تحميل رواية «قوارير من فضة» PDF

مســـاء الگاردينيـــا ❤

///// البارت الخامس والســـبعون /////

#قوارير_من_فضة ج2

#بقلمي_شمس_السعدي ..

خابرتني بيداء ..

" الو شذر حسام راح يجيب عذورة يمج كلشي ماتدري ابد لاتبينين الها او تحجين شي..  "

رديت " هو شكو نسر بي شي "

ردت " لا هذال انخطف ومانعرف شي عنه من طلع الصبح لسا "

سألت " وهسا شسويتوا يعني وين راح ؟"

ردت " ماادري ماادري هاي هنا جبناها لهنا وفد مرة حالتها .. تگول قبل فترة جاييه تهديد وهو مامهتم وهسا نسر يفتر من مكان المكان وماخله احد ماوصاه يدور عليه ..

سألتها " قدمتوا بلاغ ؟"

ردت " اي قدم نسر وعمامه كلهم مخبوصين ماشاء الله عشيرته تسد عين الشمس "

رجعت للبيت مقهورة حيل على هذال انسان طيب مايستاهل .. والاهم يحب هنا كلش ..

استغربت من حال بلدنا ووين وصلنا .. لا امان ولا راحة .. والحجي الحق والنزيه اما ينخطف او ينقتل

يارب يرجع سالم ان شاء الله..

اندگت الباب اجت عذورة وحسام ..

دخلت سلمت عليها وحسام يأشرلي من وراها…

هزيت راسي بمعنى اعرف ..

باوعتله " شنو متدخل ؟"

رد " هااا لا تعبان وعندي شغل عود امر عليج غير وكت"

ردت " لعد ليش جبتني بسرعه بسرعه لهنا وتگلي شذر عزمتنا "

رديت " اي صح اني حجيت وي بيداء تخابره يجيبج لان انت صايرة لاتطلعين ولا تجين "

حسيتها مااقتنعت بس من دخلت وشافت سمر انشغلت بيها.  

تعرفت عليها والفتت الي :

" شذر هاي انتو كلكم هيج حلوين .. شفت خالتج وهسا اختج ماشاء الله "

فرحت سمر من سمعت كلامها .. وحست بالراحة وي عذورة بحيث خلصن الوكت اثنينهن ضحك وسوالف

ودنو وياهن هم حسيتها كبرت وحتى بكلامها ونقاشها مختلفه رغم هي صارت بالمتوسطة ..

بالي كله يم هنا ..

رحت للمطبخ ثرمت اللحم والبصل وسويت كباب بالفرن

استغليت وجودهن بالاستقبال صرت كل شوية اخابر بيداء ..

وماكو شي جديد .. والمشكله مااگدر اتصل على نسر واطمأن ..

هنا :

هذال مثل عادته .. گعد الصبح لگاني قبله اسوي ريوگ

حضني وباسني " صباح الخير حبيبتي "

رديت " صباح النور " اشو مبدل من وكت ..

رد " اي عندي شغل اخلصه واروح للدوام "

سألت " لعد متتريگ ؟"

رد،" كوب جاي من ايدج الحلوة وبس مااشتهي "

صبيتله جاي شربه وطلعت اودعه مثل عادتي للباب

حضني واتنهد بحضني ..

باوعت بعيونة " شنو هالحسرة البعيونك "

رد " ماكو شي حبيبتي يله اني رايح ديري بالج على نفسج وع الجهال .. ومن تسوقين على كيفج لان ازدحامات "

طلع وهو يوصي .. بالفترة الاخيرة علمني ع السياقة لان دايما هو يطلع من وكت او يتأخر واني ارجع تكسي او انتظر .

فاشترالي سيارة صغيرة .. وبعد مابديت اتعلم اسوق صرت اخذ ولدي قبل الدوام اخذهم الاهلي ومناك اروح الدوامي .. لان عطلة وماعندهم دوام..

بعد ماطلع لبست شالي واخذت غراض ولدي .. حتى مرات يرحون بتراكاتهم خطية يكملون نومتهم هناك ..

طلعنا بسرعة قفلت الباب ورحت البيداء بالفترة الاخيرة ادزهم يمها .

داومت وطول النهار احس داخلي مامرتاح ..

كملت دوام ورجعت للبيت بعد مااخذت اولادي ..

بسرعة طبخت ..

اتصل على هذال ماكو .. عود ردت اكله يجيبلنا خبز .. هو بثلاثة ثلاثة ونص يبين بالبيت ..

باوعت ساعه ثلاثة ونص وماكو معقولة مخلص شحن ..

بقيت مخليه الاكل ومنتظرة الحد ساعه خمسه ..

عاد هنا مااتحملت ..

خابرت اخواته گالن ماشفناه ولا خابرنا ..

دور قلقتهن وياي ..

ساعه ولگيتهن يمي جايات ..

خابرت نسر وگال اني اتصرف هسا اخابر واشوف السالفه ..

كلها تدور وهو ماكو فص ملح وذاب.

صار المغرب وهذال ماكو .. احس الدنيا گامت تفتر بيه عاد هنا انفجرت مااتحملت صرت اعيط وابجي..

اجه نسر وعمامه الهذال وولد عمة ..

گالوا " طلع بنص الدوام بشغل وبعد مارجع للدوام هذا العرفوه من اليداومون وياه "

اني تخربطت وبس ابجي .. سألني نسر :

" زين ماكالج شي خاف اكو مشكله بدوامه "

رديت " اي اجاه تهديد بس مو هسا من زمان .. وهو مااهتم وهم نسينا السالفه "

حجة عمه " وشلون تسكتون عن هيج موضوع "

رديت " هو ماقبل نحجي گال مجرد تخويف "

سأل نسر " زين ليش تهديد هم اكو شي يخص شغله صاير شي "

رديت " اي گال لازم ملفات فساد وع اساس يقدمها وهددوه بس هاي قبل ماادري شصار بعد هذال مايحجي عن شغله "

عاط ابن عمه " خليه لا يحجي لايحجي وهاي النتيجة..  يعني مايكول احجي الاهلي الولد عمي .. مو احنة ببلد…….. ماكو بي لانزيه ولاشريف .. بلد حكمته المرتزقة مايعيش الشريف بينهم ..

كلامهم وخوفهم خوفني اكثر المطمني نسر يمي يهدي بيه ..

اشرلي " گومي لمي ملابسج وملابس ولدج وتعاي وياي للبيت "

رديت " لا مااروح مستحيل خاف يرجع هذال شلون اروح واتركه "

رد " يابه من يرجع كلنا ندري لاتعاندين .. ماتشوفين الوضع خافي على ولدج… احنة راح نستنفر المراكز كلها وندور عليه لاتخافين "

بالگوة قنعني اطلع من بيتي ومن ريحته الماليه البيت ..

صعدت للغرفه اخذت كم قطعه لان ادري راح ارجع وراح ارجع اشم ريحته واشوف وجهة المبتسم والمايوم حزن بوجهي لو كشر "

احس جسمي كله يرجف وبس ابجي .. ياالهي مصار سنتين على زواجنا حتى مااتهنيت ولاشبعت منه .  لاتحرمني منه ياربي وتاخذ مني اخر امل بالدنيا ..

اخذني نسر البيت بيداء .. بس گالتلي الله يساعدج

انفجرت بوجهها مااتحملت…

بجيت وعيطت ومافادني شي مااحس بداخلي مرتاح

كل شوية اتصل عليه ومغلق ..

نسر ماشفناه النص الليل .. هو وعمام هذال ماخلو مكان ما راحوا..

حتى رتب جبيرة بالدوله تعنالها .. وبمعارفه گدر يطلع امر بالتحقيق مع كل المشكوك بيهم وكل الموجودين وياه بالشغل وخارجه..

ايام وليالي وماكو خبر ..

احس النوم طار من عيني .. نسر حبيبي ماشفناه ابد ..

حتى دوام مايداوم بنفسه يدور ..

المطمني حجايتة من يگلي ..

" لاتخافين مادام ماكو اثر يعني بعده عايش وان شاء الله يرجع "

بس ياخوفي مايرجع ويختفي حاله حال غيره بهذا البلد..

اخواتي وامي كلهن ماتركني ابد… شذر تروح وترجع ماتگدر تبقى علمود عذورة ماگلنالها ..

وفوگ مصايبي كلها ..

سمعوا عمي وليث واجو..

من شفتهم حسيت بجيتهم مو خير ..

احنة رجعنا كلنا البيت اهلي لان بيت بيداء صغير

مايوسعنا ..

وهديل اخذت بنتها وراحت البيت بيداء ماما دزتها لان تدري بينا مانطيق وجودها ..

رغم مهيمن حلف مايدخل بيتهم مادام هي بي .. بس شنسوي ابتلينا بيها وخلص ..

واصلا بوضعي هذا ماعاد يهمني لا هديل ولاغيرها ..

من شفت ليث حسيت وراه مصيبة المشكله هالانسان تحسه يتجدد ومايتعب ابد يصغر ومايكبر ..

حجة عمي وتوقعت جاي يواسيني :

" بوية بعد الصار ورجلج عنده ثارات ويمكن يكتلوه او يخطفون عياله .. ولدنا راح ناخذهم… لان خاف يوم عبالهم ولده ويكتلوهم لو يخطفوهم "

رديت بحرگة گلب " تحجي صدگ عمي يعني هم زوجي مااعرف وينه وگلبي محروگ عليه..  وتحرگ گلبي على ولدي تريد "

رد ليث " هذا الصحيح مادام وضعكم بخطر مااخلي اولادي عندج بعدين وضعه معروف ليش اليشتغل هيج شغل شيتوقع… "

قاطعته وعطت بي " انت شنو يااخي ماتحس ماعندك گلب . لك اشو احسك جاي متشمت .. لو لان احسن منك ورجال اكثر منك غرت منه "

ضحك " اني رجال غصب عنج .. وهذا الشايب خليه عود يرجع ويفيدج بس ولدي اخذهم واصلا انت انطيتهم الي على طبق من فضة .. بس اقدم دعوة بهيج ووضع اخذهم منج "

عطت بي " لك هالشايب التحجي عنه اشرف منك… عاد شوف نفسك لاشرف ولارجوله باقي كل يوم وي وحدة حتى الاخذتها عليه وحبيتها خنتها "

تهستر وراد يضربني لزمه عمي وطرده .. " اطلع انت لاتتدخل "

عاط " لا اتدخل ولدي اخذهم وبالقانون "

رديت " لمن حطمت شجن وحرمتها من الخلفه هسا جاي تريد ولدك .. مو ذوله الماردتهم وتكلي سقطيهم او ننطيهم القصي .. مااريد اتشمت بس هاي كلها عداله الله .. وهسا اطلع منا واخلي القانون مالتك يفيدك "

سحب ولدي واخذهم بالقوة واخواتي وامي يعيطن عليه ..

مهيمن دخل للبيت سمع العياط وشافه مااتحمل ..

هجم عليه وشبعه ضرب وصاروا يتمالخون ..

عمي طرد ليث ..

وطلب ياخذ الولد بين ماتهدا الاوضاع يرجعهم وعدني يرجعهم بيده .. بس تنتهي الاوضاع على خير ..

اخذهم وراح .. البيت انخبص .. صرت تايهة مااعرف افكر المصايب احسها كلها تراكمت عليه ..

ثاني يوم انصدمنا بتبليغ من المحكمة.. والقاء قبض على مهيمن ..

انصدمنا ..

خابرنا نسر .  خطية حار بينا وبين يدور على هذال ..

اجه بالليل هو وماگلناله لان تعبان نام وطلع من الصبح خطية .

بيداء تخبلت من اخذوا ابنها .. وتبجي " يمه بس لايحكموه ويروح مني .. يمه ابني شلون بيه "

بيتنا خلال اسبوع المشاكل ماهدأت بي ..

ليث مسويها قضيه اعتداء على اعلامي اثناء عمله ..

لعبها صح ومااعرف منين جايب شهود يشهدون وياه ..

قبل فترة سمعت عنه اخبار من نسر .. گال كل يوم يشوفوه ناس وي وحده ..

ماصدگت الخبر احتمال زميلاته لااكثر .. لان الاعرفه يحب شجن واستقتل عليها ..

بس مااستبعد تصرفه لان اليخون مرة يخون الف مرة ..

نسر المسكين حار بين يدور على هذال وبين مهيمن والمراكز ..

راح العمو كم مرة وعمو ضغط على ليث… بس ليث معاند .. ومصر يخليه ينحكم ..

بيداء تبجي وتصيح " ضاع ابني .. الله لينطيك ياليث ضيعت ابني "

دور صار يساومني يطلع مهيمن مقابل اولادي..

تخبلت شلون اگدر استغنى عنهم ..

ومنا بيداء شحالها ..

ماما تگلي معليج مهيمن رجال يتحمل لاتتنازلين اله ..

رديت " يوم تحجين صدگ طبعا مااتنازل .. مو تزعلين بيداء بس ذولي صغار شلون اخليهم يتبهذلون يمه وهو من البدايه مارايدهم بس لان شجن مايصير عندها "

ردت بيداء " حقج دادة حقج ابني جبير وميته عليه شحال لو طفل "

حولوا مهيمن للمحكمة… نسر خلة محامي اله .. وطلب شهود .

المشكلة بس احنة شهود .. انه الحادثة صارت بالبيت وبمشكلة عائلية مو مثل ماگال بوقت عمله ..

نسر ماقبل اي وحدة بينا تدخل مراكز او محاكم وگال اني اتكفلها .. بس ماما اصرت تشهد ..

وگالتله..

" يمة اني مرة جبيرة منو يباوعلي قابل… واذا عمك ماشهد وياك اني اشهد ولا اخلي الولد بالسجن "

بس نسر ماقبل گالها خلي نشوف شيصير والله كريم ..

خابرت ماما المرت عمو وحجت على ليث وگالتلها اذا ماتنازل والله اروح بنفسي واشهد عليه واكلهم اجه البيتنا وهاد علينا واخلي هو ينسجن بدال مهيمن "

عاد مرت عمو موصلة العمو وهو متخبل من سامع ماما تروح تشهد ..

خابر نسر وگاله " مادام ليث مايتنازل اني اروح اشهد وياك واحلف لان جنت هناك "

من سمعنا كلام عمو فرحنا ..

وفعلا رايح وشاهد ضد ليث وشهادة عمو لانه ابو ليث ضعفت موقف ليث ..

واضطر يتنازل بعد مادفع نسر تعويض ..

يوم عن يوم احمد الله الخلصني من هيج انسان طمع وجشع واناني .. شلون حبيته وشنو شفت منه ماادري المهم خلصت منه ..

بقى يرجعلي الغالي وكلشي مااريد من الدنيا .. كرهت كلشي بحياتي ..

هاي مرن اسبوعين وهو ماكو خبر عنه… حسيت الكل فقد الامل برجعته ..

شذر :

بعد الصار الهذال .. صرت بين نارين .. بين عذورة وبين قلقي على هنا ..

عذورة جانت وي سمر متلائمات .. سمر طلع عندها موهبة الرسم وهاي اول مرة اعرفها يمكن هواي اشياء غايبه عني بيهن حتى من انجمعت بيهن ماشبعت بقت الدنيا تلطش بيه بكل يوم مصيبة وانشغلت عنهن ..

بس المطمني هم جدو وبيبي اعرفهم يحبوهن ورغم اخطاء سحر بس بيبي متنطي بيها ابد ..

بقت يمنا سمر اسبوع بعدها گالت ارجع لان بيبي كل شوية تخابر وين سميرة اريدها اشتاقيتلها ..

ميستغنون عنها لان مداريتهم هي وجدو ..

من راحت سمر اني ملتهية بالخياط .. رغم مامعتازة ونسر بطلني من زمان من شراكتي وي المحلات الجنت اخيطلهم يگلي تعبتي وظهرج ..

بس اني بقيت اخيط بس الي للبنات للاقارب حتى للشارع ماعدت اخيط بعد ..

عذورة مرات يجيها حسام ويطلعها ومرات تلزم الفراش وتنام .. الكيمياوي اذاها حيل .. غير ملامحها وذبلها ..

ساعات احلم بيها احلام موزينه واخاف .. اي فعلا اخاف لان احلامي احسها تتحقق ..

دوم اگعد ع السجادة وابجي وادعي .. ربي اختبرتني بهواي اشياء بحياتي وصبرت ..

الا عذراء .. اريدها منك الهي .. شابه بعدها وجاي تذبل گدامنا ..

واني ع المكينة .. اجت يمي ..

" شذر اشو اهلي فد مرة نسوني لا واحد اتصل لا حجة معقولة صاير شي .. حتى من اتصل كلمتين وتسده ماما"

رديت " لا ماكو شي بس تلگيهم مشغولين "

ردت " لا ممرتاحة .. راح اخابر ماما تدزلي مشتاق "

رديت " وين تخابريها مو ع اساس يجي حسام لو شنو مليتي مني "

ردت " شتدرين بيه امل منج بس ماادري احس داخلي مقبوض "

رديت " لعد انتظري حسام يجي لترحين "

اجه حسام من العيادة اصرت تروح .. حاول يقنعها يطلعون ماقبلت گالتله تعبانه اليوم ..

اشرلي اروح وياهم ..

شلون اروح الذاك البيت بعد السوااه شلون ؟؟

اصر حسام عليه من راحت تبدل ..

" شذر خوية اعرف الماتگدرين تدخلين الذاك البيت بس انت تفهميها هاي لو سمعت تتخربط او شو شيصير بيها"

اضطريت اروح هم يبقى بالي عليها..

خابرت بيداء گلتلها عذورة اصرت تجي .. لتفتحون الموضوع يمها .. وكأنه هنا جايه يمكم "

نسينا انه عذراء ذكيه ومتفوتها الهفوات النسيناها ..

بدلت واخذت دنو ورحنا ..

بيداء گالت نسر مايرجع  .. اطمأنيت شوية ..

وصلنا للبيت ..

باوعت الحسام " ليش جبتنا لهناك غير البيداء نروح ؟"

توتر حسام ونسينا هالسالفه..

" هااا اي بس نسر وداها يم بيداء علمودجن لان ماتدخلن البيت .."

سكتت وماردت ..

دخلنا البيت .. تلگتنا خاله سلمنا عليها ..

فروحة فرحت من شافت دنو اخذتها ودخلت ..

شافت هنا استغربت " هاي هنا لعد وين ولدج وشبيج "

هنا جانت حالتها فعلا يرثى لها .. ذبلت بأسبوعين ..

ابتسمت بثگل " مابيه افلاونزا مأذيتني .. ولدي عند بيت جدهم وهذال مسافر فأجيت لهنا يمكم "

ابتسمت " ياظالمات كلجن مجموعات هنا وتاركاتني اني وهاي المسكينه وحدنا متگابلين هناك جان اجيتن يمنا "

اخواتها كلهن يبتسمن ويجاملنها ..

سما من شافتها مااتحملت دخلت للغرفه تبجي ..

رحت وراها ..

شافتني " مامصدگة هيج صايرة .. لج عيني هاي زهرة البيت نسميها من صغرها وهي ماتفارگ الضحكة وجهها ليش هيج صايرة .. ليش احس راح نخسرها نهائي "

رديت " اسم الله لتگولين هيج .. عذورة قوية وجاي تحارب بس العلاج قوي مأثر عليها ومتاكل .. ولو الولد حسام ممقصر خطية مگابلها وگاعد .. خليج قوية حتى تقوى بينا من تشوفنا هيج طبعا تضعف "

ردت " الله يلعن هيج مرض شوكت تطيب گليلي شوكت ترجع تفتح من جديد "

رديت " حسام يگول مو شرط حسب انتشار المرض وقوة مناعة الجسم .. احتمال سنة اكثر ماندري بس ان شاء الله تخلص منه بسرعه… "

جاي نحجي سمعت صوت نسر اجه ..

بقيت بالغرفة ..

من شاف عذورة فرح " مشتاقلج بالقران… اعذريني التهيت وحتى ماخابرتج "

ردت " كلكم ملتهين عني تالي مجمع اخواتك وتاركني"

رد " لا ابد اسأليهم اصلا مااجي للبيت عندي انذار.. "

نزل مهيمن جان نايم فوگ…

واسمعهم يحجون عن مشكلته ..

عذورة استغربت " ليش مگلتولي اگول ماتخابرون والله حسيت اكو شي همزين عاد لمن طلع يلة دريت "

رد نسر " مشكله بسيطة وماتسوة .. بس الجماعة الخطبو اسراء خوش وگفه وگف النا .. "

سألت خاله " احنة التمن كلهن ونسيت اسألك هذا الخطب اسراء وياها استاذ لو شنو ؟"

رد نسر " اخوه دكتور وياها الولد الخطبها قاضي "

ردت بيداء " ياااا اگول اسراء شعجب اقتنعت ورضت تالي طلع الولد يناسب طموحها "

رد نسر " اي هم الواضح يتلائمون .. اسكتو لا تسمع وتسوولنا سالفة .."

سمعته شهگ " هاي دنو هنا .. منو جابج وي عمة اجيتي وشلون تتركين امج وحدها "

ردت " ماما اجت وياي "

غمضت عيني .. " معناها عرف عود وصيتها ماتنزل من فوگ لمن نروح "

شوية واندگت الباب " شذر اريد احجي وياج "..

حجيت من وراه " نسر عفية لاتحرجني مو حلفت متشوف وجهي بعد "

رد " والله عبالج ساكت خابرت عمامها وحجيت وياهم بس صارت هاي السالفه واخرتني تعرفين "

رديت " نسر انت تهاونت من البداية وكسرت گلبي .. وهاي انت صارلك شگد متحمل ماتفرق بعد "

رد" والله اريد اموت شنو متحمل .. شذر اني تعبان ومحتاجج لاتسوين هيج بيه "

رديت " بكل مرة تحتاجني تلگيني يمك بس هالمرة تختلف "

رد " افتحي الباب من اخواتي مو فشلتيني .. افتحي وخلي نتفاهم جوة "

مهيمن مناك اسمعه " الله يساعدك خالي لو اني منك اكسر الباب .. كرهتوني بالعرس والله انتو المتزوجين "

عاط بيه " دولي لااجي اكسرك مو اكسر الباب لو مخليك بالسجن احسنلي "

ضحك مهيمن " ترى اتشاقه هااا .. باجي على كيفج وي خالي خطية مايستاهل والله خوش رجال ويحبج وبلياج ضايع "

عاط نسر " بعد بعد جدي بيه ع الرصيف امشي ولك "

سمعت ركضت مهيمن ..

ضحكت عليهم ..

رد " عاجبج هيج يعني وج افتحي مو فتيتي گلبي فت"

ابتسمت " دور فتيتي شنو هاي ؟"

رد " شلعتي گلبي يعني هاي شرطي ويانا يگولها جان "

لو ما هنا ووضعها وعيب منها جان مافتحت ..

فتحتها ودرت وجهي " ترى فتحتها علمود هنا .. لان شتگول علينا زوجي ماهو وهم حايرين برواحتهم ومناك مهيمن يتمضحك فضحتونا "

رد " بس خليني اباوعلج مو اشتاقيت لعيونج الجنهن قطر الندى بوجه الصبح "

اتنهدت " نسر مو وكت سوالفك .. "

رد " انطيني فرصه "

رديت " انطيتك هواي .. الواگفه گبالك مو بنت ال 16 سنه كبرت والدنيا علمتني اشكال وشفت اشكال بيها "

بسرعة اجتني حضنه من وراي وحاوطني بديه وقرب وجهة الرگبتي .  ابتعدت عنه بسرعه "

" نسر عوفني كافي كافي ماتمل "

دار وجهي غصب عني غمضت.. 

" تعبتيني كافي والله گلبي ملهوف بعز كل الاني بي .. كسرت اختي ودموعها لو مهيمن وهبطتي عليه لو اختي التذبل گدامي لو ولو ماتگليلي شلحگ "

دفعته حيل .. " كلها باول اولوياتك الا اني .. "

رد " هاي انت تگولين هيج .. وين شذر القبل تفضل الغير على نفسها وين شذر اذا قصرت بحق واحد من اهلي ترفض وين شذر الجانت تنقهر حتى على عدوها"

رديت " هو لان جنت ذيج شذر الضعيفه تعودت تخطاأ بحقها وتسامحك تدوس عليه وتگول تتحمل .. لدرجة ينكسر گلبك ع الكل الا اني تگول ميخالف تتحمل وتتحملني .. للان اني نفسي شذر وي الناس كلها .  اخواتك اخواتي واهلك اهلي .. وكسرة هنا كسرتي ..

بس انت لا تختلف لان اگدر اسامح الناس كلها الا انت مااگدر اسامحك .. لان انت مختلف بالنسبة الي مثل مافضلتك على نفسي وع الكل المفروض تفضلني .. 

وماتكسرني ..

تعبت نسر تعبت اريد اعيش اريد استقر اريد ابطل خوف من المستقبل اريد ارتااااح يااخي افهمني افهميني..

حضني وباس راسي ..

بعدته وطلعت ..

صحت دنو .. وطلعت .. البنات وخاله رادني ابقى مابقيت ..

بقيت واگفه بالشارع ودموعي بطرف عيني.  اباوع البيت بيداء والقهر كاتلني ..

" وحدها هناك شنو اليضمن مايروحلها او تصيحله بحجة بنتها شنو اليضمن وفائك الي نسر شنو ؟؟"

طلع وراي " اوكفي اني اوصلج "

طلع وياي وصلني واثنينة ساكتين ..

نزلت ودخلت للبيت من غير مااحجي بقى هو يحجي وي دنو ..

دخلت وراي وقفلت الباب " ماما بابا يگول اصبري عليه"

مارديت عليها ..

سويت عشا وتعشينا ونمنا ..

ثاني يوم گعدت اشتغل حتى بلا ريوگ مااشتهي ..

اجت ببالي زمن ..

خابرتها ..

" وينج اشو مختفيه "

سألت " انت وين ببيتج ؟"

رديت " اي ببيتي تعاي "

ردت " اشوف اذا قبل .. لان اني بطلت ومن زمان تركت الشغل ومااطلع ماگالتلج خاله رسميه الله يرحمها "

رديت " لا ماادري اصلا من زمان ماملتقيه بيها الى ان ماتت الله يرحمها "

ردت " احاول اقنعه واجي واحجيلج "

احظرت الريوگ مثل قبل من تتريگ وياي ..

اجت شافت الطاولة ضحكت ..

" اشتاقيت الايامنا "

باوعتلها شكلها متغير انتبهت على اديها ..

" شنو هاي مخطوبة "

ردت " اي متشوفيني گلتلج تركت الشغل.. "

ابتسمت " الله يسعدج واخيرا اقتنعتي "

ردت " لا والله گولي انجبرت .. ابوي ومرت ابوي شكوا كلما يجي واحد ارفض .. سألوني شنو السبب وكلما انطيهم عذر مايقتنعون اخر شي وافقت مجبورة .. لعد شسوي ابقى عمري كله هيج .. خليني اتحدى مصيري اما اني مرتاحة وسعيدة او الله العالم وين اكون ..

