تحميل رواية «أرض الخناجر» PDF

روايــــة أرض الـــــخناجر 🗡️

بقلمي الكاتبة ايـــلول .

تصويت وتعليق بين الفقرات لطفاً💚

══━━━━✥◈✥━━━━══

ليش ناوي بگلبي تشلع

انتَ لو شايف ضحكتي

من شفت رساله تكول نرجع

مثل المضيع طريقه

كمت اطب للغرفه واطلع .

══━━━━✥◈✥━━━━══

جــويريه :: اتسعت فتحة عيني بصدمة واحس بروحيّ انترست غضب واني اشوف عمي وأبنه كاعدين بصف ابوي

درت عيني منهم الابوي اللي وكفلي وهوه يگول

-هلاا هلا بويه.

بس حجه حسيت ايد جدي بظهري دفعتني برخاوه باتجاه ابوي مشيت بخطوات ثگيله واعاينلهم بطرف عيني جراني ابوي يسلم عليه ومد ايده يأشر على عمي الكاعد

-سلمي على عمج.

فتحت عيني حيل مصدومة بيه انتَ التدري بيهم شكد مأذيني على اي اساس اسلم عليهم من شافني بقيت اباوعله بصدمة لزمني من اكتافي وسحبني وياه كعد وكعدني بصفة معبر ايده على كتفي محتضني وجدي واكف  بالديوان بشته على اكتافه وسبحته بأيده گاله.

شعلان:: سولف وياها وخلنه نشوف شني رايها تروح وياك تضل يم جدها.

وابوي يباوعله مبتسم دنكت إني مبتسمه واحجي بگلبي اروح اروح واخلص ما اشوف واحد بيكم بعد، تقرب ابوي يحجي وياي همس ولازم ايدي بإيده

-ترحين وياي بويه جــويريه؟

زفرت نفس براحه وخليت ايدي الثانيه فوك ايده اهز راسي اي

عيوني متروسه دموع حجيت بهمس مثله

- اي اروح طبعاً اروح بابا انتَ ماتدري شكد اتعذب هنا احسب يوم يوم شوكت تجي وتاخذني.

مد ايده على خدي واني رفعت عيني الجدي باقي على وكفته رجعت عيوني الابوي اركز وياه گال

- جــويريه بويه اسمعيني انا مو كد جدج هاي وحده والثانيه وياي للبيت مالج رجعه مرتي ما ترضى على رجعتج واخاف عليج منها، بس هذا ياسر ابن عمج يريدج اخذج  اله وبعد يصير عدج بيت وعيال وهم عمامج مو غريب  بس هاااه كون تعوفين المدرسه هذا شرطه، ها شكلتي؟

جــويريه:: وي كل كلمه يحجيها احس گـــلبي  ينقبض ويينغز بقوة كأنما سيخ من جمر. يدخل بثناياه ، آيدي ترجف واحس بنار تطلع من عيوني بلعت ريك استوعب كلامه وهوه يباوع لعيوني ويكلي

-ها بويه شكلتي ترحين وياي؟

واني بس صافنه بعيونه اريد الكاله عذر يخليه يسوي ببنته هيج

ليش ما يفكر بيه مثل جهاله البقيه ليش اني زايده عليه وحاير وين يوديني ويخلص، فزيت من صفنتي وقهري من لزم ايدي بقوة يسأل

-ها نروح؟

باوعت بعيونه حركت رأسي أأشر لا، فتح عينه بغضب خازرني ومد ايده على زندي كارصني بقووه ويحجي بهدوء

-لا بويه حبيبتي نروح نروح.

لزمت ايده حييل دفعتها من ايدي گـــلبي يدك بقوة ونفسي ثگل كمت بسرعة امشي بخطوات سريعه وترجف وكفت يم جدي ولزمت بالبشت مالته وابوي يباوعلي بغضب صوتي مخنوك وكوه احجي

-ابقى يم جدي ما أريدكم.

وبس حجيت جدي دك عوجيته بالگاع وضحك بقوة وشماته من يضحك يهتز صدره كله مد ايده المتروسه محابس وأشرلهم

شعلان:: يله يله راووني عرض جتافكم.

وكف ابوي وعمي وياسر يحجون وي جدي وكأنما اني بنته مو بنتهم، ابوي گاله

-حجي البنيه متعذبه هنا ما مرتاحه

ياسر :: يله يله جيبي ملابسج وتعالي ورانا طريق

جــويريه:: خزرته ولازمه ببشت جدي حيل  تلعب حتى نفسي من يحاجيني وهوه رفع ايده يمسح شاربه وحواب حلكه گاله جدي

شعلان:: ولك انا عدي زلم هسه اذا ردوا للقرية وشافوك بس اكلهم شووه يفترسونك عظم ما يضل منك، طكطك نعيلاتك واسلم على روحك.

ياسر ::چلاب هاي مو زلم.

جــويريه:: فزيت من صياح جدي رجعت ليوره وخالي وليد دخّل يتعارك وياهم  ابوي يسكت بيهم وياسر يغلط طردوهم طلعت من الدوانيه اركض صعدت للغرفة جسميّ ينتفض محروكه حرك هذا ابوي وهيج يسوي بيه شلون اللوم الناس من تظلمني.

محتضنه رجليَّه الصدري ارجف ميته من القهر اجت مــاسه وراي خايفه كعدت كدامي لازمه برجليه وتحجي وياي

-شصار جــويريه شبيج؟

واني بس فاتحة عيني واباوعلها اريد ابقى وحدي احس معركه براسي  ما بقى الابوي اي عذر عندي، مدت ايدها تمسح على وجهي خايفه

- جــويريه عاينيلي والله خوفتيني.

مــاسه :: اعاينلها وجها اصفر وجسمها يرجف لا هي باجيه ولا هي مصرخة مصدومة وبس فاتحه عينها، جريتها من ايدها الصدري واردد مثل امي لمن يخاف واحد من عدنا

-اسم الله الزهره أسم الله.

درت عيني على فتحة الباب بــدور واكفه بخوف تطكطك باصابعها گالت

بــدور:: جويريه جدي يريدج.

وخرت جوري من حضني بخوف جلبت بأيدي مختنكه كوه تحجي وعيونها حمر بدون ما تبجي همست

جــويريه::ما سويت شي والله.

بــدور:: ليش ما رحتي وي ابوج انه لو منج ولا اضلن هناه.

مــاسه ::درت وجهي على بــدور خازرتها اريدها تسكت ومديت ايدي لوجهه جــويريه امسحه أريدها تهدئ وفززنا صياح جدي علينه، وكفت بسرعة وجريتها من ايدها اوكفها، كضت بأيدي خايفه  تحجي بصوت يرجف

جــويريه :: لا تخلنه يضربني والله ما حجيت شي والله.

هزيت راسي اي بخوف

-اذا ما حميتج انكتل وياج تعاي.

اخذتها وطلعنه من الغرفه وصلنه للدرج جدي وابوي وجده واكفين بالهول يعاينون علينه رفع ايده جدي أشرلها تعاي،

نزلنه يمهم ومشت جــويريه بخطوات ترجف وكفت كدامه

باوعت الامي بخوف مخليه شيلتها على حلكها درت عيني اتلفت بلكن احد يكدر يحميها، ندى واكفه يم باب المطبخ تعاين بأستغراب، رجعت درت عيني لجويريه واكفه كدام جدي خايفه حيل أعاين الايدها تسحب بالردن وتنزله على جفها، عينها بعين جدي گالها.

-احنه معذبينج ولج؟

نزلت راسها وهزته لا نتر

-احنه معذبينج وما مرتاحه يمنه أيا خايسه.

رفعت راسها عيونها اعاينلهم واقره بيهن الخوف شال ايده حيل طكاها راشدي صرخت اريد اركضلها دفعني ابوي يغلط وجدي كض جــويريه من يم رگبتها خانگها وهيه مجلبه بأيده ترجف، يطكها ويرجع بحقد يطكها مره الثانيه وامي من بعيد تحجي

-حجي يتيمه حررام عليكم والله حرام.

وجده تغلط على امي، وابوي كاضني اريد بس افلت روحـــي من ايده ادري بروحي ما اكدر احميها بسّ أقلها احاول وما اعوفنها بأيد جدّي وحدها، وجها الحلو تطبع احمر وجدي ماعايفها، صياح  واجر بروحي اريد افلت والمح ندى بقوة دفعت جدي وضمت جــويريه بظهرها صاحت بوجهه

ندى:: لااا تطگهاااا.

ابوي من شاف جدي راح يطك حتى ندى عافني وراح عليه يجر بندى ويكلها

-ماالج شغل امشي.

وجدي يهد ويغلط ركضت لجويريه أريد احميها، وصارت ناس تجر بناس جده وابوي يجرون بندى ويغلطون عليها وأمي تصيح على جده علمود جــويريه، وجدي عايف الدنيا كلها ورجع جر جــويريه يطكها ويصيح

-احنا معذذذبينج ولج احناا.

صرت بينها وبينه مجلبه بأيده ومن المدافع وصلنه الباب المطبخ يم الدرج اجاني ابوي جراني من بينهم ودفعني حيل نلوت رجلي وطحت على حافة البايه مال الدرج على ايدي صرخت بكل صوتي متخبله  وامي اجتني تركض واني احس روحـــي طلعت السابع سما، كاضه ايدي الصدري واصررخ.

وامي تجر بيها من عدي تريد تشوفها اتخبلت الوجع شگ گـــلبي، ندى ترش ماي على وجهي وابوي يصيح

وليد:: أظنّها انكسرت عمت عيني.

وكامت امي بحركه تبجي شهكت وجرت دشداشتها من صدرها صاحت بحركها

-ان شاءالله بجااااه الحسين عمت عينك كون، ولكم الله اكبرررر.

شال ايده ابوي طكاها يغلطون عليها كلهم ويسبون بأهلها، واني من الوجع ودي اطلع أركض واصرخ گـــلبي  ممرود حتى من جابلي عبايه ما رضيت احركها وادخلها بالردن، كومتني امي وصاحت على ندى

-طبي الغرفتج وسديها خل اشوفن وهـــب يرضى واحد يطك مرته.

حجت وجده تغلط عليها، مشيت بايد امي ابجي روحـــي ممروده صعدت بالسياره وابوي يسوق، طلعنه من سياج القريه

نمشي بشارع ترابي والاشجار عليه من الجهتين هذا يوصلنه للشارع الرئيسي.

بعدنه ماعابرينه واشوف الولد اجو من الكيعان ملثمين ثلاثتهم

صــيهد اخوي اعرفنه، وطرواده لان هاسكي وراه عرفته، وميثم من عيونه مبين، صاروا على صفحة منّ وصلناهم واكفين سوه ومن شافوني انه وي اهلي وخروا مــيثم وطرواده على صفحة.

وصيهد مد راسه من يم ابوي نزل الجفيه من وجهه وعاينلي عاكد حاجبه.

-هاه؟ شبيها مــاسه.

كاله ابوي

-طاحت من الدرج تمشي جنها ثوله، آظن ايدها انكسرت.

وانه ابجي بصوت مخنوك فتح عينه صــيهد بصدمة وفتح باب ابوي گاله

-انززل.

نزل ابوي من السيارة وصيهد نزع الجفيه شمرها للولد وگال الابوي

-انزع شحاطتك.

نزع حذائه انطاه الابوي ولبس شحاطته، صعد هوه يسوق بس حرّك السيآره عاينلي يسأل

-شني مــاسه؟ حيل توجعج؟

دموعي مغطيه وجهي هزيت راسي اي وامي كاضتني وتتحسر كالها

-طاحت لو واحد طاكها؟

هزت راسها امي بحسره تهمس

-طاحت يمه طاحت.

