تحميل رواية «هَيْصَم» PDF
بقلم Zahraa_Ahmed
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
اختر مجموعة الفصول للتحميل (كل ملف حتى 10 فصول)
عن الرواية
الكاتبة زهراء احمد ___ سواد، ظُلم نال العِباد ذلك الفارس اعتلى الجواد يُكنى بالأسد قوي الوتد لديه أعداء شرسين أقوياء مجرمين حُقراء وعلى جنبيه إثنين أحدهم يتعامل بالدين والآخر يدعي انهُ مسكين هذه الحرب اقامها طرفان كلامها ليس لديهِ عنوان غموض سرى في جسمان وبين طيات الصفحات نكشف لكم سر سببهُ الملذات اوصل بنا إلى دار الأموات اصوات سيارات الشرطه هي الوحيده المسموعه قريب هذا البيت، دخلوا جميع العناصر والقوا القبض على كل المشبوهين الموجودين جوه، شويه شويه ابتعد الصوت بعد مراحوا للمركز وبدوا تحقيق مع ا...
رواية هَيْصَم الفصل الحادي وثلاثون 31 - بقلم Zahraa_Ahmed
اول شي حابه اشكركم على التفاعل الجميل اللي يسوويلي واهس اكتب من صدك او وصول الهَيْصَم إلى اكثر من 100 الف قارئ بوقت قياسي جدآ شكرآ للداعمين والمتفاعلين والقراء كلهم،
خلوني اكلكم اللي يسأل كم بارت بقى للهَيْصَم وينتهي اني ممحدده وقت للنهايه لان قصتنا بعد بيها كومه أحداث يعني مطولين شويه لذلك تحملونه اني وابطالي والقفلات هههه،
وبمناسبة قروب الامتحانات اسأل الرب العظيم يوفقكم جميعاً طلاب او اهل الطلاب ويارب النجاح والموفقيه للكل.
وبهاي المناسبه عندي اقتراح عنوني شنو رأيكم انأجل الهَيْصَم البعد امتحاناتكم حتر تقرأون على راحتكم؟؟
مو تعصبون مجرد مقترح😇
وبالختام احبكم كلش هوايه غاليني انتوا.
رواية هَيْصَم الفصل الثاني وثلاثون 32 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
-صداعٌ..!
يخترق الذاكرة كصِراع،
الوقتُ يمضي كسراب،
وكُلُ شيءٍ أراهُ وهم..!
النوم لم يعُد قادراً
على احتضاني كالسابق،
نغزٌ بالقلب وغصةٌ بالحلق
لا تبارحني،
لا أعاني من شيء..!
لكن أعراضُ الخيبة
من نفسي بدأت تظهر
بشكل يُخيف..!
دموعي التي تواسيني،
اختفت..!
لم تظهر منذُ فترةٍ طويلة،
هجرتني وخوفي عليها يزداد،
بعد كل شعورٍ قاتل
يحتاجُ وجود الدمع به،
لا صمتٌ يجدي نفعاً
ولا الحديث يحرزُ قدماً،
صوتي الداخلي أرهقني..!
باتَ الحملُ فوق طاقتي،
الموت الداخلي بطيء جداً
ومؤلم..!
تحيا جسداً دون روح
وتمضي وعلى وجعك السلام.
هَيْصَم: لتبجين كافي تعرفيني ما احب اسمع صوتج هيج حزين.
: ليش هيج تسوي ويايه مشتاقتلك حيل وحتى اتصال متكلف نفسك وتسمعني صوتك وانت كلت انتِ بنيتي هذا وعدك اليه؟!
هَيْصَم: كافي باباتي ان شاءالله كم يوم وتجين يمي وتملين من شوفتي وتتمنين مجايه.
: لتحجي هيج انت آخر شخص امل من شوفته.
هَيْصْم: اذا هيج أمسحي دموعج وغسلي وجهج ولتنامين ضايجه مو زين عليج بابا.
: انتبه على نفسك حبيبي.
هَيْصَم: وانتِ هم يروح الهَيْصَم.
: جان فاتح سبيكر كدرت اسمع كلامها وياه، اختنكت حيل ومكدرت اتحمل وكعت على الأرض حسيت الألم مثل سجين ويدخلوها ابطني اخذتها حجه وصرت ابجي بصوت عالي ، اصعب شي بالكون من تشوف الشخص اللي تحبه يعيفك ويروح لواحد ثاني، طلع على صوتي يمكن، عاقد حاجبه وعيونه تتفحصني مسحت دموعي وسندت جسمي بأيد والايد الثانيه لزمت بيها مكان العمليه حتى أكدر اكوم وارجع للغرفه من شاف هيج وضعي وبصعوبه اتحرك وقفني بلزمت أيدي وكال بنبرة خوف.
هَيْصَم: ليش هيج وجهج اصفر بطنج تأذيج؟
سحبت أيدي من عنده وحجيت واني امشي مبتعده من يمه.
فيروز: لا ارجع كمل نومك.
هَيْصَم: مجنت نايم.
فيروز: تصبح على خير روح هسه نام.
هَيْصَم: منعسان.
فيروز: بس أني نعسانه.
هَيْصم: لَّباءَة لتعاندين شوفي شلون متكدرين تمشين عدل.
فيروز: مبيه شي لتخلي بالك يمي.
هَيْصَم: مضهرج ميدل على انو مبيج شي لتخبليني اذا حاسه بألم كولي اخذج للمستشفى المهم اطمأن على سلامتج.
: وكفت مكاني الألم صار اقوة خليت أيدي على بطني حسيت بلزوجه وشي حار ينزل سكتت وكملت طريقي بس أديه اللي حملتني من الأرض وقفت حركتي محجيت شي لان جنت محتاجه مساعده من صدك وعنادي هاي المره راح يسببلي مشكله، خلاني على الجربايه مالته وسد الباب رجعت بيه الذاكره لأول يوم اجيت بيه لهذا المكان همات سوه ويايه نفس الشي سبحان الله شلون ترجع الصدف تعيد نفسها بس اكو فرق هاي المرة، واللي هو قربه النافرته قبل صار راحتي هسه وبالحالتين ممرتاحه بثنينهن عذاب ومحد يعرف احساسي غير اللي عايشه، طلع الإسعافات من المجر وتقدم ناحيتي منعته.
فيروز: لتلزمني.
ابتسم وكال.
هَيْصَم: للضرورة أحكام لو نسيتي؟
فيروز: منسيت مع ذلك ما اقبل تلزمني كعد خالتي هي تساعدني لتسوي شي انت.
هَيْصَم: خالتج طول اليوم وياج وهي نايمه شلون ينطيج كلبج اكعدها؟!
وبعدين اني موجود وهي متعرف بهاي الأمور لذلك ماكو داعي نزعجها بهيج وقت.
فيروز: وانت من شوكت صرت طبيب وتفهم بهاي السوالف؟
هَيْصَم: علمودج اصير حتى مهندس الطب يوكف بوجهي؟!
فيروز: خف علينا زها حديد.
هَيْصَم: الله يرحمها خوش مره جانت بس بلدها مابيه خير محتضن هيج أنسانه عظيمه.
فيروز: هَيْصَم اختنكت.
عقد حاجبه وحرك أصبعه على صدره يأشر على نفسه وكال.
هَيْصَم: بسببي؟
فيروز: اي وجودك يمي يخنكني.
هَيْصَم: شنو السبب؟
فيروز: ماكو سبب هيج من الله.
هَيْصَم: لَّباءَة بكلبج حجي كوليه أسمع.
فيروز: اريد انام تعبانه حيل.
هَيْصَم: لا مو هذا انتِ اليوم كله مو لَّباءَة اللي اعرفها افتحي كلبج وسولفيلي صاير شي وياج احد مزعلج؟
باوعت بعيونه وحجيت بدون وعي.
فيروز: اي انت.
هَيْصَم: اني؟!
ليش شنو سويت!!
فيروز: مسويت شي خليني اطلع وانت اخذ راحتك.
هَيْصَم: تعرفين راحتي يمج صح؟
ضحكت مستهزءه وكلت.
فيروز: صح لهذا السبب راح تتزوج بنت خالتك.
هَيْصَم: الظروف بعض الأحيان تحكم المتنبي يكول
مَا كُلُّ مَا يَتَمَنَّى الْمَرْءُ يُدْركُهُ
تَجْري الرّيَاحٌ بمَا لَا تَشْتَهي السَّفَنُ
فيروز: على اساس متحفظ شعر؟!
هَيْصَم: نحجي بيها بالحياة العاديه ما اعتبرها من الشعر.
فيروز: لو مو الظروف متزوجتها صح؟
هَيْصَم: لا مستحيل اتزوجها اصلآ بس لخاطر العشرة بيني وبين أخوها مو اكثر.
فيروز: عادي اسأل عن السبب؟
هَيْصَم: يوم الجمعه اسولفلج التفاصيل وعد من عندي.
فيروز: مراح ابقى هَيْصَم.
هَيْصَم: الكلبجه موجوده بالغرفه تره حافظي على نفسج ولا كل دقيقه عايدة نفس الجمله.
فيروز: متخليني غصب عني مو بكيفك.
هَيْصَم: مراح اغصبج على شي مترديه بس فراقج والموت سوه ما أكدر ابقى بعيد عنج هن يومين مشفت بيهم عيونج شنو صار بحالي لو انت ناويه على موتي لَّباءَة؟
حجيت بسرعة بس ذكر الموت.
فيروز: اسم الله عمرك طويل ان شاءالله.
هَيْصَم: اشوف بيج حنية ام وصعب رجال يرتاح يم مرأه مثل ميرتاح يم أمه.
فيروز: كم مره حبيت هَيْصَم؟
هَيْصَم: مره من سنين وأعتقد اني على أبواب الحب مره ثانيه.
فيروز: منو هي؟
هَيْصَم: خليني اعالجج واشوف اذا الخياط بيه شي لو لا.
فيروز: ميحتاج اطلع بره اني اسوي الضماد.
هَيْصَم: متكدرين راح اغمض اعيوني حتى ما اشوف شي.
فيروز: وتعالجني على اللمس.
هَيْصَم: تردين اتصل بأرفد يجي يعالجج؟
فيروز: وعادي أرفد يشوفني؟!
هَيْصَم: تره أرفد دكتور مو اي احد.
فيروز: ليش تثق بيه لهاي الدرجه؟
هَيْصَم: لان انسان وفي ومحترم وميخون العشرة وصادق وصديق وأخ واذا اكو صفات ايجابيه بعد مكلتها فهي موجودة بيه.
فيروز: متزوج؟
هَيْصَم: ليش تردين تخطبيه؟
فيروز: هو مجرد سؤال إذا متريد تجاوب براحتك.
هَيْصَم: بنت عمه حبها وهي طفله وحارب حتى تصير زوجته جانت مريضه بالقلب وهو عالجها قبل فترة، راح تتعرفين عليها بالخطوبه هي أفضل شخص موجود اهناك واكدر اثق بيه من بعده لان مثل ميكول هي نسخه مصغره من عنده.
فيروز: ليش والبقيه متثق بيهم يعني؟!
هَيْصَم: الشخص اللي ممعاشره صعب اثق بيه بسهوله.
فيروز: وخالتك؟
هَيْصَم: من هاي العائلة عندي تواصل بس وي أرفد بشكل مستمر يعني صحيح احجي وي الكل بس هو اقرب شخص اليه.
فيروز: وخطيبتك؟
هَيْصَم: شنو بيها؟
فيروز: ماعندك تواصل وياها يعني؟!
هَيْصَم: لا.
فيروز: صدگ؟
هَيْصَم: ليش هذا الشك بنبرة صوتج؟
فيروز: مو السبب معين مجرد سؤال.
صغر اعيونه وبقى يباوع بوجهي فتره بعدين ابتسم وكال.
هَيْصَم: اذا على البنيه اللي حجيت وياها قبل متجين فهاي آمندا اختي هي متعلقه بيه حيل على رغم مجنت اروح هوايه للبيت بذلك الوقت بس لان فقدت والدي وهي مراهقه خلتني بمكانه.
: قلبي يرقص طرباً، من صدك فرحت حيل لمجرد عرفت انو هي اخته ابتسمت وخفيتها حتى مينتبه وحجيت امبرره موقفي.
فيروز: واني شنو خصني بحياتك اتصلت بمنو او حجيت وي منو مصدك نفسك الصراحه.
هَيْصَم: خليني اعالجج قبل ميخلص دمج وتجبريني أأجل الخطبه.
فيروز: لهاي الدرجه مستعجل؟
هَيْصَم: خير البر عاجله.
فيروز: راح تعقد نفس اليوم؟
هَيْصَم: اي اذا قبلت.
فيروز: وليش متقبل؟
هَيْصَم: ممكن متحبني ايجوز كلبها هاوي واحد ثاني.
فيروز: ينطي جوز للماعنده سنون.
هَيْصَم: شنو كلتي؟
فيروز: اهلها هيج عدهم حريه؟
هَيْصَم: بخصوص؟
فيروز: ترفض بكيفها؟
هَيْصَم: اللي يحب ميكدر يخالف كلبه.
فيروز: احنه بالعراق سيد افندي.
هَيْصَم: مشتاقلها.
فيروز: منو هي؟
هَيْصَم: سيد افندي.
: دام صمت بيناتنا قاطعه بمدت ايده للبدي مالتي جاب مكص وكص مكان الجرح حبيت من عنده هاي الحركه فتح الضماد ونظف المكان وعقم الجرح خلالي ضماد جديد أجيت انهض من مكاني منعني من كال.
هَيْصَم: ابقي مكانج راح اطلع عندي شغل بالمركز اشربي علاجج ونامي واذا صار شي اتصلي بيه.
: طلع من الغرفه اشويه ورجع بأيدة حبوبي وكلاص مي انطاني اياهم شربتها واخذهم من أيدي اجه يطلع توقفت أمام الباب التفتلي وكال.
هَيْصَم: لتتحركين هوايه حتى ميصير بيج شي، هاي المره جان مجرد نزف بسيط المره الجايه الله يستر.
فيروز: انتبه على نفسك واذا تذكرت من توصل انطيني خبر.
هَيْصَم: هاي اول مره اطلبين هيج طلب شنو المناسبه؟!
فيروز: المظاهرات تصير اقوه بالليل والرصاص يبقى مستمر لهذا السبب اريد اطمأن عليك من توصل بالسلامة ان شاء الله.
هَيْصَم: يلوموني.
فيروز: منو؟
هَيْصَم: انسي مو كل شي بالكلب ينشرح.
: طلع وبقيت وحدي نعست وحاولت ما أنام كلبي يمه خاف يصير بيه شي الله لايقدر تقريبا نص ساعة اكثر او اقل سمعت صوت اشعار طلعت موبايلي من جيب التراك هاي عادة عندي حتى لو هسه كاعده من النوم لازم موبايلي بأيدي قريت شنو كاتب.
هَيْصَم: اذا نايمه اسف على ازعاجج واذا كاعده نامي لتبقين لهيج وقت واذا صار اي شي اتصلي، بنص الحرب اترك كل شي واجيج.
: عرفته وصل ابتسمت ونطيته لايك على رسالته تذكرت جرحي والبدي اللي تلوث دم نهضت من مكاني ورجعت للغرفه بهدوء حتى متكعد خالتي طلعت من الكنتور ملابس نظيفه ودخلت للحمام لفيت بطني بنايلون حتى ميوصل المي للجرح سويت دوش سريع بدون ما اغسل شعري لان ما أكدر امشطه غيرت ملابسي وطلعت رجعت للغرفه وخليت نفسي جوه البطانيه خالتي من اليوم اللي طلعت بيه من المستشفى متخليني انام على الأرض خطيه هي اللي تنام ونومها على رغم ثكيل بس تبقى تكعد بوقت صلاة الليل تقرأ قرآن وتصلي ومترجع تنام طول فتره وجودها يوميه اكعد اصلي بوقتها صدك رفقة الناس الصالحه تخليك خوش انسان، وبين افكاري والماضي والحاضر دخلت بنوم عميق.
Flash back
: رجع ارفد من السفر بس هاي المره جانت رجعته مختلفه بالعادة يجي يحضني وينطيني هديه من سفرته لكن هسه جانت هديته مختلفه اول مصاح اسمي عرفت من نبرة صوته عرف علاقتي بمحمد وتأكدت من هذا الشي من ضربني مكرهته ابداً لان اعرف اللي سويته خطأ جبير عقوبته الموت بالعراق مع هذا استمريت بغلطي وعاندت حتى نفسي لكن بنفس الوقت عيون ايفلين ونظرتها اليه باستصغار خلتني احقد عليهن واشك انو هن وره كل هاي السالفه، شنو مكان الغلط اللي ارتكبته هذا مينطيهن الحق يوصلن معلومه لأخويه ويخربن علاقتي بيه لادين ولا القانون يسمحلهن،
اني من زمان اعرف بقصة حب أرفد وريفان لكن من عصبيتي من عدهن ومن نفسي الصراحه كلت اسمها، هي السبب بمعرفته بعلاقتي بمحمد صحيح هو مكال منو الشخص اللي اني مرتبطه بيه وهذا زاد شكي لان محد يعرف هو منو اصلاً، زادت عصبيته من تهمتها وصلت بيه إلى انو تبره من عندي وكل هذا اني اكول حقه بس خلي نكون واقعين ليش مجتمعنا يظلم البنيه ميحاسب الولد اكثر انسان راقي ومتفهم شفته كل حياتي هو أرفد وعلى رغم هو سوه نفس الشي واسوء هم عقد عليها بدون ميكول لأهلي، شي منشوفه بس بالمسلسلات سوا على أرض الواقع ومع هذا من صارت يمي ومن خطبني محمد كلها رفضت عاشوا حياتهم مثل ميردون وحكموا عليه اعيش مثلهم، بجيت لكن بسكته يكولون تعرف ناسك بأوقات الشده وعرفت امي هي كل شي بحياتي من صدك، دعمتني وبقت ويايه مكابلتني وتبجي على بجيي حسستني بحقارتي واللي سويته، اخذتني للغرفه وبقت يمي هم ضربتني بس مو كدام احد قفلت الباب حتى محد يشوفنه من ريحت كلبها واني اعرف هي مرتاحت حضنتني لصدرها وبقت تلومني واني ادموعي تزداد وي كل كلمه تكولها.
ناهده: ليش هيج بنيتي وفرحتي بهاي الدنيا بشنو قصرنا وياج وهيج تنزلين روسنا وتحجين وي الولد شلون تكابلين اخوانج وابوج بعد بأي وجهه هاي اذا سامحوج ونسوا غلطج.
حجيت من بين شهكاتي.
حوري: اسفه والله مردت هيج يصير.
ناهده: حبل الكذب قصير وان طال واللي يعيش بالحيله يموت بالفكر اعرف منكدر نسيطر على كلبنه بس احنه نساء بعيد عن العادات والتقاليد والحرام والحلال لتنسين كرامتج وعزة نفسج وشلون تحافظين عليها ومدنسيها للي يسوه والمايسوه اللي يحب يجي يخطب ميراسل بيج بنصاص الليالي.
ماعرف شلون طلعت من عندي من كالت هيج وكلت.
حوري: بس هو خطب وأكثر من مره وهم ميقبلون بيه.
لطمت على صدرها وحجت بعصبيه.
ناهده: عزه بعيني ولج منووو هذاا.
عرفت بعد ما أكدر اضم عنها اكثر من هيج وقررت اصارحها لان ماكو احد غيرها يوكف ويايه ويدعمني بهذا الظرف.
حوري: محمد.
سمعت اسمه واجاني كف ترك أثر اصابيعها بوجهي نزلت ادموعي وعرفت لحظتها حجم الجريمه اللي سويتها اني، تحجي ويايه بحركه كلب خفت ليصير بيها شي بسببي وقتها من صدك مراح أكدر اسامح نفسي على اللي سويته.
ناهده: ايا طايحه الحظ ادبسزز ملكيتي غير هذا واخوانج يشوفون عزرائيل وميشوفوه تدرين هذا المحترم شنو سوه بخوانج لو متدرين عندج علم راد يورط نسر بقضية رشوه يروح بيها وره الشمس تدرين محمد الطايح الحظ شنو من بلاوي مسوي؟
يشتغل وي المجرمين ايدافع عن المهربين والمدمنين والتجار شلون تردين اخوانج يقبلون بيه؟!
اصلآ حتى لو قبلوا اني مستحيل اقبل على الويلات اللي عيشنا بيها بذلك الوقت.
: بقيت ساكته بالليل عرفت انو ارفد يريد يزوجني لشخص يعرفه وراح يجي يخطب ونعقد يوم الجمعه تخبلت مستحيل اقبل بس ردت اتصل بمحمد بس موبايلي أخذه ارفد انتظرت امي تجي مكدرت اكلها انطيني موبايلج لان اكيد تشك بيه لذلك كلتها جوعانه وهي خطيه نست موبايلها بدون متدري ونزلت صحيح ما استاهل كل هذا اللطف من عدها بعد اللي سويته بس هيج الأمهات لو نبقى طول عمرنا نقبل برجليهن منوفي حقهن ابداً، طلعت رقمه واتصلت عليه بس ميرد شويه ودزلي رسالة.
محمد: منو؟
جاوبته بسرعه.
حوري: اني، محمد الحكلي سمعت ارفد يريد يزوجني فدوة لكلبك سويلي حل.
محمد: شنو الفلم مصار خمس دقايق من كالها شلون وصلتلج؟!
حوري: سمعته اني صوته عالي عيفك من كل هذا ونطيني حل شلون بيه؟
محمد: لتخافين ميصير شي وعيونج هذا اخوج بطران مفكر كل شي يكدر يسوي خلي يجي يوم الخطوبه والا انهي عليج كدامه وأريد اشوف شنو يكدر يسوي.
حوري: تخبلت شنو تنهي عليه؟!
محمد: والله اذا بقى بس هذا الحل اكيد اسويه ليش يابه ليكون انتِ موافقه على خطيب المستقبل واني ماعندي علم؟
حوري: شنو هذا الحجي هو اني بيا حال لو اريد اوافق عليه اتصلت عليك واني بهذا وضعي؟
محمد: فاجأتيني متصله عليه من رقم عمتي عبالي هاي خطه من ارفد حتى يكشفنا.
حوري: وشلون عرفت مو هو؟
محمد: لا اخوج الحلو كاعد كدامي وعيونه تطاير شرار على شويه ويحركني بنظراته وتعرفين اني شلون اخاف من عنده.
حوري: مو وقت استهزاء اريد حل.
محمد: كتلج محلوله نامي وانتِ مرتاحه من هاي الناحيه بس كليلي ان شاءالله مأذوج؟
حوري: جسمي مكسر اصلاً من الضرب بدأ بيه أرفد وختمها نسر.
محمد: اني اعلمهم على هاي السوايه عبالهم انساه لا والله وكل واحد مد ايده عليج حسابه يمي بس اصبريلي.
حوري: ما أريد مشاكل الله يخليك.
محمد: اتصل بيج بعدين هسه لازم نطلع الوالد عنده خفاره.
حوري: لا لتتصل امي هسه تجي على موبايلها وموبايلي يم أرفد مو يمي.
محمد: ماشي نامي وارتاحي ولتفكرين هوايه كل شي ينحل سركي كلبي.
حوري: ان شاءالله شنو اريد اكثر من هيج.
هَيْصَم: انت من كل عقلك تحجي؟!
أرفد: لا من نصه.
هَيْصَم: هاي اول مره اشوف واحد يخطب لأخته فاجأتني الصراحه!!
أرفد: اترك سوالفك وجاوبني تقبل لو لا؟
هَيْصَم: في حال كلت لا شنو راح تسوي؟
أرفد: ازوجها أياد.
هَيْصَم: بالله العظيم خبل.
أرفد: اريد جواب هَيْصَم.
هَيْصَم: مستحيل وانت تعرف السبب.
أرفد: وافق ومتندم بعدين هاي اول مره اطلب من عندك لخاطر عشرتنا.
هَيْصَم: واذا صار بيها شي بسبب هذا الموضوع؟
أرفد: على اساس قصة حبكم مثل قيس وليلى شو ثنينكم واحد اضرب من الثاني.
هَيْصَم: سوالف الشعراء بطلها وخليك واقعي وين اكو واحد يخطب لاخته بهذا الوقت؟!
أرفد: تره مجبتك من الشارع ابن خالها انت بعدين تعرف ظرفي واللي اريد أوصله من كل هذا فلتحسسني بالمنيه وافق وخلص.
هَيْصَم: راح تسببلي مشكله ورب السماء وهي مريضه ملكيت سوالفك وخططك الا بهيج وقت!!
أرفد: موافق صح؟
كولها خلصني.
هَيْصَم: أكدر أكول لا؟
تبقى بنت خالتي وسمعتها من سمعتي.
أرفد: لتبيعهن براسي أعرفك مرايد يصير هيج.
هَيْصَم: لحظه، الو.
هَمْاس: سيدي الآمر ضَيْثَم اهنا ويطالب بحضورك فوراً.
هَيْصَم: ماشي مسافة الطريق واني يمكم.
راح تنزل بيه عقوبه بسببك.
أرفد: هَيْصَم.
هَيْصَم: نعم.
أرفد: شكراً الك مراح انسى وكفتك ويايه طول العمر.
هَيْصَم: اشمرك بالسجن اذا عاملتني بهذا الأسلوب اخويه انت ميحتاج تشكرني.
أرفد: ربي يحفظها الك.
هَيْصَم: آمين ويحفظ ريفان هم.
أرفد: هذا احله شي اسمعه غير صوتها طول اليوم.
هَيْصَم: اروح قبل متبدي غزل كل مره.
أرفد: تعرف شعوري انت لتلومني.
هَيْصَم: والله انت اول شخص اشوفه يحب بهاي الطريقه.
أرفد: طريقتي بالحب كلش عاقله عكسك وعكس نسر.
هَيْصَم: ولهذا السبب كلت هاي الجمله، اني رايح اذا تريد شي اتصل بيه.
أرفد: محروس حبيب.
لائِث: صار ساعه وين جنت؟
هَيْصَم: اخذ راجدي بعد.
لائِث: متعرف شنو صار بفتره غيابك.
هَيْصَم: هي ساعتين شنو صار بيهن؟
هَمْهَام: سيدي واحد من المساجين هرب من السجن.
هَيْصَم: اي واني شكو؟!
هَمْاس: انقتل بالطريق لكوا جثته مرميه يم وحدة من المدارس.
ضَرْضَم: والآمر اهنا يريد نفتح تحقيق بالموضوع.
هَيْصَم: اكو شي أعمق هذا السبب مجرد حجه لجيته راح ادخل واشوف وانتوا انتبهوا على المكان.
ضَرْضَم: أمرك سيدي.
فتحت الباب بعد ماطلبت أذنه وسمحلي أدخل.
هَيْصَم: احتراماتي سيدي.
ضَيْثَم: رخي هَيْصَم.
هَيْصَم: طلبتني؟
ضَيْثَم: ليش عفت المركز؟
هَيْصَم: مشكله عائليه مكدرت أأجلها سيادتك.
ضَيْثَم: محلوله ان شاءالله، تعال يمي خلي انطيك المعلومات اللي حصلت عليها بخصوص القضيه اريد من عندك اتباشر بالبحث بسريه تامه انت والفريق حتى نكدر نوصل للأسود ان شاءالله.
هَيْصَم: ان شاءالله سيدي.
لائِث: شنو يريد من عندك؟
هَيْصَم: بسم الله الرحمن الرحيم.
لائِث: جني شايف!!
هَيْصَم: اكو واحد يدخل بهاي الطريقه غير دك الباب لو هي فالتوه؟!
لائِث: انسى اللي صار وسولفلي شنو يريد من عندك الآمر؟
هَيْصَم: انطاني معلومات بخصوص القضيه.
لائِث: ماشي، سمعت تريد تخطب.
هَيْصَم: اكيد امي كالتلك.
لائِث: عيفك منو كلي وحاجيني انت صدك تريد تتزوج وحده غيرها؟
هَيْصَم: اي.
لائِث: على الاقل احنه أصدقائك ليش مكلت نفرح لفرحك ونحتفل بيك لو متريد تعزمنا على الغده بمناسبه الخطوبة؟
هَيْصَم: بعقد المحكمه اعزمكم ونسوي حفله هذا العقد خلي يمشي بهدوء.
لائِث: هَيْصَم ليش حاس اكو أن بالموضوع؟
هَيْصَم: صدك احساسك.
لائِث: شو انت ما مهتم واني محترك كلبي اذا عندك شي كوله وريح اعصابي لتخليني افكر.
هَيْصَم: شنو تريد تعرف مثلاً؟
لائِث: خطوبتك من بنت خالتك خطه صح؟
هَيْصَم: منلعب ابنات الناس احنه مو هاي اخلاقنه لائِث.
لائِث: والنعم من تربيه عمي الله يرحمه.
هَيْصَم: وهسه اذا ماعندك شي اريد اشتغل.
لائِث: عندي بما انو فتره أفراح ومناسبات اريد افاتحك بموضوع مهم.
هَيْصَم: اسمع غرد.
كلاثم: شنو تحبين تاكلين على الغده حبيبتي؟
فيروز: خاله والله دتعبين نفسج ويايه ميصير هيج.
كلاثم: انجبي انتِ بنتي واذا الام متتعب لبنتها تتعب لمنو؟!
فيروز: صارن هوايه خاله ما أكدر ارجعهن.
كلاثم: لتحجين هيج ازعل من عندج والله.
فيروز: اذا طلعت من هذا البيت تكدرين تجين تزوريني اذا اجيتي لبغداد وابقى اشوفج كل فتره.
كلاثم: راح اموتج كتلج لتحجين هيج وتضوجيني حتى لو ابني الاثول متزوجج تجين يمي تعيشين حالج من حال بناتي معززه مكرمه واللي يمسج بسوء اطيح حظه وداعتج.
فيروز: الله اخذ امي وخالتي وعوضني بيج ربي مايحرمني ويحرم ابنائج من عندج.
كلاثم: ولا يحرمني من عدكم بعد حبيبتي.
: خلصنه غده وصار المغرب انفتح الباب ودخل وبأيدة اكثر من كيس انطاهم لخالتي.
هَيْصَم: لأن متكدرون تطلعون شتريتلكم ملابس ليوم الخطوبه.
كامت من مكانها وشمرتهن على الكاع وحجت بعصبيه.
كلاثم: بعدك مُصرر يعني!!
هَيْصَم: متعلمنه نضحك على بنات الناس يمة.
كلاثم: ولك اختي من أجيت لحد الأن متصلت بيها شلون تريد هسه اروح اخطب بنتها ألك، لعبه هي خو مو لعبه تخطب وتعقد متخاف الله انت مو عندك خوات باجر هم ينكسر كلبهن وتكون انت السبب.
هَيْصَم: ليش محسستني مسوي جريمه كل مافي الأمر قررت اكمل حياتي وي بنيه بنت حلال!!
كلاثم: روح يا هَيْصَم اذا عاندت وأخذتها ماني راضيه عليك ليوم الدين.
هَيْصَم: لهاي الدرجه زاعجج زواجي؟!
كلاثم: اي لأن اختيارك غلط واني ما احب ابني يمشي بطريق اعرف نهايته شنو.
هَيْصَم: شنو نهايته؟
كلاثم: ولك يوم افهم هاي ابنيه مدللة متتحمل حياتك وضغوطات شغلك ومنعك الها، معدلها عالي وتريد تدرس جامعه وانت باب البيت متقبل وحده تطلع من عنده شلون تعيشون سوه بس فهمني؟
هَيْصَم: تتعود هذا الموجود.
كلاثم: تكسر رجليها لو يوميه رايحه لأهلها زعلانه ما أريده طلكوني؟
هَيْصَم: اكسر رجليها بس لا منو يهتم بيها ابتلي اني وانتِ ومنا عندي شغل افضل حل تروح زعلانه.
كلاثم: تسمعين ولج راح يخبلني هذا الولد كبر وتسودن ماعرف شبيه؟
هَيْصَم: سحر مسحور ام هَيْصَم اني.
كلاثم: اسم الله منو ساحرك؟
هَيْصَم: عيونها ذوبني وسحرني وسون بابنج العمايل.
كلاثم: ويتغزل بيها كدامي هاي وهي بعيده وهيج اذا صارت قريبه شلون ماتشوف طريقك يمكن.
هَيْصَم: اخ لو تعرفين معاناة ابنج جان عذرتيني بس اللي يدري يدري والمايدري كبضة عدس،
صدك ام هَيْصَم ليش كبضة عدس شنو دخل العدس بالموضوع؟
كلاثم: اني وين وهو وين ربي تشوف؟
هَيْصَم: يشوف ويسمع ويعرف شنو يصير لذلك ريحيلي عقلج وحضري نفسج ليوم الجمعه مبقى شي وجنتج تنور هذا البيت واشبال الهَيْصَم هم.
كلاثم: شو انت صاير فد مره متستحي!!
هَيْصَم: لعد اللي يزوج شنو يسوي غير يخلف شنو دخل المستحه بالموضوع يا حبيبتي؟
كلاثم: ميفيد وياك الحجي اروح اصلي احسن وادعي الله يهديك.
هَيْصَم: لتنسين تدعين يهديها عليه صار يومين ضايجه بوجهي ومتحجي ويايه عدل والدنيا بسببها طالعه من عيني حتى نفسي مسدودة عن الأكل.
: عرفته يقصدني غلست مجاوبته صاير يضرب مسامير الأخ اقترب من عندي بخطواته اني مسويه نفسي العب بالموبايل بس اشوفه بدون ميحس بيه، وصل يمي وسحبه من أيدي رفعت راسي وخزرته عبالي ايشوف شنو اسوي بيه فاجأني من قفله وخلا يمي سحب الكرسي وكعد مقابيلي خله كوع أديه على افخاذه وحضنهم مع بعض تحت فكه وينظرلي بطريقه تفصيلية حسيته اخترق اعماقي خجلت وردت اكوم وقفتني ايده اللي خلاها على أيدي بقت عيونه تتفحصني، ردت إلهي نفسي بأي شي حتى ما اركز وياه واضيع بعيونه واني اللي اخسر اخذت الموبايل وردت افتحه رجع سحبه وخلاه يمه، هاي المره حاولت اكوم مره ثانية همات رجع سحب أيدي تعبت من هذا الوضع خليت عيني بعينه وقبل ما انطق اي حرف صدمني من كال.
