تحميل رواية «قوارير من فضة» PDF

اسعد الله مسائكم بكل خير احبتي ❤

///// البارت الثامن والثلاثون /////

#قوارير_من_فضة ج2

#بقلمي_شمس_السعدي

________________________

تأكــد اني لن انســى بشاعـــة ماجعلتنــي اشعر به !!

ً

اجتني رسالة .. فتحتها من شجن ..

كاتبة بيها العنوان .. قريت العنوان هاي ببغداد مو بأربيل .. تفاجأت .. بسرعه خابرت نسر .. ودموعي ينزلن من الفرح ..

جان موبايلة مغلق .. اوووف ياالهي هسا وكتها ..

ولو هو بأربيل شيسويلي مثلا ووين يلحگ يرجع وشلون اتحمل انتظر ..

خابرت عمو بسرعة .. والبنات يسألن وخايفات عبالهن سمعت خبر مو زين او بيه شي ..

اشرتلهن " اوگفن هسا تعرفن "

رد " هلو عمو شلونك "

جاوب " هلا بنيتي شلون صرتي بالي يمج .. الولد ماكو خبر عنهم ؟"

حجيت بسرعه بدون مقدمات " عمو اجتني رساله من شجن بعنوانهم .. هم هنا ببغداد .. مااگدر انتظر نسر لمن يرجع روح انت وياي "

رد فرحان " اي زين سويتي .. اني جايج هسا حضري روحج "

طفرت من مكاني ابدل .. والبنات فرحانات .. وماما تدعي " دخيلك ياالهي تعديها على خير ويرجع الحضنها"

حجت اسراء " شلون تتصرفين وحدج .. اذا عرف نسر مايقبل انتظري خلي يرجعون وروحوا "

باوعتلها " تحجين صدگ انتي .. ابني هذا ابني .. ترديني اعرف مكانه وابقى منتظرة لليل او الباجر لمن يرجع نسر .. احتمال تغير قرارها وياخذوه الغير مكان شنو يضمني "

سألت " وشنو يضمن نطتج العنوان صحيح .. جائز تريد تضحك عليج او خافت لاتوصلولها او اي غايه عندها هي الي تاخذ زوجج تحبلج الخير ؟؟"

جاوبتها " صحيح او لا المهم اكو امل .. اذا مااروح ماارتاح .. لاتعارضين اسراء حسو بيه شويه "

اشرتلها ماما " اسكتي وخليها تروح عمها وياها ماكو شي ان شاء الله "

حجت غيداء " ليش تحسسوني عايشين بفلم هندي .. ترى ليث ابوه يعني مايأذيه .. وحتى لو اخذه يوم يومين ويرجعه بس يريد يحرگ گلبها لويش مكبرين الموضوع "

باوعتلها مصدومة " تحجين صدگ ؟؟ لو انتي بمكاني شتسوين ؟؟ انتي احمد العار غدر بخاله وزنا .. بعتي اخوج واهلج علمودة .. ترديني اشوف ابني بيد الي غدروا بيه وارتاح واسكت وانتظر شوكت يحن ويرجعه الي "

عاطت بيه " احترمي نفسج .. شوكت تنسون السالفه .. جان مراهق وغلط .. وجل من لا يخطأ .. والله حرام الربا بيجن .. ربيتجن اني مو امي وتالي تجازني بطولة اللسان والنكران .. مع الاسف "

ردت عليها اسراء " الظاهر ماعرفتي تربين الهيج جازيناج بالنكران .. وواضح من رباتج الاحمد "

كامت غيداء زعلانة " الصوج بيه اجيت ونزلت كرامتي ويمكن هاي حوبتي الي سوت بيجن هيج .. لان ماكو واحد بيكم نصفني وگال ام وحقها تدافع عن ابنها .. كل يوم تعايروني وبعدتوني عنكم .. بعد تحرم عليه طبت هالبيت .. ماما عود اخابرها واطمأن عليها اما انتن انسن عندجن اخت جبيرة "

زعلت وطلعت ركضن وراها سما والاء بس ماقبلت ..

يمكن ضغطنا عليها اني واسراء زايد ..

ماما حجت علينا .. اني حجيت من حرگة روحي ولان ضوجتني بكلامها .. بس ابد ماقصدي اجرحها ..

فعلا هي الي ربتني .. ومن كنت صغيرة عبالي هي امي

وين متروح وراها .. وحتى من انام بحضنها ..

بس الزمن تغير .. وفضيحة احمد ومريم غيرت حياتنا تماما وكأنه نزلت علينا لعنه من ذاك اليوم للان ..

اجة عمو .. وصيت البنات ع فهد وطلعت ..

ماما وراي توصي .. اشرتلها " خابروا نسر او قصي وخبروهم "

صعدت وي عمو ونطيته العنوان .. الخوف مسيطر عليه طول الطريق ادعي .. خوفي كان انه ليث مايقبل يرجعه او شجن تضحك عليه .. افكار ببالي هواي سيطرت عليه وخنگتني ..

فتحت الشباك اشم هوى .. ازدحامات بغداد ضوجتني اكثر .. بالگوة وصلنا ..

وصلنا الشارع بس مااعرف وين بالضبط خابرتها ..

ماجاوبت ..

حسيت فعلا لعبه منها حتى توترني .. كم مرة اتصل ماترد بجيت مااتحملت ..

عمو يسأل " ها بوية وين .. شنو ماتجاوب "

هزيت راسي " اي ماتجاوب الحقيرة اكيد تلعب عليه "

درت رساله فتحتها " مااگدر ارد ليث يمي .. انتي وين هسا ؟"

دزتيلها براس الشارع يم سوبر ماركت اسمة……

رجعت دزت .. لحظة راح اطلعلج… بس كون مجايبة اخوج ..

جاوبتها " لا والله مااجة وحدي "

اعصابي تلفت ..

عيوني ع كل الابواب الشارع فارغ مابي بس كم واحد ..

البيوت كلها متشابهه .. يابيت بي ابني بودي ادگ الابواب كلها وادور بيهن..

انفتحت باب وطلعت .. تأشرلنا من بعيد..

ضحكت " عمو ذيج تأشر "

حرك ورحنا الها ..

نزلت بسرعه " وين ابني "

ردت " راح اجازف بعلاقتي وي ليث بسببج .. بس حتى اعرفج اتي مو ناقصه ولا غدارة بس حبيت مو بيدي "

رديت عليها " كل هذا مايهمني  .. اخذيه بالعافيه وخيانتكم ربي يحاسبكم عليها .. المهم عندي ابني وبس"

دخلنا للبيت .. جان جود يباوع تلفزيون شافني اجه يركض .. حضنته وابجي بوسته واشم بنحره جان يضوج من ابوسه من هذا المكان لان يدغدغه .. بس مايعجبني ابوسه الا من نحره ..

سألها عمو " وين ذاك النذل "

ردت " نايم "

عاط عمو بعلو صوته " گوم ولك نذل وينك "

فز ليث بسرعه واجه .. استغرب وجودنا وبقى صافن

باوع الشجن وتعصب " منو دلهم على مكانا محد يعرفه بس لاانتي "

ردت " هيج احسن ليث كافي خلينا نعيش حياتنا خلصت عمري وياك خوف بخوف..  خايفه لا تعرف هنا وخايفه لا اخسرك وخايفه من اهلي ووووو الى متى ..

مدام كلشي نعرف خلص اما نعيش حياتنا او اروح الاهلي وننسى كلشي "

رد عليها " كافي اهدي الي ترديه يصير "

اتقرب عمو اله .. ضربه .. وتف بوجهة..

رد " يابة اسمعني "

عاط بي عمو " انجب ولا كلمة..  تطلگ هاي وترجع البيتك فاهم "

جاوبه " مااطلك يابة .. اني احب شجن "

من گال هيج احس گلبي انخلع من مكانه .. اتمنيت ميته ولاسامعه هالحجي ..

عاط عمو " يعني تبيع بنت عمك واولادك واهلك علمود هالكردية "

رادت تحجي شجن اشرلها ليث تسكت " يابة اني ماحبيت بنت عمي اخذتها الخاطرك ومن شفت شجن وحبيتها ردت انهي كلشي بس لاانت قبلت ولاشجن هم لان صديقتها .. لحد اخر لحظة مستعد استمر بحياتي وي هنا وولدي .. وشجن ماجان عندها مانع .. بس انتو الي صرتوا ضدي من غير ماتفهموني .. وهنا خربت كلشي بعصبيتها "

مااتحملت عطت بي " يااخي شنو هالوقاحة الشايلها اثنينكم .. تحاول تبرر خيانتك .. مااستحيتو وانتو مگابليني وتجذبون عليه .. لك تقشمرني بكل مرة اشك بيك وتجيب هدايه وتطلعني .  لو رجال من صدگ جان حجيت من البدايه ودافعت عن حبك الي تگول عليه "

عاط " احترمي نفسج اني رجال غصب عنج .. ساكت الخاطر ابوي "

عاط بي عمو " ياخاطر ولك انت مااحترمت ابوك من كسرت حجايتة وغدرت ببنت عمك .. انت نسيواني كل يوم الك وحدة زوجتك عبالي تعقل تالي تسودنت اكثر

بس الظاهر ماعرفت اربيك "

رديت " عوفه عمو لاتعب نفسك وياه .. اصلا اني طلع من گلبي وماله مكان بحياتي بعد .. كلشي مااريد منك بس ولدي .. وكل واحد يروح بحاله "

عمي باوعلي " انتي معليج غصب عنه يطلگها ويرجع البيته "

شجن مااتحملت رادت تدخل للغرفه ..

ليث لزمها " اذا لازم اختار بينهن .. فأختار شجن .. اما هنا تريد تبقى على ذمتي خلي تبقى ومااقصر عنها وعن ولدي رغم الي سواه نسر بيه "

ضحكت لااراديا بي گلبي يتگطع واني اشوف تمسكه بيها ..

" لا والله زحمت نفسك ابن عمي .. شكرا مابعازة صدقاتك عليه وعلى ولدي .. ماكو شي يربطنا سوة ..

خلينا ننهي كلشي احسن "

راد يحجي عمو قاطعته " عمو الخاطري اذا تريد رضاي هالمرة لاتتدخل .. خلي يطلگني احسن مماتكبر اكثر وتصير مشاكل ونسر مايسكت "

اتنهد عمو .. " اسمع ولك باجر تجي البيت عمك ونتفاهم فهمت "

هز راسه وسكت .. اخذت ابني بسرعه وطلعت ..

صعدت بالسيارة وعمو بقى جوة ..

اباوع للبيت .. مااعرف المن ومو مهم بس الي قهرني غبائي شلون حبيت هيج شخص .. تمسكه بيها مثل طعنه خنجر بگلبي ..

معناها علاقتنا والحب الي راسمته وزواجنا كان كله وهم .. اذا يحبها هيج ليش كان جبان .. ليش وهمني بحياة حلوة اني وياه واولادنا .. خليت ابني بحضني ولفيت ايدي عليه .. يمكن انتو احلى شي طلعت منه بعلاقتي بليث ..

اجه عمو .. صعد يحجي وياي ويحاول يقنعني واني بالي مو يمه .. كل عقلي وتفكيري شلون لزمها واختارها معناها صدگ يحبها .. وماحبني ابد ..

كنت اني النزوة بحياته .. وجوده بحياتي غلطه ولازم تتصلح . 

دگ موبايلي .. طلعته نسر يتصل .

رديت عاط بيه " وين انتي .. وشلون تتصرفين وحدج وليش ماانتظرتيني " ..

كان معصب مني حيل واني مثل التايهة صورتهم ماتروح من بالي نطيته العمو حجة وياه وفهمة ..

وصلت للبيت نزلنا .. تذكرت يوم زفتي وشلون طلعت منا ببدلتي البيضه فرحانه .. واليوم البياض تحول سواد وعتمة مااعرف شلون راح اقاومها..

بعد اليوم حياتي شلونها .. اولادي شأگللهم اذا كبروا .. مستقبلي شلون راح يكون… احس بضعف رغم بداخلي قوة مقيدة لسا مااگدر اتحرر من سجن ليث الي كنت عايشة وواهمة نفسي بي ..

البنات فرحانات بجود ويحضنن ويبوسن .. دخلت تعبانه للغرفه .. احس جسمي مكسر .. اريد اهرب من تساؤلاتهن .. بدلت وتمددت .

اسمع ماما تگل العمو " تعالو باجر هنا نذرت غدا الوجه الله اذا نحلت "

ضحكت بداخلي ونمت .. اريد انام احس مو يومين مانايمة وانما سنتين ..

ماگعدت لليل .. فهد يبجي .. گعدت اخذته وياي للمطبخ سويتله ممة .. رحت شفت جود يم عذورة نايم

فتحت الثلاجة سويتلي لفه جوعانة .. عازلين عشاي لان ماتعشيت ..

طلعت من المطبخ شفت ساعه نسر ومحبسه ع الطاولة بالصاله ..

باوعت للساعه بـ 3 الصبح .. معقولة رجع وشعجب ماگعدني .. من نمت ولاحسيت بشي من القهر الي بداخلي ..

رجعت للغرفه نومت فهد وبعد مااجاني نوم ..

البنات واولادهن نايمات بالاستقبال والبيت مليان ماكو مكان اختلي بي وافرغ همومي ..

گمت للصالة خليت سجادتي ..

قريت قران بين مااذن .. صليت ودعيت ربي ينسيني ويقويني مااريد اضعف مااريد اعيش عمري كله شايله هذا الهم والالم ..

كنت ساجدة وابجي وادعي ..

رفعت راسي .. شفت نسر گبالي .. لفيت السجادة

اتقرب مني ..

توقعت يعاتبني او يحجي لان رحت وحدي من غير ماانطيه علم .. گعد ع القنفة واشرلي اكعد يمه ..

گعدت يمه .. " حجالي عمي كل الي صار .. الي مثل ليث مستحيل يصونج ويخاف عليج ولااني اگدر امن عليج يمة بعد .. بقى القرار يمج "

جاوبته " قراري نفسه .. يطلگني بشرط ماله علاقه باولادي اني اتكفل بيهم ولااريده يتقربلهم "

هز راسه " يصير خير "

راح يصلي واني رجعت انام ..

للصبح البيت هوسة اخواتي وولدهم كلهم هنا .. وماما مسوية غدا الوجه الله ..

گمت تريگنا والبنات كل وحدة خلصتلها شغله ..

حسيت الشفقة بعيونهم كلهم .. وخاصه اني مااحجي ساكته بس مابينت اني ضايجة..

تغدينا وكملنا .. بعد الظهر اجو بيت عمو ووياهم ليث

نسر اول مادخل جان متحمل عليه هواي ..

بسبب الي سواه بعذراء .. عاط بي ورزله وراد يضربه بس عمي وگف گباله ..

" احترموني واگف .. الي سواه ليث ماينغفر بس انت الجبير .. خلينا نحل السالفه وبعدين تحاسبوا .. "

رد نسر " شنتحاسب .. خلي تجي هنا وتنطي قرارها وذيج الساعه كل من يروح بطريقه "

صاحني دخلت ماخليت عيني بعينه ابد .. گعدت يم ماما عمو سألني " شقررتي بوية الي ترديه يصير ولو مايهون عليه ولدي هيج يصير بيهم "

جاوبته " عمو قراري البارحة گلتلك بي .. مستحيل بعد اعيش وياه . خلي يطلگني بس ولدي يتنازل عنهم "

رد ليث بكبرياء وحتى ماخلة احترام للعشرة الي بينا

" واني موافق .. بس اذا تنازلت ماتداعيني بأي شي لانفقة ولا شي "

عاط بي نسر " لك حيوان بحال نفقتك .. الي يتنازل عن مرته وولده لاخير بي ومن اليوم انسى عندك بيت عم وباب البيت اذا عتبته رجلك اكسرها "

صاح عمي " مو هيج تبقون اخوة والي صار ساعه شيطانية ومتأكد راح يتندم عليه "

رد نسر " واذا تندم مايتغير شي ليث ماخلة خط رجعة ونهى كلشي بيده "

اتنهد ليث " بوية تخابر شيخ لهنا لو نروحله "

اباوعلة وممصدگة هيج مستعجل تنهي كلشي وتروح

رديت " نسر خلينا ننهي كلشي بسرعه لان تعبت كلش وتعبتكم وياي "

خابر عمو الشيخ اجه ..

ردد ورى الشيخ وبعدها طلگني .. غمضت عيني وحبست دموعي بين جفوني مااريدة يشوف ضعفي وانكساري .. حاولت ابين قوتي ..

فاجأني عمي بعد ماطلگ .. " بوية كل حقوقج تجيج والشقه هم اعتبريها الج "

صفنت مااتوقعت عمو يسجلها بأسمي بعد ماتطلگنا ليث رفض واعترض ..

بس عمو رزله " شتريد اسجلها بأسمك حتى تكعد بيها ذيج..  لاانت ولاهي تدخلون بيوم بيتي وتاخذون شي من املاكي .. انت الجنيت على نفسك وخسرتني وي خسارة هنا واولادك .. الشقه هاي ضمان الاولادج تردين تأجريها تخليها بكيفج "

ماعجبة الكلام دار وجهة وطلع .. بطلعته هاي اخذ كل ذرة حب باقية وياه ..

دخلت للغرفه بجيت الى ان ارتاحيت .. اخواتي يواسني وامي تگلي مو هاي الردتيها ليش تبجين ..

عبالهم ابجي لان طلگني .. مايدرون دموعي هاي لان ضيعت سنين عمري كلها بوهم .

الي صبرني انه طلعت بأثنين ورود ماندمانه ابد اني ولدتهم رغم رفض ليث الهم .. قررت اعيش واكافح علمودهم ومااخليهم يحتاجون ابو بحياتهم ..

بعد يومين وثقنا طلاقنا بالمحكمة .. نسر اكد ع التنازل حتى خاف يجي يوم يطالب بيهم .. مثل ماسوت مريم

لو قبل اگول مستحيل ليث يسويها…

بس بعد الي سواه گمت اتوقع كلشي يسوي ..

جمعت غراضي ورجعت بيت اهلي مكسورة بعد ماطلعت منه فرحانة .. عمو مرات يجي ياخذ الجهال تشوفهم بيبيتهم لان ماخذة على خاطرها مني بسبب طلاگي .. وكأنه اني الخنت وغدرت ولا عبالك ابنها السبب ..

ماما جانت ضايجة وتگول طلعتن وگلت ارتاحن بديتن ترجعلي وحدة ورى الثانية ..

ماردت اكون حمل ع اهلي وخاصه نسر المسؤولية جبيرة عليه البيت واخواتي وزوجته وبنته وفوگاها اني

طلبت منه يشوفلي شغل او تعيين رفض ..

" ارتاحي هالفترة الله رازقني والحمد لله لاتفكرين ابد والي تحتاجيه گولي "

جاوبته " حبيبي ادري متقصر بس مو شغله فلوس اني اريد اشتغل وانسى .. مااريد ابقى بالبيت وافكر اموت وربي "

رد " عليمن تموتين اعتبريه ماموجود بحياتج .. "

رديت " وهو هيج بس الخيانة صعبه وانت اكثر واحد تحس بيه .. شنو هالحب الي خلاه يتنازل حتى عن ولده .. بحياته ماضحى علمودي "

اتنهد " انسي خوية ولاتصيرين مثلي ترى تتدمرين .. الي مثل مريم وليث حرام واحد يحرگ دمه عليهم "

شذر :

مرت هالايام بصعوبه علينا كلنا والاكثر على نسر ..

هنا تكابر بس جروحها تنزف حتى ضحكة ماتضحك ولاتگعد او تحجي ويانا ..

حقها حياتها انقلبت رأس على عقب .. اما بيداء فبعد مارجع مهيمن رزلته وحجت عليه بس ماوصلتها النسر مارادت تحمله همها فوگ الهموم الي عندها ..

الوضع رغم تحسن شوية .. بس يبقى طابع الحزن موجود ..

اشتاقيت الخالة حيل .. نسر واعدني بعد مايرجع من دوامه ياخذني الها ..

وفعلا بعد مارجع اخذني البيت عمة من الصبح .. بين مانظفت وسويت غدا ..

اجت خاله ..

حضنتها حيل مشتاقتلها ..

سألتني " انحلت الظروف الي عندكم "

هزيت راسي " الحمد لله "

باوعت للگدور " شنو طابخة "

رديت " اي اليوم تتغدين ويانا حسبت حسابج "

ردت " لا مااگدر حبيبتي .. گلتلهم مااتأخر .. وبعد الظهر يجي سعد ياخذنا البيت عمي زواج ابن علاء ..

سألتها " علاء عمي مووو؟"

ردت " اي "

اتنهدت " جنت اتمنى عندي بيت عم او بيت خال .. انحرمت من كلشي .. احجيلي عنهم "

ردت " شأحجيلج .. علاء عندة ثلاث ولد .. وعامر عمج الثاني عندة اربع بنات عباله يجيه ولد ومااجاه .. ابن علاء خطب وحدة من بنات عامر .. احسن مما يرحن للغريب وهم متربين سوة وبنفس بالبيت "

ابتسمت " شگد حلو "

اتنهدت " اييييي هاي الدنيا تمر السنين بسرعة ويبقى الماضي نقطة سودة بحياتنا "

سكتت بعدها سألت " انتي شلونج وسالفه نسر شصارلها "

رديت " اهل البنية رفضوا "

فرحت " لاتصيرين غبية وحاولي تكسبيه "

رديت " شسوي مو بيدي خاله .. اكو فجوة جبيرة بينا"

ردت " الله لينطيك عادل "

اتنهدت " المشكله حلمت بسمر "

سألت " سمر منو ؟"

رديت " سمر اختي .. مو كلتلج عندي اخوات توام سمر وسحر .. سمر عندها وحمة بوجهها .  هادئة حيل من صغرها بعكس سحر .. البارحة حلمت بيها وخايفه لايكون ابوي يسوي بيها مثلي "

ردت " لاتخافين .. مااعتقد يكررها بعد الي صار وياج "

رديت " ماادري خايفه .. اتمنى اشوفهن واطمأن "

ردت " واذا رحتي عبالج يرحب بيج هاي اذا مااعتبروج ميته "

سكتت كلامها صحيح المن اروح .. الامي الي ماحسيت بوجودها بحياتي لو ابوي الي هو سبب دماري ..

اجه نسر .. وصته عليه باوعلي. . حسيته ضاج

رادت تروح بعد مافضفضت الها كل همومي وارتاحيت

ماقبل نسر تروح الا تتغدا بس ماقبلت لان خالو سعد راح يجي ياخذهم البيت جدو..

هالكلمة امنيتي احجيها من صدگ .. اتمنى اروحلهم واحجيلهم واعيش بوسطهم وراضيه بأي حكم المهم اعيش بوسط اهلي مرتاحة ..

كان نسر ضايج بيومها . 

ومن وصته خاله ضاج اكثر . بعد ماطلعت صبيت الغدا سألني " شحاجيه الخالتج عليه "

رديت " محاجيه شي "

رد " ليش توصيني بيج وتكلي راعي الله بيها ليش شمسويلج اني .. اشو مخليج على راحتج .. مقدر ظروفج وصابر بعد شسوي وانتي تتدللين عليه وتتعززين شغله من سنين صارت وراحت لويش هالدلال مو زين مني راضي ومصدگ "

باوعتله بأسف " هذا كله بداخلك اتجاهي .. انت وحدة لو من اخواتك تأذت تتخبل .. فكيف الحال اذا عاشت طفولة مثل طفولتي .. من البدايه اتفقنا وانت الخلفت وبعد مابديت اتأقلم عليك واحاول اتغير وبدل ماتساعدني هيج تحجي وياي .  ماجابرتك تتحملني وحتى زواجنا اذا تحسه صار حمل عليك ووجودي زيادة ببيتكم گول .. عادي اروح العمامي وخلي يكتلوني او يطردوني المهم ارتاح من هاي الدنيا "

هو ضايج واني ضجت من كلامه .. گمت عن الاكل

بقى هو .  همزين دنو ماهي ..

لبست ومنتظرة يخلص ونرجع ..

اجة دگ الباب " تعاي كملي..  جنت ضايج ولصت بالحجي ادري "

باوعتله " لا عادي تعودت "

رد " شتعودتي قابل كل يوم مرزلج "

رديت " شبيك نسر وياي "

رد " الي بيه انتي سببه تعبت واني احاول .. كم مرة گلتلج سلميني نفسج ماترتاحين اذا ماتعيشين هالتجربه وتعديها "

بدأ يتقرب مني .. ابتعدت " نسر لاتحاول "

رد " علمودج .. سلميني نفسج "

عطت " مو هيج انطيني فرصه "

رد " لشوكت صار اربع سنوات "

لزمني من ايدي ويهمس " غمضي وفكري بأشياء حلوة

فكري بدنو واخو الها .. فكري بحياتج ومستقبلج وياي "

رديت بتوسل " حباب عوفني "

بس جان مايسمع .  مااعرف شبي وليش هيج يسوي .. هسا عرفت ليش طلب نبقى هنا للعصر ورفض نجيب دنو ..

ابعده مايبتعد هو اقوى مني .. صار يحاول واني دموعي تنزل .. هو فاقد واني ابجي مثل الوحش ينهش بيه اشمئزيت من لمساته .. الى ان فاض صبري وعطت .. گوم مني حيوان كلكم نفس الشي كلكم ..

بسرعه ابتعد " حيوان مووو .. الحيوان ابوج يا…… اصلا شأتوقع منج وانتي بنت واحد…… وفوگاها تبيع مثاليات براسي .. او يمكن معتدي عليج وتخافين اتقربلج گولي انتي مو بنية بعد ليش تراوغين "

دموعي ينزلن واني اسمع كلامه " توقعتك مثقف وتفهمني بس طلعت ثقافتك وتعاملك وي اخواتك بس اما وياي همجي "

تعصب رفع ايده .. وبعدها نزلها استغفر الله ..

رتبي نفسج والمواعين خلينا نمشي مو مال احترام طلعتي ..

رحت للمطبخ غسلت الماعين .. بعد ما بديت احس بشي اتجاهة خلاني انفر منه..

حبيت نخوته ورجولته وي اخواته واتمنيته سند الي .. بس مجرد مارفضت انطيه الي يريده انگلب شخص ثاني .. نفسه الشخص الي عرفته من اجيت بس يعاير بيه وبماضي .. واخرها تهمني اني مو بنية .. لو ماخوفي كان گلتله تعال وتأكد حتى ارتاح ويرتاح هو من شكوكه ..

اجه للمطبخ من غير مايباوعلي .. يله فضيها ..

كملت وطلعت قبله . قفل الابواب وطلع .. رجعنا للبيت وطول الطريق ساكتين .. رجعنا النقطه البداية بعد الي صار ..

اول ماوصلت خابرت خاله بعدها تذكرت هي بالعرس سديته منها..

نزلت وي البنات سوينا عشا .. خاله وعذورة يردن يرحن للسوگ باجر حجت وياي ..

' ترحين ويانا نشتري الدنو ملابس مدرسه لو نشتريلها على ذوقنا "

رديت " لا احتمال اروح وياكم لان ماعندي مواد خياط"

كل مرة اخلي نسر يشتريلي بس هسا مااريد احجي وياه دائما يشك بشرفي ويحجي عليه واسكت بس لهنا وكافي ..

لليل صعدت لگيت خاله مخابرتني .. حجيت وياها

" هلو خاله "

" هلو امي مخابرتني وماادري بي "

رديت " اي بس ذكرت انتي بالعرس مافارغه "

ردت " احجي اسمعج دخلت للغرفه .. "

استحيت احجيلها واصلا شنو اگلها ..

رديت " ماكو شي خاله هيج شغله وراحت الحالها "

اتنهدت " ااااه ياشذر ااااه .. الي بيج اعرفه وياليتني اگدر اساعدج لو اشيله منج "

من حجت هيج دمعت عيني احسها تفهمني من غير مااحجي.. 

سديت الموبايل رجعته للمجر .. اجه هو للغرفه بدل عفته وطلعت .. رحت الغرفه الخياط كتبت المواد الاحتاجهن وهم اريد اخيط الدنو وفروحة للمدرسه .. عذورة هم رادت مني اخيطلها يلگ وكيلوت للدوام

كملت وطلعت صار بوجهي .. صدگ ردت احجي وياج بخصوص هالغرفه ..

اذا تگدرين تفرغيها لان تدرين الغرف مايكفن وهنا وولدها اجو اريد افرغها الهم واجيب اخشابهم لهنا ..

هزيت راسي " عادي ماكو اشكال شوكت ماتريد نفرغها"

سكت مارد نزل لجوة ..

رحت فرشت .. هاي الايام دنو ملتهية وي ولد هنا فرحانه بيهم ومرات تنام يمهم .. تحب فهد حيل ..

رغم بالي يبقى يمها وماارتاح الا تجي تنام يمي ..

للصبح گعدت من وكت .. سويت ريوگ هنا تحجي وي نسر على شغل وهو وعدها يشوفلها تعيين ..

كملنا البيت . بدلنا اني وخاله وعذورة .. وويانا دنو وفروحة ..

فرينا السوگ واخذت احتياجاتي .. ومناك رحنا السوگ الكاظمية ..

جاي نفتر شفت مرة ..

شايفتها بس وين .. شالت راسها باوعتلي بقت صافنه عليه واني صافنه عليها ..

خاله وعذراء دخلن للمحل .. بقيت استرجع ذاكرتي

وين شايفتها . هي بسرعه نطقت ..

انتي شذر موووو !!

من گالت اسمي وسمعت الصوت تذكرتها .. احس كلبي يريد يوكع مني بسبب خوفي ..

هي نفسها جنان صديقه امي اي هي بس كبرانة ماعرفتها جانت لابسه اسود ووياها بنيه ..

بسرعه دخلت للمحل من غير ماارد عليها .. بقيت اكل بنفسي وخايفه .  معناها عرفتني اي عرفتني بي لاتروح تگول الاهلي .. ويمكن يجون لهنا ..

لا مايجون يخافون من عمامي .. بس ليش انصدمت من شافتني وشهگت ..

حسبة تاخذني وحسبة تجيبني تمنيت لو سائلتها عن اخواتي ووين صاروا بعدهم بالمنطقه لو اختفوا ..

بس اكيد تعرف شي عنهم لان علاقتها بأمي قويه ..

صرت اتلفت خاف تجي وراي وتفضحني يم خاله وعذورة ..

عصرت ايدي عذراء فزيت " شبيج صار ساعه احجي وياج هذا القميص حلو لو لا "

رديت من غير مااشوفه " اي حلو اخذيه "

يلة بسرعه دنو تريد تروح للمغاسل ..

ردت خاله " اخذيها انتي واحنة جايين وراج .. حتى نزور ونرجع للبيت "

طلعت بسرعه ماصدگت من غير ماالتفت واباوع خاف اشوفها وتجي وراي ..

كمت اركض لين وصلت الداخل الامام ارتاحيت . اخذت دنو للحمام وهي تكلي ماما مااريد .. اريد بس مكان انهزم منها ..

هي تعرف اهل امي بالكاظميه لان اني سمعت ماما وهي تحجي وياها .. هسا اكيد عبالها عندهم ..

احس راسي راح ينفجر ..

بقينا بالامام اجت عذورة وخاله .. گعدت يمي ..

وج متت تعب . صدگ ماگلتلج ..

" شكو ؟"

" ام هديل خابرت "

استغربت " شعندها ؟"

ردت " ماادري بس گالت الماما من ترجعين خابريني ع الارضي حتى نسولف براحتنا الموبايل يصرف "

استغفرت ربي .. وگلبي نغزني .. ليش المصايب تتلگاني وين مااروح !!

#بقلمي_شمس_السعدي

يتبع .…

مساء الفل والياسمين  ❤

///// البارت التاسع والثلاثون /////

#قوارير_من_فضة ج2

#بقلمي_شمس_السعدي

________________________

اشعر وكأن حياتي اشبه بدهاليز مظلمة ..

مبعثرة كـ أوراق الخريف ..

اصبحت ابحث عن ضوء ينير واقعي المظلم..

واقعي الذي تشابهت به كل الالوان بلون قاتم ..

كم اتمنى ان اهرول راكضه الى الامام .. كي اتخلص من تلك الدهاليز .. لكني سرعان مااصطدم بجدران الحزن والخيبة ..

فأتسائل !!

لما الحزن يعتريني ؟؟ ولايفارقني ..

لما كل احلامي عبارة عن كابوس يلاحقني منذ طفولتي لما الماضي لايتركني ويجتاح مستقبلي ..

