تحميل رواية «ابي والغزلان للكاتبة ريام هادي (REEM)» PDF

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_السابع_والثلاثون

ترا تعافيت منهّن ، لا يظل بالك

مو آنه الـ يچلّب بعد بـ ذيَالك !

ولا آنه الـ بعد يسهر يتّاني تعود ،

خلني لوحدي أعيش و وحدك أحلالك ..

ماشمّك بعد ، لو شيلّه أُمي تصير !

ولا أفطُر بعد لو بيّن هلالَك ..

آنه بخير ،

وأضحك ،

وأختلط بالناس !

مو ذاك القديم الـ وحده ينعالك 💔

غزل : بدلت على السريع واخذت تلفوني ونزلت تمشيت مسافه واخذ لصوره الزينه مال الميلاد والشوارع والناس تركص ومندمجه لوين يله حسيت روحي بعدت وين اني عزه تيهت اباوع منين طبيت منين طلعت مااندل رجعت مدري وين فتت وطلعت وكل شويه اكول من هذا المكان لحد متاهه الشارع عندي خفت حيل ودمعت مباشره نزلت لزمت التلفون ادك على فيصل ميجاوب ادك مره مرتين وخمس مرات ماكو خفت اكثر رجعت دكيت على نوران هم متجاوب هنا بعد سلمتها كلت هاي هيه ضعتي ياغزل شنزلني صخام بوجهي مو منجبه وكاعده بمكاني ياربي شسوي

اباوع اكو شباب سكاره وناس تحضن بناس واشكال الاصناف خفت لا واحد منهم يتقدم عليه ويتحارش كعدت على الرصيف ابجي ياربي وين اروح تذكرت حسن اي ماكو غيره بس رقمه ماعندي لا اكو رساله مره دزها اليه علمود فيصل ميجي كال قفلي الباب  من رقمه ياارب محاذفتها فتحت الرسائل لكيتها اي ياالله مباشره دكيت من ثاني دكه شاله

حسن : هااا غزل بيج شى

غزل : متحملت من الرعب الي اني بيه بجيت تعالي حسن تيهت

حسن : وين تيهتي مو عفتج بلشقه اوكفي مااسمع زين خلي اطلع

مبين جان كاعد ويه جماعه وهوسه غزل تسمعيني

غزل : تعالي عفيه طلعت اخذ صور وتيهت وين دخلت وين طلعت

حسن : لتخافين بس لتبجين حتى افهم انتي وين اوصفيلي المكان

غزل : شارع بيه محلات واكو حديقه كباله

حسن : كل الشوارع هيج غزل انطيني علامه ادق

غزل : مااعرف مااعرف وكمت اشهك

حسن : بس اسمعيني بطلي بجي شوفي بنيه وانطيها التلفون بنيه غزل مو ولد

غزل : مااشي تقربت من بنات ٣ كاعدات وياهم ولد بس انطيتها وهي صفنت بوجهي وحجت وهو مدري شكال الها وابتسمت وبقت اعتقد توصف اله المكان وانطتني الموبايل واشرتلي اكعد بصفها خفت اكعد وخاصه بيدهم شرب بس وين اروح كلها شباب شكد ثوله شنزلني بقيت متوتره واشلع بأضافيري من الخوف اذا واحد يعيط بصفي يمكن اخرب من الرعب واشتغلت الصعادات وجفلت زاد البجي مالتي لحد ملمحت حسن من بعيد اجه يركض واني من حلات روحي ركضت عليه

والله لو ما الحرام اله احضنه من الخوف

وكفت كباله ابجي

حسن : بيج شى احد تعرضلج

غزل : لا

حسن : لعد ليش البجي ياعيني

غزل : خفت حيل

حسن : مو كتلج اني اطلعج ومقبلتي شنزلج وحدج

غزل : نزلت اخذ صور لخواتي اشوفهم الاحتفال وضعت

حسن : امسحي دموعج جنج طفله عمرها ٥ سنوات وامشي افرج اخذي بعد صور

غزل : لا التوبه اريد ارجع للشقه

حسن : امشي بدون عناد اخذي الصور واتنفسي وشوفي الناس والجو وارجعج حتى تروح الخوفه منج وهم اعلمج الطريق لازم تندلين ميصير تبقين محبوسه كل الوكت بلشقه

يله امشي وبديت امشي وياه ويشوفني اماكن تجنن بليل وحلوه وصعادات بديت اهدا واتونس بلمناظر شغلات مشايفتها بعمري وهو جان طيب ويايه اشترالي لفات واكلنا واخذت هواي صور بوكتها تونست واول مره اضحك من گلبي من يوم مااجيت للسويد

وشويه وبدو يعدون راح ندخل السنه الجديده باوعت عليه وكتله ضيعت عليك السنه اسفة المفروض ويه جماعتك

حسن : يمكن هذا احسن شى صار بعمري

غزل : شنو يعني

حسن : نحسب يله وبدينا نحسب مثل الناس ١٠ ٩ ٨ الى ان عاطو هبي نيو ير ودخلنا ٢٠١٥ جنت متونسه لان شى جديد عليه وبقينا للساعه وحده بليل ورجعنا نتمشى راح الخوف والهزه الصارت الي ورجعت متونسه حيييل

وصلنا للشقه وكتله شكراً الله يحفظك تمنيت عندي اخ مثلك

حسن : اني موجود لديرين بال

غزل : والله مااعرف شلون جان حالي بدونك وبدون نوران الله يحفظكم وسنه سعيده عليكم

حسن : وعليج ان شاء الله محتاجه شى

غزل : شحتاج بعد كافي ضيعت اهم يوم بلسنه عليك

حسن : بلعكس كلش جان الوكت وياج حلو

غزل : شكراً تصبح على خير

حسن : وانتي من اهل الخير

دخلت فرحانه ومتونسه وبديت ادز الصور للبنات مكتلهم على الصار وسكتت وراها نمت كعدت على صلاه الفجر ماكو فيصل شلون اتوقع يجي بهيج يوم

وعفته كملت الصلاه ونمت ثاني يوم كعدت ساعه ١١ الصبح ومباشره اتصلت بعمو محسن

شلونك عمو

محسن : هله بيج ياغاليه يابنت الغالي يامرت اغلى الغوالي

غزل : هاااي شنو متحمس من الصبح

لان سنه جديده

محسن : ياسنه عمو جديده هي كلها نفس الشى مكابل ابوج وكاعد

غزل : يعني هسه انت بلمطعم

محسن : اي جوعانه اجيبلج اكل

غزل : ههههه شلون اتجيبه برساله

محسن : اخابر فيصل واوصي ويوصل الاكل لحد يمج

غزل : تسلم عمو متقصر فدوة عندي شغله وياك

محسن : كولي باباتي

غزل : اريدك تبيع الذهب الضميته عندك

محسن : ليش محتاجين فلوس

غزل : لا بس اني محتاجه

محسن : ورجلج الطرن ليش مينطيج

غزل : فدووه عمو اريد ابيعه اني مو خليته امانه عندك وكتلك شوكت مااحتاج اخابرك

محسن : بنتي غير افهم شسوين بلفلوس

غزل : اريد اسوي عمليه علمود مالتي الحرك

محسن : وفيصل ليش مينطيج

غزل : مااريد منه

محسن : صاير شى بينكم

غزل : مصاير

محسن : لج بابا احجي مو طكيتي جبدي

غزل : عمو مصاير شى بس بيعلي الذهب بأقرب وكت وليضل بالك هم اخذ منه ويساعدني لان العلاج مكلف

محسن : صار بنيتي يومين والفلوس يمج

غزل : اي والله عمو كل متستعجلي كل مااحسن صدك بابا ليش محذوف الفايبر مالته

محسن : كل ما اسألة يكول من وره الجهال يلعبون بجازه وميعرفون يحذفوه وهو كومه ارقام

غزل : فدوة عمو حمل البرنامج اريد اخابره هسه مشتاقه اله

محسن : مااعرف لجهاز ابوج حتى جهازه عاوي مثله اكله اشتري غيره يكول ماطول يصيح الوو مابيه شى

غزل : لعد شلون هسه

محسن : اوكفي تعال ابني

عمار : نعم عمي

محسن : روح جيب جهاز الحجي تعرف بيه

عمار : اي اعرفله

محسن : حمل برنامج الفايبر الاهل يردون يتصلون بيه

عمار : صار عمي

محسن : هسه راح يحمل وخابري

غزل : اوك

بقيت شوي انتظر ودكيت ادك وماكو شنو السالفه شويه وانفتح الخط صحت الوو بابا

عمار : العفو اختي داشتغل بتلفون الحجي وانفتح الخط والحجي بره يم جماعه الامانه

غزل : انت منو

عمار : اني اشتغل بمطعم الحجي عامل

غزل : اخويه اذا مصارت زحمه عليك كمل الجهاز مالته وانطي وكله يتصل بيه

عمار : صار

غزل : شكراً وسديته

وراها ب٥ دقايق دك بابا وسلمت عليه جنت كل يومين او بين يوم ويوم اتصل علية واطمن

اجه فيصل زين صاحي مو سكران ومبدل وضعه تمام اني انقهر بس مابيدي شى اكول يجوز تلعب نفسه من سالفه الحرك مالتي لهسه انطي اعذار بداخلي وكلت يجوز من اسويها يتغير الحال بينا

وره يومين خابرت نوران وكتلها على الحواله وراحت هي وحسن وجابو الفلوس

غزل : باوعت اكثر من فلوس الذهب خابرت عمو

وسألته

محسن : غير بنتي وتسوي عمليه المن اضم لفلوس دزيتلج فوكاهن اصرفي براحتج حتى لو اعرف ابيع البيت وادزلج فلوسه المهم تسويها وترتاحين

غزل : فدوة لگلبك الحنين عمو متقصر والله تشكرت منه وسديته

نوران : هاي هيج تحبين عمج

غزل : كلش فوك متتصورين عمو محسن ذهب صافي واحسه ابويه الثاني

نوران : هواي عندج اباء ابوج الحقيقي وابو فيصل وذاك اليوم تكولين زوج اختي الجبيره يمكن جان اسمه سجاد موو

غزل : اي سجاد

نوران : كلهم ذوله ابائج

غزل : لان طيبين ويحبوني واحب حنيتهم عليه لهذا عاطفتي حاطتهم بهاي المنزله

محسن : انتي طيبه لهذا تشوفين كل الناس طيبه مثلج

غزل : شكراً حسن هسه كولولي شوكت نروح للطبيب

نوران : بااع شلون مكيفه

غزل : امنية عمري وراح تصير شلون مااكيف بس هم بداخلي خوف والقلق لا يكولون ميصير

حسن : ماكو شى ماله علاج بس كلشي بوكته وبثمنه

رحنا حجزنا وهذا كله استاذ فيصل ميدري اصلاً عايش بغير ملكوت

والطبيب بشرني بعد المعاينه رجلي ترجع مثل الاول بس رگبتي لان اكو مساحه متضرره حيل جانت حرق من الدرجه الثالثه للعمق وتشوه قووي كاال راح يصير على مرحلتين يكشطون من رجلي منطقه الفخذ ويخلووه على رقبتي بس اكو جزء صغير بلطول احتمال يتأخر وراها اكو مناطق بسيطه بليزر كلت حتى لو بقى شى بسيط مو منم المهم الجزء الاكبر يروح ورجلي ترجع مثل الاول وحجزنا موعد بعد كم يوم نبدي مرحله العلاج ورجعت متأمله خير وفرحانه اول موصلنا لكينا فيصل واكف بابا الشقه ينتظر

فيصل : بعد وكت

حسن : متسلم نسيت شنو السلام

فيصل : اوكف انت حسن خلي اشوف غزل افندي وين جانت

نوران : ميحتاج هيج تحاجيها رحنا للطبيب علمود الحرك مالتها وحجزنا

فيصل : ومنيلج فلوس

غزل : بعت ذهبي

فيصل : واني طرطور اخر من يعلم

غزل : انت وينك حتى اكلك حتى من اتصلت بيك براس السنه مكلفت نفسك وجاوبتني ولا من رجعت كتلي ليش خابرتي اخاف صار شى احتاجيت شى انتي تحسبني اني والماكو سوه تروح وترجع وممهتم ليش بسالفه علاجي توكفلي

فيصل : شعليه بيج واذا تعالجتي بس مااحب شى يصير بدون علمي

غزل : تواجد بلبيت واسألني واجاوبك

نوران : ياجماعه ميحتاج لهذا التوتر فيصل حجزنا لغزل وانتهى ياريت تكون موجود بيومها

فيصل : اشوف وكتي

غزل : شكراً وعفته ودخلت للشقه من باب اريد اعرف كلشي ومن باب ميجي ويايه ولا مهتم

عفته ومفتحت موضوع ويااه ولا هو وبقى اليوم كله بلشقه لو يخابر لو ينام حتى اكل مأكل

انتظرت يوم يوم جنت حابه اسويها مفاجأه لخواتي ولبابا جنت احسب ساعه ساعه

ويوم يوم للعمليه

لحد مايوم العمليه اجه واكفه واخذ صور لرجلي ولرگبتي اريد اقارن بين القديم والجديد الي راح يصير كملت اهذ الصور وبدلت وطلعت ولكيت حسن ونوران ويايه ومع الاسف فيصل ماكو شتسوي بعد يافيصل احس يتعمد اذيته يتعمد اهمالي انقهرت لعدم تقديره وضعي ساعتين مراح يأخرون عن حياته ودخلت وبدو يشتغلون حظرت نوران ويايه بحكم هي ممرضه وهم اترجم كلامهم حجيهم هادئ ومطمأن وخاصه من شافو على وجهي الخوف غمضت وادعي واقرا ايات اكول معقوله العله الي عشت بيها سنين راح تروح مني

وبدو يشتغلون محسيت غير من كالو كملنا

وبدو يشرحون الاجرائات والوقايه وشلون لازم اتابع وياهم وضعي لحين الشفاء ضمدولي رگبتي ورجلي والمكان الي اخذو منه الجلد طلعت مقبلو امشي على رجلي حتى لا ازيد الضغط ورجعت للشقه ومن يومها نوران متابعه حالتي

رشا : كعدت ويه نفسي وقررت لازم مااوكف حياتي همه متهنين واني كاتلني القهر على لحظة يوكف گلبي شستفاد اذا اموت وايتم بنتي واخليها تحت رحمه مرت ابوهاا ااخ والله وكت جنات صارت مرت شعلان جريت نفس وبديت الف الشال عدل باوعت على شكلي مرتب اليوم اول يوم اليه بلمدرسه عمو سجاد جابلي اوراقي ونقلت لبغداد والحمدلله بمنطقه قريبه اتمشى جانو محتاجين اختصاصي واليوم راح اداوم كلشي جديد حياتي دوامي لبسي وضعي نفسيتي شهر الواحد ٢٠١٥ اول مدخلت السنه كلت كون من ادخلين اجيبين الخير وياج لان تعبت وماعندي طاقه بعد اي شى يصير راح انتهي

نزلت وعفت فروحه نايمه يم ريم واستقبلتني عمه

نهر : يمه فدوة لهذا الطول

رشا : صباح الخير ياوجه الخير

نهر : والله انتي وجهه الخير يمه لا يضربنج عين طالعه حليوه

رشا :لتخافين اكو الاحلى مني

نهر : انتي عندي احلى البنات هاااج هذا اكل اخاف تجوعين

رشا : لزمت خدودها اوووف فديت الحنينه

نهر : دير بالج على نفسج يمه واقري المعوذات ومالج دخل بفلانه وهاي كالت وذيج عادات كملي دروسج وارجعي

رشا : ان شاء الله طلعت لكيت عمو سجاد هستوه راجع

سجاد : صباح الخير

رشا : هلو عمو صباح الانوار

سجاد : يله اصعدي اوديج للمدرسه

رشا : وسليل

سجاد : وديتها قبلج هو اني مبتلي بيجن من انتن وصغار اودي هاي واجيب هاي

رشا : ههههه صعدت وسديت الباب وكتله اي والله بس جنت ملازم سليل مثل ظلها واحنا نمشي كدامكم

سجاد : غير مرتي واخاف عليها

رشا : هاااا شلك بيها عمو جانت طفله صغيره

سجاد : من اول يوم شفتها واني اخاف عليها   مثل اختي متوقعت احبها وتصير مرتي وام ابني والله وكت كبرتني الله ياخذجن

رشا : ههههههه بعدك شباب عمو والله

سجاد : ياشباب ولج رجال اربعيني ويني وين الشباب

رشا : غيرك يتزوجون

سجاد : خلي يولون ولتضلين كل شويه متذكرتهم

رشا : هاي المدرسه عمو

نزلت

سجاد : اني ارجعج بين ماالكه خط الج

رشا : ليش تره مو بعيده

سجاد : ميخالف الشوارع مو امان

رشا : شكراً عمو ودخلت للمدرسه وتعرفت على المدرسات والمديره اتعس سؤال ينسأل اليه هو متزوجه لو لا لان الحلقة نازعتها ومن اكول منفصله يحسسوني راح اموت انتهت حياتي اووي خطيه ليش اطلكتو وشصار وعندج خلفه لو لا يبووو مئات الاسئله جاوبت بس كتلهم متفقنا وعندي بنيه وعايشة ويايه اتعجب على النظره شلون تتبدل تكول المطلقه جرب ولازم واحد ميوصل يمها حتى لينعدي او تحسد اووع على شنو احسد اصلاً اكرهه شى عندي هسه الرياجيل كمت احاول مااتعمق وياهن حتى ليدوخني بأسألتهن

واكمل يومي واطلع وبديت اتعود على الجو حسيت بأستقلال غريب شغلي وراتبي بيدي

وبنتي بحظني

بس الشى الي نسيته اكو رابط بيني وبين شعلان وهي فرح خلال الهوسه والمعناة الي عشتها نسيت اهم نقطه بنتي وعلاقتها بأبوها

وبيوم راجعه مكيفه مستلمه الراتب لكيت سياره بلباب هاي سياره شعلان اختنكت حيل ركضت طبيت من المطبخ لكيت عمه تسوي جاي

هذا شجابه هاا شجابه

نهر : على كيفج بنتي خابر ابوج وراحو للمطعم عليه هو وخضير خاله واستإذنو يشوف بته

رشا : ماله حق يشوفها خلي يروح لمرته تخلفله شيسوي بتي مو راد ولد

جان تدخل ريم

ريم : وانتي شبيج هنا تهتزين ذاك شعلان وروحيله

رشا : اي اروح ليش لا

ريم : اوكفي لحظه

ركضت ريم وجابت باودر هاي شسوين

ريم : نعدل جهرتج لمسات خفيفه وحطت حمره خفيفه لان راحت الدوام طويل وفتحت الشال ورديت عدلته هسه ادخلي واحجي بهدوء وثكل وبلا رجف جنج غساله عطلانه وتهز

رشا : شربت مي وسميت ودخلت بهدوء للاستقبال جان بابا كاعد ويه خاله خضير وهو لكيته مكعد فرح بحضنه وكاعد بلطرف الثاني من الصاله  وعلاكات اشكال حااط ولعابه بيدها اول مشافني كام وكف

رشا : السلام عليكم ردو السلام عليه باوعت بثقه وهدوء واشوف عيونه تاكلني اكل

ممكن اعرف شجابك

شعلان : اجيت اشوف بنتي

رشا : يابنيه ماعندك بنيه يمي

خضير : بنتي تبقى بته اول فرحته ميصير تحرمي منها الصار بينكم الطفله مالها ذنب بيه وشكد ما تحاولين تبعديها يضل ابوها كافي اسمها مرتبطه بإسمه

رشا : واني اريده بالاسم وبس بنتي ممحتاجه شغلاتك وغراضك خليهم الك لبيتك ينفعوك ورفعت تك حاجب بخزره

شعلان : اني اكدر بلقانون اشوفها بس مااريد اكبرها وأذي بتي كل فتره امر اشوفها واروح ومراح اضايقج

رشا : على شنو متعب نفسك تروح وتجي تكدر تتصل بيها تسمع صوتها وبس

شعلان : مثل ماهي بتج تبقى بتي واريدها واشتاق الها وحتى يجوز اخذها فتره وارجعها

رشا : عليت صوتي بنتره وكتله اياااك تفكر بيوم تاخذ بنتي لذاك البيت متدخله فرح اله على جنازتي

خضير : يابنتي الرحمه حلووة خلي كل فتره يجي يشوف بنيته ساعه زمان ويروح

رشا : مااشي ساعه وهنا ماكو طلعه

شعلان : تتشرطين

رشا : يحقلي وبلي يصرفلي

شعلان : مبين راجعه للدوام ويباوع من فوك ليجوه

رشا : حجيت بثقه وكتله انت شعليك  وياريت من تجي لتجيب شى لان بنتي عدها الي يكفيها وزياده

شعلان : مجبت شى الج لبنتي.

رشا : يله عادي جيب كلها كم شهر ومرتك تجيبلك الولد وتنساها

حسيته تعصب وعيوونه نطت مهتميت 

بابا كلشي محجه بس يباوع عليه

عفتهم وطلعت ادور المي حتى بس استرخي

ريم : حمامه غراب

رشا : غراب على راسه وراس الخلفه

ريم : مره مرتين تتعودين اكيد هسه من شافج مرتبه

سمعنا صوت الباب وطلعو

حجي طه : اتفقت وياه من يجي ينطي خبر حتى اجي اما اني اكون موجود لو سجاد ولو سجاد مااتوقع لان اذا شافه هاي المره واحد يذبح الثاني عود اشوف منو يكعد يمه من يجي

رشا : لا كل شويه يروح ويجي مره كل شهرين كافي

حجي طه : تبقى بنته بنيتي الضنه غالي مالج دخل بيه وبعد لطلعين اله يجي يشوف بته ويروح

نهر : شعجب قبلت طه

حجي طه : اذا مااقبل راح يسويها محاكم ومحلوه بحق رشا وبتها ويفترن بلمحاكم كافي الصار هو ساعه زمان يجي يشوفها ويروح

رشا : صاعده ابدل صعدت مغثوثه يعني يروح ويجي على بتي شلون امنعه منها شلوون ياربي

صحت ريم وريم هم من رأي بابا لان قانوناً من حقه يشوفها

سبحت وتغدينا واجه حسين صار اكثر من شهر مشايفي

ريم اخذت ابنها وصعدت حتى مباوعت عليه حسيته ضاج

سليل : الحياه تمشي بينا ومتوكف لا عليه ولا على خواتي هاي الدنيا تركض ونركض وراها كاعده اباوع تلفزيون مسلسل تركي ومندمجه واجه سجاد

سجاد : حبيبي حضريلي ملابسي

سليل : شتلبس

سجاد : باجر عندي طلعه ويه ولد نروح نودي مساعدات للحشد

سليل : شنو ياحشد سجاد

سجاد : جم حشد اكو هو واحد

سليل : لتخبلني شيوديك

سجاد : هسه تطوع مطوعنا اكلتي راسي حتى لا اطوع وتالي مساعدات مندز

سليل : اي دز وكلنا ندز وياك بس مو انت توديهن

سجاد : الجو بارد واكثر ولدنا كتلهم البرد والجوع والمعارك مستمره وهمه باقين على المساعدات الي تجي واني وغيري اذا منساعدهن شلون يستمرون

سليل : فدوة سجاد دز وانطي الي تريده بس لتروح انت

سجاد : لتشلعين گلبي واسمعي الكلام هو يوم وراجع

سليل : منو وياك وين رايح بلضبط

سجاد : ولد اسمه حيدر وعمار الي يشتغل عند ابوج رايح لقضاء الحضر

سليل : كمت ابجي من الخوف حييل خفت وهو عاط بيه

سجاد : شكوو ليش تبجين قابل رايح افخخ روحي هو اودي مساعدات وارجع

سليل : انت كعد تشوف شديصير كتل بلجمله

سجاد : اذا الله كاتبلي اعيش لو جيش بحاله كدامي راح اعيش واذا كاتبلي اموت هسه گبالج اموت الاعمار بيد الله لتضلين تتشائمين

سليل : حضنته بداعة زين لتروح

سجاد : لتعرضيلي سليل رايح أدي واجب واجي وناس هواي تبرعت وهاي كلها برگبتي نوديها ونرجع المفروض تفرحين رايح نساعد اخوتنا مو تبجين

سليل : لو بيدي اشك هدومي اني ميته خوف وهو يريدني فرحانه

سجاد : كومي حضري غراضي حتى اتوكل باجر

خلي اخابر ابوك يطلع عمار من وكت

وكافي بجي حتى ازعل عليج واروح زعلان

سليل : شسوي براسك اليابس

سجاد : ماطول تدرين راسي يابس المن موجعه گلبج وتبجين حبيبي لتخافين كولي ياالله وان شاء الله عكب باجر اني راجع

نهر : اجه طه ضايج سألته شبيك

حجي طه : اليوم موقف والله ضوجني مع الاسف على هذا الجيل

نهر : شصار

حجي طه : دك عليه سجاد علمود عمار يروح وياه يودون مساعدات للحشد

نهر : كالت سليل وجانت خايفه وتبجي

حجي طه : المن تبجي فوك متكيف رجلها رايح يساعد المفروض كلنا بلجبهه وياهم لو ما الصحه تعبانه والله لا اخذ سلاحي واروح وياهم مكافي الموصل بيدهم ولج نهر تعرفين شنو يعني الموصل بيدهم دفعنا دمنا سنين بحرب ايران والكويت والسقوط وشباب حلوة دفنا حتى شبر محد يحتلها وتالي تنوخذ كبال عينا وتردين يسكتون ولدنا

نهر : انت من هاي ضايج

حجي طه : لا ضجت من هذا الارعن مرتضى ابن السماج الي يشتغل عندي تعرفي

نهر : اي وامه خوش مره شبيهه

حجي طه : كاعد بأمان الله وجان يجيني حجي حجي

هااا ابني كوول

مرتضى : عندي حجايه وياك مهمه

حجي طه : كووول

مرتضى : سمعت ابو زين راح ياخذ عمار وياه حتى يرحون باجر

حجي طه : اي صحيح

مرتضى : لتخلي يروح

حجي طه : وليش ميروح

مرتضى : حجي هذا سني واخاف يعلس ابو زين والولد

حجي طه : لك شتحجي انت شنو سني شنو شيعي

مرتضى : متشوف السنه شلون باعوها للموصل وعمار سني ويجوز يغدر بيهم

واني احبك واحب ابو زين ولمصلحتكم احجي

حجي طه : تدري لو ما اخاف الله جان هسه اجيب سلاح وطلقتين برجلك واسكطك ولك شنو شني شنو شيعي مو عيب بابا عود اني اكول جيل هلوكت واعي وناس بجتف ناس

مرتضى : غير اخاف عليكم ياحجي هاي فوك زينيتي

حجي طه : لو ما احب ابوك الله يرحمه وبركبتك عائله اله الزمك الباب من شوكت عدنا السني يغدر والشيعي خير لو الشيعي يغدر والسني خير ولك بكل مذهب وبكل مله بيها الزين وبيها الشين البيت الواحد اخوه طالعين من رحم واحد بيهم الادمي وبيهم الگلب الساقط ونفس الشى صار بلموصل حتى لو نشوف مجموعه انطت بلكاع مو معناها كلهم باعو وكلهم سلمو اكو كومه ناس مصالوه سنه انطو نفسهم وعدموهم واطشرت عوائلهم ومارضخو للدواعش كومه نسمع بيوت انفتحت للحشد وداومهم او ختلوهم حتى ليوكعون بيد الدواعش لتعمم مرتضى وشوف النازحين شكد انهزمو بطرك روحهم مكان متساعدهم وتفتح بيتك الهم تحجي عليهم هسه من اطك مفخخه ويصيرون جرحه تروح تسأل الجريح انت سني لو شيعي يله تشيله

لدنك واحجي تسأل انت مذهبك شنو

مرتضى : اكيد لا

حجي طه : لان ذوله بشر وعراقيين سواء سنه شيعه مسيح ايزيد صابئه اي ديانه او مذهب تروح تركض حتى تشيل اخوك العراقي

لك اني بحرب ايران ردت اموت واجه الله يذكره بلخير مدري الله يرحمه نائب ضابط اسمه عمر وسحبني من الساتر وما سألني انت شيعي لو سني وتالي ركضنا سوه واتصوب وهذا الجتاف واشر على جتفي شاله وضميته من الايرانين وما كتله موت لان انت سني حاميته بروحي وطلعنا سالمين جنا اثنينا بالنا شى واحد احنا عراقيين اخوه مهمني هو منو وشنو مذهبه او حتى ديانته لكم هذا التطور لعب بعقولكم ومكان متوحدون العراق بوجهه هذا السرطان الي ياكل بينا الي اسمه داعش تجون تزرعون التفرقه بينكم مكافي ذيج السنين شكد اكلت ناس انغدرت على الهويه الالاف مكتوله والله شنو اسمه علي وذاك اسمه عمر وهذا شيعي وهذا سني ذبحوهم وخلو الامهات مفرفحه على ولدها عدا الايتام والارامل حصدو بولدنا حصد وتالي هسه جاي تعيدون الصار قبل كم سنه ذولاك ولد الناصريه والبصره والعماره وكل المحافظات ركضو على اخوتهم بلموصل ماكالو طبهم مرض ذوله سنه لا عافو اهلهم وشغلهم وحياتهم ويصيحون ذوله اخوتنا ويردون فزعتنا اتقي الله ابني انت هسه كفرت من قسمت الدين وشلت ذنب صاحبك الي تكعد وتاكل وياه لا تصير نكس تاكل وياه بنفس الماعون ومن تكوم تتفل بلماعون الاكلتو بيه

مرتضى : العفو حجي مو قصدي بس

حجي طه : كلمة ثانيه منك اكطع رزقك وقطع الاعناق ولا قطع الارزاق بس اذا تبقى بهذا عقلك والله لا اكطعه عمار اخوك وابنا وكلكم هنا حسبت ولدي وماافرق بينكم وعمار زلمه حوك رايح يساعد اهله اصلاً اني وصيت سجاد وكتله هذا امانه عندك لان هو معيل اهله ومردت يروح وياه لان اخاف عليه بس هو دك رجل اله يروح تدري ليش لان رجال من ظهر رجال وشريف اياك يامرتضى اسمع كلمة سني وشيعي اذا انت خير وابن اوادم صير مثله واقتدي بأخلاقه الذهب وشوفه اخوك مثل ماهو يشوفك اخوه وكافي هذا التخلف والجهل العاميكم

يله روح لشغلك

نهر : والله عاشت ايدك زين تسوي

حجي طه : حيل ضوجني مع الاسف عدنا هيج عقول

نهر : من وره الانترنيت وهاي البرامج الي اطب خربت عقول الشباب

حجي طه : الله يستر من هذا الجيل

اشتريت  بطانيات وملابس راح يجيبوهم فد شويه اخاف تشوفين غراض بلكراج ليضل بالج

نهر : الله يرزقك ويحمي الحشد والجيش ياعيني عليهم بهذا البرد بره ينامون

حجي طه : الله ينصرهم بحق محمد وآل محمد وترجع الموصل للعراق وتكسر عيون كل شامت ويرجعون اهلها الطيبين

نهر : امين يارب

سليل : كعدت الفجر اودع سجاد ولازمه گلبي وكل شويه اكول ربي امانتك ربي دخيلك

سجاد : هااا جبينه (جبانه) ولج شلون بيج كل مااكول صارت قويه وسباعيه ترجعين اجبن من قبل

سليل : غير اخاف عليك انت روحي سجاد تعرف شنو روحي انت الهوا الي اتنفسه بيضت عيني يله صرنا سوه

سجاد : لتخافين راجعلج وعيونج

سليل : راحو واني مفرفحه من الخوف وامشي وادعي

واليوم كله اروح واجي على ساعة اتخربط وماما كابلتني وكعدت لحد ثاني يوم كاعده بلكراج وطبكت السياره طلعت اركض ولكيت ابتسامته بوجهه اااااه عيشني ٢٤ ساعه بدمار حضنته وابجي

سجاد : هههههه هيج تحبيني

سليل :شنو تشك بحبي

سجاد : لعد من اتحارش بيج تكولين مالي حيل واهس

سليل : بله اني وين احجي وانت وين

سجاد : تعالي اشتاقيتلج واعرفج منايمه اكيد

سليل : ليش الفراش يحله بدونك وداعت زيون منمت بيه لان انت مو يمي

سجاد : اني هم منايم بس وديناهن حسبت الطريق ورجعنا وهذا عمار سبع يعرف الطرق ومتأخرنا

سليل : الف  الْحٍمَدٍ للـّہ والشكر على رجعتكم سالمين

سجاد : تحمديلي جوه تره ارجع اروح للموصل التحق واخليج تكمزين

سليل : لا لا اتحمد جوه وفوك بغرفتنا وبحضنك هم

سجاد : اي هيج من الاول ياعيني تعالي احجيلج شلون قصفنا الدواعش

سليل : عزه ياقصف

سجاد : تعالي جوه واني افهمج ياقصف زيون نايم

سليل : يم ماما قبل شويه اخذته وراحت شوي وتجي

دكي عليها وكلي الها التحقنا بلقطعات الاماميه لصد هجمات داعش الارهابيه اني وسجاد وياريت يوم كامل لا نريد نشوفها ولا تجي اصلاً وتخلي زيون يمها لان الحرب شرسه واحتمال يسقطون قتلى

سليل : ههههههههه ااااخ منك شكد احبك ابو القتلى

غزل : مرت الايام واشوف شلون يتغير الجلد وشلون التداوي والالتزام بالارشادات مهم جنت فرحانه حيل بلنتيجه ونوران تشجعني وكل متمر الايام اخذ صور ردت افرحهم مثل مااني فرحانه وبيوم متحملت وخاصه من شفت رگبتي نسبه ٧٠٪؜ طاب بعد مرور اكثر من ٥٠ يوم على العمليه والجلسات وفيصل ولا اهتم مجنت اشوفه وهو هم ميسأل تعلمت على هذا الحال البرود والهدوء وقله الكلام بينا ومخلصها بره جنت اقشمر نفسي واكول هسه من اطيب اكيد يتقبلني من شفت هيج صرت وبدت ركبتي تطلع معالمها كمت دزيت صورتي وطالعه  ركبتي كامله قبل العمليه وراها ٣ صور مراح العلاج وطايره كلت هسه يبجي بابا من الفرح وماكو مشافها اهووو اكيد ماسحين الجهال اخابر على ريم تخلي رقم سري بجهازه حتى من يلعبون مينحذف كله مااكول اله لتنطي الجهاز يكول جهال وخطيه

اتصلت على بابا وطلع توقعي صح اتصلت على عمو محسن ومحجيت على مراحل العمليه رغم خطيه ينتظر بس ردتها مفاجئه لبابا وخاصه قبل العمليه اتفقت ويه عمو محسن ميبلغ احد ابد لحد مااطيب وبنفسي ابلغهم تالي خابرت عمو محسن  وكال راح اخلي العامل يحمل الفايبر

صار خطين دكيت مباشره محد يجاوب شنو السالفه ادك وماكو الصور شافها ليش متصل حدود الربع ساعه واتصل بابا فرحان ويبجي حبيبي من الفرحه ممصدك كتله ليش من شفتها مدكيت

حجي طه : هسه شفتها بابا

غزل : صفنت شلون هسه واني عندي من ١٨ دقيقه شافها يجوز منفتحت الصور عنده الله اعلم غلست ومركزت لان فرحه بابا جانت مو طبيعيه

خابرت البنات وخطيه يبجون من الفرحه بس الي منعهم من الهلاهل علمود رشا مبقى ايام وتطلع سنويه رجلها وبتها الله يعينها بس المدوخني ياربي رشا ليش لهسه باقيه لحد ما شفتهم مكيفين ويبجون من الفرح وممصدكين كلت رشا وين شعلان

رشا : والله طلقه مو سؤال بصدري شحجي الج شحجي سكتت

غزل : اريد افهم شصاير مااريد اخرب فرحتكم بيه بس هم لازم افهم شكوو

نهر : يمه هسه انتي فرحانه ويوم مانفرح الفرحه الجبيره وركبتج كلها اطيب وتروح ليش تضوجين نفسج

غزل : مااشي بقينا نسولف ومكيفين ومفتوحه الحاكيه سديته منهم شويه ودكيت على رشا

رشا : هااا غزوله

غزل : احجيلي شكووً

رشا : شحجي

غزل : مات مووو

رشا : ياريت ياغزل والله اهون عليه اقلها ادفنه واسويله ثواب واحزن العمر كله عليه وابجيله دم مو ابجي من وراه دم

غزل : طلكج

رشا : اني طلبت الطلاك 

غزل : ليش هذا شعلان الي روحج بيه تطلكين منه

رشا : عندج وكت احجيلج

غزل : اكثر وحده هسه بلدنيا عدها وكت هو اني احجي

وبدت تسولفلي وصدمتي من عرفت بجنات كمت بلا وعي اضرب على خدودي ورشا مره تحجي ومره تبجي وساعتين ونص نسولف طفت فرحتي وطفت الدنيا كلها بعيني يمكن حالي مو احسن من حال خواتي هم رجلي مابي حظ وميباوع بوجهي بس على الاقل اني باقيه لسبب وهم ماعندي ذيج المشاعر اله ولا اكو طفل يربطني بيه ولو منين يجي الطفل من الهوا اذا من يوم ماوصلت متقرب مني

بقيت اتواصل ويه رشا واحاول اواسيها رغم اعرف بيها هي اقوى مني بس مرات حتى القوي يصير مثل الريشه يطير بنفخه من ينجرح

لكيت نفسي احن لخواتي ومحتاجه الهن ردت احجي حالي وضعي بس شكول وحدتهن منهاره اكثر مني كل وحده مكسوره شكل وبابا حبيبي يشوف حالهن كدامه خفت وبدت تهبط معنوياتي واني افكر اذا بيوم انفصل من فيصل شلون هم اطلك مثل رشا واكابله واكعد مكافي وحده مطلكة وحده ارمله اجي اني ازيدها من عرفت شغله رشا قررت احاول اتقرب من فيصل وانتبهه اكثر على بيتي مااريد ازيد كسرت بابا وأذيته همه بيا حال وهسه اجيب جرح جديد الهم هذا هو قررت ابقى واحاول اصلح الي ميتصلح

ريم : واكفه على كبرهم اليوم السنويه اليوم مرت سنه كامله على استشهاد زوجي وبنتي اباوع بصفي رشا وعمه والجهه الثانيه سليل وسجاد وبابا الكل مقهور ويقرون قران اله اني صافنه عليهم اكول شيصير هسه لو اني يمهم شيصير لو همه يمي لزمت ترابهم واشمه اريد ريحتهم اريد ضحكت رفل وهدوء سامر كعدت بنصهم وانعي عليهم وعلى الموته الي ماتوها ساعه انام على كبر بنتي وساعه على كبر رجلي غمضت والله احس شفتهم والله احس واكفين يشوفوني ردت هوا يهل ويوصل للرئه مالتي هوا يحمل ريحتهم

رشا : ريم تبجي وتصرخ وتريد تسكت خلصت الوكت تلزم راس كل گبر وتحجي بهدوء حييل تأذت بلسنويه جنت خايفه عليها لترجع بس  الْحٍمَدٍ للـّہ كدر بابا يسحبها من ايدها وياخذها كبل للامام لان صفناتها كثرت ورجعت تسكت ورجعت تحبس روحها بلغرفه لهذا جان اسلم حل بابا كال نبات بالامام حتى تبقى تقرا قران وادعيه الزياره وتصلي وابتها هناك عسى ترجع احسن والحمدلله رجعت

يمكن ريم جانت مقرره من اصحى ترجع لهدوئها بس شلون اصحى ويوميه هزه

رجعنا لحياتنا وريم مخلصتها يااما ويه ابنها او تشتغل بلبيت واكثر الاوقات ساكته وغزل نصحتها تسوي فيس تلتهي بيه وسوينا اني وياها بس هي مو بعينها دوم تكعد بلساعات صافنه ومن نسألها شبيج تكول هيج ضوجة ماكو شى حتى مرات نتوسل بيها نروح للسوك متقبل حتى الشى الي تحبه كامت متهتم بيه وسليل تحاول دوم اطلعها ولو شوي من حالتها مرات تبتسم وتذب كلام يضحكنا بس هي ضحكتها كذب وبس نعوفها ترجع تسكت لحد متعلمنا على هذا الحااال

ريم : انباع بيت عيالي والي جان قاهرني مكدرت اشوف غرفتي ولا غراض بنتي ولا رجلي طلعت سليل وعمه منطين كلشي وموزعيهن تمنيت اجيبها الغرفه لهنا بيها ذكرياتي كافي بيها ريحتهم بس لكيتهم بايعيها متت قهر وزعلت تالي سكتت حجايه متفقين الكل عليها لمصلحتج استلمت حصتي من ورث سامر وحصة تيم حطوها اموال القاصرين لان مبالغ كمت وحطيت الفلوس فوك فلوس العندي والذهب وضميتهم عند بابا وحايره شسوي اريد اشتغل اتعين اي شى حتى اطلع من الي بيه

صافنه وحايره بزماني نزلت رشا صافنه هاااا صفن المطي شبيج

حبلت

ريم : منو

رشا : كاعده بصف فرح تلعب بالالوان وترسم جان شهر الخامس  ٢٠١٥ الجو ربيع وحلوو ودك تلفوني شلته رقم غريب سمعت الالو مالتها لو يمي والله مااهدها اله للمشرحه

هند : شلونج عيني ام فروحه

رشا : شرايده

هند : ردت اسلم عليج مهما صار تبقين عزيزه واكو عشره بينا والعشره متهون اله على ابن الحرام

رشا : والله من هاي الناحيه هانت عليكم لان تعرفون انتم شنو

هند : رحمه الله والديج هاي المرجيه منج ردت بس اسلم واطمن على بت اخويه

رشا : مالج بت اخو هنا يله ولي ردت اسده جان تكول هااي شبيج صدك تحجين

رشا : شتردين هند ولو صوجي ماغيرت السيم كارت همزين خابرتي حتى اغير

هند : اجيت والله اسلم وابلغ فروحه راح يصير عدها اخ

رشا : يااخ

هند : يااااااا شبيج خيه نسيتي ابوها متزوج ومرته حبله وطلع ولد اليوم رحنا للسونار وبين ردت افرح اخته واكول اجاج اخوج شيال همج

رشا : بين الصدمه وبين الرجفه وعيت حسيت اكو احد بصفها ومتونسات على اذيتي كتلها واني شعليه

هند : اني ماابلغج اكلها ابلغ اخته

رشا : تعرفين كلش زين جايه تحركين اعصابي تدرين هسه اذا اشيل تلفون واحد لشعلان اخلي يطلك الكح.. اليمج ويطردها والله تلفون واحد بس اني بعد مااباوع جوه رجليه وسبحان الله صرتو عائله منحطه كامله من كل الجوانب واحد لايك للثاني اخت هجامه بيوت وغياره وحقوده وام سحاره وزوجة اخ عاهره وادور زلم واخ طلي بيد النسوان وبوخه بس حجي ماشاء الله شلون عائله تدرسون بلكتب والمناهج ويصير كتاب خاص بيكم ويتسمى تعلم كيفيه السقوط والانحطاط خلال ٢٤ ساعه

هند: انجبي لج هاي من غيرتج لان متخلفين لو يسمعك شعلان اله يركع راسج بلحايط

رشا : مو ابوج ميت لتخليني اسبه واكيد اسبج او الافضل ماانزل مستوايه للمستنقع القذر العايشين بيه ويله ولي واذا خابرتي مره ثانيه متعرفين شسوي بيج اسألي مرت الطلي شسوينا بيها اخاف كدرت تكوم على حيلها انتي وداعت بنتي لو اعرف يكتلوني خلاص متخلصين من ايدي وشرط اجيج بيتج اهطرج ( اضربج) واخليج فرجة للكوت كلها حتى عشيرتكم اخليها علج بحلك الكل جوزي مني تره مشايفه خبالاتي بعدج

وهاااا كولي لجنات لو تخلف ١٠ ولد اله يبقى يحبني ويتمنى الكلمة مني وكليلها الج يوم تشربين من نفس الكاس الي شربتي الي اعرفها بصفج وتسمع كلامي تره اليغدر مره يغدر عشره جنووو لتنسين كلامي وسديت التلفون وطفيته

نزلت لريم وكتلها حبلت

ريم : منو

رشا : جنات

ريم : والله حظ العواهر جواهر ناس تبقى سنين متحبل وهاي من اول طخه مو مصار مده من سقطت شبسرعه

رشا : يجوز على الاربعين

ريم :منو كلج

رشا : كعدت سولفت الها الصار

ريم : زين كدرتي تحاوبين سباعيه وذني ملعبات شبسرعه حبلت شبسرعه بين

رشا : شسوي هسه

ريم : ندز موطا وناكل

رشا : هااا

ريم : بردي گلبج

رشا : مكعد اشاقه

ريم : ولا اني رشاوي ميفيد بعد التعب والقهر والاذيه لان ميرجع الراح شفتي لا اهانه يفيد بيهم لا كتل لا ضرب حرنا شسوينا بقى بس عداله رب العالمين هي الاقوى انتي رجعتي لدوامج والحمدلله اشوفج تضحكين ومرتاحه بس مينفتح هذا الموضوع ينگلب وجهج بدلي السيم كارت حتى محد يتصل واحنا هم بلبيت منفتح هذا الموضوع صحتج عدنا تسواهم كلهم واذا جابت ولد واذا صار عنده ولد لتتوقعين راح يحبها انسيهم رشا وفوضي امرج لله وارجعي رشاوي القويه محد يستاهل يوميه راجفه وبنتج خطيه تهبط وياج

دك تلفوني بابا

حجي طه : بنتي راح يجي شعلان يشوف فرح لطلعين اني شويه واجي اخاف يجي گبلي لان هو اقرب

رشا : مااشي

سديته وكلت لريم

الله جابه

ريم : شراح تسوين

رشا : شسوي اصبري رحت عدلت نفسي ومكيجت ولبست دشداشه جديده وشال على راسي ولبست ذهب واندكت الباب وفتحت ريم اله

ريم : لا هله طب

شعلان : شنو هذا الاسلوب عيب ريم

ريم : باوعت وهزيت ايدي وطبيت باع منو يحجي على العيب

اجت عمه نهر دخلته وهم سلمت من وره خشمها واجت رشا وبيدها فرح وطبت

طبيت للصاله وهو حضن فرح ويبوس بيها وعيونه عليه

شعلان : شلونج رشا

رشا : بخير والحمدلله انت شلونك تفاجأ من سلامي الهادئ

شعلان :   بًخير اذا انتم بخير

رشا : هاااا فروحه يمك اخذ راحتك صدك بلخير على حمل جنات

شعلان : فتح عينه مستغرب شمدريج

رشا : ليش متدري ولو حقك هي الي مثلها كلشي تسوي وانت نايم ورجلك بلشمس مرتك وهند خابروني وبشروني واني باركت الهم

شعلان : والله شكول الج شلون اعتذر اكيد غثنج ويحجي بقلق بس ارجع اني اعرف شسوي بيهن

رشا : لا بلعكس هاي حياتك وانت حر بيها

شعلان: تمنيتج متعاندين وترجعين جان موصلنا لهنا

رشا : لتفتح دفاتر قديمه انت هسه عندك مره وجايك ولد بلطريق واسست حياتك لتفكر بيه اني هم يجي يوم واسس حياتي

شعلان : شتأسسين تخبلتي

رشا : نعم ليش تتوقع ابقى على حضرت جنابك وانوح العمر كله عليك لا عيني ابو صدك ابنك شراح تسمي المهم حالياً ابو فروحه عيني ابو فروحه مالك دخل بيه يجوز الله قاسملي الولد بس مو منك واعيش ويه رجال مو خرخاشه بيد النسوان كام ونزل فرح من حضنه وراد يهجم عليه جان يسمع صوت بابا وطلعت اركض حسيت كافي حركت گلبه يطبه طوب هنا شعلان انتهى مثل ماانطيته حياتي وفيت اله وغدرني شلعته من داخلي وبقى بس بيها الغدر والخذلان اسمه من ينذكر بس اتذكر دكته واذيته عفته وطلعت ومنتظره اليوم الي اتشمت بيه وافرح بكسرتهم مثل ما كسروني

يتبع ...

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الثامن_والثلاثون

‏مدري شمالهم كلمن يحب نفسة!

‏وكلما احچي روحي تصيح مو هسة..!

‏وصل حدة التعب ،تنكتني دمعي يطيح

‏عگب ما چان گلبي ولاية الونسة ،

‏سلبوّ راحتي ونشدوني هاا مرتاح؟

‏شگد ميت ضميرة اليجرح وينسة

(هدية من متابعه )

رشا : طلعت من شعلان واباوع على ريم تأشر يعني عفيه مبين سمعت الكلام وصلت ليمي جان تكول

ريم : ولج صدك تتزوجين

رشا : هو اليتزوج شعلان ويصير بيه الصار بيه تشوف رجال بعد اله تخبلت

ريم : شكوو بيها بعدج صغيره

رشا : بله مطيرين هو حب وهيام وناس معلكة روحنا بناس وخاني الي اتزوجه الكه مسوي البيت ملهى

ريم : هذا مو قياس

رشا : خصم الموضوع اكتفيت ريمو خليني عايشه لبنتي ولشغلي والكم

ريم : هو وينه

رشا : عفته يغلي خلي اله يوم واتشمت بيه يجي وداعتج عندي امل بالله جبير

ريم : الله يبرد گلبج اروح اشوف تيومي

رشا : روحي

خاني وأذاني وطعني بس يبقى داخلي الم من كلشي عشته وياه مو هينه احبه سنين وتالي اعرفه ينام يم غيري ويسوي وياها الي يسوي ويايه ويدلعها ويشمها ويدللها مثلي مااعرف شنو بينهم وشلون طبيعة علاقتهم بس تجمعني بيه ذكريات تطحن بروحي طحن اغنيه سمعناها سوه مسلسل شفناه ضحكه انرسمت على شفافنا حضن وحنيه بيوم القهر والعازه كله يمشي بيه مثل الارضه تاكل بعظامي حبيتك اكثر من روحي وهسه روحي ماتت ياشعلان هاي جزات الزين الي الله اوووووف الي الله

يوم بعد يوم ونركض على حياتنا ومن بعدها كام يجي شعلان واتقصد مااطلع مااريد حتى اشم ريحته حتى احترك بذكرياتي ويااه واذا اختنك واحن واريد ابجي اركض يم سليل وريم اكعد يمهن ومااضل وحدي حتى ماافكر بيه وهسه حاير امتحانات بكلوريا ومراقبه وبين الدوام والبيت اما ريم غير الهدوء وشغل وتيم ماعدها وحسين الي كل ميجي تتهزم منه

نهر : شبيك طه صافن صار يومين مو على بعضك

حجي طه : صافن على حالي

نهر : شبية حالك اسم الله مريض نوديك للطبيب

حجي طه : لا مو مريض بس جنت متوقع زوجت البنات وامنت عليهم واذا صار عليه شى هنه بخير

نهر : ياستار بله هذا حجي عمرك طول فدوه اروحلك لتخنكني وتقلق بالي

حجي طه : هسه اني همي كعدتنا

نهر : شبيهه

حجي طه : بعدنا ايجار صحيح ابو البيت لهسه ما داعه بيته والرجال خلف الله عليه ممزيد الايجار رغم الايجارات نار بس لشوكت اخاف يجي يوم ويكول اريد ابيعه جنت اكول حتى لو نطلع اخذ نهر واكعد بمشتمل صغير لو ٥٠ متر اني وياها كافي علينا وزايد بس هسه البنات رجعن وعدهن جهال يعني صار بركبتي ٣ نسوان واثنين جهال وين اسوحل بيهم والايجارات نار اقل مشتمل هسه ب٥٠٠ الف ايجار والشهر يطب منا ويطلع منا

نهر : اي والله صحيح بس ليش من هسه تفكر مو كاعدين والحمدلله ماكو شى

حجي طه : لازم افكر هي تصير فجأه مااريد ادوخ وابهذلكم

نهر : وشراح تسوي

حجي طه : اني جامع جم فلس اشتري كاع وابنيها وعلى كيفي هلقاسم الله يطلع اذبه على الكاع وابني عسى مايضل سنين المهم من يصير شى اكو سكف يحوينا

نهر : وين يعني تشتري

حجي طه : ادور بلكت الله الكي

نهر : اكلك بيت ذوله اهل المخضر والله نسيت اسمهم

حجي طه : بيت ابو صبري

نهر : عفيه بيت ابو صبري ديبيعوه ليش متشوفه

حجي طه : بس البيت حيل قديم منتهي نصه واكع

نهر : انت مو تريد كاع اعتبره كاع وهو سمعت بيه بيت ورثه ويردون يبيعوه يعني اكيد ارخص من البيت المابي مشاكل

حجي طه : بيه حيل ادخل بقال وقلت

نهر : يمعود كلها تريد تبيعه دشوفه ياعيني وهمه يحبوك ويقدروك بلكت يراعوك بلسعر

حجي طه : والله ياريت اني المنطقه احبها ومااريد اطلع منها

نهر : شوف البيت باجر واذا قسمتك ميصير لغيرك

حجي طه : ان شاء الله جاي رحمه لابويه وياج دوايه مشارب اليوم

نهر : ليش تنسى الدوه جم مره كتلك لو متزوج جان مرتك تجيبه الك

حجي طه : قصدج تجيبلي الجلطه بله متسكتين

نهر : ههههه سكتت

كمت سويت جاي والجهال اسمع صوتهم يكمزون فوك صحت على رشا

يمه رشاوي سكتيهم ابوج تعبان

رشا : اي عمه هسه

ريم : كاعده اتصفح بلفيس وطبت رشا

رشا : شسوين

ريم : ملل اكلب بلفيس

رشا : ليش مدورين تعيين

ريم : والله عمي علي نائب رئيس الوزراء راح يعيني مستشاره اله بس كتله مو هسه مالي مزاج

رشا : تصنفين حضرتج

ريم : هو كلامج يجبر الواحد يصنف على اساس التعينات مطشره واني مقابله ناس مخلصه ماجستير كاعده بلبيوت بقت عليه

رشا : اي والله صحيح اني هسه لو بله تعين وهذا حالي جان لكيتيني بلشماعيه

ريم : كلشي مابيج راح تكعدين كبالي وتموعين اذاني كال مشعول وكالت السعلوه وعلى هاي الرنه

رشا : اسمعي بس مو تستهزإين

ريم : حسب كولي

رشا : شوفي تعين بمدارس اهليه مدرسه حاسوب

ريم : بس رواتبهم قليله

رشا : اني مو على الراتب اذا تردين اني انطيج من راتبي بس علمود اطلعين من البيت ومتبقين هيج متكأبه

ريم :  الْحٍمَدٍ للـّہ عندي فلوس وممحتاجه

رشا : هذا الي اقصده مو شغله فلوس شغله اطلعين وتكسرين الروتين

ريم : وتيم وفروحه

رشا : نعوفهم يمه عمه شو هي روحها بيهم مرات احنا بلبيت وهي معتنيه بيهم

رشا : والله يارشاوي مرات تطلع منج شغلات بيها حظ

رشا : ايا حقيره ليش ولج اصلاً كل شغلاتي تخبل وبيها حظ

ريم : اشوف الله كريم

رشا : اكلج ريمو ليش منروح للمول

ريم : شنهي خيه

رشا : هااي شبيج فتحتي عيونج عليه مو اسمع المدرسات يحجن عن مول المنصور واشكال ملابس بيه وغراض ليش منروح

ريم : هو احنا وجهه مولات كافي علينا السوك مال منطقتنا واذا عجبنا نصرف نروح لبغداد الجديده لو للكاظميه ذني يسون ابو المول

رشا : يمعوده تغيير خلصنا عمرنا بذني السواكه

ريم : هلوو تغير والله وكت وين مشعول عنج جان خوش سوالج نيولك جديد للتغير

رشا : لتجيبين طاريه

ريم : اي والله اني هم معدتي تگلب من اتذكره كومي سوينا عشا جعت

رشا : العشى اليوم عليج

ريم : لتصيرين ناقصه مواعين الغدا جانن عليه

رشا : واني الغدا نفسه جان عليه

جان ادك غزل

غزل : هلوو

ريم : وينج مكانج فارغ

غزل : فدوة لخواتي الي يذكروني

ريم : جان سويتي عشا النا

رشا : اي والمواعين جنا ولا نحس بيها كلها براسج

غزل : هو هذا هم حظي بس بلكراب تتذكروني

رشا : ههههههه هلووو غزوله شلونج ولو سؤال سخيف اكو واحد بلسويد ويسألو شلونك

غزل : واذا بلسويد والله تراب منطقتنا عندي احلى من السويد كلها

ريم : مو وجهه فگر هي البشه (بط) تطلع من الخيس تموت

غزل : اي احب الخيس كافي وياكم

ريم : يعني احنا كاعدين بالخيس

غزل : ههههه غير انتي تكولين اني شعليه

رشا :عوفج من ريم كوليلي شلونه العلاج مالتج

غزل : الْحٍمَدٍ للـّہ بس اكو شى ضوجني

رشا : شنو

غزل : بقى خط حدود الاصبع مراح وكال الطبيب ميروح ومنكدر نضغط هوايه على هاي المنطقه نخاف من تأثير الليزر

ريم : حيل مبينه

غزل : لا مو حيل

رشا : يمعوده كولي  الْحٍمَدٍ للـّہ وين جنتي وين صرتي سهله على هذا الخط لو هنا بلعراق ارسملج عليه جبال وانهر وديان واشرح للطالبات عليه

غزل : ههههه والله ضايجه ليش مدايرين بال انتم

ريم : لان الي يشوف الموت يرضى بلصخونه روحي طلعي صورج القديمه وراح تشوفين هذا البقى لا شئ هو والماكو سوه لتضلين تاكلين بروحج وكولي  الْحٍمَدٍ للـّہ

غزل :  الْحٍمَدٍ للـّہ هم صحيح

ريم : غزوله شبيج

غزل : شبيه مابيه

ريم : احسج تعبانه حزينه طافيه وضعج معاجبني

غزل : مابيه ريمو ليضل بالج

ريم : احنا موجودات اذا ردتي تسولفين واذا ردتي وحدي تبجي وياج سليل موجوده

غزل : هههههه فدووة لماما هو اكو اطيب من گلبها غير متتحمل وتبجي

ريم : هسه اني شكلت ولج مو صوجج صوج الي ينطيج نصيحه

غزل : شكراً على النصيحه مااريد

رشا : ديري بالج على نفسج

غزل : ان شاء الله يله باي بنات

تمنيت اسولف الهن بس اعرف مباشره راح يكولون عوفي وتعالي اني باقيه مو محبه بيه بس ارجع شكول اطلكت منه لان مينام ويايه لو لان يحب غيري لو لان من يوم مااجيت محاسبني مره اله كمت لبست واخذت المفتاح والتلفون ونزلت اتمشى وحدي خلال هاي المده كمت اندل الطرق القريبه لان نطلع للطبيب هوايه وجنت اطلب منهم نروح نص الطريق مشي ومرات نركب مناك حتى اندل وبديت اندل وهم حاطه ملاحظة بلموبايل وكاتبه العنوان اخاف اتيهه وكم كلمة تعلمتها اسأل بيها رغم انطقها مكسر

امشي واشتري من السوبر ماركت اباوع ليش اتسوك اذا هو اغلب وكته بره ومو يمي تعبت من اهماله ومن يعاملني مثل الكرسي بلبيت تعبت من بروده ومن معاملته الجافه الي لا كلمة حلوة لا ضحكه لا سؤال حتى من يشوف مرات نوران تفحص العمليه مجان يكلف نفسه يسأل ويكول شلون صارت او محتاجه شى صافنه وامشي واكول الى متى ابقى هيج لشوكت ياربي لشوكت بعد شهرين واكمل السنه عنده وهو ولا مره حسسني اني مرته

رجعت للشقه صار كم يوم مشايفه نوران صار حسن بوجهي

حسن : شلونج غزل

غزل : ماشية انت شلونك

حسن :  الْحٍمَدٍ للـّہ لوين وصلتي بلعلاج

غزل : مبقى شى وينتهي  الْحٍمَدٍ للـّہ النتيجه مرضية

حسن : المهم سلامتج الباقي شغلات شكليه مو مهمه

غزل : يجوز عندك مو مهمه بس عند غيرك اهم شى من رخصتك

حسن : اطلعين نفتر نتعشى بره

غزل : لا شكراً اتعشى بلبيت

حسن : شنو متعزميني على العشا

غزل : انحرجت منه تالي كتله خابر فيصل اذا يجي على العشا تعال هله بيك

حسن : ميحتاج اخذي راحتج

غزل : عفته ودخلت مااكدر ادخله واني وحدي اعرف حسن محترم وخوش انسان وصديق فيصل بس هم عيب اعتبره

ثاني يوم اجت نوران وسحبتني من ايدي

شكوو يمعوده

نوران : علاجج وكمل ليش مترتبين روحج

غزل : شبيه قابل

نوران : قصدي نروح نسوي شوبنك واشتري سيتات نوم

غزل : اوكفي ياسيتات

نوران : تره انتي متزوجه مو بنيه

غزل : وهو وينه الزوج الي تكولين عليه

نوران : فاجأي البسي وكشخي وشوفي شلون صرتي وانتي ماشاء الله عليج جسمج يخبل ومغري وقبل جنتي تستحين تلبسين كصير هسه رجلج طابت ورگبتج شبهه انتهت بس هذا الخط صدك ليش منسوي عليه تاتو يسون فيكه عليه يطلع يخبل ومثير

غزل : التاتو حرام

نوران : اهوو العلامه الدينيه غزل هو منو يشوفه غير رجلج

غزل : اعرف بس هو يشوفه بس هم حرام ومااسوي الحرام لو مو فيصل

نوران : ومنو كال حرام امر مشكوك بيه او مكروه مو حرام

غزل : مكروه مشكوك حرام الامر عندي واحد

نوران : هذا هو براحتج بس امشي اكصلج شعرج نرتبه الج صدك لوين شعرج فتحي مشايفته

غزل : فتحت القراصه

نوران : لج هاي شنو يجنن لا عوفي حرامات مو مال كص

غزل : تدرين جان اثخن بس هاي الفتره كومه يوكع من امشط من اسبح وحتى من اكعد من النوم الكاه على المخده

نوران : كل هذا واثخن

غزل : اي والله اثخن ماما نهر جانت سولتهت بيه تسوي اشكال اله هسه منو يسوي اوف شكد مشتاقه الها

