوحدي ، صحصح جاسر ولحد يكذب عليك

سكت جاسر يراقب عصبية ثنيان ومشى بيدخل ثنيان ونطق جاسر:اهم شي لا تطيح قبل تشوف زنزانه

لف ثنيان وعقد حاجبينه ومشى جاسر لسيارته وظل يراقبه ثنيان لين مشى وركب سيارته ثنيان وارسل لنهار:شفت الكاميرات ؟

نهار:اي وكلمت طلال بيتصرف

ثنيان:جايك

قفل جواله وخرج من البيت

-

خرجت من الغرفه من شافت خروج ثنيان من البيت ودخلت غرفة ملاك بدون تدق بابها ولفت ملاك بإستغراب وعقدت حاجبينها من وجودها

بلعت ريقها ملاك تشد ياقة فستانها اللي لبسته وعقدت حاجبينها:صار وقت نتكلم الحين ؟

تقدمت شادن وتكتفت ووقفت قدام ملاك:صار يابنت عمي

ملاك:اي ومن وين بتبدين ؟ من زواجك والا من خيانتك والا من وين ؟

شادن:من منصور

صدت ملاك من طاريه وتقدمت شادن بحده:من عنده لانه هو بداية كل شي بداية وجودك هنا بينهم وبداية وجودي هنا معك

لفت ملاك بحده:قبل زواجي كنتي تقولين بتتزوجين وتتركين منصور يتعذب والحين اشوفك تزوجتي ، عسى منصور راضي عن زواجك ؟

شادن:ماتزوجت عشان منصور تزوجت عشان احمي نفسي من مشاكلك

عقدت حاجبينها ملاك بذهول من شادن:كل شي بتحطيني سبب فيه ؟

شادن:لانك انتي السبب فعلاً

صدت ملاك من كلام شادن بملل ومن اتهاماتها

شادن:جاسر

لفت ملاك تناظرها وكملت شادن:يعرف كل شي

سكتت ملاك ثواني وهمست:وشو كل شي ؟

شادن:منصور والديّه وسرقتك عشانه وسبب سجنه

جمد وجه ملاك وكملت شادن:وانا هنا عشان ينتقم منك ويغطي عيبه ويسدد باقي ديّة منصور

لانت ملامح ملاك بصدمه تناظر شادن بذهول ورفعت كتفها شادن:ومنصور بنفسه اذا طلع بيبلغ ثنيان بكل شي

ظلت تراقب شادن رجولها ما تشيلها ورفعت حاجبها شادن:وبيخرج منصور وبتخسرينه وبتخسرين ثنيان معه ، هذا اللي يراهن على خيرك ولا يبي يسمع حقيقتك ويشوفها

جلست ملاك وعيونها تراقب شادن بصدمه ورفعت كفوفها شادن:كلنا خسرنا بالنهايه بس خسارتك انتي اكبر

نزلت راسها ملاك تناظر الارض جامد وجهها وتقدمت شادن لها:جهزي اعذارك والا جهزي كرت مغادرتك اسهل

وقفت ملاك وناظرتها بحده:انتي علمتيه ؟ انتي اللي قلتي له عن كل شي عشان يهددني ؟ انتي من اي حثاله طلعتي لي ؟

تقدمت شادن بغضب:هو هددني بنفسه ولا قدرت اكذب اكثر

ملاك:وانا ويني ليه ما تجين عندي انا احلها نفس دايم ؟ ليه تتصرفين من راسك ياغبيه

شادن:اجيك تحلينها ؟ انتي مشغوله مع ولد البحر زوجك موج مو منتبهه لاحد

تقدمت ملاك واشتعلت غضب من شادن وهمست بوجهها:قصي يدي اذا جاسر طلع لك اخوك ياحماره

بلعت ريقها شادن تخفي ربكتها:منصور صار اخوي الحين ؟

دفعتها ملاك بقهر من تصرفاتها:ولا عمرك بتفهمين ، غبيه

شادن:تركنا لك كل الذكاء والدهاء يابنت عمي

ملاك لفت عليها:شوفي وين انا ووين انتي وتعرفين ان مافيك ذرة ذكاء ، قاعده تحاربيني وتاركه جاسر يسرح ويمرح ياغبيه

شادن:استهيني في جاسر لين تصبحين ومنصور حرّ ووقتها خل السقف يطيح فوق راسك بخساره

ملاك:تخسين انتي وجاسر تطيحوني وانا اعرف اتصرف بحياتي ولا بتحكميني بشي وتوكلي الحين اذلفي ربي عيال الثور اللي عندك

هزت راسها شادن بقهر وخرجت تاركه ملاك وجلست على السرير وتمسكت باللحاف ملاك بشده وهي تناظر الارض

داخلها يزيد بغليانه وجمرها تكاثر من حريقها ومن اسم منصور وثنيان اللي صاروا بكفتين

كل شي تشكل فوق راسها سحابه سوداء وحجبت عنها شمسها الحارقه ماعاد عندها كروت تطلعها وتدافع عن نفسها وتثبت نفسها

'

دخل عقاب عليهم يناظرهم جالسين ينتظرونه وجلس على كرسيّه بهدوء ورفع عيونه لعياله يناظرهم واحد واحد

ورفع عيونه من نزلت ملاك ولف ثنيان عليها ورفعت عيونها على ثنيان وبلعت ريقها تتقدم وتجلس بجانبه

لف عليها ثنيان يحسّ بإحتراقها وخمن انه السبب ولف للأكل بهدوء ياكل

ورفعت عيونها شادن على ملاك ولف جاسر عليهم يناظرهم ورجع ناظر شادن

نوره ناظرت عقاب:عقاب وشفيك اليوم خامل ؟

عقاب:من الصبح اشتغل تعبت شوي

أصايل:وانا تعبت بدوامي كان مرهق مرهق

ساري:وش بتسوين بتكملين ؟

أصايل لفت وهي تاكل:اكيد مره مهم التطوع وبينفعني

جنى:حياتي الله يوفقك

ابتسمت أصايل ولفت نوره:عقاب شرايك نشرب شاهي وناكل كيك ومكسرات بالحوش كلنا ؟

عقاب رجع ظهره لورا:تجمعوا اللي ودكم

نوره وقفت:بقولهم يجهزون القعده

تركتهم ونزلت كفوفها ملاك بتعب تناظر الأكل واخذت نفس ولف عليها ثنيان وهمس:كنتي تبكين ؟

هزت راسها بالنفي بدون تناظره وسكت ثنيان يناظرها ولف من وقف عقاب:اطلعوا لا تبطون عن امكم

وقف نهار:جاي انا

وقفت ملاك وناظرت جاسر وشادن اللي وقفوا معها وظلت واقفه تناظرهم

ولف ثنيان يوقف وناظرهم لين خرجوا ومسك ذراع ملاك وتقدم يهمس:تكلم معك؟

انضغطت ولفت تناظر ساري وجنى اللي وقفوا

ورفعت عيونها ملاك على ثنيان لين خرجوا ونطق ثنيان:تكلم معك جاسر ؟

هزت راسها بالنفي ملاك وبعدت ذراعها عنه وتقدم ثنيان:اجل وشفيك ؟

رفعت عيونها ملاك تناظر ثنيان ثواني ولاردت ومشت تتركه

اخذ نفس ثنيان بتعب وخرج خلفها

جلست ملاك وحطت ذراعها على الكنب تتكي وتناظرهم كان ودها تختفي من بينهم للابد وتترك كل شي بلحظه وحده

لكنها تناظر عقاب ونوره ونهار وأصايل وثنيان اللي بجانبها

يعورها ثنيان من مكان ما كانت تتوقع انها بتتعور فيه ابد وتشوف اسئلته بعيونه ومخاوفه وقلقه من اخر موقف بينهم ، ماودها يشوف نار داخلها مو سببها

ماودها تشوف فيه نظرات لوم وتردد واسئله

لانه يحاولها وهي مالقت شخص يحاولها قد ثنيان للحين ، هو يرغب في قربها ووصلها مع ان غيره يتمنى خلاص ملاك

رغم انها نار ولهب وتحرق اي شي تلمسه هو الوحيد اللي لمسته وما احترق للحين دافي موجه وبَحره

تخاف انها تخذله او يلاقي اجوبه من غيرها ماتبي تجاوبها هي

لف ثنيان من انتبه لها انها متكيه بيدها وتناظره ، نظرات من عيون تلمع ، عيون تعود يشوفها تحترق وتشتعل لكن كانت تلمع الحين

ما يدري هي توادع والا تقاوم والا تكابر بنظراتها لكنه ظل يراقبها ويجهل صوت افكارها

ورغم سوالف الموجودين بالمكان هي ما كانت تسمع ولا تشوف غيره ، بكل اصراره وكلامه واسئلته وقربه وحضنه ودفاه ، كل التفاصيل اللي غفلت عنها بلحظتها الحين رجعت تشوفها وتسمعها من جديد وتراكمت عليها مره وحده تفوقها انها تعشقه

تحبه ، عطاها شي اكبر من اللي تنتظره وتستناه ، عطاها عائله وتقدير عطاها مساحه وأعذار

طالت بنظراتها واخذ نفس بتوتر من وضعها وبدل نظراته عنها لاهله

وكأنه قطع حبل افكارها من التفت وعقدت حاجبينها بإنزعاج من التفت عنها

واعتدلت تمد كفها لكفه ولف عليها بصدمه يناظرها وعقد حاجبينه

مسكت كفه بقوه وحطته بحضنها ولفت تناظرهم وتبلع ريقها

ناظرها ثنيان ونزل عيونه لكفوفها اللي تحضن كفه وشد عليها وهو يجهل سببها

بللت شفايفها ملاك تحس بنظرات شادن لها لكنها مالفت عليها ابد

جاته رساله بجواله واخذه بكفه الثانيه يقرا رسالة طلال:مسكته بيحطونه يستجوبونه

قفل جواله ثنيان وابتسم يحس بكفوفها بكفه وسند ظهره للخلف وهمس:صرتي موج ؟

اخذت نفس ملاك ولفت عليه وهزت راسها بالنفي

ناظر كفوفهم ورجع ناظرها:ما احس بنار

ملاك بلعت ريقها تناظره:لو

سكت ثنيان ونزلت عيونها لكفوفهم ورجعت ناظرته:اطلب اني اخرج من المرسى للموج ، توديني ؟

عقد حاجبينه وتقدم لها:انتي تخافين الموج

رفعت راسها تنفي كلامه:ماعاد يخوفني الموج صرت استأمنه

سكت ثنيان يناظرها ورفعت عيونها لعيونه ملاك:ضجيج عقلي اعلى من اصواتهم

شد على كفوفها ثنيان وهز راسه ، نزلت عيونها لكفه الكف اللي تشعر ان داخله سعة العالمين رغم ضيق الكون عليها ، شعور الاطمئنان غريب بكفه

لف ثنيان وابتسم:سهرتكم رايقه بس الموج ينادي

ضحكت نوره ولفت ملاك عليهم وابتسمت بخفوت

أصايل:زمان كان ثنيان يهرب للبحر الحين الاثنين يهربون

ثنيان لف لملاك:ملاك طلبت

لفت ملاك عليه وابتسم ثنيان:وما بردها

عقاب:الله يسهل عليكم

وقفت ملاك وفلتت يدها بصعوبه من يد ثنيان وكأنها تخاف تتركها للأبد ويختفي عنها

لف عليها من لاحظ انها تتمسك بكفه لين اخر خطواتها وتدخل البيت

لف ثنيان على جاسر وشادن اللي جالسين ومشى خلف ملاك

دخلت الغرفه وهي تطلع لها ملابس ودخل ثنيان وناظرها:تبين نطول ؟

لفت عليه تشوف نيته من سؤاله وبلعت ريقها ثواني:انا بروح لاني متضايقه وسـ

سكتت بربكه وهز راسه ثنيان:ماني ضاغط عليك

كان قدّ كلامه فعلاً ما يبي يضغط عليها بقربه لانها اليوم مسكت كفه وباقي مشواره معها قصير

هزت راسها براحه ومشت للحمام واخذ شنطته ثنيان وابتسم يحط فيها شورتاته ومنشفته واخذ مفتاحه ومشى للحمام ودق الباب

ولفت على الباب لين نطق:بنتظرك بالسياره

هزت راسها:طيب

مشى يخرج من عندها ولفت للمرايه وناظرت الفستان التفاحي اللي لبسته وبيّن عنقها كامل وبان ورد ثنيان اللي زرعه على عروقها الخضراء

وزرع داخلها ورد بين لهب وجمر وكأنه فعل معجزه وسط اللهب وزرع ورده

رجعت تناظر وجهها وتتذكر كلام شادن وحطت ميك اب بوجهها ببرود وجمود

حتى لو كانت نهايتها على يد شادن وضميرها اللي ياكلها بسبب منصور لا زال ، هي تعيش شي اكبر من كل هذا تعيش موج يطفي لهبها وماتبي تختفي عنه وتحتاجه بهاللحظه بالذات

خرجت من الحمام ولبست عبايتها تاخذ بقية اغراضها بشنطه صغيره وخرجت

ناظرتهم جالسين وابتسمت لهم:تصبحون على خير

نوره:وانتوا من اهله استودعناكم الله

مشت ملاك بعد ما ناظرت شادن وركبت السياره بجانب ثنيان اللي حرك خارج من البيت

نزلت عيونها لدبلتها تناظرها ولفت لثنيان اللي ماكان قادر يخفي ابتسامته من ردة فعلها

لفت للطريق تشوف البحر واقترب من المرسى ووقف ولف عليها وناظرته وفتحت الباب تنزل

غمضت عيونها من شمت ريحة ملوحة البحر واخذت اطول نفس ولفت من نزل ثنيان وشنطته بيده ومشت معاه

طلع اليخت ومد كفه لها ومسكته بقوه تطلع اليخت وحط اغراضهم ومشى يدخل

جلست بهدوء من شغل اليخت وخرج عن المرسى يبتعد بالبحر وغمضت عيونها من سرعته وهواء الموج اللي تحس فيه يملي رئتها وفصخت حجابها وعبايتها واستندت على حافة اليخت ترجع راسها للخلف وترفع يدينها وابتسمت بهدوء من مشاعرها وحياتها اللي تركتها على المرسى تحترق وضحكت بعلو صوتها

تمد كفوفها للموج وتلمسه وتكت براسها تناظر الموج ورَسى ثنيان وسط البحر يترك اليخت يبحر براحة الريح وخرج لها

وتقدم لها:اسبحي اذا ودك

هزت راسها بالنفي وجلس بجانبها:اي وما بتعلميني وش الغريب اللي صار لك الليله ؟

ملاك لفت للبحر تتكي براسها وتناظره:الجمر هادي

ابتسم ونزل عيونه لعنقها ينتبه لورده اللي زرعه بين عروقها وصد بهدوء:ماهو فارق عندك اللي هددك ؟

ملاك ناظرته:اي واحد ؟

لف عليها وكملت ملاك:يهددوني كثير

ثنيان:متى صار موضوع الرصاصه ؟

ملاك:وانت بين الموج يازوجي موج

سكت يتذكر مكالمتها وعض شفته وصد

هز راسه بعد ثواني ثنيان:دريت جاك شي من جاسر لانه كلمني

ملاك هزت راسها بالنفي تصد للبحر:شادن كلمتني

ثنيان لف عليها:تحاربك ؟

ملاك سكتت ثواني:وانا مامعي ذخيره

ثنيان ناظرها تتأمل الموج وهاديه:وانا ؟

ملاك لفت عليه وهزت راسها:انت ذخيرتها هي مو ذخيرتي

ثنيان اخذ نفس:انضغطتي واجد

ملاك ماردت عليه تناظر البحر عقلها متوقف عن التفكير وكأنها بعد ماكانت تسعى طول عمرها توقفت فجأه

وسكت ثنيان من شافها ساكنه مميله راسها تناظر الموج ورجع ظهره للخلف يصد للبحر ويهدأ

رفعت عيونها لثنيان اللي صاد للبحر وساكت وجالس جنبها

كان موجود بكل وقت انهياراتها كان ما يقول لا حتى لو ماهو فاهم وجاهل ، ياكم تتمنى تستند على كتفه اللحظه هذي ويوقف عندها كل شي لكنها ماتقدر

ما تتخيل حجم الألم اللي بتعيشه بعد ما ينكشف كل شي وتنفتح ستاير خبتها عن الحقيقه

ماتبي تفقده او تفقد عائلته او تفقد اللي يعطيه اياها بدون مقابل بدون ملل بدون احساس

نزلت دموعها بدون شعور منها تذكر منصور اللي ينتظر حريّته اللي شرت الشرّ عشان تخرجه بنفسها ، وتذكر ضميرها اللي كان طول عمرها معيشها على انه حب لمنصور لان اللي عاشته مع الموج اللي امامها هو الحب الحقيقي وكل شي عاشته مع منصور هو حاجه للسند بعد فقدانه وضمير يأنبها لانها سبب سجنه

لكن الحب الحقيقي هو اللي يستند على اليخت ويتأمل الموج اللي يشابهه

همست وهي تتأمله:الموج قادر

لف عليها وناظر دموعها ولمعة عيونها وبلل أهدابها ولا ظن انها تبكي يمينه

وهزت راسها بهدوء وهي تتأمله:انا عشت ما احتجت ، لكني من بعدك احتاج لك حاجة اللهب لآخر نقطه من الموج ، احتاجك حاجتي للصيف بعز الشتاء ، انت كل حاجاتي

سكت ثنيان يناظرها وكملت ملاك:كنت تجهل كم مره حطيت قلبي المشتعل وسط موجك وطفيته ، ماكنت اقدر اقولك ولا مره اني اغرق معك وانا على اليابسه على المرسى

كانت مميله راسها على ذراعينها وتتأمله:لولا حنانك كان كل هالعمر دمعات مسكوبه ، اشوفك أقرب غريب وأبعد مستحيل واحس اني بين الكل مغتربه لكني معك بوطني ، عمري ما حسيت بالدفى بعد سنين طويله الا معاك وجنبك ، انت المكان الدافي وانا بدونك احترق

عقد حاجبينه من كلامها واعترافها ودموعها اللي تنساب بهدوء

رمشت بهدوء ملاك:ماكان ببالي بيوم اقول هذا الكلام لكني ما صرت اعرف الجاي ، دايم كانت تسيّرني القسوه لكن ماكنت اقسى الا على نفسي

رفعت اصابعها على ذراعه تلمسه بأطراف اصابعها وهمست:كل شي لمسته إحترق مابي أحرقك

ثنيان:إحترقت

رفعت عيونها على ثنيان وتكلم بهدوء ثنيان:إحترقت يوم وقفت عند أجوبتك وقلت مابي اسمعها

سكتت تناظر عيونه وكمل ثنيان:إحترقت يوم عرفت اني ابي الغرق بين الاسئله بس مابي نجاة الأجوبه

رفع حاجبه ثواني بشعور يسكنه:لان ماورا الأجوبه الا نهاية طريقك

ساحت دموعها على ذراعها تتأمله وكمل ثنيان يهز راسه:أنا موج وقلبي على الماء وقلب الماء على شطك

غمضت عيونها تفهم جملته بمفهوم من أربع حروف

' أحبك '

ناظر عيونها اللي غمضتها وعرف انها تفهم تعبيره وفتحت عيونها عليه ماتبي تخذله ماتبي تعوره ماتبي تتركه لكنها تغرق بجانبه وتبي الغرق ماودها بالنجاه

اخذ نفس براحه من نطق جملته وحسّ انها استوعبت مشاعره ولف للنور اللي بدأ يشق الظلام دليل طلوع الفجر وشروق الشمس

ووقف يدخل لداخل وغمضت عيونها ملاك بهدوء

خرج وبيده منشفته ولفت له تشوفه بوضوح من شروق الشمس وفصخ تيشيرته وجلست بإعتدال وناظرها:لو غرقت لا تنقذيني

ابتسمت ثواني لانها ماتعرف تسبح:ما بنقذك إسبح على مسؤوليتك

ابتسم بخفوت وحط منشفته وقفز من اليخت للبحر وتناثر الموج على فستانها واخذت نفس

تلفتت حوالينها بخوف من صارت لوحدها وتسمع هدوء الموج ووقفت تشوف مكان ثنيان لكن ما لقته

بلعت ريقها تنتظره وتمسكت بمنشفته وهي تناظر البحر حوالينها من كل الاتجاهات

كتمت خوفها وهي تدوره بعيونها ومن طوّل ما شافت له مكان ، كانت متأكده انه يعرف ينجو ويسبح بتمرس لكنها تخاف وسكنها الرعب من طوّل

وهمست بإسمه لأول مره على لسانها:ثنيان

ماجاها صوت وتلفتت ترفع صوتها:ثنيان

تقدمت لطرف اليخت بخوف وصرخت تناديه:ثنيان

بكت بتعب من ضغطها وخوفها ولمست طرف الموج تصرخ بإسمه:ثنيان

فلتت منشفته ترمي نفسها بالبحر تجهل النجاه لكنها بتلحقه وغطست

وفتح عيونه ثنيان من شافها تغطس وابتسم لانه سمعها سمعها تناديه ولف يشوفها تتشبث بسطح البحر وجمد وجهه يستوعب انها فعلاً ما تعرف تسبح

غطس يدخل ومدّ ذراعينه لها بجوف البحر ومسك كفوفها بقوه وحاوطها يحضنها وطَفى يتنفس وناظرها تتنفس وهي متمسكه فيه

ناظرها بصدمه ثنيان تكح وتتنفس وتشهق:منجدك ؟

رجف فكّها من برودة المويه وشعورها وراحتها بعد ما عاشت النجاه مع ثنيان

ناظرها بصدمه يشوفها تننفس بسرعه:ما تعرفين تسبحين ؟

عقد حاجبينه ثنيان:لو انا غرقت بتغرقين وراي ؟

ماردت عليه وهي ترجف وتحرك رجلينها بجهل بالبحر ومتمسكه بكتوفه العاريّه

ناظرها بذهول يستوعب انها رمت نفسها خلفه وهي تجهل النجاه

هز راسه بعدم تصديق يناظرها

ورفعت كفها تحاول تمسك اليخت وبعّدها ثنيان ولفت عليه:طلعني

هز راسه بالنفي:ناديتي اسمي سمعتك

ماردت عليه وهي ترجف من برودة الموج وخوفها من الموج والغرق اللي عاشته ثواني

وناظر أهداب عيونها المبلله ثنيان:ماعاد اسمي صعب تذكرينه وسهل تنسينه

كان بيفلت يدينها وتمسكت فيه برعب:لا تتركني

ابتسم لها وهز راسه:لا ، قولي لا تتركني ثنيان

استفزها بإبتسامته وكأنه يتحداها وسط الموج ودفعته عنها تحاول تتمسك باليخت وغطست وضحك يرفعها وشهقت تتمسك فيه من جديد

ضحك يشوف شعرها اللي على وجهها:ماهي صعبه قلتيها ثلاث مرات

ملاك فتحت عيونها بتعب:طلعني

هز راسه بالنفي ورفعت شعرها عن وجهها وناظرته بتعب يصعب عليها تقول اسمه من جديد لانها تثاقلت حروف اسمه من مشاعرها وهي تناديه لكنها تبي تحب اسمه وتبي تكرره وتتعمد يلتفت عشان تناديه وتنده له ، ماعاد صارت تقدر تقاوم كل شي يخصه كل شي فيه يجذبها تحبه وتبيه ، ماصار سهل تنساه وصعب تذكره صار داخل جوفها ما يفارقها بكل وقتها

همست وهي تناظر عيونه وإنتظاره لإسمه منها:ثنيان

لانت ملامحه ما توقع بيكون اسمه منها حلو ومختلف وكأنه لأول مره يعرف ان بداية اسمه ثاء ونهايته نون رقيق

كان منظر دهشته أمامها مدهش ، كانت تشوف وجهه من قريب ومنظر شعره المبلول ، رموش هدب عينه المبلول ، بؤبؤ بصَره اللي يلمع

كتوفه العريضه اللي متمسكه عليها بقوه ، كان ماسكها من خصرها لنفسه لجسمه وماسكته لانه النجاه لها من الغرق لكنها تغرق فيه هو وما منه نجاه ابد

بلعت ريقها تشوف نظراته لها وتحس بالتوتر لانها وسط موجه ما تلاقي لكبريائها طريق وكل ما بداخلها من لَهب مطفي ، وكأن الموج قادر وصار الموج يطفي اللهب

ناظرها متمسكه فيه وكأنها مو لاقيه نجاه وسط الموج الا فيه ولأول مره يشوف ملاك متمسكه فيه وكان منظرها وسط حضنه ، قريبه منه ، بين عالمه ، بحره وموجه وتلجأ له ! ' مُشهي لتقبيلها '

ابتسم ابتسامه خفيّه لانها مستحيل تبتعد مستحيل تصدّه مستحيل يتردد ولا يستغل اللحظه

لان تردده طال وصدودها كثر والفرصه الوحيده الان

ناظر ثغرها اللي يرجف واقترب منها يحس بذراعينها اللي تحتضنه وقبّلها

عقدت حاجبينها وغمضت عيونه بقوه من حست بثغره يلمس ثغرها واشتدت بروده فوق برودة الموج تحسه يقبلها ويشدّها اكثر له

كانت تغرق وسط الموجين وهي ما بيدها طوق نجاه من كلاهم

كان تقبيلها بمثابة المنفَى البعيد عن الكون وضجته ، ما يوجد شي أشهى مذاق من ثغرها وكأنها بدلّت الكون من ظلام لصباح ومن موج لغيم تحملهم الرياح

تحس انها تسبح داخله ماهو داخل الموج اللي تجهل قاعه ، ترتوي من الربيع الباسم اللي يقطع جفافها ، جَرى داخلها موج وكأنه سقاها من موجه وجرى نهر الهوى داخلها جريّة السيل وهي تحاول تنتقل من غَبّته لين ضفافه ، تجهل جميع اتجاهاتها وما تشوف الا هو شمالها وجنوبها وشرقها وغربها وكأنه تحكم ببوصلتها

كان دايم يظن ان البحر أعذب لين ماجرب يقبّل ثغرها على شروق الشمس وزُرقة السماء مع إحمرار شمسها وكأن اللهب التقى مع الموج جوّ وبحر

كان يرجع يخيّط تهشّم خفوقها وكانت تعلّمه الغرق الحقيقي

وسط الموج المالح كانت الأعذب لروحه ولثغره ولجوفه ، جرب يغرق في بحور بلا مواني ساعات لكن كانت الدقايق اللي قضاها يقبّلها أشدّ غرق عليه

كانت فَن غير إنها لَهب ودائماً يشوفها فَن بكل حالاتها وطريقة تشكلها قدامه بكذا حال حتى بملمس ثغرها بين ثغره ورجفتها يشوفه فَن

لأول مره تشع من داخلها لكن ما تشع لَهب تشع غرام ، لأول مره كل ما بداخلها يوافق ولا شي يردّها عنه حتى عقلها وقلبها يبيه

تتكاثر داخل معدتها جذوع الورد وتحس ان داخلها بستان من مشاعرها

رفعت كفها تلمس رقبته وشعره من الخلف وكأنه جاها معطف في عز الشتاء وكأنه جاها ورد في موسم حصاد ، وكأنه جاها صيف تحبه

يوم اقتربت منه كل هذا القرب وذاق رحيق ثغرها شمّ فيها أنعم الروائح ، كان جسمها ينبض بريحة الخزامى وزهر البرتقال ، رائحه عَذبه وكأن الزهر تناثر حوالينه ، ما يعرف هل هذا شعور او ان جسمها معطّر فطره

كانت الشمس تلمس اجسادهم اللامعه من الموج انعكست على جلودهم شمس وموج ، صبح وبحر ، صيف وغرام ، موج ولَهب

ابتعدت عنه تاخذ انفاسها من الغرق فيه وفتح عيونه من الحلم اللي كان مدفون فيه

ناظرها مغمضه عيونها ورمشها مبلول وفتحت عيونها بعد ثواني تحاول تستوعب كل اللي حصل كل اللي جَرى

بلعت ريقها ومدت ذراعها تتمسك بسلّم اليخت وتغادر حضنه وتطلع لليخت

وقفت على اليخت ترجف واخذت منشفته تغطي نفسها وطلع لها ومسك ذراعها يلفها له ومسك وجهها بيعيد الكرّه لكنها من ربكتها وخوفها وصوت نبضها العالي صفقته كف بيد راجفه وناظرها بصدمه وكأنه استفاق

ملاك بلعت ريقها بخوف وناظرته بحده وهي ترجف من البرد والموج اللي يغطي جسمها:بعّد

ابتسم من مشت تدخل وتقدم لها:رجعت لَهب يعني ؟

جلست وهي ترجف وضحك ثنيان:ما أرتويت

رفعت عيونها ملاك بربكه:خلاص

بلل شفايفه يرفع شعره عن جبينه ويهز راسه:بس اذا ودك تاخذين لون تان هذا وقت الشمس

ماردت عليه تصد وتقدم يناظر قستانها التفاحي المبلول:انزعيه تبللين المكان فيه

رفع عيونها للابتسامته:وتنتظرني انزعه قدام عيونك ؟

ثنيان ابتسم ورفع حاجبه:وش يمنع ؟

بلعت ريقها من نظراتها ووقفت:اطلع خلني ابدل

تقدم لها ثنيان ومسك شعرها المبلول:شكلك حلو بين الموج

رفعت كفها ومسكه بقوه وضحك:أعصابك !

ملاك ناظرته وهي تتنفس:اخرج

ابتسم يناظرها ونزل عيونه لعنقها اللي يزينه ورده ورجع يناظر ثغرها وابتسم بوسع مبسمه وهز راسه

وخرج يتركها وضحك يعض شفته وغمضت عيونها وهي ترجف من برودة الموج اللي غرقت فيه وتتذكر مشاعرها وقتها وملمس ثغره عليها ، هي ماكانت تعرف للاستسلام باب لكنه فتح اوسع ابوابه ثنيان واستسلمت

شدت على كفوفها بقوه ورفعت كفها على صدرها وغمضت عيونها

-

( الأفضل موج ولهب ❤️‍🔥💙 )

وقف جاسر السياره ولف لشادن اللي ناظرته:لا تضايقه

مارد عليها جاسر ونزل من السياره ونزلت معه شادن وتقدم يدخل السجن المركزي ويطلع هويته للعسكري:بشوف منصور بن محمد أخ زوجتي

هز راسه العسكري:استريح

جلس جاسر وظلت واقفه شادن بتوتر تناظر السجن

وتقدم العسكري وبيده الهويه:تفضلوا

وقف جاسر يدخل داخل غرف الزياره وجلس على الكرسي وهو ينتظر منصور

تكتفت شادن بتوتر تنتظر منصور وفتحوا باب السجن الحديدي وخرج منصور مكلبش وناظر جاسر اللي جالس وتقدم لهم

رفع عيونه جاسر لمنصور من اقترب ووقف منصور عنده يناظره ونطق جاسر بهدوء:سبب كل شي

لفت شادن على جاسر وسحب الكرسي منصور وجلس:ليه جيت ؟

جاسر:شادن كلمتني انك ماتبي تشوفها عشان تزوجتني وطلبتني اسدد باقي ديّتك ولا جاز لك الموضوع جيت اسمعه منك

هز راسه منصور:اي قلت ولا برجع بكلامي ، لا ملاك ولا شادن ابي منهم شي بعد اختيارهم ولا ابي احد يذلني بمنصبه وفلوسه عشان اطلع لحريتي

جاسر:يعني تدري بملاك ؟

سكت منصور يناظر جاسر وتقدم جاسر بهدوء:وتدري اني بركض وراها وبدخلّها مكان ما انت قاعد الحين ؟

منصور:ما يهمني

رفع حاجبه جاسر:ما يهمك ؟

منصور هز راسه:ما تعني لي ملاك ولا اي شي يخصها ولا ارتجي منها شي ، ارخصت نفسها وتلوثت وانا مابي حياتي زود تلوّث

جاسر:انت تلوّثت على قولتك بسببها وقتلت واحد مع ان القتل ماله أعذار يعني مجرم ، وهي سرقت ناس ونصبت عليهم عشان تطلعك يعني مجرمه ، مافي فرق بينكم

منصور:انا دافعت عنها ولو تشوفونه غلط انا ماني ندمان عليه لانه من رجولتي

جاسر:القتل ماهو رجوله لا تغيّر مصطلحات كبيره وتلمعّها

منصور مارد يناظر جاسر واخذ نفس ثواني جاسر:انا بسدد باقي الديّه مو عشانك ولا عشان اختك عشان ينحرق قلب ملاك بس

منصور:لا تدفع شي اللي بيدفع لي باقي أموري موجود

عقدت حاجبينها شادن ونطق جاسر:منهو ؟

منصور رجع ظهره لورا:ما يهمك ، اخر كلامي ملاك احترقت صفحتها بكتابي ولا ابي وحده رخيصه مثلها بحياتي ومثل ما باعتني وانا مسجون عشانها ببيعها وانا حرّ ، غير انها من قبل ماكانت تعجبك وعليها حركات

سكتت شادن وعقدت حاجبينها ورفع حاجبه جاسر:وشو الحركات ؟

منصور تقدم لجاسر وهمس:مستعمله

جمد وجه جاسر من كلام منصور واتهامه وطعنه بشرف ملاك

جاسر:يعني الحرب بتصير بينكم ؟

منصور رفع حاجبينه وهز راسه جاسر:لا تنسى اني جيتك وانت رديتني

منصور:يكفي تترك انتقامك على جنب وتطلق اختي

وقف جاسر وابتسم:حربك مع ملاك وحربي مع اختك

لف منصور يناظر شادن بحده اللي توترت ولف جاسر على شادن:اذا تبين تقعدين مع اخوك

منصور:مابي احد يقعد معي

شادن:منصور !

