رواية سائقة التاكسي الفصل الحادي والعشرون 21 - بقلم يارا عبدالسلام

أميرة في حجرتها، تجلس علي السرير و تشعر بقلق و ارتباك، و تأتي لها هيام. هيام: بسم الله ما شاء الله، قمر ياخواتي ايه الجمال دا كله. أميرة: من بعض ما عندكم، هو في حد في حلاوتك، دا بابا أمه داعياله. هيام: شوف البت، ها شايفاكي قلقانة، مالك و منزلتيش ليه. أميرة: مكسوفة أوي يا ماما. كلهم شوفتهم و أنا راجل و بتهيألي البس نفس اللبس تاني انزلهم بيه. و يدخل أمير. أمير: امممم، انت اخدتي علي لبسي بأه، طمعانه فيه.

أميرة ضحكت: دا ليك الشرف، اني اتكرم و البس لبسك. أمير: طب أنا عندي فكرة حلوة. أميرة: يا خوفي. أمير: اسمعي بس، انا عندي ليكي مشروع حلو. انت تلبسي هدومي و اجيبلك تاكسي، اشغلك عليه و نقسم بالنص. أميرة: يا ظريف. و ضحكت هيام. هيام: انت مش حتخلصي منه، يالله الناس مستنية تحت. و تقف أميرة. و يصفر أمير. أمير: أوبا ايه الحلاوة دي، و حتسبيها تنزل كدا يا ماما. لتضربه هيام علي كتفه. هيام: يا واد اسكت البت بتتكسف.

فتخرج أميرة له لسانها و تخرج من الحجرة. و تنزل من علي السلم و معها أمها و خلفهما أمير، لينتبه الجميع لشدة جمالها و أناقتها و فستانها الرائع المنفوش و شعرها الذي طول قليلا و غطي كتفها و كأنها أميرة و هي أميرة. فضل: يا لهوي يا ما، ايه الحلاوة دي. عاطف: بقا دي كانت عندنا و في حتتنا، دي لو جات الحته بالمنظر دا حتقوم مظاهرات. تسلم أميرة علي الجميع و تأخذ عفاف بالحضن. أميرة: وحشتيني أوي يا طنط، و وحشني أكلك اللذيذ.

عفاف: حبيبتي، بيتنا مفتوحلك في كل وقت. و اعملك كل اللي تحبيه. علاء: احم احم، نحن هنا. أميرة تسلم عليه. أميرة: حبيبي يا لولو أخبارك ايه. علاء يبرق: لولو، لا كنتي خرسا أحسن. فتضحك و تلتفت فتأتي عينها في عين زياد. أميرة: أهلا يا دكتر. و تمد يدها للسلام. زياد بابتسامة و يسلم عليها. زياد: اهلا يا سطا، وحشت التاكسي. و تضحك أميرة. أميرة: و الله حتي انا وحشني. لتفاجأ بمن يقف و ينظر إليها و يقترب. ياسين يسحب يدها من يد زياد.

ياسين: الله الله، شغالة سلامات علي أمة لا اله الا الله من بدري، محدش قالك ان دا حرام. أميرة متجاهلة كلامه. أميرة: أهلا حضرة الضابط، انا مبسوطة انك جيت بعد اختفائك. زياد بغضب. زياد: هو انت بأه ياسين. ياسين ينظر له بقرف. ياسين: و انت بأه زياد. و تأتي أم ياسين. أم ياسين: شوف الواد: مش انت وصلتني و قلت عندك شغل. ياسين بابتسامة لأميرة. ياسين: هو انا اقدر اتأخر عن صاحبي. في جانب آخر، بسمة لأمها.