نوران : هسه امشي وعوفي الاشواق

غزل : شنو غايتج من هذا كله

نوران : لازم فيصل ينتبهه عليج ويشوف الكنز الي بيده حايرلي بذيج الصفره شكد اكرهه

غزل : يعني تردين انزل نفسي اله واتوسل بيه وين كرامتي لعد

نوران : انتو مو تكولون بين الرجل والمره المتزوجين ماكو كرامه شو الكلام اختلف هسه

غزل : ماكو كرامه اذا هو متنازل دوم ويايه ومقدرني ويحبني واحبه من تصير هفوات عادي اروح اعتذرله حتى لو هو الغلطان وبلمقابل هو هم يسوي هيج شى بس بحالتي اني ورجلي نختلف اختلاف گلي

نوران :انسي الفات وابدي من جديد وياه تره فيصل طيب والله بس انتي شايفه الجانب الثاني من شخصيته

غزل : مااعتقد عنده جانت ثاني هو هذا وجهه من يوم ماشفته

نوران : يبقى زوجج ولتتنازلين عنه انتي احق بيه من اي وحده وهم لازم تتغير حياتكم لتبقون على هذا الوضع وامشي ولتكثرين بلكلام بلكت على ايدج يصير المستحيل

غزل : بدت تقنعني وكمت وياها ورحت اشتريت شغلات حلوة ورجعت للبيت سبحت ولبست سيت قصير اباوع على شكلي بلمرايه ورجلي ردت ابجي من الفرحه هسه اكدر البس بدون ما استحي واخجل فتحت شعري وخطيت مكياج خفيف اباوع شلون اطلع هيج كدامه استحي وارجع اتذكر كلام نوران من تكول اذا تبقين تستحين راح تخسرين فيصل للابد لازم احاول اقربه اليه

كلت بداخلي اجتاز حاجز المستحه انتظرت بلغرفه ومن اجه ردت اطلع بس ترددت وبعدين كلت اشش كافي كومي سوي حل روحج لبست الروب فوكاه بس هو هم بقصر الدشداشه الداخليه طالعه رجلي كلها فتحت الباب وكتله تتعشى من شافني استغرب شكلي وبقى يباوع عليه

سمعتني شكلت تتعشى

فيصل : هاي شمسويه بروحج

غزل : مفهمت

فيصل : ماكو شى اي متعشي ونعسان وعافني ودخل نام فشلت حيل هسه شعباله اوووف ياربي والله ردت بس اجذب نظره اقلها يحس طبت وضعي زين

ثاني يوم اجت نوران طايره وحجيت الها

نوران : ميخالف معناها انتبهه ابقي يوميه البسي شكل

غزل : تره هيج كرامتي صارت وصلت مسح

نوران : عادي رجلج مو غريب ومن يصير الج ويحبج عود سوي كرامته وصلت مسح

غزل : ماادري احس داغلط بتصرفاتي

نوران : اول الغيث قطره بعد حاولي غزوله

غزل : احااول وهم كلت انطي فرصه لنفسي و٤ ايام البس اشكال واروح واجي كدامه احاول افتح كلام وياه يجاوب على كد السؤال اكعد يمه اذا هو كاعد بلصاله ميرفع عينه من الموبايل وبس يكتب اتمدد بصفه ومرات اسوي نفسي طاخته بلغلط وهو ولا يهتز اخر يوم دخل وجنت ضايجه ومتحمله عليه وهم مبدله ولابسه احلى شى اشتريته

سلم وفات للغرفه وعافني دخلت وراه

انت ليش هيج تتعامل ويايه

فيصل : شلون يعني شمسوي الج

غزل : بلضبط ممسوي ليش بالك مو يمي شنو الي مانعك عني ليش مطايقني

فيصل : شتردين هسه

غزل : شريد نسيت اني زوجتك

فيصل : واذا زوجتي كاعده معززه مكرمه وتاكلين وتشربين وحالج احسن حال وبلسويد وسويتي عمليه وشكلج تحسن شتردين بعد مني

غزل : شريد اريد رجال اريد زوجي انت شنو هسه بحياتي

فيصل : اطلعي بره اريد ارتاح

غزل : مااطلع اله افتهم كاااافي حس يابني ادم ولو مره حس راح يصير سنه عندك وانت فاقد الاحساس حاولت بكل الطرق اتقرب منك ومافاد اذا مطايقني المن جبتني لهنا والمن مخليني

فيصل : اهووو بدت الاسطوانه واني اعرف شلون اسكتج وجان يجرني حييل وذبني على الفراش

غزل : وخر فيصل

فيصل : مااوخر

دفعته ولزم ايدي وبدى يتفنن حتى يثيرني بلبدايه قاومت بس هو مبين خبره بهاي الامور واني هم انسانه والي مشاعري هدأت وبديت استجيب ويااه لحد ماتقرب مني حسيتة واجب وسواه حتى مو برومانسيه ولهفه وكااام وجان يكولي انتي مو صار كم يوم تلبسين وتحيرين شسوين بروحج علمود انام وياج يله الردتي صار بعد مااسمع حسج

غزل : حسسني اني رخيصه حيل واركض وره شهوتي وجنت احاول اغري حتى يتقرب مني مو حتى احتوي كزوج واكون وياه عائله مثل البشر والناس كمت انزل بملابسي والدمعه حاصرتني

فيصل : اذا تردين كل فتره تعالي ولتضلين تفترين على راسي

غزل : باوعت عليه وحجيت بهدوء تحلم بعد تلمس شعره مني

فيصل : لعد وهاي الهوسه المسويتها ومد ايده عاى ملابسي ورفعها نزلتهم وكتله عبالي مثل الرياجيل اجيت على رجلي ادور حنانه واهتمامه كلت قبل احتمال تلعب نفسك مني بسبب الحرك وهااك الحرك الراح بس مبين جنت ماافهم  وحسبتها غلط انت متريدني كوه هيه

فيصل : بس فهميني انتي من ياطينه مكعدج بيت وممقصر عليج بشى ومعيشج بلسويد

غزل : لتعيد نفس الحجي حفظته اني كدام الله سويت المفروض اي وحده عاقله تسوي تحتوي رجلها وتحاول تكسبه ومتهدم بيتها وتحملت هاي الفتره كلها بطيب خاطر وهدوء وتعاملت وياك كأي زوجه صالحه حتى اذا اتحرك ابلغك رغم اعرف متهتم ولا بالك حتى لو اموت وماطلبت شى منك اجوع اشبع انت متدري انام اكعد ولا يمك اتمرض اسوي عمليه ولا تفكر تكول شلونج وشلون صرتي لا ضحكة لا سالفه وارجع واكول اصبري يمكن بيوم يعرف قيمتج وانت يوم بعد يوم تقلل منها لحد ما هسه دستها وساويتني حالي حال الي تنام وياهن ساعه وتكوم ولا كأني زوجتك على سنه الله ورسوله

فيصل :شتردين مني لخاطر الكائنات نوم ونمت وياج شتردديييين

غزل : صوتك لتعلي رجاءً اذا انت كل بالك ذيج الشغله واني الوب عليها فغلطان عيني وجان عندي استعداد ابقى سنين وياك ومتتقرب عادي

فيصل : لعد شبيج هسه تمصرنين (تخربط بلكلام) ومدوختني وصار ٥ ايام حرتي شسويتي

غزل : اعتقد كتلك ردت اعيش وياك مثل الاوادم بيت ورجال وعائله واطفال بس انت متريد تريد تبقى عايش دور الاعزب بس كدام اهله متزوج حتى يسكتهم

فيصل : واخيراً فهمتي

غزل : لا اني فاهمتك من زمان بس قشمرت على نفسي وعبالي تتغير وهواي اعتبارات جانت عندي وحسابات واولها حبي لعمي واحترام علاقة بابا وعمو وضحيت بشى المفروض مااضحي بيه

فيصل : بله خاتون بشنو مضحيه

غزل : بنفسي علمود هذا لايزعل وذاك ليضوج ضحيت بنفسي واني الخسرانه

فيصل : اي مو شمروج بخيمه واعتبرتها تضحيه جايب بمكان بعد ١٠٠ سنه محد يجيبج بيه وناس تحلم تجي تعيش هنا

غزل : ههه بس مو حلمي اني ما اريد اتناقش بعد وياك اي نقاش يوصل لطريق مسدود

فيصل : اسمعي يابنت الناس اني هذا حالي اطب واطلع واسهر واعيش لنفسي الي عندي اوفره الج لطلبين اكثر ولتتوقعين شى مني اكبر احصري احلامج ىتوقعاتج بقفص وحبسيهن وعوفيني ولتخنكيني لا كل شويه مدوختني بمثاليات متوكل وتشرب وتوجعين راسي بنقاشات عقيمه شفتي عيشتي وهاي راح تبقى ورضيتي بيها من الاول وبقيتي كم سنه بيت اهلي ومتنعمه بخيرهم وهسه اجيتي هنا وهم متنعمه بخيري وسويتي عملية تحلمين تسويها وصار براسج خير وثقه يعني اني صاحب فضل عليج جان ضليتي العمر كله مشوهه يعني لتمثلين دور المظلومه واني الوحش الي مدمر حياتج هااج اطبين واطلعين كتلج وين وليتي منطيج كل الحريه الي الالاف البنات بلعراق يتمننها ومطلبت منج بس لتدخلين بحياتي ولا ادكين اليتيمه وتتقربين مني من اريدج واشتهيج عود اجي ميحتاج تسوين شغلات تغريني وبعد لا كل شويه اتوقع وردت اغيرك وجنت اريد واسوي بطلي هاي الحركات

غزل : كتله برود صار وعفته ودخلت للحمام

سبحت وكمت ابجي بهدوء حتى ليسمعني ويتشمت بيه كملت سبح وطبت للغرفه وامشط وابجي كطعته لشعري سمعت صوت باب الشقه انفتح وانسد عرفت طلع وماطول بهذا الوكت طلع معناها مراح يبات هنا

الزمت التلفون لان اختنكت اذا ابقى ساكته راح اطك واموت ودكيت على ماما نهر

نهر : هااا يمه شلونج

غزل : بس كالت هيج بجيت

نهر : يمه غزوله شبيج

غزل : تعبت ماما والله بعد مااتحمل شسوي عفيه دليني

نهر : شصار وكعتي گلبي

رشا : شبيهه غزل

نهر : اوكفي خلي افهم

غزل : اريد احجي اذا اسكت بعد والله مااصبح من القهر

نهر : كمت على حيلي ورشا طفرت ويايه اشرت اكعدي وعفتها وطلعت اسولف بالاستقبال

احجي بنتي اسمعج

غزل : من وين ابدي من المهر لو من اليوم

نهر : مبين الشغله قديمه

غزل :والله حاولت اصبر بس حتى الصبر خلص مني كل مااكول اصبري وراح يتغير الحال يصير اتعس

نهر : سمي بإسم الله واحجي اسمعج

غزل : بديت اسولف بهدوء لماما واكو مواقف ابجي بيهم جنت بقمة ضعفي وقلت حيلتي واكثر من ساعه بس اني احجي وبس اسمع لو كلمة لو كلمتين لماما

نهر : سدي يمه شويه واخابرج

غزل : وين رايحه وعايفتني

نهر : تتوقعين امج نهر تعوفج

غزل : محتاجتج يوووم والله الحيل مابقه بيه وكرامتي صارت بلتراب

نهر : ماعاش ولا كان الي يدوس كرامتج واحنا عايشين سدي يوم وكومي غسلي وجهج شويه واخابرج

سديته منها وصرت بركان على ساعه وانفجر دخلت على طه واحس قبغ راسي راح يطير من الضغط والقهر

حجي طه : شبيج نهر

نهر : كعدت سولفت كولشي اله وهو ساكت وبس يسبح

تدرين كل بناتي اخاف عليهن اكثر من روحي بس غزل اكثرهن

نهر : ليش

حجي طه : لان دوم براسي كلام الحجيه بيبيتي الله يرحمها من كالت عينك على رازقيه هذه حظها ردي مثل حظ امك لاتفوتها يبن رازقيه

نهر : اي جانت تصيح لغزل رازقيه

حجي طه : لا عبالج اعتبرتها كلمة كالتها مره جبيره تتعالج يوم ما نطقتها وهي تحفر بيه وجنت دوم اكول اخاف انطيها لناس غربه وتتأذه وهاي فقيره ماتعيش بين الذيابه وافقت انطيها وازوجها لان ابن محسن وكلت محسن طيب ومرته خيره وراح يداروها واكيد ابنهم مثلهم تالي ماادري بروحي شمرت بنتي بلنار بيدي

نهر : الحل هسه شنو

حجي طه : خابريها كولي الها خلي ترجع بيت ابوها موجود

نهر : يعني متحجي ويه محسن حتى يعقل ابنه ويأدبه

حجي طه : هذا الجيل مو مثلنا ينهر هذا الجيل مايمشي بس من شور راسه لو هو اله نفس بيها مايأذيها ولو محسن حار شسوه راح يجر عدل يوم يومين وراها يعوج هاج ابني عافني وراح وحتى مااخذ شوري وبقى ولا دار وجهه وابن محسن هم اتزوجها حتى يسكت اهله مو حتى يكون عائله وياها ارجع بنتي بحضني هسه احسن مايربطها بيه طفل وتبقى معلكه مثل هسه رشا كل هاي الاذيه تمنيت اسم شعلان مينذكر كبالها ابد بس فرح رابطته بيها ويبقى لنهايه العمر تشوفه كدامها

خابريها وكول الها اذا تكدر ترجع وتعوف الجمل بما حمل نطلع بإقل الخسائر ولا نطلع بطفل يكسر ركبتها العمر كله مثل اختها

نهر : كمت وخابرتها

غزل : اطلك

نهر : اي ليش لا

غزل : شلون يصير

نهر : مثل الناس والعالم

غزل : ماما رشا مطلقه وريم ارمله ارجع ازيدها على بابا ً

نهر : عندج غير حل

غزل : جريت نفس بقهر وكتلها لا

نهر : ارجعي يمه احجزي ورجعي قبل لا تنطين اكثر من كرامتج وتعضين اصابيعج وتكولين ياريت رجعت من الاول

غزل : بابا خوما ضاج مني

نهر : ليش يضوج منج يابنتي فوك كسرتج تعالي بنيتي تعالي لحضنا والله يعوضج بلخير

غزل : سديته منهم واني كلت خلي ارجع ماابقى وياه شسوي باقيه المن حتى يوميه يهيني رجال وميريدني كوه هي

دكيت على نوران وكالت خفر باجر اجيج الصبح بديت الملم ملابسي حتى بس تحجزلي اطير للعراق وبقيت للصبح احظر وارتب لحد ما ساعه ٨ الصبح اندكت الباب

فتحتها حسن ونوران

نوران : خير صوتج البارحه ميطمن

غزل : تعالو اكعدو

نوران : كعدنا احجي مو كوه وصلت من القلق

غزل : راح ارجع للعراق

حسن : شكووو

غزل : قررت اطلك من فيصل

نوران : لا ياربي من كل عقلج

غزل : انسدت كل الابواب وماكو شى يربطنا

نوران : يعني عركه بسيطه تردين تطلكين

غزل : ياريت على العركه وياريت على المشاكل جان نحلها ونرجع طبيعي بس اني وفيصل ماكو شى يجمعنا هو ميريدني وانجبر عليه وجنت قانعه نفسي السبب الحرك ويشمأز مني وهسه الحرك وراح ونفس الشى متغير بلعكس صار النقاش بينا مبتذل ومحلوو وتجاوز وتقليل قيمه عيب عليه ابقى بعد الحجي السمعته منه

نوران : ابقي هنا اطلكي وعيشي حياتج هنا ليش ترجعين للعراق حتى تكدرين اطالبين بنص املاكه تحقي

غزل : اني مو مشايفه او بت فگر حتى ادور فلوس اني دورت وياه الاستقرار والرجال الي يحتويني  ويحترمني ويقدر كرامتي وبما ان كلها داسهن برجلي ومهتم وعاش حياته بعد مااريد شى منه وارجع لاهلي اشرفلي وحفاظ على مي وجهي

حسن : اطلكي واني اتزوجج

غزل : جفلت من حجايته وبقيت ساكته

نوران : شبيك حسن

حسن : شبيه مابيه مرايد شى غلط هو تريد تطلك وترجع للعراق واني اريد زوجه مثلها صبوره وبت اوادم وتقدرني واقدرها غلطت بشئ

نوران : بس هاي زوجة فيصل صديقنا كوم نطلع والله انت تخبلت

حسن : ليش نطلع واني كد كلمتي بس تطلك ثاني يوم من عدتها ناقص من الرجال مااتزوجها واذا على فيصل هو ماقدر النعمه الي بيده والي ميقدر حرام تبقى عنده هيج نعمه غيره يتمنون ربعها

غزل : شكول لاهلي هااا حسن شكوول دزيتوني عروس لفيصل اطلكت منه وتزوجت صديقه تتوقع اهلي راح يقبلون بهذا الشى واني شلون الي نفس اسويها عدا الكلام الي راح يصير والمشاكل

حسن : اني كدها بس حطي ايدج بيدي والله مااخذلج واصيرلك نعم الزوج الي تتمني يمكن هسه مو من حقي احجي بعدج على ذمته بس الله رقيب ويشهد على كلامي طول هاي الفتره جنت احسد فيصل عليج واكول الي عنده مثلج يكوم ويكعد يحمد الله ويشكره ويخليج على راسه

نوران : ولك وفيصل

حسن : يطبه طوب من ايده شكد حجيت وياه يفترلي ويه وحده استغفر الله اخاف احجي وعندي عرض ممبقيه واحد بنفسها ومجلب بيها وعايف هاي الالماس

غزل : اشكرك بس مااكدر مو اني الادك هاي الدكه بأهلي وبفيصل وقبل كلشي بنفسي

حسن : بعدج تحسبين احساب اله بعد كل سواياته ويااج

غزل : مااحسب اله احسب لنفسي مو اني الاحط نفسي بهيج موقف واتزوج صديق زوجي متربينا هيج حسن هاي مو اخلاقنا ولا عاداتنا ولا تقاليدنا يمكن لا سامح الله لو ميت يمكن بيها مجال وحتى هاي هم صعبه بس نكدر نكول اهون بس مو هو عايش اطلك منه وانزف لصديقه

حسن : شلج علاقه بلناس هنا كلشي اكو وماكو عيب

غزل : هنا مو بلعراق واني ماامشي على هنا لتتوقعني مثاليه بس هاي امور انزرعت بينه مااكدر محد راح يرحمني ولا يرحم اهلي وراح يطلع حجي واشاعات اني في غنى عنها والاقوى من كلشي اني من يوم مشفتك حسبتك اخ وبس وماكو اخت تتزوج اخوها

نوران : حسن كاااافي

غزل : اي صحيح كااافي اسمع كلام نوران واذا تردون بس هلمره ساعدوني محتاجه تحجزون اليه ورجاءً مااريد فيصل يدري لان راح يمنعني مو محبة بيه بس يخاف لتصير مشاكل ويه ابوه وانتم مترضون اليه اعيش ويه واحد ميطيق يشوف وجهي

حسن : غزل فكري اترجاج

غزل : ماافكر ولا احطها بالي اصلاً كتلك انت اخويه واعتبري نفسي حالي حال نوران لتناقشني عفيه تره البيه كافيني وزياده

نوران : يله حسن كووم وعوفني ويه غزل

حسن : مااريدج ترحين لج اني احبج والله تعلقت بيج

غزل : واني احبكم انتم اخوتي انت ونوران الله دزكم اليه رحمه ونعمه بلياكم الله يعلم شجان صار وعلى نياتكم ترزقون واني رزقي بلي صار انتم وكفتكم ماانساها طول العمر

نوران : كووم حسن وعوفها ترتاح شوف وجهه اصفر وترجف لتتخربط لتضغط عليها

حسن : سمعيها شتحجي اقنعيها نوران

غزل : ميحتاج تقنع والله الراح يصير لمصلحه الكل

تعصب وكاام يعيط ويحاول بس يقنعني بقيت قافله اخر شى كاام يحجي ويتوسل واني بس ساكته محجيت اي شى لحد مانوران سحبته لشقتهم ورجعتلي تعذرت ومبين تعرف اخوها نفسه بيه لان مستغربت الصار

غزل : ساعديني فدوة وخلي ارجع بأقرب فرصه

نوران : صار هسه اخابر صديقتي عدها معارف بشركات واخليها تحجزلج بس كومي اكلي فدشى راح توكعين

غزل : مابيه شى راحتي يوم ماانام بحضن ابويه وامي

نوران : ان شاء الله ولو تعز عليه اعوفج تسافرين واتمنى تبقين بس هاي حياتج واتمنى تلكين السعاده

غزل : الله كريم بوستها وطلعت

لليل اجه فيصل دخلت للغرفه ومطلعت وهو هم محاول يجي يتعذر يحاول يبرر او على الاقل يطيب خاطري بكلمة

بقيت اطب واطلع اسد الباب ورايه حتى ليحس ويشوف الجنط

وبعد اسبوع كاامل الليل ماانامه من القلق واخاف يعرف وحسن الاسبوع كله يتصل يحاول يقنعني اخر شى كمت مااشيله لو اغلقه ومااطلع من الشقه ومن يجي يدك باب الشقه ماافتحها بقيت على رإي ومااغيره

واليوم اجر بجنطي واني بلمطار ونوران ويايه حسن مقبل يجي يودعني حجزتلي لتركيا ومن تركيا لبغداد

نوران : ديري بالج على نفسج

غزل : ان شاء الله

نوران : تعودت وتعلمت عليج راح تتركين مكان جبير بحياتي

غزل : انتي هم والله جنتي نعم الاخت والصديقه الله يحبني رزقني بيج وان شاء الله نبقى على تواصل تلفونات واكو

نوران : شتحتاجين اني هنا من عيووني

غزل : محتاجه سلامتج وسلميلي على حسن وكوليله اختك غزل تكول الله يرزقك بأحسن مني لان انت تستاهل كل خير

نوران : الله يحميج غزوله

غزل : ويحميكم بستها وحضنتها وابجي تعلمت عليهم

عفت السويد ورجعت مكسوره الخاطر سافرت وحدي ورجعت وحدي بس بالاول جنت متأمله خير وهسه خايفه من الجاي وخاصه من يعرف فيصل رجعت

طارت الطياره وهلمره ماكو خوف الخوف الوحيد من المجهول ومن حياتي الرايحه الها والهم الجديد الي اجه على بابا مكافي وحده مطلقه والثانيه ارمله كملتها هسه اني

الله يعينك يابابا

طبيت لتركيا جانت هوسه والي سمعته فاتحين الهجره للدول الاوربيه لهذا هوسه وخبصه وبعد انتظار طويل  طرت لبغداد الناس تهج من العراق لذيج الدول واني هاجه من ذيج الدول للعراق وصلت لمطار بغداد العصر اوووف الحر قاتل بس والله تروح السويد فدوة كلها للحر والتراب مال بغداد لكيت بابا وماما وعمو سجاد ينتظروني ركضت ابجي وحضنتهم

حجي طه : اشش بنتي هذا هو رجعتي لحضني

غزل : والله حاولت وفشلت

حجي طه : المهم انتي سالمه الباقي فدوة الج

نهر : تعالي يمه بحضني بقيت ابجي بحضنها وسلمت على عمو الكل ساكت ومحد فتح ويايه موضوع وصلنا للبيت واباوع شكد مشتاقه الهم

ركضت اول موكفت السياره لكيت خواتي واكفات بالكراج ركضت عليهن ابوس بيهن ممصدكه شفتهم سليل وريم ورشا

واني حاضنتهم دك تلفون بابا جاوب هااا محسن

لتخاف غزل هياتها يمي وتعاال انت عندي حجي وياك ياصاحبي

يتبع ....

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_التاسع_والثلاثون

اذيه الباب من ينفتح للريح

بس شلون لو بالسجن مفتوح

كلش مو حلو قباض الارواح

وحلو كون بعدوك يقبض الروح

ابن ادم يضرب اللوح ابسامير

لكن من يموت يشابكه اللوح

اتطلع الروح اكو شغلات مرات

بس مرات هي تردلك الروح

اكو من الفرح يبجي حيل مرتاح

واكو شابع ضحك بس هو مذبوح

اكـــــــوو...كلشي ما يملك عاش مرتاح

واكو يملك الدنيه وعاش مسكين

اكو بالكبر بس مو موته عاشو

اكو مو بالكبر بس هم ميتين

اكو ميباوسونك بس يحبوك

واكو رب المباوس بس شياطين

لتخاف غزل هياتها يمي وتعاال انت عندي حجي وياك ياصاحبي

غزل : عرفت عمو راح يجي وراح يصير معاتب دخلنا للبيت والبنات دخلو الجنط ويايه واشوف تيومي وزين وفروحه كبرانين

كلها سنه عفتكم شبسرعه كبرتو

سليل : هو هذا الطفل بسرعه يكبر

نهر : كومي يمه غسلي وارتاحي بين مااسويلج اكل

غزل : مجوعانه ماما بس خليني اشبع منكم

ريم : تشبعين وتملين وتكولين لو مراجعه احسن كومي ارتاحي شويه وراج تحقيق بكد سليمه كل شويه واحد راح يسألج لازم ترتاحين

غزل : ماكو شى ضامته كلشي تعرفون

رشا : لا منعرف سنه كامله اشكال شفتي ومندري بيج وقبلها بدايه زواجج وهواي اسأله براسنه مالها اجابه لهسه واجابتها عندج

غزل : اكوم اغسل وارتاح واسولف الكم التردوه

سجاد : اني اصعدلج الجنط عوفيهن ثكال

غزل : شكراً عمو

صعدت للغرفه فوك رجعت للغرفه الجنت دوم احبس بيها روحي واعزل نفسي عن الكل صعدلي عمو الجنط باوعت غراضي وين احطهم فتحت الكنتور لكيت ملابس رشا وبتها اوف كلنا رجعنا بس خواتي وحدتهن وياها طفل عفت الجنط على حطتهن بس طلعت تراكسود مستور وحطيت الشال على راسي ونزلت ويه نزلتي طب عمو محسن مخروع يباوع بلوجوه ويدور عليه شفته جنت حيل مشتاقه اله ركضت حضنته

محسن :  الْحٍمَدٍ للـّہ على السلامه بنتي

غزل : الله يسلمك عمو

محسن : شرجعج

غزل : رجعت لمكاني ذاك مو مكاني

محسن :خابرني فيصل داخل للشقه ومدور عليج وملاكيج وكال عبالي طلعت تشتري شى وانتظرتها ساعه كامله لحد مداك عليج ولاكي مغلق وراح لهاي البنيه صديقتكم وسائلها وكلت اله سافرت للعراق مباشره اتصل بيه يعيط وصاير نار شلون اطلعين بدون علم رجلج يابنتي هاي انتي العاقله هيج تسوين

غزل : بعدين اريد افهمه جان بابا يطلع من غرفته وكاال

حجي طه : تعال محسن انت وغزل

غزل : طبينا للغرفه وسد الباب وكعدنا وسط استغراب عمو محسن للوضع كله بابا يحجي بهدوء والسبحه بيده

حجي طه : يوم ماجيت وطلبت غزل لفيصل فرحت كلش فرحت كلت بنتي ماراحت لغريب اعرف بيها راح تنصان وتنحط على الراس ومحسن يعرف حالي ويعرف الزمن شلون عكس ويايه وبناتي هنه بناته مستحيل يأذي غزل واكيد لو ما يعرف ابنه زين وراح يراعي الله بيها مستحيل يخطو هيج خطوه ويطلبها اله بس انصدم صاحبي الاعتبره اخويه اعتبره السند الي الله يكرمني بيه يذب بنتي حقل تجارب لابنه

محسن : طه بس افهمك

حجي طه : شتفهمني محسن ياصديقي  ويااعز من اخويه شتفهمني اني رجال فهمي على كدي اشوف الشى الكدامي هاك شوفها رجعتلي وره سنه مكسوره ومهزومه من رجلها الي محترمها وداس على كرامتها وقلل من قيمتها وقبلها عافها اكثر من سنه وحدها وكوه اصبر روحي وكل ما اسألك تكولي المعامله مكملت واصدكك وترجع تنطيني اعذار واصدكك غلطتي صدكتك ياخويه غلطتي مشيت عمياوي وياك كل ضني مراح تأذيني بس اريد واحد يمشي ويايه عدل بهاي الدنيا الغبره ماكو كلمن اسلمه ظهري يطعن بيه

محسن :اني مسويت شى بس ردت بنت اوادم زوجة لابني

حجي طه : من تعرف ابنك سكط ومابيه حظ ليش تورط بنات الناس عوفك من غزل حتى لو غيرها ليش الاهل من يعرفون ابنهم مو وجهه مسؤوليه ومو رجال كفو وطاير بملذاته ومستهتر يدورون اله بنيه مؤدبه خلوقه بت ناس يعني شنو تريدون تصلحون  ولدكم  براس الناس الفقره التعبانه على بناتها شلون تنامون الليل وانتم مضيعين تعب سنين لناس تعبت وسهرت وربت وكبرت بس حتى تطلع خوش بنيه وترفع راس ابوها شلون تنامون وانتم بسبب سوايتكم منوميها يم واحد حرامات ينحسب من الزلم  هسه انت تعرف فيصل وكل سوالفه الطايح حظها تعدل اخلاقه براسي  وبراس بنتي تعرفها فقيره وهادئه تجي تشيلها وتشمرها للنار وتكول الها لتخافين متحتركين

محسن : غير افهم شسوه

حجي طه : كول شنو الماسواه احجي بنيتي

غزل : وبديت اسولف بهدوء وعمو محسن مدنك وصاير نار وبس ساكت بس مكلت تقرب مني وهاي السوالف حجيت بس الي كاله الي بأن متتغير حياته وشون مسويلي منيه لان مبقيني يمه

حجي طه : سمعت عدا القبلها من جانت يمك بربك لو بنتك وهي عروس يعوفها رجلها مده طويله ترضاها احجي ترضاها اني اكلك مترضاها واني رضيتها لخاطرك وهي هم رضت لخاطرك ولو هي تنلام على هاي السالفه جان المفروض من المهر تشمر الحلقه بوجهه بسبب محبتك وصداقتنا بقت وهي فقيره ومن اهل الله سكتت وهذا اعتبره غباء لان قبلت على نفسها هذا الوضع طز بصداقتنا الي تخلي بنتي تحت رحمه شارب وزاني

محسن : والله هسه ادز عليه انعل اهل اهله واخلي يبوس رجليها

حجي طه : اي دز عليه بس يجي يطلك

محسن : انت شتكول طه شنو طلاك

حجي طه : متبقى غزل لحظه على ذمه ابنك اذا انت ترضى الغزل الاهانه وقله القيمه اني ماارضاها اني ممتنازل عن اضفر منها ابنك دربه اعوج وماينصلح واكبر غلط سويته يوم ماحاولت تصلحه  بهاي الطريقه الفاشله تزوجه وحده فقيره وتخليها مكفخه اله الاعوج اعوج مايتعدل يامحسن

محسن : بروح ابوك لتستعجل وانتي باباتي غزوله التردي يجرالج بس طلاك لا

غزل : عمو والله حاولت وحرت شسويت بس حتى يحس بيه ابنك ميريدني وميطيق يباوع بوجهي

حجي طه : وهاي غلطتك جبرته واي شى بلجبر ينكرهه

محسن : اعرف بيكم مقهورين وحقكم بس انطوني فرصه اصلح الوضع

حجي طه : اني انطيتك اعز من الفرصه انطيتك قطعه من گلبي انطيتك بنتي وهاي تاليها دوم يكولون الصديق لا تشاركه ولا تناسبه حتى يضل صديق واني شاركتك وناسبتك والنتيجه رجعت غزل بليله ظلمه تتختل بس حتى ترجع للعراق بله صار بيها شى بلطريق منو يفيدني انت لو ابنك

محسن : على كيفك ويايه طه تره اني محسن اخوك

حجي طه : لعد ياخويه ياحزام الظهر ورفيق الدرب تشمر بنتي لابنك المسربت ليش  لهاي الدرجه اني وبنتي رخيصين عندك بحيث دخلت بكل ثقه وخطبتها هسه عرفت ليش حطيت كيلو الذهب ضمان لان تعرف ابنك عاق وماوراه خير بس والله عيب عليك هاي سوايتك دكتك دكت الناقص من يغدر بصديقه ولو غادرني بكلشي ولا بهاي كسرت بختها وضيعت احلى سنين عمرها وفوكاها يعيرها لان سفرها يمه تكول مسفرها للجنه وهي دافره النعمه  روح محسن تخابر ابنك لو يطلك غيابي لو يجي ويطلك وهااا مبري الذمه من مؤخرها اخاف يتمسك بيها علمود المؤخر منريد شى لا منك ولا منه

محسن : طه بداعت الخوه والعشره البينا خلي اصلح الصار

حجي طه : ماشي رجعلي بنتي قبل ٣ سنوات بنيه ملامسها ابنك الوصخ ولا هاين كرامتها ولا مبجيها ولا ماد ايده عليها ولا معيشها القهر وتمحي كلشي من راسها وترجع غزل القديمه الهادئه الي مثل النسمه واني اشهدلك انت كدها وكدرت تصلح الصار

غزل : اباوع على عمو محسن صار دم ويصب عرك وعيونه حمره مبين صعد ضغطه وشفته ترجف

طلعت ركض جبت مي شافني البنات يإشرن هااا شصار مجاوبت ورجعت دخلت للغرفه هاااك عمو

اخذه من ايدي ويباوع بعيوني وحاصرته الدمعه

محسن : المفروض تنطيني سم على الصار بيج

غزل : اسم الله عليك عمو اشرب فدووه راح توكع شرب شويه وانطاني الكلاص

محسن : مابيه شى بنتي دنك على بابا يبوس راسه دفعه بابا على كيف لعمو محسن براحت ايده ودار وجهه وكله

حجي طه : تطلع منا تتصل بأبنك يطلكها وياريت لتشوفني وجهك بعد

محسن : كله ولا هاي طه تعرف بيه ماعندي اخ بس انت

حجي طه : واني ماشفت من الخوه بس كسرت النفس والغدر سواء منك او من اخوتي من ابويه شنو فرقك عنهم كلكم تفننتو بطعني بس كل واحد بطريقه شكل وكل واحد منكم يتقصد يضرب گلبي بناتي لان تعرفون اعز شى هنه عندي وتخلوني انزف واضل اداوي جروح وارجع ليوره اكتفيت وشبعت منكم روح محسن لااريدك ولا اريد خوتك بعد هاي الدكه مالتك

غزل : طلع عمو مخنوك واحس على ساعه يوكع طلعت وراه مكدرت اعوفه وصلت للباب وطلع عمو سجاد ويايه

محسن : بنيتي شنو رأيج بكلام ابوج تردين الطلاك

غزل : اي عمو خلي يطلكني

محسن : واذا رجعت واستسمحج وباس حتى رجلج

غزل : راح يرجع بغصب منك مو برضاته فدوة لتغصب عليه كافي يعني انت هسه تاكل اكله متحبها من يغصبوك عليها شيصير بيك مو متتحملها معدتك ويمكن تتقيأ لان انجبرت عليها هذا وضع فيصل انجبر عليه وهو مطايقني اترجاك عمو لمصلحتي وحتى مصلحة فيصل خلي نطلك الشفته منه هوايه وسكتت بعد مااتحمل ولا اريد ارجع اعيش ذيج العيشه فدوة لعمرك اعتقني منه حتى ضرب انضربت من وراه واني بعمري ماواحد ضربني بورده واسأله اذا سمعته كلمة او تجاوزت دوم غير السكوت ماعندي

محسن : اعرفج بنيتي مؤدبه وخلوقه صدك كسرت بختج بس والله متوقعت هيج توصل كلت الي يعاشرج غصب عنه يحبج هدوئج وديانتج وادبج تجبر حتى الاعوج ينصلح

غزل : المحبه من الله وابنك لو اشعله العشره شمع ميحبني كافي لهنا وخلي يطلك حتى اني ارتاح وهو هم يرتاح مني

محسن : صار بنتي صاار عافنا وصعد سيارته وراح

سجاد : مبين طه منطيها بلعظم

غزل : كلش بحيث حتى كله مااريد خوتك

سجاد : ابوج مورث حقه لو ما ابن محسن جان طيحت حظ حظه بس يجي للعراق اسحله سحول

غزل : حضنته يمه فدوة لعمي الجنتل مان

سجاد : هااا ولج عوجنا حلكنه ونحجي انكليزي لو باقيه سنين شلون

غزل : احجي بس سويدي شعبالك عمو قابل اني شويه

سجاد : هههه يله امشينا ياسويديه حضني ودخلنا

ريم : الله يثخن لبنكم شنو السالفه

غزل : بااع الغيره

ريم : ليش يمه اغار هو عمي مثل ماهو عمج وهسه يجيبلي عصير طبيعي ولفه كص ويجي مو عمو

سليل : ولجن عوفن رجلي تعال حبيبي مالك دخل بيهن

رشا : هو عمنا قبل ليكون رجلج اطلعي منها انتي اي عمو وياك الي هم همبركر دبل وقوطيه ببسي

سجاد : بله بربجن لو كايل سون جاي الي مجان وحده شمرتها على الثانيه

سليل : اني اسويلك حبيبي ذني مصلحجيات

نهر : عوفن الرجال بحاله هسه اسوي عشه كبه واكلي طماطه

غزل : اي فدوه ماما اشتاقيت للكبه مالتج

ريم : اني معدتي صارت معمل مال كبه اريد كص ارحمو بحالي جوعانه والله

سجاد : خلي ادخل لطه واروح اكتبو بورقه طلباتكم لان انسى لان حضرت جنابكم وحده تريد مايونيز والثانيه صاح ولخ كجب وادوخ

رشا : فنكر زايد بربك عمو خلي يحط بلهمبركر تصير بشده

سجاد : هاي مدرسة الاجيال تحجي بلشدات اروح اشوف ابوجن اكتبن الي تردوه وانتي حبيبي اخاف جوعانه هم شتردين اجيبلج

سليل : يمه فدوة لحبيبي واعيب الهن

ريم : اي عيني ليش لا سليل وبس والباقي عدس

سليل : يكولون خس

ريم : مو ماكو خس هسه صيف

سجاد : الله يساعدجن يانهر رجعن ورجعت دوختهن وياهن

نهر : خلي بس الله يحفظهن خليهن كبالنا شنريد  الْحٍمَدٍ للـّہ على كل حال كلمن وقسمته بهاي الدنيه

دخل سجاد وبقى فوك النص ساعه ومنعرف شصار جوه ومن طلع اخذ الورقه وبيها طلباتنا وجايب الاكل اشكال حتى للجهال جايب وبيومها كعدنا كلنا ناكل بس بابا مقبل تالي غزل كامت اله

دكيت الباب وطبيت لكيته صافن

بسته من خده

حجي طه : هاا بنتي بيج شى

غزل : تعال اكل ويانه والله مشتاقه اكل وياكم كلكم سنه كامله اكل وحدي

حجي طه : مجوعان بنتي اكلي انتي بلعافيه ويه خواتج

غزل : تعبناك اعرف عبالك زوجتنا كلت خلصت

حجي طه : مزوجتكم حتى اخلص منكم زوجتكم لان هاي سنه الحياه ولازم وحدتكم تعيش حياتها وتبني عائله واله لو عليه اخليجن كبالي حسكم بلبيت وعياطكم عندي متعتي وراحتي كافي من اطب اشوفجن گبالي

غزل : لعد كوم كلنا كاعدين ناكل فدوة لخاطري بابا

حجي طه : استغفر الله يله اكل شويه لخاطرج

غزل : فدوة لگلبك الطيب وكام ويايه وكعدنا كلنا ناكل

ومفتحنا الموضوع ابد لحد ما راحو سجاد وسليل لبيتهم وبابا دخل لغرفته وعمه صعدت فوك سحبتني ريم من ايدي ودخلتني لغرفتها واجت رشا وراها وسدن الباب

ريم : اكعدي سولفي كلشي وبلتفصيل السمعناه مقنعني اريد التفاصيل

غزل : باجر والله اسولف الكم بس خلي انام ارتاح تعبانه من الطريق

رشا : انتي تنامين واحنا الفضول يجلطنا احجي يله

غزل : والله باجر

ريم : احجي وبدون شلعان الگلب ماانام اله افهم كلشي الصار ولج بلتفصيل التفصيل الممل

غزل : كعدت اسولف الهن من ايام المهر لحد رجوعي ساعات احجي وهنه صافنات هدوء غريب اول مره اشوف خواتي هيج هادئات ويسمعوني بكل حواسهن

هذا كل الصار

ريم : وساكته

غزل : شسوي

رشا : سكوتج اكبر غلط ليش مجيتي كلتينا

غزل : مكدرت

ريم : غزل انتي تحبينا

غزل : هاااا شنو هذا السؤال طبعاً احبكم وروحي بيكم

ريم : ليش لعد محجيتي ليش من وكعتي بضيق التجأتي للغريبه والنا لا تشوفينا مو اهل للثقه او مابينه خير وانصحج صح

غزل :عفيه لتحجين هيج يمكن اكثر غلط وندمانه عليه هو مجيت وحجيت الكم يمكن مجان صار هذا حالي ولا جان وصلت لهاي المواصيل التعبانه

ريم : هواي اغلاط سويتيها وللاسف مجنا وياج

غزل : المهم رجعت

ريم : جان المفروض يوم ما ضربج اخبر عنه واعفنه بلسجن واخلي يبوس الرجل حتى اطلعي هناك القوانين مو مثلنا هنا

غزل : مو اخلاقي هايه ريمو مو تعرفين بيه مااسويها

ريم : ااااخ بس لو صايره سباعيه والله اسجنه واطلب الطلاك منه هناك واخذ نص فلوسه واحرك گلبه

غزل : متهمني الفلوس

رشا : المبدأ مو مبدأ فلوس الشغله بأن تربي وتعرفي اللعب بنات الناس مو هين

غزل : الله ياخذ حقي منه خلي يولي اريد بس اخلص منه

ريم : شلون بله ناخذ جنطنا ونهج ويه الناس هسه للسويد

غزل : شسوين

ريم : نكتل كاتيه مدري كاترينا نسحلها بلسويد كلها وابرد گلبي

غزل : ههههه مثل مسحلتن جنات

رشا : وياريت فاد رجعت لحضنه

ريم : رجعت لحضنه وتعيب ريم على طريقه كلام رشا

رشا : لتعيبين لج

ريم : يمعوده جلاب سلوكيه مال شوارع وتزوجو انتي شعليج

غزل : والله كل مااتذكر سوايتها اموت قهر ومن اتذكر اموري هنا ربى على ايدنا وخاصه اني روحي جانت بيه

رشا : الله يعينه من يكبر كافي هو ابن جنات العايقه

غزل : اروح انام نعست بعد ساعه ويأذن الفجر

ريم : غزوله

غزل : هاا عيني

ريم : احنا وياج لتخافين ومنعوفج ابد بس كافي تسكتين يجوز مرات تشوفينا هوسه ونكمز بس وكت المصيبه هم نفكر واذا متحبين الحلول مالتنا احجي ويه سليل او ويه عمه المهم متسكتين لو حاجيه بيومها جان حياتج هسه غير

غزل :  الْحٍمَدٍ للـّہ على كل حال غلطت وان شاء الله اتعلم من غلطي

كمت جان تجرني ريم

ريم : اكلج بس لا حبله يمعزايه

رشا : حتى بابا نلكاه باب الكاظم يبيع سبح من القهر

غزل : هااا ماادري

ريم : خوش نفتح روضه هنا شعدنا روحي نامي الله يستر

غزل : كمت واني مصطوره عزه حامل لا ياربي دخيلك كل مااتخيل ارجع لفيصل لان عندي طفل يصير عندي مغصه

كوه اخذت عيني النوم ونمت من التعب

ثاني يوم الصبح كعدنا كلنا نتريك اني وماما ورشا ومنتظرين ريم جان تنزل باوعت علينا وكفت على نص الدرج وكالت

ماشاء الله راح نفتح هنا قسم للرعايه الاجتماعيه كلشي عدنا هنا مطلقات وارامل وايتام

رشا : ههههههه خرب شبيج من الصبح سالمين

ريم : مو بيت والله قسم من الرعايه خلي اخابر عمو سجاد خلي يطلك سليل حتى تكمل السبحه ونصير لوز

نهر : تف من حلكج من الصبح تفاولين على اختج

ريم : بقت بس هي تطلك يكعد السيت عدل هاج شوفي الوجوه من الصبح تخبل تكولين جاين سخره وطول الطريق بلحزام مكتولات 

رشا : وانتي شلونج عااد

ريم : والات والعزه وداعت اصنام قريش الخيرين اول احزام على ظهري حتى جلاق ماكله

غزل : هههه والله اشتاقيت لسوالفجن

ريم : انتي بلذات اسكتي اكو وحده تعوف السويد غير ازوعه املاكه كلهن واجي واوزعهن هنا واحرك گلبه امشي واكيت بلفلوس واصور وادزله لحد مااخلي يكول حرمت التوبه

نهر : تعال تريكي الجاي راح يبرد

ريم : نزلت وكعدت بصفهم اريد كيري

فرح : اني اجيبلج خاله

ريم : يمه فديتها الي تحب خالتها عضيتها من خدودها

تعاال تيومي حطيته بحضني اوكله

جان يدك تلفون عمه كامت وجابت شالات شمرتهن علينا هاجن البسن حسين اجه

ريم : اهووو شعنده

رشا : انتي شنو سالفتج صايره من يجي تتخبلين

ريم : خلي اكوم احسن جان تجرني رشا من ايدي وكعدتني

رشا : اكعدي بله عيب كل مره تكومين كدامه

جان يطب

حسين : صباح الخير

كلنا كلنا صـباح النور

حسين :  الْحٍمَدٍ للـّہ على سلامتج

غزل : الله يسلمك حسوني

حسين : خابرت على عمه البارحه وبلغتني واجيت اشوفج

غزل : هله بيك

نهر : تعال تريك يمه

حسين: تريكت عمه بلعافيه

ريم : جنت اتريك بهدوء واوكل تيم ولا رفعت راسي

حسين : شلوونه البطل تيم

ريم : راد يكوم يركض عليه كعدته اكعد لتتحرك واوكل بيه

رشا : شبيج

ريم : اشش اسكتي

كملت وكمت ومباوعت بوجهه وغسلت الي ولتيم

فرح جلبت بتيم تريد تلعب وياه عفتهم وصعدت

غزل : شبيه ريم ويه حسين

رشا : والله يااختي مااعرف شجاها هي تشوفه تنكرص تاخذ ابنها وتصعد

حسين : اي غزوله شخبارج شلونها السويد

غزل : حسب فترت بقائي تعاسه بتعاسه بس شى واحد استفاديت منه سويت الحرك

حسين : اي كالت عمه على الخير والله فرحت الج

غزل : شكراً اعرف بيك

رشا : وين الجهال

غزل : صعدو فوك

رشا : خوش ريم يمهم

ريم : كاعده اگلب بلتلفون وضايجه واجت فرح تبجي خاله خاله تيومي ميتنفس

طفرت حافيه ركض للغرفه الثانيه لطمت على وجهي شفته ازرك ومفرفحه روحه

لزمته ونزلت اعيط الحكولي ابني راح بروح من ايدي

نهر : اسم الله يمه

رشا : نريد نشوف شبالع وهيج مختنك

لزمه حسين وجرته ريم عووفه وتصرخ جااان يعيط بيها ودفعها

حسين : شوو جيبي وخري

باوع عليه وعاط اركضو جيبو ملقط بسرعه

ريم : شكد جريئه ومااخاف بس اكو مواقف اجبن مني ماكو وخاصه الي تخص تيومي انتهي شفته هيج لو متت كعدت بلكاع اضرب على رجلي

حسين : الزمي عمه ودنجي راسه وجان يمد الملقط بخشم تيم وطلع فاصوليا منه وحده منا وحده منا على كيفه وضربه على ظهره ويطبطب حتى يتنفس جان يصرخ حيييل

ريم : طفرت شفته صحه ويبجي واني فرفحت روحي اخذته وحضنته وابجي

رشا : ولج فرح شجنتو تسوون

فر اخذنا عدث وفاثوليا ونلعب وتيومي طببهم بخشمه

اذا لعبتي بعد اطيح حظج وضربتها على ايدها

حسين : جيبي

ريم : عوفه هسه اسكته

حسين : شكد عنوديه جان يجره حيل واخذه وطلع

نهر : عوفي يمه يروح ويه حسين هسه يتنفس الطفل ويرتاح ويرجعه شبيج تخبلتي حسره يلزمه 

ريم : ليلخذه صيحي عفيه

رشا :تره حيل كبرتيها لو ما هو جان هسه نركض بلمستشفيات بس هو اضبط من عدنا خلصناها عياط

ريم : صيحي خلي يجيبه

رشا : امشي فوك تعالي اخذتها وصعدنا ودخلنا للغرفه بله فهميني شجاج

ريم : لج يصيحله بابا وكمت الطم على وجهي

رشا : مفهمت شنو يصيح

اسكتي خلي افهم

ريم :قبل شهرين جنت اشتغل بلمطبخ وهو يم رجلي ركض من سمع الباب توقعت واحد من عدكم مديت راسي من الباب لكيت تيم يصيح بابا لحسين وحسين مكيف وانطاه نستله واني نار وشبت بيه مكدرت اطلع كدامه ومن يومها كمت ابعد تيم منه

رشا : واذا صاحله شكوو بيها

ريم : خلي يصيح للناس كلها ولا حسين

رشا : تره والله حسين طيب وحباب اعلمج بيه لو ما تربيتو سوه

ريم : قبل راح ويه اهل قبل ابني يصيح لجده بابا لسجاد بابا عادي بس لحسين لا مااقبل

رشا : جريت نفس وكعدتها هسه عرفت سبب كرهج

ريم : مااكرهه بس مااريده بحياتي خلي يروح ابني تعلق بيه رشا كل ميجي يركض اله

رشا : من رجع من تركيا واول فتره بعد مصحيتي مو جنتي ويايه وملتهيه جان تيم يروح يم سليل وحسين هناك هوايه ودائماً يطلع وياه سليل كالت من يجي حسين ياخذ تيم ويشيله ويشتريله ويفره بلسياره وهذا طفل شمعرفه تعلق بيه

ريم : وسليل ليش مكالت ليش سكتت

رشا : شتكول غير لسانج ينمد مترين

ريم : خلي يبتعد عن ابني لا اكلب الدنيا عليه

رشا : والله باطله شكو بيها يبقى ابن عمج وهذا طفل ويتيم يحب احد يعتني بيه

ريم : اني موجوده مميته حتى يعتني بيه حسين وهو بلذات مااريد اشوفه خليني بعيده وسعيده عنه

رشا : والله جنج ياريم تتهزمين لتخافين تضعفين وتحنين

ريم : ادوس گلبي بلقندره اذا حنيت

رشا : يجوز

ريم : لتستفزيني

رشا : العفو ست سكتنا

ريم : من يجي صعديلي تيم

رشا : مالي دخل نزلي اخذي ابنج

ريم : نذله مو بيدج

رشا : غير تعلمت منج

ريم : اووووف نزلت وروحي طاكه وانتظر حسين تأخر شويه وسمعت صوت السياره ونزل وتيم شايله وبيده سياره ام الرمونت جبيره كوه يمشي وشايلها على گلبه وعلاكه صغيره حلويات وحسين شايل لعابه

تقرب مني وعيونه تباوع على كل مسامه بوجهي وكال بهدوء هااج ما اكلناه

نزله وطب تيم يركض مكيف

حسين : وين بوستي

رجع تيم يبوس بوجهه حسين وانطاه اللعابه كله هااي مال فروحه اخذها ودخل فرحان هنا عمر تيم ٣ سنوات

ريم : شكد سعرهم انطيك فلوسهن

حسين : وانتي شعليج

ريم : شنو شعليه غير ابني

حسين : عيد ميلاده بعد يومين وهاي هدية ميلاده انتي لتدخلين

ريم : تقربت منه وحجيت بنتره شتريد من ابني عوفه لخاطر الله

حسين : تره هو طفل شريد منه احبه واحب زين وفرح

ريم : ابتعد عنه مااريده يتعلق بيك هذا صغير ويلكف اي شى ويتعلق

حسين : ريمتي شبيج ويايه لهاي الدرجه مخنوكه مني

ريم : كزيت على اسناني بعصبيه واحجي بصوت ناصي اني مو ريمتك اسمي ريم او تصيحلي ام تيم

حسين : مبين رجفتج حجايتي

ريم : لا انت ولا عشره مثلك يرجفوني وارجع واعيد واصقل للمره الالف ابتعد عن ابني

حسين : تدرين شى مشتاق لهاي عيونج من تتعصب

ريم : هواي زودتها لتنسى اني مره متزوجه عيب عليك تحجي هيج 

حسين : ارمله مو متزوجه وراح يصير سنه ونص من مات زوجج الله يرحمه

ريم : الغلط مني اني واكفه واسولف وياك

جرني من جف ايدي ودفعته شسوي انت

حسين : لو شمسوين تبقين ريمتي يوم متزوجتي ركضت مثل المخبل اشرب واعيط وتهسترت وره مصحيت على غلطي رجعت للصلاه وحتى صمت تكفير عن ذنبي وبليه جرح الامام علي رحت للزياره برمضان وهوسه وزياره باوعت على القبه وكتله اليوم جرحك ياامير المؤمنين بجاه جرحك طيب جرحي لان نفسي بيها ومااكدر بلياه كمت ابجي مثل المره لان اتخيلج بحضن غيري وكل ليله اكول هسه حضنها هسه باسها هسه تضحك وياه كل خطوه مشيتيها واني نفسي بيج ياريم

ريم : ومن مات تشمتت موو وكيفت

حسين : لا وحق البجيت بحضرته ودعيت مو اني الي اتشمت بمسلم وميت شهيد لتهينيني انقهرت حيل بس الله ليعلم رغم كلشي يبقى انسان وماشفت منه الموزين بس وره السنه وره كل هاي المده صفنت واشوف شلون رجعتي لبيت ابوج ومو على ذمه رجال وحره حالي كله يتخربط من اجي هنا اريد بس اشوفج واعرفج تنهزمين مني ومن انتظر وعيني تلومني لان مشفتج اكوم اصيح تيم حبيته على محبتج و حتى اشم ريحتج بأبنج والله رجلي وگلبي يجيبوني  مو بيدي

ريم : اجيت متأخر حسين هواي متأخر الگلب شبع طعنات وعود وقهر اني روح ماعندي انت كعد ادور بكوم رماد

حسين : راضي بلرماد اخذه وبيدي اداري

ريم : انت اكثر انسان مااصدك بوعوده وثاني شى اني مو ريم القديمه التنتظرك اني هسه اذا عايشه ومستقره لابني وعلى ذكرى رجلي يعني بطل تحاول تتقرب مني عن طريق ابني عيب هاي الطريقه تستغل طفل يتيم صغير وتعلقه بيك وتكسر گلبه مثل مكسرت گلب امه

حسين : كتلج قبل شويه اني حبيته على محبتج هذا الطفل من الله روحي صارت بيه مااعرف يجوز لان اعرفج تحبي اكثر واحد بلدنيا او يمكن لان صغير وسوالفه حلوه او يمكن اني متأذي لدرجه ادور الراحه بعيونه الصغيره وابتسامته

ريم : اخر مره انبهك ابتعد عني وعن ابني وروح تزوج وعيش حياتك وخلف ومالك دخل بيه لا من بعيد ولا من قريب

حسين : تقبلين اتزوج

ريم : قابل لازمتك

حسين : اي لازمتني ومتخليني

ريم : لا بالله شلون بله لازمتك

حسين : ماخذه گلبي وروحي وحتى تفكيري شلون ارتبط بوحده واظلمها ويايه

ريم : مثل مرتبطت بيه وظلمتني عادي تصير

حسين : حاقده عاليه بسبب الصار ماالومج بس هسه انتي ام وراح تعرفين شنو معنى تربين ابنج وحيدج وميهتم بيج ويطلع عن شورج ويكسر كلامج وانتي خلصتي عمرج ادللين وتكبرين وتعلمين وروحج بيه وتالي يضرب الحايط بيج وميسمع كلامج

ريم : هسه شتريد بله من هذا الكلام كله

حسين : مااريد شى اعرف اي كلمة هسه تگبين بوجهي وادخليني بمتاهات عجيبه بس خلي شغله بالج واهلي يعرفوها لهذا اليوم لو انتي لو مااتزوج

ريم : ضل بدون زوج شعليه اني انت مو صغير وحر حياتك اني اتزوجت وخلفت وعايشه على ذكرى الرجال الوحيد الي اعتبره صاني وجان كد كلمته رجال بصدك مو كلام وعود ويصبح الصبح حجيه مثل الزبد يموع

حسين : بهاي حقج وياج

ريم : همزين اعترفت نعمه من الله ورجاءً ابتعد عن ابني ممكن

حسين : لا

ريم : عطت حسين

حسين : ياعيون حسين

ريم : لتحاول مراح تحصل شى اجيت بلوقت الضائع ياابن عمي

حسين : ماكو شى اسمه وقت ضائع طبي لابنج لتيومي حبيبي وديري بالج عليه ياريمتي

ريم : من اشتعلت ريمتك كون

حسين : ههههه شكد احبج من تتعصبين

ريم : عفته وطبيت الي يوكف گبالي يمكن افجره رشا اشرت لغزل تسكت وين تيم

رشا : بروح العزاز عوفي شوفي  شلون متونس شفته كاعد يضحك ويلعب بلسياره منطلق وياه فرح بلعابتها جريت نفس مخنوكه وضايجه احس كل قطعه بيه الها شعور شكل مااريده يتقرب مني ولا اشوفه يذكرني بكل الصار والي يشيطني اكثر من يسألوه منو جابها الك يكول بابا يخليني لو بيدي الزم حسين واحركة طول الليل اطحن بروحي ومن يجي الليل اااااخ منه شكد مأذي تجي الافكار كلها ساعه ابجي واتذكر المرحوم وبنتي وساعه اصفن على حسين الي بدا يتجرأ يتقرب مني زين اني ليش مااكدر اتعامل وياه برود ليش اتعصب ليش اتجادل وياه ليش ماعندي القوه اكعد كباله واعتبره هو والماكو سوه شحس اتجاهه لهسه داخلي بثوره بركان حاير ينفجر لو لا

مر ١٠ ايام على رجعتي واي خبر من عمو محسن وفيصل ماكو وعمو كام ميطلع للشغل ويه بابا واشوف بابا شكد تعبان ومكسور وحزين اعرف يشتاق لعمو محسن يبقى صديقه مهما كان

قررت ارجع للكليه محتاجه اداوم بقت سنه وحده واتخرج حجيت لماما استحيت اكول لبابا كلت اخاف ميقبل بس وره ساعه اجت كالت ابوج يكول خلي ترجع تكمل كليتها كلش كيفت وخاصه هاي اخر سنه حرامات

بس ليش لهسه هدوء خابر عمو سجاد على عمو محسن يسأل وهم حتى يعرفون شوكت الطلاك تفاجأنه عمو محسن بلفراش وضعه موزين

سجاد : وين ابوجن

رشا : بلغرفه

دخل عليه وطلع

سليل : هااا شصار

سجاد : كتله على محسن كال الله يشافي مالي دخل بيه

نهر : ياااا معقوله طه ميحن گلبه على محسن

غزل : دخلت على بابا وكتله فدوة اريد اروح اشوفه

حجي طه : بعد كل السواه بيج

غزل : مو هو سوه اني سويت بروحي المفروض ماابقى من شفته هيج اني وياه نتحمل الذنب وعمو طول مااني ويااه شالني على راسه حتى فلوس للعمليه زيدني ومايوم سمعت كلمة موزينه من عشت عدهم والله كمت هنا مااكدر ابات من كثر ممرتاحه يمهم بابا انت گلبك طيب وتحبه لعمو وهو متأذي عليك تقبل يموت اخوك

رفع ايده ومسح طارف عينه

جان اطب ريم

هاااا حجي شنو هااي مداعرفك صاير گلبك حجر

حجي طه : لو گلبي حجر مجان صار بيجن هيج طيبتي العمت عليه وضيعت حالي وضيعتجن

ريم :هذا عمو محسن هذا الصديق الصدوق

حجي طه : مع الاسف اذاني

ريم : مرات البشر يأذي الي يحبهم بدون ميحس وبعدين يتندم اعتبر غزل اتزوجت غريب ومتوفقت فدوة كوم اله لو انروح كلنا مو مثل ماانت ويانه والله عمو سجاد من خابر كالت زوجتة بلفراش وضعه خطير كل يومين يرجعوه للمستشفى وحتى على اساس اهل ابوه جايين خايفين يموت وميشوفوه

حجي طه : لهاي الدرجه تعبان

ريم : اوووف ياگلبك ياابو البنات شكد رهيف اكص ايدي اذا مو هسه يدك خوف على محيسن انتيمك

حجي طه : هاي شنو انتيمك

ريم : يعني صديقك بابا بس اطورنا

حجي طه : يله بدلن وخلي نروح لهذا الناقص

لبسنا كلنا ركض واجرنا تكسيات اثنين ورحنا طبينا مثل الهجوم على البيت خطيه ام فيصل بجت من الفرحه على دخلتنا واشوف شلون تبوس بغزل وتبجي وتتعذر منها وغزل هم تبجي وتكولها اشتاقيتلج

طبينا هجوم لغرفته وهو جفل من شافنه وبجه

محسن : كلت اخاف اموت ومااشوفكم

ريم : هااا هسه تموت مو تريد تتزوج

محسن : صرت صونده ياسكينه هاي تاليها

نهر :  الْحٍمَدٍ للـّہ على سلامتك

محسن : الله يسلمج

سجاد : هااا ابو فيصل كول غيرها

محسن : هااي من عيونك

رشا : على منو ادور

محسن : مأجه مو ابو گلب الاسود

جان يطب بابا لان جان واكف بره يحجي ويه ام فيصل وتأخر

حجي طه :  الْحٍمَدٍ للـّہ على سلامتك

كااام يبجي مثل الطفل من شافه وكااال لك كلت راح اموت وميشيل تابوتي طه

حجي طه : توكل وموت وخلصنه منك واشيله على راسي جان يكعد بصفه على الجربايه وتحاضنو خلانا كلنا ندمع وغزل تبجي وحاضنه ام فيصل