رفع عيونه منصور بحده ووقف يتركهم ولف جاسر على شادن:اخوك عليه تناقضات عجيبه يحارب اللي منه وفيه

شادن:قلت لك لا تروح له ليش تجي ؟

جاسر:من انتي تحكميني ؟

شادن:دام ما يبي منك شي منصور طلقني واتركني بحالي

ضحك جاسر:اسمع بالله تحسب اللي بيني وبينها منصور وبس ، نسيتي عهدنا ؟

تأففت شادن بتعب وناظرها جاسر:باقي اللي بيني وبينك ما انتهى

رفعت عيونها شادن وخرج جاسر ومشت خلفه

'

فتح جواله يشوف الساعه ولف ليامور:الفزعه ياذيبان

جلس منيف وناظره يامور وابتسم منيف:الحين اسمح لك تتسلط عليّ

فتح كفوفه:اقرب حلل فلوسي عليك

ابتعد يامور وعقد حاجبينه منيف:الحين صرت تخاف مني ؟ اقولك الفزعه امش

وقف منيف ليامور وهوّش له يامور وضحك منيف:اي اي ابيها هذي

فزّ منيف ليامور وهجم عليه يامور وغمض عيونه بألم منيف من خَمشه بخده كامل ومسك خده منيف وابتعد ولف للمرايه وجمد وجهه من شاف الدم من خده وابتسم:يسلم راسك يامور ابشر بأحلى تونه عشاء اليوم تستاهل

اخذ مناديل يمسح خده بألم واخذ جواله وخرج من البيت

ركب سيارته وشغل موقع المستشفى بجواله يمشي على الموقع لين وصل ووقف سيارته

وناظر خده بالمرايه اللي ينزف ورجع يحط مناديل ونزل

دخل وتقدم للطوارئ وهو يناظر المتدربين الموجودين

تقدم بيدخل وخرجت متدربه:ثواني لو سمحت

هز راسه وقف وهو يمسح خده بالمناديل ويناظر حوالينه ، لف يشوف العيال المتدربين اللي يتقهوون وواقفين وعقد حاجبينه بحده من سوالفهم مع المتدربات وصد من اشرت له وحده يدخل الغرفه

وجلس على السرير وتقدمت له:اشوف جرحك

منيف:وش تشوفينه ؟

المتدربه:انا متدربه بس لو جرحك يحتاج يشوفه دكتور اكيد بنادي دكتور يشوفه

منيف:لا ياخي مو انتي

المتدربه:نعم !

منيف اخذ نفس:في متدربه معكم ناديها هي تشوف جرحي

المتدربه:الكل مشغول خلني اشوف جرحك لو سمحت لا تعطل غيرك

منيف:لو سمحتي انتي اتركيني محد بيشوف جرحي

دخلت ميّ للمريض اللي بالغرفه ولفت من شافت منيف وانصدمت:انت أخو ملاك ؟

لف منيف وماعرفها:اي

ميّ:خلاص نسرين انا اشوفه

منيف:وانتي مين ؟

ميّ:انا صديقة أصايل اللي صكيت على سيارتك هذاك اليوم بحوش بيت أصايل

منيف:وأصايل وين ؟

ميّ:كانت بالبيت

منيف:الحين الحين وين أصايل ؟

ميّ:ماسكه قسم ثاني

منيف:قسم ايش ؟

ميّ:حروق

منيف:ابلش وش يحرقني الحين

ميّ لفت عليه:ما اسمع

منيف:ناديها بالله هي تعرف لي

ميّ:كيف تعرف لك ؟ انا بشوف جرحك واطهره لك

منيف:ياخي ليه محد فاهمني ما ابي

ميّ عقدت حاجبينها واخذ نفس منيف:اسمعي كلمي أصايل تجي تشوفني هي وهي تطهر جرحي

رفعت كتفها ميّ:بشوفها

خرجت ميّ من عنده ومشت للقسم الثاني ونادت أصايل:أصايل

لفت أصايل اللي ماسكه ذراع طفل وتقدمت ميّ:ابغاك تجين معي قسمي شوي

أصايل:مو فاضيه ميّ اذا عندك سؤال اسألي المشرف

ميّ:حياتي مابي تساعديني ابيك تشوفين اخو ملاك هو عندنا بالقسم

لفت بصدمه أصايل:منيف ؟

هزت راسها ميّ:خده مجروح ورفض احد يشوفه يقول أصايل تعرف لي

سكتت بصدمه أصايل وابتسمت ميّ:هذي بدايات المحبه والا في شي ما اعرفه ؟

أصايل بلعت ريقها:امسكي مكاني

تركت ميّ ومشت بتوتر لين دخلت القسم ووقفت تشوفه يناظر بالدم اللي بالمناديل وعاقد حاجبينه ورجع يحط المناديل على خده ورفع عيونه ولانت ملامحه من شافها

ارتبكت وتقدمت له وناظرها منيف تتقدم له وتخدر ولا كأن خَده مجروح ورمشت بتوتر وهمست:من ايش ؟

منيف ناظر ربكتها وحيَاها ونطق بهدوء:يامور

ناظرت عيونه ثواني أصايل:ما يحبك

منيف:ماهو طموحي ان يامور يحبني

بلعت ريقها ثواني تصد:طيب كان خليت ميّ تساعدك

منيف:ما رديتها بس هي قالت بنادي لك أصايل

ناظرته أصايل يكذب وبللت شفايفها بهدوء وسحبت من جانبها المطهر وتقدمت له:شيل المناديل

شال المناديل وعقدت حاجبينها تشوف جرحه ونزلت عيونها تمسح الجرح بشاش بالمطهر

ورفع عيونه منيف يناظرها من قريب ما يحس بشي غير بالغرام اللي يلمس صدره لها ومن إخت النهار الرقيقه العَذبه اللي أمامه تمسح جرحه ولا تدري انها دواه من كل شي داخله

رفعت اصابعها تمسك جبينه وتناظر جرحه بدقه وهمست:يمكن تحتاج خياطه

نزلت عيونها له وارتبكت من شافته يناظرها ونظراته اللي لطالما وترتها ولا تفهمها

رجعت لورا تبعد اصابعها عنه:بكلم الدكتور يشوفها

هز راسه بالنفي:طابت

سكتت وبلع ريقه منيف:اقصد ما يحتاج يعني بتطيب جرح سطحي

أصايل:لا لا مو سطحي بخلي الدكتور يشوفك

منيف لمس جرحه يتحسسه وتقدمت تبعد اصابعه:لا تلمسه

رفع عيونه عليها ونزلت اصابعها عن اصابعه:لا تعاند جرحك يحتاج خياطه

منيف:خياطه يعني أثر دايم وانا ما احب يبقى عليّ أثر

أصايل:مو مشكله يبقى أثر ، أثر يعني انت قوي

رفع عيونه عليها منيف:تهقين ؟

بلعت ريقها أصايل من طال كلامهم مع بعض لأول مره ومن نظراته لها ومن جيّته اللي تدري انها لأجلها وعشانها لكن تجهل كل مشاعره وش سببها ؟

مشت تتركه واخذ نفس منيف يغمض عيونه ثواني

كان وده الحديث يطول بينهم وتسولف معه عن كل شي وتناديه وده تناديه وتطلبه وتآمر وتنهي عليه ، وده بكل مافيها ، وترجع تلمسه وتستحي منه وترتبك

تنهد بتعب ورفع عيونه:اهخ

دخل دكتور وخلفه أصايل وتقدم الدكتور:ارفع راسك اشوف

رفع راسه منيف وناظرته أصايل ثواني وهز راسه الدكتور:مش موضوع كبير بس هنخيطه

منيف:شدعوه !

ابتسمت ثواني من كشر واختلفت ملامحه مع الدكتور وعقد حاجبينه لان الدكتور يعوره

وخيطوه غرزتين بخده وبقى أثر الجرح على خده ولف الدكتور:بس طهريه وغطيه

هزت راسها أصايل وخرج الدكتوره وتقدمت أصايل تاخذ الشاش والتيب ورفعت راسه بأصابعها وهمست:يحتاج تغير جرحك كل يوم

نطق منيف وهو يناظرها:عندك ؟

ناظرت عيونه وهزت راسها بالنفي وهز راسه منيف همس:اجل ما يحتاج

ارتبكت اكثر ترمش وتصد بعيونها وتغطي جرحه وبلعت ريقها تبتعد عنه:ما تشوف شر

مشت بتروح ووقف:أخت النهار

لفت عليه وناظرها:والا ماتحبين احد يناديك كذا ؟

هزت راسها بالنفي وتقدم منيف:بغيت اقولك اخر شي

توترت من مقدمته وخافت من اللي خطر ببالها وناظر رجفتها منيف وعقد حاجبينه:شفيك ؟

أصايل:وش الموضوع ؟

لف منيف يناظر المتدربين:اذا احد ضايقك منهم

عقدت حاجبينها ولف منيف عليها:يعني احد رمى كلمه عليك

سكتت تنتظره يقولها علميني وعطيني علم لكنه فعلاً ماله حق يطلبها تعلمه وتنهد يغيّر نيّته:علمي اخوانك

هزت راسها له ولف منيف يناظر المتدربين ولف عليها يناظرها:ولو اني ما اخاف على كوتي جبتها عندي لكن يامور ما يحبها

أصايل رفعت كتفها:يمكن هي تحبه

سكت منيف يناظرها وبللت شفايفها أصايل تصد بنظراتها وهز راسه بدون يرد وخرج من عندها وابتسم

ابتسمت أصايل تمسك قلبها وتعض شفتها

غمضت عيونها تتذكره ولفت تشوفه يخرج ويختفي عن انظارها واتسع مبسمها

'

طلع من دوامه نهار وهو يكلم وركب سيارته:انا بكلم ثنيان اول ما يطلع من البحر واخليه يشوفه

شغل سيارته وهز راسه:والله ياطلال ماودي اجيك واتصرف ولا ادري ثنيان وملاك وش بيسوون

ضحك نهار:ننتظر الغريق عاد شنسوي ، ماقصرت ياحبيبي

قفل جواله وحرك سيارتع يشغل اغاني ولابس نظارته الشمسيه واخذ جواله اللي دق ورد وابتسم:ارحبي ام النهار وست النساء كلهم

ابتسمت نوره:عيّار

نهار رفع كفه يغني:كانوا يسموني

نوره:اسمع اسمع ابيك تمرّ لي مشوار مافضيت اشوفه

نهار:من عيوني كم عندنا ام النهار ؟

نوره:وحده وماتبي تنحرم من هالحسّ

نهار:عادي امي اعترفي اني افضل عيالك واحسن واحد عندك ترا ما بيزعلون اخواني

نوره ضحكت:يالله يالله بس شفت نفسك

نهار:آمريني

نوره:لي فستان بدار مصممه واستلامه اليوم لكني مافضيت ابيك تجيبه لي

نهار:طيب روحي بكره وشوفيه عندهم

نوره:بتسافر المصممه تقول ما بلاقيها

نهار اخذ نفس:اي اروح وينه ؟

نوره:برسل لك الحين الموقع اصبر

نهار قفل من امه ورفع الصوت يغني وشغل الموقع يمشي له ووقف عند الموقع ونزل نظارته يقرأ اللوحه

' دار أزياء غلا فهد ' ولوقو المحل ' فَهد '

ابتسم بإعجاب يناظر المكان ولبس نظارته ونزل من السياره بدلته عليه ونجمته فوق كتفه وفَرده بخصره

ودخل المكان وناظر البنات اللي بالمكان وابتسم ونزل نظارته وعقدت حاجبينها من وجوده ونطقت:تفضل اخوي ؟

عض شفته نهار:اخوك ؟ افا

تقدمت وناظرته:خير اقدر اخدمك بشي ؟

نهار ناظرها وابتسم كانت لابسه عبايه بيضاء وحجاب وبيدها متر وايباد:صاحبة المكان ؟

هزت راسها:تفضل

نهار:ابيك

رفعت حاجبها:نعم ؟

نهار:ابيك بخدمه

هزت راسها:تفضل

نهار ابتسم وحك جبينه:الوالده ام نهار لها غرض عندك وتبيه

عقدت حاجبينها:ام نهار مين ؟ ما اعرفها

نهار:ام ساري

هزت راسها:اها اي طيب ثواني

لفت للعامله:جيبي فستان مدام نوره

لفت عليه:يجيبونه لك السياره تقدر تتفضل

نهار:لا عاجبني المكان

سكتت تناظره وتجوّل بين الفساتين وناظرته ورفعت حاجبها:بس ما اتوقع تلاقي مقاسك هنا

ابتسم نهار ولف عليها:تهكم ! مقبوله منك

اخذت نفس تصبّر نفسها:عندي زباين هنا ويقيسون ملابسهم عندي فإذا سمحت لا تتجول بالمكان وتضايق زبايني

نهار:وانا زبون بعد

سكتت تناظره ولف عليها:دار غلا فهد ؟ انتي غلا ؟

ناظرت حركاته وغروره:لا فهد

ضحك نهار:تعضين ؟

مدت العامله الفستان وتقدمت غلا:تفضل لو سمحت

نهار اخذ الفستان وابتسم:اتفضل

مشى بيخرج ولف على غلا:بس حلو اللوقو

ماردت غلا وخرج نهار وصدت تتأفف:استغفر الله بس

ركب السياره يحط الفستان بالخلف ويحرك للبيت

دخل البيت وقفل الاغاني ونزل ومعه الفستان يناظر اسمها على قطعة القماش اللي تغطي الفستان وابتسم يدخل البيت

وناظر نوره اللي استقبلته:امي يا أغلى الحبايب

نوره اخذت الفستان:اي ما قصرت

لفت تنادي العامله وابتسم نهار:امي ابيها

تنهدت نوره بملل وناظرته:مو فاضيه نهار لسوالفك

نهار:افا ! والله موضوع مهم ابيك تخطبين لي

نوره:المره الثلاثين ؟

نهار ضحك ومشى خلف نوره اللي تجاهلته:طيب ما سألتيني عن ذوقي يمكن يعجبك

نوره:ما يعجبك الا الغالي اعرفك لكنك ما تعرف تقدّره

نهار:غلا فهد

لفت عليه وعقدت حاجبينها نوره وابتسم نهار:حلو الاسم صح ؟

نوره:وغلا من بعد ؟

نهار:افا ؟ بنت الفهد التايقر اللي على فستانك قبل شوي

نوره ناظرته بصدمه:المصممه ؟

نهار:بذاتها

نوره:انت ما توفر نهار ؟ ارسلك تجيب فستان تجيب لي عروس ؟

ضحك نهار:بس تناسبني احب اللي كذا احب اللي تكسر راسي وما تعطيني وجه

نوره:اي اتمنى انها كسرت راسك بس

نهار:هيّا امي اخطبيها متى نحدد ؟

نوره:انت مهبول نهار فيك شي ؟ اعرفها انا اعرف اهلها اعرف انها متزوجه والا لا ؟

نهار:ماعليك اجيب علومها انا

نوره:اقول نهار لا تضايق البنت وتحرجني معها اول مره اتعامل معها ولا شفتها للحين اصلاً تعاملت معهم بجوالي ، مابي اخسر المصممات بسبب طيشك

نهار:بالله ما شفتيها ؟

مسك قلبه:اهخ يا امي تعالي اوديك لها شوفيها

نوره:نهار اعقل !

نهار:طيب قلبيها براسك يمكن تجوز لك الفكره

نوره:قلب انت براسك لان لو خطبت ماراح تلاقي غيرها وتقول ابي بعد، ماهو منيو

ضحك نهار من ذبتها وباس راسها:خفيفة دم ام نهار

نوره:وخر بس

مشت تاركته ومشى نهار لغرفته وابتسم يطلع من جيبه كرت سحبه غفله من دون ما تنتبه غلا ، كان كرت اسم الدار واللوقو والتواصل الاجتماعي لدارها

فتح جواله يحط حساباتها بجواله ويناظر الفساتين والعبايات اللي تصممها

'

صحت وعقدت حاجبينها تسمع صوت الموج وفتحت عيونها تشوف مكانها وجلست تتلفت حوالينها كان الموج الأزرق حوالينها وهي باليخت

عقدت حاجبينها تناظر فستانها الاصفر وتذكرت انها غيرت ملابسها وغفت بدون تحس

لفت على اليخت ووقفت تمشي ودخلت عليه وناظرها وابتسم:ألوان الصيف هذي احبها

ملاك:ليش جالس هنا ؟

ثنيان :تخبيت عشان تناديني

رمشت بإستيعاب:نايمه من الليل ؟

ضحك ثنيان لانها ترفض تصدق ووقف:لا نايمه من الصبح ، الليل ما نمناه

صدت عنه من ضحكته وخرجت وخرج خلفها

لفت بتوتر:طيب بنرجع

ثنيان:بغيتك تشوفين البحر بالشمس يمكن تحبينه

وقف جنبها وناظرت البحر ولفت عليه:اي حلو

ثنيان ناظرها تتجاهله وابتسم:ليه تكابرين غصب ؟

اخذت نفس:ممكن نرجع ؟

ثنيان هز راسه ولف للبحر:الراس يابس

مشى يتركها وناظرته وجلست وهي تناظر البحر وزُرقته وجماله بالشمس وانعكاس الشمس عليه وصفاء السماء وريحة البحر ، منظر يخليها تاخذ نفس طويل براحه

شغل اليخت ثنيان يرجع للمرسَى ودخلت ملاك تاخذ فستانها المبلول بيدها وتلبس عبايتها ووقف ثنيان بالمَرسى ودخل ياخذ شنطته ويخرج معها

مشت للسياره وهي ماسكه فستانها وابتسم ثنيان يمشي خلفها:كان طولنا

تجاهلته تركب وضحك ثنيان يهز راسه بتعب منها وركب جنبها وصدت تناظر الطريق وشغل سيارته يكتم ضحكته منها وحرك سيارته

وهو حاط يده على الشباك ولف يناظرها صاده ومتكتفه ودخل البيت ووقف

ونزل ملاك ونزل معها ودخلوا ومالقت احد بالصاله ولفت عليه:محد موجود

مشت للغرفه ودخل معها وحطت فستانها بالارض وابتسم ثنيان يحط شنطته:هذا الفستان ابيه لا تحذفينه

ملاك:بتلبسه ؟ حلالك

ضحك ثنيان لانها صاده عنه ومشى لها:ملاك

بلعت ريقها من نبرة صوته وتمسكت بباب الدولاب تناظر ملابسها ووقف خلفها ثنيان

وناظر شعرها ومد كفينه يجمعه من عنقها لظهرها وغمضت عيونها ملاك بربكه وتقدم ثنيان اكثر لها وناظر عنقها:خضار عروقك الشفافه تبي من يسقيها عطر وتنبت ورد

لفت عليه وناظرت عيونه:لا

ابتسم بدون يبين اسنانه وناظر عيونها:حافظك حفظي لعيني ، اعرفك تبين وتردين بلا ، تشحين بالماء وقلت لك انا قلبي على الماء وقلب الماء على شطك

نزلت عيونها تتنفس بسرعه من مشاعرها تجاهه والحواجز اللي بينهم ورفعت عيونها له:بيني وبينك حاجز

سكت ثنيان يناظرها وبللت شفايفها تغمض عيونها ثواني ورجعت ناظرت عيونه:ماقدرت امنعه

ناظر عيونها وموج عينها وبلعت ريقها:وما اقدر ، حتى لو تشوف كل شي فيني يبيك ، ما اقدر

لانت ملامح ثنيان وناظرته ملاك ومشت من جانبه واخذ نفس ثنيان يغمض عيونه ثواني ولف قبل تدخل الحمام:وانا ما اقدر

لفت عليه ملاك ورفع كتوفه ثنيان يناظرها:ما اقدر ابادر زود واحاولك اكثر ، ان كان بيصير بيني وبينك شي فبيصير اذا انتي بادرتي

هز راسه بالنفي ثنيان:انا اكتفيت

مشى يتركها ويخرج من الغرفه وتنهدت بتعب وجلست على السرير وضمت كفوفها ببعض بحيره وتعب من حالهم وحالها

زاد في داخلها ثنيان واندثر وتكاثر وبان على كل روحها وكأنه يسري بين عروقها الشفافه على قوله

عطاها عطاها وما اخذ منها شي غير الصدّ وبس ، لكنها ماتقدر تبادر بشي ممكن ينهار بلحظه ويختفي كل الحنان والودّ وتنطرد من كل حياته وحياة اهله

لفت تناظر مفتاح سيارتها ثواني ووقفت ولبست عبايتها وتحجبت واخذت مفتاحها وشنطتها وخرجت من البيت

مشت من الصاله تشوفه جالس مع نهار ورفع عيونه يناظرها تتخطاهم وتخرج

ولف يشوفها مع زجاج الصاله تشغل سيارتها وتخرج

ناظرت طريقها وهي ساهيه وعقدت حاجبينها من دخلت بزحمه وتأففت من اصوات الزحمه ولفت تناظر السوق اللي جنبها وفهمت سبب الزحمه

وقفت واخذت نفس ولفت تناظر السوق ونزلت ، تمشت فيه تناظر المحلات وتقدمت لمحل ودخلته تناظر حوالينها ، لمست العطور تشمها بهدوء وغمضت عيونها من جمال ريحة العطر

ولفت للي واقف عندها:لو سمحت مكونات العطر ؟

تقدم يشوف العطر:زهرة السوسن خشب الصندل باتشولي عنبر كشمير وبرتقال وعسل

ابتسمت من المكونات الكثيره وهزت راسها:مناسب

اخذ تست تجربه وشمته ونطق:العطر كان مقطوع وتوفر الان بكميات قليله بعضها بطلب مسبق وبيرجع ينقطع للأبد ، صعب تلقينه بعدين ، محظوظه لحقتي آخر عبوه منه

ملاك:محظوظه محظوظه ، صعب تلقاه بعدين

ابتسمت من مفهومها اللي تشكل بعقلها عن العطر وعن ثنيان اللي كثير عندها بكثرة مكونات العطر وصعب تلقاه بعدين ، صعب ومحظوظه فيه

لفت عليه:ابغاه

ابتسم:اختيار مميز العطر ينفع شتاء وصيف وما ينمل من ريحته ابداً

هزت راسها ومشت معاه وناظرت العطر وسعره الكبير مقارنة بحجمه وطلعت بطاقتها تحاسب

ونطق:حابه نغلفه هديه ؟

سكتت تفكر ثواني وهزت راسها

وحطه بالكيس ومدّه لها واخذته تخرج من السوق

ركبت السياره وناظرت العطر جنبها هي لأول مره تشتري هديه لشخص من زمن طويل ومن آخر مره أهدا عمها هديه وخذلها

حركت سيارتها ترجع للبيت ونزلت من السياره وناظرت أصايل اللي داخله البيت وابتسمت:خلصتي دوامك ؟

أصايل ابتسمت لها:حمدلله

ناظرت الكيس ورفعت عيونها:تتسوقين بدون ما تعلميني ؟

ملاك ابتسمت:مو لي

رفعت حاجبها أصايل وضحكت ودخلوا سوا ودخلت أصايل الصاله وطلعت فوق ملاك

رفع عيونه نهار:دلوعتي اشتقت لك والله القعده مع ثنيان تسدّ النفس

لف عليه ثنيان:خل أصايل اجل تنفعك

نهار ضحك وجلست أصايل:وين الناس ؟

نهار:امي معزومه وجاسر وشادن ماهم بالبيت وساري بدوامه وجنى عند اهلها وابوي مشغول ، بقي احد ؟

أصايل:اوف شكل الوضع اليوم غداء لوحدنا

نهار لف لثنيان:وش الوضع ؟

ثنيان:معكم تبون من برا ؟

أصايل بققت عيونها بحماس:تكفون

نهار:تم من يطلب ؟

أصايل:انا وبحسب حساب ملاك معانا

لف ثنيان عليها:جات ؟

أصايل:اي ماشفتنا ؟

لف يناظر الحوش وشاف سيارتها ورجع ناظر أصايل ووقف

نهار:كلم ملاك بالموضوع

هز راسه ثنيان ومشى للغرفه ودخل الغرفه وناظرها واقفه عند المرايه لابسه فستان ضيق على جسدها

وانقطع نفسه من جمالها بكل مره يروح ويرجع لها وكأنه ينبهر من جديد

لفت عليه ملاك ونطقت بهدوء:كنت بجي اناديك

ثنيان سكت ثواني وتقدم:ليه ؟

ملاك تقدمت له ورفعت عيونها له:شي لازم يصير

سكت ثنيان يناظرها ولفت ملاك واخذت الكيس من الارض ومدته له وناظره ورجع ناظرها ينتظر منها اجابه

ملاك:ماني شخص جحود وماني شخص متطلب وأقدّر اللي تعطيني وتحاوله لأجلي وكبير بعيني

ناظر عيونها ورمشت بهدوء ملاك تناظره:وان شاء الله تفهمني زي ما تفهمني دايم

نزل عيونه للكيس ورجع ناظرها:بس مو هذا اللي ابيه

ملاك:أدري بس اقبلها مني

اخذ نفس واخذه من يدها ومشى للسرير وجلس ومشت تاخذ عبايتها:بروح لمنيف

رفع عيونه عليها ومشت تتركه بالغرفه ولف يناظرها تخرج والتفت للكيس

طلع البوكس يفتحه وناظر الكرت يقراه:أبي ابقى الحبيب اللي تخبره صادق وما زال واخاف تجرحك بعض الحقايق لو أبينها ، ثقيل الحلم وأحلامي بعيده والدروب طوال وأنا ما ودي أحكي لك الين أحلامي أضمنها ، إذا بنحكي عن الواقع كثير أشياء ما تنقال وإذا بنسكت كثير أشياء صعبه ينحكي عنها

غمض عيونه بتعب وتنهد ياخذ العطر بحضنه وغمض عيونه بوجع:اهخ ملاك

فتحه يشمه ويتعطر منه وناظره ثواني ، جاهدها وحاولها وللحين تقول له ان بينهم حاجز يجهله

فتح عيونه يمسك صدره بوجع بقهر من الطريق اللي يمشونه سوا بلا وجهه

وخرج من الغرفه ومشى للصاله

أصايل:شوي ويوصل الاكل تعال

مارد عليها ورجع للغرفه وقفل الباب خلفه ومشى لأدراجه ودور بين أوراقه لين لقاها ، الصوره

رفع الصوره يناظر وجه اللي قدامه واخذها بجيبه وخرج من البيت

'

المغرب - ٧:٠٠ م

حاضنه كوبها وتناظر القطو بحضن منيف:وليش جبت قطو ؟

منيف:بدون سبب

ملاك ناظرته صاد:عشان أصايل

رفع عيونه منيف لملاك وناظرت جرحه ملاك:وجرحك منه ؟

هز راسه منيف وجات بتسأله دق جوالها اخذته تشوف اسم عقاب وعقدت حاجبينها تناظر اسمه ثواني

تخاف ، تخاف ان كل شي وصل لعقاب او ان اللي خلف الحديد خرج معه الحقيقه

بلعت ريقها ترد بهدوء:هلا

عقاب:بنتي ملاك

غمضت عيونها من سمعت صوته وابتسم عقاب:رجعت البيت مالقيتك بغيتك بخدمه

ملاك:سمّ

عقاب:والله قبل شوي دخلت البيت ياملاك لكن مالي راحه بالدنيا ، في عامل على كفالتي صارت له مشكله تهريب وما تهريب وبروح اشوف الامور بالشرطه

جلست بإعتدال ملاك:اوكيه بجيك انا

عقاب:طيب بغيت اخذ نهار لكني لقيته نايم

ملاك:ما يحتاج خلاص انا بجيك هناك على طول

عقاب:ماتقصرين

قفلت منه وناظرها منيف:وش صاير ؟

ملاك:مشكله بحلها وارجع

وقف منيف:ترجعين هنا ؟

لفت عليه ملاك وهزت راسها ثواني ومشت لغرفتها

لبست عبايتها واخذت شنطتها وجوالها وخرجت

ركبت سيارتها تحرك ووقفت عند مركز الشرطه تشوف سيارة عقاب ونزلت ومشت من نزل من السياره

تقدمت له:ندخل ؟

عقاب هز راسه بتعب وناظرته ملاك:اذا تعبان انا اشوف الامور واجيك هنا

عقاب شد على كتفها:لا لا تعالي

مشى معها ودخلت ملاك معه وتقدمت تتكلم مع العسكري ووقف عقاب ثواني

ملاك:معاي اقامته وكفيله بس احتاج اشوف الضابط

العسكري:انتظروا هنا

هزت راسها ملاك ولفت تناظر مكان عقاب وجمد وجهها تشوفه بيطيح وركضت له بخوف من شافته طاح بالأرض وركض العسكري لعقاب

طاح شماغه وعقاله جنبه مايتحرك منه شي

جلست عنده ورجفت وتقدمت له ولف العسكري:اطلب لنا سيارة اسعاف

مسكت كفه ملاك برعب ورجفت بخوف انه ينعاد لها نفس اللي عاشته ، الفقد

تذكر كلامه قبل دقايق معها:مالي راحه بالدنيا

بكت بخوف تشده وتهزه:تكفى لا تروح تكفى

زاد بكاها بخوف تحركه بقوه:تكفى

صرخت تحاول فيه يقوم وتجمعوا العسكر يناظرونهم وبكت تصرخ بخوف تتمسك بثوبه وترجو كل الرجوى انه ما يخرج من حياتها ميّت ، تفقده وتعيش فقده

تذكرت كل حنانه معها كل كلامه عنها وكل اهتمامه واحتوائه لها

تشوف نور الاسعاف اللي يعكس عليه والمسعفين اللي يشيلونه وتمسكت بشماغه وعقاله وهي تبكي وركبت سيارتها وشماغه بحضنها وحركت سيارتها خلفه وهي تمسح دموعها بعشوائه وتهمس بخوف:تكفى لا تخليني تكفى لا تروح ، تكفى

نزلت اول ما وصلوا للمستشفى وشدت على عقاله وشماغه بيدها وركضت معهم لداخل وهي تبكي ومسكت كفه بقوه بخوف وكأنها تتمسك بآخر آمانها

فلتوا يدها يدخلونه ووقفت محلها وطاحت على الارض تبكي وهي تشد على عقاله

ووقفت تمسك جبينها وتحاول تهدأ وتهدأ رجفتها واخذت جوالها وهي تناظر المستشفى

-

ثنيان ناظر طلال اللي واقف قدامه:ومارضي يعترف يقول انه يشتغل عند واحد وهو قاله يسوي كذا مع ملاك وهو ما يعرف شي اكثر

ثنيان عقد حاجبينه:وشو بتوقف القصه لهنا ؟

طلال:لا اكيد بنضغط عليه لين يتكلم وبنشوف جواله واتصالاته وحساباته بالبنك

ثنيان هز راسه:طيب بغيت اعطيك صوره ابي اعرف صاحبها

دخل يده بجيبه ثنيان يطلع الصوره وعض شفته من دق جواله:دقايق طلال

اخذ جواله وابتعد من قرأ اسمها وعقد حاجبينه يرد:ملاك

بكت وهي تتنفس بسرعه:ثنيان أبوك

جمد وجهه بصدمه:وشفيه ؟

ملاك لفت تأشر وهي ترجف وتبكي:أبوك طاح أبوك قدام عيوني طاح

ثنيان نشف الدم بعروقه وركض لسيارته:وينك ؟ وينه وينكم ؟

ملاك:بالمستشفى ، تكفى ثنيان

ثنيان:طيب جاي جاي

قفل منها وجلست بالارض تبكي متمسكه بعقاله وشماغه

وناظر طريقه ثنيان وهو مسرع واخذ جواله ودق وصرخ:رد يانهار رد

مارد عليه ودور رقم جاسر واتصل ورد جاسر:هلا

ثنيان:وينك ؟

جاسر عقد حاجبينه وناظر اهله اللي يتعشون:بالبيت ، شفيك ؟

ثنيان:ابوي طاح وملاك تقول انه بالمستشفى

جمد وجه جاسر:ايش ؟

لفوا عليه ونطقت نوره:وشفيك ؟

جاسر:اي مستشفى طيب ؟ بجيك

لف ساري بخوف ونطق:وش السالفه ؟

وقف جاسر برعب:ابوي بالمستشفى

جمد وجه أصايل بخوف وشهقت جنى ووقفت نوره:وشفيه ؟

جاسر:مدري مدري مدري

ركض يخرج وناظرتهم شادن بصدمه ولفت نوره:انتظر انتظر بجي معكم

'

دخل المستشفى ما يدري كيف عدّا الطريق كله وما يدري كيف للحين واقف على رجلينه من خوفه ودخل يركض يدور عليها بعيونه

