تحميل رواية «أرض الخناجر» PDF

روايــــة أرض الـــــخناجر 🗡️

بقلمي الكاتبة ايـــلول .

تصويت وتعليق بين الفقرات لطفاً💚

══━━━━✥◈✥━━━━══

وحرك دم وتعب واهات ودموع

وسلب راحه وسهر والنوم مسلوب

وكل موعد فرح وعياد وياه

وأشوف الكون مني يروح مكلوب

كل هذا وتكول  نعوف ونساه

لا ايوب انا ولا انه يعكوب

══━━━━✥◈✥━━━━══

ريـــمه :: اليحرگ گلبي على اهلي احرگ گلبه على تعبه

رنـــه :: حجتها ونترت ايدها من ايده بقوة مبتعده، فاتحه عيني بصدمة وكلبي يدك بقوة ما مصدكة عيوني، مشت تركض باتجاه البيت وانه احس كل ذرة بجسمي ترجف وصوت طــروادة مخنوگ همس

-رنـــه ياهي هايه؟

-ريـــمه بت عمي شاكر.

حرك راسه موافق مسح وجهه والتفت عليَّ.

-فـــدوه ردي للبيت لا تعلين گـــلبي.

مسحت دموعي گـــلبي يوجعني واحجي بغصة

-خوش بس ديربالك على روحلك عليك العباس.

هز راسه اي يعاينلي من رجعت ودموعي على خدي امشي وأتعثر، دفعت باب الحوش وطبيت صاروا بوجهي حسين وزهره صاعدين على گن الدجاج ويعاينون للگيعان، ذبيت عبايتي واجيت يمهم.

رفعت راسي اعاين ودموعي مثل الجمر على خدي، صارت جنها الدنيا غروب مو ليل ، النار وجت بكل الگيعان وتمشي بسرعة

سمعنه صوت تليفون طــروادة يدك ركض حسين جابه اخذته من ايده مكتوب "أختي1"

فتحت خط بسرعة

-الو.

عــفراء:: الوو

بس سمعت صوتها بجيت اشهك واحجي بسرعة

-حركوا گيعانه عفره، حرگوها كلها.

-طــروادة وينه ولج رنـــه اخوج وين؟

-راح للگاع.

تحجي وياي وتبجي واسمعها تگل العمتها

عــفراء:: ياهو الياخذني عمه، منذر راح ما تاناني.

وعمتها ما ادري شنو حاجتها رجعت عفراء كالتلي

-رنـــه كل ما اخابرج ردي.

-خوش.

سديت التلفون ورجعت اعاين بحرگة گلب.

وهـــب :: گلبنه وي الگاع يحترك ، وكفت أكح واتلفت ولدنا يتراكضون، ولد عمي شاكر وولد عمي خليل وصيهد ووادم السلف كلها فزعت، بس النار اقوه من الكل ما كدرنالها مشت بالزرع والهوه ساعدها.

صاح صــيهد

-لا تصب عليها ماي

عاينت الايدي المحتركة  ما مهتم، مشيت للشارع  وكفت عيني على طــروادة يا صبر گلبك.

واكف على صفحة يعاين للنار وجكارته بأيده، لا تحرك ولا حاول ويانه يطفيها، بارد بس بگلبه نار.

صاحوا علي الولد وركضت وياهم ماضل شي ما سويناه نريد النار تخمد ماكو، سلطان وسليم وسجاد وعبود ركضوا بعيد مسافة وكطعوها بتراب كبل لا النار توصل حموا وصلة من الگاع ما يطلع منها مليون، والاحترك بيه خمسين مليون.

هب هوه قوي وصار همنه نحمي گيعان الوادم وما توصلها النار

للفجر احنه نفتر داير ماداير الگاع وطرواده على فد وكفه حتى منذر حجه وياه وما رد بس ساكت، الجكارة ما طاحت من ايده، الگاع صارت سوده ومچانات بيها جمر، درت عيّني الصيهد وللولد مهدود حيلنه، ســليم وسلطان گعدوا على حيلهم بحيرة وصيهد خازرهم مصخم وحاله يهد الحيل، گاله سلطان.

سلطان:: عبالك انا الحركتها ها؟ هذا انتَ صــيهد وشكيت بينه جا بويه طــروادة شيگول علينه.

ســليم :: صــيهد هذا اخونه نوكف بوجهه ابوي وجدي علموده، نجي نحرگ گاعه؟ تسودنت انتَ؟

صــيهد :: يشهد الحسين الاعرفنه اله ايد بالسالفة بس الله يخلصه من ايدي.

وهـــب ::منذر وميثم جروا صــيهد يردونه بس يسكت وسليم وسلطان تسودنوا، مشينه الطرواده وبس شافنه جايينه عافنه وراح للبيت.

رنـــه ::طول الليل ماطبيت للبيت بس نومت حسين وزهره وضليت كاعده بالحوش واعاين للگاع للفجر يله غفيت وانه گاعده وفزيت على دفعة باب الحوش القوية وصوت طــروادة من صاح بغضب

-رنـــه.

وكفت امسح بعيوني وهو عيونه حمر ودمه محترك مشيت بخطوات ترجف يمه لزمني من اجتافي بقوة ويحجي بغضب

-ريـــمه تجيبين شعرهاااااا بأيدج.

لزمت بأيده موجوعه  وهو ماحاس على روحه صاح

-اذا ما خليتي دمها بطولها اموتنج.

مسحت دموعي اهز راسي اي وكلبي ممرود عليه طبيت للبيت ركض اجيب العبايه وهو كعد بالگاع على حيله فاتح عيونه حيل وايده ترجف، لمحت سجينته ام الياي على التلفزون مخليها جريتها بأيدي وطلعت من بيتنه شفت مرتضى وأمه صعدوا بالسيارة، رجعت طبيت للحوش لمن حركت السيآرة وراحوا طلعت

دفعت باب الحوش وطبيت صارت بوجهي فرح مرة مرتضى صاحت

-هاه؟

مشيت ساكته اريد اطب للبيت گالت.

-موهناه عمتي راحوا يشوفون عمي شتردين؟

ما اهتميت طبيت للبيت وهيه وراي دفعت باب غرفة ريـــمه، كاعده بالزاويه وحاضنه رجليها الصدرها، وهاجر نايمه على جهه، بس شافتني مسحت دموعها ووكفت.

-رنـــه!

-ليش حرگتي گاعنه؟

رفعت راسها تعاين الفرح الواكفه بالباب، اجت يمي بسرعة لزمت ايدي تريد تحجي، طكيتها اصيح

-ليش ليش جلبه ليششش حركتي گلوبنه مو بس گاعنه.

فقدت اطكها بكل حيلي كل ما اتذكر عيون اخوي وحرگة گلبه على تعبه وحجايتها الترن بأذني من گالتله احرك گلبك على تعبك، ملختها وهي مصدومه بيه ماترفع ايدها وتردني، ريـــمه صديقة عمــري وروحي ريـــمه رغم بيني وبينها أربع اسنين هي اقرب وحده الي.

فزت هاجر تبجي وتجر بيه متخبله، جرتها فرح من عدي واسمعها تصيح

فرح:: حييل.

وريمه تدفعني وتصيح

-رنـــه رنـــه ولج ريـــمه انه تمدين ايدج عليَّ؟

وشما اطكها ماترفع ايدها وتردها بس تكض ايدي وتصيح بصدمة ما مصدكة انه الامد ايدي عليها ياما وياما ضفرت شعرها الحلو بأيدي وبنفس الإيد اليوم كصيت ضفيرتها من النص صرخت مصدومة والدم ينزل من خشمها، وكفت ابجي والضفيرة بأيدي وهي ممده بالگاع تصرخ

التفتت اريد اطلع فرح بعدها واكفه بالباب وكاضه هاجر والاء مرة سلطان نازله واكفه وره فرح يعاينن متشمتات بريمه.

طلعت من بيتهم ارجف وابجي بحرگة فتحت باب حوشنه،طــروادة گاعد ومنزل راسه عبالك هموم الدنيا كلها على اجتافه، مسحت دموعي وشمرت ضفريتها يم رجله هيه والسجينة، شالها بأيده ورفع راسه عاين الايدي والدم البيها هز راسه راضي وطب للبيت.

كعدت لامه رجليه الصدري ضميت وجهي بأيدي وبجيت اخوي خسر گاعه وتعبه وانه خسرت صاحبتي.

وهـــب :: مشينه كلنه البيت طــروادة ولد عمي شاكر يردون يحاجونه قريت الخوف بعيونهم خاف يتهمهم بحرگة گاعه رغم همه اكثر اثنين ركضوا وتعبوا ســليم وسلطان بس حتى يطفون النار، دكينه باب الحوش طلعلنه حسين وطبينه للدوانيه

ضلينه واكفين متانين طــروادة لمن اجه يعاين لسلطان وسليم ساكت، گاله مــيثم.

مــيثم :: الله يعوض خويه لا تنقهر، انتَ قوي وسبع وتعرف هالزرع الله الرزقك بيه والله الاخذه يجوز بيها صالح وخير الك، يجوز خسارتك چانت جايه على شي اعز من الگيعان وطاحت بالگاع، بعد روحـــي خويه لا تقهر بروحك وتشل حالنه خل ايمانك بالله چبير والرزق ما ينگطع والله يعوض بالاحسن.

هز راسه طــروادة ساكت گاله سلطان.

سلطان:: طــروادة بيش احلفلك حرگة گاعك مالنه بيها،

وحگ لوعة گلبي الانتَ شاهد عليها لا انا ولا اخوتي النه طرف بحرگة الگاع ولا نسويها لو على گطع النحر.

ســليم :: ما نلومك لو شكيت بينه حگگ، بس وبوفاضل ركضتنه على گاعك جن گاعنه المحتركه، ولو مو تسجن ابوي لو تسجن اهلنه كلهم ما نحرگ تعبك خاب انتَ اخونه يا يوم عادينك ابن عمنه وعلي خنگتني عيونك من تعاينلنه وعبالك احنه الحاركينها.

ابتسملهم طــروادة بتعب ابتسامة جذاب متحسر گالهم

طــروادة:: أدري بيكم ما متاني تجون تبررون اعارفكم.

مسحوا وجهم براحة وصيهد عينه على طــروادة بشكّ كاشفه گالهم

طــروادة :: بس اريدن انصحكم بشغلة ولو تدخل من يمي بس دامكم تعدوني اخوكم امون!

نعاين ساكتين وهوه عينه السلطان وسليم الواكفين گدامه، خله ايده على جتف سلطان وگاله

طــروادة :: من تصيّر عركة شي مناه مناه، انتم اكعدوا بالبيت واخواتكم تحلها، اختك هيه زلمتكم مايحتاج انتم تسوون شي بعد.

دفعه سلطان خازره

سلطان:: شكاعد تحجي ولك ؟

صــيهد:: طــروادة شلك بهالحجي شني السالفة.