دنك يريد يبوس ايد بابا وبابا سحبها وحضن راسه

محسن : نعالك على راسي وشسوي بيه راضي اذبح ابني جوه رجلك بس لتعوفني تالي  عـمري وحدي اني ماعندي اخ واب والله انت اخويه وابويه والي صار تحقني بيه والعمر كله مااسامح نفسي على هاي سوايتي بس والله وتراب ابويه وابوك جانت نيتي صالح وجنت اريد نسبك وردت ادخل لبيتي احسن بنيه تشيل اسمي واسم ابني مردت تالي عمري يطبن الاجنبيات ويضيعن تعبي وتعب ابويه بس شسوي الله بلاني بولد بلاضمير وممقدر الي سويته اله وكتله اذا اموت تحرم عليك جنازتي وفاتحتي ومتبري منك ليوم الدين

حجي طه : كافي صحتك موزينه اسكت هسه وبعدين نتفاهم

محسن : مزعلان مني بس كول بعدني صاحبك واخوك والله كل الصحه ترجعلي

حجي طه : بس الله يعلم شحالي بدونك بس أذيتي على بنتي جبيره وانت تعرفني شلون روحي بيهن

محسن : حقك والله تعالي بنتي ابوس راسج واعتذر عن كلشي صار بحقج

غزل : العفو عمو انت شنو ذنبك فدوة بس خلي يستعجل بلطلاك مااريد ابقى معلكه

محسن : قافله على رأيج

غزل : اي ومااغيره

محسن : يجرالج بس يجي اخلي يطلكج

بقينا كاعدين وتعشينا سوه غزل وام فيصل وعمه نهر كملو العشا وسهرنا لل١٢ بليل سوالف وضحك

ام فيصل : الله ينطيكم العافيه والله الزاد مطاب بحلكه من يوم مارجع الكم غير شى بسيط وعلى المغذيات واليوم اكل لان اجيتً

حجي طه : كلشي مابي مثل حصان الشرطه يطارد كل وكت بعد جم يوم يجي يعيط بلمطعم ويصيح بوياي يابويه قنابل مو نسوان

محسن : اخذو ابوكم وروحو لان اذا بقى تاليها انام بالانعاش لان ام فيصل لان تخنكني هاي اذا بقيت عايش

غزل : ههههه لا خاله حبابه متسوي شى

محسن : دافعت بسرعه وعافتني

سجاد : يله يابه نتوكل تأخر الوقت

سليل : اي وباجر دوام

طلعنا وعفنا عمو محسن بأحسن حال الغريب حتى بابا ابتسامته رجعتله رغم كل الصار حمدت الله مضاعت علاقتهم لان مشايفه صداقه مثلهم واتفقو بس يرجع فيصل يطلك

وره اسبوع تماماً اجت ورقه طلاكي حتى بدون ميوصل فيصل للعراق عن طريق وكاله مسويها وطلك منقهرت لان هذا الردته بس كل خوفي لا اطلع حامل وانتظرت يوم يوم والحمدلله طلعت مو حامل ايام مرعبه واني اتخيل حامل وارجع اعيش ويه فيصل بس انتهى كابوس فيصل اي اعتبره كابوس لان أذاني حييل

اجه بابا بعدها بكم يوم وجمعنا كلنا

حجي طه : بنات اني اشتريت بيت ابو المخضر الي بعد كم بيت

نهر : بلخير كلنا باركنا اله فرحنا حيل

رشا : بس البيت حيل تعبان بابا

حجي طه : اني اعتبرته كاااع اسمه ملك اخاف يصير شى وبس الم ايدي واوكف على رجلي ابني شويه شويه سندس : الجن بابا اذا طلعونا من هذا البيت وين اوديجن

نهر : كفت فلوسك

حجي طه :  الْحٍمَدٍ للـّہ سد بسد بس ولا فلس بقه يله كم يوم وشغل المطعم ان شاء الله الم نفسي

سليل : ليش متسحب قرض عليه وتبني

حجي طه : قروض مااحبها بنتي كومه يحملون واني رجال تعبان متت شلون يضل دين برگبتي واتحاسب عليه

كلنا حجينا وكلنا اسم الله عمرك طويل

حجي طه : هلقاسم الله طابوكه طابوكه بيت الله مانبنى بيوم وليله

سجاد : هو كم متر

حجي طه : اني اشتريت نصه ١٥٠ متر

ريم : نعمة خوش مساحه

حجي طه: المهم بلغتكم

ريم : صعدت فوك افكر شسوي بلفوس العندي وابويه محتاج

بقيت الليل كله افكر حتى متعشيت

رشا : شكوو صافنه ومنزلتي بعد

ريم : راحو

رشا : اي

ريم : اني راح انطي الفلوس والذهب مالتي لبابا

رشا : هههههه

ريم : ليش تضحكين سفيهه شكلت اني

رشا : نفس قراري شسوي بلذهب وابويه بعازه الفلس وشو هو يبني النا

ريم : اي والله شفته سوده عليه حاير وحتى مطلب من عدنا رغم فلوسنا وذبنا عنده

رشا : اني مااتحمل لباجر راح انزل هسه اكول اله

ريم : اخذيني وياج

نزلنا سوه ودكينا الباب

حجي طه : هااا عصابه شعدجن

ريم : رحت للكنتور فتحته وطلعت غراضي وغراض رشا وهو صافن عفت كم فلس بلكنتور اخاف احتاج اسوي ثواب شغلات مصرف حوالي ٥ ملايين والباقي شلته وحطيته بحضن بابا

ريم : هااك بابا ابني البيت

رشا : وذني مالاتي

حجي طه : من كل عقلجن ذني لجهالكم اياكم تفرطون بحقهم الدنيا متتأمن

ريم : اني وابني نروح فدوه لتراب رجلك ليش العنده اب مثلك هم يهم هم ينام تعبان ويفكر كافي تفكر تلمنا بيت حتى متعتاز

رشا : فدوة بابا ريحنا العندنا والعندك واحد والبيت بيتنا كلنا فدووة لتكسر بخاطرنا

حجي طه : نهر وينج تعال

نهر : هااا عيني

حجي طه : شوفي بناتج شنطني

نهر : اروح فدوة للحنينات

حجي طه : كولي الهن ريكي يبس واني احاول اقنعهن هاي فلوس جهالهن

نهر : ماكو فرق يبقن بناتك والبيت النا كلنا مو عيب تاخذ منهن

حجي طه : اني على كيفي اسوي سلف وابني

ريم : ولشنو هذا شلاع الگلب توكل بالله حبيبي وخلي نشيل لبيت جديد ومنفكر بأيجار والحمدلله قريب

حجي طه : مااكدر صعبه عليه اخذ منجن

نهر : مماخذ من غريب ذني بناتك ويساعدنك

بقينا ساعه كامله نتوسل ونبوس ايده تالي حضنا وكاال يلوموني من احبجن وافضلجن على نفسي

ريم : لتكول لاحد ابني وكمل وخلي نروح لبيتنا الجديد بس فدوة ابني النا حمام فوك مو رجلينا سافت من الصعده والنزله راح يصير بيه مفاصل

حجي طه : ههههه من عيوني

رشا : سالمة عيونك بسناه وطلعنا جنا مرتاحات بشكل عجيب اول مره نحس مسوين شى بيه خير لبابا ومقدرين تعبه ولو تعبه ميتقدر بفلوس الدنيا

وره يومين اجه وكااال

حجي طه : سجلت حصه بلبيت لرشا وحصه لريم والباقي الي

ريم : ليش هيج سويت بابا

نهر : ليش طه

حجي طه : لو ما اخاف الله ولو اكو ايه او حكم يحقلي اسجل البيت كله بأسمهن واحرم حسام من الورث جان سويت هيج بس حرام عليها لو مهما كان عاق والدين ميحقلي احرمه بس هم مااكدر اضيع فلوس خواته ويصيرن كلهن بطنه

نهر : هسه انت ليش بس تفكر بلورث

حجي طه : هااي دنيا وكلمن ويومه ومااريد ينظلمن بناتي انطني حالهن ومالهن تالي يصير بطن اخوهن هيج احسن يضمنن حقهن وحق جهالهن وهم اذا اموت يورث بس بحصتي يكدرن اذا الله مكنهن ينطنه حصته كم فلس ويولي ويبقن البيت الهن سند عايشات بيه اياجن تضيعنا

وعمتجن امانه عدجن هاي امجن

نهر : يبوووً ياطه توكع الگلب اسكت بله

ريم : اي والله بابا فدوة اسكت

رشا : بدا بابا يبني البيت ومشرف على العمال سجاد هو وعمار العامل بمحل بابا  لان بابا تعبان ميكدر بلشمس يبقى واكف وعمو سجاد اغلب وكته بمحله لهذا شبهه تاركين هاي المسؤوليه على عمار

غزل : مرت الايام واجه الدوام جنت فرحانه بشكل موطبيعي رغم دفعتي تخرجو ومااعرف احد بس اكو بنيه اجت وعرفتني عن نفسها اسمها منال وعدها جانت صديقه تزوجت وبطلت لهذا قليل تتواجد ويه باقي دفعتها وهذا الشى الي خلاها تتقرب مني وحتى بحث التخرج اتفقنا نسوي سوه

كمت اروح واجي بخط حطه اليه عمو

اقرا ذبيت حيلي كله على الدراسه وحاولت انسى كل الصار رغم مو سهل النسيان بس احااول

وبشهر الواحد ٢٠١٦ كاعده اقرا امتحانات عندي ومبقى شى ونكعد نعطل مال نصف السنه وعندي مختبر ودايخه حييل اجت منال كالت غزوله اجه مصطفى

غزل : يامصطفى

منال : شبيج الي بلمرحله ويانه

غزل : شبيه

منال : يكول ولد يسأل عليج

غزل : عليه اني منو ولج وكعتي گلبي

منال : مااعرفه يكول معرفه وعندي شغله وياها واروح

غزل : هو وينه

منال : واكف يم الاستعلامات مقبلو يدخلوه اله تجين انتي ادخليه

غزل : عفيه اخاف غير اعرفه منو

منال : يمعوده اني يمج امشي نروح ونعرف منو

تمشيت بأتجاه البوابه وهناك ولمحته استغربت وهم خفت كلت اكيد صار لاهلي شى مشيت سريع وصرت بوجهه

انت مو عمار الي ويه بابا

عمار : اي اني

غزل : بابا بيه شى صار شى

عمار : اجيت عليج ممكن احجي وياج

غزل : ويايه ليش

عمار : مااخرج والله

غزل : عندي امتحان هسه

عمار : عادي انتظرج

غزل : اخاف اتأخر

عمار : حتى لو عشر ساعات انتظر

غزل : مااشي تعال ادخل انتظرني مصطفى كتله كرايبنه استحيت بس شسوي لان مبين عمار عنده شى مهم

دخلت للامتحان ومن القلق والتفكير شيريد مني طار كلشي بس كملت انطيت ورقتي وركض لكيته صافن وبيده جكاره ويدخن

جان لابس اسود بإسود

كعدت بعد مسافه عنه وكتله كووول شتريد

يتبع ......

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الاربعون

يكثر ضباب اعله الشبابيچ

تجين ببالي و اتمنى الاگيچ

ارسم على الجامه عيون حلوات

-احچي وياهن و كل ظني احاچيچ ،

دخلت للامتحان ومن القلق والتفكير شيريد مني طار كلشي بس كملت انطيت ورقتي وركض لكيته صافن وبيده جكاره ويدخن

جان لابس اسود بإسود

كعدت بعد مسافه عنه وكتله كووول شتريد

ذب الجكاره بلكاع وداسها واندار عليه جان هادئ كلش من يحجي

عمار : اعتذر لان اجيت لهنا بس ماكو مكان احجي بيه وياج احسن من الكليه فكرت اتصل بيج اكثر من مره واتراجع كلت اخاف متنطيني مجال اوضح

غزل : تتصل بيه منيلك رقمي وليش تتصل اصلاً

عمار : رايد منج تسمعيني وبعدين احكمي

غزل : سكتت وركزت ويااه تفضل اسمع

عمار : تعرفين بيه اشتغل عند ابوج وبحكم شغلي يمه وثقته بيه مرات حتى على الدخل يخليني اذا هو وابو فيصل يطلعون بشغله مهمه ولان قريب منهم مرات يسولفون بدون قصد مني اسمع واني امشي واني اشتغل خوما اسد اذني كالت غزوله وحجت غزوله بلبدايه عبالي طفله صغيره ويدلعوها وبمرور الايام عرفت بيج بت الحجي الصغيره وبقى اسمج اكثر اسم ينطقوه بينهم وهذا الشى مهمني ومره انطوني تلفون الحجي واتصلتي اذا تتذكرين

غزل : يمكن اتذكر هيج شى لان بوقتها جان الفايبر بجهاز بابا ينمسح

عمار :اي بلضبط وحجيت وياج لهنا جان الوضع طبيعي بس الصار بعده من انمسح مره ثانيه الفايبر وجنت هستوني مفعله وبعده الجهاز بيدي محسيت غير صورج تركع وحده وره الثانيه وانفتحو كدامي

غزل : جمدت من كعد يحجي

عمار : اني جاي اليوم حتى تحالليني وتواهبيني اني شفتهم ومن ذاك اليوم ضميري ياكل بيه قسماً بالله مانيتي سوء صارت صدفه

غزل : بس لحظه شلون يعني شفتهم فهمني

عمار : من وصلن انفتحت اول صوره

وجااان دنك وسكت

غزل : تذكرت اول صوره جان الحرك بعده وصوره واضحه كلش لرگبتي وجهي وشكلي كله طالع حتى بدون ربطه لان اني ماخذه الصور مو لغربه لبابا وخواتي زادت ضربات كلبي والدمعه انحصرت بوجهي شلون ولد غريب يشوف صوري

عمار : وبعدها من شفت صورج انطيت الجهاز للحجي ومن يومها الوم بروحي وميت قهر

غزل : تدري انت شسويت

عمار : اعرف والله غلطي جبير ليش اجيت اليوم حتى تحالليني وتواهبيني خاصه من عرفت انتي راجعه للعراق واشوفج رايحه جايه للكليه تمنيت اوكفج وافهمج

غزل : شتفهمني امانه انطوها الك تخونها بهاي الطريقه وشغله خاصه مااحب احد يطلع عليها تجي انت تطلع وبكل عين صلفه تكول حالليني واهبيني

عمار : عفيه لتتوترين وخليني افهمج

اني بعد يومين راح اودي مساعدات للحشد والمكان خطر كلش لدرجه كالولي تعتبر عملية انتحاريه لان هاي الاماكن ترصدها داعش بشكل جبير وتضرب اي سياره تفوت لازم استغل الوقت المناسب يله اوصلها ومن عرفت خطوره الشغله خفت لا اموت ويبقى ذنبج برگبتي

غزل :انهاريت وحيل انقهرت لان اني خلصت عمري اتختل ومااخلي احد يشوف رگبتي حتى ليعطف عليه او يشمأز وهذا شايف كل صوري وهو غريب وكتله بعصبيه وكمت ابجي

عساك متت والله لا احاللك ولا اواهبك واريد يوم القيامه الله يحاسبك على سوايتك

كمت اخذت ملازم وجان يوكف ويايه

عمار : اترجاج اسمعيني والله اني مو مثل ماعقلج هسه تصور اني رجال صايم مصلي واخاف الله وماانظر لوحده بلحرام خاصه اخر سنوات وعندي عرض اختي اصغر منج

غزل : تقبل اختك واحد غريب يشوف صورها ويشوف حاله خاصه بيها وشعرها وهي محجبه تقبلها وفوكاها تكول ماانظر بلحرام والي سويته قمة بلحرام رجال مإمنك على ماله وحتى من انطوك التلفون غير يعرفوك ثقه وانت ماشاء الله كلش كد الثقه

عمار : كل كلامج صحيح وماالوم عصبيتج بس لتبجين الطلاب لينتبهون ومااريد احد يحجي عليج شى موزين وفوكاها بسببي

غزل : شتريد انت هسه

عمار : تسامحيني والله رايح بطريق بس الله يعلم بيه ونسبة اعيش كلش قليله واجيت على ابوج وكتله ابريني الذمه بس خفت اكول اله على السويته لان خليت اخويه الاصغر مني بمكاني بلمطعم اقلها من اموت اكو واحد يصرف على اهلي وخفت ينقطع رزقه ويتبهذلون بعدي التجأت الج حتى تبريني الذمة مكدرت اروح واني اكل بروحي على سوايتي

غزل : ماابريك الذمه ليوم الدين عفته ومشيت حييل مخنوكه وابجي بهدوء وامسح عيوني مااريد احد ينتبهه ورايحه للكراج علمود الخط مالتي صعدت بلخط وكعدت ليوره وننتظر بنيه ويانه تجي حتى نرجع للبيت درت وجهي على الشارع وصافنه وعيوني دم كوه احصر الدموع حصر حتى لتنزل اكثر و كل مااتخيل شلون اتمعن بصوري وتذكرت وقت يله انطاهم لبابا يعني بقى مركز بكلشي بيه شفته واكف على الشارع ويباوع عليه من بعيد وحسيته مقهور يباوع عليه ويدنك ويرجع يرفع راسه رجعت درت وجهي الجهه الثانيه وبگلبي حقد مشايلته على بشر

صعدت البنيه للخط وانطلق ورجعت للبيت واني منتهيه دخلت شفت ماما نهر سلمت بدون مااباوع بوجهه وكتلها تعبانه اريد انام وركض ليفوك مردت وحده من البنات تشوفني ذني النمله اذا تفوت ميعوفنها اله يعرفن وين رايحه هلمره مبينة باجيه اكيد مراح يرحمني

نزعت ملابسي بقيت اباوع على رگبتي واتذكر من جانت مشوهه وشلون شافهن هذا الولد وشاف شعري وشكلي كله وارجع احقد بلزايد وانمردت واتخيل شلون يقرب ويبعد بلصوره شهكت حييل سمعت صوت ريم خفت لتدخل وتشوفني  لبست دشداشه ونمت حتى اكل مأكلت

ريم : غزوله ليش منزلت تاكل

نهر : اول مطبت كالت تعبانه راح انام وصعدت

رشا : بيها شى

نهر : ماادري يجوز بالامتحان موزينه

ريم : خلي تكعد اشوف شبيهه

رشا : شسويتي انتي اليوم

ريم : رحت على مدرسه عطور الجنه الاهليه  الي براس الشارع وحجيت ويه المديره وكالت محتاجه معلمه واكو اكثر من وحده ويايه مقدمه واذا اختارتني تخابرني

رشا : بلكت الله اقلها اطلعين من البيت

ريم : مبقى شى ويصير بيه انفصام بلشخصيه من وره الكعده

نهر : والله عيارات خلصنا عمرنا كله كاعدات بلبيت شحلاتنا نطبخ وانظف ونربي بلجهال وعايشات لا انفصمنا ولا تخبلنا

ريم :جيل الطيبين مالتكم غير جيلنا عمه احنا نازوكيات فراشات رقيقات نطيرُ في البستان منتحمل ننحبس بالاقفاص

رشا : يابه الباميه شكد تنفخ عيني الاميره ديانا خفي شويه

ريم : اوووي ملكيتي غير الباميه ولا احبها وهااا ذكرتيني بهاي المكروده ديانا الله يرحمها شحلاتها اميرة وتخبل تسوه راس رجلها شبسي

رشا : شبسي ولج منو اسمه تشارلز

ريم : يمعوده شبسي زايد عليه جنه جراده دايسها بايسكل شلون رضت بيه ماادري وفوكاها تحبه اطم روحي ومرضى بيها ابو الوعث وحبلي وحده جنها انعام وملعك بيها مثل القرد معلك بشجره اااخ من الزلم مال حرك

رشا : اي والله واولهم مشعول

ريم : هذا لا اله محرقه خاصه هو والسعلوه جنات بلدرك الاسفل من جهنم وانطفيهم بانزين

نهر : كاافي يمعودات بس تشيلن غيبه

ريم : ذوله الثنائي بلذات حلال الغيبه بيهم مو يكولون لا غيبه على فاسق ذوله الي حطو اساس الفسوق بلدنيا عدهم مؤلفات هوايه بأسمهم اهمها فسوق اتزوج فسوقه جابو فاسق جبير

رشا : هههههه خرب خوش اسلم كتاب هذا

نهر : صدك معرفنا شجابت

رشا : غابت ضحكتي وكلت بغصه خلفت ولد عمه

ريم : ياااا شمدريج شو ما كلتي

رشا : دريت بعد

نهر : شوكت جابت

رشا : صار كم شهر يمكن لو بشهر التاسع لو العاشر مااتذكر من بلغوني

ريم : منو بلغج ولج وليش محجيتي

رشا : شحجي هم ارجع اعوي يمكم وابجي

نهر : لتضوجين يمه كلمن وقسمته حسبي الله عليهم

ريم : منو كلج لتغيرين الموضوع

رشا : تتذكرين سهير جوارينا المدرسه الجانت ويايه

ريم : اي اتذكرها

رشا : قبل مده دخلت على الفيس مالتي كالت ممكن سؤال انتي رشا طه ياسين ام فرح

استغربت كتلها اي وهاي طارت كالت شكد دورت على احد يعرفج او رقم تلفون اوصلج ومن عرفت بيها ياسمين كلش كيفت جانت حيل حبابه ونروح ونجي سوه مرات لان بنفس فرعنا

ريم : وشلون عرفت انتي رشا

رشا : مو جنت ناشره صوره فروحه تتذكرين وهي مشبهه عليها ودخلت واخذت رقمها وانطيتها رقمي الجديد وكمنا نتواصل وهي كالت شعلان صار عنده ولد

ريم : عرفت من شفتج تبجين بلغرفه بقيتي يومين وتكولين مريضة اني كلت تبجين على مشعول

رشا : متعرفون من سمعت شصار بيه اااااخ لزمت دشداشتي وحطيتها بحلكي وكمت اعيط من القهر

ريم : سوده عليه ليش مكلتي اول تالي تضمين عليه

نهر : يمه ليش تمردين بروحج يرحون فدوة للتراب الدستي عليه عساهم لا تهنو ولو هذا طفل حرام واحد يدعي وماله ذنب بس كون همه مايتهنون

رشا : تهنو عمه وعاشو وماشية حياتهم وهاج صار شهرين موصل لبنته والله اعلم يجوز نساها ونساني

ريم : هاي هبه شوك فتره وتروح هو عنده هسه صار ولد وابو فلان فتره ويصحى على الخسره مقابيل هذا الولد وربج لو يموت ماينساج وهسه تشوفين

رشا : مااريد اشوف ولا اريد اسمع تعبت ياناس واني انتظر الساعه الي اتشمت بيهم الساعه الي اكول حوبتي طلعت ومكعد تطلع

نهر : يمه الصبر ماكو اعظم منه على كد صبرج ربج يجازيج اكو شغلات وامور بس ربج هو يعرفها وقت مناسب ياخذ بيها حوبه المظلوم رب العالمين يحب مناجاة العبد اله كل ترفعين ايدج للسما وتدعين وتتوسلين راح تكون الضربه اقوى للمظلوم يجوز اطول اشهر وسنين بس تجي وبوكتها راح تسجدين شكر لله بنتي جم مره كتلج ارمي حملج على الكريم هو قادر مايخلي حمل مطروح

رشا : هاي كدامج عمه ساكته وعايشه وماشية اموري بس اكو شغلات جمعتني بيه مااكدر انساها

نهر : ولا راح تنسيها تخلصين عمرج وماتنسيها بس تعيشين

ريم : صحيح كلام عمه هسه الوحده اذا مصادقه وحبيبها يعوفها تگابل الفيس وتراقبه يمكن سنه مو عاد انتي تردين بعد كل الجمعكم  تنسين بين يوم وليله

بس الافضل تكطعين علاقتج بهاي سهير لان راح تصير سولتج بيها وكل شويه مخابرتها حتى تعرفين شصار

رشا : تره ما اسألها اني بس هيج بلحجي كالت والمصيبه تكولي هلاهل هاي الساقطه هند ترست المنطقه ترس ولد عمه يضربون طلقات

ريم :على ياصخام وجهه يضربون طلقات

رشا : عيني عدهم هذا فخر خلف ولد همه اغلبهم متزوجين اثنين و٣ نسوان يعني هاي الشغله عدهم عادي ممسوي حرام

ريم : ياعيني تخر الديانه منهم

رشا : صار عنده ولد بعد وجنات كاعده بيتي تسرح وتمرح نزلت دمعتي واختنكت

نهر : صدك يمه امجن خابرت عليجن

ريم : ياام هاي

نهر : ولج سندس ياااا نسيتيها

ريم : مو اني النسيت هيه

رشا : شتريد بله ومسحت دموعي

نهر : جم مره تخابر على ابوجن وهو يطردها

رشا : زين يسوي شتريد بله اخاف محتاجه فلوس مو هي متعرفنا بس من تحتاج شى لو تجيب ابنها المدلل هنا يبوك الخير كله ويروح

نهر : والله اني كلت اخبركم اخاف تردون تسلمون عليها

ريم : الله يسلمج عمه دزي خبر لابويه ومن تخابر خلي يكول الها بناتي مايعرفنج وخلي يركز على كلمة بناتي لان احنا بنات طه مو سندس ويكولن طبعاً احجي نيابه عنا اربعتنا

رشا : احجي اني مخولتج بأملاكي المنقوله وغير المنقوله

ريم : اي مو على اساس عندج قصر فرساي واني وكيله اعمالج تهي بهي واهز بيدي جان تضربني على راسي

رشا : مو صوجج يله ولي متحجين عني

ريم : غردي يله

رشا : احم احم

نيابه عن خواتي

ريم : مالج دخل بيه عندي لسان وادز خبر اني شفتيني اكلت لساني البزون هاااج شطوله وطلعته

رشا : كون اكصه غير تنطي مجال

نهر : والله اني البله گلب الكاعده واسمع الجن عبالي كبرتن واجي اخذ شورجن

ريم : ههههه تعالي بشرفج عمه اكعدي لتتعصبين خلي الجنرال رشا تلقي كلمتها عود هي مدرسه وادرس واكول الطلاب كلها مثوله تسألي من حكم العراق بالستينات يكولون جورج بوش

رشا : هاااي اني هيج ادرس طلابي اصلاً يموتون على تدرسي يافاشله ويعتبروني احسن مدرسه

ريم : عميان خيه عميان خلي يجون يشوفون من تغسلين المواعين تعوفين الجدوره منكعه والله شنو حتى تنغسل زين وتضل لحد ما لو ذيج الفاهيه تغسلهن لو عمه

رشا : بااع منو التحجي الشاده الدشداشه و٢٤ ساعه تجلف وتنظف

نهر : كااافي يمعودات تتناكرن

ريم : كله من وراج عمه

نهر : هي هاي البقت تذبيها براسب هااي عود تردين تغيرين الموضوع صعدتي الجالي عدنا

وهسه راح تصير من الروس هي مال سندس بهذا الزلك

نهر : غير ابلغكم اخاف وحده بيجن تريد تحجي وياها تسولف اشتاقت الها

رشا : تشتاقلج العافيه عمتي بخيرهم ماخيرونا وبشرهم عمو علينا تزوجنا وخلفنا  وهاي ترملت واني انسحلت واطلكت وذيج سافرت ورجعت تركض واطلكت وصارت بلاوي بينا تكول مسلسل تركي ١٨٠ حلقه وهي ماتعرف شى علينا هسه صرنا نشتاق الها ونسولف وتريد تعرف الحلقه الاخيره مال المسلسل

ريم : خابروها وكلولها ابطال المسلسل كلهم بح بقن البطلات البوم وحده مكابله الثانيه والنهايه تلكوهن بسجن النساء لو بلشماعيه

واذا المخرج قرر يغير النهايه عود ننطيها خبر للرفيقه الماجده المناضله صاحبه العقائد الساميه سندس شاد اوغلو

نهر : والله اليكعد يمجن يرادله گلب ممدشن واني گلبي خلصان عود اكول لابوجن ميردن يحجن وياها

رشا : بس اخونا شخباره

ريم : يااااا على كوله عمه احبها من تكول ياااا وتجرها

نهر : هااا ولج ناصبه عليه

ريم : ههههه بداعت انعام اوكفي

ياااااا عدنا اخ خيه جا شنهي طلع بلحصه هذا لو وزعوه ويه اوراق النفط نستلم بيه ٥٠ لتره

رشا : والله ياخيه حتى لو تاخذي وتستلمين بيه نفط ماجيب ٥ لترات اخوج مثل الحصه التموينيه مالتنا مكتوب حصه بس التمن معفن والطحين يسيل والزيت ماكو وضالين نستلم بس شكر وكل ٣ اشهر لو نستلم لو لا ومن يحجون اجت الحصه تكول راح نستلم اكل مال شهر اخوج هيج عدنا اخ بس بالاسم

ريم : لا لا مااقبلج هذا ابن سندس ماما غطيني ودلليني لتحجين عليه تلكي هسه مكضيها بلبارات والاجنبيات من وحده لوحده وممعبرها وهسه تذكرتنا

نهر : اشيل الصينيه شكد لغيتن ياكلمة ردي بمكانج التوبه اذا اجيب طاريها

ريم : حبوب كرط بدربج عمتوو الجالي صعد لراسي

رشا : وسفن بروح ابوج اذا اكو لان الوضع حيل تخربط داخل المعده العزيزه

نهر : اطلع هسه اجيبلج

رشا : لا مااريد هسه اخابر بابا من يجي يجيبلي

اكلج ريمو خلي نروح للمول شكد حقيره كل شويه اتوسل بيج

ريم : يامول باع هاي ادوخ منه والله

رشا : على اساس يوميه مفتره بيه ولج ضلت حسره بگلبي اروح واشوفه

ريم : خابري سليل تجي ويانه

رشا : اي ويجي عمو سجاد ويصير بودي كارد ويطلع الطلعه من شواربنا مو بس من خشمنا لتباعن لدنجن تعالن منا روحن منا

ريم : اي بعرضي يخليني اكمز

رشا : شبينا صغار قابل نقشمر عمه وناخذها ويانه حتى يرضون

ريم : اخاف سليل تزعل اذا ما اخذناها

رشا : نروح اول مره ونتونس وعود ثاني مره يجي عمو ويانه ويطيح حظنا عادي

ريم : اوك نروح واذا محلو بنص المول اكتلج

رشا : خوش

غزل : كعدت وره ساعات محتصره كمت توضيت وصليت حتى الصلاه من وره القهره نسيتها كعدت كملت الفروض

ريم : اطب واطلع الكاج تصلين شنو السالفه جنتي مرتده عن الدين الاسلامي واليوم الله هداج ورجعتي

غزل : رجعت تعبانه ومصليت لا ظهر ولا عصر

ريم : هااا شعجب انتي متنسين فرض شنو السالفه احجي ولتوجعين گلبي

غزل : ريمو ماكو شى عفيه عوفيني

ريم : صار شى بلكليه

غزل : ممجاوبه بالامتحان ارتاحيتي

ريم : عبالي فد شى يمعوده قابل قامت القيامه والله بطرانه

غزل : لان قريت وتعبت واجت صعبه

ريم : كومي اكلي انتي شاطره وبعدين تعوضيها

غزل : مجوعانه

ريم : كومي غزل وبله عناد ومن تكملين امتحانات نطلع للمول نغير جو

غزل : اي محتاجه حيل اطلع اغير جو

ريم : خلصي ونروح

غزل : كعدت اقرا امتحان باجر وكوه اركز وكل مااتذكر الصار ادمع اني طبعي حساس وخاصه تجاه هذا الموضوع

مر يومين افوت بلسياره من يم البيت الي يبني بابا اعرف عمار هو المشرف على البناء لان دوم يحجي بابا بيه كدامنا باوعت هو ماكو جنت مخنوكه لدرجه اكثر من مره افكر اروح لبابا وابلغه واخلي هو وعمو سجاد يطيحون حظ حظه حتى ليتعدى على خصوصيات غيره بس اتردد اخاف من المشاكل

سليل : كاعده اكنس وزين يلعب يمي وطب سجاد ينفخ وعيوونه براسه

هااا حبيبي الله يساعدك

سجاد : هله

سليل : شو هله شكوو ياستار

شمر ملابسه وكعد يبدل ويحجي بإعصاب

شفتي هذا الناقص عمار

سليل : هذا العامل الي يشتغل ويه بابا

سجاد : اي هو الگلب

سليل : شسوه

سجاد : راح اخذ المساعدات ومااخذني وياه

سليل : الف رحمه على اهله ويحفظه لشبابه كوون

سجاد : وجع انتي صدك تحجين

سليل : والله ادعيله بلصلاه بعد يرجع سالم

سجاد : وخري من يمي لا اذب حركتي بيج

سليل : ههههه تعال اكعد ابو زيون الورد واحجيلي

ماما زيوني نصي التلفزيون يله احجي شصار ولتتعصب فدوة شغل جكاره جريتها بداعتي لتشرب مو الكحه بليل عندك توصل لسابع جار وصدرك تعبان

سجاد : انطينياها اذب حركتي بيها تره اذا ماادخن هسه احركج الج

سليل : هاااك عيني دخن الباكيت كله بس لتذب حرگتك بيه شغل الجكاره ويدخن ويسولف

سجاد : اتفقنا اني وياه ولمينا خوش مساعدات بطانيات على قماصل لان شتا وبارده وحتى فلوس اشترينا بيها طليان كال لحم نحطه بجياس وهناك يشووه اذا كدرو لان الطبخ ميضل يوم يومين يخرب

سليل : لهنا تمام شصار بله

سجاد : صار اكثر من اسبوع ابويه شفته بعيني من التعب ومتأمل نروح سإلته شوكت كال باجر صدك هسه يخابرني ويكلي طلعت بغداد ومتوجه للمكان وخلاني اشيط لله حتى فشار فشرت عليه

سليل :ليش سوه هيج

سجاد : يگلي المكان خطر واخاف يصير شو عليك وانت صاحب عائله كتله لعد انت صاحب بط مو هم عائله برگبتك وذوله الي يقاتلون مو كلهم عدهم عوائل يگلي عمي عينك على اخويه هذا امانتك واعرفك كدها وتصون الامانه شاب صغير ومايفهم علمه وخلي يصير رجال هلمره تكول جمر ويذب عليه من يحجي هيج

سليل : ياعيني عليه يرجع بلسلامة والله هذا الولد حبيته جان يضربني على حلكي

سجاد : وجع حبيتي شنو شو انتي متستحين بوجهي تكولين حبيته

سليل : هااااي شبيك قصدي مثل اخويه

سجاد : لا اخوج ولا بطيخ اذا عدتيها افلش سنونج بحلكج

سليل : مااعيدها صار حضرت الزعلان يمه الغيره ولا تطفه عندك صار شكد متزوجين

سجاد : اني شايط وهاي تكول حبيته لو ما ابنج كاعد جان عرفتج خوش تكوليها لهاي الحجايه بوجهي

سليل : حضنته وكتله الف  الْحٍمَدٍ للـّہ مرحت شسوي بيه سوي المهم باقي يمي

سجاد : لا والله حيل انقهرت وضجت جنت متأمل اروح متعرفين شلون احساس حلو من ترحين وتشوفين الولد شلون يستقبلوج والله احس مقاتل وياهم مشايفه حالهم بهذا البرد يقهرون لبت گلبج وشلون يقاتلون مثل الاسود يعني الي نسوي الهم ميجي ربع الي همه سوه عدا الشهداء الي ينطوها في سبيل التحرير

سليل : اي والله مرات اشوف يطلعون صور الهم وشكد ندعيلهم

سجاد : اااخ منك عمار لو بس الزمك

سليل : بگلبي اكول الف رحمه على اهله من مااخذك وياه جانت عشت برعب مناقصني هبطات وهزات

غزل : مر اسبوع وخلصت الامتحانات جنت مبدله ومنتظره البنات نروح للمول وكل شويه يله يمعودات وينجن تكول رايحين عرس جان بدايه الشهر الثاني ٢٠١٦

رشا : اي عيني شعندج قابل مثلنا نبدل للجهال يله احنا

غزل : والله الجهال بسرعه بدلو انتن الي تتأخرن والله راح يروح الظهر وبس تصير عصر ميخلينا بابا نروح لان يكول وكت غروب مترحن يله فضنها

نهر : اني مكمله وكاعده خلي اشوف شوكت يكملن منا لخمس دقايق مااجن ولا اروح وخليهن يكمزن

غزل : اي والله واني هم مااروح سمعنا دكت باب طلعت وفتحت الباب وباوعت مره جبيره لابسه فوطه بيضه ودشداشه سوده وعبايه على الراس وجهه نوراني يخبل بس متعوب

هذا بيت الحجي طه

غزل : اي خاله

فدوة بنيتي الكه الحجي هسه

غزل : لا والله مموجود بلمطعم

اوف ربي المن انطي وجهي هسه

غزل : تفضلي خاله محتاجه شى اني بنته

يحفظج لشبابج يوم اني ام عمار الي يشتغل ويه الحجي

غزل : هي كالت هيج انقبض گلبي وضجت معودت انسى موضوعه

اي محتاجه شى

ام عمار : والله يابنتي ردت الحجي اسأله عن ابني گلبي نار عليه صار ٣ ايام لا حس ولا خبر

نهر : منو بلباب غزوله

غزل : تفضلي خاله جوه

ام عمار : لا بنتي اجي غير وكت بس كلاص مي اذا مصارت زحمه سكري صاعد وكل شوي اعطش

نهر : منوو تفضلي

غزل : خاله ام عمار الي يشتغل ويه بابا

نهر : اي اعرفه اهلاً بيج تفضلي عيني ليش واكفه بلباب

ام عمار : مااريد ازاحمكم ومبين طالعين

نهر : اول مره تجين وتوكفين بلباب تفضلي

دخلت امه وكعدت ورحت جبت مي الها وكلي فضول افهم شصار

تفضلي خاله

ام عمار : فدوة لايدج تشربين كون من مي زمزم

غزل : امين شكراً وكعدت مقابيلها

نهر : خير شبيه عمار

ام عمار : والله ياخيتي عمار شلع گلبي كتله لتروح يمه ماعندي غيرك والي كال يوم وارجع  واخذ مساعدات للحشد توسلت ردت وكعت دخيل وماقبل كولي قنعني وراح وثاني يوم مابين بس جان تالي الليل يخابر ويطمني ويكول الطريق انسد بس ينفتح اجي  ورغم هاي اضلن رافعه ايدي للسما واطلب من رب السماوات يرجعه الي سالم وصار ٣ ايام لا يدك ولا سمعنا خبر عنه توسلت بأخوه عابد اصغر منه يحجيلي ويه الحجي عرفت نسيب الحجي رايح وياه كلت بلكت سمع خبر وهذا عابد فت گلبي فت كل شويه بحجايه شكل تالي كتله وديني على الحجي اني احجي وياه يگلي مطعم وكله زلم وين اخذج ويايه تالي اجيتكم اني اندل الفرع مالتكم بس البيت مااندله والناس الخيره هسه دلتني

نهر : بس سجاد مراح وياه

ام عمار : يايمه يعني ابني رايح وحده تعزيني يسعاد راح ابنج راح سندج راح شيال نعشج

غزل : خاله على كيفج ان شاء الله مابيه شى

ام عمار : بنتي شلون على كيفي وهو البقالي يحاميني ويحامي لاخته واخوه الله يعلم شنو حالنا بعد ابوه واخوه الجبير هو وكع الحمل على راسه اللكمه ميحطها بحلكه قبل مناكل احنا ابني مهضوم وشاف المر ومكسور الظهر يابنتي وماشاف من شبابه شى صار جم سنه الضحكه غايبه منه ودومه مهموم وتاليها يضيع مني هيج وين انطي وجهي لله المشتكى اذا صار شى بيه والله اموت وراه

نهر : اسم الله الرحمن يحفظة لشبابه لتكولين هيج انتي امه ودعاء الوالده مستجاب ادعي يرجع بخير وتفرحين بطبته عليج

ام عمار : اوف منك يعمار هيج تشلع گلب امك وتحركه عليك

غزل : اباوع على امه شلون خطيه تلوب وتبجي وشفايفها بيضت يمكن صعد سكرها هاي علاماته ركضت انطيتها مي خاله فدوه عندج علاج شى تشربي وجهج صار اصفر

ام عمار : اي والله بنتي ابره الانسولين عفتها بلبيت اكوم ارجع واخذها

غزل : نجي وياج اخاف يصير شى

ام عمار : يحفضج لشبابج ويستر عليج حجايتج كافيه

نهر : لا والله نجي وياك شوفي حالج كوه تمشين اخاف توكعين

بنات وينجن

ريم : اجينه عمه

نهر : هسه نجي ربع ساعه ونجي يله غزوله لزمناها وكومناها كوه وطلعنا اخذنا تكسي من راس الشارع وصلنا لبيتهم قريب بلمنطقه الي بصفنا باوعت مشتمل تعبان من بره طابوك بعده بس داخله رغم بساطه نضيف يلهث من النظافه فتحت الباب بنيه اصغر مني تطلع خامس اعدادي

هاااا ماما تخربطتي

نهر : شويه يمه وخري واركضي جيبي ابرتها

اي هسه وركضت البنيه دخلنا للهول جان بيه قنفات بسيطه وتلفزيون معلك بلحايط وصور اثنين رجال جبير بس مو حيل ولد شاب مدري منو كعدنا واجت البنيه اخذت الابره منها وضربتها

ام عمار : فدوة لايدج الله لايراويكم المرض تعبتكم ويايه

نهر : شنو السالفه احبيبة الدنيا تكاطعت قابل والحجي حيل يحب عمار ويمدح بيه

ام عمار : وين الحنين كون يومي گبل يومه يمه عمااار تعاال لامك لا تلجم گلبها هو ملجوم

غزل : كعدت اباوع على البيت البنيه حلوة ونازكه وتباوع وتبتسم بوجهي

انتي شسمج

اسمي بسمة وانتي

غزل : اسمي غزل

بسمة : اسمج كلش حلو وانتي هم حلوة

غزل : مو بحلاتج حبيبتي

بسمة : عمار بيه شى

غزل : صفنت بوجهه شكول الها واتذكر تواسيله حتى ابري الذمه شفت حالتهم كلش بسيط ومبينين اهله بسطاء حيل بقينا شويه ورجعنا

لكينا ريم ورشا متخبلات لان راح الوكت اخذنا تكسي ورحنا لمول المنصور تكول جهال ومحبوسين وانهدو على الالعاب ريم منا ورشا منا وماما وياهم اني جنت اباوع واتفرج ممهتمه لان بلسويد اشكال المولات شفت وهم مدري ليش بالي يم هذا الاسمة عمار ومنظر امه ميروح من بالي شلون تمسح بفوطتها البيضه وتبجي بحركة

البنات اشترو للجهال وكل وحده اشترت شى معين ريم لابسه بعدها اسود وهم اشترت ملابس سود كملنا طلعتنا واشترينا لفات اكلنا ورجعنا جانو البنات متونسات حيل ومكيفات بس اني بغير عالم بالي ولا يمهم وحتى مشتريت شى

استقبلتنا ماما سليل تعيط ليش مخذتوني وياكم بس ذني يعرفن شلون يقشمرنها كل وحده اشترت شى الها وهم وعدوها يرحون مره ثانيه وهي بسرعه رضت وابتسمت عدها اذا احنا مرتاحات هي من يمها ترتاح

ريم : رجعنا من المول اتصلت مديره المدرسه وكالت تعينتي يمنا تعالي بعد عطلة نص السنه كيفت ردت بس اغير الروتين من حياتي

لبست تراك الجديد مالتي اسود اكيد واجه حسين من الهورن مالته وطفرت تيم يركض ركضت وراه ولزمته من جتفه وشلته وين مولي ويكول بابا عن يعني سياره اششش ماكو

كاام يعيط ورجله يكمز بيها يريد ينزل مني

نهر : عوفي للولد مو شلعتي افاده طفل شرايده منه

ريم : غير ابني شنو شرايده نزلته ولزمته بيدي

نهر : كعد يلعب لو لان اجه حسين

ريم : هو شعنده جاي

نهر : بربج صار شكد مجاي مو ٣ اسابيع من وراج كل ميجي اطفرين وتاخذين تيم وياج ويسمع صريخه لابنج كل مره ويطلع مكسور الخاطر

ريم : وكسرتهم ابني وحره بيه بعدني احجي واني مرخيه لزمتي فلت وركض لحضن حسين

حسين : هلوو هلوو بحبيبي

ريم : تعال تيم

يأشر بجتفه مااا عطت حييل تعاااال

جان يحضن حسين حييل واني تخبلت

نهر : عوفي

حسين : اذا تردين انهزمي انتي لان متعلمه تنهزمين جبانه صايره مو ريم الاوليه الي تواجهه

ريم : بله فلسفه رجاءً وانطيني ابني

حسين : اذا قبل يجيج هاااج وجان يقدمه لحضني جان تيم يعيط ولزم بلوز حسين حييل وراس تيوم على كتفه

ماما تيومي تعال انطيك هميه نستله ومصاصه

ولا يباوع بوجهي

انطيك سيارتك عن وهو ولا ندار

حسين : لتحاولين عنودي على امه من يريد شى يقفل

ريم : ضجت حيل وكتله خليه الك اشبع بيه

وعفته وكعدت على القنفه وافأف

حسين : ليش مااشبع بيه وكااام يبوس ويشم بيه وهذاك السخيف يضحك ومكيف

نهر : تعال عمه اكعد ارتاح

حسين : اجيت اشوفكم واروح ويباوع عليه درت وجهي منه وعدلت الشال وكمت اباوع بتلفوني

نهر : شلونها احوالكم شغلك شلونه

حسين :  الْحٍمَدٍ للـّہ انتم شلونكم مشتاقلكم موووووت ورجع يباوع واني ولا يمه

نهر : شخبار امي شلونها صحتها

ريم : رأسن حجيت متحملت

شبيهه تموتنا كلنا وتسوي ثوابات النا وهي متموت عمر تفكة مال فراعنه

باوع عليه ورفع حاجبه درت وجهي بغرور ورجعت اباوع بتلفوني

حسين : زينه وملتزمه بلعلاج

نهر : وانتم وضعكم شلونه وليش هاي الايام ما جيت اول تالي تتأخر هلكد

حسين : ذيج الايام مشاكل من وره عمه اشواق

نهر : اشواق ليش رجعت للعراق

حسين : لا مرجعت تعرفين بيها سافرت وهنا متعاركة ويه رجلها ومطلكته وماخذه نص املاكه وعازله هي وبتها وابنها وحدهم وكل وين وين يله تسأل عن بيبي بس ذاك اليوم يمكن بيبي كايله الها تنازلت عن كلشي لابويه وهي تخبلت وعياط وصياح وتخابر ابويه بعد اشواق وهدت

ريم : انعام الثانيه ياسبحان الله

حسين : انتي شعليج احجي وياج لو ويه عمه مو ضايجه

ريم :  على اساس شكد تهمني اخباركم

حسين : اذا متهمج اسكتي

ريم : باوعت عليه بنظره حقد وهو ابتسم ودار وجهه على عمه وكعد يكمل سوالفه وهذا تيم يلعب بلمفاتيح مال السياره بحضنه والتلفون

نهر : وتالي شصار

حسين : رايده ورثها وتهدد وسوالف عوجه هوايه

نهر : هسه تجي للعراق

حسين : شيجيبها عمه هي بالمانيا ومستقره من سنين هاي بوخه وهوسه انتي لو شايفه شسوت برجلها مرتاحت اذا اخذت نص املاكه

نهر : من يومها وهي وكحه ولسان

ريم : قابل تورثه من بره منو امها وجنات طلعت على عمتها ماشاء الله العائله المالكة تورث جينات الخباثه بأجود الانواع واكيد بنت اشواق مثل امها

حسين : لا طيبه وحبابه

ريم : باوعت صفح وكتله ليش شمدريك

حسين : مو احجي وياها ومرات نسولف ساعات طويله

ريم : اممم تحجي وياها

حسين : غير بت عمتي قابل حرام

ريم : واني شنو يمه ماعسى تحجي ويه ابليس نفسه شدخلني كمت وعفتهم ودخلت للمطبخ اشرب مي شبيج رعنه ليش ضجتي واذا يحجي وياها هاااا لج اريد اضرب وجهي راشدي لان ضجت مطلعت وبقيت بلمطبخ

شويه وطب وبيده تيم بحجة يشربه مي اخذ الكلاص وشربه واني كاعده على الميز واتصفح فيس بس ابد مو بالي يم الفيس ومرفعت راسي ابد محسيت غير هوا دافي قريب اذني يهمس

حسين : تره بس انتي بلگلب ومحد يدخل بيه محد معشعش بيه بس ريمته

رفعت راسي وخرت  راسي بحركة فجائيه كتله حسين كااافي وكف وابتسم وكاال

حسين : اووووويلي شكد مشتاق لهاي النظره جنت مستعد ادفع عمري واشوفها مره وحده بس

ريم : وكفت على حيلي وعيوني اطك شرار منه يانظره

حسين : الغيره من تعرفين احجي ويه غيرج

ريم : حاولت اتماسك وابين طبيعيه وكتله بهدوء انت من كل عقلك تتوقع اغار عليك تره متهز شعره مني

حسين : هزيت ياريمتي والخلقج هزيت

ريم : علا صوتي وكتله مهزيت وابتعد عني

حسين : هسه اني يمك هاااج واكف ويبوس بتيم ويشم بخدوده

ريم : انطيني ابني

حسين : تروح لماما مقبل شفتي حتى تيومي يريدني

ريم : شووو تعااال وجريته حيييل وهذا عاااط ابتسم حسين واخذه مني وجان يكول بهدوء تعال حبيبي امك شالعه گلبك وگلبي بس تستاهل الصبر راضي على كلشي منها

ريم : تقربت منه وكتله شتريد مني هاااا شتريد

حسين : مااريد شى لان انتي الي لهذا مااريد شى مجرد وكت وتصيرين على اسمي وحلالي

ريم : شنو هاي الثقه المبالغ بيها بابا انت انتهيت نسيتك واذا اسلم عليك واكفه وياك لان ابن عمي

حسين : هسه اني كلت غير شى ساكت وصابر

ريم : راح تصبر العمر كله ومتحصل الي تريده

حسين : عااادي اصبر

ريم : بس خلي اكولك شى وحطه بالك عمري مراح اصير الك تدري ليش

حسين : ليش بله

ريم : بسبب اهلك اني جنت بنيه ومارضو بيه وانت مشيت وره كلامهم هسه تريدني واني ارمله وصاحبة جاهل من كل عقلك انت جرب روح كول الهم اذا ميضربوك طلقه مااتسمى ريم

حسين : اقنعهم

ريم : متكدر وجربت قبل ومكدرت وهسه الوضع اصعب وهم نسيت اهم شغله انت متفيدني حسين واني مااتزوج ولا افكر بلزواج عوفي لخاطر كل يوم جمعني بيك ولتحاول تستغل ابني وتعلقه بيك هذا طفل ويتيم شنو ذنبه ينتظرك اني انتظرت ومحصلت شى منك ومكنت كد كلمتك لتخلي ابني ينتظرك ويتعلق بوهم وتحسسه انت ابوه يعني تعلق ابني بيك كعد يدمره ويدمرني

حسين : والله مااريد إذيتكم ريم اني بعدني احبج ويوم عن يوم يزيد حبي الج وتعلقي بيج وتمسكي بيج مرايد بس فرصه ثانيه اثبتلج اني شنو

ريم : واني ماانطي فرصه واكولها للمره المليون عوفني بحالي وانساني وعيش حياتك وهاي بت عمتك روح اخطبها وخلي تسحبك يمها واخلص منك

حسين : لهاي الدرجه مخنوكه مني

ريم : فوك متتصور ومااريد ابني يصير ضحيه لوعودك خلي الطفل يتعلم على وضعه الطبيعي لا كل متجي حتى ميتقبل وجودي وروحه تصير بيك عوفنا رحمه لكل عزيز عندك

حسين : تيومي حبيبي روح لماما وانطانياه وكاام يبجي عطت بيه اششش كاافي باسه من خده وگلي

حسين : على كيفج وياااه وهذا الخريط مالتج ميصرفلي هسه وضعج ونفسيتج ممتقبله اي شى مني الي اريده منج لتأذين تيم هذا طفل والله ممستغله احبة على محبتج بگلبي يمكن من كثر مااحبج اي شى منج او تحبي تصير روحي بيه مو عاد ابنج

اخليج براحتج ومااضغط عليج لحد متحسين نسيتي الي سويته گبل وبإشاره منج راح تشوفين شسوي لخاطرج

ريم : مااريد بس تتركني اني وابني

حسين : حلم ابليس بلجنه تركتج مره وعضيت اصبع ندم ولهسه اعضه لايلدغ المؤمن من الجحر مرتين ريمتي

ريم : يعني شنو

حسين :يعني الريم ريمتي ومااعوفها

ريم : احجي هندي

حسين : احجي للصبح او خلي اروح اعرفج هسه تنهدين ومااكدر اسكتج مو لسان رشاشه وتأخرت المهم شفتج وشميت ريحت تيومي

باسه وطلع

ريم : اخذت تيم ولكيت عمه تگلب بالاخبار كتلها ليش مجيتي

نهر : كاعد اباوع اخبار وهو ابن عمج قابل غريب

ريم : بعد ماانزل لو الدنيا تنكلب ولا اشوفه

نهر : بكيفج يمه براحتج صعدت عصبيه حتً تيم ردت اركعه بلكاع كوه سكته وقشمرته

غزل : مر يومين وفكري انشغل حيل ياربي ليش هذا الولد ابالي شعليه بيه مات عاش اني شنو فوك سوايته

جنت اتوضى وعيوني كلها نعاس وبارد الجو الصلاه تكول جهاد بذاك الوكت شفت تلفوني بيه اضائه اني طبعي من انام اسوي صامت اجيت على التلفون لكيته يدك ورقم غريب هذا منو يتصل بلفجر باوعت ريم نايمه وحاضنه تيم لان اني كمت انام بلغرفه يم ريم والغرفه الثانيه رشا وبتها وماما

بقيت خايفه ومتردده اجاوب انكطع كلت اخلي ريم تجاوب اكعدها من النوم وسكت كمت افرك بيدي من القلق منو دك الفجر وشويه ورجع دك اخذت التلفون ونزلت للاستقبال وسديت الباب حتى محد يسمع فتحت الخط ومحجيت

جان اسمع صوت ولد بهدوء يكول الووو

الووو

حجيت برجفه هذا منو كتله منوو

غزل اني عمار

فتحت عيني وكمت اروح واجي حيل توترت هااا عمار وينك امك قلقه عليك

عمار : امي اجتكم

غزل : اي وتخربطت وبالها حيل يمك بيك شى ليش متخابرها

عمار : خطوط مكطوعه ومااحصلها صار كم يوم بس خابرتها البارحه وطمنتها

غزل : اي خطيه حيل منهاره عليك

عمار : مكالت اجتكم

غزل : اجت وتخربطت

عمار : اعرف بيها تتأذه علمودي

غزل : اذا تعرف ليش ما رجعت

عمار : انحصرنا هناك اني خابرتج وادعي الله احصلج لسبب واحد

غزل : شنوو

عمار : اليوم هجوم شرس من الدواعش ومواجهات قويه وانطينا شهداء هوايه واني كمت اقاتل وياهم لان العدد قل بهذا الموقع وبيني وبين الموت شعره الاريده منج يابنت الاجاويد بس تبريني الذمه والله اقاتل واكول ربي طول بعمري لحد متبريني ذنبج جبير يابنت الناس وخايف حتى ريح الجنه مااشمها لان شفت سترج واذا متت حتى اخاف ماانحسب شهيد ابريني الذمه وخليني اقابل وجهه كريم بنظافه ومحامل ذنبج

غزل : نزلت دمعتي واتخيل شلون يجيبوه ملفوف بعلم مثل الي نشوفهم بلفيس وشلون امه تنهار واخته تنتهي محسيت بنفسي من القهر اكول اذا تريد ترتاح وتسمعها مني اله ترجع سالم

عمار : شنو يعني

غزل : يعني تعيش عمار ترجع لاهلك ولامك واختك وعد مني يوم مترجع اكولها الك ومن كل گلبي ابريك

عمار : غزل : اذا متت

غزل : لتكمل متموت ان شاء الله ترجع واطمني وتكولي ابريني الذمه

عمار : ليش تسوين هيج ابريني الذمه هسه وخليني مرتاح

غزل : ماابريك اله ترجع لبيتكم

عمار : اذا اريد اعيش هسه حتى بس اسمعها منج

غزل : تعااال وتسمعها وانقطع الاتصال كعدت ابجي مااعرف انقهرت على شبابه او على اهله وكلامي ردته حافز اله حتى يعيش

صعدت ركض ومتوضايه وصليت وقريت قران ورفعت ايدي ادعيله يكولون دعاء الغريب مستجاب يارب استجب دعائي ورجع عمار امها شسمها اي تذكرت من كالت ورجع عمار ابن سعاد سالم غانم لحضن اهله ورجع كلمن بلحشد والجيش لاهلهم بقيت اسبح تسبيحات ونذرت صيام ٣ ايام اذا رجع

بقيت يومين اتأمل اسمع خبر منه والليل كله صافنه على التلفون اكول بلكت يتصل وماكو ادعيله من گلبي صارت سولتي بلدعاء اله لحد مادك تلفوني عصريه رقم غريب ثاني رفعته ومحجيت وسمعت صوته الهادئ يكول رجعت لخاطر اسمعها منج

يتبع .....

