تحميل رواية انثنى غيم نجد لخد الحجاز النرجسيه بقلم شُروق pdf

ريوف ناظرتهم:بنات ليش عادي انتوا كذا ؟

نورا:لاني مع بهاج صراحه ما راح اتحمل اجلس هنا اكثر بعد اللي شفته ، تسلط وقمع اراء وتدخل بكل شي

ريوف:بس ترا بتتزوجين ، ومين ؟ سلطان

نورا:مو بهالسوء

ريوف رفعت حاجبينها بصدمه وكملت نورا

:وانا صادقه محسستني بتزوج شبح ترا سلطان وبعدين كلها فتره لين نهج وننفصل

ريوف:وانا عطيتوني شليويح ؟

ضحكت نورا:لابق لك عاد

ريوف:نورا !

نورا ناظرت أنهار:محد محظوظ غيرها

ناظرتهم أنهار وتاففت:مو وقتكم

نورا ابتسمت:بهاج ينشرى ياحياتي على الاقل انتي بتكونين بأمان وحنيّه وسند ورجوله

ريوف ناظرتها:قبل شوي تقولين سلطان مو بهالسوء

نورا:قلت بس بهاج اضمن مستقبلي وحياتي وهو اخوي

أنهار:قلتيها اخونا ، ليش نتزوج ؟

نورا:بس محد قال زواج حقيقي ولا له نيه اصلاً بهاج يتزوج بس كلنا انحطينا بموقف فجأه

أنهار صدت ولا تكلمت

ريوف:ياحياتي بهاج ضحى بكل شي عشان بس يساعدنا كلنا

أنهار ناظرتها وكملت نورا:بهاج يشوفنا خواته فعلاً يوقف قدام ابويه كأنه عدوه ، يكرر كلامه كل ماشاف احد يبكي ويقول لا تبكين

شدت على كفها وهي تحس بالضيقه

وابتسمت ريوف:ياليته متزوج أنهار من اول عشان يصير يقرب لنا أكثر

نورا ضحكت:اخونا اذا تزوج انهار والا لا

أنهار وقفت وتنهدت:بطلع اشم هواء مخنوقه هنا

فتحت الدولاب وهي تطلع جاكيتها الطويل وتلبسه

ريوف:اتوقع بتمطر

أنهار:ماراح اطول

فتحت الباب وخرجت واخذت نفس من أعماق جوفها وهي تشم ريحة الطين من الرشاش اللي ينزل ويبلل الارض

خرجت وهي ترفع ذراعها تتلمس رطوبة الجو

رفعت راسها تناظر السماء وتغمض عيونها وهي تاخذ نفس

فتحت عيونها ولفت تناظر ممر النوير من بعيد

ووقفت وهي تتأمل بدايته وتتذكر وقوفهم قدام المستودع نبرة صوته اللي تختلف معاها ونظراته لها

بلعت ريقها وهي تسمع صدى صوته بإذنها عقدت حاجبينها بإنزعاج وهي تتنفس بسرعه ولفت لبيته تراقبه من بعيد

رفعت كفها لذراعها تتحسسه وتتذكر جملته قدامهم كلهم " انتي في وجهي "

شدت على ذراعها وتتذكر موقفها معاه ببيته وجلوسها جنبه ونظراته لها

صدت وهي تتصدد بنظراتها ومشاعرها لبعيد وماتعرف كم انقضى الوقت وهي تهوجس وحدها لين حست بنفسها ودخلت الملحق للغرفه وناظرتهم نايمين

رمت جاكيتها على طرف الباب ومشت لفراشها

،

قفل ستارته من دخلت ونزل راسه يتذكر وقوفها وملامحها اللي تتشكل على افكارها

وقوفها قدام ممر النوير ونظراتها لبيته ولشبابيكه هي غارقه بأفكارها هي تلمس ذراعها وتتحسسه

هي تطري عليها ذكرياتها معاه نفس ما تطري عليه

اللي فهمه من مراقبته لها انها تغرق لكن تكفي غرقها بالكبرياء

ميل فمه على جنب بشبه ابتسامة سخريه من حالها اللي كشفها فيه من شباكه ومشى لفراشه ينسدح

،

عمر:توقف المهزله اللي صارت

رَده:وليه ؟ انت قايل تزوج بناتك لعيال عمهم !

عمر:لاني داري ما بيوافقون

رَده:وزين وافقوا

عمر:تبيني اعطي بهاج وحده من بناتي ؟

رَده:اشغله عنك خل مدهاله مع الغربال

عمر:وش تقول ؟

رَده:خله خله وان زانت احوالهم اشغلناهم لين عاشوا وتعايشوا على المكان هنا

عمر:هم يتفاهمون بدون زواج

رَده رفع حاجبه وابتسم:الزواج غييير ، هو يعدهم خواته وهم يعدونه اخوهم ، تخربطت عليهم الدنيا

عمر صد بغضب وكمل رَده:اشغله بطاري الأخوه اشغله بأفكاره

عمر قعد وهو صاد وكمل رَده:وبتنخلق المشاكل من قعر الأرض

عمر التفت له يناظره وضرب كتفه يأشر له بعيونه

،

تركتهم بعد ما قالوا انهم بيفطرون عند بهاج وخرجوا

خرجت بسرعه قبل يلمحونها ومشت مع ممر النوير بخطوات سريعه بشوزها الرياضي ووشاحها اللي تستر فيه نفسها

استقرت خطواتها من دخلت ممر النوير وابتسمت وهي تشوف اوراق النوير مفتّحه من أشعة الشمس ورفعت راسها للنخل والشجر وتنهدت بتعب وضيق من خطر ببالها ابوها

انقبض قلبها وهي تتذكر كيف كان معهم وكيف صار الحين كيف كانت الحنيّه تتفجر من ملامحه وكيف صارت ريحة القسوه تفوح منه يشكل يزعجها

هي تنزعج وتنكمش اذا لمحت منه نظره قاسيه وحدة ملامحه وصرخه وتهديد

نزلت راسها وهي تغطي اذانيها بإنزعاج وتغمض عيونها بقوه

تتذكر موقفه قدامهم امس وسكوته عن اصعب قرار ممكن يختارونه ، جموده خلف رجال ما عاشوا معاهم

رجفت واقشعر جسمها وهي تتذكر وجوده معهم قبل ووجود امها ، الطمأنينه اللي عاشت في كنفها

تجمعت الدموع بعينها وجلست تتكي على شجره من بين الشجر ومسحت دموعها اللي نزلت

غمضت عيونها وهي تبكي كل اللي تبيه ترتاح من البعثره اللي تحس فيها

هي تخبي الفوضى اللي داخلها وتدري ان نورا وريوف نفس مشاعرها لكنهم يخبون على بعض

والا كيف نورا بتتخطى بندر بكل سهوله وريوف بتنسى وتتجاهل سنة التخرج اللي ممكن تضيع عليها

مسحت دموعها من خطر ببالها خواتها ظلت تبكي بدون صوت وهي ساهيه بيدينها اللي تلعب بالعشب الاخضر اللي تحتها

،

شرب شاهيه وعينه على ريوف اللي تتكلم:متضايقه تركناها لحالها

نورا رفعت انظارها لبهاج:مو عشان موضوع الزواج هي من قبلها وهي مو على بعضها

رجع ظهره لورا ونزل نظره لفنجانه وهمس:تركتوها لوحدها ؟

ريوف:كانت تلبس قبل نخرج يمكن خرجت تتمشى صارت عادتها

نورا:خليها ترتاح برا الملحق ما ينجلس فيه صراحه

سلطان:ما قابلتم ابوك؟

هزت راسها بالنفي ورفع انظاره بهاج:ولا أمي ؟

نورا:ماشفتها

بهاج اخذ نفس والتفت يناظر المزرعه مع الباب المفتوح ووقف

نورا ناظرته:بتدور أنهار ؟

بهاج هز راسه وكملت نورا:خلها تسولف معاك وشوف اشبها

بهاج صد براسه:طيب

مشى ولبس حذيانه والتفت يناظر الملحق من بعيد وضيّق عيونه من الشمس ولف لممر النوير

مشى لين كسى جسمه ونظره ظل الشجر فوقه ومشى لين وصل لمنتصفه ولمحها جالسه

تنهدت وهي تبكي والتفتت من شافته يمشي بهدوء ورويه لها

رفعت اصابعها تمسح دموعها ومن شافته زادت ببكاها اللي بدون صوت

ومشى لين عندها وعقد حاجبينه:تتخبين عشان تبكين؟

صدت براسها ورفع انظاره يناظر حوالينه المكان والتفت لها وجلس جنبها وضم كتوفه على ركبته ولف لها:مو بهالسوء !

رفعت انظارها له تناظره:عشان ابويه

هز راسه وصد عنها:يستاهل تبكين عليه أجل

أنهار:كان يقولي محد يزفك بيوم زواجك غيري وبوصي عليك كأنك عيوني قلت له ليش انا ماني عيونك ؟ قال انتي قطعه من روحي

بكت ووقفت كلامها ولف لها وناظرته وهي تبكي:ابغاه ابغاه يرجع لنا

ماتكلم وهو يناظر دموعها ورجفة يدينها وكملت:وينه ؟ احسه مو هو مو نفس اللي عشنا معاه كلنا ساكتين ونسايّر الوضع بس انا وريوف ونورا نحس بالغربه

شهقت ولفت له بكل جسمها:احسه مات

عقد حاجبينه بإنكماش من طاري الموت وشهقتها ورجفتها اللي زادت وهمس:اسم الله عليك

تقرب منها وتكلم بهدوء:يبي يرضي ابوه وامه لكنه ما فهم ولا درس وضعه معكم والا هو حيّ وبيصحى يدوركم

أنهار:ماعاد ابغاه يرجع خلاص مو قادره اناديه حتى بابا نفس قبل ، صرت اتوقع منه كل شي من غريب اتحسس يوم يمد يده علي

بهاج همس:ما قلت لك انك بوجهي ؟ من يقدر يجيك ؟

رفعت انظارها ورموشها مبلله بدموعها وتوقفت عن البكاء وهي تراقبه يتكلم بهدوء معها

بهاج:مو قلتي يعقب ؟

ناظرته لثواني لين ضحكت وابتسم بهاج:من علمك على يعقب ؟

أنهار رفعت راسها له:انت يوم كسرت عطري

بهاج ابتسم ابتسامه هاديه وناظرها بتأمل:ليته الوحيد اللي عندك ، للحين اشمه فيك

أنهار:عندي ثلاث منه

بهاج سكت يراقب نظراتها له وميلت راسها كأنها بتتكلم لكنها تمنعّت

وهز راسه:قولي ، وش ودك ؟ ودك برابع اجيبه لك؟

ابتسمت وهزت راسها بالنفي:الحسنه الوحيده بقدر احضنك بدون تأنيب ضمير

لانت ملامحه بصدمه من كلامها ونزلت انظارها لصدره وذراعينه ورفعت انظارها له:احضنك وبس

بلعت ريقها وتجمعت الدموع بعيونها بضعف

وشد على يده وانقبض قلبه هو يدري انها تضيعه وتدمره وتغرقه في جيد اطباعها وجرئتها وبرائتها لكنه ماقدر الا ينطق:والله ما أردك عنه من اليوم

رفعت راسها له وفرد ذراعينه لها وهو يقترب منها ورفعت يدينها تحاوط عنقه واكتافه وتحضنه وتبكي بضعف

شدت عليه بقوه وكأنها تنتظره من سنين هالحضن

غمض عيونه بقوه من حس بضلوعها وسط ضلوعه وشعرها يلامس وجهه

يحس بقوة يدينها حوالينه ويشد عليها ويقربها لحضنه اكثر

اخذ نفس وهو يشم ريحة عطرها ويتحسس بكفه خصرها وظهرها

يسمعها تبكي وتخفي بكاها ويدري انها تضعف وضعفت عنده ومن حُسن حظه وسوء قلبه انها ضعفت وسط ضلوعه

وده ينتشل قلبه وصدره وضلوعه وتتوسط هي مكانهم

كان الريح يعانده ويبعثره وهو ينثر ريحها اكثر على انفاسه وشعرها على وجهه

كيف يحلف يمين برب اللي خلقها انه ماوده يفكها

وده يصرخ يقول ؛ كيف أطفي الريح بثيابك وكيف اشعلك كيف انتثر على جمرك وكيف احتويك ، أعنّ لك لو تصّب الموت واتهيّلك وأجوع لك وآتمنى خنجرك واشتهيك

كانت متمسكه فيه بكل قوتها ومميله راسها على كتفه وتبكي وتغرق عنقه بدموعها لين نشفت دموعها وتلاشت من مدامعها وغمضت عيونها تتحسس عنقه من الخلف وشعره وحدود ياقة ثوبه

رمشت وهي تناظر عنقه من قريب لأنظارها وتحس بنبضات صدره وتسمعها

رفعت كف عن عنقه وكتفه وهي تلمس دقنه وفكه بأصابعها ، هي ارتخت قدام جروحها ولكنها حاربتها من حضنته هي طمعت أكثر من تنعّمت من جديد بكنف حنيّه ما تشبه أحد تشبه حنيّة بهاج وبس !

هي تحب الإهتمام وان ينصب لها فنجان من الدلال وتشربه ولا ترتوي وذاقت الدلال والحنيّه ببهاج

هو قوي وجلفّ وخشن وبدوي ورجّال يطري بكلام هي ما تفهمه حتى لكنه يحمل كيمياء بجيناته تميل جيناتها لها ، تستشعر كل الخشونه اللي بوجهه وعنقه ودقنه وشاربه وتستغرب من وين تتفجر الحنيّه هذي كلها وتعجز وتجهل هو وش يحس من ورا تفكيرها اللي استغرقت فيه وقت طويل

ماتركت فيه خليه وحده مسترخيه هي صحّت فيه مليون خليه وخليه وتركت داخله يشتعل من حرارة مشاعره وصدره

من عطرها ومن كفها اللي تلمس وجهه ومن صدود نظراته عنها وهو متأكد انها تناظره من قريب ومن على كتفه اللي سانده عليه بالتحديد

ولكنه ما قدر حتى يبعد يدينه عن ظهرها وخصرها ولا قدر حتى يلتفت ما يضمن روحه لو التفت

لكنها بعد طول الوقت اللي قضته تناظره ابتعدت عنه وجلست قدامه وناظرها

رمشت بهدوء وهي تناظر عيونه اللي تراقبها بهذيّان

وش المشكله بنظرها لو اعترفت انها غرقت قدامه وانها تفرح من كل هذا الإهتمام والنظرات لها وكأنها معجزه كونيه !

ليش قررت تسكت وتظل تناظر عيونه بدون كلام لحد ما نزلت راسها ووقفت ومشت راجعه بدون تقول شي

كان يجهل وجهها اللي كان مبتسم وهي رايحه وعاقد حاجبينه من ردة فعلها ومن سكوتها ونظراتها ولا فهم

مافهم نفسه وحاله ولا فهم حالها هي بعد ، هي استنكرت فعلتها ؟ والا بتعيدها وتكررها ؟

غمض عيونه ونزل راسه لثوبه يرفعه يشمه من جهة صدره وابتسم من شمّ ريحة عطرها اللي استقرت على ثوبه وهمس:هالمره يعقب من يغسله

رفع راسه يناظر مكانها واخذ نفس يفتح زرار ثوبه ويتنفس من أقصى رئته

طلت عليهم وهم بالصاله وناظروها وابتسمت:بقيتوا لي ؟

ريوف:عيوني انتي حتى لو مابقي حاجه اخلي شليويح يسوي لك احلى بيض

فهد التفت لها يناظرها بصدمه

وضحكت نورا:راضاك بهاج ؟

ابتسمت ودخلت لهم

سلطان ناظرها:وينه هو ؟

أنهار:جاي وراي

جلست جنب نورا وهي تنتظره يدخل مع الباب

ريوف:قوم صب شاهي لأنهار اختي

فهد:هيه انتي ترا قالوا تزوجها ما قالوا اشتغل عندها

ريوف:مغصوبه عليك لذلك مالك كلمه

فهد:على اساس انا اللي راقد عند رجلين الشيبه اترجاه يزوجني اياك

ريوف:اوف ياكثر كلامك شليويح

سلطان ضحك والتفت فهد له:هذا وهي ما صارت زوجتي

ريوف:زوجتك قال ! ترا بقعد ببيت خواتي عبالك بقعد اسوي لك فناجين شاهي لك ولخواتك

فهد:اقول بنت ! تراني رجال قول وفعل والمرَه مالها الا بيت رجالها

ريوف ناظرته بإشمئزاز ولف سلطان عليه:كفو

فهد ابتسم وتكى بكفه وكمل سلطان:شليويح قول وفعل

التفت فهد وكشر بوجهه وضحك سلطان

لفوا من دخل بهاج ورفع انظاره لأنهار اللي ماسكه فنجانها وتناظره

مشى لهم وناظر فهد ثوبه اللي مفكوكه ازاريره

فهد :انت تهاوشت مع هموم البنت ؟ والا علامك

بهاج عقد حاجبينه وقفل ازارير ثوبه:قوم بس عندي محاضرات

فهد بعد عنه وجلس بهاج

سلطان:نطلع ؟

هز راسه بالنفي وهو يفتح اللابتوب ورفع انظاره لنورا اللي ابتسمت:كيف راضيت أنهار ؟

نزل انظاره للابتوب وسكت ولفت أنهار لها بهدوء

:مين ناشر إشاعه اني زعلانه ؟

نورا:حياتي انا اختك يور سستر

أنهار:متضايقه بس مو زعلانه

سلطان:هذا وانتي بتاخذين شيخنا كلنا بهاج

رفعت انظارها لبهاج اللي يناظر سلطان بحده وضحك سلطان وصد عنه:ماغلطت ماتبي تصير شيخ خلاص الشيخ شليويح يسدنا

فهد:ياخي اهلي تعبانين على اسمي يرحم امك

ريوف ناظرته:من زينه عاد سلكوا لك بثلاث حروف

ضحكوا كلهم من كلام ريوف وانزعاج فهد منها

رفعت انظارها وهي مبتسمه وناظرت بهاج اللي يناظرهم ويضحك

ونزلت انظارها لفنجانها بهدوء ولفت لنورا وهمست

:امشي نرجع عشان يركز

نورا لفت لريوف:قومي ريوف

وقفت ريوف وتعلقت بذراع نورا:لاننا نعرف الذوق بنخلي اخونا بهاج يركز بكلاساته

بهاج:اقعدوا انا ادخل الغرفه

نورا:لا لا ركز وكمل شاهيك

مشت أنهار وحطت فنجانها على الطاوله ولفت تطلع مع البنات

سلطان:قم رفع وخلنا نشوف شغلنا

بهاج:خلوا كل شي انا ارفع بس اذلفوا

فهد:تمون ياولد العم

بهاج:توكل بس

ضحك سلطان ومشى مع فهد وخرجوا

رفع انظاره لفنجانه اللي شربت منه نصه بس وتركت نصه

ظل يناظره ونزل راسه لثوبه يتأكد ان ريحتها لا زالت فيه ، قرب من ازارير ثوبه وهو يشم صدره وابتسم وهو يشم ريحة عطرها اللي لا زالت موجوده

،

فهد قام وهو يسمع نهاية سالفتهم ومشى يركض وهو يضحك قابل قدامه نورا عند الباب وناظرته

:مسوي مصيبه ؟

فهد:الحقي ابوك عييى يزوجكم

وقفت بصدمه وضحكت:احلف !

مشى بسرعه وفتح الباب على بهاج وسلطان اللي التفتوا له ودخل وضحك:مبروك مافي عرس

قاموا وناظره بهاج:وش تهذري ؟

فهد:عمر معيي على بناته جات منه يالله لك الحمد

دخلت نورا وراه ودخلت:بهاج سمعت ؟

دخلوا أنهار وريوف:اش صار ؟

سلطان:وش سمعت ؟

فهد:عمر يتهاوش مع الشيبه حالف بناته ما يتزوجون وقال بهاج يعقب

ناظروا بهاج اللي سكت ثواني وهمس:على كيفه ؟ هو قايل

فهد:ياشيخ زين جات منه بغيت أدبّس بذي

ريوف كشرت:والله حمدلله عليا انا

بهاج لف وناظرهم:حمير انتم ؟ مو قلنا ذا لمصلحتنا ؟

سلطان ناظره:لمصلحتك انت لوحدك

ناظره بحده بهاج وضحك سلطان:وانا صادق

بهاج مشى:والله لأتزوجها طرق

ناظرته أنهار وهو يرفع طرف شماغه على راسه ويطلع من جنبها بعد وعيده لهم

وابتسمت وهي تلاحقه بنظراتها وخرج سلطان ورا بهاج:امششش يا ابو سعود

ضحك بهاج وهو يمشي للمجلس ورافع طرف ثوبه

ريوف لفت لهم:يعني ايش ؟

فهد:صامل بهاج

نورا:منجد هم حسوا بالخطر عشان كذا رفض !

أنهار ابتسمت وهي تلمحه يدخل المجلس ويختفي عن انطارها ولفت لفهد:الحق شوف اش يقولون بسرعه

مشى فهد يسرع بخطواته يلحقهم ودخلت نورا

:اخخخ يارب بهاج يبرد قلبي

ريوف:بنات تكفون ما نبغى نتزوج

نورا:محد بيتزوج منجد كل هذا عشان نفتك من المكان وتكملين دراستك

ريوف تأفتت وجلست جنب نورا وعضت شفتها أنهار وهي تراقب المجلس

لفت لهم:ما اقدر اصبر بروح اسمع

خرجت ولحقتها نورا:بنت !

تركتهم ومشت بخطواته سريعه ووقفت عند باب المجلس تتخبى وتسمعهم

،

بهاج:ترجع بكلمتك ؟ انت عطيتني وانا وافقت

رَده التفت لعمر اللي يناظره بغضب

بهاج تكى بيده:انا جاهز ومهرها جاهز وابيها هالاسبوع تكون ببيتي مدري عن عيال عمي ان كان جاهزين والا لا ، لكني عند كلمتي

عمر:هم خواتك انت قايل لي

بهاج رفع حاجبه:ما كفاك قلت ازوجهم واخرب اخوتهم وانا ما بقصر طالب ومتكلف وابي البنت

التفت لرَده اللي ساكت:ما نطلع عن شورك والا يا ابو سعود !

رَده مارد وهو يناظر بهاج واخذ نفس بهاج:وسلطان ماعنده مانع وفهد قدامكم اسألوا

عمر صد يناظر رَده ولف رَده:تم البنت لك

ابتسم بهاج وناظر عمر اللي يناظر رَده

وكمل رَده:لكنها بذمتك اختك وخواتها خواتك

بهاج عقد حاجبينه:تزوجوني وتشرطون عليّ من تكون ؟ دام بيننا عقد نكاح وشهود فهي بذمتي زوجتي وبس

رَده نطق بجمله استنكرت وجيههم منها من شدة شفافيتها وعقد حاجبينه بهاج:اعرف وش تنطق

رَده ضحك ولف عمر:وش تقول انت؟

بهاج:نيتي ماهي نيتك يا أبو سعود نيتي أصون بنات بذمتي لأنهم يبون رجال بظهرهم

رفع انظاره لعمر اللي ناظره بحده وابتسم بهاج

:ومن بينهم وحده تصير زوجتي

عمر:تعقب

ضحك بهاج:صارت وإنتهى

رَده:دامك نظيف نوايا ليه ملزّم على الوسطانيه ؟ نعطيك الكبيره وكلهم خواتك

بهاج سكت وتلاشت ابتسامته ونطق سلطان:انا ابي الكبيره

رَده:تقسمتوا وخلصتم ؟

سلطان:شاورتم وقلنا تم

عمر:اذا يبي يتزوج ولد سعود ياخذ نورا

بهاج ابتسم واخذ نفس:تصير ليه ماتصير

بلع ريقه عمر من ابتسامة بهاج وعقدت حاجبينها وهي برا واستنكرت اجابته عن نورا

لفت تناظر البنات واقفين بعيد ينتظرونها

ورَده كمل:وش قولك ياعمر ؟

عمر حك جبينه ونطق سلطان يمنعهم عن الكلام ويساعد بهاج اللي تورط بالموقف

:بعد اذنك انا ابي الكبيره

عمر:وليه ؟

سلطان:بيننا أُلفه زينه

ضحك رَده:خله خله عطه يتفاهمون زين دامه يبيها

نزلت انظار بهاج لفنجانه وحطه بالارض:استأذن

وقف وخرج من الباب يلبس حذيانه وناظرها واقفه والتفت يناظر عمر ومشت وتركته

مشت قبله وهي عاقده حاجبينها ودخلت الملحق

دخل بهاج وناظرته نورا:اش صار ؟

بهاج:مصخره يعطون كلام ويردون فيه

نورا:شسويت ؟

بهاج سحب ترمس الشاهي وهو يصب له:حليتها

أنهار اخذت جوالها وهمست:راجعه انا

خرجت وناظرها لين طلعت وناظرهم:من متى وهي عند الباب ؟

ريوف:خرجت مع فهد

اخذ نفس وصد عنهم وجلست نورا:بهاج

رفع انظاره وناظرته بخوف:تتوقع صح ؟

بهاج:ادري ماهي سهله لكنها أحسن من قعدتكم عند ابوكم وهو بهالشرّ

نورا:بس بهاج !

بهاج هز راسه:أضمن لك سلطان وفهد تراهم رجال ومتربين معي ، وانا موجود مارحت !

ريوف ضحكت:اي وصرت أقرب زوج أنهار

ابتسم وهو يشرب من فنجانه وناظرته نورا وتكلمت بهدوء:ليش اخترت أنهار ؟

رفع أنظاره من سؤالها وميل فمه:ما اخترتها

نورا:الا انت قلت قدامنا انها بوجهك مافهمت بالبدايه كلامك بس بعدين سلطان شرح لي

بهاج:هي بوجهي ما يضربها

نورا:يعني ما تبغاها ؟

بهاج اخذ نفس:وش هالاسئله ؟

نورا ابتسمت:مدري بس احسك غير مع أنهار يمكن عشان كذا سألت

سكت ونطقت ريوف وهي تناظر نورا:بينهم كمستري كبير صح ؟

ضحكت نورا ونزل راسه من كلامهم وبلل شفايفه وهو ماسك فنجانه هو مبيّن عليه ويفضح نفسه ولا يقدر ينكر حتى

رفع راسه بعد سكوتهم وابتسم:المهم اني موجود إبن أمه اللي يسوي لكم شي ، وانتي !

ناظر ريوف وكمل:ان بكيتي ليله بكّيت فهد سنين حتى لو مو هو السبب

ضحكت وهزت راسها وابتسم لهم

خرجوا وخرج معاهم وناظر سلطان اللي جاي:انا طالع

سلطان:امشش طالع بسيارتك ؟ اتوقع نسيت السواقه

بهاج مسك دقنه:بحلق ياشيخ

سلطان:بجي معك

بهاج:واعزم فهد واقلطوا ! رايح احلق انا

سلطان:ياخي خل نطلع مع بعض علامك ؟

بهاج طلع مفتاحه من جيبه:ناده

مشى بهاج لسيارته وركب وترك الباب مفتوح وهو يناظر المزرعه بهدوء

التفت من ركب جنبه سلطان وفهد ورا وقفل باب سيارته وحرك خارج من المزرعه

تاكي بيده اليسار وماسك الدركسون بيده اليمين ويسمع للشيلات اللي يحطها فهد ويختارها

سلطان ناظر بهاج بنص عين:شغل لعريسنا شي

لف بهاج وضحك وهو يخفي ابتسامته عنهم وضحك فهد:والله عاش يالقفص الذهبي

سلطان رخى الصوت:لو ماجات منهم ما كان شفناك عريس

لف بهاج يناظره وهمس فهد:نكد عليه

سلطان:وانا صادق ! وش نيته هو ووش نيتها هي

صد بهاج للطريق وكمل سلطان:كل وحده فيهم تشوفنا طريق الفرار والحريه والا ما كان صار زواج عن رغبه ابد

احتدت ملامح بهاج وهو يشد على الدركسون ولف سلطان لبهاج بهدوء:انت حتى اخترتها قبل تختارك

بهاج مارد ونطق فهد:اختار لنا التشكيله ماشاور احد

بهاج:لو داري ما ركبتوها قسم

سلطان:تزعل عشان نطلعك من التخيلات حقتك !

بهاج:ياخي خلني وش تبي تنكد علي ؟

سلطان:عشان لا راحت مع خواتها وحياتها الأوليه ما تتعور واجد

بهاج التفت له:والله ماتروح

سلطان:لا تحلف ! تراهن تقعد عندك بعش الشيبه اللي تفوح منه ريحة البل والغنم ؟ ياشيخ خلها تشم ريحة ملح البحر الاحمر بس ! والله ماتمسي غير بالحجاز

فهد ناظر بهاج اللي تغير وجهه ونطق:انكتم خلاص

سكت سلطان ووقف عند الحلاق بهاج ونزلوا

نزل بهاج وهو يفتح ياقة ثوبه:سلام

جلس على كرسي الحلاقه وهو يرفع راسه وبدأ يحلق

ناظر جواله سلطان:لو ما سمعت من البنات مادريت انك سويت لك سناب

فهد التفت لسلطان:حمل سناب ؟

بهاج وهو رافع راسه يحلق له الحلاق:من علمك ؟

سلطان ابتسم ورفع راسه:أنهار

بلع ريقه بهاج وكمل سلطان يقلدها:قابلتني مره تقول ادق سناب على بهاج ما يرد

فهد ضحك:من حمله ؟ انت قايل ما ادانيه

سلطان:أنهار محملته ، بدري الخضوع باقي ماصارت حرم لك !

بهاج بعد يد الحلاق والتفت له:علي الطلاق لو ما سكت بلعتك النعال الحين

سلطان رفع حاجبينه:اسم الله عليك ماقلنا شي نمزح

لف بهاج بعصبيه وكمل الحلاق وابتسم سلطان:زبط يامدير هذا عريس

ضحك فهد:ياخي بيثور فيك

سلطان رفع جواله يصور بهاج اللي صاد عنهم يحلق وابتسم من لقط فيديو له ونزل راسه يرسله

دخل عليهم شخص يعرفونه وقاموا يسلمون عليه ويسولفون وخلص بهاج وهو ينفض ثوبه ودخل يده يرد على جواله اللي يدق

ناظر اسمها ومكالمة سناب ولف لسلطان وفهد اللي يسولفون مع الرجال ووقف وهو يرد بهدوء:هلا

اخذت نفس ورفعت كتفها:جيتك ومالقيتك

بهاج لف يناظرهم ومشى لبرا ونطق:جيتيني وين ؟

أنهار:بيتك

بهاج هز راسه:بالحلاق

أنهار:عارفه

بهاج عقد حاجبينه:من قالك ؟

أنهار:سلطان مصور

لف بهاج يناظر سلطان وعض لسانه والتفت:ماقصر

أنهار سكتت ولاحظ سكوتها وهمس:سمّي

تنهدت بإرتباك:بسألك سؤال

بهاج:وشنهو ؟

أنهار وهي تمشي من ربكتها ولا تدري وين تسوقها خطواتها سكتت وهي تبلع ريقها بتكرار

بهاج:تنتظريني اخلص واجيك ؟

أنهار نطقت بسرعه:لا

بهاج:ليه ؟

أنهار:احسن كذا

بهاج هز راسه:ماتبين تشوفيني يعني !

أنهار تنهدت:بهاج ما أفرق معاك ؟

عقد حاجبينه بإستغراب:كيف يعني ؟

أنهار رفعت كتفها:انت قلت ، سمعتك أنا

لاحظ بعثرة كلامها وفهم بسرعه انها تقصد كلامه عن نورا ومامن فرق بينهم وحك خده وهو يهز راسه:لو بتكلم معك بتفهميني ؟

أنهار عقدت حاجبينها بزعل وسكتت

بهاج:فرقك عن النجمات إنك مجره

انفكت عقدة حجاجها وهي تعيد جملته وتحاول تفهمها ونطق بسرعه بهاج ما يترك لها مجال تفكر

:اللي سمعتيه ما يعني اللي فهمتيه ، كله مخطط له ومامن شي جالك بدون تخطيط ودِبره

لف يناظر سلطان وفهد اللي يحلقون والتفت:جايك ونتكلم الحين مشغول

أنهار نزلت راسها تناظر شوزها وهمست:اوكيه

قفل منها وناظر جواله ولف يدخل وناظره سلطان:بهاج بنرجع مع عزيز

بهاج ابتسم ورفع كفه لعزيز:الله يعينك خرجوا من عندي لعندك

ضحك عزيز وحط اصبعه على خشمه ومشى بهاج لسيارته

شغلها وناظر جواله ثواني وحطه بحضنه وحرك سيارته

شغل الراديو على شيله وهز براسه وهو يراقب مراياته ويدق بكفه الدركسون بطرب

ثبت جواله وهو مبتسم وفتح سنابه وهو يسوق ويصور وبدأ يغني مع الشيله ويرقص ويضحك ويناظر مراياته بتكرير

ابتسم وهو يرفع ذراعه يرقص ويقفل السنابه نزلها بسنابه وهو يبلل شفايفه ومبتسم ويراقب الطريق

رجع شغل شيلته المشيّوده واللي يرددها دايم ويرقص بحماسته وحماسة الشيله ويرقص ويصفق بكل طرب ويردد:مسكين مسكين من قد بلي بالغرام

كان يضرب الدركسون ويسمع كلمات الشيله بكل عقل راسخ لها وكأنه ينتبه لكلمات شيلته المحبوبه

من طرت على باله مع الكلمات ابتسم من نطق الشاعر : في ضحكتك بدر خمسة عشر في الظلام

طرت عليه بتكرار مشاهدهم وسط الظلام والبدر المكتمل اللي لولا نوره ما لمحها من ظلمة الليل

تنهد من سرحانه بها وأكمل طريقه

،

جالسه ببيته وماسكه جوالها وتهمس:مجرة ايش ؟ ليش يقول كلام كذا ويعرف اني ما أفهم ؟ طيب هو سألني وقال تفهمين وما جاوبت ؟

تأفتت وفتحت جوالها تراقب الوقت ودخلت وفزت من شافت ستورياته ودخلت وابتسمت وهي تلمح اتساع ابتسامته ورقصه وحماسته بالسياره

عضت شفتها وهي تراقب ضحكاته واغانيه وترديده هي تنهدت وهي تشوف ثوبه وشعره ودقنه اللي حلقه وأكتفى بشاربه وخبت ابتسامتها وهي تعض شفتها ولفت من انتبهت لحليمه وقفلت جوالها وتلاشت ابتسامتها

وقفت وناظرتها حليمه:وش قاعده له هنا ؟

أنهار:انتظر بهاج

حليمه:وينه ؟

أنهار:ما اعرف

مشت من جنبها وخرجت راجعه للملحق لفت حليمه تناظر البيت واخذت جوالها وجلست وهي تدق عليه

قفل الراديو من ناظر اسمها على شاشته ورد:هلا

حليمه:وينك فيه ؟

بهاج:رحت احلق وراجع

حليمه:ارجع استناك

بهاج:وصلك العلم أجل

حليمه:تعال بهاج

بهاج:جاي

قفل منها وتنهد وتغيّر موده وراقب طريقه بهدوء

،

وقفت وهي تلمحه يمشي ويلعب بمفتاحه ورايح للملحق وابتسمت عضت شفتها ولفت وعقدت حاجبينها وهي تسترجع جملته بتفكير

خرجت ريوف وهي تلمس الماسك اللي بوجهها:اوف هذا مانشف طفشني متحمله ريحته لي ساعتين

ماردت عليها وهي عاقده حاجبينها وماسكه شفايفها وتفكر وطلعت من المطبخ نورا وبيدها صحن:ذوقي

مدت لريوف تذوق وذاقت ريوف:يمي كيف سويتيه؟

نورا ابتسمت:شهرين زياده بصير شيف

ريوف:لا تضحكيني حاطه ماسك

رفعت أنظارها تناظرهم لدقايق وفزت وهي تبقق عيونها وضحكت:فهمت فهمت

لفوا لها وضحكت بصوت عالي بإنتصار رمشت تحضن نورا:يانجوم حياتي انتوا

اخذت لقمه تاكل وباست خد نورا ورمت بوسه لريوف ومشت للغرفه

ولفوا يناظرونها وتلمست ريوف الماسك:اختك شهرين ونوديها مصحه نفسيه ماتفيدك طبخاتك

نورا عقدت حاجبينها:بسم الله عليها

شهقت أنهار وهي بالغرفه وهمست:يقصدني يقصدني انا وهم النجوم

وقفت قدام مراية الدولاب:انا مجره ونورا وريوف نجوم ، يعني انا أهم يعني أنا أفرق ، صح هو قال فرقك عن النجوم إنك مجره

تنهدت وضحكت:اهخخ شاعر

تلاشت ضحكتها ورفعت راسها تناظر نفسها بصدمه

تستوعب مشاعرها اللي خرجت من فرط كتمانها هي من بعد ما حضنته تفجرت مشاعرها عليها ولاقدرت تسيطر عليها

عقدت حاجبينها بعصبيه:مو أنا كذا !

،

دخل ورمى مفتاحه من يده:سلام

وقفت وناظرته يفصخ ثوبه ويعلقه:تنتظريني اتروش واجي ؟

حليمه:اقعد

تنهد ومشى وقعد قدامها وهي واقفه

حليمه:وش صاير ؟

بهاج:العلم عندك ! ، دريتي قبل ينطقون ولا علمتيني

حليمه:لاني قفلت على الموضوع وقلت ما بيصير ولاحد بيوافق بس اشوفك رايح اليوم وطالبها !

بهاج:ماطلبتها ! هم عطوني وانا قلت تم

حليمه رفعت حواجبها:قلت إنتي في وجهي

بهاج رجع ظهره لورا يناظر امه

وكملت حليمه:عمر معيي

بهاج:عمر يدق براسه بأقرب جدر

حليمه:بهاج !

وقف وناظرها:عمر كل ما زانت له القعده هنا أكثر طلع لنا بمواضيع جديده ، مره يتزوج هو مره يزوجونا إحنا مره يعييي ومره يمشي على شور الشيبه

ناظر حليمه وتغيرت نبرته لهمس:اخذتي رخمه

ناظرته بحده ورفعت صوتها:بهاج ! تكلم زين عن عمك

بهاج:ماهو عمي

حليمه:كل هذا عشان تعامل مع بناته بخشونه شوي ؟

بهاج رفع حاجبينه وهز راسه:شوي ؟ انتي ضحك بعقلك

حليمه:عمك تحت الضغط من جدك وجدتك

بهاج:اي عشان كذا قلت رخمه

حليمه:ماجيت اتكلم عن عمك جيت اقولك ارجع بكلامك ، بنات عمر خواتك وبس

بهاج ابتسم:مع الاسف ثنتين منهم بس ووحده زوجتي

حليمه قربت منه بتهديد:كلهم خواتك ! انت بتتزوج بعمرك مره وحده وانا اللي بختارها لك

بهاج:غلطتي

حليمه:ماصدقت ينطق جدك صح ؟ على طول قلت للوسطانيه انتي في وجهي قدام اعمامك وقدامنا !

بهاج صد عنها ونطق:اسمها أنهار ، غريبه هذا وانتي عندهم

حليمه:حاطها براسك

بهاج لف لها:حاط رجالك براسي

حليمه:لا تدخل حرب معاه ريحني بهاج

بهاج:لو بدخل حرب معاه ما بدخل عشانك انتي اخترتي وانتي مبسوطه ؟، بدخل عشان بناته

حليمه:لا تتدخل ببناته ووقف اللي قاعد تسويه

بهاج ابتسم وقرب منها وهو يمسح دقنه:استعدي تزفين ولدك عريس

حليمه هزت راسها بالنفي:تدري اني بوقف قدامك !

بهاج رفع حاجبينه وهمس:ما وقفتي قدام نفسك يوم غصبوك !

سكتت حليمه ورفع كتفه بهاج:توقفين بطريق ولدك

حليمه مسكته من ذراعه:طريقك مسدود وانا أدرى بنات عمر ما يشوفونك الا اخوهم اصحى ! انت ثوبك مو من ثوبهم عشان وحده منهم تصير مَره لك ، هم تربوا برفاهية الحجاز وسعتها وانت بضيقة نجد تربيت

مارد بهاج وكملت حليمه:بتفهم كلامي بعدين

مشت وتركته وما تحرك بهاج وهو يناظر محلها

عض على اسنانه بقوه ومشى اخذ ثوبه ودخل غرفته ورماه

وقف وهو ماسك خصره ويفكر بحده ونزل انظاره من تحسس خصره وكشف فانيلته عن جسمه وناظر جرح خصره من عطرها

وتحسسه بأصابعه وهو يسترجع ريحتها بحضنه وحضنها اللي يحلف يمين ما تخطاه وان كل ما تذكره غرق بإختلاف حاله ومشاعره وجسمه اللي يحترق من الذكرى

وكل ماخطر بباله غير : أعنّ لك لو تصّب الموت واتهيّلك واجوع لك وأتمنى خنجرك واشتهيك

ابتسم من طرت الابيات بعقله وميل ابتسامته تذكرها وهو كل ما تذكرها هان عليه كل شي وضاع تفكيره واستقر عن شوشورة عقله بخيالها بس

،

وقفت بشباك الصاله وهي تناظر بيته من بعيد شربت من كوبها واستوعبت ان قهوتها انتهت بدون ما تحس وهي قدام الشباك

لفت من أنفتح الباب خلفها وناظرت عمر يخرج ورجعت صدت للشباك

بلعت ريقها وهي تتصدد عنه من مشى لها وهمس

:ليه ما نمتي ؟

أنهار:ماجاني النوم

عمر التفت يناظر معها الشباك ولف لها:ودك تتزوجين؟

أنهار لفت له:يفرق ؟

عمر رفع حاجبينه:بشوف وش رايك

أنهار:شفت راينا كلنا

عمر:ترا رجعت بكلامي لكن بهاج اخوكم صمل

أنهار ناظرت سخريته من نطق بهاج اخوكم ورفعت كتفها:معد بيكون أخونا ، هدمتوا علاقتنا الاولى الحلوه

عمر:ماتغير شي بهاج بيبقى أخوك ، ان كان قدامهم والا من وراهم

سكتت من كلامه ولفت تناظر حليمه اللي خرجت تدور عمر وهمست:عمر !

لف لها وناظرتها أنهار وفهمت من وين جاه الكلام عمر وابتسمت بسخريه وصدت عنهم

عمر:جاي

لف يناظر أنهار اللي صاده ومشى راجع الغرفه

غمضت عيونها تاخذ نفس تمنع عصبيتها وحطت كوبها على الطاوله ومشت للغرفه

،

مشت وهي تدور بعيونها على البنات ولفت لبيته لقته مقفل وقفت عند الباب ثواني

شدت على كفها بتردد ما تدق بابه وغمضت عيونها وتنهدت والتفتت بتمشي ووقفت من سمعت الباب انفتح

وقفت ثواني تترقب بنظرها جيّته لكنها مشت تسبقه بتوتر وناداها:أنهار

وقفت مكانها ولا لفت له ومشى وهو ماسك عقاله وشماغه بيده الثانيه ووقف جنبها:علامك ؟

أنهار:أدور على نورا وريوف

ناظرها صاده بنظرها وهز راسه:انا اوديك اصبري

مشى ولفت تناظره يقفل باب بيته ومن لف صدت

مشت معاه بخطوات هاديه ولف يناظر هدوئها ونطق

:تأخرتي بالنومه

أنهار:تأخرت وانا صاحيه

بهاج:من مسهرك ؟

لفت تناظره يناظرها ورجعت صدت:ولا أحد ماجاني نوم

بهاج لف يناظرهم من بعيد واقفين عند البل مع فهد وسلطان والتفت لها ووقف قدامها:بتكلم معك

ناظرته ووقفت من وقف قدامها يقطع طريقها

رفعت انظارها لوجهه ونطق بهاج:ابوك جاه العلم بتزوجك

ماردت وهي تناظره وبهاج كمل:وبعدها سلطان وفهد

أنهار همست:غريبه !

عقد حاجبينه:وش الغريب ؟

أنهار:امس يقولي اخوك بهاج وان ما بيتغير هذا الكلام حتى لو بيننا عقد نكاح

بهاج:متى قال ؟

أنهار:هذا كلام امك وانت تدري

بهاج صد وتنهد وكملت أنهار:مدري وش قاعد يدور براسها هي تنتقم لشموخ حبيبتها والا مقصدها ثاني ! فهمنا أخ بهاج أمك وش قصدها ؟ لانها وصلت الفكره براس أبويه

بهاج:شدخل شموخ ؟

أنهار:هي كانت تبيك لشموخ بس مع الأسف خربت عليكم

بهاج سكت وهو يناظرها وكملت أنهار وبلعت ريقها من سكوته:انا مزاجي اليوم متعكر ما ابغى اتكلم

مشت من جنبه ومسك ذراعها وناظرها:من عكّره ؟

ناظرته ونزلت انظارها:بدون سبب

بهاج:ليه تتصددين ؟

أنهار:قلت مو بالمود !

بهاج:فهمنا ليه بهاج كان يتصدد لكن الحين ليه أنهار تتصدد ؟

أنهار سحبت ذراعها:بهاج ما ابغى نتهاوش اتركني

ناظرته بحده ومشت لهم تاركته

التفت يناظر طريقها لهم ومشى بخطوات أهدأ

وقفت جنبهم على الحوض وهي تناظر سلطان وفهد يحلبون ناقه ويضحكون من تعليقات ريوف ونورا

وقف جنبهم ولفت نورا:خلصت كلاسات ؟

هز راسه وهو يناظر سلطان وفهد ونزل راسه يدخل بين أسوار الحوض وهو شايل شماغه وعقاله

رفع راسه سلطان يناظر بهاج جاي وفتح يدينه له يرحّب: هلا مرحبا يادهر قلبي ورجعانه ، حيّ

ابتسم بهاج من ترحيب سلطان وفتح ذراعينه يحضنه

ضحك سلطان من ناظر نظرات فهد اللي يحلب الناقه بيدينه وتوقف من شافهم يحضنون بعض

سلطان كمل يغيض فهد:يامرحبا باللي اذا غاب عنا ضاعت مراجلنا وحنا الرياجيل

ضحك بهاج وهو يشد على سلطان:لاخلا

فهد:اعقب يالرخمه

سلطان ناظره وبعد عن بهاج وهو يرفع ذراعه على كتوف بهاج:يحلب الناقه كأنه يحلب خنزير

بهاج:ياخي قم حتى الناقه مستنكره يدينك

فهد وقف ومد عقاله وشماغه لسلطان ورفع ثوبه يربطه على خصره وينحني للناقه

ناظرتهم من بعيد وبلعت ريقها وصدت بظهرها عنهم وهي تتكي بظهرها

نورا:اذا قربت بصرخ

فهد:شفيكم كلها ناقه

رفع كفوفه بيلمسهم وصرخوا يهربون وبعدت أنهار عنه بإستنكار

فهد:لا انتي ما بنقرب منك يهدّ فيني بهاج

رفعت انظارها لبهاج اللي رفع عيونه من كلام فهد وقطعت كلامه نورا:حتى إحنا بهاج ما بيسكت !

بهاج مشى لهم وابتسم:الله الله

فهد لف لبهاج:خل نتسلى بالحضر ذولا

بهاج رفع اصابعه بوعيد:احشرك

فهد ابتسم وبهاج رفع حاجبه يعرف نيته:والله بالمرش يافهد

ركض فهد يخرج ويلحق ريوف اللي صرخت اول وحده ولفوا يناظرونها تدور حول الحوض وتصرخ ونورا ضحكت:يختار ريوف الكلب يبغى يستفزها

حط شماغه على الحوض ولامس شماغه كفها بالغلط بدون انتباه له لأنه بيمشي للمرش يفتحه ويرش فهد رشّ بالماء

نزلت انظارها لشماغه اللي على يدها ورفعت انظارها من ضحكت نورا:بهاج تكفى

فتح المرّش ووقف جنبه سلطان وهو يضحك وفتحه وهو يرش على فهد اللي وقف يمنعه وركضت ريوف خلف بهاج وهي تصرخ:بهاج تكفى

بهاج لحق فهد وهو يضحك وتهاوشوا على المرش وغرقوا بعض وهم يتهاوشون وضحك سلطان:سبحان من عطاني العقل

لف لنورا يناظرها:شوفي أخيّر نصيبك

نورا ضحكت ووقف بهاج وهو يتنفس بعد ما مسك المرش وانتصر وغرق فهد اللي طايح بالأرض وهو يضحك

قفل المرش من عند سلطان وتنفس بسرعه بهاج وهو مبتسم ومشى لهم وهو مبلل ويرفع شعره عن جبينه

وهمس:الله لا يلعنك يافهد

ضحك ومشى يسحب شماغه يطمن ان جاه ماء او لا:كاويه قبل شوي

سحبه وناظر كفها اللي تحته ورفع انظاره لها تناظره

نزل راسه وهو يفتح ثوبه وناظرته ريوف:بس فدا ريوف صح بهاج ؟

لفت أنهار لهم وابتسم بهاج:فداك حتى لو كسرت راس فهد

فهد ضحك:تخسى

بهاج ضحك:ياخي استسلم

توترت من سكوتها بينهم هي تحاول تختلط بينهم بس هي متوتره ، من وجوده وشكله ولعبه وضحكه والبلل اللي يغرق جسمه وشعره

بلعت ريقها وهي تراقبه ولفت من ناظرت سلطان يناظرها وصدت عنهم

ابتسم سلطان وبلل شفايفه يمنع ابتسامته تبان وبهاج ناظرهم:بغير

مشى راجع ولحقه سلطان:اصبر

التفت وهو يمسح خشمه وناظر سلطان اللي مشى معه:علامك ؟

سلطان:قايل شي انت للعروس ؟

بهاج:من ؟ نورا ؟

سلطان:عروستك انت

وقف بهاج والتفت له:ليه ؟

سلطان:علامها مختلف حالها ؟

لف بهاج يناظرها من بعيد وزم شفايفه:مدري

سلطان ضحك:بقول شي بس والله ما العب بك

بهاج:وشنهو ؟

سلطان:ياولد البنت تناظرك

بهاج سكت ثواني:واذا ؟

سلطان:مدري بس احسها

غمز له وهو مبتسم وبهاج ابتسم له:قلت لك لا تستهين فيني

ضحك سلطان ودفعه:امشش ياولد سعود

بهاج:ذابحها الكبرياء

سلطان:اسكت لا تشوف نفسك يمكنها تهوجس بالهم اللي بتطيح فيه ان صارت حلالك

بهاج مشى يتركه:سعد عينها

ضحك سلطان يناظره رايح وابتسم بهاج وهو داخل بيته ومشى وهو يفصخ ملابسه ويناظر وجهه بالمرايه

ابتسم ودخل الغرفه يلبس ثوبه الكحلي ونشف شعره يمنع الهواء يضايقه

وسحب غترته وهو يطويها عن الهواء ويلفها عمامه على راسه

لفت من ناداهم رَده وقاموا فهد وسلطان من جلستهم يتوجهون له وعقدت حاجبينه وهي تبعد شعرها عن عينها وتناظرهم من بعيد

ولفت من مشى لهم بهاج وهو مبتسم يلمح موضوعهم من مكانه ولف يناظرهم من بعيد وهو مبتسم

ريوف ابتسمت:بهاج صراحه اشياء بدويه كيوت

ضحكت نورا وهمست:يازينه

رفع كفه من بعيد لهم وبلعت ريقها وهي تشوف شكله وعضت على لسانها من داخل وصدت تعطيهم ظهرها

ولفت نورا:تتوقعون عشان ايش ناداهم ؟

ريوف ضحكت:عشان زواج اختك ياحياتي

أنهار ناظرتهم وابتسمت نورا:تكفين أنهار بنزوجك اول وحده انتي جربي وعطينا الوضع عشان يمدينا نهرب

أنهار:تجربه انا عندكم ؟

ريوف:ياحياتي تجربتها غير عنا هي بتاخذ اخونا بهاج انا بتورط

ضحكت نورا:بيصحيك بالدجاجه ريوف ، تحزنين

كشرت ريوف ولفت أنهار تناظرهم من بعيد يتكلمون

وقفت:بدخل تعبت هنا

نورا:أنهار وحشتيني !

ناظرتها وابتسمت:تعبانه

سكتت نورا ومشت أنهار وهي راجعه للملحق

هي متضايقه من كلامهم اللي يختلف عن مشاعرها ورايها عن بهاج

هم يطرّون اسمه من غير سبب وبسبب وهي ما تتحمل لانها غارقه فيه وهي وحيده ولا ودها تغرق وهي معاهم

هي لمحت رغبة ابوها بأخوة بهاج لهم ومن كلام خواتها عنه وكأنه اخوهم فعلاً

هي ما تشوفه معها يعاملها أخ وتدري إنه يحسها غير لكنها تبي تتغيبى زيهم وتعتبر هذا وهم

تبغى تستمر بغبائها وتصد عن مشاعره لها لكنها تلمح بكلام سلطان وفهد مشاعر بهاج لها وكأنه يحكي لهم عنها او هم فاهمين ولد عمهم

انسدحت بتعب وتغطت بالمخده بإنزعاج

لفت من جاتها رساله وناظرتها من بهاج وتنهدت وهي تفتحها:لا تنامين

عقدت حاجبينه بإنزعاج وقفلت جوالها بدون رد

،

مشى لهم بعد ما انتهوا من الكلام مع رَده وناظرهم وجلس:وين أنهار ؟

نورا:والله ما اعرف قالت تعبانه وبتريّح

بهاج:وش يتعبها ؟

نورا رفعت كتوفها وسحب المركى بهاج وجلس:ريوف راحت لها ؟

نورا هزت راسها والتفتت:قلت لها تشيّك اذا صاحيه تجي تجلس ناكل سوا

رفع راسه وناظر ريوف جايه ونزل انظاره لين جلست جنب نورا:نايمه

نورا:وي منجد ؟ عبالي تستهبل

ريوف:حتى انا ناديتها وماردت

فتح جواله يناظر رسالته اللي قرتها وفهم انها تمثل ومالها رغبه تجي

نورا:اش سويت بهاج؟

بهاج رفع راسه:وانا كنت انتظر أنهار عشان اتكلم

سكت ثواني وكمل:بيصير عرس

نورا:لوحدك ؟

بهاج هز راسه:وبعدها سلطان وفهد سوا

ريوف:ياخي بهاج تكفى ما ابغاه خايفه يصحيني وانا عند الغنم

ابتسم بضحكه بهاج:حليّل فهد والله ويمزح معك

ريوف:مزحه ثقيل ما اتحمله

نورا:تبغاني أقول لأنهار اذا رجعنا ؟

بهاج:قولي لها اني ابيها وانا اعلمها

نورا فتحت صينية الحلا قدامهم وهمست:اوكيه

بهاج لف يناظر سلطان وفهد ورفع كفه بصوت عالي يناديهم:سلطان

واشر لهم يجون عشان يتقهوون والتفت يناظر ريوف اللي تناظره بإبتسامه وعقد حاجبينه وابتسم

:علامك ؟

ريوف:حلوه حلاقتك

ابتسم بإتساع مبسمه ورفعت راسها نورا:ايوا صح كنا نعلق على شكلك قبل

بهاج نزل راسه وريوف ناظرته:تكفى بهاج بصورك وانزلك بسناب

بهاج:لا لا بالله

ريوف:امانه بشوف رند اش تعلق ؟ تحب البدو

نورا ضحكت:مو صاحيه

بهاج:لا بالله فكينا

ريوف رفعت جوالها:بليز بهاج عاد اعتبرني ما صورت انشغل

بهاج صد يناظر سلطان وفهد جايين ونزل راسه لقهوته بيده

واخذ جواله وارسل لها:اذا مانمتي اطلعي لي

ارسلها وانتظر ردها لكن ماردت تنهد بعصبيه ولف من دف سلطان المركى:ما احط مركى بيني وبين الرفيق لا يحسب ان قلوبنا متجافيه

رفع راسه بهاج يتكي على المركى الثانيه ويناظر سلطان:وفجيت له باب عن الناس سكرته ، وحطيت له عن شمس قيض الغرام ظلال وشيّدت له بيت بقلبي وعمّرته

ابتسم سلطان اللي جلس ونزل راسه لقهوته وهو يكمل:حفظته ودللته وغنيت له موال وتخيّرت قربه ليتني ما تخيرته ، اداري عليه من الزعل وأزعل العذال وخطاه ان كبر في عين غيري تصغرته

فهد ابتسم:اسلم

بهاج رفع كفه يكمل لهم القصيده ولف سلطان له يناظره

بهاج نزل انظاره ورفع حاجبه من لمحها ببقية قصيدته:تكاثر علي الله يجازيه كيف الحال ،وانا يوم اسوق العمر له ما تكاثرته،وبعد كل هالتقدير والحب والاجلال ! ، تغير وهقواته عليه مغيرته،لبسته ثياب الغطرسة لين جا يختال،وكبر في عيونه يوم الاوهام غررته

تنهد وسكت بضيق وابتسم سلطان:صح لسان شاعرها وسارقها

ضحك بهاج:من نقّل الشعر ماهو سرّاق

التفت لهم وهو يسمع تعليقهم ونزل انظاره لجواله وهو هادي ولف يناظر المدى من بعيد ولف من طروها بالكلام

نورا:لا ترسلين لها تتغلى علينا بعدين

ريوف:حرام ! يمكن صحت

نورا:طيب شافتنا كلمناها بتجي بس أنهار تتغلى اذا شافتنا ندورها تحب الاتنشن

ضحكت ريوف:اخخ تتعاطى لو محور الكون يدور بالارض دار حوالين أنهار

ضحكت نورا ونزل انظاره بهاج وشد على أسنانه من فهمها بعد جملتهم

هي من شافته عطاها اللي تحتاجه تغلّت !

ولا ترد على كلامه وتتصدد عنه عشان يتقرب منها أكثر وتروي نرجسيتها !

رفع حاجبه وهمس:لعب عيال

لف سلطان عليه وبهاج صد عنهم ولا تكلم

نورا:بقول شي عن أنهار بس وربي بتزعل لو سمعتني ، بهاج اسمع بينفعك تفهمها السايكو

رفع راسه لها وابتسمت نورا:أنهار اكثر وحده مغروره بالدنيا بس انكسر غرورها هنا ، كبريائها يخررع يعني عادي تموت بس ما تقول !

ريوف:افضحيها تكفين

نورا ضحكت:والله بتزعل

سلطان ابتسم وهو يلمح اهتمام بهاج وناظرهم:اعلموا اعلموا

نورا:كان عاجبها أخو صاحبتها بالجامعه

لانت ملامح بهاج عن وجهه وشد على فنجانه

نورا:هو كان عاجبنا كلنا بس أنهار أكثر لأنه احياناً يوصلها مع صاحبتها كوفي او مول ، ترجع البيت ميته من الحب بس ما اعترفت لأحد

ريوف:كلنا كاشفينها حتى أخو البنت يدري

ضحكت نورا:يمه يمه لو تسمعني والله تزعلني

سلطان:لا يكون اللي عاجبها نفس طقة اللي عاجبك انتي بعد !

نورا تلاشت ضحكتها وسكتت وكملت ريوف:لا مررره ، مشاري ما يشبه بندر ولا شوي مشاري نرجسي وشايف نفسه وطايح عند أنهار لكن ما يقول وعشانها نفسه وتشبهه عاجبته

فهد:وش هالسواليف الخايسه ! عيب

ريوف ناظرته:شدخل حمدلله والشكر ترا سواليف عاديه

فهد:اي اسكتوا عن السواليف العاديه احسن

وقف بهاج وناظرهم:لا تبطون

سلطان ناظره:وين رايح ؟

بهاج:بطلع عندي مشوار

فهد:بجي معك

بهاج:لا

لبس حذيانه ومشى عنهم لسيارته فتح الباب وركب وشغلها وهو مطلع رجل ويناظر الملحق من بعيد

التفت للشاحن اللي بسيارته وتذكر جوالها بأول جيّتهم من شبكه بالشاحن

دخل رجله وسحب الباب وقفله وخرج من المزرعه

،

خرجت من سمعت اصواتهم ومشوا للغرفه

نورا:صاحيه ليش ماجيتي طيب ؟

أنهار:قبل شوي صحيت

ريوف:نومة العصر الله يعينك بس بتصدع براسك وخلاص

أنهار ماردت وجلست نورا:عرسك تحدد حياتي وانت نايمه

لفت لهم تناظرهم وابتسمت ريوف:استعدي انت اول وحده بتطيح

نورا:لا تخوفينها ! وبعدين بهاج ترا

نزلت انظارها من طاريه وهي تناظر جوالها ورفعت راسها:ما سأل عني ؟

ريوف:الا ، قال خلوها تطلع لي اذا صحت بس مو موجود

عقدت حاجبينها:وينه ؟

ريوف:خرج بسيارته

فتحت جوالها تناظر رسالته من برا ولفت نورا لريوف:طيب محد قال كيف بيكون الوضع ؟ فساتين وعرس عرس والا كيف ؟

ريوف:انا بلبس صراحه من زمان ماحسيت اني ريوف

عقدت حاجبينها أنهار وناظرت ريوف:انتي مصوره بهاج ؟

ضحكت ريوف:بموت من اول مانزلته ما سكت جوالي البنات مصدومين يسألون مين ؟ حتى سلطان بيّنته بالفيديو اتوقع جاتهم صدمه من أشكالهم

فتحت الستوري وهي تناظر الصوره الاولى لبهاج والفيديو الثاني اللي يقصد فيه وسلطان جنبه

رفعت راسها بصدمه:شقلتي ؟

ريوف:عيال عمي !

أنهار:مو من جدك صراحه ريوف مالك داعي تصورينهم

نورا عقدت حاجبينها:ليش عصبتي ؟

أنهار رفعت كتفها:مو معصبه

نورا:بتنفجرين حياتي !

أنهار:لان ، لاني ما ابغى احد يعرف اننا هنا وبتزوج كمان ! ومين ؟ ولد عمي

ريوف رفعت حاجبينها:محد قال انك بتتزوجين تطمني

أنهار:امسكي لقافتك ولا تصورين كل شوي حتى هم بيتضايقون

ريوف:محد قال شي اشبك انتي ؟ اثر عليك النوم بالعصر ؟

أنهار تأفتت ونزلت انظارها لجوالها بعصبيه

نورا:اشبك أنهار ؟

أنهار:انتوا ما تشوفون يعني اللخبطه اللي صايره ؟

نورا:اوكيه واحنا كمان معاك مو لحالك !

أنهار:لا انا مضغوطه اكثر وحده

نورا:عشان ايش ؟ لو تلاحظين انتي اكثر وحده محظوظه بالوضع

أنهار:اي لاني باخذ اخونا كلنا بهاج وبهاج مافي منه سمعت الكلام هذا شوي وتكتبونه على الجدران كلكم

نورا:انتي تكلمتي مع احد ؟

أنهار:لا وبلاش تزيدونها علي خلوني لحالي

نورا سكتت ولفت تناظر ريوف اللي رفعت حاجبينها بإستغراب

وقفت أنهار واخذت عبايتها اللي معلقه:بطلع اخذ هوا

،

متكي على الدركسون وساهي ولف من تقدم العامل ومد له:شكراً

قفل البنزين وحرك بهاج من المحطه وهو يراقب الطريق ومشى بطريقه بكل صمت

هو طلعته الاولى كان حاله غير عن حاله الحين

تذكر تمنّعها له وصدودها وغضبها عليه اليوم هي متقلبه مره مثل نور شمس ومره مثل ظلم الفضا

تنهد وهو يدخل المزرعه ويمشي للمواقف التفت وهو يشوفها تمشي وناظرته يدخل بسيارته وعينه عليها

ارتبكت ووقفت محلها ووقف سيارته وطفاها ونزل

ناظرها وقفل الباب خلفه ومشى وهو يتعداها وعقدت حاجبينها ونطقت:مو كنت تبغاني ؟

التفت لها:مو فاضي

ناظرته يمشي للبيت ولحقته:يعني بعرف اني بتزوج من البنات ؟

لف لها ووقف وحط مفتاحه بجيبه:ليش لحقتيني ؟ عشاني صديت عنك ؟

انكمشت ورجعت لورا بإستغراب وكمل بهاج

:ما ينعرف لك ، قايل لك لا تنامين وقريتي ونمتي وش معناته ! والا النرجسيه أنهار تسوي اللي تبيه لكن انا ما ينفع انشغل

ناظرته بإستغراب:ليش تكلمني كذا ؟

بهاج تنهد بإنزعاج وصد براسه

ورفعت كتفها:اوكيه سوري ، انشغل

مشت عنه وناظرها رايحه شد على كفه ما يناديها وينتظر منها ترتخي لحظه وتوقف وترجع له لكنها كانت تمشي للملحق ودخل البيت وقفل الباب بقوه ورمى عمامته وجلس بعصبيه

دخلت الملحق وهي معصبه ومشت للشباك تناظر محله لكنه دخل !

تنفست بعصبيه وبلعت ريقها هي توقعته باقي واقف لكنه دخل وتركها ولا ناداها

جلست ونزلت انظارها لجوالها فتحت صورته عند ريوف وظلت تناظر ملامحه وقت يقول قصيدته

هي تحس بالضغط تحس بالملامه من نفسها ، تتلخبط وترتبك وتكابر وتهرب وتتصدد وتنتظر ولا عاجبها وضعها

هي ماكانت كذا مع بهاج ! ليه الحين تزعله ؟ وتتركه يقسى عليها بسبب نفسها

مسكت شعرها بقهر وتأففت يطرّونه كثير عندها ولازم يذكرونها إنه اخوهم جميع

وهي ما تحس كذا وتلوم نفسها ليه تحس بعكس ما يقولون ، ليه نورا وريوف تقبلوا فكرة أخوة بهاج وهي لا

جالسه تحارب مشاعرها وتغلّط نفسها وتغلّط بهاج معها وتحس ان اختلافها عنهم بحد ذاته غلط

لف وهو يسمع الباب يدق وتشكل الشك بنظراته مستحيل تكون هي ! هي تكابر وتخطته ورجعت الملحق بدون ما تسأل

وقف بهدوء وهو يفتح شباكه لكن لانت ملامحه وهو يناظرها هي

ابتسم ابتسامه بارده ومشى للباب ووقف وهو يستوعب انتصاره

فتح الباب وناظرها بجمود ، بلعت ريقها من شكله واخذت نفس:يصير ادخل ؟ اذا مشغول برجع

ترك الباب ومشى:تعالي

دخلت ومشت للكنب تجلس تحت نظراته وجلست وراقبت وقوفه وهمست:ما بتجلس ؟

مشى قدامها وجلس وناظرها ينتظرها تتكلم

لكنها كانت ساكته وتتصدد بنظراتها للبيت

بهاج:اكيد مو انا اللي بتكلم لانك انتي جايه !