ومشى لين شافها بالارض تبكي وعقال ابوه وشماغه بيدها وجمد محله بصدمه وخوف

ورفع عيونه يقرأ لوحة الطوارئ وتقدم لها وهمس:ملاك

رفعت عيونها وبكت بخوف ووقفت على رجلينها وحضنته وهي ترجف ورفعت صوتها تبكي

وزاد رعبه من بكاها وحضنها:تكفين قولي مافيه شي

ملاك بكت وهي بحضنه:ما ادري ما ادري ثنيان طاح ، طاح قدام عيوني ماقدرت اسوي شي ماقدرت اسوي شي

ابتعدت عنه وهي تجهش واشرت على مكانه:طاح مافيه شي

مسك كفوفها وهز راسه:اهدي طيب ابي اسمعك علميني وين كنتوا وش صار ؟

ملاك اخذت نفس وناظرته:كنت معاه بالشرطه كنا بنسوي اجراء وكان تعبان باين عليه

رجعت تبكي بخوف تشد على كفه:بعدها طاح بالارض

لف ثنيان وعقد حاجبينه بخوف وناظرته ملاك:ماراح يصير له شي ماراح يروح مكان

لف ثنيان عليها وهز راسه:ان شاء الله ان شاء الله

تقدم يدور احد يكلمه وحاول يدخل وخرجت الممرضه:ممنوع لو سمحت انتظر برا

ثنيان:ابي اتكلم مع الدكتور اي احد ، ابوي داخل ابي اعرف وش فيه

الممرضه:ممنوع تدخل انتظر لين يطلع لك الدكتور

ضرب الباب ثنيان بغضب:اقولك ابوي داخل ما تفهمين ؟ الحين تعلموني وشفيه ابوي الحين

الممرضه:لو سمحت خفض صوتك واستريح لا تسبب مشاكل

لف ثنيان من نادته نوره وناظرهم جايين كلهم

ولفت ملاك تشوفه ونزلت عيونها لشماغ عقاب تبكي بخوف ، خوف انها تعيش شي معهم يخافونه كلهم

لف ثنيان وناظر نهار:تصرف هدّ المكان عليهم خلهم يعلمونا وشفيه ابوي ؟

نهار ناظره بخوف:وينه ؟

ثنيان:داخل

نوره مسكته:قولي وشفيه ابوك وش صار له ؟

ثنيان هز راسه بضياع وبكت أصايل تتمسك بذراع جاسر اللي واقف معهم

ساري:بيقوم بيقوم يمكن تعب بسيط ان شاء الله خير

جاسر:احد يشوف لنا دكتور والا اي زفت يعلمنا عن حالة ابوي

نهار:بشوف الوضع انا واجي

مشى مبتعد عنهم ومسك جبينه ثنيان وغمض عيونه بخوف

'

دخل منيف بصدمه من عرف بالخبر ومشى يناطرهم جالسين وتقدم لهم:وش صار ؟

ناظرته ملاك وبكت ولف عليها من سمع صوت بكاها وتقدم لها وحضنته ملاك بخوف

كان يدري انها ترعبها المستشفيات ولحظات الفقدان الاخيره ، لانه كان واقف بنفس المكان معها قبل سنين ينتظرون ذرة أمل بإن امه وابوه سلموا من الحادث لكنهم خرجوا بالخيبه

بكت ملاك وهي ماسكه عقاله وشماغه ومتعلقه بمنيف

وتنهد منيف ولف لنهار:وش صار ؟

نهار تكلم بضيق:للحين ماخرجوه من الطوارئ

عقد حاجبينه منيف بخوف ولف يناظرهم كلاً بحاله وخوفه وابتعد عن ملاك:ما بيصير شي ان شاء الله بيقوم بالسلامه اهدي ملاك تكفين

ملاك هزت راسها بالنفي:ما اقدر وانت تعرف

سكت منيف ولف عليهم وبلع ريقه يناظر أصايل اللي ماسكه ذراع جاسر وجالسه جنبه وباين عليها تبكي لكن بهدوء وخوف

صد وجلس وجلست جنبه ملاك ترجف يدينها تناظر عقال وشماغ عقاب

انهد حيلهم من الانتظار وأصبح الصبح وهم بنفس مكانهم ما يعرفون شي عن وضعه وحاله

ولفت ملاك من سمعت صوت اللي جاي من بعيد:بالسلامه ان شاء الله بالسلامه

لفوا عليه يشوفونه محمد جاي ومعه شادن وتنهد ثنيان يصد

ووقفت شادن وناظرتهم:وش صار ؟

محد رد عليها وناظرهم محمد:بيقوم بيقوم هذا العميد عقاب

جاسر ناظره:تكفى ريحنا محد ناقص يسمع شي

هز راسه محمد ووقف معهم ورفعت عيونها شادن على ملاك اللي منهاره محلها تراقبها

صدت ملاك للطوارئ وناظرت منيف اللي تقدم ومعه مويه وجلس بجانب ملاك:اشربي

ملاك:مو قادره

تنهد منيف ولف يناظر أصايل وصد ما يقدر يسوي شي أكثر من جلوسه وسطهم

انفتح الباب وفزّوا وخرج دكتور وماقدرت توقف على حيلها ملاك تناظره بترقب

نشف دمها وجمدت رجلينها تناظره وتترقبه

الدكتور:والدكم الحمدلله بخير لكن احتجنا نسوي فحوصات على قلبه وجميع وضعه واكتشفنا انه عنده اشتباه ورم على كليته اليسار ممكن تكون أثرت على صحته

ضربت صدرها نوره بخوف وجمد وجه ثنيان يهمس:كيف يعني ؟

بكت أصايل:أبوي

لف نهار لها وحضنها وناظره جاسر:وش يعني طيب ؟

الدكتور:احتاج اتكلم مع الكبير واشرح له

ساري:طيب انا اجي معك

مسكه ثنيان:انتظر اشرح لنا كلنا ابوي وشفيه ؟

الدكتور اخذ نفس:ابوكم بخير ان شاء الله بس كليته متأثره بورم كبير ونحتاج نستشير استشاري أورام وهو يتكلم معكم بس أبوكم بخير حالياً وتحت الملاحظه الى ان يستعيد وعيه

مسك راسه جاسر وصد عنهم ومشى الدكتور ومشى معه ساري يتكلم معه

ناظر الطوارئ ثنيان بصدمه وتقدم يحط جبينه على الباب

ولف منيف لملاك اللي تناظره ومسكت راسها تغمض عيونها بتعب

ناظرهم محمد ولف لشادن اللي واقف واشر لها وهزت راسها بالنفي

بلعت ريقها ملاك ورفعت عيونها تشوف ثنيان حاط راسه على الباب ومغمض عيونه وتسمع بكاء نوره اللي حاضنها جاسر

وقفت تمشي وعقال عقاب بيدها لين وصلت لثنيان وبكت بدون صوت تمسك ذراعه

ولف عليها ثنيان وتنهد بتعب ورفعت ذراعينها تحضنه وحضنها يعقد حاجبينه بتعب

رجفت وهي تطمنه وهمست:بيقوم بالسلامه اعرفه

مارد عليها ثنيان وهو حاضنها ورفعت عيونها شادن تناظرهم وصدت لابوها اللي يناظرهم

شد نهار على كفوف أصايل:ما بيصير شي بيقوم بالسلامه ان شاء الله

أصايل هزت راسها بالنفي:بشوفه تكفى نهار بشوفه

نهار هز راسه:بنشوفه كلنا بس اهدي انتي

رفعت عيونها ملاك تبتعد عن ثنيان من مشى ساري لهم ولف ثنيان عليه:وش قال ؟

ساري:كلمت الاستشاري وقال بيجي يشوف وضعه وبيسوي له اشعه وتحاليل بعدها يقولنا

جاسر وقف بعصبيه:احنا بننتظرهم يعني ؟

ساري:جاسر ترا لازم ننتظر اصبر يا اخي خلنا نطمن عليه

نوره:كلموه طيب خل يجي يشوف عقاب ويطمنا خلاص ما بقدر اوقف على رجليني زود

مشى ساري يمسك كفوف امه ويهديها وصد ثنيان عنهم ينتظر

وناظرت حالهم ملاك وتنفست بصعوبه وهي ترجف وصدت عنهم تمشي وبيدها شماغه وعقاله وناظرها منيف ومشى خلفها

مشت ماتدري لوين تبي تبتعد عنهم وبس ولحقها منيف يركض:ملاك

وقفت تحط ظهرها على الجدار ووقف قدامها منيف وناظرته ملاك ترمش بثقل وهي تناظره:بيموت وانا ما اعطيته حقه مني

سكت منيف ونزلت دموع ملاك بجمود وهمست:بيموت وهو اخر شي ناداني بنتي

تنهد منيف ومسك كتوفها وبكت ملاك ومسكت رقبتها بإختناق:بيموت بيموت

منيف:اهدي ملاك ما بيصير له شي الحين يطلعونه ونشوفه ونشوف وضعه

ملاك لفت عليه ورفعت صوتها وهي تبكي:ماكله الورم ماكل جسمه

منيف:اذكري الله ملاك وش هالكلام ؟ بيبدون معه علاج وان شاء الله يتخلصون منه

ملاك مسكت راسه بتعب وشدّ على كتوفها منيف بقوه:مابيصير له شي بس اهدي انتي لا يشوفونك كذا

ملاك ناظرته وهي تبكي وهزت راسها بالنفي:كيف قدرت اسوي فيهم كذا ؟ كيف قدرت منيف ، هذولا أهلي أهلي

سكت منيف وبكت بتعب ملاك وحضنها منيف وشدت عليه وهي تبكي

-

( لا تنسون النجمه ⭐️)

دخلوا الغرفه وبكت أصايل من شافتهم:أبوي

مسكت كفه تناظره نايم وتقدمت نوره وهي تبكي بدون صوت وجلست عنده

وتنهد ساري يناظره وبلل شفايفه ثنيان يحاول يتماسك وهو يناظر ابوه

لف نهار وحط راسه على الجدار بتعب وشد على كتوفه جاسر بقوه يقويه

وناظرهم ساري:بيشوفه الاستشاري وتحاليله واشعته ويكلمنا بس لا تضغطون على ابوي لو قام

أصايل بكت بدون ترد عليهم ونطق جاسر:أصايل !

أصايل ناظرتهم:ما اقدر

جلس ثنيان وهز رجله بتوتر وهمس:وش بيصير يعني ؟ يظل طايح بالسرير ابوي ؟

ساري:لا لا ان شاء الله بنشوف وضعه لا تيأس

ثنيان رفع عيونه:يأس ؟

اشر على ابوه بالسرير وهو يناظر ساري وتأفف ساري من الضغط

وصد جاسر يتكي على الجدار ويناظر ابوه

دخلت ملاك مع منيف وناظرت عقاب على السرير ورمشت بهدوء تناظره نايم

منيف ناظر نهار اللي متكي على الجدار مغمض عيونه ومسك ذراعه يشدّ عليه

ولف نهار عليه وحضن منيف وتنهد منيف يحضنه:أجر وعافيه ان شاء الله بيقوم بالسلامه

بلعت ريقها ملاك تسمع بكاء أصايل وناظرت الشماغ والعقال بيدها

تضايق من وضعهم ووضع ابوه ووقف يخرج من عندهم ولفت ملاك تناظره ومشت خلفه

جلس على الكراسي ومسك راسه ينزله بين كفوفه وتقدمت له ملاك وجلست جنبه

وغمض عيونه ثنيان واخذ نفس ولف عليها:مابي يصير له شي

ماردت وهي تناظره ورجع ظهره بضيق ثنيان:ماعيّشته للحين الأيام اللي يبيها مني

عض شفته من تذكر علاقته مع أبوه ولف لملاك:مابيه يروح ملاك

مدت ذراعها تحاوطه ذراعه وتقرب منه وحطت راسها على كتفه تحضن ذراعه وتنهد ثنيان يحط راسه على راسها

ونطقت ملاك:بيقوم بالسلامه ان شاء الله وبيعيش ويشوف الايام اللي تبيه يشوفها

غمض عيونه ثنيان ومسكت كفه ملاك بقوه تشد عليها

ورفعت راسها من نطق محمد:الله الله

لف ثنيان على محمد اللي مبتسم يناظرهم وناظرته ملاك

محمد:الله يخليكم لبعض ونعم الزوجه هاه ياملاك

نطقت ملاك بتعب:مو ناقصتك

محمد:لا العفو منك مانبي نقطع عليك لحظاتك مع عائلتك وزوجك وخوفك على أبو زوجك

ناظرهم ثنيان ورفعت عيونها ملاك بغضب ونطق محمد:هذا وفائك اللي تتكلمين عنه يابنت اخوي ؟

وقفت ملاك بعصبيه ورفعت صوتها:انت ما بتتركني بحالي ؟ انت ماتبي تفكني من شرك ؟ مصرّ أكرهك واحاربك ؟

محمد ناظرها بحده:انا احاربك انا ؟ انتي اللي تبين تحاربيني وتحاربين الرجال اللي قسم لقمته معك

سكتت من فهمت انه يقصد منصور وهز راسه محمد ورفع حاجبينه:والا المستور للحين مستور ؟

تقدمت ملاك له:الحين تذلف الحين من قدام عيوني تذلف والا والله لأنسى ان فيها عمّ

ناظرته بذهول:انت تشوف الوضع ؟ انت تحسّ ؟ جاي تبي تحاسبني بوضع كذا ؟

لف محمد لثنيان اللي يناظرهم وهو جالس ورجع ناظر ملاك:والله العتب ماهو عليك العتب عليهم اللي للحين حاطين لك وجود بينهم

ماردت ملاك وهي تناظره ولف محمد لثنيان:اذا ودك تعرفها فجوابها عندي

ملاك ناظرته بحده ومشى محمد تاركهم وتنهد ثنيان يرجع يمسك راسه بتعب

ولفت ملاك من تقدم ساري ومعه الاستشاري وهمست:ثنيان

رفع عيونه عليها ولف من شاف ساري ووقف وناظرهم

الاستشاري:شفت وضع الوالد وتكلمت مع اخوك وجيت عشان ابلغكم

ثنيان:وش وضعه ؟

الاستشاري:وضعه الحين مستقر لكن في ورم حجمه متوسط في كليته اليسار

غمض عيونه ثنيان بتعب وكمل الاستشاري:ومضطرين اننا نبلغ الوالد عشان هو يختار الأنسب له ، إما انه يبدأ علاج كيماوي او اننا نستأصل كليته لان صعب نستأصل الورم بدون ضرر للكليه

ثنيان:لازم يعرف ابوي ؟

الاستشاري:لازم وضروري يعرف وهو يقرر بنفسه

ثنيان ناظر ساري وتنهد ساري

ناظرتهم ملاك ولف الاستشاري عليهم:انا بمرّ عليه بعد الافاقه بإذن الله

مشى تاركهم ودخلت ملاك تناظر عقاب اللي نايم وأصايل ماسكه يده وتبكي

ودخلوا ثنيان وساري ولفت نوره:وش قالوا لكم ؟

ساري تنهد:يقولون ان ابوي متضرره كليته اليسار ويحتاج انه يختار إما يبدأ علاج كيـ ..

سكت بصعوبه يكمل وغمض عيونه ثنيان وناظره نهار:لا تقول

ساري:او انهم يستأصلون كليته كامله

مسكت راسها نوره وبكت أصايل:لا يصير بأبوي كذا تكفون ، تكفى ساري

تنهد ساري يسكت وتقدمت ملاك لأصايل وبكت أصايل:تكفين ملاك لا يصير فيه شي تكفين

ملاك:مابيصير شي ان شاء الله

أصايل بكت تتمسك بملاك:لا لا ماتعرفين وش ممكن يصير لي ماتعرفين وش يعني افقد ابوي ؟

سكتت ملاك ثواني وهمست:انا اللي اعرف

رفعت عيونها نوره وناظرها ثنيان وبلعت ريقها ملاك:والله لا يذوقك اللي اعرفه

حضنتها أصايل تبكي وتنهدت ملاك بتعب وناظرت عقاب

جاسر:لا تقعدون تبكون كذا ويصحى ابوي على هالمنظر

نهار لف لجاسر:والوضع يحتاج اننا نمثل ؟

جاسر:لا تمثل بس لا تكبّر الموضوع ابوي طيب وبخير وحتى لو ان داخله شرّ بنطلعه وبيقوم بالسلامه

نوره مسكت كف عقاب:يارب يارب

'

دخل منيف ودق الباب وناظروه

كانوا جالسين بصاله صغيره قبل غرفة عقاب اللي نقلوه عليها بجناح أوسع وأفضل

وتقدم وبيده أكواب وهمس:سلام عليكم

نهار:تعال منيف

حط الأكواب وحك جبينه:قهوه

هز راسه ثنيان له واخذ الأكواب يوزعها عليهم واخذ الكوب اللي حاطه لوحده ومدّه لأصايل ولا انتبهت له

ونطق نهار:أصايل

رفعت عيونها وناظرت منيف اللي ماد لها الكوب واخذته من يده ومشى منيف وجلس جنب ملاك

نوره:بدخل اشوف ابوكم

ساري:امي قالوا بيعلمونا اذا تطمنوا عليه وبندخل له

نوره:ما اقدر ما اقدر

تقدمت تدخل غرفة عقاب واخذت نفس أصايل تهدي نفسها وشربت من القهوه اللي مقفله بكوب اسود وعقدت حاجبينها من ذاقتها شي غير القهوه

ونزلتها تفتح غطاها وشافتها ماتشا ورفعت عيونها لمنيف اللي يناظرها وبلعت ريقها ترجع تناظر الماتشا

تقدم نهار يطلّ وناظر امه عند عقاب تتكلم معه وهمس:ابوي قام

فزّوا يدخلون عنده وفتح عيونه عقاب وناظرهم حوالينه ونطقت نوره:حمدلله على السلامه عقاب شلونك وش تحس فيه ؟

مارد عليها بتعب وتقدم جاسر:ابوي كيف صرت الحين ؟ في شي يعورك ؟

عقاب:لا لا

تقدمت أصايل تحضن كفه وتبكي بدون صوت

ساري:ابوي

عقاب:مافيني شي قلت

نوره هزت راسها:ان شاء الله

رجع يغمض عيونه من جديد وتنهدت ملاك تجلس بتعب

ولف ساري لثنيان:بنادي الدكتور

هز راسه ثنيان وخرج ساري ولف عقاب لأصايل:ابوك مافيه شي ليه تبكين ؟

ماردت عليه وهي تبكي وغمض عيونه بتعب عقاب

ودخل الدكتور:سلام عليكم أجر وعافيه

فتح عيونه عقاب وهز راسه بهدوء وابتسم الدكتور:كيف صرت ؟ ان شاء الله احسن ؟

عقاب:طيّب انا

الدكتور:بإذن الله سوينا لك فحوصات ياعمي والفحوصات طلعت لنا اللي تعبك

سكت عقاب وعضت شفتها نوره تناظره

وكمل الدكتور:في ورم على كليتك اليسار هو اللي تعبك هالفتره ولكنه ببداية نموّه حمدلله

بكت أصايل وتقدم نهار لها وغطت وجهها تحضنه وعقد حاجبينه عقاب يسمعه

الدكتور:الموضوع بسيط ان شاء الله لا تشيل همّ لكن احنا ممكن نحلّه بحالتين ، إما نبدأ علاج كيماوي يستمر فتره وأضمن لك فائدته أو اننا نستأصل كليتك كامله وهذا أسرع

سكت عقاب يناظره وتنهد ثنيان يناظر ابوه ونطق جاسر:ابوي الموضوع بسيط وان شاء الله بتقوم بالسلامه بالحالتين

عقاب ناظرهم واقفين حوالينه ولف للدكتور:أنا بخير وما يلمسني شرّ وان كان تمكن مني فشيلوه

ساري:ابوي انت فكر شوي وقرر اللي يريحك

الدكتور:اذا ودك نستأصل الكليه بنسوي تحاليل جديده ياعمي

هز راسه عقاب:شيلوه شيلوا اللي يعورني

الدكتور:براحتك نبغاك ترتاح الحين وناخذ التحاليل اللازمه ونشوف

لف عليهم:وجودكم كبير لأبوكم بس صدقوني ابوكم بخير عندنا تقدرون ترتاحون ببيتكم

نوره:بنقعد عنده ما بنروح محل

جاسر:امي والله ان ابوي بخير وانا ادري روحي ارتاحي من امس ماغفت عينك

نوره:ولا أخليه

عقاب:روحوا كلكم مافيني شي

نوره:لا تكابر عقاب وش لك بالمكابره خلنا حوالينك

عقاب:لا انا مابي توقفون فوق راسي كأني جنازه توكلوا بيتكم

ساري:بعد عمر طويل يا ابوي الله يمدك بالعافيه

عقاب هز راسه:خذ اهلك

ثنيان:انا اقعد مع ابوي

عقاب:لحد يقعد عندي المستشفى كله عندي روحوا انتم

أصايل:ما اخليك

عقاب:بتروحين بتروحين

ناظر نهار عقاب وهز راسه نهار ومسك أصايل:مشينا

أصايل بكت ومسكت كف عقاب:بترجع البيت ماراح تطول علينا

عقاب هز راسه:برجع ان شاء الله

مسحت دموعها أصايل ومشت مع نهار وخرجوا ورفعت عيونها ملاك من ناظرها عقاب ورمشت بهدوء تناظره ووقفت تخرج

اشر لها منيف وخرج قبلهم يطلع من المستشفى

وخرجوا من عنده واخذت شماغه وعقاله بيدها ومشت لثنيان اللي خرج ومسكت ذراعه تخرج معاه

تنهد ثنيان وركب سيارته وركبت جنبه ملاك ولفت عليه تشوف تعبه وهوجاسه وتنهد وقفل الباب يحرك

دخلوا البيت وكلاً نزل من سيارته

طلع ثنيان وحطت شماغه وعقاله ملاك على الاستقبال عند صورته ورفعت عيونها لصورته

ابتعدت تناظره ثواني ومشت تطلع ودخلت الغرفه

وناظرت ثنيان اللي جالس على السرير وهادي

وفصخت عبايتها وحجابها تعلقها ومشت له وجلست جنبه

غمض عيونه بتعب ثنيان ومال عليها وفتحت ذراعينها تحضنه وحط راسه على صدرها وتنهدت تمسح على راسه اللي على صدرها

حاوط بذراعينه خصرها وهمس:خليك جنبي

غمضت عيونها من صوته:أنا جنبك وأنا عونك وكتفك ومركاك

مسحت على شعره وهي حاضنته ورجعت للخلف تستند على السرير واعتدل ثنيان ينسدح وحط راسه من جديد على صدرها وغمض عيونه

مسحت على شعره ملاك وهي تسترجع كل تعبها وأول نومه نامتها بعد فقدها لأمها وأبوها والشعور اللي سكنها في نومتها

ما تتمنى اي احد يرجع يعيش نفس شعورها ويفقد احد من اهله كيف لو كان عقاب ، وهي تعرف وش يعني عقاب وكيف عياله وعائلته مترابطه ببعضها وكيف عقاب يلاحظ الجميع ولا يغفل عن عينه أحد

نزلت عيونها تشوف ثنيان اللي بحضنها وشدت عليه ودها تحبسه داخلها ولا يمسّه شرّ او وجع

ولا يهون عندها ولاهو قليل ولا ترضى تشوفه بأسوأ حال ، هي تبي تشوفه بأحلى مشاهد بصرها ، سعيد

تنهدت تمسح على شعره وتشوفه غافي على صدرها

'

فزّ وفتح عيونه ورفع راسه يشوفها تناظره وناظرها ثواني وهمست ملاك:ما نمت كفايتك

لف واخذ جواله وناظر الساعه ورجع ناظرها:محد اتصل عليّ ؟

هزت راسها بالنفي وعقد حاجبينه ثنيان:مانمتي ؟

هزت راسها بالنفي وجلس بإعتدال ثنيان:ليه ؟

ناظرته ملاك بهدوء تشوف حاله وشعره المبعثر وعلامات التعب على وجهه وهمست:ماجاني نوم

ثنيان وقف:بروح لأبوي

جلست واخذت نفس:ما امداك ثنيان

لف ثنيان عليها من نطقت اسمه وكان وده يوقف عند هاللحظه لكن كل الظروف مانعته

هز راسه بالنفي يصد عنها:لا

وقفت:انتظرني

ثنيان:لا لا انتي نامي انا اجيك الصبح اخذك

مشت تاخذ عبايتها:ماراح اخليك

لف ثنيان يناظرها وناظرته ملاك وهي تتحجب ولف ثنيان للدولاب ياخذ ملابسه ودخل الحمام وجلست ملاك تنتظره

خرج بعد دقايق واخذ مفتاحه ومشت تطلع معه ، ما سمعت حسّ بالبيت والكل نايم وخرجوا وركبت يمينه وحرك للمستشفى

وقف اول وصولهم ونزلت معاه ملاك وتقدم ثنيان لغرفة ابوه وهمست:يمكن نايم

فتح الباب بهدوء ثنيان ودخل الصاله الصغيره وتقدم يشوف ابوه نايم وهز راسه لملاك اللي برا وخرج لها:بشوف الدكتور واجيك خليك عنده

ملاك:بشوف الدكتور انا بعد

ثنيان ناظرها ثواني ومشى يتقدم قبلها ومشت خلفه

وقف ثنيان يسأل عن الدكتور وقالوا انه موجود

دق الباب ثنيان ودخل ورفع عيونه الدكتور:اهلاً وسهلاً

ثنيان دخل ودخلت معاه ملاك وجلس ثنيان:بغيت اسألك دكتور عن ابوي وحالته ما أستجد معاك شي جديد ؟

الدكتور:لا والله انا انتظر التحاليل معكم وان شاء الله الصبح يمكن تكون جاهزه اطلّع عليها وابلغكم بكل خير

ثنيان:طيب وابوي يحتاج يجلس هنا بالمستشفى هذي الفتره ؟ لاني اعرفه ما يرتاح بعيد عن البيت

الدكتور:اكيد لازم ولا يمكن يخرج لين نخلص من كل التحاليل ونقرر العمليه

سكت ثنيان ورفع عيونه لملاك اللي واقفه ووقف:طيب يعطيك العافيه

الدكتور:الله يعافيك ماتشوفون شرّ

خرج ثنيان ولفت عليه ملاك:اسبقني عنده بمرّ اجيب لك قهوه واجيك

هز راسه وهو يفكر ومشى يتعداها ويرجع ولفت ملاك ودقت باب المكتب من جديد ودخلت

رفع عيونه الدكتور واخذت نفس ملاك:دكتور

قفلت الباب ووقفت وبلعت ريقها ثواني:انا فكرت كثير وقلت اسألك يمكن يكون في احتمال اني أتبرع له بكليه

ابتسم الدكتور ثواني:بدري على هذي الأمور كان موجود الاحتمال لان كليته اليمين ماهي بصحه جيّده برضو لكن انا قلت بشوف التحاليل وبعدها اشاوركم واشاوره

ملاك جلست وناظرته:طيب يصير اطلب منك انه لو في مجال للتبرع ماتبلغ الا انا

الدكتور:ما ينفع احنا لازم نبلغه هو ونبلغ باقي أولاده

ملاك هزت راسها بالنفي:ماراح يقبل ولا يقبلون أولاده ، بلغني انا انا جاهزه واقدر اتبرع وصحتي جيّده

الدكتور:بشوف التحاليل الصبح وابلغكم ان شاء الله

اخذت نفس ملاك وهزت راسها ووقفت تخرج من عنده

مشت تطلب قهوتين وعضت شفتها وهي تفكر ولفت من مدّ لها القهوتين واخذتهم

رجعت لثنيان ودخلت الغرفه وناظرته جالس عند ابوه يناظره وساهي وميّلت راسها تتأمل جلوسه وضعفه وخوفه وهواجيسه اللي تدور براسه

وهمست:ثنيان

رفع عيونه لها وناظرها واقفه وبيدها قهوتين ولف لأبوه يناظره وقام يوقف ومشى لها

جلست معه بالصاله الصغيره وجلس ثنيان واخذ قهوته

نزل عيونه لقهوته وتكلم بهدوء:ابوي ما يحب يكون ضعيف ابد

رفعت عيونها ملاك عليه وكمل ثنيان:وادري ما عجبه وضعنا يوم قام وشافنا حوالينه ، لانه ما يحب يطيح

لفت ملاك تشوف عقاب وكمل ثنيان:ورغم انه تعبان صحى وقال مابيكم موجودين ، مايبي احد يشوفه وهو ضعيف

ملاك هزت راسها وهي تشوف عقاب:العميد عقاب

رفع عيونه ثنيان لها واخذت نفس ملاك ولفت لثنيان:بس بيقوم لان القوي ما يطيح

هز راسه ثنيان:ان شاء الله

لفوا من انفتح الباب بهدوء ودخل نهار وخلفه أصايل وعقد حاجبينه ثنيان:وش جابكم ؟

نهار:انتم هنا ؟

ملاك ناظرت أصايل:نايم

أصايل لفت عليهم:ماجاني النوم ماقدرت انام

نهار:ولا انا

ثنيان:تعالوا

مشت أصايل وجلست وناظرت عقاب من بعيد وعضت شفتها تراقبه

ولف نهار:ما كلمت الدكتور ؟

ثنيان:لا يقول الصبح بيمرّ علينا

نهار رجع ظهره لورا وسكت يناظر ابوه على السرير

وقف ثنيان ومعه قهوته ومشى لشباك المستشفى يوقف

ناظرته ملاك يشرب من قهوته وهادي ووقفت تمشي له ، وقفت جنبه ولف عليها ثنيان وهمس:ما غفيتي من أمس

شربت من قهوتها ملاك وهي تناظره:ما أنام

ثنيان:عشاني نمت على صدرك ماقدرتي تنامين اعرف

ملاك:فداك

سكت ثنيان من جوابها وهزت راسها ملاك ثواني ، ما كان يدري وين هم وكيف علاقتهم ووضعهم ، مرّه أقرب من شريان قلوبهم ومرّه أبعد من سحاب السماء عن أرضهم

لكن يتأكد دايم ان ملاك تحتاجه وتبيه لكن يمنعها الكثير ويغيّرها خوفها وعدم ثقتها

ناظرته ساهي يناظرها وعرفت انه يبي يعرف ليه دايم ضدّ وضدّ وصدت لانها هي بالذات ماتعرف ليش تكون ضدّ وضدّ ، كل شي داخلها يجري له ويموت عليه لكنها ماهي له وماهو لها ويوقف قدامها مليون حاجز

تنهدت بتعب وحسّ فيها ثنيان ورفع ذراعه يحاوط كتوفها وبيده الثانيه قهوته

حطت راسها على ذراعه من حضن كتوفها وسكتت بهدوء وغمضت عيونها براحه ، راحه مع إنها تستند على ذراع تشعر إن هاللحظه الأمان الحقيقي لمفهوم الأمان

والوّد داخلها انها تعيش عمرها كله على هذا الذراع ولا ينزاح عنها ابد

وهمست ملاك:لو تطلب أكون على هذا الذراع حياتي اللي باقي لي فيها ! ما بردّك

سكت ثنيان يسمع كلامها وكملت:ما أشوف الا إنت حولي

غمضت عيونها خوف انها تفقده وبعدت راسها تناظره وهز راسه ثنيان يكمل عنها:وخايفه معد تشوفيني حولك

سكتت تناظره وهمس ثنيان:تفهمين اللي ابي اقوله بدون اقوله وتعرفين ان كل حبال الوصل وكل أجوبة الاسئله وكل حلولنا ! ، بيدك انتي

ملاك هزت راسها:ياليتها بيدي كان ما بخلت وأتسع لك كَفي وذراعي وصدري وقلبي

ثنيان ناظر موج عيونها من تجمع بمدامعها وشدت على ذراعه ورجعت تحط راسها على ذراعه بدون تكمل شي

'

دخل جاسر ومعه شادن ونوره وناظرتهم نوره:ماصحى ابوكم ؟

هز راسه نهار:لا قاعدين ننتظر الدكتور

نوره مشت تدخل الغرفه وناظرهم جاسر بإستغراب:مارجعتم انتم ؟

ثنيان:الا بس جينا نص الليل

جاسر:فطرتم ؟

نهار:من له نفس ؟

جاسر:الا لنا نفس لا تقعد لي ذي القعده كأن ابوي بيموت

أصايل:اوف خلاص لا تجيبون ذا الطاري

لف جاسر من قام عقاب وتقدم له وقاموا له كلهم يدخلون

ثنيان:ابوي ؟

ناظرهم عقاب بتعب ومسكت ذراعه نوره:كيفك اليوم ؟

هز راسه بدون يرد وعضت شفتها أصايل تناظره

دخل ساري ومعه الدكتور ولفوا عليه

تكتفت ملاك تناظر الدكتور بترقب

الدكتور:أجر وعافيه ياعمي كيف صحتك اليوم ؟

هز راسه بدون رد عقاب ولف جاسر:وش الوضع يادكتور ؟

الدكتور ناظر الأوراق بيده:إحنا قلنا نسوي عمليه إزالة الورم بالكليه كامله ولكن كليته الثانيه بتتعب ويحتاج الكليتين

سكت عقاب يناظره وعقد حاجبه ثنيان:شلون يعني ؟

الدكتور ناظر ملاك ورجع ناظرهم:يعني ممكن ياخذ كيماوي او احد يتبرع له بكلـ

قاطعهم عقاب:لا

ساري:ابوي تكفى لا تعقد الموضوع

وقف جاسر:انا موجود

نهار:وانـ

قاطعهم عقاب:قلت لا

ثنيان لف عليه:ابوي نفديك كلنا بعمرنا لا تردنا المهم تقوم بالسلامه

نوره:عقاب !