رديت " ان شاء الله ماكو شي وتنسعدين انت بس لاتوهسين .. احجيلي منو هذا "

ردت " مو منا من محافظتنا .. من توفت عمتي ورحنا شافتني امه وخطبتني .. حتى مااعرفه كلش زين بس هو موظف وحالته زينه "

رديت " هاهي المهم زين وحباب ويسعدج .. "

ردت " الله كريم "

بيومها رتبت البيت وياي وغيرنا ديكور المطبخ والاستقبال .. غسلت البيت كله وفرشته .. مابقى شي للشتا ..

بقت للظهر يمي وراحت ..

خابرت البيداء .. اسأل على هنا ..

حجتلي عن عذراء درت من حمودي ابنها بهذال وشحالها هسا ..

رديت " لعد شلون ماوصيتوه "

ردت " وصيناه بس نسيت يگول بس الاكل ماينساه"

رديت " يلة هاهي هي اول وتالي تعرف .. الى متى نبقى نظم عنها "

اريد اصب غدا ..

اندگت الباب راحت دنو فتحته اتفاجأت بجدي

مااعرف شحسيت من شفته داخل عليه بهيبته ولابس عگال ..

فرحت سلمت عليه ودخلته للاستقبال ..

سألني " گالتلي بيبيتج محتاجتني وجان عندي شغل هواي اعذريني بوية لان تأخرت عليج "

رديت " اني هم نسيت صارت هواي شغلات عندنا .. اخواتي شلونهن بيبي؟"

رد " كلهم بخير .. گولي خيرج "

رديت " بالاول نتغدا يمي اليوم وترتاح ونسولف "

ابتسم " وبيبيتج شيقنعها مااكل وياها غير تزعل وتدور وجهها عني"

رديت " بيبي اذا عرفت انت يمي ماتزعل .. "

ضحك " هسا اخابرها وشوفي "

طلع موبايله خابر " وين بيبيتج انطيها الموبايل "

فتح سبيكر ..

" هااا حجي شلونك وين لسا ؟"

رد " والله عزمتني وحدة على غدا وبقيت يمها "

ردت " ياااا وروحة الابوية لمايجمعني بيك فراش واحد .. وانت تدري بيه لو زعلت شلون ؟"

ضحك " يا يابة كلشي ولافراشج شلون اشتم ريحتج بتوالي الليل "

ردت " خلي الرايحلها تشممك المسك والعنبر البگصايبي"

ضحكت على سوالفهم.. شگد حلو حبهم وشگد اتمنيت نعيش هيج اني ونسر طول العمر ..

رجع كمل " لاتخافين حجيه انت بالگلب ماكو وحدة تاخذني منج .. بس هسا اني يم شذرا مو گلتيلي تريدك وهي ماقبلت الا اتغدا يمها "

ردت " ياحجي صدگ هيج تهبط گلبي .. مادامها شذرا خليك يمها وسلملي عليها مسامحتك هالمرة "

ضحكت وحجيت " هااا بيبي شلونج "

ردت " بعد امي وابوية انت .. ديري بالج على جدج وغديه زين بس كون مو دهن ومالح توكليه "

رديت " لاتخافين عليه بيبي "

رحت سويت الغدا وگعدنا نتغدا .. وهو يضحك وي دنو ويسألها عن دراستها وهي تجاوبه بطلاقه ..

من تجي وتناقشه يبتسم..

باوعلي " زين ماربيتي .. طلعتي بعشر زلم .. قوتج وصبرج الج بيها عند الله .. هاي الله رزقج رجل نشمي وبنية مثل الورد .. انطوج الماگدرنا ننطيه الج وظلمناج"

للحظة مااتحملت ونزلن دموعي .. دموع جنت خانگتهن ومصبرة على روحي بالگوة ..

سألني " احجي شنو المضوجج ؟"

ححيتله كلشي صار .. بالاول گال اذا عادل بينجن وعندها بنيه حرام يابوية تحرميه لو تحرميها من بنتها .

انت ببيتج وهي ببيتها اذا مامقصر عنج ..

بس من عرف السوته بيه والصارلي وشهدت خالتي بالحجي وگلتله اسألها .. اتخبل ..

وگال " مايصير الا خاطرج طيب .. بس يجي ارشد صارلة كم يوم يركض بمعاملة راتب ابوج علمود يدوره بأسم اخواتج ضمان الهن والبيت هم ..

بس يكمل هاليومين اخذة ونروح الرجلج واتفاهم وياه..

#بقلمي_شمس_السعدي

يتبع……

مساء الورد ❤

///// البارت السادس والســـبعون /////

#قوارير_من_فضة ج2

#بقلمي_شمس_السعدي ..

طلع جدو واني التهيت بملابس زمن .. اريد اكملهم قبل زواجها ..

خابرت خاله ..

" هلو امي شلونج "

رديت " على الله انت شلونج الحسن شلونه "

ردت " زين ويگول اختي الجبيرة ماتسأل عليه "

رديت " حقج وحقه بس ماشاء الله جنها المصايب بس علينا تركض نريد شهر نرتاح ماكو "

ردت " استغفري ربج كل هذا اختبار .. اكثر من الصارلي والحمد لله بالاخير جبر خاطري بالحسن وابوه واخواته"

رديت " الحمد لله واني شوكت يجبر خاطري "

ردت " والله حلمت بيج حلم يخبل البارحة .. "

رديت " ياالله .. ماتجيبين البنات وتجين يمي "

ردت " مو اليوم خليها الباجر السيد يروح للبصرة واخليه يجيبني اني والبنات يمج "

ثاني اجت خاله من الصبح جابهم السيد وراح ..

سويت ريوگ وگعدنا كلنا ..

دنو فرحت من شافتهن… تحب بنات بعمرها ..

زينب متغيرة حيل مو ذيج الجانت ماتباوع حتى بوجهنا .. ماتخلي اخوها ينزل بالگاع ابد .. خاله تگول وياي بالبيت ابد ماتخليني لو الاخوها تشيله عني من اشتغل "

واخيرا خاله صبرت ونالت .. زوجها انسان صالح وصاروا عندها اثنين بنات وولد ..

سألتها على امي " ماكو خبر عن امي "

تنهدت " ذيج المرة اجونا بيت سعد .. ومن حجيت وياه غير الموضوع مايقبل يحجي "

رديت " زين ليش معقولة كاتلها ؟"

ردت " لا مااعتقد بس احس وراه شي .. والا لو منهزمة صدگ جان ماسكت لا هو ولا عامر "

سألتها " خاله لفت نظري شي ؟؟ خالو سعد نگول اخته ونزلت راسه وسبب موت ابوه منها وهيج يسوي . 

عمو عامر ليش يسوي هيج ؟"

اتنهدت " مو عمي جان رايدني العادل وسماح العامر "

سماح من يومها تكره عامر وتگول متسلط وعصبي لو يحلم مااتزوجه من هي وصغيرة تكرهة بس هو لا ..

لدرجة من صار الصار تأثر اكثر واحد بينا حتى اكثر مني وحلف يكتلهم اثنينهم… وعمي راد يجبر خاطرنا اثنينا ويزوجنا البعض بس لا اني قبلت ولا هو .. ورغم عمي زوجه الام هاجر وهم گرايبهم مو غريبه بس بقى حاقد عليهم "

رديت " واني اگول ليش هيج يكرهة .. ااااه ماما ااااه دمرت نفسها والحولها كلهم "

ردت " هي هاي الدنيا كلشي نشوف منها .. صح اني سامحتها وبريت الذمة الها واله بس ماانسى .. الطعنه من اقرب الناس الج صعبه حيل وتوجع .. وهذا الصار وي عامر "

بقت طول اليوم يمنا ..

بالليل سهرنا سوية .. وحجيتلها عن جدو هو راح يتصرف..

ايدتني بالموضوع " زين سويتي خلي يعرف عندج اهل صح هو طول سنين جان سند الج بس مو معناها يدوس عليج وشوكت يحجي وياه ماگالج ؟"

رديت " گال من يجي ارشد لان ملتهي براتب بابا ينقله للبنات والبيت هم .. صدگ معقولة ماما رجعت للبيت ؟"

ردت " مااعتقد ولو صدگ وعرف ارشد مايضم على عامر لان ارشد وعامر مثل الاصدقاء مايضم واحدهم ع الثاني شي "

مااعرف ليش غياب ماما شاغلني حيل .. حتى لو ماجانت زينة وياي وباعتني بس تبقى امي ..

ثاني يوم خاله رجعت البيتها ورجعت الوحدتي .. خابرت مثل عادتي وسألت على هذال .. ماكو اي خبر وعذورة گالوا احسن شوية ..

بعد كم يوم ..

اندگت الباب قوي ..

استغربت .

فتحتها نسر وجان وجهة مايتفسر ..

سحبني ودخل بيه لجوة ..

همست " نسر شبيك منا دنو .."

صاح دنو بابا ابقي بغرفتج لتطلعين ..

رديت " شبيك نسر "

رد " اني شذر اني تشكيلي الجدج وتخليني طرف ثالث بينا "

رديت " بس انت الدخلت اطراف هواي بينا انت الصاير مدري شبيك بينما السالفه مايحتاجلها تفكير "

رد " كلتلج اصبرلي "

رديت " شصبر هاي صارلنا شهر من اجت شسويت انت"

رد " عبالج سكتت .. رحت ابوها مريض وعمامها يگولون رجعها على ذمتج وعسا ما تحبسها بغرفه مالنا علاقه هيج بنت مانريدها .

گلتلهم يابة بنتكم طعنت بشرف مرتي ورادت تموتني وتسوي حيل من وراي .. يگلولي هي وحدة من الاثنين لو تكتلها انت لو احنه "

رديت بعصبيه " وهسا شنو شنو فهمني .. يعني تبقى هيج تخسرني علمودها مو هذا قرارك "

رد " شلون اخسرج علمودها اصلا هي والعدم بالنسبة الي .. وحتى جدج حجيتله وكال ماتريد بنتنا طلكها وبيت جدها مفتوحلها وتعيش براتب ابوها وورثه "

اتنهدت ..

باوعلي " يعني قابلة تعوفيني .. اموت وحق الله اموت مااتحمل لحظة دونج .. افتر وادور على هذال وتفكيري يمج "

گعدت " اني التعبت نسر اني .. انت الحل يمك اختار واني احترم قرارك ياتختارني ياتختارها "

رد " انت طبعا بدون نقاش .. بس اسمعيني… صح غلطت بحقي بس اهلها وعمامها يگولون اكتلها مانريدها وجنت مقرر لو اخذوها اخلي ملاك تروح وياها واسبوع يمها واسبوع يمي .. بس بعد الصار مااگدر امن على بنتي هم مريضه وهم تتعلعل "

رديت " يعني تبقيها "

رد " لا طبعا.. شوفي واسمعيني .. واني گلت هالحجي الجدج وخله الخيار الج وارشد شاهد وحتى گلتله اكتب تعهد او اي شي تريدة شذر انه هديل ماترجع الذمتي "

سألت " وشنو هالحجي الشهدت عليه "

رد " بيت بيداء يبقى الها مؤقتا بين ماابوها يصير زين .. وبيداء تنتقل يمنا هي وولدها بالطابق الفوگ واني ادفع ايجار ذاك البيت .. واطلكها محكمة وانطيهاحقوقها ونفقه ملاك حتى بعد ماتطالبني بشي

واني وياج نعيش هنا بعيد عن الناس كلها ..

ملاك من اريد اشوفها ادز اي احد يجيبها البيت اهلي وحتى دكتورها اخذها اني وامي لو اني وبيداء .. وهديل مااشوف خلقتها ولاتشوفني .. "

رديت " وشنو اليضمن ماكم يوم وتگلك رجعني الذمتك لو اهلها يگولون ليش مبقيها يمك بدون عقد "

رد " هذا ذنبهم هم الشمروا وبنتهم واني سبق وكلتلهم مال ارجعها على ذمتي من سابع المستحيلات .. بالنسبة الي هي ام بنتي وبس "

اتنهدت ومااعرف شحجي " هديل لعبتها صح وعبالها يتنازل ويرجعلها .. بس مستحيل انطيها هيج فرصه حتى لو بقت يم ملوكة بس يم نسر مااخليها توصل "

خليته يخابر جدي وارشد وعمه حتى يكون الحجي گدام الكل ..

وگدامهم عاهدني ماترجع وارشد راح يكتبه تعهد ماقبلت لان ماردت ورقة تربط بينا ردت العهد البينا يكون حبنا وگلوبنا وبس ..

ارشد سهله معاملة الطلاگ ..

طلگها وانطاها غايبها وگالها نفقة ملاك ومصاريفها كلهن عليه انت هنا تربين وبس ..

بيومها صالحني نسر ..

ورجع البيتنا .. ذاك البيت بقى الامه واخواته لان بيداء قررت تبيع بيتها وتفتح مشروع الابنها والباقي تشتري بي مشتمل او شقه لان هو اصلا مو غالي وماجاب سعر ..

نظفنا الطابق الفوگ ورتبناه البيداء وولدها ..

وغرفه هديل رجعت العذورة واسراء مثل قبل ..

رجع نسر الحضني وهالمرة ملكي الوحدي… ماردت اضغط عليه اكثر .. لان اعرف وگلبي حاس انه جانت متأملة بي لان مامطلگها محكمة .. لكن بعد الطلاگ مااعتقد راح تبقى .. وهالشي مو بس اني حتى البنات تراهنوا عليه ..

جدو وصاه عليه وگاله اذا بيوم زعلت لو نزلت دمعتها اخذها منك وبعد متشوفها ..

وفعلا وعدني انه مستحيل يخلي دمعه بعد اليوم تنزل مني ..

هذال طولت شغلته ومانعرف اذا عايش او ميت…

نسر يكول هالشغلة مو مال خطف عادي او عصابه هالشغله جبيرة وبيها شخصيات كبار ..

يعني لو فعلا رادوا يتخلصون منه جان كتلوه بباب بيته لو فجروا سيارته ..

هالشي زرع الامل بداخلنا كلنا والاكثر هنا .. الصارت تتمنى يكون غايب ويرجعلها بيوم ..

ولا يرجعلها مقتول ..

هنا :

كل يوم واني عيني ع الباب كل شوية اگول راح يجيني خبر عنه لو يدخلي بطوله الحلو ..

والشيب التارس راس مثل خيوط الفجر ..

لليل واني نايمة حلمت بي ..

وكانه نجمع ساطع بالسماء اختفى تدريجيا بحلول الصباح .. شعرت بأنه حزين ..

تمنيت أن أكون معه لأواسيه و لكنه بعيد جدا ..

سمعت الخوف في نبرات صوته و اختلاجات قوله ...

قال لي وداعا ثو إختفى ..

هالحلم خلاني اكتئب بس لاخلص بعد مااشوفه او يمكن شامريه بمكان وماندري صارله هواي حتى لو ميت احتمال الدود اكل جسمه واختفى شلون يعرفوه

اتهسرت وصرت اعيط وابجي..  اجن اخواتي يتراكضن عبالهم بيه شي ..

سألتني امي " شبيج شكو من خابرج"

رديت " حلمت بي يوم ماادري شبي احس بي شي يمة"

بقن يواسن بيه للصبح .

اجه نسر هو وشذر… جانت وجهوهم رغم ضايجين عليه بس موردة ..

بالضبط مثلنا اني وهذال قبل ..

نظراتهم همساتهم كلها حب .. مستحيل يفترقون اذا فترقوا مايعيشون ..

ربي مايحرمهم من الانحرمت منه ..

حتى دوام صرت بالگوة ادوام مرات يتساهلون وياي ومايخلوني اشتغل لو اسيل تاخذهن مني ..

كلهن راعت وضعي ..

اخوات هذال ماتركني ابد ..

بين كم يوم يجن يشوفني .. الى ان اجه خبر النسر انه يبطل يدور عليه ..

هالتبليغ اكد شكوك نسر وريحنا نوعا ما بمعنى انه عايش ماميت .. ويخافون نلگيه ..

شذر :

رجع نسري الي وهنا اصريت ارجع اكمل علاجي ..

اثنينا محتاجين نبدي من جديد..  ولازم نكون عائلة التزمت بصلاة الليل بنية الطفل ..

اتمنيت طفل واحد ع الاقل يعوضنا عن كل الشفناه

نسر كلما يجي استراحة .. يجيب ملوكة يمنا ..

حتى تعودت علينا ..

دنو تكمل دراستها بسرعه علمود تلعب وياها ..

صح ماتمشي وعندها خلل بعينها والسانها ثگيل بس تفتهم حيل وتعرفنا ..

بحيث من تشوف دنو تخبصنا بالعياط بمعنى تعاي العبي وياي .

كملت ملابس زمن واجت تاخذهن ..

عزمتني على زواجها تعذرت لان الوضع مايسمح ولسا لابسه اسود على هاجر ..

ودعتها بالتلفون وطلبت منها ماتگطع بيه .. جانت خايفه وتكلي ادعيلي ..

بس طمنتها وكلتلها لاتفكرين بس بسعادتج وحياتج انت بريئة ومالج ذنب ومستحيل تتعاقبين ع ذنب مو ذنبج

وعدتني تخابرني بعد الزواج ..

لكن مر اسبوع واثنين وثلاثة وماكو خبر حتى اهلها ماكو .. وكأنه زمن كانت بحياتي طيف جميل ملاك بفستان ابيض غاب عني وترك اثر جميل بحياتي ..

حزنت واختفائها اثر عليه اكثر من اختفاء امي الماعرف هي وين ..

ليالي واني احلم بيها ..

ليش اني وهي وغيرنا مظلومات لان بنات لان كنا اطفال ومانگدر ندافع عن نفسنا ..

مانگدر نحجي وقلوبنا تتألم من نهش اجسادنا بوحشية .. ومن اقرب الناس النا ..

من حجيت النسر ..

جان رده " حاولي تتعودين على وضعنا بهذا البلد..  اليروح بعد مايرجع "

وفعلا كان هذا رأي لأخر لحظة.. وخاصه بعدما فقدنا الامـل برجوع هذال ..

بس هنا مافقدت الامل كل يوم تگول باجر يرجع ..

بيداء باعت بيتها ..

وسوت كوفي المهيمن .. وخله اصدقائه يساعدوه لان اغلب اليتخرجون ماكو تعيين ..

كلنا شجعناها حتى امه اشتغلتله معجنات للكوفي وي الجاي او القهوة او اي نوع من المشروبات يقدموها ..

الولد الخطب اسراء صاروا اهله يرحون ويرجعون عليها

ونسر متوقف بسبب غياب هذال ..

بس هنا گالت ..

" نسر خلي العالم تجي ليش مأخرهم صار شهرين "

رد " شلون تصير خطبة وعرس وهذال مانعرف شي عنه وانت هذا حالج "

ردت " لاتخاف عليه اني زينة .. وهذال يرجع اليوم باجر عسا ما بعد اشهر گلبي بارد واعرف راح يرجع "

نسر " راح اگلهم بس خطبة بين مانشوف الوضع "

رجعوا خبر الهم ..

اجن اخواته وامه .. حددن الخطبة .. قرروا يسووها بقاعه لان قاضي واله معارف هواي ..

حجتلهم خالة عن وضعنا فأمه ردت :

" لعد نخليها للزواج مايصير انتو بهيج حالة واحنة نسوي حفله كبيرة "

اسراء هم ماقبلت هوسة وحفله ..

راحت وياها سما المركز تجميل .. ماعزمنا احد بس احنة وعمها وخالها وحسام وقصي من الزلم ..

عذورة جانت مريضة ماطلعت بقت وي هنا بالغرفه ..

اجه الولد جان مبين عليه الوقار وشخصية هو اكبر منها بس مبين مميز لهذا اسراء وافقت عليه ..

من اجت من الصالون .. شفناها تعجبنا ابد ماكنا نتوقع بيوم نشوفها بهيج صورة .. طالعه حلوة كلش ونازكة ..

عقدوا وكملوا لبسها واخذوا صور ..

تالي طلب من نسر ياخذها ويتعشون برة لان عازم اهلة كلهم بمطعم يحتفلون عائليا ..

وافق نسر لان ماراد يخرب فرحتها وخاصه احنة حفلتنا كانت هادية مابيها ركص او اغاني ..

راحت بدلت لبست فستان محجابات اوڤ وايت ورتبتها سما طلعت حلوة حيل ..

خاله طول ماتباوعلها تقرأ ايات وتتمنالها حياة حلوة مو مثل اخواتها ..

نسر رغم اجاه انذار انه يبطل يدور عليه بس مابطل وجان بالسر مكلف ناس يعرفون وين وليش اخذوه ..

اجاه تلفون واحنة ع العشا ..

غير ملامح وجها كلها .. بحيث فز من مكانه للاستقبال بسرعه ..

امه واخواته كلهن يسألن " شكو شبيك "

رحت وراه للاستقبال سد التلفون وباوعلي .. عيونه تلمع من الدموع حاصرهن بالگوة ..

همست " هذال ؟"

رد " مو اكيدة بس لاتحجين اي شي الهن الى ان اتأكد"

بسرعه طلع وخلاني بين شكوكهن واسألتهن ..

باوعتلي هنا " اجاه خبر عن هذال لو شنو ؟"

رديت " مااعرف ماگالي ؟"

صارت حسبة تاخذنا وحسبة تجيبنا .. بقيت حاصرة خوفي بداخلي وساكته ..

اتاخر نسر والقلق زاد ..

خابرت عذورة حسام حجتله كالها هسا اخابر نسر واشوف ..

رجع خابرها.. گالها مايرد ..

زاد الخوف والقلق اكثر عندنا..

هنا تباوعلنا ببرود " شبيجن خايفات هذال مابي شي اذا يرجع يرجعلي يمشي على رجليه "

ردت خاله " ان شاء الله..  ربي يسمع منج "

هنا رغم هي بوسطنا وكلنا يمها وممخليها تحس بشي بس احساس الغربه باين عليها ..

وكأنه غربتها تكمن بغياب هذال عنها ..

‏من بعدك

أحس بالوحدة

ومعي كل الناس ..

وينتابني إحساس

الغربة ويا مره من

إحساس ..!

اجه نسر تطافرنا كلنا .. فتحنا الباب .

باوعتله بتساؤل رد " شبيجن شغله بالشغل خبصتني كل شوية مخابرات "

من شفت وجهة وراحته .. ارتاحيت معناها مو هذال بخير ..

همسلي " الوكت فات بعد ماتسوة نرجع البيتنا خلينا نبات هنا "

هزيت راسي ورحت فرشت بالاستقبال ونمنا ..

تمدد ع الفراش وتنهد ..

" ااااه شذر اااااه لو شايفه من خابروني وگالولي لكوا واحد مكتول ونفس المواصفات التدور عليها .. شصار بيه ..

احس رجلي ماتشيلني اسوق واحس الطريق شطوله الساني مابطل دعاء ..

تالي من رحت طلع الرجال ماعنده اي مستمسكات بايگين كل غراضه وفلوسه وبايگين سيارتة وكاتليه وشامريه ..

من شفته ردت الروح بيه وگلت الحمد لله والشكر..

سألته " وانت ليش خفت مو گلت ماخذته جهة معينه يعني معقولة يكتلوه ويشمروه ؟"

رد " وليش الهم امان ذوله .. لاتنسين هذال عنده ملفات ضدهم واكيد مايتركوه بسهوله الا اذا اتأكدوا من سلامه وضعهم .. واذا حسو بخطر مايخلوه "

شهگت " تحجي صدگ نسر ليش احنة وين عايشين شنو ماكو دوله ماكو قانون "

رد " احنة عايشين بالعراق العظيم حبيبتي يعني كلشي بي مباح وجائز .. "

خفت من كلام نسر كلش .. لحد مانمت واني افكر..  مااعتقد هنا تعيش لو صار بيها شي ..

ثاني يوم رجعت البيتنا .. الصراحة مااتحمل اشوف وضع هنا وحالتها الشبه ميته تمشي بجسد بلا روح

لو عذورة الحالتها تعبانه من العلاج واحسها تقاوم وتتحدى الخاطر حبها الحسام ..

حسام الكان مثل الرحمة نزلت عليها .. لو ماهو كان مااتحملت ولا صبرت لحد الان ..

بكل مرة حسام يفتح موضوع الزواج وهي ماتقبل تخاف انه تموت ويتعذب من بعدها ماتريد تظلمه برأيها

بس احسها ترفض بسبب حالتها وشكلها..

اخواتي هالفترة ناسيتهم..

خابرت سمر سألت عليها فرحانه لان رجعت للمدرسة ارشد مسويلهم نقل ..

تذكرت ارشد هو التكفل براتب بابا والبيت ..

گلتلها اذا اجه ارشد خلي يخابرني من جهازج واحجي وياه ..

سمر ..

بعد مابدينا نستلم راتب بابا .. اشتريت موبايل علمود اخابر شذر بي ..

رجعت للمدرسة وصار طموحي اكمل واوصل ..

كعدت البيت والتفكير بأرشد خلتني اتأذى ..

بعد فترة من المشاحنات بين وبين ارشد .. قررت سحر تعلن استسلامها.. 

بحيث صارت هادية اكثر من قبل .. خلال اشهر قليله تغيرت ..

بس مرات اشوفها تحجي وي ارشد .. لو يگعدون بالحديقه يسولفون..  ومن اجي يمهم تسكت ..

ومن اسالها تجاوبني " ماكو شي مجرد نحجي عن اهلي وحياتنا قبل "

رغم احس ارشد مامهتم ودايما يذكر هاجر ويروح يزورها وحتى غرفته وصورهم مثل ماهي بس سحر دخلت الشك بداخلي ..

بمرة جاي ادرس وهي تلعب لعبه بموبايلها ..

سالتها ..

" سحر انت شغير نضرتج عن ارشد "

ضحكت " يانضرة .. هااا اذا تشوفينا نحجي فهو يطلب يحجي وياي وعود ينصحني وكذا وسوالف المحامين مثله .. بالمختصر يتفلسف زايد "

مااعرف ليش ماصدكتها ..

رغم حجيها وي ارشد خلاها حتى وياي كلامها زين وماتتعارك بعد .. وتگعد يمنا عادي..

وهاي خلصت السنة ودخلنا بسنة 2013 ..

هواي اشياء تغيرت بحياتنا خلال سنتين .. وفاة بابا انتقالنا لهنا ..

موت هاجر .. واخرها اختفاء ماما ولحد الان مااعرف شي عنها بس برود سحر ماطمني رغم جانت دوم تذكرها وتگول وين اخذوها بطلت تسأل عنها ..