سكت ما مقتنع لمن وصلنه للمستشفى انه روحـــي محتركه من الوجع نزل افتر فتحلي الباب، مد ايده يريد يكض ايدي صيحت ابجي

-اموووتن لاا.

مد ايده على زندي الثاني ساعدني انزل وجر العبايه يغطيني زين مشيت وياه كل ثانيه تمر انه گـــلبي ينمرد بيها اريد بس اخلص من وجعها وصيهد يفتر ويانه وكل شويه يصيح محترك گلبه وامي تكضه تتوسل يسكت يابه شصار بيه من عدلوها حسيتهم كسروها كسر ثاني صرخت روحـــي محتركه وصيهد مكابلني يفور، لمن جبسوها وخلصت عيوني مورمه من البجي

صــيهد طلع شويه ورجع بأيده كيكه وعصر وكف كدامي وانه كاعده على السديه، فتح الكيكه

-ما اريد روحـــي ممروده.

-شويه بس شويه.

خله الكيكه بأيدي اكلت منها شويه وهوه فتح العصير لازم العوده مال العصير قربها الحلكي يتلفت شاف امي تحجي وي الدكتوره، حاجاني بهمس

-ما طايحه انتِ واحد طاكج؟

رفعت راسي اله دار عينه الامي شافها بعدها تسولف رجع عاينلي

-كليلي ياهو ماد ايده عليج وانا اكسرلج اديه اثنينهن ياهو طاكج جدي؟

مسحت عيوني اهز راسي لا كوه احجي صوتي مبحوح من البجي

-طحت من الدرج.

سكت يعاينلي ما مقتنع مسح حلكي گال

-لا تجذبين عليَّ، مالج شغل احجي يله ما اسوي شي بس اريدن اعارف ياهو طاكج، لا اتعارك وياهم ولا شي بس هيج اريدن اشوف ياهو الطكج؟

-محد انه طحت من الدرج نزلت أركض وطحت.

هز راسه خوش متحسر شويه وطلعنه من المستشفى احس بروحي ميته من التعب والبجي صعدت خليت راسي على صدر آمي مغمضه عيني، لمن وصلنه للقريه نزلت وصيهد ويانه راد يطب من المطبخ لمح ندى وجويريه مشه لباب الهول وانه وامي طبينه من باب المطبخ جــويريه عاينتلي بعيونها الذبلانه متحسره .

اخذتني امي طبينه للهول كاعدين كلهم وصيهد واكف يم الباب

يعاينلهم بشك صاحت امي

-تعاي يمه جــويريه، بــدور وينجن تعالن اخذن اخيتجن.

درت عيني على بــدور وجويريه صعدت وياهن للغرفة، سكتت جــويريه كبل ماتحجي

-لا تلومين روحج مالج شغل انتِ

-اني الكتلج احميني مــاسه.

بــدور :: الله مــاسه حلمي يخلوه هاي التجبيره على ايدي.

شالت ايدها جــويريه غمتها، ضحكت امسح بعيوني كالت

بــدور :: والله احب هذن الشغلات هاي مال الكسر والكانونه.

مــاسه :: لو تشوفين الوجع تحمدين ربج وتشكرينه بكل ثانيه على العافيه وصحة البدن.

احجي وياهن وفزينه على صياحهم شهكت بخوف وكمنا نركض نريد ننزل عبالي عرف ابوي الدفعني وكفنه على الدرج اعاينله يتعارك وياهم وهمه متسودنين وهوه يصيح

-رضيتوا ما رضيتوا الليله حنة وهـــب وباجر عرسه.

شعلان:: ووولك انا الوادم تخابرني على العرس وانا ما ادري شني السالفه ولك صــيهد انا تسوي بيه هيج.

نعاين ما فاهمين وهمه محتركين حرك صــيهد كعد بباب الهول يدخن ويصيح على امي

-حضري كلشي ام صــيهد باجر عرس ابنج.

وابوي وجدي متسودنين والتليفونات تدك

صــيهد:: ردوا ردوا الوادم جاي تباركلكم.

وجدي يرد على الوادم وما ملحك، يحجي وي واحد يسوي روحه يضحك وفرحان وهوه من الغضب ضل يرجف وعيونه حمر اسمعه گال

-هلاا شيخ هلاا، الله يبارك بيك الله يخليك، افااا جا شني جدهم ميت وانتَ تسويلهم عرس؟ لا بويه لا رياض ما مرجيه منك هاي، دام شعلان يشم الهوه اعراس احفاده ماكو منها بالسلف.

وصيهد يدخن مبتسم بشماته جدي سد التليفون ودار الصيهد يريد يتعارك وياه مالحك كبل خابروه رد عليهم وصيهد يكلهم

-رايح للمرعى ثور تردون للعرس لو خرفان؟

وابوي يعاين بحيره جدي سد التليفون كاله

شعلان:: هاي سوايتك ان ما كسرت ظهرك بيها معتب.

صــيهد:: ذكرتني اعزم شيخ معتب نسيته.

وابوي كام الصيهد يتعارك وياه وهوه عافهم وراح خلاهم واحد يصيح على الثاني محتارين ومايلحكون وامي بساع بدت تنظّف وتعدل بهاليوم بيتنا محترك حرك من الصياح والغلط لورا الغدا اجن سيارات جايبين ذبايح نزلوهن ويهوسون الجدي وابوي رادوا يسلمون على وهـــب ووهب الهسه بالمعامل طلعت امي للهول تتعارك وي ابوي

-اكو واحد باجر عرسه وهوه مصلوب بالمعامل؟

ودوا عليه سليم يجيبه وامي انخبصت خابرت صــيهد واجه اخذها هيه وندى وراحوا اخذوا رغد مشوا للصالون وجويريه وبدور ينظفن واني مكابلتهن وكاعده.

وجده من شافت الوكت كضه وأحنا بعدنا ما كاضين لا تنظيف لا مسوين شي ودت على ريـــمه وودت على عفراء ورنه.

""""

رنـــه :: بدلت بس ما راضيه ادردم

-بس من يردونه نشتغل يودون علينه.

وعفراء تعاين علي أيدها على بطنها كبرانه گالت

-انه مستغربه طــروادة شلون هيج بساع رضى نروح.

وطرواده جان فايت من يم باب الغرفه فتح الباب گالها

-الخاطر وهـــب.

رنـــه :: هذا وهـــب جنه بــدور هم ابو خنيس متزوج سكته وضامها  النوب كبل باجر عرسه الوادم شهور تخطط وهذا بليله، باجر بالعرس نلكه مرته لابسه البدله وحاطه ابنهم بحضنها ما استغرب همه كله عدهم سريع سريع عبالك يركضون وراهم

احجي منفعله وطرواده وعفراء اثنينهم صاحوا ينترون

-وووولج.

فزيت اعاينلهم

طــروادة :: انتِ شمالج حجيج طايح حظه.

-الله عليك طــروادة لا تفجعني انتَ هم متزوج؟ اصدمني هسه عادي ارضى.

هز أيده بنفاذ صبر كال العفراء

-هسه هاي شحجي وياها انا.

عــفراء:: ههههه مو وهـــب سوالنه صدمه حتى انه اشكن بيك، صدك خويه لو متزوج طلعها احنا نرضى.

دار علينه فاتح عينه

طــروادة :: خاب حتى انتِ؟

عــفراء:: احفاد شعلان ما تتأمنون.

-احفاد نعلان احسن، ترى اخابر رجلج يجي ياخذج رايدها عون صارتلي فرعون.

ضحكنه لبست عبايتي وطلعت وياهم اول ما فتحنا باب حوشنه اعاين الباب بيت عمي شاكر طلعوا سلطان وريمه ضلينه واكفين اسمع طــروادة همس

-اهووووه.

وصلوا يمنه ريـــمه سلمت على عفراء ووكفت يمي، سلطان شال راسه مبتسم يعاين العفراء

سلطان:: شلونج خويه.

-الحمدلله الله يخليك انتَ شلونك؟

-بخير نحمد الله.

وداروجهه يحجون سوه گال طرواده

-امشن يله.

مشينه وي عفراء تلاكوا ويانه مــيثم وسليم شايلين مولده  صرنه على صفحة وطلعوا همه من الحوش همست ريـــمه يم اذني

-نسوان وزلم اليوم تنكرب

-المايشتغل عدهم استعداد يطلعونه منّ العشيره

ضحكنه ودارت عفراء خازرتنه جنها طــروادة سكته طبينه

للمطبخ شهكت فاتحة عيني على وسعها وركضنه ثنينا انه وريمه الماسه خايفين عليها من شفنه ايدها، تلفتت خاف احد يسمع

-من نصير وحدنه اسولفلجن.

ريـــمه :: يا چلب طاكج.

-انجبي ولج ابوي.

رنـــه :: احترك ابوج شماله؟

ميلت راسها تتلفت تريدنه نسكت  كمنه سلمنه على جــويريه وعفراء تعاينلها بشك اسمعها همست يمها

عــفراء :: ياهو وياج؟

وجويريه دنكت ساكته عيونها ذبلانه مشينه وي عفراء الغرفة جده سلمنه عليها خلت أيدها على بطن عفراء كالتها

-شني ولد بت؟

-والله جده بعده ما يبين بس الدكتوره گالت اظن بنيه.

تحجي وياها مبتسمه وجده غمتها

-كون ولد.

-اليجي من الله هلا بيه جده نعمه هاي.

دارت عينها علي گالت العفراء

-هاي اخيتج الچليبه لا تجيني لا تكول اشوفن جدتي ومن تسلم علي مطيتني علباها ولا تحب على ايدي.

عــفراء:: والله جده ماتلحك ملتهيه بعد تعرفين بيت والولد والفروخ ماتلحك، رنـــه بوسي ايد جده.

رنـــه ::خزرت عفراء ودرت عيني الجده احجي وياها

-جده ابوي گبل موصيني گال لا تحبين غير ايدي وانه احبن ابوي امشي بوصيّته.

هزّت راسها عوّد متحسفه طلعنه وي البنات نشتغل للغروب وي الصلاة يله اجن عمه وندى ورغد وياهن، طبت ندى حافين وجها وصايره حمره  ورغد طبت تضحك وتحجي متسوگات، درت عيوني اركز بوجهه ندى شلون مرتبكه وخايفه، والا عمه ام صــيهد تكلها على شي يله تسويه، راحت الغرفة وهـــب واحنا هوستنا بالمطبخ.

وره العشا اجن اخوات ام صــيهد والبيت انترس .

جــويريه :: كعدنه بغرفة ام صــيهد نحضر للحنه مال الولد اني وريمه وعفراء ورنه، وماسه كاعده بصفي بأيد وحده تساعدنه گـــلبي يوجعني كل ما اباوعلها، وطول اليوم سالفة ابوي تدك براسي، سحبتني عفراء من إيدي الزاويه الغرفة كعدت باوعت للبنات ورجعت تباوع الوجهي

-شبيج جوري ياهو وياج؟

دنكت عيني مختنگه  وشفتي ترجف بس دموعي مقاومات وماينزلن بلعت الغصه ورفعت عينيّ احاجيها

-ابوي اجه اليوم.

هزت راسها اي ابتسمت بقهر مستهزئه

-اني الماقبلت اروح وياه، طول هالاشهر اني بس اتمنى اخلص من جدي وارجع وي ابوي وهسه اني الرفضت اروح اني الكتله اريد ابقى وي جدي ههه.

-ليش شصار؟ انه ما اريدنج ترحين احسهم مو خوش اوادم.

