تحميل رواية «ابي والغزلان للكاتبة ريام هادي (REEM)» PDF

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_السابع

موجوعين بس انكابر اهواي

                       اني ودمعتي انعاند بقينا

شوكي يعتني وتردني الكرامات

                       ولانكدر نروح ولا أجينا

وهمزين الوحدنا وماكو شمات

                      دتعاندنا المهم رأساً بجينا

شكيت الصور گلت انسى وارتاح

                      ونسيت الذكريات اتعيش بينا

تودينا الدربهم دفعه الشوك

                   وخذينا جروح من عدهم واجينا

منو ايدايني گلبه اتناسى وارتاح

                   بلكي الله اقتنع مره انتهينا

حتى ارجع الملم باقي الايام

                    ولو ماباقي من كد مانطينا

خلص ياعيني بطلي وكافي تبجين

                 زغرنا ابعينهم كد ما بجينا 💔

سليل : طالع انت منو

اكيد يبيع لبلبي وباكله ماعنده غير شغله

نفخت بقله صبر وكتله عمو انت منو

من يرجع كوليله محسن رجع

سليل : من يرجع اكول اله

سديت الباب ورجعت اكمل شغلي اني هذا الاسم مو غريب عليه حاسه سامعته

للعصر رجع بابا وكتله وهو مباشره كمز

حجي طه : محسن متأكده محسن

سليل : اي والله محسن

حجي طه : مكلج شوكت يجي

سليل : لا والله مكال ودنحجي وسمعنا دكت الباب وطلعت بابا وعاط طلعنا اني وماما نركض واشوفه شلون حاضنه ويبجون

محسن : ولك مشتاقلك اول مدخلت للعراق روحي ادور على اخويه

حجي طه : ممصدك شفتك

محسن : عبالك متت جم مره كتلك العار ميموت بس صويحبتك ماتت

حجي طه : ولك منو

محسن : ام حمزه حرامات عبالي ازوجها الك

حجي طه : هههههههه خرب غيرتك بعدك تذكرها الله يرحمها

محسن : غير انت مقدرت النعمه وهاك اخذها الله منك دضل هيج

حضنته مره ثانيه لك والله ممصدك

محسن : مكدرت انتظر لباجر كلت اجي اذا ماالكاك اكعد بلباب والله ومااروح غير جتلالي وادور عليه

حجي طه : هههههههه تعال طب

هاي نهر ولج شصاير بيج كبرانه

نهر : هله بأبو فيصل شلونك

محسن : بخير بس تره بعدج كاشان مايخرب

نهر : ههههه رحمه الله والديك خوش ترفع المعنويات

حجي طه : اكعد يول ولك تتغزل بأختي كدامي

محسن : هسه شكلنا عيني طه قابل كتلك زوجها اليه ولو هي متزوجه زوجج الخايس شلونه

نهر : كلتها خايس وعوجت حلكي تضايقت من ذكره

حجي طه : مصارت قسمه وتفاركو

باوعت عليه خجل ودنج ثواني ورفع راسه وكال

يمعوده همزين مدري شجان عاجبج بيه جنه زرزور مهلس

نهر : ههههههه ثوله بعد

محسن : والله شلون جنتي متزوجته ماادري اني لو مره ماابوسه لو يصبوه ذهب

حجي طه : هههههههه خرب ببليسك ولك متوب كبرت يول وصرت رجال جبير معقلت

محسن : احجي عن روحك اني رجال بعدني بحيلي واخبل بس غير الخوف من المره مانعني واله جان هسه تزوجت عليها اثنين

نهر : هههه همزين تخاف من مرتك جان سويت سوايه سامي من اتزوج عليه حتى بدون ميكولي غابت ابتسامته وكال بصوره هادئه

محسن : خلي يولي خسر جوهره لو يحفي العمر كله ميلكه مثلها لتضوجين

نهر : ومنو كال ضايجه كولشي قسمه والحمدلله قسمتي واعرفها

حجي طه : يله نهوره العشا الزين من ايدج

نهر : من عيني

محسن : ولك هي مال عشى مجوعان غير مره اجي واكل واضل لليل اخليك تطردني هسه تأخرت ومبقى شى على ممنوع التجوال

دعسوقاتك وينهن ولا وحده طلعت

حجي طه : قصدك غزلاني

محسن : اشوف واحكم لو يطلعن غزلان لو دعسوقات بله الجبيره غزال ومايصيدونه بقن الصغار

حجي طه : بنات وينكم تعالو

نزلن البنات

محسن : هلا بنات الغالي

كعدو يمه وكال ولك عرايس عندك

حجي طه : مو كتلك كبرنا

هذا عمكم محسن مثل اخويه وصديقي خلصت ايام الجبهه والحروب كلها ويااه وجان اكثر واحد شقندحي (يشاقه) بجماعتي

محسن : وانت اكثر واحد يبجي بوجهه الله كل يوميه تلوي براسك يمي مثل البزون الماكلين عشاها

ريم : هههههههه لا عمو خطيه بابا حباب

محسن : انتي ياهي منهن

ريم : اني ريمو الحبابه الفقيره اهدأ وحده بنات بابا

محسن : الله يستر منج لعد

حجي طه : دير بالك منها غزالتي البريه هاي اوكف ولك بس لا امها توحمت على جهرتك الزفره وطلعت على اخلاقك بس تسوي دكات بلوادم

محسن : مو اخاف احجي الكاع محظوره

هي وينها مرتك شو لهسه ماشفتها ولو هي مشهودتلها تتلكه الخطار بلدفرات ومكان متقدم ضيافه تقدم عياط وصياح تسمع الواحد عود يله ولك اطلع مصختها يعني طرده بنزاكه ولو الله يسلمها مالها علاقه بلنزاكه ابد

حجي طه : راحت ويه الي راحو

محسن : لا اله الا الله مااتت البقيه بحياتك

حجي طه : ولك عايشه وطلكتها لا والله هي طلكتني

محسن : تفتهم هي هاي جهه ينعاش وياها

رشا .. لا عيني بابا يخبل واحلى من مرته

محسن : هاي رشا اكيد وليش مرته ليش مو امج

رشا .. ماعندي ام

محسن : مبين الشغله صايره بلنعل موو

حجي طه : ههههه كولش شوف جم سنه عايفني وانت احسب شصار بيها

محسن : والله ياخويه مو بيدي كدامك فلتنا بليله ظلمه ربك سترنا طلعنا بجلدنا جان حتى جلد ماضل بينا  الْحٍمَدٍ للـّہ على كل حاال بس كالو سقط صدام كتلهم ليله مااضل يمعود عدل بدل ابد قفلت

حجي طه : انت وين جنت

محسن : شفت ايام اذا اتذكرها گلبي ينخمش خلي يولن المهم استقرينا بلسويد وعيشتنا زينه والحمدلله

حجي طه : لعد فيصل وين

محسن : مقبل يرجع على شنو اعوف السويد وارجع للعراق هناك مكضيها لعب وهوسه وعاجبه الحال مراهق مينلزم

حجي طه : الله يحفظه الك

محسن و: وحسام وينه اكيد بلشغل

حجي طه : والله ماادري راح ويه امه من يوم الاحداث وبعد مشفته

محسن : ولك طه هاي الدنيا طلعت دايستك روحه جيه بدون بريك

حجي طه : اي والله ودوسه معدله

محسن : وهياته التاير مطبوع بوجهك من خرب غيرتك اذا صدك اريد بيوم اشوفك مرتاح ماكو بومه وتفتر

حجي طه : حضي  الْحٍمَدٍ للـّہ

محسن : خلي اروح اتوكل واجيك غير وكت

حجي طه : ابقى الله عليك بعدني ماشفتك زين

محسن : والله اجي وين اروح غير ماعندي غيرك صديق يخليني اكفر بعيشتي

حجي طه : ههههه خلف الله عليك مااحجي شى بعد

محسن : متكدر اجاك ابو غضب يلعب لعب بلساحه

حجي طه : بعدك تصيح ابو غضب

محسن : لتخاف طلع ابني غضب اكشر هم

حجي طه : الله يعينك عليه

محسن : دير بالجن على ابوجن لزمنه زين ليطير

ريم : قابل هو ديج

محسن : لا بومه وسأليني عنه وانتي ام لسان بلذات عينج عليه اعرفج گويه

ريم : دومكم ظالميني هلمره عمو صار وياكم

محسن : ياعيني ياطه مخلف ملاك وين جناحج

ريم : كصيته حتى متجرني منه

محسن : هههههه هاك ام لسان متنكدرين

ارفع الزحمه اني

سليل : اباوع على بابا وجهه تغير وابتسم حسيت ارتاح من اجه عمو محسن الظاهر جانت علاقتهم قويه

يوم بعد يوم وحياتنا تمشي بهدوء الكل عايش وحايرين بالاحداث المتخلص ومره طلع صدام وراح يرجع للحكم ومره مات ومره سافر واشكال الاشاعات الخلت الناس حتى متفكر عدل وسالفه الفلوس سالفه الي طشت المزوره والمطبوعه يعني تايهه ودليلها الله كلمن اله واحنا الفقره النه الله ماشين وياهم نشوف لوين يودونا

رجعت لحياتي بعد سفره كدرت اوكف وارجع اعيش بس احاول اترس يومي حتى ماافكر بيه اما النوم هذا اصلاً فاركني لهذا اذب حيلي بلشغل بس اشتغل حتى انامً

كوه نمت نظفت البيت كله مبقيت شى مسويته حتى بس اتعب وانام من وكت السهر دمرني وصحتي بدت تدهور اريد اتعب اريد اتكسر من الشغل حتى بس انام بعمق عفت الكل كاعد وكتلهم داخله انام

تمددت على ظهري واباوع على السكف مااريد افكر بيه دخيلك ياربي مااريد اشتاقله اي اني ممشتاقه اصلاً مرتاحه احسن مااحرك گلبي وين راح وين اجه واضل افكر بكل تصرف اخاف يضوجه اي سليل حالج هسه احسن بدونه غمضت واني احجي ويه نفسي اني مااحبه اني ممشتاقه اله اني اكرهه غمضت ومحسيت بشى لحد ماشفته بلحلم وهي كاعد بصفي وتعبان وجهه اصفر  وملابسه تعبانه وقديمه ولحيته طولانه يعني تكول هموم والمصايب الدنيا فوك راسه مو سجاد عبالك

وتقرب مني وحضني بلهفه عجيبه تكول امه وحضنها ويهمس بأذني تعبان سليل مشتاقلج

طفرت من نومي عركانه وكوه اتنفس

اريد هوا اريد هوا باوعت على الساعه معلكه على الحايط ساعه ٤ الفجر رشا نايمه

لان بهذا البيت اني ورشا بغرفه وماما وريم وغزل بغرفه هاي الطابق الفوك والجوه بيه غرفه وحده بابا نايم بيها  كمت مسحت كصتي وشلت شعري وجريت الربطه واخذت الراديو ويايه فتحت الباب وصعدت على كيفي للسطح  كعدت بنهايه السطح على طابوك ورفعت راسي للسما بيه عيطه تصعد لله گبل ااااااخ يانار گلبي كامت دموعي تنزل ليش سجاد ليش حتى بلحلم تجيني شتريد مكافي الصار شتريد مني تعبت اختنكت اكثر لزمت الراديو وفتحته وطلعت اغنيه وراها الثانيه وبس اسمع ورافعه راسي واباوع على النجوم الجو بيه بروده واني صافنه وجان تطلع اغنيه لهيثم يوم واني سمعتها لو تكول ملح وانرش على جروحي

‏‎ياناس رحمو بحالي من إيدي راح الًـغـاليُ

‏‎هاجر وماسأل عني وحدي خلاني بوني

‏‎صار الحزن موالي ياناس رحمو بحالي

حطيت ايدي على وجهي واشهك اشهك بلا وعي حسيت بأيد انحطت على راسي فزيت لكيتها ماما نهر حضنتني كمت اشهك بلزايد

نهر : كاافي ماما ولج راح تموتين نفسج معودت الله يهديج كلت هدأت ونست الصار شو جيبي خلي اطفي هذا

سليل : شنسى ماما كوليلي سوالفه غيرته خوفه حبه شنسى

نهر :حقج ماما بس محد يموت وره واحد هاي اني كدامج حبيت وانغدرت وبجيت قابل متت ومشت حياتي وهياتني  الْحٍمَدٍ للـّہ كولشي مابيه

سليل : اي مامتت بس روحي ميته گلبي ينزف دم اني عايشه بس حتى اكل واشرب بس محاسه لا بضحكه لا بمشاعر اني جسد وبس ماما اخذها لروحي وراح كمت على حيلي احجي بأعصاب واروح واجي بلسطح وماما كاعده تباوع عليه ومدمعه عيونها

اخذ كولشي حلو بيه وراح وفوكاها ميخليني ارتاح شيريد مني اله يموتني يله يرتاح

نهر : اسم الله امي شنو هذا الحجي

سليل : كعدت كبال ماما ولزمت ايدها ماما فدووه ابوسها لايدج جاوبيني من راد يسافر شكال عني شلون انطاه گلبه وسافر راح اتخبل حتى مكلف نفسه يودعني شلون كدر ماما احلفج بأعز واحد لقلبج بداعت بابا عندج كوليلي شصار

نهر : اووف ولج يمه انسي وعيشي وكافي مو گعد تمردين گلبي

سليل : ابوسها لايدج ماما احجيلي

نهر : كاافي تبجين من اشتعلت سجاد على هاي الدكه

سليل : احجيلي فدووه

نهر : شكول يابنتي

سليل : شلون كدر يسافر بدون ميودعني

نهر : اوووف ياربي ودعج يمه وراح

سليل : شلون واني مشفته جرت نفس واحس كوه تطلع الكلمة منها

نهر : اجه قبل بيوم بليل وانتي نايمه ترخص مني طب باس راسج وطلع

سليل : علت شهكتي اكثر وكتلها شفتي

نهر : اي جان الباب مفتوح مااعرف شكال بأذنج وباس راسج وطلع والله لو تشوفين حاله يبجي الكافر

سليل : شنو مجبوريته شو اني احبه وشاريته على شنو معذبني ومعذب نفسه

نهر : يعرف بروحه راح يأذيج هو كم يوم بقى وياج ركصج عاد يبقى العمر كله شاف نفسه بدا يفقد اعصابه وخانكج وغيرته كعد تأذي خله و انهزم

سليل : خلي ماطول تنازل عني بعد مااريده

نهر : ماما تكولين مااريده ومااحبه ونسيته واغنيه وحده خلتج تكطعين نفسج من البجي اذا بيوم تردين تعرفين نفسك نسيتي هذا الشخص او لا بس اسمع اغنيه تلامس واقعج وياه اذا اتذكرتي وبجيتي اغسلي ايدج بعدج تتذكري وعنده شى بداخلج

سليل : شسوي اذا حتى بلحلم يجيني

نهر : اقري ايات قبل متنامين ومبقى شى واداومين بلكليه حياه جديده وناس جدد وكولشي راح يتغير

سليل: والي انحفر بگلبي شيغيره

نهر : كومي امي غسلي مبقى شى على الاذان توضي وتوجهه لرب العالمين يبرد نار گلبج بجاه نبيه

سليل : عوفيني هنا ماما شويه تعرفين بيه احب السطح وكعدته اصلاً خلصت نص عمري بلسطوح

نهر : اي المطيرجيه مو مثلج ههههه

سليل : ابتسمت وحضنتها اووف كل مااختنك الكاج كدامي

نهر : ليش هو اني جايني نوم بس سمعت طكت باب السطح عرفت انتي

سليل : شسوي اختنكت مالي غير هذا المكان

نهر : يله بنتي امشي ننزل تسمعين اكو طلقات بلجو ليروح يصير قدر

سليل : والله كولشي يصير بعد سليل الفگر مفصل عليها تفصال

نهر : الرحمن عليج من الفگر والمصايب يله امشي ننزل بداعتي

سليل : نزلت وتوضيت وصليت ونمت قررت امشي حياتي حتى لو اشتاق ملازم انهزم

مرت حياتنا عاديه بابا بلمصرف وعلى باب الله واحنا شغل لو كاعدات نسولف ماكو شى جديد بس هوا الحنين يداعبني گلبي كل فتره وماانهار وراها البنات رجعو للدراسه رشا هلسنه سادس اعدادي وريمو رابع اعدادي وغزوله خامس ابتدائي جانو يرحون ويرجعون سوه بابا طلب من البنات بعد مينزعون الحجاب عبالهم من نرجع من الكوت ينزعنه ويرجعن مثل قبل بس هو رفض لان يخاف علينا ريم اعترضت ومرادت بس بالاخير قبلت تأخر الدوام الكليات بحكم الظرف والاوضاع حسيت روحي فگر كل مااريد اداوم يصير شى وتروح عليه السنه مصيبتي ضاعت سنتين وخايفه هلمره تضيع

حجي طه : بابا سليل وينج نزلت اركض على صوتهم

هااا بابا محتاج شى انطاني فلوس حطهم بيدي استغربت هذني مال شنو

حجي طه : اطلعي اشتري هدوم ويه عمتج مبقى شى على دوامج

سليل : بس انت ماعندك

حجي طه : لو اعرف اشتغل ليل نهار حتى اجمعلج لتهتمين فدوه الج كولشي كافي ضحيتي بسنه من دراستج حتى نروح للكوت وقبلها علمود خواتج كملي مستقبلج بابا الله يوفقج

سليل : دنجت وبست ايده حسيت بحماس حلوو واخيراً راح اشتري واحس بشعور وحده تحضر لدوامها ومستقبلها

رحت ويه ماما للسوك واشتريت كم شغله

حسيت بتغيير ولو بسيط بنفسيتي

داومت وره كم يوم اول شى سويته مخليت اي احد يتقرب مني مااريد لا صديقات ولا شى مابيه حيل اسئله واجوبه مااحب احد يدخل حياتي حتى لو يسموني المعقده

من اول يوم حسيت دراستي صعبه مو مال اتهاون وياها

جانت الجامعه التكنلوجيه حلوه والي بيها مرتبين

رجعت للبيت ومر اسبوع هدوء وبيوم كاعده اگلب بلملازم ومدنجه تقربت مني بنيه رفعت راسي باوعت عليها جانت حلوه ومرتبه تفضلي

انتي مو سليل بت عمو طه

سليل : استغربت هاي منين تعرفني

اي اني منو انتي

معرفتيني

سليل : العفو ولا صغراً بيج لا معرفتج

شبيج سليل صدك هيج اني متغيره ومعرفتيني اني جنات بنت عمج جعفر

سليل : وكفت على حيلي انصدمت ماادري احضنها اخاف مثل قبل خشم ومتكبره لان اخر سنين حيل ابتعدت عنه وصارت ويه بيبيتها بس هي عبالك حست بترددي وهي بادرت وحضنتني

جنات : والله مشتاقه الكم هوايه

سليل : ولج هاي شصايره تخبلين ومتغيره حيل

جنات : بس انتي ممتغيره رأسن عرفتج شخبارج

سليل :  الْحٍمَدٍ للـّہ اداومين هنا

جنات : اي مرحله اولى هندسه كيمياوي

وانتي

سليل : اول هندسه مدني

جنات : ليش شو اول

سليل : بسبب الظروف تركت

جنات : عادي تعوضيها شلونهم البنات وعمو وعمه

سليل : كلهم بخير وين صرتو اختفيتو

جنات : عمو علي اخذ خاله وحسين ونورس وبيبي وسافرو خاف من الصار وانهزم

سليل : وليش مأخذوج وياهم

جنات : عادي شمروني بيت جدو اهل امي وهمه مقصرو صح مشلوع گلبي يمهم بس على الاقل سمحلولي اكمل دراستي

والله مشتاقه لريم والبنات

سليل : وهمه هم اكيد مشتاقين تعالي ويايه للبيت راح يكيفون بيج

جنات : اخاف اسوي احراج

سليل : يمعوده يااحراج تعالي اني عندي بس محاظره وحده وانتي

جنات : اني هم نكملها ونروح

سليل : بوكتها كملنا واخذنا تكسي حتى نرجع من وكت لان ابو الخط يتأخر اول مدخلت جانت عمه تسوي غدا وبنفس الوكت تلف گبه طبيت بستها وكتلها عندي مفاجأه الج خطار متتوقعي

نهر : هسه ماما اغسل ايدي واطلع جان اطب بنيه باوعت عليها وجهه مو غريب

جنات : شلونج عمه اني

نهر : لتكملين عرفتج بنت الغالي تعالي حبيبة گلبي جنات يمه گلبي شكبره صار بدخلتج جنه جعفر دخل عليه

كيفت ماما بجيت جنات وبقت حاضنتها وتبجي وتبوس وتشم بيها ممصدكه شافتها

شوي وطبت العصابه وهوستها

ريم : هاي منو ام كفشه

رشا .. اشش عيب لتسمعج بلعكس كولش حلو البرم (كيرلي) مال شعرها

ريم : جنه سيم مواعين وين حلو خلي ناخذ منها احسن منشتري  من الدكان

رشا .. اسكتي اندارت علينا واجت تسلم عرفتها مباشره هي اجت بلهفه علينا استحينا نردها

بقينا نسلم ونضحك

ريم : والله وكبرتي وصارت بيج شوفه جنتي شحالج

جنات : هااا ريم بدينا بعدج حاقده عليه

ريم : شعندي وياج قابل غير من وره بيبيتج نعال وسوالفها الغمه

سليل : ريم عيب كافي

جنات : ماكو واحد مأذته بيبي حتى اني مراعت يتيمه وبنت ابنها وشمرتني بيت جدي اهل امي حتى مكلفت تطلب مني عمو علي ياخذني وياهم حالي حال نورس والاضرب خالتي اخت امي مرته هي اقترحت تشمرني حتى اهلها وبيبي انعام ولا اعترضت

سليل : حسيت من جنات متأذيه بيت اهلها شويه وطب بابا

حجي طه : عدكم خطار بابا

نهر : تعال مو غريبه هاي من ريحه الغالي

حجي طه : اباوع بوجهه البنيه

نهر : لتصفن هاي بت جعفر طه

حجي طه : جن گلبي طلع من ضلعي انعصر ورجع لمكانه سحبتها واخذتها بحضني تكول ردتلي الحياه اخويه

سليل : بابا طك بجي كوه سكت ممصدك يشوف بت عمو جعفر بقت ويانا وبينا ضحك وشقى اباوع على بابا وماما طايرين بيها حقهم للعصر وبابا بيده رجعها

ريم : اكولكم مو تحسون جنات ماكله طن نعل بيت جدها يمكن مشغليها سندريلا

رشا .. سندريلا شنو ولج

ريم : شغل وكراب واكل قليل لان عيونها من اتجيب طاريهم تختنك

سليل : اني هم حسيتها ممرتاحه

ريم :عفيه انعال ولا يوم سويتي شى عدل بحياتج حتى اليتيم ماخلص من شرج

رشا .. بس هي صايره حلوه وملابسها راقيه ومرتبه

ريم : يمعوده تلكيهن من الباله (مكان بيع ملابس مستعمله ) غاسلتهن وكاويتهن

رشا .. لا لج اعرفهن مال محلات راقيه

نهر : اني گلبي نار شلون امي تذبها هيج ذبه اخر شى اتوقعه تضحي بت جعفر

ريم : بعد الجنرال انعام ابوها متعرفه من تريد تخبث

رشا .. ضربتها على راسها اشش كافي

ريم : خلي اروح اقرا احسلي وانتن حيرن بجنات

رشا .. لو حسين مجان دوختينا بيه

ريم : هو وينه حسين فص ملح وذاب حتى محاول يطمن عليه كولش مقهوره منه

رشا .. فلت من وكاحتج

ريم : باع منو اليحجي سنو وايت بلهدوء والفقاريه

نهر : كومن كلجن على القرايه وكافي سوالف

سليل : بقت كل كم يوم ترجع جنات ويايه بلخط بلبيت بدينا نتعلم على وجودها جنت اشوف الفرحه بعيون ماما وبابا بشكل مو طبيعي تكول جعفر الكاعد يمهم مو جنات

واجه رمضان الخير علينا جان الي يميز رمضان بابا وجوده بنصنه وشلون يساعد ماما بلفطور لان عدنا دراسه جان ميطلع اله وره الفطور ويرجع بوكت السحور تمنيت متخرجه وعندي شغل واساعده اشوفه سوده عليه شلون مكسور ظهره حتى يوفر الفلس علمود دراستنا عدا همه الجبير كل ميصفن يفكر بحسام

وبيوم جمعه ورمضان ومبقى شى على الفطور رجع بابا وبيده خطار يمكن اخر واحد نتوقع نشوفه بعد هاي المده وهو شعلان

ريم : ولج رشيوه كوومي نايمه نامت عليج طابوكه كوومي

رشا .. يمعوده بعد ساعه للفطور شرايده مني

ريم : لو تعرفين منو هنا

رشا .. منو امج المناضله

ريم : وجع افتحي عيونج

رشا .. كمت وزهكانه ولو بيدي اشرب من دم ريم احجي منو اجه

ريم : مشعول الصفحه

رشا .. منو

ريم : شبسرعه نسيتي شعلان

رشا .. فتحت عيني ممصدكه شجابه

ريم : بابا طالع يتسوك وشايفه بلسوك وجلب بيه على الفطور

رشا .. خرب هذا شجابه الحقنه

ريم : لا لج والله اشتاقيت اتعارك ويااه وانتي تحركي

رشا .. ولج ياحرگ لا عبالج احنا بلكوت احنا هنا بغداد ياترى شعجب بغداد شيسوي

ريم : جلده يحكه ويريد يحترك ويدور علينا علمود هاي المهمه يله كومي غسلي جنج ميت طالع من الكبر بكفاله وامشي نكمل الفطور

سليل : متوقعنه نشوف شعلان وخاصه طلعتنا من الكوت جانت على خلاف وياهم وخاصه هو جان يضوج من بابا

صبينا الهم وحدهم واحنا وحد وبابا جان استقباله اله احسن استقبال وكملنا الفطور وبقو يسولفون بابا وشعلان وريا وسكينه يلوبن

طبو للغرفه كافي ليطلع بابا ويسويلكم هوسه

رشا .. شمسووين هسه

نهر : عيب امي شويه ثگل

ريم : هسه هو منو رشدي اباضه وجاي هو مشعول فد شخصيه مهمه قابل

نهر : فد يوم ينكص لسانج هذا الطويل

ريم : طلعت لساني والله عمه مو طويل شووفي

غزل : ماما ثلل اريد تقريني

سليل : تعاي حبيبتي وانتن حجايه مااسمع

ريم : صار

رشا .. هسه شلون

ريم : شكو تردين انطب عليه وانذبحه لو نبلغ الامريكان ونكول جان ضابط ويه صدام

رشا .. باااع هاي خبالو مو هيج قصدي

ريم : لعد شبيج تلوبين

رشا .. هههههه والله ماادري

ريم : رشاووي وضعج معاجبني من عرفتي مشعول جاي وانتي انگلب حتى وجهج

رشا .. مابيه لتحجين بكيفج

ريم : يجوز الله اعلم

حجي طه : مكتلي شعجب استقريت هنا

شعلان : مو استقرار بس كمت اروح واجي الوضع بدا يتزحزح ويوميه صاير شى عدنا وخفت لنضيع الاول والتالي وخاصه بلتصفيه الدتصير گلت لابوي نبيع وحده من الكياعين ونشتري عماره هنا اسمه سند ومجمدين فلوس بيها لا كل حلالنا بلكوت اخاف يصير شى عدنا هنا مال

حجي طه : زين تسوي عاشت ايدك

شعلان : اني اكو شى واريد اكوله

حجي طه : كول اخذ راحتك

شعلان : متوقعت هيج تستقبلني وخاصه بعد الصار هناك بلكوت

حجي طه : تبقى ابن خالي واكلت من خيركم مستحيل انكر وجودكم اني من الاول ردت اهل مو فلوس يشهد الله وداعت بناتي بس الحظ مكعد وياي وعكس

شعلان : كون مازعلان مني

حجي طه : ولا بگلبي شى كله انسى وهذا بيتك واني اخوك شوكت متحتاج تأمرني

شعلان : والله خجلان منك ومن كرمك واخلاقك وفهمتك غلط اعترف

حجي طه : تصير ياخويه كتلك انسى ولا تفكر هوايه

شعلان : وانت شتحتاج هم موجود وهذا عنواني اخاف يصير شى وان شاء الله ميصير

حجي طه : ان شاء الله هلا بيك بكل وكت

سليل : توقعت جيه شعلان عاديه وراح تروح وينسي ويجوز بعد منعرف اي شى عن اخباره واخبار اهل الكوت بس الحظ صادف ولعب دور بعد كم يوم اجه بابا مخطوف وجهه وكال اجاني طالب خالي عبد الله انطاكم عمره شكد بابا طيب شكد جان عبدالله ظالم وياه هو مقهور ويترحمله

نهر : شلون مات

حجي طه : رايح على طريق البصره طالع رتل وهو ممخفف وكاسر عليهم يمكن خافو منه وضربو سيارته وگالبين السياره عليه

نهر : لا اله الا الله خطيه

حجي طه : جان ويااه صاحبه عااش بس كصو رجليه المسكين

نهر : يمه الرحمن وهسه شراح تسوي

حجي طه : على اساس اروح للفاتحه بس طلعت خلصانه البارحه

نهر : شعجب اجاك طالب وبلغك وهمه بهيج وضع

حجي طه : مو شعلان الغبي من حركت گلبه على ابوه ماخذ سلاح وضارب رتل بله بربج عنده عقل هذا وياريت مسوي شى بس صار مطلوب للامريكان

نهر : صخام بوجهه وتالي

حجي طه : ركضو وراه وهسه مهزوم واجه طالب يتوسل بيه ابقي يمي منا لكم يوم حتى يسفروه

نهر : عفيه طه تره البينا كافينا مو مال نبقي يمنا والنبي اذا لكوه حتى انت ياخذوك

حجي طه : محد يعرف بعنواني ولا يتوقعون راح يجي هنا

نهر : والله كعد تجازف بروحك وبينا هسه احنا ناقصنا بلاوي

حجي طه : لعد اعوفه يانهر بس يلكوه ياخذوه هاي اذا مو حاكموه

نهر : يطبه مرض احد گله يسوي سوايته هاي

حجي طه : كم يوم اسبوع ويروح

نهر : منا لميخلص الاسبوع انجلط اني

حجي طه : لتخافين الله ويانه يبقى ابن خالي

نهر : عفيه گلب شلون بيك انت

حجي طه : شوف منو التحجي الي گلبها ارهف من گلبي لتكولين للبنات شى اجه خطار يمنه فتره ويروح راح انومه بلغرفه مالتي واني انام بلهول

نهر : خوش والله وكت مرحنا عدهم دخيل هو اكثر واحد جان يريد يطردنا وهسه هو دخيل عدنا اااخ من الدنيا من تفتر

حجي طه : هااا ولج صايره تتشمتين

نهر : لا والله ياخويه بس صافنه على الدنيا شلون بين يوم وليله الكاعد ويفرك بلسبحه ونافخ ريشه اجه دخيل عند الي نفخ روحه عليه الك بيها اراده ربي

حجي طه :  الْحٍمَدٍ للـّہ على كل حاال هسه مثل ماكتلج البنات مااريدهم يعرفون

نهر : صار الله يستر ويعدي الاسبوع على خير

سليل : اواخر شهر رمضان والصيام تعبانين منه رجعنا ميتين عطش دخلت ويه دخول البنات

ريم : ولكم ميته عطش شوكت الفطور

رشا .. اني جوعانه البارحه متسحرت زين اكلتي التمن واللبن كله ام بطن ولا حسبتي احسابي

ريم : يمعوده اذا انتي تنبل مال نوم اكعدج وهسه وهسه دفرتج كم مره وماكمتي

رشا .. واني اكول رجلي بيها زراك اثاري انتي اكو واحد يكعد واحد هيج شوو تعالي وركضت وره ريم وجريت شعرها وعاطت

والله اذا معفتي شعري بعد من اكعدج اذب دولكه مي على راسج عوفيني

نهر : اششش صوتكم

سليل : خير ماما شكوو

نهر : شعلان هنا

ريم : شعنده مشعول هنا مصار ١٠ ايام من جان

نهر : وراح يبقى اسبوع

رشا .. لطمت على صدري هذا الوغف مال صابون راح يبقى على گلبنا

نهر : ليسمعج ابوج ويسويج صابون رگي

ريم : ههههه واني اغسل رجلي بيج

رشا .. كفختها على راسها اشش لج انتي الثانيه

عمه الله عليج ليش اسبوع هنا

نهر : ماادري وابوج استقبله وسدن الموضوع وشويه صوتكم وعركاتكم عيب منا لسبوع اريد هدوء تام

ريم : لازم منتنفس مو

نهر : محد كال لتتنفسين بس ضبي لسانج

رشا .. اني عندي بكلوريا اريد اقرا ومالي خلك لاحد

سليل : حسيت وراه شى من عيوون ماما المتوتره بس مردت اضايقها وعفتها على راحتها

مر يومين واحنا حتى مشفناه بس نسمع مرات صوته من يحجي ويه بابا وهم كلام ممفهوم حتى بابا مطلع للشغل حتى ليتركه باجر العيد وملتهيات نسوي گليجه وماما خيطت لكل وحده دشداشه كالت اخاف عيب تلبسن بجايم كدام شعلان رغم مشفناه بس كالت اخاف يعايدكم

ريم : واني شعليه بمشعول هم غثيث وهم مكروه وهم خبيث وهم حارمني اعيط واتعارك بالبيت وتعالي البسي دشداشه وكل شويه من اكمز لازم ارفعها

نهر : وشعندج مكمزه بنتي انتي كبرتي

ريم : راح نبدي الموشح الديني كبرتي ولازم تعقلين وتثكلين البنيه زينتها العقل والهدوء موو

نهر : ماشاء الله حافظه الكلام كله

ريم : اذا صبح وظهر وليل ينعاد شلون مينحفظ واذا تردين امتحن بيه اخذ ١٠٠

نهر : وشنو الفايده متسمعين الكلام

رشا .. عوفيها عمه هاي وحده خبله ميفيد بيها جنها عبسي بس تكمز هي وكفشتها

جان تركض ورايه ريم اني عبسي ولج اني

كمت اركض واضحك وصعدت سريع بلدرج للطابق الثاني

سليل : ههههه وحدتهن شطولها خرب ويركضن

نهر : ولجن صوتجن خزيتنا

جان تعيط ريم عيطه هزت البيت وركضنا مثل المخابيل حتى بابا طلع

صعدنا لكينا رشا مزركه ولا ايد ولا رجل واشتغل عياطنا

رشا .. اني رشا طه ياسين حسين الغزاله الثانيه من غزلات طه اعرف بيكم تعرفون كولشي عني من طفولتي المعذبه لحد هاي اللحظه بس الي متعرفوه بأن اني اكثر وحده كتومه تحملت الم لدرجه گلبها مورم من القهر والتفكير يمكن متشوهت مثل خواتي بس داخلي تشووه تماماً لدرجه احس كل الناس موزينه وحقودين وكلمن يركض لمصلحته

اليوم بسبب الدراسه والتعب سادس بكلوريا وعدكم الحساب صار اجهاد عليه ومنا ريم وخبالاتها ركضت حيل وصعدت بكل طاقتي بس الي صار فاجأني اني وين فتحت عيووني وايدي مربطه اجهزه شصار

سليل : شالها بابا لرشا ومباشره صار شعلان كدامه

شعلان : شصار طه

حجي طه : رشا مااعرف شبيهه

شعلان : اجي وياك

حجي طه : وين طالع يمعود

شعلان : هاي شبيك طه امشي بسرعه مو وكت سوالف

نهر : اجي وياكم

شعلان : اشمري شى عليها بسرعه

سليل : حاضنه ريم وابجي وغزل خاتله ورايه وهم تبجي ومنعرف شديصير

نهر : سياره شعلان موجوده مجودره بلكراج رغم اعرف مخاطره نطلع بيها لان هو مطلوب واكيد سيارته مسجله عدهم بس من كثر ماضل عقل براسنا طلعنا بيها مو مال ننتظر تكسي وشعلان يسوق بسرعه مو طبيعيه

وصلنا للكندي ودخلناها للطوارئ

وركضو بيها

وحطوها بلسديه وكعت الربطه من شعرها شالها شعلان

نهر غطي شعرها زين

نهر : اي اي وابجي

شويه وطلع الطبيب

وبقى يسألنا عن وضعها

حجي طه : هي من جانت صغيره سويت عمليه لگلبها بس جانت حيل صغيره

الطبيب : رغم گلبها وضعه زين بس يبقى مسوين الها عمليه و الاجهاد يسبب عدها حاله اغماء حاولو متعبوها ودائماً لتسوي حركه مفاجأه يصير ضغط على عضله القلب وعلى الشريان التاجي الي يضخ الدم وضعها هسه استقر لكن تابعو حالتها اني ردت فعل مو طبيعيه الافضل تراجعون طبيب اخصائي

شعلان : لعد انت شنو سگافي (خياط احذيه)

الطبيب : شنو هذا الحجي اخي

شعلان : انت مو طبيب غير تعالج حالتها وضعها

الطبيب : كلمن واختصاصه وحالتها مو اختصاصي

شعلان : المن حاطيك بلطوارئ اذا متعرف شبيهه لو موديها لمضمد جان عرف احسن منك

حجي طه : كاافي شعلان هذا هو رحمه الله والديك

نهر : نكدر ندخل

الطبيب : خلي يخلص المغذي واخذوها ماعدها اله العافيه وها عود ودوها مضمد

شعلان : والله يفتهم احسن منك ابو الاختصاص

حجي طه : يمعود اسكت

شعلان : والله لو منك لا اركع راسه بلحايط كل هلوسه والبنيه جان ماتت ويكول ودوها اختصاص

نهر : غير كلمن واختصاصه

شعلان : لعد اذا تعرفون هيج المن جبتوها هنا جان رحنا مباشره وفضت

حجي طه : هو لو اكو طبيب هسه كاعد مااوديها بس خلي تكوم بلسلامه اوديها احسن طبيب

رشا .. فتحت عيني وعمه وبابا وشعلان فوك راسي

نعسانه بابا

حجي طه : ياروح ابوج هسه يكمل المغذي ونرجع للبيت

رشا .. كول لريم لتركض ورايه كله من وراها

شعلان : على اساس شلون فقيره انتي

رشا .. اهووً هم انت

حجي طه : كافي بابا عيب

نهر : يمه شتحسين

رشا .. اريد انام

شعلان : طه اني بره كملو ونطلع

حجي طه : لتتحرك شعلان

شعلان : شبيك طه صغير كدامك

رشا .. اخذوني ورجعت وبلطريق وكف شعلان مااعرف شجاب بس اسمع بابا يهوس عليه لان تسوك لحد مسمعته يكول

هاي للوكحه الي تحب الجاي طبعاً بابا مفهم شنو قصده بس اني فهمت رفعت راسي لكيته رافع تك حاجب اني باوع عليه بنظره كأنه اكوله متضحك تره ودرت وجهي

اول مدخلنا للبيت اجت ريم تركض تبجي

ريم : بعد والله مااركض وراج والله مااضربج وانتي نايمه بس لتوكعين

حضنتها اششش ريمو مابيه شى بابا جان يسد الباب وماما تنزل الغراض جان يكول بصوت ناصي

شعلان : الي يشوفجن هسه يكول ياعيني على البراءه تنكطن تنكط فقاريه

ريم : باوعت عليه وهمست بصوت حتى ميسمعون كتله مبين رجليك طابت وتريد تشرب جاي وجان تغص رشا من الضحك نريد نسكتها ماكو

ريم : هاي منين يطفوها يمعوده فضحتينا

نهر : شبيج رشاوي

رشا .. هههههه مدمعه واضحك مابيه عمه

شعلان : اكص ايدي اذا هاي مريضة عمي اصحى مني

نهر : اسم الله عليها من المرض خمسه بعيون الحساد

ريم : قصدج بعيون شعلان ههههههه جان تكفخني عمه هاي شبيكم كل شويه كافخيني مو راس صاير ميز كل شويه مضروبه

حجي طه : ادخلو بابا ليش واكفين

سليل : حضنت رشاوي وبستها واخذتها للغرفه عرفت من عمه گلبها بدا ينطي انذارات مو طبيعيه مبين حتى الي متشوهت بينا وشكلها طبيعي داخلها مشوه

صبحنا العيد وعايدنا بابا وكل وحده حط عيديه بيدها

وبوسنا اول مره احس العيد هيج حلوو بوجوده جنا طايرين ممصدكين بابا راح جاب گيمر وكاهي وكعدنا گلنا نتريك داير مدايره وطلب من شعلان هم يكعد لان مكدر يتريك ويااه وحدهم لان كاال هذا اول عيد ويانه لان القبله جان هستوه طالع وبلكوت وظروفنا مدهوره

كعدنا ناكل والكل مرتاح رغم وجود شعلان بس مركزنا ويااه ابد ومعايدنا لان كال بابا ابوه ميت ميصير

شويه وخلصنا ومد ايده ينطينا عيديه وجنت اول وحده كدامه لان سليل بلمطبخ

رشا .. هااي شنو

شعلان : عيديتج

رشا .. احد كالك الك اريد عيديه لو محتاجه

حجي طه : : ميحتاج شعلان

شعلان : مو قصدي تره لان اني اكبر منكم واحنا عدنا الصغار بناتنا ننطيهم عيديه اول يوم العيد

رشا .. بناتكم مو احنا لتنسى احنا ناس غرب عنكم والدليل انت اول واحد معترف بابا هو ابن رازقيه ورفضته حتى دخيل عدكم

حجي طه : رشا كافي

رشا .. ليش بابا مو حجي الحق هذا شكراً شعلان ممحتاجين لفلوسك خليهن الك

عفته وصعدت

سليل : طلعت من المطبخ لكيت الوجوه مكلوبه سحبت ريم من ايدها وشاورتها شصار

ريم : اختج ذبت عنقودي على مشعول طشرته وصعدت

سليل : شسوت ليش

ريم : اكولها عنقودي وحجيت لسليل

سليل : والله زين تسوي

ريم : اروح اذب كم صاروخ اساعد بيه اختي

لازم أدي الواجب

سليل : سحبتها من ربطتها تعااالي امشي اصعدي فوك صوت مااسمع

ريم : ولا عدكم واجب الضيافه ناس متعرف تكرم الضيف

سليل : اصعدي وره اختج لا خوش اراويج الكرم

ريم : صعدت يم رشا وكعدت بصفها واحسها تريد اطك

ليش هيج كلتي جان كلتي بس مااريد وشكراً

رشا .. مااحب واحد ينضر النا بلعين الصغيره وهذا شعلان اول واحد مستصغرنا

ريم : هو مكروه وشايف نفسه بس انتي شنو ضربتي بهاون ولج ضل صافن

رشا .. يطبه طوب عباله ينطي فلوس عود هو زين موزين من عدنا مبقي بيتنا وهم صوج بابا لو منه اطرده طردت الجلب

ريم : شتعرفين ابوج ميشيل گلبه من واحد

رشا .. خلي انام نعسانه

ريم : والله موتيني بس تنامين

رشا .. لو تسكتين لو تنزلين وتسدين الباب

سليل : كعدنا نسوي الاكل وماما احس بالها مشغول احجي وياها كوه تجاوب

شبيج ماما

احجي الله عليج

نهر : الصبح من رحت اجيب معجون احتاجيت نسيت اوصي ابوج شفت انوار

سليل : ياانوار صديقه ماما

نهر : اي هي وبدون ما اسألها كالت كلها مده وترجع سندس

سليل : ليش هي وين

نهر : بالاردن

سليل : شعدها وياها حسام لو وحدها

نهر : وياها موجود

سليل : وليش خايفه

نهر : هم راح نرجع لطلايب امج ومصايبها وتريد البنات نسيتي سوايتها الاخيره

سليل : ذاك وكت وهذا غير وكت يوم لتخافين شتريد تسوي والله انبلغ عليها حزبيه ومااخليها تاخذ خواتي عيشتني ايام سوده مصخمه من وراها

نهر : ان شاء الله مترجع

سليل : طولت اقامه شعلان ومنعرف السبب وبيوم راجعه من گليتي جان نهايه شهر ١٢ والجو بارد لكيت سياره هستوها تطبك بلباب ونزل واحد منها واشوفه سيف هو شافني ابتسم ابتسامه خفيفه وكال السلام عليكم

استحيت مااجاوب كلت وعليكم السلام وفتحت الباب عرفت جاي علمود شعلان

سيف : ابوج موجود

سليل : اي تفضل

سيف : سليل

سليل : انداريت عليه وكلت نعم

سيف : شلونج

سليل :  الْحٍمَدٍ للـّہ تفضل ادخل

سيف : بس لحظه

سليل : خير

سيف : محتاجه شى بكليتج عندي عرف هوايه بيها

سليل : شكراً مااحتاج

سيف : اكو شى مضوجج مني

سليل : لا ليش واصلاً شنو الي بينا حتى اضوج او مااضوج تفضل اكيد ينتظروك

ردت انهزم من نظراته الي جانت تاكلني مبين لهفته حتى يحجي ويايه واني اصلاً مهتميت ومااريد يتقرب مني ولا حتى يحجي ويايه

اليوم كله متوتره لحد مطلعو اختنكت وجوده يذكرني بغيره سجاد منه لهذا مردت حتى اتذكر شى

رشا .. شعلان طول وجوده عدنا صار شهر رغم منشوفه بس مقيد حركتنا بلبيت وصوتنا وتصرفاتنا لازم كولشي بهدوء

وبيوم راجعه من المدرسه وتعبانه وامشي وريم وغزل ورايه يمشون وممركزه لان ممجاوبه بالامتحان رغم شكد تعبت بيه

ماادري سياره تحومي ورايه وبيها اثنين شباب رفعت راسي باوعت على السياره لان شخطها وفات ومهتميت وصلت للباب شفت شعلان واكف وصاير نار ويريد يوكف الولد حتى يتعارك وذولاك طفرو اني اصلاً مهتميت لان متعلمه على هاي السوالف مال مراهقين تالي وكت

صار بوجهي

شعلان : انتي ليش متنزلين عيونج من تمشين

رشا .. باوعت برود وكتله وانت شعليك

شعلان : شنو شعليك مشفتيهم شلون يباوعولج

رشا .. شفتني بادلتهم

شعلان : غير العب بيج طوبه اذا تسويها

رشا .. تقربت منه وعيني بعينه وكتله يعني ممسويه شى غلط وامشي بدربي المن بعد تعيط وتحاسبني وانت منو تحكمني وتلعب طوبه بيه

حسيته توتر وكال بصوت عالي

شعلان : ابن خال ابوج وانتم بناته

رشا .. حيييل ابن عم الخياط الخيط بدلت العرس

ريم : ههههههه ودك عيني دك

شعلان : راح اركع راس براس

رشا .. جرب مد ايدك وشوف

جان نسمع صوت عمه

نهر : ليش بلباب بنات ادخلو

رشا .. باوعت عليه وكتله بصوت ناصي من تدخل فيما لا يعنيه لقي ما لايرضيه لتدخل بحياتنا ابد ولتنسى انت دخيل كلها ايام وتروح

ودخلت وعفته بلباب حتى منداريت اعرف بيه واحد مخبل وتحكم بلكل بس ميعرف مو احنا الي يتحكم بينا

سليل : كاعده اقرا بعد شويه عندي امتحان كاعده على الشمس الجو بارد جان اسمع واحد يكول السلام عليكم رفعت راسي واشوفه سيف شنو اريد قطره دم تمشي بدمي ماكو من الخوف مجاوبت

سيف : ردي السلام على الاقل

سليل : وعليكم خير شو هنا

سيف : اريد احجي وياج

سليل : هنا كدام الطلاب متخاف على سمعتي

سيف : على كيفج سليل تره ممسوي شى غلط

سليل : عفيه روح منا زحمه

سيف : كلمتين واروح والي يسألج هذا منو ابن خال ابويه واجه يسلم

سليل : عدنا بيت وتكدر تحجي ويايه بيه وكدام اهلي

سيف : اسويها لتخافين بس اجيت افهم شى منج وراها تلكين يم طه

سليل : بسرعه شتريد عندي امتحان

سيف : على كيفج شبيج ترجفين

سليل : احجي عفيه مالك دخل بيه

سيف : والله نسيتيني شردت احجي صار يومين احظر الكلام راح اختصر واكول الج اني رايدج على سنه الله ورسوله تقبلين

سليل : بلعت ريك واحس الخوف تملك جسمي كله كتله لا حتى بدون ماافكر

سيف : ليش لا اني مرايد شى موزين منج واذا على دراستج اني اخليج تكمليها وراح نعيش بغداد واذا تردين قريب بيت اهلج اكعدج حتى مو بعيده عن خواتج والتردي يجرالج اني

سليل : اباوع عليه كاام يمسح كصته رغم الجو بارد

سيف : اني احبج سليل وتعلقت حييل بيج ومن يوم مارحتو من الكوت ورجعتو هنا لحظه مغبتي عن بالي ومستحيل الكه وحده مثلج تصلح تكون شريكه حياتي

سليل : دنجت وكتله اني مااصلح لاي احد لان مااريد اتزوج غمضت مجرد فكره يلزمني سيف خلت جسمي كله ينتفض ومعدتي تگلب زين ليش لعد سجاد من يلزمني اتقبله ومو بس اتقبله اذوب بيده

اسفه طلبك مرفوض

سيف : فكري مخسرانه شى ومستعد حتى لو فتره خطوبه تتعلمين بيها عليه يله نتزوج

سليل : مااريد

سيف : واني مراح استسلم راح ابقى انتظر بيوم ردج

سليل : مراح تسمعه ابد

سيف : اسمعه سليل ومتأكد اسمعه مااعطلج على دراستج الله يوفقج

سليل : كاام من عندي واني حتى القريته نسيته وحيل اختنكت

طبيت للامتحان ومااتذكر حتى شجاوبت

ورجعت للبيت ومحجيت لاي احد وبقيت الشغله وكأنها مصارت بس سيف توقع مني هذا الشى لهذا اجه تقدم رسمي واتفاجأه بابا يكولي وافقي

يتبع .....

