تحميل رواية «قوارير من فضة» PDF

مساء الورد ❤

///// البارت السادس والخمســــون /////

#قوارير_من_فضة ج2

#بقلمي_شمس_السعدي ..

‏‏شتريد مني بعد ماخيبت ظني؟

هسه جاي تگول أحبك أنت لو بعدك تحبني ماكسرت الگلب بــ ايدك ..‏

امس ساهر ويا طيفك نشكي من بردك وصيفك وبسهوله جاي ترجع هو كيفك ..؟

لاتردلي هسه اني ما اريدك مابقى بيا حنان ومابقى عندك امان ..

اتقرب مني وهمس " اذا هالشي يريحج ويخليج تسامحيني اني راضي اشتكي عليه وريحيني بلكي ساعتها ضميري هم يرتاح "!!

هالجملة مافارگت بالي .. كلما اصفن اتذكر كلامه ..

ندمه .. خوفه..  تصنعه بالحب ..

هذا كله مايشفعله الي سواه بيه ..

گاعدة ع المكينه بعد اشهر من الي صارلي ..

هاي احنة بسنة 2010 ..

من صغري احب السنوات الزوجية احس بيها فال خير بعكس الفردية .. ولو هسا تشابهت سنيني وصارت يتسابقن على اذيتي ..

دنگت اريد اخلي الخيط بأبرة المكينة…  صايرة عيوني تغوش مااشوف زين .  صار عمري 25 سنة واحس نفسي كبرت حيل ..

صحت " دنو ماما جيبي لايت اريد اشوف الخيط "

جابت اللايت واجت .. فتحته الي خليت الخيط بثقب الابرة ..

هزيت راسي " هاي دخلتها ماما روحي كملي دراستج "

من بعد ماطلعت من بيتهم واني اصرف من فلوسي المجمعتهن .. واذا خلصن شلون ؟؟

قررت ارجع اشتغل مثل قبل وصيت البنات يدزولي المكينة وي مشتاق ..

رغم الاثار الجانبية الي صابتني من السكر والاسقاط ومرات رجلي او ايدي يخدرن .. بس احس راحتي بالخياط والشغل ..

اول ماخليت الدشداشة ع المكينة… دگ جهازي ..

جابته دنو .

باوعت هاي خاله .. شعندها هيج وكت باوعت للساعه بالعشرة بالليل ..

رفعته سمعت عياط وبجي بأذني .. رجف گلبي ..

صوت خاله وهي تعيط " وج شذر بيبيتج ماتت امي ماتت ماتت وعافتني "

نزلت دمعتي " لا حول ولا قوة الا بالله "

ماعرفت اصبرها او اعزيها " خاله اجيج هسا "

ردت " لا ماما هسا راح ناخذها نزورها وندفنها وللصبح نرجع مااريدج تجين اني اخابرج "

تأذيت حيل من الخبر رغم ماشبعت منها وماشفت شي منها . هم كم مرة واخر مرة عبالها اني امي وصارت تدعي وتحجي عليه .. كانت تفقد وترجع الوعيها .

ااااه امي خسرت ابوها وامها وهم ماراضين عنها ..

معقولة گلبها مايحن وماتسأل عنهم .. او هم گلبها يحس هسا وينقبض ..

تركت كلشي وگمت توضيت وكعدت على سجادتي .

بديت اقرأ سورة يس ..

حضرت ملابس سود .. وملابس دنو للمدرسه…

مااعرف شلون راح يكون اللقاء بيهم بس مضطرة اروح الخاطر خاله .. وگفت وياي بأصعب ايامي ولازم اوگف وياها ..

نمنا للصبح گعدت دنو تريكنا وبدلتلها اجه مشتاق دگ هورن .. طلعتها اله…

ووصيته " خوية من تطلعها من المدرسه اخذها البيت جدها اني مموجودة اليوم .. وللعصر اخابر البنات من ارجع تجيبها ..

رد " صار خوية بس يخابروني اجيبها الج "

دخلت للبيت بدلت بسرعه ولبست عباتي الاسلامية

وشالي ..

خابرت خالة .. صوتها من البجي متغير .. " البقاء لله خاله دفنتوها ؟"

ردت " اي شذورة اي .. لج غسلتها بيدي ودفنتها ورجعت وحدي سندي بهالدنيا راح خلص بقيت وحدي"

هي تحجي واني ابجي ..

" الله يرحمها .. وصلتوا اريد اجي "

ردت " ساعه هيج ونوصل بعدنا .."

سديته منها ماردت اروح وهي ماكو… بقيت اقرأ قران البيبي اريد اسويلها ختمة ..

كملت ورحت .. وصلت للبيت مقفول بقفل وسلسلة ..

استغربت طلعت الموبايل خابرت خاله ..

ماردت ..

المرة الثانية جاوبت " ها شذر "

سالتها " وين انتو خاله اجيت للبيت ماكو احد "

ردت " هااا اي مو عمي گال الفاتحة عندي تصير لان بيت اهلي صغير شايفته انتي مايكفي وناسنا هواي ."

اتنهد " زين هسا شلون ؟"

ردت " تعاي لهنا هسا انطيج العنوان مايتيه "

ضجت من عرفت الفاتحة هناك .. بس ماكدرت اتعذر منها واكلها مااجي ..

انطتني العنوان واسم البيت بس مااندل .. خابرت رسميه گلتلها اريدج ترحين وياي ..

ماحجت شي مريت عليها لكيتها مجهزة نفسها ..

سألتني " هذا الاسم الگلتيلي عليهم ذولة ناس معروفين منين تعرفيهم "

رديت " گرايب خاله "

ماگلتلها بيت جدي . لان اصلا اني ممعتبرتهم هيج بعد الي سووه بيه ..

ردت هي " گرايبها يعني گرايبج .. يعني عندج هيج گرايب وتگولين يتيمة وعشتي عند ام وليد وفوگاها تعبتي وشغل وضيم عود ليش ؟"

اتنهدت " ماكو احد يتحمل احد وحتى لو گرايبي مو معناها اهلي ويتحملوني "

ردت " اي صدگ منو يتحمل الثاني بهالوكت "

وصلنا للبيت جان مفتوح وناصبين جادر بالباب ..

ماعرفت منين ادخل .

تالي اجه ولد صاح " تعالن اخواتي منا ادخلن "

شلت راسي صار گبالي ارشد شافني انصدم ..

جان بيده صينية جاي وطالع من المطبخ من شافني دار وجهة ..

صاح " هاجر اخذيهن العمتي سماهر "

دخلت من المطبخ بنات هواي وكلهن يباوعن مستغربات

سلمت عليهن وعزيتهن ..

ردن التعزية ..

سألت هاجر " تشبهين خاله سماهر شتصيرين منها ؟"

رديت " بنت اختها "

شهگت هاجر " بس لاانتي بنت عمو عادل "

هزيت راسي..  ملامحهن تغيرت كلها .. تندمت گلتلهن احسهن اغتثن من عرفن ..

دخلت الخالة للغرفه البيت مليان عالم ..

شافتني اشرتلي .. حالتها حاله ووجهة ازرك من اللطم

رحت بسرعه حضنتها وابجي .. هي تبجي وياي وتشكيلي.  " راحت وعافتني شذورة بقيت وحدي مثلج يشذورة جانت ونستي وحياتي كلها هي "

تبجي وتون واني يمها بس ابجي مااعرف شلون اواسيها حتى عيوني حسيتها تحرگني من كثر البجي..

دخلت رسميه سلمت عليهن اكو بيهن تعرفهن واكو لا

المهم هي اجتماعية بسرعه تندمج ..

انتشر الخبر بسرعه بالبيت..  بنت سماح هنا ..

اي سمعه واي اثر تركتلي هالام ..

بحيث الكل يباوعلي بنظرة استحقار ..

گاعدة يم خاله .. اجن اثنين نسوان گعدن يمها يواسنها

باوعلي وحجن " بس لاهاي بنت عادل "

هزت راسها " اي "

التفتت عليه " ذني عماتج "

سلمت عادي وكان سلامهن ببرود ..

المشكله محد كال بنت عادل الا هن البقية كلها تسميني بنت سماح ..

حجت وحدة منهن " " مو ع اساس ابوي مايريد يشوف واحد منهم بالبيت "

خزرتها خاله " جايه الي مو الاحد .. ماعاجبجن اسوي العزااا ببيت اهلي "

سكتن كلهن .. حبيت شخصية خاله بينهم .. رغم مكسورة وحزينة بس ماتنطي مجال الوحدة تحجي عليه ..

بقت كل شوية جايه وحدة توكف بالباب تباوع وتروح وكانه وحدة توصي الثانية..

حسيت بنفسي متقيدة حيل ..

گامت رسميه " اني اروح عندي شغل تبقين لو تروحين"

باوعت الخاله لزمت ايدي " خليج يمي اني اخلي واحد من الولد يدزج "

راحت رسمية ..  واني بقيت يمها للظهر الملالي مابطلن نعي وحدة داخله وحدة طالعه .

هلكت خالة من البجي ..

اذن الاذان توقفت الملة . فرشوا ديصبون غدا ..

حسيت حركة غريبه بالمطبخ .. وهوسة صارت ..

سدن الباب الداخلي…

حتى محد يسمع .. شوية واجت وحدة من عماتي ..

همست الخاله بأذنها گامت ..

صارت مطافر وراها .. خفت مااعرف ليش ..

هي بلا كلشي نظراتهم الي تخوف كأنه مسويتلهن شي او مأذيتهن يباوعلي بحقد ..

اكو شي مسكتهن ..

حتى عماتي المفروض هن اخوات ابوي ماحسيت بيهن مثل خاله ولهفتها عليه وخوفها…

ابد ماحسيت بمشاعر اتجاهن باردات حيل ..

رجعت خاله عصبية وضايجة حيل ..

همست " خاله خليني اروح احس الكل مايريدني هنا "

لزمت ايدي وعصرتهن " المايريدج غصب عنه يتحمل ويسكت .. البيت بيتج مثل ماهو بيتهم وهذا عزاي عود من تجيهم تسيارة خلي يحجون "

اجت وحدة من عماتي حجت وياها :

" سماهر تعرفيه انت شگد عصبي لو ساكته عنه "

ردت خاله بعصبيه " مو وكتها بتول اخوجن زودها بس خلي يخلص العزااا والي حجي ثاني وي عمي "

صبوا الغدا .. تمن وعلية حشوة ولحم ومرگ وفوگاه خبزة ..

خاله شادة راسها ..

اشرتلي اكلي ..

همست " وانتي متاكلين "

مغمضه عينها وتحجي " مااشتهي اكلي انتي "

لفيت لفه الها " اكلي هاي الخاطري "

فتحت عينها " حبيبتي لو جوعانة اكلت بس راسي يأذيني مااگدر اكلي انتي "

اجت عمتي الي اسمها بتول ..

" سماهر امي مريضة ماتتحمل ومانريدها تعرف ببنت عادل كم جلطة وجلطة صابتها بسببه ودور تتذكره بيها لاتحجين هسا اني نبهت ع الكل مايجيب اسمها هنا وگليلها بعد لاتجي عود من ترجعين البيتج تروح لهناك تشوفج "

باوعتلي خاله وانحرجت " اسمها بنت اخوجن شبيجن انتن "

ردت " اخواني علاء وعامر ماعدنا غيرهم ..لو نسيتي هالحجي..  مو من يوم الي صار واحنة حاسبيهم ميتين مو هذا قرار ابوي وگال اعتبروا الاثنين ماتوا ودفناهم منين طلعتلنا هالبلوة الي من الصبح لسا البيت مگلوب من وراها "

باوعت الخالة والعبرة خانگتني " خاله خليني اروح مااتحمل بعد .. "

اتنهدت اوكفي لحظة اخلي واحد يوصلج دنيا ظهر هسا

رديت " لا اني اروح مااريد احد "

همست " اگعدي اني اعرف شي وانتي تعرفين شي "

طلعت موبايلها وخابرت " هاااا عمة وينك .. اذا ماعندك شي اريدك توصل بنت عمك البيتها وتخلي بالك عليها ولو اني زعلانة عليك بس مااثق الا بيك… "

مااعرف شنو حاجاها ردت :

" مو وكتها عمة بعدين بعدين اعرف هاي سوالف عامر يلة تعال اخذها امانه عندك "

سدت الموبايل " خاله مااريد احد يوصلني هو منو الطايقني هنا "

اتنهدت " بعد لاتجين لهنا اني من ارجع للبيت ادز عليج"

دگ موبايلي باوعت عذورة رديت " هااا شذر وين انتي ؟"

رديت " اني بفاتحة بيبي ام ماما .. خليها بيناتنا لاتحجين الاحد خاف احد يسألج گولي خالتها مريضه وراحت يمها .  اجت دنو ؟؟"

ردت " اي اجت هياتها واستغربنا متشوفين خابرتج ودور نسر شافها هنا وصار يسألها ؟"

رديت " شنو رجع من الدوام ؟"

ردت " اي اليوم نزل .. لو باقية يمج احسن ع الاقل هدوء يمج هنا كل شوية مشكله اسم الله عبالك قنبلة موقوته ..

لو اسراء مو نسر مايحجي وياها .. وهي متخبله كم مرة راحت تبرر وتعذر وطردها وهي متخبله كلش "

اتنهدت " بلكي تعرف خطأها تحس شلون ظلمتني..  المهم عذورة خلي مشتاق يجيب دنو اني راح ارجع للبيت . واذا نعسانه خليها تنام وللعصر يجيبها "

ردت " ان شاء الله هسا اشوفه "

كملت مكالمة همست خالة ..

" انتظري شوية .. جايتهم ناس من المحافظات وهوسة بالباب خلي يرحون واطلعي .."

بقيت يمها بس نظراتهم زعجتني .. صح اكو بيهم مايعرفوني بس يقتلهم الفضول بسبب الشبه البينا ويسألون ..

ومن تگلهم بنت اختي يستغربون ويسكتون .. الظاهر قصة ابوي وامي كانت حدث الساحة آنذاك ..

من هيج اشوف الحقد بعيون الكل .. لان العار الي صابهم ذيج السنين بدأ يتجدد بشوفتهم الي ..

الكل يحاول يخفي وجودي بس خاله الوحيدة الي ماهمها كلام احد ..

دگ موبايل خاله .. اشرتلي " يلة روحي ارشد بالباب يوصلج "

استغربت " خاله مو هذا ؟؟؟… "

قاطعتنـي " لاتخافين روحي وخابريني من توصلين "

سلمت عليها وطلعت…

باوعت بالصاله صارت عيني بعين حجية گاعدة ع القنفه وتحجي وي وحدة بصفها ..

حلوة حيل وشكلها محبوب .. مااعرف ليش رف گلبي عليها ..

طلعت من المطبخ..  شفت البنات التفتن يباوعلي…

حتى الي تغسل مواعين تركت مواعينها ودارت وجهها

هاجر دتصب جاي .. دخل ارشد حجت وياه ..

' هذا الجاي اخذه وياك بس لو جايبين واحد يسويلكم جاي بالشارع احسن احنة هنا مانلحگ بين البيت والكم"

كح وباوعلي " ان شاء الله من باجر هسا ادزلج واحد من الولد ياخذ الجاي "

اشرلي " يلة خلينا نروح "

من سمعت هيج شهگت " وين تروح "

همس " بعدين افهمج حبيبتي "

هي تخبلت مااعرف شبيها " ماتروح انت اي واحد من الولد ياخذها "

ابتسم وسحبها اله .. همس بأذنها احس نار يطلع من عيونها " وابوي يعرف ؟؟"

خزرها " وعمي شكو شبيج هاجر كبري عقلج "

ضاجت وخزرتني " روح ارشد روح من ترجع نحجي "

طلع هو گدامي داالبس بحذائي .. حجن عليها " وج شلون تأمنين يروح وياها هسا تطلع مثل امها وتاخذه منج "

درت وجهي باوعتلهن .. سكتن ماحجن ..

عفتهن وطلعت والدمعة بعيني .. الكل يعرف بسالفتهم وشوفتهم الي جددت السالفه .. الي اعرفه الاولاد يجيبون العار الاهلهم ..

هسا اني اهلي جابولي العار .. وخلو ناس المفروض يكونون اهل الي صاروا اعدائي وينظرولي بحقد ..

عماتي هاجر نسوان عمامي وكل اليعرفني .. نظراتهن متشابهة ..

دمعتي ماانتظرت ونزلت بسرعه .. ارشد گدامي ..

همس " خلينا نطلع من الباب الخلفي منا هوسة صاير والجادر مفتوح "

رحت وراها صاح واحد ورانا ..

" ارشد وين رايح "

دار وجهة " هااا بابا هسا جاي "

بقيت دايرة وجهي خفت من گاله بابا اكيد يطلع نفس عمة ويفضحني بوسط الناس ..

راح ارشد مااعرف شگالة . اجة الرجال ..

اتقرب مني واني مدنگة بخوف وتوتر .. شفت بس رجليه لابس حذاء ودشداشة ..

همس " انت بنت عادل "

اخذت نفس وشلت راسي ..

انصدمت بشكله . رجال كبير بالعمر .. لابس عگال وغترة بيضة… ابيض حيل بوجه صافي مابي بس تجاعيد بوجهة ..

لكل خط من تجاعيد الزمن حكاية ..

ولكل نقشة رواية...

صار يباوع بوجهي وكأنه يحفظ ملامحي… انسان مبين عليه الشموخ والصبر بس بنفس الوقت ما يظهر اي مشاعر وكأنه الكتمان عنوانه ..

كسر حاجز الصمت بينا ارشد بكلامه " شذر هذا جدي ابو ابوج يعني "

رجعت بسرعه اتمعن بي وكانه اريد احفظ ملامحه . مااعرف ليش اصريت اشوف كل ردة فعل منه .

توقعت يحضني يطبطب عليه وياخذ مني جرح السنين والامها ..

اتنهد " يلة بوية وصل بنت عمك بسرعة وارجع نحتاجك هنا العالم تارسة الجادر لا تتأخر "

باوعلي " اذا تحتاجين شي گولي لو خلي خالتج توصلي "

هزيت راسي بخيبة امل " شكرا ماقصرت "

دار وجهة وراح وبقت عيوني شابحة وراه ..

طلعت اجة وراي ارشد…

درت وجهي " ارجع ماكو داعي اني اروح البيت مو بعيد كلش .. "

رد " لا خاله سماهر امنتني اوصلج وتدخلين للبيت يلة"

رديت " مااعرف خاله شلون امنتني عندك وانت الي خطفتني وي عمك "

اتنهد " حقج بس خلينا نروح "

طلع قبلي شغل السيارة بالگراج الخلفي .. اشرلي اصعد

صعدت بين ما فتح الباب ورجع صعد ..

طلعنا من البيت .. جانت سيارة حديثة وعالية ..

صارت عيني ع البيت ومساحتة . كبير حديقه امامية وخلفية وكراجين وعايشين حياة الرفاهية…

بينما اني عشت عمري هنا بالكاظمية اتعب واشتغل حتى محد يمن عليه او اعتاز واذل نفسي ..

اللهم لاحسد وبالعافية عليهم .. بس ليش اني ماعشت بينهم وماصرت مثل الغريبة والمنبوذة ..

لسا نظرات هاجر ببالي وهي خايفه عليه لااخذه منها

وكأنه السوته امي ممكن اسويه اني ..

باوعلي من المراية " خوية اعذريني على كل الي صار الله شاهد ماجنت اعرف عمي يخطفج توقعت بس يحجي وياج بالباب "

رديت " شلون اعذرك واني خسرت طفلي بسببكم "

وگف سيارته بسرعه مصدوم " جنتي حامل ؟؟"

حسيته ضاج وانقهر " الله شاهد ماادري اعذريني وحقج لو تخافين منه بس الي صار لابيدي ولابيدج .. "

قاطعته " لاتعتذر  .. مستحيل اسامح خسارة ابني .. وحتى لو ردت اسامح فنظراتكم الي وابتعادكم عني يكفي انه يحسسني بغربتي بينكم ويمنعني اسامحكم "

اتنهد" امسحيها بيه اذا وحدة مستج بشي .. واذا على هاجر فأعذريها هي هيج طبعها تغار عليه ولان حامل صايرة حساسة زايد "

رديت " وليش امسحها بوجهك ع اساس انت تفرق عنهم .  جيتك البيتي وتجسسك عليه انت وعمك هذا كله مايبرر ولايشفع السويتوه بيه جنت اتوقع راح الگي اهل الي مو اعداء "

سكت ومارد الى ان وصلنا .. التفت " انتي مالج ذنب ولو عرفت متأخر .. بس اتمنى بمرور الوقت تعرفيني وتسامحيني .. خلينا نعتبر هذا اول تعارف النا واحسبيني مثل اخوج "

جنت گاعدة بالسيارة وارشد ملتفت ويحجي وياي

ماشفت ولاانتبهت النسر واگف بالباب جان ..

الا لمن دگ شباك السيارة علينا ويأشر بيدة .. بمعنى شكو او منو هذا ؟؟

فتحت السيارة ونزلت بسرعه حتى من غير مااباوع بوجه ارشد ..

بسرعة سأل " منو هذا وشعندج جاية وياه ووين جنتي ؟"

ماردت ابين خوفي رديت ببرود " جنت عند خاله توفت بيبي اليوم والولد وصلني "

بقى ارشد يباوع .. ونسر تعصب اشرله " هااا شكو "

همست " شبيك نسر مو هيج"

باوعلي " شبيج شنو ضجتي .. مو هم نفسهم ذوله الي وگعوا الطفل هسا تدافعين عنهم .. دور جايبتلي هذا المايع يوصلها انتي تردين تخبليني لو شنو ؟"

اتنهدت " منا عالم شبيك "

التفت من الجهتين " وين اكو عالم بهالظهرية "

سكتت عنه ورحت بوست دنو وطلعت المفتاح من جنطتي " هااا ماما شلونج اليوم بالمدرسه "

هزت راسها " زينة وتنهدت "

باوعتلها استغربت…

رجع سأل " هاي من شوكت مغيرة كينون الباب ليش المفتاح العندي مايفتح ؟"

رديت واني مستمرة بفتح الباب " من زمان ليش ماتدري ؟"

رد " هيج وجودي كارهته لدرجة تغيرين القفل حتى ماادخل ولا اطمأن عليكم "

سكتت عنه…

دخلت واشرت الدنو " يلة ماما تعاي ادخلي "

واگف گبالي ماگدرت اسد الباب بوجهة مو من عادتي رغم ممتعظة منه كلش ..

هو من شافني دخلت وتركته تعصب .. مادخل بس حجة بعصبية " هاااي اخر مرة اشوف هالمايع يوصلج خالتج ماترحيلها الا وهي وحدها .. وماتختلطين بواحد بيهم .. لاتنسين بعدج مرتي وغصب عنج تحترميني وتخلين اعتبار الي "

حجاهن ورگع الباب حيل وراح ..

دخلت بدلت .. وبدلت الدنو .. سألتني..

" عود انتو ليش تتعاركون وليش بابا مايجي يعيش هنا ويانا لو نروح يمة.. اشتاقيت الفروحة وحمودي وعماتي"

اتنهدت " هي اصلا فروحة مو هناك من ترديهم اخابرهم يجون يمج "

ردت " لا راح يشيلون يم بيتنا هناك بابا شافلهم بيت "

اتنهدت " حبيبتي ماما هالسوالف ماتعرفيهن بعدج صغيرة .. انتي مو تگولين اني مااريد بس يمج .. اني مااگدر اروح لهناك بعد .. وعماتج هم كل جمعه وسبت يجون لهنا يمنا وانتي دوام وتجين تنامين وتدرسين بعد ليش ضايجة "

هزت راسها " ماضايجة بس بابا خطية عفناه وحدة خلي نجيبه "

رديت " ليش وحدة هناك بيبي وعماتج وخاله هديل "

من سمعت بأسم هديل .. ضاجت وراحت جابت مخدتها وفراشها واجت .. فرشتهن ونامت .. "

ماهان عليه تنام ضايجة..  تمددت يمها نمت .. دارت وجها ودفنت راسها بصدري ونامت .. بقيت اشم بيها

" لو ما انتي شنو حياتي اني ؟؟"

للعصر خابرتني خالة تطمأن عليه .. نسيت اخابرها

ماردت اضوجها .. واحجيلها شلون جدي استقبلني ..

وهي اصلا حزينة على بيبي وحالتها حالة ..

گلتلها " خالة اعذريني مااگدر اجيج بعد لمن يخلص العزا وترجعين للبيت اجي يمج "

ردت " حقج حبيبتي اعرف الي شفتيه وسمعتيه مو هين اني هم مااريدج تجين وتنغثين ولو بنات سعد رادن يشوفنج البارحة ماهن جانن وي امهن عند بيت جدهن بكربلاء العصر اجن "

اتنهدت " خليني بعيدة احسن مااريد اشوف احد خاف يطلعن مثل بنات عمي ونظراتهن الي لو هاجر تباوعلي وعبالك راح ابوگ زوجها مني .. شفتي شلون سمعه "

ردت " شذورة امي اعرفج قوية وتحملتي .. طنشي وعبري وهاي هاجر ان اشدلج اذنها "

رديت " لا ابد خاله ولاتحجين وياها .. ترى حقهن شيتوقعن من بنت امها اخذت خطيب اختها وانهزمت "

اتنهدت " الله كريم امي الله كريم .. مايعرفوج الا لمن يعاشروج "

سديت الموبايل وتذكرت لمن انهزمت من بيت اهلي توقعت راح اجي البغداد والگي الاحضان مفتوحتلي راح الگي اهل يطبطبون عليه ويحموني من اهلي والدنيا .. تالي الغريب حماني وطبطب عليه والقريب صار مثل العدو الي ويحاربني "

رغم كل الي سووه الي بيت نسر .. بس كانوا احن عليه من اهلي وعمامي..  احتضنوني رغم غريبه عنهم .. وام نسر بالبداية اعتبرتني بنتها لو ما شغلة الاطفال غيرتها بالاونة الاخيرة ..

صح اسراء ماحبتني ابد وكانت تحفر وراي .. بس اخواتها يختلفن كانن مثل الاخوات الي ..

وخاصه عذورة احسها جزء مني وعبالك توأمي تفهمني من نظرة واني هم اعرفها وافهمها ..

رن الموبايل .. باوعت هاي عذورة ..

ابتسمت ورديت " بنت الحلال بذكرها "

ضحكت " لازم اشتاقيتيلي ؟"

رديت " ليش اكو احد مايشتاقلج "

ضحكت " لج فديت شسويتي هالمرة وهبت العواصف ورعدت الدنيا "

رديت " شتقصدين؟"

ردت " وج النسر اجانا طاير وغاضب .. وسوتله هديل غدا طردها وراح نام بالاستقبال "

اتنهدت " ماسويت شي هو تعصب لان وصلني ابن عمي"

قاطعتنـي " هوب هوب حلو لو لا ؟"

ضحكت " لو فرضنا حلو تبدلين معتز يعني ؟"

ردت " يمة هذا العشق شلون ابدله بس الصوج بيج طلعتيلنا بسالفه يتيمة وتالي طلعت عندج سلالة كلها من الجنة "

ضحكت " والله هو اني ماجنت ادري بهاي السلالة طلعوا متأخرين "

ردت " اي لو ندري ماجان تورط گلبنا "

رديت " شتسوين بيهم .. مايستاهلوج… گلبج يرادلة ناس طيبة ماتعرف الحقد وذولة مايعرفون بس الغدر "

اتنهدت " شسوولج بعد ؟"

رديت " تجين واحجيلج رصيدج لايخلص "

سديته منها .. كملت روتيني اليومي .. سبحت دنو بالليل ونومتها .. رحت قفلت البيبان بالاقفال خالة رسمية من گعدت عندي عذورة ذيج الفترة بعد مااجتني .. واستحيت اگلها تعاي احتمال تنحرج او ولدها مايقبلون سكتت ..

گمت من المغرب اقفل الابواب ..

ثاني يوم طلعت دنو للمدرسة اجه مشتاق اخذها ..

كملت شغلي وخليت اللحم ع نار هادية ..

ورحت اخيط ..

اندگت الباب باوعت للساعة ثمانية ونص ..

ابتسمت " هذا وقتها الزمن "

گمت فتحت الباب وفعلا هي ..

دخلت " اشششاه الجو اليوم بارد حيل .. راح احمي الجاي "

رديت " حميه وصبيلي وياج اني دا اخيط تعاي يمي "

صبت واجت ..

نطتني كوبي خليته يمي ع المكينه ..

گلتلها " اي رسميه شخبار المحلة "

ضحكت " ماتبطلين هالحجايه "

رديت " مو بيدي سوالفج تذكرني برسمية جيتها من الصبح تگعد يم عمة .. تتريگ يمها تساعدها تتسوگلها كلشي بيج يذكرني بذيج الايام "

اتنهدت " من تحجيلي عن ايامج وي عمتج احسدج . انه رغم مالج احد بس لگيتي احد يحتويج ويخاف عليج .. شگد تمنيت اكون يتيمة واحد يترحم عليه ولا هسا الدنيا تلطش بيه "

رديت بتنهد وحسرة جبيرة " مااگدر اگلج الله ليراويج الشفته يمكن الشفتيه اكثر .. بس لاعبالج الدنيا زاهية الي .. يمكن مثل ماگلتي احلى ايام هي السنوات الي عشتهن وي عمة الله يرحمها .. "

ردت " شوقتيني اشوفها ماعندج صور الها ؟"

رديت " لحظة اكو البوم هي وعائلتها بس من جانت شابة وابنها بعدة صغير "

رحت الغرفة وليد طلعته من الكنتور .. شكو ذكريات الهم خازنتها بوحدة من الكناتير وقافله عليهن بس الحراميه من دخلوا مكسرين الكنتور وفاتحيه لان مقفول عبالهم بي ذهب لو فلوس ..

اخذت الالبوم وطلعت ..

گعدت يمها .. بقينا نباوع للصور .. شافت وليد ابتسمت

" وج هذا حلو مو مثل زوجج يخوف اسمه عاقج حواجبه "

ضحكت " لو تشوفيه من يضحك يطلع غير شكل وابتسمت "

باوعتلي " دادة بعد المن مسويتهن علينا وع اساس زعلانة اشو تتغزلين بأبتسامته وتتبسمين "

باوعتلها " عابت صرتي مثل عذراء دومها تفسر تصرفاتي ع مزاجها "

اندگت الباب طفرت " بس لازوجج اجه .. ذكرناه واجانا"

گمت " مااعتقد هسا اشوف .."

فتحت الباب تفاجأت بعمو ابو قصي وام قصي ..

رحبت بيهم ودخلوا عادي ..

صار يباعون للبيت مستغربين لا مصبوغ ومرتب ..

دخلوا الاستقبال ..

زمن طفرت " يلة اني اروح بعدين اجيج "

بقت ام قصي تباوعلها وهي نحرجت ..

من طلعت سألتهم " متريگين اسويلكم جاي ريوگ"

رد بثگل " مشكورة اكعدي اريد احجي وياج "

گعدت ..

كح " شوفي بوية من عرفنا بالبيت تسجل بأسمج صح ضجت وحجيت بس بالاخير گلنا البيت ماراح الغريب

والبنية گرايبها ويتيمة وهي اولى بي "

بس ماتوقعنا الي سمعناه… واليوم جبت خالتج وياي حتى مااجي وحدي وانتي حرمة وحدج ومايجوز وحتى يصير الحجي گدامها وشاهدة عليه ..

احنة اعتبرناج بنتنا وعشتي وي بناتنا وبوسطنا .. بس بعدين نطلع مخدوعين ويطلع عندج اهل وگرايب وتطلعين غريبه عن ام وليد ومو گرايبها ..

هنا مانگدر نسكت بعد ..

رديت " بس عمة ونسر يعرفون وهي الگالت اني گرايبها مو اني الحجيت هذا طلبها مو طلبي يمكن رادت تحميني من الحجي لان فعلا ماعندي احد ولا اهل

هي بس خاله "

سأل " وخالتج وين كل ذيج السنين ليش هسا طلعت .. قصتج كلها ماتدخل بالعقل انتي عندج شي ؟"

سألت " مافهمت قصدك ؟"

رد " يعني اكو عندج ثار منهرمة من شي .. "

رديت " لو عندي شي جان نسر تزوجني ؟؟ .. المفروض تحجي هالحجي النسر لان هو يعرف بكلشي من البداية"

رد " والله حتى نسر صرت مااعرفه .. شمدرينا ماانتي وياه متفقين "

ضحكت " متفقين على شنو ؟؟ نضحك عليكم مثلا "

رد " لان سالفتكم ماتدخل بالعقل .. البيت يتسجل بأسمج وحصة المحلات والعمارة بأسمها شلون رهمت هاي ماادري ؟"

رديت " البيت سجلته بأسمي حتى تحميني .. لان جنت وحيدة وحتى مامتزوجة .. اما العمارة والمحلات فرادتهن صدقه جارية الروحها لهذا سجلتهن بأسمه حتى يدفع عنها البيوت الكافلتهم "

گام ضايج " وشمدرينا بهالحجي صدگ لو جذب "

رديت " تريد خابرة يجي واسأله او روحلة اما البيت فسبق وگلتلكم ادفعلكم الي اگدر عليه واقسط الباقي وماقبلتوا "

رد " الفلوس اخر همي .. الي يهمني البيت نفسه .. هالبيت من ريحة ابوي .. انطاه هدية الخديجة من تزوجت حتى ماتبتعد عنه لان زوجها من غير محافظة ولان خديجة الصغيرة والمدللة مارادها تروح عنه بعيد فهمتي ليش ضجت لان راح البيت للغريب لو لا "

سكتت وماعرفت شرد ..

احس حقه من جهة ومن جهة هاي وصيتها يعني مو بيدي ولااگدر ارجعه الهم وارتاح .. لان يعتبر هدية من عمة .. وفلوس ميقبلون ياخذون واحس نفسي بقيت بين نارين ..

طلع وهو مخيرني بخيارين اما ابقى بي ومن غير فلوس او ايجار بس يرجع يتسجل بأملاكهم او يطعن بملكيته الي ويتهمني بالنصب والاحتيال…

طلعوا من غير اي كلمة بعدها…

حتى مرته جانت مستحيه اكثر منه .. خابرت نسر ..

رد " شذر شعجب ذكرتيني گلت هسا حتى رقمي حاذفته وهذا الرقم دوم مغلق ليش ؟"

رديت " اي ماافتحة دايما مااحتاجة "

سأل " دنو بيها شي ؟"

رديت " لا خابرتك علمود عمك .. اجة اليوم "

رد بعصبيه " شعنده جايج بس لاسوالج شي او حجة عليج "

رديت " لا مسوالي شي بس من كلامة مبين عرف اني مو كرايب عمة "

رد " اي سامع من اهلي وحاجاني وسدينا الموضوع بعد شعندة اجه ؟"

رديت " اجة علمود يخليني بخيارين .. اما ابقى بالبيت بس يرجع الاملاكم او يشتكي عليه .. واني تعبت من هذا المنوال الاحسن خليني ارجعه الاسمك وارتاح وعود ادفعلكم ايجار وابقى بي "

عاط " البيت بأسمج واوراقج اصولية هي تنازلت الي واني السجلته بأسمج يعني حتى لو اشتكى قضيته ماتاكل يريد بس يخوفج "

اتنهدت " بس اني تعبت الكل يعتبرني استغلاليه استغليت عمة وخليتها تسجله بأسمي.. "

رد " خلي اليحجي يحجي شعليج منهم اليحجي وياج گليلهم نسر ذاك واحجوا وياه مالكم دخل اما عمي لاتخافين اني احجي وياه وبعد محد يتجرأ يوصلج لهناك "

خليت الشغله يم نسر هو يتصرف .. كملت شغلي خابرت خاله اسأل عليها ..

ماردت .. للظهر خابرتني وقت الصلاة . گالت ناس رايحة راجعه ماگدرت ارد عليج ..

سأآتها " شوكت ترجعين للبيت "

ردت " من تكمل الفاتحة بس ماادري بسعد راح يخليني ابقى ببيت اهلي وحدي لو ياخذني يمه "

ضجت " شنو خاله تحجين صدگ ؟ شلون اشوفج بعدين .. تدرين بخالو مايطيقني .. لا عفية حاولي تبقين بالبيت "

ردت " امنيتي ابقى مامتعودة عند احد الا ببيت اهلي .. بس سعد اخوي واعرفه من زمان وهو يريد ياخذنا يمه وامي الله يرحمها ماقبلت تگول اريد اموت ببيتي مااطلع منه .. بس هسا ماكو حجة بعد "

اتنهدت " حتى انتي راح ياخذوج مني "

ردت " لاتضوجين ابد محد يگدر ياخذني منج انتي بنتي الماولدتها "

من گالت هيج دمعت عيوني مااتحملت ..

اتنهدت " لو يصير جان تحولت بأسمج ع الاقل مااگول اني بنت عادل لو سماح مثل مايسموني ببيت جدي .."

ردت " لاتضوجين من الحجي طنشي "

رديت " ياليت بس ع الحجي .. شايفه نظراتهم شنو… لو جدي التگولين مايقبل بالظلم..  شلون يباوعلي ..

توقعت من شافني…… .."

خلص الرصيد انقطع ..

رجعت اتصلت " شبي جدج شفتي ؟"

رديت " مو مهم مااريد اضوجج بس ابد ماحسيته جدي عبالك رجال غريب "

اتنهدت " اليوم باجر يتعودون ومن يعرفوج زين يغيرون تعاملهم "

رديت " واني الى متى ابقى اگدي منهم حنان… بطلت لااريدهم ولااريد قربهم وحناتهم "

سديته منها . اجت دنو التهيت وياها ..

بعدها نمنا اني وياها.. باجر جمعه وماعندنا شي .

للعصر اجن البنات .. فرحت بشوفتهن ..

خابرت البيداء تجي علمود فروحة. دنو تحبها ..

اتجمعنا كلنا .. هنا اتبرعت تسويلنا بيتزا .. جايبه مواد وياها ..

كلنا تشاركنا بيها ..

گاعدين بالمطبخ .. سألت هنا بيداء ..

" عجبج البيت شفتيه ؟؟"

ردت " اي ولو صغير بس حلو ومرتب .. المهم ااجر وارتاح من زن نسر يريدنا يمة .. "

ردت هنا " ومهيمن يخابرج "

ردت " اي يخابر ساعه اگول همزين بعيد هنا عن عمة وساعه اگول خاف بحجة الدوام يروح الذاك الطريق مرة ثانيه "

ردت عذورة " سمعت نسر گال فد يوم اسويلي مرة على القسم الداخلي مال مهيمن لو جامعته واشوفه خاف مايداوم ويروح مناك "

اتنهدت بيداء " علواه والله اني هم گلت النسر من اجة وگع عليه گلتله ايدك الك منا وجاي .. ربيه من جديد

بس هو گال دور اخذه بالسياسه لان ولد صغير بعد احتمال يروح مايرجع..  "

سأآتها هنا " ماعرفتي شي منه عن الحادث وليش هيج سوة "

ردت " لا ماسألته .. لان زعلانة عليه بس قبل ليروح يسلم ومن يجي هم . الي عرفته طالب فلوس من هديل وهي گايلتله ماعندي روح الشذر اطلب منها وهو صاعد كم مرة من ورانا مدور ماكو بس الكنتور مقغول امن متوازي كلش صاعد بذيج الليلة السودة ماعبالة شذر تگعد "

جاي بيداء تحجيلنا .. قاطعنا صوت الباب ..

طلعت دنو تركض تفتح ..

شويه وانفتحت باب المطبخ كلنا گاعدين بي ..

باوعنا .. هاي مريم دخلت علينا…

#بقلمي_شمس_السعدي

يتبع…… .. 4000 كلمة

شلونكم حبايب ..

رغم مريضه بعدني بس كتبتلكم حتى متنتظرون .. طبعا البارحة هواي حظرت من البيجات والواتباد رغم مااحب صيغة الحظر ..

بس صدگ لو گالوا وكت الشدة ينعرف البشر

يعني مريضه وماكتبت ترى ماكفرت ..

اكو يطالبون بعد ماانشر واختصر وطلعت مغرورة واوڤر ويگولن الصوج بينا صعدنا القصه ..

كل هذا الحجي لان تأخرت ولان مريضه..

هيج البشر تردوه مثل الآلة مايتعب ولا يرتاح ولايتمرض ..

مع الاسف والله .. للبعض ..

اسعد الله اوقاتكم احبتي ❤

///// البارت السابع والخمســــون /////

#قوارير_من_فضة ج2

#بقلمي_شمس_السعدي ..

جاي بيداء تحجيلنا عن مهيمن .. قاطعنا صوت الباب ..

طلعت دنو تركض تفتح ..

شويه وانفتحت باب المطبخ كلنا گاعدين بي ..

باوعنا .. هاي مريم دخلت علينا…

گامت عذراء " خير ياطير لحگتينا لهنا "

ردت بمكر وابتسامة " سمعت منجمعات هنا وصايرات حزب ماشاء الله "

ردت هنا " منين سمعتي وشعندج جاية "

ردت عذورة " الظاهر مشتهية رزالة صار هواي مامترزلة من نسر "

ضحكت " وليش يرزلني نسر .. ماالة شي يمي .. بالمناسبة قبل ساعه شفته وهو الي گالي انتو هنا .. واجيت اخذ بنتي "

استغربت من كلامها ورديت " مستحيل نسر يدليج بمكانة "

ضحكت " ليش يحلوة .. مستغربة .. هااا صدگ اريد اشكرج لان قدمتيلي خدمة واخذتيلي حقي "

رديت بعصبية " شنو قصدج وهسا اطلعي من بيتي "

ضحكت " بيتج ؟؟ من شوكت والله طلعتي مو هينة عادي اطلع بس مااطلع فارغة .. بنتي وياي تطلع "

عاطت بيها بيداء وعذراء " اطلعي يلة واخذي شرج وياج هسا نخابر نسر ونتأكد "

اتقربت من عذورة " ياعيني عليج اكثر وحدة تقهرني انتي مسكينة "

اما انتي وتباوع عليه .. هذا مصيرج .. لان لاتصدگين نسر يحبج .. نسر يمل بسرعة واله وقت محدد للمرة ويبدلها .  يوم انتي باجر هديل وهكذا . انتن متفتهمن نسر سجن الي يدخل يمة مايطلع الا بهروب اضطراري..

تحجي بألغاز وكلام ممفهوم .. دفعنها البنات وطلعنها

بس كانت واثقه ومن تحجي كأنه ببالها شي ..

خابرت هنا النسر .. نكر وگال طردتها بس وصح گلتلها ماموجودات بس مادليتها بالمكان ..

استغربنا معقولة راقبت البنات او تعرف انه اني زعلانة هنا بس منو گللها وشعرفها اني زعلانة ..

ضجنا حيل بيومها وعكرت مزاجنا . كلامها يخوف وبي تهديد والغاز ..

كملنا تجهيز العشا .. اندگت الباب..

حجت بيداء " والله صار ينقبض گلبي كلما يندگ هالباب " ضحكتنا ..

طلعت فتحته .. صار نسر گبالي ..

" اجيت اطمأن عليكم "

سكتت وفتحتله طريق يدخل ..

دخل سديت الباب وراه ..

شافوه البنات فرحوا ..