ماذا جرى لي ؟؟ لما تجردت من احاسيسي !!

قلبي لاينبض !! ودموعي لاتفارقني !! وأنوثتي غابت عن ملامحي !! ..

_______________________________

بقينا بالامام اجت عذورة وخاله .. گعدت يمي ..

وج متت تعب . صدگ ماگلتلج ..

" شكو ؟"

" ام هديل خابرت "

استغربت " شعندها ؟"

ردت " ماادري بس گالت الماما من ترجعين خابريني ع الارضي حتى نسولف براحتنا الموبايل يصرف "

استغفرت ربي .. وگلبي نغزني .. ليش المصايب تتلگاني وين مااروح !!

رجعنا للبيت .. وبالي كله يم جنان .. شلون عرفتني معقولة من الشبه الي بيني وبين امي ..

واذا راحت گالت الاهلي .. افكار تاخذني وتجيبني .. رغم اعرف اهلي مستحيل يوصلون لهنا ويدورون عليه بس اكو خوف بداخلي كلما تندگ الباب افز من خوفي

بدلت ونزلت .. سمعت خاله تحجي بالتلفون وي ام هديل ..

اشرتلي عذراء من فوگ .. مافهمت..

بس خاله گالتلها " والله هاي جانت امنيتي وتدرين بيه هاويتها وسبق وان گلتلج وسولفت وي ابو هديل .. اي دادة اريدها بينا وماتطلع حتى الهديل ..

يصير خير يجي واگله.. يله عيني مع السلامة ..

فلقت التلفون .. سألتها بيداء " شنو وافقوا ؟"

ردت خاله " اي وافقوا بالگوة ام هديل قانعه رجلها "

حجت عذراء " شنو هو لعب زعاطيط مو رفضوا شغير رأيهم "

عاطت بيها خاله " معليج انتي لاتتدخلين "

ردت بيداء " حجيها صدگ يمه ليش وافقوا "

هزيت جتفها خاله " شمدريني .. يمكن فكر ببنته وحياتها .. اوووه يعني المرة گالتلي ابوها وافق ويگول خلي يحددون المشية ويجون .. شترديني اگلها لا مانريدها لو ليش ماوافقتوا من البداية "

جاوبتها بيداء " شعلينا احنة يجي نسر وشوفيه وبعدين مرته منا والله عيب من البنية شايلتنا على راسها واحنة نتخطب الرجلها "

ايدتها هنا وعذورة هم .. بس خاله عاطت بيهن وگامت

البنات من مستحيات مني مايحجن او يبررن حتى ..

بس هالمرة حسيتها راح تصير صدگ ..

صاحتني خالة للغرفه بعد ماكملت صلاة ..

اشرتلي اگعد يمها " يمه الله شاهد احبج .. واتمنيتج من جنتي وي ام وليد وتسولف بيج وبهدوئج وعقلج

ولحد الان والشاهد الله ماشفت منج الا كل خير لابيوم اذيتينا بحجايه ولا تدخلتي بشي .. شايله بيتي وبناتي بس نسر وحيدي .. ومن حقي اشوف ولده .. وهاي صارلكم شگد .. واني من حقي اشوف ولده وتدرين احنه نسلنا قليل الي يجيب واحد لو اثنين ولد .. ولانسر ولاقصي عندهم……… .

جانت تحجي وتحجي وتحاول تبرر واني ساكته شحجي وهي حاسمه الموضوع ..

ومالي حق احجي اصلا بعد الي صار بيني وبين نسر اخر مرة ..

شگد ضغطت على نفسي .. عذراء شگد نصحتني . بس ماگدرت ماتحمل قربه مني .. مرات اتمنى الموت حتى ارتاح لااني گادرة اعيش حياة طبيعية .. ولا گادرة انسى واستمر ..

كملت وسألتني " خو ماضل ببالج ؟"

هزيت راسي " لا خاله هذا حقج اذا نسر قابل خلي يتزوج "

گمت منها مااتحملت اخر جمله گلتها حسيتها طلعت بالگوة مني .. ضجت واحس روحي مخنوگة ..

نظرات البنات كلها شفقة الي .. وكأنه يواسوني ..

رحت للمطبخ ماردت احد يحس عليه ..

اجت هنا گعدت يمي " شلون توافقين شذر معقولة ماتحسين بغيرة ؟؟ هذا رجلج وحلالج ليش تخلين وحدة تاخذه منج "

باوعتلها وابتسمت بقهر " يعني اذا رفضت شراح يصير عندي اهل اروحلهـم .. لو عندي اخو يوگف الي وياخذ حقي .. هنا وضعي مختلف عن وضعج انتي تزوجتي لان تحبيه… وتركتيه لان خانج… بس احنه زواجنا من. البداية معروف شنو… الي معجبني جان من البداية يكره شي اسمه زواج حتى اني انجبر عليه بسبب عمة الله يرحمها… اشو هسا الوضع اختلف "

ردت " ماما تگول علمود الاطفال "

رديت " حقهم بس لو خاطبيله غير هديل "

سألت " ليش شبيها "

رديت " مااعرف ماارتاحيتلها "

ا تنهدت " هي سواء زينة او لا فأسمها ضرة .. شلون راح تتحملين.. اني لاتشوفيني هدأت .. ترى بداخلي بركان عمره ماراح يهدأ صعبه تشوفين زوجج بحضن وحدة ثانية مستحيل تتحملين .. لسا ببالي منظرهم سويه انام اگعد هم گبالي حتى بأحلامي .. "

رديت " مو گلتلج وضعج يختلف عن وضعي .. انتي جنتي تحبيه اكثر من نفسج وفجأة اكتشفتي يخونج وي اعز صديقه عندج..  بس اني هواي امور مختلفه والاهم ماكو اطفال يعني مالي عين احجي "

مااگدر افهمها موقفي .. وخاصه نسر مايباوع بوجهي من يوم الي صار .. هالمرة خسرته من صدگ… مااعرف الوم حالي لو منو بهيج موضوع…

اجه نسر صعد بدل وارتاح .. اخذتة خاله للاستقبال ..

بعد دقايق سمعنا صوته ..

" يمة هي لعب زعاطيط شنو رفضوا وشنو وافقوا .. وبعدين شنو الي خلاهم يوافقون مو ماينطيها ابوها الواحد مطلگ ومتزوج .. سدي الموضوع من يمج "

ردت عليه " يمة مايصير هاي عود انت العاقل وتعرف بالعادات .. البنية اذا خطبتها ورفضتها معناها كسرت بختها ياما ناس فصلت وصارت گعدت عشاير بسبب هيج شي "

جاوبها " تحجين صدگ يمة .. اني الرفضتها لو همة الي رفضوا لعب هي كل يوم الهم قرار .. اني من البداية ماقانع وعلمودج قبلت "

ردت عليه بعصبية " شنو ماقانع تلعب عليه مو انت الگلتلي روحي خطبيلي . تريد تفشلني وياهم… شنگول الاهلها والعمامها وتعرف ابوها شنو .. وحق الله يانسر اذا فشلتني لاانت ابني ولااعرفك "

گام من يمها " اتبري مني يمه گلتلج العندي مثل مارفضوا يتحملون نتيجة قرارهم "

عافها وطلع وهي تفرفح الى ان تخربط .. ركضن البنات شافن ضغطها مرتفع انطنها حبايه..

البيت بيومها انگلب عزا ..

نسر يدخل ويطلع مايحجي وي اي احد… حتى اكل ماياكل من الشغل للغرفه ينام ..

اجيت اريد اطلع ملابسه اغسلهن ..

دخل باوعلي " شتسوين ؟"

رديت " اغسل ملابس "

رد عليه بنتر " عوفي ملابسي لاتغسليهن بعد مالج شغل بأي شي يخصني " اخذهن مني وطلع حتى ماگدرت احجي ..

تحول الشخص ثاني ..

اخر يوم من راد يلتحق .. اجت اسراء صاحته..

" نسر ماما صارلها شگد مريضه .. حالتها فد مرة لان ماتحجي وياها "

رد " غير هي گالتلي ماعندي ابن ولااعرفك .. يعني لو تجبرني لو ماتحجي وياي "

اتنهدت " خوية حقها لو ماتريد مصلحتك ماتحجي هيج لليوم ماجبرتك على قرار بس هالمرة عندها حق عاجبك وضعك .. لاانت المتزوج ولا انت الي عايش حياتك مثل العالم لاعبالك مانعرف كلشي ندري .. صح عيب احجي هالحجي بس انتو حتى فراش ماتنجمعون بس وكل واحد بمكان ينام… .."

من سمعت كلامها انصدمت " هاي شمدريها .. محد يعرف بهذا الشي بس عذورة ومستحيل تحجي "

همزين البنات كلهن يم خاله محاوطاتها لان مريضه.. 

مااعرف اذا يدرن او لا . بس مادام اسراء عرفت موبعيدة تروح تگللهن ..

احة باوعلي " تعاي وراي "

عرفت ماراح تعدي على خير ..

دخلنا الغرفه سألني " بعد شگلتيلهم .. يتقرب مني واني اصده ومااخليه واغلط عليه واگله حيوان مووووو ؟"

جاوبته " والله محد يدري ولافاتحة حلگي شلون احجي وافضح نفسي "

عاط بيه " لاعبالج ناسي تجاوزج عليه… لسا هالكلمة ترن بأذني ولو واحد غيري جان كسر راسج على هاي الكلمة .. بس اكبر عقاب الج هو اهملج لان انطيتج فوق حجمج ماتستاهلين احد يحبج ويهتم بيج "

طلع وطبگ الباب حيل " كلامه وتجريحه الي اذاني . ضجت وبجيت مااعرف ليش .. "

بقيت شويه ونزلت جان ماهو بالبيت…

شفت عذراء عاتبتها " محد يدري بينا اني ونسر بس انتي هم گايلة الاسراء ؟"

استغربت " شگايله اصلا تعرفيني اني واسراء مانتراهم"

رديت " جا شمدريها اني ونسر زواجنا شكلي وننام منفصلين "

شهگت " عزا شدراها .. وحق الله ماگايله الاي احد واصلا بالفترة الاخيرة عبالي عالجتوا هالموضوع وعلاقتكم قويه يعني مستحيل احد يشك "

استغربت " جا شمدريها "

ردت " تتوقعين يخفى شي على ام اربع عيون .. طموحها قاضية واصلا تستحق هيج منه مايخفى عليها شي "

مابقت بس دنو .. و مستحيل تگول لان معلمتها ماتطلع اسرار الغرفه ..

اخذت دنو للغرفه وحجيت وياها " ماما اني انام بالگاع علمودج هم اكو احد يدري انام يمج مو يم بابا "

صفنت وبعدها ردت " لا ماما مااگول الاحد "

سألتها " وعمة اسراء "

سكتت وتوترت " والله ماما ماگلتلها هي سألتني گالت انتي وين تنامين ..

گلتلها اني يم ماما انام .. سألتني مرة ثانية .. ع الجربايه كلكم تنامون… گلتلها لا اني ماما بالگاع بس والله ماقصدي هي قشمرتني بالحجي والله ماما مااطلع اسرارنا ابد ولااحجي .

حضنتها " عادي حبيبتي مادام ماتدرين ماراح ازعل وياج بس بعد الي يسألج عنا گولي ماادري لاتحجين "

هزت راسها وحضنتني.. 

العتب مو ع دنو ع عمتها الي تدور وراي اقل زلة .. واني اگول هالفترة ناسيتني وبعد ماتحاربني مثل قبل

لليل رغم منبه عليه مااوصل الملابسه واغسلهن ..

بس گمت حضرت جنطته وكويت ملابسه ونزلت

البنات يحضرن العشا من يوم الاجت هنا ماتخليني اسوي عشا هي تسوي ..

طلعت مواد من الثلاجة للزلاطة .. دخل نسر سلم عادي ودخل .. راح الغرفه خاله بسرعه ..

بقوا فترة وبعدها طلعوا خالة جانت تبجي وتمسح بعيونها وهو حاضنها ..

باوعلي صارت عيني بعينه گالها " مايهون عليه زعلج .. الي ترديه يصير بس لاتتمرضين وماتخليني اشوفج مااتحمل .. صار كم يوم مجافيتني جن الدنيا طالعه من عيني "

من كلامه حسيته قبل ورضخ الامر خاله ..

اتأذيت حيل .. بقيت اثرم زلاطة بقهر… بدون مااحس جرحت روحي بالسجينه .. عطت ..

اجت هنا وعذورة يركضن " شبيج شو خلي نشوفها " 

لازمتها والدم ينزل والوجع بگلبي مو بيدي .. اول مرة گلبي يأذيني هيج .. معقولة هاي غيرة لو خوف من المجهول ؟؟

غسلت ايدي وجابت عذورة تعقيم .. سمعته سألها :

" شكو ؟"

ردت عليه " شذر انجرحت اديها "

سكت مارد . معقوله بعد ما يهتم .. جنت منتظرة منه يفهمني ويهتم بيه .. يعودني عليه شوية شويه مو فجأة يطالبني بشي مااگدر اسويه ..

استسلمت للامر الواقع ورضيت بمصيري ..

ان كان السبب بيه او بالدنيا والزمن… فهو مكتوبلي اعيشه ..

التحق ثانية يوم .. وخاله من فرحتها طابت وگامت خابرت ام هديل وحددوا المشية والمهر بيوم واحد وحتى من غير علم نسر ..

خلال هالفترة .. طلعت للسوگ اشترت الذهب وجهزت كلشي بغيابه ..

جانت تجيب كلشي بسكته وتحظر بسكته حتى ماتضوجني ..

حتى غرفه الخياط .. فرغتها علمود هنا .. بس هي ماقبلت :

" هنا تنام يمي هي وولدها الغرفه جبيرة وواسعه .. هاي الغرفه خلوها النسر وهديل "

اختنگت من سمعت ." معناها هديل تصير بصف غرفتي واكيد ماراح تعوفني بحالي "

من رجع نسر من الدوام تفاجأ خالة مكمله كلشي ..

حاجاها " شنو هاي يمة هيج متوازية تعرسيني بسرعة"

ردت " شعندنا يمه اثنينكم متزوجين قبل .. يعني ماكو داعي تطولوها "

رد عليها " بعد وكت يمة زواج هسا مااتزوج خليها بس نگطع مهر "

شهگت " ليش وشنو الي تغير ؟"

رد " هالفترة انذار والوضع تعبان مااريد التهي بالزواج ويمكن كم يوم والتحق .. واتأخر هالمرة خليها ع راس السنه ونتزوج "

ضاجت خاله بس ماحجت .. المهم عندها راح يگطعون المهر .. بيوم المشية والمهر ..

انخبص البيت من الصبح .. بيت عمهم وعمامهم من العشيرة اجو .. اجر سيارة للنسوان .. كلها راحت ماعدا هنا بقت يمي .. ماقبلت تروح ..

بيومها ماصعدت للغرفه مانطاني گلبي اشوفه ببدلة العرس ..

نزل مبدل وعطرة قبله .. بوجهي اگله " شايف كل خير وعساك سعيد الي سويته ماسواه احد وياي "

وبداخلي الوم حالي واحس بأنانية " هذا سندي وملاذي معتبرته اهلي لان انطاني الامان الي حرموني منه …

اما هو جان يباوع بنظرات عتب يتصنع الضحك والفرحة .. احسه يحاول يخفي ضوجته ويضوجني بفرحته ..

دنو ماقبلت تروح وگالتله " بعد مااحبك لان تجيب زوجة ثانية وتعوف امي "

الكل عبالهم اني اعلمها حتى خاله ضاجت مني " لاتخشنين گلب البنية .. صح انتي الربتيها وكبرتيها بس مو من حقج تكرهيها بهديل هم راح تعتبر امها حالها من حالج "

انقهرت حيل وسكتت .. دنو ذكيه لدرجة تفهم كلشي من عيوني ومن غير مااحجي .. علمتها الي ماعلمته امي اليه .. اخاف عليها اكثر من روحي .. مرات اگول اخاف اظلمها لان اخاف عليها من ولد عمتها واراقبها بس من حبي وخوفي الها هيج اسوي .. بعد كل هذا خالة تقارني بهديل .. مستحيل هديل تكون ام البنتي مستحيل .. "

بعد ماطلعوا قفلت هنا الباب واجت ..

" مااعرف شلون اواسيج "

ابتسمت " لاتواسيني يستاهل نسر كل خير "

صعدت للغرفه طلعت الموبايل خابرت خاله ..

رفضته وخابرتني ..

" الو .. بس سمعت صوتها بجيت "

" شبيج " سألتني

" مااعرف مخنوگة .. اليوم مهر نسر "

اتنهدت " مااعرف الومج لو اهديج "

رديت " اذا اني نفسي مااعرف شبيه مشاعري مخربطة ساعه اضوج وساعه اگول خلي يشوف حياته .. احس روحي مخبله خاله .. نسر الامان بالنسبه الي اخاف اذا تزوج اخسره وتغيره عليه"

اتنهدت " كلشي توقعي .. ماكو زوجه ماتغار وتحب زوجها يكون ملكها .. تعودي شذر ياما گلتلج وحجيت بس مايفيد "

عطت لااراديا " مو بيدي مو بيدي ليش محد يفهمني انتي گدرتي تنسين الخيانة .. ليش ماتتزوجتي لسا ليش مانسيتي وعشتي حياتج خاله..  اني الي بيه اكثر من هيج .. البيه احساس واشمئزاز مايروح ابد .. والله اتمنى احب واعيش حياتي مثل البنات .. بس مااگدر مجرد ماافكر بهيج شغله نفسي تلعب "

ردت " هاي حاله نفسيه .. شلون تطلعين منها ماادري .. اگلج ماتخليني اشوفلج طبيب بلكي تصيرين زينه "

استغربت " طبيب شنو خاله وشيسويلي .. قابل اني مريضه "

ردت " اي هذا مرض وحتى اني لازم اتعالج .. بس اني وضعي احسن منج انتي ماتگدرين تعيشين حياتج الا اذا نسيتي وماتنسين اذا ماتتعالجين "

رديت " سدي الموضوع خاله اي علاج هذا يشفي البيه وشينطيني مثلا حبوب نسيان لو شنو .. اذا الي صار محفور بداخلي وبعقلي .. مستحيل انسى ..

صدگ ماحجيتلج المن شفت .."

سألت مستغربة " المن ؟"

اندگت باب الغرفه توترت بسرعه سديته وغلقته ..

فتحت الباب شفت هنا ..

" عبالي نايمة .. سمعتج تحجين وي منو "

توترت " هااا وي خاله رسميه خابرتني تعتب عليه "

سألت " لعد ليش ماخابرت ع الارضي مفصول شنو ؟"

رديت " لا ممفصول اصلا هي تگول ماافصله ابد مايعجبني غير الارضي بس لان تستحي منكم تخابرني ع الموبايل "

هزت راسها " هاااا حقها يصرف رصيد هواي وهي ع گد حالها .. اذا كملتي تعاي يمي جوة اضوج وحدي "

ضميت الموبايل .. ونزلت ..

حانت تسوي معجنات هي شاطرة بيهن .. گعدت اساعدها ..

بقينا نحجي .. ضايجة تريد تشتغل ونسر ميخليها…

بس هي مصرة تسحب وثيقة وتقدم على تعيين مادام التعينات مفتوحة هاي السنة وهواي عينوا ..

ايدتها بالموضوع لان فعلا التعيين والدوام هم الي راح ينسوها مثل ماالخياط گدر ينسيني ويلهيني ..

هنا من يوم الي صار الضحكة مااجت ع وجهها ابد ..

لليل سوينا عشا وانتظرناهم لليل يلة اجو والطريق يخوف بقى بالنا يمهم…

دخلوا تعبانين .. باوعت بوجهة جان تعبان..  صعد بسرعه للحمام ..

دخلت خاله فرحانة والبنات بس عذورة اشرتلي ..

بدلت واجت همستلي " وج اصلا الي يشوفه يگول مجبور ماباوع بوجهها ابد "

اتنهدت " بعد خطب شنو الفائدة "

گعدنا ع العشا هو ماقبل يتعشا گبل نام ..

انتظرت لمن غفا يله صعدنا نمنا ..

ثاني يوم خاله بدت تجهيزاتها رغم گالها الرأس السنة يله اتزوج..

بس هي قررت تنظف الغرفه الفوگ وتصبغها ..

راد يطلع نسر سألته..

" يمة اريدك تطلع صباغ للغرفه الفوگ يرتبها ويصبغها وحتى نروح للنجار نختار غرفه يسگمها النا "

رد عليها " يمة لويش مستعجله بعد كم شهرين لاحگين

والغرفة الفوگ خليها للبنات .. وغرفه البنات نصبغها "

ردت " ليش يمة غرفه اخواتك صغيرة ذيج جبيرة وبيها حمام وتواليت وتوسعكم انتو وجهالكم ان شاء الله."

اتنهد " يمة ياجهال گولي بسم الله وبعدين انتي تعرفين ذيج الغرفه مااطيق اگعد بيها لويش تلحين .. خلي البنات يصعدن بيها هم يله تكفيهم .. والجوة فرغيها "

ضاجت خاله بس ماحجت .. بالفترة الاخيرة تغيرت حتى صارت ماتهتم المشاعري ..

الدوامات بدت .. والتهيت بدنو ودراستها .. كل البنات صاروا يداومون .. حتى هنا قدمت ع التعيين وبعد الحاح منها النسر وافق انه تتعين وحتى توسطلها يم معارفه ..

البيت الصبح بس اني وبيداء .. وخاله بدت تجهز الغرفه . صعدوا غرفه البنات وغراضهن لفوگ بصف غرفتي .. اني دخلت المكينة يمي بالغرفه ..

طلعت عمال صبغوا الغرفه ورتبوها .. حتى الستاير خيطتهن من احدث موديل… كل يوم تطلع تجيب شغلات وتجهز ..

نسر من يوم الي خطب لايخابر ولا يسأل عليها .. لمن عاتبت امها خاله ..

فخاله لحت عليه " يمة عيب صار شهر من خاطبها ولاسألت ولادزيت مصرف شيگولون علينا اهلها "

نطاها فلوس وگالها اخذي مهيمن ووحدة من البنات بسيارة مشتاق وروحوا زوروهم بحجة اني عندي انذار

ردت عليه " شلون بيك انت حالف تفشلني وي العالم "

رد عليها " يمة شبيج عليمن افشلج هي كلها شهر زمان ونتزوج شنو مراهق اني رايح جاي الهم . البنية واعرفها من الصغر بعد شعندي رايح "

من يوم الخطب لسا .. هو بس يباوع وحجيه وياي كله رسمي ..

الى ان قرب موعد الزواج وبدوا بالتجهيزات ..

اجت الغرفه من النجار نصبوها .. جانت كلش حلوة

جهزتها خاله كلها ..

نسر قرر يتزوج بسكته وبيناتهم ماراد هوسة وزفه

اشترى ملابس جدد خلاهن بالغرفه الجوة ..

واخذ قسم من ملابسه نزلهن .. اني بهاي الفترة اكتفيت بالسكوت ..

صار رأس السنة .. واجت بشارة هنا بالتعيين والي صادف وي الزواج .. الكل فرحلها اكثر من فرحتهم بالزواج..

بيوم الزواج ..

بيداء اتكفلت بالطبخ .. هم ماعازمين بس احنة وبيت عمهم ..

خاله تواسيني وتصبرني بس احس بدت شرارة نار تشتعل بداخلي ..

نزلت من فوگ هو طلع من غرفته مبدل ووراه قصي باوعلي دنگ وراح للاستقبال ..

تذكرت يوم عقدنا .. صح ماكان مثل اي اثنين بس كانت ملامحة مختلفه عن هسا ..

رحت للمطبخ وي بيداء .. والبنات ماقبلوا يرحون ..

هنا بحجة دوامها وترجع تعبانه وعذورة كذلك .. بس اسراء وسما والاء راحوا وي خاله ..

من راد يطلع اجه للمطبخ جنت گاعدة ومخليه ايدي ع خدي ..

وهو يمشي گال " هسا ارتاحيتي شذر بعدتيني عنج ان شاء الله تكونين راضيه ببعدي ومرتاحة "

طلع ولأول مرة احس روحي تريد تطلع وراه ..

كم تمنيت لو اني التقيتك قبل الان

في زمان ومكان اخران

حتى اتوجك ملكا على قلبي

ولا ادع اي شي يبعدني عنك ..

ولكن شاء القدر ان التقيك في الزمن والمكان الخطأ

ولانني لا استطيع ان اتقرب منك وابتعد عنك

سأطلق عليك لقبا لا يشاركك فيه احد

ستكون حبي المستحيل !!

#بقلمي_شمس_السعدي

يتبع……

احبتي البارت نحذف ورجعت كتبته .. انتظروني بعد ساعات اكتبلكم بارت جديدة تعويض عن البارحة

صباحوووو حبايب ❤

///// بارت اربعــــون /////

#قوارير_من_فضة ج2

#بقلمي_شمس_السعدي

ضجت من حجة هيج .. لاول مرة احس بهيج احساس

اعذرني نسر الذنب مو ذنبي ..

ذنب الظروف الي جمعتنا بوقت خطأ ..

ذنب القدر الي خلاك بطريقي بوقت كان الرجال كلهم سواسية عندي ..

بوقت كنت مجروحة وتايهة وطريقي مظلم ..

ابوية مااعتدى عل سبب طفولتي وبرائتي فقط .. لابل اعتدى على مشاعري واحاسيسي .. استبدل الحب بالكره والعاطفة بالحقد والانتقام ..

دخلت عذورة " شلون صابرة انتي لو اني منج واسم الله معتز يخطب غيري يمكن يصير بيه اكثر من هنا .. هاي اذا ماصارت سكته قلبيه بيه "

عطت بيها " اسم الله لاتفاولين على نفسج .. الي صارلي مختلف وتعرفيه كلش زين "

ردت " ليش احس عيونج بيهن حزن ويلمعن "

اتنهدت " الي بيني وبين نسر راح يبقى نفسه مايتغير بس خوفي الاكبر من شي ثاني "

ضحكت " من ام اللسان مووو"

ابتسمت .. ضحكت هي " ههههه اتخيلجن بعد يومين تتكافشن من الروس "

همست " يا شعليه بيها "

ردت " وج دائما اتخيل الضراير من الروس .. اتمنيت اسوي بشجن هيج بس هنا فاهية مافوخت گلبي .. اريدج انتي اخيتي تبيضين وجهي "

باوعتلها " تحجين صدگ شترديني اعارك علمودج "

ضحكت " لا انتي شعليها وصيحلي اسوي هجوم وياج لو اكتليها واصير اني الحكم "

ضحكت " انتي مو صاحية فوكاها راح تتخرج وهي عقلها اصغر من عقل دنو "

ابتسمت " خية اني ربيت نفسي بنفسي .. دنو ترباتج حتى احسها باردة مثلج..  اگلها سوي هيج " ماما متقبل "

تعاي ارگصي ع الاغنية " ماما متقبل "

موتتني وربي .. على يوم اكفخها بسببج "

رغم ضوجتي ضحكتني " وج مااقبل تحجين ع بنتي .. اي مااريدها تتعلم الرگص وهالسوالف تاخذها للكبر .. خليها تتعلم الصلاة القران .. السنة الجاية تتكلف لازم تتعلم "

هزت ايديها " يابة والله بطرانة وج هو العمر شبي .. صيري مثلي ساعه النفسك وساعه الربك .. وكت الاذان اصلي وبعدها ارگص واغني وافرفش الحياة حلوة خلينا نعيش ونتونس مو كافي التفجيرات الي حابستنا بالبيت حتى مانطلع من خوفنا "

اتنهدت " اي والله صايرة بغداد تبجي .. خالة رسميه ذيج المرة تگول بيني وبين الموت شعره .. صاعدة بالسيارة .. بس ماشية مسافه انفجرت سيارة وراهم بنفس المكان الي جانت واكفه بي .. يعني لو باقية جان ماتت "

ردت " اي والله بيها بخت "

بعد ماكمل الطبخ ..

بقينا گاعدين بالصاله .. گاعدين ع التلفزيون ..

جانت رغد مرت قصي گاعدة..

" شمالجن عبالك بفاتحة غير اليوم زواج اخوجن "

خزرتها هنا " عيني يازواج ليش هو اول مرة يتزوج "

باوعتلي " دادة شنو من گلب ولامهتمة .. اخواته ضايجات اكثر منج "

ردت عليها عذورة " عود ضوجي انتي من يتزوج قصي"

شهگت " يمة اسم الله بيش مفاوله عليه "

ردت عليها " وليش مستغربة صارت عادة بعائلتنا "

ضاجت رغد " وشناقصني قابل .. ليث هو نسونجي من البدايه .. ونسر علمود الجهال "

قاطعتها قصي " ويجي يوم قصي هم يتزوج علمود الجهال "

هزت ايديها وسكتت .. هنا اخذت اولادها ودخلت للغرفه ..

اشرت العذراء تسكت..  حسيت برغد انقهرت من گالتلها هيج .. صح السانها مايسكت بس حقها الي بيها مو بيدها الاطفال رزق من الله وهي ماخلت طبيب ماراحت اله اخر شي هسا قرروا يسوون انابيب بسوريا او ايران ..

وي اذان المغرب اجو .. دخلت فروحة تركض " اجت العروس اجت العروس "

گلبي نقبض ..

دخلت خاله گدامهم .. فتحن غرفتها بسرعه البنية متخربطة ..

فتحناها وهاي اول مرة اشوفها بعد مافرشوها ..

دخلت هديل لازماتها امها واختها الجبيرة متخربطة وراهن نسر ..

"دخلوها للغرفه "

باوعلي تنهد ودخل للاستقبال ..

سألت عذورة " شبيها هديل "

جاوبت خالة " انهبطت صار انفجار بالطريق بالسيطرة بالگوة رجعنا طلعنا ع غير طريق صارت لحم العالم بالگاع..  يمة تبجن على حالهم اللحم والدم بكل مكان "

همست عذراء " يمة همزين مارحت .. والله رجلها خضرة بعدها بأولها صار انفجار تاليها شلون "

اشرتلها تسكت لان خاله انتبهت علينا ..

دخلوها للغرفه .. ووياها اختها وامها وخالتها جايات

بقن جوة بين ماصبينا عشا للزلم .. اقاربهم جايين

وبعدها صبينا للنسوان .. راحت خالة صاحتهن اجن بقت بس اختها يمها ..

خالتها طول ماتاكل تباوعلي خازرتني .. اني مااكلت علمود دنو گاعدة..

اخر شي حجت .. " دادة هديل امانة عندج . خطية مكسور بختها .. ومانريد ينكسر بختها وتنظلم مرة ثانية

لان تعرفين اجت على ضرة والضرة مرة "

بقيت صافنه ومصدومة .. تحجي عادي وگدامي وعبالك اني الاجيت عليها مو هي الاجت عليه ..

گمت للمطبخ..

اجت عذراء " شمالج گمتي..  انتي ام البيت والي بالصدارة لاتضعفين وتخليهن ياخذن مكانج "

رديت " شنو السالفه قابل احنة بحرب .. هي بجهة واني بجهة مالي شغل بيها "

هزت ايدها " ابقي هيج يالفطيرة .. وج متشوفيها دخلت تتماوع من اولها "

سألتها " انتي ليش احسج متحبيها "

ردت " اي احسها مثل مريم .. بعدين اخذت فستاني ومارجعته حقدت عليها "

ضحكت " هاي لسا ببالج "

ردت " اي لعد شعبالج فلا انسى "

كملن عشا وبدن يرتبن ملابسها بالكنتور ..

التهينا بالمطبخ تنظيف وغسل ماعين ..

صفنت هنا " عوفي الماعين وروحي اصعدي الغرفتج كافي موتني .. وج شلون متحمله وفوكاها تغسل مواعين عشا زواج زوجها "

غسلت ايدي وردت اصعد .. صاح عمو محي .. " راح نزفه سوو طريق "

دخلوه زفوه التفتت لااراديا اباوع .. جان يباوع منا ومنا .. صارت عيني بعينه ..

التقت نظراتنا لاول مرة .. بسرعه دار وجهة ودخل ..

كملت طريقي للغرفه ..

طلعت موبايلي .. شفت خاله متصله خابرتها ردت ..

" ها شذورة شلونج "

نزلن دموعي " خلص اتزوج خاله "

اتنهدت .. " الله يكون بعونج لااكدر الومج ولا اواسيج الي صار صار بعد "

‏أنتِ كـ أيقونة سلام أنقذتني من قعر الظلام ومددت لي الحياة بعد أن كنتُ أتجرع الموت والآهااات ..