حجيت وي شذر وگالت احجي وي ارشد هو علاقته قوية بعمو عامر واكيد مايخبي عليه شي ..

اجة ارشد من الدوام ..

سلم وصعد يبدل ونزل .. سويتله غدا وكعد بالهول ياكل وقمر وياها تلعب بالخاشوگة وهو يأكل بيها ماتقبل الا هي تخلط وتاكل وتطشر ..

حجيت وياها ..

" ارشد شذر رادت تحجي وياك "

رد " وينها هي هنا ؟"

رديت " لا گلتلي خابريني واحجي وياه "

هز راسه " خابريها وانطيها الي "

رحت جبت موبايلي وخابرت ..

صار يحجي وياها وسلم ..

مااعرف شنو سالته تغيرت ملامحه ورد عليها :

" لا مااعرف والله هسا سمعت منج .. البيت ماينياع لان تعرفين الامج حصة بي .. البيت طلع مو ملك ايجار توقعنا البيت ملك "

استغربت ..

من غلقه سألته " يابيت تقصد ؟"

رد " بيت اهلج "

رديت " بس الاعرفه هو بيتنا ماگال بابا لو ماما هذا ايجار .."

رد " لا متوهمة يمكن ماگالولجن حتى خاف تضوجن او تتحسسن "

معقوله اهلي يكذبون علينا .. اتذكر ماما من تحجيلنا شلون باعت ذهب عندها وبابا يشتغل ورواتبه يجمعهن واشترى بيت صغير بالاول كلش ..

وبعدها باعوه من انهزمت شذر .. واشتروا بيت ثاني وجانوا مطلوبين عليه وخلصوا عمرهم يشتغلون علمود يسددون .. ماما جانت موظفة وبطلت لان رواتب قليله وبعد مابطلت سقط النظام وصعدت الرواتب وتندمت تالي رجعت بعد كم سنه وصارت تساعد بابا ..

احس نفسي عايشة بكذبه ومااعرف كلامها صح او لا بس دايما تحجيلنا شلون تعبوا ووصلو اثنينهم ..

شذر :

بسنة 2013 رجعلنا الامل من جديد ..

نايمين واجت مكالمة النسر ..

رد عليها واني جنت بين نايمة وبين صاحية ..

سمعته يگله " هذال هذا انت .. وين جنت يمعود ماخلينا مكان مادورنا بي عليك "

طفرت بسرعه ومامصدگة جان الصبح هستوه طالع ..

كمل مكالمته الماطولت الا دقيقه يمكن او دقيقتين ..

ضحكت " عايش موو هذال عايش "

ضحك وحضني " جنت اعرف وگالولي عايش بس خايف لايدگون الناقصه بي "

اتنهدت " الحمد لله .. يمكن هنا تطير من الفرح لو سمعت خطية صارلها اشهر متعذبه "

رد " بدلي بسرعه خلي اروح ابشرها .. بس لازم هالشي يبقى بينا لمن يطلع "

رحنا الهم من الصبح استغربوا ..

جانت اسراء وهنا مبدلات يردن يرحن للدوام ..

اتقربت هنا " شكو من الصبح خبر عن هذال مووو"

من شافت ابتسامتي ضحكت " لكيتوه موووو نسر احجي گلبي راح يوگف "

ضحك نسر " اي عايش وان شاء الله راجع "

گعدت بالگاع وتبجي .. بعدها سجدت وشكرت الله ..

" الحمد لله ربي مافشلتني ابد .. ليل ونهار ادعي ومافشلتني .. گولي شلون ووين "

گعد نسر يحجيلنا .. الجهة الهذال لازم عليها ملفات ماخذيه وحاجزيه لان اكو محاكمة ضدهم وتحويلهم للجنه النزاهة .. اختفاء هذال ساعدهم حتى تثبت برائتهم وماكو اي مستمسك عليهم .. لان الظاهر بيوم الطلع هذال طالبيه للتحقيق وبيده الادلة ..

فخطفوه حتى يضمنون سلامة موقفهم ..

ردت هنا " الله يلعنهم فاسدين يخطفون بشر علمود مصالحهم ..

رد نسر " زين ماكتلوه مو بس خطفوه واتعجبت اصلا شلون تركوه وهو يعرف الاي حزب ينتمون .."

بعد يومين رجعلنا هذال ..

راحت هنا البيتها نظفته ورتبته علمود خاف يجي بأي وقت ..

هنا :

من سمعت حسيت رجعتلي روحي ..

رحت البيتي رتبته ونظفته وسويت اشكال .. اكل ..

كل يوم ابدل وانتظر ..

الى ان بيوم رف گلبي وي دكة الباب ..

فتحتها جان هو .. بس ضعفان وحالته حاله ..

شفته نزلن دموعي وحضنته. ..

حضني حيل ويتنهد " تعبان هنا "

نزلن دموعي لااراديا من الفرح .. تلكوه الولد اخذهم الحضنه يبوس بيهم ويشمهم ..

ردت اخابر اهلي واخواته ..

گال اريد اسبح وانام تعبان لاتخابرين احد ..

سبح واكل شويه ونام ..

اشرلي تعاي بحضني اريد اشبع منج خفت مااشوفج ولاانام بحضنج بعد ..

دزيت رساله النسر وخبرته بس طلبت مايكول الاحد للعصر ..

فتح اديه نمت بحضنه صرت اشتم بي وابوس .. اباوع الملامحة وفرحانة مامصدگة رجعلي وبحضني هسا ..

للعصر اجو اهلي كلهم .. وخابرت اخواته اجن فرحانات صارت كلها تعتب عليه لان ماحجيت ..

كلراليسألوه رفض يحجي شي او يصرح عن مكانه ..

بس جملة وحدة گالها " بعد مالي عيشة بهيج بلد"

وفعلا بعد ماارتاح قدم تقاعد .. عندة معارف گالولة احنة نساعدك ..

طلب من اخوه الي بالخارج يساعده باللجوء ..

طبعا من سمعت استغربت ..

" هذال شتقصد يعني نطلع للخارج واترك اهلي وحياتي هنا "

رد " اني هنا مالي عيشة بعد هنا البلد المااخذلي حقي لان نزيه وصار ضدي وي الفاسد مااريده… مستعدة تخسريني انت ؟؟"

رديت " لا طبعا اصلا بلياك جنت ميته بس صعبة اترك اهلي صعبة وولدي منو يگول عمي يخليني اخذهم .. مااريد اصير بين خيارين افهمني "

رد " طاوعيني هنا .. لان اذا بقيت هنا مااسكت وابقى ادور وراهم ونهايتي معروفه معناها انقتل  .. بدل ماياخذولي حقي حولوني للتحقيق لان غايب مع انه نسر قدم دعوة والدنيا مگلوبه عليه..  شفتي وين احنة عايشين ؟؟"

وهسا شگلتي هنا ؟؟ تسافرين وياي لو لا ؟؟

#بقلمي_شمس_السعدي

يتبع… ..

حبايب اعذروني حاولت اختم اليوم وماگدرت لهذا جزأتلكم البارت..

انتظروا النهايه بالليل .. احبكم..

لاتنسون تنطون متابعة الحسابي بالواتباد ..

اسعد الله اوقاتكم بكل خير ..

///// البارت الاخيـرررر /////

#قوارير_من_فضة ج2

#بقلمي_شمس_السعدي ..

الحياةُ مواقف و تجارب ... فيها شهد النحل .. و سموم العقارب ..

و فيها شهامة غريب و خذلان الأقارب ....

هناك مواقف أيقظتنا و صنعتنا من جديد .. و هناك علاقات توقعنا منها الكثير ووجدنا منها القليل ...

هذه هي حياتنا ..

نتذوق مرها ونصبر لمذاقها الحلو ..

كنت بين خيارين بعد ماهذال خيرني .. اولادي واهلي وحياتي الاتعودت عليها ..

والهروب معه لبلد مانعرف شنو راح يخبي النا بعد مابلدنا خذلنا ..

رغم الخذلان العشناه هنا .. بس احس كياني وانتمائي ببغداد .. صعب اتحمل يوم مااشم هوى بغداد ..

لو من اطلع بزدحامات شوارعها واتمعن باللوحة المرسومة امامي ..

اطفال يرحون للمدرسة والفرحة مرسومة بوجووهم ورجال كبير حامل عدته ورايح المحله ..

لو مجموعة من طلبة الجامعه الواگفين منتظرين الباص

بغداد بحركة مستمرة ضوضائها كان مثل سيمفونية موسيقية تعزف اجمل الالحان ..

رديت بتوتر " هذال انطيني وقت ع الاقل احجي وي عمي واشوف وضعي "

رد " بس الاولاد بوصايتج .. ليش خايفه ؟"

رديت " ماخايفه بس هم حقهم ترى هم اولادهم ومايقبلون مااريد اطلع بزعل "

رد " بكيفج هنا .. انطيج اسبوع بين مااكمل معاملتي مال تقاعد "

رديت افهم من كلامكم تگلي انه حتى اذا مامشيتي اني رايح مووو"

رد " اموت هنا ومااروح وحدي .. كل عقلج اني خايف من الموت .  خوفي عليج انت والولد.   هالمرة اخذوني المرة الثانية يمحونا كلنا اني وياج والجهال .. البلد مبيوع هنا .. النزيه لو يقتلوه لو يصير وياهم واني مستحيل اتنازل وانذل الهم "

ماما جانت ناذرة تسوي غدا الرجوع هذال ..

عزمونا ورحنا كلنا ..

كانت جمعة حلوة .. اخواتي وازواجهن كلهم ..

حتى غيداء رجعت تنور جمعاتنا بعد وقت طويل ..

مهيمن كمل تجهيز الكوفي بمساعدة نسر .. صح هواي كلفه بس كان راقي وبمكان راقي ايضا..

قرروا كم يوم يسوون افتتاح اله ونروح كلنا ..

بعد ماكملنا غدا .. انجمعنا بغرفة ماما والرجال بالاستقبال بقوا ..

عذورة تشكي من الحاح حسام الزواجهم ..

ردت ماما " امي وافقي الولد تعب وهو منتظر ورايح وراجع ع الاقل تبقين تحت رعايته وگبال عينه ..

اخواتي كلهن ايدنها ..

وشذر ردت عليها " باعي حالتج شلون من يجي لو من تطلعون شلون توردين وتضحكين .. علاجج ودوائج يم حسام وببيت واحد ثقي راح كلشي يتغير وثانيا متعرفين العلاج يطول او لا شنو ذنبه الولد شاب شعره وهو منتظر ..

بعدها ابتسمت اني وفجرت القنبلة ..

" اي عاد خليني احضر زواجج قبل لانسافـر"

هنا الانضار كلها توجهت الي ..

" تسافرين شنو"

ردت ماما " شنو هالحجي وين ترحون "

اتنهدت " هذال قرر نسافر بعد الصار مايتحمل يبقى هنا"

ردت بيداء " تتركون بلدكم واهلكم علمود ناس فاسدة اذا انتو هاجرتوا وغيركم هاجر من يبقى بالبلد بس الفاسد والمرتزقة "

رديت " وقابل هو البلد شلونه .. اطلعي واتجرأي وانتفضي ع الوضع جبناها سنين من نظام النظام اسوء شنو الحصلناه شو بس قتل وموت ودمار .. وبعد وبعد العراق مايهدأ ابد .

اذا هالمرة زوجي رجعلي سالم شيضمن بالمرة الثانية يرجعلي "

سألت ماما " وولدج شلون ؟"

رديت " طبعا اخذهم وياي "

ردت " يعني ماخذين قراركم ومنتهين "

رديت " لا والله اصلا ماقبلت بس بعدين فكرت وشفت كلام هذال منطقي "

سألت " وعمج وليث راح يوافقون تاخذين الجهال "

رديت " طبعا ابلغهم بس اولادي بوصايتي وهو متنازل عنهم "

ردت بيداء " صحيح بس هم مطمأنين لان انت هنا اذا رحتي شلون "

سكتت وفعلا حرت بردة فعلهم ..

اجت اسراء گالت الولد هم يتناقشون بنفس الموضوع ونص يأيدوه ونص لا ..

سألتها " ونسر شگال ؟"

ردت " كال الشي يخصكم بس اذا هنا ماتريد لاتجبرها لان مااگدر افارگ وحدة من اخواتي "

وهذال رد عليه " يمعود اشو صار نت وفيس اكو ونتراسل ونتخابر ماكو شي صعب بعد "

اجة نسر اشرلي گمت .. اخذني للغرفه الثانية وحجة وياي ..

" سمعت من هذال تردون تطلعون .. انت قانعه لو لا "

رديت " صح صعبة عليه اترككم .. بس خلي نفسك بمكاني وانت اكثر واحد شاف حالتي بغيابه .. اشهر ومااعرف عايش لو ميت .. مادامكم بخير احمد الله بس اذا صار شي الهذال مااسامح نفسي ..

مو معناها تركوه يعني نسووه خايفه بيوم وليلة يطلع ومايرجعلي بعد .. لو يقتلوه ..

اتنهد " يعز عليه مااشوف وجهج وضحكتج .. لو من ننجمع وانت بوسطنا .. "

دمعت عيوني " اني الراح افتقد ابوي وحضن اخوي الدافي "

رد وخانگته العبرة .. " سبق وان گلتلجن انت فقارتي الظهري مستقيم بيهن .. كل وحدة بيجن تنكسر ينحني ظهري .. مااگدر اكلج ابقي سعادتج اهم عندي ومثل ماكال هذال اكو انترنيت بعد وفيس ونتواصل "

حضنته وبجيت مااتحملت .. هذا اخوي الماغفت عينه عنا ابد .. تعذب هواي علمودنا .. سفري وي هذال مو راحة النا بس وانما اله هم .. لان ما اريده يبقى شايل همنا لو يصير بي مثل ماصار بعد ماهذال انفقد تعذب بينه وبيني وتأذى من شافني مكسورة .. "

قررنا نخلي الموضوع بينا لحد مايطلع هذال تقاعد وبعدها يقدم لجوء ..

بعد كم يوم بدينا بتجهيزات افتتاح كوفي مهيمن سوينا حلويات ومعجنات ..

افتتحه نسر ابونا واخونا الكبير ..

مهيمن يحب نسر مثل ابوه واكثر . اباوعلة صار شاب ويعتمد عليه تصرفاتة موزونه صح غلط هواي بحياته بس تعلم ..

شذر :

رجعنا من افتتاح الكوفي كانت خالة وبيداء ويانا بالسيارة ..

حجة نسر ..

" يمة حسام حاجاني يريد يسويها مفاجأة العذراء ويتزوجون بعيد ميلادها بشهر الثالث "

ابتسمت اتذكرت هالتاريخ جان نفسه وقت ماصار الحرب وانقصفنا .. كان عيد ميلادها وضاجت وصارت تغلط على بوش لان ماخلاها تحتفل ..

ومن يومها بطلت تحتفل الا احنة مرات نفاجأها ..

هالمرة اذا صدك صار بعيد ميلادها راح تفرح وتغير نضرتها عن هيج يوم ..

خالة ردت " يمة اني هم اريدها تتزوج اليوم قبل باجر .. لان تدري بوضعها وبس حسام يعرفها ويراعيها"

اتنهد نسر " هالولد شگد ظلمناها طلع انزه واحد بعشيرتج كلها "

ردت خاله " يمة عشيرتي شعليها اذا همة كم فرد مابيهم حظ هسا مو حسام اخوها الذيج الماتتسمى بس شفته شلون ادب واخلاق فدوة الطوله "

قررنا نساعدة بتجهيز البيت..

هنا انطت قنفات الاستقبال مالتها ..

لان بدو يصفون غراضهم انطوها كـ هديه البيت حسام وعذورة ..

طلعنا اني وهنا وحسام كملنا كل احتياجاتهم .. المطبخ صغير بس طباخ وثلاجة ..

جانت شاكه لان نترك الجهال عندهم ..

" انتن وين ترحون كل يوم ماتعبن "

ردت هنا " موووو تدرين على وشك سفر فأريد اشتري غراض "

ردت " وليش تشترين ليش بالخارج ماكو سوگ "

بعدها جبت سمر يمي وصرت اخلي الجهال يمها بين ماكملنا كلشي طلع البيت غير شكل يخبل ..

جانت غرفة النوم هدية نسر من معرضهم غرفه تركيه تخبل ..

كل هالتجهيزات وام حسام مااجت ولاشفناها ..

بقت بس عذورة لازمها تجهيزات ..

وهسا اجه دور حسام يفاجأها ..

عذراء :

اجة حسام مثل عادته يجينا بعد العيادة ..

طلب مني نطلع ..

رديت " لاعفيه حسام خلينا هنا مابيه حيل "

رد " والله اخذج المكان يخبل "

رديت " مابيه حيل للهوسة "

رد " اصلا هدوء وماكو منه "

بدلت غصب ورحنا ..

نزل اخذ عشا لان وقت مغرب ..

واجه ..

" لعد اذا اخذت عشا وين رايحين احنه "

رد " هسا تعرفين "

اتجه بأتجاه بيتنا ..

باوعتله ابتسم " مفاجأة ممنوع تحجين "

سكتت ماحجيت شي ..

نزلت فتح الباب .. باوعت للحديقه الورد كبران ومفتح

ضحكت " ياااي باوع حسام شلون صايرة الحديقه كله منك صار فترة مجايبني اشوفها "

دخلت للبيت اتفاجأت ..

جان ماثث كله ومفروش ومرتب وريحته تخبل .

المطبخ مفتوح ع الصالة والحاجز البينهم يمه كراسي وتحفيات تخبل ..

انتبهت للقنفات شايفتهم ..

ابتسمت " هسا عرفت هنا وشذر شعندهم يطلعون يجون لهنا مووو"

هز راسه وابتسم .. عجبني التنسيق اعرفه تنسيق وترتيب هنا ولمسات شذر هم ..

هنا من يومها تحب الديكور وكانت تريد تصير مهندسة ديكور وضحكوا عليها انذاك يگلولها مهنة فاشله..

بس هسا هواي اعرف يحتاجون مهندسين للديكور ..

الصور والتحفيات كلشي بيها راقي ..

ضحك " هااا شنو رأيج "

رديت " يخبل "

سحب ايدي " بعد غرفتنا ماشفتيها "

دخلت للغرفه جانت راقية ..

لفت انتباهي صورة .. منقوش عليها تاريخ ومكتوب بيها عيدي ميلاد حبيبتي وعيد زواجنا .. ومخلي صورة خطوبتنا بيها ..

باوعتله بأستغراب " شنو هاي "

رد " بدون اعتراض بهذا التاريخ زواجنا "

فتحت عيوني " يعني بعد اسبوع شلحگ ؟؟"

رد " تلحگين وداعتج كلشي ماعندنا .. بس ملابس اخذيلج كم قطعه واحنة اصلا نتزوج ونروح للشمال "

حسيته خلاني امام الامر الواقع بمفاجأته ماردت اكسر خاطره .

ابتسمت " هذا هو حبيبي التريده يصير "

حضني حيل وباسني .. الا اعيشج احلى حياة

رديت " ان شاء الله "

حضر الاكل ع الطاولة ..

اكلنا وگعد يخطط .. ع اساس نطلع التركيا نتونس بس خاف عليه اتعب ..

گلتله اجلها لمن اطيب بس مووتنسى هااا

ضحك " شلون انسى بس طيبي الا افررج الاماكن كلها"

كملنا اكل رتب الطاولة ماخلاني اشيل شي ..

الباقي خلاه بسفري گال حرام اذبه ..

بعدها اخذني الغرفتنا ..

اريد احقق شغله متمنيها ..

باوعتله بصدمة ..

ضحك " وين راح بالج لا يمعودة اريد بس تنامين بحضني واشم عطرج "

تمدد ورحت يمه نمت .. اخذني بحضنة دفنت وجهي بصدرة وغفيت .. فعلا محتاجة هيج حضن يحتويني

فزيت باوعت للساعه عشرة ..

" تحجي صدگ ساعه عشرة شلون مخليني نايمة "

ابتسم " قابل مسوين شي غلط انت مرتي "

رديت " حاليا اسمي خطيبتك بعد اسبوع اصير مرتك "

رد " اويلي شيصبرني ماراح يطلع اسبوع بالنسبة الي "

رجعت للبيت لكيت ماما منتظرتني ..

وشذر شگد متصله بيه ..

رديت " طلعتي تشتغلين من وراي "

ضحكت " عجبتج المفاجأة "

رديت " اي بس خايفه "

ردت " لاتخافين ابد فكري بشغله وحدة انه راح تنجمعين بشخص يحبج ويعشقج وهالشي وحدة كافي عيشي حياتج وانسي المرض ثقي من تنسيه راح تتعافين نهائي "

فكرت بكلامها فعلا لازم اعيش حياتي هاي صارلي سنه اتعالج شنو الحصلته حتى لو شهر واحد باقي لازم اعيشه بسعادة "

بديت اجهز الزواجي ..

ماردت اسوي حفله بس هو اصر البس بدلة ..

اجرت بدلة وسما جانت موصيتلي على باروكة .. لان هي عندها صالون وتعرف طلعتني كلش حلوة ..

مثل ماكنت اتمنى .. بدلة وتسريحة ومكياج..

عيوني لا اراديا يبجن من الفرح..

اجاني لابس قاط ابيض وشحلاته .. من شفته مااتحملت صرت ابجي ..

اتقرب مني وباسني ومسح دموعي بيده :

" هاي الدموع يغسلني مااريدهن ينزلن حتى على موتي"

اخذني مثل الملكة صعدت يمه وهو يسوق ..

صارت عيني بعين نسر فتح اديه الي وحضني ..

گال " اليوم سلمتج بيد انسان يصونج ويحبج .. لاعبالج راح اشيل ايدي منج تبقي انت بنتي الصغيرة الربيتها على ايدي ولو ماواثق بحسام ماجان امنت عليج يمة "

وصى حسام عليه وحسام يكله بعيوني ..

رحنا البيتنا بعد مااخذنا صور  ..

جنت خايفه من هاي الليلة ..

البنات جايات ومحضرات كلشي بالبيت ..

دخلت للغرفة ..

واباوع النفسي بالمرايا ..

اجه من وراي حضني .. مااريدج تتوترين .. حياتنا كلها مثل هاي الليلة ..

بدلي وارتاحي وخلينا نتعشا ..

ساعدني بالبدلة جنت خجولة واني احس بلمساته على ظهري .. غمضت عيوني وبديت اتحسس هالمشاعر الجنت حارمة نفسي بيها ..

راد يروح لزمت ايده .. " انت صرت حلالي .. ومادام حبيبتي بهذا شكل وبمرضي وصبرت لحد ماحصلتني فمستحيل اخجل من نظرتك الي .."

ابتسم واتقرب مني .. وبدلي بيده وكأنه طفله بحضن امها .. كملنا طلعنا حضرنا العشا بقيت بالباروكة مانزعتها حبيت يبقى يشوفني حلوة حتى لو جنت حلوة بنضره ..

تعشينا وكملنا ..

رحنا الغرفتنا .. نزعت الروب ونمت يمه .. عشت بحضنه احلى ليلة بحياتي ..

نسيت شي اسمه خوف وتوتر وحتى مرض ..

حسيت حبه هو العلاج الوحيد الدائي ..

شذر :

بنفس ليلة عذورة .. كانت ليلة النا اثنينا ..

سويتلة جو رومانسي شموع والجو بارد وموسيقى ..

اجه تفاجأ .. كنت بكل ليلة اسبح واستغفر عسا وان تكون هالليلة الي ينزرع بداخلي بيها ثمرة الهذا الحب والصبر ..

تذكرت كلام المراة ام صديق نسر .. معقولة مثل ماگالت ومااشوف الطفل الا بعد عشر سنوات ..

درت وجهي النسر واتمعن بملامحه..

" ياالهي لاتحرمني من هذا الشعور .. تسبيحي واستغفاري يبقون نذر عليه مدى حياتي وكل يوم بس ارزقني بطفل ينور حياتي "

بعدني بس غفيت… رن الموبايل…

فزيت شفت خاله تخابر ..

كعدت نسر بخوف ..

" نسر خاله تتصل "

فز " خير ياستار "

رد " الو يمة هااا خير .. ملوكة شبيها .. هسا هسا جاي "

سبح بسرعه وبدل وطلع وبالي يمة .. گالتله ملاك انشمرت .. والدكتور منبه عليهم ماتنشمر كون ..

بقيت للصبح گاعدة منتضرة…

خابرني الصبح .. گال استقرت حالتها بس احتمال صابتها نوبة صرع .. وهالشي يأثر على وضعها ..

جابها يمنا كم يوم ..

كال مااگدر امن عليها هناك يم امها ..

بقت ملوكة بينا وبين امها حتى تعودت على دنو ماتريد تعوفها ..

علاقتي تحسنت ببيت جدي ..

وصرت اروح وارجع الهم ومرات نسر وياي ..

سحر نوعا ما تغيرت وصارت تحجي وياي .. مو ذيج التعيط وتحجي بنتر ..

سمر زينة بدراستها وكل سنه تطلع امتياز .. بعكس سحر ماكانت تحب الدراسة كلش ..

خالة مرات اروحلها بس دايما تخابرني مشغلة بالحسن والبنات لان دوام عندهم وامتحانات ..

اما اسراء فتزوجت بمنتصف السنة وقدمت معهد قضائي بتشجيع من زوجها واخيرا راح تحقق ✔ حلمها

مابقى بالبيت بس خالة وبيداء ..

اترجتنا خالة انه نرجع نعيش يمها لان البيت فارغ ..

نسر ماقبل لان يعرف ماارتاح بذاك البيت وشنو شفت بي وذكرياتي الموجودة هناك ..

تفاجأت بجية خالة الي ..

رحبت بيها ودخلت. 

سويت جاي وكعك ووياها جايه فروحة ..

اشرت للبنات " روحن امي بالغرفة اريد احجي وي امج بشغله "

باوعتلها بأستغراب " احجي خالة صاير شي ؟"

ردت " ادري يمكن گلبج شايل عليه لو لا .. بس ادري بروحي غلطت هواي بحقج..  جنت انانية وفكرت بس بأبني وبولد اله .. ويمكن الله ماقاسملة ..

وبالنتيجة اذيتج واذيت ابني وتأذينا كلنا منها ..

ماادري وشجاني انعمت عيوني عنج .. رغم ماشفت شي منج مو زين من يوم الاجيتي البيتي لليوم انت خادمتني وخادمة بناتي ..

صرت بنت الي واخت البناتي .. لدرجة يحبنج اكثر من اخواتهن وشفتي شسون وشلون يدافعن الج وحتى البيت مادخلله بعد مارجعت هديل ..

بس هسا البيت صفا عليه اني وبيداء .. واريدج ترجعين انتي ودنو ونسر . تعرفين نسر ابني الوحيد ومااريد اموت وهو بعيد عني ..

ماعرفت شرد الصراحة حقها ..

بقت تتوسل ولزمت ايدي مبينه ندمانه .. جيتها الي وكلامها ازاح كل عتاب بداخلي ..

رديت عليها " الترديه يصير خاله احجي وي نسر ونرجع ان شاء الله "

انتظرت نسر يجي وحجيت وياه جان رده " شنو الغير رأيج مو گلتي ماارجع لهناك بعد .."

رديت " بس هسا الوضع تغير امك وبيداء وحدهم .. مهيمن من الصبح النص الليل بالكوفي لو وياك بالشغل بعد منو الهم .  "

اتنهد " اعرف هذا مو كلامج بس خلص مادام انت تردين هالشي نرجع بس هااا يبقى هالبيت بيتنا وعشنا الي نسترق بي اجمل الليالي "

ابتسمت " اصلا هالبيت بي اجمل ذكرياتنا ومستحيل استغنى عنه "

رجعنا للبيت الجبير .. بس بعد مانقل نسر غرفة خاله وكعدنا بمكانها ..

نظفت البيت ورتب غرفتنا اني وبيداء ..

سمعت موبالي يدگ ..

رقم غريب ..

رديت استغربت " ماما ؟"

ردت " عبالج متت مووو"

رديت " لا اصلا ماسكتت وشگد سألت بس محد نطاني جواب "

ردت " عوفي مكاني بسببج تشتتنا بس ردت ماتسألين عليه بعد .. وديري بالج على اخواتج اعتبريهن امانة "

سألتها " انت وين هسا وشلون عايشه وحدج "

ردت " اني مو وحدي الي الله .. بلحظة خسرت كلشي بسببج "

رديت " ليش دايما تحمليني الذنب .. قابل اني الخليتج تخسرين اهلج وناسج هنا .. خليتيهم يكروهنا ومايستقبلونا بس هسا كلشي تغير .. نسوا او غلقوا السالفه ويمكن اذا رجعتي وتجمعين اخواتي محد يگدر يحاجيج .."

ضحكت بأستهزاء " بعديش .. لايغرج بيت جدج احتوجن عمي بيده حكم عليه ومنع اقترب منجن كل حجته خاف صيرن مثلي "

رديت " فهميني ماما شسوولج وانت شفتي جدو "

ردت " ماكو داعي تفهمين اني بخير واعرف اخبارجن توصلني بس خلي عينج من اخواتج كفري عن ذنبج بيهن "

وغلقت الموبايل ..

خلتني بوسط دوامة .. كلامها كله الغاز وكانت بكل كلمة تحملني ذنب .. وكأنه اني الكلتلها اهملينا وخلي ينهش بينا .. مبين من صوتها زينة بس وين هي ومنو وصللها ؟؟"

تذكرت ارشد من جنت ببيت جدو حجيت وياه وطلبت يعرف مكان امي من عمو عامر لان علاقته قوية بي

معناها هو الگاللها ..

بس ليش مايكول وشلون وصللها ؟؟

حجيت وي نسر عن الصار گال " معناها مامهزومة يعرفون مكانها بس مايردوجن توصللها "

سالته " وليش السالفه صارلها هواي وماتت بموتت بابا بعد ليش مايخلوها تنجمع ببناتها ووبيت وحدهن "

رد " ماكو شي يبقى على حاله سنه سنتين ينكشف كلشي المهم عرفتي هي بخير "

خابرت خاله وحجيتلها استغربت ..

" معناها اكو سر او سعد مثل مااتوقعت يكذب عليه "

سالتها " يعني ماتعرفين شي "

ردت " وروحها الامي مااعرف ولو اعرف اگلج شتدرين بيه "

مرت الايام والاشهر ..

وهنا بعد ماتقاعد هذال .. قدموا لجوء وكملوا اوراقهم بالاول طلعوا اللبنان بيومها الليل كله مانمنا ..

سهرنا للصبح سوالف وجمعت كل اخواتها يمها .. عمها وليث ماقبلوا وصارت هواي مشاكل وليث راد يشتكي عليها مما اضطروا يطلعون بسكته وخلوهم تحت امر واقع لان عندها امر محكمة بالتنازل يعني مايگدر يطالبها بيهم ..

عذورة بدأ وضعها يتحسن الحمد لله ..

واسراء صارت قاضية وحامل ..

للصبح ودعناهم بدموع .. فراگهم راح يكون صعب علينا. 

بس بقت متواصلة ويانا هناك وتخابرنا ع موبايل نسر ونحجي صوت وصورة ..

بعد فترة طلعوا عن طريق منظمة الهولندا استقروا هناك ..

بنتي يوم عن يوم تكبر ومابقالها شي وتدخل الاعدادية ..

شاطرة حيل ومن المتميزين .. فروحة بعكسها ماكلش تحب الدراسة ..

بس بعدهن اثنينهن بنفس المدرسه مايتفارگن مشتاق باع سيارته وفتح محل لان صارت عنده فقرات من السيارة والدكتور منعه من السياقه ..

كان الوحيد هو الامن على بناتنا وياه .. اضطر نسر لو ميهمن يوصلهن ..

طبعا بيداء من عرفت عندي اخوات طلبت وحدة منهن المهيمن ..

جانت تضحك وتگلي " اريد اغير نسلنا شوية بلكي يطلعون الي احفاد حلوين مثلج "

من راويتها صورهن تخبلت " وج هاي شنو يخبلن عليج شوفيلي وحدة منهن "

رحت البيت جدي وحاجيتهن .. سحر استهزأت بيه

" لا عيني اني يوم الاريد اتزوج اخذ شخص احبه ويحبني مو اي واحد "

اعرفها مستحيل تتحمل وي مهيمن او تتحمل سحر عينها بالعالي ..

اما سمر كان ردها " لا شذر اني اريد اكمل بعدني "

اخذتها على جهة " بس لاذيج السالفه بعدهي ببالج "

ردت " ماانكر ارشد بعده ببالي .. بس مو هذا سبب رفضي لان ارشد اصلا حجاها وگال بعد هاجر مااتزوج حتى احمد ومحمد خطبولهم هنودة ورونق وراح يعقدون وهو مايقبل يگول مااتزوج..  اليخليني ارفض هو دراستي ومستقبلي اريد اصير محامية "

ابتسمت " مثل ارشد يعني وتكولين مو ببالي "

اتنهدت " محترمة قراره بس مو معناها اكدر انساه مااحس اكو رجال يحلى بعيني هو الشجعني ادخل قانون اذا نجحت من السادس وگال اني اساعدج .. عسا وان بيوم يحس بيه ويتغير كلشي "

ماردت اضغط رغم كلتلها ارشد اكبر منج ودتشوفيه مايفكر بالزواج حرام تضيعين نفسج بس هي كاتمة بداخلها حب مستحيل لاهي تگدر تخلص منه وتنساه ولا تگدر تبوح بي وترتاح "

هديل بعد مامرت سنتين وهي عايشه وحدها وي بنتها توفى ابوها بنهايه سنة 2014 ..

قررت تاخذ بنتها وترجع الاهلها .. واتفقت وي نسر اسبوع يمها واسبوع يمه ..

بس ماطاولت كم شهر وخابرت الخاله گالتلها ملوكة حالتها فد مرة تعبانه خلي يجي نسر ياخذها مو تموت ويبليني ..

وفعلا كانت ملوكة شبه عايشة .. تنشمر كل شوية وتفقد مرات الى ان صحينا بيوم لگيناها ميته…

تدمرنا كلنا بيومها…

نسر حضنها ويشم بيها ..

خاله تگله " الله رحمها احسن مما تتعلعل من تكبر "

وجان يعيط ومايقبل " يكلها قابل اعيش عمري كله اراعيها واتعب بس ماانحرم من ريحتها..

كم يوم هو بلا اكل ولا شرب .. صارت روحه بدنو…

يخاف عليها من الهوى يگول مابقتلي بس هي مااتحمل خسارتها ..

بجيت بيومها وصعدت للسطح بحرگة گلب احجي واشكي ..

" ربي مثل اخذت ملوكة بالجنه ارزقني بطفل يبرد گلبه ويريحه "

الغريب هديل ابد مااجت من عرفت ماتت من خابرتها خاله لطمت وبجت بس مااجت ..

بداية سنه 2015 كانت حزينة بوفاة ملوكة ..

لكن فرحتنا كبيرة بشفاء عذورة نهائي من المرض ..

بس كان حسام متابعها دايما ويسويلها تحاليل ..

جانت تتمنى يصير عندها طفل بس حسام يأجلها يخاف عليها ..

وبينما كنا ننتظر طفل العذورة ..

صار الماجنت متوقعته .. حسيت بدوخة وتعب بالفترة الاخير حتى الشهيه قطعتها ونحول عندي ..

نسر من شافني تخبل اخذني للدكتورة وهناك اجتني الصدمة بعد ماطلبت تحليل حمل ..

ماصدگت من عرفت حامل حضني وصرنا نبجي سوية ..

يأست بعد محاولات كثيرة وبعد كلام المرأة .. صدگ كلشي بيد الله شنو الخلاني اصدگ بكلامها يمكن لان گالت العذورة انت مريضه وطلعت صدگ ..

رجعنا للبيت وبشرنا خاله صارت تبجي وتدعي الله يرزقنا الولد ..

خابرنا عذورة بشرناها اجت .. وبيومها تعشينا برة عزمنا نسر ..

حملي جان صعب كلشي لدرجة خلصتها نوم ونحول وارق ..

مر شهرين ورحت راجعت .. سوتلي سونار وهنا المفاجأة .. من عرفت بيه توأم .. الدنيا ماسعتنا ..

المفاجأة الثانية من سويت سونار بشهر الخامس وعرفت بيه اثنين ولد ..

خاله طشت جكليت وهلهلت .. ونسر صار يبجي ويحضن بيه ..

ووصى امه وبيداء مايخلني اگوم ابد ..

خاله من سمعت فرحت .. وتگلي صبرتي والله نطاج

فعلا صبرت هواي ودعيت وبجيت والتزمت بصلاة الليل والتسبيح والاستغفار وماتعبت ابد . وهاي النتيجة توقعت عشر سنوات بس بعد خمس سنوات نطاني ومو واحد اثنين ..

صارت ولادتي بشهر 11 من سنه 2015 ..

بيومها وصلت الموت .. سوتلي الدكتورة عمليه لان حالتي تعبانه خفت لايصير بيهم شي ..

جان عندي وهواس مو طبيعي ..

طلعت من العمليات وبعد مافكني البنج .. شفت الكل يمي خاله والسيد وبيت جدو واخواتي وعذورة وحسام وكل الاحبهم ..

جدو اذن بأذنهم وسميناهم حيدر وكرار لان جان طالبهم على اسم الامام علي ..

اباوع النسر عيونه حمر من الدموع ..

اتقرب مني وباس راسي ..

همست " اولادي مابيهم شي "

رد " كلشي مابيهم يخبلون والله "

نسر من اول يوم بدأ برحله السهر .. للصبح نتناوب عليهم .. مرات خاله تاخذ واحد منهم يمها بس مااتحمل اتركه ..

كل شوية اشم بيهم وابوسهم اخاف عليهم من الهوى دنو جانت تحبهم حيل…

حتى ملابسهم هي تغسلهم عني مرات لان تعرف سهر واتعب ..

حياتي تغيرت للاحسن .. كلشي اتمناه من الله نطاه الي

الاهل والسند والاولاد ..

خالة متفارگهم ابد مخليتهم يمها بالنهار وشايلتهم ع گلبها فرحانه بيهم حيل ..

بسنة 2016 وبرمضان…

صابتنا فاجعة هزت بغداد كلها ..

سمعنا بأنفجار الكرادة .. بيداء من سمعت تخبلت…

لبست وطلعت مثل المخبله ..

نسر بالدوام خابرته ..

" الو نسر سمعت بالانفجار .. بيداء طلعت متخبله "

رد " شبيها خبله شلون تخليها تروح "

رديت " لعد شلون غير ابنها "

راح يدور عليها المشكله مهيمن مختفي .. للصبح احنة هاي گعدتنا .. للفجر رجعوا كلهم…

نسر ضايج ومبين باجي ..

جان يسولفنا عن الحادث والجثث المفحمة وعيونه تجري ..

وبعدها صدمنا بخبر استشهاد مشتاق جان هناك هو ابنه عنده محل واثنينهم مالهم اثر ابنه صغير خطية مو جبير عمرة يمكن عشر سنوات ..

تخبلنا من سمعنا وخاله صارت تلطم سمعنا عياط بالشارع بس ماعرفنا المن .. لبست عباتها وراحت الاهله…

صح حان غريب عنه بس من يوم الاجيتهم وهو عايش بوسطنا بأسمه .. امين لدرجة مايشيل عينه ابد .. سنين وهو يشتغل بالسيارة لمن تعب تالي لمن قرر يرتاح وباع سيارته والعنده فتح بيهن محل اجته المنية اخذته ..

مشتاق من بين هواي ناس وشباب وشياب لهمت اجسادهم النار .. بشهر فضيل وعلى ابواب عيد ..

كان هالعيد النا حداد ..

اعلنه العراق اجمع .. الحمد لله ان مهيمن الكوفي مالتة بعيد عن الحادث..  والا كانت بيدااء ماتت هي بس سمعت وگعت وتخربطت ..

فترة طويلة وصورة مشتاق ماتروح من بالي .. لو امه وزوجته وحالهم بعده ..

اتكفل نسر بيهم من ذاك اليوم ومن اموال عمة خديجة وي البيوت الكافليهم ..

مرت السنين…

وسمر عاشت صدمة كبيرة او الصدمة الي اكبر كانت ..

من عرفت ارشد خطب سحر

..

سمر ..

من بعد سنوات طويله من وفاة هاجر مر خمس سنوات وهو باقي على وفائه ..

اني حققت حلمي الجنت اتمناه وجنت لاهيه بالدراسة مااعرف شوكت وشلون صارت بينهم مشاعر لدرجة ينسى الفارق بينهم ويخطبها ..

كانت سحر متوقعه هالشي لا بل واثقة ..

لان من حاجاها جدو دنگت وابتسمت وگلتله

" بكيفك جدو "

وخاصه بالفترة الاخيرة سحر تغيرت حيل بتعاملها وي الكل ..

دخلت وراها للغرفه ..

" من شوكت "

باوعتلي " هااا ماادري غير هو خطب "

رديت " مو جنت تضحكين عليه وتكولين شعجبج بي "

ردت " ياااا هاي لسا تتذكرين صارلج سنين ودخلتي جامعه معقولة ماشفتي واحد يناسبج .. بس المفروض بعد تنسين لان ارشد اختارني وراح يصير زوجي .. لاتسوين شغله تتعيرين بيها بالمستقبل ..

ضحكت بألم " اني اتعاير .. هسا ثبتي انت فعلا بنت ماما مو تكولين جذابات وماما ماتسويها هاي انت سويتي سوايتها .. بس مثل ماهي مااتهنت انت مستحيل تتهنين "

طلعت مهظومة خابرت شذر ابجي صارت تهدأني .. وتوصيني اصير قوية وانسى ..

وفعلا حسبته اخوي رغم الالم البداخلي بعد ماسنين عشت بآمال هسا لازم ابدد هالامل والمشاعر البداخلي

خلصت الفترة مابعد زواجهم يم شذر ويم خاله بس رجعت علمود قمر ماتگدر بلياي ..

مرت عمو علاء سمعتها بأذني گالتله جنت رايدتلك سمر لان حبابه وتحب بنتك ..

بس صدمني من گالها " وگلبي يمه ماتفكرين بي "

معناها يحبها شلون وشوكت ماادري ..

بالوقت الكنت اخفي مشاعري عنه .. هي كانت تبني مشاعر بينهم .. وخلته خلال خمس سنوات يحبها لدرجة يترك وفائه وعهده الهاجر ويتزوجها ..

اكتفيت بقسمتي من الدنيا..  ورضيت بالمقسوملي

تخرجت وتعينت ودوامت وطبعا ماهملت ولاتركت قمورة ..

كم مرة خطبتني اخت نسر الابنها ورفضت .. حتى وجهي طلبت شذر نسوي عمليه بس جنت اخاف ومازلت اخاف يتشوه وجهي او يمكن عناد وي حالي ..

هنا:

عشت بالخارج مرتاحة تحسنت علاقتي وي بنت عمو وصرنا نخابرهم ويحجون وي الجهال ع النت. 

وعدتهم نجي بس تصير فرصه ..

العرفته عنهم قصي متزوج غير رغد وصاير عنده بنيه

وليث تاركته شجن وراجعه يم اهلها بأربيل وهو باقي كل يوم وي وحدة بعده مااتغير ..

اما اني فهذال ممنقص عليه شي اولادي هم اولاده احسن تربيه واحسن مدارس مدخلهم ..

شذر :

اولادي يكبرون گبالي عيني اول خطواتهم كانت بمثابة فرحة النا. .

نسر يفقد من يجي اجازة مايطلع ابد يخلص الوكت يمهم . ومن يروح للمحلات مرات ياخذهم وياه بس يخاف عليهم. 

خاله ماصار عندها طفل بعد الحسن .. وزنوبة تخرجت وتزوجت بقت بس مروة يمها ..

عذورة صار عندها ولد واحد بس لان حسام ماخلاها  تحمل بسرعه يخاف عليها لان هي بعد الجرعات بقت ع العلاج .. ويخاف يأثر عليها رغم كانو متخوفين من الطفل لا يطلع بي شي بس الحمد لله طلع سالم ..

اما مريم فعرفت صار عندها ولد واخذته وطلعت الامريكا بعد ماطلگها زوجها لأسباب مامعروفه ..

اما بنوتي دنو حبيبتي فهي اليوم طالبه بكلية صيدله تعبت وربيتها وماضيعت تعبي .. اتمنت مجموعه طبيه بس مااعرف شنو صابها وتمرضت بالسادس ماخلينا مكان مااخذناها بس الحمد لله ع صحتها صح ضاجت وانقهرت ورادت تعيد السنه بس نسر ماقبل گالها مامستعد اخسرج علمود الطبيه ..

لان شافها شگد تعبت وتمرضت ..

ماما فيما بعد اكتشفنا زواجها من عمو عامر وهذا السر الجمع ارشد وسحر .. حتى بعد زواجهم جانت تروح وتلتقي بيها وماتگول .. لولا معرفه سمر بالصدفه..

كانو مايگولون خوفا على مشاعر زوجة عمو ام هاجر وبحجة ماما كانت مجبورة وماكانت قابله ..

للان تحملني الذنب وماتحجي وياي او تخابرني ..

هاي اخر محطات حياتنا .. قوارير جمعنا قدر واحد وكانت لنا حكايات مختلفه وذكريات عديدة ..

قد تأخذنا الظروف بعيداً .. وإلى حيث لا نعلم .. وتشغلنا زحمة الحياة .. وكل منا يبحث فيها عن الاستقرار والطمأنينة ..

ولكن رغم هذا وذاك تبقى بيننا ذكرى طيبة بالنفس وتبقى الأرواح متعلقة ببعضها ..

هذه حياتي مع بقية القوارير التي لم اتوقع يوما ستأخذ حكايتنا هذا الصدى الواسع ..

اتمنى انكم استفدتم منها ومن اخطائنا فكلنا بشر وجل من لايخطئ .. ادعوا لنا بالسعادة وترحموا لمن تركونا وفارقوا حياتنا.. 

حافظوا على بناتكم واسمعوهم لو تكلموا..  كونوا اصدقاء لهم قبل ان تكونوا اهل .. اجعلوهم يثقون بكم كي لاتندموا فيما بعد ..

محبتي لكم جميعا..

[ احبتي .. والى هنا وصلنا للنهاية .. لكن حياتهم مستمرة ادعوا لهم بدوام الصحة والسعادة .. اتمنى انكم استمتعوا مع قوارير من فضة وان اكون قد وصلت لكم الرواية على اتم وجه .. اعتذر اذا قصرت بيوم معاكم .. واشكر كل من تابعني واشاد بروايتي .. رغم كل العراقيل التي حاولت ان تمنع استمرارها الا انكم وقفتم معي وساندتوني وهذا دليل محبتكم لي ..

شكرا لكم ودمتم اينما كنتم ملتقانا معكم برواية جديدة بأذن الله ]

"واخيرا .  فقد اكملت لكم هذا البارت بصعوبة لانني تلقيت قبل ساعات خبر وفاة شخص عزيز صدمني للغايه ارجوا منكم في هذا الليلة ان تدعوا له بالرحمة والغفران وتقرأون اله الفاتحة اسمه "احمد ابن كظيمة"

صباح الورد عليكم احبتي ❤

بارت بالاحداث الجديدة لقواريرنا.  

#قوارير_من_فضة

#شمس_السعدي

وقفت أمام ذلك الطريق وذلك الدرب الذي شهد تاريخ ماضيي المؤلم وذكرياتي ..

فلم أجد إلا أطلال زائله ومتهالكه وبقايا عمر رحلت نحو المجهول وذكريات باليه لن تعود وأحلام ضائعة بين الأيام والشهور ..

هناك من يسترجع ذكرياته ليرسم ابتسامة خفية وهو يتذكر ذلك الماضي الجميل ..

الا انا !!

فذكرياتي بدأت من ذلك اليوم الذي عرفتك به ..

فوجودك اصبح ماضي وحاضري ومستقبلي ..

شهر 11 من سنة 2019 ..

بغداد مو مثل عادتها .. طرق مسدودة .. والبلد كله مگلوب مضاهرات تختلف عن سابقاتها ..

شباب وصغار وكبار .. الكل طالع والسبب سوء الاوضاع بالبلد ..

تعب الشعب وهو يطالب بأبسط حقوقه ومايلگاها رغم احنة بلد الخيرات والدول عايشة بخيرنا ..

اكو مثل خالة دوم تحجيه .. ( من لحم ثوره وطعمه ..)

لكن الوضع صار مايطمن من بداية الثورة للان والشباب دتنصاب وتستشهد ..

بيداء خايفة على ولدها .. مهيمن من اول يوم هو وي اصدقائه ودور اخذ حمودي اخوه وياه. .

وتخبلت اكثر عليهم .. نسر مشجعهم لهذا بيداء ماتكدر تحجي بس هو مراقبهم وكل شوية يخابر يكلهم ابقوا بالتحرير ولاترحون الاي مكان ..

واي شغب ابتعدوا عنه .. حتى طبخ نطبخ ويجون ياخذوه ..

اليوم عيد ميلاد حدوري وكروري ..

سبحتهم وطلعتهم .. تلگتهم خالة تهوس وتصفگلهم

( عطايا الله عطايا كبار .. ردنا واحد نطنانا ثنان )

وهم يگمزون بوسط الهول ..

نزلن فروحة ودنو من فوگ .. ووراهن بيداء ..

تقربت دنو الاخوتها .. اخذت المشط مني تمشط شعرهم الاشقر ..

تالي سحبتهم وصارت تعضعض بيهم .. بالاول بدأت بحدوري ..

تعضعض بي وكروري يدفعها ..

" عوفيه لاتاكليه ختية "

تركت حدوري وسحبته " لعد اكلك انت .. امممم طيب"

وهذا يضحك ويكركر لان تدغدغه ..

سألت فروحة " خالة مو ع اساس تسويلهم حفلة مثل كل سنة توصين ع كيك "

رديت " متشوفين الوضع ياامي .. وينه ووين الحفله "

ردت خالة " يمة خطية ماتشوفيهم فرحانين وصارلهم شكد منتضريه .. سويلهم كيكتين وخليلهم شمعه يطفوها وهاهي "

باوعت البيداء .. مشغوله تتصل بمهيمن وهو كـ العادة مايرد بس على نسر .. لان يعرف امه تبقى تحجي وتگله ارجع ورجع اخوك ..

سألتها " شگلتي بيداء تسويلهم كيك انت لو ماتگدرين "

ردت " لا اني اسويلهم اذا مااسوي للحلوين المن اسوي وهم اشتت تفكيري شوية لان راح اتخبل من ورى ولدي فوگاها هذا حمودي يدزلي صور رسوماته ويخبلني اكثر"

رديت " وليش تتخبلين بالعكس شجعيه .. اصلا اله مستقبل يخبل ولاتوقعت هيج يرسم حلو شفتهم شلون مسوين الشوارع حلوة .. اصلا هالمضاهرات ثبتت عندنا مواهب تخبل لكن حرامات مدفونة ومالهم مستقبل بالعراق "

ردت بيداء " اي والله گلبي ديتگطع من اشوف هالشباب الحلوة هيج متبهذلة والحكومة ماتهتم "

سألت خالة " يمة هم خابرتي رجلج وين ماوين صارلة كم يوم ماكو "

هزيت راسي " اي خابرته گال بلكي احاول اجي .. تعرفين الوضع وانذار صعب يجي "

اتقربت دنو تراويني صور زينة .. " ماما دشوفي يخبلن واني مشترية من زمان الزينة خلينا نسويلهم ع الاقل بس علمود الصور "

ابتسمت " سوي الترديه ماما ع الاقل تغيرن جو شوية"

ردت فروحة "اي والله اختنگنا حتى دوام ماكو ولاتقبلون نروح وي صديقات دنيا كلهم ديرحون ويسعفون المصابين ليش متخلونا "

عاطت بيها بيداء " هي هاي البقت اخوانج اثنين وانت الثالثة وبيداء تكعد تلطم هنا .. لج هي ولد وخايفه عليهم "

رديت " احنة مو مانعيجن بس خالج يخاف عليجن الوضع تأزم اكثر ومانعرف وين تصفا من خوفنا عليجن مانخليجن ترحن "

ردت خالة " كافي سدن الموضوع وگومن زينن مدري شتسون .. "

گمنا اني وبيداء للمطبخ .. جهزنا الكيك .. اجت دنو وفروحة ساعدونا .. سوو خلية نحل وشكر لمة ..

والتوام يتعاركون ع ننعجانة بيها عجين كيك يحبوه لان بي كاكو ..

خابرت عذورة " هلو حب شلونج "

ردت عذورة " هلو شذورة الحمد لله بس تمار مريض شوية "

رديت " ياعيني شبي .. واني اگول اليوم شعجب ممداومة "

ردت " اي والله حسام اخذلي اجازة وهو اليوم خفر"

رديت " لعد تعالي يمنا اليوم عيد ميلاد التوأم واصلا احنة مانسويه بس هيج بيناتنا لان خابصيني والبنات ضايجات .. "

ردت " يروحي حبايب عمتو .. شلون نسيتهم اني ولو تمار ممخليني اشوف طريقي والله .. مرات اگول الله يساعد شذر شلون مسيطرة ع التوام "

ضحكت " لان عندج دوام هيج تحسين اني ماعندي شي ولاتنسين خالة متخليني احس بيهم "

ردت " اي ماما متعلقة بيهم حيل حتى صرت اغار تگلي من يجي ابنج يغارون ولد نسر خطية "

رديت " اي عيني نحنا الاصل .. ولو خاله متفرق تحبهم كلهم اصلا بيوم الماتجيبنهم تضوج "

ردت " اوك لعد نلتقي بس راح اخابر اسراء تجيني بسيارتها وهويتها ندخل .. "

رديت " زين لعد راح اخابرها قبلج اعزمها "

غلقته منها وخابرت اسراء .. گلتلها تجي وتجيب الاولاد ووصيتها تمر بعذراء هم تجيبها وياها  ..