طــروادة :: ماحاجي باطل، سلطان اختك الحركت گاعي اختك تگلي احرك گلبك على تعبك مثل ما حركت گلبي على اهلي، اختك صايره زلمه ضاربتكم عرض الحايط وتنتقم الابوها.

وهـــب :: صــيهد جر طــروادة بس يريده يسكت وهذول تسودنوا شلون حجّه باختهم گالهم

طــروادة :: وروح شامل هيه الحرگتها.

فتحوا عينهم مصدومين وركضوا أثنينهم لبيتهم.

ريـــمه :: وخرت راسي من حضن هاجر، مدت ايدها تمسح على شعري ومسحت دموعي تأشري وتسأل ليش رنـــه طكتج

-حركت گاع اخوها.

فتحت عينها وخلت ايدها على حلكها دنكت عيني ساكته ودموعي على خدي، جريت الشال خليته على راسي وانفتح الباب طبت أمي مبتسمه كعدت كدامي على اركبها وجرت راسي الها باستني وهي تكول

- برد گلبي من شفت الگاع صايره رماد وابوج بلغني احبج من راسج.

دفعت ايدها مني وهاجر مدت ايدها تحاجيها وتشرحلها گالتلي

-شتكول اختج شني؟

اندفع وراها الباب وطبوا سلطان وسليم متخبلين وكفت خايفه وامي واكفه بوجهم جراني سلطان من وره امي فاتح عينه حيل ويحجي من بين اسنانه

سلطان :: شمسوويه ريـــمه ؟؟ شمسووووويه؟

دنكت ساكته وهم يعتون بيه ســليم يريد يطكني متخبل وسلطان يدفعه يريدني احجي، امي تغلط عليهم وتفرغ بيه من ايدهم

ســليم :: ولج صلفه والحسين ارميج ولج شگالج گلبج شلون حركتي گاعه خرب اهلج شلون رحتي للگيعان وحركتيها.

ميلاد :: انه وديتهاااا وخر ايدك منها.

فتح عينه سلطان مصدوم عاف ايدي بس دار على امي جراني ســليم ورفع ايده يطكني حميت وجهي بأيدي وهوه متخبل يردون بس يجرونه مني سلطان وامي ابتعد يرجف ويصيح

ســليم :: اموتنج ريـــمه والله، حركتي گلوبنه مو گلب طــروادة.

طكته امي على وجهه تصيح وجرت الدشداشة من صدرها شهكت ورفعت ايدها للسما تدعي عليه بالمرض ركضت ابجي واسد بحلكها

-لا تدعييين لا تدعين مالج شغل.

ســليم :: وخررري عوفيها تدعي عوووفيهااا، ادعي ادعي الله يستجابلج ان شاءالله ويحرك گلبج علينه مثل ما حركتن گلب طــروادة.

حجاها وطلع من الغرفة بعصبية جراني سلطان من زنديّ بقوة خازرني

-ضحكت عليج امي ترست گلبج بحقدها.

دفعني وطلع وامي تغلط عليهم وتسبهم دارت عينها وشهكت من شافت الشال طايح ، وشعري الچان النص رجليه صاير النص ظهري، مدت أيدها الراسي متخبله

-كاصه شعرررج؟

هستوني احاجيها اريد اكلها اي صاحت مرة مرتضى من الباب

فرح :: عمه، رنـــه اجت الصبح كتلت ريـــمه وكصت شعرها، جنها مسودنه نريد نفرغها منها ماكو.

حجتها وامي تسودنت عفتها وطلعت طبيت للدوانيه وقفلتها بس كون ما اسمع دعاويها على الناس.

رنـــه :: طلعوا الولد من بيتنا، واجه طــروادة للهول كعد يم حسين وزهره رفع عينه الي يسأل

-اكو چاي؟

-اي جاي اسوي ريوك.

سكت مدنك رديت للمطبخ كملت الريوك واخذته حطيت الصينية گدامهم دناها على حسين وزهره وجر صينية الچاي يمه اخذ كلاص چاي يشرب ساكت شويه وگال

-عبود وينه؟

-سبح وراح وي سجاد للمستشفى، رجل سجاد محتركه شويه

دك تليفونه ولمحتها عفراء جاوبها وكام وكف سده وگال

-اختج اجت.

طلعلها وانه كمت وكفت بباب الحوش طبت هيه، وطرواده ضل يم منذر شبكتها بقوة

-شلونج

عيونها مورمه وخرت منها واجوها حسين وزهره يركضون الحضنها، طبينه جوه ذبت عبايتها تسأل

-ماعرفتوا ياهو الحركها

هزيت راسي اي وحجيتلها بسرعة گبل ما يطب طــروادة، خلت ايدها على حلكها مصدومة، وكفت من طب طــروادة مدت ايدها سلمت عليه

عــفراء:: رايحه روحك عليمن، الزرع انتَ السويته لو هوه السواك؟ فـــدوه الك.

كعد بمچانه يشرب چاي ساكت وهيه تحجي وياه گالتله

عــفراء::كهلان عليك بروّح آهلي كافيك لا تضل تحرك دمك لا يصير بيك شي.

طــروادة :: خاب خويه عليمن تضحكين يا مايحترك دمي ، دونم المحترك دونمين واكولن يولن وفدوه.

عــفراء:: چا تمووووت روحك حاجيني. فـــدوه كله فـــدوه والله المهم سلامتكم كله يتعوض

سكت طــروادة جر رجله ثانيها وشعل جكارته يدخن ميت من القهر وعفراء مكابلته گالها

طــروادة:: ولج شيتعوض چا وتعبي؟ چم شهر صارلي انا محروم من نومة الليل، من اشوفن واحد نايم بالليل أتحسر واروحن اكضي الليل انطر على الزرع من الخنزير.

يكضي الشتا انا كاتلني البرد بالماي والمطر وانتِ تشهدين مو اجيج ما اكدر احرك اصابعي منّ البروده ؟

عــفراء:: سوده بوجهي كون، يابعد حيلي ميخالف جا شبيدك من تحرك گلبك يرجع؟ فوك هالضيم تخسر صحتك؟

طــروادة :: انا الهاضمتني هالشيطانه هاي بت ميلاد فرخه هلكدوتها حركت تعب أشهر وتكلي احرك كلبك على تعبك، سهله سهله.

هز راسه متحلف وجر اخر نفس من الجكارة طفاها وفتح باكيته طلع غيرها شعلها تحسرت عــفراء حايره گالتله

عــفراء:: ختولي هاي أمها تدفعها وكلنه ندري ريـــمه تموت على ابوها منهد ما طلعها من النار تتسودن عليه، وامها مناه تترس براسها ضحكت عليها.

طــروادة :: لاا بالحسين ولا ختولي اذا مابجيتها دم انا مو كهلان اذا ما حرگت گلبها وگلب امها معتب.

صاحت عفراء ماراضيه

- تخلي راسك براسها شني؟ زحمه طروادة انتَ الخوش زلمه تعاند بت مابأيدها كلّ حيلة؟ انتَ عاقل وهاي مو سوالفك فـــدوه اروحنلك لا تحطها ببالك ختولي

طــروادة :: اسكتي واليرحم اهلج هسه لو ابوي يرد من گبره ويگلي انسى السوته ريـــمه ما آنسى ، وانا لا خوش زلمه ولا عاقل، مسودن، مو جنت اتكفى الشر هسه ادوره دواره.

حجاها وگام طب الغرفته وعفراء ميته من القهر، شالت الصينية طبت للمطبخ وانه واكفه يمها احجيلها واسألها

-تباتين؟

-لا بالليل يجي عليَّ منذر.

حجت وغسلت المواعين ما راضيه عليَّ لان كصيت شعر ريـــمه

-طــروادة گالي، انتِ لو تشوفين شلون اجه محروك گلبه حتى راس ريـــمه تجيبينه اله.

عــفراء:: سوده عليه، انه البارحة تسودنت ضليت الطم عبالي الولد حركوها گلت راح يتكاتلون راحت روحـــي.

- لا همه الولد كلهم البارحه يركضون يردون يطفونها، عبود يگول سجاد رجله محتركه ، ووهب ايده عاثر وطايح على النار زين وما احترك وجهه.

تحسرت بقهر تفترّ بالبيت وتعدل وسوت الغده، وطرواده نام

طلعت للحوش ترشه وأنه وأكفه يمها اسولف اندفع باب الحوش وطفت مرة عمي شاكر،ميلاد" واجت هاده عليَّ

ميلاد:: ولج رنـــه الوصخه.

رنـــه :: انتِ الوصخه.

رجعت ليورا وعفراء كضتها من عبايتها خانكتها وتدفع بيها وهيه بس تريد توصلني صاحت وتأشر بأديها مناه ومنااه بحركه وغضب

ميلاد:: يابويه من اكضج اشرب من دمج ولج تطكين ررريمه يمممه الا املخح.

دفعتها عفراء حيل وتحجي من بين اسنانها

عــفراء:: اششش صوتج لا تعلينه يمنه، احنه مانخاف لا من صوتج العالي ولا منّ سوالفج، غير اگطع ايدج لو مديتيها على رنـــه

حاجتها وميلاد تريد تلطم رافعه اديها ليفوك تهزهن وتصيح

- وووولج كصت شعرررر ريمممممه ياا بويه لو اكضنج يا رنـــه.

دفعتها عفراء حيل وخرت من يمها وصاحت

-يله اوصلي الرنه، يله طكيها، وانه هم اروحن اسولف الريمه واذكرها بكلشي خليتيها تسووويه. اذا هيه جاهل ونست انه ما ناسيه واذكرهن وحده وحده.

فتحت عينها ميلاد بصدمة وخوف ردت ليورا خازره عفراء، وعفراء هزت راسها اي وهي تكلها

عــفراء:: كلشي ادري انه لا تشوفيني ساكته بس حتى ما اظلم مظلوم، لا تدوسين ببطني علمود ما اطلعهن كلهن.

ضلت ميلاد فاتحة عينها بغضب ودارت وجها طلعت من حوشنه شارده ، راحت وراها عفراء سدت باب الحوش وردت فتحت الحنفية وكضت الصونده تكمل رش الحوش، وكفت احجي وياها

-شنو تكليلها احجي الريمه واذكرها ما فهمت.

-هيج اجذب عليها حتى تخاف وما تستكفاج من تضلين وحدج.

-والحسين جذابه انتِ تعارفين شغلات وماتحجيلي.

-امشي مني رنـــه لا انكعج

حجتها ورشت عليَّ ماشي شويه، طبيت للبيت مقهوره وضلت تاكل بگلبي شنو الهددت بيه ميلاد.

"""""""

ندى:: مره وحده اجه سوه القفل وبعد ما بين بس من اكعد الكاه مخليلي اكل بالهول ، اسمع هوستهم بس ما فاهمه شي ولا اكو اي فتحة اكدر اباوع منها، للصبح اني فاتحة باب الغرفة وكاعده بصفة مختنگه وگلبي مقبوض، رفعت راسي من سمعت صوت قفل الباب انفتح، بقيت بمكاني كاعده بس جريت الدشداشة غطيت بيها رجليّه ورفعت راسي بسرعة من دخل باوعلي همس

وهـــب :: السلام عليكم.