يتبع.
تصبحون على الف خير شمعاتي.
البارت اكثر من 3700 كلمه.
حسابي الأنستا.
رواية هَيْصَم الفصل الثالث وثلاثون 33 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
الظروفُ كَذِبَةٌ !!
لَوّ أَحَبَّ الإنسانُ إنساناً لَأقامَ حَرباً مِنّ أجلِهِ •
_ ياسمين نايل
هَيْصَم: سولفيلي شنو صار وياج من نخطفتي إلى فقدانج للوعي اريد اعرف أصغر تفصيل حتى لو مو مهم بنظرج.
: بلعت ريقي وصفنت بوجهه شنو ممكن احجي وهو مترك شي سيء مسوا ويايه وحتى كلامه مجان محترم؟
قاطع تفكيري وهو يرجع يكول.
هَيْصَم: لتفكرين تهربين من سؤالي هذا الموضوع كلش مهم لازم اعرفه.
عقدت حاجبي وسألته.
فيروز: ليش؟
هَيْصَم: لان لّهيم مطالب للدولة وقضيتج راح تنضاف لبقية التهم الموجه اله.
فيروز: انسى اللي صار ما أريد ارفع عليه قضيه ولتسألني عن ذلك اليوم الله يوفقك.
هَيْصَم: شنو السبب؟
سوالج شي لَّباءَة؟
: توترت من هذا السؤال وطارت كل الافكار من راسي ورجعت بيه الذكريات لذلك اليوم من تحرش بيه وراد يفرض نفسه بالغصب، اكله انو راد يعقد ، لو من حاول يعتدي عليه حتى انجبر اتزوجه واترك هَيْصَم؟
معرفت شلون اطلع نفسي من هذا الوضع فألتزمت الصمت وبقيت صافنه بوجهه حرك حواجبه بمعنى يلا شي داخلي كلي احجي الحقيقه هي خربانه خربانه شنو يصير مثلاً.
فيروز: اي صارت هوايه اشياء مزعجه وما احب اشاركك بيها لتجبرني.
هَيْصَم: مثل شنو؟
لتخليني اخترع إجابات من رأسي وخاصتاً اعرف هيج نماذج وتفكيرهم القذر لَّباءَة ريحي مخي وسولفي شنو سوالج ذلك الحقير من خطفج.
فيروز: وليش تريد تعرف؟
شنو مسوه بيه ما ألك دخل.
هَيْصَم: شلون يعني ما ألي دخل؟!
فيروز: ليش شنو دخلك انت؟!
هَيْصَم: بقى خيط واحد بعقلي لتخليني افقده بسبب اسلوبج واعنادج مسأله مهمه هاي لازم اعرف بيها حتى اضيفها للقضايه مالته اريد تساعديني خليني أكدر اطالب بحقج.
فيروز: مسوالي شي.
هَيْصَم: كذب.
فيروز: لتصدك مشكلتك مجبرتك اني.
صدمني من كال وهو مصغر عيونه ويباوعلي يترقب ردة فعلي.
هَيْصَم: والاثر اللي موجود على ركبتج، او المنظر السيء اللي جنتي بيه تردين اتجاوز كل هذا لَّباءَة؟!
ابوج اذا سألني ليش هيج صار وياج ومحافظت على الأمانه شنو اجاوبه؟
: جحظت عيوني وحجيت بسرعه صحيح شفت الأثر بركبتي بس عقلي مطار بعيد مثل مسوه بيه كلامه هسه فكرت انو الأثر من اللي صار قبل ميحقني بالابرة مفكرت ابد صار شي مو زين على بالي نقذني وخاصتاً هو مسألني قبل هذا اليوم.
فيروز: لحظه بس شنو يعني منظري سيء ليش بأي حاله شفتني؟
هَيْصَم: سولفيلي حتى اعرف اجاوب على سؤالج.
فيروز: صعب ما أكدر احجي.
هَيْصَم: لَّباءَة افهمي موقفي اعتبريني ضابط بالشرطه وانتِ اهنا ترفعين قضيه ابتعدي عن علاقتنا الشخصيه وسولفيلي يلا.
فيروز: ما أكدر هَيْصَم الله يخليك لتجبرني.
هَيْصَم: واثق بيج اعرف عدل انتِ ممسويه شي غلط واذا صار شي فجان خارج عن أرادتج اني رجل شرقي صح لكن عقلي متحضر عشت بهوايه مجتمعات وخالطت هوايه ناس واعرف الزين والموزين من اعيونه لتفكرين ابداً كلماتج هسه راح تغير من نظرتي ناحيتج، وعليه افتحي كلبج شاركيني كصديق.
: كلامه طمأني بس والله صعب يعني شلون اكدر اسولفله شنو راد يسوي بيه يبقى رجل على رغم كل كلامه هسه بس اكيد راح يروح عقله لمكان ثاني ويظن بيه سوء، بقيت ساكته حتى صرخ بيه.
هَيْصَم: وتالي وياج لَّباءَة واللي رفع السماء بدون عمد اذا محجيتي بالطيب اخليج تحجين بالغصب الف مره كلت متفهم وضعج واعرف عدل مسويتي شي غلط لكن ذلك الحقير لازم ياخذ عقابه انطقي خلصيني تره صبري بده يخلص.
فيروز: قضيه ما أريد ارفع وحجي مراح احجي اللي صار يخص حياتي الخاصه وانت ما ألك علاقه عيش حياتك واترك فيروز بحالها هَيْصَم.
هَيْصَم: مستحيل تحلمين.
: عصبت حيل من عنده وحجيت بنفس نبرة صوته واني مخليه عيني بعينه.
فيروز: اني ماعرف شنو هو الوضع اللي شفتني بيه لان جان بعد محقني الأبره بس قبل كل هذا حاول يتحرش بيه راد يعتدي عليه حتى يجبرني اقبل بيه زوج ومن رفضت مجان عنده حل غير المخدرات هذا كل اللي صار عندك سؤال ثاني؟
بعد اللي حجيته عفته وكمت لزم أيدي او وقفني نزلت دموعي بس مسحتها بسرعه مخليته يشوفها.
هَيْصَم: مسويتي شي غلط او وعد من عندي راح القي عليه القبض واعاقبه على كل جرائمه واللي سوا وياج عقوبته خاصه ميعرف بيها بس رب العرش.
فيروز: كل اللي أريده اترك هذا البيت بأسرع وقت ممكن وبالنسبة لانتقامك لتدخلني بيه بكل الأحوال اللي صار ما اله علاقه بقضيتك ولاشخصك.
دارني اله من اكتافي باوع بعيوني وعقد حاجبه وكال.
هَيْصَم: شنو قصدج؟
فيروز: لّهيم هو نفس الشخص اللي حجيتلك عليه الطالب اللي جان ويايه بالجامعه وخطبني واني رفضت لان اعرف بيه مدلل ومو حمل مسؤوليه وبالاصح مجنت احبه ابداً لكن داخله عكسي تماماً اني اكرهه وهو يحبني ويمكن لهذا السبب رب العالمين عاقبني بنفس شعوره.
هَيْصَم: تذكرين ابن منو؟
فيروز: اي بس ناسيه اسمه الصراحه.
هَيْصَم: انتِ بس كولي اسم الشخص اللي تعرفيه والباقي يمي.
فيروز: مراح تفيدك معرفته لان هو معايش ويه اهله تركهم.
هَيْصَم: شلون يعني!!
فيروز: تبره من عدهم هو هيج كال.
هَيْصَم: اتبع وياج طرق ملتويه.
فيروز: شلون يعني؟
هَيْصَم: كل انسان ذكي من يخلي خطه لازم تكون اكو بديله في حال خسرت اول وحده وهو سوه هيج في حال كدرت اعرف مكانج ونقذتج ما أكدر اخذ كل المعلومات عنه وخاصتاً بعد معرفتج بهويته الحقيقيه لذلك أستخدم هذا الأسلوب حتى يوهم عقلج ف حتى لو عرفنه منو هو منكدر نلقي عليه القبض.
فيروز: ممكن يكون ابوه متفق وياه هم؟
هَيْصَم: احتمال لكن مو شرط اغلب الاولاد يسوون اشياء بدون علم أهلهم.
سكت شويه بعدين كمل بنبرة حنينه.
هَيْصَم: لتلومين نفسج على اللي صار انت ما الج ذنب.
فيروز: ليش واثق بيه لهاي الدرجه؟
هَيْصَم: بقيتي ويايه فتره طويله مشفت من عندج شي غلط وحسب معرفتي بيج مستحيل تسوين شي غلط هم وهذا المتوقع من أنثى الأسد ولهذا السبب اني كلت انتِ الوحيدة اللي أكدر أأمنها على عريني.
فيروز: واذا طلعت مو مثل ممفكر؟
هَيْصَم: مو عبثاً اني ضابط بالشرطه مو بالسهوله انطي ثقتي لأحد.
فيروز: شكراً الك على ثقتك وعلى بقائك ويايه طول الفتره المضت انت اكثر شخص غير نظرتي للناس والضباط هم، الاحترام اللي شفته بيك خلاني اتأكد مو كل أصابعك سوه ولا كل الناس مثل بعض وملازم نحكم على الناس من اول نظره او بدون منعاشرهم، جنت صعب هوايه ويايه ومكروه بأول ايام لكن بعدين صرت بحنية اب وحتويتني مثل الطفل، جانت من أجمل أيام حياتي بعد وفاة بابا مستحيل أكدر انساها وراح تبقى عايش بذاكرتي دائماً واذا رجعت الطرق جمعتنا مره ثانيه راح نكون اصدقاء مو متسلم عليه تره احرجك حتى لو يم جماعتك جنت.
هَيْصَم: انتِ كل عقلج اسمح تبقين مجرد ذكرى بحياة الهَيْصَم؟!
فيروز: بعد زواجك اي راح ابقى مجرد ذكرى اذا تذكرتني اصلاً ، زوجتك تغار اكيد وهذا الشي من حقها.
هَيْصَم: وليش زوجتي تغار من عندج؟!
فيروز: قابل تسمحلك تتواصل ويايه وحتى لو قبلت اني مستحيل اقبل ما ان تعقد عليها اقطع علاقتي بيك.
هَيْصَم: الله كريم ليوم الجمعه الف اعمامه تنكلب.
فيروز: راح انام اني نعسانه تصبح على خير.
هَيْصَم: الساعة خمسه نوم شنو هذا؟
فيروز: منمت البارحه هوايه ونعسانه هسه.
هَيْصَم: صلي وتعشي ونامي اني بكل الأحوال عندي شغل لازم ارجع للمركز.
ترك أيدي وطلع وصل يم الباب مال الصاله التفتلي وكال.
هَيْصَم: بعد ساعة اتصل بيج اذا مجاوبتي ارجع للبيت وصدكيني تتعاقبين.
ابتسمت على نفس التهديد دائماً عقوبات الهَيْصَم متنتهي.
هَيْصَم: وين انت اريد اشوفك يم دجله.
لائِث: خيرك هَيْصَم انت متجي لهنا الا اكو شي مهم.
هَيْصَم: محتار وماعرف شنو اسوي واريح كلبي، محد يفهم معاناتي ابداً انت اكثر واحد يعرف شكد عانيت ليلي مجنت انامه عشت عشر سنوات بنفس العذاب حتى لنفسي ما أكدر اعترف بيها ومع هذا ما أريد اشوفها بعيده عني.
لائِث: تحبها؟
هَيْصَم: يمكن.
لائِث: وليش متعترف!!
هَيْصَم: اخاف عليها.
لائِث: من شنو؟
هَيْصَم: يصير بيها نفس الشي، جرحين على كلبي هو الموت نفسه.
لائِث: الماضي انتهى هَيْصَم ومراح يرجع مره ثانيه ما أكدر اكلك تنسى ومستحيل تكدر تنسى اصلاً بس لازم تكمل حياتك ميصير تبقى بالماضي.
هَيْصَم: احبها وما احبها ، اريدها وما اريدها، احس بقربها راحتي او بُعدها عذاب لكلبي، دموعها مثل رصاص العدو توجع كلبي حيل أو آخ يا ابتسامتها ترجعني لأيام عشريني، ما أكدر ابتعد عنها ابد واني اللي جنت متعلق بشغلي واطلع القضايا من جوه الكاع صرت ادور فرصه ارجع بيها للبيت حتى أشوفها، ضوجتها بهاي اليومين وكاره نفسي حيل لان اشوفها شلون متغيره بسبب هذا الموضوع.
لائِث: اذا هيج تحبها انت ليش متعترفلها وتعيش حياتك المعشتها قبل شنو اللي يمنعك هَيْصَم؟
هَيْصَم: أعدائي هوايه وعلى اي ساعه اموت ما أكدر اعلقها بيه اكثر واتركها بنص الطريق.
لائِث: لو الكل تفكر بنفس عقليتك ولا واحد تزوج.
هَيْصَم: اريد حل لائِث راح اموت والله مبقى الا القليل وعقلي يوكف بسبب التفكير اكو بكلبي نار مشتغله ما أكدر اطفيها مستحيل احد يفهمني ولك اللي عشته معايشه احد، بأديه دفنتها بعد حب سنين طويله ردت ابقى وياها طول العمر وعافتني بسرعه وراحت بالكبر خانت الوعد وتركتني عايش وحدي بالعذاب ماتت لائِث تعرف شنو يعني ماتت؟ وخايف لايعيد التاريخ نفسه ويصير بيها نفس الشي ساعتها ماعرف شنو يصير بيه.
لائِث: هذا دعاء امك بصلاة الليل الله دزها ألك حتى تنسيك الماضي وتفتح وياها صفحه جديدة.
هَيْصَم:هاي المره اذا صار نفس الشي اموت لائِث والله اموت.
لائِث: اسم الله عليكم أن شاء الله تزوجون ونشوف أطفالكم وتربوهم سوه.
هَيْصَم: ما أريد أطفال اني.
لائِث: اول رجال اشوفه ميريد أطفال!!
هَيْصَم: اذا صار بيها شي يفيدني الطفل؟
لائِث: بالعباس انت خبل.
هَيْصَم: احجي جديات اني ما اشاقه ما أريد من عدها شي غير تبقى بصحه وعافيه والباقي كله مو مهم.
لائِث: هسه هذا عرسك مو؟
هَيْصَم: برأيك أكدر ازوج وحده غيرها؟
لائِث: وبنت خالتك؟
هَيْصَم: سالفتها طويله هاي اصلاً هي خطوبتنا والشيخ اللي يجي علمود عقدنا بس اني ما أريد احد يعرف بسبب وضعها الصحي خلي تصير احسن واسوي حفله بالقاعة واعزمكم كلكم.
لائِث: حتى خواتك متكللهن؟
هَيْصَم: وانت ليش تفكر بخواتي؟!
لائِث: احترم نفسك اني مو من هذا النوع.
هَيْصَم: على اساس اسمحلك تصير من ذلك النوع ادفنك على ضفاف دجله وحتى كبر ما اخليلك.
لائِث: عنيف اويلي.
هَيْصَم: خلي نرجع للمركز ونخلص القضايا العدنه.
لائِث: تدري تذكرت قصيدة للجواهري يكول بيها:
حييت سفحك عن بعد فحييني
يادجلة الخير يا أم البساتيني.
اقراله الفاتحه شو خطر على بالي.
هَيْصَم: وأقرأ للشهداء وياك.
لائِث: هو صدك وين مدفون؟
هَيْصَم: من اشمرك اهنا بنص المي اكو واحد يلومني؟
لائِث: امك.
هَيْصَم: هو منو منطيك مجال غيرها؟
: نايمه واكو أيد تلامس وجناتي فزيت مرعوبه اخذت نفس وحجيت بعصبيه ممزوجه بنعاس.
فيروز: وتالي وياك شوكت تبطل جيات الحراميه للغرفه مالتي؟
هَيْصَم: أجيت اخذ رأيج بشغله ماعرف ذوق النساء شنو تكدرين تساعديني؟
فيروز: خلصني شنو تريد؟
طلع من جيبه خواتم ثنين لازم كل واحد بأيد خلاهن كدامي وأشر بعيونه عليهن وكال.
هَيْصَم: منو احله؟
فيروز: صدك والله؟
هَيْصَم: اي والله.
فيروز: اسأل اللي راح تلبسه اني شكوو.
هَيْصَم: اني دا اسألها.
فيروز: تره بنت خالتك العروس مو اني لو النعاس ضارب مخك سيد افندي وصرت تشتبه بيناتنا؟
هَيْصَم: مقبوله من عندج جاوبيني قبل متجي امي وتخلينا نعقد باجر.
: ثنينهم متشابهين بس واحد بسيط وشكله مرتب والثاني لا الصراحه جذبني الخاتم الهادئ اشرتله عليه.
فيروز: هذا رأيي لتلبسها مثل ما اني احب وهسه اذا ممكن تطلع اريد انام نعسانة.
هَيْصَم: كلش صعب واحد يعرف اذواقجن، على كل حال شكراً الج وتصبحين على الف خير.
: تركني وطلع نزلت دموعي كلما افكر بشي يرجع الواقع يصدمني بشي اقوه.
ريهاف: وحق الخالق وداعة اخويه هاي المره اذا مبطلت تراسلني اكل لاخويه عليك وهو يشوف حل تره لعبتها النفسي كم مره كلت ما أريدك ما احبك ما اقبل اتزوجك لو تصير نبي زمانك افهم زواج ما اتزوج علاقه ما ادخل صداقه ما أريد نقطه انتهى لتلح بعد.
أجيت احظره صدمني برسالته.
: احبج وخطبتج حضري نفسج راح ازوجج وتصيرين ابيتي عن قريب.
عصبت اكثر من عنده رجعت دزيت.
ريهاف: قسم برب العباد انت انسان عديم اخلاق ومتستحق من عندي غير الحظر ولو مو امي تتصل بيه بهذا الرقم جان غيرته بس اصبرلي يجي اخويه واكله عليك.
رجع دزلي وياها سمايل كلب.
: اخوج من يرجع راح يكلج على الخطبه طلبتج من عنده وهو وافق بقت بس موافقتج حبيبي.
ريهاف: واني مستحيل اقبل بيك تحلم.
: الله كريم المهم انتبهيلي على نفسج ولتعبين هوايه، وها صدك حتى لو غيرتي الرقم هم اعرف الرقم الجديد واراسلج من عنده، تصبحين على خير ياوجه خيري.
شمرت الموبايل على الجربايه وصرت اتنفس سريع منو هذا وشنو يريد من عندي والله راح اتخبل؟!
فيروز: الوقت يمشي بسرعه جبيرة وصار يوم الجمعه اليوم اللي مردت يجي أبداً ، هنا راح نفترق والبيت اللي جمع أجمل ذكرياتي وي اكثر انسان حبيته بهاي الدنيا راح افارقه وهاي المره بشكل قطعي، الحزن اللي بداخلي لايوصف بعد متعودت عليه افقده بهاي السهوله والله صعب تخسر حبيبك كدام عيونك ومتكدر تسوي شي هسه يلا حسيت بمعاناة كل شخص فقد حبيبه وفارقه، الموت مو الشي الوحيد اللي يخسرنا ناسنا بعض المرات الخسارات تصير بسبب سوء فهم لو الكبرياء الزايد والخوف من السمعه اللي يجبرنا احنه البنات منعترف للشخص المقابل النه بالحب ونكتم مشاعرنا داخلنه وهنا نكون منتظرين شغلتين اما مع مرور الوقت ننسى ونتجاوز لو تبقى هاي الذكريات تعذب بينه بكل ليله.
شفته متأنق لابس قاط اسود وقميص ابيض طالع صاك بقيت صافنه عليه عطره الهادئ تغلغل بداخل الرئه مالتي تمنيت يبقى واكف قريب من عندي وميبتعد بس مصار هيج ابتعد من صاحتله خالتي، دخلت لغرفتي اني هم ونزلت دموعي معقوله بعد كل هذا هاي النهايه ليش هيج؟
شنو ذنبي نحرمت من كل الأشخاص اللي احبهم مبقى عندي احد حتى هَيْصَم هم راح يتركني ويروح لوحده ثانيه وينسى فيروز منو، وربي ما استاهل كل هذا، ليش هيج يصير ويايه لعد؟
بجيت لطمت صرخت بسكته بس شنو أكدر اسوي يبقى الواقع نفسه واليوم خطوبته مسحت دموعي وكعدت على الجربايه تمنيت محد يجي يمي وما انجبر اروح وياهم واذا نحطيت أمام الأمر الواقع اكله بطني تأذيني ما أكدر اروح لان مستحيل اتحمل اشوف يعقد عليها اموت بمكاني.
صحيت على طرقات خفيفه على الباب كلت تفضل دخلت بأبستامتها المعهوده اجت يمي ولمتني بحضنها ابتسمت بوجهه جان بايدها علاكه انطتني اياها وطلعت بدون متحجي شي صفنت عليه وقبل ما افتحه وصلتني رساله عرفتها من عنده فتحتها وقريت شنو كاتب.
هَيْصَم: انسي اليوم خطوبتي من بنت خالتي واعتبري اليوم خطوبتج اريدج تصيرين احله وحده بكل الحفله على رغم اني اعرف بدون شك انتِ احله وحده واذا حابه تخلين مكياج اخذي راحتج جبتلج نقاب تكدرين تلبسيه لان بكل الأحوال راح تلبسيه حتى محد يعرفج.
: ماعندي خلك اجادله سديت الموبايل وفتحت العلاكه لكيته فستان ابيض بالعادة اللي تنخطب بحفله العقد تلبس ابيض هذا ليش جايبلي ابيض؟
همات مفكرت عقلي متوقف عن العمل او اني ما أريد افكر بشي مجان اليه حيل ولا واهس اطلع اخذت الموبايل ودزيتله رساله.
فيروز: بطني تأذيني هَيْصَم ما أكدر اروح وياكم الف مبروك مقدما والله يرزقك السعادة وراحة البال وياها.
اقل دقيقه جاوبني.
هَيْصَم: مراح يرزقني شي اذا مأجيتي ويايه وبالنسبه لبطنج فالدكتور اللي سوالج عمليه موجود اهناك ايشوف جرحج ويعالجج بكل الأحوال اني جنت ناوي اخذج للمستشفى وهاي فرصه لذلك تحركي بعد نص ساعة نطلع واذا مغيرتي ملابسج تطلعين وياي بملابس البيت وانت تعرفيني اذا كلت كلمه ما اخلف بيها.
: اخذت نفس عميق وزفرته كمت من مكاني وغيرت ملابسي ، فستان ابيض مستور بس اردانه كيبور ومخصر على كل الجسم لبست شال بيج وبقيت منتظره استحي اطلع هيج كدامه اشويه واجتي خالتي الدمعه بعينها بسرعه اجت حضنتني لصدرها وتحجي ويايه بكل حنيه.
كلاثم: ماعرف ابني شبي معمي عن هيج جمال واخلاق وراكض وره وحده بكبر بنته.
فيروز: لتحجين هيج خاله ادعيله ربي يوفقه ويسعده وي اي ابنيه يختارها.
سمعت صوته قريب على الباب يحجي بصوت شويه عالي.
هَيْصَم: يسعدني لتخافين لان اختياري صح الأسد ميختار غير لَّبوة تليق بيه لَّباءَة الهَيْصَم.
كلاثم: والله اذا تزوج حوري بعمرك متشوف الراحه من وراها بنت دلال لتتوقع تتحمل حياتك.
هَيْصَم: تتحمل ام هَيْصَم تتحمل تربيه أيدي هي.
كلاثم: تأخرنا يا حبيبتي ابني المحترم ميقبل تطلعين هيج لازم تلبسين عبايه ونقاب مسيطر على الناس بدون حجه شرعيه ماعرف ليش كل هذا التحكم وهو راح يتزوج وحده ثانيه!!
هَيْصَم: ام هَيْصَم لتسمعيني اني اعرف بمصلحتها.
كلاثم: بشنو اعرف بله؟
هَيْصَم: ما أريد احد يتعرف عليها مصار اسبوعين من تعرضت لحادث والبيت ممكن مراقب حفاظاً عليكم هيج طلبت لتعتبرنه إجبار وإنما من باب الحب.
كلاثم: ليش تعرف تحب انت؟!
هَيْصَم: علميني.
كلاثم: طفل واعلمك الانسان الذكي يعرف مصلحته.
هَيْصَم: اعرفها والله شخبصتوني استعجلن خلي نطلع تأخرنا على الناس.
: لبست النقاب والعباية وطلعت ماعرف امشي بيها من ابنيه بدون حجاب لبنيه منقبه نشوف تاليها وي الهَيْصَم شنو، طلعنه وخالتي تساعدني شويه او اوكع على وجهي كرهت نفسي حيل وردت انزعها بنص الشارع وشنو يسوي مثلاً؟
تراجعت واستغفرت ربي رادت خالتي تصعد بالوره يمي وقفها.
هَيْصَم: تعالي اهنا يوم اريد استبرك بيج.
كلاثم: خليني اساعدها متكدر تصعد.
هَيْصَم: اني اساعدها متكدرين انتِ.
كلاثم: بهذلت البنيه وياك لو بس اعرف ليش تريد تسوي هيج جان رتاحيت.
هَيْصَم: لو بس تبطلن العجله الف مشكله انحلت لو اخليجن بالجيش بنفس اليوم يسقط البلد ولتصبرن ابداً مستعجلات دائماً.
كلاثم: لتحجي علينه ولك.
: راحت خالتي حتى تصعد هو استغل الفرصه وشالني وهمس بأذني.
هَيْصَم: مو تحرش وإنما متكدرين تصعدين.
: صعد بمكانه واني رفعت النقاب اختنكت حيل السيارة مضلله لذلك مو مشكله شفته يباوعلي من المرايه اللي امامه مجنت مخليه مكياج هوايه بس كحله وروج وردي بسيط صفن شويه بعدين شغل اغنيه وعله الصوت ويقرأ وياها وعينه عليه.
هذا الحلو كاتلني يعمه
فدوة شكد احبه وارد اكلمه
روحي كلها يمه
يعمه يعمه.
صاحت بيه خالتي.
كلاثم: اليوم مبارك وحياة جديدة ألك لتشغل اغاني قرآن افضل بلكي رب العالمين يهديك آخر لحظه.
هَيْصَم: هاديني لتفكرين بيه.
: بقينه طول الطريق ساكتين وهو هم شغل قرآن تعجبني علاقته احسهم اصدقاء اكثر من ابن وأمه.
حوري: بقيت كاعده بمكاني ودموعي تنزل ما أكدر اتواصل وياه وحتى امي ماعرف وينها مأجت يمي، اشويه ودخلت ايفلين تواسيني وتبجي ويايه فتره ودخلت ريفان عاطت بينه نهضت وغيرت ملابسي وحتى مهتميت شنو لابسه ساعدتني ايفلين وخلتلي مكياج واني منطقت ولاحرف بس رب العالمين يعرف بشنو داخلي شويه وسمعت وصلوا نزلت وكعدت بالصاله لكيت خالتي موجوده نصدمت شنو جابها اهنا وزاد صدمتني من البنيه اللي جانت وياها مخطر على بالي شنو الموضوع فكرت هم عازميهم بس هاي البنيه المنقبه منو؟
طردت كل هاي التساؤلات وبقى عقلي كله يمه شنو ذنبي يحرموني من الشخص اللي احبه واصلاً كل اللي يصير غصب عني وميجوز ،كل واحد اختار الطريقه اللي يريد يعيش بيها حياته ومن وصلو يمي كلهم صاروا علماء كفنوني بفستان ابيض ودفنوني بعقد باطل وزواج محرم وعلى بالهم اسامحهم وأبريهم الذمه اعرف عدل اني غلطانه بس الحكم مو عادل ابد والعراق العظيم يبقى طول عمره ينحاز للولد عكس البنيه، سمعت صوت خالتي تحجي ويايه.
كلاثم: شلونج حوري؟
طريقتها جافه فاجأتني هي متحجي ويايه هيج ابداً!!
حولت نظري الها وجاوبتها.
حوري: الحمد الله خاله انتِ شلونج.
كلاثم: والله اليوم كلش مو زينه بنتي فيروزة متأذيه وبالي كله يمها.
ناهده: نفسها هاي البنيه اللي وياج؟
كلاثم: اي هي لعد منو.
ناهده: صدك نسيت اسأل منو هي اول مره اشوفها؟
كلاثم: بنتي الخامسه وحبيبة كلبي.
: ابتسمت على اجابتها بقوا يحجون شويه ودخلت ابنيه عرفتني على نفسها ريفان تذكرت هَيْصَم من كال هي اكثر وحده يثق بيها بعد أرفد بهذا البيت وصلت يمي وطلبت من عدها اطلع كلش ختنكت خاصتا بعد مشفتها بنيه حليوه وصغيره بسرعه خطرت على بالي افكار وخيالات ما انزل الله بها من سلطان، ردت بس اطلع حتى اشم هوه اخذتني للمطبخ اشويه واجه ارفد سألني عن صحتي جاوبته وانتبهت عليهم هو وريفان جاذبيتهم حلوه والطريقه اللي يتعامل بيها وياها قليل اشوف ناس مثله بهذا الوقت هيج يتعامل وي زوجته دعيت داخلي ربي يحفظهم لبعض وميفرقهم ابد، بقيت كاعده وهي صعدت تلبس شي مستور السيد افندي يريد يسلم عليها اعرف هاي حجه من عنده حتى يجي لهنا صرت حافظه حركاته وفعلاً اشويه ودخل للمطبخ وتقرب من عندي صفن بوجهي شويه واخذ نظره للمكان رجع ينظرلي وكال.
هَيْصَم: من تجي ريفان كليلها ترحين للغرفه اذا تردين ترتاحين لتبقين كاعده اهنا الجو بارد وتحت أنظار الكل.
فيروز: لابسه نقاب محد يشوفني، بعدين اني اريد مكان مفتوح حتى اشم هوه براحتي.
هَيْصَم: ضايجه من هذا الوضع اذا اي كولي حتى نستعجل بالعقد ونرجع للبيت.
فيروز: لتستعجل بشي علمودي هذا يومك هَيْصَم عيشه مثل متحب.
هَيْصَم: اذا انتِ ممرتاحه اني هم ممرتاح.
فيروز: مرتاحه بشوفتك هيج سعيد وتكمل حياتك لتفكر بيه هوايه هَيْصَم.
هَيْصَم: سيد افندي احله.
: ابتسمت بوجهه وهو كام من يمي اجتي ريفان وهو بقى يحجي وياها عيني عليه وخطرت على بالي خطه أكدر الغي بيها كل اللي ديصير هسه بس خفت بنفس الوقت تشجعت من تذكرت سوالفه صعب اخليه يروح من أيدي وحتى لو يريد يتزوج اني ما اكون موجوده قررت اسويها وهي فرصه حتى اطلع من حياته وابطل تعذيب لنفسي، ستغليت الفرصه شفت سجينه قريبه عليه أخذته وخليتها تحت عباتي ومن دخلت ريفان كلتلها تاخذني لغرفه قريبه لان ما أكدر اصعد درج رحت وياها اول مدخلت طلبت من عدها مي طلعت السجينه وبقيت صافنه اذا صار شي لاسامح الله ومتت رب العرش راح يعذبني وادخل نار جهنم مخلده بيها منو يفيدني بهذا الوقت صحيح اتمنى الموت وأريد اخلص من هاي الدنيا بس مستحيل اسعاله، رجع مخي يقنعني انو اللي اسويه هو مجرد جرح بسيط حتى الغي زواجه اليوم بس لا مو فيروز اللي تمشي بطريق الخداع اصلاً هو من البدايه مواعدني بشي واني العلقت نفسي بوهم ما منه فايدة، أجيت اشمرها بعيد بس بنفس الوقت دخلت ريفان جانت قريبه من أيدي فكرت أريد انتحر بسرعه اجت شمرتها وبدأت تقدم نصائح بقينه نتناقش شويه بعدين سمعت صوت يمكن بدو يحجون بأمور العقد هي بسرعه كالت.
ريفان: تعالي نرجع للصاله راح يبدون العقد.
: رجعت وياها وصارت مشكله جبيره بقيت بس اباوع عليهم وداخلي فرحان بلي يصير هسه.
حوري: من دخل وصاح بصوت حوري زوجتي ميصير تزوج ارتاحيت نفسياً بنفس الوقت نزلت دموعي عليه من انضرب كل اللي ردنا نعيش بسعادة اني وياه تحت حكم رب العالمين ليش كلها صارت ضدنه؟!
صارت مشكله جبيره وكلها تدخلت واني لازم الفستان وضاغطه عليه بأيدي ودموعي تنزل ونقهرت اكثر من كال اطلكها وجاوبه أرفد متت بدمي يعني لهاي الدرجه اني رخيصه عنده!!
تندمت وعضيت اصابيعي اللي صار كله من أيدي من البدايه منطيته بلوك ومصار كل هذا لا عائلتي فقدت ثقتها بيه ولا أني نجبرت اعيش هيج وضع واشوف اهلي متبرين من عندي خسرت الكل ومربحت احد حتى محمد واذا بقى ويايه راح يبقى يتذكر هذا اليوم ويعيرني ويذلني، آخ لو يرجع بيه الزمن والله مدخلت بهيج علاقه وخليت همي كله بالدراسه ردت اركض لحضن ارفد واكله ما أريد بطلت انتوا اهم من عنده بس موقفهم كلهم منعني اخطي اي خطوه عيني عليه شلون يحجي ومعصب ومحاميني ميخلي احد يوصل يمي لان يعرف اذا وكعت بأيدهم يموتوني بدون ميرفلهم جفن.