بعدها وصيت دنو ع اخوتها ودخلت للغرفة اريد ارتبها

فكرت اغير شوية تغيير وارجع الايام قبل ..

رن الموبايل .. باوعت هاي سمر. .

ابتسمت اعرفها حاسبتلهم ما تنسى عيد ميلاهم ابد ..

رديت

" الووو كل عام وحبايب خالتهم بالف خير "

ابتسمت " فديت الخالة التذكرهم واني اكول شعجب اتأخرت اليوم "

ردت " اليوم بقيت يم بيبي مالها خلگ كلش "

سألتها " خير شبيها "

ردت " سكرها مرتفع وتعرفيها من تتمرض تصير روحها بيه وبجدي "

ابتسمت " الله يحفظها النا ماكو بحنيتها "

ردت " اي والله ابد صارتلي ام وابو .. امي ماتسأل عني وتسأل ع سحر بس "

اتنهدت " هم تعرفين اخبارها ؟"

ردت " اي مرات احجي وياها من موبايل سحر تعرفين ماتخابر بس عليها .. بس هالمرة صوتها مو زين ماعجبني يمكن مريضه "

اتنهدت " شنو علاقتها بعمو عامر معقولة نست بابا ؟"

ردت سمر " لا اني اكلج اصلا مجبورة عليه .. لان سحر دوم تدعي عليه وتكول ظالمها واريد اطلع ببيت وحدي علمود اخذها يمي واخلي جدو يطلگها منه "

رديت " ليش سحر تريد تطلع ببيت ؟"

ردت " اي هالفترة مشاكل هي وارشد على هاي السالفه حتى ابنها عند مرت عمو علاء ماتدري بي.  وهي حابسة نفسها فوگ تنزل تاكل وتصعد .. ودور مرت عمو شادة وياها تريد طفل الارشد ثاني لان تشوف هنودة ورونق كل واحدة صار عندها اثنين وثلاثة وسحر ماكو لسا "

رديت " خاف هم مثلي .. شنو هالوراثة يربي معقولة كلنا نطلع نفس ماما "

ردت " ماادري بس مرت عمو كالتلها روحي الدكتورة وسحر عاطت بيها تكلها هاي حياتنا اني وارشد لتتدخلون بينا "

اتنهدت " اوووف سحر اعرفها رعنه ماتتحمل زين مرت عمو عامر مادرت ؟"

ردت " لا مااعتقد لو درت تگلب الدنيا هي اخذله فترة مايجي عمو عامر للبيت تخبلت وزعلت گالت اكيد عنده وحدة يروحلها لمن جدو قنعها انه هو دزه بشغل "

سألتها " ليش هو مايبات يم ماما "

ردت " لا مايبات بس مرات "

استغربت "شلون يأمن يتركها وحدها "

ردت " ماادري شذر اصلا اني مثل الاطرش بالزفه واصلا عازلة نفسي اجي من الدوام انام واكعد اخلصها يم بيبي اشوف احتياجاتها هي وجدو وقمر هم ادرسها خطية ماتريد غيري "

رديت " هاي الطفله قاهرتني حيل .. لا ابو ولاام "

ردت " مرت عمو علاء وعمو علاء مامقصرين عنها واني هم متعلقه بيها كلش وابوها هم يموت عليها بس مشغول ومايفرغ لهذا مو هواي تشوفه "

رديت " لاتبررين اصلا ارشد متغير حيل مو مثل ماعرفته ومن ضم علينا مكان ماما ضجت منه كلش جان يكول اني اروضها وتالي هي روضته "

سكتت سمر لان اعرفها ماتحب تجيب سيرته .. سكتت هم ماردت اضوجها ..

حاولت اغير الموضوع وكلتلها " تجين للعيد ميلاد مال كروري وحدوري "

ردت " شنو حتسووه مو كلتوا مانسويه "

رديت " اي ع اساس مااسويه لان الوضع دتشوفيه ونسر انذار بس خاله طلبت بيناتنا نفرحهم لان خطية منتضريه يوم يوم "

ردت " يروحي بوسيلياهم بس اني مااگدر اجي منو يجيبني وبيبي هم مااگدر اتركها غير مرة اجيهم واجيب هداياهم "

سديت التلفون منها .. صارت عيني ع صورته ..

ابتسمت ..

ولاعبالك غايب كم يوم كأنه سنه بالنسبة الي ..

دزيتله رساله " حبيبي فارغ ؟"

اتصل بسرعة " حتى لو مافارغ .. اترك كلشي علمود اسمع صوتك ياحلو "

ضحكت بصوت لااراديا ..

" اويلي ياب .. لاتخبليني عاد .. منتظر ع نار شيجيب الليل واجي اشوف العيون الحلوة "

ضحكت " كبرنا عيب "

رد " ليش هو الحب يعرف عمر .. اصلا حلات الحب بالاربعين .. "

ضحكت " فديت الاربعيني مالتي يعني اكيد تجي الليله "

رد " ايون الليلة يمج اين المفر "

ضحكت " كافي سوالفك ترى استحي "

رد " تدرين شذرتي شگد يعجبني خجلج رغم سنين طويلة صارلنا سوة وانت من اغازلج احس بعد ذيج البراءة بعدهي بيج .. وهالشي يخليني احبج اكثر .."

رديت " الظاهر صدك طلعت مشتاق گمت تتغزل وتمدح بس تريد الصدك اني حموت من الاشتياق .. "

سأل " شلونهم ولدي خو ممتعبيج "

رديت " يگمزون من الصبح يردون عيد ميلاد "

رد " لا شذر فشلة ووينه ووين العيد ميلاد "

رديت " لاتخاف مو مثل كل سنه عزيمة وديجي وهالسوالف هي كيكتين وكم شمعة "

رد " اي حبيبتي عفية .. بس شلون سالفه هاي اني مواعدهم بسيارات كبار ع الرمونت اجيبلهم هسا وين الگي "

رديت " لا تزاغل انت مواعدهم من زمان شوف اي بيجي يبيع ويدزولك توصيل "

رد " الله كريم اشوف "

كملت المكالمة .. رتبت الغرفه وغيرت الديكور .. احب التغيير احس نفسيتي ترتاح ..

ساعدوني البنات ..

فرشت فرشة حلوة تركية اخذتها من تركيا من رحنا ذيج السنة ..

خليت شموع وعطرتها وطلعت ..

كملنا غدا اجو البنات عذورة واسراء وغيداء ..

عذراء بعد ماضعفت صارت تخبل ..

اسراء جانت ضايجة مااعرف شبيها ..اخذت خاله ودخلن للغرفة ..

خلت عذراء راسها بالگدر .. ليش مگلوتلي مسوين برياني جان ماتغديت حسام حارمني من هيج اكل كون كله صحي .. مايقتنع خلص طبت " ..

ضحكت " غير يخاف عليج واصلا احنة سوينا هواي عبالنا تجن ع الغدا "

ردت " لا مو اسراء كالت بعد الدوام امرلج .. شوكت تسون العيد ميلاد هسا ؟؟"

رديت " لا لليل وصيت لفات شاورما وكباب ونسويه سويه وي العشا علمود نسر يجي "

كحت " عيني عيني اليوم حبيب الگلب راح يجي اگول مبدلة ومعدلة "

رديت " يااا هو شلابسة قابل فستان هي گلبية "

ردت " عمي هي گلبيه لو قفطان .. ندري بعد ماتخيطين واعتزلتي بس مو تخيطين النفسج بس وتحنصينا "

ضحكت " لج گلتي اريد ومااخيطلج .. هاي اخيط من وراه مايخليني علمود عيوني .. بس الصراحة ماكو دشاديش حلوة .. اضطر اشتري قماش واخيط بيدي صدگ مو جبتلجن قماشات من تركيا يخبلن وينهن "

ردت " ذيج تسمع حسج غير اليكرم يخيطها وينطيها قابل احنة خياطات "

ضحكت ع سوالفها ولاتبطل ..

رحنا للاستقبال دنيا وفرح مسوياته يخبل ..

بنتي طالعه ع عمتها هنا بالديكور والترتيب محد يلحگها ..

ع طاري هنا اتصلت .. ضحكت عذورة ..

" بنت الحلال بذكرها "

اتصلت فيديو .. فتحته .. سلمت علينا كلنا ..

" شلونكم ياااي كل سنة تتجمعون هيج وتحنصوني "

رديت " لا مو مثل كل سنه هالمرة بيناتنا .. سما والاء مااجو هم والوضع "

ردت " اي الله يساعدكم نسمع اخباركم ونضوج وكل يوم هذال يثبتلي قراره صح انه طلعنا للخارج "

ردت عذورة " وج صايرة حلوة هيج هولندا تحلي وين طالعين "

ردت هنا " مو بحلاتج عيني صايرة تخبلين وين تمار شوفينيا والتوأم وينهم "

درت الكاميرا عليهم فرحانين ويگمزون .. شافوا عمتهم اجو يحجون وياها ويبوسون بالكاميرا .. دايما تخابر فيعرفوها ..

والعام التقينا بتركيا كانت ايام حلوة ..اخذنا خالة ويانا وصاروا يبجون اثنينهم .. صح كل يوم تخابرنا فيديو بس اللقاء شي مختلف ..

ماطولت هواي بالمكالمة گالت من تسوون العيد ميلاد خابروني .. لان ديطلعون ..

اجت خالة واسراء ..

گعدنا كلنا سوالف وضحك ..

راحت دنيا تبدل .. اجت صرت اباوعلها بفخر .. تذكرت اول مااجيت الهذا البيت شلون كانت ..

صغيرة بلا ام ولا اب .. شفت نفسي بيها اثنينا كنا محتاجين بعض .. ربيتها هي عوضتني واني عوضتها احسها شريكتي بالقدر ..

الطفله الي ربيتها بنتي وبكري اعتبرها .. اليوم هي شابة ودكتورة .. كم سنه واشوفها واگفة بصيدليتها ..

عيوني غرغرت بالدموع واني اتذكر ذيج الايام ..

باوعتلي ابتسمتلي .. حست بيه وفهمتني من عيوني ..

اتقربت مني وحضنتني ..

" ماما احبج "

حضنتها " يا روح امج انت "

گامت تبوس بأخوتها ..وخالة تخاف عليهم تكلها مو هيج لاتضوجيهم ..

ابتسمت .. خالة نفسها الجانت ماتريدني .. دخلت انسانة بحياتي حطمتني ورادت تفرق بيني وبين نسري نفسها هسا الي تگلي انت بنتي .. بناتي مايراعني بكثرج ونفسها هسا الي طايرة ع ولدي وتموت عليهم وتفداهم بروحها .

لو اسراء .. ضحكت ..لسا اتذكر يوم الي خنگني نسر جوة الدرج .. جان متوحش وعصبي .. وهي عبالها بينا شي ..

من يومها كرهتني ونصبت عداوة وياي ..

هسا نفسها من تريد شي من نسر تخابرني اني احجي وياه.  

لان دايما مشاكل وي زوجها وممتصافين ..

ع سالفه نسر يگول . " اكبر غلط واحد يتزوج من نفس مهنته .. هو قاضي وهي قاضية شي طبيعي مايتراهمون "

اتنهدت .. ااااا يالسنين بالعجل مريتي علينا .. بس الحلو انه هالسنين غيرتنا للاحسن . صرنا عائلة كبيرة وحلوة ونسر كل اجازة يجي بيها يجمعنا كلنا سوة ويخابر اخواته حتى هنا نفتح فيديو وتعيش الاجواء ويانا ..

خالة والسيد هم يمنا دائما .. نسر يحب السيد كلش ويحترمه وخالة هي وخاله ام نسر متراهمات بالفترة الاخيرة .

حتى بيداء وخاله صديقات حيل ويمكن تخابرها اكثر مما تخابرني ..

اذن اذان المغرب صاحت خالة ..

" يلة گومن صلن واذكرن ربجن "

گمنا للمطبخ اندگت الباب اجة ابو التوصيل جايب العشا الوصيناه عليه ..

طلعت بيداء حاسبته .. اخذوه فرح ودنو يرتبوه خالة گالت لايبرد خلوه من يجي نسر  ..

صلينا وكملنا ..

دخلت خليت مكياج ورتبت نفسي شعلت الشموع وطلعت..

صار گبالي نسري وعشقي وفرحتي ..

هستوه داخل رايح جايب مهيمن وحمودي وياه ولد بيداء. 

من شفته شهگت .. جان شايل التوأم ويبوس بيهم ..

باوعلي ابتسم .. وعيونه تغازلني وكأنه يريد يلتهمني بنظراته ..

بعده نفس وسامته .. والشيب البشعره زايده وسامة ..

سلمت عليه وبسته عادي استحيت من اخواته ..

سلم ع خالة وباس راسها ودنيا حاضنته مثل الطفله

سلمت ع مهيمن وحمودي ..

بس عيوني تركض وراه مثل الطفلة المشتاقة الابوها

اي هو حبيبي وابوية وكلشي الي بالدنيا ..

صاحت خالة " يلة جهزن العشا بين ما اخوجن يسبح ويبدل "

كح هو وباوعلي " ام دنو عيني جهزي الحمام وملابسي واشرلي اروح للغرفه "

ابتسمت اعرف سوالفه ..

دخل للغرفة وصيت البنات يحضرن الكيك واللفات . والببسي ..

دفعتني عذورة " دروحي احنة نكمل ماتشوفيه يغمز ويرامز عباله مانشوفه "

ضحكت ع حجيها ..

رحت وراه للغرفه لگيته دينزع ملابسه ..

باوعلي ابتسم وسحبني الحضنه ..

" هاي شنو الغرفه تخبل .. هيج مشتاقتلي "

ابتسمت واني اتلمس بوجهة .. " مشتاقة الكلشي بيك "

قرب انفاسه الاذني غمضت .  همس " الكلشي الكلشي "

دفعته حيل " نسر صاير كلش مو گلتلك استحي لاتحجي هيج "

رد " شتستحين ماتگليلي اشو محضرتلي الملعب ومجهزته وترديني بس اشوت بي "

عفته ورحت للكنتور اطلعله ملابس سحبني من ظهري وسحب شعري وهمس ..

مشتاق حيل ماتخلينا هنا مانطلع ..

ضحكت " والتوأم يخلوك غير يكسرون الباب هم مامصدگين اجيت "

رد " يلة الليل طويل ملحوگه "

طلعتله ملابس " ديلة اسبح كلها منتظرة "

اخذ تصبيرة وراح يسبح ..

رحت للاستقبال لكيتهن مجهزات كلشي ..

عاطت عذورة " عيني مو جعنا لاحگين ع الغزل "

اشرتلها ع دنو وفرح مااحب يسمعن هيج حجي ..

ضحكت " وج وين خطية تعبان راح يسبح "

اولاده واگفيله بالباب كل شوية يكلوله " يله بابا بساع بساع كمل "

طلع من الحمام مشط وتعطر واجانه..

ابتسمت من شاف الاستقبال .. مهيمن ضاج ..

بطرانات انتن احنة وين وانتن محتفلات. 

عاطت بي امه " شفتنا راگصين داگين . هو العراق من ضيم الضيم جبناها حروب وموت ودم من ذاك الوكت الهذا الوكت حقك ماوعيت .. شلون ندفن روحنا فوگ غضب الحكومة علينا "

اشرلها نسر .. مايقبل تعامله هيج دائما يحسسه انه هو رب البيت من بعده وهالشي انطاه ثقة كبيرة ..

رد نسر " عوفونا من سوالفكم خلوا اسودي يطفون الشموع "

شعلنا الشموع والتوأم يگمزون .. مارتاحوا الى ان طفوا الشموع. 

وخاله تگلهم گولي يارب ارزق ماما بأخو النا قبل لتطفون الشموع .

هاي كل سنه خالة تتمنى هيج امنية .. اضوج وانقهر لان مو بيدي ..

نسر يباوعلي ويبتسم ويغمزلي .. يدري بيه اضوج ومايحسسني ..

مرات يردها ويگلها " يمة شسوي بيهم عندي دنو واخوتها كافيين الحمد لله والشكر "

احس بي يريد بعد بس مو بيدي يمكن هم ذولي وبعد خلص ماكو غيرهم ..

التهينا بالكيك والاكل والهدايا .. غيداء نطتهم فلوس لان مالحگت تجيبلهم شي .. بس هم شمروهن عليها ماقبلوا ياخذون .

ممعودتهم ع فلوس شيردون نجيبلهم ..

كل الهدايا عندهم بجهة والهدية المنتظرة بجهة ثانية ..

صاروا يسألون عن السيارات ونسر ضاج خطية لان موصي عليهن ومااجن ..

وعدهم باجر ياخذهم يختارون بنفسهم يله اقتنعوا ..

كملنا ونظفنا الاستقبال والمطبخ .. البنات بيومها باتوا يمنا ..

كل اللفات والكيك الزاد خليته المهيمن بحافظات واخذهن الاصدقائه گلوله سهرانين وجعنا ..

طبعا راح بدون علم بيداء بس گال الخاله وراح لو تدري ماخلته .. محمد ما راح وياه بقى نايم ..

قفلت البيبان ودخلت للغرفه نسر يم خالة واسراء يسولفون الظاهر عندها مشكله وي زوجها..

بدلت ورتبت نفسي ..

بقيت گاعدة منتظرة التوأم بالليل ينامون يم خاله بس لان خالة بالاستقبال .. كل شوية جايين يمي ..

دخل نسر باوعلي ابتسم ..

" يلة بابا يله روحي يم بيبي خلوني اشبع من امكم "

طلعهم وسد الباب .. اتقرب مني وهمس ..

محبوبتي ..

دعيني أذوبُ في خمرِ الشّفاهِ والعنق

ولاتجعليني أستفق من سكرتي حتى الغسق

باوعتله وضحكت لان يغازلني بالفصحى .. هو بطبعه يحب يكتب خواطر فصيحة ..

بعدها طلع شوقه الي .. صارلنا هواي مامفترقين هيج

تعودت عليه بالليل ما انام الا وهو يمي ..

صحيت الصبح لگيته يريد يبدل ..

" صباح الخير "

" هلو حبيبتي "

سألته " شنو راح تلتحق ؟"

رد " لا بس اولادج من الصبح كسروا الباب علينا ماسمعتيهم "

رديت " لا ماسمعت "

ضحك " حقج ياب "

شمرته بالمخدة " بطل سوالفك ترى ..   "

قاطعني لاعمي كلشي ولاتهدديني مو كافي اطلبج كم سنة حارمتني بيهن "

ضحكت " صارلك سنين ومانسيت "

رد " شتدرين بيه اضيع حقي .. لا طبعا.   اخذه مربع منج "

خليته يبدل وكمت سبحت وبدلت .. لكيت التوام منتضرين ..

ريكتهم وي ابوهم وطلعوا ..

سويت ريوگ للبنات .. گعدنا تريگنا كلنا ..

وبعدها راحوا لبيوتهم ..

داسوي غدا والبنات ينظفن ..

خابرني نسر ..

" اكلج شذر دزيتلج الولد بيد قصي .. "

رديت " ليش انت وين ؟"

رد " اني رايح اشوف مهيمن سمعت متصوب "

شهكت " يمة اسم الله "

رد " لاتبينين البيداء ابد لمن اشوف شنو السالفه "

مااعرف شصار بيه .. لااگدر احجي ادري بيها تتخبل .. ولا اگدر ابين ماكو شي وجهي اصفر وايدي ترجف گامت ..

جانت بيداء تخبز برة شلون راح اطلع گدامها اذا اجه قصي وجاب الاولاد ..

دخلت الخالة دتنوم ابن عذورة .. رفعت راسها حست بيه. .

سألت " خير شكو ؟"

سديت الباب وتقربت منها " خالة نسر خابرني احتمال مهيمن متصوب "

ضربت ع وجهة " يايمة وج مات لو متصوب "

رديت " ماادري ماادري بس بيداء شلون .. نسر گال لتگلولها لمن اتأكد وهسا قصي راح يجي يجيب الولد دزهم نسر بيده وخاف يحجي گدامها .. "

صارت تدعي كون مابي شي .. همست ..

" تعاي نيمي الولد انتي .. واني اطلعله " ..

بقيت يم ابن عذورة انوم بي وبالي يمهم شفته نام غطيته وگمت ..

فرح ودنيا فوگ ينظفن بالطابق الفوگ..

اندگت الباب گلبي صار يدك سريع .. بقيت واكفه بالباب اباوع .. لبست خاله حجابها وطلعت ..

بيداء بالممر تخبز .. دگت عليه شباك المطبخ ..

اجيتها .. سألت " هذا قصي شعنده ؟"

رديت " هااا ماادري خاف نسر عنده شغل ودز الولد بيده "

ماطولت وياها خاف تشك بيه لان جسمي كله يرجف ..

اجو كروري وحدوري يسحلون بالسيارات مالاتهم فرحانين ..

تلگيتهم ساعدتهم لان كبار مايگدرون يسحبوها ..

وهم اسمع قصي شنو يگول الخالة ..

لان بقت تحجي وياه بالباب ..

كالها " والله عمة ماادري بس كالوا صار رمي رصاص حي ع المتضاهرين ومايعرفون منو يضرب من غير القناصين يضربون عليهم "

وگف گلبي من سمعت .. " سترك ربي استرنا .. احفظه ورجعه بالسلامة ماناقصنا قهر وحزن ماصدگت حياتنا مستقرة والحمد لله "

دخلت ولدي ودا ادخل صارت عيني بعينها ..

"لعد ماما ليش واگفه ميدخلون جوة "

رديت " مستعجل بس هي دتسأله ع بنته وزوجته حامل بطفل ثاني مادريتي ؟"

ردت " ياصلوات .. اي يمكن ماما گالتلي .. خطية رغد ع الاقل لو يصير عندها "

ماعرفت شأكلها اخترعت سالفه من وحدي ..

دخلتهم اصروا افتحهن .. فتحتهن صعدوا بيهن يسوقون .. نزلن دنيا وفرح يمهم ..

تركتهم ورحت .. دخلت خالة ضايجة..

شافت بيداء كبالها گالتلها " يلة يمة شعندج صارلج ساعه هن خبزات "

ردت " ماادري يمة شو عبالك العجين بي بركه اخبز وبعد "

دخلت خالة للمطبخ..  همستلها " ها خالة بشري "

ردت " ماادري هم قصي مايعرف شي وشلون اتطمن وهاي الغبرة تموت وراه لو صارله شي "

رديت " لا ان شاء الله ماكو شي .. راح ادخل اخابر نسر واشوفه "

دخلت للغرفة اخابر ..

جاوبني بسرعه " ها عيني .. شوفي لاتخوفن بيداء مهيمن مابي شي بس صاحبه متوفي بحضنه ومتخبل وضغطه مرتفع وهسا احنة بالمستشفى "

رديت بخوف " منو من جماعته "

رد " رزاق شريكه بالكوفي  .. مضروب بدخانية براسة وساحبه مهيمن الحضنه وهذا باقي يرافس بحضنه لمن مات "

نسر يحجيلي ودموعي تنزل لا اراديا . اوووي عيني الله يساعد امه .. الله يساعد مهيمن هذا مو بس صديق بالنسبة اله اخو يعتبره .. من الجامعه لسا هم سوه ماتفارقوا .. "

سديت الموبايل .. بقيت ابجي ع الشباب الحلوة الراحت .. بيداء تراويني مرات بالفيس شلون ينضربون ويموتون .  مااتحمل شحال اهلهم هسا.  

دخلت خالة شافتني ابجي .. تخبلت وعاطت ..

عبالها مهيمن شو شصار بي ..

بيداء ستوها مكملة وداخلة للمطبخ سمعتها تصرخ ..

اجت .. اريد اسكتها مااگدر ..

گابلت بيداء وتلطم.. ابنج راح ابنج راح يغبرة ..

بيداء هي سمعت وگعت من طولها ..

ركضت عليها ..

" شبيج خالة خبلتيها مهيمن مابي شي شويه ويجيبه نسر ويجي ليش هيج سويتي وخبلتيها لو مجلوطة لو ميتة ؟؟"

جابن البنات ماي غسلت وجهها وشربتها صحت وگامت تبجي ..

رديت عليها بسرعه " مابي شي والله مابي شي هسا راح يجيبه نسر وتشوفيه "

ردت " لاتكذبين عليه شذر ابني بي شي ؟"

نزل محمد يركض جان نايم ..

" شكو شصاير ؟"

رديت " خابرني خالك .. رزاق صديق مهيمن مستشهد "

ضرب ع گصته " لا بربج .. مايستاهل والله .. انعل ابو هيج حكومة لا بو هيج حياة .. ليش شمسوين شمسوين وننقتل هيج ..اكيد مهيمن متخبل راح ابدل واروحلهم "

صحت بي " خالك مايقبل ..اصلا هو بالمستشفى وي مهيمن واهل رزاق يكملون ويجون "

رد " يامستشفى اروحلهـم "

عاطت بيداء " بعلي لو طلعت الا اكتل روحي .. كافي راح تموتوني ناقصة عمر .. كافي هبطة اخوك بيه "

بقينا منتضرين للظهر يلة رجعوا .. مهيمن عيونه وارمة من البجي .. وكانولة بيده وشحاله ..

تلگته بيداء تبجي حضنته وهو حضنها ويبجي ..

" لج يوم الضربة الي مو اله .. هي جاية عليه بس هو اجه يركض صار گدامي اجت براسة..  لو ماصاير گبالي جان بيه وگعت "

ردت خالة " هذا حد يومه امي .. يبست ورقته بعد "

اشر نسر " خلوه يرتاح وينام ضغطه مفول بي بخت مامجلوط "

ردت بيداء " مو هينة عليه يعتبر اخوه "

رد مهيمن " هو اخوي اخوي وراح مني .. مات جوعان يمة .. يكلي كون هسا صينية مفطح وتجيني الا اكلها كلها من الجوع مامتريگ جان .. تالي راح راح لسا مامصدگ والله "

رد نسر " كافي مو زين عليك ..يخالي شفنا الضيم .. اعزاز هواي راحت گبالنا .. هذا العراق المفروض نتعود عليه ولاتصدگ ينصلح .. من گلتلك خالي التسووه مابي فايدة .. مادام هيج حكومة بي مايتغير شي ماسمعتني وگلتلي ..