-وعليكم السلام

حجيتها اباوع الوجه والايده كزبر جسمي من شفتها، مشه بلا مايحجي طب للحماح مقابيلي الباب مفتوح اباوعله غسل ايده موجوع غسل وجهه ورجليه ، ورفع ايده يفتح دكم قميصة باوعلي بسرعة دنكت عيني گال

-الي اهدوم معلگات يمج اطينياهن.

ضليت كاعده مرتبكه سد باب الحمام كمت بسرعة شلت ملابسه من التعلاگه ومشيت ايدي ترجف وكفت يم باب الحمام اعصر بالملابس اريده يفتح الباب همست

-وهـــب.

وكف صوت الماي وفتح الباب مديت ايدي واني دايره وجهي الغير جهه اخذهن من عندي ايده طخت بأيدي جريتها بسرعة ومشيت للغرفة،اباوعلها خاف بيها شي غلط خاف يگول خربطت بيتي ومكاني.

شويه وسمعت باب الحمام انفتح ثواني ودك باب الغرفة

-ندى.

-تفضل.

فتح الباب ودخل شعره مبلل باوعلي گاعده على جهه، وبالجهه الثانية يم الحايط فراشي مرتب ببساطة وأغراضي مخليتهم سوا ما مخليه اي هوسه بالغرفة، رجع باوعلي گال

-جوعانه؟

هزيت راسي لا

-جان عندي جبن وخبز اكلت.

هز راسه خوش ويعاين لفراشي، تحمحمت، التفتلي

-صاير شي؟ البارحة سمعت اصواتكم وهوسه.

-اي والله گاع طــروادة ابن عمي احتركت وللصبح احنه نطفي بيها.

- خطيه الله يعوضه، شحركها؟

-النار حركتها.

حجاها وباوع الايده المحتركه سكتت لان فشلني رفع راسه يطكطك برگبته وهمس

-ترضين انامن بفراشج؟ اريد بس اغمض عيني مابيه اروحن هناك يتعاركون ويكعدوني.

هزيت راسي اي

-تفضل فراشك هوه اصلاً.

مشه للفراش شال الغطا وضحك دار علي

-مغطيه المخده بشالج، وحاطه جرجف على الفراش، خاف اذا انامن عليهن هسه بعد تلعب روحج ما تنامين بيهن.

-لا مو هيج بس شالي ترف والجرجف هم خليتهن لهذا السبب مو لان تلعب نفسي.

هز راسه مبتسم تمدد بفراشي وجر الغطا عليه عينه عليّ من شافني اباوعله جرّ الغطا يم وجهه غمض عينه وجر نفس بقوة، بلعت ريك مقشعر جسمي، رجع فتح عينه يباوعلي دنكت عيني گـــلبي يدك بقوة

ما باوعتله بعد الحد ما حسيته نام درت عيني آله فعلاً نايم نفسه ثگيل وايده المحتركه مادها بصفه وكل شويه تنز ، فز گلبي من سمعت باب المشتمل اندك وراها انفتح، فتحت باب الغرفة على كيف اباوع ماعرفه منو ظهره علي ووجه للباب يحجي بهدوء

-وهـــب، وهـــب.

درت عيني الوهب نايم والصوت عرفته صوت صــيهد رجع گال

-مرة اخوي، يبنيه.

اخذت عبايتي بسرعة خليتها على راسي وفتحت باب الغرفة طلعت

-ها خويه.

دار علي وبلا ما يرفع راسه گال

-وهـــب هناه؟

سكتت مرتبكه هسه حسباله بينه شي شلون اكله لا همست

-اي نايم.

حط الصينية البأيده بالگاع وابد مارفع عينه علي گال

-هذن الكم، وهاي عصارة ولفاف ايده محتركه هوه خل يحط منها.

حجاها وطلع قفل الباب وراه شلت الصينية والعصارة دخلت للغرفة خليت الاكل على صفحة واخذت العلاكه مال العلاج فتحتها بيها شاش وتعقيم وعصارة حروق، مشيت كعدت كدام وهـــب اباوع الايده بحيره همست

-وهـــب.

وهو صوت نفسه يخرش، فتحت التعقيم خليت على الشاش وخليتها على ايده فز بسرعة يباوعلي عيونه حمر، رجعت ليورا مرتبكه، رجع راسه للمخده غمض عينه كوه يحجي.

-على كيف ندى.

هزيت راسي اي رجعت انظف ايده بالشاش، خليت مرهم الحروق على اصابعي ومشيته على باطن ايده وكل ما يوصل ايدي الحرك ينز ويزفر نفس بوجع، كملتها ولفيتها بالشاش، همست

-كملت.

انگلب لجهتي مغمض زفر نفس وحجه بخفوت

-شكراً نداوي.

حجاها وضم وجهه بالمخده هستوه ينام لميت الاغراض اريد اكوم من يمه فتحت عيني وكلبي دك حيل من سمعت صوته الخافت وهو يهمس

-ريحتج حلوه.

درت عليه بسرعة مرتبكه مغمض عيونه ويحرك وجهه على المخده

ابتعدت من يمه اباوعله رجع نام، عيني عليه وكل ما اتذكر حجايته يقشعر جسمي، لزمت الگلاده بأيدي گـــلبي يدك حييل

ما بقى شي ما بقى شي واوصل، بست الگلاده ودمعتي على خدي.

جريت مخده خليتها بالجهه المقابل وهـــب تمددت رغم مانعسانه بس ما عندي شي اسويه، عيّني عيه وجهه مقابيلي وهو نايم شكله أكثر برائة وهادئ، يقيت أراقبه منتظره يتحرك حتى اكعد عدل وبلا ما احس نمت .

واحس بروحي اشم دخان وريحة جكاير، فتحت عيني صار بوجهي  شهكت وكعدت عدل بسرعة اعدل بحجابي واسحب بعيايتي عليَّ نظرته إلي بغضب وكاعد قريب مني حيل

رفعت عيني اله جر نفس من الجكارة مضيك عينه هز راسه يسأل وباوع لعيوني

-منو رضا؟

بلعت ريك ساكته وكلبي صوت دكته مسموع، دنكت راسي امسح بوجهي، نفخ دخان الجكارة علي ورجع كرر سؤاله

-منو رضا؟

رفعت عيني اله اهز راسي لا

-ما اعرف.

-انا جاي اخذ راسج؟ بس ما احبن واحد يجذب علي سولفيلي ياهو رضا؟

مسحت دموعي بسرعة صوتي يرجف

-ما ااااعرف كتلك ما اعرف.

-جذااابه، جذابه كل ما نمتي صحتي رضا، ليش دوم تهلوسين بأسمه.

لميت رجليه الصدري ابجي

-ما اعرررف ما اعرف مالك دخل بيه.

-ااالي ونص.

رفعت راسي اله يبارع بغضب خازرني

وهـــب :: لا تجربين تجذبين عليَّ انا مالي شغل بيج ساعة التحجين الصدك وما تجذبين، بس مال تجذبين وتغشيني بشي ما اطلعين مناااه فهمتي !!!

خاف عبالج تغشيني واسفرج على ابو الاختج وانتِ مناك ترحين تدكين دروب ترا حضج أطيحه اذا طلعت سالفتج جذب وسفرج علمود ولد.

خزرته متخبله

-احتررررم نفسك، أشرف منك اني، تخسي تحجي وياي هيج، مو لان ساعدتني تريد تذلني وتغلط براحتك اني هم اعرف أغلط واطلعك اسقط انسان بس افكر مو مثل حضرتك كل شوية متهمني بسالفة.

سكت بغضب درت وجهي منه وكمت طلعت من الغرفه كعدت بالحمام لزمت الگلاده وبجيت، شويه ودك الباب.

-ندى.

بقيت ساكته امسح بدموعي رجع گال

-إنّا اعتذر مو نيتي اتهمج بشي بس لان نعادت هالسالفة وهالاسم خفت عليج خفت خاف واحد ضاحك عليج حتى تسافرين علموده.

-تشوفني حال وحده تصاحب؟

-لا بس نغثيت شمعنى تهلوسين بهذا الاسم؟

سكتت ميته من آلقهر گال

-اطلعي يله تعاي خل احجي وياج.

مسحت وجهي وطلعت يباوعلي بابتسامه

-جا بس انتِ تزعلين بالحمام ؟

-وين اروح ماكو غير مكان.

-تعاي بله اكعدي.

طبيت للغرفة كعدت بمكاني وهو بقى واكف يم الباب يباعولي گال

-شبيج انتِ شو ضايجة وبسرعة تگبين.

دنكت الغصه تصعد وتنزل ببلعومي گال

-احجي ندى سولفيلي

-صارلي كم شهر محبوسه هنا ضوه الشمس ما اشوفه تصدك اذا اكلك اشتاقيت توصلني اشعة شمس اشتاقيت اشوف شي غير الحياطين.

احس راح يصير بيه توحد گد ما جاي اختنك.

حجيتها وشهكت ابجي مختنكه حييل

-تعاي

حجاها ومشه، مسحت دموعي ومشيت وراه طب للمطبخ شلع الغطه من الشباك ورجع جاب بسامير وجاكوج فتح الشباك دك بسمار ورجّع سداها كضاها البسمار ما نسدت حيل، دك وراها بسمار ثاني حتى ما تنفتح اكثر ، ورجع دك الغطا من جديد طبت الشمس للمطبخ من زاويه صغيره گال

-تعاي اوكفي هناه.

وكفت وصارت الشمس على وجهي غمضت عيني وزفرت نفّس براحة، گال.

-عاينــي گدامج شجر وماي.

فتحت عيني وتقربت أكثر للشباك مقابيلي ساكيه وعلى طولها أشجار من الجهتين وبالساگيه بطوط يلعبن ابتسمت

-الله، شلون حلوات.

احجي بحماس واباوعلهن درت عيني اله اريد احاجيه لكيته مبتسم صافن بيه راحت ابتسامتي همس

-شنهنه الحلوات؟

-البطات.

-انتِ احلى بطه.

فتحت عيني بصدمة مدنكه ابتعدت من يم الشباك تحمحم رجه غطاها وگال

-بس الظهريه افتحيها عاينــي منها ولا تجين كلشي يمها من بعيد حتى خافن واحد يمر مناه ما يشوفج.

هزيت راسي اي عفته ومشيت للغرفه سديت الباب گـــلبي يدك حيل سمعته من طلع وطول اليوم ماكدرت آنسى كلماته.

"""""

مــاسه :: متحملين كلشي وساكتين بس علمود المدرسه، بالاخص جــويريه شافت الويل وكل هذا ما تحجي ابد بس حتى محد يگلها تبطلين من المدرسه، مرات نطفي الضوه حتى ننام تشعل شمعه وتضل كاعده تدرس ابقى اباوعلها لحد ما كملت طفت الشمعه وتمددت بفراشها

-جــويريه

-هممم

-شنو ناويه تصيرين من تكملين دراسه.

