رواية حكم عاشق الفصل الرابع 4 - بقلم دنيا ثروت

رحيم: فردوس.. انتي طالق. فردوس بصدمة: إيه؟ رحيم بصوت عالٍ: زي ما سمعتي، انتي طالق. ولمي هدومك واطلعي برا بيتي، يلا. فردوس: حلو أوي، وأنا اللي هعوز بيتك يعني. لمت هدومها وجاية تمشي: انسي إنك تشوفي ابنك تاني. كملت في طريقها ومشيت. قمر طلعت من أوضتها: رحيم بيه. رحيم: مفيش فردوس هانم بعد انهارده، اتفضلي على أوضتك. *** فردوس كانت بتخبط على شقة عيلتها. افتحي ياماما. أميرة بصدمة: إنتي إيه اللي جابك دلوقتي؟ فردوس دخلت بغيظ،

رمت الشنطة على الأرض: طلقني ياماما. أميرة: يعني إيه؟ فردوس: يعني زي ما سمعتي، كان نفسي أرفع عليه قضية خلع بس هو اللي سبقني. أميرة ضربتها بالقلم: هو إنتي عايزة إيه ها؟ عايزة إيه؟ ابنك وخسرته، جوزك وخسرته، عايزة إيه تاني تخسريه؟ فردوس بعصبية: شغلي، مستقبلي، حياتي. أنا فضلت تسع شهور مبروحش القناة عشان اللي اتولد ده. أميرة: وهو مش إنتي برضه اللي قبلتي بالجواز؟ فردوس بصوت عالٍ: ومكنتش عايزة أتچوز برضو.

صالح: مكنتيش عايزة تتچوزي ولا كنتي عايزة تتچوزي الشمام إياه؟ أميرة: بابا، إنت ليه مصر تفكرني بحاجة فاتت الكل نسيها؟ إنت ليه مصمم؟ صالح بضحكة: أنا برضه اللي مصمم؟ شوفي نفسك وحياتك عملتي إيه فيها عشان بتحبي واحد تاني. فردوس: أنا مش بحب حد، ده مستقبلي وحياتي وشغلي، ولا بفكر في حد ولا غيره. ودخلت أوضتها بعصبية. *** اليوم التالي. هويدا بصويت على التليفون: يعني إيه؟ يعني طلقتها؟ والواد هيتربي إزاي ياعين أمك.

رحيم: أمي، ابني كان بيموت امبارح، عايزاني أخليها في البيت بصفتها مين؟ أم ولا زوجة؟ هي حتى مش ناجحة في واحدة فيهم. هويدا: وإنت يعني شوفت أنسب حاجة إنك تطلقها؟ رحيم: يعني إيه يا أمي؟ أعمل إيه؟ هويدا: كنت سبتها تخلعك، إنت عارف البت دي ممكن تعمل إيه. دي هتاخد الواد في حضانتها وكمان تاخد فلوس هي متستحقهاش. رحيم: أمي، اللي فردوس عايزاه تاخده، بس ماشوفش وشها تاني. كفاية بقى إنتي وبابا بتحددوا حياتي، كفاية.

وقفل التليفون معاها. خرج برا. قمر كانت واقفة مجهزة شنطتها. رحيم بصدمة: إنتي رايحة فين؟ قمر: أنا مش هقدر أقعد مع حضرتك لوحدي في البيت. رحيم: طب ويزن؟ بصت ليزن وهي شايلاه بدموع: هيوحشني والله، بس صدقني عيلتي وتربيتي مش هعرف. رحيم: طيب نوصل لحل وسط. قمر: إيه؟ رحيم: أنا أول ما أجي، إنتي اطلعي، وأول ما أمشي إنتي تعالي. قمر: وده هيحصل إزاي؟ رحيم: أنا هاجي بس هنا على النوم، وإنتي طول الفترة دي قاعدة بيه. إيه رأيك؟

قمر: اممم، موافقة. رحيم: عن إذنك، همشي دلوقتي. بيقرب على يزن، بيبوسه من خده: باي يا بطل. بيمشي من البيت. بعد مرور 10 دقايق. تليفون قمر بيرن، كانت أمها نيفين: قمر حبيبتي، عاملة إيه؟ قمر: بخير يا ماما. طمنيني بابا عامل إيه؟ نيفين: أه ياحبيبتي، بياخد أدويته وبخير، متقلقيش. إنتي هترجعي إمتى يا حبيبتي؟ قمر: هحاول أشوفكم قريب يا ماما، حاضر. نيفين: حبيبتي والله، وحشاني. الجرس رن. قمر: طيب ياماما، هقفل معاكي عشان مشغولة.

بتحط يزن على السرير، كان نايم. كان الجرس بيرن كتير. قمر بخوف: حاضر، جايه. فتحت الباب. فردوس بصوت عالٍ: جوزي بيخوني يا أعالم! الحقو يا أعالم! مقعد عشيقته في البيت وعلي سريري كمان! الحقوني يا أعالم!