تحميل رواية «أرض الخناجر» PDF

أرض الـــــخناجر 🗡️

بقلمي الكاتبة ايـــلول .

تصويت وتعليق بين الفقرات لطفاً 💚

══━━━━✥◈✥━━━━══

انا الخلصت حياتة أحاه بحاه

انا الماعنده وادم توكف وياه

انا اليضحك هواي وهوه مخنوگ

انا الصاير حجاية بهاي اللحلوك

══━━━━✥◈✥━━━━══

رغد :: بين نارين حسيت روحـــي ايدي بأيده وعيني بعين اخواني وصدمتهم، صــيهد يعاين الايدي بصدمة ورد عاين لعيوني فاتح عيونه حيل

صــيهد:: رغد.

شعلان:: وووولج رددي رددي الا اذبحنج.

وسلطان كض ايدي بقوة يصيح والسلاح بعده براسه وانه عيوني تفتر بينهم بلا عقل ما ادري شني الصح واسويه كل الهامني سلطان ما يموت هد صــيهد يريد يجرني من ايد سلطان يصيح بخبال

صــيهد:: اكتل رووووحك اكتل روحك يطبك الف مرض هد ايدها هد ايدها لا انا الاكتلك.

وكضوه وهـــب وعمي شاكر وسلطان يجر بيه يريد نطلع من الحوش صاح بوجهه صــيهد

سلطان:: انتَ الجبرتني على كلشي سويته وراح اسويه، الف مره اجيتك اتوسل بس اوكف وياي بس اطيني حچايه وماتخليهم يزوجونها الغيري ولك اتوسل بيك وتطردني كل ما اجيتك طردتني ذليتني وسكتت لخاطرها.

والله على جثتي ماتزوجونها الغيري.

وصيهد متسودن يريد بس يفلت من بين اديهم نهبتت ايدي حيل بأيد سلطان جراني للحوش يمشي بساع وانه اجر بأيدي منه

-وووين وووين سلطان وين ماخذني.

ودرت على صوت مــاسه من باب المطبخ صاحت

مــاسه :: رغد.

ووي حجايتها شمرت عليَّ عباية طاحت بالگاع دنك سلطان شالها ومايعوف ايدي لان اجر بيها واريد بس ارجع للبيت نتر بوجهي

سلطان:: كاااافي كافي امشي.

حط العباية على راسي وجراني بأيده خطوة اروح وياه وخطوه اريد ارجع لاخواني وما اكسرهم هيج، اسمع وراي بس الصياح وسلطان يمشي بساع لسيارته فتح الباب صعدت ارجف ودموعي تجري واتلفت محد ورانه صعد هوه وشخط السيارة بساع درت وجهي اعاين لمحت صــيهد طلع لسيارته بأيده سلاح صيحت بخوف

-اجه اجه صــيهد راح يكتلنه.

وسلطان يسوق بسرعة سديت اذاني احس كلشي يصير بساع وما استوعب، اردد

-غلط غلط السويته غلط.

عاينتله امسح بعيوني هز راسه اي وصوته مختنك يحجي وعيّنه للدرب

سلطان:: تعبـــت ، باب مشتمل اخوج لو عده لسان جا سولف چم مره اجيته عوزي ابوسن ايده بس اطيني حچاية وگلي ما تطي رغد لغيري اشرط التريده بيت اخليلها وحدها ويمكم وشتريد بس انطق، لو يطگني لو يطردني من يوم الرديتي للقرية لهذا يوم الله انا ما مار اسبوع ما محاجي بيه صــيهد.

مسحت عيني ودرت اعاين للشارع سيارة صــيهد ورانه بس سلطان اسرع منه

-راح يكتلنه اثنينا.

حجيتها وعاينتله ارجف هز راسه لا شال المسدس من يم رجليَّه ومداه الي

-حطيه بالچكمچه.

اخذته من ايده فتحتها وحطيته مستسلمه احس بأي لحظة صــيهد يرمي سيارتنه ويفجرها بينه زفرت نفس اتذكر صدمته وتوجعني روحـــي، لحظات اتندم شلون حطيت ايدي بأيد سلطان ولحظات احس ماجان عندي غير حل.

من رديت اعاين ليوره حتى اشوفن صــيهد مالكيته گال سلطان

-ضيعنه عباله رحت للمدينة.

درت وجهي عليه بخوف

-وين ماخذني؟ خلي نرجّع للقرية انه انه احاجي صــيهد والله أنه احاجيه.

هز راسه لا.

سلطان:: نرجع؟ اتقدم خطوة حتى ارجع واخسرج للأبد، مانرجع نمرشة مانرجع.

-واخواني؟ الوادم تضل تحجي بيهم واحط راسهم بالطين؟

-محد يحجي اصبري وانا ما اخلي تلوحهم حچايه.

-لااا، رجعني انه راضيه انكتل بين اديهم ولا أنزل رأسهم.

طك الستيرن بأيده حيل يصيح ويرجف

سلطان:: ما تنزلين راسهم ما تنزلللينه، بس اطيني صبر.

غطيت وجهي أبجي بحيره وين تاليتنه، وهو جر تلفونه واسمعه يخابر سلم والنوب گاله

-شيخ جايك انا، ربّع ساعة.

سد التلفون درت عليه بصدمة

-يا شيخ؟

-خل نروح يم شيخ حيدر هوّه يحلها.

-صــيهد مايوكف بوجهه شيخ.

سكت يسوق محترك حرك وانه گـــلبي ممرود من الخوف والتفكير اكل عقلي اعصر أيد بأيد ارجف واتخيل غضب صــيهد گدام عيوني وأزيد بالبجي

سلطان:: لا تبجين فـــدوه اروحن لعيونج لا تبچين لا تعذبيني فوگ عذابي هسه تنحل والله تنحل لا تخافين بس خليج وراي.

هزيت راسي لا وصوتي مخنوك والدموع مغرگة وجهي

-والله ما يخلونه جان لازم نقتنع كلمن بنصيبه.

وهوه مركز بالدرب لان يمشي سريع ويرد عليَّ بدون مايعاينلي

سلطان:: لا يا روحـــي لا مو كل مره تستسلمين، گبل ما اطيتيني صبر وبساع رضيتي بحجيهم اوكفي وياي هالمره نمرشه بس هالمره اوكفي وياي والله اموتن بعد ما اگدر اخسرج مرتين.

عاينلي بساع ودار عيونه للدرب يزيد حيرتي وناري بصوت يرجف رديت

-واخووواني سلطان واخواني شلون اكسرهم؟

-بس لا تفكرين بأحد انتِ انسي الكل ومالج غرض.

مسحت وجهي بعبايتي من نزل على شارع بيت شيخ حيدر

اعاين للدرب، يم مضيف الگصف واكف شيخ حيدر بعبايته وعگاله ويمه ولده واخوانه يعاينون لسيارة سلطان وبس گربنه يمهم وشافوا وياه مره داروا وجهم كلهم ماعداه، صف السيارة سلطان مسافة عنهم وعاينلي

سلطان:: ضلي هناه هسّه اجيج.

تزل وانه اعاين وراه سلم على شيخ حيدر وعلى الولد اليمه ووره السلام كلهم وخروا وخلوه وي الشيخ وحده يسولف وياه والشيخ يهز راسه اي يستمعله دقايق واجاني سلطان فتح باب السيارة عاينت لوجهه بخوف گال

-لفي روحجي بالعبايه عدل ودنگي تعاي.

نزلت رجليَّ ترجف امشي بصفه بخوف لمن وصلنه يمه گال

-هله بيج بويه تعاي تعاي.

أشرلي سلطان امشي وراه امشي والخوف يدبي بجسمي، اتلفت سلطان ضل واگف يعاينلي وانه خطواتي تتبع خطوات شيخ حيدر لمن طب للحوش وصاح.

-وينجن بويه البنيات.

انفتح الباب ومدن رأسهن اثنين بنات بعمرنه اثنينهن صاحن

-ها بويه.

-وين امجن.

يعاينلي بأستغراب واجتهن امهن تحجي لمن شافتني حطت اديها فوگ راسها وصاحت بصوت ناصي

-يبووي هاه هدوكم مره؟

-بويه استري علينه خطارنه هاي رجلها وياها ديربالكم عليها.

وطلعتلي بساع تبوسني وترحب بيه وصلتني يم البنات وردت تحجي وي رجلها وهنه يمشن بيه للبيت ويحجن وياي وانه كاضتني الرجفه روحـــي رايحه حرف مانطقت، كعدني بغرفة ومره يسولفن وياي ومره يطلعن ويخلني وحدي كضيتها بچي وسلطان ما ادري بيه وينه.

مــاسه:: گامت الدنيا وما كعدت ببيتنا، اهلنه تسودنوا ولا سلطان ورغد ردوا للبيت ولا صــيهد، امي كلساع تتخربط من الخوف عليهم وابوي وعمي وليد تعاركوا وجدي طردهم اثنينهم وضل هوه يسب ويغلط، على الكل.

كعدت على بايات الدرج ابجي بخوف على رغد وادعي تعدي على خير ومايصير بيها شي، الولد كلهم طلعوا وراهم لليل واحنه كاعدين على نار، اخذت رضا من ندى لان گلب الدنيا بالبچي وجدتي ضلت تصيح وتريد تطكه، اخذته وصعدت فوك اطيته لبدور تسكته، توني اريد انزل جوه يم جوري للمطبخ واحس بصوت صــيهد رج البيت يصيح بعلو حسه

-مــاسه، مااااسه.

نزلت اركض متخرذله واشوفنه واكف كدام الدرج وجدي وجدتي بالهول يحجون وياه ويسألون وينهم سلطان ورغد وهوه ما مهتم عيونه حمر دم ويعاينلي بخزر وجهه مايكصه السيف بس وصلتله كضني من زندي وجراني الغرفة امي دفعني وسد الباب درت وجهي عليه ارجف بعدني حرف ماناطقة وحسيت الراشدي فر راسي عليه صرخت امي متسودنه وانه النفس وگف ببلعومي جراني من ايدي بغضب

صــيهد:: محضرتلها لعبااااايه بت الچلب محضرتلها العباااايه.

دموعي جرت اهز راسي لا وامي تصيح عليه وتبجي تريد بس تگدر تكوم من فراشها وتجرني لحضنها طب وهـــب دفعه يغلط

وهـــب:: والله اموتنك ياهي مالتها مــاسه.

وهوه تسودن دفع وهـــب يريد يطكه تعاركوا فوگ راس امي لمن طاحت ماتحرك لا ايد ولا رجل يله فكوا عركتهم وركضولها، طبت جوري تركض تريد ترش على وجها ماي دفعت ايد صــيهد منها وكعدت تغسل بوجه امي وتحاجيها بخنگه

-خااله خاله.

وامي تنود وكوه فتحت عينها، طلع صــيهد من الغرفة ورگع الباب وراه بكل حيله، رجعت ليوره على الحايط لميت رجليَّ الصدري ابجي وجهي احسه گب نار من الراشدي، وهـــب وجوري وندى حاروا بأمي كعدوها قاسوا الضغط واطوها ماي لمن شوي استقرت عاينلي وهـــب متحسر گال

-گومي إغسلي وجهج.

گمت للمطبخ اغسل وجهي وابجي طگني حيل رغم انه ما مسويه شي جا شراح يسوي برغد دخيلك يارب دخيلك يارب .

احجي وي روحـــي وابجي وطلع وهـــب بساع عاينت وراه من فتح باب الحوش لمحت لولد يمه مــيثم وبريا وسليم اخذهم وراحوا مادري وين.

درت وجهي من طبت جــويريه للمطبخ عاينت لوجهي بقهر تمسح على أثر اصابعه بوجهي وتردد

جــويريه:: جعل ايده بالكسر الحيوان.

-لا تدعين جوري لا تدعين.

سكتت ووخرت من يمي مقهوره راحت تسوي عصير ليمون الامي وانه مشيت اعاين للمرايه اصابعه مطبعه بوجهي شلون الحرگ صايرات اخر مره طاكني جنت صف سادس ابتدائي،

مسحت وجهي ودرت ساكته

مدري شلون عدت هالليله محد بينه گدرت تنام ولا درسنه فرحانات يوم جمعه ونستغلة بالدراسه تالي مافتحنه ولا كتاب.

رغد:: من ساعة الاجيناهم الثاني يوم انه ماشايفه سلطان ولا ادري شكاعد يصير، ضاله بالغرفة وماعدي غير الدموع ثاني يوم الصبح دك گـــلبي بخوف من سمعت البنات يتهامسن ويگولن اجه اخوها، نشف الدم بعروگي، يا شيخ ويا عشيرة التوگف بوجهه صــيهد.

اراقب بخوف وگلبي يدك بقوة لمن اجت المريه گالت

-تعاي يمه ابو خالد يريد يحاجيج.

لفيت روحـــي بالعبايه وگمت وياها بس طلعت من الغرفة صار بوجهي شيخ حيدر گال

-ها بويه، هل أجه السيد واخوج صــيهد حاضر العقد بوجوده، وانتِ وسلطان بحمايتي اليمد ايده عليكم بأعتباره متعدي عليَّ انا.

حجاها ودار على مرته گالها

-ام خالد ما اريدن ولا وحده هناه البنيات خل يطبن للغرف وانتِ ضلي يمها خل يعقدلهم السيد.