بسمة: أنا حقف بره شوية يا ماما، احسن اتخنقت من الزحمة دي. عفاف: اوعي تبعدي. بسمة: حاضر. و خرجت، هناك من يراقبها و ينتظر اللحظة المناسبة ليتحدث إليها. بسمة تقف بالخارج و تسند علي سور خارج باب الفيلا الذي يطل علي الجنينة. أحمد: شكلك مش بتحبي الزحمة. بسمة بخضة. بسمة: بسم الله الرحمن الرحيم، هو انت دايما كدا. أحمد بابتسامة. أحمد: آه، بحب أفاجئ اللي قدامي. تضحك بسمة. بسمة: دا انت حالة. أحمد: كنت عاوزك في كلمتين كدا ممكن؟

بسمة: اتفضل. أحمد بهيام. أحمد: بحبك و عاوز اتجوزك. فتتفاجأ بسمة و تفتح فمها مسبهلة. فيضم أحمد فمها بيده. أحمد: هو انت كمان علطول كدا. بسمة: علي فكرة انت جريئ اوي و مش كل شوية تعملي الحركة دي. أحمد: طب ايه. بسمه: هه. أحمد: بحبك. و يقرب منها و هي ترجع للخلف. أحمد: و عاوز اتجوزك. حتي تخبط في الحيطة فتدفعه و تجري للداخل، و يضحك أحمد علي منظرها. و يدخل خلفها و يذهب إليها و هي تقف بجوار أمها و أبيها. بسمة و هي تنظر له.

بسمة: يا نهار، دا جاي هنا. أحمد بابتسامة. أحمد: ازي حضرتك ، يا استاذ عبدالمنعم. عبدالمنعم: كتر السلام يقل المعرفة. أحمد: لا دا سلام خاص المراد. عبدالمنعم: مش فاهم يبني. أحمد: ممكن تجوزني بنتك. فيةزلوا جميعا و يأتي زياد. زياد: في إيه يا جماعة. و تفرح عفاف. عفاف: أحمد عاوز أختك. زياد: نعمة. عبدالمنعم: اصدها يخطبها يعني. زياد: هو ينفع هنا يعني.

أحمد: معلش يا جماعة، أنا لخمة شوية في المواضيع دي. قولولي أعمل إيه و أنا أعمله. يضحك أمير الذي كان بجوارهم و يتابع. أمير: ايه يبني الخيبة دي، كنت قولي و انا اخطبهالك. عبدالمنعم: عامة يبني احنا واحد و ابقي هات ابوك و المهم رأي العروسة. و ينظر لبسمة لم يجدها. عبدالمنعم: هي راحت فين. عفاف: اكيد اتكسفت و هربت في اي حته. و ضحكوا كلهم. زياد: عامة حضرتك تيجي انت و العيلة الكريمة و ربنا يعمل اللي فيه الخير.

-عند أميرة و هي تقف مع مامت ياسين. أميرة: حتسبيني بقي اعمل المحشي معاكي. أم ياسين: خلاص بقي، بقيتي من جنسنا. و ضحكوا. و تأتي لهم بسمة. أميرة: مالك يا بسمة، في إيه. بسمة بارتباك و تنظر خلفها. بسمة: هاه لا ابدا مفيش حاجة. أحمد فجأه. أحمد: بتهرب مني. فتشهق بسمة و تضع يدها علي قلبها. بسمة: لا كدا كتير انت حتموتني ناقصة عمر. تضحك أميرة و أحمد. أميرة: اتجوزيه و هو يبطل و خدي حقك و خضيه انت. بسمة باحراج.

بسمة: اسكتي يا أميرة، الله. أحمد: هو احنا لسة حناخد رأيك، دا المأذون زمانه جاي و مش مروحة انهاردا. فتزبهل بسمة و تفتح فمها و تبرق عينها و يعمل احمد نفس الحركة و يضم فمها. أحمد: ييه. أميرة: اخص عليك ياحمد براحة عليها. بسمة: علي فكرة انا حوافق عشان آخد حقي منك بس. أحمد بفرحة. أحمد: بتتكلمي جد. بسمة: لا خلاص رجعت في كلامي. و تتركهم و تعود لأسرتها. فتفرح أميرة و تحضن أحمد. أميرة: الف مبروك يا حبيبي، ربنا يتمم بخير.

و تنتهي الحفلة و يبدا الضيوف في المغادرة ، ما عدا البعض بناءا عن طلب أيوب. أيوب: يا جماعة كلكم ليكم فضل عليا بمساعدتكم لبنتي و انا لو عملت ابه مش حوفيكم حقكم و لساني يعجز عن الشكر. حامد: دا اقل واجب، و حقيقي أميرة بنت جدعة و كلنا حبيناها. أحمد: وانتم كلكم اهل لينا من دلواتي و انا مستعد لخدمة اي واحد فيكم. عبدالمنعم: تسلم يبن الأصول.