فيروز: صارت أصواتهم اعله بس داخلي مرتاح الحمد الله مراح يتزوجها ابتسمت واجيت اركص بس خجلت ولزمني العيب صدك لو كالوا ( مصائب قوم عند قوم فوائد) هم يتعاركون واني كلبي يركص فرح، الانسان مثل هَيْصَم صعب يتعوض ويمكن اني اشوفه هيج مميز لان احبه، عيوني عليه شلون واكف برزانه ويباوعلهم بثقه ومنطق ولاحرف بس من كال محمد ارفد سوه هيج حتى يزوجها للهَيْصَم باوع عليه بستهزاء وكال.
هَيْصَم: ليش برأيك اني اخذ شي مو مالتي؟!
اللي عندي زوجتك متسوه ظفرها خلي ابالك هذا الكلام بالأضافة العقد اليوم والخطبه مجانت لمرتك وانما أليه اني وحبيبتي لَّباءَة مو هيج شريان گلبي؟
ابتسمت على شريان كلبي وحبيت كلامه عني لذلك جاوبته.
فيروز: مثل متكول انت.
بعدين صفنت شنو يعني العقد اليه اني ولَّباءَة معاناتها كل اللي صار جان خطه من عنده جحظت عيوني وهو تقرب ناحيتي وهمس قريب أذني.
هَيْصَم: تجين ويايه ايدج بأيدي وتنطيني وعد للموت ميفرقنا احد؟
يتبع.
البارت اكثر من 3700 كلمه.
قفلة اليوم كلش كيوت ولطيفه شمعاتي.
تصبحون على الف خير وعافيه وان شاء الله موفقين بامتحان باجر وجميع امتحاناتكم يارب.
حسابي الأنستا.
رواية هَيْصَم الفصل الرابع وثلاثون 34 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
متناقض
يريد الأبتعاد فيقترب
ويريد الوصال فيغترب
في قلبه شعور مهيب
عن العين غير مغيب
أراد الشفاء فأصابه الحُب
جمع شتات القلب
وبدأت جروحه تطيب
بقرب الحبيب
وأُضرمت نيران الحب في قلب النقيب
خاطره بقلمي
زهراء احمد
: لزم أيدي واخذني للاستقبال واجت خالتي ويانه كل شي طار من عقلي ليش هيج وشلون وكل تفكيري اللي جنت احلم بيه راح يصير واقع و هَيْصَم حيصير زوجي لكن من دخلت وشفت السيد كاعد وخالتي هم كعدت بقيت واگفه بمكاني تمنيت بهاي اللحظه امي موجوده وهي اللي تلزم أيدي وتكعدني وتجي تحجي ويايه اطمني نزلت دموعي ليش حتى بيوم فرحتي لازم الدنيا تنغصها عليه شنو يصير لو اني حالي حال البنات وأهلي يمي وحواليه؟
صحتني من افكاري أيده اللي لزمت أيدي باوعت بعيونه ابتسم بوجهي كعدنه وبده السيد يحجي بأمور العقد والزواج والموده والرحمه واني بالي مو يمه ابداً بدت تخطر بعقلي اسأله حول اللي صار خلال هاي اليومين وليش فكر هَيْصَم يتزوجني، قراره جان من البدايه هيج لو لان بنت خالته طلعت متزوجه فمحب ينحرج كدامهم وطلع بهاي السالفه، بس لو صح مجان خلاني البس ابيض واحضر نفسي وهو من الأساس طلب من عندي اصير احله وحده ودائماً يكلي اتزوج أنثى تليق بالاسد وهاي الجمله هو يحجيها اليه كل يوم معقوله من البدايه راد يرتبط بيه؟
بس ليش كل هاي الدراما يكلي اريد اتزوجج وخلص هل فلم الهندي على شنو!!
انتبهت على خالتي وهي تحجي ويايه.
كلاثم: حبيبتي السيد صار ساعه يحجي وياج بالج وين يا امي؟
فيروز: يمج.
كلاثم: اي متجاوبين لعد ليش صافنه هيج؟
: باوعت بوجهه بعدين رجعت نظري للسيد وهو يحجي ويايه خطر على بالي سؤال خطوبته من باب الحب لو شي ثاني؟
اذا وافقت هسه راح اعيش وياه بسعادة لو ابقى طول عمري اتعذب؟
الحياة شنو مخبيتلي وياه وهل هو الانسان المناسب اليه؟
على رغم حبي الكبير ناحيته وتمنيت بكل لحظه هذا اليوم يجي وينجمع اسمي وي اسمه سوه بس ليش داخلي متردد وميقبل انطق الموافقة حسيت راح اندم بعدين أكو شي مقيدني ويمنعني اجاوب السيد اخير شي كال.
السيد: بنتي هاي آخر مره راح اعيد واذا متحجين اعرف بيج مغصوبه ومتردين تزوجين.
اجه يكمل قاطعه هَيْصَم.
هَيْصَم: لحظه بس سيدنا خلي احجي وياها دقيقه.
السيد: براحتك بس استعجل شويه ورايه عقد ثاني.
لزم أيدي وكمت وياه، اخذني لنهاية الاستقبال وكال.
هَيْصَم: شنو بيج لَّباءَة اذا محابه اللي يصير كولي عادي نلغي كل شي ونرجع للبيت مو مشكله اهم شي راحتج.
اجه يرجع يحجي وي السيد وقفته.
فيروز: ليش هيج صار؟
هَيْصَم: شنو الصار مفهمت؟
فيروز: العقد والخطوبه شلون تغيرت العروس بآخر لحظه؟!
هَيْصَم: متغيرت، من الأساس جنتي انتٍ واني بينت هذا الشي اكثر من مره بس انت منتبهتي اليه ابداً.
فيروز: وليش محجيت من البدايه على شنو اللف والدوران؟
هَيْصَم: هذا الموضوع يحتاجله شرح مطول مو مال هيج وكفه بس خلي ابالج شغله مهمه من البدايه مجنت رايد اتزوج وحده غيرج اصلاً ،انت الوحيدة اللي تليق بالهَيْصَم، خلي اكون صادق قبل ما اتعرف عليج مجنت ناوي اتزوج وأكثر شغله اكرها بالكون هي النساء ومن شفتج نكسرت هاي القاعده فأذا ردت اتزوج وفكرت بالموضوع بشكل جدي انتِ الخيار الأول والأخير وبالنسبه لكل اللي صار اليوم من نرجع للبيت اشرحلج.
: رجعنا لنفس المكان ورجع السيد يحجي مره ثانيه وهاي المره بقيت مركزه وياه الحب هو اللي دفعني اقبل على أمل القادم أفضل واصلا اني مشفت من عنده شي مو زين ولا هو شخصية تنرفض مواصفاته كل ابنيه تحلم بيها متفهم حنون وكلبه نظيف يمكن حياته السابقه جانت سيئه وحسيت بهذا الشي من اسلوبه ويايه بأول إيام جنت بيها يمه بس بعدين تغير جذرياً صار مو نفس الشخص اللي عرفته وهذا الخلاني اتعلق بيه لهاي الدرجه واحاول ما افقده، يكولون بالحب والحرب كل شي مباح واني قررت احارب حتى اعيش وياه حياة سعيدة بعيده عن ماضينا الأسود ولابد يجي يوم تنكشف بيه الاسرار وتُعالج الجروح.
السيد: فيروز ياسر هل تقبلين الزواج من هَيْصَم حيدر على مهر مقدمه 30 مليون دينار ومؤخر 50 مليون دينار اذا قبلتي قولي نعم وانت وكيلي.
صفنت بوجهه ليش خله هيج مهر غالي؟
رجعت للواقع على ألم أيدي من الكرصه درت وجهي شفتها خالتي تأشرلي براسها وتخزرني حتى اجاوب ابتسمت وحجيت ودكات كلبي صارت الف.
فيروز: قبلت وانت وكيلي.
بعد هاي الكلمه خالتي بسرعه هلهلت هسه المفروض أخجل وما اباوعله بس اني سويت العكس هيج يوم ميتعوض ردت اشوف تعابير وجهه بهاي اللحظة بكل الأحوال النقاب موجود على وجهي وبس عيوني مبينه، شفت الفرحه بعيونه نظره بكل الفتره اللي بقيت بيها وياه مشفتها ابد حسيت الفرحه دخلت بداخلي هم، عبرلي عن شعوره بأبتسامته واضح حيل انو فرحان.
رجع السيد سأله.
السيد: هَيْصَم حيدر تقبل الزواج من فيروز ياسر على مهر مقدمه 30 مليون دينار ومؤخر 50 مليون دينار اذا قبلت قل نعم وانت وكيلي.
باوعلي وكال.
هَيْصَم: اقبل تكون شريكة حياتي وأم بيتي او وريثتي وصديقتي، اقبل بيها زوجتي ونسائي الأربعة بسرائها وضرائها بمرضها وصحتها بدون شرط او قيد وغير مطالبه بشي غير متفارق عيوني طول العمر،
نعم قبلت.
السيد: ربي يسعدكم وتبقون طول العمر سوه.
: هلهلت خالتي والسيد طلع وهو سحبني لحضنه حاوطني بأديه وقبل جبيني بتعد شويه وطلع الخاتم من جيبه باوعتله نفس اللي اختاريته ابتسمت وتجمعت الدموع بعيني خله ايده تحت حنكي ورفعه باوع بعيوني وكال.
هَيْصَم: بما انو صرتي زوجتي ممنوع تنزل دموعج ادفعج عليها فصل تره.
: ضحكت لبسني اياه وطلع خاتم ثاني اله همات لبسته قبلني جبيني مره ثانيه، اجت خالتي حضنتني.
كلاثم: هاي اول مره بعد سنين طويله افرح هيج الله يسعدكم يايمه واشوف اطفالكم يلعبون كدامي.
هَيْصَم: آمين الله يسمع من عندج.
ضربته على كتفه وحضنته.
كلاثم: ملعون مو اني امك ليش مكلتلي؟
هَيْصَم: ارفد مقبل روحي ضربيه.
كلاثم: ليش؟
صدك شنو سالفة حوري شو كل شي مفهمت شلون يعني متزوجه ابن عمها بدون علم اهلها؟!
الله يجيرنا ان شاءالله شلون بنات بلا تربيه أعوذ بالله.
هَيْصَم: ام هَيْصَم معلينا بالناس خلي نرجع لبيتنا.
كلاثم: تره مقتنعت بكل هذا اريد اسويلكم حفله وافرح بيكم وخواتك هم راح يزعلن لان مكلتلهن.
هَيْصَم: عدهن علم قابل اني ارفد أعقد بدون ميدرون اهلي!!
كلاثم: على اساس انت احسن مو هياتنا اني ومرتك مجنه نعرف.
هَيْصَم: اويلي ام الهَيْصَم شكد حلوه بحلكج من كلتيها.
كلاثم: شنو هي؟
هَيْصَم: مرتك.
كلاثم: لتخجل البنيه ولك خلي نرجع للبيت ونحجي بالتفاصيل مالت حفلتكم.
هَيْصَم: منحجي بشي هسه خليها تتحسن بالأول.
كلاثم: هَيْصَم معجبتني بس لامهدديك ابني؟
هَيْصَم: طلعي من راسج المسلسلات التركيه يوم.
كلاثم: على اساس محد مهددك قبل.
هَيْصَم: محد مهددني لتخافين وهسه امشن لازم ارجع للمركز بعد ما اوصلجن للبيت.
: طلعنه وصعدنا بالسيارة نزعت النقاب بقت عيني على الطريق وصافنه لسه ممصدكه صرت زوجته شرعاً لحد الأن تحت تأثير الصدمه حتى مكدرت افرح لزمت ايدة، حضنه، كل شي صار حلال هو بأكمله صار شي يخصني، صحيت من صفنتي على صوته وهو يكول.
هَيْصَم: يا أمي غير عقدنا اليوم لاحفله ولا صخام خلينه نشغل اغنيه.
كلاثم: ماكو حرام شلون تريد رب العالمين يوفقك بحياتك الجايه وانت تعصيه هيج.
هَيْصَم: بس وحده بداعة العشره.
كلاثم: يبوو عليك.
هَيْصَم: والله اليوم ناقصه لائِث جان لعب طوبه.
كلاثم: هم هو ميعرف؟
هَيْصَم: كتله البارحه.
كلاثم: اي كلي ليش مكلت اريد اعرف السبب وضح؟
Flash back
هَيْصَم: مرحبا بالدكتور سفره سعيدة شلونك ببلاد الغربه بعيد عن وطنك، اخذك الواهس يومية عايفنا ورايح.
أرفد: هَيْصَم اترك هاي السوالف محتاج مساعدتك بشغله.
هَيْصَم: اي كول بالخدمة.
أرفد: خادم ربك حبيبي، راح ادزلك رقم طلعلي كل شي يخصه رسائل صور فيديوهات حسابات مرتبطه بيه بعد انت تعرف شغلك.
هَيْصَم: تمام دزه هسه انطيه لواحد من الشباب هو يتكفل بالموضوع.
أرفد: جؤ أريدك انت لدخل احد.
هَيْصَم: أرفد اشرحلي شنو الفلم؟
أرفد: باجر الصبح ان شاء الله اول ما اوصل لبغداد اني يمك واحجيك كل الموضوع بس ياريت تستعجل وتعرفلي منو الشخص.
هَيْصَم: محلوله ابن خالتي بس انت هدي ولتعصب مو زين عليك وانت بسفر.
أرفد: مبيه شي لحد الأن لتخاف.
: غلقت الخط وهو دزلي الرقم بقيت ابحث بيه والصدمني اللي شفته اني شخصياً متحملت وردت اروح افجر راسها بس تغاضيت عن الموضوع تبقى غريبه عني وميخصني بيها عدها اهل هم مسؤولين عن تربيتها بقيت صافن يا الله أرفد اذا عرف يتخبل شلون اشرحله وبأي طريقه لازم أوصله الكلام حتى ميستعجل ويندم بعدين، خلصت الليله واني عقلي مو يمي صار الصبح ورجع اتصل بيه اتفقنا نلتقي بمطعم قريب حتى نكدر نحجي براحتنا افضل من المركز.
هَيْصَم: الحمد الله على السلامة نورت الوطن.
أرفد: الله يسلمك شنو صار على الرقم اللي انطيته الك؟
هَيْصَم: انت تعرف هذا رقم منو؟
أرفد: اي اكيد شايفني احمار كدامك؟!
هَيْصَم: بس اهدأ شويه كل شي ينحل بالتفاهم.
أرفد: شوف اني اعرف اكو شي بينها وبين محمد ولأن اني واثق بيك طلبت اطلع المعلومات كلها من حسابها مراح انصدم اذا حجيت اي شي هسه.
هَيْصَم: أختك عاقدة وياه هيج سمعت من محادثتهم.
أرفد: لحظه بس شنو يعني عاقدة؟!
هَيْصَم: عقد سيد يعني اختك زوجة محمد شرعاً.
أرفد: كول غيرها يمعود مستحيل بنتي هاي متسويها.
هَيْصَم: للأسف سوتها وهذا الشي ما أكدر اكذب بيه عليك.
أرفد: راح انجلط وتالي وي المصايب اللي متخلص اتمنيت تتعالج ريفان وارتاح من التفكير بمرضها تتطلعلي حوري بسالفة عوجه هاي شلون اضمضمها هَيْصَم ياكلوها لحم ويذبوها عظم والله محد يرحمها.
هَيْصَم: لتكلي نكسر كلبك بعد هاي عملتها؟!
أرفد: منكسر وبس ارجع اطيح حظها بس اريد اعرف شلون تنحل اني اكثر شخص يعرف محمد شنو من بشر مستحيل يتمم زواجه من عدها ويجي يعترف او يطلب ايدها مره ثانيه بما انو استغلها صدكني راح يتركها بعد مياخذ اللي يريده وهي تدمر سمعتها وسمعتنا كلنه اريد حل ساعدني لان عقلي متوقف عن العمل بهاي اللحظه.
هَيْصَم: عندي فكره بس ماعرف اذا تعجبك لو لا؟
أرفد: احجي راح انجلط بسببك هم.
هَيْصَم: خليها تنخطب.
أرفد: المنو؟
هَيْصَم: اجمع اهلك وكول نخطبت واني موافق اذا هو رجال وعنده غيره اكيد ميسمح زوجته تنخطب حتى لو يريد ينتقم.
أرفد: لتكول زوجته لتخليني اموتك.
هَيْصَم: هذا الواقع تقبله.
أرفد: تحجي برودة دم.
هَيْصَم: تريد الطم مثلاً.
اذا انت خلصت حياتك بين المقص والمشرط فأني خلصت حياتي بين المجرمين والقتله والنساء عديمات الشرف والرجال حدث لاحرج مثل هيج موضوع عندي مثل البهارات على الاكل كلش طبيعي.
أرفد: بنت خالتك تره مو غريبه.
هَيْصَم: انت شرعاً مو ولي أمرها اني منو حتى انطي رأيي بهيج موضوع؟
أرفد: اريد حل هَيْصَم غير هذا معجبني.
هَيْصَم: اريد اخطب لَّباءَة بس تصير احسن اذا تريد تكدر تستخدمها على شكل خطه واني اساعدك بيها.
أرفد: شنو رأيك انت تكون الخطيب؟
هَيْصَم: مستحيل ما أريد اخليها بهيج وضع واني ناوي اعوضها عن كل اللي صار بحياتها.
أرفد: انت كلت تريد تزوجها فنضرب عصفورين بحجر همات متزوج حبيبتك أمام الكل والثاني نخلص من مشكلتنا.
هَيْصَم: جؤ مثل متكول مراح اخدعها هيج متستاهل من عندي هذا التصرف.
أرفد: هذا اول طلب من عندي لتكول لا بداعة خوتنا.
هَيْصَم: اشرحلي شنو تريد بالضبط؟
أرفد: خطوبتك من لَّباءَة خليها يمنه بالبيت لكن كدام عائلاتنا نكول انت تريد تخطب حوري.
هَيْصَم: اول مره اشوف رجال يخطب لأخته!!
أرفد: اختي هي اللي خلتني بهذا الوضع.
هَيْصَم: بس بشرط يكون عدها علم.
أرفد: لا لتحجي لأحد خليها مفاجأة.
هَيْصَم: ليش؟!
أرفد: لان راح تكول لخالتي وخالتي راح تكول لأمي وامي توصلها لحوري وحوري إذا عرفت تخرب الخطه.
هَيْصَم: واثق من عدها متحجي اعرفها.
أرفد: اترك ثقتك بعدين اعتبرها فرصه حتى تعرف مشاعرها ناحيتك وحاول تبين انو انت تريد تزوجها بطريقه غير مباشره وهي تفهم اذا جانت ذكيه.
هَيْصَم: بهيج مواضيع متشغل مخها اعرفها عدل راح اعيش اسوء ايامي لتنسى فضلي هذا يجي يوم واطلعه من عيونك.
أرفد: لتنسى كم مره سويتلك عمليه خارج اختصاصي فوحده بوحده.
هَيْصَم: وهسه شنو راح تسوي؟
أرفد: ارجع للبيت واشوف انتبه على نفسك اشوفك يوم الجمعة.
هَيْصَم: ياجمعه؟
أرفد: هاي الجمعه.
هَيْصَم: بعدها مصايره زينه خليها لمن تتحسن.
أرفد: خير البر عاجله ما أريد أأخر الموضوع اكثر من هذا.
كلاثم: بس هيج؟
هَيْصَم: ليش شنو تردين اكثر من هيج؟!
كلاثم: واني كلت انت واحد غبي ومتفكر بعقل طلعت لاعبها صح.
هَيْصَم: مردت هيج يصير جنت ناوي اخطب واعقد مثل البقيه بس ان شاء الله نعوض بعقد المحكمه مو هيج لَّباءَة الهَيْصَم؟
: رفعت نظري اله من المرايه اللي امامه ابتسم بوجهي وغمز خجلت ودرت وجهي للشارع ورجعت احجي وي نفسي، يعني هو من الأساس يريد يتزوجني رجعت تذكرت كلامه خلال هاي الفتره وحتى من اجه بالليل ياخذ رأيي بالخاتم ومن سألته اخذ رأي اللي تلبسه كلي اني اخذ رأيها هسه، معقوله يحبني اذا هيج ليش معترف لحد الآن شنو منتظر؟!
هَيْصَم: ام الهَيْصَم.
كلاثم: نعم.
هَيْصَم: جنتج وين صافنه؟
كلاثم: بابني وخبالاته.
هَيْصَم: لا مقبلتها كل هاي الهيبه والرزانه وتكولين خبل؟!
كلاثم: ليش ولي سويته شنو تسميه؟
هَيْصَم: معروف هذا ام الهَيْصَم نؤجر عليه.
كلاثم: تؤجر على شنو طياح حظها؟!
هَيْصَم: لهذا السبب مكلت لأي أحد تبقون تحجون عليها واني ما احب الغيبه كل انسان مسؤول عن تصرفاته عدها اهل وابوها واخوانها موجودين احنه ما النه علاقه سيرتهم اهنا وتنسد ولحد يفتحها مره ثانيه خلونه نعيش حياتنا بعيد عن مشاكل الناس اني مناقصني احمل هموم غيري.
دام صمت فتره بعدين شغل أغنيه لساجده ماعرف شنو علاقته بيها اليوم!!
العب حبيبي بوحدك بهل الساحة
العب بروحي و قلبي بس براحة
كلبي قفلته و هاخذت مفتاحة
الورد انت و ريحته الفواحة
يابو خدود تفاحة يابو خدود تفاحة
لا للحواجب ظر مشدادة سيوف
و عيوني بيحب لمن يسد ويشوف
احم حبيبي قلبي عاشق ملهوف
خليتني وياك احتار لا جنة حب لا نار
كلاثم: اعترف كافي تتحرش ببنيتي تره ما اقبل عليها.
هَيْصَم: نعترف الحياة كدامنا طويله ان شاءالله ونشبع اعترافات.
كلاثم: بعدني ممصدكه تزوجت الف مبروك يمه.
هَيْصَم: هسه غير افهم على شنو هاي الدموع يا أم الهَيْصَم؟
كلاثم: دموع فرح هاي مجنت متخيله تزوج وتكمل حياتك يافرحتي انت.
هَيْصَم: حتى لو دموع فرح ما أريد اشوف دموعج لتضوجيني.
كلاثم: تدلل يروحي مراح ابجي بعد.
: وصلنه يم البيت نزلت خالتي وبقيت بس اني وياه داخلي يكلي عاقبيه على فعلته والصراحه اني صرت أخجل من عنده عكس السابق تغيرت مشاعري ناحيته وصرت اشوفه شخص مقرب من عندي حيل وهذا الشي مولد عندي شعور غريب، قطع الصمت وهو يكول.
هَيْصَم: لَّباءَة شنو الموضوع؟
: رفعت راسي صارت عيني بعينه خجلت حيل لكن بنفس الوقت شجعت نفسي وكلت.
فيروز: اي موضوع؟
هَيْصَم: صفنتج وكأن انتِ بغير عالم مبتعده عنه ياترى شنو السبب؟
فيروز: ممستوعبه اللي صار لحد الان وأعتقد من حقي.
هَيْصَم: اعتذر لان مكلتلج بس ثقي برب السماوات اني جنت مقرر اخطبج خطوبه رسميه وصدكيني هذا مجرد عقد لتفكرين بيه راح اسويلج حفله تحلف بيها بغداد بالأخير هذا هم زواجي واكيد اني هم حاب احتفل بيه.
فيروز: راح انزل انتبه على نفسك ومن توصل كلي حتى اطمأن عليك.
أجيت افتح الباب قفله حجيت بسرعة مفكر انطي مجال سيد افندي على رغم فرحتي صار اليه بذات الوقت قررت اندمه على سوايته والحزن اللي عيشني بيه الايام الفاتت، رجعت باوعت بعيونه كايله.
فيروز: سوالفك بطلها افتح الباب خليني انزل هَيْصَم.
مسمع من عندي نزل وفتح الباب من يمي من الجهة الثانيه صعد بصفي لزم وجهي باديه الثنين وقبلني بدون مقدمات ضربت على صدره مبتعد خليت أيدي على أيده وسحبتها بس هو مثبتها حيل بقى هيج فتره بعدين بتعد وخله جبينه على جبيني ردت احجي بس سبقني وهو يكول.
هَيْصَم: من فتره طويله تمنيت ابوسج بالحلال ورب العالمين هسه حقق امنيتي، انتِ اختيار كلبي لَّباءَة، هذا السبب الوحيد اللي خلاني مرتبط بيج وتزوجج لتفكرين ابداً اكو سبب ثاني وتعرفيني ماكو ظرف يصعب عليه، أكدر اتجاوز كل المشاكل اللي اتعرضلها بسهوله بس انتِ العقبه الوحيدة اللي مكدرت اتجاوزها والاغرب من كل هذا اني حاب هذا العذاب لدرجه ما أريد ينتهي عند نقطه معينه، سمي شنو تردين خبال، حب، هوس، جنون، بس الاكيد هو أني متعلق بيج مثل تعلقي بأمي اريدج يمي وبحضني دائماَ، اريد اخليج على صدري واضمج بين اضلوعي وما اخلي احد يلمح ظل لَّباءَة الهَيْصَم.
: سكتت ماكو كلمات أكدر اعبر بيها وكرد فعل لا أرادي لفيت أديه على ركبته وحضنته بادلني الحضن حجيت قريب اذنه بصوت ناصي.
فيروز: مراح اسامحك اذا تخليت عني بيوم.
هَيْصَم: اذا روحي تركت الجسد بوقتها انتِ مجبره تسامحيني من تصيرين زوجه الشهيد.
: وخرت عنه بسرعه وضربته على صدره ونزلت دموعي تخيلت هيج يصير بيه من صدك اموت وقتها من شافني ابجي لزم وجهي ومسح دموعي بأبهامه وكال بنبرة حنينه.
هَيْصَم: لتبجين مردت اضوجج.
فيروز: لتحجي بسيرة الموت ماحبه.
هَيْصَم: تدلل لَّبوتي منذكر الموت شي ثاني يحلوه قبل ما اروح للمركز؟
فيروز: ارجعلي سالم ما أريد شي ثاني.
هَيْصَم: من اكلها يلوموني تلومني.
فيروز: منو هذا اللي يلومك وشوكت لمتك اني شنو بيك هَيْصَم؟!
هَيْصَم: بيه انتِ تمشين بكل مكان بجسمي ونتشرتي حتى بالعظم مثل مرض خبيث واني ما اثق بالأطباء تتوقعين ممكن اتعالج؟
: خجلت حيل وبقيت ساكته شويه واجاه اتصال وقبل ميفتح الخط كال.
هَيْصَم: الله باليني بيه كل لحظه حلوه لازم يقطعها.
لائِث: مصيبه سيادتك.
هَيْصَم: ليش شوكت اتصلت بيه وماكو مصيبه صايره؟
لائِث: هاي المره مصيبه من صدك.
هَيْصَم: اسمع غرد.
: وكع الموبايل من ايده والتفتلي وعيونه حمر نظرته غريبه معرفت افسرها بس الخوف سره بجسمي ياترى شنو صاير وليش اللحظات الحلوه مدوم ابد؟..
يتبع.
مساء الخير شمعاتي اعتذر من عدكم لقصر البارت اليوم بس مكدرت اكتب اكثر من هيج لظرف معين ان شاءالله اعوضكم بالبارت القادم بدون تغير موعد بإذن العليم لتنسوني من دعائكم غاليني واني هم ما انساكم ان شاءالله.
تصبحون على الف خير.
حسابي الأنستا.
رواية هَيْصَم الفصل الخامس وثلاثون 35 - بقلم Zahraa_Ahmed
مساء الخير
بهاي القصه هوايه قدمت اعذار لكن المرض الله يبعد عنكم هو السبب افلاونزا ملازمتني من نهايه السنه الفاتت واليوم زادت عليه حيل لذلك مكدرت اكتب البارت بالكامل وما أريد انزله على النص لان ميصير حلو.
ماعرف هو حظي لو حظكم لكن ان شاء الله منتاخر هوايه وباجر ينزل البارت بتوفيق الرب الجليل.
تصبحون على الف خير ويبعد عنكم كل سوء يارب ويحفظكم اليه شمعاتي.
رواية هَيْصَم الفصل السادس وثلاثون 36 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
هَيْصَم
ياقلبي وقبلتي
صلاتي وسعادتي
يافاتحة روحي
وسر ابتسامتي
ياعيني وفؤادي
وسجاد صلاتي
تعالي إلى احضاني
لاني
اريد ان اعشق
وفي بحر عينيكِ أغرق
واسأل مابال هذا القلب لتلك الفتاة وقع؟؟
ولمنطق العقل لايتبع!!
اهو عشق ياسامعي؟؟
لاني بين عينيها ضائعٌ
ليس لي مرجع..
بقلمي زهراء احمد
هَيْصَم: أريدك يمها اني بمهمه هسه وبعيد عنها حيل، اتصلت بالاسعاف بس تعرف انت لمن يوصلون اشيعها ارفد بداعة خوتنا انقذلي لَّباءَة.
أرفد: اهدأ وسولفلي شنو صار وياها البارحه مجان بيها شي؟!
هَيْصَم: وهذا اللي موتني ماعرف روح بسرعه بيتك قريب عليها استعجل.
أرفد: اشكر ربك اني بالسيارة هسه اقل نص ساعة اني اهناك وهم راح اتصل بالأسعاف الخاصه بمستشفانا اذا مكدرت اعرف شنو بيها أكدر انقذها ان شاءالله انت بس ادعي وقوي كلبك ولتخاف كمل مهمتك وتعال.
هَيْصَم:ألعن ابو المهمه المهم عندي سلامتها.
أرفد: كتلك اني راح اروح لتشتغل من كيفك وتخسر بعدين محلوله خلي عندك ثقه برب العالمين هو ميترك عبده.
: سديته ورفعت راسي للسماء، اللهي بعظمتك وقدرتك وسلطانك وجبروتك وحكمك وعدلك وقضائك آمنت بيك مترجع سائل من بين اديك انقذلي أياها لتخلي يصير بيها شي لتموتني للمره الرابعه يكفي اللي عشته لتكسرني وانت رحيم رحمن.
لائِث: وين صرت لكينه المشتبه بيهن وعتقلناهن وانت ماكو صاير شي؟
هَيْصَم: اخذوهن للمركز واني راح ارجع للبيت عندي شي مهم بعدين اتصل بيك انتبه ما أريد تصير مشاكل مثل البارحه.
ندك الباب كمت فتحته سريع من شفته كدامي بسرعة حجيت.
كلاثم: هلا بيك ابني تعال شوف شنو بيها شو حتى وجهه صار اصفر.
أرفد: شوكت نامت؟
كلاثم: وجه الصبح جنت كاعده من دخلت للغرفة.
ارفد: كم ساعه صار؟
كلاثم: اربعه يمكن.
أرفد: وشوكت كعدتيها؟
كلاثم: بصلاة الصبح ومجاوبتني كسرت خاطري لان منايمه تركتها بس هسه من كعدت شفت وضعها مو طبيعي وخفت من كعدتها مره ثانيه وماكو جواب هي من تنام تهمهم مرات اليوم هادئه حيل اتصلت بهَيْصَم حتى يلحك عليها بلكي نكدر نساعدها.
أرفد: اعتقد عدها نزيف يمكن الخياط الداخلي مفتوح وهذا محتمل مو اكثر حسب خبرتي بالعمل ولتكولين لهَيْصَم ليصير بي شي بالطريق.
كلاثم: شنو يعني نزيف داخلي وانت شلون عرفت؟!
أرفد: ماعرف ايصير اذا تحركت هوايه اثناء هاي الفتره والواضح هي مملتزمه.
: شويه وصلت الاسعاف اخذوها واني رحت وياها وصلنه المستشفى ودخلوها بسرعة طوارئ واني بقيت منتظره يم الباب ولازمة كلبي بيدي، نوب اجاني يركض خايف عليها، مامكتوبتلك السعادة يايمة.
هَيْصَم: شنو صار وين هي هسه الدكتور وين ليش محد موجود وانتِ ليش ساكته جاوبيني بيها شي مو ماتت كولي؟
كلاثم: اسم الله يا أمي ليش اتفاول على البنيه دخلوها طوارئ فحصوها بعدين دخلت عمليات يكولون صاير عدها نزيف داخلي.
هَيْصَم: وليش صار عدها نزيف داخلي البارحه مجان بيها شي؟!
كلاثم: أمر ربك لا اعتراض على حكمه وقدرته.
هَيْصَم: الحمد الله على كل حال معروفه هي النهايه الهَيْصَم بعمره منكتبتله السعادة صار حظها زفت من يوم اللي تعرفت بيه عليه لو دزيت اي شخص ثاني غيري يساعدها ولو مملتقي بيها بذلك اليوم ولا سمعت خبر وجودها بذلك البيت، شنو ختلف لو مشفتها ومعشت وياها أجمل ذكريات عمري، ابنج حقير واناني يمة، عالجت جروحي واني ضفتلها جروح جديدة بكل يوم تتأذه وتتعذب كدامي بس هذا الكلب حقير ميكدر على فراكها عيوني ادور عليها بوجوه الناس بهذلت كلبي وبهذلتها وياي شنو الحل اريد اخلص من كل هذا العذاب والضيم اللي اعيش بي من سنين واني ممرتاح لا ليلي ليل ولا نهاري نهار شوكت سفينتي ترسي على بر مو والله متت؟
: كسر كلبي مشفته بهيج ضعف من قبل دوم يتظاهر بالقوة وهو اصلا شخصيه قويه بسبب ابوه علمه يكون سند نفسه وميطخ راس لأحد طول عمره مشى بطريق عدل ومسوه شي يغضب الله ويغضبنا ابوه استشهد وهو راضي عليه بس الدنيا مرمرت ابني ودمرته، من عندك اطلبها يا أخو زينب ريح كلبه ورجع الضحكه لشفايفه وشافي مريته ولم شملهم، حضنته والأم من تشوف ابنها بهيج وضع متهتم شكد ابنها كبير بالعمر وشنو منصبه والعيب والميصير ام انا محد يكلي شنو تسوين علمود ولدج ولو أكدر اشلع اعيوني وانطيها الهم حتى لو مجانوا يستاهلوها يبقون ولدي.
كلاثم: والله وابو فاضل ميصير بيها شي لتحرك كلبي عليك انت هم يمه.