عقاب:ولا واحد من عيالي ينقصه شي

جاسر:ابوي ما بينقصنا شي نص الاوادم عايشين بكليه وامورهم تمام وش المشكله ان تبرع واحد منا لك ؟

عقاب:حرام بالله محد من عيالي يعطيني شي

تأفف ثنيان يصد عنهم ولف ساري للدكتور:اقنعه يادكتور تكفى

الدكتور:العمليه بسيطه ولا عليها خوف ومخاطر

عقاب:لا وان دريت ان واحد منكم تبرع لي باخذ روحي انا

أصايل مسكت ذراعه:اسم الله عليك

جاسر:ابوي تكفى لا تعاند ماهو وقت عناد احنا نبيك بصحتك وعافيتك لا تصعبها

مشت ملاك من بينهم تخرج ولفت شادن عليها ولحقتها

وقفت على الجدار ملاك بضيق من الوضع ووقفت شادن بجانبها وهمست:بكيتي عليه قد ما بكيتي على ابوك

ماردت ملاك عليها وناظرتها شادن:وصرتي تسندين راسك على كتف ولدهم

لفت عليها ملاك تناظرها:بتوقفين قدامي مثل ماوقف ابوك وتقولين اني انانيه وجحوده صح ؟

شادن:مو هذا الصدق ؟ دفع عمره الباقي كله منصور عشانك وبالنهايه انتي وينك ؟ هنا بينهم وكأنك بنتهم

ملاك غمضت عيونها بتعب وكملت شادن:كنتي تبين منصور ملاك ، تلبستي ثوب الشرّ عشانه وسرقتي عشانه الحين وش تغير ؟ علميني ليه ؟

ملاك لفت عليها بتعب:لاني المفروض اترك كل شي كل الدنيا بناسها واهلها واختفي ، تعبت تعبت من كلامكم وصوت عقلي وصوت قلبي تعبت ، ارحميني شادن

شادن:ولا يمكن ارحمك ، ماشفتي منصور من مده ولو شفتيه بتبكين عليه نفس ما انا واهلي نبكي عليه ، مستحيل انسى انه الحين بالسجن بسببك

ملاك صدت بتعب وكملت شادن:مستحيل افضحك عندهم او عند حبيب قلبك الجديد ثنيان ، لكن صدقيني مرد الحقيقه بتنكشف وش شعوره ثنيان اذا عرف انك سرقتيه وسرقتي اهله عشان واحد

لفت عليها ملاك وهزت راسها بصدمه من شادن وكملت شادن:أحقد عليك

ماردت ملاك تناظر شادن وناظرتها شادن بحده ومشت تاركتها

خرج الدكتور وساري معه يتكلم وناظرتهم ملاك

الدكتور:جربوا اقنعوه يمكن يقتنع

ساري:مو لازم يدري يادكتور

الدكتور:رضا ابوك أهم والله ولو ماهو راضي نلاقي له متبرع ان شاء الله

ساري تنهد وهز راسه ورجع يدخل ومشت ملاك خلف الدكتور وبلعت ريقها:دكتور

لف الدكتور بتعب:قلت اللي عندي لاخوانك ابوكم ماهو موافق

ملاك:انا مو بنته انا زوجة ولده ، وابي اتبرع بدون علم اي احد

الدكتور:ما اقدر اعذريني

مشى بيتركها ومشت خلفه ملاك:هو مايبي عياله يتبرعون له بس انا ماراح يدري واذا عرف مابيزعل

الدكتور:انتم خايفين عليه وانا عارف بس نلاقي له متبرع ونرفع اسمه بالمستشفى

ملاك:انت مو فاهمني دكتور انا على رقبتي دين وابي اسدده ولازم اسدده ، وانا اصلاً بختفي من حياتهم وانفصل وماراح احد يعرف شي

الدكتور:انا ما افهم بمشاكلكم العائليه ولا اقدر اساعدك اكثر

مشت ملاك بتعب جنبه:طيب انا اتحمل المسؤوليه صدقني ووقعني على اي ورقه مستعده ، بس تكفى ابي اتبرع انا

الدكتور ناظرها ووقف وناظرته ملاك بترجي:تكفى

الدكتور:نشوف التحاليل ونقرر

تنهدت وابتسمت بهدوء وهزت راسها:بس ماودي احد يعرف بليز دكتور

هز راسه الدكتور ومشى ومشت ملاك ترجع لهم

دخلت وناظرت عقاب اللي جالس وعاقد حاجبينه بعصبيه

نوره:ليه تبي تضرّ نفسك ؟

عقاب:خلاص عاد ، خلاص ولا واحد راضي يقفل الموضوع ؟

جاسر:انت اهدأ ولا تعصب

عقاب:قفلوا الموضوع ماني ناقص زود

سكتوا واخذت نفس ملاك واخذت شنطتها وناظرتهم:استأذن انا

لف ثنيان عليها وهزت راسها نوره:روحي يا أمي روحي

مشت بتخرج ومشى ثنيان خلفها وناظرتهم شادن

وقفت من ناداها ثنيان:ملاك

لفت عليه وناظرها:وين رايحه؟

ملاك:ابوك تعبان وباين عليه وماودي اقعد واضغط عليه وانتم بعد لا تضغطون عليه

ثنيان:ماهو راضي يقتنع مدري وش الحل

ملاك:ساري تكلم مع الدكتور والدكتور قال بيرفع اسمه وبيجيكم متبرع ليش تصعب الموضوع ؟

ثنيان:واذا طوّل الموضوع ؟

ملاك:ماراح يطول

ثنيان:كيف عرفتي ؟ اقولك ابوي مريض وباين عليه اقسم بالله يكلمنا وهو يتألم احس فيه

ملاك تنهدت:ان شاء الله بينحل الموضوع قريب

ثنيان سكت وناظرته ملاك:منيف بيمرّ عليّ

هز راسه ثنيان وخرجت ملاك من المستشفى ووقفت من شافت منيف بسيارته ومشت له

ركبت وناظرها منيف:كيف الوضع ؟

ملاك:لا تسأل

منيف:كنت بنزل بس استحيت

ملاك هزت راسها بالنفي:لا لا ما يحتاج

منيف حرك ولفت لمنيف:بسافر

لف عليها بصدمه منيف وناظرته ملاك:طلبوني شركة محاماه اقدم ندوه بالقاهره وبروح

منيف:تستهبلين ملاك ؟ بذا الوضع ؟

ملاك:ماقدرت ارفض

منيف؛ملاك الرجال يمكن يموت من تعبه وانتي بتروحين القاهره ؟

ملاك:وش اسوي يعني ؟ اعالجه منيف ؟ واقف العلاج عندي وانا قلت لا ؟

منيف سكت بصدمه وهز راسه

ولفت للطريق ملاك:بروح يومين اشتغل وارجع واموره طيبه مافيه شي

منيف:بس اللي يشوفك امس تبكين عليه ما يعرفك الحين

ملاك:تطمنت عليه مافيه شي

منيف سكت ولف للطريق بصدمه واخذت نفس بتعب ملاك ووقف عند البيت منيف ولفت عليه منيف:مرّ عليّ الصبح بكره عشان توديني المطار

منيف:ملاك !

ملاك لفت عليه تصرخ؛نعم نعم ؟ وشفيها ملاك ؟ تجننت ؟

منيف ناظر انفعالها واخذت نفس ملاك ونزلت وتركته

دخلت البيت واخذت نفس بتعب ولفت تناظر صورة عقاب وهمست:بسدد ديني ياعقاب

تأملت صورته بثبات وإصرار على عطائها الكبير بدون تردد ومشت تدخل الغرفه

اخذت شنطة السفر وحطت فيها ملابسها وطلعت جوازها تحطه على الشنطه

'

دخلوا البيت سوا وتنهدت نوره:الدكتور قال احتمال كبير يكون في متبرع قريب

ساري:ان شاء الله وانا متطمن

ثنيان تنهد ودخل وجلس بالصاله وجلسوا بتعب وناظرتهم أصايل:طيب مو لازم يعرف واحد يتبرع ولا نعلمه

جاسر؛خلاص أصايل كم مره عدنا الموضوع ابوي رافض ولا يبي

جلست شادن وهي تناظرهم وتنهد نهار:لو طوّل الموضوع بروح اتبرع انا ومحد بيوقفني

ثنيان رفع عيونه لنهار ولف من دخلت ملاك:سلام

نوره تنهدت:وعليكم السلام

جلست ملاك وناظرتهم:صار شي جديد ؟

ثنيان هز راسه:يقول الدكتور يمكن يومين بالكثير ويلاقون متبرع لأبوي

هزت راسها ملاك ووقف ثنيان يخرج من عندهم واخذت نفس تستند ملاك وهي تناظر حالهم

لفت من سمعت نوره تبكي وتنهدت أصايل:امي ؟

ساري:امي ليه تبكين الحين ؟

نوره غطت عيونها:فاقدته بالبيت فاقدته

جاسر:بيرجع ان شاء الله قوّي نفسك امي ابوي ما يبينا نكون كذا

تقدم نهار لنوره وجلس جنبها وحضنها ورفعت عيونها ملاك من دخل ثنيان وبيده جواز ملاك وعقد حاجبينه:وش هذا ؟

ملاك:جوازي

سكتوا وهز راسه ثنيان وهو عاقد حاجبينه:اي ادري انه جوازك ليه محطوط فوق شنطة سفر ؟

ملاك:لاني مسافره الصبح

لفت نوره بصدمه على ملاك ورفعت حاجبها شادن

وتقدم ثنيان:كيف مسافره ؟

ملاك بلعت ريقها من نظراتهم:جاني تكليف شغل بالقاهره بكره وماقدرت ارفض بروح يومين وان شاء الله ارجع

أصايل:بهالوضع ؟

ملاك ناظرتها:مافي وضع ، ابوك طيب وبيقوم بالسلامه ان شاء الله

جاسر:لا ونعم ونعم هذي اللي كان يناديها ابوي بنتي

سكت ثنيان يناظرها بصدمه ووقفت ملاك:انا ماني علاج لابوكم وشارده عن صحته ، ابوكم بالمستشفى وقايمين فوق راسه طاقم وش كبره وانا موجوده معه يومين والحين جاني شغل وش المانع اروح وارجع ؟

ثنيان:المانع انا

لفت عليه ملاك:بتمنعني ؟

نوره:ملاك منجدك بتسافرين وتخلينا بهالوضع ؟

اخذت نفس بتعب ملاك وصدت عنهم ورجعت ناظرتهم:لا تطالعوني كذا وكأني أنا اللي طيحت ابوكم ، قلت لكم شغل وارجع

نهار:ملاك !

مشت تاركتهم من حست بالضغط ودخلت الغرفه ونطقت شادن:هذي ملاك

لف عليها ثنيان وناظرتهم شادن:هذي هي اللي بيضتّوا صورتها

ناظرتها نوره بصدمه ومشى ثنيان يخرج ودخل الغرفه وفتح الباب بقوه

وتقدم:وش يعني اللي بتسوينه الحين ؟

اخذت نفس ملاك ونزلت شنطتها على الارض ولاردت

ومسك ذراعها بقوه ثنيان ولفّها ورفع صوته:جاوبيني

ملاك ناظرته:وش بسوي ؟ بسافر

ثنيان عقد حاجبينه:انتي نفسها اللي يومين معي ؟

ملاك ماردت وناظرها ثنيان بذهول:انتي اللي يوم كامل ما نزل عقال ابوي من يدك ؟

صدت ملاك بعيونها وهزّها ثنيان:بكيتي عليه كأنه أبوك قدام عيوني بكيتي ، سندتي راسك على ذراعي وما خليتيني والحين بتسافرين ؟

لفت ملاك عليه:ظروف وشغل يناديني

ثنيان فلت ذراعها يناظرها بصدمه:اي شغل ؟ اي شغل الله يلعن ابو الشغل اللي بيشغلنا عن ابوي

ملاك ماردت وتقدم بغضب ثنيان:فضّي شنطتك دام للحين الامور طيبه

ملاك هزت راسها بالنفي وناظرها ثنيان:بتتركيني ؟

ملاك بعدت عنه ورفعت صوتها من الضغط اللي تحسه:ماقلت بخليك ولا قلت بهاجر انا قلت يومين ياجماعه احد يفهمني

صرخ بوجهها ثنيان:ويومين عادي ؟

سكتت من صرخ بوجهها ورمشت بخوف وبلعت ريقها

ناظرها ثنيان وهز راسه:انا الغلطان

سكتت تناطره وكمل ثنيان:انا الغلطان اني عليت آمالي فيك

شدت على قبضة يدها ملاك وهز راسه ثنيان:كلهم وقفوا بوجهي وقالوا انانيه وجحوده وما تفكر في احد غير نفسها وغرورها وماصدقت

سكتت تناظره وتقدم ثنيان يناظرها:غلطان يوم كذبت عمك اقسم بالله غلطان ، وقفت معك بكل وقت طحتي فيه وقفت ولا عمري تعبت وبديتني عنك والحين يوم احتجتك قطعتيني بسيف البعد

عقدت حاجبينه ملاك وكمل ثنيان:كل شي قالوه عندك صح هذا انتي جحدتي ابوي وجحدتيني ورميتي كل شي بعرض الحايط ورايحه عشان نفسك وشغلك

تقدم بغضب وضرب صدرها بسبابته:مافي أنجس من هذا القلب ولا عمره يتعدل

رجعت للخلف وهي تناظره ورفع عيونه ثنيان عليها:كل شي عطيتيني اياه كذب واستغليتيني ويوم عطيتك انا كل شي وبغيتك تعطيني شي واحد بس ؟

اشر على شنطتها وجوازها ورمشت بهدوء ملاك تناظره ولف ثنيان ووقف عند الباب وحس انه يشتعل داخله وضرب الباب بقوه وصرخ بغضب وفتح الباب وخرج

خرج من البيت تاركهم ولفت نوره تشوف سيارته وعقد حاجبه نهار:منجدها ملاك ؟

جاسر:وش تتوقع يعني

لفت أصايل بصدمه تناظر اهلها ولفت نوره لشادن اللي تناظرها

'

جلست على السرير ملاك وغمضت عيونها بتعب ورفعت كفها لصدرها بقوه بألم

تذكر كلامه لها وكيف صدّق عمها ورمى عليها أبشع الاتهامات

ورمشت بهدوء وهزت راسها:هو ما يدري ما ينلام

مشت وجلست عند المرايه تناظر دموعها وبكت بتعب لأنها تعيش شي اقوى منها لأول مره

تمسكت بالتسريحه وهي تبكي ورفعت راسها من جديد تكتم دموعها وتمسحها ويجمد وجهها

اخذت نفس تستند بظهرها وتناظر شكلها ، بتسويها وحتى لو عاشت شي اقوى منها ماراح تترك دين عقاب ، بتعطيه كليه وحياه وعمر وصحه دامها تقدر

بتعطيهم أبوهم اللي هي فقدت وجوده ، بتعطيهم الحياه اللي تمنتها وتبي تعيشها

نزلت عيونها تذكر عمها وكلامه وشادن وثنيان ومنيف والكل وغمضت عيونها تشد على نفسها وبلعت ريقها تقوّي نفسها

وناظرت شكلها بالمرايه بجمود وهزت راسها

كانت دايم اكثر من يعطي واقل من ياخذ ، فنت حياتها كلها في تضحيه وعطاء ومالقت مقابله شي

اخذت عبايتها تلبسها بهدوء واخذت شنطتها وجوازها وخرجت من الغرفه

مرت من عندهم وناظروها ووقفت ثواني تناظرهم وخرجت

حطت شنطتها بالخلف وركبت وحركت سيارتها خارجه من البيت

ناظرت البيت من المرايه هي حاطه احتمال انها ماراح ترجع وممكن تخسر حياتها بالعمليه اللي بتسويها وابتسمت بهدوء لانها تتمنى

بعد كل هذا التعب اللي عدّت فيها تحس انها المفروض تستريح خلاص وتنتقل للبرزخ

فتحت شباك سيارتها وغمضت عيونها بهدوء تستنشق ريحة الدنيا وفتحت عيونها تسوق ونزلت دموعها وهي تضحك من وضعها وحالها

ووقفت عند بيت منيف وناظرت شكلها بالمرايه تعدله

نزلت من السياره ومشت للبيت ودقت الباب تناظر ساعة يدها ٣ بعد منتصف الليل

اخذت وقت طويل بسيارتها تتجوّل وقطعت نص الوقت لين وصلت لمنيف

فتح الباب منيف وناظرته ملاك بهدوء:وصلني للمطار

سكت منيف يناظرها ومشت تخرج واخذ نفس منيف واخذ مفتاحه وشغل سيارته ولف عليها من ركبت

وصدت ونزل يحط شنطتها بسيارته ويرجع يركب وحرك للمطار

وقف عند المطار وفكت حزامها ملاك ولفت عليه وابتسمت بهدوء:انت أفضل شي بحياتي

سكت منيف يناظرها وتنهد:ماكان له داعي هالشغل ملاك انا لأول مره ضدك

هزت راسها ملاك بالنفي:مو أول مره دايم أنت ضدي وضد كل اللي اسويه

منيف مسك كفها:تكفين ملاك لا تتركينهم هم اعتبروك بنتهم وجاتك فرصه تعدلين اللي سويتيه لهم ليه ترفضينه ؟

ملاك ناظرته وابتسمت:أحبك منيف

سكت يناظرها وتقدمت تحضنه ورمشت من طاحت دموعها على كتفه بتعب وتنهد منيف يشد عليها

ميلت راسها على كتفه تغمض عيونها وهمست:لا تزعل مني وتنساني

عقد حاجبه منيف:وش هالكلام ؟

بعدت عنه وناظرته بتأمل وكأنها بتفقده:إنت حنون ويارب ما تذوق عكس حنيّتك ابد

منيف هز راسه:ماعجبني كلامك لا تتكلمين كذا

مسكت كفه بقوه ملاك وابتسمت:أحبك مره

ناظرها منيف ونزلت ملاك ومسحت وجهها تناظر المطار وفتحت شنطة السياره واخذت شنطتها ولفت لمنيف اللي نزل

ووقف يناظرها وابتسمت له ورفعت كفها تأشر له وحط كفوفه بجيوبه يناظرها وصدت تدخل المطار

مشت وهي تجرّ شنطتها لين دخلت جلست بكوفي وحطت جوازها قدامها واخذت نفس وطلبت قهوه

وبدت تشرب منها وهي تهوجس ونزلت عيونها لساعتها لين انقضى وقتها وأصبح الصبح

وحطت كوب القهوه على الطاوله واخذت شنطتها وهمست:سويها ملاك

سحبت شنطتها تخرج من المطار ووقفت تاكسي وانحنت:مستشفى الملك فهد

هز راسه وفتحت الباب تركب وحرك للمستشفى ونزلت تدخل

تقدمت للرسبشن وحطت الورقه اللي بيدها ودخلوها لغرفة التنويم

جلست وهي تناظر الغرفه البيضاء الفارغه ودخل الدكتور بعد مده من الزمن:ناخذ فحوصات بالأول

ملاك:ما ابغى يخرج شي من هذي الغرفه واحد يعرف

الدكتور هز راسه:ان شاء الله ، استريحي

انسدحت على السرير ومدت ذراعها وتقدمت الممرضه تشبك لها الإبره وتاخذ من دمها وناظرت السقف ملاك

-

( لا تنسون النجمه ⭐️ )

وقف ساري من دخل الدكتور:في متبرع قال بيتبرع

عقد حاجبه عقاب وناظرته نوره:والله ؟

الدكتور:بس للحين تحت الفحوصات بنخليه ليله بالتنويم لين نتأكد من كل الأمور بعدها نحدد موعد للعمليه

جاسر:من المتبرع ؟

الدكتور ابتسم:ماوده تنكشف هويّته وده تكون لله

عقاب:لا ابد ، تعلمني

الدكتور:السموحه والله هذي رغبته

ثنيان:ما ناخذ من احد مانعرفه

ساري:ياجماعه ؟ يوم انحلّ الموضوع بتعقدونه ؟

نهار:وهو صادق ساري خلاص دام ما يبي نعرفه لا نعرفه

عقاب:يقعد دين عليّ ؟

الدكتور:ماهو دين ياعمي هو عمل خيري وجزاه الله خير وان كان بتردها له تدعون له بالخفاء

نوره:الله يجزاه خير يارب

لفت أصايل وتمسكت بكف عقاب:حمدلله

جلس ثنيان وهز راسه ساري:ياربي لك الحمد

عقاب ناظر شادن اللي جالسه وناظر ساري:وين زوجتك ؟

ساري:ببيت اهلها مابغيتها تجي وتعرف بتقول كل شي لاهلها ولا ودي

ولف لثنيان اللي رفع عيونه له وسكتوا يناظرون ثنيان

ونزل عيونه ثنيان بدون رد ونطقت شادن:ملاك سافرت

لفوا عليها واخذت نفس شادن:والله انا بعد انصدمت كيف تتركنا بوضع كذا ، بس تقول شغل وماتبي تقطع برزقها عشان احد

صدت أصايل بإنزعاج من كلام شادن ولفت نوره لعقاب:مانبي نتكلم فيها اللي ما يوقف معنا بشدتنا مانبيه بالرخاء

عقاب:الغايب عذره معه

ثنيان:مالها اعذار

لف عقاب وناظره ثنيان وهز راسه بالنفي:مالها عندي اعذار

سكتوا وصد ثنيان عنهم ورفعت عيونها أصايل لامها ورجعت صدت بضيق

شادن ابتسمت:اهم شي انت تقوم بالسلامه ياعمي

جاسر لف لشادن:وانتي ارجعي مع حمدان لا تخلين الصغار لوحدهم

ناظرته شادن وصد جاسر عنها واخذت نفس شادن وخرجت من المستشفى

نوره:ما ظنيت ولا مره وحده ان ملاك ممكن تتركنا بوضعنا هذا

عقاب:نوره ! خلاص قلت

ناظرهم ثنيان ووقف يتركهم ، وقف بالصاله الصغيره والتفت يناظر الشباك اللي وقفوا عنده

مستحيل يصدق انها نفس الشخص ونفس النظرات ، مستحيل يصدق انه غَفى على صدرها ليله كله ولا غفت لها عين عشان لا تضايق نومته ، مستحيل يصدق انها اللي ركضت له تبكي وبيدها شماغ ابوه وعقاله والحين هي مسافره تاركتهم بهذا الوضع

شد على يده بقهر وهو يتنفس بسرعه انخذل منها بشكل كبير ولا توقعه ، مستحيل يسامحها على كل مره بادر فيها لها وهي ما بادرت بخطوه وحده

كانت دايم تشحّ عليه بكل شي مدّتها قصيره له ، ماكان يشوف منها غير نظرات فقط ولا مره جربت تعطيه شي اكثر من زجاجة عطر

'

غمضت عيونها تشوف الساعه اللي معلقه بالجدار وصوت قطرات المغذي اعلى من صوت الهدوء اللي بالغرفه

ترمش بهدوء وهي ساهيه بعقارب الساعه ، ومن بعد مده طويله اول مره تشعر بالوحده من جديد بعد ما ودعتها

تفكر في القسم الآخر من نفس المستشفى وكلامهم عنها بهذا الوقت وانتصار شادن

غمضت عيونها بهدوء تبي تغفى تبي تنام هاجرها النوم من قبل يطيح عقاب قدام عيونها

لكنها ما تحس بتعب او نعاس وكأنها تخدرت تماماً ولا تشعر بشي

تبي الصبح يجي تبي يمرّ الوقت ويضطرون يبنجونها عشان تقدر تنام وترحم صوت الهواجيس اللي داخلها ، أزعجتها افكارها وأصوات تسمعها بتكرار ونظرات ترجع تشوفها وضحكات لها صدى بدماغها

من لحظة زواجها ومشهد ثنيان ببشته أمامها لآخر صرخه صرخها بوجهها كل شي استعادته

غمضت عيونها تذكر طعم الموج اللي ذاقته بعد ما لحقته للبحر واستقبلها بحضنه وشالها من جهلها بالسباحه لحضنه

جربت مره تترك كل الحواجز وتقدر تقبّله ولا نست ، ما نست كيف كانت مشاعرها وهي تحس بثغره وقبلاته لها

فتحت عيونها تصد وتحاول تخرج من ذاكرتها لكنها ماقدرت ، انقضى وقت طويل وصارت تهوجس ولاهي بوضع صحي جيّد

تبي اي شي يسكّت دماغها وتهدأ اي شي يشبه حضن ثنيان ودفاه وعمقه ووسعه

دخلت الممرضه عليها وناظرتها ملاك:متى بيجي الدكتور ؟

الممرضه:اول شي بيجي استشاري التخدير يشوف وضعك وبعدها ننقلك لغرفة العمليات

هزت راسها ملاك وجلست بإعتدال ورفعت شعرها بتعب وهمست:قدّها ملاك قدّها

فصلت الممرضه المغذي وتركت الابره بوريدها ودخل الدكتور وصارت الغرفه ممتلئه بالممرضين

بلعت ريقها بربكه ونزلت من سريرها ووقفت الممرضه قدامها تلبسها لبس العمليات ، وانسدحت على السرير المتحرك تناظر اضاءة السقف ومشوا فيها لغرفة العمليات

تسمع صوت خطواتهم وتحس ببرودة المستشفى تسري بعروقها ، امتلى جسدها بمغذي بارد

شدت بيدها على الغطاء اللي عليها ، لأول مره تحس ان كفها يتوق لكفه ، تنسى كل شي بهاللحظه ولا تنسى كفوفه

دخلت الغرفه وغمضت عيونها بإنزعاج من الاضاءه ولفت للدكتور اللي يتكلم معها ودخلت بدوامه وصدى وكأنها تغرق وغمضت عيونها تدخل بمفعول البنج

'

واقفين عند غرفة العمليات من بعد دخول ابوهم

ولف ثنيان على أمل جيّتها ولآخر مره يستأمل فيها ، لكنها ماجات

نزل راسه بتعب وخذلان يناظر الارض ورفع عيونه يشوف اهله جالسين

وجنى واهلها موجودين وشادن واهلها موجودين ، ورفع عيونه لمنيف اللي واقف مبتعد عنهم مسافه وينتظر معهم

اخذ جواله منيف يفتحه ما يلاقي فيه رساله او اتصال من ملاك

هزّ رجله وتنهد بتعب على ملاك وكيف شغلت باله من يوم تركها لانها ما كانت بخير

ماهو مرتاح ويحس انه مخنوق وابتعد عنهم وفتح الواتس اب يسجل لها صوته:ملاك من يوم وصلتك للمطار ما كلمتيني طمنيني وصلتي ؟

ارسل الرساله ورجع يسجل لها:ما بتسألين وش الوضع عندنا ؟ ترا عقاب لقي متبرع ودخل العمليات اليوم

ناظر الرساله صح واحد ورجع يرسل:لك يومين مختفيه ملاك علميني وطمنيني

ارسلها واخذ نفس وقفل جواله ولف عليهم يناظرهم

لف من نطق محمد:بنت اخوي يقولون مسافره

رفع عيونه ثنيان عليه وتنهد محمد:امسحوها بوجهي تعبت امسح بوجهي سواد وجهها ، لكن وش اسوي ناكرة المعروف

ناظرهم منيف بضيق ولف محمد على منيف وقام منيف يبتعد عنهم

وناظره ثنيان من خرج من عندهم دلالة انزعاجه ورجع صدّ

'

كان الشعور وعي ولا وعي ، تشوفه لكنها ماتقدر تلمسه

شي يشبه غرقها بالبحر لكن مالقت ذراعين ثنيان تخرجها من الغرق

تشوف كل شي مثل الحلم ، صورته وقربه صراخه وحضنه تحس ان داخلها يتورد من اللاوعي اللي تعيشه

الجو بارد ، بارد جداً وهي ماهي دافيه

تشوف حوالينها بحر وشجر وتسمع اصوات ضحك واسمها

تلف تشوف حوالينها عقاب ونوره ، أصايل ونهار ومنيف وأمها وأبوها موجودين

أول مره تشوف كل اللي تحبهم موجودين بدون نقص وبدون زياده لشخص ما توّده ولا يوّدها

تمنت ما تفوق تمنت تعيش بهذا اللاوعي للأبد ، حتى لو انها ماتقدر توصل لهم وتلمسهم كان منظرهم جميل

تمنت ان بعد ما تعطي حياتها لحياة عقاب تفقدها هي ، وتترك كل هذي الدنيا لأحيائها

تنضم مع أمها وأبوها وترتاح من جبال ساريّات واقفه على صدرها ومن أصوات ضمير وخطوط حمراء تشوفها وتسمعها

ورغم كل هذا الزحام شافت نور يشعّ مثل النجوم بعتمة السماء ما جذبها بين الجميع غير هذا النور

ابتسم لها وابتسمت له تتناثر منه حنيّه توصل لين عندها وتغمرها كانت تحس ان أحشائها تتحرك من مشاعره اللي يبثها لها وهمست تنطق بإسمه:ثنيان

تلفتت تشوف منصور لوحده بعيد عنها وعنهم واستغربت وجوده وبُعده عنها وحاولت تقرب منه ، نادته ونادت اسمه ورفعت صوتها عشان يسمعها لكنه واقف بعيد عنها

قربت منه لين عنده تناديه ورفعت ذراعه تبي تلمسه ومسك ذراعها بقوه وحسّت بالألم يعصر داخلها وفزّت تحاول تتنفس

وناظرت الغرفه البيضاء الخاليه وتمسكت بالسرير تحاول تلقط نفسها وحطوا عليها الاكسجين وغمضت عيونها بتعب تحس بألمها

وعرفت انها فاقت بعد العمليه وكل اللي كانت فيه لاوعي

رمشت بتعب ترجع تغمض عيونها وتتنفس بسرعه وتتألم

مسكوا ذراعها يشبكون لها مغذي ومخدر واستراحت على فراشها لوحدها

'

دخل الغرفه وناظر نوره اللي توزع الورد ولفت نوره وابتسمت:في احد بيزور ابوك؟

نهار:الكل بيزور ابوي الحين بس المهم ابوي يصحى ويصير فيه حيل يستقبل الناس

هز راسه ساري:اكيد وانا كلمتهم يمنعون اي شخص بيدخل

أصايل:الورد والكروت والجوكلت ماتوقعت ان بيصير الوضع كذا

ابتسمت نوره:ابوك العميد عقاب من ما يعرفه ؟

ابتسمت أصايل:حمدلله على سلامته خلاص ودي اشوفه بالبيت من جديد واسمع حسّه وارتاح

هز راسه ثنيان وهمس:حمدلله

نوره:أمي ثنيان خذ اخوانك وروحوا البيت ناموا وغيروا والبسوا ثيابكم وتعالوا

جاسر:وبشوتنا

هزت راسها نوره:روحوا واستريحوا محد نام من مده

أصايل:انا كمان بخاطري ارجع تعبانه مره

نهار:امي بتقعدين ؟

نوره:اي اي روحوا انتم ارسلت السواق يجيب لي عامله ومعها أغراضي وأغراض ابوكم

ساري:اذا بغيتي شي كلميني اجيك

هزت راسها وخرجوا واخذ نفس ثنيان بتعب ومشى يخرج ويركب سيارته

ويستند بظهره يناظر الشارع ثواني ، نزل عيونه لجواله الفارغ وتكاثر بقلبه الزعل والضيق والعتب والخذلان

شغل سيارته بقهر ياكل صدره ولحق اخوانه لبيتهم

وقف عند البيت ولف يشوف اخوانه يتكلمون ويدخلون البيت ، ومشى ينزل ويدخل معهم

ناظر جنى وشادن اللي استقبلوهم بالسؤال وظل يناظرهم ثواني ومشى يطلع غرفته

فتح الغرفه وغمض عيونه يبي يلاقيها يبي يشوفها موجوده ومعها كل أعذارها

لكن مالقي في الغرفه احد ناظر السرير وجدار الغرفه وقفل الباب بتعب وتكى عليه بظهره يشوف أماكنها بغرفتهم

كل شبر بالغرفه مشت فيه يذكرها وكأن ما غفى من أيام ونسى ، تقدم يناظر اغراضها على التسريحه

أرواجها وعطورها ومجوهراتها ورفع عيونه للمرايه يشوف انعكاسه وتعبه بوجهه

وكأن اللي غاب ماغاب طاريه حتى لو انه بالبعد سوّى سواياه ، وكنّ الطيوف تلاحقه تكويه

جرب النار وجمر النار ولهب النار ، جرب وش تسوي اللهب بحياة اللي تلمسه

جرّب انها تحرق وتصلى نار ، يحس جوفه يتآكل من نيران جوفه رغم انه موج والموج قادر

لكن لأول مره يقدر اللهب ، جلس على الارض يستند على السرير وفتح الدرج يطلّع من داخله الصوره