هزيت راسي اي متحسره نار بگلبي والله صعبه صعّبه احجيها ابوي هذا شلون هيج يسوي بيه، باوعت لعيون عفراء وهيه تتلفت بيني وبين البنات ماتريدهن يسمعن،

-عفراء اني طول عمــري من جنت طفلة الحد ما كبرت  اشكي الابوي من ابن عمي ياسر ودائماً اكله بابا ياسر يتحرش بيه بابا ياسر يسمعني كلام بابا ياسر يريد يلزمني وبكل مره يكلي خيولي اطيح حظه اموته اذبحه وكلشي ما شفت لا ذبحه ولا موته ولا حاجاه، وهسه هههههه هسه جايبلي ياسر يكلي تتزوجينه وبشرط تعوفين آلمدرسه.

حجيتها روحـــي ممروده ميته من القهر وهيه فاتحه عينها بصدمة مسحت عيوني اتأكد دموعي مانازلات، ومن الحركه الگه روحـــي مشلعه اللحم اللي بأطراف اظافري. تحسرت عفراء بقهر مدت ايدها على ايدي.

-همزين ما رحتي خيولون، عيشي وي حيوان ولا تعيشين وي ذكر متحرش.

-ضربني جدي وماسه دافعتلي وابوها دفعها كسر ايدها  وندى لو تشوفين شسووا بيها بالغلط وكل شوي يصيحون عليها النغله كله لان دافعلي عــفراء حتى اللي يدافعلي ينظلم، باوعي والقران إني مؤمنه واخاف ربي بس والله مرات احس بودي إنتحر وأخلص.

مدت ايدها بسرعة سدت حلكي واني احس النفس ضاك بصدري البنات التفتن يباوعلنه ورجعن دارن وجهن من عدنا جرتني عفراء الصدرها

-لا تفكرين هيج جــويريه صيري سباعيه وهسه توصلين بدراستج وتخلصين.

ضحكت رفعت راسي من صدرها مستغربه

-هسه يبطلني.

-اذا احد بظهرج مايكدر جدي يبطلج؟

مسحت وجّهي متحسره سحبتني من ايدي طلعنه من الغرفه كالت الجده

-راح اخذ جــويريه وياي نجيب دشداشتي من بيتنا ونجي.

-بساع الزلم راح تجي وبعد ما تكدرن تردن.

لبست عبايه وطلعت وي عفرء بس الولد بالساحة الفارغة اللي تصير بوسط بيوتهم، يرتبون بيها للحنه، مشينه البيت خالي شامل واني اصلاً ما فاهمه ليش عفراء جابتنا هناه، كعدنا بالحوش على گن الدجاج، وحجت عفراء براحه

عــفراء:: عليمن تردين ترحين وي ابوج لا تزعلين مني بس شنو زين؟ حنين؟ على شنو كاتله روحج عليه كليلي.

دنكت راسي فشلانه كتلت روحـــي ارجع وياه وهوه مابيه شي زين رجعت اباوعلها متحسره

-ردت أعيّش عــفراء ردت اكمل دراسه واعيش بكرامه هنا كل ساعة مذلوله وضاربيني، عفراء جده معاديتني والف كلمه تسمعني باليوم من غير الضرب.

-مو كتلج.

ماخليتها تكمل كلامهآ رأساً سكتتها احجي

-گلتي لوذي بسد قوي يحميج وهّم مآبيهم احد قوي.

ضحكت ايدها على ايدي رافعه حاجبها

-شبيه صــيهد؟ قوي وجدي يهابه، واذا گال كلمه ما يفنيها.

جريت ايدي من ايدها

-هاي من وراج فكرت بيه وفد كرهته يشبه جدي عفراء هوه وجدي نفس الرعانيه والحقاره انسان حقير ماعنده ضمير حتى يحرك گـــلبي يسب امي وهوه يضحك كل ساعه وگالي بنت الحيوانه احتركت روح امج، تردين احتمي بهيج واحد؟ لا والله خليني اشبع تكفخ بأيد جدي ولا احتمي بصيهد الحيوان.

-صــيهد من زمان هيج من وهوه طفل يغلط، هسه اهون گبل جان اليضوجه يفشر عليه ويوميه جايبلنه فصل، ابوي مره كضاه والله اتذكر عمره لو ١٤ لو ١٥

علكه بالحايط وكتله بواير.

-خالو شامل هم جان يضرب.

-اوووه اذا مسوين شي غلط يكطعهم، بس يحبونه حنين ويمشي صح مايرضى بالباطل.

سكتت وهي تحجي بحسره رجعت گالت

-ما ادري جــويريه انه فكرت بصيهد هوه يحب الحلوات هههه، بس هم ترددت من دريت بيه عاشك وحده مو من سلفنه رنـــه سامعته يحجي وي طــروادة،

امدداج ردتج اله والله شحده اليحجي وياج.

- يلعب النفس ترى؟

-ياا صــيهد يلعب النفس؟

-مو على شكله، شخصيته أسلوبه اني جنت أحترمه بعدين من تعارك وياي كرهته حيل، حيوان شايفه الحيوان هوه مثله اكله امي ميته لا تغلط عليها يكلي احتركت روح امج، واجه يريد يضربني لو ما مــاسه لزمته.

-يااا يااا هاي ليمت؟

-والله العظيم ذاك اليوم، وخله السجينه على الطباخ يريد يچويني، ويكلي اذا غلطتي عليَّ بعد الا اكص السانج.

-هاه؟ عود صدك؟

-وأم البنين، رادّ يموتني.

-يا شماله والله عود كلت سبع يحميج.

-لا خيولي واحد حيوان حشا الحيوان منّه، شعلان وحاطته نفس الطكه اثنينهم، يعني اذا مات جدي يورث حقارته وچلابيته الصيهد.

-لا نجبي شسالفه والله صــيهد سبع،

تحجي والتفتنا اثنينا على صوت طــروادة بعيد صاح

-ها صــيهد ما تجي شسوي.

فتحنا عيونه بصدمه اثنينا من سمعنه صوت صــيهد ورانه بينا وبينه بس السياج گاله

صــيهد:: روح هسه آجي.

طــروادة :: الوادم راح تجي

-هسه بس اخابر واجيك.

-تخابرمن نجمة السلف؟

-نجمة القندره وولي هسه اجيك

-حريشي الهالاسلوب الخايس.

جــويريه :: دك گـــلبي بخوف طــروادة راح وعفراء مخليّه أيدها على حلكها تسويلي اشش واحنا ما بينا وبينه بس السياج بلعت ريك ارجف واحس بأيد طكت السياج بقوه وصوته اجه بغضب ينتر

-أطلعي.

نزلت من گن الدجاج خايفه اباوع العفراء وهيه ايدها على بطنها نزلت وجرتني من ايدي مشت للباب فتحته على كيف

-ها خويه.

-وينها جيبيها.

دارتلي عــفراء هزيت راسي لا گالته

-هسه رادين للبيت يم جده تريدنه، خويه والله نتشاقى.

نتر

-اااطلعن.

حجه واسمع حسين يمه گال العفراء

-جده تكول يله تعالن.

عــفراء:: جايين.

حجتها وطلعت جرتني وراها رفعت عيني اله خازرني وشال ايده يسويلي سهّله متحلف رجعنه للبيت جده غلطت علينه لان تأخرت وعفراء من الهبطه بطنها بقت توجعها، كمت اشتغل وي البنات وايدي ترجف

""""""

ندى:: بكل ثانيه ضميري يأنبني كل ما اشوف فرحة امه واخواته گـــلبي يدك بخوف وماسه الوحيده حاسه بيه، كاعده بالغرفة ورغد تعدل بشعري اباوع للمرايه بلا روح ساكته وهنه ملتمات يمنا، مشطت شعري على طوله وشالت خصل من الجهتين لفتهن وثبتتهن بماشات، درت عيني للباب من طبت امه حيل فرحانه گالت

-ها يمه الثوب صارلج.

ابتسمتلها اهز راسي اي ووكفت تشوفني فستان وردي بيه حزام من الخصر والردن طويله وبيها فتحات الحد الزند من يم الصدر خرز يلمع وينزل ويآه بالطول، تباوعلي وتضحك مدت أيدها الرغد بيها علبه كالتها

-لبسيها هذا الذهب، يمه ندى هذن الج لمن وره عرسكم على راحتنه نروح نغيره الج.

سكتت الغصه تصعد وتنزل ببلعومي ورغد تلبسني ذهب بفرح رجعت كعدت وهيه تمكيجني لمن كملنه وطلعنه للصاله كعدت وهنه كدامي يهوسن فرحانات واني بگلبي نحيب وبجي عبالك فاتحه.

مــاسه :: يا حزن عيونها تبتسم للكل وما خافيته، خالاتي يهوسلها وامي فرحانه حيل تركص وتهوس بالهاشمي اللابسته وخالتي الصغيره تباوعلي وتهوس

-وهـــب الزين يا تين البساتين وندى تگول ما ابدله بملايين.

وفرررح گـــلبي يوم الدكن طبوووله فررح گـــلبي .

وضلن خالاتي كلهن يدبجن بالوسط ضحكنا وعاينت الرغد مفتقده ضحكتها من زمان ما شفتها هيج تضحك

خالتي الجبيره كاعده يم جده وماده رجليها ومن شافتهن سكتن كامت طبت بالنص وشالت عبايتها تهوس

"واحنا الطكينا أصبع وحتى الحاكم ركصناااه واحنااا الطكينه اصبع وحتى الحاكم ركصناااه"

وطبن خالاتي والبنات يهوسن وياها.

ورجعت ردت خالتي الثانية

"وامشن نتبارك الابن الطيبات اعلومه"

وضلن يهوسن فرحانات الفرحة امي

شويه وگالو يطب وهـــب يحنيها  صرنه على صفحة كلنه وهوه طب عاينلها مبتسم لابس دشداشة بيضه  امي وكفت كدامه عدلت كسرت الجفيه وباسته بخدوده  لام البشت والسبحة بأيده وايده الثانيه يسلم بيها على خالاتي  اللي اصلاً ماخلنه يوصل يم ندى ضلن يهوسن كدامه وهوه بس يضحك لمن لمحها وبعد ماشال عينه منها حيل حلوه طالعه حقه أخوي يضيع، مشه كعد يمها مبتسم .

ندى:: گـــلبي يدك حييل اعصر ايد بأيد وهو كاعد بصفي وخالاته يهوسله يضحكلهن اجت وحده منهن باسته وباستني كالتله، وين لكيتها خاله ولك ضاميلك بناتنا وتالي تطلع ضالمك لعابه

وهـــب :: هههه بعد روحـــي خاله أخياتي بناتج.

وكفت عدل تهوسله بعبايتها

-وووين دورها ووين لكاها وفصوص روبه يا كفاهااا

وهنه كلهن صارن بالوسط يهوسن لمن خلصت الهوسه يريد يحنيني گالت مرة عمهم وتضحك

ميلاد:: وين دورها خيه ضامها بالمشتمل مدري جم سنه صارلها.

وردت عليها خالته بصوت عالي

- وهااااي الرادها وهاااي التمناها من المشتمل الغرفته جباااانها

وضلت تهوس اباوع الميلاد نگلبت تحجي ما قابله طلعنها للمطبخ واني بس اباوع ساكته دك گـــلبي  حيل من لزم ايدي درت عيني اله مبتسم يباوعلي همس

-ضايجة؟

هزيت راسي لا ودنكت عيني عصر اصابعي بين اصابعه

-افرحي احسبيه شي حقيقي

ابتسمتله اتصنع ضل يمسح على ايدي بحنيه ويباوعلهن حجت مــاسه والتفت عليها من كالتله

مــاسه :: يله وهـــب حنيها!

التفت يضحك ومن شاف ايدها فتح عينه بصدمة

-شبيها ايدج؟

-طحت من الدرج ههههه حتى ما اتعب بعرسك.

-صدك ولج؟

-اي جا شنو حنيها يله.