هَيْصَم: معاش اللي يحرك كلبج ام الهَيْصَم بس شويه تعبت وحجيت هيج لتفكرين بيه مبيه شي.
كلاثم: حتى لو سكتت عيونك فاضحتك.
هَيْصَم: ولهذا السبب ما أريد احب ما اتحمل خسارتها كلبي مو قوي ابد.
كلاثم: لا ان شاء الله ماكو شي خليك متفائل.
هَيْصَم: ان شاءالله.
أرفد: جبتلك آخر الأخبار من العمليات زوجتك متعرضه لنزيف داخلي والحمد الله سيطروا على الوضع وديخيطون بالجرح بس اكو مشكله وهي خسرت هوايه دم ادعيلها.
هَيْصَم: ليش صار نزيف داخلي؟
أرفد: الرصاصه جانت كلش قريبه بقت شظية موجوده بالداخل هي اللي سببت النزف.
هَيْصَم: وليش الدكتور منتبه على هيج موضوع لو ميته هسه!!
أرفد: هذا الشي ميخمنه الطبيب لان الشظية تتحرك من مكانها فشلون يعرف بيها؟
هَيْصَم: انتوا أطباء وهذا واجبكم حياة الناس مو لعبه ارفد.
أرفد: انت بابا ليش ماتفهم دا اكلك الشظيه مو بنفس مكان الرصاصه الدكتور شلون يعرف انو هي موجودة؟!
هَيْصَم: طارت مثلاً!!
ارفد: يابو فاضل اللي يصبرني عليك، عزيزي افهم الشظيه متحركه عن مكان الرصاصه فالدكتور مشافها واني اشوف لو تكعد تدعيلها هوايه احسن وضعها خطر تره.
هَيْصَم: احتمال تموت يعني؟
أرفد: الأعمار بيد الله اني ما أكدر احجي بهذا الموضوع،
صدك سؤال هي مجانت تحس بألم خلال هاي الفتره؟
هَيْصَم: اي هوايه تتألم بس تشرب العلاج اللي وصفه الدكتور الها.
أرفد: ألم الخياط مختلف عن الم هيج عارض اذا جان حاد حيل والمريض ميكدر يتحمله بدون مسكن معناها مشكله ثانيه، اعرفك حريص عليها ليش منتبهت لهاي النقطة المهمه؟!
هَيْصَم: لان متوقعت ناسين شظية داخل بطنها.
أرفد: راح تخليها بصمه على الدكتور والف مرة كلت تصير، لان الشيظة تتحرك عن مكانها الدكتور وين يعرف هَيْصَم لتخبلني.
هَيْصَم: ارجع ادخل مره ثانيه وطمني اذا ابقى على عمك يخليني انتظر اسبوع بعد وهو نايم جوة.
أرفد: انت كلش صاير متحترم شنو فلمك؟!
هَيْصَم: داخل عقلي فقط خيط واحد صاحي لتخليني اكطعه وابتلي بيك هسه.
أرفد: ما أكدر افوت لان عندي عمليه بعد ربع ساعه لازم اتحظرلها.
هَيْصَم: والحل ماكو طبيب غيرك يعني يسوي العملية؟
أرفد: الحجي وياك ميجيب نتيجه اروح افضل وما يمها غير العافيه.
: من توصل إلى نقطه بالحياة ميكون بيها كدامك اي خيار ثاني، النهاية واضحة والقدر محتوم، مشاعر الكلب وحدها متكدر تنقذ احد ولو تكدر جان ممات قيس مجنون بسبب هيامه بليلى بعض الأحيان الحب هو مرض متكدر تتعالج من عنده ولتريد تتركه جسمك متعود عليه ومتشعب بكل خليه بروحك متريد تغادر المكان اللي تشم بيه هوه الحبيب والبقاء صعب هم، بين قوسين اني بهاي اللحظه بين محال ومستحيل وثنينهم صعبات، منو هي؟ وشنو هي؟
كل هاي الأسئلة مهمتني ولا ردت اجابه الها يكفي انو كلبي تعلق بيها بدون سبب وما اريد اخسرها على رغم اني اعرف نهاية هذا الطريق راح تكون مأساويه على كلبها وكلبي، طلعت بره المستشفى ودرت وجهي ناحيه كربلاء.
هَيْصَم: بداعة الخوة اللي بينك وبين العباس رجعلي اياها سالمه من حلك الموت أخذ عمري وخليها عايشه ما أريد اكثر من هيج ولا راح احجي اكثر حلفتك بغاليك وانت بكيفك تنطيني حاجتي لو لا انت وكرمك.
كلاثم: كافي تسوي هيج شوف وجهك شلون صار احمر فدوة اروحلك يا أمي كوم افحص ضغطك ليصير بيك شي وين انطي وجهي وحتى ارفد ما موجود اهنا حتى احجي وياه.
هَيْصَم: مبيه شي لتخافين بس شويه تعبان.
كلاثم: نام بوحده من الغرف لتبقى كاعد اهنا وتاكل بنفسك فدوة لروحك حبيبي.
هَيْصَم: يوم الله يخليج لتلحين عليه خليني هيج مرتاح.
كلاثم: وهسه هم ليش ميطلعون صار ساعتين جوه؟
هذا لائِث يتصل شنو اكله؟
هَيْصَم: لتحجين شي كولي نايم.
كلاثم: ليش؟
هَيْصَم: ماكو داعي يجي لهنا هو هم الله باليه بيه.
كلاثم: هو اخوك لتحجي هيج.
هَيْصَم: خليه بالمركز ياخذ مكاني هو اكثر واحد اثق بيه.
لائِث: ابنج الحلو وين صار ساعة اتصل بيه مايكول هذا حمار باله بقى يمه؟
كلاثم: هدي يروح امك ليش هاي الأعصاب؟
لائِث: وينه؟
كلاثم: نايم تعبان خطيه.
لائِث: لا والعباس جذب صوتج بيه شي كولي شكو وحق الله اذا عرفت بعدين ازعل عليكم كلكم وانسي منو لائِث.
كلاثم: بالمستشفى احنه.
لائِث: ليش شكو هَيْصَم بي شي؟
كلاثم: لا فيروز هي المريضه.
لائِث: دقايق واني يمكم.
هَيْصَم: كليله ليجي.
لائِث: سمعته شنو يكول كليله شويه واني يمك.
جيبي الموبايل.
هَيْصَم: شوف لائِث اني كلش مالي خلك اخذ وانطي وياك السرسريه اللي يمك ما أكدر أأمن بيهم خليك مكاني واذا صار شي اني انطيك علم.
لائِث: ميصير اعيفك وحدك بهيج وضع خوتنا وين هَيْصَم؟
هَيْصَم: انت أعز من الأخ لتقارن علاقتنا بهيج مواقف انت ثبتت نفسك بيها من زمان وبجدارة ثقتي بيك كامله واعتمادي عليك والقضية بركبتك من بعدي.
لائِث: صاير شي كول شنو هذا الأسلوب اللي تتبعه حسستني انت بخطر مو هي!!
هَيْصَم: ماكو شي بس منعرف شنو مضموم النه باجر جانت مجرد كلمات عاديه لدقق هوايه.
لائِث: تريد تنتحر انت جبير وعاقل معقوله تسويها وتغضب ربك؟!
هَيْصَم: اذا تبقى تمسلت اترك كل شي واجي للمركز أنزل بيك عقوبه وارجع.
لائِث: اطمأن متاكد تطلع من عدها سالمه ان شاء الله.
هَيْصَم: والله شكلي اني اللي مراح اطلع سالم هاي المره.
لائِث: هي تولد وانت تطلك لهاي الدرجه تحبها؟
هَيْصَم: اي احبها عندك مشكله؟
لائِث: كللووووووش اعترف الولد واخيراً تعالوا ولكم كلكم معزومين على جاي واللي يدفع الحساب هَيْصَم.
هَيْصَم: وخر عني قبل ما اموت من اسلوبك هذا.
لائِث: اغيرلك جو غير وين شايف صديق مثلي انت والعباس لو دور للصبح ماكو واحد يحبك بكدي.
هَيْصَم: مو صاحبتك انا كافي تتغزل.
لائِث: ليش هذا غزل؟!
هَيْصَم: اتصل بيك بعدين طلع الدكتور، رحت وكفت يمه: شلونها؟
محسن: هاي ثالث مره تجي لهنا خلال فتره قصيرة يارب تكون الاخيره، شظيه امزقة جدار الجلد الداخلي سببت نزف وأعتقد هي جانت تحس بألم خلال الفتره الفاتت ولو جايه لهنا بوقتها كدرنه نعالجها بدون ميصير كل هذا، على كل حال الحمد الله على سلامتها وان شاء الله مابيها غير العافيه.
هَيْصَم: اريد اشوفها.
محسن: راح ندخلها العنايه هسه بس يتحسن وضعها تكدر تشوف.
هَيْصَم: وشوكت يتحسن؟
محسن: متحتاج هوايه وقت بس تصحصح ويرجع وعيها، الحمد الله على سلامتها مره ثانيه.
حياتنا مثل السباق لذلك دائما نكون بعجله حتى نوصل ونكتشف شنو موجود بنهاية المضمار ونريح عقلنا من تساؤلاته على رغم الجميع يعرف نهاية السباق والوصول إلى الخط الحاسم ايدل على انو العمر وصل حده او وجودنا بهاي الدنيا راح يكون مجرد ذكرى في عقول بعض الناس ومنو هو الشخص اللي راح يبقى يتذكر انسان ميت؟
هذا السؤال دائماً اطرحه على نفسي كوني انسانه وحيده فقط والدي ويايه جنت في مرحله تفكير دائم ياترى لو متت منو اللي ينصب عزائي ويبجي عليه غير والدي اللي يذكرني حتى لو بصورة الفاتحه ويكول الله يرحمها جانت خوش بنيه؟
بعد خسارتي ادركت حتى الشخص اللي جنت معتمده عليه يدفني ويقيم على جنازتي العزاء خلص راح بهاي الحالة راح اكون وحيدة حتى بوفاتي، هوايه تساؤلات بعقولنا ما الها صحه وغير حقيقيه ابداً انخلقنا ورب العالمين هو اللي يقدر حياتنا وميتركنا مستحيل والدليل بعثلي هَيْصَم ،يمكن يشوفني علاج لجروحه بس اني اشوفه دفاني ومن تختار يكون المقابل دفان جثتك معناها نطيته كل المشاعر اللي تملكها او وثقت بيه حتى بموتك مراح يتركك،
الندوب موجودة عند الجميع لكن بنسب مختلفه وندوب كلبي كبر حملهن هوايه ردت ابتعد عن كل شي وخطرت على بالي فكره انهي حياتي اكثر من مره تخبلت فعلياً وعتزلت العالم تعرضت للعنف من قبل المجتمع والعنف مو شرط جسدي العنف النفسي اسوء بهوايه من تسمع كلمات تسم البدن ومع هذا نهضت وبقوة ومخليت أراء الناس وكلامهم يأثر بيه، صعب جداً تتجاوز الألم لكن الأصعب من تحس نفسك بحاجة لشخص يسندك بوقت مموجود يمك أحد اصلاً من تشوف نفسك وحيد راح تكون مجبر تقوه وساعتها ميكدر يهزمك أحد كائن من يكون، قصة حياتي اشبه بفلم سينمائي البعض يعتبر شي كلش طبيعي تعيش بدون اهل او تبقى وحدك أبيت رجل غريب تفقد كل شي بين ليله وضحاها، الابتسامه، الراحه النفسيه، الاطمأنان، والأمان،
شعور عدم الثقه بالناس شي مرعب لان متكدر تتعايش مع أحد اطلاقاً حتى عائلتك المقربه تحس نفسك راح تنطعن بأي وقت من اي شخص فتخلي جدار من حديد محاوطك حتى متميل لأحد ولتكون صداقات وعلاقات مع الآخرين وعلى رغم هي عادة سيئة لكن اني احبها حيل من اهم الصفات اللي لازم تتمسك بيها المرأة هي عدم الثقه بأحد الجميع خونه اصدقاء او محبين ماكو انسان صادق بالمطلق نظريه غلط جانت مرسومه بعقلي بس تغيرت من عرفته شيء ما سيطر على كلبي وخلاني اشوف سيئاته حسنات على رغم ماعنده سيئات هوايه، جنت اقرأ قبل بالتيك توك او اي موقع ثاني بالقصص بانو النساء تمجد الرجال اللي تضربها وهذا اكثر شي دارج اعتقد بقصص الفصليات مجان عندي اطلاع هوايه بيهن بس عرفت كم معلومه عن طريق الفيديوهات اللي تنشر على التواصل، صحيح العنف موجود وبكثره هم وميقتصر بس على النساء اكو رجال معنفين ايضاً وميقتصر التعنيف على الضرب مطلقاً لان هو مثل الخيانه اله هوايه أوجه لكن احنه نتفق على شي واحد ماكو شخص بهذا العالم يتمتع بعقل واعي يحب اللي يعذبه سواء كان التعذيب نفسي ام جسدي وللأسف هيج قصص تنمي بعقل البنات انو عادي تتقبل هيج ناس وتعيش وياهم على رغم ماكو شي بالكون يجبر الانسان يتحمل الاهانه حتى لو جان عاشق ولهان تبقى الكرامه اهم من كل أحد على وجه الكره الارضيه واللي يزيد العذاب اضعاف هو مدح هيج شخصيات وتأييدها على العمل اللي تسويه وكأن هو انجاز عظيم على رغم هو ميدل الا على همجيه الشخص وانحطاطه واللي يقهرك اكثر هو اغلبهم اللي يعنفون وعديمين اخلاق هم ضباط خلوني اكره شي اسمه جندي وتلعب نفسي منهم لان دائماً بقصصهن الضابط ملاصقه اله الخيانه، التعنيف، الانحطاط الأخلاقي واللفظي، والأهم انعدام احترام المرأه يعاملها وكأن هي عبده ليست إنسانه،
وتغيرت نظرتي من شفته وعرفت انو مثل ما اكو الموزين اكو الزين على رغم هو دائماً حزين وبعيد وميفتح كلبه اليه وغامض بشكل بس قربه من عندي يمثلي الأمان وحتى قبل ميصير زوجي اما اعيونه فهي سحر من نوع آخر احسهم وطني اللي احتل وضاع ابنائة، راح اكون كاذبه لو كلت كل خليه داخلي ما تنبض حب اله لان من صدك شخص يستحق كل مشاعر الحب والاهتمام.
: عيني عليه وهو لازم القرآن ويقرأ بصوت ناصي كعدت من زمان ومحجيت بقيت أمتع نظري بالنعمه اللهيه الموجوده كدامي الوقت اللي اقضي وياه قليل جدا اغلب ساعاته يكون بيها بالمركز فهيج فرص لاتعوض بس حظي واعرفه لازم يصير شي يقاطع هيج لحظات.
كلاثم: فتحت عيونها ولك هَيْصَم.
: صرخت بيه هيج واجت يمي بسرعه ماعرف وين جانت لزمت أيدي وباوعتلي بحنيه وكالت.
كلاثم: شلون صرتي حبيبتي تحسين بألم؟
فيروز: لا محاسه بشي ليش هو اصلاً شنو صار ما اذكر؟
هَيْصَم: شظيه تسببت بنزف داخلي والحمد الله عدت على خير الحمد الله على سلامتج لَّباءَة.
فيروز: الله يسلمك.
هَيْصَم: راح اصيح الدكتور حتى يشوفج.
طلع واني عيني عليه ليش هيج بارد اليوم صاير شي واني ماعرف؟
: طلعت للحديقة المكان اللي جنه نلتقي بيه دائماً نزلت ادموعي واني اتذكر شلون دمرت نفسي بأيدي وحطمت مستقبلي وخليت اهلي يتبرون من عندي.
Flash back
محمد: هذا الحل الاخير اذا مقبلتي كل واحد بطريقه.
حوري: انت عاقل شلون اكدر اخون ثقة اهلي بيه اللي تطلبه من عندي هو المستحيل بعينه.
محمد: خليج هيج تفكرين وابقي عاندي وانت تشوفين اهلج شلون كارهيني بس لان مردت يتزوجون خواتي بهاي الطريقه تتوقعين يجي يوم ويقبلون بيه زوج الج؟
حوري: كل شي يتغير مع مرور الوقت بس خلينا نصبر ليش نستعجل وبعدين نندم!!
محمد: راح نندم اذا مخطينا هاي الخطوة ليش متثقين بيه معقوله تفكرين ممكن اغدر بيج بعدين؟!
حوري: منو كال هيج؟
محمد: ترددج هو اللي يكول مو اني.
حوري: خليني افكر بعدين ارجعلك قراري.
خلص اسبوع كامل واني افكر اخير شي قررت اقبل وجان هذا أحقر واغبا قرار اتخذه بكل حياتي راح ابقى ندمانه عليه لآخر يوم بعمري، اول مكتله موافقه ثاني اليوم كلت لأمي صديقتي مريضه وأريد اشوفها قبلت لان هي جوارينه وجنت متفقه وياها اذا صار شي تتصل بيه بسرعة هي الوحيدة اللي تعرف بزواجي من محمد على رغم هوايه نصحتني انطي حظر وما اتواصل وياه بس اني الحماره بقيت متعلقه بيه ورافضه كل الافكار اللي تكول عكس هيج، رحنه للأمام الكاظم عليه السلام جان اكو سيد عقدنا بعدين طلعنه للمحكمه جان مكمل كل شي الشي اللي خلاني اتفاجئ لكن ايضاً من الثول مالتي مسألت بقيت امشي مثل ميكول بدون تفكير شخص مسحور هيج شي تقريباً، كمل كل شي ورجعنه للبيت واني مرأه متزوجه مو زواج كامل وإنما عقد فقط شرعي وقانوني ومن هذا اليوم تحطمت حياتي وحكمت على نفسي بالإعدام.
: صحيت على صوت الموبايل شفته هو يتصل غلقته ورجعت راسي على الكرسي بقيت حتى صار اذان المغرب سمعت خطوات ورايه نهضت بسرعه مرعوبه شفته واكف وأيده بجيوب البنطلون نظرته اليه كسرت كلبي حسسني بحقارتي واللي سويته وخاصتا من كال.
أرفد: نقبلتي بالكليه بشرط اني اخذج وارجعج لو نسر وبما انو حظر تجوال ودوامات ماكو راح تجين يمنا بالمستشفى نعلمج اهناك بشكل عملي.
سكت شويه ورجع كمل.
أرفد: لتتوقعين هذا من باب الثقه او اريد ارجع علاقتي بيج وين مترحين تبقين تحت نظري اللي يخون مره يخون الف واني شخص ما اتحمل الخطأ مرتين وكلي للمحامي مالتج ليجي لهنا وماكو اي لقاءات عشاق ومخطوبين واذا كاتل نفسه خلي يستعجل بالعرس وبعد زواجج من عنده تنسين هاي العائله بالكامل وكأن ما موجودة.
متحملت بسرعه كلت.
حوري: لهاي الدرجه كرهتني وراح تتخله عني على رغم تعرف بسوالفه وشلون هو شخص مجرم طيب اني غلطانه بس ابقى اختك والدم ميصير مي أرفد.
أرفد: اني مجبرتج تمشين بهذا الطريق وعلى رغم خطبج ودز واسطات بس رفضت وبشده لان خفت عليج انتِ مو بس اختي بنتي هم وتربيتي على أيدي دكتور القلب يكون قلبه رحيم دائماً بس انت قطعتي كل سبل الرحمه متستاهلين المسامحة ابداً.
حوري: مجنت اعرف هو هيج والله.
أرفد: جان سالتي اخواني ليش هيج يكرهوه وميقبلون يزوجوني اله ليش ماعدنه علاقه بيه وماننجمع سوه؟
كل هاي مصنعت بعقلج تساؤلات وخلت الشك بكلبج؟!
وشلون اكدر امنعج توكعين بهيج خطأ واني مجنت اعرف من الأساس اختي الصغيره مغرمه بأكثر انسان احنه نكرهه؟
: خلاني ابجي ودخل جوه شكد وحده سافله اني وماعندي اخلاق حسيت بغلطي وشنو سويت وعمق جريمتي صدك اني محظوظه باخ مثله لو غيره جنت اليوم بالنجف وتنقرأ فاتحتي.
فيروز: نمت بعد ما اجه الدكتور وفحصني وضربني ابره فتحت اعيوني مشفت احد وما أكدر اتحرك اخذت نفس عميق وزفرته بقيت صافنه بالمكان من عرفت ما أكدر اتحرك بقيت فتره طويله هيج حتى انفتح الباب ودخل نظرلي وصغر اعيونه حسسني مرتكبه جريمه واني ماعرف أتقدم ناحيتي كعد على أطراف السرير وقرب ايده من وجهي مرر اصابيعه على وجناتي وكال بصوت اشبه للهمس.
هَيْصَم: وكعتي كلبي لتعيديها مره ثانيه.
فيروز: شنو هي؟!
هَيْصَم: لتشمرين نفسج كدام الموت ماكو شخص يستاهل وحتى اني اذا حياتج رخيصه بالنسبه الج فهي مثل الهوه عندي لتسوين حركات بطوليه احنه الجنود معرضين للموت بأي لحظه لحماية هذا البلد وحمايتكم ماكو داعي تسويها حتى لو شفتيني انازع شوفتج وانت عايشه وبصحه اهم شي عندي.
فيروز: اسم الله لتحجي هيج ان شاءالله عمرك طويل.
هَيْصَم: فرضاً كلت لتخافين ميصير بيه شي غير اللي كاتبه الله.
فيروز: خالتي وين؟
هَيْصَم: رجعتها للبيت متناسبها أجواء المستشفى.
فيروز: وليش مبقيت يمها؟
هَيْصَم: هي مقبلت كالت خليك يم مرتك هاي الليله.
ذكرني حسيت نفسي خجلت ماعرف شنو السبب على رغم صار ساعه نسولف عادي بس اول مذكرلي العقد وزواجنا تغير وضعي درت وجهي بعيد عنه لو يصير هسه طفرت من هذا المكان بس الوضع اللي اني بيه ميسمح والأخ ماخذه الواهس، لزم فكي بايده ورجع وجهي لمكانه شفته مبتسم اني هم من الثول ابتسمت رفع حاجبه وكال.
هَيْصَم: خجلتي؟!
حجيت بسرعة.
فيروز: لاا.
هَيْصَم: مو اكول ممتعود عليج خجوله لَّباءَة الهَيْصَم.
فيروز: ليش بله شنو مسويه وعرفتني ما اخجل؟!
هَيْصَم: اعصابج هسه طلعتي من العمليات.
غمزلي مكمل كلامه: اذكرج لو ميحتاج؟
فيروز: والله ما اذكر مسويه شي يدل على عدم خجلي.
هَيْصَم: اي صح ومنو اتصل عليه واني بالمركز كتلها شنو تردين كالت انت؟!
هاي مو انتِ اعرف لتصيرين حمره.
فيروز: اريد انام وخر عني.
هَيْصَم: هسه كعدتي من النوم بعد وقت حتى ترجعين تنامين مره ثانيه.
فيروز: ماعندك شغل؟
هَيْصَم: فدوة يروح لعيونج كل الشغل والمركز هم.
ضحكت وسكتت بسرعه من حسيت بألم باوعتله ورجعت عندي شخصيتي القديمه اللي كلش احبها لذلك كلت.
فيروز: الغزل ميلوكلك هَيْصَم.
هَيْصَم: ليش بله؟!
فيروز: لان وراها راح تكول ماحبج لتتأملين.
هَيْصَم: ومنو يكول اكولها هاي المره يجوز مشاعري تغيرت ناحيتج من صرتي مرتي؟
فيروز: الواضح تأثرت هوايه بعمليتي اليوم وصرت تعترف سيد افندي!!
هَيْصَم: ليش هذا اعتراف؟!
فيروز: تعبانه حيل والخلقك لتزيدها عليه اكثر اني ممطالبتك بحب بذات الوقت اكره كلمه ماحبج تحسسني انسانه رخيصه عديمة قيمه عندك ،لتكول شي ولتعلقني بحبال كذب متريدني وتكرهني ومستحيل تحبني خلينا ننهي كل شي اهنا لتحاول تستغل احترامي الك ودوس على كلبي لان بوقتها لو يبقى على دخولك الجنه مسامحتي ورب الجلاله مستحيل أنطيك اياها.
صافن بوجهي ابتسم وجاوبني بهدوء عكس مجنت متخيله.
هَيْصَم: سالتي نفسج وجاوبتي واذا ترجعين تذكرين اني محجيت شي ابد هاي مجرد تكهناتج، خلي ابالج شغله مهمه، الهَيْصَم ميدخل لبيته وحده ميريدها سنين طويله اني بدون زواج على بالج اتزوج بعد كل هذا العمر من وحده اكرها؟!
تردين تشربين مي؟
فيروز: ليش طفرت هيج مو موضوعنا المي.
هَيْصَم: شنو موضوعنا لعد؟
فيروز: ماكو شي اني هم صوجي اتأمل بيك فايدة نسيت لوهله انت الغموض يتعلم من عندك.
هَيْصَم: يجي يوم أسراري تصير بين ايدج وكلبي هم خليج مطمأنه.
درت وجهي وحجيت بهمس حتى ميسمع.
فيروز: من اموت ويدفنوني بالنجف وتبقى حسره بكلبي اسمعها اتذكر وقتها انك حبيت ومعترفت.
: التفتت على صوت ضحكته وجه صاير احمر اختنك وكام يكح نهض من مكانه ورفع راسه فوك اتنفس بهدوء بعدين باوعلي وكال وهو بعده على نفس الابتسامه.
هَيْصَم: تعرفين اكثر شغله حبيتها بيج شنو هي؟
فيروز: انت متحبني اصلاً من وين طلعت اكثر شغله حبيتها بيه؟!
هَيْصَم: اعتبر نفسي مسمعت واجاوب على السؤال اللي طرحته، عفويتج انتِ انسانه ابد مو متصنعه على رغم كبرياء عندج عالي وعيونج اللي تحجي سوالف كلبج عكس السانج المعند بس تبقين صريحه او واضحه ومميزة بعيون الهَيْصَم.
فيروز: هسه انت تذم لو تمدح؟!
هَيْصَم: متطلع وياي والله ابقي متحمله اعترافات مثل هاي حتى الله يوفق ونطور.
فيروز: واذا ماوفق؟
هَيْصَم: لتخافين يوفق وصلنه للنقطه الحاسمه بهاي العلاقه.
فيروز: هم ناوي ننفصل؟
هَيْصَم: شنو هل سؤال الغريب؟!
فيروز: ماعدنه شي خلينا نفتح مواضيع ونسولف بيها.
هَيْصَم: وملكيتي غير هذا السؤال؟!
فيروز: اي جاوب هو مجرد سؤال.
هَيْصَم: لو ناوي انفصل متزوجتج من الأساس أمسحي من عقلج فكرت اني انجبر على شي معين لتنسين اني منو لَّباءَة.
فيروز: صيحني بأسمي حابه اسمعه من عندك.
هَيْصَم: كلبي وعقلي سموج لَّباءَة اكو احله من هيج اسم؟
فيروز: ليش يعني إلا هذا الاسم؟
هَيْصَم: للأسد لَّبوة و للهَيْصَم لَّباءَة هذا الأسم يليق بيج اشوفج ملكه بعيني.
فيروز: لا اهنا لازم تسميني احلام مو لَّباءَة.
هَيْصَم: ومنو هي احلام بالنسبه الج يروحي؟!
ركزت وي اخر كلمه كال روحي لو اني انطرشت وصرت اسمع غلط؟
من شافني هيج صافنه ابتسم وكال.
هَيْصَم: راح نصير بالتدريج يوميه نكول كلمه غزل جديدة تعودي من هسه حتى متكون نظرتج نفسها باجر.
فيروز: تضحك عليه انت!!
هَيْصَم: ليش هيج عيونج تريد تفترسني؟!
فيروز: لان جملتك زعجتني شنو يعني يوميه تكول كلمه شايفني طفله وتضحك عليها بهاي السوالف وتحاول تقنعني بكم كلمه حلوه؟
من البدايه جان الاتفاق لا اني احبك ولا انت تحبني لذلك لتعاملني بهذا الأسلوب اللي يضوجني هَيْصَم.
هَيْصَم: لهاي الدرجه زعجتج كلمة روحي؟
فيروز: لا.
هَيْصَم: لعد؟
فيروز: الجمله اللي بعدها.
هَيْصَم: يعني متردين تسمعين كلمات حلوه بشكل يومي؟
فيروز: مجان قصدك هيج.
هَيْصَم: وشنو جان قصدي؟
فيروز: انت اعرف.
هَيْصَم: نتحمل شنو ورانا الله خلقنا نتحمل هرمونات ونكد.
فيروز: طلعت نكديه؟
هَيْصَم: لا اني نكدي بس لخاطر الله كافي تعصيب ليصير بيج شي يروحي.
فيروز: لتخاف ميصير بيه شي عمر بزونه.
هَيْصَم: لا عمر لَّبوه.
فيروز: نشف ريكي بسببك اريد مي.
هَيْصَم: هذا اللي ينطي مجال لمرته هيج يصير بيه.
شربني مي قبلني بجبيني ونزل راسه لمستواي وكال.
هَيْصَم: ضروري ارجع للمركز الممرضه راح تبقى يمج موبايلج يمها اذا حتاجيتي شي بس اتصلي بيه واضح؟
فيروز: تمام انتبه على نفسك.
طلع واني نمت بسرعه حيل نعسانه يمكن بسبب العلاج.
سقت السيارة ورحت بطريقي للمركز وقفتني سيطره تفتيش.
: انزل من السياره نريد نفتشها.
هَيْصَم: نزلت كوني ملابس الزي فكلش عادي يصير هيج بس اللي مو عادي اللي صار بعده.
يتبع.
البارت اكثر من 3800 كلمه
تصبحون على الف خير وعافيه.
حسابي الأنستا.
رواية هَيْصَم الفصل السابع وثلاثون 37 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
دافئة جداً فڪرة أن يڪسر أحدهم إحدى قواعدۿ لأجلك ، ڪأن يڪون طبعه الصمت، لڪن حينما تكون أنت جليسه، يتحول فجأة لأكثر إنسان ثرثار في العالم، شعور صادق ودافئ جداً ، شعور انڪك إستثناء..
ومن يستنثي ذلك القلب من الألم؟؟؟
: من تعيش وسط مجتمع قذر ، مجرمين، قتله، سراق، مدمنين، والمدمن انواع كثيرة مايقتصر على المخدرات فقط ، ومن تكون الصح وسط الاغلاط هاي كلها وقتها سهام الجميع راح توجه ألك وانت لازم تعرف تفاصيل الخطه المحبوكه ضدك وشلون تطلع من عدها سالم، معرفه فورية؟
اكيد لا، لازم قبل بوقت من تنرسم بعقل العدوا ويبدي التنفيذ الها يكون عندي علم والا مكدرت اكون بهذا المكان اليوم، الحكمه والذكاء وسرعة البديهه ، القيادة الفذة لازم تكون موجوده داخل كل ضابط حتى يكدر يبقى بمكانه ومحد يسقطه، منو كال عملنه مو خطر؟
قمة الخطورة موجوده بالسلك اذا مجانت خارجيه فتكون داخليه اكيد لابد اكو أشخاص يردون يدمروك وخاصتاً اذا جنت انسان شريف ونزيهه أو تريد ادمر عصابه.
هَيْصَم: سبحان اللي خله لسان للكلاب وتسولف وي الأسود براحه، الواضح من جابوكم لهذا المكان مكلولكم اللعب بنصاص الليالي مع المفترس خطر، بس مو مشكله خلصت حياتي اقدم معروف للناس مثلكم هاي المره ايضاً راح اسوي نفس الشي، عدكم خيارين الأول تبتعدون من طريقي والثاني تجون ويايه للمركز مثل الشطار.
: انت الواضح مسمعت شنو كلنه قبل شويه، سلم السيارة والمسدس مالتك قبل ميصير شي ميعجبك.
هَيْصَم: انتوا سلابه لو دازكم واحد عرف؟
: عجبنه ناخذ سيارتك لو عندك مشكله؟
هَيْصَم: لا افا عليك ليش حتى عندي مشكله بس مثل متعرف السيارة جديدة صارلها سنه وخطيه متعودة عليه واخاف عليها تستوحش بدوني خاصتاً بالليل متعوده انام بحضنها فما اريد اكسر خاطرها كل شي ولا قلوب القوارير.
: الواضح ماعندك مرة تهتم بيك وتخلصها محاضن وي السيارة، ههههه.
هَيْصَم: جنت ناوي اعديها سلامات بس بما انو حجيت بطريقة ضوجتني راح اربيكم تربية غير شكل.
سيطره وهميه من خمس أشخاص لابسين الزي العسكري، المكان غلط والزمان غلط واخبارية مسبقه كل الأدلة تثبت انو هم جماعة الأسود يريد قتلي وهذا الشي محال كوني رجل دولة خارج عن القانون وعندي قسم بالانتقام من كل شخص سبب اذيه لأي مواطن عراقي ودمر شبابنا ما اكون رحيم وياه ابد منو مجان اللي واكف بظهره اسلمه للعدالة بأيدي ويتنفذ بيه الحكم اما الأسود فهذا انتقامي وياه غير شكل مميز لدرجه ميتخيلها.
كسرتهم تكسر وضربتهم بقوتي نفضت أيدي منهم مبتعد: قذرين.
هَيْصَم: درس للمستقبل ياويلكم تلعبون مع شخص هو مؤسس اللعبه من الأساس لان انتوا الخسرانين الوحيدين بيها، وهذا الدليل وصل كدامكم.
ضَرْضَم: سلامتك سيدي ليش ايدك كلها دم؟!
هَيْصَم: جرحني بالسجينه لتهتم اخذوهم شباب للمركز، لائِث وين شعجب مأجه؟!
ضَرْضَم: اصلاً هو أول واحد مستعد بينه بس ماعرف ليش منزل.
هَيْصَم: ليكون زعلان؟
ضَرْضَم: على شنو سيادتك؟
هَيْصَم: ماكو شي خلينا نروح، صعدت السياره وسمعت باب الصدر ينفتح بدون ما أدير وجهي كلت: حياك الله.
