رواية قلوب من حجر الفصل الثالث 3 - بقلم جيجي

أنتِ مكسوفة مني؟ ما حدش غريب. تحبي أساعدك؟ تعالي... وقرب عليها، وسمرة رجعت لورا، ولسه هتنادي على أختها. بس رشاد بعد لما سمع صوت سلمى بتقول: جبت لك الهدوم. أنت جيت واقف عندك ليه؟ رشاد: بشوف البنات شكلهم حلوين. سلمى: آه حلوين. طالعين لخالتهم. مش البنت بتاخد شكل خالتها؟ رشاد: ربنا يسترها وما ياخدوش مخ خالتهم. ومشى. سلمى: مالك يا بنت؟ عاملة كأن اتكب عليكِ جردل ميه بتلج. سمرة: بقولك إيه، أنا عايزة أروح. سلمى: تروحي إيه؟

هو أنتِ جيتِ عشان تروحي؟ خدي لبسي دول للبنات، والباقيين هغسلهم، وأما ينشفوا أجيبهم. حكم أنا من بدري راكناهم. سمرة بهمس: أكيد أنا فهمت غلط. أكيد مش كيف ما أنا متخيلة. ده جوز أختي. أكيد مش كده. سلمى: هجبلك العشا بتاعك. سمرة: تعباكي معايا. سلمى: تعبك راحة. وراحت عملتلها الأكل. وفضلت سمرة أسبوع عند أختها بنفس النمط. جات سلمى وقالت: بقولك إيه؟

أنا حماتي ولدها اللي في الجيش نازل إجازة، وعايزاني أعمل له عشا. أنا هروح واحتمال أبَات هناك. هعمل لك أكلك قبل ما أروح، وأنتِ خفيتي أهو. سمرة: طب وجوزك؟ احم، قصدي يعني، هيروح معاكي ولا هييجي يبات هنه؟ سلمى: اللي يشوفك يقول جوزي هياخد من وركك حتة. سمرة: لا بس حرام، لازم حد معانا. سلمى: هو هيخلص شغل وييجي عند أمه. واحتمال يبات في الشغل أصلًا. معلش والله أنا ما كنتش عايزة أروح، بس أنتِ عرفاهم بقى.

سمرة: معلش، ما تقطعيش جوزك من ناسه. اللي ما لوش خير في ناسه، ما لوش خير في حد. عشان ما تجيش مرت ولدك بعدين تقطعوا منك. سلمى: طيبة قلبك دي اللي بتوديكي في داهية. يلا سلام. سمرة: سلام. وكانت قاعدة بالليل بتسكت البنات. بس لقت باب البيت بيتفتح، ودخل رشاد وقال: إزيك. سمرة بخوف: أنت رجعت من الشغل ليه؟ قصدي يعني، أختي مش هنه. رشاد: أنا قولتلها هتتأخر في الشغل. قلت ندردش شوية. سمرة: هندردش في إيه؟ هو إحنا بينا مواضيع؟

وكملت بتحذير: كل اللي بيني وبينك أختي. أختي اللي هي مراتك. رشاد: أنا عارف. بس مش عارف جوزك إزاي جاله قلب يزعلك. إزاي حد يزعل القمر ده. وحط إيده عليها. بس سمرة بعدت وزقته جامد، وشدت البنات وقالت: بعد عني بدل ما والله العظيم أزعق والصوت وألم عليك الناس. رشاد: ليه كده بس؟ ده إحنا يا دوب بنتكلم. سمرة: كلام وسخ زيك. خليك بعيد مني. وأخدت البنات ومشيت بيهم على البيت. بس اتفاجئت بأنوار والناس ملمومة. قالت: هو في إيه هنا؟

واحدة: فرح بنت نعيمة. سمرة: ونعيمة بتعمل فرحها عندنا ليه؟ البنت: ما هي هتتجوز موسى. سمرة بصدمة: موسى مين؟ البنت: موسى جوزك. سمرة: ومالك بتقوليها بارتياحية كده كأنها هتتجوز واحد ما عرفوش؟ يا ابن الجزمة يا موسى. وطلعت على فوق. فهيمة: أنتِ مش كنتِ عند أختك؟ إيه اللي جابك؟ سمرة: إيه اللي جابني بيتي يا حماتي؟ ده بيتي وبيت جوزي وبيت عيالي. فين جوزي؟ خطيته في أنهي أوضة؟

فهيمة: في أوضتك اللي اتجوزوا فيها. رجع اتجوز فيها تاني. سمرة: كمان ده أنا هخرب بيتكم. وحطت البنات على الكنبة وفتحت الباب ودخلت. وكان موسى قاعد مع نعيمة على السرير. بص لها بخضة ونزل وهو بيقول: إنتي جيتي إمتى؟