بقى يباوع الماسه بقهر تحسر همس يم اذني

-اذا ما تحبين الحنه عادي ما احنيج.

-لا عادي شويه بوسط ايدي امك سوته خطيه.

هز راسه موافق شال شويه من الحنه خلاها بوسط ايدي، واجوه يصيحون عليه " يله اطلع" طلعلهم وهنه كعدن بعد كل مجموعه سوه يسولفن أشرت الرغد اسألها

-اگوم عادي؟

-اي عادي تعاي نكعد يم امي

اخذتني من ايدي كعدنه يم امها وخالاتها اثنين يسولفن، وخالتها الچبيره تسولف وي جدتهن وبعد بنات ونسوان ما اعرفهن شنو يصيرلهم كل مجموعه تسولف وحدها، وحده من خالاته گالت

-خاله جا ولا تعارفين اهلج؟

بلعت ريك ساكته گالتلها ام صــيهد

- الچانوا عدلين يا خسارتهم بهالدره  هاي وان چانوا ميتين الف رحمه على روحهم لمن خلفوا هيج تفاحه، يمه مريت وهـــب هاي

وجرتني الها باست خدي ابتسمتلها ساكته دارت الرغد گالتها

-شني خاله ماصار عدج فرخ بعد؟

رغد :: لا خاله ماكو.

ام صــيهد:: كتلها اخذج للدكتوره ما ترضى.

-لا خاله روحـــي جا ذاك الله ما قاسمه ومات وحمدي الله واشكريه ما طول عدج وتتعلقين بيه.

-خاله شما اتعلق بيه صدك ضل عدي اسبوع بس يا يمه يا معزته لليوم ابجي عليه.

ندى:: تحجي بقهر وهنه يحجن عليها حتى تحبل، درت عيني منهن ساكته المح البنات وحده تأشر للثانيه وصعدن  فوك.

رنـــه :: صعدنه فوك هاي بعرس مرتضى سويناها بس بعرس سلطان ما صعدنه لان ماكو هيج هوسه مثل هسه، طفينه الگلوبات وشلنه البرده نعاين حتى محدّ يشوفنه حاطين كراسي وكاعدين هواي ولد وشيوخ  وكف من بينهم مهوال سووه دائره ملتمين عليه كلهم يقرأ وهمّه يهوسون، عيوني دورت اخوي لمحته وابتسمت كرصتني ريـــمه تسأل

-عليمن تعاينين؟

-على طــروادة اخوي يخبل، شوفي الدشداشه الرصاصية تخبل عليه اكله احلى من السوده ما يرضى والله يموت جنه ابوي.

-اخواني احلى والله عاينــي سلطان اذا مو احلى واحد بقرية لفحه غميني.

درت عليها بساع غميتها اضحك

-اخوي احلى .

ريـــمه :: نجبي جا عاينــي ســليم شوفي شلون يموت اذا يوكف يم طــروادة اخوج يصير غراب.

بــدور :: اثنينجن تمسلتن اذا تحجن الصدك ولد عمي خليل احلى شي .

مــاسه :: عيب تعاينن للزلم شمالجن؟

رنـــه :: جا انتِ شجاي تسوين؟

ضحكت مــاسه تكفخ بينه، نعاينلهم يهوسون وكل ساعه واحد يهوس ما نسمعهم. دفعتهن فتحت الشباج على كيف نريد نسمع صوتهم، منذر رجل عفراء شفته بالنص شايل سلاح ويردد

"الماينزل ويهوس جاي مسير مو فرحان"

وهمه يردون ويهوسون كلهم ملتمين مثل الدائره ويفترون رجع واحد گال

"واجب يومك نفرح بيه.. انتَ الغاليي"

وطبوا كلهم للميدان يهوسون ويرددون بنفس الجمله وصوتهم يعلى أكثر واكثر.

صاحت علينه جده ونزلنه جوه  لكيت جــويريه وعفراء كاعدات على الدرج يسولفن عاينتلهن جوري خايفه هزيت راسي اسأل

-شكو؟

عــفراء:: ماكو شي، وين وليتي؟

-صعدنه فوك نعاين عليهم شلون يهوسون عود هوسات النسوان جنها عركه هوسات الزلم تموت كون زلمه انه الا هسه تلكيني بالنص كاضه دشداشتي وعگالي واهوس واطك چيلات.

-هااه هااا تطك جيلات بت شامل .

ضحكنا انه والبنات ونزلنه جوه لمن خلصت الحنه زهره نايمه على رجليَّه وانه طفيت اريد بس اروحن اجه عبود رجعنه، نومت زهره وطبيت اسبح من طلعت لكيت عــفراء مسويتلهم چاي وطماطه گلي كاعدين ياكلون همه وحسين سهران وياهم اليوم، نكثت شعري انشفه صاح طــروادة.

-مو جاي ناكل شبيج؟

-يمك حذاك؟

عبود:: الغسل هذا المآي وصلني شمالج جنج چلب تنكثين؟

عــفراء :: شني السالفه شمالكم وياها اظن هاي دوم هيج تتعاركون وياها وتتشكون منها.

رنـــه :: اي والله هاي هسه زين يوميه حتى يطكوني ووكت الاكل يبچوني ما تشوفيني ضعفانه.

فتحوا عينهم وهيه عاينتلي گالت

-ضعفانه؟  هناه جذبتي.

ضحكت وكعدت اكل وياهم كتله

-طــروادة وعلي الدشداشة الرصاصيه تگطع عليك شني احلى واحد طالع انتَ، الرعينه ريـــمه تكلي لا سلطان وسليم احلى  من طرواده كتلها خاب ولي وعلي هم يلحگون طــروادة، النوب بــدور سكتتنه اثنينه گالت  اصلاً احلى شي طالعين ولد عمي خليل، بس والله يلعبون الروح انتَ وبس محد حلو مثلك.

احجي واكل درت على عفراء تدغ بيه رجعت عاينت الطرواده عاكد حاجبه هز راسه يسأل

-وين شفتنه؟

-من بيت جدي صعدنه فوك شفناكم من الشباج.

عبود:: فرحانه؟ خايسه شني هالاستهتار.

-شني ترى مطفين الگلوبات حتى ما مبينين لا تصيح يلله يله طــروادة راضي انتَ ما عليك فهمت؟

ودرت عيني الطرواده ادري بيه ما رضى بس حتى مايحجي هز ايده گال

-لا تعيدنها ما مسموح وحده تصعد فوك وتعاين مستهترات.

دنكت اكل سكته وهوه هم سكت شويه ونتر

-شبيها ريـــمه شتكول؟

- تكول سلطان وسليم احلى من طــروادة.

عــفراء:: يله انجبي غيّر اخوانها كلمن تشوف اخوها حلو بكيفها بعد.

سكت كام غسل وانه ركضت للغرفه اريد انامن مشطت شعري اجه حسين نام بفراشه گال

-من اكعدج مو ما تكومين وياي

-غير اموتك لو كعدتني شني ليش؟

-اروحن للمرافق أخافن وحدي

-وعلي هم اكعد.

-لا تكعدين وشوفي الا أسويها على فراشج.

شمرت عليه المخده اغلط غماني ونام، ضليت اغفي وعفراء ماكو كمت ادورها شفتها من الشباج طالعه وي طــروادة كاعدين بالحوش مشيت يم شباج المطبخ اقرب حتى اسمعهم گالها

-خاب خويه ما ينسن، جا هسه لو انا حاصد حالي حالّ الوادم ما مطلوب هسه وغرگان بالدين.

-والله طــروادة ما ارضى عليك دوم اذا سويت شي الريمه، زحمه الخاطر الولد.

-لا شمسويلها هسه انا؟ ختولي هاي هيه. بس والله احرك گلبها وگلب امها؟

-شتسوي مثلاً تنهي عليها؟ ينهون على رنـــه! هاي التريدها

-اشك حلكه واكتله بمچانه الينهي على رنـــه.

-هاه اختك عزيزه واختهم زايده عليهم عادي تنهي عليها.

-شو انتِ تحجين وحدج انا كايل انهي عليها؟

-اي جا تكول احرك گلبها بيش تحرك گلبها ما تكلي؟ طــروادة هذا انتَ العاقل تحط عقلك بعقل بنيه مابأيدها كل حيله.

سكت طــروادة يدخن وهيه تحجي وياه وتقنعه گالها

- هاي هيه  يابه خوش

-مالك شغل بريمه بعد؟

هز راسه اي. حجوا على الگيعان والزرع شفتها وكفت ركضت لفراشي لمن اجت هيه سولفت وياها شويه ونمت.

وثاني يوم من الصبح رحنا البيت جدي هوسة العرس تسطر  اكثر وحده تعبانه جــويريه تسوي الشغله وجده تصيح عليها ما راضيه وتفشلها گدام النسوان  كامت تشتغل بلا انتباه  كمت يمها اساعدها.

الورا الغدا كلمن ركضتلها على صفحه تبدل وهمه گالوا الزفه من الصالون يرحون يجيبون ندى.

ندى:: رغد شكت بيه كل شويه تسألني

-شومافرحانه؟

-فرحانه بس تمنيت اهلي موجودين.

ابتسمتلي وهيه تگول

-احنه اهلج انه اعتبريني اختج وامي وعلي فد حنينه وهسه تشوفين تحسبج بنيتها.

ابتسمت اهز راسي اي زفرت نفس بحسره اباوع لروحي بالمرايه بالبدله البيضه اللي ياما وياما تمنيت البسها مثل أي بنيه، قهر بگلبي يا ريت لو عرفت وهـــب بطريقة مختلفه يا ريت عرفته قبل خمس سنوات،  بلعت الغصه مخنوكه ورغد تهفي عليَّ، خابروها كالولها ااجت الزفه، وكفت غطتني ووكفنه منتظرينهم.

لمن اجوا سمعنه اصوات السيارات بالباب گـــلبي يدك حيل كأنما عرس حقيقي  راحت رغد فتحت الباب ، لازمه المسكه بأيد والبرنص العلا راسي بأيدي الثانيه لامته من يم صدري رفعت راسي اباوع من دخل وهـــب لابس قاط كحلي ابتسم من شافني وأشر "نزلي نزلي"

وكبل ما انزله لمحت ولد واكفين يم الباب، وهـــب  وخر رغد من يم الباب واسمع هوساتهم ، اجت رغد يمي دنكت بعد ما اشوف وجهم لمحت حذاء وهـــب تلمع، من تقدم يمي ومد ايده رفع البرنص من عيوني باوع الوجهي مبتسم  باوع لعيوني  همس

-احلى بطه شافتها عيني.

ورغد مكيفه تباوع الوجهي وتضحك ابتسمت دنكت  وكف بصفي اللزم بأيده واسمع صوت صــيهد يصيح

-والله ما تطلع هيج، انتِ ليش ما جايبه عبايه وياج رغد شلون تنسينها؟

بلعت ريّك خايفه وهـــب گاله

-صــيهد هذا فوك راسها ماينشاف شي منها.

-وربعك التارسين الشارع؟  شلون تمشيها ببدلتها كدامهم هيج؟

اعصاب ويصيح لزمت بايد وهـــب حيل خايفه كالتله  رغد

- تغطيها بعباتي واضلن انا هناه لمن توصلون وتردولي؟

نتر عليها

-لااا.

وهـــب :: البشت مالك وين؟

-بالسياره ذبيته.

-جيبه.

شويه واجه صــيهد، وهـــب اخذ البشت منه غطاني بيه ويحجي همس وياي

-اخوي يخاف واحد يلمح عرضي، مو تضوجين.

هزيت راسي لا، ولزمت بأيده خايفه اعثر ما اشوف مشيت وياه بس طلعت من الباب خطوتين صعدت بالسيارة ما ادري ليش هيج صــيهد صاير اعصاب.

