تحميل رواية «أرض الخناجر» PDF

أرض الـــــخناجر 🗡️

بقلمي الكاتبة ايـــلول 

تصويت وتعليق بين الفقرات لطفاً 💚

══━━━━✥◈✥━━━━══

ابوي الشال يا هالناس

مو شايل شخص عادي

والله لو يصح تبديل

ابدله وشرط بأولادي

وجعكم ماكل الدلال

وجعكم ماكل افادي

══━━━━✥◈✥━━━━══

طــروادة:: ثواني عدن وحسيت بخطواتها وره ظهري  خطوه خطوه تقترب وتدوس على السعف اليابس  وهو جوه رجليها ينثرث، وگفت وراي  درت عليها بساع  والضوه بأيدي، ضويت على وجها.

-هاجر!!!

اعاينلها وهيه گدامي متلفلفه بعبايتها وكاضه بأيدها ضبه مال اوراق لامتهن على صدرها، ضوه اللايت على عيونها شالت ايدها تحميهن من الضوه نزّلته احاجيها

- هاجر؟

حطت اصبعها على حلگها تسكتني وأشرت بأيدها على مچان بين النخلات بعيد ومظلم

-هاي الرسايل انتِ تكتبينهن؟

هزت راسها اي وتأشر نصي صوتك، اعاين بوجها واعاين لبيوت اهلنه، وخرت الاوراق من حضنها جرت ورقة منهن ومدتها الي اخذتها من ايدي ضويت عليها اقرأ

"صار سنين اتعلم الرسم حتى اگدر اوكف گدامك اليوم "

رديت اعاينلها مستغرب وما فاهم وهيه تأشر لبعيد مشت وتبعتها الورقة بأيدي خايف عليها من اهلها واخوتها لو دروا بيها بالبستان وبهيج ساعة.

مسافة ووگفت دارت عليَّ دموعها تجري وتأشر بأيدها اكعد

-لا، راويني الاوراق البأيدج حتى تردين البيتكم ابويه انتِ مايصير طلعتج وحدج وبهيج وكت.

شالت ايدها تسكتني وخرت الاوراق من حضنها شالت الورقة الاولى مدتها الي كل المرسوم بيها ابوها بالثنية الگدام بيوتنا بصف سيارته كاتبة جواها

"ردت اروح وياه للصيد وما خلاني سبقته وصعدت وره ضميت روحـــي"

عگدت حاجبي مستغرب من قريت التاريخ نفسه التاريخ المات بيه ابوي رديت اعاينلها احس حمل كل الدنيا صار على اجتافي.

-انتِ تعرفين ياهو الكتل ابوي؟

أشرت بأيدها أصبر ومدتلي ورقة ثانية ابوي واكف بباب حوشنه ويمه زلم اثنين كاتبه على كل رسمه اسم واحد خالي سهيل واحد عمي وليد وعلى صفحة راسمه هم ثلث زلم ما مبينه وجوهم كاتبه عليهم اسماء " راضي، علي شاكر "

وجواهن كاتبة

"ابوي ووليد بسيارة وعمي شامل راح وي خالك وولد غانم بسيارة"

كعدت على حيلي يم جذع نخله مهدود هد سنين صار سنين اريدن احصل بس راس خيط واعرف ياهو كتال ابوي.

كعدت گدامي وكلساع تمدلي رسمه وكلهن متشابهات بس لمن اركز بيهن الگه اختلاف بسيط لو برفعة الايد لو مسافة صغيرة متقدمها واحد منهم هزيتلها راسي فاهمها وفاهم طريقة رسمها كلشي بالتفصيل چن فيديو مصور.

واكفين يم الشط داير مادايرهم بردي وزور والبلم بالشط وبوسطه جهاز النتل مال الصيد، ابوي بجهة النتل وشاكر بالجهه الثانية، وبالبلم الگبالهم راضي وسهيل، علي ووليد على الجرف واكفين

الرسمه الثانية البلمين اثنينهم بنص الشط ابوي يصيد وشاكر يغرف، والبلم البصفهم، سهيل يصيد وراضي يغرف وكاتبة جواها

" عدتهن بعقلي ملايين المرات حتى ما انسى شي بس هسه صعبة عليَّ ارسم بالتفصيل ايدي ترجف"

جريت نفس اقوي روحـــي وانا هالطفله احسها اقوة مني بهالساعة، هزيت راسي گوه احجيلها

-ميخالف ميخالف ما اريدن رسم بس احجيلي.

هزت راسها لا ومدتلي ورقة ثانية البلم الصاعدين بيه ابوي وشاكر قريب على البلم البيه راضي وسهيل، ومدتلي غيرها نفس الرسمه بس المسافة اقرب والثالثة ما بينهن مسافة اصلاً طبگن بلم على بلم، وسهيل بصف ابوي اثنينهم واكفين على دوسة البلم وبأيدهم شگافة الصيد مربوط عليها واير من جهاز النتل.

عاينت الايدها موجوع گـــلبي وهيه عيونها تجري شلت اللايت الطاح من ايدي اخذت الرسمه منها ضويت عليها

" ابوي طايح بالشط، سهيل ينتله وراضي وشاكر اثنينهم بعمدان يطكونه،

"كلهم اشتركوا بكتله وواحد تستر على الثاني ولليوم واحد يهدّد الثاني ما شفت اكثر من هيج وخفت، جنت صغيرة خفت احجي وخفّت انسى "

عفت الاوراق بالگاع مهدود حيلي گمت من يمها للساگيه اغسل وجهي نار احس مشتعله بگلبي اخوته المنه وبيه غدروه، ولو اشرب من دمهم واحد واحد ما تبرد نار گـــلبي

درت عليها بأيدها اللايت وواكفه وراي بعد بأيدها اوراق وتأشر عليهن شالت وحده تراويها الي كاتبة بيها

-انتَ وصيهد يردون يكتلونكم ابوي وولد غانم اتفقوا عليكم.

-بس ابوج وبيت غانم؟ وليد وسهيل ما وياهم؟

أشرت بأيدها تشرح ما فهمت كامت للأوراق الضلن يالگاع جابتهن وجابت قلمهاا لفتهن وكتبت بظهرهن

"بكتل ابوك كلهم سوه.. وعليك انتَ وصيهد اتفقوا بس ابوي وبيت غانم.

-اكو احد يعرف هاي السالفة غيرج؟

هزت راسها لا

-هجوره ابويه انتِ ابد ابد ما اريدن تحجين يم احد وهاي الرسمات تضل يمي خوش؟

عاينتلي ساكته وأشرت بأيدها شراح تسوي

-مالج غرض... ردي للبيت وبعد حتى لو تسمعين شي لا تطلعين لا اهلج يدرون ويطگونج.

هزت راسها وحافطة دربها أعاين وراها ما تمشي عدل تخفي روحها بين النخل بأقل الدقيقتين بعد ما گدرت اميز وين راحت وحتى من شغلت اللايت وضويت ماشفتها.

""""

ريـــمه:: توني اغفه وفزيت على صوت قفل باب الكنتور فتحت عيوني، مشغل ضوه الغرفة وواكف يم كنتوره

-كهلان.

حاجيته وهو ما يلتفتلي قفل الكنتور وشال المفتاح خلاه بجيبة، اعاين عليه مستغربة دار وجهه علي عيونه حمر ووجهه عبالك واحد جان يعارك

-يمه شكو؟

مسح وجهه گوه يحاجيني

-ماكو شي نامي.

-شلون ماكو شي؟ حاجيني شصاير تعاركت؟

عاينلي بخزر حاط ايده على حلگه

-اششش.. نامي گتلج ماكو شي.

دار وجهه طلع من الغرفة گمت وراه مستغربة شبيه وويامن متعارك، لگيته كاعد بالحوش مدنك واديه على راسه عاينتله من بعيد ما حاجيته، ضل كاعد بمچانه وانه من شباچ الهول اعاين عليه، مناه لمن علاوي بچه طبيت للغرفة شلته من فراشه احاجيه

-ها يمه ها.

كعدته على الچرباية گدامي جاي اسويله باللممه وطب ابوه عاينله واجه يمنه تمدد عيونه على علاوي وعلاوي يرطن

-بببه

كضه من ايده تدنه باسها ورد تمدد ما يحجي حطيت علاوي على ايده وانطيته اللمه ساكته ضل يعاين بوجهه مناه لمن غفوا اثنينهم رديت علاوي المچانه غطيتهم وطلعت من الغرفة خابرت على سلطان ما مرتاحة.

رد عليّّ كوه يحجي مكعدته من نومه

-اعذرني كعدتك هيج وكت بس ردت انشدك

-لا خويه.. گولي.

-هم واحد متحاجي وي كهلان؟

-لا.. سلامات ليش؟

-خاف وي ولد بيت عمي وليد؟

-چنه كاعدين سوه وماكو شي سولفنه وضحكنا شني السالفة .

تحسرت محتاره

-ها يله جا يجوز لان تعبان

-شصاير؟

-ماصاير شي بس شفته ماله خلك عبالي متعارك وياكم.

نهيت المكالمة وياه وضليت كاعده بحيره مبين بيه شي وسالفة يخلي مفتاح كنتوره بجيبة ابد ما هضمتها من شوكت يقفله عليَّ؟ ضليت كاعده للصبح كعدت رنـــه

-يله رنـــه اكعدي وكعدي زهره حتى ترحون لمدارسكم.

لفت روحها بالغطه ماراضيه

رنـــه:: هم ردت عليَّ كعدت الصبح لا هلا ولا مرحبا.

-خايبه گومي مابيه حيل كلساع اجي اكعدكم.

طلعت من يمهن طبيت للدوانيه سجاد وعبود وحسين نايمين، كعدت حسين وعبود من يمه فز عاين السجاد شمر عليه مخده يريده يكعد وسجاد لو مدري شيصير مايكوم من فراشه اذا ما شابع نوم .

طبيت للمطبخ سويتلهم ريوك وهمه متحمسين حتى شمس كعدت وياهم وبجت من شافتهم كلهم مبدلين هدوم المدرسة وهيه لا شلتها اقنع بيها

-خيولون نروح انه وياج يم حور.

وهيه تبجي وتفرك بعيونها

-مااا.. مااا وياهم.

رنـــه تعاينلها بقهر لمن طلع كهلان ماله خلك روحه اخذها من ايدي مسح عيونها ويحاجيها بهدوء

-نروح للمحل نشتري؟

شبگت عليه تبجي وتگله

-وي لنه.

طــروادة:: ختولي رنـــه تعاي ناخذ حور ونمشي للدكان؟

هزت راسها اي زعلانه تدنت يمها رنـــه باست اديها ضايجه عليها وشمس تتزعل تدور وجها من رنـــه، وداهم عبود المدارسهم وكهلان حطها بحضنه كعد بالهول طبيت سويتله ريوك واسمعه خابر مــيثم گاله جيبلي حور گبل لا تروح للدوام شلت الصينية حطيتها گدامه اسأل

- انت بعد ما تداوم هسه مو؟

هز راسه اي ساكت وتدنى يتريك عشر دقايق واجه مــيثم جايب حور ومستعجل متأخر على دوامه ذبها بباب الحوش ومشه ..طبت حور تتگلب جنها بطه وعيونها يخبلن، تلكتها شمس ووحده شبگت الثانية يضحكن، كضتها من ايدها وطببتها للهوه تعلم بيها تسلم علينه باسها كهلان وبس كرصها من خدها جرتها شمس جابتها يمي بستها اضــحك.

وشمس كابلت خالها تريده يخلص ريوك حتى ياخذهنّ للمحل وبس وكف هيه هم وگفت وكضت حور من ايدها غسل اديه وكفتله بباب الحوش شافته رد طب للهول صاحت

شمس:: يله خالو.

طــروادة:: اي خالي هسه.

-يله.

-هسه اوكفيلي

كض تلفونه مدري شيبحوش بيه ضاجت تطك ايدها برجلها وتصيح

شمس:: اوووف .. يله.

طــروادة:: اصبري خالي اصبري هسه اجيج.

عاينتلي بزعل وتأشر على خالها عود حاجيه ضحكت

-كهلان يله اخذها ضاجت.

