تحميل رواية «ابي والغزلان للكاتبة ريام هادي (REEM)» PDF

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_الواحد_والثلاثون

#مدونة_نور_قلبي

انا بيه حزن يترس فطور الكاع

ونواعير العيون تصير من تدمع

وبيه بالكلب شوف شكثر ونات

يذوب الصخر كونه بونتي يسمع

وانه فوك المتون محمل هموم

الجبل لو شالها من الكاع اظن يقلع

لاتغرك ضحكتي من اضحك وياك

الجمر محروك وكبالك يظل يلمع

خلص عمري بغرب يم اليكرهون

ومااظن العمر لو راح هم يرجع

سليل : لا عمو ابقى كاعد جان ياكل بس متوتر مخليته يكوم وطلعت

ركضت افتح وصلت للباب الخارجي جان صغير وكصير يعني اليوكف ويدك الباب ينشاف وجان اشوفها كدامي مباشره جفلت وكفت

بيبي انعام بلباب

انعام : متفتحين الباب شبيج اتصنمتي

سليل : ركضت ليجوه بيه خوفه منها عجيبه حتى الباب مكدرت افتحه من الخوف وركضت ماما ماما الحكي

نهر : شمرت الجفجير من ايدي وطلعت اركض اني وسجاد طفر من الكاع وعاف الاكل

شبيج ماما شصار

سليل : كمت امتمت وكوه طلعت مني بيبي انعام بره

سجاد : وشكو هيج ترجفين واطكين سن بسن روحي فتحي الباب

سليل : لا عمو فدوه اخاف

سجاد : كتلج افتحي الباب لتخافين متاكل بشر

نهر : اني افتح الباب

سجاد : وين مترحين هي تفتحه

سليل : باوعت عليه وحركت راسي معناه اي راح اطلع رجعت اتمشى وصلت ليمها وفتحت الباب بس اني قطره دم مابيه من الخوف كلت اكيد جاي تضربني لو تسوي شى لان من اشوفها لازم اكو كارثه

انعام : ثول شبيج صافنه وين رحتي ورجعتي

سليل : مجاوبتها بقيت بس اباوع بوجهه جان اطب وتدفعني من جتفي وتكول

انعام : وين نهر

سليل : اشرت بأيدي جوه طبت واني وراها امشي اول مدخلت شافت عمو وعمه واكفين

انعام : هلا هلا (وتحرك كف ايدها يمنه و يسره ) والله خوش ملمومين

سجاد : حلوين مو نخبل

انعام : انت بلذات تسكت گلبي مورم منك ولو ما معزه ابوك الواكفه بعيني جان من زمان عرفت شون اطيح حظك واخليك تبجي دم

سجاد : اهووو لغت مكافي متعبتي بس اتأذين هذا وذاك مو رجلج والگبر بعدين من تشوفيه شتكوليله جنت اشتغل لحساب ابليس والارباح بلنص

انعام : اني غسلت ايدي منك من يوم مطبكت ويه طه عليه بس متوقعتك نذل وتخون عمتك

سجاد : اني لا نذل ولا اعرف درب الخيانه واذا على سوالفج والله بعدني ماواصل لهاي المرحله بالاجرام حتى اشاركج بيه

انعام : اسكت بله بس تلغي براسي مع الاسف على المحبه الحبيتها الك واعتبرتك واحد من ولدي ولو يرجع الزمن اله اندمك على الساعه الفكرت بيها تساعد طه وبناته

سجاد : ولو يرجع نفس الزمن الي تكولين عليه اله ابيتكم كلكم بلحبس مكان طه

نهر : كافي فدوة سجاد عوفها

سجاد : قابل شعندي منفوخ من الباميه وكعد اسوي رياضه حتى تروح التخمه

انعام :منو امه مو نفسها الي انهزمت بنصاص الليالي وخلت اليسوه والمايسوه يحجي على اخويه ومات من قهرته قابل شيطلع ابنها الكح.. شتخلف

تحرك سجاد بأتجاهه بأعصاب لزمته نهر

سجاد عفيه عوفها

سجاد : يأشر بأيده ويريد يكطعها

والله امي وبسالفتها اشرف منج اقلها ماحركت بنات صغار ولا باكت ورث وبصمت مريض واكلت حق اليتيم

انعام : فتحت عينها مصدومه وتباوع على نهر تريد تاكلها

سجاد : لا عبالج مااعرف سالفتج العوجه ودكتج الناقصه

نهر : كافي سجاد ابوس ايدك ماما المن جايه

انعام : ماعندك اثبات على كولشي كلته

سجاد : مو مهم الاثبات اني انتظر اليوم الي الزم عليج لزمه وداعت امي التكولين عليها كح.. اله بيدي اسحلج للسجن واخليج فرجه للكل

كامت تعيط انعام بس لو افهم شمسويلك طه وهيج تحبه شمسويلك وگلبت عليه وطبكت وياه تتراجف عليه ومخلص حالك ومالك على جهاله وتفديهم بروحك

سجاد : مالج دخل شمسوي حطي بالج ياام علي التحفه اذا بعد اندكيتي بوحده منهن مااحلف واكول اني واني واسوي واصلخ واذبح لا بس اسوي شى واحد

اخليج تتمنين الموت ومتحصلي الشعره من راس اي بنيه بيهن مقابل حياتج كلها كااافي جوزي حتى لا ابجيج دم هو بس واحد ضال عندج خافي عليه

انعام : والله وكت وتهدد لا عبالك خفت ورجفت واذا اريد اسوي والله اسوي ومحد يوكفني

سجاد : جربي وشوفي سكتت الج هوايه بس بعد اخذ حقي بيدي اذا طخيتي وحده منهن

نهر : كافي صوتكم للشارع واصل واحنا بيت الناس مو بيتنا

جان تندار انعام على نهر اذا تدرين مو بيتج المن باقيه هنا امشي ويايه

نهر : استغربت من طلبها شنو امشي وياج وين اروح

انعام : ولج تالي عمري تجي وحده جانت تتمنى اطخ عتبت بيتي وخلصت سنينها تتمنى لحظه تعيش بيه وحده فكر بت فكر خدامه مااخليها تدخل بعيني وتكول ذيج بتج طلعيها من بيت ابويه

نهر : منو سندس اجتج

انعام : اي بت الفكر والجيفه الزركه الي نعالي احلى منها ولج تخليني علج بحلكها وفوكاها سمعت صايره تشتغلين خبازه بت حسين تشتغل خبازه

نهر : الشغل مو عيب ممسويه شى حرام

واذا على سندس مو بكيفها اطلع وامها طردتها لهذا اجتج

انعام : لتخليني اسبج وانبش جد جدج شون تشتغلين خبازه تالي عمرج وهذا الساقط رجلج وين عنج لو بس دك صدره واني واني وسوه نفسه بس هو وبس وتالي يعرفج هنا

نهر : اني بعد ميربطني شى بسامي وراح اطلك عن قريب

انعام : اطلكي وتعالي ارجعي لبيتي واسامحج على كولشي سويتي بس المهم متضلين بهاي المزبله

نهر : سكتت شويه وفكرت وكتلها ارجع بشرط

انعام : خوش والله وتتشرطين هم

نهر : تعمرين بيت طه ويرجع مثل الاول مو انتي الج ايد بحركته ولتكولين معليه مو اني لا انتي ومتأكدين بس ماعدنا اثبات عليج تكملين البيت ويرجع احسن من قبل ويرجعن البنات بيه واني ثاني يوم يمج

انعام : هلووو ياطه عيني الكتل اخوج المجرم الميخاف من الله

سليل : جنت واكفه واسمع كولشي صدمه انعام هي الحركت البيت خلتني جامده بحيث من عصبيتهم محد انتبه اني بعدني واكفه كمت ارجف واطك سن بسن واتذكر النار والحرك وغزل الي تحترك كدام عيني لو النار التاكل بشعري وجهي وجسمي كعدت بلكاع وحطيت ايدي على وجهي اريد انسى مااريد اتذكر الصار وكمت اعيط بكل علو صوتي رجع كولشي وكأنه هسه النار تاكل بيه

نهر :كعد نحجي ومحسينا غير عياط يهز البيت ونشوف سليل بلكاع تعيط وتبجي ركضنا اني وسجاد عليها نريد نلزمها منكدر ادفر بينا وتصيح نار كعد تحركني نار

جان يحضنها سجاد بكل قوته وهي مستمره تدفر بيه بس هو اقوى منها وحيل لزمها حالها خلاني ندار واعيط على امي

شفتي هذا السويته شنو ذنبها طفله الليل متنامه لان تحلم بلحرك والنار شنو ذنب هاي وركضت على غزل بلمطبخ وشلتها وقربتها من امي ورفعت نفنوفها شوفي شون رجلها مشوهه دارت وجهه متريد تشوف وعطت لديرين وجهج شوفي شسويتي

وفوكاها متردين تعمرين بيتهن وتريدين هيج بعد كل الي سويتي ارجع الج

سليل : تهسترت وفقدت تركيزي محسيت غير عمو حاضني حيل ويهمس بأذني لتخافين اني يمج ماكو نار سليل ماكو

سليل : ابجي ومغمضه واكول اكو ريحه اللحم مال غزل بعده بخشمي بعدني اشوفها شون تحترك واشم ريحتها

سجاد : حطيت وجهه برگبتي وامسد على راسها اششش ماكو اي ريحه لحم وغزل كعد تلعب افتحي عيونج  وشمي العطر الي حبيتي قبل شويه انتي بحضني مو بلبيت مو بداخل النار

سليل : بديت اشتم عطره واهدأ وارجع لوعي بس مردت افتح عيوني مردت اشوفها شكد جنت اخاف منها لأنعام صرت اضعاف اخاف صرت شون الطفله من تخاف من حيوان وتحضن ابوها وتكوله وخرني من هنا او اخذني بعيد عنه هذا حالي رفعت ايدي وحضنت لعمو حيل وابجي وكتله مااريد اشوفها عفيه مااريد افتح عيوني

سجاد : لتخافين امشي ادخلج للغرفتج

سليل : اشهك بحضنه واحجي بأذنه لان بعده وجهي بركبته عمو خايفه فدوه

سجاد : شو تعالي كومتها وبقيت راسها بحضني ومشينا هي خطوتين ودخلتها للغرفه

يله افتحي احنا بلغرفه

سليل : فتحت عيوني وكعدت على الجربايه ابجي واصيح ليش عمو سوت هيج احنا شمسوين الها

سجاد : الحجي السمعتي مااريد احد يدري بيه بعد صار الحريق ومابيدنا شى نغير الي اريده منج من تشوفين انعام توكفين بوجهه

سليل : شون اوكف واني حتى هسه مكدرت افتح عيوني واشوفها اني قبل اخاف منها هسه اكثر وكمت اخاف حتى على خواتي لتذبحهن

سجاد : متسوي شى بعد لتخافين

سليل : الي يحركنا واحنا نايمين وميهتم يكدر كولشي يسوي بس ليش هيج تسوي هي مو ام بابا شون ينطيها گلبها

سجاد : تجي عمتج نهر وتفهمج كافي دموع ومسحت دموعها بيدي يله تمددي وارتاحي

سليل : احس راسي راح يطك من الالم تمددت وعمو جاب جرجف وغطاني لان الجو طيب بلرابع

سجاد : غمضي ونامي

سليل : اخاف

سجاد : وتالي وياجً جم مره كلت مااريد تخافين رجعنا مثل قبل ليش تخليني ازعل منج

سليل : والله مو بيدي

سجاد : لا برجلج طبعاً بيدج وكولشي بيدج يله كافي خوف ودلع انتي سباعيه ولج اكو واحد يخاف منها هاي تشبه العكروكه المسحوكه بتريله وكامت ورجع سحكها مطي

سليل : ههههههههه اضحك والدموع بعيني

تشبه الضفدع كامل

سجاد : حرام عليج كمولي احلى ظلمتي

سليل : ههههههه بقيت اضحك وهو صافن بأبتسامه هادئه عليه وكاعد بصفي

سجاد : اريدج دوم تضحكين ولتخافين اذا خفتي راح تتشجع تلعب بأعصابج

سليل : اختفت ضحكتي وكتله عمو خايفه على خواتي راح امنعهم حتى من حسين وجنات

سجاد : ايااج راح يعاندون اكثر ذوله جهال ميفتهمون انتي اخاف تجي مره ثانيه اطلعي مااريد منظرج قبل شويه يتكرر اوكفي بعيني ياخبله الي اطب بنص النار واطلع خواتها تخاف من كمولي

سليل : هههههههه ها عمو شفت انت هم سميتها ضفدع كامل

سجاد : يله ارتاحي وراج اقرايه

سليل : ماشي حطيت راسي على المخده وغمضت عيوني بقه ثواني واكف وراها حسيت بحركه رجله طلع وسد الباب

نهر : هذا العندي تعمرين البيت ارجع

انعام : اصلاً اني من ترجعين اول شى اشرطه عليج تنسين شى اسمه طه وبناته

نهر : ماكو واحد ينسى روحه ماما

انعام : لتخزينا بلمنطقه تالي عمري بتي خبازه وفوكاها كاعده بيت ام سندس الفكر الي حسره عليهم اللكمه هي ودت ابنها لعمامه  لان ماعدها تعيشه تجين انتي تعيشين وياها ناس راح تاكل وجهي يمعزايه

نهر : مو مشكلتي كتلج العندي

انعام : يعني جيتي لهنا ما وكفت بعينج موزين مني الفيج بيتي مره ثانيه بعد دكتج الحقيره بينا وشون بعتينا علمود واحد حافي واتزوج عليج وسواج شماته لليسوه والمايسوه

نهر : بهاي عندج حق صحيح سامي كسرني بس مامستعده اخليج تكسريني لان مابيه بعد شى ينكسر يوم مابيه

اذا اريد اعيش واستمر اعيش لخاطر ذني البنات الضلن بلا ام ولا اب والسبب انتي

انعام : قابل اني كلت لسندس العرمه تطلك منه وتروح اديح وتتزوج واحد متزوج وتصعد براسه وتشمر بناتها هي قليله اصل من يوم يومها

نهر : وهم لو نرجع لساس المشكله من الاول هم انتي تتحملين عذاب اخويه انتي جبتيها اله جان تكدرين بذاك الوكت تخطبين اله ست البنات واحسنهم وجانت سندس معروفه بوكاحتها بلمنطقه وزوجتيها اله وهو الفطير مشه وراج وهاي نتيجتها اربع بنات وحده تنهار من اقل حجايه وشفتي حالها والثانيه بيها بكع والثالثه شبه تشوهت والله اعلم رشا شبيهه وكل هذا برگبتج

انعام : اسمعي نهر اذا ما اجيتي اليوم ويايه بعد تحلمين ارجع استقبلج بيتي ذيج المره حلفت ماارجعج وكسرت حلفاني واجيت مو لأجل عينج حتى الوادم لتاكل وجهي وتعيرني بيج وتعير اخوج وخاصه بوضعه هسه والناس كلها تحسبله الف حساب وتالي اخته خبازه

نهر : ليش تحسسيني مسويه شى موزين عبالك مشتغله بملهى او مكان موزين اني خبازه شغله شريفه اقلها مااكل حرام ولاابوك مثل ابنج واتسمى على كويت ولا ابوك ورث اليتيم

جان تتقرب مني وتكولي بأعصاب لج شون تكولين لسجاد على سالفه الورث

نهر : تمنيت اكولها للناس كلها مو بس لسجاد جان اسمع صوته طلع من الغرفه ويكول

سجاد : ليش متكولي غير حتى نشوفنا حل

: ضحكت انعام بشماته وكالت

انعام : لو تموتون متلكون حل

سجاد : والله بهاي احييج حراميه درجه اولى شكد حاولت الكه ثغره قانونيه حتى اطلع تزويرج ومالكيت

انعام : شعبالك لكولشي احسب حساب ومو اني اغلط هيج غلطه واعوف ورايه لزمه تخليكم تلزموني من رگبتي

نهر : بس نسيتي الله هو الي راح يلزمج من رگبتج وبذاك الوكت عود ضحكي

انعام : هسه ترجعين لو لا

نهر : كتلج ارجع وبنات طه يرجع بيتهن وشتردين اني حاظره

انعام : ضلي لعد بلفكر انعل ابوها لاابو ابوها الي تجيج بعد خليج بهذا البيت الجايف وبهاي الحياه الذليله تحت رحمه سندس وامها هو انتي مو وجهه نعمه قبلتي العيشه ويه واحد ميسون يتسمى رجال وهاي تاليها اتزوج عليج حيل وابو زايد عاشت ايده وهااا يكولون مرته حلوه ضلي هنا وخلي يتونس ويه مرته كافي شبع منج وشمرج شمرت الجلب

سجاد : اطلعين بره واطلعج سحل اختاري

انعام : امشي لك مبقى عليه بس وصخ رجليه والله ياالله

سجاد : تمنيتج رجال اااااخ لا اسوي بيج مثل سوايتي بواحده خليته يتمنى الموت يمكن اضل اسبوع اتفنن بتعذيبج

انعام : ولك منو هذا

طبت ريم ورشا يهوسون شافن انعام كبالهن وكفن وجان تكول بصوت عالي وبطفوليه

ريم : هاي بيبي انعاال هنا

جان تندار انعام

انعام : انعاال بحلكج وحلك الخلفج شو تعالي

جان تركض وتختل وره سجاد

انعام : هاي تربيتج خوش والله

ريم : عمو ماانطي الدفتر حتى لو تكتلني

سجاد : اشش اوكفي

نهر : عندج شى بعد نريد نتغدا

انعام : تاكلون سم كون

نهر : رحمه الله والديج خلت وطلعت نار شرار

كعدت حيل ما ضل بيه وارجف هم منها ومن كلامها وخطيه سليل ضل بالي عليها بس كلامها عن مرت سامي خلاني انتهي

باوعت على سجاد شون لزم ريم ويحقق وياها

سجاد : يادفتر

ريم : اخذت دفتر سحليه مال العربي حتى الست تكتله

سجاد : سحليه منو

رشا .. حسين ابن عمو علي

سجاد : مو عيب تصيحيله هيج

ريم : هو يصيحلي ساسوكي

سجاد : وليش اخذتي الدفتر

ريم : عمو جعت وردت لفه لبلبي راح وجابلي لفه فلافل

سجاد : اي هاي نفس هاي هو الفلافل هم لبلبي

ريم : ماااا احب اللبلبي وافتح الصمونه واطلع جم لبلوبه واكلها

سجاد : قصدج جم حمصايه

ريم : اييي وهو جاب فلافل شون اكل لبلوبه

رشا .. عمو شسوت بيه كفخته وزعلت وهو راح يجيب لفه بفلوسه حتى يراضيها وهي اكلي اللفه وبوكي الدفتر من جنطته

سجاد : وانتي وين عنها مكتيلها الي يبوك الله يذبه بلنار

رشا .. كتلها والله بس هي كالت اذا حجيت لسحليه راح تزاعلني واذا زاعلت لازم اراضيها بنستله لو طباشير

سجاد : خوش والله ست ريم كلج شبر ومسويه عصابه عليهم وهسه مو حرام عليج حسين تضربه الست

ريم : لا مو حرام

نهر : لتباوع عليه سجاد هاي وحدها يرادلها اثنين امهات يعلمنها

سجاد : جيبي الدفتر خلي اودي يحل الواجب خطيه هو ذاك هم ارعن شون ساكتلج مسويته دوشك كتل اله اخلي يمشي ويضرب بيج حتى اتوبين

ريم : هاك عمو واذا ضربني سحليه ابجي ومااحجي وياه

سجاد : الله يستر منج من تكبرين باعي ريم ميصير بابا تضربين الولد وميصير تاخذين غراض غيرج حرام

ريم : اهووو عمو كله حرام حرام والله ضجت

سجاد : جيبي الدفتر وامشي بدلي وغسلي

نهر : وين رايح

سجاد : ارجع لدفتر لحسين واروح للبيت ارتاح

نهر : تعال احميلك الاكل خطي مأكلت زين

سجاد : لو ماكل لفه فلافل من الشارع احسنلي مو باميه طلعت عليه زقوم

نهر : والله حقك تعال حباب

سجاد : اخاف اكعد اكمل وهلمره البيت يوكع على راسي اروح ارتاح وعود من اكعد اكل ليضل بالج

عينج على سليل والبنات

نهر : ان شاء الله

طلع خطوتين واجت ريم تركض هاك عمو

سجاد : شنو هذا

ريم : كتاب العلوم مالته

سجاد : جان يجرها من اذنها سمعي لج وكاحه مااريد صيري عاقله تره اخلي يزاعلج وميلعب وياج

ريم : ااااخ عمو

سجاد : بس مره ثانيه تأذي لحسين اضربج

ريم : مااضربه بس اعضه

سجاد : چلب ولج تمشين وتعضين حتى سنونج راح تتكسر وتبقين بلا سنون جان تفتح حلكها وتضرب على سنونها

ريم : عمو هذا يتحرك راح يوكع

سجاد : من العض يله امشي ولتسوين هوسه اختج نايمه

جان توخر مني وتكمز وتصيح اس اس اسيلو

آسيلو بالمغارة طفرت عليها الفارة

والفارة هندي هندي والليلة باتت عندي

جابتلي ثلاث هداية

سجاد : واحد من الهدايه اكطع العوده بيدج على صوتج العالي هذا جان تحط ايدها على حلكها وتركض للغرفه

نهر : هههههه والله هاي البنيه رغم وكاحتها بس اموت على دمها

سجاد : كون متصير نسخه من امها

نهر : ان شاء الله متصير

سجاد : رايح اني

نهر : الله وياك

حميت الاكل للبنات وتغدو واني لكمه مكدرت احط كل مااتذكر من تكول مرته حلوه اريد اذب من معدتي ااااخ ياسامي كل الديصير بيه برگبتك

سليل : كعدت على بوسات ريم ورشا

اجيتو شونه دوامكم

ريم : اخذت ١٠ بلرياضيات اريد مصاصه

رشا .. واني اخذت ١٠٠ بجغرافيه

سليل : عفيه بلشطورات وانتي ام المصاصه من تاخذين ١٠ بالاملاء اشتريلج اثنين

ريم : وايدين ٤

سليل : سنونج راحن من الحلويات

رشا .. ثلل شتريد بيبي جايه

سليل : شفتوها

ريم : وتعيط على عمه

سليل : ماكو شى يله امشو تغدو

راحو تغدو واني طلعت غسلت وجهي ومشطت شعري بعده كصير طولان بس مو مثل قبل يصير ضفير بسيطه

كعدت يمه عمه بستها حسيتها تعبانه

شبيج ماما

نهر : مابيه حبيبتي

جان اطب ام سندس جانت متسوكه كامت تساعدها اعرف بيها تشتغل بس بالها مو يمنا

ومرت الساعات وصار ٣ ايام على الصار واني بلدوام اجت الست كالت عمج بالاداره جيبي جنطتج وتعالي استغربت ولزمني گلبي لبست جنطتي وطلعت من الصف اركض

لكيت عمو سجاد

المديره كالت عمج يكول امج تعبانه لازم ترحين اني صفنت ياامي تعبانه شبيهه بس اشرت براسي وطلعت بس الخوف مسيطر على كولشي بيه بس طلعنا من باب المدرسه كتله شكو عمو فدوه

سجاد : نهر تعبانه وبس تبجي وملكيت غيرج يطيب خاطرها

سليل : فزيت عليها شبيهه منو وياها

سجاد :اني ماادري السويته صح لو غلط بس هي حسيتها منتهيه وبس تلطم وتبجي وام سندس حاولت تسكتها مكدرت كلت بلكت من تشوفج تسكت

سليل :دمعت وخفت عليها وكمت امشي سريع اريد بس اوصل طبينا للبيت وبلطرمه شمرت الجنطه وركضت عليها ردت افتهم شصار

نهر : كعدت الصبح مثل كل يوم بين البنات والمدرسه والشغل بس اني گلبي نار اريد احل شغلتي ضلت معلكه لا هو اجه ولا دزيت سجاد عليه واليوم على اساس سجاد يجي ياخذ كم حاجه لطه عنده زياره اله كملت كولشي وبقيت الوب كلت ماكو غير ام سندس تروح لبيت عيالي تفهم منهم اعرف ام سامي تثرثر وتحجي ومتضم حجايه راحت ساعه ورجعت بس مو ساعه تكول دهر صارت

اول مطبت وجهه يگلب الوان

ركضت عليها هااا خاله بشري

ام سندس : تعالي اكعدي يمه

نهر : والله بطني خبطت شصار فدوه احجي

ام سندس : يمه انه رحت الها سلمت وكعدت وسولفت ويه المره تكول هو يريدها ومايتركها

نهر : كتيلها هي متريد

ام سندس : اي كتلها وكالت ام سامي حقها ولو منها مااضل وعبن  مرته

نهر : الغصه بگلبي والله وكت واكول مرت سامي وتكون غيري كوه طلعت من حلكي شبيهه مرته

ام سندس : يمه هو رزق وكلمن ورزقه وقسمته

نهر : حسيت بلحظتها عظامي تتكسر ولحمي يحترك واني اكول حامل مو

ام سندس : اووووف دخيلك ياعلي يبرد نار گلبج

نهر : حامل كولي خاله

ام سندس : اي يمه حبله مرته شالت من ليلتها وام سامي مكيفه وين ما تولي تكول مرت سامي حبله

نهر : كمت ابجي واتخيل شون مكيف حامل متحملت اني هم بشر والي طاقه اصيح واكول ليش ربي ليش مرزقتني بشنو اختلف عنها ليش مكتوبلي القهر يعني شصار لو الي بطنها بطني راح تنكلب الدنيا راح الكل يموت جان كولشي مصار

خاله المفروض اني الحامل مو هي اني وكمت اضرب على وجهي واملخ بشعري وتلزمني وتبجي ويه بس كميه الالم الي احسه خلاني حتى اهذري ومااعرف شديصير ودخل سجاد مثل ممتفقين بس جنت مو بوعي بس ابجي واملخ بنفسي وخاله كالت اله ليش هيج حالي

سجاد : شبيج تخبلتي واذا مرته حامل

طبه مرض هو وياها من باجر اروح انعل اهله وغصب عنه يطلكج

نهر : حب عمري راح مني والله تعبت تعب والله اجت عليه ايام اون واني نايمه بس حتى ارضي وارضي اهله والله كمت من امرض ما اكول اله بيني وبين نفسي اكول خطيه فلوس الدكتور والعلاج هوايه حتى ملابس كمت مااشتري بلسنه مره حتى مااثقل عليه واكول وجوده يمي تسوه الدنيا بشنو قصرت كولولي لان مااخلف شعليه هو الله منطاني الله مقبل يفرحني

جان تلزم حلكي ام سندس وتكول اذكري الله لاتكفرين يمه ميصير

دفعت ايدها واشهك وكتلها خاله والله ممسويه شى حرام ولا مأذيه بشر ليش الزين بهاي الدنيا يطيح حظه

ام سندس : كله اختبار المؤمن مبتلى يايمه

نهر : عاف هاي الناس كلها وابتلاني زين هو مو يعرف حالي ليش صار بيه هيج

ام سندس : كافي شو تعالي وبدت تقرا ايات على راسها بس نهر فاقده كامت وتمشي وتحجي بصوت هستريا

زين يعني راح يصير بابا وهي ماما زين واني شنو اني

يعني معقوله مسحت ١٥ سنه حب وزواج والله حبيته ٦ سنوات و٩ زواج يعني معاشرته ١٥ سنه كلهن ماغزرن بعينه ولكم ناااااااار بيه نااار

ام سندس : يمه سجاد اركض جيب سليل بلكت تشوفها تهود

سجاد : ومدرستها شون

ام سندس : هو يوم واحد تولي المدرسه بيه البت تفرفح راح تموت

سجاد : ماشي

سليل : دخلت على عمه والكاها بلكاع وتون وتعيط ركضت حضنتها حيل شبيج ماما

نهر : سليل انحرمت منها هاي الكلمة وراح تنكال لمرته راح يصير اب واني هاي ضلتي

سليل : مرت عمو سامي حامل

نهر : شفتي مرته زين واني شنو يعني هاي هيه خلصت عمري واذبه بلزبل وهي تجي على الحاظر تاخذ كولشي

ام سندس : ام سامي تكول الوليد شاريهه ومايعوفها

نهر : سجاد اذا عندي معزه عندك اريد هذا الاسبوع اطلك ماابقى لحظه بذمته

سجاد : صار يجرالج بس كافي لطم وبجي ليش هو يسوه الكعد تسوي علموده

نهر : لا والله ميسوه

سجاد : لعد كافي الي يبيعج بيعي

سليل : واني يمج ماما انتي امي واغلى هم ليصير بيج شى منو النا والله اذا تأذيتي اموت اني

نهر : حضنتها اسم الله عليج

سليل : كافي والله حتى گلبي يوجعني

نهر : ليش جبتوها من المدرسه

سجاد : هاج بس شفتيها سكتي كومي والله لا اخذلج حقج بس لتنقهرين

نهر : كمت بس كوه امشي رغم هدأت وبطلت ابجي والطم واندب حظي بس وروحي الي انسحكت برجله شلون اهدأها

كل مااتذكر شون فرحان بمرته واني شمرني وداسني اريد اطم روحي من القهر بس مابيدي شى اغيره

سليل : بيومها عمه سكتت بس اعرف بيها تلوب يجوز عيونها بطلت تبجي لخاطرنا بس گلبها وروحها بعدهن مفرفحات

ثاني يوم صايره عركه بين عمو سجاد وعمو سامي والمنطقه مدخله كوه مفاككيهم لان ميقبل عمو سامي يطلك يكول مرتي وغصب عنها تبقى بذمتي وعمو سجاد مستلمه دك بوكسيات كاسر خشمه واجانه حتى قميصه مشكوك

نهر : بله لو صاير بيك شى

سجاد : هاي شبيج شيصير هو لو رجال صدك مياخذني غدر كعد احجي وياه ويشمر بلحجي ومن وره خشمه وانت منو ولتدخل كتله اني مكان طه واطلكها وحجايه ثانيه مااسمع وكل حقوقها متريدها ولو انت شعندك شو حافي موزين قبلت تعيش وياك هاي السنين كلها

جان يضربني بوجهي زين ومتأذيت واني گلبي محمل عليه كتله شو تعال كسرتلج حتى خشمه

سليل : عفيه عمو بطل

نهر : دنجت وجريت حسره بكد كل سنه عشتها وياه

سجاد : اخلصج منه لتخافين

نهر : اي عفيه سجاد اني  برگبتك

سجاد : ولا تكوليها كتلج من اول يوم التردي يجرالج

جان تطلع ريم من الغرفه وشافت سجاد جان تفتح عيونها

ريم : عمو هدومه مشككه

سليل : ادخلي اقري

جان تتمشى بأتجاه سجاد وتتقرب وتوكف بين رجله وتلزم قميصه المكطع من الايد والجيب

ريم : عمو منو كتلك

سجاد : محد اني كتلت الوكحين

ريم : مو تكول عيب واحد يصير وكح ليش انت وكح ومشكك ملابسك

سجاد : مو واحد ضربني واخذت حقي منه وضربته حتى ميعيدها

ريم : اني هم راح اضرب الصف كله لان ميلعبون ويايه ويخافون مني

سجاد : عيب ميصير

ريم : انت مو تضرب اني اضرب ما اشكك ملابسي اني اسبع منك عمو انت مثل سحليه بس توكع وتشكك هدوم

بله هاي شون بيها اخذيها مني

سليل : تعالي ريمو امشي

ريم : ثلل اني بعد اكتل اي واحد يكول بكعه وماالعب وياج

سليل : والله حتى تعبنا نكولج عيب شسوين سوي

جان يسمعني عمو

سجاد : خوش عاشت ايدج هاي عود الجبيره

سليل : اخذت ريم وركض للغرفه

وذيج لازمه رشا وتكولها عمو ضربوه ومكيفه

بليل اسمع صوت عمتي الي يناشغ بقهر على حظها وعلى ضياع حبها جنت بس اني ماانام صرنا اثنين اني وياها

ومر اسبوع ويوميه مشكله بسبب الطلاك لحد ماانطوها مهله لنهايه الشهر حتى تفكر بس هي قافله غير الطلاك متريد

ماما بعد ما اجت وعمه رجعت تخبز وشايله الشغل كله على راسها متقبل كولشي تسوي

جنت راجعه منزالمدرسه يوم خميس ومكيفه باجر ماكو دوام واسبوع الجاي الشفهي مال نهايه السنه جان تمطر وخاصه مطر نيسان يصير قوي ومرات بيه حالوب

حيل احب المطر كمت امشي على كيفي واستمتع بكل قطره تنزل من السما  اباوع البنات والطلاب كلها تتراكض منه بس اني امشي بنص الشارع بحيث كمت انكط من كل جهه ولا هامني باوعت على السما شون تنزل مطر مرات اتمنى كل قطره تنزل منه تغسل حياتي وارجع اعيشها براحه اتذكر بابا بكل مطره ميطلع للشغل ويبقى كاعد يمنا يلعب ويانا اااااه يابابا لو تعرف شكد مشتاقه الك ومشتاقه لحضنك دمعت عيني واني امشي منتبهت على الموجودين بلشارع جان يطخ ولد جنطتي وحط ورقه عليها

اني وكفت من الخوف هو غمزلي ومشه

ركضت حيل للبيت هذا شسوه احس دگات گلبي تطلع من صدري

طبيت لكيت بيبي تصب تمن احمر وكعد تگلي بيتنجان  وعمه تسوي زلاطه اول مره اتعرض لهيج موقف حتى مسلمت طبيت ركض من الخوف وشمرت الجنطه فتحتها ماكو الرقم اتنفس بسرعه تكول مسويه جريمه جان اطب عمه نهر

نهر : هااا حبيبتي الله يساعدج شو لت جيتي بستيني ولا سلمتي

كعدت على الجربايه اجر النفس وكتلها على الصار

ابتسمت على خوفي وكالت

نهر : بنتي الي بعمرج تتعرض لأشكال بلشارع واشكال الولد يتعرضولها بس تبقى البنيه وتربيتها الي تقبل تأذي نفسها وتنزل سمعه اهلها والي بيها تبقى محافظه على نفسها وهذا بعد اختيارج انتي كبرتي وحلويتي واكيد راح تشوفين اشكال الشباب

سليل : ما اريد اي احد يتحارش والله عمه اخاف ردت اخرب بلشارع

نهر : ميخالف تصير اذا تكرر الموقف امشي ولتوكفين

سليل : ماشي جان تحضني

نهر : والله وكبرتي وصرتي مره وكامو الشباب يتحارشون بيج

سليل : ما اريد اكبر وما اريد احد يشوفني حلوه ولا اريد احد يطخني ولا اريد بشر يتقرب مني

نهر : وسجاد

سليل : شبيه عمو

نهر : ليش هو الوحيد الي تقبلين يلزمج

سليل : لان كرايب بابا ومثل اخوه يعني مثل عمي وهو حباب ودوم وكف ويانا اكيد اقبل ومااخاف

نهر : انتي كبرتي امي وميصير حتى لو عمج يطخج

سليل : دنجت وتذكرت سلام غمضت وجسمي اقشعر من تخيلته

نهر : شبيج

سليل : هااا لا مابيه بس اريد انام مااريد اكل

نهر : نامي ومن تكعدين اصبلج

بقيت اليوم كله افكر بلي صار وخايفه لا هذا الولد يتحارش بيه بعد والجمعه خلصتها اقرا واقري البنات وعمو ماكو صار ٣ ايام عنده شغل

وداومت السبت  واتمشى واشوفه واكف براس شارعنا جان ولد شاب بلعشرين عمره مو بكدي مشيت سريع ومدنجه وخايفه موت منه مااريد يطخني ويطخ جنطتي

وصلت للمدرسه واني الهث 

طبيت امتحنت وره ساعه طلعت لان بس امتحانات شفهيه جان اسمعه يصيح بأسمي

سليل سليل بس اوكفي احجي وياج

اني سمعته وركضت للبيت من الخوف ردت مرتين اوكع على وجهي وطبيت للبيت كوه اجر النفس وشافتني عمه تخبلت من كتلها

نهر : اني اكول لسجاد اخلي يجوز منج

سليل : اخاف عمو يتعارك

نهر : لا ميتعارك وهم مااكدر اسكت هذا ماطول يعرف اسمج يعني راح يوميه يصيح بيه واخاف احد يسمعه وعباله عندج شى وياه الاحسن نكول لسجاد ونفضها

سليل : وتكررت الحاله ليومين وماعندي غير كل مااشوفه انهزم ركض وخلصت الشفهي عمه مشافت عمو سجاد لان ملتهي بلشغل لحد مااجه اول ايام الامتحانات التحريريه وامشي واتلفت وهم شفته واكف وكاشخ وحاط ايده بجيوبه ويبتسم

دنجت ومشيت وبگلبي اقرا ايات ميصيح بأسمي ودخلت امتحنت جاوبت ولان شاطره خلصت من وكت الماده حافظتها وجاوبت كولش زين لهذا سلمت الدفتر وطلعت من وكت وبطلعتي شفته

واكف ويمه ولد بس شافني ماادري شحجه وياه وعافه واجه بأتجاهي

مشيت سريع ردت بس اطلع منه وانهزم مثل كل مره بس ملحكت وجان يوكف بنص الشارع كطع الطريق عني

بس احجي وياج ثواني والله مااخرج

سليل : كمت ارجف واكوله عفيه وخر من طريقي حيل خفت منه

بس اسمعيني

سليل : مااسمع واجتازيته ورجع وكف كبالي

والله نيتي شريفه وصار مده مراقبج

سليل : عفيه روح والله اعيط اذا متروح احجي واني اروح يسره  يجي يسره اروح يمنه هم يتحرك يمنه والشارع شبه فارغ الطلاب بعدها مطالعه دمعت عيني من الخوف جان يفتح عيونه متفاجأ

عفيه لتبجين والله مو قصدي اخوفج بس ردت احجي وياج

سليل : الولد بعده ممكمل كلامه ومااحسه غير عمو سجاد يجره من وره ومدده بلكاع حتى بدون ميحجي

اني شفت هيج ولابسه بوتين وركض حتى منداريت ورايه وهلمره ابجي تكول عبالك مسويه ذنب طبيت ركض واعيط ماما

ماما

نهر : الرحمن شبيج سليل

سليل : عمو ضرب الولد

نهر : صخام هاي عود كتله تفاهم وياه

سليل : ليش كتيله

نهر : اي قبل شويه جان هنا جاب حليب وكيمر جماعه منطي اله مثل الصوغه هديه يعني وكال مااكله اكلو انتم وحجيتله وكال رايح الها للمدرسه وبلكت اشوفه للولد

سليل : يايشوفه بسرعه جره ونومه بلكاع ودك

نهر : وانتي ليش خايفه قابل مسويه شى

سليل : والله مسويت بس عمو من يصير عصبي تعرفين بيه

نهر :لتخافين ولج وجهج اصفر شجاج

وجان يدخل سجاد يعيط وينها الخاتون

ختلت وره عمه بسرعه

نهر : هااا شبيك ليش تعيط

سجاد :وخري نهر اريد اشوف شون توكف بنص الشارع وتسولف وياه

نهر : هي شعليها هو الادبسسز وكفها

سجاد : متعرف تنهزم منه لو عجبها وكفت تسمعه

سليل : والله عمو ردت انهزم وهو كطع الطريق

سجاد : واني خوش كطعته واريد اشوف شون يوكفج بنص الشارع

نهر : يمعود كتلك احجي وياه مو تتعارك شنو صاير ايدك والضرب والعركات

سجاد : واحد ساقط وموكفها بنص الشارع شتردين ابوسه واخذه بلحضن واكوله شتشرب جاي لو شربت وتعال نتفاهم شو انتي متعرفين تحجين

نهر : بروح ابوك لتذب حركتك بيه وبهاي المسكينه شوف رجفتها وحالها واني كتلك هي حجت كولشي من اول يوم بس انت ماكو حتى نبلغك

سجاد : سمعيني عدل اذا شفتج واكفه بنص الشارع بهاي الوضعيه وهاي كدام عمتج اطيح حظج والكتله تصير الج مو اله

سليل : واني شعليه والله هو وكفني وكمت ابجي جان يعيط حيل

سجاد : كافي بس تعوين اذا مسكتي هسه اكسر راسج

سليل : مباشره من الخوف مسحت عيوني جان تندك الباب

طلع عمو ورجع كال نسوان اثنين بره عليج

نهر : عليه منو ذني

سليل : طلعت عمه واني جلبت بدشداشتها من الخوف لان كعد اشوفه بعده يفرك ايد بأيد جان نطلع للنسوان ودخلناهن بدون منعرف هنه منو واني ركضت للمطبخ اسوي جاي الهن وخايفه لاعمو يطب ورايه ويرزلني بعد شويه واسمع عمه تكول لعمو

ذني امه واخته للولد الضربته جايين خطابه على سليل

يتبع ...

#رواية_أبي_والغزلان

#للكاتبة_Reem_ريام_هادي

#الجزء_الأول #البارت__الثاني_والثلاثون

#مدونة_نور_قلبي

ﻛﺒﺮﻧﻪ ﻭﻣﺎﺣﺴﺒﻨﻪ ﺍﻫﺪﻭﻣﻨﻪ ﺍﺯﻏﺎﺭ

ﻭعله گد ﺍﻟﺮﺩﻥ گصینه ﺍﺩﻳﻨﻪ

ﺍﺷﻤﺎ ﻣﺮﻧﻪ ﺍﻟﻔﺮﺡ ﻣﺎچنه ﻣﻮﺟﻮد

ﻣﺜﻞ ﻃﺒﻊ ﺍﻟﺮﻣﺶ ﻣﺘﺸﻮﻓﻪ ﻋﻴﻨﻪ

ﺍﻗﺼﻮﺭ ﺍﻟﻨﺎﺱ ﺗﺒﻨﻲ اﺑﺴﺎﻋﺔ ﺍﻟﻌﻮﺯ

ﻭﺑﻨﻴﻨﻪ ﺍﻣﺎﻟﻨﻪ ﻭﻃﺎﺣﺖ ﻋﻠﻴﻨﻪ

ﺻﺤﻨﻪ ﻭما ﺣﺴﺒﻨﺎﻫﻢ ﻳﺴﻤﻌﻮﻥ

ﻭﻃﻠﻊ چف ﺍﻟﻮﻛﺖ یخنگ حچینه

ﻏﺮگنه ﺍﺑﺤﺮ ﻫﻤﻨﻪ ﻭﻟﻤﻨﻪ ﺍﻻﺷﺮﺍﻉ

ﻭﻧﺬﺏ ﺍﻟﺼﻮچ ﺑﻴﻬﻢ ﻣﺪﺭﻱ ﺑﻴﻨﻪ

ﺧﻠﻴﻨﻪ ﺍﻟﺬﻧﺐ ﺑﻤﻌﺎﻛﺲ ﺍﻟﺮﻭﺝ

ﻭﻃﻠﻊ ﺳﻜﺮﺍﻥ ﻗﺒﻄﺎﻥ ﺍﻟﺴﻔﻴﻨﻪ

سليل : طلعت عمه واني جلبت بدشداشتها من الخوف لان كعد اشوفه بعده يفرك ايد بأيد جان نطلع للنسوان ودخلناهن بدون منعرف هنه منو واني ركضت للمطبخ اسوي جاي الهن وخايفه لاعمو يطب ورايه ويرزلني بعد شويه واسمع عمه تكول لعمو

ذني امه واخته للولد الضربته جايين خطابه على سليل

سجاد : هااا عيدي شگلتي

نهر : شبيك سجاد اهل الولد ذوله وجايين على سليل

جان كاعد على الكرويته (القنفه) سحب من جيبه وطلع باكيت الجكاره ورث وحده وسحب نفس قوي وباوع على نهر بكل هدوء وگال

سجاد : اطرديهم لو اطب اني اطردهم

نهر : عزه شون اطردهم

رجع عاد كلامه بكل هدوء اطرديهم لو اني اطردهم قرري كدامج ١٠ ثواني لو اطبين وتنهين هاي المهزله لو اطب اني

نهر : لا لا اني اطب شكد عيب ياربي

سليل : رجعت طبيت للمطبخ لان جنت ماده راسي اسمع وخفت حيل بس لا عمو يضربني من يطلعون والله اني ممسويه شى زين هسه اكمل الجاي لو شلون

نهر : طبيت للنسوان واعتذرت منهم وكتلهم البنيه صغيره ومنزوجها حاولن يفتحن موضوع وكفت على حيلي ردت بس يطلعن خفت من هذا الخبل ليطب ويطردهن

هنه هم من. شافن هيج الوضع راحن وطلعت وراهن ليبره وصلتهم وطبيت ركض صايره اعصاب

شجاك متكولي هي هاي حلوة منك غير الناس جايه وعيب

رفع راسي وباوع عليه ويسحب نفس من الجكاره ويكول ليش انتي تردين تزوجيها

نهر : طبعاً لا غير بعدها صغيره

سجاد : شفتي صغيره يعني مو مال هيج سوالف المن بعد كاعده وياهن وسوالف وجاي بعد سويلهن غده وطلعي ذيج خلي تكعد يمهن وتتعرف عليهن لو نختصرها وياخذوها وياهم لأبنهم

نهر : على كيفك هسه اني شگلت گبيت بيه

سليل : مديت راسي من المطبخ على كيفي اخاف وكلت بهدوء عمه الجاي شسوي بيه

جان هو يحاوبني بنبره عصبيه

سجاد : اسبحي بيه لان اذا شفتج مره ثانيه واكفه هاي الوكفه وروح ابويه مو بس اسبحج بلجاي القوري والبيت كله اكسره على راسج

سليل : عمو اني شعليه والله هو وكفني

سجاد : هااا خوش عذر باعي هاي كدام عمتج مو تكولين مكال بس تتكرر الحاله اطيح حظج واني اعرف راح يتعرضلج مره ثانيه متوكفين لو مو يوكفج تعيطين تصيحين تركضين متوكفين وتجين تبلغيني واني اعرف شسوي اله اخلي اذا شافج ينهزم

نهر : شنوالسالفه لتكبر الموضوع الولد وشاف بنيه عجبته وكفها يحجي وياها وطلع نيته شريفه ودز اهله واحنا رفضنا على شنو هاي هوستك وتهدد اصلاً مبين ابن عائله واله رغم الصار دز اهله بنفس اللحظه

سجاد : تسكتين لو تنكتلين وياها واقسم القوي عليج وعليها

سمعني زين هذا الموضوع ينسد واهتمي بدراستج بعدج صغيره مو مال هاي السوالف كل عمرج ١٤ سنه لو توصلين ٢٠ شون

نهر : اكيد تتزوج

سجاد : اروح عندي شغل لان اذا ابقى راح اصير اعصاب واني كوه لازم اعصابي

نهر : كل هاي وكوه لازمها خليني ساكته لعبت بينا لعب التوبه اذا احجيلك شى من هاي المواضيع

جان يوكف ويأشر بأصبعه بأوجهه نهر

خلي اشوف يامره بت امها وابوها تضم عليه راح تشوفين شى مني ميعجبج

نهر : اذا كل مره هيج تسوينا زفه نسكت احسن

سجاد : ليش عبالج مااعرف شى تره اني صّـْْ(☑)ـْْحّ بعد فرعين عنكم بس كولشي بعذا البيت اعرفه لتنسين انتم امانه طه يمي ومو اني اخون الامانه

نهر : يمعود شگلت هسه ودخلتني بالامانه ادلل حتى من انكح ونعطس نطيك خبر

جان يتقرب من نهر ويكول الها

عينج عليها من اليوم بعد سليل مو طفله فهمتي شنو قصدي

نهر : هستوك كلت صغيره

سجاد : صغيره بس مو طفله

نهر : وشنو الفرق

سجاد : الفرق من يشتغل العقل يفكر ويحجي صح ومن يجيم مثل عقلج يكوم يمسلت بلحجي

نهر : ههههههه شكراً يعني اني عقلي ميشتغل

سجاد : صلوات واخيراً افتهمتي

نهر : مقبوله منك سجودي بس اعصابك مو فد يوم تنجلط من الاعصاب

سجاد : والله محد راح يجلطني غير غبائج

نهر : هههههه تتغدى ويانا

سجاد : لا اروح عندي شغله ولد منتظرني بغداد الجديده عنده كم حاجه اخذهم منه ابيعهم بلكت تطلعلي استفاده منها

نهر : مو تعب شغلك فيتر الصبح والعصر تبيع غراض

سجاد : شسوي العيشه هيج ادعيلي الله يرزقني

نهر : الله شاهد امشي وادعيلك

بلرزق والله يبعد عنك اولاد الحرام

يله اروح

الله وياك

سليل : طلع عمو وصاحتني عمه كعدت بصفها والوجهه عليه ابتسامه خفيفه منها

وتلعب بشعري والله وبنتي كبرت وكامو يجوها خطابه

سليل : ماما خايفه لا عمو يضربني

اذا الولد رجع يوكفني

نهر : لتخافين ميضربج بس هو يخاف حيل عليكم لهذا لتضوجين من عصبيته

سليل : بس اني ممسويه شى

نهر : اعرف بنتي عاقله وفقيره ومؤدبه ومراح تطلع العيبه منها اريدج هيج دوم رافعه راسنا متدرين شكد كيفت من النسوان ضلن يمدحن بأخلاقج وشلون الولد يكول الهن مشفت هيج عقل وهدوء وادب

والله لو ما العيبه جان بجيت من الفرحه

سليل : وهاي دوم هيج راح يجون الولد يوكفوني

نهر : لا مو شرط اكو ولد ماعدهم اخلاق يلعبون على بنات الناس بس حجي وعود وكولشي ماكو ياخذون اليردوه منها ويعوفوها وسمعتها تصير على كل لسان ويضيع تعب الاهل بسبب واحد ميسوه البنيه شكد متحافظ على نفسها هي الربحانه بالاخير لتصدكين ولد يتزوج وحده تلعب وتكمز وتسوي علاقات الكل بلعلاقات يدك صدره بس يوم ميتزوج ميدور بس على الشريفه والسمعتها طيبه الي تصون بيته واهله

سليل : يعني هسه شسوي اني

نهر : كولشي متسوين الي عليج تقرين وتنجحين وترفعين راس طه متعرفين هو شكد يحب يشوفكم احسن البنات وبلذات انتي ومالج دخل بلرايح والجاي وبلشارع روحي بدربج ورجعي بدربج واي شى يصير وياج بلمدرسه بلطريق تعالي كوليلي لتضمين اي شى ولتخافين من اي شى اني وياج بلمره قبل الحلوه

سليل : ماشي ماما جان تحضني وتبوسني

نهر : شكد احب هاي الكلمة من حلكج انحرمت منها بس الله عوضني بيها منج

سليل : بستها وكتلها انتي امي واموت عليج

جان اطب بيبي وابتسمت من شافتنا وكالت

ام سندس : يمه كون الله يحفظجن ومايدخل بينجن بس الخير والبركه

نهر : تسلمين خاله وين جنتي

ام سندس : والله يابنتي أدي واجب وتعرفين كله سلف ودين والوادم لازم توجب

نهر : الله ينطيج العافيه ودوم توجبين

خاله هم رحتي لبيت ام سامي

ام سندس : والله يايمه مارحت بس هسه من جنت بيت ام خالص سمعت نسوان جوارينا يكولن على مرت سامي لان ام سامي تمشي وتسولف وطايره بحمل مرته

نهر : دنجت ونزلت دمعتي جان تجي خاله تحضني

ام سندس : يايمه سوده بوجهي مو قصدي يشهد الله بس انتي سألتي وانه الشفته اگله الج

نهر : اسم الله عليج خاله انتي شعليج بلعكس خلف الله عليج كعد تجيبيلي اخبارهم

ام سندس : كومي امسحي دموعج خايبه عليمن منزله هذا الليلوو هاي دموعج تسوه سامي وعشيرته كومي امسحيهن الغالي مينزل بس للغالي لا ترخصين دمعتج يمه

نهر : مسحت دموعي بفوطتها وبستها وكمت اغسل

سليل : بيبي اني كولش احبج

ام سندس : هاااا يمه شجرالج

سليل : هههههه لا بس انتي حبابه حيل وطيبه

ام سندس : يبعد گلبي وطوايفه تعالي ابوسنج چا انه احبنج اكثر يله يبعد بيتي ساعدي عمتج لا تعيفيها وحيدها

سليل : صار بيبي

شويه وطبت الهوسه تكمز هاااا ولج اجت تبوس بيه شمسويه مكسوره وتبوسين وليش تأخرتو

رشا .. اني اخذت بطاقه البكلوريا وانتظرتها طلعت من الامتحان وادور على سحليه بس لكفته كفخته

سليل : ولج ليش

ريم : اخذ مطارتي مال مي الصبح كال اشرب وارجعها ومرجعها

سليل : ضاعت

ريم : لا بس مخلص المي كله الجوعي

سليل : ههههه المي مابيه جوع

رشا .. ولزمي من ايده اله تشتريلي شربت ماطول خلصت المي مالتها

سليل : موعيب

ريم : لا موعيب ليش يشرب المي مالتي

هاج جنت منطتها علاكه بيها الكتاب مالتها اخاف تراجع قبل الامتحان فتحته وطلعت شربت رنا

هاي شنو

ريم : ردت واحد الج واحد لغزوله بس هو ماعنده فلوس

رشا .. اشترى الها والي ورادت بعد اثنين طلع الفلوس من جيبه بس كدر يشتري واحد لان ماعنده خلصن وفوكاها زعلت منه لان بس اشترى واحد

سليل : وانتي يلثوله شون تقبلين الها وفوكاها يشتريلج هاي عود مأمنه انتي اكبر منها وعينج عليها

رشا .. يمعوده هو شربت قابل شمشتري

ريم : ثلل هاج طيب الشرب بس صار حار اشربي انتي وغزوله

سليل : مو عيب ريمو ميصير لازم من تنطين شى لواحد مو تاخذين مقابيله ولو رايده شربت اني اشتريلج

ريم : اني احب سحليه يشتري حتى اخلص فلوسه

سليل : وعيب تصيحيله سحليه اسمه حسين وهو ابن عمج واكبر منج

ريم : كله عيب عيب عيب اهووو مااااا احب سحليه

سليل :ماما تعالي لريم شوفي شون تعاند

ريم : بعد ما اجيبلج شربت لان تكولين لعمه

نهر : شبيكم صوتكم عالي

سليل : تقبلين هيج تسوي وحجيت الها

نهر : عيب ماما

ريم : هم عيب

نهر : اي وميصير واذا شرب المي مالتج لازم تكوليلي بلعافيه

ريم : واني ابقى عشطانه

نهر : اسمها عطشانه

ريم : اي اعرف عشطانه وحاره ولو عنده فلوس اخلي يشتري بسكت جوعانه

سليل : تعالي اوكلج وبعدين نسولف

ريم : ثلل اريد بسكت طويل حبابه وجاي

نهر : رايحه للدكان اجيبلج شمائل مو

ريم : اي عمه حبابه

سليل : بدلت الها وسويت الجاي وحطيت نصه مي ونص جاي

ريم : اني مو كبرت وراح اروح رابع ليش تحطين مي بلجاي

سليل : موزين عليج وبعدج صغيره

ريم : شوفي وجان توكف على اصابعها شطولني

سليل : اكعدي كافي من اجيتي انگلب البيت كولي شون جاوبتي بالامتحان

ريم : ١٠ اخذت

سليل : شمدريج ١٠

ريم : شفت الست من حطت الدرجه

سليل : هسه تجي عمه اكلي وتعالي اقريج

نهر : رحت للدكان وتسوكت كم شغله عدس على حمص وبسكت لريم جان امشي ولمحت سامي جاي بأتجاهي مشيت سريع مااريد اشوفه ودخلت للبيت ردت اسد الباب جان يحط رجله

سامي : بس احجي وياج

نهر : ماكو شى نحجي

سامي : لازم نحجي

نهر : اريدك اطلگني وبس كولشي مااريد منك

سامي : واني مستحيل اطلك انتي مرتي حبيبتي حب عمري شون اتنازل عنج

نهر : صارت عيوني براسي كمت حتى مااتقبل حجايه منه كتله لحظه ادخل المسواك تعال بلطرمه