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الثامن

تعال اشمر حجايه و كول مشتاك

لتحسسني يمك مالي قيمه

لتخليني اتاني و جرحي مفتوح

مثل فطر الحياطين القديمه

الناس التفتهم ما جرحت هواي

بس المشكله الناس الغشيمه

هذوله القبل ما عرفوا يحبون

اشو صارت قصص حبهم عظيمه

ولأن ضميت جرحي و ما ندلوا

وصلوله بطرق مو مستقيمه

اجو كبالي كعدو مثل اليبوس

ابنه و يحظنه كبال اليتيمه

سليل : صاحني بابا وكعدني بصفه وماما نهر يمه عرفت اكو شى مو طبيعي

حجي طه : شوفي بابا راح ادخل بلموضوع مباشره حتى مااتعبج اعرف عندج دراسه

سليل : كووول بابا خير

حجي طه : اجاني اليوم سيف ابن خالي خضير وطلبج للزواج اني منطيته اي كلمة لان الكلمة الاولى والاخيره الج وهاي حياتج

سليل : دنجت مختنكه كوه اجر النفس

وساكته واسمع الي يحجي بابا

حجي طه : باباتي لا عبالج اني متعاجز من لكمتج او تكولين ابويه يريد يخلص مني انتي بلذات معزتج تختلف عن خواتج انتي اول فرحتي بلدنيا لهذا اريدلج الزين وسيف بوضعه وحياته هو الزين كله

هو كال اني جاهز لكولشي اطلبه سليل بس توافق

سليل : رفعت راسي وكتله وانت شنو رأيك بابا

حجي طه : والله يابنتي الشاب خوش شاب استاذ جامعي واخلاقه ينحلف بيها ومقتدر والاهم متمسك بيج يعني ماكو عيب او شى يخليني ارفض وارجع واكول القرار بيدج

سليل : جريت نفس وباوعت عليه اني مااريد اتزوج

نهر : ليش متردين كل بنيه مصيرها الزواج وانتي هسه بعمر تكدرين تتزوجين

حجي طه : على كيفج نهر وياها خلي نفتهم

نهر : ليش نغالط نفسنا اني وانت نعرف ليش متريد تتزوج

سليل : شنو قصدج ماما

نهر : قصدي تعرفي زين التردي راح كافي تضلين العمر كله تخلصين عيونج عليه وتاكلين بروحج اني ماابقى اتفرج عليج وانتي تذبلين كدامي

حجي طه : على كيفج يانهر

نهر : ياعلى كيفي طه مكعد تشوف وضعها لا ليلها ليل ولا نهارها نهار واذا كعدت وحدها بس تبجي واكلها قلان وضعفانه وجهه ليمونه صاير تكول ميت الها واحد احجي وميفيد حرت شسويت وياها تاليها بطلت بجي كامت بس تتصفن زين الى متى تبقى بهذا الحال ولج ماما راح يشوف حياته اني شوفي حياتج كافي ارحمي نفسج وارحمينا والله اني وابوك ميتين عليج

سليل : دنجت متوتره وافرك ايد بأيد اووف وبقوا يحجون يمكن فوك الثلث ساعه لحد مرفعت عيني وسألتهم خليتهم يصفنون

زين هو يدري اني مطلقه

حجي طه : مطلقه شنو

سليل : شبيك بابا نسيت اني مطلقه

حجي طه : انتي اصلاً متزوجه بس بالاسم وبسبب الظروف الصارت

سليل : بس هو ميعرف ولازم يعرف يجوز ميقتنع يجوز يلغي الشغله كلها

نهر : نكول اله على كولشي

سليل : وتتوقعين يصدك وخاصه من اكول اله سنه اني متزوجه وبيته وسكتت مكدرت اكمل بس حسيتهم افتهموني اني جنت اقصد سنه كامله بيته وملمسني

حجي طه : هم صحيح لازم يعرف

سليل : من يعرف ويقرر عود اني افكر هسه من رخصتكم اروح اكمل قرايتي

طلعت وعفتهم وحدهم متأكده سيف راح يرفض وخاصه اني متزوجه محكمه يعني شغله رسميه اكيد راح يصير عنده تحفظ بلشغله

عفتهم وكعدت اقرا وبدا الهدوء يرجع ومحد فتح الموضوع اما شعلان بعده بلبيت بس العرفته بعد يومين يطلع ليش اجه وليش راح يروح منعرف

رشا .. كاعده اقرا بليل تعبت عيوني راحت من القرايه ودكني الجوع باوعت ساعه وحده بليل

ثلل تاكلين

سليل : بربج اكو واحد ياكل ساعه وحده بليل قبل شويه تعشينا

رشا .. يمعوده جوعانه والله اكل منا اقرا منا اجوع منا تكول محطه تصريف

سليل : انزلي سويلج لفه واكلي

رشا .. سويلي انتي حبابه مابيه انزل

سليل : بله اسكتي خلي انام احسن

رشا .. لا صدكتج راح تنامين خلي انزل اسويلي لكمه قبل متسدين شهيتي

نزلت على كيف الكل نايم وفتحت المطبخ والثلاجه لكيت بيها كباب عروك باقي من العشا هو بارد جريت خبزه وسويت خيار وطماطه وصفنت شخلي بعد بيها هااا طرشي وخضره ايي لكيت شوي بتيته والله لفه صارت قنبله لفيتها وسويت جاي صبيته سمعت طكطكه مديت راسي لكيت مشعول كاعد بلحديقه يدخن وصافن هذا شعنده منايم اووي شعليه بيه

كعد اصب الجاي ابتسمت واتذكرت من حركته سحبت الجاي وتربعت بلكاع بلمطبخ وكعدت اكل جان اسمع صوت فوك راسي

شعلان : والله فزيت هاي شجابج هنا

رشا .. احجي والاكل بحلكي لكمه شكبرها وانت شعليك مطبخنا وحره بيه جعت واجيت اكل عندك اعتراض

شعلان : شميت ريحه جاي اكو راسي يوجعني

رشا .. اي اكو اصبلك

شعلان : اذا مصارت زحمه عليج بس كملي اكلج بالاول

رشا .. اذا انت وكفت فوك راسي شلون اكدر اكمل وابلعها للكمه

شعلان : على اساس انتي مقصره شويه وايدج اطب ويه اللفه

رشا .. وجان اغص بلجاي واكح احس الاكل طلع من خشمي وجان يركض وينطيني مي شربته وجريت نفس

شغلان : على كيفج المن هذا الاستعجال راح اكل من لفتج

رشا .. والله من وراك حاط عينك على اللفه اكوم اصبلك جاي حتى اخلص

شعلان : انتي ليش هيج

رشا .. باوعت عليه شنو قصدك

شعلان :  صوتج عالي وتتعاركين حتى احترام للمقابيلج ماكو لتنسين انتي بنيه ولازم البنيه يصير صوتها ناصي يعني انتي لو عايشه ويانه وهيج تحجين يمكن اكسر سنونج بحلكج

رشا .. لو تعرف شنو لو وهذا الشى ميصير وثاني شى انت شعليك اتعارك اهوس هذا شى راجعلي وانت جاي تنتقدني وانت اصلاً ٢٤ ساعه تتعارك ويه ذبان وجهك

شعلان : اني رجال وهذا الطبع سائد هوايه بس النسوان لازم اثكل وارزن واهدأ وخاصه بنات بغداد معروفات ينصن صوتهن حتى يبينن نازكات

رشا .. وشبينه يمه كل مره وكلت بنات بغداد احد كالك لازمين سجاجين بلشوارع ونذبح الناس

شعلان : يابه كون فد مره الزمج واكص لسانج

رشا .. صبيت الجاي وحطيته على الكاونتر وكتله تقضل اشرب جايك ليوكع على رجلك جان يتقرب مني وبصوت ناصي كال

شعلان : اعرف بيج بوقتها وكعتي علمود تاخذين حق اختج وضليت اسبوعين اتعالج من الحرك وكل مااشوف رجليه شلون مصموطه اكول يجي يوم واصمطج

رشا .. وهسه شتريد اتذب هذا الجاي عليه يله سويها

شعلان : ههههه شكد گويه

رشا .. اروح انام كطعت شهيتي

شعلان : تعاي اكليني كرصه شكبرها حايره شحاطه بيها بلعتها تكول لكمه وتكول سديت شهيتي

رشا .. والله الي يشوفك بعدني احجي ودخت حسيت الدنيا افترت بيه لزمت السنك

شعلان : شبيج رشا

رشا .. دايخه حييل

شعلان :اكعدي ارتاحي

رشا .. لا اصعد ارتاح بغرفتي

شعلان : خلي اروح اكعد طه

رشا .. لا ارادياً مني لزمت ايده وگلت لا لا عفيه لتكعده خطيه هسه يهبط جنت مو بوعيه من لزمته ردت فعل مو اكثر ثواني وحسيت على نفسي وسحبتها وكلت اسفه مو قصدي

شعلان : عادي مصار شى بس لازم اكعد اهلج

رشا .. لا عفيه مااريدهم يهبطون كافي ذيج المره

شعلان : اكعدي ارتاحي هااج مي

رشا .. شربت المي وبديت اجر نفس قوي شهيق زفير لحد محسيت ضربات گلبي استقرت جنت كاعده بلكاع وفوك راسي شعلان رفعت راسي لكيته صافن عليه وعيونه قلق مو طبيعي

رشا .. تره مراح اموت بس شويه دوخه حسيته صحى وعدل نفسه وكاال

شعلان : حتى واذا متي اني شكو

رشا .. ان شاء الله بلي يكرهوني شبيه هسه اكوم اكمز

شعلان : عوفي التكمز واصعدي على كيفج

رشا .. كمت شوي شوي واستعاديت وضعي

شعلان : ملاحظ متلبسين شى يستر شعرج ليش

رشا .. اهووو انت من ذوله الي عدهم ستر الشعر اهم من الاخلاق

شعلان : شنو قصدج

رشا .. هاي موديل جديد هسه الشباب يتبعوه والله البلد محتل ولازم البنات يتسترون يخافون علينا من الامريكان والله شى يضحك

شعلان : وشنو الي يضحك فوك مايخافون على بناتنا من ذوله المحتلين الانجاس

رشا .. اني البس بس من اطلع ومن وره بابا اما بلبيت ماالبس واذا تريد غض بصرك حتى لتضوج

شعلان : هذا ستر واني محلل عليج ميصير شعرج طالع كدامي

رشا .. شوف شعلان اني مااجيت ودكيت الباب وكتلك تعال شوفني اني كاعده بيتنا ونزلت بلمطبخ حتى اكل وانت اجيت ودخلت عليه  يعني انت المفروض متتجرأ وتدخل على كولتك محلله عليك ومفرعه بلا حجاب

شعلان : كلامج زينه العقل رايح 

رشا .. دار وجهه ديطلع كلت الجاي ثلج وما شربته

شعلان : اشربي انتي بلكت يثلج لسانج ويتكسر ونخلص

رشا .. طلع واني ابتسمت مااعرف من اشوفه اريد اتعارك وياه احب اداهره

كمت على كيفي وصعدت ليش هيج داتعب ياربي مرات احس بس اريد انام ومرات ينكطع النفس عندي

هسه وكته گلبي عندي سادس ااخ شوكت اخلص وادخل كليه وارتاح

صعدت تمدت ونمت

سليل : ايام الشتا البارده جو بارد ومطر وكهرباء ماكو وازمه البانزين الي خلت الناس تتخبل يعني احنا ردنا الحال يتصلح صار اتعس مرات نقرا على اللاله ومرات لوكس جابه بابا حتى نشوف زين دخلنا ٢٠٠٤ تأملنا يتحسن الحال بس الصار بلعكس دوله ماكو وناس تتعارك ويه ناس وظهرت جماعات تطلق على نفسها المقاومه ضد الامريكان

وهنا دخل العراق بموجهه جديده وغريبه معايشيها بحياتنا

سالفه سيف منحجه بيها بعد صار اكثر من اسبوعين وحتى متجرأت اسأل مااريد ينفتح الموضوع مره ثانيه سكتت يجوز عرف وبعد ميريدني

شهر الواحد ٢٠٠٤ اجه بابا وياه وايرات

نهر : هاي شنو

حجي طه : واحد من المنطقه جايب مولده شكبرها وراح اسحب منه يكول لكل بيت ٥ امبيرات

نهر : وهاي شنو حكومي بفلوس لو شلون

حجي طه : اكيد بفلوس

نهر : هو احنا منين عدنا ياطه كوه ملحكين على مصرف البنات وخلف الله على ابو البيت صار شهرين مماخذ منك ايجار

حجي طه : شسوي كدامج عيون البنات راحن من القرايه على اللاله انتي روحي شوفي الناس كتل على ابو المولده بس هو الرجال يعزني ويريد خاطري اول واحد صاحني بينهم خلي اسحب وربج الرزاق المهم يصير عدنا ضوه

نهر : براحتك

حجي طه : اخاف يجي محسن كوليله راح لابو المولد

نهر : هاااا راح يجي

حجي طه : اي قبل يومين شفته بلسوك وعلى اساس يمر اليوم

نهر : من يجي اكوله

وره ساعه ونص اندكت الباب عرفت محسن

محسن : يااهل الدار وينكم

نهر : هياتنا هلا بأبو فيصل

محسن : احترك فيصل وعشيرته

نهر : ههههه ليش خطيه

محسن : يمعوده مينجرع وميسمع الكلام خابرته شلع گلبي

نهر : شلون يعني خابرته وين اكو خطوط

محسن : اكو عندي جهاز اسمه ثريا يحصل

تردين تخابرين بيه

نهر : يخابر للخارج

محسن : اي اكيد انطيني الرقم

نهر : بس الرقم ماعندي

محسن : ادكلج على رقم الدفان مال الكاع مالتنه هاي شبيج نهر غير لازم رقم

نهر : من يصير عندي انطيك خبر

محسن : بلمشمش اذا صار

نهر : خو انت متعود تنصب على واحد

محسن : على ذكر الواحد وينه الشفيه اخوج

نهر : راح يسحب كهرباء اكو مولد براس الشارع راح ينطي ٥ امبيرات

محسن : هاي كون المولده مال طه جان انطه الكهرباء بلاش

نهر : اي والله شتدري بيه

محسن : زوج غير

نهر : هذا الطيب الگلب تصيحوله زوج

محسن : ياسبحان الله نفس ثول اخوج يرادلكم افتح بيكم رعايه للمسنين

نهر : احد كال الك طبينا بلعمرين

محسن : على اساس انتي صغيره وقرديلاتج وتعلبين بلشارع

نهر : هههههه روح لصديقك انت لسانك مينكدر اله

محسن : اكولج ام جناح وينها

نهر : ريم

محسن : شيطانه ام لسان مشتاق الها

نهر : كعد تكمز يم راس خواتها

محسن : هاج هاي الها ولخواتها

نهر : ليش كلفت نفسك

محسن : صيحيلي ريم الله عليج

نهر : هههههه صار تعال ادخل

محسن : لا مستعجل بس صيحيها وجيبي اني انطيها الغراض

اجت تركض ريم

ريم : هلوو عمو شلونك

محسن : هله بريم الفله هاج

ريم : شنو هاي

محسن : الج ولخواتج

ريم : فتحت الجيس شو هاي نساتل غريبه

محسن : غير جديده ومستورده

ريم : اخاف مطيبه تره ارجعها الك

محسن : هاي فوكاها شو جيبي اجيبلك ام التمر احسن

ريم : حيييل شكد قديم انت عمو ضلت ام تمر هسه

محسن : لعد شكو اخر شى من جنت بلعراق خلصتها نستل ام التمر 

ريم : لا عيني اطورنا وراك صار اكو نستله عمار ولؤي وسهيل ومريخ وجبري وبسك وفرقدين

محسن : ذوله عشيره ابوج

ريم : شنو عمو ناصب عليه والله ذني اطيب نساتل انت غير مضايكهن

محسن : جربي ذني وراح تنسين العشيره الكريمه الي ذكرتيها

ريم : شكراً عمو

محسن : تعاال غزوله ليش خاتله

ريم : هي تستحي حيل وتخاف

محسن : طالعه عليج ياسبحان الله

ريم : : غير اختي ياعمو لعد على منو تطلع بس اني اهدأ شويه

محسن : تعالي غزوله بس اسلم عليج

ريم : تعالي غزل هذا عمو ميخوف مياكل جهال

محسن : عود هيج مراح تخوفيها ليش اكو احد ياكل جهال

ريم : احسن حتى متحجي ويه احد بلشارع

محسن : اكو احد يكدر يحجي وياها

جامبو الجبار

ريم : هاي عليه عمو

محسن : لا على جيرانه

ريم : اروح اكل النساتل العاويه الي جبتهم واشوفهم طيبات لو لا

محسن : عاويات بعينج ارقى نوعيات كلهن اجنبيات وتصيح الهن عاويات

ريم : اني غير ممتغدايه وراح اكلهن واله جان مااخذتهن اصلاً

محسن : ليش متغديتي بله

ريم : مسويه عمه مركه شجر تحبها اذا تحبها حتى من هسه نتزاعل وهاك علاكتك

محسن : نهر ولج نهر

نهر : اجيت هااي ابو فيصل

محسن : بربج هي الشجر هم مركه

نهر : لعد مربه ياابو فيصل اكيد مرگه

محسن اكو واحد ياكل شجر

نهر : نعمه الله شبيهه هاي ريم كالت الك مو

ريم : كله ريم كله ريم شيصير من مصيبه وكالو ريم حتى دخول الامريكان للعراق من وره ريم سقوط صدام من وراها

محسن : شراح يسكتها بعد

نهر : غير انت روح لطه ينتظرك وهاي اني اسكتها

محسن : عندي سيدي راح اجيبه الكم وبيه اقراص تفرجو عليه

ريم : هلا هلا هاي الاخبار الحلوه مو جايبلي نستله بيها دهن الخنزير

محسن : احد گلج بيهن دهن الخنزير ياخنزيره

ريم : غير همه يكولون اي شى من الخارج بيه خنزير

محسن : لتصدكين كوولشي

ريم : وين السيدي

محسن : انطي لابوكم وبيه اقراص نيلز وسنبل

غزل : اني احب سنبل

محسن : واخيراً سمعت صوتج تعالي انطيني بوسه لعمو

غزل : مااا

ريم : عمو ياسنبل يانيلز شكد قديم انت واطلع اتراب

محسن : والله عرفت راح تحجين هيج جبتلج افلام هرقل وبوكاهانتس وطرزان

نهر : خوش ناقصنه ريم تتعلم تكمز اكثر

جيبلها شى يهديها

ريم : عمه احد گلج اني مخبله ولازمه شباج الامام حتى اطيب

نهر : طبي ام لسان طبي

محسن : اروح اشوف صديقي انتل حرك المولد هو ماشاء الله حيل محظوظ بهيج سوالف

نهر : راح وسديت الباب وكعدو البنات ياكلون دوم اتمنى اشتريلهم الشغلات كون من فلوسي لو من طه مو من اخد رغم محسن مو غريب ويحبهن مثل بناته بس هم تختلف لو من عدنا

وره ساعتين اجوي وصاحني طه

جي طه : اكعدي محسن لكه شراي للبيت

نهر : اييي يالله

محسن : اكول فلوس البيت يفتح بيها محل شى يفتهم بيه ويعوف شغله العربانه هو مال لبلبي بهذا العمر هو صاير باگله تايخه من التعب

حجي طه : هههههه اي والله ومجعوصه هم

محسن : لو تسويلك مطعم لو محل انشائيات واكعد واسكت بيه

نهر : اي والله خوش مشروع

حجي طه : ردت اشتري بين امن بيه البنات

نهر : كاعدين بهذا البيت وجبير وايجاره بسيط والرجال متساهل حيل وياك المن بعد شايلين

محسن : توكل على الله وسويلك شغله طور نفسك بيها

حجي طه : باجر عليها تجي الصبح مو

محسن : اكيد من الصبح يمك قبل الديج ويجوز اعوعي قبله

نهر : وين رايحين

حجي طه : كالو اكو مكبره جماعيه جديده بلكت الكه جعفر

نهر : سوده عليه هاي رابع مقبره تروح الها

حجي طه : شسوي من ضيمي وقهري اريد حتى لو جثته ادفنه بصف ابويه المهم مايبقى مجهول هيج 

محسن : هواي لكو مقابر جماعيه بس لهسه جعفر مابين

نهر : سوده بوجهي ماشاف شى. من حياته من الصبر للگبر ً

محسن : لتكلبيها مناحه رحمه لابوج بس تعوين مثل ذولاك الناس ويباوع صفح على طه

حجي طه : ولك شمسوي اني

محسن : لا يابوي كولشي ممسوي بس جنك حبله ومخلصه شهرها وتطلك وماتولد معسره وتمشي وتكطع بشعرها شعلي الشعر بلموضوع ماادري وفوكاها تسب برجلها

نهر : هههههههه خرب ببليسك محسن منين تجيب هذا التشبيهه

حجي طه : عساس انت شلونك

محسن : العيد وهلاله بس غير الوكت اغبر ماخلاني اعيش براحتي جان هسه اني رئيس وزراء العراق

حجي طه : ههههههه بس تجي وحده امريكيه حًلوة تسلمها العراق

محسن : وربك اسجله طابو بأسمها غير مشايفهن يبوو مو نسوان طركاعه وكعت من السما خليني ساكت لا انجلط

نهر : كون تسمعك ام فيصل اله تجلطك

محسن : هو اني مااخاف بس من الله ومنها ربي ارحمني لو تعقلني لو تخبلها وتخليها تزوجني

حجي طه : لو تموت متزوجك

محسن : انت بخير ونعيم ومتدري بروحك لا مره تكولك وين صرت ولا جيب انطيني ولا لتباوع ولا وديني لفلان مكان ولا كالت علان وفلان كون ايدي بيدك يطه يبن صدك امك شسمها نسيت

حجي طه : رازقيه

محسن : يطه يبن رازقيه واخلص من العلاكه برگبتي

حجي طه : هاي لان حبابه وفقيره تحجي عليها

نهر : اكوم اسوي عشا انت سوالفك متخلص

محسن : بربج طماطه تكلاه لاجعه كوون محروك جد جدها وجهه من كفاها مااريد يبين

نهر : ههههه صار

محسن : راح اكولك على شى ماطول وحدنا

حجي طه : ها ولك شو وجهك انگلب

محسن : عندي جماعه اصدقائي تعرفت عليهم هنا بأيران اول طلعتنا وبقو اصدقائي لهسه

حجي طه : اي شبيهم

محسن : سمعت يحجون عن واحد يعرفوه ورجع للعراق واتوقع راح يطك للستار بحجه محاربه النظام وهاي الكلاووات

حجي طه : منو هذا

محسن : اخو مرتك

حجي طه : احمد اخو سندس

محسن : حسب كلامهم عنده ظهر واعتقد راح ياخذ منصب وضعه حيل مرتبه توقع مرتك تجي وتختل بسده

حجي طه : تتوقع هيج حظي فگر معودت اخلص منها گبل ترجعلي هسه

محسن : مو حظك هي حظها حظ كح وسكت اعذرني ياخويه بس لساني فلت

حجي طه : استغفر الله العظيم مااكدر احجي عليها تبقى ام بناتي

محسن : حقك على راسي مااجيب طاريها بعد والله يجازيها

حجي طه : راح ترجع سندس ومصايبها

محسن : مااكولك بس الله يعينك على الجايك منها

سليل : باع البيت بابا وثاني يوم اشترى محل  اخذ اثنين وفتحهم وسواه واحد جبير صار مطعم وسماه حجي حسين على اسم ابوه لان ضل بنفسه محل ابوه سوه مثله واحسن

وساعده شعلان بعلاقاته بأن السعر اخذه جوه السوك وهذا الشى حيل خدمه لبابا

جنت كاعده اقرا

واجت ماما نهر

نهر : كومي ماما يردوج جوه

سليل : منو

نهر : سيف

سليل : طفرت من مكاني ليش

نهر : استأذن من ابوج يحجي كلمة وياج وبوجودي

سليل : شلون ابقى وحدي ويااه ميصير

نهر : مو وحدج ماما اني كاعده قريب منكم مااعوفج وحدج بس شوفي شرايد معناه شغله ضروريه الي خلت ابوج يوافق يكعد احسن مايجيج للكليه ويحرجج

سليل : اي صحيح مااريده يجي

بس استحي احجي ويااه

نهر : شوفي يمه شيريد وفضيها

بدلت لبست تنوره وقميص مستورات وربطه ونزلت من التوتر كمت حتى مشي مااعرف امشي طبيت وكف على حيله

نهر : اني هنا اذا تردون شى

سليل : مردت ماما تروح بس هي بقت الباب مفتوح وكعدت قريب من عدنا حيل

كعدت مقابيله

سيف : شلونج سليل

سليل :  الْحٍمَدٍ للـّہ بقى ساكت يباوع عليه واني مدنجه لحد محسيت بيه استجمع كل طاقته وبدا يحجي

سيف : گلي ابوج على سالفه زواجج ماانكر انصدمت وخاصه من عرفت سجاد وتخبلت بس الي طمني من كال زواج كلاوات بس حتى تسكت امج وبأن انتي مو زوجته

سليل : رفعت راسي وكتله گلك بابا بقيت سنه عايشه يمه حسيته توتر وعرك وكام يمسح كصته وكاال

سيف : اجيتج اليوم اسألج شى مهم وعلى اساسه هواي تتحدد امور

سليل : شنو

سيف : صار شى بينج وبينه

سليل : شنو يعني

سيف : يعني شلون اوصلج الفكرة اقصد تقرب علاقه زوجيه

سليل : بلعت ريك ومتت خجل شلون يصير جرئ هيج وكتله متلاحظ حضرتك حيل جرئ

سيف : جاوبيني اترجاج وراها شتردين اني حاظر

سليل : جريت نفس بقوه وگلت مصار

سيف : تحبي

سليل : وكفت على حيلي وكتله عفيه تره زودتها اني كتلك مااتزوج وانت رحت بدون موافقتي على بابا ميصير هيج تحرجني

سيف : مو بيدي رايدج حبيتج سليل روحي تعلكت بيج

سليل : واني كتلك  مااريد اتزوج ليش تلح ماكو قسمه بينا

سيف : ماشي بس لتتعصبين

سليل : عفيه انت خوش انسان والف وحده تتمناك اني ماافيدك عفيه

سيف : مااكدر حبيتج وهاي اول مره احب واتعلق هيج الحب من طرف واحد مؤذي سليل ومو بيدي شكد مااحاول ابتعد عنج الكه شى يجمعني بيج ويكبر حبج بگلبي

اني بس اريد اكولج شى حطي ترجيه بأذنج

الحب المابيه تضحيه ميعيش والي ميدوس على نفسه لخاطر حبيبه ميتسمى حب واني تغاضيت عن كولشي صار قبل سواء مطلقه او متزوجه

وسواء اكو مشاعر بگلبج اله او ماكو راح انتظر اليوم الي تحسين بيه وبحبي ارجع واكرر للمره الالف اني شاريج يابنت الناس ويوم متقبلين تصيرين مرتي اشيلج على راسي

هسه انتبهي على دروسج وشتحتاجين بكليتج اني موجود كلها جماعتي من رخصتج

طلع ودخلت ماما نهر باوعت عليها وكلت

فدووه لتزوديها عليه زواج مااتزوج

نهر : ضلي مثل عمتج لحد ميطيح حظج وتعضين اصابيعج ندم الرجال شاريج وانتي ضاله تركضين وره سراب تاليها يخلص عمرج وكولشي ممحصله

سليل : افهموني ياناس مو بيدي مااكدر احبه ليش هو بيدي وتعرفين كولش زين وضعي ماما اني اخاف من كل الرياجيل اخاف اذا واحد فات من يمي اخاف انفاسه اطخ جسمي اخاف يلمسني اني مااتجرأ اغمض عيني اخاف واحد يحاول يتحارش بيه تجي لحظات اريد اخرب بس اتخيل واحد يطخ اضفري بس سجاد مااعرف من الله لو لان من اني وصغيره هو ويايه من يلمسني يحسسني بالامان يرجعني ذيج البنيه بنت العشر سنوات الملامسها سلام المطاخ شعره منها المشافت الموت والخوف والاشمئزاز من عمها يرجعني طفله كل همها اللعب واكل الكاكاو بدون متضربها امها لان وصخت ملابسها يرجع الدنيا بعيني حلوة بعد ماشفتها ابشع شى هو الوحيد الي من يلمسني يسحبني لغير دنيا مابيها سلام القذر وصاخته ولا سندس وانانيتها واذيتها

ولا انعام وتكبرها وجبروتها وظلمها مابيها ذاك الحريق الي اكل اخت وضيع الثانيه وكأب الثالثه ولا بيها اب خلص شبابه بلسجن

سجاد يمشي بدمي

نهر : ولج انتي غبيه اكولها ميفيدج شتنتظرين

سليل : مامنتظره شى والله اصلاً غاسله ايدي منه بس احبه يمشي بدمي ماما هذا الگلب اله وحده  لا عبالج اسامحه مثل قبل ولا انسى الاذيه الي اذاها واخر دگه منه بس هم مااتخيل بشر يلمسني غيره

نهر : سليل ماما اعرف احساسج والله انتي مثل عمتج غبيه من تحبين تخلصين لاخر لحظه وتحبين بجنون بس تذكري شى الي تحبي راح وبعد ميرجع ويجوز يكون عائله ويستقر وضعه وانت تبقين هنا تندبين

حظج وعمرج يخلص ومامحصله شى

كمت اختنك وحست ماما عليه جان تجرني لحضنها

فكري ماما زين

سليل : مااريد سيف ماما مااريده

نهر : عوفي طز بيه بس فكري بحياتج محد يستاهل تضيعين عمرج وراه نفسج عليها حق عليج راعي الله بروحج يابنتي ولا تظلميها

كومي غسلي وتعاي ساعديني ورانا كومه شغل

عفنا الموضوع شبهه انسد ورجعت لدراستي وبدت حياتي وحياه خواتي تستقر اكثر وخاصه ويه شغل بابا الجديد كمنا نحس بفرحته وراحته جان يشتغل من كل گلبه وطاير بلمطعم وياه عمو محسن وشعلان جابله عمال ثقه وبدا يشتغل والحمدلله حسيت بابا صغر ١٠ سنوات من كثر الراحه الي اشوفها بعيونه واول شى اشتراه النا هو ستلايت بيومها كل شويه وحده صاعده بلسطح واتصيح على الثانيه من جوه هااا تشوفيني عبالها من توكف كدام الصحن راح تطلع  بالتلفزيون جانت فرحتنا بيه مو طبيعيه وخاصه صافنين شلون بيه جم قناه هو احنا جان بزمن صدام قناتين ونتعارك مو عاد هسه بلمئات وكل شويه وحده جاره الريمونت تريد قناه شكل

شهر الثالث اول محرم بعدالسقوط لاحظنا ظهور شعائر غريبه ممتعودين عليها كاعدين نتفرج اني وخواتي وبابا

ريم : بابا هاي شنو ليش يطبخون

حجي طه : حبيبتي هذا ثواب للامام الحسين واصحابه الي استشهدوا وياه بمعركه الطف

وكعد بابا يشرح النا المعركه

سليل : زين ليش هسه العالم تسوي ثواب وبهيج كميات وتزور وقبل ماكو

حجي طه : مو ماكو بس كولش قليل العالم تخاف وخاصه بلزياره اجت اسنين ممنوع والي يزور يشلوه الامن ويلعنون سلفه سلفاه واذا طبخ يديرون الطبخ على راسه وراس اهله وسنه مسموح بس مو كلش يعني حسب مزاجهم بس شى على شى ممنوع ومسوين رعب بكل مكان

سليل : وهسه العالم تزور بكيفها وتطبخ بس والله حلوو

وكعدنا نتفرج الناس شلون تزور وتمشي مشايه بالالاف ماكو بعد مده بسيطه بنفس اليوم ونشوف العالم بكربلاء انطحنت طحن تفجيرات اكثر من ١٢ تفجير ثرم الناس مفخخات وانتحاريين نباوع بث مباشر شلون الناس تتصارخ وتعيط والاطفال بين الرجلين عبالك يوم القيامه والناس تنشال بلكرك والعربانات الخشب مباشره ماما اخذت غزل وخرتها كمنا نبجي بهستريا على حال الناس وشويه وذاعو بالكاظميه هم تفجيرات قرب الامام الكاظم عليه السلام حاله مرعبه واحنا نشوف شلون الناس مكطمه صغار وكبار نسوان وزلم حتى قذائف هاون وقنابل يدويه جانت اول مجزره جبيره بلعراق راح ضحيتها بلمئات شنو ذنبهم كل ذنبهم حبو يحيون شعيره من شعائر الله محبه لاهل البيت ناس ممأذين احد ولا متعدين على احد بس محد رحمهم وكأن العراق مكتوب عليه ميعيش مرتاح خيم الحزن على العراق كله وكل شويه يطلع واحد مدري منين يندد بالانفجار ويطالب بمحاسبه المسؤولين وتالي كولشي ماكو راح دمهم بين نفاق الساسه وتجار الدم والسلاح

ودخلت بغداد بموجهه جديده

وهي موجهه الخطف ويوميه سامعين واحد انخطف ورايدين فديه من اهله وبابا من خوفه علينا حط خط للبنات رغم قرب مدارسهم حتى في سبيل ميصير شى عليهن يعرف الخطف بس للعداوات وللناس الي امكانيتها زينه بس خاف لان بنات ينخطفن لغير شى وريم دوم تصيح

ريم : اني ماانخطف بابا اصلاً يخافون مني عبالهم البهاق يعديهم يجوز اني اخطفهم واخذ فلوس من اهلهم وبابا يبوسها ويكول الها اخطفيني اني راضي وانطيج فلوس تدللين

وضع بابا المادي صار افضل وكدر يوكف شويه على رجليه

وبعد مرور شهر سمعنا بلكوت صار ضرب واشتباكات مسلحه بين جيش المهدي والقوات المشتركه بزعامه امريكا ومعارك عنيفه كولش

تفاجأت بابا يطلب من خاله  يتركون البيت ويجون عدنا لحد ما يهدأ وضعهم بس مقبلو  وطلبو يأجر الهم بيت واجو خال بابا خضير وزوجته ورازقيه وسيف الي اصلاً هو بغداد بس بشقه مال عزاب كاعد انتقل وياهم بلبيت وشعلان هو انتقل هم  وامه كلهم كعدو كبالنا بس طالب وزوجته بقو مقبل طالب يترك الكاع بلكوت

طلبت من البنات ابد ميوصلون منريد مشاكل وهم مااريد تقوى العلاقات وتصير رايح جاي حسيت الحظ يعكس ويايه كل مااحاول ابتعد من سيف يصير شى يرجعه

تعامل ويه الشغله بهدوء بس حياتي مستحيل تهدأ

واجت الامتحانات والكل يمتحن ومخبوص واندكت الباب ماما نهر راحت لرازقيه تودي خبز الهم تكول عيب يابو جانت تخبز وادز طلعت فتحت الباب ولد شاب گبالي

تفضل اخويه

هذا بيت حجي طه

اي تفضل

ممكن خاله نهر

سليل : صفنت هذا منو

شتريد منها

عندي امانه لازم انطيها الها وبيدها

سليل : نغزني گلبي عرفت هو ماكو غيره والله هو مباشره گلت اني نهر ردت بكل الطرق اعرف وادري ماما اذا اي خبر عنه متكولي

صفن شاب وكال متأكده انتي نهر

سليل : غير عندك شغله من سجاد الي

ابتسم الولد واطمأن بس بعده بذهول لان عباله نهر مره جبيره وطلعت صغيره كدامه

لتصفن اني نهر وسجاد داز شى بيدك ومنتظرته

اول مره افكر عدل واتصرف بسرعه وبذكاء

انطاني ظرف وكال ساعه وارجع

فتحته لكيت بي جهاز

فتحت الورقه الموجوده

شلونج نهر اعرف ضايجه لان مطمنتج بس والله مااعرف شلون اوصل  وصار اشهر بس اريد احد يوصل الكم وهسه يله دبرت هذا جهاز يتصل دولي بس دكي على الرقم الموجود واجاوبج وره ساعه يجي صاحبه ياخذه نفس الولد الي جابه دكي واني افهمج

كمت ارجف وكوه واكفه والله بلحظتها حسيت دمي نشف حتى ضغطي هبط يعني راح اسمع صوته بعد مرور سنه على سفره راح اكدر احجي وياه ركضت للسطح ردت مكان محد يقاطعني بيه ردت اعيط واحجي وانهار بدون محد يمنعني سديت بابا السطح وكفت بأخره وبديت ادك رقم رقم المكتوب بلورقه

ودك اااخ كل دكه منه ادك ويه نبض گلبي

وجان يصيح الووو بس سمعت انفاسه ويه كلمة الووو نزلت دموعي عبالك دمع العين هو اليتحكم بيها اريد تطلع الوو من حلكي

سجاد : الووو نهر تسمعيني

سليل : انفاسي ودموعي كشفتني جان يصيح بصوت عالي عباله ماما نهر متسمع بس من سمع شهكتي الهادئه وانفاسي العاااليه سكت وهدأ وهمس

شلونج سليل

سليل : لتسألني عن شى تعرفه

سجاد : ليش انتي الخابرتي مو نهر

سليل : لهاي الدرجه متريد تسمع صوتي

سجاد : مااريدج تتأذين

سليل : ليش اني بعدني ممتأذيه اني داموت سجاد شتحجي انت يااذيه تكولها تجي تتقرب مني وتحسسني بحبك وغيرتك واهتمامك وتسافر بليله ظلمه حتى بدون وداع لهاي الدرجه اني رخيصه عندك جر نفس قووي وكاال

سجاد : انتي تعرفين مكانتج بگلبي ماله داعي احجي

سليل : لا احجي فهمني كدامك وحده ثوله متفتهم طفله فهمني راح اتخبل انت شتريد تريدني كولي اريدج  لغيتني من گلبك وحياتك هم گولي لتعوفني معلكه

سجاد : اني عفتج حتى مااسمع هاي شهكتج شفتي كم يوم اختنكتي مني شلون لو تعيشين ويايه

سليل : كول انت اختنكت انت الي تريد تطفر مني كول مااحبج روحي عيشي حياتج انت دمرتني ليل نهار منهاره بسببك

سجاد : هسه اني يمج مو عفتج براحتج حتى اداومين كليه وتعيشين حياتج مااحبسج ولا اقيدج ولا أمرج ردتج تعيشين صّـْْ(☑)ـْْحّ

سليل : وحتى اعيش صح تعوفني وتطفر بس فهمني انت صاحي احلف عليك يمين مو صاحي

سجاد : لتنجاوزين سليل الزمي لسانج

سليل : ماالزمه شسوي هااا انت بسوريا قابل يمي متكدر تلمس شعره مني واليوم احجي الي بگلبي كله

سجاد : ميفيد الحجي اهتمي بدراستج احسن وعود من تتخرجين الله كريم نتفاهم

سليل : هااا وانت تريد تعوفني اربع سنوات وترجع تلكاني استقبلك بالاحضان هسه لو مبادلني الحب ومعطيني امل بعلاقتنا مو انتظرك اربع سنوات انتظرك العمر كله تدري انت واحد اناني و

سجاد : احجيها ومريض اي كالتها نهر گبلج وهسه هي تلوب بحلكج كوليها محد فاهمني واولهم انتي

سليل : من تفهم نفسك نفهمك كااافي حرام عليك دمرت اعصابي كاام يعيط

سجاد :انتم الي حرام عليكم محد حاس بيه اني مردت احب ولا اتزوج ششوف كدامي من امي الي انهزمت ويه اختي واجوي قبل مده كالولي متزوجه وعايشه بسوريا واجيت مثل المخبل عليها تالي طلعت مو هيه

سليل : بلعت ريك وگلت ليش مرجعت اذا مو هي

سجاد : شرجع حتى اضل اتحرمص واني اشوفج اطبين واطلعين وترحين وتجين ولازم احط قندره بحلكي ومااحجي

سليل : مو جنت اروح واجي بلمدرسه سوه

سجاد : الكليه تختلف تقبلين اتركين كليتج علمودي

سليل : سكتت وكمت اتنفس سريع

سجاد : تقبلين تكعدين بلبيت ٢٤ ساعه ماكو طلعه لغير بيت اهلج تقبلين متحجين ويه بشر رجال اقصد غير ابوج هاي اني واحد مخبل شكوكي مريض شسموني سموني اني احسج مالتي الي احبج لدرجه اخنكج ومااخليج بس الي بس الي تكدرين كولي

سليل : سجاد على كيفك لتعيط تهستر ويحجي وصوت تكسير

سجاد : هذا العندي تكدرين اتركين كليتج وحياتج وتصيرين طوع امري وحدي الي

سليل : ودراستي

سجاد : من باجر اتركيها وبعد باب البيت متوصلين

سليل : بلعت ريك من الصدمه وكتله ومستقبلي وتعبي ودراستي

سجاد : تلغي تماما احجي

سليل : سكتت واتنفس سريع

سجاد : شفتي متكدرين تضحين

سليل : اني ممسويه شى غلط حتى مااحجي ويه طلاب ولا حتى ويه طالبات

سجاد : وكعدتج ويه سيف بلكليه شيسموها

سليل : جمدت بلحظتها معرفت حتى ارد

سجاد : لا عبالج مسافر ورجلي بلشمس تره اعرف كولشي سليل ومره كتلج اني اقرب الج لدرجه متتوقعيها

سليل : نصيت صوتي وحجيت بهدوء والله ممسويه شى غلط وممتجاوزه حجه كم كلمة وراح

سجاد : يجي يوم واحاسبج على هاي الكعده

سليل : سجاد ارجع

سجاد : ماكو دوام وماكو طلعه

سليل : مااكدر مستقبلي هذا

سجاد : لو اني لو هو

سليل : منو قصدك

سجاد : لتخافين مكعد اخيرج بيني وبين ذاك السافل لان ذاك بقندرتي مااشتري

القصدته دوامج اتركي ومن باجر

سليل : اتذكرت تعب بابا وقهرته وسهر الليالي بلشغل حتى اروح ثاني يوم للكليه ويمشي ويكولي شوكت اشوفج بروب التخرج

همست وكتله ماابطل

سجاد : لو اني لو دوامج

سليل : رجعت دموعي طلعت وگلت دوامي

سجاد : انتي اختاريتي اتحملي نتيجه اختيارج

سليل : انت ظالم تريد كولشي الك تريد تمحي وجودي

سجاد : اكولج شى واحد بس لو مختارتني جان اختلفت هواي امور روحي مااريد اسمع صوتج بعد

سليل : لتروح اريد احجي وياك

مباشره سده  دكيت ميجاوب ادك ادك تخبلت صرت نار ردت أذي مثل ما أذاني ردت اردله الي سواه ليش هيج يلعب بيه ليش لحظه طفوله على غباء على جرح گلبي مرات الشخص من يفقد يتصرفات تصرفات تخلي يندم ندم جبير نزلت اركض لكيت ماما راجعه حطيت الجهاز بيدها جفلت

نهر : هذا شنو

سليل : هذا من سجاد خابري هو دزه

نهر : ليش تبجين وعيونج دم

سليل : ماما اذا اجه بابا كوليله اخاف سيف يرجع يفتح موضوعي كوليله موافقه

يتبع ......

#

رواية_أبي_والغزلان_الجزءالثاني

#للكاتبة___REEM___ريام_هادي

#البارت_التاسع

الحزن مرات ياكل بالبشر

     وادري الدنية ظلمه وللحزن غايه

لوتبچي عمر مايرجع الراح

       اليعوف الزاد والملح ابد متهمه الحجايه اشگد لحظات مرت ع الجرح ماطاب

             اشيل ابخيط جرحي ومانشف مايه

سليل : هذا من سجاد خابري هو دزه

نهر : ليش تبجين وعيونج دم

سليل : ماما اذا اجه بابا كوليله اخاف سيف يرجع يفتح موضوعي كوليله موافقه

نهر : شبيج تخبلتي

سليل : لتخبلت ولا شى مو انتي دوم تحجين وتكولين سجاد ميفيدج وهاي اني اقتنعت بكلامج وموافقه على سيف

رشا .. شنو عزه وعمو سجاد

سليل : انداريت لكيت رشا ورايه

مشكلته لعمج

نهر : تعالي اكعدي وخلي افهم جيبي مي لاختج بعد شلون ترجف ياالله

سليل : مااريده سمعتوني مااريده

نهر : اكعدي ياامي وخلي افتهم شنو هذا البيدج بله

سليل : كعدت وارجف اطك سن بسن واشهك بلبجي واحجي هذا جهاز هو دزه حتى يحجي وياج

نهر : وشجابه بيدج انطيني الجهاز وهاج اشربي المي

سليل : لزمت الكلاص وكوه اشرب نصه وكع من حلكي

رشا .. على گيفج گلبج راح يوكف

سليل : وكفتهم طبه مرض عساه بلكت ارتاح من هاي الدنيا الطايح حظها

رشا .. اهوو بدت سنفونيه بتهوفن كل وحده تضوج تدعي بلموت

نهر : كافي انتي الثانيه وخلي نفتهم

احجيلي ماما شصار وعلى كيفج

سليل : بديت اسولف كولشي من لحظه مااخذت الجهاز لحد ما نزلت واعلنت موافقتي بسيف

نهر : خلي ادك على هذا الارعن شمسوي

شو هذا مدري شيطلع

سليل : دكيت مجاوب بعد ويجوز سده شمدريني هذا الجهاز شلون يشتغل

هسه الولد يجي ياخذه

نهر : غير افتهم منه شنو ياخذه وتعالي انتي شلون تاخذي وتخابرين بدون متنتظريني

سليل : ردت احجي ويااه ردت افتهم ليش هيج سوه بس كوليلي من ياطينه هذا الله خالقه

رشا .. طين خاوه

نهر : وتالي وياج

رشا .. العفو سكتت وحطيت ايدي على حلكي

سليل : اتصوري يخيرني بين دراستي وبينه

رشا .. وانتي السباعيه اختاريتي دراستج

سليل : طبعا حك تعب بابا وضيمه

رشا .. وتضحيه عمو مو بعينج

سليل : ياتضحيه انتي الثانيه لتحجين شى بكيفج هو شمضحي

رشا .. لا مضحى بشى بس بصحته واحلى سنوات حياته وفلوسه ويوميه يودي ويجيب صيف شتا ويتعارك ويه انعام ويتعارك ويه امج وصاير حارس النا اخاف احد يتحارش او يباوع ويتابع كولشي يخصنا ويجب ويخلي بكل موسم دراسي بس حتى نكمل دراستنا هو اصلاً من ايدج اخذج وسجلج كليه ولو يريد بذاك الوكت وقبل طلعه بابا يكدر يكول ماعندي امكانيه ولهنا وكافي خلصتي سادس وعندج شهاده الاعداديه واكيد بوكتها راح تقبلين بسبب الظروف بس هو منطقها بلعكس جان فرحان بشهادتج

سليل : اعرف والله ومناسيه اي شى بس ليش يخليني اترك دراستي

رشا .. اكيد وراه شى وباله شى يجوز حب يثبته لنفسه و يريد يشوف الى اي مدى تحبي لو بس على الاقل مختارته جان عرفتي شنو يفكر

نهر : ميفيد بعد هذا الحجي كومي غسلي ماما وارتاحي

رشا .. كولي ياالله ولتستعجلين

سليل : كمت على حيلي منهاره مااريد افكر بشى تعبت وكمت اعيط مااريده ولا اريد اعيش بهيج دوامه يوم افكر بيه يحبني ويوم لا مااريد اعيش شوكت يحن عليه ويتقبلني بحياته سجاد دمرني ميعرف شيريد ويريد يدمرني ويااه

نهر : كاافي ماما شجاج تخبلتي

سليل : قصدج عقلت شوفي يوم تكولين لبابا سليل موافقه على سيف واذا متكولين اني احجي

نهر : ميخالف التردي يصير بس على كيفج ويه نفسج مو حتى وجهج ازرك من الرجف

رشا .. ابقي هيج وخلي الاعصاب اضيعج

سليل : وخري من يمي رشا لا والله احرك روحي هسه

رشا .. رايحه على كيفك مالي دخل ومااحجي بعد

ريم : شكو شكو سمعت عياط

رشا .. تعالي انتي لا هسه اتذب حرگتها بيج

واخذت ريم وطلعنا من المطبخ

نهر : كاافي سليل واندكت الباب

سليل : يجوز هذا الي جاب الجهاز

نهر : طلعت للولد وكتله عفيه بعد بقي محصلته والولد رفض لان وراه طريق وسفر حاولت ويااه مفاد ردت بس احجي ويه سجاد وافهمه الي سواه شنو معناه وهاي شلون بيها قبلت بسيف بس مع الاسف مكدرت احصله واضطريت انطي الجهاز للولد

ورجعت لكيتها كاعده وصافنه ودموعها تنزل من وحدها حضنتها حبيبتي كومي غسلي وارتاحي وراج دراسه حبيبتي

سليل : ماما لازم اعيش كاافي تعبت والله

نهر : سوده بوجهي كاافي اروحلج فدووه التردي يصير يله بنتي يوم يومين اذا بقيتي على هذا قرارج اني اكول لابوج

سليل : كمت واني كوه حاملتني رجلي بس غسلت وجهي ونمت حتى مأكلت شى مباشره طبيت للغرفه نمت بفراشي وغطيت راسي مااريد حتى اشوف احد

وصار الليل واني على نومتي وتالي كمت ورايه دراسه وامتحانات اقرا والماده صعبه وعقل اصلاً ما ضل بيه بس شسوي لازم انجح مااريد اضيع هاي السنه

ورجع الهدوء للبيت بس قلبي شيرجعه كاام كل يوم يمر من ايامي گلبي يزيد نار وتعب احس روحي فقدت عقلي وكمت بس اركز شلون أذي شلون اخلي يحس بمعاناتي شلون يذوق من نفس الكاس الي شربنياه

مرات الي يحب ميعرف يتصرف لو شكد ميكون ذكي او هادئ يغلب على تصرفاته الغباء

اليوم اخر ايام الامتحانات شفت جنات وسلمت عليها

امشي ويايه للبيت

جنات : مااكدر والله بيبي كالت لازم تجين من وكت

سليل : بابا يوميه يسأل عليج ومشتاقلج كولش

جنات : والله اني هم بس كدامج يادوب الحك ارجع للبيت واكمل شغلي واقرا

سليل : انتي بيج شى وضعج مو طبيعي

جنات : مابيه شى ليضل بالج سلميلي على عمو وعمه باستني وراحت حسيت بيها ابد مو طبيعيه وحتى لون وجهه اصفر وتعبان حيل انقهر عليها

رجعت للبيت واول مطبيت شفت ماما كعد تسوي خضره وصافنه

بستها وكتلها شبيج ماما

نهر : الله يساعدج يمه بشريني جاوبتي

سليل :  الْحٍمَدٍ للـّہ مكتيلي شبيج

نهر : تعالي وكعدتها بصفي

سليل : شبيج ماما تره ضل بالي

نهر : ابوج البارحه اجاني على اساس البارحه جاي للمطعم سيف ومسلم عليه وهاي السوالف واثناء الكلام راجع فاتح موضوعج

سليل : جريت نفس وغمضت عيني وفتحتها

نهر : ماما لتستعجلين فدووه وتتندمين

سليل : اني موافقه يوم وقراري متغير وتكدرين تبلغين بابا بقراري

نهر : والله لو من ذيج الايام موافقه جان هسه الهلاهل متبطل من حلكي بس المصيبه اعرفج مو بوعيج وكعد تتصرفين بليه حكمه كله حتى تأذين سجاد

سليل : هذا جوابي واذا متردين تبلغي لبابا اني ابلغه

نهر : يعني متغيرين رأيج

سليل : لا مااغير خلي اكوم اسبح الجو حار وعركت وراها انام منايمه للصبح 

نهر : والغدا

سليل : مجوعانه اريد انام وبس

نهر : الله يهديج يمه

سليل : سبحت ونشفت شعري وتمددت باوعت رشا تروح وتجي تحفظ بالاقتصاد

تره دخت اريد انام

رشا .. غير دااقره قابل داالعب

سليل : اطلعي بره اقري

جان تجي يم راسي ودنجت عليه

رشا .. سليل الله عليج لتستعجلين تره والله كعد تذبين روحج بلتهلكه وبعدين تتندمين

سليل : ليش شبيهه سيف شو الف وحده تتمناه

رشا .. اني مو قصدي اعيب بسيف بس انتي متحبي ولا الج نفس بيه ولا حتى تكدرين تتأقلمين وياه ولا ويه غيره اني شايفتج حتى بلكليه صديقات مسويتي ولا تقبلين احد يتقربلج مو عاد تعيشين ويه رجال اي مشاعر متربطج بيه

سليل : اتعلم شوي شوي اتعلم

رشا .. تره اخر العناد طيحان حظ وانتي طبعج مو عنودي شجاج هاي المره عاندتي

سليل : بلكت هلمره يكعد حظي

رشا .. ياريت يكعد شنريد احنا بس متأكده راح تتندمين وانتي بعد بكيفج باستني من خدي وكامت غطيت راسي ونمت ماريد اسمع لأحد تعبت من التفكير

ثاني يوم دخل بابا عليه وسألني عن موافقتي وكان مستغرب وأكدت اله موافقه بدون اي كلام زايد مردت احد يأثر على قراري

وبنفس اليوم العصر سمعت صوت سيف بلهول اختنكت

اجت ماما فتحت باب الغرفه وكالت

نهر : اجه سيف يريد يحجي وياج

سليل : شيريد كلساع جاي

نهر : بعدنا بسم الله ومخنوكه منه من تتزوجي شلون

سليل : الكلمة واقعها ثكيل على اذني اتزوجه هذا هو ابدل وانزل لبست بنطرون وفوكاه قميص طويل للرگبه وحجابي ونزلت دخلت وكف على حيله دنجت وكوه اتنفس

كعدت گباله وكاال

سيف : ممصدك من كال طه انتي موافقه والله على لحظه يوكف گلبي من الفرحه

سليل : باوعت عليه شلون طاير وفرحان ورجعت دنجت

سيف : بيج شى سليل شو وضعج مو مال وحده فرحانه بله ارفعي راسج خلي اشوفج

سليل : رفعت راسي بهدوء باوعت عليه وبگلبي اكول ياربي شلون راح اتقبلك شلوون

سيف : اعرف متوتره واكيد ممرتاحه وممتعلمه عليه بس بمرور الايام راح تتعودين

سليل : ان شاء الله وكمت من مكاني جان يكوم ويايه وتقرب مني وكال

سيف : اجيت اسمعها منج انت موافقه على الزواج

سليل : مردت افكر لان اذا فكرت راح الغي كولشي مباشره كتله اي موافقه بس شرطي الوحيد دراستي مااتركها

سيف : اكيد تكمليها وحتى لو حابه تعين اعينج بس تخرجي عندج شى ثاني طلب اقصد

سليل :  لا ماعندي شكراً من رخصتك وعفته وطلعت اريد هوا دخيلك ياربي مباشره صعدت ليفوك شفت ريم ورشا يسولفن بهدوء بس دخلت سكتن

حددو الخميس قرايه الفاتحه وكطع الحق

وراها بيومين يعني مو هوايه عرفت بيه مستعجل وحضر كولشي وصار موعد خطوبتي لان همه بعدهم حزانه على الحجيه مرادو حفله واني هم مااريد خلال هاي اليومين خلصتها بس نايمه اي ردت فعلت مسويت البنات بهدوء يشتغلون بلبيت حتى لا عركات لا صياح نظفو البيت كله صوت مسمعت وماما راحت للسوك اشترتلي فستان كريمي لونه وحذاء كعدت ماما حفت وجهي كله اول مره تسوي بس حاجبي من زمان سويته بس هسه رتبته اكثر واني جوه ايدها حركه متحركت وراها سبحت وبدلت وشسورت شعري ماما واني هادئه هدوئي مثل هدوء المحيط بعد ليله عاصفه

نهر : بلعافيه يوم مهنايه بنيتي

سليل :تسلمين ماما اباوع على خواتي ساكتات وبس يباوعن عليه شبيكم

ريم : طالعه كولش حلوه

سليل : انتي احلى حبيبتي وانتي رشاوي

رشا ..هااا

سليل : ليش ساكته

رشا .. انزل اشوف بابا جاب الكيك لو لا

سليل : نزلت تركض اعرف بيها مقابله على سوايتي اذا اني نفسي مقابله على الي سويته بس هو هذا الصح

نزلت لكيت امه وخالاته اثنين ورازقيه ومرت طالب الي كاعده رجل على رجل ومعاجبها الوضع واثنين نسوان مااعرف منو مشايفتهم ولان البيت گبال البيت محتاجو سيارات من بابهم لبابنا مشي بس اسمع صوت رياجيل هوايه وهوسه مبين هواي رياجيل جايين اول مطبيت سلمو عليه بحراره اله مرت طالب مدري شبيهه واني هم مهتميت الها اصلاً بالي مو يمها

حسيت الفرحه بعيونهم جان تكول مرت طالب

امج شو ماكو لو عد رجلها متكدر تجي

لو بس تعرف اطب على مجلس زلمنه تهدد وتزامط هااا وينها هسه

سليل : حيل خجلت ومكدرت اجاوب اصلاً صرت شكدودتني من حجت

نهر : اني امها لو مو بعينج

مرت طالب : اممم امها منين امها وانتي عمتها جنج مصدكه

ام سيف : الام الي تربي مو الي تخلف الحيوانات هم تخلف تره اسگتي بله

مرت طالب : شبيج عمه شگلت اني اني قصدت هي عمتها موش امها

ام سيف : جبتي التايهه قابل كلنا ما نعرف عمتهن نعرف هي شنو بس نهر دره من الله وتسوه الف ام خلفت كافي تحابي عليهن وتحبهن اكثر من روحها اكرمينا بسكوتج يمه سليل شوكت نشتري الذهب

سليل : حسيت بكسره ماما نهر وهاي مرت طالبه لسانها متبري منها بس حلو جاوبت ام سيف مباشره كلت بكيف ماما نهر

ام سيف : حابه شى معين

سليل : لا اي شى

ام سيف : سيف جاب الحلقات على ذوقه ماقبل ننتظر نشتري الذهب كال البسها بيوم قرايه الفاتحه اذا معجبتج البسيها هسه وبعدين نبدلها شوكت متحبين

سليل : عادي اي شى خاله مو مهم لتكلفون نفسكم

ام سيف : يمه فدوه للحبيبات هاي البنات المعدلات ما يتشرطن ولا يفاصلن

سليل : وجان يصيحون اقرو الفاتحه

والله حسيتها فاتحتي مال ميت مو مال خطوبه والمفروض ماكو هلاهل لان حزانه متحملت رازقيه وهلاهلها هزت البيت هز وياها الخالات

خواتي منزلن اصلاً بس رشا تحظر الكيل بلمطبخ احس حتى الصغار مراضين على سوايتي حقهن مضاكن المر من سجاد دوم يحبهن وميرفض الهن طلب ما الومهم متعلقات بيه حييل

الهلاهل ترن بأذني وصوت الرياجيل وهي تبارك السيف قبضت روحي وخااصه من كالو العريس يطب يلبسها الحلقه دخل واني حتى مكدرت ارفع راسي وكوه حابسه دموعي

حالي مثل حال واحد عطشان وبصحراء وانطوه قطعة ذهب لاهي مي ويشربها ولايكدر يبيعها ويشتري بيها ويروي عطشه منو يشتري الذهب وهو بلصحراء

سيف هو القطعه الذهبيه الي انطت الي و اني عطشانه لحب انسان من سابع المستحيل ليكون الي اعتبرته ضحى ومجاهد حتى اكون اله ياترى من راح تعرف انخطبت وصرت لغيرك شراح تسوي ياسجاد

كعد بصفي وريحته دخلت انفاسي رغم طيبه وراقيه بس والله حسيتها مثل ريحه بخور النجف من كثر ممتضايقه حاولت اجر نفس واكول هذا الردتيه انتي وهذا اختيارج مالج حق هسه تحجين شى ولا تتذمرين

سيف : ايدج سليل

سليل : صافنه وفزيت على صوته وهوا انفاسه تلامس اذني ابتعدت بحركة جداً بسيطه لا ارادياً مني ممتعلمه عليه محد انتبهه بس هو وكاال بصوت شبهه ممسموع  ويبتسم ابتسامه خفيفه

سيف : لتخافين مراح اكلج بس البسج الحلقه

مديت ايدي ترجف لزمها

سيف : ليش هيج ايدج ثلج

سليل : ماادري

سيف : مبقى شى ان شاء الله كم شهر وادفيج بحضني

سليل : دنجت من كلامه مو خجل لا اشمئزاز مجرد مااتخيل نفسي بحضن رجال تلعب نفسي وارتبك اله ذاك ااااااخ يالوعه گلبي وسبب دماره اني احضنه بكل لهفه وشوق

اني اتمنى انفاسه اني اعشق كل مسامه بيه

نفضت راسي منه وتذكرت اني صرت لغيره عيب عليه حتى افكر بغيره

بقيت هادئه وكاعده والكل بوسني وباركلي مطول وطلع

سيف : جان عاجبني ابقى يمج بس اكو خطار من الكوت اجونه علمود الخطبه وزحمه اعوفهم

سليل : اكيد اخذ راحتك

سيف : اجيج غير وقت ونكعد براحتنا

سليل : الله كريم بس طلعو اجه بابا وباس راسي

حجي طه : بلخير بنيتي شايفه كل الخير

سليل : شكراً بابا

حجي طه : ممصدك غزالتي كبرت وصارت عروس واليوم كطعت حقها

نهر : شصار ليش تأخرتو

حجي طه : واحد من كرايبه گله ليش مجبت سيد يعقد الهم اني كلت والله ماعدنا هيج صار سنين نتزوج العقد ومحكمه وبس شنو هاي جديده صارت هسه لو تكول سبيته عمي مااعرف كوه سكته سيف

نهر : اي صدك هاي مو تزوجنا خطوبه ومحكمه وزواج اول مره اسمع هيج يعني شنو زواجاتنا صار سنين كله حرام

حجي طه : والله مااعرف يكولون من باب الشرع والحلال والحرام كتلهم والمحكمه لعد حرام نفس حجايتج مو صار سنين نتزوج هيج سكتو كالو هسه الوضع اختلف ولازم نتغير ونعرف الحلال من الحرام زين ودخلوني بمتاهات لا الها اول ولا تالي

وبالاخير كال الهم سيف عود من اعقد محكمه اشوف سيد يعقدلي وفضت السالفه

سليل : اني صاعده فوك

نهر : روحي يمه ارتاحي تعالي ابوسج قبل متصعدين

حضنتني ماما حيل وباستني وصعدت ادور على خواتي ولا وحده منهن ذني وينهن

لكيتهن كاعدات بلغرفه وغزل تلعب وريم وياها ورشا تقرا مبقى شى لامتحاناتها

كعدت حتى مكالن مبروك

رشا .. راحو

سليل : اي

ريم : يله غزوله نروح لغرفتنا انخلي ثلل ترتاح

سليل : انتم شبيكم ليش ولا وحده منكم تباوع بوجهي

ريم : مابينه مو كعد نسولف وياج

سليل : شصاير فهموني

رشا .. مصاير شى ليضل بالج

سليل : لا مبين حتى منزلتو للعالم ولا باركتولي

ريم : مبروك الكوستم حلو مالتج ولايكلج

سليل : مكعد اشاقه تره اليوم اختكم الجبيره انخطبت وهاي فرحتكم الها

رشا .. من تفرح اختنا الجبيره نفرحلها شوفي وجهج ميكصه الطبر وتردين نفرحلج ونبارك هم

سليل : مااريد مباركه مالتكم يله ولو من وجهي

ريم : تره احنا طالعين ميحتاج اطردين

نزعت ملابسي وبقيت بفراشي هااا سليل الردتي صار هسه خطيبج سيف بعد جم يوم زوجج

اذا اني رايده هذا الشى ليش احس ضلوعي طابگه على گلبي من الالم ليش احس شى ياكل بروحي على البطيئ ياربي رحمتك تعبت لا ويه سجاد ارتاحيت ولا من ابتعدت عنه ارتاحيت جبتها ضيم بضيم

رشا .. مجايج نوم موو ولا راح يجيج

سليل : جوزي مني عفيه تره البيه كافيني

رشا .. البيه انتي من ايدج مو من ايد احد هذا الي يقرر بكيفه وبلحظه عصبيه

سليل : متحملت عبالك ردتها حجه وكمت اعيط

لشوكت محد يحس بيه لشوكت ولكم مايوم ارتاحيت بحياتي جبتها واني صغيره طايح حظي واخاف من خيالي لا طفوله مثل الاوادم ولا مراهقه وهسه صرت شابه اكلت تبن اكثر