لائِث: الله يحيك شلونك وشلونها؟
هَيْصَم: صاير سرسري فد مره شو؟
لائِث: ليش يابه شنو مسوي واني ماعرف؟!
هَيْصَم: تسألني عن مرتي عيني عينك وكل هذا وتكول شنو مسوي!!
لائِث: تره سألت على صحتها ماكتلك جنت احبها!!
هَيْصَم: اذا متحب ينقطع نسلك وتبقى بدون وريث سد حلكك ولتمسلت.
لائِث: اتركنا من هذا الموضوع عندي سؤال.
هَيْصَم: اسمع.
لائِث: شلون عرفت بالخطه؟
هَيْصَم: سؤالك غبي اكيد اجتني معلومه شلون اعرف لعد؟!
لائِث: شوكت اجتك المعلومة؟
هَيْصَم: من جنت بالمستشفى.
لائِث: شنو جانت الخطه؟
هَيْصَم: والله استعجلت وضربتهم معرفت المخطط شنو اعذرني.
لائِث: تضحك عليه؟
هَيْصَم: شنو سالفتكم اليوم يعني الله ماخلق شي بحياتي انشغل بيه غير اني اضحك عليكم؟
لائِث: كالتلك ليش تضحك عليه مو؟
هَيْصَم: تالي وياك انت ليش تريد تتعاقب لهاي الدرجه الانفرادي حلو؟!
لائِث: كل شي من عندك حلو ياحلو، صدك مكتلي شنو صار على الموضوع اللي كتلك بيه؟
هَيْصَم: يا موضوع؟
لائِث: صدك والله هَيْصَم!!
هَيْصَم: وسم الف شغله بعقلي وين اذكر موضوعك؟
لائِث: هَمْهَام مو اتفقنا نروح نخطبله مره ثانيه قبل متروح البنيه لأبن عمها.
هَيْصَم: جنت مشغول تره انفرغ انفسنا ونروح نخطبله مو مشكله.
لائِث: وانت؟
هَيْصَم: شنو بيه اني؟
لائِث: شوكت تدخل القفص الذهبي؟
هَيْصَم: بعد وقت لهذا الحجي مطولين.
لائِث: ليش؟!
هَيْصَم: بعد هيج مكتوب.
لائِث: مره وحده جاوب على سؤالي بدون متشلع كلبي.
هَيْصَم: دورة سنه ابوها بعدها مطالعه وتريد تنتظرها.
لائِث: الله يرحمه.
هَيْصَم: ويرحم امواتك.
لائِث: على سيرتها صدك تحبها انت؟
هَيْصَم: شنو ذكرك؟
لائِث: الطريق طويل والسوالف حلوه.
هَيْصَم: الها مامعترف تريد اعترف ألك!!
لائِث: مو كلت من جنت بالمستشفى.
هَيْصَم: اي احبها واموت عليها هم واعشقها وما اتخيل حياتي بدونها وجنت أكابر وابيع ثكل براسك.
لائِث: واني اعرف بيك تحبها من اول يوم اجت يمك بس مردت اضغط عليك حبيت تعترف من وحدك بهذا الموضوع.
هَيْصَم: انت صدك واحد ارعن.
لائِث: ليش بله؟
هَيْصَم: انت تعرف اني من شوكت اعرفها؟
لائِث: اي غير من نخطفت ونقذتها وأخذتها لبيتك لو من شوكت؟!
هَيْصَم: اي صحيح من نخطفت وأخذتها لبيتي.
لائِث: اكو شي اني ماعرفه هَيْصَم؟!
هَيْصَم: شي مثل شنو؟
لائِث: تعرفها من قبل ميصير كل هذا مو؟
هَيْصَم: وين اعرفها بالحلم!!
لائِث: لتسوي هاي الحركات مو عليه سوالفك.
هَيْصَم: اي بله شغل دماغك وانت تعرف كل الاجوبه اللي ادور بعقلك هسه.
لائِث: من سنه لو من سنتين؟
هَيْصَم: او يمكن من جانت طفله صغيره.
لائِث: تضحك عليه!!
هَيْصَم: لان سؤالك غبي جداً وانت تعرف قبل سنه وين جان مكانه.
لائِث: لتخليني اصنع إجابات من عقلي انطيني الزبده تعرفها من قبل لو هسه؟
هَيْصَم: المهم اعرفها مو مهم الوقت.
لائِث: خليك هيج نشوف شنو تاليتها.
هَيْصَم: القلب أعمى يا صاحبي القلب أعمى.
لائِث: بس أني كلبي مفتح عيونه عدل واشوفك ياصاحبي واقع في الحب من راسك حتى قدميك لا والله هم طامس مو بس واكع.
هَيْصَم: حلو الحب وين المشكله اذا وكعت بيه!!
لائِث: اوكع ياصاحبي اوكع لعنه عليه ليكلك لتوكع اسبح اصلآ مره وحده وان شاء الله يعجبك الوضع وتبقى واكع طول عمرك.
هَيْصَم: تستهزء حضرتك على اساس ماعرف انت تحب هم!!
لائِث: اني احب اعوذ بالله ويني وين الحب.
هَيْصَم: صحيح صدكت.
لائِث: وداعتك ماحب ماعندي هاي السوالف تعرفني.
هَيْصَم: والله اني نفسي تفاجأت بيها تريدني اعرفك بعدين شكو بيها ليش هيج خايف واذا حبيت قابل تمنع كلبك ينبض لأحداهن.
لائِث: شوف سيادتك ارجع لدور المدير واترك مواضيع الأصدقاء على صفحه افضل عزيزي.
هَيْصَم: ليكون اللي تحبها اعرفها كول بنت عمه بنت خاله حتى أكدر اساعدك تخطبها.
لائِث: على اساس انت عندك بنت عمه وبنت خاله وتخطبها اليه!!
هَيْصَم: اذا هيج مبقى عندي احد امي هي امك واختي هي اختك فمنو هاي اللي تحبها لائِث وليش هيج مستحي وخجلان تحجيلي عنها واني اعرف بيك حتى من تريد تنام وكم مره تتكلب بفراشك، نمنا على نفس الفراش وتشاركنا نفس الاكل وعشنا سوه بهاي الدنيا على حلوها ومرها دخلتني بيتك ودخلتك بيتي اشك بنفسي وما اشك بيك منطيك ثقة الهَيْصَم هذا الشي اللي محد يكدر ياخذه بسهوله اذا تريد من عندي روحي صدكني ماقصر انطيها واني مغمض عيوني وأعتقد وصلت الفكره ياخويه.
مرات الكلمات اللطيفه تحسسك بالذنب اكثر من الكلمات السامه والمجرحه تكدر تاخذ كلب اكبر أعدائك بأسلوب لطيف.
لائِث: اذا حجيت ماتزعل؟
هَيْصَم: ليش ازعل مسوي شي يزعل انتَ؟
لائِث: دخلت بيتك صح وعشت وياك من الطفوله عمري كله مخليت عيني على مكان غلط ولاباوعت بنظره محرمه على خواتك وعتبرتهن مثل خواتي الله يشهد ورسوله بس اريد اطلب من عندك شي وخايف ترفض هذا السبب اللي منعني احجي ماكو غيره.
هَيْصَم: كول ركبتي ألك.
لائِث: تسلم اعرف متقصر مو من شيمتك هاي، اريد اخطب اختك اذا ماعندك مانع القرار الكم اذا متقبل كلش عادي المهم صداقتنا وخوتنا ميهزها شي وقسم برب العالمين ممسوي شي غلط يعني ليروح بالك معجب ومن هاي السوالف كتلك اختك مثل اختي بس لان اني عاشرتكم واعرف تربيتكم شنو ما أريد اخذ وحده ماعرفها ماتكدر تصون بيتي.
هَيْصَم: على بالك ماعرف انت شنو لو خواتي وتربيتهن شنو!!
لتلطم مثل وحده زوجها استشهد كلش عادي تخطب من عندي ولو القرار راجع اليه زوجتك باجر بس تعرف اني ما أجبر خواتي على شي ميردنا.
لائِث: وليش ميردني وبعدين اني خاطب اختك الجبيره مو كلهن.
هَيْصَم: اختي الجبيره متزوجه.
لائِث: هَيْصَم كول من الاخير مازوجك اختي عادي والله أتفهم لتبقى تلف ودور.
هَيْصَم: اخاف على مشاعرك اني اختي مينعاش وياها صدكني.
لائِث: ليش شنو بيها؟!
هَيْصَم: مصغر من عندي نفس الشخصيه والعناد والغموض تربيتي بعد.
لائِث: مو معاشرك انا وماعندي مشكله وي طبعك وين المشكله لعد؟
هَيْصَم: مُصر بعدك على الخطبه؟
لائِث: اذا متقبل كول لتلف ودور هَيْصَم اكره هذا الطبع من يكون خارج المركز.
هَيْصَم: الله كريم افكر.
لائِث: والنعم بالله.
: جنت اتمنى يبقى ويايه هاي الفتره بس دائماً ميصير مثل ما أريد بل عكسه اسبوعين كاملين مشايفته بس مرتين مره اخذني للمستشفى حتى افتح الخياط والمره الثانيه جانت عن طريق الصدفه طلعت من الغرفه الصبح بنفس الوقت هو طلع للشغل صباح الخير مع السلامه حتى مسمعت جوابه من كثر مامستعجل،
وكالعادة الروتين المعتاد بعد الغدة لازم اغسل المواعين بعد مصرت احسن بطلت اخلي خالتي تشتغل هي تروح ترتاح بالغرفه واني اكمل شغلي وحدي على رغم هي موجودة بس اغلب وقتها تسبح لو تصلي لو تحجي وي بناتها قليل نفتح مواضيع ونسولف واصلاً اني مو من الأشخاص اللي يحبون يفتحون كلبهم لأحد احب اكون منعزله حتى ابتعد عن المشاكل، ومثل اي بنية طبيعيه كلش لازم اغني واني اغسل مواعين هاي عادة قديمة عندي من جنت عايشه وي بابا وهو مجان يمانع بالعكس يكعد بصفي على الكرسي ويبقى يغني ويايه لكن من أجيت لهنا تركتها بسبب هَيْصَم واليوم رجع اليه الواهس حتى اغني الأغنيه بعقلي ادور سمعتها البارحه واغني بيها من الصبح احسها مشابها لوضعي هاي الفتره على اساس يريد نعيش مثل المخطوبين واني من يوم اللي طلعت بيه من المستشفى مشفته بعد، اغسل بالمواعين ودندن بس بصوت عالي بالاغنيه.
بقيت ادندن حتى حسيت على ادين حضنت خصري عرفته هو من العطر واصلا ماكو احد يكدر يدخل البيت غيره، مد أديه ولزم أديه وصار يغسل مواعين ويايه ابتسمت بنفس الوقت خجلت من صار يهمس بأذني.
هَيْصَم: منو باك رجلج؟
اذا شاكه بواحد كليلي هسه ارفع بي مذكره.
فيروز: مجرد اغنيه لتاخذها على محمل الجد.
هَيْصَم: اي شخبار مريتي اليوم؟
فيروز: مصخن انت هَيْصَم؟
هَيْصَم: ليش شنو كلت غير اسأل على صحتج؟
فيروز: اذا انت بخير اني بخير.
هَيْصَم: يلوموني.
فيروز: شو هاي الفتره دائماً تعيدها منو هو اللي يلومك؟!
هَيْصَم: شعجب مسامعتها؟
فيروز: هي شنو غير افهم!!
هَيْصَم:
و يلوموني ..
أحسك تكبر بروحي و يلوموني
و انا بلا شوفتك شتنفع عيوني
يا شوكَي، ورجوتي، ودنياتي، ولوني
وعذابي ولهفتي شكواي وضنوني
يا خيعونك علية و بيك خيعوني
: ابتسمت وحسيت بيه طبع قبله على وجنتي ورجع همس يم أذني اختل توازني من كلامه لدرجه مسيطرت على الصحن اللي ابايدي لو مو ايده مثبته.
هَيْصَم: شنو العلاج لشخص ميحب الشعر وصار فجأة كل يومه يسمع عريان؟ جنت اضحك على ارفد من يتغزل بزوجته بقيس والمتنبي طلع كلامه صح.
جاوبته بنفس النبرة مالته.
فيروز: وشنو هو كلامه؟
هَيْصَم: عيفج من عنده وسولفيلي شلون اروي عيوني بشوفتج حتى ما اشتاق من اروح للدوام؟
فيروز: هسه تجي خالتي ابتعد شويه فدوة.
هَيْصَم: فدوة للي تخجل من خالتها ولج من جنتي مو مرتي بستج تردين هسه وانتِ مرتي اوخر ليش يمه!!
فيروز: مو عيب والله ميصير.
فززني صوتها هو وخر بسرعه واني من فشلتي وكع الصحن من أيدي.
كلاثم: نور البيت.
هَيْصَم: منور بيكم ام الهَيْصَم.
كلاثم: اي ابني شوكت ناوي نفرح بيكم؟
: جحظت عيوني معقوله شافتنه درت وجهي اله بسرعة هو أول مشاف وجهي هيج غمزلي وكال.
هَيْصَم: والله اذا تردين اليوم ماعندي مشكله.
كلاثم: فصليه هي واليوم لا حبيبي اريد اسويلها عرس تحجي بيه المنطقه وحنه هم وحفله مال خطوبه لان مسوينالكم شي لحد الأن لازم نفرح بيكم ميصير هيج على الساكت.
هَيْصَم: على سيرة الحفلة اجرت بيت قريب على ارفد يعني راح نصير جوارين وبعد كم يوم ان شاء الله اروح اجيب خواتي وتنتقلون اهنا رسمي ميحتاج ترجعين لأربيل مره ثانيه.
كلاثم: ليش انت تعرف اني ماحب اغير مكاني المتعودة عليه كبرت اهناك وربيت أقاربي وأصدقائي كلهم اهناك ما أكدر اعيفهم.
هَيْصَم: روحي زياره اريدكم قريبين عليه وعلى ارفد في حال صار شي احنه يمكم مو وحدكم بالبيت.
كلاثم: معجبني هذا القرار بس شنو نسوي حكمة ربنا.
هَيْصَم: عسى ان تكرهوا شيئاً وهو خير لكم.
كلاثم: اي صدك قبل متنسيني شنو اريد ممنوع تلتقي بفيروز بدون ميكون عندي علم قبل عرسكم.
هَيْصَم: وليش بله؟!
كلاثم: والله هذا الموجود اذا ميعجبك استعجل وتزوجوا خير البر عاجله.
هَيْصَم: منتزوج هسه.
كلاثم: ليش رجال ومرأه عاقدين وعايشين أبيت واحد شنو معناها هاي تبقون بدون عرس شتريد الناس تحجي عليك هَيْصَم وبعيد عنهم اني شخصيا ما اقبل تبقون بدون زواج احسبوا حسابكم من اليوم لمدة 30 يوم اريد افرح بعرسكم خلال هاي الفتره اي اعتراض ما أريد.
هَيْصَم: يوم والدها مطالعه سنته ميصير نتزوج بهاي الفتره أجليها.
كلاثم: ما ألك علاقه اطلع منها بنيتي اني احجي وياها انت بس حظر نفسك للعرس.
هَيْصَم: ام الهَيْصَم خليها على راحتها شوكت متريد الزواج لتجبريها على شي.
: اني واكفه وهم يتناقشون بحياتي بقيت صافنه معقوله اتزوج وسنة والدي بعدها مطالعه مستحيل ما أقبل قاطع تفكيري صوتها وهي تكول.
كلاثم: تعالي يمي ماما.
غسلت ايديه واجيت يمها كعدنه وبدت تحجي.
كلاثم: اني امج بنتي راح احجي وياج وافهمي كلامي، اني ملاحظه هَيْصَم شلون يحبج ومتعلق بيج ويستغل الفرصه علمود يجي يشوفج وحتى وانتِ نايمه يدخل ويبقى يمج فتره ويكوم، الرجال شنو مجان عنده صبر ميتحمل يبقى فتره طويله يشوف مرته كدامه وزواجه بعده ممكتمل من عدها، افهمي حبيبتي وين اريد اوصل اعرف والدج ومن حقج بس الحي افضل من الميت واحنه نفسنا مضامنين حياتنا عيشوا ايام عمركم ولتماطلون بالموضوع او والدج يبقى عايش بكلبلج او وعد من عندي محد ينساه بذكرى وفاته وكلنه اهلج او وياج وهسه من يجن خواتج راح تشوفين شلون نعيش مثل عائلة حلوه مع بعض، انتِ بس وافقي ومعليج بالباقي والنبي ادللج مثل بناتي وأكثر وانتِ اصلا صرتي وحده من عدهن من اول يوم شفتج بيه.
: بقيت ساكته معرفت شنو احجي بس الواضح راح يصير مثل متريد ولحد الان سيد افندي ممعترف شكد صعب اعيش وي شخص ماعرف مشاعره ناحيتي شنو صحيح اشوف الحب بعيونه وكلامه يثبت حبه بس مع هذا لحد الآن بعقلي من جان يكلي لتحبيني اني ما افيدج، على كل الايام السيئه اللي مرت احس السعادة شي ممكتوبلي وفي حالة خوف مستمر ممكن بأي لحظه اخسره، عقلي وكلبي كله وياه من يطلع من البيت حتى يرجع شلون اكدر اعيش داخل قوقعه الخوف هاي،
وشنو الحل ماعرف.
محمد: صار اسبوعين اتصل بيج وانتِ ماكو معنده لهاي الدرجه ليش فهميني شنو السبب؟
حوري: بعد كل هذا اللي سويته وتسألني بعد!! شنو تريد أكثر من هيج مو كافي ادمرت حياتي بسببك مكفاك يعني؟
محمد: هسه صرتي شريفه براسي منو اللي جانت تتوسل حتى تسمع صوتي ومن اكلها احبج تذوب جنها شمعه؟
حوري: الله ليوفقك انت بلائي وعذابي الله يشوفك إيام سودة على اللي سويته بيه ويدمر حياتك مثل مدمرت حياتي ويعاقبك على سوايتك ويايه.
محمد: يعاقبني لو مسوي شي بالحرام لتنسين كل شي صار جنتي موافقه عليه سركي كلبي فسوالف النساء المحترمه بطليها اعرف انتٍ منو، بس بكلمتين حلوين اجيتي للطريق حتى النساء الموزينه ميسونها وفوكاها مفتخر بيج الأخ ما ازوجها الا لواحد يستاهلها اريد اشوف اذا طلكتج اليوم منو يتزوجج بعد؟
حوري: ليش هيج تسوي ويايه بشنو اذيتك اني؟!
محمد: انتِ اخت الشخص اللي دمر حياتي وحطم أحلامي ولعب بيه طوبه سلب من عندي أعز ما املك لتتوقعين ابداً اللي سويته جان حب هو انتِ اصلاً منو يحبج وحده متكبره ومغروره وشايفه نفسها.
: غلقت الخط وشمرت الموبايل على الكاع ضربت على وجهي حيل وكمت اصرخ بصوت عالي: حقيره ، حقيره، اني وحده حقيره، شنو سويت بنفسي ليش هيج شمرت روحي للموت برجليه هسه شنو استفاديت اهلي تخلوا عني واللي تأملت بيه طلع ميحبني كل اللي صار ويايه من غبائي ربي سامحني شنو سويت انييي، عضيت اصابعي العشرة ندم بس شنو يفيد الفاس وكع بالراس،
على صوتي دخل ارفد يركض اجه يمي حضني ويحجي ويايه بحنيه مثل متعودت عليه قبل، انفجرت بحضنه مثل طفله حضنته حيل وكمت اشهك بصوت عالي: سامحني فدوة والله ندمانه حيل على اللي سويته اذا تريد اذبحني بس لتبقى زعلان الله يخليك.
أرفد: بنيتي والله مزعلان كافي تبجين يلا عيونج الحلوه تتعب خلص والله اطيح حظه واطلكج من عنده، اصلاً انتِ مقتنعه اخليج على ذمه هيج واحد منحط!!
رفعت راسي وحجيت واني ابجي.
حوري: كول والله.
أرفد: والله وداعة عيونج راح أسعى بهذا الشي بس كافي تبجين يلا راويني ضحكتج الحلوه.
حوري: اسفه عليك الله سامحني ولو اني اعرف ما أستاهل بعد اللي سويته وياكم وشلون نزلت راسكم بعملتي.
أرفد: كتلج مسامحج اعرفج غلطتي كافي يلا ليصير بيج شي بعدين وباجر وراج دوام بالمستشفى نامي من وقت حتى تصحصحين.
حوري: اني شنو مسويه والله انطاني اخ مثلك؟
أرفد: مدللتي انتِ يلا كومي غسلي وجهج وصلي ركعتين واسمعي شي حلو ونامي ولتفكرين بيه صدكيني اطلكج من عنده عن قريب ان شاء الله.
حوري: ان شاءالله الله يحفظك اليه يا احسن اخ بالدنيا.
أرفد: ويحفظج بنيتي.
: طلع واني سويت مثل ميكول بعد اللي كاله ارتاحيت شوي بس طلاكي من محمد هي نهايه زواجي من اي شخص ثاني إذا مردت افضح نفسي وعائلتي بسبب غبائي وطيشي.
هَيْصَم: مريتي.
التفتت شفته واكف يم الباب ومبتسم والحامض حلو بثغره مكتف أديه لصدره ومرجع كتفه على الباب ومايل راسه منظره مجذب خلاني ابتسم لا أرادي، رفع حاجبه وكال.
هَيْصَم: مرتي ليش متحجين؟
فيروز: غيرت لَّباءَة؟
هَيْصَم: لا تبقين لَّباءَة الهَيْصَم طول عمرج بس لازم نظيف لقب ثاني حتى نغير بيناتهم يامرتي.
فيروز: اي شنو تريد يا سيد افندي؟
هَيْصَم: مشتهي حلاوة شعريه تعرفين تسويها؟
فيروز: اي اعرف بس تاكل حلاوة بهيج وقت؟
هَيْصَم: ليش شكو بيها اذا اكلت؟!
فيروز: لا مبيها شي هسه اسويلك.
هَيْصَم: تمام انتظرج.
فيروز: اهنا؟
هَيْصَم: ليش مترديني ابقى اهنا؟
فيروز: لا ابقى على راحتك.
هَيْصَم: على عيونج نظرة تفاجئ مستغربه شبيه اليوم مبتسم ومنطلق على غير العاده صح؟
فيروز: لا بالعكس حلو، تبقى هيج دائماً.
هَيْصَم: متحبين تعرفين السبب لهذا التغيير؟
فيروز: اذا تريد تكول ماعندي مشكله اسمع.
هَيْصَم: بطلت ما أريد اكول خليها لوقتها.
فيروز: اكو شي حاب تكوله هَيْصَم؟
هَيْصَم: ليش واضح على وجهي اريد اكول شي معين؟
فيروز: اي واضح جداً، عيونك دتحجي هوايه سوالف السانك مينطقها.
هَيْصَم: مثل؟
فيروز: الأفضل تحجيها انت سيد افندي.
هَيْصَم: اسف.
عقدت حاجبي.
فيروز: اسف على شنو؟
هَيْصَم: على اللي صار اعرف امي قنعتج بالفكره وانو اني رجل عزابي ومرتي موجوده لذلك لازم نتزوج بأسرع وقت، شوفي لَّباءَة اني وانتِ عشنا سوه بهذا البيت فتره طويلة، تعودتي على اطباعي وتعودت عليج بنفس الوقت عرفتي من هَيْصَم وتأقلمتي ورتاحيتي بالعيش ويايه وثقيتي بيه الشي اللي مكدرت امي تنطيني اياه، مفكره انو اني همجي ما أكدر انتظر كل الفتره القادمه لخاطر عيونج ومتدري اني مستعد انتظر عمري بأكمله بدون ما امل وما انتظر من عندج مقابل وعليه اذا متردين الزواج يصير قبل سنة عمي الله يرحمه بس كولي اكيد مراح يصير عرس بدون موافقه العروس لان ما أريد اشوف على وجهج علامة حزن هيج انزعج وبهاي الحاله يصير شي مو حلو بهيج يوم مميز من حياتنا.
فيروز: مجبرتني خالتي على شي هَيْصَم كون مطمأن.
هَيْصَم: ابقي هيج دائماً لتتغيرين مع الوقت لَّباءَة.
فيروز: ان شاءالله.
هَيْصَم: احب التفاهم اللي بيناتنا واحب حجيج ويايه بأريحية وكأن احنه اصدقاء مقربين خليج هيج واثقه بيه وتاخذين راحتج بالحديث ومتتقيدين لأي سبب كان.
فيروز: على سيرة الاريحيه عندي سؤال على بالي من زمان ليش تحب الحامض حلو وتاكلها بجميع الأوقات وحتى خارج البيت؟
هَيْصَم: اصدقائي ميعرون ليش بس بما انو انتِ غاليه راح اشاركج هذا السر.
حمسني لدرجه تركت كل شي بأيدي وبقيت صافنه عليه حتى يسولف صدمني من كال.
هَيْصَم: مجرد حلاه لان عندي هبوط سكر.
فيروز: مريض انت وليش مكلتلي؟
هَيْصَم: ليش اذا كلت تبطلين تزوجيني؟
فيروز: شنو هذا الكلام هَيْصَم مقصدي هيج، طيب ليش هيج صار وياك؟
هَيْصَم: زوجج يحلوه حياته جانت طايح حظها حشاج بعض المصايب العشتها طلعت على شكل مرض مزمن ميتعالج الا بالحلاه.
غرغرت عيوني وحجيت بغصه.
فيروز: ليش شنو عشت؟
هَيْصَم: معشت شي بس لان اصدقائي ستشهدوا أمام عيني وبحرب داعش جنت اقاتل وياهم او والدي او.. لتذكريني خليني مرتاح اليوم.
: سكتت مكدرت احجي شي هي نظرته اصلاً كفيله تشرح الألم اللي بداخله مع هذا هو قوي وانسان ماكو من عنده يارب يتخلص من هذا الهم ويفتح صفحه جديده بكلبه خاليه من الحزن.
هَيْصَم: لتفكرين هوايه بيه من شفتج نسيت كل شي ورجعت مراهق كوني واثقه.
ابتسمت على كلامه ورجعت كملت شغلي.
لائِث: وهسه شلون؟
هَمْهَام: ماعرف اني صاير عقلي طبل كلها تضرب بيه.
ضَرْضَم: لتكول هيج اتوكل على الله وان شاء الله ماكو شي.
هَمْاس: كلتوا للسيد هَيْصَم؟
لائِث: لا خطيه خليه مرتاح اليوم باجر من يرجع نكله.
ضَرْضَم: هَمْهَام لتفكر هوايه ان شاء الله ميصير شي من اللي ابالك.
هَمْهَام: انت تفهم الجمعه خطبتها من ابن عمها شلون يعني مراح يصير شي انتظر تنزفله واني اتفرج؟
هَمْاس: ما بايدك شي تسويه ليش تعذب نفسك بهاي الطريقه ما افهم!!
لائِث: الصافي، حبيبته راح تروح من ايده تريده يهلهل!!!
هَمْاس: وانت ليش تزيد النار حطب متشوفه شلون محروك كلبه؟!
ضَرْضَم: صلوا على محمد وآل محمد وان شاء الله ميصير شي مو زين الله يجمع كلوبهم بالدنيا والاخره يارب بس خلي عندك ايمان ولتقنط من رحمة الله.
هَمْهَام: والنعم بالله.
قلوب شفيت بالحب وقلوب عُذبت به فهل ياترى تتغير مجرى حياتهم وتولد قصص حب من الرماد؟
يتبع.
ملاحظه مهمه للي ميعرفون لحد الأن من القراء الجدد او القدماء،
قصة للعشق رأي آخر تجمع أبطال( أرفد، ريفان ، نسر ، أيفلين، وذكرنا جزء من حياة محمد وحوري بيها لكن لاختلاف طبيعة القصتين كون الأولى قصة حب بحته اما هَيْصَم فهو قصة اكشن وانتقام وغموض ورتبط بيها بشكل اساس محمد كون قصته أيضآ انتقام وعليه نكتبت مع بعض) اعرف دختوا لكن من تقرأوها بتركيز حتفهمون شمعاتي بالأضافة شغله مهمه وهي التنزيل بين يوم ويوم وفي حال مكدرت انزل لأي سبب كان انطيكم علم قبل يوم بإذن العليم.
لتكولون البارت قصير لان اقل من 3700 كلمه بشويه.
تصبحون على الف خير.
حسابي الأنستا.
رواية هَيْصَم الفصل الثامن وثلاثون 38 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
صادت فؤادي والفؤاد ضعيفُ
والآه كلُ الآه من حواءِ.
هَيْصَم: لَّباءَة تعالي محتاجج بشغله.
اجيت اروح وياه صاحت خالتي.
كلاثم: وين حبيب امك؟
هَيْصَم: اخطفها يعني وين يا أم الهَيْصَم!!
كلاثم: خليها اهنا يمي تونسني ونسولف سوه روح نام انت تعبان.
هَيْصَم: منو كال اني تعبان؟!
كلاثم: اذا مو تعبان ابقى اهنا يمنه هم اني اشوفك على الواهس صار هوايه مكاعدين مثل الأوادم.
هَيْصَم: ذكرتيني على سيرة الكعده لائِث عزيزج يريد يخطب ومنتظر رأيج بالموضوع.
كلاثم: ليش يريد يخطبني؟
هَيْصَم: لا يخطب بنتج ريهاف كون هي قريبه عليه بالعمر.
كلاثم: خير ان شاء الله وين الكي احسن من لائِث لبنتي.
هَيْصَم: اذا هيج اتصلي بيها وخليها تفكر الولد مستعجل حتى يتزوج.
كلاثم: مو الولد انت.
هَيْصَم: شنو قصدج ام الهَيْصَم؟
كلاثم: تريدني اكوم حتى تختلي بيها اعرف سوالفك.
هَيْصَم: والله انتن النسوان عدجن سوالف غريبة عجيبه.
كلاثم: والله هو هذا تفكيرك وتحداك تكول غلط.
هَيْصَم: على كل حال عندي اتصال مهم وراها انام تصبحون على خير.
كلاثم: شفتي شنو كتلج الولد مستعجل.
: ابتسمت ورحت للغرفه هي بقت تحجي وي ريهاف واني خليت راسي على المخده شويه وصلني اشعار رساله فتحتها جانت من عنده ضحكت على اللي كاتبه.
هَيْصَم: من جنتي غريبه محد منعني من عندج هيج هسه صرتي مرتي او واكفتلي امي على النظرة اكثر من هذا الحظ بعمري مشفت.
جاوبته.
فيروز: شنو ردت انت؟
هَيْصَم: تكويلي البدله مردت شي ثاني.
فيروز: ليش انت متعرف تكويها؟
هَيْصَم: نسيت الصراحه شلون تنكوي اذا فارغه تعالي علميني.
فيروز: خالتي يمي هسه ما أكدر اجي.
هَيْصَم: ومنو يكويها اليه؟
تقبلين باجر زوجج يروح للدوام بدلته مو مرتبه تردين الموجودين يضحكون عليه هناك؟
فيروز: عندك نت طلع فيديو على اليوتيوب وتذكر شلون تكوي كل مره واحسب نفسك لسه معاقدين بهاي الحاله يرجع عقلك لمكانه وميفكر هوايه وتبقى ذاكرتك نشطه سيد افندي.
هَيْصَم: هاي امي اللي تسولف مو انتِ اكيد لان لَّباءَتي مو قاسيه لهاي الدرجه.
فيروز: هَيْصَم شنو تريد من الاخير كولي؟
هَيْصَم: اريد اشوفج ونتعرف على بعض عن قرب محاسب نفسي خاطب ابد واحنه هيج عايشين مثل الغربه.
فيروز: انت تعرفني واني اعرفك على شنو نتعرف؟
هَيْصَم: اريد اسولفلج شويه عن ماضي حياتي واشاركج كم سر من حياة الهَيْصَم.
فيروز: وليش خطر على بالك فجأة تسولفلي؟
هَيْصَم: متردين تعرفين شي عن حياتي اذا جنت حاب من قبل أو مثلاً مرتبط؟
فيروز: اني كتلك من قبل ماضيك يخصك انت في حال مردت تحجيلي مراح اسأل ولا ازعل إذا كتشفت بالمستقبل اني مو من هذا النوع هَيْصَم.
هَيْصَم: معقوله ميدفعج الفضول مو جنتي تبحثين عن حياتي شنو اللي تغير هسه؟!
فيروز: متغير شي، بعدني نفسها فيروز بس محترمه رغبتك بانو متكلي وتريد تحتفظ بماضيك لنفسك وهذا من حقك اكيد.
هَيْصَم: منو كال هاي رغبتي؟
فيروز: اذا تريد تفتح كلبك اني موجوده بأي وقت مو لأن زوجه وتريد تحجي لان مجبور او تحس نفسك لازم تسولفلي وإنما اعتبرني صديقه مثل ايام قبل والاصدقاء يتشاركون كل شي هَيْصَم، بحزنك وفرحك اني وياك لتفكر ابدا ممكن اتخله عنك لأي سبب كان ولا أني من الأشخاص اللي يتأثرون بكلام احد كون مطمأن لو منو ماكان اذا مو من عندك مراح اصدك، انت اول شخص وكف ويايه ودعمني او اول رجال انطي ثقتي ومازلت لهذا اليوم نفسك هَيْصَم متغيرت ابداً فراح ابقى وياك نفسي فيروز ومستحيل اتغير يوماً ما،
خليني اكون صريحه وياك ما احب تكون علاقتنا معقده ومبنيه على شروط لان بوقتها صعب نعيش سوه الاهتمام والاحترام والتقدير هذا عندي اهم من الحب بالف مره انك تكون رجال ويايه هذا يكفيني ما اطلب من عندك اكثر من هيج.
هَيْصَم: عيوني الج لَّباءَة واذا يصير افتح كلبي وضمج بنصه صدكيني اسويها انتِ غالية عليه حيل فوك متتخيلين.