دخلت انطيت الغراض لسليل ورجعت طلعت اله

سامي : ليش مندخل ونسولف على راحتنا

نهر : ماكو داعي هي جم كلمة وكل واحد يروح بحال سبيله

نهر : هاااا قبل متحجي مبروك كالو راح تصير اب

سامي : اعرف بيج مقهوره وحقج والله ماالومج لو شمسوين بس انتي هم افهميني اني ردت طفل ومن حقي وبنفس الوقت مردت اضيعج من ايدي اتزوجت وشرطت محد يعرف وخاصه انتي وگلت اذا طلع حرف ثاني يوم اطلكها بس متوقعت امج تعرف وتحجيلج

نهر : حبل الجذب گصير لشوكت تريده يبقى

سامي : اني احبج ومااكدر بدونج والي صار والله غصب عني ردت افرح واحس مثل الناس عندي طفل يصيحلي بابا ويكبر ويه كبرتي مردت لا اضيعج ولا اضيع حلمي اصير اب

ومن حبي الج تزوجت بلسر لوتعرفين شون عايش بدونج والله داموت بليوم الف مره من ادخل البيت وما الكاج بيه نهر تره انتي روحي وكل دنيتي بس افهمي الي سويته هم حتى اصير اب وهم حتى تبقين مرتاحه ومحد بعد يعيرج ويضوجج

نهر : خلصت كلامك

سامي : ليش مكعد تصدكيني

نهر : اسألك سؤال بداعت عزيز گلبك واكيد مو اني بس احلف بالله ورسوله لو انت بيك عيب ومتخلف جان قبلت اتزوج واعوفك حتى اصير ام

سامي : ماكو وجهه مقارنه بين الشغلتين اني من حقي اتزوج الله محلل هذا الشى

نهر : اي محلله بس الله هم مكال الك تظلم مرتك وتزوج بدون علمها وتكسر ظهرها مكلك اطب وتطلع اتجذب عليها وتكولها بلشغل وانت بحضن مره ثانيه غيرها مگلك حسره عليك الفلس وكوه ملزك المصرف والعيشه وتروح تفتح بيت ثاني اذا انت بس اني جنت ومقصر عليه من السما للكاع من يصير اثنين نسوان شراح تسوي

سامي : تعيريني لان عيشتي بسيطه

نهر : وعشتها وياك عفت بيت اهلي الي الغرفه مالتي بيه يسوه بيت اهلك كلك ورضيت بلقليل وكلت  الْحٍمَدٍ للـّہ مستوره وبحضن حبيبي

عشت وياك  خدامه انظف واطبخ واغسل وامسح من جوه رجل اهلك واخبز هذا الخبز المجنت اعرف شلون الزم العجين اكعد من الفجر حتى اهلك يتريكون خبز حار واحترك واتجوه واكول فدوه اله المهم راضي عني واسمع حجي بلصعده والنزله والتعيير وحرت شسوي حتى ارضيها لامك ادوس عليه وعلى كرامتي واكول يرخص اله المهم هو بخير ويحبني عشت الذل بكل انواعه يمك وعلى ايد اهلك بعد مجنت مدلله بيت ابويه صار عليه اللبس حسره حتى اللكمه جنت اتحاسب عليها وتالي الليل انام متكسره ومن اشوفك نايم ومرتاح اكول لعيونه كولشي يهون

وخوش جازيتني بحجه اريحج والله ماادري اضحك لو ابجي على كلامك

اسمع سامي اذا عندك ذره رجوله وكرامه طلكني لان اني مال ارجع مره الك تحلم عندي اموت ولا اخليك تلمس شعره مني

الردته وصار وكلها جم شهر وتصير اب

بعد شنو التريده مني

سامي : اريدج الج اريد مرتي حبيبتي راحتي ودنيتي كلها والله مااقصر وياج وذيج بس لخاطر طفلي مبقيها

نهر : ماكو واحد يحصل كولشي بلدنيا جان كدامك خيارين لو اني لو تصير اب وانت اختاريت روح لمرتك وابنك وانساني

سامي : مستعد كولشي اسوي بس ارجعيلي صار اقل الشهر ومتخبل والله مكعد انام مثل التايهه بلياج ارجعيلي والله اخليج تاج على راسي ومايوم ازعلج

ولزم ايدي وسحبتها بقوه منه

نهر : اذا انت رجال طلكني لان اني بسوايتك هاي مااعتبرك رجال الي يضم راسه مثل المره ويتختل ويكذب مااعتبره رجال اثبتلي رجولتك وطلكني

جان يلزمني لوه ايدي حيل ويعيط

سامي : لج اني رجال غصب عنج وعن اهلج شون تتجاوزين عليه

نهر : ايده حيل جانت تأذي ولواها حيل بس مبينت متأذيه لان الي بگلبي الاذه اقوى من لزمته وجان اعيط عليه يله يرجال وينك طلك اني اكرهك واموت منك والعن الساعه الي حبيتك بيها وضحيت بعمري بيها لو بيك زود وخير طلكني ياناقص الرجوله وناكر العشره

جان يضربني راشدي حيل وطلعت سليل وخاله يركضون دفعته حيل خاله

ام سندس : انكسرت ايدك كون ولك شون تضربها ماتستحي

سامي : ماشي يانهر راح اراويج الرجال شيسوي

نهر : ياريت اشوف رجولتك يامره

راد يرجع يضربني ودفعته خاله بره وسدت الباب طبيت اركض ماعندي غير هاي الطريقه حتى يطلگني اعرفه اذا هنته راح يطلك مااكدر ارجع بعد كافي ١٥ سنه من عمري شريد انطي بعد والله حتى حيل مابيه من القهر طبيت للغرفه وسديت الباب مردت اشوف احد تعبانه اريد اعيط اريد املخ روحي يعني كل مااتخيل شكله وياها انزف دم من گلبي

ام سندس : عيفيها يمه ترتاح انه اعرفن بضيمها مو هينه انتي اخذي خواتج ودرسيهن بغرفتي

سليل : ماشي بيبي

اخذت ريم ورشا الي صافنات ميعرفن شكو وغزل بقيتها يم بيبي

وكعدت اقرا واقريهم

حتى بيومها نمنا بغرفه بيبي ردنا نعوفها وحدها البيها كافي منريد هوسه البنات تتعبها جنت ميته قهر وامنيتي ادخل احضنها واخفف عنها بس مراح يفيد كولشي اسوي

ثاني يوم كعدنا الصبح على بوسات منها

نهر : كومو حبايب گلبي سوده عليه خليتكم تنامون بره فراشكم وانتم عدكم امتحانات يله وراكم امتحان

سليل : صباح الخير ماما

سليل : صباح العسل يله كومو

رشا .. اني ماعندي امتحان مو تدرين عمه عندي مراجعه مال بكلوريا

نهر : اي كومي راجعي وعوفي النوم اريد معدل مو بس نجاح

رشا .. عمه والله حافظه الماده

نهر : ماكو ارجعي عيديها مبقى شى للامتحانات

رشا .. شويه حبابه

نهر : ابد كومي

رشا .. كايمه

نهر : اكو وحده ولا كعد اسمع الها حس وغطت راسها بلمخده تكوم لو اجي ادغدغها جتي الدوده الدوده

جان تطفر

ريم : لا عمه لا كمت حبابه

نهر : يله تره ادغدغج واخليج تسويها على نفسج من الضحك

ريم : لا كمت عمه كله ولا دغدوغه

نهر : يله لعد كومو مبقى وكت

سليل : تريكنا وبدلنا وكلمن طلع بدربه واول مره ريم تطلع وحدها دوم رشا وياها گلت اوديها للمدرسه وارجع لمدرستي اخاف عليها تعالي اوصلج

ريم : لا سحليه راح يجي ويايه

سليل : ولج هو مناك بيتهم شيجيبه

ريم : اني كتله اخاف اروح وحدي وراح يجي ويايه

سليل : واذا ما اجه شون

ريم : والله ازاعله واكطع شعره وبعد ما اسوي صحيبه وياه ابد ابد

جان يجي ذاك الفاهي يضحك وعلاكته بيده

هلو سليل

سليل : هلو سحليه

حسين : لتكولين سحليه ما اقبل

سليل : ايباااه لعد هاي وكفختها لريم مو يوميه شايلتك وطابتك سحليه

حسين : اي هي لان تزعل وصغيره اخليها تكول بس انتي جبيره مااقبل

ريم : ولك منو صغيره اني جبيره روح اروح وحدي

حسين : يله جبيره واكبر مني

سليل : والله انتم فد اثنين سينما اروح للامتحان مالتي احسن

ديربالك عليها حضرت الاستاذ حسين

حسين : اي هيج احجي

سليل : هزيت ايدي يله روحو

جان يلزمها من ايدها ويتمشه وياها وهي بس تكمز بيده

رحت لطريقي وصلت قريب المدرسه وجان اشوف هذا الولد يمه تكول شفت ملك الموت هلمره اذا وكفني اعيط ركضت للمدرسه وحتى منداريت وكوه انهزمت منه حتى من الحر والتعب رحت شربت مي

وكعدت بمكاني وتوزعت الاسئله وبديت اركز بالامتحان واكتب

وكملت من وكت خفت اطلع والكاه ويصير الي صار البارحه بقيت انتظر لحد ما نص الصف طلع وسلمت الدفتر وطلعت جان اكو هوايه طالعين من باقي الصفوف وصايره هوسه باب المدرسه همزين مشيت ارجع للبيت جان اشوف عمو گبالي جفلت

سجاد : شبيج كمزتي شفتي چني

سليل : هاااا لا بس متوقعت تجي

سجاد : شون جاوبتي

سليل : كولش زينه

سجاد : يله امشي للبيت

جان يمشي ويدخن اباوع اكثر البنات يباوعن عليه مااعرف ليش

جانت مدرستي متوسطه واعداديه سوه لهذا اكو هوايه بنات اكبر مني مرحله رابع وخامس اعدادي والي تباوع عليه والي تلعب بشعرها والي تتموع جانت اباوع على البنات يعني عيوني تتحرك منا ومنا جان اسمعه يكول بنبره حديه بس بصوت ناصي

سجاد : نزلي عينج لا افكسها

سليل : نزلتها من الخوف وامشي وياه وصلنا للبيت جان يكول رايح محتاجه شى

سليل : متدخل

سجاد : لا وعافني وراح طبيت دايخه شبيه عمو ويايه بس همزين اجه جنت خايفه لا اشوف ذاك وهم يوكفني

من طبيت شفت عمه وحجيتلها بقت ساكته

ويوم بعد يوم كام يجيني يوصلني ويروح خاصه الرجعه الصبح مااشوفه بس بلرجعه يوصلني للباب ويروح كمت حتى ذاك الولد مااشوفه جان كل ميجي يوكف ينتظرني باب المدرسه من اطلع اشوف البنات شون يتلوكن حتى يباوع عليهن وهو ولا يمه يدخن وصافن ومنتجي على حايط المدرسه وبس اطلع يسألني شونج بالامتحان وبعدها نتمشى للبيت بدون اي كلمة

بقت ٣ امتحانات طلعت من الامتحان ملكيته دورت عليه هم ماكو رجعت اتمشى وحدي وصلت للبيت بس بالي يمه ليش اليوم ما اجاني جنت كل مااوصل عمه تسألني اجاج شصار جانت ادقق حيل على هذا الموضوع

واحجيلها كولشي

بقى امتحان اليوم وعكب باجر بس واحد رحت للمدرسه وامتحنت وبلطلعه هم ماكو منتظرت ورجعت اني امشي جان تطبك سياره يمي اني دمي نشف حتى مباوعت منو بيها من الخوف كمت امشي كولش سريع جان تنزل الجامه الوره واسمع صوت ماما

سندس : سليل هاي اني ماما

سليل : وكفت متفاجأه سياره حديثه مااعرف حتى اسمها سودا دنجت واشوف ماما كاعده ليوره

تعالي ماما لتخافين

سليل :مااجي اريد اروح للبيت

سندس : تعالي لتعاندين احجي وياج وارجعج للبيت

سليل : وليش متجين لبيتنا لو صار ميعجبك

سندس : اصعدي لتخليني انزل واصعدج كوه

فتحت الباب متردده وصعدت كعدت بصفها صعدت الجامه جان تحضني وتبوسني

سندس : شونج حبيبتي

سليل : شتردين

سندس : ليش تحجين من وره خشمج

سليل : شتردين ماما لازم ارجع للبيت من وكت مااريد ماما نهر تخاف عليه جان تلزم حلكي حيل وتفركه دفعت ايدها اااخ

سندس : اياج تعيدين هاي الكلمة كدامي شنو ماما نعل اني امج

سليل : دمعت عيني واني اتذكر شون توسلت بيها حتى متعوفنا

هسه شتردين اريد اروح

سندس : هااج انطي هاي لامي

سليل : وليش متجين انتي تنطيها

ام سندس : حالفه مااطب البيت طول مانهر بيه شون تطردني علمودها

سليل : واني مااخذهم جان ارجع الفلوس بحضنها جانت السياره تمشي على كيف ورجال جبير يسوق خوش والله حتى سايق عدها

سندس : كتلج انطيهم لأمي لتخليني اصير اعصاب عليج

سليل : متردين تشوفين خواتي

سندس : اجي من تروح هاي الفكر

سليل : متروح واذا تروح نروح وياها

جان تصير نار

سندس : اسمعي يابت بطني لا عبالج بهاي سوالفج تلوين ايدي تره لا انتي ولا الف مثلج يلوها اني مكعد اقصر وياكم وفلوس وخير من الله كعد ادز وجنت اجي كل فتره لو ما نهر هنا والي صار ويه امي بعد المن كابله خلقتج

سليل : احنا منريد فلوس نريد ام

سندس : واني شنو

سليل : مااعرف المهم مو ام

سندس : هذا الجنت خايفه منه تربيه نهر ليش مااريدها اعرفها راح تقسي گلوبكم عليه

سليل : اصلاً ماما نهر ابد متجيب طاريج

سندس : هم كالت ماما مو ليش تخليني اقهرج بلحجي اجيت اشوفج وانطيج المصرف

سليل : اريد ارجع للبيت

حصرتني الدمعه وردت ابجي بس كوه لزمت نفسي

سندس : شونهن خواتج وغزل شلونها

سليل : زين تذكرتي عندج بنيه اسمها غزل

سندس : كافي تحجين حجي اكبر من عمرج

سليل : درت وجهي على الجامه وصلنا قريب البيت بعد بيتين  جان تحط الفلوس بيدي وتكولي

سندس : مااريد اشوف عمتج انزلي هنا وهذني انطيهن لامي وبوسيلي البنات

سليل : اخذتهم ونزلت وركعت باب السياره حيل ونزلت اتمشى للبيت حتى مسألتها عن حسام اعرف هو بنعيم ومداريته ميحتاج اسأل

وصلت قريب الباب جان افز لزمني من نص ايدي وسحل للبيت وعيونه بنص راسه

عمو

سجاد : اششش ولا كلمة

دفر الباب برجله ودخلني للبيت طفرت عمتي وبيبي

نهر : اسم الله شصار

جان يدفعني حيل وكعت بلكاع

سجاد : اسألي بت اخوج وين جانت ومنو هذا النزلها من سيارته

سليل : اني من الخوف اخرسيت لا كدرت اكول هاي ماما بقيت بس مدمعه وعيوني عليه وشفتي ترجف اريد احجي مااكدر هبطت من حركته

نهر : على كيفك خلي نفتهم منها

جان يتقرب ويدنج واني واكعه بلكاع جان يضربني بجف ايده على جتفي احجي شبيج خرسه احجي لا اليوم اخلي دمج بطولج هو منو احجي

سليل : من عيطته كمت ابجي هلمره كام يعيط تخبل بلزايد وكام مني ويضرب برجله بلقنفه الي بصفي

ركضت عمه دفعته مني وجان تنزل تحضني

نهر : ماما سليل منو هذا

سجاد : اكيد هو اني عرفت من وكفتها بلشارع ومن اهله الي دزهم اكو واحد يخطب وحده بدون ميحجي وياها

سليل : فتحت ايدي الجنت عاصرتها وطلعت الفلوس وكلت بصوت كله بجي وشهك

هاي ماما وانطتني المصرف وكالت وصلي لبيبي وصلتني

حسيت عمو ممصدك

سليل : كمت اشهك اعلى واحلف والله وداعت بابا وداعتج ماما هاي ماما سندس وكالت لان انتي بلبيت وبيبي طردتها متدخل للبيت

عاط وباوع على بيبي

خاله عندج رقم امها

ام سندس : اي يمه كاتبته بورقه هسه اجيبه الك بس تهدى ياابني تره البت وجهه اصفر على كيفك

بقيت بحضن عمه ابجي والفلوس وكعت بلكاع اخذ الورقه وراح

نهر : كومي ماما ااخ يااسجاد وخبالاتك

كمت ومهبوطه من حركته واعصابه غسلت وجهي وشربت مي وتمددت وكل مااتذكر شلون دخلني للبيت اشهك

وره حدود ساعه جان اسمع صوته وصوت ماما سندس مو صوت عياط قوي

سندس : انت شلون تخابرني وتكولي الحكي لأمج

سجاد : لان اذا اكولج الحكي لبناتج مراح اديرين بال ومتجين شترجى من وحده شمرت ٤ بنات ودارت وجهه وراحت

ام سندس : يمه سجاد على كيفك قابل شصار ام واجت تشوف بنيتها

سليل : كمت على كيفي وفتحت الباب وكعدت اسمع كلامهم

سجاد : بله اعرفج غيره سزز ومتهتمين لكولشي بس مخفتي على سمعه بتج

سندس : قابل ماخذتها لملهى شو انت متعرف تحجي

سجاد : يعني من يفوت واحد غريب او من الجيران ويشوف بتج صاعده بي ام سودا ونازله بعد بيتها بيتين مكلتي شراح يحجون عليها 

سندس : غير ويه امها

سجاد : وشمدريهم حضرت جنابج الكسيف بيها اني من الناس لمحتها من بعيد نازله من السياره ومشفت منو بيها وتوقعت غير شى زين الغريب شيكول هسه اجتي وشفتي بتج گلفي نفسج ونزلي وياها لباب البيت اقلها الي يشوف جهرتج الزفره يكول امها وياها او مره وياها ميتخيل غير شى

سندس : وانت شنو تحاسبني شو حيل تعديت حدودك

ام سندس : بتي الوليد يحجي الصدك الوادم عليها الظاهر وبتج ماشاء الله كبرت وحديثه (شابه) والعين عليها

سندس : يمه ياحديثه بعدها صغيره

ام سندس : چا شون صغيره والخطابه گبل جم يوم دكو بابنه عليها بتچ كبرت واعرف ماتحسين بكبرتها لان مو جدام عينج

سندس : صدك اجوها خطابه

سجاد : هسه انتي عفتي كولشي وجلبتي بهاي

سندس : اني هواي تحملتك تره قسماً بالله اضيعك لا عبالك اني سندس القديمه الي لا تهش ولا تنش

سجاد : كدها اعرف بيج هسه تنشين وتهشين كولشي اترجى من  هيج نماذج

جان تعيط احترم نفسك اصلاً انت زايد تجي على بناتي انت منو وتدخل بيت امي شنو قرابتك منهن

ام سندس : وليدي يدخل بيتي شوكت مايريد

سندس : اهوووووو يمه اسكتي لا والله اگلب البيت على راسكم

سجاد : انتي مره وسويها حتى اطلعج تمشين صفح لا عبالج ناسي دكتج الناقصه ب طه

سندس : باع هذا طه والله خبصتنا بيه غلطت عمري ضيعت سنين وياه يوميه اغم روحي لان معفته من زمان

سجاد : ناقصه مو بيدج

جان تطلع عمه نهر هي مرادت تشوفها بس لان شافت الوضع تأزم طلعت

كافي سجاد وروح

سندس : خوش طلعت المحاميه الثانيه والله ياامي عليج سوالف لامه شًٌگوو زبايل بيتج

جان ينهد بيها عمو يريد يضربها صارت بيبي وعمه بينهم ويتوسلون بيه

وهو يعيط بكل علو حسه

سجاد : ولج احنا زبايل ترحين فدوه للتراب النمشى عليه اني مااريد الوث الساني وايدي بوحده قذره مثلج بس اذا تجاوزتي بعد والله لا اخلي المخنث رجلج وجهج من كفاج ميعرفه

ام سندس : روحي لبيتج وكافي مخازي الجيران كلها تسمعنا

سندس : مردت اجي بس كله من وره هذا كال امج مريضة

سجاد : هذا بعينج ولج وخري نهر خلي اربيها

ام سندس : يمه بداعتي كافي

سجاد : سمعي بت البي ام الي صار اليوم ميتكرر تردين تجين تشوفين بناتج هذا بيت وتشوفي بلشارع مثل الحراميه ماكو

سندس : مو هي بكيفك

سجاد : خوش خلي اشوف بكيفي لو بكيفج

سليل سليل

سليل : طلعت اركض وخايفه

سجاد : سمعيني عدل امج اذا تشوفيها بلشارع مثل اليوم وصعدتي وياها اطيح حظج

سندس : شو تصعد وعناد بيك

سجاد : تصعدين

سليل : بقيت اباوع بوجهم

سجاد : احجي

سليل : لا مااصعد ولا اسلم ولا حتى اوكف وطبيت ركض للغرفه

سجاد : سمعتيها زين

سندس : ماشي يجي يوم واردلك السويته

وانتي نهر لا عبالج تقسين بناتي عليه سامعه ربوني واني لهلي تاليهن ومرجعهن بحضني وعود ذاك الوكت امسحي ايدج بلحايط

وخلي يفيدج هذا

ام سندس : كافي روحي لبيتج

سندس : رايحه وبعد متشوفين فلس مني خلي اشوف شون تربين ٤ بنات وعود هذا الفاتح صدره ونافخ روحه يعيشهن وياج

ام سندس : مثل ماعيشتجً اعيشهن واذا انتي ماغزر التعب بيج بلكت يغزر ببنيات طه

سندس : ماشي يمه خلي نشوف

واخذت جنطتها وطلعت

ام سندس : يمه نهر انه راسي راح يطك والدنيا افترت بيه اروحن ارتاح قبل صلاه الظهر

نهر : روحي خاله

بس طبت لزمت سجاد وكعته

شوف ياابن خالي لهنا وكافي

سجاد : شكوو انتي الثانيه

نهر : جنت اكول تصرفه طبيعي واني تفكيري غلط بس الصار اليوم أكدلي شكوكي

سجاد : احجي تره اعصابي تلفانه مابيه حيل الغازج

سليل : حسيت هدوء بلبيت وصوت بسبسه كلام بس ما مفهوم فتحت الباب اشوف منو يحجي وجان اسمع عمه نهر لتكول لعمو سجاد

نهر : انت تحب سليل

سجاد : شون احبها يعني اكيد احبها واحبكم كلكم

نهر : لا مو هذا قصدي الي قصدته تحبها يعني تريدها حبيبه الك تحبها كمره ورجال مشاعر عشق

سليل : راد يغمى عليه من سمعت هيج يعني شنو هو مثل عمو سلام كزبر جسمي وانهزيت من كلام عمه يعني يريد يتحارش بيه كعدت بلكاع بصف الباب اريد اكوم مااكدر

سجاد : شبيج نهر تخبلتي

نهر : لعد فهمني شنو هاي تصرفاتك

سجاد : شبيهه تصرفاتي

نهر : مابيها بس مثل واحد المخبل شفت اليوم شصار عوفك من اليوم وذاك اليوم من اجوي خطابه عليها غير عيونك براسك وخوفك عليها

سجاد : يعني اخاف عليها واداريها واريدها تصير سباعيه واخاف على سمعتها معناها احبها

نهر : لعد شنو معنى اعصابك بس تحس اكو واحد اتقرب منها انت شفت حالتك قبل شويه لو ساكته شويه اله تخنكها

سجاد : اسمعيني زين لان هاي اول واخر مره اسمحلج تحجين بهذا الموضوع

سليل بلنسبه اليه مثل هبه الله بلذات هي دون خواتها لان بيها من تصرفاتها براءتها خوفها طريقه كلامها من اشوفها اشوف هبه لهذا حيل اخاف عليها لتفسرين تصرفاتي بكيفج

نهر : حتى الرجفه حتى عيونك الي تتحرك كل متتحرك هي

سجاد : واكثر ولوما العيب وتحل عليه اله اخذها يمي واربيها اني جنت اتمنى اتحمل مسؤوليه اختي ترجع واصير الها سند واخ واب بس الدنيا مرحمتني ولحد هسه ملاكيها واذا خوفي مبالغ على سليل لان اريد مصلحتها ومن يوم مدخلت حياتكم واني ولا مره نظرت الها كمره او بنيه انعجب بيها دوم نظرتي الها اختي الصغيره الي اخاف عليها من الدنيا كلها هاي طفله وتبقى بعيوني طفله وانتي بذات تعرفين اني مو بعيني هاي الشغلات ويه بنات يتحارشن بيه وينطني نفسهن ومتدنى نفسي اجي على هاي الطفله وافكر بيها حب وهاي السوالف التعبانه سليل اختي الصغيره وبس اذا مو بتي حتى خواتها نفس الشى بس خواتها لان اسبع منها وهم بعدهن صغار مشاد عليهن وهي بدور مراهقه مااريد من هسه تضيع

نهر : ماشي هذا هو

سجاد : شيلي هاي الافكار من راسج ولتزعليني منج

نهر : صار

سجاد : وينها صيحيها

نهر : دخلت عليها للغرفه لكيتها وره الباب كاعده وحاطه راسها بين رجلها

شبيج بنتي

سليل : رفعت راسي وكتلها عمو سجاد مثل عمو سلام

نهر : هاااا مفهمت

سليل : ليش تكوليله يحبني كمره ورجال شنو معناها

نهر : شويه واجيج وافهمج

سليل : ماما عمو هم راح يتحارش بيه

نهر : لا حبيبتي هسه اجيج وافهمج

كمت اخاف منه

نهر : ماشي ابقي هنا وهسه اجيج طلعت على سجاد

سجاد : ها وينها

نهر : نايمه اكيد تعبت

سجاد : خوش اجي غير وكت

نهر : على كيفك وياها

سجاد : الله كريم

وطلع وركضت على سليل وكومتها من الكاع

وكعدتها على الجربايه

سليل : منو عمو سجاد وليش ماما تكول انت متقرب شى النا

نهر : ماادري اذا احجيلج راح تستوعبين لو لا بس انتي كبرتي وعقلج اكبر من عمرج ولازم تفهمين الصاير

وبديت اسولف الها زواج ابويه من امي وشون تزوج عليها رازقيه وخلفت طه

كعدت بلساعه كامله احجيلها وهي مصدومه حتى مفكت حلكها لحد مكالت

سليل : يعني بيبي انعام مو ام بابا

نهر : لا مو امه

سليل : هسه عرفت ليش هيج تسوي وليش تكرهه وتكرهنا معناها عمو سجاد مو كرايب بابا

نهر : لا كرايبي اني بس هو حيل يحب ابوج ورغم عرف هو مو ابن انعام بقى يعتبره ابن عمته

سليل : احس الدنيا افترت بيه ومعدتي گلبت يعني هو مو كرايبنا يعني هو مو عمي

نهر : لتفكرين هيج يبقى عمج ويبقى كرايبنا ويخاف عليكم والله اكثر من روحه

سليل : ماما اريد انام تعبت

حسيت راسي اليوم اكتفى من السمعه راح يطك مكعد اتحمل كل الكعد يصير تمددت وغطيت راسي وطلعت عمه من جنت احضنه واتقرب منه يعني هو مو عمي زين شلون

سمعت هوسه ريم بره ورشا جانت طالعه عدها محاظره تقويه بلمدرسه اخذتها ورجعت ويه ريم مطلعت ودخلن للغرفه ولا رفعت راسي

وبيومها حتى مقريت ولا راجعت نمت لاول مره من سنتين انام اليوم كله

كعدت الفجر باوعت الكل نايم كمت من فراشي وتوضيت وصليت واخذت كتابي وكعدت اقرا باجر اخر امتحان التزمت طول اليوم بلسكوت حتى البنات متقربت منهم وعمه هم عرفت اني تعبانه والصار هدني كولش ودخلني بموجه خوف جديده

رحت امتحنت اخر يوم ومن طلعت شفت عمو واكف دنجت وتقربت منه

سجاد : شون جاوبتي

سليل : زينه

سجاد : شو زينه مو كل مره كولش زينة

سليل : اي كولش زينه

سجاد : زعلانه مو

سليل : اريد اروح للبيت عمو

كمت اخاف منه مااعرف ليش رغم مايوم حسيت بيه نظرلي بشى موزين اصلاً كمت احس من تصرفاته عمي الحقيقي ومثل ابويه بس من عرفت ميقربلي شى بديت اخاف

طول الطريق ساكتين جان يكولي

سجاد : تعالي اشتريلج من الدكان حلقوم وبسكت حلاوه اخر يوم وهم نازله نساتل جديده

سليل : مااريد

سجاد : ليش

سليل : عفيه عمو اريد ارجع للبيت

مشيت وعفته ورجع يمشي بصفي وساكت وصلنا للبيت سمعت صوت بجي طبيت لكيت بيبي حاضنه عمه وتهدي بيها ورشا واكفه على صفحه تباوع

سجاد : هااا شصار

ام سندس : طلكها سامي الله لا يوفقه

سجاد : وعلى شنو تبجين مو هذا الردتيه

نهر : ابجي على روحي على عمرري الراح

سجاد : احسن ماتخلصي ويه واحد ميسوه اظفرج همزين طلك بدون مشاكل خلي يولي اخلصي منه

سليل : عفتهم وطبيت حتى محجيت ويه عمه حسيت روحي رجعت للمثلث الاول مثلث الرعب والخوف والقلق وعدم الامان

عفتهم ودخلت وبقو يحاولون يطيبون خاطرها وبعدها مسمعت صوته اعتقد راح

يوم اسود بحياه عمه شفت بعيني انسانه ضحكت بكولشي وتجازت بلخذلان يجوز بوقتها مااعرف احساسها شنو بس بمرور الوقت ومن كبرت عرفت شنو معنى الخذلان

باوعت تأخرت ريم هاي وينها

طلعت كتلهم وين ريم

رشا .. بعدها مجايه

سليل : بس تأخرت هوايه

رشا .. اي اني هم انتبهت مسحت عمه دموعها وكامت اي صدك هاي وينها

بقينا واكفين بلباب ننتظر ماكو لازم من ساعه وربع هي هنا ياربي هاي وينها

جان تلبس عمه العبايه على راسها ولزمتها اجي وياج

نهر : تعالي يله

طلعنا مثل المخابيل اندور عليها رحنا للمدرسه سألنا هنا كالو الصف الثالث كله طلع ولا واحد باقي من اكثر من ساعه سألنا على حسين هم كالو خلصو باقي بس المعلمات والمديره

سليل : خفت من گل گلبي على اختي شجاني وامنت تروح وتجي وحدها اباوع على عمه تفرك بأيدها من القلق وتعض بأصابيعها هاي وين راحت كمنا نفتر مثل المخابيل بديت ارتعب عليها كالت عمه نرجع للبيت نبلغ سجاد لازم يطلع يدور عليها

سليل : امشي من هذا الفرع بلكت نلكاها جان فرع بيتنا القديم رغم خوف عمه من هذا الفرع لان بيه ذكريات تهد الحيل وحبها وضياع عمرها وبيه اصعب ذكرى بلنسبه اليه هو حرك البيت الي لهسه مشايفته شون صار وره مطفو الحريق

دخلنا الفرع ونشوف جهال يلعبون طوبه وبنصهم ريم تلعب كلهم ولد بس عي بنيه من الهبطه الي اكلناها كعدنا باب ناس حاطين صبه حتى مابينه نوصل ليمها ونصيحها لابسه بجامه وبقميصها مال المدرسه والصدريه ماكو وتلعب وتهاجم وتعيط جان تكول على ذاك الفريق وتعيط كووووول وحسين يكمز وياها وشالها ويفتر بيها وكعو بلكاع جان تكوم وتضربه على رجله واسمعها تكول مطي غير تشيلني زين

باوعت على عمه نهر شكد خايفين وبعيونا الدمعه متنا ضحك

وجان تكول عمه ولج زيبك شون بيج بصوت عالي انتبهت علينا

جان تشيل الطوبه وتجي تركض وتصيح متلعبون اله اجي

ريم : هااا عمه شفتي شون كولت والله العب احلى منهم

سليل : لزمتها من اذنها هذا شنو حالج وين ملابسج

ريم : ذيج الصدريه والكتاب واباوع محطوطات على شجره

نهر : صخام ولج وين بدلتي ومنيلج هاي البجامه

ريم : مال سحليه لبستها جوه ملابسي ونزعت الصدريه مااعرف العب بيها اعثر

سليل : وانت شلون تلعبين ويه الولد تدرين شون خفنا عليج وشون هبطنا واندور عليج مثل المخابيل

ريم : مابيه شى العب وياهم وجبت اثنين كول واذا فزنا يشترونا حب شمس وموطا لكل واحد وناخذ الطوبه النا

نهر : امشي للبيت يله كافي

ريم : بس هذا الهدف عمه حبابه

نهر : ميصير ياامي انتي بنيه وهمه بس ولد

ريم : كصيلي شعري واصير مثلهم اريد العب وياهم البنات حقيرات ميلعبون ويايه

نهر : جريتها من ايدها وشمرت الطوبه امشي

جان تنزل دمعتها اول مره حسيتها تبجي من گلبها

سليل : ماما  راح ابقى كاعده هنا يمها تلعب وتكمل وارجعها

ريم : هيييي احبج ثلل

نهر : لا ابقى وياكم خلي نشوف تالي ست ريم

ريم : يله شجعوني وصيحو ريمو ريمو حتى من نفوز اشتريلكم موطا

سليل : لك سحليه تستاهل من تسميك هيج هاي تاليها تلعبها ويه الولد

حسين : خوش تلعب ربحنا من وراها واذا مندخلها بلحجار توكعنا دك

سليل : خوش ابن عم روحي العبي خلي نشوف

وبقينا نباوع عليها وشون تلعب وفرحانه وكل شويه من يغلط المكرود حسين ياكل ياجلاق ياكفخه ياعيطه مسحته مسح وهو هم يضربها بس احسه مو من گلبه ومن وكعها واحد من جماعتهم راد يضربه تخبل لان وكعت ضحكت على برائتهم وتمنيت اشوف ضحكتها هيج متفاركها

وفاز فريقها واجت لازمه الطوبه كالت

ريم : كالولي اذا اخذتي الطوبه منشتريلج موطا ميخالف اذا ماكو موطا واخذ الطوبه

نهر : هههههه منريد المهم فزتي

هاج ثلل صدريتي وكتابي

سليل : خوش والله هلمره اشيل ملابسها

ريم : غير تعبانه وفزت

سليل : جبتينا كأس العراق يله هي طوبه وصخه

ريم : هسه اغسلها تصير تخبل

رجعنا نضحك على لبسها

وصلنا لراس شارعنا اجت رشا تركض وتبجي بيبي وكعت واتزحلكت ومتحجي

يتبع .....

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_الثالث_والثلاثون

#مدونة_نور_قلبي

گبل چانت محنه ،وناس توصل ناس

        وطاسة ماي چانت عدهم تغزر

عكست والنهر يطلب من الناعور

            والخبزة بعد ما گامت تشور

قل فيّ الوفه من علت شمس العوز

      وضم راسه البخت والعاهر تشور !!

حقها الفوس تعمه وتحضن الزنجار

    العصي صارت حديد وگامت تطبر

كاع الفاض مايها ونشف منهه بساع

     من يشتد عطشها من الوفه تفطر

سليل :

ركضنا طبينا للبيت لكينا بيبي مدده لا ايد ولا رجل عاطت عمه وركضت على جيرانه عنده سياره اخذوها

نهر : ديري بالج على خواتج واقفلي الباب اخاف منجي ونبات

سليل : شلون وحدنا

نهر : ما عليكم شى ماما

سليل : اخذت خواتي بحضني وهنه خايفات اكثر مني قفلت البيت كله وكوه اكلو البنات هم جانو خايفات مثلي واكثر

مر الليل وكنا كاعدين بلهول حتى مكدرنا ندخل بلغرف انام

والصبح اندكت الباب ركضت صحت منو

نهر : اني ماما افتحي

سليل : فتحتها وكلي قلق هااا وينها بيبي

نهر : خلي اخذ نفس جيبيلي دولكه المي ميته عطش

ركضت جبت المي الها والبنات كعدو داير مداير عمه شربت وكعدت تسولف خطيه انكسر الحوض مالتها وحالتها صعبه ادعيلها بتي الله يكومها بلسلامه

سليل : خطيه بيبي

رشا .. يعني راح تموت

نهر : لا اسم الله مابيها شى بس ادعولها

بقت ايام عمه تروح بين مستشفى وبين البيت وبهذا الوكت رشا بدت تمتحن البكلوريا واني مشفت عمو لان ملتهي وياهم واجه كم مره تطلع اله رشا يجيب غراض او عشى ابد مااطلع كله رشا

وحسب معرفت من عمه جايه ماما سندس للمستشفى ورايده تنقلها لغير مستشفى بس الاطباء منصحوها وهم بيبي مقبلت كل ميحجون وياها وتكول رجعوني لبيتي لحد متعبو ورجعوها للبيت طبت بلعربانه تكسر الگلب ركضنا عليها نبوس بيها جنا حيل مشتاقين الها

ام سندس : يمه فدوه للبنيات الحنينات

نهر : يله بنات عوفو خاله ترتاح

سجاد : يله خاله اشيلج للفراش

ام سندس : اخاف اتعبك يمه

سجاد : ياتعب خاله شو تعالي

شالها وجان يكول والله خاله ريشه انياله راح يتزوجج ميتعب

ام سندس : يااا خايب شضل بيه كضيت

سجاد : خاله كلج شباب كومي بلسلامه اجيبلج شويب على كدج عنده سن سنين ضالات

ام سندس : اريده حليوو يمه

سجاد : يااا مو تدللين حتى عيونه كاملات

ام سندس : شنهي تريد تجيبه اليه اعور

سجاد : لا عنده اثنين عيون بس ميشوف المهم عنده خاله لتهتمين يخلصها تلمس

ام سندس : ههههه والله عليك سوالف يمه ينطيك العافيه

سجاد : تأمريني امر

سليل : باوع عليه عمو درت وجهي ركض وطبيت للغرفه كمت مااحب اكون وياه بنفس المكان افكر واخاف واتذكر صوته وعياطه

اجت ماما تشوف بيبي مطولت نص ساعه وراحت وحطت فلوس جوه راسها جان تكولها بيبي

ام سندس : تعالي يمه اخذي فليساتج انه خلفتج وربيتج لهيج يوم تراعين الله بيه مو حتى تحطيلي وصخ دنيا جوه راسي وترحين اذا ذني بعينج اكثر من امج روحي مااريدن اشوفنج

سندس : يوم غير عندي شغل وبيت وقابل اني عايفتج اجي ازورج والله ليش ذيج الايام مو كابلتج وكعدت بلمستشفى

ام سندس : سويتي الفلحه يايمه مشكوره اخذيهن وهي سلف ودين حبيبه سلف ودين

سندس : يعني ماجيتج بيوم اله تحجين عليه

لو شما اسوي الج مو بعينج ودوم اطلعيني غلطانه

ام سندس : يمه نهر

نهر : اجيت اركض كولي خاله

ام سندس : يمه طفي الضوه اريدن انام

سندس : خوش يمه نامي

نهر : طلعت سندس نار اباوع على سليل صافنه

شبيج امي

سليل : بيبي راح تبقى هيج تعبانه

نهر : لا اذا احنا نساعدها وانداريها ترجع زينه

سليل : اي اني اوكلها بيدي

نهر : اي عفيه والبنات هم خلي دوم يطبن عليها حتى لتحس وحدها

سليل : بقينا وياها دوم اشوف عمه شون تشيل بيبي وتنظفها لان صارت الحاجتين جواها رغم مو بتها بس احس عمه من كل گلبها اداريها وتاخذ اتسبحها وتمشط الها ومرات تكعد تقرا قران يم راسها وكت الاكل اني اوكلها

عاملناها مثل الطفل نخاف عليها كولش

فاتت ايام ورشا نجحت وبمعدل عالي بس بسبب مرض بيبي مكدرنا نفرح بيها

عمو متقربت منه ابد وكل مااشوفه ابتعد

الجو صار حار وبيبي كالت لعمه

ام سندس : يمه نهر حضري السطح للبنيات تفرفح رويحتهن من الحر

نهر : ماشي من باجر انطفه اني والبنات

صعدنا نضفناه جان نهايه شهر السادس ١٩٩٧ وكمنا نفرش وانام بس عمه متقبل اله يم بيبي ومرات تصعد فوك يمنا لان بيبي تكول الها اني ابرد حتى لو حار الجو مااهتم مره جبيره ومااتحمل البروده لهذا جانت عمه صاعده نازله ساعه يمنا وساعه يم بيبي

دخلت على خاله اشوفها شونها اخاف محتاجه شى لكيتها صافنه

نهر : شبيج خاله صافنه اكو شى يأذيج

ام سندس : والله يايمه مو صافنه استغفر ربي واحمده على عطاياه انه بيوم شكيت حالي اله واعترضت على حكمه

نهر : شون يعني

ام سندس : يوم ماسندس ذبت بنياتها هنا انه باوعت على السما شايفتني من اطلع المغرب ادعي بلطرمه

نهر : اي وكلش احب من توكفين وتفتحين الفوطه وتدعين

ام سندس : بيومها باوعت وكتله ربي انه بطرك  الوليد ومادبرت عيشته ودزيته لعمامه تالي تذب عليه اربع بنيات ضلت الحسره بروحي بس انه واكف بعيني اخيج العزيز ابو الچلمه الحلوه واشوفه من اشوف بنياته سلمت امري لله وانه بيني وبينج جنت اموتن من اخذ فلوس من سندس يشهد الله وروح العزاز كل مااتسوك اباوع على الله واكولن ربي اذا فلوسها حرام لاتاخذني بذنبها عبن ماعندي حيل اعيل البنيات لو بيه وحك ام البنين مااخذ فلس منها بس شفتي حالي كوه اخبزلي جم كرصه للوادم وفلوسهن اكل بيهن وذني ٤ الله يحفظهن واكالات ومصرفهن يكسر العظم وتالي اجيتي انتي وگلت صارن ٥ ياربي شون اعين والحمدلله صرتي احسن عونه الي وللبنيات وكمت اكوم واكعد احمدالله على جيتج

وهسه عرفت ليش الله دزجن الي

نهر : ليش

ام سندس : حتى بوكعتي تعينني انه لو وحيدي اضل هاي ضلتي محد يناولني الماي حتى بنيتي تستنكس مني ولا تلزمني وهذا حالي وانتي يبعد رويحتي ينطيج لحد مايرضيج شايلتني بلصلوات رحمته شكد عظيمه رادني بأخر ايامي ماانذل وانتن وجودجن يمي خلاني حتى استحي من الله لان بيوم گلت شنهي حكمتك تذب كوم اللحم هذا علي وانت تعرف حالي

نهر : والله ياخاله مو بس احنه رحمه الج حتى انتي رحمه النا اني شفتيني محد عندي حتى امي واخويه العايشين بلدنيا نكروني ورجلي بعد التعب كله داسه برجله والحنان اخوتي واحد بلتراب سوده بوجهي مانعرف بيا كاع والثاني مسجون والله اليعلم شوكت نشوفه

ام سندس : الله يفك سجنه بجاه سجين بغداد (الامام الكاظم عليه السلام )

نهر : امين ياخاله يوم عيد واشوفه كدامي اااخ خايفه لا اموت ومااشوفه

ام سندس : بعدج شابه يمه عمرج طويل وتشوفي وتملي عينج منه والله يرزقج بأبن الحلال اليجازي تعبج خير وضنه يترس حضنج

نهر : حيييل خاله رجال وطفل مستحيل لان بعد مااكدر اتزوج ولا اكدر اتقبل رجال بحياتي هو بس واحد وانطيته كولشي وكسرني ماضل عندي شى انطي

ام سندس : الدنيا ماتوكف على واحد يمه ارضي بقسمتج حتى الله يرضى عليج ويدزلج الاحسن وهو وله يعيش حياته عليمن ادفنين هذا الحسن كله

نهر : ههههه لحد يسمعج خاله ويصدك اني حلوه شحالني

ام سندس : يااافدوه كل هذا الحسن ومحلوه چا غير هو اغم واخذ غيرج وين يلكه بندارتج وطيبه گلبج وجهج الحلو الجنه جرگه بلسمسم تخبل

نهر : هههههه والله ماكو غيرج الي يخبل يله خاله ارتاحي لازم تنامين موزين عليج السهر

ام سندس : يمه نهر وصيتج بنيات اخوج انه اعرفن انتي احن مني عليهن بس گلشي يصير هاي دنيه عينج عليهن ولا تعيفيهن اله بيد ابوهن

نهر : لتخوفيني خاله شبيج

ام سندس : مابيه يبعد رويحتي بس احبن اوصيج هذا نفس ياصاعد يانازل ومانعرف شوكت يوكف

نهر : عمرج طويل خاله عفيه صيري زينه لخاطري وخاطر البنات والله نضيع بدونج

ام سندس : ربج موجود يمه مايعوف حمل مطروح حطي عينج بعين الله وذبي حمولج عليه مايرد مظلوم

نهر : ان شاء الله يله ارتاحي

غطيتها وطلعت بس كميه الخوفه الصارت عندي من كلامها عجيبه طلعت وكعدت بلمطبخ بلكاع وحطيتي ايدي على خدي واتخيل لو يصير بيها شى اني وين انطي وجهي منو اليه وبنات طه مااكدر بدونهن غير اموت تعلمت عليهن هن صارن حياتي

جان تجي وتكعد بحضني اباوع غزل

اوووي فدوه للبنات عشره واكول گليلات

هنا عمر غزل ٤ سنوات كلامها قليل بس مفهوم هي مثل سليل تصيحلي ماما وتصيح لسليل هم ماما مرات من اشوف شون رگبتهت مشووها من جهه اليمنى ورجلها ابجي مااتحمل واشيل هم هاي من تكبر شلون وبلمدرسه شلون هاي مو ريم وتتعارك هاي فقيره حتى صوت مينسمع الها

غزل : ماما اليد هميه (اريد اكل)

نهر : اروح فدوه لكلمة ماما تطلع منج وكمت ابوس بيها وتضحك تعالي اوكلج

صبيت اكل وكعدت اوكلها

طبت ريم

عمه عمه

نهر : هااا ياستار شبيج تعيطين

ريم : اريد مكص

نهر : شسوين بيه

ريم : اكص كصيبتي

نهر : شنو ليش

ريم : العب ويه حمودي والولد

نهر : حمودي هذا منو ولج

ريم : حمودي صديق سحليه كال اذا تكصين شعرج العبج ويانا دعابل

نهر : انتي بنيه شون تكصين شعرج تصيرين محلوه

ريم : اني محلوة وكلها تخاف مني اصير ولد همه يلعبون ويايه

نهر : لا حبيبتي هسه تكبرين وتصيرين تخبلين

ريم : اهووو عمه حبابه حبابه

نهر : صيحيلي حسين

دخل حسين للبيت هلوو عمه

نهر : هله بحبيب عمتك ليش عمه هيج تريد ريم تكص شعرها

حسين : والله مو اني

نهر : لعد كول الها لتكصه

حسين : ساسوكي اذا كصيتي شعرج ماالعب وياج وبعد مااحبج

ريم : وحمودي يكول كصي

حسين : هسه اضربه لحمودي يله امشي نلعب واشتريلج

ريم : اثنين موطا

حسين : اي اثنين

نهر : دير بالك عليها

حسين : اي عمه

نهر : طلعو واني اباوع على ريم هاي من تكبر شلون هسه طفله وبدت تتعقد لان محد يلعب وياها من تصير مراهقه شلون من تشوف الشباب يرفضون يباوعون عليها

ااااخ عسى بحضه وبخته الي سوى بيج هيج

سليل : بيوم نايمين بلسطح  بدايه شهر السابع ونزلت عمه حسيت طكطكه وفتح باب نزلت على كيفي واشوف عمه تلبس عبايتها وتفتح الباب

هاا ماما وين

نهر : اصعدي فوك ولتنزلين ابد زين

سليل : ليش

نهر : كتلج لتنزلين

سليل : بقيت كاعده على بايه الدرج انتظر عمه طبن نسوان اربعه ورجال وشويه وكبت العيطه فزيت شصار نزلت اركض واسمع عمه تكول وين رحتي وعفتينا مو كلنا برگبتج وتلطم

عرفت بلحظتها راحت الحنينه راحت بيبي لدار حقها

وره ساعه اجت ماما وعياطها هز البيت هز ولطم وملخت روحها جنت ابجي حيل على بيبي بس باوعت على ماما وبگلبي اكول على شنو تبجين وانتي صار اكثر من اسبوع مواصله الها ولاتدرين شى عنها هسه صارت عزيزه

صارت الفاتحه بيومها جنت بس ابجي ومنهاره وخواتي ميعرفن بس يصارخن خاصه ريم كلبت الدنيا لحد مااخذها حسين يلعب وياها ويسكتها

جان يجي دوم بدون علم بيبيته يكول الهم عند صديقي وهو مخلصها يمنا يلعب بريم

ماما طول ٣ ايام موجوده بلفاتحه سوت فاتحه رنانه وذاك الصرف والفلوس ومخلت احد يدخل جنت طول هاي الايام مااتقرب منها وحتى هي متباوع لا بوجهي ولا وجهه عمه نهر بليل من تفض الناس جنت اموت قهر من اشوف ريم تنام بحضنها وشكد محتاجه حضنها وهي بخلت عليه وتركتنا اما حسام ولا وصل ولا حتى فكر يجي يشوفنا وثالث يوم بليل راحت حتى بدون متكول رحت

من قهرتي هم بيبي ماتت وهم سوالف ماما متحملت بليل ماكو احد كلها راحت بس عمو سجاد وعمه كاعدين يسولفون على الفاتحه طلعت بلطرمه

كعدت ابجي وحدي خاتله يم التنور مال بيبي سمعت طكطكه مهتميت وبقيت ايدي على وجهي وابجي جان اسمع صوته الي يوم معرفت هو مو قريب بابا كمت اخاف منه

سجاد : ليش كاعده وحدج متخافين وليش هيج تبجين مشبعتي بجي صار ٣ ايام

رفعت ايدي من وجهي وباوعت عليه

احنا منو النا هسه وين راح نروح

سجاد : مفهمت

سليل : بيبي وماتت واكيد ماما راح تطرد ماما نهر لان متحبها واني مااعوف ماما لو اموت وخواتي منو الهم يعني بيبي هسه يتمتنا من جديد كل ما أمن واكول هاي هي ارتاحينا يرجع يصير شى موزين والله تعبت والله

سجاد : اششش على كيفج لتأذين نفسج

حط ايده على جتفي يهديني كمزت وخرت منه هو فتح عينه متفاجأ وبقى ساكت شوي وكال

تعالي بله اني منتبه على شى واريد اتأكد منه

تقربت بس بحذر واثنينا كاعدين على صبه صغيره بصف التنور

ليش حاسج تخافين مني

سليل : دنجت وبقت دموعي تصب

سجاد : احجي الي بگلبج ولتخافين شبيج سليل ليش تخافين مني لان ذاك اليوم عيطت عليج وحاسبتج تره من خوفي عليج

سليل : بقيت مدنجه ومااجاوب جان يكول

احجي مااسوي شى

سليل : ولا تعيط

سجاد : ولا اعيط بس احجي

سليل : رفعت راسي واباوع عليه ويه كل كلمة دمعه انت طلعت مو عمو ولا تقرب لبابا شى يعني انت غريب عنا

سجاد : كالتلج نهر

سليل : اي حجتلي كولشي اذا عمي اخوه بابا سوه موزين ويايه انت غريب شسوي وليش اصلاً ادافع النا وليش باقي ويانا اذا حتى ماما عافتنا

صفن على وجهي وادري بيه تعصب بس مسيطر على اعصابه متحمل سحب جكاره ورثها ورجع راسه ليوره طخ بلشباك الموجود ورانا شبه مدد جسمه وبقى يسولف وراسه مرفوع للسما ويشرب جكاره ويذب دخانها ليفوك وكأنه يسولف ويه روحه

سجاد : بيوم معرفت السوته امي دخلت بطور كآبه كمت لا اكل ولا اشرب وحابس روحي بلغرفه وكل شويه افكر انتحر جنت بدايه مراهقتي وماافهم ومقهور شون عافوني وراحو واسمع اشكال الكلام من اهل ابويه وعماتي السب والشتم والطعن بعرضها وابويه المكسور ماعنده بس كلمة الله كريم هذا الرجال الهيبه الي جان من يوكف ويحجي يسكت الكل كلمته مسموعه على الجبير والصغير الكل يحترمه ويهابه صلب حديد وشخصيه جباره بحركة بسيطه من مره دمره خلاه مثل وصله المسح ياهو اليجي يمسح بكرامته

من وره كسرته فكرت اموت بس شلون

وبيوم كاعد حابس روحي بلغرفه والبيت هوسه عماتي و ولد عم ابويه هواي هوسه جبرني بابا اطلع اسلم طلعت وسلمت ماانسى نظره الشفقه بعين الكل وكلها تكول شوف الساقطه الكح.. شون عافت ولد مثل الورد وهجت مكدرت اجاوب احد وبقيت كاعد لحد ماكمت اجيب مي بابا كال جيب دولكه مي وكلاص رحت للمطبخ لحكني سلام عمج النكس واثنين ولد كرايبنا ولد عم ابويه تقريباً بعمري او اكبر بسنتين يعني كلنا بعمر المراهقه بس سلام اكبرنا جان يكولون شبيك يول هيج ضعفان هاي لان امك شردت ويه صاحبها

الثاني يجوابه لك منو يكول واحد يجوز اكثر من حضن لحضن هسه اني تخبلت وكمشت الكلاص وكسرته براس واحد بيهم ودمه ترس المكان على صوتنا اجو يركضون وتلازمنا بس فاككونا وبلحظتها ابويه ضربني راشدي كدامهم كلهم حتى بدون ميسمع مني ليش ضربت ذاك ودميته  اباوع شون يضحكون بشماته نار وشبت بگلبي ردت حتى ابويه اكتله لان ضربني كدامهم مكدرت اسوي شى بسبب عمري الصغير وكلها واكفه طبيت للغرفه وكسرت كولشي بيها مبقيت شى صاحي

محد دك بابي ولا كلي ليش هيج سويت

بقيت يومين تعبان حتى اكل مااكل واني اصلاً قبلها شبه كاطع الاكل وضعفت حيل لحد موكعت ونقلوني مستشفى شفت ابويه شون كاعد يم رجلي يريد بس اكوم اصحى انقهرت عليه بس بقيت مكسور وره كم يوم قررت ارجع للدراسه اقلها اطلع من جو البيت من ثاني يوم دوام شفت بلباب واكفين سلام وعصابته الي همه كرابت ابويه والضربته مشدود راسه لزموني وجروني كدام الطلاب كلها همه ٣ واني واحد يردون يضربوني اني عطت بيهم وكتلهم لو صدك رياجيل متسوون هيج هاي مو سباعيه كلكم عليه وكدام الطلاب

هدوني واتفقنا نتعارك ثاني يوم بعد المدرسه ليش هيج كارهيني مااعرف بس بوقتها ردت اضرب ردت اكطع شكو واحد كدامي واجت الفرصه حتى لو موتوني عادي هو هذا الاريده

سليل : خلصت الجكاره بيد عمو ورث الثانيه وعلى نفس كعدته يسولف واني حاطه ايدي جوه خدي وصافنه على كل حرف يكولها

سجاد : اتفقنا ثاني يوم بوكتها هنا تعلمت ادخن واشرب جكاير بدون علم ابويه خلصت الدوام وطلعت بلبايسكل مالتي وصلت للمكان الي اتفقنا بيه نتلاكه