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الواحد_والاربعون

من اسولف ضیم هجرک للعصافیر

تحط یم بابــنه وما تقبل اتطــــــــیر

صار اســــنین حلمک ساکن العین

اجیب منین یوسف ینطي تفسیـــــر

نهر شوگــــک یبس ما ظل اثر بي

وماتت بالهجر کل النواعـیــــــــــــــر

عســــــــاها ابَخت کلمن گلک اتروح

وعســــاها اتصیبه دعوات المکاسیر

مو ایـــــــــــوب طبعي واصبر ابهاي

صرت شجره وعلي فزعت مناشیر

تفرهد کلشي بیه الحــیل والحـــــال

ابشرک ثمر زرعي ابلا نواطـــــــــیر

تعال و شـــــوف حالي ایبچي جلمود

مــثل ام الغریج وتشکــــــــي للبیر

مثل ضـــــایع ابوادي وکومة اذیاب

وین ایروح گلـــــــي ابیا جهه ایسیر؟

الصارن بیـــــک کلهن صارن اویاي

بس البیــــــــه ما ظن عندک ایصیر؛

بقيت يومين اتأمل اسمع خبر منه والليل كله صافنه على التلفون اكول بلكت يتصل وماكو ادعيله من گلبي صارت سولتي بلدعاء اله لحد مادك تلفوني عصريه رقم غريب ثاني رفعته ومحجيت وسمعت صوته الهادئ يكول رجعت لخاطر اسمعها منج

ابتسمت وعرفت عمار

الْحٍمَدٍ للـّہ على سلامتك

عمار : الله يسلمج وصلت قبل شويه

وكلت اتصل بيج

غزل : مبري الذمه والله يطول بعمرك ويحفظك لاهلك

عمار : شكراً مقصرتي ورحمه الله والديكم كالت امي شلون جبتوها ومعفتوها وحدها

غزل : شلون نعوفها جانت خطيه حيل منهاره عليك وخايفه هسه شلونها

عمار : زينه وفرحانه برجعتي

غزل : ان شاء الله دوم الفرح اروح اني

عمار : اخذي راحتج مع السلامه

غزل : مع السلامة سديته منه وحمدت الله لان رجع تالي تذكرت خرب شجاني نذرت صيام هسه بيها عليها اني يله اصوم ماطول الجو بارد ميتعب

مرت الايام وجنت يومياً اشوف عمار الصبح الكاه من بعيد يباوع على اتجاه بيتنا ومن اصعد بلسياره يبقى يباوع مرات اسوي نفسي مشفته ومرات يصير وجهي بوجهه من نفوت لا ارادياً ابتسم

اليوم كاعدين نسوي ثواب السنويه الثانيه لزوج ريم وبتها نطبخ من الصبح ومخبوصين وكالت عمه العمال خطيه اثوب كثرو الاكل الهم سوينا صينيتين اكل وكملناهم وخابرنا على بابا وهو خابر عمار فتحت الباب اله من شافني ابتسم وسلم

عمار : السلام عليكم

غزل : وعليكم السلام

عمار : الحجي خابرني

غزل : اي كمل الاكل الصواني كبار تكدر تدخل

عمار : بس سويلي درب وادخل

غزل : مااشي سويت وهو طب اخذ اول صينيه بقيت اباوع عليه من بعيد

نهر : يمه غزل تعالي ليش ضاله واكفه بلباب

غزل : هااا مو اخاف عمار يرجع ياخذ الصينيه الثانيه

نهر : خوش انتظري لعد ومن يروح سدي الباب وراج

غزل : مااشي اجه من بعيد اباوع عليه شون يمشي دوم اشوفه لابس اسود بأسود

عمار : ان شاء الله ثواب واصل

غزل :امين  محتاجين شى بعد

عمار : سلامتج ادخلي وسدي الباب لتبقين واكفه

غزل : لا مااوكف

عمار : واذا عدتكم توزيع اني اوزع لطلعين انتي

غزل : اصلاً عمه تطلع مو اني

عمار : زين

ورجع شال الصينيه الثانيه واشرلي سدي الباب جان كل ميفوت من يمي اخجل هدوئه ورزانته تخليني لا ارادياً اباوع عليه بس بدون ميحس

ريم : وينج غزل

غزل : اجيت سديت الباب وراه وبدينا نصب للمنطقه

نهر : اني اطلع اوزع وانطني انتن

ريم : مااشي عمه

رشا : شبيج ريم

ريم : گلبي يوجعني البارحه احلم بنتي تكولي تعالي اشتاقيتلج

رشا : يمه شلون تكول وهي صغيره حيل متحجي من ماتت

ريم : من شفتها جانت بعمر فروحه اسم الله عليها بال ٧ سنين تقريباً

رشا : ياستار ان شاء الله ماكو شى وهاي اليوم نسوي ثواب الها ولابوها

ريم : ولعمتي تلاثتهم بأسمهم صار الثواب

رشا : جعله واصل

اكو وحده صافنه وبالها مو يمنا هييي وين بالج

غزل : يمكم

ريم : شكلنه بله

غزل : ماادري

ريم : لا هواي بالج يمنا صاير شى وضعج معاجبني تتصفنين هوايه

غزل : مابيه اذا كملتو صيحوني اغسل الغراض اروح اقرالي شويه

طفرت منهن اخاف من نظراتهن وخاصه اني مفضوحه كدامهن مااكدر اضم

ريم : اختج مو راحه

رشا : هههه نفس احساسي صايره تتصفن هوايه

ريم : بس لا وكعت بلبير

رشا : يابير

ريم : بير المصخم كله طيحان حظ الي وكعنا بيه ومحصلنه منه بس القهر

رشا : قصدج تحب

ريم : ممبين عليها

رشا : كولي ياالله هاي وجهه حب خطيه مخلصتها تقرا وكاعده بغرفتها لو تلعب ويه الجهال

ريم : اكص ايدي واذبها لاول چلب سلوكي اشوفه بلشارع اذا مو هاي البنيه تحب وتفكر

رشا : خلي نكمل وعوفي محقق كونان الي بداخلج

نهر : هاااا يمعودات رحت واجيت وانتن بعدجن مصابات

ريم : كملنا عمه هاااج

اليوم ثواب بنتي ورجلي السنه الثانيه الهم جنت اصب الاكل والغصه بروحي واكول متوقعت بيوم اسويلهم ثواب جنت اتمنى هسه اسويلهم الغدا ننجمع كلنا سويه تيومي كبر ويتحرك هوايه والي مضوجني تعلقه بحسين حتى مرات يبجي ويريده شكد حاولت امنعه مكدرت وحسين عناد بيه ياخذه ويفره ويشتريله وصلت مرحله حتى من ياخذه مااكله لا لان ميفيد يبقى يعيط ويبجي لحد ميجي حسين وياخذه يله يسكت داومت بلمدرسه الاهليه معلمه حاسوب بلبدايه دخت من التدريس الجهال صغار وكلها تعيط واني لو بيدي اركع راس براس من الوكاحه بس شسوي ممنوع اضطر اسكت واتحملهم دوامي عباره عن تقضيه وقت مردت ابقى لان التفكير تعبني واكل من صحتي اباوع صايره نص بشر من الضعف مرات ايدي لا ارادياً تروح لمكان البكع الباقيه اكثر الطكع راحت خاصه الصغار بس بقت العميقه وهذا بسبب التزامي بلخبطات الي جان يسويها سامر الله يرحمه بس اكو اماكن مراحت مع الاسف بس تعلمت عليهن صارن مني حتى ماافكر بيهن وحتى الناس احسها بدت تتعود على شگلي مو مثل قبل تشمأز يمكن بسبب الفيس ومواقع التواصل الصارت كامو يعرفون هذا ميعدي وتصرفاتهم بالابتعاد تجرح لهذا كامو يحاولون ميحسسون المقابل ولا يجرحون بس هم اكو مجموعه بعدها على فكرها القديم تحسسك انت شى منبوذ ممنوع الاقتراب منه ذوله بلذات كمت اتجنب حتى السلام عليهم

غزل : رجعت للدوام وكل يوم اشوف عمار الصبح ومرات مااشوفه لان يروح للمطعم وعمو سجاد بمكانه هسه احنا بنهايه شهر الرابع ٢٠١٦ حايره بلدوام والقرايه بس مرات يجي بالي نظراته اكول ليش هيج يباوعلي ومرات احسه ينتظرني معقوله عينه عليه وارجع اكول هاي شبيج غزل الولد صار موقف بينا وانتهى يجوز فضول يباوعلي

نظرات بسيطه بينا وادير وجهي مرات اكول عيب شيكول عليج لتنسين نفسج انتي مره مطلقه وبت الحجي طه ومرات اكول اني شمسويه بس اباوع حتى استحي ابقي عيني كل الوكت عليه

جنت اسأل نفسي هواي اسأله من شاف صورتي اكيد لعبت نفسه واكيد استخطاني

زين رقمي منين جابه واتصل هذا الرقم اشتريته من اجيت للعراق وارجع انفض الافكار واكعد اقرا واكول انسي صار شهرين على هاي الشغله طلعيها من بالج

رشا : كاعده اعلم فروحه على الاحرف ودك تلفوني واتساب جاوبت سهير سلمت عليها من تتصل لازم اسألها مو بيدي الفضول يگتلني اضافه هو هاي الفتره ولا سأل عن بنته وبعد مسلمت سألتها شخبارهم

سهير : خلي يولون شسوين بأخبارهم

رشا : مبين اكو شى جديد واله متحجين هيج شى كولي سهير شصاير

سهير : ماكو شى رشاوي ليضل بالج

رشا : بروح امج شكوو

سهير : اهووو جم مره كتلج لتحلفيني بيها

رشا : احجي حلفتج بعد

سهير : جنات حامل

رشا : هااا شنو بزون فوكه فوكه

سهير : والله ياام فروحه مااعرف على الاربعين حبلت شافتها اختي جايه من المستوصف الصحي وسألتها لان بطنها طالعه

رشا : ليش شكد عليها

سهير : ٤ اشهر وراح اطب بلخامس

رشا : سكتت واني خنجر بگلبي واباوع على بتي ردت اكول الها شفتي ابوج خلف ونساج

سهير : الوو رشا شو ساكته

رشا : ماكو شى سلامتج خلي اشوف عمتي شتريد صاحتني بعدين نسولف سديته منها والدمعه كوه لازمتها يعني شنو السويته حتى حياتي تنهدم وحياتها تعمر ومكان الطفل راح يصير طفلين وذولاك يعيشون ويه ابوهم وبنتي تنحرم منه

شكد حاقده عليه حقدت اكثر كام گلبي ينقبض واباوع على السما كل مااطلع صبح ظهر ليل شوكت مااطلع بگلبي اكول اريد عدلك يارب

خبر حمل جنات إذاني ولو تعلمت على الصدمات منهم كل فتره اسمع خبر وانهز كمت احس مراح اشوف بيهم يوم وراح ابقى دوم الطرف الخسران

اداوم بلمدرسه وبنتي بيدي اروح واجي وادرس وعايشه حياتي بس مااجذب فكري كله يمهم بعدها بأسبوع دك شعلان مجاوبت بقيت افكر شسوي لزمت فروحه وكتلها

ماما فروحه تردين اب جديد

فرح : وبابا

رشا : الي عندي بابا احلى من شعلان وراح يحبج ويجيبلج هدايا

فرح : اني اريد بابا

رشا : بس بابا الجديد احسن وهواي يحبج وياخذج للمراجيح ويشتريلج لعابات هوايه

فرح : اريد اروح للمراجيح بقيت اعيد اكثر من مره سالفه بابا الجديد

رجع دك شعلان انطيت التلفون لفرح وتحجي ويه ابوها وهاي طفله يطبع بسرعه بالها جان تكوله راح يجي بابا الجديد ويوديني للمراجيح

اسمعه يكول الها يابابا جديد منين  سمعتي هذا الحجي

وفرحه تكله من ماما

سمعته يكول انطيها التلفون لماما هي انطتنياه ابتسمت بهدوء وحجيت بثقه وكلت الووو

جان متوتر حيل ويحجي

شعلان : شلونج رشا

رشا : بخير شتريد

شعلان : شنو هذا الي تكوله فرح

رشا : شكالت مجنت يمها هسه دخلت

شعلان : شنو بابا جديد مفهمت

رشا : هااا هيج سوالف جهال لتاخذ بالك

شعلان : احجي رشا صاير شى مااعرفه

رشا : وانت شعليك اذا صار شى او مصار

شعلان : تره احجي اگلب بغداد على راسج وراس الخلفج انخطبتي موو احجي وعاط بصوت عالي

رشا : ابتسمت بهدوء وكتله وانت شعليك اتزوج انخطب اسافر مره وحرت نفسي لتدخل رجاءً

شعلان : سمعي لج والعباس ابوفاضل يارشا اذا سمعت عندج شى او انخطبتي متلومين اله نفسج احرك الدنيا على راسج وحتى فرح اخذها منج بعدج مشايفه خبالاتي

رشا : لتهدد تعرف بيه مااخاف

شعلان : استغفر الله ربي واتوب اليه شصاير رشا تره هسه اجي من الكوت واسويها عزه عليج

رشا : والله هاي حلوة ابن عمي ابن خالي انت شعلييييك

شعلان : مااشي جاي باجر واريد اشوف يامره تكول انت شعليك

رشا : سديته بوجهه وطفيت الموبايل وبست فرح الصافنه بوجهي

ريم : هااا خير وجهج بيه شى

رشا : وحجيت لريم

ريم : ليش هيجي سويتي

رشا : ماادري ردت بس احرك گلبه

ريم : كعد تلعبين بلنار انتي مو كلتي شعلان صفحه وانتهت

رشا : كل مااسمع شلون حياته ماشية هو وذيج الگلبه افور لو بيدي اشرب من دمهم

ريم : راح تخلصين عمرج هيج

رشا : من خرب بلعمر الخلصته تعلعل

ريم : بعدج تحبي موو

رشا : ياحب فدوة لعمرج ليش الي سواه شعلان يخلي بگلبي حب اله اسكتي ريم رحمه لبنتج

ريم : لتلعبين بلنار رشا تره هذا واحد خبل وراح يسويلج مشاكل انتي في غنى عنها

رشا : امنيتي ادمر حياته اعيشه واعيشها الي ضكته

ريم : والله اني هم مثلج بس مابيدنا شى افضل شى اتركي مرات ننتظر شى وميجينا وبس ننساه يجي ركض

رشا : تدرين هي حامل مره ثانيه

ريم : هاي تريد اطب مقوله اهلنا القديمه

رشا : يامقوله

ريم : والله نسيت

رشا : ثول عود تتفلسف

ريم : ولج اوكفي بس معناها تخلف هوايه حتى تلزم الرجال

رشا : لو هو الرجال تلزمه خلفه

ريم : والله لو تشده بزنجيل وحبل وتربطه بدبابه ويريد يخون يخون تعرفين شلون

رشا : شلووون

ريم : يغمز للرايحه والجايه

رشا : ههههه اي والله

ريم : اكوم على تيم

رشا : ثاني يوم داومت وشفت سياره شعلان واكفه يم المدرسه جان يشخطها وكفني

شعلان : اصعدي

رشا : منا الناس شيكول

شعلان : لتخليني اسبها كلها من الصبح اصعدي

رشا : مااصعد ومشيت خطوه

شعلان : والله اذا ماصعدتي هسه اسحلج من ايدج واصعدج كوه واريد اشوف يارجال يوكفني

رشا : عفيه عيب ليشوفني احد

شعلان : اصعدي وجفي الشر ماطول قليل طلاب اصعدي يله

رشا : صعدت وسديت الباب شخط السياره وساق سريع

تره راح نندعم

شعلان : اليوم احرك اهل اهلج تردين تتزوجين مو وتجيبين اب لبنتي

رشا : يابنتك انت مصدك نفسك شوف صار شكد متدري بنتك وحايرلي بمرتك وابنك

شعلان : صارتلي ظروف بشغلي ومكدرت ازورها

رشا : وكف السياره راح تدعمنا يمعود

شعلان : يطبج طوب

رشا : لتغلط شرايد مني هااا شرايد طلاك واطلكنا وصار بحدود السنتين وكلمن عاش حياته وزواج وانت اتزوجت شتريد مني 

وكف السياره بفرع هادئ وكاال

ارجعيلي

رشا : طكيتها بضحكه خليته يشيط اكثر ماهو شايط

شعلان : وجع شنو حجيت نكته

رشا : والله هاي احلى من النكته انت من ياطينه مصنوع شنو هاي الصلافه الي انت بيها هم الك عين وتريدني ارجعلك زين ومرتك العفيفه شسويلها

شعلان : انتي بيت وهي بيت

رشا : هااا يعني مطلكها

شعلان : مااكدر عندي ولد منها وهسه حامل

رشا : اذا هيج حياتك مستقره شتريد مني اني هم اريد اتزوج رجال واعيش بسده واخلص حياتي وياه رجال يستاهلني

شعلان : اذا حجيتي هيج بعد يارشا متلومين اله نفسج ادفنج وانتي عايشة والخلقج ادفنج

رشا : هو هذا الفالح بيه التهديد بله اسكت شبعت منك بس حجي  سكتت وهو سكت حجيت بصوت هادئ وبداخلي غصه وكتله

جنت احبك لدرجه مستعده اضحي بنفسي في سبيل اخلف الك ولد جنت اخاف بيوم اترك حبايه من علاجي لتخربط وضعي والدكتوره تأخرني اكثر جنت من احس بتعب اكول يهون لعيونه هذا حبيبي حتى اذا متت المهم يصير عنده ولد اكوم واكعد العن الحظ الي خله گلبي هيج حاله وبعدين استغفر واكول كلشي قسمه ومن اشوفك شلون تحبني وتخاف عليه احسد روحي عليك واصر اكثر اعالج نفسي حتى احبل واريحك واخلصك من كلمة ليش ماعندك ولد تعرف وصلت مرحله بحبك اشوفك اعز من اهلي صرت كلشي اليه جنت انام واحضنك واني كلي امان امنت بيك لدرجه اتحدى الناس والدنيا كلها واكول شعلان يحبني شعلان متمسك بيه شعلان يخاف علية اكثر من روحه

شعلان : والله احبج اكثر من روحي

رشا : رجعت راسي على الكشن مال السياره واحجي بهدوء ياحب وانت خنتني ياحب وانت جبتها بفرشتي ياحب وانت تزوجتها وخليتها بيتي هسه على الاقل بغير بيت لهاي الدرجه اني جنت لاشى بحياتك بحيث بسرعه بدلتني باوعت عليه وكتله من تنام بصفها وتحضنها هم تتذكرني من تشمها هم تشم ريحتي من تصبح بوجهه متتذكر من ابوسك واصحيك كله عندك انمسح

شعلان : بيش احلف الج حتى تصدكين

رشا : لتحلف لان مااصدك

شعلان : بس اسمعيني والله صارت غلطه غلطت وطاح حظي انغريت بسوالفها وحركاتها وحجي هند عنها خبلتني وهي تكول اذا تحب مرتك لتخليها تحبل تره تموت حافظ عليها واتزوج بدون متدري واكيد متشك بت عمها وهند اخذت كلمة من جنات متحجي ابد وجنات هادئه وماعدها احد وماوراها مشاكل واهل وعركات واذا تزوجتها تحبل وبعد ماالح عليج بسالفه الطفل والاهم من هذا جنات راضيه تعيش ويايه بدون محد يدري مو مثل مااخطب غير وحده يعني سولي الحياه ورديه وكلشي سهل و الشيطان غطى على عيني ومن صحيت لكيت نفسي خسران كلشي

رشا : المصيبه عذرك اقبح من ذنبك اذا انت انغريت بسوالفها جان اجيت وكتلي تره هيج ديصير تره بديت اضعف واني احبج ومااريد اخسرج ساعديني يامرتي ساعديني ياام بنتي تره الشيطان يلعب براسي تلاحكي لرجلج ولبيتج بس انت عجبتك ودخلت دماغك لان الخيانه بدمك عيونك وصخه ونفسيتك اوصخ تدنى نفسك على خطار عندك  وذيج المره مو كلت جنات مقبلت  اريد افهم الصح وين هسه تكول غرتني وضعفت من وره حركاتها والي قبلها  تكول كتلها وكوه قبلت ارسى على بر

شعلان : اني تعبان بلياج رشا والله حتى احلام احلم بيج تدعين عليه

رشا : اني ماادعي عليكم اني مسلمتكم انت وياها بيد المنتقم الجبار هو ياخذ حقي منكم

شعلان : مطالب شى منج بس سامحيني وداعت فرح اعيشج بيت تحلم كل مره بيه وادللج  دلال الكل تحسدج عليه واحطج على راسي ومستعد حتى مااروح الها اله انتي تقبلين واني مو اخر رجال متزوج اثنين نسوان يعني مسويت الحرام ارجعي رشا ميت عليج اكوم واكعد وانتي بالي ومن حسيت واحد ياخذج مني عقلي طار مدري شلون وصلت لبغداد تره حياتي ضايعه بدونج والله خيالج احسه وياي وين مااروح

رشا : وجنات

شعلان : غلطه ودفعت ثمنها والي رابطني بيها هسه الجهال حتى مالي دخل بيها روحي وعقلي وهذا ابن السطعش گلب ويأشر على گلبه يلوب عليج انتي رويحتي وماكو واحد يعيش بدون رويحته

رشا : جريت نفس بهدوء وكتله شايف هاي سما الله لو تصير كااع ماارجعلك ياشعلان

شعلان : جرحج مابرد نارج ماطفت ليش هيج گلبج اسود غلطت واجيت اعترف ومستعد ابوس ايدج وراسج وعلى قول لسانج حطي شروطج بس ارجعي انتظرت كل هاي المده كلت عسى ولعل تهدأ تفكر تحن اي شى يبدر منج يحسسني بعدج ترديني تره اني مكعد اعيش مثل الاوادم كلشي بلبيت يذكرني بيج لج مرات اصيح الها رشا وماادري بروحي اغلط بالاسم كمت اهج من البيت حتى ليذكرني بيج وتالي الليل اجي  لتشوفيني اجي مرتاح وكاشخ الكم كل الاسوي لخاطر بس اشوفج احسه عيد حتى شوفت عينج انحرمت منها من كمت اجي لفرح ومطلعين

اخذتي حقج مني مربع وعايش هسه ايام لعدوي مااتمناها حتى شغلي الجان يفور من الرزق انضرب اكثر من مره وخسرت كومه فلوس  من رحتي اخذتي الخير كله وياج والله ايام سوده مرت عليه جنت ادور بيها حضنج تتذكرين من اتعب من الشغل اشمر نفسي على صدرج واكولج مسديلي راسي تعبان جنت اذب همومي كلها واكوم هسه ادور على صدرج وحنيتج

رشا : مرتك موجوده

شعلان : محد ياخذ مكانج لو ١٠ نسوان اتزوج محد ياخذ مكانج

رشا : سؤال هسه مو صار عندك ولد شنو التغير بحياتك حسب كلامك عايش بجحيم زين مو ولد وصار عندك شسوي بيه وبفرح بعد

شعلان : احبج وحق القران احبج ومايوم غبتي عن بالي اكلها انام واكعد وفكري وياج صحيح صار ولد عندي وفرحت اول ايام حالي حال اي رجال يصير عنده طفل بس كلها ساعات ورجعت ادور حضنج ورجعت ادور صوتج وضحكتج متعرفين شصاير بيه لو احجي لباجر ميكفي اشرح ربع التعب والقهر الي احسه من انتي ماكو بحياتي لا مره ولا ولد ولا فلوس عوضني عن لحظه عشتها بحضنج

رشا : اباوع على عيونه يريد يبجي كتله تدري هسه لو تحترك كدامي مااتأذه عليك

شعلان : لهاي الدرجه كارهتني وماكو بگلبج رحمه ولا ذكرى حلوة تشفعلي بگلبج

رشا :تدري ليش وكف گلبي متحمل شوفتكم سوه لان جنت انت نبضه ومن شفت وضعك انت وياها بفرشتي گلبي طرد النبض منه ومن صحيت شطبتك تماماً من گلبي امشي رجعني لحياتك وهاي اخر مره اسمحلك تدخل بيها وتجي بهاي الطريقه تصعدني هاي المره افوتها مره الثانيه اخليها تصير دم

شعلان : لتتزوجين ومااتعرضلج

رشا : بكيفي اتزوج احب مالك حكم عليه

شعلان : انتي مره وطالعه من ظهر رجال وسويها يارشا لشوفج ايام سوده

رشا :صير كد كلامك جبتها ويايه ياتهدد ياتحلف واثنين بس حجي رجعني للمدرسه وبعد مااريد اشوف وجهك

رجع شغل السياره والطريق كله ينفخ ويفتخ بدكم الدشداشه اختنك اعرف بيه وصلني  ومن نزلت ركعت باب السياره حييل ومنداريت ورايه يمكن توسله خلاني شويه ارتاح

دخلت والمديره استغربت من تأخيري وكتلها ظرف صار عندي جنت خجلانه لا احد شافني من صعدت وكلت هذا مخبل اذا استفزه بعد اخاف يفضحني ماانطخ بيه احسن وارجع مثل الاول لا ارى القرد ولا القرد يراني

رجعت للبيت لكيت عمه نهر تلبس بعبايتها

هااا عمه وين

نهر : عينج على الجدر شويه واجي

رشا : حسيتها مو طبيعيه شنو الصاير اكو شى شو تلهثين ومستعجله

نهر : ماكو شى يمه كتلج بس عينج على الجدر بس تثخن المركة طفيها

رشا : مااشي روحي الله وياج

طلعت تركض بقيت صافنه شصاير صحت ريم

ريم : هااا الله يساعدج

رشا : رجعتي عبالي بعدج بلدوام

ريم : اليوم ماعندي دروس هوايه وين عمه

رشا : هو ردت اسألج هسه دخلت ولكيتها تلبس عبايتها وضعها مو طبيعي

ريم : يجوز نست تشتري طماطه لو خيار وركضت

رشا : لا مااتوقع

ريم : شلونه دوامج اليوم

رشا : قنابل

ريم : شكوو خير

رشا : شفت شعلان اليوم

ريم : شجابه مشعول

رشا : خلي ابدل واجيج

ريم : واني انتظر لحد متبدلين اجي وياج

نهر : جنت كاعده بلمطبخ ومنتظره يكمل واطفي الجدوره دك تلفوني رقم غريب جاوبت اني ماادير بال ياهو الي يدك اجاوبه كلت الوو منوو سمعت صوتها وتحجي بثكل

انعام : تعالي اريدج

نهر : منو

انعام : اكو غيري انعام

نهر : كمت من مكاني مستغربه هااا يوم بيج شى

انعام : تعالي هسه اريدج

نهر : بيج شى

انعام : تعالي كتلج ومااريد احد يعرف

نهر : صار دقايق واني يمج لبست العبايه واخذت تلفوني والجزدان وشفت رشا وصيتها وطلعت امشي سريع لو بيدي اطير الها اخاف صاير شى بيها ومحتاجتني رقمي منين جابته هسه وكت هاي الاسئله المهم رادتني ركبت بربع لراس شارعهم كيه ونزلت لان خفت اتأخر تمشيت وصلت للبيت صار شكد مجايه اووف دكيت الباب وفتحته نوريه

نوريه : هلو نهر تعالي ادخلي

نهر : امي بيها شى

نوريه : لا مابيها بس عدنا حجايه وياج

نهر : شصاير تره اجيت ركض حتى النفس كوه اجره

نوريه : هاااج مي اشربي

نهر : شربت المي واخذت شويه بيدي وغسلت وجهي

نوريه : هااج هذا كلينكس

نهر : ميحتاج هو ينشف تستحيف تنطيني خاولي امسح بيه وجهي اووف والله وكت سكتت وكتلها وينها امي

نوريه : تعالي طبي جوه

طبيت لغرفتها ياريحه ابويه احسها بكل حايط طبيت ولكيتها كاعده بلجربايه والسبحه بيدها حلكها معوج شويه بس وضعها احسن من قبل

انعام : اجيتي

نهر : بيج شى يمه محتاجه شى

نوريه : اليوم دزينه عليج حتى تسوينا حل

نهر : بشنو

انعام : (تحجي على كيفها) شوفي نهر اني خلصت عمري اتكرضم من وره اخوج الگلب

نهر : استغفر الله هم رجعنا

انعام : خليني اكمل

نهر : كملي بله

انعام : معودت خلصت منه ومن مصايبه هلمره بناته يحومن علينا

نهر : شجاب البنات بلنص

نوريه : ريم

نهر : شبيهه

نوريه : بعدوها عن ابني ميصير هيج يعني لزكه خوما لزكه بس لو افهم شمسوين للولد متخافون الله تسون سحوره اله وتربطنه

نهر : اوكفي بله خلي افهم لتاخذينا بصوتج العالي

انعام : صار يومين مطاحن بلبيت من وره البكعه بت اخوج اني كلت انقلعت اتزوجت وخلصنا منها تجي هسه وره متترمل تحومي على الولد

نهر : اريد افهم شصاير ويامطاحن

نوريه : اجانه اول البارحه حسين ويريد ريم يتزوجها وخله ابوه يشب ويطفه والله زوهرنا صار يومين يعني هي تزوجت وراحت وترملت وعدها ولد متنجب وتكعد تربي ابنها احسن ما ضاله تفتر على الولد الله يقبلها ازوج ابني وحيدي من ارمله وعدها طفل وبكعه ليش بله خلصو البنات هاي البنات الضالات يتمنن اشاره منه وازوجه اغاتها شنو مجبوريتنا البارحه الاب طرد ابنه من وراكم ومن وره بتكم

نهر : تره ريم متريده لابنج ولا بالها واكثر من مره يحاول وياها وهي ترفضه وحتى مرات متطلع اله

انعام : هاي السوالف السخيفه ودفاعج عن بنات سندس بطليها هاي البكعه اذا مجازت من حسين اشهرها بلمنطقه واخلي سمعتها على كل لسان لتشوفيني وكعت ولج اني انعام بعدني بحيلي

نوريه : وحتى لو عمتي مريضة ومتكدر تسوي شى اني اسوي لهنا وكافي صار سنين نتوسل بيه حتى يتزوج واشوف خلفته من وراها هج من العراق وكوه قنع ورجع ورجعت احجي واتوسل وابجي وهو ولا يمه حرت شلون اقنعه يتزوج الي بعمره عنده تلاثه واربع جهال وهو ينوح عليها بس فهمني انتن متخافن الله ولد شاب شحلاته تخلن ارمله براسه

نهر : كااافي شنو هذا الحجي الزمي لسانج تره احنا لا دازين عليه ولا كايلين اخذها هي قبل خطبها وفسخ وانتهى كلشي

نوريه: اي وتصخمت وتزوجت ومن شافت نفسها مره ثانيه بليه رجال شلون تبقى وتحترم نفسها وتربي ابنها لازم ادور على زوج مثل ابني تركب وادلدل رجليها الي مثلها متتحمل بليه رجال وهذا الاغم ابني مجلب بذيالها وكمش وعلى كد الايد وشوف قشمرته بحجايه بلزمه بوسه شمدريني شيسون المعزايات

نهر : عيب عليج ريم اشرف من الشرف تره هواي تجاوزتي وساكته الج اكلها البنيه متريده وهو الي كاتل نفسه خابري وسألي

نوريه : لا اخابر ولا اسأل اسمعي نهر دزينا عليج هسه واحترمناج بدون مشاكل ابعدي بت اخوج عن ابني واذا مسمعت كلام وعاندت راح اخزيكم وماابقي مكان مااحجي عليكم بيه والله اخليكم تهجون من المنطقه تعرفين الناس تموت على الفضايح وتموت على النميمه لا اخليها واخليكم كلكم علج جريها واحجي وياها وخلي تحترم نفسها

انعام : كولي لابوها خلي مره وحده بعمره يربي مو كاعد يحجي بالاخلاق وعايف بناته من حضن لحضن

نهر : اختنكت حييل وتعصبت من دكيتي عليه عبالي حنيتي عبالي اشتاقيتي احتاجيتي لبتج واجيتج طايره متوقعت منج هيج تسوين

انعام : اني من زمان كتلج متبريه منج ليوم الدين وماارضى عنج لو تموتين الي تحط ايدها بيد كاتل اخوها وتربي جهاله بشحاطتي مااشتريها

نهر : ولا اني بعد اطلب رضاج ولا اريده والحجي الكلتوه عيب بحق بناتي

انعام : لج مصدكة ذني بناتج انتي عاكر لاتنسين

نهر : الام الي تربي مو الي تولد وخلف الله عليج خوش تعيرين وبناتي وغصب عنج وعن كل الناس بناتي والي يلمس شعره منهن لو مو امي اسحله سحول عيب عليكم جايبيني مناك لهنا حتى اطعنون بشرفهن وانتي عيني نوريه اذا متعرفين تضبين ابنج لتذبين بلاج على بتنا هو كاتل نفسه ويتوسل بيها ومترضى

نوريه : شوف شمسويات سحوره والولد مجلب بيها كويات ومتخافن الله كلشي اتوقع منجن ذني المطلقات والارامل ينطن كلشي ويسون كلشي حتى بس يحضن برجال حتى لو ينطن نفسهن بلحرام

نهر : والله المطلقات والارامل اشرف منج ياحقيره ذني وحدتهن تسوه راسج وراس عشيرتج واذا انت تشوفينا هيج معناها انتي نكسه وهاي سوالفج مو سوالفنا كلمن يشوف الناس بعين طبعه

نوريه : يعني هم بيتي وهم تتجاوزين

نهر : والله الي يحترم نفسه احترمه مستحيتن من دزيتن عليه وكاعدات تهددن وتهينن بناتي

نوريه : مو بس اهدد والله اسويها لكم خافو الله الولد وابوه صار يومين متمالخين من وره هاي الساقطه يعني يكوله لو تروح تخطبها اليه لو مااضل بلبيت يعني اني تالي هذا الصبر كله والعذاب ازوجه ارمله والله احركم واحرك كلمن يوكفلكم

نهر : شسوين سوي ذاك حايط واركعي راسج بيه واذا انتم بيكم زود الزمو ابنكم ولو حسين احبه واعتبره ابني بس اذا من وراه تنمس وحده من البنات حتى هو اطرده

نوريه : انتي مو تخافين الله مو خابصتنا بلصلاه والديانه ترخ وتكولين احسبه مثل ابني وعود كلج حنيه ومدوختنا اتقي الله

بيه  وبعدي عن هاي المصيبه وكولي لاخوج خلي يلزم بنته كافي مره راد يلعبها علينا ويعگله بيها ويزوجها اله والحمدلله تلاحكنا بأخر لحظه هلمره اذا تكررت والله اجي باب البيت اشهركم شهيره

نهر :اخويه ميعيد الغلط مرتين وانتي ضلي هيج لحد ماتكولين ياريت زوجتها اله

نوريه : اله ميته يله يتزوجها يوم ميدفني بلكبور عود شيسوي خلي يسوي

نهر : غلطتي غلطه اله تتندمين عليها وتذكري كلامي ومثل مكتلج ريم متريده لحسين ولا يمها هو يريدها

انعام : اطردوه لتخلوه يجي خلصونا منكم الله يشيلكم بس الاذيه كون نار جهنم بكبرج يارازقيه من شفتج ماشفت الخير

نهر : مره ميته حرام عليج تدعين عليها ولو ثلثين الدعاء على الداعي الله يهديكم ولو المثلكم ماينهدي

نوريه : هلمره دزينا عليكم بلحسنا والمره الثانيه اجي بنفسي باب البيت وبنص المنطقه والشارع واشوفج شسوي

نهر : يطبج طوب انتي مره واوصلي ومو اني الاطلع الج حسين لا اخليج تحفين على كلمة منه ومتحصليها

نوريه : شفتي عمه مو كتلج مسوياتله سحر ابني مو طبيعي اعرف بيهن ذني درب الشعوذه والسحر الله لايوفقجن اني الجن

نهر : كمت وعفتهن وطلعت وارجف الطريق كله وصدري يصعد وينزل بسرعه من سرعت التنفس بلطريق ودكيت على حسين

حسين: هله عمه

نهر : تعالي للبيت

حسين : صاير شى

نهر : كتلك تعال للبيت

حسين : اني قريب منكم يم ابو زين هسه اجي

نهر : دخلت للبيت لكيت البنات بلمطبخ

ريم : طبت عمه والوجهه ازرك وترجف وشفتها بيضه

شصاير عمه وين جنتي

رشا : احجي فدوه شصار

نهر : انطني مي

رشا : هاااج اكعدي ارتاحي

ريم : صاير شى سمعت هورن حسين سحبت الشال اني ورشا بينا طبيعه حاطين بسمار بلحايط ومعلكين كل وحده شال الها اخاف احد يجي بس نجره ونحطه على راسنا مندوخ روحنا

لبسنا الشالات ودخل نريد نفهم شكوو متحجي دخل حسين وكال السلام عليكم جاوبناه بس عمه مجاوبت

حسين : هااا عمه شصاير

نهر : اسمع يمه حسين اني احبك والله شاهد احسبك ابني الماخلفته

حسين : اعرف عمه واني هم احبج وتعرفين معزتج بگلبي بس شصاير وليش ترجفين

نهر : امك وبيبيتك دزن عليه وسمعني السم الماسامعته

حسين : يعني ميجوزون اني رايح للبيت

نهر : اوكف يمه اسمعني اني خلصت عمري وشبابي العيبه ماتطلع لا مني ولا من بنات اخويه ربيتهن اذا وحده لوثت نفسها معناها كلنا نتلوث وكدامك اخلاقهن ينحلف بيهن رغم بختهن موزين وماعدهن حظ بس عدهن السمعه الزينه احنا نسوان واذا طلعت كلمة وحده الناس راح تكبرها ويروح تعب العمر وعمك مراح يتحمل

كلشي وكع على راسه وبقى جبل بس مال تطلع حجايه موزينه بحق سمعتهن هاي والله مايكوم منها والثوب الابيض اذا لكعه وحده وكعت عليه انتهى شكله ونظافته مااريد بسببك يصير شى بنات عمك وانت ماترضاها

حسين : غير افهم شكالن

نهر : اشكال الحجي وكلي ميهمني بس مال يهددن يوكفن بنص الشارع والمنطقه ويفضحن البنات لا لهنا وكافي

حسين : شحده الي يلمس شعره منهن او يطعن بيهن بحرف

ريم : شصاير على شنو هاي الهوسه فهمونا كاعدات مثل الاطرش بلزفه

نهر : يمه ريم تردين ابن عمج انتي

ريم : شنو

نهر : تردين حسين هذا هو كدامج صار يومين متعارك ويه اهله علمودج ويريدج وعايف البيت وطالع وامي خابرتني وتهدد وتوعد عبالها انتي رايدته ومقشمرته

حسين : شنو مقشمرته عمه صغير كدامج

نهر : والله هذا حجي امك مو الحجي مالتي

ريم : بقيت صافنه على حسين هذا شديسوي

نهر : شگلتي يمه ترضين بلي مسوي حتى اذا مترضين يرجع الولد لبيت اهله وكافي مشاكل وطلايب مو خلصنا عمرنا كله نصيح ونستريح بلطلايب مال امي وعلي والواكع بيها هذا المكرود طه وانت حسين هاي كدام ريم اذا متريدك ترجع لبيتك ولاهلك وتمشي بشورهم مو قبل فسخت لخاطرهم شجاك هسه تخبلت وتعاركت وياهم

وتتزوج مثل ميردون

حسين : عمه شنو صغير وياهو اليجي يمشيني اني ممسوي غلط ولا حرام بت عمي واريدها

نهر : هااي الهوسه على شنو مو علمود ريم احجي ليش ساكت كول شسويت وليش امك وبيبيتك متخبلات وحارن شسمعني عدا التهديد هاي صاحبه الشأن كدامك تردي يمه واذا متردي يطلع هسه بوجهه يروح لاهله ويراضيهم ويتزوج ويعيش حياته

حسين : شنو سالفتج عمه هو هيج على كيفج

نهر : لا مو على كيفي اني ماانتظر تجيني امك لو ابوك لهنا ويأذونا ويدمرون حياتنا العشناه من وراهم سوت النا كرصت اذن وريم اصلاً مرايدتك على شنو الدوخه بعد كلمن يكعد بمكانه

هاااا احجي ليش صافنه هذا حسين كدامج

تردي لو يروح لاهله

ريم : صفنت بوجهه وكلت اريده بس بشرط

نهر : شنو هو

ريم : يجي ابوك وامك يخطبوني من ابويه وكدام الناس كلها يقرون فاتحتي بذاك الوكت يله اكول عليك كدها وتستاهلني هذا الشرط مااغيره لو اموت

حسين : حتى لو وافقو بس ميجون

ريم : يجون لهنا حسين يطلبوني واله روح لاهلك راضيهم على كولت عمه وامشي بشورهم مثل قبل واتزوج وعيش وعوفني اعيش لابني ولتشوفني بعدها وجهك للموت

نهر : سمعتها يمه وانت متكدر على شرطها ارجع لاهلك وجفي الشر وخلي بناتي بحالهن كافي الدنيا كفخت بيهن لمن ملت لاتجي بتالي الوكت تزيدها عليهن

ريم : اباوع حسين ابتسم وطلع حتى مجاوب عمه هذا شبيه

رشا : صخام بوجهج شسويتي

ريم : مسويت

رشا : انتي وافقتي على حسين

ريم : هاي شبيج من كل عقلج يكدر يقنعهم

ماسواها قبل يسويها هسه واني ارمله وبرگبتي ولد

رشا : اذا تعرفين ميسويها ليش قبلتي وشرطي

ريم : ردت اعيش انعام ونوريه وعلي ايام سوده لان حسين مبين هلمره خوش مربيلهم گلب وكافي عايشين بتوتر ومشاكل ويوميه طلابه خليهم نارهم تاكل حطبهم

نهر : جذابه

ريم : باوعت على عمه

نهر : انتي بعدج تحبي لهذا كلتي اريده جان تكدرين تكولين مااريد وتنهين الشغله كلها بس تعرفين لو ناطقتها جان راح وتزوج وانتي متردي يتزوج ويستقر

رشا : اي والله عمه عفيه عليج لكفتيها

ريم : هااا سويتن عليه حزب موو

جان اسمع صوت رساله لزمت تلفوني وفتحته

مكتوب بيها (ماطول ترديني هلمره مااعوفج  وراح تشوفين حسين شراح يسوي بس اصبريلي كلشي مااريد طريقي طويل وصعب وكله شوك ومطبات بس وياج راح يصير مرمر احبج ريمتي

ابتسمت

رشا : شنووو منووو شصار

ريم : شبيج

رشا : رساله من منو

ريم : من مديره المدرسه تكول باجر عندج محاظره من وكت

رشا : اممم مديره المدرسه

ريم : ضربتها بعكسي على جتفها وباوعت على عمه الي لهسه خطيه تعبانه ومبينه حيل مأذياتها

تعاالي اكعدي فدووه

نهر : ولجن وين نولي بس الطلايب ورانا

رشا : ماكو شى ياعمه على كيفج هسه حسين يروح يزفهن ويسكتهن

نهر : وابوج اذا سمع شيخلصها

ريم : انتي خابري حسين وكولي ليجي هاي الفتره لحد ميهدا الوضع

نهر : هو شويه واخابره اكوم اتمدد شويه بين مااختجن تجي من الدوام ونصب

رشا : اي تأخرت اليوم

غزل : عطلت سياره الخط وبقينا ننتظر لحد ماخابر صاحبه ورجعنا بسيارته جنت قبل الاخيره وباقيه بس وحده نزلت باوعت بأتجاه عمار شو هذا بقى صافن وشكله انزعج مهتميت ودخلت للبيت لكيتها عالكه اشكال اخبار عفيه بيت قناه العربيه مو مثله يوميه طلابه

ريم : بقيت افكر بلي سويته يمكن تسرعت او يمكن غلطت او يمكن المفروض مااحجي هيج وانهي كلشي اني مااريد اتزوج بس ليش فكرت زواجه من غيري أذتني ليش مجرد مكالت عمه يروح يتزوج گلبي لزمني

هسه اني شريد اريده لو لا مااعرف

اباوع على تيم شلون نايم معقوله بيوم انجمع اني وحسين واصير زوجته ابتسمت بداخلي  وكلت حلم ابليس بلجنه

واذا طلع كدها وكدر يغير المستحيل شنو شعوري مباشره فركت وجهي مااريد مااريد هم راح ترجعين تتأملين اذا قبل صعب هسه مستحيل الصار اليوم لازم انسااه لازم

فاتت الايام والهدوء رجع لبيتنا هذا الموضوع مطلع لبابا ولا سجاد بس سليل عرفت ومعلقت على اي شى لان استغربت من ردت فعلي وكل الي كالته مستحيل حسين يكدر على اهله وكلنا نعرف هذا الشى لتتأملين ريم حتى لتنكسرين مره ثانيه كتلها بكل ثقه منو كال متأمله ولا افكر بيها اصلاً حسين يحاول بس ويه اهله مستحيل ينجح خلي شويه يشلع گلبهم مكافي العشته والعشناه بسببهم الله يسلط

وهلمره سلط ابنهم عليهم

كعدنا كلنا اليوم جمعه ونلف دولمه ونسولف اربعتنا والجهال يلعبون جان شهر السادس ٢٠١٦ بعد يومين رمضان مبقى شى

رشا : دك تلفوني واباوع سهير خير يمكن الوحيده الي مااكدر ارفض مكالمتها اخاف اكو حدث او خبر صعدت فوك وسديت الباب ورايه حتى ايدي مغسلتها

هلوو سهور

سهير : ولج عندي خبر الج بشده

رشا : خير

سهير : اليوم الصبح دزو على اختي مو تدرين بيها سستر

رشا : اي ومنو دز وين

سهير: ولج دزت عليها ام شعلان

رشا : شصاير

سهير : باقيه تتوسل بيها متحجي بس تعرفين هي اختي متضم عليه

رشا : يمعوده احجي مو ريگي نشف

سهير : شعلان لازم هند وكاتلها كتله حتى ايدها كاسرها و١٠ خياطات براسها وجسمها كله ازرك تخوف تكول اختي

رشا : لا بربج كلللوووش  زين معرفتي ليش

سهير : اصبريلي يومين واعرف لان ام شعلان طلبت من اختي يوميه تجي اداويها لان يستحون يودوها للمضمده اخاف تعرف المنطقه ويتخزون ولج تكون تصرخ من الالم وادعي على شعلان حتى كاسر سن الها الي بلبدايه اكولها خريطه مسويها

رشا : الف رحمه على كل موتاج على هذا الخبر الحلوو

سهير : خلي اروح قبل متجي اختي وهم احاول اخليها تعرف السبب

رشا : اي فدووه كون تعرف السبب وهديتج يمي

سهير : هههههه ضحكتج هااي كافيه

رشا : يمه فدوة لطولج يله باي ونزلت فرحانه وبنزلتي

دك تلفون عمه نهر جاوبته ولطمت على صدرها وعلي بيه شى

رشا : هاااا خير

نهر : ولجن مطعم عمج علي  احترك

رشا : شنو هاي اليوم الاخبار كلها حلوووه

يتبع .....

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الثاني_والاربعون

سليل ❤

تيهني بسما عيونك حمامة بليل

ياعطر البنفسج والورد والهيل

فضح سري الدمع من ذكرو اسمك

وعرفوني اعشكت والروح اخذهة السيل

كطعني وذر لتظن عليك اغتاض

ماتشكي السجج من يقسي بيهة الريل

حسين 💔

حاجيني بنظرتك وافتهم شتريـــــــد

وخلي رموش عينك هية تسألنــــي

بس حرك رمش وآنه اعرف المقصود

وسولف بالتريده عنك وعنـــــــــــــي

صوتك من تسولف حقي اذوبن بيــه.

ماجنك تسولف جنك اتغنــــــــــي

نظراتك طلاسم مالهـــــــــــن عراف

ساعة ارتخي بيهن وساعة تكتلني

ريم 💔

كلها تحچي #بالمحنة

ومامش #ابنادم يحن

وانة مثل الناي دونك

وية كل #شهگة نفس لازم اون

رشا 💔

يالرحت لحضان غيري هم تعود

بس تردهل مره موش الغالي

ماتت احلامك لان طبع اليخون

يبقى صوره ودوم احطها اكبالي

شفت غيري من رحت ضاع الوداع

اولا تريد اتشوف حتى اخيالي

ولك صرنا مانسوه لان عدنا الوفه

  باقي ويانه  اويضل  للتالي

انته ماتسوه الحجي حجمك زغير

ومن اشوفك جن شفت جتالي

غزل 💔

مشيت بدربك وانةهَ التيهت دربي ..

ما سويتلك مو زين ..!

هاي الضلت بگلبي .. 🖤  ..💔💔💔

(هديه من متابعه )

رشا : هاااا خير

نهر : ولجن مطعم عمج علي  احترك

سليل : بلعافيه يستاهل

ريم : كللللوش يوم لبيته واوزع واهليه بلكاظم كملي الخبر الحلوو وكولي مات

نهر : ولجن شجاجن مو عيب تتشمتون

سليل : اني مااتشمت عمه اني لو ما الجيران اشد وصله واركص

ريم : واني اكيت عليج يااختي

رشا : واني ادك

نهر : وانتي يمه غزوله

غزل : هههه اني اصفك الهن

نهر : يداده هاي تاليها يبنات طه تتشمتن بعمجن

سليل : ادري بيه اخوج وتنقهرين عليه بس احنا عذرينا منكدر منفرح بهذا الخبر

ريم : شنو الوجبه عمه جنج راح تبجين

نهر : غير اخويه

رشا : من امده هيج اخ

نهر : شنوً

رشا : هااا لا ماكو شى ولجن اسمعن الخبر الحلوو الثاني غير هند مسحوله وكاتلها شعلان كتله معدله

سليل : حيييل بعد ايدي معرفتي ليش

رشا : لا معرفت بس مبقى شى واعرف

ريم : احلى شى بلدنيا من تجي الاخبار الحلوة دفعه وحده

نهر : اكوم اني انتن راح اطكن مرارتي اكلهن محل عمهن احترك ومكيفات

ريم : موزين ماجبنا مزيقه هسه تلكين اخوج عليان هسه يلطم ويشك زيجه

غزل : شنو زيجه

ريم : هدومه يامثقفه من جهت صدره ويصيح يبوووو مشايفتها بمسلسل بيت الطين

غزل : ههههه اتخيل هيج يسويها والله شكله يضحك

سليل : خلي ادك على سجاد وابلغه

دكيت وكاال ادري ورايح لابوج خابرني محسن

سليل : بابا شبيهه

سجاد : هسه اوصل وافتهم

سليل : طمني عفيه يله الله وياك

رشا : شبيهه بابا

سليل : مخابر عمو محسن على سجاد وكال تعال

ريم : عمج شيطان لوتي هسه يسويله سالفه ويفرها على بابا

رشا : خلي يولي بابا شعليه

ريم : هسه تشوفين هذا عليان تربية نعوم ام الوصخ وهسه تشوفين

سليل : كملنا الدولمه ونظفنا وانتظرنا بابا اجه موعد الاكل وماكو خبر بدينا نقلق صارت ساعه ٣ العصر واجه بابا ومحسن وسجاد

ركضنا نريد نفتهم

نهر : شصار

حجي طه : اطني مي وحبابه الضغط يمكن صعد

محسن : اكعدن واني اسولف ابوكم صاير تاير مفشوش مابيه يسولف

نهر : احجي محسن شصار

محسن : قبل مده علي راد يكسر محل طه كل فتره مسويله ملعوبه شكل مره يرخص لفة الكص مره الفلافل وكام يسوي دجاج حاار شيسوي اشكال وصدك مطعمه اشتغل خير من الله كتله لطه تعال نسوي ديكورات جديده للمطعم مقبل كاال ماعندي ورايه بناء مال البيت وضلينا نتراوح يوم اكو شغل ويوم لا هاي صار ٤ اشهر اخر شى تعرفون البشر طماع كام وسوه ديكورات لمطعمه ذب شدات حتى بس يوسعه ويرتبه ويكعد طه على الحديده واخينا بالله كل مااحجي وياه وكال الرزق على الله بلعافيه عليه حقه يشتغل ومابيها شى لحد مكمل وفتح المطعم واليوم صاير تماس كهربائي عنده واخذ المطعم وكله سقوف ثانويه وديكورات گب ملحكو يطفوه واحنا كاعدين مندري اجو جماعه من السوك كالو الحك محل اخوك احترك

ركضنا وهذا الفطير يعيط فدوة اله المحل المهم يكون مابيه شى وعلي واكف متهستر  وحتى كفر كاام يكفر هو شاف طه لو الزمه وبنص السوك اضربه ويعيط انت حركته

نهر : ليش ولك مو اخوك ميجوز ولا يتوب

محسن : تالي وخرناه من طه وراح سجل دعوه ضده ورحنا للمركز وهسه اجينا

سليل : هذا من كل عقله

ريم : شكتلكم بس محد مقدر مواهبي الفذه

رشا : طاح حظه ولا يصير براسه خير عبالي كبر وعقل

سجاد : ماكو شى هسه يوم يومين تطلع لجنه وتشوف الوضع تماس كهربائي وينسد

نهر : هو بس راد يأذي لشوكت يضل هيج گلبه اسود

حجي طه : والله يانهر لو تشوفين حالي اركض مثل المخبل واني رجال جبير حتى حيلي راح كلت اخويه مات

ريم : ياااا جان صار العيد عيدين

حجي طه : لا بنتي يبقى اخويه

ريم : اكوم احسن اذا ابقى يصير بيه صرع من رخصتكم كمت وعفتهم

نهر : شراح تسوي هسه

حجي طه : شسوي اسلم امري لله واسكت ماعنده مستمسك ضدي وهم من احترك المطعم الناس كلها كاعده وشافو شلون گب من وحده

سليل : يعني معقوله ملحكو يطفوه

سجاد : مشفتي الحريق بسرعه اخذ الناس التهت تركض على محلاته خافو لا السوك گله يگب ربج ستر محله حيل تأذه والمحل بصفه اخذ شويه وتلاحكو اله

سليل : لتنقهر بابا

حجي طه : عادي بنتي هاي هيج خلصتها وياهم مو جديده بس كدام السوك كله زحمه وبهذا عمري واخويه يطعن بيه

سجاد : قابل ميعرفوك كلها تعرفك وتعرف اخلاقك ويعرفون متسويها

حجي طه : الله يهدي

محسن : اشم ريحة دولمه ياخونه منو مسوي

سليل : سوينا غدا وبعدنا مصابين منتظريكم

محسن : اذا ماكمتن تصبن هسه اخذ الجدر وتضلون هاي ضلتكم

سليل : كايمه والله اصب

صبينا وكعدنا كلنا ناكل اباوع على بابا مكسور خاطره حييل

ريم : بليل كاعده ودك تلفوني حسين جاوبت الوو

حسين : شلونج

ريم : بخير

حسين : توقعت تخابرين تتحمدين لابويه على سلامته

ريم : ليش حرر القدس وهسه رجع

حسين : تعرفين شنو قصدي اكيد تعرفين بسالفه المحل

ريم : والله المفروض اطش جكليت على هاي الفرحه العظيمه

حسين : تتشمتين بأهلي

ريم : لا استغفر الله اللهم لا شماته

حسين : متأكده

ريم : لا

حسين : شنو لا

ريم : يعني متشمته وشماته شطولها

حسين : لهاي الدرجه تكرهيهم

ريم : انت مخابرني حتى تعلمني منو احب ومنو اكره

حسين : اشتاقيتلج وردت اسمع صوتج

ريم : اروح اني

حسين : انطيني تيم

ريم : هاي شنو هلمره

حسين : انطيني تيومي تره هسه اجي

ريم : اشرت لتيم واجه يركض وانطيته التلفون ويسولف ويه حسين ويضحك كلامه مكسر عمر تيومي ٤ سنوات سوالفه تنحط بنص الگلب ومتعلق بحسين هوايه تعبت ابعده عنه لان طفل يحب الي يدلله وحسين من هاي النقطه كلش مدلل تيم

من كمل كله باي بابا دمعت اوووف  بس لو يبطل كلمة بابا

هاااا ارتاحيت

حسين : تغارين

ريم : من شنو

حسين : لان احب تيم اكثر منج

ريم : روح نام

حسين : شوكت يجي اليوم الي اخذج بحضني وانام

ريم : ميجي لتعب نفسك

حسين : يجي والخلقج يجي واذكرج

ريم : نشوف يله باي

حسين : باي حبيبي

وسده بقيت هادئه وافكر واكول منين جايب هاي الثقه كلها بس يجوز بس حجي مثل قبل خلصتها ويااه هيج

اخذت تيم وبدلت اله وحضنته ونمت

هل هلال رمضان علينا واليوم كاعدات مكيفات نتسحر سوه وناس تتعارك على التمن وناس على البيض من الشغلات الي متغيرت على مر هاي السنين كلها بلسحور لازم تمن ولبن ثابت ميتغير يومياً ونحط بصفه اما بقايا الفطور او نسوي بيض واجبان وهلقاسم الله نحط الصينيه ونكعد كلنا نتسحر

كملنا السحور وكل وحده بينا توجهت لزمت القران تقرا بس سليل وسجاد ماكو كلنا موجودين نفس لمتنا بس انضاف تيم وفرح وكاعدين على السحور على الواهس

صاح امساك ونتراكض على المي وراها نصلي وانام ونبقى نايمين للظهر وراها نكعد كعدنا ونتفاجأ بابا ماكو وعمه حاطه ايدها على خدها باب المطبخ

ريم : شبيج عمه

نهر : ابوجن من الصبح سوده عليه راح للمركز استدعوه واخذ سجاد وراح

رشا : يامركز وليش

نهر : من وره علي وسالفه الحرك

ريم : كون احترك گلبه وكل فلوسه يعني رجال صايم وتعبان واول يوم رمضان يفرفر بيه بلمراكز ليش شنو هاي الخباثه شمسويله

نهر : امرنا بيد الله يمه هذا بختنا

ريم : وتلومينا من نحجي عليه وتزعلين

نهر : شسوي بنيتي غير اخويه وهذا الگلب امداه يرجف عليهم

رشا : والله عمه زايده منج هااااج مو حسام والله نسيناه

نهر : هذا حجي يمه اسمعن خبر عنه وهسه تشوفن شلون الگلب يرف عليه

ريم : ادوسه بلقندره الگلب اذا رف على واحد ميسوه

هسه بابا يتإذه والجو نار فوكاها

كعدنا ننتظر ولل٤ يله اجوي وخطيه شفته يابسه من العطش غسل وجهه وراح يصلي ولا حجه اي كلمة

نهر : شصار فدوة سجاد

سجاد : زوعونا ٣٠٠ الف لا بيها ولا عليها وانسدت القضيه

ريم : ليش اذا ماكو شى ضد بابا

سجاد : شافوه صاحب مطعم وعبالهم ينكط فلوس وقفصو عليه والله خطيه طه ينطي الفلوس ويكول الهم هاي هديه مني الكم محالل وموهوب ومن سأله واحد من الشرطه ليش حجي تكول هيج كله حتى لاينحسب ذنب عليه منطي رشوه واني صايم وهم لايصير ذنب عليكم

خله ذاك يصفر ويكله والله للضابط مو الي تالي انطينا الفلوس وطلعنا وانسدت تماس كهربائي

ريم : كون يتكهرب علي ونخلص منه من گلبي لربي

رشا : هسه بابا ماعليه شى

سجاد : لا ماكو شى ويعرف علي مراح يحق طه بشى بس هيج خباثه وحقاره

نهر : اروح اشوفه

سجاد : واني اروح للبيت تعبت واعصابي انهارت

رشا : لان ماكو جكاره

سجاد : اي ارجف عليها واذا اجت اختجن مزوركه معناها كتلتها لان ممدخن

رشا : هو بكل الاحوال فطوركم اليوم يمنا

سجاد : اي زين حتى من اكتلها ماافكر بلفطور اخاف تزعل وتخليني جوعان

ريم : والله وكت عمو يخاف لا سليل تعاقبه

سجاد : انجبي لج شنو اخاف

ريم : هاااا يعني متخاف خلي اخابرها

سجاد : غير اريد خاطرها هاي ام زيون الورد

رشا : هلا هلا باع الحب

سجاد : اللهم اني صائم شلون كاعد يم اثنين ابالسه ماادري هسه اذا ابقى تفطرني اكوم اروح

ريم : لتتأخرون على الفطور

عدت ايام رمضان ايام نفطر كلنا وايام نروح يم سليل نفطر غزوله نجحت ومن الدور الاول  الْحٍمَدٍ للـّہ وتخرجت  ومره عزمنا عمو محسن للفطور لهسه اتذكر منظر غزل من طبت للبيت وسألتها شبيج

غزل : انقبض گلبي

رشا : نرجع

غزل : لا خطيه مشتاقه لعمو ولعمه

رشا : بقينا يمهم نفطر وره الفطور يلعبون دومنه ويعيطون واحنا كاعدين يمهم نضحك على سوالفهم ريم لعبت وياهم هي وعمو محسن ضد بابا وعمو سجاد اعرف شتفكر لان هذا البيت هواي عدها ذكريات بيه لهذا حقها تختنك

ايامنا حلووه وخاصه برمضان بابا يعزل ويخلصها قران ومرات قبل الفطور العصر ياخذ تيم وفرح ويمر على زين يشتريلهم

يحب يلمهم داير مدايره شكد هو يحبنا بس يحب جهالنه اكثر من عدنا

رشا : بقيت احوص اريد اعرف ليش انضربت هند ويوميه اخابر سهير ومتعرف ليش لحد ما مار اسبوع واني صايمه واسوي فطور وكعد اگلي بيتنجان اسوي مقلوبه ودك تلفوني جاوبت واني اگلب هااا سهوره

سهير : ولج عرفت ليش انضربت

رشا : لا عليج الحمزه اوكفي ولج ريم تعالي

ريم : وجع شبيج

رشا : هااج كملي وشمرت الخاشوكه وطفرت

ريم : وثول شكووو اهوو هم اگلي

نهر : شبيهه اختج طفرت

ريم : انتلت شمدريني منو خابرها ونتلها هيج هسه تجي والزمها انكتها وافهم شكوو

رشا : صعدت فوك وسديت الباب احجي

سهير : اختي من جانت يمهم اليوم تكول بدت اطيب احسن تكول كاعده اعقم راسها واشوف الخياط واشوفلج الباب اندفر وطردني عااط بيه شعلان وامه تتوسل بيه ورجع شبعها كتل لج رادت تموت بيده تكول عبالك مسويلها كورسات كل وره كم يوم كتله

رشا : حيل وابو زايد معرفت ليش هلكد يكتلها

سهير : دسمعي يجيج الخبر رادت تنزل اختي جبانه بس من كاام يعيط واكفه على الدرج وسامعته يكول شكبرج تصيرين وادور رياجيل وهي تعيط تكوله حقي وتزوجت وراجع ضاربها يكلها متعه بت الگلب تتزوجين متعه وتشهرينا

رشا : لابربج متعه

سهير : اي خيه طلعت الخاتون ادور متعه ولازمها جنزها تجنز مبقي عظمه بيها مره ثانيه تالي نزل وصعدت اختي تركض لان ام شعلان كامت تعيط راحت بتي ماتت

رشا : عساها ام المتعه ااااخ كملي

سهير : راجع الخياط مفتوح جزء منه وغركانه بدمها ورجعت خيطت الها تكول ضربه ضربتين بعد تسلمها

رشا : الله عساها هجامت البيوت الساقطه ام المتعه هي هيج نماذج شترجى منها وجنات عرفت لو لا

سهير : والله ماادري بس مالها حس حتى متطلع لراس الشارع كل الوكت ساده بابها وكاعده

رشا : كون ينهجم على راسها

تكول اختي على اساس هند تعيط وتكول اله اهجمله بيته العاار ومكسراته كلهن على ايدي اني هيج يسوي بيه

رشا : يامكسرات

سهير : هذا رجلج وراه بلاوي يمكن

رشا : مو رجلي

سهير : يابه طليقج

رشا : معرفتي شلون صادها لهند

سهير : موزين عرفت الج كل هاي السوالف قابل عايشه عدهم

رشا : هم صحيح

والله الخبر يستاهل بوسه عليه فدووه لگلبج

سهير : رشا فدوة بداعة فرح مو تفضحيني وتخابريهم تتشمتين لان مبينه طلعت من اختي مابيه حيل مشاكل

رشا : لا مو هسه يجي يوم اخابر واطك اصبعتين مو بس اتشمت

سهير : المهم مو هسه

رشا : معفنه تستاهل الگتل اللهم اني صائم

سهير : لا وصل صيامج اروح اكمل الفطور

رشا : الله وياج

نزلت على ريم جانت ادردم

ريم : خوش طفرتي

رشا : لج هند طلعت متزوجه متعه ولاكفها شعلان ومشبعها كتل

ريم : صخونه التلفها اي عيني هيج وحده تموت على الزلم بس هي مو صغيره وابنها بطولها صار

رشا : مدير بال بس يگلج كل كم يوم يطب يخبزها ويطلع

ريم : حييل تستاهل

رشا : اوف شكد ارتاحيت يوم لجنات

ريم : هاااج كملي لتستغليني الفطور اليوم عليج

رشا : جيبي والله احتفالاً بلخبر السعيد حتى مواعين الفطور عليه

رشا : يراد هلهوله كون يوميه مكتوله وحده منهن حتى المواعين تضل عليج

غزل : تاليها تذبوها عليه اعرف بيجن

رشا : ههههه لا والله اني اغسلها

بعد ٣ ايام وينتهي رمضان والعالم مخبوصه تشتري للعيد السوك مينمشي گتل ناس بحضن ناس تكول يبيعون بلاش والجو حار طبينا الشهر السابع تموز ٢٠١٦

طلعنا اني وعمه الصبح جبت كم قطعه لفرح ولتيم ولكل وحده تراك وريم مقبلت تذب الاسود وجبنا الها تراك اسود

كاعدين العصر قبل الفطور وكالت عمه

نهر : باجر تره نسوي كليجه

ريم : والله جتفنا يروح من وراها وتالي احنا ناكلها هو منو يجي بس سجاد وسليل وعمو محسن ومرته المن بعد هلكد نسوي

نهر : العيد مينحسب عيد اذا مو گليجه لتلغين حتى لو احنا ناكلها المهم نسوي

رشا : باجر نروح نشتري باقي الشغلات

غزل : اجي وياكم

رشا : تعاالي بس ازدحام حيل

غزل : ميخالف

رشا : براحتج

كملنا الفطور وغسلنا المواعين الي يشوف هذا اليوم يحسه يوم عادي هادئ حلوو الناس كلها مستمتعه بيه وخاصه قبلها كان ليله القدر اغلب الناس يحيون هاي الليله واكو مجموعه قبل ايام يحيوها يعني العشره الاخيره من رمضان تكون مميزه حيل وكلها صلاه وقرائه قران وتعبد واستغفار ليله الاحد ليله ٣ تموز ٢٨ رمضان

كاعدين نسولف جنا منام للسحور يله الكل يبقى كاعد ماعدنا دوام قرابه السحور

وانگلب الفيس فجأه عاجل انفجار بلكراده بالاول توقعنا انفجار عادي لان گلبنا خلصان من الانفجارات كلنا حاله حال اي انفجار يموتون الناس وراها تمشي الحياه طبيعيه صار سنين على هذا المنوال بس المتوقعناه حجم هاي الكارثه وشلون فيديوهات الشباك محصوره وتاكلها النار ويمكن احنا اكثر ناس حسينا بلي حسوه لان عشنا مو مثلهم بس تجربه مقاربه الهم من احترك بيتنا واحنا نايمين بيه وشلون نباوع على النار ومنعرف نطلع لو لا

غزل عاطت وكاامت تكمز وتصيح احتركو احتركو وريم مكابله الفيس وتشهك حتى سليل اجت تركض سجاد جابها لان منهاره وتصيح وديني لخواتي كلنا نفس الشعور صار عدنا

