رواية هي الاولى والأخيرة الفصل التاسع 9 - بقلم زهرة عصام

حسن بصلها برجاء، وأيسل بعدت نظرها عنده كأنها بتوصل له رسالة إن ملوش خاطر عندها. بصت له وهمست له بخبث: -قول لأمك، بما إنها رفضت تعتذر جوه، هتعتذري قدام الشارع كله. حسن جز على سنانه وحط إيده في شعره وقال: -وإن رفضت؟ أيسل هزت كتفها وقالت: -يبقى خلي الظابط يشوف شغله بقى. ولفت تمشي، فـ حسن قال: -خلاص، هتعتذر بس بينا وبين بعضينا. أيسل وقفت قدامه وقالت: -وهي لما مدت إيديها عليا كان بينا وبين بعضينا؟

ولما كانت عاوزة تشغلني خدامة وتهيني كان بينا وبين بعضينا؟ اللي عندي قولته. وأدي قاعدة، وقعدت على درجة من درجات السلم. حسن قال لأمه: -اعتذريها، ومشّي اللي هي عاوزاه دلوقتي يا أمي. هند بغيظ: -أنا آسفة. أيسل ببرود: -قولت قدام الشارع كله. هند: -لا بقى، دا إنتي ناوية على موتك النهارده. أنا هند اعتذر ليكي إنتي قدام اللي يسوى واللي ما يسواش. أيسل: -شوف شغلك يا حضرة الظابط. حسن: -خلاص خلاص، هتعتذر.

ضغط على إيد أمه جامد، وهند نزلت اعتذرت لأيسل قدام الشارع كله. وأيسل ردت عليها ببرود وقالت: -حضرتك زي أمي برضوا يا طنط. إبراهيم بقي واقف يتفرج عليهم وكاتم ضحكته على منظر هند وبيقول جواه: -أحسن، أهي دي اللي هتعلمك الأدب يا هند. هند طلعت جري على شقتها وهي هتفرقع من كتر الغيظ من أيسل واللي جبرتها تعمله. لقت الظابط بيديها ورقة وقال: -امضي هنا. هند: -وإيه دا يا حضرة الظابط؟ ما المحضر خلص خلاص. الظابط:

-دا عدم تعرض، هتمضي عليه إنتي وابنك عشان لو فكرتوا بس تقربوا منها هحبسكم. هند وحسن مضيوا على عدم تعرض. والظابط وقف قدام أيسل وقال بغمزة: -ها يا باشا، عاوزة حاجة تانية؟ أيسل: -تسلم يا سيد المعلمين. وبصت لحسن اللي مصدوم وقالت: -أعرفكم أشرف ابن خالتي وظابط شرطة. حسن جز على سنانه وقال بعصبية: -قولي كدا بقى إنكم طبخينها مع بعض. أشرف بحاجب مرفوع: -والله مظبطينها. أنا كنت هحبس أمك ست سنين بس لولا طيبة قلب أيسل. وبصلها وقال:

-أي حد هيعملها حاجة تاني أو يكلمها كلمة تزعلها، أنا اللي هقفله. إنتوا مفكرين مالهاش حد يقف ليها؟ لا اصحوا، أنا هنا ومش هسيبها أبدا. بت، وبص لأيسل، أي حد يكلمك كلمة متعجبكيش كلميني أنا. رجعت من السفر على اتصالك. أيسل بخجل: -معلش يا أشرف قلقتك، لكن إنت شايف الوضع. أشرف: -يا بت إنتي أختي، دا لو مكنتيش اتجوزتي كنتي اتجوزتك. حسن بصلهم بصدمة وقال بزعيق: