تحميل رواية انثنى غيم نجد لخد الحجاز النرجسيه بقلم شُروق pdf

التفت من دق جوال نورا ومن ناظرت الاسم شهقت ولفوا لها وردت:اهلين

عقدت حاجبها أنهار وهي تناظر فرحة نورا

نورا:والله ما نسيتكم ولا أنهار وريوف بس عشان جينا الرياض مره انشغلنا

لفت أنهار لريوف:مين ؟

رفعت كتوفها ريوف ولفوا لها وضحكت نورا:بليز تعال امانه خالو

ضحكت أنهار من عرفت المكالمه وتقدمت ريوف:عطيني اكلمه

نورا:بتجي ؟ ترا وعدتني وأنهار وريوف يسمعون

ابتسمت أنهار:بيجي منجد ؟

نورا هزت راسها وهي تكلم وتكلمت:متى طيب ؟ بكره ؟

غمضت عيونها بقوه بفرحه:اوكيه اوكيه مسيو مره لا تجي لحالك

لفت تناظر خواتها وابتسمت:اوكيه بقولهم ، باي

قفلت وناظرتها أنهار:خالو منجد ؟

نورا:ببكي مو مصدقه تخيلي يقول بيجي هنا

ريوف:امانه ؟ لحاله ؟

نورا:لا بيجي مع خاله والبنات

أنهار:وحشوني

ريوف:حتى انا كويس كلمك انتي ما كلمه

نورا:لا واتوقع ماعنده خبر اصلاً

فهد اشر لهم:الو

لفت نورا:خالو عبدالرحمن هذا

بهاج:وش فيه ؟

نورا:بيزورنا بس

فهد:وش له مبسوطين ؟

نورا:كان ساكن معانا بجده ونقلوا هنا بس مره وحشونا تربينا سوا

ريوف:كنا ناكل الكبده هذي معاهم

ضحكوا البنات وانشرحت صدورهم وتلبست وجيههم الفرحه وعقد حاجبينه بهاج من فرحتهم

سلطان:وهذي وشو زوجته والبنات  ؟

نورا ناظرته؛بنات خالو بيجوا معاه

-

رمى زيقارته ودخل البيت وقفل الباب وسمع اصواتهم بالمطبخ ودخل ناظرهم : مانمتم ؟

نورا:لا بسوي لخالو كيكة العسل يحبها مني

رفع حاجبه:وين هالخالو عاد

أنهار لفت له:راح تحبه

بهاج:تحبينه ؟

ابتسمت أنهار وهزت راسها له وتكى على الباب يناظرها تمشي بالسكر لنورا:وش اي ؟

رفعت كتفها:احُبه

تنهد لانها تقتله بنطقها للحُب من ثغرها

ووقف بإعتدال:انا بالغرفه خذوا راحتكم ماني طالع

نورا:لا عادي بهاج

بهاج:بنام والله تعبان

هزت راسها نورا له وناظر ريوف:لا اقوم على صوت المطافي بس

ضحكت ريوف:انا ازبطهم بالطبخه لا تخاف

بهاج ضحك:الخوف كله منك يالنتفه

ابتسمت أنهار تناظر ريوف اللي جالسه بالارض وتبتسم لبهاج وتقدم بهاج وحط يده على شعرها يحركه بعشوائه:تصبحون على خير

رفعت راسها ريوف ورمشت له وابتسمت

رفع نظره لنورا وأنهار ومشى خارج ودخل غرفته

ناظرت ريوف أنهار وابتسمت

،

دخل بهاج المجلس وناظرهم يغسلون الدِلال

رَده:جاينا عرب

بهاج:عندي علم

رفع نظره لعمر اللي جالس والتفت يعدل شماغه وسمع صوت البوابه وعقد حاجبينه من الصوت اللي تبع صوت البوابه ومشى متجه للبوابه وسلطان وفهد وراه

خرجت من الباب:مو صاحي ، عبودي جاي بالدباب حقه

ضحكت بصدمه:امانه !

عقد حاجبينه بهاج ولف لهم:عبودي ؟

التفتوا يناظرون الدباب اللي تقدم قبل السياره وعقدوا حاجبينهم يناظرونه

ولفوا يناظرون البنات من خرجوا يضحكون

وقف دبابه وفتح خوذته عن راسه:مسيو ياكلبات

ركضوا له تحت نظرات فهد وسلطان وبهاج

ونزل وهو لابسه شورت وتيشيرت وضحك وهو يفتح ذراعينه وارتمت بحضنه نورا ونطق بهاج:ابو سعود

عقد حاجبينه سلطان:ابو زيد

فهد:ابو عبدالله ياكافي

ابتسمت تتقدم له وتبعد نورا وتحضنه مع نورا

ورفع حاجبه بهاج وهو يناظر السياره اللي وقفت ونزلوا منها بنتين نفس شكل بنات عمه عمر وعباياتهم وشعورهم اللي على ظهورهم وصرخوا يركضون يحضنون بعض

ونزل عبدالرحمن اللي توقعوا انه هو لانه الكبير وناظروا شورته وهمس فهد:الاب بعد ؟

تعلقت برقبة عبدالرحمن اللي دار فيها وهو حاضنها وضحكت وبعدت عنه يحضن ريوف ونورا

لفت لعبودي من وقف جنبها يضرب شعرها:محد يركب معايا الدباب من بنات خالك عاجبك ؟

أنهار:بليز لا تقول وحشني اكثر شي الدباب ، كويس جبته بجربه

اخذت من يده الخوذه:بس راسك كبر

ظل فاهي يناظر الوضع الغريب وهمس:وصار لازم نوقف المصخره

تقدم لهم وتنحنح ولف عبدالرحمن له:اهلين

بهاج:اهلين ؟ اهلين

سلم على عبدالرحمن والتفت لأنهار اللي واقفه جنبه وجنب عبودي:ادخلوا

ابتسمت ولفت لعبودي تمد له الخوذه:بتركبني

ناظرها بهاج من مشت ورفع يده عبودي يأشر اوكيه باصبعه ومسك كفه ينزلها بهاج غصب:ارحب

عبدالاله:ياهلا

بهاج ابتعد عنه؛حياكم

مشى عبدالرحمن مع بهاج والتفت للبنات:يانوني خلي لولو تعلمك اش صار علينا بالطريق

لف بهاج لسلطان وفهد اللي يناظرون بعض ورفع حاجبينه بتعجب

دخل عبدالرحمن وابتسم:عموري !

ضحك بهاج والتفت يناظر وجيه اعمامه اللي تغيرت ورَده اللي نطق:اعقب

سلطان همس:الله يالدنيا عمي طلع عموري ومسوي عندنا عمّار الدنيا

ضحك فهد:حفله وربي ليه ماعزمناهم ذولا من اول

بهاج:ذا البغل اكبر مني وينادونه عبودي !

سلطان:جاي بشورت خل عنك الدلع

ضحك بهاج وهو يخفي ضحكته بيده اللي على شنبه

،

مشى وهو يسمع اصوات الضحك وعقد حاجبينه بإنزعاج من الضوضاء ودق الباب ينادي:يابنت

التفتت أنهار للصوت:تعال بهاج

التفت للباب:وين اجي ؟

أنهار:ادخل البنات لابسين عباياتهم

بهاج:اطلعي اطلعي

أنهار وقفت وفتحت الباب:كان لازم اقوم ؟

بهاج مسك ذراعها وخرجها وقفل الباب:صاحيه انتي ؟ وين ادخل والبيت كله حريم ؟

أنهار:طيب اش بغيت ؟

بهاج:تعرفين اذا بيتعشون والا لا؟

أنهار:ليش ؟

بهاج:عشان اشوف المطبخ اذا مفتوح نودي الذبايح

أنهار:لا خالو ما ياكل لحم ، تطلب ديلفري برقر او اي حاجه

ناظرها بهاج وهمس:مهبوله انتي ؟ نعطي الضيوف برقر ؟

أنهار:بهاج ترا خالي واعرفه ما ياكلون لحم كلهم

بهاج:يارب صبرك

عض شفته يخفي عصبيته وصد ووقف من شافه جاي لهم:قولي اخاف اركب عشان اعصب عليك زي ماكنت اسوي

رفعت حاجبينها أنهار:مستحيل اخاف وماكنت اخاف اصلاً لا تكذب

عبودي مشى لدبابه:تعالي اركبي

لف بهاج بصدمه لها من مشت له ومسكها من ذراعها: هيه وين ؟ اركبي وقدامي بعد !

ضحك عبودي:لا تخاف ترا تعرف له لها سوابق

ضحكت أنهار:بتجرب انت كمان بهاج ؟

بهاج:ادخلي عشان لا اكسر راسك الحين ادخلي

اختفت ضحكتها من عصبيته:بس بجرب بهاج

بهاج تقدم لها بعصبيه:احلقي شنبي واركبي دبابه

أنهار رفعت حاجبينها ونطق عبودي:اسمعي كلامه وانا خايف عليك كمان من زمان ماجربتيه

التفت بهاج يناظره:لا يكفي ماتخاف بالله

لف لأنهار:ادخلي

مشت أنهار معاه للباب ولفت له:تغار يعني ؟

ناظرها بهاج بصدمه:انتي صاحيه بتركبين مع هالبغل دبابه ؟ وحضن ؟ وسوالف؟ وين رحت انا ؟ عصى انا قدامك

أنهار ابتسمت بخفوت:ترا راضعين سوا

بهاج:مايهمني اخوك ابوك جدك ، ادخلي

فلتت ذراعها منه:بس تذكر اني ماقلت شي عنها

بهاج:عن من ؟

أنهار:حبيبتك واغلى ناسك ،  النايفه

سكت بذهول وصدت أنهار تدخل لداخل وضحك:والله هذي البلشه

التفت لعبودي اللي واقف بعيد ورفع راسه:تقدر تصورني مع الدباب ؟

بهاج:انا ؟

هز راسه:الفيو خيال هنا

سكت بهاج وهز راسه بأسف:ما اعرف له

مشى وتركه على دبابه ودخل المجلس على صوت عبدالرحمن:هذا زوج نهّوري ؟

لف بهاج يناظرهم وهمس:استرجل

ضحك سلطان وجلس بهاج بينهم يناظر عبدالرحمن

اللي كمل:بس انا زعلان من عمر ما عزمتني وانت تدري اني هنا بالرياض ؟ تتزوج نهّوري وانا ما احضر ؟

عمر:ماهو زواج حقـ

قاطعه بهاج:السموحه والله انها حق وواجب لكن كل شي صار بسرعه وانا ماكان عندي علم انك قريب والا كان ماقصرت

ابتسم عبدالرحمن:هذا الولد رجال ماشاء الله

لف رَده عليه:كل عيالي رجال

عبدالرحمن:بس هذا الولد زوج نهّوري ؟ خِشن مرا وعنده علوم الرجال هههه غريب تزوجتك نهّوري

احتدت ملامح بهاج وابتسم عمر له من ناظر ملامحه

رَده:ونعم ببهاج ليه ما توافق ؟

عبدالرحمن:لا بس مو تايب أنهار

اخذ نفس بهاج وهمس:استغفر الله العظيم

عمر:صادق

عبدالرحمن ضحك:صح ؟ هي كانت تحب الاجانب اكثر كانت تقول تبغى بريطاني اسباني تتزوجه

ابتسم عمر وهز راسه وهو يناظر بهاج ووقف سلطان:بجيب العشاء انا

دخل عبودي وناظره:اش العشاء ؟

سكت سلطان من سؤاله ونطق رَده:كل خير

عبودي:لا بليز مو لحم عشان ابويه ما يحبه واحنا ما ناكله

سكتوا والتفت زيد لرَده:كدينا خير

عبدالرحمن:بليز يا ، معليش اش اسمك ؟

سلطان:سلطان

عبدالرحمن:ايوا ياسلطان بالله شوف لنا بروست او شاورما شي خفيف كذا

التفت سلطان على جدّه واعمامه بصدمه

وكمل عبودي:انا بدون صوصات ابغاها ساده اذا ماعليك أمر

سلطان ناظرهم:مطعم انا ؟

ضحك عبدالرحمن:عسل هذا الولد

عض شفته بهاج يخفي ضحكته وذهوله من الاشخاض وناظرهم سلطان بصدمه وهو يهز راسه بأسف:لا حول ولا قوة الا بالله

-

ابتسمت وهي تتصور مع البنات بفرحه وتغني معاهم

ودق الباب ولفت ريوف:اكيد بهاج اخرجي له حياتي الفايده الوحيده بزواجك ما يحتاج تلبسين عبايه

ضحكت أنهار ووقفت تمشي وفتحت الباب وابتسمت من شافته بهاج ومعاه أكياس:هاك

تقدمت له تاخذ الاكياس من يده وغمض عيونه من انتثر شعرها على وجهه وكتم انفاسه لان يدري وقع ريحتها عليه

وبعدت وهي تدخل الاكياس ورفعت شعرها:باقي شي؟

ناظرها ولارد وهمست:بهاج !

هز راسه بالنفي وابتسمت ودخلت وقفلت الباب خلفها

كانت حلوه والفرحه عليها كانت حلوه وهي مرتاحه ومبسوطه كانت حلوه وهي تناديه

مشى مبتعد عن المجلس وخرج من المغاسل فهد:ما بتجي تتعشى ؟

هز راسه بالنفي وهو يشغل زيقارته ومشى مبتعد لأسفل المزرعه

وقف عند حوض النيّاق وهو يدخن وساهي

كل اللي يتصوّر قدامه الان المدلل النرجسي اللي كَوى له قلبه من لحظة ما جات وطلبت تشحن جوالها لقبل دقايق قليله

صورتها بفستانها الليموني جسمها اللي تشكّل قدام عيونه عطرها ودلالها ودموعها ارتباكها وضحكتها

هي تحبه وتبيه مثل ما يبيها لكنها تتعبه بالدلال ، تتعبه بالقرب والأحضان ماتبي تبتعد ولا يبتعد عنها ان ابتعد هو خطوه اقتربت خطوتين منه

هو خايف ينّهمر سيل قدامها ولاشي يلمه ، هو خايف ينحرق وينكوي بقربها تنهد من تذكر عيونها ودموعها وده يلتفت الحين للكل ويقول

: ‏أتركونا لوحدنا أتركونا لبعضنا

أتعبه القرب والتمنع لها ومنها ، يحاول يبتعد عشان لا يغرق يغرق بلهيبها ريحتها أول سبب لهواها ، عطرها اللي يشكّله بصورة الهايم العاشق

بلع ريقه وهو يسمع اصواتهم خلفه ولف يمشي لهم

ابتسم ورفع كفه من بعيد لعبدالرحمن:انتبه لنهوّري

هز راسه بهاج ومشوا للسياره وركب دبابه عبودي قدام عيون بهاج

خرجوا الحريم من البيت وصد يرجع للمجلس

دخل يناظر رَده اللي يقلب كفوفه:هذولا علامهم

عمر:هذولا هم من زمان ، هذي اطباعهم

رَده:والله اني احسبه يستهبل لكنه صادق

ضحك سلطان:والله ضحكوني

لف بهاج لهم:تصبحون على خير

خرج ولف سلطان لفهد:علامه ؟

هز كتوفه ومشى بهاج يدخل بيته وتنحنح ينادي:ريوف

ريوف:ادخل بهاج

دخل ونزل شماغه عن راسه يناظرهم ياكلون بالصاله على كنبه وحده وضحكت نورا:راحوا خلاص ؟

هز راسه بهاج ورفعت صحنها ريوف:تاكل ورق عنب بهاج ؟

بهاج:لا لا بالعافيه

تلفت وهمس:وين أنهار ؟

نورا رفعت صوتها:أنهار

لف من خرجت من الغرفه بفستانها وجوالها وابتسمت:قلت للولو ترسل لي الصور

ريوف:عندي بجوالي كمان انا مقاطع

مشت لها:وريني

بلل شفايفه وناظر نورا اللي تناظره وابتسم:بدخل انام وراي قومه

نورا:نسينا ان في احد باقي يدرس

ابتسم من سخريتها عليه ومشى للغرفه ودخل ورمى شماغه على فراشه وفصخ ثوبه

تقدم يحط جواله بالشاحن وسمع الباب يدق والتفت له:تعالي

دخلت وناظرها بهاج وعقد حجاجه بهدوء:علامك

أنهار دخلت وتقدمت له:ماقدرنا نتكلم سوا

بهاج:عن ؟

بلعت ريقها وعضت شفايفها بهدوء تناظر حوالينها وناظرته:عن كل شي

بهاج اخذ نفس يناظرها ساكت هو يجهل وضعهم ولا يدري كيف يجاوبها ولفت تناظر الباي خلفها وهمست تمنع السمع من خواتها:بس قولي شي واحد

بهاج:وشهو

أنهار:يصير احضنك نفس قبل صح ؟

ناظر عبرتها اللي وضحت بوجهها وسكت من سؤالها هو ماتوقع انها ترتاح بحضنه فعلاً

أنهار:اقصد انه كنت معاهم متجمعه اوكيه بس بالي انه مايصير احضنك نفس قبل ، بقي في بالي اسألك

بهاج رمش بعيونه ثواني يبلل شفايفه وابتسم يرجع بخطوته للخلف عن الباب ويفتح ذراعه:تعالي

ابتسمت بخفوت ولفت تناظر البنات برا وتقدمت وهي تعض شفايفها وتحضنه وتاخذ نفس طويل

ابتسم وهو يسمع تنهيدتها وشد على خصرها ضاع من حضنته بعد ماقدر يلملم نفسه لوحده ونطق

:من يردك انتي ؟

ضيّعته بدلالها ولهفتها لحضنه ومصارحتها انها تبيه تبي حضنه وتحبه وهمس:‏ضيّعيني يا عساني ما أتعيّن

اخذت نفس تجمع نفسها وابتعدت عنه تناظره

نزلت يدينها لكفه وهمست:لا يحرّمونه عني تكفى

بهاج شد على كفها واقترب منها يتأمل ملامحها ولمعة عيونها اللي تناظره:يعقبون

ظلت تناظره كيف يناظرها ورجعت للخلف ترجع شعرها خلف اذنها:تصبح على خير

ناظرها توقف عند الباب وهز راسه لها وخرجت وقفلت الباب

رفعت يدها على صدرها تاخذ نفس ومشت للبنات بالصاله:لا تطلعون صوت خلوه ينام

نورا:امشوا الغرفه طيب ، ريوف جيبي معاك الصحن

ريوف:باقي بتاكلين بسم الله

نورا:بلا لقافه جيبيه معاك وبس

دخلت الغرفه وهي تسحب سحابها وتفك فستانها وتسمع سواليف البنات

جلست وهي فاتحه سحابها وبجامتها بحضنها

تنهدت وهي معطيتهم ظهرها وغمضت عيونها تهدي من نفسها ونبضها

كل ما تتذكر نظراته لها وحضنه لها ودها تتركهم وتركض له الان وبدون تردد

اخذت نفس ولفت تناظرهم:ببدل بالحمام واجي

مشت للحمام والانوار مطفيه بالصاله ودخلت تنزل فستانها وتلبس بجامتها

شالت فستانها بيدها وخرجت من الحمام مشت للصاله ولفت تناظر غرفته من بعيد

وسمعت صدى صوته القديم :وتنامين بغرفتي

رجفت بإرتباك وهي تشد على فستانها ومشت بخطوات هاديه لغرفته تحت صوت نبضات قلبها

عضت شفتها بترقب ومن وصلت غرفته رفعت كفها بتفتح بابه لكنها ماقدرت

غمضت عيونها بقوه وشدت على فكها بكل قوتها

ظلت تناظر الباب بقل حيله وبلعت ريقها ورجعت بسرعه ودخلت الغرفه وناظرتهم:بنام لمّوا كل حاجه

نورا:ما سولفنا كثير

أنهار:تعبانه بكره نسولف

مشت وانسدحت محلها وعطتهم ظهرها وهي تاخذ نفس تهدي نفسها وغمضت عيونها بقوه من تخيلته:ضميني ياخوّافه

تغطت بلحافها تهرب من خيالها له ومن كلامه لها

خرجت تلبس عبايتها ولفت تناظر الملحق هي من فتره ماشافت لا حليمه ولا ابوها وقفت ثواني تناظره وتنهدت تمشي لهم

التفت يناظرها جايه لهم والتفت يناظر سلطان وفهد اللي انتبهوا له وصد

ابتسمت وناظرت ريوف ونورا:خاينين سبقتوني طيب صحوني على الأقل !

نورا:شفتك غاطه بالنوم قلت حرام

جلست وناظرت بهاج اللي صاد:خلصت كلاساتك؟

التفت لها وهز راسه وكشرت:اوف طولت مره شكلي بالنومه

لفت براسها تناظر النياق ورفعت حاجبينها:قهر النايفه باقي حيّه

ضحكت ريوف وضربتها نورا:حرام عليك

ضحكت أنهار ولفت تناظر بهاج اللي ساهي وعقدت حاجبينها وناظرت سلطان وفهد بمعنى شفيه

ولا تكلموا ابد ولفت نورا:بليز بطلب طلب بس قولي تمام

أنهار:لا لا نسيتي جوالك بالبيت صح؟

نورا ضحكت:لا وربي ابغى قهوتك بليز

أنهار:كانت كخه في جده !

نورا:لان في جده ، بس الان ماعندنا غير الباريستا أنهار

لفت أنهار عليه؛احد يبغى كمان ؟

سلطان:لا

انتظرت ثواني واخذت نفس وقامت عقدت حاجبينها طول الطريق ودخلت البيت ورمت عبايتها بالصاله واخذت جوالها ترسل له:فيك شي؟

ناظرته يقرأ رسالتها ولا رد ورفعت حاجبها بتعجب

قفلت جوالها ومشت للمطبخ وهي تفور المويه

لفت من حست بوجود أحد ومن ناظرته ابتسمت:تبغى قهوه صح ؟ بس مستحي من فهد وسلطان

بهاج هز راسه لها وضحكت تلف تاخذ أكواب

تقدم لها يناظرها تسوي القهوه وهمس:تدرين !

أنهار:عن ايش ؟

بهاج:من الاحد تبدأ اختباراتي

لفت له بصدمه:والله ؟ ماشاء الله عديتوا بسرعه

بهاج هز راسه:بس حضوري

لفت له بكامل جسمها بهدوء:اوف

بهاج هز راسه ورفعت كتفها:اش بتسوي ؟ مره تعب ومشوار من هنا لين الجامعه ، ان شاء الله مو ورا بعض الاختبارات !

بهاج اخذ نفس:لازم اروح

أنهار؛اكيد

بهاج:استاجرت شقه هناك

سكتت أنهار وكمل بهاج:ما بيمديني ارجع يومياً واذاكر وارجع اداوم المسافه بعيده وتعب

لفت للأكواب تناظرها وكمل بهاج:وبروح الجمعه عشان أستقر

همست:لين متى ؟

بهاج:اسبوعين

رفعت راسها تناظر الجدار قدامها ولا تكلمت

تقدم لها بهاج:تعرفين ان لولا المصايب والمشاكل كان جيتي معي

هزت راسها ولفت له وهي تهز راسها:اعرف

بهاج:ما أخليك

تنهدت بضيق وكمل بهاج:اذا ما تصبرين على أذاهم باخذك وطرق عن اطول شارب

هزت راسها بالنفي تبعد عنه:لا بهاج تكفى

بهاج:دريت بك ، شعليك منه ؟

أنهار:طلق المره الاولى المره الثانيه بيصير أقوى وانا ما اقدر بهاج

بهاج:تحملي فراقي اجل

سكتت تناظره ولفت عنه وعض شفته بهاج وصد عنها ينتظر منها كلام لكنها اخذت كوب نورا وخرجت من المطبخ تاركه له كوبه

-

مدت الكوب لنورا ولفت راجعه لفت لها نورا:وين رايحه؟

مشت بعيد عنهم:بتمشى شوي

لف سلطان على فهد اللي ناظره ورجع ناظر نورا اللي لفت تناظر اتجاه انهار وهمست:اشبها ؟

نزل انظاره لعنقها من بانت له شامتها اللي محفوره على عنقها وبلع ريقه ينزل انظاره لانه انتبه عليها بزواج بهاج كانت واضحه بعنقها وضوح مشرق الشمس والحين بانت له من جديد

صد لبعيد عنهم بأنظاره وتقدم لهم بهاج وناظرهم:وين أنهار؟

نورا رفعت يدها:راحت تتمشى هناك

بهاج هز راسه:انا رايح الجمعه

عقدت حاجبينها نورا ورفعت راسها ريوف:فين ؟

بهاج:الرياض وبقعد فيها اسبوعين عشان اختباراتي

نورا:بديت اختبارات ؟

هز راسه وناظر سلطان وفهد:لحالي بروح

لف لهم يناظرهم:سلطان وفهد موجودين وهذاني قدامهم اقول لكم ان بغيتوا شي سلطان وفهد عنّي

نورا لفت لهم ورجعت تناظر بهاج:مافي منك بهاج

رفع نظره لها سلطان ونطقت ريوف:عشان كذا زعلت أنهار ؟

بهاج:زعلت ؟

ريوف:ايوا باين عليها

بهاج مارد وتكلمت نورا:شوفها بهاج ترا دلوعه أنهار تلاقيها تبكي الحين

بهاج:بكيفها

سكتت نورا تناظره ورجع لورا بهاج:بسوي شنطتي

التفت ومشى راجع ووقف عند الملحق ثواني ومشى له اخذ نفس ودق الباب

انتظر ثواني لين فتحت ورفع عيونه لها هو يحلف يمين انه رجع طفل بهاللحظه من شافها ، اشتاق لها ولإهتمامها ولوجودها اللي انعدم لحظة زواجها

بلل شفايفه يمنع مشاعره تفيض أكثر:بغيت اعطيك خبر مابكون موجود اسبوعين

عقدت حاجبينها:لوين ؟

بهاج:عندي اختبارات

سكتت حليمه ورفع عيونه يناظرها وعض شفته وتردد من غصته ينطق ولكنه قدر:ادعي لي

رفع راسه من شاف دموعها وتقدم لها يحضنها

همس بضعف وقل حيله:سامحيني يمكن ما أرجع

حليمه:اسم الله عليك لا تقول كذا ، كلها كم يوم وترجع شد حيلك

رجع لورا وناظرها تمسح عبرتها:مانتي زعلانه مني ؟

حليمه هزت راسها بالنفي وانحنى يبوس يدينها وناظرها:توصين شي ؟ بمشي الجمعه

هزت راسها بالنفي بتكرار:الله يوفقك

رجع لورا بيمشي ونطقت:لوحدك ؟

لف لها يدري بمقصد سؤالها وهز راسه بالإيجاب

:لحالي

اخذت نفس براحه ومشى بهاج لبيته دخل غرفته وطلع شنطته الصغيره وهو يحط فيها اغراضه وكتبه

شد بقوه بيدينه على شنطته لانه يحاول يسكّت افكاره لكنه ما يقدر

وقف ورمى اغراضه برجله:قلت تعالي قلت تعالي وهي عيّت

تنهد وغمض عيونه خايف انها تبكي لوحدها فعلاً خرج من الغرفه وهو يناظر حوالينه مشى لغرفتهم بخطوات هاديه وفتح الباب ناظر الغرفه واغراضهم واماكن نومهم وتقدم من عرف شنطتها واغراضها

انحنى يفتحها ويناظر ملابسها وفساتينها ومكياجها جلس على رجلينه وهو يلمس ملابسها بيدينه هي تتعمد تلبس الحرير والخفيف والرقيق اللي يوصف نعومتها ويحدد جسمها ويبرز انوثتها ، شد على اسنانه وهو يناظر عطرها طلعه من بين الاغراض يناظره مستحيل ينسى شكله ولونه وحجمه هالعطر انكسر بين يدينه وخدش خصره ، هالعطر ضيّعه وتوّهه هالعطر اول سبب حبه لها كان بيتجرأ يفتحه يشمه لكنه خاف ، خايف يضعف وهو يتمالك نفسه من الغياب اللي بيغيبه ولاهو معتاده

وقف وخرج من الغرفه والعطر بيده ومشى لشنطته يحطه بين اغراضه وقفل شنطته واخذ نفس

خرج من بيته يمشي لممر النوير على امل يلقاها دورها بعيونه وعقد حاجبينه مشى يتعقّب المكان على أمل تكون موجوده وزاد استغرابه من انها مو موجوده

لمس جيوبه يتحسس جواله ولكنه مالقاه تأفف ومشى لقعدتهم قدام حوض النياق وتقدم بيسأل عنها لكنه لقاها بينهم جالسه

وقف خطواته وهو يشوفها جالسه ومشى لهم

ريوف:جهزت اغراضك ؟

هز راسه وسحب المركى وجلس وهو يتكي عليها

ريوف:حطني مع اغراضك بليز بهاج ماراح ازعجك اقدر أتشكل بالشنطه على حسب شكلها

ابتسم لها:مو تبين اغراض ؟ ارسليها لي اجيبها لك

ريوف:والله ؟ تلاقي وقت ؟

نورا:لا تشغلينه ترا رايح يذاكر

بهاج:افضى لك ياريوف قولي لي اللي تبينه يجيك

ابتسمت ريوف:ياناااس مافي منك والله بهاج

نورا:لا تعطيها وجه

ريوف:لا تخربي علي اذا ماتبغين شي !