فيديوهات ومنشورات خلتنا منام ومو بس احنا كل الناس لدرجه الهستريا من نسمع الصاير ومن صبح الصبح نشوف العمارات والمحلات مفحمه واكو ناس اختفت حتى جثث ملكو الهم من حجم الدمار كلنا بيومها مفطرنا بس شى بسيط لان اللكمه من تنزل سجاجين بلبطن من القهر يجوز احنا مامات الهنا احد هنا بس من كميه الفاجعه والشباب الراحت بيها نحس ذوله اهلنا مو غربه عائله بعائلتها ماتت كل ذنبهم رادو يفرحون بلعيد حالهم حال الناس

وصار المغرب والفيس عباره عن صور شهداء وناس تناشد وتصيح مشفتو فلان نباوع الفيديوهات امهات تلطم وتناشخ لربها لان ربت وتعبت وكبرت وشمرت للنار هو صار المغرب وكمزت ريم اريد اروح هناك

حجي طه : وين رايحه بابا مشفتي الوضع

ريم : ابوس ايدك بابا اريد اروح

حجي طه : مترحين شسوين هناك

ريم : اذا مااروح اموت

تبجي وتتوسل اخر شى دز على سجاد وگله اخذها وروح

ريم : وصلنا لمكان ذبنا التكسي وتمشينا ويايه غزل مقبلت اروح وحدي اخذت بدربي شموع وامشي واشوف الناس كومه تمشي ويايه

سجاد : ريم بيج شى

ريم : لا عمو وصلت للمكان جان مرعب ومخيف بس شفته كعدت بلكاع ابجي بنتي ورجلي صح ماماتو هنا وقبل اكثر من سنتين بس هم ماتو حرك هم ماتو بلمفخخه حسيتهم وياهم ماتو اشغل بلشموع وابجي ونسوان كبار يمي يشغلن ويبجن ويرددن يمه ذكريني من تمر زفة شباب من العرس محروم حنتي دم المصاب

علت صوت شهكتي وهناك الكل يبجي صغار كبار الكل يعيط ويصيح ليش شنو ذنبهم وغزل مثلي تباوع وتبجي بقوه

سجاد : ريم كافي خلي نرجع

ريم : صافنه على مجمع الليث ومجمع هادي سنتر شلون كوم فحم والله احس اصواتهم بأذني اسمع عياطهم وبجيهم شگالت روحكم العزيزه وانتم تحتركون شكالت روحكم وانتم تختنكون وتشوفون كلمن تحبوه ميت بصفكم ااااااااااه

سجاد : ريم تسمعيني

ريم : شنو ذنبهم عمو كلمن مات بلمفخخه شنو ذنبه

سجاد : ذنبه هو بلعراق

ريم : هاي الناس كلها تعزت كلها فقدت مثلي ويمكن اكثر مني اكو ناس عوائل بكاملها مرجعت تعرف شنو مرجعت تفحمت

سجاد : الله يعينهم كومي تره بديتي تفقدين

ريم : هاي تاليها يرحون يشترون ملابس للعيد يرجعون فحم

غزل : بدت ريم تفقد وتسرح ومتركز خفنا لترجع مثل قبل لان وضعها النفسي ممستقر مباشره اشرلي عمو وسحبناها كوه من الكااع

ومشيناها وتحجي ماتو واحتركو يعين الله امهاتكم يعين الله كلمن فقدله عزيز اليوم

تمشينا مسافه واشترالنا مي عمو سجاد وغسلنا وجهه وبقت هادئه

رجعنا للبيت والكل منتهي نبجي عليهم وهذا العيد متسمى عيد على العراقيين لان تغطى بلدم ومحد عيد ومحد لبس جديد ومحد سوه كليجه يمكن حتى اكثرهم مكالو عيدكم مبارك لان هذا العيد بلذات ترس البيوت دم والشوارع صور شهداء

(الله يرحم شهداء الكراده ويجعل مثواهم الجنه باقين في قلوبنا لابد الدهر  )

غزل : كاعده ضايجه ومخنوكه حيل الفيس حزين اگلب بيه كله صور الشهداء وقصصهم صار شهر على الفاجعه ورغم هذا بعدنا على نفس الحال من نسمع عنهم نبجي  الاحداث الصارت خلت حتى روح مابينا الشوارع الناس كلشي داير مدايرنه يبجي ويكرب الگلب تحس حتى السما تبجي عليهم

اني راح اطب انام

ريم : بعد وكت اول تالي تنامين هيج وكت

غزل : ضايجه اختنكت انام احسن

ريم : براحتج

رشا : سويت حلاوه شعريه متاكلين

غزل : لا حاره شياكلها مااريد

عفتهم وصعدت اباوع ساعه ٩ بله اذا نمت هسه شوكت اكعد طفيت الضوا وتمددت شفت ضوا موبايلي يرمش عدلت كعدتي لكيته رقم منو هذا جاوبت

الوو

عمار : راح ترجعين لفيصل

غزل : كعدت عدل بلجربايه واني گلبي يدك سريع هذا عمار

عمار مو

عمار : زين مناسية صوتي

غزل : شنو ارجع مفهمت

عمار : جاوبيني راح ترجعين لفيصل

غزل : لا طبعاً بس خلي افهم منين جبت هذا الحجي وشصاير وشعجب اتصلت

عمار : بس اردت اعرف وهذا هو من رخصتج اخذي راحتج

غزل : اوكف يعني مخابرني بليل وبدون حتى سلام وتكولي ترجعين لفيصل وشجابك على فيصل جر نفس وسكت

واني سكتت شويه وكااال بهدوء

عمار : اذا طلبو منج ترجعين لفيصل تقبلين

غزل : عفيه عمار تره انت كعد تحجي من نص الموضوع ومداافهم شصاير وحتى اذا رجعت ليش مهتم ومن اخر مره اتصلت وبريتك الذمه توقعت بعد متتصل فهمني شتريد مني وليش تسألني هيج سؤال شخصي

عمار : شلونج

غزل : بعد وكت

عمار : صحتج شلونها

غزل :  الْحٍمَدٍ للـّہ

عمار : مبروك التخرج

غزل : شكراً وسكتنا ردت اسده عيب احجي وياه بس الفضول اااخ منه كتله ممكن سؤال

عمار : جواب

غزل : ليش متصل هسه وشنو سالفه فيصل وشذكرك بيه

عمار : لازم اجاوب

غزل : من حقي تره

عمار : جنت اشتغل بلمطعم واحاسب ناس وسمعت عمي محسن يقنع ابوج ويكله يريدها ويكول ماالكه احسن منها واذا وافقت اني احجي ويه غزوله واقنعها والحجي جان قافل بس خفت لا انتي تقبلين ترجعين

غزل : تره هذا الموضوع شخصي وانت مخابر بليل وتسأل عن هيج شغله خاصه متلاحظ ادخلت هوايه بحياتي

عمار : اي صحيح اعتذر مع السلامه

غزل : مع السلامه وسديته وبقيت صافنه بس ويه الصفنه گلبي يدك يدك سريع شلون الوحده مسويه مكسوره وتخاف لا ابوها يلزمها

خمس دقايق ورجع دك ابتسمت وجاوبته

نعم

عمار : هسه مفهمت راح ترجعين لو لا

غزل : وليش تسأل

عمار : وانتي ليش تجاوبين بسؤال

غزل : اني مو بريتك الذمه وانتهى ليش بعدك تدخل بحياتي

عمار : راح ترجعين لو لا

غزل : تعصب وحجاها بصوت عالي وكتله بهدوء انت ليش تلبس دوم اسود ولا مره شفتك لابس ملون جر نفس وسمعت صوت الجداحه وجرت نفس الجكاره

غزل : مثل عمو سجاد تشرب جكاير

عمار : وحتى نفس نوعيه الجكاير ومرات اخذ منه وياخذ مني اذا مخلص

غزل : موزين تره وماما سليل شكد تتوسل بيه حتى يعوفها وهو ميعوفها

غزل : ماما تصيحين لاختج ماما تره اني شايفها لام زين الله يستر عليها صغيره مو مال ماما

غزل : اني متعلمه من اني وصغيره اصيح الها ماما

عمار : الله يحفظها الج

غزل : شكراً بس هم الجكاره موزين تشربها

عمار : ادخن قصدج

غزل : اي ادخن

عمار : هاي اكثر وحده احرك بيها واطفي ناري لو ما هيه جان من زمان محترك

غزل : عفيه لتجيب طاري الحرك

عمار : مااشي

غزل : مكتلي ليش لابس اسود رجع جر نفس ونصى صوته ويحجي برزانه

عمار : جان عمري ١٩ سنه وكاعد اقرا وملتهي وخابص الدنيا جنت طالب سادس اعدادي عايد السنه اول سنه مجبت معدل ٦٣ كلت اعيد حتى ادخل كليه زينه وارفع راس ابويه واخويه الجبير الي يشتغلون من الصبح لليل حتى يعيشونا عيشه زينه ابويه انسان شخصيته قويه وهادئ بس بسيط ماعنده أذيه على احد ولا بيوم ادخل بحياة احد احنا عائله ملتزمه جانت متعته الصلاه بلجامع واخويه يروح دوم وياه

سهران اقرا  والكل نايم وبلحظه اندفرت الباب ومااعرف منين طبولنا واثنين لزموني وجتفوني اباوع ملثمين وسلاح بيدها ركضو للغرف كمت اعيط اريد اهلي يكعدون واتقاوه وياهم ضربوني بالاخمس على راسي خلو دمي يجي على طولي دخت وافترت الدنيا بيه وجتفوني زين

واعي بس دوخه قويه لهسه اتذكر الصار لحظة بلحظتها شلون تعيط امي وبسمة صغيره كل عمرها ٧ سنين لازم دشداشتها واخويه وابويه مجتفيهم اباوع اخويه عابد ماكو جان عندي اخ

غزل : جر نفس قوووي حيل ورجع شغل الجكاره الثانيه سكتت لان اريد اسمع الصار

عمار : اخويه اسمه عمر انسان صايم مصلي يخاف الله العيبه متطلع منه هاي الجكاره مجان يحطها بحلكه المنطقه كلها تحمدبيه وبأخلاقه جان اكبر مني ب٦ سنوات عمره ٢٥ سنه يشتغل ويه ابويه بلحداده جان عدنا محل حداده وهو وابويه يشتغلون بيه والحال ماشي

المهم جابو اخويه مجتف ونريد نعرف شيردون ويعيط ويضارب بيهم بس همه جانو هوايه وسلاح عدهم

ابويه بقى يعيط شتردون من عدنا حجه واحد منهم وكال

مو كلنالك تشيل من البيت متبقى ساعه بيه

عاد جاوبهم وكاال

وين اروح اني صاحب عائله وبس هذا البيت عندي والعيشه على كد الحال واني ممأذي احد وماعندي شى ويه احد

رجع الملثم كال

انت الجبتها لنفسك كتلك اخذ اهلك واطلع لازم تصير عبره لغيرك

وكدام عيني خرطوه كوموه بلكاع متحمل عمر ودفعهم وتقاوه ويه الي لازم السلاح اجه اثنين جروه وكوموه فوك ابويه طلقه براسه

غزل : يمه وكمت ابجي من الخوف وهو يحجي

عمار : لهسه ماانسى منظر امي وهي تتمالخ وياهم وتعيط لحد ما واحد ضربها راشدي بمحبسه شك وجهه متحملت وكعت بلكاع وبسمه ختلت بحضن امي كل هاي واني اتقاوه اريد بس يفكوني كمت اضرب برجلي وايدي واعيط بكل صوتي وافشر حرت شسويت لحد ما واحد منهم سحب طلقه ويريد يكتلني بصف ابويه واخويه امي شمرت نفسها فوكايه وتعيط اكتلونا كلنا اكتلونا كلنا

عاد حجه واحد وكال عوفوه عندج بس يومين تاخذين جهالج وتولين من المنطقه بملابسكم الي لابسيها اذا اخذتي شى وياج حتى هاي بتج اذبحها كدامج

غزل : كمت اشهك واني اتخيل المنظر كتله ليش هيج سوو اخاف عدكم عداوه

عمار : لا شغله طائفيه ورادونا عبره حتى شكو واحد من مذهبنا ميبقى بلمنطقه

غزل : الله لايوفقهم

عمار : بعد مطلعو الناس اجت تتراكض وشافو حالنا اني بس جريت امي الجانت ملابسه ربطتها وركضت ادور على عابد لكيته خاتل جوه الجربايه ومغطي اذنه ويبجي جان عمره ١٢ سنه مبين حس على دخولهم وخاف وختل

رجعت اترنح لان الدم مكطع وبديت ابجي واعيط مثل النسوان على ابويه واخويه بليله وحده انكلبت حياتنا

اكثر الناس تخاف بذاك الوكت

غزل : لان انتم سنه مو

عمار : اي

غزل : الله لايوفقهم

عمار : رغم تهديد المجاميع للناس بأن محد يساعدنا جان اكو رجال طيب الله يذكره بلخير عرض نفسه ولده للخطر وجان شيعي هااا مو سني ركض ويايه وشلنا ابويه واخويه للطب العدلي لازم استخرج شهاده وفاه وشرطه وهوسه والكل يعرفون سوالف طائفيه لهذا خلص كلشي بيومين تصوري يومين وتقيدت ضد مجهول واخذناهم ودفناهم والرجال ولده ولا عافوني ولا خلوني ادفع فلس  وزوجته خلت امي واختي واخويه عدهم مقبلت يطبون للبيت لحد مينظفو وشيفيد التنظيف والي صار خله حياتنا جحيم

غزل : الله يرحمهم ويعينكم

عمار : كعد تبجين

غزل : مسحت دموعي بس صوتي بيه غصه بجي وهمست اممم

عمار : شيفيد البجي لو يرجعون اخلص العمر كله ابجي

غزل : وبعدها شصار عفيه كمل

عمار : هيج حياتي عجبتج

غزل : مو شغلة عجبتني  بس اريد اعرف شصار وراها سمعت صوت الجداحه مبين يدخن وتطفه ويشغل الوراها

عمار : كرهت الشيعه شلع وحلفت شكو شيعي اعرفه اكتله

غزل : يمه صدك

عمار : هههه لتخافين يجيج الحجي

غزل : كمل عفيه

عمار : رجعنا من الدفنه وكم واحد من جيرانه استقبلونه واني بعز كسرتي انتبهت واحد من الجيران شاورني وكال هذا حيدر هو وجماعته هدو عليكم تخبلت ردت اروح اهجم البيت على راسه وراس الخلفوه بس لزمني هذا الرجال الطيب وبقى يحجي ويكول خاف على اخوتك وعلى امك تره يرجعون يذبحوكم كلكم باوعت على امي الي متحجي وبس تبجي لو اختي  الكامن تخاف من خيالها لو عابد الي كل وكت يتصفن وميحجي ويه بشر خفت عليهم كلت إمنهم بمكان وارجع اخذ ثار ابويه طلعنا من البيت ثالث يوم وكعدنا بمنطقه تعبانه على كد فلوسنا ايجار وعفت الدراسه وعفت كلشي وكمت ادور شغل اشكال اشتغلت عامل بأسواق ومره ويه فيترجي ومره ويه نجار كل كم شهر اشتغل شويه وابطل

غزل : ليش تبطل

عمار : اتعارك ومااتحمل ذبان وجهي ومن صار عمري ٢١ سنه جمعت اول كم فلس واشتريت سلاح وقررت اروح اغدر بيهم مثل مغدرو بينا ويايه ولد من اهل ابوغريب وكال نطلع جماعه وياك بشرط تصير ويانه واني كيفت يعني عزوه وناس وراح اخذ حقي

غزل : وشصار

عمار : امي جانت خايفه مني وتراقبني وحست حالتي مو راحه وبيوم سمعتني اتفق ويه جماعه ومتحملت تنتظر طلبت مني نروح للمكبره نزور ابويه واخويه اني حاولت افلت منها لان متواعد وياهم بس هي توسلت حتى بس نروح واخذتها ورحت واول مطبينا المكبره خلتني كبالهم وكالت

تعالو شوفو تعالو يريد يضيعني ويضيع اخو واخته مكافي انتم مدفونين هنا يريد يدفنا بصفكم اني صفنت عليها متوقعت تعرف

وتعيط تعال عمر شوفه الجنت تتمناه دكتور شوفه الجنت تكول هذا الي راح يرفع راسي وضربتني راشدي بحيث مكدرت حتى اباوع بوجهه

وحلفت على كبرهم اذا سويت شى او مشيت بهذا الطريق انساهم ومتبريه مني ليوم الدين

توسلت بيها اريد بس افهمها مقبلت جانت حالتها حيل صعبه لان شكل السكر عدها من كتلوهم كدامها وجانت تتخربط ويصعد وتخربطت على كبرهم واخذتها رادت تنجلط بوكتها

وتراجعت عن وعدي

غزل : خطيه خاله مبينه متعوبه

عمار : كلش فوك متتصورين

غزل : وبعدين

عمار : متعبتي

غزل : لا عفيه كمل وبعدين شصار

عمار : رجعت اشتغل وبقت تراقبني وخلت حتى عابد يراقبني تخاف لا اسوي شى حالنا تعب والرزق قليل وكوه الزكها والايجار اكل حالنا كله ومن هدأت الطائفيه كلت ارجع ابيع بيتنا على الاقل اشتري بيت ونخلص من الايجار رجعت للمنطقه وشافني الرجال ولده ورحبو بيه وسألت عن البيت كالو كعدو ناس بيه وعرفت حيدر الناقص واهله ماخذي للبيت وعاشو بيه فتره وطلعو ومن سألت عنه وشعجب عاف البيت كال جهاله اثنينهم انسحكو وماتو وطلعو من البيت وراها بجم شهر  اجو الامريكان عليه ومن مهزوم خارطي وانكتل

غزل : وبشر القاتل بلقتل

عمار : اي سبحان الله بس رغم هاي مطفت ناري لان مااخذت حقي بيدي

غزل : بس مات وقبل ميموت اكيد احترك گلبه على جهاله

عمار : عساه بنار جهنم

غزل : وهسه بعدك تكره الشيعه

عمار : هسه روحي بيهم

غزل : هاااا

عمار : مرات رب العالمين يحب البشر لدرجه يروح برجله للغلط والحرام وهو يبعده عنه

غزل : شلون يعني

عمار : بعد مده صارت حادثه كدامي ناس جيران هم سنه مثلنا طكت القنينه بلبيت وگب البيت اباوع رجال سيد موسوي ركض مثل المخبل عليهم وطلعهم حتى ايده بوكتها احتركت ورجله ولا اهتم تقصدت اسأله من كتله ليش ساعدتهم مو ذوله سنه هو مجان يعرف بينا سنه مباشره گلي استغفر الله اخويه شنو سنه شنو شيعه عيب هذا الكلام احنا كلنا اسلام محمد وهاي المسميات المتخاف الله خلوها ورادو يفرقونا

شفته شلون واعي وشلون ضحى بنفسه علمود ناس ميعرفوهم ومن اشتغلت بلكاظميه عند قماش وشفت شلون ناس من الاعظميه تجي تكعد ويه ولد من الكاظميه وجايات ونراكيل وعلاقتهم تخبل حتى ميجيبون طاري السنه والشيعه بس بلضحك واحد يكول للثاني بلعيد لتخلصون الكيمر انتظرونا لو منطيكم من الطبخ بمحرم ماكو قيمه يله  ويضحكون صفنت لعد الصار بينه شنو

غزل : مو معناها ذوله سوو هيج بيكم معناها كل الشيعه قتله ولا السنه الي ذبحو الشيعه معناها كله السنه قتله هم هوايه من الشيعه تأذوا تره الطائفيه اكلت من الجهتين

عمار : اي صحيح وبعدها صارو عندي اصدقاء شيعه كلش هوايه والحمدلله فكري وعقلي كله تغير تكدرين تكولين الصدمه والوضع الي انحطيت بيه جبرني بذاك الوكت افكر هيج يمكن الله يحبني ونقذني وماضيعت نفسي واهلي

غزل : زين الاسود ليش متنزعه

عمار : من موتتهم حلفت ما انزعه الدنيا سوده بعيني غزل سوده رغم كل هاي السنين

غزل : شكد صار على الحادثه

عمار : ١٠ سنوات

غزل : يعني عمرك ٢٩

عمار : اي بال ٢٠٠٦ صارت الحادثه

غزل : الله يرحمهم شهداء راحو مغدورين

عمار : يرحم موتاج وبعدها تلطمت الدنيا بيه لحد مشتغلت ويه الحجي

غزل : قصدك بابا

عمار : اي اصيحله الحجي بدون اسمه والله ابوج ذهب صافي احسدكم عليه

غزل : اي فدوة لعمره اروح ماكو اطيب منه

عمار : مو لان انتي بنته واحجي هيج بس صدك رجال من اهل الله وخير كلنا نحبه والعيبه متطلع منه مرات احسه مثل ابويه على طيبته وشهامته واخلاقه الصغير والجبير هناك بلسوك يحبه وميقبل بلظلم شكد مرات تصير سوالف هو يتلافاها وميكسر بخاطر احد وبسببه عفت العصبيه والمشاكل وهو اطول واحد بقيت وياه بلشغل

بعده يحجي سمعت صوت ريم تحجي ويه رشا مباشره كلت باي وسديته بوجهه وخليت التلفون جوه راسي وسويت نفسي نايمه انفتحت الباب واسمعها تكول خطيه نايمه

ريم : منعسانه تعالي نسولف هنا

رشا : لا امشي يمي عمه من تنام متحس بس غزل بسرعه تفز وسدت الباب وراحت باوعت ساعه ١١ عزه صار ساعتين نسولف رجعت دكيت عليه شاله بسرعه

اعتذر سديته اختي اجت

عمار : زين سوين اني المفروض مااطول دوختج ويايه

غزل : لا بلعكس ماكو اي دوخه

عمار :اخذي راحتج اخاف يجي احد واحرجج

غزل : مااشي مع السلامة

عمار : بس

غزل : شنو

عمار : في حال رجع فيصل وراد يرجعج راح تقبلين

غزل : ليش هامك الموضوع كلش

عمار : مثل مسألتيني عن الاسود وجاوبتج وحجيتلج كلشي بس مره جاوبي بدون متسألين

غزل : فيصل ورقه بحياتي واحتركت والي يحترك ميرجع

عمار : تصبحين على خير

غزل : وانت من اهل الخير وسديته حاسه بشعور غريب يعني ساعتين اسولف ويه عمار ممصدكه ساعه افرح وساعه اكول اخاف ياخذ عليه نظره بس احنا مسولفنا بشى موزين وارجع اكول المفروض اسده وماانطي مجال افكار تتزاحم بعقلي ومااركز

اخر شى غمضت ونمت تعبت من التفكير عفت كلشي على حاله

ثاني يوم كاعدين جمعه وبابا جايب گيمر عرب وكعدنا كلنا نتريك سوه البنات مطفيات ياكلن بتك عين لحد مكال بابا

حجي طه : بنتي غزل عمج محسن البارحه اجه وتوسل بيه ويكول فيصل يريدج ترجعيله شتكولين

مباشره ريم ورشا صحن والعيون الجانت مغمضه انفتحت كلها اني مبدر مني اي ردت فعل لان عمار كالي البارحه لهذا تصرفت بهدوء

نهر : شعجب رادها مو طلكها وحتى للعراق ما اجه

حجي طه : يكول ماالكه احسن منها وان شاء الله ما أذيها بعد

غزل : وانت شگلت بابا

حجي طه : والله يابنتي اني مارضيت بس هم مااضلم بختج اخاف رايدته اني لو الامر بيدي ماارجعج اله لو يدكون وزنه ذهب

نهر : اذا متندم وشاريها ليش مترجعين يمه

رشا : شترجع عمه بعد سوايته نسيتي الصار خلاها بليله ظلمه تهج من اخر الدنيا وترجع

حجي طه : عوفوها براحتها هي تقرر فكري بابا

غزل : بابا ميحتاج افكر

حجي طه : هم ميخالف فكري اذا تردي اني وياج متردي انتهى الموضوع مينفتح

رشا : تره هو مميت عليها بس تلكه عمو محسن اكل گلبه لابنه وحتى يخلص من زعل ابوه والنگ مالته يرجعها ويشمرها بلشقه مثل قبل بس يجوز يتلافه المشاكل وياها

نهر : بسرعه حللتي الشغله

غزل : كلام رشا صحيح متأكده هاي سوالف عمو محسن شلون من خلاه يتزوجني وضل يهدد بيه هسه هم نفس الحال وخاصه هسه مريض عمو ويخاف ليصير شى ويتندم

حجي طه : بنتي هاي كدام خواتج وامج شتردين اني وياج گلت رأي لمحسن بس تعرفن عمجن جليب اذا اجه وحجه وياج احجي الي بگلبج وشتردين اني حاظر اكوم اروح للبيت اشوف شبقى منه

ريم : شوكت نشيل والله شكله طلع حلوو

حجي طه : مبقى شى بنتي الكاشي وكمله يركب البوب والجام ويصبغ يعني شهر زمان وتنامون هناك

نهر :والواجهه بعدها طابوك

حجي طه : وشلت ماضلن عندي فلوس كلت يلبخوها وتنعاف هيج اهم شى الجوه كمل البره شنسوي بيه وكت ما الله يرزقنا فد سنه سنتين نسوي البره الاهم الداخل كله كامل

نهر :  الْحٍمَدٍ للـّہ ان شاء الله ايه الرزق والعافيه نشوف عليه

حجي طه : امين اروح اشوف النواقص ومناك اطلع للمطعم محتاجين شى

نهر : سلامتك

غزل : بس طلع بابا استلمني ريه وسكينه

ريم : ديري بالج تقبلين

غزل : هاي شبيكم من كل عقلكم رايدني اني غير بابا كاعد استحيت احجي اكلهم سنه كامله كباله مافكر يلمسني فيصل مكتفي بحبيبته وعايش حياته وياها بس اني هيج واجهه اجتماعيه كدام اهله يسكتهم بيه

رشا : ويجوز متزوجها شمدريج

ريم : اي والله شمدريها هاي مطفيه يجوز متزوجها وانتي متدرين

غزل : والله ماادري ولا اريد ادري وسدو الموضوع رجعه لفيصل ماارجع

نهر : براحتج يمه عوفنها ولجن

اجه بابا وره يومين وكال حضرو نفسكم راح نشيل فرحنا حيل اخذنا الماسحات والسطلات وركض نغسل بلبيت جنا طايرين ممصدكين عدنا بيت ملكنا وجديد وحلوو وكل وحده بينا الها غرفه سوه ٣ غرف فوك وكال قسموها بينكم اني وفروحه بغرفه وتيم وريم بغرفه وعمه وغزل بغرفه وحمام فوك وبابا غرفته جوه صغيره ومطبخ وحولي يم الدرج سوينا هول  وحمام واستقبال جانت الخريطه مالته نفهه

فرحانات وندبج ونغسل بلبيت وبابا وعمو بره ينظفون الكراج من الانقاض

كملنا الغسل ونشفناه وصيف بسرعه نشف وسليل سوت الغده وكعدنا كلنا ناكل بيتنا الجديد

شلنا بيه يمكن صار هوايه مضاحكين ولا مرتاحين هيج وحدتنا شافت المر بكلشي بس بهاي الايام نشتغل ونتعب بس انام والضحكه على وجوهنا

صارنا اسبوع مكعدنا بس نشتغل وانرتب لحد مكملنا البيت وبابا طلب البيت القديم نغسله يله نسلم المفاتيح كال فوك ما مإجرين بيتهم النا صار سنين عيب نرجعه وصخ وكعدنا جلفناه يعني الشغل شغلين بس احنا سريعات والحمدلله كملنا

اليوم كلنا نايمات بيتنا الجديد وبغرفنا رغم بساطه الاخشاب بيها بس عدنا جنه وكلنا من رواتبنا شوي شوي نشتري كل فتره بس هسه نكعد ونستقر وراها نفكر بالاثاث

مر وقت على كعدتنا والحمدلله حالنا كلش زين بس مرات حتى من نرتاح لازم ندفع ضريبه الراحه

مبقى شى ويبدي الدوام ونحضر شغلاتنا هاي الفتره اجه شعلان لبيتنا الجديد وشاف فرح ومطلعت اله وهو هم بقى ربع ساعه وراح كالت عمه حسيته مرتاح من شاف البيت

رشا : تدرين ليش مرتاح

نهر : ليش

رشا : لان عرف هذا هو بعد انتهى ومااحتاجه بيوم ولو اني محتاجته اصلاً بهذا البيت او بدونه بس هو بقناعته بأن اذا اخذلي بيت عسى اقبل وارجع من شاف مكانه شلون جديد ومريح متحمل وضيفتي ودوامي كلك هاي هيه بعد متگلبني ميدري بيه لو عايشه بخيمه هم ماارجعله

نهر : خلي يولي يمه ولتفكرين بيه

رشا : لا ماافكر عفت عمه وطبيت شلون ماافكر واني لجعاته بگلبي بعدهن

نظفنا وننتظر بابا نصب الاكل شويه ودخل وياه وحده يمكن لو بلشارع تفوت من يمي مااسلم عليها كلنا استغربنا شجابها

نهر : سندس شجابج

سندس : اجيت اشوف بناتي

رشا : لابالله يابنات

حجي طه : طبي

ريم : وين بابا مطببها خير شرايده

حجي طه : اوكفن بنات عيب خلي تدخل بيتكم وتضايفوها وهسه دزيت على سليل هم

كعدنا ولا وحده تقربت منها وهي صافنه بلوجوه

نهر : شلونج سندس

الْحٍمَدٍ للـّہ انتي شلونج

نهر : بخير شوكت رجعتي للعراق

سندس : صار يومين واجيت اشوف البنات وعندي شغله ويه طه وارجع

ريم : على شنو بعد متعبه نفسج شنو شغلتج كوليلها والله وياج

حجي طه : ريم كااافي بابا

طبت سليل انصدمت وبقت صافنه

رشا : تعالي ليش صفنتي اقدملج امج الي بلجنسيه

سليل : شصاير

حجي طه : امكم اجتني وتوسلت حتى تشوفكم وجبتها حتى لتكول مانعني من بناتي لان اكثر من مره تخابر وتكول بناتي يردني وانت مانعهن

وعدها شغله كالت تكولها كدام البنات

ريم : والله تسوي فضل تحجي شنو الشغله بدون المقدمات المابيها معنى

سندس : شبيج ريم اني امج شنو هذا الاسلوب ويايه عود كلت كبرتن وعقلتن وراح تفهمني وتقدرن كبرتي وشيبتي

رشا : وينج والله كل الحيل بيج ومحلوه اصلاً كالو الخارج يحلي بس مصدكنا

سندس : شفت اسلوب بناتك شفتهن

حجي طه : بنات كاافي وخلي نسمع امجن شتكول

سليل : احجي ام حسام صدك مو جان عدنا اخ اسمه حسام وينه

سندس : هو جايتكم عليه بيدجن تنقذن اخوجن

حجي طه : شبيهه حسام

سندس : دخل شراكه ويه جماعه سويدين وخسر فلوسهم وعليه وصولات ومبالغ واذا مرجعهم لو يكتلوه لو يدخلوه السجن وانتم متقبلون اخوكم يضيع اجيت اتوسل ومستعده ابوس ايد كل واحد بيكم اخوكم راح يروح ويضيع حتى مكدرت اطلعه من السويد واهزمه الناس الداخل وياهم بلشغل ثكال وكرصتهم والكبر

طه هذا ابنك وحيدك مستحيل تعوفه

حجي طه : شكد عليه

سندس : ٢٠٠ الف دولار

ريم : ٢٠ شده ياسبحان الله تبيع المطعم والبيت يصيرون ٢٠ خوش حاسبتها عدل والله رفيقه قديمه مينخاف عليج

سندس : شنو قصدج

رشا : قصدها هاي الكلاوات گلبنا خلص منها واذا ابنج متورط او لا هاي مشكلته مو مشكلتنا

سندس : طه بناتك حاقدات عليه اني طبني مرض بس هذا ابنك وحيدك تقبل يموت تقبل ينسجن

حجي طه : اكيد مااقبل بس منين اجيبلج هذا المبلغ

سندس : دبره من اي مكان انت هسه عندك وداشوف كدامي بيت ملك ومطعم يعني كلشي تكدر تسوي

ريم : مو كتلكم حاسبتها صح

حجي طه : وشتردين اشرد بناتي

سندس : لعد ابنك يموت احسن ولجن هذا اخوجن تخبلتن اخوجن متفكرن بيه وحيدجن گلت راح حتى ملابسهن يبيعنها في سبيل يبقى عايش شنو الدم الجمعكم بيه مي كلكم طلعتو من بطني كلكم اخوه هاي خوتجن وانت طه مو تصيح وتستريح ابني وابني هذا ابنك التجأ الك شراح تسويله

يعني لهاي الدرجه صايرات كطع ماعدجن رحمه اني امجن لو شميصير ابقى امجن والي حق عليجن واجيت اتوسل بس حتى تنقذون اخوكم

سليل : هذا منو اشرت على زين بقت صافنه بوجهي

عرفتي هذا منو سكتت تيم فرح تعاالو

ذوله منووً هم سكتت

هذا ابني زين وهذا ابن ريم تيم وفروحه بت رشا تعرفين بينا تزوجنا لا اكيد متعرفين اني تزوجت وخلفت انتي وين جنتي عني وهااي ريم تزوجت وخلفت وترملت وماتت الها بنيه ورجال وين جنتي عنها وهاي رشا تزوجت وخلفت  وانطعنت واطلكت وين جنتي عنها وغزوله تتذكريها يمكن متتذكريها لان عفتيها لحمه حمره صغيره عمرها ٣ سنوات محركه اتزوجت وسافرت واتصوري عاشت وياج بنفس الدوله ورجعت واطلكت وانتي ماكو

ياامنا يله ادورين حقج من عدنا انطينا حق كل وحده بينا انطينا حق كل لحظه عشناها بلياج يله تحجين بلحقوق

انت حرام تتسمين ام واذا صدك جنتي ام صرت بس للمدلل مالتج حسام الي اصلاً احنا نسينا عدنا اااخ هذا بابا اذا ينطيج تعبه وكسرت ظهره لابنج اني اعتبر بابا ظلمنا كلنا لان سواها مره وباع العنده والماعنده لخاطر يعيش الشفيه وتاليها دار وجهه وراح

بابا تسمعني هاي المره الي مااتشرف تكون امي جايتني بعد سنين اطالب بلخوه والامومه حتى تنقذ شخص تسمي اخونا اذا تريد تنقذه او تشتري اعتبر نفسك بعتنا

يتبع ...

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الثالث_والاربعون

الوكت عرس عليه  والشامت الزافوف

وتكلي بحياتك  شايف الكله.

شفت كلشي بحياتي الماصخ ومملوح

وشفت طعم الحمل حلو بلاهات اهله

الناس تلم عنب ويدورون  سلال

المثلي  يلم  دمعه  شيسوي بالسله

واذا  تشرب  مروره ومن تنام  بنار 

محسود عليمن عيشت الدله

سليل : انتي حرام تتسمين ام واذا صدك جنتي ام صرت بس للمدلل مالتج حسام الي اصلاً احنا نسينا عدنا اااخ هذا بابا اذا ينطيج تعبه وكسرت ظهره لابنج اني اعتبر بابا ظلمنا كلنا لان سواها مره وباع العنده والماعنده لخاطر يعيش الشفيه وتاليها دار وجهه وراح

بابا تسمعني هاي المره الي مااتشرف تكون امي جايتني بعد سنين اطالب بلخوه والامومه حتى تنقذ شخص تسمي اخونا اذا تريد تنقذه او تشتري اعتبر نفسك بعتنا

بابا جان يسمعني ومدنك راسه على السبحه وساكت

سندس : احجي طه كعد تشوف بناتك وحده ترفع والثاني تكبس هلكد شايلات حقد على اخوجن الله اكبر صله الرحم ولجن هاي انتن مو تصلن واتصومن مو تحجن بلدين وينجن اخوجن واكع بشده ومتنقذنه اذا مو لخاطره لخاطر جهاله انتن عماتهم

ريم : ياااا اتزوج الدثو والله زين لكه وحده ترضه بيه

سندس : انجبي لتحجين هيج على اخوج

ريم : خوش تنگه وعوجت حلكي

رشا : بابا اذا انطيتها فلوس اني اخذت بنتي واطلع من البيت

رفع راسه وباوعلي وحجه بهدوء وبعده يسبح

حجي طه : عندج حصه بلبيت لا خلف الله عليه كاعده بيها واذا تردين تكدرين تبيعيها

رشا : العفو مو هذا اقصده فدوة لتراب رجلك الحصه واني وبنتي تريد اتنازلك عليها ومااريدها ولا يوم ردتها وهسه اتنازل بس لحظه ماابقى هنا اذا ساعدت حسام

حجي طه : وانتي ريم

ريم : حالي من حال اختي هم اتنازلك تعرف بينا مو بعينا الفلوس وانت عدنا تسوه الدنيا بس الديصير ظلم النا والك ولتعبك وضالين بين نارين لانكدر نسكت  ولا نكدر نجادلك الافضل نطلع من البيت لان اذا بعت كلشي وانطيتها والله اطك واموت  كافي حسره يصير عندنا جم فلس تجي تكش الاكو والماكو وبحجه وحيدك متخاف يموت نفس الكلام ونفس التمسكن اني شى واحد مدوخني حاطه كامرات حاطه واحد يجيبلج اخبارنا مامعقوله تختارين تواقيت عجيبه مثل البزون من تشم ريحة اللحم تجي تركض عليه تشمين ريحة الفلوس عدنا وتجين ركض علينا فهميني منو يوصلج اوضاعنا ولتقنعيني صدفه الصدفه تصير مره مو كل مره

سندس : شنو قصدج ولج

ريم : قصدي واضح منو دك عليج وكال الحكي صار عند طه بيت وكعدو بيه ومطعم يشتغل واجيتي ركض بلكت تحصلين كم فلس

سندس : باع هاي الي يسمعج يكول متقصده

سليل : حجي ريم صح كل فتره جايتنا وجايبه مصيبه وياج

سندس : مالي دخل بيجن بعد الحجي بيني وبين طه الظاهر جنت غلطانه من توقعت اكو ذره محنه واخوه بگلبجن لاخوجن اذا هي حتى عمتجن تسمع كلشي وساكته

نهر : طلعي عمتهن من هذا الموضوع البنات مو صغار ولا طه ميعرف يتصرف اني وياه بكلشي

سندس : هسه فضوني شصفت

سليل : غزل صافنه على سندس ومافتحت حلكها بكلمة باوع بابا عليها وكال

حجي طه : غزوله شو ساكته

غزل : شكول بابا

حجي طه : الي بالج

غزل : ماكو شى بالي

حجي طه : احجي بنتي ليش صافنه

غزل : جريت نفس بهدوء واباوع عليها واحجي معقوله مشتاقيتي النا مأجنه ولو مره على بالج

سندس : شلون مااشتاق ياامي والله حتى ابجي عليجن وجم مره اسألي لطه اسأله عليكم واخابر ومرات حتى يسد التلفون بوجهي كله من وراه بعدني عنكم

غزل : يعني بابا هو الي خلاج تاخذين حسام وتهجين بليله ظلمه وتنسينا تدرين اني وياج سنه كامله بنفس الدوله وكل مااتذكر انتي قريبه مني گلبي ينقبض واكره روحي وكعت بإكثر من شده التجإت للغربه

والج ملتجأت

سندس : ليش مخابرتي جان جيتج

غزل : على شنو تجيني شسويلي اذا اني طفله ومحروكه ومدرتيلي بال هسه راح تطلع المحنه تره الحنين يبقى حنين لو شما الدنيا تغيره وتلعب بيه وانتي اصلاً ماعندج حنيه لا عليه ولا على خواتي

سندس : والله وكبرتي وطلعلج لسان مثل خواتج

غزل : زين تدرين كبرت عبالي متعرفيني

اني هذا الموضوع ماادخل بيه وانت بكيفك بابا

سندس : اني مرايده اهجولكم بس على الاقل يشيل نص الفلوس

سليل : يعني يبيع لو البيت لو المطعم وبما ان متريدين يهجولنا يبيع المطعم ويبقى كاعد و بهذا العمر يرجع عماله لو على عرابه علمود استاذ حسام مينسجن

ريم : عساه انسجن وعفن يتصرمح ويلعب هنا وهنا بلخارج وياخذ فلوس الناس هاي اذا ماخذهن وتعال يابابا سدد مكانه مو ابويه العبادي وخزينه العراق بيده عشتوو

حجي طه : شفتي ولا بنيه طبكت وياج

سندس : بناتك من هنه وصغار گلبهن حجر على اخوهن عبالي كبرن وعقلن وتغيرت نظرتهن بس هااك استلم وحدتهن هسه مترتاح اله تشرب دم اخوها لو تشوفه مذلول ومسجون هاااي تربيتج نهر قسيتي بناتي عليه

رشا : عفيه مكافي متعبتي نفس الاسطوانه المجروخه كل كم سنه تغيبين وتغطين وننساج وجرب صرتي گبالنا  واجيتي بجيتي وبناتي وبناتي واشتاقيتلكم وميته بدونكم الي يسمعج كاطعه الاكل والشرب وتنوحين على فراكنا  ومن نحجي الحق عيرتي عمه بتربيتها النا ودرتي وجهج ورحتي اذا انتي هامتج تربيتنا المن عفتينا ورحتي وتعاليلي شبيها تربيه عمه نهر ينحلف براسنا وشوفي تربيتج للمدلل ينحلف برعونيته وقلة اخلاقه ابنج مو رجال حوك واخو خيته ابنج بس بالاسم اخو وهيج اخ منريده ولا كل شويه حجت تربيتنا وكالت عمتنا بيج زود ربي ابنج بالاول الله اعلم ليش هيج غرك بلدين يجوز مخلصها شرب وبنات موزينات وتغطين عليه

سندس : اني لو اخلص ايامي كلها يمجن مراح اسمع بس هذا الحجي الماصخ

سليل : الف رحمه على بيبي (امج) ماعدنا غير هذا الحجي هاج كلنا كدامج اذا وحده بينا حنت عليج ورادتج احنا وياها

سندس : اعرفجن لو شما اسوي لو ابوس ايد كل وحده بيجن مراح تحبني انزرع بگلبجن الكره اتجاهي بس لتنسن يلصرتن امهات الدنيا دواره وباجر عكبه يصير بيجن مثل ما هسه تسون بيه

ريم : ليش احد كلج راح نشمر بزرتنا (اطفالنا) بلشارع لو نعوفهم بعز حاجتهم اي صحيح الدنيا ادور بس عليج مو علينا انتي كرصتينا كرصه خليتي كل وحده بينا تفكر الف مره قبل متأذي ابنها ومنسوي سوايتج

الْحٍمَدٍ للـّہ مورثنا منج ننبذ جهالنا ونشمرهم ورثنا من ابونا لو ننطي روحنا الهم قليل وهمه قبل كلشي كافي فلسفه وتبرير ماله داعي دخنا والله ولعبت ارواحنا عوفينا رحمه لامج وابوج احنا منريدج منعرفج ولا يربطنا غير اسمج بلجنسيه ولو يصير يتغير وداعت ابني اغيره

سندس : انت كعد تسمعهن وساكت

حجي طه : طبعاً اسكت شتردين اسوي

سندس : اعرف ماعندك سلطه عليهن لان دومك ضعيف بس مو الى درجه يتجاوزن على امهن وتسكت

سليل : بابا اله كل السلطه علينا هسه بإشاره من اصبعه اذا يريد نموت نموت رجاءً لتحجين عليه تره منقبل

حجي طه : شتردين هسه سندس

سندس : كل هذا الحجي وتكول شتردين ساعد ابنك يارجال هسه لتبيع البيت لان لامكم وهم مااريد تتإذون والبنات بركبتهن جهال

رشا : ياعيني شكد حنينه راح ابجي من الحنيه

حجي طه : كافي مااسمع صوت كملي سندس

سندس : شكمل شنو هذا البرود العليك اكله ابنه راح ينسجن ويجوز ينكتل وانت تكول شتردين

حجي طه : ماعندي انطيج شسوي

سندس : ليش ماعندك ماشاء الله مطعمك يجيب ملايين

حجي طه : مااكدر اتصرف بيه

سندس : ليش بله

حجي طه : مو بأسمي

سندس : شنو مو بإسمك غير من سنين مشتري واذا بعته هسه خير من الله يجيب

حجي طه : المطعم بأسم البنات وذني بناتج اذا يقبلن يبيعن ابيع

سليل : تفاجأنه بكلام بابا وحده صافنه بوجهه الثانيه

سندس : لتلعب عليه طه شنو بإسم البنات وبأي حق تسجله بإسمهن

حجي طه : بكيفي مطعمي وبكيفي احركه انطيه اسجله بأسم بناتي

سندس : وحسام

حجي طه : من اموت عود خلي يجي ياخذ حقه حسب الشرع وياخذ حقه من نص هذا البيت لان النص الثاني بأسم ريم ورشا

سندس : ياشرع تحجي بيه وانت بكيفك تسجل وتريد تحرم ابنك الوحيد من الورث

نهر : والله انتي متستحين كاعد وعايش والله ينطي الصحه والعافيه وتفاولين عليه غير عين كويه ان شاء الله يومنا كلنا گبل يومه

سندس : بله انتي اسكتي الله اعلم شمسجل بإسمج وخانسه ومكيفه

حجي طه : اني لو عليه اسجل حالي ومالي كله لنهر وجوه رجلها بس هيه مقبلت

نهر : خفت اموت وتورثني امي وعلي وهمه مالهم حق بكلشي

سندس : والله حلوة مقسمين كلشي وابني المكرود كاعد هناك عباله عنده اب وكت العوز يوكفله

حجي طه : هو حسام ميعرفني بس من يحتاج فلوس من سافر لليوم شال التلفون سإل عني طيب خاطري ولو بكلمه وقبل شويه تكوليلي تزوج وعنده اثنين ولد مكال اخابر ابويه ابشره من تزوجت من صار عنده جهال عايش بلطول والعرض حياته ومن تضيق تعال يا طه

سندس : والله عيب عليك متوقعت راح تره خلي يجي يشوف ابوه شلون مسجل كلشي بأسم خواته

حجي طه : شتردين اعوف اثنين مطلقات وارمله تحت رحمته هذا بس اموت ثاني يوم يبيع البيت ويبيتهن بلشارع ماعنده غيره اعرف بيه  ويضيع تعب السنين وكسرت الظهر وياخذ الفلوس ويطير يرجع للسويد وذني يضلن متلطمات بلدنيا مخبل واعوفهن بهيج حال ذني روحي سندس ذني الي الله رحمني بيهن شلون تردين ماارحمهن وأمن مستقبلهن واخلي الذيابه تنهش بيهن واكبر ذيب هو اخوهن وكتلج من اموت عود اله حصه بلبيت هنا عود يجي  وياخذها وحتى قرايه الفاتحه على روحي مااريدها منه

سندس : على الاقل ساعدني بمبلغ واني اكمل الباقي

حجي طه : طالع من بناء وماعندي لو عندي مااقصر

كامت تعيط هزت البيت بعياطها

سندس : يعني هاي تاليها اجيك من اخر الدنيا حتى بس تساعده تكلي ماعندي وكله بأسم البنات

حجي طه : ذني البنات كدامج يردن يطن براحتهن المال مالهن

كلنا سكتنا تالي ريم كالت

ريم : لتعبين نفسج ولا وحده تنطي شوفيلج زواج غيرنا وخلي ابنج ابو منو صار مو مهم لتكولين الدثو ابنج يشوف غيرنا يصير ٥٦ براسهم مو راسنا

رشا : شنو ٥٦

ريم : بعدين افهمج شفتها بلفيس وعجبتني

سندس :هااا ولجن ولا وحده بيها خير وتساعده

سليل : ماعدنا لا اخ ولا فلوس ورحم الله من زار وخفف

حجي طه : تردين تبقين على الغدا واجب الضيف هله بيج ادخل اصلي ومن تصبون صيحوني كاام وسد باب غرفته

سندس : مااضل بهذا البيت لحظه وحده البيت الميقدرني مااريده مع الاسف حبلت وخلفت وتعبي هيج ضاع

رشا : يارب الصبر لساني راح يفلت

ريم : على كيفج يااختي انتي مربيه فاضله تربين اجيال اذا يفلت شيشده واكو ناس حرامات واحد يصرف وياهم طاقه وحجي

سندس : ممتربايات وكطعيات

ريم : وحقيرات ومو خوش بنات فضينا يمعوده مو كتلنا الجوع

راح ينعاد الحجي كله والله اروح اصب واكل وماانتظر احد كاافي لعبتي روحنا

سليل : كاافي ريم سمعتي كلامنا كله عندج شى بعد

سندس : من اليوم اعتبرتجن متن لان شفتن اخوجن بضيق وماكلفتن نفسجن توكفن وياه

رشا : الف رحمه على اهلج متنا الفاتحه على ارواحنا بعد لتجين ولا نريد نعرف اي شى عنج وخاصه عن اللولو مالتج حسومي

ريم : رايحه اصب كومن كتلنا الجوع ساعه الكشره مو غدا زقوم طلع كومن

نهر : كامن البنات  للمطبخ

وسندس طلعت وطلعت وراها

سندس : كله منج

نهر : لو باقيه فوك راسهن ومربيتهن جان عيونهن ينطوها الج لتشمرين وترجعين ادورين حنيه وامومه توكلي بالله

سندس : حتى لو يموت طه مااخلي حسام يجي

نهر : طوله العمر اله الطيب والخوش انسان الصغير والجبير يصيروله اهل وعزوه لتخافين محبينه هوايه وان شاء الله عمره طويل

سندس : عساه لاتهنى ماطول قصر على ابنه وفضل الفلوس على حياته

نهر : روحي سندس دوختينا تره

دارت وجهه وراحت وركعت الباب وراها

صبن البنات الاكل وكعدنا ناكل جان طه هادئ كلش ياكل وساكت اعرف گلبه على ابنه گلب اخويه گلب سمجه ميحقد ولا يشيل ومهما كان يحب ابنه ادري بيه هسه خايف على حسام بس بنفس الوقت ميكدر يضيع بناته

ريم : اكلك بابا

حجي طه : هاا بنتي

ريم : فيصل ابن عمو محسن مو بلسويد ليش ميتأكد من كلام ام حسام

حجي طه : شلون يعني

ريم : هناك الجاليه ناس تعرف ناس مو مثل هنا وهم من المعارف اكيد واحد يعرف حسام خاصه صار سنين هو عايش هناك

حجي طه : واذا عرفنا شيفرق

ريم : اريد گلبك يرتاح وضميرك يهدأ

باوع عليه بابا واستغرب كلامي

اعرف بيك خايف عليه بس حجيها والله جذب وفلم هندي واضحه وضوح الشمس لو صدك جان سندس هسه واكعه النا بلطبلات وعياطها واصل للبصره

نهر : مشفتي عياطها گلبت الدنيا

ريم : لا عدها نغمات خاصه من تنهار حتى تخربط بلحجي وتفشر وتغلط هي متعصبه بس مو لدرجه حسام حياته بخطر تتذكرون من جان مخطوف شسوت وهسه عصبيه بس احسه تمثيل

رشا : قابل عدها جرأه تجي مناك لهنا وتسوي هذا الفلم

ريم : والله عدها يجوز مطلوب بس مو مثل ماهي سوتها تهديد وسجن وهم كالت شيطلعلي من طه ينعم الله زايد خير

غزل : عقلج خطير بس عندي الافضل من فيصل يجيب الكم الخبر اليقين

ريم : منو

غزل : صديقتي الكتلج عليها نوران واخوها وخاصه نوران عدها اصدقاء بكل مكان واخوها هم وعادي اذا يحب بابا يكول لعمو محسن يوصي فيصل ولو هذا دهري وبارد بعد سنه ميجيب الخبر ذولاك اسرع وشاطرين

حجي طه : اي والله بنيتي ياريت وكون اقرب وقت

غزل : هسه اكمل اكل واخابرهم

حجي طه : دومج ذكيه

ريم : شعبالك بابا اني مكاني مو هنا مظلومه يمكم المفروض هسه اني بوكاله ناسا

نهر : شسوين

ريم : افتح براغي الهم

سليل : هههههه والله خبله كعدنا نضحك ونغير جو لبابا جنت فرحانه لان منطه بينا ومكسرنا كدامهم ونظرات عيونها المصدومه متروح من بالي

كملنا الاكل ورجعت للبيت وعفت البنات هنه يستفسرن

غزل : خابرت نوران اني من يوم مرجعت منقطعت منها بقينا على اتصال وطلبت منها تستفسر وانطيتها الاسم الثلاثي واسم الام حسيت هاي اليومين اصعب يومين على بابا رغم هدوئه ومصدر شى منه بس كلنا حاسين بيه ومن خابرتني نوران فتحت الكاام وياها حتى كدامه يصير الحجي

نوران : شلونك عموو

حجي طه : هله بنتي شلونج ان شاء الله بخير

نوران :   بخير والله من زمان امنيتي اشوفك

ريم : فدوة احجي وبعدين سلمي مو الرجال ضغطه صعد

نوران : ههههه اكيد انتي ريم شوفتني صورج ومن كلامها اموت على دمج

ريم : مو خوش سالفه خجلتيني سلمي خيه سلمي مالي عين احجي بعد

نوران : ههههه لا احجي وبعدين اسلم على وحده وحده عمو عن طريق جماعه استفسرو عن ابنك وطلع منطقه قريبه منا غزوله حسبة ربع ساعه تصوري

غزل : والله كلشي اتصور كملي

نوران : حياته زينه وعنده اثنين اولاد وكاعد بشقه ومتزوج سويديه ومحصل الجنسيه وضعه لابإس بس مديون شى بسيط

غزل : معرفتي شكد

نوران : صرفيات عاديه مال ونساته وسهراته ميتجاوزون ١٠ الالاف دولار اذا مو اقل وذني بس واحد يطلبهن يعني مو اكثر من واحد

ريم : يعني شده المناضله تريد تقطنا تاخذ ٢٠ شده وحده للدثو و١٩ بجيبها

حجي طه : متإكده بنتي

نوران : اي والله عمو وحتى عنده سياره حديثه يعني ماشية اموره وجهاله كلش حلوين على امهم زوجته شكره حلوه

ريم : اكيد مو احلى مني

نوران : هههههه اكيد

ريم : تره ضحكتج استفزازيه تره اني جنت شكره بس وكعت من الكاروك وصرت هيج ليغرج شكلي هسه

نوران : هههههه واضح

حجي طه : شكراً بنتي مقصرتي

نوران : اي شى تحتاج عمو بلخدمه اني

حجي طه : خادمه ربج بنيتي الله يحفظج لشبابج

نهر : كاام طه ودخل الغرفه ودخلت وراه

شبيك

حجي طه : شفتيها جايه تبوك حلالي وحلال ذني المسكينات يعني لو متخبل وبايع كلشي خوف على ابني شلون تنام وتعرف بناتها عايشات بلقله والقهر شنو من مره گلبها مالان على بناتها

نهر : نسيت هاي منو هاي سندس الي شمرت ٤ بنات لخاطر نفسها ومتعتها وهنه جهال وراحت تزوجت قابل راح يهزها هسه قهرهن وهنه وحدتهن مره ومتزوجه وعدها جهال سد الموضوع  الْحٍمَدٍ للـّہ عدى على خير وسلامه وانت هم عااشت ايدك مستعجلت

حجي طه : كم مره كتلج مااريد بناتي يتإذن بعدي كافي العاشنه قبل ضاكن المر اريدهن يرتاحن هنه وجهالهن

بس اكول حسام يعرف بسوايتها

نهر : يجوز يعرف بعد تربيه امه

حجي طه : مع الاسف بس بالاسم ابن غسلت ايدي منه كلش هسه مااريد كمت بس يبتعدون عن البنات مااريد يطاخخون وياهن

نهر : ان شاء الله ماكو شى وانت صدمتها من كتلها المطعم بإسم البنات

حجي طه : لعد شلون اسكتها الله يهديها شيطان مو مره ذني بناتج ولج تاخذين حق بناتج استغفر الله

نهر : لتضوج خلي تولي

طه : شفت اشكال وخاصه منها ضلت على هاي بس انقهرت لان تاخذ حق بناتها خلي تولي وهم بعد لتخلين البنات يفتحون الموضوع

نهر : لا هذا هو الله يديمك فوك راسهن وراسي

حجي طه : سويلي جاي راسي يوجعني

نهر : شويه واسوي العشا تعشى وراها اصبلك

حجي طه : راح اتمدد بين متكملين

نهر : ارتاحيت هسه

حجي طه : على كولت الفصعونه ريم ضميرك يهدإ وهسه هدأ

نهر : الله يريح بالك بحق محمد وآل محمد

حجي طه : امين الجهال عياطهم بلشارع سكتيهم عيب من الجيران

نهر : صاار

طلعت ورجعت اني ورشا نسوي الاكل وغزل وريم يسولفون ويه نوران ويضحكن

رشا : مرت الايام وداومنا اليوم بيدي فروحه اول ابتدائي ماخذتها للمدرسه ومكيفه بيها كسرتني من كالت ميجي بابا يودينا بسيارته يابابا وهو ملتهي بنفسه اباوع عليها الصدريه رصاصي والقميص وردي مدرسه اهليه دخلتها لان شعلان رادها مدرسه اهليه كلت طبه مرض غصب عنه يصرف عليها لعد بس حلاله وفلوسه لذيج وهو حجز الها بنفس مدرسه ريم

عينج عليها ريمو

ريم : هااي شبيج شلون ماادير بالي عليها

فرح : راح اداوم ويه خاله

ريم : ولج اذا كلتي خاله بلمدرسه اشلع اذانج

رشا : على كيفج وياها

فرح : هههه اصيحلج ست ريم

ريم : اي عفيه احترميني ست ريم

رشا : انتي وجهه ست الله يعين الطلاب عليج

ريم : وعليج مخبله البنات مربيه الاجيال

رشا : يله بااي

ريم : بااي يله فروحه

رشا : كملت اول يوم ورجعت لريم ورشا حتى نرجع سوه شفت سياره شعلان بلباب مال المدرسه وهو نازل واكف ينتظرها طلعو واباوع عليها شلون اجت تركض عليه وشلون شالها ويبوس بيها

ريم : اممم اذا انت هيج حنين مجيت الصبح تشوفها

شعلان : متسلمين

ريم : صايمه

شعلان : ليش الصايم حرام يسلم وثاني شى هذا مو رمضان

ريم : الصيام عن سلام الفاسق عباده

شعلان : ريم احترمي نفسج شويه ولتتجاوزين

ريم : اني كلت اسمك ليش اخذتها على روحك

شعلان : من زمان لسانج سم وفالت منج

ريم : ديربالك يبو مهره هذا لسان مو مهره وتروضها

شعلان : خوش تبسمرين

ريم : اني ابسمر على شنو وانت منو وابسمرك شوف بتك وخلي نروح

شعلان : تعالو اوصلكم

ريم : عدنا رجلين ونمشي

شعلان : اريد اوصل فروحتي للبيت

ريم : اخذها وديها للبيت

رشا : السلام عليكم

شعلان : وعليكم السلام هاج مو اختج سلمت

ريم : مو مصايمه كلمن وطقوسه نغزتها بعكسي وكتلها عود صومي هااا صومي

شعلان : تعالو اوصلكم

رشا : ميحتاج نمشي

ريم : هااا مو كتلك يله اخذ بنتك وصلها واحنا نتمشى

شعلان : وحدكم ميصير

ريم : احد گلك وحدتنا تمشي بلحجله توكل بالله

شعلان : تسمعين اختج

رشا : وصل فرح للبيت وجايين مشي وراك

شعلان : مااروح اله تجون ويايه

ريم : ضل انت يله رشاوي

اخذت رشا عااط راد بقينا نمشي ومدايرين بال اله لحد مصعد فرح وشخط السياره وراحو للبيت

ريم : مرته مجابت

رشا : جابت ولد

ريم : احسبي للاربعين وهسه تحبل الصخله

رشا : تكول سهير صنطه جابها من المستشفى واجه لا هوسه مثل القبله ولا هلاهل

ريم : سمعتج اول البارحه تسولفين ونسيت اسألج وهند شخبارها

رشا : حابسها بالبيت لا طبه ولا طلعه وابنها عايف البيت ورايح لبيت جده يم خضير ابو طالب

ريم : ليش

رشا : سامع بسوايه امه وهااج هناك

ريم : خليها ام المتعه مفلفله ام الزلم

رشا : وجنات ميطلع راسها متعرف شكوو

ريم : هسه تخرب بينهن اصبري اذا مو وحده طلعت خياسه الثانيه هسه تشوفين

وصلنا للبيت وشعلان يباوع عليه من فوك ليجوه ولا درت اله بال ولا اهتميت وطبيت للبيت وبقى ويه فروحه نص ساعه وراح

غزل : بديت ادور على مختبر حتى اشتغل ولكيت مختبر زين دوامه من ٣ لل ٧ جنت مكيفه واخيراً راح امارس مهنتي من اخر مره حجيت ويه عمار بعد محجينا ولا هو اتصل عفته براحته واني هم استحيت وكلت شلون احجي ويااه هلكد شيكول عليه

وبدلت وكمت يوميه اتمشى بعد شارعين المختبر جان مجمع طبي بلمنطقه وبيها المختبر اول اسبوع الوضع تمام

رجعت بيوم وامشي لمحت من بعيد عمار اي متأكده هذا عمار رغم بعيد بس الاكد الشك مالتي لبسه الاسود وجكارته واكف بعد مسافه بعيده حيل رجعت امشي ودخلت للبيت واني افكر شعنده ورايه

حجي طه : هااا بنتي الله يساعدج

غزل : ويساعدك حبيبي وبسته

حجي طه : بنتي راجعه بليل

غزل : شسوي هو الدوام من ٣ لل٧ بين منعزل واوصل تصير ٧ ونص

حجي طه : بنتي هذا شتا والجو يظلم من وكت ميصير راجعه ظلمه الظهر عادي الناس كلها موجوده بس بلرجعه صعبه شوفيلج مختبر غيره كون الصبح دوامه

غزل : والله يابابا ماكو القريبات كلهن من ٣ لل٧ او من ٣ لل ٨

حجي طه : شوفي بغير منطقه

غزل : قابل اذب الفلوس كلها كراوي هذا قريب وبمنطقتنا على الشارع وماكو شى امان

حجي طه : اعرف يابنتي بس اني شلون ارضى ترجعين مشي والدنيا ظلمه

غزل : بس بعد وكت

حجي طه : بس ظلمه وهذا الشى صعب عليه شوفي حتى ماازعلج ولا تعوفين شغلج يوميه ساعه ٧ اجي اخذج