خلينا للاولاد عشا بالصينية بالگاع واحنة گعدنا ع الطاوله كلنا ..

تعمدن يخلني يمه البنات ..

جان عينه عليه وين مااروح .. قطعت هنا البيتزا قطع صغار لان سوتها بصينية الفرن الكبيرة ..

خلت كل واحد قطعه كبيرة بماعون ..

سأل " شعرفها مريم انتو هنا وشگالت "

ردت عذراء " ماادري بس جاية واثقه معناها تعرف ومتأكدة "

صفن " طبعا هاي عندها غايه وجاي تخطط الشي شنو مااعرف ؟"

بدينا ناكل بعدها صار يتشاقى وي اخواته بس ملامحها بعدهي عصبية وضايج ..

سأل هنا عن دوامها " شلونج بالدوام هالفترة لهيت عنج وسالفه النقل نسيتها "

ردت " هاااا لا عادي اصلا تعودت هنا ماكو داعي انقل "

رد " اذا مرتاحة ابقي بس اذا متضايقه او احد مضايقج گولي لاتخافين "

ردت " منين اخاف تدري بيه مااسكت بس تعودت ع الوضع "

هنا :

مااعرف ليش من سألني نسر تلكأت . وليش رفضت النقل بينما كنت مصرة ..

يمكن حسيت بمشاعر حركت شي بداخلي .. اهتمام خاص ماكنت شايفته من قبل لان دفنت حالي وي حب مو الي ..

بعد اخر مرة من رزلت استاذ هذال قررت انقل وقدمت اوراقي بس رفضها وماقبل ..

قررت ابتعد عنه ومااختلط بي ..

بس هذا الشي ماخلاه يكف عني او يبتعد .. حسيت كلما ابتعد يتقرب اكثر ..

وكلما يقترب اكثر اصده وماانطيه مجال ..

بيوم ردنا نطلع واكفه منتظرة مشتاق .. طلع بسيارته

" ست هنا تحبين اوصلج "

رديت " لااستاذ شكرا "

رد " لاتخافين الي صار مايتكرر بس اريد اعبرلج عن اعتذاري وندمي "

اجة مشتاق استأذنت ورحت ..

بعد يومين صار اكو اشكالات بالدائرة تزوير وبيع اراضي من جوة الطاولة ..

شفت هواي من هيج حالات .. اراضي تابعه للبلدية تنباع بثمن اغلى من ثمنها الاصلي والباقي للمستفيد

مهنيتي ماخلتني اسكت .. وقدمت شكوى واجت لجنة رقابه للدائرة وصارت تبحث وتدقق ..

لكن الامر انگلب عليه .. ومااعرف شلون صارت التهمة موجهة الي .. واثنين من زملائي وياي بنفس الغرفه شهدوا انه اني الي بعت الاراضي وشريكة بهذا التزوير

المشكله فعلا الاوراق طلعن من مكتبنا وبأسمي وتوقيع منسوب الي شلون ماادري ..

احالوني على اللجنة التحقيقية .. وكنت مصرة انه الاوراق مزورة ..

كل زملائي والي اعتبرهم اخوتي تبروا من الشغله خوفا على مكانتهم..

واحد من اللجنة التحقيقية كان انسان او حرام اسميه انسان لوقاحته واتهامة لي بطريقه مستفزة ..

كان حاظر وياهم استاذ هذال ..

رد بالنيابه عني " ست هنا مو من هذا النوع انسانه نزيهة وهاي صار سنه ويانا ما شفنا الا كل خير منها "

باوعلي وباوعله " اي صحيح صحيح "

وكان يلمح الغير شي ..

نظراته استفزتني وخلتني اتجرأ واحجي " استاذ مو ملاحظ انت متحامل هواي عليه .. ان كانت الاوراق طالعه من مكتبنا فأحنة اربعة بالمكتب والمفروض كلنا نحال للتحقيق .. والتوقيع يقدم للمحكمة ونثبت التزوير .."

بهاي الفترة كان نسر حاير بمشكله شذر وعصبي دائما خفت احاجيه ..

طلعت من غرفة اللجنة مااتحملت بس ابجي ..

حسيت السالفه لافت عليه وخليت نفسي بموقف محرج

شفت احد وراي مسحت دموعي بسرعة ..

" لاتبجين اعرف انتي مستحيل تسويها… هالتحقيق شغله روتينية .. بس يدزون الاوراق للمحكمة يثبت الفساد .. لاتضوجين "

سألته " احتاج محامي اني اختي محامية واستاذة يحتاج اخابرها اولا "

رد " اذا تردين صديقي محامي و أثق بي هواي ويعرف هالقضايا وثغراتها "

اتنهدت " مااعرف مااعرف دايخة .. كل ذنبي انه مارضيت بالفساد . توصل بيهم الدنائة يكتبون اسمي ويوقعون بمكاني "

رد " هاي سهلة لاتخافين بس يروح التوقيع للأدلة الجنائية يثبت الج او لا "

اتنهدت " معناها راح يستمر هالوضع وسين وجيم "

رد " لاتخافين مااتركج وحدج "

باوعتله بأستغراب

كمل كلامه " الانسان النزيه يستحق احد يوگف وياه ويسانده واني اعرفج ماتخطأين "

كلامة ريحني بس بنفس الوقت اكو خوف بداخلي

صارت حياتي عبارة عن قلق وتوتر ..

لااشتهي اكل ولااشرب .. حتى جود مخليته على عذورة تدرسه وتهتم بي .. وفهد يالله اگدر ابدله والعبه شوية لان يشتاقلي ..

ومرات انطيه ورقه واصباغ يشخبط ويرسم واني ابقى افكر بشغلتي ..

العب بالموبايل خابرني رقم غريب ..

رديت بأستغراب " الو "

رد " ست هناء اسف ع الازعاج اني هذال "

عدلت گعدتي بسرعه " اهلا استاذ بس شلون عرفت رقمي "

رد " اخذتة من المحامي حبيت اطمأن عليج "

اتنهدت " زينة يعني شسوي .. بس تعرف استبعدوني عن الدوام لحين انتهاء التحقيق وشلون بهاي الحالة

اهلي لسا مايعرفون ومااگدر اگلهم اكيد راح يمنعوني عن الدوام "

رد " كليلهم ماخذة اجازة او اي حجة "

رديت " بحياتي ممكذبة عليهم مااعرف شلون گدرت اسكت .. اصلا اخوية يفهمني بسرعه حتى مااگدر اخلي عيني بعينه "

رد " تدرين ست هناء..  يوم عن يوم اتندم واضوج "

رديت " ع شنو ؟"

رد " على سوء ظني بيج وتصرفاتي السابقه مااعرف شلون حكمت عليج هيج "

ابتسمت " لاتهتم تصير . وگفتك وياي هسا ماانساها .. اني هم كنت ماخذة فكرة غلط عنك "

سأل " اگدر اعرف شنو الفكرة الاخذتيها عني وهسا تغيرت لو لا ؟"

رديت " احب احتفظ بيها النفسي اذا مابيها احراج "

رد " يمكن يجي يوم واسمعها "

رديت " جائز "

ضحك " ان شاء الله "

كلامي معاه بالموبايل .. لغى هواي حواجز ومشاكل بينا ..

گلت الاهلي اخذت اجازة .

بس المشكله التحقيق طول وكل فترة يدزون عليه واني بحجة الشغل اروح ..

ومن سألني نسر عن النقل توترت .

كملنا عشا رتبنا المطبخ اني وشذر .. عذورة تسوي جاي

باوعت ماكو احد بالمطبخ ..

همست " شذر محتاجتج بخدمة "

ردت " اامري "

رديت " واگعه بمشكله واريدج تساعديني "

ردت " گولي شنو حتى لو مااكدر احاول "

رديت " لاتگدرين بس يحتاج تكذبين كذبة بيضه "

ضحكت " الله يستر . خوفج من اخوج لايسويها ليلة سودة علينا خليه يطلع ونحجي "

بس الظاهر نسر ماناوي يطلع ..

حمودي جايب الاتاري مالته وگعدوا يلعبون…

دگ موبايلي . 

مسويته هزاز .. باوعت هذا هذال ..

خليته بجيب الاتراك وگمت ..

حرت وين اروح ..

دخلت بغرفه وليد .. طلعت الموبايل مقطوع الاتصال

استحيت اتصل عليه ..

دز رساله " اعتذر لان اتصلت هيج وكت بس ظروري احجي وياج "

حسيت اتصالاته كثرن وع اقل شغله اتصل وكأنه يتحجج .. والمشكله اني ابدا مااضوج من اتصالاته صايرة شنو السبب مااعرف..

اتصلت بي رد بسرعه " شلونج ست هنا "

رديت " اهلا استاذ اكو مستجدات لو شنو "

رد " خابرني المحامي الاحد يحتاجوج بالادلة الجنائية"

رديت " وشلون اروح وحدي ؟ "

رد " اذا تحبين اروح وياج اني اصلا هي شغله روتينية لاتخافين "

رديت " ماادري عود باجر ارجعلك خبر "

سديته منه دخلت شذر ..

" شبيج مو على بعضج "

رديت " اوووف شذر مشكله وگعت على راسي "

ردت " شكو خوفتيني "

سولفتلها كلشي تخبلت " عزااا وهسا شراح تسوين ونسر شلون ؟"

رديت " اسكتي ماتشوفين خايفه لايسمع  .. مالي خلگ والله يبطلني اذا عرف بس همزين استاذ هذال واگف وياي وجابلي محامي وماتركني ابد "

ابتسمت ..

سألتها " شبيج تبتسمين ؟"

ردت " لا ابد بس ماتدرين شگد ذكرتي استاذ هذال من گعدت لسا "

صفنت بوجهة " اي وشنو يعني غير جاي احجيلج شسوالي "

ردت " وهو ليش يسويلج الج بالذات..  وهو شعليه بموظف عندة متهم بالتزوير اذا مايحس اتجاهة بشي "

ضحكت " مادامج هيج حللتي مشاعره .. لعد ماتحللين مشاعر هالمگرود الگاعد برة .. "

اتنهدت " هذا شي وهذا شي ثاني "

رديت " لا مو شي ثاني ..  نسر غلط صحيح بس لاتنسين هو مريض بالشك والغيرة وساعه شيطان وصارت .. واجة كم مرة اعتذر .. تدرين كلش زين شلون يحبج "

ردت " لا ماادري .. لان الاعرفة اليحب يثق بحبيبه ومايشك بي ولايأذيه .. هنا اني خسرت ابني وتدمرت حياتي انتي گدرتي تسامحين ليث على سوايته؟"

رديت بعصبيه " لاتقارنين ليث بنسر .. ليث كان يمثل عليه دور الحب وعايش وياي مجبور علمود خاف ابوه يقطع عنه الفلوس .. ليث حتى مااعتذر ولا تندم .. وفوگاها خاني وي اقرب صديقه الي . نسر يحبج وبأشارة منج تمتلكيه كله .. يمعودة الى متى تبقين هيج ذيج بدت تتحرك وتسوي كلشي علمود يتقربلها وهو رجال مايتحمل اكيد يمل ويروحلها حتى لو مايحبها بس يحتاج مرة بحياته "

سكتت ماردت وغيرت الموضوع " عوفينا من سالفتي انتي شراح تسوين ؟"

رديت " ادري بيج راح تغيرين الحديث .. المهم الاريدة منج اجي الصبح يمج كل يوم بحجة الدوام وبعد الدوام ارجع للبيت .. وراح اگول المشتاق مايحجي الاحد والولد زين وامين .. شتگولين ؟"

ردت " عادي تعاي بس اذا عرف اخوج يشوينا اثنينا على نار هادية "

ضحكت " لاتخافين ان شاء الله مايعرف قربت تنحل "

طلعنا من الغرفه شفنا نسر يخابر ..

كمل باوعلنا " امي مريضه رايح اني انتن ترحن لو تبقن"

ردت بيداء " اي اخذني وياك اشوفها انتن ابقن هنا "

راحت بيداء وبقينا احنة ..

مرت هاليومين ببيت شذر بدون تفكير .. تونسنا يمها نسوان رايحة وراجعة علمود الخياط ..

وخاصه صديقتها زمن انسانه فقيرة وحبابه حيل ..

السبت رجعنا للبيت ..

اتفاجأت من طلع نسر من غرفه هديل ..

باوعت العذراء " شنو رجعت العلاقة "

ردت عذراء " عادي العلاقة الاستراتيجية تحتاج تنازل .. صدكتي الخانم تتحمل بدون شسمة "

خزرتها ضحكت وسكتت ..

بس مافوتتها ..

طلعت هديل من الغرفه سألتها عذراء " انتي گايلة المريم على مكانه ؟"

ردت " واني وين شايفتها حتى رقمها مااعرفه لو كلشي لازم براسي .. مهيمن دخل الغرفه شذر خلتينهة براسي مريم تجي تخلنها براسي ولاعبالك گرايبحن مفضلات الغريبة عليه .."

سمعها نسر عاط " هدييييل السانج .. شوفي محترم وصابرج عليج اي .. بس مو معناها ساكت لو يمشي عليه تمسكن النسوان..  اكره مااكره بحياتي الحيلة والتمسكن .. ترى الصبري حدود هاااا"

بدل وطلع ..

ابتسمت عذورة وحست بالنصر .. " بعدها بأولها ان شاء الله اخرها خير "

هديل دخلت الغرفتها وسدت الباب حيل ماطلعت لليل

اسراء معتكفه بغرفتها .. ماتنزل بس للدوام وترجع وحتى اكل ماتاكل ويانا ولاعبالك عايشة ويانا "

صار الاحد وطلعت بحجة خلصت اجازتي متت من نگ ماما " ليش متداومين… طولت اجازتج… ليش ماخذة اجازة "

فسويت نفسي اداوم واروح البيت عمة يم شذر ..

طلعت الاحد .. وصلني مشتاق قريب الدائرة وراح

تمشيت اريد تكسي ..

خابرني هذال " الو ست هناء وينج "

رديت " اهلا استاذ اني قريب ع الدائرة اجيت الها وبعدين اروح "

رد " لعد لتروحين وحدج اني راح اوصل اخذج ونمشي سوة "

ماقبلت بس هو اصر ..

انتظرت بعيد عن الدائرة شافني اجه .. لابسه نظارات خاف احد يشوفني .. صعدت بسرعه وياه ..

باوعلي ابتسم " عاش من شافج شلونج "

خجلت من نظراته " الحمد لله بس اخلص من هاي البلوة اصير زينة "

رد " تخلص وداعتج ماتبقى"

باوع للساعه " هسا مال ريوگ ملوكي وكوب گهوة مادام بعد وكت "

رديت " لا ياريوگ اصلا معدتي تخبط من التوتر "

رد " هو لازم نسوي شي ايجابي يزيل هذا التوتر "

رديت " بس… ."

قاطعني " هالمرة اعذريني ماراح اسمع كلامج "

حرك سيارته وراح ..

اهتمامه الزايد بيه زاد فضولي اكثر .. رغم ماناطيته مجال ..

اخذني المطعم ..

باوعتله " هااا استاذ ؟"

ضحك " اذا اگلج هالمرة لاتعاندين وتنزلين توافقين لو لا ؟"

رديت " هالمرة بس "

رد " متفقين "

نزلت . فتح باب المطعم رغم الجو بارد برة ..

بس اجتني نسمة هوى دافية تتخللها نغمة ساحرة من صوت فيروز بجو مشمس وهادئ ..

حسيت بطمأنينة وراحة اول دخولي ..

المكان مميز كان .. طلبت اكعد جنب الشباك الكبير حتى اشوف الخضار والطبيعة واستمتع بالمنظر ..

من زمان كنت احتاج هيج جو يطلعني عن الروتين العايشته .. وكانه الشخص الامامي يعرف نقاط ضعفي

قطع افكاري صوته " عجبج المكان ؟"

ابتسمت والتفت " المكان وفيروز وكلشي بي مميز شكرا الك "

رد بأبتسامة " المهم ترتاحين حاس بيج واعرف القلق والتوتر شيسوون بالانسان "

سكتت وماردت شي يضيع هاللحظات الحلوة ..

اجة النادل ..

طلب منه وجبة صباحية من البوفيه ..

وقبلها طلب گهوة ..

جابلنا الگهوة .. شربناها بين مااجة الريوگ ..

وجبه متكاملة بحيث مابقى مكان ع الطاوله..  حسيت نفسي بحلم .. لان مستحيل بالحقيقة اخطو هيج خطوة لكن خطيتها شلون ماادري ..

من كثرة الاكل الموجود گمت انقش لان مستحيل اكل هالاكل كله ..

كملنا شربنا جاي وطلعنا ..

قبل لنطلع .. صار گدامي " غطي خشمج بااللفاف لتنشلين هنا دافيه وبرة باردة "

غطيت وجهي وطلعت فعلا اجتني لفحة هوى بارد

صعدت بسرعه للسيارة ..

طلعنا للحكمة .. وبعدها للادلة الجنائية ..

اخذ تواقيع قديمة بمعاملاتي حتى يقارنوها بالتواقيع الموجودة ع المعاملات ..

كملنا للظهر واصر يرجعني بنفسه .  طول النهار وياي ماتركني ابد..

خابرت مشتاق كلتله لايجي ..

وصلني الشارعنا ماخليته يدخل .. سلم وراح ..

كان يوم مميز رغم متعب ..

اول مرة احس بنفسي فعلا انثى اهتمام هذال بيه زرع بداخلي شعور ..

كنت محتاجة احد احجي وياه واعرف مشاعري معقولة بعد الحب الكبير الليث راح اگدر اجرب مرة ثانية ..

ومنو يگول يحبني اصلا ؟؟

جائز يريد يستغلني ولان شافني صعبه المنال صار يساعدني حتى يوصلي .

بقيت الوم بحالي .. ااااه هنا الى متى تكونين ساذجة وعمية لدرجة اذا تحركت مشاعرج اتجاه شخص ماتشوفين عيوبه ..

ليش هو اني شعرفت عن هذال اشو مااعرف اي شي عنه ليش افكر بي الهاي الدرجة .

كل هاي الافكار اجتني بعد ماحجيت وي شذر وكان رأيها انه مااخطأ خطأي مع ليث واستعجل ..

لازم اثگل وانطي مجال النفسي حتى اعرفه اكثر ..

شذر :

حاسة بهنا متغيرة مشاعرها ابتسامتها طريقه لبسها كلشي متغير ..

عرفت اكو شي بداخلها .. بس المشكلة كنت خايفه عليها من تجربة ثانية فاشلة .. خاصه بعد ماحجتلي شلون كان يتصرف وياها بالبداية ..

حذرتها انه ماتستعجل خلي تختبره وتصبر قبل اي خطوة ..

معرفتي بهيج مواضيع قليلة بس الي مريت بي علمني مااثق بسرعة وخاصه بالرجال ..

خابرتني خاله ..

باوعت هنا نايمة .. مرات تجي تكمل نومتها يمي ..

رديت. 

" هلو خاله شلونج "

ردت

" هلو امي اني رجعت البيت اهلي . مثل ماكلتلج سعد راح ياخذني يمة .. واجيت اخذ ملابسي .. تگدرين تجين اشوفج "

سألتها " شنو يعني بعد مترجعين لهنا ؟؟ "

ردت " احاول بعد للاربعين..  هسا حجته ثوابات وناس تروح وترجع ويريد كل هاي المراسيم ببيته "

باوعت هنا نايمة .. كلت نص ساعة اشوفها وارجع .. بسرعه

بدلت وطفيت الگدر ع النار وطلعت ..

رحت اركض والهوى بوجهي عالي وبارد احسه ثلج وجمد ..

وصلت البيتها ..

دگيت الباب طلعتلي حضنتها .. مشتاقتلج هواي ..

دخلت اتفاجأت بواحد گاعد بالصاله..

بقيت واگفه ..

ابتسم " ليش وگفتي تعاي سلمي على جدج "

اتقربت بخطوات بطيئة وعيني على خاله ليش مگالتلي بالموبايل ..

همست خاله " طلب يشوفج هنا بعيد عن الكل "

اتقربت منه " شلونك "

اتفاجأ .. مااعرف ليش نفسيتي مااتقبلت احضنة وابوسه..  بعد برودة الي شفته..

اشرلي اگعد " انت شلونج ؟"

رديت " شلون اكون الحمد لله "

رد " خالتج حجتلي كلشي .. الصراحة مااستغربت انه ممكن يسوي هيج .. بس مااتوقعت انه يسويها ببناته .. عادل اذانا هواي ولحد هسا .. اخوته وعمة وابن عمة كلهم يتوعدون اله والمرته .. جدتج شفتيها حالها حال من راح لسا .. ابوج مرض بي من مراهقته وهو هيج شگد حجيت ضربت كلشي سويت مافاد .. اعرف الكل مايريدج بس مايعرفون شي .. ومااريد احد يعرف ..

اني راح ابقى وراج واي شي يصيرلج اني موجود بس عائلتي مااگدر افرض عليها .. سنين والعالم تاكل وجهنا بسببهم حلفت انه هو ومرته ميتين بالنسبة النا ..

بس انت تبقين من دمنا ومااگدر اشيل ايدي منج .."

اتنهدت " اعرف الكل محملني ذنبهم .. بس خاله الي گدرت تدوس على جرحها وتحتويني . لولاها مااعرف شلون كانت حياتي "

رد " خالتج طيبة مو مثل امج من صغرها مدللة ووكحة . ماگلتيلي هم بعد عندج اخوان "

رديت " بعد اثنين بنات توأم "

هز راسه " رغم جان مايحب البنات حتى اخواته ماسلمن من اذيته المهم كلشي بارادة الله "

رد " وتعرفين وينهن شلون عايشات وياهم "

حسيته يريد يجرجرني بالحجي .. هزيت راسي :

" مااعرف شي عنهم "

باوعت الخاله سكتت وماحجت شي رغم تعرف بيه اعرف مكانهم ..

طلع من جيبه فلوس " هاج هاي الج اعتبري كل شهر يجي مثلهن مصرف الج تعتبرين ملزومة منا "

رجعتهن " شكرا مااريدهن .. يمكن خالة گالتلك متزوجة واشتغل يعني ماناقصني شي "

رد " اي گالت خوش ناس والولد اعرفه حباب بس شعجب ماسألوا وشلون اخذج ومايعرف شي عن اهلج "

رديت " يعرف كلشي عن حياتي وعن اهلي وعنكم "

هز راسه " زين الله يحبج خلاه بطريقج صونيه وحافظي عليه البنية اهم شي سمعتها وشرفها "

استغربت من كلامة " يوصي بيه وكانه يگلي بكلام غير  مباشر .. " لاتصيرين مثل امج "

گمت بسرعه " يلة خاله اروح اتأخرت "

سلمت وطلعت ..

طول الطريق احس نفسي مختنگة ..

اقارن بين نسر وبين جدي .. نسر الي انتشلني من الشارع وحماني .. ماانكر اهان كرامتي وشرفي بس اهلي هم ماقصروا حتى لو مايعرفني ع الاقل يعرف قصتي ويعرف الي صارلي يعرف ابنه بعد سوايته كلشي ممكن يسوي ..

رجعت للبيت هنا گاعدة..

" دورت عليج ماكو "

رديت " رحت جبت ابر للمكينه ماعندي "

باوعت للساعه خلي اروح احسن .. قبل لتجي دنو

رديت " ابقي دنو ماتحجي اصلا "

هزت راسها " لا اروح احسن وعود اكلهم طلعت من وكت "

طلعت بعد ساعه اجت دنو من المدرسه .. تغدينا وكملنا ورحت نمت .. لقاء جدي لسا مأثر بيه وضايجة..

خابرت خاله " حسيتج ضجتي وطلعتي ترى عمي هو هيج مايعرف يطلع مشاعرة بس والله من طلعتي نزلن دموعه "

رديت " شسوي بدموعه وراي خاله .. اريد اشوفهن اشوف لهفته وحبه الي .. شنو ذنبي اذا اهلي عارات ليش يحملني ذنبهم ..

بقت تقنعني وتهدي بيه ..

للعصر اندگت الباب .. گمت بتثاقل ..

فتحته شفت شرطة بالباب..

تفاجات ..

" شرايدين "

" انتي شذر عادل "

" بلي اني ليش "

" اكو شكوى عليج بخطف دنيا نسر " صفنت

" خطف شنو هي عايشة وياي اصلا "

شفت مريم اجت ..

" وين بنتي طلعيها "

بقيت صافنه واباوعلها وهي تبجي وتمثل اني خاطفه بنتها ..

دخلتهم يفتشون البيت جانت نايمة .. گعدتها واخذتها ..

دنو من شافت الشرطة خافت وانصدمت وتبجي ..

سحبتها واخذتها مني وهي تبجي ..

اتقرب مني الشرطي .  لبسي وتعاي ويانا ..

مااعرف شسوي .  والمت التجأ

صار ببالي نسر وبس ..

طلعت موبايلي وخابرته . نسر اجت الشرطة اخذتني مريم مشتكيه عليه ..

سحب الشرطي الموبايل مني .. كانت نظرته الي استفزازية .. بقيت وحدي بنصهم وبالبيت ..

الخوف كتلني .. حسيت دموعي تنزل لااراديا ..

حجيت وياهم " والله هي عايشة وياي اني مربيتها بنت زوجي "

عاط بيه " بالمركز احجي العندج "

لبست وطلعت بسرعه.

عيني ع الطريق بلكي اشوف نسر..  ايدي وجسمي كلها ترجف الناس كلها تباوعلي بالشارع ..

عبالك مسويه شي مخل لو ارهابيه محاوطين البيت

كل هاي الشرطة علمود مرة ..

لو لان مريم زوجها البرلماني عرفت شلون تستغل سلطته ..

عرفت مريم ماتوفتها الي من نظراتها اخر مرة من اجتنا ضمتها الي وهاي النتيجة..

دخلوني المركز وكل جسمي يرجف من الخوف..  هواي سامعه بعد السقوط سولف نسر شلون كانت المرة اذا انسجنت شيسوون بيها ..

واگفه وارجف وابجي احس حلگي نشف وشفايفي زرگ وثلجن ..

ساكته وبس دموعي يرجفن ..

شلت راسي ولمحت نسر من بعيد دخل ..

احس روحي رجعتلي من شفته ..

طاير وعيونة تدورني شلون عرف اني هنا ماادري يمكن من مريم ..

شافني اجه الي يركض .. لزم ايدي احتميت بي ..

" نسر حباب طلعني منا .. وربي اموت اموت اذا سجنوني "

رد" اشششش دموعج يغسلني لاتبجين ولاتخافين لو اعرف احرگ القسم على راسهم ماتبقين دقيقه وحدة هنا .. "

سأل عن الضابط گالولة " طلع شوية ويرجع "

باوع للساعه تعصب " الكلبة اختارت الوقت المناسب هم دنو موجودة بالبيت وهم وقت انتهاء الدوام حتى يبقوج الثاني يوم اصلا دارسة الموضوع كله قبل ماتخطيه "

رديت بخوف " يعني شنو يخلوني هنا شسويت اني ليش حباب طلعني منا نسر "

لزم ايدي وعصرهن " كافي لاتخافين اني يمج لو اعرف ابات يمج هنا بس لاتخافين "

طلع موبايله وبقى يخابر .. قاضي يعرفه وضباط .. خبص الجو خبص ..

اجة الضابط جان فد واحد فاسد ومدفوع الثمن ..

يحجي من ورى خشمة ونسر مايتحمل وعصبي ..

باوعلي من فوگ لجوة..  " دخلوها وراي "

شوية ويهجم عليه نسر يضربه ..

باوعتله همسلي " اني هنا مااتركج ثانية لاتخافين يعمري "

سألني عن اسمي انطيتهيا ..

"وين تسكنين "

" كاظمية"

" شلون خطفتي الطفله وليش "

" ماخطفتها هي اصلا عايشة وياي تعتبر بنتي اني ربيتها "

" وشنو المناسبه انتي تربيها .. امها موجودة واهلها موجودين انتي منووو وتربيها "

رديت " اني مرت ابوها ربيتها من صغرها "

ضحك ورفع الجنسية " مكتوب هنا باكر بعد شلون مرت ابوها اكو اثبات "

رديت " مااعرف بهيج شغلات بس احنة متزوجين جاب شيخ وتزوجنا "

رجع ضحك " شلون شيخ يعني ماكو عقد محكمة..  شو اگلج ليش احسج عشيقته مو زوجته .. وخطفتيها حتى تنتقمين لو عندج غايه "

رديت " مااسمحلك جيبو الطفله واسالوها منو امها اصلا ماتعرف ذيج امها .. وهذا ابوها وزوجي صيحوه واسألوه "

كان يماطل ويستفزني ويلفظ الفاظ بذيئة وعبالك اني فعلا عشيقه او كان متعمد هيج يسوي ..

مااتحملت احس طاقتي نفذت وخوفي زاد وقوتي خارت واحس الدنيا دارت بيه ..

باوعتله " اريد زوجي تعبانه مااعرف شبيه "

دخل بسرعة نسر شافني عرف بيه شي .. القضية واضحة اصلا بس هو متعمد يطولها ويماطل بيها ..

حجة " زوجتي مريضه واذا صار بيها شي احملكم المسؤولية ..

رد عليه " وشنو اليثبت هي زوجتك ؟"

باوعلي واتنهد طلع موبايله .. خابر وانطاه الموبايل ..

هذا القاضي…… . وياك

اخذه حجة وياه .. كله سيدي وسيدي حتى گعدته عدلها ..

سد الموبايل وانطاه النسر ..

" تكدر توقع على اقوالها وتطلع "

رد نسر " لاعبالك افوت هالشي .. الي صار مقصود "

عاط الضابط " شتقصد تهددني "

رد نسر " افهمها مثل ماتريد .. دخلتوا مرتي بتهمة باطلة واكلكم اني زوجها ماتصدگون بعدين الام الي اشتكت اصلا مالها حق بالطفله لان متنازلة عنها يعني القضية مقصودة وراح اشتكي بطريقتي "

وقعت واخذني من المركز ..

حسيت عيوني غوشت لزمت بي .. حضني من كتفي واخذني للسيارة ..

" راح اخذج للمستشفى "

رديت " مااريد رجعني للبيت .. مااتحملت گمت ابجي "

" شسويت وهيج يصير بيه .. انعل ابو هيج دنيا مابيها حظ المظلوم والفقير ينداس بالرجلين .. يعني لو ماانت عندك عرف كان اني مسجونه وهاي غايتها تريد تسجني وتبهذلني طبعا ماالقانون كله بيدها وبيد زوجها ..

لزم ايدي ويفرك بيهم .. كافي وداعتج اطلع هالسالفه من عينها .. راح ارفع عليهم دعوة واعلمهم شلون يتهمون باطل ..

دك موبايلي باوعت عذورة. .. ماگدرت ارد جسمي كله يرجف ..

نسر خابرهم وطمنهم ..

باوعلي " راح اخذج البيتنا مااگدر اعوفج وحدج "

رديت " لهناك مااروح مااروح لو اموت مااروح "

رد " خلص اهدي بس لاتحلمين اعوفج وحدج بالبيت منا لمن اعرف سالفه مريم شنو ؟"

اخذني للبيت جسمي بعده يرجف من الخوف .

ردت انزل ماگدرت .. اخذ مني المفتاح فتح الباب واجاني ..

تعاي اشيلج ..

رديت " لا شنو تشيلني اني امشي "

همس " شوفي حالج ترجفين لاتستحين محد يشوفنا "

سحبني وحضني بين اديه وشالني للبيت .. طبگ الباب برجليه ودخلنا للبيت ..

#بقلمي_شمس_السعدي

يتبع…… .

اسعد الله اوقاتكم احبتي ❤

///// البارت الثامن والخمســــون /////

#قوارير_من_فضة ج2

#بقلمي_شمس_السعدي ..

احضنـينـي حبيبتـي واجـذبينـي اليـكِ قهـراااا ..

كوني لحبي إكتمااال

إملأي قلبي حنااان ولا تفقديه الإهتمام

أخشى إن رمشت امرأه ذهبت !!

فأناا لا أتُركُ دون لياالي ملاااح

احضنـينـي حبيبتـي واجـذبينـي اليـكِ قهـراااا ..

أريد أن أشعر أني بين ذراعيك

طفلٌ صغير .... طفلٌ بريـــئ

رغمَ أني رجلُ ... أعجزَ الرجااال

احضنـينـي حبيبتـي واجـذبينـي اليـكِ قهـراااا ..

دخلني للبيت خلاني ع القنفه..  بسرعه جاب جهاز السكر والعلاج ..

جنت احاول استوعب او احجي بس ماگدرت بعد ..

همست..

" خاله اريد خاله "

رد وهو مرتبك مايعرف شيسوي " اي اي هسا اخابرها اوكفي "

طلع الموبايل خابرها .. بس گالها شذر مريضه گايلتله هسا جاية بسرعة ..

رجع خابر امه وطلع يجيب مي سمعته يعيط عليها ويغلط على خاله ومريم ..

رجع انطاني المي " هذا علاجج اخذيه "

اخذتة واحسة يغلي .. يروح ويرجع بالبيت ..

خابر عمه واتفق يرحون البيت زوجها يجيبون دنو ..

سد الموبايل گمت ..

" نسر تحجي صدگ شلون تروحلها برجليك خاف تسوي سالفه وتسجنك "

رد بعصبية " بنت ابوها وخلي تسويها .. بالقران اخلي طلقة براسها وصدگ ادخل سجن ع الاقل اسوي الماگدرت اسويه قبل "

رديت " لاتنسى هناك دنو .. هي طلعت منا خطية مهبوطة وتبجي .. لاتتهور گدامها "

فرك وجهة .. اني رايح اقفلي الباب زين خالتج على جية لاتفتحين لمن تسمعين صوتها..

هزيت راسي ..

طلع وسد الباب ..

بقيت نايمة بمكاني واحس راسي يريد ينفجر لسا مامستوعبة الي صار .. احس روحي عايشة كابوس شرطة وسجن ومتهمة بخطف بحياتي ماكنت متوقعه ادخل مركز ويصير بيه هيج ..

اندگت الباب طفرت ..

فتحت الباب دخلت خاله حضنتها وابجي ..

حجت " شبيج سوالج شي .. شصاير خاف من جدج الصبح ضجتي ؟؟"

رديت " مريم اشتكت عليه واخذتني الشرطة "

شهگت "يا مريم ولج ؟"

رديت " ادخلي وسدي الباب بالبيت احجي وياج "

ردت " اوگفي مو وحدي ارشد جابني "

صفنت بوجها " شلون ادخله خاف يجي نسر ويشوفه"

ردت " قابل غريب غير ابن عمج وبعدين سعد ما خلاني اطلع الا لمن حجيت وي عمي وتالي دزلي ارشد ياخذني بحجة البيتهم "

بقيت صافنه مااعرف شحجي ..

قفل السيارة واجة " شلونج شذر "

هزيت راسي وبالكوة احجي " الحمد لله "

لزمتني خاله " تعاي ادخلي بالكوة واكفه على رجلج شصاير وياج وليش اشتكت عليج "

دخلنا اني وياها وارشد سد الباب واجة ..

دخل ورانا ..

گعدت يمي " احجيلي شصار ؟"

بقيت اباوع الارشد وساكته ..

رد " اذا تحبين اطلع بالسيارة اگعد "

رديت " لا ابقى "

انحرجت حيل ..

وخاله تلح عليه تريد تعرف ..

حجيتلها الي صار ..

تدخل ارشد وقاطعني " لحظة لحظة بأي حق تسجنج وين اكو هيج قانون انتي زوجة ابوها وهذا بيتكم بعد شلون ياخذوج وزوجج وين ؟"

باوعت الخالة " هااا ماادري هذا الي صار "

ماگدرت احجي واكله اصلا ماعايش وياي او افهمة السالفه من اولها..

اشرتله خاله " اكو شغلات ماتعرفها "

رد " ترى اني محامي واعرف بالقانون كلش زين ماكو هيج شي ابد ومالهم حق ياخذوها "

رديت " لاتنسى زوجها بالدولة ومسنودة بي "

تعصب " بالدولة على نفسه اذا القانون ماياخذلج حقج احنة ناخذة واكو عشاير تتدخل "

استغربت ردة فعله .. مااتوقعت بعد الي سواه بيه هو عمة هيج يحجي ..

عيني ع الباب لايجي نسر ويشوفه وهو يتوعد ويهدد

سألت خاله " وهسا نسر وين ؟"

رديت " راح يجيب دنو اخذ عمة وابن عمة وراحوا "

ردت " شلون بيج فهميني شوكت ترتاحين "

سكتت . حس بيه مااگدر احجي ومتقيدة گام

" اني طالع لبرة شوية ؟"

طلع برة اخذت نفس .. مااتحملت بجيت وحجيتلها كلشي بالتفصيل ..

ردت " هاي تعرف بيج وحدج ومايمج احد .. اووووف ياشذر وعنادج من اول يوم واني اگلج نسر سندج نسر شاريج صح اذاج وجرحج بس الشيطان شاطر واكو من يقرا براسة "

رديت " انتي گلتيها خاله الى متى يبقى يصدگ كل حجاية تنگال عني "

ردت " ماگلتلج صالحيه لو سامحيه بس خليه يمج هالوكت الاغبر مو مال مرة تعيش وحدها ماتشوفين لو ماتسمعين المصايب التصير ببغداد .. العالم ببيوتها وتنكتل ومايعرفون منو وليش كتلوهم . مو دور انتي وحدج ببيت .. واني هالتشوفيني بقيت تحت رحمة سعد مااگدر بكل مرة اجيج واحميج لو ابقى يمج "

صار المغرب ونسر ماكو ..

وخاله ماتگدر تتركني وتروح الا يجي ..

وارشد بالباب ..

تالي گلتلها " خاله باردة فشلة خلي يدخل صارلة شگد برة "

راحت صاحتة واجة..

دگ موبايلها ردت " هااعمو .. اي لسا .. بعدين احجيلك .. اي ارشد يمي .. بس يجي زوجها ارجع "

سدته .. رديت :

" خاله روحوا اني اقفل الباب لمن يجي "

رد ارشد " لا شعندنا بس يجي نروح .. مانعوفج وحدج كلشي يصير "

بقيت گاعدة .. احس راسي يريد ينفجر ومااگدر انام استحي .. وبالگوة مصبرة ع نفسي ..

اندگت الباب طفرت..  اشرلي " اني افتح ارتاحي "

دخل نسر عصبي حيل .. مستغرب الوضع..

شاف خالة سلم عادي وباوعلي ..

اتهربت من نظراته من شفت دنو . حضنتها.. وهي تبجي وخايفه ..

گامت خالة " يلة احنة نروح بس الي صار ماينسكت عنه "

رد " طبعا مااسكت وحقها اني اخذه "

تدخل ارشد " اني مستعد اتكفل قضيتها "

باوعله نسر " لا شكرا اني موجود "

رد ارشد " اصلا اني مستغرب شلون الهم حق ياخذوها المفروض انت رجل قانون وتعرف وهي زوجتك معناها البنية برعايتها شلون تسمح ياخذوها "

رد بعصبية " لو اني موجود مستحيل اخلي احد ياخذها وبعدين هالشغله تخصنا احنة "

ضحك ارشد " وليش متحامل علية .. ترى مهما صاير بينا فهي تبقى بنت عمي ومن دمي "

عاط ومااتحمل " اي صح من دمك ماگلت هالحجي لمن اخذتوها وسقطتوا ابنها لاعبالك ناسيلكم هالشغله مااعرف اصلا هي شلون نست .."

اتقربت منه وهمست " نسر مو هيج "

استغفر ربه وسكت ..

اشرت خاله الارشد " يله عمة خلينا نمشي .. وانت نسر لاتعوفها خلي بالك عليها "

طلعوا وطلعت وراهم .. من رجعت جان عصبي وانفجر بوجهي " نسر غلط غلطة بساعه عصبيه ولمجرد شك ماتحجين وياي وكارهتني وحتى البيت ماتدخليني ..

وهم اشكال سوو الج .. خطفوج وسقطوا ابنج واهانوج وطردوج وكل هاي وتستقبليهم ببيتج وفوكاها تشكيلهم همج .. شنو ماعندج رجل ياخذلج حقج . وترحين تطلبين من هذا المايع وتخليه ينطيني درس بالقانون مااعرف ياطايح الحظ اليوكله وشلون يترافع عنه ماادري "

صافنه عليه الى ان كمل " يعني كل الي شاغلك ارشد"

رد " لاتجيبين اسمه على السانج "

رديت " وانت لاتحجي وياي هيج اني مادخلته ولاجبته البيتي هو اجة وي خاله شسوي اطردة ؟؟

وبعدين بيا حال اني ومنو گالك نسيت السووه .. لو اريد جان تحملت الذل وبقيت هناك بس اني تعبت گلت اعيش وحدي ومرتاحة تالي شوف شصار محد يريدني ارتاح "

رد " من ايدج انتي عفتيني هديتي كل البنيناه "

ضحكت " شبيك نسر الظاهر انت ناسي شسويت بيه هسا طلعت السبب اني ملاحظ نفسك هواي تلومني .. انت تعرف شصار بيه اليوم .. اتمنيت الموت ولااعيش هيج احساس "

سكت ماحجة وگعد . اخذت دنو الحضني وگعدت ..

بقينا اثنينا ساكتين ..

گمت اسوي عشا ..

اشرلي " وين رايحة ؟"

رديت " اسوي عشا "

رد " اكعدي اني اسوي انتي مريضه ارتاحي "

كام للمطبخ ..

سألت دنو " وين اخذتج ؟"

ردت " اخذتني البيتها جبير وبي شرطة وخلتني وحدي وطلعت حتى خفت "

استغربت " وين طلعت ؟"

هزت جتفها " ماادري بقيت وحدي وخايفه بعدين اجت هي وجدو عباس اخذني البابا واگف بالباب .."

ماردت اضغط عليها .. خليتها وكمت وراه ..

يثرم بصل مااعرف شيسوي.

" شتسوي ؟" سألتها

رد " مخلمة "

رديت " عوفها اني اسوي "

رد " روحي ارتاحي الصارلج مو هين "

رديت " خايف عليه ؟"

باوعلي " شتگولين ؟"

رديت " مااعرف تعبانه حيييل "

رد " من ايدج گلتلج غلطت واعترفت بغلطي واعتذرت بس انتي مصرة تتعبيني وتعبين نفسج "

اتنهدت " حتى لو سامحتك ما يتغير شي انت رجعتنا النقطه الصفر "

رد " عادي راضي مستعد اصعد باية باية واكسبج من جديد بس لاتبعديني عنج "

سكتت عنه وطلعت اللحم خليته ع النار ..

سوينا عشا وتعشينا…

فرشت بالاستقبال اله والدنو ..

شالها خلاها ع الفراش ..

نمت بمكاني ..

هو تمدد وبعدها سألني " الضابط الحقق وياج خو ماحجة شي وياج ؟"

عرفت شيقصد ..

اتنهدت " عباله مو مرتك… ."

هز راسه .. حظري نفسج .. نعقد محكمة

گمت ع حيلي " منو گالك اريد اعقد "

كام واجة يمي .. " ليش شتردين تتطلگين ؟"

باوعت بعيونة ماگدرت احجي ..

