تحميل رواية «أرض الخناجر» PDF
بقلم الكاتبــة ايلول
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
اختر مجموعة الفصول للتحميل (كل ملف حتى 10 فصول)
عن الرواية
🗡️ بقلمي الكاتبة ايلول . ══━━━━✥◈✥━━━━══ - هل هي حرب ؟ - لا عليكِ فقط تمسكي بيدي . - لو لمستك يدي تَبتر تقيد حريتي بخنجر . - تظنين لحربهم اتركك؟ ولاغلال خناجرهم أقودك؟ أنا غير عنهم أنا الحرية في قيدهم -في عروقك يسري دمهم انتَ ايضاً مثلهم ! -حسناً لاختصر لكِ شئتي أم ابيتي انتِ سجينتي -اظلمتَ عيناك ؟ -أظهرت لكِ حقيقتي ، بعدما وقعتي في هاويتي . -حقيقتك لم تكن مخفيةً عني ،اود اخبارك يا عزيزي انا من كان سيد التمثيل ، وانا التي قَّدتك لتكون سجين ، أظننت انني تلك البريئة المخدوعة من ليس لها غيرك سبيل ....
رواية أرض الخناجر الفصل الأول 1 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
══━━━━✥◈✥━━━━══
- هل هي حرب ؟
- لا عليكِ فقط تمسكي بيدي .
- لو لمستك يدي تَبتر تقيد حريتي بخنجر .
- تظنين لحربهم اتركك؟ ولاغلال خناجرهم أقودك؟ أنا غير عنهم أنا الحرية في قيدهم
-في عروقك يسري دمهم انتَ ايضاً مثلهم !
-حسناً لاختصر لكِ شئتي أم ابيتي انتِ سجينتي
-اظلمتَ عيناك ؟
-أظهرت لكِ حقيقتي ، بعدما وقعتي في هاويتي .
-حقيقتك لم تكن مخفيةً عني ،اود اخبارك يا عزيزي انا من كان سيد التمثيل ، وانا التي قَّدتك لتكون سجين ، أظننت انني تلك البريئة المخدوعة من ليس لها غيرك سبيل .
-لا اود كسر كبريائك لكنني مجبر على اخبارك انا على علم بكل ما تقولين والان انظري ليديك لتشاهدي بأي سلاسل تُقيدين
لننهي ما بدأناه مرحباً بكِ بارضنا ارض الخناجر ودمائنا .
══━━━━✥◈✥━━━━══
أرَّضَ الــــخَناَجِر
أرَّض واهدة
يحكّمها منّ الخَنجِر غمَده
تَلتف منّ حولها الأجمة ، لكن حقيقتها انها أرَض مَفّازة .
سُكانها مخَّادعون
ظَاهرهم سَليم وداخلهم مليءَ بالترهات والأكَاذيب
حياتهم مظلمة قاتَّمة وأياَمهم دجية حَالكه
أَحقَادهم تلتهم أرواح ابنائهم
والغُل يعتلج في صدورِهم
لَكن من بين ركَام معاركهم ورماد محَارقهم
وَلدَ جِيل عنيد لا يحكمة خنجر ولا سور من حديد
معادي لعاداتهم كارهاً لتلك التقاليد
حنيف وعر شجاعً قوي لكن ذو غضب شديد
ظنوا انهم جيل عن قراره لا يميل
حتى احتل قلوبهم ذلك المستطرق الغريب
وبعد ان كانوا منتصرين الان عليهم المحاربة من جديد
ليُخلّد كل فرد منهم نهاية حربه الذي سمق والابق والذي هاجر
في رواية سميت أرض الخناجر
يا مرحبااا 🥹💚
خلوها بالمكتبة واياكم تنسونها هالرواية تتخلى بنص الگلب راح تدمنون عليها يا اخي احبهااا واحبكم هم
تعالوا انستا نكمل سوالفنا هناك من بعد ما تكملون قراءة المشاهد بالبارت الثاني 💚🗡️
رواية أرض الخناجر الفصل الثاني 2 - بقلم الكاتبــة ايلول
المشهد الأول
══━━━━✥◈✥━━━━══
أصوات ارتطام الابواب وحفيف الشجر أثر الهواء العالي زاد من خوفي ورعبي
ركضت بخوف خاتله بصف السياج واني اسمع صوت الولد يتسامرون يم الساگية رفعت راسي للسماء النجوم تلمع وكأنها تطمني مسحت عيوني اهمس بداخلي
يا رب محد يلزمني يا رب بسّ أرجعهن المكانهم ندمت على السويته ما اعيدها بس اخلص من هالمشكله الخوف تملكني لان آعرف لوّ أكتشفوا اني الماخذتهن محد راح يخلصني اني الوحيدة الماكو أحدّ يدافع الها
ردت اكمل مشي وبسرعة سديت حلكي بأيدي من حسيت باصواتهم قريبة مني تحركت بهدوء اتختل بصف السياج الي من خوص النخل وامر على بيبان بيوتهم بيت بيت .
الحد ما طلعت ونركع الباب وراي بقوة كعدت سانده ظهري على السعف وكاتمه صوت نفسي بأيدي كلّ ما اغمض عيني احس بالخنجر وهو على رگبتي وارجع آفتح بسرعة
نزلن دموعي غصب عني ومشيت بهمه وخوف لنهاية السياج الخارجي اتلفت مرعوبة وكعدت على حيلي شلت البلوكه من يم السياج وحفرت الكاع بإثنين ايدي خايفه ومستعجله ودموعي مغطيه خدي وشهكتي ما كدرت اضمها اكثر بس اريد الكاهم وارجعهم المكانهم قبل لا يكتشوفن اني الماخذتهم
بمجرد زحت التراب عنهم ولزمتهم بايدي شهكت بخوف واني اسمع صوتها المكروه صوتها اليعلن عن وجوده المخيف بقربي مثل كل مره ابجي بيها شمرتهن من ايدي مسحت وجهي وعيوني احاول امنع دموعي احجي بصوت يرجف
-ما بجيت ما بجيت لا يجي لا لا لا ما بحيت لاااا
انكتم صوتي وعلت دكات گـــلبي من حسيت بخطواته ورا ظهري غمضت عيوني بقوة مرعوبة بردت اطرافي واني احس بحرارة جسد خلفي ثواني وتملكني مخالبة الي مداهم على اكتافي حتى تحتضني .
══━━━━✥◈✥━━━━══
المشهد الثاني
══━━━━✥◈✥━━━━══
كعدت واني كلي فرح فتح الباب وباوعلي مبتسم
-ها ؟
حجاها وعينه بعيني ضحك من شافني لابسه وكاعده بحماس
-عاين عاين الشيطنة ليلية تنام ويَّ الدجآج والليلة ضاله لنص الليل
-هههه شلون انام مو انتَ وعدتني تاخذني للساگية ونحوش تين
-ليش ما اجيبلج شجرة التين هنا لا من شاف ولا من دره
باوعتله مقهورة
-بس انتَ كلت شاربي مو عليَّ اذا ما اليوم طلعتج للساگية .
ابتسم عاض شفته ويباوع الوجهي
-اخذج اخذج بس فد بعد نص ساعة خلي الاهل كلها تنخمد .
هزيت راسي اي بحماس وهو مكابلني مبتسم ويباوع الحركاتي ضحكت وغطيت وجهي بايدي كال
-خاب فدوه آروح لثغرج
نزلت ايدي من وجهي مرتبكة اباوعله وهو اختفت ابتسامته مسح وجهه وطلع من البيت شوي ورجع حجه بحماس مثل حماسي
-يلا يلا تعاي!
مدلي ايده باوعتلها ساكته سحبت الردن نزلتها على كف ايدي غطيته ولزمت ايده كال
-جا احس بحرورة ايدج حتى لو غطيتيها كاض نار هسه انا .
حاولت اسحب ايدي منه واني احجي
-تعوفني وامشي وحدي؟
لزمها بقوة وهو يگول
-لا من نوصل للساگية اعوفنها امشي .
طلعنا واحنا نتختل بعدنا ما عابرين البيت وسمع صوت سحبني بقوة مختلني ورا السياج وجهه بوجهي وقربة اربكني همست بارتباك.
-نرجع ؟ خفت !
هز رآسه لا
-وعدتج انا . ضلي هنانه لا تتحركين خل اشوفن يا چلب بعده كاعد
هزيت راسي موافقة كعدت على حيلي حتى اليفوت من يمي مايشوفني صرت بين سياجين. راح هو وإني اتلفت شوي ورجع همس
-يحليوه
رفعت راسي اباوعله مادلي ايده لزمتها سحبني وياه
-منو الجان كاعد ؟
-آمي خطية ما يهيد بالها ويرتاح گلبها الا تعرف منو اجه ومنو بعده كتلها كلهم ناموا روحي نامي كالت تعال هناك اسويلك تحتومة كتلها شبعان ، ضحيت باكل من ايد امي النعمة لخاطرج .
يحجي ومبتسم ضحكت وكتله
-غلطت عليها انتَ كلت اشوف يا چلب كاعد .
-عبالي ولدنا ما ادري بيها امي تدورين وراي انتِ يا ولحظ
ضحكت وطلعنا من السياج عبرناه الحد ما وصلنا للساگية وكفت وسحبت نفس بقوة عاف ايدي وكف على جهه يباوعلي التفتت عليه
-انزل بالساگية عادي ؟
-اي نظفتها من الشوك اليوم حتى تلعبين بيها بلا ما تتعور رجليج .
نزعت من رجلي ونزلت بالساگية بمجرد الماي لامس رجلي همست بفرح
-الله الله
وضحكت بصوت عالي صاح
-اشش ها ها يمعوده العرض غالي حسج رحمة للخلفتج .
هزيت راسي اي بلا ما اعلق على كلمته اللعب بالماي وهو راح على شجرة التين حاش منها وتقرب انطاني غسلتهم واكلت كعد على طرف الساگية يباوع كال
-اول مره تشوفين ماي ؟
هدأت تلاشت ابتسامتي دنكت ساكته فززني من رش ماي على وجهي
-لا تعبسين جهرتج ترى اشاقيج شمالج كلبتي وجهج .
خليت ايدي بالماي ورجعت رشيت عليه وكف مبتعد ويحجي بتهديد
- ولج مو اجي اغططج
ضحكت وطلعت من الماي حشت بعد تين وافتريت بين الأشجار الحد ما گال يله تعالي نروح كافي ، لزم ايدي ومشينا بين الاشجار من نريد نعبر غصن شجرة طخ بركبته وجرحة .
ما آهتم رجعنا للبيت دخلت بدلت وطلعت غسلت التين اخذتهم ورحت يمه شفته ساحب ياخة القميص ويباوع بالمرايه على الجرح البرگبته عفت الصحن يمه ورجعت جبت التعقيم والشاش
كعدت كدامه كال
-شتسوين ما يسوه
-لا يلتهب وتبليني بعدين تكول انتِ السبب.
آبتسم تقربت عقمت الجرح لزم ايدي بقوة باوعتله بأرتباك سحبني عليه اكثر يقرب وجهي لوجهه يحجي بهمس وعيونه تتمعن بملامحي
-حبيتي البستان ؟
هزيت راسي اي وجهي احسه صخن ابتسامة تخوف على وجهه ، همس !
-جرح رگبتي ما يتداوى هيج !
دنكت عيني واني احاول افلت ايدي من أيده حجيت وآني مدنكة
-شلون أعالجه؟
مد ايده على حنكي ورفع وجهي صارت عيني بعينه باطراف اصابعة تلمس شفتي وهمس بضياع عيونة ذبلانات
-بس خليهن بين شفتي واراويج بيا نار حركتيني .
══━━━━✥◈✥━━━━══
لقائنا بالبارت الاول ان شاءالله 💚🌿
رواية أرض الخناجر الفصل الثالث 3 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
══━━━━✥◈✥━━━━══
قريةً لفحة
في ذات زمان كان هناك قريةً غريبة الاطوار يسكنها من سموا ببيت "أل شعلان" "وارثي الخنجر "
الطغيان يجري في دمائهم، والظلم في أيديهم كالسيف لا يصدأ، ينتقل من جيل إلى جيل كما تُورّث الأرض والبيوت. كان يُقال إن خناجرهم لا تغمد إلا في قلوب من يعارضهم حتى لو كان من نسلهم ، وإن صدى خطواتهم يُسمع في الظلام قبل أن يطرقوا الأبواب
ولكن...
في احد الاعوام تغيرت الأقدار وانقلبت الادوار
ولد من صلبهم جيل غير عنهم لا يتبع ما وجدوا عليه اسلافهم
خنجراً من نسلهم، قد رُفع لا ليطعن، بل ليصد.
ومن هنا بدأت الحكاية ....
══━━━━✥◈✥━━━━══
في الجنوب ..
شهر ١٢
محرم الحرام ...
"انتِ رنّه بنت ابوج شمحلات محاچيچ"
رنــه :: ضحكت وانا اتذكر سواليف ابوي صاحت اختي عفراء
-رنه خايبه ضلي هناه حتى تسوين العشه جا ياهو يطبخلنه .
-مالي شغل انه اروحن من امس كتلج من تحوشون البتيته اروحن وياكم ياهي مالتي بالطبخ انه.
صاحت بحركه
-صخونه كون الغبره .
تحجي وتلبس بالعبايه تلثمت وانه أقلدها شتسوي اسوي دخل اخوي طروادة شافني انه هم لابسه كال .
طروادة:: شني رنه وين رايحه .
عفراء:: موتتني عبالك رايحين نتونس بطرانين مو للحصاد
رنه :: عمي وحك الحسين اروحن .
ضحك طروادة وهو يكول.
-تتعبين ومنا اخوتج ياهو الهم ما نبطي احنه الگاع مگلوبه بس نلمهن ونجي .
-اروحن انا احبن التعب .
عفراء:: خلها خل تتعب خايب ، صيحلي عبود خله يجي هنا زهره وحسين نايمين .
عكد حاجبة يسأل
-ليش عبود وين ؟
ارتبكت عفراء تباوعله ساكته صاح
-وينه ؟
-راح يم بيت عمي شاكر يم الولد .
طلع طروادة بسرعة يصيح لعبود ، طلعت للساحة داير ما داير بيتنا سياج من السعف وانا وعفراء وكفنه بالساحة متانينهم،
عاينت لعفراء راحت فتحت الماي على الحديقة وخلت اكل للدجاج بس شفتها ملتهيه غافلتها ورحت على صفحة مسويتلي فتحة بالسياج اعاين منها.
بيت جدي البيت الچبير
وداير ما دايرة بيوت اعمامي وكل بيت محاوط بسياج
والنوب سياج خارجي يلم كل بيوتنا
شفت طروادة وأكف بباب بيت عمي شاكر طلعله عبود جابه واجه مشيت بسرعة وكفت يم عفراء وهيه تباوعلي بخزر لآن أعاندها بس دخلوا كال طروادة
-عفره ضلن انا وحدي اروحن
عفراء:: شنّي السالفة وحدك لليل وما تكضي .
-ولد اعمامج رايحين للبساتين انا شلون اخذجن .
عفرا:: طروادة بروح اهلك ياهي مالتنه بيهم مناه نروح بالبستان لايشوفونه ولا نشوفهم مو وراك موكب تريد تروح؟
عبود :: وانا ابقى اطبخ ؟
طرودة :: اي بوبيه اطبخي اااخ لو ما گلبك الا اشد عليك فدان واحرث بيك الگاع .
رنه :: ضحكوا كلهم الا اني اباوع العبود اريد يشوفني رايحه وياهم مسح على گلبه ودخل للبيت وعفراء توصيه على زهره وحسين خاف يكعدون باوعت الطرودة اجه الچلب مالته هاسكي يركض كالتله
عفراء:: اربطه اذا راح ويانه ما اروحن .
-شمسويلج؟
باوعتلي كالتله رنه تخاف منه ، وانا اموتن عليه ولا يخوفني بس هيه تخاف وتذبها براسي ، انا احبنه لان كلها تخاف منه اعمامي وولدهم واكثر واحد يخاف منه جدي،
طروادة يموت عليه مرات يتمرض، يتخبل عليه عبالك ابنه مو چلب صاحله
-تعال هاسكي تعال
وهوه ركض وين مايمشي طراوده، كعد بمكانه خلاله سلسله مسح عليه واجه
اخذنه سلال وگواني وطلعنه باوعلنه طروادة بحسره مد ايده للثام عفراء رفعه عدل وي عيونها وگالها
-عفره اخر مره تحصدن وياي .
عفراء:: لا مو اخر مره شني نسيت وصيت ابوي ؟
رنه :: امشي وراهم واركز بحجيهم كالها .
طروادة :: ما نسيت شي بس صعبة عليَّ يوم الردت ازرع انتِ تركضين وياي يوم الردت احصد انتِ وياي .
-خايب جا انه مو بعينك شمالني بمية زلمه انه .
-هههههه وكفو .
رنه :: طاحن رجلي شني تركضون .
جراني دفعني كدامهم ، نمشي بين الشجر الحد ما نوصل كاعنا على غفلة وشفنه صيهد ووهب ولد عمو وليد صاح طروادة
- وأكفن هنا هسه اجي .
وكفنه وراحلهم هوه صاح عليهم
-شاردين ها؟
وصل يمهم سلم عليهم گاله وهب
وهب :: لا والله ما شاردين بسّ كاض هذه يريد يدج جدك .
طروداة :: ليش تكضه ، ياهو عاتب عليك ماتخليه يدجه ويفكنه .
رنه :: عفراء دايره وجهه من عدهم وانا اباوعلهم صيهد دار عيّنه علينا وگال الطروادة.
-شني وين جايب اهلك ؟
طروادة:: گلبت الكاع ، ورايحين نلم البتيته .
وهب :: شني السالفة ردهن للبيت احنا وياك .
طروادة :: لا خوية ، يشوفكم شعلان ويعاقبكم مشكورين .
رنه :: عافهم واجه علينا اشرلنا ومشينه وراه ، وهب وصيهد ابتعدوا من الطريق فتنا من يمهم عفراء تمشي رافعه راسها ومنزله عينها انا ألتفتت عليهم ما ادري ليش أريد اتحدى الكل اريد اكلهم عاينوا انا رايحه للحصاد وي اخوي غصباً عليكم.
وصلنا للگاع اباوعلهم شلون يلمون واسوي مثلهم لمن تعبـــت ، عبرت كعدت يم الخس اجه طرواده يمي جر اللثام من وجهي كال
-ياهو گالج تتلثمين انتِ
مد ايده للخس سحب وحدة صغيرة غسلها وانطانياها
-اكلي
اخذتها من إيده اكلتها كالتله عفراء
-بيش الساعة تروح للموكب؟
-بالاربعة واذا مالحكت ما اروح.
رنه :: طروادة اسألك شي؟
وكف عدل يباوعلي هز راسه أي كتله
-ليش خنجرنه معلك بدون گراب وخناجر بيوت اعمامي كلهن بيهن گراب .
سألت وانه اعرف الجواب بس اريد اشوف اذا يعتبرني چبيرة ويحجي وياي مثل ما يحجي وي عفراء، تغيرت ملامحه ، جاب السلة ووكف يمي گال
-افتحي الگونية .
فتحتها ودار البتيته بيها مشه وهوه يگول.
-رنه تعرفين ليش جدج شعلان ما يريدنا ولا احنه نريده.
-لا ، بس خلني اكلك انه والله اكرهه اتذكر من نجحت من السادس ابتدائي وراد يبطلني وانتَ ما رضيت هسه غير صرت ثاني متوسط بس بعدني ولا ناسيه
ويوميه من اروحن للمدرسة اريد اكله شوف بعنادك .
عفراء:: لا اجيج اغطج بساگية الخس لا تتعلمين هاي السوالف .
درت عيني منها لطروادة كال .
-محد يبطلج .
. كمل ليش ما يريدنا .
-مالج شغل .
حجه ورجع يلم ، كمت وياهم كملنه عفنه الكواني على صفحة بعدين يجي الزلمة اليشتريهن، عفراء عزلت بالسلة النه ، رجعنا للبيت لكينه عبود نايم وحسين وزهره كالبين البيت گلاب مبدين الطحين كاسرين ماعون بالگاع ، ركضت الم وامسح لان عفراء راح تحجي عليَّ
طروادة ركض سبح حتى يروح للموكب، وعفراء حضرت ملابسه السود والزنجيل مالته ، اخذهن وطلع بسرعة ولد اعمامي متانينه .
وهب ::واكف بصف صيهد وسليم اباوع الايديهم كل واحد بأيده زنجيل وصيهد يدخن ويباوعلي بنظرة احسه بيها يگلي ادري بيك خوية ادري شنو الضامه وادري بيك منين خايف .
اجاهم طروادة لاف چراوية على راسه، سلم على سليم رغم كرهه لعمي شاكر بس يحب سليم باوعلي گال
طروادة :: ها ويانا وهب ؟
دنكت هزيت راسي لا
-رايح للمعامل إشوف العمال.
سكت يباوع الصيهد آحس اثنينهم كاشفيني كالهم سليم
-جا متانين ياهو بعد؟
صيهد :: ولد عمك خليل ، ميثم وبريا .
سليم:: اوو ولّد الروسيه.
وهب :: سليم يزعلون لا تحجي يمهم هيج ترا معزولين من عدكم لان دوم تصيحون عليهم ولد الروسية من الشغل لبيتهم ومن بيتهم للشغل وهمه هالاثنين لا ام ولا اب هم خطيه
هز ايده ماقابل
سليم :: يابه شكّلت هسه سبيتهم شني السالفة تريد تعارك انت
وهب :: زعل وراح وحده باوعلي صيهد مضيك عينه شمر الجكارة بالگاع داس عليها وكال
-ها صاير محامي الخايس.
سكتت منه شوية واجوهم الولد التموا وراحوا للموكب صعدت ورحت وراهم من بعيد أعاين واتحسر اسطفوا بالشارع.كدامهم سيارة بيها المسجل والرادود
بدوا يدكون زنجيل وصوت الرادود يقرأ وانا بخطوات بطيئة تابعهم
عيني على ولدنا صيهد وطروادة واحد مقابيل الثاني حتى هنا ، تعب الرادود وأشر الطراودة صعد بداله وبس سمعوا صوته من صلى على محمد وال محمد كلها صاحت بصوت واحد وعالي
"لبيك يا حسين "
يشجعونه لان اول مره يقرأ بموكب جنت خايف عليه يرتبك وامنت من شفت صيهد اقترب يمه حاجاه وبدأ يقرأ بصوته التارسه الحزن
"والله وشسويتي بيه آه يعملة كربله
ﭼنت هيبه بزود اخوتي و عدهم انه مدلله
وين ﭼـانت هاي اليه و الـﮕلب بيها ابتلى
يا شهر عاشور عـذراً لو كلتلك لا خله
و الحزن مر على زينب يا بشر يتحمله
وهب :: بلا وعي لكيت ايدي على صدري الطم واردد وياه، ودكت الزنجيل ورا كل بيت يقراه تهز الگلب
"شلون ترضيها من جيتـﭻ اوصل لهذا الوضع
كربله و هاي المصيبة اشتكيها بيا دمع
و اليجي خطار عندﭺ ليش ﮔـلبه ينصدع
و ليش من زينب اجت راس حسين اخوها منـگطع.
طروادة :: كملنا الموكب احس بحنجرتي غصة وكف يمي صيهد گال .
-انا لازم اروح للگيعان اشوفن مكاين الماي تروح وياي ؟
-جا فلاليح جدك وين ؟
-لا تخليني اسبه واطير حسنات الموكب كوه لامهن، يغفلون يابه امس لكيت وحده من المكاين كاطعه ماي ومايدرون بيها .
-ههههه هاي هيه خلي نصلي ونروح ، الولد راحوا ؟
-اي ،اكلك هذا سليم مو يحجي عليهم ولد الروسية وولد الروسية شو ردوا للقرية سوه ؟
-يحبهم سليم بس هوه يحب يتشاقى.
طروادة:: هز أيّده مستهزئ، دخلنه لحسينية صلينه وطلعنا للگيعان .سألته واحنه نمشي
-اكلك جدك امس رايح البغداد؟
صيهد :: اي جاب بت عمتك نضال الله يرحمها.
-مايعوف البت عد ابوها.
-ابوها ماخذ مره ومو زينه وياها مدري شني جدتي كالتله روح جيبها اريدنها. موتت نضال وهسه تموت بتها .
طروادة :: الله يرحمها والله جنت احبها خوش عمه.
صيهد :: شاخطه الله وكيلك ما تتذكر من شمرتنه بالشط واحنه لا نعرف نسبح لا صخام شبعنه ماي لو ما ابوك لحكنه.
طروادة :: ههههه الله يرحمها جان محروك گلبها من أبوك وابوي.
-جا اذا محروك گلبها تغركنا ؟
-يابه هسه المره ماتت ترحملها .
-ولا اترحم وعلي .
-طاحظك يا خايس.
ضحك ومشينا من كيعان جدي الگاعي ومناك ردينه للقريه نمشي ونسولف قربنه نوصل لبيوتنا ونشوف جمرة جكارة بسد السياج، جراني صيهد وهو يگول
-اشش اوكف خلنه نشوف يا جلب هذه يدخن .
-كلنه ندخن امشي.
-اشش خل نكضه متلبس
طروادة :: مشيت وراه نتختل وكل ساعة سابة وصلنا للسيارج ظلمة ما نشوف غير جمرة هالجكارة الگشرة
افتر هوه من جهه وانا من جهه ركضنا سوه كضيناه وانصدم بشهكتها
جويرية :: ايدددك ايددك
عفتها بسرعة مصدوم وصيهد تخبل عبالي وحده من اخواته يعت بيها ويضرب ويصيح بحركة
-بت الكلب بت الساقطة تدخنين
وهي بلا صوت جريته من ايده بس اريد افرغها منه ماكدرت جنه مخبل بصوتها اليرجف بمجرد سمعت لهجتها عرفتها من كالتله
-لتسب ماما.
بهتت هاي بت عمتي نضال جريته حيل منها
اصيح بوجهه
- لا تطكهاا.
رفع ايده طكني على وجهي
وهيه راحت تركض للبيت من وره السياج.
دفعني للسياج مچلب بياختي. ويصيح
-ترضى اخواتك يدخنن تسكتتت ؟
دفعته حيل
-مو اختتتتتك مو اختك حيوان هاي بت عمتي نضال شلون تطكها لو لان يتيمه ؟
-شتعلت روح عمتك يا خايس.
مشه لبيت جدي وانا رجّعت لبيتنا، هسه حتى اخواته يحاسبهن . وهالمسكينة شيخلصها إذا درى بيها جدها.
جويرية:: دخلت للبيت ركض صارت بوجهي جده گالت
-وين جنتي ولج الغبره .
مسحت وجهي وهمست بصوت مخنوك.
-بالتواليت.
دفعتني وهي تكول
-امشي نخمدي وي البنات، الولد واح يردون ما اشوفنج تفترين هناه
سحبتني ماسه بنت خالي وليد من ايدي صعدنه فوك لغرفتهن هيه وبدور كالت
-وين رحتي ما جنتِ بالتواليت .
-طلعت بره.
سكتت تباوعلي واني الغصة خانكتني اريدها بس تعوفني وتنام فرشت بصف بدور وانطتني فراش على جهه شغلت التلفزون تتابع مسلسل تركي وتنصي الصوت خاف امها تلزمها مسحت وجهي وحجيت
-ماسه، منو الولد اليجون هنا للبيت؟
-اخواني وهبّ وصيهد، مو احنا صار بيتنا وي بيت جدي.
-وهاي البيوت المنو؟ اتذكر قبل خمس سنوات اخر مره اجيت للقرية ماجان كلهن موجودات.
كعدت على حيلها مقابيلي كالت
ماسه ::شوفي احنا بيت وليد عفنه بيتنه واجينه وي بيت جدي .
البيت الگبالنه هذه بيت عمي شاكر والبيت البصفحة البستان هذا بيت ولد عمي خليل، بريا وميثم . والبيت البالاخير بيت عمي شامل الله يرحمه يعني هسه هوه بيت طروادة
-اكو مشتمل صغير بصف بيت جدج كلش هذا شنو مخزن؟
-لا هذه الصيهد مايحب يكعد هناه بس ياكل ويشرب ويروح هناك، وحتى وهب عنده بس ما بيه غراض مايفارك أمي هذه
جويرية :: سكتت اباوعلها رجعت لفراشها شوي ورجعت كعدت كالت
-أأمنج على سر؟
هزيت راسي اي تقربت رادت تحجي وسكتت كالت
-ماكو شي اتشاقه وياج.
سكتت اباوع لوجها ،رجعت لفراشها شوي ونامت كمت على أطراف اصابعي طفيت التلفزون والضوه وطلعت من الغرفة مديت راسي اباوع للجوه طافيه الاضوية نزلت دخلت بسرعة للمطبخ وحتى ما اسوي صوت بفتحة الباب اطلع من الشباك .
افتريت طلعت من السياج الاول وفتت على بيت خالو خليل من وراهم طلعت من السياج الاخير كعدت على حيلي سانده ظهري على السياج وكدامي الشجر والنخل الهواء بارد وعالي وصوت السعف من يتحرك يرعب
بس الغصة البگلبي اقوه منهن كلهن شهكت أبجي بحركة ساعة السوده الصرت بيها بنت نضال ماتت خلصت منهم وعافتني اتحمل ظلم اهلها، ولا اني العندي أب بيه خير تحملت كلشي منه ومن زوجته في سبيل مايرجعني هنا بس رجعني، رجعني الهم.
فزيت من سمعت صوت بومه باوعت للنخل مقابيلي بسّ صوتها مبين اخاف منها من جانوا يربونها ولد خالو وليد، فزيت واكفه على حيلي لمحت خيال من بين النخل عبالك يباوعلي وكفت احاول اركز صح خيال شخص لو خيال شجرة .
فاتحه عيني كلها صوت البومه وصوت الشجر
واباوع للخيال شهكت ورجعت ليوره مرعوبه وخطوات ترجف من شفت هيئة الخيال وحسيته يقترب
ركضت للبيت واني اتلفت وجسمي يرجف وكفت يم بيت جدي خاتله من سمعت صوت احد بالمطبخ كعدت بصف السياج سمعت صوت احد من برا السياج صاح
عبود :: وينك صار ساعة ادور عليك .
طروادة :: روح نام رايح للگيعان انا .
جويرية ::اختفى صوتهم وحتى الصوت البالمطبخ حسيته اختفى، دفعت الشباك ومديت راسي چلبت صعدت ودخلت من الشباك للمطبخ سديتها والتفتت شفت جدي بباب المطبخ الداخلي مبين من ضوه الحمام صاح
-ياهي هاي.
-ها جدو أني جويرية.
حجيت بصوت ناصي رجع صاح
-ياهي هناه منجن ؟
بقيت ثابته بمكاني من شكيت بيه مايشوفني ماتحركت ، طفه ضوه الحمام وراح زفرت نفّس براحة بعدني ماخطيت وشهكت مخروعة على صوت وراي
وهو يگول
صيهد:: اذا كضيتج تدخنين بعد أچويچ بحلكج خوش؟ واذا لكيتج معلمه البنات على سوالف خايسه اعدمج واعدمهن يشهد الحسين.
عفته ومشيت بسرعة صعدت فوك لفراشي ما اهتميت الكلامة كد ما اهتميت للخيال الشفته بين الشجر واحس بصوت البومة بعده بأذني خليت المخده فوك راسي ونمت.
رنه ::بعدني ماشبعانة نوم وحسيت بعفراء تكعدني
-رنه،رنه، يله اكعدي
فتحت عيني عابسه وجهي
-يله كعدي شني ماترحين للمدرسة اليوم
-اروحن
-جا كومي شلعتي گـــلبي
رنه :: غمضت شوي ورجعت باوعتلها تمشّط الزهره فتحت ايدي أشرتلها
-تعاي زهره
اجت تركض شمرت روحها بحضني بستها
-حفظتي سورة الفاتحة ؟
عفراء:: اي اختها رنه حفظتها ، امداج وانا منتكله عليج عبالي مكتبتها السورة، عبود كعد من الفجر كتبها
-نسييت، حتى حسين ما كتبته
عيبت عليَّ تضحك واجت بسرعة تدغدغنه اني وزهره
وزهره تصررخ دخل عبود وجهه معصور وايده على گلبه وكفنه اني وعفراء خايفين
-شبيك ؟
ابتسم يحاول يتنفس باستقرار گال
-جنت بره وسمعت زهره تصرخ عبالي بيها شي
راحتله عفراء تمسح على گلبه وتكله
- امشي عليك الحسين لو تشوف بيتنا يحترك لا تركض ولا تطفينه اكعد على صفحه وعاين علينا لا تركض بروح اهلك لا تركض .
ضحك وعفراء حضنته خايفه عليه طلعنا للهول كاعدين يم الصوبة وهيه تسويلنه ريوك ، كعدت بين حسين وزهره أراجعهم قراءة.
التفتت اباوع الطروادة نايم على صفحة فاتح حلكه من التعب شوي وضلّ يصيح وهو نايم
-كضه كضه
عبود:: ياهو .
عفراء:: سوده عليَّ تعبان اجه من الگاع بالأربعة الفجر
عبود:: لو گلبي كامل واكدر اشتغل نتعاون ومايتعب وحده .
فتح عينه طروادة شمر المخده على عبود وهو يكله
-ما اريدك انتَ اذا تطكك شوكة تورم رجلك شهر .
عفراء:: اكعد غسل وتريك وياهم يله .
رنه :: كام غسل واجه كعد يمنه يتشاقى وي حسين وزهره كالتله
زهره :: امس
-اي؟
-رنه
-شبيها.
-كطت كاسكي
حجتها وباوعتلي خزرتها
-جذابة الخايسه بيج خير كولي هاسكي عدل
باوعلي طروادة بزعل
-صدك رنه ؟
-والله العب وياه وهيه عبالها طكيته
وهو بمكانه صاح الهاسكي واجه وكف بالباب يباوعله متانيه يكله ادخل لو لا گال
-تعال
دخل للبيت وكعد يم طروادة عاقل بس احنه عائلة طروادة يحبنه ويكره القرية كلها فدوه لگلبه جنه يدري بيهم ماينعاش وياهم .
كملنه وطلعنا للمدرسة عبود وصلنه نوصل حسين وزهره لمدرستهم والنوب يوصلني المدرستي التفت يباوع ويسأل
-رنه هذيج بدور بت عمي وليد مو؟
هزيت راسي اي عفته ودخلت للمدرسة .
طروادة:: شفتها تكنس بالساحة طلعت يمها مديتلها ايدي بيها فلوس
-عفره هاج.
باوعت الأيدي
-مال البتيته؟
-اي البارحة ابو حسن ماخذهن ومنطي فلوسهن الوهب .
-اكلك، لم انت وراك تجيب دوّه للزرع حنطتنا امس اعاينلها مو زينه. وحنطة جديّ خضرة.
-جدج صابغها، يله خويه انا رايح للگاع ما محتاجة شي.
ضحكت كالت
-اخذ الغزل وياك صيدلنه سمج للغده
-ولج من البارحة نصبتهن هسه اجيبهن من اجي .
صحت الهاسكي وطلعنا شفت جدي يمشي التفت باوعلي مشيت ما مهتم صاح
-من تشوفني تسلم لا ظهرك اكسرنه.
وكفت رجعت خطوة والتفتت عليه رفعت ايدي
-جلالة الطاغية شعلان لك مني سلام .
اعذرني ماكدر اجي يمك تعرف هاسكي عنده عداوه وياك يكره أمثالك
اجه يمي مديت ايدي على راس هاسكي اسكته ، رفع عوجيته خلاها بصدري يحجي بغضب
-انا زلم ماعاندوني ،انت تعاندني؟ اكسر راسك واخليك جوه رجلي
-ابن شامل انا اكسر الروس وعليها ادوس ومحد يوصلني.
صيهد:: جدددي
طروادة :: دفعت عوجيته من صدري وصيهد ووهب وعمي وليد إجوا يركضون
رفع أيده طكني راشدي
وهب :: ركضنا لازمين طروادة وهوه بس يريد يوصل جدي ويصيح
-والله بخنجرك اذبحك انعل ابوك لابو اسلافك
شعلان :: شفّت تالية ابوك شنهي سنين مذلول ومات وهوه مذلول مثله اخليك مثله .
طروادة:: تحلم تحلم تذلنه، ابوي عاش بشرف مو مذلول ومات مغدور
وليد:: سد حلكك طروادة احترم جدك.
وهب:: اخذنه طروادة سحل صعدناه بالسيارة صيهد يسوق وانا كاضة. اباوع الهاسكي يركض ورانا
صاح صيهد بغضب
-انا چم مره كتلك عوفه عوفه لا تحاجييية لا تحاجية
طروادة :: اششش اشش صوتك، اذا انتم تخافون منه وما تردون عليه ، انا ارد الماي بدم ومحد يوكف بوجهي لا ابوك ولا ابن الكلب شاكر.
صيهد:: خرب اهل اهلك اسمط صفحة الخلفوك اسكت اسكت أشتعلت روحك
وهب:: سديت حلك طروادة بأيدي هذا نار وهذا نار كابين ، عبرنه للكيعان نزل طروادة من السيارة راح الكاعه شغل المكاين درت الصيهد
-انت شبيك محترك غير جدك طكه شتريده يسوي
صيهد:: نجب لك نجب قشمر، ما تدري بيه مسودن اذا طك شعلان المشعول شلون تحلها.
-طكه بطكه تنحل.
جر عصه واجاني عفته وركضت وره طروادة المسحاة على جتفه ويمشي وي الساكيه يسكي الزرع وهاسكي يمشي وراه وصلت قريب عليه صحت
-اجي لو يعضني.
-تعال .
مشيت بعدني ما واصله باوع الهاسكي وكاله
-هاسكي شووه.
-لااااا ،طروادة بداعت ياهي لااا ،
-تعال شبيك بس يشمك يعرفك اخوه .
-قصدك صيهد چلب ؟
وصلت يمه كعدت على صفحة شوي واجانه صيهد يتمشى وكف على جهه صاح
صيهد ::كض چلبك اريد اجي يمك.
طروادة :: ما اريدك صارن هواي من البارحة لليوم.
وهب :: مشه يم طروادة جراه الصدره
صيهد:: يشهد الحسين ما ادري بروحي من طكيتك طروادة انا ليمت رافع ايدي وطاكك؟ واذا على الغلط يعني تدري بيه انا اهلي من يقهروني اسبهم.
-بوس ايدي وانساها الك.
مد ايده الصيهد وهذا جراها عبالي صدك راح يبوسها تفل عليها وطراودة تخبل صيهد يركض وطروادة صاح على هاسكي خلاه يركض وراه جر التفكه من يم الصهوه
صيهد :: صيحله اكتلللله طروادة
طروادة:: هييي هي هاسكي تعااال.
رجعله يركض افترينه وياه بالزرع كملنه سكي ورحنه وياه للشط يلم الغزل ، هستوه نزع من رجله وذب القمصلة على صفحة حتى ماتقيده مد رجله للجرف وصاح موجوع
-اااخ
اباوع للماي اليمه صار احمر ركضله صيهد
وهو روحة شاطت ،بطل مكسور وطب برجلة غسلانها
شك جبير والدم ماينكطع لفيناها واخذناه للمضمد خيطها اله ، صيهد ميت قهر عليه .
رنه :: رجعنا من المدرسة وي الغدا وانا افكر بس اوصل شنو اكل لمن وصلت للبيت لكيت عفراء تسوي كمادات الطروادة
-شكو؟
-رجله نشكت وخيطوها بس هسه صخن ؟
-شك جبير ؟
-اي سوده عليه ممرود گلبه .
وعبالك بيتنه كله موجوع لحد اله نفس ياكل ولا النه خلك شي طروادة من زمان بس يتعور يصخن وينام بالفراش . للعصر گالت عفراء
-رنه تمشين وياي للبستان بس لوحين خس ضلن عود گال العصر اكملهن وبس يضلن يخربن .
- اي بس واذا كعد طروادة خاف ما يرضى نروح وحدنا .
- ما نبطي بساع نرجع نص ساعة ونكمل .
رنه :: لبسنا العبي وعبود تخبل ما يرضى نروح وحدنا كوه قنعته عفراء طلعنا منّ البستان افترينا لمن وصلنا للواح الخس علمتني وبديت وياها شتسوي اسوي وهيه تتلفت خاف يمرون ولد اعمامي ويشوفونه
كعدت تعبانه
-عفراء جدي اليوم متعارك وي طراودة ؟
هزت راسها اي
-شيريد من عدنه؟
وخرت اللثام من وجها ومشت على صفحة ورانا يصير نخل وشجر وطروادة مخلي سياج هي واكفه تريد تحاجيني وصرخت من اندفع السياج وطفر يمها ولد الولد مصدوم وهي مصدومة فاتحة عينها متخبله دار وجهه ويصيح مرتبك
-اعتذر انا اعتذر عبالي طراودة والله العظيم عبالي طراودة
كمت بسرعة من شفتها كعدت على حيلها متخربطة من الخرعة وبيدي حجارة شمرتها عليه اجت براسه وهو يحجي
- خويه مادري ماعرفجن اجيت الطروادة
عفراء:: اطلع من البستان اطلع .
التفت باوع العفراء يريد يحجي وفتح عينه ساكت يباوع الوجها بصدمة رفعت اللثام غطت وجها والتفتنا على صوت ولد عمي
سليم بريا ووهب يركضون اجو كامت عفراء بسرعة جرتني مبتعدين والولد من خرعته يباوعلهم لمن وصلو يمه وجروه بينتهم هذا يجره وهذا يطكه سحبتني عفراء حيل تركض باتجاه البيت .
يتبع ...
الفهرس
——————
فدان / اداة لحرث الارض،تشبه المحراث الذي يجره الثور سابقاً
الغزل /شبك لصيد الاسماك
نصبتهن / ثبت شباك الصيد في الماء
گراب / غمد الخنجر ، الغطاء الخارجي للخنجر
ساگية / مجرى مائي
نلتقي اول يوم عطلة بنصف السنة 💚🥹
احجولي متحمسين لروايتنا الجديدة ؟
ايلول 💚
رواية أرض الخناجر الفصل الرابع 4 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
══━━━━✥◈✥━━━━══
ملاحظات مهمه يرجى قراءتها لطفاً.
1- وجب التنبيه أن هذه الرواية تختلف عن تلك التي يُصوَّر فيها البطل خارقًا للطبيعة والبطلة خارقة الجمال والقوة. ستواجه شخصيات متنوعة بأفكار وطباع مختلفة، بعضها قد تحبه وبعضها قد تكرهه، لكن تذكر دائمًا أن هذه الشخصيات جزء من حكاية أعمق.
2- أنتم قرّاء رائعون، وأنا لا أريد خسارتكم، لذا أرجو أن تكون آراؤكم محترمة وبناءة، فأنا لا أحب اللجوء إلى حظر أي شخص بسبب سوء كلماته. مثلما أحاول أن أقدم لك رواية تحترم ذائقتك وعقلك، أتمنى أن تبادلني ذلك بقراءة واعية وتقدير للجهد المبذول.
3- أتمنى عدم حرق الأحداث في التعليقات، لأن هناك آخرين سيقرأون الرواية لاحقًا، ولن يكون ذلك منصفًا لهم.