رشا .. على كيفج لتعيطين ليصير بيج شى بهذا الليل

سليل : شيصير اكثر من الصار عمري ١٠ سنوات وعمي يتحارش بيه مكان ماانام بحضنه واحسه ابويه واحس بالامان ويااه اخو ابويه ياناس اخو ابويه يتقرب مني ويتلمس كل شى بيه بمنتهى الحقاره والسفاله ويستلذ على دموعي وخوفي ورجفتي ويهددني يبقى هيج ويايه يمتع نفسه بيه ماهمه اني منو وبت منو وشكد عمرري حتى مخاف الله بيه واني من دمه  كلت اروح لامي غير عندي ام تالي تطبك وياه ومتصدك بيه  ومن رحت لابويه ضيعته وخليته يكتل اخوه وضيعت احلى ايام شبابه

وشردت عائله بكاملها لج اجت ايام ماانام اخاف اغمض لا احلم بيه يلزمني اخذ سنين من عمري كله نفس الحلم سلام يركض ورايه ويتلمس بجسمي وانهزم واختل وره بابا

ومن كدرت اعدي هاي المرحله حطيت عيني عليه جنت اصيحله عمو شفت بيه الامان والحنان الي فقدتهم شفت بيه العم الي ماشفته بسلام النذل وشفت بيه الاب الي انحرمت منه ودخلته السجن وصلته للاعدام وشفت بيه الاخ الي دار وجهه وراح ويه امه الي مافكر بيوم يكول خواتي ميتات عايشات داحن بلشوارع فسدن شفت بيه الحبيب الي كل البنات الي مثل عمري يتعلقن ويحبن شفت بيه الدنيا الادور عليها الي انسلبت مني  وماردت شى منه ردت بس اكون وياه طول العمر ولو ادري ميحبني والله مااهتم اكول حب من طرف واحد وهاي مشكلتي  بس ادري بيه يحبني تعرفين ليش ميريدني لان يخاف لا اطلع مثل امه وانهزم بيه واصخم وجهه ويخاف لا سلام سوه شى جبير بيه وماخذني واني صغيره ويتفاجإ بيه مو بنيه عبالج مااعرف بشنو يفكر بس يخاف يواجهني

اني تعبانه وبيه الم وقهر الجبال ميحملها اني مردت شى بس اعيش مرتاحه مو من حقي ليش بشنو اختلف عن البنات بشنو هنه احسن مني ليش لا طفوله بيها خير ولا مراهقه ولا شباب ليش مامكتوبلي افرح حتى هسه بسبب عصبيتي انخطبت لواحد مااحبه وهو مو ذنبه ذنبي اني الطايحه الحظ استعجلت وافقت ولازم هسه اعيش ويااه الباقي من عمري اي اني مااعرف اتصرف اني ثوله اني رعنه شتكولين كولي عليه بس والله من وره القهر الشفته كمت حتى مااتحمل قهره بسيطه واصبر

جنت احجي منهاره واروح واجي مثل المخبله وجان تحظني حييل رشا وتبجي بقوه

انتبهت على نفسي شگلت نسيت رشا متعرف بسالفه سلام

وخرتها من حظني رشاا انسي السمعتي انسي

رشا .. شنسى وانتي كل هذا صار بيج

سليل : ابوس ايدج انسي كل هذا من خيالي ماكو هيج شى

حضنتني اقوى وتبجي

رشا .. اسفه والله مو قصدي أذيج مااعرف كل هذا صار بيج سوده عليه كل هذا واني ماادري وفوكاها أذيج بلحجي

سليل : رشا اياج تحجين لاحد

رشا .. المن اكول بيا صخام وجهه احجي عفيه سامحيني والله مااضوجج بعد ولا اقهرج

سليل : كولشي مااريد بس ابقي ويايه محتاجه صديقه احجيلها واني ماعندي احد احجيله رغم ماما نهر موجوده بس تعبتها بهمي وشكوتي

رشا .. اني صديقتج واختج وكولشي التردي اصير بس لتنقهرين واحجي كولشي تحسي احجي ابقى اسمعلج لنهايه العمر  بست راسها وحضنتها اووف ياربي ولا وحده بينا بيها حظ والدنيا تضحك بوجهه تعاالي ارتاحي اباوع على سليل مثل الطفله المكسور خاطرها من ابوها لان طاردها لاول مره احس بسليل وقهرتها اخذتها بحضني والعب بشعرها من كثر مابجت تعبت ونامي بقيت اراجع كلامها حرف حرف ودموعي تنزل بهدوء وهي بحضني اخاف احسسها

وتذكرت بابا وسوايته لو بيدي هسه اكوم ابوس رجله على السواه النا بكولشي ماعدنا حظ بس بأبونه الله منطينا اب ماكو مثله

بس اخاف اسوي حركه وينتبهه واني وعدت سليل مااخلي احد يحس اني اعرف كولشي

خلصت شهر كامل واني كل ميحاول سيف يريد يلتقي بيه وحدنا اتهزم بابا بسبب تواصله ويه الناس اشكال وانواع بلمطعم كام يقتنع بسالفه لازم سيد يعقد من باب الشرع واني كلت لبابا مو هسه اعقد خلي اخلص المرحله الثانيه وطلبت منه اخاف يطلب سيف التقي بيه يرفض رغم اعرف بابا رافض بس للتأكيد

كاام يجي شوي ويروح بوجود خواتي هو حباب وطيب وبس يضحك بس ااخ مني بس لو شويه گلبي ينطيني مجال

رشا .. امتحنت جانت حيل تعبانه لان الاسئله اجت صعبه عبالها مثل السنه الي قبلها الي سميت سنه الحواسم عبالها غش ومعدلات قويه وهوسه بس هلمره حيل صار ضغط عليهم لهذا كامت تتعب بلقرايه

ومره رجعت صايره نار لزمتها شبيج

رشا .. هذا الخايس شعلان مشعول الصفحه

سليل : شبيهه وين شفتي

رشا .. جنت طالعه من الامتحان واشوف سياره تطبك قريب مني

سليل : والخط مالتج وينه

رشا .. صار امتحانين ميجي وكلت لبابا خطيه دور احد يوديني ماكو وكلت مبقى كل امتحانين اخلصهم شلون مجان شو المدرسه قريبه

سليل : اي كملي

رشا .. طبكت يمي السياره حديثه ونزل الجام وتعالي اصعدي اوصلج

سليل : وصعدتي

رشا .. هلوو ليش يمه هم عايزه اصلاً مجاوبته حاله حال لولد الموجودين بلشارع لو صاعده  وياه ميكولون هذا صاحبها عفته ومشيت شو هذا شخط السياره حيل ولكيته واكف يم بابنه واول موصلت ردت ادخل وجان يسد الباب بيده

شعلان : شلون تفشليني ومتصعدين ويايه

رشا .. حطيت عيني بعينه وحجيت بهدوء وكتله وانت منو واصعد وياك

شعلان : غير ابن خال ابوج

ريم : منو يكول

شعلان : شنو منو يكول

رشا .. مو هذا كلامك قبل سنه جنت دوم تكول هذا مو ابن رازقيه

شعلان : لدورين دفاتر عتيكه شى صار وراح وهسه علاقتي بأبوج كولش طيبه

رشا .. علاقتك بأبويه مو بيه

شعلان : انتي ليش هيج خشمج يابس

رشا .. عفته هواي على الشمس

شعلان : متضحك

رشا .. هسه شتريد انت وخر من دربي اريد ادخل البيت وكفتنا محلووه هنا

شعلان : واكف بشارعنا وهذاك بيتنا

رشا .. ذاك بيتكم مو هذا الساد الباب بيدك

شعلان : ليش مصعدتي ويايه

رشا .. ترضى اختك تصعد ويه كرايبك من الشارع واكثر الناس متعرف هو كرايبها تقبل هااا شو اخرسيت

شعلان : مجان قصدي شى مردتج ترجعين مشي

رشا .. مو شغلك ارجع مشي زحف على ايدي براحتي ومدرستي قريبه واهلي يعرفون وضعي شغل السوبر مان مااحبه جان يتقرب مني ويدنج لان هو اطول مني وكاال بنبره رجوليه

شعلان :يجي يوم واراويج السوبر مان شيسوي وهااا بموافقتج واطلبي بلسانج

رشا .. وخر شعلان من طريقي

شعلان : صار بس لتنسين هذا الشى

رشا .. بله هذا شيريد مني

سليل : خلي يولي ليش يتعرضلج هسه اكول لبابا

رشا .. هااا لا لتكولين منريد مشاكل

سليل : هاي منو التحجي الراعي الرسمي للمشاكل تكول مااريد مشاكل لا اكيد يوم القيامه قرب

رشا .. صنفي عليه هو اني صايره ملطشه ياهو اليجي يتگلب عليه ويحرك اعصابي

سليل : هههههه ادخلي بدلي وارتاحي شلون جاوبتي

رشا .. بعد وكت جان من دخلت كليه يله  تسألين

سليل : اي هاي رشا الاعرفها مو الي مدور مشاكل

رشا .. ناس متجون اله بلعين الحمره

سليل : ههههههه احب الخضره

رشا .. اروح ابدل واكلي لكمه واقرا احسن من هذا الخريط جاو

سليل : جاو

يمكن اني اغرب مخطوبه بلدنيا جنت لا احب اشوفه ولا اكعد وياه وحتى اذا كعدت احسه غريب عليه ومااختلي بيه وحدي نهائياً لازم وحده من البنات ويايه وهذا الشى جان حيل يضايقه ويخنكه بس ساكت ميكدر يحجي شى خلصت العطله وكولشي مفهمنا منها خلصناها ناكل ونشتغل وانام وبابا شغله بلمطعم ماشي والحمدلله وبمساعده عمو محسن الي صار الايد اليمنى مال بابا ولسانه وشقاه جان مشغل المطعم

وبيوم بابا طب وصاحنه كلنا كعدنا وماما نهر ويانا وطلع جيس بيه علب وصفطهن وحده تباوع بعين الثانيه هاي شنو ويفتح علبه يشوفها وينطيها لوحده ونفتحهن كل وحده الها تراجي

نهر : شنو السالفه طه هو انت منيلك

حجي طه : ليش منيلي خير من الله وهاي هدايا نجاح البنات كلهن اذنهن فارغه

ماعدهن كلت اجيب لكل وحده ترجيه

غزل : اني عندي بابا مال بيبي ريحانه بس جبيره ضامتها ماما نهر الي

حجي طه : تعالي بحضني اوووف فدووه للبنات جيبي خلي البسها الج

غزل : خاف متشوف

حجي طه : لا اشوف ولبستها على كيفي جان تندار عليه

حلووه بابا

حجي طه : تخبل حبيبتي بلعافيه

غزل : بابا حباب اريد دوا لهاي وتأشر على رگبتها

اريد اصير مثل ماما ثلل ورشا وريم ماعدهم من هاي

سليل : تأشر على الحرك مالتها تريده يتعالج دمعت عينه لبابا وكال

حجي طه : صار حبيبتي بس اشوف علاج اكو لو لا وشكد سعره

غزل : صار عندي اثنين ترجيات اخذهم وسويلي هاي اضوج منها مااريد تراجي

حجي طه : بستها من الحرك الي بركبتها اسوي الج بابا وذني الترجيات الج

سليل : كمنا بسنا بابا حتى لماما نهر جاب

بيومها حتى اكل من المطعم جايب كعدنا سوالف وضحك

ريم : بابا كول لعمو محسن ريم زعلانه عليك ليش ميجي

حجي طه : والله باباتي عنده شغل وهو لازم المحل ويايه ويتعب ولليل يله يروح لبيته

ريم : انت كول اله زعلانه وهو يفهم

حجي طه : صار ست ريم

اجاني سيف مثل كل مره كاعد وغزل كاعده يمنه حسيته ممرتاح

سليل : بيك شى

سيف : ضايج حيل

سليل : ليش

سيف : صار اربع اشهر خاطبج لا رضيتي اطلعين تشترين ذهب وتالي امي ملت واشترته وحتى من اشترته ماكلتي جيبه خلي اشوفه ولا اهتميتي بأي شى يخصه وكل مااجي مااكدر اكعد براحتي وياج لازم احد ومن اكولج خلي نطلع اطلعين الف عذر حتى مطلعين مرات حتى احسج ممتقبله جيتي واكول بعدها تستحي وممتعلمه عليه

سليل : اي ممتعلمه مو قصدي اضايقك

سيف : شلون تتعلمين وانتي حتى ممنطتني مجال احجي وياج وحدنا واقربج مني سليل ميصير شى احنا مخطوبين اني مو صاحبج وجاي من الشارع

سليل : مااكدر بعدنا معاقدين

سيف : اكثر من مره سمعت هاي الجمله بعدنا معاقدين وكتلج خلي نتزوج كلتي اكمل هاي السنه يله

سليل : اني مطلبت منك بس هاي السنه تكمل ونتزوج وانت وافقت

سيف : واني كد كلمتي منتزوج بس نكطع مهر اقلها احسج مرتي الي من حقي اطب واطلع وياج تكونين حلالي مو كل شويه تتعذرين بشى وبعد جم يوم دوامج واكيد مراح تقبلين اجي للكليه احسن شى اكطع مهر وانتي شوكت محابه نتزوج براحتج

سليل : رغم انخطبت اله بس محسيت بقيد قوي مثل مكال هسه نكطع مهر حسيت هذا هو انتهى كولشي

سليل : لا مو هسه صار عصبي وتقرب مني

سيف : بس فهميني شتردين ليش هلكد بارده ويايه ليش لهاي اللحظه ما سمعت كلمة وحده تبلل ريكي وتريحني

سليل : وانت ليش صاير اعصاب وتعيط

سيف : من تصرفاتج شكد مااحاول اتقرب منج تصديني حتى اذا اريد اجيب شى الج متردين حتى ماعندج لهفه لوجودي وشوفتي مرات اصفن اكول هي ليش وافقت على الخطوبه ادري اني لحيت عليج بس مجبرتج وادري طه مو من النوع الي يجبر احد وخاصه انتي يعني متأكد الموافقه اجت من ذاتج وعلى هواج

سليل : اي من ذاتي

سيف : لعد ليش هيج تتعاملين ويايه بس فهميني اخاف احجي كلمة وتنتقص من رجولتي

سليل : احجي اسمعك

سيف : مااحجي احسن لان اخاف تصير مشكله بس اتمنى الي بالي مو صحيح

سليل : شنو الي بالك

سيف : يجي يوم واكوله الج بس اتمنى مو صحيح لان مااسامحج اذا طلع صّـْْ(☑)ـْْحّ ورب الكعبه

سليل : بلعت ريكي عرفت يقصد سجاد مباشره كلت لغزل الكاعده قريب من عدنا تلعب غزوله كلاص مي لعمج سيف ريكه نشف

سيف : حضري نفسج رايح لابوج اخذ موافقته حتى ابدي بمعامله المهر

سليل : عفيه مو هسه

سيف : ليش هاا فهميني وجان يتقرب حيل مني وهو عصبي شنو تنتظري احجي

سليل : والله ماانتظر شى والله

سيف : واني مامستعد اصبر بعد صيري مرتي حلالي وعلى الزواج شوكت متحبين

سليل : جريت نفس بقله الحيله صدك اني شكعد انتظر اذا هو حتى محاول يتصل بعد ولا يتواصل غمضت وجريت نفس وكتله هذا هو التريده سوي

سيف : باجر جاي الصبح نسوي تحاليل الدم

سليل : روح لبابا بالاول

سيف : مالج دخل يجيج الصافي ماطول وافقتي

سليل : طلع حتى مشرب المي واني كعدت شتردين ياسليل تره الديصير هو طبيعي وكولش طبيعي تصرفه وطلبه قابل تبقين العمر كله مخطوبه

نهر : سمعت كلامه يمه بعد مابيها مجال تراجعين قرارج تره راح تصيرين مرت سيف

سليل : غرغرت عيووني وكتلها ماما مااريد

نهر : عزه بعيني والله عرفت ولج هسه كلتي للرجال موافقه نعقد

سليل : مااريد بطلت

نهر : مو هي لعبه ولج رياجيل وناس وخطبه وصار ٤ اشهر وياه تصخمين وجهه ابوج ويه اهل امه

سليل : غلطت اعرف والله واستعجلت

نهر : جان هسه كلتي كدامه مااريدك

سليل : مااكدر انطقها اخاف من المشاكل

ريم : اني اكولها اله

سليل : بس فهمني منين اطلعن من نسولف

ريم : احنا مثل الارضه وين ميعجبنا نطلع

نهر : بله اسكتي انتي بعدج صغيره ومتعرفين هاي الشغلات

ريم : هسه صرت صغيره من جنا بلكوت اكلتو راسي جبيره وجبيره والي بكدج متزوجات ومن تصيحيني على الشغل واكولج مابيه حيل تكولين شكبرج ومابيج حيل وتاليها هسه من حجيت كلتي صغيره عيديها ياعمه والقران انزع الربطه والبس تراكسود وانزل ويه الجهال العب طوبه حتى اصير صغيره رسمي واريد اشوف منو يدخلني من وكت ولتنسين صرت خامس اعدادي يعني مره حوك

سليل : مو وكتج ريم عفيه تره حالتي متسمح للشقه مالتج

ريم : والله صار ٤ اشهر منجبه وساكته ولا ادخلت وبس اتفرج شراح يصير مثل المسرحيه وهسه اجه الفصل الاخير لازم اشارك واله اموت قهر اسمعي سليل

نهر : ريم كافي واصعدي فوك

ريم : عمه خلي احجي تره تضل بگلبي وهسه يوكف واموت وتبتلون بيه من الاخير انتي استعجلتي وخربتي الاول والتالي ندري عمو جرحج واذاج وسمعج كلام محلو بحقج بس تعرفين بيه يحبج

سليل : ريم عفيه

ريم : من اشتعلت ريم خلي اكمل والله املخ شعري كدامج خلي اذبها للحجايه وافلت مو شعلتو سندس وحسام وانعام الثلاثي المرح مالتي الي اعشقهم وحاطتهم بگلبي شعلتيهم شعل بسوالفج

نهر : وراح اشعلج وياهم

ريم : والله لو تربطيني وتفخخيني هم اكمل كلامي

سليل : كملي يمعوده وفضيني حتى راح اوكع من طولي هلكد ممخنوكه

ريم : احم احم ارجع للدرر مالتي والحكم

هسه هو مسودن وميعرف يتصرف تنعدين منه ليش وتسوين سوايه اتعس منه وفوكاها انخطبتي هسه قشمري وكوليله انخطبت اذا خابر مو تسويها صدك وفوكاها من سيف جنه چالي على المعده ولا ينهضم

رشا .. ههههههه اي والله وجم حبايه مال معده متهدأ تبقى تفور

نهر : كملت هلمره الثانيه مو جنتي نايمه شنزلج

رشا .. هاي المكموعه صوتها عالي ومن يعلى معناها محتاجه مساعده مني واجيت اساعد

نهر : كرت عينك طه على خلفتك اثنين نسخه من سندس يتسنطن ويدخلن ولسانهن اطول من عدهن

رشا .. رجاءاً عمتوو هاي اهانه مااقبل بيها صّـْْ(☑)ـْْحّ اخت ريم

ريم : صّـْْ(☑)ـْْحّ يااختاه اي نعم ورثنا هاي الصفه المميزه من المناضله سابقاً سندس

بس گلبنا ابيض نخبل ياالله نموت شكد حلوين ياربي احنا

سليل : اصعد فوك ذني محاسات بناري ويلعبن بأعصابي

ريم : لا لا الله عليج اوكفي والله مو قصدي بس افهميني الصار اكبر غلط بحق عمو وحقج وانتي اصلاً بعدج صغيره يمكن لو عابره سنه سنتين اقلها لحد متتخرجين ونشوف ذاك الانتحاري المدعو سجاد الزرقاوي شيسوي اقلها من تقررين تعوفي وتعيشين ويه غيره يكون قرار صحيح مو حجيتي وياه وتعاركتي ونزلتي تهوسين زفوني مااريد العشا

سليل : شسوي هسه والله تعبت

رشا .. من ايدج وبيدج تنهين الصار اكعدي ويه بابا وفهمي شجنتي تحسين وشنو الي خلاج تقبلين بسيف عسى ولعل تنحل وتفصخين خطوبتج وتذبين هاي الاشهر من ذاكرتج

نهر : ولجن هو قميص وتشتري وتذبه هذا رجال واجه خطب وجاب زلم وناس الها وزنها وطلبها من ابوجن وكطعو حقها وطاب طالع صار اربع اشهر والناس تشوفه شنو تفصخ شنو تنسى هي لعب جهال

ريم : عمه الدنيا تغيرت هسه وتره كولشي قسمه اكو ناس بليله الحنه يتعاركون وميتزوجون

نهر :  وانتي شمدريج يمه اخاف متزوجه گبل وماادري وبليله الحنه طلكج

ريم : يااا غير اشعل ابوه وامه اكو رجال يطلك اني اضرب واطلك اي بس هو لا زلمه وطالع من ظهر ابوه ويسويها دك جلاليق استلمه

رشا .. ههههههه اهم شى وانتي لابسه البدله حتى يحس بالاهانه

نهر : كافي لا اركع راس براس وانتي الجبيره ذني الزعاطيط ديلعبن براسج مالج دخل بسوالفهن

سليل : حضنت ماما عفيه يوم خلصيني

ريم : وهلا وهلا وراح نخلص من الچالي

وجان تشيل عمه النعال وشمرته وبراسي صار

شوفي عمه اذا منجحت هاي السنه من الخامس نعالج السبب ضرب ذكائي وطيره

نهر : اصعدن فوك لا وروح ابويه واخويه اطيح حظجن وماابقي شعرايه براسجن

رشا .. تعالي يااختي ميقدرون مواهبنا وانتي يلجبيره ابقي ابجي لحد متنزفين لسيف العكره مااوصيج

نهر : يله اصعدن مالج دخل بذني بعدهن صغار ويحبن سجاد وميعرفن يتصرفن بعدهن عبالهن الدنيا حلويات وضحك وشقى ميعرفن الحياه الزوجيه شنو وفتحن عينهن عليه لهذا يدافعن اله لتسمعين الهن

سليل : كلامهن صّـْْ(☑)ـْْحّ ماما جان المفروض مااستعجل

نهر : كتلج وحجيت ولا فاد شلون بيج يابنتي

سليل : فدووه احجي ويه بابا بداعتي بمعزتي بگلبج احجي ويااه ماعندي غيرج تحلها اليه

نهر : اوووف احجي والله يستر

سليل : اجه بابا واسمع اعياطه مقبل على الفصخ متوقعت ميقبل حتى كال لماما لتحجي بيها ماطول رادته والولد مصدر شى منه مالها حق تفصخ وصار نقاش طويل بينهم انختم ماكو فصخ وكولشي يمشي طبيعي

بليلتها من حركت گلبي خلصتها بلسطح ساعه اكعد ساعه ابجي ياربي شلون بيه شلون للصبح كاعده النوم طار من عيني والراحه اختفت من روحي ودمي يغلي يعني ليش دومي مااعرف اتصرف ليش استعجل بكولشي الصبح دز خبر كال اخذ المستمسكات اسحب استماره واجيها خلي تحضر نفسها

اني جنت احظر نفسي بس حتى اندفن حيل بيه هذا نتيجه التسرع هذا نتيجه اتخاذ القرار بلحظه غضب ماانكر سيف الف بنيه تتمناه بس مو اني يمكن لو حب سجاد مموجود بگلبي جان عشت احسن عيشه ويااه بس اني بعده گلبي ملجوم ومتأذي  شلون اخطأ واتسرع وهو هم من صرت خطيبته كاام ميتحمل وميصبر يمكن لو منتظره لحد مااهدأ واعالج گلبي وروحي جان اتخذت القرار الصح بس بعد فات الاوان على الندم

نهر : اجه سيف وراد مستمسكات سليل

انطيتهم اله صفن

سيف : شو الجنسيه مكتوب متزوجه هي مو اطلكت

نهر : اي على اساس يبدلوها وصار السقوط وذيج الفترات تعرف الدوائر كلها مسدده ومغيرناها

سيف : يله اني اغيرها من اكمل معامله المهر مالتنا

سليل : بدلت شلون مجان ولا الي خلك وبابا جوه ضايج مني ومن تهوري وتصرفاتي الممحسوبه حتى للمطعم مراح راد يتأكد مااسوي شى يحرجه ويه سيف او احجي شى واخرب الدنيا بقيت انتظر جوه بلهول

والمفروض سيف راح يسحب استماره وراها نروح للمستشفى جان لازم من قبل ساعه هو هنا اتأخر واني منا مخنوكه احس حتى معدتي انگلبت وماما تتوسل اكل المي مااكدر اشربه

اندكت الباب وطب سيف عيونه تجدح ناار ويعيط

سيف : هذا الساقط ممطلكج بعدج على ذمته خاتون

يتبع ...

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_العاشر

شلونكم؟؟

شلون لون المستحه البوجوهكم

مثل الاول؟؟لو خبط مايه وتغير لونكم

جنت اشوف الشمس تطلع مرتين

مره من حظن السما..

ومره تطلع من اشوف اوجوهكم

شلونكم ؟؟شلون حال الوفه بين عيونكم

تربي لو عافت سججنه

انه بعيوني اشك ولا اشك بعيونكم

انه بكَليبي اشك ولا اشك بكَلوبكم

اندكت الباب وطب سيف عيونه تجدح ناار ويعيط

سيف : هذا الساقط ممطلكج بعدج على ذمته خاتون

سليل : الصدمه الي صارت خلتني مباشره تنزل دموعي مااعرف فرح على صدمه على ذهول ضليت كاعده متحركت احس رجلي بعد متعيني والله اذا اكوم اوكع من طول واخرب يعني شنو اني بعدني زوجته زين شلون هو طلكني لا اكيد كعد احلم لا هياته بابا يعيط وسيف متخبل وصوته مسمع البيت كله اذا ما واصل للشارع اني ردت فعلي الوحيده صافنه بوجوهم ودموعي تنزل

حجي طه : انت تخبلت شنو على ذمته

سيف : رحت اخذ استماره وقدمت الجنسيه مالتها شافوها متزوجه كالو ميصير فهمتهم على الوضع وكتلها مطلقه بس ممغيرين الجناسي باقي على القديم كالو انشوف بلسجلات وساعه يركضوني من غرفه لغرفه وفوكاها هوسه وانطيت فلوس يله استعجلو بيها تالي طلعت بعدها على ذمته

حجي طه : لك لتخبلني هو طلكها كدامي وكال راح امشي بلمعامله

سيف : ولا واصل للمحكمه باقيه على ذمته زين انت وين عقلك من زوجت بتك وطلكتها غير تسأل على ورقتها شصار مصار

حجي طه : هو اني جنت بيا حال مو كدامك حاير بيهم ومهزوم للكوت وروح ابويه عقل ما ضل براسي ردت بس تصفى اموري ولتنسى اني مأمن بيه ومستحيل اتوقع يدك هيج دكه

سيف : يادكه طه شلون تأمن بواحد ساقط يلعب بعرضك لعب يتزوج ويطلك ويطب ويطلع والله اعلم شمسوي

نهر : لهنا وبس سيف مااسمحلك اني مقدره وضعك وصدمتك بس مااسمحلك تتجاوز على سجاد

سيف : لعد سوايته هاي سوايه وهم الج عين ادافعين عنه

نهر : ادافع ولاخر لحظه بعمري التحجي عليه ولو كل مره اعيدها ومو قصدي اعير اخويه بس هذا حق والساكت عن الحق شيطان اخرس الي تكول عليه ساقط حط بنات طه جوه جناحه وداراهن بمي عينه ويخاف عليهن من الهوا وصيحهن كدامك اذا بيوم باوع عليهن بنظره وصخه جان اذا واحد بس فات من يمهن ياكله اكل جان يحسبهن بناته وعرضه صوتهن اذا عالي يعيط ميقبل بشر يسمع صوتهن او يعيب بيهن وبأخلاقهن وهاي سليل اكبر دليل هاي تربيه سجاد لو بيها خلل مجان كتلت روحك حتى تتزوجها وشفت خواتها زلم مو بنات اتحدا واحد يكدر يكول الهن على عينجن حاجب ياكلنه اكل تره سجاد جان الهن اب واخ وجان انظف انسان وياهن ومايوم سوي شى موزين بلوكت الي كل الناس دارت وجوهم عنا هو صار حتى الي اخ وظهر وسند وكت حسره علينه اللكمه جان يكطع من لحمه ويوكلنا اني مو بنت عمته واكبر منه جان يحاسبني تكول طفله حتى من اطلع لازم اكوله وين وليش عشنا كلنا بس بنات بيت واحد بس كل المنطقه تحلف بأخلاقنا

سيف : انتي افتهمتيني غلط على كيفج

نهر : ياغلط رحمه لموتاك شوف حالك حقك تعيط وتضوج بس مو من حقك تطعن بشرفه اذا هو ساقط معناها احنا هم ساقطات لان هاي السنين الفاتت كلها هو بنصنا ومسؤول علينا

حجي طه :  عيب تكول يلعب بعرضك هاي كلمة جبيره بحقي سيف تره حيل تجاوزت  اني اشهد لسجاد وماانسى فضله طول عمري نعم الاخ الي والاب لبناتي بس مااعرف شنو الي خلاه يسوي هيج

سيف : والله من كثر ما متخبل انتم هم على كيفكم ويايه واحد راح يكطع مهر لخطيبته يلكاها على ذمه غيره شلون تتوقع حاله

حجي طه : ادري متخبل بس مو من حقك تتجاوز

سيف : بروح امك تحملني تره البيه كافيني بس فهمني انت كلت طلكها شلون طلكها وحسب كلامك اتزوجها محكمه غير يطلكها محكمه

حجي طه : اني جنت مسجون مو تعرف وامها رادت تزوجها هو اجاني وافقت وجابها وبحضوري بعد ماقدم طلب للمحكمه واتزوجت اصولياً وهو حتى يضمن كولشي حسب الاصول حتى الجنسيه غيرها حتى يكون هو المسؤول عنها وبعد متكدر سندس تسوي شى وصارت زوجته رسمي بلمحكمه ومتزوجه بلجنسيه

سيف : لهنا كولشي تمام كمل

حجي طه : وراها من طلعت رحت جبت شهود اثنين حتى يطلك سيد كاظم الله يذكره بلخير واحد ويااه

سيف : ليش انت عاقد سيد الها

حجي طه : لا معاقد بس محكمه

سيف : لعد المن بعد جايبهم

حجي طه : والله كلت من باب الشرع

سيف : هاي شبيك طه ميصير غير لو عاقد الها سيد يله يصير شو انت تخيط وتخربط بكيفك

حجي طه : اشكرك

سيف : اوووف استغفر الله اعذرني تره والقران اعصابي منتهيه كمل فدوه

حجي طه : عاذرك ولو غير وكت جان عرفت شجاوبك

سيف : اعتذر وحقك على راسي بس كمل

حجي طه : اني سألت سيد كاظم كال خلي يرمي اليمين حتى يراجع وحده بلمحكمه ليش البنيه تتبهذل

سيف : ميصير ومياكل هذا الشى اله لو عاقد سيد

حجي طه : المهم رمى اليمين وكتله انت امشي بلمعامله اني شمعرفني بهاي الامور حتى بلدين ماافهم كفيلك الله هاي اصلي واصوم واقرا قران هاي الامور الفقهيه ولا افتهم بيها اي شى وتوني طالع من السجن واموري كلها مخربطه ومنا انعام وخوفي على بناتي ومنا العيشه شلون ادبرها يعني طايح حظي من كل مكان لهذا مدققت واصلاً مصار شى يخليني ادقق البنيه كعد تدرس ومو بالي حتى ازوجها وسجاد سنين مسلمه عرضي وبناتي وبيتي اجي اخونه تالي وكت وصار السقوط بعدها يعني فوكه فوكه الامور حتى نسيت زواجها من سجاد اله من انت تقدمت وردتها

سيف : وهسه هي مطلقه شرعاً لان كدام شهود حتى لو معاقد سيد بس شنو الفايده وهي على ذمته قانوناً شلون نشوف الشهود وانقدم معامله تفريق ويشهدون طلكها كدامهم

حجي طه : سيد كاظم مااعرف طريقه لان مهدد وطافر صار بال ٦ اشهر والثاني عن طريقه يعني اله الكه كاظم يله الكاااه

سيف :خرب حظي الاكشر

حجي طه : زين نهر هو مو اجه ياخذ مستمسكات سليل شسوه بيهن

نهر : اجاني كال معامله الطلاك شبهه كامله انطيني الجنسيه احولها لان مكتوب متزوجه راح وره مده رجعهن وكال ماكو معاملات الدوائر كلها مسدوده والسجلات ناقليها لغير مكان من وره الحواسم يخافون عليها لهذا كايلين اله انتظر فد شهر بلكت يهدا الحال وهذا الشى جان بوقت السقوط ورجع الجنسيه سألته بوقتها ورقه طلاكها كال قابل مداومين  اكيد حالهم حال كل الدوائر من يرجعون اجيب ورقتها واغير جنسيتها ورجعت ضميت المستمسكات ويه مال خواتها وبعد ما سألت

نهر : اباوع على سيف متخبل يكوم ويكعد ويضرب بلحايط حتى مباوع على سليل الي من صارت الكعده لهسه منطقت حرف

صخام بوجهك يسجاد هاي سوايه

سيف : هلمره المحاكم صايره المعاملات بيها تاخذ بالاشهر اذا مو سنين دوله ماكو وقانون فالت شسوي هسه دبرني طه خابره لهذا الطايح الحظ وخلي يجي يطلك ماعندك عنوان شى رقم ثريا اي اتصال اي شى المهم يجي يطلك ويولي

حجي طه : لا مااعرف اي شى عنه تعرفين شى نهر

نهر : هاااا لا مااعرف خفت اكول الرقم عندي ضميته هسه شلون احصله يرادلي جهاز شلون لازم احجي ويااه واعرف ليش هيج سوه يله انطي لطه

سيف : وهسه شكول لاهلي اذا همه حتى ميعرفون بيها متزوجه

نهر : ليش مبلغتهم

سيف : لا محجيت شى كلت هي باكر المن بعد جايب الحجايه الها وهسه اذا كتلهم الدنيا تشتعل

حجي طه : جان المفروض تكول وهي ممسويه شى حرام او غلط تزوجت بظرف صعب واطلكت بدون حتى ميلمسها

سيف : وشنو الفايده طعنك وبقاها على ذمته ودار وجهه وراح هي هاي دكه هسه اذا اكول ناقص نهر تتخبل

نهر : طبعاً اتخبل ومااقبل واكيد اله اسبابه

سيف : يااسباب الي يخلي يترك بنيه شابه على  ذمته ويدير وجهه ويروح وفوكاها يكذب على ابوها عود هو مسوي معامله والاخ حتى مواصل لشارع المحكمه لو للمحكمه نفسها

اندار على سليل وكاال

ليش تبجين

سليل : رفعت راسي وباوعت عليه

سيف : لتبجين اله اطلكج منا وداعتج لو اعرف انطي العندي والماعندي

سليل : دنجت ونزلت دموعي اكثر شكول مااريد اطلك اريد ابقى على ذمته اريد افهم ليش بقاني محجوزه اله ولك سجاد دومك لاعب بأعصابي

نهر : تعالي ماما اصعدي ارتاحي وربج كريم

سيف : عندي ولد صديقي عنده محامي راح اخلي يمشي بلمعامله واذا سألوكم اهلي كولو سيف أجلها عود اني اطلع عذر واشوف شلون احلها

حجي طه : اجي وياك للمحامي

نهر : طلعو وانداريت على سليل دنجت عليها تلوميني من اكولج ابن خالي مخبل ومو بعقله هاي سوايه يسويها غير مااكدر احجي كدامهم

سليل : رفعت راسي وكتلها ماما بعدني زوجته

نهر : بله هسه هاي دموع فرح حزن شنو بلضبط

سليل : مااعرف بس الاعرفه سجاد معافني

نهر : اوف يگلبج جنه گلب عمتج لا يحقد ولا يشيل والله اكص ايدي اذا هاي دموع حزن

سليل : ابتسمت وجان اسمع هلهوله

ريم : كعدت على عيطه سيف نزلت على كيفي اسمع شبيهه واتفاجأ عمو بعده ممطلك محكمه رجعت ركض لرشا الي جانت نايمه طبيت ركض لغرفتها

ولج رشا رشيوه

رشا .. امممم شتريدين عوفيني نايمه وغطت راسها

ريم : ولج تنبل كومي

رشا .. يمعوده خلي انام مو وكتج

ريم : ولج خبر اقوى من خبر سقوط صدام

رشا .. فتحت عيني واني وكفشتي شكوو ولج ياستار

ريم : كمت على حيلي واهز جتف عمو ماطلك ثلل

رشا .. فركت عيني ولج شتكولين

ريم : عمو سجاد مطلك ثلل بعدها على ذمته قانوناً

رشا .. شلون يصير وهو طلكها كدامنه

ريم : احد گلج اني قاضي وازوج واطلك واعرف بلقانون اني عليه الصافي والصافي يكول ثلل مراح تتزوج سيف وهي بعدها بذمه عمو النجر هلا هلا

رشا .. خلي نكوم نفهم شكوو

ريم : مو تردين تنامين

رشا .. يانوم هذا الخبر يخليني صاحيه لشهر ليكدام وكعدنا نسمع كولشي بس تأكدنا بابا وسيف طلعو وتحركت السياره والجو الامان جان انطكها بهلهوله كللللوووووش

سليل : انداريت واشوف ذني يهلهل واكفات على الدرج ويرگصن

ريم : عبود خطبوله مره يلا حيو حيو من غير حمره محمره يلا حيو حيو

نهر : اشششش وجع من الصبح شجاجن

رشا .. غير صبحنا بمصباح يموت ثلل اجتج بيضه مكشره ليمج بعد شتردين

نهر : باع ذني ميعرفن راح تصير مشاكل وهنه مكيفات

ريم : عادي شيصير قابل صدام وسقط والامريكان ودخلو وتفجيرات وكعولنا دك واني ودخلت علمي شيصير بعد مصايب اكبر اقلها خبر ثلل يريحنا شويه فد جم شهر ودك عيني دك

رشا .. شعندج صافنه وايدج على الخد جنج عاشكه وبالج احد

سليل : ابتسمت ومسحت دموعي باع ذني شذكركم بهاي الاغاني القديمه

ريم : صار ست ثلل نغنيلج على الموديل

اصبرلك صبر ايوب وبكدها بعد مرتين

وابقى بها تجي وياريت منتظرك يا نور العين

رشا : خلي يطول صبري وياك

ما اتعب ولا انساك

واني اللي صبرت سنين

ظلت على السنه وسنتين

نهر : بس وحده ترفع وحده تكبس تكول فرقه حسب الله عدنا

ريم : عمه متشجع المواهب الموسيقيه الشابه

نهر : بهاي الاصوات الي تكطع الخبز والمي من البيت

رشا .. والله ياعمه ذوقج متغير نسامحج بما ان احنا مرتاحات

نهر : وهاي المكروده تبجي وانت تتمضحكن

ريم : شبيهه تخبل هلجم دمعه على جم وصخايه مال الخشم كلينسه وتمسحهم وتروح بس سيف اذا لطش وصار رجلها شيروحه ياناس چالي على الگلب

هسه لو مشعول جان بيها مجال اقلها اتكافش وياه اسوي بيه دكات معدله

رشا .. نغزني گلبي من كالت هيج مااعرف ليش

نهر : يعني انتي معاجبج سيف بس اذا اي واحد يخطبها عادي

ريم : يايخطب عمه البنيه متزوجه عمو وهلا وهلا صارت صك مسجل بلعقاري اله اني اريدها لعمو وبس فدوه لگلبه شكد مشتاقه لسوالفه

سليل : اكوم ابدل تعبت وراسي راح يطك

ريم : سلامتج حقج والله اني هسه من الصدمه لو بيدي اكل طلي كامل

سليل : خوش مصدومه

ريم : شعليه هاي معدتي النونيه تحب الاكل

رشا .. اي والله اني هم جعت امشي نسوي ريوك لان هسه عمه تحير بسليل بينا الله يعينها عمه عينج على زوجه ابن خالج تره تعبانه

نهر : شوفيهن هسه اذا اضربهن احد يلومني

سليل : هههه مينطيج گلبج

نهر : فدوه لضحكتج انتي زينه بس طمني گلبي

سليل : زينه ماما ليضل بالج بس اريد اتمدد احس بدوخه

نهر : متتريكين

ريم : لو منج اكل طبقه بيض كامله و٣ كيلوات جبن على هذا الخبر

سليل : ليش احد كلج اريد اصير فيل

ريم : شبيكم ويه الفيل والله ظالمي يخبل واكله قليل بس هو حظه اجه من الدنيا سمين وكلكم حاطين عينكم عليه

رشا .. ياعيني راح ابجي من الحنيه الي نزلت عليج امشي سوي جاي لا اسويج زرافه مو بس فيل وانتم تعالو تريكو ويانه

سليل : مااكدر اريد اروح ارتاح

صعدت واني عقلي ميوكف من التفكير شديصير بيه والف سؤال بالي وكلها اجابتها عند سجاد وشلون اوصله

مر يومين وبابا وسيف يركضون منا ويجون منا واشوف ماما حايره ودايخه يجوز حتى اكثر مني

نهر : ريمو تعالي امي

ريم : هاا عمه تره والله مااشر ملابس ظهري انكسر من صعدت الدرج وذيج التنبل مخلصتها نوم علينا

نهر : مو ملابس تعالي اكعدي احجي وياج

ريم : ممسويه مكسوره والله

نهر : ولج امي ممسويه ادري بس اكعدي اريد شغله منج

ريم : مفلسه ولا دينار

نهر : راح اركعج على حلكج غير تخليني اكمل

ريم : سكتت احجي

نهر : اريدج اطلبين من ابوج يجي عمج محسن للبيت

ريم : ليش شكوو شصار

نهر : ركزي ويايه فدووه تره افادي مورم ومابيه اعيد كل شويه اريد جهاز الثريا مال عمج واذا طلبت الجهاز كدام طه راح يعرف عندي رقم سجاد

ريم : واذا عرفه شكوو بيها

نهر : اريد اتفاهم وياه بالاول وحدي يله بعدين اكول لابوج وماكو غيرج تحلها اريدج اطلبين من طه او اطلعين حجه حتى يجي محسن لهنا بدون ميشك ابوج بشى

ريم : هاي ماكو اسهل منها بس شتنطيني

نهر : نعال على راسج كولشي ماالج ولج تساوميني

ريم : هاي شبيج ياعمه قابل راح اطلب خزينه الدوله اريدج بس تسويلي بسبوسه الي وحده وماانطي منها ابد لاحد

نهر : سهله وبعد

ريم : امممم اريد تسوين شاميه وهااا اريد برياني عليه قطع لحم كبار وبتيته واريد

نهر : اوكف شلون رهمتيها مالح حلوو شكعد تخبطين

ريم : عمه انتي سويها والمعده تصفي بعدين المن لعد عدنا معده واهم شى البرياني اريد ماعون خاص اليه واله والله احجي كولشي لبابا واحرك الاخضر واليابس

نهر : انتي احجي شى لطه واحركج الج

ريم : ههههه متسويها اقصى شى عندج تعيطين وتهددين ياعمتو انت گلبك عسل عسل

نهر : متشوفين طايح حظي يله فضيني تسويها لو لا

ريم : طلباتي تجي وبدون غش

نهر : اسويلج والله بس فضيلي هاي السالفه

ريم : بابا

نهر : صوتج

ريم : بيها اكل عمتو راح احرك گلب رشا لازم ابدا العمل من هسه وركضت على بابا

حجي طه : هاا ريمو

ريم : اريد رساله توصلها لعمو محسن كول اله ريم زعلانه منك وبس

حجي طه : هاا ليش

ريم : بس هيج كول اله وهو هسه يعرف

حجي طه : صار وبعد

دنجت على خده وبست احبك

حجي طه : ههههه اوف منج ام لسان اختج شلونها منتبهين عليها

ريم : والله مابيها شى احسن مني ومنك بس جايتها هبه بسيطه من الضوجه وتروح ليضل بالك

حجي طه : الله يريح گلبها

ريم : امين مو تنسى بابا تره ازعل منك انت هم

حجي طه : صار ست ريم باجر عمج محسن يمج حتى يصالحج

ريم : طلعت اركض لعمه  يله عمه للمطبخ اريد كلهن اليوم باجر عمو محسن هنا

نهر : مالي خلك هسه باجر اسويلج

ريم : والله اروح لبابا واكوله لدز عمو واخرب كولشي

نهر : اااخ منج كايمه

ريم : نسوان متجي اله بلعين الحمره

نهر : ثاني يوم انتظرت محسن والدقيقه احسها بسنه وهاي سليل حابسه روحها

اجه محسن هاي دكت الباب

محسن : هله نهر شلونج

نهر :  الْحٍمَدٍ للـّہ جايب الثريا وياك

محسن : هاا شنو عبالي مشتاقين الي طلعتو علمود الثريا ايا مصلحجيه

نهر : اريده فدوه شغله ظروريه

محسن : هاج وين الزيبك

نهر : ريم تعالي ماما اجه عمج محسن

ريم : هلوو عموو شلونك

محسن : كالو زعلانه

ريم : اني ازعل على عمي مستحيل عمه نهر رادت الثريا ومالكينا غير هاي الحجه

محسن : صريحه ماتكذب

ريم : وليش اكذب واذا تريد هسه ازعل ماعندي شى واخسرك علاكه حلويات

محسن : اصلاً جبتهم الج

ريم : عفيه بعمو الحباب

محسن : لو ابوج ماخذ وكاحتج جان هسه عنده عماره ويمكن وزير

ريم : هههههه يعني راح اصير وزيره

محسن : لا قفاصه محد يفلت منج

ريم : اجيبلك ببسي بين متجي عمه

محسن : سويلي جاي

ريم : صاار

نهر : اخذت الجهاز وادك وارجف وادعي كون هو يشيله دك دك وجان اسمع الو مالته

نهر : هاا سجاد اني نهر

سجاد : نهر شكو صاير شى سليل بيها شى

نهر : على كيفك مابيها اي شى ولا احنا بينا شى اني خابرتك حتى اعتب عليك وافهم منك

سجاد : منيلج هذا الجهاز

نهر : من محسن صديق طه

سجاد : شصار گلبي كام يلعب

نهر : يلمصخم هاي سوايه سوايتك

سجاد : شكوو يمعوده مو نشفتي ريكي

نهر : ليش ممطلك سليل

سجاد : هاااا

نهر : لتكول هااا وتفكر بكذبه عرفنا ممطلك

سجاد : وشلون عرفتو

نهر : سألنا

سجاد : شصاير واني مااعرفه نهر

نهر : بلعت ريك وكتله مصاير شى بس ردنا نبدل الجنسيه مالتها وكالولنا مردت اكوله هذا خبل ومااعرف ردت فعله

سجاد : والمطلوب هسه شنو

نهر : شلون يحجي برود

سجاد : شتردين نهر

نهر : اريد اشرب من دمك على هاي سوايتك طه متخبل منك وحيل مقهور دكتك متتسولف سجاد وهاي المسكينه مخلصتها لو بجي لو تصفن يعني فهمني عقلك بيه شى لو ما معاشرتك صار سنين اكول خبل مو عاقل

سجاد : شتردين هسه

نهر : احجيلي كولشي احلفك بالله ورسله وكتبه احجيلي كولشي

جر نفس قووي وسمعت صوت الجداحه شلون ورث جكاره وجر نفس

سجاد : اني جان نيتي اطلكها ويوم مارميت اليمين كلت امشي معامله بس طه فاجأني كال راح اخذهن للكوت وخبلني خلاني اضرب اخماس بأسداس ومااندل دربي گلت خليها هسه اشوف تاليها

نهر : شتشوف وانت مطلكها

سجاد : شرعاً مو قانوناً وطول ما القانون ويايه محد يكدر ياخذها

نهر : هااا ياخذها شو تحجي كأنها مالتك

سجاد : تدرين كولش زين اني احبها ليش تغشمين روحج

نهر : لا بالله هو اني اغشم لو انت جم مره صديتها وجم مره كتلها منصير سوه

سجاد : هسه اكمل لو اروح

نهر : كمل يمعود

سجاد : وراها صار السقوط وهاي الشغلات انتظرت ومن صارت سالفه البنات خفت لتاخذها سندس بس من جبتهم للكوت كلت مابيها مجال لازم اعوفها براحتها تعيش حياتها اجيت ولكيت شلون هذا الخايس سيف يفتر وراها لو عقلي وكف كمت النوم ماانامه شلون وشسوي اخذت المستمسكات منج وبقت يومين بجيبي

نهر : ومارحت للمحكمه موو

سجاد : ولا وصلت ورحت سألت كالو اله اطلك محكمه او يجيبون الشهود وتصير تفريق وهاي تاخذلها اشهر اذا مو سنين لان لازم يدزون عليه وين يلكوني وخاصه بهيج ايام دوله وماكو وتايهه ودليلها الله

نهر : وبعدين شراح تستفاد من الي سويته انت عفتها سجاد وكتلها روحي عيشي حياتج ليش تناقض نفسك تحجي وتفكر بشى وتتصرف شى ثاني حتى حرام عليك توكف بختها شنو هاي الانانيه لخاطر نبيك

سجاد : اذا مو اناني يعني مااحبها الي يحب لازم يصير اناني واني من يم سليل رب الانانيه

نهر : لعد ليش متتزوجها وتخليها يمك قبل كم شهر خابرتك وتخبلت عليها ونهيت كولشي وياها وخيرتها بينك وبين دراستها

سجاد : راح اكولج شى تدرين ليش بقيت بسوريا ومارجعت

نهر : ليش

سجاد : علمودها

نهر : هاي شلك بيها

سجاد : تعرفين بقيت كم يوم يمها خبلتها وتخبلت كلت اذا ابقى راح أذيها وابطلها

نهر : انت مو طلبت هذا الشى منها

سجاد : ردت اشوف معزتي عدها من كل عقلج اخليها تعوف الكليه اني شاب گلبي يله كملت دراستها ودخلتها للكليه اجي ابطلها منها بس ردت اشوف شكد تحبني وهي مفهمتني مع الاسف وضلت تعيط واختارت دراستها ورغم هذا مزعلت

نهر : انت ليش هيج تتصرف متكولي

سجاد : حتى احميها مني كلت تكمل دراستها واني بعيد حتى مااغار واشوفها كدامي طابه طالعه واتخبل واخبلها لزمت العصا من النص كلت هم اشتغل هنا وهم ابتعد حتى تكمل دراستها ومااضغط عليها وهم انطيها مجال تكبر وتنضج حتى يوم ماارجع واطلب تكون مرتي مدك الناقصه بيه وتكون اختارتني بگلبها وعقلها ذيج السنين حبتني لان ماكو غيري كدامها ومراهقه بس هسه الدنيا كلها كدامها واذا بقت سنوات الكليه محافظه على حبها وعهدها الي احطها على راسي وتصير ام بيتي واني مأمن ميصير بيه الي صار بأبويه وطه ولتكولين سليل غير تبقى مره والمره يحكمها گلبها ومااريد يوم يحكمها ضدي اريدها تتحملني شكد متكدر مو حجي لسان قول وفعل

نهر : تنهدت وغمضت وبگلبي اكول لو تدري بيها انخطبت شسوي اااخ منج سليل شلعبتي بروحج

سجاد : شوو سكتي

نهر : شحجي وانت لاعب لعب وبكيفك تخطط وبكيفك تنفذ واحنا ضالين شطرنج بيدك

سجاد : ممأذي احد بيكم اني سافرت حتى بس ما أذيها مني واشغلها عن مستقبلها وتكمل دراستها وتختار صح هاي فوك متشكريني

نهر : ولك كول لتذبحيني خليتني شكدوتني كدام طه انت تعرف شسويت عفت البنيه معلگه لا هي الك ولا لغيرك هذا مو حجي مال عقال سجاد مو من حقكك تعوفها هيج حتى ممبلغها ولا بلغت احد انت حتى مخليت احترام لا الي ولا لابوها بكيفك تتصرف تكول جهال كدامك كول يابه هيج وهيج بالي يجوز هي متقبل يجوز ابوها ميقبل من الاول ابوها كال هي الك وانت مقبلت وراها البنيه توسلت بيك وهم ماقبلت تالي بس حسيت اكو احد رايدها انگلبت شيطان والاحلى بلوجهه توكف ولا عبالك مسوي شى وتره هي هسه مو مرتك اخاف مكيف شرعاً رامي اليمين عليها

سجاد : بس قانوناً مرتي

نهر : طز بلقانون الف درب نكدر نسوي وانطلكها منك وعود نكع القانون واشرب ميه

سجاد : انطيني سليل

نهر : شنو

سجاد : لتصفنين انطيني سليل

صعدت فوك وفتحت الباب جانت مغطيه راسها

ماما سليل

سليل : وخرت الغطا هاا يوم

شنو هذا اخذت الجهاز واني اعرف هو على الخط كمت ارجف خوف على اشتياق على لهفه اباوع على اصابيع ايدي ترجف

صحت الوو كوه نطقتها

سجاد : كلمة وحده ماعندي غيرها

سليل : شنو وابلع بريكي من الخوف جان صوته عالي وعصبي

سجاد : ترديني لو لا

سليل : هاااا

سجاد : ارجع اعيد كلمتي ترديني لو لا

سليل : نزلت دمعتي وغمضت واتنفس بهدوء جانت نبرته الاولى قويه وبأعصاب بس يمكن حس على حالي وبقى يتنفس ويايه لحد ما همس

جان يهمس سليل

سليل : اممم

سجاد : اني مكدرت اطلكج مكدرت اخسرج فكرة غيري يلمسج خبلتني مجرد مااغمض عيني واتخيل غيري يشم ريحتج خلتني اركع راسي بلحايط اني الهوا اذا فات يمج اغار عليج منه يجوز اني شكاك عقلي مو مثل غيري تصرفاتي ممحسوبه مرات ايدي تسبق عقلي وضعي مخربط بس متلكين رجال يحبج بكدي

اني هاي السنين الاخيره خلصتها اصفن على طولج من تمشين من تكعدين من تاكلين حتى من تتنفسين جنت كوه لازم نفسي منج والله خفت عليج حتى من روحي  من عيني جنت اخاف تروح عيني لجزء من جسمج وانغر بيه وافقد من حبي كل الكلته الج قبل براس السنه من كلتي سكرت هذا نقطه بحر عن الي بگلبي

سليل انت نفسي تعرفين شنو نفسي وماكو اغلى من النفس على الواحد وانتي صرتي اغلى تتحمليني تتحملين حبي وجنوني بيج كولشي مااريد منج بس تخلين بالج سجاد روحه بلتراب التمشين بيه واذا تعصب عليج وتخبل وغار من حبه وتعلقه بيج

سليل : كمت اشهك متوقعت بيوم اسمع هذا الحجي منه عمه نهر تباوع متعرف شديكول جان يحجي بهدوء عجيب وانفاسه احسها تدخل انفاسي من كثر ما مركزه ويااه واتخيله

سجاد : مو قصدي اكسرج واعلكج بيه لان انت اصلاً معلكه بروحي بس ردت احميج من سجاد الثاني الي من يطلع اني نفسي مااسيطر عليه ردت ادرسين وتكملين وافتخر بيج وبنجاحج وبعدها اجي واسألج ترديني يابنت الناس تتحمليني بس هسه من عرفتي بعدج قانوناً بذمتي راح اكول ترديني وحسبي حسابج هاي الفتره كلها مراح اتقرب منج اعتبري اختبار الي والج لحد متكونين جاهزه تتحملين كولشي ويايه واني هم عسى ولعل اعقل ومااتخبل عليج ولو الي يحب شيعقله

هااا سليل جوابج شنو

سليل : همست ونسيت حتى ماما واكفه وگلت اني كولش احبك واذا انت روحك بيه مره اني روحي بيك الف مره

سجاد : روحي ارتاحي وصلت اجابتج يبنت روحي ومسحيلي دموعج ذني مال سجاد مااحب احد يشوفهن حتى اهلج ذني الي وبس

سليل : مسحتهم وابتسمت

نهر : هااا ولج قشمرج

سجاد : صيري طبابه خير بنت عمي اعرفج طيبه لتصيرين تالي وكت مثل امج

سليل : هههههه

نهر : شكال وضحكتي

سليل : هو هسه يكولج سجاد

سجاد : هااا يانفسي

سليل : دير بالك على نفسك وارجعلي

سجاد : ادعيلي

سليل : ربي وگلبي وياك وين متروح

سجاد : انطيني نهر

نهر : شسويت وگلبت حالها

سجاد : رجعي الجهاز لصديق طه واني شويه واخابره لطه واعتذر منه

نهر : مااشي بس مكتلي شسويت

سجاد : نهر انت گلبج ابيض وطيبه وماعندج اذيه ودومج من اهل الله ادعيلي تره والله محتاج كل دعاء

نهر : اووف ياسجاد الله يعلم معزتك بگلبي وشكد ادعيلك

سجاد : عينج على أحبيبتي وبنتي

نهر : الله يهديك ويهدي گلبك واذا بيها خير الها والك يجعلها من نصيبك بجاه كلمن عنده جااه عند رب العالمين

سجاد : امين

يله رجعي الجهاز للرجال تأخرنا عيب وسلميلي على ريا وسكينه وبوسيلي غزوله

نهر : يوصل الله وياك

نهر : نزلت على محسن الكاعد يلعب دومنه ويه ريم وتعيط غسلتك خوش غسله عمو

تفضل رحمه الله والديك

بس عفيه اريدك من تروح لطه كول اله سجاد راح يخابرك ليكوله على خطوبه سليل ابد

محسن : مبين عنتر بن شداد حلها

نهر : منو قصدك

محسن : سجاد حجالي عنه طه والله هذا الولد سبع اخذ اللكمه من حلكم وخلاكم طشاركم ماله والي اتصوري طه من دوخته اجاه واحد راد مركه فاصوليا انطااه تبسي

ويكوله طيب اكله

وذاك يصيح والله مااحبه تالي اني اخذته واكلته

ريم : هههههه خوش عمو متخسر المطعم انت

محسن : شسوي الله بلاني بصديق من يدوخ حتى اسمه ينسااه هسه اذا اخلي طه رئيس وزراء العراق يخلصها يوزع بلشارع حتى للوزراء مينطي فلوس وياهو الي يشوفه فقير يكعد بصفه ويبجي ويباه واني اخلصها لازم الكلينكس اله يمسح دموعه

ريم : غير بابا حباب وطيب گلبه

محسن : وانتي هم حبابه اااخ منك يلساني

سندس الصغيره

ريم : هلوو اني طه المحسن بعد التعديل مثل البانزين المحسن

محسن : جيبيلي شخاطه خلي اجرب

نهر : ولكم مو وقت شقه يله فدووه مااوصيك

رشا .. هااي منو عدنا

محسن : بعد وكت جان سديتي الباب ورايه

رشا .. والله عمو ماادري جاي جنت اسبح

محسن : ليش باجر عيد

ريم : هههههه يعني يقصد بس بالاعياد تسبحين

محسن : هاج هذا المترجم مالتي لعد بس الامريكان عدهم مترجم

ريم : وين راتبي لعد

محسن : اروح للمطعم لا من وره هاي القفاصه حتى بنطروني ابيعه

رشا .. هههههه بنص ريمو

نهر : فدووه مو تنسى

محسن : منو كلج اني طه صدك رشاوي شسويتي على كليتج

رشا .. طلعلي تربيه اجتماعيات راح اصير مدرسه

محسن : اوووع وتاليها تكتلين بلطلاب

رشا .. ههههه لا اخذ طالبات اعداديه مو ابتدائيه

محسن : اني مثل ابوج اخذيني وياج اريد اشوف هذا الجيل الجديد شلاعب فلك وهم انطيهم درس عن الحياه وكيفيه التعامل مع الجنس الاخر واولهم التعامل معي

ريم : ههههه وين خاله عنك يجي يوم واشوفها واكول الها عمو خوش مدرس

جان يلزمني من اذني

شحدج تحجين شى اول شى اسوي حصار على علاكتج وخلي خالتج تفيدج

ريم : العفو العفو كله ولا علاكتي اضيع بدونها انت وين اكو منك اكثر رجال وفي بلدنيا

نهر : محسن تره ذني لليل ميعوفنك روح لشغلك

محسن : اي والله يعينك الله ي طه شمخلف

رشا .. غزلان نخبل

محسن : نهجم راسجن قصدجن بعران

وركض وركضنا وراه وسد باب الشارع  ويشمر بوسات ويضحك

نهر : تعالن طبن

ريم : شصار الله عليج عمه

نهر : ذيج اختجن وشوفنها

صعدن يركضن شويه واسمع ادبج صعدت والكاهن يطكن اصبع ويركصن وسليل لاول مره تركص وياهن ولازمه غزل وكفت باب الغرفه اباوع عليهن اكول بگلبي ربي ذني امانتك مشلوعات گلب دومهن وفقهن يـِْ♡̨ـِْا رَبّ تعبن وهنه بعدهن صغار رحمتك جبيره ارحمهن وخلي الجاي احسن من الراح

شويه واشوف سليل تنزع الحلقه

سليل : هااج ماما انتهى سيف من حياتي

نهر : مقتنعه يمه اخاف بعدين تتندمين

سليل : لا مااتندم الي احبه راح يصير الي شريد بعد

نهر : سكتت بس گلبي خايف نست سليل بأن سجاد اذا عرف بيها مخطوبه راح يسامحها لو لا لازم ميعرف بس هيج شى شلون ينضم شلوون

حجي طه : اجه محسن وانطاني التلفون وحجيت ويه سجاد عيطت وغلطت ولك عاار حقير هاي تاليها أمنك على بنتي وادك هيج دكه

سجاد : شتكول على راسي وماازعل منك ولو اني بمكانك اسوي اكثر بس احلفك بأمك وابوك بس لتزعل مني انت عزيز گلبي انت الاخ الماجابته امي اعرف زعلان وحقك والتريده يجرالك بس طالبك بشى واحد

سليل كولشي مااريد

حجي طه : مو كتلك اتزوجها وانت بعت مثاليات براسي

سجاد : يجي يوم واكعد وياك وافهمك والله راح تقدر وتفهمني متأكد بس هسه ابوس راسك خلي هاي الفتره تعدي وتكمل هاي المرحله واجي للعراق واطلبها منك حسب الاصول وحكمك راضي بيه

حجي طه : بس

سجاد : لتكول بس طلبتك ولتردني

حجي طه : الله كريم بس السويته ماانسااه الك

سجاد : لتخاف انسي الك

حجي طه : سكتت مثل مكالت نهر مكلت على خطوبتها مردت اكسر بيها خلي يجي ونكوله بس لازم افض سالفه سيف واكيد راح يزعل واخسره

بس سعادت بنتي فوك الكل

سليل : صدك راح اصير لسجاد بعد كل هذا العذاب يعني الدنيا راح تضحكلي اندكت الباب مال بيتنا وبابا استغرب خاله خضير وسيف وطالب وشعلان كل اعتقاده علمود موضوعي الي لهسه مفاتح بابا سيف بيه يريد طريقه مناسبه حتى يفهمه رغم صار ٣ ايام من اتصل سجاد ونزعت الحلقه بس الصار وخلانا صافنين شعلان اجه يطلب ايد رشا

يتبع ..