غزل : اخاف تعب عليك

حجي طه : تعب ولا ترجعين وحدج ولد بلركونه والمحلات

غزل : اذا تريد ابطل

حجي طه : لا بنتي هذا شغلج ومرتاحه بيه

غزل : اي والله كلش ومتونسه والي ويايه صديقتي وخوش بنيه رغم اكبر مني بس جنت اشوفها بلكليه

حجي طه : هذا هو ترحين انتي لان وكت روحتج اني بلمطعم وعادي ظهر وماكو شى بس الرجعه مطلعين اله اجيج

غزل : صاار حبيبي رحت نزعت وبالي يم عمار ش

معقوله خايف عليه ونظرته مثل بابا لهذا يجي يوصلني لازم انتبهه باجر

وداومت ثاني يوم وهم لمحته ابتسمت ودنكت عرفت يجي لخاطري مامعقوله نفس المكان ونفس الوقت يومين ويجوز ذيج الايام هم يجي وماادري طبيت ابتسم وگلبي يدك شويه وطلعت ريم تعيط

كلنا ركضنا عليها

رشا : شبيج ريمو اسم الله

ريم : خنكوني أذوني

نهر : الرحمن منو يمه

ريم : جنت نايمه واجوي خنكوني

حجي طه : كابوس بنتي تعوذي من الشيطان وكم مره كتلج لتنامين المغرب ونبهت نهر هم

رشا : اباوع على ريم تتلفت شبيج

ريم : خايفه حييل

نهر : تعاالي بحضني وبديت اقرا قران عليها جانت تكول اختنكت كاافي وتسكت عمه

ريم : مدري شبيهه كمت اخاف من خيالي ماانام اذا غفت عيني يجون ناس يإذوني ويضربوني ومرات يكطعون من لحمي بعدها بديت افقد تركيزي

رشا : اول ايام جنا متوقعين مجرد كوابيس وعادي تصير واحد يضوج يوم يومين وتروح بس الصار بعد حدود ٣ اسابيع ضبط ظهرت شغلات على ريم مرعبه متنام متاكل تدفر ابنها وتحبس روحها بلغرفه وتون دوام متقبل اداوم واذا حاولنا نتقرب منها تعيط علينا وكت الاذان تركع راسها بلحايط كوه نلزمها واذا شغلت عمه قران تعيط بكل قوتها طفووو

نهر : البنيه مو طبيعيه ولكم بنتي راح يصير بيها شى

سليل : حاجيتوها

رشا : متقبل وقافله الباب عليها ومنعرف شجاها

حجي طه : نوديها طبيب

رشا : خلي ناخذها

كمنا نفتر من طبيب لطبيب ومنعرف علتها ارقى الاطباء يسوون فحوصات وتحاليل وكلشي مابيها قطعت الاكل وكوه تاكل احنا هسه بنص شهر العاشر ٢٠١٦ الجو طيب مرات اتوسل بيها بس اطلعي بلحديقه متقبل حتى الدوام تركته

كااعده بصفها ريموو شبيج فدووه ليش هيج انگلب حالج

ريم : اريد اموت

رشا : لج عيني بس فهميني شجاج بين ليله وضحاها انكلبتي

سليل : ريموو نصيح تيموو

ريم : وخرو مني اكرهه

رشا : دخيلك ياربي

كاعدين بلحديقه كوه طلعناهاونحاول نحجي وياها جانت بس تردد كلماات بسيطه وتصفن  اندكت الباب ودفعها حسين وطب

نهر : هاااا يمه شلونك

حسين : اجيت اركض من كتيلي مريضة

نهر : مكعد نعرف علتها هاي الضحكتها تهز البيت اختفت ولا نوم ولا اكل وبس تبجي ومرات تون وتكعد بلظلمه ابوها يبجي دم عليها

تقرب حسين يريد يسلم عليها كنبص گبالها وهمس شلونج ريمتي

رشا : بس رفعت عيونها وباوعت عليه لو انگلبت گلاب جيتت عليه وتخنك بيه اضافيرها الطويله نبتت برگبته واني وسليل وعمه نعيط نريدها بس تهده

ريم : اكرهك مااريد اشوفك اريد اموتك روح مني

حسين : عووفوها جانت حيل شرسه وتعيط وضعها مو طبيعي دفعت البنات عنها ردت بس افهم شبيهه وشنو الصار هاي مو ريمتي البياض مال عيونها مگلوب احمر والوجهه كركم والشفهه بيضه مثل الميته

ريم : اكرهك اريدك تموت روحي مني روووح وتملخ بهدومه

رشا : ملخته لحسين وميقبل احد يتقرب عاط بينا عوفوها جان تملخ بيه كل قوتها رگبته وجهه تخرمش كوه سيطر على ايدها ولزمها حيييل وعااط بيها

حسين : اكرهيني كطعيني راضي بس فهميني شبيج

ريم : مااريدك اكرهك اكرهكم كلكم جرها حيييل لحضنه ويحجي بهدوء بس نسمعه

حسين : انتي تحبيني وتحبينا كلنا بس مااعرف شصار بيج وحالتج هاي مااسكت عليها لو اعرف انطي عمري انتي مو ريمتي القويه ام ضحكه الحلووه

شووو تعااالي وجااب بطل مي بارد وغسل وجهه وكامت تشهك

ريم : عوفوني اريد اموت

حسين : موتي بس اخذيني وياج

رشا : كمنا نشهك ومنعرف شصار بيها

لزم ايدها وكعدها جانت عيونها دم وتنظر على حسين تريد تشرب من دمه مثل البزون المنتظره تهجم

حسين : الزموها بنات دقايق

اخذ الموبايل ومدري المن دك اكثر من مره واكثر من واحد

نهر : المن اتصلت يمه

حسين : خابرت اول شى على عمي وخابرت ولد صاحبي ابوه متدين حيل وكتله على حالتها شويه ويجي عمو لان مبين كايل لمحسن وجايين بلطريق

اجه طه ويااه محسن شافها وحتى مسلمت عليه

محسن : تره مبينه البنيه مضروبه

حجي طه : شنو مضروبه

محسن : شبيك طه صغير لو مقاري بنتك مضروبه من جن لو بسبب نومه المغرب وفزتها لو احد مسويلها شى الله اعلم هاكم حالها هاي ريم بربكم لكم حتى متعرفني

كعد طه وحط ايده على وجهه ودمع شسوي هسه لوين اخذها اني هم اخاف عليها من هاي السوالف اكثرهم دجالين وناس متحلل وتحرم مااريد اخبلها لبنتي

حسين : عمي هسه ابو صديقي جااي بس لبسوها مستور اكثر

رشا : شلون انلبسها وهي متقبل حتى تحط الربطه على راسها اذا حتى الصلاه تركتها

حسين : لبسوها كووه

رشا :لبسناها وجانت هادئه اجت غزل من الدوام وشافت البيت مگلوب

دقايق واندكت الباب واجه الرجال كعد وقدمنا اله راد بس مي مقبل يشرب اي شى

اشر النا حسين لزمتها ودخلت بس شافها تقرب منها هي ختلت ورايه

كاال الرجاد اعوذ بالله من غضب الله

الله ليوفقك كلمن يأذي واحد بلسحر

نهر :ضربت على خدي ياسحر حجي

بتكم مضروبه مبينه تقرب وهي تضرب بيدها وتبعده

حسين : متكدر تعالجها

لا مااكدر شغلتها اكبر يرادلها ناس تقرا وتفهم بهاي الامور الي مسوي الها عمل جبير وقوي ومگلوب عليها هاي بتكم اذا متعالجت تاليها لو تتخبل لو تموت تلاحكو الها الله يلطف بحالها

حسين : على الاقل دزنا يم ناس تعرف

حجي طه : والله ياخويه اخاف عليها ليخبلوها وسامع اشكال

راح ادزكم على ناس خيره وتفهم بس طريقكم صعب الله يعينكم على بلاكم

رشا : كمت ابجي وخواتي هم منو مسويلها سحر واني لازمتها واباوع عليها شلون صافنه على الصور والحياطين وبالها مو يمنا تذكرت

سليل لزميها

لزمتها ورحت لعمه نهر الجانت تبجي وتقرا ايات

تعرفين منو مسويلها

نهر : منو ولج احجي

رشا : ماكو غير نوريه وانعام تتذكرين من كالت امهات السحوره عبالها مسوين لحسين

نهر : اي اتذكر

رشا : شوفي شسون الها وخبلناها

نهر : شلون وصلن لريم غير لازم ملابسها تاكل او تشرب شى منهن

رشا : الي مثلهن مو صعبه عليهن

نهر : والله اذا هنه سون شى الها لا اخزيهن واعزيهن

صحت حسين وارجف

حسين : هااا عمه

نهر : اسمع يمه تروح لامك وبيبيتك وتكول الهن اذا ريم صار بيها شى وتراب امير المؤمنين علي لا اصلخهن بلشارع

حسين : فهميني شصار

رشا : ماكو غير امك وانعام الي سواها لان قبل العركه الاخيره تهمونا احنا مسوين شى الك وهددو عمه ويمكن امك نفذت تهديدها

حسين : ميسون هيج بابا يصلن ويصومن وبيبي بلذات مريضة

رشا : كلها تصلي وتصوم بس اكو رياء واكو لله ياترى اهلك منو منهم روح الهم وافهم واذا طلعنا شكنا صحيح والله محد يخلصهم من ايدي كله ولا ريم

طلع يركض للبيت حتى مندار ولا سلم وعاف الرجال والدنيا كلها

حسين : طبيت للبيت وعيوني براسي واعيط يوووووم وينج

نوريه : اسم الله شبيك تعيط منو مات

حسين : سؤال جاوبيني عليه شسويتي لريم

نوريه : هااا شسويت عيني خوش والله طاب تعيط واعصاب وتسألني على هاي البكعه

حسين : شسويتن بالاحرى لريم لان اكيد بيبي وياج

نوريه : ماسوينا ليش شبيها عرج ميطكها وانت ليش بعدك وياها جم مره حجينا وياك يعني اله تموت ابوك يله ترتاح

حسين : ريم اذا صارلها شى تريد شسوي والله احرك البيت اني مو عمري ماكسرت كلمة الكم واكول حرام ومااريد اصير عااق مو بس اصير عاق اذا تأذت اصير اسقط من السقوط وانسى انتم اهلي جاوبينييييي شسويتو الها البنيه بدت تفقد عقلها

نوريه : يطبها حريشي اني شكوو بله وخر جاي تهدد وترعد تكول انجلينا وميت عليها

حسين : خوش بعيني

صعدت اخذت فلوسي وملابسي وحطيتهم بجنطه وعطوري وسحبت جنطه ثاني كم خذاء ونزلت

نوريه : ولك يمه وين رايح تخبلت اذا ابوك عرف يهجم الدنيا على راسك

حسين :وهجمتهم مخايف منه ولكم خافو الله هذا سحر تعرفون شنو سحر يعني لا صلاه ولا صوم يقبل الكم ريحه الجنه متشموها وطبت على بيبي فتحت الباب قووي

اعرف هاي شورتج واسمعوني زين السويتو اذا مبطلتو بحياتكم متشوفون وجهي وهذا مو حجي ونفخ وحق الحق والحسين الي متسمي على اسمه الشريف لا اخليكم تحفون على شوفه مني ومتحصلون اني رايح اگابلها واكعد واعالجها خلي اشوفها تبقى على حالها وراح تشوفون وجهي الثاني حتى انسى انتم اهلي وانعل الساعه السمعت بيها كلامكم وعفتها

نوريه : تخبلت ولك هلبكعه لعبت بحالك الساقطه ام الزلم موتت رجلها وهسه تموتك

حسين : والله محد راح يموتني غيركم عندج هليومين اذا مبطلتو السويتوه اهجم البيت على راسكم

نوريه : ولك انجب نسيت اني امك وهاي بيبيتك

حسين : انتم النسيتو الله وخليتو ايدكم بيد السحاره عندج بنيه متخافين وحده مثلكم تسوي لبتج وتخبلها روحي شوفيها تمشي وتعيط وتأذي كل واحد يتقرب منها ابنها تريد تخنكه انتم شنو يعني كلشي اتوقع عادي اكول من كرهم من المشاكل بس توصل بيكم تحطون ايدكم بيد ناس زباله

نوريه : لك ابني كلشي ممسوين الها

حسين : مسوين وابصم بلعشره وهسه اعرف شلون والمن رحتو وشلون وصلتو لريم

شوو وخري ودفعتها وطلعت واحس دخان من راسي يطلع كل ولا ريم حالها وشكلها يخوف اذا صار بيها شى اني هم اكدر اعيش

رحت لبيت صديق الي ذبيت الغراض وخابرت ابو صديقي الجبته وتعذرت منه لان عفته وطلعت وحجزنا يم ذوله الي يقرون ساده كالو بكربلاء

نهر : ثاني يوم من الصبح سبحناها كوه ولبسناها لكينا حسين بلباب عااطت مااريده مااصعد ويااه

كوه سكتها طه الي اجه ويانه مقبل نروح ويه حسين وحدنا والطريق كله تباوع بلمرايه عليه

وهو احس الدمعه بعينه كلنا خايفين ومنعرف شراح يصير بريم جانت عباره عن وحده مخيفه كل همها تكتل حسين وتعيط على كل واحد يتقرب منها

يتبع .....

#رواية_أبي_والغزلان_الجزءالثاني

#للكاتبة_REEM_ريام_هادي

#البارت_الرابع_والاربعون

يكشاية بالراك وجلبت بيك

يطين الجنه مدري شردت احاجيك

يراي المستحي وسالوفة اعيون

اندهلي بعد خل التفت ليك

يسنبل وانحصد بيدين فلاح

ما وده يبيعك وده يشريك

يلون الماي واصفى.. ويخبط الماي

ما تخبط واعرفك ..ضايج شبيك

اذا خلكك يضيك شويه مرات

دصيح وشوف وجهي شلون ما جيك

يدين المستحه بملوحة الهور

شايف طينتي شتريد اراويك

يروحي وكلشي بيه وكلشي ما بيك

قارنتك بروحي وما اساويك

يالحاسب احساب لشوفتك عود

اشبكنك واشمك من الاكيك

بعد موصلنا لكربلاء دلونه على العنوان الي انطاه الرجال لحسين وبس كلنا بيت فلان وين عرفوه ومباشره رحنا هواي ناس قبلنا وتنتظر

حسين : لتنزل لحد ميطلبوها مااريدها تدخل جوه وتتأذه

رشا : فدوة استعجلهم

حسين : اكو قبلنا وكتلهم جايين من بغداد كالو هم اكو من غير محافظات جايين شوي منتأخر

ريم جوعانه تاكلين شى

ريم : روح مني مااريدكم وبدت تعيط بكل علو صوتها رجعوني ماابقى هنا رجعوني

رشا : لزمت ايدها وبدت تضربني وتعيط اجه بابا من الجهه الثانيه من السياره وفتح الباب يريد بس يلزمها جان يطلع رجال لابس غتره سوده كاال جيبوها ويأشره بلسبحه

نزلناها وهي تريد تنهزم متقبل تدخل تاالي لزمها حسين وبابا حيل ودخلوها

بقيت كاعده مثل الهول جبير الناس تنتظر بيه ودخلت عمه وياهم

نهر : اول مدخلنا باوع على ريم وبدا يقرا وينفخ عليها هدأت

اشرلي كال كعدينا هنا وغطيها زين وبدا يقرا وينفخ ويه كل عيطه منه ريم تنتفض جانت لحظات مرعبه واني بگلبي بس اقرا ايات وابجي لحد مأشرلي هو كاال لتقرين اي شى استغربت شمدري سكتت وره حدود ١٠ دقايق اباوع ريم خانسه وعيونها ليفوك

صلو على محمد وآل محمد

صلينا كلنا اللهم صلِ على محمد وآل محمد

البنيه مضروبه وين جنتو عنها

حجي طه : والله ياسيدنا مجنا نعرف شنو علتها وبس عرفنا جبناها

السيد : البنيه مسويلها عمل تفريق وكراهيه والعمل انگلب عليها و مشربه ومزكيه والعمل قوي يرادله مده والتزام بلعلاج وكلها تساهيل من الله

حسين : التزم شوكت متريدها اجيبها

باوع السيد على حسين وبقى صافن شويه وكاال

تقرب وهو تقرب منه وبدا يباوع بعيونه ويقرا لحد مكال بهدوء اذا انحلت من طارف المسوي الها هواي راح يخفف العمل

حسين : شلون يعني

يعني ياابني الي بالك صحيح المسويه نيته تفريقك عنها روح حل من جانبك حتى احلها من هذا الجانب ريم بت سندس مضروبه بضربه قويه وهيج ضربات لو تخبل الواحد لو تموته ومثل مشفت عقلها مو واعي وتشوف شغلات ما المفروض تشوفها واكو شغلات راح تصير بيها صعب عقلها يستوعبه يخليها بمرور الوكت تشخط ساعدوني حتى نرجعها والله يشافيها

حسين : اساعدك سيد بس كول شسوي واني حاظر

السيد : بالاول راح انطيكم شغلات تقروها بغرفتها منو منكم ملتزم بلصلاه وبالامور الدينيه اريده ملتزم

طه : اني وعمتها

السيد : راح انطيكم ايات معينه تنقري يومياً بعد العصر مو المغرب لا بعد زوال شمس الظهر لمده ٧ ايام وتبعدون عنها اي شى يأذيها وهاي الشغلات تحطوها بهذا المي وتسبحوها بيه ٣ خميسات كل ليله اربعاء على خميس والي تسبحها لازم تكون نظيفه وماعليها الحيض تتوضى وتسمي وتدخل وياها وتسبحها والمي اليوكع منها ينذب بحديقه نظيفه مكان طاهر ميوكع بلمجاري ابد والغسله تكون الفجر قبل الصلاه ولتنشفوها المي اريده ينشف على جسمها بس من اطلعوها لفوها بشى للستر وعوفو المي الي عليها ينشف

راح تعيط وترفض لو تعرفون تشدوها وتسبحوها

حجي طه : وبعد الخميس الثالث

السيد : تجيبوها الي بالاسبوع الرابع يوم اربعاء واحسبو حسابكم تباتون هنا

حسين : سهله

السيد : ماكو شى سهل ربك مسهل الامور اهم شى متغلطون بشى

نهر : واني يومياً افتح القران بلبيت

السيد : ابد يااختي لتسوين هيج اكو ايات تخبل الجن وتخلي يأذوها الي مثل حالتها مو اي ايه تقرأ وتستمع الها ليش اعطيتكم سور من القران محدده

لتسوون اي شى من ذاتكم الزياده كلنقصان ومرات الزياده تخرب كلشي وتضيع العلاج

حجي طه : هذا هو سيد الي تريده نسوي

ناخذها هسه للزياره

السيد : لا لان تتأذه وتنشمر توكلو ارجعو واني اكلكم شوكت اتزوروها

حجي طه : الف رحمه على والديك

السيد : والديك  باوع على نهر وكاال اخذيها لاختج العلويه بلغرفه الثانيه راح تغسل الها وتنطيج مي تشربوها بس توعى فد ساعه ساعتين حتى لتعيط وتإذيكم

والله يشافيها ويشافي كل مريض ببركه محمد وآل محمد

نهر : رحمه الله والديك سيدنا واخذتها وبقى طه وحسين يمه ودخلنا على العلويه جانت مره ملكاها يخبل ولسانها ينكط عسل وشلون غسلت لريم وهي هادئه ولا فتحت حلكها تغسل واني اشهك من البجي على حالها هاي ام ضحكه الحلووه كل فتره وصايره الها هزه ترجفها ربي دخيلك ماعدنا غيرك انت مولانا ونًعــٌٓمُٓ المولى ونعم النصير

رشا :هااا شصار

نهر : الولد طلعو

رشا : اي بلسياره ينتظرون

نهر : الزميها من الجهه الثانيه لتوكع وبعدين اسولفلج

رشا : كوه تسحل بروحها رجعنا حتى بدون منوكف ونحط لكمه بحلكنا من القهر المي نحسه سم جانت اواخر ايام محرم

رجعنا للبيت دخلناها واول مبدت تصحى شربناها المي الي كالت عليه العلويه

حسين بس وصلنا شخط السياره وراح

حسين : من اخذت عمه ريم وراحت للعلويه بقى يسولف السيد شغلات حتى نتلافها ومن تشكرنا منه ودنطلع كالي كلمة دوخني بيها

دير بالك جان الدور عليك والله نجاك روح حلها

حسين : باوعت عمي طلع تقربت من السيد وكتله اني شاك امي مسويتها

السيد : الي مسويتها وحده كصيره سمينه وعدها شامه بوجهه جبيره بارزه

حسين : مواصفات امي

السيد : لا اله الا الله وحده لاشريك له روح ابني الله يهديها لامك

بس ردت اوصلهم واروح اگلب البيت عليهم بس واني اسوق گلت مستحيل تعترف بسوايتها ولا اطلع نفسها غلطانه وخاصه بيبيتي وياها ومساندتها قررت اروح للي ميخفى عليها شى واكيد تعرف كلشي لنورس اختي رحت لبيت عيالها دكيت الباب باوعت ساعه ١٢ الظهر بعد وكت فتحتلي الباب عمتها وسلمت

ودخلتني للاستقبال

نزلت تركض متفاجئه

نورس : حسوني ولا توقعت تزورني رادت تبوسني لزمتها من ايدها وكعدتها

نورس : اااخ شبيك

حسين : اكعدي عندي حجي وياج

نورس : وليش جاي حامي هيج مكافي صار كم يوم عايف بيت اهلي ومنعرفلك طريق

حسين : امي شسوت لريم

نورس : هاااا شبيهه ريم

حسين : لتسوين نفسج متدرين وفقيره اعرف سر امي دوم يمج وكلشي تسولف الج احجي ويجوز انتي هم وياهن الله اعلم

نورس : لتبليني بشى ممسويته

حسين : امي شسوت لريم وخلتها مثل المخبله ولكم البنيه راح تروح من ايدي راح تموت لو تتخبل انتم من يامله لخاطر الكعبه يعني ولا واحد منكم يخاف الله لهاي الدرجه الكرهه وصل بيكم للسحوره والدجالين

نورس : تره ممسوين شى منو حط هاي السوالف بدماغك اكيد عمتك وهي وخواتها

حسين : لزمتها حيل من ايدها اسمعي نورس اذا محجيتي شى هسه وهذا الاذان الي يأذن كعد تسمعين صوته اصيح هسه على عمتج واخابر رجلج واكولهم نورس تسوي سحوره الكم هي وامي واني اخاف الله واجيت ابلغكم حتى اطلع من ذمتكم

كاامت تبلعم وخاف وكاالت متسويها

جربي تردين تجربين

نورس : تره اني مو عدوتك ولا امي ولا بيبي يعني احنا نحبك ونخاف عليك هاي مجازاتنا

حسين : ولكم تحبوني اطمسون راسي بلخيس تضيعون بنيه مالها ذنب ولا اجت كرباكم

نورس : كله منك لو عايفها مجان صار هذا بيها

حسين : اييي شنو الصار وشلون امي سوت الها سحر

نورس : كتلك ممسويه وشبيك هيج ترجف عليها بايعنا كلنا علمودها هسه لو بيها خير ومستوى جان عذرتك شو بكعه وارمله وعدها ولد اكو اتعس من هيج مواصفات

حسين : لوما حامل جان هسه كطعت الحزام على ظهرج على سوالفج هااي

نورس : تنلام امي من تكول عامياته بلسحوره

حسين : يعني متحجين مووو سحبت التلفون ودكيت على رجلها هي تخبلت

نورس : احجي سده

حسين : سديته يله احجي لا ورب الكعبه والحسين الشهيد يانورس اهجم بيتج واخذج هسه مطلكه واراويج الماشفتي بعمرك

نورس : مجنت هيج انت الحنين ابو الضحكه الحلوه ابو گلب الطيب تنگلب تنطل وتأذيني وتأذي اهلي

حسين : انتم الي يعيش وياكم تخلو يشرك ويترك حتى دينه  احجي وفضيها

نورس : لتعيط فدووه لتسمعك عمتي نصي صوتك

حسين : فضيها

نورس : ماما من شافتك قافل على ريم وحجت ويه عمه ومفاد وانت هم يوميه مسويلك هوسه علمودها كالت الها بيبي مثل ميسون سحر لابنج انتي هم سوي وهذا حلال

حسين : اي مو هيه ايه الله العظمى انعام وبكيفها تفتي اااااااخ كملي

نورس : على كيفك فدووه لتتعصب

حسين : يمعوده احجي

نورس : دورت من ناس لناس لكت وحده قريبه من منطقتنا اسمها ام اميمه

حسين : سامع بيها هاي وحده سمعتها زباله شوداها امج عليها

نورس: ام عقيل جيرانه دلتها عليها واخذتها وراحت

حسين : خوش والله صايرات عصابه

نورس : المفروض يسون تفريق وكراهيه بينكم وطلبت شغلات ملابس او صوره وماما ماعدها اي شى لريم

حسين : اي هنا مربط الفرس شلون وصلو لريم

نورس : بقو شهرين يدورون ومفاد لا كدرو يحصلون ملابس ولا صوره ولا يكدرون يوصلون لريم بس انطتها فلوس زايد وام عقيل كالت الها بت حماتها اداوم بنفس المدرسه معلمه وياها بهاي المدرسه الاهليه ومن عرفت ام اميمه كالت الهم بس خلي تشربها وتوكلها ولو مره يدخل جوفها يعني معدتها والباقي عليه وهم اذا جابت صوره الها بعد احسن

حسين : كملي

نورس : كوه قنعنا هاي المعلمه وماما انطتها  سوار ذهب بس حتى تشربها وكالت الها نسويلها محبه نريدها لابنها وهي هم تريده بس لان ارمله تخاف من الناس نريدها متخاف وتتزوجه وهاي وافقت صدكت مصدكت ماادري بس من شافت السوار قنعت و سوت عصير وكيكه هم بيها هاي الماده واخذتها لريم بحجه عيد ميلادها وريم مردتها لان زميلتها واكلت وشربت وبنفس اليوم اخذت الها صوره بلموبايل ودزتها لماما وبدو يشتغلون الها وعلى اساس انت هم يشربوك حتى تكرهه بس ماما خافت كالت اخاف يصير بيه شى كافي هي تكرهه واطرده

حسين : وانگلب عليها

نورس : المفروض بس تكرهك ميصير بيها هيج بس حظها بعد

حسين :يعني حتى مااتزوجها تخبلوها وتسحرولها وطبها مرض شيصير بيها خلي يصير المهم اني مااتزوجها يعني انتم هم ادخلون الجنه هم تعرفون الله من امج راحت برجلها لهيج ناس نكسه مكالت اني اصلي واصوم واتعبد وهاي الحجيه الي رجلها والگبر مكافي السوته بيهم تالي تسحر الها

نورس : مستعدين كلشي يسوون بس حتى متتزوجها

حسين : وابويه يدري

نورس : ماادري

حسين : ابويه يدري لتخليني اعيد السؤال راح اعيط

نورس : اشش عفيه اي يدري وكال لماما شسووين سوي المهم ميتزوجها لبت طه والله خطيت ريم برگبتك عوفها شجلبت بيها

حسين : والله عناد بيكم اله اخذها واني اعرف شلون اتوب اهلج على سوايتهم عندج عنوان هاي السحاره

نورس : شمعرفني بيها

حسين : عوجت ايدها اريد عنوانها هسه

نورس : اااخ فدوة على كيفك والنبي هسه عمتي تسمعنا

حسين : دكي على امج وكولي عمتي تريد تروح الها او صديقتي اي شى المهم هسه اريد العنوان

نورس : هسه اخابرها بس عوفني مو حتى تقلصات بطني من وراك صارت

حسين : خابرت واخذت العنوان

نورس : هاك بس تره متستقبل ولد

حسين : تجين ويايه

نورس : لا عيني مالي دخل لهنا وبس وين اروح لهيج اماكن

حسين : امج مو راحت

نورس : واني شلي دخل

حسين : نروح اليوم لتخبليني تره ماضل واير براسي صاحي الشفته قبل شويه يخليني احرك الدنيا واعالجها

نورس : بخت على شنو ذابح روحك يحظي والله حظوظ

حسين : انجبي وامشي بدلي

نورس : هوب هوب عيني انت عبالك تروح الها يفتحولك البيبان لازم تخابر وتحجز وتنتظر سراك يله تروح

حسين : وين رايح لرئاسة الوزراء

نورس : شعبالك هسه هيج ناس همه الي بلعب والناس تتمنى منهم شوفه تره احنا ب٢٠١٦ وكل الناس اتسوي سحوره اصلاً عايشين بلسحوره والاعمال

حسين : مو كل الناس بس الناس الي متخاف الله والايمانها ضعيف

نورس : شوف حسين عنوانها هذا يمك وتلفونها هم طلعني بره الشغله كلها

حسين : شايفه من يكولون لو يجي الحمزه هسه اني اكولها الج لو يجي الحمزه مااعوفج وتجين وغصبن عليج استري على روحج وبيتج هسه الدنيا طافره من عيني لتنداسين بلرجلين

نورس : ماااشي بس لتعيط نخابر وناخذ موعد ونروح

حسين : خابري هسه

وخابرت واخذت موعد بعد ١٠ ايام

حسين : اني طالع واذا فتحتي حلكج لاهلج اني من يمي اغرد لعمتج ورجلج وكولي اخويه واحد ساقط وضيع بيتي

نورس : والله متنلام امي من راحت تسويلك مدري شجاك وين العقل وين الهدوء جنا روحك من الدنيا وهسه بايع الكل

حسين : عفيه بايع ومخلص وكلشي ماورايه وديري بالج توكفين بوجهي لان تنداسين

اني رايح واجيج بيومها واريد اشوف يابنيه متطلع ويايه

نورس : اطلع وامري لله

رشا : اخذنا ريم اتذكرت قبل بحالتها من ماتت بتها ورجلها بس ياريت هادئه وحاله نفسيه هلمره الموضوع اكبر

اجت سليل تركض وحجينا كلشي الها

رشا : شبيج وضعج مو طبيعي

سليل : خابرت سجاد سألني عن ريم

رشا : شوكت يرجع من البصره تأخر هلمره هذا الاسبوع الثالث

سليل : اي والله قلبي ورم وكله من وره عمج الزباله

رشا : علي وشجابه عليه

سليل : جان يحجيلي قبل شويه يكول رحت علمود السيارات وقطع التفصيخ ويمكن علي شاف سجاد كوم واشتري الغراض بأغلى من سعرهن حتى ميستفاد

رشا : هذا عمج خبل وتالي

سليل : تالي لازم علي من ياخته من حركت گلبه وكايله

سجاد : شوف علي اخاف عبالك اني طه الفقير الي تضربه ويكول اخويه لو تأذي ويكول لخاطر ابويه ويعبرلك تره اني مو هو اني واعوذ بالله من كلمة اني

تعرفني مخبل واذا احط عقلي ويه واحد ابجي على زمانه وعندي قابليه وبهذا عمرك امددك هسه بلشارع واسكطك السكط

علي : وخر شتريد مني جاي يمك اني

سجاد : من تحاربني على خبزتي لا والله مو بس اطيح حطك وانعل عشيرتك كلها ياسكط هلمره سويتها واشتريت المواد عناد بيه حتى اخسر دكررها اله اخليك تروح لانعام تتوسل بيها ترجعك بطنها

علي : هذا رزق وكلمن وشطارته على شنو تخبلت

سجاد : اعرف اشتريتهم عناد بيه وانت ممحتاجهم شجابكً هنا هاا مكافي بغداد ملعب روحنا وكوه جارعين وجودك هلمره بلبصره انت شنو متشبع بكلشي حاط خشمك

علي : فلوسي وحر بيها من غيرتك هيج تحجي

سجاد : ياريت فلوسك هاي فلوس حرام مبيوكه من ابوك وانتي بكتها من امك وحرمت الورثه بس يله عساها تتكاثر حتى خوش تحركك بعدين

علي : وخر يله

سجاد : ابوحسين لخاطر ابنك مراح اسوي هنا مشكله اذا انعادت شايف هاي شواربي ازينها واكعد بين النسوان اذا ماابجيك دم واحرك گلبك على كل فلس صرفته وخر من طريقي وعوف رزقي

علي : مالي دخل بيك كتلك

سجاد : حذرتك بعد وانت زلمه وابن زلمه وعيدها

دفعه وراح يدردم

رشا : شوداه للبصره وشون شاف سجاد اصلاً قابل البصره فرع وبيت غير شكبرها

سليل : بلحي الصناعي مدري شسماه هناك يبيعون مواد تفصيخ مال سيارات وارخص من بغداد ومتفق ويه رجال ويمكن عمج هم عنده شغل هناك ولمح سجاد

وضيع الشغله كلها الله لاينطي جان بيها خوش ربح

رشا : وشراح يسوي هسه

سليل : كال اكو ولد ثاني احتمال يدبرله ومن الله التساهيل بعد

رشا : الله يرزقه اوف عفيه ناس ماشفنه منكم خير يعني ترديلج واحد زين بذاك البيت ماكو هلمره كامن يشتغلن سحوره بنات الزفره

سليل : تإكدو همه

رشا : ماكو غيرهم وضع حسين يأكد شكنا وتعالي هو منو يسوي لريم سحر ويخبلها غير امه ليش ريم تنكره الكل يموت عليها بلمدرسه اليوم المداوم يتخبلون مو اشوفهم مرات من اروح الها شلون يستقبلنها

سليل : الله لايوفقهم

رشا : شو ماادري الحرامي موفقه وهذا عمج علي والسحار الله موفقه وهاي نوريه وانعامو ميحتاج اكلج اشهر من نار على علم مخلوقه من الخباثه والحقاره مو من الطين مالتنا وذيج المفروض تموت من التسعينات ولهسه مخضرمه وكاعده على گلوبنا

وجنات اااااخ ياجنات عساج بنار تاكل كل عظمه بيج وبحركه تحرك روحج ليل نهار وشفتي جنوو خلفت اثنين ولد وكاعده بيتي مهنايه وتسرح وتمرح والله موفقها اريد افتهم شو الدنيا ماشية بلمكلوب ويانا لو احنا بينه شى ومندري

سليل : الهم يوم مدوم لاحد جان دامت لغيرهمً

رشا : الجهال شلونج وياهم خوما مضوجيج

سليل : لا ملتهيه وياهم

رشا : همزين تيم اخذتي حتى ليشوف امه هيج ويخاف

سليل : ماعدنا غير حل ابقي الجهال يمي لحد ميهدا الوضع بلبيت

رشا : راح ادز فروحه هم كلشي يصير هم مااريدها تجفل وتخاف

سليل : جيبيها على واهس الولد والصبح اجيبها الج بدلي الها واخذيها

رشا : ودراستها شلون

سليل : اني ادرسها قابل علم الذره وبتج شاطره وكلشي تفتهم

رشا : اي والله ياريت اقلها نتوزع وحده يصير عينها على الجهال وحده على ريم

وسمعنا عيطت ريم وركضنا الها لكيناها تملخ بشعرها وعمه تريد تسكتها كوه لزمناها حضنتها رشا حيييل

رشا : كاافي فدوة اروحلج ليصير بيج شى

ريم : عوفوني اريد اموت

سليل : اسم الله عليج ريمو حبيبتي تسمعيني

نهر : تعالو انومها

رشا : دخل البيت كله بحاله كآبه وانهيار بسبب وضع ريم لا انام مثل الاوادم ولا نهارنا عدل كمنا نطبق اي شى كاله السيد بحذافيره نخاف لا نخطأ بشى

غزل : ابجي النهار كله على وضع ريم ومن اروح حتى امشي ممركزه ومن اشتغل اخاف اغلط هاي تحاليل ناس واكو تحاليل تعتبر مصيريه الهم

وبيوم بلمختبر اريد ارجع جان البنيه الي تشتغل ويايه كالت يكول مسؤول المختبر خلي تبقى

معرفتي ليش ابقى

والله ماادري كال اكو كم تحليل تكملهم وتروح

غزل : كملت شغلي عندي ظرف لازم ارجع للبيت من وكت

كال عشر دقايق واخليها ترجع

غزل : مااشي روحي انتي الله وياج

راحت وشبهه المجمع فرغ واني بلمختبر طب الدكتور الي بلطابق الفوك دكتور اسنان

شلونج غزل

غزل : اهلاً دكتور محتاج شى

لا سلامتج بس حبيت اجي اسلم

غزل : اهلاً بيك ورجعت اشوف الثلاجه شعدنا نقص بمواد التحاليل

سمعت بيج مطلقه

غزل : باوعت عليه مستغربه سؤاله جاوبت اي ليش

ماكو شى بس ردت يااعمى النظر يعوف هيج جمال

غزل : مدري ليش حسيت نظرته مو نظيفه وخفت منه سديت الثلاجه وارتبكت وكتله من رخصتك دكتور اريد اعزل المختبر

الدكتور : اني اخذت رخصه من جاسم (صاحب المختبر) اريد احجي وياج شويه

غزل : ماكو حجي بينا

الدكتور : شبيج خفتي تره مسويت شى اني

غزل : لا ليش اخاف من رخصتك اريد ارجع للبيت تقرب مني وبديت اخاف حييل بس اصطنع عدم الخوف وخاصه هدوء وماكو احد

الدكتور : انتي عاجبتني ودوم عيني منج بلرايحه والجايه وسألت وكالو مطلقه ليش متجين تشتغلين يمي وتستفادين

غزل : اني محلله ششتغل يم طبيب اسنان

الدكتور : التردي المهم يمي اريحج وتريحيني اكيد هسه محرومه ومشتاقه للي يريحجً

غزل : مفهمت

الدكتور : لتسوين نفسج متفتهمين

غزل : والله مفهمت

الدكتور : كلجن هيج تكولن بالاول وتسون نفسجن فقيرات ومتعرفن وبس اطخجن تموعن بيدي ويطلع العجب منجن

غزل : افتهمت شنو قصده وتخبلت عيب عليك هاي عود انت دكتور متستحي

الدكتور : لتعلين صوتج وتبيعين شرف براسي لوما مطلقه واكيد مكضيتها من واحد لواحد ويمي صرتي رب الشرف شتردين فلوس حاظر بس امشي هسه ولدوخيني لان وره كل هاي الهوسه تاليها الكاج بحضني

غزل : اني شريفه غصب عنك وعن الخلفك حرامات انت طبيب جنت احجي وخايفه موت ومنهاره بسبب صوتي العاالي دخل جااسم وكاال شصار

باوعت عليه وكتله والله عيب عليك اعتبرتك اخويه الجبير وزميل مهنه واشتغلت عندك متوقعت توصل مرحله تسوي مجال لهذا حتى يختلي بيه

الدكتور : شنو هذا تره افرك حلكج

غزل : والله حرامات الشهاده تاخذها صدك مقياس الناس وعقلهم وشرفهم مو بلشهايد واذا شفتني مطلقه مو معناها رخيصه بس اكو هواي امثالك دمرو بنات مثلي وتالي صرنا مطلقات مشكلتنا مقبلنا بلذل بس مع الاسف اكو عقول جايفه عبالهم المطلقه تصير مو شريفه وسهله لامثالك

جاسم : على كيفج غزل اخاف فهمتي غلط

غزل : مو طفله كدامك وماافهم وهااك نزعت الصدريه وشمرتها بلكاع خليها الك واخذت جنطتي وطلعت

جنت امشي ارجف وكوه حابسه دمعتي حيل خفت وهزني الموقف نظراته الي تتفحص جسمي عبالك سلعه يشتريها مقززه

رجعت للبيت هاي الايام ارجع وحدي لان بابا ملتهي ويه ريم دخلت وصعدت للغرفه اخذت المنشفه ودخلت للحمام اسبح وابجي مردت احد يشوفني هيج همه هسه بيا حال مو اجي اني ازيدها

دك باب الحمام عليه

نهر : يمه غزوله اجيتي

غزل : اي ماما

نهر : بيج شى

غزل : لا لا هسه راح اطلع

كملت وطلعت لكيت ماما منتظرتني

نهر : شبيج بنتي وضعج وجهج مو تمام صاير شى

غزل : لا

نهر : شنو لا والعيون دم

غزل : جنت ابجي على ريم

نهر : اووف سوده عليه ضعفت حيل لا اكل ولا نوم ولا راحه وبس تعيط وتضرب راسها الله يعينها شوكت نخلص وترجع بنصنا

غزل : الله كريم متأمله خير بهذا السيد

كمت امشط شعري

نهر : تاكلين يمه

غزل : لا مجوعانه نزلت وعافتني وره شويه دك التلفون اباوع رقم عمار مجاوبت

جانت روحي طاكه واصله لخشمي رجع دك مره ثانيه جاوبت نعم

عمار : السلام عليكم

غزل : وعليكم

عمار : شبيج اليوم وضعج مو طبيعي من رجعتي من المختبر

غزل : شتريد مني هااا شتريد شعليك انت ليش تراقبني

عمار : شبيج غزل

غزل : نار بيه تلكاك مثلهم لان مطلگه عبالكم سهله وتكدرون تستغلوني وكمت ابجي

عمار : منو يستغلج منو مأذيج احجي

غزل : لتعيط ومالك دخل شتريد مني عمار المن متصل انت مو تكول اخاف الله ورجال ملتزم المن كل فتره مخابرني يجوز غلطت ذيج المره من سولفت وياك بس رجاءً بعد لتتصل احتراماً لبابا اذا سمع عيب بحقي شيكول عليه اكيد راح يزعل وانت تكول احب ابوج واحترمه وين الاحترام وانت تتصل بنته وتراقبها من اطب وتطلع اذا بالك شى موزين عيب عليك اني مو هيج

عمار : هسه ليش تبجين بس فهميني منو وياج وروح ابويه اطيحلج حظه

غزل : محد ويايه بس لتتصل بعد وسديته بوجهه

تمددت غطيت نفسي وبقيت بفراشي منزلت حتى للعشا صاحوني كلت الهم تعبانه بليل الكل يم ريم وحدي بلغرفه عيوني دم كل مااتذكر الموقف ينتفض جسمي يعني شلون جرأه عليه الله ياخذك باوعت ساعه ١١ غمضت بلكت انام جان اشوف الاناره مال التلفون ركزت على الشاشه يدك رقم عمار اهووو شيريد لخاطر الله مجاوبت وحطيت البطانيه على راسي وغمضت بقى يدك يدك لحد مااختنكت باوعت ٩ مكالمات فائته دك جان افتح الخط

شكوو شتريد

عمار : ليش متجاوبين

غزل : عفيه تره اعصابي مدمره مالي خلكك وطلبت منك لتتصل بعد

عمار : سمعي يابنت الناس اني رجال على

كد حالي وعايش هسه بوضع نكدر نكول مستوره والحمدلله ممعتاز احد وهذا الشى بفضل الله وشغلي عند ابوج

غزل : الله يرزقك بس اني شعليه

عمار : خليني اكمل تره كوه مجمع الكلام

غزل : كمل كعدت عدل وركزت ويااه

عمار : اني يوم ماشفتج بلكليه وجهه بوجهه وتعصبتي وصار الموقف كله القديم وانتي طابعه بدماغي شكد حاولت ابتعد شكد حاولت ماافكر الله ختمج بدماغي ختم كل مره اكول بيني وبين نفسي منو يكول ترضى بيك اذا تقدمتلها وخاصه جان طليقها امكانيته زينه وبلسويد وعافته اني المااجي ربعه تقبل بيه واضحك على نفسي وتفكيري اعرف انتي بكلشي احسن مني بلشهاده اعلى وبلحاله الماديه كافي اني عامل عند ابوج وحده مثلج تستاهل واحد احسن مني الف مره

واقرر اروح واهج واشتغل بكل طاقتي بس حتى ماافكر بيج  ويرجعني گلبي كوه ومن اسمع اسمج عبالك واحد ويذب جمر على صدري  يجوز بگلبج هسه تكولين انت منو واقبل بيك الاحسن منك عفته بس اذا مااجي ومااكول الي بگلبي وتراب ابويه الكسر ظهري اطك واموت لان صار مده مخنوك بس اريد احجي وانقهرت اليوم من حسيتج ماخذه نظره عليه اريد استغلج لو تعرفين الي بگلبي تجاهج متتجرأين تكولين هيج غزل اني اريدج حلالي مرتي تشاركيني حياتي يجوز حياتي بسيطه ومتوالمج وماعندي شى جبير اقدمه الج ومااريد اكول اني واني وانفخ واوعد بس اكلج كلمة رجال مااخلي دمعه تنزل من عيونج بسببي ولا اخليج بعازه لو اعرف اشتغل ليل نهار ترضين بيه وبحالي يبنت الناس واذا مترضين احلفج بلحجي الغالي على گلبج لتجرحيني بكلامج كولي لا وسدي الخط

غزل : بقيت اتنفس سريع جامده على كلامه

عمار : الووو تسمعيني

غزل : اممم

عمار : تقبلين بيه

غزل : جان اطب رشا سديته بوجهه

رشا : هااا شبيج وجهج اصفر

غزل : هاااا لا مابيه رايده شى

رشا : اي اجيت اخذ التنوره النيلي مالتج اريد البسها باجر

غزل : اخذيها بگلبي اكول هسه عباله مااريده خرب حظج يغزل هسه غير تفضها رشا

بس اخذت التنوره مباشره طفرت سديت الباب وراها ودكيت عليه بسرعه جاوب همست بهدوء يمكن دكات گلبي اعلى من صوتي

اعتذر اجت اختي وسديته

عمار : والله وكعتي گلبي من سديتيه كلت هذا هو يعمار اخذت الجواب وضاعت من ايدك

غزل : انت صدمتني

عمار : هو هسه احنا برنامج الصدمه شفتي برمضان

غزل : اي شفته كلش حلوو جان

عمار : يمكن هسه راح تصدميني وتطلعلي الاء حسين من المطبخ وتكول معاك برنامج الصدمه

غزل : هههههه

عمار : فدوة لهاي الضحكه

غزل : احمم

عمار : شوفي غزل لا اني من النوع ادور علاقات وادور حرام ولا انتي من البنات الي يلعبن ويكمزن حشاج يجوز مره مرتين حجينا بس ردت افهمج زين وتفهميني وهم ردت ازرع طيب بگلبج حتى يوم ما اتجرأ اتقدملج ماانهان وانرفض

غزل : ليش الاهانه حشاك

عمار : ابقى عامل عند ابوج

غزل : الشغل مو عيب وانت رجال والنعم منك كافي شايل مسؤولية اهلك وممقصر وياهم

عمار : يعني اعتبرها موافقه

غزل : انطيني مجال افكر

عمار : اذا فكرتي راح ترفضين

غزل : ليش ارفض

عمار : لان راح تكولين مو من مستواي وهواي اعتبارات راح تحطيها بالج وراح تشوفيني اقل منج

غزل : عفيه لتحسسني اني اميره وانت الفقير من عامه الشعب مثل قصص الجهال تره احنا ابسط من عدنا ماكو وهم عانينا وشفنا المر والقله لحد ما الله وفقنا وبابا تعب حتى عماله اشتغل مبقى شى مشتغله في سبيل يوفر النه اللكمه مو جابها سهله مثل ممتوقع اني اذا اريد افكر بس لان طالعه من تجربه زواج فاشله والثانيه لازم تصيب مو تخيب وهم انت ممتزوج قبل اخاف امك متقبل تاخذ مطلقه

عمار : بلنسبه لامي تركص الها بجفيه يوميه تحجي بيج من يوم مشافتج ودخلتي گلبها مبين عليج مو بس گلب الابن اخذتي حتى گلب الام واذا وافقتي باجر امي يمكم

غزل : لا مو باجر عدنا ظروف هسه صعبه وهم صفر ميصلح

عمار : يعني وافقتي

غزل : خلي افكر

عمار : فكري منا لباجر وبليل اخابرج واخذ الجواب منج

غزل : لباجر شبسرعه يراد كم يوم يله

عمار : لباجر غزل مااتحمل وربج تخليني اكل بروحي لباجر واخابرج

غزل : الله كريم

عمار : بس گليلي احد ضوجج اليوم حجه شى زعلج

غزل : سكتت مكدرت اكول اله اخاف يسوي مشكله وياهم

لا ماكو شى ليضل بالك

عمار : اعوفج ترتاحين تصبحين على خير

غزل : وانت من اهل الخير سديته وبقيت صافنه ولج غزل عمار خطبج هااا عمااار حسيت بفرحه وگلبي لاول مره يعرف الحب وشنو نبضاته صدك نبضات الحب تختلف عن كل نبضه ادك الگلب شويه ودك جاوبته هااا عمار

عمار : يله جاوبي موافقه لو لا

غزل : مو اتفقنا باجر

عمار : اي صارت ساعه ١٢ وخمسه يعني دخلنا باجر وشوفي التقويم دخلنا يوم جديد يعني مالج حجه بعد صارت باجر واريد الجواب هسه

غزل : هههههههه عفيه انطيني مجال

عمار : انطيج العمر كله مجال بس كولي اي وابقى انتظر شكد متردين

غزل : احنا هسه انمر بظروف صعبه مااكدر احجيلك وعقلي مشوش بس تهدأ الاوضاع نفتح هذا الموضوع ولتنسى ورايه خواتي اخذ رإيهم اني مو وحدي ومااحب انطيك كلمة وبعدين ارجع بيها

عمار : اوك انتظر وامري لله المهم هسه مرافضه بشكل قطعي

غزل : ابتسمت وكتله لا مرافضه

عمار : وهذا يكفيني حالياً روحي ارتاحي ونامي

غزل : اخاف شوي وادك وتكول خلص وكتج

عمار : لا مااسويها بعد بس راح احسب ساعه ساعه لحد متكولين عمار تعال اخطبني منتظرها منج غزاله

غزل : غزاله

عمار : اي واحلى غزاله الله يحفظج ويرعاج مع السلامة

غزل : مع السلامة

غلقته والابتسامه بوجهي مو طبيعيه وطبت رشا

رشا : بسم الله ساعه اطب الكاج صافنه والوجهه اصفر وهسه اطب الوجهه مورد وتضحكين ولج اخاف نعالج بريم وصار بيج عزه اذا صدك

غزل : ههههه لا مابيه شى

رشا : الله يهديج مبقى الدور عليه وتكمل السبحه راح اخذ الشال مالتج

غزل : اخذي التردي كله كدامج

رشا : مبين المزاج برتقالي خلي اخلص من اختج وافرغلج اله احلبج واعرف شكوو وشصاير بيج

غزل : هههه ليش اني بقره

رشا :لا صخله والله ممرتاحه اكو شى ديصير

غزل : سلامتج ام فروحه الورد ذاك الشال اخذي والله وياج

رشا : اف منج يلخنيسه ساكته وراج بلاوي

غزل : لا والله ممسويه شى موزين

رشا : نشوف بعدين اروح اكوي قبل متطفى الكهرباء

غزل : روحي الله يقويج

منمت من التفكير اشكال اجت بالي بس كل اليجي نهايته اني اريد عمار حبيت بيه ثكله وهدوئه وسوالفه هذا الانسان من الله انفتح گلبي اله بس تخلص شغله ريم وراها نشوف

حسين : مرت ١٠ ايام واخذت نورس ورحت لهاي المره وعرضت عليها تبطله بس هي استغلت الموقف وكتلها انطيج الضعف بس فكي

ام اميمه : لا خمس اضعاف

حسين : شكد انطوج

ام اميمه : مليون واني اريد ٥ مليون وافكه

حسين : هوايه ماعندي

ام اميمه : بكيفك لعد انت عبالك هينه الفك انت متدري شكد تعبت بس حتى اكمله وهم ميكمل بيوم وليله لازم ايام معينه اشتغل بيه واسوي صده وابطله للعمل يعني تعب هوايه واذا متريد تفضل اطلع وراك ناس ماخذه مواعيد

حسين : انطيج اربعه

ام اميمه : ولا دينار انزل خمسه حتى ابديلك بعد يومين

حسين : التردي يجرالج بس فضيني وبطلي

ام اميمه : ماااشي تنطيني الفلوس كلها وراها مااشوفك

نورس : يمعود حسين شدسوي

حسين : انتي سكتي

حسين : باجر الفلوس يمج طلعنا

وبلباب

نورس : انت من كل عقلك منطي ٥ ملايين ولك ذني ب١٠٠ الف يسون السحوره

حسين : ولو رايده ١٠ هم انطيها لو اعرف انطيها السياره بس ماطلت وياها حتى لتشلع گلبي وبعدين تگلب

نورس : والله زايده منك

حسين : امشي ارجعج لبيتج وكولي لامي هاي دكتها ماانساها الها وخلي تفيدها السحوره

نورس : مراح ترجع للبيت

حسين : اله زوج ومخبل وارجع اني لهسه اعض اصبعي ندم لان سمعت كلامهم وعفتها گلت حرام عليه ولازم اكون بار الوالدين ومو عاق بس همه كوه سوني عاق وخلي يفيدهم عنادهم

نورس : امي اطك اذا متشوفك بلبيت هاي الايام تبجي من تخابرني وتسأل عليك

حسين : خليها لو تحبني صدك متأذيني هيج

نورس : والله ماما تحبك

حسين : بس أذتني حيييل اذتني وهيج محبه هم مااريدها خلي اوصلج وارجع ادبر الفلوس واجيبها لهاي حتى تفضلي هاي الخرابيط الي سوتها امج وبيبيتج

رشا : كمنا ٣ اسابيع جنا نشدها ونسبحها لان تعيط وتگلب الدنيا وتضربنا اني وغزل نلزمها وعمه تسبحها شفنا ايام سوده ويوم بعد يوم نخاف عليها اكثر

واليوم راكبين السياره ورايحين للسيد اليوم اربعاء وبعد ثلاث ايام  اربعين الامام الحسين (علية السلام )والدنيا مگلوبه وناس مشايه السياره وصلت قطع بلمسيب ونزلنا  وبدينا نمشي واي سياره مال العتبه نلكاها نصعد بيها بوكتها رحنا اني وعمه وحسين ويه ريم لان بابا ضغطه صعد وتخربط وبقت غزل وسليل يمه

رشا : اباوع على حسين شلون محاوط ريم وميغفل عنها لحظه اخر شى لزم ايدها ويمشي بيها جانت حيل هادئه وبس تباوع على الاضويه على الاعلام وعمه لازم السبحه وتسبح واني وياها

حسين : ريمتي جوعانه تاكلين

ريم : لا

حسين : تعرفين اني منو

ريم : اي

حسين : اني منو

ريم : انت سحليه

حسين : بجيت متحملت وكلت بصوت دخيلك ياسيد الشهداء مرايد شى بس ترجع لصحتها ونذر عليه كل سنه اجيك مشايه بس تصحى وترجعلها عافيتها تعااي حبيبتي تعالي يانور عيني انتي تاكلين شويه حتى صدرج يدفى

ريم : اريد مي

حسين : صاار

رشا : اني وعمه محجينا شى جان حسين حيل متأذي على ريم ونعرف شكد يحبها الطريق كله خلصه يدعي ومرات يبجي ويمسح دموعه من يشوفها هادئه ومتطلع حجايه منها حتى اني الجنت رافضه وجوده ويانه سكتت لان شفته شكد متأذي حتى زيان ممزين وجوه عيونه سواد مال قله نوم

وصلنا للسيد بعد تعب وازدحامات ودخلت وياهم هاي المره

السيد : اي ماشاء الله صايره احسن

نهر : بس ساكته وتتصفن

وبدا يقرا عليها ويشمر بوجهه مي وشربها مي وره وره ربع ساعه

وقف كلشي وكاال

اكو ناس يحالفها الحظ وتتعالج بسرعه واكو ناس تاخذ سنين وخاصه اذا ملكينا العمل وتبقى رحمة الله وتوفيقه

السحر مالتها مفكوك هاي قبل مده هم اجاني واحد مسويله محبه زوجته مسويتله وگلب عليه ومن تخبل عليها والرجال راد يموت راحت بطلت العمل بنفسها وسهل علاجه وبس صحه طلكها بتكم هيج انفك العمل علاجها صار اسهل

نهر : بس ليش هيج وضعها

السيد : ماكو شى مايترك اثر هي ترجع بس بلتداريج واحسن من قبل بس لازم تنتبهه من شغلات يعني متسبح  ولا تنام ولاتدخل حمام المغرب وقت المغرب خطر للي مثل حالتها تتعالج بأذن الله وترجع احسن بس تبقى اكثر وحده معرضه للضربه مثل الواحد الي مريض ويفقد مناعته وبسرعه اي مرض يلكطه والصلاه اهم شى الصلاه متتركها وقايتها من كلشي الصلاه والتسبيح بعد كل صلاه ومتنام اله تتوضى وعلى نظافه والله يشافيها ويشافي كل مريض

حسين : رحمه الله والديك سيد وهسه شنسوي

السيد : تاخذوها للزياره هاي ايام عظيمه  وتباتون هنا تزورون وتبات بالامام العباس ولان زياره وهوسه عادي قريب من الامام اخاف متكدر تدخل الضريح من الهوسه نعوف الاسبوع الجاي البعده تجون هنا وتباتون ٣ ايام بالامام العباس سلام الله على ابو فاضل وراح تنشمر وادعو الله تزوع الي بجوفها اذا زاعت طار شرها

نهر : بجاهك ياابا الفضل

السيد : توكلو بالله

رشا : اخذناها وطلعنا جان ازدحام قاتل حتى مكدرنا ندخل للضريح كعدنا قريب الامام وبتنا خلصناها صلاه وهي صافنه على الامام ونزلت دموعها

شبيج حبيبتي

ريم : خايفه منه راح يأذيني

رشا : منو يأذيج

ريم : هذا وتإشر على الامام العباس

رشا : هذا الامام سلام الله عليه ميأذي بلعكس بأذن الله يطيب كل معلول مو دوم تكولين احب ازوره

ريم : اي

رشا : تعاالي بحضني سحبت راسها وحطيته بحضني وبقت صافنه على المنارات لحد منامت

والصبح كعدناها ورجعنا جان رجوعنا دمار لان ماكو سيارات ونركب من قطع لقطع لحد موصلنا للمسيب احنا النفس كوه نجره وريم صارت خرده رجعنا گبل نمنا

وبعدها بإسبوعين اخذناها والحمدلله جانت الزياره فاضه اكو ناس بس اكيد مو مثل الزياره هلمره عمو سجاد ويانه وحسين متركنا ولا يوم بس وصلنا اخذناها اني وعمه

دخلنا للامام وبدت تون من شافته لزمتها حضنتها وكعدنا قريب الضريح بداخل

اباوع على الضريح الشريف وابجي

اجيتك ياابا الفضل ونخيتك واحلفك بأختك بعزيزه گلبك زينب انت تعرف الخوه انت ابو الخوه واني اخت واجيت وگلبي ملجوم على اختي احنا الزمن دار علينا ومارحمنا عشنا تحت رحمه الله بس عباده مارحمتنا مااذينا بشر بس تأذينا انطعنا واندسنا كلمن ناأمن بيه يطعنا شفنا المر والويل من اقرب الناس كلها تصيح يانفسي نوكع  ونكوم ونكول الله كريم الله موجود ياخذ حقنا واليوم الدوسه قويه يامولاي اليوم اختي راح تضيع مني وأذوها وهي ممأذيتهم الله مايرضى بلظلم واحنا مظلومات احلفك بأمك ام البنين شافيها وعافيها ضاكت الدنيا يابو فاضل وجرحتنا ياكفيل زينب تفرجها على اختي الحسره تشتعل بصدري عليها طفيها بحق حركت زينب على اخوتها

كعدت اشهك وحاضنتها وهي تسمعني ونزلت دموعها ويايه واعيه بس متكدر تحجي

ريم حبيبتي اخذج تغسلين

ريم : لا

رشا : بقينا الليل هناك غفت رغم مقبلو نبات بس شرحنا وضعها وبقوني بس اني وياها وعمه طلعت للصحن بره يم عمو سجاد وحسين

نايمه وتنتفض وافززها وتبجي وترجع

بقينا يومين على هذا المنوال هلكنا شوي ناكل محد اله خلك لاي شى بس نصلي ومكابلين الائمه همه مره يرحون للامام الحسين ومره لامام العباس بس اني مطلعت لان لازم ريم تبقى بضريح الامام العباس متطلع وثاني يوم بليل بدت  تون وتتهوع مثل الهوا يطلع من حلكها اخذتها ركض للمغاسل وبديت تتقيأ شى اسود اني من يمي اخترعت يمكن لو احد يگلي مااصدك بس شفته بعيني جان تجي مره جبيره بلعمر وتكول انطاج امرادج اخو زينب والنعم منه ابو فاضل طبطبي يمه على ظهرها هاي اخيتج

رشا : اي خاله اختي

يحفظها الله شابه شرايدين منها الميخافون الله

رشا : حظنه خاله بعد

روحي يمه اذبحي لوجهه الله وزعي للفقره كلشي لاادخلون لبيتكم على سلامتها وهسه جيبي خاولي وغسليلها وخليها تتوضى واجبريها تصلي

رشا : بس حالتها كلش تعبانه

هسه بأذن الله ينطيها كل الحيل واخو زينب مايقصر للي ينخاه ومشيها بين الحرمين تشم هوا وان شاء الله كلها جم يوم وتجي هي بنفسها توزع واهليه

رشا : رحمه الله والديج

عساها بحظها وبختها كلمن تسوي سحر وتأذي احد ولجن الله اكبر خافن الله كون مكانجن ويه فرعون بنفس الحفره مال النار

شيطاين يخاله موش نسوان

رشا : الله يبعدنا عنهن

غسلت لريم وبقت تتهوع حدود ٣ ساعات لحد مهلكت وكعت مني وخطيه نسوان ركضن ويايه وصحت عمه وغسلنالها وبدت تصحى بس تصيح نعسانه

بيتناها اليوم الثالث بلحضره وكعدت ويه اذان الفجر تهمس

ريم : اريد اصلي

رشا : اللهم صلِ على محمد وآل محمد فدواتك ياابو الفضل فدواتك يااخو زينب دخيلج ياام البنين نخيناكم وماقصرتو حشاكم من التقصير حضنتها حيل رغم تعبانه مشيتها وابجي فرحانه طلعت عليهم وهي بيدي

تريد تصلي وخطيه عمه حضنتها وتبجي اباوع حسين سجد لله ويبجي ومرفع راسه بقى ساجد

سجاد : الف  الْحٍمَدٍ للـّہ والشكر اخذيها خلي تصلي

ريم : تعبانه حييل

رشا : ميخالف حبيبتي ايام وترجعين مثل الاول

اخذتها وخليتها تتوضى ودخلنا مره ثانيه للضريح وصلت جان كوم تكوم تكعد واني كاعده بصفها ابجي من الفرحه ممصدكة واخيراً صحت