4- لمن لا يعلم، لقد أجريت عملية لعيني قبل شهرين، وكان من المفترض أن تتحسن حالتي، لكن الألم لا يزال مستمرًا حتى الآن. لذا، أرجو منكم التحلي بالصبر، فقد أضطر أحيانًا إلى تأخير نشر البارتات، ومن لم يتحلَّ بالصبر أرجو أن لا يقرأ حتى تكتمل.
5-إذا استغربتم أسماء الشخصيات أو وجدتموها صعبة، ستعتادون عليها مع تطور الأحداث. برأيي، الأسماء جميلة وسهلة، فلا تجعلوا السهل صعبًا. 💚
══━━━━✥◈✥━━━━══
گاتلني العَطش بس بالي مرتاح
أشرب بالرمل ومَا أنذل للانهَار
وي الگاع طولي ومن تچي الريح
أضِل ثابت أنة وتهتَز الاشچِارَ
لـ سَمير صبيح
"""""""""""""""""
رنه:: عفراء تركض وتجر بيه وياها وانه اتلفت ليورا شفت صيهد يركض عليهم، ولان اتلفت وعفراء تسحل بيه عثرت بالساگية
-اااخ شمالج سوحلتيني تسوحل.
وهيه ما مهتمه خايفه وترجف كلها دنكت عليه كومتني ورجعت تسحل بيه لمن وصلنا للبيت دفعت باب الحوش وتلاكه ويانه طرواده مستعجل يريد يطلع وكفنا نتنفس بقوة باوع العفراء بعتب وعصبية كالها.
-ها عفره؟ جا انا شوصيتج؟
عفراء:: راح يكتلون صاحبك.
مشه بهمه دفعنا من الباب وطلع بسرعة باوعت العفراء راحت للحوض الصغير البالحوش فتحت الحنفية وغسلت وجها وكعدت على حيلها خايفه وترجف، مشيت يمها مرتبكه
-كومي لا تخافين هسه طروادة يحلها.
وكفت بخوف باوعتلي مسحت وجها وهمست بصوت مخنوك
-ماتوصل الجدي كون بجاه الحسين.
دخلنا للبيت يم حسين وزهره شوي وسمعنا صياح جدي بباب حوشنه، وكفت عفراء بخوف خلت العباية على راسها كمت وياها ندفع باب الحوش ودخل جدي يغلط ويصيح
-ولج عفيره اذبحنج اليوم.
ودخل وراه طروادة يركض دفعه بقوة ووكف بوجهه، ومن شفنا ولد عمي واعمامي اجو دخلنا للبيت نباوع من الشباك صاح طروادة.
-اطلعع.
شعلان:: ولك خايس ولك اغبن، صاحبك واختك وساكت.
هو حجه هيج وطروادة تخبل بس يريد يكض جدي والولد لازمينه وكلها تصيح، اعمامي واكفين وي جدي، ويصيحون على الولد الصياح يجيب التايه، طروادة دفع الولد وصاح
طروادة:: وخروا بس احاجييييه وخر.
دفعهم حيل ورفع ايده يحذر بحرگة گلب
-وروح العزاز بخنجرك اذبحك لو فكرت تگرب صوب واحد من اهلي.
صاح عمي شاكر.
شاكر:: جا انت خنيث وتسكت على عرضك، احنه موش خناث نفرك حلكك وحلك العايبة التطلع للبساتين تخور وي الزلم.
وطروادة من بين صيهد ووهب جر عمي شاكر وسطره راشدي بحرگة، الولد يجرون بيه وهو بكل قوة يسطر بعمي على راسه، وسليم تخبل دفع طروادة حيل وطكة بوكسي على وجهه يدافع الأبوه
صيهد:: كااااافي اطلع برا اطلعع
دفع سليم برا ودفع طروادة للبيت، جدي واكف على صفحة مبتسم بشماته، وعمي شاكر يسب بطروادة وبعرضة.
باوع جدي على طروادة ورفع عينه فوك باب بيتنا على الخنجر أشر عليه بعوجيته وگال
شعلان:: تريد على درب ابوك تمشي، بس ما أهدك، راسك اكسره اكسره، انا شعلان زلم مايعلون صوتهم عليَّ، تريد انت الامس صرت تعاندني وتطكني شوف طرووووادة اذا ماحيرتك بزمانك گول جدي ماكال.
طروادة:: ههههههههه، ابوي بگبرة وبعده غاثك.
شعلان:: اضحك اضحك تعارفني زين من اكولن سالفة اسويها ولو امك موجودة تشهدلك، اسمك العاندتني بيه غيرته وخليت كلّ القرية تصيحلك مثل ما انا اريد.
صيهد:: جدددددي، امشي الديوانك الوادم راح تجيك.
حجه ودفع عمي شاكر وجدي طلعهم وسد الباب، عاين على الولد وهب وبريا صفگلهم.
-امشوا حضروا دلالكم الوادم جايه لو بس تعارفون تهوبزون.
طردهم طلعوا ساكتين وطروادة كاعد على صفحة وكف صيهد كاله
-جم مره كتلك من تريد شي بالبستان انا اساعدك؟ليش يرحن اخواتك طروادة من شوكت نسوانه يرحن للبساتين؟
طروادة::اششش اسكت مني انتَ هم.
صيهد:: امشي يله غسل وبدل وتعال للديوان الوادم راح يجون، جدك معيد اليوم اجته طلابة بسبب طروادة.
رنه:: طلع صيهد ودخل طروادة للبيت وكفنا انه وعفراء خايفين منه، دخل عبود وراه وكف كدامنه گاله
عبود:: ما سون شي خافن عليك لان رجلك متعوره وراحن بمچانك للبستان.
طروادة:: انا شوصيتج عفراء؟ كتيلي اروحن وكتلج لا خويه خليهن يولن كتلج لو لاااااا
هزت راسها اي تبجي گالها.
-تعلمتي حچايتي ماتوكف بوجهج عاشت ايدج.
رنه::دار عينه علي گال
-رنه جيبي دشداشتي السوده.
حجاها وكعد على حيله فتح اللفاف من رجله، رحت للغرفة اجت ورأي عفراء طلعت دشداشته وچفيته خلتهن بأيدي عيونها متروسة دموع
-وديهن اله وانطي التعقيم ولفاف جديد خلي يلف رجله.
سويت مثل ما كالت دخل سبح وبدل ، وطلع للديوان چلبت بعبود
-عبود ياهمَ الراح يجون
-اهل منذر صاحب طروادة.
-ياا وشيصير هسه؟
-ما أدرّي يعتذرون وهاي هيه.
رنه:: سكتت منه طلع وراهم، افتريت ورا من يم السياج من الفتحة اباوع للوادم الاجت والولد واكفين واحد بصف الثاني والناس تسلم عليهم ويطبون للديوان، درت بفزه على هاسكي يعض بردني ويسحل بيه
-وخرررر هاا تر اجيب العصا.
كعدت عدل من شفت عفراء طلعت انطت للدجاجات اكل ولمت الهدوم من الحبل تشتغل وعيونها يصبن .
وهب:: كاعدين على نار من رد جدي على الوادم اعاين لطروادة روّحه بخشمة ومنذر صاحبة يعاين عليه وجهه مشخط من كتلتنا اله، حجوا اهله يعتذرون على دخلته لبستانا حطّوا ألقرآن گدامه وحلف
منذر:: طبيت للبستان لان متفق وي طروادة اجيه بهاي الساعة اعاونه، وانا متعلم كل ما اجيته اكمزه، ما جنت ادري اهله البالبستان، طروادة انتَ اخوي وتعارفني انا ما غلطان .
ابو منذر:: احجي بويه طروادة ابنه عايل ركابنه سداده لو صدك متفق وياك يجيك لبستانك،احجي يبوي.
شعلان:: أبو منذر انا اكلك ابنك عايل و........
حجه طروادة وماخله جدي يكمل
طروادة:: من رخصة جدي، بس هوه مايعارف السالفة كاملة، عمي ابنك مابيه غلط أنا الغلطان والحك عليَّ كتله تجيني تعاوني، وساعة النشكت رجلي نمت ونسيته ماخابرته وكتله لا تجي، وأهلي راحوا للبستان، منذر من اجه عباله انا، وولدنه مايدرون بالسالفة وشالتهم الغيره لمن شافوه بالبستان.
وهب:: طروادة يحجي وجدي يريد ياكله من سكت طروادة رد جدي بعصبية كالهم
شعلان:: الااا غلطان ماسمع حس نسوان شلون يطب والبستان مسيج.
صيهد:: انحلت ان شاءالله، عمي أبو منذر احنا اهل،جدي شويه محترك كلبه لان بعد تعارف حيل يحب طروادة وما يرضى واحد يوصل كاعه.
وهب:: غير لو يخليها تنحل شعلان يعنطز وحده كل ماكلنه نحلت دك عوجيته وصاح لاااا اخر حل وصلوله منذر مايوصل لقرية لفحة الملفوحة، خله طروادة ينشال وينركع من القهر، كمنه بعناد شعلان اعتذرنه من منذر وهو كام باس طروادة واعتذر منه وكلمن راح الاهله
طلعنه بره واكفين يم طروادة سلم على الوادم وراحوا وهوه بس اخذ هاسكي من الباب وراح للشارع يعرج، اخذت سليم وبريا وتمشينه للكيعان
بريا:: سليم مدت ايدك على طروادة غلط.
سليم::ادري بس طك ابوي شني اباوع بوجهه؟
وهب:: جا ابوك غلط وانتَ تدري بيه غلط.
سكت سليم مقهورادري بيه يحب طروادة بس هم حقه آبوه وماكدر يضل ساكت، مشينه للكيعان شفنه طروادة كاعد يم النهر وهاسكي يمه درت السليم.
وهب:: نروح يمه تعتذر منه؟
هز راسه اي مشينا الطروادة منطينه ظهره ونسمعه يدندن بالطمية القراخا بالموكب
لمن وصلنا يمه دنك سليم باس راسه وكاله
سليم ::أخوك الصغير وغلطت اعذرني وبعد لا تطك ابوي لان ارجع اطكك وارجع اعتذر منك.
وكفّ طروادة سلم عليه وتصافوا بس ما اله خلك ما ضل يمنه شويه وراح، اعاين عليه اجاه صيهد صفوا سوه وطروا الزرع ،رحنه للمعمل كملنه شغلنه حالنه حال العمال جراني سليم على صفحة كال
سليم:: امس بريا نصب علي واليوم لازم اردها اله.
وهب:: صايرين تسوون مقالب بدوني؟
-هسه خلنه نتفق نرجعها اله
-هاي هيه شنو ببالك.
-خليها يمي، باجر.
""""""""""""""
رنه:: رجع طروادة للبيت وكفت عفراء بالباب تريد تحاجيه عبرها وباوعلي كال
طروادة:: رنه صبيلي عشه بسرعة عفيه اريدن أروح للحسينية.
هزيت راسي اي، وعفراء تباوعله بقهر اجت وراي للمطبخ صبت العشه اخذته اله أكل هوه وعبود شوية وكاموا غسلوا شربوا الچاي وطلعوا بس سديت الباب وراهم عفراء دخلت لغرفة امي واسمع صوتها تبجي وتنعى بشهگة كعدت اسمعها وهي تگول
عفراء:: يا خوية أمي شوصتك
وگبل الوصية حبتتك
يمه الاخو عينك على اختك
أأأخ يمه يا يمه يا صواب گلبي يمه.
يمه ابنج مابيه واعاتبنه
اخافن بالعتب ازيدن همه
يمه ما يعاينلنه ابنج شح بنظرته عنه
هذا ابنج العزيز صوب گلبي صواب الما يطيب.
رنه:: كاعده واسمعلها وحسين وزهره يباوعولي ساكتين ألتفتت بفزة على صوت طروادة وراي واكف، دخل العفراء دنك على راسها يبوسه وهي تبجي بحرگة وتعتذر منه باست ايده كالها
-فدوه اروحلج انا
عفراء::خايب خويه تغتاض عليه وتدير وجهك مني طروادة
جر ايدها باسها ويكلها
-اعتذر والله اعتذر.
مسح دموعها وكومها كالها
-بس كون ما تسوين شي من وراي، جدي شاد حزامه علي وانتِ تشوفين
رنه:: تصالحوا، واخذ تليفونه جان ناسيه طلع، ورحت العفراء اتوسل بيها
-عفوره باجر اللحجة وكلهن يرحن البيت جابر وانه شكد صار ما ملتمه وي بنات اعمامي فدوه خل نروح وياهن.
-لا انه وياج هنا نصلي ونقرأ الزيارة احسن
-شمالج فدوه والله كلهن يرحن
-احاجي طروادة اذا رضى ترحين وياهن وحدج
درت منها بزعل
-ما اروحن اذا انتِ مو وياي
سكتت من عندي وراحت تدرس حسين وزهره.
""""""""""""
جويرية:: احس ماسّه متقيدة بوجودي وياهن بالغرفة هي وبدور عبالك يردن يسوون شي وخايفات من عندي، باوعتلهن تشاورن يم الباب واجن كعدن كدامي
ماسه:: جويرية نأمنج على سر.
بدور:: بس اذا مايعجبج لا تحجين الاحد تحلفين؟
هزيت راسي اي كالت ماسه بارتباك
ماسه:: شوفي هيج وكت ولد عمي خليل بريا وميثم يطلعون الشغلهم وانه وبدور بدون ما واحد يشوفنه نروح البيتهم بسكته نلعب بليستيشن وورق ودومنه ونباوع على تلفيزونهم لان بيه قنوات ما موجودة يمنه.
بدور:: ونرجع هناه كبل لا يجون، ترحين ويانه.
جويرية:: هزيت راسي لا
-بس حرام تدخلن البيتهم بدون علمهم واذا جدي يلزمكم يذبحكم.
ماسه:: جوري حبابه حبابه لا تحجين لاحد
جويرية::ما احجي بس التسوونه غلط واذا نلزمتن شلون؟
بدور:: محد يكضنه مسوين طرق مال شرده شوفي هذا الحبل نشده على الشباج وننزل من عده بره السياج .نروح ونرد ومحد شايفنه.
ماسه:: اذا ردتي تطلعين بره اطلعي مثلنه، لان من تنزلين على الدرج يكضونج ويقفلون باب المطبخ ما تكدرين ترجعين.
جويرية، ضحكت اباوع لوجها كتلها
-طلعت ورجعت من شباك المطبخ بس هم لزموني.
من ضحكت وياهن كيفن وتحمسن يحجلي مغامراتهن كالت بدور
-احلى اللعاب شفتهن اللعاب ولد الروسية البلي مالتهم يخبل.
جويرية:: صدك امهم الروسية ما رجعت شافتهم؟
ماسه:: لا.
-وعمي خليل؟
بدور هزت راسها لا.
ماسه::بدور ام الجدورة افرشي يله اليوم ما نروح خل نضل يم جويرية سوالفها حلوه
ضحكت على اللقب دارتلي بدور كالت
بدور:: انتِ ماعندج لقب؟
جويرية:: عندي صديقاتي بالمدرسة يصيحولي جوري جكارة.
ماسة:: ليش انتِ تدخنين؟
جويرية:: ارتبكت هزيت راسي لا ساكته وهن وحدة تباوع بوجهه الثانية، صاحوا على ماسه ونزلت.
ماسه:: نزلت للمطبخ ركض لكيت وهب ضحكلي
-حقيرة تسوين روحج نايمه خافن اكلج سويلي اكل
-لا ما ادري بيك انتَ عبالي صيهد شردنه فوك آنّه وبدور وبت عمه نضال.
-شبيه صيهد يعض.
-لااا بس ما يرضى نضل سهرانات يجينه الراشدي يهلهل.
ضحك ورفع ياخته كال
وهب:: شو تخافن من صيهد وانا ما تخافن مني منا وهيج اكومج براشدي واكعدج براشدي.
ضحكت ضربته على ايده
-شتريد كلي حتى الحك اشرد كبل لا يجي.
خله العلاليك على الكاونتر كال
-كصصي هاي الخيار والتفاح، وفلسيلي رمان واريدن ثلج كسريلي انا اسبح واجي.
-اخليهن الك هناه لو اوديهن لبيتك؟
-عوفيهن وانه اخذهن، وهاي العلاكه الجن بيه حلويات.
ماسه:: جبتله هدومه ودخل يسبح كصصتهن اله جاي افلس بالرمان ودخل صيهد
صيهد::السلام عليكم.
-عليكم السلام، الله يساعدك.
-امي نايمه؟
-هستوها نامت.
شمر چفيته على جتفي وهز راسه يسأل
-المن هذا؟
-الوهب.
-وينه؟
-طب يسبح.
تقرب باوع بالكاسات وحده بيها تفاح اخضر والثانية بيها خيار وجاي افلس بالرمان هز راسه خوش كال
صيهد:: كالج وديهن للمشتمل ماله مو؟
هزيت راسي اي بخوف، أشر على الچفية مالته العلا جتفي كال
-أغسليها اريدنها الصبح ودشداشتي السوده باجر العصر اريدنها مكوية، من يطلع وهب لا تكليله صيهد جان هناه وسأل عليك خوش؟
سكتت اباوعله ولا جني اخته عبالك احجي وي غريب كد ما اخافن منه تقرب خازرني
-ولج..
-ما احجي والله خوش.
طلع من المطبخ باوعتله من الشباج راح لمشتمل وهب، اباوع مرتبكة اذا كلت الوهب صيهد يحاسبني واذا سكتت خاف يتعاركون.
طلع وهب شغل الهيتر يمي بالمطبخ نشف شعره بالخاولي وهو يكول
-تعبتج ميوسه.
وإني ساكته كملت الرمان، گـــلبي يدك حيل ومحتاره احجي لو اسكت رفع راسه باوعلي كال
-تعبانه شبيج؟
هزيت راسي لا
وهب:: يله خل اطفر كبل لا يجي صيهد
وكف لبس قمصلته، خله الفواكه بصينية صغيرة ومشه وصل للباب صحت بتردد
-وهب.
دار باوعلي دنكت الدمعه بوسط عيني احب وهب ما اريد صيهد يطكه واخاف احجي وصيهد يكتلني، رجع خله الصينية على الكاونتر مد ايده بجيب القمصلة طلع المحفظة وفتحها مدلي ايده بيها عشرة
وهب:: جم مره كتلج من تردين فلوس كليلي لا تستحين
-لا والله ما اريد مو على الفلوس
-انجبي اخذيها ويله اصعدي لا يجي صيهد
مسحت عيوني اخذتها من ايده وصعدت فوك.
وهب ::رفعت الجوزه مال المشتمل ودخلت خليت الصينية بالگاع ورحت للغرفة اجيب البطل باوعتله بحسرة لو اعوفك لو اموتن مالنه ضله سوه.
طكيته فتحته طلعت من الغرفة وهوه بأيدي رفعت راسي بصدمة من لكيت صيهد واكف يفر بسبحته، خليت البطل وره ظهري.
صيهد:: تعال.
ضليت بمكاني اعاين لوجهه صاح بعصبية
صيهد:: تعاااال.
رحت يمه ساكت مد ايده وره ظهري جر البطل من ايدي وشمره على الحايط فلشة ودفعني خانكني من ياختي لا رفعت ايد ولا عين
صيهد:: هذاااا شنو ولك شسويت بروحك حيووووان.
وهب:: دفعته اريد احاجية رجع يطكني بحرگة گلب ويغلط اندفع الباب ودخل طروادة جراه من عندي
صيهد:: والله اموتك وهب اموووتك.
طروادة:: صوووتك صوتك لا يكعد جدك.
صيهد:: موتك على ايدي وهب موتك على ايدي ولك كسرت ظهري ليششش ليش شعلمك على هذا السم هااه حاجيني ابن الكلب خرب اهلك احجي احجي.
وهب:: كعدت على صفحة امسح الدم من خشمي، وطروادة دفع صيهد على صفحة بس يريده يسكت، اباوعله شكد محروك كلبه علي يرجف كله
طروادة:: شكتلي انتَ كتلي متأكد انا مو بس شاك بوهب ليش هسه تحجي بصياح ما تحل الموضوع بسكته.
صيهد:: ههههه اخوي يسكر وهذا يگلي حل الموضوع بسكته ولك هذا اذا سكران ويجي للبيت على اخواته يعتدي وما يدري بروحه
وهب:: انجب انجب وسد حلكك شلون تحجي هيج حجي.
طروادة:: اهوووه يا طلابة الما تخلص.
اسكت هذا ينكز هذا، رجع صيهد على وهب كتله وهذاك أثرت بيه حجاية يعتدي على اخواته تخبل منها جريت صيهد خانكة
-اشششش سد حلكك ابن النعال اطي مجال.
وهب:: ما تعيدهااا هاي الحجاية صيهد .
طروادة:: اسكت انتَ اكعد يله اسكت بالحسين اليحجي بيكم اطكه على حلكه ما تنطون مجال.
كعدوا اثنينهم ينافخون
-وهب سولف شعلمك وليش؟
وهب:: صاحبي.
صيهد:: يا صاااحب منهم ها يا صاحب، وانتَ شنو حيوان ما تفهم .
وهب:: جنت احجي عليه لان يشرب وانصحه يبطل بس مره رحت يمه ولح علي جرب بس مره وحده ووره هالتجربة ماكدرت اعوفه تعلمت.
طروادة:: شكد صارلك تتسمم؟
وهب:: سنة.
صيهد:: ههههههه عفيه عاشت ايدك، شوف ولك من هليوم هالسم تعوفه، وهب عاين عاين علي يشهد الحسين اكسر رجليك واكعدك هنا واريدن اشوف شلون تشرب بعد.
وهب:: خوش، كسر رجلي اذبحني سوي التريده بس لا تكول تعتدي على اخواتك عيب عليك تحجي هاي الحجاية.
صيهد:: امشي للبيت نام
وهب::هنا اريدن انامن بغرفتي.
طروادة:: دخل صيهد للغرفة گلبها گلاب يدور خاف بيها بعد شرب ، من مالكه اخذته وطلعنه،احجي عليه ما راضي بالسواه.
""""""
رنه :: كعدت الصبح على عركة حسين وزهره واحد مشگگ دفتر الثاني، گاملهم عبود كتلهم اثنينهم يله سكتوا غسلت وجهي وطلعت للحوش عفراء تخلي سعف بتنور الطين تريد تخبز
-صباح الخير.
عفراء::صباح العافيه،رنه دولچيلي العجين.
رنه:: رجعت للمطبخ دولجت العجين اخذته ورحت يمها على التنور اتحمى وهيه تخبز متنگبه ماتريد النار تلوّح وجها
عفراء:: طروادة ما كعد؟
-لا بعده فاتح حلكه لو ما اخافن منه جا خليت اصبعي بحلكه.
عفراء:: البارحة ما ادري شعدهم هو وصيهد الليل كلّه يفترون بالحوش، النوب المصيبة طروادة رجع السالفة يگول الشاعر
-هههههه احبها هاي ضجت من نساها
ضحكت وطلعت الخبزة تشمرها بصفها على سعف التفتنا اثنينه على صوت من السياج
-عفراء، رنه.
رحت ركض وخرت السعفات من يم السياج اضحك من شفت ريمه بت عمي شاكر متلفلفة بالعباية وتتختل تحجي ويانه من بين الفتحات
-هلااا ريمه.
ريمه:: صباح الخير
عفراء:: بعد روحـــي صباح العافية
ريمه:: اريدن خبزه حاره سمعتج تطكطين كلت اي خبزت خل اروحن اجيب منها.
رنه:: ما تجين تتريكين ويانه.
ريمه:: ياا لا اطني خبزة وخل اروحن.
شالت عفراء اربع كرصات خبز خلتهن سوه واجت انطتهن الها
عفراء::ريمه ديرن بالجن على بت عمتي نضال فدوه خطيه
ريمه:: خيه وعلي ما شايفتها وهيه ببيت جدي ماطالعه وانه ما رايحة ليغاد
رنه:: ريمه ريمه، ترحين للحجة اليوم؟
-والله ما ادري وانتِ؟
-عفراء ما راضيه،
همست بصوت ناصي:: حاجيها انتِ
ريمه:: عفراء تعالن للحجة اليوم .
وعفراء تخبز وتأشر براسها" اي"، راحت ريمه، وانه رجعت للتنور اتحمى، كملنه الخبز ورجعنه للبيت رحت ابدل الي والزهره، وعفراء تسوي ريوك طلعنه للهول وفاتحين الباب، اجه هاسكي واكف بالباب ويعاين،
عفراء:: طروادة اكعد حتى هاسكي مل وهوا متانيك.
عبود::اكعد شعلان طك هاسكي.
كعد طروادة يسب بشعلان، تريكنه سوه، وصلنه عبود للمدرسة وانا بس اريد اليوم يخلص وارجع ألح على عفراء حتى ترضى نروّح للحجة.
"""""
جويرية::اتحسر من اشوفهن يرحن للمدرسة واني ابوي حرمني منها من جابني هنا، للساعة بالعشرة كاعده يم جدتي تعلم بيه اسوي مكانيس من خوص النخل كتلها
-ما اريد اتعلم ما احب اسوي مكانيس.
رفعت ايدها وجرتني من زندي عليها
-تعلمي غبره مابيج خير سويها يله.
صاح خالي وليد
-هيه لو ما غبره ما كال ابوها اخذوها.
ام صيهد:: تعالي يمه تعاي بعد گـــلبي انا اعلمنج.
جويرية:: كمت كعدت يمها عيوني يردن يطكن وايدي ترجف منّ الحركة تكابلوا خالي وليد وخالي شاكر اثنينهم يحجون عليّ واني اباوعلهم ساكته بلا ما ارد، دخل جدي صاح عليهم.
-امشوا شوفو هذا الچلب ابوها شيريد اجاي .
وكفت بلهفة كلي فرح، طلعوا اخوالي يشوفونه، وجدي اجه يمي
-كون انتِ الموصيته يجيج ولج؟
هزيت راسي لا.
رجع خالي وليد اجه كال يريد يشوفها اخذني وطلعت وياه للديوان شفته كاعد يحجي وي خالي شاكر صحت بلفة
-بابا.
ومشيت بهمة دنكت عليه احضنه وابوسه وهو بادلني بحضن بارد وكلمات عباره عن
-هلا هلا بيج.
كعدت يمه واخوالي طلعوا باوعتله
-جاي تاخذني؟
-لا وين اخذج هنا بعد اهلج همه، بس خابرني ابن خالج شامل علمود انقلج لمدرسة اخواته وسويتلج نقل بويه انا هم ما اريد اضلمج بس امري مو بايدي، جبتج هنا حتى احميج من شر المره العدي.
-منو الخابرك؟
-والله ما اعرفنه ياهو منهم كالي انا "كهلان" ابن شامل، شنو حاجي وياج شاكيتله انتِ؟
هزيت راسي لا:: هذه كهلان نفسه طروادة تعرفه انتَ
-ها ها اي ماعبالي نفسه جا اسمه كهلان لو طروادة؟
رفعت اكتافي ما ادري
-بابا اني ما اريد ابقى هنا، مو صاحين كلهم ناس تكرهه ناس وكلها تخاف من جدي، اخذني خلي ارجع يمك والله ما أسوي مشاكل وي مرتك.
-لا بويه لا،هاي كتبج جبتهن، وهاج هذا مصرف وانا اروحن.
باوعتله ساكته الغصة تصعد وتنزّل ببلعومي دخل جدي، ووكف ابوي كاله
-حجي ديربالك على حفيدتك.
وجدي يباوعله بحقد طلع ابوي ورجعت للبيت اريد بس ابقى وحدي وابجي لحكني جدي كال.
-تعارفين تقرين وتكتبين ماتولين بعد كتبج حطيهن بالتنور.
ام صيهد:: وي البنيات عمي خطيه، تروح وي البنيات وترجع وياهن.
جويرية:: كلهم يحجون واني ساكته بس اسمع غلط اخوالي اثنينهم، احس لو شما اسوي بيهمّ مايبرد گـــلبي،رحت للمطبخ وي إم صيهد، غسلت وجهي بالسنك ودرت الها احجي بغصة
-خاله اريد اعيش وي بيت خالي شامل!
بمجرد حجيت حسيت بعوجية جدي على رجلي شهكت صارخة وأمّ صيهد جرتني وره ظهرها
-وين تردين تولين ولج، بجحر احطج واطمج، باب الحوش ما تسوفينه، اكحل خنجري بركبتج لو لكيتج طالعة.
جرتني آمّ صيهد للغرفة واني احس بنار تطلع من رجلي كعدتني وتمسح بعيوني عبالها ابجي لمن وكزت بعيني ماشافت دموع كمت من يمها صعدت فوك للغرفة بس اباوع للفراغ وادعي على ابوي.
"""""""""
رنه:: رجعنه من المدرسة وراساً دخلت للمطبخ اشوف شنو مسويتلنه غده
-ليش مرگة بتيته مو تدرين ما احبها.
احجي وياها وهي تصلي كملت وباوعتلي
عفراء:: شسويلج ست رنه شتردين جا كولي الحمدلله ولا تعيبين على الاكل.
-جا ما احبه شني كوه ؟
كامتلي من السجادة عفتها ودخلت جوه غسلت وصليت طلعت يمها تثرم زلاطة كالت
-كومي صبي رنه وخلي اللحمه الچبيرة الطروادة.
صبيت الغده وشنو تكلي اسوي حتى من اكلها نروح اليوم ترضى، حد الليل اجه طروادة گالها
طروادة:: الليلة العاشر ماترحن للحجة جدتي ونسوان اعمامي راح يرحن لبيت جابر يحجن يمهم امشن وياهن.
عفراء:: لا خلي بس رنه تروح وانا اضلن يم حسين وزهره.
-اخذن زهره وياجن وحسين اخذه ويانا للحسينية.
رنه :: من وره طروادة أأشر لعفراء "فدوه فدوه" اريدها تقبل، هزت رأسها موافقة، طرت ركض بدلت وبدلت الزهره دخلت عفراء باوعتلي ورفعت ايدها تحذر
-رنّه رايحين نحيي ليلة العاشر، ضحك وي ريمه بت عمي شاكر وماسه بت عمي وليد ما اريدن اموتج بس اشوفج تتمضحكين.
-لا والحسين ولا اضحك، بس ميخالف من نخلص لطم نلتم ونسولف؟
هزت رأسها موافقة.
شوية واجت علينه جدتي جنها شعلان يتشابهون اخذتنه ومناك البنات ملتمات التمينه كلنه ورحنا على الجيران كعدنا انه وريمه سوا ويمنه ماسه وحده تكول للثانية لا تحجن، النسوان بقن شوية يسولفن النوب المره كالتلهن يله كضت سوالفجن، جدتي كالت
-"زينب إشيضل بيها"، تردن بهاي ولطمتجن نشضه وسوه.
رنه::همست ماسه بصوت ناصي
-مولاتي زينب بريئة منج جده.
ريمه::اششش تطردنه ومن نرجع تكتلنه اسكتن.
رنه:: بدت جده تقرأ وتكول::
- الليلة اموادع الوليان... زينب اشيضل بيها
إتعنت بدموع العين... والحسرة الاخوها حسين
ويا صبر التجيبة منين... لمن ينذبح عطشان.
رنه:: بصوت واحد وي اللطم ردينه
-زينب أشيضل بيها.
وكملت جدتي
-وكامت تلكف الأنفاس...وبالعشرة تدك على الراس
اوف موادع العباس.يسعر بالگلب نيران
-زينب اشيضل بيها
-ردت والگلب يسعر ..تصرخ يا علي الأكبر
عمه الفرگتك ماكدر.. فراگك بالفكر ماجان
-زينب شيضل بيها
-وردت تمشي بالالام..تصرخ عمه يا جسام
افراگك يابدر التام.. زيد بعمتك الاحزان
-زينب اشيضل بيها.
-وراحت للطفل يمه..ويلي برگبته تشمه
باجر والله يعمه..تغدي للسهم نيشان
-زينب اشيضل بيها.
رنه :: وبقينا من وحدة الوحدة ومن لطمية للطمية نحيي هاي الليلة بحزن.
"""""""""""""""""
وهب:: حاولوا صيهد وطروادة ياخذوني وياهم للموكب ما رضيت دنك صيهد علي باس راسي كال
-يشهد الحسين فتيت كلبي، هينه علي اخوي يشرب؟ عوفه يخوي ويجرالك التريده.
هزيت راسي ان شاءالله، راحوا هو وصيهد وميثم وسلطان ابن عمي شاكر، اجاني سليم كال
سليم ::ها على الوعد نمقلب بريا اليوم.
وهب:: اي بس ما ابالي شي محطط انتَ؟
سليم::هو يريد يروّح عده صحبان غيرنه متواعد وياهم يرحون سوه للحسينية،خلنه نگله تعال احنه نروح وياك وناخذه للچول ننرله من السيارة نعوفه يركض ورانه ونصوره
-مو خوش مقلب بس يله متفقين
سليم:: مو تضحك وتفضحنه تذكر مقالبه بينه شكد قوية لا يكسر خاطرك.
-ابد ولا ينكسر خاطري ضاله بگلبي من حبستوني وي چلب طروادة.
-انا هم ضاله بگلبي من انت وياه الخياس خليتوني بالشط عريان.
وهب:: راح سليم صاحله واجه بريا متعطر العزيز وكاشخ هلا بيك هلا راح تنسحل
بريا:: اول تالي وهب يروح للموكب
سليم:: الله هداه .
وهب:: باوعت السليم مبتسم طلعنه على الچول وهذا طول الطريق لا حجه لا كال وين رايحين اختاريت مجان بعيد وفارغ، اشوفن كلوبات البيوت مثل النجمة، درت السليم اريد اضحك وهذا جر السويج وصاح
سليم :: انززززل قشمر
بريا:: يله ززززوج.
باوعتلهم بصدمه
وهب:: اوووه لا تصيرون زبايل سليم هي مال غدرات شمالك الغسل.
جروني من السيارة يضحكون بس قاهريني لان خلوني اختار المكان وأجيله بإرادتي
بريا:: ههههههاي انتَ نسيت ياهو اخر واحد سوه مقلب؟
سليم:: عبالك انساها الك ولك انا تنصب علي وتاخذ مني رصيد تخسي والله.
وهب:: سليم وعلي افضحك فضيحة مو خليت ايدي بايدك وهذا بريا هو كل مره يحرضني عليك ويخطط للمقلب.
بريا:: لا تحاول صار يومين محتارين شلون نكضك
وهب:: ركضت اريد اخذ سويج السيارة ما كدرتلهم جروني حيل سليم محددني وبريا ربط ايدي برباط بلاستك لو اشعل شعلان ماينفتح
-احتركت امك ابن الروسية.
بريا:: لا تحاول ما تكدر هههههه.
-خايس إبن روسية شترجه منك غدار، سليم صخونه التلفك الخايس جا غير انا وياك متفقين.
ربطوا رجلي ووخروا صوروني
تفلت عليهم اغلط
-صدك تحجون تعوفوني هناه مربط غير تأكلني الچلاب، عمي يا مقالب يا دنيا افتحوا ايدي وصلوا على محمد صدك جذب.
احجي بلكي يتأثرون، سليم رفع ايده شمر السجينة لبعيد
سليم:: دور على السجينة ومن تلكاها افتح ايدك
وهب:: لا تصير جحش اذا وليتوا انا وين اشوف السجينة بهالليل ووين اكدر ادور ما تشوفني محدد.
ضحكوا وصعدوا بالسيارة الچلاب بطنشوا عليَّ وراحوا، الف سبة سبيتهم هاي الغدرة انا مسويها وي سليم وانتقم بنفس الطريقة، تلفتت خرب روحك شعلان هسه تاكلني الچلاب فشله بالحسين اذا كالولهم شلون مات ابنكم ويكولون كتله جلب.
تحركت احاول اكطع الرباط البايدي " احتركت لشة الخالفتكم،
بالنص ساعة انا بمچاني دخنت من القهر روحـــي طلعت تلفوني بجيب البنطرون يدك لا كادر اوصله لا صخام بوجهم رفعت راسي اعاين، من الظلام كوه اشوف حسيت جهامة جايه عليَّ
دخيل أبو الحسن بشر جني هذه يا هو يجي للجول غير الجنانونه، شوي شوي يگرب عليَّ مدري اباوعله مدري اسوي روحـــي ميت انبطحت بالگاع وعيني عليه لا اله رجلين لا راس سواده وتمشي، احضرنه يا علي وصل يمي غمضت حتى عيني
-يتبع.
رواية أرض الخناجر الفصل الخامس 5 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
══━━━━✥◈✥━━━━══
چَم مرة ردت تحّجي ويجَلب بيك جّف العيب
الحَجي المّا ينحِجي يخضُر براسَك شيب .
══━━━━✥◈✥━━━━══
وهـــب :: مغمض عيني كل حيلي ومبطوح بالگاع، واسمع صوت الخطوات يم راسي وصوت نفس يلهث، ما خفت من الموت كد ما خفت بيا عين اواجه ربي وانا عاصيه، عاد لا بيه واشرد لابيه واضل مغمض ومبطوح، صار ضوه خفيف بعيني واسمع صوت بت تهمس
-بسم الله الرحمن الرحيم
وبس سمعت صوتها فتحت عيني وتحركت اكعد جفلت هيه رجعت ليورا
- بشر انتِ؟
اسأل واباوع الضوه بعيني سواده وواكفه جدامي لا رجلين لا راس، حجت بصوت يرجف
-اي اني بشر.
-گولي أشهد أن لا اله الا الله.
طفت ضواها دارت وجها ومشت لا يا حظك صحت وراها
-مصدكج مصدكج تعاي بس افتحي أيدي
ما اهتمت مشت وانا اصيح وراها ما رجعت، انا وهـــب اخرتي مربوط ومشمور بچول، شفتها ابتعدت ايست رجعت نمّت بالگاع
متحلف بسليم وبريا يا علي اذا كضيتهم، ماكو دقايق واسمع صوت ذيابه تعوي بعيد، هسه يجن وجبه خفيفة ولذيذة ومحدد ياكلني براحتهن، درت أعاين وكعدت من شفت السواده رجعت وصلت يمي گالت
-مخطوف؟
-اي، وانا وحيد امي وعدي اخوات مالهن غيري وبيتنه ايجار يموتن من الجوع لو متت انا،والخطفوني ما يخافون الله رادو من امي فلوس وماعدها، فكي ايدي والله يفك قسمتج.
- ترى واضح جاي تجذب.
-وحك هاي صوت الذيابه التعوي ما اجذب.
-إذاً أساعدك تساعدني؟
-بالتردينه،من المليون للعشرة.
-مو كاعد ايجار،وماعدكم؟
سكتت ولا مقتنع هاي بشر گلت طنطل ويلعب علي،وين اكو بنيه بهيج مچان،گالت::
-افتح إيدك وتساعدني؟
-ميخالف بس افتحي ايدي.
مدت أيدها على ايدي تشوف الشناط،اعاين الايدها صدك مال بشر ومن وصل جلدها الجلد ايدي حسيت بحرورة دمها، رفعت راسي الها
-لا تكضيني،ما عبالي صدك مره جنت اضن انتِ طنطل.
بعدت ايدي منها وخرت الوصله المغطيه بيها وجها وضوت عليه
-شوف اني ما عندي وكت صارلي ساعتين أمشي وتعبانه، تريد اعوفك واروح، لو اساعدك وتساعدني.
عاينت لوجها ودرت بحيره شنو الجابها هناه اذا صدك مره
رديت اعاينلها وهيه متانيه احجي::
-يله خوش بس فكي ايدي.
ضلت ساكته شويه والنوب كالت بصوت مخنوگ ويرجف
-ما مصدكتك، اطيني وعد زلمه تساعدني.
-يابه لا تلطشين شني السالفة كتلج خوش اساعدج بس فضينه لا تضلين تجرولين بالسالفة.
-ما تنفتح هاي شلون افتحها؟
تمنيت ايدي مفتوحة واللطم على راسي دمي احترك خاف أدليها بالسجينة خافن تذبحني بيها.
-شوفي راح ادليج بسجينة بس اذا طلعتي جنيه مدري طنطل بداعت الله لا تذبحيني خلّيني الذيابه ياكلني ولا يكولون ذبحه جني.
حجيت هيج اريدن أأمن وهاي مثل المسودنه طكت ايدها بالگاع وبجت.
-خاب شمالج؟
دارت الي تبجي وترجف كاتلها البرد والخوف.
-انتَ ما تفهم؟ شنو جني شنو طنطل اكلك بشر بشر ومحتاجة مساعدتك تكلي تذبحيني.
-اخذي هذا ضواج وامشي ليكدام تلكين السجينة جيبيها وتعاي.
كامت والضوه بيدها جنها شاردة من اهلها هاي وراها مصيبة وكسر ارگاب، دورت شويه واجت السجينه بايدها كعدت يمي مدّت السجينة الايدي وعاينت الوجهي مخنوگه وتحجي بخوف
-ما تغدرني؟ تساعدني؟
هزيت راسي اي فتحت ايدي اخذتها منها فتحت رجلي ووكفت انكث بهدومي خليت السجينة بجيبي وهيه وكفت وي وكفتي.
-وين ما جنتي رايحه كملي دربج لا شفتيني ولا شفتج.
عفتها ودرت وجهي مشيت عنها صاحت
-انتَ مو زلمه، ومو گد حجايتك.
ما رديت عليها مشيت واضح شارده من اهلها وتبليني رجعت صاحت وهيه تبجي
-مابيك نخوه ولا غيره.
وكفت بمچاني التفتت عليها طفت الضوه البايدها واجت يمي متلفلفه بعبايه وصوت بجيها دك بگلبي وكفت كدامي تشهك.
-شنهي التردينه؟ بيش اساعدج؟ شارده من اهلج؟
مسحت عيونها تريد تحجي والبجي خانكها كالت
-مو من اهلي!
-من رجلج؟
-لا، ما اكدر احجيلك بس والله العظيم والقرآن الكريم ما اسويلك اي مشكلة بس اريد مكان ابقى بيه واتواصل وي اهلي.
-مخطوفة انتِ؟
بجت حيل تحجي بحركة
-لاا، لااا ما مخطوفة.
-شمالج بسّ تبجين شنهي السالفة.
-ما اريد شي منك بس مكان ابقى بيه بين ما أوصل الاهلي.
زفرت نفس بحيرة شي يگلي عوفها وامشي وراها مصيبة وشي يگلي لا تعوفها ساعدها
-شوفي انا عدي مچان بس خلّيني اكلج انا اسقط بشر تشوفينه سكير وطايح حظ، اشوف لو تمشين بدربج بلكن تلكين واحد احسن مني يساعدج شتكولين؟
هزت راسها لا تشهك
-انطيتني حجايه انتَ، كتلي افتحي ايدي واساعدج.
درت وجهي منها محتار شجابج علي حظي عاينتلها
-امشينا يله.
مشيت كدامها وهيه وراي تمشي وتبجي عبرنه مسافة وكفت تعبـــت طلعت تلفوني وهيه تعاين الأيدي بخوف
-راح أخابر يجيبولي دراجتي ما نكدر نضل نمشي تعبنه.