سأل " جاوبيني شتردين ؟ "

رديت " مو وكت هالحجي" ..

رد " لا وكته انتي مستحيل تگدرين بدوني ولااني ليش تكابرين "

ضحكت " تدري ماعندي احد غيرك الهيج تتصرف وتحجي لان متأكد بعد الي صار مااگدر اگلك طلگني موووو"

رد " لا طبعا ..لان اني مااگدر اطلگج لج اني ضايج منج وشاك بيج وروحي تلوب يمج وخايفه عليج مو دور هسا .. شوكت تعرفين اني احبج "

سألت " وهديل ؟"

اتنهد " معليج بيها مو يمج .. اني مااخليج ترجعين لهناك بعد نعيش لهنا "

رديت " وحتى لو طلبت ماارجع ذاك البيت بعد يحرم عليه .."

رد " افهم من كلامج راضية اعيش يمكم "

رديت " مو لان سامحتك علمود دنو .. وحتى الي صار ما يتكرر.. لان ماتعرف اليوم شحسيت اتمنيت الموت والله "

رد " اني التمنيت احرك الدنيا على راسهم .. وذيج الكلية ماشفتها لو شايفها اكسر راسها .. زوجها الاثول يم بيته الثاني .. وهي باقية تسرح وتمرح بكيفها .. كلها مغيوضة من تعلقي بيج "

غمضت عيني " اني تعبانه نسر .. شوكت ارتاح "

رد " ان شاء الله نرتاح بس بطلي عنادج "

سكتت عنه " يلة روح لفراشك مو فرحت "

ابتسم " يراد نرجع للدكتورة مالتج "

رديت عليه " بس هالمرة الك مو الي بلكي تتعلم تثق وماتغش "

ضحك ضحكة عالية .. الخاطر عيونك يحلو اروح واتعالج وكلشي اسوي..

غمضت عيوني واني مرتاحة .. مطمأنة بوجودة بالبيت ..

صح مااگدر اسامحة بس وجودة يطمأني ..

گعدت الصبح لگيته كاعد قبلي ويحجي بالموبايل ..

يقدم شكوى على مريم ..

كمل مكالمته باوعلي " صباح الخير "

رديت " صباح النور .. تتوقع مريم راح تعترف بالشكوى بعد الي شفته القانون بيدهم "

رد " وان يكن المهم اضوگها الي ضگتيه .. اريدها تطلع من جحرها وادبها… الظاهر غلطت من سترتها وغطيت عليها المفروض اتعامل وياها بأساليبها "

سويت ريوگ تريگ وكمل.. 

راد يطلع اندگت الباب ..

فتح الباب .. خالة وجدو اجو ..

استغربت من جيته وياها وشيريد؟؟

رحب بيهم عادي ودخلهم ..

همس " الظاهر راح تاخذ رجلهم لهنا "

سالت خاله " شلون صرتي ؟"

هزيت راسي " احسن زينة ."

رجع جدو حجة " حجتلي سماهر على كلشي .. واجيت احجي حجايتين .. ادري هسا تكول مالكم حق وانتو شايلين ايديكم منها .. بس تبقى من دمي والماارضاه البناتنا ماارضاه الها .  ماعندي بنيه دخلت مركز .. والي سوو هيج المفروض ناخذ حگنا منهم مربع "

رد نسر " حقها يمي هي مرتي واني المسؤول عنها .  وانتو سوو نفسكم ماتعرفوها شنو الجديد "

رد جدو " اذا القانون مااخذ حقها اسويها عشائريا "

رد نسر " من اعجز عن اخذ حق مرتي ذيج الساعه اگلكم "

رد " ومرتك ليش ماعاقد عليها محكمة لو مستعر منها "

باوعت الجدو ورديت بمكان نسر " لا مامستعر مني اصلا هو طلب مني بس جان زواجنا ع الورق لحمايتي لاتنسى هو الي حماني من الشارع لمن جنت ضايعه ومحد الي .. "

ابتسم نسر الردي ..

ورد " لاتخاف راح اعقد عليها مو لان گلتلي انت بس لان فعلا متمسك بيها ومااريد اخسرها .. مرتي مالها علاقه بأهلها والسووه .. عاشت وياي عشر سنوات راح تصير وهي صاينة بيتي وعرضي وماطلعت منها عيبة "

هز راسه جدو وگام " الله يهنيكم ويسعدكم ادري بيك نشمي وتحافظ عليها وانتي بوية اني موجود بأي وقت تحتاجيني وهاي خالتج شوكت ماترديها تجيج محد اله حق يمنعج عنها "

بعدها سلموا وطلعوا وخاله گالت اخابرج خلي بالج على صحتج ..

طلعوا التفت " شكرا لان ماانطيتي بيه گدامة "

رديت " حجيت الحقيقه ماانكر فضل احد بيوم ولا اكون جاحدة .. بس طبعا ماانسى اذيتك "

ضحك " وداعتج اخليج تنسين..  هسا اني رايح قفلي الباب زين ولاتفتحيه اخذت نسخة عندي من المفتاح "

ابتسمت " ماكو شي يصعب عليك "

رد " ابد وداعتج "

طلع سديت الباب وراه..

شوية واندگت صحت منو .

" اني زمن "

فتحته .. " زين ذكرتيني بذات "

ردت " والله عندي ظروف بالبيت واخوي الصغير مريض ملتهية وياه "

رديت تعاي ادخلي واحجيلي ..

دخلت يمي بالمطبخ ..

دنو بيومها مادزيتها للدوام .. وهنا مااجتني خطية بسبب نسر ..

كعدنا اني وزمن وتحجيلي عن معاناتها..

سألتها " ليش ماتفكرين تكملين دراستج ؟"

اتنهدت " اتمنى بس شلون ووين الحگ تعرفين وضعي شلون .. شگد اتمنيت اكمل دراستي بس ..

وسكتت ..

بعدها ابتسمت ..

تدرين شذر .. راح اكلج شي بس مو تضحكين ..

بعد الي صارلي بطفولتي وي ابن عمي تعقدت حيل وخاصه من جنس ادم ..

بس من كبرت كان اكو شخص يجيني بأحلامي ..

شكله حلو ودوم احلم بي ..

لدرجة اكعد من النوم فرحانة ومرتاحة ..

وبيوم طلعت للمدرسه… جان اكو مجموعة ولد توكف يم المدرسة .. شلت راسي شفت نفس ذاك الشاب الي احلم بي بوسطهم ..

بقيت اباوع عليه ومصدومة .. باوعلي بابتسامة خفيفه ودنگ ..

اول مرة اشيل راسي واخلي عيني بعين ولد هيج بس انصدمت حسيت روحي تخبلت ..

بقيت طول اليوم بالمدرسه افكر بي .. وليش اشوفه باحلامي ..

طلعت من المدرسة وعيني تتلفت اشوفه بس ماكو اختفى ..

رجعت للبيت عادي وبالليل تكرر الحلم هم والولد نفسه يجيني بأحلامي احس هذا الولد يحميني بمنامي وبحياتي..

حجيت الاختي . نبهتني مااحجي الاحد .. وسكتت وماحجيت الاحد ..

بس يمكن هذا الولد الوحيد الي دخل حياتي ولفت انتباهي بعد الي صارلي ..

اشوف صديقاتي يتواعدن ويحب ويحجن بالحب واني مبتعدة مااعرف شلون يأمنن بيهم ..

او شلون الوحدة تحب وتتزوج وتنقفل عليها غرفه وحدة وي شخص غريب ..

تدرين مرة خطبني ابن عمي وتخبلت خفت .. رفضت رغم اخوي وافق بس الحمد لله ابوي ماانطاني لان ابن عمي مو خوش ولد ..

مرة من المرات يأست من حياتي وخفت كل يوم يجي واحد يخطبني واخاف اطلع مو بنية واحس حياتي مالها معنى بس شغل وتعب ..

اخذت سم فار خليته بوسط كيكة واكلتها ..

انتحرت .. اعرف الاتحار حرام بس للحظة فقدت ثقتي بكلشي ..

تسممت معدتي ومن شافتني مرت ابوي حست عليه

اخذتني للدكتور ..

گالها قرحة وبداية جرثومة بالمعدة ماعرفوا شبيه ..

انطاني علاج ..

مااتحملت وخفت گمت استفرغ بس بقت معدتي تأذيني . تمرضت وصرت امشي واوگع الدنيا صارت سودة بعيني الى ان اخذني ابوي للمستشفى لگوا دمي سته صاير عندي فقر دم حاد ..

ومن يومها صارت حياتي عادية .. مخلصتها الاهلي والاخواني وبس. .

اما اني فالزواج للان بالنسبة الي كابوس ومااتمنى اعيشة بيوم ..

اتنهدت واني اسمع كلامها .

اكثر وحدة تحس بيها اني لان عشت الي عاشته واعرف من البنية تفضل التعب والشغل والحياة الصعبه حتى ماتتزوج وينكشف سرها ..

ويمكن اني اهون منها لان اكو من احتواني وساعدني .

بس هي تفكر بالكل ومحد يفكر بيها..

باوعتلها ابتسمت ..

" تدرين زمن انتي انسانه قوية حتى اقوى مني "

ابتسمت " ياقوة لايغرج ضحكتي وسوالفي بس داخلي رماد "

رديت " بالعكس انتي قويه الي قاومت الدنيا كلها مستحيل تكون ضعيفه .. انتي حتى اقوى مني "

ابتسمت " ارتاح من افضفضلج "

رديت " بأي وقت تعاي واحجيلي اعتبريني دكتورج النفسية "

ضحكت " خوش دكتورة وحلوة بعد شأريد "

گامت " اروح اني وراي شغل عود باجر اجيج دكتورتي صدگ تردين شي اجيبلج "

هزيت راسي " لا سلامتج "

راحت واني افكر احجي وي الدكتورة عن حالتها واشوف شلون اتصرف وياها مادام ماتروح للدكتورة بشنو تنصحني. 

طلعت رقمها خابرتها ..

ماردت .. دزيتلها رساله وكتبتلها كلشي ..

بعدها خابرت هنا اشوفها وين راحت اليوم ..

هنا :

اليوم ماكدرت اروح سويت نفسي مريضه وماخذة اجازة لان بعد الي صار نسر ماترك  شذر وحدها وخفت اروح لهناك لايكشفني ..

البارحة البيت انخبص بعملة مريم .. تخبلنا من عرفنا مشتكية على شذر ..

حتى ماما خابرت خالو وحجت عليه وخالو اجه وتعذر وگالها شعرفني شتسوي هي حتى ماتجينا بس تخابر الامها .

خابرها وصار يعيط واجة نسر كملها صار يهدد وحلف يكتلها ..

بس عمو وخالو هدأوه وراحوا البيتها دخل خالو الها جاب دنو وطلع لان حماية وخاف تتبلى عليه تسجنه لو يقتلوه بحجة اعتدى ع البيت وهو جان معصب خافو عليه ..

ماما تخربطت ونايمة يعني محد بحالي ويسألني ليش ممداومة ..

خابرتني شذر تطمأن عليه ..

رديت " هلو شذورة شلونج هسا "

ردت " زينة بس كافي الهبطة الاخذتها "

رديت " الله لينطيها ان شاء الله ودنو شلونها ؟"

ردت " زينة لسا نايمة خطية "

رديت " هاي الطفله هم ابتلت بهيج ام والله لو بيدي احذف اسمها من الجنسية لان ما تستحق تتسجل بأسمها "

بقينا نحجي شوية بعدها سديته ..

اجت رساله من هذال

فتحتها " وين مختفيه شنو نسيتي القضية ؟"

طلعت برة الغرفه وخابرتة ..

" الو اهلا استاذ اكو مستجدات هم عرفت شي "

ضحك " بالاول خلي اسلم شوية شوية عليه "

ابتسمت " اعتذر بس بالي يم هاي الشغله اريدة ينتهي بسرعه "

رد " ان شاء الله تنتهي اصلا الامور تبشر بخير التوقيع ثبت مو الج "

ضحكت " تحجي صدگ غير تحجي من الاول وتفرحني"

ضحك " ماردت اكلج الا يصدر قرار لان احنة عرفنا بطريقتنا .. بس من سمعت صوتج مااتحملت مااگلج وافرحج "

رديت " مااعرف شلون اشكرك استاذ فعلا موقفك هذا ماانساه بحياتي "

رد " لو بس تعوفينا من سالفه استاذ وست جان ارتاحينا .. "

ابتسمت " تبقى استاذي ومديري وايضا صديق عزيز وگفلي بوقت شدتي "

سديته منه حاسه باهتمامه لكن مااريد انطيه مجال بسرعة ..

المهم اخلص من هاي المشكله ..

گعدت فهد تريگنا ويانا عذورة ..

اجت بيداء ..

" صدك هالحجي السمعته شذر وين هسا وشلونها ؟"

رديت " زينة شبيج قبل شوية حجيت وياها وذيج وگعت بشر اعمالها اليوم نسر راح يشتكي عليها "

طلعت هديل من الغرفه حالها حال ..

حجت عذراء " نسر مايرتاح الا يطلع حق شذر ودور راح يبقى يمها هناك ومايتركها ابد "

باوعت هديل ودارت وجهها جانت مريضة او باجيه مانعرف "

اشرت بيداء " اتركنها لاتخلن عقلجن وياها هم تعتبر مرت اخوجن عيب "

ردت عذراء  " عيب !! نسيتي بسببها ردتي تخسرين ابنج واخوج .. وصارت تهمة على شذر "

ردت بيداء " گالتله اداين منها .  اذا قاصدتها او لا هي وربها بعد الله ياخذ حقنا منها "

بقت للظهر ..

گعدت ماما سلمت عليها ورادت تروح ..

اندگت الباب بقوة ..

فتحتها عذورة…

دخلت مريم .. تعيط وتصيح . 

وين هذا الخسيس النذل عود عباله يخوفني من يشتكي عليه فوك مااخذ بنتي وانطاها الوحدة عار مامعروف اصلها منين ..

عطنا بيها ..

" شكو جايه والسانج شطوله مو انتي الاشتكيتي على شذر بالاول "

ردت " اي اشتكيت لان فعلا خاطفتها .. اصلا هو مطلگها وطلعت لا اصل ولا فصل ومهزومة من اهلها وخاينه و……… .. كل هاي ومخليها عندها وحارميني منها..  "

عاطت بيها عذراء " شذر تشرفج وتشرف امثالج .. لج منين جبتي هالحجي ع الاقل ماخانته مثلج ولزمج بيده نسيتي شلون زين شعرج لو شلون شوه جسمج "

ضحكت بصوت عالي " الله راد يضوكه اللوعة مرتين والدليل ابن بيداء .. خطية شريفه لعد شلون شفتوه نايم فوگاها .."

مااتحملنا كلامها ..

ماما طردتها ..

واني وعذورة سحلناها ..

كفشتها المتباهية بيها صارت خيوط بيدنا ..

بس تعيط وتهدد ..

بيداء تفاكك بينا وماتكدر ماما خابرت نسر وتخربطت

اجت هديل وبيداء وياها بالگوة سحبنا منها ..

گامت ملابسها شحالهن وكفشتها ووجهها مخربط..

وصارت تعيط " والله الا اندمجن ."

شلة مال عوانس ومطلقات وارامل .. فاتحلة رعاية اخوجن الـ…… ..

وحدة رجلها خانها وتزوج عليها والثانية خانها واتزوج اجنبية علمود الاقامة ويقشمر بيها ومعلگها لمن تعنس والثالثة ارملة وعجوز صايرة كلجن مقهورات مني لان ماتوصلن الاضفري ..

مااتحملنا حجيها ..

طردناها اني وبيداء ..

عاطت عذراء بيها " تقصدين منو متزوج اجنبية احجي"

ضحكت بشماته " رغم حلفت مااطلعها بس خليتيني اكسر حلفي .. "

ردت عذراء " جذابه ادري بيج حية ما تحبين واحد مرتاح حاقدة "

ردت " بكيفج بس روحي اسأليه شلون طلع الالمانيا وعود خليه يجي يتزوجج شمنتظر صارله خمس سنين مخطوبين .."

اتهسترت عذراء وطردتها وتعيط.. 

دخل نسر عصبي .. شكو شبيجن صوتجن للشارع ..

شافها تخبل ..

" اجيتي والله جابج "

بسرعه انهزمت للحديقة " والله اذا لمستني ماتلوم الا نفسك "

يتقرب وهي تبتعد .. اخر شي لزمها خنگها ..

صارت ترفس جواه ..

" جنت اكول تنعدل بس ذيل الجلب ماينعدل .. ولو البنات مامقصرات وياج . بس هذا تحذيري الاخير الج .. اذا جبتي طار شذر مرة ثانية لو وصلتيلها موتج على ايدي .. وهذا عتبتي هالباب رجلج تنكسر .."

شمرها بالكاع .. گامت تزحف زحف . 

شالت جنطتها وگامت " والله الا اندمك مادام اني عايشة مااخليك ترتاح ابد .. وذيج مرتك الخاينة تفضلها عليه يا……   "

ركض وراها فتحت الباب وانهزمت بسرعه..

اجة سأل ..

شعندها جايه ..

سولفناله الحجي كله…

تخبل " منو گالها على سالفه مهيمن ؟؟"

محد رد لان فعلا كلنا مستغربين ..

باوع الامي " يمة حاجيه لاخوانج ؟"

ردت " لايمة شلون احجي هي هاي السالفه تنحجي؟"

عاط بصوت عالي ..

" منو اليوصل سوالف البيت كولولي راح اتخبل مريم شلون تخطو هيج خطوات وتحجي وهي واثقه "

سمعنا صوت عذورة تبجي وتعيط..

باوعلنا نسر ورد " لاعبالجن انسى السالفه ؟"

ركضنا الها ..

تخابر معتز وتعيط . تالي غلقته وتبجي ..

اول مرة نشوف هيج حالتها ..

لزمها نسر" اهدي شبيج .. اذا صدك متزوج وطالع الالمانيا يحلم يشوف اضفرج وهو الخسران .. لاتبجين كافي "

مسح دموعها وهدأها ..

باوعلي " خليج يمها .. "

طلع صاح هديل جيبي موبايلج ..

خليت عذورة تبجي وطلعت حسيت اليوم ماراح يعدي بسهولة ..

شذر :

منتظرة رسالة من الدكتورة تجيني بخصوص زمن ..

خليت الموبايل ع الطاولة ورحت اگعد دنو تأخرت بالنوم هواي جانت تعبانه من الدوام والي صار ..

دگ موبايلي رجعت ..

باوعت هاي عذورة رديت ..

سمعت انينها وبجيها " شكو شبيج ؟" سألتها

ردت بشهگة وعصبية وعياط " النذل الحقير الغدار كلهم نفس الشي ماكو واحد بيهم يستاهل حبنا .. حقج من هجرتي نسر يستاهلون كلهم يستاهلون ليث معتز حتى نسر كلهم نفس الشي انذال انذال .. "

ماافتهمت شي بس عياط وبجي..  وبعدها صارت هوسة وانگطع الخط ..

بقى بالي يمها اتصل محد يرد ..

خابرت ع هنا .. ماردت .. كل الاتصل عليه مايرد ياربي شلون سالفه هااي ..

اضطريت اخابر على نسر ..

بقى يدك يدك الى ان نطاه رفض !!

#بقلمي_شمس_السعدي

يتبع .…

مساء الجوري احبتي ❤

///// البارت التاسع والخمســــون /////

#قوارير_من_فضة ج2

#بقلمي_شمس_السعدي ..

سيأتي يوم تحس فيه بقيمتي..

سيأتي يوم تعرف فيه مدى حبي..

سيأتي يوم تنظر حولكـ فلا تجدني..

سيأتي يوم تندم فيه على خسارتي..

                      لكن بعـد فوااااات الاواااااان ..

أبدا لن أنسى خيانتك لي أو بالأحرى ماحل بي عندما علمت بما فعلته .. 

لن اسامحك ابدا لانك انتشلت مني كل شي جميل وكل ذكرى بيننا ..

تحملت ﻏﻴﺎاﺑﻚ القاتل .. كان ﻳﻮﻣﻲ ﺑﺪﻭﻧﻚ ﻳﻤﺮ ﺑﺒﻂء ﺷﺪﻳﺪ ..الدقيقة ﺗﻌﺎاﺩﻝ ﻳﻮﻣﺎا  .. ﺃﺣﺎاﻭﻝ ﺃﻥ ﺃﻣﻸ ﻭﻗﺘﻲ ﻭ ﻟﻜﻦ ﺩﻭﻥ ﺟﺪﻭﻯ .. ﻭ ﺣﺘﻰ أﻥ ﻛﻨﺖ ﻣﺸﻐﻮﻟﺔ ﺃﻓﻜﺮ ﻓﻴﻚ .. ﺃﻛﺎاﺩ ﺃﺑﻜﻲ ﻣﻦ ﺷﺪﺓ ﺍﻻﺷﺘﻴﺎاﻕ .. ﺗﻜﺎاﺩ ﺩﻣﻮﻋﻲ ﺗﻨﻬﻤﺮ أماام الجميع .. ﺗﻌﻮﺩﺗﻚ في كل حاالاتك .. ﺗﻌﻮﺩﺕ أﻥ أتعرف على ﺗﻔﺎاﺻﻴﻞ يومك من صوتك أو من كتاابااتك تعودت على سمااع ضحكتك فى الهااتف ..

تعودت سمااع كلامك في الهااتف أيضاا .. ﻭ ﻟﻜﻦ ﻫﺎا أﻧﺖ لست معي ﺍﻵﻥ !!

أنت مع فتاة أخرى .. ﻛﻴﻒ ﻟﻲ ﺃﻥ ﺃﻋﻴﺶ ﺑﺪﻭﻧﻚ .. !! ﻛﻴﻒ ﻟﻲ أن ﺃﺗﻨﻔﺲ .. ﻛﻴﻒ ﻟﻲ أﻥ ﺃﻗﻮﻡ ﺑﻜﻞ ﻣﺎاﻫﻮ ﺭﻭﺗﻴﻨﻲ .. أﻧﺖ ﺭﻭﺗﻴﻨﻲ ..

ﺭﻭﺗﻴﻦ ﺟﻤﻴﻞ .. حفضته و أعجبت به .. ﻻ ﺃﺣﺪ ﻳﻔﻬﻤﻨﻲ ﻏﻴﺮﻙ .. ﻻ ﺃﺣﺪ ﻳﻔﻬﻢ ﺗﻘﻠﺒﺎاﺕ ﻣﺰﺍاﺟﻲ .. ﻻ ﺃﺣﺪ يعرف معنى ﺻﻤﺘﻲ ﻏﻴﺮﻙ .. بدوونك ﺃﻳﺎﻡ ﺩﻭﻥ ﻃﻌﻢ .. ﺃﻳﺎاﻣﻲ ﺗﺤﻂ ﻓﻮﻗﻬﺎا ﺳﺤﺎاﺑﺔ ﺳﻮﺩﺍاء ، لاتختفي إﻻ ﺑﺮﺅيتك ..

من سمعت الخبر كان مثل الصاعقة .. حاولت مااصدگها لان اعرفها خبيثة وكلشي تسوي ..

بس جانت تحجي بثقة وتباوع بمكر .. وكأنها قدمت اخر ورقة رابحة عندها وانتصرت ..

اي انتصرت لان مزقت نياط قلبي بكلامها ..

دخلت للبيت متهسترة .. واردد بيني وبين نفسي

" جذابة .. اي ادري بيها جذابة .. معتز مستحيل يسويها مستحيل يكون هسا بحضن غيري "

اتصلت عليه ماكو محصلته..  رجعت اتصلت بهنودة

ردت ..

سالتها بسرعه وبدون مقدمات " معتز متزوج صدگ وطالع علمود الاقامة لو لا "

ردت بمتمته " هاااا منو گلج هالحجي "

عطت بصوت " اي لو لا احجي "

ردت " منو گلج ماكو هيج شي "

رديت ودموعي ماوگفن " وج مريم گالتلي تجذب لو لا لاتحرگين روحي احجي عليج الله ريحيني ع الاقل اذكري صدقاتنا وخوتنا العايشيها لاتخليني عايشة بوهم احجي "

اتنهدت " اي صح .. بس والله علمود الاقامة صديقه خلاها بباله والا هو يحبج ومنبه علينا مانگلج بس ياخذ الاقامة ويتركها…… "

خليتها تحجي سديت التلفون بوجهها مااتحملت اسمع تبريرات .. يحبها او لا المهم تزوجها ولمسها وينام يمها حاليا .. هذا كله يعتبر خيانه ..

خيانه گلبي الي فتح عينه عليه وحبه .. سنين واني متحملة وصابرة وتالي بلحظة انانية يهد كلشي بنيناه

اتصلت بي اكثر من مرة ماكو..

اريد اعيط اريد ابجي اريد احجي ماعندي غير اخيتي الماجابتها امي . شذر وينج لو انتي يمي جان هسا عطت وبجيت بحضنج ..

اسمعهم برة نسر واهلي يعيطون واني بالي يم سوايته السودة ..

اجه نسر يواسيني بس هالمرة ماگدر يسحب الالم البداخلي ..

خابرت شذر بجيت وعيطت وشكيت . الى ان حسيت الدنيا اسودت بعيني ووگعت ..

صحيت عليهم مخبوصين بيه .. ونسر يفرك بيدي ..

شافني صحيت حجة :

" گومي اخذج للمستشفى "

هزيت راسي " مااريد مابيه شي الوجع مو بجسمي هنا هنا واشر على گلبي وابجي "

اخذني الحضنه " كاااافي كطعتي گلبي والله الا اخليه يرجعلج لهنا مثل الجلب "

دفعته وعطت " شسوي بي يرجع لهنا بعديييييش بعد مالمسها بعد ما نام يمها شلون راح اصدگ بي بعد .. انتو شنوووو.

شلون تگدرون تحبون اثنين لو تلمسون اثنين شلووون

لو احنة ليش ماعندنا حظ بالحب ..

ليث .. معتز .. كلهم نفس الشي نفس الطينة انتو كلكم نفس الطينة ..

سحبني مرة ثانية الحضنه ويمسح براسي " كافي حبيبتي والله اخذلج حقج والترديه يصير بس لاتسوين بنفسج هيج "

اشر الهنا تبقى يمي .. واخذ امي وطلع ..

اجت بيداء گعدت يمي " ليش مكبرتها كل الشباب هيج تسوي ياخذوهن علمود الاقامة وبعدها يعوفها ويتزوج من ثوبه ومن بلدة لاتصدگين عراقي يگدر يتحمل وحدة اجنبيه تتشرط عليه بفلوسها وبجنسيتها وبلدها "

عطت بيها " عندكم عادي بس عندي لا .. اكثر شي اكرهة الخيانه .. وهو خاني وسكت . كلما اسأله يتهرب لو يجذب .. وبعدها يخلي وحدة مثل مريم تتشمت بيه .. القاهرني يخطط شلون نتزوج وشوكت ننجمع وهو نايم يمها وبحضنها .. شايفتلج نذالة اكثر من هيج"

ردت هنا " ترى حقها ومحد حاس بيها الا اني .. رغم جنت احب ليث حب اعمى .. بس من شفته وي شجن وبحضنها اشمئزيت منه وكرهتة .. ماكو مرة تتحمل الخيانه وتسكت وليش تسكت اذا عندها حلول افضل منها. 

عذراء مناقصها شي .. شهادة وبعد يومين تتوظف وتعيش حياتها وتاخذ اغاته لويش باقية وي واحد ذال نفسه بالدول وصاير جلب للاجنبية بحجة الاقامة .. اصلا مااعتبر اليسوي هيج رجال "

خزرتها بيداء " لاتزيدين الطين بله "

رديت " اطلعن خلني وحدي اريد انام "

طلعن وتركني دفنت روحي جوة البطانية وابجي بحرگة ابجي بصوت مخنوگ ..

مااريد احد يسمعني لو احد يتشمت بيه ..

بهاي اللحظة اتصل بيه ..

شفت رقمة رديت بسرعه وبدون مقدمات عطت :

" عسا الله يحرگك باللوعة والوجع الحاسه بي هسا .. لك امنتك گلبي من صغري وماباوعت الغيرك ابد صنتك حافظت عليك بغيابك تالي هيج تسوي بيه "

رد " حقج والله حقج بس مو بيدي لازم هيج اسوي علمود مستقبلنا شلون اگدر اخذ الجنسية واسحبج يمي شلون…… "

قاطعته بعلو صوتي " ومنو گلك اريد اعيش بالخارج منو گلك اريد جنسية واقامة… اني ردتك انت وبس ردت اي مكان يجمعنا هنا بتركيا باي مكان المهم مانفترق "

رد " وج افهميني لاتخلين هالحقيرة مريم تلعب بدماغج كلها فترة مؤقته وينتهي "

عطت بي " فترة مؤقته يعني شگد سنه سنتين لو من تشبع منها وتتونس واحتمال تحمل منك . شوكت فهمني لم تشبع رغباتك يله تتذكر عندك مرة بالعراق ..

لها وبس معتز .. مادام اختاريت طريقك بدوني ومن غير ماتاخذ رأي .  استمر بي الوحدك "

" يعني شنو " سأل

" يعني ايدك الي لمست وحدة غيري مستحيل اخليها تلمسني وگلبي الحبك راح اقلعه من جذوره "

رد " اوگفي مو هيج الحجي اسمعيني…… "

سديته بوجهة وبجيت..

اسمع نسر يخابر خاله مناك ويعيط ويحجي واني ازيد بعياطي اكثر واكثر اتمنيت ساعتها الموت حتى ارتاح من هذا الكابوس ..

شذر :

بقيت بحيرة ومااعرف شي . كلما اتصل محد يرد ..

نسر موبايلة مشغول .

رجعت خابرت هنا ردت واخيرا :

" الوووو هاي وينكم متت قلق "

اتنهدت " اسكتي شذر مصايب على راسنا ماتخلص "

رديت " غير تفهمني شكو عذورةة خابرت تبجي وتعيط شبيها "

ردت " معتز طلع متزوج المانية علمود الاقامة "

شهگت " اوووف عذورة مستحيل تتحمل وج تموت هاي تتخبل عليه شلونها هسا "

ردت " شلونها يعني تعبانه وبس تبجي وماتريد احد "

سألتها " زين شلون عرفتوا منو الكالها خاف جذب "

ردت " لا صدگ مريم گالت وتأكدنا من هنودة اختة .. وهسا خابر معتز اسمعها تعيط .. المشكله فقدت مثل المخبلة واغمى عليها شلون بيها ماادري احس صدمتي بليث رجعت .. مثل ماصار بيه صار بيها بس عسا وان تكون قوية وتگدر تنساه مثلي "

اتنهدت " مااعتقد عذورة تگدر تنسى بسهولة بس اني اعرفها .. وين نسر خلي يجيبها يمي هنا اني اداريها "

ردت " نسر حايرة بضيمه الله يساعده كلما يگوم من مصيبة يوگع بغيرها وعبالك تورط صار اخو البنات..

وفوگاها مريم خبلتنا جابت طاريج انتي ومهيمن وهو حاير منو گالها ..

استغربت " منين عرفت ؟؟"

ردت " ماادري هو شك وكلنا شكينا بهديل .. قبل شوية صاح عليها واخذ موبايلها .. فتشة كله مابي اي شي بس رقم امها واخواتها "

رديت " يعني حيرة لعد منو كالها هاي البنية صايرة تخوف عبالك مخابرات "

ردت " يامخابرات گولي حية وتحفرلنا بكل مكان مااعرف ليش تريد تنتقم منا على غلطة هي غلطتها وشلون عين صلفه وتگابلنا بعد عملتها "

اتنهدت " الله يكفينا شرها . اذا نسر فرغ خلي يخابرني بودي اجي واكون يمها بس حالفه ذاك البيت ماادخله بعد "

سديته منها واني ميته قهر على عذراء .. عذراء تختلف عنهم كلهم بالنسبة الي اعزها بمعزة دنو .. لان جانت اخت بالنسبة الي ..

مااتحملت اكثر اتصلت بنسر رد بثگل ..

" هااا شذر ماگدرت ارد عليج جنت ملتهي "

رديت " اعرف خابرت هنا وحجتلي .. اريدك تجيب عذورة يمي .. هي محتاجتني هسا وتدري مااگدر اروح لهناك "

رد " صار عيني .. اشوفها اذا تقبل اجيبها خلي بالج من نفسج وقفلي البيبان زين "

رديت " وانت هم خلي بالك ع نفسك لايرتفع ضغطك "

اتنهد " ااااااه شذر ااااه محتاجج "

رديت " الله يساعدك "

رد " اكثر وحدة تفهمني انت اليوم محد گالي الله يساعدك غيرج . حتى وانتي گلبج شايل مني تفكرين بيه .. اشكر الله وذيج الصدفه الخلتني اشوفج "

سديته منه وابتسمت .. رغم السواااه بيه احس گلبي مايگدر يكرهة ولايگدر يتقرب منه .  عايشة بين نارين

نار  هواااه ونار شكه وعدم ثقته بيه ..

خاف اسامح وامد ايدي . ويجي يوم يخذلني مثل ماسوة قبل ..

عذراء :

احس عيوني مااشوف بيهن من البجي بعد .. اجة نسر سويت نفسي نايمة ..

اتقرب مني…

مسد على راسي .. مسح دموعي بيده ..

حس بيه اتصنع النوم ..

" ادري بيج تسمعيني .. دلوعتي الصغيرة .. احسج بنتي مو اختي .. لان عمرج ثلاث سنوات من استشهد ابوي ..

وجنتي تتلگيني للباب من ارجع من الشغل وتصحيلي بابا ..

افرح من اسمعها وابجي بداخلي لان صغيرة وانحرمتي من حنانه . 

قربتج الي .. حتى اسراء جان عمرها تسع سنوات وتغار منج .. تتعاركن على حضني ..

وانتي تصيحين بابا وخر .. عود وخرها خلي انام بحضنك ..

جنت امد ايدي الثانية الج وماتقبلين الا نفس الايد الاخذتها منج اسراء .

وحدة تغار من الثانية عليه .. ارجع تعبان بس من اشوفجن انسى التعب .. كبرت واني يصيحولي ابو البنات مو اخو البنات ..

صح من كبرتن انشغلت عنجن بس عيني عليجن وجنت صديق مو بس اخ .. مستعد اسمع مشاكلجن كلها بس انتن الي ابتعدتن ..

كبرت ونسيتن الحضن الي جنتن تنامن عليه . وحدة دخل بگلبها الغيرة والحقد لدرجة اذتني حتى تبعد الاحبهم عنها .

ووحدة اختارت الشخص الخطأ ووافقت الخاطر سعادتها رغم جنت حاس راح يجي يوم يغدر بيها وتتأذه .

بس رغم السواااه والصار .. راح يبقى حضني مفتوح الجن بأي وقت تردن .

فتحت عيني مااتحملت كلامه فعلا محتاجة حضنه ..

سويتلة مجال يمي ع الجرباية ..

تمدد وفتحلي ايديه ..

نفس الايد الجنت انام عليها بطفولتي .. حضني ونمت ردت حضن يحتويني .. وينسيني ولو ثواني ..

غفيت بحضنة وهو يمسد براسي ..

همس " شذر تريدج يمها هناك ترحين ترتاحين كم يوم"

هزيت راسي..

رد " بعد الغدا جهزي نفسج وخليني اخذج "

گمت لميت ملابسي بجنطة ..

طلعت الموبايل غلقته وقفلت عليه بالكنتور… مااريد اسمع صوته ولاتبريراته ..

بدلت وطلعت جانو صابين غدااا ..

ماما شادة راسها ..

شافتني حجت " وين رايحة امي "

رد نسر " راح اخذها يم شذر ترتاح هناك "

ردت ماما " وليش ماتجيب شذر لهنا ؟"

اتنهد " شذر ماتقبل تجي لهنا بعد الصار .. واصلا لاتشوفني ساكت .. بدت السوالف تطلع ولابد يوم اكشف الحقايق كلها اذا تشوفني اسكت لاعبالجن انسى .. وهالحجي گولنه الاسراء هم من ترجع ..

تعبت واني اركض وراجن احس البيت صاير لغز يمكن الوحيدات الماشلعن گلبي هن الاء وسما تزوجن بعيدات مرتاحات ومريحاتني "

جان يحجي وعينه على هديل .. وهي مسوية نفسها ماتسمع وترتب بالاكل ع السفرة ..

اشرلي " يلة خلينا نروح "

سألته ماما " ماتتغدون ؟"

رد " اروح هناك يم شذر نتغدا "

رفعت راسها هديل باوعت علينا بقهر ..

عفتهن وطلعت من غير كلام اصلا جنت بحاله مابيه افكر لابهديل ولابغيرها ..

هنا :

طلعوا عذورة ونسر البيت شذر ..

حجت امي " هالولد زين منه وواگف على رجليه راح يموت بسببجن "

رديت " وليش بسببنا . گولي من المكائد الي تنصب من وراه "

ردت هديل " شقصدج شو تباوعيلي "

ضحكت " وليش اخذتي ع نفسج لو بعبة طلي يمعمع "

ضاجت " شفتي خاله شفتي شلون يكرهني شو كلشي يصير بالبيت يخلنه براسي "

عطت بيها " لعد منو موصل المريم اسرار البيت كلنا نكرهها ومانطيقها منو ممكن يتواصل وياها .. ياانتي يامسولفه الامج وامج طاشتها "

ردت " لا اني ولاامي .. واصلا ماكلت الامي اي شي وذيج هي وحلفنها "

عاطت ماما بينا " كافي كافي اسكتن راسي يريد ينفجر وضغطي مرتفع وانتن تتعاركن صاير ماكو راحة بهالبيت"

رديت " الراحة انتي ضيعتيها يوم ماجبتي هاي للبيت تدرين ابنج راحته وين وشيريد ماهمة لاطفل ولاشي جان يريد مرة تحتويه وتنسيه .  بس انتي قبل لاينسى ويبدي حياته .. ورطتيه بمرة ثانية مارايدها وانفرضت عليه "

ردت هديل بعياط " شنو قصدج انفرضت عليه قابل اني الشمرت روحي عليكم لو انتو الخطبتوا "

رديت " اي صح امي خطبت وانتو رفضتوا .. بعدها خابرت امج وشمرتج علينا وخلتنا امام الامر الواقع رغم نسر فرح لمن رفضتوا "

هي تهسترت من سمعت كلامي " شنو فرح قصدج مارايدني .  خاله مو انتي رجعتي خابرتي خطبتي واتفاهمتي وي امي وحجيتن وي ابوي ..

موو گلتيلة ……… .. قاطعتها ماما :

" يووووه انتن ماتنردن ولاتحترمن جبير اروح انام بلاغدا احسن "

گامت ماما الغرفتها وهديل تخبلت من سمعت كلامي صارت تدگ وتلطم لمن تخربطت ووگعت .

مااعرف ليش گلبي مارف عليها لو ضجت…

سحبت ولدي صبيتلهم وحدهم ودخلنا للاستقبال

غديتهم وفرشتلهم ونمنا ..

خليت بيداء خطية ملتهية بيها وبماما .. الزعلت وماقبلت حتى تتغدا ..

شذر :

گعدت دنو من النوم تريگت ماقبلت تتغدا رادت جبن ومربى .. طلعتلها ..

بقت بالمطبخ تاكل واني رحت اكمل خياط مالي شهية بعد للاكل ..

تفكيري كله بعذراء ..

اندگت الباب اجت دنو تركض صارت عندها رهبه وخوفة .. " ماما ماما الباب تندگ "

كمت " لاتخافين ماما ماكو شي "

طلعت صحت منو سمعت صوت نسر ..

فتحت بسرعه . 

دخلت قبله عذورة .. حضنتني وتبجي . 

بقيت اهدأ بيها دخلتها للبيت ونسر قفل الباب وجاب غراضها ورانا ..

گعدتها ع القنفه ..

" عذورة هاي انتي القوية هيج تضعفين .. "

ردت وهي تبجي " اي قوة هاااي .. اني جنت احجي وياجن واضحك واسولف واحشش وكلماته ترن بأذني تنطيني طاقة وايجابية..  انتظاري لليوم الننجمع بي هو الناطيني حافز اكون اقوى واصبر . لج انت اكثر وحدة تعرفين الخذلان شنو .. بس يمكن ماتعرفين شنو انسانه تحب شخص لحد الموت وتالي يخذلها "

نسر گاعد ومدنگ .. واني مااعرف شلون اواسيها واحجي وياها ..

گمت " كافي عذورة تعاي غسلي حتى انصب غدا ممتغدين مووو ؟"

رد نسر " غديها الها اني مااشتهي "

رديت " ماكو مااشتهي كلنا نكعد سوة ونتغدا .. " اشرتله يگوم الخاطرها گام واجة ورانا ..

غسلت وگعدت ع القنفه ..

اجه نسر گعد بصفها واشر الدنو گعدها يمه وحضنهن اثنينهن يبوس بيهن ..

ابتسمت والتفتت للطباخ . مسوية مطبگ سمج طلعت السمج من الفرن .

وصبيت التمن والحشو وخليت السمج فوگاها..

طلعت الزلاطة من الثلاجة والطرشي .  رتبتهن ع الطاولة وروبة ..

باوع نسر ابتسم " وج عذورة عمرج خسارة اذا مااكلتي دشوفي ريحة التمن العنبر طخت بخشمي .. "

گام غسل ورجع..

صرت اطلع العظم من السمج واخليه گدامها ..

" يلة اكلي لاازعل وياج "

صارت تنقش وتاكل بس زلاطة .. جانت مسويه رجيم بأخر فترة حتى تضعف ..

وكمنا نتعارك وياها لان السمن حلو عليها ووجهها عريض والغمازات مبينة من تضحك .. الضعف ميلوگلها

باوعلي نسر وابتسم " عاشت ايديج الاكل طيب "

رديت " عافيات "

كملنا اكل غسلت الماعين .. نسر خله القوري ع النار وسوة جاي ..

بقى يحجيلنا ع الجيش وشلون من يسوي الجاي المقر كله يتجمع على ريحته ..

ويحجيلنا عن مواقف تضحك قبل ويحاول يضحكها بس هي جانت بعالم ثاني ..

لازم كوب الجاي بيدها الى ان برد وتركته ..

" اروح انام نعسانه "

گمت وراها الغرفه وليد .. رتبتلها الفراش ونامت…

دخلت غراضها للغرفه وسديتها ..

رجعت للاستقبال لگيت نسر متمدد ع القنفه..

شافني گام " هااا نامت ؟"

هزيت راسي " هي غمضت بس مااعتقد نامت .. مو بالسهولة تنام وهي تفكر بحبها اله وخذلانه "

اتنهد " يمكن هسا انتي بداخلج تساويني بي مووو؟"

رديت " لا ابد .. الخذلان صعب صح بي اني تعودت حتى احس صار روتين الحياتي .. ماتشوفني بأشهر گدرت اتغاضى واحاول انسى والدليل اني وياك هسا نحجي عادي ..