والان تركتني في بداية الطريق ..

لتجعلني أموت مرتين ..!!

_______________________

نسر :

حتى لو ماشفت شي منها .. ولا جنت اتقربلها ..

بس وجودها يمي جان يحسسني بشعور مختلف ..

شعور ماحسيته حتى وي مريم رغم جنت اعشقها

هالانسانه گدرت تأثر عليه وتخليني انسى حقدي على جنس حواء ..

بس برودها وصدها الي وعنادها خلاني اشتري كرامتي گلت بلكي تحس وتتغير .. بس ماتغيرت واني اضطريت اوفي بالوعد الي وعدته وارتكب غلطة ثانية بحياتي !!

بليلة زواجي من هديل مااتحملت قربي منها .. رغم اتقربت وشبعت رغبتي وحاجتي بس ماحسيت بنفس اللهفه الي جنت اتمناها وي شذر ..

اخذتني رجلي الغرفتها رغم گلبي ممتعظ منها ومقهور  ..

احس گلبي يمها مو يم اي وحدة ثانية ..

ولاول مرة يتفق گلبي وعقلي عليه ..

شذر :

بعد ماكنت اسولف الدنو سوالف قبل النوم .. متعودين تحجيلي كلشي يمر بيومها وحياتها سواء بالمدرسة او بالبيت ..

وابدي انصحها وارشدها واحجيلها قصه من خيالي عن نفس الموضوع الي نحجي بي حتى ماتمل وتضوج من النصيحة ..

غفت .. بقيت وحدي حاولت انام مااگدر ..

جان يوم متعب بالنسبة الي جسديا ونفسيا .. لسا ببالي نظرات الكل والشفقه اتجاهي ..

بديت اراجع عقلي وافكر بالمستقبل .. ياترى الي سويته صح او خطأ راح يضرني او ينفعني . بين كل هذي التخبطات ..

سمعت صوت احد جاي بأتجاه الغرفه .. تصنعت النوم بسرعه .. رغم گلبي بدأ يدگ سريع ..

انفتحت الباب ..

شميت عطره عرفته هو .. بس شعندة جاي لهنا.. 

بقيت متصنعه النوم وگلبي يخفق مع كل خطوة يخطوها ..

اتقرب يمي حسيت بأنفاسه وتنهداته ..

جنت نازعة الحجاب وفاتحة القراصه .. حسيت بلمسة ايده بعدت الشعر عن وجهي ..

صار يتلمس وجهي والشامه بحسرة واهااات ..

لأول مرة اكون صامدة واتحمل رغم نومي خفيف ولمساته تزعجني ..

صار يهمس " ليش ليش هيج بعيدة عني .. حتى الگمر لو بالسما جان طلته ووصلتله بس انتي گربج ليش مستحيل بالنسبة الي ؟؟ شوكت علگتيني بيج وصرت مااحس بوحدة مثل مااحس بيج .. شوكت صرتي جزء مني .. معقولة جفاج وبعدج وبردوج قربوني منج ؟"

احس نبضات گلبي بدت تتسارع .. سويت نفسي تحركت ابتعد .. درت وجهي الدنو ردت اخلص من احساس قربه مني .. وترني لدرجة ردت ابجي ومااعرف ليش ؟؟

ردتة يطلع بس ماطلع .. سحب شعري ومااعرف شيسوي بي .. بعدها صار هدوء ..

حاولت افتح عيوني بس خفت ..

ماسمعت الباب انفتح ولاسمعته طلع .. جا وين راح ؟؟

بقيت مغمضة وكاتمة صوتي .. الى ان حسيت بحركة ع الجرباية ..

بداخلي احجي :

" شيسوي هذا وشعنده تاركها وجاي لهنا "

جنت حاضنه دنو بيدي . حسيت ايدي طخت بيده

حاولت افتح عيني بس خفت لايحس بيه گاعدة ..

بقيت دقايق متحمله وماعرفت شلون !!

فتحتهن ع كيفي . شفته نايم بالجهة الثانية من الجربايه وحاضن دنو وايدة يم ايدي ..

بقيت مستغربة " من كل عقله نام هنا ؟؟"

مااعرف ليش مابديت ردة فعل بقيت اتمعن بملامحة بشكله وهو نايم .. مثل دنو من تنام تخلي ايدها جوة خدها..

اتنهدت " شتريد مني .. وليش قربك يوترني .. طلبت  منك الامان وبس .. بس انت الي بديت تطلب اكثر وبعدتني عنك .. گلتلي نبدي من الصفر .. بس غشيت بالامتحان وطفرت للعشرة وبديت تطالبني بحقوقك ..

وسبق وان گلتلك ..

"اعذرني فأنا لست انثى كاملة .. انا نصفها والنصف الاخر هشمها الزمن وجرحها من هو من جنسك "!!

غفيت من غير ماادري بنفسي من التعب او التفكير المهم بقيت ع نومتي وماگمت .. الى ان صحيت ع الباب تندگ بقوة طفرت بسرعه افتحها ليگعدون ..

فتحتها وانصدمت !!

جانت خالة باوعت للغرفه وهمست " توازيتي هسا تاخذيه الغرفتج لو بدأ كيد النسوان "

همست " خاله والله ماادري جنت نايمة اصلا اني متفاجأة  "

حجت بهمس " حاولي تكعديه يرجع الغرفته قبل ليگعدن امهاته .. اني اگول عليج عاقله لاتخليني اخذ غير نضرة عليج "

راحت سديت الباب التفتت فتح عينه " شتريد امي ؟"

رديت " انزل جوة يم مرتك "

گام من مكانه عدل ملابسه " وانتي مو مرتي ؟"

سكتت " مو صوجج صوجي اني ماتصيرلي جارة انتي مستحيل تتغيرين "

راد يطلع حجيت " انت الي ماتعرف شتريد .. لو فعلا تحب ماكان تسرعت وصبرت "

ضحك ودار وجهة " لشوكت اصبر "

رديت " لحد ماتتعالج الگلوب ؟"

اتقرب مني ابتعدت عنه ضحك " اني عالجت گلبي بيج وعاندت نفسي وتحديتها .. بس انتي ابد ماتحاولين والدليل كلما اخطو منج خطوة ترجعين خطوتين رايح اني المرتي تصبحين على خير "

طلع وماعرفت شنو ارد .. باوعت الروحي بالمراية وابجي .. حاولي حاولي كافي تظلمين نفسج وتظلميه اذا ابوج حطمج مو معناها كلها نفسه ..

مسحت دموعي " بس شلون راح اتحمل مااگدر "

" لا تگدرين بس حاولي .. قاومي .. تذكري اليوم الي انهزمتي من البيت وماخفتي .. قوي گلبج وانهزمي من خوفج وابدي حياتج "

بقيت احجي وي نفسي وارد عليها .. لدرجة احس نفسي تخبلت ..

رجعت لفراشي نمت واتخيل لمساته… صح توترت بس حسيت بأحساس غريب ولاول مرة احسه ..

للفجر ماغفيت . اذن الاذان صليت ونمت ..

اخذتني النومة للعشرة يله گعدت ..

اول مرة ابقى هيج وكت… نزلت شفت غرفتهم مفتوحة ..

طلعن خالتها وامها ..

گلت " صباح الخير "

ردت امها " صباح النور "

وخالتها هزت اديها " دنيا الظهر ياصباح .. ماتنلام ام نسر من زوجته .. گرصتها ام هديل سكتت ..

جانت هنا واگفه ردتها " بالعكس شذورة هي ام البيت شايلتنا احنة وولدنا ع راسها ومامقصرة ويانا "

عوجت حلگها " يادادة المن انطيتيها من هسا مسويات حزب عليها "

طلعت خاله من غرفتها بيدها گلادة..  دخلت لبستها وباركتلها ..

بعد گالن نريد نروح قبل الظهر ..

خاله ماقبلت الا يتغدن .. رحت للمطبخ البنات گاعدات وعذورة جاي تسوي ريوگ ..

" همزين گعدتي نتريك سوة "

رديت " اليوم اخذتني النومة "

ضحكت بيداء " حقج حبيبة اذا النسر طار العندج بليلة عرسة شلون تكعدين من الصبح "

صفنت بوجهها مستحيه " ياعزااا شافتنا بس لا هي الگالت الخالة ؟؟ " حجيت بداخلي ..

عذورة گابلتني " اي عيني احجي شنو هالقنبلة يعني هدولة نضربت بوري .. شلون گدرتي تخليه يطير العندج "

دخلت اخت هديل هيام للمطبخ ..

يمكن سمعت الحجي .. خزرتني وراحت غسلت وطلعت من المطبخ ..

عاطت بيداء بعذورة " السانج ابد ماتسكتيه شتگول هسا عبالهن متعمدة شذر "

ردت عذورة " وشمدريها هي اصلا هن نامن من وكت "

شوية وطلعت هديل لابسه فستان بيجي ومخليه مكياج صارخ صارت عينها بعيني لان غرفتها مقابل المطبخ .. ابتسمت وراحت گعدت ع القنفه ..

ماطلعت من المطبخ طول اليوم .. واصلا البنات ماخلوني اشتغل ..

صبينا غدا راحت الغرفتها .. اجه نسر للمطبخ "جماعتي اجو الاكل يكفي "

ردت بيداء " خير من الله "

باوعلي ودار وجهة وراح الغرفه هديل ..

بقى شوية وطلع يبتسم وكأنه يحاول يغيضني ولاعبالك بالليل اجاني مثل الطفل الملهوف الحضن امه

البارحة اول مرة احس بهيج شعور وياه…

لدرجة خلاني اقاوم ضعفي واستسلم اللمساته ..

وهسا طلع من غرفتها فرحان ويضحك .. مااعرف ليش ينطيني الامل ويرجع يسحبه مني ..

كلما اصعد السلم لازم يصير شي وينزلني .. سنين واني باقية اراوح بأول باية ..

كملنا الغدا الكل راحت حتى امهاتها .. اجرلهن نسر سيارة وراحن.. امها تمشي وتوصي .. وهو يگلها بعيني لاتشيلين هم ..

يمكن اني ظالمتها مو مثل مامتوقعتها او الخايفه منه مجرد وهم ..

صعدت للغرفه كملت خياط اجت دنو وفروحة يلعبن يمي ..

كملت .. گعدت درستهن عندهن واجبات ..

للعصر بدلت ونزلت ..

شفتها طلعت من الغرفة واكو خطار ..

باوعت للصالة جانت ام مريم هنا .. استغربت جايه تبارك وخاله مبينة متضايقه لان نسر مايحب وجودهم

سلمت عادي ردت اروح سألتني " وين دنو اريد اشوفها"

اشرتلها " فوگ هسا اصيحها "

اتنهدت " اي الله مايضرب بحجار .. مثل مااخذتي مكان بنتي اجه الياخذ مكانج "

باوعت الخاله اشرتلي اسكت ..

تخاف من نسر يسمع وتصير مشكله او يطردهم ..

اتقربت منها وحجيت بهمس " خاله ترى بنتج ماهي من اجيت وبعدين هي الي زاحت مكانها محد اخذه .. وهسا كلشي صار برضاتي يعني مو غصب عني "

جانت عذورة بباب الغرفه وتسمع اشرتلي اجي ..

گمت يم البنات بالغرفه مال خاله ..

باستني بحلگي " اروح فدوة الهذا الحلگ خوش تقصفين صايرة يول "

مسحت حلگي " خرب يومج اكو واحد يبوس هنا "

ضحكت هنا عليها . گامت تهز عذورة بالغرفه دخلت اسراء هزت ايديها .. " عليمن تهزين ماعندج محاضرات انتي اشو مااشوفج تقرين "

ردت عليها " اني من جماعه الي يباوع للكتاب يحفظ نعمة من الله ناطينياها " باست ايدها وجه وگفه ..

ضحكنا على سوالفها . خابر معتز طلعت الجهاز من صدرها ماتبطل هالعادة شافت اسمه ركضت لفوگ تحجي وياه حتى ماسلمت على مرت خالها گبل طلعت تركض ..

طلعت للمطبخ بيداء تگشر بتيتة .. تعبت خطية اخذته منها وگلتلها روحي ارتاحي تعبتي اليوم ..

ماقبلت بس اني اصريت ..

اجت هديل للمطبخ اخذت گلاص اخذت مي من البراد رغم باردة بس مشغلين البراد علمود نسر مايشرب مي دافي ..

گعدت يمي ع الطاولة .. " اشو ماباركتيلي "

رديت " مبروك " واستمريت اكشر

ابتسمت " اذا كلشي صار برضاج ليش احسج ضايجة "

باوعتلها مبتسمة " منو گال ضايجة ؟"

ردت " مبينه من عيونج "

رديت " غلطانة "

همست " شذر خلينا نتفق اني ماجايه هنا بحرب .. يعني لاتصيرين ضدي ولااصير ضدج .. ومادام نسر اخذني علمود يصير عنده اولاد لازم تفسحيلنا المجال مو تحوسين وتاخذيه احنة بعدنا عرسان وع الاقل شهر لازم يبقى يمي "

صارت تحجي حجي مااعرف شنو .. وكأنه تگلي تنازلي عنه الي ..

رديت عليها " مااگدر اگله روح المرتك اذا اجاني .. وين يحب ويرتاح بكيفه "

عفتها وگمت .. رجعت هي للصاله..

اجت دنو تركض من فوگ .. تقربت وهمست..

" ماما خالة تخابر عليج بس مارديت اجيت اگلج "

رديت " اي حبيبي هسا اشوفها لاتكولين الاحد "

راحت هي صاحتها خاله تسلم على ام مريم ..

استغليت الفرصه وتسحبت لفوگ ع كيفي ..

صعدت شفت خاله متصله سبع مرات استغربت شعندها

قفلت الباب وخابرتها ..

" الو خاله صاير شي ؟؟"

ردت بتوتر " شذر امج شعرفها انتي ببغداد !! "

#بقلمي_شمس_السعدي

يتبع……

بنات الخاطر الله كافي حجي ع شذر لو انتن بمكانها ماتحجن هيج .. البنية تتابع بس تعليقات الواتباد وتالي بمكان ماتلگي ناس تدعيلها وتتعاطف وياها تشوف التجاوز والكلام البذيئ ..

اذا عندكم تحرش الاب بنته عادي ولازم تنساه وتستمر عادي فاكو غيركم مو عادي عندهم واكو ينتحرن اصلا لان شي صعب مايتحمله احد ..

مااعرف انتو من اي زاوية تنظرون للموضوع..

بعد مااقبل اي تعليق جارح .. اتحملت هواي وكلما اريد احذف واحظر ماتقبل هي تگول عادي رأيهم هذا ولازم نتحمله بس لهنا وكافي ..

اعذروني ع الاطالة ..

صباحوووو حبايب ❤

///// البارت الحادي والاربعــــون /////

#قوارير_من_فضة ج2

#بقلمي_شمس_السعدي ..

صعدت شفت خاله متصله سبع مرات استغربت شعندها

قفلت الباب وخابرتها ..

" الو خاله صاير شي ؟؟"

ردت بتوتر " شذر امج شعرفها انتي ببغداد !! "

انصدمت واحس الساني ثگل .. رجلي رجفت وعيوني غوشت ..

رديت بصعوبه " امي شنو وين شفتيها ؟؟"

ردت " مااعرف خابرتني .. انصدمت من سمعت صوتها وگالت اني سماح "

سألتها " وين خابرتكم فهميني "

جاوبت " ماادري رن الارضي ويمكن هي حافضه رقمنا ماناسيته الهيج خابرت .. واول مارديت گالت سماهر بنتي عندكم ..

سألتها منو انتي وبنتج منو ..

ردت اني سماح .. بنتي شذر اجت الكم ؟"

انصدمت مثل ماانصدمتي سنين واني امنيتي اشوفها واخذ حقي منها سمعت صوتها شبهت عليه بس ماصدگت گلت مستحيل تخابرني بعد كل هاي السنين شلون وليش خابرت ماادري ؟؟

سألتها " خاله شگلتيلها انتي ؟"

جاوبت " عطت بيها وسديت التلفون گلتلها يابنتج ليش  صارت عندج بنية .. وشسوي هنا لازم سوت بيج مثل ماسويتي بينا "

اعذريني اني لان حجيت هيج بس مااتحملت من سمعت صوتها وتخابر بعد كل هاي السنين ..

سألتها من غير ماادقق بالكلام الي حجته " وهي شردت عليج "

ردت " ماردت بسرعه طبگت التلفون "

سألت " ماعرفتي الرقم شنو ؟"

ردت " لا ماعندنا كاشف .. اوووف لو عندي جان فوخت گلبي بيها "

ارتاحيت شويه .. اكيد هاي جنان خابرتها وهي شكت اني عند اهلها لان شافتني جنان بالكاظمية ..

نزلت دموعي " خاله بعد شگالتلج هم حستيها خايفه عليه زين اخواتي ماعرفتي شي عنهن بعد شحجيتن فهميني "

ردت " شبيج شذر شلون اسألها واحجي وياها اصلا اني مااطيقها ومن سمعت صوتها تجددت جروحي كلها واصلا نكرت معرفتي بيها شلون ترديني اسأل "

مااتمنيت تعرف مكاني وبنفس الوقت حسيت بشعور غريب من عرفت بيها خابرت وتسأل عني..

ليش سألت معقولة اشتاقتلي او بالها يمي لو عندها غاية ثانية ..

ححيت الخالة على جنان .. عاتبتني لان ماگلتلها

رديت " خفت وماتوقعت راح تحجي الاهلي او يتوقعون انه اني يمكم .. وبعدين البيت مشغول بزواج نسر نسيت اگلج "

سألت " ليش هو تزوج ؟"

رديت " اي تزوج البارحة "

اتنهدت " ابقي يحظي لمن تاخذه منج وتبقين هيج "

مااعرفت شنو ارد عليها ..

ونقذني الرصيد خلص وانغلق الخط ..

ضميته بالمجر وبقيت افكر بأمي… اخاف تجي لهنا ولو لو تريد جان اجت من لحظة الي شافتني بيها جنان .. بس ليش طولت يله خابرت جنان قبل فترة طويلة شفتها ..

نزلت لجوة ضايجة.. 

صاروا گبالي نسر وخاله وهديل .. جانت تحجي وتضحك .. شافتني ابتسمت ودارت وجهها .. مااهتميت نزلت يم البنات ..

تفكيري يم امي واتصالها .. بقيت حايرة لاعندي رصيد واكمل كلامي وي خاله ولااگدر احجي وي نسر ياخذني الها ..

سوينا عشا وكملنا . گلتلهن مااشتهي.. 

بقيت گاعدة بالمطبخ..

اجه يغسل باوعلي ودار وجهة اني هم ماانتبهت عليه ولاباوعتله .

صار يكح وطول بالتغسيل واني اصلا مامنتبهة ..

كمل راد يطلع همس " شبيج ؟'

باوعتله " مابيه "

رد " ضايجة اكو شي مضوجج "

رديت " لا ماكو شي "

سكت وراح .. كملت وي البنات .. من ردت اصعد ..

شفت مهيمن .. طلبت منه يشتريلي رصيد .. نطيته فلوس يشتري وبقيت منتظرته بالمطبخ…

شفتها طلعت من الغرفه لابسه ثوب نوم وعليه روب طويل وكأنه متعمدة ..

اجت اخذت مي من الثلاجة وگلاص ..

انفتحت الباب خفت لتشوف الرصيد .. اخذت العلاليگ من مهيمن لان وصيته ع حلويات الدنو هم..

قفلت الباب ودخلنا وهي باقيه بالمطبخ تراقب

قفلت الباب .. باوعتلها " محتاجة شي ؟"

ردت " لا مااريد شي "

عفتها ودخلت..  مااعرف شلون يدخلون الرصيد صحت عذورة الغرفتي ..

" تعاي هاج خليلي هذا "

ابتسمت " منيلج هذا اني خلص رصيدي وبقيت "

رديت " اذا ترديه خليه بموبايلج وباجر اشتري "

ردت " اي عفيه اصلا انتي متحتاجيه المن تخابرين قابل .. باجر اجيبلج واحد واعبيه الج "

اخذته وراحت وبقيت حايرة .. هسا شلون احجي وياها بقيت اتگلب الى ان نمت ..

للصبح گعدت بعد وكت الكل نايم .. خليت القوري ع النار .. حسيت باب الغرفه انفتح .. توقعت خاله دائما تعد الصبح ..

صار بوجهي نسر مبدل ويريد يطلع للشغل ..

اتقرب " صباح الخير "

رديت " صباح النور "

سأل " ليش گاعدة من الصبح "

رديت " مااعرف مااجاني نوم "

سأل " من البارحة حاس عليج ترى اكو شي صاير شنو ضايجة لان تزوجت ؟"

صفنت عليه مصدومة .. معقوله من البارحة يباوعلي ويسأل وكل ضنه انه اني غايرة وضايجة !!

هزيت راسي " لا مو هيج بس .."

حجة بعصبية " شنو گولي ولو انتي حجر مايصير بيج شي "

اتنهدت " اي صح حجر .. لدرجة ماعانيت من طفولتي ولاعندي هموم غير زواجك ومحاولاتك العقابي .. عبالك حجر موووو ..

مااحس .. مااضوج..  مااغار او انقهر .. انت من زمان هيج اذا احد ضايقك لازم تضايقه وتجرحه .. "

اني احجي بحرگة. وهو صافن عليه " هوب هوب والله طلعتي مو حجر وصدگ عندج مشاعر .. وجهج صار دم اعذريني يابه .. "

رديت " تستهزأ مووو"

اتنهد " احجي شبيج اريد اطلع اتأخرت "

ماعندي حل الا احجيله اخاف يصير شي ويلومني

رديت عليه " خاله خابرتني… ."

بعدني ممكملة .. انفتحت الباب طلعت هديل باوعتلنا

اتقربت يمنا وبعدهي بملابس النوم ..

" صباح الخير حبيبي .. شنو تريد تطلع "

رد " اي عندي شغل "

باوعلي شافني مدنگة ومااگدر احجي ..

اشرلي " تعاي للاستقبال عندي شغله وياج " باوعلها

هديل بس استكان جاي وياج صبيه وخليه يمج ..

گمت وياه وهي بقت صافنه ..

دخلنا الاستقبال سد الباب " يلة احجي اسمعج "

رديت " امي مخابرة البيت جدي وخاله رادة عليها وسائلتها اذا اني عندهم او لا "

عقج حاجبه " اوگفي اوگفي .. امج شعرفها وليش سألت عليج بعد هالسنين "

اتنهدت " مو ماگلتلك من رحت وي خاله للسوگ اشترينا ملابس المدرسه شفت صديقه امي هناك صفنت عليه بالاول وبعدها عرفتني وگالت " شذر هاي انتي "

فرك وجهة " وانتي شگلتيلها "

ردت احجي انفتحت الباب دخلت هديل ..

استغفر ربه وباوعلها .. " خليه بالمطبخ گلتلج هسا جاي"

بقت صافنه .. رد " سمعتيني "

هزت راسها " صار "

رد " سدي الباب وراج "

سدته وعينها ماشالتها عني…

باوعلي اي كملي " اني ماحجيت شي ولارديت عليها بسرعه دخلت ورى خاله للمحل همزين عذورة وخاله ماسمعوا "

اتنهد '" وليش ماگلتيلي .. لو ماكو داعي . لان اني حيوان ومامخليتلي اعتبار "

اتنهدت " ااااوف نسر رجعنا .. هالكلمة گلتها بساعة عصبيه ومو قصدي وانت ماقصرت اصلا بيه .. واما هالشغله مااتوقعت راح تروح تحجي الاهلي "

هز راسه " وهاي صديقة امج منين يعني علاقتها قويه بيها "

رديت " اي كلش من طفولتي هي وياها حتى مرات تاخذني نتغدا يمها او نتعشا .. اصلا اني عرفت اهل امي هنا من خلال حديثهن "

هز راسه " جيد يعني تعرفين عنوانهم "

رديت " اي ليش ؟"

رد " لا هيج .. خابريلي خالتج "

رديت " ماعندي رصيد خلص واني احجي وياها البارحة "

طلع موبايله .. " خاف عيب اخابرها هيج وكت "

رديت " لا اصلا هي تگعد وي بيبي من الصبح "

خابرها وانطاه الي " گليله خلي نشوفها "

ردت عليه حجيت وياها وطلبت اشوفها .. گالت مااگدر ابعد عن البيت هواي بحجة اتسوگ التقي بيكم وبالسيارة مو بأي مكان لان سعد يجي اليوم وخاف مايلگاني "

اتفقنا بعد ساعه على ما تريگ بيبي وتجي ..

اشرلي " يلة بدلي بسرعه خلينا نطلع "

گمت فتحت الباب هي بالصاله گاعدة تباوع .. شافتني صعدت .. وهو راح يمها اخذ الجاي ..

بسرعه بدلت ونزلت انصدمت ..

گام " يلة امشينا "

سألت " وين رايحين ؟"

باوعلها " عندنا شغله "

سكتت بس احسها تريد تاكلني ..

طلعنا الجهة بيت خاله منتظرين بالسيارة..  وهو مابطل لوم بيه لان سكتت .. مااعرف ليش احسه مهتم للموضوع اكثر مني ..

اكتفيت بالسكوت .. بينما هو طلع عصبيته على كلشي قاهره ومضوجه بيه كأنه فرصه واجت اله ..

شفت خاله اشرتلها اجت بسرعه صعدت ..

طلع نسر شوية بعيد عن البيت .. سألها عن الموضوع

ردت " تحجون صدگ يعني جايين من الصبح علمود هيج شغله اصلا هي خمنت او خافت انه تكونين هنا

باوعتلي " هي تدري بيج تعرفين بينا بالكاظمية"

هزيت راسي " لا بس مرة سألتها عنكم عاطت بيه ومانطتني جواب بالصدفه سمعتها تحجي وي صديقتها"

ردت " بعد على شنو خايفين .. هي من صديقتها خبرتها رادت تتأكد وتلگيهم هسا هم الي خايفين ويفكرون انه انتي شوصلج لهنا ووين عايشة وشلون حياتج..  يعني لاتخافين مستحيل عادل يجي لهنا لو يريد كان اجة من زمان "

اتنهد نسر " اني مو خايف بالعكس امنيتي اعرف مكانهم وين وسبق وان سألت عليهم وطلعوا شايلين ولو اعرف بهاي صديقتها يمكن لگيتهم وحاسبتهم بنفسي بس الست هنا شعارها الكتمان دائما تحجي بالبدل الضائع "

باوعتله " تحجي صدگ يعني شنو تروح تدليهم بمكاني"

ابتسم بأستهزاء " يعني هذا الي فهمتيه من كلامي "

رديت " انت شبيك وياي "

رد " اني لو انتي "

رديت " وشسويت اني "

رد " لا ابد بس طيحتي حظي ببرودج "

رديت " اي صح اني اصلا انت صاير ماتعرف شتريد بالضبط "

رد " السانج لج اشو طالع لو من تشوفين خالتج تتقوين"

عاطت خاله " يوووووه والله زين عرفتوا اني يمكم گاعدة..  بله شكبر الواحد صايرين مثل البزون والفار .. اثنينكم ماتعرفون تتصرفون .. وقبلها انت .. بعد كافي بزعتوني متت .. اروح لايجي احد يشوفني وانسو السالفه ولاتحجون بيها بعد "

نزلت خاله سلمت وراحت .. واحنة بقينا ..لمن ابتعدت

اجه رجال من بعيد سلم وبقى يحجي وياها .. ضخم وطويل ابيض وحلو ..

ابتسمت " هذا خالو يمكن "

رد " شيصير لو تبتسمين هيج دائما "

باوعتله وسكتت ..

حرك السيارة بقت عيني عليهم هو وخاله يسولفون ..

شگد امنيتي اتعرف عليهم واعيش بوسطهم بس ااااااه اااااااه للزمن الاغبر ..

نص الطريق ساكتين..  سألني " تتذكرين عنوان صديقة امج "

جاوبتة " ليش ؟"

رد " اريده هيج تتذكريه"

رديت " اي هو قريب على بيتنا بس مااعرف اذا بعدها او لا "

نطيته العنوان كتبه وضم الورقه ..

وصلني للبيت ..

" انزلي انتي اني رايح للمحلات "

نزلت وهو راح .. دخلت البيت .. جانو البنات يسوون ريوگ هستوهم گاعدين ..

سلمت ابتسمت هنا " هلو وين كنتو "

رديت " هااا اكو شغلات محتاجتهن اخذني نسر نشوفهن "

اجت هديل " بس جايه فارغه لاعلاگة ولا شي "

رديت " اي بعدين يجيبهن .. " فعلا كنت موصيته على اقمشة شتويه وشغلات .

ردت " اشو مااقتنعت يعني بالبدايه تبسبسون وبعدها فجأة طلعتوا "

رديت " يعني لو شغله بينج وبينه كان سألتج طبعا لا هذا شي يخصكم مالي دخل بي "

عفتها ودخلت استلمتني خاله هم نفس الاسئلة . 

ونفس الجواب جاوبتها ..

بدلت ونزلت وهي كلما اشيل عيني الگيها تباوعلي ..

كملت شغلي وخليت البنات دنو وفروحة بغرفتي وادرسهم. 

للظهر اجه نسر ونقذني بالاقمشه الي جابهن حتى مااطلع جذابة ..

مرت الايام هيج بين مد وجزر .. ساعه نضحك ونسولف ونمرر الامور على خير وساعه تنگلب وتدور حجج عليه اذا نسر صعد يمنا او سولف وياي ..

اباوعلها واتسائل معقوله هيج تحبه وتغار عليه لو هذا حب تملك لااكثر ..

من ننجمع كلنا ونحجي .. او من نگعد ع الغدا .. يبقى يباوعلي ويشوف رد فعلي ..

هنا :

اول يوم داومت بي كان بنهاية السنة وبداية سنة جديدة.. 

من زمان واني غايبه عن عالم التجمعات . من الجامعه

ابد ممتعودة ادخل المكان وحدي .. كنت دائما اني وشجن .. حتى بالجامعه ماحسيت بأستغراب ابدا ..

اني من النوع الي احب اللبس والاناقة .. لابسة بنطرون وكوت فوگاه .. دخلت الدائرة طبعا تعينت بدائرة البلدية ..

سلمت اوراقي وسوالي معاون المدير مباشرة لان المدير مموجود ..

اشرلي اروح الغرفه ..

دخلت كانت كبيرة ومابيها بس رجال .. اتوقعت الگي بنات ع الاقل يخف التوتر شوية ..

سلمت وگعدت .. طبعا بساعتها اجت شكو ذكريات اليمة ببالي وحسيت بالعبرة تخنگني ..

اتمنيت ابجي وماگدرت ..

اتحديت نفسي وحالي .. ضعف الشخصية الي زرعها بداخلي ليث لازم امحيها .. كان اعتمادي كله عليه ..

حتى تعيين ماقبل يعيني حتى اكون تحت سيطرته

اول يوم مر عادي .. تعلمت كم شغله..

رجعت للبيت مثل طالب مدرسة بأول يوم اله للدوام

جوعانة مشاعري مختلطة بين الفرح والتوتر ..

ثاني يوم كذلك .. شوية شويه الى ان تعودت ..

گاعدة على مكتبي ..

نسر اشترالي جهاز تحضير گهوة لان يعرفني احبها ..

من زمان اشربها تعودت عليها من اسراء تسوي نشرب وياها ..

سويت گهوة ودا اصب بيها .. اجه العامل ..

" ست هناء المدير طالبج "

توترت .. المدير مشايفته ابد .. لان كان مسافر . 

عدلت نفسي وحجابي ورحت ..

دگيت الباب ودخلت . 

رفع راسه نزع نضاراته واشرلي اگعد ..

سلمت عليه .. هز راسه بس . 

مبين حقنه وصعب مثل ماگالوا ..

وهالشي بين بكلامه وطريقه حديثه " باعي ست .. احنة هنا نختلف .. اذا اجيتي بواسطة فمو معناها راح نتهاون .. الشغل شغل ولو مااحب بقسمي بنات لان اعرفهن يوم مريضه يوم حامل يوم اريد اطبخ لو اريد اجازة ولادة او امومة ..

سوالفجن ماتخلص .. بس انتي فرضوج عليه فرض والظاهر واسطتج قوية وجابوج القسمي ..