ضلت ساكته، صفنت بحيره اخابرمن وهاي وياي وين اضمها وشلون اوصلها للمشتمل، دكيت رقم سلطان ابن عمي شاكر، وتانيت يرد
-الو
-ها سلطان الله يساعدك!
-هلا بيك ها شكو؟
-ماكو شي، اكلك وين انتَ؟
-بالدرب راجعين للقرية نطبخ الباجر،انتَ وين؟
-سيلم وبريا وياكم؟
-لا ضلوا بالحسينية.
-الخناث ذبوني بالچول وراحوا، ماتجوني انتَ واي واحد من الولد جيبولي الدراجة.
-خرا بيكم وبشقاكم ما تبطلونه ياهو البيه حيل يجيك، خل اشوف هسه آجيك بالسيارة.
-ما اريد السيارة انا، جيب دراجتي وخل مــيثم يجي بدراجته حتى تطوني دراجتي وترحون لان ما اريد اردن للقرية.
غلط عليّ متحلف بسليم كتله
-اي أدب اخوك، وخل مــيثم يأدب اخوه هم.
سد التلفون بوجهي درت عيني للبلوه الوراي ساكته، مشيت ليكدام وهيه ضلت بمچانها صحت
-ها ما تمشين؟
اجت بخطوات سريعة تابعتني مسافة مشينا وكعدت على صفحة وهيه واكفه، أفكر بالمصيبة الراح تجيبها الي، رجعت خابرتهم كالوا راح نوصل سديته منهم وكمت احاجيها
-تعاي انزلي هناك لوذي بسد هاي الزوره لا تطلعين لمن انا اكلج حلال.
مشت بسرعة ختلت تأكدت منها ما مبينه ووكفت من شفت ضوه الدراجات، وصلوا يمي وجوهم مايكصها السيف حاقدين عليَّ گال مــيثم::
مــيثم :: بريا هيج سوه؟
وهـــب :: اي الف مره كتلهم بطلوا المقالب زحمه كبرنه ربطوني ليغاد والتمت علي الذيابه لو ما السجينة بايدي لا هسه ماكلاتني.
سلطان :: ديله لا تجذب زايد وين راح تولي؟
-ما عليكم مني بعد انطيني الدراجه وروحوا انتم.
مــيثم:: شوف وهـــب والحسين اخابر صــيهد اخليه يجي هنا يكسرك تكسر، ماتملون من المطارد جنكم زعاطيط، وهذاك الخايس بريا حسابه يمي.
وهـــب :: سكتت اخذت الخوذة من سلطان وهوه صعد وره مــيثم وراحوا، جاي البس الخوذة وصفنت ديله بله والبلوه العدي شلون بيها، درت أصيحها
-تعاي يبنيه
طلعت تتلفت وصلت يمي باوعت للدراجة
-ما عدي غير حلّ ترى لا تعاينين هيج.
-ميخالف اني امشي مشي.
-لا مو ميخالف يصير الصبح واحنه ضالين هناه لمي عباتج عدل خليها بين رجليج واكعدي صفح خلي رجليج اثنينهن هناه.
صعدت انا وهيه سوت مثل ماكتلها كاضه بياختي من وره بأيد وحده ووصلت ايدها لجلدي رفعت ظهري متقشعر
-شيلي ايدج شني السالفة لا تكضين بيه،
شالت ايدها بارتباك تهمس
-العفو العفو.
-لا يله اتشاقه كضي بيه لا تطيحين.
ردت كضت بياخي خانكتني شغلت الدراجة ومشيت لمن وصلنا للقرية طفيتها ونزلت محتار
-عاينــي لازم نطب للبيت وكون محد يشوفج وياي يذبحونه اثنينه ترى، انا اهلي مسودنين.
احجي وهيه ساكته كسرت گـــلبي كد ما بجت
-لا تخافين ما اعوفنج اوصلج الاهلج.
هزت رأسها موافقة مشيت بالبستان وهيه وراي وكفنه يم السياج اعاين للثنيه الولد ملتمين والقزانات على النار يطبخون للتشابيه مال باجر.
اخذتها وافتريت من وره البيت بلكن اكدر اطببها للمشتمل، بس الولد يفترون مايكعدون، كعدت بصف السياج اعاين عليها ترجف بردانه، بس شفت الولد داروا وجهم مديت ايدي على طرف عبايتها كضيتها منه
-كومي بسرعة.
افترينه نركض اجر بيها من عبايتها وهيه وي ركضتي تركض دخلتها للمشتمل وسديت الباب، زفرت نفس براحة ساند ظهري على الباب وايدي على اركبي،اسمع صوت دكة گلبها مثل الدمام ، شغلت ضوه التلفون ضويت على وجها، خلت أيدها على صدرها وغمضت عيونها تحاول تهدي دگات گلبها.
-ها ما بيج شي؟
هزت راسها لا
-راح ارفع الجوزه واجيج.
طلعت رفعت الجوزه ورجعتلها ضاله على وكفتها تهتز كلها من البرد، صوت طكطكة اسنانها توضح اليا درجة هيه بردانه، رفعت ايدي أأشر على الغرفة
-تلكين بطانية هناك روحي لفي روحج بيها.
مشت بخطوات ترجف دخلت للغرفة، وانا كعدت بمچاني اضــحك على روحـــي شسويت انا شعرفت عنها وجبتها هناه منين شارده شلون رضيت اجيبها وياي، مسحت وجهي بحيره كمت متردد دكيت الباب عليها وفتحته، رفعت عيني عليها كاعده بالزاويه لافه روحها بالبطانية عيونها متروسه دموع، بعدها ترجف ما دفيانه عاينت لوجها الصاير احمر ونزلت عيني بسرعة تحمحمت بحيرة
-اريد احجي وياج!
رفعت عيني اعاين الها هزت راسها اي، دخلت سندت ظهري على الباب ما ادري اسالها على شنو بالاول
-ردتي اساعدج وساعدتج،هسه سولفيلي منين شارده.
حجت بصوت يرجف، تحجي كلمة وتسكت مختنكة
-من ماتت امي ابوي تزوج وحده ارمله وعده ولد اثنين
وجابنه من محافظة المحافظة وره ما مات ابوي هذول استفردوا بيه وظلموني، شردت منهم بس اريد اوصل الاختي .
-اختج وين؟
سكتت مسحت عيونها وعاينتلي بتردد همست
-متزوجة بالخارج.
ضحكت بصدمة
-وين يا دولة؟
جرت رجليها الصدرها ورجعت تبجي وتطك على رجليها
-ما ادري ما ادري بيا دوله.
-والله سالفتج تحير وحاسج جذابه ووراج طلابه بس راح اعوفن احساسي وامشي وره ضميري.
عاينيلي انا عايش هنا وي ناس ابليس مو بشرهم
واذا دروا مره ببيتي ما اسلم على روحـــي، الاريده منج لو البيت يحترك وانتِ بيه، تكعدين ساكته تحتركين وياه وما يطلع صوتج متفقين؟
ميّلت راسها على صفحه ودموعها على خدها همست تتوسل
-بس تدورلي على اختي؟
-اختج حتى ما تعارفين بيها وين بيا بلد شلون الكاها الج؟
-حباب ما الي غيرك.
مسحت وجهي ميت منّ الحيره هزيت راسي موافق،
-ضلي هناه الباب راح اقفلنه من بره محدّ يجيج باجر نشوف وين نوصل.
مشيت اريد اطلع صاحت بخوف
-اني جوعانه.
عاينتلها دنكت عينها خجلانه، طلعت مثل ما طبيت من وره البستان رجعت للدراجة واجيت للبيت وكفت بالساحة يم الولد صاح صــيهد
-وين جنت؟
سلطان :: جانوا رابطينه مثل الخروف بالچول.
هز راسه صــيهد متحلف عاينت للقزانات يفورن واكفين عليهن طروادة وميثم سألتهم
وهـــب ::توزعون گبل التشابيه لو وراها؟
طــروادة:: وره ما تگضي التشابيه نوزع.
-جا چم خروف ذبحتوا؟
صــيهد :: ثلاثة والرابع انتَ شوي بعد واذبحنك الصايع.
طــروادة:: وهـــب خابرونه على دور بالتشابيه ردناك انتَ تمثّله.
سكتت مدنك وهم يشتغلون ويضحكون گال سلطان.
سلطان :: ولك وهـــب الله يرضاها مــيثم يمثل دور الامام علي الآكبر فـــدوه اروح الاسمه وآنا يطوني دور حرمله.
صــيهد :: انا لو عدي وجه مــيثم حتى النبي يوسف عليه السلام امثل دوره.
ضحكوا كلهم، والتهوا يطبخون، رحت للبيت، ما لكيت لا أمي لا البنات لا جدتي، رديت يم صــيهد صفيت وياه، شاورته
-صــيهد جا امي والبنات وين؟
رجع شاورني
-راحن للقراية البيت جابر.
عفته وطبيت للمطبخ دورت بجدر الخبز اخذتلي خبزة ورحت الطروادة مديتله الخبزه
-خليلي لحمة هنا.
شال وذرة لحم خلاها بالخبزة گال
طــروادة:: اكعد هنا اكل ومن تكمل شاركنه بالطبخ.
-ها لا راح اروحن احطها بالثلاجة حتى تبرد شوي واكلها.
عكد حاجيه مستغرب درت وجهي ورحت، اللفه بأيدي فتحت باب المشتمل اعاين الباب الغرفة رحت عليه دكيته على كيف ودفعته لكيتها على كعدتها ومن شافتني مسحت وجها وباوعت الايدي
-عاينــي لا امي ولا اخواتي هناه، ما عرف شسويلج اكل، جبتلج هاي من الطبخ.
حجيت ومشيت بخطوات هادئة رفعتلي أديها اثنينهن، نزلت ايدي الايدها عفت اللفه بأيدها ورجعت خطوه ليوره اعاينلها
ضلت كاضه اللفه وعينها بالگاع ما اكلت.
-راح أطّلع يبنيه اكلي ونامي.
هزت رأسها موافقة عفتها وطلعت تمشيت يم الولد صاح عليّ صــيهد مشيت يمه جر الكرسي بصفة كعدت وهّم يسولفون بيا وكت يطبخون التمن وبيا وكت يرحون للتشابيه گال مــيثم ابن عمي خليل
مــيثم :: طروادة بروح ابوك اقرالنه.
طــروادة::شقرأ.
وهـــب :: بلا ما احس على روحـــي رفعت إيدي باستعجال مأيد حجي مــيثم
-اي اي طــروادة هاي مال يا عملة كربلاء تموت بصوتك.
رفع راسه باوعلي مبتسم وانا حسيت على روحـــي نزلت ايدي ساكت، مد ايده صــيهد على جتفي عبالك يساندني
طــروادة:: وهـــب يتدلل.
مــيثم :: وانا ابن البطة السوده؟
صــيهد :: لا انتَ ابن الروسية .
حجاها صــيهد بضحك بس مــيثم شمر المس من ايده وفك حزامه يريد يروح البيته ركض صــيهد چلب بيه باسه واعتذر منه رجعوه يمنه گال طروادة
طــروادة:: اقرالك التريده انتَ
مــيثم:: لا هيه نفس خيار وهـــب
عدلوا الكراسي وكعدوا كلهم ردت اگوم لزم ايدي صــيهد ورفعها الصدري اللطم وياهم من بدأ طــروادة يقرأ
طــروادة :: والله وشسويتي بيه آيا عملة كربلاء
ﭼنت هيبه بزود اخوتي و عدهم آنا مدلله
وين ﭼـانت هاي اليه و الـﮕلب بيها ابتلى
يا شهر عاشور عـذراً لو ﮔلتلك لا خلى
و الحزن مر على زينب يا بشر يتحمله
"شلون ترضيها من اجيتـﭻ اوصل لهذا الوضع
كربلاء و هاي المصيبة اشتكيها بيا دمع
و اليجي خطار عندﭺ ليش ﮔـلبه ينصدع
و ليش من زينب اجتج راس اخوها ينگطع.
ذبحوا باللطف أخوتي ويني ووين الذبح
ذاك راس راس حسين ذاك معلك بسن ورمح
لا چفن على الغبره مرني الجسد ضل منطرح
جا بقيت احرسها جثتك والله لو بيدي يصح"
وهـــب ::كل لطمة على صدري احسها سهم ينام بگلبي شلون اللطم على الحسين وانا ماشي بدرب الكفر وكلي معاصي بيا عين اللطم واواسي صاحب الزمان.
كمت اريد اروح من يمهم ماخلاني صــيهد چلب بيه وطروادة كل ساعة وگال كض المس علي النار حط بهارات، التهيت وياهم،وطولنه للوحدة نطبخ ونسولف ونضحك شوي وكعدوا يشعرون، "احنا زلم الجنوب حتى سوالفنه شعر" گال طروادة
طــروادة ::صــيهد
صيهد ::هاه؟
-يگول الشاعر::
"قوري الچاي من الجمر لا توخره
خله يفور مثل گلبي ناره موجره"
ضحك صــيهد وگام خله القوري بالچانون وصب ماي الطروادة انطاه اله ورد صبله چاي گاله
صــيهد::شلون هاي شلون شيكول الشاعر؟
طــروادة ::عوف الشاعر واسمع انا شأگول::
"انا ابن شامل الهيبة
رباة مهندمه كحيلة
حگي لو عد السبع أجيبة"
صــيهد :: يابويه يا يابه ، اسمع اسمع يكول::
"يا ابن شامل يا هيبتنه
يرباة الرحة ودلتنه
اريدن للموت ماتخرب خوتنه.
طــروادة ::
تخرب خوتنه ؟ هاي دوم لا تفكر بيها!
صوبت گـــلبي وانتَ تحجيها
انا مثلك احصل وين؟
انتَ أخوي وعضيدي وصاحبي الزين.
وهـــب :: صفكنالهم نضحك والتمينه على طروادة نريد نكتله هستونه خلينه ادينه عليه واجانه هاسكي يركض خلانه نتطافر واحد صاعد على السيارة واحد على الكرسي، وطروادة يضحك وده هاسكي للبيت ورجع يمنه خلصوها چاي وجذب وشعر.
"""""""""
رنـــه ::فتحت عيني على صوت عفراء، نايمه على رجلها تحاجيني بصوت ناصي
-كتلتي روحج على الحجه ونمتي گبل لا تصير بالوحدة
غطيت وجهي بالعبايه اريد ارد انام نعسانه جرتها مني ودنكت علي تحاجيني همس
عفراء:: اكعدي عاينــي هل كلهنّ يلطمن شمالج خايبه هيه بس هالليلة.
وكعدتني كوه عليّ رجعنه نلطم للساعة ٢:٣٠ كامن يصبن اكل،كعدنه على صفحة اجت يمنه جويرية هستوها كعدت واجت عفراء اخذتها على صفحة ما ادري شتحجي وياها
جويرية:: اباوع لوجه عفراء ساكته، سحبت ايدي خلتها بين أديها تسأل
-شلونج ان شاءالله مرتاحة ؟
هزيت راسي لا ودرت اباوع البيبي من شفتها ملتهيه تسولف، حاجيت عفراء
-ردت اجي اعيش وياكم وجدي ما قبل.
-ابتسمت تمسح على ايدي تدفي اطراف اصابعي البردانات بأيدها الدافيه گالت
عفراء::ادري ادري بس وعلي افكر بيج،اريدن اوصيج وصيه لا تنسينها
باوعتلها بتركيز وهيه تتلفت تقربت اكثر وگالت
-حاربي حتى تعيشين احنه بقرية كلها جاره خناجرها
ويتمنون البنيه تغلط حتى يتفاخرون بذبحها.
بلعت ريك بخوف عيني بعينها همست بصوت يرجف
-شسوي؟
-لوذي بسد قوي.
عكدت حاجبي ما فاهمه
-شلون يعني؟
ضحكت وربتت على كتفي بخفة گالت
-تفهمينها بوكتها،جويرية جدي راح يحجيلج سوالف تكرهج بينه بس احنه مابينه صوج لا تصدكينه.
سكتت ما جاي افهم مقصد كلامها وهي تحجي بغموض صاحت عليها جدتي وراحت كعدت يمها بقت عيني عليها،
نص ساعة وكمنه كلنه حتى نرجع نكمل الحجة ببيت جدي،
طلعنه بالظلمة وكلنه لابسين عبي ونمشي وره جده بالبستان والبرد يدكّ بالعظم وصلنا للسياج، عفراء ورنه مشن يردن يرحن البيتهن صاحت عليهن جده
-عفره تعاي هناه وين موليه.
عفراء:: ها جده والله رنـــه نعست وانا اريد اصلي واقرأ الزيارة .
رنـــه :: چلبت بردن عفراء اتوسل
-خل اضل وي البنات ببيت جدي حبوبه حبوبه ساعة وحده واردن.
-فلك صابج وصاب سوالفج غير كتلها رنه نعست.
-فدوه فدوه
-روحـــي شوي واودي عليج عبود.
رنـــه ::رحت ركض كضيت ايد ريـــمه ودخلنه البيت جدي
كعدنه بالهول نسولف والبنات يحجن وي اخت ريـــمه بنت عمي شاكر الصغيرة "هاجر" خرسه وتحاجينه بالاشاره باوعت الجويرية ابتسمت وأشرت على صدرها ورجعت أشرت عليها وسوت اشارة قلب، باوعت تسأل
جويرية:: شنو تگول؟
ريـــمه:: تكول احبنها.
ابتسمت جويرية، ما تشارك بحديث بس تسمع سوالفنه صار تركيزي عليها الحد ما گالت بــدور
بــدور :: تعرفن شني يعني قرين؟
رنـــه:: يعني گرن بسّ بالفصحى.
بــدور :: لاا ولجن عرفت معلومات من صاحبتي وياي بالصف عاينن كل بشر عده قرين والقرين مثل الجن بس ما نشوفه هذا ويانه وين ما نروح ملازمنا هسه احنا مو كاعدين والقرين مالاتنه هم كاعدين ويانه.
رنـــه :: سدن حلكها البنات يكرصن بيها خايفات بس جويرية باوعت بأهتمام وگالتها
جــويريه ::سولفي عنه بعد بله.
بدور :: احذرجن لحد تبجي وحدها.
جــويريه ::ليش؟
بــدور :: يجي القرين يحضنج، مره اخوي صــيهد صيح علي وركضت للغرفة طفيت الضوه وبجيت كمت احس بحرورة جسم وراي وتذكرت سالفة القرين يحضن نزلت اركض الامي كاتلني الخوف.
رنـــه:: عفت سوالف بــدور وركزت بجويرية ردة فعلها على الكلام مخيفه گالتلها
جــويريه:: يعني عدكم هنآ بالقرية جن وقرين وهيج سوالف.
بــدور :: حتى طناطله عدنا.
ريـــمه :: نجبي بــدور سوالفج تخوف، جذب جويرية ماعدنه .
رنـــه :: ضجت من اجت زوجة عمي شاكر تشمر علي بالحجي كمت من يمهن رحت للمطبخ گلت الام صــيهد وديني للبيت ، لبست عبايتها وطلعت وياي وصلتني الباب حوشنه وراحت، نزعت العباية ومشيت اريد ادخل للبيت اتحرك بهدوء خاف واحد من اخوتي يفز وكفت من احس اسمع عفراء تبجي، مشيت على روس اصابيعي، دخلت للهول ادور على صوتها يجي من غرفة امي واسمع صوت طروادة يحجي وياها الباب مفتوح على كيف تقربت اعاينلهم هيه كاعده على السجادة تبجي وطروادة حاضنها الصدرة يريدها تسكت وهي من بين دموعها تطك على رجلها بحرگة وتحجي بغصة الدمع تارس وجها گالتله
عفراء:: ولك خويه يتفاخرن بكتلت ابوي ولك تكعد گبالي وتسمعني مرّ سوالفها، كتلوه بدم بارد بس لان وكف بوجهم كتلوه لان ما رضى بظلمهم، وهسه يوزن بجدي عليك.
طــروادة :: حاجيني بس حاجيني ياهي المسمعتج حجي سولفي وروح ابوي احرك بيوتهم عليهم.
رنـــه ::فتحت عينيّ بصدمة وكلبي مثل النصاب بسهم دفعت باب الغرفة، التفتوا علي أثنينهم وكف طــروادة، وعفراء مسحت دموعها تعاين الوجهي. همست بصوت مخنوگ.
-منو الكتل أبوي؟
عاينوا واحد بوجه الثاني ووكفت عفراء تريد تحاجيني مثل كل مره تريد تجذب علي بكلمتين ابتعدت عنها اصيح
-سألتج امي ليش ماتت كلتي من ولدت حسين وزهرة صار عدها مرض خبيث وماتت، وابوي بالصيد ماتّ منتول، ليش تكولين كتلوه ها عفراء ليششش تكولين كتلوه .
رفع أيده طــروادة يسويلي اششش عيونه حمر وعفراء خلت ايدها على حلكها تبجي خنكه، جراني من ايدي يمه مسح عيوني باصابعه الخشنة گال.
-ليش تعرفين وتشيلين هم اكبر من عمرج؟
ميلت راسيّ على ايده ابجي واحجي بخنگه
-ابوي مات مكتول؟
هز راسه اي، شهكت ابجي جرني الصدرة يبوس براسي ويحجي
-اخذه حگ ابوي اخذه لو اخر يوم بعمري.
جرتني عفراء من ايدي الحضنها حاضنتني الگلبها وتبجي، طــروادة عافنه وطلع، نمت على رجل عفراء وهي سندت راسها على الحايط، الدموع نشفت على رموشنه، همست
-منو الكتل ابوي؟ احجي انا مو صغيرة كافي تضمون علي.
ضلت ساكته وتمسد على شعري غمضت عيني وره مده گالت
-لا تعرفين ريت بعمري ما دريت ياهو كتال ابوي.
-خنجرنه معلك بلا گراب لان ابوي مكتول وما ماخذين ثاره؟
-لا، ابوي انكتل لان خنجره بلا گراب.
درت عيني الها ما فاهمه خلت ايدها على حواجبي مسحتهن وغمضت عيوني حركت رجلها على كيف الحد ما غفيت، وكعدتني الصبح گالت.
-ترحين للتشابيه.
هزيت راسي اي وكمت غسلت وصليت بدلت اعاينلها تلبس بحسين وزهره وحضرت هدوم طــروادة وعبود، عاينتلي مبتسمه دنكت متلافيه نظراتها گـــلبي موجوع وروحي أحسنها مخلوبه.
دخلوا بدلوا ورحنه للتشابيه العالم عبالك رايحه مشايه من كل صوب جايه لساحة التشابيه، رحنه الصفحة النسوان عفراء من شافت جدتي كاعده كالت "تعالي نكعد بعيد عنها" وصدك رحنه لبعيد كعدنه، اباوع للساحة ، جهة بيها خيم الزلم اليمثلون ادوار الكفار وهمه واكفين بلبسهم الملون ، وجّهه خيم بيض وخضر لليمثلون ادوار أهل البيت عليهم السلام.
درت عيني اعاين للنسوان منهن منكبات ومنهنّ عجايز ركزت عليهن التجاعيد تارسه وجهن والدك الاخضر راسم ملامحهن وشيلتهن البريسم حاشيتها طايحة على حواجبهن، وحده منهن كضت ايدي وكالت
-اكعدي جده لا ياخذون مچانچ.
كعدت بصفها على الحصيره الهيه فارشتها وزهره بحضن عفراء
صارت بالسبعة وبدأ المقتل يفجع الگلب وكأنما فعلاً هسه راح يتذبحون أحفاد رسول الله، وعج المكان بصوت بچي النسوان
لنهاية المقتل وي قتل الامام الحسين عليه السلام ارتفعت الاصوات بالبجي واللطم ودخلت الزلم لساحة المقتل تلطم
كمنه من مچانه نفتر عيني تدور طروادة وين يله لمحته
هو وولد عمي ملتمين بدائرة ويلطمون
ضلينه كاعدين على صفحة لمن كملوا وراحوا للاكل وزعوه ودينه زهره على طروادة واجه رجعنه للبيت .
وثاني يوم داومت بدون خلك الحد اخر درس اجتني بنيه من غير صف تسأل
-انتِ رنـــه شامل ؟
هزيت راسي اي، مدتلي ايدها بيها ورقة گالت
-هاي اطيها الاختج.
ما اخذتها من ايدها
-يا هي انتِ شنو هاي؟
تقربت اكثر تتلفت بخوف گالت
-انا اخت منذر عفيه بس وصلي هاي الورقة الاختج، لا تقرينها.
اخذتها من ايدها بخوف راحت الصفها تركض واني گـــلبي يدك حيل ليش يودي رسالة العفراء شكو، اخذتها ورحت للمرافقات دخّلت وفتحتها كاتب
"من منذر الى التي حرم عليَّ ذكّر آسمها"
وكلام فصيح هواي جان يصعب علي فهمه ملخصة بالنهاية كاتب
"رايدج بالحلال، وما اريد اجي الا اعرف كونج راضيه وما يجبرج جدج، بس ردي جواب بأيد اختي.
قريتها وشهكت مصدومة، ضميتها بصدري وبس اريد أرجع للبيت حتى احجي العفراء، ما صدكت وصلت للبيت عفراء تخبز رحتلها للتنور
-عفراء ودولج رسالة.
دارت وجها تعاين مناه ومناه بخوف وخزرتني
-شتحجين انتِ.
مديت ايدي بيها الرسالة وهمست
-منذر صاحب طــروادة .
وهي تخبلت خزرتني وصاحت
-امشي للبيت اكمل الخبز واجيج.
اخذت الرسالة ورحت بدلت منتظرتها بالغرفة متحمسه اجت للغرفة سدت الباب ضحكت ورفعتلها ايدي واركصلها بحاجبي وهي تخبلت ضلت تلطم على خدودها وتصيح
- منين جبتيها رنـــه منين.
-اخته ويانه بالمدرسة جابتها كالت وديها الاختج.
جرتها من ايدي شككتها بلا ما تقراها وجرتني من اذني صيحت ابجي كالت
- وشلون ترضين تجيبينها رنـــه شلون.
دفعت ايدها ابجي
-وخري وخري الولد يحبج يريد يتزوجج.
لطمت على وجها
عفراء:: ولج شمالج تسودنتي.
لميت الرسالة من الگاع وطلعت من يمها ابجي لفيت روحـــي بفراشي، صاحتلي زهره على الغده ما رحت، وره الغده اجت يمي عفراء جرت الغطا من وجهي كالت.
-ليش ما تغديتي؟
-ما اريد
-ترى سوايتج سوده شلون تردين ارضى
-دوم تطكيني.
-تحركين گـــلبي وعلي وبساع اتندم لان طكيتج.
مدت ايدها تمسح على راسي وتعتذر، طلعتلها الرسالة مشككه من جوه الفراش
-اقريها!
باوعتلي بحيره،كعدت على حيلي احجي
-لا تخافين من بيت جدي احنا بظهرنا طــروادة مايكدرون يسوولنه شي.
-ولان عدنا اخو مثل طــروادة لازم نحفظ ماي وجهه ونفكر بسمعته.
-حبابه بس اقريها شوفي حجايته شلون حلوه ويكول اتذكر من جنتي طفلة وابوي ماخذج البيتهم.
ضحكت وكالت
عفراء:: اي وهو هذا منذر مره من المرات من جنا جهال انا كاتلته .
-هسه اذا تزوجتيه يرجعلج الكتله.
بقت تضحك واكلت كلبها الحد ما لزكتلها الرسالة قرتها وراحت حركتها.
اجه عبود اخذ غده اله ووالطروادة بالزرع كاعدين، وعفراء تلوب درت عليها
-شكو شو مدري شلونج؟
طكطكت اديها كالت
-الصبح جدي اجه هناه وحجيه مدري شلونه احسنه راح يحرك گلب طــروادة ولا مرتاحه.
"""""""""""""
وهـــب:: ودي اخلي دبة نفط وي الماي وأحرك الزرع كله، مية فلاح بگيعانه، وشعلان يخلينه احنه النفتر بالزرع وبالمعامل.
كملنه المكاين وشغلناهن، بصفنه طــروادة يفتر بگيعانه الهيه بالاساس ملك الجدي وبايعهن العمي شامل بدون عقد وبدون اي اثبات.
ولان ندري بحقد جدي على طــروادة بس شفناه اجاه ركضناله وهاسكي هم من بعيد اجه يركض وصل گبلنه وكف بصف طــروادة ،وبس شافاه جدي لم عباته يخاف من هاسكي يشگگها وكفنه يمهم طــروادة يضحك
طــروادة::التريده شني؟
شعلان:: اشوفن كيعاني حگي لو لا؟
طــروادة:: گيعان أبوي هاي ما الك بيها أي حگ
ضحك جدي بحقد وتمشى يعاين للزرع ويهز راسه عود زين زين، وطروادة كوه كاضينه ومسكتينه اذا عاند جدي بسالفة الكيعان هسه يطرده منهن.
رد جدي وكف كدام طــروادة ورفع عوجيته يريد يخليها بصدره، كضها صــيهد نزلها يعاين الجدي مضيك عيونه، شمر الجكاره يم رجل جدي وگاله.
صــيهد:: دام انا اشتم الهوه هالكيعان تضل گــيعان عمي شامل وملك طــروادة بتعبه وبكد ذراعة.
وطروادة واكف مبتسم بهدوء وبرود، هز راسه جدي متحلف بصيهد غمضت عيني بنفاذ صبر ادري شنو راح يسوي بيه بعد هالحجي.
شعلان :: طــروادة لا تشد ظهرك بواحد منهم اذا انا ردتك تطيح، تطيح ومحد يكدر يوكف بوجهي.
طــروادة:: "بيرغ عراضة انا ما اطيح"
ضحك جدي وكرب يم طــروادة حاجاه بهمس ومشه عنه وطروادة مات قهر يعاين وره جدي وفاتح عينه بغضب دار عينه الهاسكي طك على ظهره ووداه على جدي
-لااا طــروادة .
ما اهتم الحجينه وخله هاسكي يروح ركض الجديّ ركضوا ســليم وبريا عليه يردون يحمون جدي ، وهاسكي ملخ عباته وجراها منه وهو بعوجيته يطك بيه ماكدرله طيح العبايه من متونه واخذاها بحلكه يركض بنص الكيعان والطين، صــيهد دفع طــروادة ما راضي على السواه وجدي تسودن ومستحيل يعديها على خير صاح على طــروادة
-حطيت راسك براسي يصير خير.
صعد سيارته وراح، ومن كلنه ضلينه نلوم بطروادة ما اهتم صوف الهاسكي اجاه يركض وعباية جدي بين سنونه، جراها منه شمرها بالگاع داسها برجله وراح .
رجعنه للبيت بالليل محد متحمل الثاني وتعبانين كعدنا بالديوان
مدري شلون جابوا طاري المقلب وانا اشرب ماي شرگت بالماي اكح ووكفت، شلون نسيتها شلون، صاح ســليم ؟
-وين؟ شبيك.
ما رديت عليه طلعت من يمهم فتحت باب المشتمل ومشيت للغرفة
كاض گـــلبي بأيدي، وصلت للباب دكيته وماكو آي صوت، فتحته متردد الف فكرة براسي ،على كيف أدفع الباب لمن وصلت نظرتي الها والمحها متكوره على روحها بزاوية الغرفة متلفلفه ببطانية ونايمه، غمضت عيّني أزفر نفس براحة، وكعدت على حيلي بباب الغرفة ميت قهر شلون ناسيها من امس لليوم لا ماي ولا اكل.
مسحت وجهي وكمت تحمحمت صحت عليها
-يبنيه.
فزت مرعوبه كعدت على حيلها وتستر بروحها عبالها متكشفه،
رفعت عينها عليَّ
-جوعانة؟
دنكت ساكته.
-انا اعتذر نسيتج، راح اجيبلج شي تاكلينه
احاجيها وما ترد علي بس مدنكه، عفتها ورحت للبيت، لكيت اختي تسوي اكل
-حطيلي عشه وحدي.
مــاسه :: راح اصب الصيهد تاكل وياه؟
-لا اريدن وحدي.
سكتت سوتلي صينية اخذتها ورحت للبنيه لكيتها لامه الفراش ولابسه عبايتها، تدنيت يمها خليت الصينية ووكفت.
-راح اطلع، بس شوي وارجعلج لازم نحجي ونشوفلج حل.
هزت راسها موافقة طلعت كعدت بالصالة افكر بيها وبغرابة وجودها بالچول وهل الحجته حقيقي لو وراها سالفة اكبر، شوي والتفتت على صوت باب الغرفة وكفت اعاينلها
-ها؟
حجيت واباوع الايديها تنزل بردن العبايه على أصابعها كالت
-مو تريد تسألني.
مشيت عليها دخلت للغرفة مخليّه الصينية على صفحة مآكله شوية، كعدت بمچانها مدنكه، ردتها هيه تحجي وتسولف ضليت ساكت افر بالسبحة، عاينتلها عيونها مركزات وي حركة السبحة لميتها بأيدي
-اول شي كليلي شنو اسمج ما اعرفنه وكل شوية اكلج يبنيه.
افتر بؤبؤ عينها دليل على تفكيرها بأسم، ابتسمت كاشفها رفعت عينها گالت
-بلقيس.
-شكلج مو مال بلقيس،جذابه احجي الحقيقي.
عضت شفتها ودارت عيونها تفكر بأسم جديد خلت عينها بعيني گالت
-مروه
-ههههه شلون راح اصدكج وانتِ بالأسم تجذبين.
عاينت علي وحجت بدون تردد وتفكير
-ندى اسمي.
-اممم، اي ندى منين انتِ من يا سلف وابوج شنو اسمه واختج اسمها واسم زوجها اريدنه.
ندى:: باوعت الوجهه بخوف متردده احجيله ومن المستحيل أحجي حقيقة كامله، مسحت وجهي وهو عاكد حاجبه منتظرني احجي، نزع الشحاطة من رجله كعد مقابيلي على الفراش ثاني رجله ومخلي ايده عليها يفرّ بالسبحة، طولت بسكوتي عاف السبحة كدامه، فتح الجراوية الملفوفه على راسه ورجع لفاها منّ جديد رفع عينه العيني
وهـــب :: تحجين نروح الاهلنه.
-مو كتلك.
-ما صدكتج عيديلي السالفة
-والله العظيم ما مجذبة، اني عندي أخت اكبر مني تزوجت بالخارج وراها امي توفت، ابوي تزوج وحده أرمله وعدها ولد، وره سنة ابوي مات، وهذول تحلفوا بيه وظلموني، جنت اريد اشرد من زمان بس بكل مره ما اكدر الحد امس يله كدرت وربي خلاك بطريقي حتى تساعدني وتدورلي اختي .
احجي والغصة خانگتني، ضحك يهز أيّده بأستهزاء گال
-يعني تقنعيني رب العالمين عاف كلّ هالناس الزينه المصليه الصايمة الماعدها معاصي، وداج على وهـــب السكير.
-لكل شيء سبب.
يضحك ما مقتنع انطيته اسم اختي وإسم زوجها وكف يم الباب يبحوش بتليفونه، وبدون ما يحجي ولا يباوعلي فتح باب الغرفة وطلع باوعت المكانه سبحته باقيه بالمكان مديت ايدي عليها شلتها وبمجرد خليتها بأيدي صار عطرها بخشمي، عفتها على جهه.
دقايق وسمعت صوت دگ كمت بخوف فتحت باب الغرفه شفته لازم بطانية ويدك بيها على الشباك، التفت علي من فتحت الباب
رجعت كعدت بالغرفة، ما ادري بيه اذا طلع لو لا، سحبت الگلاده البركبتي بستها وتمددت دموعي على خدي
-افرجها علي يارب.
""""""""""""""
رنـــه ::عفراء ولا رضت ترد جواب كل ما افتح حلكي واحاجيها تكتلني، الحد ما يوم من الايام نريد ننام واجه طــروادة غطيت روحـــي عود نايمه طب يتدفى على الصوبة يمنه بالغرفة وعفراء سوتله اكل جابته يمه وكعدوا يسولفون على الكاع ، طلعت عيني من جوه البطانية اعاينلهم رفع راسه گالها
-عفره منذر شعده وياج؟
واني من جوه البطانية فتحت عيني على وسعها وخليت ايدي على حلكي اكتم صوتي، عفراء بس فاتحة عينها وتباوع لوجهه طــروادة كلشي ما تحجي، وهو يحجي بهدوء رجع دنك ياكل ويكلها.
-اممم، احجي.
عفراء:: شعدي وياه.
-ما ادري كلي الروحج شني حنيتي للطفولة؟
عفراء:: طــروادة صدك تحجي؟
شرب ماي يعاين بعيونها راح تبجي محروك گلبها وهو بارد كوه يحاجيها گالها
-يسمع بيه كل ساعة وكال هنياله اليناسبك.
-واذا يسمع بيك تجي تكلي شعده وياج؟
-اتشاقه شني السالفة جا ما اعرفج انا؟
دفع الصينية يمها گالها
-والله ناس خيره ومنذر كفو اذا انتِ راضيه بيه ليش لا؟
سكتت عفراء منزله راسها گالها
-ها؟
وهيه ساكته ماتحملت طلعت راسي من جوه البطانية كتله
رنـــه :: هيه تتمنى تتزوج غريب بس تخاف من جدي ما يرضى.
داروا عينهم اثنينهم الي هيه خازرتني وطروادة يعاين رافع حاجبه همست.
-والله صرت چبيرة خلوني احجي وياكم.
طــروادة :: كومي سويلي چاي وتعاي احجي ويانه.
كمت ركض أخذت الصينية سويت چاي وغسلت المواعين وهو كام غسل، عفراء جابت الصوبة للهول، اخذت الچاي يمهم متحمسة دوم جانوا يسولفون بالسر ما يخلوني أسمع سوالفهم
، طــروادة خاط استكان الچاي شرب منها شوية ورجع عاين العفراء گالها.
-مالج شغل بجدي وبولد اعمامج الزلمه بيهم يفك حلكه
عفراء:: جدك وكف بحوشنه وهددني غريب ما تاخذين، اكعدج بنهوه، فـــدوه اورحلك لا تفتحلي باب جديد من ألهم خلني.
طــروادة:: لا والله الا انطيج المنذر وعناد وخل اشوف يا زلمه الينهي عليج، انتِ بس كليلي راضيه بمنذر انا اكفله الج مابيه مو زينات.
رنـــه :: لو بس تبطل ما تخاف من بيت جدي، طــروادة هيه ترضى بمنذر مالك شغل بيها يجوز استحت هسه.
ضحك طكاني راشدي على كيف وهيه تسويلي بأيدها سهله گالت
-كومي غطي عبود ببطانية ثانية وروحي للغرفة نامي يله.
كمت من يمها دخلت الغرفة الولد غطيت عبود ورجعت يم زهره لفيت راسي ونمت، ودوم عفراء مخربة نومتني لازم تكعدني من الفجر
-عطله ليش تكعديني.
-دجاجتج مفرخة.
فتحت عيني بفرح كمت بسرعة من الفراش لبست قمصلة وطلعت للحوش ركض فتحت باب الگن مال الدجاجه وطلعن الأفراخ ثمانية وباقي البيض ما طالع درت على صوت طــروادة هستوه يدخل للبيت چان بالسگي كال
- ها؟
-ههههه تعال شوفهن يخبلن.
اجه يمي عاينلهن گال
-الله ان شاءالله ما تاكلهن البومه.
-والله اموتها اذا وصلتهن.
ضحك،وراح للبيت، جبتلهن قش جديد حتى ادفيهن، رفعت راسي على صوت هاسكي يزئر يريد ينبح مشيت للسياج ادور عليه وينه رفعت رأسي من السياج والمح بريا ابن عمي خليل صاعد على بنيد السيارة مال جدي، وهاسكي حاصره ما يخليه ينزل وبريا يتوسل بيه يگله
-روح روح الطروادة يصيحلك من احتركت روحه.
رفع أيده يأشر على بيتنا وهاسكي نبح عليه وهو ضلّ يصيح مديت ايدي من السياج وصحت
-هاسكي هاسكي تعال.
التفتوا اثنينهم هاسكي وبريا اجه هاسكي ركض وبريا بس لمحني دنك ونزل من السيارة، رحت الباب الحوش فتحته اله دخل للحوش كعدت كدامه
-شوف اذا وصلت دجاجتي وفروخها اكض العصا مو تكول ما كتيلي.
درت على صوت عبود يضحك وكفت گال
-شوفي هاي عفراء سوت ريوك بس التؤمها، جا مو انتِ تؤمي شمالج ما تداريني مثل ما عفراء مداريه طــروادة .
يحجي ويضحك واجته عفراء من ورا بالعصا على رجليه تطكه وتضحك كالتله
-ولك مو صبيتلك ليمت ما مداريتك.
دخلنه للبيت نضحك تريكنا سوا، طــروادة بس كمل ريوكه نام، وعبود طلع وي الولد، وانه خلصتها مكابله الدجاجة كلساع جايبتلهن أكل شكل.
وره ما كعد طــروادة، صاح سون چاي ولد اعمامي راح يجون وعفراء كاتلها الخوف، سوت چاي وهو لمهم كلهم دخلوا الدوانيه رحت كعدت يم الباب واعاين من فتحة القفل المشلوعه كاله صــيهد
-لمتنه على خير على شر؟
طــروادة :: على شر اريد نذبح جدكم.
ضحكوا كلهم آلا مرتضى ابن عمي شاكر هذا الحفيد الوحيد متزوج بينهم بس ما يشبه لا اخوه سلطان ولا ســليم، مكروه .گاله
مرتضى :: بيش طالبه عمره طويل.
طــروادة:: الاذكره انتَ اكثر واحد دعيت عليه بالموت يوم النجلط.
سلطان ::يابه طلعوا شعلان من السالفة شنهي طــروادة قلقتنه، بيك شي؟
وهـــب ::عرفت سالفتهم مطوله تمددت بينهم بعدني هسه خليت راسي على المخده وطكاني صــيهد بسبحته كمت كعدت رفّع السبحة يحذرني
-تتعلم يا ديوان النكعد بيه تجر مخدتك وتنسدح.
ضحكوا ســليم وبريا أشرتلهم سهله، جابوا الچاي اول ما شربنه گال طــروادة .
طــروادة:: أنتم اخوتي مو ولد عمي، وشكد مو زينات من اهلكم عبرتهن لأجل عينكم، بس هالخوه بموقف وآحد تنتهي ، جدكم يوم الاجت ناس غربه على اخواتي دخل الحوشنه وهددهن الترضى بغريب يكعدها العمر كله بنهوه.
وهسه جايتني وادم على اختي وادري شعلان راح يجيكم واحد واحد يكلكم تنهون عليها بس وروح ذاك العزيز اليجي ويكول انا ناهي عليها أذبحه بخنجر مزنجر.
صــيهد :: يا وادم طــروادة نعرفهم لا ؟
-لا تخاف تعارفهم من يجون بعد ساعة.
وهـــب :: خويه زوجهن ياهو الينهي عليهن، شني السالفة.
مرتضى:: الغريب ترضى بيه وانا من اجيتك كتلك اريد من اخواتك ما رضيت.
سلطان :: هسه خويه شلك بهالحجي تزوجت وصار عدك بت وولد عليمن هالسالفة.
مرتضى:: لا جا ما رضى بابن عمه يرضى يطيها للغريب، انا ما ارضى.