هز راسه اي بعده مايحط عينه بعيني، اخذ محفظته ومشه لباب الهول دنك شال حور لان مشيها ثگيل بعدها تشلع گلبه ومد ايده يكض شمس من ايدها ولا رضت خزرته وجرت روحها منه بزعل أشرتله نزل حور تغار وحور بس تضحك، نزلها خلاهن وحده كاضه الثانية من ايدها مشن گدامه وتبعهن وكفت اعاينلهم من باب الحوش اجاه صــيهد جايبله سويچ السيارة اخذه منه يضحك وي البنات وشال راسه الكهلان عكد حاجبه مستغرب

صــيهد:: شني شبيك؟

-ماكو شي.. بس اشتري للبنات واردلك سيارتك.

اخذهن حطهن بالسيارة وصيهد يعاين وراه لمن شافه شغل السيارة هز ايده ومشه، طبيت للهول لگيت علاوي فاز ومدري شلون نازل من جربايته وطالع من الغرفة يزحف ضحكت شلته الحضني ابوسه وهو يضحك غسلته وريگته تلفوني بصفي ماريا مراسلتني فتحت رسالتها كاتبتلي

-تساعديني انتقم؟

-يا ساتر منين تنتقمين شني شعدنا.

-بغلاوتي عندك ساعديني.

-ولج بيمن؟ وشعجب كاعده من الصباحيات؟

-هي مــاسه ما تتركني نام.

-ههههه شتردين هسه بيش اساعدج؟

-ترى انا تعلمت عراقي.

-ادري بيج

-بس عندي كلمات صعبات تساعديني بكل وقت تترجميلي؟

-امم فهميني ليش؟

-هو شي مو منيح

-دهر دهرج شمسويه بت الاوادم؟

-راسلت اخوكي الشرشوح من حساب وهمي من شان آخد حسابه واحذفوه متل ماحذف حسابي.

عفت علاوي وكعدت عدل اقرأ رسالتها كتبتلها

-صخام الصخمج مسودنه عاقله انتِ؟

-هيك وهيك.

حطيت ايدي على حلكي وهيه قافله تمسح حساب ســليم مثل ما مسح حسابها صورتلي محادثتها وياه مسميه روحها نور ويدلعها نونه طابتله من باب تشبهه اخويه المتوفي وهوه كاتبلها الله يرحمه شلون مات وهي حاجيتله قصه كلاوات لطمت على خدي من شفت اكو چم حچاية لبنانيات، وحاجين هواي من الليل للصبح كايللها حبيتج وهيه كاتبتله خجلتني كاتبلها اجي اخطبج وهيه طالعه ماراده عليه كتبتلها

-صخام الصخمج الطام اللطمج وين مــاسه عنج.

-والله لو تعرف تقتنلي.

-ووولج ماريا ولج مجفصه شكد بالبناني ولج نص حجيج وياه لبناني.

-لا لا كتله انا من بغداد وبغداد هيك يحكو.

-صخام بوووجهج ولج والله يلگفج ما تعبر عليه يطيح حظج.

-دخيلك ما بيخوفني بس يعطيني رمز حسابه احذفه وساعتها خليه يعرف.

حطيت ايدي على حلكي الخايسه جنه نلح عليها تحجي مثلنه ما ترضى وهسه حتى تلعب على ســليم ترگع رگع بالعراقي زعلت منها ما راضيه على تصرفها، عفتها تراسل وگمت حطيت علوش بالحجله يفتر يمي وانه اشتغل واعاينله لمن اجه كهلان جايب البنات فرشن حلوياتهم بالهول نزلت علاوي يمهن يتعارك وياهن وطبيت وراه للغرفة.

وبس لمحني طبيت سد باب الكنتور قفلة وشال المفتاح ضمه بجيبه، سندت ظهري على باب الغرفة اعاينله ليش هيج جاي يسوي غير قميصه وشال راسه عاينلي وگف گدامي عينه بعيني.. زفرت نفس بحيره

-شبيك وياي؟

دنك عيونه.. وانه ميته قهر من امس لليوم مدري شبيه لا هو الحاجي وكايل شنهي المزعله من عندي ولا هو الطبيعي.

-مو وياج.

-وياي وياي تحاجي الكل طبيعي وبس انه مجافيني من البارحة الهسه.

هز راسه لاا متحسر

-مجافي الدنيا كلها وكارها ومتمني لو ميت ببطن امي ولا هالعيشه.

يحجي بقهر وانه گـــلبي ينمرد وي كل حجاية تطلع منه تدنيت عليه رافعه روحـــي على اطراف اصابعي واسد حلگه بأيدي

-اسم الله الزهره .. شبيك ليش تحجي هييج؟

عاين بوجهي زفر نفس طويل ومد ايده على ظهري يشبگني ويلمني حييل الصدره حاجيته بصوت مخنوك

-تمرد گـــلبي من تحجي هيج؟ شبيها عيشتنا؟ اشو نعمه وخير شبيك بعد؟ كهلان يروحي.

وخرني من حضنه لم وجهي بين أديه

-لا يصير بخاطرج مني.. تعبان اعذريني.

حطيت ايدي فوگ ايده امسح عليها

-عاذرتك بس انقهر ما ودي اشوفنك هيج.

هز راسه اي ساكت اخذ چفيته وطلع تلاكه وياه ســليم يحجي على بريا گاله

-سجاد ما كعد؟

وكهلان مدري شجاه حتى وي اخواني مايحجي بس هز راسه لا گاله

ســليم:: غير يكعد، راح يجون العمال خل نكضي كاشي بيت هذا الچلب راح ينزل ويدردم شكد شيفكنه منه.

طب للحوش مبتسم ويحجي وي كهلان، بس كهلان مشه بدون ما يجاوبه دار ســليم عليَّ مستغرب عاكد حاجبه أشر وراه يسأل

ســليم:: شبيه هذا؟

-مابيه شي تعبان والله هو بزراعة الشلب يتعب.

هز راسه اي

-حگه والله خل نكضي بيت بريا ونمشي نعاونه.

سكتت وشمس بس لمحته اجته تركض ضحك ودنك عليها

-هلااا هلاا بشمسنا.

شالها من الگاع يبوس بيها ولحگتها حور بس شافها ضحك من كل گلبه مدري شبيه

-ياهي هااي حور

اخذها يبوس بيها وعلاوي اجاه يزحف وهو كلساع يبوس واحد اخذهم ومشه للدوانيه يشلعون كلب سجاد لمن كعدوا واجاهم عبود للتسعة ونص مشوا وي العمال يشتغلون وسليم يروح ويجي عليَّ ساعة ياخذ ماي ساعة چاي شمر تلفونه يمي

-حطيه على الشحن.

اخذته وحجيت متقصده

-خل يطفه شبيك خايف قابل عندك صاحبه وتخاف ما تحصلك.

عاينلي وضحك ضحكه طويله درت وجهي خفت اجفص واكله على ماريا حطيت تلفونه على الشحن باب الهول مفتوح الجهال يعاينون للتلفزون ساعة يتعاركون وأحير بيهم البنات عاقلات بس علاوي يمه يمه حسره وحده تصير يمه يملشها من شعرها مره مرتين بجاهن تالي شمس جابته براشدي خلته مايعرف شلون يزحف

ركضتله شلته وهوه فاحط من البچي

-ليش يمه شمس ليش؟

شمس:: شعري.. شعري كض شعري يجرني.. هيج

وتجر بشعرها تشرحلي

-خلي يجي خالج اگله عليه شلون يجر شعرج بعد انتِ لا تطكينه نگول الخالو وهوه يطكه خوش؟

-اي

ردت كعدت يم حور گدام التلفزون وبيناتهم صحن حاطات بيه اجباستهن ياكلن، اخذت علاوي صحت على عبود من شفته كاعد بالباب الصار بين بيتنا وبيت رنـــه اجاني يضحك

-هاك اخذ علاوي يمك.. يطك شمس وحور.

عبود:: جنه ابوه جان مشبعجن كتل

ضحكت وهو شال علاوي ومشه كعد بمچانه يصيح على ســليم وسجاد والعمال الوياهم يتشرط سووا هيج وسووا هيج سجاد يضحكله ويصيح عليه

-تأمر.

وسليم يصيح عليه

-هسه اجيك اطيح حظك.

اضــحك على سوالفهم وندك باب الحوش عبود طلع وسد الباب الثاني حتى من افتح باب الحوش لا العمال يشوفوني.. عدلت حجابي ومشيت بس فتحت الباب صارت بوجهي ماريا لابسه عبايه وحاطتها على وجها مغطيته ضالات بس عيونها مبينه.. وعود انه زعلانه منها ماگدرت عيونها ضحكني طبت للهول تهفي على وجها طكتني على ايدي تعارك

ماريا:: ليش تزعلين؟

-جا تنصبين على اخوي واسكتلج؟

-مو حذف حسابي ليش سكتيلو

شلت أيدي اهدد

-ديربالج تحجين لبناني اموتج مثل ماتحجين وي ســليم عراقي احجي وياي عراقي.

ضحكت تعتذر وحور عود تعرف هاي عمتها مشت كعدت بحضنها كعدت يمها اسألها گالت

-تقبلي ماسه ما تخليني اجي لعندك؟

-تخاف عليج اشوفنج واصيبج بالعين.

-هههههه.

عاينت بوجها متحلفه

-ولج والله ودي اگطعج ليش هيج شلج بهالسالفة؟ يعني هسه لو ســليم عرفج شسوين؟ مو يمشي يگول لاخوانج.

هزت راسها لا

ماريا:: اليوم ينطيني باسوورد حسابه وقتها احذفو منه وينتهي كلشي.. ريـــمه اتركيني اخذ حقي هو حذف حسابي بدون سبب ليش لحتى انا اسكت؟

سكتت محتاره ما مقتنعه اخذت تلفونها اقرأ وياها المحادثة يكلها ليش ما داومتي تكله مرضانه طكيتها على أيدها

-شني مرضانه؟ كليله مصخنه كليله طاكتني فلاونزه صخام شني مرضانه هسه يلكفج من جفصاتج الخايسه.

وهيه مكشره تضحك اخر رسالة كاتبلها

-تريكتي؟

وماراده عليه توها تريد ترد وانه اعاين وياها كتبت

-اي، وانتَ؟

دك صوت الرسالة بتلفونه يمنه وهيه فزززت بشهگه عبالها هوه واكف فوك راسها ضحكت وهيه أيدها على گلبها شلت راسي على صوت ســليم بباب الهول.. وكفت.  عدل وهوه عاينلها ورد عاينلي

ســليم:: انطيني تلفوني وسويلنه چاي.

هزيت راسي خوش اخذت التلفون ذب الجفوف من ايده يعاينلي مضيك عيونه فتح التلفون وانه اعاين وياه گبل طب على رسايلها درت الماريا خازرتها خاف يرد عليها ويطلع صوت الرساله، اشرتلي بأيدها لا تخافين وگبل مايرد عليها شال راسه يحاجيني

ســليم:: چاي يمعوده.

-هسه اصب.

ولا رد لمن وخرت منه طبيت للمطبخ حميت الچاي مرتبكه وماريا بادن رجليها ضلت كاعده بالهول والتلفون بصفها، عاينت السليم من الشباچ مدنك على التلفون ويكتب خبطت معدتي دهر الدهرج ماريا شجابج على هالسالفه.

عيوني عليه وعلى ماريا اشرتلها تعاي يمي وخرت حور من حضنها جابت تلفونها واجتني تهفي على وجها ذبت التلفون بأيدي وانه اريد الطم اعاينله كاتبلها

-بالعافيه.. شو ما تسألين على شي يخصني چنچ تعرفين كلشي.

غميتها اكل بأظافري وهي ماتدري شترد عليه كعدت بالگاع

-صبي الچاي خل افكر.

حطت شكر بالاستكاين وانه مكابله محادثته محتاره كتبتله

-ما اعرف شي ومو كلش مهتمه.

-ما مهتمه؟

-اي

-شكو تراسليني جا؟

-يعجبني اذا ماتريد احضرني.

دنگت ماريا تعاين وياي وتسودنت هيه بس تريده يثق بيها حتى ينطيها رمز حسابه وانه راح اخليه يحضرها

ماريا:: لك هوه اخوكي اكتبي شي منيح .

-شكتب شكتب الله يورطج ورطتينا.