بهاج:ماتبين شي ؟

نورا:لا سلامتك بهاج يكفي تختبر كويس وترجع

ريوف:أنهار تبغى

رفعت نظرها أنهار لريوف؛مين قال ؟

ريوف ضحكت:خاتمك اللي كان نفسك فيه قبل نجي

أنهار:نسيته ما ابغاه خلاص

بهاج:وشهو ؟

أنهار ناظرته:ولا حاجه

لف لريوف:وشنهو ذا ؟

ريوف:خاتم كانت تبغاه وطلبته من ابو..

سكتت بتردد ولفت لها نورا من ناظرت وجهها تغير

وكملت ريوف:من ابويه بس نسي وبقي بخاطر أنهار بس

سكت بهاج وهمست أنهار:ما ابغى شي

لف بهاج على سلطان وفهد اللي ساكتين:وانتم علامكم ؟ مالكم حس

فهد:الصراحه يا ابو سعود نهوجس بفرقاك من يصبر عليه

بهاج:ما اكذبك بس

سلطان ابتسم:ياشيخ محد بيفقدك غير النايفه محد داري عنك توكل اختبر بس

بهاج رفع راسه للنياق وابتسم:عز الله

،

خرج من بيت جدته على دعاويها وابتسم:اللهم امين ، توصون شي ؟

جمعه:لا ياولدي درب السلامه ، بتصلي الجمعه هنا ؟

بهاج:بالدرب ان شاء الله

جمعه:الله يسهل لك

مشى بهاج ودخل البيت وناظر حليمه اللي لفت له:سلمت عليهم ؟

هز راسه ودخل وناظر البنات بالصاله ومشت حليمه:بتفقد اغراضك كانك ناسي شي

التفت لها:لا لا خليهم

حليمه:اعرفك بهاج

بهاج:لا تفتحين شي رتبتهم ولا ودي يتغير علي شي

سكتت حليمه وتنهدت:على هواك

وقف وحط يدينه بجيوبه ساكت يناظرهم ولفت حليمه على البنات ورجعت ناظرته:ما بتنامون ؟

بهاج هز راسه:الا

حليمه:نام عشان يمديك ترتاح

حك دقنه وهز راسه:ابشري

حليمه:تصبحون على خير

تقدمت تسلم على بهاج وابتسمت له وخرجت

لف يناظرها تناظره وصد يناظر حليمه خارجه

نورا:عادي بهاج نجلس هنا بغيابك صح؟

عقد حاجبينه بهاج:وش هالكلام بيتكم هذا

نورا ضحكت:مو بيتنا بيتك انت

ريوف:حياتي ترا ماخذ اختنا يعني بيت اختنا كمان

ابتسم بهاج:بيتكم كلكم ، ان نقص شي كلموا سلطان ترا ما بيقصر لا تستحون منه

نورا:اهم شي تطمنا بهاج عليك اوكيه ؟

بهاج:ابشروا

ناظر أنهار اللي جالسه واخذ نفس ومشى لغرفته:تصبحون على خير

دخل وقفل بابه ومشى لجواله فتحه وارسل لها

حطت اصابعها بفمها تسهى بينهم ولفت من وصلها اشعار واخذت جوالها تناظر اسمه

فتحت الرساله:لا تنامين

اخذت نفس براحه لانه ما تجاهلها كانت تنتظر يوادعها هي لحالها وخافت يكسر بتوقعاتها وآمالها

لفت تناظر نورا وريوف اللي يستعدون للنوم وانسدحت تعطيهم ظهرها

انتظرت وقت لين ناموا ولفت تناظرهم واخذت جوالها وخرجت

مشت لغرفته واخذت نفس تستجمع نفسها ودقت بابه وفتح بسرعه ومسك ذراعها يدخلها:ابطيتي

ناظرته يقفل الباب وبلعت ريقها بإرتباك ولف لها

تقدم لها يناظرها:ليه تعيين ؟ كان رحنا سوا ولا هالعذاب

أنهار:بترمي امك بالعذاب يعني ؟

سكت بهاج وكملت أنهار:شفتك اليوم معاها ، ماتقدر بهاج حتى بغلطها وجفاها انت رحت تبوس يدينها عشان تودعك

بهاج مارد وكملت أنهار:ماتقدر بهاج ولا انا بقدر

بهاج:تصبرين عني ؟

ميلت شفايفها بضيق تنفي كلامه وتنهد بهاج تقدم لها يناظر كفوفها ولمسها يشدها لكفوفه وناظر عيونها اللي تتأمله:يقولون روح ورا مستقبلك وحلمك ودرب السلامه ، لكن والله مايدرون انك مستقبلي وأكبر احلامي انا وين ما وجّهت أتجه لك

شدت على كفوفه تتقدم له اكثر هي ودها تحضنه وتسمع كلامه وهي بحضنه ماتقوى تسمعه من خطوات تبي تسمعه وهي تحضنه

لكنها رفعت عيونها عليه ونطقت جمله بالانقليزي اثارت في قلبه القهر:اصبري الترم الجاي اخذ هاللغه واكسر راسك

ضحكت لانها تدري انه يجهل كلامها ومعناه ورفعت كتوفها:قلت بتوحشني

ابتسم بسعه:والله

هزت راسها:مره بتوحشني بهاج

نزل يده عن كفوفها يحاوط خصرها يضمها:يابعد بهاج وأهله

تنهد من ضمته تغرقه بريحتها وحضنها وهمس:يا واهب العقل

حاوطت رقبته تحضنه وغمضت عيونها:بتكلمني كل يوم

بهاج:بكلمك كل يوم

أنهار:وتحكيني عن كل اختبار

بهاج:واحكيك عن كل اختبار

أنهار:تقول لي قود مورنينق وقود نايت

بهاج:لا هذي ما اعرف لها

ابتسمت تغمض عيونها بقوه وتحضنه بقوه هي تدري انها تستخبى عن الكل عشان تقدر تحضنه تحسه خطأ مع انه أكثر صواب واضح لها

اول مره ما تترد تقول اي احبه بكل وضوح ، اي ابيه بكل وضوح ما ترددت بحبه ولا شكت برغبتها له لكنهم يغلطونها ويذكرونها انها المفروض ماتحس كذا

رجعت لورا بضيق:بتركك تنام

بهاج:لا تبكين بغيابي ولا تزعلين أهد فيهم أنهار والله

هزت راسها بالنفي وهمس بهاج:اوعديني

أنهار:بليز بهاج

بهاج:لا ياخذونك أنهار بكلمتين يزعلونك !

أنهار؛ماراح أزعل بس لا تطول عشان معد تقدر تراضيني نورا بحضنها ابغى حضنك

ابتسم لانها تعترف له بدون تخجل حتى وهز راسه:ترفقي بحالك

أنهار:وانت كمان انتبه لنفسك

هز راسه واخذت نفس أنهار تعض شفتها هي ترددت قدامه ولكن لفت بترجع ولاقدرت

لفت له وضحك بخفوت:ماتقوين عني

ابتسمت وتقدمت له بسرعه تبوس خده وتحاوط عنقه وجمدت ملامحه

بعدت عنه تناظر صدمته وعضت شفتها لانها استحت لكنها ماقدرت تمنع شعورها

اخفت ابتسامتها تخرج تاركته وغمض عيونه من خرجت ورجع يفتحها ، رفع ذراعه يحطها على صدره خوف من ان قلبه يخرج من مكانه من نبضه المجنون وحرّ دمه اللي يسري بجسمه

تدلل عليه لكنه إنسان ما يقوى ، لدّى عنها بيخفف عن قلبه لكنها تغلبه وتتحداه ، وكأنها تقول ان مكانها بين طيّات اهدابه مقعدها صدره ومجلسها قلبه ولا يمكن يقدر عنها ، يحلف يمين ان الخد خد البرق والعنق ميلاف والخصر كأنه من عشاه معسوفي ورمشها حدّ سياف وفي ثغرها موته والله موته

همس يضحك على حاله:وش يغسل وجهي الحين؟ انا ثوب فيه عطرك ماغسلته بغسل خدي !

خرج للطريق وهو يناظر وراه من مراية سيارته

تنهد لانه خرج قبل يصحون قبل تطلع الشمس حتى من سمع صلاة الفجر خرج لانه ماقدر ينام حتى ، غرق في هواجيس مالها نهايه ظل يفكر بخوف ، خوف انه كل يوم يعيش اكثر معها وكل يوم يصعب عليه اكثر يشوفها تتعلق فيه ويخافه يخاف التعلق منها لانها تتعذب من ابوها وقساه وماتعودته يخاف عليها من أذاهم من أذاه بالحب من المزرعه اللي تختلف عن حياتها قبل من حبها له اللي ماتوقعته ولا يشوفونه لايق عليها ، يظلون يذكرونها بإنه مو اختيارها ولا يشبهها لكنه يشوف منها حب تتمسك فيه ولا تستحي تفصح عن كل شي يخطر بقلبها

اخذ نفس يحك جبينه ويركز بطريقه تمر عليه بذكريات كثيره بعقله ، مره يوم عرف إسمها وكانت صدمته بإنها أنهار ومره بفستانها الليموني ومره بهاوية الجبل تصوره وتحضنه ومره أمس ، كيف باسته دمرته ناظر المباني اللي بانت له لانه دخل وسط الرياض

وقف بالاشاره وتكى بيده يناظر الطريق والزحمه والناس المباني والعمران اللي يفتقدونه ، هي عاشت هنا وسط الضجه والبشر ياليتها هنا

التفت يمينه يناظر الكرسي فارغ جنبه وتنهد بتمني بياليتها هنا

،

رفعت شعرها لفوق واخذت صحنها وخرجت بالصاله حطت ايبادها قدامها تشغل لها مقطع عشان تاكل ولفت تناظر الوقت ورجعت تناظر ايبادها عطاها خبر انه بيختبر بهذي الساعه وخرجوا نورا وريوف ولكنها ظلت عشان تنتظر منه خبر عن اختباره

كانت تاكل مندمجه والسماعات على راسها انتبهت لاشعار جوالها واخذته تناظر رسالته وابتسمت

:وش تسوين ؟

فتحت الكاميرا له تتصور مع صحنها وارسلت له بعدها؛دق عليا

ناظر صورتها ولا تردد يصورها ورفع راسه يشغل السياره ويدق عليها ويخرج من الجامعه

شالت السماعه عن راسها لرقبتها وردت:ناجح والا راسب ؟

بهاج ابتسم:يقولون سبع والا ضبع

أنهار:هم يقولون أنهار ماتقول كذا

بهاج هز راسه:كويس

أنهار:امم كويس يعني مو حلو

بهاج ضحك:لا والله كويس توقعته يكون أصعب

أنهار تنهدت:حمدلله هانت خلصت واحد باقي عشره

ضحك وناظر طريقه بهدوء وعضت شفتها أنهار:وحشتني

تلاشت ضحكته بهدوء وتنهد وكملت أنهار:بس يعني صراحه مو مره فراقك عذاب ، أقدر عليه

ابتسم:٣ أيام غبت

أنهار:قليله ماخلتني ابكي وراك حمدلله

بهاج:كثيره عندي

ابتسمت أنهار وفرك عيونه بهاج بتعب من وقف عند شقته ظل يسمعها تسولف وهو واقف عند شقته ماقدر يقول انه وصل عشان لا تقفل لكنها سألت بإستغراب:كل هذا طريق ما وصلت ؟

بهاج:واصل من أول

أنهار:ليش ماقلت لي بهاج ؟ وانا جالسه اسولف

بهاج:سولفي

أنهار:لا اكيد تعبان انزل ارتاح عشان تصحى تذاكر

بهاج تأفف بتعب ونطقت أنهار:يالله ياسبع لا تصير ضبع

ضحك بهاج وكملت أنهار:من الحجاز اوكيه بس أفهم

ابتسم بهاج وغمض عيونه يهز راسه بهدوء يحلف يمين بداخله انه يعشق كلامها واسلوبها ماوده تسكت ابد

أنهار:انتبه لنفسك وطمني اوكيه بهاج ؟

بهاج:وانتي بعد

أنهار؛اوكيه

قفلت وناظر جواله بهاج والصوره اللي بانت له بعد ما قفلت ظل يتأملها بكل تفاصيل شكلها شعرها عنقها الطويل والتيشيرت اللي تلبسه والسماعات اللي على راسها ابتسامتها وصحنه بحضنها تاكل منه اندومي

غمض عيونه بنعاس وتعب ورجع يفتحها يبوس صورتها ويتنهد ناظر حوالينه وضحك بسخريه على شكله خلته يبوس صورتها بالشارع بدون ما ياخذ الشارع بعين الإعتبار

قفل جواله ونزل من السياره معه كتبه ودخل شقته

،

خرجت تضيّع وقتها بقلق وتناظر ساعتها بيدها تتلحف بشالها بعيد عن عيون الكل تأخر الوقت وماقدرت تنام عدّى على غيابه أسبوع هي كل يوم تكلمه ويطمنها لكنها تشوفه بكل مكان تستوحش المزرعه بدونه لأول مره تشوفها بهذي الوحشيّه والسعه صوت هبوبها ورياحها وأوراق نخلها وشجرها

عقدت حاجبينها بخوف تمشي لحوض النيّاق ووقفت على أسواره تلمح النياق من ظلمة الليل تتذكره هنا كثير تتذكر وقوفه وسطهم كيف يرفع ثوبه ويلمس بيدينه النياق ويتفقدها

عقدت حاجبينها بزعل من عرفت النايفه من بينهم:حتى بالظلام اشوفك

تكتفت بعصبيه تناظرها:ليش مو نايمه ؟ لا يكون تنتظرينه يسهر معاك ؟ منجد حيوانه

نزلت انظارها لساعة يدها تدري انه نايم بس تنتظر بأمل صغير انه يدق او يرسل لها

كل يوم يزيد دلالها وتطلبه يكلمها اطول من قبل

رجعت لورا ترجع بخطواتها لبيته او لبيتهم بالأصح تمشي بخفوت وبملل وترقب وزعل ، تزعل لانها تعطي نفسها أمل فيه وتغلو فيه تندفع له وتبيه طول الوقت يكون معها يدللها ويكلمها

وقفت بصدمه من دق جوالها وناظرت اسمه وفتحت فمها بصدمه تناظره ظلت ترمش وتضحك بصدمه وعضت شفتها وردت وهي ساكته

عقد حاجبه من سكوتها:نايمه ؟

رفعت شعرها وبللت شفايفها ترجع بخطواتها:لا

رجع ظهره لورا:ليه؟

أنهار:ليش دقيت ؟

بهاج:مدري لقيتني ادق فجأه

أنهار ابتسمت:قلت انك بتنام

بهاج:ماجاني نوم وقمت اراجع وشكلي بروح مواصل

أنهار ماردت وهي تمشي مبتسمه هو كان قدّ أملها حتى لو انه صغير

بهاج:نعسانه ؟

أنهار نطقت بسرعه ترفض فكرته بـ:لا

بهاج:شفيك ساكته ؟

أنهار:كنت قبل شويه أقول ما بيدق واكيد نايم واكيد تعبان وروحي نامي

سكت بهاج يسمعها وكملت أنهار: بس كان عندي صوت جوا قلبي يقول استني

ابتسم بهاج وبللت شفايفها بحيا:حطيت أمل صغير فيك وماخذلته

بهاج:أعطيك كل الأمل ولا أبخل ، لا تحطين آمالك فيني انا ما اخليك تتأملين انا اخليك تعيشين وش ودك انتي ؟

أنهار تنهدت تناظر خطواتها:عطني كل الحنيّه كل الحنان حتى لو انا ماعطيتك شي

بهاج ابتسم:انا أبيع ربيع الكل وأشتري خريفك بس

أنهار ضحكت لانها تموت من عذوبته ردوده هي هايمه فيه وفي شاعرية كونه محبوب

أنهار:لقيتك شي أكبر من ظنوني وتوقعاتي كنت تافهه لدرجة أشوف طريقة زواج الأجانب شي رومانسي مادريت ان البدوي أحلى

بهاج ضحك ورفع ذراعه ورا راسه يسمع تعبيرها:انا لساني أعجمي وكأني اميّه ودايم انت تغلبني

بهاج:اعترف انتي ضعيفة قول

ميلت شفايفها بزعل وكمل بهاج:لكن أفعالك تخليني مذبوح

ابتسمت تدري انه يقصد بوستها ونرجسيتها تثبت لها كلامه ومعناه

بهاج:هي تؤمنين بالله اني سهيت بصفحة كتابي لقيتك بأول أوراقي

أنهار:أنا أقوى من مفعول المخدرات

ابتسم:انا اشهد

مشت تدخل البيت بهدوء ونطق بهاج:ادخلي نامي

أنهار:اوكيه

بهاج:وان بغيتي شي كلميني

أنهار:ركز كويس بهاج بليز

بهاج:ان شاء الله الله يسهل

أنهار:الله يوفقك

هز راسه يناظر أوراقه ولابتوبه:ترفقي بحالك

ابتسمت وهي تفصخ شوزها:تصبح على خير

قفلت منه وضمت جوالها ودها تصرخ من فرط مشاعرها وحبها وكيف يسري فيها لأعلى السماء يدللها دلال تحلم فيه طول عمرها ولقته احلى من اللي تحلم فيه

-

شالت سماعتها عن اذنها وهي تسمع الباب يدق

وقفت نورا وهي تاكل وحطت صحنها بالارض:سلطان او فهد

ريوف:دوبنا كنا برا بسم الله

رفعت حاجبها نورا وفتحت الباب وعقدت حاجبينها من شافت حليمه تقدمت حليمه بهدوء:باقي مانمتوا ؟

نورا هزت راسها بالنفي ورفعت راسها أنهار من سمعت صوتها

اخذت نفس ودخلت وناظرتهم:ابوكم شوي تعبان

جلست بإعتدال ونطقت نورا:اشبه ؟

حليمه رفعت كتوفها:ما اعرف حرارته مرتفعه من امس ، تعالوا تطمنوا عليه

نورا لفت تناظر خواتها ووقفت ريوف:انا بجي

تنهدت أنهار وناظرت نورا اللي تنتظرها ووقفت أنهار وخرجوا مع حليمه

دخلوا الملحق وتقدمت حليمه:عمر ، بناتك جو

دخلت الغرفه ولا حصلته بسريره وطلعت وهي عاقده حجاجها:وينه ؟

نورا التفتت بحيره تناظر حليمه تدور:كان مو قادر يقوم

مشت حليمه للحمام ومشوا خلفها وفتحت الباب وشهقت

صرخت ريوف تركض وجمدت محلها أنهار من شافته طايح بالحمام

دخلت نورا بخوف:بابا

مسكت ذراعينه وهي تسمع حليمه تناديه:عمر عمر تسمعني ؟

ظلت محلها واقفه تشوف ريوف تبكي وتصرخ ونورا تحاول ترفعه وتناديه

نزلت دموعها بخوف وبدت ترجف برعب خافت خافت يكون راح ، تفقده للأبد يصير زعلهم عتابهم بعد ما يروح

لفت حليمه:نادي سلطان اركضي

لفت نورا تناظر أنهار اللي تبكي بدون صوت ووقفت بسرعه تخفي دموعها وتركض للخارج

مسحت دموعها وهي تركض ودقت بابه وهي تتنفس بخوف وفتحت الباب شموخ وعقدت حاجبينها:شفيك ؟

نورا:وين سلطان ؟ ناديه

خرج من سمع صوتها وناظرها وناظر دموعها:شصاير؟

نورا:بابا ، بابا طايح بالحمام تكفى تعال

شهقت شموخ وخرج سلطان بسرعه وهو ينادي بصوته كله:فهد

دخل الملحق سلطان وركض وشافهم بالحمام ووقف بصدمه يناظر عمه طايح وبلع ريقه بربكه

حليمه:تكفى سلطان تعال شوف عمك

انحنى سلطان:عمي

رفع ذراعينه على كتوفه ولف من دخل فهد مصدوم

نطق سلطان:ساعدني اخلص

دخل فهد الحمام وشالوه تحت بكاء ريوف خلفه وهي تناديه

شدت على كفوفها بقوه تخفف من رجفتها وهي تشوفه شايلينه كأنه ميت

تقدمت نورا اللي تبكي بدون صوت ومسكت ذراع أنهار

عضت شفتها أنهار وهمست وهي تمشي خلفهم:مابيموت صح ؟

شهقت نورا تبكي وناظرت فهد اللي شغل سيارته على خروج رَده:وش صار ؟

لف فهد:اركبوا

مشوا يركبون معاه وحرك فهد يلحق سيارة سلطان اللي فيها عمر وحليمه

شد على قبضة يده يسمعهم يبكون وهمس:تعوذوا من الشيطان مافيه الا العافيه ، مافيه الا العافيه

بلع ريقه يناظر الساعه ورجع يناظر طريقهم

،

خرج من الحمام وهو ينشف شعره ومشى لجواله يرسل لها:صاحيه ؟

انتظر ولاردت عليه ومشى يشرب شاهيه ويناظر كتابه لاخر وهله ويراجع ويلبس

قفل ازرار ثوبه واخذ كتابه وجواله وخرج

شغل سيارته والتفت لجواله وعقد حاجبه يناظر الساعه

ناظر الطريق قدامه وحرك على أمل تتصل بنص طريقه للجامعه

لكنه وصل ووقف بموقف وناظر جواله واستغرب ودق عليها انتظر ثواني ولاردت وعقد حاجبينه

يناظر رسالتها:مشغوله

ظل يقرأ رسالتها اللي كتبتها وخرجت على طول من المحادثه عقد حاجبينه وعض شفته يتوقع انها تضايقت من احد

تنهد وارسل لنورا:نورا صاير لكم شي ؟

انتظر ردها ولاردت عليه وزادت حيرته ونزل من السياره وهو يدق ودخل الجامعه

رد عليه وبلع ريقه:هلا

بهاج:سلطان وينكم انتم ؟

بهاج لف يناظر البنات والمستشفى وتردد بكلامه لين ابتعد عنهم:ولا مكان

بهاج:وش عندكم ؟ مختفين

سلطان:لا ولاشي بس جدك ذبح ذبايح صدقه وملتهين مع اللحم

بهاج رفع حاجبه:لحم ؟

سلطان:انت وينك ؟

بهاج:بالجامعه رايح اختبر

سلطان:اي زين اجل روح اختبر الله يوفقك انا مشغول

بهاج سكت ثواني من سمعه قفل جواله وناظر جواله بهدوء لثواني

هو مو غبي هو يدري ان سلطان كذب لانه يدري به ويعرفه ويعرف ان أنهار ماهي مشغوله بلحم وذبايح على قولة سلطان يدري ان صاير شي لكنه تنهد مابيده حيله ودخل اختباره