يعني اذا تردين تستمرين ويانا تنتبهين الشغلج ومااريد اعذار من السوالف الي ذكرتهن… .

استغفرت ربي ومااعرف شلون سيطرت ع نفسي

رديت " شوف استاذ .. بغض النظر عن اسلوب حضرتك بس اني من الاوائل على قسمي يعني مابحاجة واسطة لتعيني ولو ببلدنا اكو انصاف للخريج انه يتعين اول ميتخرج وينطوه حقه ماكان لجأ للواسطة اصلا .. اما بخصوص شغلي .. فبعدك ماشفت شي مني حتى تحكم عليه "

باوعلي مستغرب " واني ماقصدت هيج بس مجرد تنبيه "

رديت " العفو استاذ جان گدرت تحجي وياي بطريقه غير هاي "

سأل " وشبيها طريقتي ؟"

رديت " لا مابيها بس تستهزأ بالمرأة وتقلل من قدراتها اذا ماتريد مراة بقسمك عادي انقل على غير قسم "

رد بتكبر " لا تستعجلين اصبري خلي نشوف شغلج ونحكم "

طلعت من يمه متنرفزه بس مااگدر احجي .. اسلوبه مستفز حيل ..

ويمكن اني استفزيته بكلامي .. لدرجة صار اي شغل يجيه يدزه الي ..

والاكثر انه طلب مني اطلع لبرة وي العمال واشرف ع الشغل ..

تجيني ساعات اريد ابطل بس اتحدى نفسي واكابر ..

عندي اتحمل هالمغرور ولا اضعف واستسلم .. حتى نسر ماگلتله خفت يتعصب ويبطلني ..

صار اهتمامي بأولادي وشغلي وبس ..

شذر :

مر شهر على زواج نسر وهديل .. هو خلص معظم الايام بالدوام ..

هديل كانت تجذب نظره .. يعني اول مايجي تتلكاه وتاخذ جنطته تفرغها وتغسل الملابس ..

تحظر اكله وتغديه ..

يعني ممقصرة عنه بشي ..

هي فرحانة وكل ضنها انها سيطرت عليه وگدرت تمتلكه ..

من شاف برودي واستسلامي ..

قرر انه يبات ليلة يمها وليلة يمنا حتى مايحسس احد ..

بيوم الي يبات يمها من المغرب تدخل تبدل وتلبس وتحظر .. وبيوم الي يكون يمي تتخربط وتوگع وتخلي الكل يهتم بيها .. مااعرف ان كانت فعلا مريضه او تتحايل ..

وخاصه بعد ماغابت عنها وفرحت ..

زاد الاهتمام بيها اكثر .. خاله بشرت نسر بصگر .  ان شاء الله يجيك صگر وينور البيت ..

هز راسه " يمة گولي الله كريم "

هديل ابد ماطلبت تروح الاهلها .. كانت امها تجي تشوفها خلال ذيج الفترة ..

بس من راد نسر يلتحق طلبت تروح الاهلها هذا الاسبوع ..

خالة ماقبلت لان تخاف عليها .. بس هي قنعتها بحجة ترتاح كم يوم ومن يرجع نسر يمر يجيبها ..

وافق نسر ..

وقبل يوم التحاقه ..

كان بايت يمنا .. ودنو تحجيله عن المدرسه وتراويه دفتر الاملاء وهو فرحان بيها ..

كان واعدها كل عشره تاخذها ينطيها فلوس ..

طلع فلوس من جيبه وخلاها بالحصاله مالتها وهي فرحانة ..

سألها " شتسوين بيهن ذني صارن هواي من العام تجمعين . "

ابتسمت " اشتري بيت ونگعد اني وماما وانت "

استغرب وباوعلي .. اني هم انصدمت مثله .. اتقربت يمها .. " ليش امي مو هذا بيتنا "

ردت عليه " بس هذا البيت صار هوسة .. والعروسة الجديدة ماتحبني وووو .. "

قاطعت كلامها " لا ماما عيب هيج تحجين شگلتلج "

عرفتها رادت تحجي ع هديل وخفت تصير مشكله

دنو بلغتني انه هديل گايلتلها .. راح اجيب ولد هواي وابوج يحبهم ومايحبج روحي الامج مريم لان هاي مو امج باگتج منها "

بساعتها ضحكت على عقل هديل ومااهتميت بس مااتوقعت هالكلام يبقى بداخل دنو وتحجيه النسر ..

نومتها ..

سألني " حضرتي جنطتي "

هزيت راسي " هديل لگيتها محضرتها ماقبلت احضرها"

رد " والله كثر خيرها قبلها ماجنت اصلا متزوج هسا يلة بين عليه الزواج "

سكتت مارديت اعرفه يريد حجة يحجي بيها ..

هو هالفترة هيج صاير بركان وخاصه من يجي يمي يدور حجج ..

دگ موبايله .. بسرعه طلع برة نص ساعه ورجع ..

طفا الضوة ونام ..

للصبح ماهو وهديل هم . قافلة غرفتها وطالعه ..

عذورة صارت تحجي " شنو حرامية تقفل غرفتها "

ردت عليها خاله " حقها يمة غرفتها وبيها خصوصياتها وبعدين رجلها ماهو المن مخليتها مفتوحة "

ردت عليها " بله انتي تدافعيلها لان گرايبج . "

خزرتها " السانج يمة الله يساعد معتز يرجعج بليلتج ع هذا اللسان "

ضحكت " ذكرتيني خلي اخابرة .. قبل ليجي السايق"

عذراء :

مرت 6 اشهر على سفره حسيتها سنين طويلة ..

كل يوم نحجي ونتخابر ومانشبع ..

الشغل بتركيا متعب .. ودايما يشكي ..

رغم بعده عني بس احاول اصبره ..

" يلة حبيبي اتحمل .. كلها بعدلي سنه واكمل وترجع نتزوج "

رد " عذورة اني للعراق بعد ماارجع وخاصه بهاي الاوضاع .. اني منتظرج تكملين واجي اخذج ونروح "

رديت " بس ما اعتقد نسر يوافق وهذا مو اتفاقنا "

رد " صح جنت متأمل الاوضاع تتصلح .. بس هسا زادت وبتركيا يلة نوفر الايجار والمصرف .  تدرين شمقرر ؟؟"

سألت " شنو ؟"

رد " مقرر نتزوج ونطلع نهاجر الالمانيا هناك جماعتي ماشاء الله "

رديت " تحجي صدگ معتز اشو هذا حجي جديد منو خلاه ببالك هي تركيا مايقبلون اهلي دور المانيا "

رد " لاتگليلهم اصلا .. بحجة نطلع التركيا ونسوي اوراقنا الالمانيا "

سألته " وهيج سهلة يعني ؟"

رد " ماكو شي صعب اصلا جماعتي طمنوني واحنة عدنا سبب قوي للهجرة وتهديد ابوي كلش كافي انه نطلع ونهاجر الاوربا "

كلامة المعتز وطموحه قلقني .. اتفاقنا كان فترة ويرجع لهنا بس هسا تغير وصار يريد يهاجر الالمانيا

خلاني بين نارين ..

نار بعدة عني وشغفي اله وللحظة لقانا .. ونار اهلي وموقفهم مااعتقد يوافقون ..

كان كلما يخابرني يغريني بطموحة والحياة الي ممكن نعيشها هناك .. وكنت اسمع واسكت وادعي كون يرفضوه ومايصير الي بباله .. رغم لسا ماگلت الاهلي وبلغتهم خفت من ردة فعلهم واصلا بعد وكت حتى احجيلهم ..

شذر :

مر الاسبوع ورجعوا نسر وهديل للبيت .. كانت فرحانة وتضحك..

تلكتهم خاله سلمت…

باوعتلي وضحكت .. " خاله باركيلي طلعت حامل "

كانت صدمة للكل .. بينما فرحة كبيرة الخالة لدرجة نست نفسها وگامت تهلهل ..

#بقلمي_شمس_السعدي

يتبع .…

ادري مقصرة وياكم يومين واتأخر بس مضطرة لضروف خارجة عن ارادتي .. تقبلوا اعتذاري ❤❤

مساء العسل حبايب ❤

///// البارت اثنين واربعــــون /////

#قوارير_من_فضة ج2

#بقلمي_شمس_السعدي ..

مر الاسبوع ورجعوا نسر وهديل للبيت .. كانت فرحانة وتضحك..

تلكتهم خاله سلمت…

باوعتلي وضحكت .. " خاله باركيلي طلعت حامل "

كانت صدمة للكل .. بينما فرحة كبيرة الخالة لدرجة نست نفسها وگامت تهلهل ..

اشرتلها بيداء عليه سكتت ..

باركلها البنات .. دخل نسر وراها .. حضنته خاله وبوسته .. " يوم الي افرح بأبنك ويشيل اسمك "

باركله البنات وبوسنه .. باوعلي ابتسمت " مبروك يجي بالسلامة "

حجت هديل " ماباركتيلي "

ردت احجي حضنتني .. " يوم الج "

سكتت ..

خالة گالت اني ناذرة غدا الوجه الله اذا حبلتي…

وصت على دجاج مذبوح .. وطبخت بيدها الغدا ماخلتنا حتى نطبخ ..

الفرحة ماسايعتها حتى هديل استغربت من تصرفاتها جانت بس تضحك وتتشاقه مبين الفرح عليها ..

باوعتلها خاله " يمة صار كم ساعه من اجيتوا وانتي گاعدة كافي الطريق والطسات .. روحي تمددي بالغرفه"

ردت " خليني يمكم خاله اضوج وحدي "

صفنا عليها " من تزوجت لسا هي من الغرفه للمطبخ ماتطلع "

بس احسها تغيرت .. يمكن فرحتها بالطفل غيرتها ..

كملنا غدا طلعت خاله كم صينية للجيران والباقي صبيناه وگعدنا كلنا ..

كان ياكل ويباوعلي .. اسوي نفسي مامنتبهة وادنگ

كمل غدا غسل وصعد لان تعبان ..

صاح جيبولي جاي لفوگ .. باوعت اله وباوعتلي

حجت خاله " لاتشبحين عينج بعد منا وجاي ديري بالج على نفسج"

كمت صبيت جاي وصعدت .. اشرت الدنو

" ماما اذا خلصتي تعالي وراي "

فتحت الباب جان متمدد .. اشرلي خليه هنا

خليته ع الكومدي ..

سأل " شبيج ؟"

رديت " مابيه "

سأل " ماتتمنين الامومة تعيشين حياتج طبيعي معقولة انتي عديمة مشاعر هيج طول ماهديل تبشرهم اباوعلج مابينتي اي مشاعر لاحزن ولا فرح "

حسيت كلامه مثل طعنه بداخلي عيوني حرگني بس قاومت ..

رديت " بحياتي مااتمنيت اني يصير عندي طفل .. الامومة مو الي مااستحقها "

استغرب " ليش هيج تگولين .. بالعكس بعد ماشفت تربيتج الدنو انتي اكثر وحدة تستحقين "

رديت " دنو شي ثاني .. رجاء سد هذا الموضوع "

عفته وگمت .. اجت دنو .. گال اريد انام ساعه ارتاح

اخذتها ورحنا الغرفه بيداء هي تدرس بولدها گعدنا يمها

مااعرف ليش يجي ينام يمنا بالغرفه رغم ماكو شي يربطنا .. وملتزم يوم الها ويوم النا ..

حتى من نگعد على غدا او عشا يگعد يم امه لايمها ولايمي ..

كان يحسس الكل وبما فيهم هديل انه عادل ويانا  اثنينة

وماشفته يوم غازلها يمنا .. يمكن حتى بهاي عادل .

اما اسراء فكنت اتوقع تصرفاتها وياي من حبها وغيرتها على نسر .. بس مع هديل كانت تصرفاتها طبيعية تحجي عادي وتضحك..

عذورة من تشوفهن تگول وافق شن طبقه ..

لكن هنا وبيداء بدو يغيرون نظرتهم الها .. لان خلال فترة حملها راضية الكبير والصغير ..

وخاله اذا صاحت راسي تركض اولنا ..

والصبح تگعد قبلي تسوي ريوگ النسر حتى يطلع لان اول ماانزل الگيها محضرته ..

وبيوم الي يبات يمها تجيبلهيا للغرفه ..

حتى هو تعود عليها وصار كلشي يريدة يطلبها منه الى ان خالة صاحت عليه ..

" مو هاي شذر هم مرتك .. ليش ماتوصيها هديل حامل راعيها مو هيج كل شويه هديل "

ردت عليها " لا خالة تعبه راحة اذا مااتعب اله المن اتعب "

مرات عذورة تغمني " تعلمي يحظي .. "

خلال شهرين هديل صارت حتى كلمتها بالبيت مسموعة ..

وكله اي عيني اي گلبي اي عمري .. ماتصيح بأسمائهم ابد ..

صح كنت قايمة بواجب البيت كله بس مااعرف هيج احجي .. ولااعرف امثل الي بداخلي ع الساني ..

وعذورة دوم تلومني ..

وخاصه الصبح كل البنات يرحون الدوامهم .. وهنا تتأخر يله تجي فجنت اهتم بأولادها ماافرغ ابد حتى انومهم يمي بالغرفه . 

مرات دنو تغار منهم واول مرة اشوفها هيج .. شگد احب اعتني بالاطفال بس ماكنت اتمنى انه اصير ام اكو خوف بداخلي من امي . خايفه اطلع مثلها قاسية ..

هنا :

بمرور الوقت فرضت احترامي ع الكل بالدائرة ..

حتى الموظفين وياي ..

نضحك ونسولف بس بحدود .. كنا كل اسبوع نسوي غدا على واحد ..

بيوم الي وصلي السرة .. كنت ارجع تعبانه ومالي خلگ

كلفت شذر تسويلي دولمة .. البنية ماتگول لا ..

حتى هديل زينة بس ماامون عليها مثل شذر لان شذر تربت بينا وكبرت ببيتنا بعدين اني ضد مبدأ الزوجة الثانية والي ماتمنيته الي مااتمناه الغيري وخاصه شذر

سوت دولمة وهي نفسها طيبه حيل بالاكل ..

گلتلها تدز الغدا ساعه 12 وي مشتاق .. الولد هم ابتلى بينا .

اجة الغدا وكانت مرتبة صينية ثانيه بيها مقبلات

ودازة مواعين سفري .. ترتيب حلو ..

اجة عبد الله ولد ويانا .. اتبرع انه يگلبها ..

" اني ماكو مثلي بگلب الدولمة .. قالب واحد ماتتفتت عندني "

والصراحة فرحت لان اني يمكن افلشها بالگاع وخاصه الگدر جبير..

گلبها وطلعت تخبل ومليانه ظلوع وليه . خلت الموظفين يتجمعون ع الريحة ..

صبينا بالماعين ..

صحت العاملة .. نطيتها ماعون دولمة وماعون مقبلات

" هذا دزيه الاستاذ هذال مدير القسم عيب خاف يشوفنا ناكل وياخذ ع خاطره رغم مااطيقه بس هي اصول "

گعدنا ناكل .. شوية واجه استاذ هذال ..

" عاشت اديكم وشكرا ع الدولمة كلش طيبة "

رد عبد الله " هاي شغل ست هناء دولمة خورافية "

باوعلي وهز راسه وراح ..

كملنا لميت الماعين والصواني لگيت مشتاق منتظرني

ردت اصعد سمعت صوت يصيحني :

" ست هناء "

التفت جان استاذ هذال " بس ردت اسألج هاي من يامطعم علمود اوصي بعزومة او شي "

رديت " مو من مطعم بالبيت سويناها "

سأل " انتي سوتيها "؟

رديت بتوتر واضطريت اكذب " اي اني "

هز راسه ماشاء عاشت ايديج ..

حسيت هالمزعج متغير ولا عبالك ذاك اليصيح عليه اول مااجيت ..

تصرفاته زعجتني وخاصه هو مبين كبير مو صغير واكيد متزوج ..

استأذنت منه وصعدت حتى مانطيته وجه ..

عقج وجهة وصعد ..

بس ثاني يوم ماخلاها الي .. شلون هملته حاول ينتقم

صاحني للمكتب وصار يعيط لان مامكملة اوراق يريدهن ..

رديت عليه " استاذ مادزيتهن الي لو دازهن كان كملتهن تدري بيه مااخر شي "

عاط " لا والله دازهن بس يمكن ملتهية بالاكل والدولمة مابيج حيل تشتغلين..  مو اني عرفتها من البداية "

استغفرت ربي هز راسها " خير ماعجبج الحجي "

اتنهدت والله استاذ مااعرف شنو اگلك كل شوية برأي دا احسك بس تريد سبب تحجي بي عليه ..

رد بعصبية " وليش احجي عليج شعندي وياج قابل

بس انتو النسوان ماتنعطون وجه "

درت وجهي وطلعت مااتحملت كلامه .. فعلا نرفزني مااعرف شنو يريد ..

بس كنت مااهتم همي الوحيد شغلي وانه اثبت للكل واولهم نفسي انه گدرت احقق طموحي بعيد عن اي رجل بالدنيا ..

رجعت بيوم للبيت .. لگيت عمو هناك ..

سلمت ..

رد السلام وباوعلي ..

" اجيت اخذ الجهال البيبيتهم "

باوعلي من فوگ لجوة " هيج لابسه للدوام " باوعت النفسي ورديت " اي عمو ليش ؟"

رد " بوية سمعت من اخوج تداومين بدائرة واكيد اكو زلم وياج. . ليش ماتلبسين جبه لبس مو لايق ابد "

باوعت الامي اشرتلي مااحجي .. رديت " بس عمو هذا لبسي من صغري ومااعتقد بي شي .. ومو اول مرة تشوفني من كنت وي ليث هيج لبسي وماتحجي "

رد " بويه قبل يختلف عن هسا .. الوضع تغير واسمج مطلگة يعني حتى الي مايحجي راح يحجي "

ضوجني بكلامه " عمو مااتوقعت هيج تفكيرك ابد مايوم تدخلت بلبسنا ولا حجيت هيج .. شنو الي تغير ؟"

گام " اني اخذ الجهال واروح الظاهر مالي كلمة عليكم "

ردت ماما " لا ابو قصي انت الخير والبركة "

من طلع حجت عليه ماما .. بس مااهتميت كافي جنت شيگولون اسوي.. بحيث استغلوني وخلقوا مني انسانه ضعيفة .. 

" ماما عمي ع راسي بس مالهم حق يتحكمون بيه .. ترى اني منفصله عن ابنه وبس اولاد بينا وحتى ذولي مالهم حق بيهم لان متنازلين عنهم واني من انسانيتي انطيه ياخذهم تشوفهم بيبيتهم "

گامت وماعجبها الحجي " لا انتي صايرة فد مرة مو ذيج الفقيرة الي كلها تحمد بيها "

سكتت عنها ومارديت ..

لليل خابرت مرت عمي ع الاولاد ..

سلمت عليها وسألت عليهم " زينين يمه "

رديت " اشو لسا مارجعوا "

ردت " هااا مو ناموا خطية وگلت حرام نگعدهم وانتي باجر دوام خليهم يمنا "

مااتحملت اخليهم هناك .. رحت النسر بسرعه..

دكيت باب غرفته طلعت شذر " هااا هنا شبيج "

رديت " وين نسر .. "

سمع صوتي طلع " شكو شبيج "

رديت " اريد تاخذني البيت عمي اجيب ولدي "

رد " غير هم يجيبوهم ؟"

رديت " لا عمتي تكول يباتون يمنا ومااگدر اعوفهم هناك "

رد " اي خليهم يشبعون منهم بعد ليش خايفه باجر الصبح اروحلهم "

عاندت " لا هسا تاخذني لو اخلي مشتاق ياخذني"

عاط بيه " شنو مشتاق ياخذج بالليل اوگفي هسا ابدل واخذج "

نزلت ونزلت وراي شذر " شبيج من شنو خايفه "

رديت بتوتر " مااعرف ليش خايفه اتخيل ليث ماخذهم مني وبعد مااشوفهم "

رديت " اسم الله شبيج مو تدرين ليث عمج متبري منه ومايدخل بيتهم "

ردت " اي صحيح ✔ بس عمة لا .. وخاف يتفق وياها ياخذهم "

نزل نسر لبست عباية اسلامية فوگ ملابسي وطلعت

وصلنا البيتهم حوالي بالعشرة دگينا الباب ..

كال نسر " بله هسا شيكولون علينا جايين هيج وكت وبالبرد ماعندنا ثقه بيهم ؟"

رديت " اعذروني نسر بس ثقه ماكو بعد انعدمت مااثق بأحد "

فتح الباب قصي شافنا انصدم " ياهلا ادخلوا بس شبيكم مخطوف وجهكم "

رد نسر " نعتذر خويه بس هاي الخبله خبلتني اشتاقت الولدها واجت تاخذهم "

دخلنا لجوة " اوكفوا خلي ادخل اشوف امي بس اعتقد هم نايمين لو مخليتهم للصبح وماخذتهم خوية "

سكتت ماحجيت.. 

طلعت خاله تحجي وتعتب لان اجيت اخذهم .

" شمالج يمه غير ولدنا .. الي يشوفج يكول خاطفيهم "

نسر يباوعلي ويهز راسه مستحي .. جابتهم الي اخذت فهد حضنته..  شميته وبوسته .. استغربت .. رجعت بست نحره .. هالريحة مو غريبه .. شامتها ومستحيل انساها .. رفعت راسي وسألتها ..

" خاله ليث هنا جان .. شافهم ؟"

ردت " لا وين صار هواي مايجي "

خزرني نسر سكتت ..

طلعنا بقى يلومني " انتي شلون هيج تحجين مو تعرفين عمي مايدخله البيت .. ليش تحرجين مرت عمي وتضوجيها "

رديت " عطره بيهم .. اني اعرفه شميته بفهودي "

رد " مو اجيناهم فجأة ماهو .. بس انتي صاير بيج وهواس من ليث "

ضجت بس ماحجيت .. صح عمو مايخليه يدخل او ميحاجيه بس اني حاسه انه يمهم كان ..

وصلنا للبيت دخلتهم الغرفه ..

ماما صارت تحجي " بله اكو وحدة تسوي الي سوتيه

شكو اخذتي اخوج وطلعتي بالليل متخافين "

سكتت مارديت نزعت العبايه وطلعتلهم ملابس البسهم

سألت جود " شفت بابا هناك ؟"

هز راسه " لا ماكو "

فهودي نايم داابدله مااتحملت عطره .. اخذتة سبحته بمي دافي وبدلتله ملابس هواي ولفيته بالبطانية ..

شافتني ماما شهگت " عزااا تخبلتي تسبحيه بالبرد وبالليل لج راح تمرضيه "

نومتهم ونمت ..

اسراء تحجي وي ماما " اتركيها الظاهر تخبلت من ورى ليث وتمثل علينا القوة اصلا واضح شاغل تفكيرها ليل ونهار "

رفعت راسي باوعتلها " نامي استاذة اسراء .. خلي محاضرتج الطلابج بالجامعه "

ردت " تستهزأين حضرتج "

اشرتلها " لا ابد "

تركتها ونمت مالي خلگها ..

الكل يتوقع هاجس ليث باقي بيه .. مايدرون طلع من حياتي كلها .. وماعدت اهتم بي لدرجة ريحة شمئزيت منها ..

شذر :

مرت الايام وخاله كانت فرحانة بهديل ومراقبتها ..

يمة هم تشتهين شي .. "لا خاله مااشتهي "

يمة شو بطنج ماكبرانه " هاي بطني خاله " هي بالاصل عندها كرش يعني ميبين ..

الى ان فاض بيها وگالتلها " هديل ماما بدلي خلينا نروح للدكتور هاي صارلج اكثر من شهرين خلينا نشوف وضعه شتگلج .. انتي حللتي ؟"

" اي حللت جبت اختبار من الصيدلية "

بيوم الي راحن للدكتورة .. طلعت هديل سافرة لان نزعت العباية من تزوجت .. لبست جبه نيلي وحجاب مشجر ومكياج .. جانت فرحانة كلش ..

طلعت باوعتلي " نسر وين لسا فوگ "

خاله صاحت " نسر وينك يلة يمة تأخرت "

ماكو رد ..

اشرتلي ماتمشين تشوفيه ..

صعدت .. جان يخابر باوعلي .. انزلي هسا جاي

وضعه مخربط هاي مو اول مرة اشوفه يخابر ..

نزلت سألت خاله " هااا وينة ؟"

رديت " اجة وراي "

هديل صارت تتأفأف ..

وخاله تصيح " ولك يمة نسر هسا ازدحام ..

نزل نسر سريع ويلبس بساعته ..

" يمة خلي مشتاق ياخذج عندي شغل "

ردت " ياشغل يمة مو گلتلي كلشي ماعندي "

صاح " هسا طلعلي شغل شلون أاجله "

عافهن وطلع .. هي باوعتلي وابتسمت .. يله خاله مو مهم تلكيه عنده شغل سودة عليه ..

خلي مشتاق ياخذنا ..

دزن على مشتاق اخذهن ..

شوية واندگت الباب .. كنت بالطارمة اغسلها ..

طلعت .. گلت منوو ؟

ردت " اني "

هالصوت مو غريب عليه يمكن خاله رسميه ..

فتحتها .. طلعت هي .. فرحت من شفتها ..

حضنتها وجن اشم بيها ريحة عمة الله يرحمها .. كلشي بيها يذكرني بعمة ..

دخلتها للبيت ..

طلعت اسراء من الاستقبال تنام بي لان تجي تعبانه وولد هنا ميخلوها تنام ..

سلمت خاله عليها " شلونج يمة ؟"

باوعتلي وراحت للغرفه ..

صفنت عليها خاله " هاي بعدها المصگوعة شايلة خشمها "

ابتسمت " احسبيها عليه خاله هي هيج طبعها "

ردت " لا يمة انتي شعليج من جانت تجي البيت ام وليد هيج طبعها مرة منهن گالتلي " شلون الج نفسية تفترين ع البيوت وتگدين "

ضوجتني بيومها وماسكتت " يمة هذا شغل وبفلوسي اشتغل مامادة ايدي الاحد ولا طالبه منهم " لان شافت ام وليد تنطيني من عدها ملابس لو شغلات ماتريدهن

ماتدري اني تعبت وربيت ولدي وكبرتهم وتخرجوا ومامديت ايدي الاحد ..

صارت تتنهد . ابتسمتلها " لا تضوجين خاله .. اصلا كلما اشوفج افرح بيج ريحة من عمة وسوالفها "

ردت " الله يرحمها برحمته . "

گمت " اروح اسويلج جاي "

ردت " لااگعدي ماجاية اتضايف .  شفتج بذات وماتسألين گلت اجيج .. "

رديت " حقج والله بس الوضع تشوفيه دنو دوام واني اخيط والبنات كلهم دوام .."

سألت " ماصار عندج طفل شنو سالفتج ماتراجعين "

هزيت راسي " لا "

ردت " يمة شبيج .. روحي عالجي نفسج لاتسكتين الزلم ماتتحمل وباجر عگبه يتزوج عليج بحجة الاطفال "

اتنهدت " هو تزوج صارله شهرين واكثر يمكن ."

لطمت على صدرها .  يمة اسم الله.  وساكته وماحجيتي

رديت " شحجي خاله حقه "

صفگت ايدها .. واني اكول ليش ام وليد صارلها فترة تجيني بالحلم .. يمكن من وراج ..

شهگت " صدك خاله .. اشو اني مااحلم بيها "

ردت " تلگيها زعلانة منج .. الميت اذا مايزور احبابه بطيفهم معناها زعلان منهم "

اتنهدت " حقها صار هواي مازايرتها "

اتقربت مني " لا مو هيج حلمت لن گاعدين كلما بالمطبخ مالتها وهي دايرة وجهها عنج وانتي تتوسلين بيها تحجي وياج .. جان همستلي " گليلها خلي ترضيني يله احجي وياها "

بقيت صافنه " ليش وشمسويتلها ؟" اشو حتى بصلاتي وقراني اذكرها . 

هزت راسها " يمة هاي رساله الج .. شوفي شنو الي مسويته غاثها واصلحيه .. يلة اني اكوم "

" وين ابقي مشتاقتلج حتى ماقدمتلج شي "

اجت عذورة گاعدة من النوم سلمت ..

ردت خاله السلام وهمستلي " بس لاهاي ضرتج .. "

ابتسمت " لا هاي عذورة اخت نسر "

ضحكت عذورة " لا خاله رسمية زعلت بلة هذا الجمال كله تشبهيني بذيج البومة "

ردت خاله " اعذريني يمة العتب ع النظر .. لعد مو گالوا انخطبتي اشو بعدج هنا شنو فسختي ؟"

ردت عليها " يمة اسم الله بيش طالبتني خاله اليوم "

ضحكت عليها شلون شهگت ..

.. نزلت بيداء شافتها فرحت .

" يا خاله حبيبتي والله مشتاقين الله شكد حلوة ذيج الايام من جنا عند عمة وتجين يمنا ونسولف لو تقريلنا كف "

ضحكت خاله " ههههههههه ايام حلوة "

سألتها " صدگ خاله تاخذين كف اشو ماادري "

ردت " اي من جانت عيوني زينات واشوف بيهن .. بس هسا زمن عندج..  وردة بالخيرة وهالسوالف "

سألتها " يازمن ؟"

ردت " شبيج نستيها مو انتي العرفتيني عليها .. "

رديت " اي صدگ شلونها .. "

ردت " وين هالمسكينه حايرة بضيمها دوم تسألني عنج وانتي اختفيتي فد مرة "

رديت " شسوي خاله ظروف "

ردت بيداء " لاتخافين خاله فد يوم اجيبها واجيج اشتاقيت الذيج المنطقه طفولتنا بيها .. وهم اذا هاي زمن خوش تاخذ خيرة حتى تاخذلي "

باوعتلها " مااتوقعتج تأمنين بهيج شغلات "

ردت " اذا بالقران مابيها شي جانت عندي صديقه تاخذ بالقاموس فد مضبوطة "

گامت خاله " اروح اني لايصير المغرب عود تعالن واشيلجن على راسي .. وانتي لا تكطعين بيه والله رجلي ماتشيلني جان جيت الج بس اليوم فاض صبري وام وليد حملتني هالامانة بالطيف واجيتج "

البنات ماقبلوا تطلع وعزموها ع العشا بس ماقبلت واصرت تروح ..

بعد ماطلعت التهينا بالعشا ..

للمغرب جاي اگلي كبه .. دخلت هديل تبجي

دخلت الغرفتها .. وخالة وراها وجهها مايتفسر وضايجة

سألنها البنات .. " شكو يمة شبيها الطفل بي شي "

ردت " ماكو طفل اصلا "

عذورة حجت " شنو يعني تضحك علينا "

ردت خاله " لا المگرودة هي هم عبالها حامل وفرحانة ماشفتنها من طلعنا شلون طايرة .. "

سألتها بيداء " اخذت سونار الدكتورة شكالتلها "

ردت خاله " مو غابت عليها عبالها حامل طلع عندها تكيس هو مانع الدورة .. والا تتعالج يله "

اتنهدوا البنات " ياخطية يله المهم تتعالج ويصير عندها ليش ضايجة بعد "

ردت خاله " هو اني ردت اموت من گالتلي الدكتورة فرحانة وسويت النذر ونسر سودة عليه طاير .. اني ادري ليش هيج فرحتنا راحت .. جابت الطريق كله تبجي تگول شلون راح اگول النسر "

نسر بيومها مارجع خابر الخالة گالها اني خارج بغداد معزوم الباجر يله اجي ..

سدته منه " مايجي نسر اليوم وماگلتله خطية خاف يضوج خلي يجي باجر واحجي وياه "

هديل ماطلعت ابد ولاتعشت .. شگد توسلت بيها خالة ماقبلت ..

ثاني يوم هم نفس الشي .. طلعت غسلت ورجعت للغرفه ..

عذورة جانت فرحانة بهدية معتز دزاها من تركيا بمناسبة عيد ميلادها .. موبايل حديث ..

ودازلها ملابس هم ..

كملنا شغل وكعدنا بالحديقة .. الجو بدأ يكسر ..

وخاصه الظهر بعدنا مامتغدين منتظرين نسر ..

انفتحت الباب دخل .. اشرلي تعاي وراي ..

دخل صعد گبل خالة جانت تصلي اشرتلي ..