-اي شي يطلعني من هالقريه.

تحسرت مغمضه عيني

-اني هم اتمنى بس اطلع احسها سجن مو قريه.

سكتت ونمنا كعدت الصبح ركض بين البيت والريوك حتى الحك ابدل ونروح للمدرسه ما ضل شي للأمتحانات، وديت الريوك الجدي وابوي صاح

شعلان:: صارلجن ساعة غبرااات مابيجن خير.

عفته ورجعت ركض للمطبخ الامي اخذت منها صينية ريوك جده وديتها الها ورجعت گالت امي

-بساع تعاي اكليلج لگمه وروحي بدلي

-ما اريدن يمه ما اريدن سمموا يومي من الصباحيات.

حجيتها مختنكه ومشيت اريد اصعد لكيت جدي خازرني بلعت ريك خايفه خاف سمعني صعدت فوك وي البنات بــدور وجويريه بدلت. ونزلنه جوه متانين الرجال يجي گال ابوي

-يله اجه الحجي تعالن.

مشينه نريد نطلع وياه صاح جدي

شعلان:: ردي ولج انتِ بعد ما ترحين للمدرسه.

بلعت ريك گـــلبي يدك بقوة وخوف اباوعله ساكته وبدور وجويريه وكفن خايفات گاله ابوي

وليد :: ها حجي شمسويه گلي عليها.

شعلان:: تدعي علينه هالجلبه خلها تولي ماتروح بعد للمدرسه.

تلفتت بخوف اريد ابوي يدافعلي وهو ماصدك اجه بعصبية جر الجنطه من جتفي شمرها وكضني من اذاني

وليد :: ووولج تدعين عليمن؟

جلبت بأيده ابجي

-والله ماداعيه على احد.

رفع ايده بكل قوة طكاني راشدي احس اشتعلت بخدي نار وجدي يغلط ويسب دفعني ابوي على المطبخ وصاح على البنات اطلعن بجيت اباوعلهن جــويريه تباوعلي الدموع ترسن عينها، طلعهن ابوي گالتله امي

-مادعت على احد مــاسه عمي.

سباها متحلف جريتها من ايدها

-اسكتي يمه اروحنلج فـــدوه اسكتي لا يقهرونج.

رجع ابوي للبيت يصيح ويغلط طب للمطبخ گال

-امشي بدلي اهدومج وانزلي هسه تردين تسوين ريوك الجدج.

ام صــيهد :: كون اشك بطني واردهن ردوود ولا مخلفتهن الضيمكمممم.

حجتها وبجت وابوي نزل بالغلط والسب عليها مسحت دموعها اتسول

-لا تبجين يمه هاي هيه اسكتي.

مشيت بسرعة صعدت بدلت دموعي على خدي ونزلت للمطبخ امي طبت الغرفتها تبجي، اريد اسوي الجدي ريوك من جديد واحس بروحي فاقده جلبت بالسنك ابجي بحركة واخنك بصوتي

ألتفتت على فتحة باب المطبخ وكفت بسرعة اشهك وامسح بدموعي سد الباب وتقدم يمي، فتحت الماي غسلت وجهي وايدي ترجف

صــيهد:: عاينيلي.

درت وجهي اله بس الغصه مبينه بلا ما احجي اريد اسيطر واخفيها ما اكدر غصب عني اناشغ، مد ايده على خدي أثر اصابع ابوي مطبع بوجهي

-ياهو طاگج؟

رجفت شفتي ونزلن دموعي صاح بغضب

-ياهو ويااااج.

حجيت بصوت يرجف اشهك

-ماخلوني اروحن للمدرسه وابوي طكني لان جدي گاله تدعي علينه وانه والله ما داعيه.

جر ايده مشالهم وهو يصيح

-خرب اهل اهلهممم.

ركضت وراه خايفه وامي طلعت من الغرفه تريد تكضه وهو تخبل دفر باب الدوانيه يصيح

صــيهد :: انتَ ابووو خرررب انتّ ابو شلون تمد ايدك عليهااااا.

وليد :: مالك شغل مااالك شغل.

صــيهد:: يشهد الحسين افجررررر البيت بيكم، شني التريدووونه منهن.

ختلت على صفحة ابجي وهوه يغلط ويفشر عليهم وجدي وابوي يردونه، طب وهـــب يركض كضاه هوّه وآمي صاح عليه جدي

شعلان:: ماكو مدرسه بعد كافي شتردونها شتصير.

صــيهد:: يااهي مالتك انتَ؟ مالك شغل بأخووواتي احرك آهل اهله اليتدخل بيهن يشهد الحسين افجرررركم.

هو يصيح وهم يصيحون ويلغطون دار عليه ابجي بخنك صاح

-امشييي بدلي بساع.

ضليت بمچاني ابجي وجدي يصيح

-ما تروح اثنينهن بالمدرسه وفلوس وصرف عليييمن.

صــيهد:: صارف عليهن من جيبك؟ بتعبي يدرسن بتعبي من كد ذراعي مو بخيرك.

شعلان:: خوش والله صارت عيشتهن بكدك، اذا تردها للمدرسه رد للمعامل اشتغل وكد عليهن.

صــيهد:: تخوفني بالمعامل انتَ ؟ ارد وشني يعني تهددني؟

غلط عليه جدي وابوي يريد يطكه دار علي خزرني ركضت بسرعة بدلت ودموعي على خدي نزلت اركض وهـــب واكفلي يم الدرج وهمه طاشين جراني من ايدي ومشينه. نطلع من المطبخ

وهـــب :: ابوي طاكج؟

هزيت راسي اي ورجعت ابجي مد ايده مسح عيوني متحسر وطلعت وياه لسيارة صــيهد جلبت بأيد وهـــب احجي بخوف

-صــيهد حيل صاير عصبي اخافن اروحن وياه.

-امشي شني السالفة حرك الدنيا علمودج وانتِ خايفه منه.

مشيت بخوف فتح الباب وهـــب صعدت گدام يمه لميت العبايه عليّ زين وحرك السيآرة صــيهد ساكت طلعنه من القريه بس يدخن، ولان مدرستنه بعيده تأخرنه ، وصلني يم المدرسه درت وجهي عليه مختنكه

-متأخره خاف ما يطببوني.

طفه السيارة ونزل، نزلت انه هم افتريت يمه شمر الجكاره بالگاع داس عليها وحجه

-امشي گدامي.

مشيت وهو وراي سلم على الحارس گاله

-اختي متأخره ماكو مشكلة ؟

-اي عادي بس انت حاجي الادارة.

هز راسه موافق طب وياي للمدرسه ضليت واكفه بباب الاداره وهوه دك الباب وطب، رفعت راسي شعبة وحده بعدها ما داخله الي هي شعبة جــويريه وباقي الصفوف كلها بالدرس الاول

شفتها مدنكه وتدرس بالساحة رفعت راسها وبس لمحتني ضحكت واجتني تركض هيه وبنات اثنين صاحباتنه لزمت ايدي بفرح

جــويريه :: اجيتي قبلوا؟

هزيت راسي اي

-صــيهد جابني.

عكدت حاجبها تسأل

-وشسوين يم الادارة؟

-طبّ يحاجيهم لان متأخره

بس حجيتها طلع صــيهد جرت ايدها جــويريه من ايدي تريد تبتعد چلبت بيها، البنات اثنينهم راحن على صفحة وكفّ كدامي مضيك عيونه

صــيهد:: عدج مصرف؟

هزيت راسي اي دار بؤبؤ عينه من عندي لجويريه اللي لازمتها من ايدها وهيه تعاين لبعيد گال

-امشن الصفجن يله.

جريت جويريه ومشيت اتلفت عليه طلع من المدرسه، شكد دافعلي صــيهد ورجعني للمدرسه بس ماكدرت انسى ابوي شلون طكاني كل شويه اتذكر ودموعي تنزل، لمن كملنه اليوم وردينه للبيت بس طبينه طلع جدي من الدوانيه صاح على جــويريه

شعلان:: بس هالسنه وتبطلين.

صعدت فوك ساكته وبدور تكلها

-لا تفكرين بيه بلكت هوه بس هالسنه ويموت

جــويريه :: مسحت وجهي متحسره، بدلنه وصلينه، نزلنه جوه وي خاله ام صــيهد نحضر الغده، ودخلت ميلاد اللوگيه جايبه جدر بيه مرگة سمج وتحجي بصوت عالي

ميلاد:: وين عمي الحجي

حجتها ودخلت للهول كاعد هوه وجده كالتلهم

-سويتلكم مرگة سمج الليله شاكر يطلع ووديت الولد جابولنه سمجات كلت خل اسوي العمامي منهن.

وفتحتلهم الجدر تراويهم، گالها

شعلان:: موش مرگه هاي عشتي عشتي.

ميلاد:: ياا، گليت السمجات على نار نااصيه گلت عمي يحبهن حمر وخليت المرگه ماصخه الكم

حجتها واجت للمطبخ خلت الجدر على الطباخ وحجت من وره خشمها وي ام صــيهد

ميلاد:: صبي العمامي مايردون غداج.

سكتت ام صــيهد تنضف بالخضره، وماسه تسوي زلاطه،رجعت طلعت ميلاد يمهم بالهول وتحجي وياهم، باوعت كلمن ملتهيه محد منتبهه الي اخذت قنديل الملح وصفيت وي الجدر فتحته على كيف اتلفت بخوف صبيت نص قنديل الملح بالمركه حركت الجدر گـــلبي يدك حيل شي بيه يكلي لا تسوين هيج وشي غصب عني يتصرف بشر. سديته وابتعدت يم السنك اغسل صحونه

طبت ميلاد للمطبخ درت وجهي خفت انكشف تمشي وتحجي

-عمي انه راح اصبلكم، الحبايب للوحده وغداهن ماينصب.

وجدي بس يريد واحد يدفعه گبل يحجي وهيه تكيف حضرت صينية وصبت اخذت خضره وزلاطه شالت الصينية ومشت الهم، بسرعة خليت دولكة ماي ترستها ورحت وراها گـــلبي احسه يدك بيلعومي گد ما خايفه بس ما ادري شنو الجابرني، وصلت يمهم خليت الدولكه يم جده وهمه هستوهم يمدون ايدهم للصينية

اكل جدي لگمه وتفلها صاح عليها

شعلان:: ايا بنية الچليب، اهاه تردين تموتينه انتِ.

ميلاد:: ياا عمي ياا شبيه والحسين شحلاتها.

حط ايده جوه الصينيه وگلبها عليها نكثت ملابسه محتركه وهوه يغلط وينعل باهلها وجده وياه تعاونه بالغلط وهيه تحلفلهم ما مخليه ملح گالها

شعلان:: ترديني اموووت حتى شاكر يورثني ابنية الچليب

رفعت راسها الي ابتسمتلها بمكر ومشيت بسرعة للمطبخ صاح على ام صــيهد

شعلان:: هاي الچلبه بعد ما اريدن تخلينها تطيني شي من طبخها.