لكيت بس ولد عم ابويه سلام ماكو وياهم ولد مااعرفه بدينا نتضارب بالاول جنت مسيطر لان واحد واحد يجيت عليه واني اصلاً حامي واريد بس اتعارك وروحي بخشمي وماانسى تعيرهم اليه اضرب ويضربون بس من لزموني تلاثتهم مكدرت بعد شبعوني كتل وين ميوجعني على لحظه احس راح اموت حتى القفص الصدري حسيته تكسر من الضرب وجر واحد منهم هيج شون القلم بس براس القلم موس يردون يضربوني بوجهي جان يلزمه طه

سليل : بابا شجابه

سجاد : قبل متصير العركه وره متفقنا نتلاكه طه سامع سلام شون يتفقون لازم سلام ومطيح حظه وعارف شراح يصير ومانعه من الجيه واجه حتى يساعدني

سليل : اي وتالي كمل عمو

سجاد : انهزمو من شافوه وبقى يعيط عليهم

وابوج هنا يمكن حسب مااتذكر متزوج امج لو لا المهم كومني ونفض ملابسي جان وجهي كله ينفض دم وملابسي مكطعه اخذني لجامع قريب من المدرسه وحجه ويه شيخ الجامع وطبينا للمغاسل مكدر يوديني لأي مكان حتى محد يعرف لان اذا وصل الخبر لأبويه راح يأذيني لان يعرفون طبع ابويه شلونه

غسلت وكعدنا بساحه الجامع ونسولف

حجي طه : هسه زين هذا حالك

سجاد : طه لتلومني متعرف شيحجون لتصير مثل بابا يضرب بدون ميفهم

حجي طه : هسه اني ضربت يله يابه احجي اسمعك وكعدت اسولف كولشي لطه حصرتني الدمعه حيل وجسمي منا متكسر من الضرب حيل اختنكت

حجي طه : شوف انت بعدك صغير والدنيا وراك طويله اذا من هسه تفكر بلكتل والضرب والانتحار شون راح تكملها

سجاد : اني اصلاً اريد اموت امي عافتني وراحت واخذت هبه وخلت ابويه مثل المخبل بس يعيط ويضرب وصرنا شماته بحلك الكل شون تريد مااتعارك وماانتحر

حجي طه : على هيج المفروض اني من زمان منتحر

سجاد : انت ليش

وبدا يسولفلي طفولته وشون متعذب والتفرقه بين الاخوه والاذيه وهو شكد يحبها وهي تصده وتأذي وشون عمه انعام تعامله بكل حقاره وبيومها عرفت هو مو ابنها ابن زوجته الثانيه بقيت ساكت من الصدمه حسيت شون متأذي بس ساكت ومسلم امره وراضي بكولشي وشون مأمن بالله ودوم يكول هاي الدنيا يوم حلو يوم مر رغم هو مشاف من حلاتها شى بس متأمل بالله  ابتسامته من يحجي عن القهر المر بيه خلاني صافن وبقينا فوك ٣ ساعات نسولف خله روحي الجانت نار تصير رماد

حجي طه : انت سبع وبعدك صغير اريدك تشد حيلك ابوك محتاجك واذا كعد يعاملك هيج حتى يسويك رجال لتنسى هو هم انكسر لتكسره انت بلزايد اوكف بوجهه الكل وابني نفسك خلي الكل يكول هذا سجاد السبع رغم كولشي صار رجال ويعتمد عليه  الصار بعد ميتغير لا تصير انت هم على ابوك والي يجون عليكم حاول تتجنبهم اذا مسيطرت على اعصابك او واجههم بنفس تصرفاتهم

بيومها بقيت اسمع لكل كلمة لأبوج واخذني من ايدي واشترالي قميص لان مشكك مالتي وكله دم رغم شفت بجيبه فلوس قليله بس اشترالي حتى لا اتعاقب من ابويه وتكبر الشغله وحتى شعري مشطه  ورجعني للبيت بدون مينتبه لأحد

بقيت افكر بكل كلمة يكولها وثاني يوم اجاني بعد الدوام وجان رايح لأهل الولد وشاكيلهم على تصرفات ولدهم وحتى سلام متعاقب لان يحجي عليه خلاهم اذا يشوفوني يديرون وجهم عني

ومن اجه كال رايح للجبهه وصاني بنفسي

وماانسى كلمة كالها

لتشيل ذنب امك متعرف شنو الصار وخلاها هيج تسوي واذا هي غلطت انت لتغلط وتصير عاق الوالدين ونام مظلوم ولتنام ظالم اريدك رجال يفتخر ابوك بيك ارفع راسه بيدك هسه ترجع هيبته

واخذ حقك من الدنيا بس بحق مو باطل

ومن يومها رجعت اقرا بس معقلت تخبلت بلزايد كمت اخذ حقي من عين اكبر واحد بس مااتحارش بشر بس الي يندك بيه امه داعيه عليه بيومها خليت الكل تخاف مني وتهابني ابويه كام يشغلني بلعطله ويه فيتر صديقه حتى اتعلم صنعه وهم اقلل من المشاكل الي اسويها كملت الثالث ودخلت صناعه ابوج شفته مره ثانيه يوم ما ابويه وكع ومكدرت اخذه وحدي من دون الناس كلها تذكرته ورحت اله جان يشتغل بمطعم وعاف شغله ويوميته وخلصها ويانه والاضرب خله فلوس بيدي اخاف احتاج شى واني اعرف ماعنده

جان حتى من يجي يشوفنا ميكول لأحد حتى لنهر ميحجي يكول مااريد انعام تعرف وتسوي مشاكل لان متريده يتقرب من عدنا وبقيت اعتبره ابن عمتي واعز اصلاً من علي وجعفر وسلام النكس بقى اخويه الجبير

وبعدها التهه بيكم وبدنيته ومشفته مرت سنين ومن مات ابويه واجيت لبيت انعام شفته من شفتج خاتله وراه وخايفه مني تتذكرين

سليل : ابتسمت حييل عمو تتذكر

سجاد : ماانسى شى مر بحياتي اذا شفتي هسه كدامج رجال يشتغل ويعتمد على نفسه وعايش الفضل لله ولأبوج لو ما تشجيعه الي الله اعلم هسه منتحر او طالع ساقط ابن شوارع او مسوي شى موزين وبلسجن مرات جم كلمة تغير بني ادم كامل وابوج جان الدوا لولد مراهق كل فكرة الموت وكل الكعد اسوي الكم رد فضله عليه

وقليل بحقه هذا الشى

كل الاريده منج ترجعين تأمنين بيه مااريد الخوفه الي شفته قبل شويه نسيتي اني منو

سليل : دنجت وبنبره حزن لا منسيت انت عمو الوحش

سجاد : هااااا ولج وحش

سليل : هيج جنت اصيحلك من صغيره اخاف منك

سجاد : وهسه مااريد تخافين

سليل : بس انت تعيط وتصيح وعصبي حييل ومتتفاهم

سجاد : هذا طبعي سليل مااكدر اغيره ولا راح يتغير المريت بيه شى جبير زرع بداخلي

سليل : شزرع ليش سكتت

سجاد : مو مهم شزرع بس اني من اشوف شى غلط مااتحمل اعرف بيج تخافين من الصوت العالي وتخافين من المشاكل بس بنفس الوقت مااريدج تصيرين جبانه اريدج سباعيه قويه اطبين بعين اكبر واحد وهم الصراحه مااريد تغلطين

سليل : بس اني مغلطانه

سجاد : مااريد اصلاً تغلطين ومااريد احد يقشمرج او تصيرين نسخه من الي شفتهن

سليل : نسخه من منو

سجاد : من اي وحده تغدر وتطعن وتكذب وتنافق وتأذي وتخووون

سليل : مااسوي هيج والله

سجاد : لهذا احاسبج على كولشي وبنفس الوقت اريدج متخافين وسباعيه ومتبجين من كولشي

سليل : انت مو متكدر تغير طبعك اني هم مااكدر لازم ابجي

سجاد : اني موجود وياج واغيرج بس اسمعي كلامي تره محد يخاف عليج بكدي اريد من يطلع طه يكول صنت الامانه مااريد يلومني ليش محافظت على بناته

سليل : تتوقع بابا يطلع

سجاد : مو بعيده على الله ابوج طيب وخوش انسان والي سواه علمود يحمي بته اكيد رب العالمين بيوم ينصفه ويرجعه بينكم

سليل : ان شاء الله

سجاد : بس اريدج ترجعين مثل قبل متخافين

سليل : زين لتعيط عليه باوع عليه ورفع حاجبه وكال

سجاد : وبعد

سليل : ولتضربني

سجاد : وبعد

سليل : وتخليني احجي يله تتعارك

سجاد : وبعد

سليل : وبهدوء وعيون مدمعه كتله ولتعوفني

بقى صافن بوجهي وكال تتوقعين سجاد يعوفج

اشرت براسي معناه لا

سجاد : جاوبتي نفسج لتخافين لا اعوفج ولا اعوف خواتج لحد ميطلع ابوكم بلسلامه

سليل : وشون هسه من خلصت الفاتحه اذا ماما طردت عمه نهر

سجاد : امج دواها يمي يجيج الصافي طبي غسلي وجهج ما اكلتي شى مو

سليل : لا مجوعانه

سجاد : ماكو تاكلين بدينا هسه كتلج اسمعي الكلام

سليل : ماشي هسه ادخل اكل

سجاد : وياج كلاص جاي راسي يوجعني

سليل : شوكت تبطل جكاير والله هي توجعلك راسك

سجاد : هاي صديقتي الي بعمرها مراح تخوني

سليل : مو حلوه مو خوش صديقه

سجاد : يله ادخلي ولتنسين كلاص الجاي بكلاص اريده مو استكان

سليل : صار

دخلت للبيت لكيت عمه تنوم بغزل بس بالها بغير مكان اعرف تفكر مثلي وقلقه مثلي

غسلت وجهي وحطيت القوري على النار وسويت جاي باوعت باقي لحم من الفاتحه مال العشا كامل ومحطوط ماعون ومغطي اخذت قطعه وفلستها سويت لفه بلخبز وحطيت طماطه عليها لفه الي ولفه لعمو وكملت طلعت

وصلت يمه

هااك عمو

سجاد : هاي شنو

سليل : لفه اكل ويايه

سجاد : اكلت مجوعان بس الجاي

سليل : لعد مااكل

سجاد : جيبي يله المهم تاكلين

كعدنا ناكل بهدوء جان يكلي

بعدج خايفه

سليل : لا

سجاد : سليل

سليل : هااا عمو

سجاد : لتزعلين مني بيوم لو شميصير دوم تذكري خوفي عليج حتى لو تعصبت

سليل : اعرف تعتبرني مثل هبه الله اختك

سجاد : بلضبط

سليل : زين اذا اني مثل اختك ليش مااصيحلك سجاد بدون عمو

سجاد : صيحي عادي التردي

سليل : هاااا بس مااكدر اني متعلمه على عمو

سجاد : براحتج

سليل : اروح لماما نهر اخاف محتاجه شى

سجاد : اني طالع تعالي اقفلي الباب ورايه

سليل : راح عمو رغم جنت تعبانه بس من حجالي قصته وشون علاقته ويه بابا ارتاحيت وكمت اتذكر شجان يسوي النا وشون هاي السنين كلها واكف بجانبنا

لكيت عمه مصعده البنات للسطح وفارشه ومتمدده بفراشها اعرف بيها منايمه تقربت منها وشمرت نفسي بحضنها جان تحضني وتبوسني من راسي

سليل : شبيج ماما

نهر :مابيه شفتج كاعده ويه سجاد

سليل : اي وصالحني

نهر : اعتذرلج على السواه

سليل : لا بس كال افهميني

نهر : اريدج دوم تشوفي عمج ولتغيرين نظرتج اله

سليل : شون يعني

نهر : يعني لتكولين هذا غريب وماله دخل بينا اعتبري اخو ابوج

سليل : هو اني هيج راح اعتبره

نهر : عفيه بنتي

سليل : لتخافين ماما

نهر : من شنو اخاف

سليل : منعوفج حتى لو ماما سندس گلبت الدنيا

نهر : عرفت راح تفهميني

سليل : اكيد لان اني مثلج خايفه وعمو سجاد كال دواها عندي خلي نشوف شيسوي

نهر : الله كريم نامي تعبتي اليوم

سليل : كمت من فراشها ورحت لفراشي الهوا طيب والجو صافي اباوع على السما والنجوم بقيت اباوع لمن تعبت وغفيت

مر اسبوع على وفاه بيبي الجيران يوميه يمنا بيبي جان الكل يحبها ماعدها اذيه على احد اما ماما طول الاسبوع ما شفناها وعمو سجاد هو كام يتسوك واكيد المصرف منه لك

واليوم السابع ولازم سبع اكلات هاي عاده قديمه الكل ماشيه بيها يوم السابع ٧ اكلات اباوع على عمه الحايره شسوي وماعدها ذاك المسواك الي يكفي

نهر : شون اريد اسويلها بس المسواك قليل وفلوس ماعندي وخلف الله على سجاد هاي الايام كلها قايم بلمصرف

سليل : مو شرط ماما اي شى ونسوي قليل

كلت لسجاد يجيب دجاجه ذبح حتى نسوي ثواب وعندي طرشانه وراح الف كبه هلقاسم الله

سليل : واني اسوي الحلاوه مال التمر مثل متحبها علمتني هي عليها

ريم : اني اسوي طوبات الحلاوه

سليل : بس اغسلي ايدج وشيلي شعرج

ريم : اي راح اغسلهم

وركضت تغسل باوعت على رشا ساكته

شبيج رشاوي

رشا ..ماما ليش مكعد تجي ليش عافتنا وراحت

سليل : رحت وكعدت يمها مو تدرين اتزوجت

رشا .. اي ادري بس هي عافتنا يم بيبي وبيبي ماتت شون صار اسبوع مسألت عليها ليش متحبنا هي ليش تحب بس حسام

حضنتها وكتلها اني يمج وماما نهر ليش منكفي احنا

رشا .. واذا عفتونا

وين نعوفكم شجاج اليوم

رشا .. مااحبج اذا تعوفينا وترحين

سليل : كاعده على گلبكم وين اروح

ريم : اني اروح يم سحليه اذا عافتنا ثلل

سليل : خو انتي تكيفين حتى تلعبين براحتج

ريم : غسلت ومدت ايدها حتى اشوفها وتصيح والله نظيفه

حضنت رشا وكتلها لتخافين اني موجوده يله كومي نساعد ماما نهر

بدينا نحضر الاكل واجه عمو جايب الدجاج مذبوح يرادله تنظيف وهاي ريم عاطت

ليش عمو تذبحه خطيه وتبجي

جان يحضنها وهي ادفع بيه مااحبك انت كتلته

سجاد : عمو غير حتى ناكله

ريم : ايييع شون ناكله خطيه عنده صغار هسه يبجون عليه

سجاد : لا هذا ماعنده سألت الجيران كالو ماعنده وممتزوج

ريم : واصدقاء

سجاد : هم ماعنده مزاعل الكل

ريم : ليش مطلع لسانه هذا مقهور منك ويعيب عليك

سليل : ريمو خلي نكمل شغلنا اطلعي من المطبخ

ريم : هسه الله يذبكم بلنار لان خطيه ذبحتوه بلسجينه بعد مااكل وياكم

وركضت لبره

نهر : انطيني خلي انظفه

اجت رشا ويه عمو ينظفون واحنا نسوي بالاكل كال عمو محتاجين شى جان نسمع صوت مره بره طلع الها ورجع كال نهر اكو مره تريدج

نهر : طلعت للمره جانت جيران خاله وعشرت عمر

بنتي نهر اني والجيران كله واحد سوه اكله ثواب للمرحومه وكت المغرب نجيب الاكل ونجي

نهر : ليش خاله احنا نسويلها

هاي ام سندس الله يعلم شكد غاليه عدنا يله اودعناج اروح اكمل اجيب ابلغج حتى لا تسوين هواي

نهر : رحمه الله والديكم ننتظركم

طبيت والدمعه بعيني كتلهم

سجاد : ليش مكتيلي اتسوك الج اني مااعرف بهاي الشغلات

نهر : ربك فرجها

سجاد : محتاجين شى

نهر : سلامتك

سليل : للمغرب كملنا الدجاج والتمن والطرشانه وسوت عمه كبه وحلاوه وطبن النسوان وتصير سفره ترست البيت ترس صارت مو ٧ اكلات يمكن ١٤ اكله بكل الانواع حتى السمج والدولمه حايرين شمسوين وخير من الله اباوع شون الكل رفع ايده ويقرا على روحها الفاتحه وشلون الناس تحبها

باوعت على الباب كلت اكيد هسه تجي مستحيل متجي اليوم السابع مال امها

وطبت بس متأخره والناس بدت تاكل الكل تباوع عليها گلت لو مجايه احسن المن بعد جايه وكت المغرب استغربت من السفره المحطوطه الي بيها مالذ وطاب والنسوان شون كاعدين سلمت بس حسيت بعيون الكل تلومها لان وحده غريبه مثل نهر هي القامت بلسابع وبتها الوحيده تجي حالها حال الغريب واني اصلاً متقربت منها والغريب لاول مره رشا متتقرب منها ولا حتى تسلم عليها

خلص السابع وهي كاعده بس تجامل بلناس وعمه تفتر مثل المصرع وتشتغل والنسوان تباوع عليها شون نادره وسريعه خلص كولشي واالناس طلعت مثل كأن الهدوء قبل العاصفه بس طلعو وكملنا الغسل والشغل

وجان نسمع صوتها تصيح نهر سليل تعالن

كعدنا كبالها ونباوع عليها

سندس : عيني نهر خلف الله عليج وماقصرتي من باجر تلمين جوالاتج وتولين من البيت امي وماتت ماكو بعد متبقين هنا

نهر : والبنات

سندس : مالج دخل ذني بناتي واني حره بيهن اجي باجر الصبح ما الكاج بلبيت كله

نهر : فدوه سندس عوفيني يمهن والله مااثقل عليج منو الهن بعدهن صغار متخافين عليهن يبقن وحدهن

سندس : كتلج مالج دخل بيهن ولتسوين نفسج حنينه وطيبه وتخافين عليهن انتي ماعندج بيت يلفيج وبحجه البنات لازكه هنا والي جانت ملفيتج ماتت  بعد يوم واحد متضلين

سليل : اني اروح ويه ماما نهر ما اعوفها وحدها

سندس : انجبي لج تره اكوم اكطع النعال على راسج وصوتج نصي لتشوفين انطيتج عين تكومين تتفرعنين اريد اشوف يابنيه تطلع من البيت اله اكسر رجلج

نهر : بس فهميني راح تاخذيهن وياج لو شنو

سندس : ضالات هنا بلبيت شكو عليهن اختهن الجبيره يمهن

نهر : انتي من كل عقلج تحجين تعوفين اربع بنات وحدهن وحده مراهقه وجهال وياها

سندس : اي من كل عقلي واني بين يوم ويوم افوت عليهن بناتي واني حره بيهن

نهر : سندس صيري عاقله ولو مره بعمرج ذني صغار وميكدرن وحدهن ولج ولو مره خافي الله بناتج شون ام انتي

سندس : ام وغصب عنج قابل مثلج عاگر وامثل دور الامومه

نهر : خلف الله عليج هسه اني عاكر وطايحه حظ بس عوفيني يم البنات والله فلس مااخذ من مصرفهن واذا تردين اني اعيشهن لو اعرف اخذم بلبيوت المهم مااعوفهن سندس احلفج بروح امج العزيزه عوفيني يمهن والله احطهن بعيوني ذني بنات الغالي كولشي مااريد منج بس عوفيني يمهن

سليل : كمت ابجي واشوف عمه شون تنذل لماما وهي قافله وحاطه رجل على رجل وتحجي بخشم يابس

سندس : بله لغوه زايده اجي باجر الصبح ما الكاج

اخذت جنطتها وطلعت كعدت  تضرب على راسها وتبجي حضنتها واجت رشا هم حضنتها

رشا .. اني هم اجي وياج عمه لتبجين

كافي فدوة ماما والله منخليج ترحين اباوع ريم حاضنه غزل ومدمعه عيونها

نهر : لازم اروح لعمك سجاد انطوني العبايه بسرعه لازم يشوفلي حل

لبست عبايتها وطلعت وره ساعه رجعت عمو وصلها للباب وراح ساكته بس حسيتها احسن من قبل شويه

صعدنا رشينا السطح وفرشنا الفراش حتى يبرد بيومها لا اني ولا رشا واكيد عمه نهر نمنا وحايرين الصبح شون راح يكون علينا

وبس طلعت الشمس نزلنا سوت ريوك عمه بس محد اكل بس ريم وغزل واني بالي كله راح تجي ماما تطردها

دخلت عمه للغرفه شويه وطلعت بيدها البقجه مال ملابسها واني تخبلت

سليل : وين رايحه

نهر : لتخافين مااعوفكم

استغربت كلامها واندكت الباب طب عمو وكعد باوع علينا

شبيكم وجوهكم تتلاطم

رشا .. عمو ماما طردت عمه

سجاد : لتخافين بس اريدكم شطلب منكم تسوه حتى تبقى عمتكم

شويه وجان اطب ماما وشافت عمو لو تصركعت

سندس : يله اخذها ولي واياكم توصلون لهنا قسماً بالله العب بيكم طوبه

سجاد : سمعي ياام حسام اني ماخذ بنت عمتي لان هي عرضي ومحسوبه عليه وراح اكعدها بشقتي يعني مراح تضيع حتى لو اعرف اعوف الشقه الها بس انت شون راح تكدرين تجين بين يوم ويوم تزورين بناتج اكيد لا

وهاا راح اخذ سليل ويايه

سليل : جفلت بقيت اباوع عليه اندار وباوع بنظره خاطفه يعني اهدأي ورجع يحجي وياها

سندس : ههههه مو هي بكيفك

سجاد : اي بكيفي سليل ترحين ويه عمتج

سليل : باوعت على عمه وكلت اي اروح

سندس : شحدها تروح

سجاد : شسوين يعني تربطيها متكدرين واذا بقت اليوم باجر اخذها

رشا .. واني هم اروح ويه عمه وسليل

سليل : جانت هاي اول مره تنطق اسمي بدون ثلل

سندس : خوش والله هلمره الفصمه عليه خوش والله وعرفتي تقسين بناتي عليه

سجاد : عندج ريم وغزل منو يبقى يمهن اذا تردين اخذيهن وياج حالهن حال حسام

سليل : انقبض گلبي شون ابتعد عن خواتي حصرتني الدمعه بس اريد اعرف شنو براس عمو وليش عمه نهر هادئه

سندس : اربعتهن يبقن والله اگلب الدنيا عوفوهن شنو هذا التدخل

سجاد : جان يتقرب منها وكال الها بهدوء من مصلحتج البنات يبقن ويه عمتهن حتى اديحين براحتج ومتفكرين بيهن هاي اذا مفكرة بيهن اصلاً

سندس : احترم نفسك شنو اديح وانت لتدخل جم مره كتلك اطلع من حياه بناتي لاانت كرايبنا ولا تقرب شى من عدنا واكدر حتى اشتكي عليك

سجاد : ادخل ونص من اشوف وحده مثلج تريد تعوف اربع بنات وحدهن بيت لازم ادخل ولج لو تحجيها لساقط بلشوارع هم يكول هاي اسقط مني شون تنامين ومأمنه عليهن وحدهن انتي وياهن واحترك البيت عليهن لو وحدهن شون

خصم الموضوع اني اعرفج تردين تأذين نهر من الاخير نهر متتأذه وشقتي من هسه تحت امرها ولوحدها انتي الخسران الوحيد وبناتج راح يتأذن  وانتي واني نعرف كولش زين متكدرين تاخذيهن لبيتج لهذا اكعدي واسكتي وعوفي البنات برعايه عمتهن

سندس : سكتت شويه وبقت تباوع بلوجوه

ماشي تبقى بس مالي دخل بعد بيهن ماطول باعني ورضن بعمتهن وفلس احمر ماادز

نهر : واني كد مسؤوليتهن ولدزين

سندس : خلي نشوف شكد تتحملين مو بعدين تعيطين تعالي اخذيهن

نهر : كولشي مااريد منج

سندس : خوش ابقي وياهن هنا

سجاد : هاي هيه تكدرين تروحين ياحضره المناضله سندس

نسيت غير امكم صارت عضو فعال بلحزب باركولها

سندس : تستهزأ بلحزب والسيد الرئيس ولك تقرير واحد من عندي متشوف الشمس

سليل : ركضت على ماما كافي فدوه وعوفينا

سندس : ماشي خلي عمتج الفكر الي متكدر توكل نفسها تحير بيج وبخواتج وانت ابتعد عني تره متعرف هسه اني شنو

سجاد : الوصخ يضل وصخ لو شكد مينظف

سندس : وراح اشوفك الوصخه شسوي

ركعت الباب وطلعت

نهر : مااعرف شون اشكرك سجاد

سجاد : هاي شبيج من كل عقلج اخليها تنفذ كلامها هاي رادت بس تذلج وبعدين ترجعج اعرف بسوالفها الميت ميتي واعرف شلون مشعول الصفحه

سليل : حضنا عمه بيومها وبقت تبوس بينا

سليل : تدرون اكو وحده اليوم كالت سليل بدون ثلل

نهر : صدك انتو ليش تصيحولها هيج

رشا .. اسهل ونحبه هيج

سليل : هي حتى ريم تعرف تنطقه صحيح بس هنه عناد بيه يكولو

نهر : خليهن الله يحفظكم ويديم محبتكم

سجاد : رايح اسبوع اخاف مااجي ليضل بالكم

نهر : وين

سجاد : شغل بلبصره واحتمال ١٠ ايام الكط رزقني هناك

نهر : الله يرزقك بجاه النبي

سجاد : وانتم بنات محتاجين شى

سليل : سلامتكم عمو

رشا .. بس التقديم مال المدرسه اسبوع الجاي

سجاد : ليضل بالج الحك واقدملج

يله ديري بالكم على نفسكم وبليل سدي البيبان زين نهر وعينج على البنات

نهر : صار روح الله وياك رحمة الله والديك مقصرت

سليل : مر اليوم بفرح لان حسينا هذا هو راح نبقى كلنا سوه وبدينا انرتب البيت وغراض بيبي انطيناها ثواب وغرفتها صارت لعمه وريم وغزل لان جبيره والغرفه الثانيه اني ورشا

مرت الايام جنت كل ماانام بلسطح ابقى فاتحه عيووني جنت اتخيل هسه البيت يگب ويحركنا بس ابقى اقرا ايات لحد مااغفى

عمه رجعت تخبز للعالم وقررت تجيب مكينه مال خياط حتى تخيط لان المصرف ميكفي بس ماعدها فلوس للمكينه هي تعرف تخيط حلوو بس يرادلها تتعلم اكثر

وعمو من رجع وعرف شتريد تسوي اشترالها المكينه وجان اول خياط الها كل وحده دشداشه طرنا بيها من الفرح

مرت ايامنا بهدوء ورجعنا للمدارس واول يوم دراسه اجه عمو يوصلني وجانت ويايه رشا اول سنه اول متوسط

وصلنا وبدينا ندخل الصفوف مالتنا واخذنا دروسنا وبلفرصه اجوي بنات اثنينا اكبر مني صف سادس سألوني

انتي سليل

سليل : اي اني ليش

ولو فضول بس الي جابج الصبح اخوج

سليل : لا عمي ليش

زين متزوج

سليل : بقيت صافنه ذني شبيهن

لا ممتزوج

وحده تكول للثانيه مو كتلج ممتزوج

زين يحب عنده علاقه

سليل : والله ماادري

عفيه اسألي وباجر نجي عليج بقيت صافنه بوجهن وبس اشرت اي وطبيت للصف مالتي ومستغربه منهن

كمل الدوام ورشا طلعت قبلي واكفه يم عمو اجيت وبقينا نتمشى جان رشا عدها صديقه جديده لهذا يتمشون كدامنا هي وصديقتها واني وعمو سوه كتله عمو انت هم تحب عندك علاقه

هذا جفل وعكد حاجبه

سجاد : شنو هذا السؤال السخيف

سليل : لا مو اجوي بنات وسألو عليك

سجاد : وانتي منين تعرفيهن

سليل : ولا مااعرفهن بس هنه كالن اسألي

سجاد : وانتي الفطيره اجتي تركضين تسألين مو

سليل : شبيك عمو هو سؤال

سجاد : تبتعدين عن هيج بنات واياج اسمعج تحجين بهيج مواضيع بعدج صغيره على هيج امور

سليل : راح يصير عمرري ١٥ سنه

سجاد : ولو وطفله هم

سليل : اني يوم مااحب مااجي واكولك ماطول تصير عصبي

جان يوكف بنص الشارع حسيته يريد ياكلني ولو بلبيت يمكن يضربني

جان يتحرك ورجعت امشي وياه وبنيره حاده كال

سجاد : اذا عدتي هاي الحجايه لسانج اكصه سمعتي

سليل : دنجت ومشيت وكتله صار مااعيدها

سجاد : لتحبين حتى لتنجرحين

رفعت راسي من كلامه باوعت عليه شنو قصده

يتبع ...

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_الرابع_والثلاثون

#مدونة_نور_قلبي

مو كلمن ضحكلك يعني معجب بيك

ولا كلمن يزعلك يعــــني ميــــحبك

اكو ضحكه غدر يعرفــــها بس الذيب

واكو ضحكه فرح تبجــــيها من ﮔلبك

سجاد : اذا عدتي هاي الحجايه لسانج اكصه سمعتي

سليل : دنجت ومشيت وكتله صار مااعيدها

سجاد : لتحبين حتى لتنجرحين

رفعت راسي من كلامه باوعت عليه شنو قصده

سجاد : لتباوعين من تكبرين تعرفين شقصد

سليل : اهوو عمو كل مااحجي شى وكلت من تكبرين كتلك راح يصير عمري ١٥ سنه يعني كبرت

سجاد : امشي عدل ياجبيره وكافي لغوه

سليل : نفخت بضوجه وكملت المشي قريب منوصل البيت جان يصير گبالنا

الولد الي خطبني اني انتهيت اريد رجلي تشيلني من الخوف مباشره صرت وره عمو گلت راح يتذابحون اباوع على عمو سجاد يريد يشرب من دمه

سجاد : وخر من وجهي

بس كلمة احجي وياك وراها التريده يجرالك مااقصد اضوجك بس صار ايام انتظر اشوفك واليوم من شفتك مكدرت مااجي واحجي وياك

جان يندار عمو عليه وبنبره عصبيه وبصوت ناصي وحواجبه عاكدهم كال گبل للبيت

اني صرت عدائه من السرعه حتى ردت اوكع وكالمعتاد بهيج مواقف حتى مااندار ورايه واعرف شصار

طبينا اني ورشا بس اني وجهي ليمونه من الخوف وعمه نهر تعرفني من عيوني

نهر : شبيج امي

رشا ..اجه الولد الرادها وكف كبال عمو سجاد وهاي خافت وصفرت

نهر : انتي ادخلي غسلي وبدلي ومالج دخل بهاي السوالف مال كبار

رشا .. ليش عمه اني مو صرت بلمتوسطه وكبرت

نهر : ليش كل وحده دخلت متوسطه معناها كبرت يله لغرفتج

وانتي تعالي شكد فاهيه جنج عمتج

سليل : ابتسمت على كلامها واخذتني من ايدي لغرفتها وكعدتني على الجربايه

نهر : يله احجي شصار

وكعدت اسولف الها

نهر : وشنو هذا الخوف البيج لخاطر الله غير جاي على سجاد

سليل : اخاف يتعاركون

نهر : همه بينهم يتعاركون يتمالخون قللي الخوف امي ميصير هيج

سليل : مو بيدي

نهر : لا بيدج وكومي بدلي حتى نصب الغدا وننتظر سجادنشوف شراد منه

سليل : كمت غسلت وبدلت وشلت شعري واجت ريم وهوستها كعدنا صبينا الاكل بلهول وكاعدين بلكاع ناكل كلنا جان تندك الباب كامت ريم فتحته ودخل عمو بس حسيته ضايج أشر لعمه تعالي وراحو للمطبخ

متحملت كمت وراهم هو شافني مهتم وكأنه متقصد يسمعني

سجاد : هذا الولد الي خطبها هسه اجه يخطبها مني وكال التريده يجرالها حتى دراسه اخليها تكمل البنيه شاريها ومااقصر وياها

نهر : مكتله صغيره ومنريد نزوجها

سجاد : كتله بس هو بقى يتوسل ويكول حتى لو خطوبه المهم احجزها واني جاهز من كلشي

نهر : والله اني بلنسبه اليه ممتعاجزه من لكمتها واكيد لو طه موجود ميقبل لان صغيره بس اذا يخطبها ويعوفها مابيها شى

جان يرفع عيونه عليه وكال

سجاد : شتكولين

سليل : بقيت صافنه بوجهه حسيته ينتظر شى مني نظراته غريبه

كتله عمو اني مااتزوج بعدني صغيره ومستحيل افكر بهيج شغلات وبهذا عمري واني هسه المهم عندي خواتي يكبرن ويخلصن دراستهن واني وياهن ونرفع راس بابا بشهايدنا ياريت تكوله هي مقابله مو صغيره حتى يبطل يفتح الموضوع واكد عليه ميجي للمدرسه اخاف البنات عبالهم عندي شى وياه وتجيني سمعه موزينه على الفارغ

حسيت وجهه شبه فك كميه الاعصاب المكبوته بداخله جبيره واحسها رغم هادئ بس احس عصبي وكوه مسيطر على اعصابه

نهر : هذا هو عيني سجاد سمعت البنيه شكالت وانت فضها من يمك ويله الاكل برد تعال تغدا ويانه

سجاد : لا اروح مجوعان ورايه شغل

نهر : شسويت على المحل الكلت تأجره وتشتغل بيه

سجاد : حجيت ويه ابو الايجار وقبل وكلها يومين واستلمه ولد جنت اعرفه هم يشتغل بلسيارات يفتهم وايده ذهب راح يصير ويايه

نهر : الله يرزقك ويسهلك بحق النبي وهمزين المحل بمنطقتنا وقريب هم على شقتك

سجاد : اي تعبت من الروحه للشيخ عمر والشغل هناك واريد ابدي شغلي وحدي ليش اشتغل عامل عند الغريب وتعبي رايح اله

نهر : والله حقك

سجاد : تعالي سدي الباب ورايه

سليل : طلعت تمشيت وراه وصلت الباب الخارجيه ديطلع جان يندار عليه

سجاد : مراح تغيرين رأيج وتفكرين بيه تره خوش شاب ومبين شاريج

سليل : قبل شويه كتلي بعدج صغيره وطفله هم وماكو طفله تتزوج

رفع تك حاجب وكأنه يكول هااا هيج صارت

ابتسمت ودنجت

وراح وسديت الباب وراه ورجعت اكل بين خواتي وعمتي وشلت هذا الموضوع من راسي تماماً

مرت الايام وتفاجأنا بشهر ١٠ تعداد سكاني جنا منعرف شنو معنى تعداد وبلمدرسه شرحولنا جنا مكيفين على العطله وفوكاها ممنوع تجوال يعني ولا واحد يطلع وسيارات ماكو الشوارع فارغه واكيد هذا الشى متضيعه ريم وسحليه

ريم : ثلل تعالي اطلعي ويانه نلعب بره

سليل : ولج وين العب

ريم : ماكو سيارات وكلت لسحليه يجيب بايسكل مالته

نهر : اني مو كلت ماكو بايسكل انتي بنيه ميصير تسوقين

ريم : لا اني ولد بس انتي متقبلن تكصين شعري

سليل : عوفيها ماما خلي تلعب

نهر : اخاف عليها لتتأذه

سليل : ماعليها شى بس تعالي ودنجت بمستواها وبستها انتي بنيه واحلى بنيه ومااريد تكولين اني ولد

ريم : وتخلوني العب اذا اكول اني بنيه

سليل : اي نخليج تلعبين يله روحي بس ديري بالج لتوكعين

ريم : لا مااوكع

سليل : طلعت تركض ومكيفه لان ماكو سيارات اباوع على غزل الي متوصل حتى عتبت الباب تخاف من كولشي

ماما شنو رأيج اطلع غزل بلباب

نهر : لا اخاف الجهال يأذوها

سليل : بس صار عمرها ٤ سنوات وتخاف توصل للباب

نهر : يمكن ادخلها روضه سنه التجي حتى تتعلم على الجهال لان وراها مدرسه

سليل : زين وشكلها شلون بيه هي وجهه صار زين بس رگبتها نصها مشوهه ورجلها اليمنى

نهر : كال الطبيب من تكبر يتغير ويقل

سليل : بس ميروح نهائياً

نهر : الله لا ينطي الجان السبب عسى بحرك اكبر من حرك هاي المسكينه

سليل : قصدج انعام مو

نهر : اول مره اسمعج تكولين انعام

سليل : عبالي قبل بيبيتي ام ابويه طلعت متقرب اي شى اله على شنو بعد اسميها بيبي متستاهل اصلاً

باوعت على ماما نهر دنجت وتشتغل بقطعه قماش تخيط بس العبره حاصرتها

حضنتها وبستها

العفو مو قصدي نسيت هي امج

نهر : عادي هو اني وياج يابنتي انحكم علينا نسمع اشكال الحجي عن امهاتنا ونسكت

سليل : على طاري امي شو هاي طفرت لا حس ولت نفس جنها مصدكت

نهر : اي والله اليوم الصبح تذكرتها خليها الله يبعد شرها عنا

سليل : خلي اكوم لرشا

نهر : اذا اجوي اهل التعداد بدلو لطلعون هيج عيب

سليل : ماشي

واجويه وكعدو ياخذون المعلومات وشافو الجناسي مالتنا بس المزعج من سألو عن بابا وماما بقت عمه توضح الهم همه وين

طبت ريم وشافتهم واجت تركض بحضني وتصيح

سجلتوني

ابتسمت الموظفه الجايه وكالت

اي سجلناج

ريم : خاله سجلي ويايه سحليه

هااا منو

ريم : شبيج صديقي سحليه حتى ميروح لغير مدرسه

هههههه تدللين وبعد

ريم : بس هو وجنات ما احبها لان زاعلتني

سليل : كافي ريم عيب خلي يشتغلون

هههه لا عوفيها حبيت سوالفها

وسجلت سحليه

ريم : عفيه خاله الحبابه جان تتقرب منها ولزمت وجهه وكالت الها اني من اكبر اريد وجهي مثلج مابيه هاي النجوم الي بيه اريدهم يرحون

باوعت الموظفه وعرفت بأن ريم تعاني من شكلها وجانت الموظفه حلوه ومرتبه

ابتسمت وباست ريم وكالت الها

تصيرين احلى مني هم وهاي كلها تروح

ريم : اييي كلها واحط حمره مثلج

جان تمد ايدها على شفه الموظفه تريد حمره

سحبتها كافي ولج عيب

جان تجي وتبوسها وصارت الحمره بخدودها وهي كيفت وتصيح خدودي بيهن حمره وتكمز

نهر : ادخلو جوه وكافي هوسه

اخذت البنات ودخلنا

واخذت كل المعلومات وراحت

طلعنا من الغرفه وعمه مدنجه تخيط كعدت يمها لازمه كتابي اقرا

وشويه ورجعت طلعت ريم تلعب ودقايق جان اطب وتكول بعلو صوتها بيبي انعال بلباب كمزت عمه من مكانها

ريم : جنت العب ويه سحليه اخذت البايسكل منه وشفتها من بعيد اجتي شمرته بلكاع وركضت سديت الباب بوجهه وختلت وراه وسمعتها ادكه بس مفتحته اخاف تضربني

نهر : طبو جوه

ريم : عمه لتفتحين الباب اخاف تضربني

نهر : لا متضربج واني موجوده

ريم : بس تضربني اكسر البايسكل واكتل سحليه كتله تعال بسكوت شون اجت وراه

سليل : امشي جوه كافي تلغين

نهر : طلعت وشفتها بلباب فتحت الباب ومدخلتها بقينا بلكراج نسولف

خير هم اجيتي

انعام : شون وياج ولج هلمره صايرتلي خياطه بت حسين راح تجلطيني والمنطقه كلها تحجي بيج

نهر : شكو تحجي قابل شمسويه بايكه ناهبه ماشية بلحرام

انعام : كاعده بنص النسوان ويجن يكولن والله بتج خوش تخيط تدرين شصار بحالي صرت بنص هدومي

نهر : والله ياامي اني ممسويه حرام واذا انتي تستحين اني مااستحي لان دااوكل روحي وبنات اخويه من تعبي

انعام : والله اعرف بيج عناد بيه جم مره احلف مااجيج ولااوصل تجبريني اجي

نهر : لا جابرتج ولا شى تردين تخلصين من هذا الموضوع اعتبريني متت والي يكولج عليه كوليله ماعندي بنيه اسمها نهر ماتت

انعام : عساج متي ولا هاي المخازي الصارتنا من وراج مره تزوجتي واحد سكط وكسرتي وجوهنا كدام الناس وراها اطلكتي وراها اشتغلتي خبازه وهسه خياطه ولج شسوين بعد بيه الله لا يوفقج

نهر : رحمة الله والديج مكان متحاسبيني روحي حاسبي ابنج الجبير

الي بصم ابوه وهو ديموت لو ضرب اخوه سجينه وصله للموت لو من كطع رزقه لو من باك الكويت وحار شسوه لو هسه من صار بلبعث ويكتب تقارير على الناس وكاسر رگبهم يعني شعدد وحده اثنين انتم اصلاً غاركين بلحرام وجايه تحاسبيني لان عايشه اني وبنات اخويه بشرف وبلحلال

انعام : محد طيح حظج غير اخوج

بقيتي تمشين وراه وهاي تاليها شفتي اشواق شلون حالها عايشه بعز اطب وتطلع وذهب وفلوس ومامحتاجه شى

نهر : بس يوميه خاينها ويه وحده ويوميه مزوركها الج ودازها عبالج مااعرف لو مسامعه بمصايبه وياها يمعوده شوخلصتها كلها يمج اذا شهر يمه عشره اشهر يمج

انعام : مالنا دخل بأشواق علينا بمصيبتج

نهر : والله مو اني جبت طاريها انتي كاعده وتتباهين بولدج الي واحد انكس من الثاني ويامصيبه تكولين عليها هاي هيج عدكم الي يشتغل بشرف وميمد ايده مصيبه

انعام : نسيتي هسه انتي مره مطلكه

نهر : وشبيها المطلكه تعض

انعام : ولج بت الگلب على شنو شايله خشمج وتحجين بعنتكه نسيتي الناس شتحجي على المطلكه وفوكاها طاب طالع عليكم شاب وانتم بس بنات متخافين على سمعتج

نهر : رجفت من حجيها وصرت اعصاب اسمعي ام علي اخاف الج نيه تشوهين سمعتي وسمعت هذا المكرود ابن اخوج وتراب اخويه الغالي وابويه احرك الاخضر واليابس وامشي واحجي بلشارع على كل خيستكم

انعام : ولج تهدديني

نهر : اخاف كل مره بس حجي هلمره حلفت بلغوالي

انعام : ماعندج شى يثبت كلامج خلصتي عمرج تهددين

نهر : حتى لو ماعندي كافي الناس تسمع وهمه يموتون على الفضايح واخاف هسه تستحين من تسمعين بتج خبازه لو خياطه اخليج لعتب الباب متوصلين اخلي الكل يكول بيت اهل الحرام جان تضربني راشدي وتكولي حتى اذبحج

كمت اعيط حيل انقهرت

جوزي مني لخاطر ربج اني مااريدكم عوفوني بحالي مطلقه ساقطه كح.. شأصير خلي اصير والف مره كتلج عوفيني اني متت ماعندج بنيه اسمها نهر  متت انسيني

انعام : واني مجايه على سواد عيونج اجيت علمود مي وجهنا بلمنطقه

نهر : اييي عفيه مي وجهكم اياج اطلعين شى عني وعن سجاد اخلي مي وجهكم تغسل بيه اهل الطحين والعتيك وحق الله

انعام :هذا هو شيصير بيج طبج طوب

نهر : عفيه والف مره هم بس جوزي مني

جان تدفعني وتطلع

طبيت الشهكه بگلبي بس مااكدر ابجي وهم خايفه على سمعتي شون بيه وين اخذ البنات واولي منهم

شويه واجه سجاد وحجيتله

سجاد : متسوي شى هاي متعرف شسوي حتى تجيبج يمها

نهر : واذا طلعت حجي

سجاد : اسمعي كلامي كتلج متسوي شى

نهر : الله يستر صدك شسويت على ابن عم خاله ام سندس عرفتنا شى عن ابنها 

سجاد : كوه لكيت هذا ابن عمها تعرفين هو فقير وحباب وبيته بعيد بأطراف بغداد كوه حصلت عنوانه من شفته بلفاتحه مبين جكاره وستكان جاي احصل كولشي منه

واول البارحه رحت اله واخذت هلقاسم الله ويايه والرجال رحب بيه لان شافني بلفاتحه ويتذكرني وحجايه منا وجكاره حجالي كولشي

نهر : شكال اخو سندس وين وليش من تمرضت امه مأجه وحتى من ماتت

سجاد : هذا مصيبته مصيبه مو المرحومه دزته لبيت عمامه اول سنتين  الوضع زين وكولشي ماكو تالي طلع عمه بلمعارضه ولزمو عليه كتب ومنشورات ضد صدام ومورط اخو سندس وياه صغير ومحد يشك بيه يجيب ويودي بالاخبار لحد محاسين بيهم كوم واخذالولد واطفر لأيران تهريب

والكل تكتم على الخبر يخافون

نهر : صخام وسندس تعرف

سجاد : اي تعرف بس مجايبه طاريه ابد ولان الولد اخر سنين خلصها بيت عمه وكبر هناك محد اجه ودك باب ام سندس

نهر : واني اكول مقهوره منه اخر ايامها يعني معناها متعرف هو طافر

سجاد : حسب كلام الحجي متعرف لان مريضة ومحد كال الها وكل متسأل عنه يكولون الها هو بخير ولتخافين عليه اخر شى ملو من كثر الاعذار كايلين الها ميريد يجي لبغداد

نهر : ياعيني خطيه والله لو كايلين الها السبب الحقيقي احسن من هذا السبب الي كسر گلبها تدري شكد تبجي وتنوح عليه بسكوت وحدها حتى مره كالت اخاف اموت وميشيل تابوتي وصدك ماتت ومشاله

هسه هو شله بهاي السالفه الطايح حظها

سجاد : صغير ومراهق جان ورطوه

نهر : وسندس راح تكول الها انت تعرف

سجاد : لا واياج تحجين شى كدامها هسه الرفيقه المناضله سندس كعد يصعد صيتها وشانها وكل ميصعد هذا الشى يأثر عليها اكثر اني خال هاي المعلومه ورقه رابحه اهددها بيها اذا بيوم دكت الناقصه بواحد منكم

نهر : وتتوقع الحزب ميعرف بأخوها

سجاد : هاي شبيج يسدون الشغله ورجلها واصل وطلع اخوه هم بالامن يسدوها الها

نهر : بس لو افهى هاي شمسويه وهيج الله فتحها عليها فلوس وخير ومنصب

سجاد : زباله لتغرج المظاهر يجي يوم وهذا كله يوكع على راسها

نهر : والله جنها الشغله بلمگلوب الشريفه والتخاف الله مثلي يطيح حظها ورجلها يتزوج عليها والي تتملعب تتوفق وكل الخير يجيها

سجاد : لتقارنين نفسج بيها مااحب اسمع هيج حجي منج

نهر : والله من ضوجتي ياعيني اووووف

سجاد : البنات وين شو صنطه

نهر : من التكمز نامن وسليل تعرف بيها تحب نومه الظهر تنام ساعه وتكعد

سجاد : عندي قميص اريدج تكوي عندي طلعه

نهر : هااا ولك صاحبتك موو واغمز اله

سجاد : شنو الغريب شبيه منغولي ومااصاحب لو مخبل ومتباوعلي وحده

نهر : هههههه لا بس استغربت واخيراً الصنم راح يطلع ويه وحده ويحبها

سجاد : بعد كولي ويتزوجها هاي شبيج نهر ليش هيج دوم مخج شاطح

نهر : هااي شبيك بلكت الله وتحبها ونزوجك والله اركص بعرسك ركص للصبح

سجاد : لعد مراح تركصين ابد لان اني مااتزوج

نهر : جيب القميص انت تورم گلبي يجي يوم وتوكع بلحب واضل اضحك عليك

سجاد : خليت الحب الج هاج القميص بلعلاكه اكوي وهاا بنطرون هم وياج

نهر :جيب واخذتهم وكعدت اكوي بيهم

سليل : كعدت من النوم وطلعت من الغرفه الشعر منكوش وافرك بعيوني ماادري عمو هنا البجامه رجلها تك مرفوع وتك نازل تكول جنت بحرب مو نايمه جان اشوف عمو گبالي

سجاد : سلام قولاً من رب رحيم ولج شنو هاي

سليل : فتحت عيوني زين هاي انت هنا عمو والله ماادري وكعدت اعدل بشعري

سجاد : شتعدلين جنج طير منكع ومنتول

سليل : لا عمو لتعيب طبيت ركض للغرفه فتحت شعري ومشطته وضفرته وغيرت بجامتي وطلعت مباوعت عليه وغسلت وجهي وفرشت اسناني واجيت اتمشى كباله هااا هسه شلوني

سجاد : طير نشف المي منه بس بقى منتول

سليل : كعدت بصفه وانفخ بضوجه ليش تعيب هيج اني بشعه

حسيت الدمعه راح تطلع من عيوني هو مجاوبني رفعت عيني شفته يباوع عليه

هااا شفتني زين

سجاد : هو كعد افكر ياحيوان يشبهج من يكعد من النوم

سليل : اهوو كمت زعلانه جان يجرني من ايدي وكعدني

سجاد : شبيج خبله اشاقه وياج

سليل : محلو شقاك زعلت

سجاد : حلوه من تزعلين

سليل : باوعت عليه وكتله واخيراً كلت حلوه

سجاد : من تزعلين بس من تلحين وتعوين لو بيدي اخنكج وادفنج مثل ماابو لهب جان يدفنجن

سليل : يمه ليش تخوفني منك مو اني بس ابجي

سجاد : زين تعرفين بروحج ام دميعه

نهر : هاك عيني سجاد طلعن يخبلن عاشت

ايدي من كويتهن

سجاد : ليش تحسسيني اخترعتي البنسلين هو كوي لو عندي وكت اكوي بلشقه بس تأخرت واخاف اروح وماكو كهرباء

نهر : هاي فوكاها صدك سوي زين واشمر بلشط

سجاد : اشمر بلنهر احلى

سليل : وين رايح عمو

نهر : عمج متواعد

سليل : ويه بنيه

سجاد : لا ويه صخله ولج صوجي اني كاوي هناك وطالع بدون محد يدري

سليل : هههههه عمو الله عليك حًلوة

سجاد : لتدخلين بهاي السوالف

سليل : لعد اكيد محلوة

نهر : يجوز تلكيها زركة وشفتها سوده وعيونها جقله

سجاد : سبحان الله اول مره توصفين شكلج صّـْْ(☑)ـْْحّ

سليل : ههههههه روح عمو لتتأخر

سجاد : الله يستر حطيتن عينجن شوف شراح يصير

نهر : روح والله عليك من ترجع مر واحجيلنا

سجاد : باع هاي الثانيه والله مرات عقلج اصغر من عقل ام دميعه

سليل : فدوه لماماتي تخبل لان احلى من صديقتك تغار وحضنت عمه

سجاد : الله يثخن لبنكم اروح و

وطلع عمو واني عمه بقينا نضحك

وره ساعتين رجع اول مطلب باوع علينا وكال

اني عرفت من وره عيونجن مااشوف خير

اثنينا فكينا عيونا خير شبيك

سجاد : البنيه خابرت على صديقي كايله اله مااكدر اجي متزحلكه ومكسوره رجلها

سليل : ههههههههه حيل تستاهل

سجاد : وفوكاها تضحك

نهر : والله ههههههه انقهرنا عليك يله على الطلعه الجايه يجوز ترهم

سجاد : الطلعه الجايه لو بلبجامه اروح ومااجي اكوي هنا اخاف لتنكسر رگبتها واتحمل ذنبها من وراجن

سليل : عوفها عمو متفيدك هاي فگر يجوز المره الجايه انت تتزحلك

سجاد : والله عيونجن الفگر

نهر : هههههه تعال مسويه كاستر يخبل اكل وارتاح متسوه الدنيا الله يعوضك ويجعلها بميزان حسناتك ههههههه

سجاد : باوع عليهن وابتسم على ضحكهن ويفر بيده جيبي خلي اكل

سليل : بقينا بيومها نضحك ونسولف

وريم ورشا يقرن وكل شويه وكالو صوتكم نريد نقرا

مرت الايام وكالت عمه نهر نروح نزور بيبي بلنجف لان بالاربعين مرحنا بس طلبت من عمو سجاد يأجر سياره ويضل ويانه وشرطت علينا مننزل للمقبره وبعد تواسيل قبلت بس اني انزل والبنات يبقون بلسياره تخاف عليهن

لبسنا واخذنا كليجه قبل بيوم سويناها وحلاوه وطلعنا من الصبح عمو كاعد يلكدام واحنا كلنا ليوره وغزل بحضن عمه

سجاد : لو مبقيه البنات بلبيت هنه مال مكابر

نهر : والله ردت ازورهن الامام علي سلام الله عليه خطيه مرايحات بعمرهن زياره اله وهاي احسن فرصه

سجاد : ريم عمو متنزلين تره يأذوج يجيج الشبح

ريم : مااخاف

سجاد : يجيج الجني ابو عيون حوله

ريم : عادي عمو مااخاف سحليه عنده قناع مال غوريلا ومااخاف منه

سجاد : هاج استلمي

نهر : ريمو حبيبتي ميصير تنزلين النجوم تكبر وتكثر بس تنزلين

ريم : هااا لا لا ماانزل مااريد بعد نجوم

سليل : تعالي نامي خلي راسج بحضني عيونج حمر من النعاس والطريق طويل

خليت راسها بحضني وغمضت ومباشره نامت بقيت اتفرج من الجامه اباوع بس صحراء شطوله الطريق ومنوصل وماكو شى بس تراب لحد موصلنا احس جسمي تكسر ورشا راسها بحضن عمه واما غزل نايمه بسابع نومه لان طلعنا من ساعه ٥ الفجر

وصلنا للمقبره نزلنا على كيفنا اني وعمو وعمه والسايق بقى يم البنات هو جيرانه ورجال جبير وحباب وهم طبك قريب الكبور

وصلنا لقبر بيبي كعدت يم راسها ابجي اني وعمه وعمو يغسل بگبرها وشغل شموع وبخور وقرا سوره الفاتحه وخر على صفحه

اني بقيت ابجي على بيبي جانت طيبه وماعدها اذيه

بقينا بحدود الساعه بعد مقرينا القران

جان تكول عمه

فدوة سجاد اريد اروح لابويه صار سنين مجايه

سجاد : ماشي بس منتأخر

نهر : لا والله منتأخر

وصعدنا السياره ومشينا مسافه بيها وهم نزلنا كتلهم اريد اشوف قبر جدي مشايفته وهم اقراله قران

وصلنا وبدت عمه تبجي وتنوح يم راسه واني واكفه واعدل بلربطه ولابسه جنطه صغيره مال عمه بيها قران ردت اطلع القران

جان يصير بوجهي كبره

اباوع اسمه سلام حسين جان بعد نص متر عن قبر جدو مو شفت كبره عبالك شفته كدامي تذكرت كتله والدم الي صار عليه

بديت ارجف واطك سن بسن اريد افتح حلكي واصيح على عمه وعمو تخيط عبالك حسيت بيه ديشوفني ديصيحني صارت عيونه بعيوني كامت عيوني تصب دموع وارجف

نهر : جان بصفي سجاد يغسل بكبر ابويه رفع عينه وطفر وشمر الدبه مال المي من ايده انداريت واشوف سليل ترجف وتباوع على گبر سلام نسينه شغلته كمت مخروعه عليها

