تحميل رواية «أرض الخناجر» PDF

أرض الـــــخناجر 🗡️

بقلمي الكاتبة ايـــلول 

تصويت وتعليق بين الفقرات لطفاً 💚

══━━━━✥◈✥━━━━══

عت ياخته الياذيك، عوف السياسة

والعله راسه عليك دوس على راسه

══━━━━✥◈✥━━━━══

شاكر::هاي بنيتكم بعد تضل عدكم، البت عرض وسمعه واحنا ما نحمل مسؤوليتها .

وهـــب:: خزروه ســليم وسلطان متسودنين من حچيه وطرواده رد اجه يمشي بساع حط شمس بأيدي وركض على شاكر، صــيهد واكف على صفحة صحت عليه اريدن يكضه لان عرفته راح يطكه، ذب جكارته وركض وراه كل ظني راح يحيز بينهم.

لحگ كهلان وبس وصلوا شاكر جروه اثنينهم خانگينه كل واحد من صفحة، طرواده طكه بوكسي على خشمه والوادم كلها صاحت عليه

-لااا

ركضوا سلطان وسليم والوادم التمت عليهم طلعوا شاكر من ايدهم مدمه ، وتلازموا وياهم يتعاركون وشاكر طاح كاض خشمه ودشداشته انترست دم، الوادم تحيز بين الولد،هوسه وصياح طــروادة بس يريد يردله حطيت شمس يم السيارة وركضتلهم غلط ومسبة اكض هذا يفلت هذا كترينهم مسودنين.

وابوي كاضله صفحة هم يغلط ويسب، لا سليم وسلطان ينردون ولا صيهد وطرواده يكفون تمالخوا والوادم التمت علينه بين اليحيز وبين اليتشمت مكيف بعركتنا لمن شيخ حيدر جر كهلان وصيهد من صدور دشاديشهم دفعهم ليغاد ودار السليم وسلطان يصيح عليهم، عمام منذر كلمن يحجيله بصفحة "اي جا بتنه ونريدها وغصباً ما عليكم"

كهلان يتراجف مايگدر يسكت شال چفيته من الگاع حطها على علباه ويعاين لشاكر الگاعد بالگاع ودار لعمام منذر شايل ايده ويحجي بصوت عالي

طــروادة:: اكتل سلف واحش لسانه وخير الزلم من شاربه اجره اليگرب صوبي ويگلي الي بت عدكم .

رد شيخ حيدر دفعه للسيارة وعمام منذر گبوا يهدون ومازن وابوه يتعاركون وياهم ماراضين وصيهد ماخذله صفحة وي ولد عم منذر كاضينه انا وميثم همه يهدون وهوه يهد صياحهم يعج بالسلف لمن واحد منهم هدّ بسلاح على صــيهد وهوه چنه مسودن ركضله وسلطان وسليم ركضوا الركضته تلاكفوا وي ولد عمام منذر، شيگضيها بعد مهادد وصياح والنسوان طلعت من بيوتها تتصارخ.

ومو مال واحد يسكت داسوا بالحجي يغلطون، انا وميثم جنه نكض بيهم تالي هدينه وياهم، وشيخ حيدر هد كهلان واجه علينه وهو بس هده رد ركض العم منذر الضل يشمر بالحجي علمود شمس كتله، جرونه شيخ حيدر وولده وهذولاك الوادم كاضتهم شمس نطت من البجي اخذتها للسيارة اغسللها واحاجيها

-هاا خالي هااه ماكو شي حبيبتي ماكو شي.

شلت راسي اعاينلهم ســليم وسلطان اخذوا ابوهم للمستشفى لان الدم من خشمة ماوكف، وزلم معگله واكفين يم شيخ حيدر يحجون وي ولدنه.

عفتهم وافتريت للسيارة اخذت شمس وطلعت للقرية

-اشش هاه خالي هاه لا تبچين يابعد روحـــي محدّ ياخذج.

دك تلفوني وانا اسوق فتحت الخط والسماعه وعفته على رجلي

-ها كهلان.

-شمس وياك غير؟

-اي هاي راح أوديها لبيتكم وين انتم راح تجون؟

درت الشمس اعاينلها بس سمعت صوته ردت تبجي وتمد ايدها للتلفون اخذته من رجلي حطته يم حلكها تبجي وتحاجيه ما افهم من حجيها غير حچاية وحده

-خالو.

جر نفس متحسر يحاجيها مختنك

كهلان:: هاه يا عيون خالج ها شمسي اشش شبيج ليش تبجين.

تحجي وياه سريع وتبجي، اخذت التلفون منها كال

كهلان:: احنا رايحين وي شيخ حيدر، عاين ضل بالقرية انتَ خاف لا هذا يرد من المستشفى ويغث اهلي عينك عليهم.

-هاي هيه صار.

سديت التلفون منه ساعة الومن سلطان وسليم ساعة اگولن حگهم ابوهم وواجبهم يدافعون عنه ولو احنا بمچانهم نسوي مثلهم وأكثر حتى لو ندري بيهم باطل وكهلان على حگ ما راح نرضى يطك ويغلط عليهم گدام الوادم.

نزلت شمس مشت تركض الباب حوش بيت خالها.

رنـــه:: تلگيتها شابگتها روحـــي رايحه عيونها من البجي حمر وتناشغ، عاينت لوهب واكفلها بباب الحوش

-وهـــب شبيها؟

دار يعاينلها مدلها اديه يحاجيها

-تعاي خالي نروح نشتري؟

حطت راسها على صدري تشهگ ماترضى تروحله عاينلها متحسر

وهـــب:: خافت من الهوسه وصياح الزلم، اغسلي وجها وهسه تسكت اجيبلها رضا تلعب وياه؟

-لا مانريده.

درت وجهي اريد اطب جوه صاح

-خاب ترحين فـــدوه الابني شماله وماتردينه يلعب وياها؟

درت عيني عليه

-مچلوب بس يعارك.

-لا يا مچلوبه من طاحظج وحظ بريا وياج امشييي.

نتر وغماني بأثنين اديه.

رجعت عليه سديت باب الحوش بوجهه وطبيت جوه غسلت الشمس وحسين طلع كعد يم وهـــب بباب الحوش، طلعت ريـــمه من الحمام زهكانه كاضيتها اي لگمه تاكلها تلعب روحها وأربعه وعشرين ساعة مسطوره لو تتقيى لو تنام.

وشمس بس شافتها راحت عليها ماده اديها تريدها تشيلها اشرتلها براسي لا تشيلينها، كعدت بالهول وحطتها بحضنها

ريـــمه:: ياهو وياج شمسي؟

وشمس تناشغ تمددت على رجليها شويه وطب رضا ووهب من الباب يصيح

-روح بويه روح العب وي شمس وفنه اليطكك اموتنه، عاينــي ووولج رنـــه بس تحاجين آبني ادعي على رجلج.

ورضا اجه يضحك فتحتله ايدي يشمر روحه شمر بسته احاجيه

-شلونها ماما؟

حط اصبعه بحلكه عود مستحي

-زينه متعاركه وي بابا.

ضحكت ريـــمه وانه كعدته كدامي عدل اسأل بيه

-عليمن تعاركوا؟

مد شفايفه وشال جتافه عوّد مايدري

ريـــمه:: رضا بابا طك ماما؟

هز راسه لا ويجر الحجايه جر ويشرح بأديه ورجليه

رضا:: مامااا.

-اي

-طكت بابا

-حللل، وبعد شسوتله.

-سوتله..

صفن وحط اديه برگبته يشرح ومد لسانه

-خنگته؟

-اي

-حل ووياه.

فتح عينه خازرني شلت ايدي

-نزل عينك لا اعميهن.

گلب وجهه زعلان ومشه من يمي كعد يم ريـــمه شبگته تضحك وشمس كعدت من حضن ريـــمه كابلته واحد يرطن على الثاني.

ريمه طبت نامت وشويه وصارت هوسه ببيت عمي شاكر هوه تعارك وي ولده سلطان وسليم ومن اجوا سجاد وعبود، شاكر صيح على سجاد مديت راسي بساع اعاينله واكف بباب الحوش وسجاد بصف عبود يم باب حوشنه گاله

شاكر:: تعااال خيولون تعال لا بالحسين اردك للمعامل.

اعاين لوجهه عيونه من جوه صايرات حمر مدري زرك وخشمه ملفلف سلطان وسليم كاعدين بالحوش وجوهم مايكصها السيف وسجاد شال أيده يحجي بقلة صبر مو مثلهم همه يتحملون كلشي من اهلهم بس سجاد لا.

سجاد:: شتررريد؟

سلطان:: سجاااد

حط أيده على حلگه خازره وابوه يأشر بأيده ويصيح

-تعااال ليجاي.

عبود:: روح سجاد.

حاجاه بهدوء ما يريده يتعارك وي ابوه مسح وجهه ومشه عليهم وعبود يعاين وراه توه سجاد وصل ابوه وشاكر عاين لعبود وصاح

شاكر:: لو لفيت على سجاد النوب الا أكسّر رجليك

عبود ضحك حاط اديه وره ظهره بس سجاد تسودن مد اديه گدام وجهه وصيح بوجهه ابوه كاموله سلطان وسليم جروه يحاجونه وهو يعارك ويغلط طكه ســليم راشدي وجره اخذه للبيت وسلطان يحاجي ابوه بحرگة

-بس گلي ترتاح من تحرك گلبه تكيف من نتعارك وي اولاد عمنه هذا التريده؟

وهو كض سلطان من ياخة القميص يعت  بيه ويغلط

شاكر:: زلم انتم بيكم خيررر؟ حاطكم طــروادة للمهانه يكرب عليكم وانتم تلبلبوله مثل الچلاب.

دفعه وشال ايده طكه راشدي وسلطان وخر من گدامه مسح خده وهز راسه متحسف

-عبالك اذا طردتهم من القرية احنا نضل وياك؟

رد عليه طكه راشدي وعبود مشه يريد يوكف بينهم جريته من أيده خايفه

-تعاال مالك غرض، اجاه ســليم.

يريد يفرغ روحه من ايدي ولمح ســليم طلع جر ابوه من ايده متسودن، جريت عبود حيل طببته للحوش ورديت اعاينلهم ومتمنيه ريـــمه ما تطلع ولا تسمع ما اريدن يحترك گلبها على اخوتها.

ســليم تسودن دك على صدره يصيح على ابوه اجاهم وهـــب يركض جر ســليم يحاجيه وابوهم يغلط ويسب ورد على وهـــب ما يريده يتدخل بينهم ، طبينه جوه عبود كعد بالهول يمهم وشمس بحضنه شال راسه ينشدني

-جا مرت كهلان وين؟

-نايمه

-شني مريضة؟

-لا بس هيه جيه حامل

ضحك متفاجئ

-صددك حامل؟

-شني عبود ذاك اليوم كتلك؟

صفن يفكر ليمت كايلتله وانه تذكرت فكرت اكله بس ما گلت رد عاينلي گال

-والله ما كايلتلي وشني بيها بت لو ولد؟

طكته زهره على حلكه فززته

زهره:: شبيك ماتعرف؟ بعد مو هسه يكلولها بيج ولد لو بنيه.

ضحك شبگها يبوس بيها ويگلها

-جا اندري.

وشمس تغار تشمر روحها فوگهم، ومن يضلون يبوسون بيها وتضوج ماتكدرهم تمد ايدها الي وتصيح

-لننننه

جريتها منهم شايلتها وهي شابگه على رگبتي وتمد لسانها الهم.

بيت شاكر سكتوا ووره العشه بس اجو ولدنه ردت صارت هوسه عبود طلع وي طــروادة وريمه مشت تركض لباب الحوش وكفت يمها ايدي على گـــلبي اسمع صوته وحرگة گلبه وروحي تروح بس اريدن افهم شي ويامن يتعارك والمحه هو وسليم ممالخ

صرخت ريـــمه متسودنه وما گدرت اكضها طلعت تصرخ وجلبت بطرواده تجره وتبجي اديها يرجفن تعاين لسليم وجهه كله دم وطرواده دشداشته مشگوگه عليه وصوتهم عالي وشاكر ماخذله صفحة يغلط ويسب هوه ووليد

صيح ســليم متسودن ووهب وسلطان كاضينه وميثم وصيهد كاضين طــروادة

ســليم:: جان استحيت جان وكفنه بعينك مو زلم احناا مو بعينك وتطگه گدام الوادم؟ شگلت الروحك خااايس.