كتبلي

-لا ما احضرج متونس.. ما گتيلي بعدج مرضانه؟

قريتها ولطمت على خدودي صاح

-يله وين الچاي؟

ماريا جرت التلفون من ايدي كتبتله

-بعدني صخنانه.

-ولج مصخنه مصخنه دهر الدهرررج عرفج عرفج عليمن بعد.

ردت كتبتله

-من تغيير الجو انشلت وصخنت.

كتبلها

-حقج ما متعوده على هيج جو... المهم تدفي تدفي زين حتى لا تضلين صخنانه.

اخذتله صينية الچاي من يمي متوتره واغلط على ماريا بگلبي ، حط تلفونه بجيبه اخذ صينية الچاي وراح رجعت يم ماريا متحلفه بيها

-اكص ايدي اذا ما يطلع يدري بيج ماريا وراح تسوولنه طلابه اثنينكم.

ماريا:: ارتبكت خايفه واحكي مع حالي.. لا ما ممكن يكون كشفني حكيت معه عراقي ماراح يعرفني كنت متطمنه بس ريـــمه زرعت الخوف بقلبي.. اعتذرت منها اخذت حور راجعه على البيت واقنع حالي مستحيل يعرفني ما يگدر امشي وفكري مشغول التفتت على صوته

ســليم:: امشي عدل لا تنجبحين والبنيه تتعور.

-شو خصك؟

-امشي امشي لا الدج على حلگج.

مشيت وانا احكي وبهدله

-حاشر حالك بكلشي حل عني احسن من افرمك فرم.

ضحك يمشي ورايه لحتى وصلت لباب الحوش التفتت عليه وقف بعيد مضيق عيونه ويطلع فيي

-طبي جوه وبعد لا تطلعين العمال راح يصعدون للسطح.

-ما خصك يا اخي شو مشكلتك معي انتَ؟

ســليم:: طبيييي جوووه.

مالحقت رد عليه اجت مــاسه سحبتني للبيت واسمعها تحكي معه بعصبيه

مــاسه:: شسالفة؟ ليش تصيح عليها ترى ماصارت هاي حاط دوبك من دوبها شبيك؟

ســليم:: لا تطلعن حتى للحوش العمال راح يصعدون على السطح.

- وخل يصعدون شني طالعات مصلخات؟

سكرت الباب بوجهه واخذت حور من ايدي فاتت على البيت تبعتها موتره

-مــاسه والله ما حكيت شي هو تبعني.

-ادري خيولي الظاهر سكتت هواي والله العظيم احجي الصيهد الا اخليه يطيح حظه شايف روحه فد نوب.

سكتت خايفه احكيلها على المراسلة تقوم تزعل، العصر اجت رغد وماسه شكتلا على ســليم

رغد:: جا شسوه؟ غير عدنا عمال ومشه وراها شني السالفة مــاسه؟

مــاسه:: ولج مو بس هسه هوه على كلشي ذاك اليوم مسح حسابها وبس يشوفها شهرنا وخزانه عبالك مدري شمسوين ادري شبيك؟

رغد:: عود اوصي سلطان يحاجيه.

حكت وتمددت أيدها عبطنها

مــاسه:: ما رحتي للدكتورة ؟

-راس الشهر اروحن يجوز ندى تمشي وياي

تركتهن يحكو وفتت على الاوضة احكي مع حالي بالعراقي كرمال ما اخربط بالمراسلة نطرت لليل لحتى بعتلي مسج كاتب بيه

-اختفيتي؟

قمت قفلت الباب ورجعت كتبتله

-موجوده.

-شلون صرتي؟

-زينه زينه .

كنت احكي بدون ما اتوتر بس من ساعة ما ريـــمه قالت هو كاشفك صرت بخاف كتبت

-انت تحبني؟

-الصبح حبيتج بس هسه ما ادري چني بطلت

حكيت مع حالي"يا حيوان تحبّ وتكره عمزاجك"

كتبت

-هذا مو حب

-جا شنو؟

-ما اعرف

-تحركن مشاعري ردّيت احبنج هسه.

سكتت متنرفزه منه وكل شويه متمنيه شرشحوا وسبو واحكي على ميلاد السحاره... كتب

-وانتِ حبيتيني؟

-لا لسه.

-مو مشكلة المهم انا حبيتج بعد انتِ غصباً ما عليج تحبيني؟

-شو الشغلة بالغصب هذا مو حب.

-حب حب معليج انتِ.

-والله مو حب.

-لا تعانديني

-ما تنطاق.

-شجابرج تحاجيني جا؟

سكتت اهدي حالي واحكي بهدوء مابدنا نخرب كلشي رجعت كتبت

-تعلقت ما اگدر أحضرك

-هو هذا المطلوب.

-ليش تحشي هيج وكأنك شايف حالك.

-هههههه

-تعيش وتضحك

-ايباه حلوه هاي تدرين عدنا من واحد يضحك شيگلوله؟

-شنو؟

-جبح هالصوت

سكتت مو فاهمه كلمة جبح ماعرفت هي مدح ولا ذم كتبت

-حلوه ان شاءالله راح استخدمها من تضحك مره الثانية

-ههههههه.

-جبح هالصوت.

رسلي بصمة خفت افتحها خليت سماعات وفتحتها كل التسجيل عبارة عن ضحكته... ضحكه طويله سكتت ماعرفت رد عليه رجع كتب

-هسه انتِ شني التردينه اطلعيلي بالنظيف وين تردين توصلين؟

-وين؟ ما فهمتك

سكت بدون ما يرد على رسالتلي ساعة ورجع رد يحكي طبيعي سوالف عاديه وكل غايتي يثق فيي ويعطيني باسوورد حسابه لثاني يوم وانا احكي معه مــاسه شكت فيي بس سكتت فكرتني احكي مع امي . ريـــمه دائماً تحذرني انُ هاللعبه تضرني بس ما كنت استسلم، مــاسه بدأ دوامها وانا وحور نضل لوحدنا بالبيت ساعات بخاف وساعات شجع حالي مافي شي بيخوف، وكل يوم احكي اتصال مع ريـــمه تعلمني على الحكي العراقي لحتى صرت ما احجي اي كلمة لبنانيه وكل حجيي اتقنته بالعراقي ماصرت اواجهه صعوبة واني احجي وي ســليم

بس الخوف اللي بداخلي دائماً يسيطر عليَّ اخاف انكشف اخاف من اخواني يزعلوا وما اعرف ليش مستمره مقهوره على حسابي وعلى الصور اللي حافظتها بالحساب صوري وي بابا وان كان مو اب حنون بقيت احبه اقلها احن من امي ولو عايش ما قبل يصير كلّ هذا... اخذت حور وطلعت للحديقة اباوعلها وهي تشم الوردات لو تفتر وره الفراشات وتضحك تاخذ روحـــي ضحكتها الحلوه

فجأةً اندك باب الحوش وكفت مرتبكه

-تعاي حور

حضنتها اباوع للباب

-منو؟

مرتضى:: شوفي بغراض مــيثم سبانه عشرة اشمريها من وره الباب.

دك گـــلبي بخوف مرعوبه وحور بجت بأيدي مشيت اريد افوت للمطبخ سمعت صوت ســليم

ســليم:: شسوي هناه؟

ومرتضى حجه وياه بنتر

مرتضى:: اريدن سبانه ما تخلون شي تاخذون السباين وتشمرونهن.

حجه ورجع يدك الباب بقوة

-ســليم.

صحت بخوف ما اريد يروح ويعوف مرتضى بباب البيت

ســليم:: امشي يجي مــيثم وتعال اخذ سبانه منه هسه البت وحدها

مرتضى ::وانا شني ماكلها خلك زعطوطه حاميه البيت علينه انطيني سبااانه ووولج

رفس الباب برجله فززني، فتت للبيت عفت حور بالغرفة انطيتها التلفون وركضت للمطبخ ادور على سجينة بأيد ترجف مثل كل مره اخاف بيها كلشي يروح من بالي بس هذيج الليله تصير بعقلي، قفلت باب الهول وبعدت البرده اباوع لباب الحوش واسمع صوت عركتهم وكل شوي الباب يندفر مسحت عيوني داخلي يرجف

مرتضى:: ولك تمد ايدك عليَّ ولك تمد ايدددك علي والله اكتلك واترس بجثثكم الچول.

ســليم:: يللله يييله خايس

ابتعد صوت مرتضى وهو يغلط ويسب رجع ســليم صاح

-هيووو

مارديت ضاغطه على السجينة بقوة رجع صاح

-احاچيججج!

فتحت الشباك صوتي يرجف

-هاا؟

-ووجع حتى وجع... بيج شي؟

مارديت سديت الشباك ورحت يم حور بالغرفة تباوعلي بأستغراب كعدت على فراشي مغطيه وجهي بين ايديي ابجي، اكرهه خوفي اكره ابقى خايف من موضوع عشت عمــري كله ما اخاف من شي بس من يوم المريت بهذاك الموقف صرت اي شاب نظرته مو ريحه اخاف منه وانرعب

اجت يمي حور تباوع الوجهي بزعل وتقربت تمسح عيوني خليتها بحضني ساكته بس گـــلبي موجوع ربع ساعة ووصلتني رسالة منه كاتب

-نور

-ها

-بيج شي؟

-لا ليش

ارتبكت وبديت اقتنع هو فعلاً كاشفني كتبلي

-ليش ناشره منشور حزين؟

زفرت نفس براحة مطمنه كتبتله

-حبيته.

-خير ان شاءالله.. سؤال

-جواب.

-تحجين وي احد غيري؟

-لا طبعاً

-شلون اصدك؟

وخرت حور من رجلي هي هاي النقطة اللي ردت اوصلها كتبت

-انطيك حسابي؟

-اي

-وتنطيني حسابك؟

-لا

-ما انطي حسابي اني هم الي حق اشوف وي منو تحجي.

-اخر بنيه حاجي وياها گبل خمس سنين وطلع وهـــب ابن عمي ناصب عليَّ وهسه انتِ بعد ما حاجي وي غيرج

-شلون اصدك؟

-انطيج حسابيّ بشرط

-شنو

-اشوفج.

مسحت وجهي متوتره ومحتاره

-ما اگدر

-البارحة مو كلتي راح ترحين وي اختج لجامعتها قبل لا ترجعين البغداد؟

-اي

-اي اجي للجامعة اشوفج من بعيد وانطيج الحساب.

عضيت اصبعي ندمانه كل يوم ادخل بجذبه جديدة الحد ما كثرن وصرت انساهن ومن يرجع يسألني على شي يخصهن احتار شنو اجاوب من غبائي كتبتله

-تمام.

وطول الوقت اكل بنفسي تعبـــت وتندمت تمنيت سامعه كلام ريـــمه ومن البداية حاضرته لاغيه الحساب ومنتهي كلشي، انتظرت الحد ما اجت مــاسه ترجع على وكت وي صــيهد وجويريه بين ما مــيثم يرجع الساعة بثنتين ونص لو بتلاثة، بس باوعت بوجهي گالت

مــاسه:: شگد باچيه؟

ابتسمت اهز راسي لا ما باجيه وهي تباوعلي ما مقتنعة

-اكص ايدي اذا تطلعين ما باچيه

خليتها تبدل وتصلي صاحت عليَّ

-صليتي؟

-لا

-گومي... حتى نتغده ما نتاني مــيثم يبطي اليوم عنده شغل.

گمت اصلي مثل ما علمتني عمه ايمان بس انقهر من اتذكر اللي راح من عمــري بالحرام بأخر سجده اجت يمي مــاسه كعدت مقابيلي تباوع بوجهي وبس خلصت گالت

-سولفي ياهو وياج؟

لميت السجادة اسولفلها كل الصار تخبلت وتحلفت تحجّي الصيهد

-لا تحجين الصيهد اني راح احجي الميثم.

مــاسه:: لا عوفي مــيثم لا تشوفينه حباب خبل حاله حالهم يحط مرتضى ويكتله خليني اسولف الصيهد وهوه يحلها.

-وصيهد عاقل يعني؟

ضحكت وگمنا سوا للمطبخ نكمل الغده وحور تفتر يمنه وتحجي ما عاجبها دارت علي مبتسمه گالت

-اگلج شي؟

-اااي.

-اظن ندى حامل.

-احلفيييي.

-اشش اشش حتى ندى ما تدري امي شاكه بيها وكلنا نخاف نكلها روحـــي حللي لا تطلع مو حامل وتنقهر.