" خالي انتعشت جيلك .. خلونا نعيش جيلنا ونغير الماگدرتوا تغيروه "

وتالي ياخالي راحت ضحية هالتغيير شباب مثل الورد ولك والله ابجي دم عليكم بس شبيدنا احنة مامتكاتفين قسمونا المايخافون الله "

ردت خالة " كافي سدوا الموضوع .. وانتي فرح افرشي الاخوج بالاستقبال خلي يرتاح "

ردت بيداء " خلي يتغدا بالاول "

رد مهيمن" مااريد غدا .. رزاق مات جوعان واني اكل مستحيل "

مهيمن انتكس بعد هالحادثة .. حتى اكله قليل ..

رغم مريض بس بعد مادفنوا رزاق ورجعوا ..  رجع المكانه ..

ماسمع لا الخاله ولا الامه ..

كالهم لازم ابقى .. اذا جنت وحدي فهالمرة الي والرزاق اتضاهر .. هاي امانته الي ..

تغيرت الاوضاع ودخلت ناس غير ناس بينهم وكم مرة حاولوا يخربون التضاهرات ويقمعوها الخوف زاد على ولدنا والشهداء كثروا ..

ولاحياة لمن تنادي .. خلصت السنة ودخلنا بسنة 2020

هالسنة الي اخذت منا هواي ناس واعزاز واولهم بيبيتي

اطيب شخص عرفته من اهلي بعد خالة سماهر ..

ببداية هالسنة ظهر وباء لعين ..

اسمه كورونا .. بالاول ظهر بالصين ..

وكانت الاصابات قليلة جدا .. بحيث الاغلبية ماانطوه اهمية..

رجعت المدارس ودرسوا وامتحنوا نصف السنة وكملوا ..

لكن بأواخر الامتحانات عطلت المدارس لان ظهرت اصابات بالعراق ..

هنا خفنا .. وخاصة ع اولادي لان مخليتهم بروضه

نسر وصاني ماادزهم بعد ..

لاخر لحظة ماصدگت بهذا الوباء بس حسام اكدلنا انه فعلا اكو اصابات ..

ولان يخاف على عذراء .. طلب منها انه تاخذ اجازة بدون راتب وتگعد بالبيت ..

اول اصابة عندنا صارت هي السيد رجل خالة ..

من سمعنا تخبلنا ..

خابرتني خالة تبجي ..

" وج شذر السيد مصاب "

شهكت " اسم الله منين اجاه "

ردت " ماادري بس يمكن من شريكه جان بإيران واجه ماحجر نفسه وماكال مصاب لمن صاب السيد وياه "

سألتها " وهسا وينه ؟"

ردت " اجت الاسعاف اخذتة وعفروا البيت وطلبوا نحجر نفسنا بالبيت .. بس اني خايفه ع الجهال خاف هم نصابوا"

رديت " منين اجتنا هالمصيبة خالة .. ان شاء الله ماكو شي لاتخافين انت مؤمنه والسيد مؤمن اكيد الله يبعدها عنكم "

سديته ورحت الخالة ابجي " خاله السيد رجل خالة مصاب "

شهكت " بس لاننصاب احنة هم منين اجاهم "

رديت " شنو السالفه خاله منين ننصاب من الموبايل

اشو صارلنا شهر ماشايفيهم من المضاهرات الكورونا بعد وين ننصاب "

صارت تدعيله خاله . نسر من عرف هم ضاج .. وصيته مايختلط بأحد ويلبس كمامة وتعقيم دايما يعقم ..

صارت بيه حاله نفسية بذيج الفترة ..

ليل ونهار اعقم البيت .. حتى المسواك اعقمة يله ادخله للبيت ..

ومن يجي واحد من برة اعقمة من فوگ لجوة ..

اليوم صار بالنسبة النا بسنه .. حظر واخبار سيئة ..

من يكولون اكو اصابات جديدة تصير بينا حالة نفسية ونخاف اكثر ..

بيتنا انقسم نصين .. نص يخاف وماخذ احتياطه

ونص ثاني مثل مهيمن والبنات يكولون هو وين اكو كورونا .. هاي سووها علمود يقمعون المضاهرات ..

وخاله تعيط بيهم من تشوفهم متهاونين بالمرض ..

انقطعنا عن العالم ..

نسر صار مايجي بسبب الحظر..

بيت جدو ماشايفتهم باقيين ع الاتصالات واحد يطمأن ع الثاني..

البشرى الحلوة .. هو لمن خالة خابرت وبشرتني انهم سوو تحليل وكلهم طلع سلبي .. والسيد هم بسبب مناعته القوية تشافئ ..

هنا ارتاحيت وايقنت انه الينصاب ممكن يتشافى ..

گمت اكثرلهم عصير ليمون وبرتقال خبلتهم بي وفيتامينات انطيهم علمود المناعة ..

مااعرف شلون مرت هالايام .. ويوم بعد يوم بعد اسبوع واشهر ..

صارت الناس تتعايش وي المرض ..

واكو مايخافون  ويطلعون عادي ..واحنة لا اعياد ولا مناسبات نطلع بعدني خايفه ع ولدي وعائلتي ..

من يطلع نسر اتعارك وياه ..

وخاصة حسام وعذورة يداومون بالمستشفى فأخاف لاينصابون ..

بسبب الحظر ..

زادت مشاكل اسراء وي زوجها .. واخر شي تركته واجتنا ..

نسر ماقبل ع تصرفها . 

" بلة ماتستحين عندج اثنين اطفال منه وتتركيه "

ردت " ماياخذ كلامي كم شكوى تجيني ع شغله والصراحة صرت استحي ابررله "

رد " وانت شعليج هو شغله واعرف بي تقبلين واحد يتدخل بقضاياج "

ردت " اني مو مثله مااغلط "

عاط بيها " شنو ماتغلطين نبي انتي .. لاتخلين داء العظمة يسيطر عليج وتخسرين رجال يحترمج ويقدرج ولاتنسين هو الشجعج وخلاج تصيرين قاضيه تالي تتكبرين عليه "

ردت " صرت بتعبي وشهادتي مو هو السواني "

عاط بيها " انتي تعبتيني وماتاخذين حجي . بس يجي رجلج ترجعين وياه وتبطلين تتدخلين بشغله هو قاضي قبلج ويعرف مو انتي التعلميه من زمان يكلي حاجيها لاتتدخل بشغلي "

ردت " يعني يشكيلك عني مووو بسيطة "

ضاج نسر وگام " لا الصراحة انت ماتنحملين وزين منه حملج كل هاي السنين وخلف منج طفلين "

ردت " انتو مجتمع ذكوري لان رجال تدافعله "

صفگ ايده وهز راسه " لاحول ولاقوة الا بالله .. اروح ارتاح احسن . يلة شذر امشينا "

گمت وراه للغرفه ..

" لاتتعصب هي هاي اسراء قابل جديدة عليك "

رد " لا شذر مو هيج ماكو رجال يقبل مرته تتدخل بشغله وتريد تسيطر عليه "

رديت " يعني هو قاضي وهي قاضيه شتتوقع يتراهمون "

هز راسه " اعرفهم مايتراهمون ومايستمرون اذا بقت اختي بهيج عقلية "

رديت " الضحية اولادهم .. اكبر غلط سوت واحد بعد الثاني .. اتذكرها ماجانت رايدة احمد بس هو اصر تجيبه وهم تعاركوا وبعدها اتفقوا بس هالطفل .. ااااه اكو ناس تتمنى هالنعمه "

حضني " الحمد لله الله ناطينا اثنين طيور وزهرة بينهم بعد شنريد ؟"

رديت " الحمد لله ناطينا وزايد هم "

اخذني الحضنه واكيد مايبطل سوالفه .. حضنه بالنسبة الي ملاذ امن ارمي بي كل همومي وافكاري وانام بسلام ..

بعز نومتنا وفزيت ..

" نسر انت اليوم عقمت لو لا من رجعت من برة "

ضحك " انت صار بيج وهواس مال تعقيم ..والله دخلت للحمام وعقمت بعد شتردين "

ابتسمت " غير علمودك وعلمود ولدنا وخاله هم ماعندها مناعه "

رد " طبعا حبيبتي اذا مااخاف ع نفسي اخاف عليكم وخاصه انت سكر ومناعتج قليلة .."

بقت اسراء عندنا كم .. وبعدها اجه زوجها يحجي وي نسر يرجعها ..

وصار واحد يرفع وواحد يكبس وعبالك گاعدين بمحكمة ..

اخر شي گالتله .." بعد مالي عيشة وياك طلگني "

هو تعصب وگالها " اني هم مليت صار سنين متحمل مشاكلج واكول لا مركزي ولاسمعتي تسمحلي افضح نفس واطلگ .. بس مادام انت رايدة خلص نتطلگ بس الجهال عندي ."

ردت " تحلم ولدي عندي ومستحيل تاخذهم مني "

عاط بيهم نسر " انتو شنو ماتحترمون ناس بينكم واكفه وين انتو بمحكمة .. طلكتوا وحكمتوا بالحضانه بكيفكم . هاي انتو الدارسين والفاهمين هيج تفكرون ..لاعتب ع الجهلة .. انت روح وخليها فترة هنا وفكروا زين باولادكم قبل نفسكم .. ولاتاخذون قرار تندمون عليه "

زوجها طلع وهي بعد مارزلها نسر سكتت ..بس ماقبلت ترجع وبقت يمنا فترة طويله ..

بهالفترة سحر وارشد هم متعاركين وبينهم مشاكل وع اساس متجاوزة ع مرت عمو علاء .. ومرت عمو مخيرتهم لو هي لو سحر بالبيت ..

وهالفرصة سحر تتمناها من زمان .. انه تعزل ببيت وحدها ..

طلب ارشد مهلة من اهلة بين مايرتب اموره ويطلعون

وخابرت اني سحر رغم اعرف ردها بارد وياي ووصيتها تعقل بس اعرفها متاخذ بنصيحتي حجتها انه مرت عمو تتعارك وياها وتعيرها بالخلفة ..

بيداء قررت تخطب المهيمن .. بس مهيمن قافل وماقبل يتزوج .. رغم جنت متمنيه تكون سمر من نصيبه ..

بس من سمعته مرة يكول الامه يريد دنيا .. استغربت

دنيا اصغر منه بهواي .. واصلا تعتبره مثل اخوها حتى حجاب ما تلبس منه ..

شلون وشوكت هيج مهيمن انعجب بيها .. صح احبه واحترمه مثل اخوي بس دنيا تختلف . دنيا اريدها تختار بقناعتها وبرضاها ..

الغريب انه بيداء ماحجت ابد بالموضوع ولافتحته ..

اني هم سكتت ..

صارت گبالي .. دنو حاولت اعرف رأيها ..

خليتها گبالي وحجيت ..

" ماما دنو شنو رأيج بمهيمن "

ردت " شبي ماما من ناحية شنو ؟"

رديت بتوتر مااريد افتح عينها .. " يعني مثلا اذا واحد خطبج بعمر مهيمن تقبلين "

ابتسمت " ماما شبيج متوترة وتستحين تحجين .. اني عمري حيصير 21 سنة .. يعني افهم شنو قصدج مو صغيرة اني كبرت .. بس من كبرت شلت وياي تربيتي الربتيها الي لحد هاليوم .. من اتصرف اي تصرف يصير كلامج گبالي .. علمتيني اكون صديقه الج قبل لا تكونين ام الي .. "

استغربت وفرحت بنفس الوقت " هاي شوكت كبرتي "

ضحكت " اووووه من زمان بس انت عبالج بعدني ذيج دنو التعرفيها "

اخذتها الحضني وبوستها .. همستلي " ماما مهيمن دز فرح الي "

باوعتلها بأستغراب .. " شگالتلج ؟"

ردت " يريد يخطبني منكم "

اخذت نفس وباوعتلها بتساؤل .  جاوبتني من غير مااسأل ..

" شوفي ماما .. من صغري واني اعتبر مهيمن اخوي. الجبير . وحمودي وفرح نفس الشي .. ابد مايوم اعتبرتهم غير شي .. لدرجة من گالتلي فرح صرت اضحك واكلها دا يتشاقه .  لان مستحيل اشوفه غير اخو الي .. ماما اني حاليا دراستي اهم من الزواج بس بيوم الي اكبر واحس نفسي مستعدة الهيج خطوة اكيد مو مهيمن الاختاره "

حضنتها واني مفتخرة بكلامها .. بودي اعيط " هاي بنتي .. اني كبرتها وربيتها "

اعتراضي ع مهيمن مو فقط ع العمر مااني نسر اكبر مني بهواي .. ولا ع الشهادة لان هي دكتورة .. بس بنتي واعرفها .. دايما تتمنى تاخذ شخص مثل ابوها يحبها ويدللها .. ولان هم متربين سوة مستحيل راح تنظرله او ينظرلها بنفس نظراتنا اني ونسر ..

مهيمن بعد مااخذ جوابه من فرح بخصوص دنيا ..

ما دخل احد بينا ولا امه حجت .. رغم عرفت هي ماقابله من البداية وگايلتله اريد بنت كبيرة وواعيه الك يمكن كلنا مانريد نصدگ انه دنو وفرح خلص كبروا ..

بعد اشهر  ..

خابرت سمر تبجي .." شذر بيبي وجدو انصابوا .. واعتبرونا كلنا ملامسين واخذوهم للحجر "

صرت الطم وابجي " بيبي وين وشلون انصابت "

ردت " من جدو "

هنا گلبي انقبض وحسيت راح نخسر واحد منهم ..

جدو رغم عمرة كبير بس قوي مو مثل بيبي بنيتها ضعيفة واي مرض يهدها ..

بشهر التاسع من نفس السنة بيبي توفت ..

بيومها الخبر مثل الفاجعة كان النا ..

ابد ماطالعه من كورونا لسا .. ورغم محجورين وعندهم اصابات بس مااتحملت گلتله النسر لازم اروح ..

خالة عارضت " يمة بيبيتج ماتت بكورونا وين رايحة فكري بولدج "

نسر هم ماقبل اروح وكال هم اصلا ما يسوون فاتحة ..

انتظرت اسبوعين وبعد مااتحملت رحت الهم ..

شفت البيت كله حزين ..

مكانها فارغ ..

وين ذيج الجانت تهلهل وتمرحب بية من تشوفني ادخل للبيت ..

جانت زهرة البيت هي وهسا البيت ذبلان بغيابها ..

جدو ينبجي ع حاله .. مكابل صورتها ويبجي مثل الطفل المفارگ امه ..

خلصوا عمرهم سوه ابد ماافترقوا . مثل عصافير الحب

دخلتله اخذت من خاطره مايقبل واحد يتقربله يخاف علينا ..

باوعلي بجة " راح بيبيتج شذرة اني اموت ماابقى بعدها اموت .. لو ميت اني وهي عايشة "

مااتحملت رحت حضنته .. خلي شيصير يصير .. انعل ابو الوكت الي خلانا مانحضن احبابنا بسبب وباء ..

اني ابجي وهو يبجي واجت سمر هم حضنتنا ونبجي سوة ..

دخل خالو علاء .. " قنعنه خل ياكل مايقبل ياكل وهو هستوة طايب ولازم يتقوة "

جبت الاكل واكلته بيدي ..

ضعفان حيل ومتغير .. من رجعت النسر بس ابجي اگله نسر يبجي عليها ويتمنى الموت ..

هم تبجي عليه اذا متت هيج ..

حضني " لاتكولين هيج عمري قبل عمرج ليش نسر شنو بدون شذر .. لج عمري بدأ من يوم الدخلتي الحياتي "

رديت " اني العمري بدأ من يوم الشفتك بالكراج شلون تخوف انت وشواربك وتشرب جاي وتباوعلي بطرف عينك "

راد يضحكني " بيومها گلت خرب اهلج هيج جمال يكتل وطالعه بالفجر وبالكراج "

دفعته .. " اصلا جذاب جنت تكرهني "

رد " مستحيل .. قدرنا نكتب بهاليوم وبذرة حبنه انزرعت بهاليوم شلون اكرهج .. بس گولي جنت مااثق رغم ماهان عليه اشوفج بوسط الزلم واعوفج وحدج "

بقينا نسترجع ايامنا قبل .. لحظات نضحك بيها ولحظات نحزن بيها .. ولحظات من نذكر عمة. وسوالفها نبجي وندعيلها بالرحمة مااتذكر يوم نسيتها اصلا حتى اتذكرها.. جانت اكثر انسانه تركت اثر طيب بداخلي هي

طبعا خالة خافت لان رحت البيت جدو ماخلتني اتقرب للاولاد تخاف عليهم وصتني احجر نفسي ..

اضحك ع سوالفها وهي من صدك تحجي .. وحجرتنا اني ونسر بالغرفه .. رغم كلشي مابينا بس نسر فرح ولكاها فرصه ..

اخذ اجازة وگابلني .. رغم حزني ع بيبيتي بس وجوده يمي خفف عني وطبعا خلانا نسترجع ايامنا قبل ..

كل يوم اخابر سمر واسأل عن جدو .. طمنتني عليه احسن شوية ..

بس جيت ماما الهم ازمت وضعه بعد ماگالت المرت عمو عامر انه هي متزوجة زوجها ..

مرت عمو عامر تخبلت ورادت تحرگ نفسها من سمعت

سنين وهالسر ماطلع .. شلون امن عمو عامر وخله ماما تطلع ماندري ..

سمر تگلي ماما حيل ضعفانه وكبرانه ومو نفس شكلها قبل ..

بعدها جدو قرر انه عمو عامر يطلكها الماما وتعيش وي ارشد وسحر ببيتهم الجديد ..

وفعلا كانت هاي خطة سحر هي وماما من البداية ..

كنت حاسة ماما مجبورة لان اعرفها رغم كل مساوئها الا انه هي تحب بابا حيل ومستحيل تحب عمو عامر وتستقر وياه .. رغم معذبها هواي وياه ومعتبرها سجينه عنده ..

استقر بيت جدو ورجعت مرت عمو عامر .  بس بقت متخوفة من ماما .. وصارت تضايق سمر .  سمر البقت وحيدة بينهم .. جانت بيبي تدافعلها وبيبي راحت ..

كم مرة حجيت وياها تجي يمي او يم خاله بس ماقبلت الاجل جدو تكول خطية يبقئ وحده ..

دايما ادعيلها يجيها نصيب زين يطلعها من القوقعة الحبست نفسها داخلها ..

حجيت وياها وقنعتها بس تخلص ازمة كورونا اطلعها للخارج واسويلها عملية الوجهها وشبه اقتنعت ..

اسراء تطلكت بعد زعل اشهر ابد ماتراهموا ولا ارتاحوا

ويمكن هالحل انسب الهم رغم كلنا نتمنى انه بيوم يراجعون حساباتهم ويرجعون الاجل اولادهم بعدهم صغار ..

اني شهرين مريضه مااعرف شبيه .. بين فترة وفترة يهبط السكر .. وعندي خربطة بالهرمونات ..

هالسنة وبشهر 11 عيد ميلاد التوأم .. ذيج السنة صادفت مضاهرات وسويناه بينا ..

هالمرة كورونا ونخاف .. هم سويناها بينا داخل البيت

لليل بعد ماكملت الهوسة والتنظيف ..

حسيت بدوخة وتعب .. باوعتلي عذورة وسألت

" اشو وجهج اصفر ومتغيرة خاف سكرج "

رديت " لا مابي شي بس هالفترة تلعب نفسي حيل ومدري شبيه يمكن من العلاج "

ردت " خاف حامل "

صفنت بوجهها وضحكت .. لا يمعودة گولي غيرها هو اني هيج دائما بسبب خربطة الهرمونات .. والعلاج قوي مااتحمل "

سكتت ومااهتميت ..

بس بعدين لاحظت نفسي فعلا حالتي مو طبيعية

طلعت التقويم بالموبايل ودااحسب ..

دخل نسر للغرفه شافني. .

شتحسبين ..

رديت " لا هيج شغله شاكه بيها "

سأل " شنو ؟"

رديت " لمن اتأكد يلة اگلك ؟"

رد " وشلون انام اذا مااعرف لاتقلقيني "

بعد الحاحه .. عدلت كعدت كباله وعيونه بعيوني يريد يعرف مااتحملت ضحكت. 

" لاتباوعلي هيج مااكدر احجي "

حسيته ضاج " احجي ليش هيج تسوين بيه قلقتيني "

رديت " مو مااريد انطيك امل وتالي ماكو شي ونتفشل"

رد " حامل "

ابتسمت " يمكن "

صفن بوجهي " شنو يمكن "

رديت " يعني اعراض حمل ونفسها الحسيتها بكروري وحدوري .. بس خايفه ماكو شي يطلع "

رد" وشلون نتأكد "

رديت " هسا لو اكو صيدلية قريبة جان جبنا تحليل منزلي ..  "

بعدني ماكملت ركض بدل وطلع .. طلعت وراه ماسمعني ..

طلعت خاله " شكو ؟"

رديت " هااا ماكو شي طلع نسر يجيب جكاير ماعندة "

هزت ايديها " بله طالع بنص الليل علمود جكاير "

بقيت منتضرة برة .. لمن اجه ..

صرت احجي لان طلع .. لزم ايدي خله بيها التحليل

" يله حبيبتي سويه بسرعه واني منتظرج ."

كمت اضحك عليه وبداخلي خايفه وادعي كون مااتفشل صح يكول مااريد .. بس الفرحة واللهفة الشفتها بعيونه خلتني اخاف يخيب امله ..

اخذته ودخلت للحمام كملت وطلعت ..

صار يباوعله وياي .. صار خطين باوعلي واني مصدومة وصافنة..  خطين واضحات حيل ..

باوعلي .. " يعني شنو ؟"

رديت بصدمة " يعني حامل"

حضني وعيونه تدمع ..

ركض الامه بشرها.   بدقايق البيت كله عرف ..

كلها تبجي من الفرحة .. ودنو تكول هالمرة معليه اريد بنية .. ونسميها ملاك ..

ابتسمت .. ان شاء الله وهيج نتذكر ملوكة .. لسا مانسيناها ونذكرها بدعائنا وثوابنا رغم هي طير من الجنه ..

كل هذا واني ماصدگت لمن سويت تحليل وسونار ..

والسونار .. گالي الج شهرين استغربت .  شهرين واني ماادري جنت شاكه بس اخاف اصدگ ..

واخذ علاجات وماادري بنفسي .. بس ان شاء الله مثل مانطانياه يحفظلياه ..

بيومها نسر سوة عشا الوجه الله وجمع اهلة وبيت عمه واجت خالة والسيد .. طبعا ليث عرفنا بي خاطب . وقصي حيجيه طفل ثاني من زوجته الثانية ورغد هي المربيه بنت ضرتها وعلاقتهن زينة ..

بيومها سوينا فيديو وي هنا وفرحتلنا من سمعت والاولاد حجوا وي بيت جدهم ..

كلها فرحانة الا فرحة نسر كانت مختلفه .. الناس كلها تحجي وتضحك وهو يباوعلي بحب نظرات يسترجع بيها كل ذكرياتنا مع بعض واحلامنا ومستقبلنا ..

احس كلما يكبر يكبر حبنا ويانا ..

كان هذا الخبر هو اجمل خبر الي بسنة 2020 .. هالسنة اخذت مني ناس اعزاز ونطتني روح ثانية ببطني ..

اتمنئ انه تولد بنتي بالسلامة . لاتستغربون حاستها بنية وان شاء الله تطلع بنية ادعولي تجي بتمام الصحة والعافية ..

وشكرا الكم لان رافقتونا بجميع محطات حياتنا بفرحها وحزنها .. في امان الله وربي يبعد هالغمة عن هالامة ان شاء الله..

النهاية ..

#شمس السعدي..

صباح الورد عليكم احبتي ❤

بارت بالاحداث الجديدة لقواريرنا.

#قوارير_من_فضة

#شمس_السعدي

وقفت أمام ذلك الطريق وذلك الدرب الذي شهد تاريخ ماضيي المؤلم وذكرياتي ..

فلم أجد إلا أطلال زائله ومتهالكه وبقايا عمر رحلت نحو المجهول وذكريات باليه لن تعود وأحلام ضائعة بين الأيام والشهور ..

هناك من يسترجع ذكرياته ليرسم ابتسامة خفية وهو يتذكر ذلك الماضي الجميل ..

الا انا !!

فذكرياتي بدأت من ذلك اليوم الذي عرفتك به ..

فوجودك اصبح ماضي وحاضري ومستقبلي ..

شهر 11 من سنة 2019 ..

بغداد مو مثل عادتها .. طرق مسدودة .. والبلد كله مگلوب مضاهرات تختلف عن سابقاتها ..

شباب وصغار وكبار .. الكل طالع والسبب سوء الاوضاع بالبلد ..

تعب الشعب وهو يطالب بأبسط حقوقه ومايلگاها رغم احنة بلد الخيرات والدول عايشة بخيرنا ..

اكو مثل خالة دوم تحجيه .. ( من لحم ثوره وطعمه ..)

لكن الوضع صار مايطمن من بداية الثورة للان والشباب دتنصاب وتستشهد ..

بيداء خايفة على ولدها .. مهيمن من اول يوم هو وي اصدقائه ودور اخذ حمودي اخوه وياه. .

وتخبلت اكثر عليهم .. نسر مشجعهم لهذا بيداء ماتكدر تحجي بس هو مراقبهم وكل شوية يخابر يكلهم ابقوا بالتحرير ولاترحون الاي مكان ..

واي شغب ابتعدوا عنه .. حتى طبخ نطبخ ويجون ياخذوه ..

اليوم عيد ميلاد حدوري وكروري ..

سبحتهم وطلعتهم .. تلگتهم خالة تهوس وتصفگلهم

( عطايا الله عطايا كبار .. ردنا واحد نطنانا ثنان )

وهم يگمزون بوسط الهول ..

نزلن فروحة ودنو من فوگ .. ووراهن بيداء ..

تقربت دنو الاخوتها .. اخذت المشط مني تمشط شعرهم الاشقر ..

تالي سحبتهم وصارت تعضعض بيهم .. بالاول بدأت بحدوري ..

تعضعض بي وكروري يدفعها ..

" عوفيه لاتاكليه ختية "

تركت حدوري وسحبته " لعد اكلك انت .. امممم طيب"

وهذا يضحك ويكركر لان تدغدغه ..

سألت فروحة " خالة مو ع اساس تسويلهم حفلة مثل كل سنة توصين ع كيك "

رديت " متشوفين الوضع ياامي .. وينه ووين الحفله "

ردت خالة " يمة خطية ماتشوفيهم فرحانين وصارلهم شكد منتضريه .. سويلهم كيكتين وخليلهم شمعه يطفوها وهاهي "

باوعت البيداء .. مشغوله تتصل بمهيمن وهو كـ العادة مايرد بس على نسر .. لان يعرف امه تبقى تحجي وتگله ارجع ورجع اخوك ..