ناظر الصوره ثنيان يحفظ ملامح الشخص اللي بالصوره يتسائل من ولّد كل هالنيران بصدرها وصدره

حط الصوره بالدرج ولف للسرير وانسدح على بطنه بتعب وغمض عيونه

'

رفعت كفها تلمس جرحها وألمه والنار اللي تحرقها واخذت نفس بصعوبه

لفت من دخلت الممرضه وحطت عندها الفطور وابتسمت وخرجت

عقدت حاجبينها بتعب ملاك ماكانت تقدر تقوم عشان تاكل او تقوم عشان تاخذ الاكل

نزلت دموعها من حسّت بالوحده والحاجه لشخص يسندها على كتفه وتقوم على حيلها

دخلت الدكتوره وناظرت ملاك:كيف حالك ملاك ؟

ماردت ملاك وهي تناظرها وتقدمت الدكتوره:افطري عشان تقومين تمشين ضروري عشان ما يجيك تجلّط بالدم لا سمح الله وعشان تستصحين اسرع

صدت ملاك وناظرتها الدكتوره:في أحد بيرافق معاك؟

هزت راسها بالنفي ملاك وهي تتألم وناظرت الاكل وخرجت الدكتوره

بكت بدون صوت بتعب وثقل ونار تحرقها ويدها اللي حتى ما تقدر ترفعها للاكل وصرخت ترفع كفها ترمي الاكل

وبكت وهي تتمسك بالسرير بألم وصرخت:أهخ

اخذت نفس سريع تتنفسه ولفت من دخلت الممرضه وناظرتها ملاك وهي تبكي:تحطين الاكل بعيد ليه ؟ تشوفيني اقدر اخذه ؟ تشوفيني اقدر ؟

ناظرتها الممرضه بخوف وصرخت ملاك وهي تتوجع:تشوفيني اقدر ؟

هزت راسها ملاك:ما اقدر والله ما اقدر

تقدمت الممرضه لها وبكت ملاك تتمسك بذراعينها وهمست:احضنيني

ناظرتها الممرضه بصدمه وتقدمت لملاك وجلست ومدت ذراعينها الممرضه تحضن ملاك وغمضت عيونها ملاك:اهخ

الممرضه:تحسين بألم بالجرح ؟

ملاك:اي جرح ؟

الممرضه:اساعدك تاكلين ؟

بعدت ملاك عنها وهزت راسها بالنفي:بمشي

الممرضه:ارتاحي نمشي بس ارتاحي

هزت راسها بتكرار ومدت رجلينها ملاك وغمضت عيونها بألم

مسكت بيد الممرضه بقوه تحاول تقوم

وطلت تتنفس بسرعه بتعب وتحاول تقوّي نفسها وتقوم على حيلها ولا تحتاج احد

وحطت رجلينها الحافيه على الارض البارده ورجف كل ما بداخلها وتقشعر

غمضت عيونها بقوه من الألم ورفعت راسها للسقف بتعب:يارب

ناظرت السقف وبكت بتعب وشدت عليها الممرضه:اساعدك انا

اخذت نفس بقوه ملاك وشدت على يدها ووقفت وتمسكت بالستاره بقوه:اهخ يارب

مسكت جرحها واستجمعت نفسها تحاول تخطي خطوات قصيره

لكنها تصارع ألم كبير ونار تكويها تمسكت بالسرير تمشي بهدوء والممرضه معها

لكنها ماقدرت توقف اكثر كانت الدنيا كلها تدور فيها من الوجع وغمضت عيونها تهمس:يارب

الممرضه:تبغين ترتاحين ؟

لفت ملاك تشوف الخطوات اللي مشتها وبكت بتعب ماقدرت تبعد عن السرير حتى

جلست ملاك على طرف السرير ورفعت عيونها للممرضه:ماعمري استندت على احد

سكتت الممرضه تناظرها ومسكت السرير بتعب ملاك:ولا عمري

الممرضه:ارجعي ارتاحي وبحط لك الفطور قريب وافطري عشان تتقوين

رجعت تنسدح بتعب ملاك ولفت عليها:ابغى الدكتور

الممرضه:بيجيك

ناظرت الاكل اللي تفتحه لها الممرضه واخذت نفس بتعب وشالت الملعقه الممرضه وحطتها بين اصابع ملاك وجلست على الكرسي تنتظر ملاك تاكل

ناظرتها ملاك بهدوء ولفت للاكل تاكل بدون شهيه فقط عشان تعيش

'

ابتسم يصافحه:الله يحييك ويطول بعمرك

لف نهار يعدل غترته ويكلم:والله الحين ابوي بالمستشفى ان طلع بالبيت ببلغك طال عمرك ، اللهم امين ماقصرت

قفل ولف لساري اللي يتكلم مع الرجال بالمدخل وناظر ثنيان:جاسر راح للدكتور مارجع ؟

ثنيان ابتسم للي جاي:اصبر

تقدم وسلم عليه:ارحب ابو رامي كيف الحال ؟ الله يسلمك

ابتسم يصافحه:ارحب حيَاك

كانت غرفة عقاب تعجّ بالرجال والورد والمباركات وريحة القهوه والبخور وكأنه ببيته

هز راسه عقاب:ياربي لك الحمد العقاب ما يطيح

ابتسم له:صادق صادق الله يطول بعمرك ويخليك ذخر لعيالك ولنا زياره من جديد ان طلعت بالسلامه بيتك

هز راسه عقاب بتعب ودخل ثنيان يناظر ابوه ويطمن عليه ورجع وقف مع اخوانه

تقدم جاسر لهم يرفع شماغه:كلمته قال بيجي يشوف ابوي ويسأله اذا يبي يقعد مدد له بس يقول يرتاح ببيته احسن

ساري هز راسه:لا ما بيمدد ابوي خلاص يبي البيت

لف ثنيان من تقدم منيف لهم وناظره منيف ولف نهار:ارحب الفال الطيب

ابتسم منيف وسلم عليه نهار وناظره منيف:كيف الحال ؟ حمدلله على سلامة الوالد

نهار:الله يسلمك

منيف ناظر ثنيان ورجع ناظر نهار:والله بغيت اجي بعد عمليته بس قلت ياخذ يومين ويرتاح واجي اشوفه

نهار:حيّاك تعال ما انت غريب

لف منيف على ثنيان وصافحه:أجر وسلامه والله يطول بعمره

هز راسه ثنيان بدون رد ودخل منيف وناظره عقاب:تعال منيف تعال

ناظر الرجال الموجودين منيف بربكه وتقدم:شلون صحتك عمي ؟ حمدلله على سلامتك

ابتسم له عقاب ومسك كفه منيف وابتسم:الله يطول بعمرك

عقاب:وعمرك ويرحم من رباك

هز راسه منيف يناظر عقاب ومسح على كف منيف بيده الثانيه عقاب وابتسم منيف له بإمتنان

جلس منيف عند عقاب يناظر الرجال وصبّوا له قهوه واخذها وهو يسمع سوالفهم

'

بيت العميد عقاب بن جرّاح

في أحد مجالسه مستند على سرير ابيض كبير بمنتصف المجلس وحوالينه الورد وفازات الورد والرجال متوزعين على الكراسي يتحمدون له بالسلامه

وعياله واقفين ببشوتهم يستقبلون الضيوف ويرحبون فيهم

المجلس تفوح فيه رائحة البخور والعود والعنبر والبُن والهيل والزعفران ، ريحه توصف عتاقة المجلس واهميّة الزياره

لف ساري على اخوانه:بستريح انا تعبت واقف

نهار:ما اظن احد بيجي زود

جاسر:بنحط العشاء اصلاً على وصول فيه

ثنيان هز راسه وخرج جاسر للمجلس الثاني مع العمّال يوزعون سُفر الطعام ويوزعون الفواكه

دخل يده بجيبه ثنيان يناظر جواله وعقد حاجبينه يشوف التاريخ

٧ أيام ماهي يومين مثل ما قالت ، ٧ أيام عاشها مع زحمة الضيوف والرجال هواجيس

كان يقعد مع أربعين رجّال وتبرد قهوته بين أصابعه وهو ماهو حاس من هواجيسه

لف يناظر منيف جالس وكان وده يسأله ، وده يتكلم لكن كل العتب والخذلان بصدره ما سمح له

خرج من سمع صوت البوابه وتقدم يشوف السياره اللي تدخل وعقد حاجبينه بإستغراب

تقدمت تعطي السواق فلوس:بس ماعليك أمر شنطتي بالخلف

هز راسه ينزل واخذت نفس تفتح الباب وتنزل بهدوء وحذر من عمليتها

ورفعت راسها وجمدت محلها من شافته واقف من بعيد عند مجلس الرجال لابس غترته وثوبه وبشته

وعقد حاجبينه من شافها وشنطتها بجانبها

بلعت ريقها ولفت تاخذ الشنطه:شكراً

لفت عليه تناظره من بعيد وسحبت شنطتها تمشي للبيت بكعبها وعبايتها وحجابها

وناظرها بصدمه لين دخلت البيت ولف على الرجال اللي بدوا يدخلون للعشاء ودخل معهم

وتقدم منيف مع نهار بيدخلون ومسك ذراعه ثنيان ولف عليه منيف ونطق ثنيان:اختك جات

عقد حاجبينه منيف بذهول:وينها ؟

ثنيان اشر بعيونه على البيت ومشى من جنبه منيف يخرج للبيت ولف ثنيان يناظره من بعيد

'

دخلت البيت وتقدمت بتعب تسمع اصوات النساء بالبيت ولفت للعامله تمد لها شنطتها واخذتها العامله

وتقدمت ملاك تمشي بثقه وصوت كعبها يصدّى بالبيت

لفت نوره وهي مبتسمه ولانت ملامحها من دخلت ملاك وابتسمت:السلام عليكم

ناظرتها أصايل ولفت شادن عليها ولفت ملاك تشوف نظراتهم لها واخذت نفس وفصخت عبايتها وحجابها ومدتها للعامله وتقدمت تسلم

وقفت عند نوره اللي تخطتها:القهوه

وخرجت تاركتها ووقفت أصايل تتفادى الموقف وسلمت على ملاك

ووقفت جنى تسلم عليها وتقدمت ملاك تناظر شادن اللي وقفت لها وتخطتها قدام الجميع وكأنها ما تفرق عندها وش يقولون وكيف بيستغربون

وجلست على الكنبه وبلعت ريقها شادن تناظر الموجودين وجلست

دخلت نوره وابتسمت:العشاء الله يحييكم

وقفوا يغادرون الصاله وابتسمت نوره تهلي وترحب فيهم ولفت لجنى وأصايل:قوموا معهم

قاموا يخرجون ووقفت شادن:اساعدهم بشي ياخاله؟

ابتسمت نوره:لا ياحبيبتي كل شي جاهز روحي تعشي معهم

سكتت ملاك تناظرهم بذهول وخرجت شادن ووقفت ملاك وناظرت نوره بهدوء

ولفت نوره تناظر ملاك بحده:وش جابك ؟

ملاك:انا هذا مكان عودتي دايم

نوره:يوم انك تركتينا هالاسبوع كله مافرقت معنا رجعتك الحين ، مابي عيني تشوفك بينهم لاني مابي اسمعك كلمه قدام الكل وتخسرين كل الغرور اللي يكسيك

سكتت ملاك تناظر نوره وناظرتها نوره بحده وخرجت تاركتها

نزلت عيونها ثواني ملاك بهدوء ورفعت راسها من جديد تاخذ نفس ولفت للعامله:منيف برا

مشت ملاك بكعبها وتأففت بألم تجاهلته كثير وخرجت تشوف منيف واقف ينتظرها

وتنهدت:منيف

لف عليها منيف بصدمه ورفعت ذراعينها تحضنه وعقدت حاجبينها:اهخ

حضنها منيف ونطق:وينك ؟ ليه تسوين كذا ؟ فهميني

ماردت عليه وهي تتنفس بألم وبعدت عنه وناظرته:وحشتني

منيف:وين كنتي ؟ وليه ما كلمتيني ؟ وش قاعده تسوين ملاك يرحم والدينا علميني

ملاك:ولاشي انشغلت

منيف عقد حاجبينه:انشغلتي ؟ انشغلتي ما تطمنيني وتكلميني ؟

ملاك رفعت كتفها:لَهيت منيف والله ماقدرت

منيف سكت يناظر ملاك وميلت راسها من نظراته:تكفى منيف

منيف هز راسه بالنفي:كل مره تخليني برا الصوره ولا تهتمين لسؤالي وخوفي

عضت شفتها ملاك من تجمعت الدموع بعيونها

وكمل منيف:ولا مره اهتميتي للي ينتظر منك خبر

ملاك:والله ماهو كذا

منيف شال كفه من جات بتمسكه ورجع خطوه لورا:حمدلله على السلامه

مشى يتركها وناظرته بتعب ملاك:منيف

مارد عليها وخرج برا البيت ونزلت دموع ملاك ورفعت راسها تتنفس ونزلت كعبها من تعبت من الوقفه عليه

وشالته بيدها ومشت حافيه لين طلعت لغرفتها

مسحت دموعها وقفلت الباب خلفها

رمت كعبها ومسكت عمليتها تجلس على السرير وبلعت ريقها تحاول تنحني وتفتح شنطتها ولا قدرت

رجفت يدينها بألم وجلست بتعب وفتحتها تطلع اكياس ادويتها واخذت الدواء وبلعته بدون مويه حتى

لفت للمرايه تشوف منظرها المزيّف اللي تشكلت فيه ، فستان وشعر وميك اب وكعب وشموخ ثابت ما يهزّه شي

غمضت عيونها تحاول تستريح وتمسكت بالسرير تتنفس

وقفت تمشي بالغرفه اللي اشتاقت لها ولقتها على حالها بالضبط ، مشت للشباك وفتحته تناظر السيارات بالبيت والرجال اللي يخرجون رويداً رويداً

ورفعت شعرها تفكه على ظهرها وتتركه على راحته ولفت من انفتح الباب

ناظرها عند الشباك بأول دخوله وقفل الباب وعينه عليها وبلعت ريقها من شافته يدخل

فصخ بشته ورماه على السرير وصد عنها يفصخ غترته ويفك ازاريره الاولى وينزل ساعته

وترددت تتكلم او تقول شي وكيف تبدأ وكيف تنتهي وبلعت ريقها تتقدم له بهدوء:حمدلله على سلامته

لف عليها ثنيان وعقد حاجبينه بذهول منها وناظرت عيونه ملاك ، مليانه ملَام مليانه عَتب

وشدت على ذراعها تمسكه وتناظره ونزلت عيونها:ادري اسـ

سكتت من مشى يتركها ويفتح الدولاب وتعبت ، تعبت من كل هذا الصدود والحاجه اللي عاشتها والشوق اللي جربته بين جدران بيضاء بعيده عنه بعيده عن حضنه عن كفوفه

وجلست على السرير:ما خليتك والله

سكت ثنيان من سمعها تتكلم وناظر ملابسه يتجاهلها

وهزت راسها بتعب ملاك:ولا يوم خليتك

هز راسه ثنيان:بتفتحين موضوع الشوق والأشواق وسوالف الاطلال ونظرات الطيوف

ولف يناظرها:والموضوع اكبر من هالخرابيط

سكتت تناظره وتكلم بهدوء ثنيان:ولا اعرف اصلاً كيف رجعتي ودخلتي هالبيت وهالغرفه بكل بجاحه

شدت على اللحاف بيدها وناظرها بحده ثنيان:وكأن وجهك مغسول بتراب ماهو بمرق

سكتت من حجم كلامه ونظراته لها ماقدرت تنطق شي ولف ثنيان يلف وقفل الدولاب ويدخل الحمام

وغمضت عيونها ملاك ورفعت شعرها تستجمع نفسها من جديد واخذت عبايتها تلبسها وتتحجب وخرجت من الغرفه

نزلت تسمعهم بالصاله جالسين

نوره:حمدلله خلصنا منهم بنقعد كل يوم على هالحال ؟

عقاب:واجب وبيسوونه نتحملهم

أصايل:ابوي مرتاح بالكرسي هذا والا ينزلك نهار على الكنب ؟

عقاب:لا لا خليني شوي واروح غرفتي ارتاح

دخلت عليهم ورفعوا عيونهم عليها وناظرت عقاب وتجمعت الغصه بحلقها ماتدري تفرح بشوفته من جديد والا تبكي لانها تشوف منهم نفس النظرات

وابتسمت بين موج عيونها تناظر عقاب وهزت راسها:حمدلله على سلامتك

صدت نوره عنها وبلعت ريقها ملاك وتقدمت له

ولفت نوره:لا تسلمين عليه للحين جرحه ماطاب والعطور تزيده

لفت ملاك تناظر نوره اللي متجاهلتها وهز راسه عقاب لها:الحمدلله على سلامتك انتي

ابتسمت بهدوء ملاك وجلست:المهم سلامتك انت والعوض براس هالناس كلها

لفت تشوفهم جالسين يناظرونها وشادن تجلس جنب أصايل ونزلت عيونها تمنع دموعها من كل هالغربه اللي تحسها بينهم ورفعت عيونها من وقف نهار:ابوي تعبان وبيرتاح

ملاك ابتسمت لنهار تهز راسها وتجاهلها نهار يسحب الكرسي ويدفّ ابوه للخارج

ولفت ملاك وناظرت أصايل اللي تناظرها:شلونك أصايل ؟

أصايل سكتت ثواني ولفت لنوره:تبين شي امي بدخل انام انا بعد

لفت ملاك على جنى اللي تناظرها ووقفت نوره:لا امي روحي نامي وانا بعد بروح مالنا لزوم نقعد

خرجوا تاركينها ولفت جنى على ملاك وهمست:كل شي تزرعه تحصده

سكتت ملاك وخرجت جنى ووقف ساري يخرج معها ورفعت عيونها ملاك على شادن وجاسر اللي جالسين وهزت راسها:لفقتي زود ؟

شادن:مالفقت انتي ماقصرتي

جاسر:جحدتي ابوي وبكل وقاحه راجعه بيتنا ؟ زود على انه سارقتنا ما يثمر فيك شي

سكتت ملاك تناظره ووقف يخرج جاسر وخرجت شادن معه وبقت لوحدها ملاك بالصاله

اخذت نفس ووقفت ترجع الغرفه وفتحتها تشوف الظلام وتنهدت تدخل وتفتح فلاش جوالها تشوفه نايمه بالعرض بالسرير وكأنه يمنعها تنام قريب منه

فصخت عبايتها وجلست على التسريحه وقفلت الفلاش وبكت من شافت الظلام واخذت ملابسها ودخلت الحمام

مسكت عمليتها بتعب ونزعت فستانها تشوف اثار العمليه

-

فتح عيونه من سمع صوت المويه وجلس واخذ نفس بتعب وغضب يشوي داخله

ناظر شنطتها اللي بالارض وتذكر اللي عاشه لوحده وخلته لوحده ولا سألت او اتصلت او دقت عليه حتى

هو اللي عطاها ولا بخل هي ردت عليه بالشحّ

ماقدر ينام ورجع ينسدح بالظلام وسمعها تخرج من الحمام ومشت بالظلام لين وصلت للكنبه وانسدحت عليها وهي تضم نفسها

لمست عمليتها بيدها وغمضت عيونها وهي ترجف

تحضن نفسها بنفسها وهي تتمني تنفتح لها كل الأحضان بهذي اللحظه

لكن منيف صدّها والكل صدّها برجوعها من الموت

غفت بدون تحس من تعبها وألم عمليتها وصحت على النور من اشتغل وناظرته وعقدت حاجبينها

تجوّل بالغرفه بعد ما صحي ولبس لبس دوامه

جلست بتعب وضمت الروب عليها ولفت تناظره ياخذ ساعته يلبسها وناظرت العطر اللي جابته له جديد متجاهل منه ومن باقي العطور بمفرده

وقفت بهدوء وفتحت شنطتها تسحب منها دواها وتخبيه بجيب الروب وتتقدم للحمام

خرج تاركها ونزل لاهله تحت:سلام

نوره ناظرته:معك الاخت ؟

هز راسه بالنفي وجلس:شلونك ابوي ؟

عقاب:حمدلله احسن

ساري:يالله شوي شوي ويرجع يمشي من جديد اليوم امي اخذته برا ومشى شوي

ثنيان ابتسم:حمدلله

شادن:عمي قوي وبيرجع يمشي من جديد ان شاء الله

ابتسمت نوره:ان شاء الله عدينا الكثير ياربي لك الحمد

لفوا من دخلت ملاك وهمست:سلام عليكم

مارد عليها احد ومشت تسحب كرسيها

نوره:صار كرسي سارا بنت جاسر

ناظرتها ملاك وكملت نوره:تبي قريب من جدها

هزت راسها ملاك تمشي لكرسي سارا ونطقت نوره:مكسوره رجله هالكرسي محد يقعد عليه

رفعت عيونها ملاك وابتسمت شادن وهي تاكل لان انعاد اللي صار لها مع ملاك الآن وهمشوها من الطاوله

ناظرت أصايل والبقيه ياكلون بهدوء ولحد التفت عليها وهزت راسها ملاك وناظرت عقاب اللي يناظرها

ومشت مبتعده عنهم وناظرت حمد اللي جالس فوق البلياردو ويلعب بالكور وابتسمت بهدوء

وناداها حمد ووقف يبغاها تشيله وهزت راسها بالنفي:ما اقدر اشيلك

لفت شادن:لا تطيح حمد

مسكته ملاك بحذر ولفت لسارا اللي وقفت جنبها تكلمها ونط عليها حمد وصرخت بألم تفلته وطاح بالارض وجلست بوجع وغمضت عيونها بقوه تتمسك بالبلياردو

وركضوا من بكى حمد بقوه وشاله جاسر بسرعه يناظره

رجفت من الألم وتلوّن وجهها باللهب من شدة الوجع وهي جالسه بالارض وتقدم ثنيان يوقف بخوف يناظرها

ماقدرت تتحرك من ألمها وعضت شفتها وهي مغمضه عيونها بقوه

وتقدمت أصايل بإستغراب:فيك شي ؟

نوره:شوفي حمد صار له شي تعور ؟

رفعت يدها ملاك تمسك جرحها وفتحت عيونها تتماسك وناظرها ثنيان ثواني وشدت على البلياردو بقوه توقف على حيلها

تعرقت من حجم كتمانها للألم ومن شدة المها كانت تشعر انها بتطيح ويغمى عليها بينهم

ناظرتهم ما تسمع لهم صوت ومشت تخرج بهدوء ولف يناظرها ثنيان ولف لامه اللي نطقت:فلتت الولد كان بينكسر راسه

جاسر ناظر حمد اللي يبكي وتنهدت شادن:خلاص حبيبي خلاص

لف ثنيان يناظر ابوه اللي جالس ورجع ناظر مكان ملاك وتقدم ياخذ جواله ويخرج من البيت

ركب سيارته وهمس:مستحيل

قفل باب سيارته وحرك السياره واخذ جواله وهو يسوق:هلا طلال شلونك ؟

طلال:بخير انت شلونك ؟ كيف صار الوالد ؟

ثنيان:حمدلله ، طلال اذا فاضي قبل تروح دوامك بغيتك تجي معي المستشفى

عقد حاجبينه طلال:ليه عسى ماشر؟

ثنيان:لا بس بغيتك بخدمه اللي تبرع لابوي ما انكشفت هويته لاحد لانه رافض والدكتور رافض بغيتك تجي وتدخل انت شغلك بالموضوع ببدلتك وبطاقتك

طلال حك جبينه ثواني:طيب اقابلك هناك

هز راسه ثنيان وقفل جواله وساق لين المستشفى

كله أمل انه مخاوفه وتساؤله واستغرابه يطلع غلط ، لانه مايبي ينصدم اكثر

'

شربت المويه وحطت دواها بآخر درج وغمضت عيونها تتذكر نظرات ثنيان لها ، شكواه وعتابه لها

تعترف انه ما ينلام ولأول مره توقف ضدها معاه

تبتعد عنه وتكابر لكن تتمسك في رضاه ، ماتقدر بدونه وتفقده وهو معاها ، وكل اللي عاشته بدونه نار ولَهب ماذاقت دفى من آخر شعور معاه

اخذت جوالها تجرب تتصل على منيف لكن مارد عليها

غمضت عيونها بتعب وقامت تخرج من الغرفه

دخلت الصاله ووقفت شادن وهي شايله حمد:عنده موعد تطعيم بنروح الحين

نوره:اي يالله استودعناكم الله

لفت شادن وناظرت ملاك:تبين شي خالتي ؟

نوره ناظرت ملاك وصدت:لا سلامتك

خرجت شادن ومرت من جنب ملاك وناظرتها ملاك وخرجت تاركتهم

ناظرت الصاله اللي يجلس فيها نهار وأصايل ونوره وتقدمت تجلس بهدوء وسطهم

وناظرت كل شخص جالس على جواله:عادي تسمعوني لو تكلمت ؟

رفعت عيونها نوره:مانبي نسمع شي زياده ، مرينا بأيام سوداء ماتدرين عنها انتي مو ناقصنا شي زود

ملاك اخذت نفس:صح وانا اسفه على تقصيري والمفروض اتصل

لفت أصايل وعقدت حاجبينها:تتصلين ؟ منجدك ملاك ؟ انتي باقي تشوفين روحتك لشغلك بهذا الوضع عادي ؟

نهار:انا ظنيتها من اي احد الا انتي

ناظرتهم ملاك ولفت نوره:لو سمحتي مانبي نسمع زود

سكتت ملاك ورجعت ظهرها لورا تناظرهم يصدون عنها وبلعت ريقها بهدوء

'

دخل ثنيان وتقدم من شاف طلال واقف ببدلته العسكريه وابتسم:ارحب

سلم عليه طلال:كيف الحال ؟

ثنيان:حمدلله ، مشينا نشوف الدكتور ؟

هز راسه طلال ومشى ثنيان لين مكتب الدكتور ودق الباب ودخل

ورفع عيونه الدكتور وهو يكلم وهز راسه له ودخل ثنيان ودخل خلفه طلال وعقد حاجبينه الدكتور وقفل التلفون:اهلاً

ثنيان لف لطلال وناظره طلال:انا جاي بخصوص موضوع مهم واحتاج اطلّع على ملف

الدكتور:في مشكله ؟

طلال:لا ابداً بس الموضوع سرّي ونحتاج نمشيه سرّي

الدكتور:مافهمت ، في ضرر على عملي ؟

طلال:لا ابداً شي يخص المريض

الدكتور ناظر ثنيان وناظر طلال وجلس طلال:ملف المتبرع لعقاب بن جرّاح اذا تذكره

سكت الدكتور يناظر طلال وهز راسه طلال له:صدقني ما يجيك ضرر

اخذ نفس ثنيان وجلس قدام طلال وناظرهم الدكتور:اعطيكم هويته يعني ؟

طلال:لا اطبع لنا بياناته كامله

لف لجهازه الدكتور ولف طلال لثنيان اللي ينتظر وطبع الورقه ومدّها لطلال واخذها ثنيان بسرعه

نزل عيونه على الإسم بالانقليزي :ملاك مساعد

وجمد وجهه بصدمه يناظر البيانات ونطق الدكتور:تعرفونها اصلاً

لف ثنيان للدكتور بذهول ووقف والورقه بيده وخرج

مشى خارج من المستشفى وركب سيارته وناظر الورقه من جديد

يقرأ اسمها يتذكر رجعتها وروحتها اللي كانت بنفس الفتره ، كيف ما فكر وخمن ليه ما سأل وتحرّى ؟ ليه ماكان معها ؟ ليه خلاها تسوي كذا لوحدها ؟

رفع راسه بقهر:اهخ ملاك اهخ

اخذ نفس طويل ورجع يقرأ الورقه وهز راسه بعدم تصديق ، كيف قدرت تسكت وتعيش اتهاماته وكلامه معها ؟ كيف تجاوزت الغربه اللي ذاقتها من اهله ؟

شغل سيارته وحرك والورقه بيده ومشى دربه كله لين البيت ووقف ونزل وقفل سيارته وهو جامد مصدوم ومستغرب ومقهور

دخل البيت ومشى للصاله ودخل وناظر نوره ونهار وأصايل وناظرها جالسه ولفت له تناظره وتقدم:هذا وشو ؟

رفعوا عيونهم لثنيان اللي رفع الورقه وعقدت حاجبينها ملاك بخوف وتقدم ثنيان لها وحط الورقه قدامها ورفع صوته:هذا وشو ؟

ناظرت اسم المستشفى واسمها ورفعت عيونها بذهول عليه

وناظرتهم نوره:وش السالفه ثنيان ؟

ناظر عيونها ثنيان وهز راسه بصدمه يناظرها ورجفت توقف:امش ندخل

مدت يدها بتاخذ الورقه وابتعد ثنيان:ماراح نطلع من هنا

ملاك رفعت صوتها:ماراح اتكلم هنا ، وماراح تتكلم هنا

ثنيان:لا انا ابيهم يعرفون ويسمعون هذولا اللي اوجعك اختلافهم وزعلك تغيرهم عليك

نهار:شسالفه ثنيان ؟

ثنيان ناظر ملاك وغمضت عيونها من مشى وحط الورقه بقوه على الطاوله بالنص:هي اللي تبرعت لأبوك

جمد وجه أصايل ولفت نوره بصدمه على ملاك

بلعت ريقها ملاك وهي صاده عنهم وتقشعر جسمها من الشعور اللي داهمها ونظراتهم لها اللي تحس فيها

ورجع يضرب الطاوله ثنيان بقوه بتكرار بقهر ووقف وهو يتنفس من غضبه وناظر ملاك اللي صاده:هي

لفت عليهم تناظرهم ولفت لثنيان اللي واقف يناظرها مشتعل من ناره أمامها

واخذت نفس وتقدمت لهم:زي ما دخل الموضوع بينكم ماراح يطلع من بينكم

نوره:انتي منجدك ؟

ملاك لفت عليها وناظرتها بصدمه نوره:انتي اللي تبرعتي ؟

ملاك:ولا ابي اشوف هالنظرات وكأني سويت إنجاز

صد بتعب ثنيان من كلامها وهو مصدوم

وناظرتها أصايل:ليش ما علمتينا ؟ ليش ملاك ليش ؟

ملاك:لان مابي احد يدري ما ابي احد يدري بهالدنيا

ناظرتهم بحده كلهم وتوترت تاخذ الورقه من على الطاوله وشققتها ورمتها:ماراح ينفتح الموضوع

ناظروها بصدمه ولف ثنيان عليها وهزت راسها تحذرهم:محد بيدري

لفت نوره بصدمه على نهار اللي واقف يناظرها

ومشت ملاك تخرج من عندهم ودخلت الغرفه تتنفس بصعوبه وتوتر

ومسكت جبينها تمشي بالغرفه ولفت من دخل ثنيان وقفل الباب بقوه وتقدم لها:الحين تشرحين ليش ؟

ملاك ناظرت عروق جبينه من عصبيته وعيونه المشتعله وهزت راسها بالنفي:لانه هذا اللي كان لازم يصير

رفع ذراعه بعصبيه يرفع صوته:ليش تطلعيني من عندك ؟ ليش ما تعلميني ؟ ليش تصديني ؟

ملاك تقدمت تصرخ بوجهه:مابي تناظرني بإمتنان طول الوقت ما ابي ، ولا ابي هالشي يأثر على موج ولهب

رفعت سبابتها على صدره:عشان هذا ان مال يميل عشاني لهب مو عشاني تبرعت لابوك

ناظرها ثنيان بجنون وناظر عيونها اللي امتلت بموج عيونها وكملت ملاك:عشان عقاب اللي دخلني هنا وخلاني اعرفك واكون وحده من عايلته يستاهل روحي واعطيه

هز راسه ثنيان بعدم تصديق ونزلت دموع ملاك بثبات وهمست:عشان اسدد ديني

ثنيان:اي دين ملاك اي دين ؟ انتي عطيتيه جزء من جسدك عن اي دين ؟

ملاك:وهو عطاني ثنيان وعطاني ملاك وعطاني افضل حياه

اخذت نفس ترجف وتمنع غصتها وعقد حاجبينه ثنيان يناظرها بذهول وبكت تهز راسها بالنفي:أبيع كل عمري وأشتري ضحكة هالعائله بروحي

سكت وبلعت ريقها ملاك تكمل:حتى لو إني بيوم بكون برا برواز صورتهم ، انا بكون سبب على الأقل انهم مبسوطين

ثنيان هز راسه بنفي بتكرار:تضحين ؟

ملاك:أضحّي حتى لو اني ضحيت وأنخذلت حتى لو اني اكثر شخص عطيت وما اخذت ، عند أبوك التضحيه واجب ، ما خسرت الا ربحت بوحدتي قلب شجاع

ورفعت حاجبها ملاك تناظره امامها مصدوم:وعشان لو كلهم كذبوا خيري وصدقوا شرّي ، اكون وحدي راضيه

سكت ثنيان وهمست ملاك:وعشان اتعلم ما اقول اوجاعي للموج عشان الموج قادر

اشتعل صدره قهر من نظراتها وبللت شفايفها تمنع دموعها وناظرت عيونه:وعشان ابي أصدق انك انسان وتقسى عليّ مثلهم وتطعني بخنجرك مثل باقي الشامتين