و يدخل حلمي من الباب و قد حلق ذقنه و يلبس بدلة، و يتفاجأ به الجميع و تقف أميرة مندهشة و مرتبكة. أيوب: اتفضل يا حلمي. ينظر أميرة لأبيها باندهاش، فينظر لها بحنان و يقترب منها. أيوب: حلمي حصله حاجات كتير و أخد الدرس، و هو متقدم زيه زي أي حد و انت لكي حرية الإختيار. و أمامك كلهم متقدملك زياد و كابتن رائد و فضل. و يقترب فضل.

فضل: علي فكرة ، انت مكنتيش تعرفي عني كل حاجة، انا بساعد اهلي في الصيد صحيح، بس انا معايا كلية هندسة و قدمت في شغل و اتقبلت الحمد لله و حبدا من بكرة. أميرة بابتسامة. أميرة: و الصيد مهنه شريفة متعيبش صاحبها. ثم نظرت لهم جميعا.

أميرة: صراحة انتم كلكم لكم فضل عليه و انا عمري ما حقدر ارد جميلكم، و كلكم اخواتي. بس بصراحة، انا حكمل تعليمي الأول ابل ما افكر في الجواز و انا لسة صغيرة و مش حوعد حد فيكم ، لأني معرفش الزمن ممكن يغير فينا ايه. ثم ذهبت باتجاه حلمي. أميرة: انت شخص كويس و كل انسان ليه اخطاءه و اتمني تكون تعلمت من الي حصل و سوزان بنت كويسة و بتحبك متسيبهاش. و فجأة يصفق ياسين.

ياسين: برافو برافو، حقيقي حقيقي ، انسانه متتعوضش. و اللي يصبر عليكي باه لما تخلصي جامعة تكوني جبتي كام عريس، الي خلاكي من دلواتي كل دول وراكي و ما خفي كان اعظم. الكل ينصدم من ردة فعله. عماد: اهو دا اللي انا عامل حسابه و البركان بدا في الانفجار. أيوب: هو انت اتقدمتلها اساسا. ياسين: هو في حد بيتقدم لمراته. و يتفاجا الجميع و يتحدثوا جميعا فيما بينهم و تذهب إليه أميرة بغضب.

أميرة: انت نسيت نفسك و لا ايه و ناسي انها كانت لعبه عشان نهرب من العصابة. ياسين: لعبه، لا انت اللي نسيتي و جوازنا صحيح و رسمي. و نظر لحامد. ياسين: و لا ايه يا جدي و قد حدث بيننا خلوة كما قال الجد حامد. يصعك الجميع من كلام ياسين. أيوب: حصل الكلام دا يا عم حامد. حامد: الصراحة يبني آه، و انا اللي أصريت انه يكون رسمي، لأنهم ، كانوا مع بعض كتير بسبب الظروف اللي اتحطوا فيها. أميرة تنظر لأبيها.

أميرة: والله ما حصل حاجة يا بابا. أيوب خاف علي بنته. أيوب: متخفيش يا حبيبتي و اهدي، كل حاجة حتتحل. و ينظر لياسين. أيوب: ممكن تتفضل معايا في المكتب. عبدالمنعم: طب احنا حنستأذن. أيوب: أرجو محدش يزعل يا جماعة، وانتم شفتم بنفسكم اللي حصل. الكل استأذن و أحمد لحق بعائلة زياد. أحمد: ممكن أوصلكم. زياد بحزن. زياد: لا متتعبش نفسك، احنا جايين في التاكسي. و نظر لأميرة. زياد: أميرة عارفاه كويس. أحمد موجها كلامه لعبدالمنعم.

أحمد: طيب ممكن استأذن من حضرتك نبقي نزوركم. و أرجو اللي حصل ميغيرش ما بينا. عبدالمنعم: تنورونا يبني، وكل شيئ نصيب. و ينصرف الجميع و في حجرة المكتب ياسين و أيوب و أحمد و أمير و في الخارج تجلس أم ياسين و تجلس معها أميرة و هيام. أم ياسين: إوعي تزعلي يا أميرة، و أنا والله ما اعرف انه حيعمل كدا، ولا أعرف انه حييجي خالص. هيام: ان شاء الله خير، بس انت مؤولتيش يا أميرة ان حصل زواج رسمي. أميرة و عنيها علي المكتب.

