تحميل رواية «ابي والغزلان للكاتبة ريام هادي (REEM)» PDF

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_السابع_والاربعون

حاجيني

يعشك صباي

هاذا انه الرحت مني

اذا دربك

يزت غربه ..

زواتيتي الصور ذني ..

"انه الناحل "

" انه المتعوب "

"انه اليتوسل المكتوب"

جتال الشمس الغروب

انه ذاك .

العطش جفه عله جف محبوب ..

انه المالاكي بيه انسان...

جبت انه العمر مصيوب...

انه ذاك

اليلجمنه

سراكي البوب ..

غنتلي الصور والناي

وقريت بحسرتي المشطوب ..

ريم : يارب لتحرك گلب علي ونوريه ب حسين كله ولا هو اااااه ياحسين رجع حبك بگلبي ينبض بقوووه

نهر : شنو هذا الحجي السمعته

ريم : كعدت بلكاع وايدي على راسي ودموعي تنزل

نهر : يمه ريم فهميني شصاير شنو حشد شنو رايح

ريم : باوعت على عمه واحجي ودموعي متسكت مثل مسمعتي حسين رايح للحشد

نهر : هو حسين مال حشد اخاف اشتبهتي

ريم : سمعنا صوت باب وطلعت عمه ودخلت شمرت الشال على راسي سحبته ولبسته

نهر : تعاال يمه عمار ادخل

عمار : السلام عليكم

ريم : بقيت على كعدتي والله حيل مابيه اكوم

عمار : ضل بالي عفت المطعم واجيت اركض

ريم : احلفك بعزيز گلبك احجيلي شجاب حسين على الحشد

كعد وعمه يمه واني بلكاع على كعدتي مسحت دموعي واسمعله

عمار : قبل كم شهر شافني مره مرتين اروح اودي مساعدات وارجع وجان يساعد بلقاسمه الله ومرات يجيبلي من الجماعته المتمكنين وقوت علاقتنا كمنا مرات حتى نطلع نشتري الغراض سوه ومره جان مخنوك وضايج سألته شبيك كاال امور عائليه مردت اضغط عليه اقترحت عليه يغير جو  ويجي ويايه

ريم : اي مو رايحين للمول ويغير جو استغفر الله

عمار : يمعوده اسمعي تره مااكمل

نهر : لا يمه فدوة لطولك كمل گلبنا نار عليه

عمار : اخذته ويايه وعجبه الوضع شلون الشباب واحد يشد من عزيمه الثاني وشلون ميهابون الموت ويذبون روحهم بلنار في سبيل الشهاده والتحرير  وكام كل فتره من اروح او يروح واحد من الولد يجلب وياهم وخاصه الفتره الاخيره من عرفت عايف اهله وكاعد بشقة ولد صاحبه هلمره من يروح يبقى كم يوم وميرجع حتى مره بقى اسبوع وحذرته تره هاي مو لعب جهال وتكضيه وقت هذا موت وهو جان يبتسم ويكول مو احسن من الماتو

عرفت اخينا بالله مأيس لو عاجبه الوضع لدرجه ميكدر اذا ميروح واخر فتره من خطبت غزل والتهيت بلتجهيز والعرس كمت مااروح واكو ولد بلطوبجي يروح وهو چلب ويااه ومن خابرت على جماعه هناك اعرفهم نازل صارله يومين كاال شفته بلخطوط الاماميه وكايله تعال انزل ويايه ومقابل ينزل

ريم : صخام بوجهج ينوريه عساها بحضج وبختج انتي وانعام

عمار : هسه غير على كيفج المن ادكين وتلطمين الولد مابيه شى ان شاء الله

ريم : يا مابيه شى صار اسبوعين مختفي وتلفونه مغلق

عمار : المكان الي هو بيه شبكات ماكو واكيد اذا حصل شبكه يطمنكم

نهر : يمه عمار ولو ثقلنه عليك ارجع خابر الولد بلكت عنده عرف احد هناك ويحصله ويبلغه يرجع

عمار : اله يلتحق الولد يله لان كتلج عمه ماكو اي اتصال هناك

ريم : كمت من الكااع اختنكت بعد حتى حيل مضل بيه اسمع وصعدت فوك

عمار : عمه اعرف حسين رايد ريم حجالي قبل مده كلشي بس استحيت احجي كدامها تره حسين حيل مأيس وتعبان وبهاي حركته رايح للموت برجله

نهر : يمة حسوني سودة بوجهي كون بكلمن حرك گلبك ولا بيك شلون يمه اني هسه روحي شابه نار عليه والله احسه ابني مو ابن اخويه فدوة اروحلك شوف جماعه منا منا لازم اكو احد يكدر يوصله

عمار : هم اروح لجماعه بلكت الله يوصلون اله هسه بس لو افهم شبقاه الغبي مو كتله هاي الفتره الاوضاع موزينه

نهر : حظه يمه وحظ هاي المكروده ماشافو يوم عدل الهم الله ياابني لتنسى عفيه

عمار : شون انسى عمه من رخصتج اروح للشغل تإخرت

نهر : الله وياك

صعدت على ريم فتحت الباب لكيتها كاعده متربعه بلكاع وايدها على راسها

يمه ريم على كيفج ان شاء الله مابيه شى

ريم : رفعت راسي واحجي ويه عمه والله كتله ارجع ليش هيج يذب روحه للموت يعني هاي تصرفات واحد عاقل دوم جنت اكول حسين مو جريئ ميجازف ويوم مجازف ذب روحه للموت بله صار عليه شى والله ياعمه خلص گلبي من الموت هلمره مراح اتحمل اذا صار بيه شى مااكدر اكون قويه تعبت احارب واتعارك واوكف بوجهه الكل تعبت وحق كلام الله ورسله تعبت

الموت اكثر من مره اشوفه ورجلي تاخذني اله واطلع منه هلمره مراح اكدر اطلع ميعرف حسين كعد يأذيني مو يأذي نفسه ولا اهله

نهر : كعدت كبالها وكتلها بعدج تحبي

ريم : جريت نفس قوي اوووووف حبيته من كل گلبي لان هو اول شاب حسسني اني بنيه احب واتحب اول واحد تغزل بيه بعد مجنت يأسه بيوم اكون مثل البنات العاديات اول واحد حبني لداخلي ومعيرني بلبكع مالتي وحتى عيونه جنت من اصفن شلون يباوعلي يحسسني اجمل وحده بلدنيا  جنت دوم اشوفه صديقي نصي الثاني شيال همي متحمل خبالاتي وكاحتي اكثر واحد بلدنيا يقراني والوحيد يكدر يغير مزاجي اذا مختنكه وضايجه ومن عرفت بيه يحبني وميعتبرني اخته فرحت وطرت من الفرحه كمت احلل كل حركة منه كل اهتمام وعرفت شكد يحبني ومتعلق بيه ويوم معافني جان صدمة عمري انتظرته هواي يصحح الي سواه واستنتجدت هو يحبني بس جبان مو كد حبي واني اموت ولا الي احبه يكون متردد وجبان ومهزوز

عشت حياتي وشمرت السواه وره ظهري وصرت زوجة لانسان مااحبه بس احترمه واقدره وحبيت بمرور الوقت العشره وياه وسبحان الله رغم برود وهدوء سامر الله يرحمه واختلاف اطباعنا بس كنت احب احترامه وتقديره ودخلت الموده بينا وعشت وصرت ام وماخنت سامر حتى بفكري والله شاهد عليه واعتبرت الصار الي درس ولازم استفاد منه بس الدنيا بطلت تنطي دروس وتعلم الدنيا بدت ويايه تضرب وتكسر بدون حتى متنطيني مجال اتنفس وخسرت الانسان المفروض اكمل حياتي ويااه وخسرت عائلتي ورجعت لنقطة الصفر بس هلمره رجعت وگلي جروح وقهر وكل مااريد الملم حياتي واكول هانت اوكع على وجهي حتى ابني الي بقالي من كل المريت بيه اكثر الاوقات بعيده عنه مره بمرض مره بمشاكل واخر مره هزمتوه لان اخاف اخنكه يعني حظ ابني مو احسن من حظي الله وكعه بأم يوميه عايفته

نهر : ليش تحجين هيج ريمه شو تيومي روحه بيج واشوفج شلون مداريته وتخافين عليه من الهوا شو حتى متنامين اله ينام بحضنج

ريم : جنت دوم اكول يوم مااصير ام مستحيل اصير مثل سندس تخاف وتشمر جنت اكول احطه بروحي واخلي يكول عندي ام والنعم منها

نهر : وانتي ممقصره وياه

ريم : لا مقصره وقصرت هوايه بسبب وبدون سبب وصار ايام افكر ارتب حياتي لعيونه مااريده يعتاز احد ولا يحس روحه اقل من غيره وبس التفتت اله اجتني ضربه حسين القاضيه اي عمه ضربته قاضيه خوفه واهتمامه بيه لا ارادياً حيه الشى البداخلي الي توقعته انتهى ومات وراح ومايوم اعيد الغلط وأمن بيه لان خذلني والخذلان ماكو اصعب منه دموعه ولهفته ومواجهته لاهله وكملها شمر روحه للموت خله هذا الگلب ينبض ويشتاق ويخاف ليخسره

شسوي هسه اني على حافه بركان بأقل حركة غلط مني اوكع وتبلعني النار

نهر : شوفي ريم الصار كله قدرج ومكتوب على كصتج من يوم ولادتج وهاي اراده ربج والدنيا متوكف على واحد ولا على عزيز وغالي تمشي لو تمشين وياها وتعيشين لو توكفين بمكانج وادوسج وتمشي انتي بيدج تحددين

تدرين قبل يومين شصار بيه

ريم : شصار

نهر : شفت سامي

ريم : وين شفتي فتحت عيوني مستغربه

نهر : شفته بلسوك يمشي وياه مرته ركزت زين واشوف ولد بطوله واكف بصفه هستوه خط الشارب بوجهه وبنيه حليوه محجبه لازمه امها وبنيه حدود ١٦ سنه تمنيت الكاع تبلعني ومااشوفه شلون مشت حياته بدوني

ريم : بعدج لهسه تحبي رغم كل سوالفه

نهر : مو قضيه حب بس قضيه شلون تأمنين بشخص وتسلمي حياتج وتتحدين الكل وتاخذي وتالي يدوسها ويمشي يكمل حياته بدونج

ريم : زين هو شافج

نهر : اي شافني وفات بصفي ولا كأنه يعرفني تمنيت بلحظتها يرجع الزمن بيه واعيشه الي عايشته هسه غلطتي بقيت واكفه ومامشيت ويه الزمن

ريم : مفهمت

نهر : جنت دوم اكول يجي يوم ويتندم وتدمر حياته مثل مغدرني صحيح اجه وتوسل ارجعله بس مقابل  ارضى بنص حياة اشاركه ويه زوجه ثانيه بقيت عايشة على الاطلال والاوهام صحيح الله رحمني بيكم وصرتو انتم بناتي وحياتي والف  الْحٍمَدٍ للـّہ بس جان المفروض اتزوج واعيش شبابي الضاع واني افكر بسامي وانتظر شى مصار ولا راح يصير

وكفت والدنيا مشت وداستني تمنيت من شافني بلسوك ميشوفني وحدي يشوف رجال يمشي ويايه اوصله فكرة بأن مبقيت عايشة انتظر المستحيل  او يمكن طفل من صلبي تمنيت وتمنيت لحد مااختفى من مرمى نظري وضاع بلسوك بين الناس

بلحظتها عرفت الدنيا مشت وداستني

ريم : حضنتها لعمه وكتلها مدوسج واحنا وياج احنا بناتج وجهالنا احفادج اصلاً بدونج احنا جان ضعنا يجوز انظلمتي لان مكملتي حياتج بس حياتنا بدونج مجان كملت والله جان تشردنا وجان وحدتنا هسه الله اعلم شنو حالها كلشي صار لسبب

نهر : عفيه هذا الردته اوصله الج كلشي صار لسبب وانتي هم خربت حياتج لسبب وهذا الديصير هسه بيج هم لسبب بس مااريدج توكفين وتفكرين بلراح بعدج صغيره والعمر كدامج ومااريد بعد سنين تتعرضين لنفس موقفي وتمشين بلسوك وتشوفين حسين هو وزوجته وجهاله وتتندمين لان انتي المفروض تكونين مكانها انتي اللازم تتمسكين بالانسان الديحارب هسه لخاطرج انسي الصار كله وامحي وابدي صفحه بيضه ويااه وانطي فرصة هلمرة حسين مستقتل عليج تره شمر نفس بلموت من حسج حتى انتي ضده حتى انتي متردي وكأنه يحارب وظهره للعدو

ريم : خايفة يخذلني

نهر : الي شاف الموت يرضى بلصخونه وانتي شفتي اشكال اكيد هلمره راح تكون عندج مناعه من الصدمات ولتخافين حسين انجوى وشاف لوعت فراكج وشفتي شلون عاقب اهله اكو اقوى من هيج

ريم : خايفه ليصير عليه شى  حييل خايفه

نهر : اقري الحصانه دوم بگلبج اله وادعيله الله يرجعه بلسلامه

ريم : ياارب يرجع بلسلامه

نهر : كومي بنيتي غسلي وجهج وتعوذي من الشيطان الافكار الموزينه والفال الموزين اذا بقى بعقلج يصير تأملي خير برب العالمين وماضاقت الا وتفرج  كولي ياالله

ريم : ياالله وكمت غسلت وكعدت احاول اهدأ ومااخاف واكول هسه يدك هسه يراسلني هو ميكدر يعوفني هيج

غزل : كاعده انظف اني وبسمه وخاله تنظف خضره واندكت الباب رحت البس شى فوك ملابسي وانزل اشوف منو سمعت هوسه حطيت الجبه على جسمي وجريت الشال ونزلت بعدني بأول بايه فوك واسمع رجال يكول وبعلو صوته

يعني تزوجها الرافضيه وكسر حجايتي وحجايه عمامه وخاله تكوله قسمته والبنيه يحبها وهي ورده مال الله وحبابه

عرفت هذا عمه الي قبل مده سواله هوسه خليت وكعدت على الدرج خفت انزل ويتهجم عليه او يسوي شى وعمار مراح يسكت اله

ام عمار : هسه تزوج شتردون منه

يطلكها وياخذ من ثوبه وحده من بناتنه يله نرضى عليه

ام عمار : شنو لعب جهال هو غير تزوج وكدام الناس على اي اساس يطلكها وهي العيبه مطالعه منها

اسمعي ام عمار ابنج اذا ماطلكها واتزوج من بناتنه والله نتبرى من عنده ومنكم كلكم وحتى اودي ورقه لشيخ عشيرتنا يفصله من العشيره

ام عمار : بيا حق تفصلوه هو شسوه قابل بايك ناهب تزوج حاله حال كل الشباب والبنيه بت عائله وناس ومتدينه والله اليوم كله صوتها مااسمعه

هذا العندي ماطول كسر كلمتنا ماله مكان بينا لو يطلكها ويحترم نفسه لو ليشوفنا وجهه ولا يجي بيوم يكول عندي عمام

غزل : اسمعه واكل بشفتي معقوله يطلكني لا ميسويها عمار

رجع العم يعيط ويصيح ابنج لو شريف ميتزوج الي كتلو ابوه واخوه تكول عبالك اني الي كتلتهم هذا شبي من كل عقله بقى يعيط وعمه التزمت السكوت شويه واسمع صوت عمار صخام هذا شجابه

عمار : خير شكوو صوتك واصل لراس الشارع

باع عينه الكويه غيرك واحد يطم روحه

عمار : على شنو بله

عرفت تزوجت هاي الرافضيه

عمار : وانت شعليك

شنو شعليه غير عمك اني

عمار : واني ماعندي عمام

ام عمار : يمه على كيفك ويه عمك

عمار : اسكتي يوم انتي

هااج هذا تربيتج وين اخويه عنك جان عرف شلون يحط طلقه براسك وانت تعلي صوتك على اخوه

عمار : وابويه ذاك بلمكبره روحله اشكيله مني

مطلكها موو

عمار : اطلك منو

هااي الفوك

عمار : اول شى مااسمحلك تكول هاي الها اسم ومتشتغل عندك وثاني شى طلاك مااطلك وشتريد تسوي الك ايدك ولا انت ولا الي تسميهم عمامي يهموني واذا الشيخ مالتنا قبل على سوالفك انت واخوتك وفصلني من العشيره اني ميشرفني ابقى بيها واطلع منها بكرامتي واياك تدخل بعد لاهل بيتي وتتجاوز وتعيط هلمره راح اسكتلك عليها مره ثانيه وروح اخوك واخويه انسى انت عمي وتشوف مني وجهه مراح يعجبلك خليني محترم عمرك

والله انت فلا تستحي وناقص غيره ونامس شترجى الي يضيع دم اهله اغسل ايدي منه

عمار : اي عفيه اغسلهم بتايت وصابون وعطرها وره متغسلها

غزل : كمت اكل بأضافيري من الخوف وزاد العياط لحد مطلع العم وسد الباب وراه وهو يهدد نزلت اركض ردت اوكع على وجهي من الدرج

عمار : الله الله على كيفج جان وكعتي

غزل : عفيه بيك شى

عمار : ههههه شبيه اخبل

غزل : مو سمعت عمك

عمار : خلي يطير بطران هذا

ام عمار : يمه اخاف يفصلوك من العشيره

عمار : انتي من كل عقلج يفصلوني هذا اذا مرزله الشيخ وطرده اني اعرفه واعرف ابنه ناس اوادم واصحاب حق وميرضون بسوايه عمي

غزل : انت شجابك

عمار : خابرتني بسووم وينها الجبانه اكيد خاتله

بسمه : هياتني اكو غير درب الفلته كلت اخابرك خفت يسوي شى لغزل

عمار : حتى اشمره من فوك لو بس صاعد الها مو عاد يلمس شعره منها

غزل : ابتسمت رغم الخوف الي بگلبي

عمار : ماطول جيت خلي اتغدا هو اليوم ضرب كل شويه طالع

غزل : ليش شعندك

وكعد سولفلي على حسين واعرف هسه ريم گلبها نار عليه

كعدنا تغدينا ورجع للشغل خطيه يروح منا ويجي منا مكضيها نفرات ومن نروح لبيت اهلي ناخذ تكسي وره مباسني وطلع صعدت فوك طلعت الفلوس العندي وطلعت البتوت مالتي اربعه (سوارات) والملوي وتراجي جمعتهم وحطيتهم سوه وانتظرته يرجع بليل

بس رجع من الشغل لكاني كاعده انتظر

عمار : هااا حبيبي شو كاعده وحدج بيج شى

غزل : اي واريدك تسمعني

عمار : ياستار تره راسي يوجعني فدوة لطنكرين

غزل : لا مااطنكر اذا متسمع كلامي

عمار : احجي اسمعج

غزل : هاااك وحطيتهم بصفه

عمار : شنو هاي

غزل : الفلوس الي انطوها الي اهلي وياهم الذهب بيعهم بلكت يجيبون سياره حتى لو سايبه مستعمله اسمها سياره نروح ونرجع بيها

عمار : تخبلتي اخذ منج فلوس وذهب حتى اشتري سياره والمن اشتري داروح ب٥٠٠ وارجع ب٥٠٠

غزل : بس متبهذل ومرات كوه تطلع وحتى منطلع نفتر من وره التكسيات فدوة عمار هي الك والنا اني لا محتاجه الفلوس ولا الذهب بس احنا محتاجين سياره مرتين شفتك شلون ادوخ من تتعب خاله وتريد توديها للمستشفى وخاصه بليل تضطر ادك باب الجيران علمود السياره لشنو بعد هذا العذاب

عمار :حبيبي لتعبين نفسج اني من يصير عندي اشتري خليهم الج كاام وحطهم بحضني حاولت شكد اقنعه قافل اخر شى عااط وكاال كاافي سدي الموضوع سكتت وحطيتهم على الميز مرجعتهم ردت اكسر الحاجز الي بينا مااريد كل واحد بجهه وميحس بلثاني

ايام والفلوس والذهب محطوطات على وضعهم لا اني مرجعتهم ولا هو اخذهم

بس دوم احسه متوتر لحد مابيوم رجع واحس الدنيا طالعه من عينه

شبيك عموري حبيبي

عمار : مابيه شى حبيبي ليضل بالج

غزل : كعدت بصفه وبسته من خدي وكتله بداعتي شبيك

عمار :محسن حيل خانكني ومضوجني اليوم تلاطشنا اني ويااه

غزل : عموو شعجب صاير شى بينكم

عمار : من يوم متزوجتج واني على هذا الحال ومرتين ردت ابطل من وراه وابوج الي يلزمني لخاطره ابلعها واسكت بس فاض بيه وبعد مااتحمل وروحي واصله لخشمي كل مره اكول رجال جبير واخاطر شيباته ساكت وهم الرجال اله مواقف حلووة بعيني قبل ولهسه بعدهن بعيني لهذا ساكتله بس حيل طوخها وكام يمسلت وبعد مااتحمله من باجر مااروح بعد واشوفلي غير شغله

غزل : على كيفك ياعيني لتتعصب والله عمو محسن وردة مال الله وحباب وكلش طيب

عمار : ليش مااعرف كتلج اكو مواقف حلوة وياه بس هسه حيل ديأذيني واعرف السبب وحتى يتقصد يقلل من قيمتي كدام العمال وابلعها بس بعد مااتحمل واني كله ولا واحد يمس كرامتي هو شغل لو ذله

غزل : وبابا شيكول

عمار : الرجال هم تعب كل شويه لازمه وحاجي ويااه وايده على گلبه لنتعارك والله لو بعمري لو شويه اكبر لا امدده بلشارع اشبعه گتل بس رجال جبير واعرف سبب خبالاته هاي الفتره

غزل : لخاطري بس هلمره ارجع ولتبطل

عمار : اذا ارجع راح تصير جبيره ويجوز مااتحمل بعد كلمة منه

غزل : فدوة بس هلمره

عمار : الله كريم منا لباجر تعاال بحضني خلي ارتاح

تمددت بحضنه وافكر شلون اعدل الوضع مباشره غفى من التعب واني ابتعدت من حضنه لان نام وبقيت افكر اذا يبقى هيج الوضع اكيد راح يبطل عمار

ثاني يوم اتصل على عمو محسن ميجاوب خمس مرات دكيت وميفيد وتوسلت الصبح بعمار يروح ويجفي الشر وهو راح لخاطري وره مراح هم رجعت اتصلت بعمو وميجاوب باوعت صارت الساعه ١١ الصبح

رجعت اتصلت بعمار وكتله اريد اروح اشوف ريم لان تعبانه راح اخلي عابد  يوديني بتكسي  وهو قبل بدلت بسرعه ونزلت سلمت وانطيت الكروه لعابد مقبل ياخذ عابد حباب وهادئ وماعنده اذيه اكثر وقته لو بغرفته يقرا لو يطلع ويه جماعته بس على الغدا تصدف نكعد سوه

اخذني ودخلنا لبيت اهلي لكيت ريم حاطه ايدها على راسها ورافعه تك رجل وصافنه على التلفزيون دخلت حتى محست بيه

هلووو ريموو يمعوده

ريم : هااا غزوله ولج بيج شى

غزل : لا اجيت اشوفكم

ريم : منو جابج

غزل : عابد وين ماما

ريم : تصلي

غزل :  ورشا

ريم : بلمدرسه

غزل : شلونه وضعج

ريم : على حطت ايدج

غزل :وحسين

ريم : اي خبر عنه ماكو حتى خابرت اليوم عمار كال مدنحصله وهم على اساس اهله كالبين الدنيا ويدورون عليه

غزل : الله يرجعة بلسلامه

ادعيله ولتمردين روحج هيج باعي وجهج منتهي وجوه عيونج كلها سواد

ريم : نومي قليل رجعت اسهر وعيني متاخذ نوم

غزل : فدوة موزين عليج ميصير هيج مصار فتره من طبتي منريد توكعين وتتأذين

ريم : كاعده وساكته وانتظر الفرج

غزل : ان شاء الله تفرج

ريم : غزوله ليش جايه احجي من الاخير وجهج الف حجايه بيه

خابريلي عمو محسن خلي يجي ولتكولين اني موجود

ريم : ليش صاير شى

غزل : وكعدت سولفت الها الصار

ريم : جريت الموبايل جان بصفي واتصلت جاوبني

محسن : هااا سكينة شلونج

ريم : هلوو عمو شلونك وين انت

محسن : بلديسكو هو اكو غير المطعم

ريم : تكدر تجي هسه

محسن : خليها باجر

ريم : لا حباب عندي شغله ضروريه وياك

محسن : هسه تطلع شغله فاكسه

ريم : يله عموو تخجلني

محسن : انتي اخر وحده بلعراق تخجل يله نص ساعه واني يمج

ريم : جاي بلطريق

غزل :كملت ماما صلاه وبوستها

ماما سليل شلونها صار يومين ممخابرتها

ريم : زينه تروح وتجي للدوام وبطنها كدامها ولا تكولين ٥ اشهر عليها عبالك ٨

غزل : بلكت توم مااخذت سونار

ريم : على اساس الاحد موعدها ويه الدكتوره وتاخذ

نهر : اصب تاكلن يمه

غزل : لا جاي عمو محسن واريده بشغله

كاعدين نسولف وسمعنا صوته فتحت الباب اله ماما ودخل شافني رجع خطوه وكف مصدوم

غزل : لهاي الدرجه مطايق تشوفني وحتى اتصل متجاوبني

محسن : لو ادري بيج هنا ولا اجي هااا ريم متوقعتها منج

ريم : اني البيه كافيني انت وياها اني صاعده فوك اشوف تيم كعد لو لا

نهر : واني اكمل شغلي

غزل : تعال عمو

محسن : اريد اروح عندي شغل

غزل : الله عليك اكعد شويه وروح بس احجي وياك كعد بصفي مدلغم وضايج وميباوع بوجهي

اعرف بيك ضايج من الصار  واعرف بيك تحبني بس اني لو راجعه لفيصل جان ادمرت جان حياتي هسه جحيم

محسن : بس هو اجه يرجعج انتي استعجلتي وانخطبتي

غزل : عمو انت ذكي وتعرف كلشي يعني انت ثاق ابنك رايدني زوجة اله يحبني ويراعي الله بيه اثنينا اني وياك نعرف هو ميطيقني ومن رجع لخاطرك انت السبب بكل الصار بيه وبيه هم عيشتني تجربه المفروض مااعيشها وانحسبت متزوجه لواحد ميطيق يسمع اسمي ولا يشوفني وهم عرضت علاقتك ويه بابا بأن تنهدم شوكت تقتنع فيصل ميريدني ولو راجعه اله جان رجعني بذيج الشقه وحدي مكابله التلفزيون والحيطان

محسن : اني ردت سعادتكم مردت ينهدم كلشي

غزل : ياسعاده عموو وماكو شى بينا اني ويااه انبنا حتى ينهدم اني سنه كامله گباله عينه كل وقت مكلف نفسه يوم واحد يكعد ويايه ويسألني انت شلونج محتاجه شى مرتاحه ضايجه اطلعج الغربه الي همه اصدقائه جانو يسألون عني حتى وكت العمليه موكف ويايه يعني رجال لاوكت الفرح ويايه ولا وكت الحزن شسوي بيه بعد اني ويه فيصل شفت ايام بارده خاليه من اي مشاعر والله الي يربي بزونه سنه بيته هم يحن عليها وابنك محن لو اموت يدفني حتى الله يرحمها ميكول خصم الموضوع فيصل مجبور عليه وكلشي بلجبر ينكرهه

محسن : وهسه انتهى كلشي ليش دازه عليه

غزل : دزيت عليك من حبي الك تعرف معزتك شكبرها بگلبي واعرف اني بنتك الماخلفتها اتذكر مره خاله كالت جانت حامل وره فيصل ومات الطفل وكالت جان دوم يكول محسن ردتها بنيه تزورني من اكبر وتحن عليه لان البنيه حنينه اكثر من الولد واني احبكم ومن دخلت بيتكم وعشت وياكم صرت بتكم والله لخاطرك ولخاطر بابا وافقت على فيصل وحاولت بكل الطرق اتقرب منه بس هو ميريدني وهذا الغلط جبرته على شى ميريده وميتقبله ولا راح يتقبله

عمو اذا صدك تعتبرني بنتك ارضى بلي صار هسه اني اتزوجت انسان مراعي الله بيه ومداريني الله عليك لو بنتك ومن صلبك متكيف لان مرتاحه وسعيده

محسن : حتى لو مو من صلبي انتن بنات طه بناتي وانتي بلذات معزتج جبيره بگلبي

غزل : اذا بنتك صدك افرحلي وتمنالي الخير وانسى بيوم جنت مرت ابنك كلها فتره ويتزوج ويعيش حياته عوفه هو يتحمل نتيجه اختياره ومااريدك تحقد على عمار وتصير مشاكل بينكم متعرف شكد يحبك ويقدرك

محسن : شكالج الطايح الحظ

غزل : مو شكوه والله هو يريد يبطل في سبيل ميطاخخ وياك وتصير مشاكل

محسن : المطلوب هسه شنو

غزل : لتزعل ولا تضوج وتبقى عمي الغالي وبمقام ابويه سحبت ايده ودنكت ابوسها سحبها ودنك باس راسي وكاال

محسن : مهنايه بنيتي ولو اكولها على عمة عيني بس كلشي قسمه وهذا رجلج اني اله عرف شلون يبوك جوهره متقدر بثمن شلونه وياج زين لو يلعب بذيله كولي حتى اكصه اله

غزل : ههههه لا والله كلش زين وحباب ومرتاحه حيل ويااه

محسن : الله يحفظكم اني شريد غير راحتج وسعادتج ومبين لكيتيها ويه عمير

غزل : هههه اي

محسن : اروح اشوي على اذنه بصل اخاف يزعلج حتى يعرف عندج ظهر مو بس طه

غزل : الله يحفظكم الي

محسن : اروح اني وسلميلي على ريه وسكينه

غزل : يوصل

طلع وحسيته رضا بالامر الواقع وحيل ارتاحيت

ريم : بعد مجنت اذبه بكل مكان ومااهتم اذا دك صار الفون سلوتي مكابلته وكاعده اريده يدك اريد ولو خبر منه گلبي يوم بعد يوم يورم خوف عليه ردت خبر يريحني وتمر الايام واي خبر من حسين ماكو لدرجة حسيت بديت افقد اعصابي واتعصب على اي شى يضوجني

احنا هسه بنهايه الشهر الخامس ٢٠١٧ ورشا ملتهيه بالامتحانات عدها مراقبه هاي الفتره هادئه وساكته ومتذكر لا جنات ولا شعلان حايره بفرح وحتى شعلان مبين ولا اجه سإل عن بنته

كاعده يم تيومي وعفت غزل جوه ويه عمو محسن تراضي

اجت رشا وصبينا اكل وكاعدات نسولف  وناكل  محسينا غير الباب تريد تتكسر وانفتحت ودخل عمو سجاد يعيط على عمه نهر بسرعه البسي سليل دتنزف