وطرواده يتراجف بس يريد يكض ســليم

طــروادة:: وكلام الله لو حط روحة بسالفة تخصني لو تخص واحد من اهلي اكتله وگدام الوادم، ياهي مااالته بشمس بكيفه هيييه؟

ردوا هدوا وريمه عافت كهلان وركضت السليم متسودنه من الدم هو يعارك وهي تكض بوجهه وتصرخ لمن طاحت بأيده ركضلها كهلان واخوتها التموا عليها متسودنين طبيت للبيت اركض اريد اندل دربي واخذلهم ماي بارد سبقني حسين اخذ ماي وطلع يركض رديت وكفت بباب الحوش روحـــي رايحه وليد وشاكر بعدهم يحجون ويلغون واخواني واخوان ريـــمه ملتمين عليها يحاجونها بصوت ناصي وخايفين عليها گـــلبي طك الحد ما سمعت صوتها تبجي ولمحتها معبره ايدها على رگبة ســليم شابگته وتشهك وهو يگلها

-ماكو شي ريـــمه حبيبتي ماكو شي تعاي.

گوموها من الگاع هو وسلطان وكهلان اجه كدامهم فتح باب الحوش وخرت على صفحة سليم وصلها الباب الحوش ودار وجهه يريد يروح كضته من ايده تبجي

-وجهك... وجهك كله دم.

باس ايدها اعصاب وكوه يحاجيها

-مابيه شي هسه اغسل وجهي

چلبت بأيده روحها رايحه ودموعها يجرن

-تعال.. تعال بس .. بس خل اعقم الشك البحاجبك.

اشرله سلطان طب وياها وهوه وجهه مايكصه السيف طبوا للبيت سليم دفع باب الدوانيه حييل وطب كعد مخنزر وسلطان كاضها من ايدها ويحاجيها بهدوء، صــيهد حاجه عبود وطرواده طببهم للبيت وسد باب الحوش سلطان يعاين لطرواده بزعل وريمه تعاينله وتبجي مقهوره.

مسحت وجها وطبت لغرفتها اخذت كطن وتعقيم ومشت للدوانيه كعدت يم ســليم وسلطان يحجون وياها ويوصون بيها وهيه تمسح الدم من ســليم وتبجي مختنگه

سلطان:: كافي هسه عليمن تبجين؟

دارت عليه تشهك

ريـــمه:: اخواني ورجلي يتعاركون شلون عليمن ابجي تردون تموتوني سلطاان؟

ســليم:: مالج غرض انتِ، احنا نتعارك مناه نرد مناه عليمن حارگه گلبج انتِ؟

-تتعاركون من وره ابوي ســليم هوه هذا اليريده يرد تكرهون كهلان وتعاركونه.

-اسكتي.

لطمت على رجليها تعاين لسلطان وتبجي مد ايده يمسح عيونها ويحاجيها

سلطان:: اطلعي من السالفه انتِ ديربالج على روحج وهاي هيه،مايصير تحركين گلبج وانتِ حامل لا يصير بيج شي.

ســليم:: حامل؟

دارتله تمسح بعيونها وتهز راسها اي صفن بوجها متحسر تدنى يمها باسها بكصتها يحاجيها

-مبروك وان شاءالله تگومين بالسلامة.

ريـــمه :: مسحت عيوني اعاينلهم وكفوا كمت وراهم مشوا يريدون يطلعون وانه احاجيهم مخلوبه روحـــي

-فـــدوه سليم، سلطان، لا تشلعون گـــلبي.

دار علي ســليم يحاجيني

-ماكو شي شني السالفة لا يضل بالج روحـــي ارتاحي.

‏مشوا سديت الباب وراهم مختنگه وخايفه هاي غاية اهلي هذا اليردونه مسحت وجهي وطبيت للبيت جرتني رنـــه للمطبخ تحاجيني

رنـــه:: مو تطبين للغرفة وتتعاركون فـــدوه ريـــمه ترى هوه هم تعبان.

تحسرت اعاينلها ميته قهر

-لا عليمن اتعارك وياه .

عفتها وطبيت للغرفة مبدل وكاعد على السجادة يقرأ قرآن

اخذتلي هدوم وطلعت للحمام علكتهن وكعدت فاتحة الماي وابجي مختنگه ابسط مشكله تخلب روحـــي وتحرك گـــلبي، بالساعة عدت وانه بس كاعده بالحمام حايره شني الاسويه، هاي اليوم ابوي گدر يخليهم يتعاركون والله اليدري شراح يسوي بعد حتى يخليهم واحد يعادي الثاني ساعتها شني الاسويه انه شلون اعاين الكهلان يطكهم، واعاين الاخوتي معادين رجلي شلون اگدر، يارب ياارب .. أمنتك خوتهم يارب.

سبحت وطلعت من الحمام طبيت للغرفة مطفي كل الاضوية مخليها ظلمة كلش، شغلت الضوه عاينتله متمدد بمچانه متغطي ومغمض عيونه نشفت شعري ومشطته طفيت الضوه وتلمست الكنتور اتجه عليه لمن وصلت للچرباية تمددت ظهري عليه أثنينا ساكتين لمن دك تلفونه لفترة طويله يله رد كوه يحجي صوته مبحوح اسمعه سلم وراها سكت فترة وگال

- الله بالخير عليك ابو منذر اسمعني لو تصير مكاتل يا شمس ما أهدها ما تطلع من بيتي... ادري يابه وادري بيك ما راضي عليهم وهمه سووها عناد بس ما الهم اي حك انتَ ومازن اصحاب حگ واثنينكم تعرفون وصية منذر بعد همه محتركين من يمهم ياهي مالتهم، خاف عبالهم لان شاكر سوالهم واهس يگدرون ياخذونها لا بالحسين لا شاكر ولا ابو شاكر ولا الف مثله يگدرون يطلعون بت اختي من بيتي.

مركزه بكل حجايه يگولها ماجنت أدري شصاير وعركتهم عليمن، سكت شويه ورد گاله

-هلا بيكم بس الگعده لا تقدم ولا اتأخر انتَ على عيني وراسي ابو منذر، بس اخوتك بنص المضيف اهينهم... هلا بيك يابه هلا.

سد التلفون يستغفر ضليت ساكته واحس بيه من يتحرك كل شوي يتحسر ويهمس بصوت خافت

-اااخ يا يابه.

ويوجعني گـــلبي وي حچايته والخنگه البصوته درت عليه مديت ايدي اريد أحطها على گلبه لكيته حاط ايده ويمسح على صدره مختنك همست

-كهلان.

تحسر ساكت ودار صار مقابيلي مديت ايدي أتلمس خده

-ريـــمه

-يا حيلها.

مد أيده فرشها على مخدتي وبأيده الثانية جرني الصدره تدنيت الحضنه راسي على ايده لمني الگلبه بحسره مقهور

-احجيلي يا روحـــي كهلان سولفلي شصاير؟

-تنقهرين.

-جا اعوفنك تنقهر وحدك؟

رفعت راسي اريد أعاين بوجهه رغم ظلمة وكوه اشوفن ملامحه حرك ايده يمسح على زندي كوه يحجي مختنك حچاية يگولها وحچايه تخنگه بيها العبرة

-انهد حيلي ريـــمه، طحت وكل يوم ينكسر ظهري.

- ما تطيح انتَ تتعب چم يوم وترد توكف على حيلك.

-طحتت والله طحت يوم الدفنتهم بعد ماظلي كل حيل.

مديت ايدي اتلمس خده بخوف روحـــي رايحه عليه

-لا تحجي هيج كهلان.

-ابوج چن شايل شمس على گلبه حار شيحجي وشيسوي بنص الفاتحة كالهم بتكم مانحمل مسؤوليتها وعمام منذر يداعون بيها، ومخابرين شيوخ علمود كعده متفقين وي ابوج الاسبوع اليجي يوم الجمعة الكعده، ريـــمه وروح ذيج العزيزة كاضني عن ابوج بس عيــونج اخافن لا اكتله وماتعاينيلي بعد.

بجيت گـــلبي موجعني لمني بين أديه حيل

-اخسرك وأخسر اخواني كهلان ساعتها اصير بين نارين .

-غير لو يكف شره عني، بت اختي وببيتي صارف عليها انتَ؟ كاعده ببيتك؟ شتريد منها شتريدد؟

-مالك غرض بيه تصير كعده خل تصير مازن وابوه واكفين وياك لو لا؟

-اي الغربه واكفيلي وعمامي ضدي وشادين حيلهم حايرين شلون يكسرون ظهري.

سكتت ما ادري يا حچاية التواسيه الدنيا زادت بحملها عليه نفس ضل مايگدر يجر، لثنتين واثنينا كاعدين بلّا مانحجي شويه ودك تلفونه دار وجهه جر التلفون عاين للأسم مكتوب ســليم.

-هاچ حاجيه انتِ كليله كهلان نايم.

سكتت ماراضيه وهو فتح الخط وخلاه يمي فاتح السماعة

-الو ها سليم.

سكت منحرج شويه وگال

-ها شلونج؟

-هلا بيك زينه

-جا كهلان وين؟

سكتت محتاره تحمحمت

-نايم، محتاج شي كول.

-لا والله هيج ردت اعتذر منه لان مديت ايدي عليه ما گدرت انام

شلت راسي أعاين لكهلان ردته يحاجيه ومايخليه مقهور بس هو ضل ساكت كال

ســليم:: يله خويه اخذي راحتج.

-هلا بيك.

سد التلفون رجعته على المكتبه وهو حط أيده على عيونه يريد ينام سكتت الحد ما غفيت كعدت الصبح مالكيته طلعت للحوش مالكيت هاسكي عرفته ماخذه ورايح للگيعان، كعدت رنـــه

-كومي يله هم يله تكعدينهم وتبدلون .

هزت راسها اي ودنكت تبوس بشمس النايمه بصفها، مشيت فتحت باب الدوانيه عود حتى على صوتنا يكعدون عبود وسجاد تالي لكيت سليم نايم يمهم جار الغطه من سجاد وعايفه بلا غطه لام روحه وحاط اديه بين رجليَّه غطيته وطلعت اسويلهم ريوك وماجبت طاري السالفة يم رنـــه ولا تمنيتها تدري حتى لا تخاف.

تريكوا ومشه عبود يوصلهم المدارسهم وكفنه انه وشمس بباب الحوش تأشرلهم وتضحك، سديت الباب وكضيتها من ايدها

-تعاي نشوف اخوالج.

طبينه للدوانيه حطت اصبعها بحلكها من شافتهم اثنينهم نايمن سجاد وسليم وتسويلي

-اشش.

-لا خاله مو اشش تعاي نكعدهم.

ضحكت وتغطي حلكها بأثنين أديها، كعدت كبال ســليم وحطيتها بحضني وإعلم بيها بصوت ناصي كضته من شواربه وهدتهن بساع خايفه تضحك خنك وتغطي حلكها بأيدها وانه اشاور بيها

-عضيه

ضحكت ودنگت باسته بخده فز وجرها الصدره شبگها وحط وجهه برگبتها يدغدغها وهي تصررخ وتضحك فز سجاد وتفل على ســليم وعاينلي يشكي

سجاد:: ذاك بيت سلطان ما يولي ينام يمهم اجاني وجر غطاي خلاني الليل كله نايم بلا غطه اتوسل بعبود يكعد يجيبلي غطه ما يرضى.

كعد ســليم على حيله بس بالفانيله التعلاكه وتلفت يدور على قميصه وشمس من وره مچلبه برگبته تريده يحطها على اجتافه من مارضى وشلع كلبها سطرت مخاد وره ظهره وصعدت على جتافه غصباً عليه كضها من اديها يضحك

-وين تردين خالي؟

سجاد:: خالها الحرامي.

وسليم بساع مد ايده يصيح

-هذا شماله؟ ابجي ابجي هوه غطه خبصتنا صيف ترى صيف واذا ضليت بلا غطه شني طاكك الزرك.

سجاد:: جا ماضليت انتَ بلا غطه؟

توه سليم يحجي وشمس حطّت اديها اثنينهم على حلكه مو قصدها تسكته تريد تجلب بيه،بس إجت بوكتها عاينتلهم مبتسمه

-گوموا غسلوا المامصلي خل يصلي بين ما اسويلكم ريوك.