سجاد : سليل باوعي عليه ويدير وجهه بيده عوفي لتباوعين عليه

سليل : اسناني تكز واحجي كوه واكول يباوع عليه يريد يكتلني

نهر : حضنتها حيل واقرا على راسها وباقيه على نفس وضعها

سجاد : امشي نطلع بسرعه

نهر : سوده بوجهي كله من ورايه

سليل : يردون ياخذوني حسيت رجلي خشبت وكوه طلعت الكلمة مني

رجلي متتحرك

نهر : يمه اسم الله الرحمن الحكني سجاد

واعيط جان يعيط بيه

سجاد : اشش كافي لتخوفيها تعالي ولزم ايدها

سليل : مااكدر

سجاد : لتخافين اني ونهر يمج بس تحركي امشي نرجع للسياره

سليل : اريد ابجي اصرخ متطلع بس والله كعد اشوفه كدامه واشوف الدم الي صار بيه حسيت لحظات وراح يجي يخنكني

محسيت غير عمو يشيلني من الخوف خليت وجهي بصدره وارجف

سجاد : وخري البنات خلي ادخلها بلسياره

نهر :نزلها وطببها للسياره واني بس ابجي على حاله سوده علية ولك ليش تكسرها عساك بنار جهنم اباوع الشفه ترجف والعيون دم بس متبجي والجسم ثلج ياالله البنيه راح تروح من عدنا

جان الرجال يكول عمي اخاف داست كبر هي صغيره مو مال مكابر

نهر : مكدرنا نحجي شى شنكول نكول شافت سبب دمارها بكبره

رجع كال دخلوها للامام وان شاء الله تصير زينه

وصلنا للامام

سجاد : اخذي البنات انتي واني وياها بس بالاول اخذيها تتوضى حتى تصلي واني هم اتوضى

نهر : ماشي اخذتها وهي مثل الميته تمشي ويايه تندمت لان اخذتها گلت ردت اريحهن وازورهم ارجع مأذيه سليل خليتها تتوضى بس احسها مو بوعيها ومتحجي رجعنا طلعنا من المغاسل ولكيت سجاد ينتظر لزمها من ايدها

عفيه لتعوفها اخاف تتخربط

سجاد : لتخافين

جان بوكتها الزياره مختلطه لهذا سهل ندخل اني وياه سوه وماكو هوسه قليل كولش جنت شبه فاقده اسمع الداير مدايري بس گبره بوجهي حتى من طلعنه وكأنها صوره وانطبعت بعيوني

دخلنا للصحن الشريف حسيت ببروده جانت نهايه العاشر والجو كاسر

ريحه الامام مميزه وتحسها تدخل الگلب

لزم ايدي ودخلنا اول مره اشوفه وازور كميه الخشوع الي صارت احس جلدي كرمش

جان يهمس بأذني عمو

لتخافين انتي بأمن مكان بلدنيا

دمعت عيني من حجايته جنت حيل محتاجه الامان وصلنا للشباك لزمته جان يكولي باوعي زين وانسي الي شفتي خلي هاي الصوره تبقى بدماغج هذا الامام علي

سلام الله عليه حبيب الرسول وزوج بنته وابن عمه وداح باب خيبر امير المؤمنين

شوفي زين

بقيت اباوع وكأن عمو يقرا افكاري ويعرف صوره القبر بعدها بعيوني جان يصير عندي خشوع من الامام وهنا فقدت بديت ابجي ابجي بحرگه وكأني اشكي لأبويه حالي احاجي الامام بگلبي على الشفته واشهك عافني عمو براحتي رغم صوتي العالي بلبجي باوعت تحرك بعيد عني وكعد يباوع من بعيد عليه ولازمه سبحه ويسبح

رجعت نظري للامام ولازمه شباكه اشكيله حالي والي صار بيه وكل مااحجي واشكي احس قطعه من الالم الي بگلبي تروح مااعرف شحجيت بس كل الي بگلبي حجيته

ودموعي مسكتت ابد لحد متعبت من البجي ومسحت دموعي وباوعت على القبه وكتله ياامير المؤمنين اني ضيعت بابا رجعه اليه بجاهك عند الله تعبت بدونه وخواتي صغار اريد بابا فوك راسهن والله احس روحي يتيمه ما اريد اخلص عمري بدونه وحطيت ايدي على وجهي واشهك وحسيت ايد انحطت على جتفي وخرت ايدي من عيوني

سجاد : مكافي دموع

سليل : اشرت براسي معنى اي كافي

سجاد : سليل

سليل : اشرت براسي

سجاد : احجي سمعيني صوتج

سليل : هااا عمو

سجاد : اوووف خوفتيني حيل نشفتي دمي

سليل : العفو ودنجت

جان يرفع وجهي بيده وكال يله حتى نصلي وراها ناكل كتلني الجوع تره ابتسمت والدموع بعيوني وكتله يله

باوعت من بعيد شفت عمه تباوع النا وكاعده بعيد وتمسح بعيونها والبنات يمها وريم تفتر داير مداير الحضره وتلزم الشباك ومكيفه

تمشينا بأتجاهم حضنتني وتبجي

كله من ورايه

سليل : لا ماما انتي شعليج هي صارت بعد

نهر : كومي صلي حبيبتي الله يبرد نار گلبج بجاه الامام

سليل : كمت صليت وكعدت قريت دعاء وسبحت لازمه السبحه واباوع على ريم ورشا شون فرحانات مردت اكسر فرحتهن بلطلعه

سجاد : كملتي

سليل : اي كملت

طلعنا اكلنا ونفتر بلسوك ونشتري حلاوه جنت هادئه بشكل عجيب بس ابتسم على حركات خواتي بس انزعج من ينظرون لغزل واكو نسوان يلزمن عمه ويكولن خطيه ليش هيج شكلها

الحسره والقهر يخيم على گلبي وگلبها بس مابيدنا شى

بقينا للعصر ورجعنا

وبرجعتنا غمضت ورجعت راسي احس راح يطك من الالم تعبت حيل من البجي

والسياره تمشي وفاتحه الجامه شويه والهوا بارد فتحت عيوني باوعت لكيت عمو يباوع عليه يندار ويرجع عيونه كلها قلق وخوف

ابتسمت وكتلها لتخاف صرت احسن

سجاد : مو عليج اباوع على غزل

سليل : ابتسمت وكتله متأكد

دار وجهه مرات احسه يتقصد ميبين اهتمامه وخوفه ومرات يبين بغضب

وصلنا للبيت وجان يوم متعب وحلوو

بعدها اجه الدوام والتهينا بين دوام وقرايه ماما مأجت ولا وصلت صار اشهر وكأنها متقصده تسوي هيج حتى تشوف شون نعيش خطيه عمه مخلصتها خبز وخياطه وتحاول ترهم عيشتنا وعمو اعرف بيه مرات ينطيها

مره كاعده اقرا يمها وهي تخيط اندكت الباب وحده عدها ملابس تخيطهم طببتها ورجعت كعدت المره جانت حامل

نهر : شعندج عيني

والله عندي جهاز طفل مبقى شى كل كم شهر واجيب

نهر : الله يكومج بلسلامه

اباوع البنيه حليوه بس نظراتها غريبه تباوع من فوك ليجوه

زين شنو ترديهم مال ولد مال بنيه

عادي بيض كلهم والله عمتي الي سوتلي الجهاز وبعد جهاز امي ممكملته وكالو عليج خياطه مضبوطه

نهر : تدللين

اجيج شوكت

نهر : ٣ ايام وتعالي استلميهم

شكراً عيني

راحت المره بس بقيت بحيره ليش هيج تباوع ولزمت القماش واخيط بيه من كل گلبي تمنيت اخيط مال ابني وكل ماافكر هيج اتعوذ من الشيطان واصلي على النبي اخاف يصيب شى المره وابنها مرات عين المحب هم تصيب اشتغلت من گل گلبي وحتى طرزتهم

وبعد ٣ ايام اجت البنيه

وكعدت وتعجبت على الغراض

والله وعاشت ايدج تحفه مسويتهم

نهر : الف عافيه يلبسهن بلهنا والصحه وتكومين بالف سلامه

يوم الالج لو ذني بناتج

نهر : اي ذني بناتي مكدرت اكول مو بناتي لان حسيت بقهره من كلامها وطريقه استهزائها بلكلام

جان تكول شويه وتجي عمتي تنطيج فلوس الجهاز

نهر : اذا ماعندج خليهم هديه مني للطفل

لا عيني  الْحٍمَدٍ للـّہ خير من الله اصلاً رجلي يشتغل ليل نهار لخاطر هذا الطفل مو صار ١٠ سنوات ماعنده وميت عليه تصوري يكوم ويكعد يبوس بطني من الفرحه ويخاف عليه وعلى الطفل من الهوا

نهر : ياعيني الله يتممها الكم على خير

جان اطب عمتي ام سامي واني جمد دمي حسيت هي هم مستغربه جان تكولها

يعني ملكيتي خياطه اله هنا

ليش عمه شوفي شغلها يخبل

نهر : باوعت عليها لو بيدي اشرب من دمها لهاي الدرجه عدها جرح الناس والدوس عليهم سهل

بقيت بس اباوع عليها بس داخلي نار واني اتخيل شون سامي يبوسها ويلمسها ويحضنها ردت اخرب بس بگلبي اكول ربي منك القوه اريدها مااريد يتشمتون بيه

جان تمد ايدها ام سامي وتنطيني الفلوس

جان ادفع ايدها بهدوء وعلى وجهي ضحكه بسيطه وكتلها لو ادري هاي الهدوم لأبن سامي جان حتى القماش مني

اعتبري فلوسهن واصله خاله هديه الطفل

جان تحجي هاي الحقيره

لا عيني منريد هدايا لا خلف الله عليج بفلوسنا

ام سامي : امشي وداد عيب وهاج يمه نهر اخذي حق تعبج

نهر : لا خاله انطيهم لسامي وكولي اله هديه حبيبتك لأبنك

حسيت زوجته تريد تكطعني جان تجرها ام سامي من ايدها وطلعتها وبيدها ملابس الطفل الي اشتغلتهم وتباوع عليه بقهر

بس طلعو وسديت الباب كعدت بلكاع ابجي  بحركة متت قهر واصرخ طلعت سليل

سليل : شبيج ماما وحضنتها

ولج الحقيره تخليني اخيط ملابسه ابنه شايفه هيج نذاله

سليل : ليش هاي مرت عمو سامي

نهر : الله لايوفقه ويوفقها هسه اني بعدت عنهم شيردون مني مكافي السواه هلمره مرته عليه

سليل : خلي يولي فدوة كافي ليصير بيج شى منو النا

نهر : الله ياخذه وميفرحه ويحرك گلبه مثل محرگ گلبي

سليل : كافي فدوة ابوس ايدج كافي

كوه سكتت عمه متت قهر عليها شكد ذيج الايام جانت قويه وضعها زين شكد هسه متأذايه

اخذتها لغرفتها وخليتها تتمدد على الجربايه وبقيت يمها

لليل يله حسيتها فكت ورجعت تحجي وتشتغل بس ادري جواها الم وقهر ميحمله جبال

اجه الشتا والصوبه النفطيه علاء الدين والكتلي (قوري) المحطوط دوم عليها حتى ايدفي البيت وريحه الجاي الطيبه رتبنا البيت لاستقبال الشتا وعيشتنه مستوره بس اقل من ذيج الفترات ومرات خواتي يردون شغلات من اكول الهم عمه ماعدها يسكتون

عمو فتح محل قريب بقى يوميه يرجعنا اني ورشا واكيد دوم البنات يباوعون عليه اما ريمو تروح وتجي ويه سحليه

ايامنا هادئه يمكن حتى البنات نسو شى اسمه ماما سندس ومحد كام يسأل عليها ودخلنا سنه ١٩٩٨ سنه جديده اخبار بابا من عمو نعرفها  شكد توسلنا نشوفه ميقبل يكول هو ميقبل لان هواي رياجيل بس بكل زياره اندز اله اشكال الغراض

تمنيت ولو مره اشوفه

الشتا بارد ومطر كل ميجي عمو وكال خشمج احمر لتتمرضين دفي نفسج ورشا تمشي ويه صديقتها كدامنا هذا حالنا طول هاي الاشهر

وشهر يجر شهر لحد شهر الخامس كاعده اقرا امتحانات نهايه السنه ومدنجه ومكسور ظهري اندكت الباب فتحتها عمه

كاعده بلكاع وكفشتي واني واباوع بصفي كيكه صغيره بيها اسمي فتحت عيني رفعت راسي عمو واكف فوك راسي

سجاد : كل عام وانتي بخير

سليل : كمزت من الفرحه ممصدكه احد جابلي هديه وجان احضنه وبست خده وكتله شكراً عمو شكراً

ابتعد مني بحركة فجائيه بس مهتميت جنت طايره بلكيكه

وجان يكولي هاي طه دزها الج

يتبع ...

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_الخامس_والثلاثون

#مدونة_نور_قلبي

من طبع العطر تشتمه كل الناس

           بس عطرك غريب محير انفاسي

الناس تحط عطر ساعة زمن ويروح

             وانت سنين عطرك نايم براسي

سليل : كمزت من الفرحه ممصدكه احد جابلي هديه وجان احضنه وبست خده وكتله شكراً عمو شكراً

ابتعد مني بحركة فجائيه بس مهتميت جنت طايره بلكيكه

وجان يكولي هاي طه دزها الج

باوعت عليه متفاجئه صدك بابا دزها ودمعت عيني

سجاد : اهوو حتى هنا تبجين وتالي وياج

سليل : شبيك عمو والله دموع الفرح شلونه بابا وشوكت شفته وشكال الك

سجاد : هووب على كيفج اسألتج صلي بدون توقف وحده وحده وهاا بعدين اجاوبج عليهم هسه روحي جيبي شخاطه وشغلي هاي الشمعه حتى نحتفل بميلادج

سليل : كمت بسرعه والفرحه تريد تطلع من گلبي

وصحت بنات تعالو جبت الشخاطه جان يطلعون ريم بسرعه تخصرت واني كيكتي وين

سجاد : انتي الشهر الجاي ميلادج مو هسه

رشا .. واني راح ومجبتولي زعلت

سجاد : الشهر الجاي ويه ريم

ريم : لا اريد وحدي كيكه هلكبرها وتأشر بيدها

نهر : حييل هاي شكبرها

ريم : واريدها وحدي

رشا .. مااا معليه ليش مسويتولي زعلت

سجاد : الله يعينج عليهن يانهر

نهر : ههههه لا فدوه لعيونهن بس هنه هم حقهن اذا نحتفل بعد كلهن بنفس اليوم احسن حتى ميخسرنك يوميه كيكه

سجاد : سهله على الكيكه المهم ميتعاركن

جان تجي تركض ريم بحضن سجاد تكعد

وتلعب بلحيته

عمو حباب اريد كيكه حلوة مثل مال ثلل وكلها كاكاو بطنها واريد تكتب ريم الحلوه

سجاد : صار ست ريم وبعد

ريم : اريد ببسي هذا البطل واني اطك البطل

سجاد : صار وبعد

ريم : شأريد شأريد هااا نفاخ هوايه ويجي سحليه ياكل ويانه

سجاد : حسين لا ممنوع

ريم : لا عمو خطيه انطاني اليوم الجبس مالته والشربت لان جوعانه

سجاد : ليش مماخذه اكل وياج اندار على نهر شعجب متسوين ريوك الهم

نهر : والله من الصبح اكعد بس هي متقبل تاخذ لفه لان بس تمتحن وترجع تتريك هنا

ريم : عمو هو سحليه يشتريلي

سجاد : مو عيب ابن عمج واكبر منج تصيحين اله سحليه

ريم : وهو يصيح ساسوكي ليش عيب واني احبه هيج

سجاد : وشوكت تبطلين تصيحين ثلل وحتى انتي رشا

رشا .. والله عمو احنا نحبها هيج وهم احلى واخف شنو سليل حييل شطوله ثلل اسهل

ريم : مااريد كيكه

سجاد : هاا ليش

ريم : شنو مااصيح سحليه وما اصيح ثلل زعلت

سجاد : عمي صيحي التردي سوي

ريم : جان تبوسه اي هسه اريد كيكه وتبتسم

سجاد : انتي كاعده بنص عصابه

نهر : يمه فدوة للبنات احلى عصابه

سليل : جبت السجينه والشخاطه

سجاد : بعد جان نمتي بلمطبخ

سليل : غير ادور على السجينه الجبيره تعالي غزوله وجريتها وحطيتها بحضني شغلنا الشمعه وحطيناها بنص الكيكه وبدينا نحتفل

اباوع الكل فرحان ويبتسم واني مدمعه عيوني حسيت بلحظه بابا بنصنا لزمنا كلنا السجينه وكصيناها طبعاً عدا عمو سجاد بقى صافن ومبتسم بهدوء وبيده الجكاره الي كمت احس هس روحه من كثر ميفارگها

قطعت الكيك وانطيت لكل واحد قطعه وكعدنا ناكل عفنا الامتحانات وكولشي وقضيت ويه احب الناس عندي عمه وعمو وخواتي ساعتين فرح وسعاده كافي الكيكه من بابا تمنيته يمي

سجاد : يله كافي لعب وكملو قرايتكم

نهر : ينطيك العافيه والله جانو البنات تعبانات من الامتحان هم كيك وهم ونسه

سجاد : محتاجه شى مسواك غراض

نهر : لا تسلم ممقصر

سجاد : تعالي سليل اقفلي الباب ورايه

سليل : كمت وره عمو بيه سوله الا نقفل الباب نكول اله شكو

الوضع امان يعيط ميقبل اله نقفل الباب

وصلت يم الباب جان يمد ايده بجيبه وطلع علبه هاج هاي هديه بسيطه

اخذتها وفتحتها بيها قلم جاف فضي لونه كولش حبيته شكراً عمو ليش كلفت نفسك

سجاد : المهم تنجحين حتى افرح ابوج

سليل : ان شاء الله

راح وسديت الباب جنت طايره بهديته رغم بساطتها وطبيت شوفتها لعمه

نهر : بلعافيه حبيبتي واني هديتي غير يوم اطلع واشتريها الج

سليل : حضنتها والله ياماما انتي احلى هديه الله انطانياها

نهر : فدوة لگلبج يله روحي كملي دراستج

رحت والابتسامه مفاركت وجهي

ويومياً امتحان خلصناها بس نقرا وحدتنا كامت متكعد يم الثانيه لان منلحك وعمه ميته من التعب متعرف تخبز لو تخيط

واخر ايام الامتحانات العصر اندكت الباب توقعت وحده من النسوان التجي على عمه علمود تخيط فتحت الباب صارت ماما سندس بوجهي والله استغربت جيتها بحيث بقيت بس صافنه بوجهه جان تحضني وتبوس بيه

سندس : هلو ماما شونج حبيبتي اشتاقيتلج

طبت وركضت على خواتي الكاعدات بلكاع يقرن طفرت ريم عليها ورشا بس تباوع حسيتها ماخذه موقف منها من ذيج المره

وتقربت على رشا دنجت تبوسها

رشا .. بعد وكت هسه تذكرتينا

سندس : شنو منو علمج هذا الحجي

رشا .. ليش عبالج بعدني صغيره واحد يعلمني

اندارت ماما عليه مستغربه من كلام رشا

سندس : هاي شبيهه اختج

سليل : اسأليها هياتها كدامج

رشا .. وليش تسأليها ماعندي لسان وتجاوب بمكاني

بهاي اللحظه نزلت عمه من السطح منزله الملابس تفاجأت بماما

نهر : هاي سندس هنا شعجب عاش من شافج

سندس : ليش عيني عندج اعتراض لو هم بيت ابويه والغربه يطردوني

نهر : على كيفج مكلت شى ورجفتي كتلج عاش من شافج

ريم : ماما وين حسام الحقير ليش مإجه وياج

سندس : كعد يقرا عنده امتحانات وليش حقير حبيبتي هذا اخوج الجبير ويحبج

رشا .. مبين من هيج يوميه يمنا مكابلنه وكاعد صار شكد ابنج ممنزل نفسه وجاي شايف خواته

سندس : تلاحظين لسانج طولان ولج هاي منو مطلع عينج هيج وصايره لسان هذا الخفت منه تربيه نهر

سليل : وشبيهه تربيه ماما نهر احسن تربيه

سندس : حجت المحامي

نهر : بنات كافي عيب امكم جايه تشوفكم

سندس : لا والله خلف الله عليج سكتيهن ولج لو ما هذا تعلومج ادري بيج حاقده عليه وغيرانه مني لان صرت احسن منج ومتخبله وجايه تگلبين بناتي عليه

نهر : اني شعليه ذني بناتج كدامج يمه بنات جايبه بيوم طاري امجن

رشا وسليل : لا

نهر : شفتي ولا تهمينذ اصلاً وروح ابويه ولا بالي اصلاً ناسيتج وهم مااريد اتذكرج واغث روحي

سندس : جري عدل لا اديحج بلشوارع واخلي البنات تحرم عليج شوفتهن

نهر : هسه انتي جايه تشوفيهن لو تتعاركين ويايه ذني بناتج واكعدي وياهن واني داخله للغرفه حتى وجهي مااشوفه الج

وجان اطب عمه وتركع الباب وراها

سندس : جيبي اختج غزل مشتاقه الها

سليل : نايمه تغدت ونامت

سندس : تعالي ماما ريم شوفي شجبت الج

ركضت ريم لأمها حالها حال اي طفله وفتحت العلاكه بيها لعابه وملابس وحذاء وعلاكه حلويات

كامت تكمز من الفرحه

سندس : هاج رشاوي هاي غراضج

رشا .. شكراً مااريد خليها لأبنج

سندس : جان تشمرها عليها هاج ولج اخذيهم شكو شغله تحبيها جبتها الج

كامت رشا من مكانها وتوجهت لأمها وشمرت الغراض بحضنها

سندس شكراً مااريد عمه نهرممقصره ويايه بشى كل الاحبه تشتري اليه

سندس : وانتي ست سليل مثل اختج

سليل : ليش يايوم اخذت منج غراض حتى اخذهم هسه شكراً تعبناج منريد شى

سندس : كامت على حيلها وكامت تعيط

بله شخبلجن بله الجبيره وغاسله ايدي منها اله انتي الخاتون رشا شجاج شقرو براسج وغيروج عليه نسيتي اني امج مو عيب بعدج صغيره وتردين ايد امج هاي تربيه نهر الي تتفاخرن بيها بله اخلاق ولسان وتراددن امج

سليل : ياام تحجين عليها امنا الصارلها اكثر من ١٠ اشهر ماكو

امنا الي تنام وتطلع وتاكل وعايشه حياتها وناسيه بناتها بله بروح بيبي احلفج بيها شون كدرتي هاي المده كلها متسألين علينا

مكلتي ماتن صار بيهن شى جاعن مفكرتي مره قبل متنامين بناتي وين

سندس : هلا هلا خوش والله معلمتج الحقيره وبعد طلعيهن طلعيهن

رشا .. وعمه شعليها فوك زينيتها فوك ما متحمله مسؤوليه المفروض انتي تتحمليها شنو ذنبها تكعد الفجر تخبز وكل شويه محتركه لو الليل كله تخلصه مدنجه حتى تخيط دشداشه بفلوسها توكلنا

وانتي وابنج عايشين بنعيم ولا يمكم

سندس : باع هاي بكد القندره ولسانها اطول منها اذا مسكتي اطيح حظج

سليل : هااا يعني اجيتي حتى اطيحين حظنا

وره ١٠ اشهر جايبه لكل وحده علاكه بيه جم حاجه وتردينا نستقبلج بلهلاهل والضحك وانام بحضنج عوفج مني وريم وغزل ذني المشافن  شى من حضنج متشتاقين الهن متكولين بناتي بيهن شى مريضات ياكلن يشربن وغزل المحروكه كملو علاجها لا 

سندس :انتن متعرفن ليش هيج كعد اسوي

رشا .. ليش بله ياماما

سندس : عمتجن اتحدتني وكالت اني اعيشهن وردت اشوف شسوي

سليل : وحتى تربحين تشمرين بناتج ١٠ اشهر والله زين وهسه ماما نهر ربحت شون نصفك الها لو تردين نصفك الج

سندس : والله وكبرتن وطلعت لساناتجن

رشا .. نسيتي بنات منو احنا وامنا منو

سندس : انتي بلذات اذا ماسكتي انزع الحذاء واكطعه على راسج

رشا .. والله خوش حذاء اكيد غالي ليش تكطعي حرامات

سليل : عفيه عدنا امتحانات تردين تبقين شويه واكعدلج غزل تشوفيها وهاي ريم يمج واني ورشا داخلين نقرا متردين الله وياج شكراً للزياره

رشا .. يله ورايه تاريخ صعب مااريد اضيع وكتي

سليل : اباوع على ماما تريد تشرب من دمنا بس كوه ضابطه اعصابها

سندس : مو صوجن صوجي اني الله شاهد شكد ابجي عليجن واشتاق الجن وهاي تاليها احبل واجيب واربي وهيج اطلعن

رشا .. حبلتي وجبتي وربيتي شويه وطفرتي

سندس : ارجعجن بيوم لحضني واندمجن على كل كلمة كلتوها بحقي لمن تعيشون بلعز الكاعد اكونه الكم

سليل : خلي الج شكراً يله رشا نروح نقرا

اباوع على ريم حاضنه الغراض وفاتحه عيونها علينا نريد انطب للغرفه جان تركض ريم هاج ماما وشمرت العلاكه على القنفه

مااريد

سندس : ولج حتى انتي تعالي مالج دخل بذني خلي يولن

ريم : ثلل ورشا ميريدون منج اني هم ما اريد بس بوسيلي حسام الحقير وخلي يجي ضامتله دعابل ومصياده جديده

سليل : اجت ريم تركض عليه ولزمتني

عافت الغراض وطلعت وركعت الباب وراها

عاطت رشا المن عفتيهن اخذيهن وياج منريد شى منج الله لايعوزنا عليج

سليل : حضنتها كافي بلاعيمج طكت راحت عوفيها

شو تعالي وانتي ريمو روحي يم عمه

ريم : وذني الغراض

سليل : روحي اخذي مالاتج گلبي وتونسي بيهم

رشا .. تبجي وتحجي منريد شى منها خلي تولي

سليل : اشش كافي راحت بعد واحسن منذبهن خلي اختج تستفاد منهن كافي كدامها ذبتهن وهي طفله هاي كافيه تأذيها يله ريمو اخذيهن وطبي يم عمه

ريم : مااريد رشا تبجي

رشا .. مسحت دموعي اخذي حبيبتي وروحي اقري

سليل : وانتي امشي ويايه

طبينا للغرفه وكعدتها كبالي على الجربايه

بقيت اباوع عليها

رشا .. شبيج ليش هيج تباوعين

سليل : اول مره اشوفج جبيره وتحجين حجي اكبر من عمرج من شوكت هيج شايله على ماما توقعت بس تجي تشمرين نفسج بحضنها لان صار فتره طويله مجايه

رشا .. وكت مشفتها تطرد بعمه وتريد تبقينا وحدنا متعرفين شكد ضجت منها بس هم بقيت اشتاق الها واريد انام بحضنها

بس بيوم اجتماع الامهات هنا حسيت روحي ماعندي ام

سليل : بس اجتج عمه نهر واجت عليه والمدرسات مدحو بينا وبشطارتنا

رشا .. بس تبقى عمتي مو امي تعرفين من شفت ام صديقتي واجت تسلم وسألتني وين امج شصار بيه تمنيت اموت والكاع تبلعني ولا اوكف بهيج موقف شكول امي شمرتنا وراحت تزوجت وعافتنا صار اشهر مجايه تشوف بناتها واخذت بس ابنها ونستنا والله لو تعرفين بوكتها شكد بجيت رحت للحمامات مال المدرسه وطكيت بجي من شفت شكد امهات جايات علمود بناتهن واحنا امنا عايشه وماكو بحياتنا من يومها اعتبرت سندس ماتت ومااريد اي شى منها

سليل : حضنتها كافي بجي فدوة والله اموت قهر من تبجي وحده منجن

رشا .. مااريدها تجي هنا فدوه كولي لعمو خلي يمنعها منا

سليل : ميكدر لتنسين هذا بيت امها يعني بيتها هسه

رشا .. ماشي مناخذ شى منها

سليل : بس هي جايبه ملابس وغراض اشكال لكل وحده

رشا .. اني اريد كولشي واعرف عمه متكدر تشتري النا راضيه ابقى ومااشتري واتحمل اشوف البنات احسن مني المهم مااخذ منها

سليل : ماشي شتردين اني وياج بس كافي بجي وكومي غسلي وراج قرايه

جان اطب ريم لابسه بجامه طويله تسحل وراها اعتقد ماما جابتها اليه وفوكاها قميص طويل وفوك راسها شفقه كولشي مطالع منها عباره عن ملابس وتمشي

ريم : اذا متردون ذني كصوهن اليه اني البسهن

رشا .. ههههه خرب ولج هاي شنو

ريم : بجامه ثلل وقميص مالتها والشفقه من غراضج والحذاء هم

سليل : ههههه انزعي لتوكعين بيهن

ريم : واكو هذا الحزام اريده ثلل البسه واركص بيه

جان بيدها حزام  عباره عن زناجيل وبنهايته لؤلؤ وقفاله حلو مال حفلات هههه بس تركصيلنا

ريم : اي شغلي المسجل واركص اخذ كاسيت من عمو

سليل : خوش والله مستقبل مشرف اختنا راقصه تعالي انزعي

كوه نزعتها ولبستها غير ملابس

شفت عمه بلغرفه مالتها حاطه ايدها على خدها اجيت من وراها وبست خدها شبيه الحلو صافن

نهر : انتم الحلوات

سليل : شبيج ماما شو ضايجه اذا على كلام ماما سندس عفيه عوفيها لتضوجين

نهر : لا والله صافنه عليجن اول مره احس طه كدامي جنت اسمع كلامجن ويه امجن حسيت طه ويسولف نفس عزيه النفس والروح الابيه ابوج عمرة منزل راسه لبشر علمود فلوس حتى لو حقه دومه نفسه عزيزه ومو بعينه الفلوس وطلعتن عليه

اعرف انتي عليه بكولشي وماخذه مني بس خواتج وكحات وكاحه امهن خايفه ليطلعن طماعات عليها اليوم صفنت من رجعن الغراض رغم اعرف هنه يموتن على هاي الشغلات واني مقصره مااكدر اشتري الجن منها لان غاليات وهي جايه ماشاء الله محمله اشكال وموكفت بعينجن ومهتميتن حتى الصغيره شافتجن ومااخذت والده بجيت من الفرحه مو قصدي اعصيجن على امجن الله شاهد بس حبيت الروح

العزيزه الورثتنها من ابوجن الله يفك سجنه

سليل : والله ياماما اني هم متوقعت هيج من خواتي وان شاء الله من يكبرن يبقن هيج وميضيع تعبج

نهر : امين حلال بيكم التعب انتم بناتي

سليل : يله كومي خلي نسوي عشا جاعن امهات كروشه

نهر : هههه ولج منيلهن كروش مسلوعات من الضعف

سليل : اي ماما اضحكي عفيه

نهر : اااخ يانهر الثانيه همج بس ضحكتنا

والله انتي نهر الثانيه

سليل : ياريت اطلع مثلج وبطيبه گلبج

نهر : يله كومي اقري واني اسوي العشا

سليل : خلي اساعدج

نهر : لا ابد كومي حبيبتي وراج دراسه

بستها لعمه وكمت اقرا جانت غزل تكعد يم ريم وتباوع عليها وتحاول تقلدها حتى بلزمه القلم لحد ماوصلت تعرف تكتب احرف بسيطه بس مخربط ناس صاعده وناس نازله وناس مدعومه ههههه بس اقلها تعرف لزمه القلم

وثاني يوم امتحانا الاخير طلعت انتظر عمو يجي ورشا واكفه هي وصديقتها بصفي

جنت احط الاقلام بلعلاكه واجت رشا شاورتني

رشا .. شوفي ذنيج البنات ينتظرن عمج

سليل : باوعت هذني شبيهن من كل عقلهن

رشا .. ميتات عليه ولج حتى صديقتي تكول عمج شكد شخصيه وثكيل

سليل : خفيفات خلي يولن مو عيب واكبر منهن شافن منه

رشا .. واذا اكبر بلعكس هنه يدورن الجبير وفوكاها ممتزوج وهو ميباوع على اي وحده وهنه متخبلات

سليل : والله بنات تالي وكت لتحجين وياهن وتعالي انتي شمدريج عليه واكفات

رشا .. اجني سألني

سليل : تدرين بدايه السنه هم اجني اثنين ولبستهن وابد ماباوعت بوجهن شنو هيج عمو حلو قابل هو عمر الشريف والله ذني مخبلات

رشا .. هنه متخبلان عليه لان ميباوع على وحده ولا يعبرهن مو على شكله

سليل : مو اكول شكله عادي مو مال يكتلن نفسهن عليه والله ميستحن

رشا .. هو لان عمنا نشوفه عادي الي مثل ذني يحبن الرزن الثكيل

سليل : والله وكبرتي بت سندس وتميزين بهاي السوالف استحي عيب تره حتى من صديقتج امنعج

رشا .. لا لا سكتت اجه جون ترافولتا الثانويه ههههه

سليل : ضربتها على جتفها اش وجع

سجاد : تأخرت عليكم

سليل : لا عمو هسه طلعنا

سجاد : يله امشو

سليل : بقينا نتمشى وكل شويه ارفع راسي اباوع عليه شون يمشي بهدوء والجكاره بحلكه ولحيته الخفيفه المرتبه وشعره الراجع ليوره وجان دوم من يجي للمدرسه يجي نظيف ومرتب ابد مايوم اجاني بهدوم الشغل وخاصه هو فيتر يعني كل الوكت مدهن وعطره الطيب الي بس امشي وياه اشمه

سجاد : مضيعه شى

سليل : هاااااا شنوو

سجاد : كل شويه ترفعين وجهج عليه محتاجه شى مضيعه شى ليش مكعد تمشين طبيعي

سليل : لا ماكو شى

سجاد : مااحب الكذب احجي

جان يحجي برزانه وهدوء وميدير وجهه عليه ويسولف وجهه ليكدام واذا يريد يباوع يدير وجهه شويه وبعد ميباوع ويبقى نظره على الطريق

سليل : تدري عمو شكد بنات معجبات بيك بمدرستنا

سجاد : رجعنا لنفس الموضوع

سليل : والله هلمره مو اني هاي رشا

سجاد : خوش والله هاي هم لازم اضبطها زين مبين كبرت ومامنتبه

سليل : الله عليك لتكول الها تزعل

بس ليش البنات هيج كاتلين روحهم عليك

سجاد : واني شعليه شو سأليني الي

سليل : ماادري صفنت هسه انت طويل وشكلك زين مرتب ونظيف وعطرك طيب وثكيل وشخصيه بس عصبي متنجرع

جان يوكف باوع عليه

سجاد : تدرين بروحج صايره متعرفين تحجين

سليل : هااا غير اكولك شفت

سجاد : امشي وبلا لغوه لو ما طالعه من امتحان شمريكتج نهر باچه وهلكد تحجين

سليل : ايييع عمو مااحبها

سجاد : لعد ليش هلكد تحجين

سليل : غير اكولك ليش اباوع عليك

سجاد: وهسه المطلوب شنو مني

سليل : مامطلوب شى شكراً

سجاد : باوع صفح ودار وجهه واني كل شويه اباوع وارجع عيوني

وصلنا للبيت وباب البيت كال لرشا

سجاد : اثكلي تره اثكلج بيدي

رشا: والله عمو ممسويه شى

سجاد: ليش تردين انتظرج لحد متسوين صيري عاقله مثل اختج حتى لا اشوفج الوجهه الثاني مني

سليل : ابتسمت وكتله بعفويه يعني اني عاقله

سجاد : مرات ومرات خبله

سليل : راحت ابتسامتي وكتله ان شاء الله تحب وحده عوره زركة ايد من رجل متعرف الها وركضت ليجوه

رشا .. رفعت ايدها رشا اني معليه والله

سجاد : طبي جوه وكلي لأختج عيديها بعد  وراح اخليج انتي العوره والي ايد من رجل محد يعرف الها خلي تلزم لسانها

رشا .. صار عمو وطبت ركض

سليل : هههههه شكال عمو

رشا .. والله بس يلزمج اله يكطعج اني معليه وكال خلي تلزم لسانها لا اخليها هب العوره والي ايد من رجل ميعرف الها ههههههه اتخيل شكلج والله اطلعين فدشى

سليل : امشي لج مو ضوجني

رشا .. لتنسين هذا عمو الوحش لو نسيتي

سليل : ههههه لا ماانسى

شويه وسمعنا صوت سحليه طلعنا من الغرفه نركض جانت عمه ماكو. بلبيت اكيد اخذت غزل وراحت لو تودي خبز للناس لو شى مخيطته

طلعنا نركض حسين لازم ريم ويمشي بيها وهي مكفشه وملويه رجلها وهو خشمه يطك دم وقميصه مكطع اني شفتهم هيج تخبلت ولكم شصار

ريم : رجلي ثلل توجعني

سليل : ولكم هذا شنو حالكم ودنجت على رجلها بس لزمتها عاطت

حسين : على كيفج مو كاعد تكول رجلي شنو متسمعين

رشا .. لتعيط لك غير نشوف شصاير وهاي شبيكم جنكم طالعين من معركه وخسرانين بيها وخوش مكتولين كتله

ريم : لا احنا كتلناهم

رشا .. اذا انتم كاتليهم وهيج شكلكم لو مكتولين شون يجيبوكم على مطي مشيولين

سليل : اشش انتي الثانيه خلي افهم شصار

ريم : رشا اسكتي تره والله مااحبج بعد

سليل : عوفج من رشا احجي شصار

حسين : اني احجي

ريم : انجب انت اني احجي

حسين : انتي اسكتي وشوفي رجلج يمكن انكسرت

سليل : لتتعاركون وخلي افهم

حسين : جنت رايح لريم اجيبها من المدرسه واكو ولد بصفي يضوجون مني تحلفولي يكتلوني

سليل : انت مو بكلوريا هاي السنه شوداك على ريم عدكم مراجعه هسه

حسين : مو هي كالت تعال الي اخر يوم حتى نروح نلعب

رشا .. خوش والله شكبرك تصير وكايدتك مثل الطلي ولك سنه الجايه تروح متوسطه

سليل : عطت برشا وتالي وياج

ريم : رشا ام كفشه لتعيبين تره والله اشخبط على اللفكس مالتج الضامته بلكنتور واخربه الج والصوره الي لازكتها باب الكنتور اشخبط عليها

رشا .. حتى اركع راسج بلحايط

سليل : يبووووو كافي شبيجن خلي نفهم اذا فتحتو حلكم والله اخلي عمو يموتكم

وانت احجي موتتني

حسين : هنه غير يسكتن

سليل : مالك دخل كمل

حسين : جنا نمشي وجيتو عليه وريم وكعت دك بلحجار الهم واحد ضخم اطول مني صعدت فوكاه وعضته من اذنه وطلعت دم منها

سليل : لطمت على وجهي صخام ولج وتالي

حسين : هو دفعها حيل وكعت واتأذت رجلها وهم كامت وضلت تضرب بيه جلاليق وهو يضربها كطع شعرها تالي واحد منهم نام فوكايه وخنكني عافت الضخم وجابت طابوكه جبيره وضربته براسه وفتحت راسه كمت اخذتها وانهزمنا

رشا .. وخوش والله هسه يجون اهله وياخذوج للشرطه يذبوج يمهم وتالي يجيبون چلب ياكلج

ريم : كامت تبجي مااروح ثلل حبابه اخاف من الچلب

سليل : كفخت رشا خبال اي والله ماكو شى لتخافين ياشرطه هاي تشاقه وياج

حسين : اني هسه اكول لبابا يلعب بيهم طوبه

رشا .. اي والله وحياه عينه لعمي كدها ابو الحزب

سليل : اااخ من لسانج روحي حسوني لبيتكم وخلي اشوف المصيبه الي مسويها اخاف رجلها بيها شى

حسين : لتخافين ساسوكي مااخليهم يجون لبيتكم

رشا .. خوش والله كرندايزر انطلق بلكت ميجون يسحلوها من كفشتها

سليل : روحي طبي جوه كافي البنيه فرفحت من البجي

رشا .. موتتنا كل شويه ومتعاركه وهلمره كله ويه ولد حتى تبطل اتجيت بلعركات وانت حسين مو عندك اصدقاء متروح وياهم وتعوفها

ريم : ماااا سحليه بس تروح لصدقانك ازعل وياك وماالعب وياك واكوم بس ابجي

حسين : لا مااخليج تبجين ابقى العب وياج هاي رشا عوبه لتبجين

رشا .. اني عوبه ياابن

سليل : اششش مخليتها تكمل وعطت بيها شبيج حاطه عقلج وياهم

رشا .. متشوفين مشاكلها بلشارع قبل كم يوم ضربت بنيه وشكت راسها وهمزين امها خوش مره واجت بس عاتبت عمه وهلمره ولد والله اعلم المن تجي بيوم تضرب يجوز تجي ضاربه لو بيبي انعام لو عمو علي ههههه

ريم : اييي بيبي انعال وانومها بلشارع

سليل : كافي انتي مو رجلج توجعج

طبت عمه نهر مبين اهل الولد مستلميها من بره

نهر : كومي كولي لعفو للولد ولج راسه مفتوح يمعزايه

ريم : مااا مااكول العفو هو خنك سحليه وذا الدبه حميسه وكعني وملخ شعري

سليل : همه الي متعدين ماما

نهر : هلمره نحل طلايب ريم خوش والله وانت عمه روح لأهلك خشمك كله دم ليصير بيك شى وتوكع براسنا

حسين : اي رايح دير بالكم على ساسوكي

رشا .. عشتو جهال تالي وكت

سليل : اي عيني مو عمرج ٦٠ سنه تعالي ويايه انزعها ونشوف شبيهه رجلها

ريم : ااااخ توجعني

بيومها طلعت رض وشديناها الها وهي اله تمشي عليها وكحه متكعد

وعمه سدت الموضوع ويه اهل الولد بلتواسيل واكيد راحو لبيت عمي علي بس ذاك يموت على حسين واكيد راح يذب الصوج بأبنهم

ثاني يوم حسوني اجه وجايب لهاي الفصعونه علوجه ونستله بسك وجبس باز وجكليت ومصاص علاكه تارس الها

احب علاقتهم احسه معوضها عن حسام وهم لو هو ماكو جان ريم حيل تأذت خاصه من كل البنات ابتعدو عنها ويخافون منها اله هو يلعب وياها وحيل يخاف عليها مرات اكول هذا طالع على ابويه حنين لان ابوه صار سنين مكال شلونكم بنات اخويه واذا يشوفنا بلشارع بلصدفه يدير وجهه

اكيد حسين على ابويه طالع

نجحنا وجانت فرحتنا جبيره ومثل كل مره عمو ياخذ شهايدنا ويوديها لبابا

شكد مرت ايام رغم فقر الحال بس وجود عمه ويانه الجانت تحمل كولشي عنا يهون علينا

بس هي منو يهون عليها من سمعت بعمو سامي صار عنده ولد اتذكر ليلتها هجت للسطح وبس تناشغ بلبجي وتحجي ويه رب العالمين ساعه تعاتبه وساعه تستغفر انتهت رجعت مثل اول يوم من عرفت بيه متزوج اشوفها تروح وتجي ومره تضرب على وجهه ومره تحط ايدها على حلكها وتعيط بكل قوتها جنت اختل بلبيتونه وكل شويه امد راسي من الباب واشوف حالها وابجي عليها مااكدر اطلع يمها واواسيها لان راح تسكت وتبين روحها قويه ويبقى القهر بگلبها عفتها تبجي عسى ولعل ترتاح بعدها

كعدنا ثاني يوم ولا كأن صار شى شكد صامده وطيبه ولا تعكس ضوجتها علينا دوم ابتسامتها بوجهنه خاصه من نكعد الصبح اعرف بروحها صايره رماد بس متبين النا

اباوع على حالي واكفه كدام المرايه هيج مر الوكت وهيج كبرت

عمري صار ١٦ سنه خلصت الثالث بتفوق ورشا راحت للثالث متوسط وريمو راحت للسادس ابتدائي كبرنا احنا هسه شهر التاسع ١٩٩٩

اني رابع اعدادي الاختلاف بهاي السنه هي غزل

دخولها للمدرسه جان اكبر مخاوفنا بسبب حالتها

ومع الاسف تحققت مخاوفنا

اول يوم رجعت تبجي من المدرسه وتكول

غزل : مااداوم ماما يعيبون عليه يكولون حيوانه محروكه تخوفين وتشهك

نهر : مسحت دموعها وحضنتها لا ماما حبيبتي انتي حلوة ذوله محلوين وكحين

غزل : مااحبها ما اروح

سليل : اني اوديج بيدي

غزل : ما ما

نهر : لازم انقلها لغير مدرسه

سليل : وشنو الفايده ماما هم راح يعيبون

نهر : غزوله حبيبتي تعالي

اخذتها عمه من ايدها وجابت قطعه مال قماش مثل الربطه ولبستها الها

نهر : الله طلعتي تخبلين

سليل : باوعت طلع بس وجهه والرگبه الي يعيبون عليها ويخافون منها الجهال اختفت وهي وجهه يخبل مدبدب والعيون عسلي والربطه بيضه طلعت تموت تنكرط

غزل : اضوج ماما ليش بث (بس) اني

نهر : لا اني هم راح البس وياج

سليل : واني هم

نهر : انتي ليش حبيبتي

سليل : ميخالف ماما من تشوفنا لابسين وياها ترتاح وتحبه مااريد اختي تتأذه وتتعقد وتترك المدرسه هذا هو راح اتحجب وياها قابل ياكلني الحجاب

نهر : بست سليل الله يستر عليج ويحميج ياسليل بنت

سليل : طه بنت طه مااحب احد يكول سليل بنت سندس

نهر : ياسليل بنت نهر هيج يعجبج

سليل : اووي يخبل وبقيت ابوس بيها وتضحك

يله ماماتي نريد حجابات حلوه من ايدج

وثاني يوم لبست باوعت على

شكلي غريب عليه وخاصه بذاك الوكت قليل الحجاب بس لخاطر اختي كولشي مستعده اسوي

طلعت بلباب شافني عمو فتح عينه

سجاد : هاا شكو

سليل : تحجبت

سجاد : ليش

سليل : لخاطر غزل وحجيت كولشي اله بقى ساكت وتمشينا ورشا كالمعتاد ويه صديقتها الي صارت صديقتها الصدوقه واحنا نمشي جان يكولي بكل هدوء

سجاد :احسن شى سويتي من لبستي

سليل : باوعت عليه مستغربه ليش عمو

سجاد : كصيبتج طولانه وتجيب النظره بلشارع

سليل : اتذكرت شعري الطول وضفيرتي الوصلت لنهايه ظهري بسبب اعتناء عمه بشعري وشعر خواتي

كتله يعني هسه انت مرتاح لان محجبه

مجاوب وجر نفس من الجكاره وبقينا نمشي وصلت لباب المدرسه جان يكول بصوت هادئ

سليل انداريت عليه نعم عمو

سجاد : كولش مرتاح

وعافني وراح شكد استغرب مرات من هدوئه ومن كلماته بسبب اعجاب البنات المستمر بيه وماشاء الله صار عضو منتدب بلثانويه سنين يودي ويجيب كام الكل يعرفه

وبنات هوايه حاولو يجذبون انتباهه وهو ابد

لحد مايوم صار بيه موقف متوقعت راح يصير والي خلاني اشوف عمو سجاد بغير صوره

يتبع ...