بس عذورة تختلف بحياتها ماعاشت الخذلان هاي اول مرة بحياتها الاول حب بحياتها .  فصعب تطلع منه بسهولة "

باوعلي وعيونة كلهن ندم وحيرة " تعبت شذر بالله تعبت كلما اگوم واگول ارتاحيت تجيني طعنه توگعني ليش الله يختبرني بأخواتي .. معقولة هاي حوبتج لو دعواتج عليه هيج يصير بيه "

شهگت " لا ابد .. بحياتي مااتمنت الشر الاخواتك ولا حتى الك .. حتى من ظلمتني صح سلمتك بيد الله بس مادعيت عليك .. اني ع عدوي ماادعي ع الحطمني ودمرني مادعيت مو دور انت واهلك الي الكم فضل جبير عليه .. واخواتك هن اخواتي "

رد " ماكو كل فضل عليج لاتحجين هيج بعد . ومااريدج تسامحيني لان الي فضل عليج لو لان حميتج بيوم ..

اريدج تسامحيني لان بداخلج حب الي .. مشاعر اتجاهي .. والا لاتسامحيني ابد "

بقينا لثوانـي واحد صافن ع الثاني عيونة بعيون بعض مرات النظرات تحجي المايگدر اللسان يحجيه ..

قطعت هذي النظرات دنو وهي جايبه كتبها تريد تدرس

طلعتلها دفترها وخططتلها ..

تمدد هو ع القنفة ونام .. بقيت ادرسها للعصر .. اجاه اتصال من عمة وطلع ..

رحت گعدت عذورة نايمة راح يصير المغرب ومايصلح

ماقبلت تگعد ..

" كومي ياعيني .. گومي اسويلج جاي وكعك ماتغديتي وهسا اخابر نسر ياخذنا للامام زوري وشمري همومج هناك وتعاي ..

گامت بالگوة عليها ..

لليل رجع نسر .. فتحتله  الباب بالمطبخ حجيت وياه

" متخلينا ناخذ عذورة للامام شوية تنفه عن نفسها "

اتنهد " الا اليوم ؟؟ مابيه حيل خابرت خالي علي وطالعه روحي "

سألته " اي وشگال ؟"

رد " شيگول .. يبرر الابنه يكول بس ياخذ الجنسية يطلكها ليش مكبرين السالفه . الظاهر مسانديه علمود يسحبهم لهناك "

اتنهدت " وهاي شلون نقنعها ؟"

رد " مستحيل اخليها هيج باجر عگبه تنساه خو ماتبقى عمرها كله منتظرته .. الاحسن يطلكها ونرتاح "

سألته " شلون يطلگها وهو هناك "

رد " يصير بالتلفون بس استشرع واتأكد "

دخل للاستقبال دخلت وراهم ..

راح يمها گعد " شلونها عذورتي "

هزت راسها " احسن "

باوعلي " يلة گومن خلي نروح نزور ونرجع "

رديت " خلي اسوي عشا ونتعشا يلة "

رد " لا لاتسوين من نروح ونرجع لو مناك ناخذ لفات "

بدلنا ورحنا وهي اصلا على عيونها گامت تبدل .. بالگوة حتى تمشي ..

دخلنا وهي تزور گعدت على حيلها وتبجي فرفحت من البجي .. الرايحة والراجعه تباوعلها ..

گامت تشكي لله وتدعي من گلبها ..

بالگوة گومتها .. طلعنا نسر منتظرنا .. اخذنا فررنا وعشانا حاولنا نغيرلها جو ..

ورجعنا  وهي نفس الشي .. على وضعيتها ..

اول مادخلنا البيت نامت وماتكعد الا للظهر تتغدا وتنام وهكذا ..

مرت الايام وهي هيج حالتها ابد ماعجبتني .. نسر حاير بمريم المانعرف شتريد بالضبط..

اشتكت عليه وعلى البنات لان ضربوها ..

تخبل من عرف اخواته راح يدخلن مركز او ينسجنن المشكله عذراء بعالم ثاني مو حمل بهذلة ..

من حجالي تخبلت ..

" نسر سوي شي يعني معقولة مريم هيج تسوي بيكم "

رد " الكلبة تريد تلوي ذراعي بأخواتي "

رديت " شوفها شتريد ترى ماكو وحدة هيج مو تزوجت وراحت شتريد منا "

رد " تريدني !!"

استغربت " تريدك شنو ؟"

رد " هاي وحدة مريضة بس مو تحجين الاحد "

هزيت راسي ..

كمل كلامه " بعد ماكنت ملكها الها وعيني ماتشوف غيرها خانتني وي زعطوط .. وهسا لمن طلگتها وتزوجت وسافرت وعاشت بفلوسة ولمن حست اكو نقص بحياتها .. اجتني تساومني على نفسها تريد تكرر الي سوته وياي .. يعني تخون رجلها وياي "

فتحت عيني " لا مستحيل شنو هالانسانه هاي "

رد " وليش مستغربة هيج انسانه كلشي تسوي علمود رغباتها مستحيل تعرف تحب لو توفي .  لمن هنتها وطردتها .. صارت تريد تنتقم ع الماضي والحاضر .. واول مابلشت بيج تريد تخلص منج بأي طريقه . لان تعرف انتي الوحيدة الواگفة بطريقها "

ماصدگت من حجالي نسر .. بعد الصارلي ومن تهموني اني ومهيمن توقعت حتى مريم مظلومة رغم شافها نسر بعينه .. بس بعد ماحجالي وشفت تصرفاتها تأكدت هي مو طبيعية ..

نسر انشغل ويسوي المستحيل حتى اخواته مايصيرلهن شي ..

دخل عمة وخاله ..

تالي تفاجانه بحسام اجانه ولأول مرة ..

راح لذاك البيت گايليه هنا ..

من شافه نسر تنرفز بس حسام طلب يحجي وياه ..

دخله للبيت ..

اشرلي نسر ادخل لجوة   ..

سلمت عادي وبعدها دخلوا للاستقبال ..

خليت الجاي ع النار. .

صار هواي ماشايفته متغير وكبران .. الي اعرفه صار دكتور لان جان يدرس طبية بس دكتور شنو ماادري ؟؟

اسمعه يحجي وي نسر ويتعذر عن اخته ..

رد نسر " شنو ماكو واحد بيكم يگدرلها .. ااااخ لو كاتلها بوكتها ماصار هيج بس كلكم وكفتوا گبالي "

رد حسام " لاتنسى اني ايدتك وگلتلك اذا ماتكتلها انت اني اكتلها .. بس اخذها عمي وحماها .. لاعبالك راضي عليها اصلا صار سنين الساني مايدور على السانها والبيت ماتدخله ومن تزوجت عبالي تعقل بس تخبلت اكثر "

رد نسر " هي بس تخبلت لو تريد تدمر حياتي خاف عبالها ماخذة واحد واصل بالدولة تخوفني .. وحق الله مااخاف بس من الخلقني .. هي واليحاميلها "

اتنهد حسام " خوية شسوي فهمني والله مالي عين اطلع الاحد من وراها حتى انتو انحرمت منكم بسببها مخلص وكتي بالمستشفى..  وشغله معتز وعذراء نبهتها ماتحجي سامعه من امي رغم نبهنا ماتطلع .. مايهون عليه الي صارلها "

رد نسر " وانت مااجيت وكلتلي من سمعت "

رد حسام " عذراء بنت عمتي ومعتز ابن عمي .. وهاي خصوصياتهم مو من حقي اتدخل "

صار نسر يحجي على معتز ويتوعدله ..

سأله حسام " وهسا شناوي ؟"

رد نسر " طبعا اطلكها منه مستحيل اخليها وي واحد ملعب استغلها علمود مصلحته "

رد حسام " اخذ رأيها جائز ماتقبل "

رد نسر " تقبل غصب عنها بعد حالتها هاي وصارلها كم يوم لا اكل ولا ضحكة ولاسالفه مستحيل اخليها يمة "

رد حسام " هي ليش ماقدمت تعيين كليتها بسرعه تتعين تداوم بمختبر تحليلات بأي مستشفى "

رد نسر " هو هم هيج خليها تتعين حتى تنساه وتغير جو مثل هنا ماطلعت من حالتها الا بالدوام "

رد حسام " اذا تحب اني اساعدها بهاي الشغله "

رد نسر " لا شكرا اني اتكفلها "

كام حسام " اني اترخص بس اجيت اعتذرلك عن الصار وبالنسبة المريم شتسوي وشتقرر اني وياك حتى اذا تريدني اشهد على افعالها اني حاضر "

رد نسر " مشكور رحم الله والديك .. الظاهر اختك طالعه على خالتها .. ربيتها على كلشي عكس عاداتنا وتربيتنا وبالمختصر هيلگتها "

طلع حسام خجلان من البيت .

سد الباب نسر ودخل ..

گلتله " والله مبين هالولد حباب ابد مايشبه اخته "

هز راسه " هو هادي من طفولته بس للاسف اخته نزلت راسه وخلته يمشي محني الظهر وماعندة رجولة ."

رديت " قابل شنو ذنبه هو وليش تحاسبوه على افعال اختة "

رد " لان هاي اخته والمفروض هو يخليلها حد مو بحجة متبري منها وهي تمشي بطولها "

رديت " قابل شيسويلها ماتشوفها تشتري المشاكل شراية .. مو بعيدة تشتكي عليه وتضيع مستقبله اصلا مامعترفه بي اخوها هي "

هز راسه وگام .. عمي يكول اكو محامي شاطر يعرفه نروح نشوفه شيگول ..

سألت " يعني شنو تبقى الشكوى والبنات شلون ؟؟

رد " ابوها يگول اني احجي وياها وخلينا نشوف شيسوي.؟؟

طلع نسر كملت روتيني اليومي ..

عذورة من عرفت حسام اجه تنرفزت ..

وعبالها جاي يتشمت ..

اجه نسر ضايج مثل عادته هالفترة وماحجة شي ..

صار يجي ينام ويطلع وهكذا…

خابرت خاله عليه تسألني عن حالي ..

الاربعين قرب مال بيبي گلتلها كملتلها ختمة اتمنيت اكثر بس هالفترة عندنا ظروف ومااگدر ؟"..

ردت " ادري عرفت عندكم مشكله شصارلها ماانحلت ؟؟"

سألت " شمدريج ؟"

ردت " سمعت من ارشد حجالي مقتطفات مو ع اساس موكليه بقضيه وگال مرت نسر السابقه مشتكيه وهو هم مشتكي ..  وخطية خايف عليج يگول شلون عايشه بوسطهم"

رديت " من هيج نسر ضايج .. لان عمة وكله وهو مايدري ماجان يريد احد يعرف اسرارنا وفعلا اني وياه احجي وي ارشد لايحجي الاحد "

ردت " لا مايحجي هو اجه حجالي الي لان عباله ادري"

حجيتلها خاله الي صار تخبلت . وگالت احتمال هي السبب بكل الصارلج…

مااعرف شلون نسر قبل ارشد ياخذ قضيتهم او احتمال عمة دافع من وراه وموكله ..

مرت الايام ومريم خسرت قضيتها لان ارشد گالهن انكرن اي تهمة .. حسب مامفهمة نسر انه تتبلى عليهن ومحد لمسهن .. وثبت كلامهم…

حسام الي شهد ضد اخته بأنها كم مرة تهجمت عليهم وتعاركت وياهم ..

الطرفين دفع تعويض .. وسوو تعهد بعدم التعرض للطرف الثاني ..

بعد ما انتهى كلشي نسر لأخر مرة حجة وياها وگالها

" ابتعدي عني وعن عائلتي انسينا مثل مانسيناج حتى بنتج انسيها لان كبرت وافتهمت وماتريدج بعد .. حاولي تعيشين حياتج بعيد عنا "

بعد مافرغ من قضية مريم ..

ابتدأ بقضية عذورة ..

بالاول اجة من دوامة وگعد وياها جانت حالتها احسن بس هم لاتضحك ولاتحجي هواي مرات احاول اضحكها تبتسم بس ..

سألها " عذورة حبيبتي شناوية تبقين هيج ؟؟ تنتظرين والعمر يمر لو تعيشين حياتج حرة "

ردت " الي تشوفه سويه مايفرق بعد عندي شي "

بعد مااستشرع نسر .. جاب سيد وخابروا معتز ..

بالبداية معتز ماقبل وكاله اني شاريها واريدها بس لمن سمع ردها وموافقتها بالطلاق ..

استسلم وتراجع ..

عذراء :

عشت اسوء شهر بحياتي ..

تركت موبايلي بالبيت وغلقته حتى مااضعف وارجع عن قراري ..

صح گلبي بعده يحبه بس الخذلان صعب وكرامتي عندي اهم .. سنين واني اركض وراه بالموبايل ومااعرف وين يروح ومايروح .. حافضت على حبي اله رغم المصارحات الي كنت اتعرضلها بالجامعه .. حتى خطوبة خطبوني رفضت الاجل حبه بداخلي..

من حجة وياي نسر خليت الامر وراه لان لو يبقى القرار الي فمستحيل اقرر .. اعترف حبي اله لسا موجود صح ضجت بس بالنهاية لازم اعترف بخيانته الي ..

وهسا هو بحضن وحدة غيري .. ضحكته لمساته سوالف كلها وياها .

اجه السيد .. خابره نسر وجان عمو وقصي گاعدين

صار يلقنه السيد وهو يحجي بعدها طلگني ..

من سمعت صوته وكلامه مااتحملت .. گمت للغرفه ابجي واشهگ بحرگة ..

اجت شذر تهديني دفعتها .. " لاتهديني مااريد خليني اتعذب خليني اموت .. خليني اعاقب نفسي وگلبي ع كل يوم حبيته بي .. لج بسهولة حجاها لج حتى ماتلكأ ولا تردد من طلگني . عبالك هم وانزاح عنه "

بقيت ايام وليالي ابجي ومااكل رغم شذر ونسر ماقصروا وياي ابد مگابليني وگاعدين ويحيرون شيجيبولي ويطلعوني كل يوم .. بس ماگدرت انسى بسهولة ..

الى ان تمرضت..  لزمتني السخونة والنحول ودوم نايمة مااعرف شبيه ..

ماما من اجت وشافت حالي تخبلت .. وماقبلت ابقى هنا الا اروح وياها ..

اخذتني هناك وكل ضنها وضعي راح يكون احسن ..

ماتحسنت الا لمن نسر مااتحمل وانفجر بوجهي..

" گومي عاد كافي قبل جان خطيبج وعاقد عليج ومن حقج تبجين وتضوجين هسا بعد مايربطج بي شي ومااقبل ناصبتها مناحه وعزاا علمود هيج واحد گاعد بالخارج متونس وانتي موته نفسج هنا ..

اسمعي عذراء التحق وارجع اخذج ونقدم على تعيين لو اعرف تشتغلين بمختبر اهلي وماتبقين هيج نايمة.

تطلعين وتمشين وتشتغلين وتنسيه فاهمة "

سكتت ومارديت بس مضطرة اسمع كلامة ..

شذر :

نسر بعد ماعذورة راحت لهناك صار يخلص اليوم يمها ويجينا بس بالليل ..

رغم گلتله ماكو داعي بعد .. مريم واخذنا تعهد عليها بعد لويش تجي .

ابتسم ورد " اجي المرتي الوردتي . اجي اشمر هموم الدنيا كلها طول اليوم يمها ..

شذر انت بالنسبة الي مو بس وحدة احبها لو زوجة الي ..

انت جامع اذكر بي الله بصلاتي .. انت نقاء الگلبي وطهارة النفسي من ذنوبي "

وشما يطول الدرب

مرجعنة نمشي سوة

جان يحجي ويتغزل ورغم اكابر بس گلبي خلص دگ اله من زمان وماينفع بعد ..

المانعني عنه خوفي وكبريائي وشلون اتغلب عليهن ماادري !"

رجعت علاقتي بي طبيعية ..

خاله عزمتنا ع الاربعين مال بيبي ماگدرت اروح ماقبل نسر . يخاف عليه اضوج وانقهر من تصرفاتهم وياي

بس وعدني ياخذني للنجف بعد مايجي من الدوام ولو اعرف بكل مرة تصير شغله ونبطل ..

التحق نسر وبقيت اتواصل وي البنات هنا وعذراء ..

اتحسنت عذورة شوية ..

بس انصدمت بخبر ثاني غير كل حياتي .. خبر اذاني حيل وجرحني ..!!

#بقلمي_شمس_السعدي

يتبع .…

مساء الورد احبتي ❤

///// البارت ستــون /////

#قوارير_من_فضة ج2

#بقلمي_شمس_السعدي ..

‏احيانا نخفي اشياء لانستطيع البوح بها لمن حولنا ..

لكي لا نسبب لهم احراج وفي نفس الوقت لاتُجرح قلوبنا ..!!

بالماضي ..

اقصد قبل ان احمل في احشائي روحا واملا لمستقبلي ..

ماكنت اهتم ان حملت هديل او لا ..

كان عندي الاهم دنو وابد مافكرت انه بيوم احمل من نسر واولد وتكون عندنا عائلة ..

لما حملت تغيرت مفاهيم الحياة عندي .. بدأت انطي بريق امل الحياتي .. اتحديت وقاومت حتى نفسي ..

لكن لما خسرته .. حسيت بخسارة ذلك الامل .. بخسارة اجمل شي ممكن يحصل لي بهاي الدنيا ..

فوضت امري الربي ..

رغم هناك اشتياق كبير لتلك الروح الي تكونت بداخلي ذات يوم .. ولذلك النبض الي نغماته مافارقت اذني..

عذاب شوقي اليه كان قاسي .. عذابٌ صامت ..

مثل الطفل الذي يفهم .. ولكنه لا يعرف البوح ..!!

ذلك كان شوقي لطفلي الذي خسرته قبل ان يولد ..

_________________________

لما خابرت البنات مثل مامتعودة صدمتني هنا بخبر جرحني ..

" اگلج بس ماتگولين "

رديت " گولي شكو عذورة بيها شي "

ردت " لا مو عذورة .. بس هديل صارلها فترة مريضه اخذتها ماما اليوم للدكتورة وطلعت حامل "

من گالت هيج ماعرفت شنو ارد او احجي ..

بسرعة جاوبتها بتوتر :

" هاااا بالعافية .. اقصد مبروك .. يستاهل نسر "

للحظة تذكرت ابني .. ليش قبل كنت مااهتم وهسا انقهرت احس نياط قلبي تتمزق ..

معقولة احس بغيرة اتجاهها .. معقولة مشاعري بدت تتحرك وتتنفض وتدافع عن حقها ..

لكن للاسف بعد فوات الاواااان ..

اتمنيت الخير بداخلي النسر .. لان تعب هواي بحياته عسا وان الله يرزقة بولد يشيل اسمه مادام هالولد مستحيل يجي مني ..

غلقته من هنا بسرعه واتصلت بخاله ..

محتاجة احجي الاحد مشاعري متضاربة .. وداخلي يتألم ..

جاوبتني :

" هااا امي شبي صوتج ماعاجبني "

رديت :

" خالة هديل حامل !!"

ردت :

" وليش ضايجة هالشي طبيعي يعني هو اتزوجها يباوع الطولها لو يخلف منها "

رديت :

" صحيح كلامج .. واني الي گلتله تزوج ومن گالت حامل اول مرة ماضجت ابد .. ليش هسا ضجت واحس هاج عليه جرح فقدان ابني ماادري "

ردت :

" لان حسيتي بالامومة الحقيقية .. الطفل ذاك لو باقي كان غير هواي اشياء بحياتج .. واولهم مخاوفج من الدنيا ومن حولج .. "

رديت :

" خاله خابرتج تهديني لو تهيجين مواجعي "

ردت :

" مواجعج وجروحج ماتطيب اذا متخلين عليها ملح .. صح تتأذين وتتألمين بس تالي ترتاحين وتطيبين ..

اني لان احبج مااواسيج واطبطب عليج وبس ..

لازم اسمعج الحقيقه الي انتي مخليه حاجز بينج وبينها مغمضة عينج عنها حتى متشوفيها ..

كم مرة گلتلج ياامي نسر سلاحج نسر امانج محد يفيدج غيرة ..

لااني ولا اهلج ولااحد يحميج .. صح غلط بس هاي اول غلطة والولد متندم ويحاول يرجع كلشي القبل ..

لاترجعين النقطة الصفر وتدمرين كلشي بنيتيه ..

بالعكس المفروض هسا انتي تكملين من اللحظة الي وگفتي بيها ..

وتكملين الي بينتوه سوة .. هاي الفرصه الاخيرة الج

ياتكملين حياتج وتبنين مستقبلج وعائلة الج ..

يا تخسرين كلشي وترجعين للبداية وهنا مستحيل تگدرين تبنين بعد من جديد ..

لان الينهدم مستحيل يرجع بعد ...... .."

قاطعتها بسرعة ..

واني اسمع كلامها .. احس اجتني صفعة قوية صحتني احيت شي بداخلي وخلتني انطق ..

" خاله اريد ارجع اروح للدكتورة النفسية اراجع واكمل علاجي "

حسيت ابتسامه منها وفرحة :

" اي هيج امي قاومي مو الاجل احد .. ولا الاجل نسر لان هو اول وتالي عنده عائلة وهديل حتجيبله طفل ..

هالشي الاجلج لازم يكون عندج طفل يسندج ..

اعرف تحبين دنو وهي مثل بنتج ..

بس لاتنسين دنو مو بنتج الحقيقية شما تتعبين وياها وتكبريها تتسمى بنتهم وبأي وقت ياخذوها منج ..

اما طفلج راح يكون غير شكل بحياتج .. املج وسندج ومستقبلج "

سديته منها واني مقررة اغير حياتي...

مو غيرة لان حملت هديل .. وانما فعلا مثل ماگالت خاله .. لازم اكمل البديته ..

هالمرة واجب امه اتنازل الخاطر مستقبلي . عشر سنين مرت من حياتي واني اقاوم ولازم مااضيع كل ذيج السنين بلمحة بصر ..

رجع نسر من الدوام ..

مابينت اله ضايجة او فرحانه ..

رغم هو ابد مافتح هالموضوع وياي .. يعرف بيه ادري بس بقى ساكت وكأنه يحس بتأنيب الضمير ..

كنت قبل يوم غاسلة البيت ومرتبتة ..

بدأ الربيع يطل ..

والجو تغير وصار احلى ..

طلعت المنقله لبرة .. وحضرت السمج وكنت متأكدة يجي الي بسرعه ..

اعرفه يروح لهناك يسلم ويشوفهم ويتسوگ الهم وبعدها يجيني ..

يوم جمعه كـ العادة ..

والجو حلو .. طلعنا المنقله وهو يبتسم ..

" شمدريج مشتهي هيج گعدة وسمج ع الفحم "

ابتسمت :

" مو اگلك محد يعرفك بگدي "

ضحك :

" وياليت محد عرفني غيرج "

خليته يشوي السمج... ودخلت حضرت الزلاطة وتمن احمر ..

ودنو ترتب الطرشي والروبة والخضرة .. كبرت بنتي وصار عمرها عشر سنوات وتساعد امها...

كملت كلشي وگعدنا نتغدا ..

مندمج بالاكل .. حجيت بدون مقدمات ..

" نسر اريد ارجع اراجع الدكتورة النفسية الي كنت اراجع عندها "

ابتسم وباوعلي ..

" تدللين .. وهالمرة اني وياج ندخل سوة شتگولين "

ابتسمت :

" لا مو من اول جلسه خليها شوية وبعدين ادخل عادي"

رد " بس اكمل واغسل احجزلج .. اريد حياتنا ترجع واريد تنسين كلشي مرينا بي بذيج الاشهر امحيها من ذاكرتج للابد "

وفعلا ..

بديت اراجع من جديد ..

الجلسات الاولى كانت متعبه بالنسبة الي لان تذكرت بيها نسر ووحشيته الي بذاك اليوم ..

لكن بعد جلسات ثانية صرت احسن وبديت اتجاوب للعلاج وحتى نفسيتي ارتاحت .. گمت احس بحيوية اكثر واحس الضحكة ماتفارگ وجهي ..

احس الربيع طل على حياتي وحياة هنا الي بدت مشاعر جديد تدخل حياتها ..

هنا :

بعد ماظهرت برائتي ورجعت الشغلي .. والفضل للمحامي واستاذ هذال ..

قررت انقل من هذا القسم ..

لمن اجتني البشارة بالتلفون مااتحملت بسرعة رحت للدائرة ..

دخلت رافعة راسي بعد ماالبقية احالوهم للتحقيق ..

دگيت الباب ودخلت ..

شافني ابتسم ..

" هسا نورت الدائرة "

رديت :

" شكرا استاذ "

سأل:

" على شنو هالشكر ؟"

رديت:

" على كلشي وگفتك وياي طول هالاشهر وطلعتني من مشكله كبيرة .. ماانساها ابد وشگد مااشكرك مااوفيك حقك "

ابتسم :

" حقي هو اشوف ضحكتج الحلوة "

رديت :

" استاذ رجاء .. صحيح احترمك واعتبرك صديق الي بس مو معناها العلاقة تكون بينا فري ويصير تمادي "

كح وعدل گعدته ..

" بس هالكلام نابع منا ( ويأشر على صدرة ) هنا شوكت تحسين انه اني اكن الج مشاعر مختلفه "

رديت هالمرة بحزم :

" هالمشاعر خليها تكون صداقه افضل .. انت بمثابة مدير الي هنا لاغير "

سأل :" وبعيد عن هنا شتحسين ؟"

رديت " احس بعدم ثقه خلينا نكون صريحين ولو لا المكان ولا الوقت مناسب الهذا الكلام .. بس لازم اكون صريحة... المشاعر والاحساس الي خليتني احسهم ببداية تعارفنا هي الكفيلة انه تبعدني عنك .. لاتنسى اني مريت بتجربة فاشلة ومستحيل اكررها "

رد " بس الي صار اعتذرت عنه وانت سامحتيني "

رديت " صح سامحتك بس كـ مدير الي مو غير شي "

حسيته ضاج وصار يبرر ويحجي .. قاطعته بكلامي

" استاذ اني قررت انقل منا .. واذا مقبلت هالمرة .. التجأ الاي احد غيرك ينقـ...... ."

قاطعني : " بعد الصار مستحيل اخليج هنا وين متردين مستعد اساعدج "

تشكرت منه وطلعت ..

حسيت الكل يباوعلي بنظرة مستفزة...

وشنو غايتهم بهاي النظرة مااعرف ..

لان اشتكيت .. او لان طلعت برائتي وخسروا... او لان استاذ هذال ساعدني ؟؟"

بديت اشتغل بأوراق النقل ..

حجيت وي نسر .. ساعدني بالموضوع رغم صرنا مانشوفة هواي ..

يلة يجي الصبح يتسوگ للبيت ويشوف ماما وعذورة ويروح ويروح البيت بيداء هم ..

وبهاي الفترة اني بالدوام .

مرات نتخابر ..

ومرات يجمعنا ببيت عمة خديجة كلنا نتغدا سوة ..

بس ماما ماتگدر تترك هديل حملها صعب ومتعبها حيل

وجان مفكر يدزها الاهلها ترتاح هناك ..

بس الدكتورة منعتها من الطريق والسيارة ..

اما اسراء فأحنة بالبيت مانشوفها هواي .. من الدوام للغرفه ..

كم مرة اعتذرت من نسر رفض اعتذارها وتأزمت نفسيتها اكثر..

وگالها المفروض تعتذرين الشذر بالاول لان تهمتيها باطل بس كبريائها اكيد يمنعها من التنازل ..

بعد ماانقلت الغير دائرة ..

حسيت بفراغ كبير وافتقاد الصوته ..

يمكن .. هالشي احسن الي واله .. هيج اتأكد من مشاعري وارتاح ..

ماردت اكرر تجربة ليث واتندم وخاصه اني مااعرف شي ..

بديت الدوام ..

وياي بنات هواي هالشي ريحيني .. تعاملهم حلو ورحبوا بيه ..

اكو بيهم بنات عقود يدامون ..

من سمعوا جنت بقسم هذال .. بقوا يتهامسون ..

حجت وحدة منهم ..

" عيني الله حابج وخلص من ذاك المكان .. لان هذا هذال معروف اي وحدة تدخل يمة لازم يجرجرها .. كلها تعرفة نسونجي .. "

ردت الثانية :

" هو متزوج اگلجن لو لا اشو مااصدگ هذا عمرة ومكانته ومامتزوج "

جاوبتها وحدة :

" لا منفصل .. زوجته رفعت عليه دعوة وتطلگت ماقابل يطلگها "

هن يحجن واني مصدومة .. تذكرت اول مااجيت يمهم شسوة بيه وشگد حاول ومانطيتة مجال .. معقول هيج سمعتة امام الكل واني الغبية تحركت مشاعري اتجاهة ..

ردت وحدة " عيني ترى الرجال اذا شاف وحدة محترمة نفسها مايجبرها على شي ماتريدة .. ذني اليحجن عليه تلگيهن من غمزة راحن يركضن اله .. بعدين متشوفين بطل يعين مراة يمة لان جرب اشكال انواع وتلگيه مل ولعبت روحة "

كنت ساكته بس استمع .. لااگدر اگول زين وحباب ولااگدر اگول لا مو زين .. اكتفيت بالسكوت احسن

بس گمت كلما يخابر اسوي صامت .. يمكن ردت اكتم مشاعري وياه ..

تعرفت على وحدة من البنات يمي اسمها اسيل حبابه حيل البنية .. هاي الي ماانطت بهذال ..

صح خليت علاقتي بيها محدودة بس هي خجلتني بكرمها ..

كل يوم تجيب ريوگ وتعزمني وتساعدني بالشغل .. شجن وصداقتي وياها خلتني مااثق بأي صديقه بعد ..

كملت شغل وانتهى الدوام ..

اجت رسالة .. " اريد اشوفج ليش ماتجاوبيني "

رديت " استاذ رجاء لاتحرجني "

رد " اني بباب الدائرة اذا مااجيتي ادخل "

شهگت " عزااا راح يفضحني والله فوگاها كلها تعرفه هنا "

كتبت " لا جايه لاتدخل ابد "

طلعت صار مشتاق گبالي بقيت اباوع من الجهتين ماكو صعدت بسرعة ورحت ماردت اروح وياه ..

خابر ..

فصلته ..

رجع خابر ..

نطيته رفض ..

ومايمل ابد الى ان رديت ..

اول مارديت عاط بيه " لج شنو انتي تلعبين عليه .. انتظر وواگف بعيد حتى ماسببلج احراج تالي تصعدين وي السايق وتعوفيني .. ليش شنو سويتلج خلاج تتهربين مني .. حتى اتصالاتي ماتردين عليهن شنو التغير فهميني .. شنو الخلاج تنفرين مني .. لو انتن كلجن هيج من ننطيجن الحب وندللجن تتهربن ولو واحد ذلجن تركضن وراه ..

انعل ابو الحب الخلاني اذل نفسي الج والشيب مالي راسي ..

سداه بوجهي بقيت صافنه .. مصدومة من كلامه وعصبيته ..

" معقولة يحبني ؟؟ لو لان مانطيته مجال هيج تنرفز "

رجعت للبيت تعبانه... تغديت واخذت ولدي ونمت ..

ناموا اثنينهم بس اني طار النوم من عيني ..

المن احجي او افضفض ..

احس اكو شي يتحرك بداخلي اتجاهة... ماحسيت بهيج اهتمام او احد يتعصب علمودي ..

ليث طول عمري اني اهتم بي واحبه ويقابلني ببرود وحب مصطنع "

من كثر التفكير .. گمت نظفت البيت .. وغسلته ..

نزلت غراض الكاونتر كلها ونظفته ورجعت رتبتهن ..

طلعت غسلت الطارمة ورشيت الحديقه .. اريد شي يلهيني .. طلعت عذورة ..

شافتني گاعدة ع الثيل المبلل ..

اجت يمي ..

" اليوم شكو مسوية عمل شعبي "

اتنهدت ..

" گولي اريد اغسل دماغي شوية من افكار مدوختني "

ردت :

" لو الشغل ينسيج جان نساني قبلج .. السوتيه اني كل يوم اسويه واكثر ومااگدر اغسل دماغي "

رديت عليها " تنسين .. بس تداومين تنسين .. الشغل والمراجعين ماراح تلحگين تفكيرين . واكيد تصير عندج صداقات وتطلعن سوة وتمشن .. "

اتنهدت " الله يسمعج منج "

سألتها " هنودة هم تخابرج؟"

ردت " هنودة مثل اخوها من طلعوا للخارج نسوا اهلهم واحبابهم .. تدرين اني غلقت موبايلي من ذاك اليوم بس من اخابر افتحة .. لگيت شگد داز رسائل .

منهن يگلي ..

" انتي جبرتيني هيج اسوي .. اني طموحي اطلع للخارج واكون مستقبلي وانتي جنتي رافضة وعنادج وصلنا الهيج .. وحتى من طلگت اخوج جبرني مو اني"

تسائلت " وانتي شتگولين كلامه صادق لو لا "

ضحكت بأستهزاء " حتى لو صادق الي سواه جرحني هذا مايتسمى حب اليحب مايكون اناني ويفضل طموحاته على حبه .. تدرين اكو شغله محد يدري بيها للان .. من راد يروح التركيا وماعندهم .. شلت ذهبي ونطيته اله "

شهگت " قصدج النيشان لو ذهبج "

ردت " اثنينهن .. النيشان الجابوه الي .. وذهبي الخاص وتعرفين اني ماالبس ذهب وضامتهن وهدايا ماما ونسر الي كلهن شلتهن ونطيتهن .. گلت بس يوكف ع رجله ويرجع .. يعوضني اكثر "

سألتها " وهو شلون اخذ "

ردت " ماقبل ياخذ بس گلتله ماكو فرق بينا "

رديت بعصبيه " بس المهم اخذهن وطلع بيهن وتزوج بيهن وهسا مرتاح ومتزوج وانت موته نفسج علموده "

مسحت دموعها " ماينفع اللوم بعد .. مثل مافضل طموحة على حبنا .. اني هم راح افضل كبريائي وحياتي عليه .. حتى السيم كارت راح اكسره واشتري غيره حتى مايخابر لو يدز رسائل ندم ويحاول يأثر عليه "

من شفت كلامها وهمومها .. استحيت احجي بعد واشاركها تقلبات قلبي وعقلي ..

شتگول عليه .. هي طالعه من تجربة فاشله واني اشاركها حب جديد دخل الحياتي بدون مقدمات ..

مر كم يوم وهذال ابد مااتصل بعد ..

اتفقنا احنة والبنات نطلع نتريگ سوة .. طلعنا احنة ثلاثة بسيارة بنية ويانا .. اني واسيل وهدى ورحيق ..

دخلنا طلبنا ريوگ .. بقينا نحجي ومنتظرين ..

اجتني رسالة ..

فتحتها " تذكري الريوگ بالمطعم الرحناله اني وياج .. صوت فيروز وطعم الاكل غير شكل وياي موووو؟"

بقيت اتلفت منا ومنا .. معقولة شافني بس شلون ؟

تريگنا وكملنا ورجعنا للدائرة ..

طلعت الظهر...

وعيني تتلفت مااعرف ليش احسه مراقبني ..

بعدها ضحكت على نفسي .. معقولة ماعندة شغل وعمل ويراقبني .. صرت اتخيل اشياء ماصايرة ؟

وصلت البيتنا نزلت ..

صار گبالي بسيارته ولابس نضارة حتى ماينشاف ..

دخلت بسرعه مرعوبه ..

عزاااا هذا شبي اكيد لحگني لهنا ..

ثاني يوم من الصبح اجتني رسالة ..

" لاترحين وي السايق اني اجي اخذج من راس الشارع عندي حجي وياج وبعدها مااضوجج بس اسمعيني "

تخللت شفاهي ابتسامه هادئة ..

گمت فتحت الكنتور .. بقيت اتمعن بملابسي وحايرة شألبس ..

حسيت نفسي مراهقة بأول موعد الها ..

وعيت على حالي ..

هاي شجاي اسوي اني !!

لبست فستان وفوگاه سترة .. ورتبت وجهي لفيت شالي وطلعت ..

خابرت مشتاق گلتله لاتجيني الصبح صديقتي تمرلي تعال الظهر بس ..

طلعت والهوى جان عالي ..

يطير بفستاني .. اعدل بي من الهوى مقابيلي ..

صار گبالي بسيارتة...

فتح الشباك .. ونزع نضارته .. رمقني بنضرة ساحرة هزت احاسيسي المكتومة ..

يمكن الكاريزما الها دور ايضا بهذا الانجذاب ..

فتحت الباب صعدت. .

سبقني " صباح الخير "

رديت عادي " صباح النور .. ماحبيت هالتصرف ابد "

ابتسمت " لو ماحبتيه ماكنتي هسا يمي اتمعن بيج واشم عطرج الساحرني "

باوعتله بعصبيه " يعني طلع السبب بيه لان ردت اخلص من الحاحك واحراجك المستمر الي "

رد " لا بالعكس لاتضوجين .. حبيت اتشاقه وياج .. بعدين تمنعج عني وصدج الي هم السبب بألحاحي "

رديت " وشتريد هذال .. كلما تكلي تعاي اجيك ترى انت لاعبالك اني من التعرفهم .. سويتلي فضل وشكرتك عليه حتى اتعاب المحامي نطيتك ياهم وانت رفضت .."

ضحك " ملاحظة گلتي هذال بدون استاذ "

استحيت وخجلت ودنگت نسيت حتى الكلام الردت احجيه ..

طلعنا گلتله مااگدر اتأخر الك نص ساعه ..

گعدنا بمكان قريب على مكان دوامي .. وكل شوية اتلفت خاف وحدة من البنات تشوفني ..

سألني " شتتريگين ؟"

رديت " مااريد اي شي بس گلي شنو ردت مني "

رد " استقري عاد شبيج خايفه "

رديت " مو خايفه بس مااريد احد يشوفني وياك .. ماشاء الله كلها تعرفك وتعرف ماضيك "

ابتسم " تتزوجيني !!"

صفنت بوجهة .. " يعني رجعت النفس الحجي اول ماشفتني .. عبالي عرفت الانسانه المقابيلك شنووو؟

مع الاسف .. اصلا بعد السمعته عنك مااستغرب... ..

قاطعني " قصدي اجي الاهلج واخطبج وين راح بالج .. وبعدين السمعتيه من الناس لو البنات .. فهذا قبل لااعرفج وحتى بعد ماانفصلت من زوجتي .. وكلهم اجوني برضاتهم وبعقد مومن يعني مو بالحرام .. يعني ماكنت خاين ابد .. "

صفنت بوجهة " وتفتخر بهاي الاشياء،؟؟ انت شلون تريدني ارتبط بيك واني اصلا مااعرف شي عنك ولااعرف ليش انفصلت عن زوجتك .. هذال انت غامض"

رد " انتي ماناطيتني مجال اتعرف عليج وتتعرفين عليه .. دومج خايفه ومرتبكة .. ترديني اصيرلج كتاب مفتوح ماعندي مانع بس ع الاقل انطيني فرصه انطيني اشارة تريحني .. مو اني الغامض انتي الماتعرفين تقررين .. اذا كانت تجربتج السابقه فاشلة مو معناها تغلقين على نفسج وگلبج "

اتنهدت " خلينا نمشي راح اتأخر ع الدوام "

رد " بشرط توعديني من اخابر ماتنطيه رفض لو صامت اسمعيني .. واذا تردين اجي اخطبج من باجر ويصير كلشي رسمي .. "

سكتت ومارديت ..

گمت اجة وراي ..

التفتت عليه " رايحة وحدي احسن "

هز راسه " اتصل عليج بالليل ونحجي "

رحت للدوام واني بس افكر بي وبكلامه .. محتاجة احد احجيله .. ماكو غير شذر صح ماعندها تجربة بالحب بس اكيد راح تفهمني او مجرد افضفض ارتاح ..

مارجعت للبيت الظهر.. تغديت وكملت ..

خابرتها ..

" بس لا نايمة ؟"

ردت " لا وين عندي خياط "

رديت " نسر يمج لو لا ؟"

ردت " لانايم هو ودنو بالاستقبال احجي شبيج "

رديت " تتذكرين هذال الي حجيتلج عنه . هذا المدير "

ردت " اي اعرفه شبيج بس لا سوالج شي ؟؟"

رديت " لايمعودة شبيج دوم تفكيرج بالاشياء السيئة "

حجيتلها كلشي ..

جان ردها انه اذا يحبج خلي يخطبج وبفترة الخطوبة تعرفوا على بعض .. انت ام وعندج اولاد... لاتسوين شي خطأ يجيب الكلام الهم والاخوج ..

بفترة الخطوبة اذا شفتي نفسج مقتنعه بي كملي وياه واذا لا انهي كلشي وريحي نفسج ..

كلامها منطقي وصحيح .. الناس عليها الظاهر وخاف يشوفني احد وياه وتالي يطلعون الف حجايه عليه .. بحجة مطلقة وتطلع وي واحد هم مطلق وهم جان مديرها ومصارلي سنتين من منفصلة ...

قررت لليل احجي وياه وافهمة اذا متمسك بيه يجي يخطبني ونتعرف على بعض بفترة الخطوبة ..

شذر :

جنت اخيط خابرتني هنا .. حجينا شوية بعدها سديته

شفت حركة وراي التفتت ..

توقعت سمع كلامي وي هنا...

خفت ..

قابلني بأبتسامة " هااا ياحلو اليوم عندنا موعد للدكتورة شنو نسيتي "

ابتسمت بتوتر " هااا اي هسا ابدل بسرعه ماعندي شي"

رد " خلينا ندز دنو يم عماتها .. وبعدها نروح "

هزيت راسي " اي اني هم مااريدها تروح ويانا هناك .. بس خلينا ندزها البيداء يم فروحة وحتى تدرسها عمتها هم "

بدلت وطلعنا ..

اخذنا دنو يم عمتها ورحنا للدكتورة... هالمرة نسر قرر يدخل وياي ..

بالاول دخلت .. حجينا شوية وبعدها گلتلها زوجي يريد يدخل وياي ..

دخل نسر وهنا طلبت الدكتورة يحجيلها عن حياته ..

طلبت منه يعتبرني مموجودة اصلا ..

وفعلا كان اجرء مني بالكلام .. بدأ يحجيلها عن كلشي بحياته شكه عصبيته الغدر التعرضله الى ان وصل الي حبيت وصفه الي وكلامه عني ..

حسيت اول مرة نفتح قلوبنا البعض .. الدكتورة تسألني عن مشاعري اتجاهة ..

باوعتله " رغم لسا مجروحة منه بس بداخلي اشتاق اله لو غاب افكر بي اذا يبعد .. والاهم افرح اذا طل عليه من الباب "

كان يباوعلي والابتسامة ماليه وجهه ..

طلعنا من الدكتورة ..

ماقبل نرجع للبيت .. اخذني نفتر ..

وبعدها رحنا المطعم ..

گعدنا برة بحديقه المطعم وعلى نهر دجلة ..

الاضوية ساطعه والجو بي نسمة هوا لاباردة ولا دافيه حلو ومنعش ..

همس " شتاكلين گلبي ؟"

باوعتله " تدري هسا شنو مشتهية "

سأل " شنو ؟"

رديت " سمج حامض ومشوي ع الفحم "

ضحك " اويلي يابة بس لا حامل ؟"

ضحكت " حامل شنو؟؟ "

تذكرت من گالولي حامل شلون ضجت .. بعدها تعلقت بي حيل ..