،

دخلوا عليه بعد ما نقلوه لغرفة معاينه وبكت ريوف تركض له تحضنه:بابا

كان ساكن وهادي ناظرهم وهمس:حليمه

تقدمت نورا تخفي عبرتها:راحت تجيب لك اغراض

ناظرته وتجمعت دموعها:انت طيب ؟

غمض عيونه وعقد حاجبينه يحس بنيران جسمه ترتفع وتحرقه

رفع ذراعه يحاول يبعد ريوف اللي رفعت راسها:بابا انت بخير ؟

لفت نورا عليها:خليه يرتاح ريوف بعدي عنه

تقدمت نورا تغطيه وناظرته:بردان ؟

هز راسه يرجف من برودة جوّه وبدأ يتعرق قدامهم

عضت شفايفها ريوف تناظرهم بخوف

لفت نورا لأنهار اللي واقفه بدون ردة فعل تناظرهم وهمست:كلميهم يزيدون عليه غطاء

رفع ذراعه:ابعدي

ناظرته ريوف يبعدها عن حضنه وبلعت ريقها ومسكت كفه:بابا تعبان ؟

رفعت انظارها أنهار لنورا ورجعت ناظرته تحتد ملامحه ويجلس ويلف لريوف:ماتفهمين ؟

بلعت ريقها بخوف وهي تناظره يختلف وجهه ويعصب عليها وهمست:انا ريوف

عمر:اطلعي

نورا انصدمت ولفت تناظر ريوف اللي واقفه وتقدمت له:بابا اشبك ؟

التفت لنورا:اطلعي انتي الثانيه بعد اطلعوا اطلعوا

بكت ريوف وتقدمت تحضنه بقوه تمنعه عن قسوته:ما بخليك

دفها بقوه وكأن خلق له اربع ايادي من طيحتها على الارض صرخت أنهار لريوف بخوف ولفت بصدمه لعمر اللي صرخ بوجه نورا:اخرجوا

دخل سلطان بخوف ووقف عند الباب يناظر ريوف بالارض تبكي ولف لعمر اللي يصرخ لهم يطلعون

بلع ريقه ووقفت أنهار تناظره:ليش صرت كذا ؟ ليش يوم نسينا كل شي وجيناك بمرضك تسوي كذا ؟ ليش تعاملنا كذا ؟

رجعت لورا نورا بصدمه وكملت أنهار تناظره بحقد:اكرهك

اشر بيده:اطلعي انتي وخواتك

لفت وناظرت ريوف وهمست:ريوف

لفت نورا وناظرت ريوف اللي فقدت الوعي نتيجة توترها وضغطها وكتمانها مغشيه وركضت:ريوف

دخل سلطان وناظرها طايحه فاقده الوعي وشالها بين يدينه وخرج ومشوا معاه

،

خرج من الجامعه واخذ جواله يناظره فارغ من الرسايل والاتصالات وزاد استغرابه ومشى بيركب سيارته لكنه توقف من شاف الورقه بالباب اخذها وقرأ المكتوب : اعذرني وهذا رقمي اتصل علي

تأفف يمشي لورا السياره:لا بالله

ناظرها تأذت وواضح ان اللي دقّها حط رقمه

ركب السياره ونقل الرقم واتصل ووصله صوته:الو مرحبا

بهاج:هلا ، لقيت رقمك على سيارتي

ابتسم:اعذرني والله كنت مستعجل والا كنت بنتظرك تخرج

بهاج:مو مشكله المهم انك ولد حلال

ضحك:تامر أمر والله واللي تبيه بيجيك بس يا

سكت يترقب اسمه ونطق بهاج:بهاج

هز راسه:ونعم يابهاج ، اذا فاضي مرّ علي برسل لك عنواني

بهاج:والله ودي اقول مسامح بس انعدمت

ضحك:حقك حقك وانا مابقصر تعال والا وصلت عطهم خبر انك بهاج وان ابراهيم طالبك

بهاج:طيب جايك

قفل منه وخرج من المواقف متجه للعنوان ووقف من شاف المبنى الكبير وناظر السكيورتي اللي عند البوابه وتقدم له وفتح شباكه:انا بهاج معاي موعد مع ابراهيم هنا

هز راسه السيكورتي:تفضل حيّاك

دخل المبنى ووقف سيارته ونزل واخذ منه مفتاحه البوّاب ومشى يدخل مع الباب الدوّار ويدخل المبنى

ناظر الموظفين بكل مكان وتقدم يسأل:بغيت ابراهيم وين القاه

هز راسه الموظف:استاذ ابراهيم بالدور التاسع

هز راسه بهاج ومشى وهو يناظر المكان وركب المصعد متجه للدور المطلوب

دخل الدور وتقدم من شاف الشركه وهمس:من ذا اللي صادمني

تقدم لموظف:مكتب ابراهيم وين ؟

وقف الموظف:استاذ ابراهيم في اجتماع معاك موعد ؟

بهاج:والله مدري يعتبر موعد والا لا بس انا بهاج

الموظف ابتسم:تفضل استاذ بهاج انتظر بمكتب الاستاذ ابراهيم دقايق ويجيك

رفع حاجبينه بهاج من ناداه بإستاذ ومشى وراه

دخل المكتب وناظر وسعه والاطلاله وصور الملوك خلف ظهر الكرسي ومشى يجلس ينتظر

دخلت السكرتيره:تشرب شي استاذ بهاج ؟

بهاج هز راسه بالنفي وهو يناظر بغرابه كل شي السكرتيره اللي تلبس تنوره وقميص والموظفين اللي بكل مكان يشتغلون

وظل يناظر بإعجاب واستغراب لحد مادخل شخص يوافقه بالعمر وابتسم:بهاج ؟

وقف بهاج وابتسم له:وصلت

تقدم له ابراهيم ومد يده وسلم عليه:اعذرنا صدمناك وناديناك بعد

بهاج:مو مشكله المهم وصلنا

ابراهيم:حيّاك

جلس بهاج ومشى ابراهيم وجلس على مكتبه:حيّ الله بهاج ، عسى ضيّفوك ؟

بهاج:مشروب فنجانك

ابراهيم:انا دكتور بالجامعه تخصص إدارة أعمال والله يابهاج خرجت على عجل بلحق على شغلي ولا انتبهت لسيارتك حكيتها وسيارتي تأذت اكثر منك لا تسأل

ابتسم بهاج:المهم السلامه بالحديد

ابراهيم:غريبه بالجامعه ؟ شكلك ما يعطي انك طالب انت موظف ؟

ضحك بهاج:لا والله طالب بس شكلي تأخرت واجد

ضحك ابراهيم:ماجستير ؟

بهاج:لا بكالريوس اول سنه اقتصاد مالي

رفع حاجبه ابراهيم:حلو وكيف امورك ؟

بهاج:حمدلله ماشيه

ابراهيم:مستقر بالرياض هنا ؟

بهاج:لا والله مو من اهل الرياض من محافظات الرياض

ابراهيم:تشتغل ؟

بهاج هز راسه بالنفي وعقد حاجبينه ابراهيم:مازلت دلوع ابوك ؟

ابتسم بهاج:ابوي الله يرحمه انا معتمد على نفسي

ابراهيم:الله يرحمه وش مصدر دخلك

سكت بهاج ثواني وابتسم ابراهيم:اسف اذا كان كثرت عليك اسئله بس الصراحه في بالي شي وابي اوصل له

بهاج:عسى خير

ابراهيم ابتسم:خير خير ، كيف وضعك ؟

بهاج:وضعي زين ابوي ترك لي شي زين

ابراهيم:ابوك تاجر ؟

بهاج:عنده نيّاق ويشتري ويبيع فيها وان كان تجهل بالنيّاق مابتعرف اسمه لكنه معروف قبل ما يموت الله يرحمه في مزايين الابل والهجن

ابراهيم رفع راسه:والله ما اعرف لكن شي زين تجار الابل معناته شرّاي ؟

عقد حاجبه بهاج:شرّاي نياق ؟

ضحك ابراهيم:أسهم

بهاج:لا

ابراهيم:تفهم بتخصصك ؟

بهاج:افهم

ابراهيم:طيب بهاج انا صاعد جديد بشركتي وودي بشركاء يكونون معاي قبل شوي كنت بإجتماع مع تجار كبار لكن ودي فيك

ابتسم بهاج بغرابه:انا ؟ ماظنتي افضل من اللي شفتهم

ابراهيم:التجار الكبار بيطمعون وهم فعلاً طمعوا وطلبوا ٥٠٪؜ ، وانا صغير عندهم ماودي اخسر

بهاج:وانا مالي بالتجاره والله مع الاسف جيت عشان سيارتي

ابراهيم:فكر بهاج انا فعلاً احتاجك انت تخصصك ممتاز وبيفيدك معاي ورأس مالك جيد

ناظره بهاج وابتسم ابراهيم:متغدي ؟

عقد حاجبه بهاج ووقف ابراهيم:نخرج نتغدا ونكمل نسولف سوا ، تعال

بهاج:لا والله تسلم

ابراهيم مشى لين عنده ووقف بهاج:مستعجل انا

ابراهيم:ما باخذ من وقتك كثير نعبي بطوننا ونسولف

مشى بهاج معه ونزل معه للاسفل ووقف من ناظر سيارة ابراهيم ورفع حاجبينه من نزل العامل عشان يركب ابراهيم ولف ابراهيم:بترجع لسيارتك امش معاي

تقدم بهاج وركب جنب ابراهيم اللي حرك سيارته

بهاج:والله ماظنتي انك تاجر صغير

ضحك ابراهيم:والله يابهاج كديت على نفسي ظنتي بأعمار بعض بس انا عضيت التراب درست ادارة أعمال واخذت ماجستير ودكتوراه وسكنت لوحدي عزابي لين تعيّنت وتزوجت حمدلله عندي بنتين وولد

ابتسم بهاج وهز راسه:الله يخليهم لك

ابراهيم التفت له:وانت صرت أب ؟

لف عليه بهاج:والله عريس جديد

ضحك ابراهيم:لا انت متأخر عني بكثير

بهاج ضحك ولف عليه ابراهيم:ماودك تستقر هنا مع زوجتك ؟

بهاج تنهد من طرى عليه أنهار:والله الوضع جديد دراستي وزواجي واهلي ومكاني وحلال ابوي اللي تركه

ابراهيم:دامك تفهم بتخصصك بعطيك ملف تقراه وعن الشراكه بشركتي والاسهم والايردات ، انا كل اللي ابغاه شريك عشان نطلع أسرع

بهاج:والله خرجت من جامعتي اسأل عن اهلي الفكره هذي ماهي براسي ابد

ضحك ابراهيم:فكر بالله انت بعمري وأول تجاره لك بتكون معاي ، وابيك معي ٥٠٪؜

التفت عليه بهاج:بس ماعطيت !

ابراهيم:قلت لك التجار اللي قابلتهم طمعانين ومامنهم ضمان يشاركون بشركات صغيره لين يخسر الشريك ويبيعها عليهم ويكملون بالشركه لوحدهم

بهاج:فاهم كثير

ابتسم ابراهيم:وانت تفهم بعد

بهاج سكت ثواني ولف عليه ابراهيم:نصيحه بهاج لا توقف محلك وتضيع حلال ابوك حطه بالمكان الصح ، واضمنّي

ناظره بهاج ثواني والتفت للطريق:على خير

في نص غداه وافكاره اللي تروح وتجي رفع راسه:تنصحني بحيّ معين بالرياض ؟

ابراهيم ناظره:ودك تشتري ؟

هز راسه بهاج:ابي بيت

ابراهيم:والله الاحياء الممتازه كثيره منها الحي اللي انا فيه ، في نفس الشارع بيت بيبيعه صاحبه عمّر وخلص وشطب كل شي باقي اثاثه بس طلع له شغل خارج السعوديه واضطر يبيع

بهاج:كم دور ؟

ابراهيم:دورين مساحته زينه وشغله زين وجديد ونظيف محد سكن فيه المويه والكهرباء واصلين

بهاج: لو كان في خير بشغلك بشتريه

ابراهيم ابتسم:قلبها براسك بتكسب كثير يابهاج

هز راسه بهاج:على خير

ناظرت ريوف اللي نايمه واخذت نفس تغمض عيونها بقوه وتحاول تنسى غضبه اللي بدون سبب مرضه اللي بدون سبب اختلافه اللي يجهلونه ويستغربونه

رفعت راسها تمسح دموعها هي تحس بان كل شي فيها ينهار ، ضعف ريوف وحزنها وخوف نورا وبزوايه محد يعرفها اشتياقها لبهاج وحاجتها له

لفت لجوالها تناظره وتنهدت تمنع نفسها تتصل ماتبغى تكون سبب في انه يترك باقي اختباراته ويجي عشانها بس هي تموت من حاجتها له

اخذت نفس من دخلت نورا عليها وناظرت ريوف اللي لا زالت نايمه وناظرت أنهار:بشوفه وارجع هنا طيب ؟

هزت راسها أنهار بالنفي:لا تروحين

نورا:مو قادره

أنهار:بيطردك !

نورا:عادي بس بتكلم معاه بعرف شصاير معاه ليش تحول لشخص كاره لنا !

تنهدت انهار وخرجت نورا تاركتها ووقفت انهار تشد شعرها وتمشي لشباك غرفة ريوف

انتظرت دقايق ودق الباب ومشت وفتحته وناظرت سلطان:بهاج كلمك ؟

سلطان:لا ، ريوف قامت ؟

هزت راسها بالنفي:شوف نورا معاك بالله سلطان تكفى

سلطان:وينها ؟

أنهار:راحت عنده بتشوفه

سلطان عقد حاجبينه:توّها ؟

أنهار:لا طلعت قبل شوي

سلطان:انا كنت عنده ماجات

أنهار عقدت حاجبينها:وينها اجل ؟

تنهد سلطان والتفت يمينه وشماله ولفت أنهار من قامت ريوف ورجعت ناظرت سلطان:شوفها تكفى

هز راسه ومشى يدورها بالمستشفى

اخذت نفس أنهار ودخلت لريوف:صحيتي ياعيوني ؟

ريوف اخذت نفس:تعبانه أنهار بموت مخنوقه

تقدمت وجلست عندها وتنهدت:بس مو لحالك

ريوف بكت:ليش يسوي فيني كذا ؟ أنهار انا كنت انام بحضنه كان يجلسني بحضنه كان يبعدكم كلكم عشان انا اكون بحضنه !

أنهار:ريوف كلنا مستغربين ومصدومين كلنا نشوفه شخص ثاني مو نفس اللي نعرفه وربينا معاه

ريوف مسحت دموعها:معد ابغى اشوفه اخاف منه

مسحت على شعرها أنهار ولاعرفت ترد عليها هي تنحرق اكثر من ريوف

مسكت كف أنهار:بهاج ما وصل ؟

هزت راسها بالنفي:مايعرف

ريوف:ياليته موجود محد يفهمني زيه لو كان موجود ماكان صار فيني كذا

أنهار اخذت نفس بهدوء:بطلع اشوف نورا اقدر اخليك لحالك صح ؟

هزت راسها ريوف وابتسمت أنهار لها ومشت خرجت ومن قفلت الباب بكت

شهقت تمشي للكرسي اللي قدام الغرفه وبكت حضنت نفسها تبكي بتعب تحس بالوحده مو قادره تحزن مع خواتها حتى ، نورا تهرب منهم عشان تبكي وهي نفس حال خواتها

رفعت عيونها بسرعه من حست بكفه وتلاشت صدمتها وهمست:فهد

فهد:علامك وانا اخوك !

جلس جنبها وناظرها:ليه تبكين ؟ ريوف فيها شي؟

هزت راسها بالنفي:تعبانه فهد مرره

فهد:ما عليه هو تعبان ولاهو بوعيّه قالوا ان حرارته تشتعل تلقينها أثرت عليه

أنهار هزت راسها:لا فهد مو مرض مو تعب هو بوعيه هو كذا من يوم وصلنا لهنا

تنهد فهد:بس انتي قويه واختك تحتاجكم تراها دلوعه خلقه من ربي

مسحت وجهها أنهار تاخذ نفس ووقف فهد:بشوفها

هزت راسها ووقفت تدخل معاه ودخل فهد وابتسم من شاف ريوف وكشرت من دخل:افا تكشرين بوجهي ؟

ريوف:حسبالي بهاج

فهد:لو تدرين وش سويت تقولين وش بهاج عند شليويح !

ريوف ناظرته ودخل يده بجيبه وطلع كتكات وناظرته ريوف وابتسم فهد:والله اني شاريه عشانك

ريوف:ما اصدق كنت تبغاه لك بس تسلك لي

فهد:والله ما فيني خير عندك ، افا هذا وانا صرت اقول عن نفسي شليويح عشان تضحكين

وناظرتهم أنهار:طيب وانا وين كتكاتي ؟

فهد:انتي بهاج يجيب لك هذي محد لها

ريوف:لا بهاج ما يفكر في أنهار بس حتى فينا كلنا

فهد تنهد:يعني وشو بهاج بس !

ريوف اخذت الكتكات من يده:خلاص شكراً بس لا تذلنا

فهد:لا ماعليك بالعافيه

اكلت منه ريوف ولف يناظر المحلول بيدها:يعورك؟

هزت راسها بالنفي:ياكثر كلامك فهد اسكت شوي ناظرها تاكل:طيب طلعي كتكاتي من بطنك

ضحكت لانه زعل منجد:قلت ماراح تذلني !

فهد:ما فيك خير

ابتسمت أنهار:بس نادتك فهد ترا لو ما انتبهت

ريوف ناظرتها وضحكت بتعب:والله نسيت المفروض ما اناديه

،

تقدم بالممر يدورها هو لف المبنى كامل ولا لقاها لكنه من نزل للكوفيهات لمحها

مشى وهو ياخذ نفس براحه ويناظرها تكلم بكرسي لوحدها وتقدم لها

وقف وهو يسمعها:ما اعرف شصار له فجأه طاح وفجأه قام ما يبغانا مو قادره اتكلم تعبانه خلاص

سكت وتنهد من عرف انها تكلم بهاج او توقع لانه جمد من نطقت:بندر مو قادره اتذكر شكله وهو طايح كنت خايفه اخسره ، بس هو كارهنا كاره وجودنا هو تغير حتى بمرضه ما يبغانا ، بندر تعبانه تعبانه كل اللي ابغاه نرجع زي قبل ويختفي كل شي من حياتنا

شد على يده وهو يسمعها وعض على اسنانه بقوه ورجع بخطواته

غمض عيونه يخفي عصبيته ومشى يجلس ويهز رجله بعصبيه هي لجأت له بضعفها مع انه تركها ونساها بعد اول مشكله ، هو متأكد انها هي اتصلت عليه هو يدري انها هي اللي متمسكه فيها

رفع انظاره من خرجت أنهار وعقدت حاجبينها من ناظرته:سلطان ؟

تقدمت له:مالقيت نورا ؟

سلطان:الا موجوده تحت تشرب قهوتها

هزت راسها أنهار:كويس ، طيب شفته؟

هز راسه بالإيجاب:جدي وجدتي واعمامي كلهم عنده

أنهار:وعادي ؟

سلطان تنهد:مافيه شي

أنهار:بس احنا اللي مايبينا يعني !

سلطان:والله أنهار حتى انا جاهل كل شي قاعد يصير كل شي حواليني مدري عنه

بلعت ريقها أنهار:كل اللي ابغاه يكون موجود بهاج وبس

سلطان:لا يرحم امك وابوك لا تعلمينه خليه يكمل اختباراته

أنهار:سلطان هو يسألني كل شوي هو يتصل كل شوي

سلطان:ماعليه باقي له هالاختبارين ويرجع ان شاء الله

تنهدت أنهار وناظرها سلطان:تكفين

هزت راسها:طيب

سلطان:تبون تمشون ؟

أنهار اخذت نفس تناظر سلطان وكمل سلطان:مالكم مكان ارجعوا احسن لكم

هزت راسها ومشت تدخل الغرفه ولف سلطان يناظرها جايه من نهاية الممر ودخل الغرفه

تقدمت أنهار لريوف:بنرجع البيت

ريوف ناظرت أنهار ورفعت كتفها أنهار:نجلس ليش؟

دخلت نورا ولفت لها أنهار:وقت تشربين قهوه ؟

عقدت حاجبينها نورا وكملت أنهار:بنرجع البيت

نورا:جيتيني انتي وانا تحت ؟

أنهار:لا سلطان

رفعت نظرها لسلطان اللي ناظرها وكأنه يثبت لها تفكيرها وبلعت ريقها وصدت عنه

فهد:لا تساعدونها بتقدر تمشي على حيلها

ريوف عقدت حجاجها بزعل:أنهار !

أنهار:اساعدك بس تعالي

مشت تخرج وريوف مستنده عليها ونورا تمشي بخفوت خلفهم ناظرت سلطان اللي يمشي قبلهم ووقف عند غرفة ابوهم ولف لفهد:اقعد انا برجعهم

فهد:مالي داعي قسم

سلطان:اقعد احسن

هز راسه فهد وكملوا يمشون ودخل فهد الغرفه ولف له الشيبه:وينك انت ؟

فهد ناظر عمه اللي جالس وياكل من يدين حليمه:كنت مع البنات

الشيبه:وينهم هم ما يجون يسلمون على ابوهم ؟ شهالبنات ؟

حليمه لفت لفهد:ناديتهم بس ماجو

فهد رفع حاجبه لعمر:طردهم عمي عمر

رفع راسه عمر لفهد وكمل فهد:بس شكله ناسي

لف يكمل يناظر جده وأعمامه:وريوف تعبت وطاحت عليهم والحين رجعوا مع سلطان

رَده:وريوف شنهي ؟

فهد:اصغرهم

هز راسه زيد ولف يناظر عمر اللي ساكت

رَده ناظره:علامك طارد بناتك ؟

عمر:ما اذكر شي ما اذكر شي

سكت فهد يناظرهم ونطقت جمعه:تعبان ماكان بوعيه والا من يطرد بناته

فهد:ما طردهم بس هو عوّر ريوف وطيّحها بالارض

رفع راسه عمر بحده:خلاص انت !

فهد رفع حاجبينه:شكلك تذكرت

سكتوا يناظرون بعضهم وهز راسه فهد:ان بغيتوا شي انا برا

خرج فهد ولفت حليمه لعمر وهمست:صادق؟

عمر:شيلي اكلك مابي شي

بلعت ريقها جمعه تشد على قدم عمر اللي ممده عندها

،

وصلوا ووقف عند بيت بهاج ونزلت أنهار اللي كانت جنبه ولفت لريوف اللي همست:اقدر امشي

دخلوا وقفلت بابها أنهار ونادته:سلطان

اخذ نفس والتفت لها وتقدمت له:اشبك ؟

سلطان:وشفيني ؟

نورا:ما اعرف تطالع فيني بنظرات غريبه

سلطان ضحك بسخريه وصد عنها:ماهو وقته

نورا بلعت ريقها:لا وقته ليش تطالع فيني كذا ؟

سلطان:انتي تدرين وخايفه اني دريت عن غلطتك واني سمعتك ترخصين نفسك

جمدت ملامحها:ارخص نفسي ؟

سلطان تقدم لها بحده وهمس:واحد باعك بأول مشواركم ولا دوّر لك خبر تدقين عليه تبكين وتشكين له ليش ؟

نورا توترت وناظرته:برضو احترم نفسك وانتبه لكلامك

سلطان بغضب:زعلتي عشان قلت ارخصتي نفسك ؟ هذا الصدق ارخصتي نفسك لواحد لاهو محرم لك ولاهو يبيك وشاريك لو انه يبيك وقف على بابك من جديد وطلبك بالحلال لكنه خوّاف وجبان يستغل ضعفك بمكالمه مدتها عشرين دقيقه

نورا صدت عنه بنظراتها وكمل سلطان:عيبك ماتشوفين الا اللي تبين تشوفينه

لفت له نورا بهدوء:باقي يحبني وباقي يبغاني

هز راسه سلطان ومسك شنبه:احلقه ان شفته مره ثانيه بمجلس ابوك ، احلق شنبي وانتفه

ماردت عليه ومشت من جنبه وعض شفته بغضب يناظر محلها

،

مشت خارجه من الغرفه ولفت لنورا اللي دخلت همست أنهار:نامت ريوف انا بنام بغرفة بهاج

نورا عقدت حاجبينها:ليش ؟

أنهار:ماودي ازعجها

نورا هزت راسها ومشت أنهار لغرفته

اخذت نفس من دخلت وقفلت الباب خلفها تناظر محل نومه وفراشه ولفت تناظر مكانهم قبل يغيب ويروح مكان ، حضنه لها وكيف ماترددت تبوسه قبل يروح

مشت وانسدحت على فراشه وضمت نفسها على مخدته وتغطت واخذت جوالها دقت عليه بعد محاولاته ورسايله

دخل شقته وهو يقرأ الملف اللي بيده ومركز ومن دق جواله قفله وطلعه من جيبه وجلس:وينك انتي ؟

عضت شفتها تبكي بدون صوت من سمعت صوته وكمل بهاج:من صبح الله ادق عليك ، صاير شي ؟ علميني

شهقت تبكي وجمدت ملامحه وهمس:تبكين ؟

هزت راسها بالنفي تبكي:قالوا لي لا تقولين له بس ماقدرت بهاج تعبانه

بهاج:اهدي وعلميني

اخذت نفس متقطع تبكي:طاح علينا بالحمام لقيناه كأنه ميت

عقد حاجبينه بخوف:منهو ؟

أنهار غمضت عيونها تبكي:بابا

بهاج:ليه وش جاه؟

أنهار:ما اعرف رحنا المستشفى معاه جلسنا عند راسه لين قام ، بهاج كنا نبكي خايفين نفقده وريوف بحضنه هي سامحته على كل جفاه بس اول ما صحى طردنا

عقد حاجبينه بهاج وكملت أنهار:ما ادري كيف جاته كل القوه ودفّ ريوف عن حضنه للارض وطاحت تبكي كان كأنه شايف ابليس يصرخ علينا بهاج

سكتت تبكي وهمس بهاج؛اعوذ بالله

أنهار:ما كأنه ابونا توقعت بيقوم يدورنا بس كل اللي سواه طردنا

بهاج:وين ريوف ؟

أنهار:طاحت بالمستشفى وجلسنا معاها لين هذا الوقت ورجعنا البيت مع سلطان

بهاج:وسلطان الكلب يقول ذبايح اجل

أنهار:بهاج سلطان ما يبيك تقطع اختباراتك وتجي

بهاج:باللعنه بباقي اختباراتي بجي

أنهار جلست وهي تمسح دموعها:لا بهاج تكفى كل اللي باقي شوي

بهاج؛بجي أنهار

أنهار:لا بهاج تكفى لا

بهاج تنهد:وين خواتك الحين ؟

أنهار:بغرفتهم

بهاج:وانتي وينك ؟

تنهدت تشد على لحافه وهمست:بغرفتك

غمض عيونه بهاج يقاوم حروفه وكلامه بكاها وضعفها وهمس بهدوء:بجيك

أنهار:تكفى بهاج لا انا بخير وحتى خواتي بخير

بهاج:شلون بخير وانتي تتوسدين همومك بفراشي ؟

أنهار رفعت كتفها:وحشتني

تنهد بهاج يشد على يده ويناظر الملف جنبه وكملت أنهار:بتجي بعد تخلص اوعدني بهاج تكفى

اخذ نفس يقول ويجلس على كرسيه ومكتبه:ما بتقفلين جوالك لاني يمين بالله ان مارديتي ديورت ورجعت لك

هزت راسها بتعب تحط راسها على المخده وسكتت

كانت نقطة ضعفه قلبت حاله لحال ثاني ما يعرفه الا معاها وتنهد:ليتك تشوفين الغلا

أنهار غمضت عيونها بتعب:بهاج

رجع ظهره لورا:لبيه

أنهار:بطلب طلب

بهاج:ما أردك

أنهار:بنام بس لا تقفل ذاكر وانا معاك تكفى

بهاج ناظر كتبه:نامي ارتاحي وشوله تتعبين نفسك؟

أنهار؛تكفى لا تقفل بهاج

بهاج:لا تكثرين من تكفى انتي تدرين ما أردك بشي

تنهدت أنهار تغطي نفسها:تصبح على خير

تنهد يهز راسه:وانتي من اهله

حط جواله على مكتبه وحطه سبيكر واخذ كتبه بتعب ضغط على جبينه بتعب وبدأ يقرأ وهو عاقد حجاجه واخذه الوقت يقرأ ويقرأ لين التفت لجواله يناظر المكالمه اللي لا زالت موجوده

هي نايمه بفراشه وعلى صوته لكن فرقهم المسافه

رفع راسه لسريره يناظره فارغ وهمس:وش كان صار لو كنتي هنا !