فيروز: اريدهم سالمين عيونك والا بشنو تشوفني واضيع بنظرتهم؟
هَيْصَم: احب اعترافاتج من تكون بهاي الطريقه.
فيروز: لتعتبره اعتراف ماحبك اني تره.
هَيْصَم: حلوه من تستخدمين اسلوبي بالكلام.
فيروز: من رافق قوم اربعين يوماً صار مثلهم.
هَيْصَم: اكلج.
فيروز: همم.
هَيْصَم: امي نامت؟
فيروز: لا.
هَيْصَم: والبدله منو يكويها هسه؟
فيروز: جيبها يمي اكويها اهنا.
هَيْصَم: الاوتي يمي اخاف عليه يبرد اذا طلعته من الغرفه.
فيروز: مراح اجي لتلح.
هَيْصَم: ليش تجبريني اسوي العرس الاسبوع الجاي؟!
فيروز: ما اقبل لتنسى اني الطرف الثاني من هاي العلاقه يعني أيضاً اليه رأي.
هَيْصَم: شنو رايج نعقد محكمه؟
فيروز: خلي تجي خواتك بالأول.
هَيْصَم: بعد يومين اروح اجيبهم واحنه الأحد عقدنا حظري نفسج.
فيروز: لتخليني أمام الأمر الواقع بعدني ممستعده فكرياً.
هَيْصَم: مراح احارب بيج ليش معترضه؟!
فيروز: ميخالف هذا الموضوع نقرره احنه الثنين ميصير هيج فجأة تحدده بكيفك انتَ.
هَيْصَم: وليهمج حددي اي يوم تحبين نعقد واني حاضر حتى لو باجر تردين اني جاهز خيوط كلب الهَيْصَم انتِ.
فيروز: افكر واقتنع بالفكره وارجعلك خبر.
هَيْصَم: كالها كاظم متمردة.
فيروز: ومستحيل تغيرني.
هَيْصَم: ومنو كال اريد اغيرج حلو الانسان يكون عنده شخصيه مستقله فكريا فقط الناضجين اللي يكونون هيج، الف مره كتلج وراح اعيد اختاريتج لان انت تليقين بعرين الأسد ماكو وحده غيرج أكدر أأمنها على بيتي وحياتي ومجنت رايد اغيرج من الأساس لان اكثر شي حبيته هو شخصيتج واني افضل تبقين هيج طول العمر.
فيروز: اعترافات وره 12.
هَيْصَم: هههههه لهاي الدرجه تردين اعترف لَّباءَة؟
فيروز: اكو اشياء ميحتاج تنطقها فعلك الها يكفي.
هَيْصَم: اكو مشاعر مميزة تحتاج اوقات مميزة متصير تنحجي بهاي البساطه وبرساله وانتِ بعيده عني.
فيروز: وصلتني من زمان مشاعرك هَيْصَم ولهذا السبب قبلت اتزوجك.
هَيْصَم: شنو وصلج؟
فيروز: اسلوب التحقيق مالتك خليه للمجرمين من فيروز متاخذ حرف سيد افندي.
هَيْصَم: تعالي يمي شويه اريد احجي وياج بموضوع مهم.
فيروز: احجي اهنا مو مشكله.
هَيْصَم: ميصير ينحجي بهاي الطريقه اريد اصفن بعيونج وكوله.
فيروز: ما أكدر افهمني هَيْصَم.
هَيْصَم: اذا متجين اني اجي وتعرفيني اسويها.
فيروز: لتهدد ماحب هذا الأسلوب.
هَيْصَم: تردين تتعاقبين لَّباءَة؟
فيروز: استغفر الله امك موجوده يمي شلون اطلع كدامها هسه شنو تكول عليه؟
هَيْصَم: تره امي مصختها من جنتي مرتي مسوت هيج صح انتِ كيكه واني كلش احتاج الحلاه بس مع هذا مراح اكلج هسه بعد وقت.
فيروز: ليش تحجي بهاي الطريقه ياكيكه ياحلاه؟!
هَيْصَم: انسي كل شي وتعالي خلصيني قبل ميتصلون بيه واطلع للشغل وخاف يصير بيه شي وتبقى هاي الجمله حسره بكلبي وبكلبج.
فيروز: اسم الله عليك تموت نفسك علمود جمله اريد اعرف شنو أهميتها حتى متحجيها الا واني موجوده؟!
هَيْصَم: مهمه حيل بأهمية وجودج بحياتي.
فيروز: انتظرك بالمطبخ.
هَيْصَم: وليش مو الغرفه؟!
فيروز: لان ممنوع تشوفني هناك.
هَيْصَم: يول كم مره دخلتي لهنا وبدون عقد هم ليش هاي المره خايفه معقوله متثقين بيه يعني؟!
فيروز: استغفر الله ليش تروح للثقه بسرعة، المقصد هسه اذا طلعت خالتي اكيد راح تسألني وين ترحين فراح اكولها جوعانه اريد اكل فأذا اجت وشافتني مو بالمطبخ مو راح تاخذ عليه غير نظره ومتثق بيه بعد، وصلت الفكره سيد متدين؟
هَيْصَم: ليش متصيرين محاميه ذكائج عجبني.
فيروز: اعرف ميحتاج تكول.
هَيْصَم: مغروره.
فيروز: ثقه بالنفس يسموها.
هَيْصَم: منتظرج كومي لتتأخرين.
فيروز: لتطلع هسه ابقى خمس دقايق يلا لان ممكن تجي تتأكد.
هَيْصَم: احس نفسي بمهمه ولا كأن اريد اشوف مرتي طاح حظي على هيج حظ.
فيروز: لتعصب مو زين عليك.
هَيْصَم: لتضيعين وقت كومي حتى الجمله نسيتها.
غلقت الموبايل وكمت، بعدها تسولف، استغليت الفرصه ومشيت على كيف حتى متنتبه بس هي مراقبتني قبل ما افتح الباب وقفتني.
كلاثم: على وين ان شاء الله؟
: التفتت الها واني مبتسمه وحجيت واني أحاول اسيطر على التوتر حسيتها مثل امي وتريد تعاقبني.
فيروز: رايحه للمطبخ.
كلاثم: شنو تسوين بالمطبخ؟
فيروز: حسيت نفسي جوعانه تحتاجين شي اجيبه الج ويايه؟
كلاثم: اي صيحي هَيْصَم اريد اسولف وياه شويه بخصوص الخطبه هاي البنيه معنده ومتقبل خلي هو يحجي وياها مالي خلكها بنات هل وقت يتنعوصن يجيها الذهب ومتريده.
فيروز: ولو مو من حقي ادخل بس برأيي اذا مجانت تريده لتلحين عليها حتى متندم بعدين اذا مطلع هو الانسان المناسب والشخصية اللي جانت راسمتها بعقلها.
كلاثم: كلامج صح بس لائِث تربيتنه وابنه نعرفه مثل منعرف هَيْصَم ماكو شخص مناسب الها اكثر من عنده خاصتا هي تشبه هَيْصَم بتصرفاتها تربيته بعد.
فيروز: وشنو بيها شخصيه هَيْصَم؟
كلاثم: لان انتِ تحبيه تشوفينه انسان مميز بس ماكو واحد ثاني يكدر يعيش وياه غير عائلته أو اصدقائة المقربين، ماكو انسان عاقل يحب الغموض والاسرار والأسلوب اللي يتعامل بيه وي الناس، المقوله اتكول المجرم بريئ حتى تثبت ادانتهُ هو عنده المقوله عكس البريئ مجرم حتى تثبت برائته، وهذا اللي مخليني مستغربه هَيْصَم شلون قربج من عنده بهاي السهوله الا اذا جان يعرفج من قبل وهذا احتمال اكيد لا محاله.
فيروز: شلون يعني يعرفني اني مملتقيه بيه ابد؟!
كلاثم: ابني يشتغل بالسلك من سنين تلكي حتى المستشفى اللي صرتي بيها يعرفها وين طلعتي وين اجيتي عنده ملف كامل بهاي الأمور.
فيروز: هو يشاركج بهاي المواضيع؟
كلاثم: كتلج هو سري جداً لكن لائِث يسولفلي.
فيروز: ولائِث ليش ينطيج هيج معلومات؟!
كلاثم: لهذا السبب كتلج ماكو واحد مناسب لريهاف غيره انسان أكدر أأمن بنتي يمه ومن اموت اكون مرتاحه مراح تضيع.
فيروز: عمرج طويل ان شاءالله.
كلاثم: هذا حجي متعرفين هسه انام وما اكعد بعد على الاقل من اروح يم ابوهم ويسألني عنهن اكله صارن بركب ارجال مو حي الله واحد ماعرفه.
فيروز: هي بس ريهاف نخطبت وبناتج البقيه؟
كلاثم: يارب يصيرن لبقيه الفريق يوميه ادعي هذا الدعاء وان شاء الله ربي يستجيب.
فيروز: ليش؟
كلاثم: ولج صار ساعه شنو احجي كتلج تربوا يمي وعندي معرفه بيهم كلهم.
فيروز: يعني كلهم اصدقاء هَيْصَم من الطفوله؟
كلاثم: بس لائِث البقيه اتعرف عليهم من دخل الدورة العسكرية بس مع هذا صاروا عائلة ويانه كلهم خوش شباب متركوا هَيْصَم باصعب ظروفه وحتى اني والبنات من يتمرض لو يتصوب ليليه يبقى يمه واحد اني اعتبرهم ولدي واللي يسألني اكله عندي سته مو بس ثنين.
فيروز: الله يحفظهم.
كلاثم: الله يسمع من عندج روحي ماما اخرتج وصيحي هَيْصَم بطريقج خلي يجي.
: طلعت من الغرفه صار بوجهي هم طالع رفع حاجبه وكال.
هَيْصَم: ليش بعدج اهنا مو كلتي تلكيني بالمطبخ؟!
فيروز: اي صح بس خالتي جانت تسولف ويايه.
هَيْصَم: تمام تعالي لعد حتى نسولف.
فيروز: لا.
هَيْصَم: شنو لا؟
فيروز: خالتي تصيحك تريد تسولف وياك.
هَيْصَم: خالتج عدها مشكله وياي والله جديات؟
فيروز: تحمل هذا الموجود شنو بأيدي اسوي؟
هَيْصَم: راح اسوي حجاب حتى يكعد حظي وي خالتج.
ضحكت على كلامه ورحت للمطبخ حسيت نفسي صدك جعت.
هَيْصَم: اي ام الهَيْصَم خيرج؟
كلاثم: أختك متقبل تزوج لائِث.
هَيْصَم: اي براحتها حياتها اني ما ادخل لتتوقعين من عندي اجبرها.
كلاثم: مكلت أجبرها بس تكدر تقنعها بأسلوبك.
هَيْصَم: مستحيل.
كلاثم: ليش فهمني؟
هَيْصَم: الصداقه اللي بيني وبينه تختلف عن الزواج باجر ينسد عليهم باب وتجمعهم حياة طويله طلع مو نفس متريد لو العكس بوقتها مراح تكول صوجكم انتوا ورطتوني؟
اني رجال رجليه بالكبر على اي ساعه اموت ما أريد احمل نفسي ذنب مو كده ام الهَيْصَم.
كلاثم: وعلى أساس اذا تزوجت واحد ثاني راح تنسعد؟!
هَيْصَم: ممكن يبقى اختيارها وقناعاتها ومحد جبرها متخلي الحق على أحد، وهسه اعذريني اريد اروح انام تصبحين على خير ام الغاليات.
كلاثم: مو ياخذك الواهس يمها خمس دقايق وجي للمطبخ اذا شفت شي ناقص زايد احبسها يمي بالغرفه ليوم عرسكم.
هَيْصَم: ان بعض الظن إثم.
كلاثم: متدين ابني فدوة لكلبه.
هَيْصَم: تربيتج اكيد.
فيروز: اسم الله فززتني هو هيج يمشون هَيْصَم!!
هَيْصَم: على كيفج ياعيني شنو سويت هو مجرد حضنتج وانت تاكلين هاي هي.
فيروز: تكدر تنطي تنبيه ومتخوفني بهاي الطريقه.
هَيْصَم: تنبيه مثل شنو أصفر؟
فيروز: انسى ميفيد وياك الحجي كولي شنو تريد من عندي؟
هَيْصَم: نسيت.
فيروز: تضحك عليه انت؟!
هَيْصَم: ليش اضحك عليج ردت اشوفج وبس وين المشكله!!
فيروز: ماكو مشكله سلامتك، صدك ضوجني الجو بارد وجذبت على خالتي وطلعت حتى اشوفه تالي يطلع يضحك عليه عفته ومشيت رجع سحبني من أيدي صار مقابيلي ابتسم بوجهي وبانت غمازته حضن خدودي بأديه وقرب راسه من عندي حيل وكال بنبرة هادئة.
هَيْصَم: تعرفين شنو يصير من تركضين ساعه كامله بسبب الخوف وتوصلين لبر الأمان شايفه الراحه اللي يحسها الشخص بهاي الحاله؟
فيروز: اي اعرف هذا الاحساس.
هَيْصَم: هذا احساسي من اشوفج كدامي، انتِ الهدوء اللي اجه بعد العواصف اللي خيمت على گلبي ونستني إني أعيش، وشنو احجي عن دكات كلبي من تخلين عينج بعيني كل حصون الهَيْصَم نهزمن بنظرة عيونج لَّباءَة، اذا جان هذا اسمه حب فأني أعلن رسمي وقوعي بيه.
: دام صمت ثواني ودكات كلوبنه هو الصوت الوحيد اللي ينسمع بهذا المكان حسيت نفسي صرت حمره ومن كثر مانصدمت من كلامه عقلي توقف للحظه عن التفكير معقوله هسه هو اعترفلي بحبه لو اني غلطانه؟
اكو شي داخلي يكلي لتتأملين هسه يكلج ماحبج بس صدمني للمره الثانيه من رجع كمل.
هَيْصَم: احبج لَّباءَة الهَيْصَم او وردة حياته، انتِ الراحه بعد التعب، عيونج هي ملاذي وأماني، احبج لدرجه ما اتخيل أكدر اعيش بدونج لحظه صح مو اول حب انتِ بس حبج رجعني مراهق مو النقيب صاحب الرتب اللي يحسبوله الف حساب، تشاركيني حياتي وكلبي وروحي وتخلينا نتمرد ونصنع قصة حب من الرماد، رمادج ورمادي ننسى ايام الماضي ونفتح صفحه جديدة مموجود بيها بس لَّباءَة و الهَيْصَم؟
: نزلت دموعي وجانت دموع الفرح السعادة اللي اني بيها متوصف عرفت بهاي اللحظه صدك رب العالمين يدز عوض جميل لكل شخص متعوب هو هديتي من ربي اللي مستحيل تضاهيها هديه، لحظه منتظرتها من سنين اكيد مراح افرط بيها بهاي البساطه لذلك بسرعه جاوبته.
فيروز: اكيد اقبل تتوقع أكدر افرط بيك هَيْصَم؟
هَيْصَم: شنو كال المطرب.
فيروز: شنو كال؟
هَيْصَم:
اجيبك للدرب كتلك اجيبك
عليك اتراهن أصبح حبيبك.
والساني اللي دائماً مدخلني بالمشاكل مسكتت وجاوبته.
فيروز: ميحتاج تتراهن اني جايه للدرب من زمان.
هَيْصَم: ملعونه طلعتي تحبيني ولج؟
فيروز: منو كال؟
هَيْصَم: تذكرت عزه بعينك تحبني وماتريد تكول عزه بعيني احبك وستحي احجيلك.
فيروز: حبك عميق سيادة النقيب.
هَيْصَم: جداً بس انتِ متدرين.
فيروز: وشنو اللي خلاك تعترف هسه؟
هَيْصَم: ما اتحمل أكثر من هيج تأكدت انو أنتِ عايشه بنص كلبي وما أكدر اعيش بدونج ما أريدج قريبه من عندي بنفس الوقت بعيده فهمتي قصدي لَّباءَة؟
فيروز: الله عليك كول فيروز من صدك حابه اسمع اسمي من عندك.
هَيْصَم: ما اخليها بنفسج فيروزة حياتي بس لياخذج الواهس متسمعين هذا الاسم من عندي هوايه يبقى لَّباءَة مميز عندي اكثر.
: ابتسمت على كلامه بس صدك حسيت اسمي فاهي يمكن لان ممتعودة عليه ينطقه.
فيروز: راح تجي خالتي هَيْصَم لازم ارجع للغرفه.
هَيْصَم: ميصير تجين يمي؟
فيروز: لا عزيزي ميصير السيطره واكفه بالباب منتظرتني.
هَيْصَم: السيطره راكضه ورايه وين ماروح.
فيروز: تصبح على خير.
هَيْصَم: شنو هاي تصبح على خير؟
فيروز: يكولوها قبل النوم مسامع بيها؟!
هَيْصَم: لا اني اللي اعرف الحبيبين يختلف كلامهم قبل النوم عن الناس العاديه.
فيروز: شلون يعني؟
هَيْصَم: يعني هيج.
قرب راسه وقبلني انتقلت وياه لعالم مليئ بالحب مشاعر جنت منتظرتها من زمان وفرح كبير داخلي بعد معرفت حبه اليه، ابتعد بعد فتره واني من الخجل تركته وطلعت بسرعة من المطبخ دخلت للغرفه سمعت صوتها وهي تكول.
كلاثم: الاسبوع الجاي العقد اللي بعده ازوجكم قبل ميصير عدكم طفل وانتوا عاقدين.
: دوروني متلكوني حسيت نفسي صخنت هي شنو عرفها؟!
قاطعت تفكيري وهي تكول.
كلاثم: ام انا متمر عليه هاي السوالف بس جيد طلع يحبج سيادة النقيب، ملاعين وكفتوني على تك رجل بسببكم متركت أمام مدعيته تاليها طلعتوا واحد يحب الثاني والله يا جيل هذا الوكت غريب عجيب.
فيروز: مسويت شي والله بس شسمه.
كلاثم: ميحتاج تبررين كلنه سويناها ولهذا السبب اريد ازوجكم بما انو واحد يحب الثاني ماكو داعي للتأخير اكثر من هيج.
أرفد: ريفان شنو بيها حوري؟
ريفان: ماعرف ليش تسأل؟
أرفد: من كعدت من النوم تتقيأ وماكلت شي على الريوك يمكن متسممه من اكله معينه ماكو شي ثاني صح؟
ريفان: شنو بيك أرفد شي مثل شنو؟!
أرفد: هو صح اخوج بس يا أخي هذا الرجال ساقط حيل ومينبلع مو بأيدي بس ماحبه واتمنى ينحبس بأسرع وقت ممكن واخلص من عنده وهاي الحقيره على رغم هي اختي بس صرت اكرها مثل ما أكره ابليس ويمكن أكثر هم.
ريفان: هسه غير افهم ليش معصب انت؟!
أرفد: عليها اعراض حمل.
ريفان: استغفر الله مستحيل متسويها.
أرفد: ليش متأكده مو تزوجت بدون علمنه بقت على هاي!!
ريفان: وشلون نتأكد؟
أرفد: ميحتاج تتأكدين اني اعرف بيها.
ريفان: وشنو الحل برأيك؟
أرفد: جنت مقرر اخليهم ينفصلون بس هسه صار مستحيل وهاي المره من صدك راح اشيل أيدي من عدها واعتبرها ماتت، راح اطلب من عندج معروف اذا تكدرين ريفانه.
ريفان: عيوني ألك حبيبي.
أرفد: اتصلي بعمتي خليها تحدد موعد قريب لعرسهم قبل ميمر هوايه وقت وننفضح.
ريفان: وشنو اكلها اذا سألت؟
أرفد: حتى لو تحجين الحقيقه المهم تستعجل بالزواج لأن اعرف محمد ميهمه الموضوع واذا حصرنا بالزاويه يكول مو ابني وهنا ننفضح أكثر وتعرفين نسر واحد خبل يموتها بدون ميرفله جفن.
ريفان: وانت ليش متسامح وياها لهاي الدرجه؟!
أرفد: ربت على أيدي واختي الوحيدة واني عشت بمجتمع مختلف عن مجمتع نسر والقوانين العشائريه ومن زمان جنت خايف رب العالمين يبتلينا بيها وللأسف خوفي صار حقيقه لذلك ما أكدر ألومها وحدها احنه طرقنا باب الناس ورجعوا الناس طرقوا بابنا بنفس الطريقة ويمكن اسوء حتى نصير عبره للاخرين الحياة عبارة عن دين يجي يوم وتوفيه بالغصب لو بالرضا.
حوري: الله يخليك لتسوي هيج بيه والله ما استاهل من عندك كل هذا.
محمد: كتلج اني صيري حامل مو جنت منبهج تشربين حبوب ليش ماخذتي النصيحه اكليها اني ما اتحمل مسؤوليتج ومسؤوليه الطفل هو اني محتاج واحد يربيني منتظره من عندي اعتني بزوجه وطفل هم!!
حوري: شنو اسوي والله يموتوني اذا عرفوا.
محمد: والله محد ضربج على ايدج يحلوه، انتِ وافقتي على كل اللي صار بيناتنا وجنت مستمتعه بمشاعر الحب اللي أقدمها، لذلك لتخليني اني الغلطان الوحيد قبل ما اورطج بالطفل واتهمج بالخيانه وهنا يصير قتلج عمل شعبي وانتِ اعرف باخوانج المفترسين أكثر من عندي سركي كلبي.
حوري: الله يوكفه لهذا الكلب ويخلص الناس من عنده يارب تبتلي بصحتك وعافيتك ويصيبك بمرض يخليك مقعد رب العالمين يطلع حوبتي بيك ويعذبك بابشع الطرق ولازم تعرف العداله اللاهيه شنو هي، بعمري مدعيت على احد بس مسلمتك بأيد ابو فاضل اريد يبليك بمصيبة متطلع من عدها ابد.
محمد: تسلمين كثري دعوات وأريد اشوف اذا صار بيه شي منو يركع مصايبج اخت الابطال.
: عزة بعيني يوم عن يوم اشوف الغلط وين وصل بيه ادمرت حياتي واحلامي وجنت متأمله بارفد يطلكني من عنده بس بعد معرفت اني حامل صار صعب بل مستحيل الواضح نهايتي الموت اكيد اذا عرفوا يموتوني ويتعاقبون بعدين بسببي واني مستحيل اسمح بهذا الشي لازم اتحمل ثمن خطأي نهضت من مكاني وجبت شال ربطته بالمروحه وصعدت على الكرسي قررت هاي المره انهي حياتي من صدك بس حتى هاي الشغله مفلحت بيها بعد مفتحت الباب وصرخت بوجهي.
أيفلين: طايحة الحظ شنو تسوين انزلي يلا بسرعة.
حوري: عيفيني الله يوفقج اسوي اللي لازم يصير حتى تخلصون من عندي وما اسببلكم مشكله.
أيفلين: شوفي يكفي عليه خبالات اخوج لتخبليني انتِ اكثر، غلط وصار مصيبه او وكعت لو كل شخص فكر يخلص من مصايب حياته بنفس طريقتج جان ولا واحد عاش على الكره الارضيه كلها نتحرت، اكبر غلط نعالج الخطأ بالخطأ تزوجتي واخوانج تفهموا وسكتوا عن الموضوع معقوله بعد كل هذا اللي صار تردين تخلصين من حياتج بهاي البساطه؟!
جاوبتها ودموعي تنزل.
حوري: حامل اني ايفلين ومحمد ميقبل نتزوج بهاي الحاله راح افضحكم وافضح نفسي خليني اموت وما اجيب العار لأحد.
أيفلين: تفكرين بموتج راح تنحل المشكله متعرفين بالعراق العظيم يطلعون عليج اشاعات وتدمر سمعة اهلج من صدك بما انو نكدر نحل الموضوع لتسوين هيج، انزلي ورجعي عقلج لمكانه وبالنسبه لمحمد اني احل موضوعه وعرسكم عن قريب يصير لتشيلين هم ولتتقيدين بسبب هذا الموضوع مارسي حياتج طبيعي حتى محد يشك بيج.
حوري: شكراً ماعرف شنو اكول بس ربي يعوضج خير انتِ وريفان مقصرتوا ويايه طول هاي الفتره.
أيفلين: كلمات الرومانسية متمشي ويايه وماكو داعي للشكر اني من الأساس اعتبرج مثل اختي وبالنسبه لمحمد من حسن الحظ عندي تأثير عليه لدرجه أكدر اخليه يقدم الزواج عن موعده بس بشرط ما أريد اشوف دموعج بهاي الفتره تغيرتي هوايه عن قبل لتخلين الندم يسيطر عليج ويقضي على صحتج كلنه نخطأ لتعاقبين نفسج على الماضي بنفس الوقت خلي درس للايام الجايه مو كل انسان بالدنيا يستحق الثقه ولا كل واحد كال احبج تمشين وراه بشكل أعمى لأن الحب نوعين، حب الجسد، وحب الروح.
النوع الأول يجيج بالكلام العذب والرومانسي حتى ياخذ من عندج اللي يريده بعدين يرميج مثل أي قطعه مو مفيده عنده اما النوع الثاني يحارب الدنيا كلها حتى يحصل عليج بالحلال وميتخله عنج تحت اي ظرف كان،
هذا شرح نظري اما العملي فالنوع الأول محمد اما الثاني أرفد ومن هذا قيسي.
: طلعت وتركتني وحدي اعيش بعذاب الضمير والندم غلط واحد غير مدروس يدمر حياتك بالكامل.
محمد: اختي العزيزة متصله خير ان شاء الله.
أيفلين: اقطع النزاع محمد.
محمد: منو كلج اني حرمله واحنه بمعركة الطف هسه؟!
أيفلين: قبل شويه رادت تموت البنيه هي وابنك راح تكون السبب بموت شخصين ويبقى ضميرك يأنبك عليها وتروح لكبرها تبجي بس اكو فرق بين الأولى والثانيه ذيج جانت حقيره باعت اختك اما هاي باعت نفسها ومستقبلها علمودك وشوف انت منو تختار، لحد الأن ساكته ومدافعه عنك لكن قسماً بعظمة الله اذا متقدم العرس وتزوجها خلال هاي الأيام انسى عندك اخت اسمها ايفلين ومصيرك بالنهايه تخسر الكل مو بس حوري، تلوم أرفد ونسر بس على الاقل هم رجال حقيقين مستغلونا علمود مصالحهم رفعوا راسهم بينا وتزوجونا امام الكل عكسك انت حظرة المحامي المحترم.
غلقت الموبايل وسمعت صوت تصفيق التفتت شفته واكف ورايه مبتسم بطرف شفته بادلته ابتسامته بستهزاء عرفت انو سمعني ولازم اسم بدنه هاي الفقرة عشقي لذلك كلت.
أيفلين: اذا جانوا الرجال عاجزين النساء لازم تساعد سيادتك.
تركته ونزلت اعرف اذا ابقى اكثر يتعكر مزاجي وتنسد شهيتي عن الغده.
لائِث: تره ضوجتني صار ساعه الغي وانت تراسل احترم وجودي على الاقل يا أخي.
هَيْصَم: شنو تريد؟
لائِث: هَمْهَام الولد راح ينجلط خلي نروح نخطبله مره ثانيه.
هَيْصَم: ماعندي مشكله خلي يحدد موعد ويكلي ونروح.
لائِث: صدك والله؟
هَيْصَم: اي والله.
لائِث: احلف بالعباس مرتين.
هَيْصَم: اترك العباس بمكانه وروح شوف شغلك.
لائِث: ماعندي شغل خلصت.
هَيْصَم: باجر أني رايح لاربيل اجيب عائلتي انتبه للمركز بغيابي ولو اعرف ميحتاج أوصيك بس قلل عركات كد متكدر.
لائِث: والله المو أدمي شنو اسويله؟
صدك شنو صار على موضوع لّهيم؟
هَيْصَم: بعده بتركيا سمعت يريد يهرب الألمانيا عن طريق يخت.
لائِث: ان شاءالله يغرك ويموت.
هَيْصَم: لا لتدعي هيج أريده يرجع للعراق واحقق وياه واعذبه بأيدي اذا ربك أخذه شنو استفاد؟
لائِث: على اساس ربك يدخله الفردوس هو بسقر صدكني.
هَيْصَم: ايجوز بالهاويه مصايبه هوايه هذا يمكن يدخل لجهنم من جميع أبوابها.
لائِث: ياريت ينكشف عني الغطاء واشوف شلون يتعذب اويلي متأكد ابقى فرحان طول عمري.
هَيْصَم: اني عكسك اضوج حيل.
لائِث: ليش؟!
هَيْصَم: يتعذب واني ما اللي أيد بتعذيبه هذا قهر من نوع ثاني، عجيب أمر الناس يخطأون ويعرفون مصيرهم جهنم ويدرون ميطلعون من عدها ابد ويبقون خالدين بيها، اللي وصلنه لهاي الحاله هو مثل ماقال الأمام علي عليه السلام : ( اتقوا باطل الأمل، فرب مستقبل يوم ليس بمستدبره، ومغبوط في أول ليلة قامت بواكيه في آخره) فأذا جانت الحياة هيج قصيرة ليش منستغلها بالعمل الصالح ليش ندمر حياة الناس ونسرقهم، ناكل مال اليتيم ومننطي للسائل ومنساعد المحتاج وتخلص ايامنه وساعاتنا بالغيبه والنميمه والنفاق شنو نستفاد اذا جانت اعمارنا هي ايام قليله ومعدودة جداً، شنو ردنا نعيش مصيرنا نرجع لرب العالمين وهناك حساب بلا عمل ومنو يكدر يجيب واسطه ويطلع من عدها؟
لائِث: ماعرفت عندك هاي الموهبة طلعت متكلم.
هَيْصَم: اتعلم مني مدرسة اني بس انت شفهمك.
لائِث: ارخصني اروح اكمل شغلي وانت كمل سوالف.
: ويخلق من الناس ماهو علاج لأوجاع الكلب وبيهم يكون هو الوجع نفسه، مر اسبوع كامل انتقلت بيه عائلة هَيْصَم قريب بيت خالته وصارت مشكله لان مقبل اروح اسكن بذلك البيت يكلي تبقين يمي لذلك بقت خالتي ويايه وهو اصلا ميرجع للبيت صار فتره لان عنده شغل وخالتي تروح يم بناتها بنص يوم وتجي يمي بالنص الثاني وبالليل تبقى يمهن خالتهن لان زوجها خفر، طفت الكهرباء وعلى حظي اليوم خالتي رايحه يم بناتها اني متعودة تنطفي بس اللي خوفني هو صوت طرقات على الباب ومحاولة فتحه، دخلت للغرفه مالت هَيْصَم وقفلت الباب عليه طلعت ألموبايل ودزيت صوتيه إله حتى يلحكلي وكع من عندي من حسيت هذا الشخص دخل بعد مسمعت خطوات رجلين قريبه من الباب..
يتبع
شغله مهمه حابه انوه عليها وهي لَّباءَة هي احد اسماء اللبوه لذلك اللي يطلعله اسم معنى ثاني فهذا عنده مشكله ابحثه شمعاتي لذلك ابحثوا بأسماء اللبوه لتكتبون الاسم حاف.
البارت اكثر من 3700 كلمه.
تصبحون على الف خير شمعاتي.
حسابي الأنستا.
رواية هَيْصَم الفصل التاسع وثلاثون 39 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
ونتّ .. اوماظن مثل ونها .. الصخر
خنساه ونّت
صبّرتها .. اوكابرت عالظيم .. والكابر
يظل بسكوت .. ينهت
طاحت ، اوفوك الفشل .. بمصابها
الشامت .. تشمت
شلون ذلت .... ؟
اخ ياروحي .. الكّبل جانت عزيزة
شلون ذلت .. ؟
: نزلت بفستاني الأبيض مقبل محمد نسوي حنه لو عرس بقاعه واني هم مجنت رايدة شي من عنده، الزواج هو مؤسسه بين شخصين اما يحددها الحب أو العائلة، الحالتين بيد المتزوجين اما يخلون حياتهم سعيدة او العكس تماماً،وبحالتي كل شي يختلف حبيته او اهلي مجانوا رايديه وثقت بيه بنفس الوقت غدرني، سلمته أغلى ما أملك، بخست بحياتي علمود شي اسمه حُب وبشنو قابلني؟
جفاء، كره، غل، وشماته والأصعب هو التخلي وحتى الطفل ميريده على رغم هو يعرف انو ابنه من لحمه ودمه، اتفاجئ جداً على اللي يسمي نفسه رجل بالوقت اللي ميعرف بيه شنو يعني رجوله، كل اللي ردته هو يكون عون اليه وسند وميتركني وحدي هذا بس، الحمدلله انو عندي ارفد والا اني هسه ميته وبدون فاتحه هم وبقضية غسل عار يضيع دمي ومنو يستاهل؟
هذا السؤال طرحته على نفسي الف مره منو اللي ادمر بكل هاي القصه؟
حوري البنيه المراهقه اللي اتبعت غريزتها او وثقت بواحد حيوان يسمي نفسه رجل، اليوم اريد مو بس اعض أصابع الندم وإنما اقطعهن من مكانهن على غبائي وقلة وعيي حذرتني آمندا وكالت راح يعيفج بعد ميدك بيج الناقصه شنو تترجين من واحد مثله بس اني نعمة على عيني ومهتميت نغريت بالاحبج ونامي من وقت اخاف عليج ولتسهرين هوايه وديري بالج تباوعين بالموبايل فترة طويله عيونج تتأذة واذا تمرضت يبقى ينطي نصائح اشربي هيج وسوي هيج وينيمني على احبج وانتِ مرتي وام جهالي تاليها من اول عثرة نكشف المستور وبانت حقيقته ويمكن لو مو أرفد كاشف الموضوع وفاضحه بالعلن تركني حتى بدون ميعترف بزواجنه ويخليني إداري مصيبتي وحدي، مهتميت منو موجود واصلاً مجان اكو هوايه ناس موجوده رفعت راسي الهن والدمعه بعيني ملكيت اكو فرحه بعين احد كلها ضايجه وكأن راح تطلع جنازة من البيت مو زفه وهذا الواقع لان حبي ومشاعري كلها ختفت وصرت احس ناحيته بالاشمئزاز والقرف وماعرف شلون تخلص الايام الجاية قبل الطلاق وشلون اكدر اعيش وياه وتجمعنا غرفه وحده؟
سمعت صوت موسيقى عالي حسيت بثقل برجليه اطرافي نشف الدم بيها وايدي من كد ما اضغط عليها صارت زركه اريد انزع البدله واكول ما أريده بطلت، بس الاحلام متتحقق دخل او واضح على وجه هو هم ميريدني مجانت اكو لهفه بعينه أتقدم ناحيتي وقبل جبيني سايرته ومسويت شي عيب من الضيوف نزل على وجهي البرنص ولزم أيدي بايدة وطلعنه سمعت هلاهل ممزوجه بنبرة حزن توقفت بعد مشفت رجلين قريبه عليه بعد أيدي عن أيد محمد ولزمها رفع البرنص عن راسي وابتسم هو الوحيد اللي يحجي ويايه والدي ونسر ميعبروني اصلاً وميكعدون بالمكان اللي اني بيه وحتى اسمي ميلفضوه، قاطع شرودي صوته وهو يكول.