سأل " ليش اختفت ابتسامتج ؟"

رديت " ماكو شي باوعتله وكملت .. صدگ نسر ليش لسا ماگلتلي هديل حامل ؟"

كح وصار يفرك بوجهة " خفت عليج تضوجين "

رديت " وليش اضوج هذا حقك .. ليش انت على شنو تزوجتها غير تجيبلك اطفال "

رد " صحيح بس خفت تتذكرين طفلنا وتضوجين "

رديت " اول وتالي اسمع من البنات .. وبعدين مو بعيدة على الله يجي يوم ويرزقنا "

ابتسم " شنو شگلتي ؟ عيدي عيدي "

رديت بأبتسامة " شبيك مستغرب "

رد " اول مرة اسمعج تحجيها .. معقولة هاي شذر التحجي لو متوهم "

ضحكت " ياااا شبيك فضحتنا .. اي اني شذر .. واريد طفل وكون ولد حتى يكون اخو الدنو .. واذا هديل جابت ولد يصيرون اثنين اخوة وهي المدللة "

باوعلي واتنهد " انت شنو ؟"

رديت " شنو ؟"

رد " شنو هالگلب الشايلته لج غيرج هسا ميتات من القهر والغيرة وانتي تگولين هيج ."

رديت " وليش اغار اني احب الاطفال مستحيل احقد على طفل "

سحب ايدي باوع منا ومنا باسها ..

ضحكت " منا عالم عيب "

بعدين گام شوية ورجع..

جابولنا مقبلات وطرشي وزيتون .. بقينا ناكل .

شوية واجت سمجة شكبرها ومحمصه ومنفشة وريحتها تموت ..

شفتها ضحكت " سويتها صدگ وطلبت سمج "

رد " حبيبتي تطلب سمج ومااجيب "

رديت " تتحمل شأسويلك انت العلمتني ع السمج اذا كل اجازة تشويلي ع الفحم لمن ادمنته بسببك "

اكلنا وشبعنا وزاد منها هواي صرت اكلها بدون خبز ..

بعدها گلتله هسا كون موطا باردة بعد السمج ..

اخذنا اكلنا موطا والجو بي برودة بعده بس مااهتميت ..

بالطريق گلتله الجو هسا مال زيارة يخبل ..

لاف السيارة ..

ولا يهمج.. هسا نطلع وتلگينا بكربلاء نص الليل ..

رديت " لا نسر تحجي صدگ وين هسا حتى ماتسوه"

رد " لا تسوة والله نزور ونكمل ونبات بالفندق بعدها ضرب ع الستيرن .. اوووه خرررب ماعندنا عقد زواج او جناسي بيها اسمائنا... "

رديت " خليها غير مرة "

رد " باجر نروح نعقد واكمل الجناسي واول ماالتحق وارجع نروح الكربلاء مشتهي الزيارة حيل "

كنت مترددة بالاول ع سالفه العقد بس بعد السوتة مريم صار لازم نعقد محكمة ويكون زواجنا رسمي..

ثاني يوم رحنا كمل التحليل والعقد بنفس اليوم ..

مهري خلاه عشرة بعشرة... رغم طلبت يكون عمرة وردت اسويها نيابة عن عمة ..

من طلعنا سألته " احنة مو متفقين يكون مهري عمرة"

رد " العمرة تجيج مالها علاقه بالمهر .. واذا على عمتي فلا تخافين اني مسويلها عمرة بالنيابة وان شاء الله مقدملها ع الحج بالنيابة .."

فرحت حيل من سمعت عمة تستاهل وشگد جانت تتمنى تروح البيت الله ..

اباوعله ومستغربه.. حبه العمته ووفائه الها حتى بعد مماتت .. هسا عرفت ليش سجلت املاكها بأسم نسر لان تعرف بي ماينساها ولاينسى البيوت الكافلتهم "

طلعت فرحانة بالعقد مااعرف ليش .. يمكن لان هالمرة برضاتي مو مثل عقد السيد .. كان شكلي ومامقتنعه لمن عقد وبأتفاق ..

بقت بس الجناسي اجلهم للاجازة الثانية يكملهم ..

من راح للدوام ورجع ..

التهى بهديل... حملها متعبها والطفل ضعيف والدكتورة محذرتها ماتتحرك ابد ..

طلبت ياخذها الاهلها هاي الفترة ترتاح هناك .. رغم الطريق مو زين عليها بس ماگدر يرفضلها طلب لان مريضة ..

اخذها وصلها بسوعة ورجع بنفس اليوم ..

من رجع خابرني ..

" جهزي نفسج واخذي ملابس وياج "

سألت " وين نروح اخر مرة گلتلي هالكلام من اجينا البيت عمة وجنت صابغ البيت ومرتبه "

ضحك " لاتذكريني بذاك اليوم جنت مخطط وراسمله احلام شكبرها وتالي تفشلت "

ضحكت بصوت " لا صدگ وين رايحين "

رد " الكربلاء "

رديت " بس البنات وخاله هم يردون يرحون "

رد " هسا وين يرحون هنا عندها دوام وعذراء راح تداوم والجهال دوام كلهم عود للعطلة اخذهم نجف وكربلاء "

ضحكت " اتذكر كم مرة گلت هالكلام "

ضحك " شسوي اذا الوضع اعوج كلما ننوي نروح تطلعلنا شغله "

سديت الموبايل منه...

دخلت سبحت جهزت نفسي واخذت ملابس ..

خابرت خاله وگلتلها ..

صارت توصيني كالعادة.. ساعه تهدأ وساعه تتعصب وترزلني واني اسمع منها واضحك "

دخلت للغرفه احضرلة ملابس .. وهاي اول مرة ادخل للغرفه متربة حيل ..

طلعت ملابس اله ..

صارت عيني ع ملابس النوم .. شفت واحد طويل لونة ماروني غامق .. واكو واحد اسود هم نفسه ..

خليتهم على جسمي واباوع المراية خجلت من نفسي شلون راح البسهم واتجرأ .. خاف هم مااسيطر ع نفسي لو يصير شي ..

طلعتهم خليتهم بالجنطة..

اجة بوجهة للحمام سبح ونطيته ملابسه بدل وطلع

شافتنا دنو سألت " ماما وين رايحين هم تعوفوني مووو؟"

باوعت النسر جاوبها " حبيبتي هالمرة ماناخذج المرة الثانية ناخذج بالعطلة ..

حسيتها ضاجت وسكتت بس انهضمت ودمعتها بطارف عينها ..

حضنتها وبقيت اهدي بيها .. " ماما والله لو ماعندج دوام كان اخذتج واحنة باجر راجعين "

اقتنعت بالگوة... طلعنا البيت اهله ..

نزل هو دخلها ووصى البنات عليها ..

وبعدها اجة صعد بالسيارة دگ موبايله .. باوعت هديل بسرعة درت وجهي للشباك..

كنت لابسه عبايه اسلاميه ولافه حجابي .. ولابسه نضارات عن الشمس ماردت احرجه ومايرد ..

مرة مرتين گلتله " جاوبها شبيك نسر خاف شو شبيها "

صوت الموبايل عالي ..

" الو حبيبي شلونك بشر وصلت ؟"

رد " اي وصلت انت شلونج "

ردت " صرت زينة من سمعت صوتك يعمري "

رد " ديري بالج على نفسج "

ردت " لاتگطع بيه صوتك هو علاجي "

بقيت مستغربة من كلامها شلون تحجي وياه معقولة هيج تحبه لو مجرد كلام ؟"

باوعلي " شبيج"

رديت " مابيه شلونها هي "

رد " زينة كون تستقر وتگعد وماتخلصها تفرفر الاخواتها وتأذي نفسها "

سكتت ماحجيت ..

وصلنا الكربلاء بقينا السيارة بالگراج ومشينا .. وي دخلتنا اذن المغرب ..

واني امشي حسيت بقشعريرة من شفت الامام العباس مقابيلي ..

نزلت دموعي لااراديا .. صرت ادعي الله ينسيني كل الآم ويريح بالي ..

همس " حبيبتي خلينا بالاول نحجز بالفندق ونخلي اغراضنا وننزل نصلي ونزور .."

هزيت راسي " بكيفك "

كان اكو فندق مقابل الامام اسمه قمر بني هاشم

نطاه الجناسي ..

صعدنا للغرفه ..

غسلنا وتوضينا .. نزعت العباية الاسلامية... لبست ملف الصلاة . ونزلنا ..

باوعلي صفن " ليش لبستي هذا ؟"

رديت " ليش بي شي ؟"

رد " لا مابي بس مضوية بي شلون اليوم بيه ماادري "

ضحكت " ليش ؟"

رد " قابل شسوي اغمض عيون العالم عنج لو اتعارك فهميني "

رديت " كافي مو متوضي "

رد" قابل شمسوي بايس حاضن اشو اخو واخته عايشين "

ضحكت وسكتت عنه ..

دخلنا زرنا واحس الدموع ماتقبل توگف .. بقيت اناجي رب العالمين وابجي .. دعيت الي والاخواتي بالستر وللبنات هنا وعذورة خاصه ربي يريح بالها وينسيها .

كلمت صليت وطلعت لگيته منتظرني برة ..

طلعنا للامام الحسين هم زرنا وصلينا وطلعنا..

من طلعنا نطاني ايده ..

باوعتله ابتسم .. مديت ايدي اله عصرها وابتسم ..

رحنا للمطعم تعشينا وكملنا . بعدها افترينا اخذنا هدايا للجهال والبنات ..

رحنا گعدنا ع الشط يم مقام الامام الحجة ( عج )

اكلنا موطا ورجعنا للفندق ..

من وصلنا نطاني المفتاح .. اصعدي واني رايح اجيب شغلات لليل ومي واجي ..

صعدت قبله سبحت ومشطت ..

طلعت الثوب الماروني لبسته .. طبعا مكياج ابد مااخلي ولااعرف اصلا اخلي ..

رشيت عطر .. جان الجو حلو بشهر الرابع ..

شغلت التبريد بردت الغرفه ..

اندگت الباب طفيت الضوة وفتحتها ..

دخل :

" ليش مطفية الضوة "

رديت :

" هيج احسن هاي ضوة الامام علينا تطل شنسوي بالضوة .."

التفت شافني ..

" تعاي خليني اشوف شلابسه .. راد يفتح الضوة ترجيته

" لا حباب لتشغله استحي "

ضحك : " زين اتلمس "

رديت : " هااا مو هسا "

رد " وشترديني اشتم العطر بي .. مادام نطيتيني اشارة بعد مو بكيفج اسبح واطلع واعلمج شلون "

سبح وطلع ..

اني رتبت المي والعصير بالثلاجة. .

ورحت تمددت ع الجرباية..

كمل واجة ..

" تشربين عصير تاكلين شي ؟"

هزيت راسي " لا شبعانه "

رد " بس اني جوعان "

گعد يمي صرت اقرأ ايات بگلبي وغمضت ..

هالمرة لازم اقاوم لازم انسى وافتح صفحة جديدة بحياتي .. لازم اتحدى نفسي قبل الماضي ..

ماانكر اقشعر بدني .. بس وجوده وهمساته وهو يهديني يبعث الطمأنينة الداخلي ..

اتقرب مني بهدوء وامتلك بيومها جسمي وقلبي وكل حواسي ..

بيومها حسيت بالامان بدل الخوف .. الحب بدل الكره والاشمئزاز..

اما هو فكان بعالم ثاني .. بكل تنهيدة مني يبعث رسالة حب وشغف عبر لمساته وحركاته ..

واااخر شي ختمها بكلمة .. افيييييش هسا ملكت الدنيا ومابيها ..!!

دعيني اغوص في أعماقك

دعيني أريكي كيف يكون الجنون

دعيني ولا تسألي عن ما كان وما سوف يكون ..!!

#بقلمي_شمس_السعدي

يتبع...... .

مساء العسل احبتي ..

هدية الاربعة مليون مشاهدة .. ❤❤

///// البارت احدى وستــون /////

#قوارير_من_فضة ج2

#بقلمي_شمس_السعدي ..

قبلك لم اكن اعرف للحب معنى او طريق ..

وعرفتك فأصبحت شمسي التى لا تغيب ..

فتحت عيني اذان الفجر يأذن .. الضوة خافت يادوب ملامحة مبينة ..

ابتسمت .. وومصدگة حالي . اني بحضنة والبارحة كنت عايشة وياه احلى اللحضات وبرغبتي من غير خوف او توتر من غير ما اذكر الماضي ..

معقولة هاي اني شذر !!

قربت نفس اله وطبعت قبلاتي على خده ..

همس ..

مايصير تنزلين شوية ..

ضحكت شنو گعدت ..

اي بس مااريد اگعد اخاف يكون حلم واضوج ..

گرصته فز ..

خرررب ليش صحيتيني مو اكو ملاك يبوس بيه جان ..

بقى يباوع بعيوني .. همس " صباح الخير يعروسة "

ضحكت " ياعروسة صار شگد متزوجين "

اتنهد " شسوي غير حظي بعد سنين من زواجي يله اليوم اكتمل "

گمت سحبني .. " وين رايحة ؟"

رديت" اسبح واصلي الاذان اذن "

رد " بس بعدني ماشبعان والله اطالب بتعويض عن كل ذيج السنين "

ضحكت " الايام هواي جايه "

رد " تدرين بس ارجع اقدم نقل مااتحمل اغيب اسبوع كامل بعد "

ابتسمت ورحت سبحت .. طلعت فاتح الضوة خجلت ..

بسرعه بدلت وگمت اصلي ..

هو جان فاتح باب البلكون يشرب جكاير ..

شافني دخل وسد الباب..

راح سبح واجة يصلي ..

كملت رجعت لفراشي نمت .. رجع يمي حضني وكمل نومته ..

همس قبل لينام " باجر نروح للنجف "

ابتسمت " واخيرا راح اروح ازور عمة "

گعدنا الصبح رتبت الغرفه ولميت غراضنا بالجنطة وطلعنا ..

" خلينا نتريگ"

رديت " خليها بالطريق اشو هسا مااشتهي بعدني "

طلعنا للنجف ..

بالطريق نزلنا تريگنا ..

بعدنا جاي ناكل .. حسيت موبايلي يهتز ..

باوعلي " شبيج ؟"

رديت " نسيت موبايلي هزاز "

رد " واني اصلا غالقه "

باوعت هنا ..

رديت " الو هنا "

ردت " وين انتو .. نسر وينه ليش نتصل على موبايله مغلق "

رديت " هذا ترديه "

ردت بصوت متوتر " اي بسرعة "

حجت وياها انخطف لونه وتغيرت ملامحه .. گام بسرعة واشرلي…  اگوم ..

گمت راح يتحاسب ورجع ..

" شكو غير تفهمني "

رد " اسراء منتحرة "

شهگت " يارب سترك "

صعدنا بسرعة ورجعنا البغداد .. الطريق صار شطوله

وهو يمشي سريع كل شوية اغمض عيني واگول راح نندعم ..

ماصدگت وصلنا…

رحنا للمستشفى هناك خالة وبيداء وعمهم ..

جان نسر حالته حاله .. وجهة صار احمر وخايف

بسرعة سألهم " شلونها هسا ؟"

ردت خاله وهي تبجي " بنتي الا شوية رايحة مني .. تدري بيها كلشي ولا انت بقيت تضغط عليها بعنادك لين ماتعقدت ورادت تموت "

دخل بسرعه الها ..

عيونها ذبلانة من زمان ماشايفتها .. وضعفانه حيل

بيداء تگول صارلها كم يوم لاتاكل ولاتشرب وحابسة نفسها بالغرفه حتى دوام ماتداوم ..

معقولة هيج تسوي بنفسها لان اخوها مايحجي وياها شگد مرت عليه ايام سود بس مافكرت بيوم اسوي هيج ..

باوعلهم " وين الدكتور شگال "

رد عمهم " من الليل خلاها تحت المراقبه لان نبضها ضعيف والله ستر ماسوالنا سين وجيم .. گلتلة ماخذة دوة بالغلط اصلا هو ماصدگني بس سايرني "

اباوع النسر يتلمس بوجهها ويبوس براسها ..

حب نسر الاخواته يفوق الحدود ..

حتى التخطأ صح يقسى عليها بس مايتحمل تتأذى لو يصير بيها شي ..

اتمنيت عندي اخ هيج مثله يكون الي سند ..

فتحت عيونها وهو يحجي وياها .. شافته ابتسمت ..

گام يحجي عليها " ليش هيج تسوين هاي عود انتي العاقلة يالاستاذة هيج تسوين بنفسج شلون تكونين قدوة الطلابج وانتي ضعيفه "

ماتحجي بس دموعها تنزل .. اول مرة اشوفها تبجي ..

اخر شي اخذها الحضنه وحضنها شهگت بحضنة وتبجي

منظرهم يبجي فعلا .. خاله وبيداء واگفات ويبجن ..

اشرلي اجي ..

شافتني دنگت .. " شذر سامحيني .. شگد تمنيت الموت بس ماردت اموت واني شايلة ذنبج .. نسر كلشي بالنسبة الي والصار اعتبريه غيرة او اي شي "

سكتت عنها وماحجيت بس هزيت راسي .. صح مقهورة عليها واتمنيت ترجع علاقتهم هي ونسر بس الصارلي صعب ينمحي بكلمة اعتذار ..

طعنتني بشرفي وحطمت حياتي .. ووصلت للموت بسببها .. بس مع ذلك مااحقد عليها ..

راح نسر للدكتور يشوفه هو وعمة ..

خالة وبيداء يمها يحجن وياها بس هي كلما ارفع راسي اشوفها تباوعلي ومن انتبه عليها تدور وجهها..

اجه جابلها كرسي كعدها بي ..

وصلنا للسيارة صعدها وبصفها بيداء واني بصف بيداء گعدت وخاله يم نسر ..

وصلنا البيتهم نزلن ..

باوعلي ماتنزلين ؟

هزيت راسي " لا مو اني حالفه ماادخل هالبيت "

همس " ادري حبيبتي يس مااگدر اتركها واوصلج وارجع ابقي بين مااطمأن عليها ونروح سوة "

نزلت ماردت اخليه محتار ..

دخلت وراهم ..

هم دخلوا الغرفه خاله اني بقيت بالمطبخ. 

اجت دنو تركض بوستني ..

بعدها اجو هنا وعذورة مشايفتها صار شگد.

بوستها ..

" شلونج عذور "

ابتسمت " لوني احمر يول احلى منج "

ابتسمت " مادام بديتي تحششين صرتي زينة "

ردت هنا " ليش هنا واگفه ادخلي "

باوعت للبيت اخر مرة طلعت منه مقهورة وسابحة بدمي ..

رديت لا هنا خليني بس يخلص نسر نروح ..

طلع نسر من الغرفة ..

لتنطنها شي ثگيل بعدها معدتها متتحمل..

باوعت عذراء الي " والله عيارة فوگ ماغلطانه تنتحر حتى ترجع نسر الها .. من زمان گالها روحي اعتذري من شذر واسامحج ماقبلت "

خزرتها واشرلها النسر ..

تقرب مني " تبقين هنا يم البنات لو نروح "

رديت " اذا تريد ابقى وخلي مشتاق يدزني للبيت تعرف اني دخلت لهنا علمودك "

باوعلي بعتب " افة عليج اني علمودج شفتج تضحكين وتسولفين وي البنات "

رديت " لا خلينا نرجع .. " اشرت الدنو جابت جنطتها واجت ..

سلمت ع البنات وخاله وطلعت ..

رجعنا بالطريق گال " خلي ناخذ غدا ماتلحگين تسوين"

اخذ غدا وخبز ورجعنا ..

وصلت البيت بسرعة نزعت العبايه والشال…

حضرنا الغدا اني ودنو .. تغدينا وكملنا رغم مااكل مبين ضايج على اسراء  ..

همس " خلينا نروح الغرفتنا بعد شكو "

رديت " الغرفه يحتاجلها تنظيف "

رد " زين خلي الغرفه الثانية تنام بيها دنو واحنة فرشيلنا بالاستقبال "

فرشت بالاستقبال دنو راحت الغرفه وليد رتبتها الها صارت .

اجيت لگيته متمدد وماد اديها ويأشر .. تعاي نامي هنا

رديت " ابدل واجي "

رد" واحد ماروني وياج اشتهيته كلش "

رديت بخجل " ياااا هو وين شفته انت "

رد " وداعتج كلشي شفت حتى البياض الجوة الماروني شفته "

غمضت وجهي وانهزمت منه " يبوووو شلون فشله "

رحت لبست دشداشة ربع ردن طولة ومخصرة ع الجسم ..

فتحت شعري رشيت عطر…

بقيت اجر بالردن ربع وكلوش وزندي مبين ..

طلعت مستحيه .. بالليل اخف من النهار كلشي يبين .

باوعت لگيته مغمض عينه فرحت ..

رحت نمت ع اطراف اصابعي .. بسرعه فز ..

سحبني الحضنه وقيدني بين ايديه ..

همس بأذني وانفاسه تخللت احساسي. 

" اريد صگر بأسرع وقت يجي ولازم نكثف المهامات حتى يجي ولو مايحتاج انتي ارض صالحة للزراعة بسرعه تخضرين "

ضربته على كتفه " نسر كافي اگوم وربي ترى "

ضحك " اروح فدوة لليخجل .. هاهي ساكت بس ارجعي نامي "

سألته " يعني انت صدگ تريد تسمي صگر "

رد " لا طبعا بس هيج لقب لااكثر .. خلي يجي بالسلامة ونفكر بالاسم بعدين "

نمنا للعصر گعدت ماهو .. گمت شفته سابح وديبدل ..

باوعلي ابتسم ..

" اروح لأهلي بالي يم اسراء اشوفها ومناك اطلع للمحلات محتاجة شي ؟"

هزيت راسي " لا سلامتك "

مد ايده وسحبني الحضني " ادري بيج مو هين تسامحيها بعد السوتة ولا اني عليه عين .. بس هاي اختي مو بيدي اشوفها تموت گدامي واسكت .. گلبي صح ماراضي عنها بس مو بيدي .. "

رديت " طبعا حقك هي تشوفك ابوها مو اخوها اعرفها من اول يوم هي تغار مني عليك .. لاتشيل همي اني لازم اتعود انسى واستمر "

ابتسم وباسني براسي " اصلا انتي منو يلحگج بطيبتج ياليت كل العالم مثل گلبج وحنيته "

طلع هو واني رحت للغرفة نظفتها وغسلتها ورتبت الجرباية وعطرتها وطلعت ..

كملت دراسة دنو ..

وسويت عشا .. بعدها خابرت خاله . 

ردت ..

" هاااا امي بعدكم  لو رجعتوا "

رديت :

" رجعنا قبل الظهر اخت نسر مريضة ورجعنا "

سألت " شلونة وضعج ؟"

عرفت شتقصد .. رديت " زينة الحمد لله "

سالت " يعني كلشي تمام "

ابتسمت " اي كلشي تمام "

ردت " الحمد لله رب العالمين والله مابطلت دعاء من گلتيلي راح نروح لليل .. وهو زين وياج "

رديت " اي زين "

ردت " الحمد لله ربي يعوضكم ان شاء الله وتفرحين بأولادج "

بقيت احجي وي خاله وحجتلي عن مرة ارشد ولدت بنية وواصله الموت خطية ..

كملت مكالمة باوعت للساعه تسعه وهو مابين ..

عشيت دنو وراها مدرسة تنام من وكت ..

وبقيت انتظر نسر ..

رحت بدلت لبست الثوب الاسود وفوگاه روب ..

حضرت العشا بالاستقبال ..

وبقيت متمددة ع القنفه واباوع للتلفزيون ..

الى ان غفيت ..

للصبح گعدت على نفس نومتي والاكل مثلج والنهار طالع ..

گمت باوعت ماكو ماجاي ..

رحت الموبايلي .. لگيته متصل هواي وداز رساله..

" مااجي حبيبتي قفلي البيبان ونامي لان اسراء وضعها مو تمام "

گمت بدلت وگعدت دنو ..

بدلتلها شلت الماعين غسلتهن وحضرت الريوگ ..

وهي تتريگ راجعتلها عندها امتحان ..

اجة مشتاق دگ هورن .. اخذت جنطتها وحافظة الاكل وطلعت.

خليت شالي وطلعت وراها ..

لحد ماصعدت بالسيارة وسدت الباب يلة دخلت ..

نظفت وكملت خليت اللحم ع النار .. اندگت الباب

فتحتها جانت زمن ..

دخلتها للبيت " وين صار فترة ماكو ليش هيج غايبه "

ردت " استحي اجي من زوجج لان اعرف مايطيقني "

رديت " لا ماله علاقه اصلا هو بس الظهر وبالليل هنا "

ردت " لا هيج احسن بعد تردين شي خابريني .. "

سألتها " خالة رسميه شو ماكو هم "

ردت " ليش موجودة شعجب ماتجيج ؟"

رديت " لا والله مااشوفها حتى متخابرني "

گامت زمن " اروح اني تدرين اليوم دورة سنه امي "

رديت " ياعيني " الله يرحمها بس ماكلتيلي شلون توفت ..

اتنهدت ورجعت گعدت… " مرات يگولون حظ البنات ع الامهات..  احنة مثل امنا ..

جنت صغيرة مااتذكر بس الاعرفه حسب ماسمعت

امي توفت بسبب مشكلة بينه وبين اولاد عمة على اثرها انكتلت ماما ..

جنا بوكتها متجمعين اجو اولاد عمة البابا كسروا الباب ومتحلفين اله ووياهم امهم واختهم ..

اول ماطلع بابا ضربوه على راسه وساح الدم منه ..

طلعوا اخوتي وراه ضربوهم هم ..

امي راحت تركض تشيلهم  .. اجت اختهم ميعاد .. طفرت على امي وسحبتها من عبايتها وگعتها وبقت تضرب على راسها بالتوثية ودور اجت امها وياها بوكسيات ودفرات ..

جانت ماما حامل . بسرعة نزفت ومات الطفل ..

وشگگن ملابسها وخلنها فرجة للعالم ..

طلعت الناس كلها بالشارع تتفرج بس محد تدخل لان اليوصل يكتلوه ..

اجت مرت عمي تركض دفعتهن ولفتها بالعباية ..

صحى ابوي على حاله شافها مدماية ..

اخذوها للمستشفى عاد هنا الجيران اجت وساعدتهم

صار عندها رجه بالدماغ ونزل ماي اسود على عينها وطفلها مات .. ابو خيطوا راسه واخواني هم ..

بقت امي بالمستشفى اتذكر جابنا بابا نشوفها..

گالها افتحي عيونج هاي جبتلج زمن والجهال يبجون عليج ..

ردت عليه " مااشوفهم عيوني مااشوف بيها بس غواش"

طلعها بابا وبقت هيج حتى ماگدرنا ناخذ حقها دفعوا فلوس وطلعوا منها مثل الشعرة من العجينة..

اهل ماما واخوتها بأيران ..

قبل لا تموت حست بنفسها كتبتلهم رساله بمساعده اخوي ودزتها الهم حتى ليخلون اللوم ببابا ..

بس شيفيد ...

حقها ضاع وحقنا هم .. وتشردنا بسبب عمامي ومشاكلهم ..

قهرتني حيل ..

سألتها " يعني انتو انهزمتوا بعد السقوط بسبب خوالج وثارهم .. "

ردت بحزن " بسبب الكل حتى عمامنا ماشفنا شي منهم كلها مشاكل ع الگيعان وثارات وقتل .. وشفتي شصار بيه بسبب ابن عمي يعني قربهم اذية هيج حياتنا احسن بعيدين ومرتاحين "

گامت وهي تجر بحسرات من اااهااات الماضي وجراحه

كانت من توصف امها تبجي رغم هي صغيرة وماشافت شي منها ..

واني امي تمنيتها متوفيه وابجي عليها ولااشوف بردوها وجرحها الي ..

طلعت زمن وبقى بالي يم رسمية ..

طبخت وكملت .. خابرتها ماردت ..

رجعت خابرت نسر ..

" الو حبيبي اطلب منك طلب "

ضحك " بعد هالكلمة لو تگليلي موت نفسك اموتها "

ضحكت " ياكلمة ؟"

رد " حبيبي "

وعيت على حالي وضحكت بصوت قوي لان طلعت مني لااراديا ..

رد بتنهيدة " اويلي يابة اتمنيت عندي جناح واطير الج الا اثلم هالشفايف النطقنها "

رديت " يووووه نسر لاتسوي هيج خليها عفوية تطلع ترى استحي "

ضحك " وج شسوي مو بيدي مامصدگ ذيج الليل وصرت اشتغل لو احجي وي العالم واتخيلها… افييييش يابة لو تتكرر"

اتنهدت " البارحة بدلت وانتظرتك ورتبت غرفتنا ومااجيت سقط حقك "

رد " لا عليج الله يعني خسرت ليلة من العمر .. واني عبالي بس ذيج الليلة وراح تذليني بيها .. اااااه يااسراء تخربطت وخربت الليلة عليه "

ضحكت " عادي تتعوض المهم سلامتها "

رد " اكو واحد گالج انت ملاك لو لا .. "

رديت " اي انت "

ضحك " اموت عليج "

رديت " اوووه راح تنسيني اريد اروح الرسميه "

كح ورد " مو جنا حلوين شجاب رسميه بالنص "

رديت " صارلها فترة ماكو اروح اشوفها المرة وكفاتها ماتتنسي "

رد " اي بهاي حقج صح ماارتاح للنسوان اليفترن بالبيوت بس رسميه تستاهل وگفاتها من عمة الج "

رديت " يعني اروح "

رد " بس مو تطولين .. هاا صدك اليوم عندنا بضاعه تجي الظهر مااگدر اجي لليل اجيكم "

ضجت من گال لليل تعودت عليه وصرت اشتاقله

رديت " براحتك "

ضحك " لاتضوجين عمي بحلم بعلم اني شذر تتشتاقلي وتضوج اذا مااجيت مو حتى قفل الباب غيرته من وراي"

ضحكت " لسا تتذكر "

رد " بساعتها ردت اخلع الباب من مكانه "

رديت " لايصير گلبك اسود انسى مو اني داانسى "

ضحك " يلة خلص رصيدج ارجع بالليل ونسولف "

سألته " هااا صدگ شسويلك عشا شمشتهي ؟"

رد " مشتهي فد ماعون ماروني بوسطة قطعه من الجبن "

ضحكت " يلة روح بااي"

سديته منه والابتسامة مافارگت وجهي ..

بدلت ورحت الرسميه..

دگيت الباب طلعتلي زوجة ابنها گالت بعدهي مااجت اذا تحبين ادخلي انتظريها ..

بقيت گاعدة جوة ..

ساعه يلة اجت .. بقيت اسولف وي البنات ..

شافتني انصدمت ..

" شذر هاي انتي شلونج "

رديت بعتب " شلوني ؟ زين سألتي عليه هسا "

ردت " منو گالج مااسأل دوم اسأل زمن عليج وتگول زينة وموردة وهم طلعولج اهل وطلع عندج عشيرة شكبرها وصيتها بكل الكاظمية وانتي من عرفناج تصيحين ماعندي اهل ويتيمة ليش وشنو السبب ماادري "

اتنهدت " وانتي ضايجة علمود هالشي .. اني من دخلتلهم وياج هاي اول مرة اعرفهم وادخللهم "

ردت " وليش ولو مو من حقي بس ام وليد امنتج على بيتها ودخلتج بوسطهم جانت تعرف لو لا "

رديت " عمة خديجة كلشي تعرف عني ونسر هم .. جانت مشاكل بين اهلي وبين عمامي وانهزموا الغير محافظة ومن اجيت لهنا اضطروا يگولون قريبة عمة حتى محد يعرفني .. تتوقعين نسر يتزوجني لو مايعرف شي عني "

سكتت وكأنه تريد تعرف سبب هروبي من اهلي بس ماحجيتلها اي شي غير انه اهلي توفوا وماگدرت اروح العمامي خفت ..

مااعرف صدگت او لا بس سكتت .. وصارت تسألني عن خاله شلونها وسوالف عادية ..

طلعت منها للبيت بسرعة دنو راح تجي من المدرسة

دخلت للبيت حميت الاكل دگت الباب واجت ..

مثل العادة غديتها ونامت للعصر يلة ندرس ..

رحت اني هم نمت يمها للعصر گعدت لگيت هنا متصله عليه ..

باوعت رصيد قليل ..

دزيتلها رساله خابرتني بسرعة ..

" الو وج شذر عزاااا هذا هذال داز اختة وعمته "

رديت " تحجين صدگ ؟ ووين هسا بعدهن عندكم "

ردت " اي ماما تحجي وياهم بس مااعرف ليش خايفه"

رديت " وليش تخافين بالعكس هالشي يبين مصداقيته وياج "

هنا :

العصر ..

طلعت من الحمام لابسة تراك وداامشط ..

عذورة وماما يردن يرحن للسوگ تشتري ملابس لان طلع امرها وراح تداوم بالمستشفى ..

اسراء نايمة وبيداء يمها..

اندگت الباب ..

فتحتها عذراء واجت بسرعة ..

" ماما هاي نسوان اثنين يردون يحجون وياج "

ردت ماما :

" منو ماعرفتي ؟"

هزت راسها " لا "

طلعت ماما رحبت بيهم ودخلتهم للاستقبال ..

باوعت من باب المطبخ… مبينات مثقفات وحدة كبيرة بالعمر لابسة جبه وشال ونضارات ..

والثانية متوسطة بالعمر يمكن بعمر بيداء بس مرتبه ومعتنيه بنفسها ..

شافني بالباب ابتسمن ..

سلمت سلام عادي ودخلن ..

رحت لبست گلبيه استحيت ادخل بالتراك ..

اخذت مي الهم ودخلت ..

اخذن المي وعينهن عليه ..

سألت المرة " انتي هنا لو ذيج الفتحتلنا الباب "

استغربت " لا اني منين تعرفوني "

ابتسمت البنية اليمها " اني اخت هذال وهاي عمتي"

من گالت هيج ارتبكت ..

سألت ماما " هذال منووو؟"

ردت العمة " هذال ابن اخوية كان مدير هنا قبل وشافها والصراحة معجب بيها وبأخلاقها ودزانه عليها "

احس وجهي صار نار .. طلعت بسرعه من الاستقبال

تلگتني عذراء وبيداء ..

" منين ذني وشعندهن "

رديت بتوتر " عزااا جايات خطابه "

ردت بيداء " المن بس لا الج "

رديت " هااا اي "

حجت بيداء " وج مصارلج سنتين من انفصلتي شبسرعه "

ردت عذراء " اذا بيج حظ لتوافقين هم كلهم نفس الشي "

ردت بيداء " فكري بأولادج ليش من مات محمد ماعرفت اتزوج بس اولادي اهم اعيشلهم "

ضوجني حيل " انتي مااتزوجتي لان بقيتي على ذكراه ولان يحبج وتحبيه صعب تنسيه .. اما اني شنو اتذكر منه خيانته لو حبي اله الجازاه بالنكران "

ردت بيداء " يعني واضح موافقة وعندج علم "

رديت بتوتر " لا وربي ابد ماادري انصدمت حالي حالكم"

ردت " ممعقولة يجي يخطب بدون مقدمات "

باوعت العذراء وماعرفت شحجي توترت ..

بقيت ساكته ..

اخذت بيداء الضيافه وراحت گعدت يمهن ..

سمعت ماما گالت اشوف اخوها وعمها وارجعلكم خبر ..

من طلعن رجعت ماما ..

" منين هذا شو يگولن مدير مالتج "

رديت " اي صح بس بدائرتي القديمة مو هسا "

سالت " وليش اجه هسا بالذات "

رديت " يووووه ماما شبيكم اشو كلها تحقق وياي يعني شافني وشاف اخلاقي واجه خطب شنو الغريب ؟"

ردت " الغريب مو لان خطب .. الغريب دفاعج هذا وعبالك منتظرة هاللحظة..  شأكول الاخوج والعمج هسا يعني انتي عفتي ليث وتالي تتزوجين واحد مطلگ "

رديت " وليش اني بنت بنوت اني هم مطلقه وعندي اثنين اولاد .. يعني المطلق او المطلقة عندكم عيب لو عار "

ردت " هالحجي احجيه الاخوج مالي دخل "

باوعت العذراء " اجليها الباجر الصبح امي هسا فات الوكت "

دخلت خابرت شذر وحجيتلها وطلبت تعرفلي ردة فعل نسر ..

بس مالحگت عبالي ماما تخابرة وتحجي وياه .. اتصلت بي وگالتله تعال لهنا ..

هو للمغرب اجه .. دخلت بسرعه سويت نفسي اصلي ..

گعد هو وماما بالصاله وحجتله ..

استغرب " منين هذا وليش هنا بالذات زين منين يعرف مطلقة واجه خطبها "

صاح هنا… .

ركضت للسجادة صرت اگوم واسجد هيج بالجذب عبالي اخلص.

دخلت عذراء تضحك عليه ..

" دگومي اول مرة اعرف السجدات صارت ثلاثة بدل اثنين .. حتى على الله تجذبين دگومي النسر يريدج راح يعلمج الصلاة من جديد "

حجيت بعصبيه " وانتي ماصدگتي شبيجن كلجن انگلبتن معقدات "

ردت " تذكري حالج قبل سنتين وانتي تعرفين شبينا "

اتنهدت " هو اني نفسي مامصدگة راح اعيد نفس التجربة الوصلت الموت بسببها "

طلعت بملف الصلاة.. 

" هااا نسر صحتني "

گام للاستقبال .. تعاي وراي ..

دخل ورحت وراه گال سدي الباب وتعاي ..

احس رجلي ماتشيلني اول مرة اصير بهيج موقف ..

باوعلي " من صغرجن واني صديق الجن ابد ماتدخلت لابحياتجن ولا بلبسجن . علمتجن ع الصح والخطأ ودليتجن بدرب العدل وگلتلجن امشن ..

امشي واني رافع راسي بيجن دووم للحظة ماشكيت بوحدة بيجن خذلتني مرة عذراء وشفتي شصارلها ..

الاريد اعرفه منج شي وهالسؤال اعتبريه من صديق مو بس اخو ..

" انتِ انقلتي بسبب هذا الشي لو لا "

بقيت صافنه مااعرف شحجي ..

رديت ..

" هاااا لا والله ماكو شي اصلا انقلت لان تضايقت كلهم رجال واني بنصهم استحيت "

رد " بس من ردت انقلج كلتي مرتاحة شغير رايج بعدين "

رديت " عبالي اتعود وماتعودت "

رد " ولو جوابج ماقنعني .. بس راح اسوي نفسي اقتنعت .. وهالمرة اريد اسألج ":

" انت قابله بي .. يعني اذا سألت عليه وطلع خوش انسان توافقين ؟"

رديت " بكيفك "

رد " معناها موافقه .. "

سكتت .. " وعمي وليث ؟"

رديت " ليث ماله حق عليه "

رد " بس عمي اله حق .. اذا ليث اتنازل عن ولده لان يعرفون انتي مستحيل تتزوجين بعد ليث وراح تربيهم عمي وافق ع التنازل وانطاج الشقه حتى مايتبهذلون الجهال او ياخذهم ليث يم مرته .. فشلون راح تعتقدين يوافق على شغله مارضاها على ابنه ..

ومستحيل يرضاها عليج .. "

اتنهدت " نسر انت گلت احجي بصراحة .. والصراحة انه ليث ماله حق بولدة وعمي يجي ياخذهم بأي وقت يعجبه مو لان مستقتله ع الزواج ..

بالعكس اني لسا ممقتنعه بس هاي حياتي يعني لازم اندفن بالحياة حتى يرضون الناس وعمي..  اني لو شفت هالانسان بيوم مايناسبني او مايحافظ  على اولادي مستحيل اقبل بي .. "

رد " اني حجيت وياج هيج من البداية حتى اخليج على بينه .. ومن هسا امهد الج الوضع اذا عرف عمي ..

واذا اني ما اقتنعت بي هم مستحيل اخليج توگعين بالخطأ مرة ثانية وهالمرة وياج اثنين اطفال .."

گام .. هالموضوع لاتحجون بي مؤقتا الى ان اسأل عليه وافتهم سالفته ..

طلع واني وراه .. صاح .. يمة اني رايح محتاجين شي

ردت " وين رايح شو صاير هالبيت ماتبات بي ماعندك اهل اخوات ."

رد " ليش تحجين هيج يمه .. اشو نهاري اغلبه يمكم بس ابات هناك .. ولاتنسين شذر ودنو وحدهم شلون اعوفهم .."

سألته " ومرتك ذيج سألت عليها على ابنك "

رد " اي خابرتها زينة بس حذرتها ماتطلع وانت هم خابري امها وخليها تركد ع نفسها الاشهر الاولى مو تفرفر "

ردت " والله خابرت تگول ماتتحرك ابد حدها للحمام وترجع "

هز راسه سلم وطلع ..

حسيت شويه ارتاحيت.. 

ماما ماعجبها الوضع وكل شوية تشمر حجاية ..

تعشيت وكملت اخذت ولدي ونيمتهم بالاستقبال..

فتحت موبايلي مكالمات من هذال ..

ورسالة..

فتحتها .. " بديت بأول خطوة وبينت حسن نيتي الباقي يمج "

قفلت الموبايل ونمت ..

مااعرف شنو نهاية هالموضوع احس گلبي ممرتاح  ..

شذر :

سويت عشا وبدلت انتظرت نسر ..

صرت اباوع للساعه واحسب الدقايق حتى اشوفه ..

انفتحت الباب ركضت للمطبخ .

شافني ابتسم ..

فتح ايديه .. تعاي لهنا خليني اشمج .. دفن وجهة برگبتي .. افييييش هالريحة هاي تنسيني كل همي احس الجنة يمج من ادخل انسى كلشي ..

گعدنا نتعشا .. وصار يتشاقى وي دنو ويلاعبها دور بقى يراجعلها ..

رحت للغرفه ..

بدلت وجهزت نفسي وكأنه بعدني بأول ايام زواجي ..

بعد نص ساعه اجة ..

شافني صفر بحلگة… " ناوية تجلطيني . هي ليلة وبالظلمة ومااتحملت "

خليت ايدي ع وجهي " نسر خليني بديت اتعود لتسوي هيج "

رد " توبة عمي اطلع متبطر ع النعمة اذا حجيت.. "

سبح وبدل واجاني .. كانت ليلة اجمل من القبلها ..

وصارت الليالي بالنسبة الي وحدة اجمل من الثانية ..

وطبعا دخلت دورة عند هنا ..

اخابرها وتعلمني شأسوي ترتيبات وتنسيقات وشلون ابدل ..

مرات من تجيني تعلمني شلون اخلي مكياج وشألبس

حتى اخذتني للسوگ هي وعذورة وغيرت استايلي كله ..

بحيث من اباوع النفسي بالمراية استغرب من نفسي معقولة هاي اني ..

صرت احب نفسي اكثر .. ونسر صار بالنسبة الي كلشي بحياتي هو ودنو ماناقصني الا طفل يغير حياتي وهذا المخليني احسب يوم يوم الراس الشهر ..

بيوم الرجعنا من المول اني وعذورة وهنا والجهال  وصلني مشتاق للبيت اتصل نسر ..

رديت  .. " الو شذر هنا وياج بعدهي  "

جاوبته " اي بعدهي هنا هي وعذورة هسا حيرجعهن مشتاق للبيت "

رد " لا يرحن اني جاي خلي تنتظرني يمج ومشتاق خلي يروح "

جان صوته متغير وعصبي الواضح الشغله المضوجته تخص هنا ..