هو يتخيلها نايمه قدام عينه بكل فوضوية شعرها وبجامتها الحرير وعطرها اللي يشعل صدره

رفع راسه يناظر السقف ويشد على جبينه من صداعه ونزل نظره يكمل مذاكرته

،

خرج من الشقه رايح لجامعته بعد ما استودعها الله وقفل جواله ركب سيارته واتصل ينتظر منه جواب

ورد عليه:صباح الخير

بهاج:صباحك نور اعذرني ابراهيم دقيت بدري

ابراهيم:لا والله اني صاحي افطر مع عيالي

بهاج:بغيت اقولك اذا فاضي ودي بعد اختباري اشوف البيت شوف لي موعد مع صاحبه

ابتسم ابراهيم:على خير خل امورك عندي

بهاج:ماتقصر انا رايح اختبر وان طلعت كلمتك

ابراهيم:ابشر

قفل جواله بهاج وحرك سيارته هو ما تسرّع وبغى البيت الا عشانها ، عشانها تحترق في بُعده وتتعب بفراقه ولا وده بفراقها وده تعيش العيشه اللي تعودتها وتبيها ، بيت بالرياض ووسط زحامه تعيش بعيد عن كل مشاكل اهلهم ، يبي ينتشلها من وسطهم لحضنه ببيتهم ويدري ان بيزين كل شي وتصير زوجته علن وبيرتاح من كل هذا البعد

-

صحت على صوتهم برا وانزعجت تقوم وتخرج تناظرهم بإستغراب:اشبكم ؟

ريوف لفت لها:قولي لها تطلع جنانها على نفسها

نورا:انكتمي ريوف طيب ؟

أنهار:اشبكم بسم الله

ريوف:بدون سبب اختك قايمه من النوم وراكبها ستين جني ، اجل كل هذا عشان شربت بكوبها ؟

لفت أنهار على نورا وهمست:اشبك ؟

نورا:خلاص انتي الثانيه بتحسسوني اني مجنونه؟

مشت تاركتهم ودخلت المطبخ وتنهدت أنهار تجلس على الكنبه بتعب

ناظرتها ريوف؛ليش نمتي هناك ؟

أنهار:مانمت بدري قلت ما ابغى ازعجك ، انتي نمتي كويس ؟

هزت راسها ريوف:توقعت بهاج وصل

أنهار:مو جاي الا بعد ما يخلص

ريوف:كلمتيه ؟

اخذت نفس أنهار توقف:ارسل لي

رجعت للغرفه تاخذ اغراضها وتدخل الحمام

،

دخل البيت مع ابراهيم والعامل وناظره وابتسم

هم وقفوا على احلامه وقالوا مالك مكان غير المزرعه وبيت ابوك ومالك مكان بالرياض لكنه الحين يشوف بيته بيت أحلامه

من حوشه الوسيع وحديقته لبابه دخل معهم يناظر الصالات والغرف والمطبخ

ولف ابراهيم عليه:تصميمه حلو ماشاء الله

هز راسه بهاج وهو يناظر حوالينه وتكلم العامل:في مكيفات في اجهزه كهربائيه

لف بهاج:ما بياخذها ؟

العامل:لا يبيعها عليك بفواتيرها

هز راسه بهاج: مو مشكله

ابتسم ابراهيم:شرّاي ياجاري ؟

ضحك بهاج:شرّاي

التفت ابراهيم:على بركة الله

خرج معهم يتجه لتوقيع العقد ويقابل صاحب البيت ويتفق معه على كل شي ، هو حط مبلغ كبير من ورث ابوه في بيت ولا ندم ولا تندّم

هو معد بيقول لاحلامه لا ، هو مو لحاله الحين هو معها وهي معه بحياته وكل هذا عشانها قبل يكون عشانه

خرج ومعه صوره من العقد والمفتاح ولف له ابراهيم:اذا ماعندك شي بهاج خلنا نروح الشركه نتكلم بالتفاصيل

بهاج:تقدم وانا وراك

هز راسه ابراهيم وركب بهاج وحرك ورا ابراهيم

هز راسه وهو تاكي على مكتب ابراهيم يناظر الاوراق ويسمع منه:فهمت ، بس هالتحليل مبدئي ؟ في زياده ممكن تصير صح ؟

ابراهيم:عليك نور هذا اقل شي ممكن نوصل له وممكن يرتفع المؤشر للأعلى

وقف بهاج وحك دقنه هو اخذ وقت يقرأ عن شغل ابراهيم وكلم محامي عشان يعلمه عن مصادقية أوراق ابراهيم وطلع شغله سليم

ابتسم ولف لابراهيم:معاك ياشريك

ضحك ابراهيم وحضن بهاج:قسم بالله قلت ماتردني

جلس على كرسيه ابراهيم:طيب نوقع العقد ؟

بهاج:نوقع بس قبلها بقولك اني راجع لاهلي بعد يومين

ابراهيم:ماعليك بهاج كل المستجدات بتوصلك وبنتواصل وان كان في شغل نحتاجك بقولك قبلها بوقت

بهاج:كويس كذا

لف ابراهيم للموظف وابتسم بهاج لانه انتبه على كلامه ، على كلامه اللي صار يشبه كلامها وكيف تقول كويس كذا وكيف نَطقها على نُطقها

ونزل راسه لجيبه ياخذ جواله اللي يدق وناظر اسمها ولف لابراهيم:دقايق

ابراهيم:خذ وقتك

مشى بهاج لين البلور يناظر الرياض بمدى بصره ورد عليها:كل مافيني يهلّي

ابتسمت بهدوء:اختبرت اكيد

بهاج:اختبرت

أنهار:كيف ضبع والا سبع ؟

بهاج:كل خير ان شاء الله كل خير

أنهار تنهدت براحه:باقي اختبار واحد صح بهاج؟

بهاج:صح برجع بعد يومين ان شاء الله

أنهار:ماتقدر تجي بعد اختبارك على طول بكره ؟

بهاج لف لابراهيم اللي مع الموظف ورجع التفت:بخلص شغلي واجيك

أنهار عقدت حاجبينها:اي شغل ؟

بهاج:لا رجعت تكلمنا

أنهار:اوكيه

بهاج ابتسم:تصبرين يومين زياده ؟

أنهار ابتسمت:ما ادري انا احس انك تزيدها عشان تقيس شوقي !

بهاج ضحك:اعقب ، ما ينصبر عنك

ابتسمت ونزلت نظرها ثواني ولف بهاج لابراهيم:طيب توصين شي ؟ لا رجعت الشقه كلمتك

أنهار:اوكيه انتظرك

بهاج:وبكلم ريوف ان دقيت عليك

أنهار رفعت راسها:بشوفها

بهاج:ترفقي بحالك

أنهار ابتسمت:باي

قفل منها ولف لابراهيم وابتسم ابراهيم:جاهزه الاوراق

بهاج جلس:وانا جاهز

ابراهيم:بهاج كلمته يجهزون لك الغرفه اللي جنب مكتبي هي الحين فاضيه لكن برتبها عشانك

بهاج:ماله داعي مابطول هنا

ابراهيم:لزوم مكتب الشريك

ابتسم بهاج واخذ الاوراق من يد ابراهيم يقراها

هو راجع بصك بيت وعقد شغل ولا توقع ان بأسبوعين بيختلف وضعه ويتغير لكن ربي يسرها

،

فتحت الشباك تشوف سياراتهم تدخل واخذت نفس تشوفه ينزل معهم ويتجه للملحق

بلعت ريقها تخفي عبرتها ورجعت من شافت حليمه متجه لهم ومشت للباب وناظرتها تدخل

لفت ريوف عليها وحطت جوالها وقامت تدخل الغرفه

تكتفت أنهار تناظرها واقفه وجلست حليمه:وين نورا ؟

أنهار:بالمطبخ

حليمه:ناديها بتكلم معكم

خرجت نورا وناظرتها:اسمعك

حليمه:ابوكم رجع حمدلله

نورا:طيب ؟

حليمه اخذت نفس:بغيت اقولكم ان ماعندي علم عن اللي صار بالمستشفى علمني فهد ولا عرفت وش اسوي ، عمر ماهو كذا معاي

أنهار:ندري ماهو معك كذا والا ماكان صبرتي عليه

حليمه:ابوكم قبل يتعب كان يوريني مقاطع لكم بجواله سفراتكم وجيّاتكم حتى امكم الله يرحمها لكنه نام وبعد ماقام انتكست حالته ، هو كان عادي مافيه شي

نورا:بعد ماشافنا ، بسيطه

حليمه:انا ماتكلمت الا لاني مصدومه ابوكم بالبدايه كان أهون الحين زادت حالته

أنهار:طلعت له سبع ايادي يوم طيّح ريوف بالارض وهذا وهو تعبان

حليمه:حتى انا مصدومه ولا اعرف اسبابه ولاهو يعرف اسبابه سألته لكنه انزعج وقفل الموضوع لانه يدري ماعنده اجابه

نورا:جايه عشان تقولين كذا وش المطلوب نسامحه يعني ؟ ريوف طاحت بسببه وتعبانه بسببه لا تدافعين عنه لانك ماذقتي منه شي

أنهار لفت لنورا:اشبك نورا ؟ شوي شوي طيب !

نورا رفعت صوتها:جايه تقولنا هو مايعرف وشفيه من بلاء ! بعد ايش بعد ماعورنا كلنا ؟ تكفين اذا انتي عادي تسمعين كلام ماله داعي كذا ؟ انا مابي اسمع

مشت وتركتهم ولفت أنهار على حليمه وتكلمت بهدوء:مو منتظرين شي منه خلاص ، يكفي يتركنا بحالنا

حليمه تنهدت وصدت ثواني ولفت لها:بهاج اخوك كلمك؟

سكتت أنهار من نطقت بأخوك وناظرتها هي ما تبطل تذكرها حتى بأصعب اوقاتهم ونطقت أنهار:لا

حليمه وقفت:طيب بشوفه انا

خرجت من البيت وتأففت أنهار ومشت المطبخ وناظرت نورا:اشبك انتي اليوم ؟

نورا:مو فايقه لك

أنهار:يعني هذي ردة فعلك من اللي صار ؟ طيب ما تلاحظين انها علينا احنا ؟ واحنا معاك متأذين

لفت نورا ناظرتها:أنهار مو فايقه لك اطلعي عني

عقدت حاجبينها أنهار:اطردي انتي بعد لان ماشاء الله الكل الحين يطردني

نورا صرخت ورمت الاغراض وناظرتها أنهار بصدمه

لفت نورا:وين اجلس لحالي يعني ؟ وين اهرب ؟ خلاص خلوني بحالي

خرجت ريوف وعقدت حاجبينها ومشت نورا اخذت عبايتها وطلعت ولفت أنهار:فيها شي

ريوف:ما اعرف

اخذت نفس أنهار هي ماكان ينقصها نورا زياده ابداً

ناظرت جوالها اللي يدق واخذته ورفعت راسها لريوف:بهاج ردي عليه

مشت ريوف واخذت الجوال ومشت أنهار تاخذ عبايتها وتسمع ريوف ترد:الو

بهاج:من ؟ ريوف ؟

ريوف:ايوا

ابتسم بهاج:افا ما تدقين علي ؟

ريوف تنهدت:ماقالت لك أنهار ؟

بهاج:الا وصلني العلم

ريوف بضيق:توقعتك تجي بهاج

بهاج:بخلص اموري واجيكم ومعي اغراضك

ضحكت بصدمه:اخذتهم ؟

بهاج:ابتلشت كل يوم يتصلون يصحوني استاذه ريوف عندك طلبيه

ضحكت ريوف:كلهم اخذتهم بهاج ؟

بهاج:اظنها كلها معد احد اتصل علي

ريوف ابتسمت:شكراً مره

بهاج ناظر طريقه:وكيف الوضع اليوم ؟

ريوف:اليوم الدور على نورا ما ادري شفيها معصبه وتصرخ من بداية اليوم

عقد حاجبه بهاج:ليه وش صار ؟

ريوف:ما اعرف يمكن معصبه من اللي صار بس ماكانت كذا بالمستشفى

بهاج حك حاجبه:وأنهار ؟

ريوف:أنهار راحت ورا نورا تشوفها

بهاج:امي يوم جاتكم وش قالت ؟

ريوف:ما ادري شفتها دخلت ودخلت الغرفه انا

بهاج هز راسه يفكر ونطقت ريوف:متى جاي ؟

بهاج:يومين ان شاء الله وراجع

ريوف اخذت نفس بضيق:اوكيه

بهاج:وسلطان وفهد وينهم ؟

ريوف:فهد ناشب لي كويس اقدر اهرب منه يقول انه بيصير احسن منك بس ما يقدر الغبي

ضحك بهاج وكملت ريوف:وسلطان معانا ما خلانا

بهاج:يالله زين فيهم الخير

ريوف:بشوف نورا بهاج

بهاج:وين أنهار ؟

ريوف:مارجعت بشوفهم انا

بهاج اخذ نفس:طيب

قفلت وناظر جواله ورجع الشقه يخلص مذاكرة اخر اختبار له

،

أنهار:؛بنت اناديك انا !

لفت نورا عليها:انا مو قلت اتركوني بحالي ؟

أنهار:مو على كيفك تقلبين الدنيا وتقولين خلوني بحالي وقفي فهميني وش هذا اللي تسوينه ؟

لفت نورا عليها واخذت نفس:أنهار تكفين

أنهار ناظرتها بحده:تكلمي

بلعت ريقها نورا تصد بنظراتها وتقدمت لها أنهار

لفت نورا عليها:كنت تعبانه ومالقيت احد اقدر اتكلم معاه دقيت عليه أنهار ، دقيت وانا حلفت ما اكلمه لانه من بعد ما طلع من هنا جحدني ولا سأل عني لكني ضعفت ودقيت

نزلت دموعها وناظرتها أنهار وفهمتها فهمت مقصدها

ولفت نورا عليها تكمل:وسمعني سلطان

أنهار:قالك شي ؟

نورا:قال اني ارخصت نفسي ! تخيلي

اخذت نفس أنهار بغضب وكملت نورا:عصبت لانه صادق لانه صفعني بكلامه صحّاني أنهار ، قالي انتف شنبي لو بغاك وهو فعلاً ما بغاني

بكت وتقدمت أنهار تحضنها:حتى ولو محد يقدر يتكلم عنك كذا

نورا:صادق أنهار صادق ليتني ماكلمته ليتني مادورته ليتني مت بهمّي ولا دقيت

أنهار:اسم الله عليك لا تقولين كذا تكفين نورا ، طيب اش قالك بندر ؟

نورا بعدت عنها وناظرتها:طبطب عليّ عادي لكني صحيت بعد ما كلمني سلطان ، أنهار حسيت بغلطي ماكنت بوعيي ماكنت ادري لمين الجأ انا احس بالوحده أنهار

تنهدت أنهار تشوفها تبكي وشدت على كفوفها:انا موجوده نورا تكفين لا تقولين انك وحيده ، نبكي سوا ونضحك سوا لا تنتظرين من احد اهتمام انا موجوده نورا

رجعت تحضنها نورا واخذت نفس أنهار تمسح على ظهرها

بعدت نورا من شافت ريوف جايه:تحضنين أنهار وانا تهاوشيني على كوبك

لفت أنهار وعضت شفتها تناظر ريوف

وناظرتهم ريوف:اشبها ؟

أنهار:ولاشي

مشت نورا راجعه البيت ولفت ريوف:اشبها تبكي؟

تنهدت أنهار؛كلمت الزفت بندر وزعلانه لانها كلمته

ريوف:يع هي باقي تكلمه ؟

أنهار:لا ، عشان كذا معصبه لانها كلمته امس

ريوف:مالقيت تضعف الا عنده !

أنهار:خلاص لا تزيدينها عليها روحي لها انا بشوف سلطان واجيك

هزت راسها ريوف:كلمني بهاج

أنهار:سأل عني ؟

هزت راسها ريوف:مرتين توقعت يبغى شي كلميه اذا رجعتي

هزت راسها أنهار ومشت ريوف راجعه وابتسمت أنهار ومشت تهمس:مرتين

دورتهم ومالقتهم الا عند النياق مكانهم المعتاد

لف فهد يناظرها ونطق:جايه تسألين عن بهاج ما كلمنا

وقفت قدامهم وناظرت سلطان؛لا جايه اتكلم معاك

ناظرها سلطان ولف يناظر وراه ورجع ناظرها:وش العلم ؟

أنهار؛ما يحق لك تسمّع نورا كلام زي السمّ عشانها غلطت ، تفهم ؟

اخذ نفس ولف فهد يناظرهم بصدمه ورفع راسه سلطان؛زين عرفتي انها على غلط عقليها

أنهار:سلطان اعتبرناك زي بهاج طول الوقت وماقصرت لكن ما اسمح لك تتكلم عن وحده من خواتي كذا او تأذيها بكلامك ولا يحق لك تحاسبها

سلطان ضحك بسخريه:ما يحق لي احاسبها ؟ اسمعها تترجى واحد ملعون والدين وهي تبكي وما احاسبها ؟

وقف قدام أنهار بحده:اختك ارخصت نفسها عند واحد ما يبيها وانا ماني ساكت وان شافته عيني والله لادفنه

ناظرهم فهد: وش السالفه احد يعلمني !

أنهار:وتقولها انها رخيصه هذا حسابك لها ؟

سلطان لف بغضب عنها وكملت أنهار:اذا لسانك سمّ لا ترميه على خواتي ، كلم بهاج يتكلم معهم اذا شفت منهم غلط

سلطان؛بهاج وبهاج ترا بهاج معطيكم وجه

عقدت حاجبينها أنهار:بهاج حطنا ببيته ولا عمره تكلم عن وحده من خواتي بالشينه لان يدري اننا أنظف من ظنونك

سلطان؛روحي لبهاج اجل قولي له عن سواتها

أنهار؛وانت ليش حارق دمك كأنها وحده من خواتك ؟

سلطان لف لها:تعتبرونكم خوات لبهاج لكن انا ابقى غريب !

أنهار:سلطان مو قادره اتفاهم معاك اقسم بالله

سلطان:اي زين اجل فارقي

رجع جلس وناظرته أنهار معصب ومشت تاركتهم

،

كان يذاكر طول وقته وكان ملتهي طول الليل هو من يوم وصل الرياض ماعرف ينام الا ساعتين لكل يوم مايدري متى يخلص كل هذا ويرجع ، يرجع يرتاح باله مشغول ويدري ان كل شي معدوم عندهم كلم امه وفهم السالفه منها ويدري بصعوبة اللي مرّ على البنات

ناظر الساعه متأخره واخذ جواله ولا لقي منها اتصال دق عليها ورجع ظهره لورا ولاردت عليه

عض شفته بغضب:قلت ردي قلت ردي

وقف على رجلينه يرجع يتصل عليها وهو معصب

ودخلت الغرفه واخذت جوالها وردت:الو

عقد حاجبينه:وينك ؟

أنهار:كنت عند البنات ماسمعته

بهاج:والبنات ليه صاحين لين الحين ؟

تنهدت أنهار وانسدحت:مو جايهم النوم

بهاج:صار شي جديد ؟

أنهار هزت راسها بالنفي:لا

بهاج:والله ماني مصدقك بس ماشي اذا رجعت نتفاهم

أنهار:بترجع اليوم ؟

بهاج:ماظنتي لا ، بعد اختباري الظهر عندي شغل ولا نمت زين بنام وامشي بكره ان شاء الله

أنهار ميلت شفايفها وسكتت

بهاج:وشفيك ؟

أنهار:ولاشي اوكيه على راحتك

بهاج:احس بك

أنهار:ماتحس بهاج لو تحس ماقلت بنام وارتاح بعدين اجيك !

بهاج ابتسم:بس ماقلت برتاح قلت بنام

أنهار:مافي فرق

بهاج:في فرق لو قايل راحتي بالرياض وبعيد عنك أزعل من نفسي قبل تزعلين علي

أنهار سكتت وكمل بهاج:لكن والله اني مشغول

أنهار:مشغول بإيش بهاج ؟ خلصت اختباراتك !

بهاج:قلت لك لارجعت علمتك

تنهدت أنهار:وذاكرت اخر اختبار ؟

بهاج:ماله محل مخي فاض

ضحكت أنهار من حلطمته:ذاكر عشان لا يفيض مع اللي السنه الجايه

ابتسم بهاج وناظر كتبه:بتنامين وانا اذاكر اليوم بعد؟

أنهار:لا بنام عادي وانت ذاكر

عقد حاجبينه بزعل من رفضها:مو على كيفك

أنهار ضحكت:امس كنت تعبانه ونمت بدون ما احس عليك حتى اليوم بسهر وانت تذاكر لان مابقدر انام واحد عندي يذاكر

تنهد بهاج:ليتني عندك

سكتت أنهار وابتسمت وكمل بهاج:والله اشوفك بكل الزوايا

انسدحت وهي مبتسمه وسألها من تذكر:وين بتنامين ؟

ضحكت من سؤاله وابتسم من ضحكتها:تقتليني على مهل ، ترفقي

أنهار:تعودت على مكانك اسفه بس اذا رجعت بتدور لك غرفه ثانيه

تنهد من دلالها اللي يقتله:ادور ما يخالف

أنهار ابتسمت وهي تبلل شفايفها:اوكيه بخليك تذاكر وبنام انا

بهاج:افا تقولينها كذا وتجرحيني ؟

أنهار:والله تبغى تطوّل بالكلام يابهاج والا ما تنجرح انت

ضحك بهاج:لا تفهميني صح !

ابتسمت أنهار:بنام

بهاج:نومك هني

أنهار:طمني بعد اختبارك الاخير اوكيه ؟ نحتفل سوا

بهاج:تم

أنهار:باي

قفل وناظر جواله ورجع ظهره لورا يفتح على الصور وناظر صورتها وابتسم هو يخاف ينسى ملامحها من الايام اللي مرت عليه بدونها ، هو يذّكر نفسه كل يوم انها له وحلاله وزوجته وحبيبته وبكل مره يذّكر نفسه ! بكل مره يبوسها

خرجت وناظرته واقف عند الباب:نعم سلطان ؟

سلطان:بتكلم معك

أنهار:من ظهر ربي ؟ وشو كنت تهوجس ؟

سلطان:أنهار اطلعي بتكلم معك

أنهار تكتفت:كلمني هنا ماني طالعه بالشمس صراحه عشانك

سلطان؛مابي احد يسمعنا

خرجت من سمعت صوته ومشت لهم ووقفت خلف أنهار:هذا انت ؟

ناظرها سلطان ولفت أنهار:نورا بتكلم معاه انا ادخلي

نورا تقدمت تتعدّى أنهار:بتلّمع نفسك عند أنهار عشان سمعت ان بهاج راجع بكره ؟

عقد حاجبينه:شدخل بهاج ؟

نورا:لو سمع بهاج عن اللي قلته لي راح يمحيك

سلطان ناظره بحده:انا ما اخاف من احد وبهاج ما يمحيني عشانك ، بهاج ولد عمي واخوي قبل نعرفك تفهمين !

أنهار:خلاص بتتهاوشون يعني ؟

نورا:اخجل من نفسك بعد كلامك على الأقل لا تطلع وتورينا وجهك

سلطان لف لأنهار؛اختك تقل أدبها وانا جاي لك ماهو لها

ناظرته أنهار ببرود:هي تاخذ حقها منك !

ابتسمت نورا وناظرهم سلطان:انا الحمار اني جيت

لف بيمشي ونطقت نورا:انتف شنبك قريب

لف لها يناظرها ورفعت حاجبها تتحداه ولف يمشي عنهم

قفلت الباب أنهار وناظرتها:ليش ينتف شنبه ؟

لفت نورا:عناد خليه ينحرق

أنهار:تعاندينه وتكذبين ؟ مابغيت اقولها لك بس دق مره ثانيه بندر يطمن عليك ؟

سكتت نورا وكملت أنهار:عشان كذا لا تتحدين سلطان وانتي تدرين ان بندر رخمه

لفت ريوف تناظر أنهار وضحكت:اخذتي كلمه جديده من بهاج ؟

لفت أنهار على ريوف:مو وقتك ريوف

ضحكت ريوف:شهرين زياده ونصير مانفهم عليك

اخذت جوالها تناظر رسالته:خلصت اختباري بنشغل الحين وان رجعت وامداني اكلمك قبل انام كلمتك

تنهدت وقفلت جوالها

،

دخل على ابراهيم:سلام عليكم

ابراهيم:هلا بهاج ما طولت !