#رواية_أبي_والغزلان

#للكاتبة_Reem_ريام_هادي

#الجزء_الأول #البارت__السادس_والثلاثون

#مدونة_نور_قللي

المشكلة المابي جرح

مايفهم البي حسره

مرات تلگالك عدل

بچفوفه يحفر گبره

لحد مايوم صار بيه موقف متوقعت راح يصير والي خلاني اشوف عمو سجاد بغير صوره

نهايه شهر العاشر ١٩٩٩ يوم جمعه الصبح وره متريكنا

صاحتني عمه

نهر : ماما سليل نزلي الزوليه الصغيره مال غرفتج وغرفه اختج بس هي بقت خلصنا فرش البيت كله تكدرين تشيليها وحدج

سليل : اي ماما اكدر قابل شيراد الها

نهر : بلبيتونه موجوده

سليل : صاعده صعدت ونزلتها جانت شويه ثكيله بس مو حيل وبعدني بأول بايه نزول من فوك وجان تزلك رجلي محسيت غير روحي بلكاع ونايمه على ظهري ورجلي اعيط منها

نهر : يمه الرحمن يمه سليل كومي جنت بلمطبخ مسمعت غير صوت وكعه بس هزت البيت وعياط سليل طلعت اركض والكاها مدده بلكاع وتعيط حاولت اكومها مكدرت عاطت تهسترت وين انطي وجهي واني اشوفها مكسره كدامي حتى خشمها يطك دم وايدها مكروده عدا رجلها الي متكدر توكف عليها. طلعو البنات على وكعتها يركضون من الغرفه

سليل : ااااخ ماما الحكيني

نهر :يمه شون بيه متكدرين توكفين

سليل : ابجي واحجي وروحي شايغه من الالم عفيه ماما الحكيني لا مااكدر اوكف

نهر : ركضت لبست عبايتي

عينكم على اختكم

رشا .. وين رايحه عمه وعايفتها

نهر : رايحه لسجاد يجي يشيلها وناخذها للمستشفى اخاف كسر برجلها لتحركوها ابد

رشا .. روحي بسرعه فدوه

نهر : ركضت مثل المخبله بلشارع حتى بس اوصله رحت للمحل وبنص الطريق تذكرت اليوم عطلته رجعت لشقته وصعدت الدرج والهث من التعب

فتحلي الباب استغرب من جيتي

سجاد : خير نهر صار شى

نهر : الحك فدوه سليل وكعت ومتكدر تكوم بس لا انكسرت رجلها

سجاد : لا بربج ثواني بس البس

نهر : دقيقه ولكيته كدامي وركضنا اني وياه للبيت

طبيت لكيت رشا حاطه راس سليل بحضنها وحبيبتي تشهك من الالم والبجي

سجاد : شبيج سليل شو تعالي

سليل : راد يكومني عمو عطت لا لا عفيه لتحركني كعد اتأذه

سجاد : يمكن صدك رجلها انكسرت

سليل : لا عفيه شنو انكسرت

نهر : يمه دخيلك الله وهسه شلون

سجاد : رايح اجيب سياره حطي شى على جسمها ناخذها للكندي

نهر : بسرعه عفيه

سليل : جنت ابجي جره وحده ومااعرف ابجي من الم رجلي لو ايدي الي تحركني مجرحه من الوكعه لو خشمي الي كوه اجره النفس من وراه وكعتي جانت كولش قويه لدرجه احس ولا عظمه صاحيه بيه

سجاد : يله راح اشيلج على كيفي تحملي

سليل : حطيت ايدي داير مداير ركبته وثبت جسمي زين ورفعني احس روحي شاغت ويه رفعته وكمت اصرخ

سجاد : اششش على كيفي والله شلتج

سليل : ادري عمو بس الالم قوي مكعد اتحمل

سجاد : يله نهر وينج حطي شى عليها

نهر : اجيت جبت عبايتي مكدرت ابدل الها هي بيا حال

سجاد : شمري عليها وامشي

سليل : اخذوني للمستشفى بس احس الطريق شطوله انتهيت من الالم وكل شويه الدنيا تفتر بيه واحاول امسك نفسي مااخرب لحد مدخلوني للطوارئ وصعدوني للاشعه حاطيني على كرسي ويدفع بيه

وطلع كسر برجلي والتواء بلثانيه ورضوض خفيفه بالايد اهم شى خشمي منكسر

وبدو يسون رجلي وصياحي ماخذ الدنيا لزمت ايدي عمه بس متحملت البجي مالتي سحبها عمو وكال اطلعي بره

جان الممرض الي يسوي برجلي ايده قويه ممهتم بألمي لحد ماالزمت قميص عمو من حرگت گلبي وكتله عمو كعد يأذيني فدوه كوله على كيفه

جان يعيط بيه

سجاد : على كيفك كعد تأذيها

شسوي لازم تتحمل

سجاد : شنو حيوان جوه ايدك ومدايربال لألمها راح توكع من الالم والبجي خف ايدك عليها

ماشي

تحملي سليل خلص

سليل : اشر براسي ودموعي تصب سحب راسي لحضنه واني اشهك من البجي لحد مكمل گلت گلبي راح يوكف

سجاد : يله خلي اشيلك واحطج على الكرسي ونرجع للبيت

سليل :على كيفك والله اتأذه

ما أذيج انطيني ايدج عفيه بلسباعيه

طلعنا من ردهت الكسور لكيت عمه فاحطه من البجي اجت تركض

سجاد : المن بعد جايه ولج شكد جبانه لو مبقيج يم البنات احسن شستفاديت منج هسه

نهر : غير مكدرت اشوفها تعيط من الالم عبالك مثلك گلبك حجاره

سجاد : يله امشي من گلب الحنين بس خلي اشتري العلاج من بره حتى تشربه واضربيها ابره

سليل : لا عموو مااريد ابر اخاف

سجاد : شنو تخافين الدكتور كاتبلج على ٣ ابر لازم تاخذيهم بله دلع لازم اطيبين نسيتي وراج مدرسه وامتحانات

سليل : اي ماما شلون والمدرسه عفيه مااريد السنه تروح مني

نهر : لا حبيبتي متروح كلها كم يوم وتكومين بالف سلامه

سجاد : يله اجيب الدوا ابقى هنا لتتحركون وهم اجيب تكسي واجي

سليل : رجعنا للبيت واول موصلنا شالني ودخلني للغرفه

حسيت بألم قوي بس اخاف اعيط واترزل من عمو

سجاد : يله نهر مو تعرفين اتضربين ابر اضربيها

نهر : اي راح احضرها للابره

سليل : دمعت عيني والخوف اكلني منها لو الف كسر ولا ابره وحده

سجاد : راح اطلع بلهول من تكملين صيحيني

سليل : ميصير مااخذها

سجاد : اشش يله نهر استعجلي

طلع وسد الباب وراه لزمت يد عمه

فدوه ماما لتضربيني ابره والله اخاف

نهر : ما أذيج وعيونج لازم حبيبتي حتى تكدرين تنامين

سليل : غمضت عيوني والله الوكعة بكوم والابره بكوم ثاني

نهر : هاا تأذيتي

سليل : فتحت عيوني هاا كملتي

نهر : اي

سليل : عاشت ايدج والله راد گلبي يركف

نهر : حجي بيني وبينج اني صح اضرب ابر بس اموت خوف منها

سليل : ههههه لعد طالعه عليج

جان تبوسني عمه اووف شكد خفت عليج وردت اموت

سليل : اسم الله عليج ماما

نهر : ارتاحي شوي خلي اغطيج بلكت تنامين

سليل : احس نار برجلي

نهر : العلاج بيه مسكن قوي هسه ترتاحين

حاولي ترتاحين گلبي راح اطلع واذا احتاجيتي شى بس صيحي

سليل : ماشي

غمضت عيوني وحاولت انام بس مااكدر لان نار بكل جسمي بس بقيت عيوني مغمضه لان هم من البجي تحركني ردتها ترتاح حسيت انفتحت الباب بقيت مغمضه لان تعبانه

احس احد بصفي بس ميحجي جريت نفس عرفته هو لحظات وانفاس دافيه تقربت مني مااعرف ليش حسيت جسمي كزبر ومفتحت عيني ومباشره وخر مني بدون ميلمسني وسمعت صوت فتحت الباب وسدتها فتحت عيوني ماكو احد عرفت عمو اجه شافني وطلع

نهر :ها نايمه

سجاد : ايي اروح ارتاح شويه ساعتين وارجعلكم محتاجه شى اجيبه ويايه

ريم : اني اريد عمو

سجاد : كولي عمو

ريم : اريد دفتر  واصباغ خشبيه

نهر : ليش مكلتي اني اجيبلج

سجاد : وشنو الفرق

نهر : لا بس انت تعبان

سجاد : هاي اخر مره اسمعها منج الي يردوه البنات اني اجيبه وحالي من حالج مو تنسين

نهر : والله مو قصدي شى اهوو شبيك ياسجاد بسرعه تتحسس

عينج على سليل بس يخلص مفعول العلاج راح تتأذه حيل

نهر : سوده عليه الله يساعدها زين دوامها شلون

سجاد : اخذت ورقه من المستشفى وباجر اوديهاللمدرسه نشوف شلون الاجراء واخذلها اجازه بس المهم متعوفيها وحدها وانتي ريمو تعالي انتظري بلباب بين مااجيب الي ردتي انطي الج واروح

ريم : يله عمو

طلعت ريم بلباب واكفه واجه حسين من بعيد استغرب وجودها

ريم سادس ابتدائي وحسين صار ثاني متوسط كبر وطول وبدت علامات المراهقه عليه

حسين : شعندج واكفه بلباب

ريم : وانت شعليك

حسين : ادخلي جوه محلوه وكفتج

ريم : لك سحليه لتصير رجال براسي مالك دخل واكفه باب بيتنا مواكفه بيت ابوك

حسين : لسانج طولان تره اكصه

ريم : روح زين شواربك جنهن مجرى مال نمل شرفعاتهن محلوات عليك

حسين : ولج ساسوكي ابطحج هسه بلكاع واكطع شعرج اصلاً اكصه واسويلج ولد مثلي

ريم : هلوو يله تعال وخلي اشوف شلون تضربني مبين صار هواي مامكتول مني وجلدك يحكك

حسين : فديوم الزم لسانج واكصه ولج كبرت صرت بلمتوسطه لازم تحترميني ومتغلطين

ريم : لتشوف نفسك شطولك اطول من يوم السبت تره اني اسبع منك

سجاد : هاا شبيكم بلباب تتعاركون

حسين : هلو عمو والله شوف هاي

ريم : هاي شنو ماعندي اسم

حسين : شوف الست ريم

ريم : اي هيج عفيه جر عدل

سجاد : شبيهه زيبك

حسين : هههه اي والله زيبك ولسان ويجي يوم اكسر راسها

ريم : لا بالله

سجاد : كافي واوكفي عدل شبيج تردين تضربي

ريم : عمو واكفه بلباب ويكولي ادخلي هو شعليه

سجاد : غير يخاف عليج

ريم : شعليه بيه وثاني شى اني اصلاً مااحجي وياه زعلانه منه شعنده جاي بفرعنه

حسين : هو صوجي اني جاي اراضيج هاج

ريم : شنو هذا مااريد

حسين : شفت عمو كالت مااريد

ريم : غير افهم شنو هذا

حسين : جبتلج محفظه الحديد مالتي الردتيها مال خارطه الوطن العربي واشتريتلج مساحتين ام الريحه فراوله ومسطره ام المي وطبقه لزكات ام الگلوب وجبتلج لعبه صيد السمج

وحطيتلج وياهن جيس شاميه

ريم : الملونه

حسين : اي الملونه وبما ان انتي مردتي العلاكه راح حقج

ريم : لا لا اريدها

سجاد : زين هاي الغراض كلها بس حتى تصالحها شمسوي بله الها

ريم : خلي يولي عمو مإجاني البارحه للمدرسه بلحله وعافني ارجع وحدي اني وغزل

حسين : والله جان عندي امتحان صار امتحانه بلدرس الخامس وطبك المدرس الدرس السادس وياه وتأخرت عليها واجيت ركض عليهاشفتها طالعه واجيت اكولها ليش تأخرت دكيت الباب مدت راسها من باب الهول شافتني جان تكولي روح لتجي مزاعلتك وتأشر بيدها يمعوده بس افهمج ابد وطبت وركعت باب الهول وراها حتى موصلت لباب الشارع وعافتني بره واجيت هسه اراضيها لكيتها واكفه بلباب بس كتلها ليش واكفه طبي استلمتني

سجاد : موعيب ريمو ابن عمج واكبر منج

ريم :اي اطول مني صاير يشبه شرشبيل

حسين : هااا هيج صارت خوش لعد راح اخبث مثل شرشبيل وانطي الغراض لنورس اختي

ريم : جان اتجر العلاكه من ايده

شحدك خلي تولي شكد مكروها ولا احبها تمشي حتى متسلم وبعدها شكدوتها وشايفه نفسها جنها بيبي نعال نفس النعال

جان يكفخها سجاد على راسها براحه ايده

سجاد : لسانج شويه

ريم : وين عمو الاقلام والدفتر

سجاد : هااج

اخذتهم يله روحو شكراً عمو

حسين : واني

ريم : انت بعدني زعلانه

حسين : اهوو ريم اني زعلت وما اجيج باجر

ريم : انت سويها ولتجي اله اسحل اختك بلساحه

سجاد : لج كبرتي مكافي تتعاركين واجه وجابلج غراض حتى تصالحي

ريم : تعال عمو اشاورك انت دير وجهك لتسمع

وجرت وجهه سجاد وشاورته

ريم : احسن عمو حتى بعد ميسويها وميخليني ارجع وحدي جذب اني مصالحته

سجاد : ااااخ منج

حسين : هاااا عمو شكالت

ريم : لتصير حشور وادخل نفسك يله روح واذا ما اجيت باجر انت تخسر

وطبت ريم وركعت الباب

حسين : شفت عمو

سجاد : لك شبيك يول صير رجال واصكرها

حسين : شصكر عمو اذا بس احجي وياها لو تعضني لو تكرصني موزين بطلت جلاليق

سجاد : لا قبضنا بابا انت كبرت وصرت رجال لازم تشد عليها وهم ترخي يعني تربيها بيدك وتصير رجال عليها

بس لا فاهي ومابيك خير حتى ويه الولد

حسين : والله عمو شحده اليحجي ويايه اموته كتل حتى بلبيت شريد يسولي اله ويه هاي الدعبل مااكدر أذيها موتتني

سجاد : اني وصيتك عليها كعد تشوف اودي سليل ورشا وكتلك ريم وغزل عليك

حسين : والله اوديهم بيدي وارجعهم بيدي بس البارحه تأخرت وشفت بعينك

سجاد : يله روح للبيت زيبك تره مزعلانه بس تبيع ثكل عليك انت هم توبها اذا كل زعله علاكه هلكبرها غراض خلال سنه الكاك بسوك هرج تبيع هدومك حتى بس تشتري شغلات تراضيها

حسين : هسه بس خلي ترضى

سجاد : والله وعاشت ايدها زين تسوي بيك اكوله ربيها وتوبها وهو يكول بس خلي ترضي

حسين : عمو هاي ريمتي مااحبها تزعل

سجاد : اروح اكمل شغلي وانت ابو ريمتك دير بالك عليها وعلى غزل مو بس ريمتك

حسين : صار

سليل : كعدت من الالم اريد احرك روحي مااكدر صحت ماما عفيه تعالي اجت تركض خطيه

نهر : اسم الله يوم شبيج

سليل : نار بيه والله نار

نهر : ميخالف ماما تحملي

سليل : زين هسه اريد ادخل حمام شلون

نهر : اني اشيلج

حاولت ماشاء الله مره مااكدر

زين تعالي اتجيج وامشيج على كيف

سليل : ااااخ فدوه مااكدر

نهر : شون ياربي دخيلك والله مصيبه وكعت على راسنا

تعالي ماما رشا ساعديني

رشا .. هااا ثلل كعدتي اووي وجهك خريطه العراق صاير

سليل : متسكتين كوميني ويه ماما اريد اروح حمام مو متت

كون كوموني بس الالم كمت اصرخ كل حركه احس عضمه اطك اعيط وابجي

نهر : ادخل وياج امي

سليل : لا ماما استحي

نهر : ولج غير امج

سليل : والله استحي

دخلت وحدي بس مدبرتها كمت ابجي

دكت الباب عمه

نهر : ماما سليل خلي ادخل بنتي

سليل : مسحت دموعي وكتلها تعالي عفيه

دخلت ويايه وساعدتني وغسلت اليه اول مره من مراهقتي احد يدخل ويايه حسيت بخجل من ماما بس هي بأبتسامتها هونت عليه وطلعتني وهم رشا لكيتها بلباب وكوه امشي

غزل : ماما ثلل لتبجين اني هم رجلي مثلج

سليل : صفنت عليها وحصرتني القهره يعني بدت تنتبه على رجلها اااخ يانار گلبي واني اشوف اختي تتأذه وتنقهر

تعال غزولتي الحلوه انتي رجلج احلى من رجلي

غزل : لا انتم كلكم رجلكم احلى بس اني تك وتك

ريم : اني هم ولج تك وتك نصير سيت جان ترفع دشداشتها تعالي شوفي عندي طكع

يعني اثنينا عوبات هههههههه

رشا .. فوكاها تضحك الرعنه

ريم : شسوي لعد ابقى الطم تعالي غزوله هاج شاميه لوني حلكج مثلي حتى نطلع بعد احلى

رشا .. ههههه والله انتي مو صاحيه

غزل : اريد اشوف سنبل

ريم : راح يطلع كريسو

أبي أبي

ماذا تريد ياولد

لما لا اعمل في الاطفاء

هذا عمل فيه عناء

ارجوك ابي

لا لا لا

هناك حريق

لطيف لطيف

غزل : لا اريد سنبل احبه مااحب هذا ابو النار

سليل : خلي تباوع سنبل خطيه

ريم : تعالي نكعد نباوع

سليل : اخذيني ماما للغرفه تعبت من الوكفه

رشا .. واني جتفي وكف

نهر : يله امشي على كيفج وصلوني للغرفه والالم يدك بصدري كوه كعدت

نهر : بله هاي شون هيج

رشا .. منا ليومين اذا ابقى اتجي سليل ثالث يوم اني اروح لشعبه الكسور يجبسون جتفي

سليل : دنجت مقهوره عوفوني اني احاول امشي

جان تجي رشا وحضنتني حيل

رشا .. اشاقه وياج ردتج تضحكين شعندي كم ثلل اشيلج على ظهري

باوعت هيج من فوك ليجوه

والله ياثلل اعذريني مو مال ظهري يطك هلمره عمه تفتح هاي الغرفه وتكتب عليها قسم المعاقين والكسور

سليل : هههههه امشي لج لتضحكيني

نهر : الله يحفظجن ويديم ضحكتكم

رشا .. بوجودج انتي عمتو الحلوه

سليل : تمددت من اثر المسكنات ومر اول يوم بتعب الي ولرشا ولعمه وداومو ثاني يوم البنات واني بقيت بلبيت وفوكاها عندي امتحان الشهر الاول متت قهر ساعه ١٠ كاعده بلغرفه هستوني كعدت سمعت صوت عمو يحجي ويه عمه

نهر : تعبانه خطيه

سجاد : وانتي شبيج

نهر : والله ياسجاد انت مو غريب اني من الخبز والخياطه ظهري مكسور وبالي كله يم سليل يوم واحد احط واحرك بيها انتهيت شلون باقي الايام وهي ياعيني عليها تموت قهر ومابيدها شى. والرحمن عليها كبرانه صايره مره وكوه احرك بيها

سجاد : وين تحركيها

نهر : يعني لازم احركها يمنه يسره ومرات تدخل حمام

سجاد : اني اشيلها

نهر : يوم دوم وبليل شون  انت مشايف حالها

سجاد : ابات هنا يمكم هلكم يوم اقلها بين مطيب رجلها الثانيه وتكدر تشمر ثكلها عليها

حضريلي فراش بلهول وابقى اذا هذا الشى ميضوجج

نهر : ياااا شبيك سجاد غير انت اخويه الصغير وذني بناتك والله تسوي فضل اقلها بس هلكم يوم بين متصير زينه

سجاد : هي وينها

نهر : نايمه جوه

سجاد : روحي شوفيها كاعده

نهر : روح انت بين مااسوي ريوك

سجاد : هااا لا انتي اخاف نايمه وماخذه راحتها بلنوم

نهر : يعني شلون

سجاد : اعرف لازم بلتفصيل احجي لان دماغج ثكيل ميستوعب بسرعه

نهر : هههههه حجه ابو دماغ خفيف والله مفتهمت قصدك

سجاد : يعني اخاف ملابسها مرفوعه طالع شى هسه وصلت

نهر : يااا اي والله صحيح والنبي مأجت بالي

سجاد : عادي هو شنو اليجي بالج

نهر : خوش لكيتلك حجه حتى تحجي عليه

سجاد : لا شعدنا غيرج

نهر : هااا شعجب

سجاد : مو شفت اكو عجين متغطي بروح ابوج فد جم كرصه حاره بلريوك

نهر : من عيوني بس اشوف سليل واشغل التنور واخبز كم وحده النا حتى نتريك بيهم

سجاد : هله بلبطله

نهر : صرت بطله قبل شويه جنت ام دماغ خفيف

سجاد : وتبقين هيج شنو التغير

نهر : ههههه اخ منك اروح اشوفها واجي

سليل : دخلت عمه شافتني كاعده يمه هله بوردتي

سليل : صباح الخير ماما

نهر : صباح العافيه حبيبتي شونج اليوم

سليل : متأذايه كولش

نهر : تحملي بداعتي هسه اريكج وانطيج العلاج اوديج للحمام

سليل : ياريت وهم اريد اغسل وجهي

نهر : خلي اصيح سجاد

سليل : لا ماما عيب

نهر : شكو بنتي بس يشيلج واني ادخل وياج

سليل : لا عفيه مااريد

نهر : ولج شجاج اول تالي تستحين منه البارحه شالج

سليل : اي بس مو يوميه

نهر : ميخالف امي لازم يساعدنا والله لو حيل بيه مااخلي بشر يلمسج بس شسوي ظهري كسرني وماكدرت اشيلج واحطج

سليل : حقج ماما مكافي الخبز والخياط الله يعينج صيحي لعمو عادي

دخل عمو للغرفه

اول مشافني كتله عفيه عمو مو تعيب على كفشتي

سجاد : هااا انتي سليل من الصوت عرفتج

سليل : شفت والله عرفت راح تعيب مااريد لتشيلني

نهر : ههههه سجاد على كيفك وياها لتضوجها

سجاد : هسه اني شگلت

سليل : ماما مشطيلي شعري

سجاد : لا اخاف تلزم شعرج وتصير شعرايه بلعجين تريد تخبز

سليل : لعد ابقى هيج مكفشه وتبقى تعيب عليه

سجاد : اتحمل شسوي اغمض عود

نهر : لا مامقبوله منك تغار لان احلى منك

سجاد : لو هي احلى مني اعتزل مااطلع الشارع بعد

سليل : دمعت عيوني هيج اني محلوه

نهر : يمه تخبلين روح سجاد اني اشيلها عمي اذا كل متدخل الها تضوجها عوفها

جان يكولي وخري خلي اشيلها

سليل : مااا مااريد

سجاد : مو بكيفج

تقرب مني وخرت وجهي منه زعلانه وشالنه وصلني للحمام عمه دخلت ويايه ومن طلعنا غسلت وراحت تكمل ريوك واني ساندني عمو واغسل بوجهي وتك ايد اغسل واشمر على وجهي جان ايمد ايده وخر شعري الزك بوجهي

بقيت مدنجه ومااحجي وياه جان يحجي بهدوء

ميحتاج تضوجين المفروض عندج ثقه بروحج وتكولين اني حلوه وغصب عنك واحلى منك هم

سليل : رفعت راسي وجهي كله مي وكتله

اي احلى منك انت محلو

سجاد : هذا هو محلو محلو المهم متضوجين

سليل : ابتسمت وهو جر الخاولي ومسح وجهي وشالني

سجاد : يابه شثكلج ولج شتاكلين حصو

سليل : والله ضعيفه عمو

سجاد : وهذا الثكل مال شنو وفوكاها طويله

سليل : بس انت اطول مني بهوايه

سجاد : اوديج للغرفه لو تبقين بلهول حتى تاكلين

سليل : مااريد بلغرفه اختنك

سجاد : يله اكعدي يمنا كعدني على الكرويته وهو بصفي مديت ايدي فتحت شعري وبديت احاول اضفرها بس مكعد اسيطر

سجاد : عوفي كطعتي هسه عمتج تجي وتمشطه الج

سليل :اضوج منه مفتوح يضوجني

سجاد : ميخالف دقايق وتكمل

سليل : شسويت عمو علمود الاجازه

سجاد : انطوني ١٠ ايام الج وراها نشوف شون المهم هسه ترتاحين

سليل : شكراً تعبناك

سجاد : مااحب هاي الكلمة

سليل : ماشي

شويه واجت عمه مسويه بيض وجبن عرب وخبز حار كعدو ياكلون بلكاع واني فوك يسون لفات واخذ من ايدهم واكل كملنا وجابت عمه طاسه مي وغسلت ايدي وحلكي واني كاعده حسيت روحي جاهل ويدارون بيه

سجاد : ارجعج لغرفتج

سليل : لا ابقى هنا اختنك

سجاد : محتاجه شى مني لو اروح للمحل

سليل : سلامتك كولشي ممحتاجه

سجاد : وانتي نهر

نهر : ردتك سالم رحمة الله والديك

سجاد : الظهر اجي

سليل : هله بيك

راح عمو وبقيت كاعده الكعده كسرتني وتعبتني بس مردت اضوج عمه وخاصه هي تشتغل هم تسوي غدا وهم كملت خبز للعالم خطيه اباوع عليها شلون متعوبه وشلون مكسور ظهرها علينا وكالت دقايق واجيج اودي الخبز واجي

نهر : طلعت اودي خبز للجيران وشفته يتمشى وبيده السبحه ومدنج من شافني فتح عيني وتقرب بسرعه مني وصرنا وجهه بوجهه

سامي : شلونج نهر

نهر : بخير من رخصتك ردت اوخر من الطريق بس هو ساده عليه

سامي : اشتاقيتلج كولش مشتاقيتي لحبيبج

نهر : والله الوحيد الي اشتاقيتله هو اخويه طه صديقك صديق عمرك الي خوش جازيته بمحنته

سامي : شوكت تسامحيني وتقبلين ترجعين اليه

نهر : ضحكت بأستهزاء ههههه انت من كل عقلك ارجع وثانياً عيب عليك تخون مرتك لو الخيانه كامت تمشي بدمك

سامي : صايره قاسيه وين نهر الطيبه الحنينه الي اذا بجى طفل كدامها تبجي على بجيته

نهر : ماتت وانت كتلتها بيدك لتسوي نفسك فقير ومسكين رحمة لكل موتاك من تشوفني لتوكف بدربي لان بعد دربنا مو واحد كلمن هسه عنده حياته لتضوجني خليني عايشه حياتي بخير وهدوء بعيد عنك وعن جرحك

سامي : تمنيت هاي المده تشتاقين تحنين ليش بسرعه نسيتي حبيبج

نهر : بله متوخر من يمي دفعته ومشيت شويه تحركت منه وانداريت وكتله

هااا سلملي على مرتك اخاف تحتاج شى اخيطه الها مثل ذيج المره من جابت جهاز ابنك تدلل واكيد وصلتلك سلامي

وعفته مصدوم ومشيت تقصدت اكول اله حتى يتوبها لتجيني لان سوت بيه خوفه مااريد اتصادم وياها بعد

اكيد راح يطيح حظها حيل تستاهل حتى متوصل ليمي

سليل :

باوعت صار الظهر وطبت رشا وصديقتها بيان استغربت جيه بيان

رشا .. شلونها اختي الحلوه وباستني

سليل : الحمدلله

بيان :  الْحٍمَدٍ للـّہ على سلامتج سليل رشا كالت على وكعتج واجيت اشوفج

سليل : الله يسلمج شكراً وبقت يمنا حدود النص ساعه وراحت

اكولج رشا شبيهه بيان شو تحوص تباوع هنا وهنا حسيتها ادور على شى

رشا .. هههه ادور على عمج

سليل : هاا ياعم

رشا .. جم عم عدنه ويزورنا هو بس عمو سجاد

سليل : وليش ادور عليه

رشا .. تحبه

سليل : شنو ولج ياحب وبعدها صغيره

رشا .. ياصغيره الي علمج اكو وحده ويانا اول البارحه زواجها

سليل : لزمتها من ايدها ولج بس لا انتي تفكرين بهيج سوالف

رشا .. اييييع لا عيني يازواج اني اريد اكمل دراستي بس هاي بيان ذابحه روحها على عمو من جنا بالاول متوسط تعالي باعي بس تصفن تكتب اسمه وگلوب

سليل : حيل ضجت منها متستحي مو عيب وينها وين هاي السوالف وشون انتي قابله عليها وبعدج صديقتها

رشا .. بيان حبابه وفقيره وشاطره نار الاولى مال الصف وهي ممسويه شى بس تحبه قابل مصادقته

سليل : لا هاي البقت والله خوش بعدها بلبيضه وتحب

رشا .. عيني راح تدخل علينا سنه ٢٠٠٠ تعرفين شنو ٢٠٠٠ يعني اطورنا وتقدمنا وكلها سنه ونصير بالاعداديه

سليل : الله يستر منجن

رشا .. لتخافين عليه اني ماافكر بهاي السوالف والله شاهد هي بس تحبه مكرعه راسي من وراه اجاكم راح اكل لبس بس مابيوم كالت احجيلي وياه او سوت شى حتى ينتبه عليها

سليل : هم عايزه تسوي حتى اطيح حظها

رشا .. ليش شعليج انتي قابل انتي حبيبته

سليل : جمدت من كلامها وفتحت عيوني بقيت شويه ساكته مصدومه اريد استوعب كلامها وجان اعيط عليها

شنو حبيبته مو عيب نسيتي هو عمنا

رشا .. لا مو عمنا ولا يقرب النا بأي شى خلف الله عليه شايل همنا لخاطر بابا

سليل :كلام رشا مثل الصواعق تنزل على راسي

شنو مو عمنا

رشا .. اي مو عمنا ومتأكده انتي تدرين بيه مو عمنا

سليل : وانتي شمدريج

رشا .. قبل كم سنه من تعاركت ماما ويه بيبي علمود عمه وعلمود عمو سجاد وسمعتها تكول انت منو وتدخل

وبقت ترن بأذني ورحت لبيبي توسلت بيها مقبلت تحجي لحد مابقيت احلف بيهاحتى ايدها بستها وحجتلي

سليل : شكالت

رشا .. كالت بابا مو ابن انعام من مره ثانيه ماتت وهي تولده وربته انعام ومن كبر ومات جدو حسين طردته لبابا وعمو سجاد ابن اخوها لأنعام بس ميقرب البابا شى

بس مثل صديقه ويحبه وهو من محبته لبابا والنا يساعدنا وعده ميتركنه يعني مثل الصديق مو عم

سليل : وليش مجيتي وكتيلي ليش ساكته كل هاي الفتره

رشا .. والله بلبدايه انصدمت بس من شفت شكد يخاف علينا ويدارينا حتى اكثر من عمج علي الطلي كلت والله هو يسوه الف عم

سليل : صارت رجفه عندي وخوفه ومدري شون طلعت من لساني وكتلها عندج مشاعر تجاهه

رشا .. شون يعني

سليل : يعني مثل بيان

رشا .. لا لا فهمتي غلط اني اعتبره عمي والله مرات اشوفه ابويه من كثر ما حنين وطيب ومايوم ردت شى وكال ماعندي او مااكدر هو بس وياج شاد ويحاسبج بس احنا لا صح اذا انسوي غلط يعيط ويرزلنا بس مو مثلج

سليل : بقيت ساكته وصافنه عليها ومااعرف احجي

رشا .. شبيج صفنتي ممصدكه كلامي

سليل : لا بس انقهرت لان مكتيلي

رشا .. وانتي هم تدرين ومكلتي

سليل : كلت من تكبرون اكثر اكول خفت لتخافون منه اذا تعرفون هو مو كرايب بابا

رشا .. وليش نخاف فوك زينيته هلمره نخاف منه بلعكس اني كولش احبه واذا ميجي اضوج ومن اشوفه يداهرج اموت ضحك

سليل : تنفست براحه وتذكرت صدك ليش تخاف قابل رشا او خواتي تعرضلو للتحرش مثلي حتى يخافون  الْحٍمَدٍ للـّہ مامتعرضين مثلي واكيد ثقتهم بعمو سجاد جبيره حتى لو اكتشفو هو مو قريب بابا

رشا .. هسه شگلتي نكوله اني وياج على بيان

سليل : لا عيب شعلينا

رشا .. ليش يجي يوم ويتزوج وماكو احسن منها اقلها صديقتي وتحبه

سليل : عيب هاي السوالف رشا بعدكم صغار شنو حب شنو زواج وهي شافت منه حتى تحبه

رشا .. هو هذا المخبل البنات لان مينطي عين الهن وهم عمو حلو وطويل وشخصيته حاده يتعارك ويه ذبان وجهه ودوم مرتب وهوايه بنات يحبن هيج واحد وهو هم مو صغير عمره ٢٨ سنه يعني يكدر يتزوج واكيد الي يحبها يدللها

سليل : كافي سدي الموضوع ولتحجي كدام احد

رشا .. ماشي اروح ابدل وجوعانه

سليل : روحي راحت للغرفه وبقيت افكر بكلامها شنو الخنكني من بيان حقها بنيه مراهقه والي تريده تحبه

وره ساعه اجه جنت بس افكر بكل كلمة من رشا واصفن بوجهه

سجاد : هااا خير شو بس صافنه

سليل : لا ماكو شى

سجاد : اشيلج اوديج للغرفه

سليل : ياريت اذا متتعب

سجاد :ماكو تعب

شالني وداني للغرفه صفنت بعيونه مكنت متقصده بس ردت اشوف شافت بيان بيه وحبته هو ارتبك من صفنتي

سجاد : شكو وضعج معاجبني

سليل : مابيه ودنجت دخلني للغرفه ورشا كاعده تعدل بجنطتها فتحت عيونها من شافته شالني متدري بالاتفاق بأن يبقى

كعدي على الجربايه وغطاني

سجاد : ارتاحي واني بره اذا ردتي شى دزي هاي الخبله الصافنه ومسلمت

رشا .. هاااا عليه

سجاد : لا على خيالج

رشا .. هلو عموو شلونك

سجاد : مثل لونج بعد وكت

رشا .. هههه والله جفلت من دخلت لهذا نسيت

سجاد : كملي وامشي تغدي

رشا .. اي جايه

بس طلع اجت كمزت يمي

رشا .. سلول

سليل : هاي شو جديده

رشا .. تدرين عمو من شايلج شكلكم حلو

سليل : شنو يعني

رشا .. هااا لا ماكو شى

سليل : احجي

رشا .. اخاف ترزليني

سليل : احجي كتلج

رشا .. انتي ليش متحبين عمو

سليل : اي احبه ليش مااحبه

رشا .. لا قصدي مثل بيان

سليل :هاااا

رشا .. اكوم لا اترزل وعافتني وطفرت مثل الواحد الضربني على راسي وكال شوفي شنو كدامج مجرد تخيلت فكرة اني احبها مكدرت هو عمي شون احبه لحظه وضربت وجهي بيدي اصحي ولج هذا عمج مثل ابوج شون احبه

بيومها منمت هم من الالم وهم من التفكير ورشا مدخلت للغرفه بعد حتى لتترزل لليل يله دخلت ابتسمت وباستني ونامت

اني هم من المسكن نمت بس كعدت نص الليل اريد اروح حمام صحت على رشا حتى تكعد

رشا .. ها عيني بيج شى

سليل : صيحيلي عمه اريد ادخل للحمام حبابه

رشا .. اي كمت افرك بعيوني طلعت بلهول حس عليه عمو

سجاد : خير شكعدج

رشا .. سليل تريد عمه حتى تروح للحمام

سجاد : اني اشيلها وانتي تعالي ساعديها تدخل جوه

خطيه نهر قبل شويه يله طبت تنام كملت كومه خياط

رشا .. اي صح تعال عمو شيلها

سليل : طب عمو اني دنجت مستحيه

متت بدمي هسه شيكول كل شويه حمام بس والله من وره الابر والعلاجات شسوي

شالني وهاي رشا حاصرتها الضحكه الرعنه ااخ لو بصحتي اله اكطعها

لدخلين اني وحدي

رشا .. خوش لعد اروح انام

وركض للغرفه عافتني الثوله تكول معودت تعوفني

كوه كدرت ادخل واغسل وكملت وطلعت فتحت الباب ردت اوكع جان يلزمني حيل

سجاد : تأذيتي

سليل : لا وحصرتني الدمعه من المستحه

سجاد : اكو شى يأذيج

سليل : عمو عفيه بعد لتشيلني

سجاد : ليش

سليل : استحي

سجاد : لتستحين وهذا وضع طارئ مو بيدج

يله تعالي

شالني وطلعني بأتجاه الطرمه وين

سجاد : ادري بيج مراح تنامين هسه وتحبين الجو بهيج شهر وخاصه بيه بروده ومطرات خفيفه

سليل : ابتسمت وبقيت محاوطه ايدي رگبته

كعدني على الصبه القديمه وكعد بصفي

رفعت راسي للسما جان الوكت ساعه ٢ بليل والجو يخبل جان اسمع صوت الشخاطه وشون يورثها للجكاره بدون ماانزل راسي

سحب نفس قوي وكال

سجاد : شبيج وضعج اليوم مو تمام ولتكولين بسبب الالم البيج

سليل : ليش دوم احسك تحب تعرف شحس

سجاد : انتي كتاب مفتوح بلنسبه اليه ومن اشوف ورقه مكتوب بيه لغز مااعبر الورقه اله احل اللغز شبيج اليوم احجي اسمعج

سليل : كتله اذا حبتك وحده تتزوجها

اندار عليه مستغرب كلامي بس يحجي بكل هدوء

سجاد : ومنو هاي

سليل : وحده بصف رشا

سجاد : بيان

سليل : شنو تعرف

سجاد : هاي شبيج من كل عقلج مااعرف هاي تصرفات المراهقات خلص گلبي منها

سليل : خطيه تحبك

سجاد : مشكلتها مو مشكلتي

سليل : ليش متحبها

سجاد : اني مااحب احد ولا اريد احب وعوفي هاي الافكار تشوش عقلج وتأذيج

سليل : بقيت صافنه بوجهه اتمعن بكل كلمة يكولها

واحنا كاعدين بدت تمطر خفيف

شمر الجكاره ودنج يريد يشيلني حتى ندخل تقرب مني ديشيلني تلاكت عيوني وياه لأول مره واني اتخيل هو مو عمو حسيت عيوني تريد تشبع منه شبيه شنو الديصير بيه ليش بساعات بسيطه كمت مااشوفه عم

هو دار عيونه وكأنه يقراني

وشالني الليل وهدوئه وانفاسه الي احسهم واسمعهم وعطره الي دخل برئتي بدون استأذان خلتني اغمض واخلي راسي على جتفه يجوز محتاجه حنان يجوز عواطف مراهقه بس الي متإكده منه من هذا اليوم انتهى بداخلي عمو سجاد

وبدت اول نبضه ادك بگلبي لسجاد

يتبع ..

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_السابع_والثلاثون

#مدونة_نور_قلبي

تمنيتك محب وبشدة أﻷحزان

تصير انت ابتسامة فرح وتمرني

وتمنيتك سﻻم وجاي من بعيد

بس من شخص غالي وبيه يذكرني

وتمنيتك صديق والصداقه اشكال

بس كونك صديق بنظره تفهمني

وتمنيتك هوى وماشمه اي انسان

وتمنيتك نفس من الدنيا تخنكني

وتمنيتك محب ولو ضاك بيه الكون

اجيلك اشتكيلك همي وتظمني

وتمنيتك وفي وتحبني حد الموت

ومثل ماگلبي حبك ردتك اتحبني...

سليل : دخلنا للبيت شايلني واني مغمضه بس عقلي يفگر وگلبي ينبض بهدوء دك الباب مال الغرفه

فتحت عيني هاا ليش ادك الباب

سجاد : اخاف اختج ماخذه راحتها بلنوم اذا هي طفرت وعافتج

سليل : رشا نومها ثكيل

سجاد : واني مااكدر ادخلج للغرفه لازم تفتح الباب هي

سليل : زين خلي امد راسي افتح الباب

سجاد : ماشي

فتحت الباب بس مديت راسي لكيتها متلفلفه بلبطانيه

عمو راسها من رجلها ممبين لافه البطانيه عليها

سجاد : خوش

دفع الباب على كيفه برجله ودخلني بهدوء وحطني على الجربايه

سليل : شكراً شلعت گلبك

سجاد : ثكيله كسرتي ظهري

سليل : صدك عمو وعيوني بسرعه تريد ادمع جان يدنج عليه وقريب وجهه من وجهي وكال بنبره هدوء

سجاد : تعلمي لا كلشي تصدكين وميزي بين الشقه والصدك

سليل : اذا انت شقاك من صدكك مينعرف حتى ضحك متضحك من تتشاقه تكول بفلوس وتخاف تدفع لهذا متضحك

سجاد : نامي بين عليج النعس

سليل : تكدر تغطيني

سجاد : ماشي ست سليل

سليل : جر الغطوه من رجلي وغطاني ديطلع كتله

تصبح على خير عمو الوحش وابتسمت

سجاد : وانتي من اهل الخير ام دميعه

طلع وسد الباب وراه جريت نفس هادئ وبقيت اباوع على السكف وافكر ليش هيج اجاني احساس معقوله انسى هو عمي وافكر بيه كحب لا مستحيل اخاف تأثرت بكلام رشا ااخ منها بس اللغوه كل شويه كالت بيان وبيان وتزن براسي

بقيت الليل افكر لحد متعبت من التفكير ومحسيت غير على ايد تلعب بشعري وبوسه على كصتي من عمه

نهر : صباح العافيه بنتي

سليل : فتحت عيوني صباح النور ماما

نهر : صار موعد اكلج لان وراج دوا واذا تردين وره الدوا نامي بس هسه لازم تكعدين

سليل : ساعه بيش

نهر : عشره ونص

سليل : البنات بلمدرسه

نهر : اي كلهم

سليل : وعمو

نهر : بره ينتظر تكعدين حتى يشيلج وهم اغسلج ويرجعج وراها يروح للمحل كال عندي شغل مستعجل وسياره صاحبها كم ساعه يجي ياخذها لازم يروح يصلحها

سليل : خلي يجي

دخل وسلم وتقرب مني وشالني

دنجت مباوعت بوجهه جنت مستحيه لان يوديني للحمام وعمه تدخل ويايه وراها طلبت من عمه تغسلي شعري ونص جسمي بعيد عن الجبس الي برجلي

طلعت جابت علاكه وغطت رجلي وكعدتني على كرسي وجابت الطشت وكاسرت بيه المي وكعدت على كيفها تغسل شعري وجهي وجسمي كل متلمس مكان يأذيني كله مورم

انشلع گلبها يله كملت وطلعت جابت ملابس من الغرفه ولبستني على كيفها

وغطت شعري لا استبرد وكفتني وصاحت سجاد

يله فدوة تعال شيلها

تقرب مني بهدوء وشعري لان طويل طلع من الخاولي صار على ايده وينكط مي حسيت نكعته وشايلني ولا يباوع بوجهي

عمو شو مكلت بلعافيه

سجاد : بلعافيه اهم شى طلعتي نظيفه ذبيتي الوصخ كله

سليل : ليش اني وصخه

سجاد : شمدريني اسألي نفسج

سليل : ماما اني وصخه

جان يكعدني على الكرويته

نهر : هههه يمه بنتي تنكط ورد انت شوف ايدك سوده من الدهن

سجاد : اي مو العب كره الطائره فأيدي تسود غير من المحركات والشغل والدهن

سليل : المهم ايدي احلى من ايدك وحطيت ايدي على ايده مجنت متقصده بس جنت اريد اشوف ياهو الاحلى الايد ونضحك مباشره سحبها

باوعت عليه ودنجت شبيه اليوم مو طبيعي ويايه سكتت وبعد مباوعت بوجهه

سجاد : رايح محتاجين شى

نهر : لا سلامتك

سجاد : وانتي

سليل : مباوعت عليه كتله لا شكراً

طلع وسد الباب وكعدت عمه تمشطلي بس اني مخنوكه مدري شبيه

نهر : ماماتي سليل شبيج امي

سليل : مابيه ليش

نهر : عيونج تعبانه ضجتي من شى

سليل : ابتسمت حتى لتحس لا مابيه سلامتج

كملت ضفر شعري الي انتبهت عليه عمه صايره متذب الحجاب كدام عمو

اكولج ماما ليش صايره متذبين الربطه كدام عمو

نهر : لان التزمت بيها حبيبتي يعني مو بس علمود غزل وماطول التزمت وعن قناعه ميصير اطلع شعري كدام سجاد حرام

سليل : هااا يعني اذا التزم لازم مااطلع شعري حتى كدام عمو

نهر : اي

سليل : الله كريم عود من التزم اسوي مثلج هسه اني لابستها لخاطر غزوله حتى لتضوج

نهر : الله كريم ماما اهم شى القناعه

يله اكوم اكمل الغدا

مرت الساعات واجوي البنات وكالمعتاد هوستهم وخاصه ريم تكلب البيت من اطب

واتغدينا واجه العصر عمو جنت على كعدتي مغيرتها صار ساعات تكسرت بس مكلت لعمه خطيه اخاف تتأذه وتشيلني اول مدخل كال

سجاد : هاي لهسه على كعدتج

سليل : اي شسوي انتظرك

سجاد : مو رحت للشقه بدلت وسبحت شيخلصني لو جاي بملابس الشغل جان كلتي وصخ وريحتك دهن

سليل : لا ما اكول

سجاد : متأكده

سليل : اي

تعالي وين اوديج هسه

سليل : اريد اصعد السطح صار شكد مصاعده

سجاد : هلمرن دًرٌجّ خلف الله عليج راح ظهرك يسجاد بس خلي احجز اسعاف

سليل : هاي شبيك عمو مااريد هي جم بايه هو طابق واحد قابل اثنين

سجاد : يله امشي

دنجت وشالني بديت احب هذا الشى استمتع من يشيلني وصعدنا للسطح ومن وصلنا نزلني على كيف اكو جربايه حديد قديمه موجوده بلسطح كعدني عليها ويجر النفس

جان اضحك هههههه

سجاد : اضحكي شعندج مرتاحه واني اشيل

سليل : اي والله اني المستفاده

سجاد : خلي اخذ نفس وبدا يفتر بلسطح ويباوع اخاف احد من الجيران طالع او بيتنا يشرف على بيت بيه ولد

اخذله رحله استكشافيه للسطح

واني مبتسمه بهدوء

كعد بصفي وسحب الباكيت ورث جكاره وينفخ هواها بعيد عني

سليل : رفعت راسي جان وقت غروب الجو بارد نهايه العاشر باجر ندخل شهر ١١ والجو تغير الشتا بينت ملامحه

كتله عمو بعد شهرين ندخل سنه ٢٠٠٠ وناس تكول راح تقوم القيامه وناس تكول راح توكع الشمس على الارض وناس تكول راح يصير غزو فضائي واشكال الحجي انت شتتمنى بهاي السنه المميزه اخاف نموت بيها اقلها اعرف شجنت تتمنى بيها

سجاد : مااتمنى شى

سليل : زين متتمنى تحب

سجاد : لا

سليل : تتزوج ويصير عندك اطفال

سجاد : لا

سليل : زين على الاقل جان يقاطعنس

سجاد :تلاحظين هاي المواضيع صايره هوايه تفتحيها وتفكرين بيها

سليل : شبيك ضجت

سجاد : عمرج ما مسموح تسولفين بهيج شغلات

سليل : هم كال عمرج والله كرهتني بعمري كثر مااحجي شى وكلت صغيره طفله وعمرج

بعد كم شهر واصير ١٧ سنه يعني جبيره

سجاد : ياجبيره اهتمي بدراستج هي احسن واضمن الج من هاي السوالف المكسره

سليل : هو شردت اني بس اعرف شتتمنى

سجاد : اتمنى تسكتين وهذا الموضوع متفتحي ابد

سليل : سكتت ورجعت رفعت راسي اباوع على الغيوم شون تتحرك والهوا بارد بقينا ساكتين بحدود ٥ دقايق لحد مسمعت صوت نفس الجكاره ويكول

وانت شتتمنين

سليل : جريت نفس بتنهيده واحجي بصوت ناصي ومن گلبي

اتمنى يطلع بابا واشوفه ويرجع لحياتنا

سجاد : ان شاء الله يطلع

سليل : حيل مشتاقه اله صار سنين مشايفته تمنيت اشوفه دومك متقبل

سجاد : هو هم ميقبل

سليل : هم يجي يوم واشوفه

سجاد : مو بعيده على رب العالمين

سليل : ونًعــٌٓمُٓ باإٱللـِْﷻـِْﮭﮧ

سجاد : وبعد شتتمنين اكيد اكو امنيه بداخلج مميزه

سليل : اتمنى ماانجرح

سجاد : باوع عليه بحيره وكال شون يعني

سليل : اتمنى اسمع كلامك وماانجرح

سجاد : ياكلام

سليل : يوم مكتلي لتحبين حتى لتنجرحين

جان يلزم ايدي حيل شنو قصدج يعني حبيتي

سليل : خفت منه بسرعه انگلب وجهه وايده الثانيه الجكاره احسه يريد يطفيها بوجهي من الاعصاب اني هم بسرعه توترت وكتله لا لا والله فهمتني غلط

جان يعت ايدي قوي وهي مجروحه تأذيت

اسمعي زين هواي مواضيع المواهقات تشيليها من راسج تماماً واياج اسمع هيج شى حتى من عقلج تنشال دراستج وبس افتهمتي

سليل : اي اي والله افتهمت حسيت بألم فضيع برجلي لان من عت ايدي رجلي انعتت وايدي مجرحه اصلاً صحت ااخ بصوت عالي هدني بسرعه وكف كبالي

سجاد : شبيج

سليل : دنجت مقهوره منه وكتله نزلني عمو

سجاد : كتلج شبيج

سليل : مابيه نزلني عفيه

سجاد : ماانزلج اله افهم شبيج

سليل : جان اتحرك اريد انزل وردت اوكع جان يلزمني حيل كولش تأذيت بس مبينت اله

سجاد : على كيفج راح انزلج اوكفي

سليل : دنج شالني حتى محطيت ايدي وره رگبته من القهر ليش هيج عصبي دوم بس نحجي حجايه نبتلي

نزلني ودخلني للغرفه وجانت رشا تقرا وعافني على الجربايه حتى مباوعت بوجهه وهو هم وطلع

رشا .. هاا تعاركت الديوجه

سليل : شنو

رشا .. انتي وعمو مثل الديوجه بس تتعاركون

سليل : بله متسكتين

رشا .. ههههه مبين هلمره رزاله ناشفه

سليل : رشا مو وكتج والله مختنكه

رشا .. اليوم عمو مجابني من المدرسه يمكن ميخاف عليه بس عليج

سليل : رشا وتالي وياج اكيد مأجه لان يعرف بيان وياج

رشا .. يجوز

سليل : شنو قصدج

رشا .. مالي قصد كلت يجوز نشوف باجر والله كريم

سليل : اكعدي اقري ام البكلوريا وعوفي هاي السوالف

رشا .. صار ست سليل

سليل : بقيت افكر صدك هو ليش مراح لرشا للمدرسه كمت افكر هلمره هاي كل شويه ذابتلي حجايه وتخليني افكر بيها واحللها

اشتعلتي يارشا ام البلاوي

مرت ٥ ايام اي كلام بينا ماكو غير يشيلني اذا حبيت اروح لمكان ولا اباوع بوجهه ولا هو شكد ردت هو يحاجيني لان اني مغلطانه هو تخبل من وحده ابد قافل

لحد سادس يوم

كاعدين واندكت الباب وهو فتحها وطبت ماما شافتني واجت تركض يمه بنتي وتريد تبجي

سندس : سوده عليه هسه يله دريت

سجاد : واذا دريتي يعني شراح تقدمين وتأخرين

سندس : بله رجاءاً اكرمنا بسكوتك مجايه عليك

بقت تحضن بيه وتبوس واني اي ردت فعل ماعندي حتى محضنتها

طلعت عمه نهر من غرفتها شافتها

نهر : شلونج سندس

سندس : هله بله ليش منتبهتي على سليل هاي خوش عينج عليهن ومداريتهن زين ماماتت

نهر : قدر ويريد يصير

سندس : وانتي شبيج ثوله منتبهتي عليها

نهر : نفخت بضوجه كتلج قدر والحمدلله عدت على خير

سجاد : مبين صار فتره ممترزله واجيتي هنا حتى تاكلين اهانات وترحين

سندس : ليش عيني منو يكدر يهيني حتى ادوسه بقندرتي

جان يتقدم عمو يريد يضربها وكفت عمه نهر ولزمته

فدوه سجاد عوفها هي دقايق وتروح

سندس : خوش والله هلمره تعدين عليه الوكت شكد ابقى

سليل : ميحتاج دقايق اذا جايه عليه اني راح ادخل انام تكدرين ترحين واذا على خواتي راحن لبيت صديقه رشا شويه ويجون كلهم

فدوه عمو تعال شيلني

سندس : ولج هيج صارت فوك ما جيتج

نهر : انتي منو كلج على وكعتها

سندس : رحت اليوم للمدرسه عليهن حتى ليكولون ماعدها ام وسألت وكالو مجازه

سليل : هنا روحي شاغت وعطت لترحين للمدرسه ولا توصلين يدرون امي نهر لتخلين البنات يعرفن انتي امي

سندس : وليش عيني شبيه

سليل : مابيج بس مااريد يعرفون امي متزوجه وشامرتنا وكل سنه مره تفكر تشوف بناتها

سندس : يعني فوك زينيتي

سجاد : هذا واجبج الي انتي تخليتي عنه لتجين هسه تسوين دور الام الحنون

سندس : جان تكوم وتوكف اسمعوني زين لتشوفون ساكته الكم ولسوالفكم تره اذا لهسه بالعه تجاوزكم لخاطر بناتي وخاصه الصغار ريم وغزل واله وروح امي وابويه اوديكم وره الشمس واخليكم تحلمون تشوفون النهار بعمركم كله

سليل : مباشره كلت لعمو تعال عمو دخلني تعبت

سندس : بعدني ممكمله كلامي وياج

سليل : اجيتي وشفتيني شكراً

سندس : مريضة ما احاجيج بس احسبي احسابج بعد كم يوم جايه اخذج واخذ خواتج عندي بلبيت تبقون يوم يمي

سليل : شكراً خلي هذا اليوم الج

سندس : ماشي لترحين اخذ خواتج

سجاد : ميتحركن البنات من مكانهن

سندس : نشوف اني لو انت

اخذت جنطتها وطلعت وكمت ابجي

اجت عمه تحضني كافي يمه شبيج بجيتي

سليل : هاي من كل عقلها تجي وره اشهر حتى تشوفنا وتريد تاخذنا يوم يمها يعني شتريد مثلاً نشوف العر الي هي بيه لو شون عايشه

نهر : والله اني من كالت اخذكم ردت اجلط

عبالي دوم

سجاد : ولا اخليها تاخذهم مو هو بكيفها

كافي لتبجين

سليل : دخلني عمو للغرفه تعبت

دخلت وجنت حيل مقهوره شتريد من عدنا مكافي عافتنا وتسأل علينا بس بوكت فراغها

شالني وكعدني على الجربايه وكعد بصفي جنت اريد اشهك بس خفت ليعيط بيه جان يمد ايده ومسح دمعتي

سجاد : تدرين من كثر ما تبجين كمت استغرب اذا اليوم يفوت متبجين بيه

سليل : مو كدامك ياعمو شسوت

سجاد : واذا قابل جديده سندس عليج على شنو باجيه ومقهوره وتردين تناشغين من البجي

سليل : بس تجي كولش انقهر وانمرد باوع على وجهي وكال

سجاد : تدرين شتمنى بسنه ٢٠٠٠

سليل : فتحت عيوني مستغربه ودكات گلبي علا صوتها

شتتمنى

سجاد : اتمنى مااشوف دموع بعيونج ابد

سليل : ابتسمت ودنجت وكتله ابد

سجاد : ابد وياريت تتحقق امنيتي

سليل : واذا متحققت

سجاد : اشبعج كتل اقلها انتي باجيه باجيه ابجي على سبب مقنع

سليل : هههههههه

سجاد : اضحكي ضحكتج احلى من دموعج

سليل : رفعت عيني بعينه الي دوم احير بيهم وجان تدخل الهوسه

ريم : اني اجيت

سجاد : لا هله اجت زيبك

ريم : هلوو عمو جبتلك كيكه تخبل

سجاد : منين

ريم : صديقه رشا عيد ميلادها وانطتني كيكه ثانيه ضميتها الك

سليل : واني

ريم : هم الج

سجاد : شطلعت هاي اختاري واحد من عدنا

لازمه الماعون واكفه راحت ركضت للمطبخ ورجعت قاسمه الكيكه بنص

هاكم

سليل : ههههه حلتها

سجاد : وحسون

ريم : خلي يولي زعلانه منه

سليل :اهووو ليش

ريم : اليوم اجه للدوام وصل نورس ويانه

سجاد : ليش هي مترجع وياكم

ريم : لا عيني مو عمو طلي مسويلها خط سيارت توديها وتجيبها واليوم مأجتها وتعيب وتعوج حلكها

سليل : لشوكت تعدلين لسانج ومتغلطين

سجاد : ميتعدل اله اكصه

ريم : لزمت لسانها وكالت يمه شعندي غيره هو ورجلي

سليل : والباقي وين بلشط

ريم : لساني احجي بيه ورجلي اضرب بيها

سليل : وهسه بعد كم زعلانين غير اخته

ريم : اموت منها ولا احبها ومتسلم جنها زيتونه مرت باباي

سليل : هههههه ولج عيب

سجاد : شوكت تبطلين تعيبين

ريم : من يبيض الديج

وركضت لبره

سجاد : كام وكف وكال اني اليوم راجع للشقه

مباشره كتله ليش حسيت روحي تعودت حيل على وجوده

سجاد : عندي طلعه من الصبح لديالى راح ابقى يومين شغل وارجع وصيت نهر تخلي بالها عليج

سليل : ومنو يشيلني

سجاد : انتي سباعيه راح تكدرين ويه نهر ورشا تتحركين

سليل : ضجت وكتله تروح وترجع بلسلامه

تحرك خطوه ورجع كال

سجاد : اياج ترحين لبيت سندس متوصلين ابد لا انتي ولا خواتج

سليل : ماشي مااوصل

وخله وطلع تغطيت وحاولت ارتاح مرت كم ساعه وبديت احس بفراغ رغم هاي الايام مااحجي وياه بس اقلها احس بوجوده

ليش كمت ادور عليه وحاسه ناقصني شى

حتى اكل كوه اكل

واجت ماما وحاولت تاخذنا والحلو ولا وحده قبلت تروح حتى ريم اما غزل اصلاً تخاف منها ومن تجي متسلم عليها روحها بيه وبعمه تعتبر ماما سندس غريبه عليها

وراحت زعلانه وضايجه

تعلمنا على وضعها تجي تعيط وتصيح وتزعل وتروح تاخذلها كم شهر وتتذكر تجينا اما حسام حتى كام ميوصل من كثر مننقهر منه لان ميذكرنا تعلمنا على عدم وجوده بحياتنا

اجه من ديالى اول مدخل احس روحي طارت ويه فتحت الباب اله ليش هذا وضعي وياه ليش كمت ادور عليه دواره عيوني تراقب كل حركه كل همسه حتى من يشرب الجكاره اصفن عليه اما هو حتى ميباوع

وبقت الايام بينا ابرد من الشتا بس اني احس اكو شمعه بگلبي كعد تشتعل شويه شويه

فكيت رجلي وبديت امشي على عكازه صار اكثر من شهر ونص وهو يساعدني حتى تكفل بدراستي ويوصلني بلعربانه للصف ويدخلني اخذ الاذن من المديره بعد مادفع تبرعات للمدرسه وهي بس شافت تبرعات كامت شيكول تكول عيني عادي تدلل يموتن على الفلوس ومن ندخل للصف واشوف نظرات الطالبات واكو كم وحده خفيفه يتمضحكن ويكمزن سوالف مال زعاطيط حتى يجذبن انتباهه وهو حتى عيونه ميرفعها دوم يااما مركز ويايه لو يباوع ليكدام وهذا الشى الكبره بعيوني اكثر قبل اشوفه عادي هسه ابسط حركة منه تاخذ عقلي وافكر بيها قربه مني كام يوترني مرات اكول ارجعي مثل قبل ولج هذا عمج بس اعتقد فات الاوان وبديت انسى حتى هو عمي اللسان يكول عمو سجاد بس الگلب ينطق ويكول سجاد

وشويه شويه تحسنت حالتي بمساعدته كمت اليوم الميجي اضوج ليش هذا التغيير السريع بمشاعري خلال شهرين تغير كولشي

كمت حتى اغار عليه من بيان ومن تمشي كدامنا وهو يدفع بيه بلعربانه اكول اله عمو بطئ على كيفك ادوخ وهو جذب حتى يبتعدون مسافه بينا بس ذيج مبين منتبهه على كل حركة منه بحيث بس يبطئ هي هم تبطئ

ويوم بعد يوم اتعلق اكثر بس اكون حذره من حركاتي مرات عيوني تخوني وتصفن عليه ومن احس ابتعد عني ارجع اتعامل بهدوء وثكل

مرات افكر اذا عرفت عمه او عرف هو شلون اكيد راح اسقط من نظرهم

بس اكول اني ممسويه شى ولازم انتبه على تصرفاتي

اجت راس السنه ودخلنا سنه ٢٠٠٠ سنه ورقم مخيف اشكال الحجي عليه اكثر شى جان متوقع تقوم القيامه بليلتها ناس انقسمت نصين نص يصلي ويقرا قران والنص الثاني يحتفل

تمنيت هاي الليله موجود بس هو جان معزوم يم اصدقاء والله من كال معزوم تخيلت اشكال البنات موجودات اختنكت بس مابيدي غير السكوت والتعامل بهدوء حتى مااجذب النظر

وطبيت السنه الجديده

وصار شى غريب گلبها لحياتي كلها

حجي طه : اول يوم دخلت للتوقيف جنت بحاله من صدمه شلون كتلت اخويه وشويه واتذكر دموع بنتي واكول حيل بيه ولو عايش ارجع اكتله الف مره وميبرد گلبي منه

رحت سلمت نفسي للشرطه امشي بخطوات تعبانه بلحظات حسيت ظهري انكسر وانتهت حياتي

سلمت نفسي حتى اجنب بناتي وعائلتي يشوفوني مسحول كدامهم لان اكيد راح يعرفون اني وحتى لو انهزمت وين اروح منو اليه والى متى وشنو ذنب بناتي ومرتي يدخلون مراكز بسببي وخاصه سليل وضعها راح مباشره يعرفون وراها شى ويستجوبوها

مكافي الرعب العايشته ونفسها وروحها المكسوره هلمره اكملها اني وادخلها مراكز وتحقيق

اختصرت هذا الطريق الطويل ورحت برجلي وسلمت نفسي

ايام يحققون ويايه واني ماعندي غير اي اني كتله ومن وره فلوس

جنت اشوف نظره الضباط اليه والاحتقار من عدهم كامو حتى يضربوني كل ميحققون ويايه رغم احجي اكول الي يردوه بس هم يضربوني

ايام التحقيق متعبه ومؤذيه انهانيت وانداس على كرامتي بس كل مااتذكر دموع سليل وقهرتها وشون اخذتلها حقها يهون كولشي لعيونها

واجه يوم الحكم وانحكمت اعدام جنت متأكد اعدام قابل يطلعوني معترف على نفسي وبرجلي رايح اكيد اعدام سلمت امري لله ماانسى هلهوله انعام بلمحكمه من كالو اعدام بقت ايام ترن بأذني شلون فرحانه ومتشمته لان راح يعدموني