الله اكبر

وگفت طلعت هديل " شنو اجه نسر "

رديت " اي "

سألت " وينة ؟"

رديت " صعد "

عقجت حاجبها " ليش صعد گبل "

كملت خاله وسألتني " شبي هيج طاير صعد اكو شي بس لاگلتيله "

رديت " لا شعليه اكله هاي عذورة واسأليها هو دخل بسرعه وصعد "

صاح من فوگ " وينج شذر "

صعدت بسرعه .  دخلت الغرفه همس..

" الي حجيتيه عن ابوج صدگ لو جذب ؟؟"

صفنت بوجهة مستغربة " بعد هالسنوات كلها تسألني هالسؤال ؟؟"

حجة بعصبيه " لاتخبليني صديقة امج حجتلي غير شي "

انصدمت " ياهي صديقة امي قصدك جنان ؟؟ ووين شفتها ؟؟

سأل " مو شغلج المهم عندي اعرف الحقيقه .. ولج راسي افتر .. المرة من حجيت وياها .. گالت عندج علاقات وابوج بطلج وحبسج .. صارت بيج مثل الحالة النفسية واخر شي انهزمتي من البيت .. كم مرة لازمج ابوج فوگ السطوح .. الى ان حبسج بغرفه وعاقبج وبعدين گمتي تتهمي انه يتحارش بيج .. وامج جاويتج واكو اثار بجسمج صحيح هالحجي لو لا ؟

هو يحجي واني احس الدنيا تفتر بيه .. معقولة جنت بكابوس او فعلا مريضه واتوهم .. معقولة صرت اشك بروحي بسببهم.. 

نسر يحجي واني مصدومة واخر شي سمعته " اهلج بعد ماانهزمتي وانفضحوا بالمنطقه شالوا الغير منطقة وتگول مااعرف بعد عنهم شي "

يباوعلي ويحجي " حجيت بالگوة احس الساني ثگل

اصلا انت مصدگ وجاي تتحقق .. بعد ماكو داعي ارد عليك .. بعد مالي عيشة هنا ..

گمت اريد اخذ عباتي من الكنتور دخت ووگعت ..

#بقلمي_شمس_السعدي

يتبع .…

حبايب بسبب التعليقات الجارحة راح تختصر الرواية بطلب من الابطال  ..

مساء الورد احبتي ❤

///// البارت ثلاث واربعــــون /////

#قوارير_من_فضة ج2

#بقلمي_شمس_السعدي ..

#ابي !!

منذ طفولتي اعيش ذلك الكابوس المزعج بسببك ..

الاب هو الحضن الامن لكل بنت ..

لكن بالنسبة لي كنت ذلك الي وئد برائتي وقتلها ..

لم تراعي دمعتي ولم تشعر بوجع قلبي ..

سلطت انواع العذاب على جسدي المتهالك..

بكل نظرة ترمقني بها .. اتجرد من جميع مشاعري

وكأنني بين فك وحش مفترس ..

لايعرف شيئا سواء ان ينهش جسدي طيلة تلك السنين !!

انا طفلتك الوحيدة ..

اول حب عانق قلبك .. اول نسمة تدخل حياتك

جعلت منك ابا وحبيبا وجعلتني فريسة وجثة هامدة

اسيقتني السم بقربك مني .. وحرقت جسدي بلمساتك المحرمة ..

لاادري اي ذنب اقترفت ..

واي قسوة استحقها منك .. ماذنب برائتي التي اغتصبتها بيديك .. وماذنب طفولتي التي رسمت بها جروحا اثارها لايمحيها اي علاجا ياابي وقاتلي !! ..

_____________________________________

گمت اريد اخذ عباتي من الكنتور دخت ووگعت ..

فتحت عيني احس بغواش وراسي يوجعني ..

شفته گبالي بيده كلاص مي ويغسل وجهي ..

علامات الخوف مرسومة بوجهة ..

همس " شتحسين ؟؟ زينة ؟؟ اخذج للمستشفى "

گمت بسرعة منه ..

ابتعدت ردت اگوم دخت ..

صاح " الله الله على كيفج "

لزمت راسي .. الم فضيع ..

" اريد اروح منا " حجيت ..

رد " وين ترحين شبيج منو الج "

رديت " هو لان محد الي هيج تسوي بيه .. ارض الله واسعه .. الي حماني بكل ذيج السنين قادر يحميني هسا "

اتأفأف " ترى ماحجيت شي مجرد سؤال ؟ .. يعني شتردين من اسمع هيج حجي من وحدة غريبه وتعرف اهلج ؟"

رديت بعصبية " ثمان سنوات اني بينكم .. من بيت عمة لهنا .. ماعرفتني ابد .. اذا بعدك تشك بيه ليش امنتني بنتك وسلمتها بيدي اربيها .. اذا عندك مخاوف مني وتصدگ بغريبة ماتعرفها ليش لساتني على ذمتك .. شنو الي جابرك تحميني .. ..

قاطعني " صوتج .. منو گالج صدگت بس ردت اسمع اريد افهم يعني الغلط مني اريد ارجع اعتبارج "

رديت " ومنو گالك روح دور عليهم .. منو گالك اني اريد اشوفهم او اعرف وين همة… اني من طلعت منهم اعتبرت روحي يتيمة ماعندي اهل ليش تحاول ترجعلي الماضي وتوجع گلبي "

عاط بيه " اليوم باجر عگبه لازم يرجع الماضي لابيدج ولابيدي "

بقيت ساكته وهو يحاول يبرر كلامه ..

اندگت الباب. .

عاط " منو "

ردت فرح " اني خالو بيبي تگول تعالوا تغدوا "

رد عليها " روحي هسا جايين "

باوعلي " گومي تغدي "

غمضت عيوني واني اتذكر كلام جنان وشلون اهلي مشوهين صورتي للناس ..

رديت " مااشتهي .. روح انت "

رد " لاتحسسيسهم بشي انزلي "

رديت " تعبت تعبت .. احس روحي مخنوگة .. اذا اهلي هيج شلون الناس .  بعد مالي حق اعتب واضوج اصلا الي مثلي حرام تعيش بهيج دنيا وسخة .. الزين بيها مذموم والشين بيها محمود "

لثوانـي عم الهدوء بينا ..

اتقرب گعد ع الجرباية .. " هسا شتردين "

رديت " مااعرف شأريد..  بس المهم مااريد ابقى هنا مخنوگة "

رد " اذا من كلامي فكلتلج اي واحد بمكاني جان سأل نفس السؤال "

باوعتله " توقعتك عرفتني ومابقت ذرة شك بداخلك من يوم الي حاولت تتقرب مني .. شلون هيج الشك مالي گلبك وتريد تعيش وياي حياتك .. شلون تنبني بينا ثقة وانت لسا بداخلك شك بيه "

استغفر الله " انتي ليش ماتفهمين .. هي فرة عقلي "

گمت من مكاني ..

رحت للكنتور طلعت عباتي الاسلامية وملابسي ..

اجة يمي عاط " وين تردين انتي ؟"

التفتت " اخذني الها "

رد بأستغراب " منووو ؟"

رديت " جنان مو انت رحتلها وسمعت منها وصدگتها اريد اروح واسمع كلشي بأذني "

صفن بوجهي " تحجين صدگ .. شتحجين وياها ؟"

هزيت راسي " اي .. تعبت واني ابرر "

باوعلي " عمرج كله خايفه من محافظتكم ومن جنت التحق وارجع اشوف الخوف بعيونج .. من تمشين تتلفتين داير مداير نفسج خاف احد يعرفج او اهلج يلگوج .. شنو الي تغير هسا ؟"

رديت " انت !!"

صفن مستغرب .. كملت " اي انت .. انت فتحت الدفاتر القديمة وصار وكت ينعرف كلشي حتى ترتاح .. ويروح الشك من داخلك لان بحياتك ماراح تثق بيه ولاتبطل تعايرني بكل لحظة "

اتنهد " اذا هذا يريحج گومي بدلي "

باوعتله " بس بعدها اذا طلع كلامها كذب واعترفت تتغير حياتنا كلها "

باوعلي مصدوم من نبرة صوتي ولهجتي وياه .. فعلا لاول مرة اعلي صوتي واتحداه .. بس تعبت سنين واني ساكته واجة الوكت الي انتفض بي ..

هز راسه وطلع ..

بدلت بسرعه ولبست شالي .. اخذت جنطتي وكلشي يخصني من مستمسكات وموبايلي وفلوسي خليتهن بيها ..

طلعت صارت بوجهي بيداء " شكو شبيكم اصواتكم عاليه "

توترت " ليش سمعتي ؟"

ردت " لا جنا جوة وماما ماقبلت نصعد ونتدخل بس صوت نسر يعيط سمعناه "

اتنهدت " ماكو شي ؟"

نزلت لجوة..  خاله تحجي وياه " يمة شبيكم صاير شي ؟"

رد عليها " يمة لاتلحين الخاطر محمد گلتلج ماكو شي"

هديل واكفه بباب غرفتها تباوع ..

خزرتني من فوگ لجوة ..

رحت للمطبخ اغسل وجهي لان بجيت هواي ..

اجت وراي " وين تردين شمسويه وهيج يعيط "

مارديت عليها .. رجعت للصاله باوعلي :

" هااا كملتي خلينا نروح "

صاحت خاله " وين رايحين خلونا نفهم شضامين علينا"

همست من وراي " يمة منج صفيرة .. اكيد سويتيلج لعبه حتى يطلعج الله العالم شمصخمة "

موتتها بسكوتي وهي مستمرة تشمر حجي ..

اشرلي " يله امشي " طلع گدامي ..

حجيت وي بيداء ووصيتها على دنو .. تغديها وتنومها وتدرسها العصر ..

سألت " شنو مترجعين العصر "

رديت " مااعرف "

خاله صاحت " شذر يمة وكتها مو تدرين عندي حجي وياه حتى ماخلاني احجي شبيكم ليش هيج ضايج وانتي وجهج مايتفسر جن ميتلكم ميت "

رديت " ماكو شي خاله شغله بسيطة "

ردت " هو اكو واحد ياخذ منج حجايه انتي بير مالة قرار "

طلعت واني احجي بيني وبين نفسي " الموت اهون من الي سمعته .. لو فعلا ميتلي احد ولااسمع طعنهم الي توقعتهم ندموا وحسوا بالذنب تالي امي تحجي عني هيج وتبرأ زوجها "

فتحت باب السيارة وصعدت ..

باوعلي " بعدج تردين ترحين يعني ماغيرتي قرارج "

باوعتله ومتردد بداخلي خوف والساني يرد " اي بعدني"

اتمنيت لو مخابرة خاله .. بس خفت تمنعني  ..

طول الطريق ساكتين .. راسي اذاني حيل ..

همست " عندك براستيول بالسيارة "

رد " اي بس انتي مامتغدية خاف صار عندج هبوط خلينا ننزل بالطريق نتغدا "

رديت " مااريد ماجوعانة "

رد " بس اني جوعان "

سكتت ..

عبرنا بغداد .. وتذكرت شلون اجيتها اول مرة .. وشلون كنت خايفة ومرعوبه .. مااعرف شلون كنت قويه وجريئة وگدرت اخطو هيج خطوة وانهزم منهم ..

كلشي تجدد بداخلي .. الخوف والحزن والكره والاشمئزاز ..

راسي اذاني حيل مااتحملت بعد ..

لزمتة قوي بيدي ..

باوعلي .. عين الي وعين للشارع يباوع ..

" يوجعج كلش "

هزيت راسي .. اي

مشى سريع .. خفت ..

" على كيفك "

رد " اكو ع الشارع مطعم ننزل بي "

مسافة نص ساعه وصلنا المطعم ركن السيارة ..

" يلة انزلي حتى تاخذين علاج "

نزلت .. المطعم ع الطريق فكل الرايح والراجع يمر بي ..

دخلنا كعدنا ..

گام الثلاجة جاب مي واجة ..

فتحة " اشربي "

شربت .. الجو بي برودة . والمي مابرد وراسي يأذيني مااتحملته ..

سألني " بارد اجيبلج مي دافي"

رديت " اي "

اشر للولد جابلنا بطل مي دافي .

اجة الولد ياخذ الطلب سألني " شتاكلين "

رديت " اي شي "

رجع حجة وي الولد " اثنين قوزي على تمن .. ومرگ شعندكم "

رد الولد " تبسي ويابسة "

رد عليه " خليلنا من الاثنين "

راح الولد واني صافنه ع الشارع ..

الجو بيومها مغيم جزئي .. ساعه تطلع الشمس وساعه تغيب احس گلبي انقبض.. 

اني وين راحة .. شلون ارجع الذاك المستنقع برجلي شلون راح اتحمل ادخل ذاك الشارع الي انهزمت منه ..

قطع صفنتي الولد جاب الاكل ..

باوعلي نسر " يلة اكلي .. ترى المطعم نظيف هذا كلش من ايام الجيش جنت اكل منه . يعني قديم مو جديد "

رديت " مو شغله نظيف بس مااشتهي .. "

رد " اكلي شوية "

اكلت شوية ماگدرت .. اباوعلة جان جوعان من البارحة هو برة البيت اكيد ماماكل ..

قربت ماعوني اله :

" اكل هذا حرامات يبقى اني شبعت "

رد " لاتستغربين ميت جوع من البارحة العشا وبعد مااكلت بس ستكان جاي شربت "

سألته " وين بتت هناك "

رد " يم واحد صديقي من الجيش وعلاقتي قوية بي "

سكتت بعدها الى ان كمل اكل ..

راح يغسل .  بعدها شفته طلع للسيارة ورجع ..

جاب البراسيتول " هاج اخذي وحدة "

اخذت حباية وشربت ماي . وصى على جاي ..

شربت وياه علمود راسي

بعدها طلعنا ..

اتمنيت الطريق يصير طويل حيل ومانوصل ..

للحظة ردت اتراجع ..

بقينا ساكتين اني مخليه راسي ع الشباك ومغمضة عيني بس مانايمة ..

" وصلنا " گال ..

فزيت اباوع .. متغيرة هواي ..

خنكتني العبرة .. ابد ماحبيتج .. لان مااتذكر عشت بيج يوم حلو . عمري كله عشتة بيج وحيدة وموجوعة ومظلومة.. 

اختنگت حيل " رجعني بطلت مااريد "

باوعلي " بعد وصلنا وين نرجع "

رديت " مااريد رجعني كلتلك"

رد " من شنو خايفه اني وياج لاتخافين .. اذا طلعتي منها وحدج هسا مو وحدج .. لازم تتحملين وتواجهين "

سكتت واني اباوع الشوارعها ..لبيوتها الاشجارها الكلي بيها .. مااحس بشي اتجاهها…

اكو مغترب من يرجع البلدة يشتاق حتى للهوى البيها ..

يفتح الشباك ويستنشق هواها ..

اني سديت الشباك حتى مااشم ريحة الغدر والظلم بيها

ااااه ياانتي…

اصبحت سجينه ذكرياتك وماضيك .. جئتك كي اتحرر كي اعيش .. كي انسى .. لكن رؤياك جرحني اكثر وجدد كل مشاعري المكبوتة وآلامي ..

وصلنا الشارعنا ..

بيت جنان كان بأول الشارع ركن .. وبيتنا بفرع لجوة ..

اول ما دخلنا الشارع ..

گلتله " اطلع گبل لاتوگف "

باوعلي " بس هذا بيتها ؟"

هزيت راسي " اعرف "

مشى گبل مثل ماكلتله ..

وصلت البيتنا جان مصبوغ ومرتب مو مثل ماكان ..

حتى بابه متغيرة .. بس لساتني اتذكرة ماانساه مستحيل انساه ..

حتى لو صبغت جدرانك المهدومة .. وغيرت بابك المكسور . بس راح يبقى اثر الجريمة داخلك .. كل ركن بيك وكل جدرانك شاهدة على اغتصاب طفولتي ..

ياام بجيت واستنجدت بداخلك وماسمعت او شفت احد نجدني .. مهما تنظف راح يبقى داخلك ملوث !!'

دموعي تنزل واني اعاتبه بداخلي ..

اتنهد " كافي خلينا نمشي "

باوعتله وابجي " هذا البيت شايفه هذا .. لايغرك نظيف وحلو ومرتب .  جان وسخ .. قذر .. بقذارت روح ابوية الي استغل برائتي وحطمني "

كان الجو عصر والناس هيج وكت تطلع برة بيتها..

انفتحت الباب .. طلعت طفلة صغيرة بيدها لعابة ..

باوعتلي ابتسمت ..

همست اله .. جنت مثل برائتها .. امنيتي العب بلعابه مثلها .. ماجانت عندي طلبات هواي ولا طفله مدللة ومتطلبه .. جنت راضيه بلعبه من قماش ..

بس هم اخذوا مني كلشي حلو وبريئ ..

اتنهد " كافي گطعتي گلبي "

اشرتلها .. اجت فتحت الباب وصرت اتلمس وجهها بوستها واشم بيها ريحة البراءة .. معقولة اني جانت هيج ريحتي قبل لا يوسخها ..

طلع ولد كبير وراها صاحها راحت .

اتقرب " رايدين شي ؟" سأل

رد نسر " اسفين اخوية بس گرايبنا عايشين بهذا البيت جانو ماتعرف وين راحوا "

رد الولد " لا والله مانعرف .. هم باعوه بيوم وليلة وطلعوا من المنطقة "

رد نسر " رحم الله والديك مشكور "

سديت الباب وحرك نسر بسرعه ..

عيوني مابطلن بجي .. وصلنا البيت جنان ..

التفت الي " اذا تبقين هيج خلينا نروح "

رديت " بعديش ؟"

رد " اذا انتي بس شفتي البيت هيج صار بيج "

باوعتله " لان هالبيت ذكرني بكلشي صارلي "

رد " اذا جايبتني هنا حتى تخليني اصدگ .. ترى مصدگج وحتى لو عندي شك من شفت حالتج يم البيت راح كل الشك مني "

اتنهدت " مو الخاطرك اجيت الخاطر نفسي "

نزلنا دكيت الباب وايدي ترجف .. خايفه اذا طلعت شحجي شأكلها ؟"

طلعت بنتها من ورى الباب صاحت منووو ؟"

هاي اكيد فوفة بنتها كنا نلعب سوة ..

سألتها " خالة جنان موجودة "

ردت " منو اكلها ؟"

رديت " ماتعرفني بالاسم بس اذا شافتني تعرفني "

راحت وبعد دقايق انفتحت الباب طلعت جنان لابسه عبايتها .

شافتني انصدمت .. باوعتلي وباوعت النسر عرفته ..

" انتي شذر مووو عرفتج من ذاك اليوم بالكاظم "

رديت " اي اني .. وطبعا انتي رحتي وگلتي الامي "

توترت وباوعت النسر لان هي گايلتله مااعرف شي عنهم ..

ردت " لا مو اني اصلا اهلج مااعرف شي عنهم من طلعوا من المنطقة "

سألتها .. " لعد شلون عرفتي قصتي ؟"

ردت " المنطقة كلها تحجي بيها "

ضحكت " يعني اذا اسألهم يحجون نفس حجيج ؟"

رد نسر " لاتجذبين .. قبل سنوات وبعد ماشالوا سألت الجيران كلها عنهم وماعرفوا ليش طلعوا ؟"

توترت وبين جذبها ..

حجيت وياها " اريد اسمع منج شكالت امي عني "

سألتني هي " وانتي ليش شردتي من اهلج وسودتي وجههم .. لو شايفه امج وحالها . لو اخواتج مافكرتي اذا كبرن شنو مصيرهن ؟"

رديت " اني ماسويت شي خطأ وكل الي سمعته كذب خليني ادخل واسمع منج واسمعي مني "

دخلتنا بس على عيونها . بناتها يباوعن من شباك المطبخ .. عرفني او لا ماادري !!

دخلنا كالت " مااگدر اخليكم هواي .. ابو علي اذا اجه مايقبل ذيج المرة وحجيت وياك غصب عني لان گلتلي ضابط وفاتحين تحقيق وخوفتني بس هسا عرفت جذب "

رد نسر " وانتي خفتي من التحقيق بس ماخفتي من الله من جذبتي وحجيتيلي قصه جذب "

ردت جنان " والله ماجذبت .. اني الي سمعته من امها حجيته .. شعرفني صدگ لو جذب "

سألتها بحرگة گلب " اكثر وحدة تعرفنا انتي .. شفتيني يوم مديت راسي من باب ؟"

ردت " لا "

"شفتيني يوم طلعت للشارع ولعبت ؟"

ردت " لا "

" شفتيني يوم حجيت وي ولد او اجيتي يمنا وطلعت يمج لو كله كاعدة ع التلفزيون "

ردت " اي والله جنتي هادية ومالج حس ابد "

اتنهدت " جا شلون صدكتي بهيج شي ؟"

ردت " واني شمدريني غير امج حجت وماكو ام تطعن ببنتها ؟"

رديت " امي حجت هيج لان خاف افضحهم واطلع جذبهم "

سألت " شقصدج ؟"

رديت " اسأليها شسوو بيه .. لان الي سووه ماينحجى ولولا الله طلع بطريقي ابن حلال كان اني حالي ما يعلم بي الا الله "

باوعتله وسألت " هذا زوجج ؟"

مارديت عليها ..

باوعت النسر " يله خلينا نمشي "

رد " مو قبل مانعرف عنوانهم ؟"

رديت " شتسوي بي مااريده "

رد " بعدين تعرفين "

باوعلها بسرعه حجت " مااعرف گلتلك لاتلحون .. رجلي راح يجي مااريد مشاكل فدوة "

رديت " اعرفج تعرفيهم والدليل كلتليها اول ماشفتيني وحتى اذا ماتعرفين بيتها ع الاقل عندج تواصل وياها وتخابريها "

ردت " وشتردين منهم عوفيهم مو كافي طينتي سمعتهم من شردتي .. لو بنتي تسوي هيج اكتلها واطم عارها .. "

تعصب نسر " شو انتي ماتعرفين تحجين اذا الاهل سگط طبعا البنية تهج منهم "

ردت " لو مهما يسوون البنية الشريفه تتحمل وماتشوه سمعه اهلها .. وهسا يله كافي لاتخلوني اقلل من اصلي واطرد ضيوفي "

اشرت النسر " خلينا نگوم .. بس لو بنتج ابوها اعتدى عليها شتسوين ؟؟ "

انصدمت وماعرفت تحجي ..

اتنهدت " شفتي مجرد هالسؤال وترج وماعرفتي تردين جا شلون اني "

عفتها وطلعت ..

نسر يريد يعرف مكانهم..  ماقبلت عوفها لاتلح ..خاف تسويلنا مشاكل اصلا مااريد اشوفهم واذا شفتهم شيصير يعني مااريد خلينا نرجع ..

صعدنا بالسيارة..

" شفت شلون مشوهين صورتي .. الناس كلها عليها الظاهر .. اذا هي جنان نفسها جانت تحمد بيه وبتربيتي وتقارن بناتها بيه هسا كامت تحجي بالمثاليات .. بعد مااعتب عليك او على غيرك "

طلع موبايله خابر ..

" الو شلونك حمودي "

" هااا لا والله بعدهي شغلتي مطولة وزوجتي هم جبتها هنا علمود اوراق اطلعلها .. بس ردت فندق اذا اكو هنا "

" ماتقصر والله كفو كفو اخوي بيتي والله بس مااريد ازحمكم .. البارحة يمكم اني "

" لاتحلف شبيك .. الله كريم جايين جايين "

سد الموبايل سألته " المن خابرت شتسوي بالفندق غير راجعين "

رد " لا مانرجع اليوم عندي شغل "

سألته " شغليج هنا عندك ؟"

رد " بعدين تعرفين "

اتنهدت " نسر تدري بحالي شلون ونفسيتي تعبانه مااگدر اروح للعالم استحي "

رد " ناس طيبين والله .. وفقرة من اهل الله وما عندهم احد بس زوجته وامه وياه "

اخذنا البيت صديقه بغير منطقة .. وجودي هنا خنگني ردت اطلع منها بسرعه بس مكتوبلي ابقى ..

دك الباب البيت صغير وبسيط ..

رحب بينا الولد واشرلي " ادخلي منا خويه .. امي وزوجتي هنا "

دخلت جانت المرة تنظف خضرة والبنية تسوي عشا ..

شافني رحبن بيه ..

گعدت يمهن بالمطبخ ..

امه كامت تصلي ع النبي .. " يمة شنهي انتي حورية ماشاء الله "

ابتسمت " شكرا خاله "

ردت مرته .. " اني حامل خليني اباوعلج بلكي يطلع ابني مثلج "

ردت عليها العجوز " وج يامثلها هو كل واحد يطلع على اهلة وين لاكيتها اهله زرگان وابنج يطلع عيونه زرگ مثلها .. اهم شي تمام الخلقة "

ابتسمت على سوالفها .. مبينين حبابين ..

ردت عليها جنتها " ياعمة خليني احلم شبيج "

سالتني " عندكم جهال "

هزيت راسي " بنية وحدة "

ضحكت .. " اشوف بيج خلفة التوم "

باوعتلها مافهمت ..

ردت عليه " يعني احسج تجيبين توام توام "

رديت " عندي امي والدة توم "

ردت " ظهرج عليها طالع "

حجيها نصه مافهمته . سكتت ..

باوعتلي جنتهم " ترى عمتي لاتاخذ خيرة ولا شي بس تجيها ساعات تحجي اشياء من كيفها وتطلع صدگ .. "

گلتلهن " اساعدجن بشي "

ردت العجوز " لايمة ارتاحي جايين من طريق .. "

رديت " اليوم راح نزحمكم "

شهكت المرة " يايمة حميد .. يوم المنا الي يدگ بيتنا خطار الله . هاي نعمة الله دازها النا .. الي يدگ بابه خطار البركة والرزق تجي وياه "

صار الاذان .. فرشتلي مرته بالغرفه السجادة .. صليت وكملت .. صبيت وياها خطية بطنها جبيرة..

سألتها " بيا شهر "

ردت " السابع " الحمد لله هذا اول طفل يثبت كل الي يصير يروح صار سبع سنوات .. والله رزقني بهذا

ابتسمت " ربي يفرحج بي ويجي بالسلامة "

فرحت " رحم الله والديج .. من گال احمد خطار عندي من بغداد صديقي ومرته .. الصراحة تخوفت .. عبالي مغرورة وشايفه حالج بس طلعتي تخبلين وتنحطين بالگلب "

ضحكت " كلنا بشر حبيبتي ليش هالغرور .. بس هاا نطلبكم زيارة .. يعني من تجيبين بالسلامة تجون لهناك نزوركم "

ردت العجوز " يا علواه وازور ابو الجوادين بس يگولون الطريق يخوف وبي سلابة تكتل "

رديت " هاي قبل خاله هسا الطريق حلو مابي شي .. بس تجيب تعالوا "

فرحن ووعدني يجن ..

كملنا عشا ..

گمت اتثائب من النعاس يمكن من تعب الطريق ومن البجي عيوني حرگني ونعسن ..

صاحت المرة " خايبة كومي افرشيلهم بالاستقبال خلي يرتاحون "

ردت البنية " هسا اكوم مادام راحوا وفارغه "

سالتها " ليش نسر طلع "

جاوبت " اي طلعوا مااعرف وين "

بقى بالي يمة وين راح .. بس لا رجع الجنان ورجلها يسويله مشكله . طار حتى النوم من عيني من القلق ..

فرشت البنية وصاحتني ارتاح ..

رحت تمددت .. طلعت الموبايل شفت عذورة متصله هواي ..

خابرتها ..

" ها عيني وينكم .. والله بيج حظ واخذتيه وطلعتوا بس لا رحتوا العشكم "

رديت " ياعش لا رحنا بشغله .. صديق النسر عنده مناسبه واخذني وياه "

ضحكت " عيني عيني وج لو شايفه هديل تريد تموت كل شوية وتسأل وحدة منا .. " وين راحوا..  هم خابرت شذر .. هم عرفتوا شوكت يجون ؟"

اتنهدت " عبالها طالعين نتونس لو اخذتة منها " حجيت بداخلي

سألت عذورة " ودنو شلونها ؟"

ردت " زينة بس ضايجة عليج .. بيداء درستها وغسلت ملابسها "

رديت " عذورة خلن بالجن عليها ولاتحسسنها بغيابي "

جاوبت مستغربة " شبيج لج ليش تحجين هيج بنبرة وداع "

اتنهدت " لا ماكو شي شبيج بس هي ممتعودة تفارگني يله روحي نامي وراج دوام "

سلمت وسديته منها ..

باوعت للساعه عشرة وهو ماكو ..

وين راح ؟؟

انفتحت الباب دخل . طفرت عبالي وياه الولد ..

اشرلي " ماكو بس اني ارتاحي "

سألته " وين رحت ؟"

رد " بشغله اني واحمد ورجعنا "

سكتت .. نزع قمصلته وقميصه بقى بالفانيلا ..

دنگت ..

تمدد ع الفراش باوعلي " شنو ماتنامين ؟"

هزيت راسي " اي راح انام "

سحبت فراشي عن فراشه خليت مسافه شبر عنه

ضحك " يابة مااكلج يعني لو اريد اسوي شي هذا الشبر يمنعني .. اشو احنة عند ناس غربه وماتگدرين لا تصيحين ولاتحجين "

باوعتله مستغربة " تحجي صدگ انت "

ضحك بصوت " يابة شگد فطيرة . ليش مو اني حيوان شنو المانع بعد "

ابتسمت " يووووه شوكت تنسى "

باوعلي واختفت ملامح وجهة " تلوگلج الضحكة "

تمددت وتغطيت ..

باوعتله بعد يباوع الي ..

" اني حلفت ماابقى ببيتكم بعد "

اتنهد " يابة اني ادفع كفارة بدالج لو اصوم نيابة عنج بعد شتردين "

سكتت ماحجيت..  خلي يطلع الصبح والله كريم .

غفيت وبيوما ماگدرت انام .. احس روحي مخنوگة مااعرف شبيه ..

اباوع النسر بسابع نومة ..

واني ساعه اغفى وساعه افز ..

الى ان صار الاذان .. سمعت الحجيه تصيح بالبيت

يلة يمة گوموا صلاة .. النوم للشياطين وصلاة الفجر لأحباب الله ..

فز نسر " شكو ؟"

ضحكت " شبيك هاي خاله ام احمد تكعد للصلاة "

مسح وجه " دخيل الله وين گاعدين بوسط الكعبه "

ابتسمت .. كمت توضيت وصلينا ..

رجع نسر نام ..

اندكت الباب ..

اجت صينية الريوگ ..

صفن نسر " ولك احمد تحجي صدگ وين اكو ريوگ هسا مو كافي نداء امك طير النوم من عندنا "

ضحك " بيك بخت ماهي البارحة وشبعت نوم اليوم ايس"

ماتريگ بس شرب جاي واني اهم مااشتهي ..

بقينا للسبعه يمهم وطلعنا ..

المرة ماقبلت نروح .. بالگوة خلتنا…

سلم عليهم نسر وهم وصلى احمد يمر بينا البغداد ..

صعدت للسيارة بس حركت نعست… تكيت راسي ونمت ..

بس غفيت سمعت صوت نسر " شذر گومي وصلنا "

باوعت " شبسرعه .. منطقة غريبة "

باوعتله " احنة وين ؟؟"

رد بتوتر " شوفي شذر .. اذا ماتواجهين الوضع ماترتاحين تبقين عمرج كله تعانين"

فهمت قصدة .. بقيت اتلفت مثل المخبلة ..

اباوع للبيوت بيت بيت .. منو منهم بيتهم ..

عطت " ليش ليش جبتني الهم ومنين جبت العنوان "

رد " جبته من رجل جنان ضغطت عليهم .. بعدين ليش خايفه هم الي خايفين منج .. لازم تواجهين مخاوفج لازم تكونين قوية وتشافين نفسج بنفسج "

دموعي نزلت لااراديا ..

" خايفه نسر خايفه مااگدر .. خاف يكتلني بحجة غسل عاره لان انهزمت حتى يسكتني "

جنت احجي وارجف .. " لزم ايدي .. كافي شبيج .. ليش اني وين رحت . فن واحد يگدر يوصلج لو يأذيج"

نزل واجاني .. فتح باب السيارة ..

نزلت بالگوة خايفه مرعوبة وبنفس الوقت بودي اطلع قهر السنين كلها بيهم ..

دگ الباب ..

مرة مرتين .. تراجعت " نسر خلينا نفتح ماهمة بالدوام يمكن ..

باوع الساعته " سبعه ونص وين اكو دوام هسا "

انفتحت الباب

بهاي اللحظة ..صرت ورى نسر احتميت بي ..