بهاج:جيت اخلص كل شي قبل امشي

ابراهيم:متى ماشي ؟

بهاج:الليله ان شاء الله بعد المغرب مواعد عمال بالبيت وبعدها راجع

ابراهيم:بهاج والله اني صادق ان بغيت شي ببيتك انا موجود ارسل عمال للبيت بغيابك

بهاج:ماتقصر ان احتجت شي بقولك

ابراهيم:طيب هاك شوف الاوراق هذي تمعّن فيها وخل يكون عندك خبر بنبيع سهمين من الشركه بهالمبلغ وبنلاقي شرّاي

بهاج رفع حاجبه:مو كثير السعر على سهمين ؟

ابراهيم ابتسم:كثيره بس السوق مليان وبنلاقي مشتري بوقت قصير

بهاج:على خير بس انا اقول خلها ثلاثه

عقد حاجبه ابراهيم:ليه ؟

بهاج:سهمين على هالسعر بيشوفونا طمعانين من البدايه ومو حاسبينها صح ! خل ندخل شوي شوي ونترفق

ابراهيم:بس ترا بنلاقي مشتري لسهمين

بهاج:بس بنكسب تجار بالثلاثه

رفع حاجبه بهاج يناظر ابراهيم اللي يفكر ولف بهاج:خل الموظف يرسم لك بالثلاثه وشوف نتايجها البعيده ومن بيشتري وكم واحد بيشتري

ابراهيم:طيب بس انتظرني اشيّك

وقف ابراهيم وخرج واخذ جواله بهاج ورد على اتصاله:ايوا ، خلاص بعد المغرب بكون بالبيت انا ان شاء الله

عقد حواجبه:انت قلت بعد المغرب اجيبها للبيت ؟ ليه بعد العشاء ؟

هز راسه:طيب بس لا تتأخر ٨ انت هناك

قفل جواله من دخل ابراهيم ومعاه موظف وتكلموا بتفاصيل الشغل سوا

،

دخلت الغرفه تناظر الساعه ١٠ واخذت نفس تسترجع كلامه بإنه بينام والأكيد انه نام

تنهدت تنسدح مكانه وفتحت عن رجلينها تمسح جسمها بالكريم وتناظر الساعه

ومن دق جوالها لفت بسرعه تاخذه ومن قرت اسمه ردت:بهاج ؟

ابتسم لانها ردت بسرعه:هالمره كان عندك أمل صغير والا عدمته ؟

أنهار ابتسمت:توقعتك نمت

بهاج اخذ نفس يناظر الطريق وظلمة الليل:لا والله بعدني مانمت

أنهار همست بتردد:بتنام ؟

ابتسم:شوي وانام

كان يقصد انه شوي ويوصل وينام ببيته لكنها تنهدت تنسدح وترفع شعرها:ومتى تصحى عشان تجي ؟

بهاج:ان صحيت الصباح افطرت وجيت ويمكن اصلي الظهر واجي والله مدري

أنهار عقدت حاجبينها بحده:بهاج تستهبل ؟

بهاج ضحك وكملت أنهار:قول متى تجي عشان اذا بتجي قبل انام اروح انام مع البنات

بهاج:لا نامي بفراشي

أنهار اخذت نفس:اوكيه

بهاج ناظر طريقه والكيلومترات اللي اقتربت وكان يسمع سوالفها وكلامها واسئلتها وهو يرد بهدوء

:ماتصبرين ؟ قلت ان جيت علمتك وش اشغلني

أنهار:من امس افكر بهاج يعني اش اللي يشغلك بالرياض ؟

بهاج:والله ماشغلني غيرك

رفعت حاجبينها:اها ، قول بتنام وكلامك كثير يا أنهار ليش تسكت ؟

بهاج ابتسم:هي والله ماكان قصدي

أنهار:ليش هالمره مافهمتك صح ؟

بهاج:فهمتيني غلط

وقف بهاج عند البوابه وهمس:دقيقه

دق بوري وحط جواله على اذنه وابتسم:الو

أنهار:سمعت بوري برا بسم الله

بهاج:والله ؟ من جايكم الحين ؟ احد برا ؟

أنهار جلست:لا ما اتوقع احد خرج

بهاج ابتسم وسكت يوقف سيارته:طيب اطلعي شوفي من

أنهار:لا اخاف بهاج ترا من يوم رحت انت ما طلعت برا الا مره وحده وكنت اكلمك ، اخاف يطلع لي كلب والا اي حيوان

بهاج اخذ نفس يقفل سيارته:طيب انا اكلمك الحين اطلعي تمشي

أنهار:لا تكفى مافيني وبرد الجو الحين

بهاج غمض عيونه من قهره وضحك:أنهار اطلعي

أنهار:انت بتنام الحين بتطلعني بالبرد ليش ؟ عناد بس ؟

بهاج:لا ، مشتاق لك بس

سكتت وابتسمت بحيا وثواني اختفت ابتسامتها وجلست:بهاج ؟

ضحك لانها استوعبت بعد وقت طويل وهي ساكته ومن سمعت ضحكته وقفت:احلف انه انت

ضحك من فرط سعادته ومن صدمتها ومن حماسه ومن محاولاته بإنها تطلع لانها بتشوف سيارته

بتشوفه واقف عند البيت

شد على الدركسون من قفلت وغمض عيونه بخوف لانه ما يقوى يخاف انه بعد كل هالتباعد بيكون ناوي يسلم لكن يضيع السلام ويقول ضميني

فتح عيونه من فتحت الباب وابتسم من سيارته يناظرها

وعضت شفتها من شافت سيارته ووقفت بصدمه تضحك

انتظرها تجي لكنها واقفه محلها ونزل من السياره يناديها بيدينه وهمس:تعالي

ركضت تضحك وتنهد وهو يشوفها جايه له وغمض عيونه من ارتمت بحضنه

رجع بخطوته لورا وهو يشدها له ويرفعها لحضنه

غمضت عيونها من حست بحضنه من شمت ريحته من جديد من عرفت انه ما قوّى ينام وجاها ، جاها قبل تشرق الشمس وقبل ينام

ابتسم وده يدخلها بين ضلوعه ومن فرط شعوره رجعها لوراها على السياره يحضنها ينزل لمستواها ويحضنها ميل راسه لعنقها ياخذ نفسه الطويل بعطرها

بعد يدينه عن حضنه ولكنها شدت حضنه ماتبغى تتركه وابتسم:بشوفك

بعدت عنه وهي تبعد شعرها عن وجهها وابتسمت

رفع كفوفه على وجهها يقربها منه يبي يعدم شوقه يبي يبوسها نفس ماكان يبوس صورتها هو قرب منها  وغمضت عيونها لكنه بلع ريقه يرجع ويصبّر نفسه لانه ما بيقوى بعد بوستها

فتحت عيونها من تردد وناظرته يعض شفته وهمس وهو قريب منها:تدرين عن وش يردعني ابوك ؟

بلعت ريقها من حط جبينه على جبينها ومسكت كفوفه اللي على وجهها تناظره

وناظرها يشد وجهها بقوه لجبينه وضاع من قهره قهره انها واخيراً قدامه لكنه محروم وهمس:بوسيني انتي

ضحكت تبعده مسافه من توترها وصدمتها لطلبه وناظر ضحكتها وابتسم:ماني قليل أدب انتي حلوه حيل

بان على ملامحها الخجل وزاد بلهفته من شافها تضحك من حيّاها ورجع يشدها لحضنه وابتسم:ترفقي فيني تكفين

ابتسمت تحضنه ومشى معها وهي بحضنه تمشي ودخل البيت لفت له تبعد شعرها عن وجهها من حياها وتناظره ينزل شوزه عند الباب ويناظرها

لف على غرفة البنات وهمس:نيّام ؟

هزت راسها ومشى يدخلها تحت ذراعه ويدخل غرفته ويناظر اغراضها:انتي سكنتي فيها ؟

ضحكت تحاوط ظهره وتناظر اغراضها:لو قلت انك بتجي وما بتعاندني شلتها

ابتسم وناظرها وباس جبينها بقوه وشدت بيدينها الثنتين على ثوبه هي تحس فيه يبوس جبينها وابتسامتها تشرق من وجهها من فرحتها

رفعت راسها له وهي تحاوط ظهره وحطت دقنها على صدره تناظره وهي مبتسمه كانت تشوف نظراته لها اللي تخرج منها نيران اللهفه وهمست

:أحب نظراتك لي

تمنعت بنظراته اللي تلمع وكملت:تحسسني قد إيش انا حلوه

ابتسم ورفع حاجبينه:بس نرجسيه

ضحكت تفك يدينها عن ظهره وترجع لورا بتوتر

ناظر توترها بكفوفها اللي تفركها ببعضها:وش بتعطيني هديه ؟

رفعت راسها تضحك:بس انت اللي سافرت !

بهاج هز راسه:صح

أنهار:وان شاء الله ماتكون ناسي هديتي

بهاج:ناسيها بالسياره الصراحه

تقدم يمسك كفها وناظرت كفه ورجعت ناظرته يتكلم:بجيب شنطتي وجاي

ابتسمت ومشى يخرج وغمضت عيونها من حماسها ومشاعرها ومشت للمرايه تعدل شعرها وشكلها واخذت نفس تهدي نبض قلبها وابتسمت

دخل وشنطته بيده وقفل الباب خلفه ومشى يجلس وجلست قدامه وتناظر الشنطه وسطهم

رفع راسه:بتعجبك

هزت كتفها تنتظر هديته وناظرت وجهه من صد بنظره يفتح شنطته وعضت شفتها تعشق ملامحه وتحبها وتحب اختلافه عن كل اللي شافتهم عيونها

نزلت انظارها لشنطته وعقدت حاجبينه تمد يدها:عطري !

ناظرها تطلعه وناظرته بصدمه:انت اخذته ؟

بهاج:دورتيه ؟

هزت راسها:فقدته بس توقعت انه بمكان يعني

بهاج:معي

ابتسمت بإستغراب تناظر صدوده:ليش اخذته؟

بهاج ناظرها:طرأً للشوق ان غلبنا

نزلت نظرها بحيا وناظره بين يدينها:احبه

رفعت راسها له وكمل بهاج:احب عطرك

ابتسمت:وانا كمان احبه

طلع من شنطته الملف ومدّه لها واخذته:ايش ؟

بهاج:اقريه

فتحته تقراه وعقدت حاجبينها ولفت له:ايش هذا؟

بهاج:وش مكتوب ؟

رجعت تقرأ:عقد شراء بيت

نزلت انظارها لأسمه وتوقيعه ولفت له:شريت لك بيت؟

بهاج:لنا

سكتت وكمل بهاج:بيت لي ولك ، لزوجتي

جمدت ملامحها ترجع تقرأ العقد:بهاج هذا غالي !

بهاج هز راسه ولفت له:من فين لك؟

بهاج:ورث ابوي

أنهار:شريت البيت بكل ورثه ؟

هز راسه بالنفي وظلت تناظر العقد تفكر ولفت له وهمست:بهاج !

ناظر خوفها وتغير ملامحها وتكلم بهدوء:ما وقفت قدامهم وقلت انك بوجهي عشان تخافين ! ولا تحديت ابوك وعاندته وتزوجتك عشان تخافين ! ولا بوقف لطلاق ابوك من امي واخليه يحرّمك علي وانتي حليلتي ، ولا بسكت لو قالوا انك ما تناسبيني ولا تشبهيني ولا لايقه علي ، وبقول لنورا وريوف اني متزوج اختهم واني اخوهم الثنتين

ناظرته وبلعت ريقها وكمل بهاج:ما بوقف أنهار ، باخذك من هنا واخليك تعيشين العيشه اللي تعرفينها واللي تعودتي عليها وزود ، انتي تحبين الدلال وانا بدللك

ابتسمت تناظره بين دموعها اللي تجمعت بعيونها وكمل بهاج:بيمنعونا بس لا تخافين انا شجاع وبكسبك

ماقدرت تقاوم بعد كلامه وما تحضنه ماقدرت ظلت ثواني تتأمل نظراته لها لين تقدمت له تحضنه واخذ نفس طويل ودف برجله الشنطه اللي بينهم يسحبها بذراعه لحضنه وتتوسط حضنه وتجلس بحضنه

وتنهدت من حست انها تجلس بحضنه وبعدت عنه بعد ثواني تناظره وهي جالسه بحضنه ورفع عيونه لها ويشيل شعرها عن وجهها:انتي جهاتي وانتي عناويني وانتي ارضي وانتي صبحي وممساي ، انا اجهل كل شي واعرف انك انتي ، تجيني كثيره

بلعت ريقها تشوف نظراته لوجهها وقربه منها وجلوسها بحضنه وكمل بهاج:تجيني بعطر بين الشجر تجيني ظلال وتجيني قيظ وتجيني براد ، ماتجيني نهر تجيني أنهار ، انتي كثيره ، تتوهيني وتضيعيني وتقلبين حالي وصلتي لأقصى ذروة إعجابي

رمشت بإعجاب يتلون على ملامحها ورفعت سبابتها على شفايفه تمنعه يكمل وهمست:لا تغلبني

بهاج:انا مغلوب عندك

كان جسمها يشتعل من حرارتها ونبض قلبها يتسارع من نظراته وكلامه وصوته ومن قربه ونزلت نظرها لشاربه تلمسه بسبابتها ورجعت تناظر عيونه

تقدمت له وغمض عيونه من لمست شفايفها طرف خده وشد صدره لداخل يكتم انفاسه من شعوره

وغمضت عيونها تبوس طرف خده وتلمس بكفها شاربه وبعدت تناظره وتبتسم:احبه

بلع ريقه وهمس:منهو ؟

ابتسمت بإتساع:شنبك وهو كذا

ظل يناظرها تبتسم وتلمس شاربه وكل اللي يفكر هو كيف ثابت وصابر قدامها لهذا الوقت ؟ كيف تمنّع وقاومها لهالوقت ؟

ومن حست بحاله اللي اختلف قامت من حضنه وابتعدت تصد بوجهها:بتنام اكيد تعبان

لفت تناظره ساكت وساهي فيها وبلعت ريقها:انا باخذ اغراضي واروح انام

وقفت وهي تشهد سكوته واخذت جوالها واغراضها ووقفت ترجع شعرها خلف اذنها:تصبح على خير

خرجت وقفلت الباب خلفها وابتسمت رفعت كفها على قلبها واخذت نفس تمشي للغرفه

دخلت تناظرهم نايمين وانسدحت بتوتر تشد على قلبها هي تتذكر قربه وبوستها له ونظراته له هي تتذكر كل شي ، يوم يثبّت حبه لها بكلمة زوجتي وبعقد البيت اللي قال عنه ( لنا )

غمضت عيونها تبتسم هي غرقت تماماً في حبه وفي سرّ حبه ، كان السرّ في حبه ألذ من إعلانه

كيف انهم يسرقون بعضهم من الجميع وكيف انه ينكر كل اللي يقولونه وهم وحدهم ، هي تعشقه

،

جلس محله ساهي يناظر محلها تحت تأثير عطرها اللي منتشر بغرفته هي جلست بحضنه وباسته بكل رقه تشابه رقتها هي تبتسم له وتخجل لكنها تبادر هي قليلة كلام ولا اعترفت بصريح قلبها عكسه ، لكنه تبادر له بالقرب هي ان جلست حوالينه لازم تلمسه وتعشق حضنه وتدوره ، والأرق انها تبوسه وكل مره تكوي صدره وتربط يدينه ويحس بالعجز قدامها وبكل مره تروح بعد ما تكركب صدره ، تخرج وتنام بمحل غير صدره غير حضنه غير فراشه وغرفته

نزل راسه بتعب هو انهلك من الخطوط اللي بينهم من التحذير اللي يشوفه كل ما شافها من صورة امه قدام عيونه

ظل يفكر ظل بفراشه وبثوبه يناظر السقف ومن تعب سهره واختباراته شقاه والاحداث اللي صارت له دربه وطريق الجيّه اللي ارهقه خلته ينام بشكل مهمل وبثوبه

صحت وهي عند مراية الحمام تسمع ريوف تهمس لنورا:خليه يصحى لحاله تعالي نسوي فطور

ابتسمت من سؤالهم عنه اول ما صحت كيف بلغتهم انه وصل وجات تنام وتركته ينام بدون تفاصيل ، عضت شفتها لانها لبست بنطلون وبلوزه وسوت شعرها وكانت قريب بتسوي ميك اب على دخول نورا:حياتي شجاك الصباح هذا بتكشخين؟

رفعت كتفها:مو كاشخه ترا !

نورا:ايوا صح شوي وعطرك يوصل الرياض

ضحكت بوهقه:دايم اتعطر

نورا:طيب اسوي الفطور الحين والا بيطول نايم بهاج؟

لفت لها:ما اعرف هو تعبان مره يوم وصل اكيد بيطول انتظروه

نورا:اففف مو مصدقه وصل وخلاص بنفتك من المشاكل

أنهار:نورا لا تقولين له شي اول ما يصحى لو سمحتي ، لا تنكدي عليه

نورا:عشان لا يسلم على سلطان

أنهار ناظرته بصدمه:بتسوين مشكله بينهم ؟

نورا:اكيد أنهار اكيد لان مو انتي اللي انقال عنك كذا ، استصغري اللي سمعته

أنهار تنهدت:مو مستصغرته بس لا تسوين مشكله من اول جيّته

ماردت نورا من سمعت ريوف تصرخ وخرجت وابتسمت أنهار تطل وتناظره يخرج من غرفته

مبعثر شعره وفاتح ثوبه اللي كان واضح انه نايم فيه ويبتسم لريوف

بللت شفايفها تتنهد بربكه وابتسم من ترحيب ريوف:طيب والله لو ادري كان غبت اكثر

ريوف:ماتقدر ، والله وحشتنا بهاج مره لا تسويها مره ثانيه والا خذنا معاك

رفع راسه لها واقفه بعيد وتناظره وتلعب بخصله من شعرها وتميل بجسمها على الجدار وتبتسم لهم

قطعت نظره نورا من تقدمت:حمدلله على السلامه

ابتسم لها:الله يسلمك،خلوني اصحصح واجيكم

ريوف:بنسوي الفطور اجل

هز راسه يناظر ريوف ولف يتقدم لها ويعدي من جنبها وابتسمت:صح النوم

ابتسم لها ودخل الحمام وأجبرت نفسها تخفي ابتسامتها وتمشي للمطبخ

كانت تساعدهم وتسمع سواليف ريوف ولفت بها ريوف تناظر ابتسامتها:تفتحين النفس أنهار ليش صايره حلوه اليوم ؟

نورا:مستخدمه التنت اللي عندي خيال طالع عليها صح ؟

أنهار ضحكت لأن والله يجهلون سبايب حلاوتها لا ميك اب ولا فلاتر قادره تغلب الحب بوجه المحبوب

ريوف:لا حتى شعرها يجنن ماشاء الله

لفت لها:مو صاحين اول مره تشوفوني !

نورا؛ماتعودنا على الاناقه

أنهار:كنت الا شوي وانسى كيف كنت البس الصراحه

ريوف:انا قريب انسى متخيله ما سويت رنساج لشعري من يوم جينا هنا !

نورا:شعري يشتكي حياتي سمعته امس يبكي يقول النجده

لفت أنهار:انا ودي اغير لون شعري بنات اول مره اخليه كذا بدون ما العب فيه

ريوف:خلونا نطلب بهاج يودينا صالون بالرياض

نورا:انتي نسيتي شصار لأنهار شكلك

ريوف:انهار راحت مع بهاج لوحدهم وكان عباله ان بينهم شي وان تفكيره فيهم خربان كلنا ندري ان بهاج تزوج أنهار عشاننا ، لو رحنا سوا ما بيقول شي

التفتت تصد عنهم ويتغير وجهها من كلامهم وبلعت ريقها

ريوف:بهاج طيب ما بيقول لا

دخل على سيرته وهو يقفل ازرار ثوبه:وشفيه بهاج؟

ابتسمت نورا:نحش فيك خساره سمعت

ريوف؛بنحط الفطور بالصاله ، تعال

مشى وجلس بينهم ولف لريوف:ما سألتي عن اغراضك ؟

ريوف؛والله جبتها بهاج ؟

بهاج:والله جبتها بس بسيارتي قلت يبي لي سلطان وفهد يعاونوني لانك جايبه الرياض كلها

ضحكت ريوف وصدت نورا من طاريه وابتسم بهاج:مشتاق لهم غريبه ما شافوا سيارتي وداهمونا

لفت ريوف لنورا وأنهار وسكتت وناظرهم:شفيكم؟

ريوف:ولاشي

ابتسمت له تسلك وتصرف انظاره عن نورا اللي تغيرت ملامحها وكملت تسأله:كيف اختباراتك؟

بهاج اخذ نفس:والله تعبت بالحيل بس ان شاء الله زينه

ريوف:ما نزلت لك مواد ؟

بهاج هز راسه بالنفي وابتسمت نورا:ناجح ان شاء الله

بهاج ابتسم لها وهمس:ان شاء الله

رفع راسه لأنهار اللي تاكل وساكته وسألها:ليش ساكته ؟

رفعت نظرها له:هاه !

نورا؛مقطوع الأرسال عندك ؟

أنهار:مو مركزه

ريوف لفت لبهاج:كيف شكل أنهار اليوم ؟ امانه مو متغيره؟

عضت شفتها بحيا من سؤال ريوف العفوي اللي فجّر ملامحها من حياها وناظرت بهاج من ابتسم يناظرها ويصدّق كلام ريوف بـ:قمر أنهار

ابتسمت تخفي حياها قدر المستطاع ووقف من سمع الباب وضحك:جاهم العلم

لفت نورا لهم وهمست أنهار:لا تقومين

وقفت نورا تتجاهل وتأففت أنهار تلحقها كان بيلف يقفل الباب خلفه لكن شاف نورا جايه وأنهار خلفها وعقد حاجبه يرجع يدخل يوقفها:البسي عباتك

وقفت قدامه تناظره بربكه وهزت راسها:ماكنت طالعه

بهاج:يلمحونك

ناظرت نورا ومشت بسرعه للغرفه وخرج بهاج وابتسم من شاف فهد وسلطان وتقدم فهد يحضنه

:ترا مو مشتاقين لك بس نجامل عشان العيش والملح

بعد عنه بهاج يضحك:بخلي العيش والملح اليوم تراب اذا ما سكت

فتحت الباب ورفع انظاره سلطان من شافها تكتفت تناظرهم ولف بهاج لسلطان وابتسم:وشو ما بتسلم انت بعد ؟

رفعت حاجبينها نورا:ماله وجه

لف بهاج وعقد حاجبينه وفتحت الباب بسرعه أنهار تخرج وهي تغطي شعرها ولف بهاج لسلطان اللي كان وجهه متغير وهمس:وش صاير ؟

نورا:انا اقولك وش صاير

نطقت أنهار تمسكها:نورا مالك داعي !

تقدم سلطان يمسك ذراع بهاج:امش بهاج لوحدنا

نورا:تاخذه بعيد عشان تلّمع نفسك عنده ؟ ليش وقف خل يسمع مني وش انقال عني ، نشوف يرضى بهاج والا مايرضى

فلت يده بعصبيه بهاج ونطق:احد ينطق وش صاير ؟

فهد:ياخي يشغلونك بسوالف عاديه تعال انت

نورا:اسكت انت

عض شفته فهد ولف بهاج لنورا:وش صاير ؟

أنهار:نورا انا اتكلم اسكتي

نورا لفت لها:قلتي مو وحيده انتي يانورا وانا معاك ! اشوفك واقفه مع الغلط

أنهار:مو واقفه مع احد بس مو وقته

بهاج:نورا !

لفت نورا لبهاج وناظر سلطان خلفه:سلطان ولد عمك واللي وصيته علينا قالي بكل بجاحه اني رخيصه

عقد حاجبينه بهاج يستنكر كلامها وابتسم سلطان لانها ماعرفت تكمل كلامها:ليش تسكتين ؟ كملي ليه قلتها ؟

نورا:لانه سمعني اكلم بندر بالمستشفى

بهاج:من بندر ؟

ضحك سلطان:حتى بهاج ناسيه

بهاج لف لسلطان وهمس:انتظرني افهم

نورا:بهاج سلطان سمعني اكلم بندر وقال اني ارخصت نفسي واني رخيصه وكأنه وصي علي

بهاج اخذ نفس:والله اني مو فاهم شي

سلطان مسك ذراع بهاج:امش معي

نورا مسكت ذراعه الثانيه:بهاج ماراح ترضى ان احد يقول عني شي كذا صح ؟

بهاج ناظرها:ماني راضي بس خليني افهم وش العلم

تركت ذراعه تشوفه يمشي مع سلطان وتنهدت أنهار:ماتعرفين تتكلمين

نورا لفت لها:انتي اللي فجأه طلعتي تشبهين شخصية حليمه ، تهتمين لبهاج قد كذا

سكتت أنهار ثواني ونطقت:نفس ما انتي تهتمين

دخلت نورا من جنبها واخذت نفس أنهار تدخل وراها

،

لف بهاج لسلطان:سمعتها وش تقول ؟

سلطان:تفضفض له تترجاه يترفق فيها تبكي عشان يرد عليها بكلمتين ، ما انلام ؟

بهاج:تنلام على اللي قلته ، وش جاك ؟ تدري انها تبيه وجاها لهنا هو بعد يبيها تعرفه قبل تعرفنا احنا

سلطان رفع حاجبه:يعني عادي تكلمه بعد ما انرد من ابوها ؟ بعد ما انحاش ومعد شفنا وجهه ؟

بهاج:تراه خرج مطرود للعلم يعني ، يمكن انه يحاول يصلح بالامور ويبيها

سلطان:انتف شنبي

بهاج سكت يناظر عصبيته ونطق فهد:وانت شعليك وش هالحميّه لها يعني ! تدري انهم كذا من بيت ابوهم يعيشون شي ما نعرفه ، يمكن صاروا اصحاب بعد مو شرط يبيها

لف بهاج لفهد:مو لهالدرجه فكنا من تحليلك

بلع ريقه سلطان يشد على سبحته بكفه والتفت بهاج:غلطان وبتعتذر لها

التفت لبهاج:تستهبل !