لزمتها القران واكو ايه كال السيد خلي تقراها

وبدت تقراها ومن كملت حطت راسها بحضني ونامت

نهر : صلينا كلنا صلاة الشكر وخابرنا على طه الي من سمع كام يعيط بعلو صوته ويصلي على النبي واسمع هلاهل البنات جانت اهم علامه هي بدت تصحى هي بأن تصلي وتكدر تلزم القران بدون مترفضه والحمدلله صار هذا الشى

وبس صار الصبح كالت لرشا على كلام المره مال ذبيحه لوجهه الله مباشره حسين وسجاد راحو اشترو وذبحو وزعو للفقره

خلصنا اليوم الثالث بخير وسلامه وراجعين بلطريق وريم نايمه مثل الطفل

ريم : بدت اصحى بس احس ولا عظمه صاحيه بيه وراسي يوجعني وعيوني ناار مثل النايم وشاف كابوس وكعد تعبان ويلهث شصار وشنو البيه مااعرف بس هسه الي اريده بس انام  فتحت عيووني واني بلضريح وردت بس اصلي وانام حتى مكدرت اسألوهم شصار وليش احنا هنا

رشا : رجعنا واستقبلونا طايرين من الفرح وهي محجت شى بس كالت وين تيم

سليل : يمي حبيبتي لتخافين بعيوني

ريم : اريد اشوفه اشتاقيت اله

رشا : تشوفي بس اسبحج ونامي وارتاحي واجيبه الج

ريم : درت وجهي وصارت عيووني بعيونه جانت نظراته غريبه بس حنينه بيهم دمعات ناعمات تلالي بعيونه وبس تقرب مني وكال الف  الْحٍمَدٍ للـّہ على سلامتج

ريم : الله يسلمك ودخلت للبيت

حجي طه : ابني حسين صار شى لازم تعرفه

حسين : خير عمي

حجي طه : اجه ابوك هنا وعيط

رشا : شيريد

حجي طه : روحي لاختج لتوكع

رشا : سليل وياها شصار بابا

حسين : احجي عمي شصار

حجي طه :تعرف معزتك عندي بس انت هم ماترضالي يوميه البهذله اهلك راعين مشاكل واني گلبي خلص من المشاكل مالتهم اجه هنا بلباب يهدد ويتوعد يريدك ترجع عباله اني الي محرضك تعوف البيت

حسين : استغفر الله وتالي

حجي طه : بقى يهوس ربك الظهر اجه وناس قليله والله ردت اضربه اله شويه يعني مو كل مره نفس القاروره تعبت من قهرهم وشوفت عينك كامو يأذوني بناتي واني كلشي ولا هنه ارجع لاهلك ابني وراضي ابوك وامك وابعد عن بنتي كافي الصار بيها لهسه من وراك وكافي لهسه ساكت ماسويت طلابه شكبرها بس لو عندي دليل اهلك همه الي أذوه ريم قسماً برب العزه لا احرك الاخضر واليابس اني مسالم واخاف الله بس من تجي الشغله لبناتي هنا حتى اني مااعرف نفسي

حسين : رفعت التلفون وفتحت حاكيه وشاله

علي : هااا وينك

حسين : انت مو تريد مااتزوج ريم

علي : انت رجال واخذها شحدك

حسين : هذا هو مراح اتزوجها

علي : اي هيج ومن الاول ليش تشلع گلبي وگلب امك

حسين : بس انسو عدكم ولد اسمه حسين ومثل ماجنت بار بيكم هسه راح اصير عاااق واسقط من العااق البنيه وعفتها وحتى لبيت عمي ماادخل بعد وبيتكم يحرم عليه ليوم الدين واذا صار عليه شى اوصي جماعتي همه يتكفلون بيه اعتبر ابنك مات ودفنته

علي : ولك شنو هاي سوالف المسلسلات والمراهقين ارجع للبيت لا اكسر راسك

حسين : انت الكاني بالاول وبعدين كسر بس احسلك تتبرى مني لان بعد ماارجع وحق العباس الاجيت منه هسه تحلمون بشوفتي وخلي سوالفكم تفيدكم

سديته

حجي طه : ليش هيج حسين مارضيتها منك يبقون اهلك

حسين : ماغلطت بشى عمي وياهم جنت دوم الهم ابن بار وماكسرت بيوم الهم حجايه أذوني بكلشي وكلت ميخالف اهلي بس بعد سوايتهم الاخيره كافي مصخت بلكت الله يهتدون ولو اشك بهذا الشى

نهر : وين راح تروح يمه

حسين : ارض الله جبيره عمه تقربت وبست راسها وشاورتها امانتج ريمتي عينج عليها بروح جدي وراح اغير تلفوني واخابرج حتى اطمن عليها وهااا كوليلها الي شربتج وحده اسمها مريم بلمدرسه وياج خلي ادير بالها لتثق بأحد

نهر : الله لا يوفقها

حسين : من رخصتك عمي

سجاد : وين مولي وحدك جااي وياك

حسين : انت الضلع ابو زين لتخاف عليه اخابرك واكلك مكاني وين اودعناكم

رشا : انقهرت حيل على حسين لان يحبها وروحه بيها مستحيل بعد الصار ينجمعون

بس مو مستحيل عند الله

غزل : اليوم كاعده ريم بينا تسولف صح مو مثل الاول هوستها وسوالفها وضحكها بس على الاقل واعيه ومتعيط وتصلي وتحضن ابنها وتنام الدوام مرجعت اله عاافت المدرسه

كاعدين داير مدايرها وطايرين بيها  ومشغلين صوبه وعليه قوري الجاي وصينيه بلكاع بيها كعك وبسكت تعلوله للعصر دخلنا ٢٠١٧ نهايه شهر الواحد بطلت من المختبر ومن سألوني كلت الهم تعبت اريد غير مكان ممرتاحه وهمه معلقو وكال بابا هاي الفتره اكعدي علمود اختج تساعديها واني كيفت كعدت وسكتت خابرني مرتين عمار يسلم ويسده ومنتظرني انطي الموافقه واني منتظره افتح الموضوع ويه خواتي واحسب ساعه ساعه تهدا الاوضاع حتى اكلهم ودك تلفون رشا كل التلفونات متطفر من يدكون اله من ادك سهير معناها اكو خبر من شعلان 

ورشا رغم الصار متابعه كل اخباره

رشا : هااا سهور وينج صار شهر مختفيه على كيفج عيني تبيعين ثكل علينا

سهير : ههههه لا ولج مو انخطبت والتهيت بخطوبتي

رشا : ايا خاينه ومكلتي

سهير : قابل تجين للكوت متجين

رشا : بس اقلها ادزلج هديتج

سهير : اكيد ادزيها على العرس واريد هديه توب لتصيرين بخيله

رشا : ههههه لا ماابخل شلونج شخبارج والعريس حلوو اجم خيه

سهير : شايل نفسه اسمه رجال احسن من ماكو

رشا : ههههه راح تجيج ايام تكولين لو ضاله بنيه بطرك روحي ولا هاي الوكعه المسودنه

سهير : ههههه يجوز اكلج رشاوي

رشا : هااا ولج ياستار كولي

سهير : اريد اكول شى بس اخاف تنحسب شماته والله يعاقبني

رشا : گلبي دك حييل عرفت خبر مهم احجي عليج الله احجي شصاير

سهير : عرفت ليش ماسوو هوسه من ولدت جنات

رشا : حيييل لهسه تتذكرين ولج الولد هسه عمره بال ٤ اشهر اذا مو اكثر

سهير : اسمعيني ولج الطفل طلع بيه خلل

رشا : الرحمن يمه شلون خلل  ولج

سهير : راسه اكبر من جسمه واعضائه متكبر

رشا : دخيلك ربي زين شمدريج

سهير : من هند هي كالت لاختي غير صارن صحبه من وره الكتل الي تاكله من شعلان كل فتره ورايحه مداويتها وميخلوها تطلع ولا عدها تلفون كل ماتروح اختي تكابلها وتكعد تجرش وياها بلحجي وبس ترجع اني استلمها من الباب اعرف شيصير وهاي هند حاقده حيل على جنات واتشمتت بيها كالت لو بيها خير مجان خلفت طفل مشوه والطفل حالته حرجه لو يعيش لو لا

رشا : اني گلبي لزمني رغم كل الصار مردت الجهال يصير بيهم لان مالهم ذنب واني ام واعرف الضنى شكد غالي

سهير : والاكبر من هااي ابنه الجبير تك گليه تشوه ولادي طلع بيه ولج خلفتها كلها مشوهين وشعلان ضال يركض هنا وهنا مثل المخبل من مستشفى لمستشفى

رشا : صخام يمه عين الله على جهالنا مناقصنا مصايب وان اكول ماكو صار ٣ اشهر

سهير : والله مااعرف اتشمت لو انقهر على حال هاي الجهال

رشا : والله اني هم مثلج

سهير : تدرين اكو شى بس لتضوجين

رشا : ولج صايره مثل علاكه بابا نوئيل كلشي بيها احجي شكووو

سهير : كالت هند على اساس جنات قبل متتزوج شعلان مره اجت يمكم اسبوع وراحت

رشا : اي اتذكر هيج شى قبل متجي جيتها الاخيره والزمهم قبلها يمكن بكم شهر مو هوايه

سهير : ماادري شوكت المهم كالت قبل ميعقد عليها متقربه منه و

رشا : وشنو ااحجي صارت عندي مناعه من الصدمات

سهير : متقربه منه ومسويه اغراء وبايسته وكايلتله احبك ومااكدر اعيش من دونك وهو ضل مصدوم واجه حجه لهند وهاي كيفت وقرت براسه

رشا : الله يحركها لعد شلون يكول  مقبلت بالاول العااار ويدافع الها

سهير : ولج الاضرب هو مبادلها يعني مصادها وحااس على نفسه ودافعها وطالع ومن عدها صارتله رغبه بيها ومنا هند وسوالفها تزوجها

رشا : صخونه التلفهم ويحجي بلشرف عديم الشرف

سهير : والله جنها هند عدها شغلات على جنات تشيب الراس

رشا : خلي اختج تصير سباعيه وتفتهم

سهير : كلشي يبين وداعتج ميضل شى مضموم خليهم هسه ساكنين المستشفيات

مثل مسكنوج

رشا : اللهم لا شماته عندي بنيه اخاف عليها عداله ربج خلي يفيدوه الولد

سهير : اروح خطيبي يدك باي حب

رشا : باي حبيبتي

نزلت صافنه وخواتي ياكلن وريم تبتسم اوف اشتاقيت لعياطها وهوستها سكتت مردت اخرب كعدتهن بس بقى بالي واني اتخيل شلون يبوسها بلبيت وشلون تغري ااااخ شكد مااحاول انسى اكو نار بعدها بصدري مطافيه

كمنا نحضر للعشا اني وعمه واجه بابا وسجاد دخلو وصاحونا

نهر : هااااا عيني طه

حجي طه : اكعدي نهر ماطول كلكم موجودين

نهر : خير

طه : اجوي خطابه على غزل

غزل : بلعت ريكي والعيون كلها عليه

نهر : منو نعرفه

حجي طه : اي عمار الي يشتغل بلمطعم ويانه

اليوم حاجاني وكال طالبها واجيت اسألكم والرأي الاول والاخير لغزل 

نهر : انت شتكول

حجي طه : خوش ولد وزلمه واخو خيته ومعدل احب الشاب الي يتحمل مسؤوليه اهله وميضوج وهم صايم مصلي وماشفت شى موزين عليه

رشا : بس ظروفه تعبانه وحالته حيل ضعيفه

حجي طه : خذوهم فقراء يغنيكم الله ومو عيب الفقر بنتي  وهي عاشت ويه رجال مقتدر ومطولت وشحصلت مو اجت تركض من الخارج اني مااضغط عليها براحتها بس اذا على رأي اشوفه خوش شاب وعلى الماده الله يرزقه مو كدامكم جانت حسرة علينه الفلس وهسه بفضل الله وتوفيقه وبشغلنا عيشتنا زينه  واذا هي سباعيه تكدر تلمه

واني هم اساعدهم وكلشي بلتعاون حلوو

غزل : ابتسمت جاان ريم تنطق خلتنا صافنين

ريم : هذا هو بابا غزل موافقه خلي يجي يقرا الفاتحه

يتبع ....

#رواية_أبي_والغزلان_الجزءالثاني

#للكاتبة_REEM_ريام_هادي

#البارت_الخامس_والاربعون

لسان حال طه لسندس،،

لا عندي بخت وأزهك وأشور بيك

ولا سـيد و اگول يسـودنك جدي

يالماخذ حياتي برخص طين الگاع

متگلي_بعد_شتريد_من_عندي

حال نهر

عيش اعله كد الخلك

نام اعله كد ليلك

صدكني ماكو بشر من توكع يشيلك ..

حال سليل :

اكتبلك شعر واترس الروح احساس

واخلي بكل قصيدة العبرة والمعنى

يالزارع بگلبي من الوفى مقياس

يجي بحرگة اعلى ابابك هيج يتعنى

يصرخلك عشگ تشتم محبتہ انفاس

لو لحضہ تغيب الموت يتمنى

يامالك گليبي ضلوعي الك حراس

عايش بروحي ملك بكيفه يتهنه

بيبان الگلب بس الك مو للناس

مو ياهو اليجي  وبكيفہ يدنه

حال ريومة

تگلي شلونه گلبك ؟

گلبي ما بيه لون

عن لون الحطب لا تنشد التنور ..

حال غزوله،،

خريف سنيني ورگه تسابگ بـ ورگه

ادور بروحي غير هموم ما الگه

ماكلني الوجع وبروحي لمة آه

بس اضحك چذب والوادم مصدگه

حال رشاوي، ،

صگري الچنت ازامط بيي رافگله بومه...

(هديه من متابعه)

غزل : ابتسمت جاان ريم تنطق خلتنا صافنين

ريم : هذا هو بابا غزل موافقه خلي يجي يقرا الفاتحه

سجاد : حلتها زيبك واخيراً نطقتي بس تره مو انتي العروس

ريم : ابتسمت بهدوء وكتله اخذوها مني هاي الفاهيه مراح تنطيكم موافقتها لو غير كلمة بكيفكم متسمعون وحتى لدوخون راسكم حجيت بمكانها ولو هي معترضه جان كالت لا موو غزل عندج غير حجي

غزل : صرت طماطه ودنكت

رشا : احجي مو وكت خجل راضيه بلعيشه ويااه تره هي مو لعب دعابل وبعدين نصيح بطلنا هذا زواج ولتنسين هاي الزواجه الثانيه

حجي طه : على كيفج وياها بابا هي مو عركه

رشا : مو هاي فاهيه اطك الگلب

سليل : عوفها تفكر على راحتها المن تشلعون گلبها وتلحون عليها اكيد مستحيه هسه

حجي طه : براحتج بنتي فكري زين وشوكت متردين تنطيني خبر تعالي

كمنا نكمل العشا وصبينا وتعشينا كلنا

وراحو سليل وسجاد للبيت حسيت سليل مو طبيعيه كل شويه متمدده وتصيح نعسانه هاي شبيها والله كمنا نخاف من وره سالفه ريم

بس كملنا العشا دخلنا للمطبخ ريم صعدت واني سحبت غزل تعالي

غزل : بس اكمل المواعين

رشا : عوفيهن لا اكسرهن على راسج امشي اصعدي سديت المي وبعدني اريد امسح ايدي جان تجرني وتكولي امسحيها بهدومج مو وكت لواكه واتكيت فاكس

غزل : غير بارده وامسح ايدي

رشا : شوو جيبي وجان اتجر ايدي وتمسحها بلبلوز مال التراك مالتها هاااج نشفت شبيهن الملابس هنه اصلاً مصنوعات علمود نلبسهن ونمسح ايدنا بيهن من نخلص شغل بله تفستق وخاوليات ولواكه بعد ساعه متكملين  وسحبت ايدي حييل يله  وصعدت وياها وهي تسحب ايدي مثل الطفل دخلنا لغرفة ريم وريم متمدده بجربايتها وايدها جوه راسها جان تشمرني رشا على الجربايه الثانيه المقابيلها الي ينام بيها تيم

اسمعن لجن اني مال اصير خراعه خضره بهذا البيت مااصير واطيح حظجن اذا متحجن وانتي ريم سكتي وهناك كلتي موافقه شمدريج هاي الخنيسه موافقه اكو طبخه ريحتها محلوه تنطبخ بدوني واني الطبخه الما اشارك بيها اديرها على راسجن

ريم : لا طبخه ولا شى ريه على كيفج ليسمعوج جوه

رشا : لو تحجن هسه لو اركع راس براس مو مريضة وهاي السوالف حتى لو مريضة اشبعج كتل وراها اعالجج

ريم : والله ولا مبيه حيل احجي واداهر هاي اختج يمج هي تسولف

غزل : شسولف

رشا : احجيلي قصه ليلى والذئب احبها لان هسه اذا محجيتي شصاير من ورايه احتمال اصير الذئب ومو بس اگلج حتى عظامج امصمصه فضينا شصاير بدون مااعرف

ريم : تره صوتج مقرف صاير وعالي

رشا : هاي منو تحجي الاميره النائمه الله يحرم من جان صوتج يوصل للجامع وكل شويه بابا كال نصو صوتكم

ريم : شوفي ياام فرخه اختج تحب عمار وراضيه بيه وراح تتزوجه وعاشو عيشه سعيده

رشا : شوكت حبيتي يمعزايه

غزل : هاااا لا مااحبه

ريم : يعني ذيج المره من جنتي تسولفين بليل مو ويااه بأذني سمعتج تكوليله ليش لابس  اسود مفتحت الباب وحطيت اذني اريد اعرف منو اللابس اسود كلت بس لا فيصلوو وسكتي اريدج تحجين ماكو هناك وسمعت بجيتج وكلتي اخاف عدكم عداوه كلت هذا مو فيصل وهم اخرسيتي ردت اطب اجر الموبايل لان الفضول يقرا الف صار وراها سمعت الله لايوفقهم ولان انتم سنه مو هلمره ضليت بحيره منو لابس اسود وعنده عداوه وسني تكول داجمع كلمات متقاطعه

رشا : واني وين جنت مصحتيني

ريم : جنتي جوه تنتظريني من كتلج اشوف غزل نامت لو لا حتى تنزل تاكل ويانه حلويات لان متعشت وانتي صحتيني وبقيت افكر منو هذا وره وين متحملت وصعدت دخلت عليها ضمته كلت بانت البشاير اكو واحد ياترى منو هذا الي اتضمه علينا

ومره مرتين بابا جاب طاري عمار وهاي اختج وجهه مثل السبوره مال مدرسه بسرعه يبين عليها ترتبك عرفت هو بس ممتأكده واليوم من كال بابا خطبها حسيت عيونها تعيط وتصيح اريده

رشا : واني نايمه ورجلي بلشمس

ريم : هسه مو عرفتي روحي نامي دخت تره

رشا : وراح تقبلين

غزل : وليش مااقبل

رشا : وعيشته الصعبه

ريم : اكلها ثور تكلي حلبي لج بابا اختج تحبه لو يجدي بلترفك لايت توكف وياه وتلزمله الوارد راضيه بكلشي بس هي استحت

رشا : خايفه متكدر على عيشته وتتعب هو ذاك ابن الخير مكدرت تعيشين ويااه واني هم الصراحه مكمت اثق بإي رجال

غزل : عمار مو مثل شعلان

رشا : كلهم نفس الشى ذاك هم دك صدرة واني واني صارلي فارس ابن الحصان وخلصها خيالج وخيالج وتالي طلع ميركب بس مطايه

ريم : غزوله تحبي

غزل : اشرت براسي بدون مااحجي اي

ريم : تتحملين كلشي ويااه

غزل : اي

ريم : يابه خلي يجيب اهله ويقرون الفاتحه ولتعبونا والله تكتلون وكت على الفارغ

اني اريد انام سدن الباب وراجن ولتطفن الضوا

رشا : بعدج تخافين من الظلمه

ريم : اي اخاف

رشا : اجي انام يمج

ريم : بس لتكمزين وباركي لاختج بزر الكعده الخطوبه وكلشي مااريد منج شوفي وجهه شون تفح

رشا : شريد اني غير سعادتها والله من خوفي عليها

ريم : الله يحميها يله اطلعن حجيتن هوايه

غزل : تقربت بستها من خدها وبست رشا

رشا : خوش رشوه

غزل : ههههه والله مو رشوه غير خواتي واحبهن

رشا : الله يسعدجن امنيتي اشوف وحده بيجن سعيده ومرتاحه

ريم : اني فول راحه حتى جن عاشرت وصارو اصدقائي وحضرت جم حفله ديسكو وياهم  اكو احلى من هيج سعاده

رشا : ضلي صنفي شفنه الموت من وراج

ريم : محد شافه غيري وداعتج  الْحٍمَدٍ للـّہ على كل حاال يله طلعن

غزل : ابتسمت وحضنت رشا وطلعنا وكعدت اسولف الها كلشي صار ويايه وهي بقت ساكته حقها ماالومها الي شافته مو قليل من شعلان والي شفته اني هم من فيصل مو قليل يعني الي مثلنا المفروض متفكر ترتبط وتتزوج بعد لان اي ثقه ماعدها بس اني وضعي يختلف اني ماحبيت فيصل ولا هو حبني ولا علاقه وتضحيه وتالي هيج صار من الاول مراهمين وحاولنا انزلكها وضاعت كم سنه وملزكت والحمدلله متورطت بطفل ويااه جان صارت المصيبه اكبر

مر يومين وانطيت الخبر لعمه بموافقتي الي سكتت واكتفت بكلمة يمه انتي مو صغيره وانتي اعرف بمصلحتج وفكري زين ولتستعجلين بس اني متجرأت لا اتصل على عمار ولا هو اتصل حتى مبلغني هو راح يخطبني وكلت لعمه اني موافقه ميحتاج افكر

وراها بيومين انطو خبر لعمار وحدد الموعد

بهاي الفتره عمو محسن جان مسافر هو وخاله للسويد وبابا مبلغه بأي شى واستغربت هذا الشى لان مو طبع بابا يضم على عمو محسن

اجه بابا وبلغنا الخميس يجون يقرون الفاتحه فرحت حييل وحسيت واخيراً راح اختار انسان اني اريده وهو يريدني مو اختيار اهله

اجت امه انسانه طيبه وحبابه وكعدت ويه عمو وصاحوني علمود الذهب وهاي السوالف

ام عمار : بنتي تعرفين ظرف عمار والعيشه على كد الحال واني جامعتله جان يوم عيد ازوجه وضامه على كد حلقه ومحبس وزنجيل يعني ثكال مو خفاف واذا الله رزقه يكمله بتراجي وسوار

غزل : مااريد بس الحلقه عندي ذهب خاله

ام عمار : شلون يصير يمه هذا نيشانج

نهر : عيني ام عمار الذهب ميكعد بخت وعمار خوش ولد مثل ابني ومؤدب واحنا مقدرين وضعه عود من الله يمكنه يشترون هي وياه لتشيلين هم هاي السوالف

ام عمار : والله مااعرف شكول الكم والله من الخجل اريد ابجي

غزل : لا عفيه خاله ليصعد سكرج وتتأذين

ام عمار : ميصعد لو شيصير غير اني دازوج الغالي متعرفين شكد شلع گلبي واني اتوسل يتزوج لعد اذا هيج فلوس المحبس والكلاده على الباقيات نكمل غرفتكم ونزوجكم بسرعه

نهر : اي هيج احسن وشتحتاجين احنا اهل ومن عيونا

ام عمار : جنت دوم اكوم واكعد وبكل صلاه وتسبيحه اكول الله ينطيك بنت الحلال الي تسعدك وتجازيك على كد تعبك والله استجابلي ودزله احسن البنات

بقينا كاعدين وامه كلش تنحب وطيبه من سوالفها ومبينه حيل تحبه اتفقنا على كلشي ومردت اضغط عليه قبل ترسوني ذهب واشكال الغراض وارقى حفله ومؤخر كيلو ذهب تالي شحصلت اجيت بطرك روحي

وراواني النجوم بعز الظهر معودت خلصت منه وان شاء الله رغم بساطه الحاال الكه السعاده الجنت ادور عليها

بليل مكيفه ونخطط حتى انزل اشتري فستان وشحط مكياج وصاحني بابا

اول مشافني كال

حجي طه : بنتي دز عمار خبر تأجلت الخطبه

غزل : صفنت متفاجئه ليش تأجلت

حجي طه : والله يابنتي ماادري كال باجر الصبح ابلغك واتعذر

صعدت اركض للغرفه والكل متفاجأه مثلي سديت باب الغرفه وكعدت على الجربايه

جنت حيل مخنوكه وكوه كاتمه الدمعه ودك عمار مجاوبت وسويته صامت رجع دك وهم مجاوبت دز رساله على الواتساب كاتب بيها بس جاوبيني خلي افهمج رجعت كتبت اله مااريد شى منك ولتتصل هنا انت مو اجلت الخطبه اني لغيتها وبلغت بابا وهسه يخابرك ويبلغك

رجعت كتبلي

عمار : لتكفريني انت شبيج متفهميني ليش ويايه هجوميه اعرف طبعج هادئ ومتحجين حتى قبل من سألت عليج كلهم يكولون تكعد بلساعات متحجي وساكته بس ويايه لسانج شطوله اي موضوع تاكليني اكل بلسانج اريد افهمج ماكو ويه كل الناس نسمه هاديه ويايه تتخبلين  هذا حظي ادري بيه مكعد ويه احد قابل يكعد وياج

غزل : ضجت حييل ودكيت هاااا شتريد

عمار : اريدج

غزل : واني كلت ماكو شى بعد بينا

عمار : كل مره هاي النبره ومن افهمج تسكتين حتى النفس مااسمعه ليش هيج ويايه ياعيني لو لان احبج هيج تسوين بيه

غزل : هو كال هيج لو مي بارد نزل عليه مثل  سجينه حاميه نااار حمره من الحماوه وتنحط بمي بارد مباشره تسوي تششش هاي اني هيج  وسكتت

عمار : اسمعي شصار واحكمي وراضي وراها بلي تردي

غزل : احجي اسمع

عمار : ولتقاطعيني

غزل : مااقاطع

عمار : رجعت البارحه للبيت ولكيت عمي جاي صار سنتين دخلت استغربت جيته اثاري امي مخابرته علمود الخطبه

هااا شعجب نورتنا

اجيت اوكف هاي المهزله الي تريد تصير

عمار : خير يامهزله

صدك راح تتزوج وحده رافضيه

عمار :مسلمه راح اتزوج مسلمه شنو رافضيه

اي شيعيه رافضيه مو ذوله نفسهم كتلو ابوك واخوك هيج دمهم رخيص عندك لك ماعندك غيره ماعندك ناموس

عمار : بله عياط هسه انت جايني وره ٣ سنوات حتى تسأل اتزوج شيعيه لو لا اي راح اتزوج واحبها واريدها شلكم دخل بعد

سمعتي ابنج الخير شلون باع دم اخوه وابوه

لهسه ساكت ومحاجي شى اكراماً لابويه لان انت اخوه

يااكرام وانت تريد تجيب لبيتك الي كتلو اخويه وهجروكم

عمار : وانت وين جنت مجان اخذت بدم اخوك لو بس تعرف تعيط وعود شوفني اني الزين وابن خويه مو خوش ادمي من تهجرنا وين جنت مديت ايدك وساعدتنا جيت وكلت اخويه وابنه ماتو لازم اوكف ويه عائلته لان ضلو بلشارع سديت بابك وكعدت عود بس سويت فاتحه لميت بيها واجب وحطيتهم بجيبك يم بيتك واحنا يطبنا مرض شيصير بينا خلي يصير بله ياعمي السبع الي تحب اخوك وملتزوم وادور ثارات صار شكد مشايفين طلتك البهيه شكد صار مداك هذا الباب

ام عمار : يمه عمار عيب على كيفك

عمار : العيب مو عليه يوم العيب على حماج الجاي نافخ ريشه ويهوس وانت منو دز عليك

ام عمار : اني يايمه غير عمامك ويجون بلمشيه مالتك

عمار : مااريد احد عندي اصدقاء يسدون الشارع من الطول للطول واخويه وامي وكافي

مع الاسف انت ابن اخويه لو عايش جان عرف شلون يأدبك

عمار : لو عايش الله يرحمه جان طردك من الباب

لتتجاوز اني عمك والزم لسانك

عمار : اني متجاوزت انت جاي هداد وتهوس

غير لمصلحتك يعني شكول لاهلنا من يعرفون متزوج رافضيه ومطلقه

عمار : وشبيهه المطلقه هاي حجه ثانيه

اخذ بنتي شو متدينه وحلوه وبنيه انت اول بختها ومنك وبيك ومخلصه كليه كافي بت عمك

عمار : الله يحفظها ماادور كرايب وهاي البنيه باجر رايح اخطبها وعندي هي تسوه الف بنيه لا والله مو الف مليون بنيه وهم متدينه ومتعلمه ومن عائله ينحلف براسهم بلشرف والاخلاق موزين منها قبلت بيه

هااج استلمي شون يحرك بدمي يعني هيج مستخف بروحك ومرخصها

عمار : عمي لدوخ روحك ولا ادوخني وياك البنيه احبها واريدها واني مو صغير حتى انت تمشيني وهاي سوالفك مااشتريها بربع وسالفه السنه والشيعه متهمني وبعد عشرتي الهم ولكل اصدقائي الشيعه كمت احبهم وماعندي شى وياهم والي كتل ابويه واخويه عند ربه هو يحاسبه خلصتها مرار وكطع النفس يله كدرت اوكف على رجليه الي يهمني اخلاقها وهي ملكة الاخلاق وزايدها التدين والهدوء جمال وبت عائله

تريد تجي تخطبها هله بيك متريد الله وياك مداز على احد اني

عود شنو كبرت ومالك رداد وجبير هواي نسيت نفسك وراك اهل مو وحدك وتقرر بكيفك

عمار : لا وحدي لان من انكتل ابويه كلكم ضميتو راسكم ومن تهجرنا ولا بيت انفتح النا ومن دكنا العوز محد مد ايده وكال هااك او كال تعال ادورلك شغل تعيش اهلك وانت خلال ١٠ سنوات عدد المرات الشفتك بيهم مابيها ٥ مرات ولا مره كعدت وطولت تخاف لا اطلب منك فلوس لو اريد شى لو واكفين وكت وكعتنا احطكم على راسي واجي اخذ شوركم قبل كلشي بس مو عفتو كل مصايبنا وتريد هسه من ازوج اروح اخذ رأيكم

اذا باجر رحت خطبتها اسويلك طلابه شكبرها واشهرك كدامهم ومااخليك تخطبها لو على جثتي واذا على النسوان كومه عدنا كبع واخذ

عمار : مااريد شكراً عندي حبيبة وراح اخطبها

دخطبها وشوف ازين شاربي اذا اخذتها لو اعرف اسويها طلقات

عمار : شحدك سويها والله اوكف بوجهك

ام عمار : تهدى بلرحمن يمه هذا عمك

عمار : هيج عم مااريد انتم مو شمرتونا افصلونا من العشيره مااريدكم هي كوه

لو ما معزت اخويه وغلاوته جان عرفت شلون اجاوبك واوكفك عند حدك

عمار : شسوي سوي واخذها وعناد بأكبر شارب بيكم

سويها وشوف وطلع عمي مورث من الاعصاب

غزل : وتالي شصار

عمار : اني عاندت وكمت اعيط بس امي تخربطت من الخوف وصعد سكرها ونقلتها للمستشفى سكرها ٥٥٠ جان انجلطت غزل

غزل : سلامتها لخاله وشلون صارت هسه

عمار :  الْحٍمَدٍ للـّہ ومن كعدت مردت اكسر بخاطرها خفت يصير بيها شى واتندم طلبت مني أجلها لبعد كم يوم حتى يهدأون عمامي وهم ميسون مشاكل لابوج ومااريد اتصادم وياهم مو خوف منهم يطبهم طوب بس خوف على هاي المسكينه بكل هزه توكع

غزل : هدأت وكلت بهدوء اذا تحب انهي كلشي ولتعاند احد واخطب بت عمك

عمار : وينطيج گلبج

غزل : دمعت عيوني وبقيت ساكته

عمار : غزوله اني من تقربت منج وحبيتج مجنت العب ولا مراهق واحب وانسى بسرعه ردتج حلالي وام بيتي وحبيبتي غزل اني بسبب الصارلي ماحبيت خليتها شغل واركض على العيشه وجنت حالف مااتزوج ولا احب لان گلبي مورم وحاير بأمي واخوتي بس من شفتج واحد وشال روحي ودكها بلكاع وكال هاي الي راح تاخذ روحك وگلبك وبقيت ذيج الفترات كلها اتجنب اتقرب منج اخاف من ردت فعلج واخاف اخسرج وبعد ما الله فرحني وهداج وافقتي عليه اضيعج من ايدي غير حتى عمي اذبحه جوه رجلج

غزل : هههه لا مو لهاي الدرجه

عمار : اضحكي من اروح فدوة لهاي السنون الحلوه من تضحك

غزل : خجلت وسكتت

عمار : غزوله عكب باجر يمكم احنا ولا تضوجين ولا تشيلين هم

غزل : مو انت مفهمتني ولا حتى كلت لبابا السبب

عمار : والله كلت باجر من الصبح احجي كلشي لاحجي هم مااريده ياخذ على خاطره مني وهمه عمامي ميحقوني بشعره بس غير امي جبانه وتخاف من الملاطخ اجلتها يومين

غزل : اخاف تصيرلك مشاكل

عمار : تخافين عليه

غزل : سكتت وابتسم

عمار : الي يسمعج قبل شويه اكلتيني وشربتيني تكول عشر لسانات عدها وهسه من اريد كلمة حلوه منج يصير نص لسان اختفو انبلعو

غزل : ههههه ريم تصيحلي ام نص لسان

عمار : تعالي ياريم وسمعيها ويايه تسمعين العجب

غزل : هااي شبيك على كيفك ويايه

عمار : سمعي غزوله عكب باجر نقره الفاتحه والخطوبه وثاني يوم امشي بموضوع الزواج وشوكت منكمل نتزوج عسى وره يومين

غزل : شعندك هلكد مستعجل

عمار : من نتزوج اكلج ليش مستعجل

غزل : يله اروح اخاف احد يجي

عمار : دير بالج على نفسج وعكب باجر جايج ياغزاله عمار

غزل : سديته منه مبتسمه ومرتاحه

حجي طه : كاعد بلمطعم هستوه كمل عمار سالفته وعذرته للولد وحدد موعد جديد جان يطب علي وكفت هذا شبيهه يعيط ويصيح

علي : وين ابني طه

حجي طه : وعليكم السلام ونصي صوتك منا الناس انت مكاعد بلبيت انت بمكان رزقي

علي : واحرك رزقك اذا متكول ابني وينه

حجي طه : كلشي مااعرف عنه صار مده ماكو وحتى ميخابرني

علي : لا تعرف وتكذب يعني شلون بيك شوكت اخلص منك اله احط طلقه براسك يله ارتاح جبت العمر كله مااريد مكان يجمعني بيك حتى ابويه كمت اسبه لان خلاك اخويه

طه : احترم نفسك وكافي محترمك لهسه وممتجاوز لان اخويه جبير وعيب منا العالم كتلك امشي للبيت هناك نتفاهم

علي : لا اتفاهم ولا شى هاي كلها سوالفك حتى تحرمني من وحيدي مثل ماانت انحرمت من ابنك شلون تشوف ابني يحبني ويسمع كلامي وابنك ميه نعال راكعك متحملت كمت تخبث دومك حقير وتغار مني

طه : لا اله الا الاه روح بابا لمحلك وكفيني شرك ولي يله

علي : ابني وين حسين وين

طه : كتلك ماادري

علي : شوف بنتك الساقطه اسألها اكيد تعرف دربه هي حاطته جوه جناحه ام الزلم

حجي طه : بس سمعته هيج كال وبصوت عالي كدام العمال كمشته من قميصه وبطحته ونومته بلكاع ودك ضرب ايدي ملفوفه السبحه بيها اول ضربه بخشمه عاط وضربته ضربتين فقدت

وكوموني كوه من فوكاه

امشي اطلع بره عاار جاي تهدد وبنص عمالي

علي : اني الك والله لا ابجيك دم

حجي طه :شحدك تقرب مني لو من عائلتي وشوف شسويلك تره بعدني مناسي سوايتك الاخيره هين ياعلي هي تجمع والحساب عسير راح يكون

دفعو العمال علي بره لان الناس التمت اخذت محفظتي والموبايل ورجعت للبيت

نهر : هااا طه خير شو من وكت شبيك

حجي طه : اخوج الدماغسسز سوه بيه فضيحه كدام السوك والعمال

نهر : شصار اكعد وبده يسولفلي

خلي يولي جبان ميسوي شى

حجي طه : شيسوي بعد اكثر مو كدامج ريم جان مااتت وين اولي واخذهن واهج

نهر : وعلى شنو نهج يطبه عرج هم عايزه نعوف بيتنا

حجي طه : هذا غدار نهر حيه يلدغ ويضم راسه

نهر : ربك رحيم واقوى منه هو متخبل لان حسين لابسه وعايفهم وراح

حجي طه : انتي متعرفين شى عن حسين

نهر : كلشي مااعرل وگلبي نار على الولد

حجي طه : تعرفين بيه شكد احبه مرات اصفن تدرين حسين طالع علينا اني وياج وجعفر  ومطالع على ابوه طيب ويخاف الله وميأذي احد مسالم

نهر :من سنين منتبهه ربك رحمنا لو طالع مثل اخلاق  علي جان تخبلنا

حجي طه : بس يخابرج گليلي

نهر : ليضل بالك ابلغك كوم غسل وارتاح مبقى شى لاذان الظهر وساعه واصب الغدا

جان طه حيل مقهور واني بالي يم حسين هذا  وينه

اليوم كاعده وافرك ايد بأيد من الخجل كاعده بفستاني البيجي (اوف وايت) وبيه خيوط ذهبيه ناعمه مفصل على جسمي اول مره اشتري فستان صدره مكشوف جنت حاسه احساس غريب شى جديد بعمري مامستحيه من رگبتي رغم بيها جزء بسيط باقي حطت رشا عليه وشم من هذا اللزك يروح بلمي على شكل ملاك صغير انطه جمال لركبتي وخفى بقايه الحرك البسيط المتبقي بوكتها كال الطبيب بس هاي البقعه متروح ولان مساحتها صغيره مهتميت ولابسه عقد صغير نازك  رفعت عيني واشوف خواتي داير مدايري وماما نهر وام عمار واختها و

بسمة اخت عمار وصديقاتها اثنين الكل فرحان ومنتظرين يكطعون الحق

دقايق وسمعنا الهلاهل والجكليت صار مثل المطر على راسي فرحتي هلمره غير المره الفاتت هلمره راح اتزوج انسان اتمناني ويحلم بيه ويشوفني شى جبير  انسان احبه ويحبني ويدللني مو يعاملني مثل الخدامه عنده بس اوامر

دخل عمار وجان هم لابس قاط اسود وقميص اسود رغم تمنيت ينزع الاسود بهيج يوم بس المشكله طالع كولش حلوو بيه وانيق مكدرت اعلق لان طالع وسيم ومرتب حيل وعطره ترس المكان الدخل بيه كعد بصفي ويمسح براسه رغم شتا بس مبين متوتر مثلي

ام عمار : بلخير يمه ممصدكه شفتك عريس باس راس امه وانطته الحلقات لبسني حلقه ومحبس واني لبسته حلقه تقرب مني وهمس

عمار : تمنيت اجيبلج ذهب الدنيا كله بس على ايدج الحال على الكد الله يرزقني واعوضج

غزل : درت وجهي وصرت بوجهه وهمست بهدوء وخجل

انت احلى ذهب تقدملي

عمار : تره راح ابوسج هيج ديري وجهج وستري علينا الكاع محضوره

غزل : دنكت خجلانه تقرب باس راسي لان امه اشرت اله وكااال بس الراس ميصير ابوس بغير مكان

نهر : ههههه يصير من تتزوجون الله يسعدكم يمه كلللوووووش

وشغلو الديجي وبدو البنات يركصون مباشره استأذن وطلع

باوعت ريم واكفه على صفحه وتصفك بهدوء رغم طابت بس مرجعت مثل قبل وهم لابسه اسود توسلت بيها تنزع مقبلت

اما رشا وسليل وبسمه والبنات مكعدو كله ردح للكاع جوعانات ركص والجهال وياهم رشا وبتها لابسات نفس اللون شكلهن كلش حلوو

كوموني اركص من فرحتي كمت اركص وياهن وفرحانه  الي تتزوج عن حب احساس مو طبيعي من الجمال بلحظتها الكون ملكي نسيت كلشي مريت بيه كل دمعه نزلت بقهره ثواني ونسمع مزيقه اثاري اصدقائه جابو مزيقه فتحنا البرده والبنات يباوعون واصدقائه كلش هوايه وكلها تركص والبنات كل شويه يصيحن هذا حلوو هذا اجكم هذا ميعرف يركص كاعدات ويصنفن ويهزن بنفس الوقت تقربت من ريم وحضنتها

ريم : الف مبروك حبيبتي الله يسعدج

غزل : فرحانه حييل ريمو

ريم : عساج دوم فرحانه وسعيده

سليل : حسيت بدوخه وعيووني نار كعدت تعبت من الركص

تقربت من البنات

غزل : هااا ماما بيج شى

سليل : شوو روحي مايعه

ريم : حامل لتخافين مابيج شى

سليل : هااااا ياحامل ولج وشمدريج

ريم : مبين من وجهج مبلوع وبس تردين تنامين حللي وهسه تشوفين

غزل : وين عمو صيحو راح يجي طفل ثاني يلعب عليه

سليل : نفسي صعد وارتبكت ممصدكه صار سنين اعالج وماكو صار زين وبعد مصار معقوله حامل

غزل : خلصنا اليوم ركص بس عمار بعد مااجه لان كال اصدقائي عازميني وباسني من خدي وراح

وبليل من رجع اتصل بيه واول كلمة كاالها

عمار : حبيبي شلونج

غزل : زينه

عمار : غزوله تحبيني

غزل : سكتت

عمار : عفيه برودج عوفي هو والهدوء ولو ٥ دقايق وجاوبيني تحبيني

غزل : اي احبك

عمار : باجر من الصبح اجي اخذج نحلل دم مااضل انتظر لو جدي يطلع من كبره

غزل : هههه مااشي على كيفك نحلل ونكمل المعامل ونتزوج

عمار : وتنامين بحضني لا لا عود من تجين بس كرصه خفيفه حتى اصدك

غزل : مو لهاي الدرجه

عمار : من تحلم بشى وتعرفه مستحيل وتنام وتكعد وتكول لا ولك انت وين وهي وين انسى لتعب نفسك وترجع تحلم وترجع تلوم نفسك لان ضايع وباني احلام بلهوا وتالي بتوفيق من الله يصير اكيد تاخذلك مده حتى تصدك انتي النجمه المستحيل اوصل الها وصلت وصارت الي والي وحدي غزل والله اليوم ردت اخذج لبيتي عروس متحملت البسج الحلقه واعوفج واطلع

غزل : مبقى شى هانت

عمار : بس اتحملي عيشتنا والله اخليج اسعد البنات

غزل : ولا تفكر عيشتكم تخبل وراضيه بيها ماطول وياك

عمار : اي عفيه كثري من هذا الحجي رجلج تره بيه جفاف

غزل : هههههه حيل جفاف

عمار : صحراء وداعتج

غزل : بقينا نضحك ونسولف ونخطط شلون ايامنا الجايه نعيشها

بدايه شهر شباط والجو بارد كلش جنت نايمه وغافيه واحس شغلات تجيني بلنوم ناس تريد تضربني واصدهم ومرات اشوف نفسي بحضره لو امام ومرات بلحديقه كمت اشكال احلم واكو من الصار بيه اكيد اتعب واتخيل شغلات غافيه وشفت بنتي تتحسس بوجهي وتبوسني وتضحك اخر مره شفتها من كالت تعاليلي وراها بكم شهر انضربت وهم نفس العمر حدود ٧ سنوات فتحت عيني واسمي بسم الله باوعت بصفي تيومي نايم غطيته دوم من ينام يفتح رجله ويشمر الغطا موتني بهاي الحركه جريت البطانيه وغطيته زين عمر تيم هسه اربع سنوات و٨ اشهر گبر حبيبي وبدا يروح روضه ويلعب ويه الجهال ومن يتعب يحضني وينام بسته من خده وكمت جريت الجاكيت الصوف الاسود  الحاطته بتعلاكه وره الباب لبسته وحطيت التلفون بلجيب مال الجاكيت وفتحت باب الغرفه البيت كلش بارد باوعت على ساعه معلكه بلحولي الي بين الغرف ساعه ٤ الا عشره الفجر سديت الباب وبديت انزل بخطوات هادئه مااريد احد يحس عليه طبيت للمطبخ فتحت الثلاجه شربت مي وسميت من وره الصار بيه كمت شأكل وشأشرب اسمي عليه سديت الثلاجه واسمع صوت نقاط على السقيفه مال الكراج عرفت تنكط فتحت الباب مال المطبخ اجاني هوا بارد كلش رجفت وبنفس الوقت غمضت وجريت نفس قوي وطلعت للحديقه هي صغيره واصغر من الحديقه بهذاك البيت بس حلوة ومرتبه وبابا وعمه دوم ايدهم بيها كعدت على الحافه مال الكاشي مال الكراج ورجلي بلطين مال الحديقه وتنزل قطرات خفيفه على راسي حضنت نفسي والهوا يطير بشعري المفتوح جريت خصله من شعري اجه الشعر هوايه بيدي شكد تعب وضعف شعري من وره القهر الي امر بيه والشعر بيدي طار ويه الهوا بقيت اباوع عليه شلون يطير ويوكع بلكاع هذا اني اطير واوكع بلكاع

زادت قطرات المطر والهوا الي يدخل كل مسامه بجسمي وصافنه على حالي ضليت هوايه كاعده وصافنه على السما شلون تقطر وكل قطره تغسل بوجهي الم وحسره مرت بحياتي سمعت صوت مشيت بابا مميزه خاصه من يكعد الفجر يجر بلشحاطه مالته مرات كوه يكوم الفجر وخاصه بلشتا بس هو متعلم يكعد قبل صلاه الفجر يصلي الشفع والوتر ويقرا قران وينتظر صلاه الفجر

بقيت على كعدته وانفتحت باب المطبخ وحسيته بصفي وشويه وكعد يمي ومد ايده على كتفي وحضني

حجي طه : شيسوي الغزال البري بهذا الليل طالع بلبرد

ريم : باوعت عليه وابتسمت بهدوء وتعب ماكو شى بابا بس اشتم الهوا

حجي طه : شكعدج بيج شى

ريم : لا سلامتك بس فزيت وكلت اطلع والجو حًلو وبيه مطر

حجي طه : ريمه حاسه بشى اخاف بيج شى ومتكولين

ريم : فدوة لعمرك لتخاف ليش هيج عيونك كلهن خوف والله مابيه شى

حجي طه : مو بيدي بنتي من اشوف هدوئج وسكوتج گلبي يوجعني كل فتره واكعه وكعه تهد نص حيلي ومابيدي شى بس الدعاء

ريم : وهذا يسوه الدنيا دعائك النا هو الي بسببه الله يطلعنا من مصايبنا

حجي طه : والله يابنتي دوم ارفع ايدي للسما وادعي رب العالمين كون البيكم بيه اتحمل بس لتتأذه وحده بيجن

ريم :تعبناك مو بابا مشفت من عدنا بس الاذيه والهبطات

حجي طه : ليش هيج تكولين انتم الخير الي الله رحمني بيه انتم رزقي بلدنيا واحلى رزق دوم اكولها انتن الي الله كرمني بيجن وراح ادخل الجنه من وراجن اكو احلى من هيج رزق

ريم : والهبطات والمصايب والتعب

حجي طه : كله اختبار يابنتي والحمدلله على كلشي اني دوم اكول حتى لخواتج هذا اختبار والسبع يطلع منه ناجح

ريم : تعبت بابا والله تعبت خايفه من وكعه ثالثه تكتلني خلاص

حجي طه : لتكولين هيج بنتي هذا كفر وقلة ايمان يجوز فرحه تجيج مكان الوكعه ليش تتفاولين بلموزين

ريم : جبنا حياتنا ضيم وقهر من احنا وصغار ونفرح منا نوكع منا كدامك مبقى شى مصار النا تكول مفصله المصايب تفصال لطه وبناته نكوم من مصيبه سنه والبعدها نوكع بالاقوى منها

حجي طه : لا اله الا الله استغفري ربج بنتي ليش تظلمين نفسج وتنسين عطايا الله وتتذكرين بس النكبات ليش انتي مو كبرتي والحمدلله بصحه وعافيه غيرج ماعنده ربع عافيتج والله يحفظلج عافيتج بنيتي اكو ناس حسره عليها الهوا الهسه كاعده تشمي وبراحتج وعدها امراض بلرئه وربو وغيرها

عندج ولد غيرج ناس تحفه سنين تريد اضفر طفل ماعدها وتذب ملايين ومتحصله

عندج شهاده واكو بنات الظروف حكمتهم يبطلون وهمه يتمنون يكملون دراسه وضاع حلمهن واطبين واطلعين براحتج وتاكلين وتشربين ونايمه بفراش دافي ونظيف ومريح واكو ناس هسه بهذا البرد نازحين حسره عليهم البطانيه والسكف الي عندج ميصير بنتي تدفرين نعم الله الي عندج وتلزمين بس بلمصايب وتندبين حظج

ريم : واكو شى اهم من كل الي ذكرته الله فضلني بيه

حجي طه : شنو هو

ريم : انت انطاني اب الناس كلها تحسدني عليه سند وظهر انتجي عليه من اريد اوكع يلزمني وميخليني اوكع وحنيت الدنيا گلها بگلبه ويضحي بروحه لخاطر كل وحده بينا كافي مينام اذا ميطمن علينا ومايوم كسر بخت وحده بينا وجبرها على شى مياكل اذا ميوكلنا ويفضلنا على نفسه بكلشي انت اعظم هديه الله انطاها النا والله لو اسجد  ليل نهار شكر لله اكون مقصره

حجي طه : افاااا عليج خجلتيني

ريم : هههههه هااا بابا منين سامعها هااي

حجي طه : من المسلسلات الخليجيه اذا عمتج كل مااطب الكاها تابع مسلسل شكل واكعد وياها على الواهس وبس اباوع حلقه ابتلي على عمري تخليني اكعد غصب يوميه اشوفها وياها لحد الحلقه الاخيره يله تجوز مني

ريم : بعد عمه تموت على الخليجي

حجي طه : يله بنتي كومي توضي ماضل شى لصلاه الفجر واقري قران الله يبرد گلبج مثل برد هذا الهوا

ريم : شكد تعبانك ويانه يوميه وحده واكعه

حجي طه : ماتوكعن الله موجود واني وياجن بس صيري سباعيه وارجعي قويه اريد صوتج مثل قبل يلعلع ويترس البيت اريد كل شويه ادز نهر عليج واكول الها خلي تنصي صوتها منا الجيران

ريم : مو هيج اهدأ الك شسوي بهوستي

حجي طه : والله يابنتي اذا اكلج هوستج هي حلات هذا البيت ومناكرتج ويه خواتج هي سلوتي هوسي وعيطي وكسري لتبقين ساكته معودت صحيتي من وكعتج على موتت بنتج وكلت ياالله رجعت ورجع حسها ونفسها بلبيت وسوالفها الي تضحكني والله مرات هموم على راسي ومن اجي للبيت اضحك على سوالفج كلشي بيه يروح حتى تعبي انساه كل وحده بيجن حركه منها تخليني انسى حتى تعبي متشوفين مرات ادز على سليل احب اشوفجن كاعدات اربعتجن تتناكرن وتضحكن والجهال داير مدايركم احس الله يكولي شووف ذني حك التعب التعبته والصبر الصبرته

ريم : دنكت على ايده وبسته الله يحفظك النا

حجي طه : يله ولج الصلاه راح تروح مني كومي وجهج ثلج لتتمرضين

ريم : شويه واطب

حجي طه : اكيد يعني متتأخرين

ريم : لا ما تأخر ادخل انت لتبرد

حجي طه : اكووم ياالله ومشه خطوتين واسمعه يكول يا جابر المنكسرين ويا مغيث المستغيثين يا مجيب دعوة المضطرين

اجبر خاطرها ياالله

ريم : نزلت دمعه بسيطه من عيني على حنية بابا وطيبة گلبه دخل وسد باب المطبخ حتى الهوا ليدخل للبيت رجعت اباوع للسما واشوف شلون قطرات المطر تتسابق حتى توكع على وجهي واغمض وافتح لان المطر يوكع على عيووني

سحبت التلفون من جيبي اشتاقيت لصوره بنتي اني قليل ادخل للاستديو حتى من الزم التلفون التهي بلفيس والكروبات وصوره رفوله هي وابوها حاطتها قفل شاشه لهذا اشوفهم يوميه لهذا قليل ادخل فتحت القفل وبدت اگلب مشتاقه لصورها هي وصغيره اول مفتحته شفت صوره مسحت وجهي وركزت بيها هاي منو ماخذها اباوع اني بلعبايه وبالامام بلصيوان الخارجه كاعده ورافعه راسي للقبه مبين اباوع على الامام وجهي يخوف تعبان حيل كلبت الصوره الثانيه جانت اقرب والي جذب انتباهي صوره الي ولحسين كاعد گبالي وحاط ايده جوه خده وصافن قربت الصوره اكثر اكو دموع على خده نظراته جانت عميقه بدرجه مؤذيه شكد جانت تجمعني بيه ايام حب وعلاقه مشفته هيج يباوعلي وفوكاها يبجي سحبت نفس قووي ورجعت اتمعن بلصوره اكثر يجوز مااتذكر هو شسوه اليه ولا احد فتحلي الموضوع بعد بس اني اتذكر اخر يوم جان هو ويانا بكل خطوه ورجعنا جنت تعبانه بس واعيه  واني متجرأت اسأل شصار ولا البنات حجولي

بقيت صافنه عليه واقرب شكله بلصوره ليش حسيت بعصره بگلبي ليش حسيت بدمعتك بقيت صافنه على الصوره لحد مسمعت صوت اذان الفجر سديت التلفون وكمت اصلي لازم اسأل رشا شصار ومنو اخذ هاي الصوره بتلفوني ولو اكيد رشا اخذتها هي الوحيده التعرف الباسورد مال تلفوني ومبين حسين من اللقطه ميدري خلي بس تكعد لازم افهم

كمت توضيت وصليت لكيت بابا بلمطبخ كاعد وحاط القوري على الجاي لازم يروح يفتح مبين عمه مكعدت تعبانه خطيه

هااا باباتي اسويلك ريوك

حجي طه : لا بنتي روحي نامي لتكسرين نعستج

ريم : منعسانه واني جعت خلي نتريك سوه

حجي طه : اذا جوعانه اروح اجيب صمون حار حتى تاكلين

ريم : ميحتاج عدنا مال البارحه نحمي وناكل نعمة الله شبيها

حجي طه : ياريت بس اني علمودج

ريم : لا حبيبي هسه احمي بلفرن ويرجع جديد

حميته وسلكت بيض علمود بابا واني طكيت الي بلدهن بيضتين وصبيت الجاي وكعدنا ناكل جان اطب عمه تفرك بعيونها

نهر : بسم الله هاي شكعدج يمه

ريم : ههههه ياهو الي يشوفني يكول شكعدني

حجي طه : تعالي اكلي اليوم الريوك ام تيم مسويته

نهر : اذا ريمه مسويته اكل ليش لا

كعدو ياكلون وفرحانين بيه واني ابتسم على فرحتهم شويه وبدل بابا وتوكل لشغله

نهر : ليش متنامين وترتاحين

ريم : منعسانه

عمه اريد اسألج

نهر : كولي يمه

ريم : شخبار حسين

نهر : شجابه بالج

ريم : هيج سؤال

نهر : تدرين قبل يومين اني وابوج نسولف بيه

ريم : ليش شبيهه

نهر : والله يايمه مدري شكولج هذا الولد هم من المغضوبين عليهم الله رزقه باهل شالعين گلبه

ريم : ليش بعده على خلاف بسببي دزيله خبر وكوليله ريم متقبل بيك وخلي يرجع لاهله ويفض كلشي هو هم خطيه وتعب واعرف بحسين حوصلته صغيره وميتحمل بس اول هده وراها يتراجع ويخرب الاول والتالي ليش يتعب نفسه ويعاديهم ويعرف مراح يغير شى بيهم

نهر : مترهم بعد يمه

ريم : ليش مترهم قابل شصار هي مشكله صغيره وتنحل واهله يحبوه ومستحيل ينطون بيه وخاصه نوريه وانعام روحهن بيه

نهر : يمه الولد هج من عدهم ومن الكل

ريم : شنو يعني شلون هج سافر

نهر : والله يابنتي محد يعرفله درب ابوه متخبل وجاي على ابوج قبل يومين ومتعارك وياه يريد بس احد يطمنه عليه ابنه

ريم : اكو شى مااعرفه

نهر : هواي اشياء فاتتج

ريم : اي احجيلي

نهر : شوفي احنا ممتأكدين بس يمكن نوريه هي الي سوت السحر وهي الاذتج وهو من عرف تخبل عليهم وعاف البيت وذاك يوم وهذا يوم ميعرفوله طريق

ريم : ايا ساقطه يانوريه وليش تسويلي

نهر : هاا شبيج هاي عود انتي الذكيه والي تلكفيها وهي طايره

ريم : علمود ابنها الگلبه خلتني شاخطه المنحطه يعني هاي من كل عقلها تروح تسوي هيج حتى لا ازوج ابنها زين مخافت الله وكالت لا ادخل بخطيتها وتموت

نهر : هيج نماذج ميعرفن الله وهم مجنت متوقعتها من نوريه دوم اكول فقيره وحبابه ومو مثل علي طلعت انكس

ريم : لتزعلين مني عمه هاي سوالف امج المخرفه محد يفكر بشيطنه غيرها وهاي عربانه جتي ودفعتها وسمعت كلامها

نهر : والله مااعرف شكول بس اثنينهن دخلن بخطيتج

ريم : وهسه حسين وين

نهر : كتلج يمه محد يندل طريقه وغير رقمه وهذا الشى مخبل اهله

ريم : عساهم تخبلو حيل بيهم وابو زايد

نهر : والله مو حيل ويطبهم الف طوب بس اني هم گلبي نار على حسين مايهون عليه تعرفين بيه شكد احبه واحسب معزته من معزتجن وخايفه حيل عليه محد يندل دربه اخاف صارله شى

ريم : لا مابيه بس يريد يأدبهم كلها جم يوم ويرجع ركض لحضنهم

نهر : لا يمه هلمره غير مشفتي شصار بيه من تمرضتي يبجي الصخر

ريم : سحبت كلاص مي وشربت استحيت اسأل عمه هيج تفاصيل اخذها من رشا جان تجي رشا تفرك بعيونها

رشا : شعدجن كاعدات من الصبح دجاج خوما دجاج

ريم : وانتي شكوو كعدتي مو عطلة نص السنه وماكو دوام

رشا : ريحة الجاي والبيض صعدت لغرفتي وكعدت بطني تقرقر خلي اسوي ريوك مبينين متريكين

نهر : اني رايحه للسوك ماطول بعد وكت المسواك التازه هسه يذبوه حتى الكط براحتي

رشا : عمه رايحه ويه الفلح تنزلين المسواك شوفي الساعه ب٨ الا ربع هو اكو سوك مخضر بهذا الوكت الفلح نيام هسه ارجعي نامي

نهر : هاي عود انتي الجنتي ام بيت وتعرفين بلمسواك

رشا : جنت ياعمه جنت واخذته بت اخوج وذيج لاعبه شاطي باطي بيه

ريم : معرفتي شى بعد

رشا : بس سهير تكول ابنهم داخل مستشفى الصغير وحالته خاطره

نهر : ياعيني والله هاي الجهال تمرد الگلب

رشا : لو جنات مكانه جانت ذبحت طلي وزعته للفقره بهاي المناسبه السعيده بس هذا جاهل شنو ذنبه

ريم : دومج ترددين عساها بعزيز گلبها وماكو اعز من الطفل عند الام طالع مو بس من گلبها ختى روحها لو هيه متأذيه ميجي ربع الاذيه الي تحسها هسه

ريم : عوفينه من ذوله وكوليلي انتي مصوره هاي الصوره وفتحت التلفون وشوفتها الها

رشا : اي اني

ريم : احجيلي شصار

رشا : تردين الي يخص حسين اكيد

ريم : اي احجيلي وليش هيج مكابلني وكاعد يبجي

رشا : هو بس گابلج راد يموت من وراج يعني حسين شكد مااكول يحبج قليل بهاي محنتج مو يحبج لا مجنون بيج والله اني اعتبره جاهد حتى بس اطيبين كابلج وكعد خلي اسولفلج

ريم : بدت تسولف رشا بلتفاصيل واني ساكته بس ويه كل حرف يطلع منها عبالك بلاستر على كلبي يلزك الجروح القديمه وخاصه من عرفت شلون جان يبجي ويدعي بس حتى اطيب

بقت تسولف رشا بدون توقف حتى مكدرت احجي كلمة

رشا : هااا شو سكتي

ريم : اوووووف شنو الفايده بعد فات الاوان على كلشي وشفتي اهله شلون عاقبوني وردت اموت بسبب سوايتهم

رشا : انتي حره مكتلج ارجعي لحسين بس حطي بالج تره هو سوه المستحيل هاي المره وبايع الدنيا ومشتريج

ريم : متعرفين شى عنه

رشا : لا والله ومحد يعرف

ريم : كمت بدون مااسوي اي ردت فعل بقيت بس افكر بسوالفه لزمت التلفون ودزيت رساله كتبت بيها شلونك حسين ردت بس يجاوب كلت على الاقل من يفتح تلفونه ويشوفني مراسلته اكيد يدك

ايام وانتظر رد منه ومثل متكول عمه محد يندل دربه واهله متخبلين حتى لعمو سجاد رايحين للمحل يسإلون عنه ومحد يندله

ماانكر قلقت وين اختفى وين راح

غزل تركض تجهز لعرسها رغم بساطه الغراض والحياه الي رايحه الها بس حيل حسيتها سعيده وطايره وسليل طلعت حاامل وعمو من الفرحه شالها جانت طرحت من وراه وهي الفطيره تضحك ومكيفه

كلت  الْحٍمَدٍ للـّہ ولو اثنين من عدنا تعدلت امورهن

رجعو للدوام خلصت عطلة نص السنه اني بعد مرجعت وبطلت وبقيت بلبيت هسه احنا نهايه الشهر الثاني ٢٠١٧