صعد وهـــب بصفي  وگدام لمحت زلمه معگل وهوه عود صــيهد يسوق بس ما صعد ولد يهوسون بالشارع وهوه حار برغد شفت واحد من ولد عمهم اجه يريد ياخذ رغد وياه وهوه ما يرضى، وهـــب نزل الجامه صاح عليه بعصبيه

وهـــب :: خلها تروح وي سلطان شني السالفه فضهااا.

والرجال الكدام صاح عليه

-يله بويه يله.

اباوعلهم من الجامه اجاه طــروادة ما ادري شنو حاجاه يله اجه صعد ومشت رغد بين سلطان وطرواده.

صعد صــيهد وركع الباب حيل اعصاب وتراددوا هوه ووهب لزمت گـــلبي  بأيدي خايفه يتعاركون، شويه وسكتوا درت عيني الوهب وشلت ايدي اريد ارفع البرنص من رأسي شويه بس طلعت كذلتي صاح صــيهد بحرگة گلب

- خووويه تغطي تغطي رحمة الدين محمد تغطططي.

بسرعه دنكت مرتبكه ووهب مد ايده يغطيني زين حجه بهدوء

- لا ترفعين راسج يبين شعرج.

همست اريد ابجي

-اختنكت وهـــب حاره.

عله صــيهد التبريد ووجهه علينه گاله

صــيهد:: وهـــب خلها تدنى للنص حتى يوصلها التبريد.

تقربت شويه مدنكه والهوا البارد يجي الوجهي، بس خايفه لان كل شويه صــيهد يغلط ويعصب، يريد ينزل يكتل المصور اللي يصور الزفه شلون سيارته تتزاود وياه بالسياقه، وطول الطريق الهورنات تدك الحد ما وصلنه للقريه، دخل السيارة للحوش  واسمع هوسات النسوان وهـــب وخر بشت صــيهد ورفع البرنص من وجهي حتى اكدر اشوف باوعتلهن يهوسن بعبيهن

"واخوووونه خوش اخو يستاهل الهوسه"

ويفترن ويهوسن  رجعت ليوره من ولد جاب خروف يم رجلينه ذبحه ووهب يگله

-سليم الا اذبحك خمس خرفان بعرسك.

ســليم :: زوج مثلك واعرس انا.

يحجي وي وهـــب وابد مارفع عينه علينه،  عاف الذبيحه وگام مشاني وهـــب حتى ندخل للبيت وهنه گدامه يهوسن

"طبت يالزهره تلكيها طبت يالزهرره تلكيها"

" والحاكم گال هذا العرررس منين والحاكم گال هذا العرس منين"

يهوسن واحنا مشينا للكراسي كعدت وادور وين رغد اريدها تجي يمي، لمحتها دخلت عافت عبايتها بأيد بــدور واجتني

عدلت شعري وبدلتي ووهب بصفي من شاف عيونها حمر گالها

-شني بجيتي من وره صــيهد.

هزت راسها لا ودارت عليهن تصفك وياهن  اكثر انسان فرحان هيه امه شكد ركصت وهوست كصيره وبيضه ولابسه هاشمي حيل حلوه، بيناتهن تهوس تباوعلي طايره من الفرح ابتسملها كل ما تباوعلي.

شويه ووهب طلع من يمي وهوه يوصي برغد حتى يدخلني للغرفه، بقيت بمكاني وكرسي وهـــب كل شويه تكعد بيه وحده ما اعرفها، عيوني تدور بناتنا الاعرفهم ماشفتهن، الحد من رادوا يصبون العشا دخلن مدن السفره للنسوان وصبلهن عشا بس بدن ياكلهن كومني البنآت للغرفة،جلبت برغد كل حيلي

-افتحيلي البدله.

-خل يزفّون رجلج شبيج مستعجله، ندى مجبوره؟

-لاا بس حاره اختنكت.

-ولج غرفتج بارده.

سكتت اطكطك باصابعي، ورا العشا خالات وهـــب كل شويه تدخل وحده تسلم عليه وتخلي بأيدي فلوس لو جايبات بطانيه لو فرشة واني حتى ما اعرف شنو ارد عليهن بس اباوسهن، وام صــيهد ترد بمكاني.

دخلت رغد عدلت كذلتي گالت

- راح يزفون وهـــب، يله صيري سباعيه، هسه اهوسلج هوسه اخليج تلطمين

-لا بداعتي رغد.

ركصتلي حواجبها

رغد :: ولج شتردين اكثر انه رررغد راح اهوسلج.

-خاف سخيفه؟

-اي وعلي سدي اذانج لا تسمعينها.

-لا رغد حباابه.

عافتني وطلعت تضحك، سمعت هوساتهم كلهم وما مهتمه منتظرة هوسة رغد فتح الباب وهـــب وهنه بالباب يهوسن من بينهم صاحت  رغد

"طفي الضوه وسد الباب تونس خويه تونس"

وهنه يردن وراها دنكت عيني أكّل بشفتي سدن الباب ودخل وهـــب يضحك

-راح تموتين شبيج؟

وكفت مرتبكه

-وهـــب عفيه؟

-هااه؟ ميت من الجوع انه تردين من عشا العرس لو معلاك؟

سكتت نزع القاط درت وجهي منه لبّس دشداشه ودكوا الباب انطوه صينيه العشا خلاها بالگاع گال

-تعاي انتِ تحبين آكل الأعراس.

مشيت بهدوء لزم بدلتي حتى أكدر اكعد اكلت شويه وياه وكمت

-اريد ابدل وهـــب.

هز راسه خوش، انطاهن الصينيه، وطلع غسل رجع يمي گال

-انزعج؟

فتحت عيني حيل اباوعله رفع اكتافه

-غير انتِ كلتي اريد ابدل

-لا، صيحلي وحده من البنات بس تفتحلي الشريط مال البدله.

-انا افتحه

بلعت ريك اباوعله نشف ايده واجه وكف وره ظهري  المرايه گدامي باوعلي بالمرايه مبتسم بس اني وجهي تارسه الخوش همست

-وهـــب..

ماخلاني اكمل كلامي گال

-شو مشدود حيل هذا.

سكتت اباوعله بالمرايه فتح الشريط حسيت بيه من رخت البدله لزمتها بأثنين اديه وهوه يهمس

-مشدود حيل ما ينفتح، اوكفي.

ورفع عيّنه للمرايه باوعلي غمضت عيني ورفعت اكتافي مقشعر بدني من خله اصابعه على ظهري ومشاهن بهدوء، گـــلبي يدك حيل وجسمي مقشعر فززني صوته من هم بأذني

-حيل ترفه.

واني مدري شبيه ما اتحرك من بين أديه احس بيه رفع ايده مشاها على ايدي اصابعه باردات عكس جسمي وصلهم يم رگبتي ورجع همس

-الله يعين گـــلبي شلون أصبر.

حجايته احس وعتني ابتعدت من بين اديه لازمه بالبدله ابتسم بطرف شفته حجيت ارجف

-انتَ وعدتني ترى.

عكد حاجبه باستغراب

-وشفتيني مو گد كلمتي؟

-لا بس يعني لا تبقى كل شويه تلزمني.

هز راسه خوش وطلع من الغرفه،   بسرعه بدلت وفتحت الباب شافتني رغد طلعت وياها غسلت وجهي ورجّعت للغرفه ميته قهر، قفلت الباب وفرشت بالگاع بصف الجربايه لمن احه وهـــب ركضت فتحتله الباب دخل معصب، شاف فراشي بالگاع هز راسه موافق گال

- اذا واحد شاف فراشج بالگاع وعرف ما تنامين يمي اموتج.

- محد يشوفه.

هز رأسه خوش، طفه الضوه راح للچبريايه واني على الظلمه رحت لفراشي.

""""""

جــويريه :: احس جسمي كله ورم من التعب اريد بس تخلص الهوسه وأصعد لفراشي، ام صــيهد التهت وي اخواتها تعشيهن، رنـــه ويانه تعبـــت وعفراء كد ما وكفت ظهرها بقى يوجعها، وماسه ايدها مأذيتها وما عايفتني تشتغل وياي

الحد ما بدت الناس كلمن يروح الاهله، اخوات ام صــيهد بقن يمنا فرشتلهن بغرفتها ورنه وعفراء هم راحن من كملنه هوست المطبخ، هستوني كلت يا الله خلصت صاحت جده

-تعاي اكنسي الهول.

اخذت المكناسه ورحت كنسته مــاسه واكفتلي يم الدرج أشرتلي

"راح اصعد كملي الهول وتعاي"

هزيت راسي اي خلصت الهول وكمت اريد اغسل وجهي واصعد اجت وراي جده گالت

-اغسلي الحوش الصبح ماتلحكن نسوان تجينه تباركلنه.

زفرت نفس بقهر اباوع الوجها

-جده تعبـــت  والله اكعد الصبح واغسله.

مدت ايدها تكرصني وتغلط

- خايسه مثل امج ما بيج خير، هسه تعسلينه.

جريت ايدي منها أريد اطلع تعلمت من ماسه اذا تطلع للحوش نلبس عباية امها المعلكه بالمطبخ اريد البسها صاحت جده

-عوفيها امشي الدنيا ليل محد يجي.

عفتها وطلعت كوه اتنفس كد ما مقهوره، شغلت الماطور ورشيته وهيه واكفتلي يم باب المطبخ بس ابتعدت يم السياج بجيت مدنكه أغسل وابجي

-تعبـــت يا رب تعبـــت.

مسحت دموعي وكفت من صاحت

-مناه مناه الريگان كلها اغسليها.

هزيت راسي اي، المكناسه بأيد وصوندة الماي بأيد ثاني احس نار تطلع من صدري، كمت اخذ ماي من الصونده واخليه على صدري واغسل وجهي ابد ماتحركت منّ مكانها واكفه مثّل النسر وتأشر تعاي مناه وتعاي مناه.

وصلت يم مشتمل وهـــب باوعت للباب داكينه قفل شكده اخذه جدي من عنده، غسلت داير ما داير الحوش گالت

-رايحه اصلي لو رديت ولكيتج ما كاضيته كله ماتنامين ليلج.

بس دخلت رفعت راسي للسما صاافيه ومتروسه نجوم  شهكت من كل گـــلبي

-يارب لا تقبللها صلاة يارب كل دمعه نزلت بسببهم وكل تعب عشته ما مسامحتهم عليه.

مسحت عيوني ودنكت اكمل غسل الحد ما وصلت يم مشتمل صــيهد نظيف شمرت  المكناسه كلت بس ارشه، مخليه اصبعي بالصونده وارش يم الباب درت عيني الباب المطبخ من انفتح طلعت مــاسه  بلا حجاب مدت راسها تحجي

-ها جوري ؟

نزلت ايدي بقهر اريد أحاجيها بعدني ماناطقه عافتني ودخلت

درت ليوره فازه على صوته شهكت فاتحه عيني وهوه ما انطاني مجال استوعب جراني واني اجر بالصونده، جراني من ايدي شمر الصونده

-هددددددني.

صيحت ارجف سد الباب ولازم ايدي بقوه مجلبه بايده متخبله

-اصرررخ اصرخ والله اصرخ هدني.

عتني حيل مقابيله وكفني خازرني

-صرخي يللللله صرخي.

رفعت ايدي أحتمي خايفه جراني يدفع بيه للغرفه تخبلت بس اسحل بروحي من ايده دفعني للغرفه ووكف بالباب

-ياهو اليشبهه شعلان ولج؟

يحجي بحركه، دنكت لازمه ايدي مكان ايده امسح عليه موحوعه وكلبي يدك بخوف صيح بصوت عالي فززني من مكاني

- احجيييييي.