ماانكر ماخفت اكيد خفت الموت اله هيبته والروح عزيزه بس كل مااختنك واتذكر سليل اكول الروح ترخص الها بس الحاز بنفسي بناتي الباقيات شلون راح يعيشن وسندس شلون راح تكدر وحدها اذا اني موجود ولاعبه لعب بيهن وتتشكى من القله ومن العيشه من اني ماكو شلون

واجاني المجنت متوقع يوكف هيج وكفه ويايه سجاد رغم ابن اخوها لانعام بس وكف وكفه العمر ابن ابويه مسواها

وبقى ويايه ومساندني ومايوم زياره مأجاني شكد جنت احب اشوف عائلتي وياهم نهر بس من افكر بلمكان اختنك مااكدر اخليهم بهيج موقف

بس گلت قبل ماانعدم اطلب اشوفهم

حطوني بسجن تعبان وانتظر الموت ساعه ساعه سلمت امري لله ولزمت قرأني وسبحتي ماعندي غيرهم اقضي الليل اصلي واقرا قران وبلنهار السبحه بيدي وصافن افكر بكولشي مريت بيه

وبيوم زياره مثل باقي ايام الزياره اجاني سجاد وكال راح تنعاد محاكمتك استأناف بشرط احجي الصار

تخبلت وصرت اعصاب عليه

انت مخبل من كل عقلك اوكف كدام القاضي والمدعي العام واشهر بنتي واخليهم يدزون عليها اني اصلاً رحت برجلي وسلمت نفسي حتى ميفكرون يدكون باب بيتي مو عاد يجيبون بنتي هنا واحجي بيها وبشرفها

سجاد : يمعود اعرف رافض هذا الشى من ذيج المره قابل شتغير بس المتعرفه راح تحجي للقاضي وبس

حجي طه : هاي شون رهمت

سجاد : صديقي كرايبه حزبي جبير ومعروف ويداوم مكان حساس توصطنا يمه وراح للقاضي ولحساسيه الموضوع راح يسمعون اقوالك وحدهم

حجي طه : وهم تنكتب وشهود وهاي السوالف

سجاد : شون طه الي اريده مو تطلع لان طلعه بهذا وضعك ماكو ماطول تريد تبعد بناتك عن التحقيق معناها طلعه ماكو الي اريده هسه يتخفف الحكم ويتحول من اعدام لمؤبد

حجي طه : وشون راح تسويها

سجاد : كلشي بلواسطه والفلوس يصير

حجي طه : وانت منيلك فلوس

سجاد : يابه هسه وكت هاي اسئلتك بس ساعدني بروح ابوك ساعدني نغير الحكم

حجي طه : وشنو فرق الاعدام عن المؤبد اقلها الاعدام ارتاح واخلص بينما المؤبد موت بطئ لازم يوميه احسب ساعاتي

سجاد : المؤبد احتمال بيوم يجي عفو يصير شى يتغير الحال المهم تطلع كافي حسك بلدنيا وبناتك وخاصه سليل متحس ودت ابوها للموت بيها مجال تحس ودتك للسجن بس مراح تتحمل فكرة هي سبب وفاتك

ساعدني طه اذا مو لخاطر نفسك لخاطر بناتك

بقى ساكت ويفكر وحاير شيسوي لحد ما استسلم وكال

حجي طه : احجي بس مو شى رسمي مااريد تجي سليل للتحقيق

سجاد : والله افتهمت وروح موتاك وموتاي افتهمت بس احجي

حجي طه : ماشي الله كريم

ومرت ايام واخذوني من ايدي للضابط

دخلت وشفت سجاد وثنين رياجيل كاعدين

عرفني عليهم وحتى الضابط طلعوه مو كدامه الحجي صار واول سؤال انسألت عنه

ليش كتلت اخوك

جانت اكو غصه بلعومي ليش كتلت اخويه بلبدايه سكتت بس حسيت بوجهه سجاد التوسل حتى احجي وكأنه يكول هاي فرصتك الاخيره وبديت اسولف الصار بس مو حجي يطلع من حلكي سم جارعه وكوه يطلع من صدري

بقى الكل ساكت من كتلته خانتني دموعي ونزلت لان مهما كان يبقى اخويه شون اكتله بيدي وبديت اوصف الحادثه وكلام سليل وكولشي جانت على وجوهم القهر والضوجه ولحظات احسهم اعصاب

لحد ماكال واحد من الكاعدين الي هو الحزبي الجبير

والله ولا اخليك تنعدم على جثتي

مسحت دموعي وتأملت خير

وراحو وثاني يوم رحلوني للمحكمه وهم دخلوني للقاضي وعدت نفس الكلام

ورجعوني كله تحت رعايه هذا الحزبي الي طلع ضابط جبير

وصارت المحاكمه وتغير الحكم من اعدام الى مؤبد رغم اعرف مراح اطلع بيوم بس فرحت اقلها اعيش بحس بناتي واسمع اخبارهن

ومن رحلوني لزمت سجاد وكتله

جهالي امانتك ابوس ايدك لتعوفهم خايف من سندس اعرف بيها مو كدها لتعوفهم والله ردت ابوس ايده لان ماعندي غيره أمن جهالي وهو مقبل وباسني من راسي وكال ارتاح جهالك برگبتي ومااعوفهم للموت

رجعت للسجن وهلمره شمروني بلحبس ويه جماعه الگتل والحراميه ابتعدت عنهم محاولت اختلط ويه اي واحد يومي جان يمشي بطئ عجيب والله لحظات اندم اكول لو ميت ولا هاي العيشه بس من يجيني سجاد ويسولف على بناتي وسوالفهن احمدالله عايش بس هم انقهر كعد يكبرن واني بعيد عنهن

ويه كل زياره يزرع امل بيه ومرات من يجيب الاكل ويكول مسويته نهر والبنات لو بيدي ابقى ابوس بالاكل لان احس ريحه ايدهم بيه

مرت الاشهر واني ماعندي غير صلاتي وقرأني المفاركني لدرجه مابقيت متوفي ماختمت القران اله المساجين اول ايام يضايقوني وجم مره رادو يضربوني بس اني بطبعي مسالم ماااحب المشاكل وذوله ماخذين فكرة موزينه عليه على مسجون بسبب كتله لأخوه ميعرفون الصار وليش كتله لهذا تعاملو. ويه بحقاره تحملت هوايه وجان ردي عليهم السكوت والصلاه وقرأت القران والكتب الدنيه الجنت اوصي عليهم وسجاد يجيبهم اليه

لحد ما كفو مني وحتى كامو يستغربون شنو كاتل وشنو الصلاه المتفاركني

ودوم الضابط لوالحرس مال السجن يراقبون تحركاتي لحدمايوم نقلوني لغير حبس جان ذاك بيه اشكال المحكومين بس مابيه قتله شويه حسيته احسن من ذاك اقلها كل واحد بحاله

دوم اشوف رجال جبير بلعمر يصلي قريب مني وشويه شويه بدينا نتعرف

انسان طيب اسمه ابو مصطفى كمنا نصلي سوه وطلع محكوم ١٥ سنه لان ضرب حزبي وسب الريس

صارت كعدتنا سوه سوالفنا سوه شويه هون عليه مراره السجن بس حتى بلسجن مخلصت من المصايب واجتني الصاعقه الاولى

من استدعوني وصلت للضابط وانطاني ورقه بيها قرار المحكمه طلاك سندس بلحظتها افترت الدنيا بيه كوه لزمت روحي مااوكع اني متوقع منها قله الصبر وماباقيه عليه بس مو بهاي السرعه خلال اشهر

حسيت السما وكعت على راسي اول شى اجه بالي جهالي ذوله منو الهم

رجعت اسحل بروحي ومن شافتي ابو مصطفى مكدرت اضم عليه وكتله على القرار ردت بس احجي راح اموت من الخنكه والقهره والله شويه وانجلط

ابو مصطفى : كول ياالله ابني شسوي هذا حظك من الدنيا

حجي طه : اني الكاسر ظهري جهالي بناتي وابني منو الهم

ابو مصطفى : قابل ذبتهم بس اطلكت منك

حجي طه : ماطول اطلكت معناها راح تفكر تتزوج وراح تذب جهالها

ابو مصطفى : مو لهاي الدرجه

حجي طه : واكثر اجتها الفرصه من ذهب حتى تفلت بجلدها نار بيه حجي نار يعني حتى ماصبرت سنه مستحت اقلها من الناس حق العشره بينا بسرعه باعتني

ابو مصطفى : لتنسى هي هم حقها بعدها صغيره وانت محكوم مؤبد شتترجى منك والبنات يرادلهن مصرف واهتمام والدنيا مترحم مره وحدها

حجي طه : اني متأكد راح تتزوج وتعوف البنات سندس واعرفها مستحيل تسوي شى اله بيه مصلحتها وحتى اخاف تتزوج بيتي وادخل رجال غريب عليهم ااااخ نار وتحرك بيه

ابو مصطفى : الله يعينك ابني على بلوتك

حجي طه : بقيت ايام الاكل كوه ابلعه بس مي والسبحه بيدي حتى قرائة القران تركتها

بس صلاه الواجب اصليها انتظر يوم يوم زياره سجاد وره مده اجت الزياره وطرت ركض اله يمكن هاي اول مره اروح اركض اله بس اريد اوصل واطمن على جهالي

سجاد : لتضوج هي هاي سندس انت مو كلت متوقع منها

حجي طه : بس مو بهاي السرعه

سجاد : متفرق هسه من سنه نفس الشى

حجي طه : والجهال البنات شلون واذا اتزوجت اتجيبه للبيت وادخل رجال غريب عليهن غير اموت

سجاد : لتخاف ميصير هيج اني يمهم وعيني عليهن اصلاً اكثر وقتي وياهم

حجي طه : ادري مالي حق اطلب منك هيج طلب بس ماعندي بعد الله غيرك لتعوفهن والله اذا وحده صار بيها شى يمكن انجلط واموت

سجاد : عمرك طويل لتفكر هيج ومثل مكتلك كلمة رجال جهالك بعيوني

حجي طه : عينك على سليل تره هي حيل تنقهر وتبجي بسرعه واكيد هي اكثر وحده راح تتإذه لان جبيره وفاهمه شديصير

سجاد : صار

حجي طه : مااعرف شلون اجازيك

سجاد : هاي شبيك طه احنا بينا هاي السوالف وتعال اكولك على شنو مقهور لو منك اصلي ركعتين لله لان خلصت منها هاي من تروح ماينبجي عليها تندك مزيقه وراها وهلاهل وينطش جگليت

حجي طه : مهما كان عشره عمر وام جهالي وفوك ضيم الدنيا عليه هلمره هي والي مخوفني بس مستقبل الجهال شون راح تأمنه سندس شون راح تتعامل وياهن

سجاد : الله كريم لتفكر بشى تهون يااخويه كل مااجيك الكه حمل على راسك شنو سالفتك

حجي طه : ليش الي مثل وضعي هم يلوك عليه الفرح تدري ذيج الايام ماانام

وحق الرسول كله احلم بيهن لو يركضن ويوكعن لو سليل تعيط وينك بابا احس بيهن شى وضام عليه

سجاد : يمعود شبيهن قروده مخلف مو جهال لتخاف وإمن العليك هسه تهتم بصحتك والباقي عوفه على الله

حجي طه : ونًعــٌٓمُٓ باإٱللـِْﷻـِْﮭﮧ

سليل شلونها

سجاد : ليش دوم تسأل عن سليل اكثر وحده

حجي طه : لان اول فرحتي بلدنيا جانت هيه وهم لان مشافت شى من طفولتها اتأذت وقصرت وياها جان المفروض عيني عليها اكثر واكون حريص اكثر

سجاد : شمدريك انت غير مأمن بيه اخوك

وطلع نكس عوفنه هسه من هذا الموضوع يله احجيلي شخبارك

وكعدنا نسولف وراح مثل كل مره يحاول يلطف الجو وينطيني دافع اعيش ويروح جنت انام واكعد اكول هم يجي يوم واشوف بناتي واحضنهن هم يجي يوم واصير بنصهن وحسام راح يطلع عليه حنين على خواته لو قاسي على امه بضل وضعي وظرفي والوقت الطويل الي ميمشي بهذا السجن ماعندي غير التفكير والتمني

مرت فتره وكل ميزورني سجاد وكال نهر وحجت نهر ودوم يم البنات لحد ماحسيت الوضع مو طبيعي

لزمته وحلفته وحجالي على دكه سامي وهاي هم ضربه من ضربات الدنيا اني عاذره لان يريد اطفال بس مااسامحه لان كسر بنهر ومجان كد كلمته ويايه وعده الي

وخلاها بأهم وكت بعمرها بوكتها تأذيت حيل هاي وين تروح منو الها يمكن جانت اسوأ زياره لسجاد لان من كثر متخبلت وخفت على نهر وين تروح كال عايشه بيتك ويه جهالك زين اذا ويه جهالي شعجب سندس قبلت عقلي مشالها

لحد مكتله

اسمع سجاد وروح ابوي وتراب جعفر اذا محجيت الحقيقه وشضام عني بحياتك متشوفني وكل متزورني مااقبل بزيارتك

سجاد : واخبار جهالك ونهر منين تاخذهم

حجي طه : لتلزمني من ايدي التوجعني خليني ثاق عايف رجال مكاني اعرف انت ممجبور تتحمل هاي الامانه بس انت دكيت صدر وكتلي كدها

سجاد : ولهسه ادكلك صدري واكولك كدها ليش اني مقصر بشى

حجي طه : اي مقصر ويايه وتعاملني مثل الجاهل ومتكول كولشي الي اذا تحبني صدك احجيلي

سجاد : سندس تزوجت

حجي طه : وكفت على حيلي ممصدك من اعصابي لزمت سجاد من قميصه انت شكعد تكول

سجاد : على كيفك طه واكعد هسه عبالهم نتعارك ويسحلوكً للسجن خلي افهمك قبل ميخلص الوكت وتضل على الشهر الجاي

حجي طه : هديت هدومه وكعدت وحطيت ايدي على راسي متخبل

سجاد : سندس اتزوجت ابو الشغل مالتها رجال حزبي وامكانيته طاكه يعني يملي عينها الفارغه

حجي طه : وجهالي

سجاد : اخذت حسام وعافت البنات بيتك

(مكدرت اكول اله البيت احترك كافي صدمه وره صدمه)

حجي طه : وشمعنه حسام اخذته وشلون الها گلب تعوف بناتها وتروح

سجاد : لو معايفتهن اكول سندس تخبلت هاي شبيك طه لو ما انت اعرف بمرتك وسوالفها اجي اني اعلمك

حجي طه : والبنات منو يمهن

سجاد : وره عركه نهر اجت عاشت وياهن وهي هسه قايمه بيهن

حجي طه : ولك شلون بيه اريد اطلع اريد اطيح حظها

سجاد : والله لوبيدي جان طلعتك شنسوي نصبر

حجي طه : بناتي راح يضيعن سجاد شون

سجاد : بلعكس هسه لازم تنام رغد ومرتاح لان بناتك بيد امينه عمتهن الي ماكو اطيب منها اصلاً احن من امهن عليهن

حجي طه : تعلمني بلغاليه الحنينه مرات احسها امي مو اختي من الحنيه الي شايلتها

سجاد : خلص اعصابك على كيفك جلبه ولت

لتباوع هيج عليه والله خلصت منها لو منك من زمان مطلكها شون بقيت يمها هذا العمر كله مااعرف انت المفروض من تموت الله يدخلك الجنه بدون حساب لان عاقبك من تزوجت بيه

حجي طه : ههههه بله متسكت

سجاد : اضحك يمعود الدنيا خربانه

حجي طه : عينك عليهن اترجاك سجاد هسه هنه بلا ام ولا اب

سجاد : اذا قبل اخاف عليهم مره هسه ميه مره بس انت حط بالك هسه وضعهن احسن امهن اذيه مو نفع

حجي طه : والبنات اكيد انقهرن

سجاد : بس سليل ذنيج ميعرفن شصار

حجي طه : ااخ يابعد ابوج تحملتي الضيم وانتي صغيره چني ورثت الج مني شلاع الگلب

سجاد : كولشي مابيها وسباعيه بس هاي السنه تركت

حجي طه : طفرت هاااا ليش

سجاد : انت لتضل كل مااحجي شى وتطفر البنيه تعبانه نفسيتها وغزل اختها صغيره ولازم تتعلم ماكو سندس بقت يمها

حجي طه : يعني مابيها شى بروح ابوك

سجاد : والله تعبتني كتلك مابيهم شى

حجي طه : ونهر حال الحنينه اكيد گلبها مكسور

سجاد : تعرف بعد كسرتها مو هينه

حجي طه : دزلها خبر كول الها اخوج يكول وياج بكولشي تقرري

سجاد : يوصل انت بس صير قوي

حجي طه : ولك ياقوي وكل كم شهر مصيبه شكل كلت من ادخل السجن ماعندي بس الحياطين منين تجيني المصايب اثاري المكتوب على كصته التعب وين ميروح يلحكه

سجاد : شد حيلك مااريد اشوفك هيج محتاج شى على الزياره الجايه اجيبه

حجي طه : كولشي مااريد بس لتعوفهن

سجاد : والله حفظتها والله مااعوفهن وعيني عليهن صار

حجي طه : حضنتها والله انت اخويه

سجاد : وانت هم اخويه وبناتك برگبتي لتخاف

حجي طه : راح واني الخوف صار اضعاف شون راح يعيشن صارن ٥ بناتي ونهر وياهن منو الهن وشون راح تدبر العيشه وانعام شلون تعوفهن بحالهن الف سؤال بليوم ويه كل سؤال ياخذ حيلي

حتى نومه الليل بدت تروح مخلصها اتكرضم على بناتي واختي اعرف سجاد ميعوفهن بس هم العيشه صعبه شون يعيشون

ومن عرفت نهر اطلكت حيل انقهرت هم على حالها وهم على صديق العمر شون عافها وهي محتاجته وخذلها

مرت الاشهر والسنوات وكل يوم اليأس يسيطر عليه والعن الساعه الدخلت بيها للسجن

جانت تجيني شهرياً اخبار البنات وكل وحده شسوي اضافه شهايدهن كل سنه جنت ابجي من اشوفهن متفوقات رغم كل الصار لا اب ولا ام ويقرن وينجحن وبتفوق

جان من يجي سجاد اجبره يسولفلي على وحده وحده وشنو تحب وشنو تكره وطبعهن

من خلال الحجي والوصف لمده اشهر عرفت رشا وريم قويات لسان امهن وجرئتها جنت خايف لانسخه منها بس من حجيه ماخذات مني ومنها اما غزل نسمه ربيع هادئه كولشي هادئ بيها حتى كلامها

اما سليل غزالتي الجبيره صارت ام واخت الهن رغم عمرها الصغير

سباعية بس ام دميعه هذا لقب سجاد الها

ونهر لو العمر كله مااجازيها على كسرت ظهرها على بناتي الله حرمني الام بس انطاني الاخت الي مثل الام واكثر

رغم هي اصغر مني بس من حنيتها وطيبتها احسها امي واختي بنفس الوكت

كبرن غزلاني وكل سنه افتخر بيهن اكثر وسجاد يوم بعد يوم يخليني احبه اكثر لان معافهن وطلع رجال كد كلمته

وبيوم زياره مثل كل شهر مأجاني استغربت اول مره ميجي اول تالي بقيت بحيره وقلق

وره يومين اجاني استدعاء يم الضابط

واشوف سجاد گبالي

هاي وينك شصار ليش ما اجيت وكت الزياره

سجاد : مو وكتها هسه بعدين نسولف وقت قليل عندي متعرف شسويت حتى اشوفك اليوم

حجي طه : قلقتني شصار بناتي بيهم شى نهر بيها شى

سجاد : اجيت استأذن منك

حجي طه : بشنو

سجاد : راح اعقد على سليل

يتبع .....

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_الثامن_والثلاثون

#مدونة_نور_قلبي

اخاف احجي وتفز الروح

واخاف اسكت واضل مجروح

خايف من تصد العين اعاين ع الگلب مذبوح

ماريدك حلم بليل اشوفنه الصبح ممسوح

ماريدك عشگ يومين وثالث يوم عني يروح

ماريدك تگلي اهواك اريد نصير روح بروح

حجي طه : قلقتني شصار بناتي بيهم شى نهر بيها شى

سجاد : اجيت استأذن منك

حجي طه : بشنو

سجاد : راح اعقد على سليل

وكفت على حيلي صارت عيوني براسي من الاعصاب والصدمه شنو تعقد عليها

سجاد : اكعد يمعود بس افهمك

نرجع لقبل اشهر

سليل : نداوم طبيعي وحياتي جداً طبيعيه وحتى خواتي اما ماما مأجت بعد ولا وصلت من اخر مره من مقبلنا نروح وياها

وعمه نهر مكسور ظهرها بشغل البيت وشغل الخياطه والخبز ماقصرت لحظه ويانه من يردون البنات شى بسرعه تلبس عبايتها وتروح اتجيب مرات اموت قهر واتمنى اساعدها اخيط اخبز بس هي متقبل تكول بس انجحي وفرحي ابوج تسوه الدنيا

بس بأيام العطل كل وحده تلزم جهه وتنظف ومنخليها تلزم شى حتى غزوله تنظف ويانه

مثل العمل الشعبي كل جمعه وبأيام العطل هم لان تتعب بالايام الباقيه ونحاول نريحها بيوم الجمعه

رجلي تحسنت ورجعت امشي طبيعي احنا بشهر الثالث سنه ٢٠٠٠ العيد الجبير بعد كم يوم جان يوم جمعه ومسوين حمله تنظيف غزوله وريم على الجام واني ورشا الارضيات والتسعيف والبردات وعمه عليها المطبخ

ريم : ولج غزل هنا مطكع

غزل : شسوي انفخ عليه وامسحه بلجريده وهم يطكع

ريم : امسحي قوي شكد فاهيه بله انتي ليش مشغليج

غزل : والله اعرف حبابه خلي اكمل وياج

ريم : كملي بس لتجين على جهتي

غزل : اي

شويه واندكت الباب وطفرت ريم ركض تموت على فتحت الباب

حسين : هاي شسوون

ريم : نلعب مكعد تشوف شنسوي

حسين : هاي شبيج لج شكلت اني

ريم : ولجاجه لتغلط

غزل : هلو حسوني شوف شون انظف الجام

ريم : كله مطكع وارجع امسح وراج

حسين : على كيفج وياها غير بعدها صغيره موزين تساعدج

ريم : اهوو حجه

حسين : جان يلزمها من ايدها ويلويها

لج احجي عدل تره والله اشبعج كتل هسه

ريم : لا بالله وخر لك وجان ادفعه حيل

سليل : طلعت اركض شبيكم بس تتناكرون

حسين : مابينه شى

غزل : ريم تصيح على حسوني

ريم : تسكتين لا اضربج انتي وياه

سليل : اشش صوتج شبيج بس تعيطين

ريم : خلي يروح ثلل مااريده هنا

حسين : مجاي عليج

ريم : لا على بيبي نعال جاي مو

حسين : شفتي سليل شلون تغلط على بيبي

سليل : شسوي متكولي سنين نقنع بيها تبطل ومبطلت اله بيوم ازعلها واضربها

ريم : متسويها لان انتي هم تكرهيها مثلي

حسين : هسه خلي اطب شنو واكف بلباب

ريم : مطب

سليل : وخري ريم عيب

ريم : ماا ميطب وحطت ايدها على الباب حتى ميدخل

سليل : ليش ولج

ريم : مااريد اشوفه زعلانه

سليل : هو يايوم مزعلانه منه وتتعاركين وياه تعال حسوني طب

هو دفع ايدها وعيب عليها وطب

ريم : شفتي شون طلع لسانه وعيب عليه

سليل : ميخالف يشاقى وياج روحي كملي الجام مبقى وكت

ريم : اي رايحه وانت دير بالك تجي يمي

سليل : شبيهه زعلانه وياك

حسين : تقبلين تكول لو اني لو اختك لان مرات ارجعها ويانه

سليل : ليش ريمو

: صاعده على الدجه ولازمه الحدايد وماده ايدها بينهم وتمسح الجام وتسولف

مااحبها متسلم حقيره

سليل : ولج عيب مثل اختج

ريم : ايييع لو اختي اخنكها

حسين : هذا طبعها شسوي والله حجيت عليها ورزلتها وكتلها تسلمين عيب ذوله بنات عمنا

ريم : وشكالت كعبول

حسين : كالت من اشوفهم اسلم

ريم : ثلل ذاك اليوم نمشي سوه دفعت غزل لان لازمه ايد سحليه وتمشي

سليل : ميخالف تحب اخوها وتريده يلزمها

حسين : والله راح يخبلني من وره سوالفهن بعد مااروح واجيبهم من المدرسه

ريم : شحدك سويها وشوف بعد حتى بوجهك مااباوع لو تجيب الدكان كله ماارضى

سليل : يمعود معتمدين عليك ميخالف جهال اخذهم على كد عقلهم

ريم : على اساس هو كرندايزر هو هم مثلنا جاهل

حسين : يابه والله راح اجيج وامسح شكو جريده بوجهج

سليل : كافي شبيكم

حسين : لج نتصالح لو اروح والله بعد متشوفين وجهي ولا اجي للمدرسه وازعلي طبج طوب

باوعت شافته عصبي وزعل جان تكول تعال ساعدني نظف الجام ويايه واصالحك

سليل : متكدرين متصالحين اله بمصلحه

ريم : تجي لو لا

حسين : اجي يمعوده انطيني جريده امري لله

غزل : واني ماانظف

سليل : تعالي غزولتي ذوله وكحين واخاف يتعاركون من الشعر ويضربوج ويأذوج تعالي يمي اشتغلي ويايه ويه ماما

غزل : هاك حسوني نظف زين لا ريم تكتلك

حسين : خوش سمعه

سليل : ههههه والله من ايدك

ريم : يله سحليه اريد هاي المنطقه تلمع تشوف خشمك بيه

حسين : خو نشوف كفشتج بيها

ريم : عيني شعري سرح مي تغار من شعري

حسين : اشتغلي وكافي حجي جان تبدي تغني

ريم : هيلة يارمانة

هيلة يما

من هي زعلانة

هيلة يما

الحلوه زعلانة

هيلة يما

ريمو الزعلانة

هيلة يما

من هو الي راضيها

هيلةيما

سحليه يراضيها

هيلة يما

صايغ تراشيها

هيلة يما

حسين : وهسه شتردين تراجي

ريم : لا مااحبهن

حسين : انتي كلتي ساعدني اصالحك

ريم : ماشي لعد نظف الجام كله واصالحك وجان تشمر الجرايد وتكعد بلكاع تباوع عليه

حسين : ولج تعالي ساعديني

ريم : ماااا نظفه كله واريد يلمع يله اصالحك

حسين : ومتزعلين بعد

ريم : لا ازعل

حسين : لعد مااشتغل

ريم : لا لا ماازعل يله بس اشتغل

حسين : جيبيلي مي عطشت

ريم : شبسرعه هستوك بديت

حسين : ولج عطشان شعلي الشغل

ريم : هااك جان اتجر الصونده وتوجهه عليه نكعته وتضحك وهو يعيط

حسين : لج لا نكعتي ملابسي

ريم : حتى اتوب تزعلني وتخلي العوبه اختك تمشي ويانه

حسين : يابه شكد كلبج اسود الحكي سليل خربت الجام كله

وهي اشمري الصونده وركض اختلي

سليل : طلعت اركض شفت الجام كله مي وعطت اليوم اذا الزمج اله امسح بيج الجام اطلعي نظفي كله لا والله اكسر راسج وصايره نار عليها

ريم : طلعت من وره تانكي النفط واجت تتمشى على كيف وتحجي ويه حسين شفت من وراك ومغنزره بعيونها

حسين : اني شعليه فوك منكعتيني

سليل : اششش ويله كملي كدامج ربع ساعه اريد الجام نظيف

ريم : اي سحليه ينظفه

سليل : لا شو انتي تنطفي وانت حسين اكعد شو جيب الجرايد يله بسرعه

ريم : ثلل حبابه مااكدر وحدي خلي يساعدني

سليل : لا شو وحدج بسرعه عطت بيها وشمرت الجرايد بوجهه  وبدت تشتغل ومبرطمه

حسين : راح اساعدها خطيه اديها تتأذه من الحدايد

سليل : لا شو وحدها حتى تعقل شنو

هاي العصبيه والتكمز مالتها

وكل شويه زعلانه

حسين : لا الله عليج سليل خطيه

ريم : جان تحجي بصوت ناصي مال وحده حاصرتها البجيه سحليه حباب تعال ساعدني والله اديه توجعني

حسين : ادخلي كملي شغلج واحنا هسه نكمل الجام

سليل : جان اسمع صوته ونبض گلبي بسرعه

سجاد : هاا شعدكم صوتكم للشارع واصل

ريم : هلوو عمو وركضت عليه

سجاد : هاا شبيج

ريم : عمو ثلل متقبل سحليه يشتغل ويايه

سجاد : اي غير رجال والشغل للنسوان

ريم : لا مو هو راد يشتغل بس هي متقبل

سجاد : ولك عوفهن يشتغلن عيب تحط روحك بلنص هاي سوالف نسوان انت تحط رجل على رجل وهنه يكملن

جان تجي عمه

نهر : الله جابك فدوه تعالي نزلي البنكه مال المطبخ متروسه دهن ردت افكها منفكت

حسين : هههههه يله عمو حط رجل على رجل

جان يكفخه سجاد انجب ودخل وره نهر

واني باقيه بس ابتسم واباوع عليه حتى مسلمت ودخلت وراهم

ريم : يله تعال ساعدني

حسين : كولي حباب حسوني ساعدني

ريم : لك سحليه تجي لو والله ازعل زعله اخليك تتوسل ومااقبل

حسين : لا لا اجيت شيخلصني من اطنكرين

سليل : دخلت وكلت

شلونك عمو

سجاد : هلو سليل ويه الدرج

نهر : هاك

وبدا يصعد ويفتحها اباوع على ايده شون سريعه وبسرعه نزلها ونظفتها عمه ورجع صعد شكلها

سجاد : محتاجين شى بعد

نهر : سلامتك يمه سليل شگلتي البردات

سليل : لا بعدني منتظره يكملون الجام

نهر : كملو مال الهول اصعدي شكليهم

سجاد : اني اشكلهم اكعدي

سليل : لا اني سهلات

وصعدت احط التول واقرص بيه واعلق قطعه قطعه بس بالي يمه وين راح مدري شون انداريت واني معلقه بلدرج ودخت ردت اوكع جان الزم  الدرج وغمضت جان يركض

سجاد : بيج شى

سليل : لا بس دخت

سجاد : مو كلت اني اصعد شنو هذا العناد

سليل : راح انزل على كيفك ليش تعيط

سجاد : شو نزلي خلي اصعدهم ردت انزل بس رجلي رجفت

سجاد : انطيني ايدج وانزلي

مديت ايدي ولزمت ايده دوم يلزمني وكم مره شالني وهو الوحيد من يطخني ماانفر منه مااهتم بس هلمره مجرد لمس ايدي وينزلني احس گلبي الكل يسمع دكاته

نزلت بهدوءوكعدني على الكرويته

سجاد : ابقي هنا واني اشكلهم

شكل البردات كلهم ونزل

سجاد : شون صرتي

سليل : لا زينه مابيه شى

سجاد : لتصعدين شى عالي لتوكعين وتنكسر رجلج

سليل : مااصعد

سجاد : شبيج ليش صافنه

سليل :هااا مصافنه بس كعد اسمع كلامك غير كعد تحجي

سجاد : كومي كملي شغلج اذا صرتي زينه

سليل : اي

وكملنا الشغل وتغدينا كلنا حتى حسين ويانه كاعد بصف ريم وكل شويه يكفخها ومن تنطي عمه قطعه لحم يقسم نصها ويحط كدامها

تغدينا وقرينا الفاتحه لروح بيبي وبعدها بدينا نسوي گليجه العيد كاعدين كلنا ونسوي وعمو وحسين يلعبون دومنه على صفحه

واشوف ريم تكمز وتكوله لسجاد

عمو عنده ٦ ب٦ هذا ابو الهوايه اسود

حسين : ولج سكتي طيح الله حظج حركتي الداس عليه

سجاد : اسكتي زيبك هاك ذبيت شش ب يك ونزل الدوشيش

وكامت تأشر لسجاد من بعيد بأصابيعها

حسين : والله ماالعب اذا تبقى هيج

سجاد : اكعدي راحه

ريم : شسويت ياعمو

سجاد : لتأشرين

ريم : موزين اساعدك تفوز عليه

سجاد : مااريد وخري من يم راسه خلي نلعب

وخرت واجت ويه راس سجاد تباوع على الدومنه البيده وتأشر لحسين

سجاد : نهر اخذي ريم لا ابتلي بيها

ريم : انت متقبل اساعدك اساعد سحليه

سجاد : تعالي اخذيها

نهر : تعالي ماما كافي عيب عوفيهم يلعبون

ريم : اريد العب وياهم عمه ميقبلون

سليل : ولان ميلعبوج تخربين اللعب عليهم شو تعالي وجريت من اذنها

اكعدي ساعدينا

ريم : ااااخ اااخ ثلل كعدت

باوعت بحقد عليهم وجان تكول

ان شاء الله اثنينكم تخسرون

حسين : ههههه ميصير لازم واحد يفوز

ريم : انت اسكت كسولي لوما عمو مخسرك وفايز عليك مرتين

حسين : هاا مو اجيج واشوفج الكسولي شنو

سجاد : ولا بيك خير بس حجي هسه بس تقفل عليك بزعله تضل تتوسل يحجي ويدخن وبيده الثانيه الدومنه

حسين : ليش عمو على كيفك ويايه

سجاد : العب

سليل : اشتغل بس بالي كله يمه عيوني وايدي بلكليجه بس اذني وقلبي يمه اسمع كل كلمة يكولها

وتالي فاز سجاد وهاي الخبله ريم كامت تركص لان خسر سحليه وهو ركض وراها جرها من كصيبتها

ريم : متأذيت عيني المهم خسرت

حسين : اني زعلت وطلع من البيت وركع الباب هاي جمدت حتى الضحكه طفت بوجهه وطلعت تركض وراه

وتصيح سحليه وين وكفو بلطرمه

حسين : شكو شرايده مو تضحكين وتركصين لان خسرت اني هم زعلت منج

ريم : لا متزعل ومبتسمه

حسين : جان يباوع عليها مثل الضايج وكال

لا زعلت ورايح لبيتنا

جان تلزمه لا حباب لتروح

حسين : وبعد مااحجي وياج للابد

ريم :تعال وين وجرته حيل

حسين : شتردين

ريم : اصالحك

حسين : شلون هم تشترين اليه

ريم : لا رفعت نفسها هو اطول منها جان تبوسه من خده

وتحجي بأبتسامه بريئه هاا رضيت

حسين : بقى ساكت شويه وكال لتعيديها

ريم :شعيد

حسين : هااا لا ماكو شى يله باي

ريم : مزعلان

حسين : لا مزعلان

ريم : يله باي سحولتي

حسين : باي ريمتي

وطبيت تكمز للبيت

سليل : كمنا شغلنا واخذ عمو جزء من الكليجه لبابا وهم سوينا كيكه وسوت لحم بعجين ولفتهم لبابا وكالت عمه بوسه النه وكله عيدك مبارك يابويه واخويه وكل اهلي

سجاد : يوصل وانتم بنات

سليل : بوسه وكول اله بناتك يحبوك

سجاد : ماشي محتاجين شى ملابس للعيد غراض البنات كملتيهم

نهر : اي كملت كوشي ليضل بالك

سجاد : اني احتمال مموجود اشوف طه ومناك اروح للبصره اسبوعين يله ارجع

سليل : اني كمزت من يمي وكتله ليش

نهر : باوعت على سليل حسيتها ارتبكت احوالها مو طبيعيه هاي الايام مباوع عليه وكال

سجاد : شغل عندي اشوفكم بخير

ديري بالج على البنات نهر وهذا رقم صاحبي بلبصره اخاف يصير شى روحي للمحل وخابريني

نهر : هاا شكلت الارضي

سجاد : اي

نهر : على خير

سجاد : الخير الي يصيبج وشتحتاجين وصيت عمران اليشتغل ويايه عليكم بس كوليله للبيت يوصلج التردي

نهر : رحمة الله والديك متقصر تروح وترجع بلسلامه

سجاد : اخاف اداومون وره اسبوع العيد تمشين ويه اختج سوه وتنتبهين على الطريق

سليل : باوعت عليه واحس اريد عيوني تشبع شوف منه وكتله ان شاء الله

سجاد : رايح

نهر : الله وياك

طلع واني عيوني دمعت يعني اسبوعين مااشوفه باوعت عمه عليه درت وجهي هربت منها حسيت بديت افقد السيطره على وضعي لازم اصير اقوى عيب من عمه اذا عرفت تزعل مني وتضوج

اجه العيد واجت اول يوم ماما الظهر البنات جانو يبدلون ريم وغزل يردون يرحون للمراجيح وسمعت صوتها ويه فتحت الباب

سندس : وينجن بنات

كل وحده طلعت من جهه يمكن بسبب غيابها فترات طويله كامت من تجي نحسها وحده غريبه حتى الشوق اختفى باستنا وحده وحده حتى اني وكالمعتاد كل وحده علاكه غراض

جان تكول

سندس : بروح اخوج نهر كولي للبنات ياخذن الغراض

نهر : باوعت عليهن هو راح ياخذنها يله كل وحده تشيل علاكتها

سليل : اني مااريد شى

رشا .. واني هم

نهر : شكلت اني يله بسرعه

كامن اخذن الغراض والوجوه مگلوبه

سندس : والله ماادري شبيهن ويايه يعني الله يرضاها مخلفه اربع بنات ولا وحده منهن تحبني وكامت تبجي

نهر : باوعت عليها انقهرت وكتلها لا شون ميحبنج بس ينقهرن لان مو دائماً موجوده وياهن

سندس : شسوي يانهر هاي الحياه والنصيب هو بيدي لو بيدي قابل اعوفهن واني كدامج اريد الهن الرضى يرضن بس حتى يحبني

نهر : كافي تبجين هنه يحبنج وانتي امهن مهما كان

سندس : فدوه نهر احجي وياهن بس انتي يسمعن كلامج

نهر : صار

سندس : اني هسه وضعي تغير وحياتي كلها تغيرت وصار عندي فلوس وجاه وكولشي ممحتاجه بس بناتي يحبني

نهر : هنه يحبنج بس انتي مموجوده بحياتهن ترحين وكل كم شهر يله تمرين ساعه وبعد منشوفج

سندس : غير من وراج ومن وره سجاد

نهر : هاا صارت من ورانا ولج سندس تعلميني بيج عشره سنين واعرف طبعج كولش زين لو تردين شى تسوي لو مو احنا

سندس : عوفج من هذا الحجي ميودي ولا يجيب هسه شون

نهر : بشنو

سندس : اريد بناتي يسمعن كلامي كل فتره اخذهن لبيتي فدوه نهر احجي وياهن

نهر : سليل رشا تعالو ماما

طلعن من الغرفه وكتلهم

نهر : ليش مترحون ويه امكم يوم واحد تريد تفرح بيكم

سليل : اني مااروح

رشا .. ولا اني

ريم : واني اذا ثلل متروح مااروح

سندس : هاج شفتي صايرات عصابه خو الصغيره ولا تباوع بوجهي

نهر : ليش ياامي مو عيب وخطيه تحبكم وتريد تشوفكم بيتها وهم تشوفون اخوكم

رشا .. يااخ فدوه الي دار وجهه ومشفناه من سنين حتى مكلف نفسه يفوت علينا ولو يوم واحد حتى اذا هسه اشوفه بلشارع مااعرفه عمه هذا ترقى علينا وشاف نفسه عباله من يكعد بيت جبير ومنطقه راقيه راح يصير بس هو وبس خلي يفيده رجل امه من طيح الله حظه والله استحي اكول عندي اخ مطي مثله

سندس : شفتي هاي تاليها نهر هاي تربيتج لبناتي يغلطن على اخوهن الجبير ومايحترمنه

نهر : رشا مو عيب شنو هذا الحجي هيج تصغريني كدام امج

رشا .. العفو عمه بس هي كل متجي وصاحت اخوجن هو وينه شو حتى ولا مره اجه تكول عبالك ماعنده خوات شون تردين اعترف بيه وهو حتى مفكر مره بينا

ريم : اني زعلانه منه عافنا وراح

نهر : سندس هو ليش ميجي ويشوف خواته

سندس : غير يدرس قابل كاعد وبلعطله ويه عمه خليل والله مرات اني مااشوفه

رشا .. ياعيني قهرتيني اكيد صاير ثور من العلف والاكل والراحه

نهر :اسكتي واعتذري لأمج

رشا .. على شنو عمه عفيه متشوفين شون ترجف على ابنها

جان تكول سليل بصوت هادئ

سليل : لو يوم واحد حبيتينا مثل محبيتي جان هواي تغيرت شغلات

احنا نحبه لحسام بس هو مو الاسف نسانه ويمكن حتى نسى ابوه لهذا لا كل متجين وكلتي اخوجن من يصير اخ بصدك ويجي لهنا علينا ويدارينا بذاك الوكت نحطه على راسنا ابنج عندج وانتي ما محتاجه النا المن تجين

سندس : والله وكبرتي بابت طه وصرتي تحجين وتقارنين واطردين

سليل : مكلت شى غلط ومطردتج بس كتلج المن بعد تجين

سندس : جايه عليكم على بناتي واذا انتي معاجبج ابقى غصب عنكم امكم وتبقن بنات سندس

نهر : على كيفج هذا عيد الله اكبر مو مال عركات ومشاكل مو كل مره تجين تكببيها واطلعين

سندس : يله سكتت تعالن يمي على الاقل

سليل : بقت يمنا وتسولف وادك ناعم المشكله كمت مااحس بيها من تجي احسها غريبه بلعكس كل مطول اتذكر المأسي المرينا بيها وهي ماكو

عفتهم ودخلت مالي خلك الها تمددت حسيت بتعب لان اجتني الشهريه تحججت بيها وبعد مطلعت من الغرفه رغم شكد حاولت عمه حتى باستني بس اطلعي اتعشي ويانه خطيه امج عيد الله اكبر واني ابد مقبلت ونمت وعفتهم

مر العيد يمكن مفهمت شى منه لان هو ماكو مكانه فارغ وروحي ادور عليه كمت حيل اتأذه اذا مااشوفه كولش اتعب ورجعنا للدوام واروح وارجع ويه رشا وبيان الي هي مثلي طافيه بس من اشوفها ضايجه لان هو ماكو لو بيدي اخنكها تريد تبجي لان مموجود كمت هاي البنيه اكرهه كره العمى لان ادري بيها تموت عليه بس مابيدي شى لازم اسكت واتحمل شون اخلي رشا تعوفها وهي صديقه عمرها وهم البنيه شاطره وثكيله حيل بلشارع راسها مترفعه بس عيبها تحب سجاد وهذا الشى مخبلني

مر الاسبوعين عبالك سنتين واجه واول مدخل تقربت منه بلهفه وكتله  الْحٍمَدٍ للـّہ على سلامتك عمو

سجاد : الله يسلمج شخباركم

سليل : زينين

نهر : تعال اكعد واحجيلنا

سجاد : كولشي ماكو بس موت حر هاي عود من رحت بلثالث  لو يصير السابع هناك بلبصره شلون

نهر : الله يعينهم على الحر

سجاد : والكهرباء هوايه تطفه شلونها هسه يمنا

نهر : بعدها برمجه اثنين بثنين وتجي ايام ٣ ب٣ حسب مو تدري

سجاد : المهم هاج هاي شغلات اشتريتهم من البصره الج وللبنات وجبتلج بهارات هنديه تخبل

نهر : فدوه لأيدك تسلم

سليل : طفرت ردت اعرف شجابلي فتحت عمه العلاكه طلع شال ناعم كولش ينحط على الجتف بيجي لونه كولش حبيته

ريم : واني شجبتلي

سجاد : شوفي

وجان يطلع كراصات على شكل طباكات مال شعر على شكل فراشات كبار وسوارات ام الخرز

وهاي كيفت كامت تكمز وغزل هم ورشا جابلها مثلي انصدمت ليش مثلي بس اللون يختلف دنجت مقهوره توقعت راح يميزني بلهدايه

طلعت اخر شى عمه نهر جايب الها قطعه قماش وشال

نهر : ليش هلكد مكلف نفسك

سجاد : اعتبروها عيديه العيد لان مموجود

نهر : الله يرزقك ويدفع عنك اولاد الحرام

سجاد : امين

دخلت للغرفه والدمعه بعيني بعدني افتح الباب جان يكولي

سجاد : عجبتج

سليل : باوعت عليه بقهره وكتله شكراً عجبتني ودخلت

مااعرف ليش انقهرت وشنو الجنت انتظره منه ليش اني مااعرف هو يعتبرني اخته ويعاملني مثل عمي شمرت الشال وكمت ابجي جان تدخل رشا مباشره مسحت دموعي

رشا .. شبيج ثلل

سليل : مابيه

رشا .. الله عليج شبيج اخاف ضجتي لان اثنينا نفس الشى هاج مااريده ماالبسه ولا تبجين

سليل : شمرت نفسي بحضنها وكمت ابجي

رشا .. عفيه شبيج خلي اصيح عمه

لا لا عفيه مابيه شويه مخنوكه ومالها دخل هديه عمو

رشا .. شون مالها وانتي جنتي تضحكين ومرتاحه وفجأه گلبتي

سليل : عفيه لتحجين شى ولا تكولين لعمه

رشا .. هذا هو المهم لتبجين واذا اكو شى مضوجج احجيلي واني الي بجاج اشبعهكتل خطه مني ومن ريم نخلي يبجي على زمانه

سليل : ابتسمت وعيوني كلها دموع وكتلها وحياه عينكم امه داعيه عليه الي تستلموه

رشا .. اي فدوه اضحكي مااحب من تبجين

سليل : لخاطرج مسحت دموعي

رشا .. هاج مااريد الشال

سليل : لا حبيبتي بلعافيه

رشا .. محتاجه شى

سليل : سلامتج

رشا .. مطلعين بره عمو هسه اجه

سليل : لا اريد اقرا عندي امتحان

طلعت رشا وبقيت كاعده مخنوكه ومااعرف شكد بقى المهم راح ومشفته

واجه ثاني يوم يرجعنا من الدوام نمشي وساكتين وهو يدخن وهاي بنين العوبه شاكه حلكها من الفرحه لان هو جاي تكول عرس امها ااخ لو الزمها اله ازينها صفر

جان يجر نفس من الجكاره وكال بهدوء

شبيج ضايجه

سليل : سحبت نفس قوي بصدري وكأني جنت منتظره هذا السؤال

مابيه

سجاد : ليش لعد مغنتبه

سليل : شنو يعني

سجاد : يعني مثل واحد كوه حاصر دمعته

سليل : عاد هنا دمعت خرب شكد كمت اضوج من عيوني يلام من يسميني ام دميعه بسرعه على طرف عيني الدموع بدون ميدير وجهه عليه كال

سجاد : اياج تنزل دمعه العب بيج طوبه احنا بلشارع والطالبات داير مدايرج

سليل : مسحت عيني وجريت نفس ومشيت واحنا نمشي ورجع كال

سجاد : منو مضوجج

سليل : محد

سجاد : متأكده

سليل : اي

سجاد : جيد

سليل : شنو جيد

سجاد : ماطول كلتي محد وعيونج مدمعه معناها اني المضوجج

سليل : باوعت عليه مستغربه وليش تكول جيد

سجاد : اي واحد يزعلج ماارضى بس اذا اني عادي

سليل : شنوو عادي

سجاد : اي عادي ويله وصلنا

دااحجي وجان تكول بيان

باي سليل واعرف مو لجل عيني علمود تشوف عمو وتصير وجهه بوجهه وياه عاد اني عطت بيها وكتلها مترحين كل شويه باي

هي البنيه فشلت وراحت ورشا فكت عيونها

رشا .. شبيج شكالت البنيه وعطتي عليها

سليل : طبيت ركض ومحجيت شى

رشا .. شبيهه سليل

سجاد : طاكه فيوزاتها روحي الها وطيبي خاطرها

رشا .. ماشي

سليل : طبيت وشمرت الجنطه وكمت ابجي طبت رشا وكالت

رشا .. شبيج من البارحه مو طبيعيه

سليل : عوفيني رشا فدوه

رشا .. اكولج شى بس مو تعيطين

سليل : شكو

رشا .. اخاف من وره عمو

سليل : وشبيه عمج

رشا .. يعني لا هيج اسكت احسن لا انكتل

سليل : اي احسن وعوفوني انام من تجي عمه كوليلها نامت

رشا .. متتغدين

سليل : لا

رشا .. براحتج

مر اليوم واني مخنوكه وبعدها اسبوع على هذا المنوال يودي ويجيب غير صباح الخبر وهلو ماكو بينا

وبيوم راجعين من المدرسه لكيت ماما جايه استغربت وهم سلمت وذاك البوس والحضن وعمو يهز بيده عافنا وراح ساعه بقت واشكال الغراض جابت وراحت

بعدها بيوم كاعده العصر اقرا بلطرمه مبقى شى لأمتحانات نهايه السنه وفتح باب الشارع لان ممقفول ودخل وشافني كاعده رفع راسه اني شمدريني اكو واحد بلسطح بلبيت المقابيل يطير طيور

وهو تخبل وعاط بيه اني جفلت

شبيك عمو

سجاد : شنو معناها كعدتج هنا

سليل : ليش شكو بيها كاعده اقرا

سجاد : ومتحلى القرايه اله بلطرمه ويه ابو الطيور وليش بلا ربطه

سليل : اني ممحجبه البسها لخاطر غزل لو محجبه حتى كدامك البسها

لو نطت عيونه عليه

رفعت راسي حتى اشوف الولد الكال عليه وشفت ولد يطير جوارينه بس صدك ممنتبهه

كال بنبره اعصاب لو بيده يسحلني من شعري

كومي ادخلي جوه

سليل : ماشي كمت ودخلت وهو عاط على عمه

نهر نهر وينج واجت تركض

شبيك صار شى

سجاد : بعد ولا وحده تطلع بلطرمه وخاصه سليل لحد مااشوف حل لذوله

نهر : منو قصدك

سجاد : ذوله المطيرجيه بيت ابوسعد الكبالكم

نهر : بس همه خوش ولد ومايوم شفنه العيبه منهم

سجاد : لابالله وشتردين يطير وبنات اخوج كاعدات كباله يتونس على شوفتهن

نهر : هو محد يقرا بره غير سليل

سجاد : وانتي مكيفه يله سليل اطلعي اقري لو انطيج صفاره تساعديه

اخاف تعب يصوفر

سليل : اني ضحكت من كل گلبي وهو بقى صافن عليه

سجاد : وجع شكو تضحكين

سليل : اتخيل هههههه روحي اصوفر واشر بوصله وياه كش عاااع هههههه

سجاد : وهذا يضحك

سليل : اي لان اشوفك شون تكمز وتعيط ويمكن تعلكني وتسويني عوده مال مطيرجيه

سجاد : سكتيها نهر لا اذب ضيم گلبي بيها

نهر : هههههه والله حقها شو انت بس تتعارك وتعيط متعرف تحجي على كيفك روح للناس وتفاهم وياهم والله اوادم ومايوم شفت واحد رفع عينه على وحده من البنات وخاصه سليل

سجاد : حتى افكس عيونهم

سليل : اويلي الله واني كال هيج لو گلبي كام يدك

سجاد : اروح احجي وياهم واجي وانتي ياسفيهه اكعدي اقري وماكو طلعه

ابتسمت بوجهه صار عمو

راح ساعه ورجع والجيران واعديه يبطل ابنهم يطير طيور وهو شدد مااطلع اله اتأكد ماكو احد كدامنا يله

واني غير حاظر وصار وماشي ماعندي

مرت الايام واجه الخامس وهم احتفلنا بميلادي بس هلمره كيكه كل اسمائنا عليها حتى محد يزعل وخاصه ريم لان ادك طبل اذا مسوينا والعام عمو مسوه الها قشمرها لهذا حتى متضوج وكل خواتي ميضوجن احتفلنا كلنا سوه

جان يوم مميز طبيت عمر ١٧ سنه غمضت وتمنيت امنيتين الاولى اشوف بابا وتملي عيني منه والثانيه يحبني مثل مااحبه اي اريده احبه اعترف كمت احبه كمت اشتاقله كمت انتظره كمت حتى اتعب اذا مااشوفه

وهلمره مجاب هديه كال لان لازم اربعتكم وهو حالياً ماعنده جان ميخجل ابد ويكول ماعندي الي عرفته بعدين فلوس المحل يقسم ٣ اقسام قسم النا يساعد عمه نهر مصرف بيت وقسم اله والقسم الثالث يكمل بيه ورث اخته الي صرف جزء جبير منه على علاج غزل

طلعت سديت الباب وراه كال

لتضوجين هاي السنه مشتريت هديه

سليل : لا عمو الكيكه احلى هديه

سجاد : سليل

سليل : ااااه شكد احب اسمي من ينطقه وخاصه من يكون هادئ وبصوت ناصي وحنين جاوبته بكل هدوء وكتله هاا عمو

سجاد :كل سنه وانتي سالمه

سليل : من كال هيج تكول عبالك گلي احبج زين هذا اذا كالها شلون يمكن اخرب مااتحمل

سليل : وانت سالم شكراً

سجاد : تصبحين على خير

سليل : وانت من اهل الخير

طبيت طايره ياربي ابسط كلمة مني تكلبني

مر شهر الخامس والتهينا بين الدراسه والامتحانات شعرنا منلحك نحكه متنا لحد مخلصنا واجت العطله

ومن اول اسبوع بلعطله اجت ماما تعلمنا عليها عادي بس متوقعنا اجت وجابت وياها صاعقه

كعدت واول شى كالته

تعالي سليل يمي وانتي هم نهر

نهر : هااا خير

سليل : كعدت ومخنوكه منها وجان تكول

سندس : انتي كبرتي وماشاء الله صرتي مره وعليج العين واني لان اريد مصلحتج وصار سنه اخطط لحياتج لا عبالج لان بعيده عنكم ماافكر بمستقبلكم والله ماانام الليل اله اكول اله اخلي بناتي يعيشن احسن من عيشتي ويتزوجن احسن من قسمتي

نهر : شنو قصدج

سندس : اني راح ازوج سليل لأبن خليل

نهر : ابن رجلج عزه تخبلتي

سندس : وليش يمه تخبلت شكو بيها شو ولد مال وجاه وابن عز وخير وكاعد بقصر اقلها خيرهم ميروح للغريب لبنتي اولى بيه

نهر : لا اكيد انتي مو صاحيه البنيه صغيره

سندس : باع هاي صغيره بعمرها اني هي عندي نسيتي عمري ١٦ سنه اتزوجت وبعمر ١٧ صرت ام

نهر : هاي انتي مو هي

سندس : بله اطلعي انتي منها ولتدخلين

سليل : اني مااقبل على اي اساس تزوجيني

سندس : انتي متعرفين مصلحتج وراح ازوجج ليث ابن رجلي غصب عنج

سليل : والله مااتزوج لو الدنيا تنكلب

جان مباشره تلزم شعري وحيل تعت بيه وتعيط اسمعي لج تتزوجي ورجلج فوك راسج لا عبالج اعوف ذاك الخير كله يروح لوحده من الشارع يجيبها ليث صار اشهر اقنع بخليل يزوجج ابنه موزين رضا بيج

نهر : عوفيهاوبديت ادفع بيها

سليل : مااتزوج لو تموتين جان تضربني راشدي حيل قوي ودفعتها عمه حيل

نهر : انكسرت ايدج شون تمدين ايدج عليها

سندس : انتي بلذات اسكتي لا وحق الله ابيتج بلشوارع واخلي هذا البيت يحرم عليج

نهر : سمعي سندس لا كل شويه ومهدده

وزواج وماكو لو اعرف اسويها دم وياج

سندس : امشي لج ام الدم بابا ذاك الوكت وله عبالج بعدني ذيج سندس الي حسرة عليها الفلس وتحت رحمه اخوج ورحمتكم

هسه اكدر ادوس اكبر واحد بقندرتي اسمي نار على علم وهسه اكدر حتى انتي وذاك الي تتحامين بيه اذبكم وره الشمس

نهر : والله كولشي اتوقع من الكح...