بهاج:لا العب معك انا ، تسمع وش قايل لها انت ؟ لا بتعتذر سلطان لان ماهي بسيطه ولو جيت يوم ارخصت بإختك ما بترضاها

سلطان رفع حاجبينه:تعتبرها اختك ؟ وانا وش

بهاج:انت اخوي ماهو قصور بك ان اعتذرت سلطان لكن الغلط نوقفه ونقول انه غلط

سلطان:وما بتمنعها هي عن الغلط !

بهاج:بتكلم معها سلطان وبفهم الموضوع وبعرف وش يبي منها وهي وش تبي ، لكنك بتعتذر

سلطان:واذا ما اعتذرت ؟

رفع حاجبينه بهاج من رده ونطق بهدوء:هي تخطر براسك ترفض ؟

سلطان:ماني معتذر

سكت بهاج يناظره ولف فهد:سلطان ياخي مو وقتك فكنا من المشاكل ولا تدخل بهاج بالنص

همس بهاج وهو يناظره:وش جايك ؟

لف سلطان:وشو تجننت يعني ؟ وش جايني ؟

بهاج رفع كتوفه يناظر عصبيته:حموقي ، نار ولهب

سلطان:لانها وقفت بيني وبينك تتحدى مكاني عندك تبي تفتن بيننا

بهاج:محد فاتن بيني وبينك ماني صغير عقل

سلطان:حشى !

رفع حاجبه بهاج من سخريته وفهد لف له:ولد ! وشبك ؟

اخذ نفس بهاج يناظر سلطان وهز راسه:طيب لا تعتذر روح بالخلاء اقعد لوحدك واجيك بعد شوي

لف سلطان ورفع كفه لكتفه:روح سلطان

ناظرهم ومشى بعيد عنهم ولف بهاج لفهد:اتركه لوحده خل يقلبها براسه

فهد:تراه وقف معهم بهاج لا يجحدونه

بهاج:من يجحده يافهد الله يهديك ! انا ادري به يعني ما اعرف سلطان تلقاه عصب وطبعه شديد ورمى الكلمه ولا وده يعتذر بس يهدأ ويفهم

اخذ نفس بهاج:الحين بشوف عمك ذا مدري وش جاه

فهد:اسكت مو طايقه

بهاج لف له:زادها؟

فهد:واجد ، حتى الشيبه ناقد عليه

بهاج:طيب امش معي تدخل تناديه لي ماني داخل الملحق

فهد هز راسه ومشوا للملحق

دق الباب فهد واخذ نفس ينتظر بهاج وخرجت حليمه ومن ناظرها ابتسم ووخر فهد

ابتسمت:ياهلا ياهلا

تقدم وباس راسها ويدينها الثنتين وناظرها:كيف حالك؟

حليمه:بخير بس شفت سيارتك بالليل امس انتظرتك تجيني انت

بلع ريقه ثواني ياخذ نفس:متى بالليل؟

حليمه:ثلاث الليل

ابتسم وهز راسه:اي جيت توي كنت دخلت ونمت

حليمه:فطرت ؟

هز راسه:جيت أشيك عليه اذا موجود

حليمه:ماهو هنا عند اعمامك بالدكه

بهاج عقد حاجبه:وش جاه ؟

حليمه تنهدت:والله مدري يابهاج بس مره طيب ومره تعبان مره هادي ومره معصب ، بس الوكاد ما يبي طاري لبناته ابد

احتدت ملامح بهاج:على كيفه هو ؟

حليمه:بهاج ! لا تتدخل بينه وبين بناته

بهاج حك جبينه يبلل شفايفه:طيب بشوفه انا

حليمه خرجت معاه وناظرته:لا تسوي مشاكل

بهاج:ماني مسوي

حليمه ناظرت فهد جنبه وهز راسه:مامن خلاف

مشى بهاج واخذ نفس يدخل الدكه:سلام عليكم

رفعوا روسهم وابتسم رَده:هاه ضبع والا سبع ؟

ابتسم لانه تذكرها وتقدم يسلم على راسه:كل خير ان شاء الله

سلم على زيد وعبدالله وتقدم لعمر يصافحه:حمدلله على السلامه

هز راسه عمر وابتعد بهاج يناظره:سلامات ؟

عمر:مامن خلاف

بهاج رفع حاجبه:ماقالوا لي كذا ، بك شي ؟

عمر اخذ نفس:لا طيب وعلى حيلي قدامك

بهاج هز راسه:الله يعطيك الصحه والعافيه

مارد عمر عليه ومشى يجلس بهاج ويسمع سؤال زيد:وكيف الجامعه ؟

بهاج:زينه ان شاء الله اموري زينه

عبدالله:الله يوفقك وتاخذ الخبل اللي جنبك ذا معك

لف فهد عليهم:افا !

ابتسم بهاج ولف يناظر عمر اللي يشرب قهوته ولف لرَده:بس والله انها كثيره اسبوعين ، ابطيت على البيت المره الجايه افكر اخذ البنات معاي

رفع انظاره عمر ولف رَده لعمر ورجع ناظر بهاج:اي ما يقعدون لوحدهم

عمر:مهم لوحدهم

ابتسم بهاج:لا نبدأ حوار الأب الحريص لان اللي سويته ماهو أبوّه

عض شفته فهد وهمس لبهاج:بهاج !

عمر ابتسم:انقال لك ؟

بهاج:قصدك شكوك عندي

رَده:ماهو وقته اقطعوا الشر

عمر:ان جا مني خير وان جا مني شر محد له كلمه على بناتي غيري

بهاج رفع حاجبه:لا عاد تقول بناتي لانها ماهي مقبوله منك

عمر:ما انت وصي عليهم والله يابهاج انك تعقب

بهاج:داري عن اكلهم شربهم ؟ تعطيهم مصروف ؟ داري عن صحتهم ؟ عن دراستهم ؟

عمر:ما بتعلمني انت

بهاج:ريحنا تكفى واقصر عنا المشاكل ، على الاقل اسكت عن خطاك

رَده:يابهاج !

سكت بهاج يناظر عمر اللي يناظره ولف فهد عليه:وش فيك ؟

بهاج وقف وخرج ونزل راسه عمر ثواني يناظر رجفة يدينه وخرج

وقف زيد من نطق رَده:الحقه

مشى فهد خلف بهاج اللي ماشي لسلطان:واعد امك تراك !

بهاج:ماقلت شي  قلت اللي المفروض يسمعه

سمع صوت زيد ينادي عمر والتفت بهاج ووقف من شافه جاي له بشرّه

ووقف سلطان من بعيد يناظرهم ووقف فهد قبل بهاج يمنع الشر

لكن بهاج بعده وتقدم لعمر اللي وقف قدامه ونطق بهاج بغضب وارتفع صوته:مدّ يدك هالمره ! والله ما ينقال فيها عم تفهم ؟

تقدم يمسك بهاج من ياقته وناظره بهاج بحده ومن تقدم له عمر دفعه على وجهه بهاج بيده وحاولوا يبعدونهم عن بعض لكن بهاج كان غضبان وعمر يشتعل نيران

وقف زيد خلف عمر اللي يناظر بهاج بغضب:والله لأوقف قدامك غصب واخليك تطلق

بعد ذراعه بقوه بهاج عن ياقته اللي مسكها من جديد وناظره بتحدي:أكسر يدك اللي انمدت على ريوف ، تفهم ؟

بلع ريقه من طرى ريوف على لسانه ورفع سبابته:لا تجيب طاري بناتي على لسانك

بهاج:ياشيخ فكنا فالح بالكلام ، لا انت داري لا عن صغير ولا كبير

فهد مسك بهاج يبعده وتقدم سلطان بسرعه:ياجماعه !

عمر رجع لورا يتألم من ضربة بهاج له:بتاخذهم غصب ؟ تاخذهم وانا حيّ غصب ؟

بهاج:اخذهم وعناد بأطول شارب فيكم كلكم

لف زيد بحده عليه:بهاج

بهاج:انا ساكت عن الغلط عشان اللي عندك ببيتك والا مالك حشيمه انت

عمر:زين تدري ان وراك أم تحت اسمي

بهاج شد على فكه يناظر عمر اللي كمل:اربيك فيها

شتم شتيمه عمر ولا قدر يتحمل طاري امه بهاج وتقدم بهاج بسرعه يبعدهم ويتجه له بغضب يحاول يضربه من جديد لكنهم منعوه منعوه وصدوه عن عمر بقوه

وصرخ بهاج بحده:صونها لأنك رجال لا تدخل الحريم بيننا

ابتسم عمر:ماهي حرمه هي أمك

شد على كفه ووقف قدامه سلطان يصرخ ويرّده:بهاج

بهاج ناظره وهز راسه:انا اللي بردك عنها

عمر رفع حاجبينه:تعقب

سحبه زيد يبعده وابتعدوا عنهم ولف بهاج يفك نفسه من فهد وسلطان:ابعدوا

مشى بسرعه للملحق كان ناوي يدخل الملحق ويطلق عمر غصب عنه لكن سحبه سلطان من عرف نيته:بهاج تعوذ من الشيطان

لف بهاج عليه:دامه يتفاخر بزواجه خل اعدم هالزواج

مسكه سلطان:انتبه

فهد:يابهاج امك تستهبل كلمتك قبل تطلع من عندها توصيك هي في غنى مشاكلكم

رفع راسه يستجمع نفسه من غضبه ونيرانه والتفت عليهم:ما بدخل عليها لكن ابن امه احد يلحقني

مشى للمواقف واخذ نفس سلطان يناظره رايح لسيارته وشغلها وركب

خرج يدعس برا المزرعه بصدى صوت الكفر وعقدت حاجبينها من شافت سيارته تخرج نورا:بهاج

تقدمت أنهار:هو اللي خرج ؟

هزت راسها نورا ولفت عليها بربكه:تتوقعين تهاوش مع سلطان ؟

تأفتت أنهار:اوف نورا اوف

لفت نورا تراقب سلطان وفهد اللي واقفين ويتكلمون بغضب ومشت أنهار لجوالها تتصل عليه

قفلت عليها الغرفه وهي تنتظره يرد

لكنه كان يسوق متجاهل الرنين اللي يخترق عقله كان يغلي من غضبه كان يتعرق جبينه من نارّه ويسوق يسوق مو شايف احد قدامه يبتعد قد ما يقدر لكنه يسمع جواله اللي يدق بتكرار ماكان منه وعي لمن يكون كان يسمع صدى افكاره وصورة عمر قدامه

رفع راسه يناظر المرايه وانعكست كراتين من الخلف بعيونه هدأ من سرعته من أيقن انها اغراض ريوف اخذ نفس من رجع لواقعه ولصوت جواله ووقف على يمين الشارع والتفت ياخذ جواله ويناظر اسمها بلع ريقه يرد ويناظر الطريق خلفه اذا لحقه احد او لا:هلا

أنهار:وينك بهاج من اول اتصل عليك

بهاج:ماسمعته

تنهدت من سمعت صوته:تهاوشت مع سلطان ؟

بهاج عقد حاجبينه من كلامها:لا لا من قال

أنهار:بهاج قول الصدق تهاوشت مع سلطان عشان نورا ؟ ، هي غلطت بهاج المفروض ما تدخلك انا كلمته وخلصنا

بهاج تنهد؛أنهار !

أنهار كملت:بهاج تكفى لا تتهاوش مع احد عشان نورا او عشان وحده فينا تكفى بهاج

همس ينزل راسه:لا تقولين تكفى

أنهار:لا بقول اذا بتخرب علاقتك في احد من اهلك بقول بهاج مستحيل ارضى بشي زي كذا والحين ارجع لو سمحت بتكلم معاك

بهاج:مابرجع الحين

أنهار جلست بقل حيله:تكفى بهاج تتصالحون ونرجع زي اول وبعقّل نورا انا بس تعال

بهاج رفع راسه للطريق:والله ما أقوى

أنهار:عشاني بهاج

بهاج:لا تقولين عشاني تدرين وش انتي عندي ، ولا تقولين تكفى انتي لو بغيتي شي والله أفرش لك هدب عيني لا ترجيني بشي

أنهار تنهدت:طيب ارجع بهاج ، ارجع نصالحكم سوا

بهاج:ماتهاوشت مع سلطان

أنهار:انت خرجت معصب سمعنا صوت سيارتك ، ليش خرجت ؟

بهاج:تناقرت مع اللي بالدكه بس

أنهار جمدت ملامحها ثواني؛مع ابوي ؟

بهاج اخذ نفس:ماصار شي كالعاده لا تحاتين

أنهار وقفت بخوف:ضربك ؟ احلف بهاج انه مامد يده

بهاج:لا ياشيخه وش يضربني اقولك كلام بس وانا تضايقت وخرجت ماهي هوشه حتى

أنهار سكتت تتخيل حجم الضيقه اللي بصدر بهاج من صوته وتنهد بهاج:أنهار لا تروحين لأحد

أنهار رفعت صوتها بإنزعاج:خلاص خلاص متى يبطل يدخل بحياتنا خلاص

شغل سيارته يرجع بطريقه:طيب اسمعيني

دخلت نورا تناظرها وعقدت حاجبينها تسمعها:خل يروح خلاص كرهناه خلاص مو متحمله اسمع اسمه كل يوم وكل يوم يسوي لنا مشكله

نورا:اشبك

اخذت نفس أنهار من شافت نورا ومدت الجوال وخرجت

بهاج:أنهار ، بنت

حطت الجوال على اذنها نورا:اشبها أنهار ؟

بهاج:وين راحت ؟

نورا:خرجت ، اشبكم بهاج ؟

بهاج؛الحقيها نورا اردعي الشر يرحم امك الحقيها

،

خرجت بغضب تمشي والتفت سلطان من شافها خارجه ووقف:وين رايحه ؟

عدتهم تمشي للملحق وتدق الباب ولفت لهم:هو داخل ؟

سلطان:شتبين انتي ؟

فهد:لا تدخلين أنهار

صرخت بوجهه من قرب:وخر قلت

فتحت الباب حليمه وتقدمت تدفع الباب:وينه ؟

عقدت حاجبينها بصدمه حليمه:منهو ؟

لفت وصرخت بغضب:زوجك وينه ؟

سحبها سلطان من ذراعه يطلعها:اطلعي

دفته بقوه ومشت رايحه للدكه ولحقوها وخرجت حليمه بصدمه خلفها

ركضت نورا تشوفها تمشي للدكه وريوف خلفها:اش قال بهاج ؟

نورا:ما ادري ما ادري

دخلت الدكه ولفوا عليها وتقدمت لعمر اللي رفع راسه بصدمه:انت متى تفكنا من شرك ؟

وقف عمر ووقف زيد:اعوذ بالله

تقدمت تناظره بحده:متى تتركنا ؟ متى تنسانا ؟ مو انت طردتنا بعزّ مرضك ؟ مو انت بكل قوتك رميت ريوف عن حضنك ؟ شتبي الحين ؟ شتبي تكلم

عبدالله:بنت تكلمي مع ابوك زين

تجمعت دموعها بمحاجر عيونها تناظر الشخص اللي قدامها الشخص اللي عاشت تحت ظل حنيّته والحين ماتعرفه تجهله:اطلع من حياتنا ، روح خذ زوجتك ما نبغى منك شي

دخلت نورا تناظرهم وبلعت ريقها ريوف تسمعها

ماتكلم يناظرها ونزلت دموعها بدون تبكي وبدون تتغير ملامحها:تحط حرّتك ببهاج وتمد يدك على أصغر بناتك وتزوج وتطلق بكيفك ولا كأننا كبار ولنا رأي

تقدمت له اكثر تناظره وهي ترجف تمنع غصتها

:كرهناك ومعد ننتظر منك شي

بكت ريوف من اشكالهم وغطت اذنها تمنع نفسها عن المشاكل ولف فهد عليها وتقدم:تعالي اخرجي

مسكها يطلعها عنهم ورفع راسه من شاف بهاج جاي

مشى بسرعه من شاف ريوف:وش صاير ؟ ريوف علامك ؟

فهد:ادخل ادخل ادخل

دخل وناظرهم وتقدم يشوف أنهار بنصهم قدام عمر

أنهار:انسى انك جبت بنات بهذي الدنيا زي مانسيت امنا انسانا

ماقدرت تتكلم من تغير صوتها من طاري امها وبكت تدف صدره وهمست:اكرهك

تقدم بهاج يمسكها بهدوء:أنهار

لفت من سمعت صوته وناظرته ورجعت لفت لعمر:ومالك حكم علي ولا على وحده من خواتي ، انا من يوم تزوجت بهاج معاد صار لك وجود عندنا

رفع نظره لعمر بهاج وكملت أنهار:ولا تتفاخر بقوتك ومكانتك ابداً ، لاني اقدر ابطل زواجك بيدي

عقد حاجبه بهاج من جمد وجه عمر يناظر بهاج

وهمس سلطان:عيدنا

وبلع ريقه بهاج من نطق رَده:وش تبربر وش تقول ذي ؟

بهاج همس لها:أنهار

بعدت عنه تناظر عمر وتقدم بهاج لها:أنهار

لفت تناظره وناظرها بتمعن ومشت تخرج ولف بهاج لعمر اللي يناظره وبلع ريقه ولف لنورا اللي واقفه:اطلعي

ناظرت عمر بحده وخرجت من عندهم مشت لريوف اللي جالسه تبكي وفهد عندها:ريوف

بهاج اخذ نفس يناظر أنهار اللي غيرت طريقها عن البيت ولف لحليمه اللي مسكت ذراعه:وش تقصد؟

تتهد بتعب:تكفين اتركيني

حليمه ناظرته بحده:جاوب بهاج وش تقصد أنهار

مارد عليها وتركها يمشي لطريق أنهار وعضت شفتها حليمه بغضب

نورا:ريوف تعالي معاي

وقفت ريوف معاها وهي تمسح دموعها ولفت تمنع عن طريقها سلطان:ابعد

رفعت نظرها له من ناظرها وصدت بحده عنه ومشت تدخل البيت مع ريوف

مشى خلفها يشوفها تمشي لممر النوير ويسمعها تبكي وأسرع بخطواته يناديها:أنهار

وقفت من سمعت صوته ولفت عليه ومشى بسرعه لها وحضنها اخذ نفس يسمعها تبكي بحضنه وغمض عيونه:ليه تسوين كذا ليه ؟

بعدت عنه تناظره:تعبت بهاج تعبت من اسمه ومن طاريه تعبت من المشاكل خلاص ، خلاص خل يتركنا بحالنا مو قادره اعيش ايامي بهدوء خلاص عدمنا

بهاج تنهد يناظرها وكملت أنهار:انا مو قادره اجلس هنا دقيقه زياده بهاج ، انا احس اني مخنوقه طول الوقت مو قادره اتحمل أكثر ، ريوف كل يوم تبكي انعدمت صحتها النفسيه ونورا قاعده تلف وتدور بنفس المكان خايفه تنترك لحالها ، بهاج شوفنا قدامك

ناظرها وكملت أنهار تناظره:محد مبسوط

مارد عليها وكملت تبكي وتحاول تهدأ ولفت عليه:وقف بطريق زواج نورا ووقف بطريقي معاك ووقف دراسة ريوف ، بهاج مو قادره اتحمل شرّه قاعد يحرقني احسني محروقه

ضربت صدرها وهي تشرح له ومسك كفوفها يقربها له:اسم الله عليك

تنهدت وهي تبكي تشد على كفوفه وتشهق:ابغى امي مو قادره اتحمل

حضنها يسمي عليها من زادت ببكاها وعرف انها انفجرت هي يوم كلمته كانت اخر قطره تقدر تتحملها والحين انفجرت

مسكها بقوه يمشي معها للمستودع وفتحه ومسك يدها بقوه يدخلها ولف عليها؛احرقيه

ناظرته ونطقت:بهاج !

بهاج:احرقيه احرقي ابوهم بعد ان كانك تنحرقين لا يقعد بقلبك شوي من نارك ، احرقيه أنهار احرقيه وقفي حياتهم عند هالمستودع

مسحت دموعها اللي لازالت تنهمر منها وتقدم لها يمسك وجهها اللي تصده عنه:تدرين اني ما أقوى تبكين ، تدرين انها حرقتني دموعك

مسكت كفوفه اللي على وجهها تغمض عيونها عنه وناظر وجهها اللي غارق من دموعها وفتحت عيونها من تقدم لها بدون تفكير وبتسرع يبوسها ويشد وجهها لوجهه تركها ترجع لورا خطوه بصدمه من حست بثغره وعقدت حاجبينها تغمض عيونها بقوه

كان يقبلها لأنه صابر لأنه متكبل بالمنع لأنه بنى حدود كثيره يوم كان مافي حدود ، كان يقبلها يصرف عن باله صورة امه وصورة الكل ويحطها هي قدامه ، هي بدموعها وضعفها وشكلها ودلالها ونرجسيتها اللي هدّها ابوها لها ! ويبوسها

يبوسها لأنها تبيه بقد ماهو يبيها ولان بوسط اللهيب يبي يشعر بالدفى ، لكنها تزيده لهيب ويزيد يقبلها

حس بكفوفها تشد على كفوفه وابتعد عنها يناظرها مغضمه عيونها محلها وبلع ريقه يبعد كفوفه عن وجهها وفتحت عيونها تناظره وهي جامده محلها وارتعب من نظرات الخوف بعيونها وتقدم:ماهو غلط ماهو غلط ، لا تطالعيني وتلوميني بالغلط ماهو غلط

شدت على ثوبه بخوف وهي ترجف وتناظر المستودع وابتعد عنها يناظرها ورفعت كفوفها تمسك كفوفه بخوف من اندفاعه من وقوفهم هنا ، بين مسلكين بين خطاوي تمنّعوا عنها مالها خط رجعه ولا تقدر تقدم أكثر

وشد على كفوفها يناظر عيونها اللي تتأمله وهمس لها يطري عليها بنفس نبرة صوته اللي تميزها وتحبها:لا شعرتي بالامان صرتي حبيبه ولاشعرتي بالخوف صرتي مثل بنتي ، ما اخليك

بلعت ريقها تشد على كفوفه من مشاعرها وخوفها ورجفتها وحزنها وحتى جفاف دموعها اللي تحسها على خدودها

كانت تناظره مو مستوعبه اندفاعه وبوسته وكلامه همسه ونظراته لها مو مستوعبه انها غرقت ومالها طوق نجاه ، هي وبهاج تحت قيظ حار تشتعل فيه النيران واللهب وشوارب رجال وكيد نساء ، هي وبهاج يدورون ظلال ببعضهم لكنها تخاف وتخاف حيل

لفت لوراها من سمعت سلطان يناديه ورجعت تناظره كان يناظر ملامحها ما يبي يجيها خوف من اندفاعه ما يبي ترجع الفين خطوه منه لانها تحس بالرعب من اندفاعه بكل مره وكان يوقف نفسه عند خطى ولا يعديها لانها ترتاح أكثر

عض شفته يسمع سلطان يناديه ويدوّره وحس بكفوفها تبعدها عنه وتخرج وتمشي

التفت سلطان من خرجت وعقد حاجبينه:أنهار !

تقدم للمستودع وناظر بهاج شاد شعره وصاد عنه:علامك ؟

اخذ نفس بهاج والتفت عليه:وش صاير ؟

سلطان:مدري عن عمك ذا محد يدري به بعد ماخرجتوا مانطق بحرف

بهاج هز راسه؛مايقدر يقول شي خله عنك

مشى بيخرج ومسكه سلطان؛وين رايح؟

بهاج:صكه وراك

كان يقصد بالمستودع وخرج تارك سلطان وماشي للبيت

،

دخلت البيت ومشت للحمام بدون تناظر شي غير خطواتها دخلت وقفلت الباب وخرجت نورا تمشي للحمام؛أنهار ؟ هذي انتي ؟

اخذت نفس تمسك كفوفها:انا

نورا:اشبك ؟

أنهار:باخذ شاور جيبي لي روبي واغراضي

نورا:اطلعي اشوفك طيب

أنهار:نورا تكفين

سكتت نورا وجلست أنهار برعب تناظر الحمام وتتذكره ، ترجف يدينها كل ما تتذكر احساسها بنعومة ثغره

غمضت عيونها بقوه تشد على ملابسها ووقفت من سمعت الباب يدق

فتحته تمنع نفسها عن الشوف وتاخذ اغراضها

نورا تنهدت وهي تشوفها تخلي وجهها عنها

قفلت الباب ومشت تفصخ ملابسها وتحط راسها تحت المويه لساعات ما حسبتها من ضياعها

،

خرج من عند ريوف وهو يسمع المويه لا زالت تمشي ومشى للحمام يحط اذنه ورفع يده يدق الباب

وعت على نفسها تقفل المويه ومشت تسحب روبها ونطقت:طالعه

ربطت روبها بقوه واخذت نفس تفتح الباب لكنها وقفت محلها من شافته هو اللي واقف عند الباب

ناظرها بروبها وبشعرها المبلول وظل يناظر عيونها اللي تتأمله بربكه

خرجت نورا وناظرتهم؛أنهار !

لف بهاج لنورا اللي واقفه وجمد وجهه ومشى يخرج من عندهم ويطلع من البيت لفت لأنهار وهمست:ليش خارجه كذا ؟

أنهار هزت راسها بالنفي وتنهدت نورا:فشله عند بهاج

أنهار لفت عليها:اتركيني نورا تكفين

ناظرتها نورا ومشت أنهار ودخلت الغرفه ناظرت ريوف اللي منسدحه على جوالها وصاده عنهم وطلعت لها ملابس بيدين راجفه

،

دخل بعد مادقت عليه نورا وناظر ريوف ونورا جالسين عند الاكل وقفل الباب وتقدم لهم:أنهار وين؟

نورا:ما تبغى تقول

سكت ثواني وناظرته نورا:تعال كل

هز راسه ومشى يجلس معهم وهو ساهي وناظرته نورا وبلعت ريقها:متضايق من شي ؟

رفع راسه بهاج:هاه !