ســليم:: انا من بني قريظة ما اصلي.

سجاد:: يهودي ابن يهودي

دار علي ســليم اعصاب

-تسكتينه لو اگومن ادوس ببطنه ازوعه مصارينه.

طكيت سجاد على رجليَّه

-اسكت.

وشمس كضت بأيد ســليم ووكفت على جتافة وكفه عباله تريد تلعب وهي من جتافه وذبت روحها فوك سجاد طار كلبهم اثنينهم عبالهم تعورت

ســليم:: جا هيج هيه خالي؟

تضحك عليهم وبس تشوف واحد اعصاب تحط اصبعها بحلكها وتضحكله تجبره يضحك وينسى زعله شالها سليم بتك ايد وسأل

-ياهو هناه؟

-محد راحوا للدوام بس طــروادة ماراح يجي بالتسعه ونص يروح يمتحن ويرجع.

هز راسه خوش شال قميصة شمره على سجاد گاله

-گوم أغسله.

سجاد كض القميص بأثنين اديه وتفل عليه

ســليم:: شوفيه ريـــمه!!

-خيولي طايح حظ جيبه انه اغسله.

جريته من ايد سجاد وهوه يضحك بخباثة يحب يقهره.

طبيت للمطبخ وهوه وراي غسلت قميصة بالسنك وطلعت شريته رجعت يمه واكف بباب المطبخ شايل شمس بأيده ويسولف وياي حاولت افهم منه ليش اجه هناه مارضى يحجي حسيته بالليل متعارك وي ابوي وهل جاي نايم هناه، اسولف وياه وعيني للتلفون مراسله كهلان ومتانيه يرد علي شويه وودالي رسالة كاتب

-تريكت وي سلطان لا يضل بالج.

زفرت نفس براحه ســليم ببيتنا وسلطان وياه اطمنت، ســليم اخذ شمس وراح للدوانيه لكه سجاد راد نايم صاح

-ريـــمه هذا المطي نام.

-والله الينام ما ارجع اسويله ريووك.

ضحك سليم رد اجه يمي وشمس تتشلبه عليه تفتر مناه ومناه كلساع تصعد على اجتافه وفرحانه شلون تصير اعلى من الباب حجيتله على الكعده عض ايده بقهر

-ابوج وامج يشرون المشاكل والعركات شرايه.

-متعارك وياهم انتَ البارحة؟

-اي

-عليمن؟

-هيج هوه علمود شمس، واحد هسه بالعقل ياهي مالتك بشمس؟ بكل طلابة حاط روحك، حرك گـــلبي البارحة گتله كل الصار من وراك وخطية شمس ويتمها برگبتك لو ما طلابتك ما تكتلوا اهلها.

يحجي بقهر ونزل شمس يعاينلها

-طكك؟

-يمعوده هوه يا وكت ما طاگنه؟

سكتت مقهوره درت للطباخ واندك باب الحوش كتله

-اجه كهلان تصالح وياه.

هز راسه اي شال شمس حطها على جتافة وهيه تطك على زنوده شلون ضال بس بالفانيله التعلاكه عاجباتها كلساع تطكه عليهن وتضحك دنگ وطلع من باب الهول.

التفتت اعاين من شباج المطبخ للحوش وادعي بگلبي كون كهلان ما يفشله ويتصالحون، توه فتح باب الحوش وصارت بوجهه ماريا شايله حور، لابسه بنطرون قماش وقميص رجالي مغطي الورك وعريض وحاطه حجاب على راسها عايفته مفتوح كذلتها طالعه مناه ومناه ، شهگت ايدي على حلكي وهي بس لمحته كدامها كش وجها وصاحت

-يوووه، كمان انتَ؟ شو جابك لهون هلق؟ بعد خلصني!

دفعته من بطنه وطبت وهوه فاتح عينه بصدمة يعاين وراها نزل شمس طلعت بساع للهول صارت بوجهي وهو متسودن يريد يلطم

ســليم:: ووولج ووولج هاي هيج اجيتي من اهلج ليجاي وووولج هيج طالعه.

ركضت عليه اريد آسد حلكه مالوحه ويدفع ايدي لو لابس قميص جا شگه

-وووولج عاينــي شلووون طالعه عاايني.

-شبيهااا شبيهااا مستوره اششش صوتك صووتك .

وهي بس حطت حور بالهول ورجعتله وكفت بباب الهول حطت ايد على خصرها وايد مدتها تنتر

ماريا::شو خصك فييّ يا زلمه؟

جان يلطم على وجهه ويصيح

-جيره بفرگك يا بريا جيره بفرگك يا مــيثم

وبس حاجته نزل ايده وركضلها وانه مجلبه بيه واصيح

-ســليم ســليم

رجعت ليوره وكفت بباب غرفة رنـــه وانه كاضته بأثنين ايديي وسجاد من الدوانيه يصيح

-خاب هيوو لا تستهوش.

وسليم جنه مسودن ماد ايده ويصيح عليها

-زماااله احش رجلج من تطلعين هيج بت السگط.

كاضته واتوسل بيه يسكت وهي تگلي

-ريـــمه احش يعني متل اكسر؟

ســليم:: اكسرهن واكصصهن اعلگهن برگبتچ، يا سگط يا دايحة خلك ادبسز كل تربية ماعدج، شلااابسه شلاااابسه

تسودن يصيح ويمد ايده يريد يجرها وهي تصفك ايد بأيد گالتله

ماريا:: انا خلق وحده بلا تربايه؟ اي روح رووح شوف امك، شو قالوا؟ الجمل لو شاف حدبته كان وقع وفك رقبته.

-شترطن هاي؟؟؟

-كاافي ســليم مالك غرض امشي للدوانيه.

يفور ومحترك گلبه عليمن ما ادري دفعته حيل توه يريد يطب للدوانيه وحجت بالروسي تضحك بشماته رد عليها يركض شبگته بأثنين ايدي وهو يسب ويغلط عليها وعلى بريا

ســليم:: شحجيتي بت الهوش

ماريا:: ريـــمه سكتي والله بروح.

ســليم::رووحي روحـــي وهسه انتِ فد مندله واذا رحتي ينگطع الهوه ؟

دفعته حيل احجي وياه

-بس اسكت والله بطني ضلت توجعني ما اگدرلك.

وهو فاتح عينه وحلكه عاين بوجهي صيح

-لابسه قميصييي؟

درت عيوني لماريا قميص جوزي لافه ردنه لنص ايدها ضحكت وتهزّ بأيدها

ماريا:: شو؟ فكرك بس انتَ معك تياب بهالضيعه؟ هيدا قميص خيي بريا.

ســليم:: لنعل ابوج لا ابو خيييج انزززعي انززعي قميصي

دفعني حييل يريد يوصلها

-ووولك وولك ســليم تسوودنت.

جرها من ياخة القميص وهي تغلط وتسب. ما گدرتله صيحت على سجاد وهو من الدوانيه يصيح

-استحرم انا مو مثل هذا أبنّ قريظة.

وماريا دفعت ايده تصيح

-فكر تمد ايدك عليَّ مره تانيه وشوف شو راح أعمل فيك، اي اذا ما شرشحتك شرشحة بتضل محفورة براسك طول عمرك انا مش ماريا يا ابن ميلاد السحارة.

درت عليها مصدومة دفعتها الغرفة رنـــه وهوه يريد يكتل روحه متسودن ومصدوم بيها كضيته من اديه احاجيه

-تسودنت؟ مو زحمه تمد ايدك عليها ترضى بريا لو مــيثم يمدون ايدهم عل هاجر.

يدير وجه من عندي يفور ويتنفس بقوة يرفع بشعره ويحجي بحرگة گلب

-شفتي لسانها شطوله؟ صخونه الصخنت الزلم الرضوا تطلع هيج صارلها شكد يمهم ماعلموها شتلبس وتضم هذن عطوبها الجنهن سعفه يابسه

-ياهي مالتك؟

فتح عينه حييل خازرني

-ياهي مالتي؟ شلون ياهي مالتي ووولج شلون ياهي مااالتي.

بعدني اسكت بيه وانشمر القميص علينه درت عليها شهگت فاتحة عيني على وسعها لابسه فالينه تعلاكه تقريباً نفس فالينة سليم تعلاكه والشال ذابته وشعرها طايح مناه ومناه عيونها حمر وتحجي بغضب

-خود هالقميص تبعك، فقعتنا فيه، قصيته من كل جهه، روح لعند امك خليها ترقعلك ياه بلكن يرجع ينفعك بعدين.

هديت ســليم ومشيت اركض اريد اطببها للغرفة وفزيت على طبّه قوية من شافها دار يريد يطلع تخرذل طك بحافة الباب طلع شارد من بيتنا البيت اهلي بلا قميص

درت الماريا لطمت على خدودي هي تمسح بدموعها

-شلون تطلعين هيييج گدامه.

-مو هوه بدو قميصه؟

-صخااام الصخمني وووولج حررام.

-شوحررام شووو؟

دارت وجها تشهك وانه كلساع لاطمه على خدي وشمس ضلت واكفه بباب الهول مستغربه ومن شافتني ضلت تلطم على خدها وتلم حلگها وتسوي

-ياا.

وتلطم.

دنگت ماريا تشيل حور وتحجي بقهر

-الحق عليَّ ماكان لازم آجي لهون.

جريت حور من أيدها

-اكعدي اكعدي هيج تطلعين؟ حتى باجر نلگه مــيثم كاتل روحه

ماريا:: آي دخيلكن شو مكبرينها.

-مو مكبرينها ماريا بس حرام وزحمة چم مره حجينه وياج ليش ماجاي تعرفين الحلال من الحرام.

دارت وجها ضايجة وتبجي وسجاد من الدوانيا ويصيح

-اكو ريوك لو اروحن .

ضليت ساكته اعاين لماريا وهيه تبجي شمس شبگت عليها تمسح بدموعها وسجاد خابر على عبود يشكيله

-وين رحت وخليتني كتلني الجوع تعال .

جريت ماريا من ايدها الغرفة رنـــه يتلابسن اثنينهن طلعتلها دشداشة لبستها الها كضتها مناه ومناه تبجي وتهز بأيدها

ماريا:: مابعرف امشي فيها.

-اعتبريها فستان مصلخ ام الصلوخ

احاجيها واضحك ماريدنها تبجي وهي عبالك حاطه برگبتها حبل اعدام كطعت روحها من البجي حطيت شالها على راسها لفيته عدل ضامه شعرها زين وطلعنه للهول شمس تلعب وي حور مكابلتها وتضحك بيها.

دنكت شلت قميص ســليم من الگاع مشگگ عااينتلها

-شلون كصيته.

-لقيت مقص.

-دهر الصابج ولا تگعدين.

-شو كل تياب بريا من خيك؟ كل ما بلبس شغلة تطلع لسليم.

-همه يلبسون سوه ســليم وبريا ووهب، انتِ. وين هدومج ليش تلبسين من بريا.

-تيابي ما ينفعوا لأطلع فيين، سمسم عطتني بس كلن متل هي.

كضت طرف الدشداشة اللابستها تأشر عليها ضحكت وهي ضايجة ومختنگه.

وديت اكل السجاد ورديت يمها تحجيلي شكد تختنك وحدها وتضوج من مــاسه تروح للدوام حسيت بيها شي اكثر من التحجي حسيتها تخاف تضل بوحدها سكتت شويه واجوا سلطان وكهلان سلموا عليها مدنگين وهي منحرجة منهم وترد بصوت ناصي بس وي ســليم تلعلع

سلطان وسجاد طلعوا وطرواده طب للغرفة اخذ هدومه ومشه للحمام يريد يسبح ويروح للكليه وهيه بساع شالت حور تريد تروح

-اكعدي وين رايحه؟

-عيب.

-انچبي اكعدي بس تطلعين اهد عليج الچلب مالتنه هاسكي.

كعدت مستحيه ومدنگه تلعب وي شمس طلع كهلان من الحمام ركضتله شمس شالها يبوسها گبل من تجيه الضحكه تشگ حلكه هسه مابيه حيل حتى يضحك وعيونه دوم حمر عاينلي وعاين الحور وماريا كالها

-شلونج يابه؟

عضيت شفتي كاضتني الضحكة وهي تعاينلي وتعاينله تريد تفهم ويامن يحجي تحمحمت

ماريا:: منيحه الحمدلله.