راح وهيه رجعتني للغرفة حرف ما انطق حاسه بصيهد اذا لمحني يحط طلقة براسي وهذا الجنت متانيته ومستسلمه اله، حطتلي كرسي بالغرفة يم الباب وهيه لبست عبايتها وضلت يمي فاتحه الباب على كيف شلت راسي لمحتهم طبوا للهول السيد وشيخ حيدر وسلطان وصيهد بلعت ريك بخوف كعدوا على الكراسي گدام الباب واقرب واحد الي صــيهد گـــلبي انخمش من فتحة الباب مدلي ايده من بدأ السيد يقرأ، أيدي ترجف نزلتها حطيتها بأيد صيهد، وبنفس اللحظة طبگ اصابعه على اصابعي بقوة شهگت موجوعة روحـــي رايحه واحس اعظام ايدي انطحنن جوه ايده، نزلن دموعي ساكته وانه اسمعه يحجي وياهم .

من سألني الشيخ وخليت صــيهد هو وكيلي سحب ايده من أيدي دنگت امسح بدموعي روحـــي محتركه حرك واسمع للعقد بتركيز ووي كل كلمه تزيد دكات گـــلبي، الحد ما كملوا العقد وكعدوا ينصحون بصيهد اعاينله بس مدنك ويهز راسه خوش مد ايده للباب سداه واسمعهم طلعوا ضميت وجهي بين اديه ابجي بحرگه والمريه تمسح على ظهري وتحاجيني

-لا تقهرين روحج يجي يوم والگلوب تتصافه حتى لو زعلوا منج مده.

راحت تريد تجيبلي ماي دقايق ورجعت گالت

-يمه رجلج يگول يله خل تجي ترحون.

وخرت ردن العبايه من ايدي مسحت بيه وجهي من الدموع وگمت وياها اعاين بخوف لمحت شيخ حيدر كاض سلطان وصيهد على صفحة يحجي وياهم والولد البقيه واكفين بغير جهه مطينه ظهرهم، لمن شيخ حيدر شافني وي مرته طلعت اجه علينه

وسلطان راح للولد يسلم عليهم ولمحت صــيهد مشه لسيارة سلطان بحوش بيها وراح وگف يم سيارته

كالي شيخ حيدر

-تعاي بويه تعاي.

مشيت وراه وكف يم سيارة سلطان فتح الباب الگدام صعدت سد الباب ويحاجي بصيهد السيارته وره سيارة سلطان گاله

-اخذت منك حجاية صــيهد! ترى لو ما انتَ عزيز عدي وحلفت ماتحاجيهم ما اخليهم يردون وياك.

وصيهد بس يهز راسه اي صعد بالسيارة، اعاينله بالمرايه أشر نزلي راسج دنكت لمن اجه سلطان سلم على شيخ حيدر وصعد يمي، حرك السيارة وصيهد طلع گدامنه بس فر السيارة من يم بيت شيخ حيدر. مد ايده كض ايدي وزفر نفس بحسره جريتها من عده بعدني ما مستوعبة العقد ضحك

سلطان:: لا تجرينها بعد لا تجرينها صرتيلي نمرشة صرتي بأسمي هسه شيردون يسوون خل يسوون عسى ما يذبحوني المهم عقدت عليج.

-صــيهد شلون رضى؟

-انجبر ما يگدر يگول لشيخ حيدر لا.

سكتت اعاين للشارع صــيهد يمشي گدامنه بسيارته تقريباً الساعة بالعشرة الصبح، گـــلبي ما مرتاح وخايفه عبرنه الشوارع اللي بيها ناس ومن وصلنه للسده، شارع ترابي ومابيه بيوت فقط اراضي زراعين، صــيهد فر السيارة بنص الشارع وگف السيارة وسلطان لزم بريك بسرعة يعاينله حجيت بصوت يرجف

-سلطان.

دار عليَّ ومد ايده فتح الچكمچه يريد ياخذ المسدس مالگاه اثنينا عاينه لصيهد نزل من سيارته وگف بنص الشآرع والمسدس بأيده دك گـــلبي بخوف أشر بالمسدس انزلوا، سلطان لم ادي بين اديه

سلطان:: اشش رغدي لا تخافين ولا تنزلين لو شما يصير.

حجاها وفتح الباب نزل، وانه بمچاني رجليَّ ميتات اعاينلهم بخوف وكف سلطان گدام السيارة مسافة بينه وبين صــيهد شهگت وفتحت عيني على وسعها من صــيهد وجهه المسدس على سلطان وبلا وعي نزلت أركض بخوف وگفت گدامه متسودنه

سلطان:: وخرررري، تريد تكتلني؟ اكتلني هسّه اكتلني.

-لاااا لااا.

صــيهد:: تعااااي.

هزيت راسي لا ارجف والدموع تجري وهوه رافع السلاح وموجهه علينه جراني سلطان حيل يضمني بظهره وروحي تفرفح بس اريدن اصير گدامه، وصيهد بگل غضب وأكف گدامنه

صــيهد:: تعااااااي رغد تعااي.

ابجي وروحي رايحه ما ادري شني الاسويه احاجيه وارجف

-عاقبني انه انه الرحت وياه ابوس ايدك نزل المسدس.

سلطان:: مالها غرض انا جبرتهااا.

دار عيونه الي ونزل السلاح

صــيهد:: تعاي وياي، ماتردين ويآه للقرية.

اعاينله بخوف مسحت دموعي اريد بس اوخر من وره سلطان وهوه مايرضى خايف عليَّ من صــيهد جريت روحـــي منه گوه امشي وصيهد نزل المسدس ومدلي ايده مشيت بساع اريد اوصله توني احط ايدي بأيده وشال المسدس على سلطان فتحت عيني حيل وبخوف بعدني ما ملتفته واحس الطلقة فاتت من يم اذني صررخت بكل صوتي حيلي راح طحت بالگاع ساده اذاني وبس التفتت شفت سلطان ممدد بالگاع والدم جره من يم راسه للگاع

احس النفس وگف ببلعومي، هن ثواني بس مرن عليَّ مثّل آلدهر وكأنما الزمن وكف عد هاللحظة صريخي اسمعه صدى بأذني ورجلي ما يعنني واوكف مدري بيا حيل گدرت اوصله احضن بوجهه واصرخ وهوه بس فاتح عينه ويشهك

-سلطااان سلطاااان.

حطيت ايدي فوگ ايده اللي حاطه على جتفه ويتلوى بوجع شلت ايدي اعاين للدم وصرخت متسودنه واحس بصيهد جراني من ايدي سحل للسيارة وسلطان يتلوى بالگاع يريد يگوملي ومايگدر، قبضة ايد صــيهد على أيدي بقوة مايشوف احد گدامه سحلني للسيارة ودنك شالني من جتافي فتح الباب صعدني وسده وانه بس اصرخ اول ماسد الباب فتحته اريد انزل لسلطان رد عليَّ بحرگه صيح خازرني وكضني من فكي بقوة حط المسدس بگصتي اتنفس حيل وعيني بعينه اردد بصوت يرجف

-سلطان.

-اششش اششش صوتج ما اسمعنه لا تخليني اردن احط چيله براسه وانعل ابوووج لا ابوووه.

وخر من الباب وركعه بكل حيله، كل ذرة بجسمي ترجف صعد وشخط السيارة بقوة عاينت لسلطان ممدد بالگاع وغرگان بدمه،

احس روحـــي غابت وفززني من طكني على وجهي حيل شهكت اجر نفّس بقوة وهوه يسوق وكاض التلفون فاتح السماعة واول ما انفتح الخط صوت طــروادة يصيح بحرگة

-وووين انتَ وووين انتَ،

صــيهد:: روح للسده تلگه سلطان غاد.

-شسوويت احااااجيك؟

سده بوجهه يسب ويغلط وانه مسطوره سطر نفس بعد ما اگدر اتنفس.

مــاسه:: ميته من الخوف على رغد، الولد طلعوا يتراكضون هم راحوا مناه والمح سيارة صــيهد اجت، ركضت للمطبخ وهوه طبب السيارة للحوش شهكت فاتحة عيني على وسعها من لمحت رغد وياه طبك السيارة بشخطة وافتر بساع فتح الباب جر رغد يريد ينزلها وهي تطيح على رجليها عبالك مو بوعيها واديها ملطخات دم بلا وعي ركضت متسودنه  واحس بندى وجوري وراي وهوه بغضب يشيل رغد ويسحل بيها للمشتمل  ابجي واصرخ اريدن بس اخذها من ايده والبنات وياي مايشوف گدامه سحلها للمشتمل سحل ودفعنه كلنه سد الباب وقفله.

روحـــي راحت  جــويريه ركضت تخابر وهـــب وانه وندى اندك على الباب ابجي متسودنه واسمع صوت صياحة وبچي رغد وصوت طگاته الها اشيط اشيط وروحي تفرفح

-صــيهد صــيهد عليك العباس صــيهد.

كعدت يم ألباب على اركبي ابجي وادك بيه حيلي رايح  واسمع صياحه عليها وهيه صوتها راح تسودنت رجعت ادك على الباب بكل حيلي وردت جوري اجت تركض بخوف

-مايرد مايرد وهـــب.

درنه بصدمة على بيت عمي شاكر ريـــمه وميلا اثنينهن يصرخن.

وانفتح باب المشتمل طلع صــيهد وجهه متروس شر وغضب عبر من بيناتنا مايشوف شي گدامه طبينه نركض واشوفن رغد مشموره بالگاع  لامه رجليها الصدرها واديها ممدودات گدامها كلهن دم، شعرها مملخ ووجها أحمر مطبع بأصابع صــيهد جرتها ندى حطت راسها بحضنها وهي عيونه ذبلانه وكوه فاتحتهن.

جوري غسلت وجها وانه امسح بأديها ارجف احجي وياها وماترد عليَّ، درنه كلنه على الباب بخوف من رد طب صــيهد  وبساع دنك من بيناتنا جراها من زندها جلبنه بيها وهوه ولا مهتم اخذها للغرفه دفعها بالغرفه وسد الباب صيحت اكض بأيده واتوسل

-صــيهد حباب فـــدوه عوفها راح تموت راح تموووت.

وهوه ما مهتم دفعني من ايده وصيح بكل صوته

-اطللللعن.

ودفعني على البنات يطلعنه من المشتمل قفل الباب وراح صعد بالسيارة فرها وطلع، ركضت للتلفون اخابر وهـــب ومايرد عليَّ  خابرت على مــيثم ابجي

-الو مــيثم وهـــب وين؟

وهوه گوه يحاجيني من الهوسه اليمه

-بالمستشفى مايگدر يرد.

-شسوون؟

سكت وانه روحـــي رايحه شويه وگال

-جبنه سلطان مصوب.

شهگت بصدمة ايدي على صدري گال

-صــيهد خوماحاجة رغد؟

بجيت مختنگه

-اي حاجاها وحبسها بالمشتمل  اريدن وهـــب يجي.

-هسه اوديه الكم.

سديت التلفون احجي للبنات بخوف والتفتنا على صياح ميلاد طبت للبيت تغلط وتسب وتدعي على رغد وصيهد تريد تطب على غرفة امي وندى تدفعها صاحت سعاد

-وخري مالج غرض وخري عنها.

وكفنه وي ندى مانخليها تطب على امي وهيه متسودنه وتصيح

ميلاد:: ارتاحيتيي عقد عليها ارتاحيتي هل ابني على فراش الموت، تسمعيني لو لااا خيبه ايمان يكون يصيب سلطان شي اشرب من دم رغد عليَّ ذاك الحسين  .

ويكونه  يطلع سالم ما اخليه ياخذها الا انه ما اشمن الهوه.

وسعاد اجتها. تسكت بيها خايفه عليها تتخربط اخذتها وراحت طبينه يم امي للغرفة ذبلانه كلها  بس دموعها تجري وبصوت ثگيل تسأل

-رغد وينها؟

ندى:: صــيهد خلاها يمه بالمشتمل حتى لا يحاجونها أبوها وجدها.

وامي تزيد بالبجي لان فاهمه منو الراح يحاجي رغد، تمرمرنا  كلساع اركض للمشتمل ادك الباب واصيح على رغد بس اريد تحاجيني ماكو للأربعة العصر يله اجه وهـــب تلكيته ابجي واحجي بحركه

-كتلها وحبسها هناااه.

وهو يمشي وجهه تعبان واعصاب المفاتيح بأيده فتح باب المشتمل وانه وراه فتح باب الغرفة رغد على نفس الشمره ضاله بالگاع بس من فتحنه الباب عاينتلنا وبس لمحت وهـــب همست بصوت مخنوك

-سلطان؟؟

وهوه مسح وجهه وكضها من ايده كعدها وطكها  راشدي بحرگه يصيح

-ليش هيج ووولج ليشش؟

وهي تنود بين اديه وبس دموعها تجري، جريتها من ايده اوكفها وهوه كعد بالگاع اديه على راسه، اخذت رغد كوه تمشي روحها رايحه واحجي وياها همس

-بالمستشفى سلطان مــيثم گال متصوب بس مو خطر.

وهي حتى ماتحجي ساعدتني ندى غسلنه وجهه واخذتها الامي  وامي شبگتها وضلّت تبجي، طلعت من يمهن للمطبخ اريدن اجيبلها ماي وشفت ابوي وجدي وجده اجوا، ركضت الوهب صحتله كام كوه على روحه كعدلهم بباب غرفة امي وهم بس طبوا  حاروا شيحجون وشلون يهددون وبيا خنجر يذبحون .