رشا : داومت ومندمجه واشرح بلصف اجتني المعاونه شاورتني اكو وحده خبصت الدنيا تريدج بره وتكول اذا متطلع هسه ادخل عليها للصف

ذبيت الكتاب  من ايدي وكفت طالبه وطلعت من الصف وتوجهت للاداره وادخل واشوف جنات من الخرعه ردت اذب من راسي هاااي بس شافتني كامت تركض عليه وتريد تخنكني وتعيط

راح ابني من وراج من وره سحورتجن ودعاويحن كح.. برابيك الله لا يوفقجن شتردن مني وخرتها المعاونه والمديره يردون يسكتوها

رشا : اني كمت اعيط والج عين وتجين هنا انتي من شنو مخلوقه من ياطينه نكسه شنو هاي القباحه وعيني عينك وتتهجمين عليه

اشرت المديره للمعاونه تسد الباب وكالت

ست رشا ميصير امور البيت الشخصيه تجيج للمدرسه

رشا : مو كدامج جنت بلصف ومااعرف بيها جان تعيط جنات

هااي المدرسه الحاطتها ادرس اجيال وست وست وحده سحاره وهجامة بيوت ومتخاف الله وعايقه ومن وراها مات ابني وكامت تضرب على وجهه دفنت ولد مثل الجمار من وراها

رشا : ضحكت بصوت وكتلها المفروض اني اكول هذا الحجي مو انتي هي منو اخذت بيت منو ومن اخذت رجل منو ومن اخذت حياة منو لج انتي شاربه شى اكيد مو صاحيه

جنات : مااخذت رجل احد هو كتل روحه عليه باس ايدي حتى بس اقبل بيه شاف بيه المشافه بيج لو بيج خير مجان دور وراج ومن وره سحورتج ولدي مرضه اليوم اخزيج بلمدرسه واخلي الطالبات والمدرسات الي يحترموج يعرفون منو رشا

رشا : تاج راسج اني وراس المطي رجلج واذا هو باس ايدج واتوسل بيج لان شاف نفس الوصاخه انتي وياه مو الي يعيش بمجره صعب تعيشي بمسبح نظيف لهذا رجع للقذاره وياج وتعالي اني شعليه جايتني وتعيطين وتهوسين ذاك شعلان اشبعي بيه بلي برجلي لابسته مااشتري وعفته الج

جنات : اجيت اليوم افضحج واشوف الناس سحورتج جان تفتح علاكه وبيها ورقه وجلد ميت وراس طير معفن وشغلات تخوف وخرت منها

جنات : باع العياره عود مو مالتها

رشا : شوفي لج هذا مو ثوبي ولا اني الاسوي سحوره واخاف الله واصلي شوفي يازباله ملمومه عليها وسوت الج اذا مسوين اصلاً لتغشمين نفسج تعرفين مو الي

جنات : انتي ماكو غيرج تردين تهجمين بيتي وتحركين گلبي

المديره : نصي صوتج يااختي راح يصير فرصه والطالبات يطلعون بلساحه واخاف الصوت عالي ويسمعون

جنات : اني اريدهم يسمعون اليوم اشرها على الحبل واطلع القضى والمضى منها مناسية كتلتجن انتي وذيج الگلبه وسقطتني وهسه موتو ابني

رشا : تستاهلين ويطبج مرض واني مااشمت بطفل لان ام بس ماطولج متخبله وممرتاحه حيل وابو زايد. عسى هاي النار تعلى وتعلى وتعلى وتاكلج انتي وذاك الحقير الجنت مسلمته حياتي وروحي الحوبه تسحك وتلحك وتاخذ ثلثين من الحك ومبقى شى واخذ حقي منكم نذر عليه كل مااشوفك تعبانه ومحترك گلبج اوزع اكل لوجهه الله لج سعادتي بهاي الدنيه من اشوفج مذلوله وتعيسه وهذا حالج فرحني ورفعت ايدي وكلت يارب  بجاه كلمن عنده جااه عندك كون ياجنات متشوفين يوم عدل بحياتج وامشي اطلعي لا اخلي الحرس يجون يسحلوج ويخلوج فرجه

جنات : تدعين عليه موو الله يحرك گلبج بنتج مثل محترك گلبي والله يارشا اذا تقربتي مني ومن بيتي ورجلي لا ادفنج وانتي عايشه اني مو مثلج فاهيه واسكت عندي قابليه اكتلج خلاص وميرفلي جفن

رشا : والله تسويها مو انتي نفسج الغريتي رجلي واني مأمنتج بيتي كلشي اتوقع من العاهرات

دفعتني حيل وتفلت عليه وطلعت ردت الحكها جان تلزمني المديره

وبقت تكول منريد مشاكل استأذنت منها ورجعت للبيت اذا ابقى اوكع من طولي

طفيت صايره اعصاب

ريم : الله يساعدج شبيج صاير شى

رشا : اوكفي دكيت على شعلان دك دك وجان يشيله

انت وين

شعلان : بغداد

رشا : تعالي هسه

شعلان : شمدريج اني بغداد

رشا : تعال هسه وسديت التلفون بوجهه وبقيت كاعده واحرك برجلي من التوتر واسولف لريم وتحاول تهديني

وره نص ساعه جان يندك الجرس فتحت الباب اله ودخلته للاستقبال

شعلان : شلونج ريم

ريم : باوعت عليه من فوك ليجوه هزيت ايدي وطبيت ولا جاوبت

باوعت لابس دشداشه سوده معناها كلام جنات صحيح

رشا :هبيت بوجهه مباشره وكتله شوكت تخلصوني منكم والله تعبت يعني ابتليت حبيتك وتزوجت ابتليت على عمري المصخم عشت منه وياك هسه مو كلمن راح لدربه شتردون مني

شعلان : شبيج بس افهم

رشا : مرتك الشريفه العفيفه اجت قبل شويه هداده للمدرسه مالتي وشهرتني كدام المديره مالتي  الْحٍمَدٍ للـّہ دروس وكلمن بصفها واله جان صرت علج بحلك الكل من وراها

شعلان : شجاب جنات يمج

رشا : جاي تصيف على البحر اكله گلبت الدنيا وبديت اسولف شكالت

شعلان : مو ابني قبل يومين مات وحيل تعبت وتوسلت بيه تجي تشوف بيبيتها عفتها يمهم وطلعت وكتلها بليل اجيج متوقعت تجيج

رشا : الله يرحمه للطفل اني شعليه قابل اني موته

شعلان : احسبيها عليه بعد مااخليها توصل لشعره منج بس لتتعصبين موزين على گلبج لتتخربطين

رشا : شوفتك هي تأذي گلبي كلشي يذكرني بيك هو المدمرني احلفك بإبنك الي ترابه لهسه ميبس ابتعد عني خليني اعيش كافي الصار

كمت اكوم واكعد العن كل ساعه جمعتني بيك حس ولو مره بيه اني شكد كارهه ناس وشكد حاقده على ناس بس مثل كرهي الك ولجنات مصاير ولا راح يصير جبتها تبيع شرف ومثاليات وبطولات براسي تالي شحصلت منك الخيانه والقذاره وفيت الك وصرت محبس بيدك وانت تتقرب منها حتى بلحرام

شعلان : اني متقرب بلحرام والله والحسين و

رشا : اششش لتحلف تره الله عظيم تحلف بيه جذب والائمه يشورون اني مخايفه عليك شيصير بيك قليل وتستاهله بس اخاف على بنتي ليصير بيها شى حتى بس يحترك گلبك 

شعلان : اصلاً اني محترك من يوم معفتج وهسه صار عندي جهال وهم بعدني محترك

طفل دفنته والثاني مريض ومعلعل

رشا : هذا الولد الردته وفضلته عليه وعلى بنتك مو الشماته حرام اي اني اتشمت وحيل بيك وحتى بجنات فرحانه

شعلان : خلف الله عليج هيج صارت

رشا : اي هيج وكول لمرتك اذا تقربت من دوامي والله اجيها للكوت واخليكم فرجه للمنطقه وحتى هند ام المتعه لاعبالها ناسية سوالفها والله افضحها فتح عينه ولزم ايدي حييل شتكولين انتي

دفعته حيل وكتله بنبرت تهديد

اسمع شعلان اذا مجزتو انت ومرتك مني اخلي حتى العكال الفرحان بيه وتمشي بخشم يابس  ينداس جوه الرجلين وتعرف اذا طلعت كلمة وحده مني وعرفو عشيرتك بأن اختك الجبيره العاقله الي ابنها بطولها مرت طالب ابن خضير الي الكل تحسب اله الف حساب متزوجه متعه من ولد اصغر منها ب ١٣ سنه شراح تكون ردت فعلهم

شعلان : والله اذبحج

رشا : لتذبحني ولا تهدد

شعلان : انتي منو گلج

رشا : العار مينضم وينعرف احذر من لساني اذا فلت لتندكون بيه حتى ميفلت ويخرب الاول والتالي

شعلان : اذا طلع حرف واحد

رشا : انتم الي اطلعوه مااريد اشوف جنات بعد او تحاول تسويلي شغلات تأذيني خلي تكعد وتسكت وتنجب وانت هم اياك بعد تحاول تتقرب من حياتي بنتك بأوقت محدده تجي تشوفها وتولي غيرها ماعندي

شعلان : والله وقويتي ومتخافين

رشا : لك اني رشا لو نسيت اني الي جان عمري  ميتجاوز ال١٧ سنه وحركتك ومخفت منك اجي هسه وبهذا عمري اخاف منك اخاف شفتني سنين بيتك هادئه وطيبه وساكته هذا من اخلاقي ومن تربيتي وحبي الجااااان الك اما هسه انت عدو والعدو ماعندي اله غير الاهانه اذا تجاوز

حلوو عني وكفوني شركم لا احرك الاخضر واليابس وعليه وعلى اعدائي جر نفس قووي ويفرك بيده من الاعصاب وجهه ازرك من التوتر وكااال

شعلان :تم

رشا : عفيه هي هاي الاريد اسمعها تم وصير كدها كافي قبل مصرت كدها يبو تم

ركع الباب وطلع خابرت سهير وكتلها راقبيلي الوضع لان اعرف مراح يفوت الصار لجنات بسهوله وكتلها اذا هند سألت اختج حاجيه لاحد خلي تنكر وفهمتها الي كلته

ريم : فوك كاعده على اخر بايه من الدرج واسمع كلام رشا هم مقهوره لان اعرف حياتها حالياً شكالت جنات وشكال شعلان وهم افرح كدرت تاخذ ولو جزء من حقها حاطه ايدي جوه خدي ومستمتعه بلهوسه جان يدك تلفوني رقم غريب دك دك جاوبت الوو

حسين : شلونج ريمتي

يتبع ...

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_السادس_والاربعون

حال حسين 💔

كلها تحچي #بالمحنة

ومامش #ابنادم يحن

وانة مثل الناي دونك

وية كل #شهگة نفس لازم اون

حال ريم 💔

تريدني أحچي الصدگ ؟

ماضم عليك أحچي ؛

نوبآت أحبك صدگ

ونوبآت أكرهك صدگ !

صدگني و المُشكلة ،بثنينهِن أبچي🖤.

حاطه ايدي جوه خدي ومستمتعه بلهوسه جان يدك تلفوني رقم غريب دك دك جاوبت الوو

حسين : شلونج ريمتي

ريم : كمت من مكانك

هاااي وينك

حسين : موجود متوفر بجميع الاسواق والمحلات والمولات التجاريه

ريم : مدااشاقه انت وين محد يندل مكانك وتلفونك مغلق وهذا الرقم مال منو وين هاي الفتره غايب واهلك خابصين الدنيا عليك

حسين : ماكو ترك على كيفج اكلتيني وشربتيني جري نفس حطي نقطه بين الكلمات

ريم : دخلت للغرفه وسديت الباب وكعدت على جربايتي وجريت نفس بهدوء وبصوت هادئ گلت شلونك

حسين : شلونكم شلون لون المستحه البعيونكم

مثل الاول لوخبط مايه وتغير لونكم

جنت اشوف الشمس تطلع مرتين

مره من حضن النهار ومره تطلع من اشوف وجوهكم

ريم : مو وكت اشعار جاوبني

حسين : اذا انتي بخير اني بخير

ريم : شنو هذا البرود الي عليك اكولك اهلك خابصين الدنيا تصور ابوك اجه لمطعم بابا سوه عركه علمودك وتضاربو ارجع حسين ماله داعي تعوف اهلك

حسين : ماله داعي

ريم : اي ماله داعي كافي الصار

حسين : شنو هو الصار

ريم : تعرف كلش زين اهلك الي سولي السحر وردت اموت لو ما رحمه الله واعرف بيك تعبت ويايه كالت رشا بعدني احجي جان يقاطعني

حسين : كلتلج الصار بيه

ريم : اي كالت وهم كالت

حسين : اششش لتحجين لان محد يعرف الصار بيه بس اني لو تجيبين الدنيا كلها تشرحلج شنو الحسيته مراح يكدرون يوصفون ١٠ بلميه

ريم : اعرف تأذيت وبجيت

حسين : تأذيت هاي الكلمة تافهه ريم اني انهد حيلي عليج لاضل بيه نفس اتنفسه مثل الناس ولا ضل بيه عافيه امشي بيها

كمت المي من اشربه احسه سم ينزل بلعومي تعرفين شنو حسيته من تباوعين بوجهي وتكولين اكرهك يمكن بلحظتها لو سجينه عميه ذابحتي مااتأذه بكد هاي الكلمة اني تخبلت مو انتي اني الي ماانام واتعب مو انتي كمت ارفع ايدي لرب العالمين اكله اخذ روحي وانطي الها

ريم : بلعت ريك وگلبي ينبض حييل ويه كل حجايه ينطقها

حسين كاافي

حسين : تعرفين بيه روحي بيج وتعرفين بيه مااشوف بلدنيا غيرج سميني مخبل مو طبيعي شاخط الي تردي انتي غصة العمر الغصه الي بسببها معايش

ريم : وبعدين والى متى تبقى عايف اهلك ذوله اهلك لو نسيت ذوله العفتني علمودهم ذوله الي بيوم اجيت وكتلي مااكدر استمر لخاطرهم ذوله الي جنت تكوم وتكعد وتصيح مااريد اصير عاق الوالدين شغيرك متكولي

حسين : وبعدني اصيح مااريد اصير عااق الوالدين لهذا عفت الهم البيت لان اذا ابقى راح اسوي شى اندم عليه واني مااريد اتجاوز ولا اندم عفت الهم كلشي

ريم : والى متى همس بهدوء

حسين : اشتاقيتلج

ريم : حسين كعد نتناقش بموضوع مهم معودت اتصلت الكل خايف عليك

حسين : وانتي ماخفتي

ريم : سكتت وبس انفاسي تعلى

حسين : شكد مشتاق اشم انفاسج يلكعبه ااااخ ياريم شكد تعبت بحبج لج جيبيلي واحد بكدي تعب وضاك المر وتبهذل جيبيلي واحد يحب وهو عمره ١٥ سنه ويصبر سنين يله يكول للي يحبها احبج لج اني فتحت عيني على حبج راهقت بيج وشبيت وانتي ويايه وسافرت ورجعت وانتي بگلبي وماحلت بعيني بنيه غيرج مرات احسج بنتي الي ربيتها ومرات احسج حبيبتي الي عشقتها ومن رحتي مني ردت اموت والله مو مبالغه اموت وحق النبي كل ليلة عشتيها وانتي على ذمته اني اطعن بيها ليل نهار هجيت من العراق كله لان طول مااني قريب منج الوب عليج لج مرات تجيني افكار مال مخابيل واتعوذ من الشيطان من صرتي ام حسيت بيتم والله عبالك امي وشمرتني شحجيلج وشكول لو اخلص اشهر اسولف الصار بيه من وراج راح تكولين ابالغ

ريم : ارجع لاهلك وناسك ولحياتك الي دسوي ميجيب نتيجه لا اني بيوم اصير الك ولا انت احنا قطارين مستحيل نتلاكه على سجه وحده بس نتلاكه واحد يدمر الثاني

حسين : نتلاكه وداعتج نتلاكه ويجي يوم تنامين على ايدي والعب بشعرج واكولج هااا شفتي وعدتج وهلمره صرت كدها

ريم : عفيه حسين اعقل

حسين : عقلت مره وشحصلت

ريم : اذا اتحبني صدك ارجع لاهلك غيابك هذا مسوينا هواي مشاكل

حسين : ارجع صار وعلاقتي احسنها بأهلي واكيد اول شى يطلبوه مني اخطب واتزوج ترضين

ريم : سكتت وحرارتي صعدت

حسين : ترضين اتزوج وتنام وحده بحضني غيرج واشمها واحضنها وتصير ام بيتي واصيح الها حبيبتي

ريم : كمت امتمت من التوتر وكتله اني شعليه تزوجت او لا

حسين : ترضين

ريم : صرت عصبيه وكتله روح تزوج مالي دخل

حسين : هههههه وروحه لجدي جذابه وگلبي هسه يوجعج ومعدتج لوتج

ريم : ماكو هيج شى

حسين : لج عليه اني حسين والاعرف كل شريان ودمار بيج

ريم : مو حضرتك جراح

حسين : بيج ماخذ الدكتوراه

ريم : هذا رقم منو

حسين : رقمي الجديد

ريم : شفت رسالتي واتصلت

حسين : ليش دازه رساله ذاك السيم كارت كسرته وذبيته شدزيتي بله

ريم : بس كتبت شلونك حسين

حسين : ينعم الله عمي احسن من ماكو

ريم : شعجب خابرت اذا مشفت رسالتي

حسين : والله ياريمتي اشتاقيت لصوتج وردت اطمن على صحتج

ريم : حسين

حسين : يانور عينه حتى اسمي يخبل بحلكج مشتاقلج بكد كل لوعه متلوعها عليج

ريم : كافي تحجي هيج وين هسه باقي

حسين : بإرض الله الواسعه لتهتمين

البنات شلونهن

ريم : متكولي وين

حسين : موجود مو بعيد لتخافين مكتيلي شلونهن البنات

ريم : زينات وغزل انخطبت

حسين : عمار خوش رجال وراح يصونها

ريم : وانت شمدريك لعمار انخطبت

حسين : مو خابرته لان علاقتي طيبه بيه وبلغني

ريم : هاااا خابرته

حسين : شلونها صحتج

ريم :  الْحٍمَدٍ للـّہ افضل بس اريد اسألك سؤال

حسين : كولي

ريم : كالت رشا السيد كال انت فكيت من طرفك ومفهمت هذا الشى واتوقع تعرف منو الي مسويلي شلون فكيته

حسين : فكيته بعد شلج دخل

ريم : غير اعرف

حسين : من نتزوج اكلج

ريم : بااع هذا من كل عقلك نتزوج بابا اصحى على نفسك ولتضيع ايامك اني وياك مننجمع يصير السما والكاع تنجمع

حسين : اي يصير

ريم : شلون بله

حسين : سوي حفره بلحديقه بس شوي جبيره وترسيها مي واتركيها تركد وتهدأ وره ساعات راح تشوفين خيال السما بيها وبهيج انجمعت الكاع بلسما بلحفره

ريم : اي راح ننجمع بوادي السلام بلمقبره مالتنا من نموت

حسين : اذا بيدج تجفنيني وادفنيني راضي وابصملج بلعشره

ريم : اسم الله عمرك طويل

حسين : هي كوه غير تموتين عليه

ريم : ابتسمت على كلامه وكتله بهدوء كاافي سوالف جهال وارجع لاهلك

حسين : صايره مثل السكران من يجلب بكلمه ماارجع لتعبين نفسج ويله انطيني بوسه وخلي اروح اخابرج غير وكت

ريم : انت من كل عقلك والله استخفيت حيييل

حسين : يله اني ابوس ولا تضوجين

وجاان يبوس بقوه حسيته من كل گلبه

افيييش كون بلحقيقه جان شوفتج نار گلبي شلونها ام كافي ارجع

ريم : يله روح

حسين : هااي جديده همزين مكلتي كافي ارجع

ريم : ههههه انتبهه لنفسك

حسين : تحبيني

ريم : والله صاير موطبيعي

حسين : بوسيلي تيومي حيييل وبشرفج من تغمضين وتبوسي تخيليني اني

ريم : ههههههه روح بابا روح

حسين : لتنطين رقمي لاحد

ريم : ليش

حسين : لتنطين وهذا هو اسمعي كلام رجلج

ريم : لا مبين روحاتك ويايه للساده خلتك شاخط رسمي

حسين : احبج يااحلى ريم الله خلقها اليه

وسد الخط ومااخذت منه لا حق ولا باطل

بقيت لازمه التلفون بيدي وحايره شسوي

طلعت شفت رشا دمعتها بعينها ومخنوكه كعدت اواسيها واطيب خاطرها ذوله مديجوزون منها  اخذتها لغرفتها حتى ترتاح وتحاول تنام وراها كعدت تحاول تلملم الصار عسى ولعل تكدر بيوم تعيش حالها حال الناس بدون شعلان وجنات واخبارهم

غزل : كطعت مهر وجان المؤخر حجة بيت الله الحرام كلش حبيت المؤخر والله احلى واغلى من كيلوات الذهب

اجاني عمار حتى نشتري الغرفه جنت واكفه بلكراج انتظره طلبت من ماما او وحده من البنات تجي ويايه استحي مقبلو كالو انتي مو صغيره وبعد هذا زوجج صار بدلت لبست بلوز طويل رصاصي فاتح  وبنطرون جينز عريض وقمصله وترانشوز رصاصي رتبت نفسي وحطيت مكياج حيل خفيف خفت ليكوم يحجي بعدني مااعرف طبعه   اروح واجي بلكراج باوعت سياره طبكت بابنه مديت راسي طلع عمار ابتسمت من شفته وطلعت وسديت الباب ورايه وصعدت بصفه

عمار :فدوة لضحكتج شكد احبها

غزل : هههه صباح الخير

عمار : صباح الخير ياوجة الخير

غزل : هاي سيارة منو

عمار : ولد صديقي كلت ليش ابهذلج تكسيات ورانه فر هوايه وكل شويه مصعدج اخذتها منه نكمل وارجعها

جنت حيل فرحانه كاعده بصفه وبنفس الوقت مستحيه

عمار : شبي حبيبي ساكت

غزل : شحجي

عمار : اقدملج نفسي زوجج المستقبلي عمار ممكن فد حجايه حجايتين تحسسيني متزوجين

غزل : من نتزوج عود احجي

عمار : لعد هسه احنا شنو مو كاطع مهر قابل جنت العب

غزل : هههه اقصد من نتزوج وادخل لبيتك

عمار : اسمها ادخل لحضنك اكو فرق جبير تره

غزل : وين نروح

عمار : الله حلو من تغيرين الموضوع

غزل : ممكن سؤال

عمار : لتستأذنين الي تحبين تكولي مباشره احجي

غزل : ذاك اليوم بلخطوبه جنت حاط عطر يخبل شسمه

عمار : والله مادري

غزل : شنو متدري

عمار : مال صاحبي قبل لا ادخل عليكم سبحني بيه

غزل : بس جان طيب

عمار : مطيب اسكتي

غزل : ليش

عمار : اني صوجي خليتج تشمين عطر غيري هذا الغبي رشني من فوك ليجوه رغم العطر ماركه واصلي وغالي ويرش ويصيح يرخصلك وتالي طلعتي تحبي شلون بله ماعندي اشتري وحتى لو عندي استحيف اذب بلدولار على عطر واني ماعندي امكانيه

غزل : مو مهم حبيبي عطرك طيب بكل حالتك

عمار : ياالله نطقتها حبيبي يابويه كلت يصير عدنا ١٠ جهال يله تكولها صدمتيني

غزل : مو لهاي الدرجه هاي شبيك عمار

عمار : احلى شى بيج من تخجلين العيون تتشقلب وتباوعين بغير مكان والخدود تورد

غزل : بقينا نضحك ونسولف ونزلنا لاكثر من معرض جانت الاسعار حيل غاليه واني تقصدت مااتقرب من الغرف الضخمه الغالية حتى مااحرجه وره ٣ ساعات فر كتله

ليش منشتري عراقي ارخص واحسن من هذني الايطالي والماليزي بسرعه يتكسرن

عمار : عاجبني شغلهن مااحب الخشب العراقي وهم اريد انومج بأحلى غرفه واعرف شفتي غرف تخبل بس متقربتي منهن من وره السعر

غزل : حسيته اختنك وضاج وطلع الجكاير يدخن طول هذا الوكت مشغل جكاره لحد مختنك

غزل : حبيبي لتضوج ابسط غرفه عندي جنه والله اعتبرها المهم وياك

عمار : شسوي ردت اداين والله واشتريلج بس بطبعي مااحب الدين واستحي انزل نفسي واطلب من جماعتي

غزل : لو مداين والله مااشتري انت ليش تصعبها نشتري اي وحده بسيطه واني بترتيبي الها اخليها تخبل بس لتضوج عفيه واطفي فرحتي

عمار : بعد هذا الضيق كله واحلى الغرف مكدرتي تشتريها ومطفت فرحتج

غزل : اني فرحتي بيك مو بلغرفه جان يشمر الجكاره وتقرب مني وهمس

عمار : بس لو اعرف شمسوي بدنيتي والله رزقتي وحدة مثلج

غزل : كل خير ان شاء الله يله نروح نشوف ذيج هم حلووة وهم نازكه ولونها حلوو مريح للعين وعلى كد فلوسنا

عمار : بس الي گبالها احلى

غزل : لا اني عجبتني هااي يله ناخذها

قنعته واخذناها على كد فلوسنا وبينت اله فرحتي لان جان كل شويه يصفن بوجهي وكانه يقيس تعابير وجهي ويشوفني اخاف ضايجه او مقهوره

راد يدخلني مطعم غالي مقبلت

عمار : والله عندي فلوس بقى للغدا حاسب حسابي

غزل : واني مااريد اكعد بهيج مطعم اي محل وجبات سريعه لفه الي والك

عمار : شنو رأيج نروح لبيتنا نتغدى هناك امي مسويه مركه باميه فاصوليا بس يعجبج تاكليها وناخذ دجاجه ويانه

غزل : اخاف ميقبلون اهلي

مباشره جر التلفون ودك على بابا اني متت بدمي من الخجل ستأذن منه وكله روحو بس لتأخرها

عمار : فضت بعد

غزل : بس لتاخذ دجاج فاصوليا كاافي

عمار : عندي والله شبيج ياعيني

غزل : اريد اكل من ايد خاله مااريد من بره بس جيبلنا لبن وخضره

عمار : صاار وخابر على امه بلغها وحسيتها كيفت من نبرت صوتها واني خابرت ماما نهر وبلغتها حتى لينتظرون على الغدا

وصلنا لبيتهم وكعدنا هاي ثاني مره ادخله بس هلمره مختلفه لان داخله چنه هذا البيت مو خطار عادي

ام عمار : ممصدكه عيوني مرت عمار يمنا

غزل : بوستها اجينا ناكل يمج

ام عمار : هله بيج بنتي اشيلج على راسي

غزل : سالم راسج خاله

اجت بسمه اخته طيبه وحبابه وبس تضحك حاولت اتعامل طبيعي حتى لينحرجون اباوع على عمار راح بدل لبس تيشيرت اسود وبجامه سودا

انت كل ملابسك هيج لونهم

ام عمار : طك گلبي سنين واصيح يمه عوف الاسود بعدك شاب حتى بخطوبته توسلت بيه يكسر بلون مقبل

غزل : تمدد وحط راسه بحضني خجلت حييل

كووم عمار

عمار : مرتي شكوو قابل وهاي امي واختي ماكو احد غريب واذا اجه عابد عود اكوم حتى لا اخجلج العبي بشعري

غزل : والله استحي سحب ايدي وباسها وحطها على راسه وبديت بهدوء بأطراف اصابيعي العب بشعره

عمار : والله نعست

غزل : كوم اكل ماكو نوم كعدنا كلنا ناكل حيل حبيت الفتهم جنهم احنا هم مرات نتناكر على الاكل طبخ خاله كلش طيب وراها شربنا جاي واحنا كاعدين لزمني من ايدي تعالي اشوفج غرفتج

غزل : هااا غير مره وديني للبيت تأخرت

عمار : دقايق ما اخرج كوومي

غزل : الخجل عاميني ويه كل حركة من حركات عمار وصعدت للطابق الثاني بيه غرفتين وحده مالتنا والثانيه اصغر مال عابد

دخلت بيها جانت مصبوغه جديد

عمار : جماعتي سولي فزعه وصبغوها بلاش

غزل : عااشت ايدكم حلوو صبغها

عمار : مبقى شى اجيب الغرفه وتنورين البيت لتضوجين اذا بيه نقوضات بمرور الوكت اكملهم

غزل : ماكو شى ناقص والحمدلله كافي عدنا سكف يحمينا وماكو ايجار تسوه الدنيا

جان يتقرب مني واني ارجع

خلي نرجع للبيت جان يحصرني بلحايط وحط ايده منا ومنا

عمار : اول يوم شفتج بيه حيل اختنكت

غزل : تذكرت يقصد الحرك انقبض گلبي

عفيه سد الموضوع

عمار : فتحت الصور وشفت بنيه البراءه كلها بوجهه وضحكتها الهادئه الداعب الگلب وتدخل بيه بسرعه بس رگبتها محروكه

غزل : حجيت بغصه وقهر وكلت لعبت نفسك موو

عمار : لا وروح ابويه واخويه الاعز من روحي ملعبت نفسي لحظه بلعكس انقهرت لان حسيتج حيل متأذايه بسبب هذا الشى ومن گلبت الصور الباقيه مراحل علاجج رغم ماكو اي معرفه بينا حيل فرحت مو لان راح الحرك لا حتى لو باقي تبقين بعيني احلى البنات بس فرحت على فرحج وابتسامتج مثل الطفله الصغيره الفرحانه بلعابتها

تدرين ليش اجيتج حتى تبريني الذمه مو بس لان شفت صورج وركزت بيهم  لان جنت اتخيلج كل وكت من يوم مشفت الصور وخيالج وكلشي بيج بعيني مرات استغفر واتعوذ من الشيطان وبس اريد انام تجين بالي وخاصه جنتي على ذمة رجال وهذا الشى جان حيل متعبني

غزل : يعني لو باقي الحرك تتزوجني

عمار : اتزوجج البارحه گبل اليوم غزل اني حبيت كلشي بيج والي يحب ميشوف عيوب الحبيب لان لو شاف اكو عيب معناه ميحبه

واني احسج كامله والكمال لله اني همت بيج من لحظة مشفتج دخلتي بگلبي ومن عرفت اطلكتي يمكن اكثر واحد جنت فرحان

غزل : يعني من اجيت للكليه جنت تحبني

عمار : مااسمي حب بس تكدرين تكولين ماخذه عقلي كله وجانت اصعب مواجهه بحياتي وياج وجنت اكول ليش هي من دون كل هاي البنات شنو البيها خلاني اهيم بيها وعيوني تراقبها تصوري قبل مااروح اودي المساعدات اخذت تلفون ابوج وخزنت رقمج وهاي خيانه واني بحياتي مخاين بشر بس وياج كسرت كل قوانين حياتي انتي ذنبي الوحيد بلدنيا الي ممتندم عليه

غزل : ابتسمت على كلامه وهدوئه جان يجر الشاال ونزعه بهدوء لزمت ايده جان يبوس ايدي وخرها وحط الشال بيده وقرب وجهه برگبتي ويبوس بهدوء على كل رگبتي يتنقل بين الجهه اليمنى واليسرى والوسط

همست واني ذايبه بيده

لو جان اكو حرك تبوسه هيج

عمار : واشمه وربج مو بس ابوسه وبدا يحضني حييل وتتجرأ ايده على مفاتني مباشره دفعته بهدوء فدوة امشي نرجع للبيت

عمار : بس هيج ردت اسوي وهاي هيه جان يمصني حييل من رگبتي وابتسم وانطاني الشااال

غزل : شسويت عمار والنبي شراح يخلصني من البنات

عمار : شسوي كزكزت عليج ومرتي حلالي ممسوي حرام

غزل : امشي رجعني الله يستر من لسان البنات

عمار : جبانه تخافين منهن

غزل : مو جبانه بس استحي شيكولون عليه

عمار : زوجي باسني وهذا هو ماكو اسهل منها

غزل : يله يازوجي العزيز رجعني لبست الشال بسرعه عيب من خاله وبسمه وسلمت عليهم وطلعت وطول الطريق لازم ايدي جنت طايره بلسما

وصلني للباب وراح لان تأخر لازم يرجع السياره للولد

دخلت مكيفه ولكيت رشا تغسل بلكراج بستها

رشا : مبين المزاج وردي اي عيني صار بيها بيوت واكيد حصرج مووو

غزل : هااا شنو عيب رشا

رشا : كلنا انحصرنا خيه وتاليها اندفرنا هي تبدي بحصره وبوسه وتنتهي بلنعل

غزل : ياستار ليش هيج تفاوليني جان تحضني

رشا : هااي اختي واكعه بلحب وطامس راسها لا اشاقه وياج ان شاء الله عمار يطلع كد الثقه وتعيشين ويااه احلى حياة جيبي الماسحه ومسحي ويايه حتى نكمل وندخل وتسولفيلي ششتريتو

غزل : ماما وين

رشا : راحت لام حسن جيرانه وراح يرحن لمدري المن يأدن واجب

غزل : هستونا كملنا الكراج وطبيت اسد الباب واسمع شخطه مال سياره طبكت بابنه واندكت حيل اباوع هذا فيصل جمدت شجابه هذا

فتحت الباب رشا وهذا طب مثل الاعصار

فيصل : صدك انخطبتي

غزل : كوة طلعت الحجايه مني لان جنت خايفه حيل منه وانت شعليك مو طلكتني

رشا : لتعيط شكوو جاي هداد

فيصل : انتي مالج دخل احجي وياها

رشا : شنو مالي دخل غير اختها الاكبر منها وانت شجابك من السويد لهنا

فيصل : عود اجيت ارجع الخاتون ولكيتها مخطوبه مستحيتي تنزلين لهيج مستوى عامل عند ابوج

غزل : لتتجاوز مااسمحلك

فيصل : تسمحين وغصب عنج عبالي ادميه وارجعج على ذمتي

رشا : احترم نفسك هي ادميه واحسن منك

غزل : سحبني حيل ودفعته رشا وضرب ايدي بلحايط وهو نثر انشخطط وتأذيت بس سكتت واتذكر من ضربني مره وكطعني

ريم : جنت متمدده وايدي على عيووني وتيم يلعب قريب مني سمعت صوت قووي كمت من مكاني شكوو هاي صوت البنات واكو صوت خشن منو هذا

اخذت الشال ماما ابقى هنا فروحه تعالي يم اخوج وركض لجوه

طلعت ولكه رشا وفيصل يتعايطون وهاي غزل واكفه مخلوسه وترجف

ريم : هييي انت شنو هذا الصوت العالي وين كاعدين

فيصل : احترمي نفسج شنو هيي ماعندي اسم

ريم : احترمك من تحترم البيت الواكف بيه شنو واكف وتشمر وتحجي عمو محسن معلمك البيوت الها حرمة لو عيشتك بلسويد نستك الاصول

فيصل : شوف منو يحجي عن الاصول الي مطولت سنتين وتزوجت من خلك عامل شوكت عرفتي

ريم : والله زايده منها منتظره سنتين المفروض وره العده تتزوج

رشا : جاي هداد ويعيط وكالب الدنيا خلي اخابر عمو محسن يشوف ابنه شلون تهجم علينا

فيصل : اصلاً ابويه اليوم راح يكسر المطعم على راس العامل ولج شكلتي لروحج من تزوجتي هيج واحد لو بت الفگر ميصير الها جاره

ريم : باع منو اليحجي ابن كوندليزا رايز مو امك احبها لتخليني احجي

فيصل : انتي شدخلج وينج تعالي وجان يجيت على غزل مره ثانيه يريد يجرها من ربطتها  جان ادفعه ريم حييل وعلى صوتها وتحجي وتأشر بيدها

ريم :اسمع لك لهسه ممطلعه لساني عليك احترامي لعمو محسن لان احبه بس خطوه ثانيه تجيت بيها على غزل والقران حتى عمو انساه وبلي برجلي على راسك

فيصل : شنو تهدديني حتى اكسر ظهرج واريد اشوف شلون تتجاوزين

ريم : اي اهدد واشتكي عليك ولك تالي وكت صاير رجال علينا وتكسر وتعيط انت لو بيك حظ مجان انهزمت منك بليله ظلمه وهاي سوالفك عود مقهور وضايج وجاي نافخ الجم ريشه عندك بطلها نعرف كلش زين انت متريدها وتسوي هاي السوالف حتى كدام ابوك شوف بابا ردتها وتزوجت غيري متحقني بعد لك هاي سوالف الجهال خلصان گلبنا منها استحي على نفسك ابو كاتيا

فيصل : همزين خلصت من عدكم شلون ابويه راد يربطني العمر كله ويه هيج ناس

رشا : بااع هذا هم شايف روحه فد شوفه ولك احنا نشرفك ونشرف عشيرتك هو لوما ابوك محسن نطيك مره

فيصل : على اساس اني الكتلت نفسي عليها تحملت وجودها كوه وكلت ارجعها لخاطر ابويه بس هيج اشكال مو مال خير خليج هنا يكتلج الفگر وحسره عليج اللكمه ويه واحد مهتلف خلك عامل ياهو اليجي يكفخ بيه ويعيط عليه ويطرده

ريم : شوو تعالي وجريت غزل احجي شبيج انخلستي كليله هياته كدامج مو هذا البقيتي وتحملتي سنه عود بلكت يعدل شوفي شلون يهدد ويرعد ويحجي على رجلج على حبيبك وانتي ساكته

فيصل : شنو حبيبها هذا الخايس الميسوه فلس حبيبها

غزل : اي حبيبي ورجلي واحبه ومتعلقه بيه ومااسمحلك تحجي عليه كافي يحبني وشايلني على راسه ومقدرني مو مثلك مشفت منك بس الاذيه والاستهانه عبالك مدري منو متزوجه ودوم تحسسني مستوايه اقل من مستواك بينما انت ولاشى واني الف مره احسن منك واذا على الفلوس فدوة لتراب رجله مستعده اعيش ويااه على حصيره واكل خبز وجاي يسوه السويد ويسواك

فيصل : صار يسواني لو ما اني جان كدرتي تسوين ركبتج المشوهه هسه طلعت موزين

غزل : لا هنا اوكف مو انت ولا وكفت وياي ولا ساعدتني ولا الك فضل قيد شعره من نيشاني بعته وسويت رگبتي

فيصل : بس بذهبي سويتي بفلوسي

غزل : لا فلوسك ولا شى هذا المقدم مالتي

كافي المؤخر تنازلت عنه حتى اخلص منك لتسوي عود انت صاحب فضل براسي وكفو الغربه ويايه وانت موكفت وهسه اداعيني بشى مو من حقكك تره كلامك يغث ومابيه معنى

فيصل : صوج ابويه الخلاني اجي مناك لهنا علمود وحده مثلج وكل مكال خطيه وفقيره وحبابه خلي يجي يشوف وجهج الثاني

ريم : شبي وجهه جنه العافيه وكافي رجلها يكوم ويكعد يباوع عليه وذايب بيه انت مو مال نعمه انت مال ذني بلشوارع المشمرات ثوبك انت مال كاتيا ام الگمل

فيصل : وانتم ثوبكم العامل الحافي المجدي موو

غزل : رجااال والنعم منه وافتخر بيه عاامل على راسي كاافي احبه ويحبني

ريم : وهااا اهم شى اجه خطبها من ذاته مو امه وابوه سحلوه مثل الطلي وكلوله اتزوج وهااا كاال ميييييع حاظر

فيصل : لو ما مره جان عرفتج مقامج زين

ريم : اعرف مقامي زين ويله اطلع بره لا عيطه وحده اخلي الشارع كله يلتم عليك لك انت لو رجال متتهجم على بنات وحدهن بلبيت بس الظاهر عمو محسن معرف يربي جان يدك تلفونه واسمع يكوول جااي بابا

ريم : روح اركض اخاف نسيت الحبل لو الجت

فيصل : مع الاسف غزل راح تتندمين بكد شعر راسج

غزل : ندمي الوحيد من تزوجتك

رشا : روح لابوك لعبتها لروحنا خلصت المسرحيه مالتك

ريم : كول لعمو طلعن هداده وتعاركن وتجاوزن يعرف بينه احنه شنو وراح يصدكك

طلع وركع الباب

غزل : صافنه وجسمي ثلج جان تكفخني ريم على راسي

ريم : شبيج مثل المطي صفنتي

غزل : شفتي شسوه

ريم : عادي همه ذوله الفاشلين يوم هو ويوم مشعول

غزل : بس فيصل ميحبني ولا يطيقني

رشا : حتى يرضي عمو محسن لتنسين صار اكثر من سنه ونص ميتحاجون

ريم : يله امشي ندخل ما وراجن بس العركات وانتي اغسلي ايدج ليشوفها عمار وتكبر السالفه

غزل : شعدنا غيرج غير الفتوه مالتنا انتي وهسه راح اغسلها لايدي

ريم : اصبغي اصبغي والله لسانج اطول مني بس بمزاجج بس كتلج احجي ولا سكتي دكمه ودسنا اون مالتها

رشا : هههه بيها جينات مال سندس بس جين واحد مو هوايه

ريم : الجهال عفناهم وحدهم ادخلن

غزل : دخلت ضايجه طير فرحتي كلها واغسل بلمغسله وايدي تحركني وصافنه على المرايه

ريم : شبيج وجهه البومه صرتي

غزل : طير فرحتي كلها وخايفه لا يتعارك ويه عمار وتصير طلابه شكبرها

ريم : هذا مثل شعيلان بس تهديد وهسه راح يكول لعمو اتجاوزت ومتريدني والاهم بابا انتي تزوجتي صرتي مرت عمار شرعاً وقانوناً

دك الموبايل هاااا سليل

سليل : ولجن شصاير سجاد خابروه كالو علكت بلمطعم بين محسن وعمار وفيصل

غزل : يمه صخام

ريم : على شنو صخام ميحقونا زوبعه بفنجان وداعتج على ذكر الفنجان رشاوي فد فنجان كهوه بداعت حبيبة گلبج جنات

رشا : ثول ملكيتي غيرها

ريم : كلمن حبيبة گبال عينه اووو مااريد اصعد انام

رشا : متعرفين شصار

ريم : من تفض ملحمة كلكامش كعدوني

غزل : اني خايفه لتصير مشكله اكبر ويتأجل العرس

ريم : ميتأجل لتخافين

صعدت غسلت وجهي وتمددت باوعت بالاتجاه الثاني تيم وفرح يلعبون افكر ابقى هيج بس بلبيت لا دوام لا حياه مخلصتها بين الجربايه وصينيه الاكل والحمام اريد اغير حياتي اختنكت منها

غزل : انتظرت ماما واجت تركض وراها ماما سليل وبقينا على نار لحد مااجوي بابا وسجاد وعمار وياهم

كعدو فهمونا الي صار

حجي طه : دخل عليه محسن وجايب فيصل بيده گله انزل بوس ايدك عمك وراضي والولد سوه مثل ماطلب منه كعدو وقدمنا جايات الهم وتحمدت الهم بلسلامه وشويه وكاال هذا ابنك سوي بيه الي تريده

استغربت كلامه وضل يمدحلي بيه تغير ومراح يعيدها تالي كتله

حجي طه : على شنو هاي الهوسه كلها

محسن : نريد نرجع غزل لفيصل بعد موافقتك وراضي بكل شروطك توترت وتالي كتله لو ترهم جان كتلك بنتك هيه بس مترهم استغربو كلامي تالي كملت وكتلهم انخطبت لو محسن ركبه جني تخبل شلون تنخطب وشلون متكولي ومن سألني منو تخبل بلزايد وطلع فيصل يركض

رشا : اي اجه علينا

حجي طه : خوما سوالكم شى

رشا : لتخاف بناتك بطلات وخاصه رامبو طيحت حظه

غزل : اباوع على عمار يحرك برجله ومتوتر وطافي من الرئيسي

نهر : وهسه شفضت

حجي طه : بقيت اطيب بخاطره لمحسن ولو خربط هواي بلكلام ورجع فيصل كملها بس فضت وعمار عاقل رحمه والدك ابني سمعت كلامي ومتعاركت

عمار : هلمره لخاطرك حجي ولمعزتك مره ثانيه والله اخلي دمه بطوله

سجاد : مااتوقع يبقى هذا ميتحمل يوم يومين ويرجع للسويد

عمار : اني بلغتكم بس يتعرض ولو بحجايه انسى حتى ابوه وبذاك الوكت ياكاتل يامكتول

حجي طه : هذا هو ابني

عمار : عمي من رخصتك اريد احجي ويه غزل

حجي طه : اي ابني مرتك هيه اخذ راحتك

سجاد : اني اخذ ام زيون واروح

سليل : هستونا اجينا بعد وكت

سجاد : امشي عندي سالفه مهمه وياج

سليل : والله كلشي ماكو حفظت سوالفك كلها

غزل : عافونا كلهم وطلعو واني بقيت على كعدتي جان يوكف على طوله واشرلي تعاالي جنت ممزوجه بهواي مشاعر خوف على  قلق على الم على ضياع ركضت بحضنه وحضنته حييل جنت محتاجه للامان حضني بكل قووته

عمار : لتضوجين اني موجود

غزل : انت لتضوج من كلامهم

عمار : ماطول حصلتج يركعون راسهم بلحايط ميهموني

وخرني من حضنه وكاال نهايه الاسبوع انتي يمي

غزل : مو كلت على الشهر الجاي

عمار : اريدج بيتي مامستعد بعد انتظر

غزل : هذا هو رجع سحبني بهدوء ويبوس بخدي

عمار : تحبيني

غزل : روحي بيك عمار والله انت عندي تسوه الدنيا

سحب ايدي باسها هااشنو

غزل : انطخيت بلحايط

عمار : خااف هو مد ايده عليج

غزل : شفته انگلب كتله لا من استعجالي انضربت

رجع باسها وكال الجمعه زواجنا وراح ابلغ ابوج والكل

غزل : هذا هو الي تريده باسني وطلع اعرف بيه مخنوك لان سمعوه كلام يجرحه بس محد يهمني المهم هو عندي وصعدت لغرفتي وحاولت ارتاح واهدأ وانسى كل الصار

رشا : اتصل بسهير لو متشيله لو مشغول اسبوع كامل جدي انسمط من الفضول اريد اعرف شصار

ريم : اليوم السنويه الثالثه مال بنتي وسامر ومثل كل سنه اسوي ثواب واروح للمكبره اكابلهم واكعد واشكيلهم حالي جانت حياتي عباره عن فراغ وبنفس الوقت خوف من المجهول مطولت بلمقبره لان ورانا توزيع وهم رشا وغزل ملتهيات علمود عرس غزل مردت اكسر فرحتهم الگلب بلگلب يبقى العمر كله رجعنا من النجف وره موزعنا الثواب كملنا تنظيف كالت عمه ليش منروح نأجر بدلات

مقبلت تلبس بدله

غزل : غير تزوجت قبل

رشا : وشكوً بيها كل عمرج ٢٣ سنه يادوب طبيتي بال ٢٤ وكومه بنات بعمرج ممتزوجات ولتنسين العريس ممتزوج

ريم : لا مااريد استحي البس فستان او بدله بسيطه شلون مال المهر واروح لبيتهم

سليل : گلتي لامه اخاف عبالها بدله وبركع وهاي السوالف وتنحرجين

غزل : كلت لعمار وكال الي يريحج

رشا : الله يسعدج بوسناها كلنا واثناء منسولف دزيت رساله لسهير كتبت بيها زعلت والله ماطول مجاوبين وره ١٠ دقايق دكت

ركضت لغرفه بابا وسديت الباب هااي وينج خاتون

سهير : هم الج عين تزعلين

رشا : شكوو

سهير : من وره فلات لسانج جان صارت النا كارثه

رشا : شصار فهميني

سهير : مو خابرتي علمود اراقبلج وبلغت اختي وصدك ثاني يوم صاحتها هند وكالت جنات جوه جايبها تكفخ شعلان من بغداد للكوت لان اجتج

رشا : حيييل اي

سهير : وتكول طردها من البيت وكال الها متلفين بعد يمي مااريدج وراحت يم اهله ولان هي وهند ميتحاجون بقت فوك ومنزلت حسب كلام هند ضاربها مطيح حظها وضاله تلاسن وياه كلمة بكلمة وعالكه اريد افتهم متزوجه ثور ياهو الي يلزمها يگتلها

رشا : من سوالفهن العوجه وداعتج الاعوج مينعدل لو يوميه يضربوه وتالي شصار بعد

سهير : الي صار وراها اجه كطع شعر هند تكطع وبس تكفخ بيها كلها منو كال رشا على سالفه المتعه ومن وراج صرت تحت رحمتها وهي دزت على اختي ثاني يوم وبقت تحلف الها مو هيه وحلفت بعد متجيب خبر شيصير لان من وراج البنيه تدفع كفاره وترجع ليوره وهم منريد مشاكل وطلايب ويه شعلان هذا هو شراني وعنده قابليه يدك حتى بيتنا اذا عرف احنا الي نوصلج الاخبار شجاج حجيتي

رشا : شسوي من حركت گلبي كاعد ويهدد ويتوعد مو حجيتلج الصار ردت بس يفك مني

سهير : واختي اكلتها ولج هيه لوما تعرف بسالفه شعلان وشلون حرك گلبج وخانج ولا تساعدنا تكول من اشوف هند وجنات لو بيدي اشرب من دمهن وتبطل توصل يمهن واني اذكرها بمعاناتج وترجع تروح

رشا : يمه فدووه لعمرها ينطيها العافيه

سهير : هسه هي انكطعت من هند رغم دزت عليها اول البارحه ومراحت

رشا : ولج سهوره اني بشاربجن منو يجيبلي الاخبار

سهير : جان ضبيتي لسانج

رشا :اكصه هم مو بس اضبه بس خلي اختج ترجع تروح لهند وتعرف شصار

سهير : اخر شى عرفته شعلان هج من البيت ورجعت جنات للبيت وحدها هيه ولدها بس تعرج من الكتل الي اكلته وساده بابها عليها وساكته بس ميته قهر لان ابنها مات وهذا الثاني صحته مستقره بس معلعل

رشا : وربج هاي ولا تسكت وهسه تشوفين لازم تسويلها لعبه هيج نماذج الخباثه بدمهم وطبها مرض خليها تضوك الاذيه شلونها

سهير : الله يبعدج عنها اروح خطيبي يدك اخابرج بس اسمع شى

طلعت من الغرفه ورجعت لشغلي حايرين بغزوله

اليوم الحنه مالتي مسويت شى لان ملحكت وكاعده تحفلي رشا وريم تصفط بملابسي الباقيه لان ودينا جزء منها وعمه لازمه المبخره خنكتنا خنك بلحرمل وتسمي اندكت الباب طلعت فروحه واجت كالت ام العريس

صعدت للغرفه وسلمت عليها اباوع هيه وبسمه بيدهم علاكه كلش جبيره وبدله والعلاكه الثانيه ماسكة ورد

هااي شنو خاله

ام عمار : حلفتج بعزيز گلبج بأبوج لان دوم يكول عمار تحب ابوها لا تخجليني هاي اول فرحتي من مات المرحوم وابني انطفت الدنيا بعيونا ومعودنا شويه نشوف الفرح سمعت من عمار متقبلين تلبسين بدله واني اجرتها على ذًوقٌ بسمة لان تفهم شوي بلموديلات الجديده اريدج تلبسيها بلكت الله يهدي لابني ويكسر الاسود جنت انام واكعد واكول هم يجي يوم واشوف عرس عمار واشوف صور عرسه وجهاله واجه هذا اليوم لتحرميني منه

غزل : خاله والله استحي

ام عمار : ليش بنتي لامسويه حرام ولا غلط وانتي بعدج صغيره وشلج بلناس مو اهم شى رجلج واحنا وكلنا نريد نشوفج بلبدله لتكسرين گلب والده تشهك يوميه لله تريد ابنها يفرح مثل الشباب

رشا : شووو جيبيها خااله طلعناها والله تخبل عااش ذوقج بسوم

بسمه : شكراً رشاوي

غزل : باوعت عليها شكد نازكه وشغلها بسيط والباقه بيضه باوعت على امه الجانت تريد بس تبوس ايدي حتى اقبل وماما وسليل والكل كالو البسيها

وقررت البسها وبلغت عمار وكتله اريدك تكسر الاسود مقبل وكاال اجي بقاط كله اسود

ريم : ليش مطنكره تره الاسود سيد الالوان وهو يلوك اله على شنو تردين تبجين

غزل : تمنيت لخاطري يكسره حتى احس بفرحته

ريم : كاافي انتي فرحانه وهي مو بالالوان دزيت عمه تحجز الج بهذا الصالون راس الشارع تسويلج شى بسيط ميصير مكياج بيت لازم اطلعين عروس كامله

الليل منمته من التوتر ولا عبالك متزوجه قبل يمكن لان احبه يمكن لان تمنيت اول ليله تكون وياااه مو ويه غيره

كعدت من الصبح وركض للصالون رحت اني وماما سليل سولي مكياج بسيط كاعده گبال مرايه الصالون واباوع على صدر البدله واتذكر شلون لبست رگبة ردن بذاك العرس حتى بس اخفي الحرك مالتي وهسه  الْحٍمَدٍ للـّہ گلي ثقه كملت لبست وفوكاه الكبوس مقبل شعرايه تطلع مني رجعني عمو سجاد وجنت كامله حتى البدله بلصالون لبستها

ماكو احد بس احنا وصفنت

قبل كلها موجوده وارقىً حفله واتكيت ومحد فرحان وهسه بس احنا وبسيط والكل طاير من الفرح توقعت يجي ياخذني وانطك صور ونروح للبيت واسمع صوت مزيقه والله متت خجل عبالك مسويه جريمة لزمت ايدي ريم

ريم : اششش شبيج تره عادي انتي اليوم عروس والصار انسي راح يطب عمار وطب واتفاجأ قاط اسود والقميص ابيض والله من الفرح ردت احضنه بنص الكل باس راسي واباوع خاله نازعه الاسود ولازمه الهاشمي وتركص وتهلهل واصدقائه الكل يركصون حمدت الله سمعت كلام خاله واله جان حرمتها من هاي الفرحه

اجه بابا وحط ضرف بيدي وكال هااي هديتج بنتي وضرف بيده مقبل عماار وبابا حضنه وكله انتي هسه ابني وتره انطيتك جوهره يوم واحد متحافظ عليها اخذها منك

ابتسم عمار وباس راسه لابويه دنكت بست ايده وخواتي واكفات بعيد كل وحده منهن بعيونها الف حنيه ولهفه صحتهن واجن باسني واخذني وطلعنا

رحنا للاستديو ورجعنا لبيتهم ودخلت عروس لهذا البيت

صعدت بايه بايه والبدله تسحل ورايه دخلت لغرفتي وابتسمت على الترتيب الي مسوي هاي سوالف بسمه كلها شموع مشتغله كعدت وهو كعد بصفي

عمار : صرتي الي وبعد محد اله بيج شى

غزل : اي الك دمعت عيني وكتله بهدوء تمنيت انت تكون اول بختي

عمار : اششش اي اني اول بختج واياج بيوم اسمع منج اسم ذاك ولا تفكرين مجرد التفكير تذكري انتي هسه مرتي والفات تنسي سمعتي تنسي ماكو شى گبلي اني وبس

غزل : اي انت وبس

تعاالي اليوم اطلع بيج شلعت گلبي من محاللتيني واهبتيني

غزل : ههههههه حقود لهسه يتذكر

عمار : شلون مااتذكر شوو تعالي

غزل : خطئي من الاول كان لازم افهم ماكو شى اسمه احتمال  يصير واحتمال لا اكو امور مابيها فرصه ثانيه اما تختار الصح او الغلط واثنينهم انت المسؤول عن حياتك الجايه انت الوحيد الي تدفع ثمن اختيارك

واني دفعت ثمن اختيار فيصل غالي  وحسبت لكل الامور ونسيت اهم شى نسيت غزل  نسيت لنفسي حق عليه وبهيج امور مصيريه اترك المشاعر والاحاسيس والخواطر وافكر بنفسي  حتى لا اضيعها بيوم من الايام بس رحمة الله وعدم فقداني الامل رجع الاختيار يلعب بحياتي وهاي المره اختياري صح

نايمه بحضنه وعلى انفاسه الهادئه صبحت بيوم جديد عشت ويااه ساعات معنى الحب والالفه والموده حتى التقرب معاه مختلف كان رومانسي وحنون كله شووق كله شغف احس بكل حركه منه موسيقى تلعب على اوتار جسمي يتفنن شلون يستغل كل مسامه بيه ويطبع حبه بيها هسه عرفت معنى انام واني مطمئنه بحضن رجال اتحدى الدنيا ويااه ومااندم صافنه على وجهه وفز وحط وجهه برگبتي ويبوس بحنيه

عمار : شعنده الحلوو كاعد من الصبح

غزل : اشتاقيتلك

عمار : مو بكددي خلي اتريك بيج قبل محد يجي ويعكرون مزاجنا

غزل : ههههه اخاف تجي خاله بعدين مو هسه

عمار : عريس لا تكلمني

غزل : فديته للعريس

رجع تقرب مني وجنت ابادله بكل حب لدرجه اني الخجوله مااتوقع هذا الاندفاع مني عليه

من اول يوم تأقلمت وياهم جنت طايره بيتي وحياتي البسيطه كافي عندي رجال يباوع على حلكي من احجي

صعدت للغرفه وفتحت الظرف ردت اشوف شنو بيه واتفاجأ بيه ٣ ملايين من كل وحده من خواتي ٥٠٠ الف حتى ماما نهر وبابا مليون وكأنهم يعرفون حاجتي للفلوس وكاتبين ورقه تصرفيهم بلخير

وفتحت ظرف عمار الي حطه بيدي من طلعنا بيه ٥٠٠ يعني ٣٥٠٠ شلتهم وضميتهم كلت لازم اضمهم للظروف الصعبه واصير ايد بأيد ويه عمار

ريم : رغم وجودنا كلنا ونفر واحد راح من عدنا بس نحس بفراغ جبير

اليوم صبحنا غزل ماكو وكلنا اشتاقينا الها حتى الجهال يسألون عنها

وبمرور الايام تعودنا عدم وجودها بس عمار طيب جان كل اسبوع اجيبها يمنا من الصبح لليل ويرجعها جنت اشوف بعيونها الفرحه الي عمرري مشفتها من هي وصغيره هادئه وكتومه اليوم اختي تضحك وتتشاقى وتكمز كلها حيويه

كل يوم انتظر كلمة من حسين جان بالاسبوع مره يكتبلي شلونج ريمتي لو مشتاقلج ريمتي لو احبج موت مجنت اجاوب ردت ابتعد عنه قدر المستطاع اريده يرجع كاافي عايف اهله وناسه

ومرت الاشهر بهذا البرود واني حاولت ادور شغل الي وفجأه انقطعت اخبار حسين مر اسبوع والثاني وهو ماكو قلقت رغم جانت كلمات بسيطه منه بس اطمن عليه

بديت الوب اتصلت مغلق هذا وينه القلق خيم على حياتي وكمت اختنك ومرات ماانام بس اريد اسمع خبر عنه

رشا : شبيج صاير ايام مو على بعضج

ريم : حسين مختفي

رشا : مو كل اسبوع يدز رساله وحده

ريم : اي وهسه اختفى تماماً

رشا : يجوز مل ماكو رد

ريم : لا گلبي ممرتاح

رشا : شكوو ياستار

ريم : ليش ميراسلني زين هاي الفتره كلها وينه

رشا : تلفونه مغلق

ريم : اي مغلق

بقيت افتر ويوم بعد يوم اختنك اكثر اخر ءى تذكرت ودكيت على عمار

عمار : شلونج ام تيم

ريم : وين حسين

عمار : ياحسين

ريم : جم حسين عدنا ابن عمي وينه

عمار : شمعرفني

ريم : لا تعرف ومتأكده احجي عمار  وين حسين والله مااحاجيك واخلي غزل تتعارك وياك

عمار : يمعوده شيخلصني من طنكورتها

ريم : احجي وينه

عمار : حسين راح ويه الحشد

ريم : هاااي شلك بيها لتقشمرني وتفلت

عمار : لا والله هو يروح ويرجع مره راح ويايه للمساعدات وعجبه الوضع وكل شهرين يروح مره او مرتيم يبقى كم يوم

ريم : هو هذا مال حشد من كل عقله صار اسبوعين ماكو

عمار : هسه اخابر عاى ولد صديقي يعرفهم

سديته منه وكمت اروح وارجع وگلبي يدك يدك شويه ورجع خابر

عمار : هذا المخبل بلخطوط الاماميه وهسه عدهم عمليات تحرير للمناطق والله يستر عليه الوضع خطر

ريم : كعدت بلكاع ودموعي تنزل سديته بوجهه عمار ونزلت على عمه نهر

وينج عمه

نهر : هااا يمه الرحمن شبيج

ريم : عندج رقم نوريه

نهر : شسوين بيه

ريم : عندج او لا

نهر : اي عندي هااج

ريم : اخذته ودكيت عليها وجسمي ينتفض من الخوف جان تجاوب بس سمعت صوتها انهاريت وبعلو حسي كتلها ارتاحيتي هسه شفتي هج منكم ومني وراح للموت

نوريه : منو ويايه

ريم : اني الي وصلتيها للموت بسحورتج القذره اني الي عاديتي ابنج من وراها

نوريه : شتردين شكوو مخابره

ريم : حبيبج وحيدج للموت رايح

نوريه : يمه حسين ابني شبيهه

ريم : رايح للحشد رايح يموت رايح حتى يحرك گلبي وگلبج ارتاحي هسه كلها ايام ويجيبوه ملفوف بلعلم وخلي يفيدج عنادج

نوريه : انتي منين جبتي هذا الحجي

ريم :هذا الهامج منين جبته كولي لرجلج ارتاح هسه لا انت الحويته ولا احنا وراح بشربت مي

جان تكوم تعيط واسمع صوت شلون تلطم على صدرها كتلها اذا صار شى بحسين ذنبه برگبتكم سديته منها وكعدت اشهك

رشا : على كيفج ريوم

ريم : خايفه عليه والله موت خايفه بس لو مسج منه كلمة اطمني ميعوفني هيج

رشا : ادعيله

ريم : يارب لتحرك گلب علي ونوريه ب حسين كله ولا هو اااااه ياحسين رجع حبك بگلبي ينبض بقوووه

يتبع ....