أرفد: بنتي اليوم راح تتطلع من بيت والدها مرفوعة الراس اللي يأذيها ويجرحها حتى لو بوردة أقيم الدنيا وما اقعدها على راسه، كائن من يكون او رجال واخو خيته خلي يفكر مجرد تفكير يزعل بنيتي.
: ابتسمت حسيته رفع راسي بهذا الكلام بنفس الوقت نزلت دموعي على مقدار الألم اللي سببته إله، وقبل ميسلمني لمحمد اقترب من اذني وهمس.
أرفد: اني وياج بالسراء والضراء وخلي ابالج وجودج بذلك البيت مؤقت وما اكون رجال وكد كلمتي اذا محررتج من عنده.
محمد: تأخرنا حضرة الدكتور.
أرفد: العداوة بيناتنا قائمة ولحد الآن ممعترف بيك زوج اختي ومستحيل اعترف لذلك ياويلك تنزل دمعه من عينها القلوب اللي تخصصت بعلاجها احطمها واللي سماك محمد وعليه خليني عاقل وكافيك شري وانت تعرف أرفد وعداوته شلون تكون.
محمد: احنه نريد الصلح اخو زوجتي العزيزة وخلي تكون بيناتنا هدنه لا انت تدخل بينه ولا احنه ندخل بيك ارجع متبري من عدها احسن حتى متصير مشاكل.
أرفد: اذا انت محسوب على الرجال وزايد عليهم اللي كدامك رجل من صلب ارجال ومو من عاداتنه نترك نسائنه بدون سؤال صح انت اخذتها بالحيله بس تبقى اختي وبنت هذا البيت واللي يمسها يمسني واني اوعدك تشوف الوجه الثاني الها حتى تعرف عمامك شلون يربون بناتهم.
: يحجون بهمس حتى محد يسمع ، مجان عاجب ارفد يخلي أيدي بأيدة بس مجبور واني هم مثله مجبورة احس نفسي اساق للموت برجليه وبرضاتي، الحياة الوردية والاحلام كلها تبخرت من صرت فعلاً زوجته واخذ اللي يريده من عندي تغير حيل من بعدها واني الغبيه منتبهت عليه وصدكت بالاعذار اللي يقدمها حتى وكع الفأس بالرأس وصار الندم مينفع أبد.
ودعت اهلي وطلعت وياه، حزني ودموعي هن عزائي الوحيد ماعرف شنو ضامتلي الايام لكن يقال الكتاب امبين من عنوانه وهذا ان دل على شيء يدل على الحياة السعيدة وراحة البال ودعتها من هاي اللحظه، صعدنا السيارة، اصدقاءه موجودين ركصوا بالشارع وحتفلوا بيه وهو يضحك وياهم اسمع صوته شلون يسولف ومنطلق ولا كأن هو اللي دمر حياتي وحطمني ابشاعه، وصلنه للفندق وبطلت اسمع صوت احد الواضح كل شخص رجع لحياته الطبيعيه ، مثل المسجون بالضبط هيج احساسي وشلون تخلص هاي الأيام وي سجاني والسؤال اللي يراودني بهاي اللحظه هل ياترى يجي يوم وترجع حياتي طبيعيه مثل قبل واخلص من هذا الحبس؟
دخلنه للغرفه رفعت البرنص جانت اكو ملابس موجوده اليه تركتهم امي بالغرفه تعرف طبيعة علاقتي بيه لذلك كلهم جانوا مستورين صار غصب عنهم بالبدايه هذا الزواج لكن اليوم هو غصب عني اني هم وهذا الندم شلون يخلي الانسان مستحقر حتى من نفسه ويتمنى ترجع لحظه وحده من إيام الماضي جان والله العظيم موكفت يمه اباب المدرسه وسمعت كلامه او اول محجه ويايه حظرته وخلصت ولا هذا العذاب اللي اعيشه هسه، اخذت ملابسي جان تراك اسود طويل ومستور أجيت ادخل للحمام وقفني بسحب أيدي حيل حسيت معصم أيدي نخلع،
نضربت بصدرة أجيت ابتعد لف ايده على جسمي وحضني، شعور الأمان بهذا القرب ضروري جداً حتى تحس اذا كان هذا الشخص المناسب ألك او لا اللي تكدر تثق بيه على المدا البعيد لو العكس، وهذا اللي محسيته، عطره الادمنته، حضنه الجان ملاذي، وكلماته الغزليه الغريبه اللي اسمعها كلهم يولدون بكلبي فرحه لاتوصف وتخليني طايره بالسما وابتسم للهوه اذا مره عليه، اما الان مشمئزءة من عنده حيل وقارفه من عطره إلى درجه اريد ارتكب بيه جريمه واللي مانعني الحرام ومستقبلي يتحطم والا هو شخص ميستحق الحياة ابداً،
ضربته قوي على ظهره بأيدي ودفعته رفعت اصبعي أمام وجهه وحجيت بتحذير ونبرة غضب.
حوري: اول وآخر مره، إياك وبالك تلمسني او تحجي ويايه حرف، انت بمكان واني بمكان وزواجنا مثل متفضلت حضرتك مؤقت معناها تصرفات الهمج والمتخلفين بطلها واذا تحب سوالف السرسريه البنات ماليات الشارع أما اني تحلم تقترب من عندي.
ابتسم مستهزء وكال.
محمد: اذا تكرهين لمساتي لهاي الدرجه شلون تقبلتي تشيلين قطعه من عندي داخل احشائج؟
نسيتي سركي كلبي شنو جنه نسوي من تجين يمي بحجة رحتي لصديقتج؟!
بس يلا مو مشكله اذا ناسيه نرجع ذاكرتج شلون جانت إيام من تغفين على أيدي وتنسين نفسج، بس هذا كله ميهم صار من الماضي بس اللي محيرني هو اخوج شلون كدر يتحمل اخته هيج مسويه ويتقبلها ويدافع عنها لهاي الدرجه عديم غيره!!
: من جاب سيرته عصبت اكثر جان اكو كلاص مي موجود على الميز اللي يتوسط الغرفه أخذته وشمرته عليه بدون تفكير مطخ بيه للأسف بس من صدك تمنيت يجي بكصته ويموت واخلص حتى لو ادخل سجن لكن على الاقل ريحت كلبي، خليت عيني بعينه وحجيت بنفس نبرته، شجاعه فضيعه تولدت داخلي وخاصتاً بعد ماعرفت عندي ظهر قوي أكدر استند عليه إذا وكعت بشده.
حوري: عفنا الغيره ألك يا اخ زوجات اخواني الأعزاء واللي داقين كلبك وموتيك لتنسى شلون ارفد اخذ اختك غصب عن انفك ومكدرت تكول لا وخلاها حتى سلام متسلم عليك اما أيفلين سجنك وسجلها باسمه هم غصب وشوف منو اقوه اخواني لو انتَ؟
: اتقرب من عندي سريع وطوق ركبتي بأيده عيونه نكلبوا حمر مثل النار عروك ركبته بارزه والغضب باين عليه حيل، ابتسمت على رغم مختنكه شماته وبغض بيه شعور حلو داخلي من اشوفه هيج معصب ولكن مستمر الوضع هيج من بدأ يضغط على ركبتي بقوة حسيت للحظه راح افقد الوعي بين ايده ومع هذا بقيت صامده وياحلات الموت من يجي بعد دعاء ويخلصني من هاي الحياة المأساويه، تغيرت نظرته فجأة ورجعت مثل ايام قبل من يباوعلي بحب ايدة اللي على ركبتي رخت صرت اتنفس بقوة واكح فقدت توازني واجيت اوكع بس ثبتني بأيدة من خصري صرت اضرب بيه بقوة وهو مسوه اي رد فعل ومع هذا حاولت متنزل اي دمعه من عندي حتى ميحس بضعفي ويستغل هاي النقطه،
لزم أديه بأيدة وقربهم من شفافه قبل أصابعي واحد واحد شخصيته تغيرت 180 درجه رجع لنفس الحنيه والحب بس داخلي شي مات يمكن الثقه اكتشفته مثل الحية وخفت لا هم يريد يستغلني بعد ميستعطف مشاعري ويتركني بندمي لذلك منطيته مجال وسحبت أيدي من عنده، باوعتله بالعين الصغيرة.
حوري: لتفكر مجرد تفكير من السهوله تكدر تستغلني مرتين ، الحب اللي جان بكلبي ألك مات وي حوري التخليت عنها بوقت جنت بيه بأمس الحاجه لكلمة وحده تصبرني وتخليني اطمأن انك موجود ويايه وتكون اليه سند بعد متخله عني الكل، بس انت شنو سويت؟
عيرتني وهنتني وتخليت عني واللي مأجه بوقت الشده لامرحبا بيه بوقت الرخاء.
تركته وأخذت ملابسي ودخلت للحمام نزعت البدلة وشمرتها على الارضيه وفتحت مي بالبانيو رخيت اعصابي وهدأت شوي بس كلبي بعده ياذيني وهذا الألم مستحيل ينسي ترك بداخلي أثر مينشفي بعد مرور الف سنة، طلعت بعد فترة جففت شعري وملكيته موجود فرحت مراح اشوف وجهه وانزعج، بقيت ادور بعيني اريد اكل جوعانه شفت ثلاجه بنهاية الغرفه على الجهه اليمنى رحت بسرعة وفتحتها ملكيت شي غير كيكه ومي والجوعان ياكل كيك!!
وهذا الغبي مفكر بيه حامل واحتاج الاكل عافني وحدي وراح ،بقيت صافنه اكل لو لا بس والله ممشتهيه اكل كيك، رجعت لواقعي على صوت الباب ينفتح التفتت شفت بايدة علاكتين أتقدم وتركهم على الميز ودخل للحمام بدون ميحجي كلمه الحظ اليوم بصفي واخيراً مراح انجبر اكعد اكل وهو موجود فتحت العلاكه جايب بركر ثنين ولفتين شاورما وبطلين واحد عصير والثاني ببسي مفكر بيه حامل ابتسمت بعدين تذكرت سوالفه رجعت اكره من جديد وبديت اكل حتى شبعت طلع هو من الحمام دخلت غسلت وفرشت اسناني ورحت نمت ومهتميت لوجوده اصلا بس سمعته يكول وهو يتحسر.
محمد: تبقى طول عمرك وحيد تزوجت لو بقيت اعزب.
: طنشته ونمت.
الكلاثم: اللهم صل على محمد وآل محمد كيكه عين الحارة باردة بنتي حبيبتي.
فيروز: حبيبتي خالتي ربي يحفظج النه وميحرمنا من عندج.
الكلاثم: بعد ماكو خالتي سميني ماما صرتي بنتي رسمي بعد.
: ابتسمت على كلامها واخيراً بعد كل الايام السودة اللي عشناها يوم مفرح حفله بسيطه بالبيت النه وللاقارب بمناسبة الخطوبة الحفله اللي تأجلت بسبب الصار بالماضي، كاعدة على الكوشه ويمي كل البنات اخوات هَيْصَم وريفان وايفلين زوجات ولد خالته مجنت اعرفهن حيل لكن اليوم قوت العلاقه نوعاً ما حسيتهم عائلة من صدك دمهن ينحب ولطيفات بشكل ماعدهن مكر وخداع شفافات حيل على رغم كل وحده بينه تمثل قصة بحالها بس البساطه هي الجمعت كلوبنا سوه، اكو أشخاص من نظرة وحده تحبهم او اكو لو تعيش وياه عمرك بأكمله تبقى مطيقه، فستان ابيض للبعض يمثل سعادة مطلقه والبعض هو الكفن، بالأمس حزنا على حوري والطريقه اللي تزوجت بيها والسمعته عن محمد وتصرفاته من خوات هَيْصَم واليوم الابتسامة ماليه الوجه بسبب خطوبتي من حب حياتي، الحفلة صارت بالبيت اللي أجرة لخالتي وخواته،
ابتسمت من دخل للصاله وخجلت بنفس الوقت عيني بعينه ونسيت منو موجود يمي اصلاً ونسحرت بالجمال والهيبه اللي كدامي لابس بنطلون وجاكيت كحلي وقميص ابيض فاتح اول دكمتين اجت عيني على السلسله مالته ورفعت عيني لعيونه ابتسم بوجهي وفتح قميصه اكثر سيد متدين يعاندني، وصل يمي ونزل راسه لمستواي وقبلني بجبيني وكال بصوت اشبه للهمس حتى محد يسمعه.
هَيْصَم: الف مبروك عليه انتِ وردة الهَيْصَم وخيوط كلبه.
حسيت خدودي صاروا حمر وكلت بنفس نبرته.
فيروز: الله يبارك بيك حبيبي.
: كعد بصفي وجابت خالتي علبه بيضه على شكل قلب انطتها للهَيْصَم أخذها من عدها وفتحها دكات كلبي صارت مليون مسوي نفس السلسله اللي لابسها ويتوسطها راس لبوه ذهبي مكتوب بيه حرف ل والسلسله كلها ذهب عكس سلسلته سودة لبسني اياها وجان عاقل حيل ابتعد ولبسني المحبس والتراجي وهمس قريب أذني.
هَيْصَم: حياة الهَيْصَم صارت حلوة بيج لَّباءَة.
فيروز: هَيْصَم لتتغزل بهاي الطريقة فدوة لكلبك.
هَيْصَم: ليش؟
فيروز: لان دا أخجل ونظراتهن علينه.
هَيْصَم: لتهتمين هذا يوم من العمر مراح يتعوض خلي نعيش اللحظة.
فيروز: كل ايامنه مع بعض هي أفراح وبالمناسبة شكراً الكلادة كلش حلوه ذوقك راقي سيد افندي.
هَيْصَم: والدليل انتِ.
: ابتسمت انتبهت على ريهاف كامت من مكانها وشغلت الديجي جانت اغنيه كلش حلوه مسك أيدي ورقصنا مع بعض على رغم نظراتهم لكن مهتميت بكل هذا المكان مجنت اشوف غيره، أيديه حاضن بيها خصري واديه على صدره، عيونه تشرح الحب العميق اللي نحمله لبعض مبتسمين بسعاده ومتناسين ماضينا والحزن اللي عشنا وربك دائماً يدز العوض ان طال الزمان وان قصر، انغام اغنيه وتمايل أجساد على ساحة الرقص شعور عظيم يارب يكون من نصيب جميع حبيبين ويبقون سوه طول العمر.
: خلصت الاغنيه ورجعنه للكوشه وهسه يلا حسيت بالخجل شويه تأثير الهَيْصَم على كلبي مثل المخدرات بوجوده انسى الدنيا بأسرها، الحب شعور رائع لكن يحكمه شي واحد بس هو الشخص اللي تحبه وتتعلق بيه وتسلمه كلبك.
جان اخر جزء من الحفله هو تقطيع الكيك وبعدها خلص يوم من أجمل أيام حياتي وللأسف راح ينظم للذكريات المستحيل ترجع واعيشها مره ثانيه لكن الشعور اللي احسه بهاي اللحظات لايوصف بالكلمات سعادة مطلقه أو بهجه ماليتني، خلص اليوم ورجعنا للبيت اول مدخلنه فكرت انو راح يدخل ويانه بس صار العكس ولازم فرحتي متكتمل وارجع قلقه عليه كلما يطلع للشغل لازم ياخذ فكري حتى يرجع للبيت وهاي السلسله مستمره باستمرار عمله.
لائِث: مبروك عريسنا.
هَيْصَم: الله يبارك بيكم لكن للتوضيح بعدني ممتزوج.
لائِث: هي نفس الشي الخطوبه نفس العرس بالأخير صارت مرتك.
ضَرْضَم: وانت شوكت نفرح بيك؟
لائِث: فرحان بنفسي دائماً بقت عليك شوكت متحب تعال نفرح سوه.
هَيْصَم: هَمْهَام شنو صار بموضوع الموافقه؟
هَمْهَام: سيدي لحد الأن معلك.
لائِث: وليهمك سوي خلع.
هَمْاس: سخيف.
لائِث: مو بسخافتك الصافي.
هَيْصَم: ازعل تره ميصير هيج تحجون بالسلاح ومنو يضرب الثاني اكثر اله جائزة.
كف اردانه وتقدم بحماس.
لائِث: والعباس موافق بس شنو الجائزة؟
هَيْصَم: حبس سبوعين.
لائِث: على بركة الله توكلنا.
هَيْصَم: مع التدريب المكثف.
لائِث: احترامي الجبير لمحمد الصافي احلف عليه خوش رجال بس خلي يعيف النسوان بحالهن.
هَمْاس: اني شوكت حاجي على النسوان؟!
لائِث: احجي على الصافي انت شكوو!!
صدك لو كال المثل.
ضَرْضَم: شنو كال؟
لائِث: روح اسأله اني شعليه؟
هَيْصَم: خلصتوا تفاهه؟
لائِث: احجيها لو ميحتاج؟
هَيْصَم: اذا حاب تنزل بيك عقوبه بكيفك.
ضَرْضَم: سيدي وصلنه خبر مهم بخصوص لّهيم.
هَيْصَم: راجع للعراق.
هَمْهَام: صح شلون عرفت سيادتك؟
هَيْصَم: غضنفر انطاني خبر.
لائِث: شنو الخطه؟
هَيْصَم: راسي ياذيني من التخطيط اريد أعقد هدنه وي كل الناس ونرتاح من هذا الهم.
هَمْاس: هاي هم خطه.
هَيْصَم: بعض الظن إثم.
لائِث: هاي المره اني اوكف وي الصافي خلصت عمرك بس تخطط شلون تريد نصدك بيك هسه؟
هَيْصَم: اذا ما اخطط واحسب خطواتي للأمام اوكع ومحد يسمي عليه مو بهاي السهوله اسلم ركبتي للاعداء وانتم أكثر الناس اللي تعرفون مدا قوتهم ونفوذهم وحياتي مو بهاي السهوله اتخله عنها.
لائِث: انظر ماذا يفعل الحب، العوارض واضحه جداً سيدي.
هَيْصَم: شنو رايكم نترك النقاش بهذا الموضوع ونكمل شغلنا؟
ضَرْضَم: أمرك سيدي.
ريهاف: صار فتره مرتاحه من هذا الشخص اللي يراسل وفكرت انو رجع عقله بآخر مره رزلته بيها بس خاب ظني من فتحت الموبايل وشفت رساله من رقم غريب ونصدمت من اللي قريته.
: ليش متوافقين عليه شنو ناقصني وما اعجبج؟!
معقوله يكون لائِث هو اللي يسوي هيج؟!
طردت هاي الفكره مستحيل يسويها وهو صديق هَيْصَم من الطفوله لكن للمره الثانيه احساسي يطلع غلط من رجع دز.
لائِث: مجنت اريد من عندج شي الله يشهد بس اخذ موافقتج قبل ما انحرج من الهَيْصَم والا اني اعتبركم شرفي وعرضي عشت وياكم بنفس البيت واعرف شنو اخلاقج لذلك ردت اعرف اذا توافقين لو لا بس انتِ الله يسلمج منطيتي مجال احجي وياج مثل الأوادم كلما يوصل الحديث حتى اكلج منو اني تحظريني.
جاوبته بسرعة.
ريهاف: وراح ارجع احظرك مره ثانيه متوقعت تكون هيج وهو مأمنك على بيته وعائلته وانت تراسل باخته واذا جان عندي احتمال ارفض بعد معرفت انت منو صار رفضي شي اكيد وياريت لتراسل مره ثانيه خليني ابقى محترمه قربك من الهَيْصَم والعائلة.
اجيت احظره وقفتني رسالته.
لائِث: بداعة الوالد انتظري خليني احجي اللي بكلبي بدون متقاطعيني من حقي ابرر موقفي كدامج ميصير تنهين شي مبتده اصلاً.
ريهاف: لخاطر والدي مو اكثر لكن بالأول لازم توعدني اذا رفضت هاي المره وحظرتك تبطل تراسلني وتنسى منو هي ريهاف.
لائِث: وعد شرف، اني من الأساس مجنت اريد شي غير اعبر عن حبي واعرف مشاعرج ناحيتي حتى ميصير موقف محرج بيني وبين الهَيْصَم، عشت وياكم بنفس البيت وتربيت يمكم وانتوا عائلتي المقربه اعزكم واحبكم مثل اهلي وأكثر هم، ردت ارتبط بيج لان حبيتج من الطفوله وعشت كل هاي السنين واني متمني هاي الشغله من جنه اني و هَيْصَم نقره بالبيت وتدخلين انتِ ومسويه ظفاير ثنين وتجين تكعدين يمنه وعلى رغم شكد يطردج بس تعارضين وتجين تختلين يمي، لو من تصيحين اسمي وتكولين لائِت مو لائِث، كلبي حبج وختارج من الطفوله وجنت اغار حتى من تلعبين وي الهَيْصَم بس بقيت محافظ عليج ومعترفت حتى لنفسي بهذا الموضوع خفت تعارضين الفكره وطلعين متحبيني لو بكلبج واحد ثاني بس وصل حدها من شفت الموت على بُعد خطوه والحياة على ساعة تنتهي قررت اجازف واللي يصير خلي يصير على الاقل من يجي يومي ما اترك ندم واخذج بكلبي حسرة للكبر، مسويت شي غلط بس حبيتج ليش حتى يصير ويايه هيج؟!
: كلامه أثر بيه على رغم ما احبه ولأن اعرف عدل هو ميضحك عليه لذلك تركت الموبايل ومحظرته وقررت أوافق ويمكن مشاعري تتغير ناحيته مع مرور الايام.
فيروز: مشاعر مخربطه احس بيها هسه خوف على فرح ومرات يصير توتر وقلق، بعد اللي عشته صارت السعادة المطلقه مستحيل عليه شعور انو راح افقده متواجد بداخلي على رغم اعرف مابيه شي لكن بعد فقداني لوالدي وخالتي والظروف السيئة اللي عشنا بيها كلها خلتني اعيش بهاي الحاله، قاطع تفكيري صوت الموبايل شفت اسمه فرحه دخلت كلبي بسرعه فتحته اجاني صوته وهو يكول.
هَيْصَم: مشتاق لعيونج شنو الحل؟
فيروز: ارجع للبيت.
هَيْصَم: عندي شغل هسه ما أكدر.
فيروز: لعد ابقى مشتاق.
هَيْصَم: يصير استنسخج؟
فيروز: شنو تسوي بثنين من عندي؟
هَيْصَم: وحده اخليها يمي بالشغل والثانيه بالبيت.
فيروز: ليش مسوي العكس؟
هَيْصَم: بهاي الحاله نسختي يكحل عينه بعيونج واني ممستفاد.
فيروز: نفس الشي وي نسختي.
هَيْصَم: اتركي النسخ وسولفيلي الملاك اللي شفته اليوم يصير اشوفه من ارجع للبيت؟
فيروز: وجنت شيطان قبل سيد افندي؟!
هَيْصَم: انتِ ملاكي الجميل بكل لحظاتج بس اللي قصدته هو الفستان الأبيض الجنتي لابسته مطلعج ملاك على هيئة بشر.
فيروز: بأي ساعه ترجع للبيت؟
هَيْصَم: ماعندي وقت محدد من اخلص شغلي.
فيروز: ألك فرصه القبل نص الليل اذا مرجعت قبل هذا الوقت مشكلتك.
هَيْصَم: سندريلا تخاف من مرت ابوها انتِ تخافين من منو؟!
فيروز: امك.
سمعت صوت ضحكته وضحكت بسببها من صدك اخاف مو منها وإنما ماحب تاخذ عليه نظره ثانيه غير المرسومه بعقلها.
هَيْصَم: احبج لَّباءَة الهَيْصَم.
فيروز: احبك الأسد مالتي.
: غلقت الخط واني مبتسمه، حضرت العشا وخالتي موجودة يمي وابتسامتها ماليه وجهها، اجت حضنتني وكالت بفرحه.
كلاثم: حسيت بيج خير على عائلتي من اول مشفتج، بالأول هَيْصَم اللي رجعت حياته طبيعيه ونسى الماضي ورجع يبتسم للهوه وهسه ريهاف اللي خلصت عمري خايفه محد يتزوجها بسبب شخصيتها وعنادها فرحت لان خطبها لائِث وكلت اي واخيراً اكو بهاي الدنيا انسان مستعد يخلص عمره وياها لان مثل متعرفين البنيه تختلف عن الولد محد يتحمل تكون غامضه وعنوديه ومن اجه شخص نعرفه حق المعرفه رفضته جنت ضايجه بسبب هذا الموضوع ودعيت الله وأهل البيت تقنع ومترفض نعمتها والحمدلله اتصلت بيه قبل شويه وكالت موافقة وهسه فرحتي ما انطيها لأحد يارب يتمم عليكم كلكم على خير ويرزق بناتي البقيه قسمه زينه ويارب الفريق نفسهم لان مستحيل الكي احسن من عدهم ابد.
فيروز: آمين يارب.
: خلصنه عشا وغسلت المواعين خلص الوقت بسرعه وخالتي نامت لان اليوم جان حيل متعب استغليت الفرصه وطلعت الفستان من الكنتور وطلعت امشي بهدوء حتى متسمعني غيرت ملابسي بالحمام ورتبت شعري وخليت شويه مكياج ودخلت لغرفته بعده مأجه فتحت المجر بيه هوايه حامض حلو أخذت وحده وخليتها بحلكي طعمها طيب رجعت بيه الذكريات لأول إيام من سألني احبها لو لا ضحكت على نفسي شكد جنت غبيه بوقتها لان ماعرف اسلوبه لكن هسه العكس تماماً حفظته عن ظهر قلب على رغم بقت هوايه اشياء غامضه بشخصيته لكن الايام وضحتلي هوايه أمور.
فتحت الشباك الهوه بارد اخر ايام من السنه بس لطيف بنفس الوقت كعدت على الكرسي وبقيت أمتع نظري بالغيوم المتفرقه والقمر اللي مزين السماء ماعرف شلون غفيت وفزيت على حركه بالغرفه كمت مرعوبه من مكاني بس من شفته واكف كدامي ارتاحيت فكرت للحظه هذا لّهيم جاي يخطفني هو من شافني اتنفس سريع اقترب من عندي بسرعه ولمني بحضنه.
فيروز: شتاقيتلك.
هَيْصَم: مو مثل اشتياقي لعيونج لَّباءَة الهَيْصَم.
وخرت عنه، لزم وجهي بثنين اديه كايل: خفتي لَّبوة؟
فيروز: بس من شفتك حسيت بالأمان.
هَيْصَم: راح ابقى احميج طول العمر هذا وعد من عندي وما اخلي سوء يصيبج وأريد ضحكتج متفارق وجهج ابد تحت اي ظرف كان.
فيروز: احس كلمه احبك مو كافيه، اللي احسه اتجاهك أعظم واكبر من هيج بهوايه لدرجه ما أريدك تبتعد عن عيني لحظه وحده وتبقى يمي طول العمر.
هَيْصَم: اريد اشوف عيونج ارفعي راسج اليه.
رفعت راسي صارت عيني بعينه قبلني من جبيني بعدين خدودي وي كل قبله يكول احبج لَّباءَة الهَيْصَم حبيت هذا الاسم وعشقته هم وتمنيت أكدر اغير هويتي واسمي نفسي لَّباءَة حسسني صدك بالأمان والراحه وعرفت شنو يعني سعادة وحب بوجوده.
هَيْصَم: عطرج، مشيتج، ضحكتج، وتفاصيل وجهج، اريد احتفظ بيهن بكلبي وامنع احد غيري يشوفهن.
فيروز: ليكون تفكر تحبسني هَيْصَم؟
هَيْصَم: يم كلبي واخليج تسمعين معزوفات غزليه وي كل دكه باسمج ينبضها.
فيروز: للأسف اني مفكره ارجع للوظيفة بعد متخلص المهمه مالتك.
هَيْصَم: احاله، انسي شي اسمه شغل حتى لو خلصت المهمه.
فيروز: ليش؟
هَيْصَم: اني اشتغل بالسلك عمري كله ابقى مهدد وعائلتي هم لان عملي بمكان حساس وي ناس مجرمه خوفي عليج سبب رفضي والا اني من الأساس مجنت معارض حتى عدم لبسج للحجاب من زمان كتلج وارجع أكرر صحيح اني رجل شرقي بس تفكيري متحضر مو ضد وظيفه المرأه بالعكس تماماً اني داعم للجنس اللطيف.
فيروز: من صرت زوجي لازم تنسى شي اسمه جنس لطيف كلهن خواتك في الله اني الوحيده اللي تشوفها مرة بنظرك.
هَيْصَم: ليش هي اكو وحده حلت بعيني غيرج؟
شكد عتقلت ناس بسبب الإدمان ودخلتهم مصح وجنت الومهم لان يشربون مخدرات بس هاي اول مره اني اجرب طعمها واصير مدمن بيها لدرجه اريد استنشقها بكل لحظه.
فيروز: كلماتك لطيفه واني قلبي الصغير لايتحمل بهاي الحاله شنو اسوي؟
هَيْصَم: حبيني بكل يوم اكثر من اللي قبله خلينا نجازف ونعيش لحظات من عمرنا لاتنسى، رجعيني مراهق لَّباءَة، أريد احبج بكل طاقتي وانسى وياج منو هَيْصَم، عملي والعملية، اريد اعيش وياج خالي من الهم افقد نفسي واغفى بحضنج مثل الأطفال تكدرين تصيرين علاج لجروحي وتوعديني متركيني ابد؟
فيروز: انت سميتني أنثى الأسد والبوة متترك زوجها طول العمر راح ابقى وفيه ألك بحياتي وبعد موتي، والايد اللي حضنت ايدك مستحيل تصافح أيد ثانية، احبك اكثر مما تتخيل لذلك لتتوقع اسمح تبتعد عني واذا تريد اوقعلك عقد للموت.
هَيْصَم: ابقى وياك صورة وصوت.
فيروز: لحد ميشيلني التابوت اظل يمك.
هَيْصَم: يومي قبل يومج وردة الهَيْصَم.
سحبني لحضنه ونمنا سوه، خليت راسي على صدرة متناسيه كل الدنيا وأيده يمسد بيها على شعري حتى غفيت.
: انزل من السياره.
هَيْصَم: ليش؟
: لازم نفتشها وصلت اخباريه انو عندك مخدرات بالسياره لذلك لازم نتخذ الإجراءات القانونية واذا متتعاون تعرف العواقب، النقيب هَيْصَم متهم بتهريب المخدرات وراح يتم اعتقاله والتحقيق وياه بناءً للقانون العراقي.
الراحه لن تكتب على جباه كتب عليها العذاب منذُ الولادة..
يتبع
البارت اكثر من 3800 كلمه.
تصبحون على الف خير وعافيه شمعاتي.
حسابي الأنستا.
رواية هَيْصَم الفصل الأربعون 40 - بقلم Zahraa_Ahmed
للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
أراد قتلي..
أتى من العدم ونتشل روحي من الألم
أراد حباً طاهراً خالي من الندم
لامس قلبي بعشق جارح
لم يكن لهُ عقل وفي روحي سكن
واخذ من الود وفي اعماقي استوطن
وعندما مل مني أراد ان يبتعد من دون عذراً
هجر الروح وغرز سكيناً داخل القلب تملئني ندم
وقتلني بمنتهى الحب وذهب كما أتى عدم..
خاطرة بقلمي
زهراء احمد
: اتصل عليه من الصبح لحد الأن ميجاوب راح اموت من الخوف ومليون فكرة خطرت بمخي معقوله صارله شي؟
خطفوه او انقتل لا يمكن تصوب، ياربي والله مليت شوكت ناويه مهمته تخلص وارتاح على الاقل ما اكون قلقه هيج، يكولون التمس للمؤمن سبعين عذر واي عذر يكون مناسب لهيج وضع دنعيشه؟
والمشكله ما أكدر اكل لخالتي تتصل على لائِث ولا أني عندي الجرأة اتصل عليه المره الفاتت نخطف كدامنه ومجان يسمح الوضع بغير حل لكن اليوم الأمر مختلف شنو النظرة اللي ياخذها عليه لو اتصلت عليه وخاصتا لو هَيْصَم مبيه شي وهذا تفكير زايد من عندي، قررت اسكت بكل الأحوال لو صاير شي واحد من الفريق اتصل بخالتي وانطاها خبر واحتمال وارد جداً اني زودتها هوايه مرات اتصل عليه وميجاوبني ف وين المشكله هاي المرة، كبحت قلقي وحاولت أبين طبيعيه حتى متحس اكو شي لان اذا صار عليها اي مكروه لاسامح الله وين اخذها بهيج وقت واني وحدي حتى الإسعافات الأولية مثل الناس ماعرف، تروح من أيدي واكون اني السبب، سكتت ومرت هاي الليله على خير لكن خوفي مختفه حاسه اكو شي مو زين يصير وياه هسه من صدك.
عابد: اي سولفلي من شوكت بديت تهريب ومنو الأشخاص اللي يدعموك بهذا الموضوع؟
هَيْصَم: من حقي الشرعي اطالب بمحامي وحقي ايضاً ما انطق كلمة بدون وجوده.