سليل : جنت بلدوام يوم عادي مثل اي يوم سجاد راح للحسينيه وكال اتأخر عليج مااكدر ارجعج ارجعي تكسي ويه صفاء بنيه بلقسم مالتي هو بطلني من الخط بعد مشترى سياره بسيطة ويدويني ويجيبني طلعت ادور على صفاء جان اشوفها صعدت ويه مدير الاداره مالتنا كاعده ليوره هي واثنين بنات اشرت اصعد اني مقبلت كلت اخذ تكسي وارجع وحدي مشيت شويه طبكت سياره بصفي

تعالي ام زين تفضلي اوصلج ويه البنات

شكراً ابوتحسين اخذ تكسي هسه

صفاء : يمعوده اصعدي شوفي الجو شون نار وين بيج حيل توكفين

بقو يلحون ومقبلو يرحون حيل انحرجت وكفتنا بلشارع محلوه الرايح والجاي يباوع قررت اصعد بس المصيبه المكان الوحيد المتبقي بلسياره ليكدام صعدت واني ايدي على گلبي كلت قابل شيصير شو سجاد وماكو وكال اتأخر بقيت اكل بروحي طول الطريق شلون صعدت بعدين اكول قابل شمسويه زميل بلدوام وصعدت

حظي الاسود نزلو البنات قبلي بقيت اني وصفاء المفروض انزل وارجع ليوره استحيت هسه شيكول السايق مالتها بقيت على كعدتي ونزلت صفاء بلفرع القبل بيتنا

وصلت للبيت هستوني اريد انزل واتشكر من الرجال والكه سجاد بلباب اجاك الموت ياتارك الصلاه كمت ابلعم والله من الخوف احس راح اجيب واني ٥ اشهر عليه

نزلت والرجال راح وصلت يمه اباوع عليه عيونه بنص راسه

سجاد : خوش والله هلمره زلم توصلج للباب

سليل : اسمعني عفيه ولتتعصب جان يجرني من ايدي حيل احسها انخلعت واني اكله عفيه على كيفك بطني

سجاد : اليوم احركج واحرك الخلفوج ولج شلون راكبه سياره رجال غريب وين تلفونج لهاي الدرجه محاسه بروحج وانتي ويااه وكاعده ليكدام شنو هذا السقوط الانتي بيه

سليل : عيب هذا الحجي سجاد شنو محاسه بروحي رجال محترم ومصعدت وحدي ويه ٣ بنات

سجاد : والبنات وينهن طارن

سليل : والله نزلهن قبلي

سجاد : جان المفروض عليج متصعدين اني شموصيج مو كايلج سوالف الزملاء

والسرسر لوغيه مااريدها جم مره كتلج لو اني ارجعج او تاخذين تكسي انتي وصفاء

سليل : اي يعني من ناخذ تكسي مو رجال غريب شمعرفنه بيه اقلها هذا نعرفه

جان يلزمني من شعري حيل تخبل انكلب طنطل عليه اريد افهمه ماكو قافل

سجاد : شنو تعرفي ولج عندج شى ويااه

سليل : عيب عليك والله تعرفني اني مال هيج سوالف وانت اذا جاي من وكت ليش ممريت عليه

جان يعوفني ولزم الجنطه طشر الغراض الي بيها وفتح تلفوني هاااج شوفي جم مكالمه

اباوع ٧ مكالمات صخام بوجهج سليل هاي شلون الزكها

كمت امتمت واكله والله البنات ويايه وممسويه شى غلط

سجاد : اني محذرج لو لا

سليل : اي بس شسوي اذا البنات صعدو ويااه

سجاد : تاخذين وحدج تكسي وتنجبين وترجعين وحدج

سليل : كمنا نتعايط واحاول اقنعه ومفاد واني منا تعبانه من الحمل ونفسيتي زفت كم اعيط عليه كاافي زهكتني متعبت بس تشك شايفني جايبه رجال للبيت ولكيته بفراشك

جان يضربني حيل على حلكي كمت ابجي واعيط لتضربني مسويت شى انت مريض شكاك شكد مااحاول اكون زينه واسمع الكلام تگلبها عليه كل هاي هوستك والله ليش رجعتي ويه موظف وليش كاعده ليكدام

سجاد : لج لسانج ضبي وصوتج نصي ااخ لو ما حامل اله اجفص بطنج وازوعج دم

سليل : شسوي سوي متهمني كاافي تعبت من شكك وهوستك لطبين لطلعين لتمدين راسج هذا لتحجين وياه هذا ليش باوع عليج يعني انت ماعندك ثقه بيه شلون مبقيني على ذمتك

سجاد : تخبلتي شلون مااثق بيج

سليل : لا متثق واليوم اكبر دليل داكلك مو وحدي مو وحدي واستحيت انزل واكعد ليوره والتلفون مسمعته قابل كفرت جان يجرحني حيل من الربطه خنكني الدنبوس ويعيط ويكول

سجاد : ماكو طلعه بعد ولا دوام انتي مو ادميه مو مال واحد يبقيج بلوظيفه

سليل : مو بكيفك وماابقى ساعه هنا دفعته وصعدت الدرج وهو تخبل صعد ورايه ديجرني حيل وزلكت رجليه وجان اوكع على بطني شاغت روحي وعطت

سجاد : سليل بيج شى

سليل : الحكني سجاد احس شى نزل وكمت اشهك

ريم : طلعنا نركض ويااه لبيتها ونشوفها نايمه على ظهرها ونازل دم منها وتشهك

نهر : الرحمن بنيتي شجاج

سليل : ماما راح يموت ابني فدوة تلاحكو اله

شالوها بسرعه  وعمه راحت وياهم ورشا واحنا رجعنا للبيت وگلبنا نار عليها

سليل : طول الطريق اقرا ايات معودت صرت حامل جنت حاقده على سجاد حيل لدرجه ماطايقه اشوف وجهه وصلنا للمستشفى وطببوني للطوارئ واجت دكتوره النسائيه وانطوني ابر جنت اصرخ الم وقهر گلت هذا هو مات ابني

نهر : شصار متفهمني

سجاد : مو وكته نهر

نهر : شنو مو وكته والبنيه سابحه بدمها

رشا : على كيفج عمه مكعد تشوفي هو هم متوتر هسه خلي نشوف وضع سليل وعود وراها نعرف الصار

طلعت الدكتوره وكالت الطفل حالته حرجه كدرنا نوقف النزف الجاره نازله ولازم تنام على ظهرها وتوقعو تجيب بإي لحظه لازم تبقى نايمه على ظهرها ومتتحرك

هي حامل بولد ادعولها تكوم بلسلامه

رشا : اباوع على عمو صاير نار مبين شغله جبيره كالت كم ساعه وتكدرون تاخذوها

نهر : ناخذها للبيت عدنا

سجاد : ماعدها بيت شعدها يمكم

رشا : عمو على كيفك شبيك عصبي

نهر : شوفي شمسوي مكسوره تعالي انطب لاختج

سليل : جنت اون من الالم وراسي راح يطك وخايفة حيل

نهر :  الْحٍمَدٍ للـّہ على سلامتج يمه

سليل : الله يسلمج ماما مات موو

رشا : ياستار شلج بهذا الفال مابيج شى بس تنامين على ظهرج وكلشي تمام ناخذج ويانه بلبيت ونتناوب على رعايتج بس كون عمو يقبل

سليل : ماارجع ويااه للبيت اااااخ بطني

نهر : ليش شصاير

جان يطب وكاال  الْحٍمَدٍ للـّہ على سلامتج درت وجهي منه مااريد اشوفه

نهر : سجاد ناخذها يمنا ترتاح وبعدين ترجع للبيت

سجاد : متطلع خارج بيتها تردون يوميه وحده تجي يمها ماعندي مره تبات بره

رشا : حسيت وكأنها بايته بلشيراتون

سالمين عمو لو ما بينا كم بيت وبنفس الفرع

سجاد : كلت متبات بره

سليل : واني ماارجع وياك للبيت على كص رگبتي

سجاد : مو هي تايهه وكلمن اله

نهر : عوفها هسه وكافي تشلع افادها متشوف وضعها من ترتاح اتفاهم وياها

ساعات ورجعنا بس قبلها عمه خابرت بابا وفهمته لكينا بابا واكف باب بيتها

سليل : ماارجع للبيت وكمت اشهك

سجاد : واني كلت مطلعين منه وتنجبين وتسكتين

رشا : على كيفك ويااها عفيه متشوف وضعها

وكفنا بلباب اشر بابا لسجاد يفر السياره ولبيتنا

سجاد : هنا تبقى

حجي طه : بدون مشاكل خليها كم يوم ترتاح واريد افتهم شجاكم خلي يبرد الصار ونفتهم واذا الك حق تاخذها من عيونا مو بس عيونها

سجاد : خلي تكعد بيتها واني ابات بلمحل

حجي طه : هسه شلك بهاي الهوسه خليها بين خواتها وهم عينهن عليها وانت بيتك لتصعب الامور سجاد

سليل : رجع دخلني لبيت اهلي راد يشيلني مقبلت وارتكزت على رشا وماما جنت بلحظتها منهاره وخايفه

دخلت للصاله لكيت البنات فارشات الي ومحضرات كلشي واجن يركضن عليه

وهو مدخل

ريم :  الْحٍمَدٍ للـّہ على سلامتج شصار

سليل : حسيت بتعب وضيق ونزلت دموعي وكمت اسولف كلشي وهنه يسمعن محد علق وخاصه اجه عمار ياخذ غزل لبست ربطتي وطلعت عليه

الله يساعدك

عمار : ويساعدج ام تيم

ريم : معرفت شى عن حسين

عمار : والله مااعرف شكول بس الاخبار مطمن ماكو واحد تواصلت ويااه طمني كالو صارت البيوت متفخخه والجوامع كام يأذون جماعتنا حيل وشهداء هوايه اكو

ريم : كاافي عفيه لتكول شهداء

عمار : صار يومين اركض هنا وهنا علموده متعرفين معزته عندي وبلكن الله نسمع شى

ريم : اي شى تسمعه ماعسى الفجر خابر بروح ابوك

عمار : صاار

يله غزوله نروح

غزل : اي حبيبي بس ابوسهم واجي

ريم : مر يومين وخلصتها سليل نايمه بس خابرت وبلغتهم بلدوام وضعها الصحي موزين وقدمت اجازه مفتحنا موضوع وحتى سجاد مبين

كمت انام يمها اخاف تحتاج شى وبصفنا تيم وزين ينامون

فزيت مخروعه كابوس مزعج تعوذت من الشيطان وكمت باوعت بلشاشه مال الفون الساعه ٣ كمت على كيفي وكعدت بلحديقه الجو حار ونسمه هوا ماكو وافكر بحاله هسه نايم كاعد محتر صاير بيه شى وينك حسين مو راح اموت من وراك شويه واحس احد كعد يمي ياستار ورايه ورايه

رشا : سمعت طكت الباب عرفت انتي

ريم : ليش منايمه

رشا : افكر

ريم : بلصخول مو جنات وشعلان

رشا : قررت شى

ريم : ياستار ولو قرارات الليل مااكل بيها مثل الزبد بس تطلع الشمس تذوب

رشا : لا ولج اسمعي قررت مااتابع اخبارهم بعد ومالي دخل بيهم

ريم : لا واضح القرار زبده لورباك الاصليه

رشا : ولج والله احجي الصدك

ريم : وليش هذا القرار

رشا : تعبت منهم تعبت افكر بحياتهم واني حياتي مالها وجهه ولا ملامح أذوني واخذو كلشي مني ومامستعده انطيهم الباقي من عمري الله ياخذلي حقي منهم اخذت جزء كافي هسه همه ممرتاحين من يوم ماعفته وهو من مصيبه لمصيبه وتسوه عمره من توسل بيه ورفضت هذوله الثنائي اذا ابقى العمر كله احط عقلي وياهم مراح اعيش

واذا صار شى بيهم وداعتج متنضم ماكو شى بهذا الوكت ينضم

ريم : الله يهديج افضل قرار همه الخسرو وذيج جنات ذليله لشعلان حتى من يكتلها مالها مكان تروحله

رشا : الي عجبني اهل زوجها الاولاني شلون مااخذو ابنهم رغم عرفو متزوجه

ريم : يجوز انطاهم كم فلس وسكتهم همه من الاول غايتهم الفلوس

رشا : ميهمني بعد اهم شى عندي بنتي ودراستها ومستقبلها وهمه عساهم لا تهنو ولا ارتاحو

ريم : امين خيه هسه ممكن ترجعين لفراشج وتنامين اريد ادعي اريد افضفض عفيه بيت بس الطلايب وراكم محد يكدر يجر نفس بيه

رشا : حضنتها وبستها كومي نامي اعرف بيج بالج يم سحليه گلبي بارد حاسته يرجع

ريم : لو بس يتصل ارتاح

رشا : المسكين جان يريد حرف منج تحسسي بعد اله مكانه بگلبج خلي يجي ويشوف الخوف الي بعيونج اوويلي اهل الحب صحيح مساكين صحيح مساكين

ريم : يله ام كلثوم نروح انام لتكلب تاليها رعد الناصري

رشا : ههههه يله

ريم : رجعت نمت بصف سليل احسها منايمه بس تتگلب

سليل : تعودت انام على ريحته وبحضنه يومين ضبطت عليه وراها اشتاقيت اله بس هو تعبني كلشي حساب كاعده اكل وبصفي ماما تحاول تهدي الوضع واجت ريم تربعت وكعدت كدامي

سليل : هااا شبيج

ريم : شوكت ترجعين لبيتج

سليل : ارجع وره سوايته

ريم : لتصيرين نبي سليل تره انتي راكبج الغلط اذا مو مثله فأكثر منه

سليل : كومي من يمي ريم

ريم : اعرف الحق ينزعل منه رجلج تعرفي صعب ويغار ومكان عقله حاط طابوكه وقافل وصارلج سنين ويااه تعرفين كلشي يكرهه ويضوج منه تجين تسوين اتعس شى يكرهه وتردي ياخذج بالاحضان ويكول عااشت ايدج ام زيون مره ثانيه اريدج انشط سويها ويه مدير المصرف

سليل : شو انتي متعرفين تحجين شنو اسويها ويه مدير المصرف اكلكم ويايه بنات

مو وحدي

ريم : بس هو شافج وحدج وياريت عديتي الوضع وبلعتيها وخليتي يعيط ويهدأ وتفهمي لسانج رشاش اول تالي تحجين ويه عمو سجاد هيج هذا حبيب الگلب الي السطح لا مو هذا السطح ذيج السطوح تشهد دموعج جنا انشفها وراج بلماسحه ونصدر مياه للدول الاقليميه

خلصتيها تنوحين عليه شبسرعه نسيتي حبه

سليل : مانسيت وبعدني احبه بس تعبت من الشك كل الوكت والتحقيق وحسره اسوي شى اتعاقب

نهر : من ايدج يمه انتي ردتي وذبحتي روحج عليه والولد گلج الف مره هذا طبعي راح تتأذين

ريم : وهي زفوني مااريد العشا ومن اكلت العشا كالت ايييع مطيب مااحبه

سليل : انتم شبيكم ضدي وطابكين ويااه

ريم : مو ضدج بس ويه الحق اذا هو غلطان انتي هم غلطانه هو استعجل واتعصب وهوس المفروض تسكتين انتي دومج هيج ويااه وراها من يبرد تاخذين حقج منه

سليل : تعبت ريم مو بيدي والله مرات ارق من النسمه يصير ومرات وحش

ريم : عمو الوحش بعد يااختي الكبيره تعرفين  روحه بيج ويغار عليج كلش ويتحسس اي واحد يباوع عليج او تضحكين ويه احد يجوز هو شويه مزودها بس هذا طبعها ماغشج الرجال

سليل : بس هم ماارجع اله اتوبه

ريم : لعد راح تضلين هوايه تنتظرين لان ميتوب هو زين بهاي عقليته مخليج اداومين

سليل : بس حارمني من هواي شغلات وحابسني

ريم : وهذا الشى جان على گلبج مثل العسل لتضلين اطلعين عيوب بلرجال وهاي العيوب هي سبب حبج اله

وجان تجي رشا هاااج ابوقاسم الطنبوري شحصلت من الحب شوفيها جنها بزونه معلكه من ذيلها بنخله والفار يلعب عليها

رشا : هااا شكوو

ريم : تعالي اكعدي هذا الفريق الوطني مال الرعايه الاجتماعيه لازم يكمل راح غزل رجعت سليل يله اطلكي ويرجع الفريق يكمل وينور

سليل : حجت احمد راضي

ريم : تره اضرب بطنج هااي الصايره طوبه واخليج هسه تجيبين هدي اللعب ثلل لترجعين تنورين السطوح

سليل : حييل صار شكد مسامعتها

ريم : ياريتنا ماكبرنا وبقينا انصيحلج ثلل جان اعظم همي بلدنيا الجهال يلعبون ويايه وعلاكة الحلويات من سحليه وشلون اغث بيبي انعال واخليها تعيط

رشا : اي والله ياريتنا ماكبرنا

ريم : اكوم اسبح

نهر : اكعدي راح يصير المغرب

ريم : بس المغرب مالتج ساعه ٣ الظهر والله عليج سوالف عمه

كمت ودخلت للحمام اسبح جوه الدوش جان انسب مكان الي تنزل دموعي بدون مااتحاسب عليها بس محد يسألني ابجي لحد ماارتاح ومن اطلع ويسألوني ليش عيونج حمره اكول الهم من الصابون

بقيت ايام التزم صلاة الليل وادعيه وبدت الخنكه ترجعلي وضيق النفس كلشي داير مدايري يخنك ويتعب وخاصة مااعرف اي خبر عن حسين ومنا سليل وضعها ويه سجاد الي تأزم وكاام ميوصل للبيت هو يعاند وهي تعاند وكل واحد شايف نفسه هو الصح

محد ادخل وبابا طلب من عدنا منفتح مواضيع وياها لتحس ضايجين منها ونريدها ترجع رادها من ذاتها تشتاق وتسأل عنه بس العينتين من تشتاق تخليني اتصل اطمن على صحته وهي تسمع ومرات ادمع عيونها من كثر متشتاق اله وهو يحرك گلبها يجي للباب وميطب بس يشوف زيون ويرجع

تمنيت اسمع خبر عنه واضطريت ادز عمار لبيت انعام حتى يسألي اذا اكو خبر ميعرفون بيه زوج غزل كال الهم صديقه وحسب مفهمت امه نايمه بلفراش بسببه وانعام عمرها عمر مسلة حمرابي مثل الصل كاعده وساكته وكال طلعلي ابوه وشكله تعبان وهواي موصي معارف حتى بس يوصلون اله ولهسه اي خبر ماكو وهذا الشى خبلني بلزايد وين رحت لخاطر الكعبه فص ملح وذبت وينك حسين مشتاقيت

ايام تمر من عمرنا مرات نحسب الها ومرات تركض بينا ومنعرف شصار وليش وصلنا لهاي المرحله نريد ايامنا تمشي ونسينا كل يوم يمر هو من عمرنا ومراح يرجع

بدايه شهر السابع ٢٠١٧ كاعده وحاطه فرح وتيم وزيون واراقب اكلهم صار شهرين وسليل على حالها لا هي تنازلت ولا سجاد تنازل وحتى بابا مدخل كال همه مو صغار خليها ترتاح يمنا

سليل : شكد عنيد وشكد راسه يابس مرات اكول حقه واني حيل تجاوزت وطولت لساني ومرات اكول شصار عليه لو جاي ولو مره ومطيب خاطري جنت اخاف عليه من يروح محافظات علمود غراض وافكر بلطريق وحتى من يرجع افكر بأكله وشربه ولبسه توصل بيه مرحله انطي مفاتيح البيت لوحده من البنات حتى تجيب ملابسه نغسلهم هنا وينظفن البيت ويرجعن بديت اتعب وصحتي بفراكه تدهور تعلمت على بيتي وعلى ريحته وسوالفه وطبعه رغم ممقصرين ويايه بس هم اشتاقيت لكل قطعه من بيتي والاهم اشتاقيت انام بحضنه

وهو عناد بيه ما اجه

رشا : اباوع على ريم ذبلانه حيل ومتنام واكلها قليل موضوع حسين كلنا مأذينا بس مو مثلها كاعده صافنه عليها شلون ذبلانه والوجهه تعبان حييل وبس صافنه جان نسمع عيطت سليل الحكوني

ريم : كمزنا كلنا نتراكض يمنه ويسره شبيج

سليل : نزل والله راح اجيب وكمت اعيط وابجي

رشا : خابرت على عموو واحنا نركض نريد بس نحظر غراضها ونصهم ماعدنا لان هي بلسابع وينها وين الولاده

سليل : من الخوف والتفكير صارت عندي طلوكه واتشاهد من الخوف واصيح جيبولي سجاد

ريم : لبست سريع وسمعنا هورن مستعجل وطب سجاد مرعوب عليها وهي ياعيني خوش فرصه حضنته حيل وهو شوق وهو خوف والله لوتيه خوش تستغل الفرص وصعدنا بلسياره اني وياها ليوره وعمه ليكدام يم سجاد وهو طلقه يسوق

سليل : سجاد راح يصير شى بأبني

سجاد : ميصير حبيبتي لتخافين

سليل : كله من وراك لو ما دافعني من الدرج مجان هذا حالي

سجاد : هااا صار الصوج مني ولسانج الزفر دجيبي واني اعرف شلون اربيج من جديد

سليل : شنو قصدك ممتربايه مو عيب هذا الحجي

ريم : هسه انتي بيا حال خرب حظي الاسود اسكتي شوفي حالج طماطه مهروسه صرتي

سليل : رجعت اعيط وابجي وصلنا للمستشفى مباشره بس فحصتها الدكتوره كالت  دخلوها عمليات حالتها ابد مو مال انتظار

الخوف سيطر علينا وبابا كل شويه يتصل وخايف عليها وقعو سجاد العمليه على مسؤوليته وهذا الشى خلانا نحس اكو شى اكبر كعدت وكمت اسبح بأصابيع ايدي واقرا ايات وضع سليل خطر وحاله الطفل اخطر

اجيت يم عمو الجان متهستر ياهو اليحجي ويااه يگب بوجهه

ليش مااجيتها طول هاي الفتره

سجاد : ردتها ترتاح مني ردتها تحس من اني ماكو شنو حياتها

ريم : بس انت هم على كيفك وياها

سجاد : غير احبها واغير عليها يعني مرتي يوصلها رجال غريب وتردين اتقبل الوضع عادي

ريم : مو عادي بس هسه اذا صار بيها شى هيه او طفل راح تفيدك اعصابك

سجاد : مااكدر اتحكم بأعصابي وهم هي تجاوزت والله لو ما حامل جان اجتكم مزوركه بس بيها حظ حامل

ريم : والفايده شنو هم وكعت على بطنها الله يستر كون ماكو شى

ريم : كعدنا ننتظر وقت طويل واجت السستر تبلغنا بسلامتها بس الطفل حالته خطره سبيعي وهم لازم يدخل حضانه وهاي المستشفى مابيها

سجاد :هسه شسوي اروح ويه الطفل اوديه لو يم سليل

رشا : عمه تبقى يم سليل واحنا نودي للحضانه بمستشفى حكومي وابقى يمه وعود ارجع الها

سجاد : واعوفج وحدج

ريم : قابل راح يبوكوني ماعليه شى واذا احتاجيت احد اخابر غزل ورجلها بس عينك على سليل اذا تكعد ومتلكاه عبالها بيه شى واخاف تتأذه

سجاد : لعد امشي بسرعه اوديكم حتى ارجع

ريم : اخذنا الطفل للحضانه وجانت هوسه ولعبان نفس عافني سجاد وبقيت كاعده بالانتظار واي شى يحتاجو اركض اجيبه اباوع المستشفيات الحكوميه وتعاملها ويه الي يولدن تكول عبيد عدهم نادراً مااكو احترام وتعامل زين يعني احنا الله مكنه وكدرنا اندخل سليل اهلي الماعنده وين يولي

سليل : فتحت عيني واحس نار بطني وتذكرت الطلوكه وعطت وينه

نهر : يمه بلخير عليج جبتي ولد

سليل : عطشانه حييل

نهر :بللت بس حلكها وكل شويه تون وتسأل وينه

طب سجاد باس راسها  الْحٍمَدٍ للـّہ على سلامتج

سليل : وينه عفيه بيه شى

سجاد : مابيه وعيونج بس صغير بلحضانه لتخافين

سليل : يعني مراح يموت

سجاد : الله ينطي العمر وتشوفي شاب ويدافع عنج مني ويطردني هم من البيت

سليل : شحده

سجاد : هااا لعد مو امه تجاوزت

سليل : تره والله مو وكتها وكمت اشهك حضني حيل وباسني ارتاحي كاافي ام دميعه

اوووف شكد اشتاقيتلج حقيره عفتيني ورحتي هناك طيبي اله اطلع الشهرين من عيونج اني الج

سليل : بقيت بحضنه اتوجع وبنفس الوقت مشتاقه اله

ريم : اول يوم رجعت للبيت سبحت وبدلت واخذت علاكه ويايه بيها شغلات اخاف احتاجهم وبقيت بلمستشفى وقبل ليصير الليل لو سجاد يجي ويجيبلي اكل لو عمار معافوني عدا الفلوس ينطوها حتى ابقى

شكد توسلت بيه غزل ورشا يتناوبون مكاني مقبلت جنت خايفه على هذا الطفل وكأنه ابني مو ابن اختي

مرت ٣ ايام واحنا ننتظر رحمه الله

لازمه القران واقرا جان عصريه وقلت الرجل على المستشفى وكاعده على الكراسي وسمعت صوته صدقت ورفعت راسي واشوفه كدامي جفلت هنا حسيت الله سبحانه وتعالى يكلي كافي تعبتي هوايه رجعته الج بسرعه شهكت بقووه وصحت وين جنت 

حسين :لهاي الدرجه خفتي عليه

ريم : بدون وعي مني جريته من ايده ولزمته كعد بصفي وكتله ميته خوف عليك ليش هيج تسوي بيه حسين مشتاقيت لريمتك

حسين : رجعت ارتوي بحنانج محتاجج حيل ريم اول مرجعت ودخلت بغداد اجيت ركض عليكم وعرفت بيج انتي هنا وصلت الج واني روحي مفرفحه عليج

ريم : ليش هيج تعبان

حسين : احجيلج كلشي احجي بس ارتاح

ريم : وين راح تروح

حسين : لبيت صديقي

ريم : اهلك متخبلين عليك

حسين : خليهم

ريم : لتروح بعدني مشبعت منك

حسين : تعبان ومسابح وحالتي حاله شوفي

ريم : ريحتك طيبه وشكلك يخبل

حسين : بس اريد كلمة منج تريح گلبي التعبان

ريم : ياكلمة

حسين : تحبيني

ريم : اكو واحد ميحب نفسه

حسين : ااااخ ياريمتي والخلقج تصيرين الي لو اعرف ابوكج واسافر بيج شفت الموت اكثر من مره وانتي بين عيووني

ريم : لترجع كاافي

حسين : لازم ارجع بس هلمره

ريم : والله خايفه عليك

حسين : لتخافين متخلصين مني وراج وراج

يتبع

#رواية_أبي_والغزلان_الجزءالثاني

#للكاتبة_REEM_ريام_هادي

#البارت_الثامن_والاربعون

ماعندي حمل يطشر بريح

اجودر وين ما ذبتني دنياي

يم الناس اضحك ضحك خالين

بس وحدي من ادمع انكلب ناي

تعبني الوكت كد مانه تعبته

وعطش للنوم جفني وفوطرت شفته

شوكت ارجع لروحي واجمع اللي راح

بس بيش اجمع البريح طشرته

مفتاح السوالف بلكلب مدفون

وبشفافي قفل علمني على السكته

تبعتك ياكلب عالمامش اعمي العين

والمامش ولك ياجدم واصلته

كلي شحصلت من صاحبيت الغيم

مدري بيا جزيره العمر ضيعته

ريم : والله خايفه عليك

حسين : لتخافين متخلصين مني وراج وراج

ريم : اني مااريد اخلص منك

حسين : لو ادري هيج تخافين عليه وترجعين تحبيني جان من زمان اروح للحشد

ريم : بس لو افهم شوداك

حسين : لو تشوفين الشباب هناك شلون ابطال وگلب على گلب وشلون يضحون بحياتهم والله تستحين من نفسج لان كاعده بلبيت يعني واحدهم يدخل بنص الموت في سبيل ينقذ عائله ميربطه بيهم اي صله بس مجرد عراقيين شباب مااتت حتى بس ينقذون طفل لو مره شفت العجب هناك ايمانهم بالله والنصر يخليني اتقوى وابقى يمهم اسود والله اسود

ريم : الله يحميهم وينصرهم بس لترجع عفيه

حسين : تخافين عليه

ريم : الله يعلم شصار بيه بروحتك

حسين : اروح وما اتإخر اجيت علمود اخذ كم حاجه وهم اشوفج مشتاق لكلشي بيج

ريم : واني ميته شوق عليك

حسين : اااخ الله لوبيدي اخذج وانهزم

ريم : ههههه همزين مو بيدك

حسين : شوكت اكعد هاي الكعده وانتظر ابنا

ريم : الله كريم

حسين : لتگلبين وجهج وتحسسيني ممصدكه اخذج

ريم : اني ثاقه بيك وامشي وراك

حسين : يعني ايدج بأيدي

ريم : اكيد ايدي بأيدك

حسين : اروح حبيبي انتبهي لنفسج وصيت سجاد يجيج

ريم : لتخاف عليه بس لو تتصل بيه

حسين : والله ماكو شبكه هاي الاخرتني عليج بس مااتأخر وعيونج

ريم : راح واخذ گلبي ويااه وعيووني تباوع على طوله جنت مشتاقه لدرجه كوه حبست دموعي ومحضنته بنص المستشفى

رجع للموصل ورجعت اني النار تاكلني خوف عليه

وره ايام سمعنا الموصل تحررت ٢٠١٧/٧/١٠  والناس طلعت تحتفل بهذا الانتصار قدمو الجيش والحشد اروع صور الجهاد والبطوله والتضحيه بلنفس حتى يرجعون الموصل للعراق وطرد الانجاس منها

وبعدها بيومين طلعنا ابن سليل وجانو ينتظرون بلبيت جبناه اني وسجاد وسليل طاكه من البجي من الخوف عبالها بيه شى

سليل : شراح نسمي

سجاد : شتحبين تسمي

رشا : هااي شنو شعجب مو انت سميته

سجاد : غير اقشمرها حتى نتصالح

سليل : هههه تصالحت وتقشمرت

ريم : والله كلمة منه تنسين نفسج تعلمينا بيج

سجاد : شراح يخلصنا من لسانها يله شراح تسمي حبيبي

سليل : نسمي كيان كلش حابه

سجاد : هذا هو صار زين العابدين وكيان

ريم : بوقتها تعبنا حيل ويه سليل لان الطفل سبيعي وصغير حيل وجنا نخاف عليه ومراجعة اطباء يله شوي نشنش وصار بيه لزمه

