رواية الهجينة الفصل الخامس 5 - بقلم اسماعيل موسي

حطيت إيدي على وداني من شدة الصوت. البيت بيهتز كأنه هيغادر مكانه وأنا جواه. نفسي اللحظة دي تخلص بأي طريقة، لكن الوضع ازداد كارثية. شايف أطياف أشباح بتنزل بسرعة من على السلم. أطياف لرجال ونساء بيتجمعوا في الصالة. كيرا مش مبطلة مواء. عايز أهرب برا البيت بس رجليه مشلولة. الأشباح قربت من الصور اللي على الحيطة. الصور بدأت ترجع لمكانها تاني بعد ما كانت مقلوبة أو مايلة. الأشباح بتبص لي بغضب مش عارف ليه.

عاملين دايرة كبيرة ماسكين إيدين بعض وكيرا وسط الدايرة. خلاص مش قادر أتحمل، بصرخ من جوايا. الدايرة بتضيق على كيرا. خايف على القطة، عايز أساعدها بس مش قادر. فجأة من باب البيت دخلت سيرا. مشيت ناحية الجورمانوف. شغلت الموسيقى. الأطياف مشيت. مش قادر أستوعب الموقف. سيرا مش بتظهر بالليل. متهيأ لي كل ده حلم. اختفت الأصوات. سيرا قربت مني، قعدت جنبي. حضنتني قالت: "متخافش". سبت نفسي جوه حضنها. جسمي بيرتعش من الخوف.

بدأت أهدأ ونمت. لما فتحت عيني كان النهار طلع. كنت نايم على الكنبة، راسي في حضن سيرا اللي بتلعب في شعري. "إنت هنا فعلًا يا سيرا؟ قالت: "أيوه أنا هنا. النهار طلع خلاص، يلا قوم بلاش دلع." فضلت نايم في مكاني. لمست إيديها كانت رقيقة جدًا. تمنيت أفضل كده على طول. ظهرت كيرا اللي كانت اختفت من شوية. مقربتش منا، فضلت تبص ناحيتنا وتلف وتدور في مكانها. شاورت لها بإيدي، رفضت تيجي.

اللحظات دي لمسات سيرا أصبحت أكتر حميمية وإثارة. صوابعها اتسحبت على خدودي وصدري. كنت مستسلم باستمتاع. لحد ما فجأة كيرا نطت ناحيتي وقعدت فوق صدري. كنت بهزر، قلت لها: "إنتي بتغيري يا كيرا؟ كيرا مردتش طبعًا، بس حطت وشها على وشي. سيرا بعدت عني، قالت: "هحضر الفطار." قلت لها: "أساعدك؟ " رفضت. بعد ما سيرا راحت المطبخ، كيرا نطت من حضني، وقفت وسط الصالة وقعدت تبص لي بغضب.

خرجت برا البيت ولعت سيجارة ومشيت ناحية القبر اللي كان اختفى تاني. قعدت أفكر في نهاية الألغاز دي. سيرا اللي ظهرت فجأة. الموسيقى والأشباح وعلاقة كل ده بي. مشيت ببطء ناحية البيت. سمعت صوت في المطبخ. وقفت مكاني، متسرعتش. متأكد إن سيرا جوه البيت لوحدها. بس في شخص بيرد عليها. حاولت أسمع الكلام لكن الصوت كان واطي جدًا. فيه شباك قدامي اتسحبت ناحيته. شفت سيرا. وشفت بنت تانية بغاية الجمال والأناقة. جمالها خلاب وغير معتاد.

بسرعة مشيت ودخلت البيت ناحية المطبخ. سمعت حركة سريعة وملقتش غير سيرا لوحدها. كيرا كانت على الأرض بتلعب مع نفسها. مسألتش سيرا عن حاجة. أنا مش غبي، متأكد إن البنت دي هي كيرا القطة. مسكت كيرا وحضنتها. كانت بتقاوم بس أنا منعتها تهرب. خدتها وقعدت على الكنبة. مسكتها بين إيديا، قربتها مني، بوستها على خدها. مرة ومرات. كيرا كانت بتقاوم في البداية، بعد كده استسلمت لقبلاتي. فجأة سيرا وقعت الأطباق على الأرض اتكسرت كلها.

كيرا نطت من حضني وهربت. مشيت ناحية المطبخ، لميت الأطباق المتكسرة. سيرا كانت بتعاملني بغضب وعصبية. الشمس غابت، بس سيرا ما رحلتش زي كل مرة. قالت لي: "أنا هبات هنا في البيت النهارده. بعد اللي حصل امبارح مش من الأمان إنك تبات لوحدك." قلت لها: "كيرا معايا أنا مش لوحدي." غمزت سيرا بعينها وقالت: "ده سبب تاني سيد إسماعيل يخليني أبَات معاكم." قلت لها: "من إيه يا سيرا؟ قالت: "من الأشباح طبعًا. هو فيه حاجة تاني؟

حضرنا فشار وتسالي وقعدنا في الصالة نسمع موسيقى. أنا متكي على الكنبة، كيرا في حضني وسيرا قاعدة جنبي.