-يارب ان شاءالله تطلع صدك حامل.

-امين يارب.

كملنا غدانا وخابرنا مــيثم كال راح اوصل لا تتغدن انتظرنا بين ما وصل تغدينه سوا العصر مــاسه راحت البيت اهلها وميثم راح للشغل وي الولد بقيت وحدي خابرت بريا اسأل

-شوكت ترجع؟

-عگب باجر بالليل انا يمكم.

-اي زين

-ماري

-ها

-تجين يمي ببيتنا لو تضلين يم مــيثم.

سكتت فترة ورجعت گتله

-مو تزعل بس الانسب ابقى وي مــيثم غير هو بمثابة ابونا اثنينا.

-ههههه والله صح بس هم تجين يمي ويم رنـــه خوش؟

-اي طبعاً

-هم شايفتها؟

-لا

-همم

بقيت احجي وياه شويه وسد المكالمة نسيت موضوع سليم ونور گلت للصبح الكالي عذر اكله رجعت البغداد ما كدرت اروح للكليه واخر مره احاول وياه ينطيني حسابه خير على خير واذا ما ينطينه احضره والغي حسابي احسن من ما أتورط اكثر.

الثاني يوم الصبح كعدتني مــاسه

-ماري رايحه انه للكليه حطيت ريوگج وريوك حور على الطباخ وغطيته ريگيها وياج عفيه

شلت راسي اباوع الحور هم بعدها نايمه گمت وره مــاسه وميثم بس قفلت الباب ورجعت شمرت نفسي بفراشي نمت وفززني صوت الرسائل كعدت على حيلي افرك بعيوني شفتهن منه وأول رسالة كاتب

-وينج انا اجيت للكليه.

مسحت وجهي اني وين وانت وين.. كتبتله

-بالمحاضره.

-يا محاضره

-وي اختي

-فضيها اطلعي

-من تخلص المحاضره بعد ساعة.

-خوش.

شمرت التلفون ورجعت نمت نص ساعة وكعدتني حور شلتها غسلت وغسلت وجها خليت الريوك وكعدنا نتريك سوه، ربع ساعة ورجع دز رسائل

-وين صرتي

-ها

-وينج

عضيت اصبعي حييل اني مو البارحة كلت اكله رجعت البغداد ليش گتله بالمحاضره صوجي الف مره كلت النفسي اول ما تفزين من النوم لا تكتبين اي شي ، ما اتعلم منّ أخطائي، كتبت

-واكفه يم حديقة الكلية والاقتصاد؟

-شلابسه؟

-لا تصير ادبسز.

-حيوانه شلابسه عبايه صخام بوجهج.

-حيوان ما غيرك لابسه عباية

-سهله اذا ما اشك حلگج على هالغلط، وبعد وي العباية شلابسه جنطه يا لون؟

-اخضر

-والحذاء

-هم اخضر

-والحجاب؟

-هم اخضر

-شني مره لو مزار؟

-شنو؟

-كله اخضر رايحه تصيدين طليان؟

-اي امثالك.

-ايا بنت الحيوان اذا ما فركت حلكج فرك.

-يله روح بعد ما اريد اشوفك.

-لا يله ما افرك حلكج خلي اشوفج واروح وبعدين نتعارك... وينج جاي اباوع للحديقة وينج انتِ ليش تجذبين.

-لا ما اجذب

-ووينج.. صوريلي بله.

طلعت للحديقة اركض صورت الوردات وكصيتهن ماخليت شي يبين حتى لا يعرفها حديقتنا كتبتله

-هاي واكفه يم الورد

-ورد الخلفوج.. جذابه هذا من النت.

-والله مو من النت

-خلي ايدج يم الورده وصوري حتى اصدك ماجاي تجذبين عليَّ.

سكتت صافنه ليش لا؟ دام ما گدرت اخذ حسابه ابهذله واخليه يدور بالكليه اشلع گلبه وراها اگله اني ولد ضحكت عليك واحضره.. ركضت للغرفه لبست عبايتي ورجعت للحديقة مديت ايدي يم الوردات صورتها وكصيتها ما مخليه الحايط يبين وديتها اله كتب

-بت الحيوان ايدها تلمع

-حيوان.

-حماره يجوز هم من النت بله اگطعي الورده وصوري ايدج جاي ادور ماجاي اشوفنج.

كطعت الورده صورتها مبينتها ومبينه عبايتي وديتها اله

-دور زين وانتَ تشوفني.

-شفتتتج.

-وينك تعال خلي اني هم اشوفك.

اكتب واضحك كل ظني شاف بنيه بالكليه وراح يحاجيها وترزله دزلي صوره اباوع بالمحادثة مبتسمه ومنتظرتها تفتح النت ضعيف ثواني وانفتحت شهگت فاتحه عيني على وسعها صورتي هسه واني واكفه بالحديقه شلت راسي على صوته

ســليم::حيوااانه اوكفيلي جايج.

اباوعله مصدومة صعد على السياج من الجهه المبنيه بلوك واني رجليَّ يرجفن بس شفته دخل للحوش ركضت وعبايتي طارت من عندي بقت بالحوش دخلت للهول وجريت الباب اريد اسده مالحكت صرخت وهوه دفعه بكل حيله ركضت بوجهي للمطبخ ايديي رجفن جريت السجينة واباوعله دخل وراي واني لازمه السجينة واصيح

-اطلععع بررره اطلع برررره.

يتقدم خطوه خطوه خازرني ويأشر على روحه

ســليم:: اليلعب بناري يتحمل حرگها

-اطلع بررره اطلع بررره والله اصرخ.

-صرخي شتگليلهم چنت مصاحبته؟ وياي ووي چم واحد بعد تحجين؟

صيح بنتر ويأشر على التلفون

-جيبية.

-معليك معليك اططلع برررره.

اجه بسرعة ما مهتم للسجينة البأيدي مد أيده يريد يجرها ماعفتها تلاويت وياه اصرخ واحس بحرورة دم بين ايدي وايده بس ما ادري من منوو حور بجت وباب الحوش اندك جر السجينة من عندي شمرها واخذ التلفون من بين اصابعي.. جسمي يرجف وصوتي عالي بس اريد يوخر من گدامي

وهو ما مهتم مدنك يدور بالتلفون فتح الرمز لان اني حاجيته اله بالمراسله سمعت صوت ريـــمه تصيح ركضت للباب ابجي فتحته اله عافتني ودخلت للبيت متخبله وتتعارك وياه صاح بوجهاا

-سدددي حلگج.

ريـــمه:: ولك ســليم تسودنت؟ شلون تطب البيتهممم؟

دار التلفون علينا يصيح

-ياهو هذاااا ياهو هذاااا؟

-صديقتي صدديقتي من روسيا.

صيحت بدون خوف من اجت ريـــمه امنت

-انطيني تلفوني واطلع بررره.

سكرن المحادثة رسلها النفسه وريمه تجر بأيده التجري دم تريد تطلعه من البيت خايفة وهو عينه بعيني دفعته ريـــمه للحوش دار وجهه يحاجيني

ســليم:: وروح الحسين لو كضيتج النوب تلعبين وتحجين وي واحد مناه مناه فگرج خاف الخياس العندج مأمنين وثاقين بيج انا أكسر ظهرج.

- ما لك دخل بيه عندي اخوان يحاسبوني

هز راسه متحلف

-هاااي هيه هااي هيه تدللين خلي يشوفون محادثتج وحجيج حتى يعرفون يحاسبونج.

دار وجهه وطلع وريمه دارت عليَّ بعصبية

-انه شگتلج؟ الف مره حذرتج بس مو صوجج صوجي انه الحيوانه سكتت وما حجيت الماسه من البداية.

عفتها ومشيت اغسل وجهي وهي سكتت حور شويه واجت يمي باوعتلها ابجي

-والله ما جان قصدي توصل الهالمرحلة.

ريـــمه:: من البداية كاشفج ويدري بيج والبارحة بسمرني يدري ادري وماحاجيه

-راح يحجي الاخواني

مسحت وجهي شفايفي يرجفن وهي مكابلتني محتاره تلفوني يمها كالت

-تراسلينه؟

باوعتلها ما فاهمه

-احجي الصدك كليله قهرتني من حذفت حسابي وكل غايتي جانت احذف حسابك اعتذر منك.

هزيت راسي لا

-ما اعتذر المفروض هوه يعتذر.

-ماريا فـــدوه خليها تنحل لا توصل الاخوانج وجيبي اليسدها بعد هم يحاسبونج وهم يتعاركون وي ســليم.

دنگت ساكته ميته من القهر لو من البداية سامعه كلامها گالت

-راح اروحن عفت علاوي وشمس وحدهم.

اخذت حور منها وهي توصي اني ما احجي وبلكي هي تحاجي ســليم يسكت، سديت الباب وراها ورجعت حييل حيل ندمانه، شلت السجينية من الگاع غسلتها ورجعت للتلفون باوعت للمحادثة ابجي بحيره وخوف خليت نفسي بموقف ابد مو حلو كتبت ومسحت مرتين وتلاثة اخر شي كتبت

-ســليم.

دقايق وكتب

-خير؟

-لا تحجي الاخواني.. انتَ قهرتني من حذفت حسابي واني محتفظه بمحادثه بصوري وي بابا لهذا السبب سويت هاي اللعبه حتى احذف حسابك مو غير شي .

-مسحت حسابج لان سمعتج تگولين الماسه امي تهددني

ركزت بكلامه رجعت كتبت

-شنو سمعت بعد؟

ســليم:: كلشي ومفتخر بيج گد الدنيا.. ومن مسحت حسابج بس حتى لا امج ترجع تراسلج من حساب ثاني نسيت انتِ حاجيه وياها وتساب هم.

-لا تحجي الاخواني.

-مو شي مخجل حتى تخافين وتضمينه.

-الله يخليك لا تحجيلهم

-خوش.

-ولا تحجي على هاي العركه والمحادثة وبعد معليه بيك والله العظيم.

-غلطتي عليَّ هواي اعتذري.

-لا ما اگدر اعتذر.

-ليش ينقص من طولج.

-انت الغلطت بالبداية

-سهله خل يجي بريا ونكعد نسولف

سبيته بداخلي محترك گـــلبي كتبتله

-اعتذر منك على الغلط.

-مسامحج.

سكتت رجع دزلي صوره فتحتها اباوع صورت ايده وكتب

-شگيتي ايدي

-انت لزمت السجينه

-جا غير تردين تدجيني اعاينلج؟

ما رديت شويه ورجع كتب

-ماريا الصار ماراح احجيله الاحد تطمني وانا هم اعتذر لان تدخلت وحذفت حسابج

-شكراً والله

-هلا.

طلعت من المحادثة متطمنه ماراح يحجي عدلت حسابي واسمي بس مالغيته ولا حضرته... وبس اجت مــاسه حجيتلها كلشي لطمت على وجها

مــاسه:: مصدومة بيها وبسوالفها وهيه تعتذر وتبجي خابرت ريـــمه اعاتبها شلون ماحجتلي گالت

-غير ثقت بيه وسولفتلي شلون احجيلج.

سكتت سديت المكالمة منها وما كدرت ازعل من ماريا عاتبتها ووصيتها ما تحجي اخذتها رمشيت البيت اهلي مخبوصين برضا كلها تدرس بيه هو المفروض السنة التجي يله يسجل بس ندى استغلت تاريخ ميلاده وسجلته وكلها تصيح وياه ويدرسونه بالقراءة

ندى:: جريت رضا درته الماسه

- هاي عمتك مــاسه تدرسك اني خل اروح وي عمه رغد للدكتور

رضا:: روحـــي روحـــي ما ابجي عليج اضل يم بيبي.

-چلب ابجي عليَّ ليش ما تبجي؟

ضحكن البنات وعمتي صاحتله يمها دخلت بدلت متوتره اريد اكول الرغد اجرب احلل تحليل حمل بس متردده وخايفه خاف مثل كل مره ماكو حمل انتظرتها بين ما اجت عليَّ طلعت وياها هي وسلطان يمشي ولازمها من ايدها خايف عليها واني وراهم اضحك، صعدنا بالسيارة گال

سلطان:: شلونج خويه ام رضا؟

-الحمدلله خويه الله يخليك.