مرت الايام ورجع حسوني نور بغداد من رجع ردت روحي اليه كل ميزورنا ابتسم من اشوف لهفته وحبه سواء الي او لتيومي لو من يدز بوسه بلهوا ويسوي نفسه ممسوي شى مرات احسه رجع يراهق ويايه بس اني احاول اسيطر على مشاعري لان اعرف بروحي بسرعه انجرف اله وانسى نفسي

بعد مده عرفت منه راجع لبيتهم لان ابوه متوسل بيه يرجع وخاصه جان علي  مريض وكل شويه يتخربط وماعدهم احد ياخذه للمستشفى رجع بس يتعامل وياهم برود وعلى كد الواجبات ويعوفهم ويطلع ومرات بالايام ميشوفوه يعني علن عليهم الحرب البارده

ريم : دخلت على رشا زهكانه شبيج

رشا : والله انتي خبيثة كلتج علميني على هاي مال تثبيت هويه خلي اثبت الفيس مالتي ذاك حرامات تهكر صار جم يوم وسويت هذا وكتلج اخاف يتهكر وانتي كل شويه هسه وهسه

ريم : انتي ثوله جم مره كتلج اي روابط لدخلين

رشا : شمدريني اندز مكتوب ملابس اطفال بسعر الجمله دخلت وصار الي صار والله ميتة قهر صديقاتي مال الدوام كلها بيه وحتى اكو بنات ويايه بلجامعه بس السلام بينا دزن طلبات صداقه وفوكاها كروب القصص الي داخله بيه اشكال القصص بيه وكعد اقرا ومندمجه

ريم : بااع هاي ام القصص من كل عقلج تضيعين وكتج بيهن

رشا : شكوو بيها هم اتونس وهم افصل من دنيتي الطايح حظها وهم اكو شغلات اتعلم منها

ريم : وتتأثرين بلحب ودموعك تسيل على اطراف خديكِ

رشا : سالمين تره القصص عاميه مو فصحى

ريم : فوكاها

رشا : والله تخبل هسه انطيج بس اسوي الفيس فد خمسه او ١٠ قصص خلصي وكتج بيهن

ريم : واني اكعد اقرا هلكد غير يشكل صداع عندي

رشا : مابيج شى مثل الصل بس اقري تنسين نفسج والله

ريم : اهم شى انسى نفسي كون من اشيل راسي من القصه اكول انتم منو

رشا : يله تعالي صيري خيره وثبتيلي الفيس حبابه

ريم : توسلي بعد

رشا : اهووو والله خبيثه الله لا يعوزني عليج امشي ولي تجي غزل واخليها تسويلي

ريم : خلي تفيدج الفاهيه حايره بعمير صار اسبوعين ماكو

رشا : خليها يمعوده الله يهديهم

ريم : عمه بس تفكر بيها تخاف عليها

رشا : من شنو

ريم : تكول اخاف متحبل

رشا : هااي مثلي هم جنت كل مااجي تضل ترجف وتخاف

ريم : حقها لتنسين هاي عقدتها الوحيده ودوم تكول مااريد حظجن مثل حظي

رشا : والله ياريمو لوما الفرح بعزيت روحي وهي النفس العايشه بيه جان كلت لو ما مخلفه من مشعول هواي احسلي اقلها ماانربط العمر كله بيه حتى لو كل كم شهر يجي يشوف بته اعتبره شى اسود بحياتي وراح بس هسه مضطره حتى من اقري بنتي او ارتب دفاترها اقرا اسمه فرح شعلان ومرات اكتب الاسم بيدي يعني راح يبقى ملازمني العمر كله

ريم : خلي يولي انتي حتى وضعج وصحتج هواي تغيرت من عفتيهم

رشا : تعبت طاقتي انتهت همه عايشين واني انام واكعد اكل واشرب افكر بيهم حسيت عمري راح يخلص واني اركض وراهم يطبهم مرض شيصير بيهم خلي يصير كافي الله خلصني منه من وكت وعرفت طينته شنو الله اعلم لو ماره بعد سنين وصادمني شجان صار

ريم : الله يعوضج بالاحسن

رشا : لا عيني مااريد اي تعويض خليني هيج ملكة زماني لا رجال ولا دوخت راس

ريم : يجي يوم وتحبين وتتزوجين

رشا : ههههه والله خوش تنكتين الي عاشت مثلي حبت وانطت وضحت وانطعنت مستحيل تعيد التجربه بله لدوخيني وحيري بروحج

ريم : اروح لسليل اشوف كيان شلون صار

رشا : اخذيني وياج

لبسنا الجبب والشالات ونزلنا

نهر : هاا خيرجن

ريم : رايحين هداده

نهر : ياستار

رشا : اسكتي لج هسه تصدك

نهر : مو اول مره تسونها

ريم : رايحين لسليل

نهر : اي هاجن اخذن هاي الحلاوه الها تحبها

ريم : حلاوة الميتين

نهر : حلاوة تمن لج

ريم : اني شمدريني شو اي واحد يموت يسوله ثواب هاي الحلاوة اني من هسه اكلكم عيني من اموت لو تسون كريب بلنوتيلا لو وافل هم طيب

رشا : بان كيك اطيب

نهر : شنو ذني يمه

ريم : عجينه عمه نسويها بلطاوه ونحشيها نوتيلا وفواكهه بعدها مواصله الج

نهر : شبيه الحنيني شحلاته يتگله بلطاوه وكلاص جاي يسوه ابو هذا كرايبجن

رشا : ههههه كريب عمه مو كرايب

نهر : امشن ولن عود مثقفات كله من وره الموبايل خبلجن علينا وتلعبن لعب بنعمة الله

ريم : نروح نشوف كيون احسن

طلعنا ورحنا يم سليل جانت تركض هنا وهنا وتخاف على كيان لان زيون يضربه وهذا صغير ميتحمل

كعدنا نغير جو يمها وهي ماخذه اجازه امومه سنه كامله وكاعده وساكته بلبيت وهذا الشى مريح عمو سجاد بشكل

احنا هسه بشتا ٢٠١٨ بدايه شهر  الواحد ولا عبالك شتا ابد مو بارد وين قبل الهوا يكص كص هسه حتى الشتا تغير باقين بطرك البلوزات وعود مرات تمطر وتبرد

رشا التهت بلمدرسه والطالبات وادرس بتها صارت صف ثاني ابتدائي وتيومي دخلته روضه يتعلم بيها اما اني حاطه ايدي جوه خدي وضايجه وقررت ارجع ادور مدرسه او روضه اهليه اخلص بيها وكتي

يتصل حسين يسلم ويطمن ويروح دوم يحاول ياخذ وينطي ويايه بلحجي بس اني ماانطي مجال اخاف ارجع اتعلق وانهار من شى يرجعني لنقطة الصفر مو بيدي الصارلي مو قليل بس رغم هذا احبه واشتاقله بس درب الصامت ماشية بيه ومنتظره رحمة الله مرات احس بصوته شوق ولهفه عجيبه وانهي المكالمه بسرعه اكول اخاف انسى روحي حسيت داخله حرب ويه گلبي هو يجر واني اجر ومنو يربح بالاخير هاي ممعروفه

اليوم جمعه كاعدين نتريك ودك موبايل بابا جان مستغرب

اي هله بيك تعاال

نهر : منو

حجي طه : شعلان جاي بس صوته عصبي وكال خابر سجاد عندي حجي وياكم

رشا : ياستار شيريد

حجي طه : الله اعلم يجي ونشوف خلي اخابر سجاد يجي

رشا : گلبي عصرني هذا شيريد صار شهرين حتى مجاي يشوف بنته واني صار اشهر قاطعه عني اخبارهم اصلاً احاول امشي حياتي بدون ماحتى افكر بيهم ولا اريد اسمع اي شى عنهم

كمنا شلنه الريوك وبقيت اكسر بأضافيري من القلق

ريم : شبيج ترحين وتجين قابل اول مره يجي شعلان

رشا : گلبي يلعب ليش طلب سجاد لو جاي هيج او بس رايد بابا عادي بس طلب سجاد وخاصة المشاكل الي بينهم والكرهه الي صار يعني معناها اكو شى جبير

ريم : ماكو كولي ياالله وهو كلها شويه ويجي

طب عمو سلم وكعد

سليل وين ليش ما اجت وياك

سجاد : عفتها نايمه على بطنها من التعب الليل كله سهرانه ويه كيان نام وجهه الصبح

ريم : خطيه شلع گلبها

سجاد : هي كتلت روحها على طفل ثاني خلي تاكلها

ريم : على اساس انت مفرحان

سجاد : ليش ماافرح يوم متخلف بعد ومتلحك اكثر وتبطل من الدوام وتكعد وتسكت بلبيت

ريم : ههههه هو هذا الكاتلك الدوام متبطل سليل لو عشر جهال

سجاد : اعرف بيها عنوديه

معرفتي شيريد هذا الحقير

ريم : لا والله وهاي رشا ترجف

سجاد : على شنو ترجف صاير شى منعرفه

ريم : لا والله وهاي الفتره كلها مشايفته وحتى من يجي على فرح متنزل

سجاد : هسه نشوف شكوو

اجه بابا وكعد ربع ساعه واندكت الباب وفتح اله وطب الوجهه مگلوب وصاير ازرك احمر من الاعصاب حتى بلوجوه ميباوع ودخلو للاستقبال وسدو الباب احنا ركض وره الباب نسمع الصار

حجي طه : هااا ابو فرح خيرك شبيك جاي شكلك مال واحد عراك

شعلان : شوف طه اني يوم مادكيت بابك واخذت مره منك لان اعرفها متربايه ومأمن تشيل اسمي وتحمي بيتي ومن غلطت بحقها ضليت سنوات اكل بروحي شلون ضيعت وحده مثل رشا بس اليوم اكول  الْحٍمَدٍ للـّہ خلصت منها ميشرفني تكون مرتي

سجاد : تره كلامك ماصخ وبديت تلوص بلكلام تشرفك وتشرف عشيرتك كلها

شعلان : هااك هاي الشريفه الي تكول عليها تشرفني شوفو بتكم من اطلكت شسوت مبين غافلين عنها ومتدرون شدسوي رجلكم بلشمس

ريم : علت الاصوات مفتهمنا شكوو لحد ماعاط بابا رشااا تعالي

رشا : طبيت واني جافله وارجف هااا بابا

اباوع تلفون شعلان سكرينات لفيسي ويه واحد

شعلان : گلبي بيهن كومه عندي الج

رشا : اباوع كلام وغزل وصوري فتحت عيوني اريد اجر النفس ماكو هااي شنو

حجي طه : هذا الفيس مالتج

رشا : اي بابا بس والقران هاي مو اني

شعلان : لا امي هاي

رشا : اصعب شى من تكون مظلوم والكل بعيونها الاتهام وفوكاها بدليل قوي شلون اثبت مو اني علت اصواتهم واني مركزه بس بلصور شلون احجي ويه واحد واكول اله اني مطلقه وماعندي رجال واريدك تريحني وسوالف تقزز

ويه كل صوت عالي منهم نبضة بگلبي اعلى فقدت تركيزي ويه الكل وبس مركزه بلي كدامي واگلب صوره صوره لحد مسمعت اسم فرح فزيت من صدمتي على صدمة اكبر

شعلان : شوف طه اني اليوم اجيت مو حتى احاسب بتك ولا تهمني ولو انتم زلم صدك طلقة براسها وذبوها بأقرب خرابه اني اجيت اخذ بتي مال اعوفها ويه هيج ام ساقطه مستحيل

سجاد : احترم نفسك شنو ساقطه ومنو يكول هاي المحادثات الها

شعلان : هااي كدامكم نكرت لو كالت هذا الفيس مالتي

رشا : اي الفيس مالتي بس وداعت فرح وبصحتي وشرفي وعافيتي هاي مو اني

شعلان : كالو للحرامي احلف كال اجاني الفرج انتي اخر وحده تحجي على الشرف وتحلف بيه

سجاد : تره هواي تجاوزت لتخليني اكوملك وهنا اطيح حظك

حجي طه : خلي نفتهم على كيفك سجاد

شعلان : افتهمو انتو هاي بتكم كدامكم وافتهمو منها اني اريد بتي اخذها واروح مال ابقيها ساعه هنا اله تخبلت

رشا : هيج كول مسوي هاي السالفه كلها حتى تاخذ فرح جان يتقدم عليه وعيونه شرار

شعلان : لج اطعن بيج حتى اخذ فرح من كل عقلج تردين تفريها براسي انتي لو على ذمتي هسه مجان تكدرين تفكين حلكج جان هسه دافنج بمكانج بس العيب على شوارب ذوله الكاعدين وساكتين ينتظرون يفتهمون شلون جنتي تعرضين نفسج لواحد حتى يتقرب منج بلحرام

كاام سجاد ولزمه من دشداشته ورجعه حيل على الحايط

سجاد : اسمع لك هاي الافلام مو عليه منيلك هاي المحادثات

شعلان : احسن ماتنفش ريشك عليه الزمها وشكها نصين هاي حرام هسه تشتم الهوا

رشا : والقران ممسويه شى

جان يدفع سجاد وعاط بكل علوو حسه فيسج هذا لو مو فيسج

رشا : اي مالتي بس والكعبه المشرفه مو اني حاجيه ويه ولد ولا بيوم جاوبت ولد وفوكاها بهاي الطريقه القذره

شعلان : وعلى مدى ايام لا والحلوو وكفتي بكل عين صلفه واطلكتي لان تزوجت عود شوفوني مااقبل الغلط وانتي الغلط نفسه

سجاد : عااط سجااد وكمت ابجي احجي انتي عندج شى

رشا : ركضت اجيب قران طلعت مثل المخبله ليفوك ونزلت اركض ودخلت لزمت القران وحطيته على عيني وراسي وكتلهم مو اني وحق كلام الله هذا مو اني

شعلان : انتي مو انتي ميهمني اجيت اخذ بتي

حجي طه : مالك بنيه يمنه

شعلان : انت صدكتها اكيد

حجي طه : ليش مااصدكها تربيه ايدي واعرف بتي متسوي الحرام

شعلان : اسمعني عدل اذا منطيتوني فرح هسه واخذها بيدي واطلع اشهركم شهيره

سجاد : انت رجال وسويها والله اكاومك عشائرياً هاي اذا ماحطيت طلقه براسك

شعلان : متحقني هذا الدليل يمي سوالفها ويه واحد ولمده اسبوع وهاي صورها الي دازتهم اله وشفتوها بعينكم وهي كداكم كالت الفيس مالتي ومنكرت وحتى الحجي بيه شغلات تخصكم يعني مو مال وحده متبليه عليها

هسه تلفون واحد مني لعمامي اجمعهم هنا واخليكم فرجه لليسوه والميسوه ومثل ماوكفتي بطولج وتصيحين خلصوني منه حتى اطلكج اخليج تصيحين خلصوني من الدنيا وتاليها اخذ البنيه واطلع غصب عن اكبر شارب بيكم جفو الشر والفضيحه وانطوني بتي وهاي بتكم الساقطه انتم وياها بعد

رشا : كمت اعيط متاخذها اكتلني واخذها وتلازمو شعلان وسجاد وبديو يتضاربون كام بابا فاككهم ودفع شعلان وباوع عليه وكاال صيحي فرح

اني من سمعت هيج جبل وكع على راسي كمت اعيط بأعلى صوتي ماانطي فرح والله احرك روحي كدامكم واموت وعود ياخذها

سجاد : شبيك طه شنو ياخذها

حجي طه : كتلج صيحي فرح

ريم : دخلت متحملت جان تجيت بحضني رشا وتشهك

رشا : لتخليهم ياخذوها

ريم : على اي اساس ياخذها وشنو صوره ومحادثات منين جبتهم يجوز مرتك القذره هي هيج سوت

شعلان : اياج تجيبين طاريها اشرف من اختج

ريم : انجب واحترم نفسك اختي مو الي تتختل وتنام بفراش غيرها وتطلع بلساعات

شعلان : اقلها بلحلال مو حرام مثلها جان يضربه حيل على خشمه سجاد

سجاد : لك كاافي ماكو واحد بعينك جاي وتطعن بشرفها ياعديم الشرف ليش نسينا سوايتك  اخذ صورك وانكعهم واشرب ميهم هاي كلها مو بعيد سوالفك حتى بس ترد الي سوته

شعلان : وروح ابويه وروح ابني الماشبعت منه شوف اجتني من البارحه الفجر  هاي الصور على الفيس مالتي هاكم وفتح الفيس وشفنا المحادثات مكتوبه شوف ام بنتك شسوي مو بعيد تكبر بنتك وتصير مثلها راسلته دكيت وماكو وبس ردت الشمس تطلع واجي كلت بلكت تكول هذا مو الفيس مالتي وكدامكم بكل عين قبيحه تكول فيسي

رشا : كمت الطم على وجهي واعيط اي الفيس مالتي بس مو اني والقران مو اني

ريم : لزمت ايدها على كيفج

جان يدفعنا وعاط فرح فرح نزلت تركض لزمها من ايدها ورشا حضنتها حيل وتعيط متاخذها

حجي طه : عوفيها بابا خلي تروح ويه ابوها

رشا : مااعوفها يريد ياخذها لجنات بابا هاي راح تأذيها راح اطلع كلشي بيها

شعلان : شوو عوفيها ودفعني حيل جنت فاقده مجرد اتخيل بنتي تنام بعيد اني افقد وين يم جنات اتهستر

حجي طه : لزمت رشا وسحبتها ترجع بابا خلي تروح ويه ابوها

سجاد : شبيك طه شنو تروح وبكيفه هو

شعلان : اي بكيفي واني مامستعد اخلي بنتي ويه هيج وحده بايعه نفسها ومنحطه ومخلصه الليل من رجال لرجال والله اعلم بعد ويه منوو

جيت سجاد عليه وعاط بابا بيه وسحبه حيل وكاال لشعلان اخذ بنتك واطلع بره وبعيد حسابي وياك

رشا : كمت املخ بروحي وهو يسحب فرح الجانت تبجي على بجيتي ومتقبل تروح شالها ابوها واخذها كوه

ريم : فقدت رشا وكل عيطه منها تهز البيت وتهز روحنا وياها حضناها اني وعمه نريدها بس تسكت نخاف على گلبها

عمه تقرا ايات بوجهه وهي ازركت وتصيح اريد هوا اريد هوا ركضت اجيب مي غسلت وجهه واريد بس اشربها مي ماكو جان يسحبها عمو من الكاع وكومها للحديقه ويضرب على ظهرها على كيف بس يريد تشتم هوا وبابا دمعته بعينه ومرعوب عليها

رشا : بلحظه الهوا انكطع مني الدم ميصعد لراسي عيوني غوشت اكو لحظات تمر اصعب من الموت لحظات تحس بيها الروح تريد تطلع بس تبقى معلكه لا هي راجعه ومستقره وتهدأ ولا هي طالعه وخلصان

بديت احس المي بوجهي وملابسي بس جريت بقوه نسمه هوا بارد طب للرئه مالتي

باوعت ريم وعمه يبجون وعمو يهفيلي وبابا واكف فوك راسي نزلت يم رجله ابوس بيها

دخيلك بابا رجعلي بنتي والله اموت بدونها

حجي طه : كاافي بنتي والله ارجعها بس اصبري خلي نفهم هاي الصور منين جايبهن كوومي

رشا : ياناس مو اني طبيت الكم القران مو اني الله ليشوفني عافيه اذا اني تتوقعون هيج شى موزين مني

سجاد : لو شاكين بيج تتوقعين اخليج عايشة اذا ابوج ميكتلج اني اكتلج وبيدي بس نعرف هذا مو ثوبج وانت تربية ايدنا بس هاي الشغله جبيره مو هينه

نهر : تعالو ندخل جوه منا الجيران ليسمعون

ريم : كومي فدووة ليصير بيج شى

رشا : عساني لا عشت اريد اموت ريم اخذها مني ولج راح تروح يم جنات راح تأذي بنتي راح اطلع حركتها بيها مشفتيها من اجتني للمدرسه شلون حاقده

نهر : ابوها موجود اكيد ميعوفها

رشا : شلون انطاك گلبك بابا تنطيها لشعلان هيج هنت عليك وهانت فرح عليك

: دنك ورفعني وحضني ودخلني جوه اسحل بروحي وابجي بقهر

كعدني على القنفه وكعد بصفي

حجي طه : بنتي شعلان مخبل واجه متقصد يأذيج اني مااعرف شنو ردت فعله لو معاندي الطعن ماكو اسهل منه بس تعال اثبت للناس انتي شريفه وهذا الصار مو انتي مسويته وحتى لو ثبتنا مع الاسف مراح يصدكون وراح يكولون همه هيج كالو حتى يطمطمون الخبر

اني كلت ياخذ بته ويروح بين منفهم شنو السالفه اني لهسه ممستوعب الصار تعالن انتن تفهمن بهاي البرامج الغضب النزلت على راسنا شلون حاجيه ويه واحد من الفيس مالتج وبنفس الوقت مو انتي

رشا : والله مو اني مو اني

عاط بيه بابا وكال اعرف مو انتي بس شلون فهموني

سجاد : منطيه الفيس مالتج لوحده يجوز صديقة وياج بلمدرسه

ريم : ولج رشا اخاف فيسج الي تهكر

حجي طه : هاي شنو بله

ريم : رشا عدها فيس قبل مده تهكر هكر يعني اخذوه منها وبعد متكدر تفتحه ومدرنا بال اله وسوينا جديد

سجاد : زين الصور مال الصفحه نفسها رجعتيها لو غيرتيها

رشا : مسحت دموعي اريد اركز وجريت النفس وكتلهم

قبل مده تهكر الفيس مالتي وريم تعرف اني رجعت سويت واحد جديد وخفت صديقاتي ميعرفن الفيس الجديد وخاصه بيهن صديقات من ايام الكليه كمت ورجعت الصور القديمه يعني الفيسين نفس الصور الشخصيه والغلاف

ريم : وبهاي الحاله الي هكر الفيس يكدر يثبت هذا كلام رشا لان بلماسنجر تطلع الصوره الشخصيه مال الفيس والاسم وميطلع اذا جان جديد او قديم  لان غلطت رشا من تهكرت معلنت هذا الشى وهم مغيرت الصور رجعتها نفسها

سجاد : زين والصور الي راسليها

رشا : هاي الصور موجوده بلمحادثات القديمه ويه مدرسه ويايه مره دزيت الها تراك اشتريته واخذت الصوره على طولي ومره صبغت شعري وشسورته وهي جانت جايبتلي الصبغ وهم دزيت صورتي بس ماسحه المحادثات

والصوره الثالثه هاي قديمه من جنت متزوجه وحتى ماعندي نسخه منها

حجي طه : هذا الغلط ادزون صور برامج مو امان جم مره اكول لتبقن صور بلتلفونات ولدزن صورجن مرات يجي محسن يحجيلي بلاوي من وره التلفونات وشكد بنات انذبحن ظلم من وره الصور لو يضيع التلفون لو يبيعنه واكو ولد ميخافون الله يرجعون صورهن لو يبتزوهن لو يشهروهن وكل فتره جاي محسن وحاجيلي على شغله شايفها وخلاني اكره كلشي يخص هاي الاجهزه والله هاي نقمه نزلت علينا شنو شرف المره ينقاس من محادثات ورسائل بيا زمن احنا متكلوليً

نهر : على كيفك لتعيط شوف وجهك شلون اصفر

حجي طه :  يعني هسه اني بحالتي تعالو حلوها اليه اجه هسه شعلان ودك الناقصه وجمع عمامي وخوالي وشوفهم المحادثات بهاي الحاله شسوي اذبحج حتى الناس متاكل وجهي لو اخذج واهج بيج وابقى العمر كله بنظر الناس مو رجال

رشا : بابا ممسويه شى والله وكمت ابجي

حجي طه : لو مسويه احجي وياج اخنكج بيدي بس اعرفج متسويها هسه شلون نحلها هذا المخبل اخذ البنيه وهم بقينا تحت رحمته

ريم : هاي سوالف جنات

حجي طه : هم رجعنا على غضب شيصير وصحتن جنات هسه لو ما ابوها جعفر عزيز گلبي لا اكوم واكعد وانبش اهل اهلها

بس مو معناها شيصير وصحتن جنات

ريم : بابا هاي السوالف مال مزعطه تالي وكت ومبينه متقصده حتى تاذي رشا ليش هذا الولد الدز المحادثات لشعلان ليش مو الك انت ابوها  ليش مو لرشا نفسها يهددها بيها هاي سوالف كعد نشوفها بلفيس ونسمع قصص تشيب الراس عن  الهكريه وشلون يرجعون المحادثات والصور ويستغلون صاحب الحساب ابشع استغلال والي هكر فيس رشا بس حتى يطعن بشرفها مثل ماانطعن بشرف جنات ويحرك گلبها مثل مامحترك گلبها على ابنها المات واكيد من يعرف شعلان راح يسحب فرح منها وهاي اقوى ضربه لرشا

نهر : الله ياخذها اذا صدك عساها بحرگت گلب اقوى من حركت گلب رشا لكم هاي بت جعفر لا لا مامعقوله

حجي طه : وشلون نثبت هذا الشى انتن تعرفن بهاي التلفونات

ريم : والله مو هلكد نعرف

حجي طه : لعد بس تعرفن ادزن صورجن استغفر الله ربي واتوب اليك

سجاد : انطوني رقمه

ريم : منو

سجاد : الگلب شعلان

اخذ الرقم واتصل وطلب منه يدز الصور وذاك مكنك على السيم كارت انترنيت ودز المحادثات

سجاد : الحساب الثاني لازم نوصله وحسابج هم

رشا : ميهمني اي احد اني بس اريد بنتي ابوس ايدكم والله حتى تلفون مااشيل بعد اشمره مااريد بس جيبولي فرح هاي مراح ترحمها

ريم : خلي تسوي شى بيها وروح بنتي اروح للكوت هناك اصلخها بنص الشارع

حضنتها لرشا وهي منهاره

رشا : شيسون بيه راضية والله بس لا بنتي شفتي شلون تبجي ومتريد تروح وعدها امتحانات راح تضيع السنه عليها

ريم : خابره سجاد خلي يجيبها بقى بس امتحانين تمتحن وياخذها

خابره ومقبل ورجعت رشا تلطم على راسها

شويه واجت سليل مخروعه بلغها سجاد واخذت رشا بحضنها وتحاول تسكتها بس شلون تسكت والگلب ملجوم

فكرت لو اني بمكانها شيصير بيه مكدرت غير احضن تيم وابجي على بجية رشا الجانت تكطع الگلب

سليل : كومي تمددي فوكي ربج كريم ترجع لحضنج وين تروح

رشا : متنام اله بحضني متاكل اذا مو اني وياها اكعد من الصبح اشم ريحه شعرها احس شكد الدنيا ظلمتني بس نصفتني بفرح واجه اخذها مني يعني مكتفت اخدت رجلي وبيتي وحياتي اجت على نقطة ضعفي بتي

سليل : منو كال هيه

ريم : ماعدنا اعداء غيرها وغير بيت انعام وذولاك اختصاص سحوره مو طعن مو عائله زباله كل واحد اختصاص عنده وثاني شى ماعدهم شى ويه رشا ذولاك يحبوني الي حصرياً

حجي طه : صعدوها لغرفتها بين متنحل ونشوف شيصير

صعدناها تسحل بروحها سحل وكل شويه تختنك يصير ضغط على گلبها دخلناها للغرفه هي شافت فراش فرح وغراضها لو تصركعت تبجي وتعيط بعلو حسسها اخذوج مني الله لايوفقهم الله يشيلك ياشعلان العاار من ساعه السوده العرفتك بيها والله جزت منهم ومن حياتهم والله كلت مالي دخل بيهم بس اعيش لبنتي حتى جنات كمت ماافكر بيها واكول يجي يوم وتنكسر وتحس بلوعتي تالي هاي باقيه ساكته حتى بس تسويني رماد هسه تضربها موو هسه تجوعها هسه تنومها بلبرد وحدها تخاف فروحه والله تخاف من الظلمه

سليل : فدوة اروحلج كافي موزين على صحتج

رشا : ياصحة وبنتي راحت لاكثر وحده تكرهني بلدنيا

سليل : ابوها موجود

رشا : هو هذا يدري بروحه مخلصها دياحه ومكسرات

ريم : تره الي تسوي ميجيب نتيجة تعالو انفكر شون نحلها او نلكة احد يحلها

رشا : مااخذ غراضها فدوة خابروه اقلها ياخذ ملابسها وغراضها بارد الجو عليها

ريم : سحبت الفون واتصلت جاوب من وره خشمة خير

ريم : الله لايصيبك منه شى كون

شعلان : تحجين لو اسده بوجهج

ريم : هسه انت من سويت نفسك ابو زيد الهلالي واجيت اخذت فرح بلقوه مكلت عدها ملابس لا والطفله هسه كاعده من النوم حتى اكل مماكله

شعلان : لتدخلين انتي ومالكم علاقه بنتي واني حر بيها

ريم : اقلها تعال اخذ غراضها

شعلان : اني اشتريلها يله ولي

ريم : من ولت روحك كون وسده بوجهي

سحبت بجامه فرح وحضنتها وتمددت تبجي بخنكه مديت ايدي شفتها مصخنه والصخونه موزين عليها جبت كمادات على راسها فصلت من عدنا وبس صافنه على صورتها الي على الميز ودمعاتها تجوي خدها

اليوم كله لا اكل ولا شرب وحتى الهوا احسها كوه تجره اباوع لحلكها بيه لطمت حمه من الهزه والرجفه الصارت بيها عمه كاعده يم راسها تقرا قران واني صافنه عليها اني وسليل ومابيدنا شى نسوي حتى نريحها الشى الوحيد الي تريده وتناشد بيه ولسانها مبطل يذكره هو اسم فرح

البيت دخل بحاله من السكون والخوف لان منعرف شنو الراح يصير وعمو سجاد حاول يوصل للحساب الثاني الموجود ويه المحادثه انغلق خابرنا غزل وبلغناها بس وصيناها متحجي شى كدام رجلها عيب مهما كان يبقى غريب واجت باتت يمنا وبقت الليل كله اداري برشا البدت تعاندنا وتعاند روحها ومتريد لا تاكل ولا تشرب اله تجي بتها

بقيت صافنه وتعبانه اني ابجي اريد اشكي حال رشا دمرنا

غزل : الله يحبنا بابا وعمو صدكو رشا واله جان صارت مصيبه

ريم : حتى الفيس كمت اخاف منه

غزل : شلون راح نثبت هيه بريئه الي سواها كدر يحبكها حبكة معدله حتى المحادثات مو يوم واحد شفتهم عند عمو اسبوع كامل وكله تالي الليل حتى تثبت زين

ريم : لحد يقنعني مو جنات بس هاي ثوله مو مال هكريه وهاي الامور ماواصله لهيج ذكاء

غزل : وصلت ريمو مكدرت تاخذ شعلان وهو يموت على رشا مكدرت تخلي يتزوجها كدام الناس ويكعدها بيت تحلم تكعد بيه مع الاسف احنا انخدعنا بيها هاي حيه مسمومه تلدغ واتضم راسها وهي تحلفت لرشا اكثر من مره وماكو اقوى من هيج