طــروادة:: انتَ تاكل خره، صوج الاحترمك وكعدك بين الزلم كوم اطلع بره.
وهـــب:: تصايحوا الولد التهوا عفتهم تمددت، ســلطان اخذ اخوه وراح ولحكهم ســليم. ضلينه يم طــروادة وسوه كارثة من جاب الوادم البيته ما اخذهم الديوان جدي
التمينه كلنه نرحب بيهم، اجه جدي مدخن وراه ابوي وعمي شاكر كعدوا ويَ الوادم جايبين حتى ساده سولفوا وي جدي وهو يرحب يريد يكسر عيّن طــروادة، وطروادة يبتسمله بأنتصار
خطبوا ومتانين رد جدي رفع راسه عاين علينا واحد واحد ركز نظرته على سلطان ابن عمي شاكر ورجع يعاين للوادم گالهم.
-مره بمره، احنه هم نريد نناسبكم تطونه مره السلطان نطيكم بتنا.
حجه هيّج وسلطان طلعن عيونه من وجهه يباوع بوجوهنه، وطروادة احتقن من القهر، كل ظني الوادم ما يرضون صدمونه من گالوا.
-وأحنه راضين بنسبكم.
شعلان:: على بركة الله، ان شاء الله باجر يمكم.
قروا الفاتحة وعقدوا المنذر، كاموا الوادم يرحون بعدهم بالحوش وسلطان تسودن كوه كاضينه يسب بجدي ونسد بحكله بس اسكت.
اخذه ســليم للبيت، وطروادة ميت من القهر راد يقهر جدي بس هوه سبقة بخطوة وقهره .
رنـــه ::جنت إني فرحانة اكثر من عفراء وهيه تبجي مقهوره من تصرف جدي
-عليمن تبجين؟ جا واذا خطب السلطان ؟
-ما تفهمين انتِ اسكتي مني، هاني وهان طــروادة بالسواه.
سكتت منها لميت الاستكاين غسلتهن ونظفت كعدت هيه درست حسين وزهره، طــروادة اخذ عبود وطلع حتى ما طب للبيت گد ما انقهر، الغروب كامت عفراء تخبز وانه واكفه يمها التفتنه من اجه طــروادة يسأل
-شني عبود نام؟
عافت الخبزه عفراء كالتله
-شني؟
عاينلها بتركيز كالها
-عبود وينه؟
-غير راح وياك؟
سكت طــروادة يعاين بضياع كالها
-صار ساعتين من وديته عليج!.
يتبع...
رسم تشبيهه لقرية لفحة. مو مطابق كلشش💚
الفهرس .
"""""""
زوره....... نبات طبيعي قد يكون احياناً يشبه الشجر
الثنية.... ساحة امام البيت
تشابيه... تمثل واقعة اللطف
قزانات ....اواني طبخ كبيرة
لوذي..... أحتمي
طنطل..... هو أسطورة خيالية تراثيّة ترمز الى كائن غريب ومخيف يتحول الى اي هيئة يريدها، كذبها البعض وصدقها البعض الاخر.
-ايلول 💚
رواية أرض الخناجر الفصل السادس 6 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
══━━━━✥◈✥━━━━══
اشرهن عالملح والچمهن من اغتاض
ولا اذلهن جروحي بحضرة المخيط.
══━━━━✥◈✥━━━━══
رنـــه ::بهتتنا وخوفنه واحد يعاين بوجه الثاني شنو عبود ماكو،
ركض طــروادة البيت عمي شاكر، وعفراء ركضت تلبس عبايتها تريد تطلع
، عفتها وركضت للسياج اباوع وكلبي يدك بخوف، عيني للدرب واتخيل هسه طروادة يطلع من سياج بيت عمي شاكر وعبود وياه، اسمع صوت عــفراء يم باب الحوش تصيح،"يمه عبود يمه"
نخلبت روحـــي وكعدت على حيلي من شفت طــروادة رجع لبيتنا يركض ووهب ركض للسيارة ووراه ســليم وسلطان وصيه، كمت من مچاني اعاين الطروادة دخل للحوش وتلاكت وياه عــفراء صاحت بخوف
عــفراء::ها؟
وهوه يمشي للبيت مستعجل ويحجي گالها
-ما هوه، واعامي وشعلان من العصر ما رادين.
حجاها وطب للبيت وانا بس فاتحة عيني اعاين جر التفگه من وره التلفزون وطلع للساحة گالها
-طبي للبيت.
طلع صعد وي وهـــب والولد راحوا، وضلينا احنا الخوف ذابحنه
كلشي ما ندري.
""""""
وهـــب ::وين يولي يابه شني السالفة طــروادة.
احجي وهو ساكت صــيهد اخذ التفكه منه وهو وجهه نگلب، مرينه للمعامل گالولنه چانوا هنا،وصارلهم ساعة منّ راحوا، وكفنه يم السيارة محتارين اخابر ابوي ما يرد، خابره صــيهد رد عليه فاتح السماعة وكلنه ملتمين عليه بس نريد نعارف عبود وينه گاله ابوي
وليد :: شني احتركنه شمالكم؟
صيهد :: وين انتم؟
وليد:: بمضيف بيت حامد عدنه طللابه
صــيهد :: عبود وياكم؟
وليد:: ويانه بس لا تگُل لطروادة، جدك ما يرضه
صاح صيهد بحرگه
صيهد :: ياهو الگالكم تاخذونه وياكم ؟ بويه انعل ابوك لا ابو جدي لا ابو بيت حامد لا ابو عشيرتكم هيج هيج منكم ومن عشايركم.
جريت التلفون منه سديته احجي عليه
وهـــب :: شبيك تسودنت؟
باوعلي محروك گلبه، وطروادة صفگ ايد بأيد يسب بشعلان، اجوا ورانه الولد ســليم وسلطان، همه نزلوا من السيارة بعدهم ما واصلينه حتى يسألونه، احنه صعدنه بالسيارة ورحنه، رجعوا ركضوا لسيارتهم واجوا ورانه.
لمن وصلنه بيت حامد تلاكوا ويانه طالعين من المضيف والزلم وياهم عاينلنه جدي ودار على حامد گاله.
شعلان:: عاين چم سبع عدي، هسه بس بطيت عليهم هدوا كلهم، ياهوا اليدنالي وهاي الزلم كلها بظهري.
يحجي ورافع راسه، وهمه يضحكون وياه، تقدم طــروادة على جدي مد ايده جر عبود من يم ابوي وعاين الجدي گاله
-ما اخذت واحد من هالسباع وياك، لو ما لكيت غير عبود الگلبه تعبان، تفتر بيه بمعاملك وطلايبك.
سكتوا كلهم مستغربين كلام طــروادة وي جدي، وهو خازرنه بحقد
شعلان:: حتى يتعلم ما يضل مثل اخوه، لا يعارف اصول ديوان، لا يحشم الآكبر منه.
حامد:: صل على محمد حجي، لا ولدكم همه وهذا طــروادة سبع ما گصده أعذره اعذره.
وهـــب ::جر عبود ورحنه للسيارة هم هستونه صعدنه واشوف ورانه سيارة ســليم وسلطان، توهم وصلوا،ومن شافونه مشينه فروا السيارة واجوا ورانه، طول الدرب طــروادة ساكت، وعبود يحجي وياه بهدوء خايف منه، لمن وصلنه، جراه بنتر دفعه لحوشهم صاح وراه صــيهد
صــيهد:: يشهد الحسين اذا حاجيته اموتنك.
رنـــه ::كمت ركض، وطروادة طبب عبود للبيت تدفع، وكفت عفراء تريد تفكه من ايده وهو متسودن ويصيح عليه
طــروادة :: انا مو ناهيك من جدك ولك تعاااندني عبود تعاندني
عفراء :: يمه كافي فـــدوه طــروادة كافي گلبه لا يوكف هده فـــدوه اروحلك هده.
تجر بعبود رغم طــروادة ما طكاه ابد بس يعت بيه ويغلط وعبود ما يسكت صاح
عبود :: مو ياهو التكرهه انتَ لازم انا أكرهه وياك، لا تعلمنه على الحقد مثل ما ابوي علمك.
رنـــه ::شهكت ايدي على حلكي من طــروادة طك عبود راشدي طيحه بالگاع، وعفراء تسودنت كاضه طــروادة بأثنين اديها، ركضت العبود اكومه من الگاع دفعني من ايدي يريد يطلع من البيت صاح طــروادة .
-رد ولحسين اكتلك.
رد عبود للغرفة وركع الباب حيل، راح طــروادة للمطبخ غسل وجهه، وعفراء بس تقرأ ايات وعلّت التلفزون علمود الدعاء،عاينت لحسين وزهره، عافوا الصينية مال عشاهم وراحوا كعدوا على صفحة خايفين من طــروادة ، شلت الصينية للمطبخ، طلع طــروادة كعد بالهول يدخن اخذله شوية ساكت ورجع صاح.
-عبود إذا مرة الثانية اكضك ويَ شعلان معتب اذا ماخليتلي چيلة بنص كصتك.
عفراء:: كافيييك كافي تريد تموته.
رنـــه :: طفه الجكارة وندك باب الحوش وصوت صــيهد يصيح عليه كام طلعله، واحنه بيتنه تكهرب كلمن كعدله بصفحة عدت يمكن نص ساعة وكمت للغرفه يم عبود شعلت الضوه وكعدت يم راسه همست بصوت ناصي
-عبود.
ما حاجاني مديت ايدي جريت البطانية من راسه اعاين لعيونه مغمض وفص عينه مبين يتحرك
-عبود حاجيني والله گـــلبي ضلّ يوجعني.
فتح عينه وانگلب على ظهره يباوعلي
-شتردين؟
عاينت الخده اصابع طــروادة مطبعات حمر.
-لا تضوج من طــروادة لو تشوف شلون خفنه عليك من مالكيناك عبالنه تخربطت وطحت، والله هوه تسودن من مالكاك وطار گلبه عباله صار بيك شي.
ضحك مستهزئ گال
عبود :: لا هوه يريدني كون اكره جدي واكره أعمامي،
اذا اطلع وي جدي يگلب الدنيا، اذا رحت البيت عمي شاكر تسودن، ارد اعارف شني اليريده طــروادة ليش يكرهم عليمن.
رنـــه :: درت عيني باوعت للباب گـــلبي يدك حيل بلعت ريك اريد اكله ابوي مات مكتول واظن هذا السبب الخله طــروادة يكره جدي وعمامي، بعدني هستوني احجي وطبت عفراء وكفت بالباب أشرتلي اطلعي، كمت طلعت وهيه طبت للغرفة وسدت الباب كلشي ما سمعت منهم.
فرشت وي حسين وزهره نمت كبل ما واحد يحاجيني لان بكل عركه تصير لو انكتل وي المكتول لو ينغلط علي، كعدتني الصبح زهره نترت بوجهه
-شتردين؟
زهره :: افه كول كطي بيض
-اطك بيض؟
-ايه.
كمت من الفراش طلعت للهول طــروادة كاعد يباوع بتلفونه يم الصوبه، وحسين منتجي على رجله ويباوع وياه، تلفتت ادور عبود، فتحت باب الغرفة شفته بعده بفراشه ايده على عيونه.
غسلت وجهي وطلعت للحوش البارحة ماطره وهسه بعدها مغيمه وتنكط ، وكفت يم عــفراء تخبز ومطلعه الدجاجات وافراخهن يمها مطيتهن اكل ويفترن گالت
-رنـــه سويتي بيض؟
هزيت راسي لا كتلها
-عبود بعده زعلان !
حجيتها ودنكت راسي گالت::
-هسه يتراضون مالج شغل، طــروادة اليوم الفجر من رد من الگيعان لام فطر العبود گال مو تطين منهن الرنه.
-الله، صدك البارحه ماطره هواي هسه تلكين البستان متروس فطر، عفوره فـــدوه خل نروح نلم.
-يا عد لا بختج بهالطين وين رايحين،طــروادة من رد اليوم شصاير بحاله هوه وصيهد الطين واصل وياهم للهامه.
-جا المن راحوا للگيعان.
- غير طفوا المكاين، وفتحوا العبر حتى ما يتكدس الماي على الزرع.
رنه :: سكتت ضليت كاعده وهيه اخذت الخبز وطبت للبيت، شلت واحد من الافراخ لونه حني ، انتَ راح اسميك توتو.هديته بالگاع راح الامه، رفعت راسي ليفوك اباوع على النخل الداير ما داير بيوتنه والمح البومه على وحده من النخلات تباوع البيتنه.
-ولي والله اذا تدنيتي عليهن اموتنج.
دنكت للگاع جريتلي حجارة وشمرتها حييل ما وصلت للنخله
دنكت دورت وحده ثانية اكبر اول ما شمرتها سمعت واحد صاح
-ااااخ نعلعله والديكم.
دنكت خايفه وهو يصيح
-يا ابن چلب هذا.
وانا مدنكه واغلط عليه بگلبي ضميت الدجاجة ورجعت للبيت، طلع عبود من الغرفة راح غسل ومد مصلايته وكف يصلي، وعفراء حطت الريوك گدام طــروادة تدنوا للصينية حسين وزهره وياه وهو يحطلهم شكر بكلاصات الحليب ويخوطهن الهم خاف يبدونه.
گام عبود لم المصلاية ومشه على طــروادة دنك باس راسه گاله
عبود ::اعذرني خويه.
وطرواده هز راسه ساكت، سواله مچان يمه كعد بصفه يتريك،
عــفراء::عبود هذا فطر جابه الك طرواده من الگاع اگليهن الك؟
عبود :: اي والله سويهن
حجاها وووخر من الصينية يشرب بس حليب گالت عــفراء
-رنـــه تريكي وي اخوتج.
- لا انه اتريك وي عبود
ضحكوا ومن شفت طــروادة بيه مجال اخذني الواهس كعدت بصفه
-اريد اكللك شي بس خاف تكول لا واضوجن.
شرب چاي يعاينلي
طــروادة::سولفي بله خل نشوف شتردين.
-اخذني للــبستان الم افطر فدوات حبوب مو انتَ خوش اخو واحسن اخو وماكو منك.
اني احجي وهوه رجع ياكل مغلس كمت حضنته وهو كاعد ابوس خده واحجي
-گول اي يله گول اي عفيه عفيه گول اي.
اخذت ايده من حضنه بستها خليتها على كصتي
-عفييييه واسويلك مرگة شبزي مو تحبها؟
رفع عينه الضحكة بوجهه مايكدر يضمها گال
-لا ما احبها.
-جا انه من اخذ مرگة كله اخليلك اللحمه الچبيرة
-اي؟
-وهسه انتَ كون تاخذني للــبستان وتلم أفطّر وياي ونجيب شبنت وسلك حتى نسوي بالغده شبزي، ها قبلت؟ سكتت يعني قبلت ها؟ گول اي يله گول!
كل شوي شاربه يعلى يريد يضحك ويلزم نفسه رفع عينه العفراء ورجع عاينلي گال
-لا
جريت ايده الحضني وبردن قمصلتي مسحتها ومديت ايدي الخده مسحته
-امداني بست ايدك جيب بوساتي.
ضحكوا كلهم گال
طــروادة ::يله وره الريوك نروح.
كمت مكيفه وزهره وحسين چلبوا يردون ويانه لبستهم عفراء قماصلهم، وانا طبيت البس صاح عبود
-تعاي تريكي يله.
-بعد ما اريد راح اجيب انه واگلي.
طلعنه وياي زهره وحسين يلبسون جزماتهم بالحوش وانه لبست نعال، طــروادة يلعب وي هاسكي متانينه نخلص دار وجهه شافني لابسه نعال.
-البسي جزمه نعالج هناه ينگطع.
-ما احب الجزمه، ما ينگطع قوي هذا نعال عفره.
-اذا ينگطع تكتلج بيه.
ضحكت اريد امشي صاحت عفره من المطبخ
عفراء:: مو واحد يلبس نعالي.
غلست جني ما اسمع ،خليت السجينة بالسله وكضيت زهره من ايدها ورافعه عبايتي للنص ، طــروادة وهاسكي يمشون گدامنه،
مشيت خطوتين نعالي انترس طين ضليت كوه اجر بيه، لمن وصلنه للــبستان طــروادة راح يشوف الخس، وانه وزهره وحسين ندور افطر صاح حسين
-لگيت لگيت.
رحتله ركض طلعناها وغسلناها بالساگيه ، ذبيت النعال من رجلي ومشيت حافيه بالطين لمينه افطر ورحت احوش اشبنت وسلگ وكراث، رفعت راسي اعاين للحرثة من اجت سيارة صيهد، صاح طــروادة
-رنـــه لوذي يم السياج.
مشيت بسرعة كعدت يم السياج واعاين للحرثة وكفت السيارة نزلوا الجامه عمه ام صــيهد وياهم سلمت عليه گال
طــروادة :: ها صــيهد وين من الصباحيات؟
وهـــب :: ولك امي وابوي متعاركين، وامي من صباحيات الله نسمعها تصيح " اخذ الفروخ واروحن لهلي" واجت كعدتنه دفرات تصيح كوموا نروح لخوالكم.
ضحك طــروادة وصيهد صاح عليه
صــيهد :: جذاب هذا، بس الوالده تريد تروح لاختها واختها تكلها جيبي الفروخ وياج اشوفنهم.
الله يسلمك الفروخ احنه انا وهذا الكديش.
وهـــب ::ولك حسيت شوارب صــيهد صارن خيط لا يحلن ولا يربطن.
يضحكون وي طــروادة وامهم تطك بيهم، سلموا عليه وراحوا، اجه طــروادة يمنه شافني شلون غاطه بالطين كال
-وعلي تكتلج عفره شمسويه بروحج.
ضحكت اكمل حوش خضره، وهوه وي حسين وزهره بعدهم يلمون افطر شوي وسمع صوت الولد يضحكون أشرلي ردي لوذي يم السياج، رحت ركض كعدت يم السياج، واجوا الولد من بعيد سلموا عليه ســليم وبريا وميثم وكلهم يضحكون الا مــيثم، صاح طــروادة
طــروادة ::ها مــيثم شبيها كصتك معنجره.
مــيثم:: خاب غير ما ادري يا چلب منهم طكني بحجاره من الصباحيات.
بريا:: يكول الحجاره اجتني من بيت طــروادة وكلنه شاكين بيك؟
طــروادة :: لا وروح ابوي مو انا شمالكم،
ســليم ::ولك جان مربطنه يريد نعترف ياهو الطگه صار ساعة نحلف مو احنه، وطروادة اكلك اذا الحجاره من بيتكم وانت تكول مو انا يعني هذا هاسكي هوه الطك مــيثم .
طــروادة:: تسوون مصايبكم وتذبونها على هاسكي لا اهده عليكم.
ضحكوا كلهم كالهم
-وين رايحين
مــيثم::للمعامل، يله استودعناك كض هاسكي مو يركض ورانه.
رنـــه ::ضاله بمچاني خاتله وبريا وسليم يتحرشون بهاسكي عود مأمنين لان طــروادة يمه، بس مشوا مسافة، طــرواة هد هاسكي عليهم، شافوه اجاهم يركض وهم بكل حيلهم يركضون ويصيحون وكبل لا يوصلهم طــروادة صاح عليه ورجعه يمه يضحك عليهم.
اجيت يمه ابلعم گال
طــروادة :: ها كضيتي نرد لاهلنه؟
هزيت راسي اي شلت النعال بايدي متروس طين وزهره وحسين ولا لاحهم طين لان لابسين جزمات الا انه شوي بعد ويوصل الراسي، عاينلي طــروادة
-صدك جذب شسويتي بروحج، تعاي اغسلي رجليج بالساگيه.
اخذ نعال عفراء من ايدي ومشيت للساگيه غسلت رجليَّه وهوه لزم النعال بأيد وحده وغسله اجه يمي لبسنياه ببطن الساگيه حتى ما يتدمرن رجليَّه طين، وكفت ومشينه للبيت فرحانين بالفطر الجبناه
بعدنه ما واصلين الحوشنه واحس برجلي شطحت ليگدام، زلكت وطب النعال بنص رجلي اني اريد ابجي وحسين وزهره ميتين ضحك، وطرواده خايف على نعال عفراء اكثر مني كبل كال.
طــروادة::انگطع نعال عفره ياهو يفكج منها اليوم.
طلعت النعال من رجلي اعاينله شوي بعد وينگطع، گال.
طــروادة:: اغسليه وحطيه بالباب لا تكليلها رحت بيه.
-وهذول زوج البلبل الفتان.
حسين:: انا ماكول طــروادة
زهره :: انه كلها افه انه كطعت عالج
طــروادة ::يله مو مهم حسين ما يحجي وزهره ما مبين شني تحجي.
باوعتله بزعل الدمعه بعيني والطين وصل الحجابي كتله
- والله تعرف حجي زهره كله، هسه تضل تعيد بيه لمن تفهمه.
يضحك مشينا بس فتحنه باب الحوش لكيناها كاضه عصا وواكفه بالباب وزهره كبل ركضتلها تفتن اجتني تركض والعصا بايدها، ركضت شارده افتر بالحوش وهيه وراي صعدت على گن الدجاجات واصيح
-والله اشتريلج بمچانه والله التوبه التوبه بعد ما البسه.
عفراء:: مو عدج نعالات ليش ترحين بنعالي اموتج اليوم.
رنـــه :: جا طين ونعالي جديد خاف ينكطع.
حجيتها وطفرت شارده دخلت للحمام وطرواده يضحك وياها
عاد طولت ساعة يله طلعت من الحمام نست الكتله وعافتني.
لكيتها تسويلنه مرگه شبزي كتلها
-ها المخطوبه.
-ووجع رنـــه اكص السانج تره لا تفشليني كدام الولد.
مديت راسي للهول طــروادة نايم لان الليل كله بالگيعان مايشبع نوم، كمت للحوش اللعب وي زهره وحسين بالمرجوحة المسوينها الهم حبل رابطينه بين نخلتين وحاطين عليه مخده بالنص، ندك باب الحوش وصوت واحد من الولد يصيح
-كهلان .
دخلت للبيت ركض كعدت طــروادة طلعله، وانا مديت عيني من الشباج اعاين، شفته سلطان ابن عمي شاكر طببه للدوانيه، شفت عفراء ملتهيه بالمطبخ، رحت بسرعة لباب الدوانية اعاين من فتحة الباب حجوا بالزرع النوب سلطان مسح وجهه گاله
سلطان :: طــروادة انا ياهي مالتي شنّي ذنبي عاتب على جدك انا، رايد مره فاتح حلكي گايل.
تحسر طــروادة، شعل جكارته يجر منها نفس بقهر گاله
طــروادة:: ما الك اي ذنب هوه راد يقهرني ويرخص باختي، هاي كل ما بالسالفة
سلطان ::لعبانه روحـــي كلش بالحسين، احاجي ابوي يصيح اكسر ظهرك، احاجي جدي يصيح اطردك، ادري عبيد عدهم احنه شني هالذله هاي، انا اكدر اخابر ابو منذر واكله بويه ما اريدن مره منكم، بس ادري تصير طلابه واكسر بخاطرك انتَ.
طــروادة :: لا ترضى مالك شغل بيه انا انطيت المنذر وجدي خله شيسوي يسوي ما يهمني.
هز راسه سلطان بأسف مقهور حيل گاله
-انتَ تدري وانا ادري اذا طلعت من شوره ما يخليها تعدي على خير.
تحسر طــروادة محتار يعاين السلطان گاله
طــروادة :: هاي قهرتك مال واحد عاشگ.
ضحك سلطان مدنك يفتح بباكيت الجكاير متحسف رفع راسه خله الجكاره بين اسنانه وجدح الجداحة خله ايده سد للجكاره شعلها وجر اكثر من نفس زفره وگاله بقهر
سلطان :: انا عشگت مره وانتَ شهدت على كلشي وراحت بعد بحال سبيلها، بس من گـــلبي والله ما راحت.
طــروادة ::يابه صلي على محمد البت تزوجت، لا يسمعونك صــيهد لو وهـــب يجنزونك.
سلطان :: بذمتهم ابوي وابوها كل دمعة طاحت من عينيّ وعينها، حاقد عليهم لليوم.
-بعد اخوك هيه قسمه لا تضل تفكر بيها حرام وزحمة البت عد رجلها.
فاتحه حلكي وعيني بصدمه ونكض شعري من وره جرّتني عفراء سكته تسحل بيه للمطبخ بس هدتني صحت
- ولج ولج عرفت سر.
وهي تجر بالمس تريد تكتلني
-ولج ما تبطلين سوالفج انتِ موتيني والعباس اگول الطروادة عليج اخليه يكطعج.
-اسمعي اسمعي ولج لو تدرين سلطان طلع يحبمن گبل لا تتزوج.
فتحت عينها ساكته كرامتها ما تخليها تكلي سولفي بس مبينه تريد تعرف من شفتها هيج كتلها.
-لا انتِ ما تحبين هاي السوالف خل اسكت احسن.
عفتها ومشيت للغرفه طلعت كتبي وكعدت شويه واجت وراي كعدت يمي تسأل
-رنـــه جا شني جاي تكتبين شعدج.
-رياضيات واجب.
سكتت تعاين الدفتري شويه وجرت الدفتر من أيدي گالت
عفراء:: بله سولفيلي، سلطان شبيه!
كعدت بحماس محضره ايديه لان اشرح بيهن اكثر من الساني
- عاينــي سلطان يگل الطرواده انا اكدر اخابر ابو منذر، يعني ابو خطيبج
حجيتها وركصتلها حواجبي، خزرتني استعدلت وكملت سالفتي.
-اي يكله اكدر اخابره واكله ما اريد منكم مره ، بس انه ساكت لخاطركم لا تخرب، طــروادة كاله جنك عاشك، سلطان يگله انا عشكت مره وحده ولج طلع جان يحب رغد بت عمي وليد كبل لا تتزوج.
خلت أيدها عفراء على حلكها مصدومة گالت
عــفراء :: ياااا شوف الظيم خايبه اذكر بيوم عرسها هي تبجي متسودنه، وبالليل اجه سلطان الطروادة اذكر الهسه حجايته من گال الطرواده نار بكلبي ما تطفه، شوف ومن سألت طــروادة شبيه سلطان گالي متعارك وي ابوه.
رنـــه :: والله انكسر گـــلبي هسه انه، خطيه سلطان.
عفراء::حتى رغد والله اذكر بعرسها شبعت بجي سوده عليه.
كامت عفراء طلعت من يمي بحيرة مقهورة .
""""""""
ندى::اذا عيني تغمض احس عقلي صاحي ويفكر كمت اختنك من الخوف والتفكير الاسود البراسي، اخلص اليوم بس ابجي، شلون كدرت تسوي بيه هيج شلون تجرحني هيج جرح ما يطيب العمر كله،
مسحت دموعي من سمعت الباب انفتح جريت العبايه غطيت رجليَّه، دك باب الغرفة، وفتحه من بقّيت ساكته ماد بس عينه رافع حاجبه من باوعتله ابتسم گال
-جا تحمحي عادك .
-العفو تفضل.
دخّل للغرفة بأيده صينية غدا وأيّده الثانية علاليك، خله الصينية گدامي والعلاليك على صفحة گال.
-عذريني انا جاي انساج.
دنكت عيني اهمس
-معذور.
رفعت عيني من بقى ساكت لكيت عينه علي درت عيوني بخوف وغطيت روحـــي بالعبايه زين، كام وكف يم الباب گال
-ندى...
رفعت راسي اله ابتسم وحجه ببرود.
وهـــب :: اذا تردين بعد ما أطب للغرفة اخليلج اكلج بالهول واطلع انتِ تاخذينه.
-لا العفو العفو بيتك هذا، اني ما اقصد شي والله.
-لا حقج، غير اول ما شفتج كتلج انا سكير وساقط.
سكتت عيني بعينه، سبحه بأيده بس صوت طكت خرزها بالغرفة مسح وجهه وطلع، تنفست بخوف ادعي عليهم بحرگة خلّوني ألتجئ الشخص غريب وأحتمي بيه .
العصر رجع دخل وهو بالهول صاح
-يبنيه.
كمت لبست العبايه، وفتحت باب الغرفة اباوعله لابس دشداشة بيضة وچفيه ابيض واسود وعليها اعگال، والعطر سابقة، السبحة البأيده تختلف على القبلها، دنكت عيني گال.
-محتاجة شي، أنا الليلة ما ارد للقرية، عدج اكل ماي؟
هزيت راسي أي عندي دار يريد يطلع همست
-اكلك.
التفت علي لازم بيدة الباب حجيت بأرتباك
-ما عرفت شي على اختي؟
-والله ودّيت اسمها الصاحبي اليوم ردلي جواب كال بدوله عربية مو بأوربا بس لحد هسه مايدري يا دولة، ان شاءالله نلكاها واوديج عليها.
-ان شاءالله يا رب ان شاءالله،والله ما انسى وكفتك وياي للموت.
ابتسم فر السبحه ومسح شواربه
وهـــب ::ولا انا انسى انتِ الطنطل الخلصني من الذيابه.
حجاها يضحك وطلع،قفل الباب من بره.
""""
وهـــب :: رايحين نعقد السلطان على بت حتى اسمها ما يعَرفه وجهه بخنجر جدي ما ينكص لا هو ولا طــروادة النجبر يروح ويانه.
وصلنه للوادم يرحبون ويهلون بينه كعدنه بالديوان صرت بصف ســليم وبريا خزرني صــيهد گبل ما الوادم تكعد اجيت بصفه ولحكوني أثنينهم، كعدنه سويت ايدي مثل ايد صــيهد واعاين عليه ظهره مخليه باستقامه وانا حاني ظهري مدري شمالني رفعت روحي عدلت ظهري ودرت السليم وبريا سووا مثلي،شوي وصيهد فر سبحته، انا قلدته وهم فريتها درت السليم وبريا هم فروها،
مگابلنه مــيثم وطروادة يخزرون بينه، درنه وجوهنه منهم نعاين الجدي صدك حجيه بلا فايدة بس اقلها مايشوفنه ويخزرنه.
وسلطان عيونه ذبلانه ومبين روّحه طالعه وما راضي
دغيت صــيهد عاينلي كتله
وهـــب :: اكلك، سلطان جنه واحد عاشك .
عاينلي صفح نظرة سكتتني ،عقدوا السلطان وجدي يحجي وياهم ليمت يريد العرس، رديت دغيت صــيهد
-اكلك انا ما اتزوج بكيف جدي لو تنطبك السما على الگاع لا تگول ما گال، شنهاي جابوه سحل زوجوه كبل .
صيهد ::اكلك ليش ما تسد حلكك انتَ والزبايل اليمك لا اكوم اكطع العگال عليكم بنص الديوان.
وهـــب ::درت وجهي السليم وبريا احاجيهم
-ارتاحيتوا هسه كتلكم اسكتوا.
بريا :: معذور بعدها مأثرة بيك ربطة الچول
ســليم ::حقه يابه اسكت البارحة اعاين للتصوير موتني من الضحك مثل الخروف محدد.
وهـــب :: ليش تذكروني سهله .
رفعت راسي الجدي وحجيت بصوت عالي.
-جدي، ســليم وبريا يگولون الدور النه، مستعجلين.
ضحكوا الوادم البالديوان وابو منذر گاله
- يتدللون عساهم على نسوان.
وهم تسودنوا ضلوا يصيحون
-تسلم تسلم، لا والله وهـــب يحبّ يتشاقى
راح منهم بطل دم، برد گـــلبي وهمه ضلوا يصفنون خاف جدي يكضهم ويزوجهم كوه.
وره ما كمل العقد جدي كالهم اسبوع ونسوي العرس ووره عرس سلطان بيومين يعرس منذر،المعترض الوحيد جان طــروادة بس منذر تدخل اجه يمنه وگاله
منذر :: فـــدوه اروحلك اسكت بس خلها تصير.
وطروادة روحه طالعة.ردينه للقرية عبالك جنه بفاتحة مو بعقد قران .
"""""""""""
جــويريه:: كم مره بمره البنات مــاسه وبدور يطلعن بالليل يرحن البيت خالي خليل يبقن ساعة ويرجعن يضحكن عبالك جانن بمنتزه ويحجلي على فيلم شايفاته لو على البليستيشن
ومنو خسرت، كعدت عدل
-بــدور، اريد اكلج شي.
مــاسه ::يعني سر، اطلع انه؟
جــويريه:: لا لا عادي ابقي.
-شوفي بــدور انتِ تعرفين بسوالف الجن والقرين، اني مره طلعت وعبرت السياج الخارجي رحت يم النخل، جنت بوقتها حيل مقهوره وابجي، وسمعت اصوات مال طيور وراها شفت خيال بين النخل وكل شوي حسيته يتقرب علي.
جاي اسولف وياهن طبيعي وهذن اثنينهة صرخن وطفرن لفراشهن يتغطن ويصيحن "يمه يمه"
وبدور تصيح
بــدور :: اي والله هوه هوه هذا القرين، ولج لا تبجين وحدج يجيج.
طلعت راسها من البطانية كالت
بــدور ::النوب لا تطلعين وحدج صيري مثلنه انه وماسه كله سوه.
مــاسه:: عفيه كافي تحجن بالجن والله راح ابجي يمه گـــلبي.
هستوها تحجي وسمعن طكطكه بره الغرفة وكب صريخهن صاحت امهن.
-اجاجن اجاجن صيهد، ولج مــاسه ولج هلااه.
مــاسه ::نزلت ركض لكيت امي يم الدرج عضت اصبعها متحلفة وصلت يمها جرتني من اذني
-يمه يمه يمه اي اي اي.
-ولج راد يجي يكتلجن صوتجن شعلوه، امشي سويله عشه.
بست ايدها اضحك دخلت للمطبخ صبيتله عشاه ورحت الامي اتوسل
-يمه كومي وديه اله فـــدوه يمه يكضني من اروحن انه.
أشرتلي بأيدها لا وضلت تسبح، قريت الفاتحة الام البنين، ليست عباية امي واصله لركبي، وطلعت الصينية بأيدي دخلت للمشتمل ماله.
-صــيهد .
اجاني صوته من الغرفه
-تعاااي.
اخذت الصينية ومشيت بخوف فتحت الباب جان كاعد على الجرباية يعاين بأديه لمحتهن باطنهن مجرح، خليت الصينية بالگاع ووكفت متردده، نزل كعد بالگاع رفع عينه الي ونزلها بسرعة، گال.
-ما تاكلين؟
-ها لا، متعشين.
ضل ياكل ساكت، كعدت على صفحة تحمحمت رفع راسه عاينلي همست بتردد.
-شبيهن أديك؟
فتح اديه عاينلهن وهز راسه
-مابيهن شي.
سكتت شوية وكتله.
-جنت بالمعمل؟
هز راسه اي، كمل اكله اخذت الصينية وطلعت غسلت المواعين ومتانيه الجاي لمن كمل اخذت وياي معقم ولفاف رحتله ، من شافهن بالصينية وي الچاي گالي.
-المن ما اريد مايحتاج.
سكتت شويه وكتله
-براحتك.
اني جبتهن لان مره وهـــب هم هيج صار بيه وكعدت اعقمهن اله ودخل صــيهد شافني حسيت حزت بخاطره لان ما نهتم بيه مثل وهـــب.
كمل الچاي واجيت اريد اخذ الصينية مدلي أيده عاينت الوجهه ساكته، جر تلفونه يگلب بيه ، لزمت ايده ايدي ترجف احسه على غفله يجيبني براشدي، عقمتها ولفيتها عفتها لزم بيها التليفون، وانطاني الثانية، هم عقمتها ولفيتها.
عاينلها وراح للچرباية، لميت الاغراض ومشيت اريد اطلع همس
-مــاسه
التفتت اعاينله بدون ما يرفع راسه من التليفون گال بصوت ناصي كوه سمعته
صــيهد ::شكراً.
ضحكت بفرح رفع راسه الي، طلعت من الغرفة والضحكة شاكه حلكي، اول مره يصير هيج موقف بينا طول عمرنه نخاف منه ونهابه بحيث عيني بعينه ما اخليها، ولا يوم سمعنه منه كلمة حلوه.
جــويريه :: كعدتني الصبح مــاسه على اساس اروح وياهن للمدرسة، بدلت ونزلت وياهن، وبس شافني جدي، صاح
-فنج الطلعتي الا اذبحنج.
وام صــيهد تحجي وياه، وجده تحجي وهو يصيّح أذبحها بس تطلع، اجت يمي ام صــيهد كالت
-ميخالف يمه ردي اليوم، وانا الليله احاجي عمج والولد يقنعون جدج.
اعاين الماسه وبدور بقهر وهن هم مقهورات علي تمنيت بس ابجي شكلي البارد يبينلهم اني ما مهتمه محد حاس بالنار البداخلي، صعدت بدلت، وبقيت بالغرفة احلف اليوم اطلع برا البيت وابجي براحتي لو مو القرين يطلعلي، بس اريد مكان فارغ ابجي بيه براحتي .
بالعشرة نزلت جوه يم ام صــيهد بالمطبخ،ولان ادري بس اني وياها بالبيت حجيت براحتي
-خاله، فـــدوه اقنعيهم اني ما اريد ابقى هنا اريد اروح يم بيت خالي شامل.
-يا يمه وين رايحه جدج ما يرضى اسكتي لا واحد يسمع.
-خاله اصلاً كهلان هوه الخابر ابوي حتى يرجعني للمدرسة واكيد اذا بقيت يمهم راح ارتاح مو مثل هنا.
حجيت والتفتت على صوته وراي والعوجية بأيده يريد يضرب وام صــيهد لازمتها تتوسل بيه ذب العوجيه جر الخنجر ويصيح
شعلان::ولج تكسرين حجايتي ولج تصيحين كهلان، شعدج وياه ولج .
يحجي يحجي واني احس بعد ما اسمعه كمت اشوف الموت كدام عيني ممكن بأي ثانية هالخنجر يصير على ركبتي، فتحت الباب وطلعت اركض دفعت باب الحوش مال بيت خالي شامل النفس مكطوع وارجف كلي صارت بوجهي عفراء.
يتبع.
ايلول 💚
رواية أرض الخناجر الفصل السابع 7 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
══━━━━✥◈✥━━━━══
هذن مرن عليه وفايتات هواي
الويهن صبر ويخساً يلوني
جبت عمري سفينة مكابل وية الموج
ما شفت المراسي بيوم لفني
══━━━━✥◈✥━━━━══
جويريه:: ركضت العفراء مرعوبه وهي بس لمحتني شمرت المكناسه من ايدها وتلكتني بايدين مفتوحة وصوت يردد
عــفراء :: اسم الله اسم الله شكو؟
جلبت بأيدها ارجف وغاصة بالكلمة ولان من أكون خايفه او مرتبكه كلامي مايترتب ماعرف احجي بس أأشر على باب الحوش كوه همست
-احموني جدي راح يذبحني
وبمجرد نطقت اندفع باب الحوش ودخل جدي ووراه عمتي ام صــيهد وجدتي، عفراء ضمتني وره ظهرها واني مجلبه بيها باثنين أيديي، رفعت أيدها تحميني وتحجي
عفراء:: اوكف بروح اعزازك اوكف لا تطكها دخّلت يمنه.
وهوه بس وصل طك عفراء راشدي ودفعها للگاع، شهكت مصدومة عيني عليها عفراء لزمت خدها ووكفت بسرعة تريد ترجع تحميني وهو خله ايده بشعري وسحلني عليه يغلط، وجده وام صــيهد مجلبات بيه.
يجر بيه يريد يطلعني من بيت خالي شامل وعفراء تجرّ بأيدي الها وتحجي بحركه
عفراء:: جدي عوفها حرام عليك حرام عليك تطكها يتيمه.
وجدتي رغم تحاول تفلتني من ايده بس تصيح على عفراء
-مالج شغل مالج شغل انتِ.
رجع جدي التفت عليها طكاها على حلكها يصيح
-عفيره اردلج اجنزج.
يحجي ويسحل بيه لبيته وجده تدفع بعفراء ما تخليها تجي وراي تخلصني، وام صــيهد مجلبه بأيد جدي بس تريد تفك شعري منه، أخذني للبيت دفعني للمطبخ ولحكتنه جده جلبت بأيده، ما جنت ابجي بس اباوعله شلون يريد يوصلني حتى يكتلني من بينهن يمد عوجيته ويضربني كل الجنت أسويه امسح مكان الضربه بأيدي وعيني عليه، ومن ما ابجي عباله ما جنت انوجع يضربني بقوة اكبر، دفعنه من عندي للباب صاح
شعلان:: بت نضال ولج تعانديني ولج توكفين بوجهي أكسر ظهرج.
واني ساكته آخذته جدتي طلعته من المطبخ آحس بجسمي كله مشتعله بيه نار خاصه رجليَّه، لميتهن الصدري واجت ام صــيهد بخوف تمسح بوجهي باوعت بعينها وجلبت بأيدها اريد اوكف ارجف كلي، سندت روحـــي على الحايط وهي مچلبه بيه وتحجي كمت ما اسمع كلامها بس اريد اصعد للغرفة، چلبت بالدرج،امشي الخطوة ورجلي تهتز بس وصلت للغرفة لفيت روحـــي بفراشي فاتحة عيني نار تسعر بگلبي وجسمي مكانات الضرب ينفحن .
رنـــه :: رجعنه من المدرسة، وبالدرب احجي وي عبود لان ضايج حاولت شكد اسولف وياه ما اله خلك ماحاجاني وصلنه لباب الحوش وكال رايح للــبستان، دخلت للبيت عفراء بالمطبخ، الكهرباء طافية وهيه فاتحة الشبابيك، بدلت وطلعت يمها تبدل لحسين وزهره جاي احاجيها وسكتت من شفت خدها
-ياهو طاكج؟
سكتت ماترد كامت للمطبخ رحت وراها
-عفره ياهو وياج خدج أحمر وعيونج مورمه باجيه؟
التفتنا اني وياها على صوت طــروادة
طــروادة ::ياهو وياج عفره ؟
يحجي وخله التفكه وره التلفزون، طب للمطبخ مد ايده العفراء وهيه دايره وجها للطباخ فراها عليه عاين الخدها ولعيونها عاكد حاجبه
-ياهو محاجيج عفره؟
مسحت عيونها وگالتله بخنگة وصوت مبحوح
عــفراء :: اليوم بت عمتي نضال اجتني شارده لبدت وره ظهري تتوسل أحميها، ماكدرت جدي سحلها من وراي واخذها ما حميت البت.
حجتها ودنكت تبجي وتمسح بدموعها عاينلها بغضب كاض ايدها
-وشعلان طكاج؟
سكتت عفراء مرتبكه هد ايدها ورجع للهول يركض جرّ التفكه من وره التلفزون ركضنه وراه خايفين اثنينا مجلبين بيه وهو بس يريد يهد على بيت جدي، دفعنه وركض، عليهم وكفت اعاين بخوف واشوف عفراء لبست عبايتها وطلعت وراه ركضت وياها
دفر باب الحوش مال بيت جدي ويصيح
-شعلااااان.
وصل الباب الهول وركضت عفراء كضت ايده تتوسل تريد تاخذ التفكه منه وانه لازمته من أيده الثانية نريد نرده لبيتنه، طلعوا الولد يركضون صــيهد ووهب وخرنه منه من هم لزموه يردون بس يحاجونه وهو متخبل ويصيح
-اطلع شعلااااان.