رجعت ليوره خايفه هزيت راسي لا حط ايده على صدره

-انا اشبه شعلااان؟

اشهك بلا دموع هزيت راسي لا

-اسفه وألله آسفه.

حجيت شفايفي يرجفن احس لو يذبحني هسه ما يرفله جفن رفع ايده الترجف يحذر

-يشهد الحسين اذا النوب سمعتج مشبهتني بنعلان الا أشك حلگج.

مسحت وجهي اهز راسي اي اي

-حيوانه.

باوعتله بقهر اتوسل مايسب امي وهوه يباوعلي بغضب نتر

- السوالف العلمتج عليهنّ عفراء اذا سويتيهن امووتنج، انا مو اثول حتى تضحكين علي فهمتي؟

دنكت ميته قهر هزيت راسي اي

- واذا المحج محاوله تسوّين هالسالفه ويَ واحد مناه مناه وتنزعيله حجابك موتج على ايدي.

-ما احاااول ما احاول عسى ما باجر يبطلوني من آلمدرسه بعد ما اريد واحد يحميني بس كااافي غلطت مره لا يوميه تذكرني بيها.

-صوووتج.

-صوتك انتَ.

دخل للغرفه بعصبيه، رفعت ايدي فوك رأسي احتمي، ما طكاني وخرت ايدي اباوع لوجهه ارجف خازرني ينافخ

-انتِ فوك ظيم مشعول اجيتي تختبريني، تحجين بزودج وتغلطين عود بنيه وما اطكج غير اشوفنج شعلان واخبزج خبز.

رجعت ليورا بين الكنتور والجربايه مسافه صغيره

- لا تحطين راسج براسي

هزيت راسي اي ومسحت وجهي صوتي مخنوك

-خلي اروح جده راح تطلع لازم اكمل الحوش

شمر السبحه البأيده على الميز مسح وجهه بأثنين اديه. حرك ركبته منآه ومناه يطكطكها وحجه بهدوء

- جوري.

بلعت ريك اباوع الوجهه حجه اسمي وطلع باكيت الجكاير من جيبه شعل جكاره جر منها نفس زفره علي  مضيك عينه ويحجي بهدوء

-بله سولفيلي منو متعارك وياجن؟ امس منو ضاربج؟

هزيت راسي لا همست گـــلبي يدك بخوف

-محد.

جر نفس ثاني من الجكاره ومداها الي باوعتلها بخوف مرتبكه أشر

-اخذيها.

مديت ايدي ترجف من بين اصابعه خليتها بين اصابعي

-جري منها نفس.

-ما اريد.

-جربيها نفس الجنتِ تدخنينه؟

جريت ردن دشداشتي مسحتها وخليتها بحلكي اباوعله سحبت منها نفس وزفرته گال

-هاه؟

-زينه بس مو مثله.

-هاه اي بله كليلي ياهو كسر ايد مــاسه.

سكتت الجكاره بين اصابعي سحبها من ايدي وراساً خلاها بحلكه سحب منها نفس ورجع انطانياها مسحتها وسحبت منها نفس بعدني ما زافرته گال

-جدي لو ابوي؟

-شنو؟

-الكسر ايدها جدي لو ابوي.

-مو هيه دافعتلي.

-اممم، دخني دخني.

رفعت الجكاره الحلكي سحبت منها نفس كال

-اي دافعتلج منو الطكاج؟

-جدي.

-اي، وماسه دافعتلج وكسر ايدها؟

-لا ابوك دفعها حتى ماتحميني وصارت أيدها على باية الدرج انكسرت.

هز راسه اي وجر الجكاره من ايدي بعصبيه وبنفس اللحظه مد أيده ضربني على راسي خازرني

- انااا شكتلج على الجكاير؟

رجعت ليوره اكثر مرتبكه همست

-انت كتلي دخني.

-وانتِ شني مسودنه وتاخذين بحجيي؟

اباوعله بصدمة صاح

-بالعباس النوب من تدخنين اچويج.

يحجي والجكاره بحلكه مشيت اريد اطلع من يمه نتر متذكر

-النوب گولي علي حيوان ويشبهه شعلان الا اشك حلكج.

طلعت من باب الغرفه احجي بصوت يرجف

-شك حلك العاشكها.

-ترحيلها فدوووه ام الجكاير، رادديني بعد وشوفي شسوي بيج.

طلعت من يمه بسرعة طفيت الماطور وركضت صعدت للغرفة باوعت الماسه بزعل بدلت ورحت لفراشي گالت

-والله أشرلي اذبحج ادخلي جوه وخفت.

درت وجهي عليها

-كتله ابوج كسر ايدج.

شهكت ايدها على حلكها

-صدك تحجييين؟

-والله ما ادري بعد حجيت خوفني وحجيت.

وبس حجيت سمعنه صوت دكه بحديد قويه على باب الهول وصوته يصيح

- اكعددد شعلااان، وينك وووليد.

مــاسه فتحت عيونها بصدمة وهوه لا كال عدنا ناس وعرس وخالاته نايمات كلها طلعت نزلنه على الدرج نباوعله خالو وليد يحاجيه بهدوء وهوه نار گاله

-تكسر ايد مــاسه؟

-عمي بالحسين ما ادري بيها دفعتها وطاحت.

شعلان:: وانتَ شني تحاسبنه بناتنا لو بناتك شو صاير فد نوب انتَ وسوالفك كثرن.

صــيهد :: انتَ اول واحد أحاسبك شتريد من هاليتيمه؟ انتَ تطكها جده تطكها، المن جبتوها تدكون عليها؟

دك گـــلبي بخوف طلعله وهـــب يسكته وجدي تخبل شلون حاجاه هيج يصيح

شعلان:: هناه احط چيله براسها واكتلها ومحد يحجي حرف ياهي مالتكم بيها.

صــيهد:: فننننك يله فنك.

ابوه يحاجيه وخالاته فزن وهوه متخبل ويغلط  جراه وهـــب يريد يطلعه وهوه يصيح بحرگة گلب

صــيهد:: يشهد الحسين لو حاجيتوا البنات صاروخ وافجر البيت بيكم چلاااب انعل ساسكم.

وجدي وابوه يغلطون عليه طلعه وهـــب من الهول واخوات ام صــيهد تخبلن يردن يخابرن على ولدهن يجون ياخذونهن  يگللها

"جا احنا ما نعارفه صــيهد مسودن يمه النوب يفجركم خل نروح لهلنه"

وام صــيهد بس تريدهن يرجعن ينامن رفع راسه جدي وباوعلي بغضب جسمي رجف من نظرته اللي  سحبتني مــاسه من ايدي رجعنه للغرفه، نمت بخوف، ومن الفحر كعدنه، عبالنه رغد تبقى ويانه بس وي الريوك اجه عليها زوجها وراحت.

""""""

ريـــمه :: ثاني يوم العرس ماخلتني امي اروح يم بيت جدي جنت رايده اروح اساعد البنات ماقبلت حاجتها هاجر بالاشاره تكلها

"خليها تفرح وي البنات"

ميلاد:: هم خرسه وهم السانج متبري منج اكعددي.

نترت على هاجر ومشت للمطبخ سكتت وهاجر تبتسم حتى تبين هيه ما مهتمه طلع سلطان من الدوانيه عكدت حاجبي مستغربه ليش ماصاعد الغرفته، غسل ودخل كعد بالمطبخ دخلت وراه اسويله ريوك من امي طلعت، كمل ريوكه ساكت وكام من اندك باب حوشنه شويه ورجعلي گال

-حسين مدري شنو يريد منج.

طلعت وياه طب حسين للحوش يحاجيني

حسين:: تكول عفره انا اروحن اليوم مو تردين خياطات وينهن، تكول جيبيهن وتعاي.

درت عيني السلطان احاجيه

-امي ماترضى اروحن

-جيبيهن وتعاي.

ركضت للبيت جبت القماش وامي بغرفتها ماشافتني صحت الهاجر وطلعنه اثنينا وي سلطان ماله خلك روحه  من شاف حسين ويانه گال

- روحن يله.

مشينه وي حسين وسلطان رجع للبيت  بس طبينه للحوش هاجر ركضت للصخله فرحانه ضحكت وحسين يكلها تعاي شوفي الأرانب

-حسين هاسكي مو هناه؟

-لا لكيناه شارد الصاحبته، يرد بعدين.

عفته ومشيت اريد اطب للبيت بس فتحت باب الهول صار بوجهي طــروادة يريد يطلع كتفي طخ بأيده رجعت ليوره خازرته وهوه راد يكمل يطلع من لمح عيوني فتح عينه بصدمة

-شو انتِ خازررتني؟

-لاازم تريدني اغمض عيوني؟

-ببيتي وتنترين والسانج واصل اذانج للج.

عــفراء:: هااه هاه طــروادة شنّي السآلفه

جرتني عفراء وراها واني  متمحله عليه من سالفة هاسكي

-يله يله على اساس بيتك هوه بيت عمي شامل من انتَ تبنيه بفلوسك ذاك الوكت گول بيتي.

فتح عينه بصدمة وعفراء راحتله تجر بيه تريد يطلع ورنه تجر بيه حتى أدخّل للغرفة

- كل تربيه ماعدج مستهتره صوج سلطان الخايس.

- هاااي الشاطر بيها انتَ بس تريد سلطان يمد ايده عليَّ عبالك هوه مثلك يطك اخته.

حجيت بلا ما انتبهه النفسي محروك گـــلبي منه  وهوه من وره عفراء متسودن  مخلي اصبعه على حلكه وينتر بحرگه

- سدي حلكج سددي حلكج.

-يله يله بررره يله.

-خررررب

صيح وشال ايده بغضب طك جام الشباج مال الهول كسره ومدري شلون ايده ما تعورت رجعت ليوره فازه وعفراء مجلبه بيه

حاضنته من صدره راسها واصل لمعدته وهوه جنه شبة كهرباء، راشدي واحد منه يصفكنه بالگاع انه ورنه صاح

- تأدبي لا بالحسين اخوتج مايوكفون بوجهي انا الاربيج من جددديد.

-انتَ ربي  رنـــه ومالك شغل بينه.

طكتني رنـــه على ظهري صاح هوه

طــروادة :: رنـــه اكتليهااا اكتليهااا لو اموووتج.

عــفراء:: يااابه اطلع رووح روح ولك طــروادة.

دفعته من الهول طلعته وهوه يصيح

-بالحسين لو ما مره الا اكسرج تكسر بت ميلاد بت السحاره.

واباوع العفراء رفعت ايدها على حلكه تريد تسكته

عــفراء :: روح روح للگيعان.

دفعته طلعته من الحوش سدت الباب واجتني بعصبيه جرتني من اذاني.

عــفراء:: ولج ريـــمه ليش هيج وياااه هاه شمالج؟

جلبت بأيدها

-خيولي حقير يريد سلطان يكتلني يوميه يدفعه عليَّ

رنـــه ::هدي اذانها انه الاكضها، ولج شني تكليله ربي رنـــه جا انه ما متربيه.

دفعت ايدها اطكها

-وانتِ شلون تطكيني گدامه خايسه.

رزلتنه عفراء دخلنه للغرفه محضره غراضها تريد تروح اطيتها  القطع العندي والفلوس حتى تخيطلي يم الخياطه اليم عيالها، ضليت يمهن شويه ورجعنه انه وهاجر.

رنـــه :: اكثر شي يقهرني من عفراء تروح، اجه رجلها عليها؛

لا عبود موجود ولا طــروادة حتى يطلعوله وياها فتحت باب الحوش شافت الولد واكفين يمه مــيثم وبريا وسليم.

سلمت علي وراحت،ورا العشا اجاني طــروادة گال

-الولد راح يجون سوي چاي.