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الحادي_عشر

تعشك...تنجرح

يصعب عليك النوم

تدمع تختنك

حته الهوى تعوفه

كلهه تهون

بس هيه المصيبه شلون

بشر تشتاكله وماتكدر تشوفه

سليل : سمعنا صوتهم جان عالي وشلون شعلان يطلب ايد رشا

صفنا شعلان ورشا مستحيل مجرد مااتخيل وضعهم احس مثل اثنين واحد بلجيش الامريكي والثاني بلمقاومه مستحيل ينجمعون سوه اذا مو كل واحد منهم يشمر قاذفه على الثاني اصلاً شعلان ورشا نار وبانزين اباوع عليها مصدومه واصبعها بحلكها وتاكل بأضافيرها

ريم : بعد ابلعي ايدج

رشا .. سمعتي مو لو اني اطرشيت من الدراسه

ريم : شكوو قابل مشعول واجه يخطب مشعوله تصير حتى بلكارتون

رشا .. مكعد اشاقه هذا من كل عقله اجه يخطبني

نهر : ليش ماما من حقه رجال واي وحده تعجبه ويحسها بت اوادم وتصلح تصون بيته يتقدم عليها

رشا .. اله شعلان هذا واحد مخبل ويتعارك ويه ذبان وجهه

ريم : قصدج ويه ثيران وجهه كلمن وحجمه هذا بربج مال ذبان

نهر : ام لسان ضبي شويه مو وكتج هسه

ريم : بس هاي الحجايه اذا مااحجيها تضل عله بگلبي هذا حبها لان حركته بكلاص جاي اجيبلج قوري ذبي على راسه راح يكوم يموت عليج والله

نهر : كومي لج اصعدي فوك وجوزي من اختج

ريم : هاي شبيكم شكلت اني الحق ماخلالي صديق كلها تكرهه اوف ياريم شكد مظلومه

رشا .. كولش ياعيني عليج

ريم : هااج بس حجيت هيج صحت وركزت ويايه وعافت حتى مشعول يله اخذي حبابه حتى اضحك عليج وعليه

رشا .. عمه صيحي بريم تره والله روحي بخشمي

ريم : ديري بالج تعطسين لتطلع روحج وين نولي هسه وانجيبلج روح

سليل : ريموو اعرف عاجبج وضع رشا حتى تنصبين عليها بس تره مو وكتها

ريم : انطوني وكت واني مستعده اسكت ومااحجي بس بهذا الوكت اذا شوكت مااحجي راكعيني على حلكي موتوني عائله تموت على النعي والمصايب اذا ميبجون يوميه يسون شى يقهر حتى يبجون

نهر : تعاالي

ريم : اااخ اااخ اذني التوبه سكتت والله

نهر : لا اصعدي فوك انتي ادري بيج متسكتين

ريم : سكتت وداعت مشعول وخبالاته واغمز لرشا

شويه وراحو وطب بابا مستغرب مثلنا

وصاح رشا جان تطفر ريم

ريم : شوف بابا مال تاخذ رشا على صفحه وتحجي وياها صارت قديمه من ايام الثمانينات هسه احنا بال ٢٠٠٤ وكلها ايام وندخل ٢٠٠٥

حجي طه : شتريدن ريموو

ريم : احجي كدامي حباب الفضول قاتل يحك بجلدي والله وهو بكل الاحوال رشا راح تكولي بس شيصبرني لحد متجي تكول وراح تلزم عمه هم تسولف الها وسليل اكيد بقت عليه اختصر الوضع والوقت واحجي كدام الكل وهااا موتكولون صغيره

حجي طه : لا مو صغيره ست البنات يجوز بعد كم يوم هم يدكون بابي ويردوج مني

ريم : لتخاف محد يدك بابك باقيه مخمره على گلبك ويجوز بعد كم سنه اطلع اشتغل وياك بلمطعم خلفه اقلها استفاد مني زلمه حوك اني اعجبك

رشا .. بابا معليك بيها

حجي طه : هههههه خسران الي ميدك بابي ويريدج مني وراح احجي كدام الكل

واولهم ريموو

ريم : يعيش بابا الحلوو على عناد اليغارون

نهر : احجي طه شصار

ريم : مو جنا نتصنط وعرفنا شعلان خطب رشا ياعمه نسيتي

نهر : ولج سندس اسكتي

ريم : ماطول گلتي سندس يعني وصل حدها سكتت

حجي طه : ههههه والله بس انتي تضحكيني اسمعوني شعلان طلب رشا مني واني كتلهم اشوف البنيه تدرون بيه مااجبر وحده

وانتي بكيفج بابا

نهر : هو مو متزوج قبل

حجي طه : واذا ممسوي شى حرام او غلط وذيج مطلكها من سنين واتزوجت وماعنده شى يربطها بيه

اني اعرف شعلان عصبي وعنده اغلاط بس هو خوش رجال من عاش هنا يمنا عرفت معدنه زين والراي الاول والاخير الج رشاوي

رشا .. مااقبل بابا مااريده

حجي طه : بس بعدج ممفكره

رشا .. ولا اريد افكر شعلان اخر واحد ارتبط بيه واني هم بعدني صغيره وماشفت شى بعدني حتى ممداومه كليه مامستعده اربط حياتي من هسه بيت ورجال واعوف كولشي

حجي طه : بكل الاحوال ماانطي خبر منا لكم يوم اخاف تغيرين رأيج

نهر : فكرري حبيبتي لتستعجلين

رشا .. لا افكر ولا اريد افكر اريد اروح اشتري ملابس واحظر نفسي للكليه وهاي الامور كلها متهمني وسدو الموضوع رجاءاً

سليل : اباوع على رشا متوتره من تحجي مو مثل كل مره بثقه شبيهه ياترى

حجي طه : بكيفج بنتي انت ادرى بمصلحتج

سليل : واني بابا حجيت ويه سيف

حجي طه : من طلعو كتله بعد ساعه مرلي ومنتظره يجي واحجي ويااه

سليل : مااشي كل وحده صعدت لغرفتها اله اني بقيت بلمطبخ انتظر شوكت يجي ردت بس انهي هذا الموضوع وره نص ساعه اندكت الباب وطب سيف جانت دگات گلبي تقرا الف من الخوف خفت لتصير عركه ومشكله ويه بابا تقربت من الباب اسمع

حجي طه : البنيه تريد تنهي الخطبه

سيف : ليش بدر شى مني

حجي طه : لا بلعكس سيف انت رجال والف وحده تتمناك بس كولشي قسمه وقسمتك مو  ويه سليل

سيف : هي رادت هذا الشى لو انت طلبت منها

حجي طه : تعرف بيه مااجبر بنيه وهنه بعزيه روحي وماادخل بخطيتهن ابد والله شاهد هي رادت

سيف : اكدر احجي وياها دقايق مااخذ من وكتها

حجي طه : ليش تصعب الامور

سيف : مااصعبها بس على الاقل من حقي اسمع منها

حجي طه : استغفر الله اي يابه حقك ثواني اصيحها

سليل : نشف دمي من سمعت هذا الحجي وتحركت بأتجاه المطبخ بحركه سريعه شافتني ماما

نهر : اسم الله شبيج

بعدني احجي وجان يطب بابا

حجي طه : تعالي بابا سيف يريدج

سليل : بلعت ريكي ومشيت بأتجاه الاستقبال ودخلت هو وكف من شافني وكعدت كباله وبقت الباب مفتوحه

سيف : ابوج كال متردين الخطوبه تستمر

سليل : كاعده وافرك بيدي ورجلي تهتز من القلق

سيف : احجي اسمعج صدر شى مني واني مااعرف

سليل : حركت راسي ب لا

سيف : احجي اريد اسمع صوتج

سليل : لا

سيف : شنو السويته حتى تلعبين هيج عليه لان ردتج بلحلال لو لاعب عليج وعايفج جان حبيتيني مو

سليل : رفعت راسي وكتله عفيه ماله داعي هذا الحجي اليجرح هو كولشي قسمه واني مااكدر استمر وياك كل واحد طبعه شكل وحياته شكل اعتذر مااكدر أذيك وأذي نفسي واتزوجك والله بعدين تشكرني

سيف : اشكرج على شنو بله لان لعبتي بيه انخطبتي و٤ اشهر ضوكتيني المر وتالي اتذبين الحلقه بوجهي علمود واحد ميسوه بنجرجي حتى شهاده ماعنده

سليل : استفزني حيل بكلامه وكتله وسجاد شعليه

سيف : ليش احد كلج الكدامج حيوان وميفهم من عرفتي ممطلكج محكمه فرحتي وكتلتي نفسج عليه هو انتن البنات مال لبس مو مال احترام وحب وزواج

سليل : عيب هذا الحجي هاي عود انت مثقف واستاذ جامعي

سيف : ليش سوايتج تخلي الواحد يبقى مثقف بشنو هو احسن مني ليش ادمرين حياتج ويه واحد ميسوه اضفرج

سليل : المفروض من تعرف بيه احبه تنسحب بهدوء ماتوقعتك تقبلها على نفسك الي تتزوجها تحب غيرك

سيف : اجيت وسألتج وكلتي لا مااحبه وسألت طه وكال ماكو شى بينكم مجرد واحد تكفلكم وراها انسحب من حياتكم شمدريني حضرتج ساحله روحج وراه ودايسه كرامتج برجلج وياريت واحد يسووه جان عذرتج

سليل : رجاءاً مااسمح الك تحجي عليه

سيف : سمحتي وان ماسمحتي اركعي راسج بلحايط سوايتج ياسليل راح ادفعين ثمنها غالي صّـْْ(☑)ـْْحّ حبيتج بس ادوس على گلبي بلقندره ولا اخلي ينذل وانتي ضلي وره ابو الدهن والوصاخه خلي يفيدج

سليل : انصدمت من اسلوبه ويايه رغم اعرفه عصبي بس مو هيج يمكن البشر ينعرف وكت الاعصاب مو وكت الهدوء والراحه

سليل : كمت وكتله اسفه والله يوفقك بحياتك

سيف : راح يوفقني وانتي راح يطيح حظج بسبب اختيارج الغلط وعود اتذكري كلامي

طلع وركع الباب وراه اني ضجت من كلامه بس من اتذكر انحل كولشي يهدأ گلبي

ثاني يوم دزيت الحلقه بيد ماما وانطتها لرازقيه الي تفاجأت بلفسخ ومحد يعرف السبب غير قسمه ومصارت

رجعت انام بهدوء بس لهسه موضوع منخصم وسجاد مااكدر اوصله ورجعنا للدوام والتهينا اني بكليتي مرحله ثانيه ورشا تربيه مرحله اولى وريمو خامس علمي وغزوله صارت سادس ابتدائي

كبرنا اباوع على خواتي رشا الي طولها وجسمها الرشيق يخلي اكبر واحد ينجذب الها وبشرتها الخمريه ومعانيها الجذابه وخاصه عيونها  وبعد محفت صارت تخبل

اكثر كبرت وصارت شابه عليها العين وشخصيتها قويه وعقلها اكبر من عمرها راكزه بكولشي ومتسامح ابد الي يجرحها

اما ريم عقل صغير وتصرفات اطفال لكن شكلها بنيه شابه كامله ريم احلى جسم بينا لا ضعيف ولا سمين رشيقه ومعاني الانوثه بارزه بيها وطويله اطول مني والشعر تحت الخصر اسود فاحم سرح والعيون الجوزيه الفاتح غالبه على وجهه لكن الي مخرب مميزاتها البهاق الي بيها مغطي على الجمال الهادئ الي بيها مع الاسف كل الي يشوفها يركز بلبهاق وعايف جمالها البرئ الي رزقها الله بيه ويجرحه هذا شنو ومنين وليش عدا نظرات الاشمئزاز او العطف الي دوم تنجرح منها خلتها شخصيه شرسه اي واحد يتعامل معاها مباشره تصده لكن يمنا بلبيت تكمز عقلها اصغر من عقل غزل اعرف هاي السوالف تسويها حتى تغطي على المها تحاول دوم اداري جروحها بلضحك والشقى والمقالب ويانه لهذا دوم بابا يكول عوفو ريم لحد يحاسبها

اما غزوله سادس ابتدائي هادئه وانطوائيه رغم كبرت بس متغيرت اطباعها تكدر تكعد ساعه متحجي وتجاوب على كد السؤال بابا يصيح الها نسمه البيت البارده بليله صيف حار كولش يحبها واول وحده يسألها عليها من يدخل من البيت

ماما نهر بعدها الام الحنون النا الله رزقنا بيها نعتبرها جنه الله على ارضه هي امنا وحياتنا وخطيه حايره دوم بينا تغسل وتنظف وحايره بطلباتنا وكت الدوام متخلينا نشتغل تريدنا بس ندرس حتى ننجح

اما بابا وضعه المادي تحسن والحمدلله المطعم يشتغل خوش شغل وحتى صحته احسن صارت وكدر يوكف على رجله وعمو محسن ماتركه يشتغلون سوه گلب على گلب ورغم البيت ايجار الكاعدين بيه بس ايجاره بسيط لهذا بابا كعد يلم فلوس حتى يشتري ولو قطعه كاع ويبنيها

مرت الايام بين الدراسه والحياه واجه رمضان جان اهدأ رمضان علينا لا مشاكل ولا مصايب والحمدلله حياتنا ماشيه آحــسن مايكون وتفاجأنا بابا جاب جهاز يسموه طابوكه بيومها مثل المخبل وجلب بطواطه من ايد لأيد نريد نعرف هذا شلون نخابر بيه جنت اتمنى اسمع صوته احجي ويااه ولو كلمة اكيد ريم ورشا مينطن مجال

حجي طه : هذا واحد بلبيت واحد بلمطعم دير بالكم عليه تره كولش غالي وكارتاته غاليه مو كل شويه تلعبون بيه اشتريته حتى اخاف يصير شى ميضل بالي واقلق

نهر : والله عااشت ايدك شفت ناس شايله منه بس مااعرف شنو

حجي طه : هاي سوالف محسن هو راح جاب الي واله

نهر : زين يسووي خلي هنا

حجي طه : خزنت الرقم وهسه اعلمكم عليه

سليل : وكعد بابا يعلمنا

تمنيت اتصل ولو مره

لحد مابيوم كاعده نشتغل ومخبوصات باجر عيد جان يدك التلفون طبعاً من يدك يصير سباق ياهو توصل بالاول رغم ماما شكد تعيط عليهن ميفيد

شالته ريم واني مااسمع شتحجي جان تكول هااج عليج

استغربت شنو عليه

لزمته وصحت الوو

سجاد : شلونج يانفسي

سليل : من كثر ممشتاقه اله نزلت دمعتي

سجاد : طمنيني عنج

سليل : اخذت التلفون وصعدت

ريم : هاي خيانه غير نسلم على عمو زين

سليل : بعدين واشرت بيدي وصعدت

سجاد : اشتاقيتلج

سليل : اني هم كولش اشتاقيتلك طمني عنك

سجاد : بخير والحمدلله

سليل : سجاد شوكت ترجع

سجاد : من تكملين كليه

سليل : صدك تحجي غير اموت شصار هلكد

سجاد : اسم الله عليج غير علمودج حتى ما العبها لنفسج

سليل : لا الله عليك ليش مترجع

سجاد : شغلي زين هنا خلي الم جم فلس حتى من ارجع اكون مسيطر واتزوجج بدون مشاكل

سليل : يامشاكل ياستار شو شقه وعندك ومحل وعندك ارجع لشغلك هنا

سجاد : ارجع بس مو هسه المهم انتي ديري بالج على نفسج واقري زين اريد حبيبي شاطر

سليل : گلبي نبض بقوه من گال حبيبي جان يهمس بهدوء

سجاد : اشتاقيت لكولشي بيج ضحكتك هدوئج مشيتج زعلج نومتج حتى دمعتج سليل مشتاق لكل مسامه بيج الله عليج بداعتي حافظي على نفسج الي

سليل : محافظه والله

سجاد : اعرفج عاقله ورزنه بس كل مااتذكر انتي بلكليه ويحيطوج الشباب انجن

سليل : والله حتى صديقات ماعندي على كد السلام

سجاد : اعرف بنت روحي متسوي شى موزين

سليل : لتكطع عني بس منين جبت الرقم

سجاد : خابرت محسن واطلب منه يودي جهازه كالي على التلفون الجديد مباشره اخذت الرقم ودكيت طلعت سكينه تعرفين اول مجاوبت سلمت وكالت اكيد مخابر على ثلل مو علينا عيني احنا صرنا كخ

سليل : هههههه خرب ببليسها ولا تكعد راحه

سجاد : عود نزلي الجهاز اسلم عليهم بس بالاول حاب اكولج شى

سليل : شنوو

سجاد : كل عام وانتي بخير حبيت اول واحد اعايدج بلعيد

سليل : دمعت عيووني وكتله وانت بخير حبيبي

سجاد : اووويلي تخبل بحلكج حبيبي شكد مطي اني

سليل : ليش حشاك

سجاد : ماضكتهم لا بلحرام ولا حتى بلحلال اااخ بس لو الزمج اله اطلع ضيم گلبي بيج

سليل : هههههههه كاافي فدووه خجلت

سجاد : سهله يلوعه گلبي سهله تجين يمي واشوفج الخجل على اصوله

سليل : سجودي

سجاد : عيونه

سليل : دير بالك على نفسك فدووه وعيونك منا منا يكولون السوريات حلوات

سجاد : الي يحبج امداه اذا تدنى نفسه على غيرج الگلب والروح وحتى الجسم الج لتخافين نامي مرتاحه حتى بخيالي مخنتج ولا افكر اسويها

سليل : الله لايحرمني منك

سجاد : ولا منج دير بالج على نفسج ويله نزلي الجهاز اسلم على ريا وسكينه والبنات واروح

سليل : صاار

جان يمكن احلى عيد لان هو عايدني

واجه العيد وصار عندي عيدين هم لان سجاد يحبني واحبه والكل يعرف وكلها مده ويرجع واصير شرعاً وقانوناً مرته وهم لان حياتنا هادئه وحلووه حتى بابا وضعه تمام ومصار اي خلاف ويه اهل امه بس سيف مشفته ابد اما شعلان حسيته يفتر وره رشا لان يوميه كل منطلع يوكف بلباب يشوفها ويدخل وهي ولا يمها صامده كالاسد

دخلنا سنه 2005 ومع الاسف حال بغداد من سيئ لاسوأ الخطف صار بفلس عدا التفجيرات وبدت الناس تهاجر وكل فتره سامعين بكارثه بالاحلام منشوفها وضرت مسميات عجيبه واولها انت سني لو شيعي هذا السؤال خلصنا عمرنا منكوله صار حديث الشارع مع الاسف

صارت الانتخابات وجانت فاشله بكل المقاييس بس الفرحان بيها الجهال لان سدو الشارع ويلعبون بنص الشوارع ومحد يوكفهم لا سياره ولا شى اما على صعيد الحياه جانت نكبه لان الي اجوي كلهم همهم نفسهم ومصالحهم وبس واذا جنا بحكم ذيب صرنا بحكم الذياب ويوم بعد يوم اتعس

كل اسبوع يخابرني سجاد نبقى سولف ونضحك ويطمن ويروح بدت علاقتي تقوى بيه تاخذ غير مجريات تمنيته يرجع اريده يمي تعبت من الفراك

واجت امتحانات نهايه السنه ورشا اجلت درس جانت تعبانه ومريضة ومداومت حسيت وضعها تغير وخاصه بيوم هذا الدرس حيل جانت تتصفن

رشا .. بقى شعلان يفتر ورايه ودوم يحاول يحجي ويايه وماانطي مجال مااريد اي شى يربطني بيه مااريد اعيش تحت سلطه رجال متزمت يحير شيسوي بيه ماانكر اعجابي بيه بس كشخص مو زوج

وبيوم عندي امتحانات طلعت من الكليه اتمشى واجه زميل الي اخذ ملازم مني استحيت ارده اخذهم استنسخ ومن دااطلع اجه يركض انطاهم الي واتشكر ولا ارادياً ابتسمت لان كوه يحجي وهم الولد ابتسم شفت شعلان واكف من بعيد وعيونه براسه واجه بأتجاه الولد اني تخبلت توقعت راح يتعارك صرت بوجهه وعاط هييي انت تعاال راح يجي واني كتله من رخصتك اخويه اخذ راحتك هذا كرايبي ويجوز افتهم غلط

الشاب كاال عاادي اني احجي ويااه وافهمه

رشا .. لا شكراً اخذ راحتك وكفته لشعلان شعندك هنا

شعلان : هذا شنو اتضحكين ويااه

رشا .. وانت شنو وانت منو ابن عمي ابن خالي عود ابن خال ابويه مالك حكم عليه

وتعال كولي شنو تراقبني جان يحجي بنبره قويه ويكز بأسنانه

شعلان : تعرفين بيه رايدج وطلبتج من ابوج

رشا .. واني رفضت مالك حق بعد تفتر ورايه رجاءاً بعد لتجي هنا وتفشلني واذا اجيت اكول لبابا واخلي هو يتصرف وياك

شعلان : انتي على شنو شايفه نفسج

رشا .. وانت هم على شنو شايف نفسك شكد تخنك وشايف نفسك شوفه اسمع شعلان اذا اجيت هنا وسويت حركه محلوه بحقي والنبي افضحك فضيحه صير رجال وابتعد عني

شعلان : اني رجال وغصب عنج واراويج الرجوله شلون

رشا .. عاافني وراح جنت احجي بقوه وصمود بس جنت خايفه وخااصه واكفه ويااه كدام الكل بكراج الكليه لهذا ثاني يوم تعبت ومكدرت امتحن واجلت الامتحان من وراه ومن يومها بعد مشفته لشعلان كام حتى الصبح ميشوفني وجهه من يومها واني ادور بلعيون والفضول كاتلني وين راح مبين كد كلمته وشوفني الرجوله شلوون

سليل : نجحنا والحمدلله عدا رشاوي اجلت درس وغزوله امتحنت بكلوريا وطلعت معدل ٩٢ وفرحنا بيها هوايه وبابا جاب كيكه واحتفل بينا كلنا اتذكرت من جان يجيب سجاد الكيك ويكول من ابوجن ويزرع الفرحه بگلبنا واحنا اطفال  اووف شكد اشتاقيت اله

بقينا على الاتصال وياه بس هلمره مو كل اسبوع صار بين يوم ويوم لان زاد الاشتياق بينا والاهم زاد التعود

وبشهر الثامن تحديداً 30/8/2005  باجر ذكرى استشهاد الامام الكاظم عليه السلام جنت كولش حابه ازوره وكلت لبابا وكال اشوف يجوز نروح

حجي طه : تجون بابا ويايه

ريم : وين بابا

حجي طه : للزياره نروح مشايه للامام الكاظم حيل حاب هلسنه اروح والناس كلها رايحه ومواكب

رشا .. اني عندي امتحانات مبقى شى على امتحان الدرس الي اجلته واخاف ارجع تعبانه وامتحاني مبقى شى وره الزيارهً

ريم : اني راح ابقى ويه رشا

حجي طه : هاا عجوزيه مابيج حيل تمشين

ريم : لا والله بابا بس رشا منو يبقى يمها غير مره ودينا

حجي طه : بكيفكم وانتي غزوله تبقين ويه خواتج

غزل : لا بابا حباب اجي وياك

نهر : واني وسليل هم نروح وانتن اقفلن الباب عليجن اي احد يدكه متفتحو

حجي طه : اجيب الكم صمون ومسواك سون اكل هنا ومطلعن ابد

رشا .. يايوم طالعين وحدنا يا بابا بس وياك دحافيس

حجي طه : دحافيس شنو

ريم : يعني نساتل على جبس على حب وبشرفك بابا قمردين اذا لكيت

حجي طه : وين اكو قمردين بعد شذكرج بيه

ريم : والله اكو بس دور حباب

حجي طه : وبعد

رشا .. سلامتك حبيبي

حجي طه : يله كملو شغلاتكم وانتي نهر صيحي سليل خلي تكمل كولشي وباجر الصبح نطلع

غزل : اريد عبايه ماما مثلج ومثل ماما ثلل

نهر : اووي فدووه للبنات الي دور عبي عندي قماش عبايه راح افصلج وحده واكعد اخيطها مااكوم اله تكمل

نهر : ماما سليل

سليل : نزلت افرك بعيووني هاا يوم

نهر : حضري نفسج باجر نروح مشايه للامام

سليل : مااشي عبايتي الي خيطتيها للزياره يمج

نهر : اي يمي

سليل : لعد ماعندي شى ابدل ونروح

صعدت فوك وحضرت ملابسي جنت حيل حابه اروح للزياره وخااصه هاي اول مره اروح

سبحت ونمت وكعدنا الصبح اتريكنا وكملنا كولشي وعفنا البنات نايمات وطلعنا

لبست غزوله العبايه ولج هاي شطالعه تخبلين

غزل : ماما شوفي مثلج لابسه

سليل : لا والله انتي احلى يله الزمي ايدي ولتعوفيها

حجي طه : يله امشوو

بدينا نمشي وبابا بيده السبحه يسبح وماما هم واني اقرا ايات وادعيه بگلبي وغزوله عيونها طايره على الرايح والجاي ومكيفه حيل جنا نمشي ومواكب وتوزيع اكل بكل الطريق

حجي طه : تاكلون

نهر : اني شبعانه

سليل : واني هم بس خلي نوكل غزل متريكت زين وكفنا يم موكب يوزعون لفات كباب جانت ريحته تجنن مكدرت اقاوم واخذت لفه اباوع المواكب يتوسلون حتى الناس تاكل وحتى ماما اكلت لان المنظر موبيدك تخليك تجوع

حجي طه : كملتو يله

رجعنا نمشي جانت الاجواء كولش حلوه تحس ماكو احد بيته الكل رايح للزياره ويتسابقون للوصول

واحنا نمشي وصلنا جسر الي يربط بين الاعظميه والكاظميه

غزل : الله مي شكد حلوو

سليل : لتهدين ايدي كعد تشوفين شلون ازدحام

نهر : ماما سليل تعالو بصفي كعد تشوفون شلون ازدحام

حجي طه : يله خلي نعبر الجسر وراها براحتكم امشوو

سليل : لحظات وكإن القيامه قامت عياط وصياح وناس تدفع بناس اريد نفتهم شصار منكدر ونسمع مفخخ لو الدنيا انگلبت وصار تدافع

هي دقايق بس اشبه بلموت بأعصار ياخذ كولشي كدامه فقدت الكل غزل فلتت مني بابا وماما ماكو واني انحصرت بنص العالم اريد اتنفس ماكو احس اضلاعي تكسرت وناس تدفع بناس كمت ابجي واعيط اصيح ياالله ياالله مثل المخبله الكل يعيط من كثر الهوسه والتدافع صوتي اعيط بكل قوته مااسمعه مثل واحد عايش ويذبون تراب عليه وشويه شويه تحس الهوا اختفى والنهار صار ليل وكل ضربه تجيني من وره الدافع تشيغ روحي ابجي واعيط بكل صوتي والكل مثل نسوان وزلم اما الاطفال جوه الرجلين واصلاً محد منتبهه منو جواه كل واحد يريد بس يعيش بس لمحت منظر عمري كل ماانساه شلون اجت روجه قويه من الدفعه بعد مسافه بسيطه عني وكعت الناس من الجسر من المنظر عطت عيطه واصيح ارحمنا ياالله يلكاظم بجاهك عند ربك وابجي بهستريا بديت اتشاهد واكول مستحيل اعيش وغزل وبابا وماما ماتو اكيد اعيط بإسمهم واحد واحد بس محد يسمع الكل يعيط واندفعت بقوة بلكاع وكعدت على راسي جرني رجال ضخم ودفعني حيل حتى لا انداس بس اباوع الكاع كلها بشر ماكو شى اسمه جسر ناس انداست واختنكت وماتت وناس انشمرت بلمي وبعدها الكل تعيط

اااخ يلروح شكد عزيزه من يجيها الموت

لا ربطه ولا عبايه اصلاً مااعرف لهسه ممستوعبه شصار واني عايشه لو ميته بس اباوع فاتحه عيووني واشوف ناس واكفه على طرف الجسر تعيط وكلمن يصيح على الجان ويااه كمت سندت نفسي وبديت استوعب وياريتني مستوعبت اباوع الجهال مخنوكه ومديوسه جوه الرجلين ونسوان وحتى رياجيل جثث بكل مكان والكل يركض الناس تهسترت مثلي

اركض واعيط غزل بابا ماما اباوع بلوجوه اريد بس واحد منهم كل مااشوف شلون شباب عليهم العتب جندله مجطله ميته واني أيس ان الكه اهلي بلحظتها تمنيت ميته اي اريد اموت مااكدر اعيش بلياهم مااكدر هلمره الي خبلني اكثر وخلاني ادك على راسي واملخ شعري من شفت الناس الطايفه بلمي وشلون يحاولون ينقذوهم كلت هاي هيه اهلي هنا وهسه الكاهم ويه الغركانين وين اروح ابجي واعيط بأسمائهم اروح واجي على طول الجسر وادافع ويه الناس الي حالهم مثلي واتعس وينكم بابا فدووه ماما غزل هيج رحتو بلحظات مني اركض حافيه وشعري مهوش ودموعي تصب عثرت وكعت على وجهي واباوع ناس يطلعوها مخنوكه من الدوس كمت اباوع بين الجثث اكيد ميتين

شكد شفت مصايب اكثر من حركتنا الي لهذا اليوم احلم بيها وشلون احتركنا

هاي فاقت الحرك لان ادور على اهلي بين الجثث بين النسوان والشباب والاطفال الي مالهم ذنب بس اجو يزورون الوكت على الفاكد عزيز ومايندل دربه اصعب من السجين من يمشي بلحم ويلذبح

وكت مر ونزلت اباوع من جهه الجرف اشوف شلون يطلعون الجهال من المي غركانه وميته اباوع شلون يصفطون الجثث واحد بصف الثاني مره رجال طفل واحد بصف الثاني والكل ادور وتعيط والي يلكه واحد من اهله يرجع يدور على الثاني وعلى الثالث واكو عوائل كامله اجت للزياره وتالي يصفى بس واحد يدور بلجثث حتى بدينا نيأس نلكاهم عايشين كلمن يعيط ويرد جثه حتى مو عدل

ااااخ يلعراق خلصت عمرك كله تصفط بجثث اهلك ماتستلذ بواحد بأثنين لازم مسطرين ومجطلين بلمئات والالاف  ويترسون كاعك دم

انجريت حيل واحس واحد حضني رفعت راسي واشوفه بابا بس مضروب وراسه بيه دم كمت اعيط بحضنه واشهك واسمعه يعيط بس مدااركز بعدني

حجي طه : عايشه انتي عايشه ياروح ابوج ممصدك لكيتج

سليل : رفعت راسي وكتله غزل وماما

نهر لكيتها جانت ويايه ادور عليكم هي راحت من ذيج الجهه واني هنا

سليل : شهكت بصوت عالي غزل بابا عفيه صغيره وتنداس وعطت شفت جهال مدده

حجي طه : اشش بابا على كيفج تعالي ولزمني من ايدي وايمشي بيه اباوع الكاع متروسه نعالات مطشره الناس من حلات روحها تحفت امشي ويسحل بابا بيه واشهك وهو هم يباوع على الناس ويبجي ويصيح الله اكبر الله اكبر

رحنا للجهه الثانيه لكيت ماما ادور وتعيط وتملخ بوجهه وتبجي مبين اتفقو على نقطه التقاء لان بسرعه لكيناها رغم الهوسه ركضت حضنتها

نهر : سوده بوجهي بيج شى

سليل : غزل ماما وينها

نهر : يمه ماادري ادور وماهيه

بوكتها صارت مثل اللجان تساعد وانثارت الشائعات بأن اهل الاعظميه همه الي اثارو هاي الهوسه رادو يعلكوها سنه وشيعه بس الي صار كسر عيون الكل وسكتهم من شمرو شباب الاعظميه نفسهم بدجله حتى بس ينقذون الناس جانو ولد بعمر الورد ماهمهم ذوله شيعه كل همهم ذوله عراقيين ومحتاجين مساعده وحتى اكو بيهم غركو حتى بس ينقذون الزوار واهل الاعظميه يتراكضون حتى بس يقدمون مساعده للناس الي تأذت

بيومها تحس العراق كله انتفض بغض النظر عن الطائفه

كالو روحو للمستشفيات والمراكز كلمن عنده مفقود يروح

ركضنا بسرعه كامت ماما نزعت ربطتها ولبستها اليه وهي ضلت بلعبايه واني حافيه لكيت نعال ولبسته جبير اكيد صاحبه لو ميت لو مثلي يمشي حافي جان حالنا يبجي الصخر مثل حال باقي الناس الي لهسه يدورون على اهلهم وعيطه الامهات تسمع لسابع سما

وصلنا لاول مستشفى هوسه ومنعرف وين اندور بثلاجه الموته الي انترست والي وصل الحال الجثث بلممرات وبلكاع لو بلغرفه الي انملت وناس بصف ناس

حجي طه : ولج نهر بنتي ضاعت راحت

نهر : يمه غزوله وينج اموت اذا صارلج شى

سليل : كعدت بلكاع ابجي وماادري على اختي الي لهسه منعرف شبيهه لو على الناس الي مجطله بلممرات ومنكعين اكثرهم غرق كمت اتخيل غزل وكعت وشلون تضرب بيدها بلمي حتى تطلع كمت اعيط والطم لزمتني ماما

نهر : كافي يمه ابوج راح ينجلط

سليل : كله من ورايه ماما اني ضيعتها جانت بيدي لازمتها بيدي شلون فلتت ماادري بسرعه اختفت

نهر : ادري امي غير اني الله رحمني ورحم ابوج وانشمرنه بذيج الجهه جان هسه هم ميتين شفتي زلم عليها العتب ماكدرت تواجهه الروجه مو عاد انتي كومي اندور بعد كومي

حجي طه : خلي ارجعكم وارجع ادور

سليل : ماارجع اله غزل ويايه

حجي طه : شوفو حالكم

سليل : ماعسى دنموت ماارجع اله غزل بحضني هاي بنتي مو اختي بابا دنج وكاام يبجي حيل ويكول

حجي طه : خاف ماتت هاي صغيره وانمردت شو الناس شكد ميتين

سليل : ابوس ايدك بابا لتكولها

نهر : امشونا اندور

سليل : بقينا اكثر من ٥ ساعات اندور وصلنا لمرحله أيسنا لا هي من ضمن الميتين ولا هي من العايشين والي خبلنا كالو اكو ناس بعدها غركانه وكعد يطلعون بلجثث

نتنقل بين المستشفيات والمراكز وكعدنا اني وماما بلشارع نباوع على الناس شلون تتلاطم وكل واحد ميت اله اثنين وتلاثه واكثر وامهات تلطم وادور على ولدها لحد مااجه بابا يركض ويعيط ويكول لكيتها

سليل : خفت اكول اله وين خفت ليكون ميته

نهر : وينها

حجي طه : كعد يداوها ايدها مكسوره ورضوض عدها جان بوحده من الردهات همزين صايره سباعيه ومن سائليها منطي اسمها الثلاثي

سليل : سجدت بلشارع من حلات روحي شكر لله ممصدكه اختي عايشه يارب شكد رحيم بينا من رجعت غزل النا ركضنا

لكيتها تبجي حضنها بابا وماما

غزل : ايدي توجعني

سليل : وخرتهم وكمت اشهك واصيح كله مني اني ضيعتج اني هديتج لو صاير بيج شى يمكن اكتل روحي

غزل : توجعني ايدي ورجلي وراسي وعبايتي ضاعت ماما

نهر : اسويلج عشر عبي بس صيري زينه مصدكين مجذبين لكيناج لتبجين حبيبتي

حجي طه : خلي نطلع

سليل : اخاف موزين عليها

حجي طه : اذا تبقى هنا راح تتأذه اكثر والعياط والهوسه راح تخوفها امشي نطلعها وباجر اخذها احسن طبيب

نهر : اي احسن

سليل : طلعنا بيومها على مسؤوليتنا اصلاً الكل مخبوص مو بحال احد يطب ويطلع

وصلنا للبيت بليل حتى ابو التكسي مااخذ كروه عرف من حالنا جلنا بلجسر الصار مسمع العراق كله فتح بابا الباب والكه ريم ورشا وحده حاضنه الثانيه وكاعدات بلحديقه وعيونهن دم من البجي

ريم : كعدت من النوم باوعت ماكو احد ركضت على رشا

ولج تنبل اكعدي البيت النا وحدنا وضل البيت لمطيره طارت بيه فرد طيره واطك اصبعتين

رشا .. ماطول ماكو احد متعوفيني انام

ريم : دومج تنبل وتحبين النوم الدجاج مو مثلج هم يبيض وياكل ويحفر ويوصخ ويقوقي فوك روسنا اله انتي مخلصتها نوم جنج حيوان الكوالا مخلص عمره بس نوم

رشا .. شنو ياحيوان يمه اول مره اسمع بيه

ريم : حيوان اسمه كوالا ذاك اليوم تقرير عنه بلتلفزيون وحبيت شكله يشبهج مخلص حياته بس نوم اكثر من ٢٠ ساعه بليوم ينام اني مباشره كلت المفروض يسموه رشا

رشا .. صايره مثقفه ادورين تقارير عن الحيوانات

ريم : شعبالج عيني غير مره علميه خوما مثل غير ناس كال نبوخذ نصر وكال توت عنخ امون وملعبه نفسنا تكول راح تكتشف الجنائن المعلقه واطلعها

رشا .. اني تربيه اجتماعيات مو اثار حتى اكتشف ياثوله

ريم : هسه تكومين تتركين ياكوالا لو لا

رشا .. تسكتين لو اكطعه لشعرج لتنسين وحدنا بلبيت محد يفكج مني

ريم : لا العفو اختي الغاليه كله ولا شعري هو اني بطرك الشعر بلياه جني كعبول

رشا .. اريد بيض عيوون وسوي جاي جديد

ريم : بعد تردين اوكلج واغسلج رجلج يابه دطيري عنج ماكمتي اكلتي اروح اترس بطيني العزيز وضلي انتي حاضنه المخده لحد متخيسين عليها

رشا .. ولج انتظريني وكمنا نسوي اكل واكلنا ونضحك ونسولف وكملنا تنظيف خفنا لتجي عمه وتزفنا واثناء مكعد تگلب ريم اني لازمه الملازم وكاعده اقرا جان تعيط ركضت عليها

يمعوده شكوو انتلتي تأشر وتبجي وتكمز على التلفزيون ونقرا حادثه جسر الائمه بلحظتها حسيت خسرت اهلي راحو بعد ميرجعون وخاصه من ديكول انهار الجسر ومره يكولون الناس ذبت روحها بلمي ومره يكتبون تدافع كبير ادى الى اختناق المئات واغلبهم مات

كمنا نركض بلبيت منعرف شنسوي المن نروح منو عدنا يلحكنا

ريم : رايحه لبيت خالو خضير

رشا .. يمعوده ويه رايحه بعد الصار كله

ريم : مالي دخل بيكم اني اريد اروح اشوف احد يروح النا ويدور عليهم والله تره اروح اني

رشا .. وين ترحين تخبلتي

ريم : اي تخبلت ولج بابا وعمه وسليل وغزل كلهم هناك كلهم وابجي واعيط بلبيت

طلعت تركض للشارع حتى بدون ربطه وفتحت الباب وجان شعلان يصير بوجهنا بس طالع من بيتهم الي هو گبالنا ومبين هم مستعجل ومخبوص عبرت ريم اله تصيح

ريم : فدوه شعلان اهلنا هناك

شعلان : منو هناك احجي خلي افهم

رشا .. اني مدنجه وابجي

ريم : بابا وعمه وسليل وغزل

شعلان : لا ياالله احنا هناك هم طالب وابنه وسيف وامه ومنعرف شصار سيف خابرني مضيعهم والله يستر وهسه رايح اله

ريم : فدوه لعمرك شوف اهلي وياك

شعلان : تعالي امشي للبيت وبعد لطلعين ابد وفوكاها بدون ربطه

ريم : هسه بحال ربطه وشعر احرك شعري حتى ترتاح

شعلان : على كيفج كولي ياالله وان شاء الله ماكو شى

رشا .. عبر على بيتنا ويااه ريم تحجي وتبجي وصل ليمي مكدرت اباوع بوجهه اني تعبانه وخايفه عليهم لدرجه مستعده اتوسل بشعلان بس حتى يلكاهم

شعلان : رشا

رشا .. رفعت راسي وكلت نعم بهدوء ودموعي على خدي امسح بيهم

شعلان : الزمي اختج واقفلو الباب عليكم مااريد اي وحده تطلع منكم نهائياً لو شميصير واني رايح هسه لسيف وهم ندور على اهله وهم على اهلكم يله ادخلو مااريد اسمع صوت اي وحده بيكم اكعدو ادعو يرجعون احسن من البجي والعياط

رشا .. مااشي سحبت ريم من ايدها وطبيت وسديت الباب مكدرنا حتى انطب جوه نحس البيت ياكل بينا كعدنا بلحديقه ننتظر اي خبر

كعدنا نبجي وساعات تمر لا حس ولا نفس لا شعلان المر ولا اهلي بينو حسيت بلوحده بعز شهر  اب الحاار احس جسمي ثلج احس هاي هيه بقينا وحدنا بلدنيا ريم تعبت من البجي ونامت على رجلي ويصيح الله واكبر ونكوم نصلي ونرجع نكعد بلحديقه وعلى هذا المنوال خلصنا وكتنا كله لحد منعرف بإي ساعه بليل انفتحت الباب ويدخلون كمنا نعيط ونحضن ونبوس بيهم غزوله تبجي لحد يطخني تأذيني ايدي

ممصدكه اشوفهم كلهم كدامي همه دخلو واشوف سليل تتحرك بهدوء وتصعد الدرج واول بايتين من الدرج وكعت من طولها

ركضنا عليها ونغسل بوجهه يمكن هسه بين علينا الانهيار

سليل : نفذت طاقتي والدنيا تفتر بيه لهسه صوت الناس بأذني لهسه منظر الجثث مطشره گبالي لهسه لوعتي وحركت گلبي على اهلي تحرك بيه من طبينا للبيت وكعت وكأني لهنا عقلي وگلبي اعلنو استسلامهم

محسيت غير هدومي كلها مي واهلي فوكي يبجون وخايفين عليه

سليل : مابيه شى لتخافون

نهر : شلون مابيج وشفتج بيضه وجهج اصفر

حجي طه : تعالي بابا اصعدج فوك

سليل : اني اصعد ليضل بالك بابا انت هم ارتاح

حجي طه : شرتاح واني اليوم جان خسرتجن

كله من ورايه لو مماخذجن ويايه

نهر : قدر وصار والحمدلله طلعنا منها سلامات

ريم : اشيل غزل اصعدها

حجي طه : لا خلوها جوه يمي اني عيني عليها

نهر : لتخاف طه اني يمها اداريها بعيوني

حجي طه :  الْحٍمَدٍ للـّہ والف  الْحٍمَدٍ للـّہ والشكر رجعتولي سالمين يمكن اني مسوي شى زين بدنياتي والله جازاني وماحرك گلبي عليكم وخسرتكم الف  الْحٍمَدٍ للـّہ والشكر

سليل : سبحت وطول مااني جوه الدوش ابجي واشهك والله حتى دموعي خلصن بس مو بيدي اليوم الي عشته انضاف ويه الايام التعيسه من عمري يعني الله يقبلها ناس رايحه تزور ترجع بجفن

كملت حمامي كوه وبدلت ونمت وطول مااني نايمه احلم اركض وره غزل اخاف اضيعها لحد مكعدت عركانه وكوه اتنفس متحملت وكمت من الفراش باوعت ساعه بال ٣ الصبح نزلت جوه لكيت غزل نايمه وبابا وماما نايمين واحد منا والثاني منا وهي بلنص اجيت يم راسها حطيت راسي ومددت جسمي بلكاع يمها وشعرها يلامس وجهي ابوس براسها وكل مااتخيل ماالكاها تحسرني العبره لحد متعب ونمت

كعدنا على عياط قوي والباب تندك

كمز بابا وراح يفتح الباب ونسمع صوت شعلان يحجي وبصوته رجفه ويريد يبجي كوه يحجي من الخنكه

شعلان : انتم بخير دورنا شكد عليكم

حجي طه : اي  الْحٍمَدٍ للـّہ بس كولي شنو هاي الهوسه

شعلان :طالب انطاك عمره لكيناه ميت واجيت اشوف رجعتو لو لا ودنج ونزلت دمعته

حجي طه : انت شتكول طالب ابن خالي خضر لك لا كله ولا طالب ويضرب بلباب

نهر : لطمت على وجهه لا ياربي استغفر الله كمت ابجي بقووه لان طالب جان انسان طيب وخلوق العيبه متطلع منه

انداريت على سليل الي مباشره حضنتني وتبجي

نسمع صوت العياط الي هز المنطقه كلها حقهم طالب جان الصغير والجبير يحبه

حقاني ورجال قليل منه بهذا الوكت

طلع طه يركض واني هم وياه لبست عباتي

اباوع رازقيه تلطم وتشك بملابسها ومرته تملخ بروحها ماالومهن الصدمه جبيره لكو ابنه مابيه شى بس هو من الخنكه والدوس ميت شكد جان الله يرحمه ضخم وهيبه وطويل بس حجم الكارثه تخلي اضخم واحد يصير نمله شلون عشنا احنا ماادري يمكن النه خبزه بعد بلدنيا بس المرحوم ورقته وكعت

الف رحمه على روحه

سليل : شفت زلم ونسوان يبجون على طالب اني الي جمعتني مواقف قليله ويااه انهاريت من سمعت الخبر كل ماافكر شلون اختنك ومات اختنك من يمي سيف كاعد يبجي ويصرخ مثل النسوان ويضرب اي شى كدامه حقه الاخ عزيز ومو كل اخ اخ طالب جان والنعم منه اخ اله وسند ورجال محترم ودوم اشوفه ويه سيف مرات احسه ابوه طالب مو خضير

رشا .. جابو تابوت المرحوم واشتغل العياط والكل بلشارع كل مااتخيل حالنه جان صار مثلهم اتهستر ويلزمني گلبي ويأذيني شفت شعلان شلون يبجي بقوه على طالب اختنكت اكثر ونبضات گلبي تتباعد احسه راح يوكف اشرت لريم الجانت واكفه على صفحه تبجي

رشا .. تعالي دخليني

ريم : شبيج رشاوي ازركيتي

رشا .. مابيه بس دخليني

دخلت وشربت مي كعدت بصف غزل الكعدت مخروعه وحاولت اهديها بس صوت الهوسه البره تخلي اكبر واحد يخاف

سليل : موت طالب جانت فاجعه النا وصدمه للكل الله يعين اهله يمكن مرات نكره شى بس رب العالمين يبعده عنا لمصلحتنا يمكن لو متزوج ماما نهر كان هسه ترملت وهي مو بحال صدمه ثانيه اذا هي ممتزوجته وانهارت حتى اكل مكعد تاكل من قهرتها عليه لعد شلون لو متزوجته يمكن تموت وراه الله يرحمه مات ونفسه بيها

راحو للكوت كلهم هناك الفاتحه مالته مصقط راسه وبيته واهله وحياته خلصها بلكوت  وبابا وماما وياهم

بابا وصه عمو محسن علينا يروح ويجي وخطيه مقصر يحير شيجيب بس احنا حتى الاكل شبهه كطعناه اذا ناكل مرات لخاطر غزل علمود علاجها لان عمو محسن اخذها للطبيب ولازم التزام بلعلاج حتى اطيب وهم حتى متفكر بلي صار وتتعب بس احنا منتهين من القهر على طالب كل منتذكره لازم نبجي عليه

بابا وماما خابرو كالو نبقى للسابع عيب من خواله قبل رجوعهم بيومين اندكت الباب كمت كوه اسحل بروحي بعدني تعبانه من الصار حطيت الربطه على راسي وفتحت الباب الخارجيه واتفاجأ گبالي سجاد

يتبع ...