وضل وهـــب كاعد الحد اليل ماتحرك من مچانه، احنا متمرمرين وهمه يصيحون على عشه الساعة بالتسعه طبينه للمطبخ جاي نسوي العشا وطب صــيهد  مشه الغرفة امي،

وجدي وابوي حاجوه لابسهم مشيت وراه بخوف  بس مطمنه دام وهـــب موجود مايخليه يطك رغد، رغد بحضن امي  وهوه يحجي وياها بنتر  رديت للمطبخ اركض.

جــويريه صعدتها تدرس لان هيه اكثر وحده مالازم تضيع وقت.

وندى راحت الابنها من ضل يبجي، ضلينه بس انه وبدور نسوي العشه، هيه واكفه يم الشباج وهو مفتوح يصير گبال باب الحوش،   گدامها الميز حاطه عليه صحن وتثرم زلاطه، وانه يم الطباخ وكلساع اعاينلها اريدها تگضي بساع حتى تساعدني بالگلي.

أخر مره درت عليها فتحت عيني بصدمة وانه اشوف ســليم ابن عمي شاكر طب لحوشنه وبأيده سلاح ووراه يسحل حزام الطلق المربوط بالسلاح وگف كدام بيتنا وشال سلاحه موجهه علينه شهكت بصدمه صرخت اريد بس اجر بــدور من يم الشباج

-بــدورررر.

جريتها من ايدها للگاع بس وصلنه للگاع نرج بيتنا رج من صوت الطلق صرخت بكل صوتي متسودنه وجام المطبخ تكسر علينه واحس بأدين لمتنه حيل.

وهـــب:: لااا تخافن لا تخافن

روحـــي راحت من الخوف ارجف وصوت الطلقة من يطك بالحياطين يون واحس على ساعة تفوت طلقة براس وحده من عدنا اول ما وگف الطلق اجانه صوت ســليم بغضب يصيح

ســليم:: صــيهددد هاي بس لان سلطان بالمستشفى اذا صار بيه شي انا كتاااالك.

وهـــب يريد يجر روحه من عدنا واحنا مچلبين بيه وصيهد اسمعه متسودن الظاهر امي مچلبه بيه طلع يركض ووهب طلع وراه بــدور ضلت على كعدتها ترجف وانه بساع گمت اعاينلهم

التموا الولد كلهم وسليم وصيهد ملاخ واحد يهد على الثاني وجدي يعاينلهم ساكت، ابوي وعمي شاكر محتركين حرك كلمن خايف على ولده

غلط وسب واحد يگل للثاني انه كتالك سجاد وعبود وبريا اخذوا ســليم وميثم وطرواده ووهب اخذوا صــيهد وطلعوا من عدنه گومت بــدور تغسل وجها اصفر وترجف وجده صعد ضغطها

وكلمن يجرله بصفحة من عمي شاكر وابوي اليتعاركون من عركة جدي وياهم نگلب مو يوم انتقام علينه.

صعدت اركض لجوري مالكيتها بالغرفه افتر أدورها بخوف وفززتني من طلعتلي من الكنتور ترجف

-وين لابده موتيني روحـــي راحت.

جــويريه:: شصار هاه؟ عبالي انزل الكاكم مكتلين كلكم صار ساعة افكر وين اروح.

غميتها وانه حلكي ناشف من الخوف

-ماسمعتي ســليم يصيح؟ هوه رمه بيتنا عزه بعينه صرنه مضحكه للسلف صــيهد يصوب سلطان وسليم يرمينا تخزينا.

-سوداين شعلان بدت تنتشر بسرعة.

هزيت راسي اي ونزلت جوه

بس يلطعون الولد اثنينهم ابوي يطب على رغد يملخها ويغلط ويهدد اذبح واصلخ، وامي تمرد الگلب لا رجليها يعيننها وتگوم تحميها لا ابوي يرد من تحاجيه گـــلبي نمرد غصه صارت ببلعومي للصبح انه مانايمه اركض بين امي ورغد اللي صخنت وماتگدر تشيل ايدها.

وي الصلاة صعدت كعدت البنات كالت بــدور

-مال امتحانات هسه هيه ماتشوفين وضعنه؟

-مالج غرض بوضعك راجعي.

نزلت جوه الولد ولا واحد منهم موجود، ما ادري بيهم وين، وره الريوك رحنه للمدرسه انه مافاتحه كتاب ولا دارسه شي جاوبت جواب يوصلني للخمسين وطلعت متانيه لبنات واسمع بنات غانم يسولفن بينه لبنات المدرسه وتتقصد تسمعني تگلها

-الله عثرهم سودنوا الوادم وين مايرحون وصاحوا احنه مو ولد عم اخوه احنا واحنا تالي خوش اخوه ضلوا واحد يرمي الثاني.

درت وجهي منها ساكته شفت رنـــه طلعت من الامتحان وتدور على كتابها وي الكتب اللي بباب الصف، لمن لكته شالت راسها تدور منو من عدنه طالعه لمحتني اجت عليَّ وبنات غانم بس شافنها مشن، كعدت يمي بأيدها بطل ماي

-شلونج بالامتحان؟

رنـــه :: والله مو زينه دخت وانه امتحن لمن جابلي جكليته طارت نص ساعة كوه ركزت وجاوبت شويه.

-خلي وياج جكليته دوم.

سكتت شالت راسها تسألني

-رغد شلونها؟

تحسرت بقهر

-مو زينه صــيهد طكاها حيل والبارحة الليل كله مصخنه، شبيج انتِ شو ضايجة؟

دنكت مقهوره عبالك مو رنـــه مديت ايدي اشيل راسها عيونها متروسه دموع

- ياا رنـــه شبيج؟

مسحت دموعها شفايفها يرجفن

رنـــه :: طــروادة بالسجن.

فتحت عيني بصدمة ما فاهمه وهيه تمسح بدموعها وتطوي الاسئلة بأيدها وترد تفتحهن مدنكه ودموعها كل ما تمسحهن يردن

-البارحة هوه موجود ليمت انسجن وعليمن؟

-اي هوه البارحه ودوا عليه علمود سلطان مو هوه الاخذه للمستشفى، حققوا وياه بالبدايه وهسه هم رادوه ، گالوا اليوم يطلع بلكن من ارد للبيت الكاه جاي.

-ان شاءالله يارب لا تخافين.

هزت راسها ساكته بس مقهوره لمن طلعن البنات وردينه للبيت شفت طــروادة من رد للبيت وراحتله رنـــه تركض حط ايده على جتفها ودخلوا سوه لبيتهم.

واحنا طبينه لبيتنا ندى وجها محتقن والدمعه تارسه عينها ابنها بأيدها وتشتغل تسوي بالغده، جوري اخذت رضا بأيدها وصعدت درت الندى احاجيها

-شبيج ندى؟

-اني ما اگدر اعيش هنا والله ما اگدر كل ساعة ماردين گـــلبي بحچايه يردون يضربون رضا شلون يبجي غير اكلب البيت عليهم لو مدوا ايدهم.

تحجي والدموع تجري وانه احير شلون اوسيها، راحت غسلت وجها وانه طبيت للغرفة اشوفن امي ورغد، رغد وجها مورم وعيونها منفخه كوه تفتحهن وامي حايره بيها بأيد وحده تمرغ اديها وتمسح على راسها.

يومين عدن سمعت بيهن سلطان صوابه بجتفه واصابعه حركتهن ضعيفه خايفين منهن ينشلن، صــيهد يجي بس بالليل ومن الفجر يطلع ما ادري وين يروح، وهـــب يفتر بيناتنا وبين المستشفى رغم بيت عمي شاكر يطردونه كل مره بس هوه ماتيه سلطان.

شيخ حيدر زعل من صــيهد وحيل كبرت السالفة بينهم.

رغد طوّل هالايام هي بس بالفراش تكوم على گد الحمام وترجع لفراشها ومن يجي وهـــب يمها تسأله على سلطان يصفن بوجها ساكت بحيره اخر مره گالي

-كليلها زين باجر يطلعونه من المستشفى.

حجاها وطلع مشيت بساع حجيت الرغد وهي بس دموعها تجري الناس بالناس وبدور گالتلها

-يعني هسه انتِ وسلطان تزوجتوا؟

وهي تعاينلها ساكته وبدور متانيه ليمت ترد عليها ردت تمددت وغطت حتى راسها تبجي، وامي حيره تاخذها وحيره تجيبها.

طلعوا سلطان من المستشفى وي اخر امتحان النه .

""""

ريـــمه:: صاح ابوي على الاء

-سويله شوربه.

دارت وجها ومشت وهي تگول

-اسويله مرض فوگ مرض.

سكتت اعاين لسلطان ســليم يحطله مخده وره ظهره عدل كعدته وسأله

ســليم:: ها مرتاح هيج؟

هز راسه اي ودار الهاجر مبتسم وهي عيونها تجري راحتله باسته شبگها يحاجيها.

سلطان:: هجوره حبيبتي عاينيلي مابيه شي.

وسليم شال غيث من الگاع وحطه يم وجه سلطان باسه وشماه يحاجيه

سلطان:: غيوثي بابا حبيبي.

كلنه ملتمين يمه بغرفة ســليم گالتله امي وهيه تمسح على ايده

-يله يمه يله صير زين تروح تطلك هاي الچلبه.

عاينلها ساكت ابوي گاله

شاكر:: طلكها ختولي وازوجنك اربعه بمچانها حتى لو ردت تطلك مرتك هاي.

حجه بهدوء

سلطان:: ما اطلكها صارت مرتي بعد ماكو بشر على وجهه الارض يگدر يخليني اطلكها.

وامي لطمت على رجليها متسودنه وتصيح

ميلاد:: ساحررراتك ساحراتك  ايمان وبناتهااا مسودناتك والله تطلكها رغد ما تطب بيتي لو تموووت.

ســليم:: هوه ما يطببها بيتج يبنيلها بيت بعيد عنج.

ميلاد:: اوووع يممممه النوب يريد يحطها ببيت وحدهااااا ولك سلطااااان من هسه تريد تعزززلها والله ماتاخذهااا رغد ما تصيرلك مره.

نزل روحه للفراش يريد ينام عدل مبتسم  مغمض عينه ويگلها

سلطان:: صارت يمه صارت رغدي الي.

وامي جرت دشداشتها من صدرها وشهگت بشوغة تدعي

ميلاد:: ررربي لو سلطان حرك گـــلبي  وماطلك هالچلبه كون تحرك كلبه على ابنه عزيز گلبه.

فتحت حلكي مصدومة وسلطان تسودن والاء من باب الغرفة ضلت تصيح

الاء:: لا تدددعين على ابني الله يحرك گلبج بولدج.

وكبت العركه بيناتهن وسلطان يأشر السليم طلعهن خل يتعاركن بره، طلعنه من يمه وضلوا يمه بس هاجر وغيث، طبيت للمطبخ اسويله شوربه وامي والاء متعاركات وفرح تطلكهن اصبح مكيفه.

لمن كملت الشوربه اخذتها ورحت لسلطان غافي وهجوره ضاله تلعب وي غيث، كعدته  عاينلي يسأل

-هم عرفتي شي على رغد؟

-لا والله كلشي ما ادري.

خليتله  خبز بالشوربه وكلته احجي وياه

-شلون تسوي هيج؟

-ماخلوا گدامي حل

-جا هيج؟ خربت علاقتكم وي الولد لو صابر تلكه الف حل.

تحسر بقهر

سلطان:: صبرت ومليت جنت متأكد يزوجونها حتى يحركون گـــلبي  تدرين الخطابة الاجوها ذاك اليوم من طرف امج؟ ريـــمه امي بس تريد تحرك گـــلبي  عجيب ام ماتدور الراحة الگلب ابنها.

دنكت متحسره وانفتح باب الغرفة وطبت الاء تصيح وتحجي بصوت عالي

الاء:: اذا تاخذها تطلكني وبذمتك بذمتك ليوم الدين چيه اخذتني وانتَ عاشگ غيري وورطتني وياك.

مسح وجهه يحاول يحاجيها بهدوء

-ما اطلكج تضلين مرتي وام ابني وما اقصر بشي وياج.

وهيه تبجي وتحجي بحرگه ولاچنها هيه الذاك اليوم تتفق وي صاحبها عليه گالتله

-حاطلها مهر عشره عشرررة وانه تلاثة چنك مشتري هايشه.

-لا حشاج.

الاء:: ما تاخذهااا والله اروحن لهلي ما اضلن عدك وما ابريك الذمه ليوم الدين وابنك ما اخليك تشوفه دوم.

حاول يكعد عدل سند ظهره على المخده يعاينلها ويحجي بهدوء

سلطان:: ماتطلكين تعدي مده وهم ابنيلج بيت وحدج انتِ وغيوثي، عليمن بذمتي؟ جا انا ماعايفج حتى تصيحين بذمتك.

الاء:: لااا لا ما اريدن تبنيلي بيت ادفعلي مهر گد ما دفعتلها.

ريـــمه :: درت عليها بحرگه الجذابة صيحت بوجها

-انجبي مهرج اطيناه الاهلج واخذتي بس تلاثة شعلينه بعد.

كضاني سلطان من ايدي مايريدني اتدخل وگالها

-ميخالف اطيج مليونين تشترين بيهن ذهب.