أميرة: انا نسيت الموضوع كله و هو نفسه تجاهله و من يوم ما وصلني، اختفي و معتش كلمني. تنظر أم ياسين لهيام بابتسامة و كذلك هيام. أم ياسين: يعني لو كان كلمك كان حيفرق. أميرة بكسوف. أميرة: هاه، لا مقصدش، قصدي. هيام بهزار. هيام: لا واضح واضح. و يفتح أمير باب المكتب. أمير: أميرة تعال. و تذهب أميرة و تدخل و تنظر لياسين ثم تتوجه لأبيها. أميرة: نعم يا بابا. أيوب: محكتليش ليه علي اللي حصل دا كله. أميرة بخضة.

أميرة: هو قالكم إيه. أحمد: كل حاجة. أميرة بارتباك. أميرة: يقول اللي يقوله، انا معملتش حاجة غلط. أمير: طب اهدي وشك راح ألوان كدا ليه. أميرة تنظر لياسين. أميرة: ايه هدوءك دا يا أخي، متتكلم. ياسين: انا كل دا ساكت، عشان اشوفك انت حتعملي ايه. أميرة بعصبية. أميرة: و متوقعني أعمل إيه، بعد مسيبتني و اختفيت و مهانش عليك تكلمني و لا مرة. و الكل انصدم منها و هي و ياسين نسيو انهم موجودين معاهم و بدأو يتخانقوا.

ياسين: مشوفتيش اللي عملتيه في الفندق. أميرة: عملت إيه. ياسين: فرحانه أوي و انت رايحة مع عماد لبيت زياد و كأنك متجوزة قرطاس، بمجرد ما قالك نسيتي اني جوزك. أميرة: مكنت تعترض في ساعتها و بعدين اخواتي و وحشوني. أمير: انا حاسس انكم مش بس اتجوزتم، دانتم خلفتم. فينتبه ياسين و أميرة. أحمد: و بعدين ما تكملوا. أميرة بكسوف. أميرة: أنا، أنا. ياسين بجدية.

ياسين: انا آسف يا جماعة و انتم عارفين الي حصل و اضطرارنا للجواز بالطريقة دي. و تأكدوا ان بنتكم صاغ سليم و عمري ما جبرتها علي حاجة و لا حجبرها. ثم يوجه نظره لها و بصراحة أنا حبتها و اعتبروني بتقدملها من جديد و لو هي رفضاني انا، انا مش حطلقها برده، انا مقدرش اعمل كدا. فينفجر الجميع ضحك. أمير بضحك. أمير: أنا حاسس إننا في مسرحية كومبدية. ياسين: والله انا مقدرتش اقولها. ثم نظر لأميرة برومانسية. ياسين: صعبة عليا.

أميرة وجهها اصبح الوان و موطية راسها في الأرض. أحمد ينظر لأبيه. أحمد: أنا شايف ان حالتهم صعبة أوي. أيوب: أنا شايف كدا برده. أمير: و بعدين نشوفلهم دكتور. أيوب بجدية. أيوب: طب يبني، انت كدا بتقدملها رسمي، بعيدا عن ان انتم اتجوزتم مسبقا، فسيبنا نفكر و نرد عليك. ياسين: و ليه متفكر حضرتك و آخدها معايا بالمرة. أميرة: نعم، شوال رز جاي تشيلو معاك. ياسين: يعني مش عاجبك. أميرة: لا طبعا. ياسين: يعني مش عاوزة تيجي معايا.

أميرة باستفزاز. أميرة: لا. ياسين: متأكدا. أميرة: اه. ياسين: حتندمي. أميرة: مش حندم. ياسين: سلام يا عمي استأذن و خرج. أميرة بصدمة. أميرة: دا مشي يا بابا. أيوب بضحك. أيوب: و انت عاوزة ايه. أميرة: مش عارفة. أمير بهزار. أمير: بحبه يا بابا. أيوب: طب لما نروح اسكندرية نخطب لأحمد حنشوف الموضوع دا. و خرجوا من المكتب و كانت المفاجأة.