شالت المواعين تبجي عافتهن بالمطبخ وباوعتلي بحقد أشرتلي بأيدها سهله، هزيت راسي خوش مبتسمه، طلعت من بيتنا صبينه الغدا الهم وحدهم واحنه أكلنه بالمطبخ بس خلصنه نضفنه وصعدنه فوك ندرس للعصر وصاحت علي جده نزلت بسرعة

رتبت الشال على راسي واني اباوعلها ما فاهمه، طلعت ام صــيهد من آلمطبخ بأيدها صينية چاي گالتله جده

-جيبيها جــويريه تاخذها.

عاينتلي ام صــيهد بقهر ساكته خلتها بأيدي ما فاهمه شي لازمه الصينية وكرصتني جده من زندي

-امشي كدامي اطي الجاي للنسوان وتكعدين حذاي ما تحجين شي.

-يا نسوان؟

جرتني بأيدها مشيت خايفه على الچاي ينگلب طبيت للدوانيه اربع نسوان كاعدات وميلاد وياهن دنكت انطيهن الچاي بلا ما احجي وهنه يضحكن ويحجن وي جده

-شو حتى ما تسلم.

ميلاد:: تستحي هههههه، هيه صوتها ما ينسمع.

رفعت راسي الصينية بأيدي فارغة گالت جده وهي تدك على مكان بصفها

-تعاي جذه تعاي.

مشيت كعدت يمها گلبي يدك حيل وهنه يحجن وميلاد تحجي شهكت بس فهمت ميلاد الجايبتهن خطابه باوعلي كلهن درت عيني الجده احجي

-اني ما اريد اتزوج

خزرتي وكرصتني بكل قوة من ايدي وهي تكول

-تكملين مدرسه عدهم.

حجتها والمره گالت

-ميخالف يمه يخليج تدرسين

-ما اريد اتزوج

سكتت وجده تكرص بيه وميلاد تبرر وتگلهن خايفه ومن كرهي الها صحت بوجها

-انجبي انتِ اذا تردّين تزوجين احد زوجي بناتج مو جايه عليه الحقوده اللوگيه.

فكن عينهن بصدمة وبيبي شالت ايدها الچبيره ضربتني راشدي ورجعت ضربتني على ظهري وتجر بيه طلعتني من الدوانيه الغرفتها وشالت عوجيتها تضرب وتغلط علي وعلى امي حميت روحـــي بأيدي

-ما اريد ما اريد.

- ضلي عدي امووتنج

تحجي وتضرب، دخلت ام صــيهد تركض تريد تحميني سوت بيها فلك بالغلط والسب جرتني مخليتني وره ظهرها

-ميلاد تدفعج عليها يتيمه الله أكبر يتيمه بسكم ظلم.

وبيبي تغلط عليها وتسب طلعتني من الغرفة كل ذرة بجسمي توجعني مجلبه بأم صــيهد اشهك بلا دموع عافتني يم الدرج وراحت للمطبخ من سمعت بابه يندك، اريد اكدر احرك رجليه من الوجع ماكو احس نار مشتعله بيهن، كعدت على ثاني بايه من الدرج گـــلبي يدك بقوة احسه يريد يطلع من بين ضلوعي وعيوني يحركني أتنفس بقوة واهدي بروحي.

سمعت صوت صــيهد يحجي وي امه بالمطبخ ويسأل على ماسه وبدور، كمت بسرعة صعدت فوك، ضميت روحـــي بفراشي وكوه اتنفس البنات كابلني خايفات واني ما اريد احجي اي شي

-مابيه شي جده ضربتني.

بــدور :: ليش طكتج شتريد؟

غمضت عيوني مختنكه ما اريد احجي اي شي، مــاسه فاهمتني اخذت بــدور ونزلت جوه، واني احس بروحي مثل الطير المذبوح وين اروح، شهكت ادعي على ابوي بغصه كلشي يصير بيه بسببه وكل وجع اعيشه هو السبب، مسحت دمعتي النزلت بسرعة

ساعة ورجعت اجتني مــاسه كالت انزلي جدي يسأ عليج،

نزلت جوه جده تباوعلي بحقد سويتله چاي واخذته للغرفه گبل ما ادخل شفته خله بأيدها فلوس شدة چبيرة مال خمسه وعشرينات

خلتها بالبوفيه وقفلتها ضمت المفتاح بالنضيده مال الفراشات .

رجعت بسرعة للمطبخ گلبي يدك حيل مــاسه سألت

-شكو؟

-ماكو شي اغير الچاي بيه دهن الاستكان.

سكتت تعجن، صبيت چاي من جديد ومشيت لكيتهم طالعين للهول خليت الصينية كدامهم صاحت جده

-يله ولي مناه الچلبه.

شعلان:: هاااه كليلي عليها شمسويه.

وجده خازرتني رجعت للمطبخ بس  احاول اخمد الافكار البراسي ما اريد اسوي هيج  اريد انسى شلون ضربتني وانسى من شفتها وين ضمت الفلوس، بس ما كدرت اقاوم هالافكار اكلت راسي، اشتغل وي مــاسه وتفكيري بعيد بالاخص لان ادري بيهم وره العشا يرحون يسلمون على ناس عدهم فاتحة

كملنه العشا، وبسرعة صعدت فوك فتحت كتبي اريد التهي ما اريد امشي بكيف افكاري احاول بكل صورة أتجنبهن ماكدرت، اجن مــاسه وبدور يمي يدرسن كمت من يمهم على اساس رايحه للحمام، نزلت وصوت دكات گلبي غالبني، ضوه الهول مطفي ومحد موجود بس ام صــيهد بغرفتها تسف مكناسه

مشيت بخطوات ترجف الغرفة جده دخلت وسديت الباب وراي ارجف كلي ركضت بسرعة اخذت المفتاح من مكانه فتحت بوفيتها طلعت الفلوس ضميتهن بصدري ايدي تهتز بقوة من الخوف قفلت البوفيه ورجعت المفتاح المكانه بسرعة طلعت من الغرفة شهكت من سمعت صوت باب المطبخ مفتوح  وينرگع عبالك  شخص طلع من عنده مستعجل، صعدت فوك ارجف باوعلي البنات بصدمة

-شبيج؟

بلعت ريك  هزيت راسي ماكو شي ولزمت كتابيّ  خايفه حيل والوم بروحي ساعة وساعة يسيطر علي الشر واكول خل احرك گلبها مثل ما ضربتني،

لمن نامن البنات كمت بسرعة طلعت خايفه حيل وأتلفت مخليه ايدي على صدري ولازمه الفلوس بخوف اتختل اعبر بيت بيت  طلعت للسياج الاخير كعدت على حيلي اتلفت  صوت سعف النخل من يحركه الهوه  يخوفني، زحت التراب من يم السياج بأثنين اديه احاول اسويلي مكان مثل الحفره،  نزلن دموعي كد ما خايفه اشهك ، خليت الفلوس ورجعت عليهن التراب بسرعة ، بلوكه صغيره بصفي جريتها خليتها فوكاهن .

شهكت ورفعت راسي للنخل من سمعت صوت البومه تنفست بقوة خايفة واعاين بين النخلات امسح بدموعي واركز كل حيلي ادور على الخيال بسن النخلات

شهكت بفزة  ملتفته من حسيت صوت خطوات بصفي كلش .

يتبع.......

أيلول💚

روايــــة أرض الـــــخناجر 🗡️

بقلمي الكاتبة ايـــلول .

تصويت وتعليق بين الفقرات لطفاً💚

══━━━━✥◈✥━━━━══

دكات گلبچ تنسمَع وتبچين سنطه بلا دمَع

══━━━━✥◈✥━━━━══

جــويريه:: انكتم صوتي بس فاتحة عيني على وسعها مصدوومه وكلبي حسيته طلع من مكانه، سواد عبارة عن كتلة سواد واكفه گدامي عيشتني الرعب بكل معانيه  انتهن رجليه وروحي نخلبت اريد اكدر انطق او اتحرك واشرد ماكو، جريت رجلي الصدري وضميت راسي بيت رجليه ابجي بخنك واتعوذ بس اريد يروح من يمي واردد بصوت يرجف وشهكه

"قل اعوذ برب الفلق" "قل اعوذ برب الفلق "

كلّ ذرة بجسمي ترجف ومغمضه عيني بكل قوة على امل يروح

وفجأة واحس بأيده فوگ راسي  دفعتها مخروعه وزحفت بسرعة شارده  ما صدكت وكفت على رجليه ركضت بكلّ حيلي واتلفت مثل المخبله كل شوي عاثرة بشي  دفعت باب المطبخ وصارت بوجهي ام صــيهد كعدت على حيلي اهتز كلي مخروعه وهي كعدت يمي خايفه

ام صــيهد:: اسم الله الرحمن اسم الله يمه شبيج يمه.

واني حتى النفس ما اكدر اسحبه اريد احجي ما اكدر بس ارفع أيدي أأشر على الساحة واحرك شفايفي بلا صوت، اتلفتت هيه خايفه واحد يكعد ويشوفني، كامت بسرعة جابت ماي بكلاص وكعدت يمي تصب الماي بايدها وتغسل وجهي تردد

"بسم الله الرحمن الرحيم " اسم الله الزهره"

ومسحت على راسي الحد ما استقر نفسي بس جسمي بعده يرجف وهيه تقره على رأسي ايات غمضت عيني وسندت راسي على ايدي

ام صــيهد:: وين جنتي وشمالج مخلوسه؟

رفعت راسي الها مسحت وجهي بين اديها همست بصوت يرجف

-اجاني القرين.

حجيتها وبلعت ريك بخوف اباوع لعيونها عكدت حاجبها مستغربه

-شجاج؟

-جني، لان طلعت ابجي بره إجه يواسيني.

مدت ايدها على صدر دشداشتها هزته وهيه تصيح

-اسم الله الزهره اسم الله، كشش برّه وبعيد، يمه اسم الله شمالج خايبه جــويريه.

-خاله والقران ما مجذبه اسألي بــدور هيه اكتشفته وكل ما نبجي يجينه، يريد يواسينه.

ضحكت ايدها على حلكها ودارت وجها تباوع للباب خاف واحد يجي گالت

ام صــيهد:: النوبه من يجيج ابو گرون مادري شسمه كليله على جدج وجدتج خل يكتلهم.