صــيهد :: خرب اهلك هدّ التفكه خرب اهل اهلك هدهاااا.
يحجي ويجر بالتفكه من أيده وطرواده ما يرضى يعوفها وطلع عمي وليد يغلط ويسب،وراه لمحت جدي واكف بشموخ وصوت الصياح صار صدّى بأذني بس آفر بعيني الولد كلّهم ملتمين على طــروادة وهو عشرة وما يكضونه روحه محروكة يريد يفلت منهم ، صــيهد اخذ السلاح من أيده ولازمه بكل حيله ويحجي وياه بصياح
صــيهد :؛ حاجيني ولك حاجيني شصاير.
وطرواده نار وگابه عصب ايده وعصب كصته كله بين يريد يكض جدي صاح
طــروادة :: تطك عفره ولك والله اذبحنك شعلان.
شعلان :: يله يله اخذ اخواتك وولي مناه يله.
صوّت صياحهم يرن بالأذن صــيهد بس يريد يفهم، دفع طــروادة يريد ياخذه للبيت وهو تخبل
طــروادة :: ما ارروح دخلت ببيتي دخيله ما اطلع اذا ما اخذها، وطكتك العفره ما اعديها الك شعلان والله ما اعديها.
دفعه صــيهد حيل يصيح بوجهه
-ياهي الدخلت عدك يااااهي
لزمه من ياخته يصيح
-بت عمتي نضال.
شعلان:: بيا حك تاخذها مناه غير اخلي چيله براسك وراسها، ولي مناه واستر على روحك.
وطروادة متخبل جروه وهـــب وصيهد لباب الحوش يردون بس يطلعونه من يم بيت جدي وهو يغلط ويصيح يحلف مايعدي طكة عفره على خير. ولا يعوف بت عمتي نضال يمه .
صاح عليه جدي
شعلان :: اكسر رگبته اليعاندني حتى لو بأسمك.
وطرواده جر أيده منهم متخبل والولد يرجعون يكضونه مشت عــفراء بسرعة مدت ايدها على ظهره وحجت سريع
عفراء:: كهلان كهلان، كافي تعال
فتح عينه جدي خازرها وكلها سكتت طلعوا طرواده من حوش بيت جدي، ركضنه كدامهم دخلنه للبيت عفراء ترجف كلها، والولد جابوا طــروادة محددينه واحد مناه واحد مناه ويدفعون بيه للبيت
دخلوه للحوش واحنه من الشباك نعاين الهم لمن انسد وراهم باب الحوش صــيهد دفع طــروادة حيل وصيح عليه
-اخر حيوان ليش تخليني اسب اهلك.
وطرواده بلا ما يجاوبه راح للحوض فتح الماي على راسه وهمه يحجون عليه گاله وهـــب
وهـــب :: بطل هاي عصبيتك لا تسويلنه طلابه الف مره گلنه ديربالك ديربالك وانتَ ولا يمك حتى اليكول السلام عليكم تجر عليه تفكتك شني متعجب بس انتَ عدك تفكه.
رجع طــروادة يمهم كعد بباب الهول وهمه واكفين عاين الصيهد
گاله
طــروادة :: بت عمتي نضال ما اخليها هناك بت اجت البيتي دخيله، لو اكتل شعلان اليوم هم اخذ حگها.
سكت صــيهد مستغرب، وطروادة يحجي بحركه ميت قهر شويه وگاله
صــيهد :: شبيها؟
طــروادة:: شبيها جدك يدك عليها جا شبيها بت شابعه كتل ياهو يگوم كاتلها محد يخاف الله بيها يتيمه يتيمه اللهُ أكبر عليهم، ولك المدرسة آبوها نقلها وجدك مايخليها تروح.
صــيهد :: ياهو كالك جاي تنكتل محد محاجيها، وجدي گال مبطله من المدرسة.
ضحك طــروادة بأستهزاء ورفع ايده بتحدي
طــروادة :: والله اخذها من بيتكم دام اجت البيتي دخيله
صــيهد:: يله يله اكل خره لا تضل تمسلت لا اكطع النعال على راسك.
كام طــروادة منفعل يريد يرجع البيت جدي لزمه صــيهد لاوي ايده وره ظهره
صــيهد :: انا ارجع حگها بس لا تسويلنه طلابه انتَ ولا تحط روحك بسالفة ويَّ شعلان.
دفعه لباب الهول صاح بحرگه
طــروادة :: ولك داس بيتي طك اختي واخذ البت الدخلت تحتمي من عده يمنه شلون اسكت.
صــيهد ::تسكت، تسكت، انا أنطيتك حجاية، خلها ورأي احلها بس لا تجي تحط روحك وي قندره شعلان ويجي يسويله سالفة يحرك كلبك بيها.
سكت طــروادة مقهور وهـــب گال
وهـــب :: بس صدك جا غير دخيله بعد واحد لازم يحمي دخيله.
وهو بس حجه صــيهد نزع الشحاطه من رجله شمرها عليه شرد وهـــب الباب الحوش صاح عليه
صــيهد :: تعااال جيبها.
رجع وهـــب شحاطة صــيهد بأيده شمرها يم رجله رجع طــروادة گاله
طــروادة :: وشوف وروح اهلي لو تنطبك السما على الگاع ما زوجت اختي بمحرم وسكته، ما امشي بحجي جدك لو يموت.
صــيهد :: همزين حجيتها، انا هم ما راضي شني منطين فصلية، وحتى عرس سلطان ما ارضى يسوونه هسه هم نظلم بزواج وهم ينظلم بعرس سكتاوي عود خل يضلون الفرحة الزهره ويسوون عرسهم محد كاضهم.
طــروادة :: اي خاف عباله مشيت بحجيه ترى سكتت من زحمة الوادم.
سكتوا همه وطروادة يطحن گاله
صــيهد :: رايح انا بس يشهد الحسين اذا رديت سويتلك سالفة الا اكض تفكتك وافلشها على راسك
طــروادة :: يله ولو مناه بس شوف اذا انتَ ما حليت هالسالفه جدك اكتله اكتله، وحك اختي سهله انا اخذه.
باوعله صــيهد بطرف عينه وطلع هو ووهب، دخل طــروادة للبيت عينه على عفراء، فاتت للمطبخ ورحت وراها، شفته كعد بالهول وحسين وزهره يعصرون برجليه صاح
-عبود وين؟
عفراء:: بالبستان خابره خل يجي راح اصب غده.
سمعته خابر عبود، وعيني على عفراء تصب بالغدا همست
-عفره!
دارت عينها بس عاينتلي ورجعت تكمل صب
-ليش كلتي الطرواده كهلان انه ادري اسمه بالجنسيه كهلان مو طــروادة بس عود ليش كلتيله بيه وانتِ دوم تكولين طــروادة ؟
دارت خلت طاسة الزلاطه بأيدي حتى اصبها بصحونه وگالت
عــفراء:: حرك گـــلبي جدي وعاندته.
-هوه ليش ما يرضى نگول كهلان؟ فـــدوه سولفي لا تكليلي نجبي انه صرت جبيره
باوعتلي مضيكه عينها وهزت راسها موافقة
عــفراء:: اول ما صرنه انه وطرواده جدي راد يسمي طــروادة على اسمه "شعلان" امي عاندت سمته على اسم ابوها كهلان وسمتني على اسم امها.
جديّ تسودن ومسوي عركه شكدها شكبرها وطاردهم من البيت ورايحين لاخوالي ضالين يمهم مده، ورداهم،
من كبر كهلان شوية بعده ما مسجّل بالمدرسة كام جدي يوكفهم على خط كهلان وولد اعمامي ويكلهم اركضوا اشوف ياهو يفوز، ودوم كهلان يفوز عليهم جدي گاله
انتَ "حصان طــروادة"
انتَ قوي انتَ سبع واقوه واحد بيهم ولا تخلي واحد يصيحلك كهلان گلهم اسمي طــروادة، وهو حتى ماجان فاهم شنو يعني حصان طرواده حسباله يعني قوي ولان صغير نغر بحجي جدي وگام يگلب الدنيا اذا واحد گاله كهلان، يوميه يعارك ويوميه كاتل واحد لان يكلوله كهلان، ويجي للبيت امي اذا صاحت عليه كهلان ما يحاجيها، تكتله تكطعه تكطع ولا يحاجيها الا تكله طــروادة.
رنـــه ::جدي طلع من زمان مسودن.
هي تحجي وياي وصبت الاكل كله واني بس اسمعلها والزلاطه ضلت بطاستها ماصبيتها اخذتها من ايدي صبتها هيه ودخل عبود للبيت حيل حيل ضايج ، اخذنه الغدا وكعدنه ناكل ساكتين وره الغده انه اغسل مواعين وعفراء راحت تصبلهم چاي سمعت طــروادة يحجي وي عبود عفت المواعين ورحت يمهم افهم السالفة، عبود مدنك كوب الچاي بأيده گاله
طــروادة::مو احاجيك،سولفلي شنو المضوجك.
عبود:: والله ماكو شي، هيج مآلي خلك.
-جا ليش عازل روحك؟
عبود:: جا وين اروح؟ انا صاحبي بس سجاد ابن عمي شاكر وجدي طرده من القرية، طــروادة ترى انا امشي وي جدي لان اول شي ما شفت منه شي مو زين وثاني شي حتى يرد سجاد للقرية طاك گـــلبي عليه.
طــروادة ::بس جدك جاي يستغلك يريد يخوفني عليك.
عبود:: هههه شني السالفة اليسمعك يگول راح يكتلني.
سكت طــروادة يدخن عينه على عبود،رجعت للمطبخ اكمل المواعين واتذكر شكد جانوا عبود وسجاد صحبان ما يتفارگون بس وكت النوم ومن الصبح نلگه سجاد واكف بباب الحوش يجي يتريك وي عبود،بس مره من المرات گبل لا يبطل عبود تعاركوا وياه طلاب وشكوا حاجبه، جدي راد فصل بس سجاد جان يكلهم الا اكتلهم شلون يمدون ايدهم على عبود ،جدي گاله فنك الوصلتهم وهوه ما اهتم الجدي راح وشبع الولد كتل كسر ايده وخشمه
بيومها جدي وعمي شاكر،كطعوه من الكتل اخذوا تليفونه وودوه للمعامل البعيدة يشتغل ويضل هناك ما يلفي للقرية، عبود تمرض وراه وطول يله تعود على غياب سجاد.
مــاسه :: غطيت جويرية ميته من القهر عليها، رجليها صارن زرك من عوجيت جدي، التفتت على صوت بــدور اجت تركض وخايفه
بــدور :: يمه يمه صــيهد يريدنه يمه .
وكفت بخوف
-شيريد؟
-ما ادري دخل للدوانيه هوه ووهب وصاح على امي وين البنات خل يجن حتى جوري.
مديت ايدي اكعد جويريه فزت عيونها مورمه ووجها احمر
-جويريه اخوي يريدنه
مسحت وجها بأيدي وكعدتها عبالك بغير عالم لبستها حجاب ونزلنه لازمتها من ايدها وبدور كد ما صاحت يمه يمه قلقتني خلتني امشي الخطوه ورجلي ترجف، دخلنه للدوانية، وهـــب بصف امي ويباوع بتلفونه، وصيهد على صفحة يدخن
من دخلنه اثنينهم ما رفعوا رأسهم وكفنه يم الحايط ثلاثتنا گالت امي وهي عينها الجوري
ام صــيهد :: اخيوتج يمه يردون يحاجونج.
وهي عيونها بالگاع وبالكوه لازمتها، عينيّ الصيهد الجكاره بين اصابعه جر منها نفس زفره، وهو مدنك گال
-باجر، تداومين وي البنات، رجلج على رجلهن، لبسج مثلهن، سالفة اروح يم بيت خالي شامل ما تعيدينها، ولالكفها ما ماشيه عدل ومسويتلها غلطه مناه مناه يشهد الله والحسين اخليها من ذكر اسمي تخاف.
يحجي واني ابلعم رفع عينه الي، بس عليَّ عاين وگال
-فهمتي مــاسه؟
هزيت راسي اي ووهب من وراه يعضلي بشفته عود ميخالف ميخالف، اريد بس اطلع گالت امي
-روحن يمه .
اخذت جــويريه بأيدي وطلعنه صعدنه بسرعة،كعدت بفراشها هادئة واني وبدور نحجي على صــيهد درت عيني الجويريه رجعت تمددت بفراشها
-جوري اجيبلج غده؟
جــويريه::هزيت راسي لا وسحبت البطانية على راسي تغطيت اسمعلهن وهن يحجن على اخوهن ويفارنن بينه وبين وهـــب، غمضت عيني احاول انام بلكن انسى الوجع،،اريد ابجي اريد اطلع الغصة البگلبي، غفيت وكعدتني مــاسه على العشا ما قبلت اكوم اريد بس ابقى وحدي، رجعت تغطيت بفراشي، وسمعتهن بالليل من صعدن يمي رادن يرحن البيت خالو خليل بس مــاسه خافت من كلام صــيهد.
طفن التلفزون ونامن، كمت من فراشي احس حتى بلعومي بيه نار گد ما ضامه دموعي وكآبته بداخلي.
باوعت للبنات اتأكد صدك نايمات لبست قمصله وطلعت بجامه لبستها جوه الدشداشة، وخفت اطلع مثل ما هن يطلعن، نزلت على الدرج بدون ما اخذ حذر احد يشوفني عبالك جنت منتظرة احد يلزمني بلكن يكتلوني موت واخلص.
فتحت باب المطبخ وطلعت، وكفت بباب الحوش من سمعت صوت ، روحـــي تعبانه وبس اريد اوصل المكاني،طلعت من الحوش ومشيت بهمه ما مهتمه الشي وصلت لبره السياج الاخير الي جامع كلّ بيوتهم.
اتلفتت ادور خليتلي سعفات وحده فوك الثانية وكعدت عليهم ظهري على السياج، حاضنه رجليَّه بأديه ورافعه راسي للسما
نسمات الهوا القليلة تحرك سعف النخل بهدوء، والنجوم مبينه بكثرة، جريت نفس بشهگه ونزلن دموعي بدون صوت وحده وره الثانية، اتنفس بقوة بس اريد گـــلبي يبرد.
خليت ايدي على حلكي وبجيت بصوت
-ااااخ يا يمه يا روحـــي.
خانگه صوتي وحاضنه روحـــي بأيدي أبجي بحرگة وحتى الدمع ما برد النار البگلبي، شهكت بفزه من حسيت شي طار من كدامي فاتحة عيني كلها ومن ضوه البلوجكتر شفتها البومه اجت طايره بدون أي صوت، فاتت من كدام عيني وراحت للنخلة مقابيلي وكفت على وحدة من السعفات، مسحت دموعي اباوعلها بخوف وكلبي يدكّ بقوة.
شهگت فاتحة عيني على وسعها مرعوبة من المنظر الگدامي الخيال الشفته المره الفاتت مابيني وبينه غير متر، اريد اصرخ اريد انطق او اكوم من مكاني ما أكدر بس اشهك واسحب نفس بقوة مصتكه بمكاني وهو يتقدم خطّوه خطوه، من الرعب العشته
كمت احس حتى الهواء ماعرف أتنفسه، دنك وغمضت عيني بقوة اهتز مثل سعف النخل واحس بأيده نمدت الوجهي ومخالبه مسحن خدي، دفعت ايده متخبله وكمت اركض ركضت بكل حيلي للبيت ، دخلت للمطبخ وصعدت فوك ركض بدون ما اقفل اي باب وراي فتت للغرفة شلت البطانية من مــاسه وضميت روحـــي بحضنها ارجف كلي
مــاسه :: فزيت بخوف وهي مجلبه بيه باثنين إديها
-اسم الله شبيج جوري شكو.
اريد بس ارفع وجها واشوف شبيها ماكو حاضنتني بكل قوتها وترجف تشهك بلا دموع وصوت نفسها يخرش، فزت بــدور
بــدور :: شكو؟
-مدري شبيها البنيه خايفه، جوري شبيج حاجيني.
-يمه شو ترجف، اكعد امي؟
مــاسه :: هزيت راسي لا كامت بــدور شغلت الضوه بس نريد نفهم شبيها وهي مرعوبة حييل وأيديها لازمات بيه كلّ قوتها كوه كوه فلتت ايدها من عندي وشربناها ماي وجها صاير ليمونه وشفايفها بيض من آلخوف، رجعت تمددت مسحت على راسها
-جوري شبيج؟
رفعت عينها الذبلانه تباوعلنه دارت بؤبؤ عينها على بــدور وهمست بصوت مخنوك
جــويريه::طلعت برا.
بــدور:: ولزمج جدي ها؟
هزت راسها لا ولزمت ايدي بقوة خايفة
جــويريه::طلعلي القرين مثل الوحش وعنده مخالب وجلده اسود.
بس حجت هيج بــدور لبدت بالبطانية وبجت من الخوف واني بقيت ابلعم همست
-هاي من الخوف تخيلتي ماكو هيج.
هزت راسها لا وهمست
-متأكدة.
حجتها وخلت الخوف يلعب بيه لعب،كل شويه أتلفت مرعوبه بــدور بجت الحد ما ملت حيل بيها طلعت سالفة القرين ويوميه مسولفتها النه ومسويه روحها ما تخاف، النوب خلتنه الليل كله نتفزز وكاتلنه الخوف.
كعدتنه الصبح امي تحجي علينه لان اول مره ما نكعد من وكت
وهيه تعبانه مابيها حيل تصعد، كعدت جــويريه غسلنه وبدلنه
ونزلنه وصلنه ابوي للمدرسة عيني على جــويريه عبالك بعالم ثاني .
ندى:: صارله يومين ماجاي للبيت، اكوم افتر مخنوگه، البيت مسدود من كل مكان واذا طفت الكهرباء مايفوتله اي ضوه، كل الشبابيك دكاهم ببطانية وغطاهن.
باوعت للماي البقى عندي كد كلاص والاكل من البارحة خلص
توقعت نساني وكل شويه ادعي يتذكرني
كعدت بالغرفة دموعي على خدي اليا حالّ وصلت ووين ضعت
صغيرة على كل هذا الهم، صار الليل وهو ماكو شربت الماي وكمت احس الگاع تفتر بيه كمت من الغرفة اريد اروح الحنفية المطبخ اغسل وجهي بلكي اركز، كمت ما احس بخطواتي وين تاخذني اريد اچلب بالحايط ما اكدر ايدي تروح بالهوه والدنيا كلها افترت بيه احس بس براسي من نركع بالگاع حيل.
ما ادري شكد بقيت مغمي عليَّ بمكاني وراها كمت احس بضربات على خدي وصوت مو واضح يهمس يمي، احس ببرود ماي نكعت وجهي وصدري، اريد افتح عيني ماكدر
والصوت ما أميزه بالبداية، شوي شوي أحسه يوضح
-ندى، ندى، يبنيه.
فتحت عينيّ بثگل اباوع لوجهه، ما مستوعبه ايده تمسح الماي من وجهي وصوته مرعوب
-اصحي اصحي اخذتي روحـــي.
واني بس فاتحة عيني ما مستوعبه شي حرك راسي من حضنه ورجع بايده غسل وجهي ويمسح الماي بديت استوعب، وهو مخلي راسي بحضنه ومنكعني بالماي، ابتعدت منه بفزه اضم بشعري جوه الحجاب، وهو هم ابتعد سند ظهره على الحايط المقابيلي عينه علي، ضميت شعري بالشال ورفعت عيني اله نظرته حيل غريبة.
-شبيج؟ مريضة انتِ؟
هزيت راسي لا، لامه رجلي الصدري، مد ايده الجيبه طلع باكيت الجكاير شعل جكاره خلاها بين شفايفه ودفعلي الصينية گدامي
-اكلي اكلي.
مديت إيدي للصينية، أريد اقسم الخبزه ما اكدر ايدي ترجف كلها، باوعتله عينه وي الخبزه، الجكاره بين اصابعه، تقرب خله الجكاره بحلكه ومد ايده للصينية قسم الخبزة وخلاهن كدامي.
اكلت بالكوه گال
وهـــب ::لگيت أختج.
رفعت عيني بفزه ما مصدكه
-احلف.
-شني مجذب عليج گبل؟
هزيت راسي اي مسح وجهه وگال
-لكيتها والله بس لا تفرحين هواي!
بلعت ريك بخوف ليش حتى ما افرح يمكن بيها شي.
-بيها شي، ميته؟
عكد حاجبه ودار وجهه جر نفس طويل من الچكاره زفره ورجع باوعلي گال
-انتِ جذابه ما مهتمه الاختج، ليش تردين توصلينها.
باوعتله ساكته گـــلبي يدك حيل وهو عينه بعيني همست
-هههه أختي اختي شلون ما مهتمه.
-اممم.
هز راسه موافق طفه الجكاره باصبعين وفتح باكيت الجكاير الخلصان خله الگطف بيه ورجع يباوعلي گال
وهـــب:: ما يصير تسافرين.
دك گـــلبي بخوف منتظرته يكمل كلامه هزيت راسي اسأل
-ليش؟
-عمرج ما يسمح لازم وره ال١٨ يله يصير لو عندج ولي أمر.
-اذا اكللهم امي وابوي ميتين يقبلون؟
هز راسه لا، نزلن دموعي روحـــي محروكه حرك
-بس لازم لازم اروح الاختي.
-لازم أتانين ٨ أشهر يله تكدرين تروحين للبنان عليها.
ندى:: لميت رجليّه الصدري وبجيت بصوت شيصبرني شيصبرني ٨ أشهر شلون ياربي شلون دخيل اسمك يارب گـــلبي خلص.
-والله اوديج وعيون امي اوديج ليش البجي ليش.
ضميت وجهي بين اديه ابجي واصيح
-ما أكدر ما اكدر اصبر بعد، گـــلبي خلص صار سنتين راح اموت والله راح اموت.
رفعت راسي من حسيته كاعد كدامي مكرفص، شفايفي ترجف ودموعي على خدي
-تكدرين تكدرين، جا صبرتي سنتين ما تصبرين ٨ أشهر.
ميلت راسي على صفحة ابجي
-وين آروح وين ابقى.
ابتسم ومد ايده بجيبه انطاني جفية صغيرة بيضة و
-امسحي دموعج، جا شني انا كايلج راح اعوفنج؟
خله ايده على شاربه لزمهن من الطرف
-وعد من هالشارب ما اعوفنج الا وانتِ مسافرة الاختج، شتردين بعد.
مسحت دموعي مختنكه
-شلون أجازيك اني والله ما اعرف.
-الجنية جازيتيني من گبل لا اساعدج، كومي يله كومي لفراشج.
وكفت مستنده على الحايط اريد امشي للغرفه لمّحت علاكه على صفحة من طرفها مبين بداخلها بطّل كزاز، من شافني اباوعلها شالها خلاها بغير جهه ويمشي وي مشيتي خطوة بخطوه الحد ما وصّلت للغرفه وهو بالباب وكف،كعدت على الفراش وغطيت رجليّه بالبطانية رفعت عيني اباوعله، تحسر
وهـــب :: اريد اصدك قصتج بس والله احس اكو غلط .
هستوه حجاها وطفت الكهرباء ضلت بس جمرة جكارته مبينه بالغرفه لمحت الجمره تحركت من يم الباب لداخل الغرفة كعد يم الحايط المقابيلي ساكت ضميت روحـــي زين بالبطانية بردانه وعيني مركزه وي الجكاره من تخفت ويرجع يسحب منها نفس بقوة تقوى جمرتها
رجعت للحايط اكثر من شفت الجمره تقربت علي وصل يمي همس
-مخده اريد.
مديت ايدي اتلمس ظلمة حيل وكلشي ما اشوف شلت وحده من المخاد رفعتها اله اخذها ورجع المكانة مقابيلي، خلصت الجكارة، وبس طفاها رجع شعل ثانية بين وجهه اول ماشعلها من ضوه الجداحة، عافها مشتعله ورفع راسه باوعلي نفخ على جداحته طفاها، ورجعت الغرفة ظلمة باستثناء جمرة الجكارة گال.
-احد متحرش بيج ندى؟ متعرضه الاغتصاب؟ لو واحد جابرج تسوين شي ما رايدته انتِ.
فتحت عيني بصدمة وحجيت بسرعة
-أحترم نفسك حيوان، اشرف منك اني منو انتَ وتحجي وياي هيج.
-اششششش، اشش صوتج لج شو تغلطين؟
-ديربالك تعيد هالحجي.
سكت واني گـــلبي يدكّ بقوة وعيوني احسهن نار اريده بس يطلع من يمي گال
-ندى.
بقيت ساكته طفت جكارته وبعد صرت ما اشوفه، منتظرة اسمع صوت باب الغرفة حتى اتأكد طلع، شهكت ورجعت ليورا من سمعت صوته قريب مني
وهـــب ::ندى.
فتحت عيني بقوة، شعل الجداحة بيني وبينه، عيني بعينه نظرته تخوف همس حرف حرف
وهـــب :: منو رضا؟
بهتت روحـــي فاتحة عيني بصدمة وصوت دكات گـــلبي صار بأذني رفع حاجبه يعيد السؤال
-منو رضا؟
رفعت ايدي أمسح وجهي ونزلت عيني صوتي يرجف
-ما، ما اعرف، عن شنو جاي تحجي.
-تعرفين تعرفين زين شنو جاي احجي ، مايهمني منو اليهمني ماتجذبين عليَّ بشي، تحبين انتِ؟
هزيت راسي لا عيوني بالگاع طفه الجداحة وسمعت خطواته ابتعدن عني
-اذا ما تعرفين منو رضا ليش تهلوسين بأسمه؟
-ما اعرف ما اعرف، عبالي انتَ اسمك رضا.
سكت فترة وگال
-وهـــب، وهـــب أسمي،مو رضا.
حجاها وطلع سد باب الغرفة وراه اسمع صوته بالهول، كوه نمت وكعدت الصبح لكيته نايم بالهول، غسلت ورجعت للغرفة نمت وره ساعتين كعدت مالكيته، كمت انام ومن اكعد الكاه مخليلي اكل بالهول وطالع.
رنـــه ::فرحت من شفت جويريه تداوم بس هي ضعفت حيل ووجها دوم اصفر، كل ما اروح للمدرسة عفراء توديلها بأيدي لفة،
واحنه مرتاحين لان جدي راح لكربلاء هو وعمي شاكر علمود يكملون بنيان البيت يردونه للموكب، محد يسوي مشاكل مفتكين منه. وعرس عفراء أجلوه لفرحة الزهره، وانه كل يوم اجيها
- ليش ماتتخابرون انتِ ومنذر، ليش منذر ما يجي يشوفج؟
وهي بس تعض بأصبها متحلفه بيه لان كلساع افشلها كدام طــروادة الحد يوم من الايام اجتني للغرفة مرتبكه
-رنـــه، طــروادة يكول منذر راح يجي، شسوي؟
-الله اخيراً، اركصيله.
رفعت ايدها وغمتني على كصتي حيل ركعت راسي بالحايط خلتني اصحى حجيت بهدوء
-بدلي واكعدي، حتى الثام البسي وعباية وجواريب وجفوف.
-اي هم كلت هيّج زحمه آعرفه يعرفني واكعد وياه.
-اكعد وياكم انه، واجيب عبود وزهره وهاسكي.
-هاسكي يطب للدوانيه لا والله.
-جا منذر احسن من هاسكي؟
-اكلج شتكولين احاجي طــروادة اكله زحمه ما اريد اكعد وياه ولا اشوفنه.
-لا أحس لازم تكعدين وياه وهم حتى تفهمين منه هوه ليش خطبج خاف بس حتى يرجعلج الكتله.
سكتت مرتبكه وتاكل بأظافرها، كامت تنظف بالبيت وانه أفتر وراها هم مرتبكه شويه وشفنه منذر وطرواده دخلوا للدوانيه
راحت عفراء لبست جواريب وجفوف ولبست الحجاب والعبايه واجت تسألني
-رنـــه البسي النگاب لو اخليه يشوف وجهي حتى خاف بعدين يگول غشيتوني ماشفت وجهج.
رنـــه :: غير اكطع نعالج عليه يصحله وجه مثل وجهج جنّه گمرة، بس يله عوفي نگابج بعد هوه يعتبر رجلج.
سكتت مرتبكه راحت تسوي الچاي والعباية عليها . فتّت للهول اريد بلكن اسمع سوالفه وي طــروادة، رفعت راسي من طــروادة فتح الباب الداخلي وخله مخده حتى يضل مفتوح واجه يسأل
-عفره وين.
أشرتله على المطبخ راحلها واني عيني لباب الدوانيه المفتوح اريد الگالي طريقة اشوف بيها، اجت عفراء هيه وطرواده ، بأيدها صينية الچاي تهتزّ دخلوا للدوانيه ، واني واكفه اتحركن اريد اشوف بس اخاف من طــروادة، وكفت عدل من طلع طــروادة من الدوانيه، وعاف الباب مفتوح بس شفته طلع للحوش ركضت يم الباب مديت راسيّ عفراء تشوفني ومنذر بالجهه الثانيه اشوفه ومايشوفني.
أثنينهم ساكتين طك گـــلبي غير يحجون وهي مدنكه وجها صار طماطيه تحمحم منذر همس بصوت يرجف
-السلام عليكم.
وهي ردّت بارتباك
-صباح النور
سديت حلكي أضمّ ضحكتي اثنينهم مدنكين، رفع راسه أخيراً وهي متحنطه ولافه روحها بالعبايه لف، زفر نفس براحة وهو يباوع لوجها عاينت الايده ترجف، ابتسم گالها
- ما مصدك صرتيلي كل ضني تزوجتي، انصدمت من شفتج بالبستان وعرفتج عــفراء صاحبتي من جنه جهال.
وهي حرف ما تنطق عفراء البيضه صارت عباره عن قطعة حمره
گالها
-عاشگج انا من عمــري ١٥ سنة جنت متاني ليمت اكبر وأخطبها، بس گالولي تزوجت، حلفت بعد ما اخذ مره، جنت اعاين بعيون طــروادة وشكد اصفن بيهن لان يذكرني بيج عفراء.
هو يحجي وعفراء وكفت وركضت شارده طلعت من الدوانيه لزمتها ترجف كلها جريتها للمطبخ، راحت غسلت وجها وتهفي عليه
-ليش شردتي شبيج حلو حجيه.
وهي بلا صوت ما تنطق
-يمه شبيج ولج بس لا سواج خرسه
وهي بس تباوعلي، درت على صوت حسين اسمعه يطرد بمنذر من بيتنا ومنذر يضحك، دخل طــروادة باوعلنا وراح للدوانيه اخذ منذر وطلع، وعفراء اخذتلها يومين بس تصفن
وبدوا يرحون لكربلاء علمود المواكب، ضلينه بس احنه بيت شامل
وريمه وسليم من بيت شاكر
وماسه وبدور ووهب من بيت عمي وليد
حيل مرتاحين ويوميه نروح وي طــروادة للــبستان، الحد يوم الزيارة راح زار ورجع بسرعة لان يخاف علّى الزرع، ومرات ياخذ عــفراء وياه للسوك علمود تشتريلها أغراض للعرس، وراحوا عقّدوا محكمة اخذوها طــروادة وسلطان وجدي رأح وياهم حتى يشلع كلب طــروادة زين
وما ادري ليش جدي ساكت ومايسوي مشاكل وخله كلشي يمشي بهدوء حتى طــروادة مستغرب، حددوا يوم عرس سلطان وكلها مخبوصه، ورّاه بأربعة ايام عرس عفراء.
جــويريه:: بعد نهائياً ما طلعت ولا بجيت صرت اخآف ابجي، ولاسويت اي مشكله بس اقرأ وشنو يردّون أسوي وحتى لو يصيحون علي ما ارد، جده بس تصيح اصعدي اركض اصعد فوك، بيوم دخلت مرة خالي شاكر وكمت وي مــاسه للمطبخ نسويلها چاي، ودتني مــاسه اجيب استكاين من المعرض مال امها وكفت واني اسمع زوجة خالي شاكر تكول
ميلاد ::ام صــيهد لا تسويلج لعبة عمي گال ريـــمه وهاجر الصيهد ووهب، وماسه وبدور لسليم وسجاد،
ام صــيهد :: ولدي مايردون شلون بله كوه ازوجهم، وبنياتي ما يردن يتزوجن.
-خافنج تردين بتّ نضال.
-عمي كفي البت شرج لا رايدتها الولدي ولا البت رايدتهم.
ميلاد:: عابره سبع شطوط هيه هسه تضحك عليهم وتلزك روحها بيهم.
جــويريه::دفعت باب الغرفة خازرتها ما اهضمها من زمان اكرها كد ما جانت تضربني واني طفلة رفعت ايدي احجي بتهديد
-بالقرآن اذا اسمعج تحجين بطاريي بعد ادفنج ديربالج تجيبين طاريي.
احجي وهي تصيح "ياا يااا يمه يمه تريد تطكني. وكامت وتصيح بصوت عالي، وأم صــيهد بس تريد تسكتها، التفتت على صوت جدي وخالي شاكر وهي تصيح
ميلاد:: ولكم اكلتني أكلتني شلون اكلها ماتاخذين واحد من ولدنه يمه ملختني يمه .
وتصيح وكلبت الدنيا واني بس فاتحة حلكي مصدومة وام صــيهد تسكت بيها وتدافعلي ومن صدمتني بجذبها وتلفيقها مارفعت ايدي ودافعت النفسي انضرب وعيني عليها صريخها وحجيها عبالك هي النضربت شمرني خالي شاكر علي حافة الدرج طكت بخاصرتي روحـــي طلعتتتت وكف جدي يصيح
-والله يا بت الچلب ما تاخذين واحد من احفادي انااا اناسب ابوج؟ الا تسودنت.
هو يحجي وماسه وبدور يجرن بيه للغرفه صعدت بيدهن والصوت بعده أحسه صدى بأذني ، ثاني يوم اجت مــاسه تطكطك باصابعها كعدت يمي گالت
مــاسه :: جده تگول تعارف تركص؟
هزيت راسي ما فاهمه كالت
-باجر عرس سلطان، ونركص.
-ما اركص اني.
-جده گالت الجدي اخليها تتطوه على نسوان بيت نعيم لان يردولهم مره الابنهم ومن يشوفونها يچلبن بيها.
ضحكت مصدومه
-مــاسه شبيج تخبلتي.
-والله العظيم هيج سمعتهم يحجون
-ما اركص ما اركص بكيفهم يردون يزوجوني.
-جوري والله جدي يكتلج اركصي هنه بس نسوان كلنه نركص ميخالف
مــاسه :: حاولت اقنعها بكل صورة خايفه عليها من الضرب وبالوكت نفسه گـــلبي يوجعني عليها من حجي جدي، ابد ما قبلت، إليوم العرس كضتها جدتي من اذانها لوتها بحقد
-تركصين ولج تركصين لو ازوجنج لحميد المسودن.
جريتها من ايد جده وصعدتها فوگ اتوسل بيها تقتنع
-اركصي شويه ويانه احنه كدام العروس كلنه نركص انتِ هم سوي روحج تركصين افتكي من الكتله.
هزت راسها موافقة رجعت نزلت جوه وانه هم نزلت كملت شغلي
وصعدت فوك ابدل من راحوا جابوا العروس، اجت بــدور تركض گالت
-جابوا العروس تكول جده انزلن يله، جوري گالت اموتها اذا ما سوت شلون ما كتلها.
وجوري ساكته گالت
جــويريه:: انزلن اجي وراجن.
مــاسه ::اخذت بــدور ونزلت النسوان يترادحن بالنص ويهوسن " هاي الرادها وهاي التمناها بت الشيخ الابن الشيخ جبنها،
وترجع ام سلطان تصيح
" وفصوص روبه يا كفاها ووين دورها ووين لكاها.
والزعاطيط تتناكز بالنص سكتن النسوان وشغلن السماعة على اغاني اجت جدتي كضتني من ايدي تدفع بينه للنص حتى نركص گالت
-وينها جوريه.
رفعت راسي للدرج شهكت فاتحة عيني على وسعها واني اشوف جوري نزلت بثوب كصير وحصر وعلى خصرها وصلة وباطرافها ابو الليرة وزادت صدمتي من شفت خنجر جدي بأيدها والايد الثانية خنجر عمي شاكر وكف الدم بيه من اجت على المسجل راساً غيرت الاغنيه الكل التفت عليها وكفت كدام العروس والخناجر بأيدها ركصت بخناجرهم گدام نسوان السلف كلها.
يتبع 🌿
شعلان
————-
اولاده
———
شاكر
شامل
وليد
خليل
نضال
————
وليد
———اولاده
صــيهد
رغد (متزوجه غريب)
وهـــب
مــاسه
بــدور
———-
شامل
————-اولاده
طــروادة....عفراء
عبود .......رنـــه
حسين.....زهره
شاكر
———اولاده
مرتضى (متزوج، فرح)
سلطان
ســليم
سجاد( مطرود بسبب الجد)
ريـــمه
هاجر
مادري اذا نسيت احد🥲😂
#ايلول
رواية أرض الخناجر الفصل الثامن 8 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
تصويت وتعليق بين الفقرات لطفاً💚
══━━━━✥◈✥━━━━══
اليوم ابد مو زين وضعي
يبچن خواتي وامي تدعي
طحن النشا مطحون ضلعي
عضيت گلبي وعفت أصبعي "
══━━━━✥◈✥━━━━══
مــاسه :: بكل مره تشيل الخناجر وتحطهن ببطنها اشهك بخوف ركصها جان يخوف بسبب طريقة استخدامها للخناجر.
والنسوان يباوعلها بصدمة، راحت جدتي على السماعة تريد تطفيها وما تعرف، مشت جوري طفتها وضحكت ضحكة طويلة وشريرة كانما ضحك أفلام رعب.
جرت ايد جدتي خلت الخناجر بأيدها وهيه تضحك حلت الوصلة من خصرها شمرتها بنص الهول ومشت بخطوات سريعة صعدت فوك، جده واكفه مثل الصنم وفاتحة عينها بصدمة والنسوان وحدة تحجي وي الثانية كأنما شافن فضيحة بين الهوسه وصدمة الكل لمحت عــفراء اخذت زهره وطلعت للمطبخ وجده تشيل روحها وتركعها وتصيح على البنات محد تصعدلها صيحلي شعلان وهن يجرن بيها للغرفة يردن تسكت كعدت على الدرج صاحت على عــفراء راحتلها تركض كضتها من ايدها حييل وصاحت بغضب
-صيحيلي جددددج ولج
عــفراء:جده كهلان يذبحني لو طلعت،الزلم تارسه الثنيه
ماسه ::ابتعدت بس اعاين حي على الصلاة لايحتني كتله اليوم، التفتت لباب المطبخ سمعت صوت صــيهد يصيح بغضب على مرة عمي وخالتي
صــيهد :: صيحلي ماااااسه
وبس سمعت صوته حسيت نشف الدم بيه بس فاتحة عيني، گـــلبي صار طبل گلت هسه يطلعون كايليله مــاسه ركصت بخناجركم، يذبحني. خالتي تهدي بيه وهو متخبل لو تسوولي درب لو تصيحن مــاسه. رفع راسه ولمحني واكفه بباب المطبخ الداخلي، عيونه ينكطن غضب ووجهه ما يكصه الف سيف، خزرني وصاح
-تعااااااي
مشيت بخطوات ترجف احس برجلي ما تثبت على الگاع وصلت يمه جراني من زندي بغضب لمحت طــروادة بصف الحايط يم صيهد مدنگ، التفگه بأيده، دمعت عيوني هستوني اريد ابجي واحلف مو اني الركصت وهو صاح من بين اسنانه
صــيهد :: طلعيلي بت عمتي نضال
-هااا؟
رجع عتني حييل راح يجيبني براشدي وانه ما ادري شمالني نثولت، مرة عمي شاكر تكله مالك شغل وهوه عينه بعيني خازرني عصر زندي حيييل صاح بغضب
- جيبيهاااا.
همست بخوف واريد ارفع ايدي الخدي
مــاسه:: جده گاعده على الدرج.
دار يسب متخبل واسمع طــروادة يگله
-بس خل توصلها للمطبخ صــيهد.
دفعني للمطبخ ورجع جرني عليه تدنى يمي يحجي بأذاني
صــيهد :: لو تكتلين جده هم تنزلينهاا روحـــي اركضي لا اموووتج.
فلتت من ايده وصعدت اركض واسمع مرة عمي شاكر وراي تصيح على جده وتحجي تدردم، فتّحت الباب على جويرية
مثل المخبله أطفر وهي كاعده عبالك منتظرة عقابها، صيحت واجر بيها
- گووومي گوووومي.
جرت ايدها من ايدي تسأل بهدوء
-شكو؟
مــاسه:: صــيهد يريدج يگول بسرعة خل تجي يريد يطلعج من البيت لان جده راح تودي على جدي شعلان وعمي ولج گومي گومي، اخوي يموتني اذا ما طلعتج.
جريت العباية والشال البس بيها شلون ما چان واسحل بيها هستونه طلعنه من الغرفة تلاكت ويانه عــفراء گالت
-يله بسرعة.
نزلنه وجده على الدرج تصيح
-ردنها فوگ ما تطلع مناه ردنها اجاها شعلان.
وانه وعفراء نسحل بجوري ما مهتمين والنسوان يمدن بروسهن يعاينن وايدهن على حلكهن ويصيحن
"يااا ياا يمه هلااه"
عود اول مره يشوفن مشكلة احلف عليهن ينامن بصياح ويكعدن بعركه، وصلنه يم جده وهيه چلبت بجوري تريد تكتلها جرتها منها عــفراء وطلعتنه من الدرج اثنينه وهيه ضلت كاضه جده، سحلت جوري للمطبخ والگرايب العگارب البالمطبخ وكفن بوجهنه يصيحن
-شنهي وين مودياتها چا تكبرن المصيبة انتن.
وانه بس اريد اوصلها للباب يم صــيهد دفعتهن وجريتها وهيه مثل العجينه بأيدي، بعد شويه وأوصل للباب وجرتني مرة عمي شاكر تنتر وتصيح
-وين رايده بيها انتِ؟
وتريد تجرها من ايدي صحت عليها
-عمه صــيهد يريدها، هديها هددي.
وجويريه بس تعاين وين مانجرها تروح فلتت من ايد عمتي وصلت يم الباب ودرت عليهن يحجن يردن يجني وصيهد مد ايده على زند جويرية فوك العبايه جراها عليه وبأيده الثانية جر طرف حجابي عبالي مادري شيريد يسوي، رفعه على وجهي ومسح الحمره من حلكي خازرني ، حجه بصوت ناصي وهو طالع
-اكضج.
ضليت بمچاني اعاينلهم طــروادة يمشي كدامهم التفكه بأيده وصيهد كاض جــويريه من زندها يوديها مناه ومناه عبالك جاهل بأيده. وصلوا يم باب الحوش ووكفوا يفكرون شلون يطلعونها،اريد اضل اعاينلهم بس عيون صــيهد يفترن بكل مچان بس شافني خزرني وأشر على باب المطبخ عود سديه،سدّيته وشردت.