#ادمن_مدونة_نور_قلبي

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الثاني_عشر

ماطايب بعدني يصلن اعظامي

            وبعدني من الدمع مايابس الثامي

ولااكدر اعوفك لا اضل وياك

                 لغم دايستك جدامي

كلت موش انتة كتالي

                      وگلت غلطان باوهامي

وتوقيعك خذلني الباخر المرسال

                         نفسة بورقة اعدامي

سليل : فتحت الباب واشوف سجاد گبال عيني فتحت الباب من فرحتي شمرت نفسي بحضنه ياربي شكد جنت محتاجه اله وتعبانه ومغثوثه من الصار

ممصدكه انت بلعراق بادلني الحضن ويبتسم

سجاد : هههه منا الوادم تفتر  خلي ندخل للبيت وراها اشبعج حضن اصلاً اجيت للعراق حتى احضنج

سليل : وخرت من حضنه انت صدك كدامي

سجاد : لا بعدني بسوريا ودزيتلج خيالي

سليل : حتى لو خيالك هم راضيه والله سد الباب وذب الجنطه من ايده وتقرب وباس راسي اشتاقيتلج

احس مو باسني تكول سحب الالم الي بروحي كله رجعت حضنته بلهفه وشوق ممصدكه حاضنته بعد هاي المده من الفراك واكوله مو بكدي والله

جان اسمع صوت البنات طلعن يركضن عليه وخرت بسرعه وكفت بصفه والبنات حضنوه طايرات بجيته

ريم : هااي عموو اجه

سجاد : ياهلا بسكينه ولج هم طولانه الناس تكبر وانتي اطولين

ريم : لعد تريدني كصيره حتى ادعبل بسهوله

رشا ..  الْحٍمَدٍ للـّہ على سلامتك عمو

سجاد : ولجن عفتجن سنه طولتن هلكد لو اعوفجن ١٠ سنين شلون

ريم : اني بلنسبه اليه اصير اطول منك اذا مصرت بطول التيل مال الكهرباء واخلصها بلشارع ماكو بيت يستوعبني

سجاد : شنو الفايده شو الطول طول النخله

ريم : لتكمل عمو اعرف والعقل عقل صخله وصلت وابشرك نفس العقل ماكبر

سجاد : والله مشتاق لسوالفجن

سليل : تعاال طب ارتاح وطبينا كلنا جانت غزل متمدده متكدر تكوم واجه حضنها حيل  سجاد وبابا الوحيدين الي تحضنهم غزل ومتستحي منهم

سجاد : بنوتي الحلوة كبرانه وصايره مره سلامتج

غزل : شفت عمو ايدي انكسرت ورجلي كلها مجروحه

سجاد : عادي باباتي كلها كم يوم وترجعين احلى واحسن من قبل لتخافين ولا تضوجين فدووه للبنات الحلوات وباسها من راسها

سليل : تعرف بلي صار

سجاد : لعد ليش اجيت

سليل : منو گلك

سجاد : اول شى شفت بالاخبار وادك عليكم ماكو يومين جدي احترك من وراكم تالي اتذكرت محسن خابرته وكلي على طالب الله يرحمه وعلى الصار وياكم بس كملت البيدي حجزت واجيت وين الجهاز مالتكم ليش ادك ومحد يجاوب

سليل : تلفون بابا ضاع بيوم الزياره ومن رجعنا الفجر عرفنا بوفاه طالب الله يرحمه بابا اخذ الجهاز مال البيت وراح وياهم للكوت وثاني يوم عمو محسن اشترالنا واحد بس رقمك محافظته جان خابرت

سجاد : اذا التلفون عند طه ليش ميجاوب

سليل : يجوز ميسمعه احنا هم بليل يله يخابر ويطمن دقايق ويروح هو وماما لان هوسه والفاتحه مالته جبيره وملتهين

سجاد : كولش انقهرت عليه الله يرحمه رغم جمعتني مواقف قليله وياه بس جان رجال والنعم منه ومن اخلاقه ذهب صافي الف رحمه على روحه

كولش انقهرت من سمعت

سليل : كلنا مقهورين ومابيدنا شى غير نقرا قران ونهدي لروحه وروح كل الشهداء الراحت

سجاد : احجيلي شصار وانتي شلونج

سليل : شلوني متت والله حياني

سجاد : لتكولين هيج لو صاير بيج شى مااتحمل بلياج

ريم : تره احنا هنا مسافرنا للمريخ

سجاد : حجت ام لسان انطوني مي جاي اي شى لو بس تعرفون توكفون فوك راسي

رشا .. وين هديتي خلصت سادس ودخلت گليه وراح اخلص المرحله الاولى وانت مدزيت هديتي

سليل : رشاا شبيج خلي يرتاح وكت هدايا عيب

ريم : عيب من عمو سجاد هاي شبيج ثلل هذا عمو لو نسيتي جنت حتى اتعارك اذا مشترالي

سجاد : بهاي حقهم مالج دخل اني وياهن

سليل : هااي فوكاها واني اكول تعبان واخلي يرتاح

ريم : قابل جان يشتغل عماله هو جان مسافر ومتونس مثل حظنا مخلصيها بلبيت واقوى طلعه النا يم ابو المخضر اشيل العلاليك ويه عمه

سجاد : حطي عينج وخليني مااسافر بعد

سليل : ياريت متسافر اندار عليه وابتسم

رشا .. هديتي ياناس

سجاد : مجبت هوايه شغلات والله ملحكت وهم شغلاتهم مو قويه وحلووه جم حاجه جبت

ريم : كول صرت بخيل واضم فلوس خوش درب هاي مال ملحكت ومحلوات عمو سوالفك حافظيها

سجاد : يايوم بخلت عليجن وانتي بلذات تبقين فلوس بجيبي جيب جيب

ريم : هسه جيب خلي نشوف شجبت

سليل : جان جايب لكل وحده منا بجامه وربطات ولماما دشداشه وربطه وصابون رگي لان تحبه وسبحه لبابا  وعلبتين حلويات حاجات بسيطه بس حلووه

رشا .. بس هيج عبالي جبت سوريه واجيت

سجاد : اني اعرف مراح اخلص منجن حتى اشتري راحه بالي هاكم

سليل : طلع فلوس من جيبه وانطه لرشا وريم وغزل وكال اشترو كل وحده سيت حلوو بنطرون وقميص حتى لتكولون مجاب شى

سليل : هووايه سجاد كاافي الجبته

ريم : لا مو هوايه انتي متردين عادي احنا عمو لازم نستغله ابشع استغلال صار شكد ممشتري شغلات

سجاد : المهم خلصوني من لساناتكم الفلوس سهله

رشا .. هسه نجيب المي والجاي والشربت وحتى الغدا

سجاد : هااج استلمي عمي ذني اذا ماانطيهن مو بعيد يطردني

ريم : نطرد الدنيا كلها ومنطردك متعرف شكد مشتاقين الك

سجاد : هااي منو التحجي

ريم : الضمير المستتر مالتي تره شويه ويروح ميبقى هوايه

سليل : روحو حضرو الغدا وكافي سوالف تسبح حتى ترتاح

سجاد : اي نهر وطه شوكت يرجعون

سليل : كلها يومين

سجاد : يمكن باجر اروح وراهم للكوت لازم اروح اخذ من خاطر ابوج عيب

سليل : وين رايح مبقى شى ويجون عفيه الطريق يخوف وانت اليوم وصلت

سجاد : تخافين عليه

سليل : اووووف اذا عليك مااخاف على منو يله كوم اسبح واني هم اساعد البنات حتى نتغدا سوه

بيومها كعدنا كلنا مثل قبل ناكل وجيت سجاد غيرت من نفسيتنا كلنا الكل اكل ويضحك ويشاقى اباوع عليه ياربي شكد احبه ليش حتى ضحكته تلعب بنبض گلبي

نسيت كولشي صار ويايه كعدته بنصنا وقريب مني حسستني بالامان

وراها راح جاب اشكال حلويات وحب وكعدنا بلحديقه ويسولف النا عن سوريا ومناطقها واهلها وشغله جنت بس ساكته واسمع لكلامه جنت مااحب احجي اريد بس املي عيوني منه وخاصه ماكو احد لا بابا ولا ماما موجود حتى اخجل اكعد ويااه لان هسه الوضع اختلف عن قبل هسه كلهم يعرفون واحد يحب الثاني وكلها فتره واصير زوجته فعلياً

مقبل نسوي عشا جاب مشاوي من بره بيومها دلل البنات شيردن يروح يجيب الهن وعاد ريا وسكينه شلون ميحبن يستغلن سجاد حييل يمونن عليه وميستحن منه

لليل اتصل بابا وعرف سجاد هنا وكال عكب باجر نرجع

لهذا كال مااروح للكوت كيفت لان مراح يوصل لهناك الشى الغاب عني من فرحتي برجعته سالفه خطوبتي يمكن نسيتها او تناسيتها بوكتها ما اجت على بالي اصلاً

لليل البنات صعدو لغرفهم وصعدت غزوله ويه ريم لان كدرت تمشي بس على كيفها واني فرشت لسجاد بلهول اجه يتمدد واني رحت جبت مي اله خليته قريب عليه وكتله تصبح على خير محتاج شى

جان يجرني من ايدي حيل وكعت بحضنه شبيك سجاد

سجاد : گلتي محتاج شى واني محتاجج وجريتج

سليل : ههههه عفيه منا البنات لتنزل وحده منهن عيب

سجاد : صعدن وبعد مينزلن

سليل : وخرت من حضنه وكعدت بصفه وهو متمدد على ظهره

همست بهدوء لتنسى اني مطلكني شرعاً مو مرتك اني

سجاد : قابل احد گلج راح اسوي شى وياج ولج سنه كامله بيتي مالمست شعره منج

سليل : عفيه وابقى حباب هيج منا لحد منتزوج

سجاد : بله گبل وجنت غبي تردين ابقى غبي العمر كله

سليل : هههههه تدري بروحك صاير جرئ مجنت هيج والله

سجاد : الي منعني عنج گبل راح هسه

سليل : شنو هو المنعك

سجاد : خوفي عليج جنتي صغيره وبأمانتي ومردت اخون الامانه واكول مراهقه والعب بعقلها وفرق العمر البينا لتنسين اكثر من ١١ سنه بينا وانتي جنتي صغيره صعب اقربج الي واني اعتبر راعيكم وبلذات انتي جنت حذر  وياج لان اخاف عليج كولش وهواي اعتبارات مااريد اذكرها وافتح دفاتر عتيكه مضت وراحت

سليل : وهسه

سجاد : شتكولين انتي

سليل : اريد اسمعها منك

سجاد : يجوز اني بلكلام مو حيل شاطر واتفنن بس اكدر اكول الج وصلتي مرحله اتنفسج اتنفس شى اسمه سليل حتى من اضوج او اتعب او انغث بس افكر بيج تسكن روحي وكولشي يرجع مضبوط

سليل : يعني تحبني

سجاد : لا احب العراق

سليل : ضربته على كيفي براحه ايدي على صدره لا سجاد والله مكعد اشاقه تحبني

سجاد : مااحبج

سليل : لعد خلي اكوم كمت من يمه جان يجرني وحضني ويضحك

سجاد : بسرعه تتزعل ام دميعه

سليل : وخر مني مو متحبني

جان يحضني حييل وكاال روحي بيج سليل احبج لدرجه اغار عليج حتى الهوا اذا لامسج احبج لدرجه انام واكعد واكل وامشي افكر بيج واكول هسه شلونها بس لا ضحكت ويه احد بس لا حجت بس لا تعبت بس لا تمرضت من كال محسن على الصار تخبلت يابو الي يجيبني لبغداد اريد اندل دربي ماكو

تره حبج صار يمشي هنا ويأشر على صدره ويمشي بدمي

سليل : وخرت من حضنه وكتله واني روحي بيك

سجاد : اريد انطيج شى تلبسي لو تنتظرين ابوج بكيفج

سليل : شنوو هو

جان يطلع حلقه من جيبه حسيت بلحظتها ملكت الكون ابتسامتي امتزجت ويااه دموع

سجاد : ااخ من عيونج شكد تصرف دموع

تلبسي لو ننتظر طه

سليل : الوكت شويه زحمه لان طالب متوفي مصار كم يوم وبابا حيل مقهور عليه وكلنا هم

سجاد : اني مرايد شى طلبتج اصلاً من ابوج من زمان والشغله منتهيه بس اريد من اداومين الحلقه بيدج شوو جيبي ايدج ولبسني الحلقه  وباسها وكاال  حتى محد بعد يتقرب منج واني اكول لابوج واكول لنهر قابل مسوي حفله لتنسين انتي حتى بلجنسيه مكتوب متزوجه ممغيرها واسم الزوج سجاد

سليل : اااخ منك من عرفت ممطلك محكمه شصار بيه

سجاد : بس تكمل هاي السنه اجي اعقد عليج واخذج بعد مااتحمل بدونج

سليل : وين تاخذني عفيه

سجاد : شبيج رجفتي غير ويايه لسوريا

سليل : لا فدوه كله ولا اعوف اهلي شلون تراضاها اتركهم يوم واحد مااكدر بلياهم

سجاد : وشغلي هناك وحياتي رتبتها احسن من هنا بالف مره

سليل : فدوة سجاد مااكدر اعوف بابا وماما والبنات اموت بدونهم

سجاد : وبدوني

سليل : لتحطني بهيج مقارنه تعرف كل واحد بيكم ماخذ جزء مني

سجاد : بس اني اريد اخذج كولج

سليل : تلاحظ بديت تتجرأ هوايه خلي اكوم انام

سجاد : بس سؤال بربج كاتلني الفضول من زمان ردت اسألج عليه

سليل : شنوو

سجاد : من جنت سكران وين نمت

سليل : والله انت طالعه عينك

سجاد : هااي شبيج تفكيرج وصخ كلت وين نمت

سليل : على اساس متعرف

سجاد : والله مااعرف بس منج عرفت بس ممتأكد

سليل : دنجت بخجل واشرت هنا على صدري

سجاد : وقبلتي

سليل : اي

سجاد : ليش

سليل : لان احبك وجنت حيل خايفه عليك

سجاد : وهسه تنوميني بحضنج اذا اطلب

سليل : طبعاً لا

سجاد : ليش

سليل : لان جنت زوجي بوكتها وهم محاس على نفسك عفيه سجاد والله كعد تخجلني

سجاد : شلون بله اسكر حتى تخليني انام بحضنج توبه وتبنا الى الله وصلاه وملتزمين بيها شلون توازيني انحرف حتى اعيش مثل ذيج الليله

سليل : خلي اكوم احسن محتاج شى

سجاد : اطفري وين ترحين مني احسبي حسابج تخلصين هاي السنه متزوجين

سليل : وين مااروح لسوريه عفيه

سجاد : صار ارجع اعيش هنا لعيونج المهم متنقهرين

سليل : دنجت من فرحتي وبسته من خده

سجاد : لا لا هنا لازم ويأشر على شفايفه

سليل : لا سوريه هواي غيرتك

سجاد : والله اني عاقل وياج بشكل مستفز لا سوريه ولا افغانستان روحي نامي واستري على روحج تره الخبال من يصعد متعرفي اخاف اخذج هسه من ايدج واعقد عليج والليله متنامين اله وانتي مرتي

سليل : هههههه ممنوع تجوال وين اكو عقد

سجاد : مالج دخل اجيبه من جوه الكااع هااا شقررتي

سليل : اروح انام احسن تصبح على خير حبيبي

سجاد : حرشه علني شو تعااي

سليل : جرني وانهزمت اضحك وصعدت الدرج وهو يأشر بعيني وين ترحين واني ادز بوسات بلهوا دخلت للغرفه ونمت بفراشي جني طير وطلقوه بستان كله ورد سعاده محاسه بيها بعمري بعد هذا العذاب صار الي احبه يحبني وهو يبادلني المشاعر بدون كتمان

ريم : رشاا اكعدي

رشا .. خير ساعه بيش

ريم : ساعه ٩

رشا .. شكو دخلو الامريكان مداهمه وجاي تكعديني

ريم : عمو نايم اريد اكعده

رشا .. مترحين تكعدي اني شكوو

ريم : اريد مساعده بسيطه منج

رشا .. فتحت عيني زين هااا راح ادكين بيه الدونيه

ريم : لا بس ارحب بيه مرحبت لهسه

رشا .. اذا كعد ونتف شعرج مالي دخل

ريم : انتي بس تعاي ويايه والباقي عليه

نزلنا بهدوء جان يشوخر من التعب

رشا .. ولج خطيه والله شوفي واذا عرفت سليل والله لطيح حظج

ريم : اشش بله وساعديني

جابت خيط وعلى كيفها ربطت اصبعه الجبير بحبل ناعم وسحبته وربطته برجل القنفه وجابت صينيه وركعتها حيل بلكاع وفز عمو يصيح شكوو

ريم : ههههههه مداهمه

سجاد : ولج غضب ريم اذا الزمج والله اكطع شعرج وانظف البيت بيج

ريم : يله كوم عمو لو كبرت ومابيك حيل

كاام وجان ينجر اصبعه حيل وعاط

رشا .. اني حطيت ثلجايه بظهره يريد يطلعها ميكدر هههههه تعيش عمو وتاكل غيرها

سجاد : هاي عود انتي مربيه الاجيال راح تصيرين

رشا .. يااجيال عمو الجايين همه راح يربونا

اني عليه اطب اخرط الكتاب وادوخهم واخليهم يكرهوني واطلع واخذ راتب اخر الشهر

سجاد : خوش جيل جديد ماشاء الله خربتي المستقبل

رشا .. هو البلد خربان بقت عليه

سجاد : تعالي افتحي الخيط مشدود حيل لازم اضافر

رشا .. تقربت من رجله جان يلزمني حيل تعاالي ولج شلون تساعديها تعاالي وله اخنكها

ريم : اخنكها اني شنو

سجاد : مو اختج

ريم : ولا اعرفها

رشا .. هيج عفتيني

ريم : والله عذريني يااختاه ياروح مابعدج روح اذا تلزمني شعري الجميل يصير وصل مسح للبيت

سليل : نزلت اركض على الصوت شبيكم

سجاد : لعبن عليه

سليل : والله وكع گلبي عبالي صار شى موزين

ريم : والله يااختي الجبيره دومج عايشه بلهبطه مو جديد

سليل : ماطول خبالاتج موجوده شلون مااهبط

سجاد : سليل بداعتي الزميها اليه وجيبيها مااكدر اعوف هااي

سليل : تدلل شو تعاي وركضت وره ريم وتعيط بابا الحكني بنتك باعتني وصارت علاسه لسجاد هي سريعه متلزم بس من وره كصيبتها لزمتها حيل وجبتها

جان يلزمهن من شعرهن وركع راس براس

اخاف عبالجن كبرتن ومااكدر عليجن والله اخليجن تتندمن على الساعه الي تحارشتو بيها

ريم : هااي شبيك عمو متحب الشقه غير دنرحب بيك

سجاد : واني هسه راح ارحب بيكم جان يوكعهن حيل وكامن يكمزن

ااخ راسي ويفركن

سليل : هههههه حيل بيكم

رشا .. خووو انتي معودتي هذا سجاد حبيب الگلب تنطين بينا علموده

سليل : اششش عضيت شفتي وخجلت وذني يضحكن

ريم : يله نصالحك عموو

سجاد : تسوين الاكل انتي

ريم : مو اني احبك ومااريدك تموت على ايدي اذا حاب تتسمم اسويلك وجبه الريوك واذا تريد منا لمقبره وادي السلام الغدا عليه

سليل : اسم الله لج تف من حلكج

رشا .. عيني عيني بعد الخوف

سجاد : غير رجلها وتخاف عليه والله هاي حلووه

سليل : حسيت الكلمة هزت گلبي وابتسمت لا ارادياً

ريم : هااا عمو تسمم لو موت

سجاد : هيج اكلج يلعب النفس

ريم : والله اسأل عمه نهر كل مااساعدها تكفخني واطلعني من المطبخ وتكول مايصير براسج خير بلطبخ لو بعد ميه سنه

رشا .. اذا الباميه حطت الها شكر وليمون دوزي وسماك صارت تلعب النفس

ريم : غير غلطت بلعلب اذا همه يحطون الشكر والملح نفس العلب وتعال ذوك هو الواحد المي كوه يشربه من يكعد من النوم اجي اذوق ياهو الشكر وياهو الملح هو ابيض حطه والله كريم

سجاد : حبيبي سويلي انتي ريوك ذني بس طول كولشي ماكو

جان يصيحن سوه

رشا وريم : حبيبي اي عيني

سليل : امشوو يمعودات ولا يستحن

اخذتهن وهو يبتسم على سوالفهن شويه وغزوله نزلت يمه ويضحكون وكعدت كملت الريوك والغدا سوه وهو ولا طلع وياهن ضحك وسوالف ولعب مره دومنه ومره طاولي حسيت رجعنا صغار من جانو البنات يلعبون ويااه واني اتفرج 

مر اليوم اسعد مايكون رغم لا بابا ولا ماما وحيل اشتاقينه الهم

بليل مردت ينعاد قبل بيوم فرشت اله وهو جان بلحمام ودااصعد على الدرج وكفت وصحت تصبح على خير

سجاد : هااا شنو شعجب الفراش مو نظيف

سليل : شنو لا والله جديد اصلاً ممستعمل نزلت اشوف ويأشر على المخده دنجت جان يدفعني بهدوء كعدت على الدوشك عفيه سجاد شسوي

سجاد : اششش لدوخيني

سليل : جان يجر رجلي ونومني على ظهري ونام بحضني

متت بدمي انعادت ذيج الليله عليه وكمت كوه اطلع الكلمة عفيه سجاد منا البنات

سجاد : مينزلن وانتي تدرين هذا الشى واني ممسوي شى بس نايم اريد تسوين شى الي

سليل : شنو

سجاد : اول شى اخذي نفس واهدي دكات گلبج زرفن اذني وثاني شى لعبي بشعري اريد احس بحنانج

سليل : بس

سجاد : والله مااسويلج شى اني تعبان سليل واريد ارتاح ولو يوم بحضنج بعد متصير هيج فرصه ومااتجاوز حدودي لتنسين اني منو اني سجاد حبيبج الي بعمرج متجاوز وياج

سليل : لتزعل مني بس لان مستغربه تصرفاتك

سجاد : هاي السوالف من زمان احب اسويها وياج بس مثل مكتلج البارحه اكو هواي امور جانت مانعتني منج يله العب بشعري

بديت اهدأ والعب بشعره وبلحيته بهدوء غمض وبقيت بأطراف اصابيعي واتذكر ذيج الليله وابتسم اووف مثل الطفل بحضني ولا ذاك الي يعيط وعصبي وميتحجه احسه تحول اصغر من غزل بحضني بقيت مده طويله العب بشعره بدون منحجي اي شى لحد مثكل راسه اكثر وطلع صوت الشخير نام كمت على كيفي طفر

اسم الله

سجاد : ابقي يمي

سليل : لا صعب اخاف يجون باجر الصبح زحمه يشوفونا هيج

سجاد : كومي نامي مااريد اتعبج

باس راسي وبست خده وصعدت وهو مباشره حط راسه على المخده ونام صعدت لغرفتي ودفو راسه بعده على صدري غمضت واتخيله بحضني وغفيت

الصبح كعدت على بوسات من الحنينه اوف حضنتها حيل البيت بلياج ولا ينراد

نهر : لا مبين اذا حضر الماء بطل التيمم

سجودي وهنا شسوين بيه

سليل : غير انتي الخير والبركه

نهر : حبيبة امها انتي يله كومي ابوج يريدج هااي شنو

سليل :دنجت وكلت سجاد جابها الي باستني وكالت

نهر : ولو مو وكته بس بلخير عليج يمه يوم عيد واشوفج عروس وترتاحين بحياتج

سليل : امين ماما

نزلت سلمت على بابا جان تعبان حيل ومبين القهره عليه

مر يومين وضعنا بلبيت زين وسجاد يروح وبه بابا حتى يشوف المطعم حسيته يريد يرجع للعراق اكثر من قبل

نهر : جنت بلمطبخ اغسل مواعين والبنات بغرفهن اندكت الباب حيل ركضت فتحتها حتى ايدي مسحتها بدشداشتي من السرعه واشوف سجاد دفع الباب وطبك الباب  حيل شكد اعرفه عصبي وميتحمل وشايفته بهواي حالات بس مثل هلمره مشايفه احسه من الاعصاب اذا يلزم واحد يكتله خلاص

جان يسحبني من ايدي حيل

ااااخ سجاد شبيك

سجاد : صدك سليل جانت مخطوبه لسيف

نهر : هاااا عاط عيطه والله اباوع على وجهه دماراته كلها طالعه من جانب راسه وايده عاصرها يمكن كلمة وحده اكذب عليه يضربني يفلش وجهي

سجاد : لج احجي مخطوبه جانت موو

نهر : على كيفك فدوه اتعوذ من الشيطان وخليني افهمك

سجاد : اسمعي نهر اذا مجاوبتي هسه اصعد عليها وتراب ابويه وابوك اسحلها من فوك ليجوه واخنكها كدامج واخليج بحسرتها احجي

نهر : كمت امتمت من الخوف وكتله اي حانت بس والله فسخت ومصار شى بينهم

جان يدفعني حيل وصعد يركض عليها سوه الدرج كم بايه من الاعصاب والسرعه ركضت وراه اعيط

سليل : جنت كاعده امشط بشعري هستوني طالعه من الحمام ومنتظره سجاد كلت ارتب نفسي كدامه احب اشوف بعيونه الحب وخااصه من اكون قريبه مني ويشتم ريحتي جنت طايره بوجوده وممصدكه قوت هيج علاقتنا وشلون حبنا يكبر يوم بعد يوم والعب كل شويه بلحلقه طايره بيها

سمعت هوسه وعياط

رشا .. شكوو ياستار

سليل : ماادري خلي نشوف شكوو بعدنا نطلع من الغرفه فتحنا الباب صار سجاد بوجهي اباوع عيوونه دم جر رشا وطلعها من الغرفه وقفل الباب

سليل : شبيك سجاد شصار

سجاد : انخطبتي اله مو

سليل : بلحظتها دخل الخوف بگلبي من اوسع ابوابه حسيت مثل التارك الصلاه وعاصي ورب العالمين واجاه الموت ياخذه

شلون راح افهمه شلون راح اهدي واني اشوفه منهار وصاير بركان

من خوفي منه بجيت بسرعه واخربط بلحجي اريد بس اكوله خلي افهمك والله من الخوف مطلعت من حلكي

وبس اشر بإيدي عفيه على كيفك خلي افهمك

سجاد : ولج شتفهمين هااا شتفهمين اني رايح هناك ومأمن تحبيني ومطعنيني تالي طلعتي مخطوبه اله

سليل : منو كلك

سجاد : الحقير اخذ من خاطره علمود وفاه اخوه شفته بلشارع تقربت منه كلت عيب مهما كان ولخاطر طه يكولي مااحط ايدي بيد واحد اخذ خطيبتي مني بكل ثقه يحجيها خلاني اخرس لحد مستوعبت كلامه ردت افلش وجهه بلشارع تالي يكولي بأستهزاء يمكن مكايلين الك خطبتها اربعة اشهر وتالي عفتها لان دريت هي على ذمتك

سليل : جذاب والله اني عفته مو هو

سجاد : كلفتي نفسج جان بقيتي ويااه جان اتزوجتي يعني لو ما باقيه على ذمتي قانوناً جان هسه انتي مرته مو مرته سليل مرت سيف

سليل : فدوه بس خلي افهمك

سجاد : شتفهميني ولج اني حبيتج اكثر من روحي ردتج مرتي ام بيتي هيج ادكين الناقصه بيه وجان يدفر الميز تواليت وكل الغراض البيه وضرب الجامه مالته   بيده حسيته فقد واني اعيط سجاد بوكتها جان اعصار ومحد يكدر يوكف بوجهه اني من خوفي منه وعليه حطيت ايدي على اذني واعيط

نهر : نسمع صوت تكسير اني كلت راح يذبحها اندك الباب اني وريم ورشا ونعيط والبنات من الخوف كامو يبجون

ولك سجاد لتسويلها شى بروح ابوك

وادك مثل المخبله على الباب ردته بس يفتح الباب ماكو عياط سليل وصوت التكسير تخيلت لازم راسها ويركعها بلجام زاد عياطها كمت اعيط بلا وعي عليك العباس ابو فاضل لتسويلها شى عليك الحسين ولك سجاد عوفها والبنات يعيطن ويايه

سليل : ايده تملخت بلجام وبقى يضرب ويدفر ويفشر بلا وعي لحد منكطع نفسه وكعد بلكاع وانتجه على الحايط  وحط ايده على راسه اباوع الدم بكل مكان وايده تنكط وحاطها على راسه

تقربت على كيفي منه واشهك بلبجي فدووه سجاد اسمعني بالاول وراها لو تذبحني هم راضيه مرفع راسه ولا باوع بوجهي دنجت وكعد كباله بدون مااطخه

احجي واشهك بلبجي صحت ماما لتخافين ردت بس يوكف الدك على الباب حتى افهمه وكف الدك بس اعرف همه وره الباب بعدهم وبديت احجي بهدوء ويه كل حجايه تطلع مني شهكه تزرف صدري

حجيت كولشي لحد مفصخت وهو ساكت وبس اسمع انفاسه العاليه وعيني مفاركت ايده الي تنكط دم

هذا كل الصار

رفع راسه وباوع عليه لمسج مو

سليل : لا والقران ولا لمس شعره مني

جان يلزم اصبع الي ينحط بيه حلقه الخطوبه وجر الحلقه منها حيييل وشمرها

ولوه اصبعي هنا حط حلقته هنا حطها گبلي ااااخ ااااخ كمت اعيط احس اصبعي انكسر بيده جان يعوفها ودفعني

سجاد : لزم اصبعك وايدج واكيد شافج بدون حجاب

سليل : دنجت ودموعي تقطر ويه دمه الي يقطر بلكاع

جان بصوت ناصي وبخنكه يكول

شم ريحتج ولمس بشرتج وتخيلج مرته وشلون راح يتقرب منج ويلامس كل مسامه بيج اربعة اشهر انتي خطيبته ويطب ويطلع تقنعيني مباسج متلمس جسمج محس بدفو انفاسج

سليل : لا والله لا وداعت بابا لا والامام الكاظم الي زرته قبل كم يوم وصلت للموت مصار هيج شى غير من لبسني الحلقه وراها هو يكعد بمكان واني بمكان وبوجود وحده من البنات ابد مااكعد وحدي

مد ايده بجيبه وهدومه ادمرت دم

فدوه سجاد بس اشد ايدك مو تملخت ودمك راح يتصفى

طلع الباكيت وسحب الجكاره ورثها وباوع عليه رفع ايده بمستوى وجهي وكاال

تشوفين هذا الدم گلبي هيج دينزف شفتي هاي الجروح الي بيدي گلبي جروحه اكبر

ليش مكلتي ليش خليتيني اسمع منه ويدوسني بقندرته ليش مخليتي قيمه اليه كدامه لهاي الدرجه اني مو بعينج وعبالج جاهل وتضمين عليه

سليل : خفت تعوفني والله ردت احجي وخفت اخسرك اعرفك شكاك ومراح تصدكني

سجاد : شنو ذنبي هيج اطعنيني

سليل : عله صوت البجي مالتي وكتله كله من وراك جم مره اتوسل بيه احبك مااكدر بدونك وترفضني واخر شى تخيرني بيني وبين دراستي

سجاد : وانتي حتى تعاقبيني ترحين تتزوجين يعني لو اني مسوي سوايتج ورايح خاطب وحده راح تقبلين راح تسامحين وانتي بنيه وتكدرين تتقبلين الوضع زين شلون تردين اقبل سوايتج لج اني لو رجال وابن رجال مااباوع العمر كله بوجهج

سليل : عفيه سجاد غلطه والنبي غلطه وصارت سامحني عليها ولزمت صدره جان يذب الجكاره ويمردها بلكاع ولزمني من اثنين ايدي

وتقرب مني وصرنا وجهه بوجهه تدرين شكد حبيتج تدرين لو متدرين

سليل : احرك براسي واكول ادري والله

سجاد : لا متدرين سليل حبيتج لدرجه هجيت من العراق كله حتى لتتأذين كلت اتحمل الغربه والقهر وحدي المهم مااخنكها بشكي وخبالي عليها خليها تكمل دراستها براحتها ادري بيها تحبني ادري متبدلني بلدنيا كلها وراح تصوني ولج من ثولي وغبائي اكول لو اغيب العمر كله تبقى تنتظرني مراهن نفسي لو شكد مااعوفج اكول متطعني بظهري اي اني اشك وافكر وادقق بس من اتذكر حبج ولهفتج ودموعج وتربيتي الج اكول متسويها راح تصون نفسها الي كلها فتره وارجع اخذها لحضني هاي بنت روحي هاي مالت سجاد ارجع واخذها بحضني مستحيل تصير مثل امي وامها

سليل : شهكت بصوت عالي وكتله والله مو مثلهن والله من قهري منك هيج سويت والله مردت غيرك والله ماحبيت غيرك ولا تقبلت بشر يلمسني غيرك من اني وصغيره واحبك فتحت عيني عليك انت دنيتي سجاد انت كولشي انت روح سليل وعمرها

سجاد : كله جذب والدليل بس ضوجتج ركضتي لحضن غيري اسمعي لج من اليوم مالج وجود بحياتي المره التطعني مره بظهري متصيرلي مره لو اموت اني من كاعي ما أمن بوحده وكلت اكيد انتي غير طلعتي انكس منهن

وجان يدفعني حيل وكعت ليوره ورجعت تقربت منه وامسح بدموعي الخلتني حتى مااشوف كدامي لا فدووه سجاد شتريد اسوي بس سامحني

سجاد : تدرين اني رجال والي رغبتي وحاجتي ومن يوم محبيتج مادنت نفسي على مره ذيج سوريه مليانات نسوان حلوات واشكال مايوم زاغت عيوني على وحده اكول مااريد بيوم سليل تشك وتحلفني واكذب عليها يجوز متصدكين بس اني مالمست مره غيرج من يوم محبيتج وانتي رحتي وانخطبتي لغيري وبكل عين كويه ضامه عليه وخليتيني مضحكه اله حتى ماكلفتي تكولين حتى اتجنبيني كولشي صار

هين ياسليل هين

سليل : احرك روحي يله تصدك اكوله حتى لا اخسرك جان يكوم من الكاااع باوع يمنه يسره لكه خاولي مشمور مالتي جنت طالع من الحمام حاطته على راسي لف ايده بيه وكال

سجاد : الي بينا انتهى انتي بنت طه وبس حالج حال خواتج

سليل : عفيه اسمعني وعلى كيفك خلي افهمك

سجاد : خنتيني يانفسي والي تخون مالها مكان بداخلي لو اعرف احركها لنفسي مااخلي للخاين مكان بيه حليتج من كولشي وكم يوم وتوصل ورقتج حتى تصيرين حره شرعاً وقانوناً وشسوين سوي

سليل : اوكف عفيه دفعني حيل وفتح الباب صارت ماما والبنات بوجهه مباوع عليها ونزل وطبو يركضون عليه

واني هنا ذبيت كل ضيمي بيه كمت الطم الطم مثل المخبله يعني خسرته هاي هيه راح مني سجاد راح حب عمرري

نهر : الرحمن حبيبتي راح تموتين

سليل : راح ماما عافني بعد ميريدني

نهر : هسه يهدا ونحجي ويااه على كيفج راح تموتين

سليل : هو اريد اموت اني بدونه اموت

جان تحضني بوكتها فقدت الاحساس بلي داير مدايري اعرف خواتي يمي بس مااحس بأحد بس اعيط كوه كدرت اسكت لحد مابلاعيمي طكت كومتني ماما غسلت وجهي ورجعتني للفراش

اسمع البنات يتهامسون ويشيلون بلكزاز ويمسحون الدم

رشا .. والله متت قهر على عمو

ريم : وسليل منقهرتي عليها

رشا .. شلون ماانقهر ممروده حيل عليها بس يبقى هذا قرارها وبوكتها شكد حجينا وياها وهي قافله وهي مو تعرف عمو سجاد ميتقبل هيج شغلات اول ميجي احجيله زيدت الطين بله من ضمت عليه

ريم : شتتوقعين راح يصير

رشا .. مااعرف بس اتمنى الله يبرد نار گلبه ويرجع لسليل خطيه شفتي هليومين شلون طايره بيه وهو طاير بيها

ريم : ملحكت تفرح والله كمت اخاف نفرح بس شويه نضحك ونتونس ويمر يوم حلوو تجي وراها ايام سوده مصخمه

رشا .. الله ليعلم شمضموم

يله خلي نكمل نمسح كولشي قبل ميجي بابا

سليل : ساعات تمر عليه واسمع رنه الدقايق بلساعه واكول شراح يصير يعني هذا هو راح يتركني يومين منزلت الاكل يصعد ليفوك سألت عرفت بيه مديبات يمنا وهم متعارك ويه بابا لان ضام عليه

ردت بس يرتاح حتى احاول ويااه واتفاجأ بدخول ماما نهر تكول

نهر : كومي ماما راح ميفيد الكعد تسوي

سليل : شنو راح وين راح

نهر : سافر لسوريا

سليل : هيج بدون ميجي واحجي ويااه

نهر : اعرف بيج تعذبتي وتأذيتي الظاهر هو مو قسمتج توصل جم مره للحلك وتخرب عسى ان تكرهوا شيئاً وهو خيراً لكم كومي ماما توضي وصلي ومااكول غير الله يبرد نارج

سليل : يعني سجاد راح مني

نهر : والله ياامي مااكدر احكم هسه هو لا يحجي ويه ابوج ولا ويايه ولا اصلاً يشيل التلفون شبيدنا عليه نكول عسى تبرد النفوس كولشي يبدي صغير ويكبر اله الحزن والقهر يبدي جبير وراها يصغر اذا هو قسمتج ميصير لغيرج واذا مو قسمتج لو بليله العرس تخرب

حسيت بصداع رهيب احس روحي اذوب من القهر كل مااتذكر قبل يومين شون جنت بحضنه وشون صفى حالي بدونه حتى مودعني احس روحي تطلع

كمت توضيت احس اريد شى يهدأ عذابي

البنات كلهم ساكتات ورشا راحت امتحنت ورجعت اطب وتطلع من الغرفه بدون اي حجي بس تراقبني اخاف يصير بيه شى

سلمت امري لله ماعندي غيره اني مكتوب القهر عليه مو شئ جديد جبتها واني جايه متأذيه ومااحصل الشى الاحبه مو عاد اتزوج الي احبه كتمت المي وقهرتي وحبي بگلبي اله وگلت اذا يحبني راح يرجعلي ويسامحني

دوم اردد سجاد ميكدر بدوني كال انتي نفسي لازم بيوم يضعف ويرجعلي

ومن تمر الايام بدون سلام وكلام اتكطع وارجع لنقطه الصفر وابقى ابجي

وانهار واكول عافني للابد

رجعت لدوامي وهاي السنه الثالثه الدراسه اصعب وحيل مابيه بس مااكدر مااقرا بابا طول هاي الفتره معلق ولا كلمة على الصار جان همه الوحيد تكون صحتي زينه واسمعه يكول لماما وگليها لتعوفيها بدون اكل بدون فاكهه واني الاكل جان ينزل سم عليه

اروح واجي للكليه واني كوه اداوم بس مااريد السنه تضيع مني

رشا وضعها هم مو تمام بس تتصفن مااعرف شبيهه ومن اسألها تكون مابيه زينه

دخلنا شهر العاشر رمضان واليوم الثالث من رمضان كعد نسوي فطور وملتهين اني بلنسبه اليه اكمل كم شغله واصعد مرات افطر لبن وتمر ولوين يله اكل شى بسيط مااشتهي لكولشي روحي مكسوره من الدنيا

اندكت الباب جنا منتظرين عمو محسن يجي سمعت صوت كلت اكيد اجه وجان تنفتح باب الغرفه رشا تلهث وتكول ثلل اجه حسام

سليل : صفنت ياحسام

رشا .. اخوج

يتبع ...

مدونة نور قلبي

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الثالث_عشر

ماشايل عتاب بكلبي شايل ظيم

ومن هجرك حبيبي بيه الف غصه.

.تدري شكد جروح بفركتك شديت

ولسه جروحي تنزف ولكل جرح قصه

.. يابسمار نابت فوك جرح الروح

ياجتال كاعد ينتظر فرصه

..ياساكن منامي وصحوتي ودنياي

ياماخذ كليبي وكاعد بنصه.

.هاك الروح اخذهه وهاك عمري الراح

وبعمري الجاي صدك هم الك حصه

(اهداء من احدى المتابعات )

سليل : صفنت ياحسام

رشا .. اخوج

سليل : هااا نزلت بسرعه وياها واشوف بابا حاضنه ويبوس بيه ويبجي ممصدك شافه

تعالو بنات اخوكم رجع

رشا .. بيها البركه شجابه

حجي طه : شبيج رشا

حسام : مبين ممرغوب اني اروح اشوف غير مكان اكعد بيه

نهر : وين تروح يمه هذا بيتك تعال ابوسك شكد مشتاقه الك فدووة لطولك صاير رجال

سليل : شلونك حسام

حسام : هلو سليل شلونج

سليل :  الْحٍمَدٍ للـّہ على سلامتك

حسام : الله يسلمج

ريم : سيارتك وين يلمدلل

حسام : بعدج ضايجه مني

ريم : لا يابوي اني مااضوج لان اعرف شلون اخذ حقي

حسام : اعرف ومجربج بس مو لازم تسلمين

ريم : شلونك والاردن شلونها والرفيقه المناضله شخبارها شنو طردتك

حجي طه : كاافي بنات شبيكم

تعال اكعد ابني

سليل : اباوع على خواتي كاعدات اعصاب وحدتهن تجدح نار رغم كيفت بجيته مهما كان يبقى اخويه بس ريم ورشا مخنوكات سلمت وصعدت مالي خلك لاي شى

حجي طه : احجيلي بابا شصار مصار

حسام : ماكو شى من صار السقوط اخذت امي وسافرت

رشا .. قصدك هي اخذتك وسافرت كمل

حجي طه : رشا لو تسكتين لو تصعدين لغرفتجً

سكتت صار بابا

حجي طه : كمل ابني

حسام : وصار سنتين هناك وضجت وتعبت من الغربه ورجعت لبغداد البارحه يم ولد صديقي واجيت على بيتنا القديم واهل المنطقه دلوني مكانكم

حجي طه : هله بيك يابه هذا بيتك

نهر : اباوع على طه شلون طاير من الفرحه برجوع حسام رغم هو ابنه واني كولش احبه بس ممرتاحه لجيته وخاصه البنات ابد علاقتهم موزينه ويااه

حجي طه : امشي اني وياك نجيب غراضك وتكعد بغرفتي واني انام بلهول

ريم : بعدنا بسم الله

حجي طه : شنوو

ريم : ماكو شى اروح اشوف سليل

رشا .. اخذيني وياج عندي قرايه عمه فدووه من يأذن للفطور صيحيني 

نهر : صعدن وطه معلق على اي شى بس يباوع على حسام ممصدك رجع لحضنه

واجه استقر يمنا اول ايام هدوء صيام والبنات يكملن شغلهن ويصعدن جنت اخاف يصير تصادم بينهم مرات يطلع ويه طه للمحل ومرات يبقى بلبيت

خلصنا رمضان واجه العيد والوجوه مكلوبه

نهر : بس لو افهم شبيجن

رشا .. يعني هذا راح يخلص العمر كله يمنا

نهر : وين يروح غير بيت ابوه

رشا .. انتي صدكتي جان علمودنا وعلمود بابا وهاي الكلاوات هسه بس ترجع امه يسوينا بيباي وحتى بوجهنا ميباوع احنا عشنا ويااه كم يوم وشفناه شلون ميعتبرنا خواته ولا حتى يعترف بينا ورجل امه يصيحله بابا

ريم : عدا صاحبته يكول الها يروحلج فدووه ابويه بس خوش توبته يعيدها

نهر : كافي حبيباتي انسو ذاك وكت وله وراح وهسه الله وفقنا وانجمعتو بيت واحد ميصير هذا اخوكم

ريم : وانتي ثلل شتكولين

سليل : بكيفكم بس كلام ماما نهر صحيح يبقى اخونا

رشا .. انتي ليش هيج

سليل : شنو شبيهه

رشا .. ذبلتي حيل سليل لدرجه احسج مو ويانه 

سليل : نعسانه اريد انام طفو الضوه

ريم : مثل كل مره تطردنا وتسوي نفسها نايمه وهي منايمه

نهر : كومن نروح لذيج الغرفه عوفوها ترتاح طلعنا وطفينا الضوه وعفناها محد هاي الفتره يكدر يتقرب منها نعرف بيها تعبانه رحنا للغرفه الثانيه وكعدت البنات

فدووه بنات لخاطر ابوكم تعاملو زين ويه اخوكم مشفتو الفرحه بعيونه

رشا .. اني اذا لهسه ساكته وحبابه فهو لخاطر بابا

ريم : اني عالنه الهدنه وطول ماهو كاعد عاقل وبدون مشاكل اني هم مااسوي اي شى

نهر : الله عليكم لخاطر حببو اخوكم بيكم

رشا .. المحبه طبع عمه مو اكتساب

ريم : صفكولها وانطوها مصاصه هديه

رشا .. انجبي انتي

نهر : اني وين وذني وين

ريم : عمه والله فهمنا تدللين نمشي ونبوس بيه حتى ترتاحون

نهر : انتي بلذات اكعدي عاقله

ريم : ابوس بيه وعالنه هدنه ميعجبكم اسوي مشاكل وطلايب ميعجبكم وين انطي وجهي اسلم روحي للامريكان واكول اني ارهابيه حتى ترتاحون مني

نهر : كومي ام لسان شري ملابس

ريم : شوكت ياريم تنعدل وياج الحياه وينزلون غساله هي تشر الملابس وتخلصني من هذا الضيم

نهر : كوومي شكد تلغين

ثاني يوم كاعده اسوي ريوك ورشا بصفي اجه حسام

حسام : لج سويلي ريوك

ريم : شو لج

حسام : بكيفي ويله لتوجعين راسي من الصبح سويلي بيض واذا اكو جبن كرافت هم كطعيلي بسرعه

ريم : صار يااخويه الجبير

رشا .. راح تسويلك ريوك في اي بي مال وزراء

حسام : غصب عليها لو بس تعرف تاكل وتنام وتكمز ٢٤ ساعه

ريم : تدلل اخويه الغاالي

رشا .. سوت بيض ماعونين قدمت واحد والثاني وراها حطته على الميز عرفت ريم متعديها

هاااك هو هم سوه لكمه جبيره وحطها بحلكه وشرب جاي وعاط شمر الكلاص بلحايط

ولج حاطه للبيض شكر وللجاي ملح

ريم : اني لا ملح للبيض وشكر للجاي الله يسلمك السفر غيرك هوايه مكمت تميز

جان يلزمها من ياخه التراكسود مالتها

لج اعرف بيج خبيثه وتنكطين سم لتندكين بيه لا أذيج

جان يطب بابا وركضت بحضنه

حجي طه : ليش هذا العياط من الصبح

ريم : بابا فوك ماسويت ريوك لحسام يضربني

حجي طه : ليش حسام تمد ايدك على اختك

حسام : بابا متعرف شسوت

وحجاله هي اشرت لرشا

رشا .. غيرت الماعون بسرعه حطيت الثاني عرفت شنو خطتها

ريم : هااك بابا ضوكه

حجي طه : شبيه مالح وطيب

حسام : ضاكه والله غيرت الماعون

حجي طه : حسام اخر مره تمد ايدك على اختك مااقبلك ابد

ريم : اخذني وياك بابا اخاف يضربني

حجي طه :لا ميسويها

رشا .. طلعت ريم ويه بابا حاضنته وتعيب على حسام اندار عليه

انتي وياها موو

رشا .. نعم تحجي ويايه

حسام : اني الجن بعيني

رشا .. تسلم عينك

مرت الايام مد وجزر ويااه مرات اكرهه وجوده ومرات اكول شعليه بيه لخاطر بابا

فاتت المده توقعت بيها يروح ويخلصنا بس مبين باقي على گلبنا وبابا طاير بيه واني احاول قدر المستطاع اتجنبه

نهر : وين رايح طه

حجي طه : اتمشى شويه مخنوك

نهر : مو ممنوع تجوال ياعيني وامريكان والوضع موزين

حجي طه : داخل المنطقه ماكو شى بس افتر شويه مااروح بعيد

نهر : اجي وياك

حجي طه : هاي شبيج نهر طفل كدامج

نهر : والله مو قصدي بس ردت اروح وياك اغير جو هم ضايجه وصار شكد مطالعه بليل

حجي طه : يله البسي عباتج وامشينا

ريم : اجي وياكم

رشا .. وين رايحه بس اطفرين

ريم : اغير جو وياهم حبابين اخذوني والله عبالك كاعده بسجن بوكه

حجي طه : الي يسمعج مخلصه عمرج بلسجون

ريم : هااا بابا صرت ضدي

نهر : الله واكبر ردت افتر ويه اخويه وحدنا ميصير

ريم : دكت اليتيمه عمه يله خطيه انقهرت عليج بس من ترجعين اريد محلبي من ايدج

نهر : بس لو افهم الاكل التاكلي وين يروح شكد تاكلين وضعيفه

ريم : قصدج رشيقه اخبل ياربي شنو هذا الجسم الحلو على عناد غير ناس تاكل لفه تسمن

رشا .. وصل بسمارج يجي يوم واضحك عليج لان سمنتي

ريم : مااسمن اكل اضعاف اكلج ومااسمن اويلي على غير ناس ياكلون دولمه منا يصومون اسبوع حتى ميسمنون

غزل : اني هم مااسمن

ريم : اي عيني تعالي غزوله ويايه لتعديج الي بالي

حجي طه : يله نهر تجين لو لا

ريم : اي مستعجل حقك ماطول احنا مو وياك

حجي طه :غير مره اخذج والله

نهر : يله كملت وين سليل

ريم : تقرا فوك مدري نايمه صارت من اصحاب الكهف منعرف بيها تقرا لو تنام طول الوكت هدوء

نهر : اوووووف الله كريم يجي يوم وترجع تهوس مثلجن بلبيت يله طه

طلعنا نتمشى الهوا طيب والشوارع فارغه تذب الابره تسمعها واكثر البيوت مقفله واهلها عايفيها

شبيك ليش تعبان حاستك مو طبيعي من يوم جيه حسام

حجي طه : تعبان نهر وبس افكر

نهر : ليش ياعيون نهر شبيك شو ابنك ورجع لحضنك

حجي طه : رجع بس مكعد اكدر ارتب بيتي اتشوفين بعيونج خواته ممتقبلاته وهو دومه اعصاب وراسه براسهن توقعت يرجع حنين عليهن يحبهن يشيل المسؤوليه ويايه

نهر : بعده شوي شوي يتعود ويتعلم انت لا من هسه تقلق وتشيل هم

حجي طه : اني جبتها واني جاي شايل الهم على راسي كوليلي يايوم ماهميت يايوم ارتاحيت

نهر : والله مكبر الموضوع بمرور الايام تصفى النفوس يبقون اخوان وبناتك طيبات هسه يكوم يحبهن

حجي طه : اني اعرف سليل گلبها طيب ومتحقد وغزل بعدها صغيره راح تتعود عليه العله يم رشا وريم

نهر : ليش شبيهن

حجي طه : رشا علني تكرهه لاخوها والف مره كالتها بتصرفاتها وسوالفها اذا هي حتى من تحجي تكول اخوكم امكم ابنك ابد متكول امي اخويه دوم تعتبره غريب

وريم اقوى بعد ساكته وتبتسم وتتعامل طبيعي ومابين عليها شى بس من جوه لجوه عالنه الحرب وشرسه بلتعامل عدا دكاتها وسوالفها بأذيه اخوها ريم تضحك للهوا بس داخلها مرعب ومن تكرهه ادمر كولشي

نهر : ياستار ياربي شلك بهذا الحجي بعدهن صغار وهسه يكبرن ويتغيرن

حجي طه : بناتي مو مثل البنات الباقيات لا عٌاشن طفوله مثل الجهال ولا مشت حياتهم مثل الاوادم عدله من مصيبه لمصيبه كبرتهن گبل عمرهن وحدتهن جنها ٦٠ سنه بعقلها

نهر : والله بمرور الايام تتصافى الگلوب

حجي طه : والله ماكو اصفى من گلبج خايف لا بيوم اوكع بموقف اختار بين ابني وبين بناتي

نهر : الله لا يحيرك ولا يوكعك بهيج يوم

طه : شبيج وكفتي

نهر : شوف يافرع هذا

حجي طه : اووو فرعنا القديم

نهر : هااك شكد نبتعد عنه نرجعله

حجي طه : امشي خلي نكمله

نهر : يمعود كل المصايب بيه بيت اهلي وبيتك وبيت سامي فرع مال حرك

حجي طه : هههههه امشي الله عليج صار شكد مجاي هنا

نهر : دخلنا وكل خطوه امشيها بيه تمر ذكرى وصوره على بالي الركن الي جان يكعدون بيه طه وسامي وجعفر واصدقائهم جريت نفس واني امشي واتذكر شلون بليله ظلمه انهزمت من اهلي واجيت اركض ولكاني سامي حسيت صدري ضاق واني اوصل لبابهم مكدرت احصر دمعتي نزلت وجنهاقطرات نار تجوي خدي شكد عانيت بهذا البيت شكد انخدعت

حجي طه : بيج شى نهر

نهر : لا مابيه ليش منرجع

حجي طه : بس اشوف بيتي الي اشتراه شسوه بيه

نهر : يله امشي وصلنا لكيناه مبني بيت كولش حلو موديل حديث حجر ولا عبالك هو

حجي طه : ماشاء الله حلو مسوي شايف الخير عليه صاحبه

نهر : وان اباوع ويه طه اجت عيني على بيت اهلي ياترى وين امي هسه وعلي وجهاله وين صفه الزمن بيهم

حجي طه : بيت ابويه بعده مقفول ومندري عايشين ميتين

نهر : لتخاف عايشين لو ميتين جان عرفنا يله خلي نرجع والله نفسي لعبت واحنا نرجع انفتحت باب بيت سامي وطلعت مرته تذب الزباله يمكن عرفتني جان تصير بصوت وهي بلباب سامي شوف جهالك گلبو الدنيا

نهر : اجت حجايتها ترس اذني كوه كمت امشي يعني صار عنده اكثر من واحد

حجي طه : صوجي جبتج من هذا الطريق

نهر : عادي لتضوج بس اختنكت شويه

حجي طه : كل هوا الله هذا واختنكتي اعرف من وره الشفتي ناس متسوه التراب التمشين عليه لتنقهرين

نهر :  الْحٍمَدٍ للـّہ على كل حال

حجي طه : امشي نرجع

نهر : مااشي رجعت والطريق كله تون براسي سالفه جهاله حس بيه طه وكال

بوكت السقوط اكل سامي من عدنا اكله مرتبه

نهر : شلون يعني

حجي طه : يعني خليناه يتفل دم ومبقينا عضمه صاحيه بجسمه

نهر : صدك تحجي

وبده يحجيلي شلون ضربه هو وسجاد

حجي طه : شو مااحسج فرحتي

نهر : ولا انقهرت عادي يستاهل الصار بيه

بس من كثر ممتألمه منه وكسرته الي جبيره احس شميصير بيه ميأثر بيه

طبه مرض

حجي طه : لعد ليش هسه من سمعتي صوت مرته تأذيتي

نهر : اكيد اتأذه لان من خباثتها عرفت شلون تلزمني من ايدي التوجعني سالفه الاطفال

حجي طه : لتنقهرين بروح ابويه ميحتاج اكولج بناتي اصلاً بناتج اصلاً مرات اكول يحبوج اكثر مني

نهر : هههه اثنينا نفس المحبه اكولك هذا دكان مفتح خلي اشتري نشأ حتى اسوي محلبي لهاي الجوعيه شيخلصني اذا مسويت

حجي طه : اي والله مو لسان مدفع رشاش

نهر : خلي هم ناخذ شغلات الها ولخواتها

حجي طه : حبشكلات على كولت ريم

نهر : هههه اي حبشكلات

اخذنا كولشي ورجعنا واكيد من الباب استلمتنا همزين اشترينا الها جان شخلصنا من النك والهوسه مالتها

مرت الايام جانت علاقه حسام بلبنات موزينه اما يتناكرون او ريم تسوي مصيبه اله تخلي يكمز ويوميه گابه العيطه بلبيت بس سليل هادئه تنزل تكمل شغلها بلبيت وترجع تصعد اما تقرا او نايمه او تسمع راديو اشترته جديد تحطه يم راسه لان القديم عطل ومن يجي الليل تخلصها تفتر بلسطح ومن يحين موعد صلاه الفجر تصلي وتنام جنت اراقب كل حركه منها خايفه حيل عليها هدوئها متعبني ومتعب الكل بس منكدر ندخل لان تضوج ومتتقبل اي احد يفتح موضوع وياها

من يوم الصار وسجاد كطع ويانه وجم مره ادك عليه التلفون مغلق مبين غير رقمه وقرر يبتعد تماماً عنا جنت حيل اشتاقله سجاد غالي عليه اعتبره اخويه الثاني بعد طه لهذا متأذيه عليه مثل ما متأذيه على سليل

مابيدي شى اسوي غير ادعيلهم الله يبرد نار گلبهم

حجي طه : كاعد بلمطعم والشغل قليل  بس  الْحٍمَدٍ للـّہ احسن من غيري هو السوك كله تعبان بسبب الاوضاع وكاعد اني محسن نحسب المصاريف والدخل ودخلت علينا بالاول صفنت كلت معقوله بس من تقربت تأكدت هي سندس

محسن : هاي مو ام حسام

حجي طه : اي

تقربت اكثر وكفت كبالي

شلونك طه

حجي طه : خير شجابج جنت مصدوم من جيتها صار اكثر من سنتين مشايفها

سندس : اريد احجي وياك

حجي طه : ماكو اي حجي بينا المن جايه

سندس : غير اكعد وياك وافهمك

محسن : تعالي يابه اكعدي بمكاني واني اروح اكمل شغلي

كام محسن وهي كعدت اباوع عليها متغيره ومتحسن شكلها بس عيونها بعدها تنكط سم

حجي طه : شرايده

سندس : اريد اشوف بناتي

حجي طه : هسه تذكرتي عندج بنات

سندس : يبقون بناتي طه ربوني واني لهلي مهما كان اني امهم

حجي طه : شتريدين راجعه اطلعي ويايه بلنظيف هاي سوالف العيني والاغاتي متمشي عليه خلص گلبي منها لتنسين خلصت عمرري بين السوك والسجن وياج بلذات شفت بلاوي واعرفج اكثر من نفسج جايه وره هاي المده شتردين لو لان حسام رجع يمي

سندس : اصلاً اني الي كلت لحسام يرجعلك ويرجع لخواته

حجي طه : هااا خاف تردين تموتين وتسوين شى زين قبل متتوكلين متفيدج هاي السوالف

سندس : لتخاف مااموت عمرري طويل ولا عبالك سندس ضعفت ورجعت مثل قبل لان الدوله سقطت تره اني مثل الطماطه ارهم بكولشي

حجي طه : انتي حربايه وين متنحطين تتلونين وهسه اكيد لكيتي شى وتقويتي بيه

سندس : اخويه الله يحفظه مجاهد ورجع حتى ياخذ حقه من الي ظلموه

حجي طه : انتي لو غبيه لو عبالج الناس اغبياء مثلج لو ماانتي جنتي بلحزب وتبريتي منه لو نسيتي واخوج الطرن يعرف اخته تبرت منه وبكتاب رسمي

سندس : مالك دخل بيني وبين اخويه اني كتلك هيج شى حتى لتكول رجعت مكسوره واجدي منك اهتمام اني بس اريد اشوف بناتي وبس

حجي طه : وتتوقعين اقبل تشوفيهن

سندس : اذا متقبل برضاتك غصب عنك

حجي طه : البعث الي تهددين بيه راح

سندس : اجه الاضرب والاقوى منه واكدر كولشي اسوي بس اني لهسه تكدر تكول عاقله واجيتك ليمك حتى لتلومني اذا سويت شى

حجي طه : هسه شتردين

سندس : اشوف بناتي

حجي طه : تندلين البيت

سندس : اي اندل

حجي طه : اكيد حسام متصل بيج ومبلغج روحي ذنيج بناتج

سندس : خوش

حجي طه : سندس

سندس : هاااا

حجي طه : ليش رجعتي

سندس : كتلك رجعت اشوف بناتي

حجي طه : بس شغله بسيطه حطيها بعقلج

سندس : شنو

حجي طه : اذا حاولتي تأذين بناتي اخاف سلام ضربته على راسه وكتلته ودخلت سجن من وراه انتي اتفنن بكتلج اخليج تتوسلين بيه حتى ارحمج وخلي ادخل الباقي من عمرري بلسجن يامحلاه العمر اخلصه بلسجن واني شارب من دمج

سندس : والله وكت صاير قوي وتهدد

حجي طه : اله بناتي سندس بكلشي اسامح اله واحد يلمس شعره منهن احرك الدنيا والي بيها وتراب ابويه