أنهار:لا تكلمني كذا

بهاج سكت وبلعت ريقها أنهار:اسفه عشاني مارديت على رسالتك

بهاج:بس ؟

أنهار:زعلتك بشي ثاني ؟

بهاج تنهد وتقدم وهو يناظرها:أنهار انا ماني زعلان عشان رساله مارديتي عليها ! انا زعلان لانك تتشكلين على كيفك مو مراعيه اني اسأل نفسي علامها وش جاها وش تبي

أنهار ارتبكت وشدت على كفوفها ببعضها

بهاج:وش تبين ؟ تبين نلغي كل شي ؟ وباللعنه اقعدوا عند ابوكم لين يفرجها ربي عليكم ؟ طز بجامعة ريوف وطز بنورا وطز فيك ؟ تبين كذا ؟ تبين بهاج معد يتدخل ؟

أنهار ارتبكت من جديّته لها وتجمعت بمحاجرها دموعها:بهاج !

بهاج:لا تتبكبكين عندي ، انا اتكلم معك ما اهاوش

أنهار اخذت نفس:احسني مضغوطه بس

بهاج:من وشو ؟ انا اضغطك ؟

أنهار:لا

بهاج:مو جايز لك شي هنا ؟

نزلت انظارها وعقدت حاجبينها بزعل وضيق

وراقبها بهاج لين تكلمت وهي تناظره:خلاص اسفه

بهاج تنرفز وعض شفته:انتي حماره ؟ انا قاعد معك اتكلم وابي افهم وتعتذرين ؟ اسفه على وش ؟

أنهار:خلاص بهاج

سكت عنها ورجع ظهره لورا وصد براسه بحده

أنهار ناظرته صاد وشاد على قبضة يده وعروقه بارزه تسمع شد اسنانه على بعضها وتلمح انه ماسك اعصابه ما يعصب

كانت تراقبه وتستصعب نفسها من مشاعرها ، هو يداريها ويداري نعومتها ما يخدشها صوت عالي وعصبيه وحدة حجاجه

ميلت راسها بتعب ماودها تحس كذا لكنها ماتقدر هي تحس بإن دمها يسري بالجاذبيه له

هي تحس بطاقه كبيره بين مكانها ومكانه تحس ان داخلها سالب وداخله موجب

تستصعب انها تسيطر على شي من قوة اللي يصير

كان حاس بنظراتها وحتى بإرتباك انفاسها اللي يسمعها والتفت صوب عيونها ونظراتها وتبدل حالها ما يقول انه فهمها لكنه شك بفهمه من حالها

هي تغرق عنده ويشوف هالشي بنظراتها له

ظل يناظر نظراتها له بهدوء لثواني وكان يحس انها بتهرب وبتظل هالدوامه بينهم

قطع كل شي من قام ومشى يجلس جنبها وارتبكت وهي تناظر طرف ثوبه وهو جالس جنبها

ناظرها صاده بعيونها وهمس:وش تحسين لاشفتيني ؟

رفعت راسها له وهي تراقبه بخوف وكمل بهاج

:تحسين بالغربه ؟

أنهار بلعت ريقها وهي تناظره وكمل يسألها وهو قريب منها : احد يلومك على شي ؟

عقدت حاجبينها من نطق وذكرها بملامة نفسها وهزت راسها بالنفي:كل شي فيني طالع مني ، محد يقدر يبدل حالي

كمل يقطع جملتها ويصرّ بكلامه:غيري

تبدل لونها للإحمرار وتعرقت وقرب منها بهاج

:صح يالنرجسيه ؟

لفت عنه وبلل شفايفه بهاج يحوّر بكلامه يرسيها على برّ مره ومره يغرقها ببحر ماله قاع

:بهاج يفهمك وبهاج يسمعك ، اي شي ودك تشرحينه بعرفه من غير تتعبين

رجع عنها لورا:انتي وخواتك

لفت له من طرّى خواتها وهمست؛بس انا أفرق ! أنا مجرّه عند النجوم

ابتسم من عرف انها فهمت جملته اللي قالها وابتسم انها تفهمه وهذا اللي مبدل حالها عليه

ناظرت ابتسامته ورجعت تناظر نظراته لها

بهاج:صادق ، لكني أضغط على هالنرجسيه عشان تنطقين بشي

أنهار:بلاش تناديني كذا

بهاج:شوفيني أحاول ! لكنك مصرّه وش سبب هالاصرار ؟

أنهار لفت له ونطق بهاج بهمس بنبرة صوت تصدى بصدرها قبل اذانها:يكسيك الغرور

ارتبكت من شفافيتها قدامه وتقدم بهاج لين صدت عنه لقدام وقرب لها بيهمس لها لكنه قبل يحارب نرجسيتها وينتصر هو ضعف

ضعف من ريحة عطرها ، من شدة حماسته وانتصاره نسي انها تكركبه وممكن تقلب الطاوله عليه بدون ما تجتهد

هو كان بينطق بإذنها لكنه عجز وظل واقف قريب من اذنها

شدت على عبايتها وهي تسمع انفاسه بتوتر كانت بتلف تناظره لكنه مسك كفها بقوه والتفتت له

وغمض عيونه بربكه:لا تلفين تكفين

ناظرته من قرب وشدت على كفه بخوف يتلبسها كان قريب منها وهي تهرب منه وبينها وبينه مسافات لكنه الحين قدامها بدون ماتقدر تهرب

رمشت تناظره مغمض عيونه واعترفت بداخلها انه يعجبها وتميل له ويجذبها ويكركبها ويفهمها ويعطيها من الدلال والإهتمام اللي تتمناه

فتح عيونه من شدت على كفه وناظر نظراتها له هي تبدلت نظراتها عن أول واليوم بالذات

هي كانت تجلس جنبه بإعتياد وتلمسه وتمسك ذراعه بدون ما يتغير حالها

لكنها اليوم تغرق وهو منتبه انها تبادله الغرق ، هو يحب ٦٨ شي فيها وهي تعشق ٢٣ شي فيه

تتأمله وكأنه مجرم والجُرم انه توسطها

كانت تحس انه يقراها من نظراته وكانت تتمنى تنتشل من عنده لبعيد لكنها تعجز تبتعد عنه هي تنشد ناحيته وتوصف الكركبه اللي داخلها من مسكتها لكفه بقوه ،تحفر اظافرها بكفه من شدة مسكتها له

نطق بعد ما طال صمتهم وهو يهمس لها

:ضميني على صدرك يا خوّافه

فزت من سمعت نباح الكلب برا وفلتت كفها عنه وناظر الباب بهاج ووقف

مشى وخرج من الباب وناظر امه جايه

التفت يخفي نفسه وناظر أنهار جالسه ولف من دخلت حليمه وناظرتهم:علامكم ؟

اخذ نفس بإرتباك وشد على الباب:علامنا ؟

حليمه لفت تناظر أنهار:تسولفون عن العرس ؟

وقفت أنهار ومشت من جنبها ولفت حليمه:ابوك يبيك ويدورك

لفت أنهار عليها:يبغاني انا ؟

حليمه:اي قلت اطلع ادورك ولقيتك هنا

ابتسمت حليمه بهدوء:عند اخوك بهاج

رفعت انظارها لبهاج اللي ناظرها وصدت تمشي عنهم وركضت للملحق وفتحته ودخلت

ناظرت عمر جالس بالصاله والبنات عنده وناظرها عمر:ليه تركضين ؟

فصخت شوزها:خفت من الكلب

رفعت راسها لهم:شصاير ؟

عمر عقد حاجبينه:ماتعرفين ؟

ناظرت نورا وريوف ومشت جلست:الزواج ؟

عمر هز راسه ونطقت أنهار:طيب ؟ لا يكون بتاخذ موافقتي اليوم ؟

ضحكت نورا وناظرهم عمر وهز راسه بالنفي

:لا ، وافقت انا وقضينا

أنهار:اجل ؟

عمر:وصلني المهر اليوم دفع بهاج والله

بلعت ريقها من طاريه وكمل عمر:ياخسارته

عقدت حاجبينها ولفوا البنات عليه وكمل عمر

:دافع مهر وهو ماخذ اخته

صدت بإنزعاج وكمل عمر:كل هذا عشان يكويني

ضحك عمر:يحط راسه براسي عشانكم يعني ! لو تزوج بهاج ولو تزوجوا عيال عمه كلهم انتم من صلبي

ريوف لفت تناظر البنات ونطقت نورا:احنا محد يحكمنا لا انت ولا عيال عمي ، وافقنا برغبتنا مو عشان شي

عمر ابتسم:صح انا معلمكم هالشي

أنهار:يكفي بالله

وقفت بضيقه وناظرها عمر:اقعدي

أنهار:ماني قادره اتحمل كلمه اكثر من كذا مو قادره اشوفك بعيوني كذا ، يكفي تطيح منها اكثر

سكت عمر وكملت أنهار:اشمئز انك تغيرت منهم ومن زوجتك اللي تدخل براسك اشياء مالها داعي

عمر:وش دخل حليمه ؟

أنهار:لها دخل محد معبي راسك غيرها ، اذا انت ما تلاحظ فترا باين كل شي لنا

مشت عنهم ودخلت الغرفه ولف عمر للبنات اللي جالسين

ناظرته نورا ووقفت تلحق أنهار

ظلت تراقبه ريوف عشان يلاحظ وجودها لكنه كان صاد عنها يناظر البنات بالغرفه وقف وغمضت عيونها بقوه من تخطاها ودخل

حزّ بخاطرها انه همشها ، كانت تترقبه يسألها عشان تحضنه وتنسى كل شي زي دايم

كانت تنتظره يتذكر جامعتها ويتذكرها لكنه تخطاها

بكت بعد ما خرج من البيت وغطت وجهها بيدينها

،

جلس بهاج ومسح وجهه وناظر امه:وش يبي فيها ؟

حليمه:عشان الزواج اكيد

بهاج:جزاه خير ، ندري كلنا وخالصين

حليمه:كان لازم يتكلم مع بنته

بهاج صد ومارد وكملت حليمه:قلت اقنعه تتزوج الكبيره

التفت لها بسرعه وعقد حاجبينه:تقنعينه ؟

حليمه:ما يفرقون عندك ليه ملزّم تاخذ الوسطانيه ؟

بهاج:تكلمنا قبل ليه تعيدين كل شي

حليمه:لاني الاحظ بهاج

بهاج وقف بعصبيه:خرجي الافكار ذي من راسك تغلطيني عن شي ماهو غلط ليه ؟

حليمه:لا غلط وان كنت بتتزوج الوسطانيه ما بتصير زوجتك يابهاج لو بتموت

بهاج ناظرها بحده ووقفت حليمه:بنات عمر يعورون يابهاج ، اصحى على نفسك انت تزوجتها عشان العيب عند جدك وعند الناس ، لكنها اختك وخواتها خواتك

بهاج:يكفي تسمعيني كل يوم نفس الكلام

حليمه:تحتاج توعى ويحتاج الكلب يصحيك

جمدت ملامحه وناظرها وهزت راسها حليمه وخرجت تاركته

بلع ريقه من عرف انها نادت الكلب عشان ينبح عندهم لانها شافتهم اصلاً

تنهد وغمض عيونه وجلس ومسك راسه بيدينه

عمر دخل المجلس وناظره بهاج

رَده:هاه ماشي ؟

عمر:اي

رَده:لا تبطي

عمر:ابشر

مشى وسلم على راسه ووقف بهاج وهو يحط فنجانه ويمشي خلف عمر اللي لف يناظره ماشي وراه

ركب سيارته عمر وشغلها ولفت يسارها وهي تطلع من الملحق تتجه للسياره وتناظره متقدم لهم

بلعت ريقها بربكه وصدت بنظراتها تركب ويركبون معها نورا وريوف

مشى لباب أمه وفتحت شباكها وناظرته:هلا ياحبيبي

ناظرها من نطقت بكلمة حبيبي وماهو طبعها لكنها تشكلت تشبه بنات عمر

سكت ثواني والتفت له عمر:بتبطي ؟

بهاج ناظره ولف لامه:ان احتجتي شي كلميني

ابتسمت حليمه:لا ياحبيبي لا تشيل هم

هز راسه ولف للخلف يناظر البنات:وانتم بعد

نورا:اوكيه

ناظرها صاده لجوالها ولف يناظر عمر وبعد عن السياره وحرك عمر خارج من المزرعه

مشى راجع وخرج سلطان:راحوا ؟

هز راسه بهاج:ما بيبطون ان شاء الله

سلطان:ما بيخليهم الشيبه بعد بكره الجمعه

بهاج:اللي مصدوم منه محد لزّم على روحة السوق للرياض غير امي

سلطان ضحك:انت شفت لبسها كيف تغير؟

بهاج ناظره وابتسم سلطان:غيرها عمر باشا

تأفف بهاج وطلع جواله من جيبه وابتعد عنه وهو يدخل محادثتها هي من اخر مره ماشافها وعدت أيام تعمدت ما تشوفه ولا تكلمه ارسل لها ولاردت

،

ناظرت الفستان اللي بيد ريوف وميلت شفايفها:حلو

ريوف:بس حلو ؟ اشبك أنهار علقي طيب !

أنهار:حلو بس دوري غيره

ريوف:مالقيت شي هنا بنتظر نورا تخرج من غرفة القياس نشوف محل ثاني

أنهار تكتفتت ولفت ريوف:مالقيتي شي ؟

أنهار هزت راسها بلا وريوف ضحكت:مو هنا قسم العرايس

لفت أنهار وصرخت بصوت واطي وهي تمسك ذراعها:مو مصدقه بتتزوجين

ابتسمت أنهار:لا ماقصرتي صراحه تسمينه زواج

ريوف:هو صح إحنا كأننا نلعب وخصوصاً انا وشليويح حقي ! بس ترا افضل شي بنسويه

أنهار تنهدت:خايفه ريوف

ريوف ناظرتها بصدمه:تخافين ليش ؟ ترا مو زواج أنهار احنا بس بنشتري حريتنا من عيال عمي وبهاج بيكون أقرب واحد لك منا كلنا حتى

صدت أنهار وسكتت ولفوا من نادتهم نورا ودخلوا ناظروا شكلها

ابتسمت أنهار:يجنن نورا

ابتسمت:احسه قصير بتصير ملكتك ندوة نصح

ريوف ضحكت:ماعليك في احد وربي يموت عليك

خرجت أنهار:بسرعه غيري نشتريه ونشوف محل ثاني

طلعت جوالها وارتخت ملامحها من شافت محادثته بسناب ودخلت من الجنب تلمح رسالته

"اذا بغيتي شي ارسلي لي انا لا تطلبين ابوك "

مافتحتها كامله وقفلت جوالها عضت شفتها من تذكرته من اخر مره وتردد صوته وهمسه براسها يجبرها بـ:ضميني ياخوّافه

بلعت ريقها من طلعوا وخرجت وهي تشوف عمر وحليمه بالمحل الثاني واللي ظاهر انهم مندمجين لدرجة ما لاحظوا خرجوهم حتى

ريوف همست:مو مستوعبه كيف اندمج معاها كذا

نورا:احسه يجاملها

أنهار:يجامل ؟ هذا كله ويجامل ؟ انا مو مصدقه انه نفس الشخص

نورا:لا انا استوعبت وخلصت صراحه عديت مرحلة الصدمه

شهقت ريوف:تصمم عشان أنهار

لفت أنهار تناظر الفستان وابتسمت نورا:منجد ذوقك مرره أنهار

ريوف لفت وضحكت:فايبز أنهار صح ؟

ضحكت نورا:ادخلي نشوف مقاسك

ريوف رفعت حواجبها:عروسه حياتي !

تأففت بربكه ودخلوا معاها عشان تقيسه

سحبتها من يدها نورا وهي تطلب الفستان كانت غارقه بينهم كانت خايفه تسمع نبضها وصوته كانت تحس ان مشاعرها أقوى بكل مره يذكرونها بإنها بتصير له مع انهم يشوفونها بعاديّه بس هي تدري انها معاه ما بيكون بينهم شي عادي

تدري انها تهرب وهو يركض لها تدري بإنها بتكون زوجته فعلاً لو عاشت معاه هي ماتقدر تشوفه زي ما يشوفونه هي تشوفه أكبر من كذا

هي تحس إنها فعلاً عروسته اختارها قدامهم ووسط رجال مجلس جدها وقال انها بوجهه

لبسته وناظرت جسمها فيه وشكلها والفستان اللي يكسي جسدها

توترت وجلست بغرفة القياس وهي تهدي رجفتها وتغمض عيونها وكل اللي تشوفه هو خيالها هو بقربه ورمشه ونظرة عيونه لها كيف يتأملها ويهمس لها بنبره تبعثرها وتضيعها

فتحت عينها بسرعه من دخلت نورا:اشبك ؟

بلعت ريقها:ما ادري يمكن احس بهبوط

نورا جلست جنبها:طيب اطلعي خلينا نشرب حاجه !

أنهار هزت راسها:ساعديني انزله

وقفت وساعدتها نورا ولبست عبايتها وخرجت

نورا:بشتريه واجيكم

خرجت أنهار مع ريوف ولفت لها ريوف:وجهك أصفر نوني لا تخوفيني تعالي نجلس

أنهار جلست وهي تفرك يدينها وطلبت لها عصير ومشت لها:ما افطرتي كويس عشان كذا

أنهار:بصير كويسه لو ارتحت شويه

ريوف:تمام ياعيوني

،

كان يدخن لحاله ويسمع اصوات عمانه بالدكه خلفه

حط السيقاره على الطفايه والتفت وهو يسمع صوت السياره تدخل

عرف ان عمر رجع توقع انه بيمسي بالرياض دامه رجع بنص الليل وبعد ماتعشوا

وقف وهو يشوفه ماشي للملحق عض شفته من دخلوا وهو واقف محله

رجع وجلس وناظر جواله اللي ماردت عليه من يوم ارسلها العصر

ناظر التاريخ اللي بخلفية جواله واليوم اللي اصبحوا عليه يوم الخميس

قفل جواله وابتسم من تذكر ان مُناه تحقق بدون تعب ولو إن أنهار صعبه وما تشبهه ودربها ما يشبه دربه الا انه يبيها ومبسوط لانها بتصير له

نزل نظره لثواني ورفعه من جلس جنبه فهد وتكى:هاه يالعريس

ابتسم بخفوت وصد بنظراته وابتسم فهد:مستعد ؟

بهاج:الله يسهل

فهد:عمر ما وافق عبث ترا

بهاج:داري ، وان بغاها باللي أحسن جيت كلي وإن بغاها باللكاعه ! باللكاعه ، يوم توقع الجمعه تحت اسمها وتصير حَرم بهاج محد له حق ينطق بحرف

فهد:خوفك تحارب لوحدك

سكت بهاج من فهم مقصد فهد وكمل فهد:يمكن ماتبيك ويمكن لو ابوها صد بنظره وحده لها ! رمت كل شي ورا ظهرها عشان ابوها

بهاج نزل انظاره يفكر وكمل فهد:اكسبها بعدين تحداه

التفت من شد على كتوفه سلطان من خلفه يضحك: ‏ياعاذلين الهوى مايفيد الكلام

ابتسم فهد وصفق يكمل مع سلطان وجلس سلطان جنب بهاج يرقص:مسكين مسكين من قد بلى بالغرام

كملوا يغنون عند بهاج اللي مبتسم لهم وباله بعيد باله لا مع فرحتهم فيه ولا مع الشيله المحببه لقلبه اللي يغنونها ومستحيل يغنونها ولا يكملها لكنه ماقدر يغني معهم ماكان منه فعل الا الابتسام

،

منسدحه وتناظر ريوف اللي تقيس فستانها وتتصور ونورا اللي تفرز مكياجها على الارض وتغني مع الاغنيه اللي مشغلينها بصوت عالي

كانوا عادي حتى يوم ركبت السياره تتعذر بهبوطها كانوا عادي ماشافوا انها تعاني من الفوضى والتوتر اللي بصدرها ، التناقض اللي ياكلها لناحية بهاج واللي صار واللي وافقت عليه ، تضيع ان شافته ويغير حالها ويبدل روحها بسلاسه منه ، تميّزه تميل له يعجبها ويجذبها تراقبه بعيونها وين راح وتسأل عن مكانه وين ماغاب لكنها تخاف الفرق بينهم ، تخافه وتخاف من اندفاعه وكيف انه رامي كل اهله ورا ظهره وواقف قدامها يقول أبيك ، هو ما يصرح لانها تقطع كلامه ولكنها تدري بإنها مرغوبه منه ويشوفها عكس ما يشوفونهم كل اللي حوالينهم ، يدللها وهي تضعف عند الدلال تضعف عند دلعه لها بسمّي وحاضر ولبيه ،

تنهدت بربكه من تذكرت نظراته اللي تربكها وتستغربها له نظرات تسحرها من عذوبتها هو يناظر الجميع لكن يناظرها غير ، كيف تلمع عينه وسط عيونها كأنها أعجوبه كأنه مذبوح فيها

ابتسمت وأخفت ابتسامتها من انتبهت ان نورا تسألها:هاه !

رفعت انظارها ريوف بإستغراب وعقدت حاجبينها نورا:وين رحتي ؟

شدت على لحافها:معاكم

نورا:فستانك ما طلعتيه حتى من كيسته اشبك بارده كذا !

ريوف:مره صراحه انا كويس ما اداوم للملكه الحين ابغى الكل ينبهر فينا ويعرف اننا مو شويه

نورا:اخ ريوف سطحيه بشكل مقرف

ريوف ماردت واخذت نفس أنهار:مو قادره اتحرك زبطيني نورا

ابتسمت نورا:من عيوني ارتاحي انتي

ابتسمت لها أنهار ووقفت نورا وعضت شفتها أنهار وهي تفتح جوالها وتدخل على محادثته من الجنب تقرأ الجمله الوحيده اللي كتبها وتطلع تفتح ستوريات فهد وسلطان اللي نشيطين في سنابها عكسه هو اللي ما يصور شي ولا صور غير مره وحده وكان فيها مبسوط ويردد شيله بسيارته لوحده

تنهدت وقفلت جوالها تتجاهله

،

واقف حافي ورافع ثوبه على وسطه ويناظر بهاج اللي ماسك الغنم ويفرزها على طلب جده اللي واقف بعكازه:لا تطلع ذي السمان ماغير شحم هات لنا من ذي اللي عند فهد

مسكها بهاج وخرجها وربطها عند باب المجلس

وخرج سلطان وحده وفهد ثنتين كانوا يشتغلون يحدون السكاكين ويطلعون القدور والصحون عشان عشاهم

عبدالله:جهزوها بكره الصبح اجيب عمال يطبخونها ما بتفضون انتم وبهاج عريس

وقف بهاج وناظر عمر اللي واقف عند المجلس ويناظرهم

رَده:زين تسوي

زيد:بهاج ناقصك شي ؟

رفع راسه بهاج:لا تسلم ياعمي طالع اجيب ثيابي انا والعيال

عبدالله:توكلوا على الله

رَده:بهاج

لف بهاج وهو ينزل ثوبه من كفه وناظره رَده:دق أكد على الشيخ بكره المغرب

بهاج هز راسه ورمى نظره لعمر ومشى وخلفه سلطان وفهد

ركب فهد جنب بهاج:عز الله ما يحبونك الحموله

سلطان ضحك:نسيت ان عمته هي امه !