اشرلي جيبيلي حور دنگت اخذتها من يم ماريا حطيتها بأيده ابتسم يعاين بوجها ويصلي على محمد

-فـــدوه لوجهج، عمو حور حبيبتي.

شايلها ويحجي وياها وشمس طكته على رجله دنك يعاينلها بعده ما محاجيها وركضت تبجي الحضني رد حور الايدي وشالها يشبگها

-شمس خالي وولج ليش تبجين

وهيه شابگته وتبجي شلون نزلها من حضنه وشال حور تسودنت كوه سكتها وطب للغرفة اخذ غراضه وراح للكليه بس يمتحن ويرجع أساتذته هواي وكفوله من دروا بالصار وياه .

ماخليت ماريا تروح كعدت بالحوش انزل محاضرات لان ماعرف شلون اقنعها تميز بين الحلال والحرام وهي الهالحد ما مقتنعه رغم ادري بماسه تعلم بيها هواي ومره كالتلي حتى امي علمتني بس البنيه كضت عمرها بين روسيا والبنان صعب تتعود بسهوله وتتعلم كلشي ، نزلت محاضرة وحده چانت للشيخ احمد الوائلي اخذتها شغلتها يمها تضحك علي ما ترضى تسمع

-بس شويه اسمعي عشر دقايق اذا ماعجبج هاي هيه عوفيه.

كضت التلفون وانه كمت من يمها للحمام لعبانه روحـــي بسبب الحمل ، رجعت طبيت للمطبخ اعاينلها مندمجه وكل شويه ترجع الفيديو حتى الحجي الما فهمته ترد تسمعه مره ثانبة ضلت يمي لهدعش ونص رادت تروح البيتهم وكفت تعاين الروحها بدشداشة رنـــه، لمتها مناه ومناه جلبتها ببنطرونها وصلتها لركبها ضحكت كالت

-تي ما اوعى وانا امشي

-شني؟

عاگده حاجبي مبتسمه وهي شايله ايدها وتفكر ردت كالت

-اطيح.. لحتى ما اطيح.. اطيح.

-هههههه يله فهمت حتى ما تعثرج الدشداشة وتطيحين

-اي

شالت حور ومشت جنها وحده مسودنه بنطرونها طويل وعريض والدشداشة مجلبتها بحواف البنطرون ردتها تلبس عباية مارضت ما اكدرها بس مــاسه تگدرها تجيبها تكرص.

شلت راسي اعاين لبيتنا لمحت ســليم طلع يدخن ضحكتله غماني وصاح

-صوج اخوتها السگط.

حطيت ايدي على حلكي

-اششش

-طبيي جوه.

-مالك غرض رجلي يحاسبني.

احجي مبتسمه وهوه اجاني بساع سديت الباب وطبيت للمطبخ شويه واجاني جايب هاجر عافها يمي وراح اعاين الاديها جانن يلمعن وهسه متعوبات تحسرت احاجيها

-جاي تشتغلين بالبيت؟

هزت راسها اي مبتسمه جريت أديها ابوسهن

-ليش ما ترحين يم بيت سلطان ؟

هزت راسها لاا هواي ضايجة

-ليش اثنينهم يردونج نمرشة وسلطان.

مدت ايدها تشرح ومافهمتها سوتلي بأيدها انسي لا تهتمين

-امي خوما تطكج؟

عاينت بعيوني ساكته گـــلبي دك بخوف تحسرت وابتسمت تهز راسها لا

-هاجر خاف جاي تجذبين عليَّ؟

هزت راسها لا تضحك

-ابوي البارحة متعارك وي ســليم.

شالت ايدها تأشر وتشرح طاكهم بالخيزرانه هوه وسلطان درت وجهي گـــلبي موجوع عليهم لحد يا وكت يضل هيج وياهم ؟

لمن اجوا من المدرسة مــاسه نزلت يم بابنا مبتسمه گالت

-بناتي يمج؟

مــاسه:: ضحكت ريـــمه تهز راسها لا گالت

-مشن بناتج البيتكم.

-ها خوش يله جا انه هم اروحن.

سلمت عليها ومشيت وي بــدور البيت اهلي اشوفن امي كالت جده

- ليلى بت خليل شلونها؟

-تبوس ايدج جده.

-وينها لا تجي لا تكول اشوفن جدتي ما تودينها تضل يمي هناه عاد تخدمني ضاله محد بحالي .

عاينت الامي وهيه تعضلي بشفتها درت الجده

-ماتفيدج جده عاله گـــلبي بس تكسر بالمواعين عود تساعدني تنگل المواعين للسنك وهاي يوميه كاسره ماعونين.

-يااا شمالها خوثة؟ جيبيها الي. خليني اعلمها اخليها تحرك النار.

درت عيوني الامي اريد هيه تحجي بعد كضت حججي انه كالتلها امي

ايمان:: انتِ هم ما تكعدين البنيه اطباعها تحرك الگلب وانتِ عدج ضغط تحرك گلبج وتنجلطين اكعدي هودي، روحـــي مــاسه يمه روحـــي البيتج لا تلگين البت حارگته .

گلبت وجهي وطلعت للمطبخ رضا چلب بأيدي يريد يروح وياي وندى تخزر بيه متحلفه

-اررجع.

-شمالج خليه وياي.

-لا تعال رضا وعلي اگطعك.

وهوه يعاند بچه مچلب بأيدي جرته تريد تطكه دفعتها

-شبيييج؟

-والله ما تاخذينه مــاسه لا تشلعين گـــلبي .

-بس هددديه شبيييج؟

دفعتها وجريته ناط من البجي وهي محترك گلبها ما ادري شمالها عيونها متروسه دموع وتحجي بحرگه

-والله العظيم بس تاخذينه اكتله.

-مسودنه انتِ شمااالج؟ وين وهـــب عنج.

-خرررب روح وهـــب خوش؟

-يااا؟

دارت وجها تبجي وتمسح بعيونها ورضا مجلب بأيدي ويبجي شلته اخذته وياي وطلعت مافاهمه شبيها گلت بعدين اخابر وهـــب واشوفن شبيهم رضا كضاها بجي وماريا حارت بيه وين يله سكت، عفت ماريا يمهم بالهول وطبيت للمطبخ اكضي الغده گبل لا يجي مــيثم .

اشتغل وبالي يم بــدور من يوم الرحتلهن للمدرسة حاجيتهم هددت واشتكيت عليهن هنه كافات خيرهن وشرهن بس هيه تخاف لا توصل الصيهد ويكرها كل خوفها صــيهد لا يكرها، ردت احجي الوهب وشفتها ما تسوى اثنينا ماضللنا شي ونگعد للمراجعه انه وزاري وهيه وزاري الايام الضلت قليله مو مال احجي ووهب يتعارك وياها.

سكتت اطبخ وسمعت صوت مــيثم من طب للبيت مديت راسي مبتسمه ماريا ورضا اثنينهم تلكوه باسها ودنك باس رضا يريد يجي الحور وماريا واكفتله عظم بالبلعوم الا يغسل اديه يله تخليه يكضها، عافهن واجاني يضحك جرّني يبوسني ويگلها

-خوما اغسل يله ابوسن مرتي؟

هزت راسها لا تضحك مكيفه عاينت لعيونه ولونهن الياخذ روحـــي

-شلونك؟

دفعني للمطبخ سد الباب ودنك يبوسني دفعته اتلفت

-زحمه البنيه هسه شتفكر؟

ابتسم يكرص بخدودي فتح الباب وطلع عاينت الماريا جانت عاقله وبس شافت مــيثم راح ركصتلي حواجبها اشرتلها اكضج.

كملت الغده وصبيته خابرنه بريا وي الغده ميثم حط التلفون على رجله فاتح السماعة وبريا يحاجيه تعبان وصوته مختنك، مايدري مــيثم فاتح السماعة كاله

-شبيك شو صوتك ما ادري شلونه؟

سكت بريا فترة وميثم ذب الخاشوكه من ايده رايحه روحه بس يريد يگدر يكض التلفون بأيده ماكو

-بريا حاجيني شني شصاير؟

-ماكو شي البارحة صحباني اثنينهم استشهدوا بسيارة مفخخة ميت عليهم مــيثم صغار بعدهم ماشايفين من الدنيا شي .

شهگت ايدي على گـــلبي وبساع صحت

-يمممه

وهو بس سمع صوتي صاح

-ياهي هاي؟ مــاسه مــاسه عليج ابو فاضل لا تحجين يم رنـــه.

وميثم شال التلفون وكام من الغده طلع بره. روحـــي راحت وماريا وجها صوفر غسلت ايدي وطلعت وره مــيثم كاعد بالحديقة ايده على راسه ويحاجيه ساد السماعة

مــيثم:: اي... ليمت تنزل انتَ؟ تعال تعال واجيب اهله اليخليك ترد، ناوي تموتني انتَ؟ يصير خير تعال واشوفن شلون ترد.. يله ديربالك على روحك. خير ان شاءالله .

سد التلفون منه

-ليمت ينزل؟

وهوه مدنك مايشيل راسه ميت من القهر والخوف عليه دك تلفوني طبيت بساع لگيته هوه بس فتحت خط بجيت مختنكه

-مــاسه خويه.

-جذبت علينه گلت ما يمي اي خطر

-لا تحجين يم رنـــه فـــدوه اروحنلج .

-انه الاروحنلك فـــدوه بس رد تعال هسه شجااابرك؟

مسحت عيوني وماريا واكفه بباب الغرفه دموعها يجرن خايفه عليه

-نهاية شهر الخامس يله انزل.

-صخام الصخمني.

-هسه شبييج؟

-بيمن احلفك وترد؟

-ما اگدر خويه، اكلج ماريا وين؟

عاينت الماريا ومديتلها التلفون روحـــي رايحه اجت كعدت يمي صوت تلفوني عالي واسمعه من يحاجيها بس گالها

-ها ماريا خويه.

وهيه راح صوتها اختنگت تريد تحاجيه ما تگدر دموعها يجرن وصاها تدير بالها على روحها وسّد التلفون.

خلانه كاضين كلوبنه بأدينه وكل وصيته رنـــه لا تسمع شي، مــيثم كضاها يدعي رايح حيله، وفوگ ظيمه يخابرونه ابوي وعمي علمود الگيعان، ويمشي ساكت

شويه ورضا راد اهله لبست عبايتي وحاجيت ماريا تروح وياي مارضت لان ماتحب جده، اخذت حور وياي امي تريد تشوفها ومشيت هم لگيت ندى بالمطبخ تسوي چاي ركضلها رضا يريد يشبگها دفعته زعلانه

-ندى شمالج شني زعطوطه؟

دايره وجها حتى وياي ما تحجي

-عود صدك تحجين؟

دارت عليَّ مختنگه

-عوفيني مــاسه والله تعبانه وهذا وهـــب علمه يعاندني واهلج كلساع وصاحوا عليه النغل.

بچت شفايفها يرجفن ورضا جلب بيها مختنك شالته غسلت وجهه وباسته

-خاف يتشاقى وهـــب ؟

-لا ما يتشاقى اكله يابه لا تعلمه يعاند انه اربي واتعب ويطيح حظي وياه مو انتَ اربعه وعشرين ساعة بالشغل تجيلك ربع ساعة تكابله كل التسويه تعلمه يعاندني.

درت على صوت وهـــب طب للمطبخ عاگد حاجبه يعاينلها

وهـــب:: خير؟

ندى:: مسحت عيوني ودرت وجهي من عنده نزل رضا ركضله اي روح روح تكيف عليه الچلب ابن الچلاب بس شاله ضل يشكي

وهـــب:: طگتك؟

رضا:: اي.

-ليش وياه؟

مــاسه:: رضا ليش تجذب؟ ليمت طگتك مو انه واكفه يمكم.

ندى:: عاينت الماسه امسح دموعي ويرجعن

-لا عوفيه عوفيه هيه هاي تربية اخوج يعلمه يعاند ويجذب عوفيه.

فتح عينه خازرني خاب دروح درت وجهي منه اطفي الچاي وماسه تحجي وياه وتعاتبه وهو يحجي ويسمعني

وهـــب:: تمسلت بطه

-رحم الله والديك اي اني امسلت وانتَ تحجي درر.

