رواية بياع الورد بقلم نور محمد | كاملة

تشتري ورد ياهانم؟ ورد أحمر لزوجك أو خطيبك أو حتى حبيبك، المهم تنفعيني، الله يرزقك بابن الحلال يارب. قلعت نظارتها وبصت عليه بتفحص. شاب بسيط وملابسه عادية ومتواضعة، بس ملامحه حادة وجميلة جدا. "ممم، مش بطال. ينفع. بقول إيه ياحلو؟ أنا هشتري منك الورد ده كله، بس اركب العربية معايا." رجع خطوة للخلف بشك وقال: "وأركب العربية معاكي ليه؟ عاوزة تشتري الورد، أهلاً وسهلاً. مش عاوزة، براحتك. ربنا الرزاق. عن إذنك." "استنى، عنك ياعبيط! أنا بقولك هشتري منك الورد كله وكمان هتاخد عليهم مبلغ محترم، بس اسمع كلامي وأنا هفهمك كل حاجة، بس مش هنا." بص لها بتركيز. بنت متوسطة الجمال بس شيك أوي وباين إنها غنية جدا، بس كلامها ميطمنش. فقال: "يفتح الله! قال اركب معاكي قال! واحدة مجنونة وباين عليكي هربانة من مستشفى العباسيه، وأنا مش فاضي. عندي شغل ولازم أجمع فلوس بسرعة علشان أقدر أتعشى النهاردة. سلام." مشى من قدامها وهي نفخت بضيق وشغلت العربية ومشت خلفه...