ريم : كمت لزمت السبحت وطلعت بلكراج وساعه مغربيه ويقرون قران رفعت ايدي

ربي دخيلك ياناصر المستضعفين وياقاهر المتجبرين يامجيب دعوه المضطرين انصرنا عليهم ياالله كل فتره واكعين بمصيبه وتنصرنا عليهم انت القوي ياالله اعطينا القوى واكشف عنا هاي الغمه ياارب بحق كلمة لااله الا الله محمد رسول الله

مرات الصدمات والازمات تقوينا ومرات تهدمنا وهاي الازمه بدت تأذينا حيل انهيار رشا وسكوت بابا خله البيت جحيم

يوم بعد يوم رشا تتأذه اكثر واحنا مابيدنا شى نسوي تالي الليل ينگلب جحيم من البجي على بتها نحس كل الابواب مسدوده اكثر من مره يتصل بابا بشعلان حتى بس يجيب فرح او على الاقل تحجي ويه رشا وهو ميقبل ويهدد بابا اذا مبطل ملحه يفضحنا وهذا الشى الي كسر بابا وخلاه ساكت وخايف من شعلان لان يعرفه حقير كلشي يصدر منه

حسين يتصل احجي شويه واسده مرات توصل الحجايه لحلكي اريد اسولف كلشي اطلع الي بداخلي لان حيل تعبت بس على اخر لحظة اسكت واتردد وهو يحس بيه واكثر من مره يكولي بيج شى احسج مو طبيعيه واتهرب منه واغير الموضوع لو اتعذر واسده ومرتين اجه محجينا شى كدامه وهاي اوامر بابا خاف ليوصل الموضوع لانعام ونوريه وتتشمت بينا او تستغل الموقف

نهايه الشهر الثاني شهر كامل ٣٠ يوم مرت على روحة فرح وكل يوم يمر رشا تذبل اكثر وصلت ايام نخلي الها مغذي لان متاكل ومتقبل حتى تروح طبيب اختي بدت تنهار وكل يوم تكعد مخروعه من النوم تكول بتي جوعانه لو بردانه لو نعسانه او ضربتها جانت تحس جنات كعد تمارس ابشع حالات التعذيب

وبيوم كاعده يمها وصافنه على وجهه الصار بكد اللكمه دك تلفونها جاوبت اني لان هي حتى صوتها ميطلع سمعت صوت فرح

هاااج فرح فرح طفرت من مكانها وايدها وشفتها يهتزون من الضعف ومن الالم الي عايشته

هااا ماما فروحه وكمت ابجي شلونج

فرح : موزينه ماما تأذيني خاله جنات تضربني

رشا : كمت اضرب على رجلي ايا ساقطه كولي لابوج ماما

فرح : كلت اله ورادت تجويني بوجهي كالت بس اكول اله تجويني بلجطل تحطه على النار وتحطه بوجهي يصير يخوف حتى الجهال يعيبون عليه وتخليني اغسل مواعين وامسح البيت ومن مااعرف تضربني وكامت تبجي شاغت روحي من اسمع دموعها وشلون بتي المدلله مذلوله

هي يمج هذا تلفونها

فرح : اي ماما

رشا : انطينياها عرفت هي خلت فرح تتصل هاي طفله منين تجيب موبايل

جنات : هااا خير شتردين

رشا : عبالج السويتي تفلتين منه

جنات : اني شسويت قابل اني اراسل ولد واكولهم تعالو ريحوني وادزلهم صوري

رشا : اعرفج وراها عبالج نجحتي بلي سويتي مرات غلطت الشاطر بألف وهاي غلطتج الي خوش راح ادفعين ثمنها

جنات : كامت تتفلسف اني اريد اعرف عمي شلون مذبحج بعد المحادثات مالتج

رشا : لان يعرفني شريفه وتربيه طة مو مثلج بت شارع وتربيه انعام

جنات : تاج راسج اني وانعام

رشا : شكد انخدعت بناس بس مثلج مشفت  هاي الي بلملهى اشرف منج اسمعيني لج بتي اذا لمستيها بعد تتذكرين شلون طرحناج اني وريم هلمره اشمرج من السطح  وكولي رشا كالتها وسوتها

جنات : والله عينج كويه غير وحده بعد سوايتها تضم راسها ولو العيب مو عليج على عمي وسجاد الخلوج عايشة همه صارو رياجيل بس براسي ويردون يگتلوني واني تزوجت بلحلال خلي يشوفونا مرجلتهم بوحده مخلصه الليل حبجيه وادور متعه بلتلفون

رشا : اااخ لو الزمج ياجنات اله اشرب من دمج

جنات : خوفتيني كامت رجلي اطخ وحده بلثانيه والله ياالله مااخاف بس من الي خلقني

رشا : ليش انتي تعرفي اكص ايدي اذا تعرفين الله لتصلين احسلج ممقبوله منج على سوالفج المكسره

جنات :  الْحٍمَدٍ للـّہ اني مو رشا

رشا : اسوه راسج وراس العار رجلج ابو النسوان المخنث اخذها البتي منكم واني اعلمكم

جنات : ابقى هددي وضوكي لوعتي من خسرت ابني

رشا : لج انتي شنو شاخطه اني شعليه بأبنج قابل اني الله وموته

جنات : من سحورتج ودعاويج خلي تفيدج هسه وترجعلج بتج ويوميه انومها بكتله واكعدها بكتله واموتها جوع شكوو ضيم وقهر وحقد شايلته عليج اطلعه بيها ويله ولي ردتج بس تسمعيها شلون عايشة ويايه

انطينياها احجي وياها

جنات : لو تموتين

رشا : جان اسمع عيطت فرح وتصيح ااخ الخ خاله وبجت

كمت اجر بلدشداشه مالتي من حلات روحي

ريم : على كيفج

جان تسده بوجهي دكيت رفضته وراها غلقته ونار وشبت بيه دكيت على شعلان مغلق

ريم : يمعوده اكعدي

رشا : شكعد وبتي ضايكة المر هناك تضربها وتحرك گلبي عليها

ريم : سافله مو بيدها والله احسها مو صاحيه تحس بنقص واطلعها بهاي السوالف

رشا : محد يهمني هسه بس بتي جان تجيني رساله من الشركه انفتح خط شعلان مباشره اتصلت ضل يدك وميجاوب مره مرتين ثالث مره جاوب

شعلان : خير شرايده

رشا : بس اسمعني ولتسده

شعلان : عندي شغل

رشا : احلفك بعزيز گلبك دقايق وروح

شعلان : شتردين رشا حتى اسمج كرهته صوتج يگلب معدتي مشمأز منج

رشا : عادي وراضيه والله حتى لو تذبحني بس فرح مالها ذنب

شعلان : يعني تعترفين  بسوايتج

رشا : جريت نفس وغمضت وفتحت عيووني وحجيت بهدوء خفضت نبرت صوتي الله عليك تتوقع رشا تسويها رشا الجانت من تمشي الهوا ميطخ خشمها اني بمراهقتي مامشيت غلط انت كتلت نفسك عليه لان ماانطي مجال تتوقع هذا اسلوبي زين ارجع اقرا الكلام اني هيج احجي گلبك شيكول الك شعلان

شعلان : خلصت سنين من انام واشوفها بمكانج اغم روحي على غلطتي بحقج واكول شلون خنتها وقبلت على نفسي اخسرها ويوم ماجتني الرسايل اول شى ردت اسوي اجي اذبحج بيدي من غيرتي وقهري وراها كلت ليش اوصخ ايدي بيج كافي اخذ فرح وتحلمين اخليج تشوفيها وهذا اكبر عقاب تستاهلي

رشا : تدري شى

شعلان : شنو

رشا : تعرفني مااسويها وتعرف كلش زين مو اخلاقي ومتأكده كعدت هاي الايام كلها حتى بس تلزم خيط يأكد شكك واخذك لفرح بس حتى تكسرني وابشرك كسرتني رجعلي بتي كلشي مااريد منك

شعلان : كتلج هسه تحلمين تشوفيها واياج تخابرين بعد

رشا : جنات كعد تضربها وتأذيها خاف الله بيها هاي بتك اول فرحتك

شعلان : الطفله مدلله بيتي لتحجين شى بكيفج

رشا : قبل شويه خابروني وفرح تشكي من تعامل جنات وياها اذا صار شى بيها

شعلان : لتكملين وتهددين ميصير طول ماانتي بعيده عنها البنيه بخير ومالج دخل بعد بيها جان يسده

شمرت التلفون بلكااع الله ياخذك ياعار

ريم : ليش نزلتي نفسج اله

رشا : وابوس رجله هم بس يرجعها اليه لو مأذيني لو مكطعني عادي بس لا فرح هسه انتي من انضربتي بلسحر لو اسم الله بتيم مو بيج جان تحملتي

ريم : لا والله مااتحمل

رشا : بينا يهون بس بجهالنا لا

ريم : متشوفين بابا دوم يكول بيه ولا بيكم والله هسه حسيت شنو معنى كلامه

شووو كومي غسلي وصلي اليوم كله مصليتي وربج قادر يظهر الحق

رشا : يعني شغله تافهه هيج ومنكدر نحلها

ريم : خوفج من التوافهه هي الي تأذي

سليل : سجاد جان طول الايام كاعد على اعصابه وكلف ولد يرجع الحساب القديم مال رشا ومفاد لان عطلوه هو والحساب الثاني جنت اشوفه شلون يدخن ويحرك بصدره من التفكير حمدت الله بأن مصدكها وماعنده شك بيها ودوم يكول رشا متسويها الي خانكنا ماعدنا دليل يثبت مو سوايتها

ثاني يوم سبحت تيم وطلعته جنت اشوف رشا شلون تباوع وتنقهر حتى مرات اخلي ينام بحضنها بس اكيد مياخذ مكان فرح

دك تلفوني باوعت نوريه هاااا هاي شتريد جاوبت نعم

نوريه : شلونج

ريم : بخير شعجب مبين حلمانه بيه

نوريه : شوكت اتوبين من ابني

ريم : اهووو هم رجعنا هسه اني يمه كرباه شوكت متضوجين وصحتي عوفي ابني احد گلج اني لازكه بيه حتى جياته قليله

نوريه : شوفي ريم اخاف اختج سكتو عن فضيحتها ورجلها كدر ياخذ بته ويسكت اني مااسكت واوصل خبر لحماج الجبير اكله تعال شوف مرت اخوك الشهيد تتمعشك ويه ابن عمها طابه طالعه وادز اله سكرينات مال اختج واخلي ياخذ ابنج وعود گابلي رشا واندبن حظجن

ريم : بطبعي مااخاف ولا اهتم بس مثل مكالت رشا لو بينا الاذيه سهله  بجهالنا صعب ومنكدر نتحمله خفت من كلامها وبينت نفسي قويه اعتقد عرفت خوفي واستغلته ضدي

نوريه :اعرف حماج عصبي ومينجرع وماعنده لحيه مسرحه بس يعرف ثاني يوم يحجز ويجي للعراق ياخذه منج صيري حبابه واعرفي حجمج شكد ولتصيرين نسخه ثانيه من اختج ولتكولين محذرتيني

ريم : شتردين مني

نوريه : مااريد شى بس عوفي وحيدي واذا شفتي يفتر عليج اطردي افلتي بريشج احسن ماانتفه الج

ريم : شسوين سوي لا انتي ولا انعام ولا علي ولا الف مثلكم يهزوني واذا اني عفت حسين لو تموتين مراح تكدرين تمشين كلامج عليه

نوريه : اطلعي منها نصيحه مني وهلمره خابرت ونصحت مره ثانيه تلكي الراح يصيرلج

ريم : سديته بوجهه خايفه نزلت اركض على عمه وبابا من يوم شغلت رشا كلشي احجي اله وكعدت مقابيلهم وسولفت

حجي طه : هذا الخفت منه توقعت اذا مو من حسين يعرفون من جنات لان عدها اتصال بيهم

نهر : وشراح نسوي هسه

حجي طه : نشيل من بغداد

ريم : لا بابا كله ولا هاي السالفه

حجي طه : شسوي تردين انتظر حتى علي يطبلي للمطعم ويفضحني كدام العمال

نهر : حتى لو عفنا بغداد البيت وين نعوفه المطعم وهذا باب رزقك

حجي طه : المطعم اعوفه على عمار ومحسن بكل الاحوال هاي الفتره شفتي صحتي تعبانه ومااتحمل هوايه اروح همه يمشوه والبيت أجره وبفلوس الايجار أجر بغير مكان

ريم : وبعدين انهزمنا مثل مرحنا للكوت وصارت النا مصيبه وتعرفنا على مشعول واهله عدا المشاكل الصارت النا ليش من يصير شى جبير لازم ننهزم

حجي طه : لان اخاف عليكم ذيج اختج تصارع الموت لان اخذوها بتها وحاس بيها شلون اني لو أذو ٤ بنات تتوقعين اتحمل اني لا حول ولا قوه لا اكدر اواجهم واوكف بعينهم ولا اكدر انتظر شراح يصير ماطول بيت علي يعرفون راح يستغلون الموقف

نهر : نبلغ حسين هو يتعامل وياهم

حجي طه : ريم اني اعرف حسين يريدج وزواجج منه معناها اذيه الج طول العمر اختاري لو تتزوجي وتتحملين الي يصير وتوقعي حتى بأبنج يأذوج لان ذوله رحمه بگلوبهم انشالت شفتي صلخوج بسحر خلوج شبهه مخبله ورشا طعنوها بشرفها ماكو وحده بيجن عدها شى وياهم اذا ما دمروها نصيحتي الج سدي هذا الباب وللابد حتى ترتاحين ذوله ما وراهم بس الاذيه لتصيرين نسخه مني بنتي ويمكن أذيتج بعد اقوى لان انتي بنيه متتحملين

ريم : كمت من عدهم واتصلت على حسين

حسين : كاعد بلغرفه ومعتزل الكل وهمه مثل كل مره وخاصه امي تحاول تحجي ويايه وماانطيها مجال دخلت للغرفه عليه وكعدت يمي

نوريه : يمه حسين لشوكت تضل هيج والله ورم گلبي من سوالفك

حسين : صاير شئ

نوريه : اريد افرح بجهالك اريد ازوجك كبرت الي بعمرك اثنين و٣ جهال عنده

حسين : الف مره حجينا بهذا الموضوع

نوريه : شوف حمات نورس تخبل ذيج البنيه بت عائله ومثقفه كافي جمالها والعيون خضر تموت الله يحفظها لشبابها وكل منروح الهم تسأل عليك خلي نحطبها الك والله بعدين تتشكرني

حسين : سمعيني يوم وجان يدك تلفوني صار شكد مداكه جاوبت

مشغول شويه ونتخابر

ريم : تعال هسه عوف كلشي وتعال

حسين : مااشي اخذت السويج والموبايل وكمت

نوريه : بعدنا ممكملين كلامنا

حسين : اجي ونكمل

نوريه : وين رايح

حسين : مجاوبت وطلعت اركض صوتها موطبيعي

ريم : ربع ساعه ولكيته على الباب فتحت الباب اله واشرت على الحديقه حاطه كراسي بيها تعال نكعد هنا كعدنا وهو مستغرب وجهي

حسين : شكلج مو طبيعي

ريم : خلي احجي ولتقاطعني عفيه وبعدين احكم وبديت اسولف على شغلة رشا انگلبت خلقته وتالي كتله على مكالمة امه

حسين : اعرف رشا متسويها

ريم : دزيت عليك اليوم مو حتى تنطي رأيك بموضوع رشا دزيت حتى اكول الك احلك من وعدك واعتبر اي عهد وعد بينا ماكو

حسين : شبيج ريم

ريم : مابيه وعفيه احترم قراري

حسين : ياقرار

ريم : اهلك مؤذيين وتحملت هواي منهم وبعد خلصت طاقتي علنت استسلامي من وصل الشغله للاعراض والجهال اعلن انسحابي

حسين : واهلي شعليهم بشغله رشا وانتي تكولين شاكه بجنات

ريم : وشاكه بأختك نورس ومتأكده لان هي تفتهم بهاي الامور والحاسبه وداخله دورات هاي جنات تكدر تغدر تسوي سحوره بس هكريه وهاي الامور مدبرها وهي متطلع ولا عدها صديقات غير اختك الي تعرف كلشي

حسين : هذا مجرد شك مو اكيد

ريم : لا اكيد فكر بيها تحملت يوم معفتني ودرت وجهك وتحملت يوم السحر وخلوني افتر بلساده والائمه ولو ما رحمه الله مااعرف هسه اني وين گلشي يأذيني اتحمله  بس مااتحمل اعيش الي تعيشه رشا بتها مو يمها وامك هددتني عيني عينك بإبني لهذا ياحسين اذا تحبني ابتعد عني كافي الصار اني وياك مستحيل ننجمع

حسين : بس اصبريلي والله اني اصير ظهرج وشحده الي يلمس شعره منج

ريم : لمسوو حسين وطيحو حظنا بدوها من ابويه ونهوها قبل شويه اتصال امك اني لعبت روحي من كلشي يذكرني بأهلك واريد اعيش وانساكم

حسين : حتى اني

ريم : اذا خيروني بينك وبين ابني اعذرني ابني اهم وبقائي وياك يهدد ابني اهلك مجرمين وماعدهم مخافه الله وكلشي مباح عدهم حتى سالفه رشا امك تعرفها بحذافيرها وقاريه المحادثات يعني بس الغبي يكول مالهم ايد بيها حسين دومك تكول احبج واخاف عليج اذا صدك تخاف علية ابعدني وابعد عني عن مصايبكم وحقدكم وروح ياابن عمي شوف حياتك ومستقبلك مره كتلك وهسه اعيدها قطارنا كل واحد اله سجه مستحيل يتقابلون

حسين : بس اني احبج ومااكدر بدونج

ريم : واني احب ابني واموت  بدونه لتصير اناني وفكر بتيم مو تحبه وتحبني خ

ابعدنا عن نار اهلك اترجاك كافي الصار لهسه

حسين : ريم ارجعي فكري متعرف شكعد اسوي حتى ننجمع بيت واحد

ريم : مااريد انجمع ولا اريد شى يربطني بيكم حسين احلفك بريمتك وحبك الها ابتعد عني وخليني اعيش بهدوء ويه ابني بعيد عن القال والقلت واهلك اترجاك

حسين : هذا قرارج النهائي

ريم : ومااغيره كاام وكف وحسيت بخنكته

حسين : يعني ترتاحين اذا عفتج

ريم : واعيش براحه ويه ابني اترجاك حسين

حسين : يجرالج المهم سعادتج

عافني وطلع بقيت مخنوكه واكول هو هذا الصح مشفت منهم بس الاذيه بقيت ساعه صافنه على السما ورافعه راسي احس شى يوكع من عيووني اعرف دابجي بس اكابر واكول هو هذا الصح اندفعت الباب وجان اطب فرح جفلت من شفتها تبتسم وتصيح ماما

يتبع .....

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_التاسع_والاربعون

بعد ما اجيب جرحي اتروفه اليّه اردود...

أنه استجمعت حيلي وبالصبر رفته...

تمرّ واتشوفني شلونه الوكت وياي...

ما مهموم واضحك والحزن عفته...

من اتشوفني تعرفني ...؟؟؟؟لا والله...

مو ذاك الغشيم المن كبل شفته...

اكبالك غير واحد بي شبه من ذاك ....

ما يشبه هذاك البي جرح عفته...

مرّه التجربه المريت بيهه وياك...

مرّه وعلمتني وحنظلك ضكته...

ولَو خسران....بس الله ايعوض الراح...

حب راح ابعشرتك وانتهه بوكته....

عفتك دون ما تسمعلي وقع اقدام....

ما تحجي الشموع وينطفن سكته...

عرض كدامي ظلي وعطّلت ممشاي....

حاجيته ونصحته ومن رفض دسته...

وظل حلمك ابعيني اعله الجفن مطروح....

جذاب اليكلك من رحت جسته...

ريم : صافنه على السما ورافعه راسي احس شى يوكع من عيووني اعرف دابجي بس اكابر واكول هو هذا الصح اندفعت الباب وجان اطب فرح جفلت من شفتها تبتسم وتصيح ماما كمزت من مكاني والكرسي وكع ليوره وركضت على فرح حضنتها وابوس بيها

منو جابج حبيبتي

فرح : بابا

ريم : وينه بابا اباوع شعلان ماكو لزمت ايد فرح وفتحت باب الشارع مديت راسي لمحت سيارته راحت هذا شبي

فرح :وين ماما

ريم :سديت الباب ورجعت بستها من خدها وكتلها تعالي جنت احس لازمه روح رشا الي راح ترجع للدنيا دخلت للبيت وشافتني عمه نهر باست فرح ورادت تهلهل من الفرح لزمت ايدها وكتلها اشش عمه الله عليج تعالي نسويها مفاجئة الها صعدنا الدرج وفتحنا باب غرفتها وهي نايمه مثل الطفله المكسور خاطرها قربت فرح الها دنكت باست خد امها وصاحت بأذنها بهدوء

ماما اكعدي اني اجيت

رشا : من عذابي وقهري وروحي الميته كمت اعيش على المهدئات حسيت بصوت يرن بأذني من كثر ما موجوع گلبي على بنتي گلت اتخيل ومفتحت عيني لحد مسمعت الصوت مره ثانيه فتحت عيني واشوف فروحه كدامه من حلات روحي سحبتها وحضنتها حييل واشهك بعلو صوتي وابوس بيها فقدت ممصدكه هي كدامي

نهر : على كيفج يمه البنيه مردتيها

ريم : خليها عمه هاي من لوعت گلبها واشتياقها

رشا : وخرتها من حظني اريد املي عيني بيها والله لهسه ممصدكه فرح كدامي ابوس بيدها وبخدودها

فروحة ماماتي انتي زينه أذوج منو جابج

فرح : بابا جابني وصلني للباب وكال ادخلي لامج

رشا : باوعت على ريم وينه شعلان جوه

ريم : لا راح شفت سيارته

نهر : شجاه هذا مخبل

ريم : اكو شى مو طبيعي ليش رجع فرح

رشا : رجعت حضنتها حييل وابوس بيها اباوع عليها سوده عليه الشعر مهوس والهدوم وصخه

ليش امي هيج وصخه اول تالي

فرح : خاله جنات متقبل اسبح واذا اسبح لازم وحدي واني مااعرف اغسل شعري زين بلشامبو ولا اكدر امشطه

ريم : الله يشيلج ياگلبة ياجنات

رشا : تعالي حبيبتي اكيد جوعانه

فرح : اكلت ويه بابا لفات وباسني وانطاني ذني وكال خلي امج تشتري ملابس هوايه الج والعاب

طلعت من جيبها ورق حدود العشر ورقات

ريم : باع الكرم هذا شارب شى اكص ايدي

رشا : خلي ادك عليه وجريت الموبايل من جوه راسي واتصلت يدك وميجاوب

ريم : يمعوده عوفي تعالي فروحه اسبحج

رشا : اني اسبحها

ريم : بيج حيل توكفين شوفي حالج منتهيه

رشا : ماطول رجعتلي فروحه كل الحيل بيه

ريم : مااشي سبحيها بس اوكف باب الحمام اخاف توكعين

رشا : اي تعالي ويايه جنت احس بألم بصدري ودوخه بس من فرحتي برجوعها حسيت كل الحيل بيه

اخذتها للحمام ودخلتها للدوش اباوع الشعر مكفش وناس لازكه بناس حااولت افكه وگلي قهر وحاسرتني دمعتي

فرح : اااخ ماما ااااخ كعد اتأذه

ريم : عوفيها رشا شو جيبيها كعدت افك شعرها على كيفي ورشا كعدت باب الحمام ورجعت راسها على الباب وتبجي

رشا : هااي المدلله هيج يصير بيها جنت ماامشط الها اله بمشط خشب حتى ليوكع شعرها و٢٤ ساعه اغسل وابدل واعدل هيج يصير بحالها

ريم : الْحٍمَدٍ للـّہ رجعت

فرح : خاله والله يأذيني على كيفج

ريم : اي ياروح خالتج على كيفي بس هو هذا شعرج وكح كام يتعارك واحنا لازم نهزمه ونفتح شعره شعره

باوعت زين وفتحت فروة راسها صخام بعينج جنات تقربت من رشا وشاورتها

ريم : البنيه مكمله بدايه بشعرها

رشا : لا بربج وكمت من مكاني وافلي بشعرها

ريم : على كيفج قابل صواريخ وتي ان تي بشعرها هو گمل اكو طفل ميصير بيه عادي هسه شامبو من الصيدليه نغسل شعرها بيه مره والثانيه يرجع لوز ونظيف

رشا : والله متقصده بكل حركة تسويها اذتها حتى تأذيني يعني لو الزمها اذا اكطع من لحمها واشرب من دمها ماارتاح

ريم : على كيفج ويانه مصاصه الدماء حيل متأثره بفلم توايلايت وصايره دورين لحم ودم ولج هم لو دمها بيه خير ماالومج هاي دمها نكس حرامات سنونج تصير برگبتها تسممين خيه

رشا : خلي اشوف عمه بلكت تروح جيبلي الشامبو هسه من الصيدليه

ريم : ابقي يم بتج هسه اني اروح لعمه واجيج

رشا : بستها ودنكت بمستواها وكتلها ماماتي شنو الصار وبابا جابج

فرح : بابا كتل خاله جنات حيل وخلاها تبجي وكلها دم من خشمها وحلكها واموري يبجي بابا جان يجر بيه

رشا : ليش متعرفين هزت براسها متعرف

فرح : وعمه هند باستني وكالت روحي لامج واجه بابا اخذني بلسياره بس اني وياه

رشا : شصاير ياالله لازم افهم ضربج ابوج

فرح : لا بس خاله جنات جانت تضربني هنا

اباوع رجلها بيه زراك خفيف وظهرها ايا ساقطه تضربها بأماكن مينتبهه الها شعلان

وبعد شسويلج

فرح : ومن يجي بابا تكولي نامي وتغطي وغمضي عيونج واذا فتحتيها اجويج بلسجينه والجطل وتحميهم على النار كدامي واني اخاف واروح انام

رشا : بديت اختنك من كلام فرح يعني معقوله اكو هيج گلب معقوله اكو هيج ناس گلبها ميت هاي طفله شلون تأذيها هيج

فرح : ماما عفيه ما اريد ارجع يم بابا وخاله

رشا : ماارجعج لو على موتي حضنتها وابوس بيها وبيه عيطه اهز الكوت كلها على راس جنات الحقيره وشعلان الي ميعرف بته شصاير يعني بس لو حاط عينه عليها جان عرف شصاير بفرح واحد انكس من الثاني ياربي

سبحناها ومشطنا الها ولبست الها بجامه جديده مباشره نامت بفراشها وطول ماهي نايمه اني ابجي

ريم : يمعوده مو هياتها شبيج تبجين

رشا : شنو ذنبها طفله بلثاني ابتدائي هيج يصير بيها تدرين المرت بيه مراح تنساه العمر كله

ريم : تكبر وتنسى

رشا : جان نسينا احنا سوالف امج واسوالف انعام والحرك وغيرها وغيرها محد ينسى شى تأذه منه حيل ويبقى يحفر باله حتى لو جان طفل

ريم : بمرور الايام احنا وياها واندللها وان شاء الله ترتاح وترجع ضحكتها وتنسى الفات كله هسه هيه يمج لازم تنتبهين على صحتج شوفي حالج تخوفين من الضعف وجوه عينج اسود عدا من تمشين تلهثين حاسه گلبج بيه شى لازم نروح طبيب

رشا : والله بيه ضيم شلون لهسه يشتغل ماادري

ريم : گلبج ياباني مو صينيه يتحمل الصدمات

رشا : اووف ياريمو تعبت وداعت فرح تعبت

ريم : تهون وتصير سوالف

رشا : شوكت مو خلصنا مصيبه وره الثانيه اني الاريد اعرفه شصاير وشعلان ليش ضارب جنات الفضول مو الف يقرا والنبي مليون

ريم : وداعتج اني مليار ولازم نعرف شصار ورجعت فرح بيها شى وشغلتج مال محادثات شصار منها ااوووف كومه اسأله

نهر : بنات خابر ابوجن كتله على فرح وخطيه حيل كيف وخابرت غزل هم وسليل هسه جاايه اجت هذا صوتها

دخلت سليل تريد تهلهل برجعت فرح وشافتها نايمه

سليل : هسه شلون اريد اطش جكليت علمود فرحتها

ريم : بله خلي اشوف الجكايت يسوه لو لا هله هله ماكنتوش جيبي خيه بحضني اني وفرح واحد

سليل :خوش درب من تكعد اطش عليها

ريم : كعدوها معودنا سليل صايره تلافه واطش ماكنتوش

سليل : شسوي مكدرت اطلع عمجن ميقبل جريت الجكليت مال التقديم وحطيته بعلاكه واجيت اركض وتعالي شنو تلافه دومي اصرف خوما مثلج قفاصه وادورين وياك وياك

ريم : شسوي اني مره ارمله ماعندي راتب خوما مثلجن عدجن من يصير عندي ابطل تقفيص والله لايعوزني عليكم وجيبي الجكليت لا اكعد فرح والله

رشا : ههههه يمعوده انطيها راح تكعد البنيه

سليل : هاااج جوعيه ام بطن وياريت مبين بيج

اخذت ٣ وطلعت فتحت وحده وحطيتها بحلك تيم والثانيه بحلكي اباوع بقت البنفسجي الي يحبها حسين دمعت عيني

واختنك صدري وكأني جنت فاصله عن الصار قبل ساعتين والتهيت بفرح وهسه رجعت لواقعي نزلت اغسل المطبخ والمواعين مااريد افكر اني شسويت وكل شويه اقنع روحي هو هذا الصح بس ليش اريد ابجي ليش منظره وهو يطلع مكسور ومقهور متروح من عيني ساعدني ياارب اسيطر على حالي ومااضعف

رشا : بقيت اباوع على فرح شلون نايمه بعمق سوده عليه شفتي منها الحقيره شكد بعد ادعي ياربي اكوم واكعد اتحسب عليها ماكو مناسبه دينيه ماانذر اريد حوبتي تطلع تمددت بصف فرح وحضنتها وتذكرت كلامها هند باستها وكالت ارجعي لامج هند شعليها زين هاي شلون احصلها وهي ماعدها تلفون لازم اتصل بسهير ماعندي غيرها هي توصلي لهند لازم افهم الصار

شويه وصاحني بابا ونزلت عليه فرحانه برجعت فرح

باسني وراد فرح كتله نايمه كعد بصفي ودك وجان اسمعه يكول ها ابو فرح

گلبي نغزني

حجي طه : انت رجعت فرح ومشكور بس غير افهم شصار ورجعتها وانت هنا عيطت وصيحت وطعنت شرف بتي

شعلان : ماكو شى طه سد الموضوع وانسى الصار وفرح ورجعتها لامها

حجي طه : شلون انسى الصار هي هينه هاي سالفه اعراض واطير بيها روس وفصول انت طعنت بشرفها ولهسه احنا منعرف شصار ومن حجيك معناها ظهرت براءت بتي ومامعقول اسكت بعد سوايتك