سكتت تعاينله بحقد وتخزر بيه اخذت غيث تبوس بيه وطلعت هم اهون طلع بيها شي زين  تحب ابنها ودايره بالها عليه درت لسلطان مقهوره

-كلشي ما تطيها!!

سلطان:: لا تحاجينها خطيه انا اساساً مقهور عليها حقها تورطت وياي ما اريدن اظلمها.

-طلگها.

-ريـــمه شبيج شلج بهالحجي من ليمت تدخلين انتِ؟

سكتت ضايجة طلعنه من يمه انه وهاجر   وهم لكيت امي والاء يتعاركن تگلها

ميلاد:: شلون ترضين؟؟ جا بدل ما تهددينه لو اخذ رغد تمشين لهلج وتحرمينه من ابنه.

الاء:: لا خل ياخذها شأريد منها.

ميلاد:: خيبه انه دعائي بالمچان لو اخذها ينحرك گلبكم على ابنكم.

والاء مكيفه وماترد على امي مغلسه، ولدنه ضلوا مايحجون وي صــيهد، وحتى ســليم ووهب محد يحجي وي الثاني، وما ادري شلون تاليها

""""

مــاسه :: صــيهد شگد راح لشيخ حيدر وهوه ابد ما يحاجيه وحتى على عرس صــيهد ما يجي گايله انتَ اطيتني حجايه وطلعت مو گد حجايتك.

وبعدهم كلمن يجرله بصفحة، رحنا وي جوري وصيهد عقدنا محكمه وهم گوه رهموها لان بعدني ماداخبه الثمنطعش،

وجوري وجها تارسه الخوف تريد تشرد متسودنه خاصه وره ماصارت سالفة رغد  حيل ضاجت منه بس ما بأيدها شي وحتى موعد العرس حددوه، امي خابرت وحده من خالاتي خلتها تجي اطتها فلوس وراحت تشتري لجوري غراض وكالت لجويريه

ايمان:: بس رغده تصير زينه اخليها تاخذج وتروح للسوك تجيبين اليعجبج.

وهيه ساكته الليل كله تفكر والخوف كاتلها، نزلت جوه لگيت رغد بالمطبخ وجها اصفر وتعبانه جاي تشوي معلاك الامي.

-ليش ما كتيلي وانه اشويلها.

رغد:: صرت زيّنه اگدر  لا تخافين.

درت لباب المطبخ من طب صــيهد عاين علي ماعاين لرغد جنه ما يشوفها گالي

صــيهد:: مــاسه جيبيلي چاي.

مشيت بساع للطباخ وهوه راح للمشتمل سويتله چاي واخذته اله طبيت للغرفة خليته على الميز ودرت اريد اطلع صاح وراي بهدوء

-مــاسه.

درت عليه ساكته عاينلي تحسر ودنك عاين لكوب الچاي يحجي بتردد

-زعلانه؟

ضليت ساكته لمن رد عاينلي  مسح وجهه محتار شلون يحجيها

صــيهد:: لان طگيتج زعلتي؟ زعلتي مني؟

عاينلي هزيت راسي آي مرتبكه دنك ساكت اخذ كلاص الچاي يشرب عفته وطلعت كعدت يم امي ورغد بالغرفة رغد توكل امي وانه احجي كتلها

-يمه البنيه خايفه وبس تبجي ماتريد تاخذ صــيهد.

رغد:: ياريته لو شخص يتفاهم جا راحت گالتله اجل العرس انه ما متقبلتك.

مــاسه:: اسكتي فـــدوه اسكتي النوب يعدم لبنيه.

ايمان:: باجر انه احاجي جــويريه.

سكتت محتاره  وسمعنه رضا يبجي جابته ندى واجت يمنه جزعانه امي ضلت تلعب وياه وتمسح على ظهره سكت گالتلها

ايمان:: ندى يمه خل انه ابشرج گبلهم،كاعد يدورون مره لرجلج.

ووي حجايتها ندى فتحت عينها بصدمة وامي مبتسمه ببرود گالتلها

-لمي رجلج يمج  يشوفونه ينام بالدوانيه صاحوا نزوجه ترى مو حباً بوهب يردون يزوجونها بس يردونه تكثر مسؤوليته حتى مايگدر يطلع من جوه اديهم.

ندى:: دنكت ساكته مختنگه  وهيه تنصح وتعلم، شويه وگمت اخذت رضا ورحت للغرفة توه نام حطيته بفراشه وضليت افتر بالغرفة روحـــي ممروده  واتخيله يتزوج اموت والله مو بكيفه،

صارت بالوحده واني كاعده وميته قهر لحد ما سمعته دخل للبيت فتحت باب الغرفة اباوعله غسل لمحني واكفتله بباب الغرفة دخل يريد ياخذ البطانية ويروح للدوانيه،  سديت الباب قفلته وشلت المفتاح وهوه وكف يم الكنتور اخذ ملابس وشال البطانية بأيده الثانية مشه للباب فتحه ما انفتح وياه دار يباوعلي.

تمددت على الچربايه وتغطيت نايمه صفح وايدي جوه خدي اباوعله  عاف البطانيه على جهه واجه عليَّ مدلي ايده يحجي بهدوء

وهـــب:: انطيني المفتاح

-ما انطي، وما تطلع من الغرفة شنو انتَ هاجرني؟

رفع حاجبه مصدوم رجع ايده  وهز راسه يسأل

-شتردين؟

-نام بالغرفة

-يمج؟

وخرت الغطا من عندي نزلت واني احجي

-نام اني آنام بالگاع.

وهو يباوعلي ساكت فرشت بالگاع اخذت بطانيته تغطيت. وهو بس يستغفر نزع قميصه وتمدد على الچربايه اباوعله يتصفح بالتلفون سألته

-وهـــب رغد تبقى متزوجه سلطان؟

-لا.

-ها؟راح تخلونهم يتطلكون.

-امم

-حرام عليكم انتم ليش هيج تسوون؟

عاف التلفون وكعد على حيله يباوعلي بحيره

وهب:: ليش ما تنامين؟

غمضت عيني بس گـــلبي  محترك وميته قهر  شويه وفتحت اباوعله عايف التلفون ومغمض كمت  مشيت بصف الچربايه كعدت بالگاع اباوع لوجهه فتح عينه وفززني اريد اگوم ولزمني من ايدي مثبتني بمكاني

وهـــب:: شبيج اليوم؟

-گول الروحك.

مسح وجهه يزفر نفّس بحيره

وهـــب:: هسه انا شمسويلج يمج حذاج؟

-تريد تتزوج عليَّ؟؟؟؟

حجيتها وعيني بعينه بقى ساكت ودموعي نزلن مسحتهن ووگفت احجي

-والله بس تتزوج اخذ ابني واروح ماتلكاني ارجع للبنان.

-تهريب؟

-معليك تهريب مو تهريب.

اجه وراي بساع جراني من ايدي ودفعني للحايط لازمني من فكي اعصاب ويحجي بأذني حتى رضا مايفز

وهـــب:: ترحين تهريب وي زلم مثل ما اجيتي مووو؟

چلبت بأيده موجوعه وهو ينتر بغضب

-بدل ما تحجيلي تخلين زلم غربه تساعدددج؟

-عوفني أذيتي.

دفعني من ايده وراح للچربايه بعصبيه مسحت عيوني ورجعت لفراشي مختنگه غطيت وجهي ابجي، وهو ماگدر يبقى بالغرفة انطيته المفتح وطلع.

"""""

جــويريه :: أحس الايام الفاتت اهون چنت متقبله صــيهد بيهن بس بعد ما شفته من ضرب رغد وجان عنده استعداد يگتل ابن عمه وهو اساساً يحبه ومعتبره اخوه، كرهته كرهته وحرت شلون اخلص روحـــي منه، والايام تمشي بسرعة ما بقى للعرس غير أربعة ايام واني روحـــي تلوب ام صــيهد حجت وياي الحد ما تعبـــت  ابد ماگدرت تغير شي من تفكيري.

وحتى رغد اللي ما تحجي وي صــيهد حاولت وياي واني من تحاجيني اعوف مشكلتي وأفكر بيها يوميه تصير هوسه علمودها يردون سلطان يطلگها وسلطان ما يقبل ويحلف ما يطلك والف تهديد هددوه گالوله تنطرد من العشريه گالهم ميخالف اخذها واروح مايهم.

وهي هم تمسكت بيه وگالتهم ما اريد اتطلك رغم بيومها ابوها شكد ضربها بس ما استسلمت.

مــاسه كل يوم هي وندى يرحن للمشتمل يعدلن ويرتبن اغراضي هناك واني روحـــي تروح بكل يوم يمر احس رايحه لجهنم، وطول هالفترة ابد ماشفته لو اسمع صوت سيارته أشرد فوگ

الحد يوم الحنه كعدت على الهوسه خالاته كلهن عدنا وأهل جده وهوسه وخبصه.

غسلت ورحت يم مــاسه وندى للمطبخ ضايجات سألتهن شكو گالت مــاسه

مــاسه:: تعاركوا من الصبح والله لعبت روحـــي من المشاكل.

-ليش شكو؟

-علمود رغد سلطان ما يرضى يطلكها وصيهد يگلهم اخليهم هيج لا هم للسما ولا هم للگاع.

-يابه بعمري ماشفت انسان ينگط سم مثله شهالحقاره هاي؟

ندى::. اسكتي ولج هي على هايه اهون شوفي عرسج شراح تصير بيه، لا بيت شاكر يجون، ولا بيت شامل ولا هذا الشيخ الجانوا عنده سلطان ورغد وهم جدج وابوج كلمن يحجيله بصفحة يارب تعدي على خير.

سكتت بحيره اريد ادعي مثلها بس ما ينطيني گـــلبي  بلكي يصير شي ويلغون العرس ولو هوه اني عقدت محكمه هوسة العرس شعليها بعد.

مشيت وي مــاسه لغرفة امها سلمت على خالاتها وراها رحت الغرفة جده سلمت على اقاربها بس ابوس بيهن وهي تشرح هاي بت هاي وهاي خالو هذيج على اساس اني مهتمه

رجعت وي البنات للمطبخ اساعدهن بالغدا وهنه يحجن عليَّ ماقابلات

للعصر اجت رغد تخليلي مكياج وانه سبحت الف سبحة حتى اتمرض وما انجبر اسوي حنه ولا تمرضت، كعدت يمها ميته من القهر مغمضة عيني واتخيل روحـــي راح انحبس وياه بالمشتمل بعد وين اشرد

افكر وحتى ما اسمعهن شنو يكولن أحس بيهن يمشطن شعري ويعدلن ويرتبن واني بالي ولا يمهن.

الحد ما رغد طكتني

رغد:: وين رحتي؟

فتحت عيني ساكته  كومتني    وندى تلبسني بالذهب وماسه ترشلي عطر. مستعجلات باوعت لروحي بالمرايه الفستان احمر كصة الصدر قلب والردن تول،  مخصر الحد الخصر تجي بيه نفشه خفيفه.

ندى لبستني گلايد اثنين وحده خناگ وحده طويله، وتراجي. وسوارات ومحابس اثنين وحلقة باوعتلهن ودرت لرغد اسألها

-هذن كلهن ذهب؟

-اي مال مهرج شبيج؟

-والله ثروة واني صار ساعة افكر اذا شردت منين اجيب فلوس هاي الفلوس لابستهن.

ضربتني على ايدي تضحك وتعدل بشعري طلعت وياهن كعدت على الكراسي وگدامي ميز عليه كيكه وحنه وڤازه بيها ياس كلهن ترتيب ندى ورغد، تحسرت اعاين للنسوان كاعده بين كل هالناس بس احس بروحي حيل بعيده

اباوع بيهن وحده وحده والمح بنات غانم كاعدات يم امهن غير تخبلت تمنيت اگوم واطردهن صحت لماسه كتلها گالت

مــاسه:: اي هذن بكل عزه لطامات.

-خرّب حظي شجابهن.

سكتت واباوعلهن بحقد محترك گـــلبي   مــاسه ورغد جابن خالة ايمان يمي بالعربانه مالتها وخرت كرسي صــيهد وكتلها خلنها يمي يروحلها فـــدوه صــيهد، حطنها يمي وهي مبتسمه واخواتها يحجن وياها كالتلهن

ايمان:: امده رجلي الغدرني كون حيلي گبل واهوس الچنتي.

وهنه تسودنن خلن وحده تدكلهن وهنه كامن يهوسن ويركصن  عفتهن كلهن وركزت وي عبير تباوع وره مــاسه وين ماتروح مــاسه تباوعلها بقهر ومن شافت الحلقة بأيدها عيونها دمعن مرات اضوج منها ومرات انقهر عليها.

رغد وخرت خاله ايمان من يمي ورجعت الكرسي بصفي من راد يطب صــيهد يحنيني شلت راسي اعاينله بضوجه وهوه دخل ماشايل عينه اول مره اشوفنه لابس هيج لبس كامل كل مره يلبس بس الدشداشة هالمره لابس دشداشة بيضة وبشت اسود حوافه ذهبي وعگال وبأيده سبحه سوده وخالاته يهوسله ويبوسن بيه درت عيوني من عده لرغد اللي طبت لغرفة وهـــب.