سديت الموبايل وباوعتلها " نسر يگول لاتروح خل تنتظرني ومشتاق خلي يروح"

ارتبكت وتغيرت ملامح وجهها وكأنه تعرف لويش رايدها ..

نزلن من السيارة ودخلنا للبيت منتظرين نسر .. والف فكرة وفكرة اجت ببالنا ..

#بقلمي_شمس_السعدي

يتبع… .

صباح الخيرات حبايب ❤

///// البارت الثاني والستــون /////

#قوارير_من_فضة ج2

#بقلمي_شمس_السعدي ..

بقينا منتظرين هنا مرعوبة والف فكرة براسها ..

عذورة شكت وحست اكو شي نعرفه وساكتين ..

" اگلجن ليش احس تعرفن نسر شعندة بقانا هنا شمسويه هنا ؟"

عاطت هنا من التوتر " كلشي مابيه شبيج انتي الثانية"

اشرت العذورة تسكت ..

فتح الباب ..

عدلت گعدتها وباوعتلي ..

دخل عصبي " هنا تضمين عليه ؟؟"

ردت بتوتر " شنو ؟"

رد " شنو القضية الي نحكمتي بيها وشنو علاقتج بهذا هذال "

هنا :

من سمعت كلامه توترت اكثر ماكنت متوقعه راح يعرف هالسالفه .. توقعت بس يسأل عنه "

عاط " ردي عليه واحجيلي " باوع العذراء وشذر

" اخذن الجهال من واطلعن "

طلعن وسدن الباب وراهن ..

باوعلي ..

رديت " ماردت اگلك لان جنت محتار بهمك وي شذر وماردت ازود همك .. استاذ هذال ساعدني لااكثر هذا كل الموضوع "

عاط " وشنو المقابل ؟"

من گال هيج انصدمت ونزلت دمعتي " شتقصد ؟"

رد " ولج الرجال سمعته زفت .. ماكو واحد سألته اذا ماگال نسونجي ومطلگ واي وحدة يشوفها يسوي المستحيل حتى يحصلها "

رديت " وانت توقعت انه اختك سهلة وممكن يحصلها بسهولة موووو؟"

رد " لا تردين عليه بسؤال احجي فهميني راح اتخبل .. لج اني مو سألتج من خطب گلتلج هو سبب نقلج گلتي لا ماارتاحيت بالدائرة ليش جذبتي عليه ليش ماگلتيلي ع القضية ليش سويتيني مثل الاطرش بالزفة .. هيج مسحتي وجودي وتصرفتي من كيفج لو صايرلج شي واني ماادري احجي شبيج ساكته "

كان يعيط ومتعصب حيل ماعرفت شرد عليه كل كلمة حجاها صحيحة بس خفت ..

" خفت اگلك .. خفت تبطلني .. "

صفگ بيده " تخافين ؟؟ عشت عمري صديق الجن مو اخو وتگليلي اخاف .. ليش تتعمدن تأذني وتهزن ثقتي بيجن .. مو خليتج گبالي وسألتج ليش ماحجيتي ليش تخليني اسمع من الغربه ليش ؟ يگلولي جانت متهمة بقضية تزوير وفساد ومديرها ساعدها بأي حق يساعدج وبعدها يجي يخطبج .. منو يسوي هيج بلا سبب منووو؟"

هو يحجي واني ساكته بس ابجي ماعندي شي احجيه ..

كل كلامه صحيح .. تصرفت بغباء وتالي كلشي انكشف

فرك وجهة وگعد " منو تهمج بهاي القضية ؟"

رديت " اثنين من القسم ومن طلعت برائتي تحولوا للتحقيق "

هز راسه " ذولة حسابهم بعدين .. بس هذا هذال ماارتاحيتله واذا ساعدج مو معناها نيته صافيه .  اصلا السمعته عنه يكفي .. راح احجي وي امي ترجعلهم خبر رفضنا .. هالانسان مستحيل اقبل ترتبطين بي .. والله العالم ليش زوجته رفعت عليه قضية وتطلگت .. مااريد يتكرر الصارلج وي ليث "

هو يحجي واني ساكته لاگلتله اي ولا لا ..

اشرلي " گومي خلي اوصلجن .. اليوم هدمتي الثقة البينا .. راح تخليني اتبع غير طرق وياج مااريد اتبعها

بس انت تحت المراقبة منا وجاي .. ومشتاق يوصلج من الباب للباب .. طلعه الاي مكان والوحدج انسي .. احمدي ربج مابطلتج من الدوام ..

بس حتى ماتلوميني وتگولين ماگلتلك خفت تبطلني ..

فتح الباب وطلع صاح عذراء " يلة خلي اوصلجن "

طلع قبلنا للسيارة.. 

طلعت ابجي صارت شذر گبالي .. " شفتي حظي شلونه"

هدأتني " لاتخافين يهدأ واحجي وياه تعرفن اخوجن وطيبته ماينطيه گلبه "

ردت عذراء " اووووف الله يساعدة علينا والله كل وحدة بينا جايبتله هم شكل "

ماحجيت طلعت بسرعه ..

صعد جود يم خاله هو فهودي .. صعدت ماباوع حتى الوجهي ..

حرك السيارة واخذنا للبيت ..

باوعلي .. " ارفضي من يمج وخلي امي تخابرهم وتگلهم البنية ماتقبل تتزوج وسدي الموضوع نهائي لان اذا تدخلت اني مايصير خير "

دخلت للبيت ..

صارت ماما تحجي لان تأخرنا " وين لسا ؟"

ردت عذراء " ازدحام اليوم "

ردت " يلة بدلن وسون عشا "

بدلت وغسلت واجيت الماما دتصلي ..

گعدت يمها " ماما بلغي اهل المدير الاجو خطبوا اني رافضة "

ردت " ليش شو حسيتج قابله من اجن "

رديت " لا وين قابلة شعندي بالزواج بعد "

گمت عنها .. صليت ووصيت عذورة ع الجهال ونمت

افكر بعلاقتي وي نسر وشلون راح تتصلح ويرجع يثق بيه ..

بقيت افكر الى ان نمت ..

النص الليل سمعت جهازي يهتز ..

باوعت جهالي نايمين فارشتلهم عذراء يمي ..

رجعت باوعت للموبايل هذا هذال ..

" عزااا شعندة بهذا الليل بس لا ماما خابرتهم لو منتظرة للصبح "

مارديت سويته صامت . اجت رساله " ردي ليش ماتردين .. تلعبين عليه اجي اخطبج ترفضين شنو الصار فهميني "

غلقته " شفهمة اذا اني نفسي مافاهمة حالي . ساعه اريدة وساعه اخاف واتردد .. وزاد الطين بله موقف نسر واحتمال هيج احسن حتى ارتاح "

نمت للصبح گعدت بدلت الجود وبدلت .. ريكته وحضرت اكله ودزيته البيت بيداء يروح وي اولادها

شفته واگف قريب ع البيت .. بقيت اتلفت همزين من الصبح ماكو احد من الشارع ..

طلعت بيداء " تعاي ادخلي "

رديت " هااا لا وراي دوام وازدحامات هم يله اوصل "

طلعت بسرعة اجه مشتاق صعدت وياه .. تذكرت نسر من گال اراقبج معقولة صدگ يسويها ويراقبني ..

دز رسالة ..

" احجي وياي لا وربي اوكف السيارة وانزلج غصب واحرجج لتخليني اتبع هيج اساليب "

دزيت رسالة " بعدين احجي وياك هسا روح مااگدر "

رد " ع الاقل فهميني ليش رفضتي "

رديت " مااگدر احجي گلتلك بعدين بس روح هسا واني اخابرك بعدين "

ردت بس اخلص منه .. التفتت سيارته ماكو ارتاحيت

يالله بس لايطلعي من اي مكان ..

ماارتاحيت الى ان وصلت للدائرة .. نزلت صارت بوجهي اسيل .

سلمت عليها ودخلنا سوة ..

ساعة 11 گاعدة بالدائرة وعندي شغل ع الحاسبة ..

رن موبايلي ..

باوعت هذال ..

اتنهدت " شلون راح تخلص وياك "

رديت .. اول ماگلت الو .. تعصب

" بحياتي ماكو مرة لعبت عليه مثلج… انعل ابو الحب الذلاني الج .. لج تعاقبيني لو تطلبين مني ثار .. تگليلي اخطبني وتالي ترفضيني .. مو هذال الينضحك عليه "

خليته يحجي كل البداخلة ..

رديت " كملت هسا احجي لو بعد عندك كلام تحجيه "

رد " وج رجال الشيب بدأ يطلع براسي هيج تلعبين عليه "

رديت " هو انت تنطيني فرصة احجي..  اشو بس تعيط عليه "

رد " اريد اشوفج هسا "

رديت " هسا شلون عندي دوام "

رد " اخذي زمنية ساعه مااعطلج "

رديت " خلي اشوف وضعي وارجعلك خبر "

بقيت افكر شلون وبأي حجة اطلع .. اجت اسيل شافتني ..

" شبيج هناء صاير شي "

رديت " هاااا اي عندنا ضرف بالبيت واريد اروح "

ردت " ولسا واگفه روحي واني اسويلج اجازة "

رديت " سويها زمنية ساعه وارجع مااتأخر "

ردت " زين لعد واذا الظرف قوي لاتجين بس خابريني"

اخذت جنطتي وطلعت ..

مشيت الراس الشارع بقيت منتظرة شفته اجه ..

صعدت بسرعه واتلفت عبالك احد يراقبني ..

باوعلي " شبيج هيج خايفه شكو "

رديت " امشي بسرعه امشي "

حرك سيارته واخذني مسافة عن الدائرة ..

گلتله " ماننزل خلينا هنا "

سأل " شصاير فهميني "

رديت " اخويه سائل عليك وهو مايفوته شي تعرف انت يشتغل بالدفاع وعندة معارف هواي .. جايبين كلشي عنك ..

حتى قضيتي عرفها وضاج وعصب عليه..  انطاني انذار حتى من الدوام يبطلني ..

وفوگ كل هذا جايب السيفي مالتك وعلاقاتك كلها وزوجتك شلون رفعت قضية عليك ..

من سامع هيج متخبل ورفض ومنعني اجيب اسمك حتى ..

هذال لاتحاول احنة طريقنا مسدود ومستحيل اعاند او اخسر اخوية وهو ماقابل ..

فرك وجهة وباوعلي ..

" انتي قابلة بيه لو لا "

باوعتله وسكتت ..

رجع سأل " ليش ساكته احجي انتي رايدتني لو لا "

اتنهدت " مااعرف مااعرف هذال خايفه مااريد اعيش تجربه ثانية فاشلة .. گلبي يگول شكل وعقلي شي ثاني انت حتى زوجتك مااعرف ليش انفصلت عنها كلشي مااعرف عنك "

قاطعني " لان عقيم "

صفنت بوجهة ..

كمل كلامه " شبيج صفنتي هي تركتني لان مايصير عندي اطفال اول ماعرفت مايصير عندي تخلت عني وگالت من حقي يصير اطفال عندي .. رغم جنت احبها حب ماينوصف .. وحتى اخذتها الاحسن الاطباء  اعالجها عبالي منها .. وتالي لمن طلع السبب بيه طلبت الطلاق بنفس اليوم .. ولما رفضت لان احبها ومحتاجها ماجنت اريد اطفال هي الطلبت نروح الدكاترة حتى تتعالج .. ردتها بس هي لان احبها ..

تالي زعلت وطلعت وبعدها بفترة قدمت دعوة عليه وقدمت اوراق تحاليلي للقاضي وتطلگت مني ..

عرفتي ليش كرهت النسوان ..

وصارن بالنسبة الي متعه لاغير .. كل اسبوع او شهر اعقد واشبع منها انطيها حقها ونفض السالفه .. بقيت اعاقب نفسي واعاقبهن على انانيتهن وغدرهن .. صح من حقها يصير عندها طفل .. بس اني جنت احبها ولو مايصير عندها هي .. جان تحملت وصبرت لان احبها .."

بقيت مستغربة وصافنة… للحظة تغير وقلب الشخص ثاني .. مليان مشاعر وحزن مكتوم .. اذا شگد جان يحبها وخذلته ..

بقيت اقارن حالي وياه .. يمكن لو ليث مايصير عنده اطفال وهيج يحبني مستحيل افكر اخذله او اتركه ..

سكتت وهو يحجي لان مااعرف شنو اجاوبه ..

بعدها سكت هو هم .. وصارت لحظات صمت بينا ..

بعدها اتنهد وسألني " وهسا شگلتي ؟"

رجعت سألته " يعني اختاريتني لان عندي اطفال حتى مااطالبك يوم بطفل "

رد " حبيتج لان مختلفه نزيهة ونقية .. ماعرفت عندج اولاد الا لمن حبيتج وصارحتج .. بالصدفة سألت عنج وعرفت ليش انفصلتي ..

هنا اني حبيتج اول مرة اتمسك بوحدة بعد سنين طويلة قطعت الامل بالحب .. اذا تمسكتي بيه اعيشج ملكة واتحدى الدنيا علمودج .. ومستحيل اباوع الوحدة غيرج مثل الي ترك جوهرة مثلج وراح تزوج "

مااتوقعت يعرف كلشي عني .. سألني " هااا شگلتي ؟"

رديت بتوتر " المشكلة مو بيه بأخوية .. شلون اقنعه بيك وهو يعرف بعلاقاتك وسمعتك .. هذال انت حتى الموظفات الوياي يعرفن كلشي عنك "

رد " گلتلج السبب بس بعد ماحبيتج ماحلت وحدة بعيني .. وبعدين الموظفات شمعرفهن بيه ماتعرفني الا المجربتني "

صرت اتأفأف ومااعرف شنو ارد ..

باوعتله " اخر كلام عندي الك .. اذا تريدني ومتمسك بيه اقنع اخوية .. مستحيل اوگف بوجهة واحجي وياه انت ماتعرفة شنو بالنسبة الي هذا ابوية مو اخوية .. خذلته مرة ومستحيل اخذله مرة ثانية "

اتنهد " خلص اني اروحلة للمحلات واتفق وياه "

باوعتله بأستغراب " شمعرفك بمكانة "

ابتسم " كلشي اعرف عنج "

رجع وصلني قريب الدائرة وراح .

الحد مادخلت الدائرة واني افكر بي .. اول مرة شخص هيج يتمسك بيه .. معقولة يحبني الهاي الدرجة لو لان ماگدر يحصلني بسهولة !!"

شذر :

قبل يوم التحاقه .. رجع من المحلات ضايج..

جنت بالغرفه حضرت ملابسه وجنطته ..

هو دخل اتقرب مني باسني مثل عادته برگبته وشمها وراح للحمام ..

رحت للمطبخ حضرنا العشا اني ودنو ..

طلع من الحمام مشط واجة ..

جان ياكل ع الصامت وصافن .. ماردت اسأله گدام دنو

هو لو عنده شي جان حجاه من غير مااسأل ..

كملنا عشا راح للغرفه ودنو يمي غسلت الماعين اخذتهن رتبتهن بالكاونتر ..

دخلت الغرفتها كلتلها هسا اجيج ..

رحت للغرفه جان يگلب بالتلفزيون ..

شافني اشرلي ع حضنه ..

تقربت منه ..

" ماردت اسأل بس حالتك قلقتني صاير شي ؟"

اتنهد " هنا مدوختني "

سألت " شبيها ؟"

رد " هذا الخطبها اجاني .. لو شايفته .. اكبر مني شعره مشيب بس هو مرتب نفسه ومحافظ على جسمه وشكله..  المحيرني متمسك بيها حيل وگلتله ماكو مرة للزواج بقى مصر .. واخر حجايه گالها احنة اثنينة راشدين ونعرف مصلحتنا خليها برضاتك احسن .. حسيته يهددني لو يتحداني معقولة هنا تحبه وبينهم شي الهيج متأكد "

رديت بسرعه " لا مستحيل ليش انت ماتعرف هنا لو اكو شي جان گالت "

رد " زين ليش هيج متمسك بيها "

سألت " وانت ليش متوافق اذا متمسك بيها هو ورايدها"

رد " ليش عبالج مااريدلها السعادة .. مااريدها تنسى العاشته وي ليث .. بس مو هذا..  لو احجيلج عن سوالفة يشيب راسج..  مامخلي وحدة تعتب عليه ماعاقد عليها خايف يسوي بهنا هيج ويتركها بعد فترة ..

اني اريد مصلحتها اريد واحد يباوعلها شلون اباوعلج اني .. اروح وفكري وگلبي كله يمج.  

ضحكت " هاي شنو جاي تذم بالرجال لو تمدح بنفسك "

ضحك " ليش اني مو هيج ؟"

رديت " امممممم ماادري "

سحبني بسرعه وصار فوگاي .. باعي لعيوني واحكمي شوفيهن شلون يباعلج .. غمضت عيوني لا حباب لتباوعلي هيج استحي ..

اتقرب مني اكثر .. باعلي لا اهجم ..

فتحت عيني..  صارت بعينه .. ابتسمت ..

همس " احبج .." رديت " اني هم "

رد " انتي هم شنو ؟"

رديت " احبك "

ضحك واخذتي الحضنه وصار يتنفس برگبتي .. ااااه شذر ااااه صرت مدمن بيج ..

التهيت وي نسر وسوالفه ونسيت دنو اخذتني الغفة ..

گعدت اشوف دنو ..لگيتها نايمة غطيتها ورجعت..

حسيت بشي .. ضجت حيل وانقهرت… كنت متوقعه احمل هذا الشهر .. منتظرة راس الشهر يوم يوم وتالي ماكو شي ..

معقولة هذا امتحان من ربي الي .. نطانيها بلحظة ضعف ولمن تعلقت بي وسمعت صوت نبضه اخذه مني .. وهسا منتظرة وماكو ..

بعدها استغفرت ربي ..

للصبح بعد ماالتحق نسر خابرت خاله ضحكت عليه :

" تحجين صدگ .  لج امي هذا رزق الله لاتسوين هيج اذا مو هذا الشهر الشهر الجايه اكو نسوان يبقون اشهر وسنين وماكو شي كلشي بقسمة الله .. لاتصيرين مثل هاجر جابت بنية وضاجت تريد ولد وهسا تريد تحمل مرة ثانية علمود تجيب ولد وهي بذاك حملها وصلت الموت ..

سديته منها خابرت هنا تسأل .. الظاهر تعرف هذال رايح النسر ..

حجيت وياها " نسر قافل ع الموضوع حجيت وياه يگول مامقتنع بي وخايف عليج .. وفوگ كل هذا الاستاذ مالتج يتحداه ويكله احنة راشدين وافق برضاتك احسن شنو معناها "

اتنهدت " اوووف شذر انصحيني شسوي تعبت .. "

سألتها " انتي ترديه لو لا احسج مترددة "

ردت " گلبي يريده بحيث من اسمع صوته مااعرف شيصير بيه .. بس تفكيري مخربط وخايفه "

رديت " مااعرف شنصحج انتي اعرف جنت قبلج افكر بعقلي وتالي خسرت هواي سنين من عمري .. اذا تشوفيه يحبج ومتمسك بيج وبولدج حاربي الاجله وحاولي تقنعين اخوج بهدوء "

ردت " هو يباوعلي بحب .. واولادي يگول اخليهم بعيني واعتبرهم ولدي لان تدرين مايصير عنده اطفال يعني راح يحبهم مثلي او ع الاقل احسن من ابوهم المايسأل عليهم وين "

رديت " لعد خلي نسر گبالج من يرجع واحجي وياه "

سديته منه وبديت بروتيني اليومي .. رحت للغرفه نظفتها وصرت اشتم بمخدته بيها ريحته ..

اتذكرة من يشم بيه ويصيح افيييش .. ضحكت..

لو من طلع للدوام شلون حضني لمدة دقايق لااني اگدر اعوفه ولا هو ..

بعد ماداومت عذورة خابرتها لان لسا ماباركتلها ..

ردت " مبروك يحلوة "

ردت " بعد وكت انتي بله من صرتي بحضن نسر نسيتينا "

ضحكت " ماتبطلين سوالفج "

ردت " تدرين منو وياي يداوم "

سألتها " منو "؟

ردت " اخو العار مريم "

سألتها : " بس لا حسام "

ردت " ليش اكو غيره ؟"

سألتها " هو دكتور مووو "

ردت " اي دكتور مال مطايا هو شفهمة هذا بالطب بس يمكن واسطات اخته تلعب دور "

رديت " لا مالج حق .. من زمان البنات گالوا شاطر حيل وبعدين هو شهد وياكم ضدها يعني مو بحالها مبين مو مثلها وحباب "

ردت " ماادري ليش مااستلطفه رغم اجه وباركلي وخلاني بالمختبر ووصى عليه بس اضوج منه فوگاها شايف نفسه يمكن بداخله يتشمت بيه على عملة معتز "

رديت " انتي صايرة حساسة زايد .. الولد ماطلع عليه شي وحباب "

سديته منها وحسيت نفسي بدالة كل شوية متصله على وحدة لو متصلين عليه ..

مر هالاسبوع بصعوبه عليه بغياب نسر .. هو قدم على نقل وبلكي يطلع بسرعه ويجي يداوم ببغداد .. يومية او بين يوم ويوم المهم مايغيب عليه هواي واخر النهار يمي ..

خابرني قبل لايجي ووصاني ..

" الو حبيبتي تعرفين صديقي حمودي الرحنالهم من رحنا الاهلج ؟"

رديت " اي اعرفهم شبيه"

رد " خابرني يريد يجيب امه للطبيب وهم يزورون وگلتلهم تبقون يمنا .. مااگدر ادزهم الاهلي وانتي اعرفج ماترتاحين هناك راح اجيبهم يمج "

رديت " عادي حبيبي بالعكس افرح لان حبيت امه كلش وزوجته هم حبابه .."

سديته منه .  بسرعه خابرت الزمن وصيتها على غراض واقمشة ..

خيطتلهن كل وحدة دشداشة .. للطفل خيطت تراك صيفي لان مااعرف ولد او بنية .

نسر موصي مشتاق على ملابس ..

همزين يصادف عطلة خابرت البنات يجون يمي هم يساعدوني وهم يتونسون ..

هنا ماقبلت تجي تستحي من نسر وخايفه من ردة فعله بعد اخر كلام اله وي هذال ..

اجت عذورة جمعه وسبت.. قبلها حضرت الكبة والدولة وحتى الكباب ثرمته وجمدته .. وصيت زمن تخبزلي خاف ميحبون خبر المخبز ..

من رجع نسر من الدوام اجو.  وصلهم البيت ..

بعد مادخل بساعه اندگت الباب هو راح للغرفه يتمدد

اجيت صحته گام من شفت العجوز حضنتها وسلمت عليها. 

فرحت من شافتني " هااا بنيتي شلونج بشري شصار عندج "

رديت " صار وراح مامقسوملي "

اتنهدت " اووووف الله يعوضج انتي ظهرج مثل ظهر امج "

دخلتهن للغرفه يرتاحن ..

صاير عندهم بنية حلوة ..

اجتهن عذورة سلمت ..

باستها وهمست " انتي مريضه يمة "

ردت عذراء مستغربة " لا مابيه شي "

هزت راسها الله يشافيج ان شاء الله.. 

باوعتلي عذورة مستغربة .. گلتلهن ارتاحن بين مااسوي ريوگ الجن ..

اجت وراي عذورة " وج هاي تخوف دور طلعتني مريضه واني كلشي مابيه "

ابتسمت " احسها من اهل الله .  لعد اني گلتلي يصير عندج توأم وتالي بس واحد وراح .."

هزت ايدها " يمعودة مااثق بهاي السوالف "

رديت " مااعرف والله بس هي ماتاخذ خيرة او شي .  جنتها تگول هيج يطلع الكلام وحدة منها عندها نور "

ردت عذورة " شنو نور ؟"

رديت " مرة عمة حجتلي عن هيج شي . تگول مو اي واحد يصير عنده نور هالشي مثل الهاجس او الاحساس يعني يشوف شي ويحس بي فجاة تكدرين تگولين الله كاشف عنه الحجاب مثل مايكولون "

رغم كلشي حجيته حسيتها ما اقتنعت..

ومصرة انه علم الغيب عند الله وبس ماتعرف النور الله يمن بي عبادة الصالحين "

بقوا يمنا ثلاث ايام ..

راحوا للطبيب وبعدها اخذناهم للامام زاروا واخذنا نسر عشانا بالمطعم ورجعنا ..

ثاني يوم رجعوا المحافظتهم .. جان بودي اسألهم عن اهلي لو ادز احد يسأل اريد اشوف اخواتي شبيهن .

خاصه من حلمت اخر مرة بحلم مزعج يخصهم وبديت اخاف من احلامي من يوم طفلي من راح وخسرته ..

للظهر خابرت هنا النسر ترك كلشي وراح ..

هنا :

هذال مايأس بين فترة وفترة يروح النسر يرفض الى ان صار يدز ناس عليه وبطل يروح بنفسه ..

بيوم الگال راح ادز ناس .. اجة ليث كسر الباب..

فتحتها عذراء تفاجات من شفته گبالي جنت انوم بولدي هسا جايه تعبانه من الدوام ..

اول ماشافني هجم عليه وصار يغلط..  " لج طايحة الحظ منو هذا هذال التردين تتزوجيه وتخليه يربي ولدي ."

گمت وعطت بي " انت منو وتتحكم بيه ولدك مالك حق بيهم نسيت انت تنازلت عنهم .. روح خلي شجن تجيبلك اولاد "

عاط " مو بكيفج تحلمين اخليج تتزوجين واذا تزوجتي اندمج ومااخليج تشوفين اظفر منهم .. "

عاطت بي ماما واسراء وطردوه ..

طلع وهو يتوعد ويعيط .. بسرعه خابرت نسر وحجيتله حتى يتصرف وياه ..

اجة نسر العصر وعمي وياه ..

دخلوا صاحني عمي ..

سألني " بوية البنية سكه وتنخطب بس انت تختلفين ادري بيج عاقلة واخوج ماقابل ولااحنة .. السواه ليث اني احاسبه عليه .. بس انت فكري بولدج وربيهم وكبريهم ماعندنا جهال تربى عند الغريب "

ابتسمت " عمو انت تنصحني لو تهددني لو شنو ماعرفت ؟؟ "

رد " ليث خبل وخاف يسوي شي الج لو للجهال كرسي الشر ولاتعانديه واني هم راح اوگف هالولد عند حدة ومايجي بعد "

رديت بعصبيه " ليش ليث يتدخل هو شعليه اصلا مو متزوج بعد شيريد مني اتزوج مااتزوج هالشي يخصني"

رد عمو " ليث ابن عمج قبل ليصير زوجج "

نسر " عمي ماكو داعي هالحجي .. لا هنا ولا اني موافق عليه بس ليث ماله حق يتدخل واذا عتب بعد الباب رجله تتكسر .  "

رديت بدون تفكير " لا نسر اعذرني اني ماگلت ماموافقه اني موافقة واولادي بوصايتي لا ليث ولا غيرة عنده شي يمي "

گام عمي وهو متعصب صاح " لم اختك نسر .  من اشتغلت طلعت عينها وتريد تفضحنا وي واحد سمعته سابقته بالنذالة…  لو ماناطيته عين ومجال ماتجرأ وتمسك هيج بيها "

رديت " عمو مااسمحلك… ."

قاطعني نسر بعصبيه " هنا السانج..  وادخلي جوة بعدين احسابج "

ردت احجي وياه شال ايدي راد يضربني .. ولي من وجهي ذليتيني وكسرتي كلمتي بحجايتج ..

دخلت جوة ضايجة والبنات يحجن عليه لان طولت بالحجي وي عمي وفشلت نسر گدامه…

من طلع عمي اجه نسر ..

دخل يعيط " دوام ماكو انسي بعد .. اريد اعلمج شلون تكسرين كلمتي وتگولين موافقه .. عمي كلامه صحيح لو مامنطيته عين مااتجرأ كل يوم رايح جاي .. ولو يبقى اخر رجال بالدنيا تحلمين اخليج تاخذيه فهمتي

طبگ الباب وصاح ..

" اسمعي يمة هنا اذا كسرت كلمتي وداومت احاسبج الج مو الها .. وربي اتصرف تصرف مامسويه بحياتي "

بقيت ابجي واندب حظي امي اجت حجت عليه وطلعت كل اليجي يخلي السبب بيه .  حتى صفوا وي عمي ضدي ..

شلون يردوني انساه واخذله وهو متمسك بيه ومستعد كلشي يسوي حتى يقبلون ..

وفوگاها ليث حلف يعرفه منو ويروح يحاسبه ..

خابرني رديت ..

" هااا هنوة ليش اخابر ماكو ابن عمج طارد الجماعه الدازهم وفشلني وياهم منو هذا ؟؟"

رديت " هذا طليقي اجه وسوالي مشكله واخوي بطلني من الدوام وحلف مايخليني اعتب الباب بعد "

قاطعني بسرعة وبكلامة صدمني :

" جيبي اولادج وتعاي نتزوج ونخليهم امام الامر الواقع"

#بقلمي_شمس_السعدي

يتبع .…

مساء الخيرات ❤

///// البارت الثالث والستــون /////

#قوارير_من_فضة ج2

#بقلمي_شمس_السعدي ..

هنا :

" شتحجي انت هذال .. مستحيل طبعا اصلا مااعرف شلون توقعت اني اوافق واسويها معقولة هذا تفكيرك بيه .. نسر ابوية تفهم شنو ابوية .. لو اعرف اخسر الدنيا كلها ومااخسره .. اذا تحبني صدگ تنتظر وتصبر واذا لا .. فمن هسا كل واحد يروح بطريقه احسن "

سديته منه بسرعة ..

حسيت نفسي تسرعت .. ماجان قصدي اكسر كلمته گدام عمي ..

بس من عمي استفزني مااتحملت ..

ثاني يوم الصبح گعدت متأخرة راسي يأذيني طول الليل افكر ومانمت ..

خابرت اسيل ..

" ها هناء اشو لسا ماكو وينج صاير شي ؟؟"

رديت :

" مااگدر اداوم ابني مريض فد مرة "

ردت :

" لعد حسويلج اجازة اليوم ان شاء الله ميشوف شر يارب "

تشكرت منها وسديته ..

اليوم دبرتها باجر شلون ..؟؟

طلعت صارت بوجهي ماما باوعتلي ودنگت .. جانت تنظف بالتمن ..

اجيت يمها " صباح الخير ماما "

ماردت ..

سكتت رحت غسلت البيت فارغ وهادئ ..

حتى جود دازته ماما للمدرسه وماادري ..

كعدت يمها " ليش متحجين وياي ؟"

باوعتلي " وشتردين احجي وياج اذا صايرة طفله وراسج يابس ماتفكرين .. صايرات كل وحدة تمشي الي براسها ماتشورن امجن او اخوجن .. مو كافي هججتنه من البيت بعد تردن تهججنه من الدنيا كلها "

رديت " مو احنة الهججناه انتي يوم جبتي هديل للبيت خسرتي البنية الجانت شايلتنا على راسها وخسرتي ابنج وياها "

ردت بعصبيه " هديل شعليها مو اختج الشمرت التهمة عليها وخبلته للولد "

رديت " هاي اني احجي وتذكري كلامي اذا ماطلع وراها هديل شوفي .. اسراء تدرين بيها عندها اهم شي كبريائها ومستحيل تگول هديل قرأت براسي وخلت الشك بعقلي .. عبالج من طلبت تصعد غرفتها لفوگ هيج بدون سبب اصلا اسراء طول اليوم بالدوام لو بالغرفه بعد شوكت تلحگ تراقبهم مثل ماتگول "

عاطت بيه " كافي اسكتي مو تردين تطمين سالفتج تفتحين سالفه جديدة وتخربين اخوج ومرته وهي حامل "

هزيت ايدي " هو انتي لليوم ماشفتي بس عيوبنا واخطائنا وبدل متنصحينا تعيطين علينا وتسكتينا "

ردت " وج شأنصحج انت بنت العشر سنوات اشو عمرج 30 سنة وعندج طفلين .. شلج بالزواج..  حيري ربي اولادج وكبريهم اشو عندج شقه وراتب بعد شتردين "

باوعتلها " يعني قصدج حرام اعيش .. حرام احد يهتم بيه ويحبني ويكون سند الي والاولادي .. اذا عشت زواج فاشل المفروض مااعيش بعد "

ردت " لان اعرف اختياراتج كلها غلط .. قبله ليث انعميتي وماشفتي غيرة "

ضحكت " انعميت ؟؟ لعد منو الشجعني ابن عمج وماتلگين احسن منه .. وكم مرة اجي زعلانه تقنعيني وترجعيني اله حتى ماخليت النفسي كرامه الهيج تمادى وياي وتالي تزوج "

هزت ايدها " هنا راسي يوجعني ومالي خلگج انت تردين تطلعين نفسج صح بأي طريقه .. مالي دخل بعد اخوج ذاك واحجي وياه ولو دمرتنه الابني بس شسوي ابتله صار اخوجن .. ماارتاح الا من الاء وسما لان بعيدات اما انتن شلعتن گلبه من الجبيرة للصغيرة "

گمت عنها واكتفيت بالسكوت ..

شغلت نفسي بالتنظيف والبيت . كملت دخلت الغرفه وخابرت شذر ..

" الو شذر شلونج "

ردت :

" هلو هنا شلونح انت البارحة نسر اجه متعصب حيل وضغطه مرتفع شصاير ماقبل حتى يحجي ؟"

رديت " وج تهورت ولصتها گدامة وگدام عمو والله ماقصدي بس ماردت عمو يتحكم بمصيري ويهددني بولدي ماشفتيه شلون يحجي نرفزني "

اتنهدت " اووووف هنا اوووف الاحسن تجين وتحجين وي نسر بهداوة وفهميه موقفج وليش هيج حجيتي "

رديت " خاف يتعصب "

ردت " يتعصب احسن مما يبقى ضايج منج وتصير بينكم فجوة "

رديت " زين الظهر اخلي مشتاق يجيبني "

للظهر .. حجيت وي ماما ..

" ماما راح اخابر مشتاق يجي ياخذني البيت عمة خديجة "

التفتت " شعندج رايحة لهناك حتى تحرگين روحه وهو اصلا مايقبل تطلعين "

رديت " اريد اروح اعتذر منه يرضيج يبقى هيج ضايج مني "

اتنهدت " جان فكرتي قبل لاتحجين وتزعليه وتكسريه گدام عمج .. اخذي عذراء وياج لاترحين وحدج والبيت عمتج وترجعين لا منا ولا منا "

انتظرت عذورة تجي من  الدوام…

جانت تعبانه تلگيتها بالباب " خلينا نمشي وين مشتاق بعدة بالباب موووو"

ردت " وين ولج بس لا راح تنهزمين وي همام مدري شسمه "

ضحكت " عايشة الدور انت .. وبعدين اسمه هذال مو همام .. دمشي اريد اروح البيت عمه اشوف نسر العصر يطلع "

ردت " وج تعبانه اريد اتغدا ونعسانه "

رديت " عود هناك تغدي يم شذر .. ماصدگت ولدي نامو بسرعه اريد ارجع قبل ليگعدون "

سحبتها بالگوة واخذتها ..

شذر :

گلت الهنا تجي ومااعرف شلون افتح الموضوع وي نسر ..

اجت دنو ووراها نسر ..

صبيت الغدا مسويه مطبگ باقلاء وتشريب ..

دخل يبدل ..

رحت وراها .. اشرت الدنو تغسل وتبدل وتجي ..

فتحت الباب جان ينزع بقميصه .. اتقربت كملتهن اله

باوعلي وابتسم سحبني من خصري وقربني اله ..

" لا تتحارشين بيه ترى مااتحمل واتغدا بيج "

اتذكرت توصيات هنا وضحكت " شمالي صايرة فد مرة الولد بس فتحت قميصه ذبلن عيونه "

ابتعدت عنه وحجيت " لايروح بالك بعيد .. تعبان وگلت اساعدك .. طلعت ملابسه بين ماراح سبح واجة ..

صبيت الغدا .. كملنا غدا سويت جاي .. هو راح للغرفه ماگدرت افتح الموضوع ع الغدا خفت يتعصب ومايتغدا  ..

اخذت الجاي ورحتلة ..

" نسر راح تجي هنا لهنا "

باوعلي " شعندها جايه گليلها نسر مايجي يبقى بالمحلات وبعدين اني مو منبه عليها ماتطلع شلون تجي "

گعدت يمه " نسر هنا مو طفله .. اذا غلطت خليها گبالك واحجي وياها مو تعاقبها هيج وتحرمها من الدوام لاتنسى هالدوام ضمان الها والولدها "

رد " هاي شكتلج بسرعه .. تدري بيه مااگدر احجي وياج .. بس حبيبتي هالمرة عوفيها وراي لاتتدخلين هنا تغيرت ويرادلها شدة اذن حتى ترجع الوعيها "

رديت " حقك ومااتدخل بينكم بس ع الاقل اسمعها ولاتخجلني اگعدوا وحدكم وتفاهموا ومالي دخل بيكم"

سكت مارد .. تقربت منه وبست خده .. السكوت علامة الرضا ..

باوعلي بطرف عينه .. علمنج ع الحيلة .. دتعاي انتي الجنيتي على نفسج ..

بعد مانام .. گمت منه .

خابرت هنا وگلتلها تجي ..

دخلت سبحت ورتبت المطبخ ..

باوعت الدنو نايمة.. فتحت جنطتها شفت ناطيها جدول الامتحانات…

بقيت گاعدة لمن اندگت الباب ..

فتحتها البنات هنا وعذراء ..

دخلتهم للمطبخ .. ركضت عذورة للگدر اخذت خاشوگة وتاكل هي واگفه ..

اجيت حميت التشريب الها ..

باوعتلي " هاي ام المصايب جابتني بلا غدا .. "

صبيتلها گعدت تاكل .

وهنا عينها ع البيت كل شوية تتلفت ..

رديت عليها " نايم بالغرفه "

اتنهدت " يدري راح اجي "

رديت " اي يدري "

ردت " وشگال ؟"

رديت " ماگال شي هو يگعد وتفاهمي وياها بالهدواة ارجعي هنا الهادئة الرقيقه ذيج "

باوعتلي " ليش هسا شصرت ؟"

رديت " نفسج بس زاد عندج هرمون العصبية شوية "

باوعت العذراء وضحكت " يمكن انطيتي الهداوة الذيج البنية "

باوعتلي عذراء " وربي صايرة فد مرة كارهة روحي حتى الدوام كارهته بسبب هذا مااريد اسميه .. كل شوية جاي بحجة شغله حتى شغلاته تافهة اخر شي عطت بي وكلتلة لاتجي بعد يمي جاي تحرجني "

ضحكت " وج خطية اشو قاهرني هالولد مااعرف ليش وخاصه من اجه هنا وحجة وي نسر حسيته حباب "

هزت راسها " لايغرج كلهم نفس الطينة من مريم المعتز الهديل ماشاء الله "

سمعت كحت نسر طبعا من الجگاير هواي يشرب وخاصه من يضوج..

هنا بسرعه عدلت گعدتها وتوترت ..

رحت بسرعه للغرفه طلع هو من الباب ..

همست " البنات هنا " واشرتله يكون هادي ..

راح للمطبخ .. شافهن ..

گامت عذورة سلمت عليه .. هنا رادت تگوم اشرلها تگعد

غسل وباوعلي " حبيبتي جاي جيبيلي "

راح للاستقبال .. اشرت الهنا تروح وراه ..

گامت وهي تباوعلنا بتوتر ..

دخلت وراها .. بقينا بالمطبخ گاعدين بس نسمع كلامهم ..

اول مابدأت " نسر ادري بيك ضايج مني بس وربي ماقصدي اكسر كلمتك لو احرجك .. ضجت من عمو وشلون تصرف وياي .. يعني ترضاها يحلل الابنه ويحرم عليه "

رد نسر بعصبيه " لو غير واحد اني وگفت وياج وسندتج بس هذا نسخة من ليث ولج مااريد الصار يتكرر افهميني .. كل مرة اگول هنا اعقل وحدة بأخواتي شغيرج فهميني "

گمزت عذراء من مكانها وعاطت " واحنة مخابيل لو شنو استاذ نسر نحن هنا "

رد " انتي الخبلة مو يمج غلسي "

ضحكت على سوالفهم ..

رجع كمل وي هنا .. " مااريد عمي يلزم عليج زلة .. من احجي اريد ترفعين راسي واذا عندج شي تناقشيه وياي مو تطفرين بالحجي .. ليش شتسوالي من يكلي الزم اختك لاتطلع من الطريق .. البارحة تعاركت وياها ووصلت انهي كلشي وافض الشراكة بينا علمودج وانتي تنزلين راسي "

صار هدوء بينهم .. بعدها سمعنا هنا تبجي وتتعذر منه ..

رحت شفتها حاضنته وتبجي .. اشرتله مايكسر بيها ابتسملي ..

ورجع حضنها ويطبطب على ظهرها ..

" كافي لاتبجين .. بس اريدج توعديني هالسالفه تنسيها وهالشخص تنسيه نهائي .. واذا هو فعلا معدنه اصيل راح يبين بمرور الوقت مستحيل اشوفج تشمرين نفسج بالنار واسكت .. اذا تگولين اخوي وبمقام ابوي فعلا خليها وراي "

هزت راسها ومسحت دموعها ..

باوعلي .. صيحي ذيج ام بطن ماخلصت اكل وتعالن هنا يمي ..

التمينا كلنا سويت جاي وكعك وخلصناها سوالف وضحك ..

هنا :

بعد الصار مستحيل اگدر اخسرة بعد واخسر ثقته ..

قررت ادوس على گلبي ومشاعري وانسى ..

صح شفت الاهتمام والحب من هذال رغم ماشفته من احد قبله .. بس مو معناها كلشي نتمناه نحصله ..

يمكن مكتوبلي مااعيش الحب بحياتي .. بس حبي الاولادي اكبر واعظم ..

طلعت من بيت عمة .. خليت مشتاق يمررني ع محل موبايلات ..

اخذت سيم كارت جديد ..

ورجعت للبيت .. ثبتت الاسماء كلها وطلعت ذاك القديم كسرته وشمرته ..

اجت ماما " صالحتي اخوج "

رديت " اي صالحته واعتذرت منه وسمحلي ارجع للدوام "

هزت راسها وطلعت .

قربت امتحانات جود .. بديت اراجعلة المواد ..

مر كم يوم وهذال ماعرفت شي عنه صرت اطلع من متأخرة للدوام وارجع من وكت حتى مااشوفة ..

حسيت بفراغ بحياتي صحيح بس لازم اقاوم ..

سمعت من شذر هذال راجع النسر حاجي وياه بس نسر گاله مثل كل مرة انساها لان مستحيل تصير الك ..

بعدها اختفت اخباره نهائي ..

بيوم اني بالدائرة اجت بنية متوسطة بالعمر… شفتها احس شايفتها من قبل بس ماادري وين ..

عبالي عندها معاملة او شي ..