ضحك فهد ولف لبهاج:الحين امك تزفك بكره والا تزف بنت رجالها لك

بهاج اخذ نفس وهو يخرج من المزرعه:والله شكلها بتزف بنت رجالها

سلطان:انا ازفك وانا امك

ضحك بهاج وناظر شكله بالمرايه:احلق الدقن والا اخليه ؟

فهد:خله

سلطان:شيله يارجال كأنك بالاربعين

بهاج:اخففها وخلاص !

سلطان:اسأل المَرَه

لف بهاج له وضحك سلطان:وانا صادق هي وش ماتبي واحلقه

فهد:بنت عمر عادي تقول احلق شنبك ابيك املط كأنك اجنبي

لف بهاج له بصدمه:وانا ولد ابوي !

سلطان:تعقب بنت عمر صح يابهاج؟

بهاج:عند شنبي ؟ صاحي انت ؟ شنبي هذا شنبي ؟ رجولتي كلها فيه وتقولي بنت عمر احلقه ؟

لفوا يناظرونه ولف لهم:والله لأحلقه

ضحكوا وضحك بهاج فهد:كان علقناك مع خرفان العشاء يالخروف

ضحك بهاج:ارفع علومك

،

خرجت من الحمام والروب عليها وناظرت حليمه اللي عند المغسله تغسل

مشت ووقفت خلفها وهي تسحب معجونها وفرشتها

رفعت انظارها للمرايه تناظر حليمه اللي تغسل ولابسه فستان ناعم اول مره تشوفها بالستايل هذا وابتسمت بسخريه

حليمه:ضحكيني معك

أنهار:لا بس استغربت لابسه من اليوم ! بكره الملكه

حليمه ضحكت بهدوء:لا هذا مو لملكة بهاج ماشفتي امس اللي اخترته ؟ اوه صح امس ماكنتي زينه صح كيف صرتي ؟

أنهار هزت راسها وهي تفرش اسنانها ولفت حليمه وهي تنشف يدينها وابتسمت:الصراحه ماكنت بتكلف بس عمر أصر اشتري شي غالي ويعجبه والا انا قلت بهاج وأنهار ؟ لعب عيال وشخابيط ورق بس

أنهار نزلت المعجون من فمها وابتسمت:والله ودي اخذك على عقلك واقولك شخابيط ورق بس تراها شخابيط عقد نكاح

سكتت حليمه واتسع مبسم أنهار والتفت تفرش اسنانها وهي مبتسمه

حليمه:على قولتك ، بس ان شاء الله فرحتنا الكبيره بالحقيقه

لفت أنهار عليها وكملت حليمه:بهاج وبنت عمه شموخ

تلاشت ابتسامة أنهار واحتدت ملامحها وابتسمت حليمه:كلنا بنفرح فيهم وأولهم انتي بهاج اخوك يستقر ويبطل هالمسرحيه ؟ وش احلى !

مشت وتركتها وشدت على فرشاة اسنانها أنهار وغسلت فمها ونشفت وجهها وناظرت وجهها بالمرايه هي تضغطها وتذكرها باليوم ٧ مرات إن بهاج بعين الجميع والمفروض بعينها بعد يكون أخوها لكنها تأبى تشوفه نفس ماتبي حليمه

هي تحس بربكة العروس وتوترها وتدري انها بتخط توقيعها كزوجه بعيون بهاج حتى لو تأبى أمه والقبيله كامله

مشت للغرفه ورمت منشفتها عن شعرها واخذت جوالها وهي عاقده حاجبينها ومالقت منه رساله دخلت تناظر ستوري فهد اللي مصوره بالحلاق ومبتسم وكاتب عريسنا

ارتبكت وهي تشوفه بالشكل اللي تحبه محلق ، بلعت ريقها هي ماشافته من أيام وتتخبى عنه وتتجاهله ومن شافته الحين حست بنبضات قلبها وحرارة دمها بين عروقها ابتسامته للصوره وكلام فهد

قفلت جوالها وشدت على روبها ورفعت انظارها تتجاهل شعورها لكنها شافت نورا جايه وشايله فستانها ومبتسمه وانهد حيلها وتأففت من مشاعرها وماقدرت الا انها تنطق:خلاص ارحموني

نورا دخلت:كويته لك كنت خايفه احرقه صراحه بس ساعدتني ريوف بعلقه هنا اوكيه ؟

صدت تنشف شعرها:حطيه في اي مكان

تأففت بإنزعاج ولفت تشوف نورا وريوف كل وحده تكوي فستانها وصدت بربكه

،

طلع جواله وهو يفتح رسالتها لكنها ماردت احتدت ملامحه بعصبيه وضغط على اسنانه بغضب

دق عليها وهو ينتظرها ترد لكنها من سمعت جوالها ولقته هو قفلته قبل يسمعه احد ولفت تناظرهم برا الغرفه والكل ملتهي

ناظر جواله ورجع يكرر الاتصال وقفلته وتأفتت:خلاص اف

دخلت المحادثه ومن ناظرها موجوده ارسل لها:اطلعي

رفعت راسها تناظرهم ورجعت تناظر جوالها:ليش ؟

بهاج:اطلعي والا انا جيت ، اطلعي أنهار

هزت رجلها بتوتر:ما اقدر

بهاج دق عليها وصمتت جوالها ووقفت وهي تاخذ عبايتها وتغطي شعرها وتخرج

لفت حليمه لها وناظرتها ريوف:ما بتنامين ؟

شدت على جوالها:مو جايني نوم بتمشى شوي وراجعه

ناظرت عمر وحليمه اللي بطرف الصاله ولبست شوزها وفتحت الباب وقفلته ومن لفت وشافته واقف بعيد ينتظرها انقبض صدرها ومشت وهي تشد على طرحتها اللي على راسها

صدت بنظراتها عكس اتجاهه ووقفت قدامه:اشبك ؟

بهاج عقد حاجبينه وماتكلم ولفت له تناظر حدة نظراته وبلعت ريقها:اذا عشان مارديت كنت مشغوله

بهاج مارد وارتبكت اكثر وهي تشوفه ساكت وشدت على طرحتها بخوف:سويت شي ثاني كمان ؟ قلت مارديت كنت تعبانه مو مصدق اسأل البنات

همس:شفيك ؟

صدت بنظراتها:ولاشي

بهاج:تعبانه واسألك وشفيك وتقولين مافيني شي ؟

رفعت نظراتها تترقب عصبيته وخافت لانها ما تشوف بهاج معصب ولا تبي تشوفه او تتخيله:لا تكلمني كذا

بهاج قرب منها ونزل كفه لكفها ومسكها ورفعت راسها له بربكه والتفت يمشي ومشت معاه

نزلت نظراتها لكفه اللي ماسك كفها ورفرف قلبها من مشاعرها وعضت شفتها تخفي ابتسامتها

مشى معها بهدوء عكس اللي داخله يمشي بممر النوير وسط ظلمته وماسك كفها اللي يحسه يتعرق وسط كفه وهذا دليل ربكتها وتوترها

همس:متوتره ؟

ناظرته صاد عنها:لا طبعاً ليش اتوتر عشان ظلام يعني ؟ وبعدين في نور ما اعرف نور ايش يمكن نور القمر

لف لها ووقف وناظرته:متوتره عشان بكره ؟

سكتت ورجعت لورا وصدت وهي تهز راسها بالنفي

بهاج:غريب ! ، بتصيرين زوجتي وحلالي وتسكنين ببيتي بعيد عن خواتك وتنامين بعيد عنهم

سكت ثانيتين وكمل يضيعها:تنامين جنبي

فلتت يدها من كفه ورجعت لورا: إحنا بيدورون حوالينا يذكرونا اننا اخوان ، ما يحتاج هم كلهم امك مابتقصر وبتخطب لك كمان لذلك ماراح اتوتر عشان مسرحيه احنا رسمناها عشان مصالحنا كلنا

بهاج عقد حاجبينه ثواني:وش عليك منهم ؟ انتي وش تبين ؟

أنهار:انا ابغى تتركوني بحالي ما ابغى احد يضغط علي يكفي خلاص

بهاج:من يضغط عليك ؟

أنهار:انت وامك وزوج امك وخواتي وكل احد هنا

بهاج:محد يضغط عليك أنهار انا قدامك اتكلم حتى صوتي اقل من صوتك بس انتي ضاغطه نفسك

أنهار انحنى ظهرها بإرتخاء بتعب وأنهد حيلها وصدت براسها تخفي نفسها

بهاج:بين اي ولا ليش ؟ من يحاربك ؟ ليه تحاربين نفسك بنفسك ؟

تقدم لها يلفها له وصدت وسحبها ولفت له:بهاج !

ناظرته ومن شافته يناظرها وشادها بقوه عشان تتكلم ولا تخفي نفسها تنهدت

همس لها:تطمني ، ليه وإنتي معي متروعه ؟

ناظرته وعقدت عيونها بحزن وتعب تحاول تتركه لكنه يأبى

كمل بهاج:ليه ياخذونك بين كلمه وكلمه هم يبونك كذا امي وابوك ! ما كانوا يبونا سوا وللحين بيعقدون أمورنا لكني معك ، تضعفين وانا معك ؟ ظهرك ووراك وسندك ! والله ان بغوها حرب حرايب اني ما أصد

ماردت عليه ونزل انظاره يتأملها وقرب منها:انتي تبيني وانا ابيك

هزت راسها بالنفي تحاول تبتعد عنه وكمل وهو يشدها ورفع صوته:لا تقولين لا

فلتت نفسها تبعده:لا لا لا

تنهد بعصبيه وبلل شفايفه يهدي نفسه ويبتعد عنها

رجعت وراها تناظره ونطقت:خلاص بهاج لا تسوي فيني كذا

لف لها وهمست:محد يبغانا سوا

بهاج رفع صوته بحده واحتدت ملامحه:باللعنه

رجفت بخوف ورمشت من صوته وتقدم لها:باللعنه ماتفهمين !

دفعت صدره عنها بخوف ومشت راجعه وعض شفته وسحبها من ذراعها ولفت له:اتركني اروح

بهاج؛ماخلصت

أنهار بعد ما اختلف صوتها ووضحت نبرتها:تكفى بهاج

فلت يدها من شاف عيونها تغورق بالدموع وتنهد بتعب وهو يشوفها ترجع للملحق

هو يحاول لكنها شديدة بأس جبانه وتخاف ، تخاف من ردة فعل الجميع لو قالت تبغاه وتحبه

هي ما تنكر كلامه يوم يقولها انها تبغاه لكنها ترفض تصرح وتجهر ببوحها

غمض عيونه وهو يتذكر صوته وخوفها من رفعه وطلع جواله يرسل لها يداريها قبل تنزل دموعها

عض شفته وهو يكتب لها وهمس:خوّافه

ارسل لها:لا تبكين ، ينثني غيم نجد لخد الحجاز النرجسيه

تنهد خايف تكون بكت ولا سبق دمعتها

دخلت وفصخت شوزها وناظرت جوالها من وصلتها رساله منه وقرتها

رجعت ظهرها لورا بضعف وقل حيله ترد عليه

:لا تتعبني بهاج تكفى ما بهرب منك اكثر

عقد حاجبينه من قرأ كلامها ورفع راسه للملحق وقفلت جوالها تمشي للشباك لمحته باقي واقف محله يناظر جواله وتنهدت تدخل للداخل

قرأ رسالتها اللي لمح فيها خوفها وضياعها هي تقوله انها تهرب منه لانه يضغط عليها لانه يندفع لها ولا يخاف

حسّ بالندم لحظه هو ما يربحها لصالحه بإندفاعه هو يخوفها ويشتتها ، هم يحاربونها ولا يعرف كيف لكنه يدري انها بين نارين

-

يوم الجمعه

سمع الباب يدق ونفث اخر نفثه من دخانه وطفاها وتقدم للباب وفتحه

فهد:علامك ؟ راقد باقي ؟

بهاج:لا

فهد:وشبك ما طلعت ؟ ما بتتجهز وتدخل المجلس قبل يجون الناس ؟

بهاج:الا

فهد:بك شي انت ؟

بهاج:لا يافهد لا روح شوف وش عندك شغل انا بلبس واجيك

فهد:طيب

قفل الباب خلف فهد ومسك جبينه هو صاحي من أمس ولاقدر ينام يهوجس لوحده بالبيت تغمره الفرحه بإنها قريبه منه ويغمره الخوف بإنها تبعد ، هو ما بيردها ويعاندها هو بيلبي رغبتها يبعتد ويعطيها فرصه لنفسها وروحها يدري انها تنضغط ومو متعوده على هالضغط لكنه ما يقوى ، مايقوى عالصبر عليها

كل هذي الافكار براسه بلحظه ما اخذ شاور ولبس ثوبه وقفل ازراره

طلع الطاقيه من درجه ولبسها على شعره وسحب الشماغ يحطه على كتفه ويرفع العقال على طاقيته

لبس ساعته وكبكه وتعطر وخرج من الغرفه

لف يناظر بيته هو بيدخله الليله بس ما بيدخله لحاله بتكون هي معاه

ابتسم ابتسامه هاديه وخرج يقفل الباب وراه على صدى اذان المغرب

مشى لسلطان اللي نزل من سيارته كاشخ وابتسم:حيّ العريس

ابتسم بهاج وهو يوقف عند السياره ويرفع شماغه ويعدله ويثبت العقال عليه

سلطان:حسافه ما امداك تتبخر كان خليت امي تبخرك

بهاج نطق من تذكر امه:امي حيّه

سلطان سكت ولف بهاج عليه:لكن ما بخرتني

سلطان ابتسم:اصلاً ريحتك فايحه من قبل انزل من السياره ماعليك

ابتسم بهاج له لانه يدري بإنه يداريه ويجبر بخاطره ويفهمه ويفهم حزنه:عقبالك

سلطان:ماني بعيد باخذ اخت حرم بهاج

ضحك بهاج وعض شفته يدري إنه يبي يطيره من فرط سعادته يوم يقول عنها حرم بهاج ، يدري ان بهاج بيضحك وفعلاً ضحك ومشى مع سلطان للمجلس

دخل وناظر الضيوف اللي وصلوا وعمامه وتوسط المجلس بجانب رَده وعمر

التفت يناظر عمر اللي جامد ولف من سؤال رَده:وين بشتك ؟

بهاج:ما يحتاج دامنا بمكاننا

دخل فهد والشيخ معاه ووقفوا يسلمون وعدل شماغه بهاج بتوتر من جلس جنبه الشيخ

رفع انظاره يشتتها بعيد عنهم من بدأ الشيخ بمراسم كتب عقد النكاح

بدأ ينطق اسمه واسمها سوا ويكتبه ويضمّنه أمام الموجودين وتحت مسامع عمر اللي كان حاله مستغرب ، ساكت وكأنه راضي وجامد كأنه رافض

لف بهاج لعمر اللي توقف السؤال عنده بـ:زوّجتك إبنتي أنهار على سنة الله ورسوله

سكت بعد نطق الشيخ بإسم بنته بلع ريقه من مرت صورتها عليه وناظر بهاج اللي ينتظر منه جواب

لف عمر لرَده اللي يناظره وينتظره ينطق خلف الشيخ وناظره رَده بنظره تجبره يتكلم

بلل شفايفه ولف لبهاج:زوّجتك بنتي أنهار على سنة الله ورسوله

اتسع مبسم بهاج من توقف الكلام عنده ونطق:قبلت بهذا الزواج على سنة الله ورسوله

وقع عند اسمه ورفع راسه للشيخ اللي يدعي له ويبارك له وابتسم:اللهم امين

لف الشيخ:نبي توقيع الزوجه ماعليك أمر

وقف عمر تحت نظرات بهاج له والتفت يناظر فهد وسلطان اللي الفرحه تغمرهم يشاركونه مشاعره اللي يجهلها الحضور وأعمامه ، يشوفون انتصاره بعيونه بدون ينطق لهم

،

نطقت بهمس:مصخره

لفت لها نورا اللي لابسه فستانها وتناظر اللي يرقصون:ماعليك من أحد

أنهار عقدت حاجبينها تناظر حليمه اللي ترّقص البنات وتمسك يد شموخ من بينهم ترقص معها والتفتت تناظر ريوف ونورا اللي كاشخين وواقفين جنبها

لفت من نطقت حليمه:جايه ياعمر

ريوف همست:ياشين الاسم من فمها

نورا لفت تناظرها تفتح الباب ويدخل عمر بالمدخل ومعاه دفتر ولفت لأنهار:أنهار

لفت أنهار وناظرت ابوها اللي واقف ويناظرهم واخذت نفس

مشت ومشوا خلفها البنات لحد ما طلعوا لعمر وناظرتهم حليمه:وقعي

رفعت أبصارها لأبوها لوهله حست انها قدام غريب ماهو أبوها ، لان عمر ابوها وعدها يزفها بدموعه وفرحته وخوفه ودعواته اللي تشوفه الان هو شخص ماهمه شي وكأن بنته بتشخبط على دفتر عادي ماهو عقد نكاح

نزلت انظارها من شورقت عيونها بالدموع وناظر العقد وارتبكت هي وش قاعده تسوي وليش حياتها تغيرت من لحظة ما جات هنا

مسكت كتفها نورا ورجفت أنهار ولفت لها ابتسمت نورا:وقعي أنهار

ناظرت ريوف ونورا اللي ينتظرونها ووقعت وحطت القلم بمنتصف الدفتر ودخلت تاركتهم

وقفت نورا تناظر عمر اللي نطق لحليمه يبلغها بموعد العشاء متجاهل وجودهم ودخلت تلحق أنهار

دخلت الغرفه أنهار وقفلت الباب عليها ومسكت صدرها ناظرت شكلها عاكس بالمرايه قدامها

مكياجها وشعرها وفستانها الليموني اللي يكشف عن فخذها وأكتافها ويضم جسدها لدرجة رسمه

هي تحاول تخرج من طاري العروس وتهجر الأبيض وتحس إنها بعزيمه عاديه لكنها ماتقدر تهرب أكثر عقدت حاجبينها وهي تسمع طلق النار وخرجت من شباكها تناظر الرجال اللي يلعبون بالنار بالحوش ويصفون صفين ويعتلي صوت الشيلات بالحوش كانت تحاول تلمحهم وتعرفهم لكنهم يبعدون عن نظرها لفت وهي تسمع صوت الاغاني برا

ومسكت راسها بقوه تهدي نفسها

-

( التشبيهات بحسابي بالاستقرام r_55shog )

-

كان ماسك ذراعين أعمامه ويناظر سلطان وفهد اللي يرقصون قدامه بسيوف كان متجاهل تضاحيك الجميع وعينه على أخوانه سند ظهره أصحابه من المهد فرحتهم فيه وهو يدري انهم يزفون فرحته الليله بطريقتهم ، يحرك يدينه يتغنى مع الشيلات ويضحك لسلطان وفهد ويعزز لهم تقدم وهو يشيل السيف اللي مدّه له فهد يعزمه وسطهم وفعلاً شال السيف يرقص رقصات أهل نجد اللي تغنّت بهجه من إنتصاره ببنت الحجاز النرجسيه

يرقص وسطهم مع فهد وسلطان تحت نظرات عمر لهم هو تجرأ وتغيّر وتسرع هو يتبع خطوات ما تعوّدها ولا رسمها وتوقعها لكنه يمشي على قول أبوه وأمه يرضيهم رضى البار

،

لفت من تقدمت لهم جمعه تدخل الغرفه مع عزه:اخرجي ياعروس

ناظرتهم أنهار بصدمه:وين ؟

جمعه:بنزفك لبيت رجلك

أنهار لفت بصدمه لخواتها:نورا !

نورا:زفة ايش لا طبعاً شكراً

جمعه؛اسكتي انتي ماهو بكيفك الحين يدخل رجالها ونزفهم سوا لبيتهم

مسكت جبينها أنهار:اوميقاد

ريوف:وش حركات الجاهليه هذي لا طبعاً ما بنزفهم  ولاشي

جمعه:انا باخذ رايكم يالفصعونات انتم !

نورا:بتاخذين راي أنهار وأنهار قالت لا ومحد بيغصب أنهار على حاجه وانا موجوده

عزه؛علامكم عدائيات يابنات عمر ! هذا اللي المفروض يصير ماهو غلط

ريوف:لو سمحتي اخرجي منها انتي

لفت جمعه وهي تنادي:ادخل يا ابو عبدالله

رفعت راسها أنهار وهي تسمع صوت رَده ولفت لنورا وريوف:بنات بلا مصخره تجمّع علي الحين كل رجال القبيله !

نورا:انتظري اشوف وأجيك

مشت وهي شايله طرف فستانها وتخرج من المدخل تسمع أصوات الرجال برا والحريم داخل

عقدت حاجبينها ورفعت عيونها للي يطلع من المطبخ يتنحنح

التفتت وجمد محله من شافها عقدت حاجبينها وتأفتت من الفوضى بالمكان ولفت تدخل تاركته محله ، كانت تتحرك وشعرها على ظهرها مستريح وبكل حركه يداعب ظهرها قدام عينه وهو ما يقوى لأنه بدوي والبدوي تحرّم على أنظاره الغزال البشري لكنه شافها وماهو قصده ، شافها وتوقف دمّه بمكانه هي حتى ما راعت إنها شبه عاريه أمامه ما أهتمت انه رجل والمشاهد هذي ماهي عوايّد أبصاره

خرج سلطان وناظر رَده اللي يسأله:قلت لهم ؟

سلطان:لا

اخذ نفس يفتح زرار ثوبه الأول:البيت زحمه بالحريم

رَده:الحين تكلمهم جدتك

لف بهاج عليه:علامك ؟

سلطان:ولاشي 

انتظروا عند الباب لين طلعت جمعه:مدري ليه تزوجونه هالعنيده هذي

همس عمر:وش صاير ؟

جمعه:ماتبي تطلع

تنهد عمر ودخل وسأل بحده رَده:على كيفها ما تطلع لبيت رجالها ؟

جمعه:ماتبينا نزفها ، ما ارضى على ولدي لكن ما أخس تربيته في بناته

بهاج ناظرهم:ماهي بنته الحين هي بوجهي وان كانها ماتبي محد يغصبها

رَده:ماهو شورك ولا شورها

بهاج:انتم بتزفونا سوا ! هي ماتبي وانا ما ابي ؟ وش لكم ؟

جمعه:ياولدي ما يصير حريم اعمامك وبناتهم يزفونكم لعتبة بيتكم وبعدها بكيفكم

بهاج:ما يخالف لو ماصار ، بدخل لها بدون قروشه

لف لجمعه:شوفي لي درب ياجَده

دخلت جمعه وهي ترفع صوتها:العريس بيدخل

لفت تتجاهل حديث عمر معها ورجفت من نطقت جمعه تبلغهم

لف عمر عليها:اطلعي لهم

كانت بالغرفه عاجزه تطلع عاجزه تعدي الليله عاجزه تتقبل خروجها عن خواتها

نورا:أنهار اشبك ؟ اخرجي كأنك رايحه ما اعرف فين ترا معانا انتي مو بعيد ! وعند بهاج فخلاص !