سندس : انجبي ترحيلي فدوة ولج لو بيج خير ماطلكج رجلج ياعار

سليل : كافي لتحجين على ماما كمت اعيط وابجي

هاي احسن منج اقلها مشمرتنا وراحت تزوجت

سندس : احسن مني اني اعلمج سمعيني عدل وتراب ابويه ياسليل اذا متزوجتي ليث لا اخلي هاي الي تسميها ماما تحلمين تشوفيها تقرير واحد مني اخليج ثاني يوم ترحين للنجف تزوريها

سليل : ركضت حضنت ماما حيل

نهر : انتي مره وسويها ولج حقيره الله اعلم شسويتي حتى وصلتي لهنا ولج مو كسر الرگاب بيها حوبه وشتردين سوي ميهمني انتي ونعالي

سندس : خوش بعيني

سليل : طلعت وكمت ابجي ماما فدوه مااريد اتزوج

نهر : هاي شبيج من كل عقلج اخليج تتزوجين هاي تخوط بصف الاستكان خلي تولي

روحي غسلي واني رايحه لسجاد

سليل : لزمتها لا عفيه لترحين اخاف تسوي شى لعمو

نهر : لازم نوكفها هاي وحده متخاف الله واخاف تسوي شى نندم عليه لازم انبهه

راحت انداريت شفت خواتي خايفات حيل حضنتهم احاول اهدأ وضعهن وكتلهم

ادخلو للغرفه رشا عينج عليهن

رشا : مااشي لتخافين متكدر تسوي شى خلي تولي

سليل : بستها وبست خواتي الي حتى مفتحن حلكهن من الخوف ودخلن للغرفه

وشويه واجت وياها عمو ويعيط

سجاد : هو بكيفها تزوجج

سليل : عمو عفيه مااريد اتزوج وكعدت بلكاع ابجي جان يدنج ويشيلني وكعدني على الكرويته

سجاد : لتخافين محد راح يزوجج وهاي امج اني الها

نهر : فدوه دير بالك نسيت هي حزبيه جبيره ورجلها هم

سجاد : انعل ابوها لابو حتى الحزب

نهر : صخام صوتك ليسمعوك هو احنا ناقصنا مصايب

ومنا الجهال اخاف يحجون بلشارع ميعرفون

سجاد : اليوم احرك اهل اهلها ولو اهلها خوش ناس بس هي عار سكط

سليل : شراح تسوي عفيه خاف تأذيك

سجاد : لتخافين شويه وجاي

طلع وانتظرنا ساعه تجر ساعه وهو ماكو ومتت بدمي الخوف سيطر عليه شسوي وعمه هم خافت حيل لان هوايه تأخر صار العصر وهو ماكو

لبست العبايه عمه وطلعت

نهر : رحت للمحل افهم وين صار سجاد

شفت هذا الولد عمران وسألته

متدرين غير اخذته الشرطه اجت عليه دوريه وشالته

نهر : صخام بوجهي ليش

عمران : منعرف هو من اجيتي انتي عليه وراح وياج رجع دياخذ فلوس ويبدل واجوي عليه صارو فوك روسنا

نهر : تخبلت عرفت راح تأذي

رجعت للبيت واني شايغه روحي ومفرفحه والله وعرفتي تلوين ايدنا ياسندس الساقطه

رجعت عمه من كالتلي على الخبر متحملت وكعت حسيت الدنيا افترت بيه محسيت غير هدومي كلها مي والبنات خواتي يبجن واني بحضن عمه

نهر : ولج يمه كومي مو والله راح اموت من الهبطات

سليل : كمت اصرخ وابجي روحي كوليلها والله اتزوج بس خلي اطلع عمو من السجن

نهر : على كيفج ياامي منو يكول هي

سليل : لا هي متأكده ورادت تخلص من عمو ويجوز هسه تسوي شى موزين الج ابوس ايدج ماما روحي الها وكولي اتزوج بس متأذيكم

نهر : كافي بداعت ابوج كافي مو گلبج راح يوكف من البجي

سليل : اذا صار بيه شى مااتحمل والله اموت والله صفنت عمه عليه بحيث جنت فاقده فكره مااشوفه بعد او يكتلوه او يصير مثل بابا بلسجن العمر كله مسيطره على راسي وخلتني انهار واهذري بلحجي

نهر : تعالي رشا ساعديني

كوموني وغسلو وجهي وتمددت بلفراش انتهيت كل شويه احط المخده على حلكي وابجي

مر اليوم عليه مر والله امر من العلقم والليل كله ابجي واتخيل كعد يضربوه لو يگتلوه ويدفنوه لان اكيد ماما سوت شى جبير حتى ياخذوه

طلع الصبح صعدت مثل المخبله للسطح وادعي يرجع اباوع على السما واشهك من البجي لحد محسيت عمه تكومني وتنزلني

نومتني بفراشي وغطتني بدون متحجي شى

وغمضت من التعب

نهر : اباوع على سليل حالها متغير من اشهر والبارحه الي صار وانهيارها اكدلي شكي الجنت خايفه منه صار اااااخ ياربي لتشلع گلبها بشى مستحيل والله هاي البنيه من يومها مظلومه مااريدها تنكسر اكثر ماهي مكسوره والي هسه تحس بيه اكبر غلط وراح يضيعها شسوي ياربي وين انطي وجهي

وينك طه الحمل زاد وبدا يكسرني ياخويه

مابيها مجال لازم اسوي شى

اخذت العبايه ولبستها وطلعت وركض لبيت انوار

دكيت الباب فتحته وتخصرت من شافتني

خير شرايده

نهر : اريد عنوان بيت سندس

انوار : واني شكو ماعندي

نهر : اعرف كولش زين عندج انتن غير صديقات

انوار : ماانطي

جان تطلع امها حجيت وياها وهي انطتني العنوان وانوار تخبلت عفتهن يتعاركن وبسرعه رجعت للبيت اخذت جزداني واول تكسي وكفته حتى بدون مااعامل

ورحت لبيتها وصلت منطقه راقيه كولش والبيت قصر هزيت ايدي والله وكت تلام امي من تكول بت الفكر تعالي ياانعام وشوفي بت الفكر وين عايشه

دكيت الجرس واجت مره فتحت الباب

خوش والله وعدها خدامه اااخ يلوكت من ينطي جوز للماعنده سنون

دخلتني من كتلها اني عمه جهالها

اباوع على البيت هاي هنا عايشه وشامره بناتها بيت تعبان ولج ياسندس الحرك بيج قليل

وجان تنزل المسعده تتمخطر وطك طك بلشحاطه العاليه والل شكد عدها فلوس يبقى الفكر يعيط على وجهه وذوقها السزز

سندس : شكو جايه شتردين

نهر : انتي بلغني عن سجاد

جان تنزل وكعدت وحطت رجل على رجل

سندس : والدور الج بعده

نهر : اليوم يطلع ميبقى

سندس : هههههه شنو وجايه تأمريني بابا روحي تلاحكي لروحج وعوفي ذاك يخيس بلسجن عبالج اعوفج واعوفه تخربون تعبي وعود سمعوني صوتكم وغلطكم وتجاوزكم عليه

نهر : يطلع لا والله هسه اروح بوجهي لأقرب مقر حزبي وابلغ عليج

سندس : هههههه شتبلغين بله

نهر : تقربت منها وكتلها اكول على اخوج المهزوم بأيران وشلون هو ضد الدوله هو وعمج وانتي ضامه الموضوع

حسيت وجهه انخطف لونه بس بينت قويه

سندس : عبالج ميعرفون كلها تعرف واني اصلاً تبريت من اخويه

نهر : خوش اذا مدايره بال ومخايفه اروح وابلغ

جان تكوم تعيط

سندس : هسه شرايده

نهر : يطلع سجاد واليوم وتنسين موضوع سليل

سندس : سجاد يطلع سهله بس موضوع سليل ماانساه وراح ازوجها وهاا بموافقتها وعود ذاك الوكت اشوف شسوون

نهر : طلعي سجاد اليوم منا للعصر اذا ما اجه وداعت طه البعتي عليه وعلى اعدائي

عفتها وطلعت بس ماانكر ماخفت منها هاي مو سندس القديمه الي نكدر عليها بعيطه بلغلط نعيرها هاي وحده قويه فلوس وجاه عدها يعني اي حرب وياها اكيد نخسر

بله هسه كدرت اهددها بموضوع اخوها همزين سجاد حجالي بله لو محاجي جان شلون يمكن يصير مثل جعفر لزمت گلبي يمه اسم الله مابيه حيل اخسر اخ لاخ سجاد اعتبره اخويه وخاصه هاي السنين صار قريب حيل مني ومعزته جبيره بعد طه

رجعت للبيت وبقيت كاعده حتى شغل ايدي مأخذت تعبت من التفكير والقهر

وساعه بعد ساعه بيومها حتى البنات اباوع عليهن دمعتهن بعينهن وكوه رشا وكلتهن اما سليل بغير عالم

صار العصر جان تندك الباب طلعت اركض اكول اكيد سجاد

وصدك طلع هو

كمت ابجي من الفرحه لان شفته جنت حيل خايفه عليه

سجاد : يمعوده شبيج قابل متت هو توقيف كم ساعه

نهر : ياكم ساعه جان رحت بيها من وره هاي الساقطه الادبسسز

سجاد : اني عرفت هي سوتها

نهر : تعال طب خطيه سليل منتهيه عليك

سليل : سمعت صوته واني ابجي وحاصره وجهي بلمخده رفعت راسي اي هذا صوته وطلعت ركض من الغرفه وشفته كدامي من حلات روحي ممصدكه ركضت وحضنته واشهك بلبجي نسيت عمه وخواتي ومهتميت لأحد من خوفي عليه هو بقى يمسد بشعري ويكول شبيج جبانه ماكو شى

سليل : خفت حيل ليصير بيك شى

سجاد : كافي خوش حجه اجتج عيد عندج هسه تبجين براحتج

نهر : كافي ماما خلي يكعد يرتاح

سليل : جنت حاضنته بقوه ولهفه عجيبه حتى مااريد اوخر من حضنه بس حسيت ايد انمدت وجرتني بهدوء باوعت عمه وحطتني بحضنها وكأنها تكولي كافي حضن لتنسين نفسج

اجوي البنات يركضون عليه ويبوسون بيه فرحانات وشويه وعمه كالت ادخلو جوه عندي شغله ويه عمكم

ردت ابقى مقبلت

ودخلنا للغرفه تمنيت اعرف شصار معرفت وراها سمعت صوت الباب انسد عرفت راح حتى متجرأت اسأل عمه

وثاني يوم ماكو واني گلبي نار ليش مأجه بس عمه ممرتاحه مدري شبيهه

حجي طه : احجي سجاد شون تفكر هيج بسليل شون تعقد عليها

سجاد : وكعدت سولفت كولشي اله وهو يضرب بلميز الي يمنا

حجي طه : تخبلت الحقيره شون تريد تزوجها لناس زباله  شون اطلع اريد اطلع سجاد واذبحها

سجاد : والله اني اريد اذبحها بس حرامات اوصخ ايدي بيها

من البارحه منايم وبس افكر ملكيت غير هذا الحل حتى بعد تركع راسها بلحايط

حجي طه : قابل بكيفها خلي تولي متكدر تجربها

سجاد : اني مااخاف منها لان وحده حشره ادوسها بقندرتي بس خايف من تهديدها يخوف سليل وهاي جبانه مشفتها شصار بيها هذا الحل يضمن متتقرب منها بعد ولا تهددها سندس مراح ترتاح ولا تهدأ اله تزوجها لابن رجلها

بقى ساكت طه ويروح ويجي مثل المخبل

اكعد مو دخت من روحتك وجيتك

حجي طه : باوع عليه وكال موافق بس بشرط

يتبع ...

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_التاسع_والثلاثون

#مدونة_نور_قلبي

شـايـف مـن تـهـز حـسـراتـك الـگـاع

ومامـش بشـر گـدهـا يصيـرلـك بـيـر

شـايف مـن يـسـألونـك علــه الـحـال

تگـول بخـيـر وأنـت مضيـع الـخيرر .. ..

حجي طه : باوع عليه وكال موافق بس بشرط

سجاد : شو شرط

حجي طه : اسمعني وفكر بكلامي وشرطي عدل

بس قبل الشرط عندي سؤال واريدك تجاوبني بصراحه ولو صعبه عليه اسأله بس لازم

سجاد : كول

حجي طه : انت عندك مشاعر تجاه سليل

سجاد : شون يعني

حجي طه : يعني اذا تزوجتها تكدر تعاشرها وتكون مرتك صدك

سجاد : وكف على حيله مستغرب وكال شبيك طه شو سؤالك مدري شلونه اني كتلك اعقد عليها حتى امها متأذيها وتجبرها على شى متريده وهم نحافظ على مستقبلها مو اتزوجها واعاشرها

حجي طه :سألتك وجاوب

سجاد : طبعاً لا سليل بلنسبه اليه اختي الصغيره حالها حال هبه واذا جنت اخاف زياده عليها بسبب لان جبيره خواتها ولازم تصير قدوه الهن وبسبب الظروف المرت بيها مااريدها معدومه الشخصيه ولان هم خواتها من هنه وصغار قويات اله هي فقيره وتبجي على اقل شى لهذا ردت اربيلها گلب

حجي طه : ماشي سمعت جواب سؤالي اسمع شرطي

سجاد : كول

حجي طه : تعقد عليها وتصير تحت حمايتك واعرفك متقصر اذا طلعت بيوم من السجن ثاني يوم من طلعتي اطلكها هاي حاله

اوفي حاله بيوم رادت هي تطلك منك تريد تتزوج زواج طبيعي وعن قناعتها هم اطلكها  وبدون اي تردد وتعوفها لحياتها وبدون متلمس شعره منها يعني تبقى مثل ماهي واذا مطلعت ومتت هنا

وحسيت بعد مده انت كدرت تجتاز مرحله تكون اختك وتقبلتها مره الك ونفسك مالت الها بأي شكل واكيد هم بعد موافقتها تمم زواجك بيها وخليها ام جهالك وابد مطلكها

سجاد : شون اتمم زواجي مستحيل

حجي طه : اني حطيت الحالتين كدامك وانت اختار بس في حال مكدرت تتقبلها كزوجه طول الحياه اياك تلمسها مو تتزوجها وتتقرب منها وتكسر بختها وتعوفها

سجاد : تتوقع هيج مني

حجي طه : انت ذهب صافي والعيبه متطلع منك لو اعرف بيك خلل واحد بلميه مستحيل اتوسل بيك تخلي بناتي واختي برگبتك بس تبقى شاب ومهما كان تبقى هي بنيه وحلالك والنفس اماره بكولشي

سجاد : لتخاف واني نفسي واعرف اتحكم بيها واكو شغله نسيتها فرق العمر بينا تبقى سليل طفله

حجي طه : سليل صغيره مو طفله اكو فرق لتنسى عمرها ١٧ سنه وبعمرها اني متزوج امها وعدنا هي يعني هيج عمر اكو بنات هوايه يتزوجن بعمر صغير بس مو طفله واذا على الفرق ١١ او ١٢ سنه فرق مو هوايه اكو ناس يوصل الفرق بينهم لل١٨ سنه هذا مو قياس واني من كتلك تمم زواجك بيها لان ماالكه رجال زين مثلك لبنتي ومو عيب افكر بيها واريدها تصير تحت حمايتك ومرتك لان لو تجي للواقع محد يستاهل هاي الغزاله غيرك بس انت تكول هي اختي

سجاد : اي اختي وتبقى

حجي طه : ماطول هيج تحرمها على نفسك حرمت الاخ على الاخت ويوم متحس سليل مو اختك ونفسك تغيرت عندك حل من اثنين لو اطلكها لو اتمم زواجك منها

لتكسر بخت بتي سجاد هاي غزالتي اول فرحتي

سجاد : لتخاف بتك اعقد عليها مده واعوفها شوكت ماهي تريد

حجي طه : واذا طلعت  هم لتنسى

سجاد : ان شاء الله تطلع

حجي طه : توكل بالله

سجاد : محتاج شى

حجي طه : اي

سجاد : تأمر

حجي طه : بنتي حطها بعيونك ولتأذيها

سجاد : ان شاء الله

سليل : اباوع عمه كاعده وحاطه ايدها على خدها وتعبانه حيل واني مو اقل منها روحي تلوب عليه ومااعرف شصار ومااعرف ماما بعد شسوي وشنو الضامته النا

وشويه وشفت عمه طفرت طلعت وراها لكيتها تفتح الباب لعمو سجاد

اوف مي بارد ونزل على گلبي  الْحٍمَدٍ للـّہ مابيه شى

نهر : تعال طب وين جنت والله موتتني رعب گلت بس لا صار شى

سجاد : قابل شيصير شبيج

نهر : والله كلت منا للعصر مبينت اروحلك للمحل

سجاد : جنت يم طه

نهر : طه ليش بيه شى الله عليك

سجاد : مابيه يمعوده يعني شون نبقى واكفين بلباب ونسولف

نهر : تعال ادخل

سليل : شلونك عمو

سجاد : هلو انت شونج اليوم

سليل : دنجت وكتله  الْحٍمَدٍ للـّہ بس گلبي يكول تعبان وروحي هلكانه من القلق عليك

دخلنا واول مكعد كال تعالي سليل اكعد

كعدت بصف عمه وهو گبالنا اول شى سواه سحب النفاضه وخلاها بصفه ورث جكاره وسحب نفس وجان يكول

سجاد : جنت يم طه رحت اخذ رأيه على شغله وافق عليها

نهر : شنو هي قلقتني

سجاد : راح اعقد على سليل

سليل : من الهبطه ردت اخرب لا اكيد كعد احلم بقيت اباوع بدون ماارمش من الصدمه

نهر : انت من كل عقلك شنو تعقد سجاد

سجاد : عندج غير حل يله انطيني هاي امها وحده ادبسسز ومتستحي وعدها قابليه تحرك الاخضر واليابس علمود نفسها ومصلحتها والفلوس حتى لو تشمر بتها بتهلكه واليوم كدرنا نوكفها باجر شلون يجوز تسوي الف لعبه وتجبرها على الزواج

نهر : مستحيل لازم اكو غير حل وشون طه قبل

سجاد : كتلج ماكو غير حل من تصير بذمتي تركع راسها بلحايط شتريد تسوي قابل

نهر : وشون تتزوجها ولك راح اتخبل يعني مستقبلها كله يروح

سليل : مباشره كلت  وهمه يتناقشون وعمه منهاره

اني قابله

عمه اندارت عليه وعاطت وهاي اول مره تسويها

نهر : اسكتي انتي شنووقابله

سجاد : على كيفج نهر تره الموضوع مينحل بعياطج

نهر : زواج ماكو واني لو اعرف اكتل سندس وادخل بيها سجن ومااخليها تتقرب من سليل

سجاد : هذا حجي انتي من كل عقلج تكدرين على هاي الحيه الي مثلها عدها قابليه تذبح وتصلخ المهم محد يوكف بوجهه وهاي بتها شتريد تكولين قانوناً هي امها واحق منج بيها ومو بس هاي حتى لو وكفنا اني وياج ضدها راح تسوي المستحيل وتخلي بت اخوج برجلها تروح الها وتكولها ماما موافقه اتزوج وبذاك الوكت عود خلي يفيدج عياطج

نهر : دمعت عيني وكلبي صار نار خايفه حيل عليها وبنفس الوكت مااعرف شلون احميها

سجاد : البارحه سألتج وكتلج من درت سليل اخذوني الشرطه شكلتي كلتي صاحت قابله اتزوج بس خلي يطلعوه زين لو تنعاد الحاله بيج او تسوي شى لوحده من خواتها تتوقعين هاي الجبانه راح تسكت اول شى تسوي تركض مثل المخبله لأمها زوجيني حتى تكف الاذى عنكم

وحتى لنوكع بهيج مطب اخليها على ذمتي وخلي تركع راسها سندس بأقرب حايط

سليل : وافقي عمه صدك هذا احسن حل

نهر : وشلون تتزوجها لو شنو

سجاد : اعقد عليها بس عقد

نهر : يعني مو زواج كامل

سجاد : لا بابا يازواج كامل هاي اختي اكو واحد يتزوج اخته

سليل : حسيت الكلمة ضربت گلبي اعرف هو يسوي هيج حتى مااضيع بس تمنيت يكول متروح لغيري او اي شى بدال مايكول اختي دنجت وجريت تنهيده احسها زرفت صدري من القهر بس ارجع واكول احسن مااتزوج ابن رجل ماما لان صدك لهسه منعرف شراح تسوي

نهر : وشوكت اطلكها

سجاد : هو هسه اني اتزوجت حتى اطلك وهاي كدامج شوكت متريد اطلكها بس تعدي مده وامها تنسى موضوع الزواج وعد مني شوكت متريد اطلكها

نهر : جريت حسره وقهر لان اعرف بت اخويه تحبه وفوكاها راح تصير مرته شلون حالها ياربي هونها عليها هاي مراهقه ومتعرف مصلحتها عساها بحضج وبختج ياسندس كون متشوفين يوم راحه بحياتج مثل ما سالبه راحتنا

وطه سوده عليه عرف مو

سجاد : شحجي صار ساعه مو كتلج اجيت من عنده وافق على كولشي

نهر : اكيد مات قهر

سجاد : حقه مو هينه عليه وهو هم فكر ويايه وملكه احسن من هذا الحل

نهر : زين من تعقد وين تاخذها

سجاد : شبيج وين اخذها اكيد تبقى هنا يمكم الوضع كما هو ميتغير ابد بس الفرق متكدر سندس تزوجها وهذا هو

نهر : زين وشوكت تعقد

سجاد : المشكله هسه هي قاصر ولازم ولي امرها لازم اروح لمحامي واستشيره حتى ابدي بالاجرائات من هسه

عندج شى سليل تردين تكولي

سليل : باوعت عليه وكتله سوي الي تريده واني وياك من رخصتكم وخليت وطبيت احس نفسي متضايقه ومشاعر متضاربه من باب اصير زوجته ومن باب اعرف شى مؤقت ولغايه وراها كولشي ينتهي

دخلت للغرفه لكيت رشا صافنه

هااا شبيج

رشا .. راح تتزوجين عمو

سليل : دنجت استحيت منها شكول ياربي

رشا .. زين اذا تزوجتي راح يصير زوج اختي لو عمي وماما من تعرف اكيد مراح تسكت واحتمال تسوي كارثه

سليل : كعدت بصفها شسوي كوليلي

رشا .. خايفه سليل حيل

سليل : من شنو خايفه

رشا .. خايفه لتزوجني اني

سليل : لا متسويها بعدج صغيره

رشا .. كلها سنتين واصير بعمرج وهم راح تفتر ورايه قابل هم يتزوجني عمو شطلعت هاي ماخذنا مقاوله

سليل : ابتسمت لتخافين مااخلي ماما تزوجج غصب بذاك الوكت اني كبرت لو اعرف انهزم بيج ومااخلي تسوين شى ميعجبج

حضنتني حيل وكالت

رشا .. اني كولش احبج سليل اني امي واختي انتي كولشي بحياتنا لتعوفينا بيوم

سليل : مااعوفكم لو اموت

يله كومي نرتب الغرفه صايره هوسه لتجي عمه وتحجي كافي هي اعصاب لتذب حركتها بينا

رشا .. ابقي مرتاحه اني ارتبها انتي عروسه هسه

سليل : ههههه ولج صدكتي هذا كله فلم حتى مااتزوج ابن خليل

رشا .. ويجي يوم الفلم يصير حقيقه

سليل : فتحت عيني عليها استغربت من كلامها باستني من خدي وبدت تلملم الملابس والغراض

تمددت على ظهري وراسي رافعه للسكف وافكر شراح يصير بالايام الجايه

مطلعت بعد وعمه مشفتها بيومها لان اعرف بيها ممرتاحه وتعبانه حيل وقلقه وحتى البنات من دخلو عليه بستهم وكتلهم تعبانه اطلعو حبابات ورشا طلعتهم

مر يومين واني غير السلام ويه عمه ماعندي وكل مااباوع بوجهه احسها مدمعه ومقهوره وممروده حيل لا هي تكدر تفتح الموضوع ولا اني

وثالث يوم بليل كاعدين نتعشى واندكت الباب وطفرت ريمو فتحت الباب وطب عمو

سجاد : السلام عليكم

نهر : وعليكم السلام

سليل : مدنجه اكل مرفعت عيني وبهدوء من اجه كمت حتى كوه ابلع اللكمه

سجاد : سليل

سليل : رفعت عيني بعيونه وكتله نعم عمو

سجاد : حضري نفسج باجر نروح نحلل دم كملت نص الاجرائات

نهر : بهاي السرعه

سجاد : شعدنا اليوم الواحد يفرق ومنعرف شكعد تخطط الرفيقه المناضله سندس

نهر : الله ياخذها ويخلصنا منها

سجاد : شو ساكته

سليل : شكول

سجاد : عندي شى

سليل : كتلك عمو شسوي اني وياك

سجاد : باجر ساعه ٨ الصبح اجي اخذج

نهر : اجي وياكم

سجاد : تعالي اذا تردين بس البنات شلون يبقن وحدهن

نهر : هااا اي هم صّـْْ(☑)ـْْحّ روحو وحدكم بس دير بالك عليها

سجاد : لا بالله اني توصيني

نهر : هسه اخذني على كد عقلي وكلي اي

سجاد : لا

نهر : اهوو سجاد والله گلبي مقبوض وانت هادئ ولا داير بال

سجاد : شتردين اكطع روحي بلعكس منتظر اللحظه الي اشوف الرفيقه الماجده سندس

ريم : اجي وياكم عمو

سجاد : وين ترحين

ريم : اي مكان اريد اطلع من البيت عمه متقبل العب بلشارع

سجاد : كبرتي زيبك وراح ترحين للمتوسطه شويه اعقلي واثكلي

ريم : لا عمو بعدني اريد العب طوبه ويه سحليه واشتري من الدكان وياه

سجاد :خليها تطلع ويه حسين

نهر : يمعود اخاف عليها من امي اخاف تعرف واطيح حظه

سجاد : اني سألته مره وكال يجي بدون علمها

نهر : ميخالف اخاف تشوفه وياها وتلعب بيهم طوبه وهاي ريم لسان متسكت

ريم : لا اسكت عمه اسكت بس اطلع وياه والله ضجت محلوه العطله

نهر : هسه مو وكتها بعدين نسولف

ريم : هيييي وافقت عمه

نهر : ولج منين وافقت

ريم : لا وافقتي مو عمو

سجاد : اي تره وافقتي

نهر : هلمره انت وياها عليه

سجاد : لتخافين حسين سبع ويخاف عليها واني موصي

نهر : الله كريم

سليل : كملت اكل وكمت حتى بدون مااحجي وغسلت وطبيت للغرفه

وبقو همه يسولفون

تمددت وسويت نفسي نايمه مااريد احجي ويه احد

ثاني يوم بدلت شون مجان وطلعت لكيت عمه واكفه بلباب وجهه ممرود

سجاد : كملتي

سليل : اي

سجاد : يله صديقي عنده سياره اخذتها نروح بيها ونجي حتى منتأخر

سليل : يله

نهر : تعالي ابوسج وحضنتني حيل عمه

تكول عبالك مسافره

وطلعت وياه وكعدت بصفه جان گلبي يدك بهدوءعجيب لحظات كاعده يمه واشتم ريحته وفتح كاسيت وطلعت اغنيه لكاظم الساهر جنت اول مره اسمعها

أحبك جدا وأعرف أن الطريق إلى المستحيل طويل

(وأعرف أنك ست النساء

ست النساء وليس لدي بدليل

وأعرف أن زمان الحبيب إنتهى

آه ومات الكلام الجميل

أحبك جدا

وأعرف أني أعيش بمنفى

وأنتي بمنفى وبيني وبينك

ريح وغيم وبرق ورعد وثلج ونار

وأعرف أن الوصول لعينيك وهم

وأعرف أن الوصول إليكي، إليكي إنتحار

ويسعدني

ويسعدني

ويسعدني أن أمزق نفسي

لأجلك أيتها الغاليه

دمعت عيني كلامها حيل لمس گلبي وعبالك رساله من سجاد اليه ويه الاغنيه نزل الجامه ويدخن بس مطلع ايده ويسحب بهدوء

واني صافنه على الشارع وكلمات الاغنيه ترن بأذني

وصلنا للمستشفى ونزلنا بس كلمة اسمع منه تعالي منا وروحي منا يدليني الطريق وانتظرنا السره ودخلنا اني اخاف من الابر بسرعه اصفريت المحلله ابتسمت وكالت

شبيج ماما هي جكه بسيطه باوعت عليه وكأني استنجد بيه مباشره لزم ايدي بقيت اباوع عليه بس هو ميباوع وبگلبي اكول شيصير لو هسه انت تحبني ربع الحب الي احبه الك مجان هسه طايره من الفرحه وياك لن راح نعقد بس مبين اني بس الاحلام املكها

كملنا الفحص ورجعنا بلطريق اشترالي عصير اخاف اتخربط لان حسيت بدوخه اني اخاف من الدم والابره

وبلرجعه وصلني للبيت وبس كال

سجاد : احسبي حسابج يومين ونعقد لان عندي واسطه يطلعون التحليل بسرعه

سليل : اشرت براسي اي

سجاد : محتاجه شى

سليل : لا

سجاد : رايح وشخط السياره وراح ليش هذا البرود الي بينا قبل ولا يعاملني هيج

دخلت للبيت استقبلتني عمه من الباب وكعدت سولفت الها الصار الي هو عباره عن كولشي مصار رحنا واجينا ساكتين

وراها بيومين اجه من الباب بلغ عمه وكال تحظر روحها

نهر : بس هي قاصر شلون تعقد الها

سجاد : حليتها لتخافين

اجت عمه بلغتني واني نزل عليه برود مو طبيعي ولا اهتميت تمددت من ساعه ٩ بليل حتى عشى متعشيت مااريد اشوف احد وره مده مااعرف شكد

حسيت بطكطكه وخرت الغطا من راسي لكيت رشا تگلب بلملابس

سليل : شسوين

رشا .. احضرلج ملابس

سليل : مال شنو

رشا .. مال باجر

سليل : وشكو باجر

رشا .. عرس امي غير وراج عقد محكمه  واخاف ترحين لغير مكان بيش ترحين بلدشداشه والنعال

سليل : يمعوده اي شى البس

رشا .. واني هم كعد احضرلج اي شى قابل حضرت بدله

سليل : شو انتي مصدكه الموضوع

رشا .. مو شغله مصدكه بس لازم ترحين مرتبه عمو دوم مرتب ملابسه من يطلع شون ترحين وياها جنج ميساء السحاره وانتي وكفشتج

سليل : لا اسوي تسريحه واروح مو والله بطرانه

رشا .. اسكتي بله شوفي حضرتلج بنطرون جينز وقميص مربعات مالتي الجديد والحذاء مالتج الي مقبلتي تلبسي وتكولين مااعرف امشي بيه

سليل : اي صدك مااعرف امشي

رشا .. باجر اعرفي وطلعي مرتبه وشعرج شسوين بيه

سليل : يمكن احط ربطه

رشا .. انتي بس بلمدرسه تلبسيها علمود غزل المن لابستها بلعقد شيلي لشعرج ذيل حصان

سليل : رشا متوخرين من يمي ذيل حمار احلى

رشا .. حمار حصان هي كلها ذيول المهم تشيلي مو ظفيره جنج بالاول ابتدائي

سليل : انتي ماعندج شغل وعمل وجايه تكمزين يم راسي

رشا .. حبابه بس باجر والله ملابس بسيطه ومرتبه شبيج

سليل : باوعت عليها وعجبتني الفكره مااشي

رشا .. هلا هلا فكت العقده اهلهل

سليل : اششش ليسمع احد

رشا .. سكتت

سليل : ابتسمت على عفويتها ورجعت غطيت راسي وكلمعتاد ماانام الليل اله الفجر اصلي وانام

كعدت الصبح على صوت عمه وهي تكولي اكعدي ماما مضل وكت

كمت بيش الساعه

نهر : ساعه ٧

سليل : بعد وكت

نهر : غير تبدلين وتاكلين لكمه خوما تضلين جوعانه

سليل : مااريد مجوعانه

نهر : ميصير ياامي

سليل : عفيه ماما مااريد

نهر : راح اسويلج جاي وحليب

سليل : واني راح اسبح وابدل

نهر : ماشي

سليل : سبحت وطلعت نشفت شعري زين ردت اضفره بس باوعت على رشا النايمه على بطنها وفاتحه رجلها ومكفشه تكول مقاتله بمعركه بدر وتعبانه

ابتسمت على نومتها وبديت امشط شعري الطويل ورفعته عالي ذيل لحصان ولبست الملابس الي حضرتهم اليه وطلعت

نهر : باوعت على سليل اول مره اشوفها هيج اليوم فتحت عيني ممصدكه هاي بنت اخويه كبرت وصارت عروس رغم بساطه اللابسته بس طالعه حلوه وحيل مرتبه

فدوه للبنات الحلوات

سليل : خجلت وكتلها شكراً ماما

نهر : تعالي

وركضت جابت عطر ورشتلي شويه جانت ريحته كولش طيبه وهادئه

تعالي اشربي الحليب

كعدت شربت باوعت للساعه صارت ٨ الاعشره

ليش متجين ويايه شون اروح وحدي

نهر : ياريت ياماما بس اخاف يصير شى وماكو احد هنا اخاف امج تجي غفل وتسوي شى اقلها اني هنا

سليل : واحنا نبقى هيج خايفين منها

نهر : الله كريم بس خلي تخلص شغلتج

سليل : سمعت صوت الهورن نفسه مال البارحه

نهر : اخذتي المستمسكات

سليل : كلهم يم عمو باقيات

نهر : ديري بالج على نفسج امي

سليل : صار

طلعت من الباب لكيته واكف منتجي على السياره باوع عليه بنظره غريبه من فوك ليجوه

وجان يكول بهدوء اصعدي

صعدت كعدت يمه بس ليش احس بخجل وخوف ليش كمت احسب حساب للهمسه اذا تطلع مني

وهو ليش هيج هادئ ‏‏ بس سلام وبس

وصلنا للمحكمه احس وجهي نار من الخوف تكول راح يعدموني

كعدني بمكان وكال دقايق واجي مدري وين راح متت خوف رغم مو هوسه ناس قليل بس لان اول مره ادخل هيج مكان وراها اجه

وين جنت عفيه

سجاد : تعالي

سليل : مد ايده ولزمته من ايده وكال بصوت هادئ راح يجي سرانا وراح يصير شى بس اريدج تصيرين قويه وسباعيه

سليل : رجفت من الخوف شكو عمو

سجاد : مفاجأه

سليل : شنو

سجاد : تعالي

وصلنا للباب شويه وصاحو اسمائنا

سليل طه ياسين وسجاد جلال

طبيت اباوع رجال كاعد اتوقع القاضي وكاتب وعمران صديق سجاد ولد غريب مااعرفه

سألني القاضي انتي سليل

جنت خايفه لدرجه بلا وعي لزمت ايد سجاد حيل

وكوه تطلع الحجايه مني

باوع باوراقنا وكال قاصر وين ولي امرها

دمعت عيني ودنجت

وجان يهمس عمو بأذني

شوفي منو اجه

ااااخ بيه عيطه تسمع المحكمه كلها شفته دخل وبيده الكلبجات الشعر ابيض والوجهه ضعفان بس مزين وعيونه المغوركه بلدمع نفس العين الحنينه الجنت اعشقها ركضت بسرعه واعيط بابا ونسيت اني وين وحضنته حيل واشهك بلبجي وهو هم يبجي ويايه ويبوس بيه

سليل : ليش بابا هيج حارمنا منك ليش

حجي طه : اخاف عليكم ياعيون ابوج وروحه شونج غزالتي ولج صايره عروس ماعرفتج

جان يصيح القاضي تعالي ازوجج وهديتي الج ١٠ دقايق تكعدين وياه بس خلي نكمل

سجاد : شكراً تعالي يله

وسحبني بهدوء من حضنه الي ماودي اتركه وكفنا يم القاضي والله نسيت سجاد ونسيت نفسي وكولشي بحياتي بس اريد اشبع شوف منه اشتاقيتله بكد الهوا الي اتنفسه اباوع وهو هم يباوع عليه ودموعنا تصب سوه دموع تشرح حب الاب وتضحيته لخاطر بنته دموع تشرح كميه الالم والمعاناه الي عشناها بعده وشلون الزمن يلعب بينه لان هو مو ويانه

كوه طلعت مني كلمت انت وكيلي 

ردت بس يخلص العقد حتى ارجع احضنه ارجع اشم ريحه ابويه ريحه الحنيه والطيبه والحنان هذا خيمتي الي انهدمت فوك راسي يوم ما عافنا وانسجن ردت احضنه واشبع من حضنه الي انحرمت منه سنين بسبب واحد ميسوه التراب الي يدوس عليه ابويه

وتم العقد وبحضور ولي امري الي متوقعت اشوفه يمكن اسعد شى صارلي من يوم حادثه الحقير

وركضت حضنته وابوس بيه واشهك مره ابوس ايده مره راسه فقدت

دخلونا بغرفه وكعدت يمه ولازمه ايده

حجي طه : ولج صايره عروس متوقعت هيج كبرانه

سليل : عوفك مني انت شلونك وشلون صحتك

حجي طه : من شفتج ردت صحتي وعافيتي

شلونهن خواتج وعمتج

سليل : كلهم بخير وكلنا ميتين عليك نتمنى نشوفك ليش متخلينا نزورك

حجي طه : اخاف عليكم بنتي ابقو بأمان هيج

سليل : ياامان بعدك

حجي طه : انتي شلونج وهاي امج الحقيره شون دكات تسوي بيكم ااخ لو بره السجن اله اذبحها

سليل : شنسوي حظنه من الدنيا هي امنا

وبقيت اسولف وياه وكل شويه يبوسني وابوسه وابجي ولا بطلت بجي لحد مااجه الشرطه وكال خلص الوكت توسلت بيه مقبل كال لو ما القاضي مجان بقيته

تقربت منه وبست ايده وجان يكولي

حجي طه : بابا اسمعي كلام سجاد ولتكسرين خاطره بيوم ولتنسين انتي هسه مرته لو مهما كان لتكسرين كلامه وعينج على خواتج ونهر امانتج هاي الحنينه بوسيلياهم كلهم وحده وحده

وانت سجاد اذا گبل هي امانتك مره هسه الف مره

سجاد : صار حجي لتخاف بعيني

سليل : بابا فدوه دير بالك على نفسك

حجي طه : لخاطر هاي العيون الحلوه ولخاطر خواتج ادير بالي صار بس لتبجين كافي

شهكت من البجي وكوه سحبوه مني جان يسحبني سجاد لحضنه

سجاد : كاافي اسكتي المفروض هسه طايره من الفرح لان شفتي

سليل : بحضنه ابجي واحجي شوكت يطلع ليش يخلص عمره هناك كله من ورايه

سجاد : رجعنا مااحب اسمع هذا الحجي منج ويله امشي ليطردونا منا

وخرت من حضنه وكتله

شون جبت بابا

سجاد : امشي نطلع وافهمج وامسحي عيونج هسه عبالهم كاتلج يمعوده ويجروني تحقيق

ابتسمت ومسحت عيوني وطلعنا شفنا عمران واكف هو ولد سلم عليهم وراحو وركبنا السياره

وكال تتريكين

سليل : مجوعانه وامسح بعيوني

سجاد : اني جوعان امشي ناكل واسولف الج

سليل : يله ورحنا مطعم وجان اول مره ادخل مطعم وفوكاها ويه سجاد الي لحد هسه مواعيه من صدمه شوفه بابا ومفكره تره اني هسه مرته

كعدنا وطلب الي كباب وهو هم على واهسه بديت اكل لان جعت من وره ريحه الاكل

وبدا يسولف

سجاد : زواجج ميصير اله ولي امرج لان قاصر وكالو عمها وبما ان عمج علي كولش انسان خير مردناه لان مراح يجي يصير وكيلج ويجوز يخبث ويروح يبلغ المناضله سندس وتخرب الشغله كلها

سألت كالو يصير نقدم طلب بأن ولي الامر يحظر كون ماعدها اخ اكبر منها توكله ويعقدلج ويرجعوه للسجن وركض واسطه ومنا ومنا كملت الشغله بيوم واحد وانتظرت موعد العقد معودت صار الوكت ايدي على گلبي ليخرب شى وتتأجل وشفتي اجه بنفسه وهم شفتي وكمل كولشي

نزلت الاكل من ايدي وكتله

مااعرف شون اشكرك الي كعد تسوي ماكو مثله

سجاد : قابل شمسوي يله يمعوده اكلي وعوضي الدموع الراحن خرب ببليسج تانكي باب الشرجي مو مثل عيونج شكد تبجين

سليل : ههههه شسوي ام دميعه بعد

سجاد : زين اعترفتي

يله ورانا رجعه هسه عمتج على نار كاعده

سليل : اكلنا ورجعنا

وطول الطريق ساكتين وبديت اصحى يعني اني هسه زوجته زين شون هااا شبيج سليل تخبلتي عادي شنو شون احس داخلي بدا يثور وبدا گلبي يدك قوي تكول مثل النايمه وهسه صحيت

وصلنا للبيت لكيت عمه بلباب تلوب نزلت اركض فرحانه هي استغربت من فرحتي وحضنتها حيل واحجي بصوت عالي ماما شفته وحضنته والله مو حلم وبسته وكال بوسيلي الحنينه

هي من سمعت هاي الكلمة مال الحنينه عرفت احجي عن بابا مباشره بجت ولزمت ايدي

نهر : شونه ضعفان تعبان وضعه صحتي ولج احجي

سجاد : ميحلى الحجي اله بلباب ادخلو جوه

اخذتني عمه وكعدتني وسولفت كولشي الها وهي خطيه تبجي وتكول تمنيت اشوفه ولو مره روحي ميته عليه

سجاد : حقه وضعه ميسمح والمكان والسجن مو مال ترحون

نهر : ونخلص العمر كله منشوفه

سجاد : يجي يوم وتشوفو اني رايح

نهر : وين شسويتو

سجاد : عقدنا ومن تجي سندس دزي عليه

نهر : يعني هسه هي مرتك

سجاد : بلورق نهر بس هي بت اخوج وهياتها بحضنج

سليل : دنجت وضجت بس هو كلامه صحيح

نهر : مو قصدي بس

سجاد : بدون تبسبس الي سويته لمصلحه الكل وحتى تبقى بحضنج ومتبيع وتشتري بيها

نهر : عاشت ايدك والله انت ماكو مثلك

الله يحفظك النا

سجاد : محتاجين شى

نهر : لا

راح وعيوني وراه اااخ ياسجاد شون بگلبي الي يوم بعد يوم يتعلق بيك

باوعت عليه عمه وكالت

نهر : لتعبين نفسج امي

سليل : هااا بشنو

نهر : گلبه ملجوم

سليل : شنو مفهمت

نهر : الي مثل سجاد ميعرفون يحبون لان ملجومين

سليل : يعني جان يحب

نهر : اي يحب

سليل : گلبي نبض بخوف وكتلها منو

نهر : امه واخته الي طعنو وراحو ومن يومها كره شكو شى اسمه حب بنتي اني اعرف بيج تحبي

سليل : جفلت من كلامها واستحيت

نهر : بس هذا حب غلط من السما للكاع اختاريتي غلط بنتي اول شى عمرج صغير وهذا عمر مراهقه والحب بيه طايش واعمى وثاني شى هو اكبر منج بهوايهروالاهم انتي تحبي لان ماخذ دور الاب والاخ ومعوض النقص الي بحياتج بعد متكبرين وادخلين جامعه وتشوفين اشكال الشباب راح تتندمين وراح تكولين اني حبيت الشخص الغلط

سليل : ماما اني

نهر : خليني اكمل واهم من هاي النقاط كلها سجاد ميأمن بمره شكاك وعصبي وميعجبه العجب واذا بقيتي بهاي مشاعرج راح يدمرج ويجرحج اختاريتي غلط امي اني ما الومج بس كعد اصحيج على وضعج سجاد رجال واخلاق وسبع وكولشي زين بيه بس يصلح يكون الج اب او اخ او عم غير هذا الشى راح يدمرج تلاحكي لنفسج ياروح نهر وفوك كل هذا هو يشوفج اخته يعني حب من طرق واحد وهذا اتعس حب بلحياه مااريد بيوم اشوفج مدمره بلحب مثل عمتج الخذلان صعب امي صعب كولش الله لايشوفه الج اياج تنسين هذا كلامي

وره حبج هذا خساره جبيره واني حذرتج

سليل : سكتت بس احس گلبي ميسمع واذني انغلقت وعيوني ترفض تشوف الحقيقه وكل مسامه بيه تكول لا انتي تحبي وهو هم راح يجي يوم ويحبج واكثر

باستني وكامت

مباشره ركضت للغرفه كعدت على الجربايه وحطيت ايدي على اذني مااريد اسمع ولا اريد اشوف جان افز من صوت رشا

رشا .. هااا بشري

سليل : وجع فززتيني

رشا .. صرتي مرته

سليل : ابتسمت وكتلها اي

رشا .. جان تكوم تهز جتف

سليل : ولج شبيج

رشا .. مبروك يااحلى اخت بلدنيا

سليل : بس على الورق شبيج يعني زواج كذبي

رشا .. المهم صار زوجج كذبي صدكي بعدين تبين

سليل : سوالفج مال اكبر من عمرج

رشا .. لتنسين الجينات الوراثيه مال سندس تمشي بلدم

سليل : ههههههه اي والله بس انتي طيبه وحنيته ماما مع الاسف لا بس مصلحتها

رشا .. عادي تعلمنا والله لوما اخاف من عمه اله اشغل مسجل هسه ودك ركض للكاع

سليل : هههههه والله خبله

خلي ابدل وانتي لتحجين اي شى كدام ريم لان مراح تفهم

رشا .. لا لتخافين مااحجي

مر ٣ ايام بلضبط ويوم احد عطله شهر السابع تموز وحاره مسموطين سمط بلحر والكهرباء ٢ ب٢ ونلوب وكل شويه انطب نسبح تكول بطات

كاعدين وره الغده نباوع تلفزيون داير على قناه الشباب طالع كارتون وجان نسمع صوتها ادك باب الهول اني لوتني بطني من الخوف

عمه اجت تركض من غرفتها جنا منتظريها

نهر : رشا اخذي خواتج وادخلي وشيصير مطلعين ابد من الغرفه افتهمتي

رشا .. ليش عمه

نهر : كتلج مطلعين لو شميصير اقفلي الباب

رشا .. ماشي وانتي سليل لهي امج بين مااروح لسجاد واجيج

سليل : شكول

نهر : اي شى عدا سالفه زواجج

ريم : ثلل تزوجت وفاتحه عيونها

رشا .. اششش وتعالي ندخل

واخذت البنات وطبت

فتحنا الباب لماما ودخلت حتى مسلمت على عمه وعمه مهتمت اخذت العبايه وطلعت

سندس : وين راحت عمتج على الشفيه سجاد تخوفني بيه

سليل : شتردين يوم ليش جايه

سندس : سمعيني عدل شفتي شسويت بعمج نومته بلسجن بتلفون واحد اذا مسمعتي كلامي انوم عمتج مكانه شوفي اني داسوي هذا الشى لمصلحتج مردت استخدم القوه وياج لو تعرفين الخير الجايج والعيشه الزينه جان ركضتي وكلتي ماما زوجيني

سليل : بس اني مااريد ازوج

سندس : وليش حابه تبقين بهذا البيت الفگر

سليل : ليش فگر مو عشتي بيه وانولدتي بيه

سندس : عيشه الكشره هم تتسمى عيشه بنتي اسمعي كلامي والله متخسرين الولد شاب حلو وامكانيته زينه وراح تعيشين عيشه ملوك حتى خواتج تكدرين تساعديهن ليش تبقين العمر كله بهاي الخرابه

سليل : اني اريد اكمل دراستي

سندس : اني اخليج تكملين اتفق وياه بس وافقي

سليل : مااريد كتلج مااريد

سندس : شو تتزوجين ورجلج فوك راسج لحد هسه عبالي ادميه وكبرتي وعقلتي وادورين مصلحتج واحجي وياج بهدوء بس الظاهر انتي مال سحل وغصب واذا مسمعتي كلامي تنسين عمتج وحتى هذا عمج الخايس اضيعه ذاك اليوم جانت كرصت اذن خافي من الجبيره

سليل : باوعت اندفعت الباب ودخل سجاد وعمه

سندس : اجت العصابه والله خوش من امداج رحتي ركض عليه شكد جبانه ومابيج حظ طول عمرج تبقين هيج

نهر : مالج دخل بيه وحيري بروحج

سندس : شوفو اني اجيت اليوم احجي بهدوء ولا عبالج تكدرين تلوين ايدي مثل ذيج المره حليتها هس لو مو تهددين اخذ سليل اخذها واليوم تروح ويايه

سجاد : ليش هو بكيفج

سندس : لا بكيفك بله متوخر من وجهي

سجاد : مااسمحلج تاخذيها مرتي وماانطيها

بقت صافنه على كلامه

نهر : سليل هسه مرت سجاد شرعاً وقانوناً

سليل : اباوع على ماما وجه اصفر ازرك تريد تستوعب كلامهم متكدر وعمو مبتسم بهدوء بشماته

سندس : شون وشوكت

نهر : قبل كم يوم عقد الها

سندس : باطل ماكو هيج عقد مياكل بعدها قاصر

سجاد : لا زاهي شوفي سندس اذا انتي ذكيه مره اني اذكى منج مئات المرات عبالج تفوتني سالفه هي قاصر واله ولي امرها

خلي اضوجج اكثر كطعت حقها وبحظور ابوها يعني اصولي وشرعاً وقانوناً مرتي ومالج حق تلزمين شعره منها

سليل : هنا ماما بعد علنت انهيارها وعيطت عياط تكول وحده وحركوها جيتت عليه تريد تضربني جان يلزم ايدها سجاد حيل

سجاد : اياج كتلج شعره متلزمين منها

سندس : ولكم ساقطين سرسريه هاي تاليها تكسرون بيه وتلعبون ورايه وانتي بزر بطني هاي تاليها ولج ردتلج العز تزوجين هذا الفيترجي وجه الفكر

سجاد : تسكتين لو اجفت وجهج مثل مااجفت المحرك ضبي لسانج لهسه ساكتلج لان انتي عمتي ام مرتي

سليل : سجاد يستفزها وهي تعيط تالي سوت المتوقعناه

وكل عيطه يمكن تسمع المنطقه كلها

سمعي لج ماطول دكيتي هاي الدكه الناقصه بيه وبعتيني وخليتي ذوله وتأشر على سجاد وعمه يتشمتون بيه مالج مكان هنا مو تزوجتي تولين وياه بعش الدجاج العايش بيه واذا شفتج هنا وتراب امي اكسر رجلج

نهر : مو بكيفج وين تروح تبقى هنا

سندس : كلمة ثانيه واطردج وراها والبنات اخذهم واسد هذا البيت واذا على البنات حتى لو ابقيهن يمي المهم اكسر ظهركم واحرمكم منهن تحلمون تشوفون شعره منهن واني امهن ومن حقي كولشي اسوي

نهر : تاخذيهن يم رجلج وابنه متخافين عليهن

سندس : ليش اخاف كبال عيني هاج مو هذا الداخل طالع من البيت ومأمنه بيه اتزوج سليل واعرف عناد بيه حير بيها مو مرتك لحظه متبقى لا انت ولا سليل وانتي نهر اختاري لو تكعدين على البنات هنا بهذا البيت وتراعيهن بدون سليل لو اطلعج وياها وتنسين رشا وريم وغزل وتراب امي وابويه تحلمون تشوفوهم وذاك حايط امسحو ايدكم بيه

سليل : على اي اساس مااعوف خواتي

سندس : تردين خواتج تطلكين وباجر

سجاد : من كل عقلج اطلكها امشي سليل وانتي نهر وعوفو البنات خلي اشوف شون اداريهن

سن خوش عدكم ١٠ دقايق مااشوف وجهكم هنا

نهر : ولج تخبلتي تأذين بناتج ماعندج رحمه بيهن شون توديهن لغربه

سندس : عسى مااحركهن متدخلون والله ابلغ بيكم واتهمكم تتحارشون بيهم لو تردون تخطفوهن الف فلم اسوي وانعل اهل اهلكم

جان يلزمها سجاد قوي وركعها بلحايط ولزمناه ولج حقيره محد يكدرلج اليوم اله ادميج كافي تحملتج هوايه

سندس : رجال وسويها وانتن يله بره

سليل : كعدت بلكاع الطم واعيط تهسترت حرام عليج مكافي عفتينا صغار وحرمتينا من الام مكافي بعز ما محتاجينج درتي وجهج ورحتي بتج محركه ونايمه ولا هزتج والثانيه بكعت ولا اجت بالج انتي شنو من بشر خافي الله ولو مره احنا بناتج مو عدواتج لو ما عمه وعمو جان هسه احنا بلشوارع الله اعلم شنو حالنا كافي خافي الله لو بزون وعدها جهال متسوي سوايتج

جان يلزمني سجاد وكومني وعاط بيه كافي ليصير بيج شى حتى والعباس ابوفاضل احركها وهي عايشه

سليل : متشوف شكعد تسوي تبيع وتشتري بينا جان يعيط بنهر امشي كتلج وبعدين غصب عنها ترجع البنات

اباوع على ماما متخوصره وتحرك برجلها وترجف تريد تكطعنا ولا مهتمه لا لحالي ولا لكلشي وعمه منتهيه جان تكول

سجاد اخذ سليل وروح

سليل : اني جفلت شنو عمه شتكولين

نهر : روحي يمه لبيت رجلج واني باقيه هنا يم البنات وانتي مو بعيده عني دقايق اني يمج اشوفج

سجاد : لج خلي تولي لتسمعين كلامها

نهر : ابوس ايدك اسمع الكلام واخذها وروحو

سندس : لج اخذي ملابسج كلها وهذا البيت يحرم عليج خلي اشوف او اسمع جاي هنا اطيح حظج ومباشره اطرد عمتج واخذ خواتج

سليل : دموعي تصب وسجاد صاير بارود ويعيط على عمه يريد يقنعها تروح ويانا ونعوف البنات على ماما لان جان متأكد هي متتحملهن وتالي ترجعهن بس عمه متتحمل يوم بدونهن وهم اتخاف عليهن من الغريب

تقربت مني وشاورتني عمه

نهر : يمه خواتج اذا راحن اخاف عليهن ليصير الصار بيج اذا عمج مارحم حالج لغريب شيسوي بيهن وهاي دنيا مااريد يعيشن العشتي واذا طه جابلج حقج ذني منو الهن ومنو يجيب حقهن هنا واني فوك راسهن مأمنه عليهن وانتي مو بعيده عليه بلكت فتره وتهدا الامور وترجعين وعايفتج يم رجلج وبأيد امينه لخاطر خواتج تحملي

سليل : شهكت شهكه يمكن وصلت للسما وكلت لسجاد

يله امشينا

سجاد : ولكم لتخبلوني خلي تولي لتسمعون كلامها والله مااخليها اليوم تطلع صاحيه

باوعت عليها وكلي حقد وهي هم تباوع تريد تشرب من دمي انداريت على سجاد وكتله

سليل : فدوه امشي اترجاك وباوعت بعينه اتوسل بيهم واشهك صفن بوجهي ومسح عيني بيده جان يكول

سجاد : جيبي غراضج وامشي لبيتج

يتبع ...