كعد يمي منزل عينه وانه عيوني على بنات غانم يتمضحكن ويتشاورن، درت منهن على صوت خالته يسولفن وياه شال راسه يحاجيهن بس ما يباوع على البقيه رغم مابيهن غريب بس بيت غانم وهم يقربولهم، يحجي وياهن وجر ايدي بأيده لزمها جوه الميز جريتها من عنده ماعافها لزمها بقوة جريتها حيل انطك الميز وتحرك العصير ابتسمت اباوع لوجهه خالاته وهوه يعصر أيّدي بقوة درت وجهي عليه باوعلي مبتسم ولا عبالك مسوي شي .

بس وخرت خالته من يمه قرب  وجهه يمي يباوع لوجهي وابتسامته ماتنعرف اذا حقيقة لو جذاب ومال واحد معصب  همست وعيني بعينه

-ايدي جاي تأذيني

-لا تجرينها وهيه ماتوجعج.

رخت لزمته الايدي سحبتها بسرعة خليتها فوك الميز مبتسمه واباوع للنسوان وندى وماسه  يصورن بينه وهوه بعد حتى بالجذب ماگدر يبتسم  الحد ما رادّ يحنيني مد ايده وباوع لوجهي يحجي بهمس

صــيهد:: رجعي ايدج الايدي.

مديت ايدي اله  بقهر جراها عليه مايخلي احد يشوف عصر اصابعي حيل ورجع خفف لزمته  رفع ايدي  وي مستوى الميز گال الماسه

-تعاي حطي الحنه انتِ انا ما اكضها.

تقربت مــاسه اخذت من الحنه وحطت بوسط ايدي وهوه شال الشريط الاحمر  لفاه على ايدي وشداه وكف يريد يطلع وخالاته مايرضن يگلله صور ويا مرتك واجن علي وكفني بصفه مد ايده على خصري بلعت ريكي بخوف وهوه  يعاين لماسه   بس صورت وخر ايده وراح يم امه باسها وباس اديها وهيه ابد ماحاجته زعلانه من عده طلع من يمنه تنفست براحة واجت رغد يمي اتوسل بيها تكومني كافي لعبت روحـــي.

وبس كمت بسرعة دخلت للحمام سبحت وبچيت من كل گـــلبي، افرك الحنه من إيدي بقوة وماتروح بقيت كاعده بالحمام الحد ما مــاسه صاحت عليَّ لبست وطلعت، بالليل  الولد سووا حنه  وصيهد كضاها اعصاب وروحه بخمشه، لا ولد بيت خالي شاكر اجو ولا بيت خالي شامل.

نزلت يمهن شويه وصعدت فرشت فراشي ولفيت راسي بس اريد انام الافكار نخرت عقلي بالگوه غفيت وكعدت الصبح كلمن يركضله بصفحة وهذا يصيح وذاك يصيح اخذنه وهـــب للصالون على اساس اني ورغد بس ابوها وجدها مارضوا رحنا اني وندى وابنها وياها عل گلبها بهذلها وروحها طلعت، وعبالم الوقت يركض بسرعة بسرعة خلص باوعت للمرايه وعيوني انترسن دموع  والبنيه تسألني

-ها ماعجبج لمكياج؟

هزيت راسي اي رغم ماجانن دموعي من المكياج وهي جان مكياجها ينضرب بيه المثل بوقتها كد ما حلو بس مو لوضعي، دخلت ندى گالتلها

-لا عاشت ايدج كلش حلو والله.

سكتت البنيه ضايجة جنت اخر عروس تكمل مكياجها راحت غسلت ورجعت گالتلي

-انقهرت والله انه اول ماشفتج گلت هاي الراح تطلع توب اليوم،   ضجت من ماعجبج.

-لا حلو ماقصدي مو حلو اني.

بقت ساكته وكفت ندى لبستني الكبوس وغطتني بيه شدته من يم صدري وانطتني المسكه، لزمتها ومنزله أيدي وهم كل شويه مخابرينها على تلفون ام صــيهد، طلعنه للساحة  اباوع من دخل صــيهد ووياه وهـــب واسمع بره صوت لهورنات والهوسات باوعتله لابس بدله سوده وقميص ابيض  واعصاب على شنو بله مو هاي مشيت حجايتك وسويت التريده شكو معصب بعد والله يا الله.

بأيده بشت وصل يمي وفتحه يغطيني بيه واني روحـــي محتركه حرك من القهر رغم الجو بارد احس بروحي محتره گد ما مقهوره

-ترى ملبسيني كبوس شنو هذا تخليه عليَّ؟

-اشش سدي حلكج.

وهـــب :: شني السالفة صــيهد؟؟

جــويريه خويه، الشارع متروس زلم  وكلها ربعنه  هيج استر بعّد أخوج.

سكتت عيوني متروسه دموع وكف يمي وجر ايدي غصب خلاها بأيده  ووهب اخذ رضا من ندى وهي تمشي وياي تساعدني على البدله جانت حيل ثگيله وكوه امشي بيها، كلش ما أشوف وعلى ساعة اعثر، عبالي راح امشي هواي بس  خطوتين وصار گدامي باب السيارة  واني افتر بحيرة شلون اصعد والبدله شكدها شكبرها  ساعدني هوه وندى صعدت سدوا الباب جان زلمه معگل كاعد كدام وميثم يسوق  وهوه صــيهد مدري وين راح شلت راسي اباوع تحمحم مــيثم يحجي بصوت ناصي

مــيثم:: لا تعاينين خويه جاي يصورون.

دنكت ساكته الحد ما اجه صــيهد صعد وتلفونه يدك كل شويه وهوه اعصاب وضايج كال الميثم

-كهلان مو گال اجي للزفه ليش ما اجه؟

-والله ما ادري من حاجيته كال أجي وراكم .

سكت مقهور لحد ما وصلنه للقرية ونزلوني  تمنيت افلت روحـــي من البدله امشي وهي تجي وراي دخلنه للبيت ايدي بأيده والهلاهل   والهوسات گدامنه  بس وصلني وكعدت وخر الكبوس من عدي وطلع  واني اباوع للنسوان لعبانه نفسي من كلشي

صبوا العشه بسرعة لان الدنيا ترعد وخافوا تمطر عليهم،

درت لرغد اتوسل تطلعني مناه اخذتني لغرفة بيت وهـــب  بس دخلت نزلن دموعي وهي تتوسل بيه

-بس خلي يصورنكم سوا والله تتندمين بعدين  اسمعي من عدي جــويريه.

تحجي وتمسح دموعي بحذر،الحد ما النسوان راحت واجه هوه ياخذني للمشتمل عبالك ماخذني للجحيم  امشي خطوه خطوه وروحي رايحه، دخلنه للغرفة مــاسه وخالاته اثنين ويانه علمود الصور وكفت وهوه بصفي وماسه تصورنه بالكاميره وخالاته يحجن الزمها احضنها وهو عبالك مايصدك يلزم ايدي بقوة  واني گـــلبي ينمرد من الخوف الحد ما مــاسه كملت تصوير وطلعت شارده وخالاته هم سلمت وطلعن  وخر من يمي واني بسرعة درت وجهي امسح دموعي.

ودرت عليه شغل الهيتر قفل الباب بلعت ريكي گـــلبي  يدك حيل دار وجهه باوعلي. مضيك عيونه ويسأل

-بردانه؟

هزيت راسي اي.

-بدلي

بقيت اباوعله بخوف روحـــي رايحه نظرته تخوف، دنكت شفايفي يرجفن  فتح باب الغرفة وطلع كعدت بالگاع ابجي  ميته من الخوف وكل ما افكر يمد ايده علي اختنك  وينقبض على گـــلبي، گمت اريد افتح الكنتور واخذلي ملابس مقفولات كل الكناتير بس بالزاوية معلك روب نوم ابيض طويل  ساقيات وفوكه القطعة الثانية ردن  مستور، اخذته  عفته على الچرباية ورحت للباب قفلته وفتحت قيطان البدله والسحاب ذبيتها بالگاع لبست الروب بسرعة. علكتها اخذت الاغراض المخلياتها بالزاويه ورحت للحمام سبحت ورجعت لبست الروب بس طلعت من الحمام صار بوجهي وكفت بمكاني مرتبكه باوعلي من فوگ ليجوه.

لميت الروب على صدري گال

-تعاي تعشي.

حجاها وراح للغرفة مشيت وراه ارجف بروده وخوف مجلبه بالروب بأثنين اديه وهوه لابس دشداشة بيضة جر الهيتر قربه يمي كعدت بالگاع والصينيه گدامي  دك تلفونه وهوه مدري شيسوي يم الجرارات فتح خط وسماعة بدون ما يحجي واسمع صوت واحد يگله

-ها زعلت؟

-انچب.

طــروادة:: باجر تجيني للبيت واباركلك اذبحلك وهـــب.

-عايفني علمود سلطان هسه عرفت ياهو العزيز عدك.

-وكلام الله لا يابه شتحجي انتَ، ردت اجي بالزفة بس بعد مالحكت.

-هممم مالحگت لو اكو واحد حاجاك؟

-لا لا محد انا مالحگت، هسه يله  بعدين نسولف الله يسعدك ويهنيك وها اكلك خل بالك على المره ترى انا اخوها مو ياخذك لواهس وعبالك تايهتلك حظك اطيحه.

يججي بضحك وصيهد يعاينلي مضيك عيونه گاله

-ان شاءالله.

سد التلفون دنكت  ادفي رجليَّ يم الهيتر  عاف تلفونه على الشحن ومد ايده الي بيها تلفون عافه يم رجليَّ يحجي بهدوء

-ما تطين رقمج الاحد غير مــاسه ورنه، ماتنزلين برامج من كيفج، اذا رقم يخابر عليج ما تردين.

يحجي واني ساكته اباوعله خلفية التلفوم جكاره  باوعتلها وباوعتله دفع الصينية يمي

-اكلي.

-شبعانه.

-لا ماشبعانه.

سكتت وهو تربع بالگاع سوه لفة صغيره ومداها الي اخذتها لان حتى لو اكله ما اريد ما يقتنع اكلتها گوه على روحـــي وهوه ما اكل شي گمت غسلت  ورجعت للغرفة اسأله

-مفاتيح الكنتور مالكيتهم أريد ابدل.

واكفه يم الباب فاتحته واحجي وهو كاعد على طرف الچرباية يدخن زفر الدخان مضيك عينه وباوعلي من وجهي لرجليه گال

-ضلي بهذا حلو عليج.

درت وجهي على فتحة باب المشتمل دخلت مــاسه مبتسمه بأيدها چاي، دخلت للغرفة مستحيه وهي انطته چاي ومدت ايدها تنطيني هزيت راسي لا ما اريد دنكت شالت الصينية وطلعت ضل يشرب چاي ويدخن منطيني ظهره واني حيره تاخذني وحيره تجيبني والدموع كل شوي تتجمع بعيوني خلص چاي وطلع  مشيت اباوع وراه ومن كل عقلي ادعي يروح، شفته دخل للمطبخ غسل الكلاص   نشفه وخلاه وي الكلاصات، مطبخة مابيه هواي اغراض ونظيف حيل محد مشتغل بيه، رجعت للغرفة بسرعة كعدت يم الهيتر  مدنكه.

وهو رجع دخل للغرفة قفل الباب وراح للكنتور بأيده مفاتيح، فتح كنتوره  اباوعله بطرف عيني  كلشي مسفط بمكانه  تراكات البيت  بكنتور وقمصان الطلعه بكنتور والدشاديش بكنتور وين لاكيها ماخذ ثلث خانات وعايفلي تلاثة.

درت وجهي من عده من شفته طلعله تراك ونزع الدشداشة

ضليت ادفي برجلي وادعي الله يهديه ويعوفني بحالي لمن الله يفرجها واخلص من عنده.

وسط هوسة افكاري فززتني لزمته لزنودي رفعني من الگاع واني بأثنين اديه ساده الروب على صدري واباوعله بخوف جر الخاولي من شعري دفعت ايده مبتعده ارجف  وما اخلي عيني بعينه

-شبيج؟

تقدم خطوة ورجعت خطوة مختنگه باوعتله اريد ابجي عگد حاجبه بغضب نتر

-شبيييج لج؟

-اروح.

جراني من أيدي حيل عليه نتربغضب

-انتَ شني من بشر اليوم عرسنه وبعدج تصيحين اروحن وين توولين؟

بجيت اشهك واجر بروحي من عده بلا وعي ارد

-للبنات.

دفعني على الچرباية حيل يسب بيه وبالبنات لميت رجليَّه الصدري بخوف ودموعي  تجري باوعلي وصيح بغضب

-انتِ تتقصدين تحجين وياي هيج بس حتى اطكج.

هزيت راسي لا ابجي وهوه متخبل

صــيهد:: لا انتِ زعطوطه واكولن حقها واعذرها اشو وكحه ومفتشه باللبن شلج بسالفة اروحن يم البنات بعد؟

غطيت وجهي متخبله شورطني شجابني على هيج بشر وهوه مثل المخبل ضل يدفر بالاخشاب بحرگه وصيح بصوت عالي

-اسكتييي اسكتييي.

سديت حلكي بأيدي كاتمه صوت بچيي واباوعله بخوف نزلت من الچرباية وهو كعد بالگاع اديه ترجف من العصبيه ويتنفّس بقوة مسح وجهه باوعلي  واكفه بزاوية الغرفة مخروعة دك بأيده على مكان بصفه

-تعاي اكعدي خلي احاجيج.