نورا:متضايق ؟

بهاج هز راسه بالنفي:لا لا

نورا:تهاوشت مع سلطان عشاني ؟ قول بهاج عادي ترا ندمانه اني دخلتك بيننا

بهاج عقد حاجبينه:لا ابد ما تهاوشنا انا وسلطان اخوان ما يدخل بيننا الشيطان

نورا اخذت نفس:كويس ، طيب تكلمت معاه ؟

بهاج:لا ، ما امداني مع الفوضى اللي صارت

رفع عيونه لريوف اللي تاكل بهدوء ورجع يناظر نورا اللي تناظره وتناظر ريوف ولف بهدوء:ريوف

رفعت راسها وكمل بهاج:ليش ما تاكلين ؟

ريوف:مالي نفس بس غصبتني نورا

نورا:اكيد لان محد بهذا البيت يسمع مني لا انتي ولا العنيده اللي داخل

بهاج اخذ نفس وغمض عيونه بصداع ووقف:بالعافيه ، بدخل انام

ناظروه ومشى يدخل الغرفه وهمست نورا:الكل متضايق مو معقول اللي قاعد يصير ، كل يومين لازم تصير مصيبه

ريوف:وانا ما بتحمل اكثر من كذا

ناظرتها نورا وتنهدت ورجعت تاكل

دخل غرفته وفصخ ثوبه ومسك جبينه يتعارك مع صداعه وانسدح اخذ جواله بتردد

هو وده يرسل لها يقول ما اخطينا ، هم يخطون وإحنا حبنا صواب ، وده يقول لا تبتعد عنه لو خطوه وحده لا تبتعد

لكنه ماقدر ماقدر يرسل لها شي لانها تنفر ونفورها يقتله ولا يبي يعيشه يلوم تسرّعه يلوم لهفته يلوم حبه وقلبه اللي يتآكل بنيران هواها

ناظر صورتها بجواله واخذ نفس طويل وهو يتأملها

قفل جواله وشد على عيونه بقوه بتعب وألم

،

لفت من شافتهم نايمين واخذت جوالها وخرجت من الغرفه مشت وهي تناظر غرفته من بعيد ودخلت الحمام ، هو فزّ من سمع صوت باب وخرج مشى بالصاله المطفيه أنوارها والتفت من سمع صوت المويه بالحمام نزل انظاره للجوال اللي تاركته على المغسله وعرفه ، عرف انها هي اللي بالحمام وشد على قبضة يده يمنع وقوفه ويمنع الشوف بهاللحظه ودخل غرفته تارك الباب مفتوح وقفل انواره ووقف جنب الباب عشان لا تلمحه

وخرجت وهي تتلفت ومشت للمطبخ تفتح انواره وتدخل تاخذ تفاحه من الثلاجه وتمشي للشباك تناظر المزرعه قدامها

كانت تقضم من التفاحه بيد ويدها الثانيه ترفع فيها شعرها المهمل عن عنقها من الخلف

وقفت لوهله تناظر المستودع من بعيد من مسافه بعيده غمضت عيونها من تكرر المشهد عليها للمره المبالغ فيها ورجعت تفتح عيونها وتنزل التفاحه من يدها وينقبض قلبها لانها تحس فيه ، تحس انه يسري بمجرى دمها ياكل من عقلها من فرط التفكير فيه هي تتخيله تحلمه تتمنى وصوله ، لكنها تخاف تخاف انها تخطي خطأ كبير ، خطأ يترك الكل يتعجب منه زي ماتعجبوا من زواجها به وكيف اختارته وكيف انه مستحيل يكون اكثر من أخ وبعيد عن المعقول بعيونهم جميع ، تخاف انها تتقرب منه اكثر وتشوف نظراتهم لومهم عتابهم بإنه ماهو صواب ، تخاف ترمي بزواج ابوها المهجور من عقلها وياكلها الخوف وتدري انها تخاف ويصارحها بهاج بخوفها وجُبنها لكنه أقوى من حبها أقوى من صوت قلبها ، يتصارع الخوف مع ذكريات عقلها ضحكته صوته همسه نظراته حضنه وحتى بوسته الوحيده ، هي تعيش بدوامه ماتدري كيف تتغلب عليها كل اللي تفهمه انها يوم عن يوم يزيد عشقها له يوم عن يوم تتعلق فيه أكثر ، تبغاه برغبه أقوى

حطت تفاحتها على الرف واخذت نفس تخرج من المطبخ وتطفي الانوار وتدخل الغرفه

خرج من ظلمة غرفته ومشى لمكانها مكان ماشافها واقفه وقف عند الشباك ورفع مدى بصره وشاف المستودع وفهم ، فهم ليش طولت بالنظر وبإيش سرحت وليه هجرت تفاحتها وهربت

التفت يناظر تفاحتها يمينه اللي ميّزها حتى بالظلمه ورجع يناظر المستودع من بعيد ورجع لغرفته قفل بابه وانسدح على وجهه بتعب وضيق

،

لفت بإنزعاج من طلب نورا:ماراح افطر خلاص نورا

نورا:قومي انتي ريوف ، مو معقول صارت وظيفتي اجّمعكم من جديد

ريوف:مالي نفس نورا

نورا:مو على كيفك تعالي

ريوف:ماقلتي لأنهار كذا !

لفت أنهار عليها وناظرتها وتأففت ريوف:طيب روحي الحين أجي

خرجت نورا وصدت أنهار على ايبادها ولفت تناظرها ريوف وتكلمت بهدوء:مو زعلانه على اللي سويتيه

رفعت أنظارها أنهار وكملت ريوف:نورا تقول انك زعلانه وتتوقعين اني زعلانه عليك وانك تكلمتي كذا

أنهار هزت راسها بالنفي:لا ، اعرف انك مو زعلانه علي لاني ماسويت شي غلط

ريوف مشت وجلست جنبها وهمست:اقولك شي تستغربينه ؟

لفت لها أنهار تناظرها واخذت نفس ريوف:مو خايفه من كثرة المشاكل ، خايفه تكون سبب يتركنا فيها للأبد

عقدت حاجبينها أنهار ونزلت دموع ريوف:ما ابغاه يتركنا ، ابغاه يرجع نفس قبل

أنهار:ريوف ! ريوف وقف قدام جامعتك وقف قدام زواج نورا وقف كان بيضربني مرات كثيره ، ريوف اللي تتكلمين عنه تغير مو نفس اللي ربانا وعشنا معاه ، بطلنا نبغاه وبطلنا نسامحه

ريوف:ما راح اقدر اتعايش بدونه ، ما اقدر اتحمل يتغير شي بحياتنا اكثر من موت امي

تنهدت أنهار وهي تناظر دموعها وتقدمت تحضنها ورفعت انظارها من شافت نورا واقفه ويبدو عليها انها سمعت كل كلام ريوف

تنهدت أنهار تناظر نورا وخرجت نورا ورفع راسه بهاج:ما بيجون ؟

نورا بلعت ريقها وجلست جنبه:ريوف تعبانه بهاج

لف عليها وعقد حاجبينه:تعبانه من وشو ؟

نورا اخذت نفس:تعبانه من المشاكل تعبانه من كل شي ريوف بترجع تتعب نفسيتها من جديد

سكت بهاج يناظرها تتكلم ولفت عليه نورا:لازم تبعد عن هنا لازم تكمل دراستها

اخذ نفس بهاج وصد وكملت نورا:سو اي شي بهاج

غمض عيونه لثواني بضغط وسمع جواله يدق بجيبه وهز راسه لنورا ووقفت نورا تمشي للمطبخ

ناظر اتصال ابراهيم ورفع راسه من خرجت ريوف ورد:هلا

ابراهيم:هاه ياشريك رجعت لأهلك ونسيت ان لك شغل بالرياض ؟

وقف بهاج ودخل غرفته:مو ناسي بس انشغلت وقلت لي انت اذا في شي ضروري بنتكلم

ابراهيم:ارسلت لك على ايميلك شيّك عليه ، يمكن تجي بأقرب فرصه

بهاج:اجي الرياض ؟

ابراهيم:اكيد ، بس شيّك على الايميل افهم كل شي وبعدها كلمني متى تجي يصير نحدد احنا موعدنا مع الجماعه لازم تكون موجود بهاج

بهاج تنهد بتفكير:ويطول الوضع ؟

ابراهيم:ليله وارجع اذا مستعجل

بهاج:طيب بشوف اموري وارد عليك

ابراهيم:طيب طيب

قفل بهاج واخذ لابتوبه وجلس وفتحه فتح ايميله وغمض عيونه بغضب من شافه بالانقليزي

رفع راسه ثواني يفكر ولف من دخلت ريوف:اقدر اجي ؟

هز راسه:تعالي

ريوف:تذاكر ؟

بهاج:لا ، بس في شغله ماعرفت اسويها نادي أنهار

تقدمت ريوف :انا اساعدك عادي

بهاج:لا سوته لي قبل أنهار ونسيت ، ناديها

هزت راسها وخرجت تاركه الباب مفتوح ومسك جبينه بهاج يناظر اللي قدامه

ريوف دخلت:أنهار بهاج يبغاك

جلست:ليش ؟

ريوف:يبغاك تسوين له شي بلابتوبك

أنهار:سويه انتي

ريوف:رفض ، يبغاك انتي تسوينه

أنهار تنهدت بربكه وناظرتها ريوف:اشبك ماتبغين تشوفينه ؟

أنهار:ما ابغى يفتح معاي الموضوع

ريوف:عادي قولي له ليش مصعبتها ؟

اخذت نفس:طيب ريوف اطلعي بلبس

خرجت ولفت لجوالها تاخذه وارسلت له:اش اللي ماتعرف له ؟

لف من جاته رساله منها وقراها ورفع حاجبه:بتحلينها من بعيد يعني ؟

أنهار ماردت تقرأ رسالته ووقفت غيرت ملابسها ورتبت شكلها وخرجت

لفت نورا وهمست:اخيراً

مشت تتعداهم لغرفته وخفّت خطواتها بربكه وهي تشوف بابه مفتوح اخذت نفس تقوّي نفسها ودخلت ناظرته على لابتوبه جالس ورفع انظاره عليها وارتبكت صدت تمشي له:ايش فيه ؟

جلست جنبه ومد لابتوبه بدون ما يتكلم واخذته تقراه رفع انظاره عليها وهي تقرأ ولفت عليه:بتروح؟

استغرب وناظر اللابتوب:كاتبين اني رايح؟

أنهار هزت راسها بالنفي:عملاء جدد من الخليج جايين عشان اجتماع بالرياض وكاتبين انه بيكون اتفاق بين الطرفين وتوقيع عقود من المدراء التنفيذيين

سكتت ثواني تناظره وكملت:بتروح للرياض ؟

اخذ اللابتوب من حضنها يناظره:اكيد

لمت كفوفها بخوف ببعض وظلت تناظره كانت خايفه ينعاد اللي صار لها بغيابه خايفه انه يختفي يتركها يتركهم والتفت من شافها ساكته ومن ناظرها بلعت ريقها:بتطول ؟

بهاج ناظر ملامحها اللي شحبت وتغيرت ونبرة الخوف اللي بصوتها وهز راسه:يمكن أطول

أنهار:يعني أكثر من المره اللي طافت ؟

هز راسه؛شهر ، شهر ونص ما اعرف

بلعت ريقها وهمست:بهاج !

اخذ نفس والتفت عليها:لا أروح ؟

ماردت عليه وكمل بهاج:بروح أنا بس انتي اذا مخوّفتك روحتي تقدرين تجين

عقدت حاجبينها:اجي وين ؟

بهاج:للرياض

أنهار:تستهبل اكيد والبنات ؟ وهم اذا صارت مشكله بسبب اني رحت معاك !

بهاج:هم تقصدين فيها ابوك ؟

ماردت عليه وكمل بهاج:والله اذا هم بيخوفونك مره ثانيه وبتقعدين شهرين بغيابي وتقدرين وتقوين ؟ الله يقويك ماني جابرك

لانت ملامح أنهار من الضغط اللي حسته والخوف والتوتر ومن برودة تعامله معاها من استخفافه بسؤالها بلعت ريقها تخفي غصتها عنه ولفت بتروح ومسكها من ذراعه:ما بتروحين ذي المره بعد ؟

لفت عليه:مايهمك

بهاج ناظر ملامحها وحسّ انها بتبكي هو بكل مره يوقف عند لحظة بكاها ولا يقدر ، ما يقدر يكمل

وتنهد يشدها تجلس:عشانك والا عشان خواتك ؟ تبينا نروح جميع ؟ نروح جميع

صدت عنه وسكتت ثواني:ريوف

بهاج رفع راسه للصاله ورجع ناظرها:عشان ريوف ؟

لفت عليه:ريوف مو بخير بهاج ، اخر مره سألتني عنك عشر مرات كانت تتوقع انك تجي

تنهد وصد وهو يعض شفته وكملت أنهار:ريوف ماتقدر لو رحت

سكت لأنها تلف الموضوع على ريوف بدون ما تتكلم عن نفسها:وش اسوي ؟ اقدم لها على جامعه بالرياض وتداوم يومياً من هنا ؟

أنهار؛ما اعرف بهاج

بهاج:صعبه تروح كل يوم من هنا ، هي وش تبي نسألها بالأول

أنهار:تسألها الحين ؟

بهاج ناظرها:اي عشان اخذها معي للرياض واخليك انتي ونورا

قالها بحده ينتظر منها ردة فعل والتفت يرفع صوته:ريوف

ردت عليه وناداها بـ:تعالي

صدت أنهار عنه ودخلت ريوف وناظرتهم:اشبكم؟

بهاج قفل لابتوبه واشر لها تجلس قدامه جلست وهي تناظر أنهار اللي صاده وتناظره:اشبك ؟

بهاج ابتسم:تبين تكملين جامعتك ؟ معي الترم هذا وندرس سوا ؟

سكتت ولفت أنهار تناظرها ورفعت كتفها يربكه

بهاج:وش ودك ؟ ودك تدرسين بجده ؟

لفت بصدمه أنهار عليه ولا التفت يناظر ريوف:وين ماودك تدرسين انا معك ، قولي بهاج ابي هالجامعه وتدخلين الجامعه وهالترم

ريوف:جده ؟

بهاج:تبينها ؟

أنهار:وش يوديها جده لحالها ؟

ريوف:لحالي ؟

بهاج:من قال لحالها ؟

أنهار:كيف يعني ؟

بهاج التفت لريوف:انتي وين تبين اي جامعه ؟ ما انتي لحالك انا موجود

ريوف تنهدت:ما ابغى اروح لحالي

بهاج:ما انتي لحالك

ريوف:ابغى هنا ، بالرياض معاك

بهاج:متأكده ؟

هزت راسها ريوف ونزل راسه يناظرها بحنيّه:لا تفكرين في احد فكري انتي وين تبين ، روحي اجلسي لوحدك فكري وعلميني

ريوف ناظرت أنهار ورجعت تناظر بهاج وهزت راسها

ابتسم لها بهاج ومشت تخرج من الغرفه ولفت أنهار:مافهمت جده هذي !

بهاج ناظرها:تدرس بجده وش اللي مافهمتيه؟

أنهار:لحالها ؟

بهاج:لا

صد عنها بخوف من تفكيره:مع فهد

تقدمت بصدمه:مو من جدك !

لف عليها:ليش ؟ عادي ننشب بحلق ابوك لين يتزوجون وتروح ، تروح تدرس ومو لوحدها

أنهار:مستحيل ريوف توافق مستحيل ، هي وفهد مايتفاهمون ابداً تبغاهم يتزوجون ؟

التفت بجسمه يناظر انفعالها وهمس:شدراك؟

أنهار:اعرفها اختي واعرفها مستحيل ترضى وتتعايش مع فهد مستحيل

سكت يناظرها صاده وتكلم بعد تفكير:وخواتك بعد يعرفونك ويقولون مستحيل بهاج وأنهار أكثر من أخوان

لفت له وجمد وجهها وكمل بهاج:يعرفون اللي يصير ؟

بلعت ريقها وتغيرت ملامحها وكمل بهاج:لا تظنين انك تعرفين خواتك زين لانهم ما يعرفونك ولا يعرفون شي عنك ، وريوف تنسأل وهي ترفض او توافق

ماردت عليه وصد بهاج بنظره:ماتدرين يمكن انهم يعيشون شي نفس اللي نعيشه

ناظرته بصدمه والتفت عليها:حتى هم واثقين لا تطالعيني كذا

صدت عنه بربكه واخذ نفس بهاج ووقفت تخرج أنهار من غرفته ورفع راسه يشوفها تجلس جنب ريوف بالصاله ووقف يطلع

أنهار:ما تبغين ؟

ريوف:الا بس ما ابغى ابعد عنكم

نورا:نونو انتي ريوف بتدرسين وبنكلمك

ريوف رفعت راسها من دخل بهاج:لا ابغى بالرياض ما ابغى اروح جده

أنهار:متأكده ؟

هزت راسها ريوف:ما ابغى ارجع اعيش بجده

لفت نورا على أنهار وجلس بهاج على ذراع كنبه:أقدم لك ؟

هزت راسها ريوف:بس اخاف ما يقبلوني

ابتسم بهاج:افا ! انا ادخلّك غصب

ابتسمت له وضحكت أنهار:ونلاقي لك سكن بالجامعه تجينا ويكند

لف بهاج على أنهار ورجع ناظر ريوف:لا انا افكر بحل افضل

لفت أنهار تناظره بحده وابتسم بهاج:تروحين مع فهد

تلاشت ابتسامتها:فهد ؟ اش يجيبه معاي ؟

بهاج:يتوظف هناك وتعيشون سوا انتي تدرسين وهو يشتغل

نورا لفت تناظره بصدمه:كيف يعني يعيشون مع بعض

حك جبينه بهاج:هو في شي ناقص ماقلته صح ، يعني تتزوجون

وقفت ريوف بسرعه:مستحيل

ابتسمت أنهار ولفت تناظر بهاج اللي ناظرها ولف لريوف:مستحيل ليه ؟ انتي تدرسين وتخلصين امورك وترجعين ، ابوك بينشب بحلقي ريوف ما بيخليك لوحدك وانا مابقدر اخلي الثنتين ذولا ولا بيخلينا نروح سوا وش نسوي ؟

ريوف:مستعده ما ادرس بس ما اروح مع فهد

حطت رجلها فوق الثانيه أنهار وابتسمت تناظر بهاج بإنتصار وكشر بهاج:تبالغين !

ريوف:بهاج قلت مستحيل مستحيل

نورا لفت على بهاج:وليش فهد طيب ؟

بهاج؛من اجل ؟

نورا:سلطان

بهاج:سلطان يهوجس مهو معنا ولا يبي يتزوج في راسه وحده

عقدت حاجبها نورا وسألت أنهار:مين ؟

بهاج ناظر نورا:وحده من خوات فهد

رفعت حواجبها بدهشه نورا وصدت عنهم ورجع يناظر ريوف:بقدم لك بعدين نحلها

ريوف:بهاج !

بهاج:طيب خلاص قلت بحلها بس نقدم لك عشان تلحقين عالسنه

ريوف سكتت والتفت بهاج يناظر أنهار:انا بروح الرياض قريب

نورا لفت:والله ؟ ليش ؟

بهاج؛عندي شغل

ريوف:بتطول ؟

رفع انظاره على أنهار وهمس:ليله ما بنام

ابتسمت بصدمه تناظره وعرفت انه كان يكذب كان يعاندها وعضت شفتها تخفي ضحكتها

نورا:متى رايح ؟

بهاج:بكره ان قدرت اخلص شغلي وارجع

ريوف اخذت نفس:وتقدم لي ؟

بهاج:اي اعرف دكتور بالجامعه بيضبطك ماعليك

نورا:انت تعرف دكتور ؟

أنهار ضحكت:لا ترا مو هيّن على فكره

ناظر ضحكتها وهز راسه بأسف وناظر ريوف:محلوله

ابتسمت ريوف له ومشى خارج بهاح ووقفت أنهار تلحقه

وقفت على الباب وهي تناظره يلبس شوزه:كذاب يعني ؟

لف عليها وناظرها:تضحكين ؟ شفتي وجهك انتي يوم قلت شهرين !

ابتسمت:بس طلعت تكذب

بهاج تقدم لها:ماكنت اكذب كنت ابيك تجين معي

ارتبكت وهي تناظره وكمل بهاج:ليله ونرجع

أنهار:مستحيل ، ما بعيد اللي صار اخر مره خرجت معاك

بهاج:تخافين منهم ؟

كان يقولها بسخريه من كلامها عن ابوها بهم وسكتت

بهاج:والا تخافين مني ؟

ناظرته ثواني وصدت من تذكرت واخذ نفس بهاج:خذي عبايتك وتعالي

أنهار:وين ؟

بهاج:نتكلم

ناظرته وابتعد بهاج ينتظرها ومشت تاخذ عبايتها وخرجت على جيّة حليمه ووقفت وهي تشوفها مو لحالها وتقدمت لهم

حليمه:جيت مع شموخ بشوف وش تسوي ؟ طولت اليوم ماجيتني

ناظرت شموخ أنهار وناظرت حليمه اللي تناظرها

بهاج:اذا بنتكلم عن اللي صار مالي خلق

حليمه:مو بس نتكلم معاك ونتكلم مع أنهار قالت كلام كثير

أنهار:لا تاخذين دور زوجة الأب مو لايق

حليمه:ما يهمني تعاملك مع ابوك اللي قليت ادبك عليه قدام اهله ، يهمني قصدك يوم تقولين أقدر انهي زواجكم بيديني

لف بهاج على أنهار اللي فهمت قصد حليمه وهمست:اش قصدك ؟

حليمه:انا زواجي ماهو تحت التهديد نفس زواجكم المزيف هذا ، واذا عبالك بيصير شي ينهي زواجنا على قولك فهو مستحيل مستحيل

سكتت أنهار تناظرها وكملت حليمه:مرده بينتهي وبهاج ياخذ عروسته اللي نعرفها ونبيها

لفت أنهار لشموخ اللي واقفه وتقدم بهاج:صرتي تخربطين بالحكي

حليمه:ماخربطت بشي

بهاج:طيب بنتكلم انا واياك سوا بس اتركينا من هالكلام

لف يناظر أنهار اللي تناظر شموخ وسحبها من ذراعها:تعالي

ناظرته أنهار ومشت معاه وابتعدوا تكتفت وهي تمشي:والله مادريت انك خاطب ماشاء الله

لف لها وتأفف:مو صاحيه انتي بعد

وقفت ولفت له:مو من جيبي من امك هذا الكلام

بهاج:اي وامي تقول هذا الكلام عشان تغثك وانتي كالعاده يجرّونك بكلامهم وين ماراحوا

أنهار؛محد يجرني

بهاج:تخافين منهم ، تخافين من ابوك وتخافين من ردة فعل خواتك وصديقاتك اللي مالهم داعي بحياتك

أنهار:بهاج !

بهاج:اذا بتصدقين خرابيط امي عز الله كدينا خير

أنهار؛مو خرابيط امك تسويها بهاح وتلصق شموخ بظهرك غصب ، هي عالطالعه وعالنازله تقول اخوك واخوك

بهاج:امي تعرفني وانا ولدها وتشوف حالي وتفهم عليّ ، وعشانها تعرف وش بجوفي واقفه بيننا لو ماشافت شي فيني ماتكلمت

سكتت أنهار تناظره وكمل بهاج:مهلوس فيك

بلعت ريقها أنهار وصدت بنظرها وكمل بهاج:لا توقفين عند كلام امي ، بتجين معي للرياض بكره

أنهار:مو صاحي اقسم بالله انا وين وانت وين

بهاج:لا تتهربين المره الاولى رفضتي وسكتنا المره ذي والله لأمددها أنهار

أنهار؛تعاندني يعني ؟

بهاج:اي انافس راسك اليابس

تنهدت تصد عنه وكمل بهاج:بس علميني من من خايفه ؟ منهم والا مني ؟

لفت له:ليش أخاف منك؟

لف يأشر بيده:خايفه يصير اللي صار بالمستودع

ارتبكت تبتعد:بهاج

مشى خلفها:وش يعني تتوقعين ما بنفتح الموضوع ولا كأن شي صار ؟

لفت عليه تناظره:اي ولا كأن شي صار وبننسى

بهاج عقد حاجبينه:ننسى ليه ؟ ماغلطت انا

أنهار لفت عليه بصدمه وكمل بهاج بهدوء:اي ماغلطت هم يغلطون يوم يلفونا بكلامهم واننا اخوان ولا يسألون عن مشاعرنا ! ، هم يغلطون يوم يحرمونا عن بعض ويحشرونا بزاويه مالها منفذ عشان يطمنون ، لا انا ولا انتي نغلط

أنهار:امك تتطلق منه بهاج بسببنا

بهاج:خايفه يطلقون ؟ اجل وش قصدك امس يوم تقولين قدام الجميع اقدر انهي زواجكم ؟ مو قصدك تنهيهم معي !

جمد وجهها ونطقت بسرعه:لا

سكت يناظرها وكملت بربكه:لا مستحيل واكيد مو قصدي كذا قصدي اخرب بينهم بس

رفع حاجبينه يناظر ربكتها ولفت عليه تناظره:لا تطالع فيني كذا !