رغد:: ندى حتى بالولادة انتِ وياي.

سلطان:: اي تروح وياج اذا ما ترضى اكتل وهـــب.

ضحكت وهي ساعة تحجي وياه غــزل ساعة تعاركه وهو متحمل وساكت الحد ما وصلنا نزلنا وضل منتظر بالسيارة دخلت للدكتورة طول هالمده متردده تسوي سونار من ما بقى شي لولادتها يله سوت سونار حتى تشتري ملابس وطارت من الفرح من گالولها ولد طلعتلي عيونها مدمعه

-من اول ما حبينا بعض ردنا نسمي ابنا سيف.

واني بس اضــحك لزمت بأيدي تريد تسوي تحليل باوعت بوجهي

رغد:: ندى امي وصتني اسويلج تحليل حمل خلي نجرب .

-والله اني هم رايده اسوي بس خايفه من النتيجه خاف مثل كل مره ههه.

-عادي واذا؟

سكتت متوتره سوينه تحاليل سوه گـــلبي يدك بقووة وخوف ولا رحت ولا جبت التحاليل عفتها وطلعت بره بالباب ايدي ترجف خايفه اسمع طلعت وراي هيه تبجي واديها يرجفن

-حامل ندى حامل، والله والله حامل.

اباوعلها واحس بروحي اسمع صوتها صدى اريدها تعيد الحجاية مره ومرتين الحد ما اصدك حضنتني والعالم تباوعلنا بچيت اشهك وسلطان اجانه يركض ماقابل على وكفتنا العالم تباوع علينا وهي من فرحتها تگله

-ندى حااامل.

سلطان:: امشن جوه فـــدوه اروحلج الوادم تعاين رررغد.

جرتني من ايدي دخلنه جوه دموعي تجري أيست يصير عندي طفل اباوع الرضا يكبر كدام عيني واتحسر ريت عنده اخوان وما يبقى غريب هنا.. اباوع الوهب وحنيته على رضا واصفن بيني وبين نفسي ينحرم من الاولاد بسببي بس رب العالمين رحم بحالي ورزقني .

رغد ما گدرت تصبر خابرت على آمها وبشرتها وباوعتلي تسأل

-اخابر وهـــب؟

مسحت عيوني اهز راسي اي ما اريد اضم عنه هالفرحة ولا ثانية. خابرت وما رد عليها. رجعت خابرت مــاسه ونسمع يمهم هوسه كالتلها

مــاسه:: هذا وهـــب يمنه امي كالتله .. رغد ضل يبجي.

رغد:: سوده علي يابعد حيلي.

سدت المكالمة من مــاسه اريد ابطل ابتسامه ما اگدر وما بلساني بس الحمدلله والشكر الك ربي الف الحمدلله رجعنا للبيت تلكتنا عمتي والبنات كلهن واكفات وجويريه تضحك، نزلت اباوع وراهن شفته شايل رضا وواكف مبتسم حضنتني عمه تبجي والبنات وحده وحده تباركلي واخر واحد هوه تقرب يمي حضني يبوسني براسي وجويريه صاحت عليه

-من هسه اذا بنيه الكرار.

وهـــب:: والله خويه نسويها مبادل اذا انتِ خلفتي بنيه الرضا. خير على خير واذا لا شوفولكم مره احنا ما ننطي.

صــيهد واكف بباب المشتمل صاح عليه

-يله ولا يهمك اسينات الرضا.

جــويريه:: والله ما اسمي أسيتات الا اسميها زليخة

صــيهد:: غير ارمي كهلان.

ضحكنا كلنه ودخلنا للبيت عمي وليد من عرف. بدل ما يتبارك گال

-كون وليد مو تخلفين بت.

ايمان:: تعاي يمه ندى خل اوصي بطنج تخلف ولد مو بت عمج هيج يكول.. شني هيه بكيفها شو مدري شلون حجيك؟

شايله ايدها وتحجي وياه بحرگة، زعل وطلع.. ما گدر يكسر فرحتي ابد طايره من الفرح بيه.

ما گدرت اروح وي رغد بيوم ولادتها اجت عليها ريـــمه حتى هيه تروح وياها عمه توصي بيها وهي خايفه اكثر من رغد

ايمان:: ولج يمه شمالج؟

ريـــمه :: هزيت ايدي بخوف شجابني شوداني اسمع صوتها ويكتلني الخوف اخذناها انه وسلطان واجت ويانه جــويريه على اساس هي سباعيه تالي بس سمعت صريخ صالة الولاده عافتنا وطلعت شارده

ورغد انمردت روحها تعبـــت حييل ، شبعت بچي من خلوا سيف بين اديها تعبت وبالي يم علاوي. من الصبح لليل يله طلعونه ، اجت جــويريه اخذت سيف وانه سانده رغد طلعنه سلطان يعاين الايد جوري عيونه مدمعه مايگدر يكض الطفل فتح الباب صعدنا بالسيارة واخذته من جــويريه كعدت كدام يم سلطان كبل ما يشغل السيارة مد أيده اللي حطيته بأيده يعاين بوجهه عيونه مدمعه رجعه الحضني وبس وصلنا للبيت نزلنا رغد يم عمتي ايمان اجت امي تغلط وتسب تريدها يمها وابد محد من عدنا حاجاها عاينت بوجهه سيف غمته هو وسلطان ومشت.

عفتهم ورديت للبيت اركض لكيت ست رنـــه وبريا كاعدين بالحوش ايدها بأيده گتله

-انتَ تنزل البيت اهلك لو البيتنا؟

بريا:: عاينــي هذا باب بيني وبينج اربعة وعشرين ساعة مگابلج ومطين عيشتج.

ضحكت عفتهم وطبيت جوه رنـــه معشيتهم ومنومتهم خابرت كهلان عال كلي مده صارله حال حال لا يحجي ولا يسولف وي احد وكنتوره قافله ودوامه ما يهتمله وبين مده ومده من يستلم راتب ابوه يعزل منه ويكلي ضميهن ولا تاخذين منهن ابد.

تعبني حيل وحتى اخواني يشكون ضايجين من يشوفونه يحاجيهم بزعل وكل مره ابررله تعبان اعذروه ويسكتون .

شويه ورد علي يحاجيني بتعب

-الو

-ها كهلان الله يساعدك

-هلا بيج يابه.. بشري شلونها مرت سلطان؟

-لا الحمدلله هستونا ردينا للبيت

-يا الله الحمدلله

-وين انتَ؟

-بالگاع ليش؟

-اگول متعشي لا؟

-اي

-خوش يله ديربالك على روحك

سديت التلفون منه سبحت وغسلت هدوم طلعت اريد اشرهن وهذول كاعدين تحمحمت

-رنـــه اطلع لو لا؟

رنـــه :: ضحكت وبريا يضحك وياي كاض بأيدي ويفر الحلقة بأصبعي

-تعاي.

اجت وتعاين البريا بطرف عينها متعاندين هوّه وياها هو يگلها مخربه لحظاتنا وهيه تگله منيلكم لحظات انتم

وجوهكم مال مشاكل، شرت هدوم وردت طبت للبيت كال

بريا:: اكلج اخوج زعلان عليَّ؟

عاينت بوجهه مستغربه

-لا ليش؟

-مساع رحت اعاونه بالگاع اسولف وياه حتى ما يحاجيني ولا چنه يسمعني.

-والله هوه صارله مده مدري شبيه تدري حتى گالي اذا بريا ينزل عرسوا هسه ومارضيت.

-لا يابه صبرنا وصبرنا ضلت على هالچم شهر يكضن وسهله.. ولو انا طاك گـــلبي.

حجه ومد ايده يحضن خدي ويتلمس طرف شفايفي قشعر بدني هم الجو بيه بروده وهم هو يلعب بكلبي وخرت ايده

-وخر بريا بردت

-المفروض تدفين انتِ عكس الوادم؟

ضحكت وهوه حط ايده على جتفي ودناني الصدره يشبگني باس راسي وجر نفس طويل

بريا:: روحـــي وراحتي انتِ.

-عيوني انتَ.

-فـــدوه اروحلهن.. احلى شي حجينا وجهه لوجهه ما تجي شمسنا تسد التلفون بوجهي

-هههههه والله لو تدري بيك  تجي يمي تضل كاعده.

-شفتي غرفتها شسويت بيها اليوم؟

شلت راسي من صدره اسأل

-لا شسويت؟

وكف وجرني من ايدي وياه

-تعاي شوفي.

شغل فلاش التلفون ومشينا لبيتنا سوه بعده ما كامل واظلم جلبت بزنده عدل خاف اعثر، طبينه للغرفة الرايدين نسويها الشمس ضوه عليها ماكو شي متغيره

-شسويت شو نفسها؟

دار عليَّ مد ايده حضن خصري ورجعني على الحايط جلبت بيه بأيد والايد الثانية خليتها على حلكي گـــلبي دك بقوة

-هاا؟

بريا:: چم مره غشيتي بس انزل واخليك تبوسني وينها البوسه.

حطيت ايدي على حلكي حييل وهوه يضحك قرب شفايفه باس ايدي ومد ايده برخاوه يتلمس خدي ويطيح شالي من شعري لجتافي غمضت عيني ارجف وصوت نفسي عالي قشعر بدني من انفاسه الدافيه وهي تنساب على رگبتي .. بهدوء سحب ايدي من حلكي وشال راسه يياوع لعيوني

-ما اجبرج بس والله انتِ وعدتيني.

دنگت ساكته اسب بجويريه مدري ليش بس هي اجت بببالي لان حذرتني مدري لان صرت بهالموقف كد ما تعززت على بريا.

قرب خده يمشيه على خدي وشال ايدي لرگبته يريد احضنه، عبرت ايدي اثنينهن حضنته رفعني من خصري ضام وجهه برگبتي

-رناتي بدويتي روحـــي .

وانه الساني. مدري وين راح حجايتين ما اجمع، رجع نزلني ييوس خدي الحد طرف شفايفي يسأل

-ترضين؟

مدنگه ساكته ووجهي يريد ينفجر گد ما صخنت رفع وجهي من حنجي يبوسني وما تهنى بس كمل بوسته سمع صوت طــروادة يصيح على هاسكي گبل گال

بريا:: اذا يكضني وياج وهنا والله يرميني تفكته بچتفه النوب

-انتِ ضل هناه انه راح اطب للحوش شويه وروح.

هز راسه خوش يضحك جر إيدي باسها وحجه بانتصار

-بستج.

-بالغش بالغش وخر.

جريت ايدي وركضت اتختل طبيت للحوش وركض للهول وهو شويه واجه ضليت كاعده يم ريـــمه طب للهول شكد حاجيناه انه وريمه وسألنا شبيك ما يحجي بس عاف تلفونه على الشحن ورد للگيعان كالت ريـــمه

-شفت شي؟

-شكو؟

ريـــمه:: كهلان عنده تلفون صغير ورقم جديد وهسه يله عرفت

سكتت اعاينلها تحجي بقهر وعيونها متروسه دموع

-خاف قديم؟

-لا باكيت الرقم لكيته بالجرارات واول البارحة شفت التلفون كال لا مو الي هسه لمحته بجيبه.

عاينتلها محتاره وهي ميته من القهر طبت الغرفتها وضليت وحدي أفكر بكهلان شجاه مده صارله على هالوضع.

ريـــمه:: ما حجيت ولا رديت سألته على التلفون حيل مستغربه تصرفاته اجه صــيهد تعارك وياه لان متغير لا راح وياهم الموكب لا راح وياهم لزيارة لا يتشاقه ولا يهتم الواحد منهم وكل ما يسألونه عذره نفسه مابيه شي تعبان.

الحد يوم الحصاد بس كضه حصاد واخذوه راح تداين فلوس وجابهن الي حسبهن وحطهن بكنتوري گـــلبي . انوجع

-المن تداينت.

-من يجن فلوس الحصاد كولي لعبود يوديهن الشيخ حيدر.

حطيت ايدي على گـــلبي مخنوگه

-تريد تموووتني كهلان حاجيني وين رايح وتوصي هيج.