سندس : بعدك تحلف بيه والله بطران لو هذا ابويه اله اتبرى منه على دكته السواها

حجي طه : كومي من يمي واستري على نفسج

سندس : راح اكوم مو لان خفت من تهديدك بس لان مضل وكت اروح اشوف بناتي

محسن : هاي شبيهه

حجي طه : تريد تشوف البنات

محسن : وقبلت

حجي طه : اي

محسن : والله لو منك ولا اخلي تشوف اضفرهن

حجي طه : البنات كبرن مااكدر امنعها وهنه يقررن يردن امهن لو لا واذا منعتها اليوم راح تسوي شى وتشوفهن خلي تروح الها بلبيت احسن ماتحرجهن بدوامهن هاي وحده صلفه كولشي يطلع منها

محسن : شلون جنت متزوجها لو منك استشهد من حرب ايران ويخلون على صدري علم ولا اتزوجها ولك وحشي حظه احسن من حظك

حجي طه : وحشي منو

محسن : الكتل الحمزه اكو واحد ميعرفه هو الي خرب فلم الرساله اني بس يموت الحمزه مااكمل الفلم اكول كله من وره وحشي لو مكاتل الحمزة جان شفت شنو نهايه الفلم

حجي طه : هههههههه ولك والله ضايج وضحكتني اني هم احب الفلم وانقهر من ينكتل

محسن : تدري جم مره شايف فلم الرساله يمكن ١٠ مرات هو يموت الحمزه احس الفلم خلص اگلب القناه هو صدك شنو نهايته

حجي طه : ههههه كوم محسن نكمل شغلنا

محسن : شدعيلك ياوحشي انت وسندس

اثنينكم مخربين احلى فلمين فلم الرساله وفلم طه

حجي طه : ههههههه كوم يمعود

محسن : كمت لتعيط هسه هاي المفخخات وينهن عن سندس بس لو افهم

حجي طه : ابقى اروح اني اشيل الغراض احسن

محسن : اجيت شكد عكره يموت على الشغل

نهر : كاعده اتفرج تلفزيون وكاعده يمي غزل افلي بشعرها احب دوم افحص شعرها لان طويل واخاف تنعدي من الطالبات بگمله بصوابه

كل اسبوع اكعد افلي شعرها كله رغم نظيف بس اخاف

واندكت الباب

كومي ماما افتحي

حسام : اني افتحه

نهر : عبالي نايم

حسام : لا كعدت

شويه واسمعه يكول تعالي يوم وطبت لا هله ولا مرحبا اني شفتها لو شكوو شغله غمه سوتها اتذكرتها

سندس : شلونج نهر

نهر : خير شذكرج بينا

سندس : ماتذكرتج اني اجيت على بناتي

نهر : هاااا زين تعرفين عندج بنات

سندس : تعالي ماما غزل تعالي ابوسج

نهر : رجعت ليوره ومتقربت جان يجرها حسام من ايدها

حسام : شبيج مثل الصنم هاي مو امج بوسها

نهر : على كيفك حسام وياها

حساام : قابل شسويت الها بس حتى تسلم على ماما

باستها ورجعت وكفت يمي

سندس : وين البنات

نهر : يبنات تعالو سليل رشا ريم وينجن

سليل : سمعت صوت ماما نهر ولبست نعالي

رشا .. اوكفي خلي اجي

وطلعت ريم من الغرفه الثانيه ونزلنا سوه

وجان نشوفها كدامنا ملابسها مرتبه والمكياج زين مو طوخ ومبينه متحسن ذوقها وبصفها واكف حسام جان تكوم تبجي وتأشر

سندس : تعالن يمه طك گلبي عليكم

نهر : تقربو بنات عيب مهما كان هاي امكم

سندس : شو تحجيها بأستهزاء

نهر : هسه اني شكلت ليش انتي مو امهن

تعالو حبايبي

سليل : باوعت عليها وتقربت وحضنتني واني مبادلت الحضن ولا البوس عبالك صخره بحضنها وريم كذلك وصلت يم رشا جان توخر

رشا .. هوب هوب وين لا عبالج راح اخذج بالاحضان غلطانه انتي مره غريبه عني على اي اساس احضنج

سندس : ليش يمه غير اني امج

حسام : احجي عدل لا افرك حلكج

رشا .. طبعاً غير ابن امك شترجى منك

تقرب يريد يضربني جان تلزمه

سندس : على كيفك ماما حقها بنيه وزعلانه على امها

رشا .. هههه ياام هاي انتي من كل عقلج تحسبين روحج ام بله ياحضرت الام وين جنتي صار سنتين مكلتي اخاف ماتن انقصفن بالاحداث اتحارشو بيهن انذبحن اي شى من طلعنا من بيتج ويه عمو سجاد ماكلفتي نفسج تكولين وين بناتي

سندس : اني ادري سجاد اخذجن دزيت جماعه للكوت وتأكدت وكلت بس تخلص الحرب ارجعجن لحضني حسيت الكوت أمن الكم

رشا .. تدرين اني ممستغربه من تصرفاتج لان هاي ثالث مره تسويها المره الاولى يوم محتركنا واخذتي ابنج الوحيد وطفرتي حتى مفكرتي ادخلين على غزل الي غرفتها قريبه عليج جوه وفلتي بروحج العزيزه وبأبنج وعفتي اربع بنات تاكلهن النار

وثاني مره يوم متزوجتي وهم اخذتي المدلول وعفتينا كاتلنا الالم وحده محركه والثانيه بهاك والثالثه مصدومه والرابعه صافنه على خواتها متعرف شلون اداويهن وعشتي حياتج المترفه

والمره الثالثه بلسقوط سقطت بغداد اخذتي ابنج العود الجبير العلي العتب والعين وسافرتي بيه وعفتي اربع بنات شابات متعرفين مصيرهن حتى مكلفتي نفسج تودعيهن واتكفل بيهن ولو عمو سجاد ميعتبر غريب هذا اخونا الجبير وابونا الثاني بس عفتينا بعهدته ودرتي وجهج ورحتي حتى مكلتي اخاف بلطريق بدخول الامريكان يصير عليهن مصيبه اهم شى نفسج وابنج المن بعد جايه متكوليلي وجايه بكل عين قويه وتحضن وتبوس بينا

حسام : اذا مسكتي هسه ادميج

نهر : شحدك حسام على اي اساس تضربها

حسام : لعد متشوفين شلون تتجاوز على امها

رشا .. لهنا حدك هاي مو امي امك انت اني امي هاي المره الكبالك اسمها نهر وياها سليل اختي بس سندس امك انت وتسوي فضل تروح وياها لا اريد اشوفك ولا اشوفها

حسام : مبين جلدج يحكج وتردين تتإدبين

سندس : كاافي حبيبي يجي يوم وتقدر وضعي وترجع لحضني

جان اطكها بضحكه ريم

ريم : ههههه العفو والله مو قصدي اضحك بس الثقه حلووه بس من تزيد تسوي الواحد مضحكه

حسام : شنو قصدج انتي الثانيه

ريم : حبيت جملة ترجع لحضني ومنو رشااا ههههههه والله ياام حسام احييج على الثقه الي عندج

سندس : وانتي ياجبيرتهن ماعندج كلمة اتجرحيني بيها

سليل : لا اجرح ولا احجي البيه كافيني بلنسبه اليه شفتج وشكراً على سؤالج عود السنه الجايه نشوفج وذني بناتج انتي وياهن مو صغار بعد وهنه ادرى بحياتهن من رخصتكم

ريم : هله بلجبيره خير الكلام ماقل ودل

سمعتي ياام حسام نشوفج السنه الجايه شكر الله سعيج

حسام : شفتي عمه اخلاقهن تلوميني من اعيط عليهن

نهر : ممسويات شى وممتجاوزات

سندس : اكيد عيني عاجبج كلامهن

رشا .. عمه شعليها تره احنا مو صغار اني ثاني كليه وسليل المفروض هسه متخرجه لوما الظروف وريم سادس اعدادي وغزل اول متوسط يعني كلنا گبار ونقرر شنريد واني عني مااعرفج

خليت وصعدت ولا درت بال

ريم : اخذيني وياج ريا وين عايفه سكينه وحدها اخاف اسوي جريمه ايدي تحكني

رشا.. وكفت على الدرج تعاالي يله

سندس : والله وعرفتي تگلبيهن وتقسين گلبهن عليه

نهر : بعد كل السويتي وتحجين اصلاً استغرب عليج شلون جايه بياعين لخاطر ربج

حسام : لا هنه ذني صلفات لو مضروبات جان عرفن يحجن عدل

نهر : بس فهمني شبيك ويه خواتك كورك بكورهن حصره وحده حجت شى لطيتها على حلكها تريد بس تضرب وتأذي مو عيب فوك ماعايفهن صار سنين تجي هيج تتعامل وياهن

سندس : على كيفج عيني قابل اكلهن

لتنسين هو هم اخوهن

نهر : كون هو يتذكر هسه رايده شى اذا ماعندج شى رحمه لامج الطيبه سدي الباب وراج

سندس : يعني اطرديني

نهر : كتلج اذا رايده شى واذا جايه على حسام هياته يمج ميحتاج توصيه مبين من شگله ميت عليج غير امه

سندس : تعال يمه نطلع واني عود غير وكت امر واطيب خاطر خواتك

نهر : اااخ منج بس لو افهم شجابج يعني ناقصنه مصايب وبلاوي

طلعت وبقيت اباوع على غزل الي صافنه على امها اخذتها بحضني وبستها

يله ماما تعالي اكملج شعرج

دخلنا ٢٠٠٦ ومن يوم ماشفنا ماما بعد مرجعت بس حسب الي سمعناه من حسام رجعت للاردن وكلنا شهرين او تلاثه ترجع للعراق تستقر وخاصه بعد مستلم اخوها منصب جبير بوحده من الوزارات وهي راح تتعيين بجاهه

سليل هادئه مثل البحر الهادئه بعد ليل هائج كله اعصار ودوامات نحسها ورده وتذبل كدامنا بس محد يدخل بيها سفر عمو سجاد دمرها مرات اكعد تالي الليل الكاها صافنه على السكف ودموعها تنزل ومرات تكوم وتصعد للسطح شكد حاولت اتقرب منها بس فشلت

رشا .. رجعت من الدوام جان عدنا امتحانات  وبلطريق السياره مال ابو الخط عطلت نزلت اني  والبنات بنص الطريق بمنطقه قبل منطقتنا المشكله كل اثنين من البنات بجهه واني بجهه بيتنا جنا تلاثه هنه صعدن تكسي وراحن واني بقيت حايره كلت يله امشي مسافه مو حيل بعيده والجو جان حيل بارد ونهايه الواحد  وقطرات مطر خفيفه سديت القمصله زين وحضنت ملازمي وجنطتي وبديت امشي الجو رغم برودته بس جان كولش حلو بديت امشي واحس الطريق شطوله شلون بله شراح يوصلني بلسياره احس الطريق كولش قريب بلمشي شطوله واني امشي ومااباوع على احد وكفت سياره بصفي بسبب الاوضاع مال الخطف خفت بس سويت نفسي مو يمي وكملت مشي واسمع اسمي

شعلان : رشا رشا

رشا .. انداريت عرفته من صوته

شعلان : شكعد تسوين هنا

رشا .. وعليكم السلام ورحمه الله

شعلان : اوووف السلام عليكم

رشا : جاوبتك وعليكم

شعلان : مجاوبتيني شكعد تسوين هنا

رشا .. اعتقد عندك عيون وتشوف رايحه لبيتنا

شعلان : شوكت تتعلمين تجاوبين بدون تهجم وبإسلوب

رشا .. هااي منو اليحجي

شعلان : امشي اوصلج للبيت

رشا .. شكراً ميحتاج قريب البيت

شعلان : شنو قريب بعد وين وهم شوفي الشارع فارغ بس كم رجال وانتي تمشين على الشارع طبك احد هسه وجرج تحارش

رشا .. شحده

شعلان : هي مو سباعيه الوضع موزين وغلط بنيه تمشي وحدها بدون اعناد اصعدي ولتنسين اني ابن خال ابوج مو غريب

رشا .. كتلك مااريد اني اروح مشيت خطوتين وكال بصوت امر وبقوه

شعلان : اذا مصعدتي هسه اجرج من ايدج واصعدج وعود بذاك الوكت خلي نشوف سباعيتج وين

رشا .. رجعت انداريت وكتله شنو كوه

شعلان : اي كوه وغصب عنج تره لا عبالج اتحارش وميت عليج اني علمود طه وهم تعتبرين عرضي زحمه اشوفج واعبرج واله لو بيدي لو تنسحكين تنباكين متهميني بس لخاطر طه

رشا .. ضجت حيل من حجايته واختنكت وكتله منو كلك اني هيج افكر اصلاً ولا تهمني واعرف متفكر هيج المشاعر متبادله اني هم مااطيقك

شعلان : كولش زين لعد اصعدي وفري عليه وعليج وكفه الشارع والرايح والجاي يباوع علينا يله وبدون عناد وراس يابس لان مااتحرك منا اله اوصلج

رشا .. نفخت بقله صبر اووف

شعلان : لتضلين تنافخين يله اصعدي

رشا .. رجعت للسياره وفتحت الباب الوره

جان يكولي

شعلان : احد گلج اني السايق مالتج

رشا .. انت موردت توصلني هنا اصعد

شعلان : اصعدي ليكدام رشا لتخافين مااكلج

رشا .. كتلك اكعد ليوره

شعلان : اصعدي ليكدام تره وصلت لهنا (ويأشر على خشمه ) مااريد اتعصب

رشا .. سديت الباب وفتحت الباب الامامي بصف السايق جانت سياره حديثه اول مره اشوف شكلها كعدتها فد مريحه كعدت وهو صعد ويسوق وهادئ كولش جان يكول

شعلان : خطج وين ليش مراجعه ويااه

رشا .. عطلت سيارته بنص الشارع

شعلان : ليش مااخذتي تكسي ورجعتي

رشا .. مااصعد تكسيات

شعلان : هااا رشا الحديديه تخاف من التكسيات

رشا .. مو قصه خوف بس ممتعلمه وحدي اصعد

شعلان : كولي خايفه وفضيها

رشا .. كتلك مااخاف بس مااصعد وحدي

شعلان : اممم عادي تره اذا كلتي جبانه واخاف

رشا .. زهكت وباوعت عليه خفت يله شتريد هسه

اندار وباوع عليه ابتسم بهدوء

شعلان : الاعتراف حلوو

رشا .. درت وجهي على الجامه ومباوعت عليه شويه وطبك يم اسواق قريب فرعنا بشويه

شعلان : ثواني بس اجيب غراض للبيت ما اتأخر

رشا .. ماااشي

بقيت اگلب بلاوراق الي بيدي جان تنفتح الباب وتنجر ايدي حيل عطت واباوع حسام

حسام : خوش والله راكبه سياره رجال غريب  وكاعده بثقه بلخير على ابويه وتربيته

رشا .. دفعت ايده وكتله بعصبيه احترم نفسك لتحجي على تربيتنا

حسام : والج عين تحجين اليوم اشرب من دمج وعود افتحي حلكج الجايف وطلعي عضلاتج عليه اله اربيج من جديد شو تعالي

رشا .. جرني حيل من ربطتي جنت حاطه دنبوس حسيته طب برگبتي (بلعومي) من الجره القويه

ااااخ لك عوفني منا العاالم هد ربطتي وديلزمني من ايدي

حسام : انزلي گلبي وامشي جرني حيل من ايدي مشينا خطوتين اريد بس افهمه تكول حاقد ومعود لكه حجه بعدني بصف السياره خطوتين وجان ينجر حسام ويصير بلكاع وفوكاه شعلان ودك ضرب شعلان ضخم وطويل بسرعه كتم على انفاس حساام ضربه بوجهه مباشره طلع دم من خشمه ويعيط شلون تنزلها من السياره انت منو

جريته لحيل شعلان وخايفه مرعوبه منظرهم جان يخوف وهمه واحد فوك الثاني ويتضاربون والحظ ظهر والجو بارد ماكو احد بلشارع والناس هم صايره تخاف تدخل من المصايب الي كعد نسمعها كتله

شعلان هذا حسام اخويه والله اخويه

كام من فوكااه يلهث منين اخوج

رشا .. شبيك شعلان هذا حسام

شعلان : شوكت اجه

رشا .. قبل مده وهو عايش يمنا بلبيت

شعلان : مشايفه وشمدريني هو هذا حسام

حسام : ولج وتحجين وياه بكل عين صلفه اليوم احرك عشيرتج

رشا .. دنجت عليه وكتله وفوكاها لسانك شطوله دشوف وجهك شلون صار خريطه هاا نسيت اكولك هذا ابن خال بابا شعلان مد ايده شعلان وكوم حسام

شعلان : اعتذر منك أذيتك بس انت هم مصختها شلون تسحبها من السياره غير تفهم بالاول اني منو وراها تحقني شتريد تسوي بلخدمه

حسام : اني مشايفك حتى اعرفك ابن خال ابويه

رشا .. عوجت حلكي وكتله بهدوء على اساس ٢٤ ساعه مكابل ابوك وكاعد تفتر وياه على الكرايب والاصدقاء

حسام : امشي كدامي

شعلان : انت بعد عرفت كرابتنا ماله داعي تاخذها وتروح وانت شوف حالك اصعدو اوصلكم مبقى شى للبيت

رشا .. صعدت ليوره وحسام ليكدام وكعد يفهم حسام شلون شافني وصعدني وانطاه كلينكس يمسح خشمه

بسرعه وصلنا ونزلنا مد واحد للثاني ايده وتصافو واني دخلت احس نار برگبتي طبيت ركض ليفوك اريد بس افتح الربطه والكه رگبتي مشخوطه ومتإذيه جان اطب سليل

سليل : هااا شبيج

رشا .. اخوج المخبل شافني صاعده ويه شعلان وراد يضربني وجرني من الربطه وجرحني

سليل : وشجابج على شعلان

رشا .. شافني بلطريق ابو الخط سيارته عطلت وكعد افهمها كل الصار

سليل :  الْحٍمَدٍ للـّہ فضت

رشا .. لا غلطانه مفضت

سليل : شكوو

رشا .. اوكفي طبيت غسلت وجهي ورگبتي وبدلت وكعدت انتظر بابا اعرف وكت رجوعه حتى نتغدا سوه وره ربع ساعه طب ونزلت شفته كعد يشوف حسام وليش هيج وجهه مضرب

نزلت نار وكلت لبابا وجان حسام واكف وعلى صوتي طلعت عمه وسليل من المطبخ

بابا اني اجيت اشكيلك ابنك شسوه

حجي طه : على كيفج بنتي كعد يفهمني هسه صار سوء فهم

رشا .. يصير بس مو من حقه يغلط ويطعني بتربيتي واذا هو يشوف تربيه سندس تره تربيه نهر غير

حسام : لان بابا واكف واله جان عرفتج شلونها تربيه سندس

حجي طه : حسام كااافي وانتي رشا مااسمع صوتج

رشا .. اني مااريد شى بس خلي يبتعد من دربي افهم ولو مره انت بلنسبه اليه ميت اني ماعندي اخ وامك احتفظ بيها لنفسك امي نهر وابويه طه وروحي سليل وريم وغزل انت وامك ناس غربه عني واذا تريد تصير رجال لتصير براسي

جان يجيت وسحلني من شعري حيل ويملخ بيه ويعيط رجال غصب عنج حقيره جان يدفعه بابا حيل وضربه على صدره بقوه  وحضنتني عمه وتعيط عوفها

حجي طه : اياك بيوم تلمس شعره منهن طول مااني عايش بلدنيا

حسام : شفت لسانها الزفر وگباحتها ذاك اليوم ردت اطيح حظها وماقبلت الي واليوم شفتها بسياره واحد شتريد مني اكعدها بحضني واطبطب عليها واكولها تعالي سولفيلي هذا منين

حجي طه : ما كلت هيج بس على الاقل تفهم منها خواتك اشرف من الشرف حسام لا عبالك هسه تجي تحكمهن او تعيد تربيتهن ذني عندي اربع زلم مو بنات والعيبه متطلع منهن اني ما كتلك ليش تحاسبها بس على الاقل لا ايدك والضرب

حسام : والله اني هيج واي وحده تغلط منهن اكسر راسها

سليل : على اي اساس

رشا .. باوعت على سليل واخيراً نطقت

حسام : انتي ثانيه مبين معاجبج الوضع

سليل : احجي عدل لتنسى اني اختك الجبيره واحترام لبابا مراح احجي بس شى واحد

لتجي من تالي وكت تصير اخ علينا بلقوه والضرب والاهانه تريد تصير اخ احتوي خواتك وصير سندهن حزام ظهرهن وعوضهن على الي شافنه من ضيم وساعد ابوك بمصرفهن وعيشتهن وبذاك الوكت مو بس اخ نخليك وتحكم ونسمع كلمتك حتى تاج على راسنا نخليك

حجي طه : كاافي اسكتو حسام بعد مااسمح الك تعامل خواتك بلضرب مره ثانيه اذا انمدت ايدك اكسرها الي عدها شى موزين وشفت شى عليها تجي تكولي واني اعرف شلون اتصرف واذا محاسبتها عود بذاك الوكت تسوي الي تريده بس مال تمشي وتعيط وتضرب وتتأمر مااقبلها ابد بعدني مميت وتتجاوز عليهن من اموت شسوي

وانتي رشا اخوج اكبر منج صوتج ميعلى عليه وحتى خواتج نفس الشى غير الاحترام بينكم مااريد شنو صغار واعلمكم واحدكم اطول مني واذا البنيه او الولد كلكم على ابواب زواج غير الاحترام بينكم مااريد والي اسمع متجاوزين بيناتكم وروح ابويه اني الي أذي واندمه على الساعه الي فكر يكسر كلامي بيها لتشوفوني محترمك واكول كبار عيب امد ايدي عليهم وتتمادون هلمره حذرت مره الثاني تشوفون وجهه بعمركم مشايفي

نهر : استهدوا بالله وتعوذو من الشيطان على كيفك طه ليصعد ضغطك

حجي طه : اني راجع للمطعم

نهر : والغدا

حجي طه : مااريد اتسمم واخاف يصير شى ورايه بس خابري وخلي اشوفهم شسوي بيهم

سليل : طلع بابا وركع الباب وراه كومت رشا تعالي فوك ويايه

حسام : بعيني يارشا

رشا .. لا بخشمك الينزف دم

سليل : اشش كاافي وانت هم روح غسل وبدل هدومك كلها دم

امشي وياي انتي

رشا .. عااشت ايده لشعلان لو عايفته بعد يضربه

سليل : سديت حلكها ومشيتها مسمعها لان جان ديروح للحمام

رجع الهدوء بيتنا بس احس كل واحد من اخوتي يريد غلطه على الثاني

كاعده بلكليه اقرا ومندمجه اجت جنات تبجي طفرت من مكاني

سليل : شبيج عفيه

جنات : يردون يزوجوني ابن خالي كوه فدوه سليل مااريد اتزوجه

سليل : امشي ويايه للبيت لازم نلكه حل

جنات : واذا اجه غالي وابنه

سليل : بابا يتكفل بيهم لتنسين بابا هو عمج وهو اولى بيج جم مره كتلج تعالي عيشي يمنا مقتنعتي

جنات : ابوس ايدكم خلصوني من عدهم ابن خالي واحد حقير مااحبه اموت منه فاشل لا شهاده ولا اخلاق ولايشتغد مخلصها اكل ونوم ومصرفه من ابوه

سليل : تعالي ويايه وخلي يركعون راسهم بلحايط

اخذت للجنات للبيت وانتظرنا بابا وكعدنا كولشي حجينا شويه ودك الموبايل مالتها جان عدها واحد اسمه دمعه جان حديث

كاامت ترجف من الخوف

جنات : عفيه عمو يردوني ارجع حتى العصر يعقدولي سيد عليه

نهر : هو بكيفهم ابقي هنا وشحده الي يطخج

حجي طه : شوفي بنتي انتي مو صغيره وتكدرين قانوناً تشتكين عليهم وميكدرون يزوجوج غصب

جنات : لا يكدرون يضربوني ويجبروني عليه

حجي طه : مااخلي واحد يلمس شعره منج حالج حال بناتي انتي بنت جعفر تعرفين شنو بنت جعفر بنت الغاالي روحي اصعدي ويه البنات وراح ادز على خالج وابنه ويصير خير

صعدناها وجانت حيل منهاره وتعبانه وبس تبجي شويه وطبك ابن خالها وخالها نزلو بيدهم سلاح وضربو بلهوا احنا عياطنا اخذ الدنيا اله رشا طفرت للشباك تشوف شكوو

رشا .. اباوع شلون تلازمو ويه بابا لو اني تخبلت كلت راح يكتلوه ونزلت ركض حافيه

والبنات يعيطن ورايه فتحت الباب وشفت شعلان اجه وبيده سلاح ويعيط عليهم وطلع جم واحد من منطقتنا يعرفون بابا اجو يركضون هو شافني واكفه هيج اجه بأتجاهي دفعني على كيفه وبصوت ناصي طبي جوه

رشا .. اخاف على بابا مااطب

شعلان : اطبي رشا واذا طلعتي بنص الزلم رجلج اكسرها افتهمتي

جان يسد الباب حيل واشتغل العياط بره

يتبع ....

#ادمن_مدونة_نور_قلبي

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الرابع_عشر

#حال_سليل💔

تراا .اشتااگيت

        والمشتااگ يفضح روحة

#بجـــروحة.

عفت بـية جـــرح لو صدفــة

         انذكر طرواااگ تشـــوفة يشگگ

#بــــروحة.

شاايفلك جرح ميهااب

         لو مر طاري… الملوحة.

جرحي انة هذة النوع

لا يعــتگ ولا ينسـة.

ولا يرظــة. يلـــم

. #روحـــة 💙

شعلان : اطبي رشا واذا طلعتي بنص الزلم رجلج اكسرها افتهمتي

جان يسد الباب حيل واشتغل العياط بره وصار طلق سديت اذني من الخوف ورجعت باوعت من فتحت الباب

نزلت سليل والبنات كلنا صرنا وره البنات وجنات تملخ بوجهه

جنات : راح ياخذوني والله راح يزوجوني اله

سليل : لتخافين بابا ميعوفج الهم

جنات : كعد تسمعين الهوسه بره وطلقات

ريم : هذا مشعول گلب الامه والله هم بيه بله

رشا .. هشش خلي نسمع

صار صوتهم عالي وادخلو اهل المنطقه ويحاولون يهدون الوضع لحد مسمعنا يدخلون جوه ويتفاهمون واحنا ركضنا

طبو للاستقبال عمه حاضنه جنات وتمسد بشعرها وتقرا ايات عليها وكل متكمل ايه تكولها سوده عليه تعال يجعفر شوف وحيدتك وحالها وتبجي

ريم : هسه ياعمه فوك متسكتيها تبجيها

جنات ميصير شى والله وهسه تشوفين راح تبقين هنا ويانه بس من هسه فراشي مااقبل احد ينامي بيه احد من انام اصير نينجا اضرب جلاليق

رشا .. هسه بس خلي تفض وين متنام براحتها

ريم : اني انطي انذار من البدايه حتى اذا متقبل اسحلها هسه وانطيها بيد ابن خالها ونخلص منها

جنات : ههههه بعدج تتشاقين

ريم : هو اليعيش ويه هاي العائله ومصايبها لو يضل يضحك مثل المخبل لو ينتحر واني قررت اعيش بكامل قواي العقليه واضحك عليج وعلى امثالج

جنات :هههههه شبيهم امثالي يله مقبوله منج والله ياريم توخرين الهم من الگلب الحزين

ريم : شكراً بس مو بلاش خلي تفض واني اعرف شلون اخسرج مو عمه

نهر : هسه وكتها ريم البله

ريم : كولشي بوكته حلوو

سليل : خلي نسمع

ريم : وخرن اختصاصي هذا

سليل : كعدنا نسمع وره الباب الصار

حجي طه : اسمع ابوانمار بدون مشاكل وحتى لا كل شويه تصير هوسه بت اخويه راح تبقى يمي

ابو انمار : من شوكت عرفت عندك بت اخو شو ذبيتوها ورحتو

حجي طه : مو اني الذبيتها ولو ادري بيها عندك ممرتاحه مجان بقيتها يوم واحد بس من شفتها كالت ماكو شى

ابو انمار : من ذبتها بيبيتها وعمها مجان اخذتها

حجي طه : ماادري بيها توقعت سافرت وياهم ولو ادري وروح اخويه ماابقيها لحظه عندك او عند غيرك هنا اجيبها يم بناتي حالها من حالهن

ابو انمار : اسمع طه اني هاي البنيه ربيتها وتعبت عليها وصرفت فلوس كومه عليها وردتها لابني وراح ازوجها وابن خالها اولى بيها

حجي طه : على اي اساس تزوجها وهي مقابله

ابو انمار : غصب عنها تقبل شنو بكيفها

شعلان : قابل بكيفك غير هي بالغه سن الرشد وتكدر تتزوج بكيفها

ابو انمار : حضرتك منو وليش تدخل وقبل شويه ردت تضربني اني وابني

شعلان : الي يجي بأحترام نحطه على راسنه والي يتجاوز نعرف شلون نوكفه ونأدبه واذا عليه اني ابن خال طه والي يجري عليه يجري علينا ومن تعديت على حرمه بيته يعني تعديت حرمتنا

ابو انمار : اني اجيت اخذ بت اختي انتم الي تعديتو

شعلان : اكلك انت كاعد بديوان قبل تعرف بأصول العشاير

ابو انمار : اي اعرف واصلاً شيخ عشيرتنا ابن عمي لزم

شعلان : اذا ابن عمك تروح اله وتكوله منو الاحق بلبت انت لو عمها وارجع هنا هوبز وعيط وشيل شلاحك

انمار : اليوم اذا مترجع جنات ويانه اسويها دم

شعلان : يله سويها علواه انتم المتعدين ودايسين بيتنا وبسلاحكم يعني كتلكم حلال وحتى عند العشاير مالكم ديه وفصل

واذا نريد نردها افصلكم مربع وروح اسأل جبيركم

ابو انمار : راضي بكلام كرايبك

حجي طه : اي راضي وياه البنيه بعد متطلع من بيتي

انمار : اني خطيبها على اي اساس تبقى هنا اذا تردون هسه اعقد عليها

حجي طه : ماطول ماراضيه شعره متشوف منها

تعالت الاصوات كل واحد يهدد ويتوعد واكو كم رجال كعدو طرف ثالث حتى يحلون الاشكال وكوه هدأ العياط جان يكول

ابو انمار : صيحها وهي تحجي كدامنا واذا اختارتنا هسه اخذها من ايدها

حجي طه : واذا مرادت تنسوها تبقى هنا عندي

كمت وصحت جنات

جنات : عفيه عمو مااريد ادخل عليهم والله اخاف

حجي طه : اسمعي بنتي اليوم ياكاتل يامكتول مال اعوفج الهم يحلمون انتي امانه المرحوم وماانطيج الهم اله بحاله انتي تردين

جنات : لا مااريدهم

حجي طه : راح ادخلين وكدام بيت خالج والناس الكاعده دقيقه ماابقيج بس يسألوج وتجاوبين

جنات : اي ميخالف

طبت وترجف وكدام الكل سألوها

وين تردين تعيشين

جنات : بيت عمو طه

ابو انمار : ليش بنتي ذاك مو بيتج وابن خالتج شاريج وبيبيتج تحبج

جنات : مااريد ارجع اريد ابقى هنا

حجي طه : سمعتوها بأذنكم واصولياً البنيه تبقى عند عنها

ابو انمار : بس انت عندك ولد شاب

شعلان : وانت عندك دجاجه شو هم ولد شاب يعني نفس الشى

ابو انمار : اني ابني رايدها على سنه الله ورسوله وبس تقبل ثاني يوم ازوجهم

جنات : مااريد خالو اعتذر

حجي طه : روحي عمو يم خواتج ارتاحي

حجي طه : سمعت ردها

ابو انمار : هسه اخابر عمها علي وامه واريد اشوف يقبلون بهذا الحال

حجي طه : شسوي ايدك الك والبنيه متطلع منا لو مو علي

ابو انمار : يله كوم انمار النه جيه ثانيه ناخذها

شعلان : هله بيكم ومااوصيك اضرب زين هلمره مو بلحايط

طلعو وفضت الهوسه واجه بابا علينا

اسمعو من اليوم جنات حالها من حالجن وان شاء الله بنتي الخامسه تصيرين

جنات : شكراً عمو متقصر

ريم : وين تنام

نهر : البيت كله الها انومها بحضني

غزل : مااا حضنج الي ماما

جنات : هههه لتخافين مااخذها منج وين ماانام عادي لتهتمون حتى لو افرش هنا بلهول

رشا .. تعالي يمنا حتى كل غرفه بيها تلاثه

جنات : اخاف اضايقكم

سليل : لا بلعكس راح احضرلج فراش مريح واذا عندج غراض افرغ الج خانه بلكنتور

ريم : جنوو شر الملابس عليج

جان تكفخني عمه اااخ

نهر : هي مال ملابس هسه

ريم : والله عقدت حياتي واريد اخلص منها ارحمو بحالي من الصعده والنزله رجلي صارن مال طائر اللقلق من الطول

سليل : اني اشر بس اسكتي

جنات : عفيه لتسوون تفرقه تره بذاك البيت جان شغل البيت كله عليه

حجي طه : هاي الامور بينكم العليه يابنتي شتردين اذا تستحين مني عمتج موجوده والبنات تأمرين امر وغراضج اني اعرف شلون اجيبهم من بيت خالج واذا منطاهم خلي يولي اخلي عمتج تشتري جدد الج

جنات :الملابس والغراض كلهم بيبي انعام ادز مصرف كل شهرين  واني اشتري والباقي ياخذه خالي يعني هو مميت عليه ولا صارف

حجي طه : لا اله الا الله هسه انعام شلون تعوفج يمهم مخافت عليج

جنات : اذا هي امي شمرتني وتزوجت ومسألت عني بقت على بيبيتي

ريم : كلنا بلهوه سوه عادي تره امنا هم حبابه عافتنا وطارت

نهر : اني امكم لو ماافيد

رشا .. ليش هو اكو بحنيتج احد

غزل : اني مامتي نهر

نهر : تعالي ياروح نهر

سليل : اني فوك

ريم : ثلل وين ابقي ويانه

سليل : شويه راسي يوجعني وهم عندي قرايه من يصير العشا صيحوني

صعدت وانباوع عليها بغير ملكوت

بليل على العشا اجه حسام

حسام : هاي منو

ريم : معرفتها

حسام : لا

ريم : هاي جنات شبيك

حسام : هاي شكبرج صايره

جنات : شلونك حسام

حسام :  الْحٍمَدٍ للـّہ شعجب هنا

رشا .. راح تعيش ويانه عندك مانع

حسام : هسه اني شكلت بسرعه گبيتي

ريم : متعشي

حسام : اي تعشيت بس اريد جاي وهاا دير بالج تحطين شكر لو بهارات والله اذبه على راسج واحركج

ريم : هاي بس الصبج حسومي لان ما اركز من اكعد من النوم

حسام : يله وسوي جديد مو مال الظهر متحمي الف مره

ريم : بعد اي اوامر ثانيه

حسام : ماكو شى اني بره بلهول

جنات : هاي شبيهه ليش هيج يحجي

رشا .. مالج دخل بيه هو من الاساس هيج من المصنع جاي بيه خلل

جنات : اخاف يضوج لان راح اعيش يمكم

رشا .. من يصير بيته عود خلي يضوج يله نكمل العشا

مرت الايام وهدوء وعطله نص السنه الكل كاعد بلبيت

جنات : ليش سليل دومها وحدها وساكته مجانت هيج صّـْْ(☑)ـْْحّ هي من الاول هادئه بس هسه منطويه على نفسها

رشا .. شوي ظروف وبمرور الوكت ترجع

حسام : ولج ريم نعااال غضب الله على راسج وينج

ريم : هاا هاا شبيك تعيط

حسام : قميصي ماركه بولو وينه

ريم : اني شمعرفني شنو هاي البوله

حسام : اسمه بولو لتغشمين نفسج الرصاصي وبيه علامه نيلي

ريم : هاااا اي عرفته مشرور بلسطح

حسام : صعدت ملكيته

ريم : شمعرفني وينه طار يجوز

حسام : اسمعي لج اذا مطلع التيشيرت ملابسج كلها احركها

رشا .. شصار ليش تعيط

حسام : تيشريت مالتي ماكو

جنات : اذا ضميته بلغرفه ويه ملابسك

حسام : وانتي منو كلج تلعبين بغراضي مو ذني موجودات مكسرات ايدهن

جنات : اني مو قصدي بس ردت اساعد

رشا .. على كيفك وياها خطيه ممسويه شى

نهر : شبيك حسام

ريم : يتعارك ويه ذبان وجهه

حسام : محد بعد يلعب بغراضي

ريم : يعني مااشر ملابسك كولش زين

حسام : تشريها وانتي الممنونه

ريم : والله حرنا وياك

نهر : يمه شتريد اني الي تريده اسوي

حسام : عمي ذني يتقصدن يحرگن دمي

رشا .. بدت الاسطوانه المعروفه امشي جنات نكمل شغلنا

نهر : اني بعد اسوي شغلاتك بس لتعيط

حسام : وانتي المطكعه جري عدل

ريم : شنو شگلت

نهر : عيب حسام

حسام : شگلت اني لعد بس هي تضوجني

ريم : اذا اني مطكعه فهذا بسبب اهمال امك عافتنا النار تاكل بينا وطفرت

حسام : اهووو هم رجعنا تعيدن الف مره بلموضوع

ريم : اني ريم طه ياسين الغزاله الثالثه من غزلان طه يمكن اكثر وحده تضحك وتكمز وتتشاقى بلدنيا وتموت على المقالب بس من قهرتها تعلمت واني صغيره اكتم كولشي بداخلي الوجهه يضحك والگلب يبجي هذا اني كلها تعيرني لشى اني مو سبب بيه كلها تحسسني اني منبوذه شى موزين وصخ معدي اجرب لحد مقتنعت الغلط بيه ولازم ابقى بعيده عن الكل وبس اهلي

حتى صديقي الوحيد سحليه ابن عمي حسين اختفى وسافر وحتى مفكر بيوم يراسلني ويتواصل ويايه هسه اني مرحله سادس اعدادي يمكن اني بمرحله المراهقه بس محسيت بيها هي وينها المراهقه اذا حتى من امشي بلشارع محد يباوع عليه واشوف البنات اشكال والوان اني مااريد احد يتحارش بس بنفس الوكت مااريد نظره الشفقه بعيونهم

كتمت الم بگلبي وتحملت واكول يجي يوم تتعدل حياتي بس كل مااكبر يزداد همي وتعبي وصلت مرات اتمنى مااكبر تصرفاتي كلها مال اطفال احب اتعامل بعفويه وبهوسه مااريد افكر بنفسي واشوف حالتي بلمرايه واتحصر لهذا اكثر وحده متنتبهه على نفسها ويمكن اكثر وحده مبتعده عن المرايه هي اني اكرهه شى لنفسي المرايه تشوفني شگلي وبگعي الي دوم اتعير بيهم واليوم اخويه ابن امي وابويه عيرني يله عادي كولشي اتوقع بقت عليه

عفته وصعدت كعدت بلغرفه ولزمت ورقه واشكك بيها هذا الشى كولش يريحني

اتمنى تتعدل حياتي واصير مثل البنات مرات اصفن على غزل اكول هاي شلون بيها من تكبر اكثر وتصير بعمري يمكن تتهستر على حالتها بله شنو ذنبنه يصير بينا هيج شنو السويناه حتى نخلص حياتنا وهذا حالنا

رشا .. كدر بابا يجيب غراض جنات وحاولنا نرتبهم وبيوم كاعده واسمعها تبشبش بلتلفون عدها موبايل خااص بيها

ويه منو حسيتها ارتبكت

احجي والله مااكول لاحد

جنات : اخاف تحجين

رشا .. هااي شبيج جنات والله مااحجي

جنات : ولد ويايه بلكليه

رشا .. اي وبعدين

جنات : يريد يخطبني

رشا .. وانت قابله يعني تردي

جنات : اي اريده خوش ولد وحباب بس اهله صعبين

رشا .. وشعليج انتي بأهله

جنات : خايفه ماارتاح وياهم

رشا .. اهم شى هو ماطول تكولين خوش ولد ورايدج

جنات : كاتل نفسه ويحبني

رشا .. ليش ميخطبخ هسه

جنات : استحي مصار كم يوم من صارت مشكله شكبرها من ورايه واخاف عمو ميقبل وهذا خالي هم اذا سمع شيخلصني منه

رشا .. اذا على بابا فهو حباب ويريد سعادتج اكيد واذا على خالج اكيد راح يسكته وماله حق اصلاً انتي مو صغيره والج كامل الحق تقررين مصيرج

جنات : هو والولد يتوسل هسه يجي يخطب يخاف من خالي ليرجع ويغير رأيه وتصير مشكله

رشا .. توكلي على الله واكعدي ويه عمه فهميها وهي تبلغ بابا واطفري من ضيم فلان ولتبقين تحت رحمه احد انتي هنا يمنا وبينا والله شاهد كلش احب وجودج ويانه بس ماطول راغبه تتزوجين وتكولين خوش ولد المن تنتظرين اني اخاف ترجع انعام وتاخذج وذيج مترحم اخاف بابا كدر يوكف خالج بس ميكدر يوكف انعام وعلي لان همه اولى بيج

جنات : اي صحيح راح اكعد ويه عمه ولو استحي

رشا .. يمعوده والله عمه وردة وسهله ومومعقده وتتفاهم روحي توكلي على الله

رشا .. راحت كعدت وياها وعمه فرحت وحجت ويه بابا وصاحها وسألها ومن اجت حجت النا

ريم : هااا بشري حمامه غراب طلي

جنات : الطلي هذا شنو

ريم : يعني انلاصت وتعلكت

رشا .. يمعوده مو وكتج احجي شصار

جنات : عمو يريدني لحسام

ريم : ههههههه والله لو ضاله على ابن خالج العرگجي اشرفلج

رشا .. وشگلتي

جنات : كلت لعمو اعتبره مثل اخويه

ريم : وبابا شكال

جنات : حاول يقنعني واني سكتت وحست بيه عمه وفهمته اني مالي رغبه بحسام

ريم : اذا تتزوجين حسام هاي امج طاكتج بدعوه من الفجر مال وحده غاضبه على خلفتها لان بس الي الله ميحبها ويغضب عليها تصير مرت حسام

جنات : شبيكم ويااه ليش هيج تضوجون منه

رشا .. منضوج بس انتي شفتي شلون جاف ويانه بلتعامل ومتطلع الكلمة الحلووه منه وهو اصلاً ميطيقنا وشفتي على اقل شى يتعارك ويعيط مسوي منيه لان عايش ويانه

جنات : اني بكل الاحوال مامتقبلته واريد الولد الكلت عليه

ريم : وافق بابا

جنات : كال خلي يجيني واسأل عليه ونشوف

رشا .. انت شتكولين خوش ولد لو نص ونص

جنات : لا والله حباب بس مثل مكتلج اهله مزعجين وصعبين بس عادي كال نكعد بوحدنا مالنه دخل بيهم

ريم : الله يوفقج جان اعيط ولج رشا عدنا عرس هلا هلا لازم نحضر ملابس

رشا .. ولج شعنونه اصبري خلي نشوف شيصير

ريم : قابل شيصير اذا طلع زين مستحيل بابا يرفض والله لا اركص ركص بعرسج بعرس امي مراكصه

رشا .. بعرس امج خلصناها مناحه

جنات : هاي شكعد تحجن ياعرس امجن غير جنتو ممولودات

رشا .. عرسها الثاني عيني مو الاول

جنات : هاااا نسيت

ريم : وين ثلل

جنات : مثل كل يوم لو تشتغل جوه لو حابسه روحها بلغرفه

سليل : كاعده وحدي اختنك من اي هوسه اريد عزله راحه مكان افكر بيه بكلشي صار بيه اعرف غلطت من ضميت عليه بس من خوفي حتى ليعوفني وهاي تاليتها عافني

حبي اله مو شى عادي مو حب وحده لواحد مصارت قسمه بينهم بحيث اتقبل الظرف واكول يله صارت بعد لازم اعيش

اني وحده ظرفها وحياتها يختلف عن اي وحده غيري لا نفسياً ولا عاطفياً اكدر ارتبط بغيره اني من جنت مخطوبه لسيف حتى انفاسه توترني من اتخيله يلزمني اختنك واعتب واحس الدنيا تضلم بعيني يمكن بسبب المر عليه من اني وصغيره او تركيبتي هيج بس ويااه انسى نفسي وكلشي مريت بيه شكد جنت احبه وروحي بيه بس اخر ايامه ويايه شفت وجهه جديد منه غزل وحب وجرأه شفت حب متبادل عواطف جياشه حسيت وياه احلى احساس ممكن تحسه الوحده وتتمناه من حبيبها غيره على دلع على غزل على هيام اخذني بحضنه وصعدني لسابع سما وبلحظه نزلت على راسي لجوه الكاع اعرف اني غلطت بس تمنيت منه ميقسى عليه جنت انتظر ورقه طلاكي يمكن هي الامل الوحيد الباقي عندي لهسه ماكو صار كم شهر هدوء يعني بعدني معناها على ذمته اتمنى بس اسمع صوته سجاد ياترى شلونه حالك بدوني هم تشتاقلي مثل مااشتاق وميته عليك هم تسهر الليل وتفكر بيه هم تكول وينها عايشه ميته تتذكر ضحكتي ريحتي لمستي ليش هيج انت قاسي ليش گلبك حجر من تزعل

تمنيت اكعدك يمي وافهمك على احساسي واثبتلك اني مسويت الي بالك غلطت اي بس مو لدرجه الي متوقعها

اوووووف ياگلبي شتتحمل بعد من حبه بعدني بلعشرينات وگلبي صار سبعيني

من يوم مسافر واني كولشي مااعرف عنه وحتى ماما اسألها تكول حالي من حالج وادعيله يكون بخير يسجاد صدك انت بخير بدوني

رجعت داومت نروح ونجي اني وجنات بلخط نفسه  ايامي متشابهه ماكو اي تغيير بيها وبيوم ٢٠٠٦/٢/٢٢ الاربعاء سمعنا خبر هزنا هز تفجير ضريح الامامين علي الهادي والحسن العسكري عليهم السلام بسامراء

جانت صدمه للكل عمليه ارهابيه منظمه بلبدايه جان الظاهر مسيطر على الوضع بس المتوقعناه الي صار بعدها بدت الطائفيه بأوسع ابوابها انتشر الخبر بغداد اصلاً هي بغداد مجانت امنه كلها خطف ومفخخات وناس تعلس بناس انتشر بوكتها كلمة العلاس وهي للي يبحث عن ناس ويبيع اخبارهم واحداثياتهم للعصابات والمجاميع المسلحه ويقبض مقابيله فلوس

كامت الناس تخاف من خيالها صار الجار والصديق يخوف كمنا نسمع قصص ولا بالاحلام تصير والي زاد الرعب اشعال نار الطائفيه قتل وتفجير ودمار عوائل بعوائلها تنذبح كل ذنبهم همه من طائفه معينه السني يذبح الشيعي والشيعي يگتل السني كلمن وطريقته بلتصفيه صار محرم دخول الشيعه للمناطق السنيه ومحرم دخول السني للمناطق الشيعيه

الي يدخل لو يطلع لولا

شوارع بغداد صارت شبهه فارغه صارت ساحه لتصفيه الحسابات ماخلو لا حرمه للمره ولا لطفل ولا للكبار بلعمر كل واحد يطلع من بيته يحس روحه شايل جفنه بيده لو ينكتل على ايد طائفه معينه لو ينگتل بلمفخخات اتفننو بكل اساليب البشاعه والقتل صار دمنا ماكو ارخص منه

حرق بيوت الله قتل على الهويه الي اسمه عمر ينقتل والي اسمه علي ينذبح صارت العاالم تركض حتى تغير اسمائها لو تسوي جناسي مزوره اخاف سيطره وهميه تلزمه وتاخذه وتنهي حياته شباب بعمر الورد مجطله بلشوارع وبلساحات المتروكه ايام تبقى بلشمس والناس تخاف تتقرب منها لو يجون الشرطه تاخذهم لو تنهشهم الحيوانات

والطب العدلي انترس شباب مكتوب عليهم مجهول الهويه اااخ يلطب العدلي شكد حويت شباب تبجي عليهم السما شكد اندفنت ناس اهلها لهسه يدورون عليهم  شنو ذنبهم كل ذنبهم همه بلعراق وذنبه انولد شيعي والثاني انولد سني وكعو اثنينهم بيد الي ميخافون من الله

احنا كمنا نخاف نطلع ومن باب البيت للدوام ومن الدوام لباب البيت

نريد بس نخلص السنه على خير كل شويه سامعين فلان انكتل فلان اختفى فلان انخطف فلان طفر هو وعائلته

وبابا يمشي ويوصي بينا جان مرعوب علينا اخاف يصير شى وكل شويه اياكم توكفون لواحد لتباوعون على احد متاخذون شى من شخص متعرفوه عبالك عمرنا ٣ سنوات جنا نسمع ومنجادل حتى بس اطمنه

زاد هم بابا بضل هاي الظروف وخاصه برگبته اربع بنات ويخاف لا بيوت يصير شى ونتأذه حتى عمه نهر حرم عليها طلعه الشارع وكاام هو يجيب المسواك

وحسام دوم يتعارك ويااه لان ميسمع الكلام ويطلع اصلاً يسويها عناد

رشا .. متكوليلي شوكت يجي هذا الي يريدج

جنات : مو كدامج علكت على حظي

ريم : اذا تمشين وره الحظ عمرج مراح تتزوجين عيني خابري وخلي يجي يخطب ويفضنا

جنات : نسيت اسألكم شى شعجب ماعدكم موبايل لازم كل وحده منكم عدها وخاصه بهاي الظروف يصير شى تخابرون

رشا .. منريد نضغط على بابا لان اكيد اذا جاب لوحده الثانيه متسكت على الاقل لازم يجيب ٣ اجهزه وهو خطيه يلم الفلس على الفلس علمود يشتري بيت ملك

ريم : اني قررت بس ادخل گليه وانجح من السادس اطلب منه جهاز

رشا .. هسه انجحي هو انتي ادرسين مصفطه وكاعده

ريم : بربج مصفطه وكاعده لو ما ٢٤ ساعه عيني بلكتاب

رشا .. وبالج وين

ريم : بالاكل

جنات : ههههه لا نجحتي

ريم : لج عيني شسوي الاكل طيب مو بيدي افقد من اجوع ابويه مااعرفه من اشوف الاكل لو يطلبون اذبح رشا اذبحهه المهم اكل الي احبه

رشا .. ناقصه مو جديده عليج تبيعيني بجدر دولمه

ريم : وداعتج بماعون دولمه مو جدر

جنات : امهات الاكل والدولمه شتكولون اخلي يجي

رشا .. مو شيبتي گلبي خلي يجي وفضيها

جنات : الجمعه ماطول كاعد عمو

رشا .. اجه زميل جنات وكعد ويه بابا وجبر حسام هم يحضر الكعده وبدو يسألون عنه وطلع مثل مكالت خوش شاب وعائلته متمكنه وضعه زين وبسبب الاوضاع والخوف الي بلشارع الي منعو بيه المزيقه والاغاني واي مظاهر الفرح والي يخالف يشعلون اهل اهله انقرت فاتحه جنات وهمزين خالها مدخل توقعنا تصير مشاكل بس عدت على خير وحتى مقبلت تبلغ انعام وعلي كالت همه ذبوني المن بعد اخذ رأيهم

تمت خطبتها جانت كلش حلووه ونازكه واهله عددهم قليل لان اكثرهم محافظات طريقهم بعيد لهذا اكتفينا بخطوبه بسيطه و هلاهل وشوي اغاني بصوت مو عالي نخاف ليصيرون براسنا متدينين ويهاجمون بيتنا لان الدوله الهم احنا حالياً دوله بس بالاسم مالها اي سلطه فقط سلطتها البوك والنهب والتخريب

اذا حتى الشرطي والعسكري اذا بيه زود يطلع بلزي مالته ويفتر مباشره يكتلوه خلاص ويمثلون بجثته يعني دوله عصابات ومليشيات وارهابيه وقتله وعلني وبدون خوف والناس الفقره امثالنا الوكعت بيها

امتحنا جانت سنه عجيبه كلها تتلفت وتخاف البنات على الاطلاق محجبه حتى المسيحيه لبست من الخوف نروح ونجي وايدنا على گلبنا ليصير شى وتعالت اصوات الطائفيه معلنه قتل الشباب بدون رحمه كمنا يوميه نشوف لافته لطالب ويانه مكتوب عليه اثر حادث غدر انترست باب كليتنا وشوارعنا من هاي اللافتات لدرجه كمنا منحسب شكد ديموتون كلها صور شباب واصحاب العلم والاساتذه والاطباء والكفائات العلميه مثل الحديقه الحلوه المخضره وتجيب مكينه وتحش بيها هيج كامو يحشون بشبابنا

تعلمنا نماشي يومنا وبلصلاه دوم نردد يارب سترك يـِْ♡̨ـِْا رَبّ دفع البلاء يـِْ♡̨ـِْا رَبّ نجنا من كيدهم

نجحنا اني وجنات ورشا وغزل وريم منتظرين النتيجه مالتها لان بكلوريا

اني صرت مرحله رابعه وجنات هم ورشا مرحله ثالثه وغزوله ثاني متوسط حبيبتي كبرت وصارت مره وريم ننتظر تنجح حتى تدخل گليه اما حسام هو

تارك الدراسه ومكمل وشكد حاول بابا وياه حتى يرجع يقدم ويدخل گليه مقبل

نهر : وين رايح يمه

حسام : اجت امي من السفر

ريم : احممم رجعت نورت بغداد بلمناضله

حسام : تسكتين لو انزع الحذاء على راسج

ريم : ليش تعصبت قابل غلطت عليها گلت نورت

حسام : شكد لسانج طويل وماعندج احترام لا انتي ولا ذيج

ريم : شنسوي هاي الجينات ياعيني مدارس احياء مال السادس هندسه الوراثيه جينات الوالده قويه طابعه بينا

نهر : كاافي ريمو وتعالي سوي زلاطه

ريم : حبابه عمه اكمل مسلسل ساره

نهر : جم مره شفتيها

ريم : حلوه تفتهم بالاخير حبست روحها ورجعت لحالتها وخلصت من الدنيا السوده

نهر : جيبي التخته والغراض واكعدي هنا سوي واتفرجي

ريم : حسن يحسن خلصت المسلسل تصيح حسن

نهر : اذا تعرفين هيج ليش تباوعيها

ريم : علمود اخوها سبحان الله نفس الي عدنا

نهر : لسانج ضبي وجان  ياخذ المفاتيح وطلع

زين مسمعج

ريم : وخلي يسمع قابل شيسويلي يزوجني غصب مثل ساره وياخذ الورث مالتي همزين ماعندي ورث هنه بطرك جم بوتين وجنطتين وجم قطعه ملابس عود انطي التراجي مالتي يستفاد منهن لصاحبته

نهر : كومي كملي ميصيرلج جاره لا انتي ولا ذيج

جنات : عمه اليوم يجي عدي ياخذني نشتري النيشان تجين ويايه

نهر : ليش مااجي يايمه شعندي غيرج

ريم : كللللوش زوجناها واخلصنه منها

جنات : متخلصين على گلبج

ريم : اني اريد اركص ضايجه

جنات : تلحكين تركصين

نهر : يله بنتي روحي حضري نفسج

رشا .. راحت اشترت النيشان وجان بسيط بس حلوو لاحظت عمه نهر ضايجه من سألتها كالت امه ولا تنجرع ولا حبيتها بس هو خوش ولد كون تبقى مرتاحه ويااه

وره ٣ ايام وتحديداً بدايه الثامن جان بدايه اليوم عادي كلش بابا راح للمطعم واحنا كل وحده على شغلها وحسام طلع كال عندي شغل وراها اروح لماما اتغدا يمها

جنت اصفن واكول حتى مكلفت نفسها تجي خليها احسن للعصر وحسام ماكو اجه بابا دايخ

حجي طه : حسام كال الكم شى

سليل : اني جنت فوك مااعرف شوكت طلع

ريم : كال يروح لولد صديقه ويتغدا ويه ماما

حجي طه : ادك عليه ماكو دك قبل ساعه صحت الو مجاوب وانسد وراها طفه التلفون

نهر : لتخوفني طه قابل شبيهه

حجي طه : ماادري نهر گلبي يلعب صار فوك الساعه ادك ومغلق

ريم : تلكاه حضن امه ونام وطفه التلفون

نهر : اصعدو بنات فوك وعوفن ابوجن يله

سليل : اشوف بابا حيل قلق وتعبان ويلوب

زاد توتره من تأخر وصار ممنوع تجوال وهو ماكو ولا عدنا رقم ماما واندك عليها ويوم كامل صار سم علينا بابا كاعد بلكراج ويطب ويطلع يريد بس الصبح يطلع حتى يروح يدور عليه وتكوله ماما نهر تعرف مكان سندس يكول اعرف المنطقه گلي عليها

احس بابا مثل الطير المذبوح وجهه ذبل بسرعه والجكاره متنزل من ايده من قلقه خلانا كلنا نخاف

وبس افتح التجوال ساعه ٥ الصبح لبس وطلع الليل كله ولا وحده من عدنا نامت جنت اتمنى هو يم ماما اقلها حتى يترزل رزاله زينه على سوايته بس وره ساعه ١٠ الصبح اجه بابا يدك على راسه ويعيط ولج نهر الحكي حسام شالوه ولج راح وحيدي