مسحت دموعي ورحت بخطوات ترجف كعدت كدامه على اركبي أمسح بعيوني واوخر بشعري من وجهي بعشوائية وخوف مد ايده وخر خصله  لوره أذني  ورجع ايده على رجله زفر نفس بحسره يباوع لوجهي گال

-حاجيني بله كليلي شتردين؟

هزيت راسي لا صوتي مختنك وكوه يطلع

-ماتمد ايدك عليَّ؟

-اليسمعج يگول هذا يوميه طاكها ليمت ماد ايدي عليج انا؟

-لا لا مو هيج

مسحت عيوني عدل واحجي وصوتي رايح

-يعني ماتمد ايدك علي ماتلزمني اموت روحـــي والله.

فتح عينه بصدمة وتفاحة ادم صعدت ونزلت دنكت عيّني خايفه وادري حچيي وياه لا يقدم ولا يأخر وهوه متزوجني كله علمود هالشي، رجعت رفعت راسي وهو على نفّس النظرة

صــيهد:: انتِ تردين تلعبين جوري وانا هالحجي ما يمشي وياي، لو غريبه وماشايفتني بيها مجال اكولن مستغربه انتِ نايمه على صدري وبين اديه وصارلج فوك السنة يمنه شني بعد؟

يحجي بنتر كوه لازم أعصابه عني رجعت أبجي وأتوسل

-حباب، والله ما احب تلزمني أكرهك.

أحجي بعشوائية وحتى ما منتبهه اذا حجيي بيه خطأ بس صفنته بعيوني سكتتني وي اخر كلمة يباوعلي واحس حتى ملامحه تغيرت مسح وجهه بأثنين اديه هز راسه خوش

-ماتطلعين من المشتمل.

-ميخالف انام بالهول!

هز راسه لا، تلفتت ادور مكان اكله عليه ويقتنع گتله

-أنام بالمطبخ؟

-لا.

-وين انام؟

سكت وكام من يمي اخذ باكيت الجكاير وطلع غطيت وجهي أبجي بحرگه حيل مقهور، مسحت دموعي وگمت شلت المفاتيح من الميز وفتحت الكنتور اباوع لملابسي المسفطة اخذت منهم تراك بدلت ورحت اريد اتوضى، شفته بالمطبخ، شباك المطبخ چبير وناصي  فاتح خانه وحده وواگف يدخن، عفته ومشيت توضيت فرشت السجادة صليت والدموع على خدي ادعي ربي يحميني ويخلصني من الورطة الخليت نفسي بيها.

بس خلصت صلاة جريتلي فراش مديته يم الميز گدام الچرباية طفيت الضوه وتمددت متغطيه وگلبي يدك حيل  باوعتله من فتح باب الغرفة شغل الضوه عاينلي وجهه مايكصه السيف، طفه الضوه وراح للچرباية تمدد ساكت شويه وگال

-خل واحد يشوف فراشج مو وياي الا حظج اطيحه.

بقيت ساكت وملتفه بالغطا زين بردانه نتر

-سمعتييي؟

-اي.

-ادبسر.

رديت بگلبي مغمضة عيني وگلبي  بعده يدك بقوة بس ردت أأمن وأنام، ساعات مرت واني كل ما احس بروحي راح اغفى افتح عيني بخوف واباوعله بعده كاعد يتگلب لو يباوع بتلفونه.

هستوني غفيت واحس بروحي انشال من الگاع فتحت عيني وشهكت بخوف ادفع بيه وهو شايلني بين اديه

صــيهد:: اششش.

حطيت ايدي بصدره ادفعه. وهوه ما مهتم عافني على الچرباية ولزم ادي بقوة

صــيهد:: نامي هناه ما اسويلج شي.

هزيت راسي لا خايفه منه  جر رجليَّ وجبرني اتمدد

-انخمدي گلت.

نتر بعصبيه وجر الغطا عليَّ تبسمرت بمكاني وهوه افتر نام بمكانه منطيني ظهره ورغم شكد جنت نعسانه خفت ارجع انام حيل خايفه منه وما مأمنه بيه ولا بمقدار ذر.

ما ادري شوكت غفيت وفزيت مخروعه على دگة باب المشتمل واباوع الادين صــيهد لاماتني على صدره بس استوعبت ابتعدت من يمه بفزة وهوه فتح عيونه حمر  باوع للساعة بالسبعة والباب تفلش من الدك، كام بسرعة لبس تشيرت.

واني نزلت من الچرباية امسح بأيدي من لزمت ايده مشيت وراه فتحت باب الغرفة وماده بس عيني لمحت جدي وخالي وليد وجده واكفين بالباب

مدري شكالوله وهو بقى يصيح يغلط ويطرد بيهم گاله جدي

شعلان:: مو دگيت صدددرك وصحت مرتي محد جايسها جيب بياضها وخلني اصدك الاخذتها بت بيوت،لو تطينياها اذبحها.

فاتحه عيني مصدومة وهوه هد على جده يغلط ويسب وابوه لازمه ومن عله صوتهم وصياحهم سديت باب الغرفة وكعدت بالگاع بخوف أبجي الذبح وراي وراي قبلت بأصعب الاشياء بس حتى احمي نفسي وبعدهم وراي ذبيت نفسي بنار وماخلصت منهم لحكوني جدي ناوي على ذبحي ومخليني بباله.

  اسمع صياحهم وغلطهم وهوه بينهم ماساكت سمعتهم من طردوه  للمعامل وصوت وهـــب يتعارك وياهم ماقابل يكلهم العالم تجي تباركله شلون تطردونه وجدي يكله

شعلان:: سوالفه كثرن، وانا سكتتلكم هواي، انتم وولد شاكر استهتروا ارد اطيح حظكم وانعل ابهاتكم.

طب صــيهد للغرفة يتراجف يدور علي واني وره الباب كاعده ولامه رجليَّه الصدري دار وجهه عليَّ بس لمحني اجه جراني من اجتافي وگفني ومد أيده بعصبية لوجهي يمسح عيوني ويحجي

بحرگه

صــيهد :: اي شي يسألونج كولي ما ادري عد صــيهد خوش؟

هزيت راسي اي وهو يمسح بدموعي ويحجي

-لا تبجين، بدلي حتى ترحين يم امي.

-وين راح تروح انتَ؟

-للمعامل.

رجفن شفايفي بخوف احجي والغصه خانگتني

-واذا جدي راد يذبحني؟

صــيهد:: فنه لو لاحج الا اكصص اديه.

بعده صوتهم يم باب المشتمل  راح للكنتور  يبدل واني اخذت دسداشة ورحت للحمام  بدلت وطلعت  لازم شالي بأيده وواكف مستعجل

-البسي بساع.

اخذته من ايده اريد اگدر الفه على راسي ماكو خايفه منهم  حطوا الخوف بگلبي بحيث بمجرد اسمع كلمة ذبح  توجعني رگبتي واحس بروحي بدت تطلع، جراني عليه من ايدي فراني گدامه لف الشال على راسي واني مدنكه عيوني ودموعي تنزل بلا صوت تحسر يتلمس وجهي ويمسح بدموعي

-ليش خايفة انتِ؟

-ما.. ما اريد اموت.

جراني الصدره حاضني بچيت بصوت وهوه حيل لامني بين اديه  يبوس راسي ويردد

صــيهد:: والله محد يوصلج وداعت امي، غير امحيهم لو جاسوا شعره من راسج.

وخرني من حضنه يمسح بعيوني جراني من ايدي وطلعنه من المشتمل  للبيت دخلنه من المطبخ مــاسه وندى ورغد كلهن بالمطبخ وهوه يمشي ما مهتم دخلنه للغرفة يم امه سلمنه عليها گالها

صــيهد:: يمه أنا رايح لان ابوي الحنين ما اگدر احط حچايته جوه تعال وادوسنها رايح الخاطره مو الخاطر غيره، مرتي يمج واريدن من الله بشر يحاجيها، ان چان هيه لو اخواتي يشهد الحسين اليمسهن بحجايه امسه بصاروخ.

ايمان:: مودع بالله.

باوعلي  وطلع وجدي يغلط عليه  وبس شاف صــيهد طلع من القرية نفخ ريشاته واجه للغرفة يتهدد ويحجي گتله

-كلشي ما ادري عد صــيهد.

تفل عليَّ متحلف

-صوجي مارديتج لعمامج يدوسون على راسج بقنادرهم.

طلع من الغرفة يصيح

-جيبولي سلطان خل يجي يطلك رغد

وخالي شاكر كاله مايقبل يطلك ومن طرده للمعامل ماقبل گاله ابني مريض وصوابه بعده ماطايب وين توديه، وكف بوجهه جدي علمود ابنه عكس خالي وليد اللي لو الولد مارضوا يرحون لمكان يبقى يصيح اني اروحن واغضب عليكم ومتبري منكم.

ويجبرهم باوصخ الطرق حتى يرحون.

وما اعرف اذا الصار من صالحي لو لا، من جهه خايفه منهم ومن جهه مرتاح من وجود صــيهد رجعت يم البنات  نمت بيناتهم واكللهن

-يروح فـــدوه صــيهد لحضنجن.

ويخنگني ماقابلات احجي عليه، التلفون اللي انطانياه نسيته بالمشتمل، واني من شفته طول يومين ما اجه رجعت لدراستي.

"""

ريـــمه :: احاول التهي بسلطان  اداريه وهو يخلص الليل يون ينوجع واصابعه يخدرن گـــلبي  ينمرد عليه والاء كل ما تسمعه موجوع تصيح

-حييل.

تخليني اموتن من القهر، ومن جهه اخواني اساساً حيل متأثرين بزعلهم وي ولد بيت عمي وليد اول مره يطول الزعل بينهم هلكد بس سلطان كل ما يجيب طاري زعلهم يرجع يگول يله الخاطر رغد يهون زعلهم.

ومن جهه امي وضغطها عليَّ تخنگني شما حاولت أتحسن  تضغط عليَّ بكل الطرق تخليني ما اعرف شلون اتنفس اضل بفراشي مختنگة والنفس ما ينجر وياي

كمت نزلت جوه فتحت الباب على سلطان نايم، طلعت للحوش  بعدني مختنگه ضايك النفس بصدري.

رجعت طبيت اخذت عبايتي وطلعت بره الحوش كعدت  يم النبگه سانده ظهري على سياج حوشنه وأتنفس بقوة  بس اريد ارتاح  ربع ساعة حسيت باب حوشنه انفتح وضوه على وجهي

سلطان:: هاه شبيج؟

-مابيه شي مختنگه وحرت وين آروح.

اجه يمي  ايده معلكه برگبته   كعد بصفي يسأل

-شبيج ليش مختنگه؟

عاينت لوجهه متحسره ورفعت اكتافي ما ادري

-انتَ مو چنت نايم شكعدك؟

-طــروادة خابرني، گال الحك اختك اظن هم راحت تنتحر.

يحجيها بحسره درت اتلفت اعاين

-وين شافني، لا شسالفة غلطنه مره جا يوميه نعيدها؟

جراني على صدره الجهه الما مصوبه، ساكتين اثنينا نص ساعة وگال

سلطان:: كومي خل نطب جوه بردت.

گمت وياه  بس درنه  نريد نطب للحوش شفت طــروادة يفتر يم سيارته گدام بيتهم عاينلنه  وسلطان يحجي بهمس

-مشكور.

وهوه ضحك يگله

طــروادة:: بالخدمه، اخليلك هاسكي كفيل بحراستها؟

سلطان:: لا لا ســليم موجود راح اكلفه هوّه وداعتك اقوة من هاسكي.

ضحكوا اثنينهم واجاني سلطان مبتسم دفع الباب تونه طبينه للحوش وكب صوت الصياح ببيتنا وطلع ســليم يركض وهاجر بين اديه غرگانه بدمها

يتبع...

أيلول 💚

أرض الـــــخناجر 🗡️

بقلمي الكاتبة ايـــلول 

تصويت وتعليق بين الفقرات لطفاً 💚

══━━━━✥◈✥━━━━══

منيلها عيــونج خناجر گطعتني!

══━━━━✥◈✥━━━━══

ريـــمه :: صرخت متسودنه وهو يركض مايشوف دربه وانه وسلطان نركض وراه من حلاة روحه يركض للشارع عايف السيارات وسلطان يركض وراه بس يريد يكضه ويجره لسيارة طــروادة نركض ومحد فاهم شي.

صعدت بصف ســليم وهي بحضنه وطرواده فر السيارة بساع

صياحهم وهوستهم وانه عيني بعينها اللي گوه فاتحتها تغمض وترجع تفتح ســليم نزع قميصة وحطاه على راسها يرجف كضيت اديها ابجي يمه هاجر وفززني صياح ســليم على سلطان

ســليم:: ما ادررري ما ادري سمعت صوت طبه قوية ولگيتها يم الدرج والدم تارس الگاع.

الحد گبل المستشفى بعشر دقايق جانت فاتحه عيونها وراها غمضت مغمي عليها نزلنه نركض واخذوها من ادين ســليم للسديه مال الطوارئ واحنا نباوعلها بخوف وهم واحد يفحص نبضها وواحد يقيس الضغط وبنيه تفحّص بالجرح كعدت بالگاع ارجف روحـــي رايحه وگوه اجر النفس اشهك بصوت وسليم كعد المستواي يحاجيني واديه تتراجف

ســليم:: ريـــمه، مابيها شي مابيها شي هسه بس يخيطون راسها تكعد شو عاينــي علي ريـــمه.