جــويريه:: روحي احسها بأطراف أصابعي كل ساعة أگول هسه تطلع، ما مهتمّه آلشي وفجأة أنتبه وأستوعب،حسيت آلم ايدي فززني رفعت راسي اباوع الصيهد وأيده القابضه على زنديّ بقوة، احس بأصابعه وصلن للعظم، رجعت رفعت راسي اباوعلهم اثنينهم اعصاب واكفين بباب الحوش، يوديني يسار ويرجعني يمين، دار وجهه عليَّ جر العباية نزلها على وجهي وغطاه ، يحجي بشر
صــيهد :: كضي العبايه مناه
-ما اشووف .
ما اهتم جراني بأيده وبخطوات سريعة احس بروحي اركض دفعني الداخل بيت خالي شامل ،وخرت العبايه من راسي اباوعله هو وطرواده، صيهد مد ايده سد باب الدوانيه عليّّ، اسمع صوتهم واحاول أرجع اركز وأستوعب
طــروادة :: شافنه مرتضى، بس ما يدري ياهي ويانه.
صــيهد ::خله خله سهله..
جــويريه:: كعدت بالزاويه حاضنه رجلي الصدري گـــلبي يدك حيل ليش سويت هيج ليش خليت نفسي بمشكلة أكبر من الجنت بيها، دقايق وأنفتح الباب رفعت رأسي دخل منزل عينه وأشر بأيده يحجي بنتر
صــيهد ::خلي العبايه على راسج وأوكفي.
رفعت العبايه من اكتافي الراسي وكفت وهوه ما يباوع الوجهي أشر بأثنين أصابع، ونتر
-تعااااي.
تقدمت خطوتين رفع راسه نزلت عيني الأيده بيها سلاح، أحس وشه صارت بأذني، عزلوني هنا حتى يكتلوني ومايخربون العرس،
رجعت اباوع لوجهه خازرني بغضب وسأل من بين اسنانة
صــيهد :: ركصتي؟
بلعت ريك عيني بعينه ساكته وكل ثانية انزل نظري للسلاح احس راح يرفعه ويرميني، صيح بغضب
صــيهد :: أحجيييي.
فزيت بخوف رجعت خطوه ليورا هزيت راسي اي، ونزلن دموعي، دار بغضب مسح وجهه وبسرعة تقدم خطوة بأتجاهي، رجعت ليورا بخرعة، نتر
-شنهي الردتيه شنهي غايتج بالسويتيه، احجي احجي سولفي.
فاتحه عيني كلها بخوف وكلبي مثل الطير المذبوح منتظرة موتي بأي ثانية، هو يسأل واني ساكته وعيني للسلاح البأيده، تخبل من ماجاوبته صاح والشر يتناثر بين كلماته
صــيهد :: احجي احجي بررري .
جفلت منه دايره وجهي وامسح بدموعي اتلفت شفت كتب الجهال بالگاع ركضت للدفتر بأيد ترجف كتبت على الورقة "خايفة "ورفعتها اله الورقة كلها تهتزّ بأيدي باوعلها بغضب وعگد حاجبه.
صــيهد :: أحجي ليش ما تحجين ليش تكتبين.
رجعت للورقة اريد اكتب ماكدر اسيطر على القلم ودموعي عشرة عشرة بلا صوت، اول مره ينزلن گدام بشر، لان حسيت الموت بيني وبينه خطوه ، كتبت،
"ماكدر احجي يطلع كلامي غلط.
قراها وجر الدفتر من عندي بخبال شگگه متخبل صاح وعيونه مفتوحات على وسعهن
-اااااحجي راح امووووتنج يشهد الحسين.
بجيت اشهك واحجي بسرعة رغم ادري من أكوّن خايفة ماتطلع من حلكي كلمة صح، صحت بخوف
-جددده گالت اكرصي
عكد حاجبه ما فاهم واني اعيد الكلام بگلبي بصورة صحيحة ومن احجيه يتخربط، گال
صــيهد:: جده گالتلج اركصي؟
هزيت راسي اي،نتر
-ليششش رضيتي؟
اهتز جسمي كله من الفزه وحجيت بسرعة دموعي مغرگه خدي
-گالتلي احمدج لزويج الاعمى
غمضت عيوني ميته قهر صاح
-ليش تحجين بالمگلوب شمالج؟
فتحت عيني اباوع للسلاح،انتبه عيوني للسلاح راح للباب بسرعة فتحة وصاح
-طــروادة
لمحت طــروادة اجاه اخذ السلاح منه ورجع صــيهد گال
-احجي على كيف،ماكاض عليج سيف انا
مسحت دموعي بس آريد الرجفة تروح، وأتنفس بقوة، رجع ليورا وكف يم الباب وعينه عليَّ، گال
-فضيهاااا.
رددت الكلام بگلبي واحاول احجي بهدوء اتنفست بقوة وحجيت كلمة كلمة
-جده،گالت، الماسه، خلي، جويرية، تركص گدام، النسوان، حتى يخطبنها، ومن ما قبلت، اركص ،كرصتني ،وگالت، ازوجج، لحميد، الاعمى.
هز رأسه بغضب وسأل بشك
-ليش بخناجرهم؟
دنكت عيني ساكته وهو سكت فترة وحجة بتهديد
صــيهد :: الخناجر الركصتي بيهن الليله يركصن على رگبتج!
رفعت راسي اباوعله بخوف صاح
-لا تعاينين هيج.
نزلت عيني خاايفه حييل صاح
-هالمره راح احميج بسس!!!
لو عدتيها وسويتيلج سالفة مناه مناه انا الاذبحج يشهد الحسين.
كمل كلامه وطلع بغضب سد الباب وراه، كعدت بالزاويه خايفة وارجف كلي.
"""""""""""""
رنـــه ::كاعده كوه على روحـــي اريد بس نردّ لبيتنه وعفراء كاضتنه كوه، نترت ايدي منها احجي
-كومينه نرد لبيتنه شنهي ضالين هناه وجده تطك بيج.
عــفراء::ولج سدي حلكج راح اكرصج كرصه والعباس الا اخليها تزورك شهر، الزلم تارسه الثنيه شلون نطلع اذا ما ويانه زلمه غير وديت على اخوتج ونتانيهم يجونه ام طفگه.
خزرتني حييل درت وجهي منها مدغوغة ، واعاين للنسوان والجدتي بطرف عيني، افكر بجويريه آخذوها البيتنه گبل لا يوصلن السالفة الجدي وسكتن جده گوه لمن يكضي العرس.
كمنه للمطبخ من جابوا العشه كلمن صينيتها گدامها وأحنه البنات نوزع برتقال وموز وقواطي نفتر عليهن والتريد بعد ونعبرها تجرنه من طرف ثوبنه، جرتني وحده مطيتها خمّس قواطي درّت عليها گالت
-بعد وحيده الهذا الفرخ.
-ليش ما اطيج انتِ تگومين توزعين وانه اكعد بمچانج؟
انه مدنكه عليها واحجي وهيه ضحكت وطكتني على ايدي
-يا خيبه شمالج فلك صابج ولا تكعدين هههههه
ومدت ايدها اخذت قوطيتين، والوراي يسوحلن بيه يردني اكمل توزيع، كملتهن وطلعت كعدت على الدرج عيني على العروسه، حلّوه وعيونها خضر يگطعن، كعدت بصفي مــاسه كتلها
-خطيه جــويريه كون يحمونها.
مــاسه :: من رادها صــيهد خفت عليها ما جنت ادري بيها عفراء الموديه عليهم حتى يحمونها.
رنـــه ::عاينــي العروس "الاء " كاضه الورده بأثنين اديها عبالك راح تشرد منها.
مــاسه :: هههههه جبحج لا تضحكيني خاب اكلج احسها بگعه لكطه حيه صفيره.
-اي والحسين انه هم گلت، شلون عرفتها فنج؟
-شلون؟
-ريـــمه مساع أجت گالتلها عدلي بدلتج طلحت مناه ومناه وهيه گالتله مالج شغل، فشلت ريـــمه قهرتني ردت اكوم اسوحلها هيه وبدلتها
ماسه :: يااا ولج جا شنهي عبالج بس هايه ، مساع هم هاجر حاجتها بالاشاره عود تكلها انتِ حلوه وهيه ضلت تعاين بضوجة ما راضيه وتحجي شلون لعبانه روحها تكلهن شبيها هاي شني خرسه وخطيه هاجر ضاجت
-ام خيسه وعلي بس خل تضللها شهر هناه الا اكتلها ليش ضوجت هجوره، بس اكلج عيونها يگطعن كون انه عيوني خضر ولا اصاحبج، ولا اعاين الواحد اضل اليريدني اعاينله يطيني فلوس يله.
ضحكت مــاسه اتلفتت ورجعت سألتها
رنـــه :: اكلج مــاسه مو گالوا اختج رغد اجت؟
مــاسه ::اي بس اضن متعاركه وي رجلها وصلتنه عيونها مورمه ومصخنه سلمت علينه وطبت نامت بغرفة أمي لا شافت العرس لا شافت العروس.
رنـــه :: سكتت اباوعلها بس كامت من يمي كمت الغرفة عمه ام صــيهد فتحتها على كيف ومديت راسي اعاينلها نايمه، طلعت من يمها أحجي بگلبي " اثنينهم چانوا يحبون بعض، سلطان شافها تزوجت كدام عينه وهسه هيه حضرت عرسه شلون قهر هذا
بدت النسوان تطش ومرة عمي شاكر واخواتها اخذن العروس البيتهم. اجتني عفراء وزهره گمت وياها طلعنه من المطبخ لكينه عبود واكفلنه بالباب صفيت وياه امشي واحجي
-اكلك جدي درى؟
التفت عليَّ ماله خلك هز راسه يسأل
-بيمن؟
درت عيني العفراء تمشي وكاضه زهره من أيدها خزرتني، سكتت، وكفنه يم حوش بيت جدي عبود محتار شلون يوصلنه الحوشنه ، الوادم تفتر وولدنه واكفين سطر سمعته صاح على طــروادة، مديت راسي اعاين اجاه صــيهد وطرواده اثنينهم گالهم
عبود :: البنات يردن للبيت ومناه هذول واكفين.
صــيهد :: متوازيات خلها لليل لمن تطش الوادم ويردن.
طــروادة :: لا خويه كافي خلهن يردن هناك يندغن من جدتي، تعال جيبيهن يله مغطايات بعبيهن شعليهن جاي يعضونهن.
رنـــه ::سكت صــيهد مدنك مشه عبود كدامنه وطرواده بصفنه من جهة الزلم ويمه صــيهد يدخن مشّوا ويانه، عفراء منگبه ومدنكه وزهره بأيدها، واني العبايه على راسي وما مدنكه ، واحنه نمشي عاينت لجهة الولد وهذا صاح
صــيهد :: دنگييي.
درت عليه خازرته
-شعليك بيه انتَ مالك شغل.
خزرني بغضب وطرواده صاح
طــروادة :: ولللج.
صــيهد::نزلللي عينج لا اعميها
هزيت أيدي مستهزئة من وصلنه الباب حوشنه طبيت وجراني من عبايتي كضه طــروادة وهوه يصيح
صــيهد::ولللج ويامن تحجين هيج.
جريت عبايتي منه وعفراء تجر بيه تريد تطببني للبيت، وطرواده وعبوي كاضينه دفعه طــروادة يصيح متخبل
طــروادة:: تريد تطكهاا وانا واكف.
وانه خازرته بغضب وهو بس يريد يفلت منهم ويجيني صاح
صــيهد:: خرب اهل اهلج لا تخزيني بت النعال انعل ساسج.
رنـــه::انتَ ابن النعال.
بنفس اللحظة دار عليّ طــروادة طكاني راشدي بكل حيله شهكت مصدومه وجرتني عفراء للبيت طبيت للغرفة ابجي واغلط وانعل بيهم.
رفعت راسي من طبت عفراء صاحت
عــفراء:: ارتاااااحيتي ارتاحيتي الرعينه الهايشه ماتصريلج چاره ولج شسوي بيج شسوي اعضج من كلبج.
وانه من بين دموعي امسح واصيح
-والله اغلط واغلط هوه شنهو هذا واحترمه مسوي روحه علينه زلمه ابو خيسه ابن الخره ابن الچلب انعل ابوه لا أبو الخلفه.
اجتني متحلفه تسد بحلكي وادفعها
عــفراء:: ولج لا تغلطين ولج تأدبي والله اموتنج على هذا السانج.
دفعتها حييل
-والحسين ما احترم چلب بيهم، وانعل واغلط واليحاجيني اتفل بكصته شعليهم بيه عدي اخوان ويحاجوني ياهو مالتهم همه انعل ابوهم لا ابو الخلفهم.
ابجي واحجي بحرگه وطب طــروادة بعصبية بأيده خيزرانه كضته عــفراء وانه رحت للزاويه ضميت روحـــي بيها ابجي واعاينلهم كاضته وتتوسل بيه وهو يصيح
طــروادة :: ولج ما اكدرلج انا رنـــه السانج بطول النعال تغلطين على صــيهد ولج ترحيله فـــدوه والعباس وروح ابوي اكطعج تكطع.
-جاااا ما تشوفه يريد يطكني.
صيحت وهوه يريد يوصلني وعفراء تحلف بيه يعوفني دفعته للباب صاح
طــروادة :: اريد اسمعنج بعد تغلطين وتتجاسرين على الاكبر منج الا اكسر الخيزرانه على رجليج.
حجاها وطلع دارت عليَّ عفراء صاحت
-حييل حيل وياج كونه كاتلج.
-اي اي يله بعد المن كضيتيه جا ماخليتيه يكتلني.
طلعت من يمي وركعت الباب حيل، غطيت وجهي بالبطانية وابجي بكل حيلي وأصيح كون اموتن ماعدي اهل مايحبوني مايردوني وابجي ابجي حيل واعصر بعيوني كل قوتي واشهك
الحد ما غفيت.
جــويريه :: رفعت راسي على فتحة باب الدوانيه الداخلي صارت بوجهي عفراء، اجت يمي وتباوع للباب الثاني خاف واحد يدخل، كعدت بصفي خايفه كالت
-جا انا وصيتج تحاربين حتى تعيشين لو ترحين للموت برجليج؟
تحسرت ساكته لزمت ايدي مبتسمه وهي تگول
-لا تخافين.
جــويريه:: قهروني حيل وما ادري شلون سويت هيج اني بالبداية كلت انزل امد روحـــي بالگاع واصرخ والنوب اكوم واطفر فوك النسوان اسوي روحـــي مخبله، بس من كالتلي ازوجج لحميد الاعمى حركت گـــلبي وهيج فجأة تذكرت الخناجر بس التهوا بكتهن.
عــفراء:: لا تعيدينها جــويريه تدرين هسه طــروادة وصيهد راح يحمونج بس جدّي يحاسبهم، صــيهد خطيه يوديه للمعامل ويخليه يشتغل بدون ما يلبس چفوف ومن الصبح لليل يتشگگن اديه وينهد حيله
وطرواده بألف شغلة يقهره.
-ليش ساكتيله؟ ليش يقبلون يعاقبهم هم مو صغار!
عــفراء:: اليطلع من طور جدي يطرده من القريه ويطلعه من سلفنه يذب بيه كتاب ما مسؤل عنه ولا اله شغل بيه، واليطلع ثاني يوم ينكتل ومحد يفزع وياخذ بثاره.
-شنو ينكتل منو يكتله؟
-أحنه عشاير واواحد يطلب الثاني ثار، وبعد اكلج شغلة كلشي عايشين بيه من گــيعان ومعامل وحلال كلشي كلشي بأسم جدي سياراتهم هاي التشوفينها كلها بأسم جدي ما يرضى واحد يسجل شي بأسمه
ها وعايني المايشتغل بمعامل جدي وكيعانه محد يطيه شغل.
جــويريه:: سكتت مستغربة كلامها وهي مبتسمه ساكته رجعت كلتلها
-سمعت رنـــه تبجي شبيها؟
تحسرت بقهر گالت
عــفراء:: موتتني رنـــه بعدها زعطوطه وطايشه تريد تاكل الوادم، تريد كون تعاند ومحد يحاجيها ومحد يكلها على عينج حاجب، هسه انه ما ارضى واحد يحاجيه بس غير احجي حگ الله يا رنـــه ما تنرد ولا ينگدرلها.
-لا والله رنـــه حبابه على كيفكم وياها.
-والحسين محد محاجيها خيه،بس ما تنررررد، من ردينه من بيت جدي لبيتنه صــيهد گالها لا تعاينين وهيه تسودنت تريد تاكله شلون تحاجيني ياهو مالتك بيه، نعلها وردت هيه نعلته طكاها طــروادة.
جــويريه::سكتت من صاح عليها طــروادة، طلعت وياها من الدوانيه للهول، حسين وزهره يباوعون افلام كارتون كعدنه يمهم اني وياها منتظرة مصيري.
وهـــب :: صاير جني عجايز السلف ابوكن من طبخ العرس واوديلها، اخذتلي ماعون ورحت دكيت باب الغرفة محد رد عليَّ صحت
-يبنيه!
وماكو اي رد فتحت باب الغرفة اعاين هاي ماكو اتلفتت شني السالفة طلعت من الغرفة سديت الباب ورجعت فتحته بلكن تظهر ماكو
-يمعوده ندى يبنيه!
سمعت حركه بالحمام مشيت دكيت الباب
-يبنيه
نكطع كلشي لا صوت لا نفس، رجعت دكيت الباب
-ندى
-ها، ها.
-ما تحجين من مساع اصيح عليج شمالج؟
-مو عبالي احد غيرك وخفت.
-شكاعد تسوين بالحمام؟
-أسبح غير؟
-ها خوش، اكلج هذا اكل من العرس بكتلج راح أحطه بالغرفة واروحن اكليه كله بالكوه بكته كون حتى الصحن تطبكينه وتاكلينه.
ندى:: سكتت واكفه ورى الباب ولازمه ملابسي بأيدي گـــلبي يدك حييل خايفه، الحد ما سمعت صوت باب المشتمل انفتح ورجع انسد، لبست وطلعت دخلت للغرفة، مخلي الاكل ومغطيه، نشفت شعري بالخاولي وعفته مفتوح گبل ما امشطه تقربت للأكل جذبتني ريحته اريد أشوف طعمه، اخذت من اللحم شويه اكلت كلش عجبني، رفعت راسي بفززه على فتحة باب الغرفة دخل مبتسم وايده متروسه فواكه وقواطي وبس انتبهلي فتح عينه على وسعها كمت بسرعة اجر بالعباية وهو دار وجهه مرتبك ويحجي
وهـــب :: عبالي بعدج بالحمام والله والعباس ما ادري بيج طلعتي .
لبّست العبايه على لبسي وخليت شال على رأسي همست
-ماصار شي.
-ادور؟
-اي.
دار وجهه الي گال
-غير تقفلين باب الغرفة.
-نسيته، والله توقعت ماترجع بعد.
-مو بكتلج بعد وجبتهن.
حجاها وتقرب خلاهن يم الصينية يسأل
-شلونه الطبخ.
-كلش طيب.
-أنا طبخته شعبالج جا، غير انا طباخ مال اعراس.
-مبين مبين لا تحلف.
ضحك يفرّ بسبحته
-يله اكلي واخذي راحتج ما اجي بعد.
حجاها ودار يريد يطلع مشيت خطوتين وراه اريد اقفل باب الغرفة اول ما طلع من الباب ولزمت اليده اريد اسده التفت يباوع لعيوني، بلع ريك عينه بعيني همس
-ندى.
واني اباوعله ساكته مرتبك مسح لحيته وزفر نفّس بحسرة، گال
-لا تخليني اشوفنج بدون حجاب بعد، عفيه.
دنكت عيني متفشلة
-والله العظيم ما متقصده اني اصلاً اموت من الحرام،
بس والله عبالي ما ترجع ونسيت اقفل باب الغرفة.
رفعت عيني اباوعله ميلت راسي بأسف
-أسفه.
وهو عيونه مافارگت وجهي همس بصوت ناصي
-الشفته حيل حلو وما اريد ادخلج بذنب وياي.
-فـــدوه آنسى لا تتذكرني بلا حجاب.
-ما ينسي، هي ثانية بس عبالك عاينتلج ساعة، حفظت كلشي كعدتج ورجليج وشعرج المبلل وهو نازل على اجتافج،مثل الليل.
رجعت ورا البآب خايفه ومدنكه
-وووهب.
زفر نفس بقوة
وهـــب :: رايح اقفلي الباب.
دار وجهه وراح سديت الباب وقفلته ورجعت كعدت بعبايتي گـــلبي يدددك بكل قوته.
وهـــب :: اول ما طلعت تلاكه وياي ســليم گال
ســليم ::خاب تعال عاين المصيبه.
-ها شنهي من مصيبة.
ســليم:: خاب سلطان ماكو اشتهرنه.
-ولك شفته طب البيت عمي شامل .
مشينه انا وسليم البيت عمي شامل سمعناهم بالحوش يحجون فتحنه الباب وطبينه لكيناهم سلطان وصيهد وطرواده
كاعدين سوه، سلطان يدخن وهمه يحجون وياه صاح عليه ســليم
ســليم :: وين شارد انتَ ما تجي انزفك.
وسلطان يدخن ساكت گال صــيهد
-شسالفتك يابه كوم يله، بت الوادم شنهي ذنبها.
سلطان:: ما الها ذنب، ولا انا الي ذنب، ولا الچنت هاويها إلها ذنب، ما ادري ذنب منو هاي النار البگلبي
صــيهد:: يطبك مرض كلنالك من يا سلف الهاويها خلنه نمشي عليها، اذا انتَ لمن قروا الفاتحة وعقدت يله كلت والله انا هاوي غيرها، تحمل اليغلط يتحمل غلطه وينجب.
وهـــب :: نعاين انا وسليم وبريا لحكنه ساكتين، صــيهد يرزل بسلطان، وطرواده بس يكح ويصيح "سدوا السالفة" اريد اكضلي خيط من السالفة ماكو، ضحك سلطان وجر نفس من الجكارة طويل عاين الصيهد وگاله
سلطان:: ههههه متزوجه، تاخذ المشيه الرجلها،شتكله ابن عمي يريد مرتك؟
اتلفتت بينهم مستغرب من سلطان، وصيهد جرّ الخيزرانه من ايد طــروادة وگام يريد يكتل سلطان، كضوه طــروادة وسليم وهو متخبل
صــيهد:: اذا تفك حلكك بعد أشكه خلصن بنات وتحب متزوجه أبن النعال عرض الوادم لعبه عفت الدنيا كلها رايح تعشگلي متزوجة، والله امووووتك.
يصيح وطرواده يدفع بيه، وسلطان يضحك خبل صــيهد، دفعه طــروادة حيل صاح بوجهه.
طــروادة :: گبل لا تتزوج رادّها وماصارت البت اهلها مايطونها وراحت بحال سبيلها لا اله شغل بيها ولا هم يحزنون.
صــيهد ::جا هو اغم وخلاها تروّح الغيره خلي ياكل نعل وينچب بعد، كوم يله كوم المرتك وحلكك ما تفكه شنّي هالزحمة هاي ما تستحي انت عايف بت الوادم وجاي هنا تتذكر خساراتك امشي يله.
وكف سلطان أخذناه على اساس نزفه، التفتت اعاين الصيهد وطرواده بالحوش يحجون بسكته وسلاح طــروادة بصفه، اجه صيهد وطرواده ضل، زفينه سلطان وطلعنه، ردت اسأل صيهد شصاير عافني ورد البيت عمي شامل.
رحت وراهم دكيت باب الحوش وطبيت صاح صيهد
-ها شعدك؟
-انتم شعدكم؟ شتسوون انا وياكم.
طــروادة :: تعال اكعد بلكن وتطيح الكتله بيك وتنحل السالفة.
رحت كعدت بصف صــيهد يدخن ويعاين بطرف عينه درت الطرواده اسأل
-عليك الحسين شصاير.
-جدك يريد يكتل بت عمتي نضال وضامينها هناه.
-ليش شنهي السالفة شمسوية البت حتى ماينسمع حسها ولا تنشاف بالبيت.
-يابه هاي جدتك تسوي كل مصيبة بكد راسها جابره البنيه الا تركصين كدام النسوان، وبت عمتي نضال مقهوره منهم ماخذه خناجرهم ونازله، خنجر شعلان وخنجر شاكر، بعده جدك مايدري بالسالفة.
صــيهد::خله يدري شيسويلها والله اكتله وما اخليه يجيسها.
طــروادة :: سهله سهله.
وهـــب :: بعدنه نحجي واندفر باب الحوش وكفنه انا وطرواده وطب جدي وعمي شاكر وأبوي يصيحون، وصيهد ضل كاعد ويدخن، صاح جدي.
شعلان :: جيبها ولك الليله ما تغمض عيني اذا ماذبحتها.
طــروادة :: ما توصلها لو تذبح زلم.
شاكر :: ولكم ما تستحون ولكم خلت سالفتنه علج بحلوك النسوان، وفوكها تحاملوها.
وهـــب ::تصايح طــروادة وياهم رد ليورا وجر أقسام وجهه التفكه عليهم.
طــروادة :: ابن أمه اليوصلها.
وجدي تسودن وابوي يغلط وعمي يلطم على راسه شلون تشيل سلاحك علينه علمود وحده ركصت بخناجرنه، اتلفتت اريد صــيهد يتحرك يحجي ضال كاعد حاط رجل على رجّل ويدخن صيحت عليه، طفه الجكارة وگام نزل التفكه من طــروادة وتقدم وكف كدام. جدي
صــيهد :: مرة عمي شاكر كايلتلها تركصين بهذن الخناجر جدج يگول، ومن ما راضيه كايلتلها يجيج جدج يذبحج، البت لا طالعه من البيت ولا تعارف هذا خنجر ياهو، جابتهن الها مرة عمي شاكر وكالتلها جدج يگول تركصين بيهن .
وهـــب :: اثنينه نعاين الصيهد بصدمة هاي السالفة منين جابها، جدي تسودن على عمي شاكر وعمي يحلف مرتي مالها شغل بس صــيهد قنعهم، التفت شعلان زنك شاكر من بلاعيمه گاله
-هسه توديها الاهلها.
طلع عمي شاكر وهو مدخن، وابوي كاض جدي من ايده، عاين الطرواده بحقد گاله
شعلان:: تشيل تفكتك بوجهي خير خير ان شاءالله سهله.
وطرواده مبتسم ببرود صاح عليه جدي
-صيح البت نضال يله.
صــيهد:: انا اصيحها، طــروادة خل يگابلك شويه مو انتَ مشتاگله.
حجاها وراح وكف بالباب صاح على عبود يجيبها
جــويريه::كمت خايفة وعفراء تطمن بيه لفيت روحـــي بالعباية زين، شفت صــيهد واكف بباب الهول داير وجهه الهم وظهره علينه من راحله عبود يگله
عبود:: هاي جبتها.
التفت عاينلي وأشر براسه تقربي مشيت بخطوات ترجف وكفت بصف الحايط ، قرب راسه الي گال
صــيهد:: كولي مرة عمي شاكر اطتني الخناجر وكالت اركصي. بيهن جدج كال، وخفت منك وركصت.
هزيت راسي اي بخوف صاح
-امشي يله.
مشيت وراه شافني جدي مد ايده صاح
شعلان:: تعاي جدي تعاي، النسوان چلاب يردني اكتلنج لان وحيدة بتي تعاي.
مشيت ورجلي ترجف مد ايده على جتفي حضني فتحت عيني على وسعها خايفة ما مصدكته مشه نطلع من الحوش واني ودي اچلب بطرواده بأيدي ورجلي واكله خلوني يمكم.
يمشون واني أتلفت خايفه شفت صــيهد ووهب اجوا ورانه دخلت للمطبخ جدتي واكفه وعوجيتها بأيدها وتباوعلي بحقد گالها
شعلان:: هاي بت الچلب مرة شاكر مطيتها الخناجر وكايلتلها جدج يكول تركصين بيهن تريدني اذبحنها لان بت نضال هيه من زمان تكرهه نضال وهسه تكره بزرت نضال.
هو يحجي واني اباوع ساكته مــاسه تأشرلي تعالي همست
-جدو راح اروح وي مــاسه.
عافني ورحت بخطوات تركض الماسه جرتني من ايدي فوك ميته من الخوف گالت
-غير وكف گـــلبي عليج.
-الولد گالوله مرة شاكر كالتلها اركصي بالخناجر.
ضحكت مــاسه مكيفه واني من الهبطه تمددت وافكر بالعشته طول هاليوم.
" بيت شاكر "
ريـــمه ::اركض هيج وهيج روحـــي طالعه من ابوي كتل امي ووداها الاهلها، الولد تعاركوا وياه، وسلطان طلع من غرفته يصيح على ابوي، صار مو عرس ظيم، كفيت البيت ورحت الابوي للدوانيه اطيته چاي وكعدت يمه
-بويه فـــدوه اروحنلك رد امي انتم شنهي صغار وتوديها الاهلها، ها بويه اخلي ســليم يروح يجيبها.
شرب چايه وهز راسه لا
-بويه الخاطري فدوه والحسين انا على ساعة اموتن من ظيمكم يوميه عركه يوميه طلابه.
بجيت مخنوكه مد ايده الوجهي مسح دموعي وباس راسي
شاكر :: لا تبجين بعد روحـــي، اردنها من جدج يرضى.
ريـــمه :: جدي راح يصيرله سنه طارد سجاد اخوي مناه والهسه ما راضي ترده، تريده هسه يرضى ترد امي.
-خل يبرد گلبه شويه واحاجيه والله اردنها.
ريـــمه :: كمت من يمه عاجزه وكلبي يفور لكيت فرح مرة مرتضى تكتل بفروخها وهاجر تريد تحميهم وهيه تصيح عليها، صحت على هاجر
-تعااي مالج شغل.
عافتهم واجت يمي مقهوره تأشرلي بأيدها بمعنى خطيه تكتلهم، وانا ما اكدر اشوفهم يبجون.
-ميخالف امهم ياهي مالتنه من نحميهم منها تسويلها عركه.
اشرتلي بأيدها تشرح (أمي راح ترد؟)
-اي ترد يوم يومين ويردها ابوي.
سكتت واجت يمي للمطبخ انظف بيه شويه وطلع سلطان صاح
سلطان :: ريـــمه اصعدي شوفي هاي شتريد.
-أي خويه صار.
ركضت فوك وهو طب للمطبخ، دكيت باب غرفتها صاحت
الاء::تعااي.
فتحت الباب وطبيت لكيتها تمشط بشعرها هستوها طالعة من الحمام كتلها
-مبروك حبيبتي زواجة الدهر ان شاءالله
بدون ما ترد عليَّ أشرت على الچرباية وگالت
الاء:: غيّري الفرشة توصخت هاي.
وكفت بصدمة اعاينلها
-وبعد؟ تكعدين وامشطلج شعرج؟
-لا انه امشطنه، بس غيري الفرشة وانزلي.
-فرشاتج بهذا الكنتور، غيريها انتِ وشويه اسلوبج بعدج ما بايتتلج ليلة ببيتنا ضمي حقارتج من اول يوم بينتيها.
حجيت وطلعت كبل ما اسمع ردها نزلت للمطبخ، سلطان كاعد وهجوره منتجيه على رجله يسولف وياها تأشره وما فهمها، رفعت أيدها أشرت على سحبة عيونها وعلى خشمها وحلكها ولمت أصابعها باستهن گالها
-شنهو، انتِ حلوه؟ اي انتِ گمر مو بس حلوه.
ضحكت ورجعت تأشرله لا وترسم بملامحها أشرت على الدرج.گالها
-انا حلو؟
ضحكت على محاولاته الفهمها، هجوره تقهر جانت تحجي وذكيه ذكيه بشكل مو طبيعي فجأة بعمر السبع سنوات سكتت وبعد ما حجت نهائياً ولليوم هي ما ناطقة سلطان وسليم آخذوها لهواي دكاتره ماكو اي مشكلة، السبب مانعرف.
فهمت من محاولاتها ودخلت كتله
ريـــمه :: تكلك مرتك حلوه.
حضنها يبوس بخدودها ويگلها
سلطان:: يابعد روحـــي عيــونج الحلوه يا ضوه عيوني هجورتي.
وهي تضحك وتحضن بيه، طب ســليم شافهم صاح
-اهووه انتَ مو عرست ما تولي فوك، هاجر باجر سلطان يصير عده فروخ وبعد مايريدج.
حضنت سلطان حييل تهز راسها لا گالها
سلطان:: سويله احترك ابوك.
رفعت ايدها سوت السليم احترك ابوك وهو اجاها يريد يعضها وسلطان يحمي بيها يضحكون، احب اهتمامهم وخوّفهم عليها عدهم هجوره تسوه الدنيا.
للوحدة اخذتها ورحنه ننام وسليم طلع وي بريا ووهب، عاينت السلطان ضل بالمطبخ يدخن.
رنـــه ::ضل طــروادة ما يحجي وياي يومين وضلن يومين العرس عفراء گالت باجر من الصبح توبسين راسه وتكليله ما تنعاد، وصدك كعدتني الصبح شفته يتريك هو وعبود بالهول، غسلت وجهي ورجعت يمهم دنكت جريت ايده بستها
-والله بعد ولا اعيدنها.
رفع راسه باوعلي عيوني مدمعه ومختنكه
-صاحبني فـــدوه.
-رنـــه على الولد ما تغلطين لا تخليني اطكنج واموتن من القهر.
-اذا بعد عدتها اكتلني والله.
ابتسم وسحبني من ايدي سوالي مچان يمه كعدت اتريك صاح عبود يقلد عليَّ
-اذا بعد عدتها اكتلني .
ضحكوا اثنينهم واني اخزر بعبود، هستونه ناكل وسمعنه صوت يصيح
-ولك عبوووود عبوووودي.
شهك عبود وذب كلاص الچاي من ايده ركض فتح باب الهول وكام وراه طــروادة كمت بسرعة اعاينلهم من الشباج، عبود فتح باب الحوش وصار بوجه سجاد شبگه بكل حيله يبجون أثنينهم
عبود::ولك روحـــي انتَ طك گـــلبي عليك.
سجاد :: يابعد حيلي مو گدي بالحسين مو گدي.
وطرواده متانيهم واحد يعوف الثاني حتى يسلم على سجاد ماكو مل منهم صيح عليهم يله عبود هد سجاد وخلاه يسلم على طــروادة وانه وعفراء من يمنه نضحك مكيفين حيل نحب سجاد على حبّه العبود
عبود:: تعاال طب نتريك سوه.
سجاد:: ولك بعدني ما طاب البيتنه لا مسلم على اهلي .
عبود:: رديت سجاد رديت بعد ماكو فراگ.
سجاد:: اي جدك المسودن الله هداه.
ضحكوا اثنينهم گاله طــروادة.
طــروادة :: يله روح الاهلك سلم عليهم ورد العبود.
ضحكوا راح سجاد البيت عمي شاكر، وعبود عينه وراه وطرواده يسحل بيه يريد يطب للبيت يضحك، حيل حيل فرحان عبودي برجعة سجاد وترس البيت بضحكته ويشاقينه مكيييف.
""""""""""
ندى :: لازمه الگلاده بأيدي ودموعي تنزل سكته بلا صوت
احسب يوم يوم شوكت يصير عمــري ١٨ شوكت اخلص شوكت ارتاح، شيخصلهن وشلون بيه كاعده ببيت انسان غريب على ساعة ادخله بمشكله وي اهله،
مسحت دموعي رجعت لبست الكلاده وبستها
وكمت اريد ارجع افرش الغرفة لان ناكثة فراشها بالهول وفاتحة الشباك ورافعه البرده عليها يتغير هواها، وكفت سديت الشباك هستوني انزل البرده وشفت باب المشتمل تحركت يدته وصوت المفتاح افتر كل ظني وهـــب،
شهكت مصدومة وبسرعة سديت البردة من شفت......
يتبع......💚
#ايلول
رواية أرض الخناجر الفصل التاسع 9 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
تصويت وتعليق بين الفقرات لطفاً💚
══━━━━✥◈✥━━━━══
ماهي جروح يصويحب نگش خنجر !
══━━━━✥◈✥━━━━══
ندى :: شهكت مصدومة وبسرعة سديت البرده من شفت بنيه دخلت سدت الباب وراها اسمع صوتها تحجي بحرگة تصيح
مــاسه :: مبتليه انه مبتليه هذا يصيح وين اهدومي ذاك ياخذ الغراض ومدري وين يوديهن وامي تفتر وراي هسه وين الكه الصينية ام العنب وين
ندى:: درت عيني للمواعين اليمي غاسلتهم ومرتبتهم وياهم صينية فافون صغيرة وثگيله منقوش عليها عناكيد عنب بجهتين
گـــلبي يدك بقوة ما اعرف شنو اسوي ايدي ترجف وأفتر بالغرفة ما اعرف وين اختل واسمعها هي تدور وتحجي بحرگه،
رجعت للبرده رفعتها اباوع بخوف شفتها راحت باتجاه المطبخ ورجعت تريد تجي للغرفة وي كل خطوة گـــلبي تزيد دكته هستوها توصل باب الغرفة ودخل وهـــب يركض ويصيح
وهـــب :: اوكفي اوكفي.
عافت الباب وراحت لنص الهول تريد تحجي وياه وهو دخل ركض وكف يم باب الغرفة كالتله
مــاسه :: انتَ وين تودي المواعين وهـــب؟ ما تردهن للبيت؟
وهـــب :: ياهو گالج تجين هناه وانا ما ادري؟
بقت تباوعله باستغراب مسح وجهه مرتبك گالها
-يعني لو كايلتلي انا اجي عليمن متعبه روحج.
مــاسه :: غير امي كتلتني كله من وراك تاخذ المواعين وما تردهن للبيت.
وهـــب :: يا مواعين ولج رديتهن كلهن للمطبخ.
-خاب والله امي حافظتهن تكول الصينية الفافون ام العنب ماهيه والدولكه الستيل المخططه وخواشيك وصحنين وكلاص، ولك اليوم نعال امي عيد بظهري من وراك كل ساعة لازكتني بطكه.
حجت ورفعت طرف حجابها تمسح بعيونها عود تبجي راحلها يواسيها حط ايده على كتفها وايده الثانية يمسح براسها ويگلها
وهـــب :: يله خويه يله ميخالف تنسينها من تأكلين الأقوى هو نعال نمونه.
-يا خويه نعالها جديد وثگيل.
-عمت عيني عليج خويه باجر اجيبلها واحد خفيف حتى من تنكتلين بيه ما تنوجعين.
مسوين نفسهم يبجون ومندمجين بتمثيلهم أثنينهم گالتله
مــاسه :: حتى رقم النعال طبع بظهري.
-من حبها الج خويه هيه لو ما تحبج ما تطبع نعالها بظهرج.
-اي اي صدك بعد انتَ اكثر واحد مجرب.
ضحك ضربها على راسها وهي عافته واجت للغرفة تريد تدخل لحكها جراها ووكف يم الباب كالتله
-شبيها غرفتك؟ شو كل ما اريد اطبلها وجهك يصوفر؟
وهـــب :: طنطل!
-هههههه، وهـــب حبوبي وين الصينية وعلي أميّ تكتلني، احجي الصدك مضيعها؟ شــامرها؟
-لا والحسين هاي ضامها، روحـــي دوري بالمطبخ وهسه انا اشوفنها بلكن بالغرفة.
راحت هيه باتجاه المطبخ نزلت البرده وركض رحت للباب دخل وهـــب وسد ألباب، أصبعه على حلكه ويسويلي "أشششش.
هزيت راسي اي وأشرتله على الصينية، قفل باب الغرفة هستوه، وتحركت اليده وصوت مــاسه تحجي
مــاسه :: يااا، وهـــب.
-اجيتج اجيتج.
-شو أفتح الباب.
-جاي ابدل، اكلج هاي الصينية يمي، ما ترحين وانا اجيبنها وراج؟
-مو تبطي امي بعدها كاضه نعالها.
حجتها وراحت مــاسه، وهو كعد على حيله ابتعدت اباوعله، ورا ما استوعب رفع راسه باوع الوجهي ابتسم وگال
وهـــب :: چا انكشفنه!
-اختك؟
-اي ميوسه هاي.
دنكت شلّت الاغراض ومشيت خطوتين يمه، وكف واخذهن من ايدي باوعلهن وگال بابتسامة
-باجر اجيبلج طباخ صغير ومواعين الله لايعوزنه لمواعين امي.
-وهـــب !
همست اباوع لعيونه صفن بعيني تفاحة ادم تصعد وتنزل، بلعت ريّك خايفة
-اذا عرفوا بوجودي شنو يصير؟
سكت ماجان متوقع سؤالي بعد عيونه عن عيوني يفكر ورجع باوعلي، ابتسم
-الاحسن مايعرفون!
-واذا عرفوا؟
-ما راح يعرفون!
-اذا عرفوا يأذوني؟
أبتسم وعينه تتمعن بعيوني، زفر نفس بحسرة وهو يگول
- شحدهم يلوحونج محد يوصل الطرف ثوبج.
دنكت ساكته وخايفه، ما احس بأمان لا بوجود وهـــب ولا بعدمه،
رفعت راسي من ابتعد أخذ المواعين وراح.
مــاسه :: طلعت من يم وهـــب ما مرتاحة ضليت واكفه بالباب شويه افكر عليمن خايف وما يرضى اطبن الغرفته جا هيه شبيها، عفته ومشيت طبيت للمطبخ امي كاعده وبصفها رغد مالها خلك حتى ويانه ما تحجي .
صفيت وي جــويريه وبدور نشتغل بالمطبخ واسمع امي تحجي وي رغد وهيه تگلها
رغد ::والله يا يمه ويشهد الله على كل حرف، ما اجيكم ولا الفي عليكم لو ما أكولن خافن عيالي بعد يومين يعايروني بأهلي، اجي من لا چاره ومن العيب.
-ياا يمه ليش رغده خايبه يااا.
ورغد دارت راسها تعاين للباب ودموعها نزلن بلا صوت وامي طاير كلبها عليها، ندك باب المطبخ وصوت صــيهد يحجي
-مــاسه.
امي دارت عينها لجويريه وهي ركضت بسرعة صعدت فوك، وانه ودي اشرد وياها، راحت بــدور فتحتله الباب ورغد بسرعة مسحت دموعها بس على منو على صــيهد يلگفها وهيه طايره
دنك باس راس امي وباس أيدها، يعاين الرغد بشك وكف على جهه عينه عليها وهيه ماتباوعله خله سبحته وچفيته بأيد بــدور
صــيهد ::رغد.
حاجاها وانه من يمي اسلمها، حرك راسه يسأل بشك
-ياهو وياج؟
رغد :: محد.
سكت ما مقتنع وهيه ما تعاين العينه تشرد عيونها هيج وهيج
هز راسه موافق وعاينلي إهو يحضي رجع عليَّ أشر بأيده كانما يخوط وفهمت معناها چاي أشرتله اي وبسرعة سويتله اله شربه وطلع، ووهب جابلنه المواعين تهريب هم يخاف من امي طلع شارد
للعصر رغد دكت رجل هسه اروحن والولد كلهم ماموجودين
وهي تبجي عبالك ميتلها واحد وتحلف بعد ما تجي هناه وامي محروك گلبها وميته من القهر گالتلها هسه اشوفن حتى لو ســليم ابن عمج شاكر يوديج.