بهاج اخذ نفس:ان كانك تخافين مني فماني مسوي شي ماتبينه

لفت عليه وكمل بهاج؛بس بغيت امشي لدرب سفر معك ، نترك كل ابوهم هنا

بلعت ريقها تناظره وكمل:ونشوف بيتنا وتشوفين شغلي ومكتبي وتشوفين الرياض ، جنبي ومعي

تنهدت بضيق:كيف بهاج ؟ مستحيل تصير ؟

بهاج:انتي تبين ؟

سكتت تناظره وسألها بهاج؛تبين تجين معي ؟

هزت راسها بالإيجاب وابتسم بهاج لها وابتسمت من ابتسامته ورفع راسه براحه:محلوله اجل

بهاج؛عندي

مشى وهو يناظره يدخن عند الحوض لوحده

وتكلم من كان ساهي:وين وصلت ؟ جبتوا عيال ؟

لف سلطان ورمى زيقارته:ما انتبهت عليك

بهاج:داري

سلطان ناظر زيقارته اللي تحت رجله:معد شفناك

بهاج:على الاقل ماني موجود وبالي بعيد

سلطان مارد وصد عنه واخذ نفس بهاج:وش تهوجس فيه ؟

سلطان:ابد ، الفراغ وانا اخوك

بهاج:وين فهد ؟

سلطان:كان جنبي لكن ناداه الشيبه

بهاج هز راسه:ماشي للرياض بكره ان شاء الله ويمكن الصبح

سلطان عقد حاجبينه:ليه ؟

بهاج:عندي شغل كان ودي اناديك لكن ماني لحالي

رفع حاجبه سلطان:من معك ؟

بهاج:حَرم بهاج أم سعود

ابتسم سلطان من ابتسامة بهاج وضحك بهاج:شفيك؟ رايح مع زوجتي وش الغريب ؟

سلطان:والله انت وزوجتك ماخذين الكل بعرض الحايط ، هي تقول بالصريح قدام الجميع انها بتنهي زواج ابوها وانت بتاخذها للرياض وانت تدري ان بتقوم القيامه عليكم

بهاج:الحب ياسلطان وش يفهمك ؟

سلطان ابتسم واخذ نفس:وش يفهمني ؟

سكت بهاج يناظره صد:ماله داعي تعتذر لأحد نورا فهمت ان الموضوع ما يسوى

التفت سلطان وكمل بهاج:لا تكبرها انت بعد مردنا بنرجع نقعد بهالقعده سوا لا يحوشها ضيقة نفوس

سلطان هز راسه بالنفي ونزله:مامن ضيقه

بهاج رفع ذراعه على كتف سلطان:تبي شي من الرياض ؟

سلطان:سلامتك

بهاج؛لا تنساني بعد جيّتي يبي لك تفرّع من جديد

ضحك سلطان وابتسم بهاج ماشي لأمه دق باب الملحق ولحد رد عليه والتفت من سمعها خلفه

:خالتي حليمه عندنا

لف وناظرها:عندكم ؟

شموخ:اي وصتني اجيب لها جوالها من الملحق

هز راسه بهاج:قولي لها بهاج يبيها لو فضت

شموخ:تعال كلمها

بهاج:لا لا

مشى من جنبها ودخل البيت وناظر ريوف لوحدها بالصاله:وينهم ؟

ريوف:أنهار تاخذ شاور ونورا بغرفتها

بهاج مشى وجلس جنبها:طيب تعطيني بياناتك قبل امشي للرياض ؟

ريوف:دخلت اشيك بجوالي برسل لك

بهاج لف ثواني يناظر الغرفه ورجع ناظر ريوف:بسألك ريوف وش صار بالضبط بين نورا وسلطان؟

ريوف:والله ما اعرف حتى ما قالت لي شي نورا كلمت أنهار جيت لقيتها تبكي وتتكلم مع أنهار

بهاج:اي يعني أنهار تعرف اللي صار بالضبط ؟

ريوف:اتوقع ايوا ، بس ليش تسأل فتح الموضوع سلطان من جديد؟

بهاج:لا لا بس انا اسأل ان كان في نورا شي مضايقها اكثر ابي افهمه

ريوف:ما اتوقع نورا باقي زعلانه شفتها انت اليوم

هز راسه بهاج وابتسم ورفع راسه من فتحت باب الحمام تخرج ومن ناظرته رفع حاجبينه لها

وناظرت ريوف وبلعت ريقها وحطت يدها على فكها:ريوف

حك انفه بهاج:علامك ؟

أنهار:اخخ ألم ألم بموت ريوف الحقيني

وقفت ريوف ومشى بهاج ويدينه بجيوبه

ريوف:اشبك ؟

أنهار صرخت:يعورني ريوف بموت من الوجع

لفت ريوف على بهاج:بسم الله اشبها

طلع يدينه:مدري ، أنهار وش يوجعك ؟

خرجت نورا وناظرتهم:أنهار !

جلست على الكنبه:ضرسي فكي راسي كله يعورني كله مشدود لين اذني

ريوف:كيف عورك طيب كنتي بالحمام؟

عقدت حاجبينها بألم:مو قادره مو قادره اتكلم

بهاج عقد حاجبينه:اوف شكله عصب

نورا:تروحين المستشفى طيب ؟

رفعت عيونها لبهاج اللي بققها بتحذير ورجعت تنزل راسها:ما ادري يعورني نورا مو قادره اتكلم

ريوف:توديها بهاج؟

بهاج ناظرها من رفعت راسها:اي اوديها بس مامن مستوصف قريب للاسنان ، أنهار تصبرين للصبح وأوديك للرياض ؟

نورا:للرياض ؟

بهاج:اي ، دربي

بلعت ريقها أنهار:ايوا اصبر عادي

نورا:وشو طبتي ؟ قبل شوي ماتقدرين

أنهار:نورا انتي كمان ! ترا ألم من يوم صحيت بس يروح ويجي والحين زاد

ريوف:وبعطيك الحين مسكن تتصبرين عليه

بهاج:عليك نور ، روحي نطي جيبيه

مسكت فكها وناظرت نورا قدامها وعقدت حاجبينها بألم

لفت نورا:تتوقع ما يقولون شي ؟

بهاج:وانتي بعد تتكلمين عن ابوك بالجماعه ؟ قولي وش يقول ابوي لوحده

نورا:ما ابغى اجيب طاريه

بهاج:ماعلينا منه مو لازم يدري

نورا:تروحون من دون محد يدري ؟

بهاج:يدرون ان سألوا بس لحد يقول شي اذا سكتوا

نورا لفت لأنهار:وانتي وقت ضرسك يعني بتورطين بهاج بمصايب

أنهار رفعت حاجبينها:هو قالي !

جمد وجهه يناظرها وبلعت ريقها تناظر نورا:قال بوديك يعني يعني كيف نورا بالله اموت من الألم ؟

نورا:لا ماعليك اذا احد قال شي هالمره انا ماراح اسكت

رفعت عيونها لبهاج اللي هددها بعيونه ولفت تاخذ من ريوف المسكن

بهاج:ادخلي ارتاحي وحاولي تنامين ان صحيت الصبح قبل امشي اصحيك

أنهار:اتصل علي

هز راسه ومشت أنهار للغرفه ولفت نورا:بتنام؟

بهاج هز راسه ومشت تدخل غرفتها وابتسم لريوف اللي لحقتهم ومشى للغرفه وابتسم من تذكرها

كانت تبي تروح معه وماترددت تقول اي ومثّلت المرض عشان تقدر تشاركه الطريق للرياض

مشى ينسدح يفكر بكيف يقضي الطريق والمشوار للرياض وهي جنبه

،

خرجت من الغرفه بعد ماشافته يكتب لها:مشينا

ابتسمت تلم اغراضها بدون صوت وتمشي بتأني وفتحت باب الغرفه وناظرته واقف وابتسمت

قفلت الباب خلفها وناظرها وعقد حاجبها وابتسم

:مانمتي ؟

هزت راسها بالنفي:كنت اسوي شعري

رفع راسه لشعرها وفتحت عبايتها تلبسها:بس خذ بهاج الشنطه هذي حطيت فيها فستان وكعب وميك اب وعطوري ، قلت لي متأخر اني بشوف زوجة صاحبك

بهاج اخذ الشنطه:لقيته راسل لي يعزمني على الغداء يوم عرف انك بتجين معي

قفلت عبايتها:اوف توترت يارب تطلع بعمري

بهاج:مشينا ؟

هزت راسها تخرج وهي مبتسمه والتفت بهاج عليها يعض شفته ويبتسم

كان خروجهم بالسَحر قبل أذان الفجر بدقايق وعشان محد يكون موجود تعمّد يخرجون بدري

ناظرته ينتظرها تلبس شوزها وابتسمت له وفجأه فزت والتفت بهاج وفزّ:بسم الله الرحمن الرحيم

عقد حاجبينه:وين سارين انتم ؟

مسكت صدرها بخوف واخذ نفس بهاج:خرعتنا ياجدي

رَده:ليه وش عندك؟

بهاج:بمشي للرياض أنهار ضرسها يعورها

لف يناظر أنهار اللي مسكت فكها تناظره

رَده:وتروح الحين للرياض ؟ صل وامش

بهاج:عشان يمديني نرجع

رَده:رح

بهاج:يالله اجل توصي شي؟

رَده:سلامتك

مشى بهاج ومشت أنهار معاه وركبت السياره

لفت عليه:مت من الخوف يوم شفت لحيه طويله بيضا بالظلام

ضحك بهاج من وصفها وضحكت بصوت عالي من ضحكته والتفت عليها:اسكتي فضحتينا

رجع بسيارته لحد ماطلعوا من المزرعه ومسك طريق الرياض وهو مبتسم

فتحت اللمبه اللي بينهم وفتحت مرايتها وتطلع مكياجها بحضنها

والتفت يناظرها مشغوله بشكلها ترسم عيونها وخدينها وتتأمل شكلها ثواني وترجع تكمل

لين وصلت لأخر خطوه خلته يتأملها أكثر وهي تحط روجها على ثغرها وتطبق شفايفها على بعضها

وتناظر شكلها لفت عليه وابتسمت؛ما امداني احط ميك اب

قفلت مرايتها ورجعت مكياجها والتفت لطريقه:مابتشغلين شي نسمعه ؟

أنهار:اها يعني سواليفك مو حلوه يا أنهار

بهاج:داري مابتسولفين وش عندك من سوالف

أنهار:انت سولف طيب ليش أنا ؟

بهاج سكت ثواني والتفت لها:بسألك عن نورا وش قالت بالضبط عن سلطان ؟

أنهار:ليش تسأل ؟ نورا كلمتك ؟

بهاج:لا انا اسأل

أنهار:سلطان سمع نورا تكلم بندر ويوم رجعوا شافته يعاملها معامله بارده وسألته قال لها ارخصتي نفسك وكلمتي واحد ما يبغاك وحتى قال لو رجع يخطبك بينتف شنبه

رفع حاجبه بهاج وكملت أنهار:ما اعرف ليش قال كذا ويدري ان نورا الى الان تحاول تتخطى اللي صار

سكت بهاج وكملت أنهار:وبعدين هو المفروض يعتذر لنورا غير انه بالملكه دخل بدون صوت وشافها بفستانها متخيل ! ولا قال اسف ولاشي

لف بهاج عليها:متى شافها؟

أنهار:بملكتنا

بهاج التفت للطريق وسكت يفكر وكملت أنهار:ونورا ماكان فستانها يستر شي اصلاً ، عيب ما يعتذر

بهاج:فهمت

ناظرته أنهار يفكر ولفت لجوالها:تسمع ايش؟

بهاج:اي شي عن الحب

ضحكت بصدمه من طلبه وصدت لجوالها وكمل طلبه:بس خليجي نفهم عليه

أنهار:كنت حشغل إليسا

بهاج:فكينا أنهار

تنهدت وهي تدور اغنيه واخذ جوالها من يدها:انا ادور اغنيه

أنهار:بس ترا مهدي مره ما بنوصل الا الظهر

بهاج:وش تبين نوصل بسرعه ؟

أنهار لفت للطريق وبهاج يناظر جوالها ويكتب اغنيه ورفع الصوت وحط جوالها بحضنه وابتسمت من اشتغلت الاغنيه

نزل انظاره لجوالها وعقد حاجبه من انتبه لخلفية جوالها ورفع راسه للطريق ورجع يناظره واخذه بيده وناظر صورتهم سوا وابتسم بوسع مبسمه ولف يناظرها تناظر الطريق وحط جوالها بحضنه ومد يده لكفها والتفتت من لمس كفها وناظرته مبتسم

ابتسمت بربكه وهي تحسه ياخذ كفها ويشده لكفه ويناظر الطريق

رجعت ظهرها لورا بتوتر تخفي ربكتها وتناظر يدها بيده وابتسمت

الطريق فارغ وساكن والظلمه تضمه من كل الجهات مافي دليل غير نور القمر اللي ينتصف السماء وصوت اغنيتهم المسموعه وكفوفهم وابتساماتهم اللي يتبادلونها لبعضهم بدون كلام

وسحبت من حضنه جوالها بتفتحه وانتبهت انه كان بحضنه وان خلفيتها صورتهم سوا ، كانت جنبه ولابسه شماغه على راسها عمامه وهو بجانبها يبتسم وغروب الشمس خلفهم

وابتسمت لانها عرفت سبب ابتسامته ومبادرته لكفها وفتحت الكاميرا وهي تشد على كفه

لفت عليهم الكاميرا وابتسم يناظر الجوال وصورتهم

التفتت عليه وتقدمت تحط راسه على حضنه وتتصور معاه

ضحكت لانها تتأثر من صوت الأغنيه ومن احساس كفه بكفها ، تتقرب منه أكثر تحط راسها على كتفه وتشد ذراعه لها نزلت جوالها وغمضت عيونها تمد يدها الثانيه لخصره تحضنه

تنهد وميّل راسه على راسها اللي على كتفه وظل يراقب الطريق وكفه بكفها كان ساهي في الصوره اللي تشكلت قدام عينه

باللحظه اللي يعيشها معاها وياكم كان ودّه يعيشها ويشتريها بالغالي النفيس وانحنى يبوس شعرها اللي على كتفه وابتسمت تغمض عيونها بحضنه ورجع يناظر الطريق وهو حاط راسه على راسها

:انتي ديرتي ربعي وهلي ومنفاي ، ودي الليل ما ينطوي للصبح وودي أعيد الطريق من أوله ويطول يطول ويطول فينا ولا ينتهي

رفعت عيونها له تناظره وكمل وهو يناظر الطريق

:درب ما ينتهي وانتي معي

نزل نظره يناظرها وابتسمت له وابتسم لها

وشدت على كفه:بس نهاية طريقنا بنروح نشوف بيتنا اللي شريته عشاني

ضحك بهدوء وهز راسه:انا اشهد شريته عشانك

أنهار:فيه بلكونه ؟

عقد حاجبه:شمعنى بلكونه تبين ؟

أنهار:عشان أشوفك منها وانت جاي من دوامك

ابتسم يناظرها وكملت أنهار وهي مبتسمه:واشوفك وانت تودعني رايح لدوامك واشرب قهوتي فيها الصبح ونسهر فيها بالليل نسمع اغاني زي كذا

اخذت نفس تناظره وهمست:بحضنك ، كذا يعني

ناظر ابتسامتها اللي تلاشت وناظر الطريق:وليه تعبسين ؟ خايفه ما يصير ؟

ابتعدت عنه تناظره والتفت بهاج:تدرين ان مردي باخذك من هنا لبيتنا ويدري اللي ما يبي يدري انك لي واني اخترتك لانك أنهار ماهو عشان أنقذ احد من احد ، وتدرين ان مرد اللي قال مانلوق على بعض بيشوفونا نتشابه ، بتصيرين تشبهيني وأشابهك ونجيب سعود اللي يشبهنا سوا

ضحكت وصدت للطريق تناظره وابتسم بهاج:مو بس انتي تتخيلين البلكونه انا اتخيلها بعد

لفت أنهار:يعني موجوده ؟

هز راسه بالإيجاب وابتسمت:احلى شي

ابتسم لإبتسامتها ورفع ذراعه يسحبها لحضنه ويبوس راسها ويتنهد

يتنهد خوف من اللي خلفه أهله وابوها وامه والجميع ، خايف من الصور اللي تصير ذكريات ومن الأحلام لا تظل أحلام ومن انها تحلم أكثر ويحلم أكثر ولا يوصل لمبتغاه هو مايدري وش مصير السرّ اللي بينهم والامور كل مالها تزيد وتتعقد وهم كل مالهم يزيدون تعلق

خفضت صوت الموسيقى من دخلوا للرياض وشافت مباني الرياض وشوارعها والزحمه اللي دخلوا فيها وابتسمت:بهاج تاخذ لي قهوه ؟

بهاج:اخذ لك

أنهار:ستاربكس بهاج شوفه هنا قريب

اشرت عليه ولف بهاج يوقف والتفت:وش قهوتك؟

أنهار:خلني انزل معاك وانا بطلب لك على ذوقي

ابتسم لانه يدري انها تقول كذا عشانه ما يعرف ولا بيعرف طلبها وهز راسه ونزلت

قفل سيارته ومسك كفها ودخلوا وناظر الناس اللي تبدأ صباحها بقهوه بالكوفي ومشى معها لحد ماوقفت وطلبت طلباتهم

وناظره من نطق برقم الحساب ودخل يده بجيبه يطلع بطاقته ويحاسب وابتسمت أنهار تناظره

تقدم ياخذ طلبهم ومدت له كوبه واخذت كوبها:دقيقه بهاج

التفت لها وشافها بتصور وضحك:بتصورين كل شي اليوم

رفعت كوبها جنب كوبه تصور اكوابهم سوا وابتسمت توريه الصوره وابتسم؛مشينا طيب

أنهار خرجت معاه؛بتروح شغلك اول ؟

بهاج:اي بعدها بنشوف لنا محل نسوي فيه ستاير للبيت، اذا ودك وتفهمين

أنهار هزت راسها ومشت تركب وحرك سيارته بهاج

لفت عليه:بهاج ليش مانمر البيت أول بشوفه قبل نختار أثاث

بهاج:ما بيمدينا على الاثاث بغيت ناخذ ستاير ونحجز للمطبخ دولاب لانه بياخذ وقت

أنهار:وباقي الأثاث ؟

التفت لها وابتسم:تطلبينه

ابتسمت وصدت للطريق:بس عيوني ماتطيح الا على الغالي

بهاج:بيّن

لفت عليه:بطفرك

بهاج:فداك

ابتسمت له وكمل بهاج:شغلي ماشي أنهار اصبري سنتين وتصيرين شيخه ، بشتري أطلق سياره

لفت بجسمها عليه:وتسفرني ؟

بهاج:لافه العالم مع اهلك باقي تشتهين تسافرين؟

هزت راسها:معاك ، مو مع اهلي

ابتسم يناظرها:وين تبين ؟

أنهار:باريس

بهاج هز راسه يناظر الطريق:تم

ضحكت لانه يجاريها ولفت تشوفه يدخل مواقف المبنى ويوقف ويتقدم السكيورتي بيفتح لها الباب لكن بهاج نزل:تعال خله

تقدم لبهاج اللي ترك بابه مفتوح ومشى لأنهار يفتح بابها ونزلت

التفت عليها:شركة زوجك ابو سعود

ضحكت وحاوطت ذراعها تدخل معاه دخل بهاج وتقدمت له سكرتيره:اهلاً استاذ بهاج

بهاج:ابراهيم وصل ؟

هزت راسها بالنفي:على وصول

بهاج؛بدخل مكتبي علميه اني وصلت اول ما يوصل

ابتسمت:اكيد ، نورتينا

ناظرت أنهار وابتسمت أنهار:ثانكيو

مشى بهاج معها وضحكت وهي تمشي معاه

كانت تشوف اهتمام الجميع ببهاج وتحس يكسيها الغرور ، هي كانت تعيش بفرط نرجسيه لكنها انهجرت منها بعد وصولهم للمزرعه ورجعت تعيش غرورها معاه

دخلت المكتب وابتسم:حيّ الله ام سعود

ابتسمت تمشي لمكتبه:اوه

تقدم يناظرها تمشي بالمكتب ومشت لكرسيّه ولفت عليه:تسمح ؟

بهاج رفع كفه:حلالك

جلست على كرسي بهاج والتفت بهاج من دخلت السكرتيره:تشرب شي استاذ بهاج؟

هز راسه بالنفي والتفت لأنهار:اسألي الشيخه أنهار

ضحكت أنهار:بهاج !

ابتسمت السكرتيره ولفت أنهار:لا شكراً

لفت لبهاج:الملف موجود استاذ بهاج اذا تبي تطلع عليه اجيبه لك قبل وصول استاذ ابراهيم

هز راسه بهاج:هاتيه

خرجت تاركتهم ومشى يجلس قدامها يناظر اسمه على المكتب ويشوفها تجلس على كرسيه وتتفقد المكتب

دخلت السكرتيره بالملف والتفت بهاج ياخذه من يدها وتبلغه:استاذ ابراهيم وصل هو بمكتبه

بهاج:انا بروح له

لفت أنهار ناظرته:بتطول ؟

بهاج وقف:خلك هنا ، اخلص من ابراهيم واجيك

أنهار ابتسمت له وهزت راسها ومشى يخرج من المكتب

ضحكت من فرط سعادتها وحماسها بشكل بهاج اللي يلوق بالمكان ، تضحك لأنه يزيدها نرجسيه بكلامه واهتمامه فيها قدام الجميع

،

دخل بهاج وابتسم ابراهيم:حيّ الله

تقدم يسلم عليه وناظره ابراهيم:منت لوحدك

بهاج ابتسم:ام سعود جايه تطمن على حلالها

ضحك ابراهيم:حلالها ماهو حلالك تقبّل

بهاج:ماهو كله عشانها

ابراهيم ضحك:مابي اعطلك اجل ندخل صالة الاجتماعات الجماعه على وصول ؟

بهاج:ندخل

ابراهيم وقف:بنكون على اتفاقنا بيحاولون يخفضون نسبة ارباحنا من اسهمهم لـ١٥٪؜

بهاج:واللي نبيه ؟

ابراهيم:٢٠٪؜ مانقدر ناخذ اقل بيكون فيها خساره

بهاج هز راسه:اجل نبدأ بـ٣٠٪؜ وبيحاولون وبنتفاهم انا وانت قدامهم واننا بننزل النسبه لـ ٢٠٪؜ عشان الودّ

ابتسم ابراهيم:دبلوماسي

ضحك بهاج؛نكسب ودّهم

ابراهيم:توكلنا على الله

،

كانت تنتظره على المكتب تدور بالكرسي وتلعب بخصله من شعرها وتتذكره ، تتذكر انه قبل ينزلون هو لبس ثوبه جديد من السياره تتذكر انه يرحب فيها بمكتبه وبين الموظفين ويناديها بأم سعود

رغم مناداته الخشنه اللي تكبّرها هي تغرق بحبه بدلاله لها ، ابتسمت وهي تلعب بالكرسي وتتذكره ولفت من دخل المكتب وناظرها:تصاحبتي مع الكرسي ؟ بنخليك المديره إحنا

ضحكت :خلصت ؟

بهاج هز راسه وتقدم لها يجلس على المكتب قدام كرسيها:تؤمنين بالله اني بصير غني من اليوم ؟

ضحكت بصوت عالي وكمل بهاج بصدمه:والله من جدي أنهار يتكلمون عن فلوس داخل وانا حصتي كبيره ، ورث ابوي مردوده عليّ مضاعف

أنهار:يعني ما اشوف السعر بالاثاث ؟

ضحك وضحكت وسكت يناظرها تضحك:يالضحكه اللي تموتني وتحييني

ابتسمت تمد كفها لكفه:طيب باقي بنلف الرياض

رفع كفه الثاني يأشر على خشمه وابتسمت توقف

اخذت شنطتها وخرجت معاه مشت وناظرت ابراهيم اللي تقدم لهم:شرفتينا ام سعود

ابتسمت أنهار:شكراً

ابراهيم:نشوفكم على الغداء ان شاء الله

بهاج؛ان شاء الله

مشوا خارجين وناظرته يتقدم يفتح لها باب السياره:بتعود !

ناظرها تركب:متعوده من قبلي

ضحكت وركب جنبها يحرك كانوا يتجولون بمحلات أثاث كانوا يختارون أقمشه دانتيل وشيفون ، ألوان من الأبيض والسكري والذهبي

كانت تنقي معه وتشاوره كأنها فعلاً تأثث بيت عمرها وبيت عايلتها

جلس وهو يناظرها ترسم مع المصممه وتأشر على تصميمها اللي ببالها وضحك لأنها أربشت العمال بأفكارها وطلباتها

ورفعت عيونها له:بهاج تعال ساعدني

وقف ومشى لها واخذ نفس يوقف جنبها وابتسمت المصممه:ذوقها صعب جرب تقنعها

بهاج ناظرها وحيرتها بوجهها:ظنك بيفرق ؟ والله سعادة الدار من أهلها

ابتسمت أنهار:كلامك حلو بس برضو ابغى المطبخ يكون حلو

ضحك لانها ما اقتنعت والتفت يختار معها وخرجت بعد دقايق طويله وإتفاقيه واخذت نفس اول ماركبت السياره:٤٠ يوم عشان يخلصون المطبخ ليش نفاس ؟

ابتسم وشغل سيارته وهو ساكت

والتفتت عليه:بس كويس أنجزنا توقعت نطول ونتأخر ما يمديني أتجهز

بهاج ناظر الساعه بالسياره:يمديك البيت قريب ، قصدي بيتنا

ابتسمت ولفت عليه تناظره ورجعت تناظر الطريق

دخل الحيّ وهدأ من سرعته يأشر:هذا المسجد اللي بصلي فيه وأضرب سعود عشان يصلي معي

لفت تناظره جديّته وابتسمت بحب وأشر على نهاية الطريق:بيت إبراهيم

لفت تناظر البيت:ماشاء الله مرتب مره

هز راسه وابتسم:وهذا بيتنا

وقف قدامه ولفت عليه:والله بهاج؟

ضحك:والله

نزلت تناظر البيت من برا وتقدم يفتح الباب ودخلت وابتسمت من شافت البلكونه اللي تتوسط البيت ومرتفعه ولف يناظر مكان عيونها:بسألك من هنا وش غدانا ؟ وتقولين مظبي لحم وأجيك طاير

لفت عليه تمسح على ظهره:حلوه كل أحلامك وأحلى شي انها مستحيله

ضحك:افا ما تطبخين لحم وتغديني ؟

أنهار لفت له بجسمها وحطت يدها على صدره:لا اسمع انا اكون بالبلكونه وتدخل علي معاك اكياس وتقولي اش تتوقعين غدانا ؟ واقولك بيتزا تقول لا سوشي

ابتسم لابتسامتها:مو بس انا اللي مستحيله احلامي

ضحكت بصوت عالي ومشت قبله:تعال ما بتوريني البيت ؟

هز راسه يمشي وراها ودخلت تدور بأنحاء البيت تشوف زواياه الفراغ اللي يعجّ بالمكان بصدى ومع ذلك تحس انها دخلت مكان بترتاح فيه

لفت تناظر الكنبه الموجوده بالصاله:كنبه بهاج؟

ضحك:جبتها لانه فاضي قلت تنفعني قبل يجي كل شي

مشت تجلس عليها وابتسمت ولفت تناظره واقف

:بنعيش هنا منجد بهاج؟

هز راسه يطمنها:ان شاء الله

اخذت نفس:طيب جيب اغراضي من السياره الحين عشان ابغى اغير ملابسي واتجهز