كعدت مقابلي وحجت " اني اخت هذال "

تذكرتها " اهلا وسهلا بشنو اگدر اخدمج "

ردت " اخوية يحبج ومتمسك بيج..  حار شسوة حتى اخوج يقبل وماكو .. وفوكاها انت خذلتيه وللمرة الثانية يحب وحدة وتخذله .. حتى متغير حيل ودوم ضايج يدخل ويطلع مثل واحد ماله وجود .. من راد يخطبج كان فرحان وهو يحجيلنا عنج .. هسا رجع الحالته قبل حاولي ترجعين وياه ع الاقل بس طمنيه انت بعدج رايدته "

اتنهدت " ولو الوقت ماملائم ولا المكان .. بس هذال دخل حياتي فجأة وخربط مشاعري .. يمكن بلحظة ضعف واهتمام منه انشديت اله .. بس مو معناها اضحي بأخوية واخسره .. وسبق وان گلتله اذا يريدني يقنع اخوي .. اما غير شي فمستحيل يصير "

شگد حاولت بس تعذرت وگامت ضايجة .. جنت مقاومة الاخر لحظة حتى اضعف واتراجع ..

طلعت من الدوام صار بوجهي ليث ..

" اريد احجي وياج "

مشيت عنه " ماكو حجي بينا "

رد " اني اريدج هنا .."

ضحكت " شنو ؟؟ رايدني شنو ؟"

رد " اريد ارجعج "

ابتسمت " وشجن تدري ؟"

رد " معليج بشجن انتي بشقتج وهي ببيتها "

ابتسمت " هو اني عفتك الها لان مااحب احد يشاركني بشي خاص الي . المهم اذا تطلگها افكر بالموضوع "

رد " تردين تلوين ذراعي مووو"

رديت " ليش الوي ذراعك مو انت تريد ترجعني عادي ارجع بشروطي "

ضحك " تدرين بيه مستحيل اتركها "

رديت " انت ماكو عندك شي مستحيل .. مثل ماخنتني وياها هسا جاي تخونها وياي "

اجة مشتاق صعدت وعفته واكف ..

من وصلت خابرت نسر وحجيتله .. گال اني اتصرف وياه لا تحجين وياه بعد ..

بس الغريب انه عمو ومرت عمو اجو النفس الطلب ثاني يوم ..

نسر رد عليهم " عمي لو رايدة تبقى وياه ماجان تطلكت بعدين ليث مو بس خانها واذاها حيل شلون تريدها تعيش وياه وتنسى كل الفات "

حاولوا شگد بس كان الرفض جوابي ونسر ساندني بهذا القرار ..

بس ماما ضاجت وگالتلي " لو موافقه وبشروطج ع الاقل اولادج يربون عند ابوهم "

ابتسمت " واعيش مثل قبل وياه موووو استجدي الحب والاهتمام منه .. لو ليلة يمي وليلة يمها "

ردت " وشبيها مو هاي اخوج متزوج اثنين "

ضحكت " بس گلبه وين ؟؟ يم شذر .. حبه واهتمامه المن ؟؟ الشذر .. مو دفاعا عن هديل .. بس انتي ظلمتيهم كلهم بهذا الزواج .. مستحيل اكو رجال يعدل بالحب ..

نسر عادل بالعلاقة الزوجيه والاحترام والمصرف وغيرها بس بالحب مستحيل يكون عادل وانت تشوفيه صارلة شكد هناك يمها مااجة بات ليلة وحده هنا وهديل ماهي وحتى لو اجت بحجة حامل وحملها بخطر مستحيل يوصلها يعني راح يبقى الوضع كما هو عليه "

ردت " ابقي تفلسفي وتالي تخسرين المشيتين "

رديت " اخسر احسن مما اعيش وي شخص مثل ليث "

اعرف ماما وغايتها اولادي مايربون عند غريب هذا تفكيرها وهو نفسه تفكير عمو ومرت عمو ..

شذر :

بدأت امتحانات دنو ..

التهيت بيها مدة اسبوع تقريبا ..

جان نسر بالدوام ..

خابرني " حبيبتي لاتنتظريني اتأخر لان راح امر على هديل اجيبها من اهلها "

تذكرت هديل .. طول ذيج الفترة نسيتها عشت احلى ايام حياتي .. من دلال وحب واهتمام بكل اسبوع يجي بي يعيشيني بي وكأنه اني عروس ..

معناها راح تنقسم الايام بينا .. راح ينام يمها ويشم عطرها .. راح يسوي وياها مثل مايسوي وياي .

اول مرة بحياتي احس بالغيرة ..

ماعرفت الغير الا مرتين .. مرة من اجو اخواتي للدنيا وماما تركتني علمودهم .. وهاي المرة الثانية ..

خابرت عذورة ..

" الووووو عذورة وين انت "

" بالدوام ليش ؟"

" لج نسر حيجيب هديل اليوم "

" اي سمعت ماما تحجي وياه ع اساس الدكتورة گايلتلها الخطر زال وماعليج شي "

اتنهدت ..

ردت " شبيج تتحسرين ع الاقل انت بعيدة عنها بس احنة شلون .. الله يسامحج ماما على هاي السالفه "

رديت " تدرين جنت مااغار منها ابد اشو هسا مااعرف شبيه بس افكر "

ردت " مو جنتي عديمة احساس شسويلج متت واني اگلج حركي نفسج اكسبيه تالي لمن تزوج وانگلبت حياتنا "

سكتت لان فعلا كلامها صحيح اني السبب ومالازم اشكي او احجي المفروض اتحمل .. المهم هي مو يمي واشوفه من يروحلها يمكن ساعتها اموت ..

طول اليوم انتظر ماكو .

يأست منه .. اكيد اليوم يمها يبقى مايگدر يعوفها وفوگاها حامل بأبنه ..

لليل حسيت بالباب تنفتح ..

ركضت اباوع .. شفته دخل من الباب فرحت .. فتحت باب المطبخ وحضنته .  صرت اني اشم بي مو. هو يشم بيه ..

ضحك " هيج مشتاقتلي .. مرات والله احس روحي بحلم شگد اتمنيت هاللحظة من زمان ارجع وتتلگيني تحضنيني "

ابتسمت " تعودت عليك بحياتي الجديدة .. "

لزمني من حنكي وسحبني باسني وباس الشامة البخدي

ابد ماسالته عنها او ليش اتأخر ..

مااحب اضيع اجمل لحضاتنا بسوالف تافهة ..

من يجي واقفل باب البيت احب اكون بمنعزل عن العالم احس هالبيت جنة بالنسبة الي ..

واعز اثنين بحياتي موجودين هم نسر ودنو ..

تعيشينا وبقى يلعب وي دنو .. جايبلها هدايا ومكعبات بمناسبة نجاحها لان نجحت للرابع ..

دخلت سبحت وبدلت كالعادة وكانه عروس بليلة عرسها

هالمرة لبست اوڤ وايت ..

خليت مكياج خفيف مثل ماعلمتني هنا .. بس خليت كحل برزت بيهن فص عيني اكثر ..

لبست الروب وطلعت ..

باوعت للساعه عشرة..

صحت دنو " يلة ماما روحي نامي "

ردت " بس مانعسانه ماما "

رديت " حفتحلج كارتون بالتلفزيون واگعدي شوية الج ساعه واطفيه "

هزت راسها ..

باوعلي ضحك " اي بابا اسمعي كلام امج .. عود تنيم ابوج وترجعلج… ودور كحلة يربي شمسوي وهيج تنطيني عطايا من الجنة "

ضحكت ع سوالفة واشرتله عليها ..

همست " شبيك كبرت ترى وتفتهم "

اشرلي روحي اني افتحلها كارتون واجيج ..

رحت للغرفه اجة وراي ..

شافني تخبل..  ومثل كل مرة مايضيع حقه ابد . بس بالنسبة الي اكتفي انام بحضنة وبس لان احس بالامان واني بحضنة..  احس بالحنان الماشفته ولاحسيت بي ابد ..

وهذا الحلو بحياتنا .. انه اثنينا ننسى الدنيا من نكون سوية .. لا هو يذكر هديل او غيرها ولااني اذكر الماضي واوجاعه ..

اما هديل فكنت اعرف اخبارها من عذراء ..

" لو شايفه من وصلها للبيت ورجعلج تخبلت وصارت تبجي وتشكي الماما وتگلها صارلها ثلاث اشهر ماشايفني تالي يعوفني ويروح يمها .. و ماما تكلها مو لان انت مريضه وهي وحدها گاعدة..  ماتكدر تگلها انما الحب للحبيب الاولي "

ابتسمت " والله عندج سوالف گوليلي انت شخبارج "

اتنهدت " زينة اخر الاخبار اجتي عبير اخت معتز المتزوجة هنا ماادري شذكرها بينا .. واجت "

عذراء :

ارجع من الدوام تعبانه .. طول النهار واكفه ع رجلي بالمختبر تحاليل ماتخلص ومراجعين هواي..

كل كم ساعه يجي حسام يطمأن عليه رغم صار شهر مداومة بس مايترك هالعادة ..

لو يجيب كوب جاي او گهوة الي ..

ومرات يحاول يعزمني ع ريوگ وارفض ..

احسة يحرجني يم زملائي .. سبق وان گايلتلهم يصير ابن خالي .. ورغم كلهم يمدحون بي وبأنسانيته وي المرضى الا اني ابدا مااستلطفه ..

رجعت للبيت تعبانه تغديت ونمت ..

للعصر گعدتني هنا .

" گومي اجت عبير بنت خالو علي تريدج "

فتحت عيني " يا عبير ؟"

ردت " اخو معتز "

ماادري ليش توترت من سمعت اسمه " شذكرها بينا ؟"

گمت غسلت وسلمت عادي ..

ماما يمها گاعدة ..

طلبت نكعد وحدنا نحجي ..

اشرت ماما للبنات وگامن ..

باوعتلها " عبير اذا جاية بخصوص معتز لاتحجين "

ردت " اسمعيني بس .. انت اكثر وحدة تعرف معتز شكد يحبج ولو مامجبور ماسوة هيج ؟"

رديت " وشنو الجابرة هاااا الا يطلع المانيا يگدر بأي طريقه يطلع وخاصه هم متعرضين التهديد ومحاولة قتل يقدم لجوء .. بس هو اختار الطريق السهل وكذب عليه وماگالي خله مريم وغيرها تتشمت بيه "

ردت " عذراء انت من البدايه رافضه يطلع الالمانيا هو انت تركيا ماقبلتي ترحين الا يم اهلج بعد شلون يقنعج"

ضحكت " عذر اقبح من فعل .. عبير لاتبررين اليحب يسوي المستحيل الحبيبه مو يخليني عايشة بوهم ويروح يتزوج اجنبية "

ردت " لا عذراء گولي حسام سمم عقلج عن معتز وخلاج تتركيه "

رديت " يا حسام شبيج هو اني وين شايفته بعدين من داومت وياه لليوم مافتح موضوع معتز ..اخوج مايعرف يتصرف صار يتهمني بالتقصير ويتهم حسام وبعد الله العالم المن يتهم .. لج اني نطيته ذهب النيشان كله وذهبي الخاص حتى يشتغل بتركيا وبعدها يرجع نتزوج بس هو اخذهن وراح تزوج بيهن واهلي لسا مايدرون بهذا الحجي .. بعد شلون ترديني بعد اثق بي "

ردت " زين هو يريد يحجي وياج ع الموبايل شلون ؟"

رديت " مااريد اسمع صوته .. اعذريني .. والمرة الثانية اذا تردين تجين يمنا تتونسين اهلا وسهلا بس اذا علمودة لاتجين احسن لان تتعبين "

حسيتها ضاجت وطلعت وماما تسألني شسويتيلها وطلعت زعلانة .. حجيتلها سكتت ..

احس لسا غصه بداخلي بسببه .. كلما اتذكر دمي يغلي ..

شذر :

كل شهر انتظر وتالي اتفشل وماكو حمل .. قررت اروح للدكتورة اشوف وضعي ..

خابرت خالة ..

" هلو يابذات ليش متسألين عن خالتج "

رديت " والله خاله مشتاقتلج واريد اشوفج بس انتي ببيت خالو وتدرين بخالو وموقفه.. "

ردت " شوفي الجمعه الجاية نروح اني وبنات سعد ننظف بيت اهلي .. لان متروك صارله اشهر . شتگولين تجين يمنا وهم نشغلج ويانا "

ابتسمت " ياليت بس وخالو ؟"

ردت " ماهو عندة بضاعه بالميناء من البصرة يروح يجيبها يبقى كم يوم هناك يلة يجي هو وعمج عامر"

رديت " اشوف نسر وارجعلج خبر .. خابرتج علمود شغله ثانية "

ردت " گولي "

رديت " اريد دكتورة زينة نسائية "

ردت " بس لا حامل "

اتنهدت " لا وين هاي صار كم شهر كلشي ماكو "

ضحكت " وليش ضايجة ناس اكو سنين ماعندها تبقى المهم خليني اسألج منو دكتورة زينة واحجزلج ونروح"

رديت " اي ياليت والله "

نسر صار دوامة ببغداد كل يوم استراحة ويوم دوام .. وهاليومين يتقسمن بينا .. رغم يخلص يوم ونص يمي ويروحلهم المغرب يبات ويروح للدوام مناك .. بس تبقى هالليلة الها اشتياق خاص..

ابقى متلهفة لليلة اليبات يمي بيها ..

ابد مااحب انكد او اضوجه لان هذا حقها رغم هي عدت نص مرحلة الحمل وحسب ماسمعت ماتقبل تراجع او تاخذ سونار خاف يطلع بيها بنية ..

بيوم الخميس حجيت وي نسر :

" حبيبي باجر عمة تروح البيت جدو هي وبنات خالو ينظفوه ورادتني وياها "

اتنهد " اني ماامنعج من خالتج بس تعرفين الوضع وخالج "

رديت " خالو ماهو يروح للبصرة "

رد " بكيفج روحي بس اذا سوو شي لاتبقين اطلعي بسرعه لاتخلين بالي مشغول "

رديت " يعني تتوقع خاله تخليهم يأذوني ؟"

رد" ادري بيها تحبج"

سكتت وبعدها كملت .. وهو جان مندمج بشعري يتلمسه ويشم بي ويحاول يمهد للوضع ..

" واكو شغله ثانية بعد "

اتقرب الرگبتي ورد " اممم شنو "

" اريد اروح للدكتورة "

سحب وجهة بسرعه وباوعلي " شبيج مريضه ؟؟"

رديت " لا بس اريد اراجع "

رد " كلشي رزق بيد الله ليش توهسين .. شفتي مرة انطانا من اول ليلة وهالمرة اتأخر .. يريد يختبرنا .. بعدين هو كم شهر صارلج ليش هيج ضايجة "

رديت " ليش مو من حقي ؟"

رد " من حقج والله وامنيتي اشوف بيتنا مليان جهال منج بس مااريدج تضوجين وتفكرين"

رديت " هي بس مراجعه واجيك نفسي عليمن اضوج "

رد " بكيفج حددي اي يوم واخذج "

رديت " خلي تحجزلي خاله واگلك "

لليل راح نسر لهناك .. گعدت لفيت دولمة لان سمعت خاله گالت نبقى للعصر ينظفن واكيد ماكو اكل ..

وثاني يوم گعدت من الصبح خابرت خاله گالت قبل العشرة نروح ع كيفنا .. گعدت دنو بدلتلها وجهزت الدولمة والخبز .. وطلعنا البيت جدو تقريبا بالتسعة ونص ..

دنو وياي ودنمشي وصلنا قريب البيت شفت بنات يمشن ووياهن ولد اتقربن نزلت خالة ووياها بنات اثنين .. ووياهم ارشد

تقربت منهم التفتت خاله ..

" هلاو حبيبتي "

بوستني وبوست دنو .. صاحت ..

علا .. تقى .. هاي شذر ..

شهگوا من شافوني .. عمة تشبهج حيل ..

سلمت عليهن ورحبن بيه مبينات حبابات ..

شافني ارشد ابتسم ..

" شلونج شذر دائما اوصلج سلام يوصل لو لا "

رديت : " الحمد لله اي سلام ؟"

رد " بس لا زوجج مايگلج دائما من امر للمحلات اشوفه واسلم عليه واگله وصل سلامي البنت عمي "

ابتسمت " اي يوصل "

رغم ابد مواصلي سلام .. اعرفه يغار ومستحيل يگلي ارشد يسلم عليج ..

دخلنا للبيت ..

گال ارشد " اني رايح تردون شي ؟؟"

ردت خاله " لا عمة مشكور عطلناك عن شغلك بس شسوي السعد وسوالفه يخاف نطلع وحدنا "

راح ارشد وبقينا بالبيت

نظفناه كله واني وياهن كملنا من وكت ..

طلعت گدر الدولمة .. ضحكت خاله وباوعت للبنات

" هااا شگلتلجن "

ردت علا " طبعا عمة خابصتنا بيج .. كلما نشتغل وگالت باردات بالشغل لو شايفات شذر نار وشرار .. واذا سوينا دولمة .. گالت مو مثل دولمتها تخبل "

ابتسمت " الدولمة هاي وصفتها مو الي العمة خديجة هي علمتني عليها .. ولو اضوگجن دولمة اللبن جان تعجبتن ع طعمها "

سوينا الدولمة طبخناها .. بعدها صبيناها بالصينية راحت خاله جابتلنا لبن من المحل ..

كان يوم حلو .. اعيشة مع جزء من عائلتي .. بنات خالو سعد حبابات حيل .. صح مايشبهن خالو بالشكل يشبهن امهن بس المهم اطباعهن ماتشبهة وطيبات حيل ..

قهرني خطية وهن يحجن عن طبعه .. حارمهن من كلشي .. لايخليهن يطلعن ولا عندهن موبايل من المدرسة للبيت..  بحجة يخاف عليهن ..

يمكن امي مسويتله عقدة نقلها بتعامله وتربيته البناته

خلص النهار بسرعة وياهن ..

طلعنا اجه ارشد خابرته عمة اخذهن ..

واني رجعت للبيت…

مااكتفينا بهذا اليوم بين فترة فترة وكلما يرحن للامام او اي مكان تخابرني خاله ونلتقي ..

مرة خابرتها اسأل عليها گلتلي رايحة للامام .. بس ماگالتلي تعاي ..

حجيت النسر .. گال ليش باقية وحدج بالبيت روحي يمهن وزوري .. اوصلج اني وبعدين ارجعلج بالليل نرجع سوة ..

رحنا للامام دنو مو وياي بيومها ماخذها الاهلة يم فروحة هناك ..

وصلني وراح.. 

بقيت ادور عليها ماكو وجهازي مخليته بالامانات تعبت ..

گلت خلي ازور بلكي الگيها ..

زرت الي والعمة متعودة كلما ازور اطلع وارجع ازورلها

رحت المكان الصلاة اصلي ..

لفت انتباهي مرة جبيرة گاعدة على كرسي متحرك ..

بقيت اباوعلها واريد اتذكر وين شايفتها… بس بالصدفه انتبهتلي ..

اني دنگت بسرعة عنها ..

بس هي مانزلت عينها مني ابد .. اشرت لبنية يمها صغيرة تصيحلي ..

اجت البنية ..

" بيبتي تصيحج "

" سويت نفسي مامنتبهة "

" هااا منو بيبيتج وشتريد "

اشرتلي عليها باوعتلها..  اشرتلي بيدها ..

وتهمس " تعاي اگلج "

احس گلوبنا تحجي مو عيوننا .. عيونها بدن يلمعن كلما تقربت منها ..

وصلت الها .. سألتني ..

" انتي منوووو .. تعرفيني ؟"

بقيت اباوعلها ونزلت دموعي .. نفس الملامح ونفس الشكل الي شفته .. اي هي .. هي الجانت بينا خطوات وماالتقينا .. هي الي ماخلوني اوصللها خافوا عليها مني

احسها عرفتني بس تريد تتأكد .. گلبها رف بس ماتگدر تحجي .. خافت تنطقها "

مسحت دموعي وردت امشي ..

صاحت وراي بتساؤل  .. انتي بنت عادل ؟

غمضت عيني واحس گلبي ينزف ..

ماگدرت انطق بس عيوني تجري.. هزت راسها اي انت بنت عادل .. تشبهين سماهر وسماح انت هي موووو گولي انت بنتهم گولي ..

رديت " واذا گلت شيتغير ؟؟ گلبج هذا الرف عليه وعرفني راح يحن عليه لو يحكم عليه بالهجران مثل غيره "

شهگت وصارت تنحب وتون ..

اووووف تعاي ابوسج واشم ريحة الما بار بيه ..

نساني وجازاني بالهجران بلكي انت احن منه عليه ..

ماصدگت احد منهم فتح حضنه الي .. ارتميت بحضنها مثل العطشان وشاف ماي گدامة.. 

صارت تبجي واني ابجي .. احس النسوان كلها تباوعلنا

اجن عماتي تخبلن من شافني ..

" شتسوين هنا ؟؟"

سكتت مارديت .. بيبتي احسها تخربطت ..

سحبتني عمتي نرجس .. " هاي سوالف سماهر بس هي تعرف بينا هنا .. طبعا عليمن تطلعن منو اختها .. اذا وصلتي الامي بعد نحجي العامر وهو يتصرف وياج "

اباوعلة تجر النفس بالگوة وتگلهن وين راحت ولجن ..

ترد عليها .  " راحت يمه راحت منين تعرفيها انت "

ردت " ولجن هاي بنت عويدل "

ردتهـا " بعدج تفكرين بيهم يمة عادل مات مات انسيه كافي "

ردت " لا ولجن مامات اني احس مامات وهاي ربجن مااطول دعائي دقايق وجابلي بنته الحد عندي "

طلعت مهضومة وابجي ..

مفهميها ابوي ميت .. يالله شلون حضن دافي عليها بس عماتي ليش يسون هيج وياي ليش يحرمني منها ..

طلعت وخابرت خاله ..

ردت " هااا شذر شلونج  "

رديت " ليش ماكلتيلي هي وياج حتى مااجي ليش ؟"

ردت " وج هي منوووو شبيج "

رديت " بيبيتي "

ردت " وين شفتيها شوكت اجيتي وشلون عرفتيها اصلا ماببالي اگلج والله خفت عليها وماعبالي تجين اصلا .. "

رديت " شفتها مرة بالفاتحة مال بيبي وتذكرتها بس لو شايفتها خاله شلون رف گلبها عليه وعرفتني بسرعة بس المايخافن الله منعني منها وبعدني "

ردت خاله " سديه ولاتبجين بعدين اخابرج راح ندخل للامام هسـا يله وصلنا "

سديته منها ومشيت حتى مافكرت اگلها اني بباب الامام طلعت من مهضومة ومكسورة خاطر اريده هو الياخذلي حقي ..

خابرت نسر ابجي..  تخبل " شبيج منو وياج "

رديت " رايحة للبيت اني "

رد " جايج هسا "

#بقلمي_شمس_السعدي

يتبع…… ..

اسعد الله اوقاتكم بكل خير احبتي ❤

///// البارت اربعة وستــون /////

#قوارير_من_فضة ج2

#بقلمي_شمس_السعدي ..

وصلت للبيت مهضومة .. بالي يم نظراتها وگلبها الرف عليه ..

صح الي سوه اهلي ماينغفر .. بس اني شنو ذنبي اتحمل ذنبهم ..

دخلت البيت .. دقايق واجة نسر ..

" شكو شصار من وياج ؟"

رديت " شفت بيبيتي ام ابوية هناك .. تدري گلبها رف عليه عرفتني بسرعه من غير مااحجي حضنتها ومااحجيلك عن الحنان العندها .. بس عماتي سحبني منها وحرمني .. تدري هددني اذا اوصللها يحجن العمو عامر يهددني بي "

تخبل من سمع نسر " وانتي اصلا ليش رحتيلها شعليج بيهم گلبج هذا شوكت يقسى فهميني كم مرة گلتلج انسيهم خلينا نعيش حياتنا مادام اهلج عايشين مستحيل ينسون وراح يعاقبوج الج "

رديت " مو بيدي والله مو بيدي كلما اكول ابتعد الله يخليهم بطريقي "

گام من مكانه بسيطة اني اتصرف ..

رفعت راسي " وين رايح "

رد " بشغله مااطول وانت لاتبجين كافي محد يستاهل دموعج .. اليبيعج بيعيه .. ليش تدورين حبهم وحنانهم ليش حبي مايكفيج ؟؟ لو مقصر عنج بحناني ؟؟"

رديت " لاتگول هيج .. حبك ماكو منه "

دنگ عليه " اويلي يابة اخذي شگد ماتردين مرخوص الج گلبي وحبي وكلشي بيه "

ابتسمت..  اخذ المقسوم وراح ..

لليل اجة جاي اسوي عشا .. اشرلي " طفي الطباخ جبت عشا وياي "

هو دخل يسبح ويبدل . خابرتني خالة ..

" هاا شذر ماگدرت اخابرج جانت الدنيا مگلوبه "

رديت " ليش شنو الصار "

ردت " مو اني ماسكتت وحجيت عليهن .. وتهمني اني الگايلتلج .. ووصلتها العمي رزلهن هم وگالهن مو من حقجن تطردنها هي بالامام مو ببيتجن ومادام امجن عرفت ليش تأذنها وتحرمنها منها ..

ودور عمتي تخربطت والتهينا بيها "

سألتها " وهسا شلونها ؟"

جاوبت " احسن بس ضغطها ارتفع .. ودور زوجج كملها"

استغربت " ليش شسوة ؟"

ردت " اجة البيت جدج والتقى بجدج وعمامج وحتى سعد جان موجود .. گالهم العندة شي يروح الابوها وياخذ حقه منه .. مرتي بوصايتي هسا الي يمسها يمسني والي يمسني مااسكتله واخذ حقي منه مربع "

ابتسمت " يعني نسر هيج حجة وشكالوا ؟"

ردت " شگالوا خالج وعامر ماقبلوا ورادوا يحجون بس جدج سكتهم وگالهم البيت مفتوح الها .. شوكت ماتريد تجي ومحد يتنفس وياها "

اتنهدت " مااريد اروح بعد جربتهم كم مرة وجرحوني بعد مااذل نفسي الهم "

ردت " الزمن كفيل يغيرهم ويحننهم عليج "

سديته من خالة ورحت شفته يبدل ..

اتقربت منه وابتسمت .. وين رحت بعد ماطلعت مني ؟"

باوعلي " خابرتج خالتج ؟"

هزيت راسي ..

اتقرب مني " الي يأذيج يأذيني ومستحيل اسكت عن اذيتي .. خلي يعرفون وراج ظهر مو ياهو الاجة وصار رجال براسج .. قسما بالله اذا سكتت العمج ذاك فبعد مااسكت بيهم حظ خلي يروحون يحاسبون ابنهم مو يحاسبوج "

تعشينا وكملنا روحي صارت بدنو .. رحنا جبناها ..

سمعنا البنات فارشات بالحديقه وكاعدات .. وبيداء هم يمهن .. اصرن انزل يمهن ..

گعدنا كلنا بالحديقه سوالف وضحك .. اجت خالة يمنا

" شلونج امي صرت اسمع اخبارج من البنات ليش متسألين عليه معقولة بعده گلبج شايل مني "

رديت " لا خاله مستحيل اشيل عليج بداخلي وذاك البيت هم بيتج بأي وقت تردين تجين هلا بيج "

ابتسم نسر وغمزلي ..

بقت شوية وراحت لان متعودة تنام من وكت ..

گام نسر دخل جوة ..

شوية وطلعت هديل .. بطنها كبرانة وضعفانه متغيرة حيل ..

شافتني لزمت بطنها وظهرها وتمشي على كيف ..

" لمة خير .. اشو متجمعات كلجن "

ردت عذراء " ليش حرام ؟"

ردت " لا عمي حلال بس جان صحتني يمجن .. يعني لو ما نسر يجي يگعدني ويطمأن عليه وعلى ابنه جان مادريت .. اووووف الحمل متعبني حيل .. انت شلونج شذر "

رديت " زينة الحمد لله .. الحمد لله على سلامتج سمعت وضعج مو تمام "

ردت " اي والله يمكن عين صابتني بس هسا الحمد لله ماكو بعد خطر "

طلع نسر بيده اوراق ..

شافها " هاا هديل شلونج هسا سألت امي عليج گالت نايمة "

باوعتلنا وانحرجت .. " زينة الحمد لله "

ابتسمت هنا " انت وين رحت  ؟"

رد " جبت ذني الاوراق بغرفتي فوگ باقيات مال ترقيات مالتي محتاجهن "

هي بسرعه استأذنت ودخلت ..

اشرلي " ترحين لو بعدج "

رديت " يله خلينا نروح "

طلعنا من البيت ودنو وياي بعدنا بالباب سمعنا صوت خاله ..

ركض نسر للبيت دخل واني وراه ..

شفت البنات يتراكضن للبيت ..

دخلنا هديل متمددة وسط البيت ومغمي عليها..

صاح نسر " جيبن مي بسرعه "

طلعت هنا مي من الثلاجة اخذ بيده وطش بي وجهها شهگت وفزت من برودته ..

بقت تون ..

سألها " شبيج ؟"

ردت " ماادري شبيه دخت جنت كلشي مابيه اشو فجاة دخت"

رد نسر " شتحسين اخذج للمستشفى ؟"

ردت " لا بس انام اصير احسن .. لاتخاف عليه وعلى ابنك "

باوعلي هنا وعذورة وضحكن ..

خاله صارت تحجي عليها وگالتلها " شعندج طلعتي مو گلتلج نامي لو الا تهبطين گلوبنا يلة ترتاحين "

ردت " لاتخافين خاله اني وابني بخير هي دوخة بس "

طلعت وعفتهم دنو بقت برة خافت تدخل ..

اجت عذراء وراي " ام عيون الملونة حسدتها .. اوووف ياشذر عيونج الليزر مو مثلهن…

بس اخذتي نسر وطلعتي تخربطت البنت فجأة "

ابتسمت " بطلي سوالفج كافي "

اجة نسر اشرلي طلعنا ..

بالطريق صافنة لزم ايدي " اعرف تريد تغيضج وتتحايل"

رديت " تقصد منووو ؟"

رد " هديل "

رديت " لاتهتم ماادير بال الهيج سوالف "

ابتسم وسحب ايدي باسها ..

بعد ماشافت لي خاله دكتورة حجزلي نسر واخذني الها .. 

اخذتلي سونار وسوتلي تحاليل ..

گالتلي رحمج نظيف بس عندج التهابات راح انطيج علاج ومنشطات ويوم 13 تجيني ..

التزمت بالعلاج مثل ماگالتلي ويوم 13 رحتلها .. سوتلي سونار ثاني .. ونطتني ابرة اخذها وگلتلي باجر بالليل يلة يتقربلج ..

بيومها وسويت حصار عليه .. وكل شوية يدعي ع الدكتورة لان حرمته ..

ثاني يوم المفروض يكون عند هديل لان يومها .. بس ماراح علمود كلام الدكتورة ..

خلص النهار يمهم وبالليل رجع .. بس ابد ماخلتها النا كل شوية تتصل ..

وينك

شوكت تجي

غير هي ليلتي ..

اخر شي غلق الموبايل يلة ارتاح .. النهاية الشهر كنت متحمسة .. بس للاسف ماكو شي ..

نسر واساني " لاتضوجين ع الشهر الجاي ان شاء الله يمكن بسبب توترج وحالتج النفسية ذيج الليلة وهم اتصالات هديل اثرت الهيج ماصار "

رديت " لا نسر هديل او التوتر شعليه هو كلشي بقسمة الله "

رد " وهاي انت گلتيها كلشي بقسمة الله "

كانت الشهور تمر بطيئة بالنسبة الي .. وكل راس شهر اتأمل وتالي يخيب املي ..

حتى صرت استحي وي نسر ع سالفه الجدول لان كل مرة احرجة اما يصادف بيوم ليلة هديل او بيوم دوامة ويضطر ياخذ اجازة بالليل ويرجع او يستبدل يومه بغير يوم ..

بطلت احجي بالجدول وخليتها ورى الله ..

لاحظ نسر وسألني ..

" اشو هذا الشهر مارحتي دكتورة ؟"

رديت " الدكتورة گالت ماحاجة تجين استمري ع نفس العلاج والطريقه "

بس بالحقيقة اني فضلت هيج لان صرت اخجل كل شهر يتأمل وياي وماكو شي ..

من بعد هالاشهر ..

اصرت خاله انه تاخذ هديل للدكتورة تشوف وضعها وخاصه هي دخلت بشهر السابع وماتعرف شي عن حالتها ..

من اخذتها للدكتورة هنا گالت رجعن اثنينهن ضايجات

سألتهن ..

" هااا بشروا ؟"

ردت امي " بيها بنية وتگول زينة الدكتورة انطتها علاج وحددتلها موعد ثاني "

رديت " المهم الطفله زينة الحمد لله "

باوعتلي هديل " ع اساس كلش مهتمة للطفله… يلة اركضي اركضي الصاحبتج بشريها وتشمتن بيه "

هزيت ايدي " انتي شبيج شنو هالاسلوب .. شنو تتشمت لاتنسين هالطفله بنت اخوي يعني من دمي اذا مااخاف عليج فأخاف عليها .. وشذر مو مثلج لليوم ماحجت عليج .. رغم انت الاجيتي عليها واخذتي زوجها "

اشرتلي ماما اسكت ..

ردت هي " كل مرة تعيدنها .. هسا اني شنو شايفه منه اشو جانت ماتريدة وماتخليه يوصللها من اجيت اني حله بعينها واخذتة مني وماكفاها السوته .. طلعته من البيت نهائي ويجيني مثل الخطار ويروح هم حاسبته زواج هذا "

رديت " والله محد جبرج شمتوقعه مثلا من اخذتيه عن شرك .. "

عفتها ومشيت وهي طلعت ضوجتها بيه صارت تبجي وتلطم ..

شذر :

من عرفت جنس الطفل .. حبيت اسوي جهاز طفله الها اخذت رأي نسر ..

ابتسم " الي يريحج سويه مادام طالع من گلبج الطيب"

حسيتها تطلع تشبه دنو ..

دنو من عرفت فرحت " يعني حيصير عندي اخت صغيرة وتجي لهنا تلعب وياي "

ضحكت " حبيبتي راح تصيرين اختها الكبيرة تعلميها وتلعبين وياها .. "

اتنهدت " يمكن تسوين الماگدرت اسويه وي اخواتي ..

نفس فارق العمر بينا "

جدو كم مرة موصي نسر يجيبني الهم ..

بس ماقبلت اروح .. تعبت واني استجدي منهم الحنان وتالي الكل ينظرلي نظرة حقد ..

اخر شي حاجاني نسر ..

" شذر صرت استحي من جدج بكل مرة يگلي جيبها وتعال واني اتعذر .. روحيلهم بس مرة وحدة ع الاقل "

اتنهدت " بكيفك شوف اي يوم ونروح "

رد " جدج مسوي ثواب وعزمنا الخميس شتگولين "

هزيت راسي وسكتت ..

واجة اليوم الموعود ..

كنت مترددة اروح بس نسر طلب مني اروح واواجه الكل مادام جدي وبيبيتي هم الطلبوا يشوفوني ..

اول مادخلنا طلع ارشد ووياه بعد اثنين ولد سلموا ..

اشرلي ارشد ..

ذولي اخواني احمد ومحمد

سلمت عليهم بعدها طلع رجال كبير ..

اشرلي ..

وهذا ابوية عمج علاء ..

سلمت عليه رد عادي ..

بعدها دخلوا نسر للاستقبال واني للبيت ..

جانت گاعدة بالصاله وعينها ع الباب .. شافتني ابتسمت مثل الطفل من يشوف امه دخلت عليه ..

رحت ركض حضنتها وبستها .. لزمت ايدي

" يعني انتي قريبه يمي وماتجيني .. وجايه بفاتحة بيبيتج وماادري .. تمرضت من شفتج لسا هسا يلة صحيت وشگد طلبتج وگالوا ماتجي ..

قابل شأريد منج بس اريد اشوفج ..

اتنهدت " مااريد اجي المكان مامرغوبه بي .. "

ردت " ومنو ماراغبج غصب ع الكل تجين هذا بيت جدج السواه ابوج وامج انت مالج دخل بي ..

صدك احجيلي وين عايشين وعدج بعد اخوة ..

هزيت راسي " عندي اخوات توأم .. عمرهم 16 سنه حاليا "

فرحت " صلوات .. واهلج وين هسا "

اتنهدت " ماادري لان اني متزوجة من زمان ومارايحتلهم ابد "

ردت " ليش هم الگطعوا بيج لو انت الگاطعه "

اتنهدت " هم الگطعوا بيه ونسوني .. مثل ما الدنيا كلها نستني "

دخلت خاله . احس روحي رجعتلي ..

تخلصني من النظرات الي تحدق بيه كل شوية ..

سألتني " شلونج امي بيبيتج خبصتني بس تسأل عنج"

ابتسمت ..

صاحت بيبي " وينجن امي جيبن البنت عمجن ماي جاي .. "

رديت " لا مااريد ماعطشانه "

اجت هاجر شايلة بنتها صغيرة بس تخبل .. انطتها الامها وراحت حتى ماسلمت ..

ولا عبالك بنات عم يباوعن مثل الغريبات .. الحلو ببيت جدو كلهم ببيت واحد ..

يعني ارشد وهاجر جانوا عايشين بنفس البيت واتزوجوا بنفس البيت..  امهاتهم اثنينهن سوة ..

ارشد طلع اكبر مني بسنه يعني مو كبير وهاجر اصغر مني بسنتين .. بعد عندها اخوات ثلاثة اصغر وحدة بالابتدائية نفسها الشفتها وي بيبي بالامام ..

حسب ماسمعت من خالة .. جدو مقرر يزوج كل وحدة من بنات عمو عامر الولد عمو علاء ..

صبوا العشا وبيبي كلما اشيل راسي اشوفها تباوعلي وتبتسم ..

بس جو البيت كئيب ردت بس يخلص العشا واطلع حتى خاله ماحجيت وياها .

عبالي اشوف علا وتقى بس خالو من عرف عازميني ماجاي زعلان ..

مااعرف ليش يكرهني الهذي الدرجة ..

من طلعنا سلمت ع بيبي حضنتني وهمست بأذني ..

" لاتحرميني من شوفتج بأخر ايامي .  " كسرت خاطري ..

طلعت وطول الطريق ساكته .. همس " شبي الحلو ساكت بس لا احد مضوجه "

باوعتله " لا مابيه بس نعسانه "

رد " هسا اخليج بحضني والوليلج ونامي "

ابتسمت " ودنو نسيتها "

رد " ماتخليها اليوم يم البنات "

ابتسمت " هي ماترتاح اذا مو يمي وبفراشها اعرفها "

رحنا اخذنا دنو ورجعنا للبيت ..

خابرة عمة بنص الطريق ..

حجة وياه ..

ياشيخ ؟؟

وشوداه ؟؟

شمعرفـة بيهم ؟؟

يصير خير ان شاء الله. 

كمل مكالمته .. ماحجيت مو من طبعي اسأل الا اذا هو حجة من نفسه ..

من وصلنا ردنا ننام .  فتح ايده نمت بحضنة..

گال " تعرفين هذا الخطب هنا قبل كم شهر ؟"

رديت " اي اتذكر شبي "

رد " اليوم ماخذ ناس ورايح الشيخنا ومحاجيه على هنا "

رديت " شنو ذكر هسا صارلها السالفه هواي "

رد " ماادري .. قبل فترة سمعت مترقي المنصب اعلى وتعجبت اكو ناس تمدح بنزاهته .. ماتوقعت هيج شخص يطلع نزيه "

رديت " مرات المظاهر خداعه ..  مو كل شخص سئ بنظر الناس معناها سيئ من الداخل .. "

رد " وهسا شلون ؟ احتاريت بي كم مرة رفضته ورجع وبعد ماكلت خلص نسى السالفه رجع هسا شذكره معقولة هنا عندها علم"

رديت " مستحيل هنا وعدتك وتخاف على زعلك مااعتقد تعرف بس جايز الرجال عندة اسبابه او مشغول بسالفه المنصب الجديد الهيج اجل الموضوع "

رد " المشكلة عمي يگلي نمشي باجر الشيخنا ونگله ماعندنا مرة وماننطي واني اتخبل ولا واحد يفرض رأيه عليه "

رديت " روحوا باجر وشوف شيگول والله كريم "

هنا :

بعد مانهيت كلشي وي هذال .. ومن بعد اشهر رجعت شفته مرة ثانية بمكان ماكنت متوقعته بدائرتنا جاي مع لجنة تفتيشية بس شنو موقعه ماعرفت ..

اسمع البنات وهن مخبوصات ويكولون ولجن هذال ابو النسوان اترقى. .

ردت اسيل " لا عيني يگولون متغير بعد مايباوع الوحدة ومايشيل عنه .  ع اساس خطب وراح يتزوج عمي هنيالها الاخذته وگدرت تاخذة .."

كنت استمع بصمت الكلامهن .. معناها خطب وراح يتزوج الله يهنيه .. ضحكت بأستهزاء على نفسي ..

كلهم نفس الشي ابد ماكو احد يحب وينتظر ويحارب .. المشكله من شفته ابد ماباوعلي "

ضجت بيومها حيل لعد وين ذاك الحب والكلام والاهتمام معقولة كله مجرد وهم وكذب ..

رجعت للبيت ضايجة منه حيل .. مو لان خذلني وانما لان عشمني بيوم بكلام طلع كله كذب ..

بعد يومين الصبح خابزتني شذر ..

" دريتي هذال رايح الشيخكم ؟"

رديت بأستغراب  " شعندة ؟"

ردت " عليج "

رديت " متأكدة ترى سمعت خاطب وراح يتزوج "

ردت " شبيج والله حتى عمج معترض "

رديت " ونسر شگال "

ردت " حاير اليوم يرحون ويشوفون شيگول شيخكم بس انت سوي نفسج متدرين ولتحجين الاحد "

رديت " لا المن احجي "

طلعت للدوام وكالعادة شغل وهوسة ..صارت وحدة گبالي باوعت هاي شجن .

استغربت..

" خير شجابج ؟"

" اريد احجي وياج "

رديت " ماعندي شي احجيه روحي منا "

ردت " ماااخرج هن كلمتين حتى لو جوة بالحديقه "

نزلت وياها للحديقة مال دائرة..

التفتت عليها " شعندج گولي ؟"

ردت " شتردين منا ؟"

رديت " شريد مثلا هو منو يمكم "

ردت " لا تغشمين نفسج .. اعرف بعدج حاقدة عليه وتردين ترجعين الليث بس حتى تغيضيني "

ضحكت " منو گلج ارجعله لو يبقى بس هو رجال مااخذه "

ردت " لعد كلام ابوه شنو البارحة . اني سمعته خابره وگاله نروح باجر تجيب سيد وترجعها .."