يجرني من ايدي بس يريد اتنفس زين وانه الهوه كام مايوصل الريتي

طــروادة:: گوم ســليم طلعها بره هنا تخنك.

جراني ســليم من ايدي طلعني بره الطوارئ وركض يجيبلي ماي امسح دموعي ويردن ينزلن شني من شهر هذا مامر اسبوع اذا ما طاح واحد من عدنه وطب مستشفى.

جراني ســليم فاتح بطل الماي ويغسل وجهي وهوه بطرك الفانيله الداخلية.

مسحت وجهي ودموعي وهوه ضل واكف يمي بأيده بطل الماي ويعاينلي بخوف.

درت عيني للباب اشوفن طــروادة طلع يتلفت يدور علينه لمن لمحنه واجه بساع نزع قمصلته ومدها السليم يگله

-البس شهرتنه.

وسليم اخذها منه يلبس وطرواده يگله

طروادة:: خيطوا راسها وعلكولها مغذي وكعدت هسه راح يدخلونها للأشعة.

جراني ســليم من ايدي گومني يسأل

-ها صرتي زينه نروح يمها؟

هزيت راسي اي ودخلنه جوه الولد كلساع يخابرون على طــروادة لمحت صــيهد ووهب من خابروه وكالهم لا تجون ماكو داعي زينه وبس تكمل اشعة اذا ماكو شي خطر يطلعونها.

ضلينه متانين لمن طلعوها وضلت نايمه على السدية والمغذي يمشي بأيدها كعدت يمها دموعي تجري وجها اصفر وشفايفها بيض سوده بوجهي، امسح على أيدها فتحت عينها كوه تعاينلي بتعب.

-ها هجوره.

زفرت نفس بحسره تعاين السلطان اجوا يمها اثنينهم، وطرواده ضل واكف بالباب دك تلفونه بأيده رد اسمعه يهمس

طــروادة:: ها صــيهد، انتَ شدراك مو بالمعامل؟

حجه متنرفز وعاينوله الولد من عله صوته طلع من المستشفى، ضلينه يم هجوره لمن گالوا ماكو شي خطر تكدرون تطلعون وتراقبوها اذا تقيئت او اغمه عليها ترجعونها.

شالها ســليم وطلعنه من المستشفى وكفوا الولد يعاينون وهـــب بسيارته وصيهد بسيارته وواكفين يم طــروادة يحجون وياه، طــروادة بسّ شافنه طلعنه فتح السيارة وهمه رجعوا كلمن السيارته صعدنه بسيارة طــروادة وهوه اجانه اعاين للولد هم كلمن فر سيارته وراح، وهـــب طلع گدامنه، وصيهد راح بغير طريق.

مشينا مسافه وسلطان گال الطرواده

سلطان:: صــيهد رد من المعامل؟

طــروادة:: لا بس مخابر وهـــب ووهب گايله رايح للمستشفى علمود هاجر ومن سمع اجه.

سكتوا محد حجه بعد لمن وصلنه للبيت عفيه گلب عدها امي وگدرت تنام، ضال بس ابوي وسجاد متانين، اخذها ســليم فوگ الغرفتنه وصعدوا ويانه الولد حطاها بفراشها وسجاد يبوس براسها كعد سلطان كدامها يحاجيها

سلطان:: موجوعه هجوره؟

شالت ايدها تأشر على راسها منين يوجعها

ســليم:: هسه تشربين علاج وتنامين تگعدين زينه.

سجاد:: غير تديرين بالج من الدرج يا بعد روحـــي النوب شغلي الضوه يله تنزلين.

يحجون وياها هوه وسليم وهيه عينها مافارگت سلطان ميل راسه يعاينلها بشك لم اديها وسط ايده اعاينله بلع ريكه وسأل بتردد

سلطان:: شلون طحتي من الدرج هاجر؟

زفرت نفس بحسره وجرت أيده فتحتها تعاين الباطن ايده وتتلمسها بأطراف اصابعها متردده عاينتلي وردت عاينت لسلطان وخلت اصبعها على باطن ايده مثل القلم ركزت وياها وهي تكتب حرف حرف

"الاء"

فتحت عيني بصدمة اريد اجيبلها ورقه حتى تكتب وسلطان صيح يرجف

-عووفيهاا، هاجر الاء دفعتج من الدرج؟

هزت راسها اي، وهو كمز يركض، وسليم يسب ويغلط متحلف اذا سلطان ماطكها يرميها.

ثواني وگب صريخ الاء وصوت بچي غيث سلطان مايشوف گدامه كتلها حيل ويسحل بيها من شعرها للدرج يريد يشمرها كضوه سجاد وسليم، وابوي من جوه يصيح عليه

وكفت بباب الغرفة اعاينلها اول مره ما اوكف بوجهه سلطان وهو متسودن يطلع من بين الولد ويصيح بحرگة ناسي حتى وجع ايده

-ووولج تشمرين هاجر ووولج تردين تموتينهاااا؟

وهيه تسب وتغلط وتصيح

-كعدت غيبييث من نومه مادفعتها انه بس طكيتها وهيه طاااحت.

سلطان:: لنعللل ابوج لا ابو غيث امشييي لا اعدمج وولي لهلج.

ركضت لغرفتها تلم اهدومها وسليم يكله

ســليم:: من باجر تطلكها لا وحگ الحسين احطلي طلقة براسها واريدن شريف يطلع وراها.

وهوه راح يغسل وجهه تعبان طلعت الاء تبجي وشايله غيث جراه من ايدها ودفعها يصيح على سجاد

-وديها الاهلهااا.

الاء:: ابنننني ابني والله ما اروحن بدووونه.

تصرخ متسودنه وهوه يدفع بيها جلبت بأيده تبجي وتتوسل

الاء:: ابني.

انطاه الها وصوته مختنك گال السجاد

-ودّيها الاهلها

اخذها سجاد وراح وهوه ايده ضلت توجعه نزل وي ســليم جوه وانه رديت الهاجر اسألها

-ليش الاء دفعتج؟

رفعت اكتافها ما ادري وتمددت مغمضه عينها،الثاني يوم طب ســليم روحه بخشمه ويحجي وي سلطان بحرگة يگله

ســليم:: مودين عــفراء شلون ودينه مرتك، لنعل ابوهم لا ابو نسوانهم وحگ ذاك الحسين لو طلعوا حچاية تمس ام شمس لاحرك سلفهم بكبره.

وابوي شال النعال شمره على ســليم متسودن ويغلط

شاكر:: ياهي مالتك بيهم يطبهم مرض جعلها لا ردت وجعلهم لا ارتاحوا شلكم غرض بيهم؟

وهم تسودنوا هو وسلطان وسجاد گبوا بوجهه يتعاركون وياه وطلعوا من البيت راحوا البيت عمي شامل.

"""

رنـــه:: كاعده وي طــروادة من غبشه هوه يريد يروح للگاع وانه كاضه قمصلته بأيدي واكله

-البسها والله بارده.

-هسه تحتر واحيرن بيها اذبها بمچان وانساها.

-والله بارده اليوم البسها ولو احترت الدنيا علگها على زوره على عمود حتى تشوفها من تكضي من الگيعان تجيبها وياك.

احجي وهوه مدنك بالگاع يلبس جزمه، وگف اخذ القمصله من ايدي لبسها مبتسم ودرنه على صوت سيارة بصف بيتنا فتح باب الحوش ودار علي مصدوم

-عفره هاي.

طلعلهم وانه رحت بساع اعاين من يم الباب نزلوا هيه وشمس بأيدها ومنذر وياها، اعاين لمنذر خجلان مايحط عينه بعين طــروادة وعفراء عيونها مورمه من البجي، وخرت على صفحة عدلت حجابي وطبوا همه سلم منذر وهو مدنك طب وي طــروادة للدوانيه.

سلمت على عفراء واخذت منها شمس وهيه بساع طبت للبيت مشيت وراها اعاينلها بخوف راحت للمطبخ غسلت وجها واجت يمي

-شبيج عفراء؟

هزت راسها ماكو شي كعدت بالهول حطيت شمس يمها

-شبيج عفراء عيــونج مورمه

تحسرت عيونها متروسه دموع مدنكه تعدل بهدوم شمس وطلع طــروادة دارت عليه بس شافته دنكت تمسح عيونها وهوه اجاها وكف يمنه يحاجيها

-ها عفراء شني شصاير.

عاينت لباب الدوانيه وردت عاينت لطرواده تحجي وصوتها مختنك.

عــفراء:: امس بيت عمي شاكر ودوا الاء سلطان طاكها، ومن امس الهالساعة الدنيا انگلبت الزلم تصيح بصفحة ونسوانهم بصفحة، اكلوا منذر شلون ماتطك مرتك وتوديها الاهلها، يابه ياهي مالتنه احنه؟ لا شلون مثل ما ودوا الاء توديلهم عــفراء.

ويغلطون ويدعون اعمامي ساكتين ومن ضلن النسوان يغلطن ويدعن على ولد عمي شاكر رديت جا شني گـــلبي من حجر واسمع دعاويهن واسكت؟ واعمامي مارضوا عليَّ شلون ما سكتت.

تحجي ودموعها تجري وطرواده يسمعلها بغضب نتر

-منذر هم حاجاج؟

عــفراء:: لا سوده عليَّ تسودن والله وتعارك وي عمامه واهله ومارضى يجيبني بس انه لحيت لان طك گـــلبي من الحجي.

-خيولون لا تبجين بعد ماتردين وياهم.

حجاها وراح المنذر وعفراء تبجي مقهوره وانه من يمي انعل بيهم واسب النوب مو انقهرت حيل ضليت اغلط على سلطان واخوانه طكتني عــفراء

عــفراء:: تحركييين بگلبي انتِ؟ چا انه المن اجيت مغتاظة؟ غير حتى محد يدعي عليهم گدامي ويحرك گـــلبي .

كمت من يمها وكفت يم باب المطبخ

-خيولون مو هاي من وراهم بجيتي.

خزرتني تمسح بدموعها شويه وصاحلها طــروادة مقهور طلعت تحاجي منذر بالحوش وطرواده دنك يبوس شمس، مشيت بساع للمطبخ اعاين المنذر وعفراء من الشباج يمسح دموعها ويگلها

-وعلي لو عدي فلوس اشيلن ما اضلن بالسلف ولا اخليج يحترك گلبج.

عــفراء:: منذر ترى انه ضامه بگلبي وساكته الخاطرك مهونه المر، مليت من عمامك وكل ما الاء زعلت ردوا عليَّ يغلطون ويدعون على ولد عمي گدامي، والله يچوون گـــلبي وانه ما ارضى واحد يغلط على اهلي.

وهوه مدنك مقهور ما يدري شيحجي جر ايدها لوجهه باسها وايده الثانية يمسح عيونها ويگلها بحسره

منذر:: حقج يابعد روحـــي حقج، خل اروحن هسه ما اگدر اضلن مستحي احط عيني بعين طــروادة، ولا تشيلين هم الله كريم.

هزت راسها ساكته باسها بكصتها وطلع وردت هيه طبت للبيت عاينت الطرواده حاط شمس بحضنه ومن شافها كام خله شمس بأيدها وطلع وره منذر عاينت العفراء گتلها

-اسوي عجين تمن وتسيحيلنه؟ نستفاد من زعلج

غمتني تضحك

عــفراء:: اعجني يله يلنادره جا موديه طــروادة للگيعان بدون ريوك؟

-اكل خبز بايت وجبن وجاي كافي طلابه.

اجت عليَّ تضحك وطب طــروادة بعده مقهور بس من شافها تضحك بساع تغيرت ملامحه كاضتني من اذني وحطت شمس بأيدي تگله

عــفراء:: عمّت عيني تريگك خبز بايت؟

ضحك اجه يمنه وهو يگلها

طــروادة:: والله مرات تخبز العصر، تعشينه بيه وتريكنه وبالغده تسويلنه الخبز الضال تشريب وفنه اليفك حلكه ويحجي والله عبود ذاك اليوم راد يبجي يگلي خويه طكني جفاف ابوسن ايدك تزوج تزوج خل مرتك تطبخلنه.

رنـــه :: انهجم بيتك وبيت عبود فد كلاوجيه عفراااء طــروادة يريد يتزوج ومحتار شلون يفاتحنه بالموضوع ذبها براس عبود، اسكت اسكت ابو النسوان اكص ايدي اكصها اذا ماطلعت متزوج وضامها علييينه وحتى احتمال مفرخين

جراني طــروادة عليه وصاح العفراء

-اخذي شمس من ايدها خل اكتلها.

وهي ماصدكت جرت شمس من عدي تطك بيه وهوه كاض ايدي وجراها الحلكه يعضني صرررخت بكل صوتي. خليتهم مايندلون دربهم هوه وعفراء اثنينهم يسدون بحلكي ويصيحون

-اششش اشششش.

دفعتهم شارده

-وعلي المن عليكم السلف كله.

طــروادة:: طاحظج على هالصوت هذا.

عــفراء:: دخيلك ياعلي شاده سماعات ببلاعيمج ووولج؟

ضحكت. وعبود وحسين وزهره كلهم فزوا گال طــروادة

طــروادة :: عبود لو تدك هاونات يمه مايگعد وعلى هالصوت الخايس كعد.