كمت ساكته لاول مره سويتلهم چاي واعاين من شباج المطبخ طبوا واحد وره الثاني حتى وهـــب العريس شعدك جاي يحضي امداني وامده هيج عريس،

ادردم وي روحـــي ماكدرت اضل ساكته.

خليتله الچاي بترمز اخذه هوا واستكاين وراح كد ماضايجه منهم حتى مالي خلك اسمعلهم.

وهـــب :: لماتنه مو مثل گبل، بريا عبالك بعالم وحده، سلطان وصيهد بس واحد يحجي شي الثاني يشمر عليه حجايه وتكب بينهم، بس طــروادة يعدلها بسوالفه الحلوه مثل عمي شامل

خلانه نضحك كلنه  تمددت منتجي على المخده وسليم وبريا بصفي  سلطان جر ســليم  دفعه لبعيد ومد روحه مخلي راسه على بطني لان مالكه مخده مندمجين نسولف ووصلت رساله التليفوني درت عيني بس قريت اسمه رجل رغد تجاهلته مارديت ولا شفتها اصلاً.

اعاين للولد ومديت ايدي العب بشعر سلطان

سلطان:: شوف شوف بس تزوج تعلم.

-اعجبك.

صــيهد :: يللله لا تشاقون هيج شقه

سكتنه نضحك سلطان يگلب بتليفونه  وهوه على بطني، ودك صوت رساله  دنكت عاينت ويآه دخل عليها  ركزت من لمحته هم رجل رغد كعد سلطان عدل فاتح عينه  كلها ومتاني الصوره تحمل وبنفس الوكت دكت رساله بتليفونات الكل.

يتبع....

ايلول💚

روايــــة أرض الـــــخناجر 🗡️

بقلمي الكاتبة ايـــلول .

تصويت وتعليق بين الفقرات لطفاً💚

══━━━━✥◈✥━━━━══

بعدك

ما بنيت لغيرك احلام

ولا لعيونهم مشّيت الايام

وگف ميلي بـرحيلك صارله اعوام

ويلوموني ...

و انه بيا حال وانلام  .

══━━━━✥◈✥━━━━══

وهـــب :: بس وصلت رسالة للكل واحد عاين لوجهه الثاني مستغربين  وكلمن كض تليفونه جريت تليفوني فتحت الرسالة ولان النت بعيد الصورة طولت ما فتحت  شلت راسي اعاين وي سلطان هستوها الصورة فتحت تدنيت عليه اركز وهو طب على الصورة والمحها جثة ممدده لا مبين منها وجهه ولا شي بس الدم يمها  طفر سلطان يركض  والولد واحد يصيح على الثاني شنهاي شنهاي

وبنفس اللحظة وصلت رسالة ثانية  النه واحد وره الثاني مكتوب بيها

"أليسوه والمايسوه اليوم اخليه يلعب بعرضكم.

شلت راسي  لصيهد مصدوم وهوه فتح عينه بصدمه همس

-رغد.

كل الصار بثواني بس جنهن عمر وركضنه مثل المسودنين اركض ودرت عيني لسيارة سلطان وشخطتها طلع گبلنه كلنه، ومــيثم وهوه يركض لسلاحه  صاح

مــيثم :: سلطااان بلا سلاح.

مــاسه :: كاعدين بغرفة ندى  انه والبنات نسولف وهيه كاضه الصايه والحجاب مال رغد راحت بيهن للصالون بيوم العرس، رشتلهن عطر وخلتهم بعلاگه گالت

ندى:: عادي وهـــب يقبل يوديهن الها؟

هستوني احاجيها وفزينه على صياح الولد وركضتهم صرخت هيه فازه من وهـــب دفع الباب وركض صعد على الميز وجر السلاح من فوك الكنتور  مافاهمين شي امي تصرخ متسودنه وصوت صــيهد يصيح بحرگة گلب

- والله احرررررررك سلفهم.

طلعنه نركض اعمامي وجدي يتصايحون وامي وجده يصرخن  وطب صــيهد الغرفة امي متسودن وامي مجلبه بيده تحاجيه وهوه يرجف بحرگه شمر الفراشات من النضيده وجر التفك وامي تسودنت ضلت تلطم، وصوت طــروادة يصيح عليهم من بره الحوش  جدي يغلط عليهم يريدهم يكلوله عليمن هادين،

وهمه يتراكضون طلعوا من البيت وامي تركض وراهم نريد نكضها ماكو وجدي وابوي يخابرون ركضت وره امي من طلعت بره الحوش طاحت بالگاع وتبجي تصرخ

-يمه وووين رايحين ووولك يمه.

كعدت يمها ارجف اريد اهديها صعدوا بالسيارات كلهم من چبيرهم لصغيرهم سجاد وعبود طلعوا من بيت عمي شاكر كلشي مافاهمين حالهم حالنه وصعدوا وياهم شخطوا السيارات وطاروا نشوف وراهم بس الترابه والسلاح طالع من الجامات.

وهـــب :: احس حيلي نهد والمسافة البينا وبينها مو ربع ساعة حسيتها سنين مايكضن، سيارة سلطان كدامنه اشوفها طايره، ووراه صــيهد وطرواده، وانه وسليم وبريا بسياره وميثم وسجاد وعبود ورانه.

ونعاين كدامنه سيارة سلطان طفرت من الشارع للترابي نگلبت صيحنه كلنه بخوف

-الله الله.

صــيهد وصله وماوكف، وكبل ما نوصل سيارة سلطان شفناه طلع من السياره  يرول سند اديه على اركبه، وسليم يمي انتهى عباله صار بيه شي ، من وصلناه  وكفت بس نزلت سليم عليهم ومشيت، اعاينلهم بالمرايه مــيثم وكف عليهم، وبريا خابرهم

بريا::سلطان مابيه شي؟

ســليم :: وراكم احنا مابيه شي سهلااات.

وهـــب ::وصلناهم  نرمي ونزلنه نتراكض بسلاحنه بس نسوان تتصارخ وفروخ تبجي اركض وره صــيهد هوه وطرواده وهمه يدفرون بالبيبان من غرفة الغرفة، ولا وحده البيهن كالت هاي غرفة اختكم، ركضت الصيهد اتعثر  دك باب الغرفة ودفره واشوفن رغد مدمايه بالگاع جثة لا تحرك ايد ولا رجل.

من صدمتي بمنظر اختي ماتن رجليَّه وصيهد ركضلها حطها بحضنه متسودن يمسح الدم من وجها ويطك على خدها يحاجيها بصوت يرجف

صــيهد :: خوويه رغد ررغد.

اندفعت من الباب وطب سلطان دمه بطوله ومترب  جراها من ايد صــيهد يصيح متسودن

سلطان:: رغددددد رغددد.

رغد :: اريد افتح عيني ما أكدر، صوت براسي مثل الصدى جفنيّ ثگيل ومستسلمه للموت، هاي اخر محطات الصبر، والموت ارحم الي من الاعيشه.

اخذني الظلام وردني صوت صــيهد اريد اكد افتح عيني واحرك شي من جسمي اريد اكله خويه تأخرت عليَّ اريد أكدر انطق واحجيله وياخذ حگي من الكل اولهم أبوي وجدي.

بس كلشي خارج عن سيطرتي احس جسمي مات وروحي مچلبه بالحياة استسلم واحس شي بيه يفز ما يريد يروح، اقاتل وبس أريد ارفع جفني وأفتح عيني، وسمعت صوت فزز وجع بگلبي يعادل وجع جسمي الف مره.

وچن شايله جبل على عيوني احس كل حيلي راح يله گدرت ارفع جفني وألمح وجهه المدمه، بالالف يا علي يله كدرت احرك بؤبؤ عيني الصيهد اللي حاير يلف بيه بعبايه يرجف وشالني على گلبه، عيني كوه فاتحتها.

غمضت ورجعت فتحت خايفه على اخواني وولد عمي خايفه على سلطان، من سمعت صوت زلم السلف تتصايح وياهم، تارسين الساحة، والولد يمشون كدامنه شايلين تفكهم على جتافهم وصيهد شايلني ويمشي وراهم، رديت غمضت وفتحت من حسيت روحـــي بحضن وهـــب همست صوتي رايح وخايفه

-صــيهد.

واسمع صوته يصيح والولد يأيدونه، صاح بحرگه

صــيهد:: لا يضل واحد ببيته سلفكم الليله احركه يشهد الحسين.

وهـــب :: طاحت ايدها الجانت كاضه بأيدي وطاحت وياها روحـــي صيحت على صــيهد

-صــيهد تعااال صــيهد.

صاح على صــيهد واحد من اعمامهم

-عمي شني ما صايره زلمه يطك مرته؟

صــيهد:: ضلوا ببيوتكم والكفل اخته احركها هيه والبيها.

صعدوا الولد وطلعنه ، ذبينه الاسلحة بسيارة مــيثم ردوها ســليم وعبود للقريه واحنا رحنه للمستشفى، اخذها صــيهد من ايدي طب للمستشفى يركض واحنه وراه اطاها الهم، وسلطان بباب المستشفى طاح

شگ براسه چبير واصابعه ثنين مكسرات.

"""""

مــاسه :: ليلنه نگلب خوف وصياح وعرك واحنا يكون فاهمين الولد عليمن هدوا وليش، ومن ثارن الطلقات وسمعناهن تسودنه مو كلش بعيدات علينه من حوشنه وسمعناهن، الوادم ضلت تخابر على جدي گالوله عقيل رجل رغد كاتلها.

واحنا تسودنه امي شكت دشداشتها تلطم واحنا نصرخ ونبجي كل ظنه رغد ماتت لمن ابوي صاح

- بالمستشفى اسكتن اسكتن.

بس شيسكتنه، جدي عباله سالفة كتله وبس حتى يستهان بيها، مسحت وجهي وكمت للهول فاتح السماعه مال التلفون ويحجون وي صــيهد هوه وابوي گاله

شعلان:: شني ولك محد طاك مرته وهاد على الوادم؟

واسمع صــيهد يصيح بحرگه

صــيهد:: هاد عليهم؟ شتحجي انتَ عمي وحگ الحسين الليله اخليهم ليلهم احمر الليله بيوتهم من النار ما تطفى.

وليد :: صــيهد حاجيني بويه الوادم تخابر علينه واحنه ما فاهمين شي ما نعارف وين الحگ ونحجي ونردهم ، مخلينه على عمه عيوووونه انتم.

صــيهد:: ودالنه صورتها مدمايه وكتبلنه اليسوه والما يسوه اخليه يلعب بعرضكم، وصلت اختييييي جثة غرگانه بدمهاا يا حگ التحجي بيه انتَ، اريد قندره من شيوخكم يگول الحك الهم الا اكتله وياهم.

ماسه :: حجاها وسد التلفون، ابوي وجدي وعمي شاكر تسودنوا كلمن يخابر بصفحة وكل ساعة واحد مصيح علينه لان نبجي، لمن اجوا سجاد وعبود ووراهم سيارة تجر بسيارة سلطان، طلعن ريمه وميلاد والاء متسودنات ويتصارخن وسجاد يصيح

-مابيه شي والله مابيه شي

لمن جدي صيح عليهن يله سكتن وهوه كض الولد يحجي وياهم ويسأل عبود گاله

عبود:: من وصلنه مالكينه لا رجلها ولا زلمه من بيتهم لا اخوته لا ابوه، بس من اعمامهم وكنالهم الكم مهله ساعتين احنا وياكم گوم، هسه بس يردون الولد من المستشفى، ندكهم ونحرك سلفهم.

شعلان:: شلون ما كتلتوووه بساعتها انتم خنااااث مابيكم خيررر.