ريـــمه ::جنت بس بفرح صرّت بعلتين اقلها فرح اهون تخاف من امي ومن مرتضى الا مرة سلطان كل حچايه تشمرها بكد راسها ومحد وأكف بوجها ولا تهاب احد، ساكته ومتحمله لانها عروس والخاطر سلطان
درت عيني الهاجر اسأل
-سجاد وين؟
أشرتلي باصابعها وفهمت انُ اخذ عبود وراح، رجعت سألتها
-فرحتي من اجه سجاد؟
حضنت روحها والضحكه تارسه وجها، ابتسمتلها والتفتت على دكت باب الحوش مشيت فتحته
-هلا عمه تفضلي
إم صــيهد:: شلونج يمه، ياهوا من الولد هناه؟
-ليش ماكو شي؟
مسحت وجها بطرف شيلتها البريسم تعبانه ومقهوره هزت راسها بأسف
-ام صــيهد :: رغده علت گـــلبي آندري شمالها هسه تريد ترد لعيالها اكلها تاني يردون اخوتج ويودونج ما ترضى تسودنت بس تبجي.
اريد احجي والتفتت على صوت سلطان وراي يحجي بخوف
سلطان:: ها عمه سلامات؟
ام صــيهد:: يمه اخيتك رغد تريد ترد لعيالها والولد ما همه عدالي ســليم هناه ردته يوديها.
سلطان :: انا اوديها عمه صار بس ابدل هدومي واجي
ريـــمه ::راحت عمه وهي تدعيله وهو راح بسرعة صعد الغرفته يبدل، انه ضليت بالحوش اعزل بيه، لمن اجه سلطان گال
-ريـــمه روحـــي كليلها يله.
خليت العبايه على رأسي ورحت البيت جدي لكيت رغد كالبتها مناحه وجده تغلط عليها وهي تصيح
-اروحن وحدي ما اروحن وي سلطان
صاحت عليها جده
-وحدج حتى آخلي شعلان يعدمج.
عاينتلي ام صــيهد كالتلها وتتوسل بيها
ام صــيهد::هاي ريمه تروح وياكم ولج يمه شمالج تسودنتي بهالمغربيه
ريـــمه ::رغد انه اروحن وياكم لان نريد نمر الامي هم.
وهي متخبله تبجي وجده تتهدد عليها طلعت البيتنه حاجت سلطان گال
سلطان :: ما اعضها اذا راحت وياي وحدها.
ريـــمه :: يجوز البنيه رجلها ما يرضى، ميخالف فـــدوه العينك هيه مدري شبيها وبس تبجي لا تزيدها.
سكت يدخن، لبست زين وطلعت صعدت وياه بالسيارة لمن اجت عمه ام صــيهد ووياها رغد، صعدتها وره وحاجت سلطان اول ماحرك السيارة گالتله
رغد :: مبروك خويه الله يهنيك ويسعدك ويجعله زواج الدهر.
تحجي والغصة خانگتها درت عيني ألها مستغربه وهو الجكاره بحلكه وخرها ورد بنفس النبره
-يبارك بيج..... سكت شوية وهمس بصوت ناصي "خويه"
درت عيني الرغد شفايفها يرجفن ماتريد تبجي تعاين من الجامه للشارع وفاتحه عينها حيل تقاوم بس ماكدرت نزلن دموعها على خدها مثل المطر.
عاينت السلطان يرفع راسه للمرايه يشوفها ويتحسر بقهر دك گـــلبي بخوف شنو الجآي يصير، لمن وصلنه الشارع عيالها مسحت دموعها ولزمت جنطتها، وصلناها لبيتهم نزلت بدون ماتحجي ولا كلمة ومشت حانيه ظهرها ما تلتفتت بس عيون سلطان مافارگنها
مديت ايدي على ايده
-سلطان.
التفت عليّ عينه تلمع حرك السيارة بدون ما يحجي وإنه الافكار براسي تخوف، ردينه للبيت هو وصلني وراح صاحت فرح مرة مرتضى
-العروس تگول اريدن دجاج على العشه، تشرط الجايفه
طبيت للمطبخ واني احجي
-ميخالف عروس ومن حقها.
-وانه بعرسي ثاني يوم امج كومتني للشغل.
-شوف شمسويه والله عاقبج بأمي، والاء يجوز مسويتلها شي زين بليلة عرسها امي راحت لهلها زعلانه.
احجي واشتغل وهيه نگلب وجها، ما اريد انطيها مجال حتى ما ياخذها الواهس على مرّة سلطان حتى لو مبينه خبيثة وحقيرة تضل مرته وما يرضى واحد يمسها بشي هذا الاعرفه باخواني.
وي الصلاة بدوا يردون للبيت وطب ابوي گال
-اريدن دشداشتي النيليه ريمه خل اروحن ارد امج.
ضحكت مكيفه وفرح من يمها ضحكت واجت يمي همست
فرح:: الاء راح تاكل تبن امج ردتلها.
عفتها ورحت اضــحك، طبيت الغرفة اهلي ادور على دشداشة ابوي الرادها ماهيه ما ادري امي وين مخليتها فتحت الكنتور اعاين وادور بين الدشاديش المسفطة شفت شي نيلي وما ادري اذا دشداشة لو لا، جريتها من بيّن الهدوم بس طلعتها طاح منها
"گراب خنجر"
عاينتله باستغراب هذا گراب خنجرنه؟ لو لا شلته من الگاع اعاينله واكلب بيه مناه ومناه، رجعته للدشداشة ورجعتها المچانها، اخذت غير دشداشة اطيتها اله وطلعت للباب عاينت لخنجر بيتنا معلك كامل هوه وگرابه.
گـــلبي مقبوض من كد ما الافكار البراسي سوده وما تقبلتها
حاولت انسى كلشي وأطلع اعذار ترضيني بس حتى ما أضل افكر.
رنـــه :: عيني على عفراء جهزت كلشي العرسها بنفسها بس چم مره ام صــيهد راحت اشترتلها وبعدين كله هيه تحضره لو ياخذونها الولد للدلاله لو للسوك بالكوه. عفتها وطلعت للحوش مغرب والشمس صايره برتقاليه
ادور حسين وزهره لكيتهم خاتلين وره البيت جايبين طين ويسوون منه هوايش ونعجات وبيت، بس شافوني خافوا ووكفوا يحجون
حسين:: بعد ما اعيدنها لا تطكين
زهره:: لا تططين.
درت وجهي اعاين للبيت جريت البرميل الفارغ خليته يغطينه وكعدت يمهم
-العب وياكم بس لا تكولون العفره
هزوا راسهم مكيفين واجت دجاجتي وفروخها يمنه، سويتلهم ثور جبير وخليتله گرون وهمه مسوين هوايش هواي وخرفان خليناهن كلهن سوه مسويلهن حضيرة گال حسين وهو يأشر على ثوري
-هذا جبير نخليه ابوهم
-اي ونسميه صــيهد .
شهك فاتح عينه وخازرني رفعت ايدي اهدد
-لا تخزر لا افكس عيونك آبو خيسه.
حسين:: وخري يله وخري لا تلعبين ويانه
-ما اوخر والحسين اطكهن هسه أخربهن كلهن، جيب ، جيب.
جريت الطين منه، رفع ايده سداها وطك ثوري سفطه بالگاع، تخبلت وبأثنين أديه كضيت هوايشهم وجعصتهن رجعتهن طين
بجه حسين يصرخ عبالك مطبرته يغلط عليّ
حسين:: الهايشه ام الگمل.
كضيت الخيزرانه مال طــروادة وكتلته بيها وهو لم الطين سواه طوبات وركض وراي يريد يطكني شردت للبيت اصيح على عفراء.
عفراء:: ولك ولك حسين يااا يااا تريد تطكها؟
حسين:: طكتني ام الكمل طكتني الهايشه خطيه انتِ والله خطيه كتلوج طــروادة وصيهد ضليتي تبچين أهئ أأهئ.
يعيب علي ويغلط هجمت عليه اريد اكتله وكضتني عــفراء وانه اشيل بروحي واركعها بالگاع
-والحسين اكتلك الخايس الووووصخ يووميه نشر فراشك ها ها احجي احجيييي.
وهو يمشي ويعيب علي يقلد شلون طكاني طــروادة ذاك اليوم
-اكضك والحسين اذا ما كتلك الكسلان الوصخ المجعج
باع رجليه كاتلهن الوصخ.
نزع النعال ورفع رجليه يراويني شلون بيض ويلمعن
حسين:: احلى من وجهج هذا الخايس ام عيون الخايسات، اذا ما اكل الصيهد تكول عليك ثور.
جرته عفراء من اذانه بجه يكلها
حسين:: هيه هاي شني يوميه تكلي العب وياكم بالمرجوحة وبالطين ولا تكولون العفراء، الخايسه.
عــفراء:: ولك لا تغلط لا تغلط اختك وأكبر منك اشلع اذاناتك والله.
حسين:: ختوووولي.
جرت اذانه حيل مايرضى يتنازل لمن كالتله اجويك گالها
حسين:: بعد ما اغلط ولعباس، بس كليلها بعد لا تجي تلعب ويانه.
رنـــه :: غصبااااااااً علييييك عيني.
عافته عفراء وانه واكفه اتشمت بيه لان تأدب بس دخل للحمام يغسل حسيت الخيزرانه نزلت على رجلي طفرت شارده وهي وراي وتصيح
-الزعطوطه اذا ما كطعتج.
طبيت للغرفة وسديتها اصيح عليها
-عكب باجر تتزوجين وافتك منج.
-يوميه اجي اكتلج ولا تفتكين.
-ام منذررررر عيني ام منذوري يوديلج رسااايل ام الرسايل.
عبالي ما تكدر تفتح الباب اشو هاي دفرته علي بكل حيلها وفتحته صعدت فوك المخاد ولازمه مخده وحده احمي بيها رجلي
-يله يله والله ما اعيدها يبوووووي يبووووي.
بس وصلت يمي دفعتها وشردت اضــحك طلعت من باب الهول شفت باب الحوش مفتوح شوية وكبل لا ينسد. لمحت واكفين صــيهد وبريا ووهب وسليم وطروده جايين من الكيعان ، وحسين يمهم بأيده الثور مالي المجعوص
نسد الباب وره حسين، ركضت للسياج بكل مچان مسويتلي فتحة عاينلتهم كلهم مركزين وياه وهو يشكي الطرواده علينه انه وعفراء النوب دار الصيهد گاله
حسين:: سوت ثور شگده شكبره وخلتله گرون تكول نسميه صــيهد.
عضيت اصبعي متحلفه بحسين، والولد طاحوا بالگاع يضحكون الا الغضب صــيهد مركز وي حسين، طــروادة سد حلكه وصيهد يكله
صــيهد :: عوفه يابه خل يحجي، حسين ياهي السوت الثور
حسين:: اختي.
صــيهد :: رنـــه؟
طــروادة:: نجب وسد حلكك لا تمسلت، حسين قصدة زهره طفله وشافتك جنك ثور سمته على اسمك مابيها شي.
حسين:: لا رنـــه مو زهره.
وهـــب :: ماخذينك رمز للقوة شبيك لا تضوج.
بريا:: لا تضوج صــيهد الثور يعني قوي.
دار عليهم خازرهم، عافهم وراح، ركضت للمطبخ سويت روحـــي اشتغل وي عفراء واحضر بالعشه، دخل طــروادة للبيت سلم وانه حتى ما رديت گال
- رنـــه مو عيب تكولين على صــيهد ثور.
-انه؟ ماكايله.
حسين:: جذابه ولعباس كالت
رنـــه :: جا حسين يكول على جدي شعلان" گرميده"
حجيتها وسويت روحـــي زعلانه شرّدت للغرفة لمن صبوا العشه ورجعت اكلت، وره ساعة نقهرت على حسين وزهره اخذت اللايت ورحت سويتلهم طين كعدت اصنعلهم هوايش وخرفان وسويت فروخ اثنين بنيه وولد عود حسين وزهره، عفتهن وكمت غسلت، اعاين لدجاجاتي وفروخها الكبرانين چالات على السياج ونايمات.
فتت للبيت بلا صوت اخافن من عفراء لمحتها بالغرفة تنوم بحسين وزهره وتعلم بيهم يحترموني، نقهرت بعد ما احاجيهم واتعارك وياهم، دورت طــروادة ما لكيته طالع،
مشيت للحوش واسمع صوت يدندن من الدوانيه عبالي سجاد وعبود اثنينهم هناه تمشيت بهدوء مديت راسي شفته بس عبود دفرت الباب فز
-ها شلونك، وينك اليوم كله مختفي.
ضحك يباوعلي
عبود:: وي سجاد.
-وينه شعجب مخليك بوحدك؟
نزل عينه عود زعلان گال
-اظن نساني
بس حجاها اندك باب الحوش وصوت سجاد يصيح
-صاير تنساني عبودي.
مشيت بسرعة للهول دخلت وعاينتلهم من الشباج صاح عبود
-تعال.
سجاد فتح باب الحوش وعبود طلعله من الدوانيه فاتح ايديه اثنينهن اله ويدندن بنفس القصيدة
عبود :: بصبي العيون اطبعت صورتك
يا نفس روحـــي وطيبة نسمتك
فوگ الدليل مطرزه محبتك
وتريد مني انساك يا سلوتي.
وصل يم سجاد وواحد حضن الثاني بكل حيله، طبوا للدوانيه سوه.
بس شفت عفراء طلعت من الغرفة بسرعة رحت غسلت بدلت ونمت شارده لان ادري بيها تريد توصيني ما اريد اتخيل بيتنه بدونها.
كعدوني حسين وزهره الصبح ناسين عركة البارحة
-ما اروح للمدرسه انه، انتم روحوا
عفتهم يتناكرون بالغرفة وكمت شفت عــفراء بالمطبخ كاعده على البريمز تسويلهم سياح، اكلوا اكلوا من تتزوج عفراء بعد ياهو يسيحلكم،طــروادة واكف يم الطباخ يطك بيض ويحجي وياها،
رجعت ليوره من شفت الموضوع بيه اسمي گالها
طــروادة:: تغلط رنـــه هواي
-طايشة بعدها شوي شوي تتعلم.
-اي، النوب عادت صــيهد، وهذا متسودن منها.
-صــيهد عاقل يخلي عقلة وي عقلها شسالفة.
-غير صار مطي، كتله والحسين خوتنه تخرب على رنـــه كلشي ولا تحاجيها.
-انتَ هم على كيفك زحمه، كهلان مو كلش تعادي صــيهد، ورنه ياخذها الواهس تضل ماتحترم واحد.
طــروادة :: لا جا انا ليش طكيتها وحاسبتها غير حتى ما ياخذها الواهس، آطيح حظها من تغلط.
رنـــه ::دار شافني فركت عيوني عود هستوني طالعة من الغرفة غسلت وصليت طلعت للحوش اريد اجيب الهوايش السويتهن البارحة لحسين وزهره شهكت مصدومة وانه اشوف دجاجتي وفروخها مذبحات ومشمورات صيحت ابجي واكض بيهن كلهن مذبحات.
طلعوا عــفراء وطرواده يركضون وحتى عبود فز واجه، ابجي بصوت وهمه مصدومين يباوعولهن
رنـــه :: هاااسكي ذبحهننن والله امووووته والله
طــروادة :: گومي لا تبجين.
عبود :: هاسكي البارحة مربوط إنّا ربطته
ابجي وايديه انترسن دم منهن وعبود يجر بيه گالت عفراء
عــفراء:: خاف صــيهد؟
رفعت راسي عفت الدجاجه بالگاع ووكفت ارجف كلي
ركضت للباب وطرواده ركض وراي كاضني صيحت بس اريد افلت من ايده لو اشرب من دمه مايبرد گـــلبي .
-هددددني هددني وعلي امووووتنه الحقير ابن الخره موتهننن.
وهًو يسد بحلكي ويدفعني للبيت صيح بعصبية
طــروادة :: كاااافي.
-بجااااه الحسين يااا صــيهد يذبحونك مثل ما ذبحتهن بجااااه فاطمة الزهره تمووووت يا صــيهد.
اجاني طــروادة بعصبية سد حلكي وحضني الصدرة
-لا تدعين لا تدعييين، اششش والله اطيح حضة اذا هوه كااافي لا يحترك گلبج راح يصير بيج شي خرا بيهن ولج كااافي.
واني متخبله ابجي بحرگه جراني للبيت وصاح على عبود
-اخذهن ذبهن بعيد
طبينه للبيت وهو ما عايفني كعد وحاضني الصدره وانه ميته من القهر أبجي بحرگة
-وتكلي ليش تغلطين عليه شفته شسوه شفته؟؟
-انعل والديه والله، واجيبلج من هذن الزينات عليمن قاهره روحج.
-هذن انه لميت بيضاتهن بيضه بيضه وكففتها وفرحت من طلعن وربيتهن يوميه اديربالي عليهن والحقير اجه ذبحهن.
عــفراء:: يجوز مو هوه رنـــه، انه هيج گلت صــيهد.
رنـــه :: لا هوه هوه لان گلت عليه ثور ولعباااااس لو تموتني يا طــروادة بعد ما احترم صــيهد.
مسح عيوني ورجعني الصدره متحلف بصيهد
-والله والحسين والعباس باجر اسوي ثور هااااكده واكتب عليه صــيهد، شوفوني وعلي شوفوني انه اله اعلمنه شلون يذبح دجاجاتي.
جر راسي عليه اقوى
طــروادة:: كافي ولللج، هسه يجوز مو هوه؟
-هوه لو صــيهد لو هاسكي ياهوه الكتلهن اموتنه.
-عوفي هاسكي خلينه على صــيهد هوه هوه انا هم اگول هوه.
كمت من يمهم رحت للغرفة ابجي عدل ومتحلفه بصيهد، خلصت دموعي وكمت علمود عفراء باجر عرسها.
"""""""""""""
وهـــب :: وتكلي امي ليش تنام ببيتك وماتنام هناه غير هذا من صباحيات الله يكعدنه بالدفرات، باوعتله روحـــي طالعه صاح
شعلان:: گوموا للگيعان مــيثم وبريا من البارحة يم المكاين، بادلوهم.
رجعت لفيت راسي وانا احجي
-ولد الروسيه هذول تموت عليهم.
رجع دفرني وخرت البطانية خازره
-يله وخر ولا تمد رجلك عليَّ مرّه الثانية.
وكفت روحـــي محروكه وابوي واكف بوجهي والمشعول يغلط ويهدد
-ياااابه رووووح شخبصتنه، احاسبكم واحاسبكم هوه انتَ ليمت ما محاسبنه شنهو البعد ماشفناه منك، وخابصنه شعددددك شعدك.
رفع ايده ابوي طكاني كدام جدي المنعول
-تريدنه مدمغة مثلك مو؟
وليد:: صووووتك ما اسمعنه امشي اخذ صيهد وروح للگيعان يله.
شعلان:: لا مو للگيعان، هسه يرحون للمرعى بدل الرعيان يسرحون يله خلني اربيكم من جديد طيح حظكم شامل ماضل بيكم واحد خير.
وهـــب:: نسرح ليش لا مثل عمي شامل فـــدوه الگلبه علمنه شلون نرعى حلالنه.
رفع ايده يريد يطكني جروني امي وابوي غسلت وجهي وطلعت للحوش صــيهد متانيني مضيك عينه وخلكه بخشمة
-ما اجيت وياي ردت اكتل جدك وعشرة يله كضوني.
صــيهد:: امشي يله مــيثم ضل يدخن من امس بايت بالمكاين.
-هههههههه عاقبوني اروحن للمرعى اسرح وانتَ وياي.
خزرني ما راضي وطلع ابوي يحاجيه ويتوسل بيه يرضى يروح
وليد :: جدكم بويه جدكم لا تكسرون حجايته
صــيهد:: احتركت روح جدي وروحك وياه،يشهد الحسين اذا ماشبعت ذيابة البر بيهن.
وهـــب :: صعدت وياه ساكت النصّ الدرب ودار عليَّ صاح
-بعدك تشرب هذا السم ولك.
هزيت راسي لا ودرت وجهي اعاين من الجامه، لمن وصلنه للمرعى، صــيهد كعد يشرب گهوه ويعاين للولد المخلينهم يرعون الحلال رفع عينه عاينلي صاح
صــيهد:: امشي اسرح، اخذهن ليغاد واكطفلك وحده للذيابه.
-والله انتَ گوم اسرح انا ما اعارف.
جر العصا وگاملي ركضت منه شارد، ضلينه ساعة كاعدين متونسين كون دوم هيج يعاقبنه كلشي ما نسوي بس نعاين ونشرب گهوه شويه واجونه الرعيان واحد منهم خله عصته بأيدي وگال
-خابرنه عمي الحجي يگول خل آلولد بالحلال مناه للعصر
صــيهد:: انعل ابوك لا ابو عمك الحجي.
مافادت عصبية صــيهد عافونه وراحوا للصهوه اخذت العصا ورحت اصيح
-هووووي هوووويعه تعالن مناه نعل، صــيهد الهوش راح.
وصيهد كاعد منتجي على كرسي ومخلي ايديه وره راسه التفت عاينلهم صاح
صــيهد :: مو مهم الهوش، المهم النعجات اسرح اسرح وانجب.
-ولك مشن ليغاد صيح عليهن.
-تعالن.
وهـــب:: خرب تحجي صدك انتَ يربطونه بمچانهن يمعود جيبهن.
صــيهد::تعاالن.
-اجنك يرجفن من الخوف مو مــاسه وبدور هنه گووووم.
-والله لو يحتركن ما أگوم.
عاند وماگاملهن، الولد اليسرحون بيهن من شافوه ما يگوم راحولهن، گام جر بساط احمر فرشة وخلاله مخاد اثنين ، لف الچفيه على راسه ونام، خرب سروح ووياك ماينراد، انا هم عفت النعجات ورحت كعدت يمه ، العب بالتليفون.
شويه ودك تليفون صــيهد عاينتله كاتب
"بيرغ عراضة "
عرفته طــروادة غلس ما رد عليه
-چا ليش ما ترد
-مالك شغل.
-هم صدك.
سكتت وكتبت رسالة الطرواده
"احنه بالمرعى وشافك خابرته ومايرد عليك حقير اخوي"
طلعت من الرسايل رجعت اعاين بالمنشورات الحد ما سمعت صوت سيارة سلطان نزل منها طــروادة شفته شلون يمشي واجت ببالي حجايته
"بيرغ عراضة انا ما اطيح"
صحت عليه من بعيد
-اي بالله ما جذبت يوم الگلت بيرغ عراضه انا ما اطيح، ابن شامل الهيبه.
صــيهد :: انجب لا تتلوگله.
حجاها وكام وكف طلعله جكاره بين ما وصله طــروادة واحد يعاين للثاني بعتب
-شني متعاركين؟
طــروادة :: انتَ الذبحتهن؟
وهـــب:: ياهنه؟
صــيهد:: اي انا.
طــروادة::تحرك گلب رنـــه ولك؟
-جا ترضى تگول للفروخ هذا الثور صــيهد؟
وهـــب :: شصاير شصاير فهموني حاجوني كلولي شسوه صــيهد ؟
طــروادة :: زلمه شكدك شكبرك تعاند جاهل وتخلي راسك براسها؟ مسودن عاقل انتَ.
صــيهد:: وجاي مناك لهنا تحاسبني علمود دجاجات رنـــه؟
طــروادة :: واذبحنك لاجل رنـــه ولك تروح فـــدوه لدموعها خايب بجيتها عزيزة ابوي هاي.
وهـــب :: وكفت بينهم لان شفت طــروادة صدك اعصاب بس صــيهد يحاجيه ببرود، دار وجهه وراح طــروادة زعلان من صــيهد وهذا دخن ضل يسحك جكاير ويرد ليوره، عفته ماحاجيته .
اربع ساعات مرن واجوا ورانه الولد حتى مــيثم وبريا التعبانين ماضيعوا الفرصة واجوا يضحكون علينه.
ســليم:: عمي تلوگ هيه گوه هوه انتَ مال عصا وتركض وره النعجات
وهـــب :: والله انا افضل عصا واركض وراك.
بريا:: صــيهد هذا انتَ السبع مالنه هيبتنه النزامط بيه تاليتك عصتك وتسرح.
مــيثم :: صــيهد جبتهم الك مثل ما ردت، خلهم يسرحون وامشينا للگيعان.
وهـــب :: وكف صــيهد وهمه فلت وجهم يباوعون الميثم بحقد وبريا يگله
بريا:: مو انا اخوك!!
مــيثم ضحك وحاجاه بالروسي
مــيثم :: Хорошо, что ты мне сказал, я не знал, что ты мой брат.
حجه وخبل صيهد گبل خزره
صــيهد:: الف مره كايلك يمي ماتحجون هيج هسه شلون تقنعني انتَ ما سبيتني
مــيثم :: هههههه لا والله مو هوه گالي انا اخوك كتله زين من كتلي انت اخوي ماجنت ادري،اضــحك عليه.
وهـــب ::مشيت وي صــيهد وميثم ماد ايدي واضحك على ســليم وبريا، لمن وصلنه للگيعان مــيثم نزلنه وراح للبيت ينام مشيت وره صــيهد عاين الگيعان طــروادة شاف بس هاسكي ضل يتلفت يدور على طــروادة شافه طلع من الشط والغزل بأيده
مشه عليه وانا وراه.
وكفنه على صفحة وطرواده جنه ما يشوفنه صاح عليه
صــيهد:: تصاحب؟
طــروادة ::لا.
-يطبك مرض.
وهـــب :: اراقب ساكت اخذله شويه صــيهد رجع گاله
صــيهد ::گـــلبي اوجعاني الخايس لا تدير وجهك مني.
اجاه طــروادة وهوه يحجي
طــروادة :: چا گلبك ما اوجعك وانتَ تذبح دجاجاتها ليش؟ حركت گلها وبجيتها من الصبح؟
صــيهد:: ما ادري صارت بعد، تصاحب؟
طــروادة :: اصاحب بس بعد لا تغث رنـــه اموتنك.
صفكتلهم من تصالحوا گاله صــيهد
صــيهد :: بعد كرهتها رنـــه اشوفن دم سنوني ولا اشوفنها.
-عاد هيه تموووت عليك ، بالحسين تكرهك تتسودن منك.
صــيهد:: تروح فـــدوه العفراء، واخلاق عفراء.
طــروادة :: اكلك ما تنجب شو تحجي باخواتي گدامي؟
- لا تمسلت ماحاجي شي انا جاي اكلك فرق السماء عن الگاع بين عفراء ورنه .
وهـــب :: عفراء احسنها زلمه حوك وعلي بت عمي شامل يابه هيبتها من هيبة ابوها.
طــروادة :: بالحسين فلا تستحون، انا يا يوم جايب طاري وحده من اخواتكم وتحجون باخواتي؟
صــيهد :: هنه ياهنه اخواتنه؟ رغد متزوجه احجي بيها اختك عادي وبدور بگد السان رنـــه.
وهـــب :: ضحكت مدنك، يسوي روحه عادي عده وهوه طفر مــاسه وماذكرها، طــروادة هم ضحك فاهم، مشينه للگيعان ما ضل شي للحصاد.
"""""""""""""""
رنـــه ::شكد ما شردت من عفراء حتى ما توصيني لزمتني، جرتني للغرفة وسدتها درت وجهي منها ما اريد اعاين لعيونها وابجي گالت
عــفراء:: رنـــه، انه ادري مايحتاج اوصيج بس ميخالف حتى لا تگولين ما وصيتيني.
درت عيني الها عيوني متروسه دموع گالت
- احلى ما بالبنيه أخلاقها، رنـــه انه ادري بيج تردين تصيرين إنسانه قوية ومحد يوكف بوجهج، بس والله القوة مو بالغلط ولا بقلة الاحترام، ولا بالصوت العالي
من تغلطين وتقللين احترام وي هذا وهذاك هاي مو قوة لااا انتِ هنا تثبتين للناس قلة تربيتج وضعف شخصيتج، الهوسه والعربده والصياح وتكبير المشاكل هاي كلهن ما يمدن للقوة بصلة.
-انه ما احب احد يحاجيني غير اخواني اكره ولد اعمامي من يحاجوني على شي حتى لو غلط علمود هيج مرات اغلط.
-انا ابوس ايدي وجهه وگفه اذا ولد عمي يحاجوني لو شافوني مسويه شي غلط هذا من غيرتهم وحرصهم عليَّ، جا شسوي بيه ابن عم وصيت اذا مابيه غيره عليَّ.
دنكت ساكته گالت
-رنـــه راح تصيرين انتِ ام البيت هذا بيتج، حسين وزهره بعيونج تخلينهم، طــروادة عمود بيتنا هذا لا تقهرينه فـــدوه اموتن وعلي، وعبود رنـــه عبود لا تخلين واحد يضوجه وشيريد سويله فدوه.
-جا هم وصيهم عليَّ.
-والله وصيتهم واحد واحد.
سكتت امسح بدموعي جرتني الحضنها ضميت وجهي بصدرها وبجيت ، وخرتني من اجه حسين گالها
-جدي بالحوش يريدج.
وكفت بخوف وهيه مسحت دموعها وطلعتله مشيت وراها واكف بباب الحوش عوجيته بأيده وهيه وكفت بباب الهول گالها.
-عرسج باجر!
وهيه ساكته هز راسه متحسف
شعلان:: حصلتي الردتيه بس كون تشردين من القريه مو؟
-بزود طــروادة، طالعه منها بأذن الله.
-روحـــي روحـــي فلتي بس لوّ تموتين اخواتج الضلن مايطلعن من هالقريه ولا يوصلهن غريب لو اعارف اكتلهن
- الكاتبه الله يصير، مصيرنه وين ماصار مقبول.
حركت گلبه تفل بالگاع صاح عليها
-نكسه مثل امج.
فر راسه وراح. دفعت مردي بهوه شرجي.
طبيت جوه للبيت شويه واجت عمتي ام صــيهد عفتها يم عفراء وكمت طلعت للحوش فتحت حلكي مصدومة وانه اشوف دجاجات جديدات وحلوات كلهن ريشش رفعت راسي عبود واكف يم باب الحوش مبتسم
-انتَ جبتهم؟
عبود::جا شلون نخليج مقهوره.
-فـــدوه اروحلكم.
لعبت وياهن فرحانه بيهن بس مايصيرن عزيزات مثل الماتن.
جــويريه:: انتظر الليل ساعة ساعة حتى اصعد فوك بس اريدلي مكان وحدي اريد ابجي تعبـــت كلشي جاي يضل بگلبي الحجي السم الاسمعه من اخوالي وجدي وجده، وزوجة خالي شاكل الي من اول ما رجعت حاده اسنانها عليَّ، تجي البيت جدي بس حتى تحاجيني وتروح، لزمتني بالمطبخ منّ زندي وهي تحجي من بين اسنانها
ميلاد:: ابجيج دم انا انكتل وانطرد من وراج؟ سهله اشوفنج ويامن حطيتي راسج.
جريت ايدي منّها ساكته رجعت عليّ جرت اديه اثنينهن خلتهن بصدرها وهيه لازمه ايدي بقوة شكت دشداشتها وصرخت
-ياااا يمممممه يمممممه.
واني بس فاتحه عيني مصدومة واجر بأيدي منها اريد افلت روحـــي وهيه ملخت روحها ومجلبه بأيدي طبوا للمطبخ يركضون خالي وليد وخالي شاكر، واني من الصدمة اريد احجي ما اكدر
احس راشدي خالي شاكر على وجهي مثل السم، وإم صــيهد تدافعلي وخالي وليد يصيح عليها، عيني ما فاركت ميلاد شلون كدرت تبجي وكأنما فعلاً شخص مكتول تبجي وتلطم على رجليها تصيح
ميلاد:: بكد بزري وملختني.
ورغم خالي شاكر يضرب بيه ويجر بشعري عيني مافاركتها شكلها خلاني اشك بروحي اني فعلاً ملختها وضربتها جراني خالي وليد من صدر دشداتي خانكني ويصيح
-ولج صدك انتِ تمدين ايدج على مرة خالج؟
واني مثل العجينه بأيدهم لا اكول اي ولا لا بس اهز راسي لا وجده واكفه بالباب تصيّح عليهم
-حييل حييل.
احس بروحي انجريت من بينهم اندفعت ليورا وماسه وبدور لازماتني وصوت رج اذني رج وهو يصيح بوجهم
صــيهد :: انعللللللل والدديكم. ساسكم اشعله.
يغلط ويسب بيهم وخالي شاكر يتعارك وياه.
يكلوله طكتها وهو يصيح
-جذذذابه جذاااابه
وبيبي تصيح عليه "اطلع لا تدخل روح مناه"
مــاسه وبدور يغطن بشعري لازماتني، دار عليّ عيونه خازراتني بغضب صاح بصوت احس ايد مــاسه وبدور الازماتني رجفن
-مديتي ايدددددج عليهااااا؟
نزلت عيني إلها بجيها يثبت اني فعلاً ضاربتها يمكن صح ضربتها بلا ما احس، ما ادري ضربتها لو لا ليش هيج بجت بقهر يعني صح اني مديت ايدي عليها.
رفعت عيني العينه الخازرتني هزيت راسي اي فتح عيّنه بصدمة
ساكت وهمه يصيحون عليه ويسبون بيه، أشر الماسه بحاجبه اصعدن، جرني صعدنه فوك كعدت على صفحة گـــلبي يدك حييل والخنگه ببلعومي اباوع ألماسه وبدور ميتات من الخوف
اجت مــاسه بأيدها كلاص ماي غسلت وجهي وهي تدعي
مــاسه:: كسر بأيدك يا عمي.
واني بس ساكته وجهي احسه مشتعل نار تمددت بفراشي بس افكر مديت ايدي عليها لو لا واعيد كلشي صار بدماغي من اول مادخلت للمطبخ، درت عيني الماسه وبدور من اجاهن صوت صــيهد وكفّن خايفات يردن ينزلن بــدور مسحت على راسي تباوع العيني
بــدور :: لا تبجين وحدج يجيج القرين ضمي البجيه بس نصعد يمج ابجي خوش؟
هزيت راسي اي بس اريد يعوفني ويرحن، نزلن وضميت روحـــي بالفراش روحـــي تحترك حرك شلون بيه شنو المسويته بحياتي واجي الجحيم مثل هذا. ويجي حجّي عفراء براسي لوذي بسد قوي، منو القوي الاكدر أحتمي بيه.
محد محد يگدر يحميني من شرهم، خنجر جدي اخرته على رگبتي لو شكد ما حاولت احمي روحـــي تاليته يذبحني.
مــاسه :: نزلنه سوينه العشا انه وبدور، عمي شاكر حجه الجدي، وميلاد احته تبجي وتتمسكن ما ادري شلون كادره الجدي وبسرعة ينسى سواياتها العوج، ضل يتهدد على جويرية والا اذبح والا اصلخ كالتله
ميلاد:: صــيهد يحاميلها عمي ويغلط عليَّ.
صاح جدي بغضب
شعلان:: صــيهد ما يوصل البيت وبت نضال هناه.
وليد:: بويه واليرحم اهلك جا ياهو مالته صــيهد اجه لكاها عركه فرغ البت من ايدنه لا تدخل ولا حجه.
گلبوا جدي گلاب على صــيهد، بس كضينه العشا صعدنه فوك جــويريه نايمه، وبدور من الخوف هم نامت ضليت شويه وحدي اتابع مسلسلات الحد ماغفيت.
رنـــه :: الصبح اخذوا عفراء للعادوله، واجن بنات عمي يمي التمن، ضليت اركض هيج وهيج طلعت للحوش اريد اجيب المكناسه لكيت ريـــمه واكفه وتعاين لخنجرنه. وطبت جوه من اجيتها.
للظهر جابوا عفراء وام صــيهد تقرأ عليها معوذات خايفه عليها واحنه نصفكلها شكد ما گـــلبي خايف من فراگها شكد ما فرحانتلها، وهيه عينها مافارگتني، وزهره كاعده يمها، لمن اجت الزفه ضلت ترجف، طبن نسوانهم يهلهن ويركصن ويهوسن
"هاي الرادها وهاي التمناها وبت الزين الابن الزين جبناها"
ماسه :: خلن الكبوس عليها وكومنها يردن يطلعنها ورنه انتهت كامت تشهك وراها تسودنت نريد بس نسكتها انه وريمه ماكو ، عفتهن وكمت من سمعت صوت صــيهد يصيح متخبل
صــيهد :: اميييي وين شلون ما تروح وياها وينها.
-جدي كال محد تروح وياها.
سب جدي متخبل وراح جاب امي غصباً على جدي وداها وي عفراء.
طلع ورجع علي خازرني يسأل
-وهـــب وين؟
-نايم بالمشتمل من البارحة.
فتح عينه بصدمة صاح على بــدور، اخذنه للبيت بس طبينه جرله خيزرانه وراح الوهب مديت راسي من الشباج اعاينله دفر الباب دفرتين وفتحه كضيت گـــلبي بأيدي.
يتبع....
هم گولوا قفلة قوية🌚🔪
رواية أرض الخناجر الفصل العاشر 10 - بقلم الكاتبــة ايلول
روايــــة أرض الـــــخناجر 🗡️
بقلمي الكاتبة ايـــلول .
تصويت وتعليق بين الفقرات لطفاً💚
══━━━━✥◈✥━━━━══
احس البيه مو بيه
أهلي كتالي مو رجال..
انا كتالتي أبنيه
══━━━━✥◈✥━━━━═
مــاسه :: لطمت على خدي ميته من آلخوف هسه يگطعه الوهب شلون شسوي درت على بــدور حالها اتعس من حالي اثنينه خايفين على وهـــب من صــيهد
بــدور :: نروح نحميه؟
-ولج ننكتل وياه.
احجي وياها وارجف اعاين من الشباج، نزلت جــويريه تسأل شصاير، ماخلتها جده تروح ويانه البيت طــروادة،دارت عليها بودر تحجيلها، سمعت صوت صــيهد يصيح على وهـــب گـــلبي راح، خل اروح شيسوي خل يسوي.
طلعت بسرعة من بيت جدي لمشتمل وهـــب دفعت الباب ايدي ترجف وصيهد متسودن خانك وهـــب من ياخته ويصيح
صــيهد ::ولك ما تتوب انتَ حيوان شكاعد تسوي بروحك اموتنك والله.
صيح وطكاه راشدي بكل حيله، ووهب بس ساكت حتى ايده مايرفعها، دموعي على خدي خايفه اروحن واحاجيه، صوتي يرجف صيحت بخوف
-صــيهد لا تطكه اروحلك فـــدوه لا تطكه.
التفتوا عليّ إثنيتهم واني روحـــي رايحه جراه صــيهد حيل يعت بيه ويصيح
-خايفة عليك خااااايفه عليك وانتَ ما تخاف عليهن ما تفكر بيهن وانت تشرب هالسسسسم ابن النعال ولك احجي.
رجع طكاه على وجهه واشوف الدم نزل من خشم وهـــب ركضت اكض بأيد صــيهد ابجي واتوسل
-علييك العباس عوفه عوووفه.
دفعني حيل خازرني ويصيح
-وخرررري ولج وخررري.
وكفت ابجي ووهب يعاينلي ساكت عيونه متروسه دموع وصيهد مثل النار يريد يحركه ، يحجي بحرگه فتحت حلكي بصدمة من استوعبت كلامه وعاينت للگاع كلاص وبطل، شهكت ايدي على حلكي ، وصيهد روحه طالعه وكف بتعب يحجي وي وهـــب الكاعد على حيله ومنزل راسه.
صــيهد :: ما تخاف من الله؟ ولك جا خاف على عرضك خاف على اخواتك من تتسمم خاف على بت عمتك العايشه ويانه بنفس البيت ولك شكاعد تسوي برووحك.
صيح متخبل ووهب وكف خازره وعاط بوجهه
وهـــب :: الف مره گتلك لا تحجي هيجججج.
وصيهد تخبل جراه بكل قوه يطكه ويرجع يرفعه ويطكه بوكس على وجهه كطعه ويصيح
-ولك من تتزقنب يروح عقلك حالك حال الحيوووان تصير بهيمه لا عقل ولا فهم.
بجيت عاجزه احمي وهـــب وانه اشوف الدم غطى وجهه وصيهد ما عايفه كل ما اكض ايده يدفعني ويرجع على وهـــب، روحـــي راحت وفتحت عيني بصدمة شهكت وانه اشوف بنيه طلعت من الغرفة بعبايتها ترركض جرت وهـــب من ايد صــيهد وصاحت بوجهه وهي تبجي
ندى:: لا تضرررربه.
غمضت عيني وفتحتهن ما مستوعبه وصيهد ابتعد فاتح عينه على وسعها مصدوم، وهي وجها احمر من گد البجي ودموعها على خدها، واكفه گدام وهـــب اللي مابيه يرفع ايده ودايخ من كد ما صــيهد طكاه.
درت عيني الصيهد وهو يتلفت بيني وبينهم بصدمة، وكف وهـــب يمسح الدم من خشمه، جر البنيه خلاها وره ظهره وهيه تبجي بخوف ولزمت بقميص وهـــب من وره، ضحك صــيهد ما مستوعب.
صــيهد :: وهـــب وهـــب شكاعد تسوي انتَ؟ ووووهب، تسودنت ؟
وهـــب :: خلني احجيلك.
حجاها وصيهد تخبل لو بأيده يذبحه، رجع جراه خانگه وعيونه شايطه يصيح
-شتحجييييي ولك اشتحجيييي.
والبنيه بسرعة حطت روحها بنصهم تريد تطلع وهـــب من ايد صــيهد وهذا تخبل شلون كضت ايده دفع وهـــب وصاح بوجها
صــيهد :: وخرررري.
مشه بالهول متخبل ويمسح بأيده منين ما كضتها طب للمطبخ ورجع مغسل ايديه اثنينهن.
ووهب دار على البنيه يهمسلها
وهـــب :: اشش لا تخافين لا تخافين اخوي هذا.
وهي تبجي منهاره وتباوع الوجهه تهمس بصوت يرجف
ندى:: دم دم وجهك كله دم.
كعد صــيهد ايده على راسه ما مصدك وهـــب هيج يسوي
وهـــب :: خلني افهمنك.
وصيهد صفك أيد بأيد بحيرة
صــيهد :: شتفهمني ولك هههه شتفهمني انا امنعك من الشرب، طلعت تجيب بنات، اريدن اكدر استوعب سوايتك والله ما تنعقل.
وكف وهـــب بعصبيه مخلي اصبعه على حلكه
وهـــب:: اششش،لا تضل تمسلت لو تسمع وتفهم لو تسد حلكك وما تحجي حجي زايد.
وصيهد جر الكلاص شمره على وهـــب أجه بالحايط، صاح عليه
صــيهد :: وااالك عين تحجي .
وهـــب:: وداااعت امي انتَ فاهم غلط بس لو تسمع وافهمنك، بيش احلفلك فاهم غلط.
صــيهد :: بيش تحلف وانت نكس؟
دنك وهـــب ساكت وانه عيوني على البنيه مرعوبه حييل وكاضه بقميص وهـــب بأيد ترجف وايدها الثانية لامه العبايه عليها تشهك بخوف.