أنهار:لا تكلميني كذا خلاص يكفي هم

نورا:محد يسمعنا انا اكلمك لانه منجد أنهار ما يسوى هو مو زواج حقيقي

ناظرتها أنهار تترجاها تسكت وابتسمت نورا:اموت على العيون الحلوه ياناس احب الميك اب على عيونك

أنهار:انا فين وانتي فين

دخلت ريوف تضحك:بموت عسسسل بهاج يوم شافني قال حيّ اخت العروس ، لا عسول كيف يقول عروس

نورا ابتسمت:يالله أنهار تكفين نضحك وننبسط عليهم وكيف رافضين ومقهورين

تنهدت ورفعت سبابتها:عطيني عطري

مدته لها ريوف وتعطرت وحطته يمينها واخذت نفس ووقفت

تعالى صوت ريوف تغطرف بصوتها ولفت بصدمه أنهار:ياويلك

سحبتها نورا وهي تغطي عبايتها عن بهاج اللي يتوسط البيت تخرجها معاها لهم

بلعت ريقها من شافت ابوها وكل ماخطت خطوه بان أمامها شخص لين ماشافت بهاج وسط أعمامها وجَدها

رجفت بإرتباك وهي تحس بنظرات عماتها وبناتهم وجدتها ولفت لريوف بحده:خلاص اسكتي

ضحكت ريوف تتجاهلها واخذت نفس توقف قريب منهم ونطق رَده:سلمي على جدِك

لفت له تناظره وصدت للجهه الثانيه تتجاهله ورفع حاجبه رَده ورفع صوته عمر:سلمي

ماردت وهي تتجاهل وضحك بسخريه رَده ولف لعمر يتشّمت فيه

مشت من عندهم وجلست وهي تتنفس بسرعه بربكه

رَده:مبروكين مبروكين

التفت يخرج وخرجوا معه عبدالله وزيد اللي تجاهلوا أنهار تماماً بعدم إهتمام وباركوا لبهاج وخرجوا

رفع نظره لحليمه اللي واقفه وظل يناظرها ثواني ينتظر جيّتها له لكنها كانت توقف مع عماته ولا تقدمت حتى ولف من سؤال جمعه:وين بشتك يابهاج ؟

أبتسم بهاج ورفعت نظرها تنتظر جوابه ونطق بهاج:ماله داعي

نزلت أنظارها وعقدت حاجبينها بهدوء من جوابه واخذت نفس من جلس جنبها

عزه:والله ودي أجامل وأقول تلوقون لكن مامن تشابه

رفعت أنظارها أنهار من سمعت ضحكة حليمه اللي أكدت:كلنا والحين من شفناهم جنب بعض نقول ما يلوق وما يلوق

بهاج عض شفته من ضحكهم وكملت منيره:ماهو راكب يابهاج ياولدي سامحنا بس هذا الصدق ما تلوقون

جمعه:اسكتي انتي وهي مانبي رايكم

التفت بهاج يناظر وجهها وزعلها وعقدة حجاجها وصدودها ابتسم وهو يمسك كفها بين كفينه الاثنين ولفت له تناظره وزادت ابتسامته:يالله حيّها

ظلت تناظر عيونه ونظراته لها وماقدرت ما تبتسم هو فعلاً بكل الخشونه اللي فيه واللي تنفّر الجميع منها ! يكلمها بكل دلال ونعومه يرحب فيها ويهلي

نورا:بليز يعني لازم ناخذ صورة أول انتصار لنا

بهاج:عز الله إنتصار

ابتسمت نورا وهي توقف جنبهم وتمشي بسرعه ريوف تنحني عند بهاج ويبتسمون بسعه لكاميرا جوال نورا وضحكت أنهار من شافت الصوره

ريوف:صراحه بهاج بيننا مو راكب بس حركبوا

ضحكوا وابتسم بهاج من ضحكهم

ولف لأنهار:جاز لكم اللحم ؟

لفت له أنهار:مع الاسف اول معلومه تعرفها اني ما اكل لحم

بهاج:اسألك بالله ! لا ياشيخه ، يانورا

لفت له وناظرها بهاج:ماذقتوا العشاء ؟

نورا:لا

عقد حاجبينه:خسارة النقوه من ظهر أمس أنقي في النهايه محد أكل الا عزه وبناتها ؟

ضحكت ريوف:اخخ حتى انا قاهرتني

بهاج ابتسم ولف لريوف اللي جالسه جنبه:حماتك يالطيبه

ريوف:بهاج لا تذكرني تكفى

ضحك بهاج وعض شفته يصد عنهم لعماته اللي أمامه يسولفون ويجهلون حوارهم

شد على كفه اللي نسى تماماً انها على كف أنهار ونزل نظره ليدها كانت مزينتها بمناكير وخواتم وأساور

انقبض قلبه وهو يلمح فخذها المكشوف من جلوسها هو تجاهل جيّتها الكثيره عليه يوم أقبلت وتجاهل لون فستانها وشكلها لانه ماوده يندفع ماوده ينفّرها بس صورتها قدامه بعيونها وشعرها المنسدل وفستانها كتوفها وعنقها طولها وخصرها

بلع ريقه وهو يرفع عيونه لبعيد لكن ماطاحت الا بعين أمه اللي تراقب المشهد لدرجة شك إنها شافته وقت بلع ريقه

صد يتجاهلها ويوقف وتوقف مع جمعه:بنزفكم اصبروا

بهاج:لا لا ارتاحي ماله داعي

لف لأنهار:جيبي عباتك

مشت ريوف لداخل ولفت أنهار عليهم تناظرهم

نورا:لا تطالعيني كذا مو أول مره ننام بعيد عن بعض

أنهار:بتخيل انك بدبي مع صحباتك لين اتخطى

ضحكت نورا:ياليت

اخذت نفس ولبست عبايتها وناظرت ريوف:لا تنسوني

ريوف:أنهار حياتي إحنا جنبك لدرجة لو تكحين سمعناك

ابتسم بهاج من كلامهم وهمس:اسم الله عليها

لفت تناظر رده العفوي من كلام ريوف العفوي ابتسمت بهدوء تناظرهم وتمشي خلف بهاج اللي خرج

مشت وهي تناظر طريقها لبيته وتناظر طرف ثوبه مع مشيّها للبيت

وقف وهو يفتح الباب وفتحه ولف لها ينتظرها تدخل قبله واخذت نفس ودخلت البيت ومشت للصاله وجلست على الكنبه تناظر حوالينها

قفل الباب وسحب عن راسه شماغه وطاقيته وحطها على كتفه ومشى يجلس جنبها صدت تستنشق نفسها من حسته جنبها

ونطق بهدوء بهاج:لا تصدين عني ، انتي طلبتي ما أجيك الا على ودّك وانا على ودّك ، مابي شي من الهموم يدّك على صدرك انا قلت انتي في وجهي

تقدم لها بحنيّه يحاوط كتوفها ويلمس بكفه كفها لين ما لفت له وأبتسم هو فعلاً مبسوط انها جنبه مبسوط انها معه: لو تطلبين الشمس وسهيل وعطارد ! قلت أبشري والرمّش يامر أمر  يا لول وجداني ويا درّه

ناظر عيونها اللي تشعل بصدره نيران لهفه وشوق

:تبيني أخوك نفس ما يقولون ؟

بلعت ريقها بإرتباك من قربه وكلامه ومن تناقضها هي من خوفها وقت قال أخوك وهزت راسها بالنفي

بهاج ابتسم:ولا أنا أبي واللي تبينه يصير لكنك حيرتيني ياسيد كل الغنادير

شدت على كفه ونزلت أنظارها هو كلامه معسول يناديها بمليون مسمى غزلي وهذا يربكها

بهاج:أنهار !

رفعت راسها له وهي تشد على كفه:كل اللي أبغاه سِعه

سكت بهاج وكملت أنهار بربكه:ما أبغى احسني بمكان ضيق

بهاج ابتسم:ان ما يوسعك بيتي يوسعك هدب عيني

ضحكت لأنها تدري انه يداعبها ويلطف الجو ورفعت كتفها:ما أبغى استحي منك وأصد عنك وأتخفى عن أحد وأخاف من أحد

بهاج:اي ينفع ويصير ، بس قولي لي يجوز أتغزل وأشعر فيك والا هذا يخليك تستحين ؟

ابتسمت وهي تشد كفه لناحيتها:أحُبُه

برقت عيونه بلمعه وهمس:منهو !

أنهار:كلامك

ابتسم من ابتسامتها يناظر ثغرها المبتسم وعيونها اللي تراقبه تحط عينها بعينه من الإعجاب ويحط كفه فوق قلبه من آهاته

هو يجاهد عشان ما تخافه وما يندفع هو يتوقف على جمر حامي قدامها

وهز راسه يصبّر نفسه:ابشري بي

هي تكويه من تناقضها وخوفها وجُبّنها لكنه يجاريها وماله الا الصبر واللهيب اللي بيكويه لأجل تخضع لقلبها وتصد عن رأي الناس

التفت يناظر البيت:وين ودك تنامين ؟

أنهار لفت تناظر الغرف:ما أعرف

مسك كفها ووقف:قومي معي

مشت معاه وهي تناظر كفه بكفها وتشوف شماغه على كتفه وتعض شفتها من مشاعرها تجاهه

وقف قدام الغرفه وفتحها:تبين هذي ؟

هزت راسها:ايوا عادي

دخل وفتح أنوارها ولف لها ومشت وهي تفرك كفها

بهاج:ارتاحي أجل بجيب لك أغراضك

مشى وتركها ومن ناظرت ظهره رايح هي عضت شفتها وغمضت عيونها بقوه وتنهدت هي تتعذب من رجولته ودلاله لها ، كيف ينفذ طلباتها وهو مبتسم وكيف يتأملها ويدللها بالكلام

تنهدت من وقف خلفها يحط شنطتها ولفت له وابتسمت ورد لها الابتسامه وخرج

قفل الباب وجلست وهي تضحك فتحت شنطتها تغير فستانها وتطلع اغراضها

وقف عند باب غرفتها ومسك قلبه يغمض عيونه هو ماتخطى شكلها فستانها ريحتها وعيونها وابتسامتها هو يحارب نفسه يوم انه يجاريها تنام بعيد عن حضنه وهمس:الله يقويك يابهاج

مشى ومسك شماغه بيده ودخل غرفته رمى شماغه وفتح ازارير ثوبه وهو يصبر نفسه:اليوم ببيتك بكره بحضنك يابهاج

فصخ ثوبه وهو يفكر في إنها تهواه ويدري بها ويشوفها كيف تناظره وتخجل منه وترتبك جنبه وتضحك له لكنها تخاف وطبعها الخوف وهو تعوّده وأعتاده لكن وش يصبره

ما يقوى عن جمر ثغرها وهو نيته جمرها ، يجتمع فيها سحر الغموض اللي يقتله وبين النرجسيه

قدر انه ينسدح بعد تفكيره الطويل وقدر يعمض عيونه بتعب هو سهران من وقت طويل لكنه معاها ضيّعت نعاسه من أهدابه وحور عينه

ابتسم وهو يتذكر كيف نطقت بكلمة : أحُبُه

بنطق حجازي صلّب جسده قدامها هذا وهي تحب كلامه شلون لو قالت أحُبَك ، كيف لو قالتها بالحجازي المدلل الناعم من ثغرها

عض شفته وهو مايقوى مجرد التفكير

صحت وفتحت جوالها وناظرت الساعه وتثاوبت

ناظرت السقف بنعاس وجلست وهي تطقطق أصابعها وتتثاوب هي بعد ما اخذت شاور بالليل نامت بدون حتى تنشفه ومسكت شعرها تجاول تلم بعثرته وترفعه

وتاخذ روبها الحرير وتلبسه على بجامتها وقفت وفتحت الباب ومن فتحته ناظرته يجلس بالصاله وقدامه لابتوبها وابتسمت:تدرس ؟

سكت وهو يناظر شكلها ونزل انظاره للابتوبه:صباح النور

أنهار ضحكت:سوري بديت شماته من بكير

رفع أبصاره من سمع ضحكتها ومشت قدامه للحمام وغمض عيونه ثواني

كان يتخيل وجودها في بيته وصحوّها ومنامها لكنه ما توقع يكون الصبح حلو معها لهالدرجه

بجامتها الحرير وشعرها الفوضوي وابتسامتها

خرجت وهي تفرش اسنانها وفاتحه جوالها وجلست قدامه تناظر صورها مع البنات ومع بهاج بالستوري

عقدت حاجبينها ووقفت تفريش اسنانها ورمت جوالها بعصبيه ومشت تغسل فمها

ناظرها وهمس:وشفيك ؟

مسحت فها واخذت نفس بعصبيه وطلعت له:ريوف منزله صورتنا ستوري

بهاج:شفتها

أنهار:وعادي ؟

بهاج:وش الغلط ؟

أنهار:عندها صحباتي وصحباتها وصحبات نورا وصحبات ماما الله يرحمها كمان

بهاج:لين الحين مدري وش معصبك ؟

أنهار هزت راسها بالنفي وتأففت وجلست وهي تتصل على ريوف:وماترد كمان

بهاج رجع ظهره لورا:متفشله يعني ؟

أنهار:بهاج لا تتحسس

بهاج:اجل وشفيك ؟

أنهار اخذت نفس وهي تقرأ رسايل صحباتها المستغربين من الصوره بأسئله كثيره من بينها:تزوجتي ؟

بهاج ناظرها وناظر اصابعها اللي بفمها تعضها وتراقب جوالها وهمس:ابي افهم

ناظرته أنهار:مو متفشله بس مو مستعده الكوكب كله يدري اني تزوجت مو لازم احد يعرف

بهاج:منتي مسويه شي غلط والزواج علن شمعنى هم ما يدرون

أنهار:لان انا اعرف مجتمعي بهاج

بهاج:وش بيسوون غير انهم بيفرحون لك ؟

نزلت انظارها تناظر قروب صحباتها اللي كانت هي محتواه وبخوف فتحت تقرأ وعرفت كلامهم وتأكدت بعد ماقرته:بنات أنهاز تزوجت شفتوا ستوري اختها

ردت وحده من بينهم:بصييح شفتوا زوجها ؟ هذي اللي جلست سنه تقول اذا ما اخذت بريطاني ما بتزوج !

ضحكوا بتضاحيك طويله وكملت وحده؛اتوقع ولد عمها ريوف تقول

بلعت ريقها وهي تكمل محادثتهم وكلامهم

:وليش ماعزمتنا طيب ؟

:انتي شفتي وين تملكت ؟ حتى مو بقاعه شكله بالبيت

:ليش بالبيت كأنه زواج مسيار مسكينه

:زوجها فايبز بدو حلوين مو قادر أتخطى

:مو ذوق أنهار بس ذوقنا كلنا

: بنات خيال وهيبه وجنتل

ضحكوا ولا قدرت تكمل تقرأ

قفلت جوالها وناظرت بهاج اللي يناظرها وسأل:وش قريتي ؟

ماردت ووقف ومشى لها وجلس:وش يقولون ؟

أنهار:ولاشي

بهاج مسك جوالها:عطيني أشوف

أنهار:بليز بهاج اتركني

بهاج:افتحيه أنهار

فتحته ومدته له وهي تناظر ملامحه الجامده وهزت رجلها بزعل:يتشمتون فيني

لف لها:خرجتك من قروبهم شتبين فيهم !

أنهار:ليش بهاج ليش ؟ الحين يقولون زعلت وتحسست !

بهاج:وانتي زعلتي ما زعلتي ؟ وبعدين وش هالثقل دم اللي فيهم كيف مصاحبه بنات كذا انتي ؟

أنهار:بتلومني أنا يعني ؟

بهاج:اي بلومك تزعلين من حشرات نفسهم يقولون تزوجت ولد عمها بشماته ليه ؟ وش فيه ولد عمك ؟

أنهار:مافيك شي بهاج حتى يمدحونك

بهاج رفع حاجبه:بتتأثرين بكلام الرايح والجاي ؟

أنهار عقدت حاجبينها بزعل:ليش يتكلمون كذا ؟

بهاج:لأنهم ما ياصلون ظفرك

أنهار ناظرته وكمل بهاج:ووش كلامهم المخيس هذا تقول بدوي وماهو ذوق أنهار ، أنا ماني ذوقك يابنت ؟

أنهار ناظرت عصبيته وضحكت:بهاج !

بهاج كمل بتساؤل:وانا صادق شتبين بالبريطاني

أنهار:اوف بهاج لا تستهبل

بهاج:ما بستهبل وانتي لا تزعلين واليوم اطلعك امشيك نجد كلها وصوري ونزليها قدامهم قولي هذا البدوي اللي ذوقي ماهو ذوقكم وتعقبون

ضحكت من عصبيته ولهجته:اخخ عسول تدري !

لف لها:الحين انا بشنبي ذا وتقولين عسول ؟

طبقت شفايفها على بعض تمنع ضحكتها وجلس قدام لابتوبه وناظرها

أنهار:منجد بتطلعني نجد كلها ؟

هز راسه وابتسمت:والله ؟ عادي محد يقولنا حاجه؟

بهاج:مو مالي عينك انا اقولك تم !

أنهار؛بس لازم نستأذن اكيد

بهاج:لا انتي بس قولي بهاج بيطلعني واتحدى ابن امه احد يتكلم

أنهار ضحكت تدري انه يستهبل:ايوا صح خصوصاً الشيبه رَده

وقفت تاركته يضحك ودخلت المطبخ وتلفتت:يعني فين اسوي مويه حاره اذا مافي غلايه ؟

بهاج مشى ودخل:والله مادريت انك بثره كذا والا ماكان تزوجتك

أنهار:يانصاب

بهاج عبى لها مويه بإبريق وشغل عليه:تعلمي على الغاز عشان تطبخين لي

أنهار:واذبح الذبيحه واصلخها ؟ كان تزوجت شموخ تفهم أكثر

ناظرته بحده وشمقت تطلع لها كوب :كوب ؟

هزت راسها ورفع اصابعه:اثنين

أنهار ابتسمت وطلعت واحد ثاني وحطتهم جنب بعض مشى ووقف جنبها يناظرها وفتحت علبة القهوه وهي تحط منها بالأكواب:وهذي قهوة من ؟

أنهار:قهوه أمريكيه واذا تبغى ايس امريكانو ينفع كمان

ابتسم على لهجتها ورفع حاجبها:امريكانو ؟

هزت راسها وهي تحرك القهوه:أفضل من مليون كوفي طبعاً اقول كذا لإني مشتاقه لستاربكس بس مستحيل اقدر اذوقه هنا

ناظرها وناظر فمها اللي تخرج منه لهجه اول مره يسمعها وينطق كلام اول مره يسمعه وهمس:لا تتكلمين كذا

لفت له من مشى يقفل المويه:ليش ؟ اشبه كلامي ؟

حط المويه بالأكواب وناظرها واقفه جنبه تناظره تنتظر منه جواب لكنه كمل يصب المويه يتجاهلها

أنهار عقدت حاجبينها من تجاهله:البدوي اللي من ذوق كل البنات الا أنهار

لف لها:يعقبون بس

أنهار:هم يقولون كذا وأهلك يقولون

بهاج:انتي ماتلوقين الا علي

ابتسمت أنهار ورفعت حاجبينها من خشونته وقت نطق يأكد لها

مشى وهو ياخذ كوبه ويخرج وخرجت خلفه:بس مره ماتاخذ بكلام الناس ، ليش ؟

لف وناظرها وجلس:وش هم الناس ؟ قيل وقال وبس ياخذون فلان وعلان علك بحلوقهم لا دخلونا جنه ولا دخلونا نار

اخذت نفس أنهار وسكتت لانها ما تقدر تكون بتجاهله وقوته الذاتيه بعيد عن الناس

رفع نظره يناظرها ساكته وكمل:بس انتي تمشين على قول الناس

أنهار رفعت كتوفها:ما أقدر صراحه أتجاهل

بهاج جا بيتكلم بس انفتح باب البيت وعقد حاجبينه والتفت

دخلت حليمه وناظرتهم:صاحين ؟

بهاج:صاحين ! بس وش فيك دخلتي كذا ؟

حليمه ضحكت:مابتقولي ادق باب بيتي اكيد !

لفت أنهار لبهاج وتنهدت بقل صبر من تلميحاتها

لفت حليمه لأنهار:اذا تبين تفطرين مع خواتك ترا قعدوا

أنهار ماردت ووقفت ودخلت الغرفه وابتسمت حليمه من دخلت الغرفه المغايره عن غرفة بهاج دليل انها نامت فيها

بهاج:وش عندك يمه ؟ من صبح الله

حليمه:ماتبيني اسيّر ؟

بهاج:سيّري سيّري

تجاهلها ونزل انظاره للابتوبه على خروج أنهار اللي لبست عبايتها وخرجت من البيت

'

دخلت الملحق وهي عاقده حجاجها من تصرفات حليمه ولا لمحت اللي جالسين بالصاله على الارض يفطرون لين نطقت ريوف:ياعروسه

رفعت نظراتها لهم:ياعروسه اجل ؟ اش مسويه انتي ؟

ريوف ناظرت نورا:ياليل مو ناقصتك انتي كمان

لفت أنهار لنورا وجلست على الكنبه:هاوشتيها صح؟ كويس لانها ملقوفه

ريوف:كل هذا عشان نزلت صوره ؟ كويس مانزلت فيديو كمان

نورا:يابجيحه على الاقل اعتذري

ريوف:ماسويت شي !