نزلنا نركض ونبجي مصدكنا السمعناه بذيج الايام بلذات جان الذبح مو طبيعي حتى الي يخطفوه يذبحوه ياخذون الفلوس ويذبحوه عياط عمه سمع المنطقه كلها

نهر : يبوووو عليك ي طه راح وليدك وحيدك  راح الجنت تصير وتكول عكازتي

وتلطم كوه لزمت ماما نهر وحضنتها

كاافي فدووه ليصير بيج شى

نهر : ولج اخوجن راح تعال كولي شلون عرفت

حجي طه : افتريت على عنوان سندس رحت لصديقتها انوار اكيد تعرف وانطتني عنوانها ومن رحت مجان تعرف شى عنه وبقينا اندور وهي ادك على صديقه الي دوم وياه هم مشافهه لحد ماهسه رجعت اني ومحسن بس ذبني بلباب دك تلفونه جاوبت صوت واحد غريب ويكول ابنك عدنا تريده تنطينا ٥٠ شده نهر منين اجيبهم لو ابيع نفسي هم ماادبرهم اني كتله شغله طائفيه لو فلوس بقى يسب ويكفر ويكول لو ادز الفلوس لو ابنك تلكاه بلزباله شلون بيه دبريني

اباوع على خواتهم كلهم يبجون ومنهارين حتى ريم اله رشا بجت شويه وسكتت وكعدت على صفحه

نهر : شنسوي هسه طه

حجي طه : مااعرف انتظر خبر منهم هذا ابني وحيدي والله خلي ياخذوني بمكانه راضي بس ليسوون شى بيه اني راح ابيع المطعم على الفلوس العندي واشوف شكد يصيرن

سليل : گلبي انمرد على حسام مهما كان اخويه ومااتحمل يصير بيه شى

المنطقه انگلبت علينا خلال ساعه وحده الكل عرف حسام مخطوف

كلها واكفه مسلحه بس شنو الفايده هو يمهم

وبعدها بساعه ونص تقريباً اجت ماما تعيط وتلطم وتصيح ابني طه وتملخ بشعرها

حضنتها ماما نهر لان گلبها طيب ومتحملت الموقف ونست كولشي سوته سندس لان حالنا مو مال حقد وهذا شسوه وذاك شقرر

سندس : ابني امانتك جان طه اريده منك مالي دخل هو هلواحد الطلعت بيه من الدنيا

حجي طه : ان شاء الله يرجع والله ارجعه

نهر : استهدي بلرحمن وادعي انتي والده ان شاء الله ميحرك گلبج عليه

سليل : جنت ابجي وكاعده على صفحه لزمت السبحه واسبح وابجي الله ذب عليه كل الهدوء بس دموعي مو هادئه متوكف وريم جانت تروح وتجي وتاكل بأظافرها واعرفها ميته خوف عليه ومرات تحضن غزل وتبجي بقووه اسمع صوتها واني جوه وهي فوك

مر يوم كامل وخابرو ونزلو المبلغ بعد ما بابا بقى يتوسل بيها الى ٤٥ شده وكالو كل ميتصلون نحاول انزل المبلغ كلش جبير وخيالي بلنسبه لحالنا وهو بابا حاول يفهم الي خطفو حسام هو على كد حاله وبس المطعم عنده

يومين ماشفنا النوم والراحه جانت جنات هي التنظف وتسوي اكل رغم مناكل منو اله نفس ياكل بس خطيه مقصرت ولا تكعد اكل وجاي ومي للخطار ناس طابه وناس طالعه وسندس كل شويه لاطمه وتعيط

وبيوم كاعدين وجانت رشا تباوع وساكته اقل وحده بينا تأثرت مبين من وجهه كالت

رشا .. يعني صدك بابا راح يبيع المحل

سندس : وخلي يبيعه طز بيه حياه اخوج اهم

رشا .. وانتي ليش ماادبرين فلوسه مو عندج خير من الله لحكتي بابا على هذا المطعم المعيشنه

نهر : رشا مو وكت هذا الحجي

رشا .. لعد شوكت عمه من ينباع ويرجع بابا يبيع لبلبي بلشوارع وينكسر ظهره على العربانه حتى يرجع استاذ حسام لحضن امه

نهر : عطت بيها بقووه انجي رشا هذا اخوج واكع بضيق والله اعلم هسه شصاير بيه طز بيه المطعم المهم يرجع سالم النا شجاج تخبلتي

متحملت حجي عمه ونظرات سليل لبست ربطتي وطلعت خطف من باب المطبخ لوره البيت اكو ممر عدنا نحط بيه قناني غاز وجلكانات النفط كعدت بيه وحطيت ايدي على وجهي وكمت ابجي جان اسمعه يكول

شعلان : شسوين هنا

رشا .. وخرت ايدي ومسحت دموعي وانت شجابك هنا

شعلان : جنت بلكراج مالتكم ولمحتج

رشا .. وهسه شتريد باوع وركز بوجهي وجان يكول

شعلان : كعد تبجين ممصدك رشا تبجي اله قامت القيامه

رشا .. ليش عود احد گلك اني حيوانه وبلا احساس وماابجي

شعلان : لا مو هيج قصدي بس على سوالفج وجسارتج متوقعت بيوم تبجين طلعتي حنينه على اخوج

رشا .. ومنو كلك كعد ابجي على اخويه

شعلان : انت صدك تحجين اني عبالي مكطعه روحج علموده

رشا .. اي انقهرت لان انخطف بس مو مال اكطع روحي

شعلان : شنو انت من گلب لخاطر الخلقج حجر بابا هذا اخوج غير وحده تملخ روحها علمود اخوها

رشا .. گلتها اخوها واني حسام مو اخويه

شعلان : لا اخو الجيران شكد اعرف بيج لسان وكحه وعرمه بس متوقعت هيج بليه حنيه وناكره للخوه هو حتى الغريب ميت قهر على طه وحاله

رشا .. اختنكت اكثر مما مخنوكه وكمت ابجي واحجي وبصوت احس اذا اسكت گلبي راح يوكف

ياخوه تحجي انت عليها حسام من اول يوم راح ويه امي بعد ماسأل عنا ولا كال خواتي ميتات عايشات

شعلان : يجوز ظروفه صعبه او شى منعه تبقن خواته

رشا .. ماكو شى يمنع الاخ من خواته جان صغير وانكول امي تحكمه زين من گبر وعبر ١٨ سنه وينه يعرف بأبويه بلسجن ومالنا والي حار بلفلوس ورجل امه وبلعز ونسى خواته تجي ايام حصره عليهن اللكمه

شعلان : ماكو احد ينسى اهله وخواتي

رشا .. لا نسى وشمرنه من حياته لتشوفه هسه اجه ودك ناعم لابويه لان ماكو مكان يلفي

شعلان : رشا تره الولد مخطوف مو كاعد يلعب يعني الموقف تره جبير مو لازم هيج تتصرفين اقلها تتذكرين الايام الي جان بيها وياكم

رشا .. انت تحجي شى معايشه ولا شايفه حقك مو انت معشت بضيم الحصار وعذابه خلصتها بنعيم

شعلان : هاا افتريتي عليه اجه سرايه

رشا .. عوفني وروح رجاءاً

شعلان : هسه غير افهم اذا مو على حسام على شنو تبجين وراها اروح

رشا .. ابجي لان فاهميني غلط

شعلان : والصح شنو

رشا .. اني مقهوره لان انباك بس مو الى درجه اموت روحي واضيع كولشي لخاطره يردون كون اشك ملابسي وابجي ليل نهار عليه

شعلان : بس هذا الطبيعي هو اخوج

رشا .. هم كال اخوج اتنرفز من هاي الحجايه يااخ وهو حتى شكولنا جان ميعرفها ولا اجينه باله

شعلان : على كيفج ليش تبجين وتعيطين

رشا .. لان محد فاهمني محد حاس بلي حاسته تدري اجت ايام اباوع على عمه نهر شلون تاكل على كيفها حتى يكفينا الاكل ومن نكمل اروح اختل اشوف شسوي الكاه تاكل الباقي من اكلنا حتى تسد جوعتها وبليل تروح عيوونها بلخياط وتسمع من التسوه والماتسوه حجي حتى ينطوها جم دينار تشتري بيه مسواك لو سجاد الي هو لا منا ولا من كرايبنا يخلص يومه جوه السياره ومدهن ومكان مايضم تعبه اله يجيب غراض وملابس اخاف نحتاج شى وحتى لنباوع على غيرنا وننقهر وريم الجانت رغم اداهره بس متعلقه بيه تضم الصجم والدعابل والمصياده وتكول بس يجي حسام انطي الهم ومرات اشوفها تبجي من تباوع على الغراض الضامتهم وتشتاقله وتكول شوكت يرجع بعد ما اضوجه ما اخرب ملاعيبه

وحسام الي تسمي اخويه مايوم گلف نفسه يجي ويه امه ويكول خلي اسلم على خواتي ومن رحنا الهم يباوع علينا بتكبر وبخشم يابس وكوه يكعد ويانه وياكل تكول عبالك جايبه امه بنات من الشارع ومكعدتهن گباله بقيت اراقب وضعه وحياته اشوف شون ينزع ويلبس بأرقى الملابس والمحبس الذهب بيده وسويج السياره ومحفظته المليانه فلوس وبيت مثل القصر عايش بيه يسرح ويمرح واحنا مخلصيها بالايجارات وبيت بيبي الله يرحمها وملابسنا الي تصغر تلبسها لاختها الاصغر منها

شعلان : انتي ليش متنسين الفات گلبج مليان حقد موزين والله ماله داعي تفكرين بلي صار انسي وعيشي حياتج والحمدلله هسه حياتكم احسن من قبل لازم تبطلين حقد

رشا .. اي حاقده وكارهتهم مااريدهم بحياتنا بخيرهم ماخيرونا وبشرهم عمو علينا

يعني معودنا بابا شويه يتنفس ويكدر يعيش ويعيشنا براحه بدون أذيه وبدون تقصير يجي ينطي تعبه لحسام

شعلان : كومي

رشا .. وين

رشا .. كومي خلي اشوفج شى

شتريد روح عفيه

شعلان : كتلج كومي بله عناد

رشا .. كمت من مكاني ومسحت عيووني وكفت بصفه وأشر بيده

شعلان : كعد تشوفين ذاك

رشا .. باوعت بابا كاعد بعتبت الباب ويدخن  ومدنج راسه للكاع وحالته كلش تقهر ويمه عمو محسن وسيف وابوه خضير ولد جيرانه يطيبون خاطره ويحجون ويااه

شعلان : ذاك اب ميعرف ولا يحس بلي تحسي همه ومهمومه هسه ينقذ ابنه ولو مخطوفه وحده منجن الله لايقدر جان انجلط ومات انتي حقج تنقهرين وتحقدين وتضوجين بس مو من حقج تتحكمين بشعور ابوج وتصرفه هو هسه يريد ابنه ماعسى يسلم روحه مكانه موبيده هاي غريزه الله خلقها بالاب وخاصه ابوج حنين وطيب وميتحمل شى يصيبكم اني شفته يوم مااخذتكم امكم كعد مثل النسوان يبجي عليكم بنصنا من يومها عرفت شكد متعلق بيكم وميتحمل احد يأذيكم مو هسه وابنه مخطوف ودنسمع الناس التنخطف تنگتل شلون راح يتحمل يشوف ابنه مذبوح ومشمور بلزباله اكيد حتى لو يبيع ملابسه هم يرجعه واحنا الله شاهد كلنا حاولنا ننطي ونساعده بس هو مقبل من اكولج هيج شى مو حتى اعيرج اعرف سوالفج وتفكيرج بس حتى اوصلج حال ابوج وضعه كلنا وياه بس هو يحس هاي مسؤوليته وديحاول شكد ميكدر يرجعه

رشا .. باوعت على شعلان

شعلان : لتصفنين على وجهي فكري بكلامي احقدي ضوجي بس اياج تحسسين ابوج بان انتي ممهتمه بخطف اخوج هذا الشى راح يكسره ويإذي اكثر ما هو مكسور

رشا .. جريت نفس وغمضت

شعلان : ارتاح وادخلي جوه وحاولي اذا مكدرتي تصيرين قلقه مثلهم اكعدي بغرفتج ولا تتطاخخين ويه احد من البيت الكل تعبان وكل واحد بيكم متأذي بس بدرجات والي افتهمته انت اقل وحده متأذيه على حسام خلي تمر هاي الايام على خير وسلامه 

وبعدها شتحبين تسوين محد راح يمنعج

رشا .. شكراً

شعلان : هااا هاي منو يراد اشكر العصابه الباكت حسام خلتج تشكريني

رشا .. سحبتها مو شكراً ودرت وجهي

شعلان : هههههه شكد عصبيه وعنوديه

يله روحي غسلي وارتاحي وان شاء الله يرجع بأقل الخسائر

رشا .. انت فهمتني مو لو مثلهم

شعلان : اول مره افهمج صّـْْ(☑)ـْْحّ لتفكرين بشى بس ادعي يرجع حسام بسلامه مو لخاطره لخاطر ابوج الطيب حتى يكدر يوكف على رجله

رشا .. الله يرجعه بلسلامه لخاطر بابا

شعلان : عفيه يله ادخلي وبعد لطلعين هواي زلم بلباب ناس تجي وناس تروح

رشا .. مااشي

شعلان : هاااا ماسمعت

رشا .. كتلك ماشي ليش بيها شى

شعلان : راح تخليني مو بس اشكر العصابه ادزلهم هديه لان ام خشم يابس كالت ماشي

رشا .. ابتسمت على كلامه وكتله وانت هم تعرف تنكت (تشاقه) ومرات دمك خفيف مو دوم بس اكثر الاوقات  يصير دمك اثكل من دهن كريز متجرع ولا تنبلع

شعلان :هاي رشا الاعرفه مو القبل شويه تبجي وتمسح بخشمها

رشا .. مامسحت خشمي مسحت عيوني صفن على عيوني وابتسم مباشره ارتبكت وكتله من رخصتك وخرت منه ركض

دخلت للبيت لكيت جنات بلمطبخ تحضر الجاي

جنات : تأخرتي ويه الحلو

رشا .. ياحلو

جنات : شفتج واكفه ويه شعلان كلت خليها براحتها

رشا .. تره فاهمه غلط

جنات : غلط او صّـْْ(☑)ـْْحّ المهم رجعتي مرتاحه وما مغثوثه وتعبانه

رشا .. تره ماكو شى بينا

جنات : شبيج رشا قابل اني تهمتج وياه ليش توترتي يبقى كرايبكم وانتي حره توكفين وياه لو لا

رشا .. المن هذا الجاي

جنات : للرياجيل بره كلت اكمله واصيح احد يوديه

رشا .. تعبناج ويانا

جنات : لتكولين هيج انتم اهلي وان شاء الله تزول هاي المصيبه

رشا .. يـِْ♡̨ـِْا رَبّ

جنات : هاج كلاص الجاي مالتي ومالتج صعدي بس انطي لصينيه للولد واجيج

رشا .. انتظرج

طلعت من المطبخ وصعدت ليفوك بدون مااباوع بوجهه احد اسمع سندس شلون تبجي وتنعي على حسام اني گلبي مقسوم نصين نص ميته قهر عليه وادعي يرجع ونص مقهوره وحاقده واحس كل ميظهرون بحياتنا وراهم مصيبه

سليل : اجه بابا وصاحني للمطبخ

هااا بابا بيك شى عفيه

حجي طه : لتخافين بنتي مابيه شى

سليل : شلون مابيك وانت على ساعه توكع على وجهك

حجي طه :هذا امر الله ولا اعتراض على حكمه ننتظر ونشوف ربج شكاتب

بنتي رايد منج اطبين للغرفه بلكنتور مالتي اكو فلوس احسبيهم اني جان گلت لعمتج بس كاعده يمها سندس واكو اوراق مال مطعم هم جيبيهم بلكت الكي مشتري واشوف شكد يصيرن واكول الهم هلكد عندي بلكت يرحمون بحالتي ويرجعوه الي

سليل : ان شاء الله يرجع الله ارحم الراحمين

حجي طه : يله بنتي بسرعه حتى نروح اني وعمج محسن اكو شراي بلكت الله يهدي وياخذه بسعر مناسب

سليل : صاار بابا طبيت للغرفه وفتحت الكنتور وكعدت اطلع الفلوس اباوع خطيه بابا ولا اتهنى بيهم ويجمع بيهم من دم گلبه بس حتى يشتري بيت ويرتاح اووف يابويه دومها عوجه وياك

بديت ادور بالاوراق موجوده المستمسكات مالتنا ومال محل واوراق بسيطه وفتحت ورقه ورقه اخاف اكو وحده يحتاجها بابا كلهن حاطهن بعلبه مال جگليت مستخدمه وضامهن بيها فتحت  ورقه من ضمن الاوراق والكاها ورقه طلاگي من سجاد اباوع التاريخ بعد شهر من سفره

يتبع ....

#ادمن_مدونة_نور_قلبي

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الخامس_عشر

(بارت طويل لعيونكم )

ونرد مرات نلوم ارواحنه ونندم

نرد مرات نزعل اليل مانحلم

محسود العمر عمريش

خلص بين حسبه وهم

بنيت أحلامي فوك الغيم

من تطلع شمس أحلامي تتهدم

صح نشوف لجن لذه العميان

جي طعم ألوان بعينه ملثم

عشنه وي الخلك وننعد من السكان

وي عدة الفرحة اسمائنه تنظم

بديت ادور بالاوراق موجوده المستمسكات مالتنا ومال محل واوراق بسيطه وفتحت ورقه ورقه اخاف اكو وحده يحتاجها بابا كلهن حاطهن بعلبه مال جگليت مستخدمه وضامهن بيها فتحت  ورقه من ضمن الاوراق والكاها ورقه طلاگي من سجاد اباوع التاريخ بعد شهر من سفره

بقيت صافنه وايدي ترجف واقرا كل شويه الورقه لهسه ممستوعبه شمرتها وحطيت ايدي على حلكي وابجي ابجي بقووه مااريد احد يسمعني واضرب برجلي جريت المخده مال بابا وحطيتها بوجهي وبديت اصرخ وابجي ليش سجاد ليش لهاي الدرجه هنت عليك جان تنفتح الباب ريم

ريم : اسم الله شبيج ثلل

احجي عفيه

سليل : حاصره وجهي بلمخده وابجي بهستريا

جرت وجهي  فدووه شبيج صار شى حسام بيه شى

اشرت على الورقه البلكاع

ريم : تأشر على ورقه سحبتها وقريت ورقه طلاكها من سجاد انصدمت هاي شوكت طلكها

سليل عفيه على كيفج گلبج راح يوكف

سليل : ريم طلكني واني كاعده انتظره كاعد انتظر كلمة منه

ريم : كومي فوك لحد يسمعج اجت كم مره من جيرانه بره على عمه كومي نصعد ليسمعوج عفيه

هااي شنو الفلوس

سليل : بابا رادهم

ريم : لميت الفلوس والاوراق وحطيتهم بلكنتور وسديت الكنتور ورجعت على سليل وكومتها احسها على ساعه توكع على وجهه كومي عفيه طلعنا من الغرفه وصعدتها على كيفي شافتنه عمه نهر

نهر : بيها شى سليل

ريم : هاااا لا بس كعد تبجي على حسام ليضل بالج راح اخذها فوك ترتاح

نهر : صيحي وحده من البنات تسوي جان للنسوان

ريم : هسه احنا بياحال عدنه واحد مخطوف هي مال جاي بله  نسويلهن اكل فد مره ونجيب دي جي حتى يردحن شويه

نهر : اششش من العالم فوك مجايين ياخذون بخاطرنا ويوكفون ويانه واصعدي يله كافي ادردمين

ريم :صاعده

صعدت ريم ودخلتها بغرفتها جان تطفر رشا وجنات

رشا .. هااا شصار شبيهه سليل

ريم : لكت ورقه طلاكها عمو سجاد مطلكها

رشا .. صخام شوكت

ريم : مااعرف مقريت التاريخ جنات ولو تعبناج بس اكو نسوان جوه تريد عمه وحده تسويلهن جاي

جنات : من عيني هسه نازله

رشا .. تعاالي سوده عليه شون تشهك

سحبتها بحضني وتبجي

سليل : طلكني واني جنت اكول هسه يرتاح ويرجعلي هسه فتره ويكول سامحتها

رشا .. شوفي ولو مااريد ازيد تعبج بس تره الخلل منكم اثنينكم انتي ضميتي عليه وتعرفين طبعه صعب ويغار ويشك اكيد هاي ردت فعله على سوايتج وهو هم غلطان يوم مكال روحي عيشي حياتج

ريم : اي كالها عمو بس مو معناها تركض تنخطب

رشا .. انجبي انتي واسكتي

ريم : ادري الحق ينزعل منه هسه هو كال روحي عيشي ومالي دخل بيج انتظري سنه سنتين وراها انخطبي اتزوجي مو يسد التلفون منا ترحين تنخطبين منا

رشا .. نزعت النعال من رجلي وشمرته على ريم اسكتي ام لسان

ريم : همزين ما أجه بيه جان خسرتج قوزي

رشا .. والله انتي فد وحده ماعندج شغل وعمل ومرات تخربطين بلحجي ومتعرفين تحجين شوفي اختج الجبيره شصاير بيها وانتي ولا يمجً

ريم : لا غلطانه ميته قهر عليها بس شنو الفايده طلكها والي كعد تسوي تأذي نفسها ولو تبقى العمر كله تبجي احتمال ميرجع وكل واحد غلط لازم يعيش نتيجه غلطه

سليل : شنو الفايده بعد هو راح غلطت او هو غلط عافني

رشا .. كلشي بيد الله واذا هو قسمتج ميصير لغيرج لو الدنيا تحترك اني اكول الاحسن تحاولين ترتبين حالج بدونه يجوز يجي يوم ويشتاق ويرجع

ريم : والله عمو قافل لو يجي الحمزه انتي شايفته من يقفل على شغله لو ابوه من الگبر يتوسل بيه ويكوله ولك لخاطري يكوله يابه ارجع لكبرك مااغير رأي

رشا .. سليل صيري قويه ولو مره بعمرج

سليل : كل هذا العشته ومو قويه

رشا .. قصدي من ناحيه عمو سجاد اعرف هو نقطة ضعفج الوحيده بس لازم هاي النقطه تنتهي ماطول هو اختار يبعدج من حياته هذا هو انتي هم ابتعدي كم مره حاولتي تحافظين عليه ومفاد طبعه صعب وضعه اصعب والبينكم شى جبير وانكسر وعمر المكسور ميرجع مثل الاول شوفي حالج ذبلانه تكول ام وميت ابنها الوجهه طول الوكت ذبلان كلامج قليل متكعدين ويانه انعزلتي ليش تعاقبينا شنو ذنبنا احنا نحبج والي كعد تسوي يأذينا وياج

سليل : ليش مكالولي انتم متعرفون مو

ريم : اني عن نفسي هسه دريت والله

رشا .. واني هم وداعتج

سليل : ليش بابا ضم عليه

رشا .. اكيد علمودج لو كايلج من اول مستلمها جان انتهيتي

سليل : اريد هوا اختنكت

ريم : رشا ويايه خلي نكومها للسطح

صعدوني البنات فوك جان الجو حار لان شهر الثامن بس اكو نسمه خفيفه كعدت على صطل جبير موجود بلسطح مشمور اشتم هوا والبنات قريبات مني جان ادنج ريم عليه

ريم : عمو حبج من گل گلبه وانتي حبيتي من گل گلبج بس الله مجمعكم لتعترضين على حكمه وعوفي الامور كما هي ادري بيج متأذي بس والله ميفيد الي كعد تسوي طنشي وعيشي محد يموت وره واحد هسه تلكي عايش وياكل ويشرب ومصادق

رشا .. ولج غضب الله على راسج هاي عود كعد تواسيها

ريم : اي ليش اجذب قابل يصير راهب ويعتزل الحياه اصلاً الرياجيل كلهم ميعيشون بليه نسوان واذا ميصادق وحده واثنين ميرتاح

رشا .. عمج مو من هذا النوع

ريم : اعرف بس ماكو شى هسه يمنعه سليل وانتهى موضوعه وياها بعد من حقه يعيش

رشا .. تره حجيج كعد يأذي اختج

ريم : تتأذه مني احسن ما بعدين تسمع وتنصدم ونخسرها مشكلتها وهي كعد تسمعني حبت بروحها وگلبها وعقلها منطت مجال لواحد منهم يكون حر حتى بعدين تكدر ترتكز عليه خلت الكل ملك سجاد

وهاي نتيجتها تحس روحها مسحوبه منها وگلبها راح يطلع من صدرها وعقلها راح يوكف من التفكير ماكو واحد منهم يساندها ويخليها قويه

رشا .. وانتي شمعرفج بهاي السوالف قابل حابه من قبل

ريم : مو شرط احب حتى اعرف ولو الي يشوف حب اختج يكره كولشي اسمه حب

سليل : اعرف يروحي ضعيفه وخاصه تجاهه بس اكو شغلات الواحد مو بيده ميكدر يتحكم بيها ويغيرها

ريم : مامطلوب منج تغيرين شى بس المطلوب ترجعين لوعيج انتي جبيرتنا واحنا كلنا نعتمد عليج وشوفي حالنا اخونا الوحيد مخطوف ومنعرف يموت لو لا وبابا منهار على ساعه يوكع ويوكف گلبه من خوفه على ابنه وهو معتمد عليج تقوي اذا نزلتي وهذا حالج راح يتأذه اكثر هو ضم عليج حتى بس ميشوفج هيج وهلمره اتخربط حالج لتأذي عفيه اكثر مما هو متأذي

سليل : حطيت ايدي على وجهي وكمت اشهك

رشا .. ابجي شكد متكدرين محد يلومج بس ارجعينا والله محتاجيج جايتنا ايام بس الله اليعلم بيها

سليل : بقيت اشهك اريد اطلع قهري وألمي منه والبنات بقو صافنين عليه فوك النص ساعه وساكتات لحد متعتب وصدري تنك واكح من البجي وبقيت رافعه راسي للسما لحد مهدأت

ريم : اباوع على سليل شلون تشهك وكوه حابسه دمعتي شكد تأذت من حبها لعمو مرات اموت قهر من اشوفها مثل السمجه المزوهره تلوب عليه وهسه كعد تتكطع من عرفت طلكها والله خايفه ليوكف گلبها من القهره جانت صدمه جبيره الها احاول الطف الجو وانسيها بس مبين حبها اله بدمها لو شميصير يبقى سجاد نقطه ضعف سليل

سليل : نزلت عيوني واباوع عليهن شلون خايفات عليه ومدمعه عيونهن

مسحت وجهي وكمت يله امشو ننزل

ريم : شلون صرتي

سليل : يم الله لتخافون صدمه وتروح خلصت عمري كله صدمات

رشا .. اعرفج قويه وراح تجتازيها

سليل : وحتى لو مجتازيت الدنيا مراح توكف ورانه هسه ابونا الحيله مهدود لازم نوكف ويااه

نزلنا كلنا جوه جان گلبي نار وحيل متأذايه بس خواتي مالهن ذنب تصنعت القوه كدامهن وكعدنا على صفحه ونشوف ماماسندس  شلون تلطم وتبجي والجيران يهدون بيها

رشا .. اذا هيج ميته عليه متدفع فلوس لو بس تعرف ابني وابني

سليل : كاافي ليسمعوج

رشا .. واذا خلي تسمع فلوسها وين الرفيقه

ريم : خلصن في سبيل المقاومه وطرد الاحتلال

رشا .. والذهب الي جانت ايدها مترفعها من تحركها

ريم : دفعت صدقه على روح القائد

سليل : تكول ماعندي وانتو تعرفون شكد تحب حسام اكيد لو عدها متنتظر

رشا .. والله تعرف ابوج فقير وفطير گلب وراح يشيل تعبه ويفدي ابنه على شنو تخسر فلوس بعدين يفيدوها

ريم : والله اني ميته خوف على حسام واريده يرجع بس هم لازم تشارك بلفديه اني متإكده عدها فلوس وذهب وضامتهن خلي بابا يكول الها ماعندي فلوس بس نص المبلغ والباقي هي ادفعه

رشا .. مو بلحيف اذا مو يدفعهن كلهن مايرتاح ويرجعنا على الرنكات

سليل : شنسوي غير اخونا وحيدنا واكع بشده

رشا .. اخوجن الجن اني ماعندي بس واحد ومسافر عمو سجاد

سليل : گلبي وجعني بس ينذكر اسمه

ريم : هسه بس خلي يرجع عود وراها مندير بال اله اني مااريده يموت سليل هو يأذيني ويعيط عليه ويعيرني بس هم مااريده يموت قابله بلي يسوي المهم عايش

سليل : سحبتها بحضني وحضنتها لتخافين حبيبتي ان شاء الله يرجع بلسلامه

سليل : رجعت للغرفه طلعت الغراض والفلوس وسحبت ورقه طلاكي وحطيتها بصدري ورجعت حطيت الفلوس بعلاكه هي والاوراق وصحت بابا وانطيتهم اله

وصعدت فوك وكل شويه افتح اقراها اتمنى هسه كون عندي اتصال بيه بس اكوله على الاقل جان ودعتني او گلتها بوجهي مو تنهزم وتروح وحجايه ريم ادك براسي يعني يجي يوم والكه وحده بحياته وماخذه مكاني زين هو يكدر يعيش ويه غيري ويحبها ويدخلها گلبها معقوله ينساني ويطويني من حياته مااريد افكر مااريد خليني حايره بمصيبه ابويه هسه ضميت الورقه ونزلت وياهم جان يوم متعب ناس طابه طالعه وماما نهر مانشفت دمعتها وسندس هاي بحث اخر اكيد تكطع نفسها لان هو روحها وتحبه حيل بس ليش مساعدتنا بلفلوس معقوله الفلوس اهم من ابنها هسه احنا وشمرتنا وفهمنا بس هذا حسام روحها من الدنيا

سليل : ١٠ ايام لا ليلنا ليل ولا نهارنا نهار والكل تتراكض منا ومنا وصلت مرحله يدورون بين العصابات ياهو عنده عرف بعصابه يراسل صاحبه ويسأله يمك لو لا مرات من يسولفون احس روحي بفلم اكشن امريكي حتى العصابات صارت معارف واسطات

رشا ..

طبت ريم والشهاده بيدها ناجحه رغم حزنا وخوفنا على حسام لا ارادياً طفرنا اني وعمه وسليل عليها نبوس بيها ونبارك جان معدلها ٨١ ممصدكين طالع خوش معدل الها

سندس : بله مستحيتن اخوجن مخطوف وتباركن وفرحانات

سليل : غير ريم نجحت

سندس : واذا نجحت قابل صارت دكتوره فوك متكعدين تدعن لاخوجن جايات فرحانات بشهاده اعداديه وتباركن تكول عبالك مدري شحصلت

عفت حضن ريم وانداريت عليها

حقج ماالومج مو انتي ماتعبتي ولا سهرتي ولا انكسر ظهرج ولا درستي ولا هميتي بيوم حتى تحسين بهاي الفرحه شمرتي بناتج ودرتي وجهج وطفرتي هذوله وأشر على عمه وسليل ذوله همه الي تعبو واليوم حصدو حق تعبهم انتي حيري بأبنج وبسوالفج

سندس : خوش مخليه محامي الجن ولج رشيوه هذا اللسان الزفر ادوسه برجلي لتنسين اني امج حقيره اخاف شفتيني مكسوره على اخوج تره اطيح حظج واحرك عشيرتج

نهر : ماله داعي هذا الحجي سندس مصار شى لكل هذا

سندس : اي عيني طبعاً غير ادافعلج ليش  متحاميلها مو بنات صايرات تكول عدوات الي متستحن تجاوبن امجن وحدتجن بطول قندرتي ولسانها اطول منها

ريم : هسه شتردين منفرح يله هاج لزمت الشهاده وشكيتها

سليل : ليش ولج

ريم : حتى ام حسام ترتاح

عفتهم وصعدت

رشا: ارتاحي مثل كل مره لازم اطفين الفرحه بگلوبنا بس لو افهم شمسوين لله حتى خلاج امنا

سليل : روحي وره ريم اصعدي

باوعت عليها وكتلها مكافي متعبتي دومج كاسرتنا دومج دايستنا جوه رجلج شيصير هسه لو كايمه وبايسه بنتج ومحسستها بلفرحه وتفتخرين بيها يعني بنات عاشن مثل ظرفنا زين وكملنا دراستنا مكان متشجعينا اجيتي جم مره وكلتي ندمانه ومشتاقه الكم وبإي موقف يصير اتبيعينا اريد مره وحده تصيرين امنا ماكو هاج هسه شستفاديتي من كسرتي فرحتها وفرحتنا

سندس : ولجن اخوج مخطوف يافرح

سليل : تره صارله سنين هو مخطوف صار سنين اخذتي وطلعتي وخطفتي من نصنا لتجين هسه اطلبين من عدنا نموت نفسنا عليه اخونا على العين والراس بس ريم ونجاحها هم مهم عدنا لان تعبت وكافحت ورفعت راسنا واذا انتي تعتبرين هذا الشى تافهه احنا عدنا شى كولش جبير مانسمح لاحد وحتى انتي بأن تقللين من عنده ورجاءاً انتي خطار هنا لتتجاوزين على وحده من خواتي مااسمح

سندس : خوش ربيتي ينهر يجاوبن ويراددن امهن

سليل : من تنطينا حقنا كأم نطيج حقج كبناتج

عفتها وصعدت

نهر : بناتج كبرن سندس مو صغار لا عبالك تعيطن وتهوسين او تقشمريهن مثل قبل وحدتهن هسه صار هي الحاكمه نفسها وتعرف تجاوب اكبر واحد نصيحه مني الج لو تتعاملين وياهن بطيب لو عوفيهن لان مراح يسكتن

ولمعلومج لسانهن الي تحجين عنه ورثنه منج لتنسين العرق دساس والحمدلله اخذن بس اللسان منج مو غير شى

سليل : صعدت ليفوك وحضنت ريم الجانت تبجي

ليش تبجين ياعيني

ريم : شفتيها حتى مبروك مكالت

رشا .. ولتكول بعد احسن اني ابوسج وابارك واذا تردين اهوسلج هسه واريد اشوف منو يسكتني حتى هلاهل والله اهلهل كللوش

سليل : هههههه اش ولج فضحتينا

رشا .. شكوو اختي ونجحت وحده كسوله وطلعت ٨١ شلون مااعرف غير من فرحتي بيها

ريم : هههههه والله قريت

رشا .. بخت عمي صدك كالو البكلوريا جنص وانتي جنصج بلمكان

ريم : قل اعوذ برب الفلق حطيتي عينج

جان اطب غزل وبيدها الحلووه مليانه جگليت ذبته فوك راس ريم

غزل : مبروك يااحلى ريمو

رشا .. منيلج هذا الجكليت

غزل : اكو جيس ضامته ماما نهر اخذت منه مال الخطار

سليل : والله عااشت ايدج

ريم : حضنت خواتي الله لايحرمني منكم

رشا .. اوكفي خلي اخذ هزه مركصت للكاع

شغلولي يلبرتقاله عذبتي حاله

غزل : اركص وياج

سليل : ههههههه وهسه امجن تصعد تكطع شعرجن

رشا .. هلووو شحده يمد ايده علينا احنا بنات طه الي يلطخنا بقطره مي نحركه بكاز وصخ

ريم : شمعنه وصخ

رشا .. حرامات النظيف غاالي

سليل : ههههه بست ريم وكتلهم يله اكعدو عقال وبلكت الله يرجع حسام والفرحه تصير فرحتين خلي انزل اكمل شغلي بلا مشاكل

نزلت وماما بعد مفتحت حلكها ابد بس تباوع بحقد النا وعلى اعصابها

ثاني يوم

كاعدين  كلنا ويانه شعلان الي معاف بابا لحظه هو وعمو محسن عادي عمو دوم وياه بحكم صديقه بس الصدمه من شعلان الي لازم بابا مثل ظله ويركض وياه ويخابر على اصدقاء عدهم جماعات ومعارف بهاي الامور بس حتى يوصلون لمكان حسام وبين يوم ويوم يتصلون وينزلون بلسعر

وحده من المكالمات جانت كدامنه واشوف بابا شلون يتوسل بيهم ويكول الهم

حجي طه : احلفكم بنبي واهل البيت كتلكم ماعندي وروح ابويه لو عندي ساعه مااخلي يبات يمكم المطعم معروض للبيع وشبه انباع ويه الفلوس العندي يصيرن ٣ دفاتر

والقران ماعندي اخذوني بمكانه حتى لو اتذبحوني بس عوفوه شاب اشاف من عمره

سألوني عن البيت

البيت الكاعد بيه ايجار والله مال ناس مسيح دزو احد يسأل بلمنطقه

سندس : كلهم امه دتموت بدونه

رشا .. اذا تموتين مدفعين

سليل : اشش خلي نسمع

بقى بابا يتوسل بيهم وسدوه مثل كل مره

سندس : هذا الي الله قدرك عليه ٣ دفاتر وهمه يردون ٢٠ هسه يعني راح يذبحون ابنك

حجي طه : منين اجيب وكلام الله وتراب ابويه ذني كل فلوسي حتى وياهم مصرف البيت  حتى المطعم بعته شسوي بعد

سليل : سحبت رشا وريم لان شفت رشا عيونها صارت براسها عرفت مراح تسكت وخفت لتصير مشكله وبابا البيه كافي حتى اكل مياكل اله نتوسل بيه والله احسه گبر ١٠ سنين فوك عمره حتى من يمشي محني الظهر ياعيني عليك يابابا مشفت يوم راحه

معودت الدنيا شويه ضحكت الك ورجعت بجتك

كاعدين جوه بلمطبخ نسوي لفات مخلمه وجاي عشا

رشا .. اكولج يمكن سمعت صوت شعلان

سليل : والله ماادري اذا اجه عيب نودي الاكل لو نسوي غير شى

رشا .. شكوو بيها كلها نعمه الله

سليل : ميخالف عيب لفات شوفي اذا هو حتى نطلع كبب وعدنا لحم مسلوك اشوف شسوي بيه اكل

رشا .. هو غدا لو عشا يمعوده

سليل : لج عيب امشي شوفي هو لو مو هو

رشا .. طلعت للهول ردت امد راسي للاستقبال من يم الباب اشوف منو طلع بابا وتوجهه للحمام تقربت شفته كاعد وحده

دفعت الباب وطلبيت

السلام عليكم

شعلان : وعليكم السلام منين طلعت الشمس

رشا .. مناك من العوجه

شعلان : ميلوكلج تنكتين انت انطيج لسان طويل عرامه وكاحه تكمز

رشا .. منين الاخير اجيت اكولك تتعشى

شعلان : هاي عشا لو طرده

رشا .. مسوين لفات مخلمه تاكل لو اله نسويلك طليان

شعلان : هسه اني فتحت حلكي وكتلج اريد طلي انتي مو معزبه مااريد بس كلاص مي

رشا .. عرفت متريد ميعجبك هيج اكل اذا مو هبيط ولحم كومه على التمن متاكل

شعلان : لا اله الا الله هسه اني اريد افتهم شى جاي تقدريني وتعزميني على العشا لو اطرديني

رشا .. احنا مسوين عشا مخلمه وبما ان انت ميعجبك اكلنا راح انسوي غير شى الك درت وجهي وجان يكول

شعلان : اريد ٣ لفات

رشا .. انداريت عليه شنو

شعلان : وفوكاها طرشه رحمتك ربي

رشا .. مو طرشه سمعت كلت ٣ لفات

شعلان : ماطول سمعتي ليش تردين اعيد الحجي

رشا .. مو هوايه ٣

شعلان : سويهم ٤ لفات واذا طولت وكفتج راح انومج بدون عشا لان راح اكلهم كلهم

رشا .. مهروش مماكل عايفيك بدون اكل

شعلان : روحي جيبي لفاتي وياهم كلاص جاي مو استكان كلاص وزيدي شويه شكر

رشا .. بعد عندك اوامر ثانيه

شعلان : مي مجرش هم يله بسرعه جوعان

رشا .. صفنت عليه

شعلان : لتصفنين لو حابه اسويهم ٥ لفات

رشا .. ركضت للمطبخ

سليل : هااا شكال

رشا .. ولج يريد اربع لفات

سليل : اي نسويله خير من الله طاوتين مسويه

رشا .. كعدت اسوي اللفات وكملتهم وحطيتهم بماعون وصينيه وبصفها جاي ومي مجرش ولفه لبابا لان مياكل اكثر نفسه مسدوده

طبيت لكيت بابا كاعد بصفه

تفضل

شعلان : رحمه الله والديج

رشا .. هااك بابا حبيبي لفتك

حجي طه : مو كتلج مجوعان ليش تلحين يابابا

رشا .. عفيه لخاطرنا اله نتوسل بيك صار بيك شى منو النا

شعلان : هو حقه مياكل كلنا نفسنا مسدوده على الاكل

رشا .. رفعت راسي ٤ لفات ومسدوده لو مفتوحه شتاكل تاكلني

شعلان : ويايه

رشا .. لا مو وياك انداريت على بابا بسته واخذها

شويه واندكت الباب عمو محسن جاي وطلع بابا اله جان مستعجل مقبل يدخل شويه واسمع صوت شعلان يصيح رشا

رشا .. اجيت اركض اول مره يصيح هيج وفوكاها بصوت عالي تكول كاعد بيته

خير شتريد

شعلان : حطي شويه ملح احد گلج بيه ضغط

رشا .. الله مطولج ياروح جبت الملح وفتح اللفات وحطيت بيهم مدنجه واحط رفعت عيني واشوفه صافن على وجهي منتبهت القرب الي بيني وبينا لدرجه يشم ريحتي واشم ريحته وخرت بسرعه من انتبهت

شعلان : طيبه كولش

رشا .. شنو

شعلان : اللفات غير ليش عبالج غير شى

رشا .. محتاج شى بعد لو مسدوده نفسك

ضحك بصوت لدرجه ابتسمت على ضحكته

شعلان : متكدرين تسكتين

رشا .. مااتسمى رشا اذا اسكت

شعلان : مااريد سلامتج

رشا .. شعلان شوكت تلكون حسام مو الموضوع طول

شعلان : خفتي عليه

رشا .. دنجت لا مخايفه بس بابا تعب حيل وانتهى حاله وخايفه عليه

شعلان : متعرفين تكذبين مبين على وجهج الخوف عليه اعترفي تره مابيها شى يبقى اخوج

رشا .. من رخصتك

شعلان : رشا

رشا .. نعم

شعلان : لتخافين مبقى شى وتفض

رشا .. الله كريم شكراً تعبناك ويانه

شعلان : الف عين لاجل عين تكرمون

رشا .. عفته وطلعت واحس گلبي يدك قوي ليش من اسمع صوته احب اشوفه او اداهره

سليل : بعد يومين بصوره مفاجأه نزلو السعر وصار ٥ دفاتر

وجان تجي ماما سندس وتنطي ٥٠ ورقه

حجي طه : صارو ٣ ونص بعد دفتر ونص منين اجيبهم

سندس : اني كل ملكيتي ذني ماعندي غيرهن متاخذ من اهل امك مو خير من الله عدهم بله وكت كرامه هسه ابنك على ساعه يكتلوه معودنا ينزلون من ٥٠ الى ٥

حجي طه : همه كل العصابات تبدي بأسعار عاليه وخياليه وتنزل

سندس : ليش مبين تعرفهم حقك عااشرتهم من جنت بلسجن

حجي طه : معاشرت ولا شى بس من البلاوي الي نسمعها من الناس ربع العراق باكو ولدهم وصارت الناس خبره وتعرف

سندس : مالي دخل جبت اله ٥٠ ورقه اريد ابني

رشا .. احجي شفتو هي تخليني اتعصب

سليل : الله عليج لتحجين شوفي حال بابا والله كاتله القهر

اندكت الباب وطب محسن وشعلان كعدو بنصنا لان همه مو غربه ومتعلمين عليهم وخاصه الفتره الاخيره يوميه شعلان يمنا

صاحو بابا على صفحه وطلعو بلكراج بس ريم اكيد تلوب اله تعرف شكوو

حجي طه : شنو هاي الفلوس

محسن : هاي ٥٠ ورقه مني ضامهم للعوزه كلت اخاف يصير شى اخذهم فدووه لتراب رجلك اهم شى سلامه ابنك

حجي طه : مااخذ تعبك لو اموت

محسن : لو ابني بمكان ابنك جان انطيتني حتى ملابسك ليش مااعرفك يا طه اخذ ياخويه ولتشلع گلبي خلصت ١٥ يوم تعيط وتكول اني اطلعه وهسه من وصلت للحلك اعرف متعسره ونخاف لا نعاند ويأذون الولد همه مو كالو الك بعد منخابر بس حتى ناخذ الفلوس يعني بعد مينزلون هاك وربك كريم بس طلعه

حجي طه : محسن هذا تعبك بلمطعم

محسن : يمعود فدوه اهم شى سالمين ونشتم الهوا ربك يعدلها ولتنسى عندي راتب بلسويد احرك اهله لفيصل اذا ميدز الي ذيج الفترات كلها عفته اله لان مااحتاج هسه اخلي يدزلي ليضل بالك خير من الله عندي بس كول شكد صار المبلغ ٣ ونص مو

حجي طه : لا صار ٤ لان سندس انطت ٥٠ ورقه

محسن : يراد اهلهل واخيراً حست

حجي طه : بلكت يخابرون وابلغهم صارت ٤

شعلان : لتبلغ ولا شى اني انتظرت يخلص ابو فيصل كلامه واحجي هااك خويه

حجي طه : شنو هذا

شعلان : هذا دفتر

حجي طه : انت من كل عقلك اخذ

شعلان : مو مني هذا

حجي طه : من منو

شعلان : من حبوبه الله يرحمها

محسن : هااي شنو عاشت ولك تضحك علينا وينها بس لا ركبك چني يول

المره شبعت مي ورد وبخور وتحولت نفط وصدرناها شطلعها هسه

شعلان : هههههه الله يرحمها اني القصدته هذا حقك من كاعها الي وهبتك اياها قدرناها وهاي حصتك وبالاتفاق اي وعمي خضير اخذهم وفك ضيقتك

حجي طه : اني حالف يمين فلس مااخذ منكم

شعلان : ويمينك عليك ماكاسره اني ماكتلك من عدنا كتلك من حبوبه وانت ماحلفت على حبوبه

محسن : هذا لوتي يفيد بلدوله يقشمر الوادم ويقنعهم

شعلان : راح اصير نائب وانت عود انتخبني

محسن : انت بس صير وخليني حمايه وياك بسرعه ابيعك بكم شده واخليهم يعلسوك واستفاد خلي اطك براسك

شعلان : هههه خلف الله عليك عمي اني انطيك فلوس ولا تعلس ولا تدخل بخطيتي

هااك طه ورجع ابنك يمعود متعبت وتريد تحطه بحضنك تره ذوله مايتشاقون تلاحك لروح ابنك وكافي تعاند

ريم : رجعت ركض وحجيت للبنات كلشي

رشا .. معرفته لشعلان هيج صاير خير

ريم : غير يتلوك لناس بلكت يحسون يارب ارزقني واحد يتلوك علمودي ويمرغل روحه بلتراب وينطي شدات حتى بس ارضى عليه

رشا .. شنو قصدج

ريم : ولج ريه مااحب دور الغباء وتسوين نفسج كعبول وكلشي متفتهمين

رشا .. شفهم احجي عدل

ريم : قصدت على شعلان

رشا .. واني شعليه بيه

ريم : مشفتي شلون مرغل روحه ومن اطبين واطلعين يباوع على طولج والله مراقبته

رشا .. صدك

ريم : يمه يمه شوف شلون فتحت عينها وكيفت

رشا .. مكيفت

ريم : اذا هيج عاجبج مجان وافقتي عليه

رشا .. ميفيدني

ريم : ليش ميسبح وصخ بيه ريحه

رشا .. بله بدون شقه

ريم : انطيني عيب بيه شو حلوو وطويل وشخصيه وامكانيه ومخبل مثلج وعصبي مثلج يعني حياتج مراح تخلى من الاكشن ابسط شى تلزمي من شعره تركعي بلحايط يلزمج من رجلج يسحلج بلبيت واذا حبيتو تحتفلون بميلادكم واحدكم يشعل الثاني ويحركه واني اطفيكم لتخافين

رشا .. بله ضحك مو وكت شقاج

ريم : الله عليج معاجبج شعلان

رشا .. لا

ريم : ريه مو عليه احجي الصحيح مااحجي لاحد

رشا .. شتردين ريم مني تره والله مو بحالج

ريم : عاجبج مو

رشا .. يعني

ريم : شنو يعني لو اي لو لا

رشا .. شنو الفايده واذا عجبني ميفيدني

ريم : من ياناحيه

رشا .. من طبعه الصبع من اهله وعاداتهم اني ما اتوالم وياه شفتي اي مكان نكعد بيه لازم نحركه

ريم : احلى والله يخلي يحياتكم دوم متفاعله من مواد الكيمياء حجايه منج وحجايه منه تصير عركه من الروس وراها تبوسي ويبوسج وعاشو عيشه سعيده

رشا .. هواي مأثره عليج المسلسلات كومي مني

ريم : اكص ايدي اذا محبيتي حب مو طبيعي مااتسمى ريم

خلي اروح اطشر خبر تكمله الفلوس للباقين الكعده وياج توجع الراس

سليل : كملت الفلوس وخابرو واتفقو على مكان عافو الفلوس بيه والمفروض بعد ساعه يجي حسام ٦٠ دقيقه اشوف بابا يروح ويجي بلكراج وبلباب احس روحه تريد تطلع الجكاره منزلت من ايده وشفته ترجف ويباوع للسما ويدمع ويمسح عيونه ويرجع يدخن جنت خايفه عليه اكثر مما خايفه على حسام عمو محسن وشعلان وخضير وحتى سيف الكل منتضر وسمعنا صوت طلقات

طلعنا نركض ونشوف بابا حاضن حسام ويبجي من كل گلبه وعمو خضير ورجال من عمامهم ضربو طلقات علمود سلامته

طلعت سندس تركض وتهلهل وعمه وياها اباوع ريم تبجي وحاضنه غزل ومكيفه ورشا واكفه بدون اي دمعه نزلت من عينها  بداخلي اكول مو گلب تملك صخر حتى هذا الموقف مهزها دخلو للبيت والكل يبارك لبابا وانترس البيت ناس وكلها تهني برجعته بذاك الوقت اكثر الي ينخطفون ينقتلون بس  الْحٍمَدٍ للـّہ رجع حسام سلاماات

التهينا نقدم ببسي وعصاير للناس ونسوان كلها اجت تكول عرس

٤ ساعات يله فضت وكلمن راح واني اطلع القواطي  مال ببسي الفارغه صار بوجهي سيف

سيف : شلونج سليل

سليل : عدلت ربطتي وكفت  الْحٍمَدٍ للـّہ

سيف : مبروك على رجعت اخوج

سليل : شكراً ردت اطب وجان يكولي

سيف : شو متزوجتي وينه سجاد توقعت بهاي المحنه اول واحد الكاه

سليل : انداريت عليه وكتله لو يعرف اكيد ميتأخر

سيف : ليش ماعندج اتصال بيه

سليل : شوف سيف اني وسجاد كولشي انتهى بينا

سيف : هااا شعجب

سليل : قسمه

سيف : يعني صحيتي وبديتي تفكرين صح

سليل : اي والله مجنت افكر صح لان لو مفكره ولو مره مجان انخطبت الك بس ثوله وغلطت وهسه صحيت

سيف : يعني تعتبرين خطوبتك غلط مني

سليل : اذا اكو شى غلط سويته بحياتي فهي خطوبتي منك اتمنى تحاللني وتواهبني وتنسى كولشي صار

سيف : تردين انسى أذيتج واستغلالج الي

سليل : اعتقد رديتها واخذت حقك مني

من رخصتك

سيف : سليل اني مستعد نرجع سوه وانسى كولشي

سليل : واني لو ابقى بلا زواج العمر كله مااتزوجك روح شوف بنت الحلال الي تناسبك

سيف : ابقى على غبائج وحبج لواحد ميسوه لحظه تفكرين بيه واحد فاشل شكوكي مريض

سليل : رجاءاً مااسمحلك تحجي عليه

الزم حدك اني انتهى بيني وبينه كأرتباط زواج لكن منتهى بيني وبينه الاحترام والتقدير يبقى هو كلشي بحياتي ومااسمح بشر يجيب طاريه بكلمة موزينه يباوع عليه ومعاجبه كلامي تقربت منه ورفعت حاجبي وحجيت بثقه

وهاااا بعدني احبه بشكه بخباله بمرضه بجنونه بكل صفه موزينه احبه وروحي بيه واتمناه تمني ومااشوف رجال بعده ولو يجي هسه بأشاره منه ارجعله لان هذا روح سليل وعمرها ومااتخلى عن روحي وعمري لاخر يوم بحياتي

عفته وطبيت تقصدت احرك گلبه مااحب احد يحجي عن سجاد لو مهما سواه رجعت للمطبخ واكمل شغل ويه البنات كملنا ودخلنا للهول اشوف ماما شلون حاضنه حسام وتبوس بيه بعد مطلع من الحمام سبح وزين ولبس ملابس نظيفه تقربنا عليه نسلم لهسه مسلمنا عليه صحت البنات وتقربنا نبوس بيه توقعت يكون بلهفه علينا بس هو ولا يمه صّـْْ(☑)ـْْحّ بادلنا الاحضان بس مو بلهفه اله رشا من بعيد ولا تقربت كالت  الْحٍمَدٍ للـّہ على سلامتك

سندس : متجين تبوسين اخوج

رشا .. كافي انتي شبعتي بوس شيسوي بعد بوساتي

سندس : طبج مرض تعال حبيب امك

جان يطب بابا

وكعد يمه ويسولف شلون خطفوه جان مبين ضاربي لان اكو علامات على وجهه مال الضرب وره مكمل الكلام جان تكول سندس

سندس : عيني من باجر اني اسفره ماابقي لحظه هنا

حجي طه : شلون يعني تسفري

سندس : اسفره من كل عقلك ابقي بلعراق بعد الصار ابني جان خسرته يرجع للاردن ويقدم لجوء وياخذ الاوراق وياه مال الخطف تساعده ماابقى بعد هنا

حجي طه : غير يبقى ويه ابوه وخواته

سندس : واني يمه اذا صار بيه شى يفيدني ابوه وخواته

نهر : خلف الله عليج مو ذني بناتج

سندس : بله نهر لتدخلين اني من حقي اخاف عليه هو هلوحيد وشفتي شصار بيه مامستعده اضحي بيه

رشا .. متحملت اسكت وحجيت لعد عادي عندج تضحين بأربع بنات

حجي طه : شوفي سندس ابني باقي يمي معودت رجع الي ولخواتي تردين تشوفي عادي يجيج بس هاي سالفه السفر تشيليها من راسج

سندس : لا والله ماابقي لو مو انت من كل عقلك اخلي ابني للموت كوه طلعناه من حلك الموت تريدني احط ايدي جوه خدي وابقي لحد مايصير بيه شى والله علمود انت متكدر بدونه

حساام: اني مو صغير وياهو اليجي يقرر مكاني

سندس : بله احجي انت يمه شتريد

حسام : من باجر احجز وارجع للاردن ماابقى بعد

حجي طه : واني وخواتك

رشا .. احنا منو حتى الاخ يتنازل ويبقى

حسام : لتدخلين انتي

حجي طه : عوف اختك واحجي ويايه

وين رايح وعايفني

حسام : بابا اني ماابقى مامستعد اخسر حياتي حقك انت مشفت الصار بيه وشسوو بيه وصلت الموت جم مره اتشاهدت وكلت رحت بيها لو جنت بمكاني متفكر تبقى بلعراق

حجي طه : ابني الالاف الناس تهجرت وتأذت وتضررت ومسافرت وبقت اني برگبتي اربع بنات وانت لازم تكون وياهن اقلها اذا صار عليه شى انت تصير حاميهن اني ذبحت روحي وبعت المحل وكولشي عندي بس حتى تبقى ويايه

سندس : شنو عيني تعير ابنك لان انطيت فلوس

حجي طه : اسكتي لخاطر الكعبه محاجي وياج اني احجي ويه ولدي الوحيد الي اكول عكازتي وحامي بناتي وسندهن ولك شوف ذني منو الهن اذا صار عليه شى شوفهن شابات اربعه وعمتهن خمس نسوان منو الهن

حسام : مثل معاشن قبل بدونك ودوني يعيشن هسه بلعكس هسه كبرن ويكدرن يعيشن نفسهن لو بس وحدتهن تلاسن وتجاوز

رشا .. احترك گلبي متحملت وكتله هذا مو هذا ابنك الذبحت روحك عليه لا اكل ولا شرب وردت تموت وراه وبعت مطعمك وباب رزقك هاك فلست من وراه واضرب ايد بأيد شفت رجعنا صفر اليدين وراح يعوفك ويروح من جنت اعيط واكول ميستاهل كلكم صرتو ضدي شوفه هذا يستاهل ترجعنا حسره اللكمه علينا علموده

حجي طه : كاافي رشا احترمي نفسج

رشا .. محترمه بابا بس ابنك ممحترم وباعك وانت ضيعت الدنيا وبعت كولشي علموده هاي سوايه تسويها بينا علموده واحد تربايه امه ومو رجال

جان يضربني بابا راشدي كدامهم جفلت رغم الضربه قويه بس منزلت ولا دمعه

حجي طه : اصعدي فوك وصوتج مااسمعه

رشا .. عفتهم وصعدت

سليل : جفلت من بابا ضرب رشا بطبعه ابد ميضرب ولا ضارب وحده بينا اشرت لريم وغزل يصعدون وصعدنا كلنا مردت اصلاً اشوف المهزله الصارت

حجي طه : حسام تبقى لو تسافر

حسام : اسافر

حجي طه : هذا هو الله وياك

سندس : امشي يمه ويايه لبيت خالتك انوار اخاف ابوك يلعب بعقلك ويقنعك تبقى

حجي طه : لتخافين هذا تربيتج ميتغير اخذي وروحي

نهر : طب طه لغرفته وسندس اخذت حسام وكم قطعه ملابس مالته وراحت

دخلت وراه لكيته حاط ايده على راسه ومدنج بلكاع

كعدت بصفه

ليش هيج ضربت رشا اول تالي تضرب وحده من البنات

حجي طه : صوتها عالي وتجاوزت

نهر : من حركت گلبها عليك

حجي طه : يمكن لان حجيها صحيح ضربتها

نهر : اروح اطيب خاطرها وانت على كيفك

ويه نفسك خلي يروح بقت عليه ياطه

صعدت لرشا لكيتها صافنه ومحتحجي ويه احد بس كالت مابيه شى ليضل بالكم

وسكتت

سليل : ثاني يوم اجه حسام واخذ غراضه وبس كال مع السلامة يعني جيته كأنه بس حتى ياخذ الخير الصار عدنه ويرجعه لنقطه الصفر بابا مطلع ولا سلم ولا حتى فكر يشوفه قبل ليسافر جانت خسارته جبيره باني امال راح يوكف بظهره وتالي كسر ظهره وراح

وره اسبوع خلص الفلوس العدنه كعد نشوف الحال وخاصه بابا مطلع يدور شغل حيل مكسور خاطره

رشا .. انزعن

ريم : شننزع ولج 

رشا ..تراجي مالتجن

سليل : هاااج ونزعنا تراجينا بدون حتى منسأل ليش لان نعرف حتى ينباعن ونعيش بيهن هلكم يوم حتى غزل نزعت بدون متسأل

عافتنا ريم ونزلت

دكيت غرفه بابا وسمعته كال ادخلي

دخلت واني مدنجه وحطيت التراجي بصفه

هااك بابا بيعهم واشتري عربانه واحنا نساعدك بالاكل نسوي الحمص والباكلا واذ تريد ماطول هسه حار الجو سوي موطا وبلشتا عود نسوي لبلبي واني هم عندي راح اعلك ورقه على الحايط الي تريد درس خصوصي اجتماعيات ادرسها وشيجي منهن انطي الك ونشوف سليل بلكت تلكي شغله ونتساعد كلنا

اشرلي تعالي اكعدي بصفي اجيت كعدت وهو عدل كعدته كدامي وكال وين ضربتج

رشا .. اشرت على خدي تقرب وباسه شكد تحملت صار ايام ماابجي بجيت ونزلت بست ايده وحضنته

حجي طه : لتبجين بابا دمعه منجن تكطع لحمي

رشا .. مو قصدي اعلي صوتي عليك العفو بس والله من حركت گلبي يعز عليه اشوفك مكسور ظهرك وتدفع عربانه تالي عمرك مكان ماهسه كاعد معزز مكرم ومرتاح ترجع تأذي صحتك وتفتر علمود توكلنا انت تعبت بلمطعم ومعودت وضعك يرتاح شلون اشوفك ترجع للتعب واسكت

حجي طه : اني معزز ومكرم بيجن انتن صحتي وعزوتي جنت غلطان يوم مافكرت ابني هو سندي هسه عرفت انتن سندي وظهري

رشا .. بس اشر بابا كلنا فدووه لعيونك بس من حجيت علمود حسام لخاطرك والله

حجي طه : انتي بس خليج بمكاني ابني ديموت شلون اسلمه للموت علمود احافظ على المطعم نفرض حافظت عليه وبعدين اوكلكم واشربكم منه وهو جوه التراب شلون اكدر انام الليل واني ادري اكدر انقذه وابخل عليه واحرمه من عمره

رشا .. بس امه تكدر تدفعله

حجي طه : ادري بيها بس هاي وحده جشعه ومااعرف شنو الي بعقلها يجوز توصل مرحله بيها متدفع وتضحي بيه مكدرت اجازف وانتظرها

كلت فدووه الفلوس اله المهم يطلع سالم يابنتي هذا ابني حتى لو عاق مااكدر اشوفه يموت كدامي ولو وحده منجن الله يستر عليجن يمكن حتى ماالحك اتفاوض وياهم واموت بلحظتها هو عافني واختار نفسه هذا هو الله وياه المهم ماانام واني دافن ابني بيدي ولا من اموت اقابل وجهه كريم يحاسبني على تقصيري تجاهه كله رزق من الله الفلوس تتعوض النفس والاب مايتعوض

رشا .. هذا هو بابا المهم تكون مرتاح احنا وياك وشتفصل احنا نلبس

اندكت الباب طبو كلهم كعدو بصف بابا وغزل بحضنه رغم كبرت وبلغت بس بعدها ميحلالها الكعده اله بحضنه وحتى جنات كاعده ويانه

حجي طه : ربيتي يانهر والنعم من تربيتج

نهر : ذني بناتك والطيبه ورثنها منك

حجي طه : الله يحفظهن ويبارك بيهن وانتي خامستهن عمو

جنات : اكيد عمو تسلم الله يحفظك النا

ريم : اني جعت تره

كفختني رشا ام بطن متكدرين تسكتين

ريم : من اجوع انساكم كلكم يله نسوي اكل يله بابا حبيبي تعال ويانه ناكل سوه

سليل : بيومها رجعنا لحياتنا بدون حسام اعرف بابا مقهور حيل بس مابيده شى

وبعد اسبوعين صار عرس جنات بسبب الوضع استعجلو بلعرس لهسه اتذكر طلعت تخبل هي وجهه جنه تفاحه مربرب بس الجسم رشيق جانت كولش حلووه العرس بدون مزيقه لان ممنوع وضع تعبان لهذا بس زفه عاديه كم سياره اخذوها وراحو لزمها بابا وسلمها بيد عريسها واستغربت لبسها كلاده ذهب كدام عيالها  وباسها من راسها وماما نهر محبس ومن سألت ماما نهر كالت اداين من محسن حتى ليطلعها كدام عيالها بدون كولشي اشترى الكلاده والمحبس وانطاني المحبس اني البسها حتى ليكولون عمتها منطتها شى

ابتسمت على طيبه بابا وحنانه

رجعنا للدوام وبابا لهسه مشترى العربانه بس يوميه يطلع من الصبح يرجع لليل تعبان هلكان وينطي مصرف لعمه منعرف بشنو يشتغل اباوع هدومه بيها تراب ومن ينام يون من ظهره لحد ما عرفنا يشتغل عماله بواحد من العمارات تخبلنا بيومها ردنا بس نقنعه حتى يبطل مقبل لان اليوميه زينه وتكدر تسد ولو شى بسيط من حياتنا

وبيوم اجه عمو محسن طاير للبيت وجان يوم جمعه نتغدا وطب ركض بس فتحت الباب غزل

محسن : ولك جبت الك خبر يسوه ملايين

حجي طه : والله اخبارك كلها غمه

محسن : لك صرفو منحه مال شهداء السياسيين وانت مشمول بيها علمود اخوك جعفر ولك يكولون ٨٠ مليون لكل واحد من اهله  لك يول راح اطك ويصير براسك خير يلفكر

يتبع ...