هز راسه ماكو شي وطلع من البيت خابرت سلطان ابجي واحجيله كال هسه اخذ صــيهد واروحله رجع الساعة بالتسعه من الليل عيونه تركز بملامحنا واحد واحد شبگ شمس ويشمها بحسره يسولف وياها

-اعز من الهوه انتِ

وهيه تبوسه حيل وتشبگه فتح ايده الزهره ويعاين لحسين ورنه. درت امسح عيوني خايفه حييل عبالك جاي يودعنه واحد واحد وسواها، تشاقه وي رنـــه الحد ما حضنها وباسها يوصيها

-مو تهملين دراستج.

رنـــه:: انتَ موجود ما تخليني اهملها.

سكت مبتسم يعاين لحسين وحسين جنه انا يعاين بقلق لمن بجه غطه وجهه بالتشيرت ويبجي كام كهلان كعد يمه شبگه يبوس بيه ويحاجيه

-عليمن تبجي؟

حسين:: انتَ حاجيني وگلي عليمن صارلك مده مقهور وتعبان؟ وهسه حجيك ويانه مدري شلونه.

سكت وضل مده كاعد يمهم طب للغرفة وكمت وراه حاط علاوي على گلبه اعاينله ودموعي تجري وگلبي يوجعني رد علاوي لفراشه واجه يمي جرني من ايدي الصدره حاضني بكل حيله بچيت مجلبه بيه بخوف وما شبعت منه ولا لحكت اتطمن، وخرني من صدره خله بايدي مفتاح.

-بـ ١٢ ضبط تفتحين الكنتور تلكين اوراق تنطينهن السلطان خوش؟

هزيت راسي ما فاهمه

-ريـــمه وروح ابوي تحرم علي شوفتج وشوفة ابني لو ما سويتي الگتلج عليه .

عافني بهتانه وطلع مشيت بخوف اعاين وره الكنتور سلاحة ماكو كعدت بالگاع مهدود حيلي وين رايح وويامن عنده ثار.

بجيت الطم على وجهي ركضت للتلفون اخابر على اخواني محد يرد تخبلت بس اريد اعرف شصاير رنـــه تخابر على بريا وهم ما يريد متت من الخوف للساعة ب١١:٣٠ سمعت هوسة الولد وطبوا البيتنا كلهم مخابر سلطان وكايللهم ترحون لدوانية ابوي اللمتكم العمر كله.

طبوا كلهم اعصاب واولهم صــيهد وانه الخوف يدبي بجسمي

طــروادة:: اصبر على المر بس ما مجبور اجرعه لو اموتن ماعفت دم ابوي صبرت سنين حتى اعرفنه واجه اليوم العرفته واجه وكت الاخذ حگه، ايام وليالي انه اخابرهم والف على التلفون چفيه أغير صوتي واكلهم

-اعرفكم بالاسم انتم كتالت شامل واحجي تفاصيل من رسمات هاجر.

واشوفنهم كل يوم يلتمون كاتلهم الخوف وكل مره اهددهم" راح احجي الابنه" ويكلولي لا تحجي والتريده يوصلك.

وصار وكت يوصلني الاريده اتفقت وياهم يجون كلهم سهيل راضي علي وليد وشاكر على اساس بس حتى ينطوني فلوس واسكت منهم.

كعدت فوك الساتر سلاحي بأيدي وعيني للشارع مابيه اي سيارة ، السيارة الانا اجيت بيها ذبيتها بعيد من يجون ما يشوفونها حتى لا يعرفونها سيارة ســليم.. خابرت سلطان يحجي ويهدد هوه وصيهد

سلطان:: بس كلي وين انتَ حاجينا شصاير؟

-افتح السماعة خلي الولد كلهم يسمعون صوتي

صــيهد:: احجي احجييي فتحها خرب روح اهلك انتَ ووووين؟

-انا رايح اخذ حگي وثاري.

صــيهد:: ولك موتتني وين رايح بوحدك. ثارك عدمن. كهلان.

-صــيهد سلطان.. الولد كلهم يمكم.

-كلنا نسمعك

- ثاري عد اهلكم.. وليد وشاكر وسهيل وعلي وراضي ابن غانم همه كتالت ابوي وانا ابن شامل ما اعوفن ثاري.

سديته منهم طفيته وعفته بجيبي عيني للشارع جريت تلفوني الثاني من شفت سيارتهم خابرتهم

-اوكفوا يمكم

شاكر:: بويه تعال اخذ فلوسك وفكنا شرك.

-جايك.

صفوا السياره اعاينلهم من بعيد كلهم بالسيارة وهذا الجنت رايده سحبت اقسام وما گدام عيني غير صورة ابوي.. رميتهم بدون وجع گلب

يتبع...

أيلول

أرض الـــــخناجر 🗡️

بقلمي الكاتبة ايـــلول

تصويت وتعليق بين الفقرات لطفاً 💚

══━━━━✥◈✥━━━━══

أحنا من زين الزلم ما عدنا خوف

الزلمه خوفه من الردي لا يغدره

العال بأهلي روحوا وصلوله الكلام

خلي من الصبح چفنه يحضره

بعد لا دوله التحميه لا عمام

محد يلفيه بس المگبره

══━━━━✥◈✥━━━━══

رنـــه ::  نعاين عليهم من باب الدوانيه مخبوصين وواحد يصيح على الثاني والتلفون بين اديهم كلهم مركزين بصوت كهلان .. شهگت، گـــلبي انفجع اعاين بوجهه ريـــمه مصدومة وهيه كاضه الاوراق بأيدها وتعاينلهم ترجف محد مستوعب حچي كهلان سد التلفون بوجهم

اعاين عليهن وعلى صياحهم وهوستهم احس صوتهم صدى بأذني وما ببالي غير حجي اخوي.. درت الريمه اريد اگدر احاجيها، كعدت على أركبها فاتحة عينها حييل ما مستوعبه.. اجه سلطان يركض جر الاوراق من اديها ورد للدوانيه وهم يصيحون ويتعاركون ويردون يخابرون على كهلان ومايحصلون يخابرون على ابهاتهم ما يردون لمن شافوا الرسومات، ســليم عاين بوجهه سلطان وصاح بصدمة

ســليم:: هاجر.

ووي حجايته طلع يركض اتلفت بين الكل چني بحلم، انهد حيلي اريد واحد يحاجيني واحد ضل بيه عقل من بيناتنا حطيت ايدي على اذني ما اريد اسمع صوتهم بس اريد افهم شجاي يصير بينا نز جسمي بفزة على صوت ريـــمه وصريخها لطمت على وجها بكل حيلها ركضلها سلطان يريد يكضها  ما يگدرها، شمس وعلي يبجون وزهره حايره بينهم.

لمحت عبود كاعد على حيله بالدوانيه وسجاد حاط ايده على گلبه بخوف يحاجيه، وصيهد مدري وين يريد يطلع ووهب وميثم كاضينه حسيت بروحي ميزت من صياحهم بس اسم هاجر مسحت عيوني گـــلبي موجوع اركز وياهم

وبس طب ســليم جايب هاجر صــيهد مد ايده يريد يجرها دفعه ســليم حيل ركضلهم سلطان عايف ريـــمه كعدت يمها على اركبي احاجيها صوتي يرجف

-ريـــمه.. ريـــمه.

وهي تهتز بأيدي تركز بيهم وترد تصيح بصدمة، فزيت على صياح صــيهد طك ســليم حيل اعاين بوجهه ســليم من حاجبه الدم ينزل على طول وجهه

صــيهد:: حاااجيني حاجيني هاجر.

وهاجر تعاينله بخزر وسلطان يحاجيها بهدوء يردون يفهمون منهم تأشر السلطان وصيهد متسودن ما گدر يفهمها ســليم انطاها تلفونه تكتبلهم رخت ايدي من ريـــمه اسمع صوت سلطان وشهگته وهو يقرأ كلامها شلون صعدت بالسيارة ختلت وشلون شافتهم من كتلوا ابوي كتلوا ابوي بدم بارد تعاونوا عليه اخوته والغربه وشلون ابوها من رد لسيارة لگاها وحاسبوها هو وميلاد.

حطيت ايدي على عيوني احس نار تطلع من بينهن بلحظة وحده بيتنا ماضل بيه واحد قوي يسند البقيه ولدنا الچانوا يعاركون الگاع ما شفت بيهم واحد ما حنى ظهره ومد ايده يدور شي يستند عليه.

وهـــب:: عقولنه ما مصدكه ولا راضين نقتنع، صــيهد يصيح جذب ماكو هيج شي لمن وصله فيديو من طــروادة مسحت وجهي واكف بصفة اسمع وياه وكلنه منتبهين، عباره عن تسجيل صوتي لمكالمة بين شاكر وواحد صوته ثخين وبعيد لمن اركز بيه هذا صوت كهلان انهد حيلنه بحجيهم ويا ريت مصدكين هاجر ولا سامعين المكالمة .. يگله

-ما استحيت تتعاون وي الوادم حتى تكتل اخواك.

شاكر:: بويه انتَ منين ناصب علينه شني؟

-احجي وياي عدل لان تسجيل فيديو عندي الجريمتكم هسه اسلمه الابن شامل وللشرطة جر عدل احسنلك.

وراها صوت ماكو قدم الفيديو صــيهد ورد الصوت

شاكر:: كلي انتَ منين اطلع خلني اشوفنك ليش ضال تخابر وتتختل وتهدد كونك زلمه تعال واجهني.

-جا انتَ واخوك زلم من حطيتوا ايدكم بأيد راضي وعلي وسهيل حتى تكتلون اخوكم؟ اشرحلك شلون سهيل ينتله وشلون انتَ وراضي تطكونه؟ اشرحلك شلون علي ووليد ضلوا واكفين على الجرف يحرسولكم المنطقة خاف واحد يشوفكم بس فاتتهم شفت وسجلت كلشي وصار سنين أدور عليكم بس اريدن اعرفكم .

وهـــب::حطيت ايدي على گـــلبي مهدود حيلي من سمعت صوت ابوي يم شاكر يگله

وليد:: جيبه خلني احاجيه.... عمي هسه انتَ شني التريده كاتلين عمك كاتلين خالك عليمن محترك كلبك؟

-لا عمي ولا خالي، انا زلمه صار سنين ادور عليكم وهسه عرفتكم اريدن اعرف ليش كتلتوه شلون انتم اخوته تتفقون وي وادم غربه عليه عقلي ما مستوعبها هاي سولفلي ليش ؟ يجوز اطلع غلطان وظالمكم.

شاكر:: جيب التلفون جيبه...شنهي التريده وتمسح التسجيل العندك؟

وهـــب:: طاح التلفون من ايد صــيهد جلب بأيد سلطان خشمه يجري دم انهد حيلنه وضاگت بينا ديرتنا الوسيعه طلعت من الدوانيه بره الحوش. ماكو هوه يطفي نار الوجرت بگلوبنا، ما يتموا بس اولاد عمي شامل همه يتمونا كلنا.

لحگوني الولد بهوستهم ما ندري وين نروح ركض صــيهد الاهلي يتراجف ويصيح على امي من قهره ما يدري شني اليسويه وولد عمي سلطان وسليم حرف ما ينطقون

حسينا ارواحنا محددين مــيثم جر صــيهد غسل وجهه يحاجيه

مــيثم:: بس على كيفك وخلينا نشوف دربنا ونفرزن كهلان ووين .

درت وجهي الصيهد ما يوم شفته منزل راسه هيج مسح وجهه وسلطان گاله

-خابر.. خابر شيخ حيدر بلكن عنده خبر كهلان وين.

دك صــيهد على شيخ حيدر وما جابله طاري للسالفة شيگله اهلنا الكتلوا عمنه؟ شيحجي؟ سأله على كهلان گاله ما ادري سد التلفون وردينا كل واحد بصفحة نخابر على اي واحد بلكن نحصله كهلان تلفونه طافي وابوي مغلق وعمي شاكر يدكّ ومايرد.

مــاسه:: اعاينلهم من باب المطبخ دموعي بجرن وامي تلوب وتلطم على صدرها اخواني متسودنين، مسحت عيوني اسمع صريخ ريـــمه ركضت للغرفة جريت عبايتي احاجي بماريا

-ضلي هنااه رايحه اشوفن البنات.

طلعت رجليَّ يرجفن وبس اريدن اوصل البيت عمي شامل احس الدرب صار شطوله عليَّ وكل موقف وي عمي ذكرته بهاللحظة وكلهن مرن على ذاكرتي، دفعت الباب وطبيت عبود كاعد بالحوش اسمعه كوه يجر النفس وشهگته تمرد الگلب وسجاد مكابله ميت من الخوف ويحاجيه ويسب بأهله.