#بقلمي_شمس_السعدي

يتبع .…

صباح العسل لعيونكم ❤

///// البارت اربعة واربعــــون /////

#قوارير_من_فضة ج2

#بقلمي_شمس_السعدي ..

اي ذنب اقترفت .. ليكون ربيع عمري كـخريف طفولتي !!

دگ الباب ..

مرة مرتين .. تراجعت " نسر خلينا نمشي ماهمة بالدوام يمكن ..

باوع الساعته " سبعه ونص وين اكو دوام هسا "

انفتحت الباب بهاي اللحظة ..

صرت ورى نسر احتميت بي ..

مشاعر ممتزجة خوف وتوتر وتجدد للذكريات ..

سمعت صوت بينة .. باوعت ..

شافتني ارتعبت .. فزت من مكانها..  عرفتني لو شبهت عليه مااعرف ..

كان نص وجهها ابيض ونص بي سواد ..

هي تباوعلي بحيرة واني اباوعلها بشغف واشتياق ..

معقولة هاي الوحمة هيج خربت جمال وجهها الناصع

تشبهني بس الفرق العيون هن على عيون ابوي مو ملونات عسلي ..

اتقربت رجليه منها لااراديا " هاي انتي سمر ماعرفتيني ؟"

ردت وعيونها غرغرت بالدموع " بس لاانتي ؟"

هزيت راسي " اي اني اني شذر تعرفيني اكيد تتذكريني"

سمعت صوت وراها .. " شعندج جايه .. انتي ميته بالنسبة النا "

باوعتلها سحر ..

لو ماالوحمة الي بوجه سمر مافرقت بينهم .. بس الفرق انه سحر قوية والسان ..

سمر هاديه ..

سألها نسر " ابوج موجود ؟"

عينها عليه وردت " لا مموجود بالدوام وحتى لو هنا مايطلع الكم لان بالنسبة النا هاي اليمك ميتة "

همست " تتوقع جنان لو زوجها مخبرهم ؟"

رد " كلشي توقعي اكيد عندهم علم مبين من هاي اختج ام اللسان مااستغربت "

رد نسر " وامج ؟؟ "

باوعت سمر السحر خزرتها ..

ردت سحر " ورانا دوام يله روحوا .. ادخلي سمر جيبي جنطتج "

تخبلت من شفت نظرات الحقد بوججهها الله اليعلم شنو حاجيلهن ..

صحت وراها " انتن تعرفن ليش نهزمت ؟"

ردت سحر " اكيد علمود واحد من صحبانج "

عاط بيها نسر " السانج لج عبالك بيكسي ماشاء الله "

سدت الباب بوجهنا ..

همس الي " واني الي ضايج من سكوتج .. ابقي هيج احسن "

بقيت اباوع للبيت وابجي .. شفت شفت شلون تكرهني اختي .. كله من وراهم الله يعلم شحاحجين عليه ..

باوعلي .. اصعدي

رديت " وين اصعد المن جبتني ليش خليتني اشوفهن واتدمر ليش ؟"

همس " اصعدي ومعليج "

صعدت ودموعي مابطلن ..

حرك السيارة دخلها بالفرع ..

باوعتله " ليش وگفت ؟"

رد " اهلج بعدهم بالبيت .. قابل وين يرحون . بس يخافون من المواجهة .. وهاي جنان اااااخ بوية خربت الاول والتالي "

رديت " يعني شنو نبقى هنا واگفين "

رد " اهدي "

بقينا دقايق واگفين ومثل مااتوقع نسر .. طلعوا البنات لابسين جنطهم ..

سحر باوعت منا منا .. ورجعت للبيت مدت راسها حجت ورجعت طلعت .

معناها اكو احد بالبيت ..

ابتعدوا عن البيت وعيني وراهم اباوع الخطواتهن ..

بلكي حظجن احسن من حظي وخلوجن تكملن دراسة وتوصلن . 

بس نظرات سمر مافارگتني..

نزل نسر .. " ابقي هنا هسا جاي "

بقيت اتلفت شتگول علينا الناس . واحنة واگفين هيج نراقب ..

بقى يروح ويرجع .. الى ان انفتحت الباب . 

مدت راسها امي تباوع ..

اشرلي نسر ادنگ من بعيد..

درت وجهي بسرعه .. رجعت دخلت وطلعت هي وياه

اول ماطلعوا اجاهم نسر ..

اني شفته تخربطت احوالي ..

كبران وشعرة مشيب .. بس بعدة محافظ على لبسه ولياقته ..

نزلن دموعي تذكرت كل لمساته الي وهمساته..

من ضربته ماعرفت وين وكنت اتوقع مات .. انقهرت وردت ارجع اشوفه بس خفت ..

وتالي بعده عايش حياته ومستمر بعد مادمر حياتي وحطمني ..

بين عليهم الارتباك ..

بقوا يحجون شوية اشرلي اجي ..

التفتت ماما انتبهت الايدة من اشر ..

شافتني شهگت " شذر "..

فتح الباب بسرعه وراد يدخل هو امي ..

دفعهم نسر ودخل ..

اتقربت الهم .. ابوي عاط بي .  اخذها الساقطة وروحوا منا ..

صاح نسر " اذا تريد فضايح مستعدين .. خلي الشارع كله يعرف بنتك ليش انهزمت .."

اتقربت وبقيت بالباب خايفة… ساعه ارجع وساعه اتقدم ..

اتقدمت ببطئ سحبني من ايدي " شبيج ترجفين صيري قوية اني وياج"

شافني تخبل .. دخل جوة بسرعه جاب مسدس صغير واجة ..

عطت وصرت ورى نسر ..

خلاني بسرعه وراه .. " يلة اضرب اضرب وادخل سجن وذيج الساعه الماعرف يعرف "

رد عليه ابوي " انت شتعرف منها .. هاي دنست شرفي انهزمت وي صاحبها وجابتلي العار .."

عاطت ماما " اخذيه وولي .. نسيناج من زمان انتي ميته بالنسبة النا شذكرج بينا "

بجيت " انتي هيج تحجين .. جا ليش خابرتي خاله وسألتي عليه ليش ؟؟"

من سمعت هالحجي تخربطت .  " خالتج . شلون وصلتيلهم ومنين عرفتيهم "

رديت " بعمرج ماصدگتيني .. بس هي صدگتني .. لان تعرفكم  شنو..؟ "

عاط ابوي " انجبي عار .. منيلج هذا .. ويأشر على نسر

طبعا الي تنهزم من اهلها تلگيها حتى بالملاهي تشتغل "

ماما جانت ساكته وكعدت بالكاع من الصدمة ..

عاط بي نسر" احترم نفسك اني زوجها .. وانت ماتوصل ذرة الشرفها .. صانت نفسها لوحدها بينما انت جنت تنتهك بعرضها الي مثلك حرام يتسمى ابو "

رد بعصبية " جذابة هاي اني لزمتها نايمة وي واحد .. وحبستها وبطلتها الي تسوي هيج طبعا تذب تهمة على ابوها وتستر روحها "

عطت ماتحملت شلون بوجهي ويطعن بشرفي ..

صرت بوجهة وحجيت .. ماخفت لا من مسدس ولا من الموت . هي موته وحدة خلي احجي كل الي بداخلي وارتاح خلي اموت مايهمني اصلا شنو عيشتي بعد ..

" انت شنو من بشر .. نسيت لمساتك الي .. نسيت شلون تمارس وياي .. لو من تخلي ايدي على مناطقك الحساسة وتگلي ريحيني .. لك انت حتى اغتصاب ردت تغتصبني .. "

اتهستر ويصيح " جذابة جذابة .. "

باوعت الامي " كم مرة گلتلج يمة ابوي هيج يسوي بيه

وانتي شسويتي ضربتيني بدل ماتصدگيني .. ترستي جسمي جويات .. واثارها لسا بجسمي .. الي ماتعرفيه

باخر ليلة راد يغتصبني .. واني ضربته بالسجينه وانهزمت .. ماسألتي ليش ؟؟ ماحن كلبج شوية "

جانت گاعدة وتبجي بس ..

سحلني ابوي من شعري وضربني لزم ايده نسر حيل ولواها . گعده بالكاع واخذ مسدسة وخلة رجله ضغط بيها على ظهره حتى مايگوم ..

ماقبلت من شفته رغم جنت اريد اشرب من دمه ..

" مو هيج نسر "

باوعلي " تعاي اخذي حقج منه . لاتاخذج الرأفه بي هذا حلال كتله "

عاطت ماما " عرفه راح تموته "

عاط بيها " خايفه عليه .. بنتج سنين وهي ميته .. تنزف من قهرها وتتعذب .. وانتي تدافعين عنه .. المثلج تاخذ حق بنتها وحقها .. بس بأفعالج هاي يمكن جنتي تدرين وساكته .. "

اباوعلهم ومتأسفه على كل لحظة خوف خفت بيها منهم .. اصلا حرام اعاتبهم ..

دموعي ينزلن .. اتقربت منهم وعطت بعلو صوتي " الي انتو بي اكبر عقاب الكم .. الله نقذني منكم رحمني بناس تخاف الله .. اما انتو فأثنينكم نفس النمط .. الي خانت اختها والي خان خطيبته كلشي اتوقع منهم ..

عوفهم نسر .. عوفهم .. خليهم يعيشون حياتهم بعذاب .. خايفين من عمامي ومنهزمين .. اكدر باتصال واحد اجيبهم لهنا .. بس اني مو مثلكم..  واحمد الله انه ماطلعت اشبهكم ..

اااااخ شگد كنت تافهة الدرجة خفت بيوم اقابلك واواجهك .. طلعت انت الي تخاف من مواجهتي وتتهرب لانك مذنب ..

خوفي بس على خواتي خاف تسوي بيهن مثل ماسويت بيه ..

طلعت وعفتهم ..

خليت نسر يهدد ويتوعد ..

سحب الطلقات من المسدس وشمر المسدس عليه ..

اتنهدت " ليش سحبت الطلقات خايف يكتلني ؟؟ .. اصلا اني هسا اذا متت ارتاح بعد ما واجهته.. "

صعدنا بالسيارة..  حسيت ببرود مو طبيعي بيه ..

باوعتله ." ليش احس مااخذت حقي بعدني ليش احس نفسي ضعت اكثر ليش  "

باوعلي .. ابجي فرغي صيحي لاتسكتين .. جبتج لهنا حتى تواجهين خوفج وترتاحين .. مو حتى تاخذين حقج لان ذولة حرام يوسخ حتى السانه وياهم .. ماشفتيهم شلون خايفين . اصلا تلگيهم هسا عرضوا بيتهم للبيع "

هو يحجي واني ساكته .. اخر شي انفجرت من البجي مااتحملت .. ردت اعيط واطلع قهري ..

سد شبابيك السيارة وحرك .. ساكت وخلاني على راحتي ابجي ..

ابتعد اشرتله .. اوگف اريد اشوف سمر. 

وكف .. وين تشوفيها غير راحت للمدرسه

مدام راحن مشي معناها قريبة .. هن هسا بالمتوسطة

" تحجين صدگ بلة شنگول اذا رحنا "

رديت " اني ادخل معليك "

باوعلي " بهذا وجهج "

رديت " شبي "

رد " مابي شي بس مرورم .. ااااوف ياربي دور من تبجي تنگلب طماطة "

مسحت وجهي " اني وين وانت وين "

ضحك " شعجب ماگلتيلي حيوان "

ضحكت .. رجع ضحك " هيج اضحكي الي ينقهر هو وامج ولو بعد مااريدج تگولين امي وابوي لان مايستاهلون .. صيحيهم باسمائهم "

جابلي بطل مي غسلت ورتبت نفسي ..

سأل ابو المحل ع المدرسة وصفله  بعد شارع عن البيت. 

رحنا الها جانت تقريبا بالتسعه ..

راد ينزل اشرتله يبقى ..

دخلت للمدرسة وللادارة .  جان درس عدهم ..

حجيت وي المديرة گلتلها اني گرايبهم ماكلتلها اختها.

دزت العاملة صاحتها ..

اجت شافتني انصدمت .. باوعتلها المديرة .  " تقربلج "

هزت راسها سمر .

اخذتها وطلعنا بالممر .. هي بس ساكته ماتحجي ..

حاجيتها " مااعرف تصدگيني لو لا .. بس اني غير الي وصللكم من تكبرين احجيلج كلشي هسا مااگدر "

ردت " اني مااتذكرج زين بس شفت صورنا بالالبوم سوية من صغار..  بابا يگول جانت عندج سوالف مكسرة وانهزمتي .. بس ابد مايحجون بيج بالبيت..

بس هو كلما نسوي وكاحة يعايرنا بيج . انتي صدگ وحدة مو زينة "

دمعت عيوني " لا ابد والله .. ابو هو راد .. "

سكتت ماگدرت اكمل ..

سألتها " انت عندج موبايل " هزت راسها لا

باعي راح اكتبلج رقمي ضميه يمج .. اذا تصدگين اني مامسويه شي خابريني .. اما اذا مصدكتهم شكيها وشمريها وانسيني .. اني بعد مااجي لهنا اهلي اذوني هواي . "

هزت راسها جانت تغطي الوحمة بشعرها حتى تخفيها ونص عيونها هم .

حضنتها وبوستها " لاتخلين سحر تعرف اجيت "

هزت راسها ..

ماحافظة رقمي رحت ركض خليت نسر يكتبه الي بورقة وجبته الها ..

اخذتة ضمته بالجواريب ..

مبينه شخصيتها ضعيفه حيل ومتوترة او تحس بنقص وعدم ثقة بسبب الرحمة الي مضيعه جمالها .

رادت تروح للصف سألتها " بابا هم يلمسج او يحضنج "

صفنت بوجهي مستغربة سؤالي ..

هزت راسها لا وراحت ..

طلعت من المدرسة وريحتها بخشمي عبالك ذيج الطفله نفسها تركتها قبل ثمان سنوات ..

شفت نسر واكف يشرب جكاير يم السيارة ..

شافني وشمرها بالكاع وداس عليها ..

صعدت للسيارة بسرعه ..

سألني " هااا شفتيها ؟"

هزيت راسها " بعد ليش ضايجة شگالتلج "

رديت ودموعي نزلن " الله لينطيهم مايعرفون يربون الله ليش نطانا الهم.  خلقوا من عندنا شخصيات ضعيفه ومهزوزة .. حتى عينها ماتخليها بعيني ماعندها كل ثقه بنفسها "

رد " بس ذيج البيكيسي تختلف عنجن "

رديت وابجي " حتى ذيج هم السبب سممو عقلها عني من هي صغيرة .  زرعوا الحقد بگلبها "

طلعنا من المحافظة وعيوني مابطلت بجي اتمنيت ماجاية ولاعشت هيج لحظات ..

بس من واجهتهم حسيت براحة.. 

مسحت دموعي..  وباوعتله " شكرا نسر "

باوعلي " ليش ؟"

رديت " لان لو ماانت وياي وانطيتني القوة ماكنت هيج قوية "

ابتسم " صح انهاريتي بس اكو قوة بداخلج . عجبتيني"

سألته " يعني ثقيت بيه "

اتنهد " لوما ثاق بيج ماخليتج مرتي .. تدرين من البدايه اعرف جنان تجذب .. واجيت وصلتلج حجيها ردت اشوف ردج .. مو معناها شاك بيج بس حتى اوصل الهاي اللحظه "

رديت .. " انت شنو طلعت تخوف "

ابتسم " اعجبج "

طول الطريق اتذكر كلشي صار وابجي .. نسر مخليني على راحتي ابد ماضغط عليه .  حسيت راحتي بالبجي

بس راسي موتني كلش . 

غوشت عيوني وبعد مااشوف ..

صحت .. نسر الحگلي مااعرف شبية ..

وگف السيارة .. " شتحسين "

راسي وعيوني غوشت ..

رد " هاي ضغطج "

نزل جابلي عصير وحلا نطاني .. گال ارتفاع او انخفاض راح يتوازن بالحلا ..

استمرينا بالطريق وقرب الظهر ..

اول ما دخلنا بغداد .. اخذني للمستشفى قاسو ضغطي طلع مرتفع ..خلولي مغذي وابر .

بقيت ساعه مااتحملت كلتله خلينا نطلع ..

گمت وبعدني دايخة ..

مد اديه ..اتكي  عليه ..

باوعتله ضحك " لاتخافين مااكلج والله "

ابتسمت .. لزمت ايده وطلعنا للسيارة ..

صعد گلتله " مااروح للبيت بهيج حاله "

هز راسه " هو ببالي اصلا ناوي اخذج البيت عمتي ترتاحين هناك "

اتجهنا البيت عمة .. بالطريق نزل المطعم جاب غدا واجة ..

دخلنا للبيت بارد ثلج لان متروك ..

دخلني للغرفه ..

وراح جاب الصوبة الكهربائية شغلها ..

" همزين اكو كهرباء ع الاقل تدفين شوية .. يرادلنا نفط اشتري واخليه هنا احتياط "

نمت شوية غفيت ماادري بروحي ..

سمعت صوته يگعد بيه ..

بالگوة فتحت عيني ..

شايل صينية " گومي تغدي وبعدين نامي "

رديت " نعسانه اريد ارتاح "

رد " اي تغدي ونامي لليل معليه بيج "

گمت على عيوني .. اكلت شوية وشربت مي .. ورجعت نمت . 

گال " راح اخابر خالتج تجي يمج .  "

لزمت ايده لااراديا " لا عوفها مو هسا مالي خلگ احجي اي شي "

ابتسم وهز راسه ..

غفيت ماادري بروحي .. گعدت الشمس غايبة .

باوعت للساعه خمسة ..

گمت لبرة شفته متمدد ع القنفة نايم وباردة .

رحت گعدته ..

" نسر گوم باردة وصار المغرب "

فز شافني " شلون صرتي "

ابتسمت " احسن "

رد " ياالله ان شاء الله "

گام من مكانه " شتگولين نبقى هنا "

رديت " هااا بكيفك "

ابتسم " بالقران مااسوي شي علمودج اريدج ترتاحين "

ابتسمت " اليوم كلشي بيه مختلف "

ضحك " لا والله انتي الي مختلفه .. ولا عبالك ذيج شذر الي اعرفها "

ضحكت عفته وطلعت للمطبخ.. عايف الصينية بأكلها ع الكاونتر . صفيت الاكل وغسلت الماعين ..

التفتت شفته يباوعلي ويبتسم..

هزيت راسي " شكو "

رد " شتگولين نطلع نفتر "

رديت " مابيه حيل وين نطلع هيج جو "

رد " هيج بس نفتر "

مابيه حيل بس بسبب الحاحه وافقت ..

طلعنا .. افترينا ورحنا للمول .. تعشينا هناك وغيرنا جو ورجعنا غايته يخليني انسى وماافكر وفعلا گدرت انسى ولو لساعات معدودة ..

برحعتنا دگ موبايله .. باوعت هديل تتصل !!

#بقلمي_شمس_السعدي

يتبع .…

اعتذر حبايب هذا الي گدرت اكتبة الكم .

اسعد الله صباحكم بكل خير احبتي ❤

///// تكملة البارت اربعة واربعــــون /////

#قوارير_من_فضة ج2

#بقلمي_شمس_السعدي ..

‏آحتآج الى قلبا يحتويني ويضم آوجاعي المرتبكة ويشعرني بـ اني بخير !!

رجعنا دگ موبايله .. باوعت هديل تتصل !!

شاله ورد ..

" الووو .. هااا يابة .. لا مااجي .. شبيها امي ؟؟ .. زين زين اني اخابرها .. مشكورة "

باوعتله " شبيها خاله ؟"

رد " قلقه علينا وماانطيناهم خبر .. كلما تتصل ارفضه من البارحة واليوم… مرتفع ضغطها يمكن "

رديت " خلينا نروح للبيت حقها يبقى بالها "

رد " لا گلتلهم .. ارتاحي اليوم وباجر نرجع "

رديت " اني زينة لاتخاف عليه .. ومناك دنو هم وحدها خلينا نرجع "

رد " مو خابرت خالتج تجي باجر مانگدر نروح ونرجع "

اتنهدت " اووووف مااعرف شراح اگلها  "

رجعنا البيت عمة .. بالي يم دنو .. بس لازم احجي وي خاله اذا عرفت متأخر راح تزعل .. واذا گلتلها مااعرف رد فعلها بس الاحسن تعرف "

رجعت كهرباء ماكو ..

البيت بارد ..

صار يفرك بيدة " اااااشششششا .. البيت بارد شنسوي هسا "

اخذت منه جداحة شعلت الطباخ ..

طلعت شمعه من المجر .. شعلت وحدة بالمطبخ ووحدة بالاستقبال ..

سويت جاي علمود ندفأ ..

جبت بطانيات واجيت..  شافني ابتسم " عوزنا نشعل حطب ونتدفأ عليه "

التفينا بالبطانية وگعدنا ع القنفات ..

الجو اظلم وملتفين ..

سكتنا شوية البيت هادئ .  جانت الله يرحمها العمة اذا البيت هدئ فجأة گالت نولدت بنية ..

شربت الجاي .. وتذكرت اليوم شلون مر علينا .. كان كابوس حقيقي .. دمعت عيني .. احس الدنيا خانگتني يمكن ارتاحيت من واجهتهم وعرفت انه مايستحقون الحزن بس الي اذاني اكثر بهذا اللقاء اخواتي ..

نظرة سمر ماتروح من بالي .. وعيون سحر الي كلها حقد اذتني ..

حرموني من كلشي حلو بهاي الدنيا .. حضن الام وحنية الاب .. وحنان الاخت ..

شهگت ببجيتي .. سمعني :

" هاي شنو تبجين .. شگلنا احنة .. بله منو يستاهل دموعج "

رديت بخنگة .. احس شي كاتم على صدري اريد اصرخ اريد اطلع كل القهر الي بداخلي..  ماعز عليه غير اخواتي ونظرتهن اليه ..

لف بطانيته ع جتفه واجة يمي ع القنفه.. 

اتنهد .. " جنت مثلج ضايع مهموم ليل ونهار .. ماطايق الدنيا .. كاره حياتي كلها .. النسوان عندي نقطة سودة بحياتي ..

حتى من شفتج ماهزيتي مشاعري لان جنت اتوقع كل البنات متشابهات ..

قاطعته " ولحد هسا "

ضحك " هااا اي شويه بس هذا طبع مو بيدنا..  مااكلج اني سيطرت بسرعه ونسيت .. بس گدرت اتجاوز .. والدليل مشيت وياج واني بگلب بارد واثق بكلامج ومصدگج .. حتى لو جنت اشك بيج بس العشرة بينت معدنج شنو .. "

اتنهدت " ترى اني مو معقدة فد مرة والدليل انه گمت مااخاف من وجودي وياك بغرفه وحدة وبيت واحد الوحدنا "

ضحك " وهاي نقطة الج .. العافية بالتداريج .. يمكن السبب بيه ماگدرت احتويج .. اتفقنا نبدي من الصفر

وبسبب……   وقطع كلامه ..

المهم ماعلينا .. اريدج تفتحين گلبج الي نكون اصدقاء صدگي وعهد عليه مااطالبج بشي بس اريدج تكونين مرتاحة يمي مو خايفه .. نفسج ريحيها لا تخافين ..

الي صارلج انسيه او حاولي ..

احنة حتى حجي بينا ماكو .. مااعرف شتحبين وشتكرهين ..

ابتسمت " بس اني اعرف كل اطباعك .. "

ضحك " لابربج .. معناها عاجبج مووو ؟"

ضحكت " ههههههه ع شنو اعجب بيك اشو عصبي دووم "

رد " ابطل لعيونج بس هااا مرات تصير سهوا مو تحاسبيني عليها "

ضحكت على سوالفه يحاول بكل طريقه ينسيني او يخليني اضحك ..

بقينا نحجي الى ان غفيت وبعدهي الكهرباء ماجاية ..

أي امرأة انتِ ؟؟

كتاب أُفرغت فيه معاني الجمال لا أشكاله ..

وصفاته لا أسماءه ..

وكأنك خلقت من طين الجنان المعقود بالنور فلا حللت بزاوية إلا أشرقت، ولا نظرتِ في ليل إلا أضاء سناه ..

ويتخلل هذا الجسد الفاتن المبدع شرايين تجري بالحسن ومادته .. حتى كأني حين ألامسه أجد له وهجاً يفور كزهرة منثورة العبير ..

ومن غرائب جمالك أنه متجدد.. فأراك كل يوم امرأة جديدة زِيد في جمالها ودلّها وحسنها ..

وأرى أنوثتها كشجرة مثقلة بثمارها .. فتترنح من ثقل هذا الجمال وكأنها تقول لي: احمل عني أيها العاشق ..

اخذتنا الغفة بعد ماكنا نسولف .. احسها احسن من قبل رغم مجروحة بعدهي بس صارت اقوى . دفاعها عن نفسها ووگفتها گبال ابوها .. خلتها تكون اقوى وتتحسن نفسيتها .

اجت الكهرباء .. فزيت من الضوة بعيني ..

باوعتلها .. شلون متلفلفه ومتكية ع القنفه وغافية ..

شالها واگع وخصلات شعرها نازلة .. بقيت اتمعن بيها واريد اشبع من شوفتها المحروم منها .. يمي ومااگدر اطولها ..

صعب احجي واگول اني رجال والي غريزة .. بس من تزوجت هديل الي جذبني الها غريزتي وبس ماحسيت بشي يشدني الها ..

بينما من اباوع الشذر احس كل حواسي تروحلها .. دوم من اكعد بالليل اباوعلها يلة انام ..

مرات استعجل واتقربلها من شغفي الها اريدها تشيل هالحاجز بينا . بس عرفت ماكو شي يخليها تنسى الي المواجهة وهاي جانت الحل الاخير ..

مااريد اخسرها وخاصة بعد ماثبتت برائتها اهلها عرفوا بيها متزوجة وبحمايتي ..

معناها هسا هي مرتي گدام الكل مااكسر شي ينظم بعد

قررت اكسبها شوية شوية ..

فتحت صفحة جديدة بحياتي وياها .. صح هديل بحياتي بس مااگدر اظلمها .. راح تبقى زوجتي واحترمها .. وشذر راح تبقى الدرة الي موجودة بقاع البحر ..

والي راح ابقى احاول واغوص بأعماق هذا البحر حتى احصل عليها. 

ماگدرت اشيلها للغرفه خفت تگعد وتسويها سالفه عليه

وتفرني بعد ماصدگت فتحت گلبها الي ..

رحت للغرفه جبت مخدات والصوبة واجيت..

شغلت الصوبه . 

حجيت وياها " شذر شذر گومي نامي عدل هاي مخدة جبتلج "

ماگعدت تعجبت .. " اول مرة تنام هيج . هي اذا فتحت الباب تفز بغرفتنا "

رفعت راسها على كيف ونومتها .. جانت ترجف .. بودي اخذها الحضني وادفيها بس ماگدرت ..

غطيتها عدل ..

سديت الباب حتى يدفأ الاستقبال .. نمت ع القنفة الثانية وتغطيت ..

فتحت عيني الصبح على ريحة الجاي ..

گعدت باوعت المكانها فارغ ..

گمت .  شافتني ابتسمت " صباح الخير .  "

ماعندنا شي بالبيت ..

حميت الي زاد البارحة .. وترى القنينة راح تخلص ..

ويرادلنا نفط . يعني لازم نتفرغ للبيت شوية هنا ..

اباوعلها واضحك..

صفنت عليه " ليش تضحك طلباتي هواي مووو؟"

ابتسمت " احسج صرتي مثل امي من تريد شي مني للبيت "

ضحكت " اي خالة دوم تگول .. الرجال مايهمة شي بالبيت اهم شي ياكل ويطلع . "

رديت  .. " عمي صار بس تجي خالتج اخليج يمها واروح .. صبيلي بس جاي مااشتهي "

شذر :

صبيت جاي وع اساس ما يشتهي گعد اكل وياي ..

ندگت الباب راح فتحها دخلت خالة ..

سلمت وباوعتلي " شبيج نسر قلقني عليج "

اشرتلها تگعد بعد مابوستها " لاتخافين اگعدي وافهمج "

گعدت صبتيلها جاي ..

گالت " عوفج من الجاي فهميني شكو "

گام نسر " اني راح اخذ قنينة ابدلها . وجليكان اجيب بي نفط واجي "

عرفته يريد يخلينا وحدنا..

طلع وسد باب المطبخ ..

اتنهدت " البارحة شفت الاهلي "

صفنت " يااهلج ؟"

رديت " امي وابوي واخواتي "

شهگت " عززا العزاهم وين شفتيهم .. وشلون عرفوا مكانج "

رديت " اني رحتلهم نسر اخذني "

عاطت " شلون ترحين ماتخافين على نفسج ..

قاطعتها " گلتلج وياي نسر .. واصلا هم الي خايفين مني مو اني ..

سألت " شلون ؟"

حجيتلها كلشي من اول وصلونا لحد ماطلعنا ..

احجي وابجي محتاجة حضن يهديني .. ماصدكت فتحت اديها ..

ارتيمت بحضنها بسرعة وبقيت اشهگ واصرخ وابجي..

بقت تمسد على راسي وتدعي عليهم :

" الله لينطيهم نفس الوجع الي خلوني امر بي .. لسا اتذكر شلون جنت ابجي بسكته واتصنع القوة . بعدها مااتحملت رحت ذبيت نفسي بحضن امي وابجي بحرگة طلعت قهري بحضنها الى ان ارتاحيت .."

سألتها " وراح ارتاح "

ردت " يمكن ترتاحين لان واجهتيهم وطلعتي حقج منهم .. بس اني مااعرف اذا ارتاح بيوم او منو يگول اگدر اواجههم مجرد ذكر اسمهم يشمئز بدني منهم "

هدأت ورفعت راسي " خاله مااتوقعته هيج يسوي توقعت يحس بالذنب يعتذر يتوسل يبجي بس هو استمر بطعن شرفي وگدام نسر .. ويگله عني حجي ميتسولف "

اتنهدت " هالولد الله انطاه الج نعمة .. والا لااهلج فادوج ولا عمامج وحتى اني ماافيدج .. هاي اجي شويه اشوفج واواسيج واروح .. "

هزيت راسي " نسر مااعرف شلون اوفي حقه .. وگف وياي بأصعب لحظات حياتي .. صبر عليه واتحملني

ردته يكون سعيد ويتزوج لان اعرف نفسي ماراح اگدر انطيه حقوقه .. بس بداخلي جنت ضايجة لان حسيت من تزوج كأنه شي ملكي نطيته الوحدة غيري "

نسر :

طلعت من البيت علمود تاخذ راحتها وي خالتها .

رحت بالممر اشوف جليكان للنفط ..

رجعت يم باب المطبخ..  سمعت شلون تحجي وتبجي

احترگ گلبي عليها ..

مااعرف شنو الي خلاني ابقى اسمع حجيهن .

بعدها ردت اروح سمعت جابن اسمي بقيت ..

ردت اشوف كلامها ورأيها بيه ..

حسيت نبرة صوتها تغيرت وهي تحجي عني .. معناها اكو شي بداخلها اتجاهي بس تخاف تطلعه .. خوفها الي واگف حاجز بينا .  ولازم ازيل هالخوف منها بالتدريج واصبر عليها حتى لو طولت المهم ينتهي هالشي..

اكثر شي تندمت عليه زواجي من هديل .. تسرعت وبساعه غضب .. او بالاحرى انفرضت عليه فرض . وماگدر اقلل من قيمتها وخاصه هي حامل مني وراح تتسمى ام اولادي ..

طلعت من البيت والفرحة بداخلي ماتنوصف ..

شذر :

سمعت نفتحت الباب عبالي اجة نسر ..

مسحت وجهي ..

بس ماكو احد .. فتحت الباب ماكو…

معناها جان هنا بس لاسمع كلامنا !"

بقت خالة يمي ساعة تواسيني وساعه تنصحني اترك الماضي وراي وابدي من جديد واعيش حياتي ..

ويمكن هو هذا الصح بس شلون ماادري !!

خالة جانت صافنه ..

بعدها حجت ' تدرين شذر لازم افصل الخط الارضي بس اااخ امي شلون اقنعها مستعزة بي .. هسا احنة 2009 والعالم كلها موبايلات عندها وي الا الارضي تگول ما احبه.. 

واخاف امج ترجع تتصل وشلون بيه ..

رديت " بيبي نفس خاله ام نسر هم ماتقبل تفصله مستعزة بي رغم الاغلبيه فصلوه ..