#رواية_أبي_والغزلان

#للكاتبة_Reem_ريام_هادي

#الجزء_الأول #البارت_الاربعون

#مدونة_نور_قلبي

من سئلوني صح گالوا انطوك جروح ؟؟

لا گلت للشماتة انطوني عيديه

شايف من تجيك الطعنة من أحباب

هيچ جروحك تحس بيها روحيه

تصور تبتدي تشتاگ للچتال

اذا چف التطعنك بيها حنيه

سليل : فدوه امشي اترجاك وباوعت بعينه اتوسل بيهم واشهك صفن بوجهي ومسح عيني بيده جان يكول

سجاد : جيبي غراضج وامشي لبيتج

نهر : اخذها وروح فدوه

سليل : دخلت ركض للغرفه لكيت البنات كاعدات وبعيونهن الف سؤال وحيره خاصه ريم المصدومه ركضت رشا عليه

رشا .. راح تروحين

سليل : مو سمعتي شكالت

رشا .. مو كتلج لتعوفينا

سليل : موبيدي والله شفتي شصار واني معايفتكم اجي والله اذا ابقى راح تاخذكم وتأذيكم

رشا .. اني راح اطلع عليها

سليل : جان اجرها وين رايحه لطلعين ابد اكعدي وسكتي لتزيدين الطين بله هسه تتخبل بلزايد

رشا .. لعد نخليج تعوفينا هي وين عارفتنا كل كم شهر تجي تسويلها مصيبه وتروح

والله حتى كرهت اليوم الي تزورنا بيه

سليل : فدوه اسكتي وخلي اروح وبعدين نشوف شلون واني قريبه مو بعيده

ريم : شنو اتزوجتي عمو شون يصير

سليل : تقربت من ريم الي احسها ضايعه ومتعرف تفكر

ريمو حبيبي رشا راح تفهمج اعرف يجوز بعدج صغيره ومراح تفهمين بس اعرفج ذكيه وراح تستوعبين الي كعد يصير

ريم : لتروحين وتعوفينا شون اكدر بدونج بلبيت شون اكعد اصبح مااجي ابوسج واشاقه وياج واضوجج وبعدين اجي اراضيج سليل لترحين

سليل : سنين اتوسل بيج كولي سليل تكولين ما ثلل احلى واسهل وهسه نطقتي

ريم : ابقي وبعد مااكول ثلل ابد بس ابقي

سليل : حضنتها حيل وسحبت رشا هم لحضني واباوع غزوله واكفه على صفحه ودمعه بعيونها اشرت الها بيدي تعالي غزولتي اجت تركض وهم حضنتها وبست كل وحده منهن

سليل : راجعه لتخافون ديرو بالكم على نفسكم وعلى عمه ولتضوجوها وخاصه انتي ريم صيري عاقله واسمعي الكلام

رشا .. يله لتتأخرين امشي نساعدج

سليل : اخذ كم شغله واذا طول الوضع اجي اخذهم كلهم

حطيت كم قطعه ملابس والشغلات الضروريه وطلعت

لكيت سجاد واكف بلكراج يدخن وصاير بارود وماما كاعده حاطه رجل على رجل وتهز بيهم من التوتر اما عمه نهر دموعها عشره عشره حضنتها جان تشاورني

نهر : ماما ديري بالج على نفسج

سليل : لتخافين

سندس : فضنها

سليل : باوعت عليها وبصوت كله الم واحس اريد اعيط من القهر بس لزمت نفسي وكتلها

حرامات انتي امي

سندس : امشي اطلعي بره واذا اجيتي هنا اكسرها لرجلك ماطول كسرتي كلامي ولويتي ايدي وضيعتي تعبي انتي مو بنتي

سليل : ابتسمت بأستهزاء وكتلها ومنو كال اني بنتج اني نهر

سندس : امشي لا اكطعج هسه

سمعت سجاد عيطت سندس شمر الجكاره وطب وباوع عليه وكال يله

سليل : احس روحي تريد تطلع شون اعوف خواتي وعمتي بقيت واكفه ودموعي تنزل جان يجرني من ايدي

سجاد : امشي واشر بأيده بوجهه ماما وكال الها

تسوه عمرج مكدرتي تسوين الردتي ومراح اخليج بيوم تسوين وعناد بيج

يله وسحبني وطلعنا وعفنا ماما تغلط وتسب بعلو حسها

طلعنا من البيت ونتمشى بلشارع جان يندار عليه وكال امسحي عيونج منا الناس لينتبهون

اخذت طرف الشال الحاطته على راسي ومسحت عيوني بس گلبي يبجي والله بدون توقف ورم من القهر

اخذ العلاكه البيدي وشالها وبقيت امشي بصفه ومدنجه

عبرنا الشارع شقته قريبه بعد شارعين عنا على الشارع العام

وصلنا للعماره وصعد واني وراه

دخلت للشقه

سجاد : تعالي شبيج واكفه بلباب

سليل : تقربت وكعدت على القنفه جان مسوي تغير بيها مغير التخم والميز مال التلفزيون وحاط ميز صغير كدام التخم الشقه نظيفه مرتبه صح اكو كم شغله محطوطه بشكل هوسه بس نظيفه والكاع تلمع

بقيت مرتبكه ومااعرف شراح يصير وشنو حالي والى متى ابقى هنا

سمعت صوت باب اتوقع فتح باب البالكون مال غرفه النوم يجوز يدخن

بقيت على كعدتي بلربع الساعه وافرك بيدي من التوتر

شويه وشفته طلع من الغرفه واجه كعد بصفي اني مشاعري خوف وقلق واريد ابجي من الصار كله بس اخاف يعيط لهذا حاصره القهره بگلبي

جره نفس وبدا يحجي بهدوء

سجاد : ادري بيج خايفه ومقهوره بس مابيدنا شى هسه شفتي امج شون هوست وتمنيتج انتي ونهر تصيرن اقوى وتكسرون كلامها وتجي حتى نهر ويايه اعرف بيها متتحمل خواتج ثاني يوم ترجعهن بس ااخ كله من وره نهر مسمعت كلام

سليل : احجي ومخنوكه كوه يطلع الحجي مني

عمه تخاف على البنات من خليل وابنه تكول شون اخليهن بيت رجال غريب وشفت حجيها صّـْْ(☑)ـْْحّ منعرف ذوله شنو خلي عمه بلبيت على راس خواتي أمن بس اني هسه بالي يمك

سجاد : يمي

سليل : اي يعني راح تتقيد بوجودي

سجاد : وليش اتقيد اني اصلاً اكثر الاوقات بره واذا على النومه انتي تنامين بلغرفه واني هنا بلهول

سليل : لا عفيه اني انام هنا مااريد اخرب وضعك ومكانك

سجاد : اسكتي ولتناقشين

سليل : عمو عفيه عوفني براحتي انام هنا

سجاد : اسمعيني سليل اني مااعرف شكد انتي باقيه هنا وشون راح يصير التعامل بينا بس اريد كم نقطه تحطيها بالج اول شى الكلمة الاكولها متناقشيني بيها يعني نوم تنامين بلغرفه وانتهى وغراضج حطيهن هناك ثاني شى شايفه باب الشقه

سليل : اي شبيه

سجاد :راح اقفله عليج من اطلع لان اخاف يصير شى

سليل : شيصير يعني

سجاد : مااريد اطلعين انتي وحدج واخاف عليج لان وكت هوايه اطلع والعماره اكثرها عزابيه خلي اشوف الوضع اذا طول اغير الشقه

سليل : ماشي

سجاد : واي شى تردي كولي لتستحين واخذي راحتج بكولشي الشقه شقتج

سليل : شكراً

سجاد : تعرفين مااحب هاي الكلمة

سليل : دنجت وكتله هسه شسوي

سجاد : شسوين سوي اني طالع

سليل : وين اخاف وحدي

سجاد : لازم تتعلمين اني ورايه شغل والتزامات لازم تتعلمين على المكان لحد متفض هاي الشغله

سليل : ان شاء الله

سجاد : يمج كولشي بلثلاجه واني من ارجع اجيب عشه ويايه

سليل : اسوي اني

سجاد : لا ميحتاج ارتاحي

سليل : عافني وطلع وسمعت قفل الباب

فتحت عيوني وحدي بلشقه حطيت ايدي على وجهي وبجيت اتذكر منظر خواتي ودموع عمه وقهرها

بقيت هوايه ابجي لحد محسيت عيوني ورمن كمت من مكاني غسلت باوعت ماطول سجاد ماكو طلعت اخذت غراضي وسبحت وكعدت مشطت شعري وظفرته

زين هسه شسوي والله ضوجة كمت افتر بلشقه فتحت باب غرفته دخلت افتر ويه كل خطوه گلبي يدك دكات ناعمه وهادئه مديت ايدي على المشط مالته اتلمسه وعلى عطره سحبته وقربته من خشمي وجريت نفس منه احس دخل روحي غمضت واتخيل حضنه اااااااه ياسجاد لو تعرف ابسط شى بيك احبه

رجعت العطر وبديت افتر بلغرفه فتحت كنتوره باوعت والله مرتب احسن من كنتوري صاير بلدفرات عدا مرات الكه هدوم ريم ورشاعندي تلمست قمصانه وتيشيرتات وابتسم ممصدكه المسهم سديت باب الكنتور وباوعت على فراشه جانت جربايه خشبيه ام نفرين بس مو جبيره تقربت منها وتمددت حطيت وجهي على المخده مالته وغمضت وشميتها بهدوء اتخيل شلون نايم وانفاسه وريحته الي بلفراش اخذتني لغير عالم حسيت بقربه مني وتخيلت من جان يشيلني من كثر ممرتاحه وممصدكه نايمه بفراشه بدت تهدا نفسي وغفيت نمت نومه صار سنين منايمه بهيج بعمق نمت ساعات طويله

فتحت عيني طفرت اتذكرت اني بلشقه وحدي والغرفه ظلمه طلعت اركض مرعوبه جان يصير بوجهي

سجاد : شبيج سليل

سليل : جريت نفس خفت لان ظلمه ساعه بيش هسه

سجاد : بلوحده بليل

سليل : شنو حيييل شكد نمت

سجاد : رجعت ولكيتج نايمه عفتج ترتاحين حتى على الاكل مكعدتج كلت شوكت متكعدين تاكلين

سليل : بس لو مكعدني

سجاد : لا جنتي نايمه بعمق ورايحه بسابع نومه

سليل : بكلبي اكول يعني دخل شافني معناها

سجاد : الاكل بلفون مال الطباخ اذا تردين حمي واكلي لتبقين جوعانه

سليل : وانت

سجاد : اكلت وراح انام

سليل : ماشي طبيت للمطبخ باوعت نظيف ومرتب عدا كوب مال جاي محطوط على صفحه فتحت الفرن وباوعت لفه همبركر جبيره طلعتها دافيه مو مال احميها

كعدت اكل بلمطبخ مااريد اطلع واضوجه اخاف نام كملت اكل وغسلت بلسنك

وطلعت على كيفي لكيته نايم على القنفه وحاط مخده جوه راسه  يدخن وصافن على السكف ونايم بلبجامه والفانيلا السودا

سليل : تصبح على خير عمو

سجا وانتي من اهل الخير

اخذت علاكتي جانت بلكاع ودخلتها للغرفه واخذت منها فرشه الاسنان فرشت ورجعت دخلت للغرفه وتمددت بجربايته اااخ ياليل اني بلا شى ماانامك مو عاد هسه وفوكاها اني وياه بمكان وحدنا فدوه ياگلبي ارحمني ليش هيج تنبض بقوه

بقيت اتگلب اريد انام ماكو

كمت من الفراش وفتحت باب الغرفه كلت بلكت كاعد طلعت باوعت ساعه ٣ ونص الصبح

تقربت بهدوء لكيته غافي كعدت على الطبله الي كبال القنفه النايم عليها واباوع عليه واحجي بگلبي

شون اتعامل وياك شون راح اكدر اعيش وياك بيت واحد بدون مااغلط وافضح مشاعري اذا انت تجي ساعه انتهي وتبقى عيوني تفتر وراك شلون اذا عايشين سوه

تقربت اكثر قربت وجهي لوجهه حسيت انفاسه اطخ بوجهي غمضت وحسيتهم ااااه ياانفاسك ليش هيج احبك ليش احس كولشي بيه يرجف عليك

ثواني وتحرك وانكلت على الجهه الثانيه وكفت من الخوف وركض للغرفه

دخلت وسديت الباب واتنفس سريع من الخوف بله لو فاتح عيونه شكول اله لازم مااسويها بعد

رجعت لفراشه وحضنت المخده وغمضت ولهسه انفاسه الدافيه احسها وغفيت

كعدت على صوت ركعت الباب وقفلها

كمت ركض عرفت طلع باوعت حاط على الطبله جبن عرب وصمون رفعت راسي شفتها ساعه ٩ الصبح حتى متريك ويايه

دخلت للمطبخ الجاي حار مبين متريك لا وفوكاها غاسل الكلاص مالته

رحت للحمام غسلت ورجعت للمطبخ تريكت ورتبت كولشي ورايه مااريد اسوي هوسه

باوعت على الشقه نظيفه ممحتاجه تنظيف بس ميخالف انطفها وين اروح اخلصها شغل وجان تندك الباب واني نشف دمي من الخوف حتى مكلت منو وشويه واسمع صوت عمه نهر ركضت للباب ماما

نهر : حبيبتي افتحي الباب هاي اني

سليل : عمو قافل الباب من بره

نهر : شنو ليش قافلها

سليل : مااعرف

نهر : شويه واجي

رحت مفوره على سجاد للمحل شنو يقفل الباب عليها

وصلت قريب المحل لان هوسه ورياجيل اشرت لعمران شافني وصاح لسجاد اجه

سجاد : هاا نهر خير صار شى

نهر : بله شكلت لروحك من قفلت الباب عليها

سجاد : ليش رحتي للشقه

نهر : غير اشوفها مكتلي ليش قافل الباب عليها بله صار قدر وانت ماكو شلون بله تموت وانت متدري

سجاد : قابل شصار لان العماره اكثرها عزابيه وشباب صاعده نازله قفلت الباب

نهر : تكدر تطلب منها هي تقفله من جوه ومتفتحه لأحد مو تقفله انت

سجاد : ماكو فرق

نهر : لا اكو سجاد لتنسى هاي سليل انت ربيتها على ايدك يعني مستحيل تسوه شى موزين ولا تكسرلك كلمة

سجاد : هاي الهوسه كلها لان قفلت عليها الباب

نهر : لا بس اذكرك اذا نسيت

سجاد : هاج مفتاح الشقه وشويه واجي وراج

نهر : جيب اخذته وصعدت وفتحت الباب جنت مشتاقه الها اريد اخذها العمر كله بحضني

سليل : فتحت الباب وشفت عمه بوجهي ركضت بحضنها وابوس بيها حيل اشتاقيت الها مو عبالك البارحه عفتها عبالك عمر

نهر : شونج ماماتي

سليل :  الْحٍمَدٍ للـّہ تعالي اكعدي

نهر : احجيلي شونه وضعج

سليل : ماكو شى وانتم والبنات ليش مجبتيهم وياج

نهر : خلي هلكم يوم اخاف امج تسوي ملعوبه

سليل : اباوع عمه ممرتاحه كتلها بيج شى ماما

نهر : والله يايمه اكو سؤال وماكل گلبي والليل منايمته

سليل : شنو

نهر : سجاد

سليل : شبيه

نهر : تقرب منج او صار شى

سليل : لا ماما شون تفكرين هيج

نهر : ولج شلون ماافكر واني الليل ماغمضت عيوني خفت تصيرين مرته صدك

سليل : دنجت وكتلها لتخافين ماكو شى واني نمت بلغرفه وهو بلهول ويعاملني ولا كأني موجوده والوضع كولش طبيعي واقل من الطبيعي

نهر : بنتي حافظي على نفسج

سليل : شبيج ماما فدوه ليش هيج تحجين ويايه

نهر : والله من خوفي عليج كتلج گبل واعيدها عليج سجاد ذهب وماكو منه بس ميصلح زوج الج اب اخ عم اي غيرها لا حافظي على نفسج للي يستاهلج ويخليج سعيده مو الي يتعبج

سليل : ليش هيج تحجين والله اموت قهر

نهر : يجي يوم وتكولين صدك كالت عمتي بس اسمعي كلامي لتلبسين براحتج كعدتج نومتج بأحساب لتنسين اكو شاب وياج بلشقه وخاصه انتي مرته وحلاله يعني يكدر يتقرب وكت ميريد لتصيرين مجرد لحظه بحياته يحصلها ويشمرها ولو اعرف سجاد ميسويها وماكو مثل نظافته بس هم ميمنع الحذر

سليل : كافي ماما ماله داعي كلامج عمو مو مال هيج سوالف

نهر : المصيبه خايفه منج مو منه

سليل : هاااا شون يعني

نهر : اخاف تضعفين وتحاولين تتقربين منه

سليل : مو لهاي الدرجه ماما عفيه بديت اضوج

نهر : الله يستر هاج

سليل : شنو هاي

نهر : سويتلكم فاصوليا بس طبكي التمن ادري بيج تعرفين تسوين غدا الكم

سليل : ليش ياماما متعبه نفسج من الصبح وكاعده وتعبانه

نهر : هو اني نمت اصلاً حتى اكعد كلت الهي روحي واطبخ الغدا احسن مااتخبل من التفكير

ويوميه بعد اجيبلج الغدا

سليل : ليش اني اطبخ

نهر : اعرف بيج تعرفين بس مو هوايه اني هم اعلمج واقويج بلطبخ

سليل : لشوكت ابقى هنا

نهر : والله ماادري امج قبل متطلع كالت بس توصل هنا راح اعرف وانفذ كلامي خلي هاي المده تهدا الخبله كون مصيبه تاخذها وتخلصنه اااخ شكد رجفتنا وأذتنا

الله لاينطيها

سليل : عفيه ماما ديري بالج على رشا اخاف تسوي شى وتاخذها مكاني

نهر : شحدها والله اطيح حظها

سليل : المهم هسه نبعد ماما عنها

نهر : الله كريم اروح للبيت خواتج عفتهن نايمات

سليل : بوسيلياهن

نهر : يوصل هاج ماما المفتاح وتعالي اقفلي ورايه

سليل : اقفلي ورجعي المفتاح لعمو

نهر : سمعي اياج تقبلين يقفل عليج الباب ويروح شنو حيوانه ويحبسها لو ميأمن بيج

سليل : شكو بيها ماما غير يخاف عليه

نهر : يخاف وحد وهيج تصرف وحد صار عليج شى شون اطلعين

سليل : قصدج احترك شنو الغريب گبل مو احتركت

نهر : ياستار ولج ماما اسمعي كلامي ولتفسرين الكلام غير

سليل : شسوي لازم اسمع كلامه مااريد مشاكل

نهر : ميخالف هم كوليله لتقفل الباب

اندكت الباب وكلت منو

سجاد : اني افتحي

فتحت الباب ودخل

هاا خاتونه شبيج جايه من الصلح هداده

نهر : والله مو هداده بس اخاف من الاقدار

سجاد : ماشي ابقي المفتاح بس ابد متفتح الباب غير الي والج سمعتيني

سليل : اي

نهر : اروح اني

سجاد : ريحه فاصوليا

نهر : والله خشم شون اشتميت

سجاد : غير الشقه كلها ريحه

سليل : اصبلك

سجاد : لا مجوعان قبل شويه تريكت

نهر : اروح مثل ما وصيتج ماما

سجاد : شوصيتي ياستار منج اياج تسمعين كلامها

سليل : ابتسمت وكتله لا مااسمع

نهر : هاا ولج

سليل : ههههه اشاقه وبستها وعافتني وراحت تمنيت اشوف خواتي ميته عليهن بس همه كالو مو هسه

وراها بيوم كعدت لكيته عايف نسخه من المفتاح وقافلها من بره علكته بسمار وعفته

مر شهر  واني يم سجاد حياتنا ابرد من الثلج يمكن قبل يسولف ويايه يكعد يتعارك اي شى يصدر منه هسه ابد يجي وكت الاكل ياكل ويروح ومرات ياكل بلمحل ويرجع بليل يسبح وينام يمكن اذا يريد يحجي ويايه يسألني تردين شى حتى من ناكل سوه بدون حجي والله لحظات احس حتى النفس ممنوع

بيوم بديت اختنك لان لا طبه ولا طلعه وعمه تجي دقايق وتروح واشتاقيت لخواتي وكل مااكول اله اريد اروح اشوفهن يكول مو هسه وماكو حتى شغل اشتغله حتى ملابسه هو يغسلهم ميقبل اسوي شى وطفت الكهرباء وهي شقه وصغيره وبشهر الثامن نهايته آب  وموت حر

حطيت الربطه على راسي ولابسه دشداشه مستوره وفتحت البالكون واكو كرسي حديد جريته وكعدت مغرب واكو نسمه هوا صح حاره بس احسن من جو الشقه صفنت على الشارع والسيارات لان شارع عام اباوع على الناس رايحه جايه والناس والعوائل والي يتمشى والي يتسوك هوسه والمنظر حلو بقيت بحدود ساعه صافنه حاطه ايدي على الستاره مال البالكون وصافنه

شويه انتبهت مو البالكون الي بصفي الثانيه بيها ولد شاب يروح ويجي اني شفته طبيت اركض

يعني غير غثيث ميشوفني كاعده الايبقى

طبيت وسديت الباب والبرده ونزعت الربطه وطبيت سبحت ماكو غيرها حتى يروح الحر

بين مسبحت ومشطت شعري اجت الوطنيه كيفت كولش وخاصه جان اكو اوركنديشن (تبريد) بلشقه وهي صغيره من يشتغل تبرد

فتحت الثلاجه اكو لحم مثروم كلت اسوي عشه مخلمه سلكت اللحم وحمسته وكملتها من بصل وطماطه  بس اطك بيضه وتكمل طفيتها بين ميجي اكملها حتى ناكلها حاره

كعدت اتفرج على تيفي الشباب مسلسل مصري وصافنه عليه باوعت ساعه ٩ انفتح الباب وطب ابتسمت لان اجه بس اباوع واشوفه عيونه براسه ركع الباب اني كلت صارت مصيبه كمت من مكاني

وبدون اي كلام لزم ايدي حيل وعتها ويعيط وصاير نار

سجاد : شطلعج للبالكونه شون اطلعين

سليل : والله من الحر طفت الكهرباء وكتلني الحر

سجاد : اني مو مانعج من الطلعه

سليل : قابل وين رحت مطلعت بره الشقه والله مسويت شى بس كعدت اتفرج على الناس

سجاد : لو تموتين مطلعين ماطول كايلج مطلعين راسج متمدي من الشباك الفمره كتلج العماره بيها عزابيه ليش مسمعين الكلام

سليل : دمعت عيني وانقهرت وكتله تره والله سامعه كلامك

سجاد : وبيش طلعتي بهاي بجامتج

سليل : لا والله بلدشداشه وحتى حطيت ربطه على راسي

سجاد : حتى لو مجان لازم اطلعييين ويعيط بأعصاب

سليل : والله متوقعت هيج متقبل لو ادري مااطلع

سجاد : اذا وصلتي للبالكون بعد اكسرها رجلج سمعتي

سليل : اشرت براسي اي

بس اني هم تعبت

سجاد : شمسويلج وتعبتي وعاف ايدي

سليل : هي هاي ممسويلي كاعده مثل المسجون وحدي بين اربع حياطين حسره عليه الطلعه والحجي نسيته من كثر مكاعده وحدي

سجاد : هسه الي يسمعج يكول جنتي يوميه اطلعين

سليل : مااطلع بس خواتي يمي اضحك واشاقى وياهن والعصر كلها نكضي بلطرمه ناكل ونسولف او بلسطح نشتم هوا ونونس روحنا واني جم مره كتلك وديني والله مشتاقه الهن وگلبي طاك عليهن وانت متقبل

سجاد : يعني اذا مااطلعج لازم اطلعين وحدج

سليل : كعدت على القنفه وكمت ابجي هسه اني وين  طالعه وبعد مااطلع

جان يكوم يعيط

اني مو كتلج لازعلى كولشي تبجين وتدرين من وره سوايتج اني شسويت

سليل : رفعت راسي وباوعت عليه شسويت

سجاد : اجاني

الولد الي بلشقه البصفي وسألني منو يمي عباله صاحبتي وجايبها وبسببج كتله هاي مرتي

سليل : باوعت عليه وكتله وهذا الصدك انت مكذبت

سجاد : ممجبور اكول وثاني شى انتي مو مرتي

سليل : احس ضغط على گلبي صار  منا احبه ومنا تعبانه من الخنكه الي بيها ومنا هو لابسني لمده شهر كامل انهاريت اريد احجي كافي اكدر اسميها لحظه جنون عاشقه

كتله:

لا مرتك وبعقد رسمي

سجاد : تدرين كولش زين ليش تزوجتج بسبب الظروف وحتى احافظ عليج انتي مثل اختي وتبقين هيج اختي وبس

سليل : هو كال هيج لو بانزين ذب على النار الي بگلبي وكمت اعيط بوجهه

اني مو اختك افهمها اني مو هبه اني سليل سلييييييل

انت اسمك سجاد جلال واني سليل طه منين بعد اختك

سجاد : تخبلتي نصي صوتج لا افرك حلكج

سليل : تريد يله افركه اكتلني كطعني حتى ترتاح لا عبالك راح اتأذه ياما وياما اجت مصايب على راسي متعلمه واذا على الاذيه ماكو اكثر اذيه من الي كاعد احسه واني وياك بمكان واحد

سجاد : شنو قصدج

سليل : خلي اكولك شنو هنا واضرب على گلبي قوي واحجي بحركه گلب ودموعي تنزل تعرف شنو معنى تحب واحد وتعيش وياه بنفس المكان وممنوع عليك تتقرب منه تعرف شنو احساسي واني اشوف الانسان الاحبه عايشه وياه لمده اكثر من شهر وكلامي وياه ميتجاوز الثواني شلونج شمحتاجه وبس حتى بوجهي ميباوع ويتجنب يكعد يمي بمكان ويتهرب ساعات في سبيل ميشوفني تعرف شنو معنى اشتاق من تطلع وتبقى روحي تلوب عليك من ترجع واحسب   دقيقه دقيقه على الساعه صافنه ومن اسمع صوت المفاتيح تفتح الباب شيصير بيه والله احس گلبي من ضلوعي يطلع  تعرف اني احبك بقى يباوع بصدمه بوجهي ويبلع ريگه بصعوبه بس عيونه تنط شرار منها واني ولا مهتمه بس احجي وابجي

سجاد : تخبلتي شنو هذا الحجي شنو تحبيني

سليل : اي احبك وحتى لتكول تحبيني مثل اخوج وابوك وعمج وهاي الشغلات لا اني احبك وروحي بيك واحبك حب البنيه لحبيبها

كعد على القنفه وسحب جكاره وشغلها بس اباوع على ايده ترجف بقى يسحب نفس وره نفس ويباوع للكاع مدنج بدون اي گٌٰــلمة ورجله تهتز متوتر

نزلت بمستوى كعدته ولزمت رجله واباوع عليه وكتله بصوت كله الم وحب اني احبك سجاد حيل احبك باوع عليه وسحب نفس قوي ونفخه وكال انتي طفله ومتعرفين مصلحتج وهاي مراهقه لا تحبيني ولا بطيخ مجرد شغلات مال مراهقين وبس تكبرين تنسيها

سليل : اعرف راح تبقى تحاول تقنعني اني غلطانه وطفله ومن هاي السوالف  بس لو تحجي العمر كله مااقتنع لان اني مو من يوم او يومين حبيتك صار سنه احبك سنه ليل ونهار صيف وشتا وكل وقت وكل لحظه افكر بيك

سجاد : بابا اسكتي انتي مكعد تعرفين شتحجين ياحب هذا لان شفتيني اهتم بيج واخاف عليج حسيتي بحب واني هم احبج بس كأختي انتي تعرفين فرق العمر شكد

سليل : اعرف وميهمني واصلاً مو هوايه

سجاد : سليل افتهمي هذا الي تحسي نكدر اسمه اعجاب مراهقه طفوله غباء اي شى المهم مو حب

سليل : وكفت على حيلي وكتله مو من حقك تقيم المشاعر الي بداخلي اني الاحسه اجيت وكتله الك جان يسحب ايدي وكعدني كدامه وشمر الجكاره بلنفاضه وكال بهدوء



سجاد : سليل بابا انتي بعدج مفاهمه الحياه وبعده عقلج صغير مو معناها اني دوم وياج وادافع عنج واساعدج لازم تحبيني ولتنسين قبل كم ساعه جنتي تصيحين عمو

سليل : بس اني من سنه گلبي يكولك سجاد

نفخ بنفاذ صبر وكال

سجاد : الله مطولج ياروح شون اقنعج اني مااريد اجرحج واقهرج

سليل : اعرف متحبني

سجاد : لا احبج بس اختي بنتي اي شى غير الي بالج

سليل : واني مطالبه شى منك بس ردتك تعرف مشاعري

سجاد : ولازم هاي المشاعر تنتهي

سليل : مو بكيفك گلبي واني حره بيه جان يوكف ورجع  يعيط وكف ويأشر بيده

سجاد : شنو مو بكيفك ولج منين جايبه هاي الجرئه انتي الفقيره الي تبجين من كلمة شنو هاي الجساره وفوكاها متستحين وتحجين بوجهي ولا ذره مستحه دوم اعرفج تخجلين من خيالج شجاج هسه تخبلتي

سليل : وكفت وصرت بوجهي ولزمت قميصه من صدره اي تخبلت واحبك واريدك جان يضربني راشدي بكل قوه وعاط انجبي طايحه الحظ واياج اسمعج تحجين هيج شى بعد

وخرت ايدي  ودفعته وركضت للغرفه هنا شون الواحد وصحاني

شمرت نفسي على الجربايه وطكيت بجي مااعرف ابجي لان غلطت من اعترفت بمشاعري جان المفروض مااتصرف هيج لو ابجي لان ضربني واستهان بأحساسي

بقيت اشهك بقهر صعب ياربي الحب من طرف واحد صعب يأذي ويكطع الگلب

بقيت على نومتي يمكن ٣ ساعات ابجي ونمت من التعب حتى اكل مأكلت وماادري هو اكل او لا

فتحت عيني صبح بس مااعرف بيش الساعه لازم احط ساعه بلغرفه حتى اعرف من اكعد وانام كمت بس متردده اطلع مقهوره قهره احس الي يكولي شونج ابجي

فتحت الباب وطلعت على كيف ملكيت احد باوعت ساعه ١١ الصبح ولكيت صمون محطوط عرفت متريك وطالع

حتى اكل مااكدر اكل ونفسي تلعب وحيل مقهوره ومن كثر ماانهضمت وانقهرت احسها نزلت بمعدتي وتوجعني حيل

طبيت للمطبخ لكيت عشا البارحه بلثلاجه نفسه مماد ايده

حتى هو مماكل رحت غسلت اباوع بلمرايه عيوني وارمه وجهي بيه خطوط حمره مال ضربته لزمتها بقهر وحاولت ابردها حطيت شويه ثلج بلكت يروح الحمار وراها

حميت الجاي وحطيت حليب وشربت كوه شربت شويه وعفته

تذكرت الصار كله ورجعت راسي ااااااه شگد متأذايه منو يحس بيه منو راح يفهمني

شويه واندكت الباب

تقربت وصحت منو

نهر : افتحي ماما اني

سليل : فتحت الباب وجان اشمر نفسي بحضنها واشهك جنت حيل محتاجه حضنها

نهر : اسم الله شبيج امي

شو تعالي وسديت الباب واخذت سليل وكعدنا

شنو هذا حالج شبيج

سليل : وبديت اسولف كولشي الها

وهي بس صافنه

نهر : هذا الخفت منه وحذرتج وما سمعتي كلامي

سليل : ماما اخذيني وياج عفيه ما اريد ابقى هنا

نهر : لو بيدي اصلاً مجان خليتج تباتين يوم واحد بس امج كل كم يوم تمر تشوف شكو وتطلع

سليل : هيج الرفيقه سندس متفرغه النا وين جانت ذيج السنين مو تجي ايام بالاشهر منشوفها ودوم تكول مشغوله وشغل وماعندي وكت لو هسه تفرغت النا لان شغله بيها أذيه

نهر : شنسوي ياامي هذا حظنا من الدنيا لو جان الامر بيدي والله اخليها تحلم تشوفكم بس كدامج اصلاً من تجي حلكي ماافكه شتحجي وشتكول اسكت وما اتناقش وياها اخاف تطردني وتاخذ البنات اني مااهتم اجي هنا بس مااكدر يوم أمن على خواتج يمها

سليل : ادري لو ما هيج ولازمتنا من ايدنا التوجعنا مستحيل اعوفج واعوف خواتي بس هي لاعبتها صح

نهر : عوفج من هذا الكلام الي هسه مدوخني شون كدرتي تحجين هيج ويه سجاد

سليل : ماادري دنجت مقهوره جان ترفع راسي بيدها

نهر : شبيج حبيبتي

سليل : گلبي يوجعني مقهوره لدرجه حتى الهوا الي اتنفسه يجرح بصدري مااعرف راح تفهميني لو لا

نهر : تدرين اني اكثر وحده بلدنيا فاهمتج لان جربت الحب واذيته صح القصه والوضع يختلف بس عن تجربه وبعد هاي السنين اكولج محد يستاهل تأذين گلبج علموده تضحين وتحبين واتعبين وتالي تجازين بخذلان اني خايفه لا تنكسرين كسره اكبر من هاي

سليل : شنو الاكبر وهو محاس بيه شيصير بعد اكثر واني اكوله احبك واريدك يضربني

نهر : اني مااقبل يمد ايده عليج بس انتي هم غلطانه ميصير تنسين وضعج

وتنسين انتي بنيه ولازم تصيرين ثكيله وهادئه واكثر مستحه مو تنسين تربيتج واخلاقج وتنزلين نفسج لهاي الدرجه تحبين على عيني وراسي بس مو مال ترحين انتي تعترفين اله شبقى بعد عبالج يحبج من تتصرفين هيج بلعكس انتي نزلتي من نظره

لتنسين نفسج سليل تصرفج البارحه اكبر عيب وغلط اني مااريد ازيد تعبج وقهرتج بس هذا الواقع البنيه شكد متصير ثكيله ورزنه ومؤدبه وتستحي كل ما الرجال ينعجب بيها انتي هذا مو طبعج صدمتيني من كلتي هيج سويت يمكن اتوقعها من اي احد بس منج لا

سليل : اعرف غلطت وجانت لحظه صعبه وكسرت نفسي كدامه بس مو بيدي من الخنكه والضغط الي اني بيه حجيت

نهر : ارجعي سليل الهادئه الطيبه الي ادنج من المستحه هذا مو ثوبج حبيبتي الجرئه والخفيه مو اخلاقج

سليل : شسوي هسه ما اكدر حتى اباوع بوجهه

نهر : اني مااكدر ادخل بلموضوع لان راح تكبر وتصير محلوه بحقج اكثر هسه ارجعي تعاملي طبيعي وياه

سليل : شلون مااكدر

نهر : لا تكدرين حاولي

سليل : الله كريم باستني عمه وطلعت باوعت العلاكه الي تجيبها يوميه فتحت الجدر لكيت تبسي بقه بس اسوي تمن

حطيته على الطباخ وبديت انظف ذبيت حيلي كله بلتنظيف ما اريد افكر مااريد اتخيل شصار البارحه شغلت راديو الهي بيه نفسي ويه الشغل

نظفت الشقه كلها طلعتها تلمع حتى الغراض النظيفه رجعت لمعتها غسلت ملابسي وشريتهم بلحمام حتى يذبون المي مالتهم وراها اشرهم على المشر الي هو حاطه بداخل الشقه طبكت التمن وعفته يتهدر ويكمل على نار ناصيه ودخلت سبحت ومن طلعت ضفرت شعري وكعدت باوعت ساعه ٣ الظهرزومااجه هو جان ساعه ٢ يجي معناها مراح يتغدى اني هم ضجت اكثر ما اني ضايجه وما اكلت بقيت اليوم كله بس اتفرج على التلفزيون لحد الليل كولشي مااسوي ومن تطفى الكهرباء ابقى اهفي بلمهفه وماافتح شباك

ما اريد مشكله جديده

باوعت ساعه ١٠ انفتحت الباب كعدت عدل باوع عليه وكال السلام عليكم

وعليكم السلام شمر المفتاح ودخل للغرفه واخذ ملابس ودخل يسبح واني كاعده طلع ينشف بشعره كتله

سليل : تتعشى

سجاد : تعشيت

سليل : زين كمت وكتله تصبح على خير

سجاد : وانت تعشيتي

سليل : اي ومشيت ادخل للغرفه سمعته يكول

سجاد : وانتي من اهل الخير

دخلت وسديت الباب وتمددت والدمعه بعيني ودوخه لازمتني لان من غدا البارحه

شويه واندكت الباب

كعدت عدل وكتله تفضل

فتح الباب ودخل كال

سجاد : ليش مماكله

سليل : اكلت

سجاد : عشا البارحه على حطته والصمون نفسه والغدا ملازمته اصلاً شون بعد اكلتي ليش الكذب

سليل : مجوعانه

سجاد : من غدا البارحه ومجوعانه

سليل : اي مجوعانه لو هاي هم جبر لازم اكل

سجاد : احجي عدل كمتي حتى متحترمين لتشوفين ساكت على سالفه البارحه

سليل : ضرب وضربتني رزاله ورزلتني بعد شتريد تسوي وعفيه مااريد اي مشكله هسه والله مو حمل مشكله اريد انام

سجاد : نامي

طلع وركع الباب بيومها منمت اصلاً للصبح يله غفيت

مرت ٤ ايام هذا حالنا واحد ميحجي ويه الثاني على كد السلام اكلي كولش قليل حسيت بتعب وكمت هوايه ادوخ وكل شويه اريد اوكع وبيوم اشتغل بس الهي نفسي جنت امسح الغرفه وفاتحه الشباك شويه تتهوى الغرفه اني بطبعي امسح الكاع بيدي وصله واستلم الشقه كلها مسح بيدي جنت امسح جوه الشباك

رفعت راسي ومحسيت بعد بشى لحد مافتحت عيني والكه نفسي بحضنه ويضرب بوجهي بيده

سجاد : تسمعيني سليل

سليل : اشرت براسي اي ومكدرت افتح عيني حيل حسيته شالني وحطني على الجربايه ويدور بغراضي على عبايه مجنت جايبه ويايه

سجاد : وين عباتج

سليل : حجيت كوه مجايبتها

سجاد : لازم اخذج للمستشفى

سليل : لا

سجاد : دمج مغرك الدنيا

سليل : احس بألم براسي مو طبيعي فتحت كوه عيني اريد استوعب الي يصير باوعت عليه شفته مخبوص ويرجف

سجاد : هاج حطي هذا الشال على جتفج وامشي للمستشفى

سليل : مااروح مابيه شى لزم راسي وعاط شون مابيج وشوفني ايده اشون متروسه دم

سجاد : تكدرين تكومين لواشيلج

سليل : لا اكدر اكوم جان يمد ايده لزمتها وكوه اتحرك اني الدوخه موتتني وخطوه خطوه وصلت للدرج وردت اوكع شالني ونزلني صار ولد كبالنا

خيرك سجاد

سجاد : زوجتي مضروبه براسها وشبه فاقده

سليل : اني مغمضه وجهي بصدره بس من سمعت كال زوجتي احس گلبي نبض بقوه

ردت ابقى هيج اتحمل الالم والدوخه بس ليبعدني من حضنه

الولد مبين عنده سياره لان ركض نزلني من حضنه ودخلني للسياره وكعدت واعيه بس بصعوبه افتح عيني

نزلنا اتمشى ودخلنا للمستشفى الطبيب كال

يمعود سهله على كيفك خبصت المستشفى اني كلت مضروبه طلقه

سجاد : دكتور رجعت لكيتها غركانه بدمها شون مااغبص الدنيا

هي بشنو مضروبه

سجاد : ماادري بس مبين بحافه الشباك لان جواه لكيتها متمدده

الضربه مو مال خياط لان عباره عن زرف براسها بس عميق هو سبب النزف كله

اتسمعيني بنتي

سليل : اشرت براسي اي

الدكتور : جيد بله افتحي عيونج

وبديت افتح عيوني واحركها مثل ميكولي اخر شى طلب تحليل من كتله جنت دايخه

عقمولي الجرح وشدوه داير مداير وجهي حتى ين

ضغط عليه ويتوقف النزف وطلع التحليل فقر دم

انطى لسجاد مجموعه ادويه وتوصيه بالاكل الزين اني ممركزه وياه لان اريد بس ارجع احس بنعس

طلعنا من المستشفى ورجعنا واسمع سجاد

يتشكر من الولد صعدت كوه ودخلني بلفراش

سجاد : شوي واجيج راح ورجع وره نص ساعه جايب وياه معلاك شوي وزلاطه وكرفس واجه كعد يمي على الجربايه وبصينيه صغيره حطهم كدامي

سجاد : يله اكلي

سليل : مجوعانه

سجاد : اريد افتهم الي دتسوي شنو معناه

سليل : شمسويه

سجاد : ليش تأذين نفسج

سليل : ممأذيه

سجاد : من متاكلين تأذين نفسج ومن تشتغلين وانتي دايخه هم تأذين نفسج ولج احس كاشي الشقه راح ينشلع من المسح

سليل : ممتقصده أذي نفسي وثاني شى وين اروح التهي بلشغل

سجاد : يله اكلي بداعت طه

سليل : كعدت اكل وكوه ابلع اللكمه وهو راح وجاب وصله ومسح الدم من الكاع ردت امسحه مقبل كملت ورجع شال الاكل من كدامي واخذت العلاج الي انطاني الطبيب وتمددت

سجاد : محتاجه شى

سليل : سلامتك

سجاد : تصبحين على خير

سليل : وانت من اهله وجان يكول بهدوء

لتخوفيني بعد عليج

سليل : اشرت براسي اي وعافني وطلع كمت كل كلمة يكولها افسرها الف تفسير حتى لو مو بقصد احسب الها حساب نمت من اثر المسكنات كعدت على اصوات مشتاقتلهم بكد الدنيا وبوسات بخدي فتحت عيني 

والكه رشا وريم وغزل حضنتهم ممصدكه كدامي

رشا .. هااا ثلل يكولون متعاركه وفاشخه ٥

سليل : شون اجيتو

ريم : عمو سجاد جابنا اشتاقيتلج ثلل والله مرات ابجي لان مااشوفج

حضنتهم حيل وردت ابجي من كثر ممشتاقه الهم

غزل : شوكت ترجعين

سليل : ان شاء الله ارجع ولج حليانه وكبرانه

غزل : ماما ارجعي ويانه

سليل : غير مره ارجع

رشا .. يله اروح اسويلكم ريوك

سليل : ليش ساعه بيش هسه

رشا .. عشره الا ربع اذا عمو جابنا سحل من الفراش حتى نصبح عليك وناكل سوه

سليل : وعمه وينها

رشا .. بقت خفر بلبيت اخاف ماما سندس تجي اذا هي هاي الفتره صايره مقيمه عدنا كل شوي وكامزه كالت تبقى اخاف تجي تغطي علينا وتكولها نايمات

ومن نرجع تجيج

سليل : خوما تضايقكم

رشا .. خلي نتريك واسولفلج شسويت

راحت تسوي ريوك وحضرت كولشي سجاد جايب بيض وكيمر عرب وصمون حار عايفه بلمطبخ وعافنا وحدنا جنت كاعده بين خواتي مثل الكاعده بلجنه حيل مشتاقه الهن وجيتهن بوكتها

اخذتني رشا وغسلت وجهي ورگبتي وشعري اطرافه لان بيه دم بس حاولت متوصل المي للجرح وغسلت جسمي كله وبدلت ملابسي كلهن بدون ماادنج او اسوي مجهود حتى لا ادوخ حبيبتي كبرانه وصايره شاطره

وضفرت شعري على كيفها وكعدنا نتريك وبدت تسولف الصار

رشا .. جنت كاعده اشتغل وماما وعمه كاعدات وتعرفين امج تحير شذب حجي شو هاي سكتت وجان تكول لعمه

سندس : رشا كبرانه هم صايره مره

نهر : جوزي منها مكافي ذيج هججتيها

سندس : مالج دخل انتي ولتنسين اني هنا واصله منج وتأشر على خشمها بس اضوج اطردج

نهر : انتي من يامله لخاطر ربج كل متجين تعيطين وتسويلج مشكله وترحين وتردين بناتج يحبنج هنه اصلاً شافن منج بس المصايب واخر شى بعدتي اختهن عنهن

سندس : بله اسكتي ولتخرطين براسي وعوفيني ويه رشا

نهر : مااعوفج احجي كدامي

سندس : ولج نهر لتحطين راسج براسي

نهر : من انهجم راسج كون

سندس : بله متولين تعالي ماما رشا

اجيت وكعدت بصفها

كامت تلعب بشعري

ماما شلونج بلمدرسه

رشا .. بعد وكت غير عطله هسه

سندس : رحتي ثالث وصرتي مره

رشا .. اي ادري وبعدين

سندس : شنو قصدج

رشا .. ماما شتردين مني عفيه بدون هاي الحنيه الزايده

سندس : اعرف بيج عقلج جبير وذكيه واكيد راح تفتهمين كلامي

نهر : عوفيها سندس كومي ماما رشا

رشا .. لا عمه خلي افهم ماما شتريد مني

سندس : نهر اذا حجيتي حجايه ثانيه العب بيج طوبه اسكتي

رشا .. اسمع كملي

سندس : بنتي ابن عمج خليل ولد شاب وحلو وامكانيته زينه حتى سياره عنده وخير من الله فلوس واملاك ويريد بنيه حًلوه وصغيره شون انتي يعني قسمه ذهب مستحيل تلكين مثلها وفوك كل هذا اذا تزوجتو يجوز تعيشين يمي بلبيت الجبير واطلعين من قفص الدجاج العايشه بيه صيري سباعيه مو مثل اختج الفگر راحت ذبت نفسها بتهلكه حتى متتزوجه لتضيعون تعبي وتخطيطي كل هاي الاشهر والله نصير بلسما اذا تزوجتي ابن خليل

رشا .. مااريد

سندس : لج امي والله تتندمين بعمرج تزوجت بس معرفت اختار وهاي تاليها كتلني القهر الفگر وقله الحال وضيعت شبابي على الفارغ اريدج تعيشين احسن عيشه وحتى خواتج تكدرين تساعديهن

نهر : مو على اساس طه اخذج بت وزير وعشتي بلفكر والله تحجين الاخرس

سندس : مالج علاقه بعمتج الرعنه ركزي ويايه انتي اذكى من اختج وطالعه عليه ادري بيج ولج حطي ايدج بيدي واعيشج ملكه وعوفي هذا الضيم كله واقبلي ومن باجر اسويلج احلى عرس والله تكومين تمشين وتصيحين عاشت ايدج ماما على هاي القسمه الزينه

رشا .. بس الولد ما اعرفه

سندس : وره الزواج تعرفي اهم شى تقبلين بلزواج لج امي اكلها خير من الله والف بنيه تتمناه ومعودت اخلي وحده منجن اله ذيج

الثوله مشت وره ذاك التافهه النافخ روحه على الفكر بقيتي انتي لازم تسمعين كلامي وتشيلين سوالف الناس التعبانه المتوكل خبز سوالف عمتج

رشا .. شوفي ماما زواج اني مااتزوج هاي من الاخير

سندس : انتن ليش تعاندني وتخلني اسوي شى مااحبه

رشا : اسمعيني زين اخاف عبالج تسوين مثل مسويتي بسليل اني هاي الشغلات متأثر بيه اني مو سليل الفقيره ولا عمه الي تخاف تطرديها ومتحمله كولشي  اني ميهمني بشر حتى خواتي حتى عمتي محد يهمني ابيع الكل يعني تحبسين عمو او عمه اطرديها او تأذيها خواتي تبعديهن عني كلهم ميهموني ولا يهزون شعره مني لو يموتون كدامي مااهتم  اني اهم شى عندي نفسي واذا طردتيني اروح يم سليل يعني لتحاولين ويايه مثل سليل زواج مااتزوج

سندس : ايا گلبه هيج صارت

رشا .. واكثر واذا تردين هسه الم ملابسي والحك سليل واخاف تحاولين تزوجيني غصب تفكرين بطريقه ثانيه لتعبين نفسج عندي قابليه حتى انهزم واصخم وجهج لو اكو لأبن رجلج مزوجيني علمود فلوسك وامي غصبتني

سندس : هاي تربيتج نهر والنعم منها

رشا .. هستوج كلتي طالعه عليه لازم متستغربين

سندس : والله حرامات حبلت بيجن وتعبت وخلفتجن بس للاذيه وخلصت حياتي بلفكر من وراجن امده هيج خلفه طايح حظها طبجن مرض خيسن هنا بهاي العيشه الزفره

جان تغمني وتطلع

انداريت على عمه لكيت دمعتها بطرف عينها ومصدومه من كلامي وجهه اصفر

تقربت منها ونزلت بست ايدها وكتلها افديج بروحي واصير جوه تراب رجلج انتي وخواتي انتم كل حياتي بس جنت متوقعه تفتر عليه خاصه من صارت شغله سليل وهاي الايام كلها افكر شكول الها اذا فتحت الموضوع ويايه وحتى تمرنت بلساعات على المرايه حتى ابين قويه كدامها ومااخربط بلكلام او امتمت انتم كل حياتي عمه وسليل امي وريم وغزل عيوني بدونكم اموت واذا لمسكم الهوا واذاكم اتخبل مو عاد تأذيكم بس ماعندي غير حل حتى افلت من اذيتها بله سليل تزوجت عمو اني شون افلت هم اتزوجه شطلعت هاي ماخذنا مقاوله

نهر : ابتسمت وردت ابجي وحضنتها حيل

ولج ميصير يجمع بين الخوات يعني ميصير يتزوج اختين

رشا .. هااج فوكاها يله اتزوج سعدون المخبل

نهر : هههههه كبرتي يابت طه وصرتي قويه وتوكفين وتاخذين حقج

رشا .. شعبالج عمه اعجبج بهيج سوالف

نهر : انتي نسخه من سندس بقوتها ولسانها بس داخلج وگلبج وروحج طه وكاعد كدامي  الْحٍمَدٍ للـّہ ماطلعت ولا وحده على امجن بالاخلاق

رشا .. ماما صنعت بلعراق قطعه وحده وعزلو المعمل

نهر : هههههههه تعالي بحضني

رشا .. لتزعلين مني فدوه

نهر : ماكو امي تزعل من بناتها

رشا .. يله يااحلى عمه بلدنيا نروح نكمل الغدا الله عليج اريد تمن احمر جوعانه انفتحت نفسيتي على الاكل خلصت من الرفيقه سندس لو بيدي هسه اشد وصله واركص

نهر : احلى تمن اسويلج وتعالي اعلمج شون يصير

سليل : والله ذكيه شون اجت بالج

رشا .. والله ايام افكر حتى نوم ماانام وهلمره انتي ماكو يمي اجت ساعات اريد اجيج ركض من كثر ممشتاقه الج وخفت لتسوي بيه مثلج وكعدت اخطط واحفظ الكلام

سليل : والله اني دمعت الله يساعد عمه شون تحملت تسمعه

رشا .. ماعندي غير حل

سليل : والله وبطله ولج اني صدك امج

رشا .. واغلى والله وحضنتها حيل

ريم : اني هم اريد حضن مو بس رشا

سليل : ههههه تعالي وحضنت حتى غزل الصافنه بوجهنا

مرت ٣ ساعات وخلصناها ضحك وشقى جنت طايره بيهن حتى الم راسي ناسيته واكلت كومه وياهن

وراها اجت عمه وحياتي انتهت من شافتني تبوس بكل راسي ومبقت غير دقايق اخذت البنات وراحت بس من اخذتهن تكول اخذت روحي حيل انقهرت بس مابيدنا شى

المهم شفتهن اخذت علاجي وتمددت اني احب نومه الظهر نمت كعدت على دكه الباب عرفت سجاد

سجاد : يله كومي راح يصير المغرب

سليل : ساعه بيش

سجاد : بلسبعه

باوعت بيده كلاص برتقال وجان يقدمه هاج اشربي

سليل : ليش تعبت نفسك

سجاد : ماكو تعب اشربي لازم فقر الدم يروح ونقص فيتامينات هم عندج سكراب طلعتي

سليل : ههههه لا مابيه شى

كاعد على الجربايه بصفي كتله شكراً لان جبت البنات

سجاد : مو كتلج مااحبها كلمة شكراً

سليل :باوعت بوجهه وكتله اني مااكدر بعد اصيحلك عمو

سجاد : ليش

سليل : دنجت وكتلك مااكدر وخلص

سجاد : صيحي بلي تردي بس تنسين ذاك اليوم كله والي كلتي كله تشيلي من عقلج

سليل : لتخاف شلته كله وانت هسه عم وصديق واخويه الجبير وبس

سجاد : عفيه هيج اريدج

محتاجه شى راح ارجع لشغلي

سليل : لا شكراً

وطلع واحجي بداخلي تبقى حبيبي تبقى اول واحد نبض گلبي اله بس بعد ما ارخص نفسي كافي الصار ذاك اليوم

ثاني يوم جمعه وكاعد لكيته يدك بلبالكون

سليل : شسوي

سجاد : راح اسيج البالكونه بسيم حتى ميبين وهم تكدرين تكعدين براحتج وراح اجيبلك زرع هنا

سليل : يعني تدخل شمس

سجاد : مو سيم ناعم لا زين ويعبر هوا وشمس وتكدرين تشوفين بره بس المهم الي قريب علينا ميشوفج زين

سليل : ياريت احب اكعد بيها

سجاد : تكدرين تسوين جاي حتى اكمل لو بعدج دايخه

سليل : لا  الْحٍمَدٍ للـّہ صرت زينه ورحت سويت الجاي وكعدت يمه من يشتغل وبيومها كمل البالكون وغسلناها كولش كيفت بيها

وراح جاب سنادين زرع اشكال وكال بعد ذني مسؤوليتج اتلهي بيهن

خلال اسبوع سويتها جنه كراسي اثنين وطبله صغيره وداير مداير زرع وهي جبيره يعني الكعده بيها تسوه الشقه كلها

صارت سلوتي وحتى هو مرات يحب يكعد بيها ويدخن بس من هو بيها اتقصد مااكعد يمه يعني انگلبت الادوار اني كمت اتجنب نكعد سوه مده طويله  فكيت الشاش وصار راسي زين

اجت المدارس واجت عمه جايبتلي اشكال غراض طلع هو منطيها فلوس تتسوك مال السنه الجديده وهم طلبت غراض وشغلات بذاك البيت تجيبهم اليه

خواتي اجوني مره ثانيه هم كم ساعه وراحن

بديت اتأقلم على حياتي بلشقه

هلسنه اني خامس اعدادي جان المفروض سادس بس مع الاسف تركت بس يله كولشي قسمه

حياتي وياه هادئه احاول اتجنبه شكد مااكدر  وبعد ٣ ايام المدرسه

جنت كاعده بعد الليل اكيد ماانامه تمددت وغمضت عيوني ردت بس اغفى راح تصير ساعه ٤ الصبح ومنايمه حسيت الباب انفتح بهدوء

بقيت مغمضه عيوني ونايمه على ايدي اليمنى احس بحركات رجله يمشي بهدوء ويتقرب شوي شوي لحد موصل يمي و كعد بموازات نومتي وقرب وجهه وجان احس  بأنفاسه الدافيه تلامس وجهي اااااه نفس الي سويته قبل مده بس هلمره احس دمي وكف احس جسمي وكل مسامه بيه تكزبر لان هو قرب وجهه من وجهي ردت افتح عيوني بس خفت يطلع حلم لو يطفر ويطلع عذر يكسر هاي المشاعر الي احسها بدت تتقرب الانفاس اكثر حسيت راح يلامس وجهي اسمع صوت انفاسه وشون يجر النفس بهدوء ثواني بس حسيته تعادل العمر كله

جان يوخر ردت اكوله لتروح عفيه فتحت عيني على كيف لكيته فتح الباب وطلع

السواه دمرني رغم ملمسني بس حسيته ليش هيج سوه اذا اني اخت اله ليش اجه ودخل غرفتي وهو اصلاً ميدخل اله يدك الباب وليش بنص الليل وهذا السواه شنو معناه اخاف ردت ارجع اتزن خرب كل الموازين ورجع اعصار گلبي

يتبع ...