-لللج

مــاسه:: اشش صوتكم شني السالفة وهـــب.

ندى:: مسحت عيوني عدل اخذت صينية الچاي وطبيت للهول حطيته كدامهم گال

وليد:: صخونه حتى صخونه جا حطيتي كرصة خبز وي الچاي لو واحد الا يحجي.

رجعت للمطبخ مــاسه تحجي وياه وهوه شايل رضا ورضا يتمسكن عليه اخذت خبزه وديتها الابوه ودخلت للغرفة واسمع حجيهم وراي، گـــلبي محترك شويه ودخل رضا بأيده كعده بالگاع عاف التلفون بأيده واجه يمي گمت من يمه جرني من ايدي حييل

-وخرر.

-اشش صوتج.

دفعني للزاوية بصف الكنتور بحيث رضا ما يشوفنه شلت راسي خازرته

-سالمين شبيج؟

-شبيه؟ شوف اسلوبك وتعال گلي شبيج، وخرر وهـــب .

دفعته اريد اطلع رجعني بقوة لنفس المكان

-خرررب عورتني.

حط ايده على الحايط يمنعني اطلع وايده الثانية كاضني من زندي

-شمسويلج؟

-لا تغشم روحك ولا چن صاير شي من نتعارك لا وره ساعة تجيني جنك كلشي ما مسوي .

-ليمت متعاركين مسودنه انتِ؟

ضحكت مستهزئه وهوه يخزر ويجر بأيدي

-عليمن تعاركنه البارحة؟ مو علمود رضا مو كتلك لا تعلمه يعاندني وانتَ تگله كلها وولي ؟

فتح عينه كلها

-هاي الشقى سويتيها عركه.

لطمت على رجليَّ

-مو شقى هذااا تعلمه يعاندني ومايحترمني فوگ ظيم ابوك وجدتك تخرب رضا عليَّ، امداها من عيشششه التخلص وياكم.

احجي بحرگه واليص بالحجي محترك گـــلبي .

مد ايده يكضني من فكي خازرني

-بطه لا تضلين تمسلتين شو صايره مدري شلونج.

-عووفني

-وبله ماعفتج شتسوين؟

دفعت ايده بقوة ماعافني يقوي لزمته الوجهي أذاني بچيت طالعه روحـــي منه ومنهم ومن رضا ومن حجيهم تعبانه تعبانه من كلشي

وخر ايده وجرني الصدره حاضني

-ووخر وووخر عوفني

-اششش

-شلعت گـــلبي .. والله شلعت گـــلبي موتوني انتَ ورضا.

اشهك واحجي من بين دموعي وهو يحضني بقوة يبوس راسي ويحجي

-مانعيدها بعد ربينا من جديد.

-تعبـــت

-ما اعيدنها وعلي بس لا تتعبين.

غطيت عيوني بأيدي وهوه لامني على صدره ويمسح على ظهري اتمنى اگله ابوه وسعاد وجدته شلون يحاجون رضا من هوه ما موجود شلون يغلطون عليه ويفشرون وودهم بس يطكونه .

دار الرضا صاح عليه

وهـــب:: تعال رضا بويه تعال.

وخرت من صدره امسح بعيوني ورضا شمر التلفون واجاه شاله

-بوس امك انعل والديك من تضوج بطتي بعد.

باسني رضا ويحجي بزعل

-اسف.

نزله من ايده

-روح العب بالتلفون انا هم راح ابوسنها واگلها اسف.

ركض رضا للتلفون كعد وظهره علينه عاينلي وهـــب مبتسم رجعني ليوره اكثر

-وخر وهـــب مالي خلك.

-والله اسف ادري غلط السويته

-جا اذا تدري غلط ليش تحرك گـــلبي ؟ والله رضا كام على كلشي يعاندني اي شي يريد يسويه واگله لا كبل يسكت ويخاف هسه عناد يسويه محتمي بيك لان يدري تضحكله .

-شتردين ندى اطگه لو اعصب عليه؟ ما اگدر ترى اخافن لا بيوم من الايام يگول عليَّ ريت ما ربيت عده.

درت وجهي ابجي الموضوع يخنگ ويطلع الروح

-انت لو ما تفكر هيج وعامله وربيه وكأنما هوه ابنك فعلاً حاسبه على الغلط وعلمه مو على كلشي تضحكله والله حتى مايگول رجل امي ظلمني، لا انتَ هيج تظلمه من ماتحاسب وتعلم تظلم.

مد اديه اثنينهم لم وجهي بينهن يمسح دموعي باسني بين عيوني ووخر يباوع لعيني

-بيج شي انتِ بچيچ مو بس علمود هالسالفة؟

دنگت اهز راسي لا شحجيلك شيسكتك اذا حجيت اذا ابوه ومرته حتى عليه يحجون على ابو اني ما راح يصير عندي جهال بعد ووهب يربي النغوله، اسكت گوه على روحـــي.

-بطه شو عاينــي عليَّ

شلت راسي أعاين بوجهه من بين دموعي مسحهن متحسر

-ياهو وياج ؟

-محد

وخرت ايده ومشيت للكنتور بس اضلن كدامه بعد شويه احجي كلشي اجه وراي وكف بصف الكنتور

-يحليوه.

سديت باب الكنتور اباوعله

-هاه؟

-بعدج زعلانه ؟ ترى هسه اموتن.

-ااي تموت علمود زعلي.

-ههههههه

جرني من ايدي الصدره حاضني ورضا من يمه يصفكله

وهـــب:: انا زلمه گلبه مو گد زعل حرمته.

-اذامو گد الزعل ليش تزعلني؟

-اختبر گـــلبي يگدر على زعلج لو لا ؟

-يگدر يگدر كلشي تگدر

-شگدر؟ چنت انا الصح و صاحب الحگ لمن طاحن دموعج ، لا والله انا الغلطان وانا الاعتذر وابوسنج يحلوة الحلوات.

-غشني بحچيك هذا

بسته بصدره هوه اني الما اگدر على زعله لم وجهي بين اديه يحجي بجدية

-اسف يبعد روحـــي

ابتسمت اهز راسي خوش ينضحك علي بحجايتين ، طلعنه بره وابوه بس شافنه سوه ومبتسمن ورضا بيناتنا صاح عليه

وليد:: وهـــب حضر روحك هل چم يوم ناخذلك مره من بيت غانم شني تضل بلا فروخ؟

وهـــب:: اخذ الروحك بويه انا مرتي وأبني تارسين عليَّ الدنيا.

جريت رضا وطلعت للحوش ادري شنو الراح يحجونه وگلبي مو گد حجيهم تلاگت وياي جــويريه تسأل

-شكو شبيج؟

جــويريه :: هزت راسها ماكو شي ومشت كعدت بالزاويه يم الخضرة دخلت للبيت علمود خالتي ايمان اسويلها تمارين لرجلها وصار بوجهي الصياح والغلط خالي وليد يصيح على وهـــب

وليد:: ما تخلف تضل تربي نغوله انتَ؟

وهـــب:: رضا ابني رضيت ما رضيت رضا اااابني.

فززيت ورجعت ليوره من خالي وليد سحب وهـــب وضربه راشدي دفعه بره الهول يغلط عليه ويطرد بيه وبس دار ولمحني تفل يصيح

-ماخذين عواجر لا بارك الله بيجن.

ايمام:: حسبنا الله ونعم الوكيل، حسبنا الله ونعم الوكيل.

داروا عليها يصيحون هوه وجده وسعاد نزلت بــدور بسرعة صاحت على سعاد

بــدور:: انتِ مااالج غرض لا تحطين روحج بينهم ما مسموحلج تصيحين على امي.

وابوها تسودن يريد يضربها واني واكفيه بينها وبينهم واحس الراشدي بأي ساعة يجيني وبدور ما مهتمه الابوها كل حجيها وي سعاد وسعاد تغلط وتهد الحد ما فشرت وجده جرتها ضربتها راشدي

-شو ما تحترمين انتِ؟

وسعاد گلبت الدنيا بالصريخ شلون جده ضربتها وخالي وليد تعارك وي امه وهيه تگله

-خايب سحرررنك خايب الاغم سودننك.

سعاد:: عفنه السحوره االج والايمان احنا عايفينها على الله.

ايمان:: سلمتج بأيد الله يكون يعثرج يا سعاد.

مدت لسانها هالطول على خاله ايمان ووي غلطها دخلت رغد هي من اول ما دخلت مختنگه ولگت سعاد تغلط على امها بسرعة أشرت البدور براسها وهدن اثنينهن على سعاد وابوهن يجر بيهن ويضربهن وجده تصيح

-حييل حييل خايبات.

شفتها لزمت بــدور من شعرها ركضت وياهن عضيتها من أيدها واحس بخالي وليد يجر بشعري وبشحاطته يضربنه تحمست وعجبتني سالفة تضرب شخص اباوع الرغد شلون تضربها تسد ايدها وتضرب واسوي مثلها احنا مكتولات مكتولات عاد نكتلها زين، رغد مدري شبيها متحمله عليها ششگت حتى دشداشتها عليها .

وخرت بسرعة شاردة من دخل صــيهد وصيح بصوت عالي والبنات هم وخرن وابوهن يضرب بيهن جراه صــيهد يصيح

-خيرررر.

وخالي وليد يرجف بعصبية ويغلط ويصيح

-بوووويه ملخنها ملخنهااا كدامي جا وراي شيسووون.

ويهد يريد يضربنا وصيهد يدفعه اني احس ظهري مشتعل نار من ضربات الشحاطة وسعاد فوك ما دشداشتها مشكوكه شكتها بعد وتصرخ بكل صوتها عبالك ميتلها احد وجده مكابلتها وتگلها

-لو ما خليته يطلگج انا موش بت ابووي.

كبت بين صــيهد وابوه طلعنه للمطبخ نغسل وهمه صوتهم شما جاله يعلى كتلهن

-اني راح اشرد لان هسه يرجع علي ويگلي شكو تعاركين.

رغد:: روحـــي واذا اجاج كليله الصدك كليله تغلط على امك وتدعي عليها، ااامي تجي وحده مثل هاي تغلط عليهاا امداااني لو سكتت.

عفتهم ورحت للمشتمل اركض ادري بيه لو شما يصير اول وتالي يرجع عليَّ، وفعلاً ساعتين واجاني اعصاب دخل رگع الباب حيل واني كاعده بالگاع فاتحة الملازم وادرس ما ارفع راسي شويه ونتر

-هاي الادبسر شغالطه على امي؟

شلت راسي اباوعله دخيلك يا علي

-هواي غلطت ودعت وتكلها سحاره.

-انعل ابوهاا لا ابو اهلها .

وكف بحرگه يدخن ويغلط ويسب ما حاجاني اخذله شويه وطلع راسلت رغد كالت انه حاجيته وكتله السالفة كلها.

بالليل بالعشرة يله اجه اول مادخل سمعت ضحكته فتح باب الغرفة والمح شمس بأيده

-عاينــي شني جبتلج.

كمت اركض اخذتها من ايده ابوسها

-يمه يا روحـــي يا عمــري

وهي تحضني حييل حضنتها احسها كلها حنيه وهو واكف كدامنه مبتسم بأيده علاگة حلويات گال

-چلاب مايرضون كوه جبتها.

-هههههه. والله اني كل ما اروحلهم الكاها لو نايمه لو يم بيت جدها طك گـــلبي .

مسح شاربه مبتسم

-هلبت يطك گلبج عليَّ من افارگج.

-وين هوه انتَ مفارگني؟

حجيتها مبتسمه وهوه بسرعة گلب وجهه ووكف

-بس تردين تفارگيني.

-لا شسالفة.

-اي اي شسالقة، جيبيها يله خل اوديها.

-عوفها خلي اشبع منها ساعة ووديها.

اخذ تلفونه وطلع زعلان بقت شمس يمي اضــحك وياها واشاقيها وبس المح عيونها ابجي ما اگدر شكد اقنع روحـــي وأفكر هذا قدر وكلنا على هالطريق بس كل هالحجي هيج.