سكتت وهيه واضح عليها ما مصدكتني كومتني من أيدي  وكفت يم السنك غسلت زين وصعدت فوك تمددت بفراشي والخوفه بعدها بيه كل ما أتذكر اللحظة هذيج من اني ادور عليه بين النخل وبمكان بعيد وفجأة لكيته بصفي، كشت روحـــي ومديت ايدي على راسي امسح عليه من تذكرت شلون خله ايده فوك راسي، غمضت عيني اتذكر مخالب والله مخالب الخلاهن على رأسي مو ايد عاديه

جريت فراشي بصف الحايط حتى يصير الحايط بظهري بلكي أأمن وانام، هستوني غمضت عيني ورجعت سمعت صوت البومه

فتحت بخوف أركز بالصوت كمت بسرعة عبرت من بين مــاسه وبدور شباك الغرفة مفتوح وكفت يمه اباوع للنخل بس صوتها مبين، سديت الشباك وجريت بطانيتي تمددت بين مــاسه وبدور حتى احتمي بيهن.

رنـــه ::فتحت عيني فازه على صوت عبود يدغ بيه ويهمس

-رنـــه،رنـــه.

رفعت راسي من المخده كوه مفتحه عيني

-شكو؟

-كومي شوفي طــروادة شو مصخن فد مره.

كعدت بفراشي اعاينله واعاين لحسين وزهره النايمين بصفي عايفين فراشاتهم وجايين عليَّ، زهره شوي بعد وتطبب رجلها بحلكي، وعبود ضال واكف بباب الغرفة وانه النعسه بعدها بيه ماتروح رجع كال.بنتر

عبود:: خااب گومي.

رفعت أيدي خازرته

-شنيي؟

-وسم حتى سم كومي شوفي طــروادة مصخن.

كمت من الفراش مفتحه تك عين طبيت الغرفة طــروادة وعبود وراي يلغي، شغلت الضوه وكعدت يمه مديت ايدي على كصته

-يمه گاب نار.

عبود:: صار ساعة كل ما اكعدنج تردين تنخمدين هاي رابع مره اجيج.

-غير ل١٢ مانايمه ضليت ادرس

-ديله يله شوفي شتطينه، ماكو خافض حراره شي؟

رفعت اجتافي مادري

-اندري، من جانت زهره تصخن عــفراء تحطلها تحميله، شوف الثلاجه بلكن ضاله وحده.

عبود::هههههه طاحظج.

فتح عينه طــروادة خازرنه دفع ايدي من كصته

طــروادة :: وخري عني لا اكوملج.

عبود::خاب كوم خل اخذك للمستشفى.

هز راسه لا وجر الغطا عليه زين طلعنه من يمه بالهول كال عبود

-نخابر عفراء لو زحمه خاف نايمه.

-لا تكعد گبل الصلاة بنص ساعة هيه خابرها بله.

دكّ عليها اثنينه مستحين خاف تطلع نايمه ويكعدون هيه ورجلها،بأخر دكه ردت علينه بخوف

-ها عبود الو.

عبود:: الو،شلونج.

-شكو؟ بيكم شي؟

-لا، بس اكلج هذا طــروادة مصخن فد نوب شنشربه.

رنـــه:: عفره ما يرضى عبود يخليله تحميله.

حجيتها وعبود طكاني على راسي حيل يصيح

-شمالج تاكلين تبن انتِ سدي حلكج. لا يكوملج.

عــفراء:: رنـــه تسمعيني.

-اسمعج كلي الهذا الخايس لا يطكني والحسين اخليهم بلا اكل ولا شرّب كادرين عليَّ وعلي اضل ما اطبخلهم ترى.

عــفراء:: ها هاا السانج السانج كضيه شويه مسويته أحَمر هسه انتِ نصبه، اسمعيني.

نترت وانه خازره عبود

-اسمعنج.

-اكو بالثلاجة براسيتول شربيه وحده، وسويله كمادات لا يشمر.

-خوش.

سدينه التلفون مشيت للثلاجه وعبود حضرله طاسه وكمادات كوه كعدناه شرب الحبايه وكعدت يمه اسويله كمادات، عبود رد نام وانه مكابله طــروادة وكاعده كل شوية مغيره الكماده، من أردها على كصته ينز جسمه ويفتح عينه، همس بصوت تعبان.

طــروادة:: روحـــي نامي رنـــه.

-لا مالك غرض خلني يمك بلكن تنزل الصخونه وجهك بعده نار.

غمض عينه صفنت بوجهه مكسور گـــلبي  گد ما انقهر على الگاع تمرض، ساعة مرت وانه يمه، طــروادة بلا ما يصخن يحجي وهو نايم، النوب هسه مصخن ماخله سالفة ماحجاها، شوي وكام يشوفني عفراء كل ما يفتح عينه يكلي

-روحـــي نامي عفره صرت زين.

عصرت الخاولي رجعته على راسه احجي

-لا مبين صرت زين، نام نام لا اخنكك.

شال الخاولي من كصته ورفع راسه منّ المخده يعاين الوجهي عاكد حاجبه

- رنـــه !

-لا انه امك.

-انجبي.

رجع رأسه للمخده ورجعت الكمادات على راسه واديه ورجليه نام شويه ومن جددتها هم فز فتح عيونه حمر دم عاينلي ورد غمض يهمس وهو مغمض

-حتى بتعبي ماخلوني اعيش يابه

حجايته مردت گـــلبي  مرد رجع ون بوجع

-اااخ يا بويه.

-اسم الله عليك، طــروادة اودي عبود يجيب الولد ياخذونج للمستشفى.

هز راسه لا، شويه حسيت حرارته نزلت عفته وكمت  صليت وطلعت للحوش هستوها الشمس تطلع، مشيت فتحت سلسلة هاسكي احجي ويا

-صاحبك مريض.

وهو يفتر وراي، فتحت گن الدجاجات طلعن وانه لازمه بأيدي عصا، لان الديج ينكر شبعته كتل يله گام يخاف مني وماينگرني بس هم ما اثق بيه اخافن يغدرني، اطيتهن اكل

-تعالن، تعى تعى تعى.

عفتهن ياكلن وصعدت على الگن اعاين من فوك السياج، فارشين نايلون بره السياج ومخلين الحنطه الحصدوها، وعلى صفحة مخلين التبن تل صاير شگده، وبعد نص گاعهم ما محصوده، تفلت واحجي بحركه

-تف عليكم وعلى گاعكم كون هم تحترك مثل ما حركتوا گاعنه.

"مخلينها بظهر بيتنا حتى يحركون گلب طــروادة الچلاب" ادردم واغلط  هستوني انزل ولمحت جلكان النفط دك گـــلبي  حيل وتلفتت اعاين بخوف، رجعت صعدت على الگن اتلفت لبيوتهم ولا باب مفتوح بعدهم منخمدين كلهم.

نزّلت بسرعة ومشيت للجلكان لزمته بخوف وافكر" أبديه على الحنطه وأخربها كلها بعد مايكدرون يبيعونه يخسرون مثل ما طــروادة خسر"، درت عيني لباب بيتنه  خايفه منه اذا كضاني هوه يكتلني، مايلحك بيه بسرعة ابديه وأرد ركض.

ولان مأمنه محد كاعد طلعت بطرك الدشداشة والشال عفت باب الحوش مفتوح امشي بسرعة واتلفت طلع هاسكي وراي اجاني يركض يريد ينبح

-اششش اسكت وحمس اسكت.

حط راسه بالگاع يشمشم،  مشيت بسرعة  گـــلبي يدك بقوة وصلت يم الطعام(بذور الحنطه) كعدت على حيلي وبس اريد افتح القبق مال جلكان النفط،  بكل حيلي احاول وماكو، عيني على باب حوشنه طلعن الدجاجات وراي خرب ، غلطت بصوت

-انفتح انفتح اشعلك وأشعل شعلان وياك.

-شسوين؟

رفعت راسي وشهكت فاتحة عيني على وسعها والنفس حسيته وكف ببلعومي، وكفت على حيلي وانه اشوف بريا وميثم واكفين كدامي مصدومين

مــيثم:: ولج شمطلعج هيج انتِ مسودنه؟

يحجون بصدمة وبريا اتلفت يأشر علي ويحجي

بريا:: بيدها نفط هاي تريد تحرك الحنطه!!!

سكتوا اثنينهم واحد يعاين بوجهه الثاني ويردون يعاينولي مصدومين صاح بريا

-امشيي ردي للبيت امشيي

نترت خايفه لان انكشفت واريد أضم خوفي

-ووولي ووولي مالكم شغل عاب هالشكول.

مــيثم :: ايا عرمه بالحسين اكطع الخيزرانه على راسج ووولج شوما تردين انتِ.

حجاها واجه بريا يريد ياخذ الجليكان من أيدي نبح عليه هاسكي رد ليوره وهاسكي يزئر عليهم.

-دوروا وجهكم عاب هالوجوه ما تستحون تعاينولي.

بريا:: امشششي لج زعطوطه امشييي على حور حالج نعاينلج، ردي للبيت لا يكضج شعلان يعلكج بالسياج يومين.

مــيثم :: تريد تبلي طــروادة هاي عرمه بالحسين ماتنكدر، وولج غير تطيح براس طــروادة المگرود ذيج هيه كلها تكول طــروادة الخرب الحنطه لان احتركت گاعه.

بلعت ريك ساكته آفكر بحجيهم صدك خاف يشكون بطرواده عفت الجلكان ومشيت بسرعة شارده صاح وراي

بريا:: عررمة اگطع النعال على راسج بعد لو لكيتج طالعه هيج.

ووكفت خازرته

-خااب ابن الروسيه انا اكطع النعال على راسك.

التفت على مــيثم فاتح عينه على وسعها مصدوم وهد يريد يجيني كضاه مــيثم يغلط

مــيثم :: ما مربايه انتِ خل اشوفن طــروادة واسولفله يرضى بعرامتج.

-مالكم شغل بينه مربايين ما مربايين ياهي مالتكم.

بريا بسرعة نزع نعاله شمره عليَّ طاحت الطكه بهاسكي عاص وعاينلهم يريد يهجم دنكت شلت النعال شمرته عليه، اثنينهم غطوا وجوهم من النعال بس طاح يمهم ركضوا عليَّ يردون يكتلوني، ركضت للبيت وانا اصيح على هاسكي

-أشوه أشوووه.

وهوه ما صدك گبل ركض عليهم، طبيت وسديت باب الحوش بسرعة صعدت على گن الدجاج اعاينلهم ركضوا شاردين من هاسكي صعدوا فوك قمرية السيارة وهوه يفتر داير مادايرهم عاينولي متحلفين طكيت أيد بأيد غميتهم ونزلت.

صحت الدجاجاتي طببتهن للبيت ومديت راسي الهاسكي

-تعااال كافي تأدبوا ولد الروسيه بعد ما يغلطون، هااسكي تعال تعال.

أجاني يركض طببته وهمه نزلوا يغلطون متحلفين بيه سديت الباب بوجهم وطبيت للبيت احجي وي روحـــي

-همزين كضوني حجيهم صدك لو مبديه النفط على الحنطه كلها راح تكول هاي سواية طــروادة ويبلونه والنوب ينقهر ازيد من قهره على الگاع.