ضحكوا مشوا يسلمون على عفراء وطرواده ما راح للگيعان چلبت بيه عفراء كالتله خل اسوي ريوك تريك ويانه وروح وانه افتر ورأها وابرر

-والله نوبات اخبزلهم الصبح لا يجذبون عليج وعلي اسويلهم اكلات تموت تفحط.

عبود:: ذاك اليوم شوتلنه دجاجة بالتنور غير صارت بالتسعه واحنا ما متعشين وكلنه مكابلين الدجاجه ونهفيلها الجمر طفه والدجاجه بعدها.

طــروادة:: صدك عفراء بس واحد يحجي حگ الله صارت فد شي ماينشبع منها.

رفعت اهدومي من اجتافي اركصلها بحواجبي اضــحك وهي تگلهم

-جا بعد ليش تچذبون وتكولون طاكنه جفاف.

ضحكوا كعدوا بالهول ملتمين على شمس مكعدينها بنصهم وحاطين مخدات وراها يخافون لا تطيح، وگفت اگلي وعفراء سوت سياح. طــروادة خابر عليه ســليم طلع يمه شويه ورد يمنه  بالمطبخ گالتله عفراء

عــفراء:: الولد ما تصالحوا؟

طــروادة:: لا والله محد يرضى يتنازل، صــيهد يصيح بعد انتهت ولو جنت امشي بشارع واشوفنهم يكتلون بسلطان اعبر ولا چني اشوفنه، وسلطان يصيح ما اصالحه الا يرضى اسوي عرس واخذ رغد، وكل واحد منهم يجرله بصفحة لعبوا روحـــي.

عــفراء:: هاي اول مره زعلكم هيج يطول!

-اي والله، ســليم حلمان بأبوي يگول جن واكف بالبستان يعاينله من بعيد ضايج ما وصل يمنه عاينلنه وراح.

عــفراء:: ماكتله يعني يكلكم تصالحوا ماراضي عليكم.

-بساع بساع فسرته.

ضحكنه وهوه دنك اخذ سياح من يمها واكل گالها

-صــيهد واحد جذاب امس بس سمع هجوره طايحه من الدرج اجه من المعامل للمستشفى.

-خطيه حتى ماشاف شي من عرسه.

-بس يرد للقرية نعزمهم هوه ومرته ووهب ومرته  نسويلهم غده.

عــفراء:: اي والله زين تسوي.

رنـــه :: اخذنه الريوك وكعدنه بالهول طــروادة ياكل وانه اعاين اللگمته هوه وعبود ياكلون سريع وبساع يكضون، كام غسل وكف يم الباب يشرب چاي وعبود كام وراه هم غسل واجه يمه ينشف ايده بالخاولي ويحجي وعفراء گالتله

عــفراء:: يا شو هذا صاير اطول منك.

طــروادة:: غير اكصص رجليَّه اذا اطول مني.

ضحك عبود وكف بصف طــروادة  ويرفع رجليَّه يريد يصير اطول منه طكاه طــروادة يضحك شويه عبود اطول

عــفراء:: طــروادة لو يطلع من الباب يدنك انتَ اذا تطول بعد لازم نعلي البيبان.

عبود:: يابه انا حبه ومفشوگه من ابوي نسخه هسه اصيرن بطوله.

طــروادة :: اموتنك ما تصير اطول من عدي.

وعبود يصيح

عبود:: الله اكبر هسه انتَ عايز؟

ضحكوا طــروادة  توه يريد يروح للگيعان واندك الباب كمت بساع اعاين طبوا ولد عمي شاكر همه حتى ما يباوسون طــروادة لان امس شايفينه بس عبود وسجاد محاضن جن صارلهم سنة محد شايف الثاني.

كامت عفراء غسلت لان رادوا يحاجونها، طلعتلهم للحوش ما رضوا يطبون للدوانيه، سلمت عليهم وسليم يگلها

ســليم:: خوما واحد مد ايده  عليج لو غثج بحجايه، يعني رجلج اقصد.

-لا خويه ابو شمس سبع ماله غرض بحجي احد، ولا رضى يجيبني هناه بس انه لحيت عليه وردت اجي ارتاح چم يوم.

سلطان:: اعذريني خويه ام شمس.

يحجون وياها مقهورين كالتلهم

-خويه صدك جذب عليمن تتعذر؟ شنّي السآلفة.

سكتوا ضايجين، سلطان رد لبيتهم وسليم راح وي طــروادة للگيعان فتنت العفراء عليه

-تدرين طــروادة كضت عطلته وجان اليوم لازم يروح للكليه بس غلس.

-ياا صدك؟ جا تكضي عطلتهم گبلكم؟

-اي والعباس، اكله جا ليش ماتروح يكلي اول يوم هوسه خيولي باجر اروحن وكاضيها غيابات بس انه اكلج هوه يدرس شاد حيله بالامتحانات.

سكتت تسمعلي وانه كضيتها فتنه مره افتن على عبود مره على طــروادة وعلى حسين بس زهره سلمت من عدي لان صاحبتي لا افتن عليها ولا تفتن عليَّ.

ولاول مره مارضيت عفراء تشتغل بالبيت حسيتها صدك تعبانه اشتغلت انه نظفت وركبت الغده كعدت يمها بالغرفة وطلعت كتبي اقرأ گالت

-جا مو بعدها عطلتكم شو تدرسين؟

-غرت من جــويريه مــاسه كالتلي تدرس حتى بالعطلة.

ضحكت تبوس بشمس گالت

-كون صدك يعزمهم طــروادة وانه هنا اريدن اشوفها واشوفن رغد والله شايله همهن .

كمت أشرن الهدوم وسمعت صوت بريا ركض صعدت على گن الدجاج وبدون صوت بس أشرتله فتح اللثام من وجهه واجاني يمشي مدنك مبتسم وصل يمي شال راسه يعاينلي حطيت اديه على السياج اعاينله گال

-صباح الخير

-يا صباح صارت الظهر الساعة بالعشرة ترى.

ضحك مسح وجهه بطرف الچفيه تعبان ورد شال راسه عاينلي مضيك عيونه

بريا:: شلونج؟

-الحمدلله زينه

سكت مبتسم وجهه احمر ومبين تعبان

-انتَ وين چنتَ؟ شو تعبان وبعدين مو عدكم دوام اليوم ليش مارحتوا لا انتَ ولا طــروادة ؟

ضحك داروجهه يتلفت يتأكد محد موجود  گال

بريا::اول يوم مو مهم! عوفج مني انتِ شلونج خوما تتخربطين من السكر؟

تحسرت چني عجوز وشايله هم واحجي بحزن

-عاين هوه زين بس انه مرات اكل حلويات بالبوكه  ويصعد السكر بساع اشرب حبايه ومن طــروادة يسألني اكله ابد ولا شايفه الحلويات شنّي شكلهن

حجيت بالنهايه مبتسمه لان اغش طــروادة بس هوه راحت ابتسامته وعاينلي بضوجه ما راضي

بريا:: لا رنـــه لا تسوين هيج صدك تحجين ياهو الاهم الحلويات لو صحتج؟

-ترى والله انه بعدني صغيره واحبن الحلويات والفواكه، هسه راح يجي الصيف وتنزل الفواكه الحلوه والرطب النص ونص وتردوني ما اكل والله اكل يا سكر يا بطيخ هاه والبطيخ هم من اروحن للــبستان احوشن وين الصفره ومستويه.

دار وجهه ضايج يمه بلوكه عدلها برجله وصعد عليها يعاين لعيوني، بعصبية  يحجي

بريا:: ما تاكلين اي شي حلو!!

-اكلك ترى انتَ تدرس قانون لا تصير عليَّ دكتور مالك غرض انه اعارف ليمت اكل وليمت أخذ علاج.

-واذا تخربط السكر ومحد يمج غير تموتين؟

-الى رحمة الله.

بريا:: واناا؟

-تاكل حلويات وتقرالي الفاتحة ههههههه.

احجي واضحك عادي بس هوه ضايج صدك دنك يحجي بقهر

بريا:: غير اموتن وراج.

سكتت اعاينله شال راسه ضيكت عيوني

-شني تموت وراي؟ ياهي مالتك انتَ اخواني ما يموتون وراي.

نزل من البلوكه دار وجهه من عدي وانه ضايجه احجي عليه بدون غلط رد عاينلي گال

بريا:: هسه عوفي الموت على صفحة وعفيه رنـــه لا تاكلين حلويات.

عاينتله بطرف عيني ماعاجبني اريد انزل گال

-لا رنـــه اوكفي.

رديت اعاينله صعد على البلوكه اعاين لوجهه احسه جوعان ومستحي يگلي

-اجيبلك لفة؟

هز راسه لا ومركز بعيوني

بريا:: انا كل يوم اجي هناه بس ماجاي اشوفنج وما اگدر اصيح عليج خاف يطلع حسين يمج.

-اي النوب طــروادة گال اذا الكاج تحجين وي بريا الا اذبحه.

هز راسه اي متحسر وحجه بهدوء

بريا:: عاينــي اريد تگولين للولد يجيبولج قفص وحمام.

-المن؟ ليش؟

-خل يجيبولج وانا اكلج ليش.

-ما ادري ما يرضون، عود اشوفنهم.

توني حجيتها وسمعت عفراء تصيحلي نزلت بساع وركضت للحبل  اجت وراي گالت

-تعاي سبحي زهره.

رحت بساع وافكر شسوي بالحمامات سبحت زهره مشطتها وكضيت تلفوني ادور فديوهات لطيور الحمام شفتهن يخبلن شلون يطيرن ويرفرفرن بجنحانهن، احنا عدنا بالنخل بس مو أليفات مثل هذن البالقفص، نزلت الفيديو وديته الطرواده ولعبود كتبتلهم

-اذا تحبوني جيبولي طيور.

طــروادة ماعده نت ما وصله، وعبود وصلته شويه وشافها كاتبلي

-جا موعدج؟

-هذن طيور حب  وبلابل انه اريدن حمامات حتى اطيرهن بالسما.

-ويصير اسمج رنـــه المطيرجية.

-انت ابد ما تحبني ولا مره ردت شي وگتلي اي كون كايله الطرواده چا گالي صار ومن عيوني،

هاي هيه ما اريدن منك شي مشكور عبود.

دزيت الرساله وهوه وده ضحك ورد كتبت

-بريا عده طيور صارله جم شهر من جابهن من اجي ابوگن چم وحده من عده.

-صدك عده طيور؟ جا شني هوه احسن من عدي يطير حمام وانه لا؟

ما وصلته الرساله راح النت من عده، سكتت الحد الغده من اجه طــروادة طب يسبح وانه اعاين التلفونه ماعده نت  شلون توصله رسالتي، طلع من الحمام ينشف بشعره وعفراء واكفه وشمس بأيدها، اجه يمها باس شمس ونكث شعره عليها وهي تضحك بصوت سودنته اخذها من ايد عفراء يبوسها ويضحك وياها.

كعد بالهول وزهره ركضت جابت مشط واجت تمشط شعره وهوه يعوفها براحتها الحد ما تمل تصعد على اجتافه وتشمر روحها گدامه يكضها يضحك تغار من يضل يبوس بشمس، طبيت وي عفراء للمطبخ گالت

-اكلج اخلي طــروادة ياخذ زهره للدكتور شو حيل ناعمه هسه عبالك حتى ما مسجله بالمدرسه خاف عدها نقص نمو؟

-لا شسالفه مابيها شي خليها ناعمه شتردين منها؟

-والله ما ادري ماتكبر حيل صغيرة، اكلج حجيها صاير زين وقوي.

-اي وصلوات ذكيه حييل تدرين اقري حسين رياضيات ومن اكله عشرة زائد خمسه شكد هيه من يمها بساع تكول اخمسطعش وحسين بعده يحسب بأصابعه.

-حسين ولا يعجبني صاير كسلان فد نوب.

-لا لا ترى انه اجذب من اكولن كسلان احرك بگلبه بس هوه شاطر ولو يدرس مثل الاودام ياخذ الاول لو مايعنطز الخايس.

ضحكت تصب غده مديت راسلي للهول من سمعت صوت رسالة وصلت الطرواده شفت تلفونه بأيده فاتح نت سمعت صوت الفيديو الدزيته اله شافه رافع حاجبه ماراضي بس شال راسه عاينلي شردت للمطبخ صاح.

طــروادة:: شيليها من بالج شني زلمه انتِ تردين تصيريلي مطيرچيه.

يحجي وانه بالمطبخ ضايجه واكفه يم السنك واسمعله گالت عفراء

-شكو؟

وانه مدري شبيه بس واحد يگلي على شي لا ابجي، بساع طاحن دموعي وهيه تصيح

-ياا يااا شكو؟

غطيت وجهي بأيدي وهيه تجرها تريد تفهم شكو ابجي مكطعه روحـــي واجه طــروادة

عــفراء:: شگتلها طــروادة ؟

طــروادة:: رنـــه وعلي هسه اكتلج.

يحجي وانه اشهك وابجي دفعت ايد عــفراء ورحت للسنگ اغسل وجهي وهيه تحجي عليه ماتدري شني الفلم گالها

طــروادة:: ولج تريد طيور شني مطيرچي.

مسحت وجهي ودرت عليه مقهوره

-جا مو هذا ابن الروسيه عده طيور؟

رفع حاجبه خازرني

طــروادة:: اهاا هنا مربط الفرس وانتِ شدراج بصخام عده طيور.