اما امي لاتخافين مااعتقد تتصل بعد .  لان من گلتلها انتي مخابرة خاله .  تخبلت وتوترت وخافت .  او سالفه نسر تلكيهم شالوا من المنطقه كلها خاف ندلي عمامي عليهم ..

ردت بحرگة گلب " عساهم ان شاء الله بعد وبعد .. مااعرف ذولي شلون طلعوا شاذين هيج .  ماعدنا واحد بالعشيرة مثلهم لامن عمام ولا من خوال ..

اوووف ذكرتيني .. هالفترة مااگدر اطلع هواي بعد ..

لان كل مرة اتحجج الامي واطلع .. ومن يخابر سعد مايلگاني .  صار يحجي عليه ويگلي طلعاتج كثرن..

مااريد احسسه .. خلينا نبقى ع الموبايل .. واذا صحت فرصه اني اخابرج ونلتقي "

هزيت راسي " حقج اني هم بليتج بيه وبمشاكلي "

سحبتني الحضنها ..

" اصلا ماتعرفين معزتج عندي احسج بنتي .. يمكن رد حقي بيج بعد مااخذج منهم وانطاج الي "

ابتسمت وارتاحيت الكلامها.. تمنيت ابقى بحضنها وانام بي وانسى همومي ..

گامت " يله اتأخرت . مثل ماوصيتج .. اكسبي الولد بعد ماكو حجة الج .. "

اتنهدت " ادعيلي خاله ادعيلي انسى وارتاح "

رفعت ايديها وتوجهت للقبله . " يارب بحق اسمك الاعظم..  تريح گلبها وتنسيها وتكتبلها كل خير بحياتها"

طلعت سديت الباب وراها .. لملمت البيت ورتبته الاستقبال والغرفه ..

لبست عباتي وشالي بين مااجة نسر .

شافني استغرب " هاا وين وخالتج وين ؟"

رديت " راحت هسا .. واحنة خلينا نرجع للبيت "

رد " هاا اي خلي نرجع "

خله القنينة بالمطبخ ودخل الجليكان مال نفط للمخزن قفل البيبان وطلعنا ..

بالطريق باوعتله " نسر ماتخلينا نروح نزور عمة خديجة صار هواي مارايحين حتى خاله رسميه حالمة بيها ولن زعلانة عليه ..خاف لان مااروحلها "

رد بضحك " وجايز زعلانة عليج لان موزينه وياي وتدرين بيها شلون تحبني وحست بيج شالعه گلبي "

ضحكت " فرحت لان اجت من جانبك .. لا جديات خلينا نروحلها بلكي ترضى عني رغم مامقصرة عنها لابدعاء ولا بقران وصلاة "

رد " ان شاء الله اني هم اريد اروحلها واريد ازور ابو الحسن سلام الله عليه صار هواي مازايرين .. شنو رأيجن الاجازة الثانية ناخذ سيارة جبيرة ونمشي "

رديت " بكيفك بعد احسن "

رجعنا للبيت .. دخلنا صارت بوجهنا عذورة .. استغربت مامداومة بعدين تذكرت عطلة ..

باوعتلي غمزت " خوش تسوين بعد بيتي "

خزرتها " اششش لايسمعج احد بالج وسخ نظفيه "

ضحكت " مو بيدي امركم يجيب الشك يمنا كلشي ماكو وبرة الساتر الله منكم .. ومخلين البنية تفور وتغلي وتشيط "

خزرتها ودخلت صارت هديل گبالي بالمطبخ ..

سلمت ردت " بديتي تلعبين شذر موووو .. وخاصه من عرفتي بيه مو حامل . حلة  بعينج حتى تحرميني يصير عندي طفل وتبعديه عني "

رادت تحجي عذورة اشرتلها تسكت .. لان مااعرف شلون تفكر مرات مااحسها بعمر هنا .. هنا عاقله وواعيه ومن تحجي برزانه .. اشو هاي تفكيرها مااعرف شلون

بس ليش گالت حلة بعينج ؟؟

سكتت عنها ودخلت .. جان نسر يم خاله گاعد ..

سلمت عليها عاتبتني :

" يمة من اخذتيه وطلعتوا ماكو واحد بالبيت تگلوله وين رايحين المن . لو انتي وياه شيجي ببالكم تسوون"

رد عليها نسر " يمة شبيج اني الي اخذتها عندنا شغله ومناك صارت عزومة مفاجأة اخذتها وياي .. "

ردت عليه " لو قبل مالي دخل بيكم .. بس هسا صارن عندك اثنين نسوان ولازم تعدل بيهن . بنت الناس مو لعبه .. وهي بحاجتك هسا وخاطرها مكسور "

استغرب " شبيها ؟؟ الطفل بي شي ؟؟"

باوعتله خالة وحجت بتوتر " ماكو طفل بس…

قاطعها " يعني شنو تضحك علينا ؟؟"

#بقلمي_شمس_السعدي

يتبع……

صباح الورد احبتي ❤

///// البارت الخامس والاربعــــون /////

#قوارير_من_فضة ج2

#بقلمي_شمس_السعدي ..

تعصب حيل " شنو تضحك علينا؟"

ردت خاله " يمة شنو تضحك هي البنية اصلا مصدومة وصارلها يومين شحالها .. هاي سوالف نسوان ماتعرفها ادخل وي مرتك وهي تفهمك يعني الي صار لابيدها ولابيدنا وان شاء الله تتعالج وتفرحون بالجهال"

باوعتلي وكملت " ماگلتيله انتي ؟"

هزيت راسي " لا "

بقى يباوعلي .. اشرتله خاله ..

" گوم الغرفتك مرتك تفهمك وصير هادي مو كلشي بالعصبية "

استغفر الله وگام ..

راحت وراه للغرفه وسدت الباب ..

صاحت خاله " جهزن الغدا بسرعه "

اخذت دنو وصعدت اريد ابدل ..

طلعت ملابس سألتني " ماما انتو ليش تعوفوني وحدي"

اتقربت منها وحضنتها " صارت شغله بسرعه وانتي عندج مدرسة ماگدرنا ناخذج "

حسيته انهظمت وتحسرت " بعد لاتعوفيني هنا لو لا تطلعين خليج يمي "

استغربت من كلامها وحسرتها " ليش هيج تگولين اكو شي صاير ؟"

هزت راسها " لا لا ماكو شي . بس اني مااگدر بدونج "

حضنتها وبوستها " لاتخافين ماما بعدين هنا بيبي وعماتج كلهم يحبوج يعني مو وحدج هنا .. وفروحة هم يمج تلعب وياج وتحبج "

سكتت ماردت ..

دخل نسر ضايج .. باوعلي " ليش ماكلتيلي ؟؟"

رديت " ماادري اصلا نسيت "

اتنهد " حقج والله .. بس هاي ضوجتني اذا مامتأكدة ليش تحجي وتأملنا "

فتح الكنتور طلع ملابسه وراح للحمام ..

جان متوتر وضايج .. يمكن ضاج لان ماكو طفل حسيته رايدة "

بدلت بسرعه ونزلت وياي دنو .. شفت خاله دخلت الغرفه هديل وسدت الباب..

رحت وي البنات نحظر الغدا ..

اجت هنا " اي عيني شذورة وين ما وين اشو صايرين مانتشاوف "

ابتسمت " انتي ماكو دوام وتجين تعبانه "

حجت عذراء " دشوفي الوجه مورد عليج الله وين طار بيج النسر "

ضحكت على سوالفها .. رديت " للجحيم وضحكت "

صفنت " عابت تصنفين عليه "

ماتدري الي حجيته هو الصحيح ..

گعدنا كلنا ع سفرة وحدة بس محد نطق كلمة .. كل شخص صافن بهمة .. كنت اكل بطئ ودايخة مالي خلگ

باوعلي وهمس " بيج شي ليش متاكلين ؟؟"

هزيت راسي " مابيه بس مااشتهي "

همس " اكلي حتى اقيس ضغطج وتاخذين علاج "

رفعت راسي كانت عينها عليه .. تباوعلي بنظرة غريبة

درت وجهي عنها بسرعة .

رغم ماعندي شي وياها ولا اغار منها بس احسها ماحبتني او تحس بغيرة من تشوفني يم نسر ..

كملنا غدا .. صعد نسر للغرفه رحت وي البنات للمطبخ

اجت وراي وجانت عصبية ..

" انتي مو جنتي وياه يومين ماخذته ومتونسة .. بعد شعندج اخذتيه هسا ؟"

باوعتلها " وين ماخذته .. ترى هو صعد اني شعليه "

ردت " شفتج تتهامسين وياه بالغدا الله عالم شنو گلتيله وصعد "

اتنهدت وباوعت للبنات اشرتلي بيداء اسكت عنها..

ردت عذورة بمكاني " هديل شبيج يعني شتتوقعين من اخذتيه عن شرج يعوفها ويگابلج "

ردت بعصبيه " اني اخذته لو انتو موتوا نفسكم عليه .. وع اساس مايصير عندها ويريد اطفال .. اشو من تزوج صار نسر عزيز وتزاودني عليه "

ضحكت عذورة " منو موت روحة عليج ؟؟"

اشرتلها تسكت ..

هي انتبهت " ليش تأشريلها تحرضيهن عليه مووو؟"

وانت عود بنات خالتي تصفن وي الغريبة عليه مع الاسف هو مريم ماعاشت وياجن .. بس اني مو مريم فهمتن "

عافتنا وراحت ..

دخلت الغرفة خالة ..

شوية وطلعت خالة .. باوعتلي وصاحت البنات ..

" بيداء عذراء تعالن للغرفة اريدجن "

راحن وراها وعذورة گالت " ضربني وبكى سبقني واشتكى "

صعدت للغرفه لگيته نايم وبحضنه دنو نايمة ..

ابتسمت ..

منظرهم حلو .. شگد تمنيت عندي اب ياخذني بحضنة وينطيني حنانه مو ينهش بيه ..

اخذت بطانية ونمت ع الفراش ..

فتح عينه .. وين تعاي هنا يم دنو نامي المن فارشة ..

رجعت الفراش ورجعت نمت يمهم ..

باوعتله رجع غمض .. تذكرت شلون دافع عني يم ابوي ودمه محروگ .. يعني شخص غريب مااعرفه ولايعرفني حماني ودافع عني وخلة كل ثقته بيه ..

وابوي .. ااااااه ..

طردت هالافكار من راسي وصرت اردد بيني وبين نفسي .. لازم انسى .  لازم انسى .

بقيت اقرأ اية الكرسي واستغفر الى ان انام… مااريد شي يذكرني بالماضي الاسود ..

بقيت استغفر الى ان نمت ..

العصر گعدت ادرس دنو .. لليل بعد العشا صعدت قبل نسر ..

طلعت الاقمشة وگعدت ع المكينة ..

‏صعد للغرفه شافني اشتغل ..

" هااا شنو تردين تخيطين ؟"

رديت " اي عندي هواي خياط .. عادي تنام جوة لان بصوت المكينة ماتگدر تنام وانت وراك شغل "

باوعلي مستغرب " براحتج "

دار وجهة ونزل حسيته ضاج بس تعمدت اخليه يروح يمها .. مو من حقي اصير انانية لااني صايرلته مرة ولاهو مرتاح وي هديل ..

واول وتالي هو يريد طفل خلي تنطيه هي مدام الها رغبة بي اكثر مني ..

بقيت اخيط النص الليل نعست ونمت ..

الصبح گعدت دنو للدوام بدلتلها ونزلتها ..

طلع هو من الحمام جان يسبح شافني كال صباح الخير رديت عليه ورجع للغرفه ..

حضرت الريوگ بيداء لكيتها قبلي علمود ولدها ..

هنا وعذراء يبدلون عندهم دوام ..

بيتنا الصبح عبارة عن فوضى .. مايهدأ الا بثمانية ..

بعد مايروحون كلهم للدوام ..

سوينا ريوگ ولفات ... اجه السايق وصلتهم بيداء للباب

اجة هو للمطبخ مبدل ..

سألته " اسويلك ريوگ "

هز راسه بمعنى اي ..

سويتله جبن وجاي وبيض ..

خليتهم يمه .. اكل بدون مايعلق او يحجي شي ..

دخلت بيداء من برة تفرك بيدها " اششششاه باردة "

شافته سلمت عليه وگعدت تتدفأ يم الصوبة ..

سألها " مهيمن وين اشو مااشوفة شنو بالمدرسة "

سكتت وباوعتلي ..

رجع سألها " اكو شي ضامته عليه "

اتنهدت .. والله خوية انت البيك مكفيك وماردت اگلك

بطل اكل وباوعلها " شبي گولي ؟"

ردت " رجع يروح العمامة .. وهذا عمة مسويله واهس ومقشمره وياخذة باليومين وثلاثة .. حتى دراسته هملها .. ويغيب هواي سألت عليه بالاعدادية .. اخاف هم يرسب ويفصلوه .."

اتنهد وسألها " من يمتى هالوضع "

ردت " من زمان "

اتعصب " وليش ماحجيتي ؟"

توترت " من جنت ملتهي بشغله هنا "

عاط بيها " يعني صارله اكثر من ثلاث اشهر وماحجيتي شمنتظرة لمن يضيع يلة تحجين "

ردت " خوية ماردت احملك… ..

قاطعها" شنو ماردتي . ليش مهيمن مو ابني مو ربيته اني شلون هيج يصير ماادري باجر لمن يضيع ابنج مايخلوها براسنا .. مسمى هو عايش يمنا .. حتى لو هو يروحلهم مايگولون احنة لان هو عايش يمنا مو يمهم "

گام من مكانه .. راح الغرفته اخذ غراضه وطلع ..

سألته بيداء " وين رايح "

رد " اجيبه واجي "

لطمت على خدها يمة بس لايتعاركون .. صوجي حجيت شورطني ..

گعدت خاله حجتلها بيداء تخبلت .. " ادري بيجن لمن تموتنه يله ترتاحن .. اخلص من وحدة تجي الثانية ولجن هو الولد عندي حتى بولده مافرحانه .. "

بقت تتصل عليه وينطيها رفض وكلما يرفضه تتخبل وتبقى تحجي ..

من خوفنا عليه حتى ريوگ ماتريگنا ..

طلعت هديل من غرفتها والضحكة تارسة وجهها ..

" صباح الخير "

محد رد من التوتر ..

سألت " شكو شبيجن ؟"

طلعت من المطبخ اريد انظف البيت… همست " ماتردين دومج معبسة لو لان عافج واجاني ؟"

نرفزتني باوعتلها " ترى اني الي گلتله روح مو هو الي عافني "

ضحكت ومشت ماصدگتني ..

اني هم مارديت عليها بعد شتحجي اسكت..  اعرفها تريد تستفزني .. واصلا مااعرف ليش هيج تسوي رغم ابد مااكرها ولا عندي شي وياها ..

مرات احسها مدفوعة او احد مسلطها عليه بس منوووو معقولة اسراء ؟؟ ولو اسراء هالفترة مشغولة بالدوام وهم تريد تحول وتصير قاضيه حلم حياتها… يعني مو بحالنا ؟؟

للضحى رجع نسر ومهيمن .. وجان متعصب حيل منه بس ماحاجاه بتعصب ..

گعده گباله هو وامه وصار يفهمة ويوعي ..

ووعدة بس يخلص السنة سادس شيريد يجيبلة ..

نسر رغم ضايج من مهيمن .. بس ماتصرف وياه بعصبية وكلما خاله ترزله وتگله " فكر بأمك عمامك مايحبوك غايتهم يحرگون گلب امك عليك "

نسر جان يخزرها ومايقبل تحجي وياه هيج . لان مهمين كبر مو مال ضغط وعصبية ..

من گام حجة وي بيداء " اليوم هم مامداوم .. واخذتة للمدرسة طلعت حجة مريض جان .. والمدير گال غياباته هواي لازم تسوون تقرير واجازة حتى نحذفهن"

شهگت بيداء " وهسا بلة فصلوه "

اتنهد " اني اتصرف وعمة اني الي حجي وياه العصر اروحلة اني وعمي واشوف غايته "

ردت خاله " يمة عوفه خلي يولي هذا شراني وخاف يأذيك "

رد عليها " قابل زعطوط ومااعرف اتصرف .. اريد اروح وخلي يفك حلگة "

كام " يله اني رايح للشغل خاف اتأخر اتغدوا لاتنتظروني "

صاح هديل ساعتي نسيتها انطينياها ..

راحت ورجعت " ماكو ماهي وين مخليها "

رد " يمج على الكومدي "

رجعت " ماكو شو تعال شوف انت "

راح وهو يستغفر .. دخل سدت الباب بسرعة ..

شوية وطلع ضايج..  جنت الگط تمن ع الطاولة گبال غرفته تصير ..

طلع ضايج ..

مر من يمي ما باوع بوجهي اصلا ..

طلع بسرعة ..

اكيد مقهور من شغله مهيمن .. طلعت هي بيدها سله ملابس تريد تغسلهن تباوعتلي وابتسمت ..

للظهر اجو الجهال من المدرسة تغدينا وكملنا ..

صعدت دنو متعودة تنام ساعه ترتاح واگعدها تدرس

دخل الغرفه ..

همست " الله يساعدك اسويلك غدا ؟"

رد بثگل " لا شكرا هديل جاي تسويلي "

استغربت بس مسألته..  فتح الكنتور طلع جنطة بيها اوراق ومستمسكات .. اخذ منها اوراق وطلع ..

رحت تمددت يم دنو .. للعصر هو ماهو طالع ..

طلعت هديل من الحمام .. گعدت يم الصوبة تمشط

اني مخليه فرح ودنو ادرسهم وبيداء يمنا تدرس ابنها حمودي ..

طلعت خالة من الغرفه " يمة غير تنشفين شعرج ليش هيج ينكط مي "

ضحكت " خالة شسوي حتى تمرضت من ورى وكاحة ابنج "

اشرتلها بيداء " اشششش منا الاطفال شلون هيج تحجين "

اجت عذورة جايبة كلاص جاي وكعك گعدت بصفي وهمست " مقشمرة امي بالبواجي والتمسكن .. الله اليعلم شلون تقشمر نسر وتخليه يسوي وكاحة… تحجي وتعوج بحلكها ضحكتني بس سكتت لان بقت تباوع "

لليل اجة هم ضايج ومايباوع بوجهي .. استغربت معقوله لان گلتله اريد اخيط ..

بعد العشا جبت جاي ونطيته .. رفع عينه بعيني

باوعلي ودار وجهة ..

رجعت للمطبخ ..

نظفته وصعدت… دخلت شغلت التدفئة… ونزعت الدشداشة الشتوية مااعرف انام بشتوي ..

نزعت الحجاب . باوعت النفسي بالمراية .. عود اني ليش البس .. مو هديل ماتلبس .. يمكن من هيج تبسمر عليه خاف لان تشوفني البس حجاب شلون فاتتني هاي

فتحت شعري انفتحت الباب توقعت دنو ..

التفتت ..

دخل .. ارتبكت " هاا نسر هذا انت "

رد " اي اني ليش عندج مانع ..لو هم عندج خياط اروح عنج اذا تردين .. وفوكاها تتباهين وتحجيها انه انتي الي گلتيلي روح مو اني عفتج "

باوعتله مستغربة " شبيك نسر ؟"

تذكرت كلام هديل " اوووف منها وصلتها بغير طريقه "

رديت " مو هيج الحجي والله ماقصدي شي "

قاطعني " يمكن ذليت روحي الج هواي الهيج تعامليني"

ضجت " يعني هسا انت تريد تفهمني لما گلتلك روح ضجت ورحت نمت بس مووو .. اسمع لليوم ماحجيت شي بس لاتحاول تطلعني غلطانه .. الي وصلك مااعرف شنو غايته وفعلا كنت اخيط .. واصلا انت تفرح تروح هناك شتسوي يمي ؟"

اتقرب " لازم غرتي "

رديت " لا..  بس انت متقلب .. وين حجيك البارحة وين وعودك .. وين ثقتك بيه .. بسرعه تنرفزت عليه وصدگت الحجي .. "

اتنهد شافني ضجت ابتسم " حلو شعرج من تحليه بعد لاتشديه وبطلي سالفه الحجاب اصلا اني شايف شعرج هواي ومن تنامين عليمن لابسته بعد "

رديت " ماادري اخذني الواهس "

ضحك " بعد مااريدج تتقيدين فاهمة "

سكتت .  كام من مكانه ..

" هسا شلون اروح هناك تضيفيني هنا ؟"

ابتسمت " بكيفك اثنينهن غرفك وين يريحك نام "

ضاج " شوكت يروح منج هالبرود . شوكت احس بغيرتج عليه "

رديت بضحك " ليش اغار هي مرتك هم والها حق عليك "

فرك وجهة " انام احسن راح تجلطيني "

ابتسمت عليه ..

سحب الفرشة وباوع " وين دنو ؟"

رديت " بعدها جوة هسا تصعد "

رد " دور خليها يم امي تنام ترى كبرت وتفتهم "

رديت " بس تعودت عليها مااگدر "

رد " ابسط شي حجينا لو حجينا شي تفتهمة وهي ذكيه عود من التحق او ما انام هنا خليها يمج "

سكتت ورحت اطلع دشداشة غير هاي مبين زندي كله

صاح " عوفيها لاتبدلين هم الشوف حرام ومايصير "

بقيت بيها خيطتها ربع ردن وكلوشه للنوم لان بالصيف حارة البسها من يلتحق ..

تورطت لبستها .. من دخل وهو يباوع ويتمعن ..

حتى وهو متعصب ..

حاولت اكسر خوفي بقيت لابستها فرشت الدنو بالكاع نامت ..

اشرلي انام فوگ يمة ..

باوعلي بتوسل .. ووعدني مايسوي شي ..

نمت وقاومت نفسي وتحديتها ..

بقيت گاعدة وخايفه الى ان غفيت وماحسيت بنفسي

گعدت الصبح جان نايم على شعري ..

اريد اگوم ماگدرت التفتت شفته .. حاولت اسحبه ماكدرت همست نسر نسر ..

فز ..

گمت بسرعه باوعلي وابتسم " احلى نومة نمتها "

صباح الخير ..

ابتسمت " صباح النور "

ابتسم " زين ماضجتي وتعصبتي من شفت روحي نايم على شعرج گلت شيخلصني اليوم "

ابتسمت على حجيه واكتفيت بالسكوت ..

كمت اريد اكعد دنو ..

همس " السكوت علامة الرضا "

باوعتله وابتسمت .. گام بسرعه والابتسامة مافارگته .. اخذ خاولي وراح للحمام متعود حتى لو شتا لازم يسبح الصبح يله يطلع ..

فتحت الكنتور .. طلعت دشداشة بدلت ردت الف شعري مالفيته بطلت .. سويته ذيل حصان ونزلت ..

شافني البنات تعجبن وابتسمن .." اكو تطورات هواي "

گالت عذورة..

ابتسمتلها بس ماحجيت ..

طلعوا كلهم للدوام هديل بطبعها تتأخر بس من ينام يمها نسر تكعد من وكت ..

للظهر اجه نسر .. سلم ودخل يبدل…

باوعتلي وبقت صافنه .. مستغربة وجودي بلا حجاب هنا عرفت سمعانه شي وتدري مابينا شي ..

واحنة نتغدا .. سألني نسر .. هم قستي ضغطج ..

سألت خاله " ليش شبيها ؟"

رد " تخربطت بيوم الي طلعنا وطلع مرتفع اريد اخذها الدكتور يشوفها "

رديت " لا زينة ماارتفع بعد .. "

هز راسه اشرتله خاله… باوع الهديل " وانتي هديل تاخذين علاجج ."

فرحت وجاوبته " اي اخذ بوقته وعندي مراجعة راس الشهر هم "

رد " لاتفوتين المراجعات ولا الادويه "

هزت راسها .

كملنا غدا رادت تروح للغرفه..  گالتله " نسر هنا تنام مووو"

باوعلي بسرعه درت وجهي سويت نفسي ماسمعت ..

اتنهد " اي هسا جاي "

گام الغرفتها .. صعدت ووبالي كلامة من يكلي .. شبيج انتي باردة معقولة ماتغارين .. معقولة اني صدگ باردة وماعندي مشاعر .. زين ليش من اشوفه افرح ومن يغيب اضوج . لو من يروح للدوام يبقى بالي يمة ومن يرجع ارتاح .. اذا عندي برود هذا شنو ؟"

لليل وصاني احظر جنطته باجر يلتحق ..

حظرتها ونزلتها بالصاله لان ينام يم هديل .. 

شافتني كالت " ليش حظرتيها اني ردت احظرها "

رديت " ماكو فرق "

سألتني " عود ليش نزعتي الحجاب ؟"

رديت " ليش مايصير.. كنت البسه لان متعودة اشتغل والف راسي "

سألت " وهسا شنو الي تغير "

رديت " نسر ماقبل وشعري بدأ يوكع من الحجاب "

اتنهدت وراحت ..

صعدت نمت .. حلمت بي نايم يمي يتلمس بوجهي سحب شعري ونام عليه .. حسيت بأحساس حلو ..

وصاني على نفسي ودنو ..

وبعدين كال " حبيني لو ليوم واحد .. خليني اعيش حبج يوم واحد بس وريحيني "

فزيت من نومي المنبه يدگ ..

الساعه ستة .. صاير الصبح والاذان مأذن وماادري ..

معناها نسر رايح .. هو يطلع قبل الفجر ..

گمت توضيت وصليت .. گعدت دنو ..

شفت هنا تسوي ريوگ تفاجأت ..

" ليش تسوين ريوگ روحي بدلي اني اكمل عنج يرادلج ساعه يله تبدلين .. ضحكت..  هو هم هيج .."

ابتسمت الها " هنو صايرة حلوة ووجهج يضحك خليج هيج "

اتنهدت وراحت ..

هنا :

دائما احاول اخفي مشاعري اتخبى ورى ابتسامتي وقوتي المصطنعه ..

المجتمع للاسف مايرحم المراة المطلقة .. بالدائرة

وخاص بقسمنا كلهم يباوعولي بالبداية بنظرة المطلقة الي زوجها طلقها واكيد لازم السبب منها ..

لان هاي نظرة اغلب الناس الها ..

كدرت بشهرين ونص اثبت نفسي .. بحيث كل الي بالغرفه يحترموني ..

مايوم تجاوزت حدودي ولا ضحكت او حجيت بخفة وي اي احد بيهم تعاملي ومجاملاتي ع كد الشغل وبس

الا شخص واحد ماعرفت شلون اتعامل وياه ..

اصده يزيد .. الين يستغل ..

صار يفهم تصرفاتي على مزاجة..  من غير الشغل الي يدزه الي ويتعمد يدزه حتى يخليني انتفض واروح احجي وياه ..

مرات اريد احجي النسر بس اتراجع واخاف .. خفت يتعصب او يخليني اترك الشغل ..

بيوم كملت الشغل ودزيته بيد العامل للمدير ..

شوية واجة العامل…

" ست هناء المدير يريدج "

گمت رغم ضايجة منه ..

دگيت الباب ودخلت ..

جان يبتسم على غير عادته استغربت ..

اشرلي اگعد…

گعدت .. شويه واجة العامل جاب اثنين جاي خلاهن مقابيلي ..

گام هو وگعد گبالي …

سألته " خير استاذ ليش صحتني "

رد " اشربي جايج ونحجي "

رديت " شكرا هسا شربت "

كح .. " اكو ارض اريدج تشوفيها وياي .. او هي مجموعة اراضي نطلع عليهن كشف "

رديت بأستغراب " بس اني شعليه "

رد " شنو شعليج غير انتي بقسمي تشتغلين "

رديت " اي بس اكو هواي وياي ليش اني "

رد " لان هذا من ضمن الشغل الي خلصتيه هسا ودزتيه يعني لو غيرج مخلصه جان هو راح "

سكتت وعرفته متعمد دز الشغل الي حتى يجبرني اروح ..

سأل " هااا شگلتي "

رديت " هاهي استاذ "

كمت اخذت جنطتي من الغرفه وطلعت لكيته منتظرني المفروض اي واحد يروح وياي ليش هو بالذات راح مااعرف ؟..

رحنا للاراضي شفناهن وقيمناهن ومطلع مساح حددهن

كملنا الظهر رجعنا ..

بالطريق وكف يم مطعم ..

باوعتله " ليش وكفنا هنا "

ابتسم " ميت جوع وتعبنا خلينا نتغدا ونرجع "

رديت " لا شكرا استاذ مااشتهي "

رد " يابة شبيج معقدة . يعني شبيها اذا مديرج عزمج لاتخافين مااخليج تدفعين ويضحك .. شگد غثيث "

رديت " مو قصة فلوس استاذ بس… . "

قاطعني " يابة والله مانتأخر شبيج نتغدا ونطلع واذا متردين بس اشربي شي دافي بردتي "

باوعتله وتنهدت " استاذ اذا تريد ابقى انت واني اخذ تكسي "

شافني مابيه فايدة..  اتنهد " خلص لاتنزلين اروح اجيب سفري ع الاقل ناكل بالسيارة .. "

راح واني بقيت بالسيارة رغم البرد احس بحرارة بجسمي من التوتر .. احس الكل شافني بالسيارة .. ردت اكعد بالورة كال مايصير عيب والناس تشوفني شيكولون اشتغل تكسي !!

شفته اجه ارتاحيت ..

صعد انطاني السفريات لفات ومقبلات وكولا ..

باوعلي " متاكلين؟"

رديت " بعدين اكل كلتلك مااشتهي "

رد " براحتج .. "

مشى مسافه وكف بمكان هادي سفط السيارة

التفت اله بعدني ماحاجيه..

اشر بيده " شسويلج ماانطتيني مجال كلتلج خلي نكعد بالمطعم حتى نسولف براحتنا ماقبلتي تنزلين راسج يابس وتتعززين عليه.."

عقجت حاجبي " شنو تتعززين وشتريد تحجي ترى تصرفاتك ماتعجبني استاذ "

رد " اني اريدج هنا "

فتحت عيني " شنو اريدج "

رد " اعقد عليج "

رديت بعصبية " ومنو گلك اريد اتزوج اصلا هستوني طالعه من تجربه فاشله شتكول عليه الناس '

رد " والناس شمدريها .. لاتخافين..  نعقد بس ونتزوج بالسر .. حتى اهلج مايدرون… نطلع بحجة شغل او بعد الدوام الشقه اثنينة محتاجين بعض……  "

بعدة مامكمل تفيت بوجهة .. " انت شنو شايفني من ذني التعرفهن .. من البداية اعرفك منحط وتمثل علينا بنزاهتك .. المرة الثانية افضحك بالدائرة كلها وربي واذا احتكيت بيه او حجيت اندمك والله اخلي عشيرتي كلها توكف بوجهك ."

ردت انزل .. لزم ايدي وعصرها " اوكفي هالسوالف ماتعبر عليه كلجن هيج تتعززن وبعدين تبقن تسحبن فلوس براسي "

ضربته بالجنطة على راسه ..

ونزلت اركض من خوفي ..

دموعي ينزلن واحسن يجمدن بخدي…

اريد تكسي ماكو طارن ..

مشيت مسافه واحس روحي جمدت من البرد ..

صعدت باول تكسي وگف ورجعت للبيت مارجعت للدوام ..

دكيت الباب فتحتها شذر .. جنت محتاجة احد احجيله اختنكت مااعرف شبيه..

نفسي مكطوع واحجي بالگوة ..

سألتني " شبيج هنا وليش اجيتي هسا "

همست بخوف " لاتخلين احد يحس اخذيني لفوك بسرعه مااريد يشوفني واحد "

ردت " لاتخافين ماكو احد كلهن بالغرف بس بيداء تخبز بالترك .."

صعدتني للغرفة مالتها ..

اول مادخلت گعدت ع الجرباية وابجي اتقربت مني ..

شبيج خوفتيني ..

حجيتلها كلشي بدون تردد اعرفها ماتحجي الوحيدة الي اثق بيها واعرفها ماتفضحني ..

من سمعت اتهسترت وصارت تبجي وياي وتعيط ..

حضنتني حيل وتبجي " الله يلعنهم الله ياخذهم .. حقير… ."

مااتوقعت ردت فعلها هيج .. خفت عليها من شفتها ترجف وتعيط وتبجي .. اني الي مريت بالموقف ماصار بيه مثلها ..