صدت تتماسك وترفع صوتها:وعشان أنا أتعود اوقف لوحدي ولا أتعود عليك ، عشان أنا أبقى طول عمري ملاك بنت مساعد ماني لَهب موج ، وعشان اتعلم من طيحتي وارجع اوقف قدامكم كلكم من جديد

تقدمت له تناظر عيونه:عشان ما يبقى لي دين عند احد ، وعشان اسكّت الشامتين

رجفت تحاول ما تبكي وصدت تدور بالغرفه وهي ترجف:وعشان ملاك اللي ركضت طول دربها لوحدها تموت لوحدها

اخذت نفس متقطع من صوت غصتها ولفت عليه وبكت ماقدرت

وميّل راسه ثنيان يناظرها بتعب من شكلها وعضت شفتها ملاك تبكي وهزت راسها بالنفي:ما خليتك

نفث زفيره من صدره بقهر:ملاك

وتقدم لها يحضنها وبكت ترفع يدينها على كتوفه من انحنى لها

غمضت عيونها تبكي وشد عليها ثنيان يعقد حجاحه بتعب يلمس خصرها وجرحها

بلعت ريقها تتماسك ورفعت كفوفها لكتوفه تبعده ولا ابتعد ، تألمت وغمضت عيونها بتعب:اتركني

ثنيان:وأنا جثه

نزلت يدها ليدينه اللي على خصرها وظهره وابتعدت عنه ورفع راسه وهو متمسك بخصرها وناظرها من قريب

آثار دموعها وصوت انفاسها من بكاها ونظرات عيونها له

هز راسه يناظرها وهمس:بموت ندمان على اللي صار

ماردت عليه ملاك تناظره ونطق ثنيان:ممتلي فيك كل ما قلت ابعد ثنيان رجعت ابتديك من جديد ، ذقت الغرق مرّه وأنا بعمر صغير وذقت الغرق الحين وأنا بعمر كبير

سكتت ملاك تناظره وهي ماسكه كفوفه اللي على ظهرها وكمل ثنيان:تعلمين وتدرين ويدرون العالم كله بإني أحبك

غمضت عيونها بقوه من سمعتها وفلتت كفوفها من على كفوفه من تأثير اعترافه لها وفتحت عيونها تناظر عيونه

ثنيان:من أعلى خصل شعرك لأدنى دنَاك ، وعليّ العتب ليه من أول مره شفتك ماقلت أحبك كان المفروض من أول مره عرفتك أناديك بأحبك ، حُب مرهون للأبد موجود بالدّم على مسامات جلدي ومتوسط نخاعي ، أحب شرّك قبل خيرك أحب نارك قبل دفاك ، واللي يشوف الجمر عكس اللي وطاه

رفع راسه بتعب يتنهد ورجع ناظرها من قريب:اقسم بالله ضامي الماء وقلبي على الماء وقلب الماء على شطك ، تناثرتي فيني نثر السمّ بمجرى الوريد ، اشعلتي كل شي كان ساكن داخلي

نزلت دموعها تناظر عيونه ونظراته لها وكمل ثنيان يناظر عيونها:مادريت ان الموج دايم قادر لكن اللهب قادر بعد ، لمستيني واحترقت وإلمسيني احترق دامك ضمادي ، عشقت انا الآلام منك ومن عشقي أنا حتى الدواء أردّه ، تفيضين من عيوني

نزل عيونه لثغرها وعنقها ورجع يناظر عيونها:كنت بإنتظار دايم معك ، بإنتظار المية قُبله وإنكسار كبريائك ورضا الكون عنا ، انتي عمرك ماكنتي شرّ انتي بس طالعتي بالمرايه الغلط طالعيني أنا عمري ما بخليك شرّ

هز راسه يناظرها:أحبك في كل الخصام وفي كل وقت عصيب وفي كل وقت حسيتي اني ما اهتم بك ، أحبك ياجنون العاقل

سكت ثواني وكمل:أصيح بإسمك وأنا راضي ، احكميني واطلبيني وافقديني واسألي عني ودوريني وموتي فيني

هز راسه:بس موتي فيني مثل ما أنا أموت فيك ، راضي والله راضي سلميني للظلام ان لوّحت يمنى نهاري وعاتبيني لين احس اني من الأعذار عاري واتركيني للسهر معاك بس معاك

ناظرها ساكته تبكي بدون صوت وتناظر عيونه فالته نفسها بين يدينه ونطق:تكلمي قولي أحبك قولي عشقتك قولي حرام أجفاك ، وأمانه فكيني من كل عذر وقولك ظروفي ، مابيني وبينك بعد ظروف بيني وبينك أقوى منها ، إنتي أدفى ماورا صدري وإنتي آخر عهد بحياتي ، مستعد أبيع دنياي القديمه باللي فيها ، إنتي دنيا ثانيه ما إنتي اضافه

بلع ريقه من نظراتها وقربها له وكمل:روحي علمي الصبح او الليل كان الليل ما يدري علميه ان انتي اللي طولتي نعاسي ، وأنا صبور والله صبور ولكني وصلت لآخر صبري على وصالك

شدها أكثر له وناظر ثغرها وهمس:حيّ العطش لو تمدين الوصل في كاسك

رفع نظره لعيونها:جيت لك لا ترديني

غمضت عيونها من انتهى من كل كلامه ومشاعره اللي نثرها ملح على جروحها على مخاوفها خذلانها وأقفال أبوابها

فتحت عيونها له ماتقدر ترد بحرف واحد بعد كل هذا الكلام والشعور ورفعت كفوفها على صدره وهمست:عطني وقت

رفعت عيونها عليه وهزت راسها بتعب:بس وقت

ناظر عيونها وهز راسه وفلت يدينه عنها ورجع بخطواته لورا وناظرته ملاك يمشي لوراه ويناظرها وخرج يتركها

جلست وبكت بتعب تبي توقف هنا ، هنا عند اعترافه وكلامه ومشاعره وما تكمل شي اكثر

تبي تموت بعد كل هذا الكلام وتستريح لانها ما تتخيل النهايه بينهم او الجاي

فتحت الدرج وسحبت منه ورقه وقلم بيد راجفه وكتبت اللي ماقدرت تقوله له ونزلت دموعها على الورقه وهي تكتب

-

موج ولَهب ❤️‍🔥💙

خرج نهار من البيت وهو ماسك جبينه ومتكي يناظر الطريق بصدمه وذهول من ملاك

لف من دق جواله واخذه يرد:هلا

منيف:وينك ؟

نهار اخذ نفس:أتجوّل

منيف:تمرني والا أجيك؟

نهار:انا قريب انا بجيك

قفل منيف واخذ نفس بضيق وقام يغير ملابسه واخذ جواله من دق ورد:طالع

خرج ومشى لسيارة نهار وركب جنبه وقفل الباب ولف نهار:ليه ما علمتني ؟

عقد حاجبينه منيف:عن ايش ؟

نهار:عن ملاك

جمد وجه منيف يناظر نهار وبلع ريقه:وشفيها؟

نهار عقد حاجبينه:ماتدري؟

منيف:عن وشو ؟ تكلم

نهار تنهد وحرك سيارته:ياخي احسبك تدري اقسم بالله

منيف:وش صاير ؟

نهار بلل شفايفه بهدوء:ملاك تبرعت لأبوي بكليتها

جمد وجه منيف بصدمه وميَل راسه:وشو ؟

نهار:اي والله ولا كانت مسافره كانت بالمستشفى نفسه

منيف رجع ظهره للخلف ومسك راسه بصدمه وناظر طريقه نهار:وماتبي احد يدري بس ثنيان اكتشف الموضوع

رفع راسه منيف يناطر الطريق بصدمه وحك جبينه نهار ولف من دق جواله وعقد حاجبينه من الرقم الغريب:هلا

:عفواً اخت نهار ؟

عقد حاجبينه:اخت نهار ؟

:ايوا عندنا فستان بإسم نهار عقاب والا غلطانه بالرقم ؟

غمض عيونه بقوه يتذكر انه قبل تعب ابوه دخل على بوتيكها وطلب فستان بإسمه وهز راسه:اي اي صح

:طيب وقت التسليم من العصر لبعد العشاء

هز راسه نهار:طيب شكراً

قفل جواله ولف منيف اللي يحاول يتصل على ملاك:اذا تبي نروح للبيت احسن تشوفها

منيف:اي اي بالله نهار

هز راسه نهار يمشي لبيتهم ودخل وتأفف من شاف سيارة بندر وهمس:وقته ذا

عقد جاجبينه منيف:من ذا ؟

وقف نهار بالمواقف:هذا اللي بيلوي ذراع ابوي بأصايل

لف منيف بإستغراب:وش دخل أصايل ؟

نهار لف لمنيف:يبي ينتقم من اللي سواه ثنيان بجواهر بإنه يخطب أصايل لولده قدام الناس

جمد وجه منيف وهمس:وش هالليل عندي ياربي ؟

نزل نهار وفتح بابه منيف ولف يشوف بندر اللي لابس بشته وخلفه راشد ولده وظل يناظر راشد وكأن في احد سبقه لحلمه وبيتلاشى حلمه قدام عيونه بلحظه

تقدم نهار:حياكم الله

مشى بندر:عسى ابوك مو تعبان نقدر نشوفه

نهار:حياك حياك

فتح المجلس لهم ودخلوا يجلسون ودخل منيف وناظرهم وجلس نهار وهو يتصل:ساري بلغ ابوي انه عنده ضيوف

قفل جواله نهار وناظر راشد وبندر اللي جالسين قدامه

دخل عقاب بعد مدّه على عكازه وابتسم بندر يوقف له:افا عكاز يسند العقاب

هز راسه عقاب وساعده ساري يجلس:الله يسلمك

بندر:حمدلله على سلامتك

رفع عيونه ساري وجلس يمين ابوه ودخل ثنيان وعقد حاجبينه يناظرهم:سلام عليكم

رفع عيونه راشد بحده على ثنيان وجلس ثنيان يسار عقاب وناظر بندر

عقاب:جاي لوحدك يابندر غريبه

بندر:اي والله جيت أكمل ماوقفنا عنده ما عطيتنا كلمه

لف منيف بخوف يناظر عقاب وبلع ريقه ولف عقاب يناظر منيف ثواني ولف لبندر:اي موضوع ؟

لف ثنيان على ابوه وضحك بندر:قالوا تعبت كليتك ماهي ذاكرتك

ساري:انا اقول ثمّن كلامك قبل تقوله افضل

بندر:لحد يتدخل بيني وبين عقاب

عقاب مسك كف ساري وهز راسه لبندر:عطنا علمك

بندر:وقفنا عند رضاي ياعقاب وقلت راشد لبنتك نسدّ اللي حصل

نزل عيونه منيف يحترق ويسمعهم ومسك الفنجان اللي مدّه له العامل وبلع ريقه يشد على الفنجان

وهز راسه عقاب:لو ما عطيت رجّال كلمه وقلت له تم ماكان رديتك ياراعي الأنساب

عقد حاجبه نهار ولفوا العيال على عقاب بإستغراب

ولف منيف يفهم من وجيههم ان ماعندهم خبر

وعقد حاجبه بندر:وش يعني ؟

عقاب:يعني سبقك لها رجّال وهذا هو قاعد قبالك

جمد وجه منيف ولفوا عليه جميع بصدمه وناظرهم منيف

بندر ناظر منيف ولف لعقاب:تحسب هذا خلاصك يعني ؟ تقول للناس بغيت اعطي بندر لكن سبقه واحد ؟

عقاب:هذا الصدق ولكن تعبي عثر طريقهم والا كتب كتابهم قريب ويالله دام انت اول من عرف الله يحييك

بندر وقف وهز راسه بالنفي:لا والله ماتمشي عليّ ياعقاب واعلن لناسك وجماعتك ان بندر ما اخذ حقه للحين

سكت عقاب يناظره وخرج بندر ووقف راشد وناظر منيف بحده ووقف يخرج مع ابوه

ولف نهار على ابوه:وش صار الحين ؟

عقاب ناظر منيف اللي يناظرهم مرتبك ومصدوم:اعذرنا رمينا عليك علومنا اعتبره ماصار

ثنيان ناظر منيف اللي بلع ريقه:وش اللي ماصار ؟

سكت عقاب وبلل شفايفه منيف بخوف ، خوف سكنه واستوعب انها ممكن تروح عنه ونطق:انا ابيه يصير

لف نهار بصدمه على منيف ونطق ثنيان:وش تقول انت ؟

عقاب:وش اللي تبيه يصير ؟

منيف ارتبك من نظراتهم له:يعني هذا اللي صار الحين ، ان بنتك الله يطول بعمرك تصير من نصيبي

نهار:منيف وش تخربط انت ؟

منيف ناظر عقاب اللي نطق:كذا تخطب بنتي ؟

منيف جمد وجهه يعدل جلسته:لا والله ادري اني المفروض اكلمك بوقت أنسب لكني الحين عطيتك كلمه ولا رديتك حتى لو انها ماهي مقصوده وبجيك وأخطبها منك بالشكل اللي يرضيك

ثنيان لف لعقاب بصدمه وناظرهم ساري:وش هالفوضى ؟

عقاب:اي لا عرفت كيف تخطب تعال اخطب

سكت منيف واستند بقوه عدى عكازه عقاب يوقف ومسك ذراعه ساري يساعده وخرجوا

ولف نهار:تستهبل منيف ليه ماعندي علم ؟

منيف:صار عاد

رفع عيونه منيف لثنيان اللي يناظره ووقف ثنيان وخرج من عندهم

اخذ نفس منيف بوهقه وشد على ياقته بإختناق

'

دخل ثنيان خلف ابوه وتقدم عقاب يدخل للصاله ورفعت عيونها نوره لثنيان وصدت لعقاب:كان ارتحت بالغرفه لين العشاء يجهز

عقاب:لا تعبت هناك مامن تعب هنا ، حوالينك

ابتسمت بهدوء نوره ورفعت عيونها لثنيان ورجعت تناظر عقاب:وش تبي اجيب لك ؟

رفع عيونه عقاب عليهم:شاهي واقعدوا جميع كل واحد وزوجته

ابتسم ساري:ابشر ابوي اهم شي انت استريح

نوره:اجل بنادي أصايل انا

وقفت ومسكت ذراع ثنيان وخرجت معه وابتعدت وناظرته:وش قالت لك ملاك؟

ثنيان رفع كتوفه:ولاشي

نوره:ثنيان ماني مصدقه للحين ليه خليناها لوحدها ؟ من كان معها طيب ؟

ثنيان:محد

نوره غطت فمها بقهر واخذت نفس:وانا زعلتها زعلتها كثير ، يبي لي اشتري لها هديه واراضيها

ثنيان:مازعلت منك

نوره:كيف مازعلت ، والله ذوقتها السمّ مني

ثنيان:اهم شي ابوي لا يدري ويتعب الحين

نوره:لا لا ما بقول وحرّصت على نهار وأصايل ما يعلمونه ، لكني أخجل منها والله

ثنيان سكت وصد واخذت نفس نوره وطلعت فوق

دقت باب غرفة ملاك ولفت ملاك ودخلت ، اخذت نفس ملاك من شافت نوره وصدت

تقدمت نوره وبلعت ريقها:ملاك

رفعت عيونها ملاك:لا تكفين مابي اشوفك تعتذرين لي وتدورين كلام ، كنتي معذوره وقتها وتعبانه وادري

جلست نوره وناظرت ملاك وهمست:ليش ما علمتيني ملاك ؟ ليش يا أمي ليش ؟ عقاب بعد عمليته ماقدر يسوي شي كيف قدرتي لوحدك ؟

ابتسمت ملاك بهدوء:ما عرفتيني للحين ؟

ناظرتها نوره بذهول:انتي اقوى بنت شفتها بحياتي واللي خلفك خلّف خير هالدنيا كله

تلاشت ابتسامة ملاك تناظر نوره وشدت على كفوفها نوره:بستامحيني صح ؟

عقدت حاجبينها ملاك بضيق ولفت لنوره:مازعلت عليك بيوم انتي عطيتيني شي محد عطاه من قبل ، بس تكفين تكفين دايم اسمعي مني

نوره شدت على كفوف ملاك:انتي بنتي وانا اعدل اغلاط عيالي بيدي ، خطاك بعيوني صواب كنت ابيك جنبي بوقت طيحة عقاب ما ظنيت انك جنبنا كلنا بهذاك الوقت

اخذت نفس ملاك:مابي احد يدري

هزت راسها نوره وابتسمت:قومي انزلي معي

وقفت ملاك تنزل معها

'

دخل ثنيان وجلس مع عقاب ودخل جاسر وعياله وشادن وابتسم عقاب من تقدم جاسر:سلموا سلموا

تقدموا يسلمون وباسهم عقاب وجلسوا جنبه

ورفعت عيونها شادن لثنيان اللي صاد عنها يناظر ابوه

ودخلت أصايل وابتسمت:ابوي

رفع عيونه عقاب:فرحتي

تقدمت له وباست راسه:شلونك اليوم ؟

عقاب:احسن احسن اقعدوا حواليني

لفت أصايل وناظرت ثنيان وجلست قدامه ودخل ساري وخلفه جنى وابتسمت:اخيراً بنتجمع زي قبل

شادن ابتسمت:اي حمدلله كذا اكتملنا ناقصنا خالتي بس

عقاب:وملاك

رفع عيونه ثنيان من لف عليه عقاب ونطقت أصايل:امي بتناديها

سكتت شادن ودخلت نوره ودخلت خلفها ملاك ورفع عيونه ثنيان وناظرته ملاك بهدوء

رجف قلبها وهي تناظر نظراته لها ولفت على نوره اللي ابتسمت لها:تعالي ملاك

تقدمت ملاك لين جلست جنبه واخذت نفس من حست بقربه من جديد وبلعت ريقها

ولف عقاب:شلونك ملاك ؟

رفعت عيونها وابتسمت:حمدلله المهم انت

لفت أصايل تناظر ثنيان وهز راسه عقاب:الحمدلله ، نهار بالمجلس مع منيف اخوك

لفت أصايل على طاريه وهزت راسها ملاك:شوي واقوم اشوفه

رجعت ظهرها لورا وحضنت كفوفها ببعضها بتوتر

بدوا يسولفون مع بعضهم وهي ساكته وساهيه وتقدم ثنيان بهدوء:ابوي بغيت اقاطعكم ماعليك أمر

سكت عقاب ورفعت عيونها ملاك عليه ونطق بهدوء ثنيان:وقدامكم كلكم ابي اعتذر لزوجتي ملاك

لانت ملامحها وابتسمت نوره وكمل ثنيان:يمكن ضغطت عليها من الوضع اللي كنا فيه وهي معها حق بشغلها وإنشغالها وادري انها حتى بغيابها موجوده بيننا وأبي زوجتي ملاك تكون مقدّره من الكل

لف يناظر شادن وجاسر ورجع لف لابوه من جديد:ومابيها تحسّ بالغريبه وهي بيننا

رمشت بهدوء تناظره يتكلم بهدوء ولف عليها ثنيان يناظرها ولف لابوه اللي نطق:بنتي ملاك ولحد يقدر يقلل من تقديرها وهي ببيتي

لف ثنيان على ملاك ورفعت راسها ملاك لعقاب وابتسمت بهدوء تخفي دموعها

وهزت راسها نوره:وان شاء الله ان ملاك ما تزعل مني انا بعد

هزت راسها بالنفي ملاك بربكه:معذوره دايم انتي

ابتسمت بإمتنان نوره لملاك وبللت شفايفها ملاك بهدوء ولفت لثنيان اللي يناظرها ومسكت كفه تشد عليه بقوه وهزت راسها:شكراً

كانت الكلمه الوحيده اللي قالتها بعد كل كلامه معها وما يعرف ليش سمعها أحبك يمكن من فايض شعوره ؟

سكت يناظرها وشدت على كفه ولفت عليهم وتقدمت العامله تصب لهم شاهي وناولتهم فناجينهم

ومدت الفنجان لملاك ولا هان تفلت كفها من كفه ومدت كفها اليسار تاخذه ولا تفلت كفه ابد

لف عليها ثنيان يحس بكفها اللي شاده عليه بقوه واخذ فنجانه باليمين ورجع ظهره لورا

ناظرتهم شادن وكيف تبدل حالهم مع ملاك وعقدت حاجبينها بإنزعاج ولفت على جاسر اللي يتكلم مع عياله

أصايل:اوكيه دام الكل موجود الا نهار شرايكم نروح نسهر يوم سهره حلوه

عقاب:انا معك وين ما تبين

ابتسمت أصايل:بس تقوم على حيلك بالأول

عقاب عض شفته ورمى عكازه:أنا طيب وين تبين ؟

ضحكت أصايل:نحضر حفله زي زمان

ساري:ياليل ابو جوك أصايل نشغل اغاني بالبيت اسهل

عقاب:نروح نروح

أصايل:بس ممنوع احد يعتذر

جاسر:أصايل تكفين

أصايل:ابوي !

عقاب:ممنوع

ابتسمت أصايل ولف عقاب عليهم كلهم:الكل

ابتسم ثنيان يهز راسه ولف عقاب:من الفنان ؟

أصايل:تامر حسني

عقاب:الكل يعتذر

ضحكوا وضحكت ملاك ولفت على ثنيان تشوف ضحكته وتحس بدفى كفه ، كان أفضل مشهد تتابعه ، سعادته

ودها تشتري باقي عمرها وتخلي هذي الضحكه عليه دائماً

مظهره أفضل مظهر شافته فيه ، وأفضل ضحكه سمعتها بحياتها

ابتسمت بهدوء تناظره ولفت من نطق عقاب:محمد عبده وش قصرّ ؟

نوره:يووه عقاب البنت تبي الدلع والاغاني وش لها بمحمد عبده

عقاب:ما نبي اجل

تأففت أصايل ولفت نوره:روحي مع زوجك ان شاء الله

أصايل:اذا جاء بروح معاه وبشوف بعدين دموعكم وراي تقولون ياليت رحنا معاها

سكت عقاب ثواني ولف لساري وثنيان اللي ناظروه

وهزت راسها أصايل:اوكيه الاقي لكم حفله لمحمد عبده مو مشكله

ابتسمت أصايل ولفت ملاك تناظر عقاب وكيف تشافى بوجوده بينهم وعرفت ان دواء الشخص وضماده ،

- عائلته -

شرب من الشاهي عقاب:وبنطلبه يغني لنا سرّ حبي فيك غامض

ولف لنوره يغني لها وهو مبتسم:سرّ حبي ما انكشف

جاسر:سلمك الله ابو ساري هذا مو محمد عبده هذا ابو بكر سالم

ضحكوا ولف عقاب:الفن واحد مابينهم فرق

نوره:تذكرها ؟

لفت عليهم:اول اغنيه اهداني اياها بعد الزواج

ابتسمت أصايل:رومانسي العميد عقاب

ضحك عقاب:ايش خلاني اعشق فيك والعشقه تلف

ابتسمت ملاك لانه يدندن ويغني

كان الجو دافي حتى فنجان الشاهي بيدها مابرد من دفى القعده بينهم ، من دفى كف ثنيان بيدها وابتسامته وراحتها بينهم

ولف عقاب يغني ويناظر ثنيان:فوق شاطي البحر حيث اللول يوجد والصدف واللقاء قد كان صدفه ؟

ابتسم ثنيان وكمل:لا جزى الله الصدف

ضحك عقاب وابتسمت ملاك تناظرهم واخذت نفس عميق وتنهدت ولف عليها من حسَ بتنهيدتها وناظرته ملاك وهي مبتسمه وابتسم بوسع ثغره

كانت أفضل هديه هداها لملاك ، عائله

لف عقاب لنوره يغني لها:إنت تحفة صاغها الرحمن من احلى التحف ،إنت في الدنيا قضيه ما تحملها ملف ،وانت احلى اسم في قلبي رباعي الحروف

ابتسمت له نوره وهي ماسكه فنجان شاهيّها

-

لف منيف على نهار:نهار يرحم ابوك لا تقعد تطالع فيني كذا

نهار:مصدوم

منيف:وشو مصدوم ؟ ترا خطبتها وش الصدمه ؟

نهار:اي خطبتها يعني تبيها يعني تتزوجها وتصير زوج أصايل

منيف:وانت ماودك؟

نهار ابتسم بصدمه وضحك منيف:على اساس الحين ابوك وده اصلاً ؟

نهار:الحين اذا طلعت مع أصايل تطلع معنا بعد ؟ ابوك يالبلشه

منيف ابتسم من نهار وكمل نهار:لا انا ماني موافق

منيف:ادري لكن مدري ليه تكلمت وفتحت حلقي

نهار:ياخي ابوي بيوافق وأصايل توافق بس انا لا

منيف:دام أختك وابوك موافقين شعلي فيك ؟

ضحك نهار:افا افا يامنيف

رفع عيونه منيف من دخلت ملاك ووقف:ملاك

ابتسمت ملاك له ووقف نهار:والله مابغيت اقوله

عقدت حاجبينها ملاك ولفت لنهار بصدمه

منيف:ليه ما علمتيني ؟

ملاك:كفو نهار كفو هذا وانا قايله لحد يدري

نهار:قسم بالله احسبه يدري

تنهدت ملاك ولف منيف لها وتقدم:قعدتي لوحدك ؟

هزت راسها ملاك:لا وخلاص منيف لا تفتح الطاري

منيف ناظرها ومشى نهار يخرج من عندهم ولفت ملاك من نطق منيف:تعرفين وش سويتي ؟

ملاك بلعت ريقها وهزت راسها:اعرف ومو ندمانه

منيف:ليه دايم تضحين بإسراف ؟ كل حياتك تضحيه لغيرك ، متى تضحين لنفسك ؟

ملاك سكتت وتقدم منيف وهمس:ضحيتي عشان منصور والحين ضحيتي عشان ثنيان واهله

ملاك:وما خسرت بالثنتين

منيف هز راسه بالنفي:ليه تبين تتعبيني معك ؟ وتخوفيني عليك ؟

ملاك تقدمت ومسكت كفوفه:لاني ما ابيك تخاف اكثر انا اعرف وش اسوي ولا ابي احد يعلمني ويحذرني

منيف:عشانك ملاك عشانك

ملاك ابتسمت:صدقني مو ندمانه ولا يخطر ببالي هالموضوع ابد

منيف:جرحك بيبقى على خصرك لين الممات

ملاك:شارة ضميري

سكت منيف وشدت على كفوفه ملاك:وحشتني اصلاً

ابتسم لها منيف وبلع ريقه من تذكر اللي صار وسكت ما يقدر يفاتحها بالموضوع ابد

'

خرج نهار يناظر ساعته ومشى لين مكانها وابتسم يشوفه مفتوح ووقف سيارته ونزل

دخل ولفت عليه وابتسم من لقاها وترسم مع زبونه ومن شافته سكتت

لف للي واقفه عند الكاشير:طلبية نهار عقاب

هزت راسها ومشت تدخل المستودع ورفعت عيونها غلا تناظره ونزلت عيونها تنشغل عنه وابتسم يشوفها مشغوله تتجاهله

وخرجت العامله:استاذه غلا مالقيت فستان نهار عقاب

رفعت عيونها غلا على نهار ومشت للكاشير تفتح الفواتير وابتسم نهار:نهار عقاب

غلا:سمعت

لفت للعامله:شوفيه في المستودع

مشت العامله ولفت غلا:هالمره اختك زبونتنا ؟

نهار ابتسم:لا والله نهار بكبره

سكتت غلا ثواني وعض شفته نهار:ضريبة ان اسمك ما يحدد جنسه

صدت غلا من جابت العامله الفستان واخذه نهار:نفس المواصفات ؟

غلا:وش مواصفاتك استاذ نهار ؟

نهار:أندر قطعه وأحلاها وأغلاها ، بس عجبني تناديني استاذ

رفعت حاجبها غلا:تستاهل راعيتها

ابتسم نهار:بخطب قريب وبشاور على خطيبتي تلبسه

غلا:بتقول قصة حياتك يعني ؟

نهار:اذا مهتمه تسمعينها

غلا:لا

ابتسم نهار وناظر الفستان المغطى ولف لها:الحساب

نزلت عيونها للكمبيوتر غلا وطلع جواله نهار وهو يناظرها ورفعت له يحاسب وحط جواله يدفع ابل باي

وهزت راسها بهدوء:لبس العافيه

نهار:الله يعافيك

مشى يخرج وابتسم يحط الفستان بالخلف ويلف يناظرها بالمحل وركب سيارته وحرك

'

دخلت الغرفه وشافته يكلم ولف عليها من انتبه

وارتبكت تقفل الباب خلفها وتدخل تعلق عبايتها وتجلس قدام مرايتها تناظر انعكاسه

كان يتكلم بالانقليزي وعيونه عليها ، نزلت عيونها تنزل مجوهراتها وساعتها

وفتحت الدرج الاخير تاخذ دواها وهز راسه ثنيان يتكلم ويناظرها

وناظرت الورقه اللي كتبتها وقفلت الدرج وصدت بعيونها من قفل ووقف

واخذت نفس تلهي نفسها عنه وتقدم لها ثنيان وحط يدينه حوالينها وهي جالسه وناظرها بالمرايه من رفعت عيونها تشوف انعكاسه

وهز راسه ثنيان:ماقلتي غير شكراً

بلعت ريقها تصد عنه بعيونها:مستعجل تسمع جوابي ؟

ثنيان نزل عيونه لعنقها ورفع كفه يشيل شعرها عن عنقها:مستعجل

رجفت ترفع عيونها من حست فيه يلمس عنقها وبلعت ريقها من اصابعه اللي يمررها على عنقها ويشيل شعرها عنه

يناظر عروقها بوضوح ، خضارها وجذورها ورفع عيونه عليها بالمرايه:مستعجل واجد

بللت شفايفها بهدوء:ما عرفت أجوبتك عشان نوصل لهنا

ثنيان هز راسه:اعرف والجواب الوحيد اللي ماعرفته ما يهمني ، ليش سرقتي ؟ صدقيني ما يهم

نزل عيونه لعنقها:لانك سرقتي القلب وهذا أغلى شي سرقتيه

ملاك:ما يساوي بملايين من غلاه

رفع عيونه ثنيان عليها ورمشت بهدوء ملاك تشوفه تايهه وعطشان قدامها وينتظر بس ينتظر عشان يقدر يغني موّال ياوصلها الغالي هلا ، لكنها تخاف وواقفه عند فاصله ما تقدر تتخطاها للسطر اللي بعدها ويفهمها

وقفت ملاك ولفت عليه واعتدل ثنيان بوقوفه يناظرها وتقدمت له ملاك وناظرت عيونه:يوم كان كل شي من حواليني يطفح من القسوه وحدك اللي لمست روحي بحنيّه ودفى

تنهد ينتظر اعترافها وتعبيرها لكنها هزت راسها بالنفي:ثنيان

تقدم لها يناظرها بشوق وتعب وجهد ورفعت عيونها عليه وتجمع موج عيونها ورفعت كفوفها لوجهه اللي تعشقه ولمست خدينه بيدينها ورفع كفوفه على كفوفها:سمّي ولبيه

ملاك ناظرت عيونه تغرق فيه:ألف مره أسفه

غمض عيونه بتعب:اهخ ملاك أكره كل مافيك وأحبك ، أحبك

قربت منه اكثر تشوفه مغمض عيونه:لا تبديني عليك ثنيان

فتح عيونه ثنيان يناظرها وناظرت عيونه ملاك:أبتعد عنك لأجل تعرف إنت كل الأجوبه

ثنيان:قوليها طيب قوليها وخلينا ننتهي

ملاك:هذا خوفي اننا نتهي

سكت ثنيان يناظرها وشدت على وجهه ملاك:والله ما بدّل داخلي غيرك وما طفّى اللهب غير الموج

ناظر عيونها من بدت تنزل دموعها وهمس:مابيك تبكين كل ما قربت لك

هزت راسها بقل حيله:تشوف إن الطريق لي أطول

‏وأشوف إن الاماني كثار ‏ولا تكفيني الدنيا لو أشرب من هواك بحور

سكت ثنيان يناظرها وهمست:تركت لك ورقه بأدراجي

عقد حاجبينه ثنيان وهزت راسها ملاك:اقراها متى ماكان ودك

ناظرها ثنيان وقربت منه ملاك:بس تأكد اني ما كذبت فيها بحرف واحد

وهز راسه بالنفي:ليه تسوين كذا ؟

ملاك ماردت عليه وقربت منه أكثر تقطع المسافه اللي مابقي منها غير شعره ولمست ثغره بثغرها وعقد حاجبينه بصدمه وغمض عيونه بقوه من اقتربت له ألف خطوه وقطعت له ألف ميل

ونزل كفوفه من على كفوفها وحاوط ظهرها وخصرها يقربها زود على قربها

لمست خدينه تلمس الحنيّه بكفوفها ولمست عنقه من الخلف وشعره ، تقبّله ، تقبّله عشان ما تندم على لحظه كان فيها قريب وصدته

ما تندم انه ما عرف حجم تمنيها له ولقربه ووصله ،

لكنها ابتعدت اقصر من تمنيها وناظرته وهي تتنفس بسرعه بربكه وفتح عيونه يناظرها من ابتعدت

ورمشت بهدوء تناظر عيونه وبلعت ريقها ومشت تاخذ عبايتها من خلفه ومفتاحها وتخرج تاركه جوالها وشنطتها لأول مره