أنهار:ماني راضيه حياتي تنزلين صورتي

ريوف لفت لها:دايم انزل صورك عندي ؟

أنهار:الحين مو لحالي

ضحكت ريوف بصدمه:لا تقولين أغار على زوجي لانه مو لايق

جمدت ملامح أنهار من ضحكاتهم ونقدت نفسها إنها فعلاً فعلاً اللي كواها وثار داخلها بالغضب هو ان بهاج جنبها وان صحباتها كانوا يتكلمون عنه

صدت عنهم وهي تاخذ نفس تخفي عصبيتها

نورا:بس كويس شكلي كان حلو بالصوره صراحه

ريوف:كلنا حياتي نسيتي ان الميك اب بلمساتي

نورا ضحكت:تذكرت قبل أنام اني طلعت بفستاني عند سلطان وبكل غباء دخلت ونسيت وانا اقول اشبه مصدوم

ريوف ضحكت:تخيلت هو لحاله فاهي

أنهار:وين شافك ؟

نورا:دخل بالمدخل قبل يدخل بهاج

ريوف:جاتكم حرم عمر ؟

أنهار:بليز لا تجيبين طاريها

ريوف ضحكت:صارت عمتك مرتين هاردلك

أنهار:تعقب

رفعت حاجبينها نورا:اوف تغيرت اللهجه !

ريوف:نامت يوم عند بهاج تهكرت

ضحكت أنهار:غباء مو منه

نورا:اكثر واحد يقولها بهاج

ابتسمت أنهار لانها ما انتبهت فعلاً وعضت شفتها تصد عنهم بإبتسامه

ودق الباب ووقفت ريوف:اذا عمة أنهار بقفل بوجهها لان مين قالها تنسى مفتاحها

أنهار كشرت:بطلي تقولين عمتي

فتحت الباب وابتسمت من سمعت ريوف تنطق:هلا بالعريس

ماقدرت تخفي ضحكتها هي تستحي حتى قبل يدخل تستحي من تسمع طاريه بس

ضحك بهاج:اخت العروس بنتعبك بس نادي العروس لان العريس يبيها

ريوف:اها يعني خذ أنهار وإحنا كخه !

بهاج:أعقب !

ضحكت ريوف:فاتتك من فم أنهار نكته

بهاج عقد حاجبينه:وشهي

مشت أنهار تبعد ريوف:خلاص بعدي

ريوف وقفت ورا أنهار اللي تبعدها:أنهار تقول تعقب

مافهم عليها لان أنهار تبعدها وتدخلها لفت أنهار وهي تضحك وناظرته:اشبك ؟

بهاج:مو قلت بلف فيك نجد ؟ نسيتي ؟

رفعت حاجبينها:اوه طلع حقيقي

بهاج ضرب صدره:قول وفعل

ابتسمت:والله يعني البس ؟

هز راسه:انتظرك بالسياره

ابتسم لها ومشى رايح لسيارته وركبها تحت أنظار أعمامه ورّده بالدكّه

وقف سلطان من شافه يركب سيارته ومشى له

فتح شباكه بهاج وطلع يده من تقدم له سلطان

:على وين ؟

بهاج:عندي مشوار مع الأهل

ضحك سلطان:امش يالأهل

ضحك بهاج:ما بطول سدّ عني ان قالوا شي

سلطان حط اصبعه على خشمه وبعد عن السياره

خرجت وهي تشيل شنطتها بيدها وتمشي له وتبتسم لانها تلمحه يناظرها

فتحت الباب وهي تركب جنبه وناظرته:وين ؟

لف راسه يرجع لورا ويخرج من المزرعه ويلف لها:بعلمك الحين

ابتسمت وهي تناظر الطريق بحماسه هي ماطلعت من وقت طويل والحين تطلع مع بهاج ولوحدهم

نزلت راسها تعض شفتها وتشوف كفه يشغل الراديو

:شغلي انتي لأن ما بيجوز لك ذوقي

أنهار:عادي أسمع كل شي

بهاج:لا شغلي اللي تبين انتي

ابتسمت وهي تفتح جوالها ولف يناظر ابتسامتها هو يهوى هالمبسم والثغر الخجول اللي بين وهله ووهله تعضه من مشاعرها معاه

شغلت أغنيه ولفت له ومن فهم انها لبنانيه رفع حاجبينه:كدينا خير

لفت لشباكها تحرك راسها مع أوتار الاغنيه

لف يناظر الطريق هو يحلف يمين ان ما بعمره سمع أغاني نفس هالاغنيه ولا يفهم عليهم لكنه ضحك من اندمجت تغني وتحرك يدينها

لفت له تغني مع الاغنيه وما خرج منه غير إبتسامه

لين خلصت الاغنيه ولفت له:دورك

بهاج:تصبرين على ذوقي نفس ماصبرت على ذوقك

أنهار:قول انك ماتحب عمرو دياب عشان أزعل عليك !

بهاج:لا ياشيخه ؟ منجدك ؟ عمرو دياب هذا أقدع أصحابي يجي ياخذ رطب من نخلنا

ضحكت بصوت عالي وضحك من ضحكتها وهو يشغل شيله لها ومن بدت رفع كفه يرقص معها

ناظرته تستغرب كلمات الشيله وكيف ان بهاج حافظها ويفهمها كأنه كتبها

رفع يده وهو يسوق ويغني مع الشيله ولفت تفتح جوالها وترفعه قدامهم وابتسمت

بدت تصور وهي تميّل راسها مع رقص ذراعه وتبتسم هي برغم اختلافها عنه الا انها ما تحس بنفور ابد كل اللي تحسه انها تنجذب لناحيّته بأطباعه وحركاته

نزلت راسها تناظر الجوال وخفض الصوت:اتحداك تنزلينه للرخوم اللي عندك

لفت له:لا طبعاً مستحيل

بهاج:اي قايل والله يأثرون عليك

أنهار:محد يأثر علي بس انا ما ابغى

بهاج سكت ولف للطريق وقفلت جوالها تلف له:فين رايحين ؟

بهاج:قربنا

سكتت تنتظر وصولهم ولف من طريقهم السريع للطريق الوعرّ وعقدت حاجبينها:لا تقول برّ !

مشى بالسياره وفتح شباكه وهو يحرك وسط الرمال مبتعد عن الطريق يرقى جبل وهي متمسكه من وعورة الأرض وعاقده حواجبها تنتظر مسلك طريق غير الخلاء

ووقف بنهاية الجبل وشهقت:بس

ابتسم ولف لها:قولي ما يستاهل ؟

لفت له بخوف ونزل بهاج:انزلي

نزلت تناظر حافة الجبل والغيوم اللي تتشكل بالمكان والشمس اللي شبه غاربه

ولفت تبعد شعرها عن وجهها:بهاج يخوف

بهاج:ماشفتي الغروب هنا تعالي

مشت وهي توقف جنبه تتأمل الجبل والإرتفاع ورفع ذراعه يلفها من أكتافها ويأشر:شوفي الوادي

ناظرت الوادي أسفل وهي تبعد شعرها من الهبوب اللي يضايق بصرها

التفت يناظر شعرها اللي تلعب به الهبوب ويناظر نظراتها للمكان وتركها يفتح باب السياره اللي بالخلف

لفت له:بهاج في بيوت في الوادي ؟ حرام مين يسكن هنا ؟ مافي حاجه

بهاج خرج وهو يلف شماغه بيده:على أساس مزرعة جدك بنص الرياض

ضحكت وناظرت الشماغ اللي بيده ورفعت انظارها له من وقف قدامها وبعد شعرها للخلف عن وجهها وانكتمت انفاسها من تقدم لها أكثر يبعد شعرها عن خدها ويحطه خلف اذنها ويرفع الشماغ للخلف ويثبته على جبينها

كان يلفه عمامه فوق راسها عشان لا يضايقها شعرها لكنها ابتسمت وهي تلمح ازرار ثوبه قدامها دليل قربه لها

نزل أنظارها وهو يسوي الشماغ لها ولمح ابتسامتها وصدودها بنطراتها لصدره

وماقدر الا ينطق: ‏أرتعي في روض صدري وإسفهلّي

رفعت نظراتها بإستغراب وابتسم وهمست:يعني ايش ؟

ضحك وهو يربط العمامه وينزل براسه لها:ماتفهمين

أنهار:أفهم بس صعب كلامك أحياناً زي الحين اش يعني هذي اسفهلي ؟

ابتسم لأنها تسأل فعلاً من جهل وزم شفايفه:وش فهمتي ؟

أنهار ابتسمت:يعني أحضنيني ؟

ابتعد خطوه لورا وناظر نظراتها اللي تتأمله والعمامه على راسها:انتي ودك ؟

أنهار لفت تناظر المكان اللي هم فيه ورجعت تناظره

بهاج:في هالفضا ؟ اقربي

قربت منه بربكه وحاوطت صدره تحط راسها على صدره وابتسمت وهي تغمض عيونها بقوه

هي مانست حضنه بأول مره هي تتمنى تحضنه طول الوقت من حنيّة حضنه ومن أستقر راسها على صدره رفع كفوفه على ظهرها وشعرها يشدها

اخذ أنفاس عطرها يتكي بجسده على السياره هو ساقته رجليه لهنا كثير وشوهدت أبصاره غروب وشروق الشمس من حافة الجبل كثير لكن هاللحظه هي أجمل لحظه يعيشها ، هو بدوي ويعشق الرمل وخشونة الأرض لكن نعومتها جنبه بهالمكان تحسسه إنه فوق غيمه من الغيوم اللي تحاوط المكان ما تحسس ان رجليه على صلب الرمل

هي تتوّه بالرفض تاره وتاره بالإيجاب ونطق يهمس لها وهو يمسح على ظهرها:تعرفين وش اللي مصبرني رغم إن هواك حيّرني ؟

رفعت راسها وهي لا زالت تحضنه وناظرته ونزل أنظاره لها:اني أشوفك قدامي

ابتسمت ترجع وجهها على صدرها تخفي ذهولها من كلمة هواك هو يوم يلّمح ما يلّمح بالحب هو يلّمح بالهوى

ابتسمت:طيب مره حلو الهواء هنا

بعدت عنه تناظره ورفع حاجبينه:من ما يشوف ان الهوى حلو ؟

لفت تناظر الشمس والتفت لجواله اللي يدق بالسياره وفتح الباب واخذه وعقد حاجبينه من قرأ الاسم ورد:هلا

لفت عليه تناظر وجهه اللي تلون بالغضب ونطق

:وليه نرجع ؟

عمر:وش لك تطلع؟ ارجع دام مامن شغل

بهاج؛ان صار ودي أرجع برجع وماني خاطف بنتك ان كان نسيت امس ترا كتبنا الكتاب

تقدمت من عرفت انه ابوها ونطق عمر:ارجع يابهاج

بهاج:يصير خير

قفل جواله وهمست:اشبه ؟

بهاج:والله مدري عن ابوك

أنهار:اش يقول ؟

بهاج:ما يهمنا وش يقول

أنهار سكتت ودخل كفوفه بجيوبه يناظر الغروب وابتسمت ترفع جوالها:خيال الغروب هنا

نطقتها بالانقليزي اللي خلاه يبتسم:الـ وش ؟

لفت له:غروب يعني

بهاج ابتسم لأنها تدمره كل ما تكلمت ولوّنت لهجها رغم جهله الا انها تجذبه بنطقها

رفعت جوالها تصور الغروب ولفت الكاميرا على بهاج اللي شغل زيقارته وابتسم لها وابتسمت تلف الكاميرا عليهم سوا وخلفهم الغروب

نفث الزيقاره من فمه ورفع ذراعينه يحاوط كتوفها ويناظر اشكالهم بالكاميرا

بعدت عنه تصوره لوحده مع السياره ونطق:تحبينه واجد شكلك ؟

كان قصده على نفسه لانها تصوره وفهمته وتفهمه لكنها تحب تكون غبيه ونطقت:أحُبه

ابتسم وكملت:أحُب التصوير مره

هز راسه ونزله وضحك لانها تستغبي ورمى زيقارته يدعس عليها برجله

-

( التشبيهات بحسابي بالاستقرام r_55shog )

نزلت انظارها لجوالها وعقدت حاجبينها:اوف نورا وريوف مكلميني كذا مره

بهاج هز راسه ولف للطريق يدري إن عمر ما سكت

اتصلت وهي تنتظر:نورا اشبكم ؟

نورا:فينك ؟

ناظرت البوابه اللي وقفوا عندها:وصلنا ليش ؟ اشبكم؟

دخل بهاج ولفت تناظر عمر وسلطان وفهد واقفين وكأنهم ينتظرونهم وقفلت وهي تناظرهم

وقف بهاج ولف لها:ادخلي

لفت له وعقدت حاجبينها:اش صاير بهاج ؟

بهاج:مو صاير شي خذي اغراضك وادخلي

أنهار:ليش واقفين ينتظـ

انقطع صوتها من انفتح بابها وسحبها عمر ينزلها وصرخت بألم من طاحت على الارض وهو ماسك ذراعها بقوه

ونزل بهاج بسرعه وقفل بابه واحتدت ملامحه:وخر عنها

عمر وقفها ووقفت تناظره بخوف ورعب وسحبه فهد يبعده عن بهاج:صل على النبي

عمر:قلت لك ارجع والا ماقلت ؟ ترجع بعد ماتغرب الشمس تعاند ؟ تاخذ بنتي مني غصب ؟

بهاج مسك كفه اللي على ذراع أنهار وتقدم له بعصبيه:بنتك زوجتي وما راحت الا مع زوجها ، بعد يدك عنها

أنهار رجفت بخوف وهي تناظرهم وهي بينهم ولفت تلمح وجه عُمر اللي تلون بالإحمرار من شدة عصبيته وتجمعت بمحاجر عيونها دموعها بخوف

بهاج سحب كفه:شيل يدك عنها قلت

عمر فلت كفه ودفع بهاج بقوه اللي مسكه من ياقته يوخره وصرخت أنهار وهي تشوفهم يتهاوشون وسلطان وفهد بينهم

ركضت نورا من سمعت أصواتهم وخرجوا كلهم ولفت أنهار لنورا اللي حضنتها

مشت حليمه بسرعه:بهاج

ظلت تنادي عليه تحاول تبعده عن عمر ولكنهم تشابكوا سوا وسلطان وفهد يحاولون يسحبونهم

كانت مغمضه عيونها بحضن نورا وتسمع كلام عمر البذيئ اللي ماعمرها سمعته من أبوها وبكت

شدت عليها نورا بخوف وهي تشوف عمر برعب

وقفت ريوف خلفهم وهي تشوف رَده اللي مشى لهم بعكازه:لعنه تلعنكم جميع

بعدوهم وناظر عمر بهاج بحده ونطق رَده:بزارين تتشابكون قدام الحريم ؟ وش جاكم ؟

فهد مسك صدر بهاج يبعده وغمض عيونه بهاج يتنفس ويتذوق من شفايفه الدم

عمر ناظره:والله لاشق راسك مره ثانيه ياولد الكلب

رفع راسه بصدمه بهاج وعض شفته سلطان اللي ماسك عمر والتفت لعمر:عمي ! ثمّن كلامك

بهاج هز راسه:العيب ما ينقال لحيّ العيب ينقال لميّت والميت أخوك يارخمه

عمر:تبطي عظم ما الرخوم الا أشكالك

رَده:عمر !

سكت عمر ونطق رَده:وش جاك ؟ وش عندكم ؟

عمر:ابي يطلق بنتي الحين واليوم

لفت أنهار بصدمه وضحك بهاج وهو يمسح شفته ورفع عيونه لعمر:تعقب

عمر:طلّق

رَده؛ماهو مطلق انت بعقلك ؟ امس زواجه وانت موافق وش جاك الحين ؟

عمر؛ما ابيه ياخذ بنتي ؟ ولا ابي واحد من عيالكم الرخوم ياخذون وحده من بناتي

رفع حاجبه سلطان وفلت ذراعينه عن عمر ورجع لورا:خلك قدها ياعمّ

بهاج:لا تقوله عمّ يخسى ينقال عنه عمّ

رَده؛بهاج ! انكتم

لف بهاج يناظر البنات:ادخلوا البيت

عمر:ادخلوا بيت ابوكم

نورا لفت وهي مصدومه من أبوها وبعصبيه نطقت:انت خليت فيها أب ؟

عمر:ادخلي مع خواتك

نورا:اذا رجعت لعقلك

تقدم عمر لهم ومسكه سلطان يرجعه لورا ولف عمر لسلطان يناظر ذراعه

رَده؛ما انت بعقلك

عبدالله:استهدوا بالله ياجماعة الخير ، وش جايكم ؟ امس ترقصون جميع

بهاج لف يناظرهم وهزت راسها نورا ومشت مع البنات تدخل لبيته وانحنى بهاج ياخذ الشماغ اللي طاح عن راس أنهار وناظر امه اللي واقفه ومشى من جنبها يلحقهم

دخل البيت ودخل خلفه سلطان وناظرهم بهاج التفت لوجيههم وهمس:ولا وحده تبكي

رفعت أنظارها له وقرب بغضب:لا تبكين قلت

ماردت عليه وهي حابسه بكيّتها وشد على الشماغ بيده من سمع سلطان يناديه ودخل الغرفه وقفل الباب خلفه بقوه

لف سلطان وناظرهم:لحد ينطق له معصب لأن ابوكم طرّى ابوه بالشينه وهو ميت

نورا:لا تقول ابوكم اقسم بالله واحلف يمين ان هذا مو ابونا هذا انسان ثاني

سلطان:الله يصلح الحال بس

لفت نورا تناظر ريوف اللي ساكته وتهز رجلها وناظرت أنهار اللي تمسح دموعها وصدت تضم كفوفها ببعض بضيق

دخلت حليمه وناظرتهم:وين بهاج ؟

سلطان؛خليه لوحده ياعمّه

ماردت عليه ومشت وفتحت الباب عليه والتفت يناظرها:خليني لوحدي

حليمه:وش صار ممكن افهم

بهاج التفت لها:لا مو ممكن تفهمين ولا ممكن تسمعين مني ولا ممكن توقفين قدامي الحين وتدافعين عن احد غيري

حليمه:انا ماعرفت من الغلطان عشان اوقف مع احد غيرك ، انا زيي زي الباقين مدري وش جاكم

بهاج:بس تدرين وسمعتي وش قال عن ابوي

حليمه:استفزيته

بهاج ضحك وعض شفته والتفت لها:اخرجي مابي أعقّك

حليمه:بهاج ارجع لعقلك

صرخ وهو يتقدم لها:قال عن ابوي كلب وهو ميّت شبعان موت ! ان كان بقي بقلبك إخلاص لعشرته توقفينه عند حده ، طز بولدك وباللعنه لكن لا تسكتين عن أبوي وهو ميّت ، لا تخلينه يسبّه وهو ميّت ما يقدر يدافع عن نفسه

سكت من حسّ بعلو صوته ورجفته وعصبيته وناظر سلطان اللي برا واشر له وصد بهاج

مشى سلطان ودخل:اطلعي واتركيه ياعمّه

ناظرته وهو صاد عنها ومشت تخرج برا عنهم رفعت أنظارها لحليمه اللي خرجت ولفت تناظر الغرفه هي وقفت تبكي من سمعت صوته وعصبيته

خافت لأنها اول مره تشوفه وتسمعه بهالشدّه

سمعت سلطان يقفل الباب عليهم ولفت لنورا وريوف تناظرهم:ريوف

ريوف ماردت وهي متجاهله بنظراتها عنهم

أنهار بكت لأنها ماترد وتخفي خوفها ومشت تجلس جنبها وتحضنها:لا تصيرين كذا تكفين لا تذكريني كيف كنتي بعزاء امي

ريوف مارفعت ذراعينها حتى وهي صاده عنهم بجمود

نورا:احنا بعزاء ابوي الحين

لفت أنهار تناظر نورا وهزت راسها بالنفي:كان بيضربني

نورا مسكت ذراع أنهار:محد يقدر يسوي لك شي

،

ناظره سلطان وهو جالس:محد بيسكت له

بهاج مارد وكمل سلطان:فقد عقله حتى بناته يجهلونه وش جايه هو

بهاج:العتب مو عليه صدقني

سلطان تنهد ومشى له وجلس جنبه:يمكنها ماتقدر تدافع عنك يمكن خايفه يطلقها ويتركها

التفت بهاج عليه:وتقوم تجحد عشرة أبوي ؟

سلطان:انت تعرف امك وكلنا نعرفها ومن تزوجته تغيرت حياتها للافضل هو يطلعها وما يخلي عليها قاصر وخلاف هي خايفه تفقد هالشي

بهاج:لا تفقده اجل ، بتفقدني انا

سلطان سكت وكمل بهاج:لان من اليوم لين أتكفّن محد برقبتي غير البنات اللي برا قعود

سلطان ناظره والتفت بهاج عليه:دام خربت ولا بتقدر تتزوج ولا فهد يتزوج ونهّج ؟ فهم برقبتي أنا لوحدي

سلطان:ما أنت لوحدك

هز راسه بهاج ووقف سلطان وخرج من الغرفه ومشى وناظر أنهار:ادخلي شوفيه

جلست بإعتدال بخوف:اشبه ؟

سلطان:متضايق

نورا:عادي انا اشوفه

سلطان:لا ما يخالف أنهار تدخل له أحسن

ناظرت نورا ورجعت ناظرته:اخاف يعصب علي

ابتسم سلطان:ما يعصب ادخلي

بلعت ريقها ومشت لغرفته وفتحت الباب تناظره ماسك راسه وبيده الثانيه جواله وهمست بخوف:بهاج

رفع أنظاره يناظرها ونزل يده عن راسه:تعالي

دخلت وقفلت الباب خلفها وتكت عليه:لا تعصب عليّ

عقد حاجبينه وجلس بإعتدال:ليه أعصب عليك؟

رفعت كتفها واشر لها تجي تجلس جنبه ومشت وجلست ولفت له تناظر وجهه:تعورت ، وجهك كله جروح

ابتسم من قلقها وعيونها اللي تتمعن بها وجهه:طبت

تنهدت بقلق وكمل:كان بإصبعه خاتم عشان كذا تجرّح وجهي ماهو شي يعور لا تحاتين

رفعت شفايفها تمنع بكيّتها:ماعمره مدّ يده

ناظر عيونها من بدت تغيّم بالدموع وهمس:لا تبكين

نزلت راسها وتنهد وتقدم ياخذها لحضنه ومن حضنته شهقت تبكي واخذ نفس بضيق هو يدري انها بتبكي وانها اعتادت طعم الدموع لكنه ينحرق من دموعها ولا يبيها تبكي وهي معه أبد

أنهار حطت وجهها على كتفه وهي تبكي وتمسكت بثوبه:كأن بداخله شخص ثاني مو نفسه مو نفسه

مارد عليها وكملت أنهار:ريوف تعبانه بهاج

بعدها عنه وعقد حاجبينه:شفيها ؟

أنهار:ماتبكي ما تتكلم ما يطلع منها شي صار فيها زي ماصار بعزاء ماما ، بهاج هي تحتاجني بس أنا ضعيفه زيها

رفع اصابعه يمسح دموعها:مأنتي ضعيفه أنا موجود عشانك وعشان ريوف ونورا

ضمت شفايفها بإمتنان لوجوده وكلامه رغم إنه متأذي من ابوها لكنه ماتكلم وقال شي هو ما عبّر لها عن عصبيته وقهره من أمه ومن أبوها وهمست تميل راسها:مابتقول شي ؟

بهاج عقد حاجبينه:اقول وش

أنهار:تفضفض لي

بهاج:اللي فيك يكفي

أنهار:في مكان

بهاج ضحك:مامن مكان يكفيك اللي جاك تعالي معي نشوف ريوف

رفعت أنظارها تشوفه يوقف وياخذ نفس يستجمع نفسه وخرج

مشى وناظرته نورا ولفت لريوف اللي صاده بعيونها للاسفل ومشى بخطوات هاديه وجلس على رجلينه عندها وناظرها:شفيك ريوف ؟

ماردت عليه وحط كفه على كفوفها وناظرته وهز راسه بهاج:خايفه ؟ زعلانه ؟ قولي أنا موجود وخواتك حوالينك ، انتي ماخسرتي شي

ماردت عليه وكمل بهاج: لا تحسبين ان الليالي كل ابوها ربيع ، لازم تلوفك هبُوب القيظ وسمومها

ريوف:ماكان يصير فينا كذا كان هو معانا بس الحين مو موجود ما اعرفه ولا ابغاه

بهاج هز راسه:وانا معاك الحين وش تبين ؟ تبين تكملين جامعتك ؟ تبين جامعة جده والا الرياض ؟ والله لأجي معك وتدرسين وتخلصين سنتك الأخيره وأنا أزفك من جامعتك

ميلت شفايفها من غصتها وتجمعت الدموع بعيونها:كلهم كانوا ناسين

بهاج رفع حاجبينه:افا ! خواتك يدرون لكن ما بيدهم شي وانا موجود ما بقصر

ريوف:ما ابغى اجلس هنا خلاص تعبت

بهاج هز راسه من نزلت دموعها براحتها على خدودها ولف لنورا اللي تناظرهم

وتقدمت نورا لريوف تحضنها وابتسم بهاج:ما يخالف

هزت راسها نورا له واخذ نفس ووقف:بطلع شوي

تقدمت أنهار من خلفه:لا تروح له

التفت بهاج لها:مامن مشاكل لا تحاتين ارتاحوا انتم

ناظرته بقلق وابتسم لها وخرج قفل الياب وغمض عيونه يتنهد ناظر المزرعه قدامه ومشى وهو يستجمع طاقته ونفّسه وناظر حذايينهم عند بيت جده ودخل ولفت جمعه له:تكفى ياولدي لا تكملون هنا

بهاج ناظرهم متجمعين ووقف فهد:امش معي

بهاج عقد حاجبينه:وشبكم ؟ جاي اتكلم انا

رفع راسه رَده:اقعد

جمعه التفتت:يارَده !