سجاد:: مالكينااااه مالكيناه شنكتل؟

تعارك وياهم جدي طلعوا من الحوش طلعنه انه وجويريه شفناهم كاعدين بره الحوش بصف السياج يمهم صناديگ طلق ياخذون ويعبون بالمخازن مشينه من يم مشتمل صيهد نعاين للشارع هلبت يردون، ساعة مرت واشوفن السيارات نزلت على شارعنه طايرات، ركضنه للبيت

-بويه اجوا الولد.

كامولهم وامي ترجف كلها ركضت وياهم، طبوا وهـــب وصيهد للبيت مستعجلين ويتراكضون وصياحهم بحرگه صاح صــيهد على امي

- بساااع بدلي هسّه ياخذج سجاد للمستشفى.

- ووولك يمه ميته لو عدله اختك حاجيني لوعتوا گـــلبي.

وهوه ملتهي لف الچفيه على راسه وتلثم بيها ويشد بمشلح السلاح على صدره، ذولاك خابروا شيوخ والشيوخ خابروا جدّي گالوله

-كض ولدك ذولاك متانينهم يم النهر وره الساتر راح يتكاتلون.

وابوي من يمه صاح

وليد :: اذا ردوا ولدي وما حاركين سلفهم انا الاحطهم على النهر واكتلهم.

وذاك الزلمه يصيح بالتليفون

-عقيل جان سكران ومايدري بروحه، تحاسبون زلمه سكران؟ اطوا مجال يجون يحولون عدكم وتنحل.

وصيهد راح على جدي متسودن جر التلفون من ايده وسد الخط

كاله

- حگ اختي الليله اخذه، لا يحولون عدنه ولا يدورون حل.

جدي صفكلهم يله ما يله، وزلم عشيرتنه مدري ليمت وصلهم الخبر بربع ساعة كلمن جاب سلاحه وسيارته واجه، ترسوا الساحة،

طلع وهـــب من غرفته وهم مشلح الطلق على صدره وندى وراه تبجي خايفه مجلبه بأيد جــويريه

وامي طلعت ترجف سجاد متانيها بالباب اخذها وراح  ابوي وعمي شاكر تحزموا وي الولد

وجدي صاح على جده

شعلان::امشي جيبي عيال شامل وعيال شاكر هناه.

وهيه بساع حطت العبايه على راسها وطلعت.

ركضت للمطبخ اعاين من الشباج وكفوا بحوشنه گـــلبي يدك بخوف امسح دموعي ويردن ينزلن، كلهم ملثمين والمشالح وجعبة المخازن تارسه صدورهم، طبت رنـــه واخوانها من باب المطبخ خايفه كلشي ماتدري

رنـــه :: وين راح يرحون؟

درت عليها مختنگه گوه احجي جرتها جــويريه تمسح بدموعها

- لا تخافين.

وهيه تعاين ميته من الخوف هستوهم الولد يردون يطلعون وهيه جرت روحها من ايد جوري  وطلعت تركض  وترجف صاحت   بخوف دموعها خانگتها

رنـــه::طــروادة.

داروا عليها الولد كلهم، ومن بينهم اجوها يركضون عبود وطرواده چلبت بأديهم تبجي وصوتها يرجف

رنـــه :: خاف تمووتون؟ اموتن انه بدونكم والحسين اموتن.

طــروادة خله ايده على راسها وعبود يمسح بعيونها

طــروادة:: افاا رنـــه بت شامل تخاف؟ لا تخافين رادين بحيل الله، انتِ طبي جوه ولا تردين للبيت لمن اجيج خوش؟

بعدهم يحجون وياها وطبوا عيال بيت عمي شاكر ميلاد چلبت بسلطان  اصابعه وراسه ملفوفات، تكله لا تروح وهوه ولا دايراها بال طلع من الحوش، وهنه طبن للبيت، والولد عافوا رنـــه وراحوا يركضون ورهم.

بساع طلعت اركض من المطبخ للحوش من يم المشتمل اعاينلهم، السيارات وحده وره الثانيه والسلاح اشوفنه طالع من الجامات، الطامه الاكبر رجل رغد وهوه سكران داز الصورة الغير ولدنه وكاتبلهم نفس الحجي وهمه متسودنين.

رديت طبيت للمطبخ جــويريه حايره بين ندى وبين رنـــه، ندى اول مره تعيش هيج موقف عكسنه احنه متعودين، ورنه مره طــروادة هم هيج عركه وردلها مصوب، هل ميته من الخوف

كومتها ريـــمه غسلت وجها تسأل

ريـــمه :: شصار؟كلشي ما ندري احنه بس گالوا عركه وسلطان مگلوبه بيه السياره.

مــاسه :: عقيل الحقير طلع يسكر وهوه سكران كاتل رغد ومودي صورها للولد كلهم كاتبلهم اليسوه والمايسوه اخليه يلعب بعضركم، والنوب مو بس الولدنه مودّي آلصور حتى الوادم من السلف وكاتب نفس الحجي مايدري بروحه جعل طلعت روحه.

احجي وهيه حاطه ايدها على گلبها بصدمه ومن نظرتها حسيت بيها تدري بسالفة سلطان ورغد درت عيني ساكته اجت جده تغلط على ندى شلون خايفه على وهـــب، وراحت للهول كعدت يم ميلاد ونسوان ولدها فرح والاء.

شويه ودك هورن سيارة طلع جدي واحنه بباب المطبخ نعاين ركضت رنـــه من لمحتها عفراء وجها اصفر وخايفه كلنه نحجيلها

مشينه وراها من طبت للهول سلمت وجده كالتلها

-ياهو الجابج رجلج؟

عــفراء:: لا جده حماي جابني جا منذر وي الولد وما رضى يكلي شني السالفة، هل اجيت.

كلنه صحنه

-دخيلك يا علي

من سمعنه صوت الطلق وبعد ما سكت، كعدت عــفراء يم جده ايدها على بطنها ووجها اصفر حسين وزهره كاعدين يمها وندى بصفها، الاء تعاينلها بطرف عينها، شلت راسي اشرت الريمه وجويريه ورنه وبدور.

اجن وراي وهاجر وي ريمه يمشن على كيف صعدنا للطابق الثاني

-نصعد للسطح؟

رنـــه :: نشوفهم؟

بــدور:: لا بس الطلق مبين ينشاف.

هزن راسهن اي  فتحت باب السطح على كيّف خايفه وطلعنه وحده وره الثانيه وكفنه نعاين الرمي مگابل وتارس السما شلون الجمر احمر وينزل عليهم

ريـــمه :: يارب يردون سالمين يا علي.

مــاسه:: كاضين گلوبنه ونراقب، كل طلقة تطلع تضوي للحظة وتنطفي عايفه وراها شريط احمر ملون الليل، سواها صــيهد وخله سماهم حمره من الطلق.

كل شويه ننزل جوه ونرد نصعد ساعة وساعتين مرن وهمه الطلق ما واكف صارت ب٢:٣٠ الصبح  كعدنه على حيلنه بالسطح نعاين، احس گـــلبي ارتاح من كمت اشوفن الرمي بس من صفحتنا، وصوت السلااح بده يقل والطلق الاحمر اللي ملون السما هم قل الحد ما بقى بس صوت بيكيسي.

درت الهاجر اللي سانده راسها على جتف ريـــمه تأشر ومافهمتها

رنـــه ::ريـــمه ظلمه مانشوف هاجر شنو جاي تكول.

ريـــمه :: تكول هذا صوت البيكيسي مال سلطان.

جــويريه::وين تعرف بالسلاح؟

ريـــمه :: اول ما اشتراها سلطان  وراد يجربها راح للمرعى واخذ هاجر وياه تحب السلاح وتعرفه بانواعه وانه اذا يگلولي جيبي المخازن اخذلهم الطلق عود هسه بديت اتعلم.

مــاسه ::نعاين الهاجر مبتسمين وهيه تمسح على گلبها وتأشر گالت ريـــمه

-تگول لا تخافين يردون سالمين، لو صاير عليهم شي الطلق ما يسكت للصبح.

رنـــه :: احسن منجن تفتهم صح صح هجوره طمنتيني والله.

"""""""

وهـــب :: ما ندري ياهو التصوب وما ندري ياهو النكتل همه شردوا لحكوهم سليم وبريا وخمسه من ولد السلف، وكفنه من الرمي الا سلطان  البيكيسي بأيده، وصيهد ركض للسيارة جر القاذفة "RBG7"

كعد ركبه ونص وفجر بيوتهم، عيوني تفتر عليهم واكف وره سلطان اجاه طــروادة يريد يجر السلاح منه وهوه ما يهده، اريد اروحن احاجيه يعوف سلاحه هوه اصابعه مكسره ووضعه مو زين بس ما رضى يضل بالمستشفى وحتى اصابعه ماجبروهن بس لفوهن اله، هستوني اوصلهم ووكفت ما مستوعب كلامه من يگله

طــروادة :: الخاطر رغد، كوم يله حتى نروح للمستشفى، تشوفها راح تموت ولك.

مايدرون بيه وراهم وكفوا اثنينهم ونصدموا من شافوني، شال ايده طــروادة يسكتني گبل ما احجي

-حلكك ما تفكه مو وكتها.

واخذ سلطان مشوا من كدامي

""""

ماسه :: ندعي تكضي على خير وردينه خفنه من صار صوت قوي شلون الانفجار، وراها نعاين وگبت نار عاليه

بــدور::حركوا بيوتهم صيهد حلف يحركهن واخوي گد حلفانه.

جــويريه:: يمه جا والناس ،النسوان الاطفال شنو ذنبهم؟

مــاسه :: لا جوري طلعوا من بيوتهم، الوادم من تصير عليهم دكة عشاير وهمه الغلطانين يطلعون من البيوت ما يضلون تلكينهم من زمان شاردين.

سكتت جــويريه ما مقتنعه، صاحت علينه جده نزلنه جوه جهال مرتضى نايمين يم أمهم بغرفة جده وميلاد تتلوك الجدي تعصر برجليه وتسويله عصير ليمون وكل شويه كالت

ميلاد:: يمه عمي راح يموت صخام دهر الدهر النسوان الزلمه راح يموت.

وتعصر برجليه وتنگل ساعة ماي ساعه عصير ساعة حباية ضغط لمن مل منها طكاها بالسبحه ينتر

شعلان:: ما تولين عني كل ساع وبغگتي راح يموت وراح يموت موت الليلفج امشيي.

راحت ريـــمه جرت امها من يم جدي ما راضيه وامها تدفع بيها وتخزرها، سكتنه ومر الوكت كاعدين بالمطبخ يم ندى وعفراء، صار الفجر وهمه ماكو وي أذان الفجر يله شفنه السيارات نزلت على شارعنه ونسمع بسّ صياحهم وكلنه كاضين الشياج كل وحده بينا تريد تشوف اخوانها سالمين، لمن الهوه يحرك باب الحوش يله نلمحهم

رنـــه :: طــروادة هذاااك طــروادة، بعد عبود عبووود وينه.

اعاينلها تلوب مثل المحتركه، وعفراء ركضت كعدت حسين من النوم كالتله

عــفراء:: اركض شوف اخوانك وولد عمك كلهم موجودين؟

وحسين النوم بعيونه يفرك بيهن هز راسه اي وصل للباب صاحت عليه بخوف

عــفراء:: حسين ومنذر هم شوفه.

حجتها ودارت علينه تعصر باصابعها صاحت رنـــه

رنـــه :: ذاك بريا وسليم ووهب، عبود وينه؟

بــدور :: وينهم شلون شفتيهم؟

ومدت راسها وي رنـــه تعاين، اجت الاء للمطبخ ايدها على بطنها

الاء:: هاه ردوا، شني شصار؟

محد من عدنه حاجتها صاحت

الاء:: گبور تلفجن بحلكجن عظم ما تحجن.