رديت " متوهمة "

ردت " لا مو متوهمة لان واجهتة وصار يقنعني بكلام فارغ .. انت بعد تركتيه ليش تردين هسا تخربين زواجنا"

رديت " ومن اخذتيه مني ماخفتي تخربين زواجنا "

ردت " وانت تردين تسوين وحدة بوحدة "

رديت " لا طبعا مااحب احد يشاركني بشي ملكي لو اريد ارجع ماتطلكت اصلا "

ردت " انت ماتعرفين هالحب شخسرني .. خسرت اغلئ شي ممكن المراة تحلم بي .. ويمكن هذا بسبب دعائج علينا "

رديت " وشنو خسرتي مثلا .. اشو اخذتيه من صديقتج الوحيدة ومن اولاده وبيته بعد شنو الخسرتيه "

ردت " خسرت الاطفال .. علمود هالزواج يبقئ بالسر وعلمود هو مايريد اطفال هسا اني حرت شسويت وشگد اخذت حبوب الى ان دمرت نفسي بيدي .. صرت هسا اتمنى الطفل . انتي طلعتي كسبانه بولدج ع الاقل تركيلي ليث يعوضني .. هنا ع اساس اطلع للخارج اتعالج وبسبب الصار اجلت رحلتي .. خايفه اروح وارجع الگيكم متزوجين "

رديت " انت غبيه .. صدگتي بي ومشيتي وراه مثل العمية .. ليث اناني يحب ياخذ ماينطي .. كم مرة طلب مني انزل اولادي او انطيهم وكنت ارفض لان هو بطبعه يحب يكون حر .. الاهم عنده يطلع ويتونس ويحقق طموحاته .. اليوم هو حسب مااسمع اعلامي ناجح .. انتي شنو الحصلتيه ؟؟

خسرتي صديقتج وشبابج والاطفال .. على شنو فهميني

ردت " لاتحاولين تقهريني .. ليث يحبني حب اعمى عمرة مازعلني مدللني مهتم بيه .. نسافر ونتونس بس بسبب ابوه وبسببج راح تتغير حياتنا "

گمت من يمها " تعبتيني شجن .. جاي اگلج ليث مستحيل ارجعله اطمأني وعيشي وياه وتونسي مايهمني .. واصلا اني على وشك زواج اطمأني "

تركتها وگمت ..

مااعرف ليش انقهرت عليها .. حسيت بكسرة بداخلها

شلون حبيت هالانسان اني ..

اصلا واضح للمقابل شلون اناني .. احمد الله واشكرة انه ماسمعت كلامة بخصوص اولادي ..

لليل اجة نسر ..

طلب يشوفني اني وماما..

دخلنا للاستقبال ..

فتح الموضوع

" اليوم دز علينا شيخ العشيرة..  ومن رحنا طلع الخطبج قبل فترة جايب شيوخ وسادة ورايحيله ..

وطالبيج من الشيخ ..

والشيخ يگول سألت عليه وعلى ناسه وعمامة يگولون خوش ناس . 

صح الرجال عندة سوالف قبل بس بالحلال .. وهو حالف انه اذا تزوج وگدام هالشيوخ والناس الاجاويد وطلعت عليه شغله مو زينة ساعتها يتگاوم ..

واكو سادة كافليه گدام الشيخ وهو خلاني امام الامر الواقع..  وحولت هالامر الج ..

الرجال مبين شاريج .. بقت الشغله يمج توافقين تتحملين مسؤولية اختيارج .. وبالحالتين اني وياج .

رديت " الصراحة اني نسيت السالفه يعني ماادري "

رد " فكري وانطيني الجواب الشيخ منطيهم مهله اسبوع ويرجعلهم الخبر .. وگالي اذا وافقت اجيبه واخليه يتعهد يصونها ويحافظ عليها "

سألت ماما " وعمك شگال "

رد " عمي مثلي انحط امام الامر الواقع كلما يرفض يطلعله الشيخ بسالفه صفح ..  بس من طلعنا گالي احجي وياها ترفض ..

واني گلتله الرأي رأيها شتقرر اني وياها .. ومادام الرجال شاريها ومتمسك بيها اكيد راح يصونها ويصون اولادها..

ترك نسر الامر الي .. حتى ماما هالمرة سكتت وكانه مقتنعه ..

جمعت اخواتي وخابرت شذر وصرنا نحجي كلهن يكللي مبين متمسك بيج .. حتى الجانت رافضه الفكرة قبل هسا اقتنعت وگالت بكيفج ..

تمسكه بيه ورفض عمي واصراره على ليث خلاني اقتنع

واوافق عناد بيهم بس جنت متخوفه من شغله ..

وهم اولادي ..

شذر نصحتني اصلي صلاة استخارة وانام ..

سويتها فعلا وطلع الحلم حلو ..

وكعدت مرتاحة ..

بعد يومين حجيت وي نسر وگلتلة ..

" اريد احجي وياه بحضورك .. "

سأل " شتردين منه ؟"

رديت " اريد اتأكد بشغله بخصوص اولادي "

رد " الترديه احجي وياه بي گدام الشيوخ حتى يكون مثل التعهد شتردين بعد "

اعرف هذال مرة وعدني انه يحافظ عليه وعلى ولدي بس لازم اضمن مايتراجع او اندم بيوم ..

رجع الموافقة نسر للشيخ وخلة شروطي وشروطه وهذال ما اعترض على اي شرط منهم ..

حدد يوم المشية وكانت للمضيف الشيخ لان يعتبر او التكفل بهذي الخطبة ..

نسر حظر واولاد عم بابا بس عمو ماقبل يحظر قبل يوم اجه وهدد هو ليث ياخذون الاطفال مني ..

واخرها طلب اسجل الشقه بأسم اولادي ضمان الهم ..

وفعلا تنازلت عن الشقه الاولادي حتى يرتاح عمي هو وليث الي حسيته انجن وماعرف شيسوي ..

حتى سمعت رايح الهذال ومهدده ..

كل هاي الشغلات صارت والتحضيرات والمشية اني ابد ماحجيت وي هذال ..

اجن اخواته اثنين وعمته حددن يوم المهر .  وجايبات فلوس وتخم ذهب ضخم وحلقه..

ماما رفعت راسها وارتاحت من شافت كرمهم والمهر الجابوه .. رغم ماطلبنا ابد ..

طلعت للسوگ وي شذر لان احب ذوقها وتنسيقها .

اختاريت فستان وردي ترابي بس كان عريض مابي احجام صغيرة..

ضجت حيل .

ردت شذر " اخذيه واني ارتبه الج "

رديت " نسيت عندنا مرت اخو شاطرة بالخياط"

ماحبيت اسويها هوسة وماعزمت احد بس اخواتي واحنة .. حتئ غيداء اجت .

جان شهر 11 والجو بارد وحلو ..

اخذت اجازة بس ماگلت السبب حتى اسيل رغم صديقتي بس ماحجيت لان اعرف يصير جدل اذا عرفن العريس هو هذال ..

بدلت وسويت مكياج خفيف ..

اجه هذال واهلة ..

عقدلنا السيد .  بعدها دخل يمي ..

شافني ابتسم ..

اخواتي يتهامسن " وج تگولين كبير طلع جنتل مان "

هو عيونه ماشالها مني ..

قرب شفايفه الاذني وهمس " شلعتي گلبي ياظالمة "

ابتسمت " ليش مااستاهل؟"

رد " الغالي يستاهل نسعاله "

جان يوم حلو .. گومني اخواته نرگص علمود التصوير حسيت عيونه ماتشوف غيري .. نصيت عيني من الخجل ..

كلما ارفع عيني اشوفه يباوع .. بداخلي ادعي هالنظرات تدوم الي .. مااريد بس الله يديم هلمحبه "

بعدين اخذنا صورة عائلية هو خلة جود بحضنة وفهد بحضني .

بعد ماخلص اليوم ..

لليل نسر عزمنا يجيبلنا عشا . شذر هم بقت يمنا وكلنا نضحك ونسولف ومتونسين ..

سمعنا عياط هديل ..

ركضنا للغرفه شفناها تنزف ..

تخبلت ماما وصارت تحجي عليها " كلة من رگصج كم مرة گلتلج اكعدي متسمعين الحجي "

ردينا عليها " مو وكت هالحجي متشوفين حالتها "

خابرت شذر النسر " وينك نسر بسرعه تعال هديل دتنزف "

ربع ساعه ونسر يمنا . 

بهاي الفترة بدلنالها وحضرنا غراضها هي هستوها داخله بشهرها ماتوقعنا يصير يهيج ..

راحت ماما وبيداء وياها ..

وكلنا بقينا ندعي ربي يطلعهن بالسلامة هي والطفلة ..

شذر كل شوية تخابر نسر يگللها بعدهي .. تنزف وماعندها ولاده متعسرة ..

اخذنا الخوف والقلق .. كم ساعه وماكو خبر . 

اخر شي لمن نسر معيط عليهم وكالب المستشفى يلة محوليها عمليه بس بعد النزيف والولادة المتعسرة .

حتى الدكتورة گايلتلهم الطفلة متعسرة وتعبانه مااعتقد تطلع سالمة ..

اول ماكملت عمليتها خابر نسر بسرعه وبشرنا..

سدت التلفون شذر وابتسمت " الحمد لله اثنينهن طلعن سلامات .. "

#بقلمي_شمس_السعدي

يتبع……

حبايب ضغطي هابط وبالگوة كتبت اعذروني ع البارت اعرف قصير بس ماگدرت اتعذر واخليكم تنتظرون.. 

مساء الورد احبتي ❤

///// البارت الخامس والستــون /////

#قوارير_من_فضة ج2

#بقلمي_شمس_السعدي ..

من گال جابت ارتاحينا كلنا ..

اتأخر يلة رجع بالليل كلنا منتظرين على نار ..

سألوه البنات " لعد الطفلة وين بقت هناك ؟"

رد " طلعت مختنگة بسبب عسر الولادة .. خلوها ع الاوكسجين بالخدج الباجر .."

سألته " يعني زينة مابيها شي "

رد " ان شاء الله زينه الدكتور يگول لاتخافون هواي هيج يصير وبالخدج يصيرون احسن "

اطمأنينا شوية ..

بوسوه البنات وباركولة .. اتقربت منه بسته " تتربى بعزك ان شاء الله "

همس " يوم الج ان شاء الله "

بيومها بتنا يم البنات .. حاروا شيسموها كل شوية وحدة تطلعلها اسم ..

عاد ردت دنو " سموها ملوكة مثل صديقتي حلو اسمها"

حضنها ابوها " مادام دنو طلبت هالاسم خلص راح نسميها ملاك "

فرحت دنو كلش ..

تذكرت الجهاز السويته الها ..

" نسر قبل لتطلع للمستشفى باجر اخذني للبيت وحتى انطيك الجهاز السويته .. وسويتلها كركوت حلو غلفته وطرزته يخبل طلع .."

ردت سما جانت حامل هم اخت نسر " لعد اني هم اريد تسويلي جهاز كامل الابني "

ابتسمت " مو تتدللين "

رد نسر " مرتي ام گلب الطيب اكيد ماتبخل عليجن بس مو تعبنها مااقبل "

ضحكنا كلنا ..

ردت اسراء " اذا هي قابله انت اطلع منها هي اذا حبت شي تبدع بي "

بقينا صافنين ومصدومين بنفس الوقت اول مرة اسمعها تمدحني من يوم الدخلت الهذا البيت لسا ..

والصدمة مو بس الي للكل كانت .. لدرجة صرنا واحد يباوع للثاني ..

بعدها تلافيت الموقف ورديت عليها " شكرا "

ونسر هم رد " طبعا مرتي مبدعة بكلشي وغمزلي "

بقينا سهرانين قريب الفجر ..

اخواتة واني كلنا داير مدايرة .. وصاروا يحجولنا ع طفولتهم… كل وحدة بيهن تحجي موقف صار وياها ..

ونسر المسكين من صغرة مبتلي بيهن ..

حجالنا موقف ضحكنا عن اسراء ..

مرة راح يجيبها من المدرسه هي وهنا .. وبالطريق

اكو بيت دائما يربطون الكلب مالتهم بالباب بحديقتهم الخارجية ..

فهي كلما تمر تتحارش بي .. مرة منهن شالت طابوگة وشمرته بس الصدفه جان مامربوط بيومها .. والسياج مال الحديقه مو عالي كلش وجان سياج حديد او شرك يسموه  ..

الكلب طفر بسرعه من السياج وركض وراها .. وهي شمرت جنطتها وتركض واني وراهم بكل سرعتي اريد الحگ بيهم ماكو ..

ابد مااذه واحد بالشارع وكانه حافظ شكلها .. سحبها من صدريتها ووكعها وصار فوكاها وهي تصيح نسر راح ياكلني تعال ..

هنا تخبلت جيتت فوگاها وحضنتها ووهو مجلب بيها مايعوفها الى ان اخذ وصله من اديها ..

من شفته عضها تهسترت ..

صرت اضربه بوكسات ودفرات وهو خرمشني تخرمش وهم حصلتلي عضه منه ..

كل هاي صار بسبب اسراء ولو هي بطولاتها هواي جان حياتي وياها كلها اكشن ..

ردت مبتسمة " لو مااني حياتك عاديه مو زين خليت اكشن بطفولتك "

ردت هنا " وبقت اسبوع تخاف تطلع ضمدوا ايدها وضربوها ابرة ومن يومها كرهت الابر ."

كمل نسر " بس للامانة هالجلب عقلها صارت تروح بطريقها وتجي بطريقها حتى ذاك الشارع مامرت بي بعد "

كلنا ضحكنا ضاجت وكامت " اروح اگوم احسن الظاهر ماعندكم سالفه غيري ووراي گعدة من الصبح "

فرشولنا البنات بالاستقبال اني ونسر .. وهم راحوا ناموا

نايمة بحضنة وسألته " شنو شكلها ملوكه ؟"

رد " تدرين من الخبصه حتى نسيت اصورها الكم .. بس هي طالعه على ابوها حلوة "

رديت " اممممم معناها حلوة وتنگط ملح "

ضحك " هاي شلون رهمتيها لو حلوة لو مملوحة مو اثنينهن .. باجر تجي وتشوفيها"

رديت " لا باجر اروح قبل ليجون ..عود صورلياها انت"

ثاني يوم ..

طلعت وياه من الصبح وصلني للبيت ..

اخذ جهاز ملوكة المسويته وراح ..

دنو بقت هناك تريد تشوف ملوكة ..

بيداء گالت اني ادرسها وادزها للمدرسة وي فروحة ..

صفنت ع البيت تنهدت .. غمضت عيني وصرت اتخيل هالبيت مليان اطفال وكلها تلعب سوة واني ونسر گاعدين بالمطبخ نتفرج عليهم ..

اتنهدت شگد حلو هالشعور .. گمت كملت خياط عندي نسر مااعتقد يرجع اليوم راح ينشغل بيهم ..

خابرني الظهر ..

" هااا بشر طلعوا ؟"

رد " اي طلعنا .. لو شايفه دنو مگابلتها وگاعدة ماتفارگها "

ابتسمت " هي منتظرتها يوم يوم حتى تشوفها "

رد " يلة حبيبتي اشوفج بالليل اجي اشتاقيتلج "

رديت " ابقى يمهم خاف يحتاجوك ؟"

رد " شنو مليتي مني ؟؟"

رديت " بودي تگابلني كل ثانية بس همة هم الهم حق عليك "

ابتسم " هاي مگابلهم النهار كله بس بالليل مااعرف اذا مااجي اشمج وانام بحضنج "

رديت " لعد منتظرتك الليلة "

رد " عاد كون اكو حبشكلات "

ضحكت " ماتشبع ابد "

كملت شغلي ودخلت سبحت ..

رتبت الغرفه وغيرت الفرشة ..

خابرت هنا بقينا ندردش ..

" خابرني هذال يگلي راس السنة الجديدة نتزوج "

رديت يعني بعد اقل من شهرين مو ع اساس گلتي مااتزوج بسرعه ..

ردت " اي صحيح بس هو يگلي احنة اثنينا كبار وواعين مامحتاجين فترة نتعرف عندنا شهر كافي "

رديت " هي الاحسن ماتطول متشوفين ليث يحوم "

ردت " خلي يولي شيسوي خلي يسوي  المهم اريدج تطلعين وياي نجهز اني حجيت وي نسر ووافق "

رديت " ان شاء الله شوكت متردين گولي واذا تحبين اخيطلج گلبيات مثل القفطان هسا جاي اشتغله يخبل "

ردت " ياليت مااگول لا شهادتي مجروحة بخياطج "

سديته منه .. رحت للغرفة بدلت ورتبت نفسي ..

سمعت الباب انفتحت ركضت للفراش سويت نفسي نايمة ..

سمعت باب الغرفه انفتح ..

كتمت صوتي بس انفاسي تتسارع ..

احس بحركته وهو دينزع ملابسه ويبدل ..

بدت خطوات رجله تتقرب الي ..

ودقات گلبي تتسارع اكثر .. ممتعودة ابد ع التمثيل ..

اتقرب مني ..

بدأ يتلمس وجهي بأطراف اصابعه ..

الى ان وصل لشفافي بقى يتلمس .. نزل على رگبتي

الصدري جسمي بدأ ينطي ردود فعل ..

همس بأذني وهو يشم برگبتي .. احبج من تمثلين وتفتحين المجال الي حتى اخذ راحتي .. ابقي هيج اتصنعي النوم وخلي الساحة الي ..

فتحت عيوني مااتحملت ابتسمت ..

" ادري بيك ماتگعد راحة گوة مصبرة ع روحي تدري "

ضحك " ادري بيج تعمدت العب ع الوتر الحساس ادري بيج ماتتحملين "

صفن بيه " ليش مااكدر اشبع منج .. تدرين من انام اباوعلج يله .. حتى خاف الله ياخذ امانته واني نايم اكون اخر واحد اشوفه انت .. ومن ماابات يمج اخاف على روحي اكثر .. خاف اموت بيوم وانت مو يمي "

عطت بي " اسم الله ليش هيج تگول بلا كلشي احلامي مزعجة صايرة "

ضحك " هو ردت اشوفج تخافين عليه "

گمت عنه " معقولة تختبرني بهيج شي ؟؟"

رد " لا صدك شتحلمين شبيج خايفه "

رديت " ماكو شي واصلا مااگدر احجي اذا حجيته يتحقق "

اخذني الحضنه " تعاي نامي ولاتفكرين ان شاء الله نكبر سوة ونمشي ع العكازة اثنينه والاهم نحج سوة اثنينة "

رديت " امين يارب "

من التعب غفة بسرعه ..

بقيت اباوعلة واتمعن بملامحه..

اتقربت منه وبديت اشم بحضنة..

حس بيه ..

همس " تحبيني "

رديت " اموت بيك "

ابتسم وباسني بكصتي بقيت صافنه بي الحد ماغفيت  ..

إحبك أنت وحدك ..

أنا آنثاك العاشقة لك حد الثمالة المباحة

جئتك طفلة تائهة على أرصفة الزمان و من بين الطرقات

آسمح ليّ أن أتغلغل كـ طفلة بين ثناياك

أكون و أتكون منك و لك ..!!

ثاني يوم اجت دنو .. ع بالي تبقى هناك يم اختها..

من سألتها طلعت حجتها هناك مااگدر ادرس هوسة وخطار كل شوية يجون..

حتى من اسألها عن ملوكة تگلي زينة وتسكت ..

عرفت اكو شي صاير وساكته ..

خابرتني هنا علمود نطلع سالتها من خلال الحجي ..

ردت " خاف لان عاطت عليها هديل .. "

سالتها " ليش عاطت بيها شسوت ؟"

ردت " ماسوت بس گاعدة يم ملوكة وتلعب بيدها لا صغيرونات .. بس ذيج تعرفيها تعظم الامور .. عاطت بيها وكالت تريد تشيلها وتملخ ايدها ..

عاد ماما گالتلها بيبي بعدهي صغيرونة من تكبر العبي وياها ..

وبعدين احنة كم مرة شلناها خليناها بحضنها بس هي ماقبلت بعد كالت خلوها بفراشها لاتبجي ..

عاد تدرين بدنو شلون تنهظم بسرعه وذيج عبالك بس هي جايبه خابصتنا خبص ..

جابت امها يمها وخطية بس تسخر بيها ..

يمة روحي يمة تعاي وشيلوني وخلوني وازراراتي وعمليتي صارلها اسبوع هسا وبعدهي ماتگوم ..

اتنهدت " عوفينا منها .. ملوكة شلونها .. نسر مصورها الي حليوة تنطي شبه الدنو ونسر "

ردت " اي هي ماما تكول نسر بصغره بس الطفله حيل صغيرة وخامله دوم نايمة وهاي مكيفه ماتگعدها . ماما تكعدها غصب ترضعها "

رديت " جائز ماتعرفلها خلي خاله تدير بالها عليها "

ردت " هو هم هيج ماما ماتفارگها ابد .. وامها هم هنا بعد العاشر تروح "

هنا :

من داومت والبنات عرفوا مخطوبة .. اخذوا على خاطرهم بس كلتلهم صار كلشي بسرعه وماكنت حاسبة حسابي واصلا ماسوينا حفله بس گطعنا مهر بينا اهلة واهلي وبس ..

جبتلهم جكليت وبقلاوة بمناسبة خطوبتي ..

هذال احسه مراهق ..

كل شوية يدز رساله لو يخابر ..

بس العجبني بي رومانسي حيل .. بحيث من يتغازل وياي اعيش بدنيا ثانية وانسى نفسي ..

گاعدة اشتغل ..

اجتني رساله ..

أنا رجل عندما يعشق أنثى .. يغلق عيناه عن كل نساء الكون

وعندما يحلم بإمرأة ... يقتل كل حلم بسواها

وعندما يعدُ إمرأة في الحب .... يموت دون وعده ..

ابتسمت وخابرته ..

رد بسرعه " ماگدرت اخابرج كلت خاف عندج شي واحرجج "

رديت " ماعرفتك اشو قبل جنت ماتعرف احراج او شي تتخطى الحدود دائما "

رد " لان ضامن هسا انتي الي صرتي "

رديت " رومانسيتك زايدة "

رد " نقطه ببحر وداعتج "

ابتسمت ..

سألني " ماتخلينا نطلع نتغدا برة . جان گلتلج بالبيت بس ادري بيج ماترحين وياي لهناك ووحدي "

ابتسمت " زين تعرفني صرت "

رد " دارسج دراسه .. لاعبالج طول ذيج الاشهر من تركتج مااعرف شي عنج .. جنت اوصلج للدوام ومن تطلعين كذلك واخبارج تجيني يوم بيوم ..

ولو اگلج شنو رأيج واحنة نتغدا نحجي بكل الايام الفاتتنا "

رديت " ماادري خاف اتأخر "

رد " اني زوجج ترى .. وبعدين هو غدا مو تطلعين انت وصديقاتج تتغدن سوة اعتبريها نفس الشي "

انصدمت " طلعت صدگ تراقبني "

رد " مو گلتلج اخبارج تجيني .. يله بعد الدوام اجيج واخذج "

رديت " بس لتوگف بباب الدائرة "

رد " ليش مايدرون خطيبج اني "

رديت " لا ماگلت "

سأل " ليش ؟"

سكتت ..

اتنهد زين اوگفلج بالفرع البصفها ..

من كملت رحت للمغاسل رتبت وجهي وطلعت ..

صاحت اسيل وراي ..

" هنا يجيج السايق ؟"

رديت " هااا لا مايجي راح اخذ تكسي "

هزت راسها " عبالي يجيج گلت اروح وياج توصلوني بطريقكم الخط مالتنا مايجي يله راح اخذ تكسي باااي"

خليتها تطلع وطلعت وراها ..

باوعت تقريبا كلها رايحة .. رحت للفرع لگيته واكف ولابس مناظر ..

صعدت اتقرب باسني ..

ابتسمت " ليش متخفي بنظارتك "

رد بثگل " غير بسببج تستعرين مني "

رديت " لا وربي بس تعرف الدائرة اغلبها تعرفك وخفت ياخذن غير نظرة عليه "

هز راسه " حقج ماالومج "

حرك السيارة ومشينا ..

اباوعلة ضايج . 

سالته " شبيك ضجت"

رد " مو منج .. بس مرات الانسان يرتكب اخطاء ويتندم عليها بس بعد فوات الاوان "

اخذني المطعم نزلنا ..

طلب غدا ونتغدا وهو يباوعلي ويبتسم .. ويجيب ويخلي گدامي ..

رديت " لا هذال مااكل هالگد "

رد " شنو مسوية دايت اشو جسمج حلو وخصرج خصر ساعة رمل بعد ليش ؟"

خجلت من كلامه وهو يوصف جسمي ..

رديت " هو مااحب جسمي يخرب "

اتنهد " احس يوم يوم تدرين .. "

رديت " بعد وكت الشهر الواحد ليش مستعجل "

رد " احسبي حسابج زواجنا بقاعه اسويه "

رديت " تحجي صدگ ؟؟ اثنينه متزوجين قبل مالها داعي هالهوسة .. "

رد " عندي غايه اريد اغلق افواه هواي ناس واولهم دائرتج تعزمين الكل بيها.. "

باوعتله وسألت " شنو الخلاك تتمسك بيه "

رد " كلشي بيج .. واخرهن من رفضتي ذاك الطلب ونهيتي كلشي هنا حسيت خلص خسرتج وانتظرت فترة تنسين وارجع بقوة ورحت گبل الشيخكم والحمد لله هالمرة صارت "

رديت " تدري الصراحة اخر مرة ضوجتني ومااتوقعت بعد ننجمع .. من طلبت مني انهزم .. حسيت نفسي رخيصه عندك "

رد " لا ابد دومج غاليه بس اعذريني جان لازم اضمن المرة الگلبي اختارها "

كملنا غدا ..

اخذني المحل العاب اشترى الاولادي ودزهن بيدي ..

فرحوا من شافوهن ..

سألني فهد " منين جبتيها ماما "

رديت " مو اني عمو هذال "

رد جود " شبيك هاي من بابا الجديد "

ضحكت " منيلك هالسوالف "

رد " عذورة گالت "

اتنهدت " اوووف عذراء والله ليسمعج عمي يتخبل هو بلا كلشي ويگلي مو تخليهم يصيحون الذاك بابا "

عذورة نايمة ضربتها على خدها .

فزت " شكو ؟"

ضحكت " شلون تعلمين جود وتكليله هذال بابا الجديد"

ردت وهي نعسانه " والله عبالي شو شبيج .. قابل جذبت خطية الولد كل شويه يباوع للصور ويسألني منو هذا شأكله مثلا "

رديت  " امممم تدرين زواجنا حيسويه بالقاعه "

ردت " عادي شباب وباول عمركم من حقكم "

رديت " طبعا شباب شنو شفتيني وجهي مليان تجاعيد لو جسمي مترهل "

باوعتلي " اگلج روحي الهمام خابريه وسولفي "

رديت " وج هذال هذال مو همام "

ردت " من خفت هالاسم ماحبيته خليني مسميته همام احسن "

ابتسمت " دنامي نامت عليج طابوگة اروح اتغدا واشوف ملوكة "

رحت شفت ماما مبدله..

هااا ماما وين

ردت :

" اشو بنت اخوج خاملة مااعرف شبيها ووجهها اصفر يمكن ابو صفار بيها .."

رديت " بس ماما اليوم الها اسبوع ما اعتقد يأثر "

ردت " ميخالف اروح واتاكد خابرت اخوج هسا حيجي ياخذنا .. وانتن مو تختلن بالغرف لايجي احد ومنا ام هيام وحدها فشله اگعدن يمها "

راحت ماما اجت بيداء يمنا ..

التهيت ادرس بجود وغسلت ملابس گامت عذورة تسوي عشا ..

اجيت اساعدها ..

باوعتلي " اگلج صدگ تتزوجون بقاعه لو تتشاقين "

رديت " اي صدك شبيج "

ردت " يااا لعد لازم نحضر فساتين هسا وكتها انتو تسوون بالقاعه شياب ويدورون زفه "

رديت عليها " عود من تتزوجين لاتسوين بقاعه "

اتنهدت " مااتزوج اني "

حسيتها ضاجت سكتت عنها ماقصدي اضوجها ..

للمغرب اجت ماما ..

سألناها " هااا بشري ؟"

ردت " اي بيها ابو صفار جان بس يگول الكم بالرضاعة كثروا لان ابو صفار هو سبب خمولها .."

دخل نسر ووصى هديل ..

" الدكتور يگول الها بالرضاعة الطبيعية ليش مترضيعها"

ردت " ماعندي حليب "

رد " هو وين ترضيعها اشو بس نايمة خاله انتي ساعديها وگوميها مو وضعيه هاي .."

ردت " اگلك ماعندي حليب قابل اجذب تعالي شوف "

رد " ششوف شبيج "

عافها وطلع " يمة اعتمد عليج انت اسهري عليها ورضعيها لاتخلنها تنام سمعتي الدكتور شكال مو زين عليها ."

ردت " روح يمة انت ولاتشيل هم اني اكعدلها كعود "

ثاني يوم من داومت ..

سلمت اسيل ردت بثگل .. استغربت..

طول النهار هي ماتحجي وياي واذا حجت ع گد السؤال

رحت يمها :

" شبيج اليوم ضايجة من شي لو زعلانة عليه "

بطبعها ماتحب تظم شي بداخلها بس يسألها احد تكتهن كلهن ..

" انت ليش ماگلتي مخطوبة الاستاذ هذال "

انصدمت : " شمدريج ؟"

ردت " شفتكم البارحة من طلعت اتأخرت يلة اجرت تكسي وشفتج يمه گاعدة بالسيارة..  بالاول انصدمت عبالي عندج شي وياه .. بس گلت يمكن هو خطيبها لان ماعزمتينا ولا حجيتي عنه شي "

اتنهدت " اعتقد تعرفين السبب كلكم ماخذين نظرة عليه مو زينة "

ردت " ليش مو صحيح  .. انت شلون ثقيتي بي "

رديت " هواي امور صارت .. بس اهدي واني احجيلج كلشي "

حجيتلها شلون رادني بالبدايه وشلون صديته ورجع خطبني وكم مرة رفضه اخوي الى ان خطبني من الشيخ مالتنا "

ابتسمت " طلع يحبج صدگ بس هم ديري بالج خاف عينه تزيغ منا لو منا "

ضحكت " لا مستحيل اصلا توبته "

ردت " عود بالزواج هم لاتعزميني "

رديت " شلون اكيد انت اول وحدة بس الباقيات شيسون لو عرفن "

ردت " گليلهن من هسا احسن وخلي التحجي تحجي ع الاقل ماخطبج بالسر .. وسوى المستحيل حتى ياخذج اصلا تلگيهن كلهن يتمننه بس مايطولنه "

سمعت كلامها وگلتلهن كلهن انصدمن وصارن يتسائلن شلون وشوكت وشعجب تزوج بالعلن .. محد متوقع هذال ممكن يحب ويتزوج ..

بهاي الفترة اني بديت اجهز وكل يوم نطلع اني وشذر نشتري ملابس واخذت اقمشه تخيطلي كلبيات ..

بين الدوام والسوك تعبت حيل ..

بقت شغلات للبيت .. خابرني هذال نروح للبيت اشوفه واقرر شنغير بي ..

وصلنا للبيت كان بمنطقة راقيه صح مو كبير كلش بس مرتب وبي حديقه حلوة مثل مااتخيلته بالضبط ..

كان اغلب اثاثة جديد ومابي شي ..

بس الكاونتر يحتاجله تغيير وقنفات الصاله ..

مد ايدة الي واخذني الغرفه النوم ..

فتحها .. غرفه عاديه ..

باوعتله " هاي غرفتك وي زوجتك "

رد " اي ماغيرتها بعد "

سألته " كم وحدة جايبها لهنا بعدها "

سحبني اله وهمس " معليج بالماضي ولاتفكرين بي الاهم هسا والمستقبل الج .. يحقلج تحاسبيني عن مابعد اليوم انسي الماضي حتى نعيش حياتنا "

ابتسمت " مجرد سؤال كان ماقصدي "

قرر الغرفه ينطيها ويصبغها ويرتبها ..

باوعت للساعه " خلينا نروح "

رد " بعد وكت اريدج يمي اريد اشبع منج "

حسيته بدا يراوغ ..

رديت " امممم بدت سوالفك لا عيني كلشي بوقته حلو مو ع اساس نروح نختار الغرفه شنو غيرت رأيك "

سحبني من ايدي گعد ع القنفه وخلاني بحضنة حسسني انه طفله بحضنة ويدللني ..

مااعرف شصار بيه وكأنه اول مرة اختلي برجل ببيت وحدنا . حسيت نفسي اول مرة اعرف رجل واحس بمشاعرة اتجاهي ..

جان يداعب احساسي ومشاعري قبل جسمي بحيث فقدت وانتهيت بين اديه .. مااعرف شنو الي خلاني اوعى على حالي واني نايمة ع القنفه وهو فوگاي شلون ويمتى ماادري عبالك كنت مخدرة ..

فزيت من مكاني .. عدلت نفسي ..

رد " شبيج هنا "

رديت " خلينا نروح "

رد " بس اني زوجج "

رديت " اعرف بس مايصير اي شي بينا الا لمن نتزوج لاتحرجني اكثر هذال "

هز راسه " بس ماسوينا شي من البالج .. ع العموم خلص اوعدج مااجبرج على شي الا لمن نتزوج ولو من تصيرين يمي مااصبر"

طلعنا اختارينا الغرفه ورجعني للبيت..

وصلنا للبيت باوعتله " ادخل تعشا يمنا "

رد " لا ماكو داعي اصلا تعبان اروح للبيت "

رديت " بس انت ابد ممتعرف ع اهلي بس بيوم المهر"

رد " خاف اسببلهم احراج وممتهيأين "

رديت " ماكو احراج صرت واحد من البيت "

ابتسم " اذا انزل فراح انزل علمود جود وفهد اريد اشوفهم "

ابتسمت " لعد يلة انزل "

نزلنا دخلت قبله اشرت للبنات " اجه هذال ادخلن "

راحن لبسن حجابات بين مافتحت الباب اله ..

دخل للاستقبال ..

ماما دتصلي گلتلها " هذال هنا "

كملت بسرعه ولبست حجابها وطلعت تسلم عليه ..

جان خجول يمهم بس يحاول يسترق النظرات الي بين اللحظة والثانية ..

صاح جود وفهد اله .. وصار يسألهم ويلعب وياهم ..

خابرت نسر گلتله ..

گال راح اجيب شذر واجي ..

اجة وجايب وياه مشاوي من المطعم ومقبلات وصمون حار .. وعذورة مسوية دجاج مشوي ..

شذر يم البنات بالمطبخ ..

رحت سلمت عليها وراويتهن صور الغرفه الاختارينا نفسها عجبتهن حيل ..

هديل من سمعت شذر بالبيت .. گامت مع العلم عي من جابت لسا نايمة ماتگوم ابد حدها للحمام وترجع وهاي راح يصيرلها شهر ..

شذر :

خابرت هنا النسر وبلغته انه هذال موجود يمهم ..

باوعلي ..

گومي نروح الاهلي هذال هنا يمهم زحمة يبقى وحدة وهم اول دخلته بعد الخطوبة النا اخذ عشا من المطعم البنات مايلحگن يسون شي ..

رديت " روح انت حبيبي وسلملي ع البنات .."

رد " مايهون عليه تبقين وحدج واحنة كلنا مجموعين هناك ودنو هم من الدوام للبيت تضوج خطية بعد الحاحه اضطريت اروح "

اخذنا مشويات من المطعم.. اول ماوصلت ساعدت البنات بيداء هم يمهم ..

هنا مخبوصه وفرحانة بنفس الوقت احسها موردة وبس تضحك ..

باوعت العذورة وحجيت بداخلي " يوم الج وافرح بيج"

حيل كاسرة خاطري احسها شما تخبي حزنها فهو ظاهر بعينها وواضح مايفهمها احد بس اني ..

دخلت هديل وبيدها مميات تغسلهن ..

" شلونج شذر "

رديت " الحمد لله انت شلونج مبروك ع الطفله تتربى بعزكم "

ردت " شكرا يوم الج "

باوعت العذراء " شوية عذراء اريد اغسل المميات مادام ملوكة ابوها يمها "

عبالها تغيضني بهيج شغلات ..

ابتسمت " عذورة وين الحليب خلي نسوي حلاوة بعد الاكل "

غسلت المميات وراحت .. اجة نسر بيده ملوكة اشرلي

" تعاي شوفيها "

تركت كلشي بيدي وركضت اشوفها ..

اباوعلها صافنه وعيونها تخبل وساع .. اتقربت منه اخذتها وصرت اشم بيها اتخبل ع ريحة الطفل ..

استتشق ريحتها .. ماحسيت الا انسحبت من ايدي

" اريد ارضعها جوعانة "

اخذتها وراحت ..

غمزلي نسر .. ابتسمتله ورحت يم البنات ..

فرشنا السفرة وخلينا الاكل ..

نسر طلب كلنا نگعد سوة .. حتى اسراء گعدت يمنا واتعجبنا الصراحة ..

هذال كان مندمج يلعب وي اولاد هنا الواضح يحب الاطفال حيل ولا عبالك كبير نازل العمرهم ويدغدغ بيهم وذولي يضحكون ..

  كعدنا كلنا…

صار يحجي عن شغله وشلون محد يخليه يشتغل وكلها تريده يسوون اليردوه ..

لان بالمختصر النزيه بهذا البلد مستحيل يخلوه يشتغل او يكون نزيه ويخرب كل مخططاتهم ..

صارت اسراء تناقشه بالقانون وهو وياها مندمج وهاي اول مرة تندمج مع شخص وتناقشه ..

حسيتها فعلا متغيرة ..

من حجتله عن امنيتها انه تصير قاضيه شجعها وگالها اعرف اخت صديق الي قاضيه هم اذا تحبين اخليج تتواصلين وياها ..

ردت " حاليا هالشغله قيد التفكير لان دوامي بالجامعه شاغلني ارتب اموري يله اقدم على هيج خطوة "

قطع نسر حديثهم عن الشغل والقضاء وهالسوالف ولو بيدهم يبقون للصبح يحجون ..

سأله نسر " شوكت حددتوا موعد انت وهنا "

رد " اول خميس بشهر الواحد اعتقد يصادف 6 بالشهر"

رد نسر " بيها الخير بس مو مستعجلين "

ضحك هذال " شمستعجلين يمعود شعندنا بعد "

رد نسر " وشوكت تعقدون محكمة ؟"

رد هذال " ع الاسبوع الجاي ان شاء الله "

كملنا عشا وراح هذال ..

كملت الماعين وي البنات و رجعنا للبيت ..

مابقى شي الزواج هنا والحفله راح تكون مختلط بالقاعه طبعا نسر ماوافق وضاج يتخبل من شغله الاختلاط ..

وصانا كلنا يكون لبسنا محتشم ..

اني قررت البس قفطان رحنا اني ونسر اختاريناه ..

عذورة اشترت فستان حلو ونسقت وياه حجاب ..

نسر ماقبل تعزم من گرايبه .. عزمت هنا بس اخواتها

خالة ماقبلت تجي بقت يم ملوكة لان هديل هم راح تحضر .

قبل يوم الزواج سوينالها حنة .. لبست بيومها لان بس بنات . ثوب قصير ماروني اللون المفضل النسر ..

ورفعت شعري عالي ..

خلتلي سما مكياج طلعت غير شكل ..

بيناتنا گمنا نرگص ومشغلين ديجي .. اغاني ..

بيومها هديل متصلة على اخواتها وعازمتهن .. تفاجأنا بأختها وامها جايات ..

اختها جانت تباوعلي من فوگ لجوة تريد تاكلني .. ضجت من نظراتها كلش ..

صارت عذراء تقرأ المعوذات ..

" وج روحي بدلي راح تاكلج "

باوعتلها وهمست " وج احس هي ضرتي مو هديل "

ردت بهمس " الله العالم شحاجيه الاختها عنج "

لليل التهينا بتحضيرات باجر لان بالقاعه ..

شفت اسراء دخلت الغرفه هديل وسدت الباب وراها بقت نص وطلعت ضايجة حيل ..

بعدها صاحت الامها وراحن للغرفه…

شوية وطلعن عادي ماكو شي ..

ثاني يوم قبل لنروح بالقاعه ..

شافني تخبل " بس لا هيج تطلعين ؟"

باوعت النفسي " ليش شبيه ؟"

رد " اشو هذا اللبس مطلعج حلوة خاف واحد يباوعلج روحي البسي عباتج الاسلامية "

ضحكت " لعد المن اشتريتلي هذا "

رد " ماعبالي هيج يطلع عليج اذا انت شتلبسين يطلع حلو عليج شلون اضمج بالبيت ومااطلعج "

رديت " معناها گلي لتطلعين "

رد " هااا علواه ونبقى بالبيت اني وانت بس ونتسامر "

رديت " هههههه هو احنة كل الايام وحدنا باقين شنو الجديد "

بالگوة اقتنع اروح بس حلفني مااتحرك من مكاني.. 

وصدگ بقينا گاعدين اني وعذورة واسراء وبيداء ع نفس الطاولة مااتحركنا ..

دخلوا هنا وهذال وجانت مثل الاميرات بفستانها .. اختارت بدلة مال محجبات طلعت حلوة حيل ..

اولاد عمة واصدقائه كلها ترگص بالوسط .. موظفات هنا كلهن اجن ..

ماعبالهن احنة اهلها ..

متعجبات ع الحفله وعلى هذال شلون يباوعلها ..

اما هنا فكانت عيونها تدمع من الفرحة ..

واولادها بوسطهم ..

كملت الحفله وراحوا العرسان البيتهم…

اخذنا الجهال ويانا للبيت وگالوا باجر نمر ناخذهم ويانا للشمال يرحون ..

هنا :

كان يوم زواجي يوم مميز عشت بي اجمل اللحظات .. سويت شغلات هواي كنت احلم بيها ..

هذال طول ماگاعدين وهو ينظرلي بحب وهذا الي عشت عمري كله اتمناه . نظرة حب واهتمام ..

اباوع للموظفات كلهن عيونهن عليه ممصدگات ويتهامسن ..

ومو بس هن اغلب الموجودين يتهامسون بينهم ..

اولادي فرحانين ويرگصون ..

هذال طول مگاعدين هو مخليهم بحضنة..

اخذنا صور عائلية شگد سوه ..

كملت الحفله تعشوا المعازيم من وكت علمود نروح البيتنا .. لان الوضع تعبان ومانگدر نتحمل ذنب الناس الجايه وخاف يصير بيهم شي ..

البنات اخذوا جود وفهد وياهم وفهود يبجي ورانا يريدنا ..

هذال همس " لاتضوجين هي بس الليله وباجر هم ويانا"

كان مواعدني شهر العسل يكون بالشمال ..

من كنا صغار نروح واتذكر المصايف والمي بس مااتذكر كلش زين ..

رجعنا البيتنا دخلت البيت نظيف ومرتب ..

ولد عمة حابولنا عشا ..

صعدت الغرفتي بدلت دخل هذال ..

عيشني ليلة مميزة بحيث خلاني انسى كل ذيج الايام العشتها من عمري ..

ثاني يوم بدلت وحضرت جنطنا وطلعنا من الصبح

لگيت عذورة مبدلتلهم ومحضرة جنطهم ..

اخذتهم وطلعنا للشمال ..

عشت اجمل اسبوع هناك رغم باردة وثلوج ..

اولادي فرحوا بهيج اجواء ..

جود يصيحله عمو بابا ضحكنا اثنينه عليه .. لا هو يگله عمو ولا يكله بابا اثنينهن ..

لكن للاسف من رجعنا سمعت خبر بنت نسر ملوكة ومرضها الصدمنا كلنا وحزنا عليها ..

#بقلمي_شمس_السعدي

يتبع… .