عابد: انت تعرف بكل الأحوال راح تعترف، نقيب وعندك اطلاع على الطريقه اللي نستعملها وي المجرمين وكنت انت شخصيا تستخدمها وياهم.
هَيْصَم: ويمكن استخدمها وي حضرتك بالمستقبل الله اعلم.
عابد: احترم نفسك واعرف وي منو تحجي لتنسى اني أعلى من عندك رتبه والرائد اللي يحقق وياك.
هَيْصَم: الرتبه مو مهمه الأهم هي السمعه وهذا الشي انت تفتقده للأسف.
عابد: مستغني عن حياتك؟
هَيْصَم: اني رجل ميت من سنين طويله واللى اعيشه الان هو عمر إضافي حتى اخلص الناس من عدكم.
عابد: ساعد نفسك واعترف بجريمتك تعرف بوقتها راح يتخفف عنك العقاب والا العواقب مو سليمه.
هَيْصَم: لتخوف الغركان بالمي، عشت طول عمري واني ادرس السلك واخطط مو بالسهوله تاخذ كلمه من الهَيْصَم، وإذا مصدك بمقولة اخذها من حلك السبع فأحب اكلك اذا انت ماتعرف ماكو واحد وصل لحلك السبع ورجع سليم وعايش دروس الابتدائية خليها لأيام الطفوله كبرنا عليها حضرة الرائد.
عابد: خوفي عليك بعد كل هذا التكبر تنداس بالرجلين.
هَيْصَم: مشاعرك الزايدة وزعها على سندس سمعت بيها مشتاقتلك صار اسبوع مزايرها والجفاف العاطفي واصل حده، روح الها قبل متخونك وتكربس براسك طفل وبعدها الله اعلم بأم الجهال باي مزبلة تشمرك على حد علمي البيت مسجل بأسمها هديه من السيد الوالد حفظه الله ورعاه.
رفع ايده حتى يضربني بسبب عصبيته لزمتها بقوه لدرجه حسيت عظمه نكسر بأيدي.
هَيْصَم: وجودي اهنا بارادتي لتفكر الهَيْصَم ينجبر على شي اني رجل خاويت الموت وتربيت على المسداسات والبنادق والحرب هي عرسي والاعلى من عندك لو سمع بلي تسويه جان فصلك من شغلك لان متعرف وي منو تلعب لذلك احترم نفسك وايدك اذا تحب تبقى بمكانها حافظ عليها بجيبك كدامي متنرفع، وبعدين بكل هذا المركز مكدروا يجيبون شخص نزيهه يحقق ويايه على الأقل يحترمون مكانتي بالمجتمع!!
عابد: تحجي بالواسطات اهناا؟
هَيْصَم: وشبيها الواسطات معاجبتك؟!
موصلت بزودها لهذا المكان والا واحد مثلك متجاوز الثلاثين شلون صار رائد بين يوم وليله واحنه كل ثلاث سنوات تجي ترقيتنا؟
عابد: من المهمات يكافئوني ليش محروك دمك؟
هَيْصَم: اني الأسد اقتل ما انقتل والنار اللي راح تاكلكم كلكم بس اصبر وشوف شلون تتحطمون واحد وره الثاني ميحتاج انزل نفسي واحرك دمي بسبب واحد تافهه مثلك واحنه أرجال ماضينا يشهد ابطولاتنه بالوقت اللي جنت تهرب بيه يم سندس حاربنا وي داعش وايدك اللي تعلمت على الكريمات والماسكات متتقارن وي اللي تربت على السلاح اما عيونك اللي اشوف الاكشن وي جيمس بوند اني جنت اعيشه لحظه باللحظه نشوف الموت بعيونه ونركض اله بابتسامة، سمونا مندسين وسمونا خارجين عن الدوله وطعنوا بينا بس حتى تصيرون بعيون الناس شرفاء والجندي العراقي حقير بنظرهم طعنتوا بشرفنا وصارت سمعتنا زفت على كل السان، بالوقت اللي تاكل بيه كنتاكي الجنود مجانوا يلكون صمونه يسدون بيها جوعهم، قدمت والدي واخواني وأصدقائي شهداء ولهذا اليوم اسم العسكري مربوط بالموت ومع هذا صامدين ومازال حب الوطن موجود يمشي بدم كل جندي، هذا تاريخي وتاريخ كل عراقي نزيهه بهذا العمل، كلي انت شنو قدمت حتى ينطيك الحق تمد ايدك عليه بسبب اتهام باطل؟
عابد: شنو يثبت اتهام باطل؟
هَيْصَم: سوالف الأذكياء بطلها متلوك لحمار مثلك ولو الحمار عنده قيمه واهميه اكبر من جنابك السخيف.
عابد: مراح اتحملك أكثر من هيج عدل سلوبك ولتتجاوز.
هَيْصَم: حضر نفسك بعد خروجي من السجن راح تطلع من هاي المهنه بشكل رسمي.
عابد: ههههههاي ضحكتني ليش عيني شنو تكدر تسوي مثلاً؟!
هَيْصَم: انت تمارس البغاء وتسكن بيت مشبوه على رغم تحذيرك أكثر من مره لكن وي كل مرة تخالف وتعيدها.
عابد: وهذا مراح يطلعني من المهنه.
هَيْصَم: تاخذ رشوة وتتعاون وي العدو، بالأضافة اتهامك للنقيب هَيْصَم بتجارة المخدرات دون وجود دليل شرعي.
عابد: الكيس بسيارتك شلون مو دليل شرعي؟!
هَيْصَم: وشنو يثبت الكيس مالتي؟
عابد: بسيارتك خلاه الجني مثلاً؟
هَيْصَم: ممكن، علاقتي مو جيدة وياهم هاي الفتره.
عابد: تضحك عليه انت؟
هَيْصَم: اذا شايف نفسك مضحكه فهاي مشكلتك.
عابد: اعترف لتخلينه نعذبك وناخذ الاعتراف غصب.
هَيْصَم: ممنوع معاقبة اي متهم قبل ثبوت الجريمة وانت لحد الأن مثبتت الكيس اليه.
عابد: لتخبلني جان بسيارتك شلون يعني مو الك؟!
هَيْصَم: وين لكيتوا الكيس؟
عابد: تحت الكشن الخلفي.
هَيْصَم: معقوله اكون غبي حتى اخليه كدام الانظار؟!
عابد: رب العالمين يريد يكشفك.
هَيْصَم: سبحان الله جان مقرر يطيح حظك على أيدي والحمدلله على هاي النعمه دائماً مفضل عليه بهيج شغلات.
عابد: مصيرك تعترف وتنحبس على جريمتك بالنهايه لازم يطبق العدل ويحق الحق.
هَيْصَم: يحق لتخاف والدليل طردك من العمل.
عابد: مُصر على اتهامي بشي اني ما ألي علاقه بيه وهاي بحد ذاتها جريمة يعاقب عليها القانون.
هَيْصَم: تعجبني من تحجي بالقانون تحسسني انك شخصيه وكذا على رغم حقيقتك مخلصها بجي يم الجنس اللطيف، اوبس سندس مالتك مو لطيفه ابد شفتها مره تتعارك على سعر كيلو بتيته، صدك ليش مخليها هي تتسوك غير انت رجال العائلة لو اكو واحد غيرك يدير الوضع بغيابك لان على حد علمي هي تخاف من الظلام وانت عندك خفارة هوايه هاي الفتره.
عابد: تجاوزت هوايه وصدكني كلهن سجلتهن ألك راح تتحاسب عليهن وحده وحده.
هَيْصَم: سوي اللي تكدر عليه ولتقصر واذا جنت محتاج مساعدة اتصل بفريقي راح ينطوك معلومات اضافيه.
عابد: منين جايب كل هاي الشجاعة؟!
هَيْصَم: ابن والدة دائماً شجاع.
عابد: مصيرك تنذل وتنزع من عندك الرتبه وانت منزل راسك وتتعاقب مثل المجرمين.
هَيْصَم: احنه الأسود متهمنا الرتب والألقاب اسمنا هو يعرف علينه ولهذا السبب يسمى الأسد حاكم الغابه وماكو حيوان يندك بيه.
عابد: والله اذا انت تشوف نفسك عايش بعالم الحيوان فهاي مشكلتك.
هَيْصَم: ليش انت معتبر نفسك من البشر؟!
عابد: شنو قصدك بهذا الكلام؟
هَيْصَم: انتوا الحيوانات اللي عايش وياها لهذا السبب اضربلك مثل بيهم لان اعتقد تعرف اصنافهم عدل.
عابد: مبقى شي ويتقرر مصيرك وتعرف الحيوانات شنو تكدر تسوي.
هَيْصَم: رحم الله امرئ عرف قدر نفسه.
ضَرْضَم: كاعد بالتحقيق هسه ومبقى شي وتطلع نتائج المختبر بوقتها شنو نكدر نسوي؟
هَمْاس: نكدر نتلاعب بالنتائج.
لائِث: الصافي تريد تغش القانون؟!
هَمْاس: كلنه نعرف هو بريئ وهاي تهمه ملفقه وين المشكله اذا ساعدنا؟!
لائِث: لتخاف هم تطلع خطه من عنده.
هَمْهَام: ما اعتقد لو خطه جان طلع من زمان صار يوم كامل وهو بالتحقيق.
لائِث: يطلع لاتخافون.
ضَرْضَم: تعرف شي لائِث؟
لائِث: شنو اعرف مثلاً؟
ضَرْضَم: اني اسأل شنو ضام علينه؟
لائِث: قابل اني هَيْصَم والي خلك هيج اخطط؟
هَمْهَام: ينخاف من عندك تعرف شي ومتكول.
لائِث: حتى لو اعرف مستحيل اكول خليها بحسرتكم.
هَمْاس: اليوم بفلوس باجر ابلاش.
لائِث: منو اللي جذب عليك حلاة الخبر بوقته مثل الجاي شكد طيب بس اذا بارد يصير ما اله طعم.
ضَرْضَم: انت تريد تجلطني؟
لائِث: استغفر الله تره ابتليت بيكم اني خلوني محتار بأهله شلون اكلهم ابنكم نسجن وراح ينحال محكمه والبطرانين عبالهم هيج اني فارغ اخطط والله يالله.
هَمْاس: متعودين عليك عباس المستعجل وهذا هدؤك فاجأنه.
لائِث: من كثر ماعشت وي الهَيْصَم صرت غامض مثله بشرفكم مو صفه حلوه؟
هَمْهَام: صفه طايح حظها.
لائِث: يطلع واكله عليك قابل يبقى طول عمرة مسجون.
هَمْاس: اتركوا هاي السوالف وخلونا نفكر بطريقه نكدر نطلعه بيها من السجن.
لائِث: لتعب نفسك ميحتاج تفكر بشي خطه من سيادته.
ضَرْضَم: والعباس راح ارتكب بيه جريمة يا أخي موتني.
لائِث: دتاخذ كلماتي يدادا لتصير سارق تره الله يذبك بالنار معليه حذرتك.
هَمْاس: لائِث اذا تعرف شي كول لتشلع كلبنا.
لائِث: انتم حابين شلاع الكلب واني الف مره اعيد هَيْصَم راح يطلع هي مجرد الليلة.
هَمْهَام: واذا طول اكثر من ليله؟
لائِث: بوقتها نصرف لكن هذا الشي مستحيل.
ضَرْضَم: نتصل بغضنفر؟
لائِث: ميحتاج الآمر يمه موجود هسه.
هَمْاس: انت منين تجيب هاي المعلومات؟
لائِث: صديقي موجود اهناك هو يتصل بيه.
هَمْهَام: تضحك علينا عمري كله مشفت عندك صديق غير الهَيْصَم.
لائِث: تره مو مرتي هو واخاف اخونه ويكشفني أكدر اصادق اي واحد مثل ميعجبني و هَيْصَم ميدخل.
ضَرْضَم: لتصيح طرشت أذني.
هَمْاس: اشبيك تهز رجلك هيج؟!
لائِث: راح اموته على أيدي هذا البربري والله ما ارتاح اذا مطبعت أيدي على وجهه.
هَمْهَام: تخبل الرجال خويه بيك شي ليش تحجي وي نفسك؟!
لائِث: عابد هذا الحقير اللي يحقق وي الهَيْصَم يتجاوز هوايه يراد واحد يوكفه عند حده ويطيح حظه ويعلمه شلون يحترم الأكبر من عنده هو كل واحد مابيه حظ بس تصير بايده السلطه يبقى يخربط عباله أدوم، ضوجني هذا الملعون وحرك دمي.
ضَرْضَم: ماكو داعي تضوج هيج بالأخير ميصير غير اللي يريده الهَيْصَم.
هَمْهَام: الهَيْصَم فاتح اتصال وياك؟
لائِث: اني الساني لازمه غصب ليش تخليني اغرد؟!
هَمْاس: صلوا على محمد وآل محمد لتتعاركون مثل الصغار ميصير هيج.
لائِث: سكتوا الصافي لا ابتلي بيه والعباس.
ضَيْثَم: سولفلي شنو صار وياك بالتفصيل.
هَيْصَم: طلعت من البيت الساعه سبعه الصبح على الشارع العام شفت مرة ورجال جان بأيدهم طفل وقفوني ابنهم مريض وماكو سياره وكفتلهم من باب الانسانيه صعدتهم ويايه وصلتهم للمستشفى وكملت طريقي بعد مسافه مو طويله وقفتني دورية الشرطه وكأن عدهم خبر مسبق اكو شي بالسيارة حتى المكان يعرفوه انتبهت لحركاتهم وعرفت هاي خطه حتى يوكعوني ويخلوني اترك القضيه.
ضَيْثَم: طالبت بتحقيق خاص وياك بما انو اني المسؤول عليك محد يكدر يمسك بسوء ونعرف شلون نطلعك من هذا الوضع.
هَيْصَم: اريد اتواصل وي أهلي اطمأنهم سيدي تعرف امي مره جبيره متتحمل هيج خبر لازم احجي وياها حتى يكون عدها علم اني وين.
ضَيْثَم: اتصل بيها وطمأنها ولتكلها انت مسجون ان شاء الله عن قريب ترجع لمنصبك ومكانك مع تبريئ رسمي.
هَيْصَم: شكرا جزيلاً سيدي.
ضَيْثَم: انت ابني قبل متكون بالسلك ومتدرب عندي.
هَيْصَم: الله يديمك انت والدي الثاني.
ضَيْثَم: والدك المفتخر بيك لتنسى، راح تطلع من غرفه التحقيق بعد متتصل بأهلك واحد من الولد اهنا من ضمن فريقي اي شي يصير انطيه خبر هو يكلي.
هَيْصَم: تأمر سيدي.
ضَيْثَم: رخي ،اتركك بحفظ الله.
: جنت كاعده بعد منامت خالتي عيني على الساعه والموبايل عقلي وكلبي يمه شنو صار وياه ليش هيج تأخر ومتصل وميجاوب على اتصالاتي هم؟
اساله هوايه بمخي وأريد الها اجابه، بين صفنتي وتفكيري شفت اجاني اتصال طفرت من مكاني بحركه لا اراديه وفتحت الخط بدون ما أقره الإسم لان اعرف ماكو غيره يتصل وهمات ردت اعرف اي خبر عنه من اي احد ماكو مشكله، حجيت بسرعه قبل ما اسمع صوته.
فيروز: وينك انت من الصبح لحد الأن اتصل بيك ومتجاوب عقلي يمك صاير شي هَيْصَم ريحلي كلبي وجاوب.
هَيْصَم: اجاوب بس انطيني مجال اكلتيني بالأسئلة حتى امي مو هيج.
فيروز: لان خايفه عليك مو بأيدي.
هَيْصَم: ماعاش اللي يخوفج كلما في الأمر صار عندي مشكله بالشغل ومكدرت افتح خط اعتذر لان قلقتج لَّباءَتي.
فيروز: روحي انت شلون ما اخاف عليك الله انتبه على نفسك وخلي موبايلك مفتوح حتى أكدر اتواصل وياك واطمأن.
هَيْصَم: ما اعتقد أكدر عندي مهمه خلال هاي اليومين التواصل يصير صعب لتخافين عليه لان ماكو شي خطير واذا صار شي لاسامح الله لائِث موجود هو يتواصل وياكم.
فيروز: لتخوفني هَيْصَم كول صاير شي لتكذب عليه؟
هَيْصَم: مصاير شي بس مشغول كلش هاي الفتره هن مجرد يومين ويمكن اذا خلصت شغلي قبل وقت ارجع، لتبقين قلقه وتفكرين بسلبيه واني كل اعتمادي عليج من زمان كلتلج اريد اترك أنثى الأسد بعريني وما اخاف عليها لتخليني افكر بيج واحمل همج ميصير شي مو زين ان شاء الله وانتِ وامي تدعلي.
فيروز: راح اشتاقلك حبيبي.
هَيْصَم: اني يمج ومشتاق مابالج وانتِ بعيده؟
فيروز: ربي يحميك اليه من كل شر ويرجعك سالم وينصرك على أعدائك.
هَيْصَم: آمين، حضري نفسج بعد نهايه هذا الأسبوع زواجنا.
فيروز: ليش مستعجل لهاي الدرجه؟!
هَيْصَم: متردين تصيرين مرتي رسمي؟!
فيروز: لا مو هيج القصد بس يعني.
قاطعني مخلاني اكمل كلامي.
هَيْصَم: لابس ولا شي راح ادزلكم حمايه ولائِث هم، روحي انتِ وامي وشتري كل اللي ترديه جهزي نفسج على راحتج عندج اسبوع كامل اليوم جمعة تلحكين يعني.
فيروز: لائِث مو وياك بالعملية؟
هَيْصَم: لا بس اني وبقية الفريق خليت لائِث بالمركز هو عيني وأذني اهناك.
فيروز: هَيْصَم متأكد ماكو شي؟
هَيْصَم: ماكو شي مشاكل دائماً تصير بالشغل لتهتمين متعودين عليها.
فيروز: اذا انت بخير مو مهم اي شي يصير اهم شي سلامتك حياتي.
هَيْصَم: احبج لَّباءَة الهَيْصَم.
فيروز: واني احبك هَيْصَمي.
هَيْصَم: حلوه يا الملكيه.
فيروز: انت مطر الخير اللي اجه على حياتي من بعد قحط طويل لذلك مستعزه بيك وصرت ملكي من يوم العقد.
هَيْصَم: تمنيت موجوده يمي هسه ومتعت نظري بوجهج الجنه العافيه.
فيروز: اني يمك حتى لو مو جسد كلبي وروحي مرافقيك وين مرحت خليها بعقلك هاي الشغله.
هَيْصَم: اذا صار اي شي بعدين اتذكري حبيتج من كلبي وتمنيت تصيرين ام الأولادي لكن إذا جان للقدر رأي آخر لا اعتراض على حكم الله.
فيروز: من تحجي هيج تخليني اتأكد صاير شي وياك بداعتي هَيْصَم كولي لتخلي عقلي يصنع افكار من عنده.
هَيْصَم: وداعتج مو شي خطر ان شاء الله على وعدي نهايه هذا الأسبوع زواجنا ويومين وارجع للبيت ونجهز مع بعض وانت تعرفين وعد الهَيْصَم بصمه وشاهد.
فيروز: واثقه بيك واعرفك كد الوعد واني منتظرتك ترجع ونجهز كل شي سوه.
هَيْصَم: ان شاءالله يعمري روحي نامي هسه تأخر الوقت حيل واذا صار عندي مجال اتصل بيج واذا متصلت اعرفي ظروفي منعت والا اني ميمنعني عنج غير الموت.
فيروز: اسم الله عليك عمرك طويل ان شاءالله.
هَيْصَم: ويخلص يمج لَّباءَة الهَيْصَم.
: غلقت الخط وعلى رغم اتصاله لكن بعدني ممرتاحه اكو هم جبير على كلبي ممطمأنه ابداً.
حوري: رجعنا للبيت عمو جان خفاره فطلعت بس عمتي عيني انتقلت بالمكان هي هاي الحياة اللي ضحيت بكل شي حتى اعيشها!!
شنو مستفيدة لا زوج بيه خير واكدر اعتمد عليه ولا أهل، كل بنية بصباح زواجها يجون أهلها يسلمون عليها ويباركولها بس اني عكس حسيت نفسي فصليه وما أكدر أللوم احد غير نفسي اني اللي غلطت وهذا اللي يمشي وره كلبه على اساس حب واعيش وياه حياة ورديه تاليها تدمرت احلامي وتحطم مستقبلي لو شنو محجيت مستحيل اعبر عن شعوري والألم والتأنيب اللي احس بيه هسه، جانت عمتي حبابه عكس متوقعتها اجت يمي وحضنتني ردت ابجي واشكيلها بس سويت العكس قررت اتجاهل الكل وما احجي وي احد اكثر من اللازم اللي عشته خلاني افقد ثقتي بالناس كلهم ماعدا ارفد لان هو الوحيد وعلى رغم السويته بقى واكف ويايه وساندني.
أمل: الف مبروك بنتي يارب زواجة الدهر، الله يرزقكم الذريه الصالحه ويخليكم سعداء دائماً وتكون ايامكم مليانه حب وفرح.
ضحكت على كلامها بداخلي ياحب هذا اليحجون عليه!!
اخذتني للغرفه جان تصميمها تركي ابيض وذهبي الأثاث مجذب والتصميم هم، جرباية تتوسط الغرفة وعلى جهة اليمين الكنتور وعلى جهة اليسار المرايه واكو ميز صغير ويمه قنفه، صفنت شويه وأخذت نفس وحجيت وي نفسي ألومها: محد جبرج جان اختيارج وقرارج اتحملي (وما ظلمناهم ولكن كانوا لأنفسهم يظلمون).
فتحت الكنتور جانت كل الملابس مرتبه امي دزتهم قبل يومين من الزواج الأسود، اخذت فستان وردي ودخلت للحمام اخذت دوش سريع وطلعت لافه المنشفه على راسي رفعت وجهي صارت عيني بعينه درت وجهي وجففت شعري ومشطته ستحيت انزل بنفس الوقت وجودي يمه محابته متضايقه حيل وخاصتا من كال.
محمد: اهلج وين شو مشفنه ولا واحد بيهم؟
راد يقهرني سويت العكس وجاوبته.
حوري: ميحبون يشوفون وجهك لهذا السبب مأجو.
محمد: على اساس اني كاتل نفسي عليهم سودة عليه راح اموت.
حوري: آمين ولو هي المكبره متاخذ بس الزين.
محمد: ومنو يربي ابنج يحلوه؟
ليكون مفكره تتزوجين بعد موتي؟!
حوري: اولاً ابنك اللي تحجي عليه انت تبريت من عنده قبل مينخلق وفي حال متت خاله موجود أو امه هم صدكني مراح يذكرك اصلا بالأضافة لتفكر هوايه بيه كون على ثقه كرهتني بكل الذكور ولو مو كلها ماعدها شرف مثلك.
تغيرت ملامحه وصار عصبي حيل اتقرب من عندي بسرعه ورجع لنفس الحركه وحاوط ركبتي بس هاي المره صار العكس ضربته على بطنه بقبضة أيدي بتعد عني متألم رفعت اصبعي بوجهه وحجيت بتهديد.
حوري: نسر بالجيش وابن خالي هم وأرفد دكتور جراح والله العظيم اسوي شي بنفسي وابليك واخليك تتورط بروحين مو روح وحده لتفكر ابد اني نفسي حوري اللي حبتك او وثقت بيك كلبي هسه يحمل ألك الحقد والكره ولو تجيني بكفن دمعه وحده ما انزلها عليك ماعرف اهلك شلون متحمليك لو ابني هيج يطلع صدكني ارميه بأقرب مزبلة.
: ضربني كف حسيت خدي خدر من الألم ومع هذا بقيت قويه ومنهزيت رفعت عيني وحجيت مستهزءة.
حوري: غريب أمركم ادافعون عن النساء بالمحاكم او وي زوجاتكم تصيرون كلاب.
محمد: احترمي نفسج تجاوزتي كلش واذا ساكت مو احترام الج وإنما لخاطر ابني اللي بطنج لا أكثر.
حوري: على اساس انت معترف بيه مو نفسك اللي تخليت عنه وكلت هذا مو ابني شنو تغير هسه وقررت تعترف بيه؟!
محمد: يعجبني عندج مشكله؟
حوري: هه ضحكتني، بابا اصحه على نفسك اني مو نفس حوري قبل أربع أشهر تغيرت فرق السماء عن الأرض لذلك هاي سوالفك متمشي عليه احتفظ بيها لواحد غبي تعبر عليه، سركي كلبي جانت مؤثره قبل بس هسه لو تسويني سبرنكت كلبك ماعاد تأثر ابد.
محمد: ومنو ضحك عليج وكلج اني اريدج لو كاتل نفسي عليج عقلج هذا شغليه واخوج اللي شاده بيه الظهر ميكدر يسوي شي وي محامي لعبته القانون وملفات الفساد ومثل مضيعت أخوج قبل خمس سنوات وقلت رتبته أكدر اسوي أكثر هسه وأدمر عائلتج بالكامل لتخليني اصير مو أدمي بما انو قررت اتقبلج زوجه واعترف بلي ابطنج امشي ويايه عدل لاتعرفين العواقب شلون تصير.
ابتسمت وحجيت بثقه.
حوري: من ادمرهم كلي حتى اجي وياك ونشوف الحطام سوه وصدكني اني اتشمت بالكل لان الجميع مرحمني.
محمد: ليش يرحموج فضل من عدهم بقيتي عايشه وممتي.
حوري: كم مراهقه وبنيه ادمرت حياتها بسبب امثالك؟
ولتفكر حوبتنه تعدي لا بالله ربك ياخذها وان طال الزمان خلي نفسك مستعد متعرف بعقاب الله بأي طريقه يجي.
طلع من الغرفه واني نزلت يم عمتي البيت هدوء وهي مره لطيفه مثل امي تماماً يمكن لهذا السبب هن صديقات حيل، خلص اليوم ولازم اصعد للغرفه وهذا المزعج ما اتحمل وجوده يمي، غيرت ملابسي لتراك خفيف وفتحت الموبايل شفت رساله من ريفان جاوبتها وشغلت قصيدة لباسم ياسبحان مغير الأحوال بالوقت اللي جنت احبه بيه متركت اغنيه مسمعتها واعيش اللحظه واتخيل نفسي اني وياه نرقص على انغامها ضحكت على نفسي شكد جنت خبله بعض الأحيان ميحتاج سنين طويله حتى تكبر بالعمر بعض الاحداث اللي تصير وياك تكبرك بين ليله وضحاها وهذا وضعي حاليا احس نفسي عمري سبعين سنه على رغم العشرين موصلتلها، مندمجه وي القصيده حتى سمعت صوت حركه يم الغرفه خطرت على بالي فكره سريعه بحثت على النت وطلعت اغنيه فتحت شعري وعدلت كعدتي ومسحت دموعي بمكان ما اغث نفسي اغثه وارفع ضغطه واراويه الله حق، دخل ومبين عليه تعبان حقه الشغل وي المجرمين مبيه راحه، عليت الصوت وصرت اغني وي الأغنيه.
لك ساعة السودة العرفتك بيها
تريد اذكرك لو جنت ناسيها
وحدي عفتني بنص بحر
غركان بس الله الستر
دكيت دكه..دكيت دكه النذل ميسويها
غلطه وعليها تندمت..من جيت الك وتنازلت
اه امدا هذا الوكت..اه امدا هذا الوكت
خلاني اني احتاجلك تاليها
شبيه انا ماصدكت جويت ايديه وماتبت
اني شجاني تخبلت مديتلك ايدي وبعد تجويها
وسفه عفتني بلا سبب خليتني بنارك حطب
واله عشرتك لو ذهب ماتسوى عندي وبعد ما اشريها
اي والله صدقت يا حسام ساعة السودة اللي تعرفنا بيها على ناس متسوه اظفرنا.
خزرني ودخل للحمام وضرب الباب بعصبيه واني ابتسمت مستغله حملي والطفل لذلك ماخذه راحتي ميكدر يسوي شي وهذا قطره ابحر من اللي اريد اسويه بعدين.
هَيْصَم: شنو صار وياك؟
لائِث: الكيس بعده بالمختبر.
هَيْصَم: ولشوكت راح يبقى بالمختبر؟
لائِث: حتى يتم تبرأتك.
هَيْصَم: انت غبي شلون اتبرأ بهاي السهوله والكيس مطلعت نتيجته لحد الأن؟!
لائِث: راح تطلع كفاله وكلنه محامي لسيادتك.
هَيْصَم: ما أريد اطلع بكفاله خليني هيج مرتاح.
لائِث: ميصير تغيب عن المركز سيدي متعرف الوضع شلون صاير وانت مموجود.
هَيْصَم: مارس غبائك بعيد عني لان ما ألي خلك ابداً لسخافتك هاي.
لائِث: وين المشكله بلي كلته؟!
هَيْصَم: متوقف عن العمل تحت التحقيق يعني ما أكدر ارجع لمكاني السابق اذا متمت تبرأتي من الجريمه بشكل نهائي.
لائِث: والحل؟
هَيْصَم: خلي محمد يجي وانت تعرف شنو لازم تسوي عدل اعتمادي عليك لائِث.
لائِث: واذا تحولت للمحكمه شلون؟
هَيْصَم: اني اريد انحال محكمه انت بس سوي اللي كلت عليه ولتفكر هوايه.
عابد: صباح الخير سيادة النقيب هَيْصَم.
هَيْصَم: وجهك مورد الواضح سندس راضيه عليك.
عابد: راح أحاول اسوي نفسي مسمعت شي.
هَيْصَم: ليش مسمعت قابل سندوسه ملبستك تراجي؟!
عابد: وتالي وياك ليش متحترم؟!
هَيْصَم: حضرت نفسك حتى تنطرد؟
عابد: مثل محضرت نفسك للمحكمه.
هَيْصَم: بهاي صدقت كلش متحمسلها.
عابد: واخيراً شرف المحامي.
محمد: سبحان الله السيد هَيْصَم متهم؟!
هَيْصَم: هاي المره راح ادافع عن شخص ينتمي للدوله.
محمد: لا غلطان انت مجرم بوضعك الحالي يعني من جماعتي المفضلين او داعتك راح استقتل حتى تطلع من الحبس.
هَيْصَم: قرب موعد المحاكمه هذا اللي أريده واذا متكدر دبرلي محامي ثاني.
محمد: ازعل عليك لعبتي هاي اعتبر يومين ومحاكمتك تصير.
هَيْصَم: يوم، باجر اريدها.
محمد: تره هو مو فستان او اوصي عليه محاكمه هاي شغله بيها قانون وقضاة وسوالف هوايه.
هَيْصَم: وانت مينخاف عليك كدها.
محمد: لازم تستخدم واسطتك وتساعدني.
هَيْصَم: لائِث يساعدك المهم تسوي اللي أريده.
محمد: شنو المقابل؟
هَيْصَم: شنو تريد؟
محمد: الفلوس وصخ دنيا مثل متعرف.
هَيْصَم: غايتك شنو محمد؟
محمد: على رغم عدنا عداوه مستمره لكن ما اكرهك اني رجال مسالم مع هذا اريد شغله مهمه تخص قضيه معينه لازم تساعدني بيها.
هَيْصَم: مبيها مخالفه للقانون؟
محمد: لا شخصيه.
هَيْصَم: اعتبرها محلوله.
محمد: من احتاجك لازم تكون موجود وتساعدني.
هَيْصَم: اذا مو وي الباطل ادلل.
محمد: كتلك شخصيه.
عابد: خلصت نقاشكم نكدر نسولف هسه ونحقق لو لا؟
محمد: منين دخلت شو مشفتك؟!
عابد: من السكف.
محمد: طلع عنكبوت الأخ.
عابد: يكولون انك شاب حشاش بس استخدم هذا الأسلوب بعيد عن المركز والتحقيق اهنا لازم تحترم والا تعرف شنو نسوي بيك.
محمد: تهديد علني نقطه تسجلت ضدك.
هَيْصَم: معصب السيد الرائد الواضح سندس زعلت.
محمد: ايباه عندك سندس؟
عابد: راح اخذكم لغرفة التعذيب او اراويكم شنو أكدر اسوي بيكم بسبب التجاوز وعدم الأحترام.
محمد: خفت الصراحة خليني اسكت.
هَيْصَم: كون رجال وسويها حتى ورقة فصلك تجي على طبق من ذهب وبدون ما اتعب نفسي وياك بالتحقيق والأثباتات.
عابد: تهديدك ميخوفني.
هَيْصَم: هذا تنبؤ للمستقبل ليش تفكره تهديد؟
الرجال امثالنا ينفذون الوعود ميحجون حجي فارغ.
عابد: وأريد اشوف شلون تنفذ وعدك وانت بالسجن؟
هَيْصَم: تحتاج عمر بأكمله حتى تعرف منو الهَيْصَم وللأسف ماعندك رصيد كافي حتى تكدر تكتشفني بالشكل الصحيح، اني رجل خاويت الموت من الطفولة السيطره عليه وردعي شي صعب، اللي وصلتله جان عن طريق تضحيات ودم مو مثلك واسطه فلتفكر مجدر تفكير اطخ راسي لو انذل ومن عجائب الدنيا السبع تكدر تسجني وجودي اهنا بناء على رغبتي الشخصيه غير هيج محد يكدر يكلبج الهَيْصَم، غير اللي خلقك ماكو قوة بالكون تمنعني خليها حلقه بأذنك حضرة الرائد.
: الجو غيم وهو بارد يلفح وجهي رجعت بعقلي ذكريات الماضي وشلون جنت عايشه وي والدي بسعادة وبدون هم فززني صوت الموبايل مالت خالتي رحت يمها اركض شفتها صار وجهه احمر وضربت على صدرها حيل وصرخت بصوت عالي اني اهنا فقدت توازني وصابتني دوخه قويه تحول النور إلى ظلام دامس وصار اللي ممحسبيله..
يتبع..
البارت اكثر من 3800 كلمه.
شغله صغيرونه شمعاتي لتحركن القصه على المتابعات الجدد لان حلاتها بغموضها.
تصبحون على خير وعافيه.
حسابي الأنستا.