سألتها " شگلتي بيداء تسويلهم كيك انت لو ماتگدرين "

ردت " لا اني اسويلهم اذا مااسوي للحلوين المن اسوي وهم اشتت تفكيري شوية لان راح اتخبل من ورى ولدي فوگاها هذا حمودي يدزلي صور رسوماته ويخبلني اكثر"

رديت " وليش تتخبلين بالعكس شجعيه .. اصلا اله مستقبل يخبل ولاتوقعت هيج يرسم حلو شفتهم شلون مسوين الشوارع حلوة .. اصلا هالمضاهرات ثبتت عندنا مواهب تخبل لكن حرامات مدفونة ومالهم مستقبل بالعراق "

ردت بيداء " اي والله گلبي ديتگطع من اشوف هالشباب الحلوة هيج متبهذلة والحكومة ماتهتم "

سألت خالة " يمة هم خابرتي رجلج وين ماوين صارلة كم يوم ماكو "

هزيت راسي " اي خابرته گال بلكي احاول اجي .. تعرفين الوضع وانذار صعب يجي "

اتقربت دنو تراويني صور زينة .. " ماما دشوفي يخبلن واني مشترية من زمان الزينة خلينا نسويلهم ع الاقل بس علمود الصور "

ابتسمت " سوي الترديه ماما ع الاقل تغيرن جو شوية"

ردت فروحة "اي والله اختنگنا حتى دوام ماكو ولاتقبلون نروح وي صديقات دنيا كلهم ديرحون ويسعفون المصابين ليش متخلونا "

عاطت بيها بيداء " هي هاي البقت اخوانج اثنين وانت الثالثة وبيداء تكعد تلطم هنا .. لج هي ولد وخايفه عليهم "

رديت " احنة مو مانعيجن بس خالج يخاف عليجن الوضع تأزم اكثر ومانعرف وين تصفا من خوفنا عليجن مانخليجن ترحن "

ردت خالة " كافي سدن الموضوع وگومن زينن مدري شتسون .. "

گمنا اني وبيداء للمطبخ .. جهزنا الكيك .. اجت دنو وفروحة ساعدونا .. سوو خلية نحل وشكر لمة ..

والتوام يتعاركون ع ننعجانة بيها عجين كيك يحبوه لان بي كاكو ..

خابرت عذورة " هلو حب شلونج "

ردت عذورة " هلو شذورة الحمد لله بس تمار مريض شوية "

رديت " ياعيني شبي .. واني اگول اليوم شعجب ممداومة "

ردت " اي والله حسام اخذلي اجازة وهو اليوم خفر"

رديت " لعد تعالي يمنا اليوم عيد ميلاد التوأم واصلا احنة مانسويه بس هيج بيناتنا لان خابصيني والبنات ضايجات .. "

ردت " يروحي حبايب عمتو .. شلون نسيتهم اني ولو تمار ممخليني اشوف طريقي والله .. مرات اگول الله يساعد شذر شلون مسيطرة ع التوام "

ضحكت " لان عندج دوام هيج تحسين اني ماعندي شي ولاتنسين خالة متخليني احس بيهم "

ردت " اي ماما متعلقة بيهم حيل حتى صرت اغار تگلي من يجي ابنج يغارون ولد نسر خطية "

رديت " اي عيني نحنا الاصل .. ولو خاله متفرق تحبهم كلهم اصلا بيوم الماتجيبنهم تضوج "

ردت " اوك لعد نلتقي بس راح اخابر اسراء تجيني بسيارتها وهويتها ندخل .. "

رديت " زين لعد راح اخابرها قبلج اعزمها "

غلقته منها وخابرت اسراء .. گلتلها تجي وتجيب الاولاد ووصيتها تمر بعذراء هم تجيبها وياها ..

بعدها وصيت دنو ع اخوتها ودخلت للغرفة اريد ارتبها

فكرت اغير شوية تغيير وارجع الايام قبل ..

رن الموبايل .. باوعت هاي سمر. .

ابتسمت اعرفها حاسبتلهم ما تنسى عيد ميلاهم ابد ..

رديت

" الووو كل عام وحبايب خالتهم بالف خير "

ابتسمت " فديت الخالة التذكرهم واني اكول شعجب اتأخرت اليوم "

ردت " اليوم بقيت يم بيبي مالها خلگ كلش "

سألتها " خير شبيها "

ردت " سكرها مرتفع وتعرفيها من تتمرض تصير روحها بيه وبجدي "

ابتسمت " الله يحفظها النا ماكو بحنيتها "

ردت " اي والله ابد صارتلي ام وابو .. امي ماتسأل عني وتسأل ع سحر بس "

اتنهدت " هم تعرفين اخبارها ؟"

ردت " اي مرات احجي وياها من موبايل سحر تعرفين ماتخابر بس عليها .. بس هالمرة صوتها مو زين ماعجبني يمكن مريضه "

اتنهدت " شنو علاقتها بعمو عامر معقولة نست بابا ؟"

ردت سمر " لا اني اكلج اصلا مجبورة عليه .. لان سحر دوم تدعي عليه وتكول ظالمها واريد اطلع ببيت وحدي علمود اخذها يمي واخلي جدو يطلگها منه "

رديت " ليش سحر تريد تطلع ببيت ؟"

ردت " اي هالفترة مشاكل هي وارشد على هاي السالفه حتى ابنها عند مرت عمو علاء ماتدري بي. وهي حابسة نفسها فوگ تنزل تاكل وتصعد .. ودور مرت عمو شادة وياها تريد طفل الارشد ثاني لان تشوف هنودة ورونق كل واحدة صار عندها اثنين وثلاثة وسحر ماكو لسا "

رديت " خاف هم مثلي .. شنو هالوراثة يربي معقولة كلنا نطلع نفس ماما "

ردت " ماادري بس مرت عمو كالتلها روحي الدكتورة وسحر عاطت بيها تكلها هاي حياتنا اني وارشد لتتدخلون بينا "

اتنهدت " اوووف سحر اعرفها رعنه ماتتحمل زين مرت عمو عامر مادرت ؟"

ردت " لا مااعتقد لو درت تگلب الدنيا هي اخذله فترة مايجي عمو عامر للبيت تخبلت وزعلت گالت اكيد عنده وحدة يروحلها لمن جدو قنعها انه هو دزه بشغل "

سألتها " ليش هو مايبات يم ماما "

ردت " لا مايبات بس مرات "

استغربت "شلون يأمن يتركها وحدها "

ردت " ماادري شذر اصلا اني مثل الاطرش بالزفه واصلا عازلة نفسي اجي من الدوام انام واكعد اخلصها يم بيبي اشوف احتياجاتها هي وجدو وقمر هم ادرسها خطية ماتريد غيري "

رديت " هاي الطفله قاهرتني حيل .. لا ابو ولاام "

ردت " مرت عمو علاء وعمو علاء مامقصرين عنها واني هم متعلقه بيها كلش وابوها هم يموت عليها بس مشغول ومايفرغ لهذا مو هواي تشوفه "

رديت " لاتبررين اصلا ارشد متغير حيل مو مثل ماعرفته ومن ضم علينا مكان ماما ضجت منه كلش جان يكول اني اروضها وتالي هي روضته "

سكتت سمر لان اعرفها ماتحب تجيب سيرته .. سكتت هم ماردت اضوجها ..

حاولت اغير الموضوع وكلتلها " تجين للعيد ميلاد مال كروري وحدوري "

ردت " شنو حتسووه مو كلتوا مانسويه "

رديت " اي ع اساس مااسويه لان الوضع دتشوفيه ونسر انذار بس خاله طلبت بيناتنا نفرحهم لان خطية منتضريه يوم يوم "

ردت " يروحي بوسيلياهم بس اني مااگدر اجي منو يجيبني وبيبي هم مااگدر اتركها غير مرة اجيهم واجيب هداياهم "

سديت التلفون منها .. صارت عيني ع صورته ..

ابتسمت ..

ولاعبالك غايب كم يوم كأنه سنه بالنسبة الي ..

دزيتله رساله " حبيبي فارغ ؟"

اتصل بسرعة " حتى لو مافارغ .. اترك كلشي علمود اسمع صوتك ياحلو "

ضحكت بصوت لااراديا ..

" اويلي ياب .. لاتخبليني عاد .. منتظر ع نار شيجيب الليل واجي اشوف العيون الحلوة "

ضحكت " كبرنا عيب "

رد " ليش هو الحب يعرف عمر .. اصلا حلات الحب بالاربعين .. "

ضحكت " فديت الاربعيني مالتي يعني اكيد تجي الليله "

رد " ايون الليلة يمج اين المفر "

ضحكت " كافي سوالفك ترى استحي "

رد " تدرين شذرتي شگد يعجبني خجلج رغم سنين طويلة صارلنا سوة وانت من اغازلج احس بعد ذيج البراءة بعدهي بيج .. وهالشي يخليني احبج اكثر .."

رديت " الظاهر صدك طلعت مشتاق گمت تتغزل وتمدح بس تريد الصدك اني حموت من الاشتياق .. "

سأل " شلونهم ولدي خو ممتعبيج "

رديت " يگمزون من الصبح يردون عيد ميلاد "

رد " لا شذر فشلة ووينه ووين العيد ميلاد "

رديت " لاتخاف مو مثل كل سنه عزيمة وديجي وهالسوالف هي كيكتين وكم شمعة "

رد " اي حبيبتي عفية .. بس شلون سالفه هاي اني مواعدهم بسيارات كبار ع الرمونت اجيبلهم هسا وين الگي "

رديت " لا تزاغل انت مواعدهم من زمان شوف اي بيجي يبيع ويدزولك توصيل "

رد " الله كريم اشوف "

كملت المكالمة .. رتبت الغرفه وغيرت الديكور .. احب التغيير احس نفسيتي ترتاح ..

ساعدوني البنات ..

فرشت فرشة حلوة تركية اخذتها من تركيا من رحنا ذيج السنة ..

خليت شموع وعطرتها وطلعت ..

كملنا غدا اجو البنات عذورة واسراء وغيداء ..

عذراء بعد ماضعفت صارت تخبل ..

اسراء جانت ضايجة مااعرف شبيها ..اخذت خاله ودخلن للغرفة ..

خلت عذراء راسها بالگدر .. ليش مگلوتلي مسوين برياني جان ماتغديت حسام حارمني من هيج اكل كون كله صحي .. مايقتنع خلص طبت " ..

ضحكت " غير يخاف عليج واصلا احنة سوينا هواي عبالنا تجن ع الغدا "

ردت " لا مو اسراء كالت بعد الدوام امرلج .. شوكت تسون العيد ميلاد هسا ؟؟"

رديت " لا لليل وصيت لفات شاورما وكباب ونسويه سويه وي العشا علمود نسر يجي "

كحت " عيني عيني اليوم حبيب الگلب راح يجي اگول مبدلة ومعدلة "

رديت " يااا هو شلابسة قابل فستان هي گلبية "

ردت " عمي هي گلبيه لو قفطان .. ندري بعد ماتخيطين واعتزلتي بس مو تخيطين النفسج بس وتحنصينا "

ضحكت " لج گلتي اريد ومااخيطلج .. هاي اخيط من وراه مايخليني علمود عيوني .. بس الصراحة ماكو دشاديش حلوة .. اضطر اشتري قماش واخيط بيدي صدگ مو جبتلجن قماشات من تركيا يخبلن وينهن "

ردت " ذيج تسمع حسج غير اليكرم يخيطها وينطيها قابل احنة خياطات "

ضحكت ع سوالفها ولاتبطل ..

رحنا للاستقبال دنيا وفرح مسوياته يخبل ..

بنتي طالعه ع عمتها هنا بالديكور والترتيب محد يلحگها ..

ع طاري هنا اتصلت .. ضحكت عذورة ..

" بنت الحلال بذكرها "

اتصلت فيديو .. فتحته .. سلمت علينا كلنا ..

" شلونكم ياااي كل سنة تتجمعون هيج وتحنصوني "

رديت " لا مو مثل كل سنه هالمرة بيناتنا .. سما والاء مااجو هم والوضع "

ردت " اي الله يساعدكم نسمع اخباركم ونضوج وكل يوم هذال يثبتلي قراره صح انه طلعنا للخارج "

ردت عذورة " وج صايرة حلوة هيج هولندا تحلي وين طالعين "

ردت هنا " مو بحلاتج عيني صايرة تخبلين وين تمار شوفينيا والتوأم وينهم "

درت الكاميرا عليهم فرحانين ويگمزون .. شافوا عمتهم اجو يحجون وياها ويبوسون بالكاميرا .. دايما تخابر فيعرفوها ..

والعام التقينا بتركيا كانت ايام حلوة ..اخذنا خالة ويانا وصاروا يبجون اثنينهم .. صح كل يوم تخابرنا فيديو بس اللقاء شي مختلف ..

ماطولت هواي بالمكالمة گالت من تسوون العيد ميلاد خابروني .. لان ديطلعون ..

اجت خالة واسراء ..

گعدنا كلنا سوالف وضحك ..

راحت دنيا تبدل .. اجت صرت اباوعلها بفخر .. تذكرت اول مااجيت الهذا البيت شلون كانت ..

صغيرة بلا ام ولا اب .. شفت نفسي بيها اثنينا كنا محتاجين بعض .. ربيتها هي عوضتني واني عوضتها احسها شريكتي بالقدر ..

الطفله الي ربيتها بنتي وبكري اعتبرها .. اليوم هي شابة ودكتورة .. كم سنه واشوفها واگفة بصيدليتها ..

عيوني غرغرت بالدموع واني اتذكر ذيج الايام ..

باوعتلي ابتسمتلي .. حست بيه وفهمتني من عيوني ..

اتقربت مني وحضنتني ..

" ماما احبج "

حضنتها " يا روح امج انت "

گامت تبوس بأخوتها ..وخالة تخاف عليهم تكلها مو هيج لاتضوجيهم ..

ابتسمت .. خالة نفسها الجانت ماتريدني .. دخلت انسانة بحياتي حطمتني ورادت تفرق بيني وبين نسري نفسها هسا الي تگلي انت بنتي .. بناتي مايراعني بكثرج ونفسها هسا الي طايرة ع ولدي وتموت عليهم وتفداهم بروحها .

لو اسراء .. ضحكت ..لسا اتذكر يوم الي خنگني نسر جوة الدرج .. جان متوحش وعصبي .. وهي عبالها بينا شي ..

من يومها كرهتني ونصبت عداوة وياي ..

هسا نفسها من تريد شي من نسر تخابرني اني احجي وياه.

لان دايما مشاكل وي زوجها وممتصافين ..

ع سالفه نسر يگول . " اكبر غلط واحد يتزوج من نفس مهنته .. هو قاضي وهي قاضية شي طبيعي مايتراهمون "

اتنهدت .. ااااا يالسنين بالعجل مريتي علينا .. بس الحلو انه هالسنين غيرتنا للاحسن . صرنا عائلة كبيرة وحلوة ونسر كل اجازة يجي بيها يجمعنا كلنا سوة ويخابر اخواته حتى هنا نفتح فيديو وتعيش الاجواء ويانا ..

خالة والسيد هم يمنا دائما .. نسر يحب السيد كلش ويحترمه وخالة هي وخاله ام نسر متراهمات بالفترة الاخيرة .

حتى بيداء وخاله صديقات حيل ويمكن تخابرها اكثر مما تخابرني ..

اذن اذان المغرب صاحت خالة ..

" يلة گومن صلن واذكرن ربجن "

گمنا للمطبخ اندگت الباب اجة ابو التوصيل جايب العشا الوصيناه عليه ..

طلعت بيداء حاسبته .. اخذوه فرح ودنو يرتبوه خالة گالت لايبرد خلوه من يجي نسر ..

صلينا وكملنا ..

دخلت خليت مكياج ورتبت نفسي شعلت الشموع وطلعت..

صار گبالي نسري وعشقي وفرحتي ..

هستوه داخل رايح جايب مهيمن وحمودي وياه ولد بيداء.

من شفته شهگت .. جان شايل التوأم ويبوس بيهم ..

باوعلي ابتسم .. وعيونه تغازلني وكأنه يريد يلتهمني بنظراته ..

بعده نفس وسامته .. والشيب البشعره زايده وسامة ..

سلمت عليه وبسته عادي استحيت من اخواته ..

سلم ع خالة وباس راسها ودنيا حاضنته مثل الطفله

سلمت ع مهيمن وحمودي ..

بس عيوني تركض وراه مثل الطفلة المشتاقة الابوها

اي هو حبيبي وابوية وكلشي الي بالدنيا ..

صاحت خالة " يلة جهزن العشا بين ما اخوجن يسبح ويبدل "

كح هو وباوعلي " ام دنو عيني جهزي الحمام وملابسي واشرلي اروح للغرفه "

ابتسمت اعرف سوالفه ..

دخل للغرفة وصيت البنات يحضرن الكيك واللفات . والببسي ..

دفعتني عذورة " دروحي احنة نكمل ماتشوفيه يغمز ويرامز عباله مانشوفه "

ضحكت ع حجيها ..

رحت وراه للغرفه لگيته دينزع ملابسه ..

باوعلي ابتسم وسحبني الحضنه ..

" هاي شنو الغرفه تخبل .. هيج مشتاقتلي "

ابتسمت واني اتلمس بوجهة .. " مشتاقة الكلشي بيك "

قرب انفاسه الاذني غمضت . همس " الكلشي الكلشي "

دفعته حيل " نسر صاير كلش مو گلتلك استحي لاتحجي هيج "

رد " شتستحين ماتگليلي اشو محضرتلي الملعب ومجهزته وترديني بس اشوت بي "

عفته ورحت للكنتور اطلعله ملابس سحبني من ظهري وسحب شعري وهمس ..

مشتاق حيل ماتخلينا هنا مانطلع ..

ضحكت " والتوأم يخلوك غير يكسرون الباب هم مامصدگين اجيت "

رد " يلة الليل طويل ملحوگه "

طلعتله ملابس " ديلة اسبح كلها منتظرة "

اخذ تصبيرة وراح يسبح ..

رحت للاستقبال لكيتهن مجهزات كلشي ..

عاطت عذورة " عيني مو جعنا لاحگين ع الغزل "

اشرتلها ع دنو وفرح مااحب يسمعن هيج حجي ..

ضحكت " وج وين خطية تعبان راح يسبح "

اولاده واگفيله بالباب كل شوية يكلوله " يله بابا بساع بساع كمل "

طلع من الحمام مشط وتعطر واجانه..

ابتسمت من شاف الاستقبال .. مهيمن ضاج ..

بطرانات انتن احنة وين وانتن محتفلات.

عاطت بي امه " شفتنا راگصين داگين . هو العراق من ضيم الضيم جبناها حروب وموت ودم من ذاك الوكت الهذا الوكت حقك ماوعيت .. شلون ندفن روحنا فوگ غضب الحكومة علينا "

اشرلها نسر .. مايقبل تعامله هيج دائما يحسسه انه هو رب البيت من بعده وهالشي انطاه ثقة كبيرة ..

رد نسر " عوفونا من سوالفكم خلوا اسودي يطفون الشموع "

شعلنا الشموع والتوأم يگمزون .. مارتاحوا الى ان طفوا الشموع.

وخاله تگلهم گولي يارب ارزق ماما بأخو النا قبل لتطفون الشموع .

هاي كل سنه خالة تتمنى هيج امنية .. اضوج وانقهر لان مو بيدي ..

نسر يباوعلي ويبتسم ويغمزلي .. يدري بيه اضوج ومايحسسني ..

مرات يردها ويگلها " يمة شسوي بيهم عندي دنو واخوتها كافيين الحمد لله والشكر "

احس بي يريد بعد بس مو بيدي يمكن هم ذولي وبعد خلص ماكو غيرهم ..

التهينا بالكيك والاكل والهدايا .. غيداء نطتهم فلوس لان مالحگت تجيبلهم شي .. بس هم شمروهن عليها ماقبلوا ياخذون .

ممعودتهم ع فلوس شيردون نجيبلهم ..

كل الهدايا عندهم بجهة والهدية المنتظرة بجهة ثانية ..

صاروا يسألون عن السيارات ونسر ضاج خطية لان موصي عليهن ومااجن ..

وعدهم باجر ياخذهم يختارون بنفسهم يله اقتنعوا ..

كملنا ونظفنا الاستقبال والمطبخ .. البنات بيومها باتوا يمنا ..

كل اللفات والكيك الزاد خليته المهيمن بحافظات واخذهن الاصدقائه گلوله سهرانين وجعنا ..

طبعا راح بدون علم بيداء بس گال الخاله وراح لو تدري ماخلته .. محمد ما راح وياه بقى نايم ..

قفلت البيبان ودخلت للغرفه نسر يم خالة واسراء يسولفون الظاهر عندها مشكله وي زوجها..

بدلت ورتبت نفسي ..

بقيت گاعدة منتظرة التوأم بالليل ينامون يم خاله بس لان خالة بالاستقبال .. كل شوية جايين يمي ..

دخل نسر باوعلي ابتسم ..

" يلة بابا يله روحي يم بيبي خلوني اشبع من امكم "

طلعهم وسد الباب .. اتقرب مني وهمس ..

محبوبتي ..

دعيني أذوبُ في خمرِ الشّفاهِ والعنق

ولاتجعليني أستفق من سكرتي حتى الغسق

باوعتله وضحكت لان يغازلني بالفصحى .. هو بطبعه يحب يكتب خواطر فصيحة ..

بعدها طلع شوقه الي .. صارلنا هواي مامفترقين هيج

تعودت عليه بالليل ما انام الا وهو يمي ..

صحيت الصبح لگيته يريد يبدل ..

" صباح الخير "

" هلو حبيبتي "

سألته " شنو راح تلتحق ؟"

رد " لا بس اولادج من الصبح كسروا الباب علينا ماسمعتيهم "

رديت " لا ماسمعت "

ضحك " حقج ياب "

شمرته بالمخدة " بطل سوالفك ترى .. "

قاطعني لاعمي كلشي ولاتهدديني مو كافي اطلبج كم سنة حارمتني بيهن "

ضحكت " صارلك سنين ومانسيت "

رد " شتدرين بيه اضيع حقي .. لا طبعا. اخذه مربع منج "

خليته يبدل وكمت سبحت وبدلت .. لكيت التوام منتضرين ..

ريكتهم وي ابوهم وطلعوا ..

سويت ريوگ للبنات .. گعدنا تريگنا كلنا ..

وبعدها راحوا لبيوتهم ..

داسوي غدا والبنات ينظفن ..

خابرني نسر ..

" اكلج شذر دزيتلج الولد بيد قصي .. "

رديت " ليش انت وين ؟"

رد " اني رايح اشوف مهيمن سمعت متصوب "

شهكت " يمة اسم الله "

رد " لاتبينين البيداء ابد لمن اشوف شنو السالفه "

مااعرف شصار بيه .. لااگدر احجي ادري بيها تتخبل .. ولا اگدر ابين ماكو شي وجهي اصفر وايدي ترجف گامت ..

جانت بيداء تخبز برة شلون راح اطلع گدامها اذا اجه قصي وجاب الاولاد ..

دخلت الخالة دتنوم ابن عذورة .. رفعت راسها حست بيه. .

سألت " خير شكو ؟"

سديت الباب وتقربت منها " خالة نسر خابرني احتمال مهيمن متصوب "

ضربت ع وجهة " يايمة وج مات لو متصوب "

رديت " ماادري ماادري بس بيداء شلون .. نسر گال لتگلولها لمن اتأكد وهسا قصي راح يجي يجيب الولد دزهم نسر بيده وخاف يحجي گدامها .. "

صارت تدعي كون مابي شي .. همست ..

" تعاي نيمي الولد انتي .. واني اطلعله " ..

بقيت يم ابن عذورة انوم بي وبالي يمهم شفته نام غطيته وگمت ..

فرح ودنيا فوگ ينظفن بالطابق الفوگ..

اندگت الباب گلبي صار يدك سريع .. بقيت واكفه بالباب اباوع .. لبست خاله حجابها وطلعت ..

بيداء بالممر تخبز .. دگت عليه شباك المطبخ ..

اجيتها .. سألت " هذا قصي شعنده ؟"

رديت " هااا ماادري خاف نسر عنده شغل ودز الولد بيده "

ماطولت وياها خاف تشك بيه لان جسمي كله يرجف ..

اجو كروري وحدوري يسحلون بالسيارات مالاتهم فرحانين ..

تلگيتهم ساعدتهم لان كبار مايگدرون يسحبوها ..

وهم اسمع قصي شنو يگول الخالة ..

لان بقت تحجي وياه بالباب ..

كالها " والله عمة ماادري بس كالوا صار رمي رصاص حي ع المتضاهرين ومايعرفون منو يضرب من غير القناصين يضربون عليهم "

وگف گلبي من سمعت .. " سترك ربي استرنا .. احفظه ورجعه بالسلامة ماناقصنا قهر وحزن ماصدگت حياتنا مستقرة والحمد لله "

دخلت ولدي ودا ادخل صارت عيني بعينها ..

"لعد ماما ليش واگفه ميدخلون جوة "

رديت " مستعجل بس هي دتسأله ع بنته وزوجته حامل بطفل ثاني مادريتي ؟"

ردت " ياصلوات .. اي يمكن ماما گالتلي .. خطية رغد ع الاقل لو يصير عندها "

ماعرفت شأكلها اخترعت سالفه من وحدي ..

دخلتهم اصروا افتحهن .. فتحتهن صعدوا بيهن يسوقون .. نزلن دنيا وفرح يمهم ..

تركتهم ورحت .. دخلت خالة ضايجة..

شافت بيداء كبالها گالتلها " يلة يمة شعندج صارلج ساعه هن خبزات "

ردت " ماادري يمة شو عبالك العجين بي بركه اخبز وبعد "

دخلت خالة للمطبخ.. همستلها " ها خالة بشري "

ردت " ماادري هم قصي مايعرف شي وشلون اتطمن وهاي الغبرة تموت وراه لو صارله شي "

رديت " لا ان شاء الله ماكو شي .. راح ادخل اخابر نسر واشوفه "

دخلت للغرفة اخابر ..

جاوبني بسرعه " ها عيني .. شوفي لاتخوفن بيداء مهيمن مابي شي بس صاحبه متوفي بحضنه ومتخبل وضغطه مرتفع وهسا احنة بالمستشفى "

رديت بخوف " منو من جماعته "

رد " رزاق شريكه بالكوفي .. مضروب بدخانية براسة وساحبه مهيمن الحضنه وهذا باقي يرافس بحضنه لمن مات "

نسر يحجيلي ودموعي تنزل لا اراديا . اوووي عيني الله يساعد امه .. الله يساعد مهيمن هذا مو بس صديق بالنسبة اله اخو يعتبره .. من الجامعه لسا هم سوه ماتفارقوا .. "

سديت الموبايل .. بقيت ابجي ع الشباب الحلوة الراحت .. بيداء تراويني مرات بالفيس شلون ينضربون ويموتون . مااتحمل شحال اهلهم هسا.