بقيت اهدي بيها " خلص شذر لاتخافين "

مسحت دموعها وسألتني " خو مسوالج شي "

هزيت راسي " لا .. بس مااعرف شلون راح اتصرف بعدين واذا شفته شسوي .. "

ردت " گولي النسر خلي يتصرف "

رديت " لا ديري بالج .. نسر مايسكت احتمال يكتله ويبطلني '"

ردت " زين واذا كررها ماتخافين "

اتنهدت " اني اتصرف وياه بعد لو يموت ما اطلع وياه اشوفلي حل لتخافين "

بقينا نحجي شوية الى ان هدأت ..

خلتني نايمة بغرفتها .. وطلعت ..

راسي يوجعني حتى بدون ماابدل نمت بس نزعت حجابي ..

صورته ماتروح من بالي .. بقيت اراجع تصرفاتي شنو الي خلاه هيج يتصرف وياي حتى اني مو من النوع الي اضحك واسولف ..

اخذت اجازة مرضية يومين على ماارتاح وارجع ..

امي سألتني گلتلها مريضة ..

استغليت هالاجازة وي اولادي جود بالمدرسة واصلا ماالحگ ادرسة متكفله بي شذر خطية لان ماالحگ ..

كاعدين بالغرفة واراجعلة دروسة ..

سمعت صوت عياط برة .. طفرت من مكاني ..

شفت امي تبجي وتلطم ..

والبنات يمها مايعرفن شبيها ..

نريد نفهم ماكو. ..

عاطت بيها بيداء " فهمينا شبيج .. عمي شگالج شكوووو ..

توقعت ليث بي شي .. بس عياط امي وخوفها مستحيل يكون علمود ليث ..

ولو گايلة ليث ولاصادمتنا بخبر نسر !!

#بقلمي_شمس_السعدي

يتبع .… 3000 كلمة

حبايب هواي يسألون ليش تنزلين البارت متأخر كلكم تعرفون عندي طفل رضيع لمن ينام يلة ابدي اكتب وانزل متأخر حسب وقتي الي مايگدر ينتظر ينام ويقرأها الصبح ..

تحياتي ❤❤.

صباح العسل ❤

///// البارت السادس والاربعــــون /////

ج2

..

ارجوك ..

لاتتركني وحيدة بدنيا ظالمة لاترحم ..

أرجوك عد لي وكن بقربي ... وسأكون بقربگ دائمآ ..

جنت بالمطبخ اني وبيداء ..

سمعت صوت عمتي وعياطها .. تركت كلشي من ايدي وركضت مااعرف ليش گلبي نغزني ساعتها..

خفت وگمت اسحب برجلي .. اخاف اتقدم واسمع خبر يصدمني ..

اتصل بيها عمو محي بس شگالها ماعرفنا ..

بس تلطم وتصيح نسر .. البنات كلهن مثل حالي مصدومات وخايفات ..

سألنها :

" ماما احجي نسر شبي ؟"

بقت تلطم وتبجي وتصيح " نسري يمة نسري ولجن اخوجن وسندجن طاگة عليهم مفخخة وبالمستشفى"

من سمعت احس رجلي ارتخت وردت اوگع لزمت بسرعه بسور الدرج واتكيت عليه ..

طلعت هديل من الحمام مرعوبة وتبجي " شبيجن منو المات بس لانسر ؟"

عاطت بيها بيداء " اسم الله اسكتي "

خالة تخربطت .. حرنا بيها ودموعنا تجري مانعرف شنسوي ووين نروح ..

هنا خابرت القصي .. مايرد ..

خالة بالكوة تاخذ النفس خفنا عليها .. لبست عباتها بيداء وراحت المشتاق .. لبسنا خاله جواريبها وعباتها ودخل ساعد بيداء هو وامه اجت هم ..

اخذوها ..

والمرة تمشي وتدعي " لاتاخفن ان شاء الله مابي شي "

البيت انگلب عزااااا ..

كنت ساكته بس دموعي ينزلن وحدهن ..

گاعدة على باية الدرج ..

وتذكرت الحلم ..

مااجة وصاني بالحقيقة.. اجاني بحلمي قبل ليروح ..

بقت وصيته ببالي وشلون سحب شعري ونام عليه

" حبيني لو ليوم واحد .. خليني اعيش حبج يوم واحد بس وريحيني " ..

بقيت الوم روحي .. حسيت اني على وشك خسارة اعظم واحسن رجل بحياتي ..

ااااه ياربي .. خليه يرجع سالم .. واحاول حتى لو اضغط على نفسي وارضيه ..

لاتخليه يروحي ويتركني ماعندي غيره .. لااهل لاسند ولا احد ..

هسا اكتشفت وادري اكتشافي متأخر .. انه شذر لو مانسر ماالها وجود ..

اللوم بنفسي راح يموتني اكثر من وجع گلبي ..

البيت انگلب بساعة ..

اجت ام قصي .. وبيت ابو مهند اخو ام قصي ..

بيت خالهم عباس ومرته وحسام ..

من غير الجيران بعد ما سمعوا.

النسوان بالصاله والرجال بالاستقبال ..

لسا ماعرفنا خبر اكيد ..

عمو ابو قصي وقصي راحوا يتأكدون .. ولسا ماكو جواب ..

عفتهم وبقيت بالمطبخ ..

اباوع للباب اتخيل هسا يدخل وينور البيت بطولة الحلو وملابسه العسكرية..

يباوعلي ويبتسم ..

گمت اتخيل عطره وصوته بالبيت ..

اجت دنو خايفه وتبجي ..

" ماما بابا مايرجع "

حضنتها " اششش حبيبتي لاتگولين هيج .. بابا راح يرجع وكلشي مابي "

ردت بحزن " بس خالة هديل… ." وسكتت

مسحت دموعها وسألتها " شبيها خاله هديل شگالتلج "

اتنهدت " ماكو شي ماما هيج .. "

بوستها حبيبتي گولي لاتخافين .. خاله هديل تأذيج ؟؟

ردت وهزت راسها " لا متأذيني "

حاولت وياها ماردت .. مااعرف ليش حسيت هديل مسويتلها شي ودنو تخاف تحجي ..

ماردت اضغط عليها واتعب نفسيتها ..

صحت فروحة يمها تلعب .. ونزلت ..

شفت جايبين خالة .. رحت للغرفه ..

نايمة وتون وتبجي .. وام قصي وام مريم يمها ..

اشرتلي بيداء .. رحت يمها ..

سألتها ع خالة ..

" شلونها شگالوا شبيها ؟"

ردت " ضغطها مرتفع وسكرها اثنينهن .. المهم حبيبه اعتمد عليج مااگدر اعوف ماما .. اريدج تسوين عشا ووياج عذورة .. حتى لو اشوي دجاج .. احنة وينه وين الاكل بس هاي الناس عيب شنطيها "

هزيت راسي وطلعت ..

طلعت الدجاجات .. غسلتهن وتبلتهن وخليتهن بالفرن ..

بقيت كاعدة بالمطبخ ويمي عذورة تخابر بمعتز وتبجي وخالها كل شويه يخابر يسأل ..

تذكرت من اخذني الاهلي شلون يدافعلي .. وشلون هجم على ابوي ويگلي تعاي اخذي حقج ..

اااااه ياالهي .. ليش مانحس بقيمة الانسان الا لمن نخسره ..

اجت هديل جانت تحجي وي امها " اي ماما تعالوا باجر اريد اموت… "

هزت ايديها عذراء .. " تريد تموت .. الگرطة الاول موتته بشهر .. ونسر صوبته بشهرين الله اليستر "

همست " كافي لاتفاولين اسم الله "

اجت هنا تركض ..

عمو خابر .. ركضنا للغرفه خاله تحجي وياه ..

" يعني عايش ؟؟ شلونه .. امانة عليك بوسة الي وطمني "

سدت التلفون وباوعتلنا .. " خلن سجاداتجن كلجن .. اخوجن لسا بالعمليه… جروح بجسمه هواي وشضايا… ادعلة يطلع منه .. "

باوعتلي " شذر يمة انتي يتيمة وبلكي دعائج مستجاب هذا رجلج ومالج غيرة ادعيله من گلبج "

نزلت دموعي " اي والله خاله مالي غيره "

حجت هديل " كلما مالنا غير ولانسوه بلياه . يمة ابو بيتنا وسندنا ربي اريدة. منك ترجعليا سالم… ..

عفتهن وطلعت…

شفت الدجاجات بعدهن ..

وطيت النار .. وصعدت .. خليت سجادتي وگعدت اناجي ربي وابجي.

الى ان اذن المغرب .. صليت ونزلت ..

الكل بعده موجود ..

گمنا اني والبنات سوينا عشا وخليناه ..

لگيت بيداء تخبز .. وگفت يمها .. ردت انهزم من البيت كله احس روحي مخنوگة بلياه ..

وگلبي يريده .. بحياتي مامارة عليه هيج مشاعر .. ماحسيت بهذا الفراغ الا لمن ماتت عمة بس ..

نفس الفراغ والوحدة والغربة الي حسيت بيها ..

حجت بيداء " تدرين جان يحبج حيل "

باوعتلها وعيوني دمعت . هزيت راسي

كملت " شهدنا حبه المريم .. بس حبه الج مختلف .. من تمرين وكانه روحه تطير وراج بس ما يبين.. مايوم التحق اذا مااجاني بالليل وگالي " شذر امانتي الج بعدي ديري بالج عليها هي ودنو .. وخاصة اخر يوم "

رديت بشهگة " حتى اني وصاني بنفسي ودنو عبالك حس راح يصير شي .. هسا حسيت بوحدتي بعده .. هسا عرفت اني مااكدر بلياه .. "

بقيت احجي وياها وهي تسمعلي وتبجي كلشي بداخلي حجيته ..

سألتني بعتب " اذا هيج تحبيه ليش كسرتي گلبه وقبلتي يتزوج غيرج "

رديت " ماقبلت . خاله خلتني امام الامر الواقع .. وماردت احرمه من الاطفال واكون انانية .. وافقت الخاطرة وخاطر سعادته "

ردت " بس سعادته انتي مو الاطفال . والله گال الامي " دنو كافي عندي مااريد جهال بس من حس بيج راضيه سكت ورضا بالامر الواقع "

مايفيد بعد لوم .. خليه يرجع بالسلامة .. وبعدها شيريد يصير .. يريدها يريدني ابد ما اعترض.. المهم هو بخير"

سويت صينية اخذتها للبنات بعد ماراحوا كلهم ماقبلن ياكلن .. سونها عزا ..

مااتحملت اشوفهن يبجن بدل مايدعن .

عطت لااراديا " كافي كومن .. اخوجن .. بخير بدل ماتبجن گومن تعشن وادعله .. لاتنصبنها عزا اسم الله "

ردت هديل " اذا جوعانة اكلي معليج بينا .. لان هو مايهمج طبعا ماتهتمين "

ردت خاله " حجي شذر صح گومن اتعشن مايصلح على اخوجن .. وين اسراء ماشفتها "

باوعنا صدگ اسراء ماهي ..

طفرت بيداء " بس لا شو شصار بيها . "

عاطت خاله " خاف يصير بيها مثل ماصار من استشهد ابوجن "

تطافرنا ندور عليها بكل البيت…

صعدنا الغرفه بيداء مقفولة .. كسرانها ..

" اسراء وينج اطلعي "

ردت " شتردن روحن منا لاتخافن ماانتحر "

اشرتلنا بيداء نخليها على راحتها .. بقت هي يمها تحاول تتدخللها ..

نزلنا كلنا.. تكسرت الباب .. طلع مهيمن صاح " منو ؟"

سمعنا صوت غيداء تبجي " اني افتحن "

فتحنا جانت لابسة اسود وتلطم گعدت بالگاع..

شلناها گوة لجوة.. " يمة اخوي .. سودة عليه ولجن راح وهو زعلان مني .. عساني اني متت ولا هو .. ولجن هذا ابني مو اخوي .. راح ومابست ايده وراسة وخليته يسامحني "

عاطت بيها هنا " كافي لاتبجين ولاتولفين اله .. لابسة مصخم وجايه تصيحين .. نسر عايش شبيج "

مسحت دموعها وباوعتلنا ..

شافتنا كلنا لابسين الوان ارتاحت ..

سجدت بالگاع وتبجي ..

حسيتها صدگ محروگ كلبها عليه ..

بقينا كلنا سهرانين يم خاله ومنتظرين عمهم يخابر

دگ الموبايل تطافرنا ..

جاوبت بيداء ..

گامت تضحك وعيونها يبجن .. واحنة نبجي وياها ..

سدته وضحكت " طلع طلع من العمليات وحالته مستقره . " عاد شوية گدرنا نتنفس ونرتاح ..

راحت عذورة تبشر اسراء ماقبلت تنزل يمنا ..

شوية ودگ موبايل هديل .. اخذتة وراحت الغرفتها

من سمعنا الاخبار الحلوة .. كدرنا شوية نرتاح كلمن گامت الغرفتها ..

اخذت دنو وصعدت ..

خابرت خاله .. حجيتلها عن نسر تخبلت وصارت تدعيله لان هي تعزه كلش وتحترمه ..

ضاجت حيل عليه ..

اندگت الباب سديته بسرعه وفتحته ..

عذورة " راح انام يمج .. البيت هوسة ..

فرشتلها ونامت يمي .. غفيت بسرعه من البجي والتعب حلمت بعمة وصار هواي ماحالمة. بيها .. جانت ضايجة وتوصيني بنسر ..

خفت حيل وگعدت مرعوبة.. ياربي اجعله خير ان شاء الله.

صليت الفجر ورجعت نمت ..

للصبح اجو اهل هديل .. وابوها وياهم اول مرة اشوفه

سلمت عليهم .. شافني صفن عليه مااعرف ليش ..بس جان رجال حباب ومتدين مبين ..

البنات بالدوام .. هنا داومت لان خلصت اجازتها وعذورة عندها امتحان ماگدرت اتأجله ..

دزينا الجهال كلهم للمدرسة .. والتهينا بالبيت والخطار

اجت هديل ..

" شسويتوا غدا اهلي هنا "

ردت بيداء جانت تعجن " خلي ايدج وي شذر اني راح اخبز تبقى وحدها شتصير للبيت للطبخ "

ردت " غير اهلي جايين خطار شلون اعوفهم وخاله مريضه ونايمة "

ردت عليها " قابل اهلج غربة هم من اهل البيت .. "

اتنهدت وراحت ..

اجو البنات الاء وسما هم وازواجهن بس اولادهن باقين هناك لان دوامات ..

ركبت الغدا وحدي اجو البنات شافوني ساعدوني ..

رادوا جاي اخذت جاي وماي ورحت ..

سلمت عليهم وقدمت لهم..

رد ابو هديل " رحمة الله والديج بوية الله يجبر خاطرج ان شاء الله "

باوع الهديل " بوية كومي ساعدي اخيتج وحدها "

باوعتلي وردت " ماعندها شي بوية .. مكملين كلشي "

بقيت صافنه عليها.

عفتها وطلعت . اخذت امها ودخلت الغرفتها ..

كملنا وغديناهم .. راح زوج الاء للسوگ اشكال تسوگ وجاب . ترس المطبخ ترس ..

وخالهم وحسام هم ماقصروا جابوا مسواك ولحم ..

يعني الكل ما تركنا.. بس مكانه غير ومختلف ..

گعدت خاله بالصاله .. سويتلها غدا لان ماتغدت ويانا

باوعتلي وحجت " تعبتي امي الله ينطيج العافية "

رديت " غير هذا بيتي خاله يعني ماكو تعب "

استحت ام هديل وحجت " والله هدولة هم تشتغل وي البنات وتخربطت لااكل ولاشرب على نسر سودة عليه بس تبجي .. تگول شهرين ونص وياه مدللني دلال ومخلاني اضوج بيوم "

ردت خاله " هو گلبه حنين سودة عليه .. الله يرجعة سالم البيتة والنسوانه ان شاء الله "

بقينا على هاي الحالة عشرة ايام .. خطار وناس رايحة راجعة .. جماعته هواي والتجار كلها تعرفه من غير الي وياه بالجيش يروحون للمستشفى يشوفوه ..

خابر ابو قصي وگال راح نطلعه بس يرادله عناية وممرض ينظف جروحة ويعقمها ..

حضرن اله جرباية بالاستقبال ..

سدته خاله وباوعتلنا " حضرن جرباية بالاستقبال "

ردت هديل " ليش خاله غرفته جوة ويرتاح بيها واني اداريه "

ردت هنا " واليجي وين ندخله الغرفته بوسط البيت "

ايدتها بيداء " اي صح جماعته هواي خو ماندخلهم بوسط البيت والغرفه النوم . بقوه بالاستقبال الى ان يطيب "

من كالوا راح يجي حسيت الدنيا فتحتلي ابوابها من جديد ..

صعدت بسرعه للغرفه .. طلعت من الفرشات الي مطرزتهم بيدي وظامتهم ..

نزلتهم ..

شلنا الجرباية للاستقبال.. وفرشتها تخبل صارت ..

ضحكت بيداء " عيني عيني هاي سبشل الحبيب الگلب"

ابتسمت .. " طرزتهم بيدي ذولي "

ردت هديل " موديلهم قديم عندي فرشات يخبلن "

حجن البنات " بالعكس يخبلن ونزاكة .. "

رتبنا الاستقبال وبخرناه ..

حضرنا الغدا المفروض قبل الظهر يوصلون بقينا كاعدين على نار حتى محد داوم بيومها ..

كنت ناذرة اطش جكليت عليه لو دخل من باب البيت .

نطيت فلوس المهيمن يجيب جكليت من الراقي گلتله

وخاله جابت ذبيحة السلامته ..

كل شوية خاله تخابر القصي ويكلها بعدنا ..

الى ان اخر مرة گالها دخلنا شارعكم ..

ركضنا كلنا للباب .

دخلوا السيارة لجوة..

نزل يمشي على تك رجل وسانده قصي ووجهة كله ضماد وجروح ..

ذبح القصاب الذبيحة جوة رجله…

البنات محاوطيه ويبوسون بي .. عينة جانت تدور بينهن .. خالة والبنات كلهم واكفين .. وهديل وياهم..

حسيت عيونة تدورني .. اتقربت فتحت جيس الجكليت شافني ابتسم .. طشيت الجكليت عليه ..

وحجيت " نورت البيت كله .. الحمد لله على سلامتك "

ابتسم " هذا نورج يالغاليه "

دنگت . صاح قصي " كافي غزل رحمة لهلكم جتفي راح خلونا ندخل ..

دخله للاستقبال ..

نام ع الجرباية.. حجت خاله " يرادلة كرسي ..

رد قصي " اجيبله العصر واني يمة هنا ابقى . يمون ابو صگر ..

ضحك نسر بس مبين متوجع ويكابر .

اخواته محاوطاته كلهن .. وفرحانات بي ..

اجت غيداء من بيتها تبجي .. طاحت عليه وبوست ايده وراسة وتوسلت يسامحها .

ماحجة شي بس مسد على راسها ..

دنو مافارگته ابد مگابلته وگاعدة ..

صاحت خاله " يله اطلعن كافي خلي يرتاح . وسوله غدا بسرعه "

بس اسراء ماتركته ابد حاضنته وگاعدة..

لان هي بالاصل متعلقه بي وهسا خافت خسارته . حتى دوام ماداومت ابد رغم عندها محاضرات هواي

سويت الغدا وخليتله سوب لحم زين اله..

اخذت الصينية .. اجت هديل سحبتها مني

" انتي مشغولة ماتلحگين اخذها اني "

اخذتها وراحت بقيت صافنه . محد انتبه بس عذورة

غمتني " لج فاهية دشوفيها شلون نادرة اخذتها ع الجاهز وراحت حتى بحجة اني سويتلك "

جابت جنطته طلعت ملابسه غسلتهن ونشرتهن ..

بعدها جابتله ملابس جدد ..

خلينا نبدلك تراك جديد لايجي احد ..

رفعه قصي وهي ساعدته . لبسته ملابسه ..

جانت ماتنطيني مجال اي شي اسوي ..

ناس رايحة وراجعة لليل ..

صاح شذر .. ردت اروح سبقتني .. " هاي عيني محتاج شي "

رد " هاااا اي اريد موبايلي مااعرف وين "

ردت " اي لكيته بالجنطة ومطفي جان خليته ع الشحن"

مااتحملت سوالفها . كملت شغلي وصعدت الغرفتي متت تعب وقصي نايم يمه ..

نمت دنو شفت خاله متصلة هواي ..

خابرتها ..

" هاااا امي شلونه نسر مو گلتلج اذا اجه خابريني "

رديت " اي والله خاله ماشفنا دربنا طول النهار خطار وكلها اجت من اقاربهم والجيران وغدا وعشا .

احنة كلنا واكفين بالمطبخ ومانلحگ .."

سألت " ونسر شفتيه زين ؟"

اتنهدت " اي زين بس ماشفته هواي "

ردت " ليش امي شلون تتركيه لابد يحتاج شي .. شلون ابقى اعلمج . وين دموعج عليه وتكولين بس خلي يجي وشيريد اسويله "

اتنهدت " اي خاله بس هديل متنطيني مجال مسيطرة عليه وتدرين بيه بعدني استحي مااگدر ابدله او احضنة واكومة "

عاطت بيه " تتعودين كافي دلال .. شوفيها شتسوي تسوي اتعلمي ..خليه يحس بوجودج ترى اذا لغت وجودج ماتحصلين كلشي "

بقت تحجي عليه وتعلمني ..

كملت منها سديته شفت رساله .. " المن مشغول ؟"

دزيتله " خاله خابرت تسأل عليك "

رد " تعاي ماشفتج مشتاقلج "

حسيت گلبي رجف من قريتها وابتسمت ..

دزيتله " وقصي عيب "

رد " نايم بسابع نومة "

گمت بسرعه باوعت النفسي دشداشتي مليانة مي من المواعين والشغل ..

بدلتها وعدلت شعري خليت الشال ونزلت على اطراف اصابعي خاف تشوفني هديل ..

عبالك تسوي سباق وياي ..

فتحت باب الاستقبال . باوعت القصي يشوخر تعبان ..

شافني ابتسم ..

اشرلي اسد الباب .

اتقربت منه .. زاح نفسه شوية .. ومد ايديه الي ..

ترددت انطيه ايدي بس قاومت . تذكرت وصايا خاله

من تگلي " بس اول مرة تحسين بخوف وتتوترين وبعدها تتعودين "

نطيته ايدي .. عصرهن وگعدني يمه .. احس ايدي جمدوا ويرجفون بين اديه ..

همس " لاتخافين . بوسط الموت واحلم الزم ايديج واحضنها بين اديه ..

اخذها بين اديه وينفخ بيها بأنفاسه الحارة يدفيها ..

غمضمت عيني واحس روحي بادت وذابت . حسيت بخوف بس قاومت ..

ماخليت ذاك الاحساس يسيطر عليه .

همس " افتحي عينج وخليني اشبع منهن "

فتحتها بثگل سألني" شحسيتي ؟"

ابتسمت " مااعرف "

سأل " خفتي ؟"

رديت " شويه "

ضحك " رحمتك ربي لو ادري متصاوب من زمان حتى تگعدين هيج گعده يمي "

رديت " اسم الله شلون تحجي هيج "

سألني " خفتي عليه ؟"

رديت " مايعلم بحالي الا الله .. شكد تاركه اهلي بس ماحسيت بخسارتهم ولا حسيت بيتم الا لمن سمعت بيك "

ابتسم " تحجين صدگ شذر هيج اني مهم بحياتج "

رديت " انت كل حياتي والله "

راد يكوم مايكدر " وج شسوي هسا اني احس روحي مقيد اريد اصرخ بعلو صوتي . بس لا اني بحلم "

ضحكت عليه وعلى تصرفاتة وهو يشيل ايده للسما ويكله رحمتك ربي .. عسا ان تكرهوا شيئا وهو خيرا لكم ..

لو ادري الموت هيج يقربج مني جان رحتله برجليه..

جنت احجي بعفوية والي بداخلي اگوله بلا تردد احس گلبي والساني اتحرروا ..

اباوع لعيونه يلمعن من الفرح .. رغم مايگدر يكوم ويتوجع بس يكابر من الالم ويضحكلي ..

ردت اگوم شفته تعب .. همس " ابقي يمي هنا "

اشرتله على قصي " عيب لايگعد "

اتنهد .. وطلب ايدي مرة ثانية .. نطيته ايدي سحبها وخلاها على شفافه وباسها ..

رجع احساس غريب سيطر عليه ..

سحبتها بسرعه وطلعت ببرودة الجو جسمي صار نار ووجهي حار ..

طلعت ابتسم واتلمس وجهي ومرتبكة ..

صارت گبالي هديل واكفه ..

شفتها انصدمت. بسرعه صعدت لفوگ بس بقت واگفه وحسيتها ضايجة حيل ..

دخلت للغرفه .. بمشاعر مختلطة .. خوف وتوتر ومشاعر حلوة اول مرة احس بيها ..

تذكرت عذورة من تحجيلي عن حبها .. معناها هو هذا الحب . داخلي كله يرجف . واتوتر ..

معقولة اني هيج احبه .. لدرجة تغلبت على خوفي بسببه .

فتحت شعري ونمت .. وصرت اتخيل كل همساته وحركاته ..

كعدت الصبح مثل الفراشة الي تتنقل من زهرة الزهرة

كعدت دنو بدلتلها ومشطتلها ونزلنا ..

صارت خاله گبالي صبحت عليها ردت

" هلا امي .. صباح النور .. نسر گعد سويله ريوگ حتى ياخذ علاجة .."

دخلت للمطبخ شفت هديل تسوي ريوگ استغربت مو عوايدها تكعد من الصبح ..

حجت " لاتسوين النسر اني سويتله .." ابتسمت وراحت معناها ماضاجت مني .

طلعت دنو .. ودخلت صاح شذر ..

اجيت عبالي قصي يمه . طلع رايح للدوام لان خلصت اجازته وگال بعد الظهر يجيب مرته ويجي يبقون هنا ..

دخلت اجت وراي هديل " ها عيني محتاج شي "

رد " لا مشكورة تعبتج هاي شذر اجت "

تقدمت اله " تعبك راحة حبيبي گول شتريد "

رد .. اريد اگوم للحمام .

ردت " اي اني اسندك گوم… "

حضنته بأثنين اديها ورادت تگومة بس ماگدرت ..

اجيت بسرعه ساعدتها ..

من نزلت راسي نزل شعري على وجهة ..

استنشقه وهمس.. افيشش ..

هي انتبهت خزرتني بس ماحجت ابد ..

گومناه ع الكرسي جابله قصي البارحة .. واخذتة مني دفعته للحمام ودخلت وياه ..

ماضجت ابد لان هاي الخطوة مستحيل اگدر اسويها وادخل وياه ..

عدلت فراشه بين مارجعوا ..

ماقبل وحدة منا تسنده .. صاح بيداء اجت سندته ونام ..

يمكن ماراد يحرجني .. حس بيه توترت ..

بقينا اني وهديل نفس الحالة .. بالنهار ماتخليني اتقرب منه واغلس عنها لان هي زوجته مثل مااني ويمكن هي فارغه اكثر مني ..

بس بالليل مايتحمل .. يدز رساله وينزلني ..ولان مريض مااگدر ارفضله طلب ..

ابقى يمة شويه واصعد رغم مايتعدى حدوده وياي مجرد يتغزل ويلمس ايدي لااكثر ..

خلال هالفترة حسيت نفسي اول مرة اعرفه .. اخجل وافرح بكلمة منه ..

حتى هو حسيته تغير يكابر ويقاوم حتى يتعالج ..

رغم رجله تعبانه وتأذيه ..

بعد اسبوع كلها راحت .. البيت فرغ .. رجعنا النفس الهدوء ..

اعتمد على نفسه ويكوم ويگعد ..

بس من يريد يكعد يحتاج احد يسندة ..

هديل جانت دايما تتسابق وياي حتى تسنده ..

بس هالمرة ماهي بالحمام ..

سويتله فواكه واخذتهن ..

ابتسم من شافني " عاش من شافج ليش تختفين الا اصيحج "

رديت " شسوي اكو من ماخذ مكاني وميخليني "

ضحك " محد ياخذ مكانك يحلو . صح اني اعزها واحترمها بس مكانتج انتي غير بگلبي "

ابتسمت واتقربت منه .. گال اسنديني ..

دنگت عليه حضني باثنين اديه وراد يكوم بس احسه قيدني حيل . اتقرب وجهة من وجهي حيل ..

همس " احبج بگد رحمة الله "

غمضت " نسر لايجي احد "

رد " محتاج اگوم اريد اصعد الغرفتنا تعبت "

كعد زين . وسحبني يمة .. خله عيني بعينه دنگت . رفع وجهي وقرب وجهة ..

ارتبكت .. ونقذتني خاله على اخر لحظة ..

دخلت علينا خجلت وهي هم خجلت .. بسرعه طلعت

شافتني بيداء ضحكت " عيني عصافير الحب اهدوا لاتصيبكم عين "

استحيت " هااا شمسوين "

ردت " لا ابد بس لقائتكم السرية بالليل .. الله يسعدكم اي اريدج هيج شذورة اخوي تعبان . انغدر وانظلم سعادته وياج لاتبخلين عليه "

ابتسمتلها وهزيت راسي ..

كلما اخابر خاله واحجيلها عن مشاعري وخوفي بنفس الوقت ..

تشجعنـي وتكلي حاولي حتى لو فشلتي حاولي بس لاتيأسين .

وفعلا كنت احاول مرات اسيطر على نفسي ومرات اتهرب منه .. مازال اكو خوف بداخلي ومااعرف شلون راح اتخلص منه ..

هنا :

داومت بعد الاجازة.. كنت ضايجة على الي صار بنسر

ومانعرف شنو مصيرة ..

قررت اتجنب المدير ومااوصل يمه ابد .

هو هم مادز عليه بعد .. بس يبعث شغله اخلصه وادزه بيد العامل. .

بيوم صاحني ترددت اروح… بس العيون كلها عليه وخاف يشكون ..

رحت اول مادخلت عاط بيه وشمر الاوراق بوجهي " شنو هاي شغلج اذا ماتكدرين ليش تشتغليهن .. صايرة مهملة وكثرت اجازاتج "

خليته يحجي الى ان سكت .. رديت عليه " استاذ انت شتريد مني ادري بيك تتعمد لان ماصرت وسخة مثل الي تعرفهم "

عاط اكثر وطردني " اطلعي برة قليله ادب عبالج الناس كلها مثلج منحطة .. هو ماوسخ المجتمع غيرجن انتن "

مااتحملت عياطة طلعت بسرعه والدمعة حاصرتني .. احس الكل يباوعلي .. مااعرف سمعوا لو لا بس عرفته يريد يشوه سمعتي حتى اطاوعه بس مستحيل اخليه يشوه سمعتي لو اعرف ابطل من وظيفتي واگعد بالبيت

يوم عن يوم اختنگت .. مر اسبوعين وهو محاربني..

اتشجعت ورحت اله للمكتب .

شافني دنگ " هااا شگلتي ؟"

رديت " اريد انقل منا .. "

باوعلي " معناها تتهربين مني "

رديت " اذا مانقلتني منا مستعدة ابطل ولاابقى هنا "

ضحك ضحكة طويله وكال " اهدي كافي .. لاتنقلين ولاتبطلين .. احسبي الي صار ما يتكرر "

رديت " صار ولا ماصار اني بعد مااريد ابقى هنا "

رد " واني مااريدج ترحين منا .. هناء اعذريني بس الي صار غصب عني .. ماعبالي انتي مختلفه .. السبب مو بيه بهواي بنات سلمني نفسهن بحجايه وحدة "

رديت بعصبيه " وانت كمدير محترم المفروض جاي هنا تشتغل مو تدور علاقات .. لا تبرر النفسك وتخلي السبب بالبنات .. بعد الي سويته وياي متأكدة انه انت الي جبرتهن والله اعلم بشنو هددتهن .. منا وجاي مااريد ابدا تدز عليه المكتبك الى ان انقل "

تركته وطلعت .. خلص الدوام اخذت جنطتي وطلعت

لكيت ليث گبالي . استغربت .

" شعندك هنا "

رد " اصعدي بسرعه لاتخليني اطلع عن طوري "

رديت " ماكو شي بينا يخليني اصعد وياك روح هسا يجي مشتاق ياخذني "

عاط " اصعدي لج ترى مايصير خير "

اجة استاذ هذال المدير .. " ست هناء منو هذا ويباوعلي بمكر "

رديت بعصبيه " هذا ابن عمي وطليقي استاذ شكرا لتخاف "

صعدت وياه حتى اخلص من هذال ..

باوعلي منو هذا بس لا حبيبج الجديد !!

يتبع .. .