مشى بهاج وجلس وناظر عمر اللي صاد وناظر أعمامه وجَدّه ونطق:ماني جاي اتهاوش ولا ادور عذر ومسامح انا جاي اعطي الجميع خبر ، البنات برقبتي دامه مو قادر يمسك أعصابه

التفت عمر:بتاخذهم بناتك يعني وأنا حيّ ؟

بهاج:أخذ وحده منهم زوجتي والباقي خواتي ماهم صغار يكونون بنات أحد ، خلصوا جامعتهم وريوف بتخلص جامعتها قريب ان شاء الله ، ان بغوا شي بيصير لان معدهم صغار

رَده؛هذا ابوهم يزعل منهم مره ويرضى عشر

بهاج التفت لرَده:ان كانك راضي ماني راضي أنا

عمر لف له وكمل بهاج:وأنهار زوجتي وقدام الكل واللي ما يرضى لا يرضى ماني مدور رضا أحد

عمر:امك ماهي راضيه

نزل أنظاره بهاج وسكت وكمل عمر:طلاق يمين بأمك اللي قاعده تسمعنا ورا بابها الحين ؟

رفع راسه بهاج يناظره بحده ومسك ذراع عمر زيد:تعوذ من الشيطان

وكمل عمر:طلاق بالثلاث ان عرفت انك لمست بنتي ان امك طالق بالثلاث ، لا تطلق لكن تبطي تلمسها ، وبناتي حلم عيال عمك

رفعوا اصواتهم يهدونه ولفت جمعه لبهاج تمسك ذراعه وشد على اسنانه بهاج والتفت لسلطان وفهد اللي وقوف ويناظرونه

وغمض عيونه يهدّي نفسه ويحط قدام عينه أمه وكلام سلطان عنها

ماطلّق عمر الحين الا انه يدري ان حليمه ما تقوى وان ماقوَت حليمه ما بيقوى بهاج

وقف بهاج وخرج تحت أصواتهم لعمر وبلع ريقه يخرج ويفتح ازرار ثوبه بضيقه مسك عنقه ياخذ نفس من أسفل صدره لأعلاه ولف من حس بذراع فهد وشالها:اتركوني

مشى عنهم وهو يتنفس بحده ومشى مع ممشى النوير ووقف بمنتصفه ولف للنخل اللي حوالينه ومشى يضربه بيدينه شد على شعره وجلس بظهره على النخل اللي خلفه ومسك راسه بيدينه

خطرت بباله كيف انها تغيرت اطباعها وكلامها وشكلها هي تبدلت لحياة عمر من تزوجته وعمر كيف عطى بناته الدلال عطاه حليمه وحليمه ما بتقوى

غمض عيونه يهدي نفسه ورفع راسه وطاحت عينه على مفرق النوير والشجره العاليه اللي حضنها لأول مره عندها وكيف انها توسطت حضنه أول مره هنا عندها ، شد على قبضة يده يتذكرها وتنهد يرفع راسه للاعلى

لفت تسمع كلام فهد اللي يقوله عندهم وأمنعت دموعها تنزل تحت سؤال نورا:فين بهاج طيب ؟

فهد:خرج يمشي

نورا:ماني فاهمه يقول كذا عشان يقهره في أمه ؟ طيب كلنا ندري ان بهاج ماخذ أنهار عشاننا ، وبحسبة أخونا كلنا مستحيل يفكر بأنهار غير كذا

رفعت نظرها لسلطان اللي ناظرها ولمح دموع أنهار اللي تنفي كلام نورا ولف سلطان لنورا:يبي يستفزه

نورا:مو عارفه شقاعد يسوي وليش يسوي كذا لبهاج بالذات ؟

فهد:عشان بهاج واقف معكم

نورا:هو بعد عنّا وما يبغى احد يقرب منا ؟ أناني

بللت شفايفها أنهار ووقف وبلعت ريقها بتتكلم وناظرتها نورا:بتروحين لبهاج ؟

أخذت نفس وهزت راسها بالنفي ونطقت نورا:ليش ؟ لا تخلينه لحاله اذا ما بتروحين انا بروح

أنهار:روحي انتي

سلطان وقف:لا انتي روحي له

لفت أنهار عليه وناظرها:نورا تقعد عند ريوف

نورا:روحي أنهار بليز حرام يقعد لحاله انا بشوف ريوف بالغرفه ، واذا مابتروحين قولي لي انا ما بخليه

سلطان:لا لا بتروح ماعليك

لفت نورا عليه وهز راسه سلطان ودخلت نورا ولف سلطان:تعالي اوديك ما بتدلين

أنهار:سلطان

سلطان:امشي اخرجي

خرجت معه وخرج فهد معهم ومشت بينهم ولفت لسلطان:ليش تخليني انا اروح ؟

سلطان:كلنا ندري وش إنتي عنده ، دواه انتي اعرفه

لفت تناظره ووقفت ولف فهد يناظر سلطان وصد يبعد عنهم ولف سلطان لها:تكذبين على خواتك انتي بس هو ما يكذب علينا

أنهار:ماكذبت على احد هم مقتنعين

سلطان:كان بإمكانك تنكرين وتفصحين مثل ما يفصح بهاج عند اهله

أنهار سكتت وكمل سلطان:ماني متدخل بينكم ، امشي

مشت معه ومن دخلوا ممر النوير لمحته قاعد وتنهدت من قعدته وراسه اللي رافعه للاعلى والتفت سلطان عليها ومشى راجع وكملت تمشي لوحدها وهي تناظره ووقفت من التفت عليها

تنهد بهاج ونزل راسه ولف لها يرفع صوته:ليش جيتي ؟

تقدمت له أنهار ووقف بهاج ينفض يدينه ناظرت كفوفه:مين ضربت ؟

بهاج رفع راسه لها:ماضربت احد

تقدمت بتمسك كفوفه وابتعد عنها وناظرته

بهاج:مابني شي بغيت اقعد لوحدي

أنهار:بتوقف بيننا أمك يعني ؟

التفت لانها عرفت وتقدم:من علمك ؟

أنهار:فهد

بهاج تأفف:مايمسك شي هالحمار

رفعت كفها لذراعه تناظره صاد وهمست:بهاج

التفت لها واخذ نفس لانه ما يقوى وبلع ريقه:هو كان بيصير بيننا شي اصلاً ؟ اخوان اخوان لان صدقتي انتي معهم والحين يوم استوعبتي وش فاد ؟

سكتت أنهار وتقدم لها:تحرمين علي وأمي عنده ببيته

رجفت بخوف وفلتت كفها عن ذراعه وابتعد بهاج:اتركيني يرحم امك

التفت من جاب طاري امها وناظرها واقفه محلها:أنهار

رفعت يدينها تبعده عنها وهزت راسها له والتفتت ومن لفت هي بكت بدون صوت حبست عبرتها عنه عشان لا يقول لها لا تبكين

مشت تبتعد وهي تمسح دموعها وظل مكانه واقف يناظرها شافها ترجف وعرف انها تبكي هو ما يجهل طبعها ولكنه ينحرق وهو واقف محله بعيد عنها ويدري انها تبكي

دخلت البيت وجلست وهي تضم عبايتها على نفسها وناظرتها نورا:اشبك ؟ لقيتيه ؟

أنهار هزت راسها بالنفي

نورا:يالله وين يكون راح ؟ طيب سلطان وينه ؟

هزت كتوفها وهي تتجاهلها وخرجت نورا وناظرت سلطان اللي كان بيدق الباب:كويس جيت

دخلت ودخل سلطان:ليه وش صار؟

نورا:شوف وين بهاج بروح له

لف سلطان لأنهار اللي رفعت راسها له وكملت نورا:ماحصلته أنهار وانا مابقدر اخليه لحاله

هز راسه سلطان ومشت نورا ولفت له:تجي معاي ؟

مشى سلطان وخرج معها وناظرهم فهد:واحد طالع واحد خارج شسالفه ؟

سلطان:ادخل جايك انا

هز راسه فهد ودخل ولف لأنهار اللي غمضت عيونها وناظرها:شقال بهاج ؟

أنهار:لا تسألني

فهد:والله اللي سواه ابوك حرام وشلون يحرّمك على بهاج وهو رجالك ؟ وش جاه ؟

أنهار ماردت عليه وتكت براسها على يدها وناظرها فهد:والله انه انقهر وادري به ولد عمي مابغى شي بهالدنيا كثر ما بغاك

بلعت ريقها أنهار وكمل فهد:وقف قدام كل رجال المجلس وقال انتي في وجهي وعاند ابوك واخذك عناد ، حط الدنيا بكفه وانتي بكفه وهذا الحين اختربت علاقته بأمه والسبب انتي وتحسبينه زعل ؟ والله يشتري الغالي النفيس عشانك ويقوم يحرّمك ابوك ؟

جلست أنهار بإعتدال:لا تتكلم كذا عند أحد

فهد:ليه ، ترا الكل يشوف بهاج معك

أنهار:برضو لا تتكلم فهد لو سمحت

فهد:بسكت دام هالشي مستحيل يصير وابوك حيّ كانهم يشوفونكم اخوان خل يكملون لان هذا اللي بيصير

سكتت ونزلت راسها أنهار وهي تشد على كفوفها ولفت من شافت نورا تدفع بهاج من ظهره وتضحك:جبته لكم غصب لأني نورا مو أي احد

ضحك بهاج ودخل سلطان يناظرها مع بهاج وقفل الباب خلفه ونزل راسه يدخل يده بجيبه يطلع مسباحه شد على مسباحه وهو يشوفها تشد كتوف بهاج وتضحك:عباله وحيد الغبي

بهاج التفت لنورا وابتسم:تدلليني نفس خواتك خطأ !

نورا:عادي ندلعك ماعندنا الا انت ندلعه

صد سلطان واخذ نفس طويل 

وجلست نورا:اصلاً ما اعرف ليش متضايق من كلامه ؟ هو عباله مسكك من نقطة ضعفك ما يدري انك اخذت أنهار عشاننا وعشان مصلحتنا بس

لف بهاج يناظرها صاده عنهم وكملت نورا

:الشي الوحيد اللي سواه صح انه منعنا من سلطان وفهد

رفع حاجبه سلطان ولف فهد:على اساس انا ميت واخذ اختك اللي داخل ، تناديني شليويح وتبيني اتزوجها ؟

نورا ضحكت:ياليتك تكون موجود اذا صحت تلطف جوها هي تضحك معاك

فهد:من ما يضحك معي ؟ دمي خفيف من ربي

كشرت بوجهه نورا وهي تضحك ولفت تناظر سلطان اللي واقف يناظرها وصدت لأنهار اللي وقفت:بدخل عند ريوف تعبانه برتاح

مشت من جنبه ودخلت الغرفه وغمضت عيونها بتعب ومشت تفصخ عبايتها وتنسدح جنب ريوف

لفت تعطي ريوف ظهرها وغمضت عيونها تتذكره هي ماتتذكر شي غير كلامه اندفاعه لها يوم طلبها تحضنه ويوم قرب منها ويوم حضنته يوم جافاها من زود اندفاعه لها ويوم تقرب منها من زود لهفته لها

هي تشعر بالرعب من كلام نورا عنهم وطبيعة الموضوع بعيونها وتحس بالرعب اكثر من صراحة سلطان وفهد معها

هي ماتبي شي هاللحظه الا ان حضنه ما يحرم عليها هي كل اللي تبيه بهالدنيا تحظى معه بحياه هنيّه ، كل اللي تبيه هو ، هو وبس

،

فتحت عيونها تلف وتناظر نورا نايمه وريوف مو موجوده لفت تاخذ جوالها وتناظر الساعه

مشت وهي تربط شعرها وخرجت ناظرت ريوف جالسه جنب بهاج تشرب من كوبها وبحضنها ايبادها وبهاج قدام لابتوبه ودفاتره

رفع راسه لها وهمست:صباح الخير

ريوف:صباح النور كويس صحيتي تعالي افطري معايا

أنهار:باخذ شاور اول

رجعت تدخل تاخذ اغراضها وروبها ومنشفتها ودخلت الحمام

نزل انظاره ينشغل بمحاضرته ولف يناظر ريوف اللي تتسوق ملابس وابتسم وناظرها:تبينهم ؟

هزت راسها:بس مو عارفه لفين يوصلونها

بهاج: انا اخذها لك

جلست وناظرته وابتسمت:والله ؟ لو اطلب اي شي تستلمه لي ؟

بهاج:اي اللي تبين

ريوف:ماتصير مشكله ؟

بهاج هز راسه بالنفي وابتسمت ريوف:اوكيه بس قد كلامك ترا

بهاج حط اصبعه على خشمه وابتسم وضحكت ريوف ولف بهاج للابتوبه:بطلع انا لسلطان وفهد افطر معهم ان قامت نورا تعالوا لا تقعدون

ريوف هزت راسها:بجي معاك وبرسل لأنهار تجي مع نورا

بهاج:تعالي اجل

وقفت ريوف وهي تمشي مع بهاج ولبست شوزها تحت أنظار بهاج لها وابتسم لانها تدلل معه وتبتسم 

مشى معها وناظر سلطان وفهد اللي يشربون شاهي ورفع راسه فهد:حيّ حَرم شليويح

ابتسم بهاج:تعقب

ضحك فهد وجلست ريوف:ايوو كان بيكون كابوس بس ربي خلصنا حمدلله

فهد:شدعوه والله اني حليّل

ريوف:عند امك بس

ضحك بهاج ولف سلطان للنيّاق:النايفه نشيطه اليوم

ابتسم بهاج:شفتها

ريوف:مين هذي ؟

فهد:هذي طال عمرك تتمركز بالمركز الاول بقلب بهاج ، هي والعدم

ريوف لفت لبهاج بصدمه ولف لها بهاج:ناقه من نياق ابوي الله يرحمه احبها حيل

سلطان:يغليها اكثر منكم

بهاج:انكتم

ريوف:تو ماتش ! ترا حيوان مستحيل يحبها اكثر منا

لف فهد:لا تقولين حيوان مهي حيوان

ريوف:بالله ؟ اجل الناقه ايش ؟

فهد:الناقه ناقه ماهي حيوان

ريوف ناظرته بصدمه:مو صاحي

بهاج:ترا صادق والله النايفه عندي غاليه

ريوف رفعت راسها:جات أنهار

التفت بهاج يناظرها جايه اخذ نفسه وهو يشوفها تمشي ، هي تمشي بقلبه بكل خطوه تمشيها هي تستثيره

مشت وجلست جنب ريوف وناظرتها ريوف:نورا فين؟

أنهار:جايه ورايا

رفعت نظرها لبهاج وصدت عنه بسرعه

نزل انظاره بهاج لفنجان الشاهي وجلست نورا:هاي

جلست جنب أنهار:واو الجو خياال اليوم شكله بيجي مطر صح ؟

فهد:لا ماهي غيوم مطر

ريوف:جانا محلل الطقس ، انت من يوم قلت الناقه مو حيوان وانا غاسله يدي منك

ضحكت نورا:مين يقول ؟

ريوف:شليويح يقول الناقه مو حيوان الناقه ناقه

ضحكت نورا وناظرت فهد:مو صاحي

ريوف:ماشفتوا حبيبة بهاج ؟

رفعت راسها أنهار وناظرتهم:مين ؟

ضحكت ريوف ولفت لبهاج اللي ناظر أنهار وتعجّبها

ونطق فهد:وحده تقولون الطول والا العرض ؟ هو ملامح هو زين ؟ تمشي على قلبه ماهو على الارض

عقدت حاجببنها أنهار ولفت لبهاج اللي ابتسم لفهد

سلطان:يقصد النايفه

أنهار:مين هذي ؟

رفع يده بهاج للنياق:هذي

لفت تناظر الناقه اللي بالحوض وعقدت حاجبينها:ناقه ؟

فهد:لا تستهينين ترا يغليها اكثر منك

رفعت حاجبها ولفت لبهاج تناظره يضحك ورجعت ناظرت فهد:ترا حيوان !

ضحكوا من ردة فعل فهد وعصبيته:الناقه ماهي حيوان انتم حيوانات بس النياق لا

سلطان:بس ترا صادق النايفه زايده عن النياق عند بهاج

بهاج:انشهد

لفت له ورجعت تناظر النايفه قدامهم ولفت من وقف بهاج:والله انها زايده عن النياق

مشى يدخل بحوض النياق تحت انظارهم ومشى للناقه اللي تقدمت له من عرفته وابتسم

مسح على جبينها وهو يناظرها ولف سلطان لهم:لقاء الحبايب

ضحكت ريوف وعقدت حاجبينها أنهار تناظره يبوس جبينها ويمسح على رقبتها

ووقفت أنهار ومشت لين الحوض وتكت على أسواره وناظرها بهاج ونطقت:انت كمان ماتشوفها حيوان ؟

ابتسم وهو يمسح عليها ومشى لين عندها والناقه تمشي معه:حيوان بس عاد ماهي اي حيوان

ناظرت الناقه اللي يفصل بينها وبين الناقه أسوار الحوض:اغلى من الانسان ؟

التفت يناظرها وعقد حاجبينها لانها تتكلم بجديّه بدون ضحك وكأنها تسأل تنتظر اجابه وهمس:منجدك؟

أنهار ناظرت الناقه وناظرته وهزت كتفها ولفت ترجع لهم

لف يناظر النايفه وطلع راجع لهم يجلس

ريوف:بهاج تكفى غسل يدك بعد ما لمست جسمها

لفت أنهار بإستنكار:جسمها ؟

هزت راسها ريوف وصدت أنهار عنهم تناظر النايفه اللي تعلف وتمشي وتسرح

نورا:ليش غاليه عندك بهاج؟

بهاج:هذي من نياق ابوي اللي كانت عنده

نورا:مافي غيرها ؟

بهاج:الا في النايفه والهنوف وغضبه وفاطر

ريوف:بسم الله ليش مسمينهم كذا ؟

بهاج؛ابوي مسميها

فهد:لو علينا سميناها على اسمك والله

ريوف لفت له:لا شكراً ما ابغى حيوان تسمونه على اسمي

فهد:هي الزمي حدك بس

تنهدت أنهار:مدري احسني على هذا الطاري اشتهيت كبده وتقاطيع

سلطان:ياربي لك الحمد طلعوا ياكلون نفس اكلنا

نورا:كان عندنا بجده محل يجننن كنا ناخذ منه ساعات مره يمي

فهد لف:من هو ؟

نورا:الكبده يمي حقتهم

ضحك بهاج :تبين ؟

لفت أنهار عليه لانه يسألها وابتسمت:ياليت

ولفت تناظر النياق: بس يكون لحم ناقه

ولفت لبهاج تكمل بإبتسامه:مو اي ناقه ابغى النايفه ابغى كبدة النايفه

ضحكوا وابتسم بهاج لانه لمس فيها جديّة كلامها وغيرتها من نطق فهد بغلاة النايفه عند بهاج اكثر منها

ريوف:نذله أنهار

فهد:ينحرك ولا ينحر النايفه

لف بهاج عليه ورفع حاجبه وجمد فهد:اسف نسيت انك بتحلق شنبك لو قالت لك احلقه

عض شفته سلطان واحتدت ملامح بهاج ولفت أنهار على بهاج وناظرتهم نورا:مين ؟

بهاج:يخربط بالكلام الحمار ذا

فهد:عاد لا تسبني عندهم !

بهاج:دام الناقه مو حيوان فأنت الحيوان قم عني

ضحك سلطان من كشر فهد