كعدت حسين وزهره سبحوا وراحوا يبدلون حضرت هدومي مال المدرسة وطبيت للمطبخ اسوي الريوك ،طلعت الخبز حميته واصيح على حسين

-كعد عبود يله.

شويه وطلع عبود يفرك بعيونه يعاين من وره خشمه رفع أيده يأشر

-شتردين انتِ؟ خبصتيه شو عفره جانت تسوي الريوك وتكمله ماينسمع صوت، انتِ بس تطكطكين وصوت المواعين واصل السابع جار وفوك هذا كله طبخج يلعب الروح.

نزلت ايدي بيها الخبزات اباوعله والدمعه التمّت بعيني

-صدك؟

ضحك اجه يمي جر راسي عليه باسه وهو يضحك

عبود:: خاب انتِ غير حتى السم من إيدج عسل، شعدي غيرج انا.

عيبت عليه اضــحك غماني وراح يغسل لمن رجع گال

-انتِ لا ترحين اليوم، اخذلج اجازه حتى تسوين شوربه شي الطرواده.

-عدي موضوع مهمّ بالرياضيات.

-هوه من يصير زين يقريج.

-يله خوش.

ريكتهم بسرعة وطلعوا للمدرسه سويت ريوك الطرواده ومشيت كوه كعدته كام غسل مجلب بالحايط، وبس رد لفراشه تمدد وجهه أحمر وعيونه منفخه ومدمعه من الصخونه.

-بس اكل شويه حتى تشرب دوه.

-ما اريدن.

-انا اوكلنك شويه عليك الله جا شلون تصير زين.

مسح وجهه وكعد كوه على روحه سويتله لفات صغار اوكله واصبله الچاي بالصحن ياخذ من إيدي ويبتسم على كيف گال

- البارحه ليش تكليلي انا امك.

-هههههه، مو انتَ ضليت تروح منا وتجي مناه مره تكلي عفره مره ما ادري شتحجي، النوب لكيتك تسولف وي ابوي.

سكت رفع راسه الي عاف صحن الچاي بالصينية متحسر وسأل بصوت مخنوك

-شسولف؟

باوعت بعيونه ساكته وهو متاني احجي زفرت نفّس بحسره

-گتله حتى بتعبي ماخلوني أعيش بويه.

هز رآسه بأسف

- شاكر وشياطينه حتى على لگمه الحلال لاحگيني.

-اي همه چلاب هوه وولده.

رفع راسه خازرني دنكت بسرعة

طــروادة :: تأدبي رنـــه لا تغلطين على آلولد لا حضج أطيحه.

-جا بس همه يغلطون شني همه حلال وانه حرام.

نتر بعصبيه

-ياهو الغالط شو تمسلتين انتِ؟

شلت الصينية وطلعت من يمه اريد اكله صوجي سويتلك ريوك وخفت يخلي الصينية براسي غسلت المواعين وشفته كام غسل ورد للغرفة، شوي وصاح

-رنـــه.

مشيت بزعل فتحت الباب اعاينله مسح وجهه وگال

-انتِ كبرتي كافي سوالف المزعطه عوفيها حلاتج بحلاوة حجاياتج وسوالفج مو بالغلط والصياح شني انتِ تردين تصيرلي ميلاد؟ ترا أكسر ظهرج!!!

عدلي وحسني الفاظج دام النفس عليج طيبه، اذكري حچاية ابوي من يكلج شمحلات محاچيج، جا شمالج السانج كام مايحجي غير الغلط؟

واكفه بالباب مدنكه واكل بشفتي شهكت ودموعي نزلن على خذي وهوه يرزل بيه رفعت ايدي امسح دموعي وشفتي ترجف

سكت متحسر كعد على حيله

-تعاي.

طبيت للغرفه وانه اشهك واكفه يمه جراني من ايدي الحضنه يبوس براسي ويحجي

طــروادة :: وكلام الله ينفت گـــلبي من تبجين.

شهكت مغطيه وجهي بأديه

-امسحي دموعج لا تقهريني، انا لو ما رايد مصلحتج جا صفگتلج على الغلط.

رفعت راسي من صدره امسح بدموعي واحجي

-جا ما تحاجيهم كضوا عمرهم يغلطون عليَّ ومايحترموني عودك اكبر مني همّه ويخلون راسهم براسي.

باوعلي باستغراب ومد ايده يمسح عيوني ويحجي

-ياهو الغالط عليج؟، هوه بس صــيهد هذا مسودن شلج شغل بيه خيولي.

-لاا، حتى هذول الخياس ولد الروسيه.

حجيت اباوع لعيونه نزل ايده وضيك عيونه مركّز بعيني وهز راسه يسأل

-ليمت غالطين عليج؟ وين شايفينج همه حتى يغلطون عليج؟

راحت البجيه اعاين لوجهه وادورلي عذر گـــلبي كام يدك حيل

-من جنت بكد زهره تتذكر؟ غلطوا علي!

سكت يعاينلي بشك ما مقتنع كمت بسرعة واحجي اضيع السالفة

-راح اسويلك شوربه.

وطلعت من يمه ركض للمطبخ سويتله شوربه وهوه رجع نام ، ندك باب الحوش وسمعت صوت صــيهد يصيح

-طــروادة.

رديت بگلبي وهرش حتى هرش، صيح صيح مل وراح ولا فتحتله الباب وراه بنص ساعة اجوا ســليم وسلطان صيحوا وطولوا

ماراحوا مشيت ردت اهد عليهم هاسكي وسلطان يصيح

-خاب طــروادة هيووه.

هستوني اصيح الهاسكي وسمعت صوت عبود يمهم هوه وسجاد گالهم

عبود :: مريض طــروادة كلش.

سلطان:: جذب بس مايريد يشوفنه.

عبود:: لا وعلي البارحة الليل كله يون مصخن وصاير بيه فلك.

ســليم :: جا ما كعدتنه نآخذه للمستشفى صدك تحجي ليش هيّج عايفه ضال وحده؟

سلطان:: افتح الباب شمالك خل اشوفنه.

فتح الباب عبود يأشرلي طبيت بسرعة وهوه فتحلهم باب الدوانيه، مشيت الطرواده كعدته

-الولد اجوا يشوفونكم.

فتح عينه بالكوه تلمست وجهه رجع صخن حيل همس

-ياهمه؟

-هذولاك الغلطت عليهم مساعه وانتَ ما رضيت!

-مــيثم وبريا؟

-لاا، الثانين الگلت عليهم چلاب همه وابوهم.

گلب عيونه يستغفر ورجع باوعلي بخزر جر الغطا فوك راسه ساكت كمت طلعت من يمه اعاين من شباج الهول اجوا وراهم صــيهد ووهب وعبود اجه يريد بس يقنع طــروادة يكوم يمهم ما يرضى مايريد يشوف أي واحد.

وانه ضاله أراقب بيهم گاله صــيهد

-ها كعدته؟

عبود:: ما يرضى يكعد والله من الصخونه ماله خلك

سلطان:: لا وعلي دره بينه انا وسليم هناه ومايريد يشوفنه.

وهـــب :: يابه غير يگلولك مريض صدك جذب شني السالفة.

دار وجهه سلطان ضايج عاينت الصيهد گال العبود

صــيهد:: سويلنه درب خل نروحله.

عبود:: تعالوا طبوا محد هناه

رنـــه ::اسمع واغلط على عبود ركضت للمطبخ وهمه طبوا للغرفة يحاجون طــروادة يردون يآخذونه للمستشفى ومايرضى گاله سلطان.

سلطان :: انعل ابو الگيعان لا ابو الحاصوده ولك تتمرض علمود الگيعان، انا خسارهن شكد يصيرن فلوسهن خمسين مليون؟ باجر ابيعن سيارتي وسيارة ســليم واحطهن جوه رجلك صددك تحجي انتَ؟

ســليم :: وكراب الگاع عليّ انا اكربها طــروادة بس شد حيلك رحمه الأهلك خاب يروحلك فـــدوه كل فلس بهالقريه.

وهـــب ::حكيت خشمي ساكت أعاين عليهم وهمه بس يحاولون يراضون طــروادة كعدوا يمه وهوه ممدد بفراشه، وصيهد واكف على صفحة متاني لحدمن راح يضل ساكت گالهم طــروادة.

طــروادة :: اريدكم سالمين يابه على الفلوس انا؟ مخاويكم طمع؟

سلطان :: محد گال مخاوينه طمع جا حگك اهلنه الحركوا گاعك واحنه الندفع خساراتك، هسه عوفك من الگاع وگوم خلنه نأخذك للمستشفى.

دنك صــيهد طفه جكارته بالنفاضه وصاح

صــيهد:: ماتشوفون رواحكم چلبتوا؟ اطلعوا يله انا ويآه نروح للمستشفى مو صح طــروادة؟

ضحك طــروادة يهز راسه أي والولد يضحكون يحركون بگلب صــيهد

سلطان:: ترى اول صاحب الطرواده انا، انتَ جنت عدوه.

صــيهد:: انتَ صاحبه مانختلف، بس انا اخوه.

وهـــب :: صيحنه نضحك ونصفك الصيهد گالهم طــروادة

-اطلعوا خل ابدل!

صــيهد:: أساعدنك؟

ســليم:: اذا انتَ تساعده كلنه نشارك بالمساعده.

صــيهد:: لا ما ارضى طــروادة عرضي محد يبدله غيري.

طــروادة :: عمي بس اطلعوا انا ابدل شمالني تسودنت اخلي واحد منكم يبدلي.

وهـــب ::ضحكنه وطلعنه كلنه، ســليم وسلطان راحوا للگيعان وي الحاصوده وانا واكف كدام صــيهد اريد أفاتحه بالموضوع واخافن يگطع البرجله عليّ، ضيك عيونه وهز رآسه يفرّ بسبحته

صــيهد:: شعدك؟

-هاه؟

-ووجعاه، شتريد.

-هيج أكولن جا حتى وانتَ لابس بنطرون وقميص تكض سبحة؟

-اي بكيفي ،اكلك سبحتي الكريمه وين شو مارديتها؟

وهـــب ::دنكت ساكت اغلط على روحي شحجاني ما ادري وين ضيعتها، اجه طــروادة ونقذني طلعت وكبل ما اروحن سمعتهم يحجون بسالفة هزيت راسي متحلف بيهم، همه  راحوا للمستشفى وانا مشيت للمشتمل تلاكه وياي ابوي صاح

-امشي اخذ الدركتل والعربانه للحاصوده

-عمي بالحسين هم الي شغل مو الفلح موجودين همه ينگلون.

-جدك يگول الفلح يبوگون خل واحد من الولد يصعد بالدركتل وشد عليه العربانه الچبيرة حمل الحنطه بيها. يله بعد ابووك يله.

-يابعد ابوك يادنيا، عمي بالحسين هم اروحن ايدي محتركه وين اكدر اسوقن الدركتل.