ظل يناظر الفراغ ولف يشوف الأدراج بخوف ، يخاف إنهم يوقفون هنا وبعدها تنحط نقطة نهايه

لكنه فتح الأدراج يدور على ورقه ، ورقه تكشف كل شي وتنتهي بعدها كل الاسئله كل الفضول

وانحنى ياخذها ومشى للسرير وجلس وفتحها يقراها يقراها وهو يسمع نبرة صوتها وكأنها تقرأ عليه مخطوطها

:جيتك بقايا حيّ كل أكثره مات وقسّمت لي مسراتك وضحكاتك معي نصفين وكأن بوجودك نزعت كل أوجاع الماضي ، فاجئني حنانك وصرت الوضوح والسؤال المنطقي لاصارت الراحه جواب وصرت الرضا قبل الزعل ، صرت البراهين لسكون الوقت والإرتياب وصرت اليقين بعزّ الشك لكني من قبل أعرفك كان لي خلّان عشت سنين ظلما ما وصلها نور لين دكةّ خطاك ، يشبع داخلي خوف وألم أمتلي الوداع وأقول مع السلامه اكثر من مره لكن ما أقدر أخرج منك وكأني لقيت نقطة النور بحياتي وما اتمنى افقدها ، رغم إنك محال ووصولك محال وإنك صبح سريع الزوال لكني أخاف أخرج منك ، انا ماكنت خاينه العهد وناويّه الوداع لا واللي خلقني كنت اتمنى اختم معك كل امنياتي ، أحبك

غمض عيونه من قرأ الكلمه ومن نبض قلبه بتسارع ورجع يفتح عيونه يكمل الورقه

:أحبك رغم إنك موج وأنا لهب وما نلتقي لو كل الحياه دربين ، تعرف وش يعني أحبك رغم خوفي من الموج وجهلي بالسباحه لكني ماترددت بيوم أطيح بالموج مع الموج ، لاني ما اخاف الغرق انا غرقت من زمن وانا معاك ، ودّي لو كنت جيتك بوقت أفضل وبحال أحسن وبقلب صافي من الجروح كان ودّي أحبك لين أخشع بحبك وأقول آمين وأطرّز من اسمك اللي خفت اقوله عقد لولو ومرجان ، ابحث وراي دامك وقفت بحثك ابحث ورا الصوره اللي خلتني بيوم ارجع لك ووقفت بيني وبينك حاجز بكل مره ، ابحث ورا ناري اللي قدرت تطفيها

مسك جبينه وهو يقرأ آخر كلامها:اللي عرفتها تجري وتلهث ورا الدنيا اليوم واقفه محلها تنتظر الدنيا تجري لها

ختمت الرساله بإسمها:ملاك أو لَهب

ناظر الورقه مذهول من كل مخطوطها وكلامها ، يعيد يقرأ الجمل يحفظ اللي ماقدر يحفظه ، ويلمس حروفها باصابعه

ماهو مصدق كل هذا الكلام وكان وده يسمعه يسمعه ويقراه بدموعها وصوتها ورجفة يدينها ماكان راح يكون نهاية مخطوطها غير حضنها

لكنها تركت الورقه له تخليه جالس يهوجس بس بحروف على ورق أبيض

'

ركضت دربها كله بسيارتها لين الشاليه ووقفت عند البحر وخرجت تاركه بابها مفتوح وغمضت عيونها تشم ملوحة الموج وتسمع صوته الهادي ، تغرق بالموج مثل ماغرقت بالموج الحقيقي

تحب الموج مثل ماتحب الموج الحقيقي ، تبي قرب الموج مثل ماتبي قرب الموج الحقيقي

مشت تجلس على الرمل تناظر الموج ورفعت عيونها لآخر مداه وهمست:ماعاد صار عندي حيل أكثر ، ماعاد صار عندي صبر اكثر

وكأنها استسلمت وتعرّت من كل الثقل اللي عليها ، تبي يعرف ويدرون العالم وحتى لو النهايه سيئه

وحتى لو كانت آخر مره تشوفه وتسمعه ، هي تبي النهايه من كل شي

غمضت عيونها من تذكرت البيت اللي احتضنها والصدر اللي احتواها ، عقاب ونوره ، أصايل ونهار وحتى ساري وجنى

كل شي عاشته مع أفضل عائله ماتقدر تخليه ، ماتقدر تتخلى عنه لكن الصبر له حدّ وهي فاقت كل الحدّ

تحس ان ضميرها يياكل من جوفها بسبب منصور وكيف تركت كل شي يقدر يطلعه وتحس ان ضميرها ياكل من جوفها بسبب عطاء عقاب وعايلته لها وبسبب منيف اللي واقع بحب بنت مستحيل تكون له بسببها وتحس ان ثنيان الضحيه الاولى بكل القصه ، كل ماتذكره تبكي ولا تقدر تقاوم

ضمت رجلينها ببعضها تتذكر كل ليله قضتها معه كل هوشه وابتسامه وكل ضربه وبوسه ، عاشت معه الضد والضد ولا مره عاشت معه بعاديّه

كل شي عطاها اياه كان يأثر فيها ويلمس روحها ولا ودها بيوم تجيه منشرح صدرها له ويجازيها بمعرفته بكل شي

ميلت راسها تناظر البحر بهدوء ودموعها تنزل بهدوء على خدينها

'

عاد الرساله مليون مره ولا عرف وش يسوي

اخذ نفس يناظر الغرفه وبلع ريقه يلف يناظر درجه

فتحه وطلع من داخله الصوره اللي مخبيها ورافض يعرف صاحبها

تأمل وجهه ثنيان بحرقه وخوف وقهر ان هذا الشي الوحيد اللي بقي بينه وبين ملاك

وبيده يعرفه وبيده يتركه لكن ملاك ماراح تخطي خطوه زود وهو ماعرف الصوره وصاحبها ويدري

لكنه يخاف ، يخاف ينصدم بشي اكبر من ظنونه

تنفس بسرعه وهو يفكر ووقف يدور بالغرفه ثواني ودخل رسالة ملاك بجيبه ومشى والصوره بيده

وخرج من الغرفه مشى لين غرفة جاسر ورفع كفه وتنفس بهدوء ودق الباب

فتح جاسر وناظر ثنيان وعقد حاجبينه:وشفيك ؟

ثنيان:ناد لي شادن

تقدم جاسر:وش صاير ؟

ثنيان:نادها جاسر

ناظره جاسر ثواني ولف وناظر شادن اللي مع الصغار:ثنيان يبيك

رفعت عيونها شادن بذهول:يبيني انا ؟

هز راسه جاسر ووقفت بربكه تاخذ وشاحها وتغطي فيه وتتلثم ووقفت بجانب جاسر

وناظرها ثنيان وبلع ريقه:تعرفين كل شي عن ملاك ؟

سكتت شادن ولفت لجاسر بصدمه وعقد حاجبينه جاسر

ثنيان:ردي لو اسألك عن شي تجاوبيني ؟

هزت راسها شادن بهدوء ورجفت يد ثنيان ورفع الصوره قدام شادن:من هذا ؟

جمد وجه شادن وعض شفته جاسر وصد عنهم

بلعت ريقها شادن وناظرت ثنيان ورجعت تناظر الصوره:منصور

عقد حاجبينه ثنيان وهمس:من منصور ؟

شادن:اخوي

نزل الصوره ثنيان يناظرها:وينه ؟

شادن:مسجون

لف جاسر يناظر ملامح ثنيان اللي كل مالها تتغير وكملت شادن:بتهمة قتل

جمد وجه ثنيان يسمعها تكمل:وملاك تسدد ديّته

صد عنها وتكتفت شادن:يحبها وتحبه من قبل ما ينسجن وكانت بتتزوجه وبدت تسرق الناس عشان تقدر تطلعه ومن بين اللي سرقتهم انتم ، والحين منصور باقي له القليل ويتسدد ، سدتت ٢١ مليون

لف ثنيان بصدمه يناظر شادن ورفعت حاجبها شادن:وكان شرطي على اخوك يكمل ديّة منصور عشان ملاك ما تكمل تسرقكم لانها للحين ودها تكمل الديّه وتطلع منصور ، صدقني ملاك تحب منصور بجنون والا كيف تسرق ملايين من ناس وتخاطر بنفسها عشان واحد ؟

جاسر لف لشادن ورجع ناظر ثنيان اللي يناظرها جامد وجهه

شادن:ومحد راضي باللي تسويه ملاك وقلت لك وقلت لاخوك اننا تبرينا من ملاك بسبب جنونها في منصور

شد على الصوره ثنيان يناظرها ورفعت كتفها شادن:واذا تبي تتأكد منصور بالسجن العام تقدر تزوره وتعرف من اللي تزوجتها ياثنيان

سكت ثنيان ولف لجاسر اللي واقف جنب شادن ونطق جاسر:حذرتك ثنيان وقلت لك بتصعب عليك ودوّر وراها بس ما سمعتني ، البنت ماهي زينه وكل من يعرفها قال عنها انها ماهي سـ

سكت جاسر بقهر يناظر اخوه وهز راسه بتعب:البنت ماهي شريفه ثنيان

جمد وجه ثنيان يناظر جاسر ورفعت كتوفها شادن:واللي قتله اخوي كان يعرف ملاك وعلى علاقه فيها ، وغيره كثير

لف ثنيان يناظرهم بصدمه وهز راسه بالنفي وتنهدت شادن:روح لمنصور وبتصدقنا وقتها

جاسر:ثنيان اسـ

قاطعهم يخرج من عندهم ويطلع من البيت

مشى بسرعه وركب سيارته ورفع الصوره قدام عيونه مصدوم يناظر الشخص اللي بالصوره

اللي كان سبب في حريق ملاك ونارها وشرّها وظلامها

هز راسه بصدمه من فكرة ان ملاك ماحبته ، ولا يمكن تحبه وان كل شي عاشه معها كذب

وكل مره صدته صدته لانها ماتبيه واسبابها كاذبه

مسك الدركسون وغمض عيونه:اهخ

رفع يدينه على شعره يشده بجنون وشغل سيارته وحرك

شد على جبنيه وهو يسوق وصوت نبضات قلبه يعادل سرعته ، يتذكر كل شي ويربط كل شي

مكالمة السجن العام بليلة زواجهم وروحتها للسجن وبكاها قدامه ، وكيف فتحت باب السياره تنهار وتبي تنتحر

يذكر كل شي كل شي وكأن ذاكرته رجعت من جديد تعمل

وقف عند السجن وفتح باب سيارته ونزل ، مشى والصوره بيده ودخل

ووقفه العسكري:هويتك لو سمحت

طلع بوكه ثنيان ومد هويته ورفع عيونه العسكري يسأله:من بتزور ؟

سكت ثواني يناظر العسكري جامد وجهه:منصور ، منصور بن محمد

دخل على التفتيش وتمسك بالصوره بيده ودخل غرفة الزياره ووقف يناظرها فارغه

لف بعينه على الباب الحديدي ينتظر جيّة منصور

وتنفس بسرعه يسترجع كلام شادن وذكرياته مع ملاك وكأنه بداخل نار تحرقه ويشتعل كله لَهب

رفع عيونه من سمع صوت صدى الحديد والكلبشات ودخل منصور وناظر ثنيان

ميّل راسه بتعب ثنيان وصد عن منصور من شافه نفس الشخص ومسك راسه ثنيان بقوه

تقدم منصور وناظر ثنيان ووقف:محامي ؟

لف ثنيان وهو يتنفس بسرعه بقهر وناظر منصور وملامح منصور وهز راسه بالنفي بتكرار

وعقد حاجبينه منصور ومد الصوره ثنيان له واخذها منصور وعرف انها الصوره من ملاك ، الصوره اللي عطاها لها بإول دخوله وكتب عليها طلبه الوحيد ' لا تنسيني '

ورفع عيونه لثنيان وتقدم ثنيان:انا ثنيان بن عقاب بن جرّاح

سكت ثواني ثنيان يناظر ملامح منصور وهز راسه:زوجها اي

جمد وجه منصور يناظر ثنيان وتبدلت ملامحه لغضب:وش تبي ؟

ثنيان:انا وش ابي ؟ انا ؟ انت اللي شتبي ؟ انتم اللي دخلتم حياتي انتم

تقدم ثنيان بغضب وناظر منصور:انت وبنت عمك اللي دخلتم حياتي وسرقتوني وسرقتوا اهلي

منصور:انا ما سرقت احد

لف ثنيان عنه وضحك بقهر ورجع ناظر منصور

ورفع كتفه منصور:بنت مساعد اللي سوت كل هذا عشاني انا ما طلبتها ورديتها وحذرتها

ثنيان تقدم لمنصور بغضب:حذرتها ؟ اي تحذير ؟ دفعت لك ٢١ مليون من ناس مالهم ذنب اي تحذير ؟

منصور رفع صوته وتقدم لثنيان:انا من يوم عرفت انها تزوجتك عشان تسرقك وانا منعت زيارتها لي ورفضت دفاعها عني بالمحكمه وكرهتها عشر اضعاف حبها لي

سكت ثنيان يناظر منصور بذهول وكمل منصور:ولا ابي وحده ارخصت نفسها لواحد عشان فلوسه حتى لو كان عشاني ، وفلوسها اللي دفعتها لو تقدر تاخذها خلها تاخذها وبترجع لها وفي راس كبير واقف معي وبيطلعني

ثنيان ناظره بغضب وكمل منصور:تدري ليه انسجنت ؟ تعرف ؟ لاني لقيت ملاك مع واحد بالمكتب

سكت ثنيان وعقد حاجبينه وهمس منصور:ويوم مسكتها بأبشع ممسك ، قتلته وكنت بقتلها

جمد وجه ثنيان يناظر منصور ورفع كتفه منصور:بيقولون لك قتل واحد تحرش فيها اي صح لاني بستر عليها ، لكن الحقيقه ماهو تحرش الطرفين كانوا راضين وكنت بشيل العيب عن اسم عمي الله يرحمـ

ماكمل كلامه من صرخ ثنيان وتقدم له يضربه على وجهه وطاح منصور على الارض ودخل العسكري وتقدم ثنيان ومسك منصور من رقبته:اقسم بالله ما اخليك اقسم بالله ما اخليكم

بعدوه العسكر وصرخ ثنيان بغضب واشتعل وجهه باللهب ودفعهم بقهر عنه ومسكوه يخرجونه

وخرج من السجن وصرخ بصوته كله وتنفس يمسك صدره ولف يناظر العسكر اللي واقفين

العسكري:لو اشتكاك بنرجعك محله

مارد ثنيان ومشى يترنح لين سيارته وفتح بابه وقفل الباب ومسك صدره اللي يرتفع وينزل بسرعه من عصبيته وصراخه ونزل راسه يهزه بتعب

ولف لجواله واخذه يدق عليها ولاردت عليه ودور رقم منيف ودق عليه

ورد منيف اللي نزل من سيارته يناظر بيت عقاب:هلا ثنيان

ثنيان:وين اختك ؟

عقد حاجبينه منيف ولف مالقي سيارة ملاك ولا سيارة ثنيان:مدري بس سيارتها مو ببيتكم

ثنيان هز راسه وجا بيكمل منيف وقفل الخط ثنيان

عقد حاجبينه منيف وناطر جواله ومشى بهدوء وهو يدق على ملاك ولاردت عليه

وتنهد ودخل المجلس وناظر عقاب اللي جالس ورفع عيونه عقاب وبلع ريقه منيف:سلام عليكم

عقاب:وعليكم السلام

تقدم منيف وجلس ونطق عقاب:وين جماعتك ؟

منيف ابتسم بهدوء:مالي جماعه تعرفني ياعمي

عقاب:وشلون بتخطب لوحدك ؟

منيف:أسدّ ، أسدّ عن جماعتي اللي المفروض معي

عقاب:ونعم يامنيف

اخذ نفس منيف:يمكن انت تشوف رجال لهم مناصب ونسب ويناسبونك بأفضل نسب ، ويمكن لانها بنتك الوحيده تبي لها افضل رجّال بهالدنيا يعيشها نفس ما انت عيشتها واحسن

سكت عقاب وكمل منيف:بس صدقني محد راح يقدّر بنتك كثري ولاراح يحبها قدّي ولاراح يجيب لها نجوم السماء سلسال غيري

سكت منيف يناظر عقاب:ومستعد اعيشها نفس حياتك واحسن ومستعد اني اشتري لها احسن بيت وادفع مهرها اللي يقدر غلاتها عندك

عقاب:من وين ؟

منيف:وشو اللي من وين ؟

عقاب:من وين بتجيب بيت ومهر وعيشه نفس هالعيشه واحسن ؟

منيف حك جبينه:قدمت على وظيفه وانتظر ردهم ولي ورث من عند ابوي الله يرحمه تركه لي والباقي بجيبه ان شاء الله

عقاب رجع ظهره لورا:وملاك ؟

منيف:شفيها ؟

عقاب:تعرف انك تخطب ؟

منيف هز راسه بالنفي وسأل عقاب:ليه؟

منيف:تقول انك ماراح توافق ولا بنتك بتوافق

عقاب تقدم بهدوء:شوف يامنيف انا أصايل عندي تسوى كل الأموال هذي وكل المناصب والتقدير ، وما تتساوم وتتقارن بين احد

سكت منيف يناظر عقاب بربكه وكمل عقاب:لكن انا ما ارفض واسأل بنتي ، الخطّاب كثير اللي جوني عشان أصايل من وهي بالـ ١٨ لكن هي ترفض وانا ارفض بعدها ، اشور عليها اي لكن القرار عندها

منيف مسح جبينه بتوتر:انا ابي رايك انت ، ابي احس انك راضي عليّ

سكت عقاب يسمع منيف وابتسم منيف بربكه:كلمتك كأنك ابوي السموحه ، بس كنت اقصد اني ابيك انت تعطيني بنتك

عقاب ناظر منيف وسكت وبلع ريقه منيف من سكوته:انا عشت سنين طويله وحيد ماعندي بحياتي غير ملاك وملاك انشغلت بحياتها الحين وصفيت وحدي ، وكبرت

هز راسه منيف يناظر عقاب:كبرت ولاودي اقعد وحيد ، ابي عائله نفس ما تمنيت

عقاب هز راسه:الله ينولك كل خير

سكت منيف لانه ماجاوبه وكمل عقاب:والقرار عند أصايل

وقف منيف من وقف عقاب وهز راسه يتدارك الموقف:الله يطول بعمرك

هز راسه عقاب وخرج منيف ونزل راسه وعقد حاجبينه بضيق من وضعه ومن ثقته وكرامته اللي ماحس بوجودها

تعوّر وهو يتكلم وهو يحسّن صورته قدام عقاب ، تعوّر لانه وحيد وماحوله احد

تقدم وركب سيارته بقهر وسحب حزامه يربطه وحرك سيارته خارج

وقف عند البوابه من دخلت سيارة حمدان ولفت أصايل تناظر سيارة منيف وهمست:لحظه حمدان

وقف حمدان وفتحت شباكها أصايل تناظر منيف اللي بسيارته

وشد على يده منيف يناظرها وحرك سيارته يخرج من البيت

عقدت حاجبينها أصايل وقفلت الشباك ولا فهمت نظراتها ووضعه ، كان لابس ثوب وغتره وكاشخ لكنها مافهمت ليه شافت منه هذي الملامح

'

( لا تنسون النجمه ⭐️ )

دخلت الشاليه وناظرت اماكنها معاه وميّلت راسها تتأمل ، بلعت ريقها ومشت تجلس محله بالكنبه ولمست ظهر الكنبه وغمضت عيونها تنسدح عليها

ياليت كانت الدنيا معها رحيمه لكنها كانت قاسيه معها ، كل شي سوته رجع يأذيها وكل شرّ زرعته حرق داخلها

ماهي قادره تخرج من دوامة الحيره والخوف وتتخلص من مشاعرها اللي تحبس سعادتها

رفعت عيونها بصدمه من سمعت صوت السياره بالخارج وجلست وناظرت السياره من قزاز الشاليه وجمد وجهها من شافته ثنيان

وقفت ومشت بسرعه تفتح الباب ووقفت تناظره نازل

ناظرت نظراته لها وفهمت انه عرف ، انطفت لمعة عيونه اللي كانت دايم تلمع لشوفتها

شدت على الباب ونزلت دموعها وخرجت له ووقفت قدامه تنتظر منه كلمه وحده

لكن ثنيان كان جامد يناظرها وهمس:ليش ؟

بكت ولا قدرت تتحمل وعضت شفتها تناظره

وهز راسه ثنيان:انا زرعت طول هذي الفتره بأرض ماهي بأرضي كيف استغرب اني ماجنيت ثمرها ؟

ماردت عليه وهي تبكي وناظرها ثنيان:كنت موهوم ساكن في وهم ، كنت مخدوع عايش في خدعه

هز راسه:النيران اللي اشتعلت داخلك وكانت حاجز بيني ويينك ماهي ماضيك وعائلتك ، كانت رجّال

بكت وتقدمت له بتمسك ذراعه وابتعد عنها:كنتي يميني في سريري وقلبك في سجن ؟ بتطلعين ولد عمك عشان دينه ؟

ناظرها وهز راسه:كيف اصلاً صدقتك ؟ كيف وانتي قدرتي تسرقين غيري وعديتي على رجال كثير وشيوخ

جمد وجهها بصدمه من كلامه وكمل ثنيان:الكل كان يأشر عليك وانا ماني سامع لهم ، الكل حذرني لكني مافهمت ، مافهمت لين شفت صاحب الصوره وقالي حقيقتك

همست ملاك وهي ترجف:لحظه كيف عرفت ؟

ثنيان رفع حاجبينه:سألت بنت عمك ورحت لولد عمك القاتل قالوا كل شي

غمضت عيونها ملاك تستوعب حجم اللي سووه فيها وتقدمت له:تجلس تسمع مني ؟

ناظرها بجنون:اسمع ايش ملاك اسمع ايش ؟ انا تعبت اقسم بالله تعبت من انتي يرحم اهلك من انتي ؟

ملاك بلعت ريقها:انا ماني نفس اللي قالوه ، ثنيان انت تعرفني

ثنيان:سرقتي عشانه والا ما سرقتي عشانه ؟

سكتت ملاك تناظره وصرخ بوجهها ثنيان:ردي

هزت راسها وناظرها ثنيان:تدرين وش يقول عنك ؟ تدرين وش قالوا لي عنك ؟

ملاك ناظرته بجمود وكمل ثنيان بغضب:قالي انه قتل عشانك كنتي مع واحد بالمكتب

عقدت حاجبينها ملاك بذهول وكمل ثنيان:وبنت عمك تقول ان غيره عدوا عليك كثير

ميلت راسها بصدمه تسمع كلامه وهز راسه ثنيان:ملاك

قاطعته تصرخ:صدقتهم ؟ جاوبني صدقتهم ؟

ثنيان:يطلع بحياتي كلب طلعتي عايشه عشان روحه هو وش تظنين بيصير فيني ؟ احترقت ملاك احترقت شمّي رمادي

بكت بقهر تصرخ بوجهه وتدفعه:صدقت ، صدقتهم

مسك ذراعينها ودفعها يصرخ:ضربته ضربته

رفعت عيونها وهي تبكي وناظرها ثنيان بعيون تشتعل نار وقهر وصرخ:كسرت فمه اللي تكلم عليك

رجفت وهي تبكي وهز راسه ثنيان:اعرف وش قالوا عنك ووش بيقولون واعرف اني انا اكثر واحد انضحك عليه

ملاك تقدمت له:دامك ماصدقته يعني تعرف خيري ، تعرف اني ماني مثل اللي يقولونه

صرخ يبتعد عنها:اي خير ؟ اي خير ؟ انتي سرقتيني وسرقتي اهلي عشان كلب قاتل ، قاتل يطعن بشرفك وانتي هنا تحاربيني عشانه

ملاك صرخت تتقدم له:طحت ثنيان طالع فيني طحت وانحرقت بسببهم

ثنيان هز راسه:جزاتك

سكتت ملاك وكمل ثنيان:حق الناس منك رجع عليك

بكت ملاك وهي تناظره وتقدم لها ثنيان:عشتي معه وسرقتي عشانه وتكلم عليك وانا الوحيد اللي صدقتك انا الوحيد اللي كسرت فمه يوم تكلم عليك ، يوم سرقتيني عشانه ووقفتي قدامه وصديتيني عشانه هو ارخص بسمعتك وانا اللي عزيتك وقفت قدام اهلي وقدرتك ومسحت ماضيك كله وتقدمت لك وقلت ابيك وجاهدت عشان وصلك ، ورديتيني عشان كلب تكلم عليك

بكت بدون رد تناظره وهز راسه ثنيان بخذلان وقهر

ثنيان:عزاي لأهلي اللي نادوك بنتي وعشتي معهم واكلتي بينهم ، عزاي لجوفي اللي احترق عشان يرضيك وغرق عشان يحميك

ملاك ناظرته بين دموعها بدون رد تشتعل نار أمامه وكلن لأول مره يشتعل قدامها هو بعد ، كانوا لأول مره لهب مقابل لهب

ثنيان هز راسه ودخل يده بجيبه وطلع منها شيك:قيمة كليتك

رفعت عيونها بصدمه تناظره ومشى ثنيان يتركها

ركب سيارته وحرك تاركها وظلت واقفه محلها تتذكر كلامه والافتراء اللي رسمه منصور حوالينها

وجلست على الارض تعجز رجولها تشيلها ومسكت التراب بيدينها تحترق من جوفها

ورفعت راسها تصرخ بعلو صوتها وتبكي ، رفعت يدينها على صدرها تضربه بقوه من اللي يصير معها من الخذلان اللي تعيشه

عضت شفتها من منصور وهزت راسها بالنفي وهي تبكي بصدمه ، هي رمت نفسها بأوسخ محل عشانه وما كان منه الرد الا انه يعوّرها يعوّرها بأكثر مكان يعوّر ، بقلبها

ذاقت ابشع كلمات ممكن تسمعها من ثنيان وابشع افتراء تسمعه من منصور

تلفتت وكأنها تدور دروب الآمان اللي حست انها خرجت منها ، حست انها بهاللحظه زائده مثل صدى مهتز ماله معنى ، حست ولأول مره ضئلها وضعفها وكأنها أخف من غصن هزيل

ماتدري من وين بتجيها قوه وصبر بحجم كل اللي ذاقته ، تهشّم داخلها واحترق آخر املها

ملاك وحيده وبتموت وحيده ، هذا الصوت اللي كانت تسمعه بعقلها وتناظر البحر قدام عيونها

تغيرت ملامحها ولانت وكأنها استوعبت حجم خيبتها وحزنها وضعفها

'

-بعد مرور أسبوع -

وقف قدام الزنزانه الاخيره للنجاه وهو مبتسم بإنتصار وناظر اللي يستقبله بالخارج وخرج اول خطواته على الأرض ، على الحريّه

وتقدم بشنطته لين وقف قدام الشخص اللي انتصر معه وكان سبب في انتصاره واخذ حقه وهز راسه

لف منصور لجواهر وابتسم:نزور اهلي والا اهلك ؟

جواهر ابتسمت:اهل زوجتك

اتسع ثغره يناظر جواهر وهز راسه ومد كفه لها وابتسمت تناظره ومسكت كفه ومشى معها وفتح السواق السياره لمنصور وجواهر وركب

وركب السواق وحرك وابتسم منصور يناظر الطريق مع شباكه

ولفت جواهر:زارك ثنيان ؟

لف منصور وهز راسه وهو يناظر الطريق:قبل أسبوع

جواهر:محد يدري وينه

لف منصور عليها وكملت جواهر:ولا لملاك

منصور:مستحيل مع بعضهم

جواهر:لا لا ثنيان لوحده شافوه بالمطار

سكت منصور يناظر الطريق وابتسم:المهم سلامتي مع اغلى غنيمه وانتصار

ابتسمت جواهر تناظره ورجعت ظهرها للخلف ولفت تناظر الطريق

ووقف السواق ببيت جواهر ونزل منصور من شاف راشد وبندر وام راشد بإستقباله

وابتسم وتقدم لهم وفتح ذراعينه بندر وتقدم يضحك منصور وحضنه

ابتسمت جواهر تناظرهم ولف منصور لراشد وابتسم راشد:النسيب

حضنه منصور وابتسم يلف على ام بندر:عمتي

سلم عليها وهزت راسها بهدوء تناظره ولف منصور:اعذروني جيت من سجني لكم على طول

بندر:حياك منصور حياك ببيتك

ابتسم منصور ولف لجواهر اللي تقدمت له ودخل معها للبيت

'

نهار ناظر منيف:بترجع منيف

منيف:وين ترجع ؟ جوالها واغراضها كلها عندكم وماهي مع ثنيان وينها ؟ جاوبني نهار وينها ؟

نهار تنهد:ملاك ما ينخاف عليها

منيف هز راسه:هالمره بخاف

نهار:طيب اخر مكان رحناه كان الشاليه ولا لقيناها يمكن راحت الدمام الخفجي اي مكان قريب

لف منيف عليه:مصرّ تهوّن الموضوع نهار ؟ اقولك كل اغراضها هنا اختي ما خرجت من البيت الا هاربه

نهار تنهد وناظره منيف وهز راسه بتعب:تركتني وتركت كل شي

جلس منيف بصدمه وهمس:تركتني

رجع ظهره لورا نهار يناظر حال منيف ولف من دخل عقاب عليهم ورفع عيونه منيف:وش صار ؟

عقاب:ماعرفت شي ، ثنيان برا السعوديه لكنه لوحده

نهار:وش صار عليهم هم ؟ ليه كل واحد بمكان ؟

عقاب ناظر منيف:صار شي بينهم ؟

منيف رفع متفه:قلت لك دق علي ثنيان يدورها بعدها ماعرفت شي

عقاب جلس واخذ نفس:يرجعون انا متأكد

منيف سكت وناظره عقاب:ملاك بالذات بترجع

هز راسه منيف:يارب

خرج نهار من الديوانيه وتقدم للبيت وتقدمت له أصايل:وش صار ؟

نهار:منيف متوتر وابوي ماعرف شي عن ملاك

نوره ضربت رجلينها:هالبنت بتجننا عليها وش صار عليها ؟

نهار:ماندري الموضوع يخوف بس مابغيت اقول شي لمنيف ، الشاليه كان مفتوح يوم رحناه وسيارة ملاك موقفه لكنها مو موجوده

جلست أصايل بخوف وناظرت نهار:نهار ما بتسوون شي ؟ يمكن فيها شي يمكن صار لها شي

نهار:ابوي متكفل بالموضوع وبيعرف قريب ان شاء الله

تنهدت نوره:الله يردك بالسلامه ياملاك

أصايل:اكيد تهاوشت مع ثنيان والا ماكان ثنيان هرب بعد وسافر

نهار:وش صار عليهم ياخي ؟

أصايل رفعت كتوفها بتعب ولفت تناظر الديوانيه من بعيد

'

دخل جاسر الغرفه ورفعت عيونها شادن عليه وتقدمت له:اخوي خرج

لف عليها بصدمه جاسر وعقد حاجبينه:كيف خرج ؟

شادن رفعت كتوفها:اندفعت الديّه اللي مادفعتها انت

جاسر:وينه ؟

شادن:ببيت اهل زوجته

جاسر تقدم لها:اي زوجه

شادن ناظرته:بنت بندر

سكت جاسر وعقد حاجبينه اكثر وكملت شادن:جواهر اللي طلعت منصور من السجن

جاسر تقدم وناظرها بصدمه:انتم من وشو مخلوقين ؟ وش هالمخططات ؟ كيف جواهر جابت درب لمنصور ؟ وكيف منصور انتقم من ملاك واخوي بهالطريقه ؟

شادن رفعت كتفها:هذي عدالة الله

جاسر:اي عداله ؟ انتم بغابه

شادن سكتت تناظره وهز راسه جاسر:مابيك تكونين موجوده من اليوم ، اطلعي من البيت اللي دخلتيه واخرجي بشرّك

شادن ابتسمت وناظرها جاسر:اطلعي انتي وبنت عمك من حياتنا

شادن:هذا اللي كنت ابغى اقوله وكنت انتظرك ، انتيهنا ياولد العميد

جاسر هز راسه بذهول منها:اذا قدرتي تغدرين ببنت عمك مع اهلك وش بقى بتسوين ؟

شادن:على اساس انت ماغدرت فيها ؟ حتى انت كنت بتطيحها معي

جاسر:اقسم بالله ولا اجي بربع شراستكم وعداوتكم لها ، انا ما اخذت منها غير حق اهلي وتبقى غريبه ما يربطني معها دم ، لكن هي عاشت معك ببيت واحد وبعتيها برخيص بلحظه

شادن تقدمت للدولاب تفتحه وتلم اغراضها:كل شخص بياخذ حقه

ولفت عليه وابتسمت:والحين اقدر اخرج من تحت سلطتك واخيراً

جاسر سكت يناظرها ولفت شادن تكمل اغراضها وعقد حاجبينه برعب جاسر وصدمه من خروج منصور واقترانه بجواهر

ابتسمت شادن وناظرته وناظرها جاسر لآخر نظره وخرج تاركها

'