وكفت بس شافت دموعي مدت ايدها مسحتهن وتبوس بوجهي حضنتها وتمددت على الچرباية وهي بحضني احجي وياها واسولف تضحكلي الحد ما سكتت باوعتلها نايمه حضنتها وغفيت وفزيت من دخل صــيهد تمدد بجهته وهي بيناتنا تلمس ايدي

-يردونها.

-بس هالمره خلها تنام يمنه.

-يله نامي غلسي خلي اطفي التلفون.

طفه تلفونه حتى من كهلان يتصل عليه ما يحصله باسها بخدها وهز راسه بحسره نظرته تحجي حجي البگلبه، رجعت غفيت شويه وفزيت على دگة الباب طلع صــيهد بسرعة طلعت وراه خاتله وره الباب وهوه فتحه الهم كهلان ورنه

صــيهد:: الصبح اجيبنها.

رنـــه:: هزيت راسي لا ما گدرت انام لان هيه اصلاً مصخنه ومدري شبيه خايفه لان قريبه من سعاد وما ارتاح. كاله كهلان

-والله تفز تشلع گلبكم لان مصخنه خل تصير زينه وتبات يمكم.

هز راسه خوش رد الباب بدون ما يطبگه وجابوها شايلتها جــويريه تبوس بيها وتشم رگبتها حيل عيونها متروسه دموع، طبيت يمها اخذتها من ايدها وحاجيتها. همس

-جوري والله ادري تديرين بالج عليها، بس انه ما ارتاحيت اخافن عليها من سعاد.

هزت راسها اي مدنگه تعاين لوجهه شمس وحيل مقهوره

-تجين تباتين يمنه؟

احجي همس وهذا مدري شلون سمعني

صــيهد:: خل اختك تحترم نفسها، تريد تاخذ مرتي

-يله رنـــه تعاي

غطيت شمس بالعبايه وطلعت اخذها من عدي كهلان مشينا البيتنا يسألني على جــويريه

-شني ضاجت؟

-اي

تحسر ساكت، حط شمس بفراشي ودنك باسها يحاجيها

-يابعد روحـــي يا خالي يمن اروحنلج فـــدوه .

التفت ريمه واكفه بباب الغرفة مبتسمه احبن شكلها هيج بالليل تاخذ راحتها لان تدري عبود بعد مايطب للبيت وحسين نايم، تفتح شعرها وتلبس دشداشة كصيره وربع ردن، وكف كهلان بصفها ومد ايده لمها الصدره يعاينولي

-رنـــه اذا مابيج حيل وكلساع تكعدج ناخذها يمنه انا راح اسهر ادرس.

-لا والله عادي ماعندي شي

هز راسه خوش طفه الضوه وطلعوا سدوا الباب وراهم، جريت تلفوني اعاين بيه مراسلته من العصر والهسه ما راد ومن اخابر يطلع مغلق يخليني كاضه گـــلبي بأيدي، تمددت بصف شمس اشم ريحتها يله انامن.

الصبح لكيته مراسلني

-حبيبتي لا يضل بالج ما يمي تغطيه

مسحت وجهي گـــلبي يوجعني

-اذا تگدر خابرني گـــلبي يوجعني وخايفه.

كمت بهدوء كلهم بعدهم نايمين بس سمعت صوت كهلان وريمه من المطبخ اريد ادخل اصبح عليهم بس وكفت من انجاب طاري شمس صرت على صفحة اسمعلهم

كهلان:: مازن يگلي مالك غرض بحجيهم ومتعارك وي عمامه

ريمه:: خل ياكلون تبن جدها وعمها يردونها تضل يمنه همه ياهي مالتهم والله عمام ابوها؟ كلهم جذابين هسه صارت عزيزة بعد چم شهر حتى اسمها ما يذكرونه.

فتحت الباب ودخلت عاينولي اثنينهم طــروادة دنك ومسح عيونه

-يردون شمس؟؟

احاجيه صوتي يرجف وكفت ريـــمه كاضتني من ايدي

-مالج غرض بيهم الجمعة تصير الكعده وشمس محد ياخذها من عدنا.

وكف كهلان طلع من يمنه وانه الخوف اكلني اكل ساعة ساعة احسب ليوم الجمعة، وبريا خلصها وياي رسالة وحدة باليوم بس يطمّني بيها

الحد يوم الكعده اجه مازن من الصبح حطيت ايدي على گـــلبي طببه طــروادة للدوانيه واخذله شمس وكفت يم باب الدوانيه اعاين من الحافة شابگها وعيونه تجري يحاجيها مختنك

مازن:: شلونج عمو زينه؟

وهيه تشبگه ضايجه لان يبجي شمها حييل متحسر

-اااخ يا روحـــي يا ريحة عزيز گـــلبي .

درت وجهي امسح بعيوني حاسه بنفس الوجع ضليت كاعده بمچاني اسمع سوالفه وي كهلان.

مازن:: كهلان انا وياك مو وياهم وبنص الديوان وبين الشيوخ اكلهم وصية منذر بنته تضل يم خالها، بس خويه الي طلب يمك.

-تأمر.

-كلشي يصير تتعارك وياهم تصير طلابه بيناتنا بت اخوي ماتحرمني منها بالاسبوع خليها يمي يوم من الصبح لليل هذا الاريدنه ما تحرمني من شمس.

يحجي والغصه خانگته وكهلان گاله

-تحجي صدك مازن؟ شلون احرمك منها اصلاً عيب عليك تحجيها.

گمت من يم الباب گـــلبي ممرود ضل يمنه ساعة وراح رتبنه الدوانيه وحضرنه الچاي علمود الكعده وبس بدا الوادم تجي اخواني ضلوا يلوبون من القهر من وره شاكر ووليد ، مازن كالهم اخوي هيج وصه وعمام منذر يكولون شاكر مايريدها بالقرية وشاكر يگلهم اي ما اريدنها.

عله صوتهم يتعاركون كهلان ميت من القهر وسليم وصيهد تعاركوا وي اخو الاء يردون يكتلونه، والوادم كامت طلعت بلا ما تنحلّ السآلفة شاكر شرد البيته وكهلان يريد يهد وكوه كاضينه، وانه ما هامني شي دام شمس يمي هاي هيه وكلشي من بعدها يهون .

عدن چم يوم كهلان تعبان حيل لحيته ماكله وجهه والاسود خانگه وفوگها تعبّ بالحصاد وهو يشتغل يقرأ لان ماضل شي للامتحانات وهوه مو زين هالسنة ،

مــاسه وبدور كعدن يراجعن للوازري، وانه كل ماردت ادرس يشغل بالي بريا روحـــي تروح من يضل يوم كامل يله يوديلي رسالة وطول حيييل ما نزل.

الحد ما بدت امتحاناتي، شاكر ووليد وميلاد كلهم ساكتين مفتكين منهم ، مازن يجي يشوف شمس عدنا ماياخذها يمهم رغم كهلان ما معارض بس ما ادري ليش ماياخذها وهالشي مريح گـــلبي .

باخر امتحان كعدت بتلاثة ونص على صوت رسالة من بريا كاتبلي

-باجر انزل رناتي.

-انتظرك يا روحـــي .

ومارد علي وراها، كمت اريد اغسل حتى اقرأ طبيت للمطبخ اريد اغسل وجهي اسمع صوت كهلان بالحوش تدنيت للشباج اعاينله ملثم سلاحة بأيده وتلفونه على اذنه يحجي

-ها مازن اجيت؟ يله جايك.

شال السلاح حطه بجتفه وطلع گـــلبي يدك بسرعة وخوف كعدت على حيلي بالمطبخ روحـــي راحت وعبالك ما عندي عقل لا عرفت اكعد ريـــمه تخابر اخوانها ولا عرفت اطلع وراه اصيحله.

طلعت افتر بالحوش واعض بأيدي للخمسة الصبح يله رد انصدم بيه

-وين جنت؟

-بالگاع.

-يااا گاع طــروادة ياا گاع حصدنا بعد ياگاع التروحلها.

اشهك يلا دموع خايفه جرني الصدره

-اششش ماكو شي لا تخافين.

وخرت من صدره اعاينله بخوف

-وين جاي تروح.

-راجعتي ؟

-كهلان!!

-تعاي راجعي خل اسويلج ريوك.

جرني من ايدي للبيت مارضى يحجي شي، بدلت وطلعت وداني هوه للمدرسة امتحنت ورجعت ادري بروحي درجاتي هالسنة ماراح تتعدى الستين بس الحمدلله على كل حال هذا الگدرت عليه، رجعت للبيت تلكتني شمس انسى التعب وانسى الدنيا كلها بس هيه تضحكلي.

شبگتها وريمه ايدها على بطنها مكيفه لان خلصت امتحانات بدلت وركضت للتلفون كل ظني الگه رسالة منه بس راحت ابتسامتي من مالگيت شي ، خابرته مغلق.

سكتت كلت مثل كل مره يطفي تلفونه ونهاية اليوم يله يشعله ويرد عليَّ، كضيت اليوم نايمه شمس كل شويه تكعدني ببوسه اعاين للتلفون بلكن الكه رسالة منه وماكو ارد انام .

الحد ثاني يوم بديت اخافن خابرت مــاسه احاجيها تبجي وتكلي

-ماكو شي

-مــاسه بداعت حور بريا بيه شي حاجيني.

-لا والله.

-جاااا ليش تبجين؟

-المفروض هسه هوه جاي والهسه ماحصلناه تلفونه طافي من البارحة.

اسمعها واحس گـــلبي ينعصر عصر ريمه جرّت التلفون من ايدي تحاجيها وانه مخلوبه روحـــي يا ربي بعد كل حيل مابيه مالي حيل اي صدمة ولا الي گلب يحمل انفجع بعزيز.

سدت التلفون تحاجيني

ريـــمه:: شسالفه رنـــه هوه يطفي تلفونه هسه لو يوصل لو يرد عليكم لا تخافين.

هزيت راسي اي ايدي على گـــلبي مكابله التلفون وكاعده متت الف مره وريمه كلساع تقيس السكر خايفه، لوره الغده طلعت من الغرفه كهلان كاعد بالهول وبحضنه شمس بس شافني وكف مستغرب

-شبيج؟

وانه مچلبه بالحايط احس رجليَّه يرجفن كضيت بايده كوه احاجيه صوتي مختنك

-بريا ماكو من امس تلفونه طافي والمفروض اليوم هوه هناه نازل.

التفت يعاين لريمه ورد عاينلي

-شسالفة لا تخافين ماكو شي تعاي اكعدي .

كعدت سم شمس لامه رجليَّ الصدري انود رايحه روحـــي وأعاين على كهلان من باب الهول المفتوح طلع للحوش يخابر على مــيثم اسمعه غلط عليه لان شايفه ماله خلك وناشده شبيك مــيثم ما حاجي.

صبرت الحد ماصار الليل بجيت كل صبر ماضل عدي

ريـــمه:: اششش رنـــه صدك تحجين؟ لا تفاولين عليه.

-ولج اموووتن والله تعبـــت گـــلبي كضه ماكو بريا ماهوه.

طلعت للحوش. مختنگه واسمع هوسة الولد بالساحة، رجعت للبيت لبست عبايتي كوه اتحرك وريمه تحجي بخوف

-وين رايحه.

-يم.. يم مــاسه وماريا.

كضيت شمس من ايدها ايدي ترجف طلعت من باب الحوش شافني كهلان اجاني بساع

-وين رايحه.

وانه اريد صوتي يطلع ماكر شلت ايدي أأشرله على بيت خليل، دار وجهه ماراضي خايف علي

-غير تضلين يمي انتِ سكرج كلساع يصعد.

-مابيه.. مابيه كلشي مابيه بس خليني اروحن اشوفن ماريا.

دنك شال شمس وكضني من أيدي

-تعاي.

ومن باب الحوش سمعت صوت بجيهن اثنينهن كهلان نزل شمس بايدي وصاح على مــيثم علمود يجي يحاجي البنات ، طبيت يمهن مچلبه بالحايط وماسه بس شافتني بساع مسحت عيونها ووكفت

-هلا بيج رنـــه .

تريد تقوي روحها وهنه عيونها شما تمسحهن يجرن كعدت يمهن وكل ساعة تمر يخلص بيها صبري والخنگه تذبحني، عدت الساعة بالوحدة من الليل والولد بعدهم هوسه ويحجون يم مــيثم بالحوش لان هوه انهد حيله. وماريا تعاينلي وتبجي حطت راسها على رجلي بصف راس شمس الغفت بحضني

سندت راسي على الحايط مغمضه ودموعي تجري وينك وينك ليش هديت حيلي شضل بگلبي وهيج تبهذلني.

