رواية سباق بلا نهاية الفصل الثاني 2 - بقلم فونا

يا مريم! بعد مرور الوقت... بدأت أفتح عيوني بتعب. كنت في أوضة غريبة عليا، متعلق لي محلول ويوسف أخويا كان قاعد جنبي. أول ما شافني صحيت قرب مني بلهفة: _مريم أنتِ كويسة؟ قلت بتعب: _إيه اللي حصل؟ قال بعتاب: _اغمي عليكي بسبب الدواء اللي بتاخديه. بصيت له بهدوء والصراحة مهتمتش لأنه عرف. خدت نفس عميق وقومت من على السرير بتعب. فقرب مني بسرعة: _رايحة فين بس.. أنتِ تعبانة ولازم ترتاحي. شيلت الكانولا من إيدي بهدوء:

_هرتاح في بيتي. وطبعًا يوسف معرفش يتكلم لأنه عارف إنها عنيدة! ركبت عربية يوسف وهو بدأ يسوق في صمت. قطعته أنا: _مين جابني المستشفى؟ _بنت من اللي معاكي في الكافيه مع شاب تاني. _مين الشاب ده؟ _معرفش بس أول ما عرف إني أخوكي اطمن ومشي وقال هو ويتعامل مع الراجل اللي اتخانقتي معاه. بدأت افتكر الأحداث اللي حصلت في الكافيه وافتكرته! هو هو نفس الشاب اللي كان في السباق.

يوسف روحني البيت واطمن عليا وراح لشركته وأنا فضلت طول اليوم نايمة من التعب مقدرتش أتحرك. صحيت بعد نوم طويل وببص في موبايلي لقيتها ٩ بليل. قومت وبدأت أجهز... لبست بنطلون أسود جلد، وعليه توب أحمر بنص كم، ولميت شعري ديل حصان، وحطيت ميكب خفيف. آه كنت في المستشفى الصبح بس مستحيل أنزل وأنا مش مرتبة. خدت المهدئ... وبعدين نزلت ركبت الريس وبدأت أسوق لمكان معين. أول ما وصلت مكان السباق ابتسمت بمتعة. _إيه اللي جابك هنا؟

_وأنت مالك؟ عند چون بعد ما وديتها المستشفى وأخوها جه والدكتور بلغنا إنها بتاخد مهدئات بكميات كبيرة. بعد كده انسحبت بهدوء من وسطهم وطلعت ركبت عربيتي واتجهت للقسم عشان أخلص شغلي وأشوف هعمل إيه مع الراجل اللي اتخانقت معاه. بعد وقت طويل كنت تعبت، قومت من مكاني واتجهت لعربيتي وركبتها... روحت مكان السباق مش عارف ليه بس لقيت نفسي في المكان. ركنت العربية وكنت لسه هنزل لقيتها! هي إزاي كانت تعبانة الصبح وجت هنا بليل! نزلت

بغضب مكتوم وقربت منها: _إيه اللي جابك هنا؟ _وأنت مالك؟ ردت عليا ببرود وأنا الصراحة اتنرفزت. نزلت من الريس وكانت هتمشي بس وقفت قدامها: _ما تتكلمي عدل معايا. _وأنا مش عايزة أكلمك أصلًا. ومشيت من جنبي بكل برود ولا كأني واقف! دخلت هي جوا وأنا دخلت وراها بضيق ومش عارف هي عنيدة كده ليه! دخلت وقعد مع الشلة اللي كانت عبارة عن بنتين وهي التالتة وولدين. دخلت وقعدت وسطهم بكل برود فبصتلي وقالت ببرود: _لازق ليه خير. _وأنتِ مالك.

ضحكت بخبث لما لقيت ملامحها اتحولت لضيق. قعدت بكل راحة فواحد من الولاد اتكلم: _ده يا ستي چون.. لسه منضم جديد معانا. ردت مريم بضيق: _وهو أي حد معدي كده يبقى معانا ونثق فيه. كملت كلامها وهي بتبصلي _مش يمكن وراه مصيبة. خلصت كلامها وهي بتطلع من جيبها علبة واتصدمت منها! _أنتِ بتشربي سجاير! ضحكت بسخرية: _السجاير دي تشربها العيال اللي شبهك. بصيت لها بعصبية وبعدين اتصدمت: _أوعي يكون اللي في بالي. ضحكت.

فضلت شوية واخد وضع الصدمة... وأنا اللي كنت بقول عليها كتكوته... ده أنا اللي كتكوت! كانت لسه بتولعها فشدتها منها بعنف ورميتها. _أنتَ مجنون أنتَ إزاي تعمل كدا! _لو أنتِ مجنونة أنا أجن منك.. مستحيل أسيبك تشربي الزفت ده! _وانت مالك كنت ولي أمري! بصيت لها في عيونها جامد: _حاجة شبه كده. بصت لي بنرفزة وكانت لسه هتتكلم بس قاطعتها:

_ويكون في علمك لو مقومتيش دلوقتي حالًا كل أخبارك هتكون واصلة لأهلك واعتقد أنتِ عارفه إيه اللي ممكن يحصلك!! عند مريم أول ما خلص كلامه بصيت له شوية وبعدين نطقت بكرة: _كلكم شبه بعض. قومت من مكاني بسرعة وركبت الريس.. البنات حاولت توقفني بس كنت أسرع منهم ومشيت بسرعة. وأنا بسوق بدأت مشاهد مقرفة تيجي قدام عيني. _أنتِ بنت عاقة! _مش هتخرجي عن طوعي أبدا! _يا أنا يا اللي في دماغك! _اطلعي برا بيتي أنتِ متستحقيش تكوني بنتي!

مشاهد كتير أوي وكانت كلها قساوة من الست هانم! حتى مش قادرة أقول عليها ماما... أنا مكنتش كده! كنت بنت طبيعية بتحب الحياة لغاية ما بابا اتوفى وكل شىء اتغير. بلا وعي كنت بزود السرعة وأنا مش حاسة... ومش شايفة بسبب دموعي اللي كانت في عيني. دقايق ولقيت نور أبيض قوي في وشي، سامعة زمارة عالية، ناس بتصرخ... وفي لحظة كنت منطورة أنا والريس بسبب الخبطة اللي اتخبطها في عربية قدامي جاية عكس.

اترميت على الأرض وأنا حاسة إن كل عضمة في جسمي بتوجعني... حسيت سائل دافي نازل قدام عيني... صوت ناس بتصرخ... وناس بتنادي وتقول إسعاف... وأنا الرؤية بقت مشوهة قدامي.. بصيت جنبي كانت الريس ومتكسرة ميت حتة... وهنا دموعي نزلت بغزارة لأنها كانت آخر هدية جات لي من بابا. وفي وسط كل ده سمعت صوت: _متخافيش يا مريم.. مش هسمح للموت ياخدك مني.