طبيت للهول. البنات يبجن ريـــمه مملخة روحها وتلطم على صدرها ووجها بكل حيلها وتصيح بصوت مبحوح

-انه الوديته انه الگتله روووح وياهم ياااا يمه.

ورنه على صفحة كاعده شمس شابگتها تبجي يحضنها وهيه بلا صوت بس دموعها يجرن، كضيت ايدين ريـــمه احاجيها ما تحس بروحها دعت على ابوها وامها بحرگة گلب تشهك ومن بين دموعها تدعي عليهم حرت بينها وبين رنـــه بالنص ساعة عدت وسمعت صوت الولد

طلعت اركض لباب الحوش صاروا بوجهي توهم يطلعون من الثنية صار بوجهم ضوه سيارة وكفوا كلهم درت وجهي اعاين للسيارة من الضوه ماجاي اميز ياهو الاجه لمن نزل. لمحته كهلان عاف السيارة مشتغلة وبابها مفتوح يمشي بخطوات ما ثابته صار گدام الضوه بأيده سلاحه يمشي خطوه يروح ويجي دايخ توه يعثر وركضله صــيهد بكل حيله بس راد يلحك عليه ويكضه.. توه يمد اديه يريد يلكفه وكهلان طاح دفعتني رنـــه وطلعت تصرررخ متخبله كضاها بريا وهي بس تريد توصل الكهلان.

روحـــي راحت صــيهد تسودن. شالوه هوه وميثم للسيارة وسليم ركض شغلها فروا السيارة طايرين ورنه تخبلت بريا يحاجيها ويتوسل بيها ولا سكتت كوه وصلها الايدي شبگتها ابجي، بعدنا بباب الحوش ودك تلفون وهـــب درت عيني عليه بس رد اشر السلطان على سلاح طــروادة ركض سلطان شاله صاح على بريا

-تعااال بريا تعال.

وهـــب:: ركضنا للسيارة من صــيهد خابرني ابوي مخابره يون ويفزعه الحگلنا تكتلنا، عفنا السلاح بأيد سجاد وركضنا للسيارة انا وسلطان وبريا اسوق بساع وما ادري بروحي ادعي عليهم بالموت لو أدعي نلحگهم

بين ما وصلناهم طبگت السيارة ونزلنا نركض جايبهم الهيمه السيارة مزرفة ابوي فاتح الباب ونازل ممدد بالشارع ودمه يسيل ركضتله وبس وصلت يمه فتح عينه ايده على فخذة

-هاا بويه

-الحكنيي الحكني ولك صــيهد بووويه.

كعدته عدل اتأكد من صوابه شديت رجله بجفيته وگمت وي الولد  السيارة  غارگه بالدم،  السايق سهيل، وبصفه جان كاعد شاكر ووراه كاعدين ابوي وراضي وعلي، بالمچان الوره السايق كاعد راضي.. وكهلان راميهم من صفحة السايق الصفحة الثانية مالايحها شي.

سلطان يفتر بوجع گلب وخوف اديه يرجفن ما گدر يحرك ابوه ويشوفه عدل لو ميت، دشداشته البيضه مگلوب لونها احمر من الدم، بريا افتر عليهم واحد واحد راضي ميت وسهيل ميت  وشاكر صوابه ببطنه بس بيه نفس .

جرينه علي طلعناه من السيارة لمن شفناه مابيه صواب بس مغمي عليه سلطان خابر الاسعاف گوه يحاجيهم ما گدرنا نحرك شاكر من مجانه صوابه قوي ودمه يسيل.

علي ابن غانم صحى وبس لگه اخوه مكتول. لطم وشك ثوبة يصيح يا بويه يا راضي الدقيقه احسها تمر بساعة من الصدمة ضالين هادئين بس نعاين عليهم وعلى الدم.

جنت عبالي ما يدرون كهلان الراميهم بس لمن علي ابن غانم خابر اهله يفزعهم ويكلهم كهلان ابن شامل كتَلنه  عاينت بوجهه سلطان حاير، اثاري كهلان راميهم من الساتر ونازل واكف يم السيارة معاينلهم  وما يدري بيهم ضالين عدلين، ابوي وعلي  شايفينه.

بين ما اجوا الاسعاف والشرطه شالوهم وشالونه للمركز ثلث ساعات يله طلعونه مشينا للمستشفى لگينه الولد گدامنه ابوي وشاكر اثنينهم بالعمليات درت السليم اسأل

-صــيهد وينه؟

مسح وجهه بقهر گوه يحاجيني

ســليم:: الشرطة اخذت كهلان ومشه وراه.

التمت وهسه هاي هيه كملت،  للساعة بالسبعة الصبح يله شاكر استقرت حالته ردينا انا وبريا للبيت خاف لا بيت غانم لو اخوال كهلان يدكونه  صــيهد خابرنه گال سلاح كهلان  تخفونه چن لا صار ولا انصنع  تونه وصلنه القرية لكينه عبود وسجاد بره كاعدين عبود وجهه اصفر وتعبان  درت السجاد انشده

-سلاح كهلان وين؟

سجاد:: ضميته.

-وين ضميته؟

-ضميته يابه محد يلگاه.

سكتت منه اعاين لعبود وبس شال راسه درت وجهي مال عين اعاين بوجه واحد منهم .

مــاسه:: للصبح ما غفت عينهن ونامن كضنها بچي وخوف على كهلان  ريـــمه ما هدت هاجر وحتى من اجت عليها ميلاد ماخلتها تروح  وميلاد تغلط وتسب لمن سجاد طردها يله ولت من عدنا...ما گدرت ما اخافن من كالوا ابوي وشاكر مصوبين.. بس ريـــمه ذبت شيلتها ودعت  من كل گلبها كون ابوها ما يطلع بسلامه والليله گبل باجر ينلف بالچفن.

ومرتضى اجه هداد يريد يكتل عبود وياخذ حگ ابوه  تعارك وياه سجاد ويحلف كل يمين يكتله،  ما كضت هوستنا لمن الصبح اجوا الولد ودرينا منهم كهلان ماخذته الشرطة ماتن البنات  بچن لمن عيونهن ورمت.

بيت غانم وولد سهيل مشتكين على كهلان  وولدنا مثل بلاعين الموس لا يگدرون يحجون بالسبب والتسجيل  ما يردون احد يعرف السالفة وشلون اهلنه غدروا عمي وي الغربة ولا يگدرون يسكتون ويخلون كهلان بالسجن لا ليلهم ليل ولا نهارهم نهار.

محد من عدنا گدرت تداوم هالمده،  انه عايفه بيتي وكاعده يم ريـــمه ورنه حالهن يفلش الگلب  وولدنا كاضينها بين الكعدات وبين المراكز والمستشفى، ومن احير بسالفة ومحد يفهمني اخابر على مــيثم  هوه يفهمني... كهلان ما معترف ولا سلاح موجود ولا سيارة واصله للمچان الرماهم بيه... ومحاجين أبوي وشاكر ما مخلينهم يشتكون ورايحين العلي ابن غانم هم محاجينه وكلهم هددوهم بالتسجيل مال المكالمة وبساع غيروا أقوالهم وكالوا لا مو كهلان  مسلبچيه سبگولنه.. ضلوا بس ولد سهيل مايرضون يتنازلون  ويحلفون لو طلع من السجن يكتلونه، الولد كالولهم ميخالف تنازلوا ونحلها عشائرياً

مارضوا.

وبيت غانم هم وره ما تنازلوا  خابروا يهددون كهلان بس يطلع من السجن احنا كتالته وصيهد يگلهم يطلع وسهله هالمره اشوفن يا عشيرة تلفيكم

يعارك ويهدد ميت من القهر ورغم عدن ثلث ايام على السالفة هوه ابد ما رايح الابوي للمستشفى وشايفه ولا يريد يشوفه يجي بالربع ساعة للبيت يسبح ويشرب چاي ويرد يطلع حيله انهد، رابع يوم جابوا ابوي من المستشفى، مديتله فراش بالهول وهـــب وبريا ساندينه اعاينله من بعيد گـــلبي  جفل من عنده الحمدلله على السلامة ما گدرت اگله،  مددوه  وهـــب ما يعاين بوجهه وابوي يصيح ويغلط عليه علمود يعدله على الفراش يسوي اليريده ساكت لمن استقر.

وهـــب عافه وطب للغرفة يم امي طبيت وراه مختنگه اعاينله تمدد حط راسه على رجلين امي وغطه عيونه بأيده

اجه يمه رضا يحاجيه وهوه مغطي وجهه حرف ما نطق لمن امي مسحت على راسه وشهگ يبجي مرد گـــلبي  ضام وجهه من عدنا يبجي بحرگه مهضوم. وامي دموعها يجرن غطت. حلكها بالشيله  ايدها على راس وهـــب وتنوعي بصوت يمرد الگلب 

وابوي من يمه يغلط ويسب ما يتنازلون ويكولون غلطنه ابد، درت وجهي طبيت للمطبخ جــويريه والبنات كاعدات اخذت عبايتي من فوك الباب

-انه رايحه يم البنات.

جــويريه:: خل اروحن وياج.

هزيت راسي خوش اعاينلها عافت كرار بأيد بــدور ولبست عبايتها طلعنه سوه وروحتنا لا تقدم ولا اتأخر ما ندري بيمن نواسيهن ويا حچاية التصبرهن، تلاگوا ويانه عبود وسجاد وحسين رادين من الگيعان وكت نثار الحنطة وما يردون تخرب گيعانهم ضلوا بالحوش يغسلون واحنا طبينه للهول  سلمت على رنـــه   گوه ترد صوتها رايح  شمس اجت تركض لجويريه شالتها تبوسها وتحاجيها طبينه للغرفة يم ريـــمه. كاعده تعاين العلاوي نايم گدامها وهجوره كاعده يمها.. كعدنه سوه نحاجيهن  بلكن شوي يفكن  بس وين ريـــمه دموعها يجرن  كالت رنـــه

-ما سمعتي شي؟ ما كالوا ليمت كهلان يطلع؟

تحسرت ساكته ما ادري شأگللها

جــويريه::  رنـــه والله يطلع... دام كلهم گالوا لا مو كهلان وضلوا بس ولد سهيل هم هسه صــيهد يلگه حل يقنعهم وغصباً عنهم يسحبون الدعوة وتخلص.

ريـــمه شالت راسها تحجي ونفسها مگطوع

-طلع هذا؟

-ياهو تقصدين ابوي؟

هزت راسها لا تمسح بعيونها

ريـــمه:: شاكر.. شاكر طلع من المستشفى.

هزيت راسي لا وهيه ترجف تخوف

-يكولون يومين تلاثه يله يطلع بعده

لطمت على رجلها تبجي بحرگه

ريـــمه:: ينسجن وهوه ما كاتلهم؟ والله لو كاتلهم مووت ما ينقهر گـــلبي  على سجنه والله ما انقهر.

جرتها جــويريه الحضنها   شبگتها  وهيه تطك على رجلها بحرگه گـــلبي  مردته ورنه تعاينلها بعيون ذبلانه ما تحجي شي، ضلينه يمهن بالساعتين وكامن ويانه من ردنا نطلع كضيتها  على صفحة احاجيها.

-ريـــمه ترى انتِ اكبر وحده بيهم المفروض توكفين وياهم تصبرينهم .. هاي رنـــه ما متعلمه تفارگ كهلان وكلساع سكرها يصعد كون انتِ توكفين وياهم  وتقوينهم ريـــمه جا هيج هيه؟

دنگت بقهر تهز راسها لا ردت تعاينلي عيونها يجرن

ريـــمه:: اواسيهم؟ ولج اواسيهم شگللهم اعذروني ابوي كتال ابوكم... اعذروني انه القنعته يروح وياهم للصيد ذاك اليوم  بس كليلي بيمن اواسيهم؟

- وجعنا واحد وابهاتنا نفس الطينه بس ياهي مالتي بيه؟ انه احبن عمي واحب عياله اخذ ذنب ابوي وچن انا المسويه هالجريمه ليش؟ انتِ تحطين روحج  بمچان المذنب رغم مالج ذنب المفروض ما تفكرين هيج.