ادمن مدونة نور قلبي

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_السادس_عشر

ﺗﻌﺎﻝ ﺑﺼﺪﺭﻱ ﺍﺿﻤﻚ ﻳﺎﺣﺒﻴﺒﻲ ﺷﺒﻴـــﻚ

ﺑﻠﻜﻲ ﺑﺼــﺪﺭﻱ ﺍﺧﻔﻒ ﻫﺎﻳﻪ ﻭﻧﺎﺗـــــﻚ

ﺍﺣﺴﻚ ﺍﻧﺘﻪ ﺑﻴﻪ ﻭﺍﻧﻲ ﻋﺎﻳــــﺶ ﺑﻴـــﻚ

ﻭﺍﺣﺲ ﺩﮔﺎﺕ ﮔﻠﺒﻲ ﺗﺤﺎﭼﻲ ﺩﮔﺎﺗــــﻚ

ﺍﺫﺍ ﺗﺬﺑـﻞ ﻋﻴﻮﻧﻚ ﻓﺪﻭﺓ ﺍﻟﻚ ﻫﺎﻟﻌﻴــــﻦ

ﻭﺍﺧﺬ ﻋﻴﻮﻧﻲ ﺍﻟﻚ ﻭﺍﻧﻄﻴﻨﻲ ﻣﺎﻻﺗـــﻚ

(شعلان )

محسن : ولك جبت الك خبر يسوه ملايين

حجي طه : والله اخبارك كلها غمه

محسن : لك صرفو منحه مال شهداء السياسيين وانت مشمول بيها علمود اخوك جعفر ولك يكولون ٨٠ مليون لكل واحد من اهله  لك يول راح اطك ويصير براسك خير يلفكر

حجي طه : منيلك هذا الحجي

محسن : يمعود اكو مؤسسه فاتحيها وهي توزع هاي المنح وكالو لكل واحد ٨٠ مليون

حجي طه : انت خلصها ويايه كالو وكالو وثاني شى اخذ عوض عن دم اخويه من كل عقلك

محسن : شلون راح اركع راسه بطاوه الطماطة باع هذا يتفستق وهو كاتله الفگر

ريم : هههههههه

محسن : هاك هاي السفيهه ام حلك ضحكت متكدر تضمها ولج تضحكين على ابوج

ريم : اني ام حلك عموو دشوف حلكي غير يخبل

محسن : اطب بيه تريله من الگبر

ريم : بابا الله عليك حلكي جبير

حجي طه : هاي شبيج بابا مالج دخل بعمج كبر واخرف حلكج يخبل وصغير وانت لتعيب على غزال الريم

ريم : على عنادك عمووو

محسن : قصدك باص ريم تتذكره شلون جان يودينا للدوام والمدارس مابيه خير يمشي على كيفه بس اسمه ريم عود غزال بنتك هيج الاسم غزال والوجهه صخله مدعومه

ريم : والله زعلت عمو هيج صارت كمت من الاكل

محسن : ام بطن ادري بيج راح تاكلين بلمطبخ

ريم : لا مااكل وزعلت وهااا اخاف تصالحني مااتصالح

محسن : زوج الي يصالحج

نهر : جوز منها محسن وكمل يمعود هاي شنو المنحه

محسن : يكولون الي عنده اخ شهيد يروح يسجل وياخذ لو ٨٠ لو ٨٢ هيج شى وتتوزع على اهل الشهيد وانتم عدكم جعفر يعني طكيتو بلدهن الله ربكم شتردون بعد

حجي طه : يمعود بس حجي ومثل مكتلك مااخذ فلوس دم اخويه وعلى اي اساس ومنو يكول الفلوس حلال وحتى لو اكو فلوس انطيهم لبنته جنات

محسن : مو بناتك كاعدات مااريد اقسم كدامهن الله يرحمه لاخوك عود استلم وسويله ثواب

حجي طه : جنت متأمل لاخر لحظه الكاه عايش

محسن : هواي ناس مثلك متأمله وتاليها لكوهم عظام باقين

نهر : هلمره حتى جثه ما اله اوف سوده بوجهي شاب ماشاف من عمره شى اخذوه الميخافون من الله هسه لو بس نلكه جثته ضال لا گبر اااخ لجمت الاخو مالها دوا

حجي طه : والله لهسه حتى مااكدر اكول الله يرحمه لساني مينطقها

محسن : اسمع طه تره انت هسه بوضع مو مال اخويه ومثالياتك الي خلتك تالي عمرك تشتغل عماله

حجي طه : محسن كافي وإشر بعيوني على البنات

محسن : شكو تأشر مااسكت والله شنو بناتك صغار وحدتهن بغل شكبرها شوفهن

عرايس

رشا .. هسه مفهمنا كعد تمدحنا لو طيحت حظنا

محسن : حجت نيوتن بله يافيلسوفه مكعد تسمعين كلام ابوج الي يغث مااريد الفلوس وميصير وهاي الكلاوات من الاخير نروح نقدم ونسوي معامله لا احرك عشيرتك كلها هو احنا كتلنا الفگر والجلب يبجي علينا وهذا جايني يوزع ملايين ويصيح حرام

رشا .. بابا والله كلام عمو صحيح وانت اصلاً مماكل حق جنات هي بكل الاحوال تاخذ حالها من حالك

وجان نسمع ريم من المطبخ تكول

ريم : ولكم عمه هم الها صرنا من اصحاب الملايين

محسن : هاك حتى الدوده حجت وكاام بهدوء

نهر : يمحسن جوز منها

محسن : اششش وصل للمطبخ

ريم : طبيت للمطبخ اكل لان اكو بعد على الطباخ معكرونه صبو بس ماعون الها كلت اكل بدون محد يحس لان عود زعلانه حتى بعدين اخسر عمو واني راسي بلطاوه ومااحس غير ينجر شعري اااخ ااخ

محسن : تعالي روحي اكلي وبطلي هاي كلاواتج

ريم : بحلكي الاكل مليان واحجي ويطفر

مااكل زعلانه

محسن : لا بالله وهاي المدافع الي تطلع من حلكج شنو حلويات العيد ولج فاره عبالج مااعرف متكدرين بدون الاكل

جرني وكعدني بصفهم وهمه يضحكون

اي اضحكو وانتم تشوفون اختكم مسحوله من شعرها ومحرومه من العشا ويحجي عليه ومدافعون

سليل : والله بس نحجي تنگلبين علينا

غزل : انتي وعمو اصدقاء

محسن : ولكم نطق ابو الهول فدوه لصوتج سمعينه والله شلون انتي اخت ذني السحالي وحدتهن لسانها لسان ضفدع اذا انمد ياستار منه لازم يصيد شى

رشا .. اليوم خوش مستلمنه عمو صخول وسحالي وضفادع شبقى بعد بينا حديقه حيوانات سويتنا

ريم : والله اني مااقبل احد يحجي عليه وبما ان اني كبرت وراح ادخل كليه الي يصالحني لازم ب١٠ الالاف حلويات يترسهن ويجيبهن غيرهن مااباوع بوجهه وهو يسمعني مو صح يااخت رشا

رشا .. صّـْْ(☑)ـْْحّ يااخت ريم كلامك عين العقل

محسن : اطرشيت مااسمع شنو هذا الادب النزل عليجن اخت وعين العقل والله داحس يوم القيامه تقوم

سليل : اي والله عمو هاي ريه وسكينه بعد

محسن : الف رحمه على امج لا خلتولي امج الف رحمه على ابوج صدك احسن تشبيهه ريه وسكينه

سليل : اسم الله على بابا ليش هيج عمه تكول

نهر : ماما الرحمه للعدل والميت عادي

محسن : لا مو مدريتي اذا ابوج مااخذ المنحه راح اذبحه بيدي وبذاك الوكت تجوز عليه الرحمه

حجي طه : هسه من اجيت بس هوسه وخبصه لا رضيت تكعد تاكل ويانه ولا خليتنا ناكل براحه جنك طفل ولك يول كبرت عجزت عمرك اربعينات ومبقى شى وتدخل الخمسين

محسن : شبيهه گلي شو اخبل بس انت تغار مني لان كل البنات يتحارشن وانت يصيحن الك عمو لو حجي

حجي طه : غير حجي اني قابل خفيف مثلك اخذ زمني وزمن غيري

محسن : على اساس شلون جنت جون ترافلتا تمشي وتركص وتغني وعايش حياتك بلطول والعرض شو كطعتها حروب وسجون وشغل لو مسجون حرب ميطيح حظه بكدك

حجي طه : وتالي هسه

محسن : الله العالي باجر نروح للمؤسسه ونسأل ونشوف معقب يكمل الاجرائات وتاخذ فليساتك وتكعد وتسكت وعوف المثاليات رحمه لحسين ابوك تره وصلت حدها وياك من ساعه الكشره من عرفتك لو مستشهد بلحرب  ولا صداقتك الغمه  اقلها ادخل الجنه مو هسه من وراك ادخل النار كل شويه شايل غيبتك وحاجي عليك

حجي طه : ههههه بعدنا بيها روح الله وياك

محسن : كالو وره ماخلصت الزفه اجت الرعنه تهلهل هذا حالي وياك وره سنين عشره وايام سوده مثل وجهك جاي تكول روح لو لان راح يصير عندك فلوس تريد تدفرني

ريم : اي بابا عوفه لعمو يحجي عليه

محسن : هااا مو هسه اخليج تكمزين ام حلك

ريم : شوف هاي كدامهم اذا متصالحني بعلاكه نساتل والله مااحجي وياك بعد حلفت الله

محسن : لتحجين خلي راسي يبرد منج

ريم : مااشي عموو كمت وصعدت وعفتهم

نهر : هسه شراح تسوون

محسن : نروح نستفسر ونسأل يله اروح اني وانتي نهر عقلي اخوج مو وكت هاي السوالف

نهر : الله كريم

محسن اروح اني تعالو سدو الباب ورايه

رشا: اني اكوم عمو وراك

طلعت وراه جان يكولي سدي الباب وابقي بلكراج دقايق واجي

بقيت اروح واجي بلكراج واباوع على الحديقه وره شويه اجه عموو هااج

هااي شنو 

محسن : علاكه لام حلك مااريدها تزعل مني

رشا .. هههههه والله ريم لعبتها صّـْْ(☑)ـْْحّ

محسن : كوليلها لتحلف بعد لا اكسر راسها

رشا .. ميفيد بعد خسرتك

محسن : تره مو بس الها اخاف تقشمركم الكم هم بس اكو شغلات الها وحدها شسوي هاي الفصعونه مااكدر على زعلها

رشا .. الله يحفظك النا عمو مع السلامه

صعدت ركض لكيتها واكفه كدام المرايه وتباوع على البهاق مالتها وتفحص كل وحده   كل مره هيج تسوي ومن تشوف وحده من عدنا طبت عليها تسوي نفسها تعدل بشعرها

هاااج بخت علاكه شكبرها

ريم : هلا والله شعبالج عيني اني ريم والاجر على الله

تعالي اكلي ويايه وصيحي البنات

رشا .. هو اصلاً كال حاسب حسابنا بس اكو كم شغله بس الج

ريم : فدووه لعمو محسن يخبل

رشا .. ههههه خوش لاكيته على كد ايدج

ريم : بس لتحطين عينج دخيلك

سليل : بقينا اني وعمه نقنع بابا بسالفه المنحه لحد مقتنع ومن الصبح طلعو هو وعمو جنا كاعدين على نار وصارت ساعه ١١ الصبح رجعو والوجوه مگلوبه اول مدخل سألته عمه هاا بشرو

محسن : اسمة بالحصاد ومنجله مكسور

نهر : شنو يعني

محسن : ماله حق طه لان اخوه متزوج وعنده بنيه تروح الفلوس للبنيه وامه الشهيد يعني لامج يمسعده

حجي طه : كلشي قسمه والله فرحت لان جنات راح تجيها فلوس

نهر : انت مو كلت لكل واحد

محسن : والله كالولي طلع المبلغ ٨٠ مليون لكل عائله مو كل نفر ولان اخوج مو اعزب الورثه مالته بنته وامه

نهر : وطه واني

محسن : خلصوها سوو ثوابات للمرحوم من جيبكم

حجي طه : كتلك مصار شى وبروح ابوك اتفق ويه صديقك المعقب يطلع الفلوس لجنات خطيه يتيمه وتزوجت جديد خلي الفلوس تفيدها

محسن : والله سبع يعني تركض حتى اطلع الفلوس لمرت ابوك

حجي طه : مالي دخل بمرت ابويه اني لخاطر هاي اليتيمه منو الها خلي تطلع وتعيش مرتاحه بلكت تشتري مشتمل احسن ماكاعده ايجار وهم حالها يتعدل هي هم مثل بنتي وارتاح من اشوفها بخير لتنسى هي بت جعفر ومااريد اقصر وياها كافي السنين الراحت ضلت خدامه عند الميسوه وأذوها بروح ابوك محسن كمل المعامله

محسن : اوف صار يابه صار تدلل اني اترخص اروح

سليل : اباوع لبابا يبين قوي ومرتاح بس اعرف بيه مكسور وخاصه تأمل تجي فلوس ويرتب وضعه بيومها البيت كله انقطعت شهيته حسينا روحنا رجعنا لنقطه الصفر والله كمنا نحس الفگر والعوز مكتوب النا لاخر عمرنا

ورجع بابا يشتغل عماله جان هذا الشى ياكل ويشرب ويايه والله احس على ساعه اموت من القهر من وراه من يرجع يون من التعب حتى الضحكه بدت تختفي من بيتنا واحنا نشوف ابونا هذه حاله

وحسب معرفنا من عمو المعامله مشت بالاوراق الثبوتيه ماال جنات الي راح بابا بنفسه جابها من عدها

ومرت الايام بقهر وقله الحيله حاولنا اني والبنات نقتصد بلمصاريف والشى المنحتاجه ومو ضروري منشتري واجه رمضان نهايه شهر التاسع رغم هو شهر الخير والبركه بس علينا جان قاسي اكل قليل وبابا يوم اكو شغل ويوم لا حاولنا منحسسه واي شى ناكل ونسوي نفسنا مرتاحات بس هو من ياكل جان يباوع بلوجوه ومرات يختنك ويكوم احنا متعلمين وضايكين المر من احنا واصغار بس بابا مكعد يتحمل يشوفنا هيج لا لحم لا سمج اكثر اكلنا نواشف طماطه وبيتنجان وبتيته لو تمن ولبن وشوربه والتمن مره احمر مره اصفر ومرات دجاج نسوي لان رخيص ونحاول انوع بيه ونسوي اشكال بس احس بابا ابد ممرتاح

ويباوع علينا بعيون كلها قهر

بيوم قبل وكت الفطور نص رمضان اندكت الباب وراحت فتحتها غزل طب شعلان وبيده اشكال غراض

شعلان : يابه تستقبلون خطار

نهر : ياهله بيك بيتك هذا

رشا .. طب شعلان واباوع بيده اشكال العلاليك وسمجتين سكف ويطبب بلغراض واني صافنه

حجي طه : هاي شنو شعلان

شعلان : جبت فطوري ويايه گلت حتى مااصير ثكيل افطر كوه عدكم

حجي طه : تره خير من الله عدنا ليش گلفت نفسك

شعلان : منو كال مكلف اكوله فطوري جبته ويايه واريدكم تفطرون ويايه اخاف اعزمكم ومتجون كلت اجي اني

حجي طه : هله بيك شوكت متجي وبدون اي شى زارتنا البركه بس بدون الفطور هسه البنات ونعر اسويلك احسن فطور

شعلان : هاي شبيك طه بينا هاي السوالف معناها تطردني

حجي طه : لا والله بس مااحب تكلف نفسك

شعلان : عود على الجايات اجي بطرك روحي وهم افطر يمكم لو متريدني

حجي طه : شلون بلعكس صار فتره مشايفك والله اشتاقيت لسوالفك تعال اتفضل

رشا .. اختنكت حيل واني اشوف البنات يدخلون العلاليك دخلت للمطبخ فتحتهم لكيت خمس نوعيات فاكهه كل نوع بلثلاث كيلوات وسمجتين سكف وكيلوين كباب والماعون الثاني مشاوي تگه ومعلاك هم بيه بلكيلوين وصمون وانواع المقبلات حتى الببسي والسڤن جايبه

بله شنو معناها جايب هلمد عود ماعدنا ويتصدق علينا

سليل : على كيفج رشا تره مبين مو قصده وشفتي شلون دخل فرحان ومبتسم وجاي يفطر ويانه لتكبريها

رشا .. شلون مااكبرها عود ماعدنا فطور وجايب فطوره ويااه

ريم : تره اني شميت الريحه يعني مال تكولين كرامتنا وهاي السوالف اركعج بجدريه الشوربه

رشا .. بله انجبي انتي شنو مماكلين

نهر : خير بنات شصاير صوتكم ليبره

ريم : تعالي لبنت اخوج البطرانه الرجال اشكال جايب اكل وهاي جاي تبيع براسنا مثاليات بابا هذا اكل وعند الاكل تسقط كرامات وامم

رشا .. اي مو مشوهه ومماكله

ريم : اي وعيني ضيگه وجوعيه بعد شيعجبج هم اكل من هذا الاكل وانتي ضلي طرگعي مثل هذا البصل الي بطاوه

نهر : ماما رشا تره لتنسين هو هم كرايب ابوج مو غريب وجاي يفطر يمنه ومحب يكلفنا وجاب شغلات ويااه

رشا .. مو هلكد يجيب مابيها معنى تصرفه

سليل : ليش ترجفين ياعيني شنو هاي الاعصاب الي انتي بيها

ريم : تره المدفع راح يضرب والله لو بيدي افر المدفع واخلي يضرب براسج المزنجر

غزل : ريمو راح يضرب يله تعااي

سليل : وركضت ريم مثل كل مره هي وغزل كدام التلفزيون من يضرب المدفع يشمرن نفسهن عود ضربهن ولا يكبرن يموتن على هاي الحركه وضحكهن لوين يوصل

نهر : يله تعالو صبو الاكل

رشا .. الي جابه الاخ موو اني مااكل انتي مو مسويه تمن اصفر وبتيته وصدر دجاج اني اصب واكل

نهر : ليش يايمه شوفي الاكل شكد طيب مبين من ريحته

اني مااريد

ريم : يابه عوفيها خلي تزرف الريحه خشمها

بقت رشا متوتره وتلوب وبس طلع بابا حتى يدخل حمام ويتوضى طبت تركض عليه عرفت راح تسوي شى

رشا .. شنو معناها هلكد جايب اكل

شعلان : والله فزيت عبالي طبو علينا الامريكان

رشا .. احجي شعلان ليش هلكد جايب اكل قصدك تتصدق علينا تره احنا منقبل صدقه ولا اي شى من احد عشنا طول عمرنا نفسنا عزيزه ومنقبل انت او غيرك يبيع خير براسنا

شعلان : تره انت فاهمه غلط اني بس حبيت افطر وياكم

رشا .. قاطعت كلامه وكتله تجي تفطر وتاكل من اكلنه مو تجيب اشكال والوان وتحسس بابا بعجزه وقله حيلته تدري هسه شصار بيه من طببت الاكل وميكدر يجيب النا منه لتشوفه يضحك وكلامه عادي اني اعرف هسه داخله نار بس بالعها وساكت

شعلان : تره انتي حيل كبرتي الموضوع عمي حتى الفطور مااريده

رشا .. اذا متريده تاخذ اكلك والي جبته وياك منقبل صدقه من احد جان يكون ويوكف كدامي وصار نار وجهه بوجهه ويايه ويحجي ويحرك ايده حسيت على لحظه ويضربني من اعصابه هو يحجي بصوت ناصي حتى ميسمع بابا بس كلامه بأعصاب

شعلان : ياصدقه شبيج تخبلتي طه ابن عمتي وانتم بناته ومثل اهلي مكفرت ولا ذنبت ردت بس اجي افطر انتي ليش هيج دومج تفهميني غلط واعصاب وحاقده على الدنيا كلها تره اني مو امج ولا اخوج ولا بيبيتج انعام وحاقده عليه سويت شى وممتقصد لا اقلل من قيمتكم ولا اتصدق وهاي الخرابيط مالتج حبيت افطر وياكم هاي كل جريمتي ولو اعرف هيج تقابليني ولا اوصل واياج مره ثانيه تعلين صوتج عليه عندج حجي تحجي بهدوء مو تگبين بوجهي اذا ساكت هسه تره لخاطر ابوج والناس صيام مااريد اكسر واهسهم ويومهم واله ماابقى لحظه هنا

بطلي هاي سوالفج مال صدقه وانطاني وخلاني فكري ولو مره بطريقه نظيفه لا كل الناس عندج ولد گلب وقصدهم يأذوج او يقللون من قيمتج

سليل : شفت بابا طلع ركضت مردت تنحرج رشا وخفت ليشوفها وحدها ويه شعلان سويت نفسي احجي وياها يله رشاوي افرشي السفره وشمرتها عليها

حجي طه : تفضل شعلان مو ردت تتوضى

سليل : جريت رشا ولج تخبلتي

رشا .. متخبلت بس شفتي شسوه

سليل : الولد مسوه شى حتى لو ضجتي ميصير هيج تتصرفين يبقى خطار بيتنا

نهر : وينجن بنات يله تعالن صلن حتى نصب

رشا .. رحت صليت المغرب دومنا هيج نصلي المغرب ونفطر وراها نصلي العشا

لكيت البنات مكملات قبلي وفرشنا السفره وانمددت اشكال الاكل رغم عمه وطه هواي حجو على الاكل بس هو جان يبتسم ويحاول يوضح الهم بس من يدير وجهه عليه تروح ابتسامته وعيونه تصير نار رحت للمطبخ وصبيت ماعون تمن وحطيت فوكاه بتيته وصدر دجاج وبصفه كاسه صغيره زلاطه مسويتها غزل وجبتها واجيت البنات بقو يباوعون عليه بس ميكدرون يحجون لان بابا كاعد وهم شعلان هستوني مديت ايدي اخذت خاشوكه انمدت ايد واخذت الماعون رفعت راسي شفته بيد شعلان

شعلان : اني حاب اضوك طبخ نهر ولو ضايكه قبل بس عجبني ولو اخذته منج تكدرين تصبين غيره

رشا .. باوعت بحقد عليه وهو ولا اهتم

حجي طه : ولك مو خبصتنا فطوري وفطوري وتالي متاكل منه

شعلان : لا ليش اكل بس حاب اخلص هذا الماعون بالاول اكل نهر ماكو مثله

رشا .. كمت جبت ماعون ثاني صبيت وكعدت گباله اكل جنا كاعدين بلكاع فارشين سفره وناكل لا اراديا ارفع عيني اشوفه شياكل وارجع انزلها طول فتره الاكل هو ما مد ايده على اي اكله جابها هو شرب الشوربه الي اني مسويتها وميعرف اني بس كلش حبها واكل كل الماعون الجنت صابته جان يكول رشا

رفعت راسي وباوعت عليه

شعلان : اذا مصارت زحمه عليج بعد صبيلي اذا انتي صابه مال عصافير وين اودي

رشا .. رفعت تك حاجب وكتله هذا الاكل الي جبته كدامك خير من الله ليش متاكل مو هو فطورك

شعلان : طه تره بنتك مو معزبه ومتعرف تضايف اني اريد اكل تصبلي وهي تتحجج متريد تكوم وتريد توكلني على كيفها

حجي طه : كومي بابا رشاوي شجاج عيب بنتي

رشا .. نفخت بقله صبر وسحبت الماعون من ايده وكمت شمرته بلسنك وصبيت بلم (ماعون كبير ) وخليت بيهم وجبته گلت خلي اشوف شلون ياگله كله

تفضل

شعلان : اي هسه خوش من الاول جايبه ماعون مال ستكان جاي وصابه جم خاشوكه بيه

رشا .. بربك ذاك شكبره وتكول ماعون صغير

نهر : خلي ياكل بنتي وتعالي كملي فطورج

ريم : رشاوي لقمه القاضي بلسمجه هااج مو تحبيها

رشا .. مااريد حجيتها بنتره

ريم : بكيفج اكلها اني كون دوم مترديها حتى اني اكلها

سليل : اباوع على رشا تطحن ويه روحها اووف منها همزين بابا ممنتبهه

رشا .. اباوع على شعلان اكل الماعون كله ولا تمنايه بقى

شعلان : والله وعاشت ايدج نهر النسوان المعدله بلطبخ مثلج طارن بنات هلوكت مخلصاتها تگلاه كولشي ماكو اكل ونوم وتكعد تگلي وتسوي لفه عود مثل هذا الاكل الطيب لو الشوربه الطيبه

نهر : الشوربه رشا سوتها

شعلان : هااا بس شويه مالحه

رشا .. باوعت صفح عليه ودرت وجهي الكل اكل واني مأكلت من وراه مركزه ويااه مو بيدي حيل اختنكت شلنه الاكل وضل من عنده هوايه خلته عمه بلثلاجه حتى غير وقت نحمي وياكلوه سويت جاي الهم وحطيته بلصينيه تقربت منه والله ردت اذبه بحضنه مثل قبل شلون من كلاص ذبيته عليه  بس تكول عبالك حس بيه باوع بعيني وهمس جان بابا كاعد وعمه نهر بصفه ويسولفون

شعلان : دير بالج تسويها هلمره تلث كلاصات يعني ابوج ميخلصج مني

رشا .. تقربت وقدمتله  وهمست والله لو بيدي القوري كله اذبه بحضنك واخليك شهر نايم بلمستشفى بقسم الحروق

شعلان : والله اخليج انتي السستر مالتي (الممرضه) واخليج انتي بيدج اداويني

رشا .. وكفت وكتله هلووو

نهر : هااا رشاوي بيج شى

رشا .. لا لا مابيه ارتبكت وهو اخذ الكلاص ويبتسم

رجعت للمطبخ وكعدت والبنات غسلو المواعين وصعدو وبقت سليل كعدت بصفي

سليل : تره الي ديسوي لخاطرج مو لخاطرنا

رشا .. درت وجهي عليها شنو قصدج

سليل : لتغالطين روحج تره شعلان يحبج ومبين عليه

رشا .. حبته حبايه كون

سليل : رشاوي اعرف بيج عندج مشاعر اتجاهه ودومه بالج

رشا .. هاي شبيج سليل الاكل مأثر عليج

سليل : لتغالطين نفسج هو مفضوج اول ميطب يدور بعيونه عليج وانتي طول ماهو بلبيت متوتره واعصاب

رشا .. هو يسوي شغلات تستفزني

سليل : مو قصده بس انتي دوم تفهمي غلط وشفتي اليوم اعرف تهجمتي عليه والله اعلم شحجيتي وخليتي الولد ميطخ الاكل الجايبه وخلصها تمن وصدر دجاج

رشا .. حجيت الحق

سليل : من وجهه نظرج مو من وجهه نظره رشاوي لتصيرين مثلي وتخسرين الانسان الي يحبج شعلان يحبج وخطبج قبل واعرف بعدج باله ورايدج واضعاف قبل واكيد يحبج عيونه تكول هيج اني ماادخل بحياتج بس انطي فرصه اله لا بكل شى تتهجمين افهمي صح ولو مره بحياتج لتصيرين مثل اختج الغبيه تعرف حبيبها من شنو يضوج وركضت سوت الي يضوج منه وطفرته

رشا .. مو انتي

سليل : لتكملين ولتنصحين انصحي نفسج وصيري سباعيه مو بس لسان

سليل : كمت وعفتها وبيومها اشوفها اطب وتطلع وابتسم على توترها وطلع شعلان وعيونه عليها وحتى هي مكدرت تبعد عيونها منه عرفت رشا تحبه بس متعترف

مرت ايام رمضان هلقاسم الله ناكل ومشين امورنا جان القاهر بابا اضافه لوضعنا حسام الي مفكر مره يدك علينا وعلى بابا ويطمن ويسأل اقلها يحسس بابا بإهتمامه ابد ولا كأنه اجي واخذ كل خيرنا وراح

واجه العيد جان عيد عادي نعتبره حاله حال باقي الايام وخاصه بعده دوام الكليات تبدي هنا عدنا معضله جديده ريم واول سنه الها بلكليه اكيد يراد الها ملابس جديده قررنا اني ورشا وغزل منشتري اي شى هلسنه وفلوس ملابسنا الي ماما نهر ضامتهم وتجمع بيهم صار كم شهر حتى من يبدي الدوام متحتاج يكونون لريم

طلعت ريم وماما يتسوكون اكثر من خمس ساعات حتى ضل بالنا والاوضاع موزينه وبغداد ابد مو امينه وذني بلسوك كل هذا الوقت لحد مرجعو عاطت ريم

ريم : ولكم بنات طه وينجن تعالن كطيعه يشلعن الفاد يله ولجن انزلن

سليل : نزلنا نركض نريد نفرح لفرحتها ونشوفها شنو اشترت جان تكعد بلكاع والعلاليك داير مدايرها

واحنا كعدنا بصفها

سليل :هاي شنو مشتريه السوك كله

ريم : هاج وانتي هاج وانتي هاج واشمر لكل وحده علاكتها

سليل : هااي شنو فتحت علاكتي لكيت قميص وتنوره وحذاء

ورشا هم نفس الشى وغزل صدريه وقميص وجنطه وجواريب مال متوسطه

سليل : هااي شنو

ريم : كل وحده وملابسها

رشا .. وانتي

ريم : اني شفت عمجن محسن لكفته من الشارع وكتله هديتي وين وانطاني فلوس اشتريت سيت كامل بيها قميص وتنوره وحذاء وجنطه قابل بس عم بالاسم واني وعمه اشترينا لكل وحده بيجن زي بس فلوس ما كفت اشتري جنطه لكل وحده بس لغزوله لان جنطتها تعبانه وهاي تنزيلات اشتريت واني الي وحده تعرفون طالبه جامعيه جديده والي هيبتي لازم كلشي جديد لتخافون اشتريتها سوده حتى نلبسها تلاثتنا بما ان انتم اداومون قبلي راح اسمح الكم تكشخون بيها وترجعوها والله اذا صار خدش بيها اذبحجن

سليل : ليش ياقلبي مو كلنا انتي تشترين وسيت واحد وين يكفيج ليش قبلتي ماما

نهر : شسوي دكت رجل بلسوك ومقبلت

ريم : شلون البس جديد وخواتي ميلبسن يحرم عليه الجديد ماطول تنحرمن منه لو نلبس سوه لو ماالبس

سليل : حضناها ودمعنا من وراها

ريم : دفعتهن ومسحت دموعي يله وخرن مو تقشمرني الجنطه اذا صار بيها شى اسويها دم هاي دخلت وتعاركت ويه ابو البسطيه عليها كوه حسبها ب١٥ يريدها ب٢٠ القفاص

رشا .. وين يكفيج سيت ياريم

ريم : انتي موجوده مو اتلابس وياج يوم البس ملابسج ويوم ملابسي نتبادل يمعوده قابل وين رايحه للديسكو هلموجود البسه كولن همزين قفصت على عمو محسن جان خلصناها اني وياجن جاي وجكاير ونغني ظلموه

سليل : ههههههههه اااخ من لسانج

نهر : الله يحفظ خوتج بحق النبي واهل البيت ومايدخل احد بينجن

ريم : مكدرت اشتري وخواتي يلبسن القديم جنت مستعده اي شى البس ولا اخليهن هيج جنت اتمنى لو مكمله كليه ومتعينه واساعدهم حتى من اخذ من عمو محسن لان احبه واعتبره مثل بابا امون عليه ومن اخذ اضم لخواتي اخاف يعجبهن شى وياكلن اعرف بيهن يحبون الحلويات مثلي

اني انقبلت علوم حاسبات جامعه المستنصريه جنت فرحانه بقبولي بس بنفس الوقت خايفه شلون راح يتعاملون الطلاب ويايه وبهذا شگلي قبل بس بنات وهسه بنات ولد جنت الليل كله افكر شلون وشراح اسوي اذا بيوم احد فشلني او سمعني كلمة محلوه بحقي مرات اكول اني مو مال گليه ومرات اكول ليش شبيهه قابل الي دخلن احسن مني اني مو مريضة وليش استحي من وضعي وانترس كولي ثقه وراحه بس من اطلع واشوف نظرات الناس ترجع الراحه والثقه اطير واتصير ماعندي اي ثقه بروحي واكره حالي وضعي واكره كل انسان سبب حالتي هايه

سليل : داومنا اني مرحله رابعه مرحله التخرج جنات بطلت مع الاسف زوجها مقبل من وره اهله وهي رضخت للامر الواقع رغم حجيت وياها من خابرت بابا بس كالت مااريد اخسر رجلي بلكت السنه الجايه اقنعه

مثل كل سنه اكعد وحدي ومرات ويه بنات علمود الامتحانات زميلات وبس ماعندي صداقه قويه وياهن وارجع للبيت اكمل شغلي وادرس اول اسبوع وضعنا ماشي رغم يرادلي ملازم هوايه واستنساخات كومه بس احاول هلكدر عليه اكتبه لو استأذن من وحده من البنات اخذ ملزمتها واجي استنسخها يمنا بلمنطقه ارخص بلكليه وبره الكليه المكاتب غاليه يمنا محلات بسيطه والاستنساخ ارخص

وبهيج امشي حالي ورشا مثلي واذا قليل نكتبه حتى نبقي الفلوس للملازم المهمه

وبعد ٣ اسابيع من دوامنه اتفاجإنه بجيه جنات زوجها موصلها وراح جنا حيل فرحانين بجيتها وحتى بابا طار من اجت

كعدنا سوالف وضحك وجان تفتح جنطتها

طلعت فلوس دولارات بيهم بال ٣ دفاتر حطتهن بحضن بابا

جنات : هاك عمو

حجي طه : هاي شنو بنتي

جنات : ذني الطلعن من مؤسسة الشهداء

حجي طه : اي بنتي ذني حقج

جنات : اعرف حقي بس لو ما انت اني ميوصلني ولا فلس ولو ما انت جان هسه بعدني خدامه بيت خالي اذا ممتزوجه ابن خالي السگير ويجوز بوكتها يعرفون وياخذوني اسحبهن وياخذوهن يعني انت كم فضل الك عندي هم خلصتني منهم وتعاركت علمودي وردت تموت من ورايه بس حتى تبقيني يمك  وهم زوجتني الي اريده وهم جبتلي حق لو غيرك يحطه بجيبه

حجي طه : مااخذهن ابد واني ماعندي اي فضل عليج انتي حالج حال بناتي واعز انتي بنت الغالي الي لهسه صوته يرن بأذني

جنات : اسمعني فدووه عمو تره ماعندي وكت لازم اروح عمتي جايتني بيتي صارلها اسبوع وكاتمه على انفاسي كوه طلعت كتلها للطبيب وعدي شوي ويجي ياخذني عنده شغله يم ولد يكملها ويجي ياخذني

نهر : بنتي ورجلج شون قبل

جنات : اني من رحت سحبت الفلوس طلعو اكثر من ٥٠  مليون والباقي لبيبي انعام لان امه بقيت النا ١٥ مليون وهذني ٣٥ مليون اريد عمو يشتغل بيهن

حجي طه : لج بنتي انتي اولى بكل فلس ذني الفلوس يجيبن الج خوش بيت تكعدين وتسكتين لا ايجارات ولا شى

جنات : الحجي بيني وبينكم اشتريت هسه بيت لازم اسجله بأسم عدي اكيد مراح يقبل يكعد بيتي وامه اصلاً مراح تخلي راح تاكل گلبه يعني فلوسي هم راحن

نهر : بس هذا رجلج بنتي

جنات : على عيني وراسي عمه والله شاهد كلش احبه واحترمه بس الدنيا متتأمن واني حتى ماكو شى يربطني بيه حتى طفل وذني الفلوس اجني هديه من السما اليه لازم احافظ عليهن اني كلت لعدي الفلوس نص الي ونص لعمي لان هو راح يطلعهن اليه وهم مراح يدخل ويايه بلقسام حتى المعامل تصير اسرع وخليت ١٥ مليون بحضنه وميعرف شكد بقى لان رحت اني والمحاميه الي وكلها عمو محسن واستلمت لهذا هو عباله بس ٣٠ حصتي وانطيت ١٥ لعمي 

حجي طه : شلون هيج تسوين يابنتي وتخربين صورتي كدامه

جنات : متخرب عمو احسن متروح كل فلوسي ولا انت ولا اني نستفاد وفهمته هذا حقك وهاا كتله وهذا الشى مكذبت بيه كتله يكولون اكو بعد قطعه ارض وراتب هاي الامور بمرور الوقت على الموازنه مال السنه الجديده لهذا هو گيف وسكت ومدقق بعد لان سمع بعد وراها شغلات اني حتى مدققت ردت بس استلم الفلوس واطلع والله ممصدكه كلت هسه يصيحون ويكولون رجعوها نكذب عليكم

ريم : والله لو منج اركض بيهن واشوف منو ياخذهن مني

جنات : ههههه اي والله نفس تفكيري

وبقيت المحاميه تكمل كلشي

نهر : وامي اجت

جنات : مالها عنوان ثابت لهذا بقى باقي المبلغ حساب الها بلمؤسسه بس تراجع يصرفوه الها

ريم : والله بخت حتى بهاي مبخوته بيبي نعال

رشا .. اششش ليسمعوج

ريم : ولج متت هاي المره شمسويه والله يوميه يدز فلوس الها يعني هي احقر خلق الله وفاتحهه بوجهه واحنا اااخ ياحنه دومها مسدوده والمفتاح مشمور بلمحيط الاطلسي

رشا .. ههههههه اششش اسكتي خلي نفهم

حجي طه : بنتي شيلي فلوسج

سليل : بقى بابا وجنات كل شويه بنقاش وتوسل واحنا ساكتين لحد مباست ايده وكالت اله

جنات : اشتري مطعم او اي مشروع وكمل امورك وسويلي سلف وفيني اعتبرهن دين لمده ٢٠ سنه وفيهن على راحتك وهاي كدام البنات محالل وموهوب ليوم الدين هنه مني الك تريد ترجعهن بكيفك مترجعهن اعتبرهن من جعفر الك

بجه بابا وحضنها جان تصرف جنات يخلينا لا ارادياً نبجي وبقت تبوس بيده وهو براسها وخلتهم وسمعت هورن زوجها وراحت بيومها بقينا مصدومين واجه عمو محسن ومن عرف اول شى سواه كام يطك اصبعتين وكال لوما المره بلبيت وحدها اله ابات يمك تخوف انت اخاف يصير شى وتنگلب الدنيا العراق يحترك لان انت مشهودتلك ياابو المصايب

رغم بابا حيل تأذه لان اخذهم من جنات بس كلام ماما نهر ومحسن بأن هنه دين من جعفر وسند هم لبنته حتى اخاف بيوم تحتاج انت اكثر واحد تحفظ حقها خلاه يهدأ

ومن الصبح طلعو يدورون على محل بسبب الاوضاع والقتل والتهجير جانت اكثر الاسواقات والاماكن تعبانه لهذا حاولو يختارون مكان بيه رجل وحركه وخلال ١٠ ايام كدر بابا يشتري مطعم بمكان ممتاز ويجهزه احسن تجهيز جان طاير من الفرحه

وبدا يشتغل بيه وجاب عماله القدماء الي اكثرهم بطلو من باع المطعم ذاك لان الي اخذه اذاهم مو مثل بابا جان يتعامل وياهم مثل ولده بس خابرهم اجو يركضون وخلال شهر واحد اشتغل المطعم  شغل مو طبيعي ميلحكون يبيعون فلافل وكص وهمبركر وتمن ومرك بأنواعها جان مطعم جبير وتعامل بابا وعمو محسن يخلي الواحد اذا اشتره مره لازم يرجع يشتري لان المطعم نظيف والتعامل والاسلوب اساس البيع الناجح

واول شى سواه بابا بعد شهر من الشغل رجع كل وحده ترجيه بأذنها وحتى لعمه نهر اشترى وجانو احلى من القديمات تقرب ينطي لكل وحده بيدها علبتها ويبوسها من راسها

ريم : اني اريد من خدي مو بس من راسي

حجي طه : هههههه تدللين غزالتي

وبعدها بكم يوم انطه فلوس لعمه واشترت لكل وحده سيت جديد اضافه للي اشتريناه

يمكن الضيقه الي فاتت علينا عرفتنا احنا شكد قويات ونكدر نوكف بوجهه الدنيا ومنعترض على حكم رب العالمين ونبقى حامديه وشاكريه طول هاي الفتره ولا مره زهكنا وانقهرنا ولا حطينا عيونا على غيرنا جان بوقت تعبنا وضيق حالنا وجوعنا  الْحٍمَدٍ للـّہ حالنا احسن من غيرنا والحمدلله ساتر علينا بهاي الظروف التعبانه قوه تحملنا وتمسكنا نوكف مع بابا بمحنته جان نتيجتها الله فتحها عليه من اوسع ابوابه ودزله الرزق لحد بيته لكثر ماهو مؤمن بأن الله عدل ورزاق يرزق من يشاء بغير حساب

ورحيم بعباده مهما كان الضيقه الي واكع بيها

رشا .. فرحت لوضعنا الجديد وجنت حيل مرتاحه وبديت اقرا واجتهد احنا هسه بشهر ١٢ مبقى شى للعيد وهاي اخر ايام انداومها وره العيد الامتحانات كاعده على المصطبه رحت جبت اكل من الكافتريا جان الدوام متزعزع بسبب الظروف والاوضاع ومفخخات وقتل على الهويه حتى اكثر طلاب الاقسام كامو يحضرون بس على كد الامتحانات

شفت خيال يمي وجان اسمع السلام عليكم

رفعت راسي من الملزمه

رشا .. وكفت على حيلي وكعت الملزمه بلكاع هااا شعلان صار شى بابا بيه شى

رشا .. مابيه شبيج يعني من اشوفج لو مخروعه لو لسانج ١٠ مترات

رشا .. جريت نفس وانتبهت هو يمي شو انت هنا بلكليه ليش شعندك

دنج ونفض الملزمه وحطها بصفي

شعلان : اكعدي اريد احجي وياج

رشا .. مااكدر اكعد يمك الطلاب تشوفنا

شعلان : محد يهمني اكعدي اريد احجي وياج تره حوصلتي طكت ومابقى حيل ولا صبر عندي

رشا .. اششش نصي صوتك يمعود وين كاعد بلديوان عدكم

شعلان : هو انتي لو بعدج بلكوت اخليج هيج تحجين ويايه

رشا .. هسه شتريد فضني ورايه محاضره مهمه

شعلان : اكعدي شنو قصاص موكفتنا شو الكليه وقليل بيها وحتى الموجودين شافوج ويايه اكعد كافي ملحه

رشا .. كعدت وحيل متوتره هذا شجابه من كثر توتري منتبهت هو لابس جينز وقميص طالع حيل راقي ولا هذا شعلان ابو الدشاديش ولو هم تلوك اله يطلع هيبه وحلو بس حبيته اكثر هيج

احجي اسمعك وبسرعه

شعلان : ماطول بسرعه يابنت الناس اني قبل اجيت وخطبتج من ابوج واختصرت كلشي ورفضتي

رشا .. اي وبعدين

شعلان : وهسه اجيتج بنفسي احجي وياج واكول الج يابنت الناس اني رايدج حلالي ام بيتي تصونيني واصونج

رشا .. رجفت من طلبه رغم سابقاً طلبني بس هلمره مااعرف ليش حسيتها مختلفه يمكن لان وجهه بوجهه ويااه

بقيت ابلع ريك من التوتر

شعلان : شوفي رشا اعرف انتي تشوفيني اتعس رجال وعصبي ومااتعاشر بس اني غير شكل اني بس مااحب احد يكسرلي كلمة ويعاندني وراها اخذي التردي مني العناد والخشم اليابس مااحبه اتخبل منه

رشا .. اعتقد هاي اكثر صفتين بيه شلون تخطب وحده بدمها يمشي العناد والخشم اليابس

شعلان : لان حبيتج

رشا .. اني تحبني اني

شعلان : اي ليش شبيج عرجه عوبه جگمه ليش مااحبج

رشا .. ابتسمت على كلامه

شعلان : وهاي الضحكه بلذات طيحت حظ اهلي وحرگتني حرك

رشا .. شعلان عفيه كاافي

شعلان : شوفي رشا اني صريح والي بگلبي على لساني من يوم مشفتج وانتي دخلتي عقلي ردت أذيج بيوم سوايتج انتي واختج بس من شفت دفاعج عنها وشلون متخافين حبيت قوتج اني احب المره القويه انتي مهره قويه بريه اذا اريد اروضج اتعب وينكسر ظهري بس بلنهايه ارتاح واستمتع بترويضج لان راح يكون الها طعم ثاني وردت وتقربت بس شفتج اعند مماتوقعت والي صار وكعت بحب هاي المهره وخلتني مكان ما أذيها حتى اروضها احتويها وافهمها عسى ولعل تتروض

اني جايج وطالب تكونين الي يامهره وصدكي مراح اخليج بيوم تتندمين الج حقوقج كامله وكت ماالكه الاحترام والتقدير منج والطيب راح تشوفين شعلان ثاني

رشا .. رجفت من گلامه واحس گلبي طبل جان يحجي بهدوء وبحنيه اول مره اشوفه هيج حتى عيونه احسهم يتفحصون كل مسامه بوجهي

بلعت ريگي وكتله

بس احنا اطباعنا مختلفه وحياتنا تختلف اذا نكعد بمكان انحركه من الاعصاب

شعلان : وهذا الي ميزج بگلبي لان انتي غير النسوان الي شفتهم قويه صبوره وبنفس الوقت طيبه وحنينه وهيج وحده ماالكها مثلها لو افتر الدنيا كلها اني مرايدج تستعجلين رايدج تفكرين اكعدي ويه نفسج واي ملاحظه او شى معاجبج نتفاهم بيه ويشهد الله مااكسر بخاطرج قيد شعره

رشا .. جريت نفس وكتله وليش هسه اجيت

شعلان : لان بعد مااتحمل خايف لا ترحين مني خايف بيوم اكعد الكاج صرتي لغيري رشا اني حبيتج واني اول مره احب ومستعد اذبح واصلخ لخاطرج ولتكولين هذا بس حجي جربي وشوفي

رشا .. ما اريد ذبح وصلخ اريد واحد يفهمني يقدرني ميكسرني بيوم ولا يغدر بيه يشيلني على راسه ويخليني كلشي بحياتي اني اول شى وقبل كل شى يحبني بطبعي بلسيئ قبل الزين مايتأمر عليه ويحسسني بيوم اني اقل منه او هو صاحب فضل او هو متحمل العيشه ويايه من وره خشمه اريد اهم شى يعتبرني نصه الحلوو نصه الثاني مو تحفيه بيته

شعلان : عاشريني ومراح تخسرين انتي دومج تفهميني غلط انطي فرصه مره ويجوز بوكتها راح تعرفين داخلي شنو

رشا .. المشكله اعرفك انت متزمت وعصبي ومتتحجه ومتتفاهم شلون اعيش ويه هيج واحد

شعلان : هذا الواحد التحجين عنه مستعد لعيونج كلشي يغير بس كولي اي لان حبج من گل گلبه حبج واول مره يتمنى مره اتمناج واول مره يحلم بمره حلم بيج واول مره يتنازل لوحده اتنازلج رشا اني حتى مااضوجج مني متحمل الغيره تاكل بروحي اكل من اداومين ومن ترحين وتجين تمنيتج الي والله لا احبسج بحضني ولا اخليج اطلعين

رشا .. شفت هذا قصدي مااريد اعيش مسجونه مجرد زوجه تطبخ وتنظف وتربي الجهال اريد احس بكياني بأستقلالي اريد اكون كد المسؤوليه واستمتع بنجاحي واحقق طموحي وانت راح تكتم هذا الطموح انت طبعك غير طبعي وحياتك غير حياتي

شعلان : شنو التردي

رشا .. اكمل دراستي

شعلان : تم وبعد

رشا .. واتعين

شعلان : بمدرسه مال بنات

رشا .. ميخالف المهم اتعين واعتمد على نفسي وتكون الي شخصيتي المستقله

شعلان : تم وبعد

رشا .. هاااا يعني موافق

شعلان : كتلج تم

رشا .. واذا رجعت بكلامك

شعلان : مو شعلان الي يرجع بكلامه اني زلمه ابن زلمه وكلمتنا شرفنا

رشا .. جريت نفس ودنجت مااعرف شكول اله بعد

شعلان : مهرتي تقبلين اكون خيالج

رشا .. ابتسمت وكتله خليني افكر

شعلان : بداعت ابوج كافي مو صار ٣ سنوات روحي تلوب عليج تردين تموتيني والله هسه اذا اروح ومماخذ الجواب منج يمكن مفخخه اطك وتموتني

رشا .. اسم الله

شعلان : اويلي الله ولج احتركت عشيرتك شعلان تخاف عليه يلحسين تخاف عليه

رشا .. اشششش فضحتنا يمعود صوتك

شعلان : وافقي وريحي گلبي وراها تعاركي ويايه عادي اعرفج مخبله

رشا .. هااااا بدينا

شعلان : والله محد خلاني اهيم بيج غير خبالاتج ولسانج هااا نروح لطه ركض

رشا .. انت هسه مو كلت فكري براحتج

شعلان : احس الصبر خلص مني والله خلص اريدج رشا احبج وروح ابويه احبج وروحي تلوب عليج اريد كلمة منج تريحني طيب علتي تعبت سنين واني اشوفج كدام عيني ومااكدر احجي وياج واذا تقربت احسج نار وتگب بيه حتى مااكدر احجي شى اخاف ينكسر خاطرج مني واذا اسوي شى بنيه صافيه تفهميني غلط تعبت واني احاول اتقرب وافشل اني مو مال اكمز ويوميه اسوي شى يلفت انتباهج اني اريدج حلالي وزوجتي وحبيبتي وام بيتي

رشا : ابتسمت وميته خجل اول مره تصير ويايه احس وجهي يطلع نار منه

شعلان : احجي يبعد رويحته لشعلان موافقه عمي لتحجين هزي راسج

رشا .. باوعت بوجهه وكتله روح لبابا

شعلان : اسمعها منج بداعت اعزاز گلبج وياريتني منهم

رشا .. منهم يشعلان موافقه

يتبع ......