دخلت أصايل المستشفى تكمل تدريبها بيومها الأخير ودخلت تشوف المتدربين اللي بالقسم

جلست بزاويه لوحدها بضيق من الوضع ببيتهم وحاجتها لملاك وخوفها على ثنيان وخطبة منيف لها اللي للحين ما جاوبت عليه

ما عاشت فرحتها بخطبته رغم انها تمنته وحلمت فيه لكنه يوم جاها ، جاها بوقت غريب ومبعثر

اخذت نفس تناظر كفوفها وناظرت الثوب اللي تقدم لها ورفعت عيونها تشوفه واقف

ولانت ملامحها تشوف الكيس اللي بيده والورد وكوبين

وابتسم بهدوء بدون يبيّن اسنانه:ماقدرت ما أجي

وقفت بصدمه تناظره وكمل منيف:وأبارك لك بنهاية تدريبك

رمشت بهدوء وهمست:كيف عرفت ؟

منيف ناظر عيونها:اللي مهتم يعرف

بلعت ريقها ورجفت يدينها ومد لها البوكيه واخذته من كفه وابتسمت ورفعت عيونها عليه من تجمعت دموعها وفهمها ، فهمها من شاف اختلاف حالها

ونطق:دريت ان محد بيكون معك وانتي متعوده يكونون حواليك ، ودريت ان الوضع الحين أشدّ ضيق علينا كلنا بس مع ذلك جيت

عضت شفتها تتأمله ورفع كتفه منيف:يمكن لأني اشعر بالوحده مثلك

ناظرت عيونه ونظراته لها وهمست:بترجع ملاك

هز راسه بالنفي:حتى انتي مو متأكده حتى انتي تحترين

مسحت دموعها اللي نزلت بعشوائيه:مشتاقه لها بس والا ماراح اخاف عليها او اخاف على ثنيان حتى

تنهد منيف وجلس وحط الاكواب بحضنه والكيس بالارض وناظرته أصايل وجلست جنبه بالورد وناظر الفراغ منيف:كنت اقولها تروح بس ما ظنيت تروح بدوني

عقدت حاجبينها أصايل من ضيق منيف ووضعه وبللت شفايفها:منيف

لف عليها من نادته وناظرها وهزت راسها له:أنا موجوده وأعرف ماراح أسدّ مكانها لين ترجع بس

سكتت بتردد من نظراته والتفت بجسمه عليها:هذا أطول حديث معك وأول اسم اسمعه وأول مره اشوفك فيها بعد ما خطبتك

بلعت ريقها بربكه واخذ نفس منيف:يمكن وصلك الخبر في وقت ماهو مناسب وانا خطبت بوقت ماهو مناسب

ناظرته أصايل ترتخي من شعوره ونظراته وكمل منيف:بس أول مره أشعر ان لي صوت وشعور اقدر أوصلّه

سكتت وكمل منيف:لانك غاليه ومدللـه وبنت العميد عقاب ولأنك اخت النهار وصيتك يسبقك يوم جيتك ، جيتك من مجلس بيت ابوك لوحدي ما استحيت من وحدتي

هز راسه يناظرها:ووقفت عندك نهايتنا ، وقف عندك الكلام وانا نسيت نفسي وتركت كل الدروب وجيتك ، وفاضت مشاعري ولا أقدر أخفّي زود ، انتي أول من دخل صدري وفتق من داخله خيوط ملونه وأسقى ربيع عاش طول عمره في عجاف

ناظرت عيونه أصايل من كلامه وكمل منيف:غنيمة أيامي وأصح اخطائي

نزلت عيونها للورد واخذ نفس منيف:وادري ان الطريق بيوقف بيني وبينك لين ألقى طريق ملاك لكني أبي اعرف من انا عندك ؟

رفعت عيونها أصايل عليه تناظره ونزلت عيونها للأكواب المقفله وهمست:ماتشا ؟

ناظرها منيف ورفعت عيونها عليه وهز راسه وتقدمت تاخذ من حضنه كوب وناظرته:اسألني أبيها ؟

سكت يفهم تلميحها وحياها من اجابته بالصريح وابتسم بهدوء:ماهو مهم تبينها المهم تحبينها ؟

ابتسمت أصايل تشرب من الماتشا وصدت عنه واتسع مبسم منيف وناظر الكيس:شريت لك بودرة ماتشا وعدتها عشان تشربينها بالبيت

لفت عليه وناظرها منيف:بيتنا

سكتت بربكه وصدت عنه وابتسم منيف ولف يفتح كوبه ويشرب من الماتشا

-

عقاب لف عليه:جرّب البنك شوف اخر عمليات الدفع من هناك نعرف وينها

لف منيف يناظر ويترقب وهز راسه العسكري:برفع طلب للبنك واشوف

عقاب:لا ترفع انا ما انتظر ، اتصل على مدير البنك وعطني السماعه اكلمه

هز راسه العسكري وحط نهار يدينه بجيوبه ينتظر واخذ السماعه عقاب:سلام عليكم

تقدم منيف بتوتر يسمع

عقاب:معك العميد عقاب بن جرّاح ، ماعليك زود ، عندنا بحث مهم وما يتأجل ابد ، ملاك بنت مساعد نبحث عنها ونبي اخر عمليات دفع من بطاقتها البنكيه

هز راسه عقاب:اعرف حدود الشغل وضوابطه والله بينرفع طلب وبيوصلك لكن ودنا نستعجل وتشوف الموضوع الان

اشر عقاب للعسكري ولف للكمبيوتر العسكري

وهز راسه عقاب:الله يطول بعمرك ننتظر اتصالك

مد السماعه عقاب ونطق منيف:وش صار ؟

عقاب:دقايق يشوف الموضوع ويتصل

رجع ظهره للخلف منيف وناظرهم نهار:يمكن ما استعملتها

عقاب:يمكن ويمكن اي ليش ما نجرب ؟

منيف:اكيد استعلمت بطاقتها مستحيل تعيش بدون فلوس

عقاب:هي وين عاشت اصلاً ؟

سكت منيف وتكتف ينتظر الايام تمشي بسرعه والى الان ما هدأ باله وسكن ، وين ملاك ؟

مرّت اربع ايام زود على الاسبوع ولارجع ثنيان ولا ملاك رجعت

رفع عيونه وبلع ريقه يشوف عقاب اللي وده يصارحه ويقوله ان يمكن ملاك هربت او ثنيان ضغط عليها وعرف كل شي وهددها وهربت

ما يعرف وين ودته هواجيسه الا يوم دق التلفون وفزّ

تقدم عقاب واخذ السماعه:هلا ، معك

هز راسه واشر للعسكري وهز راسه العسكري:وصلت

عقاب:وصلت ماقصرت معنا

قفل التلفون وناظره عقاب:وين ؟

العسكري:قبل ساعتين

جمد وجه منيف وكمل العسكري:فندق جبل عمر

عقد حاجبينه عقاب وكمل العسكري:مكه المكرمه

لف عقاب على منيف وعقد حاجبينه منيف ونطق نهار:في مكه ؟

'

مشت بين الحشد والاعراق والجنسيات وتدخل داخل حدود الحرم اللي هربت له رغبه بالشفاء بالتطهير بالجبر ، الراحه والاطمئنان

تقدمت تناظر الكعبه من بعيد براحه تغمر جوفها ونزلت مع السلالم الكهربائيه ومشت تدخل في صحن الطواف

وقفت بين الطائفين وعيونها على الكعبه ونزلت دموعها وتقدمت تدخل بين الحشد تسمع أدعيه بكل اللهجات وتسمع دموع وآهات ، حاجات ومطالب وأمنيات

كان الوقت ٤ بعد منتصف الليل وقبل أذان الفجر ، جوف الليل

تمسكت بالكعبه ومن لمستها بكت ، ماكانت تشعر بالتزاحم لان داخلها أزحم من كل هذا الحشد

حطت راسها على الكعبه وهي تبكي وكل مطلبها ، انها ما تيأس ما تقنط ما تجزع

مرّت بأشياء كثيره ، خذلان وفقد وأقسى كلام

لكنها تمسكت بأغلظ حبل ، إيمانها بالله ووجوده

شهقت وهي تبكي ونطقت بحرقه:يارب ، يارب جيتك من أقصى مكان من أبعد مدى ، جيتك بإنكسار املأ جوفي اطمئنان وامسح على قلبي

مسكت صدرها تدقه بهدوء وبتعب وبثقل:يارب سامحني يارب

بكت من جديد ورفعت راسها:سامحني يارب ، عوضني يارب وأجبرني يارب يارب هذا القلب القلق ‏آمنه بأمانك حتى يطمئن ، يانور هذا الكون ، يا عون من يطلب العون

شهقت تمسح دموعها وهمست:ارضى عني وارضني مالي سواك ، جيتك مالي سواك يارب انت الحكم وانت القاضي يارب

رفعت عيونها وتنهدت وسع رئتها ولفت تترك مكانها وتمشي

اخذت لها ماء زمزم وجلست أمام المعتمرين والكعبه وسكن جوفها وهدأت روحها تناظر الحرم بسكون

انتظرت دقايق وأذن للفجر ووقفت تسمع أذان الحرم بمسمعها كله بيقين : الله أكبر

أكبر من كل الهموم وأسباب الهموم ، أكبر من الدنيا وحياتنا بالدنيا ، وأرحم بنا منا ، قادر على أن يجبر كسرك ويقوي ضعفك ويؤنس وحدتك ويحقق أمانيك

كانت تعلم ان كل هذا الابتلاء والثقل اللي جعلها تتوارى عن أعين الناس وتذهب لله في دجى الليل شاكيه وداعيه وراجيه لم يكن عبث بل كان رحمة من الله لينزع من صدرها حب الدنيا وزينتها

رفعت راسها وهمست:يارب

مشت تصطف مع المصلين وتكبر وتصلي

'

سحب شنطته بيده وجوازه بكفه وخرج من المطار ووقف يناظر حوالينه

راجع لنفس المكان اللي تأذى منه بعد ما طاب لوحده وسافر لبعيد ، راجع الان لنفس المكان

فتح شنطة سيارته وحط شنطته وركب يشغل سيارته

واخذ نفس من تذكر وجودها يمينه ، مع انه حلف انه طاب ورجع أقوى لكنه من أول مكان تذكرها على طول

لف يناظر مقعدها ورجع يلف يناظر طريقه وحرك

مشى للخبر وفتح جواله يسمع رسايله والاتصالات اللي تراكمت عليه ولا فكر انه يناظرها حتى

ناظر بيتهم من بعيد ماشي له وعقد حجاجه من حريق جوفه واشتعال النار داخله

ووقف عند البوابه ثواني وغمض عيونه بتعب واخذ نفس ودخل البيت يوقف سيارته بجانب سيارات اخوانه

وشد على الدركسون ثواني وفتح بابه ينزل ومشى يناظر بيتهم ودخل

مشى للصاله ولفت نوره:نهار ؟

وسكتت من شافت ثنيان وجمد وجهها بصدمه وتقدم ثنيان وهمس:أمي

وقفت بخوف تضمه وغمض عيونه من حضنته وانحنى لها

نوره:ثنيان أمي وين كنت ياحبيبي ؟ ليه تخوفنا عليك ؟

ثنيان مارد وهو مغمض عيونه وابتعدت نوره تناظر شعره اللي حلقه ولونه اللي تغير وهمست:وش صاير معك ؟

ثنيان رفع كتفه ولمست خده نوره:وش صاير يا امي وش صاير علمني لا تخوفني عليك

جلس ثنيان وجلست جنبه نوره وانحنى يحط راسه على فخوذها وناظرته بخوف نوره ومسحت على راسه:ما بتعلمني ثنيان ؟

ثنيان:ماصار شي

نوره:كيف ماصار شي انت اختفيت وملاك اختفت ولا بلغتونا بشي ، ملاك معك ؟

سكت ثنيان بدون رد من جابت طاري ملاك وناظرته نوره وجلس ثنيان بتعب ولف على نوره:معد في ملاك

عقدت حاجبينها نوره وكمل ثنيان:ولا تسألين اكثر

وقف ومشت خلفه نوره:شلون يعني ما اسأل ثنيان انت تبي تمشي الامور كذا ؟ انا بسأل وابوك بيسأل لين مانفهم

مارد ثنيان وهو يمشي وفتح الغرفه وناظر الغرفه وتقدمت نوره:ابوك منشغل يدور على ملاك مالقينا لها مكان ، تركت سيارتها بالشاليه ولاندري وينها

ناظر الغرفه ثنيان بتعب ولف لامه وهز راسه بهدوء

وتقدمت بخوف نوره:يا أمي ياثنيان

ثنيان:امي جاي تعبان ابي ارتاح

سكتت نوره تناظره وهزت راسها وخرجت ومن قفلت الباب غمض عيونه بقوه من اعتلت صدره جمره كَوت داخله

فتح عيونه يناظر السرير ومكانها ومشى ينسدح مكانه وغمض عيونه ، يذكر اخر نومه نامها على صدرها ، اخر أمان عاشه واخر شعور

يذكر لمسات كفوفها لشعره وكأنها موجوده الان

فتح عيونه بتعب يناظر السقف

'

دخل عقاب البيت وتقدم لنوره:هذي سيارة ثنيان ؟

هزت راسها وتقدم بصدمه نهار:ثنيان رجع ؟

نوره:رجع ولا علمني وش صاير سألته عن ملاك وقال ماعاد في ملاك

سكت عقاب ثواني:ملاك في مكه

عقدت حاجبينها نوره:وين ؟

عقاب مشى يجلس ورفع عيونه لنوره:وش صاير مع ولدك وملاك ؟

نوره:ما ادري سألته ماجاوبني حاله ماهو زين عقاب

نهار تقدم يجلس ورفع عيونه عقاب من دخل جاسر:ثنيان رجع ؟

هزت راسها نوره:اي اي

جاسر سكت بقلق ولفت له نوره:انت وينك خليت الصغار مع الخدامه وطلعت ؟ وين زوجتك ؟

جاسر ناظر ابوه:ابوي انا طلقت

بقق عيونه نهار ولفت نوره بصدمه:وش تقول ؟

جاسر:انتهى اللي تعبنا عشانه

نزل عيونه عقاب وهز راسه:هذولا عيالي

لفت نوره ومسكت راسها بتعب ورفع عيونه جاسر لنهار اللي يناظره مصدوم

ولفوا من دخل ثنيان وناظرهم:سلام عليكم

ناظرته نوره:مانمت يا أمي ؟

تقدم لأبوه وانحنى يبوس راسه ولف لنهار اللي وقف له:اشتقنا لك

حضنه ثنيان وضرب كتفه ولف لجاسر اللي واقف

ظل يناظره جاسر بقهر على حاله وهز راسه ثنيان وناظرهم عقاب وقوف قدام بعض

وتقدم جاسر يحضن ثنيان وتنهد ثنيان وابتعد يناظره جاسر:حمدلله على سلامتك

هز راسه ثنيان وجلس وناظره عقاب:وش صاير معك ؟

ثنيان لف لابوه وهز راسه بالنفي:ولاشي

ناظره بعصبيه عقاب ورفع صوته:وشو ولاشي كيف ولاشي ، تغيب كل هذي المده وترجع وتقول ولاشي ، تختفي زوجتك وندورها ما نلقى غير سيارتها واغراضها بالشاليه ؟ وش صاير ثنيان انطق

ناظرهم ثنيان بهدوء ورجع ظهره لورا:ولاشي انفصلنا

ناظرته نوره بصدمه ولف نهار:وش صاير معكم انتم؟

عقاب عقد حاجبينه:كيف يعني انفصلتم ؟

ثنيان:يعني معد في شي يربطني فيها

سكت عقاب يناظره ولفت نوره بصدمه:ليش ؟ وش يسوى ؟

ثنيان ناظر امه ورجع ناظر ابوه ونطق جاسر:ماكانت تناسبه اصلاً

نزل عيونه ثنيان ونطق عقاب:ماراح ينفتح هالموضوع لين ترجع ملاك واسمع منها نفس ما سمعت منك

رفع عيونه ثنيان ووقف عقاب وناظر نوره:شوفي عيالنا

تنهدت نوره ولفت تناظر جاسر وثنيان

خرج تاركهم ولف نهار:ليش ياخي ثنيان ؟ ليش ؟

ثنيان ناظر نهار وسكت وصد عنه وتأفف نهار من الوضع الفوضوي ووقف يخرج من البيت

ركب سيارته واخذ جواله يتصل ورد عليه منيف:هلا نهار

نهار:وش تسوي ؟

منيف ناظر يامور اللي قدام عيونه:بالبيت اهوجس

نهار اخذ نفس:ثنيان رجع

انصدم منيف وجلس:لوحده ؟

هز راسه نهار:لوحده

منيف سكت وكمل نهار:قلت لك لانك كنت تبي تعرف وش صار مع ملاك ومعه

منيف هز راسه:اي بشوفه ان شاء الله

نهار عض شفته يتذكر كلام ثنيان ولاقدر يقول شي وقفل جواله

ناظر جواله منيف وعقد حاجبينه يفكر ، يبي يعرف اللي حصل ووش صاير

لف من دق جواله من جديد واخذه واستغرب اسم عمه اللي على شاشة جواله وهمس:عسى خير

رد:هلا

محمد ابتسم:شلونك ولد اخوي ؟

منيف:حمدلله

محمد:افا ماجيت ولا تحمدت بالسلامه ؟ انا قلت يمكن ماعرف قلت اعلمك وتفرح لنا

عقد حاجبينه منيف:وش صاير ؟

محمد:منصور

سكت منيف وكمل محمد:خرج حمدلله بالسلامه

جمد وجه منيف وضحك محمد وناظر منصور اللي امامه:بلّغ اختك تفرح له

سكت منيف بصدمه وابتسم محمد:بلعت لسانك ؟

منيف همس:حمدلله على سلامته

محمد:ما يقبلها منك تعال بعشاك وذبيحتك

مارد عليه منيف وضحك محمد:يالله قلت اعلمكم ويكون عندكم خبر

قفل محمد وناظر جواله بصدمه منيف ، من طلعه ؟ وكيف خرج ؟ معقوله ملاك سددت الباقي وهربت ؟ والا وش صاير حوالينه ؟

'

ناظر العطر قدامه وهو هادي يتذكرها ، يتذكر بكاها وصوتها ونظراتها مستحيل يكون كل هذا كذب وتلفيق مستحيل ماهو قادر يصدق

اخذ نفس ولف ياخذ جواله وخرج من البيت

نزل ولفت أصايل:ثنيان ؟

تقدمت له وحضنته وغمض عيونه ثنيان:اشتقت لك

أصايل ابتعدت عنه:وانا اكثر ، وش صاير ؟

لف ثنيان يناظر ابوه وامه واخوانه ورجع ناظر أصايل:ولاشي

أصايل مسكت ذراعه:انتظرني بجي معاك

سكت ثنيان من مشت أصايل تاركته ولف يناظرهم جالسين وخرج

ركب سيارته ينتظر أصايل وخرجت وركبت جنبه وحرك بدون يتكلم

لفت أصايل تناظره هادي وساكن وهمس:امس جيت بس قالوا انك نمت انبسطت انك رجعت

هز راسه بهدوء وكملت:فين بتروح ؟

ثنيان رفع كتفه ولفت عليه أصايل:وقف هنا

وقف السياره على جنب ومسك كفوفه ببعض واخذت نفس أصايل:قولي ثنيان وش صاير ؟

ثنيان لف يناظر أصايل وهز راسه بالنفي:هربت ظني بتقنع واصدق بس ماقدرت ، اقسم بالله مو مصدق وكأني طحت بقاع جهنم من حرّ داخلي

عقدت حاجبينها أصايل تناظره وكمل ثنيان وهو يناظر الطريق:لمستني واحترقت وماصدقتها يوم قالت انها بتحرقني

هز راسه:ماصدقت

أصايل سكتت تسمعه ولف ثنيان على أصايل:معد في ملاك أصايل ، طريقي وطريقها تفارقوا

أصايل:ليش طيب ؟ علمني ؟ وشو السبب ؟ كانت اموركم حلوه كنتم متفقين ومناسبين بعض وش تغير ؟

ثنيان:كل شي

أصايل:طيب تعرف ان ملاك في مكه ؟

هز راسه ونطقت أصايل:يعني الموضوع كبير لدرجة انت تهرب للبحر وهي تهرب لربي ؟

ثنيان التفت لأصايل ومسكت كفه أصايل:ماراح ينتهي شي انا بنفسي بحل كل شي بينكم وترجعون احسن من قبل

ثنيان:لا أصايل لا تتدخلين وابعدي عنها خلاص ماراح تدخل بحياتنا من جديد

أصايل:كيف ماترجع تدخل كيف ؟ ملاك اكثر من اختي وماراح ارضى على اللي صار

تنهد ثنيان بتعب وحرك سيارته:برجعك واروح

أصايل:فين بتروح ؟

ثنيان:عندي شغل

أصايل:قولي اول ماراح تختفي ؟

ثنيان هز راسه بالنفي وناظرته أصايل بضيق ووقف عند البيت ولفت أصايل:اي شي تبي تقوله بسمعك

ابتسم لها بخفوت وتقدمت له تحضنه وتنهد يحضنها ونطقت أصايل:كل شي بيكون كويس بإذن الله

ابتعدت عنه ونزلت من السياره وحرك ثنيان سيارته

عض شفته بتفكير ومشى دربه لين بيتها

ووقف يناظر البيت تردد ومشى ورجع يوقف وضغط على كفه ما يدري وش يسوي لكن ناره تكويه وما يقدر يقاوم احتراقه اكثر

قفل سيارته ونزل ومشى للبيت ودق الباب

ومشى منيف وفتح الباب وجمد وجهه وهمس:ثنيان !

ثنيان ناظر منيف بقهر وسكت منيف من شاف نظراته ورجع خطوه لوراه:حيّاك

هز راسه بالنفي ثنيان:جاي اخذ حقي منكم

منيف:ادخل ثنيان ادخل

ناظره ثنيان وهز راسه منيف ومشى ثنيان يدخل البيت

ناظر البيت ويتذكر اول جيّته هنا عشان يهدد ملاك وعشان يخطبها ويذكر

يذكر اول مادخل الصاله هذي وجلس على سفره وحده معها ومع منيف واكلوا سوا

جلس ثنيان ومشى منيف وناظره وجلس قدامه:شلونك ؟

ثنيان ناظر منيف:محترق

تنهد منيف:وش عرفت ؟

ثنيان هز راسه:كل شي

بلع ريقه منيف بتوقع وكمل ثنيان:كل شي يخليني احترق ، منصور والديّه وسبب سجنه

نزل عيونه منيف وناظره ثنيان بقهر:انا دخلتكم بيت اهلي ووثقت فيكم ياخي

منيف رفع عيونه:ومن يوم دخلت ملاك بيتكم وقفت عن كل شي

صد ثنيان:ريحنا تكفى

منيف:اقسم بالله ثنيان ملاك من بعد زواجك وقفت كل شي ، وماقدرت تكمل واللي طلع منصور الحين ماهي هي انا متأكد

عقد حاجبينه ثنيان وهمس:طلع ؟

هز راسه منيف وسكت ثنيان

واخذ نفس منيف:ثنيان كانت تحترق بوجودها معكم وكانت بتهرب وتترك كل شي ، اي اعترف واقولك انها غلطت وسرقت ومشت بالشرّ بس صحت وهي جنبك

سكت ثنيان وكمل منيف:استوعبت وهي بينكم

ثنيان:انا صدقتها وساعدتها واكتشفت انها تعيش عشان واحد قاتل بالسجن ، سرقتني وسرقت اهلي وخربت حياتي ولصقت فيني فضيحه عشان واحد كلب قاتل

سكت منيف وتنهد بضيق وكمل ثنيان:ونفس ما دخلت ولد عمك بالسجن عشان واحد كانت بتدخلني انا بعد عشان منصور

رفع عيونه منيف وعقد حاجبينه:مو هي اللي دخلت منصور ، منصور بنفسه قتل واحد عشانه تحرش في ملاك لا يكذبون عليك ثنيان

ضحك ثنيان:تحرش اجل ، يقولي انها كانت تعرفه وجاهم بالمكتب لقاهم سوا وكان بيقتلها مع الكلب اللي كان معها

عقد حاجبينه بصدمه منيف وهز راسه:من قالك هالكلام ؟

ثنيان:هو بنفسه القاتل الكلب

منيف:منصور ؟

هز راسه ثنيان ورفع راسه منيف:اهخ يارب

نزل راسه وناظر ثنيان:كذاب ثنيان كذاب وكذب نفس ما كذب عمي وكذبت شادن

تنهد ثنيان بإنزعاج:ماصدقته اصلاً

منيف:اقسم بالله ماهو كذا ، ملاك عاشت شي محد يعيشه وتحرش فيها واحد بمكتبها وجاها منصور وقتله قدام عيونها ودليل محاكمته اصلاً فيديو كاميرا من مكتب ملاك وبوريك اياه دقيقه

وقف منيف وعقد حاجبينه ثنيان يسكت ثواني ودخل منيف غرفته وجلس على كمبيوتره ودخل خلفه ثنيان وناظره

بحث بين مقاطعه وتسجيلاته ولف لثنيان:تعال

تقدم ثنيان وانحنى وشغّل المقطع منيف

عقد حاجبينه يشوف ملاك جالسه على كرسيها ودخل عليها رجّال وركض لها يمسكها وبعدت عنه وضربها يثبتها على الكرسي ، فتح عبايتها وهو خانقها بكف وكانت تضربه وتحاول تتخلص منه

ودخل منصور وسحب الرجّال وطاح على الارض واخذ منصور درع من على المكتب وخبطه على راسه بقوه

جلس على صدره يضربه بتكرار وكانت ملاك واقفه تصرخ وماسكه راسها وتبكي

عقد حاجبينه ثنيان بصدمه ولف منيف:منصور يبي ينتقم من ملاك بس عشانها تزوجتك

لف ثنيان يناظر منيف وكمل منيف:دق عليها بيوم زواجكم وعمي ماقصر كان يروح ويعبّي راسه عليها وعليك

وقف ثنيان ورجع ظهره للخلف منيف على كرسيه:اي صحيح ملاك سوت كل هذا عشان منصور بس منصور خذلها بالنهايه وخذلها عمي وخذلتها شادن ، لكنها والله تعبت ثنيان وقاعده تاخذ نصيبها من الناس اللي سرقتهم واكثر

سكت ثنيان وكمل منيف:ولو انها ماتشعر بالذنب والخذلان والحب اللي عاشته معكم ماكان تبرعت بكليتها لابوك ، تشوفه مثل ابوها وتشوفكم اهلها وبكت ايام طويله من صوت ضميرها

بلع ريقه ثنيان يشد على كفه وكمل منيف:كانت الفتره الاخيره تجي البيت وتنام بالصاله بعد ما تبكي ، كان كل كلامها عن تعاملكم معها وكيف تنادونها بنتي وتحتونها وانت اكثر واحد ثنيان شاف حزنها بميلادها انت شفت ثنيان

ثنيان هز راسه بتعب:ماني قادر

منيف وقف وتقدم لثنيان:مابيك تسامحها واذا ماتبي اختي لا ترجعّها بس لا تصدق كلام احد عنها ، انت عشت معها وانت عرفتها وما كذبت بشي عليك كل اللي قالته كان صدق لكن خبّت الحقيقه ما كذبت

بلع ريقه ثنيان وكمل منيف:عمي حرقنا من واحنا صغار ثنيان ، احترقنا بينه وخرجنا من عنده ولا سلمنا ، للحين يبي يحرقني ويحرق ملاك معي مع انها تعبت عشان نكون منهم وحاربت وذاقت المرّ وخاطرت عشانهم ، بالنهايه شوف وش سووا فينا

ناظره ثنيان وهو ساكت وكمل منيف:ما يهمني شي الحين غير ان ملاك ترجع وتكون بخير

مارد ثنيان ومشى يخرج من غرفة منيف وتنهد منيف وجلس وناظر الفيديو بقهر ووقف بغضب يخرج من البيت ولف ثنيان من شاف منيف خارج وهمس:وين رايح ؟

منيف تعداه:اخذ حق اختي

مشى يفتح سيارته منيف ومشى ثنيان لسيارته وركب

وناظر سيارة منيف وغمض عيونه بقهر ، ملاك دفنت نفسها بالنار والجمر عشانهم ومحد للان اخذ حقها ورفم انه محروق ماقدر ما يلحق منيف

وقف عند بيت عمه منيف ونزل ونزل معه ثنيان ومشى بسرعه منيف ودق الباب بقوه :منصور يا ابن الكلب اطلع

دق الباب بقوه ووقف خلفه ثنيان يناظره واقف محله

فتح الباب محمد وعقد حاجبينه:من الكلب ؟

منيف:انت وعيالك كلهم واللي جابك طلّع لي منصور الحين

خرج منصور وعقد حاجبينه وناظر منيف:خير انت ؟

منيف:وش قايل عن اختي ؟ وش قايل عن ملاك يا ابن الكلب ؟

رفع عيونه منصور لثنيان اللي واقف وناظر منيف:اذا عرفت تتكلم زين فتحنا لك بابنا

جاء بيقفل الباب وتقدم منيف وسحب منصور من ياقته وضربه

ومسكه بقوه منصور وتضاربوا وتقدم محمد بيفزع ومسكه بقوه ثنيان ولف عليه محمد بذهول

وقف منيف ورفس منصور على بطنه ولف لعمه يناظره:اقسم بالله اللي يدوس على طرف من اختي ملاك لأدفنه والله لأحرق هالبيت فوق روسكم ، خلاص عاد

محمد:والله لأشتكيك والله لأخليك تخيس نفس ماخاس ولدي

ثنيان لف لمحمد:زين تدري انه خسيس

وقف منصور وضحك وهو يتنفس بسرعه:وشو صدقت الهطف ذا وكذبتني ؟

ثنيان:ابلع لسانك لا اكمل عليك انا بعد

منصور:تعقب

تقدم ثنيان ومسكه منيف وضحك منصور:دام جيت بقدم لك هدية سلامتي بتعجبك

لف محمد عليهم وتقدم منصور ماسك بطنه وضرب الباب:يا أم محمد

عقد حاجبينه ثنيان ووقف منيف يناظرهم وخرجت جواهر من البيت وناظرت ثنيان وجمد وجه ثنيان من وجودها وعقد حاجبينه منيف يناظرها

وابتسم منصور يناظر ثنيان:شرايك ؟

رفعت حاجبها جواهر وتكتفت تناظر ثنيان وناظرها ثنيان بصدمه وعدم تصديق ورجع ناظر منصور اللي مبتسم:وش تسوي هنا ؟

منصور ضحك وتقدم ثنيان:انت وش قاعد تسوي ؟

منصور:اخذ حقي منكم

ثنيان رفع صوته:اي حق ؟ اي حق اللي اخذناه منك وبتردّه ؟ انت اللي قتلت وهذا جزاك ؟ انت صاحي والا مهبول ؟

ولف لجواهر بصدمه:كيف وصلتي له ؟ من دلك عليه ؟ ووين اهلك ؟

منصور سحبه من ذراعه:كلامك معي

رفع كفه ثنيان يصفعه كف وتقدم محمد يسحب ثنيان ورفع صوته منيف يدخل بينهم

وتقدم ثنيان يضرب منصور اللي ردّ له الصفعه وتضاربوا قدام عيون جواهر

وناظر عمه منيف بقهر من تسلطه ومن يده اللي يحاول يمدها عليه وضربه يدفعه وطاح محمد يجلس على الارض ولف منيف لثنيان يسحبه

وناظره ثنيان بغضب ورفع صوته:اقسم بالله ويمين بالله ان طلعت بوجهي لأذبحك وأبكي اهلك عليك تفهم ؟

منصور:تخسى ياولد عقاب تخسى وانا اللي برباك انت وزوجتك الـ

رمى شتيمه وتقدم منيف بيصفعه وابتعد منصور عنهم وناظره منيف:والله يامنصور لاطلع عشرتها من عينك ياجاحد

منصور:توكلوا بس لا انادي لكم الشرطه تلقطكم

ناظره ثنيان بغضب وهز راسه والتفت منيف وسحب ثنيان معه

وخرج ثنيان ومسك ركبته يتنفس بتعب وبلل شفايفه يذوق دمها واخذ نفس منيف ولف لثنيان يناظره

رفع عيونه ثنيان يناظر منيف وهمس ثنيان:ديني ودين الجحود

منيف هز راسه وهو يتنفس:ماقصرت

مشى ثنيان يفتح سيارته ومشى منيف يركب سيارته وحركوا سوا مبتعدين

ناظر وجهه ثنيان وشد على اسنانه بقهر من منصور وكلامه وغضبه وجحوده وهز راسه بصدمه:ما يستاهل ياغبيه ما يستاهل

انقهر من كل اللي سوته ملاك عشان كلب مثل منصور وشد على يده بقهر

ضرب الدركسون يتذكر جواهر يبي يعرف وشلون وصلت لمنصور وليه بندر ما نشر خبر زواجها ؟ وليه ما ما كان يدري عن شي ؟ ومتى تزوجها ؟ وهي اللي طلعته والا لا ؟

اسئله براسه كثيره مالقي لها اجابه وصرخ بقهر:اهخ ياملاك

النار تحرقه من ملاك واللي سوته بحياته وحياتها

-

( لا تنسون النجمه ⭐️)