فززتني ايد مــاسه

-رنـــه رنـــه، كومي نامي بالغرفة شمس خطيه بس تتفزز

شالتها من رجلي وانه وكفت ما اگدر ادوس على الگاع حاجيتها صوتي مبحوح

-ماريا وينها؟

-يم مــيثم تعاي نامي هناه ولا تخافين بلكن للصبح يفتح تلفونه مــيثم حصل ولد اخوه هم غاد يگله تلفوناتهم مغلقة حتى لا يتجسسون ومدري شني.

مسحت عيوني ساكته تمددت على جربايته شمس بحضني وماسه طفت الضوه وطلعت غطيت وجهي ابجي بصوت والله گـــلبي تگطع. وكمت اتخيل صوت الرسالة كلساع احس روحـــي اسمع صوت رسالة واعاين للتلفون ما الكه شي .

بنص دموعي غفيت غفيت وانه ادعي ربي يرده الي بسلامة لان گـــلبي بعد مو گد اي صدمة.

غفيت والدموع تارسه عيني  ودافنه راسي برگبة شمس .

للصبح حسيت ضوه اجه على عيوني وراح وايد خشنه مسحت على خدي وصوت ينهمس گبال وجهي

-رناتي

يتبع...

أيلول 💚

أرض الـــــخناجر 🗡️

بقلمي الكاتبة ايـــلول 

تصويت وتعليق بين الفقرات لطفاً 💚

══━━━━✥◈✥━━━━══

وبالروح لگعة حزن

من ابتسم ما تروح

وبالماي ما تنغسل

══━━━━✥◈✥━━━━══

-رناتي.

رنـــه :: فتحت عيني بفزه والمحه گدامي مدنك عليَّ حاني ظهره يتلمس بوجهي ومبتسم، شهگت بصوت اريد اصرخ ما مصدگه عيوني ووي شهگتي كتم انفاسي بشفايفه

وانه من الهبطه والخوف الماكلته من البارحة مدري شصار بحالي رخت ايدي الجنت اطكه بيها ونجريت الظلام ماحاسه على شي.

مــاسه:: طلعت من الغرفة فازه على صوت الطكطكه عبالي رنه راحت الاهلها،فزيت فاتحة عيني حيل من   انفتح باب غرفة بريا وطلع من الغرفة متخرذل  انه اريد اصيح مصدومة بيه وهوه مد ايده على ايدي وجرني حييل

-تعااااي تعاااي رنـــه مدري شبيهاا.

دفعني لغرفته رنـــه نايمه درت وجهي منها اله احاجيه وابجي

-ليمت اجيت؟ وين جنت ليش ...ليش ماترد.

-وووولج عوفيني رنـــه اغمى عليها شوووفيها.

صيح يتراجف  ودفعني من جتفي يريد التفت عليها وآنه بعدني بصدمتي وبس استوعبت ركضت طكيت رنـــه على وجها متخرذله

-ررنه رنـــه .

وهو كابلني بخوف يعاينلها رشيت على وجها ماي ايدي ترجف وهوه يمسح بوجها، حركت جفن عينها تجر نفس وتتنهد عاينت لبريا خشمة ينزف دم وهوه ماحس كل باله يم رنـــه يعاينلها بخوف

-بريا خشمك!

مسحه بأيده وعاينلها بس شاف الدم كام طلع من الغرفة يغسل ورنه فتحت عينها بثگل  شافتني گدامها عيونها ذبلانات رجفن شفايفها شويه شويه وعيونها انترسن دموع شهگت بخنگه تبجي وتحجي بروح متعوبه عبالها حلمانه مو صدك بريا هناه.

كعدت على حيلها تبچي بخوف وقهر 

- رنـــه اشش هذا بريا اجه هذا.

احجي واجر بوجها امسح دموعها بس هيه عبالك ماتسمعني  دموعها تجري وساده حلگها بأيدها حتى لا شمس تفز طب بريا للغرفة 

-تعال عبالها بعدك ماجاي.

مسح وجهه واجه كدامها من بين دموعها بس شالت راسها وشافته  صيحت بصوت عالي يمرد الگلب وتبچي بحرگه شبگها يرجف

-اششش  يابعد روحـــي رنـــه اشش شسالفة.

بس رادها تسكت وهي مفجوع گلبها شابگته بأثنين اديها وبچيها يمرد الروح شلت شمس من فزت وضلت تبجي، واجه مــيثم يركض هوه وماريا على صوت بچي رنـــه، وميثم من الباب بس لمح بريا كاعد على طرف الچرباية گدام رنـــه وشابگها فتح عينه حيل ودار وجهه يغلط على بريا

ورنه ميته من البجي ماحاسه على روحها وبريا بس يريدها تسكت، عفت شمس بأيد ماريا ومشيت يمهم احاجيها وامسح بعيونها وهو يبوسها براسها ويگلها

-والله مابيه شي رنـــه يا روحـــي عاينــي عليَّ.

مدنگه ترجف ودموعها تجري درت عيوني البريا شصاير بحاله ضعفان والشمس ماكله وجهه وفوك حاجبه زلغ وايده اليمنى هم مزلغة عبالك محكوكه بالگاع، سكتت رنـــه بس تناشغ صاح عليه مــيثم

-ووين جنت؟

عاينله بريا ووكف مشى يمه لان مــيثم مايگدر يطب للغرفة ورنه بلا حجاب مدله ايده سلم عليه ويحاجيه بتعب

-من اجينا انگلبت بيّنه السيارة صحيت انا بالمستشفى وتلفوني الصغير البيه رقمي طايح مالكيته وهذا مكسور ماذكرت ولا رقم من ارقامكم هل ماخابرت عليكم.

يحجي وي مــيثم وتدنى يم ماريا الشايله شمسعيونها متروسه دموع باسها براسها  وكرص خدها يحاجيها باس شمس وميثم يحجي وياه محترك گلبه لان البارحة متنا من الخوف عليه.

رنـــه حطت راسها على جتفي مغمضة عينها روحها رايحه حيل تغيرت كلشي يخوفها كلشي يبچيها تخاف على كل الحواليها بالأخصّ اخوانها وشمس وبريا طاير گلبها عليهم.

مــيثم گال البريا

-طب شوف بت العالم راح تتسودن من وراك.

اعاينلهم ابتسم بريا وطب للغرفة مسح وجهه وأشرلي براسيه وخري من يمها هزيت راسي لا وشبگت رنـــه يأثنين ايدي انه خازرته وهوه خازرني

-وخري شمالج؟ مــيثم تعال المرتك.

مــيثم:: تعاي سمسم.

هزيتله راسي خوش متحلفه وخرت من رنـــه مسحت عيونها ووگفت

-سهله انا الك.

بريا:: بررره.

امشي ودرت الرنه احاجيها وجها اصفر كاعده على الچرباية اديها بحضنها عيونها ذبلانه ظافره شعرها كصيبه راخيه وشعرها متبعثر مناه ومناه، صحت عليها

-رنـــه لا تحجين وياه الا يبطل.

رنـــه :: مسحت عيوني اعاين وراها گـــلبي يدك حييل طلعت وسدت الباب، عاينتله تمشى يم الشباج وخر البرده على صفحة ورد كعد كدامي مدنك، وجهه تعبان ومزلغ، مسحت وجهي متحسره نزلت ايديي اثنينهن الحضني مد أيده يحضنهن بين اديه

-رنـــه .

عاينت لعيونه التارسهن التعب، شال ايديي الوجهه يبوسهن ويحجي

-اعتذر والله ما قصدي تخافين هيج.

-تبطل؟

سكت وتدنى يمي اكثر مد ايده وره راسي يضمني الصدره  غمضت عيوني راسي على جهة گلبه جريت نفس طويل بس اريد الرجفه والخوف البگلبي يرحن.

احس بأيده مسحت على شعري ودنك باس راسي يحجي

-بدويتي شجابج الغرفتي؟

ميلت راسي اريد اوخر ماعافني خله اديه اثنينهن على ظهريّ يحضني بقوه ويحجي بأذني

-بس شويه واعوفنج.

هدأت مغمضة عيني قشعر بدني من حسيت انفاسه الدافيه تحاوط رگبتي ملت براسي، اريد اوخر جسمي يرجف

-بريا.

جريت نفس بشهگه كاضه ايده بقوة لمن ضم وجهه برگبتي شاربه ينغز جلدي كل ما شفايفه تلامس جلد رگبتي بشفايفه الدافيه تنتنقل يتثاقل من مچان المچان عايفه وراها بوسه خفيفه كافيه ترجف جسمي وتضاعف دگات گـــلبي.

إيده تحاوطني بقوة يضمني على گلبه حييل يحاول ينسيني خوفي ويحسسني بوجوده.

دفعته من ايده ابتعد بساع وكض ايديي يمسح عليهن صوت نفسه عالي شلت راسي أعاين بوجهه ضوه الغرفة الخافت مايخفي التعب المرسوم بملامحه عيونه الاحبهن واحب بياضهن الصافي متروس شرايين حمر

ملت براسي اعاين بوجهه عيوني متروسه دموع لحد يا وكت اعيش هالخوف.

مد ايده الخشنه يحضن بيها خدي

-شبيج رناتي؟

دنگت عيوني متحسره شفايفي يرجفن حرك ايده على خدي ورفع وجهي من حنجي بأصابعه. هز راسه يسأل

-عليمن تبجين؟

-عاجبك بهذلتي وخوفي؟ مرتاح وانه يوميه ميته من الخوف؟

حجيتها ودموعي جرت دفعت ايده دايره وجهي منه وامسح بعيوني، جر ايدي يعصر اصابعي بين اصابعه

بريا:: لا والله ما عاجبني وميت من القهر چيه مخوفج عليَّ بس والله مو بقصدي كل ما تصير سالفة فكري بس بيج ردت بس تلفوني يشتغل واگدر اوديلج رساله اطمنج بيها ما اشتغل، هستوني وانه راجع جبتلي جديد ماراسلت بعد مالحكت .

هزيت راسي اي وامسح وجهي يأثنين ايديي

-اي اي وانه اضل يوميه كاتلني الخوف ها استهشد ها انخطف ها صار شي موو؟

احجي بحرگه ايدي ترجف وهوه يعاينلي مبتسم  لم وجهي بين أديه وطبع شفايفه على خدي يبوسني حييل

-فـــدوه اروحن للتخاف عليَّ.

-وخررر.

دفعته حييل ومسحت خدي بردني جريت شالي من الچرباية لبسته

-توني جاي لا تسويلج زعله رنـــه.

-تبطللل؟

وگفت على حيلي گدام الشباچ وهوه كاعد على طرف الچرباية دنك هز راسه لا يحرك بگلبي  وكف گدامي شلت راسي أعاين بوجهه

بريا:: انا ابطل وهذاك يبطل وفلان تصوب واهله ماخلوه يرد جا ياهو يضل بعد؟

-ياهي مالتك؟

-شلون ياهي مالتي جا غير گاعنه.

درت وجهي للشباچ افور انه مو حمل هم وخوف شجابني، جرني من ايدي الصدره بچيت بصوت تعبانه

-اشش رنـــه شسالفة؟

-تعبـــت .

-لا جاسج التعب بعد روحـــي .

وخرت من حضنه امسح بعيوني من اندك الباب فتحته مــاسه تعاينلي مرتبكه گالت

-طــروادة بالباب يريدج.

هزيت راسي اي عدلت شالي على راسي وجريت عبايتي البسها وهوه وكف كدامي مد أديه على حواف العباية من يم وجهي يعدل بيها ويعاين بعيوني

-لا تضلين ضايجه

-تريك ونام.

-اي هسه ام حور تسويلي ريوگ.

حجاها ودار وجهه الماسه الواكفه بباب الغرفة  مشيت من يمه اخذت شمس من ماريا وطلعت للحوش مــيثم واكف يم طــروادة سبقني بريا ومد ايده سلم عليه

بريا:: البقيه بحياتك.

يحاجيه علمود منذر  وطرواده يحجي وياه ويسأل وين چان ضلوا واكفين يسولفلهم من انگلبت بيه السيارة ابو الحوادث ما ضل حادث ما جربه ماضل شي ما تصوب بيه.