شعلان : طه سد الموضوع احسن الك والي اذا انفتحت نار راح تاكل الكل رجعت بتي لامها ومستعد اجي ابوس راسك وراس رشا

حجي طه : مو هيج الحجي شعلان اذا ماافهم كلشي واعرف منو الي طعن بشرفها مااعدها بسهوله

شعلان : اني بلطريق هسه بعدين نتخابر ونتفق واجيك لبيتك واراضيك

حجي طه : مو كلشي بلمراضاه ياابن خالي والسويته راح تدفع حقه وبدم گلبك هم وسده بوجهه

رشا : شكوو بابا

حجي طه : من رجعت فرح عرفت فضت شغلتج وبين كلشي وضحت الحقيقه بس هذا شعلان ميقبل يحجي الصار بس اله اندمه على سوايته وعلى وكعتج ذيج الايام كلها عباله يجي يتعارك ويطعن ويفشر واسكتله والله لا اطلعها من خشمه فتن الناقص الغيره

نهر : بلكت الله ويفض كلشي لتزعل روحك مايضل شى مضموم

حجي طه : هسه اخابر خالي خضير وافهمه كلشي لان اكيد براءت رشا عنده واله مجان رجع فرح

رشا : كمت وعفتهم يسولفون وراها كعدت فروحه وين متروح وياها حتى من كعدت تاكل بيدي اوكلها

ثاني يوم الظهر متحملت واتصلت على سهير

سهير : عااش من سمع صوتج خلصت مصلحتج من عدنا

رشا : لا والله بس اعرفج ملتهيه متكوليلي شوكت تتزوجين صار شكد مخطوبه من حرب الكويت

سهير : هههه وداعتج من معركة احد مخطوبه غير يوميه ميت واحد ومتأجل هلمره خاله كتله بس يطلع الاربعين مالته اذا متزوجنه افصخ

رشا : رجلج خضره على الرجال

سهير : حيل بيه منو كله يخطب

رشا : سهوره عندي شغله يمج

سهير : ياستار ماطول صارت بيها سهوره

رشا : والله اخر مره وداعت فرح

سهير : شتردين

رشا : بس اريدج ترحين لهند للبيت وتنطيها تلفونج احجي وياها

سهير : لو كايله تحررين فلسطين اسهل

رشا : الله عليج بداعت خطيبج شغله ضروريه كلش اعرف بس انتي ادبريها ولازم احجي ويه هند

سهير :مو اختي كاطعه من زمان علاقتها بهند وهي هم جانت تروح من وراج وبلعركه الاخيره بطلت توصل

رشا : عادي روحي وكولي الها هذا التلفون رشا تريد تحجي وياج

سهير : واذا سوت مشكله

رشا : متسوي لتصيرين جبانه بس هلمره والله مااطلب شى منج بعد

سهير :شوكت تردين اروح الها

رشا : ياريت هسه

سهير : انتظريني ساعه اكمل الخبز البيدي

رشا : لتتأخرين فدووة

سديته وعبالك اني الي بلتنور مو الخبز مال سهير الانتظار قاتل وبعد ساعه وربع دك الموبايل واتساب جاوبت واسمع صوت هند

هند : هاااا خير شرايده

رشا : شلونج ام علي

هند :بخير وخشي بلموضوع لان وكتي ضيك شرايده رشا

رشا : شصاير اريد اعرف شلون رجعت فرح

هند : واني شعليه

رشا : مال تبوسين فرح وتكولين الها ارجعي لامج وراها انه

هند : مو بتج بحضنج بعد شلج بلغوه الزايده

رشا : اعرفج تكرهيني وتموتين مني ومايوم ردتيلي الخير وهجمتيلي بيتي ولعبتي بعقل شعلان حتى يخوني جان تقاطعني

هند : بله مطيرين ليش اكو رجال يلعب بعقله انتي مصدكه بهذا الشى لج بابا لو شعلان ميريد يخون لو الف وحده مثلي متعلب بعقله يجوز احجي براسه انبهه على اشياء ممنتبهه عليها بس مال اخلي هو يحبج ومخلص الج ويخونج سولفيها للبطه

لو هو يحبج صدك وعينه مليانه ويخاف الله بيج لو جنات تتصلخ كدامه مينهز عليها او يجي يكلج يابه تره هاي بت عمج مو راحه خلي ارجعها لبيت ابوج او يسويله حركه ينبهج بأن بدا يضعف اتلاحكي لبيتج هذا لو هو ميريد بس اخويه عينه نكسه وعجبته بت عمج بيضه وطويله وحليوه وتفتر كدامه عجبه يضوك طعمها وبت عمج عين الله عليها ابد ماتستغل هيج مواقف وحده حسوده وتحب تاخذ حاجت غيرها وحبت تعيش عيشتج اني بس عليه فتحت الطريق الهم ذوله همه جاهزين للانحراف بس اني وجهتهم

رشا : بس الاعرفه انتي اول من لعب براسهم

هند : اني ردت ولد لاخويه عساه لاصار عنده ولد الحقير وجنت اجي مرات اشوف عيونه يباوع عليها من تروح وتجي عرفت بس يريد بز حتى يجيت

رشا : تحجي واني اتكطع ونفسي تلعب حسيت روحي جنت بؤره مال قذاره وماادري بيها

هند :وتزوجها وخلف منها وهي عضت الايد الي انمدت الها واني خوش كرصتها واني كرصتي والگبر والي اكرهه مااجوز منه اله اعيشه جحيم الله بعينه

رشا : احلفج بداعت علي اعرفج محرومه منه هسه وگلبج نار عليه احلفج براسه تحجيلي الصار

هند : كلة من وراها الكح.. ضيعت الاول والتالي وحركتني يم شعلان بس حييييل خوش توبتها

رشا : هند حلفتج بإبنج عليج العباس ابو فاضل احجي الصار

هند : شوفي اني احجيلج بس مو بعدين تركضين تكوليله والله اذا شهدوني انكر واطلعج جذابه ولا عبالج الي  سويته لخاطرج  انتي بفلس مااشتريج سويته لنفسي ولخاطر فرحه تبقى بت اخويه واني احبها وطفله من عرفت بيها يم جنات گلت هاي راح اطلع حليب رشا من عيوون فروحه وراح تأذيها

رشا : احجي فدووة ومااكول لاحد شصار

هند : دزيت امي من كالت فرح يم ابوها وحجالها سالفتج العوجه مال الفيس اني اكرهج بس اعرفج متسويها رحت للبيت لبست العبايه وطلعت اركض وكعت دخيل لامي تقبل اطلع ومن رحت لبيت شعلان شفت بتج واكفه على التخته وتمسح بلغراض وهدومها وصخه وتنظف مااكلج انهضمت تبقى من دمي عيطت عليها وهيه عينها فنصه وحده بايعه ومخلصه طردتني من البيت وكالت اذا اجيتي انطي خبر لشعلان واخلي يكطع النعال على راسج انهضمت هاي المتسوه الفطر الي برجلي تطردني

رجعت للبيت فايره دزيت عليه امي احجي وياه بلبدايه ماقبل ابو الوعث يجي تالي كوه توسلت امي بيه واجه وكعدت گباله وكتله

هند : اعرف حتى بوجهي متباوع ولتباوع اني هم گلبي مايصفى عليك  

شعلان : فضيني شرايده

هند : شوف اني سمعت بسوايت رشا وتره رشا ماتسويها

شعلان : شمدريج متسويها

هند : والله مرات عقلك يقفل ويصير بلوكه

شعلان : مبين صار كم يوم مكاتلج وجلدج يحكج

هند : بيك زود روح لذيج العرصه ام البلاوي والطلايب المسمومه لك انت حاطلك عكرب بلبيت

شعلان : هسه صارت موزينه موسويتها رابعه العدويه

هند : جنت مغشوشه بيها وغلطت

شعلان : هااا مغشوشه لو لان طلعت خيستج لوما الفضيحه واخاف يسألوني ليش كتلتها خلاص جان هسه انتي بلنجف

هند : عوفك مني لاتضل مجلب  دزيت عليك علمود رشا انت عندك صداقه وياه بلفيس معلق فديوم

شعلان : حاظرتني

هند : زين تسوي تفتهم

شعلان : تره راح اكوملج

هند : بله يلتفهمها وهي طايره لو رشا مسويه هيج ويه واحد هذا الواحد شمعرفه انت جنت رجلها وليش دزو الصور الك خو يدزوه لابوها

شعلان : اول تالي ادافعيلها منين نزلتلج هاي المحبه

هند : بعدني اكرهه ومااحبها وماارتاح الها بس الحك حك وروح شوف بتك مسويتها مرتك وصلت مسح تكرب عليها كراب المطي وهاي لحمه صغيره بعدها مال شغل

كوم حزام حزامين لجنات وروح ابويه اذا مطلعت سواياتها اتفل بوجهي ولك هاي السوالف والدغش ماتطلع بس من العكربه جنو ذيج بس لسان متسوي شى حرام ليش واحد يضلم بختها لك دواها الضرب واذا طلعت جنات مو وراها تعال انعل سلفايه وروح ابويه ماافتح حلكي ومستعده ابوس رجلها واراضيها ولو ما متأكده هيه وراها مااصيحك شعلان احنا الي نلعب بلناس مو تالي وكت تجي هااي تلعب بيك لتصير زوج وفكر بيها مبين الشغله ملعوبه

رشا : وليش دافعتيلي

هند : اني السويته لخاطر بتج تبقى بت اخويه مااقبل حالها هيج وهذا ماله دخل بلي بينا واني اكرهج تره لان شايفه نفسج فد شوفه وشايله خشمج بس اعرف هذا مو دربج واعرف جنات مثل مااعرف جف ايدي ولوين تكدر توصل بنذالتها هاي وحده لخاطر مصلحتها تبيع روحها

رشا : كملي عفيه

هند : كام شعلان طفر جنه هم يرادله بز ودفعته عليها وهو هم  مامقتنع حييل ميه بلميه سوايتج شويه ضليت كاعده بس البيه ميخليني حطيت العبايه على راسي وراه دخلت من المطبخ لكيته حاصرها بلحايط ودك بلصونده كل ضربه تنزل على جسمها مي يبارد على گلبي جنزها تجنز مابقى عظمه بيها صاحيه بس هي كويه البربوك تالي عطت وكتله ودي امير لاهله ماطول تجذب وهو شافني تخبل بس ذيج طفرت من جواه وركضت على ابنها هي روحها بأمير جان شعلان من شافها هيج جر امير ياخذه لاهله مو هو طول هاي الفتره مسكتهم عنها وهاي تخبلت وكامت اطلع جيفت بطنها وعود لان تحبه لشعلان وتغار عليه وخافت لايرجع الج سوت سوايتها عباله رجال مساعدها طلعت نورس بت عمها مو عائله تكول سبتتنك (مجاري) كلشي بيها ويحجون عليه بنات تالي وكت

رشا : اني مخلوسه واسمع كل كلمة من هند مرات تسمع ناس مؤذيه وناس متخاف الله هوايه بس لهاي المرحله مسامعه اثنينهن بنات عمي واثنينهن بنات ويعرفن بسوايتهن يمكن يذبحوني لهاي الدرجه السقوط عدهن وهنه مو صغار وامهات يعني الاجرام يمشي بدمهن

وعرف شعلان اني شريفه ومسويت شى

هند : ولزم جنات سحل البيت سحل يابويه ردت اطش واهليه وتشمتت بيها ليش انسى من حركتني يم شعلان وبسوايتها ضيعت ابني وهسه ميباوع بوجهي

رشا : بگلبي اكول اللهم اضرب الظالمين بلظالمين واخرجنا من بين ايديهم سالمين وحده حطت ايدها بأيد الثانيه واتفقن عليه ودمرن حياتي وهسه وحده كعد تأذي الثانيه بنفس الايد الي بيوم وصلتني للموت

هند : شو ساكته

رشا : رجعت ركزت وياها وكتلها ومن عرف شسوه بيها شعلان

هند : ماسوه شى بس كطع الصونده عليها يضرب ويعيط بكل علوو حسه اااخ لو شايفتها مثل الجريدي حاصرها ويضرب بيها وين متجي الصونده وعافها مدده بلكاع تون والوجه تشريب لحم صاير واني باوعت عليها وتشمت وعفتها وطلعت شفت شعلان اخذ بتج من ايدها وصعدها بلسياره عرفت جابها واجه عليج

رشا : ارتاحيتي من شفتيها هيج

هند : مي بارد وربج واعرف مراح يجوز منها اله يندمها على الساعه الجت بيها للدنيا هو ميطلكها علمود ابنه لان مريض يخاف عليه بس راح يخليها تعيش الذل والاهانه والمر اخويه من يخبث  اكبر واحد ميلحكه

رشا : بهاي صدگتي

هند : مااوصيج اذا اجه وتوسل ارجعيله مثل  الصخله ماعندج كرامه

رشا : لو يموت لو يبوس رجلي ماارجعله

هند : خلي يستاهل

رشا : سكتت شوي وجريت نفس وحاولت اهدأ واقلل توتر وكتلها اعرف بيج هسه من كعد تحجيلي حتى انتقم من شعلان لان مبينه حاقده حيل عليه انتي هسه سولفتي مو محبة بيه ولا لان حلفتج سولفتي حتى أذي بعد لشعلان

هند : اذا تعرفين المن تسألين

رشا : تدرين شئ مرات تصير مصيبه ويجي بابا يكعد ويسولف ويايه ويصبرني ويكول خير والله كريم  وربج ضاملج الخير ومن تشوف كلام الله عسى ان تكرهوا شيئاً وهو خيراً لكم

اصفن اكول ياخير يجي واني خسرت رجلي وبيتي وعيشتي وحب عمرري اثاري الله سبحانه وتعالى نقذني من واحد حرامات يتسمى رجال وافني عمري لخاطره لو الصار بيه واني بعمر الاربعينات لو الخمسينات شجان صار بيه اكبر غلطه سويتها يوم مقبلت بأخوج واكو فرق بلتفكير والعقل والبيئه جان لازم افهم هذا الانسان ميصلح يكون رجال لمرته واب لبنته وظهر وكت العازه حتى مدققت سبب طلاكه من زوجته الاولى غلطتي وغلطت كومه بنات مثلي من نتزوج مطلق كل اعتقادنا هي الغلطانه وهو مابيه قصور يبقى رجال وماكو شئ يعيبه وهو العيب نفسه

طلع الله يحبني يوم ماشوفني نذاله وخست الانسان الي متزوجته الي جنت حاسبته ملاك وهو ابليس يتعلم منه

هند : راح ارجع التلفون لسهير وهااا لتنسين اذا سويتي شى من ورايه اطيح حظج اخاف تخليني اشهد بهذا الحجي كله اكول جذب ومصار

رشا : كلشي مااريد بس الله يبعدني عنكم وعن شركم

سدت الخط وشعوري متضارب افرح لان ثبتت برائتي وجنات انكتلت كتله معدله او انقهر لان انطعن بشرفي من اقرب الناس وردت اخسر سمعتي وبنتي بقيت كاعده على الجربايه وصافنه وطبت ريم

ريم : هااا خيرج

رشا : كعدت حجيت كلشي الها

ريم : خرب عرضج ريم تجيبيها سنتر عرفت نورس ام الوصخ وراها من تلفون نوريه مبين

رشا : شنسوي هسه

ريم : اكعدي واسكتي

رشا : والصار

ريم : انسي

رشا : من كل عقلج

ريم : اي من كل عقلي اذا عرف سجاد وبابا مراح يسكتون ويسوها عشائرياً

رشا : وهذا الي اريده

ريم : عبالج راح يسكت شعلان راح يعلكها بلزايد ويجوز ينكر وهند من الاول كالت مااشهد بعد منين تثبتين برائتج واخاف الشغله اندفنت راح نرجع نحفرها ونشوفها للناس وتصيرين علج الهم لتتوقعين شعلان ينطي بروحه ويسوي نفسه غلطان هو لكيتي جنات على فرشتج وفرها عليج كدام العشيره مو عاد هاي السالفه

خلي بتج بحضنج وابتعدي عنهم

رشا : مو كدامج جزت منهم بس همه معافوني

ريم : عيشي بدونهم وخلي نبلغ عمه نهر بلصار وتقنع بابا هم يسد الموضوع اذا انفتح هذا حقير شعلان عنده قابليه يثبت الصور ويكول مالتج ولا كدام عشيرته يطلع مو رجال وميعرف يحكم مرته

ريم : هو خوش اكلت الها كتله شكد مقرفه وماعدها كرامه مشبعها كتل وباقيه

رشا : كله حتى لا اشمت بيها

ريم : فارغه ماعدها شغل وعمل فاشله عوفيها وكافي الصار

نزلنا على عمه وفهمناها  وهي جان رأيها مثل رأي مرات المطالبه بلحق يثير المتاعب والمشاكل وخاصه اذا شغله تخص السمعه والشرف اعتمدنا مبدأ ابعد عن الشر وغنيله

رشا : ركضت على شغله دوامها مردت السنه تروح منها وعندي مدرسه تصير بت خالتها لمديره فرح وفهمتها الظرف حتى لو تطلع دور ثاني المهم السنه متعبر عدها وقبلت ترجع للمدرسه جنت خايفه لترسب وتتأذه نفسيتها اكثر

بابا جان يلوب على شغلتي ودوم شعلان يتهزم وبقت عمه وره بابا لحد مقتنع تنسد السالفه لان ماعدنا شى ملموس بيدنا نكدر نوكف بوجهم بيه

غزل : جنت اركض من دكتوره لدكتوره وكل وحده تنطيني اشكال العلاجات وميصير الحمل صار سنه على زواجي جنت اشوف الابتسامه الهادئه بوجهه خاله وعمار بس اني نار تاكل بيه اريد طفل اريد اصير ام علاقة عمار وعمو محسن تحسنت وبيوم راجع عمار وجان هادئ حييل

شبيك حبيبي

عمار : مابيه شى سلامتج

غزل : الله عليك شبيك لتشلع گلبي

عمار : اليوم جان عمو محسن تعبان ومتخربط وضعه

غزل : يمه شبيهه

عمار : مبين مغثوث وتالي كعد يحجي ويه ابوج اني ردت اطلع واعوفهم بس هو كال ابقى انت مو غريب حبيت حجايته وتقديره تعرفين شنو الي مضوجه

غزل : شنو

عمار : فيصل متزوج سويديه

غزل : الله يهني

عمار : يعني هيج بكل سهوله

غزل : اي بكل سهوله وليش اصعبها

عمار : متنقهرين تضوجين

غزل : ولا بالي واعرف هذا راح يصير بس انقهر على عمو لان خطيه كتل روحه يبقي بلعراق او يزوجة عراقيه ومرهمت ويااه

عمار : اي جان حيل تعبان ومقهور

غزل : هذا اختياره بعد وحياته

عمار : فاجأتيني بتصرفج

غزل : لتتوقع اكو احد بعقلي وبگلبي غيرك فيصل مرحله وانتهت من حياتي ولا لمحه يجي بالي

عمار : اذا اجه كولي حتى اموتج

غزل : هههه لا ميحتاج نسولف جان تندك الباب دخلت بسمه مخروعه

هااا شبيج

هذا عمو جوه مكعد تسمع صوته

عمار : اهوووو شجابه

بسمه : فدوة عمار اطرده والله يسوي جالي بلمعده من يجي

عمار : ابقي هنا يم غزل ولتنزلن

طلع وره دقيقه طلعنا وراها وروسنا مدندله من الدرج نسمع شكووو

واسمه يكوله والله عيب عليك عمي يعني جاي مناك لهنا حتى تكول مرتك لهسه محبلت تره هاي عيب بحقك هاي سوالف نسوان مو زلم مشوربه

غير لمصلحتك

عمار : بالاول ليش تتزوج وبعدها ليش تزوجت وبعدها ليش مرتك محبلت والله امي الي هيه العمه ماسوت سوايتك حتى وكفتنا واحنا نحجي بهاي السوالف عيب بحق رجولتنا

صارلك سنه وماصرت اب

عمار : عسى ما عشره غير هاي حياتي استغفر الله يوازيني كوه على المشاكل عمي اني متفق وياها منريد طفل هسه وضعي ممترتب ومنا لسنتين او ٣ يله افكر اصير اب ارتاح رحمه لموتاك

اني بتي اجتها قسمه وكلت يجوز ابن عمها رايدها وهو اولى بيها

غزل : كمت اطك سن بسن واني اسمع كلام عمه الي يحرك الدم

عمار : مشيها عمي الله يوفقها اني رجال متزوج ومااتزوج بعد مكتفي هو وحده وكوه مدبرها هلمره اثنين

مو اني كلت ماطول متخلف تردها لاهلها وازوجك بتي

عمار : احد دازك عليه لان وضعك ابد مو طبيعي عمي مرتي مابيها شى وهاي اخر مره اقبلك تحجي بهيج مواضيع مال نسوان وانت اذا تحب هيج تسولف لتجيني لان اتخبل من هذا الحجي

وبتك زوجها مشي البنيه والله حمضتها يمك

يمه صبي لعمي اخاف جوعان اني صاعد انام من رخصتك وصعدت خفت لا افقد اعصابي

غزل : شافنا واكفات وعيوني مدمعه سحبني من ايدي ودخلني للغرفه وسد الباب وحضني شبيه الحلو

غزل : راح تتزوج موو

عمار : شوف ام نص عقل الثانيه شزوج مو متزوجج لو انتي راس بصل

غزل : مدااشاقه عمار راح تتزوج عليه

عمار : لتصيرين مثل عمي عقلج ثخين

غزل : وخرت منه وحطيت ايدي على وجهي وابجي

سحب ايدي وباسها

بابا مااتزوج والله العنده مثلج يحمدالله يوميه اني اخذتج وانتي تمشين بدمي شلون بعد اكدر اعاشر غيرج لتضلين اي حجايه تهزج عمي يخيط ويخربط بكيفه بعدنا نحجي ودكت الباب خاله واول مدخلت

عمار : يمه اخطبيلي بت عمي غزل وافقت

ام عمار : يااااا شحدك هو العنده هذا الذهب الصافي يدور على التنك

عمار : هااج حتى عمتج وياج اني كلت كلها شهر شهرين وتصير من الروس والشعر وصوتجن للشارع واصل شو كل ماادخل الكاجن مصافيات شوكت تعلك نريد اكشن

ام عمار : فال الله ولا فالك غزوله والله وردة ومعدله ومرتبه وتسمع الكلام والعيبه متطلع منها ومتخليني حتى اصير عصبيه

عمار : يعني مااتزوج عليها

ام عمار : غير الزمك الشارع

عمار : شفتي هااج

غزل : ابتسمت ومسحت دموعي وبست خاله

عمار : الله يستر منجن من تتفقن

غزل : جنت مرتاحه حيل وسعيده حياتي ويه عمار كلش حلووه بس ماكو حلوو يكمل تمنيت احبل ويصير طفل عندي ولو واحد حتى تكمل فرحتي حيل مأزمتني شغلة الطفل وميته رعب لا مااحبل بحياتي واخسر حياتي الي بطلعان الروح حصلتها

ريم : الصفنه والهدوء سكن حياتي هاي الايام صار شهر مشايفه حسين ولا شال تلفون واطمن وحقه بعد كلامي ميصير احجي ولا اعتب جبنا مرجوحه للجهال مرات اكعد بيها وافتر وصافنه وهاي كمزت گبالي شكوو فزيت

رشا : خابرت حسين

ريم : هاااا اسمه يلعب بروحي واختنك

شبيهه

رشا : بلغته بكلام هند وحلفت اله وهو سده

ريم : وشنو الراح يصير

رشا : اذا رجال وكدها يربي اخته مال اخليها تعدي هيج سلامات ابد ذيج وشبعت طن گتل بقت نورس

ريم : وشذكرج وره شهر

رشا : بلبدايه مردت مشاكل بس اليوم فتحت عيوني وگلي امل اشوف عركه عركتين

ريم : راح تعلك بيتهم

رشا : وهذا المطلوب

طبت سليل وبحضنها كيان وبيدها زيون جنها كنغر وتمشي شمرتهم وكعدت

سليل : اووف شلعو گلبي

رشا : وعمو يريد بعد جهال

سليل : بطران عمجن مو هو اليتعب عوفكم من سجاد هسه تدرن اليوم شگلي سجاد

ريم : شكاال

سليل : حسين راجع لاهله وياكلون عقله يردون يزوجوه

ريم : جفلت من مكاني وكلت وقبل على الخطوبه

سليل : هاااي شنو عيني ست ريم شعليج انتي

ريم : انتبهت على نفسي ورجعت لمكاني بس سؤال شبيج

رشا : مبين

سليل : والله الدك على الحديد يفله والله اعلم يجوز بمرور الايام نسمع بعرسه والله يستاهل تعب خطيه بس كون الي يتزوجها بيها خير مو مثل امه واخته

ريم : متحملت وكمت خفت لا اتعصب كدامهن

رشا : شفتيها شلون تگلت

سليل : ههههه گرب نار الغيره گرب نار الغيره وأولي وأولي

رشا : شكد قديمه واطلعين تراب

سليل : اني احب القديم شلج دخل

رشا : صدك حسين يريد يخطب

سليل : مكلت يريد كلت اهله اكلو راسه

رشا : معناها بدا يفكر

سليل : والله يارشاوي احسه بسمار هذا منه حتى يوصل الخبر لريم اني لهسه ممقتنعه حسين يعوفها ويدير وجهه ويروح بكل برود سامعه من السكوتي موتي وهذا سكوتي مينعرف شيفكر

رشا : حتى لو بابا ميقبل ومينطيها والاكبر علي ونوريه لو يموت حسين ميخطبها

سليل : ربج قادر على كل شى

رشا : الله ياداعيه

سليل : عندي شغله وياكم والتهينا بحسين

رشا : خير

سليل : هسه احنا برجب وبعد كم يوم ندخل شعبان شنو رأيجن نحجز لماما للعمره

رشا : شجابها بالج

سليل : مرات اشوفها تباوع على التلفزيون من تطلع الكعبه الشريفه وتضل تبجي وتكول هم يجي يوم واشوفج مسويه الجواز ومنتظره دعوتك ياارب وتبقى تبجي وهي متكلف

رشا : نحجز الها ولبابا شتكولين

سليل : ياريت بس اني ماعندي هوايه

رشا : مني وهم نكول لغزل ولريم اذا ماعدهن اني وياج نشيلها

سليل : اي والله ياريت صحنا ريم وكالت عندي فلوس انطي حالي من حالكم وخابرنا غزل مردنا ناخذ لان خفنا يتأذه وضعها بس هي مقبلت اله تشارك ومردنا نحسسها هي اقل من عدنا بس اخذنا اقل بشويه

جمعت الفلوس من البنات على العندي وانطيتهم لسجاد وريم باكت الجوازات وحجزنا الهم

سليل : اليوم واكفه ماما نهر وبيدها الجنطه ودموعها عشره عشره ممصدكه تروح لبيت الله جانت هاي هديتنا البسيطه الها حك تعبها وتربيتها وسهرها وحبها الي عوضنا عن فقدان الام وشكد منسوي شغلات الها نقطه بحر عن تضحيتها وحبها النا

وبابا مبتسم رغم مقبل نحجز بفلوسنا وراد يرجع المبلغ وهو يدفع  بس مقبلنا هذا الحجي طه مي العين قليل بحقه

واكفين بلطرمه وبيد رشا دولكه مي تشمرها وراهم والجنط يحطها سجاد بلسياره

نهر : يمه مااعرف بيش اجازيجن حققتن حلمي

سليل : هههه والله ياماما المفروض بعلكس احنا بيش انجازيج

ريم : نهوره انتي الضلع الماينشلع هلمره نوديج لمكه المره الجايه بشرم الشيخ على البحر

نهر : مااريد بس بيت الله اكعدي وسكتي ام الضلوع

غزل : راح نشتاقلج ماما

نهر : راح ادعيلج يم بيت الله يفك بطنج وتحبلين وتفرحينا

رشا : واحنا بنت البطه السوده متدعينا

نهر : اااخ منجن شلون ماادعي كل وحده منجن لساني ميبطل دعاء الها

سليل : تروحون وترجعون بلسلامه

ريم : بوسنا ايد بابا وعمه وهاي اول مره نودعهم ونبقى بلبيت وحدنا صعدو السياره وشمرت المي رشا وراهم وعيونه كلها حب الهم

وصلهم عمو للشركه ومعافهم اله بلمطار ورجع واول شى قرره منبقى وحدنا  كاال اسد بيتي ونجي يمكم حتى لتبقون  وحدكم واحنا كيفنا سليل ويانا وانگلب البيت روضه فرح وزين وتيم وكيان يسحف ويعيط على واهسهم

ايام وحدنا مو ١٢ يوم تكول ١٢ سنه يوميه نخابرهم ونفتح كاميرا وياهم فرحتنا من نشوف عمه تبجي من الفرح لان راحت عمره وزارت بيت الله وقبر الرسول

باجر يجون وسوينا الهم ميز بسيط بيه كيكه وشغلات مال عمره جنا طايرين من الفرح وكاعده ارتب جان تندك الباب وركض زين وتيم للباب واسمع صوته بلعت ريك وعفت كلشي من ايدي وطلعت اشوف منو جان اشوفه واكف كدامي بأناقته ومزين ومرتب نفسه اول مشافني ابتسم بهدوء

حسين : شلونج ريم

ريم :  الْحٍمَدٍ للـّہ تعال ادخل

حسين : مستعجل بس اجيت على سجاد

ريم : هااا سجاد يعني مو جاي تشوفنا

حسين : لا جاي اشوف سجاد

ريم : ضجت حيل وكتله مموجود روحله للمحل

حسين : اي رايح

ريم : طبيت ضايجه يحجي ويايه برود

مشيت شوي خفت ليطلع تيم وراه للشارع ويسويلي مصيبه حرك ميكعد والكاه شايله ويبوس بيه ويكله افيش بيك ريحة امك من اشتعلت امك شكد ريحتها طيبه وذاك السخيف تيومي يضحك  ابتسمت على كلامه رجعت مطلعت بس مدري ليش فرحت هسه اني الرعنه مو كتله كلشي انتهى المن ارجف عليه

شوي وطب تيم وبيده سياره دوم من يجي يشتريله احب حنيته وطيبة گلبه من هو وصغير حنين عليه وهسه على ابني هسه شيصير لو امك مو نوريه وابوك مو علي ولا بيبيتك انعام مجان هسه بيتنا اني ويااك اااخ عسى بحضج وبختج يانوريه العوبه