وهـــب:: أسمعني واذا حسيت انا مجذب عليك اكتلني بگلب بارد أنا راضي.
سكت صــيهد محتار مابيه يوكف على حيله، مكسور بسواية وهـــب ، التفت عليَّ مسحت دموعي گال
صــيهد :: امشي مناه مــاسه ردّي للبيت.
درت وجهي ارجف اريد آروح، اثنينهم صاحوا
-مــاسه.
التفتت عليهم دموعي على خدي
صــيهد :: كلشي لا تحجين خوش؟
هزيت راسي اي وطلعت.
وهـــب :: مشيت للباب وره مــاسه اريد اقفلنه، مفلش القفل، صاح.
صــيهد :: عوووفه عوووفه تعال.
رجعت يمه اعاين الندى الخوف كاتلها
-روحـــي للغرفة، لا تخافين تذكري شكتلج!
مسحت عيونها ترجف ومشت للغرفه، عفت صــيهد وطبيت للحمام غسلت وجهي من الدم ورديت يمه كاعد على صفحة يدخن الجكاره بأيده ترجف من العصبية، وخرها وأشر اكعد، كعدت على صفحة اعاينله.
صــيهد :: سولف شيخ وهـــب سولف يالماجنت تفوتلك فرض صلاة سوولف يله.
وهـــب ::شوف انا ما اجذب، احجيلك كلشي وداعت امي ما اضمن عليك شي.
صــيهد ::أحجي.
وهـــب :: البنيه ما عدي شي وياه.
-ههههه وشتسوي ببيتك تتعبد؟
-لا، شارده وساعدتها.
عكد حاجبه، طفه الجكاره يريد يركز وياي
-لا تلعب عليَّ يشهد الحسين أكسر ظهرك، البت منين؟
-لكيتها بالصحراء.
-شني؟
-لا، هيه لگتني مربط.
فر راسه يدور شي يطكني بيه.
-تتذكر من ســليم وبريا ربطوني بالچول؟
عاينلي خازرني
وهـــب :: بيوم الربطوني بالچول جتني سواده انا عبالي طنطل يلعب علي گالت اساعدك وتساعدني رضيت لان صوّت ذيابه يمنه وبس تعوفني وتروح ياكلني، من فكت ايدي گالت ساعدني بس اريد مچان اضلن بيه لمن الكه اختي.
صــيهد:: عليمن جاي تضحك ولك.
-وداعت خوتنه وانتَ اعز عدي من الهوه ماجاي اجذب عليك.
البت نختني ماكدرت ما اساعدها، امها وابوها ميتين ومرة ابوها ملوعتها شردت منها لا عدها عمام ولا اخوال بس اخت وحده دورت عليها طلعت بالبنان عايشه غاد ومايصير تروحلها الا لمن يصير عمرها ١٨.
رجع طلع باكيت الجكاير دخن من جديد حاير يصدكني لو لا
صــيهد :: يعني هاي سالفتك لو احجيها لمخبل ما يصدكها
وهـــب ::لا يصدكها المهم انتَ تصدك انا مامجذب.
-شلون رهمتها تعيش وياك بنفس المچان، وبعد تعال اكلك يا ارعن يا ساقط شلون تزقنب والبت هناه شكالك گلبك،بت مأمنه بيك ماتخاف وانت شارب تعتدي عليها؟؟؟
-انتَ شني سالفتك كلساع وگلت تعتدي حيوان انا شني؟
-تروح فـــدوه للحيوان اقلها ينكتل مره مرتين يتوب الا انتَ لو اكص منك لحم ما تتوب، البت ما تضل هناه.
-ما اعوفنها.
-تاكل تبن وتنجب، تردها منين ماجبتها.
-على كص رگبتي ماعفتها، انا اطيتها حجايه.
-تعاند انتَ؟
-يابه يا عناد!!! هسه انتَ صير بمچاني واجت وحده دخلت عدك، تطيهااا؟ لو تگطع زلم وما تعوفها؟؟
سكت خازرني طلع تليفونه من جيب الدشداشة، رفعت عيني البآب الغرفة ودي اكوم أطمنها واكلها لا تخافين ما اعوفنج لو يذبحني، نزلت عيني وحسيت لمحتها يم الشباج رجّعت رفعت راسي عاينت شايله البرده تعاينلي ودموعها على خدها، ابتسمتلها والله ما اعوفنج، درت عيني الصيهد من شفته يخابر.
صيهذ :: الو طرواده ....
كضيت بجي على اختك؟
تعال البيت هذا الچلب، وهـــب راح انحره.
سدّ التليفون خازرني شويه وطب طــروادة عيونه حمر وما له خلك روحه، عاين الوجهي وللبيت والكزاز الكسره صــيهد هز راسه راضي
طــروادة :: ياهو الكاتل ياهو المكتول؟
صــيهد :: تعال تعال حل مصايب ابن عمك.
عاينلي طــروادة بعصبيه
طــروادة :: ولك انتَ ما تبطل شرب؟
صــيهد :: هههههه ولك يا شرب يا دنيا هيه بس شرب اسمع مصيبته الثانية.
اتلفت بشك وصيهد يحجيله السالفه فتح عينه بصدمة
طــروادة :: وهـــب انتَ مسودن؟
وهـــب ::لا.
صــيهد :: لا وين، وهـــب عاقل واحنه مسودنين، وهـــب صح واحنه غلط، شلون يتنازل القديس وهـــب .
طــروادة :: على كيفك انتَ، جا شيسوي اذا بت نخته يردها؟
صــيهد :: اجاني المسودن الثاني، ماكتلك يردها بس ضلتها وياه نفس البيت تشوفها صح انتَ؟ وفوكها يسكر هناه ابن النعاااال، واليوم محد طالع من فطر الگاع باجر عگبه يطلع الف واحد وراها ويسوونك خاطفها واطيك للموت وهـــب هذا التريدده انتَ، ولك سالفتك غير الدم مايحلها، ويشهد الحسين سلف وراك اكتل.
طــروادة :: صح حجي اخوك وهب وابوك وشعلان وشاكر إذا دروا وهاي مو بعيده، يعاقبونك ويردونها منين ما اجت، وتكبر مايحلها شي بعّد تنكتل.
وهـــب ::لا تحاولون ما اعوفنها وعلي.
صــيهد ::سد حلكك شعلت روحـــي، ولك عرض وادم هاي زلم تتكاتل علمودها، شحجي وياااااك شلون افهمنك
طــروادة :: خافنه جذاب ماكو بت هاي مقلب.
صــيهد :: لا تحرك گـــلبي انت الثاني غير أنا شفتها
سكتوا محتارين، صــيهد حيل قافل ادري بيه خايف عليَّ وادري اذا احد طلع وراها ننكتل انا وياها، رفع راسه صــيهد وكف ورفع ايده يحذر
صــيهد:: اعقد عليها.
-ها سالمين شنّي السالفة؟
طــروادة ::وهـــب حجي صيهد صحيح، السالفة ما تنضمّ، والبت تطلع وراها أهل وعشيرة وكلبهم على عرضهم مايبرد الا بكتلك أقلها لو صار شي هيه مرتك
ساعتها بيها باب وجواب وينلكالها حل.
ضحكت مستهزئ اهز بأيدي
-ترا چم شهر ضلن واسفرها الاختها.
صــيهد :: تعقد عليها لو تطلعها مناه ومالك شغل بيها، يشهد الحسين اكتلنك لا تضل تجر وتعر بالسالفة.
ندى:: مسحت دموعي گـــلبي يدك حيل واكفه يم الشباك واباوعلهم، اخوه رجع خنكه بعصبية وهو عينه علي هزيتله راسي لا ما اريد يقبل بهيج حل، خل يعوفني اني الكالي غير مكان، رجع باوع الاخوه وهز راسه موافق، سديت البرده وكعدت على حيلي ابجي .
شسويتوا بيه يا هلي وين وصلتوني لوعات گـــلبي كثرن يا يمه،
ابجي بحرگه ولازمه الگلاده بأيدي، تعبـــت لشوكت اصبر لشوكت أضحي واتحمل همي شوكت يخلص.
رفعت راسي امسح بدموعي من دخل وهـــب سد باب الغرفة وبقى واكف بمكانه، وجهه من الضرب منتفخ ويم حاجبه جرح بعده ينزف، وارنبة خشمة حمره ، مشه بخطوات هادئة كعد كدامي.
وهـــب :: ليش طلعتي من الغرفة؟
ميلت راسي دموعي تتسابق على خدي
-خفت.
-من شنو خفتي؟
مسحت عيوني اشهك واحجي صوتي يرجف
ندى:: خفت خفت عليك خفت يكتلك.
زفر نفس بحسرة ولم شفته الداخل حلكه يحجي بهدوء
-أمسحي دموعج.
-باوع والله العظيم ما يطلع وراي احد والله ما اورطك بأي مشكلة والله والله ما اجذب.
لميت رجليَّه الصدري ابجي حايره شلون اقنعه غمض عيونه وتقرب اكثر كعد مثل كعدتي.
وهـــب :: آدري ومصدكج بس أخوتي خايفين عليَّ.
-زين عوفني اروح ادورلي غير مكان.
ضحك دنك ورجع باوع لعيوني هز راسه لا
-ما اعوفنج.
رفعت ايدي مسحت عيوني وهو منتظرني احجي همست وعيني بعينه
-اني ما اقبل بالحجوه اخوانك، وهـــب اني ضحيت بسنين من عمــري وتحملت كلشي والله تحملت عذاب زلم ما تتحمله، تعبـــت واكتفيت ما اقبل بعقد ....
باوعلي بشك
-راح يصيرلج يمي شهرين يا يوم شفتي مني شي مو زين يا يوم سمعتج حجاية؟ هسه صارت اذا عقدت عليج يعني تضحيه شني راح اكص جناحاتج؟ شسالفه.
-وهـــب حباب بس اسمعني.
-اكلج ترى لو ما طالعة من الغرفة وشايفج صــيهد جا عدت السالفة على خير لا من شاف ولا من درى، انتِ طلعتي وزدتي النار حطب.
وكف مبتعد من يمي مقهور رجع التفت علي حجّه بعصبية
-اول ما يصير عمرج ثمنطعش اطلكنج وتسافرين الاختج، اشو انا من جازفت وجبتج للقرية ماكتلج مضحي.
سكتت اباوعله حيل مقهور ماكتله شي يقهر هو كبّر الموضوع وكفت هزيت راسي خوش
-يعني وحده بوحده مو؟ خوش هاي هيه.
-انتِ البديتيها، من الاول "افك إيدك وتساعدني"
وهسه نكمل البديناه تسكتين اخوتي وترضين بالعقد وبالمقابل اكملج كلشي علمود سفرج الاختج.
وكفت كدامه ابتسمت رغم دموعي الكل ما امسحها تنزل
-ماشي قابله.
هز راسه موافق وطلع من يمي، بس سد الباب وراه كعدت على حيلي ابجي.
""""""
رنـــه :: ما جنت متخيله ابجي وره عفراء، احس تيتمنه من جديد لمن تزوجت، حتى اخواني ما ادري بيهم وين متمدده على رجل ريـــمه ودموعي على خدي، سحبتني من ايدي كعدتني ومسحت دموعي بأيدها.
ريـــمه :: كافي مو زين عليها تبجين وراها، كومي غسلي وصلي ادعيلها تتهنى وتنسعد، واحنه يمج هم اخواتج رنـــه.
هزيت راسي اي وكامت هيه لبست عبايتها حتى تروح طلعت وياها للحوش مشه وياها حسين وصلها البيتهم لان تخاف منّ هاسكي
غسلت وصليت دعيتلها من كل گـــلبي بس ما كدرت اكف من البجي لميت السجادة وكعدت بالزاويه حاضنه رجليَّه الصدري ودموعي على خدي والوم بروحي شلون كتلها تتزوجين وآفتك منج، مرت ساعة وانه اسمع صوت اخواني بالهول وصوت طــروادة يسأل عني گاله عبود "بالغرفة تبجي"
ومن اسمعهم يحجون ازيد ما ادري شبيه هلكد استصعبت روحتها ودمعتي ما نشفت شوية وطبوا عليَّ كلهم طــروادة شايل صينية العشا ويضحك
طــروادة :: ياهو اللازم يسولنه عشه احنه لو انتِ؟
عبود:: راح نخابر عــفراء نكلها ارجعي رنـــه موتتنه من الجوع.
ضميت وجهي بأيدي اشهك اجوا اربعتهم حاضنيني
طــروادة :: كافي ابويه كافي شسالفة ترى هاي هيه ماكو ربع ساعة.
عبود:: اسكتي وناخذج ويانه للصيد.
حسين :: اسكتي واسويلج ثور بأسم صــيهد.
حجاها وضحكني طــروادة طكاه خازره ماراضي
طــروادة :: عيب ما يصير.
ونكزت زهره تدافعله وتصيح
زهره :: لا تططه.
جراها طــروادة الحضنه يبوسها ويدغدغها وعبود يعيب عليها شلون حجيها ثگيل وحتى بالمدرسة رسبت لان ماتكدر تحجي بصوره صحيحه، گال طــروادة.
-يله كافي تعالوا تعشوا انا سويتلكم العشه اليوم.
عبود :: هنه بتيتايات وطماطه وخبز من الجدر شمسوي مفطح.
رنـــه ::اكلت وياهم كوه على روحـــي يحاولون يضحكون ويسولفون رغم كلهم مقهورين وكل ساع واحد ذاكرها مچانها على الصينية ضل فارغ وكلنه نعاينله.
وره العشا طــروادة ضل ويانه وعبود راح وي سجاد، طبيت للمطبخ انضف وعينيّ عليهم كاعدين بالهول طــروادة ماد رجليه وساند ظهره على الحايط والتليفون بأيده يتصفح، وحسين وزهره يكتبون عين للدفتر وعّين للتلفزون ، رفعت عيني للحايط بوجهي يصيرن صور أهل البيت الامام علي والامام الحسين والامام العباس، عليهم السلام غمضت عيني ادعي
"اللهي بحق علي واولاده اسعد أختي وهنيها.
كضيت تنضيف ورحت يمهم تربعت وكعدت جريت رجل طــروادة خليتها على رجلي وفلتت الدبوس من دشداشتي أدور برجليه شوك وهو كيف گبل گالي
طــروادة :: اااي هناه اكو شوكه تبزني باصبعي الچبير.
نبشت رجليه وكل شوكه اطلعها انقهر وياها تعبان ورجليه رايحات من الشوك، ونوم الليل محروم منه كل هذا علمود الزرع
اخذت تلفونه منه واجت زهره تضويلي، نزل راسه على المخده مغمض وحسين ركض جابله ابره يدور برجله الثانية احنه ندور برجليه وهوه نام.
لمن اندك باب الحوش، ركض حسين شافه واجه گال
-سلطان يريد طــروادة.
كعدته طلعله طبّوا للدوانيه سويتلهم چاي وداه حسين ولان سالفة سلطان تقهرني ما گدرت امنع فضولي، بس شفت حسين وزهره ملتهين رحت يم باب الدوانية اعاينلهم من الفتحة مال مچان القفل، سلطان يدخن وطرواده يعاينله شويه وگاله.
طــروادة :: كافيك عوف الجكاير راح تموت.
هز راسه لا بقهر
سلطان:: الجكارة ما تموت حجايتها الموتتني.
-ياهيه؟والله خبلتني هسه غير يحجي؟
طفه الجكاره وعاين الطرواده عيونه دم گاله
-رغد.
-ردينه؟؟ سلطان شنّي السالفة المره تزوجت وانتهت سالفتها وانت تزوجت كافي انسى.
ضحك سلطان والدموع تلمع بعينه حجه بغصة صوته رايح
سلطان:: گالتلي خويه الچانت تگلي يا عشگي.
حجاها وضحك ضحكه طويله جر الجفيه من راسه غطه وجهه وبجه يشهك، فتحت حلكي مصدومه بيه، كام طــروادة من مچانه كعد كدامه مخلي ايده على جتفه يحاجيه بهدوء
طــروادة :: عليك الحسين كافي، هذا انتَ الزلمه الكلف تبجيك حجاية؟
رفع راسه سلطان يمسح دموعه ويهز راسه لا ويحجي بغصة
سلطان:: صوبت گـــلبي من حجتها وجن شلت الصواب من گـــلبي الكلبها ساعة الرديت عليها وكتلها خويه، نمردت روحها كدامي ماكدرت تكض دموعها.
- شجابك عليها وين شفتها؟
-انا الوديتها لعيالها ههههه كالتلي تتهنى بعرسك خويه.
هاي حبيبة روحـــي انا العلمتها على العشك انا العلمتها شلون تحاجيني وشنو تكلي من تلاكيني
تالي تكلي خويه.
-لا تلومها مابأيدها شي.
هز رأسه سلطان ميت من القهر سمعت باب الحوش اندك على كيف وما اهتميت مركزه وياهم بس شفت حسين طلع للباب يركض، گال سلطان.
-ابد والله ما ألومها وادعي الله تنساني وتتهنى بحياتها لان ادري بيها بعدها تتعذب طــروادة وحگ الله احس دموعها يچون گلبي مو خدها.
-الله كريم يخوي الله كريم، توكل على الله وفكر بمرتك لا تظلمها.
-ما ظالمها بس والله ماكادر اتقبلها اعاينلها وأتمناها رغدي.
هم يحجون واندفع باب الدوانيه الخارجي طب صــيهد وكفوا اثنينهم مرتبكين، سلم على سلطان وكعد يمهم يعاين بشك، هسه الا تجي تغسل هالوجهه، صاح طــروادة
-چاي چاي.
رحت للمطبخ حميته ولا تستاهل واحد يسويلك چاي جديد، صبيت ووداه حسين الهم، رجعت اعاينلهم رجلي تكطعن من الوكفه بس فضوليّ اقوى، شويه وسلطان گام ترخص وطلع.
تلفتت هيج وهيج إشوف حسين وزهره وين ودرت للباب اريد ارجع أعاين صار بوجهي طــروادة فاتح الباب خازرني وكفت عدل بلعت ريك بخوف
طــروادة :: شتسوين هناه؟
درت عيوني منه هيج وهيج جراني من ايدي.
-شسمعتي رنـــه؟
-ما سمعت شي من گالوا صــيهد اجه اجيت أشوفه حتى ادعي عليه علمود دجاجاتي.
احجي مرتبكه وهو خازرني ما راضي
-ما اريد اشوفنج هناه تحرركي.
هزيت راسي اي وخرت شويه، طب وسد الباب حيل، رجعت يم الباب اسمعهم گاله
صــيهد:: هاه ياهو اليعاين؟
-زهره هاي.
-امم زهره كتلي.
عفتهم ومشيت ادعي عليه طلعت للحوش اباوع لشحاطته والله الا اقهرنك طبيت للمطبخ جريت سجينه ام المنشار وكعدت يم نعاله شكيت تك منه، اخذته ومشيت صيحت الهاسكي شمرته يمه واحجي وياه
-هاي اول مره اسوي جريمه واتهمك بيها ميخالف تحملني حتى اطيك اكل.
عفته ورجعت للبيت ركض اخذت حسين وزهره طبيت للغرفة انومهم.
""""""
وهـــب :: مشيت البيت عمي شامل من خابرني صــيهد محضر روحـــي. لحجيه طبيت للدوانيه تخنك من جكايرهم عاينلي بطرف عينه ما عاجبه، كعدت يم طــروادة گال
صــيهد ::لكينه سيد مو مناه راح نجيبه الليله يعقدلك يا مصخم يا خايس،حتى ما يحجي الجدك الملطم.
-اشكرك.
طــروادة :: كافي صــيهد انحلت ان شاءالله، كافي تلومه.
وهـــب :: مديت ايدي اريد اجر الباكيت منه جراه ما يرضى يطيني جكاره هزيت ايدي طــروادة كال شويه والولد يجون وصيهد يعاين الطرواده بشك گاله
صــيهد :: گبل لا يجون الولد، اكلك سلطان شبيه؟
دنك طــروادة ساكت ورث جكاره يله رفع راسه وگاله
-متعارك وي مرته.
صــيهد :: هااا، حسيت سمعت شي ما ادري جنكم حجيتوا بأختي؟
رفعت راسي اعاين الطرواده بشك شجاب طاري أخواتي بالنص مسح وجهه حاير گال
طــروادة ::شني السالفة يا اختك شجابها بالنص، متحاجي هوه ومرته علمود أختها اسمها رغديه تريد تزوجها السليم.
وهـــب :: مو گالوا اخواتها كلهن متزوجات والبقيه صغار
-ها؟ اي بت عمها تعتبرها اختها شلون انا احسبكم اخواني هيج.
كام طــروادة فتح الباب للولد طبوا ســليم وبريا وميثم وجابوا وياهم سلطان رغم ضايج وماله خلك لعبوا دومنه وخطيه طــروادة كل شويه رايح مسويلنه چاي خلصنه لعب وكعدوا يقرون شعر گالهم طــروادة
طــروادة:: ما احجي انا تبوكونه
مــيثم :: اشعرلكم بالروسي؟
صــيهد:: لااا جذاب تسب بينه
بريا:: لا لا، انا امدحكم بشعر بالروسي اوكفولي يگول الشاعر الروسي أخناتون، صفگولي حتي اتشجع.
وهـــب ::صفكناله نضحك وصيهد يريد يگومله يكله جذاب راح تسبونه بالروسي تحمحم وحجه روسي لبگ
بريا:: Все вокруг меня ослы, я один принц.
اترجملكم بالعربي كتلكم خوتكم خوش خوه وصحبتكم تسوه .
مــيثم:: صــيهد بالحسين جذاب يگول كل اليمي حمير وانا وحدي أمير.
كاموله صــيهد وطرواده كتلوه، كلنه جنه نضحك الا سلطان بعالم ثاني منتجي على المخده يدخن ساكت، گال مــيثم
مــيثم :: عريان السيد خلف يگول::
أجيك عيون ذيب
وغيظ حيه
وغيمة مروه
وهبوب اعذيبي أهب
وبيك أذبل كل خضاري
وشبت الصفصاف أشب.
صــيهد :: لو تحط ايدك على القران وتحلف ما اصدك بيك ما عاشگ.
ســليم ::انتَ ياهو الحجه وكتله عاشك.وانا احلف محد بينه عاشگ غيرك.
ضحك صــيهد يطفي الجكارة بالنفاضه وضل مبتسم وصافن الجكارة طفت وهوه ضال يجعص بيها بالنفاضه، باوعنه واحد بوجهه الثاني ضل مبتسم وحده أضنه نسانه كاعدين
طــروادة:: أحم أحم الو يمعود صــيهد.
رفع راسه بفزة كعد عدل جر المخده خلاها بحضنه يعاين النه يسأل
صــيهد:: وين وصلتوا.
مــيثم ::دك القران انت ماعاشگ!
صــيهد:: عاشگ خالتك الروسيه، ما تنجب.
ســليم:: والله هسه تعترف ولك تعشگ من ورانه واربعه وعشرين ساعة تحاسب بينه، عمي بالحسين رايح ومنتهي انتَ.
طــروادة :: اول مره اوكف ضدك وياهم صدك اثاريك عاشك من ورانه.
مــيثم:: هسه شني باجر نروح نخطبلك؟
صــيهد :: اهوووه چلبوا واحد شلون ما يضحك.
وهـــب :: اضــحك سكته واوز بالولد عليه بله انا اخافن احجي يمي بريا شاورته" كله اذا ماعاشك يعني ما تهتم اذا كلنه العاشگها صــيهد ....
وبريا بساع اندفع وتحمس حجه بصوت عالي
بريا:: صــيهد صــيهد انتَ مو تگول انا ما عاشگ ولا شي.
-اااي.
بريا:: خوش خوش، العاشگها صــيهد.....
حجاها يضحك والولد مندمجين هستوهم يردون يضحكون واجتنه نفاضه الجكاير تون بيني وبين بريا نرگعت بالحايط وطفر كزازها علينه وكفوا الولد مصدومين بتصرف صــيهد وهوه خازر بريا بغضب
صــيهد:: السانك اكصه.
مــيثم:: شني السالفة صــيهد كاعدين ونتشاقى لو جايه براس واحد منهم وفاشخه شتسوي؟
صــيهد:: اخذه للدكتور يخيطه.
حجاها وگام طلع من يمنه زعلان كمنه وراه من ضل يصيح
طــروادة :: خيير خير شني السالفه.
وصيهد كاض شحاطته بأيده ويتهدد
صــيهد:: اطلع چلب ابن چلب اذا اطب البيتك بعد يعوف نعولت الوادم كلها ياكل نعالي ليشش.
-هاسكي ماياكل نعوله هاي سوالفك.
خزر طــروادة ودار وجهه لكاني اضحك شمر النعال علي لبس نعالي وراح ضحكنه عليه وطشينه كلمن راح البيته ل١٢ اجوني هوه وطرواده
طــروادة :: اول مره ما ادري اوكف وياك لو ضدك بسالفة عقد وهـــب.
سكت متحسر ودار عينه علي
صــيهد :: وانا شني مكيف بس والله هالبت وراها كسر رگاب وهوه بس هالواحد اضيعه طــروادة ؟
-لا هاي هيه حقك.
سكت حاجينه وهـــب ورحنه نجيب السيد، صاعد بصفه وهوه يسوق
-صــيهد.
التفت يعاينلي ورد عاين للشارع
-تضم عليَّ؟
-لا، شضام عليك؟
-خيولن، لو تحلف للصبح ما اصدكك ياهي هاي العاشگها.
ضحك متحسر رفعت ايدي طكيته على راسه
-راح رأح صفن.
-هههههه، وعلي طــروادة انزلك هناه اشبعنك دمغات.
-ياهي الطيحتك!
-"نجمة سلفنه"
-اويلاااه، يعني من ديرتنا، من القريه؟
هز راسه لا
-خل نمشي عليها لا تضيع منك وتضل تلقي عليَّ اشعار.
تحسّر بقهر وهز راسه لا، وصلنه للسيد خطيه فاهمنه غلط وكعد ينصح ويعلم كاله صــيهد
-سيد الولد اخوي والبت بنيّة عمي واهلنه مايرضون يزوجونهم رادوا يشردون وانا كلت اسوي خير ازوجهم واسكت الاهل بعد مايكدرون يسوون شي
-بارك الله بيك وليدي بارك الله بيك.
لمن وصلنه للقرية فرينه السيارة وره نزلناه كاضينه مناه ومناه نختل بيه احنه بس نريد نوصل الوهب واجاني هاسكي يركض السيد جر ايده مني شارد وجلب بصيهد يحجي
-ها ها وليدي انا اخافن من الچلاب.
صــيهد :: هاي عود انتَ سيد وتخاف من الچلب.
رفع راسه السيد يعاين الصيهد بحيرة سكتت هاسكي وأشرتله روح ضل يمشي ويرد يتلفت خايب روح مو وكتك هسه. طببنه السيد البيت وهـــب لكيناه نايم فاتح حلكه دفره صــيهد برجله
-اكعد السيد يريد يسلم عليك.
وكف وهوه مغمض عيونه مد ايده الي خليت ايدي بأيده جراني يسلم مغمض ويحجي
-اهلاً وسهلاً سيد اهلاً.
جبته براشدي فتح عينه عاين بوجهنه
وهـــب :: اعذرني مولانه هستوني نايم وشوي بعدني ما مستوعب بس اوكف خل استوعب وأحاجي وياك.
فرك عيونه وراح غسل كعدنه السيد بالهول ورحت وراه للمطبخ
-وهـــب شارب؟
-لا والله شسالفه بس لان هسه نايم ماصارلي ربّع ساعة.
-حاجيت البنيه، رضت؟
-رضت بس بداخلها ما راضيه.
-مانريد نحلف جذب، احاجيها أنا ميخالف؟ من وره الباب؟
ندى:: مسحت عيوني ووكفت لافه العبايه علي دك الباب ودخل وهـــب يباوعلي بحسره گال
-طــروادة يريد يحاجيج تعاي هناه.
رحت يمه وره الباب واكفه وهوه فتح الباب على كيف صوت ولد يحجي بهدوء
طــروادة :: السلام عليكم خويه.
-وعليكم السلام.
- خويه لو اكو حل ثاني احنه ما نضغط عليج ونحميج ونوصلج الاختج بعيونه، بس احنه وادم عرب وعشاير وسالفة تحمي بت شارده من اهلها وراها كاتل ومكتول وما تنسد، انتِ ترضيها وهـــب الساعدج ينكتل؟
رفعت عيني الوهب يباوعلي ساكت دنكت اهمس
-لا ما ارضى.
طــروادة:: الف رحمه على والديج، اخيتي كون العقد من نفس راضيه ونيه صافيه مانريد باجر عگبه نحلف جذب.
سكتت أعض بشفتي محتاره رجع گال
-ها خويه اخذ حجايه منج؟
-اي.
-الله يستر عليج ويحفظج، تعال وهـــب.
ندى ::طلع وهـــب من يمي رجعت كعدت وره الباب هادئة بس اريد گـــلبي يرتاح علمود نيتي تكون صادقة بالعقد شوية واجه وهـــب فتح الباب على كيف وضل واكف برا هو والسيد وياه، كل شوي تصير عينه بعيني سأل السيد اذا إني مجبوره ابتسمت اباوع الوهب دنك ساكت جاوبت السيد لا ما مجبورة، كمل العقد بوجود صــيهد وطرواده.
اخذوا السيد يرجعونه ووهب طلع من البيت .
رنـــه :: كعدت الصبح من وكت لاول مره، عاينت المچان عفراء بحسرة، كمت غسلت وصليت بالي يم طرواده بعده بالگيعان طلعت للحوش بعدها الشمس هستوها تطلع صعدت على گن الدجآج ورفعت راسي اعاين من السياج لمحت اثنين من ولدنه رادين للبيت المسحاة على اجتافهم، نزلت بسرعة ورحت من فتحات السياج اعاين زين شفتهم صــيهد وميثم.
ركضت لمچان هاسكي نايم هزيته هز وفتحت السلسله منه
-تعااال حبيبي تعال.
مشيته لباب الحوش فتحته اله وهمست
-شوووه شوووه روح اركض.
طلع يركض وانه بسرعة رجعت اعاين من فتحات السياج يمشوون بهيبه ويسولفون كل واحد جكارته بأيده ، وهاسكي راح عليهم يركض بلا صوت هاي الحلوه بيه وهمه شافوه اجاهم ضلوا واحد يدفع بالثاني وركضوا للنخلات كل واحد صعد على نخله.
كعدت بالگاع اضــحك متشفيه بيهم حييل، رجعت اعاينلهم كعدلهم هاسكي بين النخلتين وبس واحد منهم يحاول ينزل ينبح عليه ويرجع يصعد، اضــحك متونسه لمن شفت طــروادة اجاهم صاح على هاسكي راحله وخلاهم ينزلون.
طبيت للبيت ركض حطيت الچاي على النار طب طــروادة اول ما عاينلي كتله
-صباح الخير.
-صباح العافيه، ها ليش هاده هاسكي على الولد؟
سكتت أحك بشعري
-يا هاسكي؟
-يا هاسكي هيه مال چذب، صــيهد گبل گال هاي اختك هدته علينه بطلي رنـــه بطلي تعادين صــيهد زلمة شكده شكبره مو عيب؟
-كل ما اشوفنه اتذكر ذبح دجاجاتي.
-مو جبنالج غيرهن.
سكتت وهوه راح يغسل تعبان حيل، شغل التلفزون على دعاء الصباح وجابله بطانية من الغرفه تمدد بالهول صاح
-رنـــه راح انام من تسوين الريوك كعديني.
هزيت راسي موافقة هو ونام وانه طلعت للحوش اريد اكنسه منا لمن يكعدون كلهم واسوي الريوك، كنسته وجاي ارش بيه والمح شي يتلولح على السياج، تدنيت يمها، هايشه من طين مربوط برگبتها خيط ومعلكه بالسياج، كضيتها بأيدي اگلب بيها منحوت على صفحة منها"رنـــه " والصفحة الثانية "الهايشه"
اخذتها ورحت الطرواده انفص غضب هزيته من جتفه فز عيونه حمر وانه اصيح ومتخبله
-عاين شمسوي.
-شكوو؟
-عاين صــيهد شمسوي مسوي هايشه وعليها اسمي.
كعد على حيله اخذها من ايدي يعاين بيها وآنه أنافخ ميته من القهر
-وعادمني رابطها من ركبتها بخيط ومعلكني بالسياج، عود يعني اعدمج.
-خيولي انا اطيح حضه.
-زعطوط هوه ومخلي عقله وي عقلي؟
-صيري انتِ احسن منه وكبري عقلج لا تردين عليه، انتِ عاقله وعقلج يوزن بلد، صــيهد ترى مخبل عوفيه لا تدوخين روحج بيه.
هزيت راسي اي رجع نام اخذت الهايشه خربتها وحاولت انسى رجعت للحوش اطيت الدجاجات اكل وسمعت صوت ام صــيهد
-رنـــه يمه رنـــه.
رحت ركض فتحتلها الباب بأيدها سفطة خبز توه مخبوز
-صباح الخير
-صباح النور عمه، شوكت اجيتي من عفراء؟
-بالليل رديت يمه ماكدرت اباتن عدّهم!
-عفراء زينه.
-ياا مكيفين بيها متسودنين عليها والله ابو منذر هوسلها بعباته والمره فرحانه بيها، ورجلها عين البارده عليه ما مصدك ماخذها.
-يارب يارب تنسعد وتتهنى.
ضحكت وخلت الخبز بأيدي
-اعرف اخبز عمه.
-ادري چا سباعيه انتِ بس ميخالف اشتهيتلكم هالخبزات.
احذتهن منها وراحت كملت الريوك وكعدتهم طــروادة گوه كعد، صار اليوم ركض رحنه للمدرسة ومن رجعت اريد ابجي شلون تعبانه وارجع اسوي غده اول ما طبيت لگيت طــروادة طابخ تمن رفع راسه ضحك گال
-تعاي بله شوفيه شو صار حبه وحبه.
اجيت يمه هدرته وخليت عليه علاكه اضــحك
-هسه يصير زين.
-بعد انتِ سوي مرگه سلكتلج لحم انا.
هزيت راسي موافقة ورحت ركض بدلت ورجعت للمطبخ فرحانه لان فكر بيه وماخلاني أتعب وحدي.
وره الغدا راح وي الولد علمود الحاصوده للعصر وگب الصياح ركضت خايفه وعبود طلع يركض، عمي شاكر يصيح على طــروادة.
شاكر :: الحاصوده ما تمّر الگاعك.
طــروادة :: حاصودة أبوك هيه؟ شلون بله ما تمّر الگاعي
طــروادة يهد على عمي شاكر والولد كاضينه وعمي شاكر هم ولده كاضينه اجاهم جدي يصيح
شعلان:: جيبلك غيّر حاصودة هاي ما تحصد زرعك.
وطرواده تخبل اعاينله وميته من القهر شايطه روحه وبس يريد يلوح واحد منهم، والولد هم ما راضين على عمي شاكر وجدي ويصيحون عليهم
سلطان:: تحصد للسلف كله ومن توصل الطرواده ما رضيتوا بكيفكم هيه؟
يحجون ويگب الصياح بيهم گالهم طــروادة والشر يتنافض منه
-ارميها وما اخليها تحصد گيعانكم
شعلان:: خوش زلمه انتَ وترميها؟
طــروادة :: غصباً عليك وعلى كل شارب، ابن شامل انا وحگ الحسين افنيكم فني لا جد ولا عم يوگف بوجهي.
هد عمي شاكر عليه يريد يطگه والولد يجرون بطرواده للبيت وكل واحد يصيّح بصفحة، طبيت للبيت بسرعة وهمه طببوه للحوش متسودن بس يريدهم يهدونه صاح على سلطان.
-بالحسيين اكتنله ابوك خل يتجفى شري.
صــيهد:: سد حلكك كافي اطي مجال مو بكيفه ما تحصدلك فالتوه هيه.
دفع صــيهد بغضب طب للبيت ورگع باب الهول بوجهم وكفت على صفحة وحسين وزهره طبوا للغرفة شاردين، طب للمطبخ يغسل وجهه احمر ويرجف من العصبية، يسب بيهم.
مشيت وراه وكفت بالباب احجي بهدوء
-طــروادة بس على كيفك لا يصير بيك شي.
صاح بحرگه
-ولج حصدت للوادم كلها وصلت كاعي صاحوا ما تحصدلك شوفلك غيّر حاصودة.
-مو بكيفهم بس على كيفك لا يحترگ گلبك.
طلع من المطبخ ميت من القهر اخذتله كلاص ماي بارد شربه عيونه حمر وايده ترجف
-خاف جنت اسكت الخاطر الولد واگول اخوتي وزحمه، هسه لا والله حتى الخوة ماتوكف بوجهي.
-جيب غير حاصوده خيولون.
عاينلي بعصبيه يصيح
-وهيج خنيث انااا وارضى بحجيهم، كل سلف اله حاصوده وغصباً عليهم تحصد كاعي.
نحجي واحس اذني انطرشت من صوت الطلق صرخت وهوه دفعني على الغرفة طبيت اركض حاضنه زهره وحسين الگلبي اصرخ وهمه يبجون، واعاين الطرواده ركض جر سلاحه وسحب اقسام، وكف الطلق وبسرعة طلع عفتهم وطلعت وراه أركض خايفه وصوت عمي شاكر يصيح
شاكر :: ولك تنعلني طــروادة تنعلني.
ركضت بكل حيلي خايفة على اخوي واشوفن عمي شاكر التفكه بأيده والولد اجوه يركضون يجرون بيه وبس شافوا طــروادة طلع والتفكه بأيده ضموا ابوهم بظهرهم وولد بيت عمي وليد وبيت عمي خليل كاضين طــروادة يردون بس يجرون التفكه من أيده
روحه طلعت ينشال من بينهم بس يريد يفلت من اديهم اعاين الايده صبت دم وما عاف التفكه صــيهد يجر بيها كل حيله وهو ما يرضى يهدها ويحلف يكتل شاكر ماعافها الحد ما طاح عبود. بالگاع يشهك، فتحت عيني بصدمة وطلعت أركض متخبله
-عبود عبود.
كابلته ارجف واصيح متخبله، أجو يركضون وطرواده ذب التفكه واجاه چلب بأيده كوه يحجي
عبود:: عوف السلاح.
جراه طــروادة وانه ابجي متخبله وكفه مستند على جتفي ويهمس
-ليش طلعتي رنـــه.
ساكته بس دموعي تنزل طببناه للبيت وركضت اجيبله ماي ايدي ترجف وطرواده يغسل بوجهه يحاجيه بخوف
-اخذك للمستشفى حاجيني؟
عبود:: لا لا مابيه شي، هسه اصير زين.
شرب ماي ويعاين الايدي شلون ترجف يضحك وانه وطرواده ميتين من الخوف الولد صوتهم بالحوش يردون يطمنون عليه فتّت للغرفة وطبوا يمه يحاجونه اعاينلهم من الباب حسيت اريد عفراء اريد أأمن وما آخاف بوجودها.
كاموا الولد طلعوا وطب سجاد متسودن ماجان موجود يحاجيه بخوف
سجاد:: شصار ها ياهو وياك عبودي.
عبود :: ابوك رمه على بيتنا ههه يريد يكتل طــروادة.
اتلفت سجاد ما فاهم يعاين الطرواده.
سجاد :: ابوي وطرواده ينجازون بس انتَ لا يصير بيك شي من وره ابوي والحسين اكتله.
سكت عبود مدنك وسجاد ميت قهر وكف گاله
-رمه بيتكم انا ارمي بيتنه عبودي بس لا تضوج.
طــروادة :: لا سجاد لا تدخل خلك بعيد يردون يعاقبونك.
سجاد:: شيسوون خل يسوون.
حجاها وطلع من بيتنا، شوي وعبود نام، طــروادة طلع ووي صلاة المغرب رجع ووراه سيارات شرطة، وكف بره حوشنه، ركضت بخوف اعاين من السياج، شفته كاعد على الدرام يدخل، وبس طلعوا الولد وحاجوهم الشرطة تسودنوا يعاينون الطرواده وانه ما فاهمه شي لمن طلع عمي شاكر وجروه الشرطه يله فهمت
كل واحد بيهم يصيح بصفحة ولد عمي شاكر متسودنين على ابوهم يردون يجرونه من الشرطه ومن بينهم لمحت ريـــمه طلعت تركض وتصرخ متسودنه
ريـــمه :: يااااابه.
بجيت وانه اشوفها شلون تنشال وتنركع متخبله وإخوتها بس يردون يجرونها للبيت ادري بيها عدها الدنيا بجف وابوها بجف ثاني.
طببوها للبيت وسيارة الشرطة اخذت عمي شاكر بس راحت هدوا على طــروادة سلطان وسليم ومرتضى وهو كاعد هادئ
يدخن ساكت وصيهد ووهب وبريا وميثم واكفين بوجهه ولد عمي شاكر صاح سلطان
سلطان :: هسه تروح تتنازل طــروادة.
هز راسه لا وطب للبيت عاف الولد يتعاركون وياهم كعد يم عبود هادئ وانه گـــلبي نار عليه كد ما أنقهر اليوم، كام صله وصاح
-رنـــه سوي عشه الاخوتج.
طبيت للمطبخ اسوي العشا واسمع الباب كل ساعة يندك وما يطلع كعد عبود تعشوا هو وزهره وحسين، الوره العشا عبود كاله انا رايح السجاد، وطلع وطرواده ضل كاعد ما يريد يحاجي واحد من الولد.
طلعت برا اطي اكل الهاسكي رفعت راسي اعاين وكف النفس ببلعومي وآنه اشوف گيعانه تحترك شهكت والتفتت اريد اركض الطرواده لكيته واكف وراي يعاين للگاع ساكت نظرته تحجي ضيمه وقهره وتعبه، شهكت ايدي على حلكي وارجف
-كاعنه جاي تحترررك.
مشه بدون ما يحجي بهدوء طلع من البيت ركضت جريت عباتي واحجي وي حسين وزهره
-لا تطلعون هسه اجي.
طلعت اركض وراه شفت الولد راحوا يركضون للگيعان وهوه يمشي بهدوء من التفت وشافني صاح
-ردي شجابج.
صيحت ابجي
-ما اعووووفك.
جراني من ايدي ومشه باتجاه النخل النروح بيه كل مره انا وعفراء للــبستان، مو بنفس الدرب الركضوا بيه الولد للگيعان.
نمشي بين النخل ارجف كلي وعيني عليه وكف وسكتني من سمع صوت رنة حجل اتلفت عبالك وحده تركض وبرجلها حجل
اتلفت. يدور وانه عيني وياه والمحها وحده بعبايه تركض باتجاهنه دفعني الوره النخله وختل هوه هم لمن وصلت يمنه وكضاها منّ اجتافها.
فتحت عيني بصدمة وآنه اشوفها ملثمة وكاضه الدبه بأيدها وريحة النفط تفوح منها فاتحة عينها حييل خازره طــروادة وكلبي نمرد من عرفت هالعيون حجت كلمة كلمةً بغضب وهي بين اديه
" اليحرگ گلبي على اهلي أحرگ گلبه على تعبه"
يتبع.....
ايلول 💚