دخلت خالة شافتني ابجي .. تخبلت وعاطت ..

عبالها مهيمن شو شصار بي ..

بيداء ستوها مكملة وداخلة للمطبخ سمعتها تصرخ ..

اجت .. اريد اسكتها مااگدر ..

گابلت بيداء وتلطم.. ابنج راح ابنج راح يغبرة ..

بيداء هي سمعت وگعت من طولها ..

ركضت عليها ..

" شبيج خالة خبلتيها مهيمن مابي شي شويه ويجيبه نسر ويجي ليش هيج سويتي وخبلتيها لو مجلوطة لو ميتة ؟؟"

جابن البنات ماي غسلت وجهها وشربتها صحت وگامت تبجي ..

رديت عليها بسرعه " مابي شي والله مابي شي هسا راح يجيبه نسر وتشوفيه "

ردت " لاتكذبين عليه شذر ابني بي شي ؟"

نزل محمد يركض جان نايم ..

" شكو شصاير ؟"

رديت " خابرني خالك .. رزاق صديق مهيمن مستشهد "

ضرب ع گصته " لا بربج .. مايستاهل والله .. انعل ابو هيج حكومة لا بو هيج حياة .. ليش شمسوين شمسوين وننقتل هيج ..اكيد مهيمن متخبل راح ابدل واروحلهم "

صحت بي " خالك مايقبل ..اصلا هو بالمستشفى وي مهيمن واهل رزاق يكملون ويجون "

رد " يامستشفى اروحلهـم "

عاطت بيداء " بعلي لو طلعت الا اكتل روحي .. كافي راح تموتوني ناقصة عمر .. كافي هبطة اخوك بيه "

بقينا منتضرين للظهر يلة رجعوا .. مهيمن عيونه وارمة من البجي .. وكانولة بيده وشحاله ..

تلگته بيداء تبجي حضنته وهو حضنها ويبجي ..

" لج يوم الضربة الي مو اله .. هي جاية عليه بس هو اجه يركض صار گدامي اجت براسة.. لو ماصاير گبالي جان بيه وگعت "

ردت خالة " هذا حد يومه امي .. يبست ورقته بعد "

اشر نسر " خلوه يرتاح وينام ضغطه مفول بي بخت مامجلوط "

ردت بيداء " مو هينة عليه يعتبر اخوه "

رد مهيمن " هو اخوي اخوي وراح مني .. مات جوعان يمة .. يكلي كون هسا صينية مفطح وتجيني الا اكلها كلها من الجوع مامتريگ جان .. تالي راح راح لسا مامصدگ والله "

رد نسر " كافي مو زين عليك ..يخالي شفنا الضيم .. اعزاز هواي راحت گبالنا .. هذا العراق المفروض نتعود عليه ولاتصدگ ينصلح .. من گلتلك خالي التسووه مابي فايدة .. مادام هيج حكومة بي مايتغير شي ماسمعتني وگلتلي ..

" خالي انتعشت جيلك .. خلونا نعيش جيلنا ونغير الماگدرتوا تغيروه "

وتالي ياخالي راحت ضحية هالتغيير شباب مثل الورد ولك والله ابجي دم عليكم بس شبيدنا احنة مامتكاتفين قسمونا المايخافون الله "

ردت خالة " كافي سدوا الموضوع .. وانتي فرح افرشي الاخوج بالاستقبال خلي يرتاح "

ردت بيداء " خلي يتغدا بالاول "

رد مهيمن" مااريد غدا .. رزاق مات جوعان واني اكل مستحيل "

مهيمن انتكس بعد هالحادثة .. حتى اكله قليل ..

رغم مريض بس بعد مادفنوا رزاق ورجعوا .. رجع المكانه ..

ماسمع لا الخاله ولا الامه ..

كالهم لازم ابقى .. اذا جنت وحدي فهالمرة الي والرزاق اتضاهر .. هاي امانته الي ..

تغيرت الاوضاع ودخلت ناس غير ناس بينهم وكم مرة حاولوا يخربون التضاهرات ويقمعوها الخوف زاد على ولدنا والشهداء كثروا ..

ولاحياة لمن تنادي .. خلصت السنة ودخلنا بسنة 2020

هالسنة الي اخذت منا هواي ناس واعزاز واولهم بيبيتي

اطيب شخص عرفته من اهلي بعد خالة سماهر ..

ببداية هالسنة ظهر وباء لعين ..

اسمه كورونا .. بالاول ظهر بالصين ..

وكانت الاصابات قليلة جدا .. بحيث الاغلبية ماانطوه اهمية..

رجعت المدارس ودرسوا وامتحنوا نصف السنة وكملوا ..

لكن بأواخر الامتحانات عطلت المدارس لان ظهرت اصابات بالعراق ..

هنا خفنا .. وخاصة ع اولادي لان مخليتهم بروضه

نسر وصاني ماادزهم بعد ..

لاخر لحظة ماصدگت بهذا الوباء بس حسام اكدلنا انه فعلا اكو اصابات ..

ولان يخاف على عذراء .. طلب منها انه تاخذ اجازة بدون راتب وتگعد بالبيت ..

اول اصابة عندنا صارت هي السيد رجل خالة ..

من سمعنا تخبلنا ..

خابرتني خالة تبجي ..

" وج شذر السيد مصاب "

شهكت " اسم الله منين اجاه "

ردت " ماادري بس يمكن من شريكه جان بإيران واجه ماحجر نفسه وماكال مصاب لمن صاب السيد وياه "

سألتها " وهسا وينه ؟"

ردت " اجت الاسعاف اخذتة وعفروا البيت وطلبوا نحجر نفسنا بالبيت .. بس اني خايفه ع الجهال خاف هم نصابوا"

رديت " منين اجتنا هالمصيبة خالة .. ان شاء الله ماكو شي لاتخافين انت مؤمنه والسيد مؤمن اكيد الله يبعدها عنكم "

سديته ورحت الخالة ابجي " خاله السيد رجل خالة مصاب "

شهكت " بس لاننصاب احنة هم منين اجاهم "

رديت " شنو السالفه خاله منين ننصاب من الموبايل

اشو صارلنا شهر ماشايفيهم من المضاهرات الكورونا بعد وين ننصاب "

صارت تدعيله خاله . نسر من عرف هم ضاج .. وصيته مايختلط بأحد ويلبس كمامة وتعقيم دايما يعقم ..

صارت بيه حاله نفسية بذيج الفترة ..

ليل ونهار اعقم البيت .. حتى المسواك اعقمة يله ادخله للبيت ..

ومن يجي واحد من برة اعقمة من فوگ لجوة ..

اليوم صار بالنسبة النا بسنه .. حظر واخبار سيئة ..

من يكولون اكو اصابات جديدة تصير بينا حالة نفسية ونخاف اكثر ..

بيتنا انقسم نصين .. نص يخاف وماخذ احتياطه

ونص ثاني مثل مهيمن والبنات يكولون هو وين اكو كورونا .. هاي سووها علمود يقمعون المضاهرات ..

وخاله تعيط بيهم من تشوفهم متهاونين بالمرض ..

انقطعنا عن العالم ..

نسر صار مايجي بسبب الحظر..

بيت جدو ماشايفتهم باقيين ع الاتصالات واحد يطمأن ع الثاني..

البشرى الحلوة .. هو لمن خالة خابرت وبشرتني انهم سوو تحليل وكلهم طلع سلبي .. والسيد هم بسبب مناعته القوية تشافئ ..

هنا ارتاحيت وايقنت انه الينصاب ممكن يتشافى ..

گمت اكثرلهم عصير ليمون وبرتقال خبلتهم بي وفيتامينات انطيهم علمود المناعة ..

مااعرف شلون مرت هالايام .. ويوم بعد يوم بعد اسبوع واشهر ..

صارت الناس تتعايش وي المرض ..

واكو مايخافون ويطلعون عادي ..واحنة لا اعياد ولا مناسبات نطلع بعدني خايفه ع ولدي وعائلتي ..

من يطلع نسر اتعارك وياه ..

وخاصة حسام وعذورة يداومون بالمستشفى فأخاف لاينصابون ..

بسبب الحظر ..

زادت مشاكل اسراء وي زوجها .. واخر شي تركته واجتنا ..

نسر ماقبل ع تصرفها .

" بلة ماتستحين عندج اثنين اطفال منه وتتركيه "

ردت " ماياخذ كلامي كم شكوى تجيني ع شغله والصراحة صرت استحي ابررله "

رد " وانت شعليج هو شغله واعرف بي تقبلين واحد يتدخل بقضاياج "

ردت " اني مو مثله مااغلط "

عاط بيها " شنو ماتغلطين نبي انتي .. لاتخلين داء العظمة يسيطر عليج وتخسرين رجال يحترمج ويقدرج ولاتنسين هو الشجعج وخلاج تصيرين قاضيه تالي تتكبرين عليه "

ردت " صرت بتعبي وشهادتي مو هو السواني "

عاط بيها " انتي تعبتيني وماتاخذين حجي . بس يجي رجلج ترجعين وياه وتبطلين تتدخلين بشغله هو قاضي قبلج ويعرف مو انتي التعلميه من زمان يكلي حاجيها لاتتدخل بشغلي "

ردت " يعني يشكيلك عني مووو بسيطة "

ضاج نسر وگام " لا الصراحة انت ماتنحملين وزين منه حملج كل هاي السنين وخلف منج طفلين "

ردت " انتو مجتمع ذكوري لان رجال تدافعله "

صفگ ايده وهز راسه " لاحول ولاقوة الا بالله .. اروح ارتاح احسن . يلة شذر امشينا "

گمت وراه للغرفه ..

" لاتتعصب هي هاي اسراء قابل جديدة عليك "

رد " لا شذر مو هيج ماكو رجال يقبل مرته تتدخل بشغله وتريد تسيطر عليه "

رديت " يعني هو قاضي وهي قاضيه شتتوقع يتراهمون "

هز راسه " اعرفهم مايتراهمون ومايستمرون اذا بقت اختي بهيج عقلية "

رديت " الضحية اولادهم .. اكبر غلط سوت واحد بعد الثاني .. اتذكرها ماجانت رايدة احمد بس هو اصر تجيبه وهم تعاركوا وبعدها اتفقوا بس هالطفل .. ااااه اكو ناس تتمنى هالنعمه "

حضني " الحمد لله الله ناطينا اثنين طيور وزهرة بينهم بعد شنريد ؟"

رديت " الحمد لله ناطينا وزايد هم "

اخذني الحضنه واكيد مايبطل سوالفه .. حضنه بالنسبة الي ملاذ امن ارمي بي كل همومي وافكاري وانام بسلام ..

بعز نومتنا وفزيت ..

" نسر انت اليوم عقمت لو لا من رجعت من برة "

ضحك " انت صار بيج وهواس مال تعقيم ..والله دخلت للحمام وعقمت بعد شتردين "

ابتسمت " غير علمودك وعلمود ولدنا وخاله هم ماعندها مناعه "

رد " طبعا حبيبتي اذا مااخاف ع نفسي اخاف عليكم وخاصه انت سكر ومناعتج قليلة .."

بقت اسراء عندنا كم .. وبعدها اجه زوجها يحجي وي نسر يرجعها ..

وصار واحد يرفع وواحد يكبس وعبالك گاعدين بمحكمة ..

اخر شي گالتله .." بعد مالي عيشة وياك طلگني "

هو تعصب وگالها " اني هم مليت صار سنين متحمل مشاكلج واكول لا مركزي ولاسمعتي تسمحلي افضح نفس واطلگ .. بس مادام انت رايدة خلص نتطلگ بس الجهال عندي ."

ردت " تحلم ولدي عندي ومستحيل تاخذهم مني "

عاط بيهم نسر " انتو شنو ماتحترمون ناس بينكم واكفه وين انتو بمحكمة .. طلكتوا وحكمتوا بالحضانه بكيفكم . هاي انتو الدارسين والفاهمين هيج تفكرون ..لاعتب ع الجهلة .. انت روح وخليها فترة هنا وفكروا زين باولادكم قبل نفسكم .. ولاتاخذون قرار تندمون عليه "

زوجها طلع وهي بعد مارزلها نسر سكتت ..بس ماقبلت ترجع وبقت يمنا فترة طويله ..

بهالفترة سحر وارشد هم متعاركين وبينهم مشاكل وع اساس متجاوزة ع مرت عمو علاء .. ومرت عمو مخيرتهم لو هي لو سحر بالبيت ..

وهالفرصة سحر تتمناها من زمان .. انه تعزل ببيت وحدها ..

طلب ارشد مهلة من اهلة بين مايرتب اموره ويطلعون

وخابرت اني سحر رغم اعرف ردها بارد وياي ووصيتها تعقل بس اعرفها متاخذ بنصيحتي حجتها انه مرت عمو تتعارك وياها وتعيرها بالخلفة ..

بيداء قررت تخطب المهيمن .. بس مهيمن قافل وماقبل يتزوج .. رغم جنت متمنيه تكون سمر من نصيبه ..

بس من سمعته مرة يكول الامه يريد دنيا .. استغربت

دنيا اصغر منه بهواي .. واصلا تعتبره مثل اخوها حتى حجاب ما تلبس منه ..

شلون وشوكت هيج مهيمن انعجب بيها .. صح احبه واحترمه مثل اخوي بس دنيا تختلف . دنيا اريدها تختار بقناعتها وبرضاها ..

الغريب انه بيداء ماحجت ابد بالموضوع ولافتحته ..

اني هم سكتت ..

صارت گبالي .. دنو حاولت اعرف رأيها ..

خليتها گبالي وحجيت ..

" ماما دنو شنو رأيج بمهيمن "

ردت " شبي ماما من ناحية شنو ؟"

رديت بتوتر مااريد افتح عينها .. " يعني مثلا اذا واحد خطبج بعمر مهيمن تقبلين "

ابتسمت " ماما شبيج متوترة وتستحين تحجين .. اني عمري حيصير 21 سنة .. يعني افهم شنو قصدج مو صغيرة اني كبرت .. بس من كبرت شلت وياي تربيتي الربتيها الي لحد هاليوم .. من اتصرف اي تصرف يصير كلامج گبالي .. علمتيني اكون صديقه الج قبل لا تكونين ام الي .. "

استغربت وفرحت بنفس الوقت " هاي شوكت كبرتي "

ضحكت " اووووه من زمان بس انت عبالج بعدني ذيج دنو التعرفيها "

اخذتها الحضني وبوستها .. همستلي " ماما مهيمن دز فرح الي "

باوعتلها بأستغراب .. " شگالتلج ؟"

ردت " يريد يخطبني منكم "

اخذت نفس وباوعتلها بتساؤل . جاوبتني من غير مااسأل ..

" شوفي ماما .. من صغري واني اعتبر مهيمن اخوي. الجبير . وحمودي وفرح نفس الشي .. ابد مايوم اعتبرتهم غير شي .. لدرجة من گالتلي فرح صرت اضحك واكلها دا يتشاقه . لان مستحيل اشوفه غير اخو الي .. ماما اني حاليا دراستي اهم من الزواج بس بيوم الي اكبر واحس نفسي مستعدة الهيج خطوة اكيد مو مهيمن الاختاره "

حضنتها واني مفتخرة بكلامها .. بودي اعيط " هاي بنتي .. اني كبرتها وربيتها "

اعتراضي ع مهيمن مو فقط ع العمر مااني نسر اكبر مني بهواي .. ولا ع الشهادة لان هي دكتورة .. بس بنتي واعرفها .. دايما تتمنى تاخذ شخص مثل ابوها يحبها ويدللها .. ولان هم متربين سوة مستحيل راح تنظرله او ينظرلها بنفس نظراتنا اني ونسر ..

مهيمن بعد مااخذ جوابه من فرح بخصوص دنيا ..

ما دخل احد بينا ولا امه حجت .. رغم عرفت هي ماقابله من البداية وگايلتله اريد بنت كبيرة وواعيه الك يمكن كلنا مانريد نصدگ انه دنو وفرح خلص كبروا ..

بعد اشهر ..

خابرت سمر تبجي .." شذر بيبي وجدو انصابوا .. واعتبرونا كلنا ملامسين واخذوهم للحجر "

صرت الطم وابجي " بيبي وين وشلون انصابت "

ردت " من جدو "

هنا گلبي انقبض وحسيت راح نخسر واحد منهم ..

جدو رغم عمرة كبير بس قوي مو مثل بيبي بنيتها ضعيفة واي مرض يهدها ..

بشهر التاسع من نفس السنة بيبي توفت ..

بيومها الخبر مثل الفاجعة كان النا ..

ابد ماطالعه من كورونا لسا .. ورغم محجورين وعندهم اصابات بس مااتحملت گلتله النسر لازم اروح ..

خالة عارضت " يمة بيبيتج ماتت بكورونا وين رايحة فكري بولدج "

نسر هم ماقبل اروح وكال هم اصلا ما يسوون فاتحة ..

انتظرت اسبوعين وبعد مااتحملت رحت الهم ..

شفت البيت كله حزين ..

مكانها فارغ ..

وين ذيج الجانت تهلهل وتمرحب بية من تشوفني ادخل للبيت ..

جانت زهرة البيت هي وهسا البيت ذبلان بغيابها ..

جدو ينبجي ع حاله .. مكابل صورتها ويبجي مثل الطفل المفارگ امه ..

خلصوا عمرهم سوه ابد ماافترقوا . مثل عصافير الحب

دخلتله اخذت من خاطره مايقبل واحد يتقربله يخاف علينا ..

باوعلي بجة " راح بيبيتج شذرة اني اموت ماابقى بعدها اموت .. لو ميت اني وهي عايشة "

مااتحملت رحت حضنته .. خلي شيصير يصير .. انعل ابو الوكت الي خلانا مانحضن احبابنا بسبب وباء ..

اني ابجي وهو يبجي واجت سمر هم حضنتنا ونبجي سوة ..

دخل خالو علاء .. " قنعنه خل ياكل مايقبل ياكل وهو هستوة طايب ولازم يتقوة "

جبت الاكل واكلته بيدي ..

ضعفان حيل ومتغير .. من رجعت النسر بس ابجي اگله نسر يبجي عليها ويتمنى الموت ..

هم تبجي عليه اذا متت هيج ..

حضني " لاتكولين هيج عمري قبل عمرج ليش نسر شنو بدون شذر .. لج عمري بدأ من يوم الدخلتي الحياتي "

رديت " اني العمري بدأ من يوم الشفتك بالكراج شلون تخوف انت وشواربك وتشرب جاي وتباوعلي بطرف عينك "

راد يضحكني " بيومها گلت خرب اهلج هيج جمال يكتل وطالعه بالفجر وبالكراج "

دفعته .. " اصلا جذاب جنت تكرهني "

رد " مستحيل .. قدرنا نكتب بهاليوم وبذرة حبنه انزرعت بهاليوم شلون اكرهج .. بس گولي جنت مااثق رغم ماهان عليه اشوفج بوسط الزلم واعوفج وحدج "

بقينا نسترجع ايامنا قبل .. لحظات نضحك بيها ولحظات نحزن بيها .. ولحظات من نذكر عمة. وسوالفها نبجي وندعيلها بالرحمة مااتذكر يوم نسيتها اصلا حتى اتذكرها.. جانت اكثر انسانه تركت اثر طيب بداخلي هي

طبعا خالة خافت لان رحت البيت جدو ماخلتني اتقرب للاولاد تخاف عليهم وصتني احجر نفسي ..

اضحك ع سوالفها وهي من صدك تحجي .. وحجرتنا اني ونسر بالغرفه .. رغم كلشي مابينا بس نسر فرح ولكاها فرصه ..

اخذ اجازة وگابلني .. رغم حزني ع بيبيتي بس وجوده يمي خفف عني وطبعا خلانا نسترجع ايامنا قبل ..

كل يوم اخابر سمر واسأل عن جدو .. طمنتني عليه احسن شوية ..

بس جيت ماما الهم ازمت وضعه بعد ماگالت المرت عمو عامر انه هي متزوجة زوجها ..

مرت عمو عامر تخبلت ورادت تحرگ نفسها من سمعت

سنين وهالسر ماطلع .. شلون امن عمو عامر وخله ماما تطلع ماندري ..

سمر تگلي ماما حيل ضعفانه وكبرانه ومو نفس شكلها قبل ..

بعدها جدو قرر انه عمو عامر يطلكها الماما وتعيش وي ارشد وسحر ببيتهم الجديد ..

وفعلا كانت هاي خطة سحر هي وماما من البداية ..

كنت حاسة ماما مجبورة لان اعرفها رغم كل مساوئها الا انه هي تحب بابا حيل ومستحيل تحب عمو عامر وتستقر وياه .. رغم معذبها هواي وياه ومعتبرها سجينه عنده ..

استقر بيت جدو ورجعت مرت عمو عامر . بس بقت متخوفة من ماما .. وصارت تضايق سمر . سمر البقت وحيدة بينهم .. جانت بيبي تدافعلها وبيبي راحت ..

كم مرة حجيت وياها تجي يمي او يم خاله بس ماقبلت الاجل جدو تكول خطية يبقئ وحده ..

دايما ادعيلها يجيها نصيب زين يطلعها من القوقعة الحبست نفسها داخلها ..

حجيت وياها وقنعتها بس تخلص ازمة كورونا اطلعها للخارج واسويلها عملية الوجهها وشبه اقتنعت ..

اسراء تطلكت بعد زعل اشهر ابد ماتراهموا ولا ارتاحوا

ويمكن هالحل انسب الهم رغم كلنا نتمنى انه بيوم يراجعون حساباتهم ويرجعون الاجل اولادهم بعدهم صغار ..

اني شهرين مريضه مااعرف شبيه .. بين فترة وفترة يهبط السكر .. وعندي خربطة بالهرمونات ..

هالسنة وبشهر 11 عيد ميلاد التوأم .. ذيج السنة صادفت مضاهرات وسويناه بينا ..

هالمرة كورونا ونخاف .. هم سويناها بينا داخل البيت

لليل بعد ماكملت الهوسة والتنظيف ..

حسيت بدوخة وتعب .. باوعتلي عذورة وسألت

" اشو وجهج اصفر ومتغيرة خاف سكرج "

رديت " لا مابي شي بس هالفترة تلعب نفسي حيل ومدري شبيه يمكن من العلاج "

ردت " خاف حامل "

صفنت بوجهها وضحكت .. لا يمعودة گولي غيرها هو اني هيج دائما بسبب خربطة الهرمونات .. والعلاج قوي مااتحمل "

سكتت ومااهتميت ..

بس بعدين لاحظت نفسي فعلا حالتي مو طبيعية

طلعت التقويم بالموبايل ودااحسب ..

دخل نسر للغرفه شافني. .

شتحسبين ..

رديت " لا هيج شغله شاكه بيها "

سأل " شنو ؟"

رديت " لمن اتأكد يلة اگلك ؟"

رد " وشلون انام اذا مااعرف لاتقلقيني "

بعد الحاحه .. عدلت كعدت كباله وعيونه بعيوني يريد يعرف مااتحملت ضحكت.

" لاتباوعلي هيج مااكدر احجي "

حسيته ضاج " احجي ليش هيج تسوين بيه قلقتيني "

رديت " مو مااريد انطيك امل وتالي ماكو شي ونتفشل"

رد " حامل "

ابتسمت " يمكن "

صفن بوجهي " شنو يمكن "

رديت " يعني اعراض حمل ونفسها الحسيتها بكروري وحدوري .. بس خايفه ماكو شي يطلع "

رد" وشلون نتأكد "

رديت " هسا لو اكو صيدلية قريبة جان جبنا تحليل منزلي .. "

بعدني ماكملت ركض بدل وطلع .. طلعت وراه ماسمعني ..

طلعت خاله " شكو ؟"

رديت " هااا ماكو شي طلع نسر يجيب جكاير ماعندة "

هزت ايديها " بله طالع بنص الليل علمود جكاير "

بقيت منتضرة برة .. لمن اجه ..

صرت احجي لان طلع .. لزم ايدي خله بيها التحليل

" يله حبيبتي سويه بسرعه واني منتظرج ."

كمت اضحك عليه وبداخلي خايفه وادعي كون مااتفشل صح يكول مااريد .. بس الفرحة واللهفة الشفتها بعيونه خلتني اخاف يخيب امله ..

اخذته ودخلت للحمام كملت وطلعت ..

صار يباوعله وياي .. صار خطين باوعلي واني مصدومة وصافنة.. خطين واضحات حيل ..

باوعلي .. " يعني شنو ؟"

رديت بصدمة " يعني حامل"

حضني وعيونه تدمع ..

ركض الامه بشرها. بدقايق البيت كله عرف ..

كلها تبجي من الفرحة .. ودنو تكول هالمرة معليه اريد بنية .. ونسميها ملاك ..

ابتسمت .. ان شاء الله وهيج نتذكر ملوكة .. لسا مانسيناها ونذكرها بدعائنا وثوابنا رغم هي طير من الجنه ..

كل هذا واني ماصدگت لمن سويت تحليل وسونار ..

والسونار .. گالي الج شهرين استغربت . شهرين واني ماادري جنت شاكه بس اخاف اصدگ ..

واخذ علاجات وماادري بنفسي .. بس ان شاء الله مثل مانطانياه يحفظلياه ..

بيومها نسر سوة عشا الوجه الله وجمع اهلة وبيت عمه واجت خالة والسيد .. طبعا ليث عرفنا بي خاطب . وقصي حيجيه طفل ثاني من زوجته الثانية ورغد هي المربيه بنت ضرتها وعلاقتهن زينة ..

بيومها سوينا فيديو وي هنا وفرحتلنا من سمعت والاولاد حجوا وي بيت جدهم ..

كلها فرحانة الا فرحة نسر كانت مختلفه .. الناس كلها تحجي وتضحك وهو يباوعلي بحب نظرات يسترجع بيها كل ذكرياتنا مع بعض واحلامنا ومستقبلنا ..

احس كلما يكبر يكبر حبنا ويانا ..

كان هذا الخبر هو اجمل خبر الي بسنة 2020 .. هالسنة اخذت مني ناس اعزاز ونطتني روح ثانية ببطني ..

اتمنئ انه تولد بنتي بالسلامة . لاتستغربون حاستها بنية وان شاء الله تطلع بنية ادعولي تجي بتمام الصحة والعافية ..

وشكرا الكم لان رافقتونا بجميع محطات حياتنا بفرحها وحزنها .. في امان الله وربي يبعد هالغمة عن هالامة ان شاء الله..

النهاية ..

#شمس السعدي..

https://www.youtube.com/watch?v=CCl-ktI7fPA