رشا : كملنا شغلنا وكاعدين كلنا نسولف ونضحك ودك تلفوني اباوع رقم شعلان اهوو شيريد

كمت ودخلت بغرفة بابا وفتحت الخط

نعم

شعلان : شلونج رشا

رشا : طول مااني بعيده منكم بخير

شعلان :مااحب هاي النبره منج

رشا : متوقعت بعد تتصل هم الك عين بعد سوايتك الاخيره انت ومرتك الحقيره

شعلان : ما اريد افتح دفاتر عتيكة اني جايج بطلب

رشا : خير

شعلان : اريدج ترجعيلي

رشا : من كل عقلك بعد الصار كله

شعلان : حتى جنات اطلكها واسجل البيت بأسمج بس ارجعي

رشا : لو تبقى اخر رجال بلدنيا يعني كالو شطبنا كيم اوفر انتهت الزلم كلها وبقى بس شعلان بالاخير هم ماارجعلك ولا اباوع بوجهك

شعلان : غلطت ومعترف بغلطي وصار سنين منسيتي

رشا : نسيت

شعلان : شفتي لعد ارجعيلي

رشا : نسيتك انت شعلان

شعلان : اني ماانسي اني اول حب بعمرج

رشا : جنت اول حب هسه لا شى عندي انت ابو بنتي مع الاسف غيرها اي شى مالك لا ذكر ولا حب ولا عشره كلها مسحتها جوه رجلي واخر مره من وكفت تعيط وتريد تمد ايدك وتضربني وبكل عين صلفه تتهمني بشرفي هاي منسيتها تره تكدر تكول غلست عليها حتى ماانزل مستواكم وحتى لا اقهر بابا واكعده ثاني مره كدام خواله من ورايه

شعلان : شسوي واحد ويكلي ام بنتك هيج وهيج وبدليل تردين اصفكلج لو اخذج بالاحضان غير اني ردت اكتلج خلاص بوكتها بس لو لاكفج وحدج

رشا : متكدر تلمس شعره مني وعرفت بيه ماعندي شى وسكتت بوكت التهايم تجي تركض وكت الحق تسكت شيطان مو بيدك

شعلان : ذيج الشغله انسيها بداعت فرح عندج وخليني بلموضوع الاهم اريدج ترجعين وكتلج حتى البيت اسجله بأسمج

رشا : مو اني الي تشتريني بيت بيه كل سوالفك المكسره شوف شعلان رجعه ماارجع واغسل ايدك مني واذا اكره شخص بحياتي فأنت اكثر شخص كرهته بعمري كله وياك جنات نفس المستوى

عندك يمي مره بلشهر تجي تشوف فرح وتروح غيرها اني لا اعرفك ولا تعرفني

اختنك وحسيت بعبرته وكاال

شعلان : اترجاج رشا مستعد اجيب ساده وعمامي اكلب المنطقه كلها واتوسل لابوج واصيغج من راسج لرجلج ذهب والي اطلبي بس ارجعي

رشا : طلبت قبل مده ورفضت حافظ على البقى من رجولتك وكرامتك وبعد لتتصل بيه البينا انتهى وربك عاادل وكريم واخذت حقي تسوه عمرك هسه عايش ويه وحده مطيقها وحده حيه تحير شسوي مصايب ومتكدر تأمنها على بيتك

وحده بيوم فضلتها عليه واليوم جاي تتوسل حتى بس ارضى بيك يكفي تنام بصفها وتتذكرني واضل حسره بروحك

كسرتني وكفت على حيلي ونسيتك يكفي تشوفني عايشه احسن عيشه وانت اعرف بيك راح تخلصها من مره لمره حتى بس تعوض رشا لو تموت متلكه وحده مثلي حبتك وسمعت كلامك وقدرتك وصانت بيتك وشرفك ومايوم كسرتلك كلمة لك شعلان لو تحفه وتمشي على رگبك متلكه اضفري

روح خلصها ويه وحده الله اعلم شراح اتسوي مستقبلاً بيك هيج وحده مثل جنات بوكت الشده ادفرك وكت الحاجه متوكف وياك هاي تبيعك بشربت مي وحيل بيك هو هذا المستوى الي يلوك الك

شعلان : لتتجاوزين

رشا : متجاوزت بس الحق يزعل نصيحه مني دير بالك لطعنك بيوم الي تطعن مره كلشي تسوي هيج وحده تنام بصفها نومه الذيب تك عين ماكول الله يعينك على ما بلاك

شعلان : تمنيت ترجعين واثبتلج شكد احبج وشاريج

رشا : هههههه والله تضحك اعرف دمك خفيف بس متوقعت لهاي الدرجه تثبتلي ثبتت ابو فروحه وانت كدها ابد مخلفت وعد بس عفيه لتعيدها ليسمعك احد وتصير مضحكه

شعلان : اعرف بروحي خسرتج كلت احاول مره اخيره

رشا : لتحاول ابد ولا تعيدها روح لمرتك ولابنك المريض الله يشافي وانساني لان انت وذيج نسيتكم وطلعتكم من حياتي النظيفه

لتتصل بعد واذا ردت فرح اتصل لو على عمتي لو بابا حتى صوتك اشمأز منه وسديته بوجهه وسويت حظر اله نزلت دموعي تحرك خدي وعدت نفسي ماابجي عليه ابد بحياتي واذا اختنك واضوج وابجي بس علمود أمنت بيه وحبيته

سليل : واكفين  اني وريم ورشا وغزل وسجاد والذبيحه بلباب ومنتظرين بابا وماما نهر وبس نزلو من التكسي هلاهل مالتنا والجكليت جنا حيل فرحانين بيهم الدنيا مسايعتنا

احنا بنهايه الشهر الرابع ٢٠١٨ الجو حلوو

دخلناهم بهوسات وردح احنا والجهال

نهر : يمه اروحلكم فدووه شكد اشتاقيت الكم تعالو حبايبي

ريم : هااي شنو اشتاقيتي للجهال اكثر من عدنا

نهر : هو غير احبهم على محبتكم غياره شو تعاالي ابوسج والله مشتاقه حيل الكم كلكم

سجاد : صرتي الحجيه نهر

نهر : وين الله واحج واصير حجيه رسمي

ريم : احنا عدنا الي يروح عمره نصيحله حجي او حجيه شجبتينا

نهر : كل وحده هديه بسيطه هيه وجهالها مابيه اشيل لا اني ولا ابوج

حجي طه : والله بضاعتنا بلعراق بعد احلى بس لازم نجيب مناك

سليل : بقينا كلنا كاعدين وسوينا غدا لوجهه الله وزعناه على سلامتهم وبليل اجه عمو محسن وعمار بعد معزلو المطعم وبقو يتعللون وعشا شوي تكه ومعلاك وسوينا مقبلات وراها الفواكهه والكرزات وسوالف وضحك والكل بات هنا حتى سليل وسجاد جانت سهره تخبل وثاني يوم البيت انكلب جماعه بابا بلسوك كلها اجت وبعدها نسوان من المنطقه لعمه وكل وحده وعلاكتها سبحه وسجاده واطلع گبل

رجعنا لحياتنا ايام تمر من عمررنا تمشي واحنا واكفين نحسب بيها اليوم شكد بلشهر فات الشهر الرابع والخامس والسادس والسابع وكل شهر اكول راح يتغير حالي بس كما انا الاشهر الفاتت جانت هادئه نسبياً

فرح نجحت وكدرت تجتاز هاي المرحله بدون متعيدها ورشا مخلصتها دوام وهسه عطله ولو تسوي اكل وتنظف لو تختفي كاعده تقرا قصص ومندمجه وكل مااطب لو الكاها تمسح عيونها وخشمها لان تأثرت بمشهد لو صايره بارود من شخصيه بلقصه وتعد وتسب وتلعن ولازم الثلاثي المرح ينذكر بلسب جنات وشعلان وهند اما الثلاثي مالتي همه انعام وجنات ونوريه كلمن عدوه گبال عينه 

احس رشا حياتها وحالتها افضل بهوايه بدت تشفى من شى اسمه شعلان وجنات

اما غزل حايره بسالفه الطفل الي مخبلتها ومخلصتها من دكتوره لدكتوره وهذا الشى موتر عمه وياها ونكوم ونكعد ندعي الها تحبل لان غزل بدت تتعب نفسيتها وتتأذه

وسليل بعدها اجازه امومه مبقى شى واداوم وحايره شلون بلجهال تالي صفت تبقي بس كيان لان زيون    روضه

اباوع على تيومي گبر شبسرعه ذاك اليوم جان يزحف والكلمة كوه تطلع منه ابني راح يدخل مدرسه اول ابتدائي اباوع على طوله وضحكته وسوالفه يحب يكمز وذكي متعلق بأبويه وبحسين جنت افكر شلون اذا تزوج حسين اكيد مراح يبقى العمر كله ينتظرني

مجرد الفكره احس واحد يلحم شباك من حديد على صدري من اشهر كالت سليل اهله ضاغطين عليه علمود الزواج ومعرفنا شسوه لاهله من عرف اخته وره مصيبة رشا هدوء حتى من سألت عمه كالت ماادري معقوله عبر الموضوع هيج عادي ولو هو عنده هيج سوالف گلبه رجيج

لحد مابيوم صاحتني عمه جنت فوك كاعده اتصفح بلفيس وحاره طافيه الوطني على السحب والطابق الفوك نار نزلت اتأفأف وروحي بخشمي والكه نوريه گبالي كاعده بلهول ركزت گلت اخاف الحر موع عيوني ومخلاني اشوف كدامي

نهر : تعاالي يمه خالتج نوريه جايه تحجي وياج

ريم : ابتسمت بأستهزاء خالتي ماعندي خاله

نهر : تعالي ريم اكعدي

ريم : كعدت وحطيت رجل على رجل حسيتها مال وحده بس يراد الها دنبوس وتنفجر مثل النفاخه المنفوخه هوا زايد وكوه متحمله واطك بوجهي نعم خالتي العزيزه

نوريه : انتي شارطه على حسين تقبلين بيه  اله نجي نخطبج واني اليوم اجيت بنفسي اخطبج اله

ريم : من الصدمه وكعت رجلي

يتبع ...

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الاخير_القسم_الثاني

لاتزرع ورد بتراب الايام ..

غدار الزمن ووروده ذبلانه .

ولا تعشك أخدود البيه ألوان .

مو كول الخدود الحمر خجلانه

مرات السنابل تنحني للكاع

مو مسكينه لكن هي ريانه .

ومرات السنابل تعله فوك الهام .

مو هيبه العلو تلكاهه فرغانه .

أو لاتسكي الزرع من ماي جاسه الغير

يجيب الماي كول ما لكت كيعانه .

وليغرك شجر لابس خضار الكون .

هذاك التوث منه الغنم شبعانه .

والبر حي عزيز وأغلى ماموجود

وجذوعه الخضار سنين عريانه ...

سليل :

اشتغل وملتهيه بلجهال اندكت الباب

فتحت الباب ولكيت وحده لابس بنطرون يمكن مدخلته عند البنچرچي والقميص كصير وشال موضوع الشال هذا داقني اباوع عليها تفصلي نعم

هذا بيت ابو زين

سليل : فتحت عيني عليها وكمت اطكطك كلت هسه تكول اني مرتي خرب عقلي الاكشن

اي بيته منو انتي

اني ام وليد وديت سيارتي للمحل مالتي وهو انطاني العنوان كال تجين ساعه ٤ الظهر تستلميها واجيت على الموعد

سليل : اباوع عليها من فوك ليجوه مو مره قنبله حتى مكتلها تفضلي

ثواني واشوف سياره عاليه طبكت بلباب ونزل منها سجاد

سجاد : السلام عليكم

وعليكم السلام هاي وينك ياعيني تأخرت

سليل : خزرتها هاي شبيها تتموع واباوع عليها وعلى سجاد

وسجاد يباوع وحاصرته الضحكه

سجاد : متأخرت تفضلي سويج السياره وضبطت الج كلشي

عااشت ايدك والله مو كدامك ايدك ذهب بلسيارات سيارتي متتصلح اله على ايدك

سليل : تفضلي ادخلي اخاف بعد عندج سوالف ويه ابو زيوني

لا حبيبتي تسلمين متأخره تفضل باقي حسابك وشيصير اخابرك عوود

سجاد : ان شاء الله

ركبت السياره وراحت واني طبيت للبيت شايطه لله

سجاد : قبل متعيطين وتسوين هوسه هاي زبونه عدنا بلمحل توكف وتخلي الرايح والجاي يصجم بيها

سليل : وانت شعليك بت عمك بت خالك وحده متقصده تجي لمكان تتصجم بيه

سجاد : تعالي اخذيلج راشدي

سليل : سجاد تره روحي واصله للسما مو مال هاي سوالفك

سجاد : ابتسم وكال تغارين عليه

سليل : اذا محجيت شعندك ويه هااي والقران لحظه مااضل بيتك واخذ جهالي واروح لبيت اهلي

سجاد : حتى اكسر رجلج مو هي تايهه

سليل : احجي شعندك وياها ونزلت دمعتي

سجاد : حضني حييل وعيونج ماعندي شى بس رجولتي مسمحتلي مره توكف بمحلي وتتصجم واسكت ولو عندي شى وياها مااخليها تجي للبيت هنا واعرفج راح تشوفيها اتواعد وياها بأي مكان بس اعرف بروحي مااسوي الغلط تالي عمري اغلط هاي شبيج حبيبي

سليل : كمت ابجي بعد مالك دخل بيها واحظرها اذا تتصل

سجاد : تأمرين ااخ شكد حلو من تغارين وتشيطين لو لاعب بعد عليج وكايلج صاحبتي

سليل : جان ملحكت تكمل الكلمة اكتلك خلاص

سجاد : مرتي صايره مجرمه

سليل : اذا شى يخصك اي ابو طبر ميلحكني

سجاد : ههههه تعالي اراضيج

سليل : راضيتني

سجاد : لازم اراضيج بعد

سليل : منا الجهال

سجاد : بابا زيون عينك على اخوك بس نشيل الفراش اني وامك ونجي

سليل : ههههه تموت على الشيل

اندكت الباب راح فتحها طلعت رشا وبتها ضحكت وكتله يله امشي شيل

سجاد : لا عبالج فلتي الليل كله عشا

سليل : هههههه

رشا : اجيت بوقت خايس مو

سجاد : كلش

رشا : لعد باقيه كاعده

سليل : هههه اي عفيه خلي ارد السواه قبل شويه

سجاد : رايح اودي غراض لابوج وارجع

سليل : شبيج وضعج مو طبيعي

رشا : منتظره خبر من ريم

سليل : شكوو ياستار

رشا : تجيبلي رقم جنات

سليل : هااا رجعنا شصار

رشا : كعدت سولفت كلشي الها

سليل : وشراح تسوين

رشا : اخابرها

سليل : يمعوده جوزي منهم خليهم حوبتج ناس تاكل ناس

رشا : اذا مااحجي ماارتاح

شويه وصلت رساله رقم جنات اخذت الموبايل وصعدت ليفوك بغرفة سليل

دك شويه وجان اسمع صوتها

صار ٥ سنوات ماانسى التاريخ ٢٠١٤/٩/١ من دخلت عليج ولكيتج بفراشي

جنات : منين جبتي رقمي وشتردين

رشا : بس ردت اكلج هااا توجع موو تأذي الخيانه الف  الْحٍمَدٍ للـّہ هسه انتي كعد تعيشين نفس العشته بس اني عندي كرامه عفتها الج وطلعت وانتي بلا كرامه راح تضلين العمر كله يدمغ على راسج ويه ضرتج عايشه وتشوفين رجلج شلون ينام ويه غيرج هاي اذا مخلفت ولد وشمرج بلشارع

جان تسده بوجهي رجعت كتبت رساله الها وكتلها شفتي يجنات الي يعيش بلحيله يموت بلفكر وانتي يوميه راح تموتين وتعيشين احقر احساس من شعلان فضل وحده عليج وجابها بفرشتج شكد صارت مواقف ومصايب سواء بيج او بيه مرتاحيت بكد هسه الله يلراحه الي اني بيها ابقي هيج مكفخه اله وذليله انتي مو موجهه نعمه واحترام وجهه ذل واحتقار وحصلتيها بأمتياز الف  الْحٍمَدٍ للـّہ والشكر طلعت حوبتي بيج واخيراً خمس سنوات انتظر واكول يارشا شوكت تضوك جنات الي ضكتي ويوميه وداعت بنتي اسبح  وادعي وخاصه بصلاة الليل  وارفع ايدي اكول يارب العرش العظيم ذوقها الي ذقته وحسبي الله الوكيل هذا دعائي يومياً خمس سنوات مابطلت يوم من هذا الدعاء واليوم الله استجابلي

من اليوم بعد ماادعي بس الي ولبنتي ولاهلي بلستر والصحه والعافيه انتم صفحه وانتهت من حياتي دزيت الرساله على الواتس حتى اعرف قرتها وصار خطين زرك كمت وحظرتها حتى لدز شى يغثني توجهت للقبله وسجدت لله شكر

سليل : صعدت وشفتها ساجده وتبجي وبس رفعت راسها حضنتها كاافي

رشا : ارتاحيت سليل كلش ارتاحيت عاشو كلهم الي عشته

سليل : اطويهم من عمرج

رشا : طويتهم وداعت فرح ومن اليوم مالهم وجود لا بخيرهم ولا شرهم

سليل : تعالي نسوي كيكه ونروح نتعلل يم ماما وهم نحتفل بمناسبة فرحتج

رشا : يله امشي

سوينا كيكه وحظرنا كلشي ساعه ورحنا هناك للبيت وكعدنا نسولف ونضحك وعمه تدعي لغزل تصير عمليه طفل الانابيب مبقى شى وتسويها

غزل : لميت الفلس على الفلس الخمسه الالاف والعشره وكل مينطيني مصرف ومرات البنات ينطوني اضمه بقوطيه صغيره لحد وماما من سمعت انطتني ٥٠٠ الف لامتهم خطيه الها حسبتهم وطلعو ٣ ملايين كلت لعمار اسوي بمستشفى كمال السامرائي على الخااص ورحت حجزت جنت اخاف وافكر بس متأمله خير وفحوصات وروح وتعال وعلاجات واركض بكل طاقتي وعمار وماما ويايه وسولي حقن الاجنه بلرحم الخوف متملكني لان حيل تعبت من العلاجات وهم لان لميت الفلوس كوه يعني احسه الامل الاخير الي

خاله وبسمه ساعدوني حيل ميخلوني اشتغل وطلبت من عمار اروح لبيت اهلي مقبل كال ابقي يمي استحي اروح واجي عليج يوميه بقيت مردت احرجه يوميه بليل الزم التسابيح والادعيه وعلى نومتي واتوسل يصير طفل كمت اخاف انام ليصير شى انطوني مده ١٤ يوم وارجع للمستشفى واحلل التزمتني دكتوره حتى للعياده رحت الها في سبيل ميصير خطأ خلصت ١٠ ايام نايمه على ظهري وبس التسابيح وايات القران ومرات احب اتصغح واقرا قصص ادزهم الي رشا حتى اخلص وكت

غزل : كعدت الصبح اليوم العاشر الي  الالام قويه عندي كمت للحمام ولكيت عندي اسقاط لطمت وكعدت بلكاع ابجي

ام عمار : يمه غزل افتحي الباب شبيج

بسمه : شصاير يوم

ام عمار : ماادري نزلت من فوك تركض حتى مصبحت وبس دخلت سمعت عيطتها وبجيها

بسمه : اخاف سقطتت

ام عمار : دخيلك يارب غزوله بداعت ابوج افتحي الباب لتصعدين السكر عندي مابيه حيل هبطات

غزل : جنت ابجي بهستريا واني اشوف حالي ذبيت كوم فلوس ومصار عدا العلاج وأذيته مبين من وضعي ولا واحد ثابت لان نزف قوي اسمع خاله تبجي وادك بلباب شكول الها سحلت روحي كوه وفتحت الباب

ام عمار : شبيج يمه

غزل : وكعو خاله وحضنتها وابجي

ام عمار : فدوة الج حبيبة يجون غيرهم اذكري الله بنتي همه لحمه لو شباب شسوين

بسمه : خلي نغسل الها ونطلعها ونخابر عمار ياخذها للطبيب وضعها مبين موزين

غزل : غسلولي وبدلو ملابسي واني اشهك من البجي وصعدوني للغرفه وغيرو الفراش ومددوني واشهك

كعدت يم راسي ام عمار وتقرا ايات

خابري اخوج خلي يجي

بسمة : اي هسه

غزل : بقيت اشهك بدون توقف عبالك قهري كله انفجر بذاك الوكت بقت خاله وبسمه يحاولون يطيبون خاطري ومافاد هلمره احس بقهر اكبر لان اعرف بيهم ينتظرون الساعه الي احبل بيها

اجه عمار وكعد يم راسي ويبوس بيه

عمار : شبيها حبيبي شنو هاي الدموع يمعوده منو مات

غزل : جهالي عمار ماتو ولا واحد بقى

عمار : ومنو يكول كلهم مو زرعو ٦ وحتى اذا كلهم  الْحٍمَدٍ للـّہ والشكر المهم سلامتج وانتي عندي تسوين روضه جهال

غزل : وديني للدكتوره

عمار : صار اني ابدلج واوديج

غزل : لا اني اكوم مابيه شى

ام عمار : اخذها يمه وطمني عليها وخلي تفحصها زين ليروح يصير بيها شى لان نزفت هوايه

غزل : اخذني للدكتوره وكوه امشي وبعد سره طويل فحصتني وكالت مسقطتهم ولا واحد باقي رجعت ابجي وهي اطمن بيه اكدر ارجع اعيد الكره شعيد هي فلس فلسين واعيدهم عبالها كل الناس مثلها عدها ملايين تذبهم كل وكت طلعت والدنيا طافره من عيني وسألني عمار وكتله ولا واحد

عمار : فدوة الج المهم انتي زينه وصحتج زينه

صعدت بلسياره واباوع على الشارع جهال اشكال والوان وجهال وصخين بلترفك لايت يبيعون ويجدون يعني شيصير لو اني هم عندي واحد ذوله مو شامريهم ردت والله واحد مو اكثر

اباوع على عمار اعرفه مقهور مثلي بس يغطي وميبين الي كتله وديني لاهلي

عمار : ليش حبيبي بيتج ترتاحين اكثر

غزل : عفيه وديني اريد ماما

عمار :اذا ترتاحين اوديج

غزل : كتله جيبلي ملابس اذا تكدر حتى لو باجر

عمار : ليش تباتين

غزل : اي عفيه كم يوم اصير زينه وارجع

عمار : مااكدر غزل موتعرفين تعلمت عليج ليش تكبرين المواضيع شى ومصار قابل الدنيا انگلبت

غزل : فدوة اروحلك عوفني كم يوم هنا ارتاح بس ارجع وياك راح اتأذه

عمار : هذا هو اخلي بسمه تحطلج كم شغله واجيبهم واجي كم يوم تردين تبقين

غزل : مااعرف

وصلني للبيت ودخلني واجت ماما ورشا يركضون

هااا يمه خيرج

غزل : حضنتها وابجي

رشا : شصار عفيه تعاركتو

عمار : لا والله بس فشل سالفه الطفل ومعاش ولا واحد هسه جنا يم الدكتوره وهي كدامكم كالبتها مناحه

غزل : شلون مااكلبها مشفت شصار بيه لحد مزرعو

نهر : يمه عمار عوفها يمنا وروح ومن ترتاح تعال اخذها

عمار : هو جبتها يمكم عمه عينج عليها رحمه لاهلج وسكتيها تره والله الموضوع ميسوه

رشا : احنا يمها ليضل بالك توكل بالله

راح وسدينا الباب ودخلنها

نهر : شجاج يمه فدوة الج صحتج وعمرج بلدنيا

رشا : غزوله هسه انتي تذبين حركتج بلرجال هو شعليه

غزل : من قهري متعرفون شحس والله متعرفون

نهر : لا يمه اني حاسه بيج محد ضاك الي ضكتي غيري تعالي ارتاحي وربج يسهل

رشا : اباوع عليها بحضن عمه مثل الجاهله تشهك وتناشغ حيل مدمره نفسيتها جانت حيل فرحانه من سوت عمليه طفل الانابيب

خابرت سليل حتى تجي وريم اقلها من تشوفنا كلنا ترتاح

وره ساعه ريم وسليل يم راسها

ريم : يمعوده هسه اجيب وانطي الج فدوة الج جهالي كلهم ولا تبجين

سليل : واني تسوين فضل تاخذين زين وكيان مرمرو گلبي

رشا : بقت عليه اني اريد اقرا البارت مبقى شى وينزل اخذي فرح

صار عندج روضه

غزل : اريد من بطني اريد ابني وابن عمار متعرفون النار الي بصدري الله يحفظلكم جهالكم وهمه هم اعتبرهم جهالي بس اريد طفل من اكثر انسان احبه شنو ذنبه يبقى بله جهال

نهر : امر ربج

غزل : اني قررت اطلب الطلاك منه

ريم : هاي مأثر عليها الاسقاط انجبي واياج تعيديها

غزل : لعد يبقى بدون جهال مكافي تزوجني مطلقه هلمره مااخلف

سليل : اتزوجج بنيه او تزوجج مطلقه ماكو فرق مو فيصل اخذج بنيه ومحبلتي شنو هذا الحجي وثاني شى هو محد ضربه على ايده حتى تتزوجي وين يلكه منج گتل نفسه حتى تصيرين اله لتقللين من قيمة نفسج وهذا الحجي الماصخ بطلي

غزل : احسن مايتزوج عليه ويكسرني

رشا : هسه الرجال تصخم تزوج والي يسمعج يكول صار ٢٠ سنه ماعندج اطفال هو سنتين

غزل : بس الدكتوره كالت عندج خلل بالانابيب الناقله والطفل ميصير اله عن طريق الانابيب وسويت كدامكم وذبيت كومه فلوس عدا المراجعات والم العلاج وتالي مصار

ريم : يصير وعيونج مو مره مرتين او تلاثه لحد ميصير

غزل : اي مو عندي بنك اخذ منه ملايين واسوي

نهر : كلنا نساعدج

غزل : مااريد احد يساعدني اريد اطلك

سليل : هااي تخبلت اكوم اسويلج شى تاكلي بلكت تصحين على نفسج

غزل : جنت فاقده الامل وفاقده حتى الرغبه بلدنيا اصعب شى من افقد اهم احساس ممكن المره تعيشه وهي الامومه اشوف الي بعمري والي اصغر صارن امهات واني لا

نهر : سمعت صوت طه رحت اله وفهمته على وضع غزل بس هو يهديها خفت لتتصل بعمار وتهجم بيتها

حجي طه : وينها هسه

نهر : بغرفتي

حجي طه : خلي اصعدلها

غزل : كاعده والبنات دايرمدايري دخل اندكت الباب ودخل بابا كامو البنات كلهن يبوسن بيه ويسلمن واني ظهري ميلخني مااكدر اكوم تقرب مني وباس راسي شمرت نفسي بحضنه وابجي

حجي طه : لا لا غزالتنا الهاديه تبجي غزوله هاي العيون الحلوات متبجي بنيتي

غزل : مراح اصير ام

حجي طه : وشمدريج انتي تعلمين الغيب كله امر الله ورزق الله وفي السَّمَاء رِزقكم وما توعدون

غزل : تعبت بابا علاجات ومراجعات وكوه جمعت الفلس على الفلس وسويت ومنجح

حجي طه : ينجرح المره الثانيه

رشا : اجه عمار جاب غراضج ويريد يصعد يشوفج

حجي طه : خلي يجي

غزل : دنكت وافرك بيدي وامسح بعيوني

دخل عمار وتقرب مني سلم على البنات وباس راسي

حجي طه : ليش مكتلي على غزل

عمار : مردت ادوخك حجي وكلت اكيد من يرجع للبيت يشوفها

غزل : بلعت ريك وبتهور گلت

اني اريد اطلك الكل سكت وخواتي تخبلن وحده تباوع بعيون الثانيه

عمار : شنو تطلكين

غزل : تهسترت اعصابي وكتله مااخلف مو كدامك المن تضيع عمرك تنتظر طفل من مره متخلف

عمار : حجي متسكتها رحمه لابوك لوما مقدر وضعج جان عرفت شجاوبج

حجي طه : شبيج بابا حرام عليج هذا اعتراض امر الله وانتم بعدكم صغار والعمر كدامكم

غزل : افتهموني عفيه اني مااخلف والدكتوره كالت طفل انابيب وسويت ومصار على شنو بعد يبقى ويايه ويتعب نفسه ومصاريف ومغثه وروح وتعال

عمار : ليش اني تزوجتج علمود الجهال

غزل : بس الجهال اهم شى

عمار : عندج بس مو عندي

غزل : عندك هم بس انت متحجي وضام بگلبك

حجي طه : صوتج بابا نصي

غزل : العفو بابا اني هسه مااريد بس يعوفني وكلمن يروح لحال سبيله

عمار : يعني انتي تنطين فكرة موزينه عليه بأن اني رجال ماعندي ذمه وضمير وراح اذبج بيوم من الايام منو زارع هذا الشى بالج

نهر : اعذرها يمه دنكت وگلت شافتني وطبعت بالها

عمار : مع احترامي الج عمه تره مو كل الرياجيل سامي هواي اكو رياجيل ضالين ويه نسوانهم خمس سنوات وعشره و١٥ واكو ماتو وبقو ومتزوجو على نسوانهم وعاشو عيشه مرتبه وحلوة اعرف الجهال زينه الحياه الدنيا بس مو الحياه الدنيا كلها اني راضي بأمر الله اجه  الْحٍمَدٍ للـّہ مااجه هم  الْحٍمَدٍ للـّہ تره مو كل اصابيعكم سوه وعندي غزل تسوه الف طفل اني شسوي بلجاهل وانتي مو امه تره هاي تقلل من قيمتي من تتصرفين هيج لتقررين بكيفج والرجال اذا يريد يتزوج لو عنده عشر جهال يتزوج فوك مرته ويطلع عذر من جوه الكاع

حجي طه : اي والله يابني صدكت سمعتي رجلج شاريج وميريد شى منج بس حبج واهتمامج هواي عدهم جهال بس عيشتهم موزينه والرجال يكره الساعه الي يطب بيها بلبيت واكو ماعدهم بس ملك زمانه ويموت على زوجته

غزل : والناس كل مااشوف احد وصاح محبلتي

حجي طه : فضول الناس متخلصين منه اكو ناس هيه عايشه على هاي السوالف وحتى لو صار طفل عندج بعد مده يسألوج ليش مسويتي ناس فارغه تحب تدخل بغيرها عليج بيتج ورجلج ومالج دخل بأحد والي يسألج ليش ماعندج اطفال كولي اراده الله هاي الكلمة الوحيده الي اريدج تنطقيها بدون متناقشين اراده الله

عمار : هاي كدام ابوج اذا انعادت سالفه الطلاك والله اندمج راح اعبرها لخاطر وضعج بس اذا تنعاد ياغزل تشوفين شى محلو مني

حجي طه : هذا هو ابني بعد متعيدها

يله بنات عوفن اختجن ويه رجلها وانزلن سون عشا تره جعت

ريم : نزلنا وعفناهم جانت غزل تبجي بهدوء

غزل : باوعت عليه ضايج

لزمت ايده دفعها

عمار : موعيب تسوين هيج كدام اهلج اني ضاغط عليج على سالفه طفل فد يوم سمعتي حجايه مني تقهرج بسبب هذا الموضوع