غير قفل اراويه ايدي ولا مهتم يغلط ويسب واذا ما تروح انتَ انا اروحن، جريت السويج منه ومشيت للدركتل شغلته وتنگبت بجفيه اتمنى هيج اعصار يجي يشيل القرية من الخريطه، شديت العربانه عليها ومشيت للگيعان لكيت ســليم وسلطان يحملون بالتبن هم بدركتل،تفلت عليهم

-من جير بفرگكم جا الطعام ياهو ينگله شعلان.

سلطان:: خاب اسكت شعلان المشعول مخلي جواسيس هناه حجينه عليه مساع وهذا ابو عمار ضل ياخذها ويجيبها طلع يوصله حجي.

-نتسابق؟

ســليم :: هاي دركتل مو دراجه انجب واكعد.

وهـــب :: اكلك بريا وميثم وين شو غاطين.

تحسر سلطان يهز براسه گال

سلطان:: بالمعامل

-لاااا، ليش ؟

ســليم:: ما ادري حسب سوادين شعلان طخت بعقله وداهم للمعامل.

وهـــب ::زفرت نفس متحسر وسقت الدركتل للحاصوده ابو الحاصوده ضل يصيّح وينتر شلون بطيت عليه

-خاب لا تضل تعنطز بالحسين انزل اكتلك بالنعال خايس ابن الخايس.

-صارلك ساعه ورانه گــيعان الوادم نضل بگاعكم احنه؟

مشيت الدركتل بصفه فرغ الحنطه بيها واخذته للبيت، وعلى فد جره للغروب يله كضينه رديت للبيت مهدهد وايدي متبنده من الوجع طبيت للمطبخ صارت بوجهي آلعافيه الشوفتها تروح كل التعب دنكت ابوسن راسها

ام صــيهد:: الله يساعدك يمه.

-يابعد روحـــي يساعد بختج.

مــاسه :: اجه وهـــب للسنك فتح ايده يريد يغسلها ويعاينلي أشرلي تعاي يمي اقتربت يمه حجه بهمس

وهـــب::بساع سويلي اكل البنيه ماتت من الجوع

-وديتلها بدون ما وأحد يشوفني

-اه شلون فتحتي الباب؟

-اخذته من غرفتك وحتى النسخه العد صــيهد هم اندلها لا تخاف اكدر اوصلها بألف طريقة.

ضحك يغسل بأيده

وهـــب :: انتِ كفو وعلي.

-اممم بس تحجيلي بعدين.

-تمادت ولي مناه صبيلي عشا ميت من الجوع.

-هههه اطلع يله روح للدوانيه بت عمه تريد تجي تساعدني.

راح يسبح، واجت جــويريه يمي هيه وبدور ساعدني بالعشا وامي كاعده بالگاع تگلي دجاج على البريمز، ندك باب المطبخ وصوت صــيهد

-مــاسه.

درت عيني آلامي خايفه غطيت شعري زين ومشيت فتحت الباب على كيف اعاينله واكف يدخن

-ها.

-ياهو جوه؟

-بالمطبخ؟ انا والبنات وامي!

هز راسه لا

صــيهد:: بالدوانيه مشعول موجود؟

-جدو؟ اي هوه وابوي ويمهم عمي شاكر.

-جيبي عشاي لهناك ما اريدن وياهم.

سكتت وهزيت راسي اي خزرني

-شوماعاجبج.

-لا والله بس غير كتلك اي.

-ما ارريدن.

نتر وراح زعلان سديت الباب ودرت الامي فاتحه اديه واحجي

مــاسه :: يمه والله ماكتله شي

بــدور :: هوه ما يرضى واحد يضل ساكت لو كايلتله اي هسّه أجيبه مايضوج.

مــاسه :: انجبي انتِ انجبي شارده أربعة وعشرين ساعه وكلشي ذابته براسي، شكتله انه شكتله ويزعل بس يريدله حجه.

مشيت للطباخ احجي مختنكه وامي تصيح راح اكوملجن، صفت وياي جــويريه تحجي بهدوء

جــويريه :: عادي اخذيله العشا وكليله اني ما اقصد شي من سكتت.

مسحت وجهي اهز راسي اي كملنه عشاهم وديناه يمهم جــويريه ما ترضى حتى توصل للدوانيه اليوم ما ادري شبيها.

صبينه صينيه النه بالمطبخ هنه كعدن وانه اخذت صينية الصيهد مشيت البيته طبيت ودكيت باب غرفته ماحاجاني فتحته وشلت الصينية طبيت اعاينله متمدد على الچربايه وتلفونه بأيده.

-ما اريدن اخذيه.

سكتت مختنكه

-والله ما قصدي شي من سكتت مو ماراضيه والله.هزيتلك راسي نسيت تضوج.

سكت شمر التلفون على الميز وكعد

-ذيج الخانسه وينها ما تساعدج؟

-جــويريه؟

-بــدور!

حجاها وكعد يم الصينية ياكل وكفت يم الباب كتله

-تساعدني مرات.

سكت عفته وطلعت ركض طبيت للمطبخ كعدت أكلت وياهن لمن كملنه نظفنه البنات صعدن وانه ضليت اسوي كهوه الهم اجه يمي وهـــب بالمطبخ

-ميوسه.

درت وجهي عليه

-هاه.

-تذكرين جم مره انا مطيج عشره؟ وشكد صارف عليج؟

وكفت عدل عفت البأيدي غمزتله

-تريدهن شنو؟

ضحك

-لا بس صيري حبابه مره وحده وسويلي شي بيه خير.

-شتريد ليمت كايلي على شي وما مسويته الك؟

تحمحم متحمس ودار للباب يتأكد محد موجود كض ايدي يتوسل

وهـــب :: روحـــي الصيهد كليله وهـــب عده سباق ترضى يروح، وجيبيلي سويج الدراجة منه.

جريت ايدي منه مبتعده

-يااا والله، يمه ياهي مالتي انه.

-شكد چلبه ولج ولا عشرة غزرت بعينج.

-وهـــب توديني للموت انتَ؟ ترضى انكتل؟

-شنّي السالفة راح يعضج هوه؟ اذا مارضى يكلج لا وهاي هيه.

-جا اذا هيج ما يخوف ماتروح انتَ تكله؟

حك شعره بحيره

وهـــب :: مو انا يكتلني قاسي وياي.

-اي اي وانه حنين وياي بابا انه اكثر وحده بيكم مكتوله.

-بالحسين ولا ينشد بيج الظهر، اختيش انتِ كل خير مابيج، امددداج وامده اخوتج.

ضحكت صبيت الكهوه وداها ورجعلي

-ميوسه والله اطيج خمسه وعشرين.

سكتت محتاره اكل باضافزي

-بشرط، تحجيلي ياهي هاي البنيه البالمشتمل؟

خزرني يعاين مناه ومناه خاف واحد يسمع ورفع ايده على حلكه يسويلي

وهـــب :: اششش، حتى وي روحج ما تجيبين طاريها ولا تذكرينها مــاسه فهمتي؟

هزيت راسي اي وسكت هوه ضايج تندمت لان كتله هيج شويه وهز راسه موافق

-اسولفلج بس بشرط تقنعين صــيهد اروحن للسباق وتجيبين سويج الدراجه منه.

زفرت نفس اقوي بروحي هزيت راسي موافقة وطلعنه سوه لبيت صــيهد هوه ضل واكف بالباب گال

وهب ::اذا كتلج بس صيحي بصوت عالي.

مــاسه ::شتسوي اذا صيحت تجي تحميني؟

وهب :: لاا، حتى الحك اشرد.

طكيته على ايده ضحك ودفعني للبيت گبل ما اگول بسم الله، صار بوجهي صــيهد طالع من الحمام ينشف بشعره هز راسه ها، ومشه للغرفه وانه اطكطك باصابعي ساكته، مشيت ورّاه للغرفة

-احم اجيت آخذ الصينية.

سكت لبس دشداشته ووكف يسد بدكم الردن، فتح الجراره يختارله سبحه شال وحده نيليه بلون دشداشته وثانية لون بيجي محتار بينهن

-البيجي احلى وي الدشداشه.

رجع النيليه سد الجراره وراح للميز يخلي عطر عاينلي بالمرايه وهز راسه

-احجي تره من اول ماطبيتي مبين تردين شي؟

ابتسمت بخوف الوم بروحي واهمس

-انه، لا ما اريد شي ههه.

دار خازرني

-ووولج تجذبين؟

-وهـــب وداني عليك.

عكد حاجبه متانيني اكمل

-يگول عدي سباق اريد اروحن ويريد سويج الدراجه وگالي اذا قنعتك يطيني خمسه وعشرين وسالفه.

هز راسه موافق ورجّع للمرايه لفّ الچفيه على راسه كمل ورجع دار عليَّ

صــيهد:: روحـــي كليله يگول صــيهد تاكل تبن وتنجب، خوش؟

هزيت راسي اي خوش گال

-شتگليله؟

مــاسه :: اكل تبن وانجب.

فتح عينه على وسّعها خازرني

-شنيي؟

رفعت ايدي أبلعم

-انتَ كتلي

-كتلج كليله مو تگليلي، امششي يله ردّي للبيت ولا تضلين كلساع طالعه طابه.

مشيت بسرعة اريد اطلع صاح

-الصيينيه.

رجعت اخذتها وطلعت ركض مالكيت وهـــب بالباب لا يا غدار، ركضت للمطبخ لكيته متانيني گبل گال

-بشرري.

-الغدار ليش تعوفني وتشرد.

-مو كلت حتى واحد من عدنه ينكتل ليش اثنينه، التبذير حرام.

-مو كتلك ما يرضى

-شكالج؟

-گال گليله خل ياكل تبن وينجب.

-حيوانه شو تغلطين عليَّ؟؟

مسحت وجهي محتاره بينهم

-غير هوه گالي ياهي مالتي انه؟

هز ايده مراضي وطلع من البيت زعلان، صعدت ركض لكيت بــدور كاضه جــويريه وتحجيلها على القرين راح تخبل البنيه

-بــدور بطليّ هالسالفه

بــدور :: انتِ ما تصدكين بس شوفي جــويريه تكول كل ما ابجي يجيني.

مــاسه:: جــويريه هاي يعلمنها بالمدرسه صاحباتها وتخلس بيج

جــويريه:: سكتت هو اني من گاعي مخلوسه الحد هسه محد منتبهه للفلوس وهالشي مخليني طول اليوم خايفه واحس مبين للكل اني الماخذتهم.

رنـــه ::طــروادة شويه صار احسن بس بعده ما يطلع من البيت ماله خلك للعصر يله طلع گعد بالحوش وهاسكي يمه، جبتله صحن شوربه احجي

-سويتها الك الصبح وعفتها.

ابتسم اخذها من ايدي، اجوه حسين وزهره جابوا كتبهم قراهم انه هم ركضت جبت الرياضيات وكعدت يمه يقريني ويسأل

-فهمتي؟

-آي والله هاي هيه.

طبكت الكتاب ودّك تلفونه فتح السماعه وحاجاها

عــفراء::شلون صرت