مسحت عيونها وهيه ساكته، درت وجهي لجويريه تحجي وي رنـــه وتگلها داومي انتِ سادس مايصير تفوتج امتحانات... ورنه ساكته  وكفنا يمهن مديت ايدي الايدها احاجيها.

-والله صــيهد ما يعوف كهلان يطلعه من السجن لو كلفه روحه.

رنـــه :: هزيت راسي اي متحسره    راحن اثنينهن وريمه  مشت للغرفة وادري بيها تسد الباب وتكضيها بچي، غسلت وجهي گـــلبي يوجعني   عاينت الهاجر كلساع اريد اسألها على تفاصيل عن ابوي واخافن اخاف تكتبلي شي ما يحمله گـــلبي

طبيت للهول سمعت صوت عبود من الدوانيه صاح

-رنـــه .

فتحت الباب ومديت راسي احاجيه

-ها.

اعاينله ماد رجليَّه  وساند ظهره على الحايط. وحسين متمدد بالجهه الثانيه يعاين بتلفون عبود گال

-طبن شوكات برجلي ما تطلعينهن؟

هزيت راسي اي  جبتلي  ابره ورجعت كعدت گباله حطيت رجله على رجلي اطلع الشوك منها لمن كضيت مدلي ايده تدنيت  بصفه  جانت خشبة صغيرة من المسحاة  بين الاضفر واللحم نمرد گلبه لمن طلعتها عاينت بوجهه

-توجعك؟

ابتسم هز راسه لا ومد ايده يحضن خدي يسأل

-قستي السكر؟

-اي زين.

دنك ساكت كضيت ايده بين ايديي روحـــي رايحه

-عبود... فـــدوه گلي طــروادة يطلع ما يضل بالسجن  لا تخليني اتأمل وتالي ما يطلع.

تحسر جر ايدي عليه لمني بحضنه يبوس براسي اختنگت  دموعي يجرن

عبود:: خالي جعفر بالهند وما يگدر يرد هسه بس هوه يگدر يسد حلوگ ولد سهيل خل يرد وسهله.

-يعني ما ينسجن غير؟

-عاينــي هوه لو ضالين بس ولد سهيل  تنحل لان تصير تضارب شهادات والاكثرية ينكرون كهلان الرماهم جان طلع بساع بس هسه ابن راضي رابط على الخط وره ما علي ابن غانم تنازل  هذا راح وصف وي ولد سهيل كالهم لا كهلان الرماهم وعمي تنازل بسبب التهديد... بس والله وعيونج تنحل وهم شيخ حيدر تدخل بالسالفة وصيهد خابر جدي محسن گاله بالسالفة خاف يحولونه البغداد... هم تدخلوا وان شاءالله خير.

هزيت راسي خوش وادعي بگلبي كون تنحل كون كهلان يرد اموتن لو ما اشوفنه...  طلعت من يم عبود كلشي يمرّ بثگل ضايعين بدونه  وما اصدك يجيني الليل حتى اضم روحـــي بفراشي وابجي  للصبح حسيت على ريـــمه تكعدني تدغني بأيدي فتحت عيوني اعاين بوجها گالت

-كعدي زهره وگومن يله للمدرسة.

هزيت راسي لا ما اريد اداوم جرتني من ايدي

-گومي رنـــه لا تشلعين گـــلبي.

دنگت على زهره كعدتها  غطيت شمس وطلعت گوه على روحـــي   غسلت اعاينلها   تسوي ريوك وكعدت الولد طبيت للغرفة بدلت ومشطت زهره طلعت للهول حطيت علاوي بحضني  اعاين بوجهه متحسره

-والله لو تدري ابوك فراگه شيسوي بگلبي.

دنگت ابوسه وهو يضحك للهوه  مشت ريـــمه للدوانيه ودت ريوك عبود وسجاد وجابت ريوكنا كعدت يمنه تصب چاي. وتحجي ويانه عبالك مابيها شي وانه ادري كل هذا هيج عاينت بوجها اسأل

-هاجر وين؟

-نايمه ما كعدتها.

هزيت راسي خوش ما ودي اروح ولا اداوم بس تدك بگلبي حجايته لا تهملين دراستج، طلعنه وي عبود تلاكه ويانه بريا عاين بوجهي مقهور

بريا:: وين رايح انتَ؟

عبود:: اوديهم المدارسهم وامشي للگيعان

بريا:: روح انت وي سجاد انا اوديهم واردلك للگاع.

هز راسه عبود  موافق صعدوا حسين وزهره ليوره وصعدت انه يمه اعاين من الجامه ساكته   لمن وصلنا زهره وحسين لمدرستهم ومشه يريد يوصلني مد ايده يكض ايدي

-رنـــه .

درت وجهي عليه ساكته عاينلي ورد عاين للدرب يحرك اصابعه فوك ايدي

-شبيج يا بعد روحـــي؟  عليمن خايفه وعلي كهلان يطلع شكد يطول شهر شهرين تاليته غصباً عليهم يطلع.

-والشهر والشهرين شويه؟  غير گـــلبي ينطحن.

بريا:: گتلج شهر شهرين انطي مثال مو شرط يضل هلكد شدراج يجوز بعد يومين تنحل السالفة ويطلع.

-ان شاءالله يا رب ان شاءالله بس انتم لا تعوفونه فـــدوه يوميه روحوله.

عاينلي مصدوم وانه مدري شبيه خايفه على اخواني حاستهم وحدهم گال

-شتحجين انتِ ياهو يعوفه؟

-خايفه عليه.

-وداعت عيــونج تنحل ادعيله وكله يسهل.

هزيت راسي اي  خوش وصلني لباب المدرسه نزلت يعاين وراي لمن طبيت، گوه على روحـــي اتابع الدرس والشرح وي المدرسات واتخيل من اطلع الكه كهلان راد للبيت،

بس كضه دوامي وطلعت لگيت بريا متانيني يم الباب مال المدرسة واكف بصف الشرطي عاينت بوجهه ابتسم أشر براسه تعاي سلم على الشرطي مشيت بصفه  مد أيده على جتفي اخذ الجنطة يسأل

-بشري خوما فايتج امتحان؟

-لا

صعدت بالسيارة  مرينا لمدرسة حسين وزهره ضالين واكفين بالباب متانين ... زهره اول ما صعدت گالت البريا

-طــروادة ما طلع؟

عاينلها بالمرايه ساكت وانه اعاينله متأمله يگلها اي  هز راسه لا

-يطلع بس مو هسه... زهره حسين اي واحد من هاي الجهال بالمدرسة ينشدكم على طــروادة لا تحجون اي شي.

زهره:: انه اجت بنيه  بتّ حيدر ابن جبر كالت صدك كهلان رمه عليهم گتلها لا جان نايم وهمه يجذبون.

بريا:: اي عفيه وحتى يم صاحباتج لا تحجين.

حسين:: انا محد سائلني واليجيب طاري كهلان اكسر الرحله على راسه وراس الخلفة.

بريا:: اي جا ياهو اخوك... ما يكعد گرندايزر.

سكت حسين ضايج وبريا بس يريد يضحكهم، تونا وصلنا للبيت لگينه سيارة مرتضى طابگه گدامنه نزلوا شاكر منها حطوه بالعربانه  ســليم ومرتضى وسلطان واكف على صفحة نزلنا نعاين عليهم.  شكد تمنيته يموت وما ارد اشوف خلقته لا هو ولا وليد

اجه بريا حط ايده على جتفي  ومشه زهره  وياه

-تعالوا يله.

طببنه للحوش وراح  صارت بوجهي ريـــمه گتلها

-ابوج طلع من المستشفى.

عاينت بوجهي ساكته، اجتني شمس تركض دنگت شبگتها وشلتها ابوس بوجها من دون الكل تگلب اسمي وتحجيه مكيفه

-لنه.

بستها بخدودها ومسحت على شعرها أشرت على ريـــمه

شمس:: خاله سوتهن.

-يخبلن.

-سويلج؟

-لا انه چبيره.

-عادي عادي.

إبتسمت اكرص بخدودها نزلتها راحت تدور مشط طبيت للغرفة گوه اجر نفس  رديت طلعت بساع مديت راسي احاجي ريـــمه

-هاجر وين؟

-بالغرفة يم علاوي.

-مو تخلينها تروح.

هزت راسها لا.

وصدك ما خلتها تروح من يجون عليها ميلاد لو مرتضى ريـــمه تگلب الدنيا وسليم وسجاد يتعاركون وياهم ومايخلون هاجر تروح... الوكت حيل ثگيل واليوم من يمر عبالك ياخذ من حيلنه.. تمنينه بس يخلونه نروح ونشوف كهلان محد رضى وصيهد والولد ابد ما متيهينه بس محد منهم رد طب بيتنا غير سجاد لان ما معترف بشاكر ابوه.

ومثل السم عدن اخمسطعش يوم  وبعدها سالفة كهلان ماينعرفلها حل ماخلوه يصعد محكمة ويوميه نفرفح من القهر يوميه تصير هوسه وعركه وصيهد يهد ويكضونه  وانه بدأ صبري يكضي بعد مابيه اصبر اكثر اخوي ما چن يطلع منها

كمت من بين زهره وشمس  تلفوني بأيدي غطيتهن وطلعت اسمع صوت ريـــمه تنوم بعلوش وصوتها مخنوك طلعت للحوش كعدت يم الحديقة دموعي تجري  تمنيتها موجوده تمنيت أأمن وما اخاف بس هيه  تگدر تطمني

"وينج ولج يمه عفره يبعد حيلي"

لو موجوده غصباً على اكبر شارب تخليهم يطلعونه من السجن ما ضلينه هيّج ضايعين.

مسحت عيوني على صوت رسالة بالتلفون فتحته مالي واهس بشي كاتبلي

-رنـــه والله ادري مو وكتها وصعبه بس انجبرت باجر التحق.

ذبيت التلفون بحضني ورديت ابجي بحرگه هيه هاي العايزه هسه كملت وياي دقايق وخابرني جاوبته ابجي

-الو.

-الو ها حبيبي كعدتج؟

-لاا

سكت شويه ورد گال

-جاي تبچين.

-هسه وكتها تلتحق وكتهااا؟

-اطلعي للحوش جايج.

سد التلفون وانه بس اريد دموعي  تكف  حسيت كلشي التم على گـــلبي  مسحت وجهي وگمت فتحتله باب الحوش طب يعاين بوجهي مستغرب

-عليمن تبجين.

وخرت من گدامه ساكته رديت كعدت على حافة الصبه وهو سد الباب واجه وراي كعد بصفي يحاجيني بحيره

-رنـــه! بس حاجيني عليمن تبجين؟

هزيت راسي ماكو شي  تدنى يمي مد ايده الجتفي يدنيني الصدره شبگني يبوس راسي ويحجي مقهور

بريا:: بالعباس انجبرت لو بأيدي ما اروحن واعوفنج بهالوكت بس اخذت كل اجازتي واخذت فوگها بعد ما اگدر.

-بس انه تعبانه والله العظيم تعبانه وكافي عليَّ التفكير بأخوي اروح افكر واخاف عليك النوب عايزه؟

حرك ايده يمسح على زندي ويشبگني حييل

-والله مو بمچان خطر لا تخافين عليَّ ولا تفكرين بيه فـــدوه اروحنلج.

سكتت مغمضه عيني ما عندي حل انكتب على گـــلبي  التعب ،  ضل كاعد بصفي شابگني وساكت   لو يمسح  على زندي لو يمسد على شعري ما ودي يروح  لو بس يضل يمي، مغمضه عيني ما غافيه بس اريد گـــلبي  يرتاح فزيت على صوت عبود وهو يگله

عبود:: خاب هاي ما ينسكت عليها ياهو گالك تحضن اختي خايس؟

وخرت من صدر بريا  دفعت ايده ما بعدها ضحك   يعاين العبود

بريا:: باجر التحق والله

-لاا جا مو كلت بعدها؟

-بعد ما صارت لازم باجر

-الله يسهلك

دنگت ساكته منحرجه لو بس كاعده يمه وكاض ايدي ميخالف بس مال حاطه راسي على صدره ومغمضه تفشل بس شلت راسي العبود خزرني كال

عبود:: يله اخذوا راحتكم... رنـــه شويه وطبي نامي وراج دوام.