غزل : لا

عمار : لعد ليش تسوين هيج مااقبل هاي السوالف كدامج مو طفل لتقررين بكيفج انتي حبيبتي ومرتي واريده منج مو من غيرج

غزل : كلتها لان احبك

عمار : تحبين لتجرحين وخلي شويه ايمان بگلبج لا يصير شى بسيط تنسين كلشي وتعترضين على حكمه ويله عقوبه عليج اخذج ويايه للبيت

غزل : لا فدوة عوفني هنا ارتاح

تقرب مني وباسني وحط كصته على كصتي

عمار : مااكدر انام بلياج كومي غزوله لتعوفين حبيبج ينام بوحده وماكو احد يداريج بكدي وامي وبسمه ضال بالهم كومي حبيبتي هناك نداريج

غزل : باوعت عليه وتقربت وبست خده اعتذر والله من حبي الك خفت لابيوم تتزوج عليه او تكسر بيه او تريد جهال ومتكولي

عمار : لو اريد اسوي الكلتي ميوكفني جاهل وحطي بالج اني احبج وتحبيني وحياتي مرتاح بيها والحمدلله ماكو واحد بيدي يجيب المشاكل لروحي غزل اني ماجبتها هين ومرتاح اني من يوم وفاة ابويه واخويه ضكت المر لحد موصلت لهاي الراحه والضايك الجوع يعرف قيمة الخبزه

مااقبل تبجين ولا تجيبين طاري هذا الموضوع نرجع نحاول نجمع ونسوي سلف وكل ميصير نسوي لحد ما الله يرزقنا كافي رازقنا الصحه ومنذب فلوسنا على الاطباء مال الامراض كومي ويايه لبيتج واياج بيوم تتنازلين عني وعنه

غزل : بسته وحضنته  ولزم ايدي يله كوومي

سليل : كاعدين بلمطبخ وايدنا على خدنا بالنا يم غزل ونزلت وكايدها عمار

حجي طه : خيركم

عمار : ماخذ مرتي حجي هاي مالتي شسوي بيها

حجي طه : بهاي حقك بس تره اني هم الي حق بيها

غزل : انت الخير والبركه بابا وبست ايده وهو باس راسي

نهر : ليش متبقيها يمنا

عمار : تصير زينه واجيبها

ريم : الاسبوع الجاي نجمتع كلنا هنا عود جيبها عفيه

عمار : ميخالف اجيبها يله نروح

غزل : رجعت وياه للبيت وخاله باستني وطيبت خاطري اباوع على طيبتهم وخاصه خاله ولا كسرت بيه ولا غثتني وبسمه شالت شغل البيت كله بس وكت الاكل يصيحوني حتى ناكل سوه

سلمت امري لله وحاولت اهدي نفسيتي واتعامل طبيعي حتى مااخسرهم

رشا : ٢٠١٩/٨/٢٣ اول بارت نزل من قصتنا جنا نتراسل كلنا بكروبنا الي بلواتساب وفرحانات وخايفات بنفس الوقت وكل شويه ريم تعيط راح اجيب من الخوف جنا نقرا بأستمتاع وخاصه تفاصيل تخص بابا اكو شغلات نعرفها هو حاجيها النا واكو شغلات من عمه نهر عرفناها

دوم ايدنا على گلبنا لتنعرف شخصياتنا

نقرا ونندمج والاحلى نبجي وبعدين نضحك على نفسنا

لحد مايوم قرينا شى دوخنا سالفه صبا حبيبة بابا راسلنا عمه كالت اي ابوجن جان يحب وحده وكت مامتزوج امجن الفضول قره الف واحنا ماشاء الله ابد مو فضوليات او متجمعنا كاعدات كلنا وتكمز زيبك وبطنها اكبر منها

اليوم اسأل بابا لو مطي ينطح مطي لازم افهم هاي صباوي منوو

نهر : مو قريتن البارت

رشا : بس مو مثل منسمعها منه نزلنا جوه جان كاعد والجهال يمه ياكل ركي ويوكلهم

حجي طه : نزلتجن مو راحه

نهر : راح يستلمنك

حجي طه : شصاير

ريم : منو صبا

سليل : اباوع على وجهه بابا تغيرت معالمه وابتسم ودنك وسحب السبحه الي حاطها صفح وكاام غسل ورجع كعد بمكانه واحنا كاعدات بلكاع مثل الجهال انريد نسمعها منه لحد ماباوع بعيونه المتروسه تجاعيد من الگبر بس بقن حنينات وتشع منهن الطيبه

حجي طه : بال ٨٥ شفتها شطب ريحان واكفه وتبجي العيون سبحان الخالق سوادها

وكفت يمها واني قصدي افهم منها جنت نازل من الجبهه ومن سألتها عرفت بايكين جنطتها وراكضه وره الحرامي ومكسور الكعب

كعد يسولف النا شصار بينهم واكيد اكو شغلات خفاها عنه لان ماما كالت يحجي شغلان ويحتفظ بلباقي بس كلنا حسينا بعد هذا العمر كله من يحجي بيها بحسره وغصه

رشا : يعني اني انولدت على ايدها

حجي طه : اي على ايدها

رشا : من هيج گلبي طلع اعوج وبيه مصايب وامراض ومكسور اثاري من وراها لان تحبك وانكسر كلبها بتك هم انكسر گلبها

حجي طه : والله يابنتي مجانت نيتي سوء وروح ابويه ومعزتكم تكدرين تكولين ظهرت بحياتي بلتوقيت الغلط تمنيت بوكتها اكون سبع وشويه افكر بنفسي جان هسه هي مرتي الي وكفني زواجي من امجن ولا صارو ٣ جهال عندي سليل وانتي وحسام خفت عليكم

سليل :وشنو الفايده محصلتها

حجي طه : قسمه ردت اشوفها بس حتى اتعذر منها وماشفتها وره مده كم مره اروح لبيتهم وماالكاها لحد متجرأت سألت وكالو تزوجت وشالو من المنطقه غلطتي حبيت بلوقت الغلط وكسرت گلبي وگلبها

ريم : المهم ابويه طلع رميو وحب على سندس حقها تحاربك غير حاب فوكاها

حجي طه : ليش هي امجن تتعاشر

ريم : شبيهه بس تتمالخ وتعد وتصف وتتأفأف وتندب حظها شحلاتها من تكعد الصبح على عياطها اكشن بابا

حجي طه : وخوش عيشتني سندس الاكشن

الْحٍمَدٍ للـّہ على كل حال منو كلكم على صبا

كلنا اشرنا على عمه

نهر : كاعدين نسولف وذكرناها

حجي طه : الله يذكرها بلخير تمنيت اعرف وين صارت يله هاي الدنيا متنطينا كلشي

كعدنا ويه بابا وكل شويه نسأله بحجه ونجمع معلومات عنه تكول استخبارات بيومها صوت ضحكنا وسوالفنا للكراج واصل وكاعدات كلنا يم رجله

مشينا ونقرا بحياه بابا ومعاناته ويه امنا اكو هواي امور منذكرت لان منعرفها ولا شفناها اسرار بقت بگلب طه وسندس محد يعرفها غيرهم

بدايه شهر التاسع دك الموبايل وصوت حسين يرجف كعد تجيب ريم ركضنا كلنا للمستشفى لكينه جايبها وجاي نضحك اني والبنات على شكل حسين يريد يبجي

نهر : يمه على كيفك قابل داخله بعمليه انتحاريه هي رايحه تجيب وصحتها زينه شجاك ترجف

حسين : مشفتيها شلون تعيط ومي نزل منها

نهر : جنك عمك من كلشي تنهز هسه تطلع من العمليات واسمع شلون تقسم بلبنج

حسين : ليش تحجي

سليل : اووو بطولات وداعتك

شويه واجت السستر بلغتنا جابت جنا نعرف بيها ولد والحمدلله ولدت بلسلامه اباوع على حسين كاام يبجي من الفرحه

سليل : كون يشوفك سجاد اله يسويك نصبه

حسين : حقي سليل متعرفين شنو شعوري من راحت مني وعاشت حياتها وخلفت كلت هاي هيه مراح تصير بيوم ام بيتي وام جهالي واليوم الله رحمني وحققلي الي اريده متريدين ابجي زين واكف على طولي ريم حصلتها بدم گلبي

نهر : اي والله يابني الله يحفظكم بحق النبي محمد واهل البيت ويبعد عنكم عين الحساد

غزل : طلعت

ركضنا عليها ودخلوها للغرفه وبدت السنفونيه مالتها واول شى عاطت وصاحت ااااخ من اشتعلت نوريه الساقطه ولزمنه حلكها

حسين : لا مبين راح تقسم على الثكيل

سليل : نصيحه اخويه اطلع كمل حساب المستشفى وطكلك جكاره بره بين متخلص هوستها لان راح تستلم اهلك بلسره

هز ايده يضحك وطلع وصدك مباشره غزل وخرت ايدها وعاطت علي باك الدجاجه والطلي ولك طلي عبالك اعوف حسوني

نهر : اليوم راح اطلع ضيمها كله هههههه

رشا : واكيد امج وياها

نهر : تعلمت على سوالفها شسوي اسكت

ريم : نعوووم عساج بلغم يطشر راسج يم السحوره لا انتي ام البعوره ام السحوره نوريه نويره هي ونورس البربوك

رشا : سكتوها شهرتنا ههههههه

بعد الفلم الي سوته ريم خلت وحدتنا ميته ضحك نريد نسكت ماكو صحت البرنسيسه وصاحت سحليه وينك ااااخ بطني شكيتوها موو

رشا : لا حياتي دسنا دكمه ونزل الطفل ورجعنا طفينا الدكمه

نهر : هلمره كلجن عمليات موتني ولا وحده طبيعي بيجن

سليل :غير الدكتورات ياهي التروحين الها وصاحت ماعندج توسع دخلوها عمليات ونطلع هيج  انون ونعيط ونسب

رشا : بس مثل ريم ضاربه الرقم القياسي بلبنج

حسين : هااا صحت

نهر : اي يمه تعاال يمها

كعد يم راسها ويبوس بيها وبأيدها وفرحان حييل سحبت غزل وبستها يوم الالج يووم

غزل : الله كريم ماما كلشي رزق

نهر : اي يمه عفيه بلسباعيه دوم اريدج هيج متهتمين وتعوفيها على الله

ريم : ابني وينه

حسين : شويه وبجيبوه الج

ريم : صرت اب حبيبي

حسين : ومنج هذا احلى شى منج ياحب عمري المستحيل

ريم : الف  الْحٍمَدٍ للـّہ اهلك درو

حسين : اي بلغتهم وباركولي

ريم : باوعت حسيته مقهور عرفت مفرحانين اله لزمت ايده وبستها وكتله لتضوج كافي اني وتيم وابنه وياك صدك نفس الاسم الي اتفقنا عليه

سليل : شراح تسموه

حسين : ردت اسمي علي عاطت لان على اسم ابويه تالي اني اريد اسمي من اسماء الامام علي سميته حيدر

رشا : وهلا بحيدوري نور حياتنا اجه وان شاء الله اجه الخير ويااه

سليل : طلعنا ريمو من المستشفى وطلبت تبقى يمنا متكدر وحدها من وره تيم لان حرك

رشا : دك رقم غريب فتحته سمعت صوته لاول مره اسمعه وكأنه واحد غريب عرفت بروحي طبت تماماً منه

هااا شعلان

شعلان : اريد اجي اشوف فرح

رشا : هله بيك تكدر تروح تلكاها بلبيت بس يمهم بابا

شعلان : ليش انتي وين

رشا : شى ميخصك ومبروك على زواجك

شعلان : توقعت عرفتي

رشا : هاي حياتك وانت حر بيها من رخصتك مستعجله بتك بلبيت شوفها وتوكل وسديت الخط

ابتسمت وامشي بممرات المستشفى واباوع على حسين شلون يدفع بريم مكيف

اليوم بغداد صبحت على تظاهرات بالاول عبالنا مثل التظاهرات القديمه مسيره وساعه وساعتين وتفض بس الصار شى فاق التوقعات ظهر جيل جديد قوي وسبع ثبت للكل العراق بلد الابطال بكل اجياله وجيل الببجي ثبت هو جيل يقهر المستحيل

كل ولدنا طلعو بلمظاهرات وخاصه عمار جان يبات مرات بساحه التحرير وهذا الشى يخوف غزل بشكل بس هو يصبرها

علكت المظاهرات واشتددت وتوقعو يقمعوها بس شبابنا انطو شهداء في سبيل متنطفئ الثوره

دز بابا على البنات كاعدات كلنا نسوي اكل ولفات للمتظاهرين هلقاسم الله كص دجاج ومجموعه من الكبب كل وحده لازمه جهه وريم متكدر تكعد لان بعد الاربعين مطالعه وباقيه تأشر انطوني هاي القطعه وانطوني هااي وتاكل

سليل : خلي نكمل يمعوده

حسين : انطوها غير جوعانه

ريم : شفت حبيبي شلون يضطهدوني هي لفه

رشا : ثالث لفه تاكلين مو معده جيس زباله كلشي بيها

غزل : هااج هاي لفه

ريم : غزل احسن منكم

سجاد : استعجلو بنات ورانه طريق خلي اخابر عمار حتى يستلم الاكل من عدنا

حجي طه : بابا غزوله تعاالي

غزل : رحت ويه بابا للغرفه وطلعلي علاكه سوده

حجي طه : هااج بنتي

غزل : شنو هذا بابا

حجي طه : هاي فلوس هلنكدر عليه هاي ٥ ملايين مني ومن عمتج وخواتج لميناها مال طفل والعلاجات الوراه

غزل : لا بابا مااخذهم

حجي طه : اياج تردين ايد ابوج لو مو تتزوجين وان شاء الله يقسملج بلخلفه اياج بيوم تردين ايدي

غزل : عمار ميقبل

حجي طه : لزمته وحجيت وياه وقنعته صح تعبني بس بالاخير وافق هااج بنتي وتوكلي على الله تخلص المظاهرات وارجعي سوي ولتشيلين هم كل ماالله يرزق رجلج ويرزقنا نحاول لحد مابيوم تكعدين كعدت ريم هسه وبحضنج الطفل

غزل : حضنت بابا وكعدت ابجي

حجي طه : هاي شنو مااريد اشوف عيونج الحلوات تبجي صايره من كلشي تبجين يله اطلعي ويه خواتج ورانا شغل

طلعت دموعي بعيني وابتسم بستهم كلهم وتشكرت منهم وهمه اصلاً سوو نفسهم ميعرفون شى خابرني عمار وبلغته وكاال اردها الهم ان شاء الله دين برگبتي المهم راحتج حبيبي

غزل : راحتي ترجعلي سالم

عمار : لتخافين حبيبج على گلبج باقي وبحضنج

غزل : احبك

عمار : اموت عليج

غزل : انتبهه على نفسك

عمار : من عيووني

غلقته والفرحه ماليه نفسي والكل يضحك ويسولف وماما باستني ومسحت دموعي ورجعت اكمل شغلي وياهم ودخل عمو محسن طبعاً فيصل صار غنده طفل من زوجته فرحت لعمو لان جان امنيته يصير عنده طفل يشيل اسمه كلشي قسمه والله يرزقني مثل مارزقهم

محسن : هاااا بنات طه انجمعتن

نهر : غير يساعدني مااكدر وحدي

محسن : وزيبك تاكل هاي ضربوها دخانيه بلكت تبطل اكل

ريم : تغار مني لان مااسمن وانت شوف كرشك شكبره

محسن : من جنت بشبابي خير اخبل غير النسوان الرايحه والجايه تتغزل بيه

حجي طه : بدا مسيلمه الكذاب

محسن : اي حقك مو تشوف وجهك ٢٤ ساعه تعوي وتروح وتجي منزل راسك ممركز بلحلوات من يصجمن بيه حقك هو اليتزوج سندس يمشي ويسولف ويه روحه ويكول شسويت بروحي ويغم بكصته

حجي طه : عمجن بس بوخه وخلصها اتزوج وهاي حلووه وذيج تخبل

محسن : غلطتي مازوجتك ام حمزه الله يرحمها

سليل : غص بابا جان يشرب مي وكاام يضحك

حجي طه : محد عم عليه غيرك تمشي وتصيح اتزوج ام حمزه طولها بعشر نسوان وتالي لا تزوجتها ولا تزوجت غيرها ومكابلك وكاعد

محسن : هذا ابوجن كل خير مابيه بس بشى واحد  خلفجن حتى اضحك عليجن

ريم : هيج صارت عموو هدوني عليه اليوم اقطه لو تجي ام حمزه

سليل : كاعده واباوع عليهم بابا وصوت ضحكاته الدافيه وعمو محسن وريم التركض وراه ولازمه عمليتها وماما ورشا وغزل وحسين وسجاد الواكف على صفحه وبيده الجكاره ومبتسم

كل واحد بيهم لزمنا ايدكم ودخلناكم حياتهم وشوفناكم الظلم الفقر القهر الجوع الالم الدموع الموت الخذلان الخيانه وشلون عشناها وشلون كدرنا نجتازها بأيمانه بالله وقدره يجوز ايامنا الجايه اصعب ويجوز اسهل كله بأمر الله كل الصار بينه سببه الاختيار الخطأ يوم ما وافق بابا يعيش مع الانسانه الخطأ ويرتب حياته على اساس رغو ضعيف  وقبل يسكن بصف ناس خطأ اختارو الصح ولو بعد تعب وعناء لان مستقبلكم يعتمد على اختياركم

  واليوم نفس الايد الي سحبتكم لبيت طه وبناته وعيشتكم الاشهر الفاتت حياتهم بجيتم ضحكتم تألمتم معاهم راح اطلعكم

الكاتبة ريام :  ودعو معي طه وبناته سحبتكم من ايدكم وغلقت باب البيت وكفنا كلنا بعتبت باب بيت طه وگلوبنا تدعيلهم بلخير

عمو طه الله ينطيك الصحه والعافيه انت ابونا كلنا حنيتك وطيبتك وايمانك بالله علمتنا هواي امور الله يرزقك على كد نيتك الطيبه

عمه نهر منبع الاصاله والطيب انتي مثال للشرف والاخلاق والامومه والكفاح كلنا عشنا حنيتج وطيبتج وندعيلج بلخير ياغاليه

سليل ام دميعه دمعتج غاليه علينا يارب عيونج متشوف دموع والله يحفظلج عموو الوحش واطفالج الحلوين ولتنسين سجودي اربعيني ديري بالج عليه ههههه نتشاقه وياج الله يحفظلج عائلتج وسجاد الطيب العم الحنون والسند القوي والشهم لبيت طه انتم احلى اثنين مختلفين حبكم المميز والمختلف خلانا نعشق التحدي مثل صبرج وتحديج لحد مصرتي لسجاد راح نشتاق الكم يااحلى ثلل

رشا : اااه يارشا ياطيبه وقويه ياصاحبه الكرامه والقوه يارزانه بيت طه الله يحفظلج فروحه ويعوضج الخير انتي علم ومتتعوضين شكراً لان سمحتي نعيش المج ونشاركج كل لحظه عشتيها يارب  حياتج القادمه افضل من الفاتت ندعيلج بكل خير ولتنسين مو كل اصابيعج سوه ونبقى نردد ونكول اشتعلتي جنات

ريم : عسل بيت طه وحلاوته وضحكته وقوته وسباعيته غزال البراري راح نشتاق لكل ضحكه منج ولكل عركه وكل كلمة الله يحفظلج حسين واطفالج انتي وحسين مثال للحب الصادق ومثال للي يكول مستحيل هذا الشى يصير ثبت حسين من تزوجج ماكو شى اسمه مستحيل اكو شى اسمه اسعى ياعبدي وانا اسعى معاك الله يحفظكم

غزل : غزوله الهادئه الطيبه ام ضحكه تجنن يارب يحفظلج عمار ونشوفج عن قريب احلى ام والكل يدعيلج ملايين الناس تدعيلج بلذريه الصالحه انتي طيبه وصبوره ومؤمنه وكله رزق من الله والله يرزقج من اوسع ابوابه

ماكو نهايه للقصه لان بنات طه موجودات وحياتهم مستمره الي علينا نطلع هسه من بيتهم ونودعهم  سديت الباب وعفناهم بحياتهم يكملوها وصوت ضحكاتهم ترن بأذنا كلنا ونكول

يعز علينا فراقكم ولكن في القلب محبتكم وذكراكم

مع السلامه ياغزلان طه

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الاخير_القسم_الثاني

لاتزرع ورد بتراب الايام ..

غدار الزمن ووروده ذبلانه .

ولا تعشك أخدود البيه ألوان .

مو كول الخدود الحمر خجلانه

مرات السنابل تنحني للكاع

مو مسكينه لكن هي ريانه .

ومرات السنابل تعله فوك الهام .

مو هيبه العلو تلكاهه فرغانه .

أو لاتسكي الزرع من ماي جاسه الغير

يجيب الماي كول ما لكت كيعانه .

وليغرك شجر لابس خضار الكون .

هذاك التوث منه الغنم شبعانه .

والبر حي عزيز وأغلى ماموجود

وجذوعه الخضار سنين عريانه ...

سليل :

اشتغل وملتهيه بلجهال اندكت الباب

فتحت الباب ولكيت وحده لابس بنطرون يمكن مدخلته عند البنچرچي والقميص كصير وشال موضوع الشال هذا داقني اباوع عليها تفصلي نعم

هذا بيت ابو زين

سليل : فتحت عيني عليها وكمت اطكطك كلت هسه تكول اني مرتي خرب عقلي الاكشن

اي بيته منو انتي

اني ام وليد وديت سيارتي للمحل مالتي وهو انطاني العنوان كال تجين ساعه ٤ الظهر تستلميها واجيت على الموعد

سليل : اباوع عليها من فوك ليجوه مو مره قنبله حتى مكتلها تفضلي

ثواني واشوف سياره عاليه طبكت بلباب ونزل منها سجاد

سجاد : السلام عليكم

وعليكم السلام هاي وينك ياعيني تأخرت

سليل : خزرتها هاي شبيها تتموع واباوع عليها وعلى سجاد

وسجاد يباوع وحاصرته الضحكه

سجاد : متأخرت تفضلي سويج السياره وضبطت الج كلشي

عااشت ايدك والله مو كدامك ايدك ذهب بلسيارات سيارتي متتصلح اله على ايدك

سليل : تفضلي ادخلي اخاف بعد عندج سوالف ويه ابو زيوني

لا حبيبتي تسلمين متأخره تفضل باقي حسابك وشيصير اخابرك عوود

سجاد : ان شاء الله

ركبت السياره وراحت واني طبيت للبيت شايطه لله

سجاد : قبل متعيطين وتسوين هوسه هاي زبونه عدنا بلمحل توكف وتخلي الرايح والجاي يصجم بيها

سليل : وانت شعليك بت عمك بت خالك وحده متقصده تجي لمكان تتصجم بيه

سجاد : تعالي اخذيلج راشدي

سليل : سجاد تره روحي واصله للسما مو مال هاي سوالفك

سجاد : ابتسم وكال تغارين عليه

سليل : اذا محجيت شعندك ويه هااي والقران لحظه مااضل بيتك واخذ جهالي واروح لبيت اهلي

سجاد : حتى اكسر رجلج مو هي تايهه

سليل : احجي شعندك وياها ونزلت دمعتي

سجاد : حضني حييل وعيونج ماعندي شى بس رجولتي مسمحتلي مره توكف بمحلي وتتصجم واسكت ولو عندي شى وياها مااخليها تجي للبيت هنا واعرفج راح تشوفيها اتواعد وياها بأي مكان بس اعرف بروحي مااسوي الغلط تالي عمري اغلط هاي شبيج حبيبي

سليل : كمت ابجي بعد مالك دخل بيها واحظرها اذا تتصل

سجاد : تأمرين ااخ شكد حلو من تغارين وتشيطين لو لاعب بعد عليج وكايلج صاحبتي

سليل : جان ملحكت تكمل الكلمة اكتلك خلاص

سجاد : مرتي صايره مجرمه

سليل : اذا شى يخصك اي ابو طبر ميلحكني

سجاد : ههههه تعالي اراضيج

سليل : راضيتني

سجاد : لازم اراضيج بعد

سليل : منا الجهال

سجاد : بابا زيون عينك على اخوك بس نشيل الفراش اني وامك ونجي

سليل : ههههه تموت على الشيل

اندكت الباب راح فتحها طلعت رشا وبتها ضحكت وكتله يله امشي شيل

سجاد : لا عبالج فلتي الليل كله عشا

سليل : هههههه

رشا : اجيت بوقت خايس مو

سجاد : كلش

رشا : لعد باقيه كاعده

سليل : هههه اي عفيه خلي ارد السواه قبل شويه

سجاد : رايح اودي غراض لابوج وارجع

سليل : شبيج وضعج مو طبيعي

رشا : منتظره خبر من ريم

سليل : شكوو ياستار

رشا : تجيبلي رقم جنات

سليل : هااا رجعنا شصار

رشا : كعدت سولفت كلشي الها

سليل : وشراح تسوين

رشا : اخابرها

سليل : يمعوده جوزي منهم خليهم حوبتج ناس تاكل ناس

رشا : اذا مااحجي ماارتاح

شويه وصلت رساله رقم جنات اخذت الموبايل وصعدت ليفوك بغرفة سليل

دك شويه وجان اسمع صوتها

صار ٥ سنوات ماانسى التاريخ ٢٠١٤/٩/١ من دخلت عليج ولكيتج بفراشي

جنات : منين جبتي رقمي وشتردين

رشا : بس ردت اكلج هااا توجع موو تأذي الخيانه الف الْحٍمَدٍ للـّہ هسه انتي كعد تعيشين نفس العشته بس اني عندي كرامه عفتها الج وطلعت وانتي بلا كرامه راح تضلين العمر كله يدمغ على راسج ويه ضرتج عايشه وتشوفين رجلج شلون ينام ويه غيرج هاي اذا مخلفت ولد وشمرج بلشارع

جان تسده بوجهي رجعت كتبت رساله الها وكتلها شفتي يجنات الي يعيش بلحيله يموت بلفكر وانتي يوميه راح تموتين وتعيشين احقر احساس من شعلان فضل وحده عليج وجابها بفرشتج شكد صارت مواقف ومصايب سواء بيج او بيه مرتاحيت بكد هسه الله يلراحه الي اني بيها ابقي هيج مكفخه اله وذليله انتي مو موجهه نعمه واحترام وجهه ذل واحتقار وحصلتيها بأمتياز الف الْحٍمَدٍ للـّہ والشكر طلعت حوبتي بيج واخيراً خمس سنوات انتظر واكول يارشا شوكت تضوك جنات الي ضكتي ويوميه وداعت بنتي اسبح وادعي وخاصه بصلاة الليل وارفع ايدي اكول يارب العرش العظيم ذوقها الي ذقته وحسبي الله الوكيل هذا دعائي يومياً خمس سنوات مابطلت يوم من هذا الدعاء واليوم الله استجابلي

من اليوم بعد ماادعي بس الي ولبنتي ولاهلي بلستر والصحه والعافيه انتم صفحه وانتهت من حياتي دزيت الرساله على الواتس حتى اعرف قرتها وصار خطين زرك كمت وحظرتها حتى لدز شى يغثني توجهت للقبله وسجدت لله شكر

سليل : صعدت وشفتها ساجده وتبجي وبس رفعت راسها حضنتها كاافي

رشا : ارتاحيت سليل كلش ارتاحيت عاشو كلهم الي عشته

سليل : اطويهم من عمرج

رشا : طويتهم وداعت فرح ومن اليوم مالهم وجود لا بخيرهم ولا شرهم

سليل : تعالي نسوي كيكه ونروح نتعلل يم ماما وهم نحتفل بمناسبة فرحتج

رشا : يله امشي

سوينا كيكه وحظرنا كلشي ساعه ورحنا هناك للبيت وكعدنا نسولف ونضحك وعمه تدعي لغزل تصير عمليه طفل الانابيب مبقى شى وتسويها

غزل : لميت الفلس على الفلس الخمسه الالاف والعشره وكل مينطيني مصرف ومرات البنات ينطوني اضمه بقوطيه صغيره لحد وماما من سمعت انطتني ٥٠٠ الف لامتهم خطيه الها حسبتهم وطلعو ٣ ملايين كلت لعمار اسوي بمستشفى كمال السامرائي على الخااص ورحت حجزت جنت اخاف وافكر بس متأمله خير وفحوصات وروح وتعال وعلاجات واركض بكل طاقتي وعمار وماما ويايه وسولي حقن الاجنه بلرحم الخوف متملكني لان حيل تعبت من العلاجات وهم لان لميت الفلوس كوه يعني احسه الامل الاخير الي

خاله وبسمه ساعدوني حيل ميخلوني اشتغل وطلبت من عمار اروح لبيت اهلي مقبل كال ابقي يمي استحي اروح واجي عليج يوميه بقيت مردت احرجه يوميه بليل الزم التسابيح والادعيه وعلى نومتي واتوسل يصير طفل كمت اخاف انام ليصير شى انطوني مده ١٤ يوم وارجع للمستشفى واحلل التزمتني دكتوره حتى للعياده رحت الها في سبيل ميصير خطأ خلصت ١٠ ايام نايمه على ظهري وبس التسابيح وايات القران ومرات احب اتصغح واقرا قصص ادزهم الي رشا حتى اخلص وكت

غزل : كعدت الصبح اليوم العاشر الي الالام قويه عندي كمت للحمام ولكيت عندي اسقاط لطمت وكعدت بلكاع ابجي

ام عمار : يمه غزل افتحي الباب شبيج

بسمه : شصاير يوم

ام عمار : ماادري نزلت من فوك تركض حتى مصبحت وبس دخلت سمعت عيطتها وبجيها

بسمه : اخاف سقطتت

ام عمار : دخيلك يارب غزوله بداعت ابوج افتحي الباب لتصعدين السكر عندي مابيه حيل هبطات

غزل : جنت ابجي بهستريا واني اشوف حالي ذبيت كوم فلوس ومصار عدا العلاج وأذيته مبين من وضعي ولا واحد ثابت لان نزف قوي اسمع خاله تبجي وادك بلباب شكول الها سحلت روحي كوه وفتحت الباب

ام عمار : شبيج يمه

غزل : وكعو خاله وحضنتها وابجي

ام عمار : فدوة الج حبيبة يجون غيرهم اذكري الله بنتي همه لحمه لو شباب شسوين

بسمه : خلي نغسل الها ونطلعها ونخابر عمار ياخذها للطبيب وضعها مبين موزين

غزل : غسلولي وبدلو ملابسي واني اشهك من البجي وصعدوني للغرفه وغيرو الفراش ومددوني واشهك

كعدت يم راسي ام عمار وتقرا ايات

خابري اخوج خلي يجي

بسمة : اي هسه

غزل : بقيت اشهك بدون توقف عبالك قهري كله انفجر بذاك الوكت بقت خاله وبسمه يحاولون يطيبون خاطري ومافاد هلمره احس بقهر اكبر لان اعرف بيهم ينتظرون الساعه الي احبل بيها