شمس عبرت من ايدي الخالها شالها وانه واكفه بصفه عيوني البريا وهو يعاين بوجهه كهلان ومن مــيثم يحجي وي كهلان بريا يعاينلي، شلت راسي اعاين لشمس دام كهلان يسولف هيه تبوس خده فوگ لحيته. سلم عليهم ومشينا منطينهم ظهرنا.

دار وجهه عليَّ

طــروادة:: شني  باچيه؟

شلت راسي عاينت بوجهه هزيت راسي اي

-حلمت بيه مات .

-خيولي لا تبجين ما يموت راح يعرس.

يمشي ويحجي وياي وگفت خازرته  شني يعرس؟ دار علي

-امشيي

-شيعرس؟

مشيت بصفه وشمس شلعت گلبه ما تخاف تطيح وهوه شايلها صعدت على اجتافه گال

-غير حلمتي بيه ميت؟ هاي هيه يعني ما يموت يعرس.

-عليمن يعرس؟

-على حسنه ملص.

حجاها ومشه بخطوات كبار رجليَّه هالطول الرجل شبختين يوصل بيتنا طبيت وراه للبيت لگينه ريـــمه كاعده بالحوش يم الحوض ايدها على خدها لعبانه روحها، طــروادة نزل شمس من اجتافه راحت تركض الريمه مسحت وجها تحجي وياها وطرواده گالها 

طــروادة:: ها ريـــمه شبيج؟

يعاينلها بخوف هزت راسها ماكو شي  كعد يمها يمسح على راسها ويحاجيها بخفوت، رغم شگد تعبان ومكسور ظهره بالصار بس كل هذا وهوه يحاول يوكف على رجليَّه يضم حزنه بگلبه لان يدري كلنه مستندين عليه لو طاح كلنه ننهدم.

ريـــمه بعدها تتخربط وتلعب روحها رغم دخلت بشهرها الخامس كومها كهلان  طبينه للبيت شمس تهوس على راسهم وريمه تسأل على بريا كعدوا بالهول يسولفلها طبيت للغرفة ذبيت عبايتي اعاين الزهره سوده عليَّ نايمه وحدها اليوم، اخذت تلفوني وطلعت  اريد اروح للمطبخ اسوي الريوك.

طــروادة وريمه عبالهم من طبيت للغرفة ماراح اطلع بعد لكيتها حاطه راسها على صدره وهوه رافع وجها بأيده ومنصي عليها توه يريد يبوسها وشمس مدنگه تلعب بتلفونه، فاتحه عيني حيل اعاينلهم لا بيه ارجع ولا بيه اكمل مشي للمطبخ.

فزوا اثنينهم  سوه روحه يتلمس بوجهه ويگلها

-لا لا زين ما مصخنه.

دنگت وطبيت للمطبخ   اعض بأيدي متفشله من طــروادة عفت تلفوني يمي وغسلت القوري اريد اسوي چاي دك تلفوني صوت رسالة وبس لمحته بريا شغل تلفونه الجديد  وحط رقمه الثاني  ابو الوتساب عفت القوري وكعدت بالگاع احاجيه

-خوما بعدج تبچين؟

-لا.

-لو ضاله يمي شيصير بالدنيا؟

قريتها وسكتت كتب

-كاعده بالحوش منيلج نت؟

-على كهلان

قراها وودالي صوره ماريا كاعده بصفه على القنفة بالهول لامها الصدره مبتسمه وعيونها حمر.

عفت التلفون على صفحة ووگفت اسوي الريوك 

متانيه الطماطة تستوي مركزه وياها حوافها مناه ومناه صارن حمر والزيت يفرگع صورتها وهيه على الطباخ وديتها اله كتبتله

-جاي  اسوي ريوك، انتَ تريكت لو بعدك.

-بعدني مــاسه وميثم جاي يسوون صارلهم ساعة.

-راح اكضي انه.

-كليلي تعال تريك يمي ليش مستحيه؟

ابتسمت كتبتله

-لا والله مو هيج

-جايج

-لاا

فتحها ومارد دقيقتين واندك باب الحوش عضيت ايدي منحرجة من طــروادة هسه يگول سوت الريوك علموده مو علمودي مديت راسي اعاين من شباچ المطبخ گاله

بريا:: گلت اجي اتريك وياكم.

-ماعدنا ريوك.

-جاي اشم ريحة چاي؟

طــروادة:: مال البارحة حميناه وشربناه كضه.

يحجي وياه وميثم حط ايده على علباه يجر بيه

مــيثم:: مسويلك الريوگ بأيدي تعوفني وتجي شلووون؟

ابتسملهم طــروادة وبريا يضحك شال راسه صارت عينه بعيني واجوه سليم ووهب يكتلون بيه واخذوه البيتهم سحل، طب طــروادة للبيت بساع حطيت الريوك بصينية واخذته للهول  كعدت زهره اجت ضمت روحها بحضني

طــروادة:: شبيج زهره.

وهيه ضامه روحها ما تحجي گالتله ريـــمه

-لان رنـــه البارحه ما نامت يمها.

طــروادة:: مو نامت يمج ريـــمه ؟

رنـــه :: يحاجونها وما ترد عليهم بيها طنگورتي مال الصبح من تعبر السطعش يله هاي الطنگوره تخف  كامت غسلت ورجعت باست طــروادة وباست ريـــمه كعدت بصف شمس تتريگ ويانه  طــروادة ياكل سريع يريد يروح للكليه ريـــمه كالتله

-اكلك البارحه وين چنت بتلاثة اجيت للغرفة عبالي تقرأ مالكيتك.

عاينلها ساكت ودار وجهه منها الي دنگ يشرب چاي وغلس ما جاوب سوه لگمه الشمس وكلها ويحجي وياها.

كام غسل واندك باب الحوش حيل نشف ايده وطلع باب الهول مفتوح نعاين منه للحوش، بس فتح الباب صــيهد دفعه من صدره حييل وخازه طب وياه للحوش ورگع الباب وراه وكفت بساع ومشيت يم باب الهول اعاينلهم مستغربه ليش هيج خازر كهلان

صــيهد:: وين چنت البارحة؟

-وين؟

-كهلان ووووين جنت البارحة؟؟

نتر بصياح وشال ايده يدك على صدر طــروادة وطرواده هادئ ويرد عليه ببرود

-بالبيت ما طالع.

صرخت فازه من صــيهد شال أيده طك كهلان راشدي حييل ركضت ارجف دفعته اصيح بوجهه

-لاااا تمد ايدك عليييه.

ارجف متخبله شلون يطگه هيج جرّني كهلان لوره ظهره وصيهد يجر بيه من ياخة القميص يعته وينتر بعصبية

-ترررريد تموووت انتَ؟؟ والله اكسر رجلك بالحسين اكسرر رجليك.

طــروادة:: صوتك، اسكت.

عته بقوة وبأثنين اديه چلب بياخة قميصة ينتر

صــيهد:: تدور على موتك انتَ؟ حاجيني تدور على مووووتك؟

دفع ايده صيح بوجهه

طــروادة:: شبيييك؟ اذا منذر ماعنده زلم تاخذ حگه وعايفين مازن وحده تريدني اسكت؟

صفگله صــيهد يتراجف

صــيهد:: لااا لااا شلون زحمه ابن شامل يسكت شلون؟ اذا ما يروّح بوحده يهوفج مناه ومناه وينكتل ما يرتااااح، ووولك جا فكرت باهلك ياهو الهم؟ مرتك اخوووتك؟ جاان حجيت واخذتنا وياك مو من وره ظهرنا انتَ وهالخايس ماازن.

يتصايحون ويتعاركون وانه مافاهمه شي دفعني كهلان بأيده لباب الهول رجعت ليوره وطب سلطان جر صــيهد يحاجيه يهدي بيهم وهمه واحد صوته اعلى من الثاني

النوب سكتوا اثنينهم مشيت بساع اعاينلهم من باب الحوش واكفين واحد يعاين بوجهه الثاني وسلطان بصفهم يحاجيهم وما اسمع شيحجي وياهم

ريـــمه:: ها رنـــه .

درت عليها كاعده بباب الهول ايدها على بطنها روحها رايحه رجعت يمها

-ماكو شي گومي بس هذا الارعن طك طــروادة كسر بأيده الخايس.

زهره:: لا تدعين غير اكبر منه طــروادة مو يطك عبود.

-انجبي انتِ تدافعيلهم ولد ايمان تموتين عليهمم.

گلبت وجها وطبت للهول يم شمس كومت ريـــمه طبينه للهول وهوه شويه وطب للبيت اعصاب ووجهه احمر غسل وطب الغرفته بدل اخذ ملازمه وطلع بدون مايحجي ويانه كل مره يروح وي صــيهد وجويريه هل مره راح وحده يمشي بالنص ساعة يوصل للشارع وياخذ تكسي، ضلينه ما مرتاحين ريـــمه خابرت على سلطان واجاها كعدت وياه بالحوش تحاجيه وانه اتصنت عليهم خايفه على كهلان كالها

سلطان:: بيت علوان محد لاگيلهم اثر عدهم زعاطيط شاطرين بس ينشرون على الفيسبوك احنا زلم كتلنه مرته وكتلانه لهذا السبب كهلان متسودن هوه ومازن يطلعون يدوّرون يوميه لان بيت علوان بين مده ومده جاي يجون الگيعانهم، انا ما الوم كهلان وحگه ما يسكت ولا مازن يگدر يسكت بس كهلان غلط وصيهد صاحب حگ لان يطلعون بوحدهم مايگول حتى نروح وياهم

-بس صــيهد طگه.

-عادي انتن لا تحطن روحجن بيناتنا وشلون يطكك ومدري شني احنا متعلمين وندري صــيهد من خوفه علينه يطك چنه عمي شامل مانزعل منه بس لحد منجن تدخل روحها وتخلنه واحد يحقد على الثاني.

عاينتله ريـــمه مصدومه

-يااا سلطان؟

ابتسم وطكها على خدها يشاقيها

-لا والله بس لا تكبرن السالفة ولا تگليله ليش يطكك يضوج غلسي چنج ماشايفته لان كهلان هاي المسودنته شلون صــيهد طگه گدامجن.

سكتت ريـــمه مقهوره سلطان ضل شويه يمها وراح ردت اجت يمي خابرت على جــويريه بالي يمه اخافن لا يتعاركون غاد ما ردت عليَّ وره نص ساعة يله خابرتني

-وين انتِ؟

جــويريه :: درت وجهي اعاين روحـــي طالعة من الحروره گتلها

-راح اروحن للكافتريا كولي رنـــه صاير شي؟

-اكلج اخوي ورجلج متعاركين ديربالج لا يتعاركون بنص الوادم.

-هسه راح اروح اشوفنهم.

سديت التلفون منها ومشيت لكليتهم على اساس يعني اذا يتعاركون اني اگدر اسوي شي اخلصها اباوع بوجهم توني وصلت هواي طلاب بره لمحت كهلان گاعد على المصطبات بأيده ملزمه ويمه ولد يحجي وياه وبالمصطبه المقابيله گاعد صــيهد وجهه مايكصه السيف بأيده كلاص سفري مال چاي ويعاين الكهلان بخزر.

مشيت وگفت گدامه وكف بساع

-امشي.

حجاها ومشه من يم الهوسه مشيت وراه وكفنه على صفحة يحاجيني مضيك عيونه من الشمس

-كضيتي؟

-اي وانتَ؟

هز راسه اي ضايج

صــيهد:: هذا الخايس بعد خل يكضي ونطلع.

كعدنا بالكافيتريا منتظرين كهلان طول وصيهد ضاج خابر عليه يحاجيه بزعل وكهلان گاله

-رديت بتكسي.

تخبل صــيهد كمت امشي وياه مرتبكه وبس صعد للسياره غلط وسب بكهلان ويسجل بصمات ويدزله يسب بأهله واني الادري بيه يمووت على خالي شامل شلون يغلط عليه هيج شمر التلفون وشغل السيارة يسوق ويدك هورن ومن يمر بأزدحام وواحد يضوجه ينزل الجامه وينعل بالعالم ومن واحد يعانده يصيح عليه

-انزززل ادوس على راسك.