اجه عمار وكعد يم راسي ويبوس بيه

عمار : شبيها حبيبي شنو هاي الدموع يمعوده منو مات

غزل : جهالي عمار ماتو ولا واحد بقى

عمار : ومنو يكول كلهم مو زرعو ٦ وحتى اذا كلهم الْحٍمَدٍ للـّہ والشكر المهم سلامتج وانتي عندي تسوين روضه جهال

غزل : وديني للدكتوره

عمار : صار اني ابدلج واوديج

غزل : لا اني اكوم مابيه شى

ام عمار : اخذها يمه وطمني عليها وخلي تفحصها زين ليروح يصير بيها شى لان نزفت هوايه

غزل : اخذني للدكتوره وكوه امشي وبعد سره طويل فحصتني وكالت مسقطتهم ولا واحد باقي رجعت ابجي وهي اطمن بيه اكدر ارجع اعيد الكره شعيد هي فلس فلسين واعيدهم عبالها كل الناس مثلها عدها ملايين تذبهم كل وكت طلعت والدنيا طافره من عيني وسألني عمار وكتله ولا واحد

عمار : فدوة الج المهم انتي زينه وصحتج زينه

صعدت بلسياره واباوع على الشارع جهال اشكال والوان وجهال وصخين بلترفك لايت يبيعون ويجدون يعني شيصير لو اني هم عندي واحد ذوله مو شامريهم ردت والله واحد مو اكثر

اباوع على عمار اعرفه مقهور مثلي بس يغطي وميبين الي كتله وديني لاهلي

عمار : ليش حبيبي بيتج ترتاحين اكثر

غزل : عفيه وديني اريد ماما

عمار :اذا ترتاحين اوديج

غزل : كتله جيبلي ملابس اذا تكدر حتى لو باجر

عمار : ليش تباتين

غزل : اي عفيه كم يوم اصير زينه وارجع

عمار : مااكدر غزل موتعرفين تعلمت عليج ليش تكبرين المواضيع شى ومصار قابل الدنيا انگلبت

غزل : فدوة اروحلك عوفني كم يوم هنا ارتاح بس ارجع وياك راح اتأذه

عمار : هذا هو اخلي بسمه تحطلج كم شغله واجيبهم واجي كم يوم تردين تبقين

غزل : مااعرف

وصلني للبيت ودخلني واجت ماما ورشا يركضون

هااا يمه خيرج

غزل : حضنتها وابجي

رشا : شصار عفيه تعاركتو

عمار : لا والله بس فشل سالفه الطفل ومعاش ولا واحد هسه جنا يم الدكتوره وهي كدامكم كالبتها مناحه

غزل : شلون مااكلبها مشفت شصار بيه لحد مزرعو

نهر : يمه عمار عوفها يمنا وروح ومن ترتاح تعال اخذها

عمار : هو جبتها يمكم عمه عينج عليها رحمه لاهلج وسكتيها تره والله الموضوع ميسوه

رشا : احنا يمها ليضل بالك توكل بالله

راح وسدينا الباب ودخلنها

نهر : شجاج يمه فدوة الج صحتج وعمرج بلدنيا

رشا : غزوله هسه انتي تذبين حركتج بلرجال هو شعليه

غزل : من قهري متعرفون شحس والله متعرفون

نهر : لا يمه اني حاسه بيج محد ضاك الي ضكتي غيري تعالي ارتاحي وربج يسهل

رشا : اباوع عليها بحضن عمه مثل الجاهله تشهك وتناشغ حيل مدمره نفسيتها جانت حيل فرحانه من سوت عمليه طفل الانابيب

خابرت سليل حتى تجي وريم اقلها من تشوفنا كلنا ترتاح

وره ساعه ريم وسليل يم راسها

ريم : يمعوده هسه اجيب وانطي الج فدوة الج جهالي كلهم ولا تبجين

سليل : واني تسوين فضل تاخذين زين وكيان مرمرو گلبي

رشا : بقت عليه اني اريد اقرا البارت مبقى شى وينزل اخذي فرح

صار عندج روضه

غزل : اريد من بطني اريد ابني وابن عمار متعرفون النار الي بصدري الله يحفظلكم جهالكم وهمه هم اعتبرهم جهالي بس اريد طفل من اكثر انسان احبه شنو ذنبه يبقى بله جهال

نهر : امر ربج

غزل : اني قررت اطلب الطلاك منه

ريم : هاي مأثر عليها الاسقاط انجبي واياج تعيديها

غزل : لعد يبقى بدون جهال مكافي تزوجني مطلقه هلمره مااخلف

سليل : اتزوجج بنيه او تزوجج مطلقه ماكو فرق مو فيصل اخذج بنيه ومحبلتي شنو هذا الحجي وثاني شى هو محد ضربه على ايده حتى تتزوجي وين يلكه منج گتل نفسه حتى تصيرين اله لتقللين من قيمة نفسج وهذا الحجي الماصخ بطلي

غزل : احسن مايتزوج عليه ويكسرني

رشا : هسه الرجال تصخم تزوج والي يسمعج يكول صار ٢٠ سنه ماعندج اطفال هو سنتين

غزل : بس الدكتوره كالت عندج خلل بالانابيب الناقله والطفل ميصير اله عن طريق الانابيب وسويت كدامكم وذبيت كومه فلوس عدا المراجعات والم العلاج وتالي مصار

ريم : يصير وعيونج مو مره مرتين او تلاثه لحد ميصير

غزل : اي مو عندي بنك اخذ منه ملايين واسوي

نهر : كلنا نساعدج

غزل : مااريد احد يساعدني اريد اطلك

سليل : هااي تخبلت اكوم اسويلج شى تاكلي بلكت تصحين على نفسج

غزل : جنت فاقده الامل وفاقده حتى الرغبه بلدنيا اصعب شى من افقد اهم احساس ممكن المره تعيشه وهي الامومه اشوف الي بعمري والي اصغر صارن امهات واني لا

نهر : سمعت صوت طه رحت اله وفهمته على وضع غزل بس هو يهديها خفت لتتصل بعمار وتهجم بيتها

حجي طه : وينها هسه

نهر : بغرفتي

حجي طه : خلي اصعدلها

غزل : كاعده والبنات دايرمدايري دخل اندكت الباب ودخل بابا كامو البنات كلهن يبوسن بيه ويسلمن واني ظهري ميلخني مااكدر اكوم تقرب مني وباس راسي شمرت نفسي بحضنه وابجي

حجي طه : لا لا غزالتنا الهاديه تبجي غزوله هاي العيون الحلوات متبجي بنيتي

غزل : مراح اصير ام

حجي طه : وشمدريج انتي تعلمين الغيب كله امر الله ورزق الله وفي السَّمَاء رِزقكم وما توعدون

غزل : تعبت بابا علاجات ومراجعات وكوه جمعت الفلس على الفلس وسويت ومنجح

حجي طه : ينجرح المره الثانيه

رشا : اجه عمار جاب غراضج ويريد يصعد يشوفج

حجي طه : خلي يجي

غزل : دنكت وافرك بيدي وامسح بعيوني

دخل عمار وتقرب مني سلم على البنات وباس راسي

حجي طه : ليش مكتلي على غزل

عمار : مردت ادوخك حجي وكلت اكيد من يرجع للبيت يشوفها

غزل : بلعت ريك وبتهور گلت

اني اريد اطلك الكل سكت وخواتي تخبلن وحده تباوع بعيون الثانيه

عمار : شنو تطلكين

غزل : تهسترت اعصابي وكتله مااخلف مو كدامك المن تضيع عمرك تنتظر طفل من مره متخلف

عمار : حجي متسكتها رحمه لابوك لوما مقدر وضعج جان عرفت شجاوبج

حجي طه : شبيج بابا حرام عليج هذا اعتراض امر الله وانتم بعدكم صغار والعمر كدامكم

غزل : افتهموني عفيه اني مااخلف والدكتوره كالت طفل انابيب وسويت ومصار على شنو بعد يبقى ويايه ويتعب نفسه ومصاريف ومغثه وروح وتعال

عمار : ليش اني تزوجتج علمود الجهال

غزل : بس الجهال اهم شى

عمار : عندج بس مو عندي

غزل : عندك هم بس انت متحجي وضام بگلبك

حجي طه : صوتج بابا نصي

غزل : العفو بابا اني هسه مااريد بس يعوفني وكلمن يروح لحال سبيله

عمار : يعني انتي تنطين فكرة موزينه عليه بأن اني رجال ماعندي ذمه وضمير وراح اذبج بيوم من الايام منو زارع هذا الشى بالج

نهر : اعذرها يمه دنكت وگلت شافتني وطبعت بالها

عمار : مع احترامي الج عمه تره مو كل الرياجيل سامي هواي اكو رياجيل ضالين ويه نسوانهم خمس سنوات وعشره و١٥ واكو ماتو وبقو ومتزوجو على نسوانهم وعاشو عيشه مرتبه وحلوة اعرف الجهال زينه الحياه الدنيا بس مو الحياه الدنيا كلها اني راضي بأمر الله اجه الْحٍمَدٍ للـّہ مااجه هم الْحٍمَدٍ للـّہ تره مو كل اصابيعكم سوه وعندي غزل تسوه الف طفل اني شسوي بلجاهل وانتي مو امه تره هاي تقلل من قيمتي من تتصرفين هيج لتقررين بكيفج والرجال اذا يريد يتزوج لو عنده عشر جهال يتزوج فوك مرته ويطلع عذر من جوه الكاع

حجي طه : اي والله يابني صدكت سمعتي رجلج شاريج وميريد شى منج بس حبج واهتمامج هواي عدهم جهال بس عيشتهم موزينه والرجال يكره الساعه الي يطب بيها بلبيت واكو ماعدهم بس ملك زمانه ويموت على زوجته

غزل : والناس كل مااشوف احد وصاح محبلتي

حجي طه : فضول الناس متخلصين منه اكو ناس هيه عايشه على هاي السوالف وحتى لو صار طفل عندج بعد مده يسألوج ليش مسويتي ناس فارغه تحب تدخل بغيرها عليج بيتج ورجلج ومالج دخل بأحد والي يسألج ليش ماعندج اطفال كولي اراده الله هاي الكلمة الوحيده الي اريدج تنطقيها بدون متناقشين اراده الله

عمار : هاي كدام ابوج اذا انعادت سالفه الطلاك والله اندمج راح اعبرها لخاطر وضعج بس اذا تنعاد ياغزل تشوفين شى محلو مني

حجي طه : هذا هو ابني بعد متعيدها

يله بنات عوفن اختجن ويه رجلها وانزلن سون عشا تره جعت

ريم : نزلنا وعفناهم جانت غزل تبجي بهدوء

غزل : باوعت عليه ضايج

لزمت ايده دفعها

عمار : موعيب تسوين هيج كدام اهلج اني ضاغط عليج على سالفه طفل فد يوم سمعتي حجايه مني تقهرج بسبب هذا الموضوع

غزل : لا

عمار : لعد ليش تسوين هيج مااقبل هاي السوالف كدامج مو طفل لتقررين بكيفج انتي حبيبتي ومرتي واريده منج مو من غيرج

غزل : كلتها لان احبك

عمار : تحبين لتجرحين وخلي شويه ايمان بگلبج لا يصير شى بسيط تنسين كلشي وتعترضين على حكمه ويله عقوبه عليج اخذج ويايه للبيت

غزل : لا فدوة عوفني هنا ارتاح

تقرب مني وباسني وحط كصته على كصتي

عمار : مااكدر انام بلياج كومي غزوله لتعوفين حبيبج ينام بوحده وماكو احد يداريج بكدي وامي وبسمه ضال بالهم كومي حبيبتي هناك نداريج

غزل : باوعت عليه وتقربت وبست خده اعتذر والله من حبي الك خفت لابيوم تتزوج عليه او تكسر بيه او تريد جهال ومتكولي

عمار : لو اريد اسوي الكلتي ميوكفني جاهل وحطي بالج اني احبج وتحبيني وحياتي مرتاح بيها والحمدلله ماكو واحد بيدي يجيب المشاكل لروحي غزل اني ماجبتها هين ومرتاح اني من يوم وفاة ابويه واخويه ضكت المر لحد موصلت لهاي الراحه والضايك الجوع يعرف قيمة الخبزه

مااقبل تبجين ولا تجيبين طاري هذا الموضوع نرجع نحاول نجمع ونسوي سلف وكل ميصير نسوي لحد ما الله يرزقنا كافي رازقنا الصحه ومنذب فلوسنا على الاطباء مال الامراض كومي ويايه لبيتج واياج بيوم تتنازلين عني وعنه

غزل : بسته وحضنته ولزم ايدي يله كوومي

سليل : كاعدين بلمطبخ وايدنا على خدنا بالنا يم غزل ونزلت وكايدها عمار

حجي طه : خيركم

عمار : ماخذ مرتي حجي هاي مالتي شسوي بيها

حجي طه : بهاي حقك بس تره اني هم الي حق بيها

غزل : انت الخير والبركه بابا وبست ايده وهو باس راسي

نهر : ليش متبقيها يمنا

عمار : تصير زينه واجيبها

ريم : الاسبوع الجاي نجمتع كلنا هنا عود جيبها عفيه

عمار : ميخالف اجيبها يله نروح

غزل : رجعت وياه للبيت وخاله باستني وطيبت خاطري اباوع على طيبتهم وخاصه خاله ولا كسرت بيه ولا غثتني وبسمه شالت شغل البيت كله بس وكت الاكل يصيحوني حتى ناكل سوه

سلمت امري لله وحاولت اهدي نفسيتي واتعامل طبيعي حتى مااخسرهم

رشا : ٢٠١٩/٨/٢٣ اول بارت نزل من قصتنا جنا نتراسل كلنا بكروبنا الي بلواتساب وفرحانات وخايفات بنفس الوقت وكل شويه ريم تعيط راح اجيب من الخوف جنا نقرا بأستمتاع وخاصه تفاصيل تخص بابا اكو شغلات نعرفها هو حاجيها النا واكو شغلات من عمه نهر عرفناها

دوم ايدنا على گلبنا لتنعرف شخصياتنا

نقرا ونندمج والاحلى نبجي وبعدين نضحك على نفسنا

لحد مايوم قرينا شى دوخنا سالفه صبا حبيبة بابا راسلنا عمه كالت اي ابوجن جان يحب وحده وكت مامتزوج امجن الفضول قره الف واحنا ماشاء الله ابد مو فضوليات او متجمعنا كاعدات كلنا وتكمز زيبك وبطنها اكبر منها

اليوم اسأل بابا لو مطي ينطح مطي لازم افهم هاي صباوي منوو

نهر : مو قريتن البارت

رشا : بس مو مثل منسمعها منه نزلنا جوه جان كاعد والجهال يمه ياكل ركي ويوكلهم

حجي طه : نزلتجن مو راحه

نهر : راح يستلمنك

حجي طه : شصاير

ريم : منو صبا

سليل : اباوع على وجهه بابا تغيرت معالمه وابتسم ودنك وسحب السبحه الي حاطها صفح وكاام غسل ورجع كعد بمكانه واحنا كاعدات بلكاع مثل الجهال انريد نسمعها منه لحد ماباوع بعيونه المتروسه تجاعيد من الگبر بس بقن حنينات وتشع منهن الطيبه

حجي طه : بال ٨٥ شفتها شطب ريحان واكفه وتبجي العيون سبحان الخالق سوادها

وكفت يمها واني قصدي افهم منها جنت نازل من الجبهه ومن سألتها عرفت بايكين جنطتها وراكضه وره الحرامي ومكسور الكعب

كعد يسولف النا شصار بينهم واكيد اكو شغلات خفاها عنه لان ماما كالت يحجي شغلان ويحتفظ بلباقي بس كلنا حسينا بعد هذا العمر كله من يحجي بيها بحسره وغصه

رشا : يعني اني انولدت على ايدها

حجي طه : اي على ايدها

رشا : من هيج گلبي طلع اعوج وبيه مصايب وامراض ومكسور اثاري من وراها لان تحبك وانكسر كلبها بتك هم انكسر گلبها

حجي طه : والله يابنتي مجانت نيتي سوء وروح ابويه ومعزتكم تكدرين تكولين ظهرت بحياتي بلتوقيت الغلط تمنيت بوكتها اكون سبع وشويه افكر بنفسي جان هسه هي مرتي الي وكفني زواجي من امجن ولا صارو ٣ جهال عندي سليل وانتي وحسام خفت عليكم

سليل :وشنو الفايده محصلتها

حجي طه : قسمه ردت اشوفها بس حتى اتعذر منها وماشفتها وره مده كم مره اروح لبيتهم وماالكاها لحد متجرأت سألت وكالو تزوجت وشالو من المنطقه غلطتي حبيت بلوقت الغلط وكسرت گلبي وگلبها

ريم : المهم ابويه طلع رميو وحب على سندس حقها تحاربك غير حاب فوكاها

حجي طه : ليش هي امجن تتعاشر

ريم : شبيهه بس تتمالخ وتعد وتصف وتتأفأف وتندب حظها شحلاتها من تكعد الصبح على عياطها اكشن بابا

حجي طه : وخوش عيشتني سندس الاكشن

الْحٍمَدٍ للـّہ على كل حال منو كلكم على صبا

كلنا اشرنا على عمه

نهر : كاعدين نسولف وذكرناها

حجي طه : الله يذكرها بلخير تمنيت اعرف وين صارت يله هاي الدنيا متنطينا كلشي

كعدنا ويه بابا وكل شويه نسأله بحجه ونجمع معلومات عنه تكول استخبارات بيومها صوت ضحكنا وسوالفنا للكراج واصل وكاعدات كلنا يم رجله

مشينا ونقرا بحياه بابا ومعاناته ويه امنا اكو هواي امور منذكرت لان منعرفها ولا شفناها اسرار بقت بگلب طه وسندس محد يعرفها غيرهم

بدايه شهر التاسع دك الموبايل وصوت حسين يرجف كعد تجيب ريم ركضنا كلنا للمستشفى لكينه جايبها وجاي نضحك اني والبنات على شكل حسين يريد يبجي

نهر : يمه على كيفك قابل داخله بعمليه انتحاريه هي رايحه تجيب وصحتها زينه شجاك ترجف

حسين : مشفتيها شلون تعيط ومي نزل منها

نهر : جنك عمك من كلشي تنهز هسه تطلع من العمليات واسمع شلون تقسم بلبنج

حسين : ليش تحجي

سليل : اووو بطولات وداعتك

شويه واجت السستر بلغتنا جابت جنا نعرف بيها ولد والحمدلله ولدت بلسلامه اباوع على حسين كاام يبجي من الفرحه

سليل : كون يشوفك سجاد اله يسويك نصبه

حسين : حقي سليل متعرفين شنو شعوري من راحت مني وعاشت حياتها وخلفت كلت هاي هيه مراح تصير بيوم ام بيتي وام جهالي واليوم الله رحمني وحققلي الي اريده متريدين ابجي زين واكف على طولي ريم حصلتها بدم گلبي

نهر : اي والله يابني الله يحفظكم بحق النبي محمد واهل البيت ويبعد عنكم عين الحساد

غزل : طلعت

ركضنا عليها ودخلوها للغرفه وبدت السنفونيه مالتها واول شى عاطت وصاحت ااااخ من اشتعلت نوريه الساقطه ولزمنه حلكها

حسين : لا مبين راح تقسم على الثكيل

سليل : نصيحه اخويه اطلع كمل حساب المستشفى وطكلك جكاره بره بين متخلص هوستها لان راح تستلم اهلك بلسره

هز ايده يضحك وطلع وصدك مباشره غزل وخرت ايدها وعاطت علي باك الدجاجه والطلي ولك طلي عبالك اعوف حسوني

نهر : اليوم راح اطلع ضيمها كله هههههه

رشا : واكيد امج وياها

نهر : تعلمت على سوالفها شسوي اسكت

ريم : نعوووم عساج بلغم يطشر راسج يم السحوره لا انتي ام البعوره ام السحوره نوريه نويره هي ونورس البربوك

رشا : سكتوها شهرتنا ههههههه

بعد الفلم الي سوته ريم خلت وحدتنا ميته ضحك نريد نسكت ماكو صحت البرنسيسه وصاحت سحليه وينك ااااخ بطني شكيتوها موو

رشا : لا حياتي دسنا دكمه ونزل الطفل ورجعنا طفينا الدكمه

نهر : هلمره كلجن عمليات موتني ولا وحده طبيعي بيجن

سليل :غير الدكتورات ياهي التروحين الها وصاحت ماعندج توسع دخلوها عمليات ونطلع هيج انون ونعيط ونسب

رشا : بس مثل ريم ضاربه الرقم القياسي بلبنج

حسين : هااا صحت

نهر : اي يمه تعاال يمها

كعد يم راسها ويبوس بيها وبأيدها وفرحان حييل سحبت غزل وبستها يوم الالج يووم

غزل : الله كريم ماما كلشي رزق

نهر : اي يمه عفيه بلسباعيه دوم اريدج هيج متهتمين وتعوفيها على الله

ريم : ابني وينه

حسين : شويه وبجيبوه الج

ريم : صرت اب حبيبي

حسين : ومنج هذا احلى شى منج ياحب عمري المستحيل

ريم : الف الْحٍمَدٍ للـّہ اهلك درو

حسين : اي بلغتهم وباركولي

ريم : باوعت حسيته مقهور عرفت مفرحانين اله لزمت ايده وبستها وكتله لتضوج كافي اني وتيم وابنه وياك صدك نفس الاسم الي اتفقنا عليه

سليل : شراح تسموه

حسين : ردت اسمي علي عاطت لان على اسم ابويه تالي اني اريد اسمي من اسماء الامام علي سميته حيدر

رشا : وهلا بحيدوري نور حياتنا اجه وان شاء الله اجه الخير ويااه

سليل : طلعنا ريمو من المستشفى وطلبت تبقى يمنا متكدر وحدها من وره تيم لان حرك

رشا : دك رقم غريب فتحته سمعت صوته لاول مره اسمعه وكأنه واحد غريب عرفت بروحي طبت تماماً منه

هااا شعلان

شعلان : اريد اجي اشوف فرح

رشا : هله بيك تكدر تروح تلكاها بلبيت بس يمهم بابا

شعلان : ليش انتي وين

رشا : شى ميخصك ومبروك على زواجك

شعلان : توقعت عرفتي

رشا : هاي حياتك وانت حر بيها من رخصتك مستعجله بتك بلبيت شوفها وتوكل وسديت الخط

ابتسمت وامشي بممرات المستشفى واباوع على حسين شلون يدفع بريم مكيف

اليوم بغداد صبحت على تظاهرات بالاول عبالنا مثل التظاهرات القديمه مسيره وساعه وساعتين وتفض بس الصار شى فاق التوقعات ظهر جيل جديد قوي وسبع ثبت للكل العراق بلد الابطال بكل اجياله وجيل الببجي ثبت هو جيل يقهر المستحيل

كل ولدنا طلعو بلمظاهرات وخاصه عمار جان يبات مرات بساحه التحرير وهذا الشى يخوف غزل بشكل بس هو يصبرها

علكت المظاهرات واشتددت وتوقعو يقمعوها بس شبابنا انطو شهداء في سبيل متنطفئ الثوره

دز بابا على البنات كاعدات كلنا نسوي اكل ولفات للمتظاهرين هلقاسم الله كص دجاج ومجموعه من الكبب كل وحده لازمه جهه وريم متكدر تكعد لان بعد الاربعين مطالعه وباقيه تأشر انطوني هاي القطعه وانطوني هااي وتاكل

سليل : خلي نكمل يمعوده

حسين : انطوها غير جوعانه

ريم : شفت حبيبي شلون يضطهدوني هي لفه

رشا : ثالث لفه تاكلين مو معده جيس زباله كلشي بيها

غزل : هااج هاي لفه

ريم : غزل احسن منكم

سجاد : استعجلو بنات ورانه طريق خلي اخابر عمار حتى يستلم الاكل من عدنا

حجي طه : بابا غزوله تعاالي

غزل : رحت ويه بابا للغرفه وطلعلي علاكه سوده

حجي طه : هااج بنتي

غزل : شنو هذا بابا

حجي طه : هاي فلوس هلنكدر عليه هاي ٥ ملايين مني ومن عمتج وخواتج لميناها مال طفل والعلاجات الوراه

غزل : لا بابا مااخذهم

حجي طه : اياج تردين ايد ابوج لو مو تتزوجين وان شاء الله يقسملج بلخلفه اياج بيوم تردين ايدي

غزل : عمار ميقبل

حجي طه : لزمته وحجيت وياه وقنعته صح تعبني بس بالاخير وافق هااج بنتي وتوكلي على الله تخلص المظاهرات وارجعي سوي ولتشيلين هم كل ماالله يرزق رجلج ويرزقنا نحاول لحد مابيوم تكعدين كعدت ريم هسه وبحضنج الطفل

غزل : حضنت بابا وكعدت ابجي

حجي طه : هاي شنو مااريد اشوف عيونج الحلوات تبجي صايره من كلشي تبجين يله اطلعي ويه خواتج ورانا شغل

طلعت دموعي بعيني وابتسم بستهم كلهم وتشكرت منهم وهمه اصلاً سوو نفسهم ميعرفون شى خابرني عمار وبلغته وكاال اردها الهم ان شاء الله دين برگبتي المهم راحتج حبيبي

غزل : راحتي ترجعلي سالم

عمار : لتخافين حبيبج على گلبج باقي وبحضنج

غزل : احبك

عمار : اموت عليج

غزل : انتبهه على نفسك

عمار : من عيووني

غلقته والفرحه ماليه نفسي والكل يضحك ويسولف وماما باستني ومسحت دموعي ورجعت اكمل شغلي وياهم ودخل عمو محسن طبعاً فيصل صار غنده طفل من زوجته فرحت لعمو لان جان امنيته يصير عنده طفل يشيل اسمه كلشي قسمه والله يرزقني مثل مارزقهم

محسن : هاااا بنات طه انجمعتن

نهر : غير يساعدني مااكدر وحدي

محسن : وزيبك تاكل هاي ضربوها دخانيه بلكت تبطل اكل

ريم : تغار مني لان مااسمن وانت شوف كرشك شكبره

محسن : من جنت بشبابي خير اخبل غير النسوان الرايحه والجايه تتغزل بيه

حجي طه : بدا مسيلمه الكذاب

محسن : اي حقك مو تشوف وجهك ٢٤ ساعه تعوي وتروح وتجي منزل راسك ممركز بلحلوات من يصجمن بيه حقك هو اليتزوج سندس يمشي ويسولف ويه روحه ويكول شسويت بروحي ويغم بكصته

حجي طه : عمجن بس بوخه وخلصها اتزوج وهاي حلووه وذيج تخبل

محسن : غلطتي مازوجتك ام حمزه الله يرحمها

سليل : غص بابا جان يشرب مي وكاام يضحك

حجي طه : محد عم عليه غيرك تمشي وتصيح اتزوج ام حمزه طولها بعشر نسوان وتالي لا تزوجتها ولا تزوجت غيرها ومكابلك وكاعد

محسن : هذا ابوجن كل خير مابيه بس بشى واحد خلفجن حتى اضحك عليجن

ريم : هيج صارت عموو هدوني عليه اليوم اقطه لو تجي ام حمزه

سليل : كاعده واباوع عليهم بابا وصوت ضحكاته الدافيه وعمو محسن وريم التركض وراه ولازمه عمليتها وماما ورشا وغزل وحسين وسجاد الواكف على صفحه وبيده الجكاره ومبتسم

كل واحد بيهم لزمنا ايدكم ودخلناكم حياتهم وشوفناكم الظلم الفقر القهر الجوع الالم الدموع الموت الخذلان الخيانه وشلون عشناها وشلون كدرنا نجتازها بأيمانه بالله وقدره يجوز ايامنا الجايه اصعب ويجوز اسهل كله بأمر الله كل الصار بينه سببه الاختيار الخطأ يوم ما وافق بابا يعيش مع الانسانه الخطأ ويرتب حياته على اساس رغو ضعيف وقبل يسكن بصف ناس خطأ اختارو الصح ولو بعد تعب وعناء لان مستقبلكم يعتمد على اختياركم

واليوم نفس الايد الي سحبتكم لبيت طه وبناته وعيشتكم الاشهر الفاتت حياتهم بجيتم ضحكتم تألمتم معاهم راح اطلعكم

الكاتبة ريام : ودعو معي طه وبناته سحبتكم من ايدكم وغلقت باب البيت وكفنا كلنا بعتبت باب بيت طه وگلوبنا تدعيلهم بلخير

عمو طه الله ينطيك الصحه والعافيه انت ابونا كلنا حنيتك وطيبتك وايمانك بالله علمتنا هواي امور الله يرزقك على كد نيتك الطيبه

عمه نهر منبع الاصاله والطيب انتي مثال للشرف والاخلاق والامومه والكفاح كلنا عشنا حنيتج وطيبتج وندعيلج بلخير ياغاليه

سليل ام دميعه دمعتج غاليه علينا يارب عيونج متشوف دموع والله يحفظلج عموو الوحش واطفالج الحلوين ولتنسين سجودي اربعيني ديري بالج عليه ههههه نتشاقه وياج الله يحفظلج عائلتج وسجاد الطيب العم الحنون والسند القوي والشهم لبيت طه انتم احلى اثنين مختلفين حبكم المميز والمختلف خلانا نعشق التحدي مثل صبرج وتحديج لحد مصرتي لسجاد راح نشتاق الكم يااحلى ثلل

رشا : اااه يارشا ياطيبه وقويه ياصاحبه الكرامه والقوه يارزانه بيت طه الله يحفظلج فروحه ويعوضج الخير انتي علم ومتتعوضين شكراً لان سمحتي نعيش المج ونشاركج كل لحظه عشتيها يارب حياتج القادمه افضل من الفاتت ندعيلج بكل خير ولتنسين مو كل اصابيعج سوه ونبقى نردد ونكول اشتعلتي جنات

ريم : عسل بيت طه وحلاوته وضحكته وقوته وسباعيته غزال البراري راح نشتاق لكل ضحكه منج ولكل عركه وكل كلمة الله يحفظلج حسين واطفالج انتي وحسين مثال للحب الصادق ومثال للي يكول مستحيل هذا الشى يصير ثبت حسين من تزوجج ماكو شى اسمه مستحيل اكو شى اسمه اسعى ياعبدي وانا اسعى معاك الله يحفظكم

غزل : غزوله الهادئه الطيبه ام ضحكه تجنن يارب يحفظلج عمار ونشوفج عن قريب احلى ام والكل يدعيلج ملايين الناس تدعيلج بلذريه الصالحه انتي طيبه وصبوره ومؤمنه وكله رزق من الله والله يرزقج من اوسع ابوابه

ماكو نهايه للقصه لان بنات طه موجودات وحياتهم مستمره الي علينا نطلع هسه من بيتهم ونودعهم سديت الباب وعفناهم بحياتهم يكملوها وصوت ضحكاتهم ترن بأذنا كلنا ونكول

يعز علينا فراقكم ولكن في القلب محبتكم وذكراكم

مع السلامه ياغزلان طه